བོད་ཡིག

e-texts based on the ACIP/ALL Input

/shes rab kyi pha rol tu phyin pa 'bum pa rgya cher 'grel pa/ 'jam dpal gzhon nur gyur pa la phyag 'tshal lo/ /shes rab bdag nyid pha rol phyin pa'i gtso/ / rgyal ba'i yum la gus par phyag 'tshal nas/ /bla ma'i lung gis bdag la phan pa'i phyir/ /'di yi gzhung 'grel gnod 'joms bya bar 'dod/ /de bzhin gshegs pa rnams kyi gzugs kyi sku dang / dam pa'i chos kyi tshogs srung bar gtogs pa'i phyir/ 'phags pa byang chub sems dpa' phyag na rdo rje la/ 'phags pa byams pas 'khor gyi nang du dris pa dang / 'di skad bdag gis thos pa zhes bya bas/ shes rab kyi pha rol tu phyin pa bshad pa 'di bdag gis thos par khas 'ches so/ /bcom ldan 'das kyis 'di skad bshad do/ / zhes ci'i phyir ma brjod ce na/ bcom ldan 'das kyis bshad pa ni/ phyag na rdo rje bdag nyid kyi spyod yul du mi 'gyur ba'i phyir te/ 'di ltar bcom ldan 'das kyis 'jig rten gyi khams sna tshogs nas 'dus pa'i 'dul ba'i rigs dang / bsam pa dang / spyod pa dang / mos pa dang / dbang po tha dad pa rnams la/ skad cig gcig la yang mi rtag pa dang / sdug bsngal ba dang / stong pa dang / bdag med pa dang / mi skye ba dang / mi 'gag pa dang / gzod ma nas zhi ba dang / rang bzhin gyis mya ngan las 'das pa la sogs par dbye ba dang / phung po dang / khams dang / skye mched dang / rten cing 'brel par 'byung ba dang / 'phags pa'i bden pa la sogs par dbye ba dang / dran pa nye bar gzhag pa dang / yang dag par spong ba dang / rdzu 'phrul gyi rkang pa dang / dbang po la sogs par dbye ba dang / stobs bcu dang / mi 'jigs pa bzhi dang / sangs rgyas kyi chos ma 'dres pa bco brgyad la sogs par dbye ba rnams/ skad sna tshogs dang / sgo sna tshogs dang / sgra sna tshogs dang / cho 'phrul sna tshogs dang / 'jug pa sna tshogs dang / 'bras bu thob pa sna tshogs kyis skad cig de nyid la bshad pa'i ye shes gcig gis ston te/ de snyed cig char phyag na rdo rje'i spyod yul du mi 'gyur ba'i phyir/ bcom ldan 'das kyis 'di skad bshad do zhes ma brjod kyi/ bdag gi spyod yul du ci tsam gyur pa nyi tshe bstan pa'i phyir/ 'di skad bdag gis thos pa zhes bya bar ston to/ /de ltar cis mngon zhe na/ de bzhin gshegs pa'i gsang ba'i mdo las/ zhi ba'i blo gros phyogs bcu'i 'jig rten gyi khams tshad med pa grangs med pa dag na/ sems can du bsdu bar bsdus pa'i sems can ji snyed yod pa/ sangs rgyas kyi ye shes kyis mkhyen pa'i sems can gyi khams ni ches mang gis/ sa'i khams ni de lta ma yin no zhes bya ste/ zhi ba'i blo gros gal te sems can de dag thams cad snga phyi med par mi'i lus thob par gyur la/ zhi ba'i blo gros sems can de dag thams cad 'di lta ste/ gnas brtan shA ri'i bu'i shes rab dang / ye shes lta bu dang ldan par yang gyur la/ shA ri'i bu lta bu'i sems can de dag thams cad kyi shes rab dang / ye shes gang yin pa'i shes rab dang / ye shes de sems can gcig la yod par gyur te/ rnam grangs 'dis/ sems can thams cad shes rab dang ye shes de lta bu dang ldan par gyur la/ zhi ba'i blo gros sems can de dag thams cad kyis/ bskal pa las lhag par the tshom dri ba bsams shing gzhal te yongs su btsal la/ sems can gcig gis the tshom dri ba gang yin pa de gnyis pa ma yin pa'i rnam grangs 'dis/ zhi ba'i blo gros sems can thams cad kyi the tshom dri ba tha dad pa bsams te/ bcom ldan 'das kyi gan du dong nas/ se gol gtogs pa srid la the tshom dri ba de dag gsol kyang / bcom ldan 'das kyis sems gcig gis rjes su zhugs pa'i dran pas/ de dag gis the tshom thams cad bzung nas/ gsung gcig brjod pas the tshom thams cad gcod de/ de dag thams cad kyang rang gi the tshom bsal bar shes shing / zhus pa'i lan bcom ldan 'das kyis lung bstan pas thams cad kyang sems rangs par gyur to zhes bya ba la sogs pa gsungs pa lta bu ste/ de lta bas na de bzhin gshegs pas 'dul ba rnams la bstan pa'i rim pa de ni/ byang chub sems dpa' chos sdud pa rnams kyi spyod yul du mi 'gyur ba'i phyir/ bcom ldan 'das kyis 'di skad bshad do zhes ma brjod par bdag gi spyod yul du ji tsam gyur pa dang / ci thos pa nyi tshe bstan pa'i phyir/ 'di skad bdag gis thos pa zhes bya ba gsungs so/ /dus gcig na zhes bya ba ni/ dus gang yang rung ba cig gcig na zhes bya ba'i don to/ /ci'i phyir dus nges pa ma mdzad ce na/ dus nges par bstan pa ched mi che ba'i phyir ro/ /rnam pa gcig tu na rtsod pa med par bya ba'i phyir yang / dus nges pa ma bstan te/ 'di ltar/ de bzhin gshegs pa ni skad cig thang cig yud tsam de nyid kyi tshe 'jig rten gyi khams sna tshogs dang / gnas sna tshogs rnams su byang chub sems dpa' 'am/gzhan yang rung ste/ 'dul ba sna tshogs rnams la chos bshad pa/ rnam pa sna tshogs mdzad par snang ste/ gal te byang chub sems dpa' 'am/ gzhan dag kyang rung ste/ gdul ba'i 'gro ba de dag thams cad gcig tu 'dus par gyur na/ 'di skad du de'i tshe na de bzhin gshegs pa ni 'jig rten gyi khams 'dir yul 'di zhes bya ba na/ bdag cag gi de na bzhugs so/ /bdag cag gi de na bzhugs so zhes rtsod pa'am/ yid gnyis su 'gyur ba yang srid de/ de ltar 'gyur du dogs pa'i phyir/ thams cad du yang chos sdud pa mdzad pa rnams kyis dus nges pa ma mdzad do/ /yang rnam pa gcig tu na/ rgyal po'i khab na lan mang du bzhugs bzhugs pa'i phyir/ rgyal po'i khab na bzhugs pa'i dus cig gcig na zhes bya ba'i don to/ /bcom ldan 'das zhes bya ba ni bdud bzhi bcom pa dang ldan pa la bya'o/ /yang rnam pa gcig tu na rten brten par bya ba dang ldan pa la yang / bcom ldan 'das zhes bya ste/ brten par bya ba yang rnam pa drug ste/ dbang phyug dang / ye shes dang / grags pa dang / dpal dang / bsod nams dang / brtson 'grus dang / brten par bya ba 'di rnams/ de bzhin gshegs pa la mnga' zhing ldan pas na/ bcom ldan 'das zhes bya'o/ / rgyal po'i khab na bzhugs zhes bya ba ni/ bcom ldan 'das bzhugs pa'i gnas mchod rten du gyur pa bstan pas/ sems can rnams kyi bsod nams 'phel bar 'gyur ba'i phyir gnas nges par bstan to/ /gnas de na bzhugs pa yang rnam pa bzhis bzhugs te/ spyod lam gyis bzhugs pa dang / chos 'chad pas bzhugs pa dang / snyoms par 'jug pas bzhugs pa dang / nang du yang dag 'jog gis bzhugs pa'o/ /de la sku'i phrin las su gtogs pa gang ci yang rung ste zhes de dag thams cad ni spyod lam gyis bzhugs pa'o/ / gsung gi phrin las gang yin pa de dag thams cad ni chos 'chad pas bzhugs pa'o/ /thugs kyi phrin las gang yin pa de dag thams cad ni snyoms par 'jug pas bzhugs pa dang / nang du yang dag 'jog gis bzhugs pa'o/ /de la rtag tu mnyam par 'jog cing ting nge 'dzin la snyoms par 'jug pa ni snyoms par 'jug pa'i bzhugs pa'o/ /thugs rje chen pos 'jig rten la dgongs pa dang / lha la sogs pa 'ong ba'i go skabs dbye ba'i phyir gcig pu dben pa na bzhugs pa ni/ nang du yang dag 'jog gis bzhugs pa'o/ /rgyal po'i khab kyi ri bya rgod 'phungs pa la zhes bya ba ni/ gnas phun sum tshogs pa bstan te/ yul de na 'dre gdon gyis rtag tu gtses pa las/ grong khyer gyi ming rgyal po'i khab tu btags nas 'dre gdon gyis mi tshugs par gyur te/ de tshun chad yul dang grong khyer de rgyal po'i khab tu grags so/ /yang rnam pa gcig tu na grong khyer de grong khyer thams cad kyi gtso bo yin te/ rgyal po dang 'dra ba'i phyir rgyal po'i khab ces bya'o/ /mdo sde 'di yang gsung rab thams cad kyi gtso bo yin par bstan pa'i phyir/ grong khyer gyi mchog der bshad pa smos so/ /rgyal po'i khab ces bya ba'i yul dang grong khyer de yang rab tu rgya che bas/ rgyal po'i khab kyis phyogs gang kho na na bzhugs pa mi shes te/ de gsal bar bstan pa'i phyir/ rgyal po'i khab kyi ri bya rgod 'phungs pa la zhes bya ba gsungs so/ /ri de'i dbyibs bya rgod 'phungs pa 'dra ba'i phyir bya rgod 'phungs pa zhes bya'o/ /rgyal po'i khab dang ri bya rgod 'phungs pa zhes bya ba'i gnas gnyis smos pa ni khyim pa'i phyogs dang / rab tu byung ba'i phyogs gnyis la phan 'dogs pa bstan pa ste/ rgyal po'i khab smos pas ni bcom ldan 'das rgyal po'i khab tu bsod snyoms mdzad cing gshegs pa'i tshe/ khyim pa'i phyogs su gtogs pa rnams de bzhin gshegs pa'i sku blta bas chog mi shes pa mthong na dad pa skyes te/ bsod snyoms la sogs pa 'bul zhing / bsod snyoms byed pa'i sgo nas phan 'dogs so/ /ri bya rgod 'phungs pa smos pas rab tu byung ba'i phyogs su gtogs pa rnams la/ chos kyis phan 'dogs pa bstan pa ste/ rab tu byung ba rnams 'du 'dzi'i nang na mi gnas par dgon pa'i sa phyogs ri la gnas pa rnams la dam pa'i chos bshad pa'i sgo nas phan 'dogs pa'i phyir ro/ /dge slong lnga stong tsam gyi dge slong gi dge 'dun chen po dang thabs cig ste zhes bya ba la sogs pas 'khor phun sum tshogs pa bstan pa ste/ 'khor yang dge slong gi 'khor dang / byang chub sems dpa'i 'khor rnam pa gnyis te/ de gnyis las dge slong gi 'khor sngar smos pa ni/ rab tu byung ba rnams sbyin gnas su gyur pa'i mchog yin pas/ 'jig rten pas mchod cing bkur sti bya ba'i 'os yin pa dang /[ (]bcom [,]bcom ldan [)]'das kyi zham 'bring na rtag tu gnas pa dang / 'jig rten pa thams cad kyi spyod yul du gyur pa'i phyir dge slong gi 'khor sngar smos so/ /byang chub sems dpa'i 'khor ni/ khyim pa'i tshul du gnas pas sbyin gnas su ma grags pa dang / sems can gyi don la gshegs pas zham 'bring na mi rtag pa dang / 'jig rten pa thams cad kyi spyod yul ma yin pa'i phyir phyis smos so/ /dge slong lnga stong tsam dang zhes bya ba'i grangs smos pas 'khor mang ba bstan pa'o/ /thams cad kyang dgra bcom pa/ zag pa zad pa zhes bya ba la sogs pas ni/ 'khor rnams yon tan phun sum tshogs pa bstan pa'i sgo nas che ba nyid bstan pa ste/ thams cad kyang zhes bya bas ni 'khor 'phags pa nyan thos de dag thams cad kyang / dgra bcom pa sha stag ste/ 'khor de'i nang na rgyun tu zhugs pa la sogs pa slob pa'i gang zag gam/ so so'i skye bo gcig kyang med par bstan pa'o/ /dgra bcom pa zhes bya ba ni nyon mongs pa'i dgra rnams bcom pa'i phyir ro/ /yang rnam pa gcig tu na/ a ri han zhes bya ba mi skye ba'i don la yang snyeg ste/ 'khor bar slar mi skye ba'i chos nyid can sha stag go zhes bya ba'i don to/ /yang rnam pa gcig tu na/ a ri han zhes bya ba 'os pa'am/ nus pa la yang snyeg ste/ bdag gi don thams cad yongs su rdzogs pas/ gzhan la rjes su ston par 'os shing nus pa'am/ dge 'dun dkon mchog ces bya bar 'os pa'am/ khams gsum gyi mi dang lha'i gtso bo rnams kyis mchod pa rnam pa du mas mchod par 'os pa sha stag go zhes bya ba'i don to/ /yang rnam pa gcig tu na a ri han zhes bya ba mchod pa la yang snyeg ste/ 'phags pa dgra bcom pa de dag de bzhin gshegs pa la sgrub pa'i mchod pas rgyun mi 'chad par mchod par byed pa'i phyir yang dgra bcom pa zhes bya'o/ /zag pa zad pa zhes bya ba ni zag pa rnam pa bzhi ste/ 'dod pa'i zag pa dang / srid pa'i zag pa dang / ma rig pa'i zag pa dang / lta ba'i zag pa rnams spangs te zad par gyur pa la yang / zag pa zad pa zhes bya ste/ de la 'dod pa'i zag pa ni/ 'dod pa'i khams su gtogs pa'i nyon mongs pa rnams so/ /srid pa'i zag pa ni gzugs kyi khams dang / gzugs med pa'i khams su gtogs pa'i nyon mongs pa rnams so/ /ma rig pa'i zag pa ni khams gsum char gyi ma rig pa'o/ /lta ba'i zag pa ni/ lta ba lnga ste/ 'jig tshogs la lta ba dang / mthar 'dzin par lta ba dang / log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa'o/ /chos 'di rnams kyis sems can rnams 'khor bar 'khor zhing ngan song du ltung bar byed pa'i phyir zag pa zad pa zhes bya'o/ /nyon mongs pa med pa zhes bya ba ni las kyi kun nas nyon mongs pa dang / nyon mongs pa'i kun nas nyon mongs pa dang / rnam par smin pa'i phung po'i kun nas nyon mongs pa dang / skye ba'i kun nas nyon mongs pa rnams spangs shing med pa la bya ste/ de la las kyi kun nas nyon mongs pa ni 'du byed kyi dge ba dang mi dge ba dang lung du ma bstan pa'i las rnams byed pas nyon mongs pa'o/ /nyon mongs pa'i kun nas nyon mongs pa ni 'dod chags la sogs pa'i nyon mongs pa rnams so/ /rnam par smin pa'i kun nas nyon mongs pa ni sdug bsngal zhing nyon mongs par 'gyur ba'i gzhi phung po lnga la bya'o/ /skye ba'i kun nas nyon mongs pa ni ma'i mngal nas 'byung ba'i tshe sdug bsngal mang po nyams su myong ba ste/ de rnams med pa la nyon mongs pa med pa zhes bya'o/ /dbang du gyur pa zhes bya ba ni dbang bzhi dang ldan pa la bya ste/ bzhi gang zhe na/ rdzu 'phrul la dbang ba dang / dbang po la dbang ba dang / ting nge 'dzin la dbang ba dang / shes rab la dbang ba'o/ /de la rdzu 'phrul la dbang bas ni sems can gyi 'jig rten dang / snod kyi 'jig rten de dag gi dbang du 'gyur ro/ /dbang po la dbang bas ni spyod lam nye bar zhi bas de dag la 'jig rten rnams dga' ba skye bar byed do/ /ting nge 'dzin la dbang bas ni bdag gi sems dbang du 'gyur ro/ /shes rab la dbang bas ni nyon mongs pa dang las dang rnam par smin pa thams cad med par byed de bcings pa las grol ba bzhin du rang dbang thob par 'gyur ro/ /sems shin tu rnam par grol ba zhes bya bas ni sred pa'i phyogs su gtogs pa'i nyon mongs pa dang / nye ba'i nyon mongs pa thams cad spangs par bstan pa ste/ de ltar sems rnam par grol ba thob pas ni snyoms par 'jug pa'i sgrib pa las rnam par grol bar gyur pa bstan to/ /shes rab shin tu rnam par grol ba zhes bya bas ni ma rig pa'i phyogs su gtogs pa'i nyon mongs pa rnams spangs pa bstan te/ de ltar shes rab rnam par grol ba thob pas nyon mongs pa thams cad spangs pa'i phyir/ nyon mongs pa'i sgrib pa las rnam par grol bar bstan to/ /cang shes pa zhes bya ba ni 'jigs pa med pa la bya ste/ de bas na mdo sde dag las kyang / 'jigs pa med pa'i phyir cang shes pa lnga gsungs pa lta bu ste/ lce 'bab pa la sogs pa 'byung ba'i bag tsha ba dang / 'jigs pa med pas khyu mchog cang shes pa dang / 'thab mo'i 'jigs pa med pas rta dang glang po che cang shes pa dang / gzhan gyis gnod pa byed pa'i 'jigs pa med pas seng ge cang shes pa dang / 'chi ba'i 'jigs pa med pas dgra bcom pa cang shes pa rnams so/ /'dir ni cang shes pa zhes bya bas bag tsha ba bzhi med pa bstan te/ bzhi gang zhe na/ sdug bsngal gyis bag tsha ba dang / 'jigs pas bag tsha ba dang / 'jig rten gyi chos kyis bag tsha ba dang / mi shes pas bag tsha ba'o/ /de la mya ngan dang smre sngags 'don pa dang / sdug bsngal ba dang / yid mi bde ba rnams med pas sdug bsngal gyis bag tsha ba med do/ /bdag gis smad pa dang / gzhan gyis smad pa dang / ngan 'gror ltung ba dang / 'tsho ba mi 'byor ba dang / chad pas gcad du dogs pa dang / mi snyan par grags su dogs pa dang / 'chi bas 'jigs pa rnams med pa'i phyir 'jigs pa'i bag tsha ba med do/ /rnyed pa dang ma rnyed pa dang / grags pa dang ma grags pa dang / bstod pa dang smad pa dang / bde ba dang sdug bsngal gyis gos pa med pa'i phyir/ 'jig rten gyi chos kyis bag tsha ba med do/ /mi shes pa dang / the tshom dang bcas par shes pa dang / log par shes pa med pa'i phyir/ mi shes pa'i bag tsha ba med de/ de bas na de lta bu'i bag tsha ba rnams med pa'i phyir cang shes pa zhes bya'o/ /glang po chen po zhes bya ba ni gtso bo chen po zhes bya ba'i don te/ khyad par rtogs pa'i chos thob pa'i phyir glang po chen po zhes bya'o/ /bya ba byas pa byed pa byas pa zhes bya bas ni/ bya ba thams cad yongs su rdzogs pa'i yon tan bstan pa ste/ las kyi gtso bor mi byar mi rung ba la ni bya ba zhes bya'o/ /zhar la bya ba ni byed pa zhes bya ste/ de la las kyi gtso bo mi byar mi rung ba yang tshul khrims dang / ting nge 'dzin dang / shes rab yongs su rdzogs par byas pas sdug bsngal thams cad las rnam par thar bar bya ba ste/ de dag yongs su rdzogs par byas pa la bya ba byas pa zhes bya'o/ /zhar la bya ba ni 'dod pa chung bar bya ba dang / chog shes par bya ba dang / sbyangs pa'i yon tan la gnas par bya ba dang / sems can thams cad mgu bar bya ba la sogs pa yongs su rdzogs par byas pa ni byed pa byas pa zhes bya ste/ de bas na bya ba byas pa byed pa byas pa zhes bya ba 'dis bsgrub par bya ba'i rnam pa thams cad yongs su rdzogs pa'i yon tan bstan to/ /khur bor ba zhes bya ba la/ khur ni rnam pa bzhi ste/ phung po'i khur dang / nyon mongs pa'i khur dang / khas 'ches pa'i khur dang / brtson 'grus kyi khur rnams te/ de la sdug bsngal gyi bden pa yongs su shes pas ni phung po'i khur bor ro/ /kun 'byung ba spangs pas ni nyon mongs pa'i khur bor ro/ /lam bsgoms pas ni khas 'ches pa'i khur bor ro/ /'gog pa mngon sum du byas pas ni brtson 'grus kyi khur bor bar shes par bya'o/ /bdag gi don rab tu thob pa zhes bya ba la/ bdag gi don thob pa ni rnam pa gnyis te/ don ma yin pa spangs pa dang / don du gnyer ba grub pa'o/ /de la ma rig pa spangs pas nyon mongs pa'i sgrib pa thams cad spangs par gyur pa ni/ don ma yin pa spangs pa'o/ /rig pa bskyed pas mya ngan las 'das pa thob pa ni don du gnyer ba grub pa'o/ /srid par kun tu sbyor ba yongs su zad pa zhes bya ba ni srid par sbyor ba'i nyon mongs pa dgu spangs pa la bya ste/ srid par sbyor ba'i nyon mongs pa dgu gang zhe na/ lta ba'i kun tu sbyor ba dang / mchog tu 'dzin pa'i kun tu sbyor ba dang / the tshom gyi kun tu sbyor ba dang / phrag dog gi kun tu sbyor ba dang / ser sna'i kun tu sbyor ba dang / khong khro ba'i kun tu sbyor ba dang / nga rgyal gyi kun tu sbyor ba dang / ma rig pa'i kun tu sbyor ba dang / sred pa'i 'dod chags kyi kun du sbyor ba rnams te/ nyon mongs pa 'di rnams kyis sems can rnams 'khor bar skye bar sbyor ba'i phyir srid par kun du sbyor ba zhes bya'o/ /bka' yang dag pas sems shin tu rnam par grol ba zhes bya ba la de bzhin gshegs pa'i bka' yang dag pa ni yang dag pa'i lta ba la bya ste/ yang dag pa'i lta ba la goms par byas pas nyon mongs pa'i sgrib pa thams cad yongs su spangs te/ sems yongs su dag par gyur pa la bka' yang dag pas sems shin tu rnam par grol ba zhes bya'o/ /sems kyi dbang thams cad la pha rol tu phyin pa'i mchog thob pa zhes bya bas ni bsam gtan dang ting nge 'dzin la goms pa'i mthus sems la dbang thob pa'i yon tan bstan pa ste/ sems la dbang thob pas bsam gtan bzhi dang / gzugs med pa'i snyoms par 'jug pa bzhi dang / 'gog pa'i snyoms par 'jug pa dag la/ lugs dang mthun pa dang / lugs dang mi mthun pa dang / thod rgal du snyoms par 'jug pa la thags thogs med cing / ji ltar 'dod par mnyam par 'jog nus pas snyoms par 'jug pa thams cad la sems dbang du gyur pa yongs su rdzogs shing mthar phyin pa sha stag go zhes bya ba'i don to/ /gang zag gcig ma gtogs pa ni 'di ltar slob pa rgyun du zhugs pa tshe dang ldan pa dga' bo'o zhes bya ba ni 'phags pa kun dga' bo 'ba' zhig de'i tshe rgyun du zhugs pa'i 'bras bu thob pa dgra bcom par bya ba la slob pa yin te/ thams cad kyang dgra bcom pa zag pa zad pa zhes bya ba la sogs pa'i yon tan smos pa'i nang du ma gtogs te/ de 'ba' zhig rgyun du zhugs pa yin gyis/ gzhan thams cad dgra bcom pa sha stag go zhes bya ba'i don to/ /de ltar 'khor dge slong rnams bstan nas/ 'khor dge slong ma dang / dge bsnyen dang / dge bsnyen ma rnams bstan pa'i phyir/ dge slong ma grags 'dzin dang skye dgu'i bdag mo chen mo la sogs pa lnga brgya tsam dang / dge bsnyen dang / dge bsnyen ma shin tu mang ba kun kyang chos mthong ba sha stag dang zhes bya ba gsungs te/ kun kyang chos mthong ba sha stag ces bya ba ni de dag thams cad kyang bden pa mthong ba sha stag go zhes bya ba'i don to/ /byang chub sems dpa' sems dpa' chen po tshad med grangs med pa zhes bya ba la sogs pas byang chub sems dpa'i 'khor phun sum tshogs pa bstan pa ste/ tshad dang grangs nges pa ma smos pa ni/ 'jig rten gyi khams rnam pa sna tshogs du ma nas 'dus pa sha stag ste/ mang ches pa'i phyir tshad dang grangs 'di snyed cig go zhes tshad dang grangs chod par ma smos so/ / byang chub sems dpa' yang rnam pa lnga ste/ lhag pa'i bsam pa dag pa dang / rtsol ba dang bcas pa la mtshan ma med par gnas pa dang / mtshan ma med pa la lhun gyis grub par gnas pa dang / spyod pa nges pa la zhugs pa dang / skye ba gcig gis thogs pa rnams so/ /de la sa dang po nas sa drug pa la gnas kyi bar du ni lhag pa'i bsam pa dag pa'o/ /sa bdun pa ni rtsol ba dang bcas pa la mtshan ma med par gnas pa'o/ /sa brgyad pa ni mtshan ma med pa la lhun gyis grub par gnas pa'o/ /sa dgu pa ni spyod pa nges pa la zhugs pa'o/ /sa bcu pa ni skye ba gcig gis thogs pa yin par shes par bya'o/ /thams cad kyang gzungs rab tu thob pa zhes bya ba la sogs pas ni byang chub sems dpa' de dag gi yon tan phun sum tshogs pa bstan pa ste/ de la gzungs zhes bya ba yang chos rnams kyi don dang tshig rnams phyin ci ma log par 'dzin pas na gzungs zhes bya ste/ mdor bsdus na dran pa dang shes rab la bya'o/ /so sor dbye ba rnam pa bzhi ste/ byang chub sems dpa' rnams bzod pa thob pa'i rgyur gyur pa'i gzungs dang / gsang sngags kyi gzungs dang chos kyi gzungs dang / don gyi gzungs so/ /de la bzod pa thob pa'i rgyur gyur pa'i gzungs ni chos thams cad gzod ma nas ma skyes shing rang bzhin gyis stong par rtogs par bya ba'i phyir bsgom pa'i tshe shes rab dang dran pas bsgom pa'i don dang / tshig ma brjed par rtogs pas thams cad rang bzhin gyis ma skyes par rtogs par nus shing / stong pas mi skrag par gyur pa la bzod pa thob pa zhes bya ste/ bzod pa de lta bu thob pa'i rgyu ting nge 'dzin bsgom pa'i tshe/ shes rab dang dran pa la bzod pa thob pa'i rgyur gyur pa'i gzungs zhes bya'o/ / gsang sngags kyi gzungs ni/ byang chub sems dpa' rnams ting nge 'dzin grub cing sems la dbang du gyur pa'i mthu dang / sngon gyi smon lam dang spyod pa'i shugs kyis/ sems can rnams kyi gnod pa sna tshogs bsal ba'i phyir gsang sngags kyi tshig rnams byin gyis rlobs te/ de ltar ting nge 'dzin gyi mthus byin gyis brlabs pa'i gsang sngags de dag gis kyang sems can rnams kyi gnod pa thams cad sel nus par 'gyur te/ de lta bu'i gzungs sngags byin gyis rlob pa'i mthu dang ldan pa la gsang sngags kyi gzungs zhes bya'o/ / chos kyi gzungs ni sa thob pa'i byang chub sems dpa' rnams sangs rgyas dang byang chub sems dpa' rnams la chos nyan pa'i tshe sngon mi shes ma thos pa'i chos kyi tshig rnam grangs mang po tshad med grangs med dpag tu med pa rnams ji skad bshad pa bzhin du shes rab kyis zin cing dran pas yun ring por yang mi brjed par nus pa la chos kyi gzungs zhes bya'o/ /don gyi gzungs ni de ltar chos kyi tshig mang po bshad pa rnams phyin ci ma log par bzung ba'i don sa dang / pha rol tu phyin pa dang / byang chub kyi phyogs dang / stobs dang / mi 'jigs pa la sogs pa 'bras bu thob par bya ba rnam pa mang po tshad med grangs med pa rnams thob par nus pa'i dran pa dang / shes rab tu ldan pa la don gyi gzungs zhes bya ste/ de lta bu la sogs pa'i gzungs dang ldan pa la gzungs thob pa zhes bya'o/ /ting nge 'dzin rab tu thob pa zhes bya ba ni dpa' bar 'gro ba'i ting nge 'dzin la sogs pa ting nge 'dzin brgya phrag mang po rnams thob pa zhes bya ba'i don te/ ting nge 'dzin de dag gi mtshan nyid kyang 'og nas zhib tu 'chad do/ /stong pa nyid kyis rnam par spyod pa/ mtshan ma med pa'i spyod yul can/ rtog pa med pa'i smon lam dang ldan pa zhes bya bas ni rnam par thar pa'i sgo gsum thob pa'i yon tan bstan pa ste/ de ltar gong du bshad pa'i rim pas gzungs dang ting nge 'dzin thob pa'i byang chub sems dpa' de dag chos thams cad stong pa nyid du gtogs pas na/ stong pa nyid kyis rnam par spyod pa zhes bya'o/ /de ltar stong pa nyid la spyod cing bsgoms pa'i rgyus/ gzugs la sogs pa phyi nang gi chos gang la yang dngos por mi lta zhing / mtshan mar mi 'dzin pas na mtshan ma med pa'i spyod yul can zhes bya'o/ /de ltar chos thams cad la dngos por mi lta zhing mtshan mar mi 'dzin na/ chos gang la yang chags pa med pas/ khams gsum gyi bde ba'am 'byor pa gang la yang bde bar rnam par rtog pa med cing / de dag thob par bya ba'i phyir smon pa med pas na/ rtog pa med pa'i smon lam dang ldan pa zhes bya'o/ /chos thams cad la mnyam pa nyid kyi bzod pa rab tu thob pa zhes bya ba ni de ltar rnam par thar pa'i sgo gsum gyi ting nge 'dzin la legs par gnas pa de spros pa thams cad nye bar zhi ba'i phyir chos thams cad mnyam pa nyid kyi bzod pa bzhi thob par 'gyur te/ bzhi gang zhe na/ bdag dang gzhan du rnam par rtog pa med pa'i phyir sems can mnyam pa nyid kyi bzod pa dang / byams pa dang sdang ba med pa'i phyir 'du shes mnyam pa nyid kyi bzod pa dang / chos thams cad de bzhin nyid tsam du zad pa'i phyir chos thams cad la mnyam pa nyid kyi bzod pa dang / 'khor ba dang mya ngan las 'das pa la sems mnyam pa'i phyir mi gnas pa mnyam pa nyid kyi bzod pa ste/ bzod pa de lta bu dag dang ldan pa'i phyir chos thams cad mnyam pa nyid kyi bzod pa rab tu thob pa zhes bya'o/ /thogs pa med pa'i spobs pa dang ldan pa zhes bya ba ni de ltar chos thams cad la mnyam pa nyid kyi bzod pa rab tu thob pa de shes rab kyis chos thams cad stong par rtogs kyang / snying rje chen pos sems can yongs su mi gtong ba'i phyir stong pa nyid kyi rang bzhin mya ngan las 'das pa mngon du yang mi byed la/ shes rab kyis chos thams cad stong par rtogs shing / nyon mongs pa rnams spangs pas 'khor ba la yang chags shing thogs pa med pa/ nyan thos ltar mya ngan las 'das pa la yang chags shing thogs pa med pa'i shes rab dang ldan pa la/ thogs pa med pa'i spobs pa dang ldan pa zhes bya'o/ /bstan pa zad mi shes pa la so so yang dag par rig pa'i tshul khong du chud pa zhes bya ba ni de ltar gong du bshad pa'i rim pas thogs pa med pa'i spobs pa dang ldan pa/ sems can rnams la chos bstan pa'i thabs rnam pa mang po zad mi shes pa rnams la rab tu mkhas pa'i yon tan dang ldan pa sha stag go zhes bya ba'i don to/ /mngon par shes pa chen pos rnam par rtse ba zhes bya ba ni de ltar chos bstan pa'i tshul la mkhas pa'i byang chub sems dpa' de dag ji ltar chos bstan pa'i tshul la mkhas pa'i rgyu bstan pa ste/ sems can rnams la phan gdags pa'i phyir bsam gtan dang / ting nge 'dzin la mnyam par gzhag pa'i mthus mngon par shes pa drug thob par 'gyur te/ mngon par shes pa drug po de dag gis sems can gyi don rnam pa sna tshogs byed pa la mngon par shes pa chen pos rnam par rtse ba zhes bya ste/ chen po smos pa ni 'jig rten pa'i mngon par shes pa dang / nyan thos dang rang sangs rgyas kyi mngon par shes pa bas mthu dang yon tan khyad par du 'phags par che ba'i phyir ro/ /mngon par shes pa drug ni lha'i mig dang / lha'i rna ba dang / rdzu 'phrul gyi bya ba shes pa dang / gzhan gyi sems shes pa dang / sngon gyi gnas rjes su dran pa shes pa dang / zag pa zad pa shes pa dang drug go/ /de la lha'i mig gis ni phyogs bcu'i 'jig rten gyi khams kyi sems can rnams dge ba dang mi dge ba ci spyod pa rnams gzigs nas/ de dang mthun pa'i don mdzad do/ / lha'i rna bas ni sems can dmyal ba dang / dud 'gro dang / yi dags dang / mi rnams kyi sdug bsngal ba dang / yid mi bde ba'i sgra thos nas de dag gi sdug bsngal sel bar mdzad do/ /rdzu 'phrul gyi bya ba shes pas ni lus dang ngag gi sprul pa sna tshogs dang / yo byad kyi dngos po rnam pa sna tshogs sprul pas sems can rnams kyi so so'i yid dang sbyar te phan 'dogs so/ /gzhan gyi sems shes pas ni sems can gzhan rnams kyi sems la ci sems pa shes pas de dag gi bsam pa dang / bag la nyal ba dang / dbang po la sogs pa ji lta ba bzhin du mkhyen nas/ de dang mthun par chos ston cing phan 'dogs so/ /sngon gyi gnas rjes su dran pas ni sems can rnams tshe rabs snga ma la gnas gang dang gar skyes pa dang / ci dang ci spyod spyod pa mkhyen pas/ de dang mthun par chos bstan pa la sogs pas phan 'dogs pa dang / byang chub sems dpa' rnams kyi sngon gyi spyod pa rlabs po che rmad du byung ba rnams bdag gis dran pas sems can rnams la bzlas pas sems can rnams dad pa bskyed pa dang / rtag par lta ba dang / chad par lta ba rnams la tshe rabs snga ma byung ba'i rgyud bstan pas rtag par lta ba dang / chad par lta ba las bzlog par mdzad do/ /zag pa zad pa shes pas ni byang chub sems dpa' bdag dang gzhan gyi nyon mongs pa zad pa yang dag pa ji lta ba bzhin du rab tu mkhyen to/ /bdag dang gzhan gyi nyon mongs pa zad par gyur tam/ ma gyur pa yang rab tu mkhyen to/ /bdag dang gzhan gyi nyon mongs pa zad par bya ba'i thabs ma yin pa yang rab tu mkhyen to/ /de ltar byang chub sems dpas de dag thams cad rab tu mkhyen nas/ bdag nyid kyis zag pa zad pa mngon du mdzad do/ /byang chub sems dpa' zag pa zad pa'i shes pa de nyid kyis/ zag pa dang bcas pa'i chos rnams dang lhan cig tu gnas kyang chos de dag gis bdag nyid kun nas nyon mongs par mi 'gyur ro/ /de ltar mngon par shes pa drug po de dag gis sems can gyi don rnam pa sna tshogs pa mdzad pa la mngon par shes pa chen pos rnam par rtse ba zhes bya'o/ /mngon par shes pa shin tu ma nyams pa zhes bya ba ni byang chub sems dpa' de dag tshe 'phos na yang mngon par shes pa drug po de dag nyams par mi 'gyur te/ mngon par shes pa drug po de dag ni byang chub sems dpa' la tshe rabs thams cad du med par mi 'gyur te/ brgya la dud 'gro'i skye gnas su skyes na yang nyams shing med par mi 'gyur ba'i phyir mngon par shes pa shin tu ma nyams pa zhes bya'o/ /mnyan par 'os pa'i tshig dang ldan pa zhes bya ba ni de ltar mngon par shes pa drug dang ldan pa'i byang chub sems dpa' sems can la phan 'dogs pa gtsor byed pas/ phan gdags par bya ba'i sems can de dag kyang byang chub sems dpa' de dag la rang bzhin gyis dga' ba'i phyir byang chub sems dpa'i ngag nyan par 'gyur te/ byang chub sems dpa' gdams shing rjes su bstan pa las srog gi phyir yang 'gal bar mi byed pa'i phyir mnyan par 'os pa'i tshig dang ldan pa zhes bya'o/ /yang rnam pa gcig tu na/ byang chub sems dpa' sngon sbyin pa dang / tshig snyan pa la sogs pa bsdu ba'i dngos po bzhis sems can rnams la phan 'dogs pa'i bsod nams kyi mthu dang / byang chub sems dpa' nyid kyang don dang ldan zhing / rigs pa dang ldan pa'i tshig 'ba' zhig smra ba'i phyir mnyan par 'os pa'i tshig dang ldan pa zhes bya'o/ /le lo med cing brtson 'grus brtsams pa zhes bya ba ni bdag dang gzhan gyi don phun sum tshogs par bya ba la le lo med cing brtson 'grus brtsams pa zhes bya ba'i don to/ /lus dang srog la mi lta ba zhes bya ba ni dam pa'i chos btsal ba dang / sems can gyi don gyi phyir lus dang srog la mi phangs par dam pa'i chos btsal ba dang / sems can gyi don byed pa la bya'o/ /tshul 'chos pa med pa zhes bya bas ni lus kyi las yongs su dag pas log par 'tsho ba'i skyon med pa bstan pa ste/ rnyed pa dang bkur sti 'dod pa'i phyir gzhan dag la lus kyi spyod lam 'chos shing zhi ba dang tshul du shis par ston pa ni tshul 'chos pa zhes bya'o/ /kha gsag med pa zhes bya bas ni ngag gi skyon med par bstan pa ste/ rnyed pa dang bkur sti 'dod pa'i phyir gzhan dag la gcam pa'i tshig smra ba ni kha gsag ces bya'o/ /grags pa dang / khe dang bkur sti'i sems med pa zhes bya ba ni yid kyi las yongs su ma dag pa'i skyon med pa bstan pa'o/ /zang zing med pa'i chos bstan pa zhes bya bas ni sbyor ba yongs su dag pa'i yon tan bstan pa ste/ sems can rnams la chos ston na yang snying rje yongs su zin cing shes rab kyis shin tu sbyangs pas/ rnyed pa dang bkur sti la chags pa'i sems med pa la zang zing med pa'i chos ston pa zhes bya'o/ /'di yan chad kyis ni byang chub sems dpa'i sa bdun pa man chad rtsol ba dang bcas shing mtshan ma med pa la spyod pa'i yon tan rnams bstan pa'o/ /chos zab mo'i bzod pa dam pa rtogs par khong du chud pa zhes bya ba la sogs pas ni byang chub sems dpa'i sa brgyad pa yan chad rtsol ba med cing mtshan ma med par gnas pa rnams kyi yon tan bstan pa ste/ byang chub sems dpa' sa brgyad pa la gnas pa yan chad ni sems can yongs su smin par bya ba dang / sangs rgyas kyi zhing yongs su dag par bya ba thams cad ched du bsams shing btsal mi dgos par sngon gyi spyod pa'i shugs dang / smon lam gyi mthus lhun gyis grub pa nyid du yongs su rdzogs par 'gyur zhing / chos thams cad gzod ma nas ma skyes par rtogs pas chos zab mos mi 'jigs shing mi skrag pa'i mchog tu gyur pa'i phyir chos zab mo'i bzod pa dam pa rtogs par khong du chud pa zhes bya'o/ /mi 'jigs pa chen po thob pa zhes bya ba ni de ltar chos zab mo la bzod pa thob pa'i byang chub sems dpa' de dag tshangs pa la sogs pa'i lha'i 'khor dang / rgyal rigs dang bram ze'i 'khor dang / bdud dang mu stegs can la sogs pa'i 'khor gang dang gang du 'gro yang mi shes pas 'jigs shing bag tsha ba dang / nyon mongs pa las gyur pa'i 'jigs shing bag tsha ba med pa'i phyir mi 'jigs pa chen po thob pa zhes bya'o/ / yid yongs su zhum pa med pa zhes bya ba ni de ltar mi 'jigs pa chen po thob pas rgyal rigs dang bram ze la sogs pa'i 'khor gang dang gang du 'gro yang 'jigs shing bag tsha ba med de/ spobs pa phun sum tshogs pa dang ldan pa'i phyir yid yongs su zhum pa med pa zhes bya'o/ / bdud kyi las thams cad las yang dag par 'das pa zhes bya bas ni cis kyang mi brdzi ba'i mthu dang ldan pa bstan te/ bdud kyi las 'og nas 'byung ba rnams dang / mdo gzhan las bshad pa'i bdud kyi las thams cad kyis mi tshugs pa zhes bya ba'i don te/ las kyi sgrib pa rgyun bcad pa zhes bya ba ni de ltar gong du bshad pa'i rim pas mi shes pa dang / nyon mongs pa'i 'jigs pa med cing / bdud kyi las las yang dag par 'das pa'i phyir sngon gyi las kyi dbang gis bde 'gro dang / ngan 'gror skye bar 'gyur ba med pa sha stag go zhes bya ba'i don to/ /las dang nyon mongs pa bcom pa'i phyir rgol ba rab tu bcom pa zhes bya ba ni las dang nyon mongs pa'i dgra rnams spangs pa zhes bya ba'i don to/ /pha rol po'i rgol ba thams cad kyis zil gyis mi non pa zhes bya ba ni mu stegs can phas rgol ba rnams kyis mi thub pa zhes bya ba'i don to/ /nyan thos dang rang sangs rgyas thams cad kyis rtogs par dka' ba zhes bya bas ni byang chub sems dpa' de dag gi shes pa dang / bsam pa dang / spyod yul rnams nyan thos dang rang sangs rgyas rnams kyis shes par mi nus pa zhes bstan pa'o/ /chos rab tu rtogs pas rnam par dbye zhing bstan pa la mkhas pa zhes bya bas ni phung po dang / khams dang skye mched la sogs pa 'jig rten pa'i chos rnams dang / sa dang / pha rol tu phyin pa dang / byang chub kyi phyogs la sogs pa 'jig rten las 'das pa'i chos rnams rab tu rtogs pas/ chos de dag gi rang gi mtshan nyid dang / phyi'i mtshan nyid rnam par dbye zhing / gzhan la ston pa la mkhas pa zhes bya ba'i don te/ de dag gis ni byang chub sems dpa' sa brgyad pa'i yon tan bstan to/ / bskal pa grangs med pa nas smon lam shin tu brtsams pa zhes bya bas ni sa dgu pa'i yon tan bstan pa ste/ sa dgu pa la gnas pa'i byang chub sems dpa' ni sngon bskal pa grangs med pa nas/ sangs rgyas kyi chos yongs su rdzogs par bya ba dang / sems can gyi don mthar phyin par bya bar smon lam btab cing / byang chub sems dpa'i spyod pa brtsams pa rnams mthar phyin cing yongs su rdzogs par gyur te/ sngon gyi smon lam gyi mthu dang / spyod pa'i shugs kyis de yan chad sangs rgyas kyi chos yongs su rdzogs par bya ba'i spyod pa dang / sems can gyi don yongs su rdzogs par bya ba'i spyod pa rnams 'bad cing btsal mi dgos par lhun gyis grub pa nyid du yongs su rdzogs par 'gyur bas sangs rgyas su bsgrub pa dang / sems can gyi don du spyod pa rnams kyang gdon mi za bar 'grub pas spyod pa nges pa la zhugs pa zhes kyang bya ste/ de lta bu'i yon tan dang ldan par gyur pa yang sngon yun ring po nas smon lam shin tu brtsams pa'i 'bras bu yin pa'i phyir/ bskal pa grangs med pa nas smon lam shin tu brtsams pa zhes bya'o/ /bzhin 'dzum pa dang ldan pa/ thog mar smra ba/ khro gnyer med pa zhes bya bas ni de ltar sngon gyi smon lam gyi mthus spyod pa la nges par zhugs pas/ sa dgu pa'i byang chub sems dpa' de dag sngon sems can rnams la tshad med pa bzhi spyod spyod pa'i rgyu mthun pa'i 'bras bu bstan pa ste/ de la bzhin 'dzum pa dang ldan pa zhes bya bas ni byams pa'i rgyu mthun pa bstan pa ste/ sngon sems can la byams pa spyod spyod pa'i rgyus dus thams cad du sems can rnams la bzhin 'dzum pa 'ba' zhig ston cing sems can rnams dga' bar byed kyis/ nam yang ngo 'dzum nag cing sems can rnams mi dga' bar mi byed do zhes bya ba'i don to/ /thog mar smra ba zhes bya bas ni snying rje'i rgyu mthun pa bstan pa ste/ sngon sems can rnams la snying rje spyod spyod pa'i rgyus byang chub sems dpa' de dag sems can glo bur du 'ongs pa ma 'dris pa rnams la yang snying rje'i shugs kyis sems can de dag dga' bar bya ba'i gtam gyis snga nas bsu zhing gsang por smra ba dag go zhes bstan pa'o/ /khro gnyer med pa zhes bya bas ni dga' ba dang / btang snyoms kyi rgyu mthun pa bstan pa ste/ sngon sems can rnams kyi 'byor pa la phrag dog dang / sems 'khrugs pa med cing / dga' ba bskyed bskyed pa dang / bdag la gnod pa byed pa dang / nyes pa byung ba rnams la yang bzod cing dang du blangs te/ btang snyoms su 'jog 'jog pa'i rgyus mi dga' ba dang khros shing 'khrugs pa'i mtshan ma bzhin khro gnyer can du nam yang mi 'gyur ba dag go zhes bya ba'i don to/ /snyan cing 'jam pa'i tshig dang ldan pas pha rol la tshigs su bcad pa'i dbyangs su brjod pa la mkhas pa zhes bya bas ni sangs rgyas kyi zhing du 'gro 'gro ba dang / mngon par shes pa la spyod spyod pa rgyu mthun pa'i yon tan dang ldan pa bstan pa ste/ byang chub sems dpa' de dag sngon sangs rgyas kyi zhing nas sangs rgyas kyi zhing du 'gro zhing / de bzhin gshegs pa rnams la tshigs su bcad pa'i dbyangs kyis yon tan rnams brjod cing bstod bstod pa dang / mngon par shes pa'i mthus sems can rnams kyi spyod pa dang / bsam pa'i rjes su mthun par yid du 'ong zhing 'thad pa'i tshig gis chos ston ston pa'i rgyus sa dgu pa thob pa'i tshe yang lhun gyis grub pa nyid du de bzhin gshegs pa rnams la bstod pa dang / sems can rnams la chos ston pa'i tshe snyan cing 'jam pa'i tshig dang ldan pa tshigs su bcad pa'i dbyangs su brjod pa la mkhas par 'gyur ba dag go zhes bstan pa'o/ /spobs pa mi chod pa zhes bya bas ni sa dgu pa la gnas pa'i byang chub sems dpa' de dag 'khor gyi nang du chos smra ba chen po yin pa'i yon tan bstan pa ste/ de dag so so yang dag par rig pa bzhi dang ldan pas 'khor mang po la chos ston pa'i tshe na/ spobs pa chen pos bshad pa la thags thogs med cing sus kyang zil gyis mi gnon pa dang ldan pa dag go zhes bya ba'i don to/ /'khor mtha' yas pa zil gyis gnon pa'i mi 'jigs pa dang ldan pa zhes bya bas ni 'khor gyi nang du 'gro ba la mkhas pa'i yon tan dang ldan pa bstan pa ste/ de ltar so so yang dag par rig pa bzhi dang ldan zhing spobs pa phun sum tshogs pa dang ldan pas lha dang mi la sogs pa'i 'khor gang gi nang du 'gro na yang / mi shes pas 'jigs shing bag tsha ba med de/ bdag gi shes pas ni 'khor thams cad zil gyis gnon la/ gzhan sus kyang bdag zil gyis mi gnon pa'i phyir 'khor mtha' yas pa zil gyis gnon pa'i mi 'jigs pa dang ldan pa zhes bya'o/ /bskal pa bye ba mtha' yas par bstan pa'i ye shes kyi 'byung ba la mkhas pa zhes bya bas ni brtson 'grus kyi pha rol tu phyin pa'i rgyu mthun pa'i 'bras bu dang ldan pa bstan pa ste/ sems can gyi don du chos ston pa dang / dka' ba spyod pa'i brtson 'grus lhun gyis grub pas ci bya'o cog la skyo zhing yid 'byung bar mi 'gyur te/ bskal pa du mar spyod kyang yun ring por thogs pa'i 'du shes med pas/ bskal pa bye ba mtha' yas pa yang yengs la zad cing 'das pa'am/ de las byung bar byed pa la mkhas pa dag go zhes bstan pa'o/ /de ltar sa dgu pa'i byang chub sems dpa' spyod pa la nges par zhugs pa rnams kyi yon tan bstan nas/ sa bcu pa'i byang chub sems dpa' skye ba gcig gis thogs pa rnams kyi yon tan bstan pa'i phyir/ thams cad sgyu ma dang / smig rgyu dang / chu zla dang / rmi lam dang / sgra brnyan dang / mig yor dang / nam mkha' dang / dri za'i grong khyer dang / sprul pa dang / gzugs brnyan lta bur khong du chud pa zhes bya ba gsungs te/ sa bcu pa la gnas pa'i byang chub sems dpa' rnams kyis don dam par chos thams cad dngos po med par rtogs kyang / kun rdzob tu de bzhin gshegs pa rnams la mchod cing bkur stir bya ba dang / sangs rgyas kyi zhing yongs su dag par bya ba dang / sems can yongs su smin pa dang rnam par grol bar bya ba'i spyod pa rnams sngon gyi smon lam gyi mthu dang / spyod pa'i shugs kyis btsal zhing 'bad mi dgos par lhun gyis grub pa nyid du 'byung ste/ spyod pa de dag la yang dngos po dang mtshan mar mi 'dzin cing ma chags par spyod pa ni/ chos thams cad sgyu ma dang smig rgyu la sogs pa lta bur khong du chud pa'i phyir ro zhes bstan pa ste/ sgyu ma la sogs pa'i dpe rnam pa bcu bstan pa yang / gdul bya'i skye bo rnams kyi bsam pa dang / the tshom tha dad pa rnams bsal ba'i phyir te/ chos thams cad rang bzhin gyis stong ste/ dngos po med na ci'i phyir kha dog dang dbyibs la sogs pa'i rnam pa sna tshogs su snang bar 'gyur snyam du sems pa la/ sgyu ma'i dpe bstan te/ dper na sgyu ma mkhan gyis rta dang glang po che la sogs pa'i dngos po sna tshogs byas pa rnams kha dog dang dbyibs la sogs pa'i khyad par sna tshogs su snang yang yang dag par yod pa ma yin pa de bzhin du/ chos thams cad kyang kha dog dang dbyibs la sogs pa'i dngos por snang yang yang dag par yod pa ma yin no zhes bstan pa'o/ /sems can kha cig ni de ltar chos thams cad dngos po med na/ sems dang sems las byung ba rnams ci la yang dmigs te 'byung bar 'gyur snyam du sems pa la/ smig rgyu'i dpe bstan te/ smig rgyu la chu'i dngos po med par yang de la dmigs nas chu'i 'du shes skye zhing / sems dang sems las byung ba rnams 'byung bar 'gyur ba de bzhin du/ chos thams cad kyang rang bzhin gyis stong zhing dngos po med de/ dmigs pa'i yul ma yin yang / sems can rnams phyin ci log tu rtog cing 'khrugs pa las sems dang sems las byung ba rnams 'byung bar 'gyur ro zhes bstan to/ /chos thams cad dngos po med na skye ba dang 'jig par yang ji ltar 'gyur snyam du sems pa la chu zla'i dpe bstan te/ dper na nam mkha' la zla ba snang na ni chu'i nang du yang zla ba 'byung zhing snang bar 'gyur la/ nam mkha' la zla ba mi snang na ni chu'i nang gi zla ba yang med cing mi snang bar 'gyur ba de bzhin du/ chos thams cad skye ba dang 'jig par snang ba yang phyin ci log tu rtog pa'i bag chags yod na ni snang la bag chags de dag byang ste med na skye ba dang 'jig par yang mi snang ngo zhes bstan pa'o/ /chos thams cad rang bzhin gyis stong ste dngos po med na/ bza' ba dang btung ba la sogs te 'jig rten gyi tha snyad rnams ji ltar 'byung bar 'gyur snyam du sems pa la/ rmi lam gyi dpe bstan te/ dper na rmi lam na bza' ba dang btung ba dang / sbyin pa dang len pa dang / bde ba dang sdug bsngal la sogs pa rnam pa sna tshogs par snang yang dngos po'i rang bzhin du yod pa ma yin pa de bzhin du/ chos thams cad don dam par dngos po med par yang 'jig rten gyi tha snyad rnam pa sna tshogs snang ba'i rmi lam dang 'dra'o zhes bstan pa'o/ /chos thams cad dngos po med na ming gi tshogs dang tshig gi tshogs rnams ji ltar 'byung bar 'gyur snyam du sems pa la/ sgra brnyan gyi dpe bstan te/ dper na brag dang / gcong rong smra ba med pa las sgra 'byung ba grag pa/ sgra gzhan gyi rkyen gyis 'byung ba de bzhin du/ sgrar rtog pa'i rnam par shes pa 'khrul pa las/ ming gi tshogs dang tshig gi tshogs rnams 'byung bar 'gyur gyi/ dngos po ni gang yang med do zhes bstan pa'o/ /chos thams cad dngos po med na/ ji ltar rgyu dang rkyen rnams las 'byung bar 'gyur snyam du sems pa la/ mig yor dang / nam mkha' dang / dri za'i grong khyer gyi dpe bstan te/ dper na mig rab rib can du gyur pa'i rgyus skra shad 'dzings pa la sogs pa snang ba dang / ri rab kyi ngos su rin po che bai DUr+ya'i 'od kyis nam mkha' sngon por snang ba dang / yul gyi khyad par dang sprin dang nye ba'i rgyus/ dri za'i grong khyer dngos su yod pa ma yin pa de bzhin du chos thams cad kyang rgyu dang rkyen las 'byung ba yang don dam par yod pa ma yin no zhes bstan pa'o/ /chos thams cad dngos po med na/ rgyu dang 'bras bu 'dra bar ji ltar 'gyur snyam du sems pa la/ gzugs brnyan gyi dpe bstan te/ bzhin gyi rgyus me long gi nang du bzhin gyi gzugs brnyan bzhin dang 'dra bar snang yang / bzhin yang dag pa ma yin pa de bzhin du chos thams cad kyang rgyu dang 'bras bu 'dra bar 'byung yang don dam par yod pa ma yin no zhes bstan pa'o/ /chos thams cad dngos po med na/ 'gro ba dang 'ong ba la sogs pa'i bya ba rnams ji ltar yod par 'gyur snyam du sems pa la/ sprul pa'i dpe bstan te/ dper na sprul pa rnams 'gro ba dang 'ong ba la sogs pa'i lus kyi las dang / ngag gi las rnams byed pa sna tshogs snang yang / dngos por yod pa ma yin pa de bzhin du/ chos thams cad kyang kun rdzob tu bya ba sna tshogs byed par snang yang don dam par dngos po yod pa ma yin no zhes bstan pa'o/ /sems yongs su zhum pa med pa zhes bya bas ni byang chub sems dpa' de dag gi sems shin tu rnam par dag pa'i yon tan bstan pa ste/ sa 'og ma la gnas pa'i byang chub sems dpa' kha cig ni tshogs yongs su ma rdzogs pa dang / rtog pa dang bcas pa'i phyir/ de bzhin gshegs pa rnams dang / sa 'og ma la gnas pa'i byang chub sems dpa' yon tan gyis 'phags pa rnams kyi spyan sngar sems zhum par 'gyur yang srid kyi/ sa bcu pa la gnas pa'i byang chub sems dpa' ni tshogs yongs su rdzogs shing / rnam par mi rtog pa lhun gyis grub pa dang / dbang po rnams thob pa'i phyir rnam pa thams cad du sems zhum pa med pa dag go zhes bstan pa'o/ /sems can thams cad kyi sems kyi rgyu ba dang / shes pa phra ba dang / spyod pa dang / mos pa khong du chud par bya ba la mkhas pa zhes bya bas ni ye shes kyi pha rol tu phyin pa yongs su rdzogs pa'i rgyus sems can thams cad kyi sems kyi spyod pa rjes su rtogs pa zhes bya ba'i ting nge 'dzin dang / chos kyi dbyings la 'jug pa zhes bya ba'i ting nge 'dzin thob pas/ sems can thams cad kyi sems kyi rgyu ba dang / mos pa khong du chud pa dang / de bzhin gshegs pa rnams kyi ye shes phra ba dang / spyod pa la 'jug pa khong du chud par bya ba la mkhas pa'i yon tan bstan pa ste/ de la sems can thams cad kyi sems kyi spyod pa rjes su rtogs pa zhes bya ba'i ting nge 'dzin thob pas ni sems can thams cad kyi sems kyi rgyu ba dang / mos pa rnam pa sna tshogs khong du chud nas sems can de dag gdul ba'i thabs la mkhas par gyur to/ /chos kyi dbyings la 'jug pa'i ting nge 'dzin thob pas ni de bzhin gshegs pa rnams kyi ye shes zab cing phra ba dang / spyod pa rgya chen po khong du chud par bya ba la mkhas par gyur pa dag go zhes bstan pa'o/ /sems can thams cad la sdang ba med pa'i sems dang ldan pa zhes bya bas ni sems can thams cad yongs su bskyab pa la brtson 'grus ma btang ba'i phyir/ byams pa chen po'i stobs dang / sems can thams cad kyi sdug bsngal sel ba'i phyir snying rje chen po'i stobs dang ldan pa bstan pa'o/ /bzod pa rlabs chen po dang ldan pa zhes bya ba ni sa bcu la gnas pa'i byang chub sems dpa'i de dag thams cad mkhyen pa'i ye shes khyad par can du dbang bskur ba dang ldan pa'i ting nge 'dzin thob pas/ sa 'og ma dag la mi skye ba'i chos la bzod pa thob pa de dag shin tu sbyangs shing rgya che bar 'gyur te/ sangs rgyas bcom ldan 'das kyi ye shes kyi spyod yul zab cing phra ba rtogs par dka' ba rnams kyang rtogs par nus shing bzod pa rlabs chen po dang ldan pa zhes bya ste/ de bas na byang chub sems dpa' de dag gi mkhyen pa ni thams cad mkhyen pa la dar las chod pa tsam mo zhes bya'o/ /chos thams cad mnyam pa nyid du rtogs par bya ba'i ye shes la mkhas pa zhes bya ba la chos thams cad mnyam pa nyid kyi chos nyid de bzhin nyid la bya ste/ de bzhin nyid de dag gis so so rang gis rig pa'i ye shes kyis rtogs par byed pa la yang mkhas la/ gzhan rtogs par byed du 'jug pa la yang mkhas pa zhes bya ba'i don to/ /chos nyid zab mo dang ldan pas gting dpag dka' ba zhes bya ba ni byang chub sems dpa' de dag gis chos nyid zab mo rtogs pas de dag gi sems kyang zab cing brtag dka' ba'i phyir ro/ /rang gi sems la dbang rab tu thob pa zhes bya ba ni byang chub sems dpa' de dag gi sems yongs su dag pas nyon mongs pa'i dbang du mi 'gyur ba zhes bya ba'i don to/ /chos thams cad la dbang shin tu thob pa zhes bya bas ni 'dus byas dang 'dus ma byas pa'i chos thams cad sems tsam du zad par shes pas phyi rol gyi dngos po mi brtson par/ bdag gi sems kyis ci 'dod par bsgyur nus pa'i mthu dang ldan pa dag go zhes bstan pa'o/ /las dang nyon mongs pa dang lta ba'i sgrib pa thams cad las rnam par grol ba zhes bya ba ni las dang nyon mongs pa dang lta ba'i dbang gis khams gsum du mi skye ba zhes bya ba'i don to/ /bden pa rtogs par bstan pa la mkhas pa zhes bya bas ni rten cing 'brel par 'byung ba yan lag bcu gnyis gzhan gyis rtogs par bya ba'i phyir bstan pa la mkhas pa dag go zhes bstan pa'o/ /rten cing 'brel par 'byung ba'i tshul zad mi shes pa la zhugs pa zhes bya ba la rten cing 'brel par 'byung ba'i tshul ni skye ba dang 'gag pa med pa'i chos zab mo la bya'o/ /skye ba dang 'gag pa med pa nyid la zad mi shes pa zhes bya ba ste/ de la zhugs pa ni rtogs shing khong du chud pa la bya'o/ /lta ba dang / bag la nyal ba dang / kun nas ldang ba thams cad dang bral ba zhes bya ba la/ lta ba ni 'jig tshogs su lta ba dang / mthar 'dzin par lta ba dang / log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa'o/ /bag la nyal ba ni bdun te/ 'dod pa'i 'dod chags bag la nyal ba dang / khong khro ba bag la nyal ba dang / srid pa'i 'dod chags bag la nyal ba dang / nga rgyal bag la nyal ba dang / ma rig pa bag la nyal ba dang / lta ba bag la nyal ba dang / the tshom bag la nyal ba'o/ /kun nas ldang ba brgyad de/ rmugs pa kun nas ldang ba dang / gnyid kun nas ldang ba dang / rgod pa kun nas ldang ba dang / the tshom kun nas ldang ba dang / phrag dog kun nas ldang ba dang / ser sna kun nas ldang ba dang / khrel med pa kun nas ldang ba dang / ngo tsha mi shes pa kun nas ldang ba ste/ nyon mongs pa de dag dang bral ba zhes bya ba'i don to/ /kun tu sbyor ba thams cad spangs pa zhes bya ba la/ kun tu sbyor ba ni dgu ste/ chags pa kun du sbyor ba dang / khong khro ba kun du sbyor ba dang / nga rgyal kun du sbyor ba dang / ma rig pa kun du sbyor ba dang / lta ba kun du sbyor ba dang / mchog tu 'dzin pa kun du sbyor ba dang / the tshom kun du sbyor ba dang / phrag dog kun du sbyor ba dang / ser sna kun du sbyor ba ste/ nyon mongs pa 'di rnams sems can rnams 'gro ba rgyud lngar skye bar byed cing / kun tu sbyor ba'i phyir kun du sbyor ba zhes bya ste/ nyon mongs pa de rnams spangs pa la kun du sbyor ba thams cad spangs pa zhes bya'o/ /las dang nyon mongs pa thams cad rab tu zhi bar bya ba la mkhas pa zhes bya ba ni/ byang chub sems dpa' de dag thams cad la bdag dang sems can thams cad kyi las dang nyon mongs pa thams cad spang bar bya ba'i thabs la mkhas pa dag go zhes bstan pa'o/ /bden pa rab tu rtogs par bya ba'i ye shes la mkhas pa zhes bya ba ni 'phags pa'i bden pa bzhi dang / kun rdzob dang don dam pa'i bden pa rnams bdag dang gzhan gyis rtogs par bya ba'i thabs la mkhas pa zhes bya ba'i don to/ /chos thams cad sgra brnyan dang 'dra bar rtag tu rgyun mi 'chad par mos pa zhes bya bas ni lung gi chos gsung rab yan lag bcu gnyis la sogs pa sgra dang tshig gi rang bzhin du grag pa rnams la/ dngos por mi lta bar sgra brnyan dang 'dra bar rtogs pa dag go zhes bstan pa'o/ /chos kyi tshul bstan pa tshad med pa la 'jigs pa med pa zhes bya bas ni de ltar lung gi chos rnams la/ don dam par dngos por mi lta yang / kun rdzob tu sa dang pha rol tu phyin pa dang / byang chub kyi phyogs la sogs pa'i chos kyi tshul bstan pa rnam pa sna tshogs la mkhas pas/ 'khor gang dang gang du chos de dag rnam par phye zhing ston pa la 'jigs shing bag tsha ba med pa dag go zhes bstan pa'o/ /bdag nyid ji lta ba bzhin du khong du chud par bya ba la mkhas pa zhes bya bas ni ye shes kyi pha rol tu phyin pa yongs su rdzogs pa'i rgyus/ de bzhin gshegs pa rnams kyi ye shes kyi spyod yul la 'jug pa la mkhas pa'i yon tan bstan pa ste/ de bzhin gshegs pa'i ye shes kyi spyod yul yang rnam pa gnyis te/ don dam pa'i bdag nyid ji lta ba bzhin du thugs su chud pa dang / kun rdzob kyi chos rnams kyi bdag nyid ji lta ba bzhin du thugs su chud pa'o/ /de la don dam pa'i bdag nyid ji lta ba bzhin du thugs su chud pa ni don dam par chos thams cad de bzhin nyid tsam du zad de/ mtshan ma dang rtog pa thams cad kyi yul las 'das pa'o/ /kun rdzob tu bdag nyid ji lta ba bzhin du thugs su chud pa ni sems can yongs su smin par bya ba dang / sangs rgyas kyi zhing yongs su dag par bya ba la sogs pa sangs rgyas bcom ldan 'das rnams kyi spyod pa bla na med pa rnams te/ de bzhin gshegs pa'i ye shes kyi spyod yul de dag yang dag pa ji lta ba bzhin du rtogs par bya ba la mkhas pa zhes bya ba'i don to/ /sangs rgyas kyi zhing mtha' yas pa rnam par bkod pa'i smon lam gyis 'gro ba yongs su zin pa zhes bya bas ni smon lam gyi pha rol tu phyin pa yongs su rdzogs par bya ba'i rgyus sngon smon lam ji ltar btab pa de bzhin du grub pa'i yon tan bstan pa ste/ sngon byang chub sems dpa'i sa 'og ma la gnas pa'i tshe/ sangs rgyas kyi zhing bde ba can dang / pad+mo can la sogs pa'i rgyan dang bkod pa rnam pa sna tshogs mtha' yas pa rnams mthong zhing thos nas/ nam bdag mngon par sangs rgyas pa'i tshe sangs rgyas kyi zhing de lta bu'am/ de bas kyang lhag pa dang ldan par gyur cig ces smon lam btab pa dang / smon lam dang mthun par brtson 'grus brtsams shing byang chub sems dpa'i spyod pa yongs su rdzogs par byas pa'i mthus sa bcu la gnas pa'i tshe/ sangs rgyas kyi zhing yongs su dag pa de lta bu dang ldan par gyur pa las sangs rgyas kyi zhing du mtha' yas pa rnam par bkod pa'i smon lam gyis 'gro ba yongs su zin pa zhes bya'o/ /'jig rten gyi khams grangs med pa na bzhugs pa'i sangs rgyas rjes su dran pa'i ting nge 'dzin rtag tu rgyun mi 'chad par mngon du gyur pa zhes bya bas ni bsam gtan gyi pha rol tu phyin pa yongs su rdzogs par byas pa'i 'bras bu dang ldan pa bstan pa ste/ byang chub sems dpa' de dag sngon sangs rgyas rjes su dran pa'i ting nge 'dzin bsgoms pa'i dbang gis sa bcu la gnas pa'i tshe yang 'jig rten gyi khams tshad med grangs med pa dag na bzhugs pa'i sangs rgyas bcom ldan 'das de dag thams cad mngon du gyur cing / sangs rgyas de dag gi spyan snga na rtag tu gnas pa dag go zhes bya ba'i don to/ /sangs rgyas 'byung ba thams cad du nye bar 'gro ba la mkhas pa zhes bya bas ni 'jig rten gyi khams gang dang gang du sangs rgyas 'byung bar 'gyur ba de dag thams cad du song nas mchod cing bkur sti bya ba la mkhas pa dag go zhes bstan pa'o/ /sangs rgyas dpag tu med pa la gsol ba btab par mkhas pa zhes bya ba ni 'jig rten gyi khams tshad med grangs med pa dag na sangs rgyas bcom ldan 'das ji snyed bzhugs pa de dag thams cad kyi drung du song nas/ chos kyi 'khor lo bskor bar gsol ba btab pa dang / yongs su mya ngan las 'da' bar bzhed pa rnams yun ring du bzhugs par bya ba'i phyir gsol ba 'debs pa la mkhas pa zhes bya ba'i don to/ /sems can gyi lta ba sna tshogs kyis yongs su bskyed pa'i nyon mongs pa zhi bar bya ba la mkhas pa zhes bya bas ni thabs kyi pha rol tu phyin pa yongs su rdzogs par byas pa'i 'bras bu bstan pa ste/ sems can rnams kyi bsam pa dang / bag la nyal ba dang / spyod pa dang / mos pa dang / dbang po tha dad pa rnams gzigs nas/ de dag la ci rigs par chos bstan cing nan tan byed du bcug pas de dag gi lta ba sna tshogs las gyur pa'i nyon mongs pa rnams thabs mkhas pas zhi bar bya ba la mkhas pa dag go zhes bya ba'i don to/ /ting nge 'dzin brgya stong mngon par sgrub pa la rnam par rtse ba'i ye shes rtogs par bya ba la mkhas pa zhes bya bas ni mngon par shes pa'i rgyu ting nge 'dzin yongs su rdzogs par byas pa'i 'bras bu dang ldan par bstan pa ste/ sngon ting nge 'dzin rnam pa mang po bsgoms pa'i mthus rdzu 'phrul rnam pa sna tshogs kyis rol cing / sems can gyi don rnam pa sna tshogs mdzad pa la mkhas pa zhes bya ba'i don to/ /yon tan brjod pa bskal pa mtha' yas par mi zad pa dang ldan pa zhes bya bas ni sa bcu la gnas pa'i byang chub sems dpa' de dag gi yon tan re re nas brjod na bskal pa mtha' yas par brjod kyang mi rdzogs pa'i yon tan de lta bu dag dang ldan pa sha stag go zhes byang chub sems dpa' rnams kyi yon tan brjod pa mjug bsdus te bstan pa'o/ /'di ltar byang chub sems d pa' sems dpa' chen po bzang skyong dang zhes bya ba la sogs pas ni bcom ldan 'das 'khor byang chub sems dpa' bye ba khrag khrig brgya stong phrag du ma bzhugs pa thams cad kyi mtshan brjod kyis kyang mi lang bas de dag gi nang nas gtso bo nyung shas cig gi mtshan brjod de bstan pa'o/ /'phags pa nyan thos kyi dge 'dun rnams kyi mtshan ni ma brjod la/ 'khor byang chub sems dpa' rnams kyi mtshan ci'i phyir brjod ce na/ byang chub sems dpa' rnams ni mthu che ba dang / 'jig rten gyi khams thams cad du grags pa dang / byang chub sems dpa'i theg pa la gtogs pa'i phyir ming khyad par du brjod do/ /de ltar bcom ldan 'das kyi 'khor phun sum tshogs pa bstan pas mdo sde thams cad dang mthun pa'i gleng gzhi bstan nas/ shes rab kyi pha rol tu phyin pa 'di bshad pa'i gleng gzhi khyad par can bstan pa'i phyir/ de nas de'i tshe bcom ldan 'das nyid kyis gdan seng ge'i khri bshams nas sku drang por bsrang ste/ dgongs pa mngon du bzhag nas skyil mo krung bcas te bzhugs so zhes bya ba la sogs pa gsungs te/ de la bcom ldan 'das nyid kyis gdan seng ge'i khri bshams pa ni shes rab kyi pha rol tu phyin pa bshad pa 'di thun mong ma yin par bstan pa dang / dkon zhing rin che bas mchod cing bkur sti bya bar 'os pa yin par bstan pa dang / 'khor rnams gdul ba'i phyir te shes rab kyi pha rol tu phyin pa 'di bshad pa'i gdan yang bcom ldan 'das nyid kyis bshams pa dang sbyar na/ 'di bshad pa yang gzhan gyi spyod yul ma yin te thun mong ma yin par mngon no/ /de ltar bcom ldan 'das nyid kyis gdan bshams pa dang sbyar na/ chos bshad pa 'di dkon zhing rin che bas mchod cing bkur sti bya bar 'os pa yin par mngon no/ /de ltar bcom ldan 'das nyid kyis gdan bshams nas 'khor rnams 'di snyam du sems te/ bcom ldan 'das nyid kyang chos bshad pa 'di la de lta bu'i bkur sti dang / rim gro mdzad na bdag cag lta smos kyang ci dgos snyam nas chos bshad pa la rim gro cher byed du gzhug pa'i phyir bcom ldan 'das nyid kyis gdan bshams par rig par bya'o/ /sku drang por bsrang ba dang / skyil mo krung bcas par bstan pas ni gdul bya'i 'gro ba rnams sgom pa dang mthun pa'i lus rab tu sbyangs shing las su rung bar bya ba bstan pa'i phyir ro/ /dgongs pa mngon du gzhag pa bstan pas ni gdul bya'i 'gro ba rnams ting nge 'dzin bsgom pa la sogs pa la sems rtse gcig tu gnas shing las su rung bar bya ba'i phyir dran pa mngon du gzhag pa bstan pa'i phyir ro/ /chos bshad pa'i gleng gzhi 'di yang / cho 'phrul rnam pa gsum gyis bstan te/ ting nge 'dzin gyi cho 'phrul dang / byin gyi rlabs kyis cho 'phrul dang / chos snang ba'i cho 'phrul gyis bstan to/ /de la ting nge 'dzin gyi cho 'phrul ni ting nge 'dzin gnyis kyis bstan te/ ting nge 'dzin gyi rgyal po dang / seng ge rnam par rol pa'i ting nge 'dzin to/ /de la der zhugs nas ting nge 'dzin gang du ting nge 'dzin thams cad 'du ba dang / khong du chud pa dang / rjes su 'brang ba dang / 'du bar 'gyur ba'i ting nge 'dzin/ ting nge 'dzin gyi rgyal po zhes bya ba la mnyam par gzhag go zhes bya ba la sogs pas ni ting nge 'dzin gyi rgyal po'i cho 'phrul bstan te/ ting nge 'dzin gyi rgyal po zhes bya ba yang ting nge 'dzin 'di la mnyam par gzhag nas/ ting nge 'dzin thams cad kyi don 'grub cing / ting nge 'dzin thams cad kyi mthu dang / yon tan dang ldan pa rgyal po dang 'dra ba'i phyir ting nge 'dzin gyi rgyal po zhes bya'o/ /de bas na ting nge 'dzin der ting nge 'dzin thams cad 'du ba dang / khong du chud pa dang / rjes su 'brang ba dang / 'du bar 'gyur ba zhes gsungs te/ de la 'du ba dang khong du chud pa zhes bya bas ting nge 'dzin de dag thams cad rnam par mi rtog cing mi g.yo la/ sems rtse gcig tu gnas shing btang snyoms dang ldan pa'i rang bzhin du gcig ste tha mi dad pa bstan to/ /rjes su 'brang ba dang / 'du bar 'gyur ba zhes bya bas ni 'od zer 'gyed pa dang / sems can gyi don bya ba la sogs pa don du bsgrub pa rnams gcig par bstan to/ /ting nge 'dzin gyi rgyal po'i cho 'phrul de yang rnam pa bzhis bstan te/ yan lag dang nying lag las 'od zer 'gyed pa dang / spu'i khung bu nas 'od zer 'gyed pa dang / rang bzhin gyis 'od zer 'gyed pa dang / ljags kyi dbang po las 'od zer 'gyed pa'o/ /de la de nas bcom ldan 'das dgongs shing yang dag par mkhyen pas ting nge 'dzin de las bzhengs te/ 'phrul gyi spyan gyis sangs rgyas kyi zhing 'di la rnam par gzigs so/ /de ltar gzigs nas sku thams cad nas 'od rab tu bkye ste zhes bya ba nas/ sems can gang gis 'od de mthong ba dang / 'od des gang la reg par gyur pa de dag thams cad kyang bla na med pa yang dag par rdzogs pa'i byang chub tu nges par gyur to zhes bya ba'i bar gyis ni yan lag dang nying lag nas 'od zer 'gyed pa'i cho 'phrul bstan te/ de la de nas bcom ldan 'das dgongs shing yang dag par mkhyen pas zhes bya bas ni/ de ltar ting nge 'dzin la mnyam par gzhag pa las/ sngon gyi smon lam dgongs shing sems can gyi don bya ba'i dus la bab pa mkhyen pa bstan to/ /'phrul gyi spyan gyis sangs rgyas kyi zhing 'di la rnam par gzigs so zhes bya bas ni sangs rgyas kyi zhing 'di na 'khod pa'i sems can rnams skal ba dang ldan pa dang mi ldan pa brtag pa'i phyir gzigs pa bstan to/ /bcom ldan 'das la ni de ltar dgongs shing gzigs pa'i rtogs pa mi mnga' mod kyi gdul bya'i skye bo rnams kyis de ltar mthong ba dang / chos sdud pa'i byang chub sems dpa' rnams kyis 'jig rten gyi tha snyad du brjod du rung bar bya ba dang / ma 'ongs pa'i dus kyi skye bo rnams chos 'chad pa la nan tan bskyed pa'i tshul bstan pa'i phyir de lta bu bshad do/ /'od zer bye ba khrag khrig brgya stong drug cu drug cu byung ngo zhes bya ba la de bzhin gshegs pa'i 'od zer ni kha dog rnam pa drug yod de/ sngon po dang / ser po dang / dmar po dang / dkar po dang / le brgan dang / 'od gsal ba'o/ /'od zer kha dog drug po de dag phyogs bcur rnam par 'phros na drug cur 'gyur ro/ /bye ba khrag khrig brgya stong du gyur pa ni gdul bar bya ba'i sems can mang ba dang / don du bsgrub pa mang ba'i phyir 'od zer kha dog sna gcig las kyang de snyed du 'phros par rig par bya'o/ /drug cu drug cu zhes lan gnyis smos pa ni/ zhabs gnyis la sogs pa sku'i yan lag dang nying lag phal cher gnyis gnyis yod pa brtsan par byas nas lan gnyis su bzlas te gsungs par rig par bya'o/ /'od zer de dag kyang don rnam pa gnyis sgrub ste/ 'jig rten gyi khams rnams kun tu snang bar byed pa'i don sgrub pa dang / sems can rnams la phan 'dogs pa'i don sgrub pa'o/ /de la 'od zer bye ba khrag khrig brgya stong drug cu po de dag thams cad kyis stong gsum gyi stong chen po'i 'jig rten gyi khams 'di thams cad snang bar byas te zhes bya ba la sogs pas ni 'jig rten gyi khams rnams kun du snang bar bya ba'i don sgrub pa bstan to/ /sems can gang gis 'od de mthong ba dang / 'od des gang la reg par gyur pa de dag thams cad kyang bla na med pa yang dag par rdzogs pa'i byang chub tu nges par gyur to zhes bya bas ni sems can rnams la phan 'dogs pa'i don sgrub pa bstan to/ /de nas yang bcom ldan 'das kyis ba spu'i sgo thams cad nas 'od zer rab tu dgye ba mdzad de zhes bya ba la sogs pas ni/ spu'i khung bu nas 'od zer 'gyed pa'i cho 'phrul bstan te/ 'od zer de dag kyang don dam pa gnyis sgrub pa ni snga ma bzhin no/ /de nas yang bcom ldan 'das kyis de bzhin gshegs pa'i rang bzhin gyi 'od kyis zhes bya ba la sogs pas ni de bzhin gshegs pa'i rang bzhin gyi 'od zer 'gyed pa'i cho 'phrul bstan pa ste/ 'od zer de dag kyang don dam pa gnyis sgrub pa ni snga ma bzhin no/ /rang bzhin gyi 'od ces bya ba ni sku mdog bzang zhing 'od gsal ba 'phros pa la bya'o/ /de nas bcom ldan 'das kyis zhal gyi sgo nas ljags kyi dbang po bkram ste zhes bya ba la sogs pas ni ljags kyi dbang po las 'od zer 'gyed pa'i cho 'phrul bstan pa ste/ zhal gyi sgo nas ljags kyi dbang po bkram ste stong gsum gyi stong chen po'i 'jig rten gyi khams 'di thams cad ljags kyi dbang pos khyab par mdzad nas zhal 'dzum pa mdzad pas ni/ bcom ldan 'das chos 'chad pa'i snga ltas bstan to/ /ljags kyi 'od zer de dag thams cad las pad+ma rnams byung ba bstan pas ni/ chos 'di nyan pa'i byang chub sems dpa' rnams pad+ma cis kyang ma gos pa ltar/ byang chub sems dpa'i skyon med pa la nges par 'jug par gyur pa'i mtshan ma bstan to/ /pad+ma de dag la de bzhin gshegs pa'i sku mang po bzhugs shing pha rol tu phyin pa drug dang ldan pa'i chos 'di nyid ston pa bstan pas ni/ byang chub sems dpa' chos 'di nyan nyan pa de dag pad+ma kha phye zhing rgyas pa bzhin du blo rgyas te/ bla na med pa yang dag par rdzogs pa'i byang chub tu sangs rgyas nas/ phyogs phyogs su pha rol tu phyin pa drug dang ldan pa'i chos 'di nyid 'chad par 'gyur ba'i snga ltas bstan to/ /de nas bcom ldan 'das kyis gdan seng ge'i khri de la bzhugs bzhin du sangs rgyas kyi ting nge 'dzin seng ge rnam par rol pa zhes bya ba la mnyam par gzhag ste zhes bya ba la sogs pas ni seng ge rnam par rol pa zhes bya ba'i ting nge 'dzin gyi cho 'phrul bstan te/ cho 'phrul 'di yang snod kyi 'jig rten bzang zhing bde bar byi dor bya ba dang / sems can gyi 'jig rten la phan gdags pa dang rnam pa gnyis su bstan te/ de la snod kyi 'jig rten bzang zhing bde bar byi dor bya ba'i cho 'phrul ni/ stong gsum gyi stong chen po'i 'jig rten gyi khams 'di rnam pa drug tu g.yos te zhes bya ba nas sems can thams cad la phan pa dang bde ba skyed par gyur to zhes bya ba'i bar gyis bstan te/ rnam pa drug tu g.yos pa ni g.yos pa dang / 'gul ba dang / ldeg pa dang / chem chem zer ba dang / 'ur 'ur zhes zer ba dang / shig shig ces zer ba rnams te/ re re la yang drag dal rnam pa gsum gsum ste/ dang po dal bus g.yos pa la g.yos pa zhes bya'o/ / de'i 'og tu 'bring du g.yos pa la rab tu g.yos pa zhes bya'o/ /de'i 'og tu de bas kyang drag tu g.yos pa la kun du g.yos pa zhes bya ste/ lhag ma rnams la yang de bzhin du sbyar ro/ /mtha' mtho na ni dbus dma'/ dbus mtho na ni mtha' dma' zhes bya ba ni de ltar rnam pa drug tu g.yos pa nyid kyi tshe/ mtha' dang dbus mthon dman du gyur pa la bya bas rnam pa drug tu g.yos pa'i nang du gtogs te logs shig tu mi bgrang ngo / /dal bus bags kyis nyams su bde ba dang / sems can thams cad la phan pa dang bde ba skyed par gyur to zhes bya bas ni de ltar rnam pa drug tu g.yos pa'i tshe yang / sems can rnams sngang zhing skrag pa la sogs par mi 'gyur bar ri dang sa gzhi dang rtsi shing la sogs pa yang la 'jam zhing snum pa dang nyams dga' bar gyur to zhes bstan to/ /de nas de'i tshe skad cig yud tsam thang cig la stong gsum gyi stong chen po'i 'jig rten gyi khams 'di na/ sems can dmyal ba dang / byol song gi skye gnas dang / gshin rje'i 'jig rten dang / mi khom pa dang / ngan song dang / ngan 'gro dang / log par ltung ba gang ji snyed yod pa de dag thams cad rgyun chad par gyur te zhes bya ba la sogs pas ni sems can gyi 'jig rten la phan gdags pa'i cho 'phrul bstan te/ sems can gyi 'jig rten la phan gdags pa'i cho 'phrul de yang stong gsum gyi stong chen po'i 'jig rten gyi khams 'di'i sems can ngan song rgyud gsum la sogs pa na gnas pa dang / phyogs bcu 'jig rten gyi khams gang+gA'i klung gi bye ma snyed kyi sems can rnams ngan song rgyud gsum la sogs pa na gnas pa ngan song gi sdug bsngal nas thar cing mtho ris kyi bde ba myong bar gyur pa dang / stong gsum gyi stong chen po'i 'jig rten gyi khams 'di na sems can dmus long dang / 'on pa la sogs pa'i mi bde ba dang bcas pa rnams kyang mi bde ba de dag las thar ba dang / lus dang ngag dang yid kyi las dang / 'tsho ba mi dge ba rnams kyang dge bar gyur pa dang / sems can thams cad kyang gcig la gcig pha ma dang / phu nu la sogs pa dang 'dra bar sems mnyam par gyur pa dang / dge ba bcu'i las kyi lam dang ldan zhing tshangs par spyod pa dang / gtsang sbra che ba dang / nyes pa'i skyon med pa dang / mi dge ba'i rtog pa thams cad dang bral ba dang / sbyin pa la sogs pa'i dge ba'i shes rab dang ldan par gyur pa ste/ de la mi khom pa zhes bya ba ni dam pa'i chos mngon par rtogs shing 'phags pa'i sa thob par bya ba'i skabs dang skal ba med pa la bya'o/ /mi khom pa de yang rnam pa brgyad de/ brgyad gang zhe na/ sems can dmyal bar skyes pa dang / dud 'gro'i skye gnas su skyes pa dang / yi dags su skyes pa dang / mtha' 'khob kyi kla klor skyes pa dang / gzugs med pa dang / 'du shes med pa'i srid par skyes pa dang / dmus long dang / 'on pa dang / lkugs pa la sogs par gyur pa dang / log par lta bar gyur pa dang / sangs rgyas med pa'i bskal pa la skyes pa rnams so/ /de'i tshe bcom ldan 'das gdan seng ge'i khri de nyid la bzhugs pas 'di lta ste/ dper na nyi ma bsgribs pa med pa nam mkha'i dbyings yongs su dag pa la 'dug pa'am zla ba nya ba'i dkyil 'khor ltar zhes bya ba nas de bzhin du bcom ldan 'das phyogs bcu'i 'jig rten lha dang bcas pa/ dbang po dang bcas pa/ tshangs pa dang bcas pa/ gtsang ma'i gnas dang bcas pa zil gyis gnon par bzhugs shing / 'od dang sku mdog dang / gzi brjid dang dpal gyis mdzes shing lham me lhan ne lhang nge'o zhes bya ba'i bar gyis ni bcom ldan 'das kyi gzi brjid chen po'i yon tan bstan pa ste/ nyi ma dang zla bas skar ma la sogs pa'i 'od can thams cad zil gyis mnan pa dang / ri'i rgyal po ri rab kyis ri gzhan rnams zil gyis mnan pa bzhin du/ bcom ldan 'das kyis kyang 'jig rten lha dang bcas pa rnams zil gyis mnan te bzhugs so zhes bstan te/ 'od kyis ni tshangs pa'i 'od bsnyems pa rnams zil gyis mnan no/ /sku mdog gis ni brgya byin la sogs pa'i lha mdog bzang po bsnyems pa rnams zil gyis mnan to/ /gzi brjid kyis ni bdud dang mu stegs can rnams zil gyis mnan to/ /dpal gyis ni mi rnams zil gyis mnan te bzhugs so/ /'od dang ldan pas ni mdzes so/ /sku mdog dang ldan pas ni lham me'o/ /gzi brjid dang ldan pas ni lhan ne'o/ /dpal dang ldan pas ni lhang nger bzhugs so zhes bya bar sbyar ro/ /de nas bcom ldan 'das kyis stong gsum gyi stong chen po'i 'jig rten gyi khams 'dir bcom ldan 'das kyi rang bzhin gyi sku ci 'dra ba de bzhin du bstan to zhes bya ba nas/ stong gsum gyi stong chen po'i 'jig rten gyi khams kyi mi thams cad dang / lha thams cad kyis de bzhin gshegs pa'i sku blta bas chog mi shes pa mthong nas 'di snyam du sems par gyur te/ de bzhin gshegs pa bdag cag gi mdun na bzhugs shing chos bstan to snyam mo zhes bya ba'i bar gyis ni byin gyi rlabs kyi cho 'phrul bstan te/ byin gyi rlabs kyi cho 'phrul zhes bya ba yang bcom ldan 'das kyi byin gyi rlabs kyis stong gsum gyi stong chen po'i 'jig rten gyi khams kyi lha dang mi rnams de bzhin gshegs pa mthong nas dad pa skyes te/ mchod pa sna tshogs byed pa dang / mchod pa byas pa'i me tog la sogs pa de dag kyang de ma thag tu bcom ldan 'das kyi dbu'i steng gi nam mkha' la me tog la sogs pa'i khang pa brtsegs pa/ stong gsum gyi stong chen po'i 'jig rten gyi khams tsam du gnas par gyur pa dang / khang pa brtsegs pa de las kyang me tog dang dar gyi lda ldi mang po 'phyang bar gyur pa dang / me tog dang dar gyi lda ldi de dag dang / bcom ldan 'das kyi 'od snang ba gser gyi kha dog lta bu des kyang / stong gsum gyi stong chen po'i 'jig rten gyi khams 'di dang phyogs bcu'i 'jig rten gyi khams gang+gA'i klung gi bye ma snyed shin tu mdzes par khyab cing gsal bar gyur pa dang / de bzhin gshegs pa'i rang bzhin gyi sku gcig pu bstan kyang / gling bzhi'i mi rnams dang / rgyal chen bzhi'i ris kyi lha la sogs pa 'dod pa'i khams dang / gzugs kyi khams kyi lha rnams dang / stong gcig dang / stong gnyis dang / stong gsum gyi stong chen po'i 'jig rten gyi khams kyi mi thams cad dang / lha thams cad kyis de bzhin gshegs pa'i sku blta bas chog mi shes pa mthong nas thams cad kyang de bzhin gshegs pa bdag cag gi mdun na bzhugs shing chos ston to snyam du sems par byin gyis brlabs pa la byin gyi rlabs kyi cho 'phrul zhes bya'o/ /de bzhin gshegs pa'i sku blta bas chog mi shes pa zhes bya ba ni de bzhin gshegs pa'i rang bzhin gyi sku de mdog bzang zhing gzi brjid che la 'od gsal ba/ mthong na skyo mi shes shing phyi phyir je bzang je bzang snang ba la bya'o/ /de nas yang bcom ldan 'das kyis gdan seng ge'i khri la bzhugs bzhin du 'od rab tu dgye ba mdzad de zhes bya ba la sogs pas ni chos snang ba'i cho 'phrul bstan te/ chos snang ba'i cho 'phrul de yang rnam pa gnyis te/ 'jig rten gyi khams snang bar byed pa'i cho 'phrul dang / 'khor sdud pa'i cho 'phrul lo/ /de la yang 'od des stong gsum gyi stong chen po'i 'jig rten gyi khams 'di rab tu snang bar gyur to zhes bya ba nas/ steng gi phyogs kyi 'jig rten gyi khams gang+gA'i klung gi bye ma snyed po de dag na sems can gang ji snyed 'khod pa de dag gis kyang stong gsum gyi stong chen po'i 'jig rten gyi khams 'di na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa de dge slong gi dge 'dun dang bcas pa/ byang chub sems dpa'i 'khor dang thabs cig tu bzhugs pa mthong bar gyur to zhes bya ba'i bar gyis ni 'jig rten gyi khams snang bar byed pa'i cho 'phrul bstan pa ste/ bcom ldan 'das kyis 'od rab tu bkye ba mdzad pas stong gsum gyi stong chen po'i 'jig rten gyi khams 'di dang / phyogs bcu'i 'jig rten gyi khams gang+gA'i klung gi bye ma snyed rab tu snang bar gyur te/ snang ba des 'jig rten gyi khams de dag na gnas pa'i sems can rnams kyis stong gsum gyi stong chen po'i 'jig rten gyi khams 'di dang / phyogs bcu'i 'jig rten gyi khams gang+gA'i klung gi bye ma snyed dag na bzhugs pa'i sangs rgyas bcom ldan 'das rnams mthong bas dga' ba dang dad pa skyes te/ mi mjed kyi 'jig rten gyi khams 'di na bcom ldan 'das shAkya thub pa bzhugs pa la mchod cing phyag 'tshal du 'ong 'dod par gyur to/ /de nas shar phyogs logs su 'jig rten gyi khams gang+gA'i klung gi bye ma snyed 'das pa kun gyi pha rol na 'jig rten gyi khams rin chen yod pa zhes bya ba yod de zhes bya ba la sogs pas ni 'khor sdud pa'i cho 'phrul bstan te/ gong du smos pa'i rim pas sa g.yos pa dang 'od snang ba chen po 'byung ba dang / 'od des mi mjed kyi 'jig rten gyi khams 'di na/ bcom ldan 'das shAkya thub pa bzhugs pa'i sku blta na chog mi shes pa de phyogs bcu'i 'jig rten gyi khams na bzhugs pa'i byang chub sems dpa' rnams kyis gzigs nas/ bcom ldan 'das shAkya thub pa la phyag bya ba dang / bsnyen bkur bya ba'i phyir mi mjed kyi 'jig rten gyi khams 'dir 'dus shing gshegs par bya ba'i phyir/ 'od rab tu dgye bar mdzad pa nyid la 'khor sdud pa'i cho 'phrul zhes bya'o/ /'jig rten gyi khams gzhan na bzhugs pa'i byang chub sems dpa' de dag 'od zer gyis bskul te/ mi mjed kyi 'jig rten gyi khams 'dir gshegs pa yang / bcom ldan 'das shAkya thub pa sngon byang chub sems dpa' mdzad pa'i tshe/ byang chub sems dpa' de dag dang smon lam gcig tu btab cing / byang chub sems dpa'i spyod pa mthun par spyod spyod pa'i rgyus bcom ldan 'das shAkya thub pas gdul zhing dge ba'i bshes gnyen mdzad par gyur pa'i phyir/ byang chub sems dpa' de dag bcom ldan 'das shAkya thub pa'i spyan sngar gshegs par gyur to/ /shar phyogs logs su 'jig rten gyi khams gang+gA'i klung gi bye ma snyed 'das pa kun gyi pha rol na zhes bya ba la ni 'jig rten gyi khams mtha' yas pa'i phyir pha rol gyi mtha' bltar med mod kyi/ 'jig rten gyi khams gang tshun chad kyi byang chub sems dpa' 'dir gshegs pa rnams kyi mtha' ma la kun gyi pha rol zhes bya'o/ /kun gyi pha rol zhes smos pas de tshun chad kyi 'jig rten gyi khams na bzhugs pa'i byang chub sems dpa' thams cad gshegs par blta'o/ /bzhugs shing 'tsho skyong zhes bya ba la yongs su mya ngan las ma 'das shing srog gi dbang po'i rgyun la bzhugs pa'i phyir bzhugs zhes bya'o/ /sku la snyun mi mnga' ba'i phyir 'tsho zhes bya'o/ /glo bur gyi snyun mi mnga' bas sku tshe'i mnga' thang bzhin du tshe'i bar chad mi 'byung ba'i phyir skyong zhes bya'o/ /yang rnam pa gcig tu na chos kyi sku ni gnas pa'i rang bzhin pas chos kyi sku'i rang bzhin du bzhugs pa la bzhugs zhes bya'o/ /longs spyod rdzogs pa'i sku ni byang chub sems dpa' yongs su dag pa rnams la/ chos dang zang zing gi longs spyod kyis 'tsho ba'i phyir longs spyod rdzogs pa'i sku'i tshul du bzhugs pa la 'tsho zhes bya'o/ /sprul pa'i sku ni sems can yongs su ma dag pa rnams skyong ba'i phyir sprul pa'i sku'i tshul du bzhugs pa la skyong zhes bya'o/ /byang chub sems dpa' sems dpa' chen po de dag kyang phal cher gzhon nur gyur pa zhes bya ba la bcom ldan 'das shAkya thub pa'i zham 'bring na bzhugs pa'i byang chub sems dpa' de dag las kha cig ni rang bzhin gyis 'dod chags chung bas sems dang po bskyed pa nas tshangs par spyod pa la gnas shing sa bcu yongs su rdzogs par gyur pa dang / kha cig ni byang chub sems dpa'i sa brgyad pa yan chad la gnas pa thob pas rtsol ba dang / rnam par rtog pa thams cad dang bral te/ sangs rgyas bcom ldan 'das chos kyi rgyal po'i rgyal tshab tu dbang bskur bar 'os pa'i phyir rgyal po'i sras gzhon nu rgyal tshab tu dbang bskur bar 'os pa dang 'dra bar chos kyi rgyal tshab kyi sa la gnas pa'i phyir gzhon nur gyur pa zhes bya'o/ /pad+mo rin po che sna tshogs kyi rgyu las byung ba gser gyi kha dog can rnams bskur ba dang / snyun gsol spring ba ni ma 'ongs pa'i dus kyi sems can rnams nga rgyal dang phrag dog med pa'i phyir te/ sangs rgyas bcom ldan 'das rnams kyang gcig la gcig 'di ltar sri zhu dang / gus pa mdzad na bdag cag gis de ltar bya ba lta smos kyang ci dgos snyam du sems shing dad pa bskyed pa'i phyir ro/ /yang rnam pa gcig tu na bcom ldan 'das shAkya thub pa'i 'khor thams cad kyis 'jig rten gyi khams gzhan yang sangs rgyas bcom ldan 'das rnams bzhugs par yid ches par bya ba'i phyir ro/ /rigs kyi bu sangs rgyas kyi zhing der bag yod par spyod cig ces bya ba ni mi mjed kyi 'jig rten gyi khams 'di snyigs ma lnga dang ldan pa'i phyir/ bag yod par spyod cig ces gdams shing rjes su bstan pa mdzad do/ /de la snyigs ma lnga ni nyon mongs pa'i snyigs ma dang / dus kyi snyigs ma dang / che'i snyigs ma dang / lta ba'i snyigs ma dang / sems can gyi snyigs ma'o/ /de la nyon mongs pa'i snyigs ma ni/ mi mjed kyi 'jig rten gyi khams 'di na 'dod chags dang / zhe sdang dang / gti mug la sogs pa'i nyon mongs pa rnams shas che bas mi dge ba bcu'i las la sogs pa sdig pa'i chos mang du spyod pa dang / de'i rgyus sems can dmyal ba dang / dud 'gro dang / yi dags kyi nang du skye bar 'gyur ba mang ba dang / mir skyes na yang sdug bsngal mang po dang ldan pa mang du snang ste/ de dag ni nyon mongs pa'i snyigs ma las gyur to/ /dus kyi snyigs ma ni mi mjed kyi 'jig rten gyi khams 'dir bar bar du mu ge'i sdug bsngal mi bzod pa rnams 'byung / bar bar du ni nad kyi sdug bsngal brnag mi bzod pa rnams 'byung / bar bar du ni sems can rnams gcig la gcig 'tshe zhing gnod pa byed pa'i dbang gis 'thab cing mtshon gyis 'debs pa mang du 'byung / bar bar du ni chu'i 'jigs pa 'byung / bar bar du ni me'i 'jigs pa 'byung / bar bar du ni rlung gi 'jigs pa 'byung ste/ de lta bu'i dus ngan pa mang du 'byung ba la dus kyi snyigs ma zhes bya'o/ /tshe'i snyigs ma ni mi mjed kyi 'jig rten gyi khams 'di'i sems can rnams kyi tshe la nges pa med de/ bar bar du ni tshe'i tshad dpag tu med/ bar bar du ni tshe lo bcu par 'gyur/ de la yang nges pa med de/ kha cig ni ma'i mngal nas tshe 'pho/ kha cig ni skyes ma thag tu tshe 'pho/ kha cig ni lang tsho'i dus la bab na tshe 'pho/ kha cig ni dar la bab na tshe 'pho/ kha cig ni rga nas tshe 'pho ste/ de ltar tshe la nges pa med pas de'i rgyus mya ngan dang smre sngags 'don pa dang / sdug bsngal ba dang / yid mi bde ba la sogs pa rnam pa mang po 'byung ste/ de ltar sems can rnams kyi tshe la nges pa med de/ tshe dus ngan pa'i phyir tshe'i snyigs ma zhes bya'o/ /lta ba'i snyigs ma ni log par lta ba la sogs pa mu stegs can gyi lta ba ngan pa dge ba thams cad rtsa ba nas 'byin pa rnams kyang mi mjed kyi 'jig rten gyi khams 'dir mang du 'byung ste/ lta ba de dag gis byang chub sems dpa'i skyon med pa la 'jug pa'i skal ba med par 'gyur ba'i phyir lta ba'i snyigs ma zhes bya'o/ /sems can gyi snyigs ma ni mi mjed kyi 'jig rten gyi khams 'di'i sems can rnams phal cher skur pa 'debs pa'i ngang tshul can ma dad pa/ mkhas pa dang mi mthun pa skyes bu dam pa rnams kyis shin tu smad pa/ dam pa'i chos kyi snod du ma gyur pa sems can gyi rgyud sa tsha sgo can lta bur gyur pas dge ba'i lo thog mi 'phel ba phal che ba'i phyir sems can gyi snyigs ma zhes bya ste/ mi mjed kyi 'jig rten gyi khams 'di snyigs ma de lnga dang ldan zhing skyon che ba'i phyir sangs rgyas kyi zhing yongs su dag pa gzhan nas 'dir 'dong ba'i byang chub sems dpa' rnams la sangs rgyas kyi zhing der bag yod par spyod cig ces sangs rgyas bcom ldan 'das de dag gis gdams shing rjes su bstan pa mdzad do/ /de ci'i phyir zhe na/ 'jig rten gyi khams der skyes pa'i byang chub sems dpa' sems dpa' chen po de dag ni mgu bar dka' ba yin gyis der nyams par gyur ta re zhes bya bas ni sangs rgyas kyi zhing 'dir bag yod par spyad par bya ba'i rgyu bstan te/ 'jig rten gyi khams de de ltar skyon che bar ma zad kyi/ der skyes pa'i byang chub sems dpa' yang sems can gdul dka' ba rnams 'dul 'dul bas thabs mkhas shing mkhyen pa rgya che ba'i phyir mgu dka' ba yin gyis/ byang chub sems dpa' de dag gis ma khrel bar gyis shig ces gdams shing rjes su bstan pa mdzad do/ /rim gror bya ba dang / bkur stir bya ba dang / phu dud du bya ba dang mchod par byed cing zhes bya ba ni lus dang ngag dang yid gsum gyi sgo nas gus shing bsti stang byed pa'i rnam grangs so/ /snyun mi mnga' 'am/ gnod pa ma mchis sam/ zo mdog bde'am/ sku nyams dang ldan nam/ bde ba dang dgyes par spyod dam zhes bya ba ni glo bur gyi snyun mi mnga' zhes bya'o/ /na bza' dang / bsod snyoms dang / gnas dang / snyun gyi rkyen sman rnams dang ldan pa la gnod pa ma mchis pa zhes bya'o/ /bgres pa la sogs pas sku zor lci bar ma gyur pa la zo mdog bde ba zhes bya'o/ /snyun mi mnga' ba dang gnod pa ma mchis pa dang zo mdog bde ba gsum char dang ldan pa'i 'bras bu ni sku nyams dang ldan zhing bde ba dang dgyes par spyod pa'o/ /shar phyogs kyi 'jig rten gyi khams kyi 'khor sdud pa'i cho 'phrul ji ltar bstan pa de bzhin du/ lho phyogs la sogs pa steng gi phyogs kyi 'jig rten gyi khams la thug gi bar du phyogs thams cad la yang de bzhin du sbyar bar bya'o/ /de nas de'i tshe skad cig yud tsam thang cig la stong gsum gyi stong chen po'i 'jig rten gyi khams 'di rin po che'i rang bzhin du kun nas gnas par gyur te zhes bya ba la sogs pas ni/ shes rab kyi pha rol tu phyin pa 'di bshad pa'i mthu dang / byin che ba bstan pa dang / phyogs bcu'i 'jig rten gyi khams nas gshegs pa'i byang chub sems dpa' la sogs pa dad pa dang / mos pa bskyed pa'i phyir bcom ldan 'das kyi byin gyi rlabs kyis mi mjed kyi 'jig rten gyi khams 'di rin po che'i rang bzhin du gnas par gyur cing / /rgyan sna tshogs kyis brgyan pa 'jig rten gyi khams pad+mo can zhes bya ba sangs rgyas kyi zhing yongs su dag pa dang 'dra bar gyur pa bstan to/ /shes rab kyi pha rol tu phyin pa 'bum pa rgya cher bshad pa las/ gleng gzhi'i le'u ste dang po'o// //de ltar gleng gzhi'i le'u bstan nas/ de'i 'og tu gzhung gi don nyid bstan pa'i phyir/ de'i tshe bcom ldan 'das kyis 'jig rten gyi lha dang bcas pa/ tshangs pa dang bcas pa/ dge sbyong dang bram ze'i skye dgu dang bcas pa/ lha dang mi dang lha ma yin dang bcas pa mang po tshogs pa dang / byang chub sems dpa' sems dpa' chen po phal cher gzhon nur gyur pa mang po de dag 'dus par thugs su chud pas/ bcom ldan 'das kyis tshe dang ldan pa sha ra dwa ti'i bu la bka' stsal pa zhes bya ba la sogs pa gsungs so/ /theg pa chen po'i mchog bstan pa 'di byang chub sems dpa' rnams la bka' stsal te/ skabs dbye ba'i rigs pa las shA ri'i bu la bka' stsal te/ skabs phye ba ni shes rab kyi pha rol tu phyin pa 'di theg pa gsum char gyi spyir thun mong du bstan pa yin te/ de ltar cis mngon zhe na/ shes rab kyi pha rol tu phyin pa 'di las thams cad shes pa nyid dang / lam gyi rnam pa shes pa nyid dang / rnam pa thams cad mkhyen pa nyid dang gsum char rgya cher bstan pa'i phyir te/ gal te byang chub sems dpa' 'ga' zhig la bka' stsal te/ skabs phye nas/ theg pa chung ngu pa dang / skye bo gzhan dag shes rab kyi pha rol tu phyin pa zab mo 'di bdag cag gi spyod yul ma yin no snyam nas 'bad cing rtsol bar mi byed kyang srid kyi/ shA ri'i bu la bka' stsal te skabs phye na/ theg pa chung ngu ba la sogs pa skye bo thams cad kyang shes rab kyi pha rol tu phyin pa 'di shA ri'i bu'i spyod yul du gyur pa dang sbyar na bdag cag thams cad kyi spyod yul du yang 'gyur ro snyam nas theg pa chung ngu pa la sogs pa skye bo thams cad kyang 'bad cing rtsol bar 'gyur bar bya ba'i phyir/ shA ri'i bu la bka' stsal te/ skabs phye'o/ /rnam pa gcig tu na de bzhin gshegs pas chos bstan pa 'di gsung gcig gis kyang skye bo thams cad kyi yid dang mthun par chos bstan pa sna tshogs so sor bstan pa khyab par 'byung ste/ skye bo de dag kyang so so nas de bzhin gshegs pa ni bdag cag gi mdun na bzhugs shing chos ston to snyam du sems pa dang sbyar na/ thams cad la bka' stsal te skabs phye mod kyi/ 'on kyang chos sdud par byed pa rnams kyis de snyed cig char la bsdur mi rung bas skye bo thams cad kyi spyod yul du 'gyur ba shA ri'i bu la bka' stsal te/ skabs phye ba gcig pu smos nas chos bsdu ba byas par rig par bya'o/ /shes rab kyi pha rol tu phyin pa 'di bshad pa ni/ bcom ldan 'das kyis sgo gsum gyis bstan te/ mgo smos pas go ba dang / rnam par spros nas go ba dang / drang dgos pa'i 'dul ba dang / 'dul ba rnam pa gsum las brtsams te/ mdor bstan pa'i sgo dang / 'bring du bstan pa'i sgo dang / rgyas par bstan pa'i sgo ste/ sgo gsum dang rnam grangs bcu gcig gis bshad de/ de la rnam grangs bcu gcig ni dang po shA ri'i bu la bka' stsal te bshad pa gcig dang / rab 'byor la bka' stsal te bshad pa lnga dang / brgya byin la bka' stsal te bshad pa gnyis dang / byams pa la bka' stsal te bshad pa gnyis dang / byang chub sems dpa' chos 'phags dang rtag tu ngu'i gtam glengs nas gnas brtan kun dga' bo la bka' stsal te yongs su gtad pa gcig dang 'di dag ni rnam grangs bcu gcig go/ /de la mgo smos pas go ba rnams kyi phyir mdor bshad pa gsungs pa/ shA ri'i bu 'di la byang chub sems dpa' sems dpa' chen po chos thams cad rnam pa thams cad du mngon par rdzogs par 'tshang rgya bar 'dod pas shes rab kyi pha rol tu phyin pa la brtson par bya'o zhes bya bas de la sha ra dwa ti'i bu zhes bya ba ni/ gnas brtan shA ri'i bu'i ma'i ming las dras te bos pa'o/ /'di la zhes bya ba ni theg pa chen po bstan pa 'di la'am/ shes rab kyi pha rol tu phyin pa bstan pa 'di la bya ste/ byang chub sems dpa' sems dpa' chen po theg pa chen po 'di la gnas te zhes bya ba'am/ shes rab kyi pha rol tu phyin pa 'di la gnas te zhes bya bar sbyar ro/ /byang chub sems dpa' zhes bya ba la/ byang chub sems dpa' ni rnam pa gnyis te/ kun rdzob kyi byang chub sems dpa' dang / don dam pa'i byang chub sems dpa'o/ /de la kun rdzob kyi byang chub sems dpa' ni yang dag par rdzogs pa'i byang chub dang sems can dmigs nas dang po byang chub tu sems bskyed pa ste/ e ma'o bdag bla na med pa yang dag par rdzogs pa'i byang chub mngon par rdzogs par sangs rgyas nas sems can thams cad shin tu mthar thug pa'i mya ngan las 'das pa la dgod par bya'o snyam du bsams te/ byang chub dang sems can la dmigs nas shes rab dang snying rje gnyis kyis kun rdzob dang don dam pa'i bden pa gnyis la gnas te/ byang chub kyi sems rin po che bskyed pa dang ldan pa ni kun rdzob kyi byang chub sems dpa' zhes bya'o/ /de la don dam pa'i byang chub sems dpa' zhes bya ba ni byang chub sems dpa'i sa rab tu dga' ba la sogs pa sa bcu'i sems bskyed pa dang ldan pa rnams ni don dam pa'i byang chub sems dpa' zhes bya'o/ /slob dpon gzhan dag 'chad pa ni sems can thams cad de bzhin gshegs pa'i snying po yin no zhes gzhung las 'byung bas sems can thams cad ni de bzhin nyid kyi rang bzhin can yin no/ /de bzhin nyid de la yang gnas skabs gsum yod de/ ma dag pa'i gnas skabs dang / dag pa dang ma dag pa'i gnas skabs dang / shin tu yongs su dag pa'i gnas skabs so/ /de la ma dag pa'i gnas skabs ni/ so so'i skye bo thams cad yin te/ de dag la byang chub kyi gnas skabs ni med kyi sems dpa'i gnas skabs 'ba' zhig tu zad pas de bzhin nyid de la sems dpa' zhes bya ba'i ming du brjod do/ /dag pa dang ma dag pa'i gnas skabs ni 'phags pa rnams yin te/ de dag la byang chub kyi gnas skabs dang / sems dpa'i gnas skabs gnyi ga yod pas/ dag pa dang ma dag pa'i de bzhin nyid de la byang chub sems dpa' zhes bya ba'i ming du brjod do/ /yongs su dag pa'i gnas skabs na ni byang chub kyi gnas skabs 'ba' zhig tu zad pas de bzhin nyid de la de bzhin gshegs pa zhes bya ba'i ming du brjod de/ ji skad du rab 'byor de bzhin gshegs pa zhes bya ba de ni yang dag pa de bzhin nyid kyi tshig bla dgas so zhes gsungs pa lta bu'o/ /sems dpa' chen po zhes bya ba ni chen po rnam pa bcu gcig dang ldan pa'i phyir sems dpa' chen po zhes bya ste/ bcu gcig gang zhe na/ 'bras bu dang mthun pa'i rigs dang / rigs dang mthun pa'i mos pa dang / mos pa dang mthun pa'i bsam pa dang / bsam pa dang mthun pa'i smon lam dang / smon lam dang mthun pa'i spyod pa dang / spyod pa dang mthun pa'i brtson 'grus dang / brtson 'grus dang mthun pa'i dus dang / dus dang mthun pa'i tshogs dang / tshogs dang mthun pa'i yang dag par 'grub pa dang / yang dag par 'grub pa dang mthun pa'i 'bras bu dang / 'bras bu dang mthun pa'i sems can gyi don dang / chen po rnam pa bcu gcig po 'di dag dang ldan pa'i phyir byang chub sems dpa' sems dpa' chen po zhes bya'o/ / chos thams cad ces bya ba 'dis ni ji snyed yod pa bstan to/ /rnam pa thams cad du zhes bya ba 'dis ni ji lta ba bzhin du yod pa bstan to/ /mngon par rdzogs par 'tshang rgya bar 'dod pa zhes bya bas ni mngon par rdzogs pa'i byang chub thob par bya bar sems pa bstan to/ / de la chos thams cad ces bya ba la/ chos ni rnam pa gnyis te/ kun brtags pa'i chos rnams dang / yongs su grub pa'i chos rnams so/ /de la kun brtags pa'i chos rnams ni/ khams gsum du gtogs pa dang / dus gsum du gtogs pa'o/ /yongs su grub pa'i chos rnams ni 'jig rten las 'das pa skye ba med pa dang / 'gag pa med pa dang / gzod ma nas zhi ba dang / rang bzhin gyis yongs su mya ngan las 'das pa dang / dngos po med pa'i ngo bo nyid dang / stong pa nyid la sogs pa'o/ /rnam pa thams cad du zhes bya ba la rnam pa gnyis te/ kun rdzob kyi rnam pa dang / don dam pa'i rnam pa'o/ /mngon par rdzogs par 'tshang rgya bar 'dod pa zhes bya ba la/ mngon par rdzogs par 'tshang rgya ba rnam pa gnyis te/ thams cad shes pa nyid kyi ye shes dang / rnam pa thams cad mkhyen pa nyid kyi ye shes so/ /de la thams cad shes pa nyid kyi ye shes kyis ni kun brtags pa'i chos rnams kun rdzob kyi rnam par mngon par rdzogs par 'tshang rgya'o/ /rnam pa thams cad mkhyen pa nyid kyi ye shes kyis ni yongs su grub pa'i chos rnams don dam pa'i rnam par mngon par rdzogs par 'tshang rgya ste/ de bas na rnam pa thams cad du mngon par rdzogs par 'tshang rgya bar 'dod pas zhes bya ba gsungs so/ /shes rab kyi pha rol tu phyin pa la zhes bya ba ni dngos su na 'jig rten las 'das pa'i ye shes rnam par mi rtog pa rdo rje lta bu'i ting nge 'dzin du gtogs pa de smon lam dang / brtson 'grus brtsams pa dang / nyon mongs pa dang / las dang / sdug bsngal dang / 'khor ba dang / rnam par rtog pa dang / yon tan dang / shes par bya ba dang / rnam pa 'di dgu'i mthar phyin pa'i phyir shes rab kyi pha rol tu phyin pa zhes bya'o/ /gzhan yang de'i rjes las thob pa rnam par rtog pa dang bcas pa dang / rnam par mi rtog pa'i ye shes me long lta bu dang / mnyam pa nyid dang / so sor rtog pa dang / bya ba grub pa'i ye shes rnams kyang de'i rgyu las byung ba'i phyir 'bras bu la rgyu btags te shes rab kyi pha rol tu phyin pa zhes bya bar rung ngo / /nyan thos dang rang sangs rgyas rnams kyi mthar phyin pa'i sar gtogs pa dgra bcom pa'i lam gyi ye shes kyang shes rab kyi pha rol tu phyin pa'i rgyu mthun pa yin pa'i phyir shes rab kyi pha rol tu phyin pa zhes bya bar 'gyur ro/ /byang chub sems dpa' rnams kyis mos pas spyod pa'i sa nas bzung ste/ sa chos kyi sprin gyi bar du mnyan pa dang / bsam pa dang / bsgom pa la sogs pa'i rim pas mngon par 'phel ba chos kyi dbyings dri ma med par byed pa thabs kyis zin pa/ de bzhin nyid la kun du 'gro ba'i don dang / mchog gi don la sogs par rtogs pa'i khyad par mngon sum du byed pas/ sa dang sa dag la gnas rnam par dag pa'i shas je che je cher gyur pas lhag par rtogs pa'i khyad par thob par byed pa'i ye shes dag kyang shes rab kyi pha rol tu phyin pa zhes bya ba'i ming du 'gyur ro/ /ming gi tshogs dang / tshig gi tshogs dang / yi ge'i tshogs yongs su 'gyur ba'i chos bstan pa gang yin pa de dag kyang shes rab de dag sgrub pa dang / rtogs pa dang / mthar phyin pa'i sa'i ting nge 'dzin la gnas pa'i dngos po ma lus pa'i khyad par rtogs par byed pa'i rgyu yin pa'i phyir shes rab kyi pha rol tu phyin pa zhes bya ba'i ming du brjod do/ /de ltar ci tsam du rnam pa 'di lta bu dag mngon par ston pa theg pa chen po'i tshul gang yin pa thams cad la yang shes rab kyi pha rol tu phyin pa zhes bya'o/ /de ltar shes rab kyi pha rol tu phyin pa zhes bya bar brjod pa 'di rnams las 'dir ni sangs rgyas kyi sar gtogs pa'i shes rab 'jig rten las 'das pa rnam par mi rtog pa la shes rab kyi pha rol tu phyin pa zhes bya'o/ / de bas na shes rab kyi pha rol tu phyin pa 'di la brtson par bya'o zhes bya ba ni rnam par rtog pa thams cad dang bral ba shin tu yongs su dag pa'i shes rab kyi pha rol tu phyin pa la brtson par bya'o zhes bya ba'i don to/ /kha cig na re 'di la shes rab kyi pha rol tu phyin pa zhes bya ba ni theg pa chen po la bya bas na nyan thos kyi theg pa dang rang sangs rgyas kyi theg pa spangs pa ste/ theg pa chen po la brtson par bya'o zhes bya ba'i tha tshig go zhes zer ro/ /kha cig na re de la gang gi tshe shes rab kyi pha rol tu phyin pa zhes bya ba rnam pa thams cad mkhyen pa nyid la bya bar gyur pa de'i tshe ni shes rab kyi pha rol tu phyin pa la brtson par bya'o zhes bya ba rnam pa thams cad mkhyen pa nyid kyi don du brtson par bya'o zhes bya ba'i tha tshig go/ /gang gi tshe rnam par mi rtog pa'i shes rab bam/ theg pa chen po la shes rab kyi pha rol tu phyin pa zhes bya bar gyur pa de'i tshe ni shes rab kyi pha rol tu phyin pa de la gnas te brtson par bya'o zhes bya bar rig par bya'o zhes zer ro/ /shes rab kyi pha rol tu phyin pa la brtson par bya'o zhes bya ba la brtson pa rnam pa gsum ste/ bslab pa la brtson pa dang / spyod pa la brtson pa dang / yang dag par sgrub pa la brtson pa'o/ /de la mnyan pa'o/ /bsam pa la sogs pa'i dus na ni bslab pa la brtson pa ste/ de yang shes rab kyi pha rol tu phyin pa la bslab par bya'o zhes bya ba 'og nas 'chad pa'o/ /sgrub pa'i dus na ni spyad pa la brtson par bya ba ste/ de yang shes rab kyi pha rol tu phyin pa la spyad par bya'o zhes bya ba 'og nas 'chad pa'o/ /rab tu rtogs pa'i dus na ni yang dag par 'grub pa la brtson pa ste/ de yang brtson par byed pa'o zhes bya'o/ /zhes 'og nas 'chad pa'o/ /brtson par bya'o zhes bya ba ni bya bar 'os pa ste bya ba'i rigs so zhes bya ba'i tha tshig go/ /de dag gis ni gang gis bya ba dang / gang la bya ba dang / gang bya ba rnam pa de gsum bstan pa yin te/ nyan thos dang / rang sangs rgyas kyi theg pa pa rnams la ni nges pa med pa'i phyir/ byang chub sems dpa' rnams nyid kyis bya'o/ /bsgrub par bya ba thams cad kyi rtsa ba de yin pa'i phyir shes rab kyi pha rol tu phyin pa nyid la bya'o/ /rgyun chad pa dang / gus pa dang / 'grub pa la sogs pas brtson par bya'o/ /'dir 'bras bu phun sum tshogs pa dang / rgyu phun sum tshogs pa dang / sbyor ba phun sum tshogs pa gsum bstan te/ chos thams cad rnam pa thams cad du mngon par rdzogs par 'tshang rgya ba zhes bya ba ni 'bras bu'o/ /shes rab kyi pha rol tu phyin pa zhes bya ba ni rgyu'o/ /brtson par bya'o zhes bya ba ni sbyor ba'o/ /rdo rje gcod pa las gnas par bya ba dang / bsgrub par bya ba dang / sems rab tu gzung bar bya ba ji skad du bshad pa de bzhin du/ 'dir yang chos thams cad rnam pa thams cad du mngon par rdzogs par 'tshang rgya bar 'dod pas zhes bya ba 'dis ni bsam pa phun sum tshogs par bstan pas gnas bstan pa yin no/ /brtson par bya'o zhes bya ba ni sgrub pa bstan pa yin no/ /shes rab kyi pha rol tu phyin pa la zhes bya bas ni rnam par mi rtog pa'i shes rab kyi pha rol tu phyin pa la brtson par bya ba'i phyir sems rab tu gzung bar bstan pa yin no/ /de ltar mgo smos pas go ba rnams kyi don du shes rab kyi pha rol tu phyin pa yongs su rdzogs par byas nas/ bcom ldan 'das cang mi gsung bar gyur pa dang / de'i 'og tu gnas brtan shA ri'i bus rnam par spros na go ba rnams kyi don du 'bring du bshad pa'i skabs dbye ba'i phyir/ bcom ldan 'das byang chub sems dpa' sems dpa' chen pos chos thams cad rnam pa thams cad du mngon par rdzogs par 'tshang rgya bar 'tshal bas/ ji ltar shes rab kyi pha rol tu phyin pa la brtson par bgyi zhes bya ba'i zhu ba brtsams so/ /des ni mdor bstan pa'i chos rnam pa bzhi zhus pa yin te/ ji ltar byang chub sems dpa' sems dpa' chen po zhes bya ba dang / ji ltar chos thams cad rnam pa thams cad du mngon par rdzogs par 'tshang rgya bar 'tshal zhes bya ba dang / ji ltar shes rab kyi pha rol tu phyin pa zhes bya ba dang / ji ltar brtson par bgyi zhes bya ba rnams te/ de bzhi yang 'og nas skabs ji lta ba bzhin du ston to/ /de la shar dwa ti'i bu 'di la byang chub sems dpa' sems dpa' chen pos gnas pa med pa'i tshul du shes rab kyi pha rol tu phyin pa la gnas te sbyin pa dang / gtong ba dang / yongs su len pa mi dmigs pa'i phyir yongs su gtang ba med pa'i tshul gyis sbyin pa'i pha rol tu phyin pa yongs su rdzogs par bya'o zhes bya ba la sogs pas mdor bshad pa'i sgo nas chos thams cad bsdus te bstan nas/ spyod pa rnam pa bzhi bstan te/ spyod pa rnam pa bzhi yang rnam par mi rtog pa'i pha rol tu phyin pa'i spyod pa dang / nyon mongs pa med pa'i byang chub kyi phyogs kyi spyod pa dang / bar du gcod pa med par sems can yongs su smin par bya ba'i spyod pa dang / gos pa med par sangs rgyas kyi chos thams cad yongs su smin par byed pa'o/ /de la thabs mkhas pas ni pha rol tu phyin pa'i spyod pa 'grub bo/ /yongs su 'dris pa'i shes pas ni byang chub kyi phyogs kyi spyod pa 'grub bo/ /snying rjes ni sems can yongs su smin par byed pa'i spyod pa 'grub bo/ /shes rab kyis ni sangs rgyas kyi chos yongs su smin par byed pa'i spyod pa 'grub bo/ /de la rnam par mi rtog pa'i pha rol tu phyin pa'i spyod pa ni/ gnas pa med pa'i tshul du shes rab kyi pha rol tu phyin pa la gnas te zhes bya ba la sogs pas ston to/ /pha rol tu phyin pa'i spyod pa de yang gnas pa dang / sgrub pa dang / 'khor gsum yongs su dag pa dang / rnam pa gsum gyis bstan te/ rdo rje gcod pa las gnas par bya ba dang / bsgrub par bya ba dang / sems rab tu gzung bar bya ba bstan pa lta bu'o/ /de la gnas pa med pa'i tshul du/ shes rab kyi pha rol tu phyin pa la gnas te zhes bya ba ni/ de las gzhan pa'i 'bras bu'i khyad par 'dod pa yongs su btang ste/ snying rje'i dbang gis sems can thams cad la phan pa dang / bde ba bsgrub par bya ba'i bsam pa dang / shes rab kyi dbang gis khams gsum pa'am chos thams cad kyang rung ste/ gang la yang mi gnas pa ni 'dir shes rab kyi pha rol tu phyin pa la gnas pa zhes bya'o/ /thams cad la mi gnas pa gang yin pa de nyid shes rab kyi pha rol tu phyin pa la gnas pa yin no zhes dgongs pa'o/ /'dir yang shes rab kyi pha rol tu phyin pa zhes bya ba ni rnam pa thams cad mkhyen pa nyid dam/ rnam par mi rtog pa'i shes rab bam/ theg pa chen po yin par bstan to/ /byang chub kyi lam dang mthun par spyod pa ni sgrub pa ste/ de bas na sbyin pa'i pha rol tu phyin pa yongs su rdzogs par bya'o zhes gsungs so/ /don dam par chos thams cad la yongs su mi rtog pa ni 'khor gsum yongs su dag pa yin te/ de bas na sbyin par bya ba dang / gtong ba po dang / len pa mi dmigs pa'i phyir yongs su gtong ba med pa'i tshul gyis zhes bya ba gsungs so/ /byang chub sems dpa' ni snying rjes bskyod pas sems can thams cad la ci 'dod pa de thams cad sbyin par byed kyang / de'i tshe ni de sbyin pa zhes brjod par zad kyi sbyin pa'i pha rol tu phyin pa ma yin no/ /gang gi tshe sbyin pa byed pa'am/ sbyin pa byin pa'i 'og tu yongs su brtag pa bzhis yongs su brtags shing / yang dag pa ji lta ba bzhin yongs su shes par byed pa bzhis yongs su shes par byas nas/ shes rab kyis yongs su dag par byed pa de'i tshe na de legs par sbyangs pas pha rol tu phyin pa zhes bya bar 'gyur ro/ /byang chub sems dpa' ni dang por snying rjes las thams cad byas nas phyis shes rab kyis yongs su sbyong ngo / /de bas na snying rjes ni sgrub par byed do/ /shes rab kyis ni dag par byed do/ /snying rjes ni bsam pa dag par byed do/ /shes rab kyis ni sbyor ba dag par byed do/ /snying rjes ni kun rdzob la gnas te sgrub par byed do/ /shes rab kyis ni don dam pa la gnas te sbyong bar byed do/ /snying rjes ni las thams cad sems can gyi don du byas pa'i phyir bsod nams kyi tshogs su bgrang ngo / /shes rab kyis ni byang chub kyi don gyi phyir byas pas ye shes kyi tshogs su bgrang ngo / /de bas na yongs su gtong ba med pa'i tshul gyis sbyin pa'i pha rol tu phyin pa yongs su rdzogs par bya'o zhes gsungs so/ /'di la byang chub sems dpa' rnams sa dang po la de bzhin nyid rtogs pa nas bzung ste/ sbyor ba thams cad don dam par brtags nas/ de bzhin nyid du mngon sum du mthong bas/ de bzhin du gnas par 'gyur gyi gzhan du ni ma yin no/ /de bzhin nyid de yang sbyin pa byed pa'i tshe ni sus kyang sbyin pa'am/ blang bar mi nus te/ de bas na don dam par yongs su gtong ba zhes bya ba gang yang med do/ /bza' ba dang / btung ba dang / mal cha la sogs pa yongs su gtong ba gang yin pa de dag ni kun brtags pa'i chos la gnas pa'i phyir rmi lam gyi tshe dang sgyu ma bzhin te/ yang dag pa ni ma yin no/ /de ltar don dam par yongs su gtong ba'i mtshan nyid dang bral ba nyid la yongs su gtong ba med pa'i tshul zhes bya'o/ /yongs su gtong ba med pa'i rigs pa des dngos po la sbyin par bya ba dang / bdag la gtong ba po dang / slong ba la len par byed pa dang gsum mi dmigs te/ mi dmigs pa'i ngo bo nyid dang bral ba'i phyir/ sbyin pa'i pha rol tu phyin pa yongs su rdzogs par bya'o/ /dang por rgyu ni snying rje'i stobs kyi kun rdzob kyi tshul la gnas te/ 'jig rten pa'i spyod pa'i dbang gis sbyin pa byed do/ /de nas shes rab kyi dbang gis don dam pa'i tshul la gnas te/ 'jig rten las 'das pa'i spyod pa'i dbang gis thams cad kyang shes rab kyis yongs su brtags na dmigs su med par gyur pa de'i tshe/ sbyin pa'i pha rol tu phyin pa yongs su rdzogs pa zhes bya bar 'gyur ro/ /de bas na dang po sems bskyed pa'i dmigs par gyur pa sems can dang / byang chub gnyis yongs su ma btang bar gyur te/ de'i phyir byang chub sems dpa' zhes bya ba'i ming de yang don dang ldan par 'gyur ro/ /de lta na sbyin par bya ba dang / gtong ba po dang / len pa po rnams mi dmigs pa dang / sbyin pa dag shin tu 'gal ba yin na/ ji ltar mi 'gal ba bzhin du byed par 'gyur zhe na/ thabs mkhas pa ni pha rol tu phyin pa'i mthus rung bar 'gyur te/ thabs mkhas pa'i pha rol tu phyin pa ni kun rdzob 'dzin pa'i snying rje dang / don dam pa mi 'dzin pa'i shes rab gnyis kyis skam la rgyu ba dang / chu la rgyu ba'i srog chags kyi sbyor ba bzhin du shin tu 'gal ba yin du zin yang / sbyor ba'i rnam pas 'gal ba med par grogs byas nas cig car sgrub cing byang chub kyi bar du spyod de/ bsod nams kyi tshogs dang ye shes kyi tshogs thams cad bsgrubs na/ byang chub sems dpa' rnams la phan 'dogs pa'i mchog tu 'gyur te/ 'og nas kyang skabs ji lta ba de dang de dag tu de'i bshad pa 'byung ngo / /ltung ba mi 'byung ba dang lhag par ltung ba mi 'byung ba'i phyir tshul khrims kyi pha rol tu phyin pa yongs su rdzogs par bya'o zhes bya ba la/ byang chub sems dpa' ni khyim pa'i byang chub sems dpa' sdom pa'i bslab pa dang / rab tu byung ba'i sdom pa'i bslab pa gnyis yang dag par blangs te gnas pa na ltung ba byung na yang dus las yol bar lhag par ltung ba mi 'byung gi myur zhing myur du mthol bar byed de/ de bas na ltung ba mi 'byung ba dang / lhag par ltung ba mi 'byung ba'i phyir zhes bya ba gsungs so/ /'dir yang shes rab kyi pha rol tu phyin pa la gnas te zhes bya bar snyegs te/ bdag ni tshul khrims dang ldan pa'o/ /bdag ni tshul khrims so/ /'di ni 'chal pa'i tshul khrims so zhes bya ba ni rnam par rtog pa gsum mi dmigs pas/ 'khor gsum yongs su dag par rig par bya ste/ 'di ltar 'og nas kyang bdag ni tshul khrims dang ldan no/ /'di ni tshul khrims so/ /'di ni 'chal pa'i tshul khrims so zhes bya ba'i rlom sems su mi byed do zhes 'byung ngo / /'khrug pa med pa'i phyir bzod pa'i pha rol tu phyin pa yongs su rdzogs par bya'o zhes bya ba ni/ bzod pa'i pha rol tu phyin pa'i ngo bo nyid bstan te/ de yang snying rje'i dbang gis sems can gyi 'du byed rnams la 'khrug pa med pa dang / shes rab kyi dbang gis bdag med par rtogs pa'i phyir ro/ /'dir yang bzod pa dang / bzod par bya ba dang / gnod sems rnams mi dmigs pas 'khor gsum yongs su dag pa ni 'og nas skabs ji lta ba nyid du 'chad do/ /lus dang sems kyi brtson 'grus nyams pa med pa'i phyir brtson 'grus kyi pha rol tu phyin pa yongs su rdzogs par bya'o zhes bya ba 'dis ni brtson 'grus kyi pha rol tu phyin pa la 'jug pa bstan te/ rgyun du chud pa dang / gus pa dang / nan tan du lus dang sems kyi brtson 'grus nyams par mi byed par brtson 'grus kyi pha rol tu phyin pa yongs su rdzogs par bya'o zhes bya ba'i tha tshig go/ /nyams pa med pa de yang shes rab dang snying rje gnyis kyis 'gyur ba nyid do/ /'dir yang brtson 'grus dang ldan pa dang / brtson 'grus dang le lo rnams mi dmigs pas pha rol tu phyin pa nyid du 'gyur ro/ /ro myang ba med pa'i phyir bsam gtan gyi pha rol tu phyin pa yongs su rdzogs par bya'o zhes bya ba ni/ gal te bdag gi don du bsam gtan la 'jug na ni bsam gtan gyi ro myong bar byed par 'gyur na 'di ltar byang chub sems dpa' ni bdag gi don 'ba' zhig la sbyor ba thams cad la sdig pa bzhin du rnam par smod par byed na/ de la bsam gtan gyi ro myang ba'i yid la byed pa lta ga la yod/ de bas na nyon mongs pa can dang / dag pa dang / zag pa med pa'i bsam gtan gsum las dag pa dang / zag pa med pa nyid la snyoms par 'jug gi /nyon mongs pa can la ni mi 'jug go zhes bya ba'i tha tshig go/ /'dir yang ting nge 'dzin dang ldan pa dang / ting nge 'dzin dang g.yeng ba rnams mi dmigs pas/ pha rol tu phyin pa yongs su rdzogs par 'gyur ro/ /chos thams cad mi dmigs pa'i phyir shes rab kyi pha rol tu phyin pa yongs su rdzogs par bya'o zhes bya ba ni gang gi phyir de bzhin nyid tsam du mthong bas ni 'jig rten pa'i kun brtags pa'i chos thams cad mi dmigs la/ 'jig rten las 'das pa yang rnam par mi rtog ste/ de bas na shes rab kyi pha rol tu phyin pa zhes bya bar 'gyur ro/ /ji ltar na shes rab kyi pha rol tu phyin pa la gnas te/ shes rab kyi pha rol tu phyin pa yongs su rdzogs par byed ce na/ gang gi tshe shes rab kyi pha rol tu phyin pa zhes bya ba rnam pa thams cad mkhyen pa nyid dang / theg pa chen po la bya ba de'i tshe na ni klan kar 'gyur ba med do/ /gang gi tshe rnam par mi rtog pa'i shes rab la bya bar gyur pa de'i tshe yang / don dam par shes rab kyi pha rol tu phyin pa'i chos gang yang med do snyam du sems pas shes rab kyi pha rol tu phyin pa rnam par rtog pa med pa'i bdag nyid rnam par mi rtog pa'i shes rab kyi pha rol tu phyin pa la gnas pa yin te/ de'i tshe ni khams gsum la sogs pa de bzhin nyid tsam du zad do/ /kun rdzob kyi rnam par skyes pa'i shes rab sbyor ba'i lam du gtogs pa ni rnam par rtog pa'i bdag nyid yin yang rnam par mi rtog pa'i shes rab kyis yongs su zin pa'i phyir shes rab kyi pha rol tu phyin pa zhes bya bar 'gyur ro/ /de bas na shes rab kyi pha rol tu phyin pa la gnas te/ shes rab kyi pha rol tu phyin pa sgom par dgongs pas klan kar 'gyur ba med do/ /'dir yang shes rab can dang shes rab dang / 'chal pa'i shes rab rnams mi dmigs pas 'khor gsum yongs su dag pa yin par rig par bya'o/ /de ltar rnam par mi rtog pa'i pha rol tu phyin pa'i spyod pa bshad zin nas/ da ni nyon mongs pa med pa'i byang chub kyi phyogs kyi spyod pa bstan par bya ste/ de yang sha ra dwa ti'i bu byang chub sems dpa' sems dpa' chen pos shes rab kyi pha rol tu phyin pa la gnas te/ dran pa nye bar gzhag pa mi dmigs pa'i phyir dran pa nye bar gzhag pa bzhi yongs su rdzogs par bya'o zhes bya ba la sogs pa gsungs so/ /byang chub kyi phyogs kyi chos rnams sgom pa ni nyan thos dang rang rgyal gyi theg pa pa mya ngan las 'das pa la gzhol bar byed pa rnams nyid la rigs kyi/ byang chub sems dpa' rnams la mi rigs so zhe na/ yang 'di la nyes pa med de/ byang chub sems dpa' rnams ni chos thams cad rnam pa thams cad du rtogs par bzhed cing / chos thams cad mi dmigs pa lhur len pas/ ci byang chub kyi phyogs kyi chos rnams don dam par yod dam 'on te med ces de dag la yongs su brtag par rigs so/ /'on te de ltar gyur na/ byang chub kyi phyogs kyi chos rnams bsgom pa'i rgyus mya ngan las 'das pa mngon sum du byed par 'gyur te/ 'on kyang byang chub sems dpa' rnams kyis rgyun du zhugs pa nas/ dgra bcom pa nyid kyi bar du thob par 'gyur ro zhe na yang / sngon gyi rtsol ba'i shugs kyi mthu nyid kyis de 'grub pa'i phyir 'di la nyes pa med do/ /gang dag 'khor ba la nyes dmigs su mthong nas yid byung ba dang / mya ngan las 'das pa la yon tan du mthong nas de nyid don du gnyer zhing bsgrub pa de dag ni sngon gyi rtsol ba'i shugs kyis dran pa nye bar gzhag pa rnams bsgom pa'i rgyus 'bad mi dgos par mya ngan las 'das pa mngon sum du byed par 'gyur gyi/ byang chub sems dpa' gang dag 'khor ba dang / mya ngan las 'das pa la sems mnyam pa/ sems can thams cad la phan pa dang / bde ba bskyed pa lhur len pa dag ni sems can la phan pa'i rgyu yin pa'i phyir 'khor ba la yang mya ngan las 'das pa bzhin du yon tan du gzigs la/ sems can la phan 'dogs pa'i gnas ma yin pa'i phyir/ mya ngan las 'das pa la yang 'khor ba bzhin du mi mthun par gzigs pa dang chos nyid tsam du zad pa'i phyir de gnyi ga yang mnyam pa nyid du gzigs pas dmigs su med pa'i ngo bo nyid du so sor rtogs pa'i phyir byang chub kyi phyogs kyi chos rnams bsgoms te/ de dag ni byang chub kyi phyogs kyi chos rnams mngon sum du mdzad pa tsam du zad kyi/ rgyun du zhugs pa'i 'bras bu la sogs pa'am/ mya ngan las 'das pa mngon sum du mdzad pa'i phyir nye bar gnas pa ma yin te/ de nyid la yongs su 'dris pa'i shes pa zhes bya'o/ /'di ltar 'og nas kyang byang chub kyi phyogs kyi chos rnams la gnas nas 'di ni yongs su 'dris par bya ba'i dus yin gyi/ mngon sum du bya ba'i dus ni ma yin par shes so zhes bya ba la sogs pas yongs su 'dris pa'i shes pa bstan pa las 'chad do/ /dran pa nye bar gzhag pa mi dmigs pa'i phyir dran pa nye bar gzhag pa bzhi yongs su rdzogs par bya'o zhes bya ba ni de la lus dang / tshor ba dang / sems dang / chos rnams dang / rnam pa bzhi rnams la rjes su lta ba rnam pa bzhi la/ dran pa nye bar gzhag pa bzhi zhes bya ste/ sngar yongs su shes par byas nas de'i 'og tu yang dag pa ji lta ba bzhin du yongs su rtog pa na/ lus dang / tshor ba dang / sems dang / chos rnams dang / de dag la dmigs pa'i dran pa dang / shes rab gnyis dang / de dang mtshungs par ldan pa'i sems las byung ba'i chos rnams kun brtags pa'i mtshan nyid du rtogs pas yang dag pa'i don ma yin par yongs su shes par bya ste/ don dam par brjod du med pa ni dran pa dang shes rab gnyis kyi spyod yul ma yin pas dran pa nye bar gzhag pa'i mtshan nyid don dam par yod pa ma yin par rtogs nas/ shes rab kyi pha rol tu phyin pa la gnas te/ dran pa nye bar gzhag pa rnams yongs su rdzogs par byed ces bya'o/ /de bas na 'bum pa 'di nyid las kyang / dran pa nye bar gzhag pa rnams dmigs su med pa'i phyir zhes bya ba gsungs so/ /yang dag par spong ba bzhi yongs su rdzogs par bya'o zhes bya ba ni/ brtson 'grus kyis dge ba bskyed cing sdig pa mi dge ba'i chos rnams spong bas na/ yang dag pa'i spong ba bzhi zhes bya ste/ de yang sdig pa mi dge ba'i chos ma skyes pa rnams mi skye ba'i phyir 'dun pa skyed/ 'bad/ brtson 'grus rtsom/ sems rab tu 'dzin to zhes bya ba dang / sdig pa mi dge ba'i chos skyes pa rnams spang ba'i phyir 'dun pa skyed ces bya ba la sogs pa dang / dge ba'i chos ma skyes pa rnams bskyed pa'i phyir 'dun pa skyed ces bya ba la sogs pa dang / dge ba'i chos skyes pa rnams gnas pa dang / phyir zhing 'phel ba dang / nyams par mi 'gyur ba dang / yongs su rdzogs par bya ba'i phyir 'dun pa skyed/ 'bad/ brtson 'grus rtsom/ sems rab tu 'dzin to zhes bya'o/ /rdzu 'phrul gyi rkang pa bzhi yongs su rdzogs par bya'o zhes bya ba ni 'dun pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa dang / sems kyi ting nge 'dzin spong ba'i 'du byed dang ldan pa'i rdzu 'phrul gyi rkang pa dang / brtson 'grus kyi ting nge 'dzin spong ba'i 'du byed dang ldan pa'i rdzu 'phrul gyi rkang pa dang / dpyod pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa sgom pa ste/ ting nge 'dzin 'di bzhis rdzu 'phrul dang / 'phags pa'i yon tan dang / 'byor pa chen po thob par 'gyur ba'i rgyu dang / rten dang gzhi yin pas rkang pa dang 'dra ba'i phyir rdzu 'phrul gyi rkang pa zhes bya'o/ /dbang po lnga yongs su rdzogs par bya'o zhes bya ba ni dad pa'i dbang po dang / brtson 'grus kyi dbang po dang / dran pa'i dbang po dang / ting nge 'dzin gyi dbang po dang / shes rab kyi dbang po rnams te/ dad pa la sogs pa 'di dag gi dbang gis zag pa med pa'i chos nyid thob par 'gyur ba'i phyir dbang po zhes bya'o/ /stobs lnga yongs su rdzogs par bya'o zhes bya ba ni/ dad pa la sogs pa'i dbang po lnga po de dag nyid goms pa'i mthus nyon mongs pa'i phyogs rnams kyis zil gyis mi non te/ mthu dang ldan par gyur pa la stobs lnga zhes bya'o/ /byang chub kyi phyogs kyi yan lag bdun yongs su rdzogs par bya'o zhes bya ba ni/ dran pa yang dag byang chub kyi yan lag dang / chos rnam par 'byed pa yang dag byang chub kyi yan lag dang / brtson 'grus yang dag byang chub kyi yan lag dang / dga' ba yang dag byang chub kyi yan lag dang / shin tu sbyangs pa yang dag byang chub kyi yan lag dang / ting nge 'dzin yang dag byang chub kyi yan lag dang / btang snyoms yang dag byang chub kyi yan lag ste/ sa dang po la byang chub kyi rang bzhin gyis chos nyid rtogs par byed pa'i dus na/ dran pa la sogs pa 'di rnams rgyu dang grogs su gyur pa'i phyir byang chub kyi yan lag ces bya'o/ /'phags pa'i lam yan lag brgyad pa yongs su rdzogs par bya'o zhes bya ba ni/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin rnams te/ sa dang po thob nas sa bcu'i bar du bsgom pa'i lam la 'jug pa'i tshe/ 'di rnams dang ldan pa'i phyir 'phags pa'i lam yan lag brgyad ces bya'o/ /byang chub kyi yan lag bsgom pa 'di yang 'og nas theg pa chen po bstan pa las rgyas par 'chad do/ / yang dag par spong ba la sogs pa'i mtshan nyid dngos po med pa'i ngo bo nyid yin pas yang dag pa'i spong ba la sogs pa dmigs su med pa'i ngo bo nyid du yongs su shes par byed cing shes rab kyi pha rol tu phyin pa la gnas te/ byang chub kyi phyogs kyi chos rnams yongs su rdzogs par byed do zhes bshad do/ /stong pa nyid kyi ting nge 'dzin la yongs su rdzogs par bya'o zhes bya ba ni rnam par thar pa'i sgo gsum byang chub kyi phyogs bsgom pa dang rjes su mthun zhing / mya ngan las 'das pa thob par byed pa'i phyir/ byang chub kyi phyogs nyid kyi nang du bgrang ngo / /'dir ni byang chub sems dpa'i skabs su gtogs pas ting nge 'dzin gsum du brjod do/ /de la stong pa nyid kyi ting nge 'dzin zhes bya ba yongs su grub pa'i mtshan nyid ni/ kun brtags pa'i mtshan nyid kyis stong ste/ kun brtags pa'i rnam pa des stong ngo zhes stong pa'i rnam par bsgoms na/ sems rtse gcig tu gyur pa la stong pa nyid kyi ting nge 'dzin zhes bya'o/ /brjod du med pa'i don dam pa de nyid nam mkha' bzhin du gzugs la sogs pa'i mtshan nyid thams cad dang bral ba/ mtshan ma'i rnam pa med pa'i mtshan nyid spros pa thams cad nye bar zhi ba yin pas zhi ba'i rnam par bsgoms na/ sems rtse gcig tu gyur pa la mtshan ma med pa'i ting nge 'dzin zhes bya'o/ /de bzhin du khams gsum pa rnams dngos po med pa'i ngo bo nyid kyi rnam par mthong bas/ chos thams cad la mi mthun pa'i 'du shes nye bar bzhag nas/ phyis de la smon pa'i gnas su mi byed par yang dag par rjes su mthong ba na sems rtse gcig tu gyur pa la smon pa med pa'i ting nge 'dzin zhes bya'o/ /de ltar nyon mongs pa med pa'i byang chub kyi phyogs kyi spyod pa bstan nas/ de ni bar du gcod pa med par sems can yongs su smin par byed pa'i spyod pa bstan pa'i phyir/ bsam gtan mi dmigs pa'i phyir bsam gtan bzhi yongs su rdzogs par bya'o zhes bya ba la sogs pa gsungs te/ sems can yongs su smin par bya ba de yang 'jig rten pa dang / 'jig rten las 'das pa'i bsam gtan dang ting nge 'dzin gyi phyogs dang / mngon par shes pa'i phyogs dang / ye shes kyi phyogs kyis bya dgos pas/ phyogs kyi chos gsum char yang der 'dus te/ de la bsam gtan la sogs pa'i chos thams cad dang por sems can la phan par bya ba'i phyir kun rdzob tu bzung ste/ phyis don dam par yongs su brtags na bsam gtan la sogs pa'i ngo bo nyid du mngon par zhen par mi byed par snying rje dang / thabs mkhas pa gnyis kyis slar yang kun rdzob nyid la dmigs nas sems can la phan par byed pas sems can yongs su smin par byed pa'i spyod pa rnam par gzhag go/ /de la bsam gtan bzhi ni gzugs kyi khams kyi bsam gtan dang po dang / bsam gtan gnyis pa dang / gsum pa dang / bzhi pa rnams te/ bsam gtan de dag kyang / bsam gtan dang po'i ni rtog pa dang bcas dpyod pa dang bcas pa'o/ /bsam gtan gnyis pa ni rtog pa med pa la dpyod pa tsam dang bcas pa'o/ /bsam gtan gsum pa dang / bzhi pa gnyis ni rtog pa yang med dpyod pa yang med pa ste/ bsam gtan de dag 'jig rten pa rnams ni bdag tu lta ba dang bcas par bsgom/ nyan thos dang rang sangs rgyas rnams ni gang zag la bdag med par rtogs nas bsgom mo/ /byang chub sems dpa' rnams ni chos dang gang zag gnyis la bdag med par rtogs nas bsgoms te/ don dam par bsam gtan dmigs su med kyang / kun rdzob tu snying rje dang thabs mkhas pa gnyis kyi dbang gis so so'i mtshan nyid ji lta ba bzhin du bsgom mo/ /tshad med pa bzhi yongs su rdzogs par bya'o zhes bya ba ni byams pa dang / snying rje dang / dga' ba dang / btang snyoms rnams te/ de bzhi char la yang byang chub sems dpa' rnam pa gsum gyis bsgom ste/ gsum gang zhe na/ sems can la dmigs pa dang / chos la dmigs pa dang / mi dmigs pas bsgom pa'o/ /gzugs med pa'i snyoms par 'jug pa bzhi yongs su rdzogs par bya'o zhes bya ba ni nam mkha' mtha' yas skye mched dang / rnam shes mtha' yas skye mched dang / cung zad med pa'i skye mched dang / 'du shes med 'du shes med min gyi skye mched do/ /rnam par thar pa brgyad yongs su rdzogs par bya'o zhes bya ba ni gzugs can gzugs rnams la lta ba dang / nang gzugs med par 'du shes pas phyi rol gyi gzugs rnams la lta ba dang / sdug pa'i rnam pa la mos pa dang / nam mkha' mtha' yas skye mched la sogs pa bzhi dang / 'du shes dang / tshor ba 'gog pa'i ting nge 'dzin bsgom pa dang brgyad do/ /mthar gyis gnas pa'i snyoms par 'jug pa dgu yongs su rdzogs par bya'o zhes bya ba ni bsam gtan bzhi dang / gzugs med pa'i snyoms par 'jug pa bzhi dang / 'du shes dang / tshor ba 'gog pa'i ting nge 'dzin dang dgu'o/ /mngon par shes pa lnga yongs su rdzogs par bya'o zhes bya ba ni/ lha'i mig dang / lha'i rna ba dang / /gzhan gyi sems shes pa dang / rdzu 'phrul gyi bya ba shes pa dang / sngon gyi gnas rjes su dran pa'o/ /'du shes bcu bsgom par bya ste zhes bya ba la sogs pas ni/ 'dod chags kyi gnyen por rnam par bam pa la sogs pa'i 'du shes bcu bsgom pa bstan to/ / sangs rgyas rjes su dran pa bsgom par bya'o zhes bya ba nas/ lha rjes su dran pa bsgom par bya'o zhes bya ba'i bar du rjes su dran pa drug bsgom pa bstan pa ste/ sangs rgyas bcom ldan 'das de rig pa dang zhabs su ldan pa kha lo sgyur ba skyes bu 'dul ba bla na med pa 'jig rten mkhyen pa zhes bya ba la sogs pa'i yon tan gyi sgo nas rjes su dran pa'o/ /chos rjes su dran pa bsgom par bya'o zhes bya ba ni lung gi chos dang / thob par bya ba'i chos so/ /de la lung gi chos ni mdo'i sde la sogs pa theg pa che chung gi gsung rab rnams kyi yon tan rjes su dran pa'o/ / thob par bya ba'i chos ni rgyun tu zhugs pa'i 'bras bu'i chos dang / stobs bcu dang / mi 'jigs pa bzhi dang / sangs rgyas kyi chos ma 'dres pa bco brgyad la sogs pa'i yon tan rnams rjes su dran pa bsgom pa'o/ /dge 'dun rjes su dran pa bsgom par bya'o zhes bya ba ni 'phags pa'i gang zag brgyad la/ bcom ldan 'das kyi nyan thos kyi dge 'dun ni 'phags pa'i lam la gnas pa/ shin tu legs par zhugs pa sbyin gnas chen po bsod nams kyi zhing yin pa la sogs pa'i yon tan gyi sgo nas rjes su dran par bya ba bsgom pa'o/ /tshul khrims rjes su dran pa bsgom par bya'o zhes bya ba ni lus kyi sdom pa gsum dang / ngag gi sdom pa bzhi bsdams shing srog gcod pa la sogs pa'i rnam pa bdun spangs pa'i mtshan nyid la mtho ris su skye bar 'gyur ba'i yon tan gyi sgo nas rjes su dran pa'o/ /gtong ba rjes su dran pa bsgom par bya'o zhes bya ba ni chos dang / zang zing dang / mi 'jigs pa sbyin pa'i 'bras bu 'jig rten dang 'jig rten las 'das pa'i longs spyod chen po'i rgyu yin pa'i sgo nas rjes su dran pa'o/ /lha rjes su dran pa bsgom par bya'o zhes bya ba ni 'jig rten dang 'jig rten las 'das pa'i lha rnams las bzang po dang / bsod nams chen po'i rgyu las byung ba yin pas brnyas shing smad par bya bar mi rigs kyi/ mchod pa dang bkur sti bya ba'i gnas yin pa'i sgo nas rjes su dran par bya'o/ /dbugs phyi nang du rgyu ba rjes su dran par bya'o zhes bya ba ni bsam gtan dang / ting nge 'dzin bsgom pa la sems sbyang zhing las su rung bar bya ba'i phyir dbugs phyi nang du rgyu ba rjes su dran par bya ba bsgom pa'o/ /skyo ba rjes su dran pa bsgom par bya'o zhes bya ba ni skye ba dang / rga ba dang / na ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrugs pa la sogs pa yid 'byung bar 'gyur ba'i gnas rnams la dmigs nas nyes dmigs su lta zhing skyo ba rjes su dran pa'o/ /byang chub sems dpa'i skyo ba rjes su dran pa ni chos thams cad bdag med pa'i ngo bo nyid yin pa la/ byis pa rnams kyis snying po can du blo bskyed de 'jug par mthong nas de dag shes par bya bar myur du sngon du gtong ba'i yid la byed pa ni skyo ba rjes su dran pa zhes bya'o/ /'chi ba rjes su dran pa bsgom par bya'o zhes bya ba yang skyo ba rjes su dran par bya ba nyid kyi nang du gtogs mod kyi logs shig tu bkar te/ smos pa ni lhag par skyo bar 'gyur ba'i rgyu yin pa'i phyir ro/ /lus rjes su dran pa bsgom par bya'o zhes bya ba ni lus la ma chags par bya ba'i phyir/ glad pa'i rgyas nas rkang pa'i bar du mi gtsang ba sna tshogs kyis gang bar bsgom pa'o/ /mi rtag pa'i 'du shes bsgom par bya'o zhes bya ba la sogs pa rnam pa gsum ni sdug bsngal gyi phung po lnga la mi rtag pa dang / sdug bsngal ba dang / bdag med pa'i 'du shes bsgom par bya'o/ /mi sdug pa'i 'du shes bsgom par bya'o zhes bya ba ni rnam par bam pa la sogs pa'i 'du shes bcu gong du smos pa nyid mdor bsdus te bsgom pa bstan pa'o/ /'chi ba'i 'du shes bsgom par bya'o zhes bya ba gang du yang 'chi ba'i 'du shes smos pas lan gnyis su zlos pa 'dra ba/ gong du smos pa ni rjes su dran pa'i skabs yin/ 'di ni 'du shes kyi skabs yin pas nyes pa med do/ /dga' bar bya ba mi dmigs pa'i phyir 'jig rten thams cad la dga' bar mi bya ba'i 'du shes bsgom par bya'o zhes bya ba ni 'jig rten pa'i rigs pa dang / bzo'i gnas thams cad dang / sgyu rtsal rnam pa sna tshogs drug cu rtsa bzhi la sogs pa la mngon par dga' bar mi bya'o/ /yid brtan du mi rung ba'i 'du shes bsgom par bya'o zhes bya ba ni khams gsum pa la chags su rung ba'i rgyu yang dag par rjes su ma mthong bas de la 'dod pa med par gyur pa'o/ /sdug bsngal shes pa bsgom par bya'o zhes bya ba ni phung po la sogs pa'i chos thams cad kun rdzob kyi sgo nas/ sdug bsngal ba nyid du shes par byas nas/ de'i 'og tu de dag nyid don dam par shin tu dngos po med par shes kyang / sems can yongs su smin par bya ba'i phyir/ kun rdzob tu sdug bsngal gyi rnam pa nyid du shes pa dang / gzhan la yang de bzhin du shes par byed pa'i sdug bsngal shes pa ste/ de bzhin du thams cad la yang sbyar bar bya'o/ /kun 'byung ba shes pa bsgom par bya'o zhes bya ba ni phung po dang / khams dang / skye mched la sogs pa de dag nyid rab tu skye bar shes pa dang / de shes par byed pa'i shes pa yang kun 'byung ba shes pa'o/ /'gog pa shes pa bsgom par bya'o zhes bya ba ni don dam par 'gog pa mi dmigs kyang / kun rdzob tu sems can yongs su smin par bya ba'i phyir 'gog pa dang / zhi ba dang / gya nom pa dang / nges par 'byung ba'i rnam par shes pa dang / shes par byed pa'i shes pa gang yin pa'o/ /lam shes pa bsgom par bya'o zhes bya ba ni kun rdzob dang don dam pa'i tshul snga ma bzhin te/ lam dang / rigs pa dang / sgrub pa dang / nges par 'byin pa'i rnam par shes shing shes par byed pa gang yin pa'o/ /zad pa shes pa bsgom par bya'o zhes bya ba ni nyon mongs pa dang nye ba'i nyon mongs pa thams cad dang / sdug bsngal dang / bdag dang gzhan rnams kyi srid pa yongs su zad pa shes pa dang / yongs su zad pa'i rgyu shes pa ni/ byang chub sems dpa' rnams kyi zad pa shes pa'o/ /mi skye ba shes pa bsgom par bya'o zhes bya ba ni bdag dang gzhan gyi srid pa'i 'gro bar skye ba thams cad shes pa dang / mi skye ba'i rgyu shes pa ni byang chub sems dpa' rnams kyi mi skye ba shes pa'o/ /chos shes bsgom par bya'o zhes bya ba ni kun rdzob tu chos thams cad mngon sum du shes pa dang / don dam pa'i dbang gis de bzhin nyid du shes pa ni chos shes pa'o/ /rjes su rtogs pa shes par bya'o zhes bya ba ni kun rdzob tu chos thams cad rjes su dpag pas shes pa dang / mi rtag pa la sogs pa mngon sum du ma gyur kyang de lta bur 'gyur bar shes pa dang / byang chub sems dpa' rnams chos thams cad stong pa nyid du rjes su mthun par shes pa gang yin pa'o/ /kun rdzob shes pa bsgom par bya'o zhes bya ba ni/ 'phags pa thams cad kyis sems can dang / bum pa la sogs pa mkhyen pa dang / byang chub sems dpa' rnams kyis gzugs la sogs pa kun brtags pa'i chos thams cad la dmigs pa'i mkhyen pa gang yin pa'o/ /yongs su 'dris pa shes pa bsgom par bya'o zhes bya ba ni shes pa gang gis byang chub sems dpa' rnam par thar pa'i sgo stong pa nyid dang / mtshan ma med pa dang / smon pa med pa dang / byang chub kyi phyogs kyi chos rnams bsgom yang / mya ngan las 'das pa mngon sum du ni mi byed kyi/ de dag nyid goms pa dang / rab tu byung bar byed pa'i shes pa de la yongs su 'dris pa shes pa zhes bya'o/ /gal te mya ngan las 'das pa mngon sum du byed na ni/ de rgyun du zhugs pa la sogs pa nyid du 'gyur te/ des dgos pa'i phyir yang dag pa'i mtha' la reg par mi byed kyi shes pa des chos tsam du sgom par byed do/ /'o na mya ngan las 'das pa thob par byed pa'i chos rnams bsgoms pas ji ltar yang dag pa'i mtha' mngon sum du byed par mi 'gyur zhe na/ skyo ba yid la byed pa dang mi ldan pa'i phyir ro zhes sngar yang bshad do/ /gzhan yang yang dag pa'i mtha' mngon sum du byed pa'i sngon du 'gro ba ni zhi gnas dang lhag mthong bsgom pa yin te/ byang chub sems dpa' rnams ni de ltar yang dag pa'i mtha' thob par byed pa'i zhi gnas dang lhag mthong bsgom par sbyor ba mi mdzad kyi/ chos thams cad dmigs su med par bsgom pa rgyas par bya ba 'ba' zhig gi phyir/ byang chub kyi phyogs kyi chos rnams la dmigs pas na/ mnyam par ma bzhag pa'i shes pa tha mal pas so sor rtog go/ /de bas na zhi gnas dang lhag mthong gi rkyen dang mi ldan pa'i phyir yang dag pa'i mtha' mngon sum du byed par mi 'gyur ro/ /'di ltar 'og nas kyang rab 'byor gang gi tshe byang chub sems dpa' sems dpa' chen po rnam pa thams cad kyi mchog dang ldan pa'i stong pa nyid la so sor rtog kyang mngon sum du bya'o snyam pas so sor rtog par mi byed kyang / 'di ni yongs su 'dris par bya ba'i dus yin gyi/ mngon sum du bya ba'i dus ni ma yin no zhes so sor rtog cing mnyam par ma bzhag pa nyid du dmigs pa la sems nye bar 'jog kyang / byang chub sems dpa' sems dpa' chen po bar skabs der byang chub kyi phyogs kyi chos rnams las nyams par yang mi 'gyur la/ zag pa zad pa mngon sum du yang mi byed do zhes bya ba la sogs pa 'chad do/ /sgra ji bzhin pa shes pas bsgom par bya'o zhes bya ba ni sgra gang dang gang yin pa la sgra ji bzhin zhes bya ste/ de shes pa ni sgra ji bzhin shes pa'o/ /shes pa gang gis byang chub sems dpa' sems can dmyal ba dang / dud 'gro dang / yi dags dang / lha dang / mi dang / tshangs pa thams cad kyi sgra dang skad thams cad so sor rtog cing mkhyen pa ni sgra ji bzhin shes pa'o/ /thams cad la yang shes rab kyi pha rol tu phyin pa la gnas te zhes bya bar sbyar bas dmigs su med pa'i tshul gyis sgom par byed ces bya bar shes par bya'o/ /rnam par rtog pa dang bcas pa rnam par dpyod pa dang bcas pa'i ting nge 'dzin yongs su rdzogs par bya'o zhes bya ba la sogs pa ni gzugs kyi khams kyi bsam gtan bzhi bsgom pa bstan pa ste/ bsam gtan bzhi po de dag kyang don dam par dmigs su med par rtogs nas/ kun rdzob tu thabs mkhas pa'i dbang gis sems can gyi don du bsgom ste/ de la bsam gtan dang po la ni rnam par rtog pa dang bcas rnam par dpyod pa dang bcas pa'o/ /bsam gtan gnyis pa la ni rnam par rtog pa med cing / rnam par dpyod pa tsam du zad do/ /bsam gtan gsum pa dang / bsam gtan bzhi pa la ni rnam par rtog pa dang / rnam par dpyod pa gnyi ga med pa ste/ rgya cher 'og nas 'chad do/ /yongs su ma shes pa yongs su shes par bya ba'i dbang po yongs su rdzogs par bya'o zhes bya ba la sogs pa ni/ zag pa med pa'i dbang po gsum bshad pa ste/ mthong ba'i lam la ni yang dag pa'i yongs su ma shes pa shes par byed pa'i dbang po 'byung ngo / /bsgom pa'i lam la ni kun shes pa'i dbang po 'byung ngo / /mi slob pa'i lam dgra bcom pa'i sa la kun shes pa rig pa'i dbang po 'byung ste/ 'di dag gi dbang gis zag pa med pa'i chos thob par 'gyur ba'i phyir dbang po zhes bya'o/ /zil gyis gnon pa'i skye mched yongs su rdzogs par bya'o zhes bya ba ni/ sems sbyang zhing las su rung bar bya ba'i phyir/ gzugs rnams la bzang ngan dang che chung la sogs pa phyi rol gyi dngos po mi brtsan par bdag gi sems kyi dbang du byas te/ ji ltar 'dod par shes par bya zhing blta bar bya ba ste/ brgyad po de dag kyang gang zhe na/ nang gzugs su 'du shes pas phyi rol gyi gzugs chung ngu kha dog bzang po dang / kha dog ngan pa rnams la lta zhing / gzugs de dag zil gyis mnan nas shes/ zil gyis mnan nas mthong ste/ de lta bur 'du shes par gyur pa 'di ni zil gyis gnon pa'i skye mched dang po'o/ /nang gzugs med par 'du shes pas phyi rol gyi gzugs chen por gyur pa/ kha dog bzang po dang / kha dog ngan pa rnams la lta zhing / gzugs de dag zil gyis mnan nas shes/ zil gyis mnan nas mthong ste/ de lta bur 'du shes par gyur pa 'di ni zil gyis gnon pa'i skye mched gnyis pa'o/ /nang gzugs med par 'du shes pas phyi rol gyi gzugs sngon po/ kha dog sngon po/ sngon po lta bur ston pa/ 'od sngon po 'byung ba rnams la lta ste/ dper na zar ma'i me tog gam/ yul bA rA Na sI'i ras phun sum tshogs pa sngon po/ kha dog sngon po/ sngon po lta bur ston pa/ 'od sngon po 'byung ba de bzhin du nang gzugs med par 'du shes pas phyi rol gyi gzugs sngon po/ kha dog sngon po/ sngon po lta bur ston pa/ 'od sngon po 'byung ba rnams la lta ba 'di ni zil gyis gnon pa'i skye mched gsum pa'o/ /nang gzugs med par 'du shes pas phyi rol gyi gzugs ser po/ kha dog ser po/ ser po lta bur ston pa/ 'od ser po 'byung ba rnams la lta ste/ dper na dong ga'i me tog gam yul bA rA Na sI'i ras phun sum tshogs pa ser po/ kha dog ser po/ ser po lta bur ston pa/ 'od ser po 'byung ba de bzhin du nang gzugs med par 'du shes pas phyi rol gyi gzugs ser po/ kha dog ser po/ ser po lta bur ston pa/ 'od ser po 'byung ba rnams la lta ba 'di ni zil gyis gnon pa'i skye mched bzhi pa'o/ /nang gzugs med par 'du shes pas phyi rol gyi gzugs dmar po/ kha dog dmar po/ dmar po lta bur ston pa/ 'od dmar po 'byung ba rnams la lta ste/ dper na ban du dzi ba'i me tog gam yul bA rA Na sI'i ras phun sum tshogs pa dmar po/ kha dog dmar po/ dmar po lta bur ston pa/ 'od dmar po 'byung ba de bzhin du nang gzugs med par 'du shes pas phyi rol gyi gzugs dmar po/ kha dog dmar po/ dmar po lta bur ston pa/ 'od dmar po 'byung ba rnams la lta ba 'di ni zil gyis gnon pa'i skye mched lnga pa'o/ /nang gzugs med par 'du shes pas phyi rol gyi gzugs dkar po/ kha dog dkar po/ dkar po lta bur ston pa/ 'od dkar po 'byung ba rnams la lta ste/ dper na skar ma pa ba sangs kyi mdog ltar dkar po/ kha dog dkar po/ dkar po lta bur ston pa/ 'od dkar po 'byung ba de bzhin du nang gzugs med par 'du shes pas phyi rol gyi gzugs dkar po/ kha dog dkar po/ dkar po lta bur ston pa/ 'od dkar po 'byung ba rnams la lta ba 'di ni zil gyis gnon pa'i skye mched drug pa'o/ /de rnam pa thams cad du gzugs kyi 'du shes las yang dag par 'das te/ thogs pa'i 'du shes rnams nub par 'gyur gyi/ sna tshogs kyi 'du shes rnams yid la mi byed pas nam mkha' mtha' yas so snyam nas/ nam mkha' mtha' yas skye mched rdzogs par byas te/ gnas pa 'di ni zil gyis gnon pa'i skye mched bdun pa'o/ /de rnam pa thams cad du nam mkha' mtha' yas skye mched las yang dag par 'das te/ rnam par shes pa mtha' yas so snyam nas/ rnam par shes pa mtha' yas skye mched rdzogs par byas te/ gnas pa 'di ni zil gyis gnon pa'i skye mched brgyad pa'o/ /chub pa'i skye mched yongs su rdzogs par bya'o zhes bya ba ni sems sbyangs shing las su rung bar bya ba'i phyir/ phyogs bcu thams cad du sa dang / chu dang / me dang / rlung dang / sngon po dang / ser po dang / dmar po dang / dkar po dang / nam mkha' dang rnam par shes pa gang yang rung bas/ chub par gang bar sems shing yid la byed pa'i bsam gtan bsgom pa la bya'o/ /bsdu ba'i dngos po bzhi yongs su rdzogs par bya'o zhes bya ba ni sems can yongs su smin par bya ba'i phyir sbyin pa dang / tshig snyan pa dang / don mthun par spyod pa dang / gzhan gyi don spyod pa dang rnam pa bzhis sems can thams cad yongs su bsdus nas yang dag pa la dgod pa'o/ /rnam par 'god pa bzhi yongs su rdzogs par bya'o zhes bya ba ni chos gdags pa rnam par 'god pa dang / bden pa gdags pa rnam par 'god pa dang / rigs pa gdags pa rnam par 'god pa dang / theg pa gdags pa rnam par dgod pa ste/ de la chos gdags pa rnam par dgod pa ni mdo'i sde dang / dbyangs kyis bsnyad pa'i sde la sogs pa sems can gyi don du ming du btags shing rnam par dgod pa'o/ / bden pa gdags pa rnam par dgod pa ni sems can gyi don du don dam pa dang kun rdzob kyi bden pa bzhi rnams ming du btags shing rnam par dgod pa'o/ /rigs pa gdags pa rnam par dgod pa ni ltos pa'i rigs pa dang / bya ba byed pa'i rigs pa dang / gtan tshigs sgrub pa'i rigs pa dang / chos nyid kyi rigs pa rnam par dgod pa'o/ /theg pa gdags pa rnam par dgod pa ni/ nyan thos dang rang sangs rgyas dang / byang chub sems dpa'i theg pa khyad par du phye zhing ming du btags te rnam par dgod pa'o/ /sa bcu yongs su rdzogs par bya'o zhes bya ba ni byang chub sems dpa'i sa rab tu dga' ba nas/ sa chos kyi sprin gyi bar du yongs su rdzogs par bya'o/ /spyod pa bcu yongs su rdzogs par bya'o zhes bya ba ni chos spyod pa rnam pa bcu sems can gyi don du yongs su rdzogs par bya ba ste/ chos spyod pa bcu ni dam pa'i chos yi ger 'dri ba dang / klog pa dang / kha ton byed pa dang / bris te gzhan la sbyin pa dang / 'chang ba dang / mchod pa byed pa dang / nyan pa dang / sems pa dang / sgom pa dang / gzhan dag la ston pa rnams so/ /bzod pa bcu yongs su rdzogs par bya'o zhes bya ba ni rang bzhin gyis bzod pa dang / gzhan gyis gnod pa byas pa la ji mi snyam pa'i bzod pa dang / sdug bsngal nyams su len pa'i bzod pa dang / chos la nges par mos pa'i bzod pa dang / bya dka' ba la bzod pa dang / thabs kyi sgo'i bzod pa dang / skyes bu dam pa'i bzod pa dang / rnam pa thams cad du bzod pa dang / phongs pa 'dod pa la bzod pa dang / 'di dang gzhan du sdug bsngal ba la bzod pa'o/ /de la rang bzhin gyis bzod pa gang zhe na/ gang rang bzhin gyis mi 'khrugs pa/ sha mi ldon pa dang / zhe la mi 'dzin pa'o/ / gzhan gyis gnod pa byas pa la ji mi snyam pa'i bzod pa gang zhe na/ byang chub sems dpa' la gnod pa byed pa'i sems can rnams la/ byang chub sems dpa' 'di ltar 'du shes skyed de/ 'di dag ni rkyen la rag lus pa 'du byed tsam du zad de/ 'di la bdag gam/ sems can nam/ srog gam/ skye ba gang gshe ba'am/ khro ba'am/ rdeg pa'am/ mtshang 'bru ba gang yang med do snyam du sems shing sems can du 'du shes pa med de chos tsam du gnas so/ /de chos tsam gyi 'du shes de la gnas nas/ gzhan gyis gnod pa byas pa la ji mi snyam zhing bzod pa'o/ /de la sdug bsngal nyams su len pa'i bzod pa gang zhe na/ 'di la byang chub sems dpa' 'di ltar slob ste/ bdag sngon 'dod pa'i longs spyod tshol ba na sdug bsngal gyi rgyur gyur pa'i 'dod pa rnams kyi don du/ sdug bsngal rnam pa mang po myong zhing nyams su blangs te/ zhing rmo ba dang / tshong bya ba dang / rgyal srid bya ba la sogs pa'i sdug bsngal ni mi shes pa'i dbang gis don med par myong gi /da ni bde ba thob par 'gyur ba'i dge ba spyod pa la sngon gyi sdug bsngal bye ba khrag khrig brgya stong du ma bas lhag pa'i sdug bsngal nyams su blangs pa yang rigs na/ de las chung ba lta smos kyang ci dgos snyam du de ltar tshul bzhin yid la byed cing / byang chub thob par byed pa'i byang chub sems dpa' sdug bsngal thams cad nyams su len pa'i bzod pa'o/ /chos la nges par mos pa'i bzod pa gang zhe na/ 'di la byang chub sems dpa' chos yang dag par shes shing len par spyad pa'i blas dkon mchog gsum gyi yon tan dang / yang dag pa nyid kyi don dang / sangs rgyas dang byang chub sems dpa' rnams kyi mthu chen po dang / rgyu dang / 'bras bu dang / thob par bya ba'i don dang / bdag gis de thob par bya ba'i thabs dang / shes par bya ba'i spyod yul la yun ring por goms par byas pa dang / shin tu rnam par dag pa'i ye shes yang dag par grub par byas pas mos pa rab tu zhen pa'o/ /bya dka' ba la bzod pa gang zhe na/ de ni rnam pa gsum ste/ 'di la byang chub sems dpa' sems can dman zhing kha nyen pa rnams kyis gnod pa byas pa la bzod pa dang / rje dpon du gyur pa la bdag nyid kyis bzod pa dang / rigs dang rus kyis rab tu dman par gyur pa'i sems can rnams kyis gnod pa chen po byas pa la bzod pa dang gsum mo/ /thams cad kyi sgo'i bzod pa gang zhe na/ de la yang rnam pa bzhi ste/ 'di la yang byang chub sems dpa' mdza' bshes dang / mi mdza' ba dang / tha mal pas gnod par byas pa la bzod pa dang / de gsum bdag pas dma' ba dang / bdag dang mtshungs pa dang / bdag pas lhag pas gnod par byas pa la bzod pa'o/ /skyes bu dam pa'i bzod pa gang zhe na/ de ni rnam pa lngar rig par bya ste/ 'di la byang chub sems dpa' dang po nas bzod pa la phan yon du lta ba dang / bzod pa dang ldan pa'i mi la phyis dgra mang du mi 'gyur ba dang / dbyen byed pa mang du mi 'gyur ba dang / bde ba dang yid bde ba mang du 'gyur ba dang / 'gyod pa med par tshe 'pho ba'i dus byed cing lus zhig ste/ tshe 'phos nas kyang mtho ris kyi 'jig rten du lha rnams kyi nang du skye bar 'gyur ba'o/ /de de ltar bzod pa la phan yon du lta bas bdag kyang bzod la/ gzhan yang bzod pa la bskul ba dang / bzod pa'i bsngags pa brjod pa dang / bzod pa dang ldan pa'i gang zag mthong na yid dga' bar 'gyur ro/ / de la byang chub sems dpa'i rnam pa thams cad du bzod pa gang zhe na/ rnam pa bcu gsum ste/ byang chub sems dpa' mi bzod pa'i rnam par smin pa'i 'bras bu mi 'dod pa myong bas 'jigs pa'i phyir bzod pa dang / sems can rnams la snying rje ba dang / byams pa'i bzod pa dang / bla na med pa yang dag par rdzogs pa'i byang chub rab tu 'dod pas bzod pa'i pha rol tu phyin pa yongs su rdzogs par bya ba'i phyir bzod pa dang / rab tu byung bas bzod pa bya bar rigs pas bzod pa bya ba'i yi dam bcas pa'i phyir bzod pa dang / sngon bzod pa bsgoms bsgoms pas/ rigs phun sum tshogs par 'gyur ba'i phyir rang bzhin gyis bzod pa dang / chos thams cad bdag med par rig nas brjod du med cing chos nyid tsam du rtogs pas chos la nges pa'i bzod pa dang / gnod pa thams cad bzod pa dang / thams cad la bzod pa dang / dben pa'am mi mang po'i nang du yang rung ste/ yul thams cad la bzod pa dang / snga dro dang / nyi ma gung dang / phyi dro dang / nyin par dang / mtshan mo dang / 'das pa dang / ma 'ongs pa dang / da ltar byung ba dang / na ba'i tshe dang / mi na ba'i tshe dang / dar ba dang / rgud pa'i dus thams cad du bzod pa dang / lus kyis mi rtog par bzod pa dang / yid du mi 'ong ba'i tshig mi bzod par ngag gi bzod pa dang / mi 'khrug cing bsam pa ngan pa med par yid kyis bzod pa dang bcu gsum mo/ /de la phongs pa 'dod pa la bzod pa gang zhe na/ de yang rnam pa bzhi ste/ sems can sdug bsngal ba rnams slong mi mkhas par slong ba'i nyes pa la bzod pa dang / sems can sdug bsngal ba rnams kyi sdug bsngal med par bya bar rtsol ba la bzod pa dang / sems can chos tshol zhing chos kyi rjes su sgrub pa rnams la chos ston par brtson pa'i bzod pa dang / sems can brel ba'i grogs byed pa la 'bad pa'i bzod pa dang bzhi'o/ /'di dang gzhan du sdug bsngal ba'i bzod pa gang zhe na/ 'di la byang chub sems dpa' bag yod par gnas shing dge ba spyod pa na/ grang ba dang / tsha ba dang / bkres pa dang / skom pa dang / sbrang ma dang / sdig sbrul la sogs pa'i gnod pa bzod pa dang / lus dang sems ngal ba bzod pa dang / sems can la snying brtse ba'i phyir 'khor ba na 'khor ba'i tshe/ skye ba dang / rga ba dang / na ba la sogs pa'i sdug bsngal bzod pa'o/ /lhag pa'i bsam pa nyi shu yongs su rdzogs par bya'o zhes bya ba ni/ byang chub sems dpa' sangs rgyas kyi chos la dad pa dang / shes rab kyis rtogs pa'i rgyus sangs rgyas kyi chos la mos pa dang / rtogs pa dang / nges par khong du chud pa'i bsam pa ni/ byang chub sems dpa'i lhag pa'i bsam pa ste/ de yang rnam pa nyi shu'o/ /nyi shu gang zhe na/ sangs rgyas dang / chos dang / dge 'dun la lhag par dad cing sems pa mchog gi bsam pa dang / byang chub sems dpa'i tshul khrims kyi sdom pa yang dag par blang ba la lhag par sems pa'i tshul khrims kyi bsam pa dang / sbyin pa dang / bzod pa dang / brtson 'grus dang / bsam gtan dang / shes rab yang dag par grub par bya ba'i phyir lhag par sems pa'i pha rol tu phyin pa'i bsam pa dang / chos dang gang zag la bdag med pa dang / don dam pa dang chos kyi de bzhin nyid zab mo la lhag par sems pa yang dag pa'i don gyi bsam pa dang / yang dag par rdzogs pa'i byang chub tu sems rtse gcig tu nges par gyur cing mi 'gyur ba brtan pa'i bsam pa dang / mos pas spyod pa'i sa la lhag pa'i bsam pa ma dag pa'i bsam pa dang / sa dang po nas sa brgyad pa'i bar gyi lhag pa'i bsam pa dag pa dang / mthar phyin pa'i sa ste sa dgu pa dang / bcu pa'i lhag pa'i bsam pa shin tu dag pa dang / sangs rgyas dang byang chub sems dpa' rnams kyi mngon par shes pa bsam gyis mi khyab pa'i mthu la lhag par sems pa dang / sems can rnams dge ba byed du 'jug pa phan pa'i bsam pa dang / bla ma dang sbyin gnas la mi slu ba'i bsam pa dang / byang chub sems dpa' chos mthun par spyod pa dang / 'grogs na bde bar bya ba'i bsam pa dang / nyon mongs pa dang / nye ba'i nyon mongs pa dang bdud kyi las thams cad zil gyis mnan pa dag gi sems kyi dbang du gyur par bya ba'i bsam pa dang / 'du byed thams cad la skyon du lta ba'i bsam pa dang / mya ngan las 'das pa la phan yon du lta ba'i bsam pa dang / byang chub kyi phyogs kyi chos rnams rtag tu bsgom par bya ba'i bsam pa dang / byang chub kyi phyogs kyi chos de dag nyid bsgom pa dang mthun pa'i bar du dben pa la gnas pa'i bsam pa dang / 'jig rten gyi zang zing dang / rnyed pa dang bkur sti la mi lta ba'i bsam pa dang / theg pa chung ngu spangs te theg pa chen po rtogs par bya ba'i bsam pa dang / sems can thams cad kyi don thams cad bya ba'i bsam pa dang nyi shu'o/ /thams cad mkhyen pa'i ye shes yongs su rdzogs par bya'o zhes bya ba ni thams cad mkhyen pa'i ye shes rnam pa gsum ste/ nyan thos dang rang sangs rgyas kyi thams cad mkhyen pa nyid kyi ye shes dang / byang chub sems dpa' rnams kyi lam gyi rnam pa mkhyen pa'i ye shes dang / de bzhin gshegs pa'i rnam pa thams cad mkhyen pa'i ye shes yongs su rdzogs par bya'o/ /zhi gnas dang lhag mthong shes pa yongs su rdzogs par bya'o zhes bya ba la zhi gnas ni stong pa nyid kyi ting nge 'dzin sgom pa la rnam par mi rtog pa'i sems rtse gcig tu gnas pa'o/ /lhag mthong ni de ltar sems rtse gcig tu gnas pa las bying zhing rmugs par mi 'gyur bar shes rab kyis gsal bar byas te/ yang dag pa'i don lhag par mthong bar byed pa'o/ /rig pa gsum yongs su rdzogs par bya'o zhes bya ba ni/ sngon gyi gnas rjes su dran pa'i rig pa dang / tshe 'pho ba dang skye ba shes pa'i rig pa dang / zag pa zad pa shes pa'i rig pa dang gsum mo/ /so so yang dag par rig pa bzhi yongs su rdzogs par bya'o zhes bya ba ni chos so so yang dag par rig pa dang / don so so yang dag par rig pa dang / nges pa'i tshig so so yang dag par rig pa dang / spobs pa so so yang dag par rig pa ste/ de la chos so so yang dag par rig pa ni mdo'i sde la sogs pa zhal nas gsungs pa'i lung gi chos rnams yang dag par rig pa'o/ /don so so yang dag par rig pa ni lung gi chos de rnams kyi don yang dag pa gang yin pa rig pa'o/ /nges pa'i tshig so so yang dag par rig pa ni/ byang chub sems dpa' lha dang klu dang gnod sbyin la sogs pa sems can yin no cog gis smras pa'i skad brda phrad cing / sems can yin no cog gi skad du gsung zhing chos ston pa'o/ /spobs pa so so yang dag par rig pa ni byang chub sems dpa'i spobs pa sus kyang zil gyis mi non pa ste/ gzhan la chos 'dri ba'i spobs pa thogs pa med pa dang / gzhan gyis dris pa'i lan 'debs pa la spobs pa thogs pa med pa dang ldan pa'o/ /mi 'jigs pa bzhi yongs su rdzogs par bya'o zhes bya ba ni mngon par byang chub pa la mi 'jigs pa dang / zag pa zad pa la mi 'jigs pa dang / bar du gcod pa'i chos nges par bstan pa la mi 'jigs pa dang / nges par 'byung ba'i lam bstan pa la mi 'jigs pa ste/ de la mngon par byang chub pa la mi 'jigs pa ni/ de bzhin gshegs pas chos thams cad kun rdzob dang / don dam pa'i mtshan nyid du phyin ci ma log par thugs su chud de mngon par byang chub la/ lha 'am/ bdud dam/ tshangs pa'am/ dge sbyong dang bram ze la sogs pa mthu dang rdzu 'phrul dang yon tan dang ldan pa shes rab bsnyems pa gang yang rung ba 'ga' zhig gis/ mngon par byang chub pa ma yin no zhes rgal ba'i gzhi dang / gtan tshigs med de brgal du dogs pa med pas na/ mngon par rdzogs par byang chub pa la mi 'jigs pa zhes bya'o/ /zag pa zad pa la mi 'jigs pa ni/ de bzhin gshegs pas 'dod chags la sogs pa'i nyon mongs pa'i zag pa rnams bag chags yan chad spangs te/ zad par mkhyen pa la zag pa ma zad do zhes sus kyang sun dbyung zhing gtan tshigs kyis brgal du med de/ mi dogs shing mi 'jigs pa ni bag med pa dang / ngo tsha mi shes pa dang / khrel med pa la sogs pa'i chos rnams 'phags pa'i lam dang / dge ba'i phyogs kyi bar du gcod pa yin no zhes bshad pa la thog tu ma bab pa med pas na sus kyang bar du gcod pa'i chos ma yin no zhes gtan tshigs kyis brgal du med de/ mi 'jigs shing mi dogs pa'o/ /nges par 'byung ba'i lam bstan pa la mi 'jigs pa ni/ de bzhin gshegs pas nges par 'byung ba'i lam mya ngan las 'das pa thob par 'gyur ba'i rgyu yin par bshad pa la/ dge sbyong dang bram ze sus kyang nges par 'byung ba'i lam ma yin no zhes rgal zhing gzhan du bsgyur du med de/ mi dogs shing mi 'jigs pa'o/ /ma nyams pa'i mngon par shes pa lnga yongs su rdzogs par bya'o zhes bya ba ni 'gro ba'i 'chi 'pho dang / skye ba thams cad du mngon par shes pa lnga dang ldan pas mngon par shes pa nyams pa med pa'i phyir mngon par shes pa ma nyams pa zhes bya'o/ /pha rol tu phyin pa drug yongs su rdzogs par bya'o zhes bya ba ni pha rol tu phyin pa drug sngar yang bshad mod kyi/ 'on kyang 'dir sems can yongs su smin par byed pa'i skabs su gtogs pa yang bshad do/ /nor bdun yongs su rdzogs par bya'o zhes bya ba ni/ dad pa dang / tshul khrims dang / thos pa dang / gtong ba dang / shes rab dang / ngo tsha shes pa dang / khrel yod pa rnams so/ /skyes bu chen po'i rnam par rtog pa brgyad yongs su rdzogs par bya'o zhes bya ba ni/ byang chub sems dpa' rnams 'di ltar rnam par rtog ste/ nam zhig sems can thams cad kyi sdug bsngal thams cad sel nus snyam du rnam par rtog pa dang / nam zhig dbul bas sdug bsngal ba'i sems can rnams 'byor pa chen po la 'jog nus snyam du rnam par rtog pa dang / nam zhig sha khrag dang bcas pa'i lus kyis sems can rnams kyi don byed nus snyam du rnam par rtog pa dang / sems can dmyal ba na yun ring por gnas pas kyang / nam zhig sems can rnams la phan pa byed pa 'ba' zhig tu 'gyur snyam du rnam par rtog pa dang / nam zhig 'jig rten pa dang / 'jig rten las 'das pa'i 'byor pas 'jig rten thams cad kyi re ba yongs su rdzogs pa mthong bar 'gyur snyam du rnam par rtog pa dang / nam zhig bdag sangs rgyas su gyur nas sems can thams cad 'khor ba'i sdug bsngal thams cad las yang dag par 'byin par 'gyur snyam du rnam par rtog pa dang / sems can thams cad la phan 'dogs pa med pa'i skye ba dang / sems can gyi don du sbyor ba med pa'i sems dang / don dam pa'i ro gcig pu la spyod pa dang / skye bo thams cad sim par byed pa ma yin pa'i tshig dang / gzhan la mi phan pa'i 'tsho ba dang / gzhan la phan pa byed mi nus pa'i lus dang / gzhan la phan 'dogs pa la mi gsal ba'i blo dang / sems can la phan par mi spyod pa'i nor dang / 'gro ba rnams kyi don spyod pa med pa'i dbang phyug dang / gzhan la gnod pa byed pa'i dga' bar tshe rabs tshe rabs su ma gyur cig snyam du rnam par rtog pa dang / srog chags thams cad kyi sdig pa'i las thams cad kyi 'bras bu bdag la smin la/ bdag gis legs par spyad pa'i 'bras bu thams cad sems can thams cad la smin par gyur cig snyam du rnam par rtog pa ste/ 'di dag ni skyes bu chen po'i rnam par rtog pa brgyad do/ /sems can gyi gnas dgu yongs su rdzogs par bya'o zhes bya ba ni de ltar rnam par rtog pa na rnam par rtog pa de dag 'bras bu yod par bya ba dang / snying rjes 'jig rten pa rnams la bltas nas/ gzhan la phan pa bsgrub par bya ba dang / shes rab kyis mi dmigs pa yid la byed pa bsgom par bya ba dang / sems can gyi 'jig rten dang snod kyi 'jig rten yongs su brtag pa'i phyir/ sems can gyi gnas dgu bsgom par bya'o/ /sems can gyi gnas dgu po de dag kyang gang zhe na/ lus tha dad cing 'du shes tha dad pa dag dper na mi rnams dang lha kha cig go/ /lus tha dad pa la 'du shes gcig pa dag dper na tshangs ris kyi lha dag dang po 'byung ba'o/ /lus gcig la 'du shes tha dad pa dag dper na 'od gsal ba rnams so/ /lus gcig la 'du shes gcig pa dag dper na dge rgyas kyi lha rnams so/ /nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med pa'i sems can rnams so/ /de ltar bar du gcod pa med par sems can yongs su smin par bya ba'i spyod pa bstan nas/ de'i 'og tu sangs rgyas kyi chos yongs su smin pa'i spyod pa bstan par bya ste/ de yang de bzhin gshegs pa'i stobs bcu yongs su rdzogs par bya'o zhes bya ba la sogs pas bstan to/ /de la de bzhin gshegs pa'i stobs bcu gang zhe na/ gnas dang gnas ma yin pa mkhyen pa'i stobs dang / las kyi rnam par smin pa mkhyen pa'i stobs dang / mos pa sna tshogs mkhyen pa'i stobs dang / khams sna tshogs mkhyen pa'i stobs dang / dbang po mchog dang mchog ma yin pa mkhyen pa'i stobs dang / thams cad du 'gro ba'i lam mkhyen pa'i stobs dang / bsam gtan dang / rnam par thar pa dang / ting nge 'dzin dang snyoms par 'jug pa'i kun nas nyon mongs pa dang / rnam par byang ba dang ldan pa thams cad mkhyen pa'i stobs dang / sngon gyi gnas rjes su dran pa mkhyen pa'i stobs dang / tshe 'pho ba dang / skye ba mkhyen pa'i stobs dang / zag pa zad pa mkhyen pa'i stobs so/ /sangs rgyas kyi chos ma 'dres pa bco brgyad yongs su rdzogs par bya'o zhes bya ba ni/ de bzhin gshegs pa la 'khrul pa med pa dang / ca co med pa dang / bsnyel ba med pa dang / sems mnyam par ma bzhag pa med pa dang / tha dad pa'i 'du shes med pa dang / so sor ma brtags pa'i btang snyoms med pa dang / 'dun pa nyams pa med pa dang / brtson 'grus nyams pa med pa dang / dran pa nyams pa med pa dang / ting nge 'dzin nyams pa med pa dang / shes rab nyams pa med pa dang / rnam par grol ba nyams pa med pa dang / lus kyi las thams cad ye shes sngon du 'gro zhing ye shes kyi rjes su 'brang ba dang / ngag gi las thams cad ye shes sngon du 'gro zhing ye shes kyi rjes su 'brang ba dang / yid kyi las thams cad ye shes sngon du 'gro zhing ye shes kyi rjes su 'brang ba dang / 'das pa'i dus la ma chags ma thogs pa'i ye shes mthong ba la 'jug pa dang / ma 'ongs pa'i dus la ma chags ma thogs pa'i ye shes mthong ba la 'jug pa dang / da ltar byung ba'i dus la ma chags ma thogs pa'i ye shes mthong ba la 'jug pa'o/ /byams pa chen po yongs su rdzogs par bya'o zhes bya ba la sogs pas ni tshad med pa bzhi yongs su rdzogs par bya ba bstan pa ste/ tshad med pa bzhi sngar bstan pa ni/ sems can yongs su smin par bya ba'i spyod pa'i skabs su bstan/ 'di ni sangs rgyas kyi chos yongs su smin par bya ba'i skabs su bstan pas lan gnyis su zlos pa la nyes pa med do/ /de bzhin gshegs pa'i stobs bcu la sogs pa de dag kyang 'og nas rgyas par 'chad do/ /gos pa med par sangs rgyas kyi chos yongs su smin pa'i spyod pa bshad zin to/ /de ltar mgo smos pas go ba'i gdul ba rnams kyi don du mdor bshad pa mdzad nas/ mdor bshad pa de nyid las glengs te dkar po'i chos thams cad bstan pas gzhi bzung nas/ rnam par mi rtog pa'i pha rol tu phyin pa'i spyod pa la sogs pa spyod pa rnam pa bzhi bstan pas rnam par spros na go ba'i gdul ba rnams kyi don du 'bring du bshad pa'i sgo bstan pa'i phyir/ rnam pa thams cad mkhyen pa'i ye shes rnam pa'i mchog thams cad dang ldan pa mngon par rdzogs par 'tshang rgya bar 'dod pa'i byang chub sems dpa' sems dpa' chen pos shes rab kyi pha rol tu phyin pa la brtson par bya'o zhes bya ba la sogs pa gsungs te/ 'bring du bstan pa de yang don rnam pa brgyad kyis bstan to/ /brgyad gang zhe na/ gang gi phyir brtson par bya ba dang / ji ltar brtson par bya ba dang / brtson par byed pa rnams kyi mtshan nyid dang / brtson par byed pa rnams kyi rab tu dbye ba dang / brtson pa la gdams pa dang / brtson pa'i phan yon dang / brtson pa'i rab tu dbye ba dang / bshad pa 'di gtan la dbab pa dang rnam pa 'di brgyad do/ /de la gang gi phyir brtson par bya ba zhes bya ba la/ byang chub sems dpa' rnams kyi 'dod pa ni rnam pa gsum ste/ theg pa gsum bsgom par 'dod pa dang / byang chub sems dpa'i che ba'i bdag nyid 'dod pa dang / sangs rgyas kyi che ba'i bdag nyid 'dod pa ste/ 'dod pa de dag thob par bya ba'i phyir shes rab kyi pha rol tu phyin pa la brtson par bya ba ni/ gang gi phyir brtson par bya ba bstan pa'o/ /de la thams cad mkhyen pa'i ye shes rnam pa'i mchog thams cad dang ldan pa zhes bya ba ni/ sangs rgyas bcom ldan 'das rnams kyi ye shes rdo rje lta bu'i ting nge 'dzin gyis bsdus pa rnam par mi rtog pa'i ye shes la/ rnam pa thams cad mkhyen pa nyid ces bya ste/ de la rnam pa thams cad ni skye ba med pa dang / 'gag pa med pa dang / gzod ma nas zhi ba dang / rang bzhin gyis mya ngan las 'das pa dang / dngos po med pa'i ngo bo nyid dang / stong pa nyid dang / mtshan ma med pa dang / smon pa med pa la sogs pa ste/ rnam pa de dag thams cad kyi rnam pa'i mchog ni rnam pa'i gtso bo stong pa nyid kyi rnam pa de rnam pa gzhan dag gi rtsa bar gyur pa'i phyir ro/ /de bas na rnam pa thams cad kyi mchog gi rnam pa dang ldan pa rnam par mi rtog pa dmigs par bya ba dang / dmigs par byed pa'i dngos po ma nyams pas/ mnyam pa nyid du 'jug pa ni rnam pa thams cad mkhyen pa'i ye shes yin par bstan te/ ye shes de lta bu mngon par byang chub par 'dod pa ni/ thams cad mkhyen pa'i ye shes rnam pa thams cad kyi mchog dang ldan pa mngon par rdzogs par 'tshang rgya bar 'dod pa zhes bya'o/ /lam gyi rnam pa shes pa nyid ces bya ba ni byang chub sems dpa' rnams kyi lam gyi rnam pa shes pa nyid yongs su rdzogs par bya ba bstan to/ /thams cad shes pa nyid ces bya ba ni nyan thos dang / rang sangs rgyas rnams kyis ye shes thob par bya ba bstan pa'o/ /sems can thams cad kyi sems dang spyod pa dang shes pa'i rnam pa shes pa nyid ces bya ba ni byang chub sems dpa' rnams kyi lam gyi rnam pa shes pa nyid kyi 'bras bu bstan te/ byang chub sems dpa' rnams ni lam gyi rnam pa shes pa nyid yongs su rdzogs par byed cing sems can rnams kyi sems dang spyod pa rnams rtogs nas sems can la phan pa sgrub pa'i phyir ro/ /bag chags kyi mtshams sbyor ba'i nyon mongs pa thams cad spang bar 'dod ces bya ba ni rnam pa thams cad mkhyen pa'i ye shes rnam pa'i mchog thams cad dang ldan pa'i 'bras bu bstan pa ste/ de la bag chags ni rnam pa gsum ste/ las kyi bag chags dang / nyon mongs pa'i bag chags dang / tshe'i bag chags dang rnam pa gsum mo/ /mtshams sbyor ba yang rnam pa gsum ste/ las kyi mtshams sbyor ba dang / nyon mongs pa'i mtshams sbyor ba dang / tshe'i mtshams sbyor ba dang rnam pa gsum ste/ rten cing 'brel par 'byung ba ni mtshams sbyor ba zhes bya'o/ /de ltar bag chags thams cad dang / mtshams sbyor ba thams cad dang / nyon mongs pa thams cad spang bar 'dod pas/ shes rab kyi pha rol tu phyin pa la brtson par bya'o zhes bya ba dang sbyar ro/ /byang chub sems dpa'i skyon med pa la 'jug par 'dod pas zhes bya ba la sogs pas byang chub sems dpa'i yon tan gyi che ba'i bdag nyid bstan to/ /de la byang chub sems dpa'i yon tan yang rnam pa bzhir bstan te/ ma dag pa'i yon tan dang / dag pa'i yon tan dang / so so yang dag par rig pa'i sa'i yon tan dang / mthar thug pa la gnas pa'i sa'i yon tan rnams so/ /de la sa dang po nas sa bdun gyi bar du ni yid la byed pa rtsol ba dang bcas pa'i phyir ma dag pa'o/ /sa brgyad pa la sangs rgyas kyi sku mngon par sgrub pa dang / de bzhin nyid khong du chud pa la sogs pa ni sa'i yon tan dag pa rnams so/ /sa dgu pa la rdul phra rab kyi rdul shes pa la sogs pa ni so so yang dag par rig pa'i sa'i yon tan rnams so/ /sa bcu pa la 'das pa dang / ma byon pa dang / da ltar byung ba'i sangs rgyas bcom ldan 'das rnams kyi sangs rgyas kyi yon tan rnams thob par 'dod pa la sogs pa ni mthar thug par gnas pa'i sa'i yon tan rnams so/ /de la byang chub sems dpa'i skyon med pa la 'jug par 'dod pa zhes bya ba ni/ nyan thos dang rang sangs rgyas kyi sa las ldog pa la byang chub sems dpa'i skyon med pa zhes bya'o/ /nyan thos dang rang sangs rgyas kyi sa shes par 'dod pa zhes bya ba ni yon tan rnams kyis lhag pa'i phyir/ nyan thos dang rang sangs rgyas kyi sa rnams shes nas/ sa de dag las 'das par 'dod ces bya ba'i tha tshig ste/ sa'i ye shes la zhugs pa'i byang chub sems dpa' rnams ni yon tan rnam pa bzhis nyan thos dang rang sangs rgyas las 'das pa yin te/ bzhi gang zhe na/ dbang po'i khyad par dang / sgrub pa'i khyad par dang / ye shes kyi khyad par dang / 'bras bu'i khyad par rnams so/ /de la nyan thos ni rang bzhin gyis dbang po rtul po yin/ rang sangs rgyas ni dbang po bar ma yin/ byang chub sems dpa' ni dbang po rnon po yin no/ /de ni dbang po'i khyad par ro/ /nyan thos dang rang sangs rgyas ni bdag gi don lhur len pa/ bdag gi don nyid sgrub cing bdag la phan pa 'ba' zhig mthar phyin par byed do/ /byang chub sems dpa' rnams ni bdag dang gzhan gnyi ga'i don lhur len pa/ bdag dang gzhan gyi don nyid bsgrubs nas/ bdag dang gzhan la phan pa nyid mthar phyin par mdzad de/ de ni sgrub pa'i khyad par ro/ /nyan thos dang rang rgyal rnams ni chos rnams la mi rtag pa dang / sdug bsngal ba dang / stong pa dang / bdag med pa'i nyid du rtogs te/ byang chub sems dpa' rnams ni bdag dang gzhan la phan par mdzad pa la zhugs pa'i phyir rig pa'i gnas thams cad la mkhas pa dang / sems can gyi don rnam pa du ma bsgrubs nas/ de'i 'og tu chos thams cad dmigs su med pa'i mtshan nyid du rtogs par mdzad de/ de ni ye shes kyi khyad par ro/ /nyan thos dang rang sangs rgyas rnams ni nyon mongs pa'i sgrib pa rnam par dag pa nyid thob nas phung po lhag ma med pa'i mya ngan las 'das pa thob par byed do/ /byang chub sems dpa' rnams ni nyon mongs pa'i sgrib pa dang / shes bya'i sgrib pa dang gnyi ga spangs nas/ mi gnas pa'i mya ngan las 'das pa bsgrubs te/ 'khor ba'i mtha'i bar du sems can la phan pa'i don 'ba' zhig mdzad de/ de ni 'bras bu'i khyad par ro/ /phyir mi ldog pa'i sa la gnas par 'dod pas zhes bya ba ni byang chub tu sems bskyed pa dag /phyis byang chub kyi sems las ldog pa ni/ rgyu rnam pa bzhis 'gyur te/ byang chub sems dpa'i rigs dang mi ldan pa'am/ sdig pa'i grogs pos yongs su zin pa'am/ snying rje chung ba'am/ 'khor ba'i sdug bsngal shin tu yun ring zhing mi bzod pas 'jigs pa'i phyir byang chub kyi sems las ldog par srid de/ rgyu de bzhi char yang sar chud pa'i byang chub sems dpa' la med do/ /de bas na sa rab tu dga' ba la sogs pa la phyir mi ldog pa'i sa zhes bya'o/ /mngon par shes pa drug la gnas par 'dod pas zhes bya ba ni/ mngon par shes pa lnga sngar smos pa'i steng du/ zag pa zad pa shes pa dang drug la mngon par shes pa drug ces bya'o/ /sems can thams cad kyi sems dang spyod pa rnam par g.yo ba shes par 'dod pas zhes bya ba ni byang chub sems dpa' sems can gyi don lhur len pas/ sems can gyi sems la ci sems pa dang / spyod pa gang la dad pa la sogs pa ji lta ba bzhin du shes nas/ de dag gi don bya dgos pas de skad ces gsungs so/ /nyan thos dang rang sangs rgyas thams cad kyi ye shes zil gyis mnan par 'dod pas zhes bya ba ni nyan thos dang rang sangs rgyas kyi ye shes gang zag la bdag med pa tsam shes pa ste/ byang chub sems dpa'i ye shes gang zag dang chos gnyis ka la bdag med par rtogs pas zil gyis mnan par 'dod pas zhes bya ba'i tha tshig go/ /gzungs kyi sgo dang ting nge 'dzin gyi sgo mang po thob par 'dod pas zhes bya ba ni sngags kyi gzungs dang don gyi gzungs la sogs pa dang / dpa' bar 'gro ba la sogs pa'i ting nge 'dzin rnams ni byang chub sems dpa'i sa rnams thob par bya ba dang / sangs rgyas kyis thob par bya ba'i rgyu dang sgo yin pa'i phyir gzungs dang ting nge 'dzin gyi sgo zhes bya'o/ /nyan thos dang rang sangs rgyas kyi theg pa pa'i rigs kyi bu dang rigs kyi bu mo sbyin pa gtong ba thams cad kyi dge ba'i rtsa ba de dag thams cad rjes su yi rang ba dang ldan pa'i sems bskyed pa gcig gis zil gyis mnan par 'dod pas zhes bya ba ni/ nyan thos dang rang sangs rgyas dag gi sbyin pa byed pa'i sems de ni sred pa dang bcas shing / rnam par rtog pa dang bcas pa'i phyir srid pa'i 'bras bu dang bdag gi don du byed pas dag pa ma yin gyi/ byang chub sems dpa'i rjes su yi rang ba'i sems ni/ sred pa med pa dang / rnam par mi rtog pa dang / mtshan ma'i spyod yul ma yin pa dang / bdag dang gzhan la phan pa bsgrub pa ste/ yon tan de dag gis 'phags pa'i phyir zil gyis gnon to/ /de bzhin du tshul khrims la sogs pa gzhan rnams la yang sbyar bar bya'o/ /sems can thams cad kyi don du sbyin pa chung ngu byin yang / thabs mkhas pas rnam pa thams cad mkhyen pa nyid du yongs su bsngo ba'i tshul gyis ji lta bur na tshad med grangs med dpag tu med par 'gyur snyam na yang zhes bya ba ni sems can tshad med pa dang rnam pa thams cad mkhyen pa nyid dpag tu med pa'i phyir/ thabs mkhas pas yongs su bsngos pas yo byad dang mi ldan te/ sbyin pa chung ngu byin kyang / sbyin pa'i gnas tshad med grangs med pa dang / bsngo ba'i dmigs pa dpag tu med pa dang / 'khor gsum yongs su dag pa'i phyir/ 'bras bu tshad med pa grangs med dpag tu med par 'gyur bar 'dod pas zhes bya ba'i tha tshig go/ /de bzhin du tshul khrims nas shes rab kyi pha rol tu phyin pa'i bar du sbyar bar bya'o/ /sha ra dwa ti'i bu gzhan yang byang chub sems dpa' sems dpa' chen po sbyin pa'i pha rol tu phyin pa la gnas par 'dod pa dang / sbyin pa'i pha rol tu phyin pa yongs su rdzogs par bya bar 'dod pas zhes bya ba ni 'khor gsum yongs su ma dag pa'i sbyin pa spyod pa ni sbyin pa la gnas pa'o/ /'khor gsum yongs su dag pa'i tshe ni/ sbyin pa'i pha rol tu phyin pa yongs su rdzogs pa zhes bya'o/ /tshul khrims kyi pha rol tu phyin pa la sogs pa pha rol tu phyin pa lhag ma lnga rnams la yang de bzhin du sbyar bar bya'o/ /sha ra dwa ti'i bu gzhan yang byang chub sems dpa' sems dpa' chen pos sems 'di ltar bskyed de/ ji ltar na tshe rabs thams cad du bdag gis sangs rgyas kyi sku mthong bar 'gyur zhes bya ba ni de bzhin gshegs pa'i chos kyi sku dang / gzugs kyi sku mngon sum du mthong bar 'dod pa dang / mthong nas kyang sangs rgyas kyis dge ba la bskul bar 'dod pa dang / sangs rgyas kyis dgongs par 'dod pa dang / sangs rgyas mnyes par 'gyur bar 'dod pa dang / sangs rgyas kyis yongs su gzung bar 'dod pas shes rab kyi pha rol tu phyin pa la bslab par bya'o zhes bya ba'i don to/ /sangs rgyas kyi sku yongs su bsgrub par 'dod pas zhes bya ba la sogs pas/ sa brgyad pa'i yon tan rnam par dag pa rnams thob par 'dod pa'i bsam pa bstan te/ de la skyes bu chen po'i mtshan sum cu rtsa gnyis dang / dpe byad bzang po brgyad cu'i 'og nas 'chad pas 'dir ma bshad do/ /tshe rabs dran par 'dod pa dang / byang chub kyi sems mi stor ba thob par 'dod pa la sogs pa go sla ba rnams kyang ma bshad do/ / de la bshad dgos pa rnams bshad par bya ste/ dge ba'i sems bskyed pa gcig 'ga' yang snying po byang chub la nam 'dug gi bar du mi zad par bya bar 'dod pas zhes bya ba ni chu'i thigs pa gcig rgya mtsho'i nang du blugs pa zad par mi 'gyur ba bzhin du/ rnam pa thams cad mkhyen pa nyid du yongs su bsngos pa yang 'khor ba'i mtha'i bar du sems can gyi don byed pa'i phyir mi zad pa zhes bya'o/ /sangs rgyas kyi skye ba rgyun mi gcad pa'i don du gnas par 'dod pas zhes bya ba ni/ sa brgyad pa la gnas pa'i byang chub sems dpa' phyir mi ldog pa yin pas/ sangs rgyas skye ba rgyun mi 'chad pa'i phyir ro/ /byang chub sems dpa'i rigs yongs su bsrung 'dod pas zhes bya ba yang phyir mi ldog pa'i sa yin pas byang chub sems dpa'i rigs las mi nyams par srung bar gyur pa'i phyir ro/ /sangs rgyas kyi rigs rgyun mi gcad pa'i don du gnas par 'dod pas zhes bya ba ni/ sa brgyad pa la gnas pa'i byang chub sems dpa' sangs rgyas su nges par lung bstan pa yin pas na/ sangs rgyas kyi rigs rgyun mi 'chad pa ste/ de ltar sangs rgyas kyi rigs rgyun mi 'chad par 'dod pas kyang shes rab kyi pha rol tu phyin pa 'di la bslab par bya'o zhes bya ba'i tha tshig go/ /nang stong pa nyid la gnas par 'dod pas zhes bya ba ni nang gi chos mig dang / rna ba dang / sna dang / lce dang / lus dang / yid rnams te/ de la mig mig gis stong zhes bya ba la sogs pa ni nang stong pa nyid do/ /phyi stong pa nyid ces bya ba ni/ phyi'i chos gzugs sgra dri ro reg bya chos rnams te/ gzugs ni gzugs kyis stong ngo zhes bya ba la sogs pa lta bu'o/ /phyi nang stong pa nyid ces bya ba ni nang gi skye mched drug dang / phyi'i skye mched drug rnams ni phyi nang gi chos yin te/ de la nang gi chos rnams ni phyi'i chos rnams kyis stong / phyi'i chos rnams kyang nang gi chos rnams kyis stong ngo zhes bya ba lta bu'o/ /stong pa nyid stong pa nyid ces bya ba ni chos thams cad stong pa nyid gang yin pa'i stong pa nyid de yang yod pa ma yin te stong pa'i phyir/ stong pa nyid stong pa nyid ces bya'o/ / chen po stong pa nyid ces bya ba ni shar gyi phyogs shar gyi phyogs kyis stong ngo zhes bya ba nas/ steng gi phyogs steng gi phyogs kyis stong ngo zhes bya ba la sogs pa snod kyi 'jig rten chen po stong pa nyid gang yin pa'o/ /don dam pa stong pa nyid ces bya ba la/ don dam pa ni mya ngan las 'das pa ste/ mya ngan las 'das pa yang don dam par yod pa ma yin pas/ mya ngan las 'das pa nyid kyis stong pa nyid gang yin pa'o/ /'dus byas stong pa nyid ces bya ba la/ 'dus byas ni 'dod pa'i khams dang / gzugs kyi khams dang / gzugs med pa'i khams kyi chos rnams te/ de dag kyang 'dod pa'i khams ni 'dod pa'i khams kyis stong ngo zhes bya ba la sogs pa'o/ /'dus ma byas stong pa nyid ces bya ba la/ 'dus ma byas zhes bya ba ni gang la skye ba yang med/ 'gag pa yang med/ gnas pa las gzhan du 'gyur ba yang med pa ste/ de la 'dus ma byas pa yang 'dus ma byas pa nyid kyis stong ngo zhes bya ba lta bu'o/ /mtha' las 'das pa stong pa nyid ces bya ba ni sems can la sogs pa dngos po gang gis mtha' dmigs su med pa de la mtha' las 'das pa zhes bya ste/ mtha' las 'das pa nyid mtha' las 'das pa'i rang bzhin gyis stong ngo zhes bya ba lta bu'o/ /thog ma dang tha ma med pa stong pa nyid ces bya ba ni 'khor ba la sogs pa dngos po gang gis thog ma 'ong ba dang / tha ma 'gro ba dmigs su med pa ste/ thog ma dang tha ma med pa nyid thog ma dang tha ma med pa nyid kyis stong ngo zhes bya ba la sogs pa lta bu'o/ /dor ba med pa stong pa nyid ces bya ba ni mi gnas pa'i mya ngan las 'das pa'i tshe na yang dge ba mi zad par bya ba'i phyir dor ba gang yang med pa ste/ dor ba med pa nyid dor ba med pa'i rang bzhin gyis stong pa'o/ /rang bzhin stong pa nyid ces bya ba ni 'dus byas dang 'dus ma byas pa'i chos rnams kyi rang bzhin ni/ nyan thos dang / rang sangs rgyas dang / byang chub sems dpa' rnams dang / de bzhin gshegs pa rnams gang gis kyang ma byas te rang bzhin gyis stong pa'o/ /chos thams cad stong pa nyid ces bya ba la chos thams cad ces bya ba ni/ phung po dang / khams dang / skye mched dang / gzugs can dang / gzugs med pa dang / 'dus byas dang / 'dus ma byas pa la sogs pa ste/ chos de dag thams cad chos thams cad kyi rang bzhin gyis stong pa gang yin pa'o/ /rang gi mtshan nyid stong pa nyid ces bya ba la gzugs kyi mtshan nyid ni gzugs su yod pa/ tshor ba'i mtshan nyid ni bde ba dang / sdug bsngal ba dang / bde ba yang ma yin sdug bsngal ba yang ma yin pa myong ba/ 'du shes kyi mtshan nyid ni mtshan mar 'dzin pa/ rnam par shes pa'i mtshan nyid ni bye brag tu rnam par phye ste shes pa/ phung po rnams kyi mtshan nyid ni sdug bsngal ba/ khams kyi mtshan nyid ni myur ba'i dug dang 'dra ba/ skye mched kyi mtshan nyid ni rnam par shes pa skye ba'i sgo zhes bya ba la sogs pa chos rnams kyi rang gi mtshan nyid rnams rang gi mtshan nyid kyis stong pa gang yin pa'o/ /mi dmigs pa stong pa nyid ces bya ba ni/ gang 'das pa yang mi dmigs/ ma 'ongs pa yang mi dmigs/ da ltar byung ba yang mi dmigs te/ mi dmigs pa de nyid mi dmigs pa'i rang bzhin gyis stong pa nyid gang yin pa'o/ /dngos po med pa stong pa nyid ces bya ba ni de ltar chos thams cad mi dmigs te/ dngos po med pa gang yin pa de'i rang bzhin yod snyam du sems pa las bzlog pa'i phyir dngos po med pa de yang dngos po med pa'i rang bzhin gyis stong ngo zhes bya ba'i don to/ /ngo bo nyid stong pa nyid ces bya ba la/ ngo bo nyid ni bdag gi ngo bo nyid dang / gzhan gyi ngo bo nyid de dag dang gzhan gyi ngo bo nyid ces bya ba de yang / bdag dang gzhan gyi ngo bo nyid kyis stong pa gang yin pa'o/ /dngos po med pa'i ngo bo nyid stong pa nyid ces bya ba ni/ 'dus byas dang / 'dus ma byas pa'i chos rnams dngos po med pa'o zhes bshad pa dang / dngos po med pa'i ngo bo nyid yod snyam du rnam par rtog pa skye ba las bzlog pa'i phyir/ dngos po med pa'i ngo bo nyid kyang yod pa ma yin te stong pa nyid do zhes bya ba'i tha tshig go/ /stong pa nyid de lta bu la gnas par 'dod pas shes rab kyi pha rol tu phyin pa la bslab par bya'o zhes thams cad la sbyar bar bya'o/ /stong pa nyid 'di rnams kyang rang bzhin ni gcig tu zad pa las/ bye brag tu phye ba ste bco brgyad du bshad pa ni/ phyi nang gi dngos po rnams la mtshan mar 'dzin pa las bzlog pa dang / rnal 'byor pa'i sems dang / yid la byed pa'i khyad par las sgro btags te rnam pa bco brgyad du bshad do/ /dmigs pa dang / dbang dang / de ma thag pa dang / rgyu'i rkyen khong du chud par 'dod pas zhes bya ba ni rkyen bzhi rtogs par 'dod pas zhes bya ba'i tha tshig ste/ rnam par shes pa skye ba'i rkyen bzhi la/ gzugs la sogs pa yul drug ni dmigs pa'i rkyen to/ /mig gi dbang po la sogs pa dbang po drug ni dbang gi rkyen to/ /rnam par shes pa drug 'das pa'i de ma thag pa ni de ma thag pa'i rkyen to/ /kun gzhi rnam par shes pa ni rgyu'i rkyen te/ rkyen de rnams kun rdzob dang / don dam pa'i mtshan nyid du phyin ci ma log par rtogs par 'dod pas zhes bya ba'i tha tshig go/ / rnam pa dang mtshan nyid ces bya ba ni 'dus byas dang / 'dus ma byas pa'i chos rnams kyi don dam pa dang / kun rdzob kyi rnam pa dang mtshan nyid rtogs par 'dod pas zhes bya ba'i don to/ /chos thams cad kyi de bzhin nyid ces bya ba la sogs pa la/ de bzhin nyid la ni tha dad pa med mod kyi de'i gzhi dang 'jug pa tha dad pa las rnam pa gsum du dbye ste/ de la 'jug pa tha dad pa rnam pa gsum ni/ byang chub sems dpa' rnams kyi lam gyi rnam pa mkhyen pa nyid dang / sangs rgyas bcom ldan 'das rnams kyi rnam pa thams cad mkhyen pa nyid dang / nyan thos dang / rang sangs rgyas rnams kyi thams cad shes pa nyid kyis 'jug pa'o/ /de la chos thams cad kyi de bzhin nyid ces bya ba ni/ phyi nang gi chos gzugs dang sgra la sogs pa'i yongs su grub pa'i ngo bo nyid gang yin pa de la/ chos thams cad kyi de bzhin nyid ces bya'o/ /ma nor ba de bzhin nyid dang / gzhan ma yin pa de bzhin nyid dang / 'gyur ba med pa'i de bzhin nyid dang / yang dag pa ji lta ba'i de bzhin nyid dang / de bzhin nyid bzhi po 'di yang chos thams cad kyi de bzhin nyid la/ byang chub sems dpa' rnams kyi lam gyi rnam pa mkhyen pa nyid kyis phyin ci ma log par rtogs pa'i rnam grangs tsam du zad de/ de dag ni byang chub sems dpa' rnams kyi lam gyi rnam pa mkhyen pa nyid kyis 'jug pas khong du chud par 'dod pa bstan to/ /chos thams cad kyi chos kyi dbyings khong du chud par 'dod pas zhes bya ba ni chos kyi sku'i rang bzhin ni stobs dang / mi 'jigs pa la sogs pa sangs rgyas kyi chos thams cad kyi gzhi yin pa'i phyir chos kyi dbyings zhes bya ste/ chos kyi dbyings de lta bu de bzhin gshegs pa'i rnam pa thams cad mkhyen pa'i ye shes kyi 'jug pas khong du chud par 'dod pas shes rab kyi pha rol tu phyin pa 'di la bslab par bya'o zhes bya ba'i tha tshig go/ /chos thams cad kyi yang dag pa'i mtha' khong du chud par 'dod pas zhes bya ba ni/ nyan thos dang / rang sangs rgyas rnams kyi phung po'i lhag ma med pa'i mya ngan las 'das pa ni/ yang dag pa'i mtha'i de bzhin nyid ces bya ste/ yang dag pa'i mtha'i de bzhin nyid de lta bu nyan thos dang rang sangs rgyas rnams kyi thams cad shes pa nyid kyi 'jug pas khong du chud par 'dod pas zhes bya ba'i don to/ /de dag gis sa brgyad pa'i byang chub sems dpa'i yon tan thob par 'dod pa bstan to/ /stong gsum gyi stong chen po'i 'jig rten gyi khams gang+gA'i klung gi bye ma snyed cig yod pa de dag thams cad shes par 'dod pas zhes bya ba la sogs pa nas/ pha rol tu phyin pa drug yongs su rdzogs par bstan pa'i bar du ni sa dgu pa'i so so yang dag par rig pa'i yon tan thob par 'dod pas shes rab kyi pha rol tu phyin pa 'di la bslab par bya ba bstan pa ste/ de la stong gsum gyi stong chen po'i 'jig rten gyi khams gang+gA'i klung gi bye ma snyed thams cad shes pa dang / stong gsum gyi stong chen po'i 'jig rten gyi khams kyi rgya mtsho chen po la sogs pa'i chu rnams skra'i rtse mo brgyar gshags pas gyen du blang bar 'dod pa la sogs pa ni/ chos so so yang dag par rig pa'i mthus de ltar nus pa bstan pa ste/ skabs 'dir chos so so yang dag par rig pa zhes bya ba/ 'jig rten dang 'jig rten las 'das pa'i chos rnams kun rdzob dang don dam pa'i mtshan nyid du yang dag par rig pa ste/ ji ltar snang zhing grag pa'i chos thams cad don dam par ji ltar snang zhing grag pa bzhin du ma grub pas/ byang chub sems dpa'i sems kyi dbang du gyur te/ kun rdzob tu byang chub sems dpa'i mthu chen po bstan pa'i phyir sa dang / chu dang / me dang / rlung la sogs pa'i chos rnams la dbang du gyur pa bstan to/ /sha ra dwa ti'i bu byang chub sems dpa' sems dpa' chen po shar phyogs kyi 'jig rten gyi khams gang+gA'i klung gi bye ma snyed dag na sems can ji snyed cig 'khod pa de dag thams cad tshul khrims kyi phung po la 'god par 'dod pas zhes bya ba la sogs pas ni nges pa'i tshig so so yang dag par rig pa'i mthu bstan te/ sems can thams cad kyi sgra dang skad mkhyen pas/ de dag gi sgra dang skad du chos bstan te tshul khrims kyi phung po la sogs pa la 'god par 'dod pas shes rab kyi pha rol tu phyin pa la bslab par bya'o zhes bya ba dang sbyar te/ de bzhin du phyogs bcur bsgre bar bya'o/ /sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod cing sbyin pa gtong ba'i tshe 'di ltar bslab par bya ste/ sbyin pa rnam pa 'di ltar byin na ni 'bras bu chen por 'gyur zhes bya ba la sogs pas don so so yang dag par rig pa'i mthu bstan te/ sbyin pa la sogs pa'i chos rnams bshad cing / spyad pa'i don rnams rtogs nas don dam par rtogs pa'i dbang gis ni 'khor gsum yongs su dag par 'gyur/ kun rdzob kyi don rtogs pa'i dbang gis ni 'bras bu chen por 'gyur ro/ /sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ thabs mkhas pas sbyin pa 'di ltar byin na ni sbyin pa'i pha rol tu phyin pa yongs su rdzogs par byed do zhes bya ba la sogs pas sbyin pa'i pha rol tu phyin pa gcig pu'i nang du tshul khrims kyi pha rol tu phyin pa la sogs pa lhag ma lnga rnams 'dus par bstan pa ste/ de la zang zing dang chos dang / mi 'jigs pa gsum las gang yang rung ba cig sbyin par byed pa'i tshe/ 'khor gsum yongs su dag par byin na sbyin pa'i pha rol tu phyin pa yongs su rdzogs par 'gyur ro/ /sbyin pa byed pa de nyid kyi tshe/ srog gcod pa dang / ma byin par len pa la sogs pa spong ba nyid tshul khrims kyi pha rol tu phyin pa yongs su rdzogs pa'o/ /sbyin pa byed pa nyid kyi tshe/ len pa po la sems 'khrug pa med par byams pa dang / snying rje bskyed pa nyid bzod pa'i pha rol tu phyin pa yongs su rdzogs pa'o/ /sbyin pa byed pa nyid kyi tshe/ bdag gi lag dar cing sbyin pa bya bar spro ba'i sems bskyed pa nyid brtson 'grus kyi pha rol tu phyin pa yongs su rdzogs pa'o/ /sbyin pa byed pa nyid kyi tshe/ sems gzhan du ma yengs shing rtse gcig tu gyur pa nyid bsam gtan gyi pha rol tu phyin pa yongs su rdzogs pa'o/ /sbyin pa byed pa nyid kyi tshe/ 'khor gsum yongs su dag par byed pa nyid shes rab kyi pha rol tu phyin pa yongs su rdzogs pa'o/ /de ltar sa dgu pa'i yon tan 'dod pas shes rab kyi pha rol tu phyin pa la brtson par bya ba bstan nas/ da ni sa bcu la mthar thug par gnas pa'i yon tan rnams thob par bya ba'i phyir/ shes rab kyi pha rol tu phyin pa la brtson par bya ba bstan pa/ sangs rgyas bcom ldan 'das 'das pa dang / ma byon pa dang / da ltar byung ba rnams kyi sangs rgyas kyi yon tan thams cad shes par 'dod pa dang / thob par 'dod pas shes rab kyi pha rol tu phyin pa la bslab par bya'o zhes bya ba la sogs pa gsungs so/ /de la sangs rgyas bcom ldan 'das rnams kyi yon tan ni rnam pa gnyis te/ don dam pa'i yon tan dang / kun rdzob kyi yon tan no/ /de la don dam pa'i yon tan ni chos kyi sku'i rang bzhin rnam par dag pa nyid do/ /kun rdzob kyi yon tan ni stobs dang / mi 'jigs pa dang / sangs rgyas kyi chos ma 'dres pa bco brgyad la sogs pa'o/ /chos 'dus byas dang / 'dus ma byas zhes bya ba la/ 'dus byas kyi chos zhes bya ba ni/ rgyu dang rkyen rnams 'dus shing tshogs pas byas pa la 'dus byas zhes bya ste/ de yang zag pa dang bcas pa dang / zag pa med pa'o/ /de la zag pa dang bcas pa ni/ khams gsum du gtogs pa'i chos rnams so/ /zag pa med pa ni 'phags pa'i lam gyi rang bzhin te/ chos de dag kun rdzob dang / don dam pa'i tshul du yang dag pa ji lta ba bzhin du shes pa ni/ mthar phyin cing chub pa yin pas pha rol tu phyin pa zhes bya'o/ /chos zag pa dang bcas pa dang / zag pa med pa rnams zhes bya ba la zag pa dang bcas pa ni gzugs la sogs pa ste/ gang la nyon mongs pa rnams skye ba rnams so/ /zag pa med pa ni sa dang / pha rol tu phyin pa dang / mya ngan las 'das pa la sogs pa ste/ gang la nyon mongs pa rnams mi 'byung ba'o/ /de dag pha rol tu phyin pa ni snga ma bzhin no/ /chos dge ba dang mi dge ba rnams zhes bya ba la dge ba ni 'dod chags med pa dang / gti mug med pa dang / zhe sdang med pa la sogs pa'o/ /mi dge ba ni 'dod chags dang zhe sdang la sogs pa'o/ /chos 'jig rten dang 'jig rten las 'das pa'i rnams zhes bya ba ni mos pas spyod pa'i sa man chad ni 'jig rten pa'i chos so/ /sa dang po yan chad sangs rgyas kyi sa la thug gi bar du 'jig rten las 'das pa'i chos rnams so/ /chos gzugs yod pa dang / gzugs med pa'i rnams zhes bya ba la/ gzugs yod pa la ni bltar snang zhing thogs pa dang bcas pa rnams so/ /gzugs med pa ni bltar mi snang la thogs pa med pa rnams so/ /chos lung bstan du yod pa dang / lung bstan du med pa rnams zhes bya ba la lung bstan du yod pa ni 'dod chags med pa dang / zhe sdang med pa dang / gti mug med pa'i sems kyis sbyin pa dang / tshul khrims la sogs pa spyad pa'i rgyus mtho ris dang longs spyod chen po thob par 'gyur ro zhes bya ba la sogs pas lung bstan du rung ba rnams so/ /lung bstan du med pa ni bzo'i gnas dang rol mo la sogs pa spyad pa'i 'bras bu bde ba dang / sdug bsngal gang du yang 'gyur bar nges pa med pa'o/ /chos nges pa dang ma nges pa zhes bya ba la/ nges pa ni nyan thos dang / rang sangs rgyas dang / byang chub sems dpa'i ris su nges pa rnams so/ /ma nges pa ni dge ba'i bshes gnyen dang / sdig pa'i grogs po'i khar las pa rnams so/ /chos 'byung ba dang mi 'byung ba rnams zhes bya ba la/ 'byung ba ni khams gsum nas 'byung ba'i rang bzhin can rnams te/ rgyun tu zhugs pa la sogs pa nyan thos kyi 'bras bu rnams dang / sa dang po la sogs pa byang chub sems dpa'i sa rnams dang / byang chub kyi phyogs dang / pha rol tu phyin pa la sogs pa mya ngan las 'das pa thob pa'i rgyur gyur pa rnams so/ /mi 'byung ba rnams ni de las bzlog pa 'khor ba'i rgyur gyur pa'i chos rnams so/ /chos 'grib pa'i tshul can dang khyad par gyi tshul can rnams zhes bya ba la 'grib pa'i tshul can gyi chos ni shes bya dang / nyon mongs pa'i sgrib pa rnams so/ /khyad par gyi chos ni sgrib pa de gnyis kyi gnyen por gyur pa rnams so/ /so so'i skye bo'i chos dang / 'phags pa'i chos rnams zhes bya ba la/ so so'i skye bo'i chos ni mi rtag pa la rtag pa dang / sdug bsngal ba la bde ba dang / mi gtsang ba la gtsang ba dang / bdag med pa la bdag tu lta ba la sogs pa phyin ci log tu spyod pa rnams so/ /'phags pa'i chos ni de las bzlog pa ste/ mi rtag pa dang / sdug bsngal ba dang / bdag med pa dang / mi gtsang ba la sogs par lta ba'o/ /slob pa'i chos dang mi slob pa'i chos rnams zhes bya ba la/ slob pa'i chos ni rgyun tu zhugs pa nas phyir mi ldog pa'i bar gyi chos rnams so/ /mi slob pa ni dgra bcom pa'i 'bras bu'i chos so/ /nyan thos dang rang sangs rgyas kyi chos rnams zhes bya ba la/ nyan thos kyi chos ni 'phags pa'i bden pa bzhi'i sgo nas 'jug pa la sogs pa'o/ /rang sangs rgyas kyi chos rnams ni rten cing 'brel par 'byung ba rtogs pa'i sgo nas 'jug pa la sogs pa'o/ /byang chub sems dpa'i chos dang / sangs rgyas kyi chos rnams zhes bya ba la/ byang chub sems dpa'i chos ni mos pas spyod pa'i sa nas sa bcu'i bar gyi byang chub sems dpa'i spyod pa rnams so/ /sangs rgyas kyi chos rnams ni de'i 'bras bur gyur pa/ sangs rgyas kyi sar gtogs pa/ ye shes lnga dang stobs dang mi 'jigs pa la sogs pa'o/ / chos thams cad kyi pha rol tu phyin par 'dod pas zhes bya ba ni sngar smos pa'i chos thams cad mdor bsdus nas bstan pa ste/ mdor na ji skad du smos pa'i chos thams cad kun rdzob dang don dam pa'i mtshan nyid du yang dag pa ji lta ba nyid du rtogs te/ mthar phyin par 'dod pas shes rab kyi pha rol tu phyin pa la bslab par bya'o zhes thams cad la sbyar bar bya'o/ /chos 'das pa dang / ma 'ongs pa dang / da ltar byung ba thams cad kyi de bzhin nyid khong du chud par 'dod pas zhes bya ba la sogs pas sa bcu'i byang chub sems dpa' rnams kyis gong du smos pa'i chos rnams kyi don dam pa'i mtshan nyid rtogs pa'i yon tan thob par bya ba'i phyir shes rab kyi pha rol tu phyin pa la bslab par bya ba bstan pa ste/ don dam pa'i mtshan nyid kyang de bzhin nyid dang / mi skye ba dang / yang dag pa'i mtha' zhes bya ba ste/ de dag gi mthar phyin par 'dod pas zhes bya ba'i tha tshig go/ /nyan thos dang rang sangs rgyas thams cad kyi sngon du 'gro bar 'dod pas zhes bya ba ni sa bcu la gnas pa'i byang chub sems dpa' ye shes dang / mthu dang / rdzu 'phrul la sogs pas nyan thos dang rang sangs rgyas thams cad pas khyad zhugs par 'phags te/ gtso bor gyur/ dam par gyur/ phul du gyur pa la sngon du 'gro ba zhes bya ba ste/ de lta bu'i yon tan thob par 'dod pas shes rab kyi pha rol tu phyin pa la bslab par bya'o zhes bya ba'i don to/ /sangs rgyas bcom ldan 'das thams cad la rim gror bya bar 'dod pas zhes bya ba ni/ sa bcu'i byang chub sems dpa' dbang thob pa'i mthu dang / rdzu 'phrul gyis sangs rgyas bcom ldan 'das rnams la skad cig yud tsam thang cig la yang bla na med pa'i rim gro bsam gyis mi khyab pa mdzad pa'i mthu mnga' ba/ de lta bu'i yon tan thob pa zhes bya ba'i tha tshig go/ /sangs rgyas bcom ldan 'das thams cad kyi nang gi 'khor du gyur par 'dod pas zhes bya ba ni/ sa bcu pa'i byang chub sems dpa' rnams sangs rgyas kyi sar skye ba gcig gis thogs shing thams cad mkhyen pa'i ye shes la dar las chod pa tsam du zad pas sangs rgyas kyi 'khor du nye ba'i phyir nang gi 'khor zhes bya ste/ de lta bu'i yon tan thob par 'dod pas zhes bya ba dang sbyar ro/ /'khor mang po dang ldan par 'dod pas zhes bya ba ni/ sa bcu pa'i byang chub sems dpa' rnams sangs rgyas dang 'dra bar gyur pas/ brgya byin dang tshangs pa la sogs pa lha'i nang na mthu che zhing rdzu 'phrul chen po rnams kyis mchod cing bkur sti bya ba'i gnas yin te/ 'khor de lta bu mang po dang ldan par 'dod pas zhes bya ba'i don to/ /byang chub sems dpa'i 'khor thob par 'dod pas zhes bya ba ni sa bcu pa'i byang chub sems dpa' rnams sa 'og ma'i byang chub sems dpa' rnams kyis 'khor du bskor cing bkur sti bya ba'i gnas yin te/ de lta bu'i yon tan thob par 'dod pas zhes bya ba'i tha tshig go/ /sbyin bdag thams cad kyi sbyin pa yongs su dag par 'dod pas zhes bya ba ni sa bcu pa'i byang chub sems dpa' yon tan thams cad kyi mthar phyin pas bsod nams kyi zhing du gyur pa'i phyir ro/ /sbyin pa la thogs pa med pa'i sems dang ldan par 'dod pas zhes bya ba ni sa bcu pa'i byang chub sems dpa' rnams la sbyin pa la sogs pa'i pha rol tu phyin pa yongs su rdzogs par bya ba'i mi mthun pa'i phyogs cung zad kyang med pa de lta bu'i yon tan thob par 'dod pas zhes bya ba'i don to/ /sems can thams cad sbyin pa las byung ba'i bsod nams bya ba'i dngos po la dgod par 'dod pas zhes bya ba la sogs pa ni sa bcu pa'i byang chub sems dpas chos bshad cing sems can gyi don du sbyar ba rnams la thogs pa med de/ ji ltar sbyar ba de bzhin du 'grub pas don med par mi 'gyur ba'i phyir/ sems can rnams bsod nams bya ba'i dngos po lnga la 'god pa don med par mi 'gyur te/ de lta bu'i yon tan thob par 'dod pas zhes bya ba'i don to/ /mig lnga rnam pa thams cad du yongs su sgrub par 'dod pas zhes bya ba la sogs pa la sangs rgyas bcom ldan 'das rnams kyi gzugs kyi sku'i spyan ni sha'i mig go/ /ting nge 'dzin dang / snyoms par 'jug pa dang / mngon par shes pa thams cad kyi ye shes ni lha'i mig go/ /thams cad mkhyen pa'i ye shes ni shes rab kyi mig go/ /thams cad du 'gro ba'i lam mkhyen pa dang / dbang po mchog dang mchog ma yin pa mkhyen pa dang / mos pa sna tshogs mkhyen pa dang / khams sna tshogs mkhyen pa'i ye shes ni chos kyi mig go/ /rdo rje lta bu'i ting nge 'dzin gyis bsdus pa'i ye shes dgra bcom pa'i lam mkhyen pa ni sangs rgyas kyi mig go/ /shar phyogs kyi 'jig rten gyi khams gang+gA'i klung gi bye ma snyed dag na/ sangs rgyas bcom ldan 'das ji snyed cig bzhugs pa de dag thams cad lha'i mig gis blta bar 'dod pa dang zhes bya ba la sogs pa ni sa bcu pa'i byang chub sems dpa' rnams kyi mngon par shes pa lnga khyad par du 'phags pa thob par bstan pa ste/ 'jig rten pa'i mngon par shes pa dang / nyan thos dang rang sangs rgyas rnams kyi mngon par shes pa rnams ni bdag dang mtshungs pa dang / bdag pas dma' ba rnams kyi sems la sogs pa shes pa tsam du zad kyi/ byang chub sems dpa' yongs su dag pa rnams kyi mngon par shes pa ni sangs rgyas bcom ldan 'das la sogs pas gong ma rnams kyi thugs la sogs pa shes pa la thogs pa med de/ de lta bu'i mngon par shes pa khyad par can dang ldan pa'i yon tan thob par 'dod pas shes rab kyi pha rol tu phyin pa la bslab par bya'o zhes bya ba'i tha tshig go/ /shar phyogs la ji lta ba bzhin du phyogs lhag ma bcu la yang de bzhin du sbyar bar bya'o/ /sha ra dwa ti'i bu gzhan yang byang chub sems dpa' sems dpa' chen po sangs rgyas bcom ldan 'das de dag phyogs bcu kun du chos gang ston pa de dag thams cad dran pa'i stobs dang / shugs gcad du mi chod pas yang dag par gzung bar 'dod pa dang / bla na med pa yang dag par rdzogs pa'i byang chub kyi bar du de thams cad chud mi za bar 'dod pas zhes bya ba ni sa bcu pa'i byang chub sems dpa' rnams kyi dran pa'i gzungs khyad par can bstan te/ yon tan de lta bu thob par 'dod pas shes rab kyi pha rol tu phyin pa 'di la bslab par bya'o zhes bya ba'i don to/ /sangs rgyas bcom ldan 'das 'das pa dang / ma byon pa dang / da ltar byung ba rnams kyi sangs rgyas kyi zhing dang / sangs rgyas kyi zhing yongs su dag pa mang po mthong bar 'dod pa dang / yongs su sgrub par 'dod pas zhes bya ba ni sa bcu pa'i byang chub sems dpa' rnams dus gsum gyi sangs rgyas kyi zhing dag pa dang / ma dag pa mthong bar bya ba dang yongs su dag pa sgrub nus te/ de lta bu'i yon tan thob par 'dod pas shes rab kyi pha rol tu phyin pa la bslab par bya'o zhes bya ba'i tha tshig go/ /de bzhin gshegs pa rnams kyi mdo dang / dbyangs kyis bsnyad pa dang / lung du bstan pa zhes bya ba la sogs pa ni sa bcu pa'i byang chub sems dpa' rnams kyi shes rab kyi mthu bstan pa ste/ de bzhin gshegs pa'i gsung rab yan lag bcu gnyis po de dag skad cig yud tsam thang cig gis thos pa dang / gzung ba nas gzhan la rgya cher yang dag par ston par nus pa'i yon tan de lta bu thob par 'dod pas shes rab kyi pha rol tu phyin pa 'di la bslab par bya'o zhes bya ba dang sbyar ro/ /shar phyogs su sangs rgyas bcom ldan 'das thams cad kyis gsungs pa dang / gsung bar 'gyur ba gang ci yang rung ste zhes bya ba la sogs pa yang byang chub sems dpa' de dag gi shes rab yongs su dag pa/ bdag dang gzhan gyi don phun sum tshogs pa dang ldan pa de lta bu thob par 'dod pas zhes bya ba'i don te/ de bzhin du phyogs bcu la sbyar bar bya'o/ /shar phyogs kyi 'jig rten gyi khams gang+gA'i klung gi bye ma snyed dag na/ mun pa mun gnag smag tu gyur pa/ smag gis khyab pa/ nyi ma dang zla ba 'di ltar rdzu 'phrul che zhing 'di ltar gzi brjid che la/ 'di ltar mthu che ba gnyis kyis kyang lham mer mi rung / lhan ner mi rung / lhang nger mi rung ba de lta bu thams cad snang bar bya bar 'dod pas zhes bya ba la sogs pas ni sa bcu pa'i byang chub sems dpa' rnams kyi mthu phun sum tshogs pa bstan pa ste/ de lta bu'i mthu dang yon tan thob par 'dod pas shes rab kyi pha rol tu phyin pa la bslab par bya'o zhes bya ba'i tha tshig ste/ mun pa mun gnag smag tu gyur pa zhes bya ba ni 'jig rten gyi khams dag gi bar gyi mun gnag la bya'o/ /shar phyogs kyi 'jig rten gyi khams gang+gA'i klung gi bye ma snyed dag na sangs rgyas kyi sgra dang / chos kyi sgra dang / dge 'dun gyi sgra sems can rnams kyis ma thos pa de lta bu'i 'jig rten gyi khams dag tu sems can de dag thams cad kyis sangs rgyas dang chos dang dge 'dun gyi sgra thos par bya bar 'dod pa dang / yang dag pa'i lta ba la dgod par 'dod pa dang zhes bya ba la sogs pas sa bcu'i byang chub sems dpa' de dag gi mthus sems can yongs su smin par byed nus pa bstan te/ de lta bu'i yon tan thob par 'dod pas shes rab kyi pha rol tu phyin pa 'di la bslab par bya'o zhes bstan to/ /shar phyogs kyi 'jig rten gyi khams gang+gA'i klung gi bye ma snyed dag na/ sems can long ba ji snyed cig yod pa de dag thams cad bdag gi mthus mig gis gzugs mthong ba dang / 'on pa rnams rna bas sgra thos pa dang / smyon pa rnams dran pa thob pa dang / gos med pa rnams gos thob pa dang / bkres pa dang skom pa rnams zas dang skom thob pa dang / nad pa rnams nad 'tsho bar 'gyur ba dang / btson ra dang khri mon na 'khod pa rnams bdag gi rdzu 'phrul dang / bdag gi mthus dga' mgur 'dong du yod par bya'o snyam na yang zhes bya ba la sogs pas sa bcu pa'i byang chub sems dpa' rnams kyis sems can sdug bsngal sna tshogs las thar bar bya ba'i mthu phun sum tshogs pa bstan pa ste/ mthu dang yon tan de lta bu thob par 'dod pas shes rab kyi pha rol tu phyin pa la bslab par bya'o zhes bya ba'i tha tshig go/ /ji ltar na phyogs bcu kun gyi phyogs re re'i 'jig rten gyi khams gang+gA'i klung gi bye ma snyed dag na/ sems can mi khom pa dang / ngan song du lhung ba sems can dmyal ba'am/ byol song gi skye gnas sam/ gshin rje'i 'jig rten pa ji snyed cig yod pa de dag thams cad bdag gi mthus/ de nas tshe 'phos nas mi'i lus thob par bya snyam ste zhes bya ba la sogs pas ni/ sa bcu pa'i byang chub sems dpa' de dag gi mthus sems can rnams kyi mi khom pa brgyad la sogs pa med par bya nus pa dang / de dag med par byas nas kyang / tshul khrims dang ting nge 'dzin la sogs pa'i 'bras bu phun sum tshogs pa la 'god par nus pa bstan pa ste/ mthu dang yon tan de lta bu thob par 'dod pa'i byang chub sems dpas shes rab kyi pha rol tu phyin pa la bslab par bya'o zhes bstan pa'o/ / de ltar sa bcu pa'i byang chub sems dpa'i yon tan dang / che ba'i bdag nyid thob par 'dod pas shes rab kyi pha rol tu phyin pa la brtson par bya ba bstan nas/ de'i 'og tu sangs rgyas kyi che ba'i bdag nyid thob par 'dod pas shes rab kyi pha rol tu phyin pa la brtson par bya ba bstan pa'i phyir/ de bzhin gshegs pa'i spyod lam la bslab par 'dod pa dang zhes bya ba la sogs pa gsungs te/ de la de bzhin gshegs pa'i spyod lam ni bzhengs pa dang / bzhud pa dang / bzhugs pa dang / mnal ba rnams nyan thos dang / rang sangs rgyas dang / byang chub sems dpa' la sogs pa gzhan gang dang yang mi 'dra bar 'phags par bzang zhing 'di kho na lta bu yin no zhes sus kyang mi rtogs pa'o/ /de bzhin gshegs pa'i spyod pa dang / tshul rnam par dag pa zhes bya ba yang spyod lam gyi khyad par nyid bstan te/ spyod pa dang tshul la skyon med cing / bdag dang gzhan gyi don du phun sum tshogs par mdzad pa la rnam par dag pa zhes bya'o/ /de bzhin gshegs pa'i sku'i phrin las dang zhes bya ba la sogs pa ni/ sangs rgyas kyi chos ma 'dres pa bco brgyad bshad pa'i skabs su bshad pa'o/ /ji ltar na bdag gis glang po chen po'i lta stangs kyis bltas te/ sems can rnams la thogs pa med par chos bstan par 'gyur zhes bya ba la/ glang po che zhes bya ba ni rgya gar skad du nA ga zhes bya ste/ nA ga zhes bya ba dam pa'am/ mchog gam/ gtso bo la yang bya/ glang po che dang / klu dang / sangs rgyas bcom ldan 'das la yang bya ste/ skabs 'dir ni sangs rgyas bcom ldan 'das kyis gzigs pa'i stangs sam thabs la glang po che'i lta stangs zhes bya ste/ lta stangs de yang steng na 'dug pa la bskyed de mi lta/ 'og na 'dug pa la btud de mi lta/ g.yas g.yon na 'dug pa la mig bzur te mi lta/ rgyab na 'dug pa la mjing pa bsgyur te mi lta/ thag ring po na 'dug pa la bsgrims te mi lta/ thag nye ba na 'dug pa la sgrim pa med par yang mi lta'i/ ji ltar 'dug pa'i spyod lam dang ji ltar lta ba'i mig gis 'jig rten gyi khams thams cad du sems can thams cad dang / chos thams cad la lta ba ni glang po che'i lta stangs zhes bya ste lta stangs de lta bus bltas nas/ sems can rnams la thogs pa med par lhun gyis grub pa nyid du chos ston pa'i yon tan che ba'i bdag nyid de bzhin gshegs pa la mnga' ba thob par 'dod pas shes rab kyi pha rol tu phyin pa la brtson par bya'o zhes bya ba dang sbyar ro/ /ji ltar na bdag seng ge chen po'i rnam par bsgyings pas rnam par bsgyings par 'gyur zhes bya ba ni/ de bzhin gshegs pa'i mthu dang / gzi brjid kyis bdud dang phas rgol ba la sogs pa spa gong zhing zil gyis mnan pa'i mthu bstan pa'o/ /ji ltar na bdag gis don yod pa'i rnam par mnan pas rnam par mnan par bya zhes bya ba ni/ rnam par smin pa'i 'bras bu bstan pa ste/ gzi byin gyis zil gyis mnan nas de'i mthus dam pa'i chos la bkod de yongs su smin par bya ba'o/ /ji ltar na bdag sa chen po la sor bzhi tsam gyi rkang pa sa la mi reg par 'gro bar 'gyur zhes bya ba la sogs pas de bzhin gshegs pa'i sku'i spyod lam skyon med pa bstan te/ yon tan de lta bu thob par 'dod pas shes rab kyi pha rol tu phyin pa la bslab par bya'o zhes bya ba'i tha tshig go/ /ji ltar na bdag rgyal po chen po bzhi'i ris kyi lha rnams dang zhes bya ba la sogs pas ni de bzhin gshegs pa mngon par 'tshang rgya ba'i tshe byang chub kyi shing drung du gshegs pa na 'khor phun sum tshogs pa bstan te/ yon tan de lta bu thob par 'dod pas shes rab kyi pha rol tu phyin pa la bslab par bya'o zhes bya ba dang sbyar ro/ /ji ltar na bdag byang chub kyi shing drung na 'dug pa'i tshe zhes bya ba la sogs pas ni de bzhin gshegs pa mngon par 'tshang rgya ba na byang chub kyi shing drung du bzhugs pa'i tshe gdan bting ba phun sum tshogs pa dang gdan phun sum tshogs pa bstan pa ste/ de lta bu thob par 'dod pas zhes bya ba dang sbyar ro/ /ji ltar na bdag snying po byang chub la 'dug ste/ mtshan gyis legs par brgyan pa'i lag gis sa chen po la brdabs nas nag po'i phyogs bdud 'khor dang bcas pa shin tu pham par bya snyam na yang zhes bya bas ni bdud las rgyal ba phun sum tshogs pa bstan te/ de lta bur 'dod pas shes rab kyi pha rol tu phyin pa la bslab par bya'o zhes bya ba'i tha tshig go/ /ji ltar na bdag bla na med pa yang dag par rdzogs pa'i byang chub tu mngon par sangs rgyas nas/ 'gro ba dang / 'greng ba dang / 'dug pa dang / nyal ba'i sa phyogs de dag rdo rje'i rang bzhin du 'dug par 'gyur snyam na yang zhes bya ba ni de bzhin gshegs pa'i sku rdo rje lta bu dang ldan pa byin che ba bstan pa ste/ sa gzhi rdo rje'i rang bzhin du ma gyur na sas mi theg cing 'gas par 'gyur ba'i phyir ro/ /ji ltar na bdag nyi ma gang la mngon par byung ba de nyid kyi nyi ma la nag po'i phyogs 'khor dang bcas pa pham par byas te zhes bya ba la sogs pa ni chos kyi 'khor lo bskor ba 'bras bu dang bcas pa bstan pa ste/ de lta bu'i yon tan thob par 'dod pas zhes bya ba dang sbyar ro/ /ji ltar na bdag bla na med pa yang dag par rdzogs pa'i byang chub tu mngon par sangs rgyas pa'i tshe/ nyan thos kyi dge 'dun ni tshad med grangs med par 'gyur zhes bya ba la sogs pa ni de bzhin gshegs pa'i 'khor yongs su dag pa phun sum tshogs pa dang / sku tshe'i tshad dpag tu med pa phun sum tshogs pa dang / 'od dpag tu med pa phun sum tshogs pa bstan pa ste/ de lta bu'i che ba'i bdag nyid thob par 'dod pas shes rab kyi pha rol tu phyin pa la bslab par bya'o zhes bya ba'i don to/ /ji ltar na bdag bla na med pa yang dag par rdzogs pa'i byang chub tu mngon par rdzogs par sangs rgyas pa'i tshe/ sangs rgyas kyi zhing der 'dod chags dang / zhe sdang dang / gti mug gi sgra yang mi grag par bya snyam na yang zhes bya bas ni de bzhin gshegs pas nyon mongs pa'i bdud bcom pa'i rgyu mthun pa'i 'bras bu phun sum tshogs pa bstan pa'o/ /ji ltar na bdag bla na med pa yang dag par rdzogs pa'i byang chub tu mngon par sangs rgyas pa'i tshe sangs rgyas kyi zhing de'i sems can thams cad 'di ltar sbyin pa na dge ba'o zhes bya ba la sogs pas ni/ de bzhin gshegs pa'i shes rab kyi rgyu mthun pa'i 'bras bu phun sum tshogs pa bstan pa ste/ sngon shes rab sbyangs pa'i 'bras bus sangs rgyas kyi zhing der skyes pa'i sems can rnams de lta bu'i shes rab dang ldan par 'gyur ba'i phyir ro/ /yon tan de lta bu dang ldan par 'dod pas shes rab kyi pha rol tu phyin pa la bslab par bya'o zhes bya ba dang sbyar ro/ /ji ltar na bdag yongs su mya ngan las 'das kyang dam pa'i chos nub ces bya ba'i sgra yang mi grag par 'gyur snyam na yang zhes bya bas ni dam pa'i chos nub par mi 'gyur ba'i byin gyi rlabs phun sum tshogs pa [(]thobar [,]thob par [)]bya ba bstan pa'o/ /ji ltar na bdag gi ming thos pa tsam gyis zhes bya ba la sogs pa ni sngon gyi smon lam gyi rgyu mthun pa'i 'bras bu phun sum tshogs pa bstan pa ste/ sngon byang chub sems dpa' mdzad pa'i tshe/ nga'i ming thos pa tsam gyis sems can thams cad bla na med pa'i byang chub tu nges par gyur cig ces smon lam btab pa de bzhin du/ mngon par byang chub pa'i tshe grub par gyur pa de lta bu thob par 'dod pas zhes bya ba dang sbyar ro/ /sha ra dwa ti'i bu gang gi tshe de ltar byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ yon tan 'di dag sgrub par gyur pa de'i tshe zhes bya ba la sogs pas byang chub sems dpa' de ltar sangs rgyas kyi yon tan che ba'i bdag nyid thob par bya ba'i phyir shes rab kyi pha rol tu phyin pa la brtson par byed pa'i phan yon bstan pa'o/ /de ni sems can rnams byang chub la dgod pa'i phyir tshangs par spyod pa yin te/ 'du ba'i chos rnams kyis yongs su 'du ba ma yin no zhes bya ba la sogs pas de ltar spyod pa'i byang chub sems dpa'i bsam pa yongs su dag pa dang / spyod pa yongs su dag pa bstan pa'o/ /ci lags bcom ldan 'das byang chub sems dpa' sems dpa' chen po la pha ma dang / mchis 'brang dang / bu dang bu mo gdon mi 'tshal bar 'tshal lam zhes bya ba la sogs pa ni gong du byang chub sems dpa'i yon tan glengs nas/ rigs kyi bu dang rigs kyi bu mo rnams byang chub sems dpa' de'i pha ma la sogs par 'gyur bar yid dam bcas pa dang / rgyal po chen po bzhi la sogs pa dga' bar gyur te/ btsun mo'i 'khor dbul bar yid dam bcas pa las grengs nas/ shA ri'i bus bcom ldan 'das la byang chub sems dpa' la bu smad la sogs pa gdon mi za bar 'tshal lam zhes zhus pa'i lan du/ bcom ldan 'das kyis bka' stsal pa/ byang chub sems dpa' nyid 'dod pa'i yon tan lnga la chags te spyod pa ni ma yin gyi/ kun rdzob kyi bden pa la gnas te ma chags bzhin du thabs mkhas pas bsdu ba'i dngos po bzhis sems can rnams bsdus te dam pa'i chos la dgod pa'i phyir/ 'dod pa'i yon tan lnga la spyod pa bstan pa ste/ 'di yan chad du gang gi phyir brtson par bya ba bstan zin to/ /de ltar gang gi phyir brtson par bya ba bstan nas/ da ni ji ltar brtson par bya ba bstan pa'i skabs dbye ba'i phyir/ bcom ldan 'das ji ltar byang chub sems dpa' sems dpa' chen pos shes rab kyi pha rol tu phyin pa la spyad par bgyi zhes bya ba la sogs pa gsungs te/ de la ji ltar spyad par bgyi zhes bya bas ni shA ri'i bus dmigs pa dang bcas shing mtshan ma dang bcas pa'i tshul gyis byang chub sems dpa' dang shes rab kyi pha rol tu phyin pa dang / de la spyad pa gsum zhus so/ /sha ra dwa ti'i bu 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ byang chub sems dpa' yang dag par rjes su mi mthong ngo zhes bya ba la sogs pas gang zag la bdag med pa'i sgo nas/ byang chub sems dpa' dang / byang chub sems dpa'i ming dang / byang chub sems dpa'i spyod pa dang / shes rab kyi pha rol tu phyin pa dang / shes rab kyi pha rol tu phyin pa'i ming dang / spyod pa dang mi spyod pa rnams don dam par dmigs su med pa bstan to/ /gzugs yang dag par rjes su mi mthong ngo zhes bya ba la sogs pas chos la bdag med pa'i sgo nas gzugs la sogs pa don dam par mi dmigs pa bstan to/ /ji ltar spyad par bgyi zhes zhus pa'i lan du de ltar spyad par bya'o zhes bstan pa'i tha tshig go/ /de ci'i phyir zhe na/ sha ra dwa ti'i bu de ni 'di ltar byang chub sems dpa' yang byang chub sems dpa'i rang bzhin gyis stong ngo zhes bya ba la sogs pa'o/ /ji ltar yang dag par rjes su mi mthong ba'i gtan tshigs bstan to/ /de ci'i phyir zhe na/ de'i rang bzhin ni de yin te zhes bya ba la sogs pas ji ltar stong pa'i gtan tshigs bstan te/ de ni 'di ltar stong pa nyid kyis gzugs stong pa ma yin zhes bya ba ni gzugs la stong pa nyid kyi rang bzhin yod pa'o/ /gzugs las gud na yang stong pa nyid med ces bya ba ni stong pa nyid kyi rang bzhin dngos por grub pa zhig gud na yod pa ma yin gyi/ gzugs kyi rang bzhin don dam par yod par ma grub pa nyid stong pa nyid yin no zhes bya ba'i tha tshig ste/ de bas na gzugs nyid kyang stong pa nyid do/ /stong pa nyid kyang gzugs so zhes bya ba gsungs te/ gzugs dang stong pa nyid don dam par tha dad pa ma yin te/ gnyis ka yang don dam par stong pa'i rang bzhin du gcig go zhes bya ba'i don to/ /de bzhin du tshor ba la sogs pa 'og ma rnams la yang sbyar bar bya'o/ /de ci'i phyir zhe na/ de ni 'di lta ste/ byang chub sems dpa' zhes bya ba 'di yang ming tsam mo zhes bya ba la sogs pas byang chub dang / byang chub sems dpa' la sogs pa ming gis gong du smos pa rnams kun rdzob du ming tsam du brjod du zad kyi/ don dam par dngos po yod par ma grub po zhes bya ba'i tha tshig go/ /de la 'ga' zhig 'di snyam du rtogs te/ byang chub sems dpa' dang / gzugs la sogs pa de dag de ltar rang bzhin gyis stong ste med na ri bong gi rwa bzhin du bltar mi snang ba'i rigs na/ gzugs la sogs pa ni de lta ma yin no snyam pa la/ de yang 'di ltar gzugs ni sgyu ma lta bu'o zhes bya ba la sogs pa sgyu ma'i dpe bstan te/ sgyu ma mkhan gyis rta dang glang po che la sogs pa sgyu mar byas pa rnams rta dang glang po che la sogs pa'i rang bzhin du yod pa ma yin yang rta dang glang po che la sogs pa'i gzugs su snang ba dang 'dra'o zhes bya ba'i tha tshig go/ /de ltar spyod pa'i byang chub sems dpa' sems dpa' chen po ni chos gang la yang skye ba yang dag par rjes su mi mthong ngo zhes bya ba la sogs pa ni de ltar gong du smos pa'i rim pas chos thams cad sgyu ma lta bur rtogs na/ 'dus byas dang 'dus ma byas pa'i chos rnams la/ skye ba dang 'gag pa la sogs pa'i 'du shes mi skye ba bstan to/ /de ci'i phyir zhe na/ de ni 'di ltar chos thams cad so so'i ming ni sgyu ma ste/ rnam par brtags pa de dag 'phral du byung ba'i ming yang dag pa ma yin pa las yongs su brtags pas tha snyad du brjod do zhes bya ba la sogs pas yang dag par rjes su mi mthong ba'i gtan tshigs bstan pa ste/ chos rnams so so'i ming dang mtshan mar brtags pa rnams yang dag par yod pa ma yin pa las/ byis pa so so'i skye bo rnams kyis glo bur du ming dang tha snyad tsam du btags par zad kyis/ don dam par yod pa ma yin no zhes bya ba'i tha tshig go/ /sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe 'di ltar yongs su rtogs te/ 'di ltar byang chub sems dpa' zhes bya ba 'di ni ming tsam mo zhes bya ba la sogs pas ni don gong ma nyid gsal bar bya ba'i phyir bstan pa'o/ /sha ra dwa ti'i bu 'di lta ste dper na bdag bdag ces bya ba ni tha snyad du brjod mod kyi de la yang dag pa ji lta ba bzhin du yongs su brtags na dmigs su med do zhes bya ba la sogs pa ni/ mu stegs can gyis bdag rnam pa sna tshogs su brtags pa rnams/ nyan thos gang zag la bdag med par rtogs pa rnams kyis med par khong du chud pa'i dpes byang chub sems dpa' dang / byang chub dang / sangs rgyas dang / shes rab kyi pha rol tu phyin pa don dam par rjes su mi mthong ba bstan pa'o/ /de bzhin du gzugs dang tshor ba la sogs pa gzhan rnams la yang ci rigs su sbyar bar bya'o/ /de ltar shes rab kyi pha rol tu phyin pa la spyod pa'i byang chub sems dpa' sems dpa' chen po ni de bzhin gshegs pa'i shes rab ma gtogs par/ de ma yin pa'i shes rab nyan thos dang rang sangs rgyas thams cad kyi shes rab kyi bar du dmigs su med pa'i stong pa nyid nye bar bzung bas zil gyis gnon to zhes bya ba la sogs pas de ltar stong pa nyid rtogs te/ dmigs su med pa'i sgo nas shes rab kyi pha rol tu phyin pa la spyod na shes rab khyad par can thob par 'gyur ba'i phan yon bstan pa ste/ 'jig rten pa rnams dang / nyan thos dang rang sangs rgyas rnams kyi shes rab ni dngos por lta ba la dmigs pa'i phyir/ byang chub sems dpa' de'i shes rab kyi dngos po dang mtshan ma med par rtogs pas zil gyis gnon to/ /sha ra dwa ti'i bu gal te dzam+bu'i gling 'di dge slong sha ra dwa ti'i bu dang / maud gal gyi bu lta bu sha stag gis zhes bya ba la sogs pas byang chub sems dpa' de'i shes rab khyad par du 'phags pa gsal bar bstan pa ste/ 'phags pa nyan thos kyi nang na shA ri'i bu dang maud gal las shes rab rno ba med pa de lta bu sha stag gis dzam+bu'i gling 'di 'dam bu'i tshal la sogs pa bzhin du gang bar gyur pa rnams kyi shes rab thams cad bsdom pa dang / byang chub sems dpa' shes rab kyi pha rol tu phyin pa la spyod pa'i shes rab cha shas dang / dpe dang zla la sogs pas kyang bsgrun du med pa bstan to/ /de ci'i phyir zhe na/ sha ra dwa ti'i bu de ni 'di ltar byang chub sems dpa' sems dpa' chen po rnams kyi shes rab ni sems can thams cad yongs su mya ngan las 'da' ba'i don du nye bar gnas pa yin te/ nyan thos dang rang sangs rgyas kyi shes rab ni de lta ma yin no zhes bya bas de ltar shes rab khyad par can du 'gyur ba'i gtan tshigs bstan pa ste/ nyan thos dang rang sangs rgyas ni bdag gi don lhur len/ byang chub sems dpa' ni sems can gyi don lhur len pa'i phyir khyad zhugs so/ /sha ra dwa ti'i bu ga zhan yang byang chub sems dpa' sems dpa' chen po shes rab kyi pha rol tu phyin pa la spyod pas nyin gcig tu yongs su bsgoms pa'i shes rab ji tsam pa des/ nyan thos dang rang sangs rgyas thams cad kyi shes rab zil gyis mnan cing gnas te zhes bya ba la sogs pas/ de bas kyang shes rab khyad zhugs pa bstan to/ /de bzhin du shar phyogs la sogs pa phyogs kun tu sbyar bar bya'o/ /sha ra dwa ti'i bus gsol pa zhes bya ba la sogs pas ni/ shA ri'i bu don dam pa'i tshul la gnas te/ the tshom dris pa'i lan bcom ldan 'das kyis kun rdzob kyi bden pa'i tshul du byang chub sems dpa'i bsam pa rgya che ba bstan nas/ khyad par du 'phags pa bstan pa'i phyir sha ra dwa ti'i bu de ji snyam du sems zhes bya ba la sogs pa don dam par bye brag med du zin kyang / kun rdzob tu sngon gyi smon lam gyi mthus bsam pa rgya chen po bskyed pas khyad par yod par bstan te/ bsam pa rgya chen po de yang gang zhe na/ bdag gis lam gyi rnam pa shes pa nyid la spyad de sems can thams cad kyi don byas la chos thams cad rnam pa thams cad du mngon par rdzogs par sangs rgyas par byas te/ sems can thams cad yongs su mya ngan las 'da'o zhes bya ba la sogs pa'o/ /sha ra dwa ti'i bu 'di lta ste/ dper na srog chags kyi rigs srin bu me khyer ni zhes bya ba la sogs pas nyan thos dang rang sangs rgyas kyi dpe srin bu me khyer las blangs/ byang chub sems dpa'i dpe nyi ma'i dkyil 'khor las blangs nas bsam pa dang spyod pa rgya che chung gi khyad par bstan to/ /de skad ces bka' stsal pa dang / tshe dang ldan pa sha ra dwa ti'i bus bcom ldan 'das la 'di skad ces gsol to zhes bya ba la sogs pas chos nyan pa'i 'khor rnams kyi the tshom bsal ba'i phyir/ nyan thos dang rang sangs rgyas kyi sa las 'das par gnas pa dang / phyir mi ldog pa'i sa thob par gnas pa dang / byang chub kyi lam yongs su sbyong ba la gnas pa gsum zhus pas so/ /de la nyan thos dang rang sangs rgyas kyi sa las 'das shing zhes bya bas ni nyan thos dang rang sangs rgyas kyi sa las 'das par gnas par bya ba zhus so/ /phyir mi ldog pa'i byang chub sems dpa'i sa thob pa dang zhes bya bas ni phyir mi ldog pa'i sa la gnas par bya ba zhus so/ /byang chub sems dpa'i lam yongs su sbyong ba lags zhes bya bas ni/ byang chub kyi lam yongs su sbyong ba la gnas par bya ba zhus so/ /de la sems dang po bskyed pa nas zhes bya ba nas phyir mi ldog pa'i byang chub sems dpa'i sa thob bo zhes bya ba'i bar gyis nyan thos dang / rang sangs rgyas kyi sa las 'das pa dang / phyir mi ldog pa'i sa la gnas pa dang / byang chub kyi lam yongs su sbyong ba la gnas pa gsum char bstan to/ /sha ra dwa ti'i bus gsol pa/ bcom ldan 'das sa gang la gnas pa'i byang chub sems dpa' sems dpa' chen po nyan thos dang rang sangs rgyas thams cad kyi sbyin pa'i gnas su 'gyur ba lags zhes bya ba ni/ byang chub sems dpa' dang / nyan thos dang / rang sangs rgyas kyi sa las 'das ma thag tu/ nyan thos dang rang sangs rgyas rnams kyi mchod gnas su 'gyur ram/ 'on te dus gzhan zhig na nyan thos dang rang sangs rgyas kyi mchod gnas su 'gyur snyam nas zhu ba zhus pa'o/ /bcom ldan 'das kyis bka' stsal pa/ sha ra dwa ti'i bu thog ma sems bskyed phyin chad ces bya ba la sogs pas sa dang po rab du dga' ba thob ma thag tu nyan thos dang / rang sangs rgyas thams cad kyi sbyin gnas su 'gyur bar bstan to/ /de ci'i phyir zhe na/ de ni sha ra dwa ti'i bu byang chub sems dpa' sems dpa' chen po yod pas dge ba'i chos thams cad 'jig rten du 'byung bar 'gyur te zhes bya ba la sogs pas sbyin gnas su 'gyur ba'i gtan tshigs bstan te/ dge ba'i chos thams cad 'jig rten du 'byung ba yang rnam pa gnyis te/ 'jig rten pa'i chos dang / 'jig rten las 'das pa'i chos rnams so/ /de la 'jig rten pa'i chos rnams ni/ 'di ltar dge ba bcu'i las kyi lam rnams 'jig rten du 'byung bar 'gyur ro zhes bya ba nas/ gzugs med pa'i snyoms par 'jug pa bzhi 'jig rten du 'byung bar 'gyur ro zhes bya ba'i bar du'o/ /'jig rten las 'das pa'i chos rnams ni mngon par shes pa lnga 'jig rten du 'byung bar 'gyur ro zhes bya ba nas/ sha ra dwa ti'i bu dge ba'i chos de dag la sogs pa mang po 'jig rten du 'byung bar 'gyur te zhes bya ba'i bar du'o/ /dge ba'i chos 'di dag 'jig rten du byung bas/ rgyal rigs che zhing mtho ba dag yod pa yin zhes bya ba la sogs pas dge ba'i chos rnams 'jig rten du byung ba'i rnam par smin pa'i 'bras bu bstan te/ de la 'jig rten pa'i chos zag pa dang bcas pa'i rnam par smin pa'i 'bras bu ni/ rgyal rigs che zhing mtho ba dag yod pa yin zhes bya ba nas/ 'du shes med 'du shes med min skye mched kyi lha rnams yod pa yin zhes bya ba'i bar du'o/ /'jig rten las 'das pa'i chos zag pa med pa rnams 'jig rten du byung ba'i rnam par smin pa'i 'bras bu ni/ rgyun du zhugs pa rnams 'jig rten na yod pa yin zhes bya ba nas/ de bzhin gshegs pa dgra bcom pa yang dag par rdzogs pa'i sangs rgyas rnams 'jig rten na yod pa yin no zhes bya ba'i bar du'o/ /gsol pa/ bcom ldan 'das de lta lags na byang chub sems dpa' sems dpa' chen po rnams sbyin pa yongs su sbyong ba lags sam zhes bya ba ni/ gong du byang chub sems dpa' rnams kyi yon tan smos te/ de lta bu'i yon tan dang ldan pa'i byang chub sems dpa' rnams nyan thos dang rang sangs rgyas rnams kyi sbyin gnas su gyur pa bstan pa dang / de ltar sbyin gnas su gyur pa de dag la mchod cing yon phul na 'bras bu chen por 'gyur ram mi 'gyur zhes zhus pa'o/ /sha ra dwa ti'i bu byang chub sems dpa' sems dpa' chen po rnams ni sbyin pa'i rnam grangs kyis yongs su sbyong ste zhes bya ba ni/ sbyin pa'i 'bras bu tshe rabs phyi ma la rnam par smin pa chen por 'gyur ro zhes bstan pa'o/ /de ci'i phyir zhe na/ byang chub sems dpa' sems dpa' chen po la sbyin pa byin na ni kun kyang shin tu dag pa ste/ de yang 'di ltar sha ra dwa ti'i bu byang chub sems dpa' sems dpa' chen po ni sbyin pa yongs su gtong ba ste zhes bya ba ni/ byang chub sems dpa' la sbyin pa byin pa tshe rabs phyi ma la yongs su sbyong ba'i gtan tshigs bstan pa ste/ sbyin pa byin pa'i 'bras bu 'jig rten dang 'jig rten las 'das pa'i dge ba'i chos rnam pa du ma thob par 'gyur ba'i phyir sbyin pa yongs su sbyong ba zhes bya'o/ /byang chub sems dpa' la sbyin pa byas pa'i 'bras bu dge ba'i chos rnam pa du ma thob par 'gyur ba de dag kyang gang zhe na/ 'di ltar dge ba bcu'i las kyi lam rnams zhes bya ba nas/ sangs rgyas kyi chos ma 'dres pa bco brgyad kyi sbyin pa yongs su gtong ngo zhes bya ba'i bar du ste/ de yan chad kyis ji ltar brtson par bya ba bstan zin to/ /de ltar ji ltar brtson par bya ba bstan nas/ da ni brtson par byed pa rnams kyi mtshan nyid bstan pa'i phyir/ gsol pa/ bcom ldan 'das byang chub sems dpa' sems dpa' chen pos ji ltar shes rab kyi pha rol tu phyin pa la brtson par bgyis na brtson zhes bgyi ba lags zhes bya ba gsungs te/ ji ltar brtson par bgyis na shes rab kyi pha rol tu phyin pa la brtson par chud ces zhus pa'o/ /sha ra dwa ti'i bu 'di la byang chub sems dpa' sems dpa' chen po gzugs stong pa nyid la brtson na brtson zhes bya'o zhes bya ba la sogs pas brtson par byed pa rnams kyi mtshan nyid bstan te/ phung po lnga dang / skye mched bcu gnyis dang / khams bco brgyad dang / 'phags pa'i bden pa bzhi dang / rten cing 'brel par 'byung ba bcu gnyis dang / 'dus byas dang 'dus ma byas pa'i chos rnams [(]snyong [,]stong [)]pa nyid la brtson par byed na brtson par chud do zhes bya ba'i tha tshig go/ /de la phung po dang / khams dang / skye mched dang bden pa dang / rten cing 'brel par 'byung ba rnams smos pa ni/ phung po la sogs pa so so'i mtshan nyid bye brag tu phye ste stong pa nyid du bstan to/ /'dus byas dang / 'dus ma byas pa'i chos gang ji snyed ming du gdags su yod ces bya ba dang / rang bzhin stong pa nyid ces bya ba ni chos thams cad spyir bsdus pa'i mtshan nyid stong pa nyid du bstan pa'o/ /stong pa nyid bdun po 'di dag la brtson na brtson zhes bya'o zhes bya ba ni/ phung po dang / khams la sogs pa so sor phye ba bdun po la bya'o/ /de stong pa nyid bdun po 'di dag gis shes rab kyi pha rol tu phyin pa la brtson par byed kyang brtson zhe'am/ mi brtson zhes mi brjod de zhes bya ba ni/ de ltar brtson pa rnams kyi mtshan nyid bstan na brtson par byed pa de lta bu don dam par dngos po yod do snyam du rtogs pa las bzlog pa ste/ de ltar brtson par byed pa rnams kyi mtshan nyid bstan pa yang kun rdzob kyi tha snyad tsam du bstan du zad kyi/ don dam par mtshan nyid ma grub pa'i phyir brtson zhes bya ba'am mi brtson zhes bya bar brjod du med do zhes bstan pa'o/ /de ci'i phyir zhe na/ 'di ltar des gzugs brtson zhes bya ba'am mi brtson zhes bya bar yang dag par rjes su mi mthong ngo zhes bya ba la sogs pas don dam par mtshan nyid dmigs su med pa bstan te/ de yang gzugs la sogs pa so so'i bye brag gi ngo bo nyid dmigs su med pa dang / 'dus pa'i ngo bo nyid dmigs su med pa dang / rang gi mtshan nyid dmigs su med pa dang / chos thams cad dmigs su med pa dang rnam pa bzhis stong pa nyid la spyod na brtson par chud do zhes bstan te/ de la gzugs la sogs pa so so'i bye brag gi ngo bo nyid dmigs su med pas stong pa nyid la spyod pa ni/ de ci'i phyir zhe na/ 'di ltar des gzugs brtson zhes bya ba'am mi brtson zhes bya bar yang dag par rjes su mi mthong ngo zhes bya ba nas/ rnam par shes pa kun nas nyon mongs pa'i chos can nam/ rnam par byang ba'i chos can du yang dag par rjes su mi mthong ngo zhes bya ba'i bar gyis bstan to/ /gzugs la sogs pa'i chos rnams 'dus pa'i ngo bo nyid dmigs su med pa ni/ gzugs ni tshor ba dang lhan cig kun du rgyu zhes bya bar yang dag par rjes su mi mthong ngo zhes bya ba nas/ rnam par shes pa ni 'du byed dang lhan cig kun du rgyu zhes bya bar yang dag par rjes su mi mthong ngo zhes bya ba la sogs pa'i bar gyis bstan to/ /de ci'i phyir zhe na/ de ni 'di ltar chos gang yang chos gang dang yang lhan cig tu kun du rgyu ba med de zhes bya ba la sogs pas 'dus pa'i ngo bo nyid dmigs su med pa'i gtan tshigs bstan to/ /sha ra dwa ti'i bu gzugs kyi stong pa nyid gang yin pa de ni gzugs ma yin te 'di ltar gzugs kyi stong pa nyid gang yin pa de yang thogs par byed pa med do zhes bya ba nas/ rnam par shes pa'i stong pa nyid gang yin pa de ni rnam par shes pa ma yin te 'di ltar rnam par shes pa'i stong pa nyid gang yin pa ste/ rnam par shes par mi byed do zhes bya ba'i bar gyis ni rang gi mtshan nyid dmigs su med pa bstan to/ / de ci'i phyir zhe na/ sha ra dwa ti'i bu gzugs kyang gzhan ma yin la/ stong pa nyid kyang gzhan ma yin la/ stong pa nyid kyang gzhan ma yin zhes bya ba nas/ gang mi skye mi 'gag cing kun nas nyon mongs par 'gyur ba med/ rnam par byang bar 'gyur ba med la mi 'grib mi 'phel te zhes bya ba'i bar gyis ni rang gi mtshan nyid dmigs su med pa'i gtan tshigs bstan to/ /'das pa yang ma yin/ ma 'ongs pa yang ma yin/ da ltar byung ba yang ma yin pa de la ni gzugs med do/ /tshor ba med do zhes bya ba nas/ de la ni sangs rgyas med do/ /byang chub med do zhes bya ba'i bar du chos thams cad dmigs su med pa bstan to/ /sha ra dwa ti'i bu byang chub sems dpa' sems dpa' chen po de ltar spyod pa ni shes rab kyi pha rol tu phyin pa la brtson zhes bya ste zhes bya ba ni/ de ltar spyod na shes rab kyi pha rol tu phyin pa la brtson pa'i mtshan nyid du chud do zhes bstan pa'o/ /de ltar shes rab kyi pha rol tu phyin pa la spyod kyang / gzugs la brtson zhes bya ba'am/ mi brtson zhes bya bar yang dag par rjes su mi mthong ngo zhes bya ba nas sha ra dwa ti'i bu rnam grangs de lta bus na/ chos thams cad 'du ba dang 'bral ba med pa'i phyir byang chub sems dpa' sems dpa' chen po shes rab kyi pha rol tu phyin pa la brtson zhes bya ba'o zhes bya ba'i bar du ni bdag nyid la byed pa por rnam par rtog pa med pa dang / bdag tu lta ba med pa'i phyir/ bdag nyid la brtson pa'am mi brtson pa'i rnam par rtog pa yongs su spangs pas brtson pa'i mtshan nyid du chud pa rnam pa gzhan gyis bstan to/ /sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ stong pa nyid dang stong pa nyid du mi sdud mi 'byed de zhes bya ba nas/ smon pa med pa dang / smon pa med par mi sdud mi 'byed de/ smon pa med pa'i rnal 'byor dang yang ma yin no zhes bya ba'i bar gyis rnam par thar pa'i sgo rnams la/ sdud pa dang 'byed pa rnam par rtog pa spang bas brtson pa'i mtshan nyid bstan te/ stong pa nyid ces bya ba'i chos zhig dngos por yod na ni stong pa nyid de ma yin pa gzhan dang sdud cing 'byed pa yang srid na/ stong pa nyid ces bya ba'i chos dngos por grub pa gang yang med pas stong pa nyid dang stong pa nyid du mi sdud mi 'byed do/ /stong pa nyid kyi rnal 'byor dang yang ma yin no zhes bya ba ni/ stong pa nyid kyi ting nge 'dzin la bya ste/ ting nge 'dzin de yang dngos po med pas ting nge 'dzin gzhan dang mi sdud mi 'byed do zhes bya ba'i tha tshig go/ /de bzhin du mtshan ma med pa dang / smon pa med pa la yang sbyar bar bya'o/ /de ci'i phyir zhe na/ de ni 'di ltar stong pa nyid la 'du ba'am 'bral ba med do zhes bya ba la sogs pa ni/ rnam par thar pa'i sgo gsum dngos po med pa'i gtan tshigs bstan to/ /sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ chos rnams kyi rang gi mtshan nyid stong pa nyid la 'jug ste/ de de ltar khong du chud pas gzugs mi sbyor mi 'byed do zhes bya ba nas/ rnam par shes pa mi sbyor mi 'byed do zhes bya ba'i bar du phung po lnga rnams kyi rang gi mtshan nyid yod par ma grub pas mi sbyor mi 'byed pa bstan to/ /gzugs dang sngon gyi mthar mi sbyor mi 'byed de zhes bya ba nas/ rnam pa thams cad mkhyen pa nyid dang da ltar byung bar mi sbyor mi 'byed de/ de ni 'di ltar da ltar byung ba nyid du yang dag par rjes su mi mthong ngo zhes bya ba'i bar gyis/ 'jig rten pa dang 'jig rten las 'das pa'i chos thams cad dang / dus gsum du mi sbyor mi 'byed par bstan pa ste/ chos rnams kyang rang bzhin gyis ma grub la/ dus gsum yang dngos po yod pa ma yin pas/ de dag gcig la gcig sbyor zhing 'byed par yang dag par rjes su mi mthong ngo / /sha ra dwa ti'i bu byang chub sems dpa' sems dpa' chen po de ltar spyod pa ni/ shes rab kyi pha rol tu phyin pa la brtson zhes bya'o zhes bya ba ni brtson pa'i mtshan nyid mjug bsdus te bstan pa ste/ de ltar chos rnams dang dus gsum dmigs su med par rtogs nas chos rnams dang dus gsum gang yang yang dag par rjes su mi mthong ba nyid shes rab kyi pha rol tu phyin pa la brtson par chud do zhes bya ba'i tha tshig go/ /sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ dus gsum mnyam pa nyid du stong pa nyid kyi phyir zhes bya ba nas/ sngon gyi mtha' 'am/ phyi ma'i mtha' dang / da ltar byung ba'i mthar mi sbyor mi 'byed do zhes bya ba'i bar gyis dus gsum gyi mtha' rnams phan tshun sbyor ba dmigs su med pa bstan te/ dmigs pa can rnams ni sngon las ci byas pa'i 'bras bu da ltar byung bar rnam par smin/ da ltar byung ba'i tshe las ci byas pa'i 'bras bu phyi ma'i mthar rnam par smin pas las dang dus gsum dngos po yod do snyam du rnam par rtog pa yang bzlog pa'i phyir/ don dam par dus gsum mnyam pa nyid de/ dbyer med cing stong pa nyid yin pa'i phyir phan tshun mi sbyor mi 'byed do zhes bstan pa'o/ /sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ rnam pa 'di dag brtson par byed de/ brtson pa des thams cad mkhyen pa nyid 'das pa dang mi sbyor mi 'byed do zhes bya ba nas/ thams cad mkhyen pa nyid da ltar byung ba dang sbyor ba'am 'byed pa lta ga la yod ces bya ba'i bar du thams cad mkhyen pa nyid dang dus gsum du mi sbyor mi 'byed pa bstan te/ dus gsum dang thams cad mkhyen pa gnyi ga yang don dam par yod pa ma yin pas/ 'das pa dang / ma 'ongs pa dang / da ltar gyi dus rnams thams cad mkhyen pa nyid kyi dmigs pa'i yul du ma grub pas dmigs par bya ba dang / dmigs par byed pa'i mtshan nyid du sbyor ba 'am 'byed pa med do zhes bya ba'i tha tshig go/ /sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gzugs dang thams cad mkhyen pa nyid du mi sbyor mi 'byed do zhes bya ba nas/ thams cad mkhyen pa nyid dang byang chub tu sbyor ba'am 'byed pa lta ga la yod ces bya ba'i bar du 'dus byas dang / 'dus ma byas pa'i chos rnams dang thams cad mkhyen pa nyid du mi sbyor mi 'byed pa bstan te/ gzugs la sogs pa'i chos rnams dang / thams cad mkhyen pa nyid don dam par dngos po yod par ma grub pas/ gzugs la sogs pa'i chos rnams thams cad mkhyen pa nyid kyi ye shes kyis mkhyen par bya ba ste dmigs pa'i yul yin/ thams cad mkhyen pa ni dmigs par byed pa yin no snyam pa dmigs par bya ba dang / dmigs par byed pa'i dngos por rtog pa spong ba dang / gzugs la sogs pa 'di dag sbyin pa la sogs pa bsod nams bya ba'i dngos por yongs su bsngos na/ thams cad mkhyen pa nyid thob pa'i rgyur 'gyur ro snyam pa'i rnam par rtog pa'i sgo nas/ rgyu dang 'bras bu lta bur yod pa'i rnam par rtog pa spangs pas/ sbyor ba dang 'byed pa med pa bstan pa ste/ de ltar spyod na shes rab kyi pha rol tu phyin pa la spyod par chud do zhes bya ba dang sbyar ro/ /sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gzugs dngos po yod ces bya bar mi sbyor ro/ /gzugs dngos po med ces bya bar mi sbyor ro zhes bya ba nas/ rnam pa thams cad mkhyen pa nyid dngos po yod ces bya bar mi sbyor ro/ /rnam pa thams cad mkhyen pa nyid dngos po med ces bya bar mi sbyor ro zhes bya ba'i bar du 'jig rten dang 'jig rten las 'das pa'i chos thams cad dngos po yod pa dang dngos po med par mi sbyor ba bstan te/ kun rdzob tu ni dngos po yod pa'i zlas dngos po med pa 'grub/ dngos po med pa'i zlas dngos po yod par 'grub kyi/ don dam par gzugs la sogs pa'i dngos po gang yang ma grub pas/ dngos po med pa yang de'i zlas mi 'grub ste/ de bas na dngos po yod pa dang dngos po med pa gnyis phan tshun ltos pa'i tshul gyis mi sbyor ro zhes bya ba'i don to/ /sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gzugs rtag ces bya bar mi sbyor ro/ /gzugs mi rtag ces bya bar mi sbyor ro zhes bya ba nas/ rnam pa thams cad mkhyen pa nyid rtag ces bya bar mi sbyor ro/ /rnam pa thams cad mkhyen pa nyid mi rtag ces bya bar mi sbyor ro zhes bya ba'i bar du 'jig rten dang 'jig rten las 'das pa'i chos thams cad la/ mu stegs can kha cig ni rtag par rtog / nyan thos dang rang sangs rgyas rnams ni mi rtag par rtog ste/ de dag gi mtha' las bzlog pa'i phyir don dam par gzugs la sogs pa'i chos rnams dngos po yod par ma grub pas/ rtag pa dang mi rtag ces mi rtog pa nyid la mi sbyor ba zhes bya'o/ / sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gzugs bde'o zhes bya bar mi sbyor ro/ /gzugs sdug bsngal lo zhes bya bar mi sbyor ro zhes bya ba nas/ rnam pa thams cad mkhyen pa nyid bde'o zhes bya bar mi sbyor ro/ /rnam pa thams cad mkhyen pa nyid sdug bsngal lo zhes bya bar mi sbyor ro zhes bya ba'i bar du gzugs la sogs pa 'jig rten dang 'jig rten las 'das pa'i chos thams cad la/ mu stegs can kha cig ni bde bar rtog /nyan thos dang rang sangs rgyas rnams ni sdug bsngal du rnam par rtog pa las bzlog pa'i phyir don dam par gzugs la sogs pa'i chos thams cad dngos po yod par ma grub pas/ de la bde ba dang sdug bsngal du rtog pa yang mi 'byung ba bstan to/ /gzugs bdag ces bya bar mi sbyor ro/ /gzugs bdag med ces bya bar mi sbyor ro zhes bya ba nas/ rnam pa thams cad mkhyen pa nyid bdag ces bya bar mi sbyor ro/ /rnam pa thams cad mkhyen pa nyid bdag med ces bya bar mi sbyor ro zhes bya ba'i bar du yang mu stegs can rnams ni gzugs la sogs pa'i chos rnams la bdag yod par rtog / nyan thos dang rang sangs rgyas rnams ni bdag med par rtog ste/ mtha' de gnyis las bzlog pa'i phyir/ byang chub sems dpa' shes rab kyi pha rol tu phyin pa la spyod pa/ bdag dang bdag med pa gnyi gar mi rtog go zhes bstan pa'o/ /gzugs zhi zhes bya bar mi sbyor ro/ /gzugs ma zhi zhes bya bar mi sbyor ro zhes bya ba nas/ rnam pa thams cad mkhyen pa nyid zhi zhes bya bar mi sbyor ro/ /rnam pa thams cad mkhyen pa nyid ma zhi zhes bya bar mi sbyor ro zhes bya ba'i bar du gzugs la sogs pa'i chos thams cad la zhi ba dang ma zhi ba rnam par rtog pa spangs pas brtson pa'i mtshan nyid bshad de/ don dam par gzugs la sogs pa'i dngos por ma grub pas/ de dag gi yon tan zhi ba zhes bya ba'am/ ma zhi ba zhes bya bar brtag tu med pa'i phyir ro/ /gzugs stong zhes bya ba'am/ mi stong zhes bya bar mi sbyor ro zhes bya ba nas/ rnam pa thams cad mkhyen pa nyid smon pa yod ces bya ba'am smon pa med ces bya ba'i bar du ni/ gzugs la sogs pa'i chos thams cad la rnam par thar pa'i sgo stong pa nyid dang / mtshan ma med pa dang / smon pa med pa'i dngos por rtog pa las bzlog ste/ stong pa nyid dang / mtshan ma med pa dang smon pa med pa'i dngos po yod par rtog pas kyang mi brtson la/ rnam par thar pa'i sgo gsum dngos po med par rtog pas kyang mi brtson na shes rab kyi pha rol tu phyin pa la brtson par chud do zhes bstan pa ste/ de la gzugs stong zhes bya ba'am/ mi stong zhes bya bar mi sbyor ro zhes bya ba nas/ rnam pa thams cad mkhyen pa nyid stong zhes bya ba'am mi stong zhes bya ba'i bar du ni rnam par thar pa'i sgo stong pa nyid la/ stong pa dang mi stong bar rnam par rtog pa spang ba'i sgo nas brtson pa'i mtshan nyid bstan pa'o/ /gzugs mtshan ma yod ces bya ba'am/ mtshan ma med ces bya bar mi sbyor ro zhes bya ba nas/ rnam pa thams cad mkhyen pa nyid mtshan ma yod ces bya ba'am/ mtshan ma med ces bya bar mi sbyor ro zhes bya ba'i bar du ni/ rnam par thar pa'i sgo mtshan ma med pa la/ mtshan ma yod pa dang mtshan ma med par rnam par rtog pa spang ba'i sgo nas brtson pa'i mtshan nyid bstan pa'o/ /gzugs smon pa yod ces bya ba'am/ smon pa med ces bya bar mi sbyor ro zhes bya ba nas/ rnam pa thams cad mkhyen pa nyid smon pa yod ces bya ba'am/ smon pa med ces bya bar mi sbyor ro zhes bya ba'i bar du ni rnam par thar pa'i sgo smon pa med pa la/ smon pa yod pa dang smon pa med par rnam par rtog pa spang ba'i sgo nas brtson pa'i mtshan nyid bstan pa'o/ /gzugs skye zhes bya ba'am 'gag ces bya bar mi sbyor ro zhes bya ba nas/ rnam pa thams cad mkhyen pa nyid skye zhes bya ba'am/ 'gag ces bya bar mi sbyor ro zhes bya ba'i bar du chos rnams la skye ba dang 'gag par rnam par rtog pa yongs su spang ba'i sgo nas brtson pa'i mtshan nyid bstan pa ste/ don dam par gzugs la sogs pa'i chos rnams dngos po yod par ma grub pas/ de dag gi chos nyid skye ba'am/ 'gag pa yang mi 'grub pa'i phyir ro/ /gzugs 'das zhes bya bar mi sbyor ro/ /ma 'ongs zhes bya bar mi sbyor ro zhes bya ba nas/ rnam pa thams cad mkhyen pa nyid 'das zhes bya bar mi sbyor ro/ /ma 'ongs zhes bya bar mi sbyor ro/ /da ltar byung ba zhes bya bar mi sbyor ro zhes bya ba'i bar du ni/ dus gsum gyi gzugs la sogs pa'i chos rnams kyi bye brag la/ rnam par rtog pa spang ba'i sgo nas brtson pa'i mtshan nyid bstan pa ste/ nyan thos rnam par smra ba pa thams cad yod par smra ba la sogs pa/ 'das pa'i gzugs ni bya ba byas zin pa'i dngos por yod/ ma 'ongs pa'i gzugs ni bya ba byed par 'gyur ba'i dngos por yod/ da ltar byung ba'i gzugs ni bya ba byed pa'i dngos por yod do zhes smra zhing rtog pa las bzlog pa'i phyir/ gzugs nyid kyang don dam par dngos po yod par ma grub pas/ gzugs kyi yon tan dang / bye brag bya ba byas zin pa dang / bya ba byed par 'gyur ba dang / bya ba byed pa'i dngos por mi 'grub ste/ de ltar mtshan mar mi 'dzin pa'i phyir dus gsum la mi sbyor ro/ /de bzhin du rnam pa thams cad mkhyen pa nyid kyi bar du sbyar bar bya'o/ /gzugs brtan zhes bya ba'am/ mi brtan zhes bya bar mi sbyor ro zhes bya ba nas/ rnam pa thams cad mkhyen pa nyid brtan zhes bya ba'am/ mi brtan zhes bya bar mi sbyor ro zhes bya ba'i bar du/ so so'i skye bo rnams ni gzugs la sogs pa'i chos rnams brtan pa dang snying po yod par lta/ nyan thos dang rang sangs rgyas rnams ni mi brtan zhing snying po med pa dang / gsob gsog lta bur lta ba las bzlog pa'i phyir/ gzugs la sogs pa'i chos rnams don dam par dngos po yod par mi grub pas/ de dag gi yon tan dang / skyon brtan pa dang / mi brtan pa yang dngos po med pa'i phyir de lta bur rnam par rtog pa spang ba'i sgo nas brtson pa'i mtshan nyid bstan pa ste/ gzugs la ji lta ba bzhin du rnam pa thams cad mkhyen pa nyid kyi bar du chos thams cad la yang sbyar bar bya'o/ /gzugs yod ces bya ba'am/ med ces bya bar mi sbyor mi 'byed do zhes bya ba nas/ rnam pa thams cad mkhyen pa nyid yod ces bya ba'am/ med ces bya bar mi sbyor mi 'byed do zhes bya ba'i bar du ni gzugs la sogs pa'i chos rnams la/ yod pa dang med pa'i mthar rtog pa spang ba'i sgo nas brtson pa'i mtshan nyid bstan pa ste/ mi sbyor zhes bya ba ni/ yod med kyi mthar rtog pa dang bcas pas brtson par mi byed pa'o/ /mi 'byed ces bya ba ni de las bzlog pa ste/ mi sbyor bar yang mi 'byed do zhes bya ba'i don to/ /kun rdzob tu chos rnams yod pa dang med pa'i mtshan nyid shes par byas nas/ thabs mkhas pas de la ma chags par brtson par bya dgos pa'i phyir ro/ /de shes rab kyi pha rol tu phyin pa la spyod pa'i tshe/ spyod ces bya bar mi dmigs so/ /mi spyod ces bya bar mi dmigs so/ /spyod kyang spyod la mi spyod kyang mi spyod ces bya bar mi dmigs so/ /spyod pa yang ma yin mi spyod pa yang ma yin zhes bya bar mi dmigs so zhes bya ba ni/ spyod pa dang mi spyod pa la sogs pa'i mtshan nyid rnam pa bzhir rnam par rtog pa spang ba'i sgo nas brtson pa'i mtshan nyid bstan pa ste/ de la spyod ces bya bar mi dmigs so zhes bya ba ni gong du bshad pa'i tshul ltar spyod cing brtson pa'i mtshan nyid dang ldan pa la yang de ltar spyod na/ shes rab kyi pha rol tu phyin pa la spyod par chud do zhes mtshan mar yang mi 'dzin pa'o/ / mi spyod ces bya bar mi dmigs so zhes bya ba ni gong ma las bzlog pa ste/ brtson pa'i mtshan nyid dang mi ldan pa la yang 'dis spyod pa'am/ brtson par mi chud do zhes kyang mtshan mar mi 'dzin pa'o/ /spyod kyang spyod la mi spyod kyang mi spyod ces bya bar mi dmigs so zhes bya ba ni/ kun rdzob tu mi spyod par yang chud la/ don dam par spyod par mi chud do zhes bya ba'i mtshan mar yang mi 'dzin pa'o/ /spyod pa yang ma yin mi spyod pa yang ma yin zhes bya bar mi dmigs so zhes bya ba ni/ rnam par rtog pa dang po las lta 'og spos pa ste/ don dam par spyod pa yang ma yin la/ kun rdzob tu mi spyod pa yang ma yin no zhes bya bar mtshan mar mi 'dzin pa ste/ de ltar rnam par rtog pa bzhir mi 'jug pa ni/ shes rab kyi pha rol tu phyin pa la brtson pa'i mtshan nyid du chud do zhes bya ba'i don to/ /sbyin pa'i pha rol tu phyin pa'i don du shes rab kyi pha rol tu phyin pa la mi spyod do zhes bya ba nas/ yang dag pa'i mtha'i don du shes rab kyi pha rol tu phyin pa la mi spyod do zhes bya ba'i bar du/ sbyin pa'i pha rol tu phyin pa la sogs pa'i chos rnams tha dad par rtog pa spang ba'i sgo nas brtson pa'i mtshan nyid bstan pa ste/ chos thams cad stong pa nyid kyi chos nyid du tha dad pa med pa la/ tha dad du 'dzin pa mi 'thad pa'i phyir ro/ /de bas na de ci'i phyir zhe na/ byang chub sems dpa' sems dpa' chen po shes rab kyi pha rol tu phyin pa la spyod pa ni/ chos gang la yang tha dad pa'am/ bye brag gam/ khyad par du lta ba med de zhes bya ba'i gtan tshigs gsungs te/ shes rab kyi pha rol tu phyin pa dang / sbyin pa'i pha rol tu phyin pa la sogs pa dngos po tha dad pa dag cig yod na ni/ gcig sgrub pa'i phyir gcig la spyad ces byar rung na/ chos de dag thams cad don dam par rang bzhin dbyer med pa'i phyir/ gcig gi don du gcig la mi spyod do zhes bya ba'i don to/ /de lha'i mig gi don du shes rab kyi pha rol tu phyin pa la mi spyod do zhes bya ba nas/ zag pa zad pa'i ye shes kyi don du shes rab kyi pha rol tu phyin pa la mi spyod do zhes bya ba'i bar du/ mngon par shes pa la brtson pa'i rnam par rtog pa spang ba'i sgo nas brtson pa'i mtshan nyid bstan pa'o/ /de ci'i phyir zhe na/ 'di ltar shes rab kyi pha rol tu phyin pa la spyod pa'i tshe/ shes rab kyi pha rol tu phyin pa nyid kyang yang dag par rjes su mi mthong na zhes bya ba la sogs pas/ mngon par shes pa'i chos rnams dang / shes rab kyi pha rol tu phyin pa nyid kyang don dam par ma grub pa'i gtan tshigs bstan pa ste/ tha dad du dbyer med pa ni gong du bshad pa dang 'dra'o/ /sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe 'di snyam du bdag gis rdzu 'phrul gyi rkang pa la gnas te/ shar phyogs kyi 'jig rten gyi khams gang gA'i klung gi bye ma snyed dag na/ sangs rgyas bcom ldan 'das gang ji snyed cig bzhugs pa de dag thams cad la rim gror bya'o/ /bkur stir bya'o/ /phu dud du bya'o/ /mchod par bya'o snyam du mi sems so zhes bya ba nas/ sems can grangs med tshad med pa dag bdag gis yongs su mya ngan las 'da' bar bya'o snyam du mi sems te zhes bya ba'i bar du mngon par shes pa drug thob pa'i mthus phyogs bcu'i sangs rgyas rnams la/ mchod cing bkur sti bya ba dang / sems can yongs su smin par bya ba'i rnam par rtog pa spang ba'i sgo nas brtson pa'i mtshan nyid bstan pa ste/ gzhan ni rang log tu zad sems can yongs su mya ngan las 'da' ba ni zag pa zad pa mngon par shes pa dang sbyar ro/ /bdud glags tshol zhing nyams bskyod pa rnams kyis glags mi rnyed de zhes bya ba nas/ sangs rgyas bcom ldan 'das de dag dang nam yang 'bral bar mi 'gyur ro zhes bya ba'i bar du brtson pa'i mtshan nyid gong du smos pa rnams dang ldan pa'i phan yon bstan pa ste/ phan yon de yang bdud kyis glags mi rnyed pa'i phan yon dang / 'jig rten dang 'jig rten las 'das pa'i don grub pa rnams lhun gyis grub pa dang / nyon mongs pa thams cad sel ba dang / phyogs bcu'i sangs rgyas bcom ldan 'das rnams nyan thos dang rang sangs rgyas kyi sar lhung ba las yongs su srung ba dang / 'jig rten pa'i lha thams cad bar du gcod pa las yongs su srung ba dang / lus kyi skyon thams cad med par 'gyur ba dang / gzungs dang ting nge 'dzin la sogs pa'i sgo mngon du 'gyur ba dang / skye ba thams cad du sangs rgyas mnyes par byed cing sangs rgyas dang bral bar mi 'gyur ba dang brgyad de/ de la bdud glags tshol zhing nyams bskyod pa rnams kyis glags mi rnyed de zhes bya bas ni bdud kyis glags mi rnyed pa'i phan yon bstan to/ /'jig rten dang 'jig rten las 'das pa'i bya ba gang ji snyed cig yod pa de dag thams cad kyang lhun gyis grub pa dang / yongs su brtag pa med par mthun par 'grub bo zhes bya bas ni/ 'jig rten dang 'jig rten las 'das pa'i don rnams lhun gyis grub pa'i phan yon bstan te/ yongs su brtag pa med par zhes bya ba ni dogs pa'am the tshom med par 'grub bo zhes bya ba'i don to/ /'jig rten pa'i nyon mongs pa gang ji snyed yod pa de dag thams cad kyang rab tu bsal bar 'gyur ro zhes bya bas ni/ 'jig rten pa'i nyon mongs pa thams cad sel ba'i phan yon bstan to/ /shar phyogs kyi 'jig rten gyi khams gang+gA'i klung gi bye ma snyed dag na/ sangs rgyas bcom ldan 'das gang ji snyed cig bzhugs pa zhes bya ba la sogs pas ni/ phyogs bcu'i sangs rgyas rnams kyis nyan thos dang rang sangs rgyas kyi sar ltung ba las yongs su srung ba'i phan yon bstan to/ /rgyal po chen po bzhi dang / sum cu rtsa gsum gyi lha rnams zhes bya ba la sogs pas ni/ 'jig rten pa'i lha rnams bar du gcod pa las srung ba'i phan yon bstan to/ /de la lus kyi skyon du bya ba gang ji snyed cig yod pa de dag thams cad kyang tshe 'di nyid la thams cad du thams cad med par 'gyur ro zhes bya bas ni/ lus la skyon med pa'i phan yon bstan to/ /gzungs kyi sgo dang / ting nge 'dzin gyi sgo dang / spobs pa dang / so so yang dag par rig pa'i sgo dag kyang tshegs mi che bar mngon du 'gyur ro zhes bya bas ni gzungs dang ting nge 'dzin la sogs pa'i sgo 'grub pa'i phan yon bstan to/ /tshegs mi che ba zhes bya ba ni nyon mongs shing 'bad mi dgos par 'grub bo zhes bya ba'i don to/ /skye ba'i skye mched thams cad du yang zhes bya ba la sogs pas sangs rgyas mnyes par byed cing sangs rgyas dang 'bral bar mi 'gyur ba'i phan yon bstan pa'o/ /sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa ni 'di snyam du chos gang la la zhes bya ba la sogs pas chos rnams 'du ba dang 'bral bar rnam par rtog pa spang ba'i sgo nas brtson pa'i mtshan nyid bstan pa ste/ 'khor ba dang mya ngan las 'das pa'i chos gang yang don dam par yod par ma grub pas/ 'du ba dang 'bral ba la sogs pa yang mi 'grub ste/ phrad pa'am mi phrad pa zhes bya ba yang 'du ba dang 'bral ba'i rnam grangs tsam du zad do/ /'di snyam du bdag gi chos kyi dbyings mngon par sangs rgyas par 'gyur ram/ 'on tam mi 'gyur zhes bya bar mi sems te zhes bya bas ni mngon par 'tshang rgya bar rnam par rtog pa spang ba'i sgo nas brtson pa'i mtshan nyid bstan pa ste/ don dam par mngon par 'tshang rgya bar byed pa dang / mngon par 'tshang rgya bar bya ba mi 'grub pa'i phyir ro/ /chos gang yang chos kyi dbyings dang tha dad par yang dag par rjes su mi mthong ste zhes bya ba yang don gong ma nyid gsal bar ston pa ste/ chos kyi dbyings zhes bya ba ni stong pa nyid kyi rang bzhin yin la/ de dang tha mi dad pa ni stong pa nyid kyi rang bzhin no zhes bya ba'i don to/ /chos kyi dbyings dang chos rnams su bye brag tu bya ba mi byed de zhes bya ba ni don dam par chos rnams thams cad chos kyi dbyings kyi rang bzhin du ro gcig pas mtshan nyid bye brag tu dbyer med do zhes bstan pa'o/ /chos kyi dbyings khong du chud par 'gyur ram/ 'on tam khong du chud par mi 'gyur zhes bya bar mi sems te zhes bya ba ni chos kyi dbyings dang bdag gnyis dbyer med pas khong du chud par byed pa dang / khong du chud par bya ba mi dmigs pa'i phyir te/ de bas na de ni 'di ltar des chos gang gis chos gang khong du chud par bya ba de lta bu'i chos gang yang yang dag par rjes su mthong ba med do zhes bya ba la sogs pas de'i gtan tshigs bstan to/ /de yang 'di ltar de ni chos kyi dbyings stong zhes bya bar mi sbyor/ mi stong zhes bya bar mi sbyor ro zhes bya ba ni/ don dam par chos kyi dbyings rtog par byar yang med pas stong zhes bya ba'am/ mi stong zhes bya bar rtog par mi byed do zhes bya ba'i don to/ /gzugs dang stong pa nyid du mi sbyor/ stong pa nyid dang gzugs su mi sbyor ro zhes bya ba nas/ yid kyi rnam par shes pa'i khams dang stong pa nyid du mi sbyor/ stong pa nyid dang yid kyi rnam par shes pa'i khams su mi sbyor ro zhes bya ba'i bar du ni/ phung po dang / khams dang / skye mched kyi chos rnams stong pa nyid dang sbyor ba'i rnam par rtog pa spang ba'i sgo nas brtson pa'i mtshan nyid bstan pa ste/ gzugs la sogs pa'i chos rnams kyi rang bzhin stong pa nyid yin te/ stong pa dang tha mi dad pa'i phyir ro/ /de ci'i phyir zhe na/ sha ra dwa ti'i bu 'di lta ste/ stong pa nyid kyi rnal 'byor 'di ni rnal 'byor dam pa ste zhes bya ba ni/ de'i gtan tshigs bstan pa ste/ chos rnams dngos po yod par lta zhing / mtshan mar 'dzin pa rnams ni/ gzugs la sogs pa dang stong pa nyid du sbyor ba srid kyi/ shes rab kyi pha rol tu phyin pa la spyod pa'i rnal 'byor 'di la gnas pa ni/ mtshan ma thams cad dang bral ba'i phyir rnal 'byor dam pa ste/ de'i phyir de lta bur sbyor ba med do zhes bya ba'i don to/ /sha ra dwa ti'i bu byang chub sems dpa' sems dpa' chen po stong pa nyid la spyod pa ni/ nyan thos kyi sa'am/ rang sangs rgyas kyi sar mi ltung ngo zhes bya ba la sogs pas de ltar brtson pa'i mtshan nyid dang ldan pa'i phan yon nyan thos dang rang sangs rgyas kyi sar mi ltung ba dang / sangs rgyas kyi zhing yongs su dag par byed pa dang / sems can yongs su smin par byed pa dang / bla na med pa yang dag par rdzogs pa'i byang chub tu myur du mngon par 'tshang rgya bar 'gyur ba rnams bstan to/ /sha ra dwa ti'i bu rnal 'byor du bya ba gang ci yang rung ste/ de dag gi nang na shes rab kyi pha rol tu phyin pa'i rnal 'byor ni rab ces bya/ mchog ces bya zhes bya ba la sogs pa ni de ltar brtson pa'i phan yon gong du smos pa rnams dang ldan pa'i phyir/ nyan thos dang rang sangs rgyas la sogs pa'i rnal 'byor gang bas kyang lhag pa'i phyir shes rab kyi pha rol tu phyin pa la brtson zhing rnal 'byor du byed pa 'di rab dang mchog la sogs par 'gyur te/ rab ces bya ba dang mchog ces bya ba la sogs pa ni bzang ba'i rnam grangs tsam du zad do/ /de ci'i phyir zhe na/ 'di lta ste/ shes rab kyi pha rol tu phyin pa'i rnal 'byor 'di ni zhes bya ba la sogs pas/ rnal 'byor de rnam par thar pa'i sgo gsum dang ldan zhing / bla na med pa yin pa'i phyir rab dang mchog la sogs par 'gyur ba'i gtan tshigs bstan to/ /sha ra dwa ti'i bu de ltar brtson pa'i byang chub sems dpa' sems dpa' chen po ni lung bstan pa zhes bya ste/ bla na med pa yang dag par rdzogs pa'i byang chub tu nye bar gyur pa'o zhes bya ba ni shes rab kyi pha rol tu phyin pa la de ltar brtson zhing rnal 'byor du byed pa ni/ byang chub sems dpa'i sa brgyad pa thob cing sangs rgyas su lung bstan pa dang / ring por mi thogs par mngon par 'tshang rgya bar 'gyur ba'i phan yon bstan pa'o/ /sha ra dwa ti'i bu de ltar brtson pa'i byang chub sems dpa' sems dpa' chen po ni sems can tshad med grangs med pa'i don byed kyang zhes bya ba nas/ chos kyi 'khor lo bskor bar bya'o snyam du mi sems so zhes bya ba'i bar du de ltar brtson pa'i yon tan lung bstan pa la sogs pa dang ldan yang / bdag ni shes rab kyi pha rol tu phyin pa la brtson pa yin no snyam mam/ lung bstan pa la nye bar gyur pa yin no snyam mam/ sangs rgyas kyi zhing yongs su dag par bya'o snyam mam/ sems can yongs su smin par bya'o snyam mam/ bdag sangs rgyas nas chos kyi 'khor lo bskor bar bya'o snyam du mtshan mar 'dzin cing rlom sems su 'gyur ba med pa'i phan yon bstan to/ /de ci'i phyir zhe na/ de ni 'di ltar de chos kyi dbyings la bye brag tu 'byed pa med do zhes bya ba nas/ de lta bu'i chos gzhan gang yang yang dag par rjes su mi mthong ngo zhes bya ba'i bar gyis/ de ltar rlom sems mi skye ba'i gtan tshigs bstan to/ /de ci'i phyir zhe na/ byang chub sems dpa' sems dpa' chen po de shes rab kyi pha rol tu phyin pa la spyod pa'i tshe/ sems can gyi 'du shes mi skye'o zhes bya ba nas/ mthong ba po'i 'du shes mi skye'o zhes bya ba'i bar gyis rlom sems mi 'byung ba'i gtan tshigs bstan te/ mu stegs can gyis brtags pa'i bdag tu lta ba rnam pa mang po ming gis smos pa rnams las 'ga' zhig gis 'du shes skye na ni/ rlom sems kyang skye na bdag tu lta ba de rnams gang du yang 'du shes mi skye bas/ de lta bu'i rlom sems mi 'byung ngo zhes bya ba'i don to/ /de ci'i phyir zhe na/ de ni 'di ltar sems can shin tu skye ba med cing 'gag pa med pa'i phyir te zhes bya ba la sogs pas bdag tu 'du shes mi skye ba'i gtan tshigs bstan to/ /sha ra dwa ti'i bu de ltar spyod pa'i byang chub sems dpa' sems dpa' chen po ni/ sems can skye ba med pas shes rab kyi pha rol tu phyin pa la spyod pa yin zhes bya ba la sogs pas/ de ltar bdag tu lta ba'i 'du shes med pas/ shes rab kyi pha rol tu phyin pa la spyod pa'i mtshan nyid dang rnam grangs bstan to/ /sha ra dwa ti'i bu 'di ni byang chub sems dpa' sems dpa' chen po rnams kyi rnal 'byor dam pa ste zhes bya ba la sogs pa de ltar skye ba med pa dang / 'gag pa med pa la sogs pa'i sgo nas shes rab kyi pha rol tu phyin pa la spyod pa ni/ 'jig rten pa dang / nyan thos dang / rang sangs rgyas thams cad kyi rnal 'byor las 'phags pa'i phyir rnal 'byor dam pa zhes bya ste/ de bas na des de ma yin pa'i rnal 'byor rnams zil gyis mnan te gnas so zhes bya ba gsungs te/ de ma yin pa'i rnal 'byor zhes bya ba ni 'jig rten dang / nyan thos dang rang sangs rgyas kyi rnal 'byor te/ de dag las 'phags pa'i phyir zil gyis mnan te gnas so zhes bshad pa'o/ /sha ra dwa ti'i bu rnal 'byor 'di la spyod pa'i byang chub sems dpa' sems dpa' chen po ni de bzhin gshegs pa'i stobs bcu mngon par sgrub po zhes bya ba la sogs pas rnal 'byor dam pa de la spyod pa'i yon tan bstan pa ste/ yon tan de yang de bzhin gshegs pa'i stobs bcu la sogs pa sangs rgyas kyi yon tan rnams sgrub nus pa dang / sbyin pa'i pha rol tu phyin pa la sogs pa pha rol tu phyin pa drug gi mi mthun pa'i phyogs ser sna la sogs pa med pa bstan to/ /'di yan chad du brtson pa rnams kyi mtshan nyid bshad zin to/ /da ni brtson pa rnams kyi rab tu dbye ba bstan pa'i phyir/ gnas brtan shA ri'i bus bcom ldan 'das byang chub sems dpa' sems dpa' chen po gang shes rab kyi pha rol tu phyin pa'i rnal 'byor 'dis spyod pa de/ gang nas tshe 'phos te 'dir skyes pa lags/ 'di nas tshe 'phos nas gang du skye bar 'gyur zhes gnas gang nas lhags pa dang / gnas gar skye ba'i sa phyogs zhus pa dang / de'i lan du gnas gang nas lhags pa bstan pa'i phyir/ sha ra dwa ti'i bu byang chub sems dpa' sems dpa' chen po gang shes rab kyi pha rol tu phyin pa'i rnal 'byor 'dis rnam par spyod pa ni/ sangs rgyas kyi zhing gzhan nas tshe 'phos te 'dir skyes pa'am/ dga' ldan gyi lha'i ris dang / mi'i nang nas tshe 'phos te 'dir skyes par shes par bya'o zhes bka' stsal te/ de ltar gnas gang nas lhags pa'i sa phyogs spyir bstan nas/ sha ra dwa ti'i bu de la byang chub sems dpa' sems dpa' chen po gang sangs rgyas kyi zhing gzhan nas tshe 'phos te 'dir skyes pa de ni zhes bya ba la sogs pas/ byang chub sems dpa' sems dpa' chen po shes rab kyi pha rol tu phyin pa la brtson pa rnams kyi rab tu dbye ba mdor bsdus nas rab 'bring rnam pa gsum du phye ste bstan to/ /de la byang chub sems dpa' sems dpa' chen po gang sangs rgyas kyi zhing gzhan nas tshe 'phos te 'dir skyes pa de ni zhes bya ba nas/ de bzhin gshegs pa dgra bcom pa yang dag par rdzogs pa'i sangs rgyas de dag la yang bsnyen bkur byed par 'gyur ro zhes bya ba'i bar du ni/ byang chub sems dpa' shes rab rnon po mchog rnams bstan te/ sangs rgyas kyi zhing yongs su dag pa na shes rab kyi pha rol tu phyin pa la spyod spyod pa'i shugs kyis 'dir skyes na yang shes rab kyi pha rol tu phyin pa'i rnal 'byor 'di myur du 'grub pa dang / 'di nas tshe 'phos na yang shes rab kyi pha rol tu phyin pa'i chos zab mo 'di mngon sum du 'gyur zhing / shes rab kyi pha rol tu phyin pa'i rnal 'byor la mnyam par 'jog pa dang / sangs rgyas kyi zhing yongs su dag par skye ba dang / sangs rgyas de rnams la bsnyen bkur byed nus par 'gyur ba de lta bu dag kyang yod do zhes bstan pa ste/ shes rab kyi pha rol tu phyin pa'i rnal 'byor la/ rnal 'byor myur du 'grub ces bya ba ni shes rab kyi pha rol tu phyin pa'i don zab mo bsgom pa la brtson par byed pa na rnam par mi rtog pa'i ting nge 'dzin bsgom pa la/ sems rtse gcig tu gnas shing bsam gtan las su rung ste/ bsam gtan gyi nyams myur du thob par 'gyur ro zhes bya ba'i don to/ / sha ra dwa ti'i bu de la byang chub sems dpa' sems dpa' chen po gang dga' ldan gyi lha'i ris nas tshe 'phos nas 'dir skyes pa de ni tshe gcig gis thogs pa ste/ de ni pha rol tu phyin pa drug las nyams pa med pa'o/ /gzungs kyi sgo dang / ting nge 'dzin gyi sgo thams cad kyang der ma 'dus pa med do zhes bya ba ni/ byang chub sems dpa' sems dpa' chen po rnams kyi nang nas/ shes rab 'bring dang ldan pa rnams bstan te/ de dag ni dga' ldan lha'i ris nas tshe 'phos nas sangs rgyas kyi zhing 'dir skyes te pha rol tu phyin pa drug mi nyams pa dang / gzungs dang ting nge 'dzin gyi sgo thams cad dang ldan pa de lta bu dag kyang yod do zhes bya ba'i don to/ /sha ra dwa ti'i bu byang chub sems dpa' sems dpa' chen po gang mi'i nang nas tshe 'phos nas mi dang skal ba mnyam pa nyid du skyes pa de ni zhes bya ba nas/ de la gzungs kyi sgo dang ting nge 'dzin gyi sgo rnams kyang myur du mngon du mi 'gyur ro zhes bya ba'i bar gyis byang chub sems dpa' sems dpa' chen po'i nang nas/ shes rab rtul po tha ma rnams bstan pa ste/ phyir mi ldog pa'i byang chub sems dpa' sems dpa' chen po ma gtogs par zhes bya ba ni/ sa brgyad pa'i byang chub sems dpa' phyir mi ldog pa kha cig sems can gyi don gyi dbang gis mi'i nang du skye zhing tshe 'phos pa dag kyang yod de/ de dag ni dbang po rtul po ma yin la shes rab kyi pha rol tu phyin pa'i rnal 'byor la yang mnyam par 'jog nus shing / gzungs dang ting nge 'dzin gyi sgo rnams kyang thob par nus kyi/ de la ma gtogs pa dge ba'i las dang bsod nams kyi dbang gis mi'i nang nas tshe 'phos te/ mi'i nang du skyes pa kha cig ni de'i tshe shes rab kyi pha rol tu phyin pa la brtson yang sngon shes rab kyi pha rol tu phyin pa la goms par ma byas pa dang / rang bzhin gyis dbang po rtul bas/ shes rab kyi pha rol tu phyin pa'i rnal 'byor la myur du mnyam par 'jog mi nus la/ gzungs dang ting nge 'dzin gyi sgo rnams kyang myur du mngon du mi 'gyur ro zhes bstan pa ste/ myur du mngon du mi 'gyur ro zhes 'byung ba dang sbyar na/ tshe 'di la shes rab kyi pha rol tu phyin pa la goms par byas pa la sogs kyis 'gyur ro zhes bya ba'i don to/ /byang chub sems dpa' de lta bu dag kyang yod do zhes bstan pa'o/ /sha ra dwa ti'i bu gang khyod kyis de skad du zhes bya ba nas/ sangs rgyas bcom ldan 'das rnams dang 'bral bar mi 'gyur ro zhes bya ba'i bar gyis ni/ gong du zhus pa'i lan rab 'bring gsum du rnam par phye ste bstan nas/ de nas mdor bsdus te lan btab pa de yin no zhes bka' stsal pa'o/ /sha ra dwa ti'i bu byang chub sems dpa' sems dpa' chen po thabs la mi mkhas pa dag ces bya ba la sogs pa ni brtson pa rnams kyi rab tu dbye ba rgyas par bstan pa ste/ de dag kyang thabs la mkhas mi mkhas dang / dbang po rno rtul dang / spyod pa'i khyad par las rnam pa bzhi bcu rtsa lnga yod par shes par bya ste/ de dag kyang gang zhe na/ thabs la mi mkhas pa dag bsam gtan dang po la yang mnyam par gzhog ces bya ba nas/ de dag dbang po rtul zhing mi rno ba yang yod do zhes bya ba'i bar gyis ni/ dbang po rtul po thabs la mi mkhas pa bsam gtan dang ting nge 'dzin thob pa'i rgyus lha tshe ring por skye ba dag kyang yod de/ der skyes pa'i rgyus sangs rgyas bcom ldan 'das la bsnyen bkur byed na yang dbang po rtul por 'gyur ba dag kyang yod do zhes bstan pa ste de ni dang po ste rnam pa gcig go/ /sha ra dwa ti'i bu gzhan yang byang chub sems dpa' sems dpa' chen po bsam gtan la yang mnyam par gzhog la zhes bya ba nas/ de dag kyang dbang po rtul po yin te/ dbang po rno ba ma yin no zhes bya ba'i bar gyis ni/ dbang po rtul po thabs dang mi ldan pa bsam gtan thob pa'i rgyus/ gzugs kyi khams kyi lhar mi skye bar 'dod pa'i khams su mi'i nang du skye ba dag kyang yod do zhes bstan pa ste/ de ni gnyis pa'o/ /sha ra dwa ti'i bu 'di ltar yang byang chub sems dpa' sems dpa' chen po bsam gtan dang po la yang snyoms par 'jug ces bya ba nas/ bskal pa bzang po 'di nyid la bla na med pa yang dag par rdzogs pa'i byang chub tu mngon par 'tshang rgya'o zhes bya ba'i bar du ni/ byang chub sems dpa' bsam gtan dang / ting nge 'dzin la yang snyoms par 'jug /byang chub sems dpa'i spyod pa la yang spyad nas/ bsam gtan gyi dbang gis lhar skye ba spangs te/ snying rje'i dbang gis sems can gyi don dang / sangs rgyas mnyes par bya ba la brtson pas sangs rgyas kyi zhing yongs su dag pa dag tu skyes nas/ bskal pa bzang po 'di nyid la mngon par 'tshang rgya ba dag kyang yod do zhes bstan pa ste/ de ni gsum pa'o/ /sha ra dwa ti'i bu gzhan yang byang chub sems dpa' sems dpa' chen po bsam gtan dang po la snyoms par 'jug ces bya ba nas/ de yang srid pa la brkam pa'i phyir ma yin gyi/ sems can yongs su smin par bya ba'i phyir ro zhes bya ba'i bar du ni/ bsam gtan dang ting nge 'dzin la snyoms par 'jug kyang / de dag gi dbang gis lhar mi skye bar sems can gyi don du rgyal rigs che zhing mtho ba'i rigs su skye ba dag kyang yod do zhes bstan pa ste/ de ni bzhi pa'o/ /sha ra dwa ti'i bu 'di ltar yang bsam gtan dang po la snyoms par 'jug ces bya ba nas/ sangs rgyas bcom ldan 'das rnams kyang mnyes par byed do zhes bya ba'i bar du ni/ bsam gtan dang ting nge 'dzin la snyoms par 'jug kyang / thabs mkhas pas bsam gtan dang ting nge 'dzin gyi dbang gis lha tshe ring por mi skye bar sems can gyi don du 'dod pa'i khams kyi lha'i ris drug tu skye ste/ mthu phun sum tshogs pa la gnas nas sems can yongs su smin par bya ba dang / sangs rgyas kyi zhing yongs su dag par bya ba dang / sangs rgyas mnyes par byed pa dag kyang yod do zhes bstan pa ste/ de ni lnga pa'o/ /sha ra dwa ti'i bu 'di ltar yang byang chub sems dpa' sems dpa' chen po shes rab kyi pha rol tu phyin pa la spyod pa dag thabs mkhas pas bsam gtan dang po la yang snyoms par 'jug ces bya ba nas/ de bzhin gshegs pa dgra bcom pa yang dag par rdzogs pa'i sangs rgyas de dag la yang / chos kyi 'khor lo bskor ba'i don du gsol ba gdab pa byed do zhes bya ba'i bar du ni/ thabs mkhas pas sems can gyi don du tshangs pa'i 'jig rten du skyes nas/ rdzu 'phrul gyis sangs rgyas kyi zhing nas sangs rgyas kyi zhing du rgyu zhing chos nyan pa dang / sangs rgyas mnyes par byed pa la brtson pa dang / de bzhin gshegs pa mngon par sangs rgyas nas ring por ma lon pa la chos kyi 'khor lo bskor bar gsol ba 'debs pa dag kyang yod do zhes bstan pa ste/ de ni drug pa'o/ /sha ra dwa ti'i bu 'di ltar yang byang chub sems dpa' sems dpa' chen po tshe gcig gis thogs pa zhes bya ba nas/ sangs rgyas kyi zhing sna tshogs su chos kyi 'khor lo bskor ba dag kyang yod do zhes bya ba'i bar du ni/ bsam gtan dang ting nge 'dzin la sogs pa la snyoms par 'jug kyang / de dag gi dbang gis lha tshe ring por mi skye bar dga' ldan gyi lha'i nang du skye ste/ de nas kyang sems can gyi don du dzam+bu'i gling 'dir mi'i nang du skye ba bstan te mngon par sangs rgyas nas/ sangs rgyas kyi zhing sna tshogs dag tu chos kyi 'khor lo bskor ba dag kyang yod de/ dper na 'phags pa byams pa byang chub sems dpa' lta bu'o zhes bstan pa ste/ de ni bdun pa'o/ /sha ra dwa ti'i bu 'di ltar yang byang chub sems dpa' sems dpa' chen po mngon par shes pa drug thob pa dag ces bya ba nas/ sangs rgyas kyi zhing nas sangs rgyas kyi zhing du 'dong ba dag kyang yod do zhes bya ba'i bar du ni/ mngon par shes pa'i dbang gis khams gsum gyi lha dang mi'i nang du mi skye bar sangs rgyas kyi zhing yongs su dag par skye ste/ sangs rgyas bcom ldan 'das mnyes par byed pa dag kyang yod do zhes bstan pa ste/ de ni brgyad pa'o/ /sha ra dwa ti'i bu 'di ltar yang byang chub sems dpa' sems dpa' chen po mngon par shes pa drug thob pa dag ces bya ba nas/ nyan thos dang rang sangs rgyas kyi theg pa'i sgra yang mi grag pa de lta bu'i sangs rgyas kyi zhing nas sangs rgyas kyi zhing du 'dong ba dag kyang yod do zhes bya ba'i bar du yang / mngon par shes pa'i dbang gis sangs rgyas kyi zhing yongs su dag par skye ba dag kyang yod do zhes bstan pa ste/ de ni dgu pa'o/ /sha ra dwa ti'i bu 'di ltar yang zhes bya ba nas sangs rgyas kyi zhing nas sangs rgyas kyi zhing du 'dong ba dag kyang yod do zhes bya ba'i bar du ni/ sangs rgyas kyi zhing tshe dpag tu med par skyes nas/ sems can dang sangs rgyas kyi chos yongs su smin par byed pa dag kyang yod do zhes bstan pa ste/ de ni bcu pa'o/ /sha ra dwa ti'i bu 'di ltar yang byang chub sems dpa' sems dpa' chen po zhes bya ba nas/ gang na sangs rgyas bcom ldan 'das rnams bzhugs pa de dag tu skye bar 'gyur bar byed pa dag kyang yod do zhes bya ba'i bar du ni/ mngon par shes pa'i dbang gis dkon mchog gsum gyi sgra mi grag pa'i 'jig rten gyi khams su song nas/ der dkon mchog gsum gyi sgra dang bcas par chos bshad nas/ dkon mchog gsum gyi legs pa brjod pas sems can de dag dga' ba skyes nas/ sems can de dag sangs rgyas bzhugs pa'i 'jig rten gyi khams su skye bar byed pa dag kyang yod do zhes bstan pa ste/ de ni bcu gcig pa'o/ /sha ra dwa ti'i bu 'di ltar yang byang chub sems dpa' sems dpa' chen po dang po sems bskyed phyin chad ces bya ba nas/ de dag tu yang sems can rnams kyi don byed pa yod do zhes bya ba'i bar du ni/ sangs rgyas kyi zhing yongs su dag par skyes nas sa dang po thob par byas te/ bsam gtan dang / ting nge 'dzin dang / snyoms par 'jug pa rnams thob nas/ byang chub kyi phyogs kyi chos rnams dang / sangs rgyas kyi chos rnams bsgoms te khams gsum du yang mi skye bar khams gsum gyi sems can rnams kyi don byed pa dag kyang yod do zhes bstan pa ste/ de ni bcu gnyis pa'o/ /sha ra dwa ti'i bu 'di ltar yang byang chub sems dpa' sems dpa' chen po pha rol tu phyin pa drug la spyod pa dag /dang po sems bskyed pa nyid kyis byang chub sems dpa'i skyon med par zhugs nas/ phyir mi ldog pa'i sa thob pa yang yod do zhes bya ba ni/ pha rol tu phyin pa drug yongs su rdzogs par byed cing sa dang po thob nas/ ring po ma lon par phyir mi ldog pa'i sa brgyad pa thob par byed pa dag kyang yod do zhes bstan pa ste/ de ni bcu gsum pa'o/ /sha ra dwa ti'i bu 'di ltar yang byang chub sems dpa' sems dpa' chen po dang po sems bskyed pa nyid kyis zhes bya ba nas/ bskal pa'i lhag mar gnas pa dag kyang yod do zhes bya ba'i bar du ni/ sa dang po thob ma thag tu mngon par sangs rgyas nas chos kyi 'khor lo bskor ba dang / sems can yongs su smin par byas nas mya ngan las 'das nas kyang dam pa'i chos yun ring du gnas par byed pa dag kyang yod do zhes bstan pa ste/ de ni bcu bzhi pa'o/ /sha ra dwa ti'i bu 'di ltar yang byang chub sems dpa' sems dpa' chen po dang po sems bskyed pa nyid kyis zhes bya ba nas/ sangs rgyas kyi zhing yongs su dag par bya ba'i don du 'dong ba dag kyang yod do zhes bya ba'i bar du ni sa dang po thob nas/ shes rab kyi pha rol tu phyin pa'i rnal 'byor yongs su rdzogs par bya ste/ byang chub sems dpa'i 'khor mang po dang bcas par sangs rgyas bcom ldan 'das rnams blta ba dang / sems can yongs su smin par bya ba dang / sangs rgyas kyi zhing yongs su dag par bya ba'i phyir sangs rgyas kyi zhing nas sangs rgyas kyi zhing du 'dong ba dag kyang yod do zhes bstan pa ste/ de ni bco lnga pa'o/ /sha ra dwa ti'i bu byang chub sems dpa' sems dpa' chen po shes rab kyi pha rol tu phyin pa la spyod pa zhes bya ba nas/ thabs mkhas pa dang ldan pa rnams bsam gtan dang / tshad med pa dang / ting nge 'dzin dang / snyoms par 'jug pa 'di dag yang dang yang du rnam par mnan cing snyoms par 'jug pa dag kyang yod do zhes bya ba'i bar du rnam par mi rtog pa'i shes rab kyi pha rol tu phyin pa la gnas te/ bsam gtan dang ting nge 'dzin la dbang du gyur pa bstan pa'i phyir/ thabs mkhas pas thod rgal du snyoms par 'jug pa dag kyang yod do zhes bstan pa ste/ de ni bcu drug pa'o/ /sha ra dwa ti'i bu 'di ltar yang byang chub sems dpa' sems dpa' chen po dran pa nye bar gzhag pa bzhi thob pa zhes bya ba nas/ de dag ni phyir mi ldog par shes par bya ba'i bar du ni/ byang chub kyi phyogs kyi chos rnams dang / sangs rgyas kyi chos rnams dang ldan zhing yongs su 'dris pa'i shes pas rgyun du zhugs pa'i 'bras bu la sogs pa yongs su shes par byas kyang de dag mngon sum du mi byed par sems can gzhan rnams lam gyi 'bras bu de dag la so sor 'god pa dag kyang yod do zhes bstan pa ste/ nyan thos dang rang sangs rgyas rnams kyi 'bras bu thob par bya ba'i ye shes gang yin pa de ni/ byang chub sems dpa' sems dpa' chen po'i bzod pa yin te zhes bya ba ni/ nyan thos dang rang sangs rgyas rnams kyis rgyun du zhugs pa la sogs pa'i 'bras bu thob par gyur pa'i ye shes de byang chub sems dpas thob kyang mi skye ba'i chos la bzod pa thob pas/ nyan thos dang rang sangs rgyas ltar rgyun du zhugs pa la sogs pa'i 'bras bu la mi gnas par de dag shes par bya ste/ sems can yongs su smin pa dang / sangs rgyas kyi zhing yongs su dag par byed nus pa nyid la bzod pa zhes bya ste/ de ni bcu bdun pa'o/ /sha ra dwa ti'i bu 'di ltar yang byang chub sems dpa' sems dpa' chen po pha rol tu phyin pa drug la gnas shing / dga' ldan gyi gnas yongs su sbyong ba dag kyang yod de/ sha ra dwa ti'i bu byang chub sems dpa' sems dpa' chen po de dag ni bskal pa bzang po par shes par bya'o zhes bya ba ni/ rnam par mi rtog pa'i pha rol tu phyin pa drug la gnas nas/ bskal pa bzang po 'di nyid la mngon par sangs rgyas par byed pa dag kyang yod do zhes bstan pa ste/ dga' ldan gyi gnas yongs su sbyong zhes bya ba ni bskal pa bzang po 'di nyid la dga' ldan gyi lha'i pho brang du mngon par sangs rgyas nas/ dga' ldan gyi lha'i ris kyi sems can gyi 'jig rten dang / snod kyi 'jig rten yongs su dag par mdzad pa la bya ste/ de ni bco brgyad pa'o/ /sha ra dwa ti'i bu 'di ltar yang byang chub sems dpa' sems dpa' chen po shes rab kyi pha rol tu phyin pa la spyod pa zhes bya ba nas/ de dag ni tshe gcig gis thogs par shes par bya'o zhes bya ba'i bar du ni/ byang chub sems dpa' skye ba gcig gis thogs pa dag /nyan thos dang rang sangs rgyas dang / sangs rgyas kyi chos thams cad dang ldan zhing sems can yongs su smin par bya ba'i phyir/ yongs su 'dris pa'i shes pas khong du chud par byed kyi/ nyan thos dang rang sangs rgyas rnams ltar mngon sum du mi byed pa dag kyang yod do zhes bstan pa ste/ de ni bcu dgu pa'o/ /sha ra dwa ti'i bu 'di ltar yang byang chub sems dpa' sems dpa' chen po pha rol tu phyin pa drug la spyod pa dag ces bya ba nas/ de dag ni bskal pa grangs med tshad med pas bla na med pa yang dag par rdzogs pa'i byang chub tu mngon par 'tshang rgya'o zhes bya ba'i bar du/ byang chub sems dpa' la la myur du mngon par 'tshang mi rgya bar pha rol tu phyin pa drug la spyod cing / sems can gyi don du 'khor ba na yun ring du gnas te/ sems can rnams bla na med pa'i byang chub la bskul ba dang / sangs rgyas kyi zhing yongs su dag par byas te/ bskal pa grangs med tshad med pa 'das nas/ bla na med pa yang dag par rdzogs pa'i byang chub tu mngon par 'tshang rgya bar byed pa dag kyang yod de/ dper na 'phags pa 'jam dpal gzhon nur gyur pa lta bu'o zhes bstan pa ste/ de ni nyi shu pa'o/ /sha ra dwa ti'i bu 'di ltar yang byang chub sems dpa' sems dpa' chen po pha rol tu phyin pa drug la gnas shing zhes bya ba nas/ gnod pa dang ldan pa'i lus kyi las dang / yid kyi las mi byed pa dag kyang yod do zhes bya ba'i bar du ni/ byang chub sems dpa' la la pha rol tu phyin pa drug la gnas shing / bdag nyid lus dang ngag dang yid gsum sdom pa la gnas nas/ sems can rnams kyang sdom pa de la 'god pa dag kyang yod do zhes bstan pa ste/ de ni nyi shu gcig go/ /sha ra dwa ti'i bu 'di ltar yang byang chub sems dpa' sems dpa' chen po zhes bya ba nas/ sems can rnams kyi ngan song gi lam gsum po rgyun gcod pa dag kyang yod do zhes bya ba'i bar du ni/ byang chub sems dpa' kha cig sems can gyi don du sangs rgyas kyi zhing nas sangs rgyas kyi zhing du 'dong zhing ngan song gsum gyi rgyun gcod pa dag kyang yod do zhes bstan pa ste/ de ni nyi shu gnyis pa'o/ /shar dwa ti'i bu 'di ltar yang byang chub sems dpa' sems dpa' chen po zhes bya ba nas/ 'tsho ba'i yo byad skyon med pa yongs su sgrub pa dag kyang yod do zhes bya ba'i bar du ni/ byang chub sems dpa' kha cig pha rol tu phyin pa drug la gnas shing / sbyin pa nyid kyis sems can rnams ci 'dod pa'i dngos pos tshim par byas te/ sems can rnams kyang sbyin pa nyid la 'god pa dag kyang yod do zhes bstan pa ste/ de ni nyi shu gsum pa'o/ /sha ra dwa ti'i bu 'di ltar yang zhes bya ba nas/ sems can rnams lus dang ngag dang yid kyi sdom pa la rab tu 'god pa dag kyang yod do zhes bya ba'i bar du ni/ byang chub sems dpa' la la pha rol tu phyin pa drug la gnas kyang / tshul khrims kyi pha rol tu phyin pa lhur blangs te/ sems can rnams kyang tshul khrims kyi sdom pa la rab tu 'god pa dag kyang yod do zhes bstan pa ste/ de ni nyi shu bzhi pa'o/ /sha ra dwa ti'i bu 'di ltar yang zhes bya ba nas/ gnod sems med pa la rab tu 'god par byed pa dag kyang yod do zhes bya ba'i bar du ni/ byang chub sems dpa' la la pha rol tu phyin pa drug yongs su rdzogs par byed kyang / bzod pa'i pha rol tu phyin pa lhur blangs te/ sems can rnams kyang bzod pa'i pha rol tu phyin pa la rab tu 'god pa dag kyang yod do zhes bstan pa ste/ de ni nyi shu lnga pa'o/ sha ra dwa ti'i bu 'di ltar yang zhes bya ba nas/ mngon par brtson pa la rab tu 'god pa dag kyang yod do zhes bya ba'i bar du ni/ byang chub sems dpa' kha cig pha rol tu phyin pa drug yongs su rdzogs par byed kyang / sems can le lo can rnams kyi gnyen por brtson 'grus kyi pha rol tu phyin pa lhur blangs te/ sems can rnams kyang brtson 'grus kyi pha rol tu phyin pa la 'god pa dag kyang yod do zhes bstan pa ste/ de ni nyi shu drug pa'o/ /sha ra dwa ti'i bu 'di ltar yang zhes bya ba nas/ 'dod pa la dben pa la rab tu 'god pa dag kyang yod do zhes bya ba'i bar du ni/ byang chub sems dpa' la la pha rol tu phyin pa drug yongs su rdzogs par byed kyang / sems can sems g.yengs pa rnams kyi gnyen por bsam gtan gyi pha rol tu phyin pa lhur blangs te/ sems can rnams kyang bsam gtan gyi pha rol tu phyin pa dang / 'dod pa las dben pa la 'god pa dag kyang yod do zhes bstan pa ste/ de ni nyi shu bdun pa'o/ /sha ra dwa ti'i bu 'di ltar yang zhes bya ba nas/ ngan song thams cad las yang dag par bzla ba'i phyir chos ston pa dag kyang yod do zhes bya ba'i bar du ni/ byang chub sems dpa' kha cig pha rol tu phyin pa drug yongs su rdzogs par byed kyang / sems can shes rab 'chal pa rnams kyi gnyen por shes rab kyi pha rol tu phyin pa lhur blangs te/ shes rab kyi mthus de bzhin gshegs pa'i skur sprul te chos sna tshogs pa bstan nas sems can rnams ngan song las bton te shes rab kyi pha rol tu phyin pa la 'god pa dag kyang yod do zhes bstan pa ste/ de ni nyi shu brgyad pa'o/ /sha ra dwa ti'i bu 'di ltar yang byang chub sems dpa' sems dpa' chen po zhes bya ba nas/ byang chub sems dpa' sems dpa' chen po tshe gcig gis thogs pa sha stag skye bar byed pa dag kyang yod do zhes bya ba'i bar du ni/ byang chub sems dpa' la la sangs rgyas kyi skur sprul nas/ sems can rnams yongs su smin par byed cing / sangs rgyas rnams mnyes par byed de der chos mnyan te/ sangs rgyas kyi zhing de'i yon tan rnams mthong nas/ bdag gis sangs rgyas kyi zhing de bas kyang rgya che zhing khyad par du 'phags par bya'o/ /der tshe gcig gis thogs pa'i byang chub sems dpa' sha stag skye bar byed pa dag kyang yod do zhes bstan pa ste/ de ni nyi shu dgu pa'o/ /phyogs lhag ma rnams kyang don de dang 'dra ste/ lho phyogs kyi 'gres ni sum cu'o/ /nub phyogs kyi 'gres ni sum cu gcig pa'o/ /byang phyogs kyi 'gres ni sum cu gnyis pa'o/ /byang shar gyi phyogs mtshams kyi 'gres ni sum cu gsum pa'o/ /shar lho'i phyogs mtshams kyi 'gres ni sum cu bzhi pa'o/ /lho nub kyi phyogs mtshams kyi 'gres ni sum cu lnga pa'o/ /nub byang gi phyogs mtshams kyi 'gres ni sum cu drug pa'o/ /'og gi phyogs kyi 'gres ni sum cu bdun pa'o/ /steng gi phyogs kyi 'gres ni sum cu brgyad pa ste/ byang chub sems dpa' kha cig de lta bu dag kyang yod do zhes bya ba'i tha tshig go/ /sha ra dwa ti'i bu 'di ltar yang byang chub sems dpa' sems dpa' chen po pha rol tu phyin pa drug la spyod pa'i tshe zhes bya ba nas/ yid yongs su dag pa la bslab par bya'o zhes bya ba'i bar du ni/ byang chub sems dpa' la la skyes bu chen po'i mtshan sum cu rtsa gnyis dang ldan par byas te/ lus blta na sdug la dbang po gsal zhing yongs su dag la/ spyod lam mdzes pas skye bo thams cad kyi yid du 'ong bar byas te/ skye bo kun de la mos pa'i dge ba'i rtsa ba dang / sngon gyi smon lam gyi mthus sems can rnams theg pa gsum gyis yongs su mya ngan las 'da' bar byed pa dag kyang yod do zhes bstan pa ste/ de ni sum cu dgu pa'o/ / sha ra dwa ti'i bu 'di ltar yang byang chub sems dpa' sems dpa' chen po zhes bya ba nas/ gzhan mi smod pa dag kyang yod do zhes bya ba'i bar du ni/ byang chub sems dpa' la la pha rol tu phyin pa drug la spyod cing / dbang po yongs su dag par byas nas sems can bdag bstod cing gzhan la smod pa rnams kyi gnyen por bdag de ltar dbang po yongs su dag cing skyon med kyang / bdag la mi bstod gzhan la mi smod pa'i sgo nas sems can yongs su smin par byed pa dag kyang yod do zhes bstan pa ste/ de ni bzhi bcu pa'o/ /sha ra dwa ti'i bu 'di ltar yang byang chub sems dpa' sems dpa' chen po dang po sems bskyed phyin chad ces bya ba nas/ log par 'gro ba dang ngan song du mi ltung ba dag yod do zhes bya ba'i bar du ni/ sa dang po la gnas pa'i byang chub sems dpa' kha cig sbyin pa'i pha rol tu phyin pa dang / tshul khrims kyi pha rol tu phyin pa la gnas te/ pha rol tu phyin pa de gnyis kyi 'bras bus dbul ba'i sdug bsngal dang / ngan 'gro'i sdug bsngal mi myong bar sems can gyi don la brtson pa dag kyang yod do zhes bstan pa ste/ de ni bzhi bcu gcig pa'o/ /sha ra dwa ti'i bu 'di ltar yang byang chub sems dpa' sems dpa' chen po dang po sems bskyed phyin chad phyir mi ldog pa'i sa ma thob kyi bar du nam yang dge ba bcu'i las kyi lam mi gtong ba dag kyang yod do zhes bya ba ni/ byang chub sems dpa' kha cig dge ba bcu'i las kyi lam lhur blangs nas sa dang po thob par byas te/ sems can rnams kyang dge ba bcu la 'god pa dag kyang yod do zhes bstan pa ste/ de ni bzhi bcu gnyis pa'o/ /sha ra dwa ti'i bu 'di ltar yang byang chub sems dpa' sems dpa' chen po zhes bya ba nas/ sbyin pa dang ngag snyan pas sems can yongs su sdud pa dag kyang yod do zhes bya ba'i bar du ni/ byang chub sems dpa' kha cig sbyin pa'i pha rol tu phyin pa dang / tshul khrims kyi pha rol tu phyin pa lhur blangs te/ 'khor los sgyur ba'i rgyal por gyur nas sems can rnams dge ba bcu la bkod de/ bsdu ba rnam pa gnyis kyis sdud pa dag kyang yod do zhes bstan pa ste/ de ni bzhi bcu gsum pa'o/ /sha ra dwa ti'i bu 'di ltar yang byang chub sems dpa' sems dpa' chen po zhes bya ba nas/ sangs rgyas bcom ldan 'das de dag la yo byad thams cad dang / mchod pa sna tshogs kyis rim gro dang / bkur sti dang / phu dud dang / mchod pa byed pa dag kyang yod do zhes bya ba'i bar du ni/ byang chub sems dpa' kha cig sbyin pa dang / tshul khrims kyi pha rol tu phyin pa lhur len cing / tshe rabs du mar 'khor los sgyur ba'i rgyal srid la gnas te/ mthu chen po dang ldan pas phyogs bcu'i sangs rgyas mang po mnyes par byed cing / mchod pa byed pa dag kyang yod do zhes bstan pa ste/ de ni bzhi bcu bzhi pa'o/ /sha ra dwa ti'i bu 'di ltar yang byang chub sems dpa' sems dpa' chen po pha rol tu phyin pa drug la gnas shing zhes bya ba nas/ chos snang ba de dang nam yang bral bar mi byed pa dag kyang yod de zhes bya ba'i bar du ni/ byang chub sems dpa' kha cig pha rol tu phyin pa drug la gnas shing chos bstan pas sems can rnams kyi ma rig pa'i mun pa bsal te/ yongs su smin par byas nas mngon par 'tshang rgya ba dag kyang yod do zhes bstan pa ste/ de ni bzhi bcu lnga pa'o/ /sha ra dwa ti'i bu 'di ni byang chub sems dpa' sems dpa' chen po sangs rgyas kyi chos las yang dag par byung ba yin no zhes bya ba ni gong du smos pa'i byang chub sems dpa' de lta bu dag sangs rgyas kyi chos la dar zhing 'phel ba'i rim pa bstan pa yin no zhes bya ba'i don to/ /sha ra dwa ti'i bu de lta bas na byang chub sems dpa' sems dpa' chen po zhes bya ba la sogs pas ni/ byang chub sems dpa' de dag nyid las gleng bslangs nas/ chos rgya cher bshad pa'i skabs dbye ba'i phyir gsungs te/ kha na ma tho ba dang bcas pa'i lus dang / ngag dang yid kyi las zhes bya ba ni skabs 'dir sdig pa mi dge ba'i las la mi bya'i/ dmigs pa dang bcas pa'i lus dang ngag yid gsum gyi las kha na ma tho ba zhes bya ste/ dmigs pa dang bcas pa ni byang chub sems dpa' shes rab kyi pha rol tu phyin pa la spyod pa'i skyon du 'gyur ba'i phyir de lta bu'i go skabs mi dbye'o zhes bstan pa'o/ /de skad ces bka' stsal pa dang / tshe dang ldan pa sha ra dwa ti'i bus bcom ldan 'das la 'di skad ces gsol to zhes bya ba la sogs pas/ don dang tshig de nyid las glengs te/ chos rgya cher bshad pa'i skabs dbye ba'i phyir lus dang ngag yid gsum gyi las kha na ma tho ba dang bcas pa gang lags zhes zhus pa'o/ /bcom ldan 'das kyis bka' stsal pa zhes bya ba la sogs pa ni/ lus dang ngag yid gsum gyi las kha na ma tho ba gang yin pa bstan pa ste/ lus dang ngag yid gsum dngos po yod par dmigs pa dang / de dag gis bya zhing brtsams pa'i las dngos po yod par lta ba ni/ byang chub sems dpa'i skyon yin pas kha na ma tho ba dang 'dra bar spang bar bya ba yin pa'i phyir kha na ma tho ba zhes bya'o/ /sha ra dwa ti'i bu byang chub sems dpa' sems dpa' chen po shes rab kyi pha rol tu phyin pa la spyod pas ni/ lus gang dang / ngag gang dang / yid gang gis 'jungs pa'i sems bskyed pa'am zhes bya ba la sogs pas pha rol tu phyin pa drug gi mi mthun pa'i phyogs 'jungs pa la sogs pa 'byung ba'i lus dang ngag yid gsum mi dmigs pa bstan to/ /sha ra dwa ti'i bu byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ lus kyi gnas ngan len skyed pa dang zhes bya ba nas/ yid kyi las kha na ma tho ba med pa'o zhes bya ba'i bar du ni/ byang chub sems dpa' la lus dang ngag yid gsum gyi sgo nas kha na ma tho ba mi 'byung ba dang / ci'i phyir kha na ma tho ba mi 'byung ba'i gtan tshigs bstan pa ste/ yid kyi gnas ngan len skyed pa tsam du ni shes par mi bya ste/ de ni gnas med pa'o zhes bya ba ni/ byang chub sems dpa' la lus dang ngag yid gsum gyi sgo nas dmigs pa dang bcas pa'i skyon de lta bu 'byung mi srid do zhes bya ba'i don te/ gnas ngan len zhes bya ba dang / kha na ma tho ba zhes bya ba ni 'phyas su 'gyur ba'am/ skyon du 'gyur ba'i rnam grangs su rig par bya'o/ /lus kyi gnas ngan len yongs su sbyong ngo zhes bya ba/ byang chub sems dpa' ni lus kyi skyon dag par byed cing med par byed pa yin gyi/ skyon de lta bu skyed pa ma yin no zhes bya ba'i don to/ /gsol ba/ bcom ldan 'das ji ltar na byang chub sems dpa' sems dpa' chen po lus kyi gnas ngan len sbyong ba lags zhes bya ba la sogs pa ni/ chos nyan pa'i 'khor rnams kyi the tshom bsal ba'i phyir/ lus dang ngag yid gsum gyi gnas ngan len ji ltar sbyong zhes zhus pa dang / lus dang ngag yid gsum don dam par mi dmigs pa nyid gnas ngan len sbyong ba yin no zhes bshad pa'o/ /sha ra dwa ti'i bu gzhan yang byang chub sems dpa' sems dpa' chen po sems dang po bskyed phyin chad/ dge ba bcu'i las kyi lam rnams yang dag par blangs te gnas shing zhes bya ba la sogs pa ni/ kun rdzob tu lus dang ngag yid gsum gyi skyon med pa rnam pa gzhan du bstan pa ste/ byang chub sems dpa'i sa dang po thob nas dge ba bcu la gnas te/ nyan thos dang rang sangs rgyas kyi sems mi skye bar sems can thams cad la snying rje chen po bskyed pa yang / lus dang ngag yid gsum gyi skyon sbyong ba yin no zhes bstan pa'o/ /sha ra dwa ti'i bu byang chub sems dpa' sems dpa' chen po shes rab kyi pha rol tu phyin pa la spyod pa/ byang chub kyi lam yongs su sbyong zhing zhes bya ba la sogs pa ni/ byang chub kyi lam yongs su sbyong zhing sbyin pa la sogs pa'i pha rol tu phyin pa drug yongs su rdzogs par byed pa de lta bu dag kyang yod do zhes brtson pa'i rab tu dbye ba bstan to/ /gsol pa/ bcom ldan 'das byang chub sems dpa' sems dpa' chen po'i byang chub kyi lam gang lags zhes bya ba ni/ gang byang chub kyi lam yongs su sbyong zhing pha rol tu phyin pa drug spyod pa dag kyang yod do zhes bshad pa la/ pha rol tu phyin pa drug ma gtogs par byang chub kyi lam gzhan gang zhig yod snyam nas zhus pa'o/ /bcom ldan 'das kyis bka' stsal pa zhes bya ba nas/ 'di ltar chos thams cad la dmigs pa med cing / blang ba med pa dang / dor ba med pa'o zhes bya ba'i bar du ni/ byang chub kyi lam gang yin pa bstan pa ste/ lus dang ngag yid gsum la sogs pa'i chos ming gis smos pa rnams dngos po yod par mi blta ste/ de dag la mi dmigs pa nyid bla na med pa'i byang chub thob par 'gyur ba'i rgyu yin pa'i phyir byang chub kyi lam zhes bya'o zhes bstan pa'o/ /sha ra dwa ti'i bu byang chub sems dpa' sems dpa' chen po lam de lta bus pha rol tu phyin pa drug la spyod cing nan tan du byed pa de dag ni sus kyang thub pa med do zhes bya bas ni/ chos thams cad mi dmigs pa la gnas pa'i byang chub sems dpa' de la bdud dang bar du gcod pa sus kyang mi tshugs so zhes bstan pa'o/ /gsol pa/ bcom ldan 'das byang chub sems dpa' sems dpa' chen po tshul ji lta bur spyod pa rnams thub pa ma mchis pa lags zhes bya ba ni/ gong du cis kyang mi tshugs pa'i yon tan mdor bshad pa de nyid rgyas par bshad pa'i skabs dbye ba'i phyir zhus pa'o/ /bcom ldan 'das kyis bka' stsal pa/ nam byang chub sems dpa' sems dpa' chen po shes rab kyi pha rol tu phyin pa la spyod pa'i tshe gzugs la rlom sems med pa dang zhes bya ba nas/ mya ngan las 'das pa la rlom sems med par 'gyur ba de'i tshe/ byang chub sems dpa' sems dpa' chen po pha rol tu phyin pa drug gis rnam par 'phel ba yin te sus kyang thub pa med do zhes bya ba'i bar du ni/ 'dus byas dang 'dus ma byas pa'i chos gang la yang dngos po yod par mi sems par gyur pa de'i tshe/ bdud dang phas kyi rgol ba la sogs pa sus kyang mi tshugs shing bar chad byed mi nus so zhes bstan pa ste/ rlom sems zhes bya ba ni dngos po yod par sems shing de dag la brten pa'am bsnyems pa'o/ /sha ra dwa ti'i bu 'di ltar yang byang chub sems dpa' sems dpa' chen po pha rol tu phyin pa drug la gnas te/ thams cad mkhyen pa nyid kyi ye shes yongs su rdzogs par byed cing zhes bya ba nas/ de lta bu'i lus yongs su 'dzin par mi 'gyur ba dag kyang yod do zhes bya ba'i bar du ni/ thams cad mkhyen pa'i ye shes kyi mthu rgya cher bstan pa'i phyir gnas brtan sha ra dwa ti'i bu the tshom 'drir gzhug pa'i skabs dbye ba'i phyir/ byang chub sems dpa' kha cig thams cad mkhyen pa'i ye shes yongs su rdzogs par byed pa ngan song rnams su mi skye zhing mi dbul po dang dman pa'i lus su mi skye ba dag kyang yod do zhes bstan pa'o/ /de nas tshe dang ldan pa sha ra dwa ti'i bus bcom ldan 'das la 'di skad ces gsol to zhes bya ba nas/ de lta bu'i lus yongs su 'dzin par mi 'gyur ba'i thams cad mkhyen pa'i ye shes de gang lags zhes bya ba'i bar du thams cad mkhyen pa'i ye shes de ni de bzhin gshegs pa la mnga'i/ byang chub sems dpa' la mi mnga' ba'i rigs na/ byang chub sems dpa' la mnga' ba'i ye shes de gang lags zhes zhus pa'o/ /bcom ldan 'das kyis bka' stsal pa zhes bya ba nas/ sangs rgyas kyi zhing gi yon tan rnam par phye ba dag kyang mthong ngo zhes bya ba'i bar du ni/ byang chub sems dpa' sa brgyad pa yan chad la phyogs bcu'i de bzhin gshegs pa mang po mthong ba dang / de dag las chos nyan pa dang / byang chub sems dpa'i dge 'dun dang 'grogs pa dang / sangs rgyas kyi zhing yongs su dag pa mthong bar nus pa'i ye shes yod de/ ye shes de lta bu thams cad mkhyen pa'i ye shes kyi rgyu'i gtso bor gyur pa'i phyir/ thams cad mkhyen pa'i ye shes dang ldan no zhes bshad do/ /ye shes de lta bu dang ldan pa'i byang chub sems dpa' sems dpa' chen po ni/ sangs rgyas kyi 'du shes mi skyed do zhes bya ba nas/ sangs rgyas kyi chos thams cad kyang yongs su rdzogs par byed de/ sangs rgyas kyi chos thams cad kyang yang dag par rjes su mi mthong ngo zhes bya ba'i bar du/ ye shes de lta bu dang ldan na kun rdzob tu chos thams cad la spyod cing bsgom yang don dam par chos de gang la yang dngos po'i 'du shes mi skye ba dang / dngos por mi dmigs pa dang / dngos po yod par mi lta ba'i yon tan bstan to/ /sha ra dwa ti'i bu 'di ltar yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ mig lnga rab tu thob pa dang / yongs su sbyong ba yod do zhes bya ba la sogs pas/ byang chub sems dpa' la la spyan lnga dang ldan pa yang yod do zhes brtson pa'i rab tu dbye ba bstan pa ste/ sngar spyan lnga bstan pa ni/ de bzhin gshegs pa'i spyan lnga'i skabs su bstan pa 'dir ni byang chub sems dpa'i spyan lngar bshad pa'i skabs su bstan pas lan gnyis su zlos pa'i nyes pa med do/ /de la sha ra dwa ti'i bu byang chub sems dpa' sems dpa' chen po sha'i mig gis dpag tshad brgya mthong ba yod do zhes bya ba nas/ sha ra dwa ti'i bu 'di ni byang chub sems dpa' sems dpa' chen po'i sha'i mig yongs su dag pa'o zhes bya ba'i bar du byang chub sems dpa'i sha'i mig bstan pa ste/ byang chub sems dpa'i sa mthon dman dang / yon tan che chung gi rim pa las/ la la'i sha'i mig gis ni dpag tshad brgya tshun chad mthong / la las ni dpag tshad stong mthong / la las ni stong gsum gyi stong chen po'i 'jig rten gyi khams kun mthong ba yang yod de/ mdor na dngos po gzugs can du gtogs pa thams cad la thogs pa med par mkhyen pa 'jug pa ni byang chub sems dpa'i sha'i mig ces bya'o/ /sha ra dwa ti'i bu rgyal po chen po bzhi'i ris kyi lha'i mig gang yin pa de ni byang chub sems dpas rab tu shes so zhes bya ba nas/ sha ra dwa ti'i bu 'di ni byang chub sems dpa' sems dpa' chen po'i lha'i mig yongs su dag pa'o zhes bya ba'i bar du ni/ byang chub sems dpa'i lha'i mig yongs su dag pa bshad pa ste/ byang chub sems dpa'i lha'i mig yongs su dag pas ni/ 'dod pa dang gzugs kyi khams kyi lha'i ris kyi lha'i mig ci 'dra ba dang de dag gi spyod yul dang / lha de dag gi bsam gtan dang / ting nge 'dzin dang / phyogs bcu'i sems can rnams kyi skye ba dang / tshe 'phos pa rnams thogs pa med par shes shing / 'dod pa dang gzugs kyi khams kyi lha rnams kyis ni/ byang chub sems dpa'i lha'i spyan ci 'dra ba dang / de'i spyod yul shes par mi nus so zhes bstan pa'o/ /sha ra dwa ti'i bu byang chub sems dpa' sems dpa' chen po shes rab kyi mig dang ldan pas zhes bya ba nas/ 'di ni sha ra dwa ti'i bu byang chub sems dpa' chen po'i shes rab kyi mig yongs su dag pa'o zhes bya ba'i bar du ni/ byang chub sems dpa'i shes rab kyi mig yongs su dag pa bstan pa ste/ mdor na 'dus byas pa la sogs pa'i chos ming gis smos pa thams cad la/ shes rab kyis thogs pa med par 'jug cing mkhyen pa la/ shes rab kyi mig yongs su dag pa zhes bya'o/ /sha ra dwa ti'i bu byang chub sems dpa' sems dpa' chen po chos kyi mig gis zhes bya ba nas/ de ltar na sha ra dwa ti'i bu byang chub sems dpa' sems dpa' chen po'i chos kyi mig yongs su dag pa yin no zhes bya ba'i bar du/ byang chub sems dpa'i chos kyi spyan bshad pa ste/ 'phags pa nyan thos rnams kyi nyon mongs pa spang ba dang / sa'i rim pa la sogs pa shes pa dang / byang chub sems dpa' rnams kyi spyod pa dang / mthu dang yon tan la sogs pa'i chos rnams mkhyen pa la chos kyi spyan zhes bya'o/ /de la gang zag 'di ni dad pa'i rjes su 'gro ba zhes bya ba ni/ 'phags pa nyan thos kyi gang zag dbang po rtul po dad pa'i rjes su 'brang ba la bya'o/ /gang zag 'di ni chos kyi rjes su 'gro ba zhes bya ba ni/ dbang po rnon po chos kyi rjes su 'brang ba la bya'o/ /gang zag 'di ni stong pa nyid la gnas pa ste/ gang zag 'di'i dbang po lnga ni rnam par thar pa'i sgo stong pa nyid kyis skye bar 'gyur ro zhes bya ba ni/ nyan thos kyi gang zag kha cig rnam par thar pa'i sgo stong pa nyid kyi ting nge 'dzin la gnas nas/ dad pa la sogs pa'i dbang po lnga thob par 'gyur ba dag kyang yod de de lta bu shes pa'o/ /dbang po lngas de ma thag pa'i ting nge 'dzin thob par 'gyur ro zhes bya ba ni/ dad pa la sogs pa'i dbang po lnga thob pa'i mthus rgyun tu zhugs pa'i 'bras bu thob par bya ba la sbyor ba'i ting nge 'dzin thob par 'gyur ba ste/ ting nge 'dzin de'i mod la gzhan gyis bar ma chod par rgyun tu zhugs pa'i 'bras bu thob par 'gyur ba'i phyir de ma thag pa'i ting nge 'dzin zhes bya'o/ /de ma thag pa'i ting nge 'dzin gyis rnam par grol ba'i ye shes mthong ba skye bar 'gyur ro zhes bya ba ni/ rgyun tu zhugs pa'i 'bras bu thob pa la rnam par grol ba'i ye shes mthong ba zhes bya ba ste/ rgyun tu zhugs pa'i 'bras bu thob pa na/ 'phags pa'i sa dang zag pa med pa'i chos sngon ma thob cing ma mthong ba/ thob cing mthong bar gyur pa'i phyir mthong ba'i lam zhes kyang bya ste/ mthong ba'i lam de la sgrib pa dang mi mthun pa'i phyogs spangs te/ de dag las grol ba'i ye shes thob pa la/ rnam par grol ba'i ye shes mthong ba skye bar 'gyur ro zhes bya'o/ /rnam par grol ba'i ye shes mthong bas/ 'jig tshogs la lta ba dang / the tshom dang / tshul khrims dang / brtul zhugs bsnyems pa'i kun du sbyor ba gsum rab tu spong bar 'gyur te zhes bya ba ni/ de ltar rgyun tu zhugs pa'i 'bras bu thob pa na/ kun du sbyor ba'i chos gsum spong ste/ de la 'jig tshogs la lta ba zhes bya ba ni/ phung po lnga 'jig pa'i rang bzhin can rnams tshogs pa la bdag gcig pu rtag par blta'o/ /the tshom ni 'phags pa'i bden pa la yid gnyis za ba'o/ /tshul khrims dang brtul zhugs bsnyems pa ni/ tshul khrims srung ba dang / brtul zhugs kyi dka' ba nyams su blangs pa tsam gyis mya ngan las 'da' ba thob par 'dzin pa ste/ chos de gsum gyis grol zhing thar par ma 'gyur gyi 'khor bar kun du sbyor zhing skye bar 'gyur ba'i phyir/ kun du sbyor ba gsum zhes bya'o/ /gang zag 'di ni rgyun du zhugs pa zhes bya'o zhes bya ba ni/ de ltar yon tan gong du smos pa rnams dang ldan pa de lta bu'i gang zag 'di ni rgyun du zhugs pa yin no zhes shes pa ste/ de lta bu'i shes pa ni byang chub sems dpa'i chos kyi spyan no zhes bya ba'i don to/ /des bsgom pa'i lam rab tu thob nas/ 'dod pa'i 'dod chags dang / ngan sems rab tu srab par byed de/ gang zag 'di ni lan cig phyir 'ong ba'o zhes bya ba ni/ rgyun tu zhugs pa'i 'bras bu thob ste/ mthong ba'i lam la gnas pa yan chad la bsgom pa'i lam zhes bya ste/ zag pa med pa'i chos ji ltar mthong ba de nyid gsal bar bya zhing / mi mthun pa'i phyogs spang ba'i phyir/ yang dang yang du goms par byed pa la bsgom pa'i lam zhes bya'o/ /'dod pa'i 'dod chags ni/ 'dod pa'i khams kyi 'dod chags kyi yul rnams la zhen pa la 'dod pa'i 'dod chags zhes bya'o/ /ngan sems zhes bya ba ni zhe sdang gis sems can gzhan la gnod par sems pa'o/ /de ltar bsgom pa'i lam la gnas shing / 'dod chags dang zhe sdang gnyis spong bar sbyor ba'i gang zag de mi dang lha rnams kyi nang du lan cig skyes te/ de phan chad mi dang lha'i nang du mi skye ba la lan cig phyir 'ong ba zhes bya'o/ /de lam de nyid de bas kyang shin tu bsgoms nas/ 'dod pa'i 'dod chags dang / gnod sems rab tu spong ba thob par byed de/ gang zag 'di ni phyir mi 'ong ba'o zhes bya ba ni/ bsgom pa'i lam de nyid la gnas te lan cig phyir 'ong ba'i tshe/ 'dod chags dang zhe sdang srab mor byas pa de dag ma lus par spong ba ni/ slar lha dang mi'i nang du mi skye bas na phyir mi 'ong ba zhes bya'o/ /de lam de nyid de bas kyang shin tu bsgoms pas/ gzugs kyi 'dod chags dang zhes bya ba la sogs pas/ gang zag dgra bcom pa'i rgyus bstan te/ gzugs kyi khams dang gzugs med pa'i khams kyi 'dod chags dang / ma rig pa dang / nga rgyal dang rgol ba spangs pas/ dgra bcom pa thob par bstan pa ste/ gzugs kyi khams dang gzugs med pa'i khams kyi 'dod chags ni/ gzugs kyi khams kyi bsam gtan bzhi dang / gzugs med pa'i khams kyi snyoms par 'jug pa bzhi'i ting nge 'dzin gyi ro la chags pa'o/ /ma rig pa ni bsam gtan dang / ting nge 'dzin la mi shes pa'i sgrib pa'o/ /nga rgyal ni bsam gtan dang ting nge 'dzin de dag nyid bsnyems pa'o/ /rgod pa'i bsam gtan dang / ting nge 'dzin de la mnyam par gzhag pa'i tshe/ zhi gnas kyi shas chung zhing lhag mthong gi shas che bas sems g.yeng ba ste/ skyon de rnams spangs pas khams gsum gyi nyon mongs pa dang bral ba la/ gang zag dgra bcom pa zhes bya ste/ gang zag gi rim pa de lta bu dag shes pa ni/ byang chub sems dpa' rnams kyi chos kyi spyan zhes bya'o/ /gang zag 'di ni mtshan ma med pa la gnas pa ste zhes bya ba nas/ gang zag 'di ni dgra bcom pa'o zhes bya ba'i bar du yang snga ma bzhin te/ khyad par du rnam par thar pa'i sgo mtshan ma med pa'i ting nge 'dzin la gnas te bsgom pa tsam du zad do/ /gang zag 'di ni smon pa med pa la gnas pa ste zhes bya ba nas gang zag 'di ni dgra bcom pa'o zhes bya bar rab tu shes te/ sha ra dwa ti'i bu 'di ni byang chub sems dpa' sems dpa' chen po'i chos kyi mig yongs su dag pa'o zhes bya ba'i bar du yang bshad pa'i don snga ma bzhin te/ khyad par du smon pa med pa'i ting nge 'dzin la gnas te rgyun tu zhugs pa nas/ dgra bcom pa'i bar du thob par byed pa tsam du zad de/ de lta bu shes pa ni byang chub sems dpa' rnams kyi chos kyi spyan yin no zhes bstan pa'o/ /sha ra dwa ti'i bu gzhan yang byang chub sems dpa' sems dpa' chen pos gang ci yang rung ste/ kun 'byung ba'i chos can de dag thams cad ni 'gag pa'i chos can no zhes bya ba nas/ 'di ni sha ra dwa ti'i bu byang chub sems dpa' sems dpa' chen po'i chos kyi mig yongs su dag pa'o zhes bya ba'i bar du/ mos pas spyod pa'i sa la 'jig rten dang 'jig rten las 'das pa'i chos skye ba'i chos can gang yin pa de dag thams cad 'gag pa'i chos can du shes pas dbang po lnga la sogs pa thob par 'gyur ba de lta bu shes pa yang / byang chub sems dpa'i chos kyi mig yongs su dag pa yin no zhes bstan pa ste/ kun 'byung ba'i chos can zhes bya ba ni skye ba'i chos can zhes bya ba'i don to/ /sha ra dwa ti'i bu gzhan yang byang chub sems dpa' sems dpa' chen po chos kyi mig gis/ byang chub sems dpa' sems dpa' chen po 'di ni sems dang po bskyed pa ste/ sbyin pa'i pha rol tu phyin pa la spyod do zhes bya ba nas/ sha ra dwa ti'i bu 'di yang byang chub sems dpa' sems dpa' chen po'i chos kyi mig yongs su dag pa'o zhes bya ba'i bar du sa dang po'i byang chub sems dpa'i spyod pa dang / yon tan shes pa bstan pa ste/ shes pa de lta bu yang byang chub sems dpa'i chos kyi mig yongs su dag pa yin no zhes bshad pa'o/ /sha ra dwa ti'i bu gzhan yang byang chub sems dpa' sems dpa' chen pos/ byang chub sems dpa' sems dpa' chen po 'di ni bla na med pa yang dag par rdzogs pa'i byang chub tu lung bstan pa'o zhes bya ba nas/ de ltar na sha ra dwa ti'i bu byang chub sems dpa' sems dpa' chen po'i chos kyi mig yongs su dag pa yin no zhes bya ba'i bar du ni/ sa gnyis pa yan chad kyi byang chub sems dpa' rnams kyi rang bzhin dang / spyod pa dang / yon tan rnams shes pa bstan te/ shes pa de lta bu yang byang chub sems dpa'i chos kyi mig yongs su dag pa yin no zhes bshad pa'o/ /sha ra dwa ti'i bu 'di ni byang chub sems dpa' sems dpa' chen po byang chub kyi sems kyi rjes la rdo rje lta bu'i ting nge 'dzin la mnyam par bzhag nas zhes bya ba nas/ sha ra dwa ti'i bu byang chub sems dpa' sems dpa' chen po bla na med pa yang dag par rdzogs pa'i byang chub tu mngon par sangs rgyas pa'i sangs rgyas kyi mig yongs su dag pa'o zhes bya ba'i bar du ni/ byang chub sems dpa'i sangs rgyas kyi spyan yongs su dag pa bstan pa ste sangs rgyas su ma gyur pa la/ byang chub sems dpa' sangs rgyas kyi spyan zhes bya ba ni sangs rgyas kyi spyan gyi yon tan de lta bu byang chub sems dpa'i sa bcu la yongs su sbyangs pa'i rgyus thob pa'i phyir/ byang chub sems dpa'i sangs rgyas kyi spyan zhes bya'o/ sha ra dwa ti'i bu de ltar na byang chub sems dpa' sems dpa' chen po mig lnga yongs su sbyang bar 'dod pa dang thob par 'dod pas zhes bya ba nas/ mig lnga po de dag la bslab pa'i byang chub sems dpa' sems dpa' chen po rnams ni/ bla na med pa yang dag par rdzogs pa'i byang chub tu mngon par 'tshang rgya'o zhes bya ba'i bar du ni/ byang chub sems dpa'i spyan lnga po de dag thob pa yang pha rol tu phyin pa drug spyad pas thob po zhes bstan pa ste/ de ci'i phyir zhe na zhes bya ba la sogs pas pha rol tu phyin pa drug gi nang du spyan lnga la sogs pa dge ba'i chos thams cad 'dus pa'i gtan tshigs bstan to/ /sha ra dwa ti'i bu la la zhig yang dag par smra bas zhes bya ba la sogs pas pha rol tu phyin pa drug gi nang na yang shes rab kyi pha rol tu phyin pa gtso bo yin par bstan pa ste/ su zhig shes rab kyi pha rol tu phyin pa'i nang du dge ba'i chos thams cad 'dus so zhes smra ba de ni yang dag par smra ba'am bden par smra ba yin no zhes bya ba'i don to/ /sha ra dwa ti'i bu shes rab kyi pha rol tu phyin pa 'di la spyod pa'i byang chub sems dpa' sems dpa' chen po ni mngon par shes pa'i pha rol tu phyin pa rab tu 'thob ste zhes bya ba nas/ mngon par shes pa drug yongs su rdzogs par byed pa ni/ bla na med pa yang dag par rdzogs pa'i byang chub kyis rnam par 'phel lo zhes bya ba'i bar du ni byang chub sems dpa'i mngon par shes pa drug bshad pa ste/ sngar mngon par shes pa bshad pa ni de bzhin gshegs pa'i mngon par shes pa ste mdor bstan pa'o/ /skabs 'dir ni byang chub sems dpa' rnams kyi mngon par shes pa bstan pa ste rgyas par bshad pa'o/ /sha ra dwa ti'i bu 'di ltar yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ sbyin pa'i pha rol tu phyin pa la gnas shing zhes bya ba nas/ 'ong ba med pa dang / 'gro ba med pa nye bar bzung ba dang / yongs su 'dzin pa med pa nye bar bzung bas rnam pa thams cad mkhyen pa'i lam yongs su sbyong ba yin no zhes bya ba'i bar du byang chub sems dpa' kha cig sa'i rim pa la mthon dman dang / spyod pa rgya che chung gi bye brag las pha rol tu phyin pa drug car yongs su rdzogs par byed pa yang yod/ pha rol tu phyin pa gcig gam/ gnyis sam gsum la sogs pa rdzogs par byed pa yang yod do zhes bstan pa ste/ mtha' las 'das pa stong pa nyid kyi phyir zhes bya ba ni/ sgro 'dogs pa dang skur pa 'debs pa'i mtha' gnyis spangs pa la bya ste/ don dam par dngos po yod par yang sgro mi 'dogs la/ kun rdzob tu med par yang skur pa mi 'debs pa'i phyir ro/ /chags pa med pa'i sems nye bar bzung bas zhes bya ba ni/ gtong ba po dang len pa dang / sbyin par bya ba'i rdzas gsum char la dngos por lta zhing zhen pa med pa'i phyir zhes bya ba'i don to/ /de ltar sgro 'dogs shing skur pa 'debs pa med pa dang / 'khor gsum yongs su dag pas sbyin pa byas na/ rnam pa thams cad mkhyen pa nyid kyi lam yongs su sbyong bar 'gyur ro zhes bya ba dang sbyar te/ byang chub kyi lam yongs su dag par byed do zhes bya ba'i don to/ /de bzhin du tshul khrims la sogs pa'i pha rol tu phyin pa lhag ma rnams la yang ci rigs su sbyar bar bya'o/ / 'ong ba dang 'gro ba med pa nye bar bzung ba zhes bya ba ni/ rnam pa thams cad mkhyen pa'i lam zhes bya ba smos pas/ lam yod pa dang / 'gro ba dang 'ong ba yang yod snyam du sems pa las bzlog pa'i phyir 'ong ba med pa dang / 'gro ba med pa zhes bya ba gsungs te/ chos thams cad ni skye ba na yang gang nas kyang 'ong ba med pa/ 'gag pa na yang gang du yang 'gro ba med de/ de ltar 'ong ba dang 'gro ba med par rtogs pa nyid byang chub kyi lam yongs su sbyong ba yin no zhes bstan pa'o/ /de la sbyin pa ni yongs su 'dzin pa nye bar bzung ba las gdags so zhes bya ba nas/ shes rab ni shes rab 'chal pa nye bar bzung ba las gdags te zhes bya ba'i bar du ni/ sbyin pa la sogs pa'i pha rol tu phyin pa drug rnams smos pa yang don dam par dngos po yod pa ni ma yin gyi/ kun rdzob tu sbyin pa la sogs pa'i mi mthun pa'i phyogs ser sna la sogs pa'i zlas bsgrubs te btags pa tsam du zad do/ /de ni brgal to zhes bya bar rlom sems med do/ /ma brgal to zhes bya ba rlom sems med do zhes bya ba ni/ sbyin pa la sogs pa'i mi mthun pa'i phyogs ser sna la sogs pa spangs te/ de dag las thar to zhes bya bar mi sems so zhes bya ba'i don to/ /ser sna la sogs pa de dag nyid don dam par yod pa ma yin pa'i phyir ro/ /sbyin pa byed do zhes bya bar rlom sems med do/ /sbyin pa mi byed do zhes bya bar rlom sems med do zhes bya ba nas/ shes rab 'chal ba can no zhes bya bar rlom sems med do zhes bya ba'i bar du sbyin pa la sogs pa pha rol tu phyin pa drug dang / de dag gi mi mthun pa'i phyogs ser sna la sogs pa drug car yang don dam par dngos po med pa'i phyir de dag tu mi sems so zhes bstan pa'o/ /spyos so zhes bya bar rlom sems med do zhes bya ba la sogs pas ni/ 'jig rten gyi chos brgyad kyis ma gos par bstan to/ /de ci'i phyir zhe na/ sha ra dwa ti'i bum skyes pa ni spyos zhes bya bar rlom sems med do zhes bya ba la sogs pas de'i gtan tshigs bstan te/ spyo bar bya ba dang / spyo bar byed pa dang / spyo ba'i dngos po gsum char don dam par ma skyes pa'i phyir de ltar mi sems so zhes bya ba'i don to/ /de ci'i phyir zhe na/ 'di ltar shes rab kyi pha rol tu phyin pa ni/ rlom sems thams cad yang dag par gcod pa'i phyir zhes bya ba ni/ shes rab kyi pha rol tu phyin pa la rlom sems thams cad gcod pa'i don ston pas/ de la spyos pa'i byang chub sems dpa' la de lta bu'i rlom sems mi 'byung ngo zhes bya ba'i don to/ /'di la sha ra dwa ti'i bu byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ yon tan ji snyed cig yod pa de dag ni/ nyan thos dang / rang sangs rgyas thams cad la med de zhes bya ba ni/ byang chub sems dpa' shes rab kyi pha rol tu phyin pa la spyod pa dag /sems can yongs su smin par byed pa dang / sangs rgyas kyi zhing yongs su dag par byed pa la sogs pa'i yon tan 'og nas 'byung ba rnams nyan thos dang rang sangs rgyas rnams la med do zhes bstan pa ste/ yon tan de dag kyang gang zhe na/ sems can yongs su smin par byed pa zhes bya ba nas/ de ltar spyod pa ni bla na med pa yang dag par rdzogs pa'i byang chub las yongs su nyams par mi 'gyur ro zhes bya ba'i bar du'o/ /shes rab kyi pha rol tu phyin pa bstan pa 'di bstan pa'i tshe zhes bya ba nas bla na med pa yang dag par rdzogs pa'i byang chub tu sems bskyed do zhes bya ba'i bar du ni/ shes rab kyi pha rol tu phyin pa 'di bshad pas/ sems can yongs su smin par gyur pa bstan pa'o/ /de nas bcom ldan 'das kyis de'i tshe zhal 'dzum pa mdzad do zhes bya ba nas/ phyi ma'i dus na de bzhin gshegs pa dgra bcom pa yang dag par rdzogs pa'i sangs rgyas rgyan gyi rgyal po zhes bya ba sha stag 'jig rten du 'byung bar 'gyur ro zhes bya ba'i bar du ni/ 'khor yongs su smin par 'gyur ba rnams bla na med pa'i byang chub tu lung bstan pa bshad pa'o/ /de nas tshe dang ldan pa sha ra dwa ti'i bu dang / tshe dang ldan pa maud gal chen po'i bu dang zhes bya ba nas/ shes rab kyi pha rol tu phyin pa 'di ni byang chub sems dpa' sems dpa' chen po rnams kyi pha rol tu phyin pa thub pa ma mchis pa'o zhes bya ba'i bar du ni/ shes rab kyi pha rol tu phyin pa'i yon tan bsngags shing bstod pa ste/ rab dang mchog ces bya ba la sogs pa ni/ bzang bar bstod pa'i rnam grangs su zad do/ /bcom ldan 'das shes rab kyi pha rol tu phyin pa 'di la spyod pa'i byang chub sems dpa' sems dpa' chen po rnams kyis ni/ mi mnyam pa dang mnyam pa'i sbyin pa yongs su btang ngo zhes bya ba nas/ rigs kyi bu dag de bas na byang chub sems dpa' sems dpa' chen po ni/ sems can thams cad la phan pa dang / bde ba'i don du zhugs pa yin no zhes bya ba'i bar du ni/ shes rab kyi pha rol tu phyin pa la spyod pa'i byang chub sems dpa' rnams kyi yon tan bsngags pa bstan pa ste/ mi mnyam pa dang mnyam pa'i sbyin pa yongs su btang ngo zhes bya ba ni/ 'khor gsum yongs su dag pa'i sbyin pa sngar yongs su btang ngo zhes bya ba'i don to/ /yongs su gtong ngo zhes bya ba ni/ da lta'i dus na 'khor gsum yongs su dag par gtong ba'o/ /yongs su gtang bar 'gyur ro zhes bya ba ni/ phyis yongs su gtang bar 'gyur ba'o/ /de'i slad du mi mnyam pa dang mnyam pa'i sbyin pa'i pha rol tu phyin pa yongs su rdzogs par 'gyur te yongs su rdzogs so/ /yongs su rdzogs par 'gyur ro zhes bya ba ni/ mi mnyam pa dang mnyam pa'i sbyin pa yongs su btang ba dang / gtong ba dang gtang bar 'gyur ba'i 'bras bu sbyin pa'i pha rol tu phyin pa yongs su rdzogs pa dus gsum du sbyar te bstan pa'o/ /de bzhin du tshul khrims kyi pha rol tu phyin pa la sogs pa la yang ci rigs su sbyar bar bya'o/ /mi mnyam pa dang mnyam pa'i gzugs thob par 'gyur ro zhes bya ba la sogs pa ni/ de bzhin gshegs pa'i gzugs dang tshor ba la sogs pa'i phung po lnga ni 'jig rten pa dang / nyan thos dang rang sangs rgyas rnams kyi phung po dang mi mnyam pa ste/ mi mnyam pa de lta bu dang mnyam pa thob par 'gyur ro zhes bshad pa ste/ de bzhin gshegs pa'i gzugs ni mtshan dang dpe byad kyis brgyan pa blta bas mi ngoms pa'o/ /tshor ba ni bde ba dang sdug bsngal du bral ba'i tshor ba btang snyoms pa'o/ /'du byed ni dge ba dang / mi dge ba dang / lung du mi ston pa'i mngon par 'du byed pa med pa lhun gyis grub pa'o/ /rnam par shes pa ni yul rnam par rig par byed pa ma yin pa ye shes lhun gyis grub pa'i rang bzhin te/ de lta bu'i phung po lnga ni 'jig rten pa dang / nyan thos dang / rang sangs rgyas la sogs pa su la yang med pas mi mnyam pa zhes bya ste/ byang chub sems dpa' shes rab kyi pha rol tu phyin pa la spyod pas/ phung po lnga mi mnyam pa de lta bu dang mnyam pa thob par 'gyur ro zhes bya ba'i don to/ /yang na de bzhin gshegs pa ni chos kyi sku ste/ don dam par phung po lnga'i rang bzhin ma yin mod kyi/ phung po lngas 'dul ba'i sems can rnams la/ longs spyod rdzogs pa dang / sprul pa'i skus phung po lngar bstan to/ phung po lnga po de dag kyang mtshan nyid 'di kho na yin no zhes sus kyang thog tu mi phebs shing / bsam gyis mi khyab pa la mi mnyam pa zhes bya ste/ mi mnyam pa de lta bu thob par 'gyur ba la/ mi mnyam pa dang mnyam pa'i gzugs dang tshor ba la sogs pa thob par 'gyur ro zhes bstan pa'o/ / mi mnyam pa dang mnyam pa'i byang chub tu mngon par byang chub nas/ mi mnyam pa dang mnyam pa'i chos kyi 'khor lo bskor to zhes bya ba ni/ bla na med pa'i byang chub tu mngon par byang chub nas/ bla na med pa'i chos kyi 'khor lo bskor to zhes bstan to/ /de ci'i phyir zhe na/ byang chub sems dpa' sems dpa' chen po yod na/ mi'i 'jig rten 'jig rten du 'byung bar 'gyur ro zhes bya ba la sogs pas ni/ byang chub sems dpa'i yon tan bsngags pa'i gtan tshigs bstan pa ste/ byang chub sems dpa' bdag dang gzhan rnams shes rab kyi pha rol tu phyin pa la spyad pa dang / spyod du bcug pas de'i 'bras bu 'jig rten pa dang / 'jig rten las 'das pa mtho ris dang / mya ngan las 'das pa'i bde ba phun sum tshogs pa 'byung bar 'gyur ro zhes bstan pa ste/ yang dag par bral ba'i bde ba yang rung ste zhes bya ba ni/ mya ngan las 'das pa'i tshe ni nyon mongs pa'i sgrib pa dang / shes bya'i sgrib pa gnyis ka dang legs par bral ba'i phyir/ mya ngan las 'das pa nyid la yang dag par bral ba bde ba zhes bya'o/ /de nas bcom ldan 'das kyis de'i tshe zhal gyi sgo nas ljags kyi dbang po bkram ste zhes bya ba nas/ sha ra dwa ti'i bu'i le'u la thug gi bar du 'od 'phro ba dgye ba mdzad de/ sngar 'od 'phro ba bkye bas 'khor bsdus pa rnams kyi lhag ma rnams 'od 'phro 'dis bsdus nas yongs su smin par byas te lung bstan pa bshad pa'o/ /de yan chad du ni gang gi phyir brtson par bya ba dang / ji ltar brtson par bya ba dang / brtson par byed pa rnams kyi mtshan nyid dang / brtson par byed pa rnams kyi rab tu dbye ba rnams/ bcom ldan 'das kyis bshad pa dang / sha ra dwa ti'i bus gleng bslang ste zhus pa bstan zin to/ /shes rab kyi pha rol tu phyin pa 'bum pa rgya cher bshad pa las shA ri'i bu'i le'u ste gnyis pa'o/ / //da ni brtson pa la gdams pa bshad par bya ste/ brtson pa la gdams pa de yang 'phags pa rab 'byor gyis zhus te bshad pa/ sems can yongs su smin par 'gyur ba mang du yod par gzigs nas/ de nas bcom ldan 'das kyis tshe dang ldan pa rab 'byor la bka' stsal pa/ rab 'byor byang chub sems dpa' sems dpa' chen po rnams la shes rab kyi pha rol tu phyin pa rtsom ste/ ci nas kyang byang chub sems dpa' sems dpa' chen po rnams shes rab kyi pha rol tu phyin pa la 'byung bar 'gyur ba/ de lta bu'i chos kyi gtam bya bar spobs pa skyed cig ces bka' stsal te/ shes rab kyi pha rol tu phyin pa la 'byung bar 'gyur ba zhes bya ba ni/ shes rab kyi pha rol tu phyin pa la spyod cing de'i don rtogs pas/ go 'phang mthon por 'gyur ba la 'byung ba zhes bya'o/ /chos kyi gtam zhes bya ba ni/ brtson pa la gdams pa'i chos bshad pa 'og nas 'byung ba la bya'o/ /de nas byang chub sems dpa' sems dpa' chen po de dag dang / nyan thos chen po de dag dang / lha'i bu de dag 'di snyam ste zhes bya ba la sogs pa ni chos nyan pa'i 'khor byang chub sems dpa' la sogs pa de dag 'di snyam du gnas brtan rab 'byor 'di nyan thos yin pas/ nyan thos kyi theg pa'i chos rnams shes pa tsam du zad na/ bcom ldan 'das kyis theg pa chen po'i chos kyi gtam byed du bcug pa 'di rang gi blos ston tam/ de bzhin gshegs pa'i byin gyi rlabs kyis ston snyam du the tshom za ba bstan pa'o/ /de nas tshe dang ldan pa rab 'byor gyis sangs rgyas kyi mthus zhes bya ba nas/ byang chub sems dpa' sems dpa' chen po rnams la/ shes rab kyi pha rol tu phyin pa bstan pa ni/ nyan thos dang rang sangs rgyas thams cad kyi yul ma yin no zhes bya ba'i bar du ni/ gnas brtan rab 'byor gyis 'khor rnams kyi rtog pa sems kyis rtogs nas/ theg pa chen po'i chos kyi gtam bya ba 'di ni bdag gi shes rab dang spobs pa ma yin gyi/ de bzhin gshegs pa'i byin gyi rlabs dang mthus ston to zhes bshad pa ste/ gnas brtan rab 'byor 'di ni byang chub sems dpa' chen po yin te/ bskal pa grangs med pa nas bsod nams dang ye shes kyi tshogs bsags pa/ chos zab mo la bzod pa thob pa yin mod kyi/ nyan thos kyi theg pa la gnas shing dge slong gi tshul gyis 'dul ba'i sems can rnams kyi don du/ nyan thos kyi tshul du bstan pas bdag nyid kyi tshig yin pa skad byas nas/ 'khor gyi nang na kha cig ma gus shing ma dad par 'gyur du dogs pa'i phyir/ 'di ni bcom ldan 'das kyi bka' yin gyi/ bdag gi tshig ma yin no zhes bstan to/ /sha ra dwa ti'i bu 'di ni de bzhin gshegs pa nyid byang chub sems dpa' sems dpa' chen po rnams la shes rab kyi pha rol tu phyin pa thabs kyis ston pa mdzad kyi zhes bya ba ni/ de ltar de bzhin gshegs pa'i byin gyi rlabs dang mthus/ rab 'byor chos kyi gtam byed du bcug pa nyid la thabs kyis ston pa mdzad pa zhes bya'o/ /bcom ldan 'das byang chub sems dpa' byang chub sems dpa' zhes bgyi na/ 'di lta ste/ byang chub sems dpa' zhes bgyi ba'am/ shes rab kyi pha rol tu phyin pa zhes bgyi ba 'di/ chos gang gi tshig bla dgas lags zhes bya ba la sogs pa ni/ gnas brtan rab 'byor gyis ming dang brdar gdags pa tsam gyis brtson pa la gdams pa dang / sems can mi dmigs pas brtson pa la gdams pa dang / tshig bla dgas mi dmigs pas brtson pa la gdams pa dang / chos thams cad mi dmigs pas brtson pa la gdams pa dang / gdams pa bzhi'i skabs dbye ba'i phyir zhus pa'o/ /bcom ldan 'das byang chub sems dpa' zhes bgyi ba'am/ shes rab kyi pha rol tu phyin pa zhes bgyi ba de lta bu bdag gis yang dag par rjes su mi mthong ngo zhes bya ba la sogs pa ni/ rab 'byor gyis don dam pa'i bden pa la brten nas/ byang chub sems dpa' dang / shes rab kyi pha rol tu phyin pa zhes bya ba don dam par dmigs su med na su zhig gang la gdams par bya zhes zhus pa'o/ /rab 'byor 'di lta ste/ shes rab kyi pha rol tu phyin pa dang / byang chub sems dpa' dang / byang chub sems dpa'i ming du bya ba de dag ni ming tsam ste/ ming de ni nang na yang med/ phyi rol na yang med/ gnyis ka med par yang mi dmigs so zhes bya ba nas/ rab 'byor byang chub sems dpa' sems dpa' chen po shes rab kyi pha rol tu phyin pa la spyod pas/ ming dang brdar byas pa'i chos su gdags pa rnams de ltar khong du chud par bya'o zhes bya ba'i bar du ni/ ming dang brdar gdags pa tsam gyis brtson pa la gdams pa bstan pa ste/ rab 'byor 'di lta ste/ shes rab kyi pha rol tu phyin pa dang / byang chub sems dpa' dang / byang chub sems dpa'i ming du bya ba de dag ni ming tsam ste/ ming de ni nang na yang med/ phyi rol na yang med/ gnyis ka med par yang mi dmigs so zhes bya ba 'dis/ bcom ldan 'das kyis kun rdzob dang / don dam pa'i bden pa gnyis ka la brten nas bka' stsal pa ste/ byang chub sems dpa' la sogs pa don dam par phyi dang nang dang / phyi nang gnyis ka ma yin pa na yang dmigs su med mod kyi/ kun rdzob tu sems can yongs su smin par bya ba'i phyir/ ming dang brda tsam du gdags pas gdams shing rjes su bstan par bya'o zhes bshad pa'o/ /rab 'byor 'di lta ste/ dper na sems can sems can zhes bya bar ming du gdags pa'i ming de ni btags pa tsam ste zhes bya ba nas/ rab 'byor de bzhin du shes rab kyi pha rol tu phyin pa gang yin pa dang / byang chub sems dpa' gang yin pa dang / byang chub sems dpa'i ming gang yin pa de dag thams cad kyang btags pa tsam ste/ btags pa'i chos gang yin pa de la ni/ ming dang brda tsam du tha snyad kyis btags pa ma gtogs par skye ba'am/ 'gag pa med de/ ming de ni nang na yang med/ phyi rol na yang med/ gnyis ka med par yang mi dmigs so zhes bya ba'i bar du ni/ mu stegs can gyis bdag dang / sems can dang / gang zag la sogs par btags pa rnams yang dag par yod pa ma yin yang / kun rdzob tu bdag dang sems can zhes bya ba la sogs par ming dang brdar btags pa ste/ bshad cing sun dbyung ba bzhin du/ byang chub sems dpa' dang / shes rab kyi pha rol tu phyin pa dang / byang chub sems dpa'i ming yang don dam par yod pa ma yin du zin kyang / kun rdzob tu ming dang brdar tha snyad du btags te bshad par bya'o zhes bstan pa'o/ /rab 'byor 'di lta ste/ dper na nang gi gzugs zhes ming du bya ba ni/ chos su btags pa tsam du zad de zhes bya ba nas/ rab 'byor 'di lta ste dper na/ gang 'di phyi rol gyi rtswa dang / shing dang / yal ga dang / lo ma dang / 'dab ma zhes bya ba de dag thams cad kyang ming sna tshogs kyis tha snyad du brjod de/ de dag kyang ming dang brda tsam du tha snyad kyis gdags pa ma gtogs par skye ba'am/ 'gag pa med de/ ming de ni nang na yang med/ phyi rol na yang med/ gnyis ka med par yang mi dmigs so zhes bya ba'i bar du ni 'jig rten pa'i chos phung po lnga dang / skye mched bcu gnyis dang / khams bcwa brgyad dang / nang gi lus kyi rnam pa dang / phyi rol gyi rtsi shing la sogs pa don dam par yod pa ma yin yang / kun rdzob tu ming dang brdar tha snyad du btags te brjod pa bzhin du/ byang chub sems dpa' dang / shes rab kyi pha rol tu phyin pa yang ming dang brda tsam du btags te gdams par bya'o zhes bstan pa'o/ /rab 'byor 'di lta ste dper na/ 'das pa'i sangs rgyas bcom ldan 'das kyi mtshan tsam zhig yod pa yang zhes bya ba la sogs pa ni/ sprul pa'i sku 'das pa'i mtshan dang / rmi lam la sogs pa ni kun rdzob dang don dam pa gnyis kar ma grub kyang tha snyad du brjod pa'i dpes/ byang chub sems dpa' la sogs pa kun rdzob tu tha snyad du brjod cing gdams par bya'o zhes bstan pa ste/ de bas na rab 'byor de ltar byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ ming dang brdar btags pa dang / gdams ngag tu btags pa dang / chos su btags pa la slob par bya'o zhes bya bas don dam par byang chub sems dpa' la sogs pa dngos por ma grub kyang / kun rdzob tu sems can yongs su smin par bya ba'i phyir/ ming dang brda tsam du btags te/ gdams pa la slob par bya'o zhes don gyis mjug bsdus te bstan to/ /rab 'byor byang chub sems dpa' sems dpa' chen po shes rab kyi pha rol tu phyin pa la de ltar spyod pas ni/ gzugs zhes bya ba rtag par yang dag par rjes su mi mthong ngo zhes bya ba la sogs pa ni gong du smos pa ltar/ chos thams cad btags pa tsam du zad par slob cing / 'doms pa'i 'bras bu rnam par rtog pa thams cad spangs par 'gyur ba bstan pa ste/ de la gzugs zhes bya ba rtag par yang dag par rjes su mi mthong ngo / /gzugs zhes bya ba mi rtag par yang dag par rjes su mi mthong ngo zhes bya ba nas/ gzugs zhes bya ba ma zhi bar yang dag par rjes su mi mthong ngo zhes bya ba'i bar du ni/ mu stegs can rnams gzugs la rtag pa dang / bde ba dang / bdag yod pa dang / ma zhi ba'i bdag nyid du yod par rtog pa dang / nyan thos dang rang sangs rgyas rnams gzugs la mi rtag pa dang / sdug bsngal ba dang / bdag med pa dang / zhi ba'i dngos por yod par rtog pa de dag byang chub sems dpa' shes rab kyi pha rol tu phyin pa la spyod cing gdams pa la slob pa rnams la de lta bu'i rnam par rtog pa mi 'byung bar bstan pa'o/ /gzugs zhes bya ba stong par yang dag par rjes su mi mthong ngo zhes bya ba nas/ gzugs zhes bya ba smon pa med par yang dag par rjes su mi mthong ngo zhes bya ba'i bar du ni/ rnam par thar pa'i sgo gsum dang / de dag gi mi mthun pa'i phyogs rnams su rnam par rtog pa mi 'byung ba bstan pa ste/ mu stegs can rnams ni/ gzugs la mi stong pa dang / mtshan ma dang bcas pa dang / smon pa yod par rtog /nyan thos dang / rang sangs rgyas rnams ni/ gzugs la stong pa dang / mtshan ma med pa dang / smon pa med pa'i dngos por rtog gi /byang chub sems dpa' la de lta bu'i rtog pa mi 'byung ngo zhes bstan to/ /gzugs zhes bya ba 'dus byas su yang dag par rjes su mi mthong ngo zhes bya ba nas/ gzugs zhes bya ba mya ngan las 'das par yang dag par rjes su mi mthong ngo zhes bya ba'i bar du ni/ nyan thos dang rang sangs rgyas rnams chos rnams la gnyen po dang mi mthun pa'i phyogs kyi dngos por rnam par rtog pa rnams/ byang chub sems dpa' chos thams cad btags pa tsam du slob cing / brtson pa la gnas par byed pa rnams la mi 'byung ba bstan pa ste/ nyan thos dang rang sangs rgyas rnams chos rnams la so sor rtog pa na/ mi mthun pa'i phyogs kyi dngos por rtog pa ni/ gzugs la 'dus byas dang / kun nas nyon mongs pa dang / skye ba dang / mi dben pa dang / mi dge ba dang / kha na ma tho ba dang bcas pa dang / zag pa dang bcas pa dang / nyon mongs pa dang bcas pa dang / 'jig rten pa dang / 'khor bar rtog pa'o/ /de'i gnyen po'i dngos por so sor rtog pa ni/ 'dus ma byas pa dang / rnam par byang ba dang / 'gag pa dang / dben pa dang / dge ba dang / kha na ma tho ba med pa dang / zag pa med pa dang / nyon mongs pa med pa dang / 'jig rten las 'das pa dang / mya ngan las 'das par so sor rtog pa rnams/ byang chub sems dpa' chos thams cad btags pa tsam du slob cing 'doms pa la mi 'byung bar bstan to/ /gzugs la ji lta ba bzhin du tshor ba dang / 'du shes dang / 'du byed dang / rnam par shes pa ste/ phung po lnga dang / skye mched bcu gnyis dang / khams bcwa brgyad dang / khams rnams 'dus pa las byung ba'i reg pa dang / reg pa'i rkyen gyis byung ba'i tshor ba rnams la yang / mi mthun pa'i phyogs dang / gnyen po'i phyogs dngos por rnam par rtog pa ni/ nyan thos dang rang sangs rgyas rnams la 'byung gi /byang chub sems dpa' chos thams cad btags pa tsam du rtogs shing / brtson pa la 'doms pa rnams la mi 'byung bar bstan pa yang / tshor ba zhes bya bar yang dag par rjes su mi mthong ngo zhes bya ba nas/ de ci'i phyir zhe na/ byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ shes rab kyi pha rol tu phyin pa de dang / byang chub sems dpa' de dang / byang chub sems dpa'i ming de 'dus byas kyi khams na yod par yang dag par rjes su mi mthong ngo / /'dus ma byas kyi khams na yod par yang dag par rjes su mi mthong ngo zhes bya ba yan chad kyis bstan te/ ji ltar phung po dang / khams dang / skye mched la sogs pa'i chos rnams la mi mthun pa'i phyogs dang / gnyen po'i dngos por rnam par rtog pa mi 'byung ba de bzhin du/ shes rab kyi pha rol tu phyin pa dang / byang chub sems dpa' dang / byang chub sems dpa'i ming yang kun rdzob tu brda dang / tha snyad tsam du btags te brtson pa la 'doms kyi/ don dam par ni de dag kyang 'dus byas dang / 'dus ma byas pa'i khams na yod pa'am/ 'dus byas dang 'dus ma byas pa'i rang bzhin du yod pa'i rnam par rtog pa mi 'byung ngo zhes bya ba'i don to/ /rab 'byor de ci'i phyir zhe na/ de ni 'di ltar byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ chos de dag thams cad la mi rtog rnam par mi rtog ste zhes bya ba nas/ rab 'byor de ltar byang chub sems dpa' sems dpa' chen pos shes rab kyi pha rol tu phyin pa la spyod pa'i tshe/ ming dang brdar bya ba'i chos kyi gdags pa khong du chud par bya ste zhes bya ba'i bar du/ de ltar rnam par rtog pa mi 'byung ba'i gtan tshigs bstan pa ste/ chos de dag thams cad la mi rtog rnam par mi rtog ste zhes bya ba ni/ phung po dang khams la sogs pa gong du smos pa'i chos de dag la mi mthun pa'i phyogs dang / gnyen po'i dngos por mi rtog cing rnam par mi rtog par gyur pa'i phyir ro zhes bya ba'i don to/ /de shes rab kyi pha rol tu phyin pa la spyod pa'i tshe rnam par mi rtog pa'i chos la gnas shing / dran pa nye bar gzhag pa rnams bsgom pa'i phyir shes rab kyi pha rol tu phyin pa la spyod do zhes bya ba ni/ byang chub sems dpa' de don dam par chos thams cad yang dag par rjes su ma mthong bas/ rnam par mi rtog pa'i chos la gnas nas kun rdzob tu sems can yongs su smin par bya ba'i phyir ming dang brda tsam du gdags pas/ dran pa nye bar gzhag pa bzhi bsgom pa'i phyir shes rab kyi pha rol tu phyin pa la spyod do zhes bya ba'i don to/ /rnam pa thams cad mkhyen pa nyid yid la bya ba ma gtogs par shes rab kyi pha rol tu phyin pa nyid kyang yang dag par rjes su mi mthong ngo zhes bya ba la sogs pa ni/ de ltar dran pa nye bar gzhag pa bzhi bsgom pa'i phyir shes rab kyi pha rol tu phyin pa la spyod pa na yang / kun rdzob tu rnam pa thams cad mkhyen pa nyid thob par bya ba tsam zhig yid la bya ba ma gtogs par/ shes rab kyi pha rol tu phyin pa la sogs pa don dam par yang dag par rjes su mi mthong ngo zhes bstan pa'o/ /de bzhin du yang dag par spong ba bsgom pa nas/ sangs rgyas kyi chos ma 'dres pa bcwa brgyad bsgom pa'i bar du sbyar bar bya'o/ /byang chub sems dpa' sems dpa' chen po des shes rab kyi pha rol tu phyin pa la spyod pa'i tshe/ chos rnams kyi chos kyi mtshan nyid shin tu rtogs pa yin te zhes bya ba ni/ de ltar shes rab kyi pha rol tu phyin pa la sogs pa don dam par yang dag par rjes su ma mthong ba nyid chos rnams kyi don dam pa'i mtshan nyid legs par rtogs shing khong du chud pa yin no zhes bya ba'i don to/ /chos rnams kyi mtshan nyid gang yin pa de ni kun nas nyon mongs par mi 'gyur ro/ /rnam par byang bar mi 'gyur ro zhes bya ba ni chos rnams kyi don dam pa'i mtshan nyid rtogs pa gang yin pa de rang bzhin gyis yongs su dag pa'i phyir/ so so'i skye bo'i tshe yang nyon mongs par mi 'gyur la/ 'phags pa'i tshe yang rnam par byang bar mi 'gyur te/ de bzhin nyid ni rang bzhin gzhan du mi 'gyur ba'i phyir ro zhes bya ba'i don to/ /rab 'byor de ltar byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ ming dang brdar bya ba'i chos kyi gdags pa khong du chud par bya ste zhes bya ba ni/ de ltar brtson pa la gdams pa'i yon tan mjug bsdus nas bstan pa ste/ don dam par chos thams cad mi dmigs shing brjod du med kyang / kun rdzob tu ming brda tsam du gdags pa khong du chud par bya ste brtson pa la gdams par bya'o zhes bstan pa'o/ /de ltar des ming dang brdar bya ba'i chos su gdags pa khong du chud nas/ gzugs la chags par 'gyur ba med do zhes bya ba nas/ sangs rgyas kyi zhing yongs su dag par bya ba la chags par 'gyur ba med do zhes bya ba'i bar du ni/ de ltar kun rdzob tu ming dang brda tsam du tha snyad du gdags te brtson pa la gdams pa byed kyang / don dam par chos gang yang rjes su ma mthong ste/ rnam par mi rtog pa la gnas pa'i 'bras bu gzugs la sogs pa'i 'jig rten dang / 'jig rten las 'das pa'i chos thams cad la chags par mi 'gyur ba bstan to/ /de ci'i phyir zhe na/ de ni 'di ltar gang chags par byed pa'am/ gang gis chags par bya ba'am/ gang la chags par bya ba de lta bu'i chos thams cad med pa'i phyir ro zhes bya ba ni/ de ltar chags par mi 'gyur ba'i gtan tshigs bstan pa ste/ gang chags par byed pa'i ming dang gang gis chags par 'gyur ba'i 'dod chags dang / gang la chags par bya ba'i dngos po de dag thams cad don dam par yod pa ma yin pa'i phyir ro zhes bstan pa'o/ /rab 'byor de ltar byang chub sems dpa' sems dpa' chen po shes rab kyi pha rol tu phyin pa la spyod pa ni/ sbyin pa'i pha rol tu phyin pas rnam par 'phel lo zhes bya ba nas/ gzungs kyi sgo rnams kyang thob par 'gyur ro/ /ting nge 'dzin gyi sgo rnams kyang thob par 'gyur ro zhes bya ba'i bar du ni/ de ltar chos thams cad la ma chags par spyad pa'i 'bras bu pha rol tu phyin pa la sogs pa byang chub sems dpa'i yon tan gyi chos rnams thob par 'gyur ba bstan to/ /rab 'byor byang chub sems dpa' sems dpa' chen po shes rab kyi pha rol tu phyin pa la spyod pas/ ming dang brdar bya ba'i chos su gdags pa rnams de ltar khong du chud par bya'o zhes bya ba ni/ chos rnams ming dang brdar tha snyad du btags te brtson pa la gdams pa mjug bsdus te bstan pa'o/ /de ltar btags pa'i gdams pa bstan nas/ de ni sems can mi dmigs pa'i gdams pa bstan par bya ste/ de yang gnas brtan rab 'byor gyis brtson pa la gdams pa dang po zhus pa'i tshe/ byang chub sems dpa' sems dpa' chen po zhes smos te zhus pa la/ 'khor rnams kyi nang na kha cig byang chub sems dpa' zhes bya ba dngos po yod do snyam du the tshom za ba bsal ba'i phyir/ rab 'byor gang yang khyod kyis bcom ldan 'das byang chub sems dpa' byang chub sems dpa' zhes bgyi na zhes smras pa de la/ rab 'byor de ji snyam du sems zhes bya ba la sogs pa gsungs te/ de yang byang chub sems dpa' zhes bya ba sems can gyi dngos por yod par 'dzin na/ mu stegs can gyis btags pa'i bdag la sogs pa bzhin du yod par rtog na rnam par rtog pa gsum du 'gyur te/ gzugs la sogs pa nyid dam/ de las gzhan par rtog pa dang / gzhi dang gnas pa'i dngos por rtog pa dang / de dag gang la yang ma gtogs pa'i dngos por rtog pa bsal ba'i phyir/ rab 'byor de ji snyam du sems/ gzugs byang chub sems dpa' yin snyam mam/ gzugs ma yin pa gzhan zhig byang chub sems dpa' yin snyam mam/ gzugs la byang chub sems dpa' yod snyam mam/ byang chub sems dpa' la gzugs yod snyam mam/ gzugs med pa zhig byang chub sems dpa' yin snyam mam zhes bya ba dri ba rnam pa lnga dris te/ de la gzugs byang chub sems dpa' yin snyam mam/ gzugs ma yin pa gzhan zhig byang chub sems dpa' yin snyam mam zhes bya bas ni/ gzugs nyid byang chub sems dpa' yin snyam pa dang / de las gzhan pa byang chub sems dpa' yin snyam du rnam par rtog pa spang ba bstan to/ /gzugs la byang chub sems dpa' yod snyam mam/ byang chub sems dpa' la gzugs yod snyam mam zhes bya bas ni/ gzhi dang gnas pa'i dngos por rtog pa spang ba bstan to/ /gzugs med pa zhig byang chub sems dpa' yin snyam mam zhes bya bas/ de dag gang la yang ma gtogs pa'i dngos por rtog pa spang ba bstan te/ de yang 'dus byas dang 'dus ma byas pa'i chos gang yang byang chub sems dpa' ma yin/ de dag las gzhan yang byang chub sems dpa' ma yin/ de dag la byang chub sems dpa' gnas pa yang ma yin/ byang chub sems dpa' la de dag gnas pa yang ma yin/ de dag gang gi nang du yang ma gtogs ma 'brel bar gang gud na yod pa yang ma yin no zhes bstan pa ste/ de la gzugs byang chub sems dpa' yin snyam mam zhes bya ba nas/ rga shi med pa zhig byang chub sems dpa' yin snyam mam zhes bya ba'i bar du ni/ byang chub sems dpa' 'dus byas kyi chos rnams kyi dngos po ma yin par bstan pa ste/ 'dus byas kyi chos de dag kyang phung po lnga dang / skye mched bcu gnyis dang / khams bco brgyad dang / sa'i khams la sogs pa khams drug dang / nang gi rten cing 'brel bar 'byung ba bcu gnyis kyi ris su gtogs pa rnams ma yin no zhes bstan par rig par bya'o/ /bcom ldan 'das kyis bka' stsal pa/ rab 'byor de ji snyam du sems/ gzugs kyi de bzhin nyid byang chub sems dpa' yin snyam mam zhes bya ba nas/ rab 'byor de ji snyam du sems/ rga shi'i de bzhin nyid med pa zhig byang chub sems dpa' yin snyam mam zhes bya ba'i bar du ni/ byang chub sems dpa' zhes bya ba 'dus ma byas pa'i ngo bo nyid du yang yod pa ma yin pa bstan te/ 'dus ma byas pa zhes bya ba ni/ rgyu rkyen rnams 'dus shing tshogs pas byas te bskyed pa ma yin pa'i phyir/ gzugs la sogs pa'i chos nyid stong pa nyid de/ rang bzhin gzhan du mi 'gyur ba'i phyir de bzhin nyid ces bya'o/ /de bzhin nyid de la rang bzhin du mar dbyer med du zin gyis kyang / de'i gzhi gzugs la sogs pa'i phung po lnga dang / skye mched bcu gnyis dang / khams bco brgyad dang / khams drug dang / nang gi rten cing 'brel par 'byung ba'i yan lag bcu gnyis rnams rigs rigs su phye ba las/ gzugs kyi de bzhin nyid tshor ba'i de bzhin nyid ces bya ba la sogs pa rnam pa du mar gsungs te/ byang chub sems dpa' zhes bya ba de bzhin nyid de nyid kyang ma yin/ de las gzhan pa yang ma yin/ de bzhin nyid de la gnas pa yang ma yin/ byang chub sems dpa' la de bzhin nyid gnas pa yang ma yin/ de dag gang du yang ma gtogs pa gzhan zhig gi dngos por yod pa yang ma yin no zhes bstan par rig par bya'o/ /bcom ldan 'das kyis bka' stsal pa/ rab 'byor khyod kyis don gyi dbang gang zhig mthong na/ de skad du gzugs kyang byang chub sems dpa' ma yin zhes bya ba nas/ rga shi'i de bzhin nyid med pa yang byang chub sems dpa' ma yin zhes zer zhes bya ba'i bar du bcom ldan 'das kyis/ rab 'byor khyod ji snyam du sems/ gzugs byang chub sems dpa' yin snyam mam zhes bya ba la sogs pa dris pa dang / rab 'byor gyis de ma lags so zhes gsol ba'i tshig bzlas te bka' stsal nas/ khyod kyis don gang las bsams te/ gzugs la sogs pa 'dus byas kyi ngo bo nyid dang / gzugs kyi de bzhin nyid la sogs pa 'dus ma byas pa'i ngo bo nyid gang yang byang chub sems dpa' ma yin/ de dag las gzhan pa yang byang chub sems dpa' ma yin/ de dag la byang chub sems dpa' yod pa yang ma yin/ byang chub sems dpa' la de dag yod pa yang ma yin/ de dag med pa yang byang chub sems dpa' ma yin no zhes zer zhes de'i gtan tshigs dris pa'o/ /rab 'byor gyis gsol pa/ bcom ldan 'das byang chub sems dpa' shin tu ma mchis shing mi dmigs na/ de la gzugs kyi tshig bla dgas byang chub sems dpar 'gyur ba lta ga la mchis zhes bya ba nas/ rga shi'i de bzhin nyid ma mchis pa byang chub sems dpar 'gyur ba lta yang ga la mchis te/ de ni gnas ma mchis so zhes bya ba'i bar du ni/ rab 'byor khyod ci'i phyir gzugs la sogs pa byang chub sems dpa' ma yin zhes zer zhes gtan tshigs dris pa'i lan du/ byang chub sems dpa' zhes bya ba nyid kyang / don dam par ngo bo nyid yod par ma grub ste/ rang bzhin gyis stong pa nyid yin pa'i phyir shin tu med na/ gzugs la sogs pa 'dus byas kyi chos rnams sam/ gzugs kyi de bzhin nyid la sogs pa 'dus ma byas pa'i chos rnams byang chub sems dpar 'gyur ba lta ga la mchis zhes bstan pa ste/ de ni gnas ma mchis so zhes bya ba ni/ de ltar 'gyur ba mi srid do zhes bya ba'i don to/ /bcom ldan 'das kyis bka' stsal pa/ rab 'byor legs so legs so/ /rab 'byor byang chub sems dpa' sems dpa' chen pos sems can mi dmigs pas/ shes rab kyi pha rol tu phyin pa mi dmigs pa la de ltar bslab par bya'o zhes bya ba ni/ sems can mi dmigs pas brtson pa la gdams pa mjug bsdus nas bstan pa ste/ shes rab kyi pha rol tu phyin pa dang / byang chub sems dpa' don dam par dmigs su med par rtogs nas/ kun rdzob tu sems can yongs su smin par bya ba'i phyir/ ming dang brda tsam du btags pa brtson pa la gdams par byed pa de legs so zhes bstod nas/ de ltar bslab par bya'o zhes bka' stsal pa'o/ /rab 'byor gang yang 'di skad du 'di lta ste/ byang chub sems dpa' zhes bya ba de chos gang gi tshig bla dgas yin zhes zer zhes bya ba nas/ rnam par shes pa smon pa med pa'i tshig bla dgas mi dmigs par shes rab kyi pha rol tu phyin pa la bslab par bya'o zhes bya ba'i bar du ni/ gong du bcom ldan 'das la rab 'byor gyis byang chub sems dpa' zhes bgyi ba de chos gang gi tshig bla dgas lags zhes zhus pa la/ 'khor gyi nang na kha cig byang chub sems dpa' don dam par phung po la sogs pa'i ngo bo nyid du med du zin kyang / tshig bla dgas su btags pa'i ngo bo nyid du yod do snyam du rtog pa skye ba de las bzlog pa'i phyir tshig bla dgas mi dmigs pa'i gdams pa bshad pa ste/ de yang gzugs la sogs pa phung po lnga'i tshig bla dgas dang / gzugs la sogs pa phung po lnga po de dag nyid la rtag pa la sogs pa phyin ci log bzhir 'dogs pa'i tshig bla dgas dang / phyin ci log bzhi'i gnyen po mi rtag pa la sogs pa bzhir 'dogs pa'i tshig bla dgas dang / rnam par thar pa'i sgo stong pa nyid la sogs pa gsum du 'dogs pa'i tshig bla dgas dang / de'i mi mthun pa'i phyogs mi stong pa la sogs pa gsum du 'dogs pa'i tshig bla dgas mi dmigs pa bstan to/ /de la rab 'byor de ji snyam du sems/ byang chub sems dpa' zhes bya ba 'di gzugs kyi tshig bla dgas yin snyam mam zhes bya ba nas/ byang chub sems dpa' zhes bya ba 'di rnam par shes pa smon pa med pa'i tshig bla dgas yin snyam mam zhes bya ba'i bar du ni/ bcom ldan 'das kyis byang chub sems dpa' gzugs la sogs pa'i tshig bla dgas yin snyam du sems sam zhes dris pa dang / rab 'byor gyis don dam par tshig bla dgas mi dmigs par rtogs nas de ltar mi sems so zhes gsol pa'o/ /bcom ldan 'das gzugs shin tu ma mchis shing mi dmigs na/ byang chub sems dpa' gzugs kyi tshig bla dgas su 'gyur ba lta ga la mchis zhes bya ba nas/ bcom ldan 'das smon pa med pa shin tu ma mchis shing mi dmigs na/ byang chub sems dpa' rnam par shes pa smon pa med pa'i tshig bla dgas su 'gyur ba lta ga la mchis zhes bya ba'i bar du ni/ rab 'byor gyis byang chub sems dpa' don dam par tshig bla dgas kyi dngos por yod pa ma yin pa'i gtan tshigs bstan pa ste/ byang chub sems dpa' nyid kyang don dam par yod pa ma yin la/ gzugs la sogs pa dang / de dag gi rtag pa dang mi rtag pa la sogs pa nyid kyang dngos por med cing de dag tu gdags pa'i tshig bla dgas kyang yod pa don dam par rang bzhin gyis ma grub pas de dag byang chub sems dpar mi 'gyur ro zhes bya ba'i don to/ /bcom ldan 'das kyis bka' stsal pa/ rab 'byor legs so legs so/ /rab 'byor byang chub sems dpa' sems dpa' chen po shes rab kyi pha rol tu phyin pa la de ltar spyod pa'i tshe/ gzugs kyi tshig bla dgas mi dmigs pa dang / tshor ba'i tshig bla dgas mi dmigs pa dang zhes bya ba nas/ rnam par shes pa smon pa med pa'i tshig bla dgas mi dmigs par shes rab kyi pha rol tu phyin pa la bslab par bya'o zhes bya ba'i bar du ni/ tshig bla dgas dmigs su med pa'i gtan tshigs rab 'byor gyis bshad pa mnyes par bstod nas/ tshig bla dgas mi dmigs par gdams pa'i mjug bsdus te/ de ltar bslab par bya'o zhes bstan pa'o/ /rab 'byor gang yang khyod kyis 'di skad du bdag gis 'di lta ste/ byang chub sems dpa' zhes bya ba'i chos de lta bu yang dag par rjes su ma mthong ngo zhes zer ba ni zhes bya ba la sogs pas/ rab 'byor gyis dang por zhus pa'i tshig bcom ldan 'das kyis bzlas te bka' stsal nas/ byang chub sems dpa' yang dag par rjes su ma mthong ba la gleng bslang ste/ byang chub sems dpa' 'ba' zhig don dam par mi dmigs par ma zad kyi/ 'jig rten dang 'jig rten las 'das pa'i chos thams cad kyang / don dam par yang dag par rjes su mi mthong ngo zhes chos thams cad mi dmigs par gdams pa bstan to/ /de la chos kyis chos kyi dbyings yang dag par rjes su mi mthong ngo / /chos kyi dbyings kyis chos yang dag par rjes su mi mthong ste zhes bya ba la/ chos zhes bya ba ni kun rdzob brtags pa'i chos rnams so/ /chos kyi dbyings zhes bya ba ni/ yongs su grub pa'i chos de don dam par kun brtags pa dang / yongs su grub pa gnyis ka stong pa'i ngo bo nyid du ro gcig ste/ tha dad du dbyer med pas gcig gis gcig mi mthong ngo zhes bstan pa'o/ /rab 'byor gzugs kyi dbyings kyis chos kyi dbyings yang dag par rjes su mi mthong ngo zhes bya ba la sogs pas ni gzugs la sogs pa'i chos rnams so sor phye nas/ chos thams cad mi dmigs pa bstan pa ste/ gzugs kyi dbyings zhes bya ba ni/ kun brtags pa'i gzugs kyi rang bzhin no/ /chos kyi dbyings zhes bya ba ni/ yongs su grub pa'i gzugs kyi rang bzhin te/ de gnyis gcig gis gcig mi mthong ba ni sngar bshad pa bzhin no/ /gzugs la ji lta ba bzhin du tshor ba la sogs pa nas/ chos kyi dbyings kyi bar du yang de bzhin du rig par bya'o/ /rab 'byor 'dus byas kyi dbyings kyis 'dus ma byas kyi dbyings yang dag par rjes su mi mthong ngo / /'dus ma byas kyi dbyings kyis 'dus byas kyi dbyings yang dag par rjes su mi mthong ngo zhes bya ba ni/ 'dus byas dang 'dus ma byas kyi chos thams cad bsdus te spyir mi dmigs pa bstan pa ste/ 'dus byas dang 'dus ma byas gnyi ga yang don dam par rang bzhin dbyer med pas/ gcig gis gcig mi mthong ba ni snga ma bzhin no/ /'dus byas kyi dbyings ma yin par yang 'dus ma byas kyi dbyings rab tu gdags par mi nus so/ /'dus ma byas kyi dbyings ma yin pa yang 'dus byas kyi dbyings rab tu gdags par mi nus te zhes bya ba ni/ 'dus byas dang 'dus ma byas gnyi ga don dam par ro gcig pas/ 'dus byas ma gtogs par 'dus ma byas logs shig tu gdags su yang mi rung la/ 'dus ma byas ma gtogs par 'dus byas logs shig tu gdags su yang mi rung ngo zhes bya ba'i don to/ /de bzhin nyid du rang bzhin gcig pa las yongs su ma dag pa'i tshe ni 'dus byas zhes gdags/ yongs su dag pa'i tshe ni 'dus ma byas pa zhes gdags te/ dper na chu'i dngos por gcig pa las rnyog ma can gyi tshe ni chu ma dngas pa zhes bya/ phyis rnyog ma med par gyur pa'i tshe ni chu dngas pa zhes bya ste/ chu'i rang bzhin la tha dad par gdags su mi rung ba bzhin no zhes bstan pa'o/ /rab 'byor de ltar na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ chos gang yang yang dag par rjes su mi mthong ste/ yang dag par rjes su ma mthong bas mi 'jigs mi dngang zhes bya ba la sogs pas/ chos thams cad mi dmigs par rtogs pa'i 'bras bu'i phan yon bstan pa ste/ phan yon de yang dad pa che ba dang shes rab rno bar 'gyur ro/ /dad pa che bas ni chos zab mo bshad pa dang / shin tu bya dka' ba bsgrub pa dang / sangs rgyas kyi chos shin tu ngo mtshar rmad du byung ba rnams la ma dad pa'i dbang gis 'jigs pa dang dngang ba dang skrag par mi 'gyur ro/ /shes rab rno bas ni zab pa dang bya dka' ba dang / sangs rgyas kyi chos shin tu ngo mtshar rmad du byung ba rnams la/ sems zhum pa dang yid 'gyod par mi 'gyur ba bstan to/ /rab 'byor de ci'i phyir zhe na zhes bya ba nas/ de chos thams cad yang dag par rjes su mi mthong bas mi 'jigs mi dngang skrag par mi 'gyur ro zhes bya ba'i bar du ni/ de ltar skrag par mi 'gyur ba'i gtan tshigs bstan pa'i sgo nas/ chos thams cad mi dmigs pa de nyid zhib tu bstan pa ste/ de yang phung po dang / khams dang / skye mched dang / rten cing 'brel bar 'byung ba'i yan lag rnams smos pas ni phyi nang gi chos rnams bsdus so/ /'dod chags dang / zhe sdang dang / gti mug rnams smos pas ni nyon mongs pa'i phyogs su gtogs pa'i chos rnams bsdus so/ /bdag dang sems can dang srog la sogs pa smos pas ni mu stegs can gyis bdag tu btags pa sna tshogs btags pa tsam du yod pa rnams bsdus so/ /khams gsum smos pas ni 'khor bar gtogs pa'i chos thams cad bsdus so/ /nyan thos dang rang sangs rgyas la sogs pa 'phags pa rnams dang / 'phags pa'i chos rnams smos pas ni/ rnam par byang ba'i phyogs su gtogs pa dkar po'i chos thams cad bsdus te/ de ltar 'jig rten dang 'jig rten las 'das pa'i chos thams cad yang dag par rjes su ma mthong bas 'jigs shing skrag par 'gyur ba'i rgyu mi dmigs pa'i phyir mi 'jigs mi skrag go zhes bstan to/ /gsol pa/ bcom ldan 'das ci'i slad du byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ chos thams cad la sems zhum par mi 'gyur zhes bya ba nas/ rab 'byor de ltar na byang chub sems dpa' sems dpa' chen po'i yid yongs su skrag par mi 'gyur ro zhes bya ba'i bar du/ shes rab rno ba'i rgyu sems zhum par mi 'gyur ba dang / yid yongs su skrag par mi 'gyur ba'i gtan tshigs rab 'byor gyis zhus pa'i lan bka' stsal pa ste/ de la sems dang sems las byung ba'i chos yang dag par rjes su mi mthong ste zhes bya ba ni/ 'jug pa'i rnam par shes pa drug dang / kun gzhi'i rnam par shes pa dang / de dang 'brel pa'i sems las byung ba'i chos rnams don dam par mi dmigs pa bstan pa'o/ /yid dang yid kyi khams yang dag par rjes su mi mthong ste zhes bya ba ni/ nyon mongs pa'i yid dang / de dang 'brel pa'i sems las byung ba'i chos rnams don dam par mi dmigs pa bstan to/ /rab 'byor byang chub sems dpa' sems dpa' chen pos de ltar chos thams cad mi dmigs pas/ shes rab kyi pha rol tu phyin pa la bslab par bya ste zhes bya ba la sogs pas brtson pa la gdams pa'i don dang / tshig mjug bsdus nas bstan pa ste/ de yan chad brtson pa la gdams pa bshad zin to/ /shes rab kyi pha rol tu phyin pa 'bum pa rgya cher bshad pa las le'u gsum pa'o// //da ni brtson pa'i phan yon bshad par bya ste/ de yang bcom ldan 'das gzugs yongs su rtogs par 'tshal ba'i byang chub sems dpa' sems dpa' chen pos/ shes rab kyi pha rol tu phyin pa la bslab par bgyi'o zhes bya ba nas/ de ci'i phyir zhe na/ shes rab kyi pha rol tu phyin pa 'di las gang la byang chub sems dpa' sems dpa' chen po rnams dang / nyan thos dang rang sangs rgyas rnams kyis rtag tu rgyun mi 'chad par bslab par bya ba'i theg pa gsum rgya cher bstan to zhes bya ba'i bar gyis bshad do/ /phan yon de yang rnam pa bzhi ste/ yongs su rtogs par bya ba'i chos rnams yongs su rtogs pa dang / spang bar bya ba rnams spongs pa dang / yongs su rdzogs par bya ba rnams yongs su rdzogs pa dang / mngon sum du bya ba rnams thob pas mngon sum du byas pa'o/ /de la bcom ldan 'das gzugs yongs su rtogs par 'tshal bas zhes bya ba nas/ bcom ldan 'das 'khrug pa yongs su rtogs par 'tshal ba'i byang chub sems dpa' sems dpa' chen pos shes rab kyi pha rol tu phyin pa la bslab par bya'o zhes bya ba'i bar du ni/ phung po dang / khams dang / skye mched dang / rten cing 'brel par 'byung ba'i yan lag bcu gnyis rnams kun rdzob dang don dam pa'i mtshan nyid du shes par bya ba rnams yang dag pa ji lta ba nyid du shes pa ni shes rab kyi pha rol tu phyin pa la brtson pa'i phan yon yin no zhes bstan pa'o/ /bcom ldan 'das 'dod chags spang bar 'tshal ba'i byang chub sems dpa' sems dpa' chen pos shes rab kyi pha rol tu phyin pa la bslab par bgyi'o zhes bya ba nas/ mi dge ba bcu'i las kyi lam spang bar 'tshal ba'i byang chub sems dpa' sems dpa' chen pos shes rab kyi pha rol tu phyin pa la bslab par bgyi'o zhes bya ba'i bar du ni/ 'dod chags la sogs pa nyon mongs pa'i phyogs su gtogs pa'i chos spang bar bya ba rnams spangs pa ni/ byang chub sems dpa' sems dpa' chen po shes rab kyi pha rol tu phyin pa la brtson pa'i phan yon yin no zhes bstan pa ste/ de la 'dod chags dang / zhe sdang dang / gti mug gsum ni nyon mongs pa thams cad dang / mi dge ba thams cad kyi rtsa ba yin pa'i phyir spang bar bya'o/ /'jig tshogs la lta ba zhes bya ba ni phung po lnga 'jig pa'i rang bzhin can rnams tshogs pa bdag med pa'i dngos po la bdag dang bdag gir 'dzin pa'o/ / the tsom zhes bya ba ni las dang / 'bras bu dang / bden pa dang / dkon mchog la sogs pa la yid gnyis za ba'o/ /tshul khrims dang brtul zhugs bsnyems pa zhes bya ba ni/ srog gcod pa la sogs pa lus kyi gsum dang / brdzun du smra ba la sogs pa ngag gi bzhi spang ba'i mtshan nyid ni tshul khrims so/ /brtul zhugs ni ri dgas dang / phyugs kyi brtul zhugs byed pa dang / thal ba la nyal ba dang / ral pa thogs pa la sogs pa mu stegs can gyi dka' thub rnams te/ tshul khrims dang brtul zhugs de dag gis grol thar par 'dzin cing dge ba gzhan mi spyod par de dag nyid mchog dam pa yin no snyam nas de dag bsnyems pa'o/ /'dod pa'i 'dod chags dang gnod sems zhes bya ba ni/ 'dod pa'i khams kyi 'dod chags dang / khong khro ba'o/ /gzugs kyi 'dod chags zhes bya ba ni/ gzugs kyi khams kyi 'dod chags bsam gtan dang ting nge 'dzin gyi ro la chags pa'o/ /gzugs med pa'i 'dod chags zhes bya ba ni/ gzugs med pa'i khams kyi snyoms par 'jug pa bzhi'i bde ba la chags pa'o/ /kun tu sbyor ba zhes bya ba ni kun tu sbyor ba dgu ste/ chags pa dang / khong khro ba dang / nga rgyal dang / ma rig pa dang / lta ba dang / tshul khrims dang / brtul zhugs bsnyems pa dang / 'jungs pa dang / the tshom dang / phrag dog rnams te/ 'di rnams kyis 'khor bar kun du 'ching zhing sbyor bar byed pa'i phyir kun du sbyor ba zhes bya'o/ /bag la nyal ba zhes bya ba ni bag la nyal ba bdun te/ 'dod pa'i 'dod chags dang / khong khro ba dang / gzugs dang gzugs med pa'i 'dod chags dang / nga rgyal dang / ma rig pa dang / lta ba dang / the tshom rnams te/ 'di rnams mngon du ma byung zhing rab tu phra ba'i tshe/ mi mngon par bag la nyal ba las ldang zhing 'phel ba dang / lus dang ngag yid gsum gyi rjes su 'brang ba'i phyir bag la nyal ba zhes bya'o/ /kun nas ldang ba zhes bya ba ni kun nas ldang ba bcu ste/ rmugs pa dang / gnyid dang / 'phyar ba dang / 'gyod pa dang / phrag dog dang / ser sna dang / khrel med pa dang / ngo tsha mi shes pa dang / khro ba dang / 'chal pa rnams te/ 'di dag gis sems dkris shing glags pa las 'dod chags la sogs pa'i nyon mongs pa rnams ldang ba'i phyir kun nas ldang ba zhes bya'o/ /zas bzhi zhes bya ba ni/ kham gyis za ba'i zas dang / reg pa'i zas dang / yid la sems pa'i zas dang / rnam par shes pa'i zas te/ de la kham gyis za ba'i zas ni/ dper na 'dod pa'i khams kyi mi dang lha la sogs pa'i zas kham gyis za ba lta bu'o/ /reg pa'i zas ni dper na bya dang rus sbal la sogs pa sgo nga las skyes pa lta bu ste/ ma ma'i lus kyis reg pa'i drod kyis 'tsho ba'o/ /yid la sems pa'i zas ni/ dper na mu ge byung ba'i tshe/ pha ma gnyis kyis thal ba'i thum bu gdung la btags te bzhag nas/ bu chung ngu gnyis shig la nged slar 'ongs te phye 'di las zan byas te sbyin gyis/ de'i bar du ma ngu bar 'khod cig ces bsgo nas pha ma gnyis kyis bu gnyis khyim du bzhag ste/ yul gzhan du zas tshol du dong ba'i phyir na/ bu gnyis kyi yid la bdag cag gi zas phye yod do snyam du yid la sems shing re bas/ zas su phye de ma thos par yang yun ring por tshe ma 'das te 'tsho ba lta bu'o/ /rnam par shes pa'i zas ni gzugs dang gzugs med pa'i khams kyi lha rnams kyi rnam par shes pa la/ bsam gtan dang ting nge 'dzin bsgoms pas bde ba'i ro myong bas zas gzhan mi dgos par 'tsho ba lta bu'o/ /sbyor ba bzhi zhes bya ba ni/ 'dod pa'i sbyor ba dang / sred pa'i sbyor ba dang / lta ba'i sbyor ba dang / ma rig pa'i sbyor ba ste/ de la 'dod pa'i sbyor ba ni/ 'dod pa'i khams kyi 'dod chags la sogs pa'i nyon mongs pa rnams te/ lta ba dang ma rig pa gnyis ma gtogs so/ /sred pa'i sbyor ba ni gzugs dang gzugs med pa'i khams kyi 'dod chags la sogs pa'i nyon mongs pa rnams te/ lta ba dang ma rig pa gnyis ma gtogs so/ /lta ba'i sbyor ba ni 'jig tshogs la lta ba dang / mthar 'dzin par lta ba dang / log par lta ba dang / lta ba bsnyems pa dang / tshul khrims dang / brtul zhugs bsnyems pa dang lnga'o/ /ma rig pa'i sbyor ba ni/ khams gsum gyi ma rig pa ste/ nyon mongs pa 'di rnams kyis sems can rnams khams gsum dang / 'gro ba drug dang / skye ba bzhi rnams su skye bar sbyor ba'i phyir sbyor ba zhes bya'o/ /chu bo bzhi zhes bya ba ni/ sbyor ba bzhi po 'di dag nyid sems can rnams ngan song gsum du khyer bar byed pa'i phyir chu bo dang 'dra bas chu bo zhes bya'o/ /mdud pa bzhi zhes bya ba ni/ chags sems dang / gnod sems dang / tshul khrims dang / brtul zhugs bsnyems pa dang / lta ba bsnyems pa ste/ nyon mongs pa 'di rnams kyis sems can rnams grol thar par mi 'gyur bar 'ching bar byed pa'i phyir mdud pa zhes bya'o/ /nye bar len pa bzhi zhes bya ba ni/ 'dod pa nye bar len pa dang / lta ba nye bar len pa dang / tshul khrims dang / brtul zhugs bsnyems pa nye bar len pa dang / bdag tu smra ba nye bar len pa ste/ de la 'dod pa nye bar len pa ni/ 'dod pa'i khams kyi 'dod chags la sogs pa'i nyon mongs pa rnams so/ /lta ba nye bar len pa ni/ 'jig tshogs la lta ba dang / mthar 'dzin par lta ba dang / log par lta ba dang / lta ba bsnyems pa dang bzhi'o/ tshul khrims dang brtul zhugs bsnyems pa nye bar len pa ni sngar bshad pa'o/ /bdag tu smra ba nye bar len pa ni/ bdag gi lus la bdag go zhes smra ba'am/ nga'o zhes pa'i nga rgyal la bya ste/ nyon mongs pa 'di rnams kyis 'khor ba'i lus nye bar len par 'gyur ba'i phyir nye bar len pa zhes bya'o/ /phyin ci log bzhi zhes bya ba ni/ mi rtag pa la rtag par 'dzin pa dang / sdug bsngal la bde bar 'dzin pa dang / bdag med pa la bdag tu 'dzin pa dang / mi gtsang ba la gtsang bar 'dzin pa dang bzhi'o/ /mi dge ba bcu zhes bya ba ni/ srog gcod pa dang / ma byin par len pa dang / 'dod pa la log par spyod pa ste/ lus kyi gsum dang / brdzun du smra ba dang / phra ma zer ba dang / tshig kyal pa dang / ngag rtsub mo ste ngag gi bzhi dang / chags sems dang / gnod sems dang / log par lta ba ste yid kyi gsum dang bcu'o/ /spang bar bya ba'i rigs su gtogs pa rnams la/ 'dod chags la sogs pa gzhan ni spang bar 'tshal bas zhes gzhung las 'byung la/ zas bzhi dang / sbyor ba bzhi dang / chu bo bzhi'i skabs su yongs su rtogs par 'tshal bas zhes 'byung ba 'di dag yongs su rtogs par byas nas spang bar bya ba yin pas/ spang bar 'tshal bas zhes ma smos kyang spang bar bya bar rig par bya'o/ /'dod chags la sogs pa gzhan rnams la yongs su rtogs par 'tshal bas zhes ma smos kyang / yongs su rtogs par byas nas spang bar rig par bya'o/ /de ltar nyon mongs pa'i phyogs su gtogs pa'i chos spang bar bya ba rnams yongs su spangs par gyur pa ni/ shes rab kyi pha rol tu phyin [(]pha [,]pa [)]la brtson pa'i phan yon yin no zhes bstan pa'o/ /dge ba bcu'i las kyi lam yongs su rdzogs par bgyi bar 'tshal ba'i byang chub sems dpa' sems dpa' chen pos shes rab kyi pha rol tu phyin pa la bslab par bgyi'o zhes bya ba nas/ sangs rgyas kyi chos ma 'dres pa bco brgyad yongs su rdzogs par bgyi bar 'tshal ba'i byang chub sems dpa' sems dpa' chen pos shes rab kyi pha rol tu phyin pa la bslab par bgyi'o zhes bya ba'i bar du ni/ yongs su rdzogs pa'i phan yon bstan pa ste/ shes rab kyi pha rol tu phyin pa la brtson na 'jig rten dang 'jig rten las 'das pa'i dge ba'i chos rnams yongs su rdzogs par 'gyur ro zhes bstan pa'o/ /de la 'jig rten pa'i dge ba'i chos ni dge ba bcu dang / bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi rnams so/ /mngon par shes pa la sogs pa gzhan rnams ni/ 'jig rten las 'das pa'i dge ba'i chos rnams te/ de dag yongs su rdzogs par gyur pa ni brtson pa'i phan yon yin no zhes bya ba'i don to/ /byang chub kyi yan lag dang ldan pa'i ting nge 'dzin la gnas te/ bsam gtan dang po las langs nas 'gog pa la mnyam par gzhag pa dang zhes bya ba nas/ de ltar de dag dang ting nge 'dzin gyi sgo gzhan dag thob par 'tshal ba'i byang chub sems dpa' sems dpa' chen pos/ shes rab kyi pha rol tu phyin pa la bslab par bgyi'o zhes bya ba'i bar du mngon sum du byas pa'i chos rnams thob pas/ mngon sum du byas pa'i brtson pa'i phan yon bstan pa ste/ thob pas mngon sum du bya ba'i chos kyang bsam gtan bzhi dang / gzugs med pa'i snyoms par 'jug pa bzhi dang / seng ge rnam par bsgyings pa'i ting nge 'dzin la sogs pa'i ting nge 'dzin rnams dang / gzungs kyi sgo rnams bsgoms pas de dag gi 'bras bu thob cing don mngon sum du gyur pa ni/ shes rab kyi pha rol tu phyin pa la brtson pa'i phan yon yin no zhes bstan pa'o/ /de la byang chub kyi yan lag dang ldan pa'i ting nge 'dzin la gnas te zhes bya ba ni dang po'i ting nge 'dzin la mnyam par 'jog pa'i tshe/ bdag gis byang chub kyi rgyur gyur pa'i chos rnams mngon sum du bya'o snyam pa'i bsam pas ting nge 'dzin la mnyam par gzhag ste/ ting nge 'dzin de bsgom pa las byang chub kyi yan lag bdun mngon sum du thob par 'gyur ba'i ting nge 'dzin de la byang chub kyi yan lag dang ldan pa'i ting nge 'dzin zhes bya ste/ ting nge 'dzin de la gnas nas/ bsam gtan dang po la sogs pa dang / 'gog pa'i ting nge 'dzin la mnyam par 'jog spel mar bya ba ni ting nge 'dzin la dbang du gyur pa bstan pa'i phyir ro/ /byang chub kyi yan lag dang ldan pa'i ting nge 'dzin dang / seng ge rnam par bsgyings pa'i ting nge 'dzin la sogs pa ting nge 'dzin rnams kyi mtshan nyid ni ting nge 'dzin gyi theg pa chen po'i skabs nas/ gzhung 'di nyid las 'og nas zhib tu 'chad pa'i phyir skabs 'dir ma bshad do/ /bcom ldan 'das gzhan yang sems can thams cad kyi bsam pa yongs su rdzogs par bgyi bar 'tshal ba zhes bya ba nas/ de lta bu'i dge ba'i rtsa ba yongs su rdzogs par bgyi bar 'tshal ba'i byang chub sems dpa' sems dpa' chen pos shes rab kyi pha rol tu phyin pa la bslab par bgyi'o zhes bya ba'i bar du yang / yongs su rdzogs pa'i brtson pa'i phan yon sngar bshad pa'i lhag ma bstan pa ste/ sems can thams cad kyi bsam pa yongs su rdzogs par bya ba dang / dge ba'i rtsa ba yongs su rdzogs par bya ba las glengs te/ byang chub sems dpa'i skyon chen po rgyas par bstan pa'i phyir/ skabs 'dir logs shig tu phye ste bstan to/ /dge ba'i rtsa ba gang yongs su rdzogs pas zhes bya ba la sogs pas ni dge ba'i rtsa ba yongs su rdzogs par bya ba'i khyad par bstan pa ste/ ngan song rnams su mi ltung ba smos pas/ dge ba bcu'i las kyi lam spangs pa'i dge ba'i rtsa ba dang / rigs dma' bar mi skye ba smos pas nga rgyal bcag cing bla ma la rim gro dang / bkur sti byed pa'i dge ba'i rtsa ba dang / nyan thos dang rang sangs rgyas kyi sa la mi gnas pa smos pas chos la bdag med par rtogs pa'i dge ba'i rtsa ba dang / byang chub sems dpa'i skyon chen por mi ltung ba smos pas/ thabs mkhas shing chos la mngon par chags pa med pa'i dge ba'i rtsa ba ste/ dge ba'i rtsa ba de lta bu yongs su rdzogs par 'dod pas shes rab kyi pha rol tu phyin pa la bslab par bgyi'o zhes bya ba dang sbyar ro/ /de nas tshe dang ldan pa sha ra dwa ti'i bus/ tshe dang ldan pa rab 'byor la 'di skad ces smras so zhes bya ba la sogs pa ni 'phags pa shA ri'i bus/ byang chub sems dpa'i skyon chen po dri ba las gleng bslang ste/ 'khor rnams the tshom bsal ba dang / chos bshad pa zhib tu bstan pa'i phyir/ 'phags pa gnyis gcig gis dris pa'i lan gcig gis btab pa ste/ byang chub sems dpa'i skyon chen po zhes bya ba ni mos pas spyod pa'i sa la drod dang / rtse mo dang / bzod pa dang / 'jig rten gyi chos kyi mchog ces bya ba/ rnam pa bzhi las rtse mor gyur pa'i tshe na 'khor gsum yongs su ma dag par sbyin pa la sogs pa spyod cing / nyan thos dang rang sangs rgyas kyi sar yang mi ltung la/ byang chub sems dpa'i sa dang po yang thob par mi byed par bar ma dor gnas pa ni/ byang chub sems dpa'i skyon chen po zhes bya ste/ de bas na skyon chen por ltung ba gang yin zhes dris pa'i lan du/ nam byang chub sems dpa' sems dpa' chen po thabs mi mkhas pas pha rol tu phyin pa drug la spyod cing zhes bya ba la sogs pa gsungs so/ /de la chos la sred pa zhes bya ba ni/ chos rnams la mtshan mar 'dzin pa ste/ de nyid gsal bar bshad pa'i phyir/ gzugs stong zhes bya bar mngon par chags shing gnas te 'du shes pa dang zhes bya ba la sogs pa gsungs te/ de yang rnam par shes pa smon pa med ces bya bar mngon par chags shing gnas te/ 'du shes pa 'di ni tshe dang ldan pa sha ra dwa ti'i bu/ byang chub sems dpa' sems dpa' chen po'i mi mthun pa'i chos la sred pa ste skyon du 'gyur ba'o zhes bya ba'i bar gyis ni gzugs la sogs pa'i phung po lnga rnams la stong pa dang / mi rtag pa dang / sdug bsngal ba dang / bdag med pa la sogs par rtog cing sgom pa'i tshe/ dngos po yod pa dang / mtshan ma can du dmigs shing bsgom pa'i phyir chos la sred pa zhes bya'o/ /rtag pa la sogs pa phyin ci log tu ma gyur pa'i phyir mthun pa zhes bya ste/ byang chub sems dpa' ni chos gang la yang mtshan mar mi 'dzin cing / 'khor gsum yongs su dag par spyod pa'i rigs pa las dngos por chags shing mtshan mar 'dzin pa'i phyir skyon du 'gyur ro zhes bya ba'i don to/ /byang chub sems dpa'i skyon ni rnam pa gsum ste/ lta ba phyin ci log tu gyur pa dang / sems phyin ci log tu gyur pa dang / 'du shes phyin ci log tu gyur pa'o/ /de la mngon par chags zhes bya ba ni/ lta ba phyin ci log tu gyur pa'o/ /gnas zhes bya ba ni/ sems phyin ci log tu gyur pa'o/ /'du shes zhes bya ba ni/ 'du shes phyin ci log tu gyur pa bstan to/ /gal te gzugs 'di spang bar bya'o/ /'dis gzugs spang bar bya'o zhes bya ba nas/ rnam par shes pa 'di spang bar bya'o/ /'dis rnam par shes pa spang bar bya'o zhes bya ba'i bar du ni/ gzugs la sogs pa'i phung po lnga po so sor phye ste/ spang bar bya ba'i sgo nas mtshan mar 'dzin pa'i skyon bstan pa ste/ 'dis gzugs spang bar bya'o zhes bya ba ni/ spong bar byed pa'i byang chub sems dpa' 'dis gzugs spang bar bya'o zhes bya ba'am/ 'phags pa'i lam bsgom pa 'dis/ gzugs spang bar bya'o zhes bya ba mtshan mar 'dzin pa ste/ de bzhin du rnam par shes pa'i bar du sbyar bar bya'o/ /sdug bsngal 'di yongs su shes par bya'o zhes bya ba nas/ lam 'di bsgom par bya'o/ / 'dis lam bsgom par bya'o zhes bya ba'i bar du ni/ 'phags pa'i bden pa bzhi la/ sdug bsngal ni shes par bya'o/ /kun 'byung ba ni spang bar bya'o/ /'gog pa ni mngon sum du bya'o/ /lam ni bsgom par bya'o zhes 'byung ba la mtshan mar 'dzin pa skyon du 'gyur ro zhes bstan pa ste/ 'dis zhes bya ba ni snga ma bzhin no/ /'di ni kun nas nyon mongs pa'o/ /'di ni rnam par byang ba'o zhes bya ba nas/ 'di ni byang chub sems dpa' sems dpa' chen po'i skyon med pa'o/ /'di ni skyon du 'gyur ba'o zhes bya bar chos de dag la mngon par chags shing gnas te/ 'du shes pa 'di ni byang chub sems dpa' sems dpa' chen po'i mthun pa'i chos la sred pa ste/ skyon du 'gyur ba'o zhes bya ba'i bar du ni/ chos rnams la blang ba dang / dor ba'i 'du shes dang / mtshan mar 'dzin pa skyon du 'gyur ba bstan pa ste/ de la 'di ni kun nas nyon mongs pa'o zhes bya ba ni 'dod chags la sogs pa'i 'khor ba'i rgyur 'gyur ba'o/ /'di ni rnam par byang ba'o zhes bya ba ni dran pa nye bar gzhag pa la sogs pa byang chub kyi phyogs kyi chos mya ngan las 'das pa'i rgyur 'gyur ba rnams so/ / chos 'di dag ni bsten par bya'o zhes bya ba ni yang dag par lta ba dang / dad pa la sogs pa byang chub sems dpa'i spyod pa dang mi 'gal ba rnams so/ /chos 'di dag ni bsten par mi bya'o zhes bya ba ni log par lta ba dang / ma dad pa la sogs pa byang chub sems dpa'i spyod pa dang 'gal ba rnams so/ /'di la byang chub sems dpa' sems dpa' chen pos spyad par bya'o zhes bya ba ni/ sbyin pa'i pha rol tu phyin pa la sogs pa'o/ /'di la spyad par mi bya'o zhes bya ba ni/ sbyin pa la sogs pa'i mi mthun pa'i phyogs ser sna la sogs pa'o/ / 'di ni byang chub sems dpa' sems dpa' chen po'i lam mo zhes bya ba ni/ byang chub sems dpa'i lam la rnam pa gnyis te/ mthong ba'i lam dang / bsgom pa'i lam mo/ /de la mthong ba'i lam ni sa dang po la chos kyi dbyings rnam par dag pa yang dag pa ji lta ba bzhin du rtogs pa'o/ /bsgom pa'i lam ni chos kyi dbyings ji ltar rtogs pa de nyid sa gnyis pa la sogs pa la yang dang yang du goms par byed pa'o/ /'di ni lam ma yin no zhes bya ba ni/ byang chub sems dpa'i lam gong du smos pa'i mi mthun pa'i phyogs su gyur pa/ nyon mongs pa'i sgrib pa dang / shes bya'i sgrib pa rnams so/ /'di ni byang chub sems dpa' sems dpa' chen po'i bslab pa'o zhes bya ba ni/ byang chub sems dpa'i bslab pa rnam pa gsum ste/ sdom pa'i bslab pa dang / dge ba'i chos la sogs pa'i bslab pa dang / sems can gyi don byed pa'i bslab pa'o/ /'di ni bslab pa ma yin no zhes bya ba ni gong ma las bzlog pa'o/ /'di ni byang chub sems dpa' sems dpa' chen po'i sbyin pa'i pha rol tu phyin pa'o zhes bya ba ni/ 'khor gsum yongs su dag par sbyin par byed pa'o/ / 'di ni sbyin pa'i pha rol tu phyin pa ma yin no zhes bya ba ni/ 'khor gsum yongs su ma dag par sbyin pa byas pa ni sbyin pa tsam du zad kyi/ pha rol tu phyin par mi chud do/ /de bzhin du tshul khrims la sogs pa pha rol tu phyin pa lhag ma lnga la yang sbyar bar bya'o/ /'di ni byang chub sems dpa' sems dpa' chen po'i thabs mkhas pa'o zhes bya ba ni/ don dam par chos thams cad stong par rtogs kyang / kun rdzob tu bsdu ba rnam bzhi la sogs pas sems can yongs su smin par byed pa'o/ /'di ni thabs mkhas pa ma yin no zhes bya ba ni nyan thos ltar zhi ba phyogs gcig la gnas pa'am/ so so'i skye bo ltar dngos po la chags nas 'khor ba la gnas pa lta bu'o/ /'di ni byang chub sems dpa' sems dpa' chen po'i skyon med pa'o zhes bya ba ni/ skyon med pa'i mtshan nyid 'og nas 'chad do/ /'di ni skyon du 'gyur ba'o zhes bya ba ni/ skyon gyi mtshan nyid gong du bshad pa nyid do/ /de ltar chos rnams la mtshan mar 'dzin cing mngon par chags te/ 'du shes su byed pa ni byang chub sems dpa'i sgrib pa yin pa'i phyir skyon du 'gyur ba'o zhes bstan pa'o/ /nang stong pa nyid la phyi stong pa nyid yang dag par rjes su mi mthong ngo zhes bya ba la sogs pa ni 'phags pa shA ri'i bus 'phags pa rab 'byor la/ byang chub sems dpa'i skyon med pa gang yin zhes dris pa'i lan du/ byang chub sems dpa'i skyon med pa gang yin pa zhib tu bstan pa ste/ nang stong pa nyid la phyi stong pa nyid yang dag par rjes su mi mthong ngo zhes bya ba ni/ nang stong pa nyid nang stong pa nyid kyi rang bzhin gyis stong pas phyi stong pa nyid la sogs pa stong pa nyid gzhan gyis stong par bya mi dgos te de bas na de stong par bya ba'i phyir/ nang stong pa nyid la phyi stong pa nyid btsal mi dgos pas/ de la yang dag par rjes su mi mthong ngo / /de bzhin du stong pa nyid bcwa brgyad la yang sbyar bar bya ste/ de ltar phyi nang stong pa nyid la sogs pa dngos po tha dad par mi lta bar rang bzhin gyis stong pa nyid du ro gcig par rtogs pa nyid byang chub sems dpa'i skyon med pa yin no zhes bya ba'i don to/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen pos shes rab kyi pha rol tu phyin pa la spyod pa'i tshe/ rnam pa 'di ltar bslab par bya ste/ slob pa'i tshe ci nas kyang gzugs shes par bya ste/ gzugs des rlom sems su mi bya'o zhes bya ba nas/ sangs rgyas kyi chos ma 'dres pa bcwa brgyad shes par bya ste/ sangs rgyas kyi chos ma 'dres pa bcwa brgyad po de dag gis rlom sems su mi bya'o zhes bya ba'i bar du yang phung po dang / khams dang skye mched la sogs pa 'jig rten pa'i chos rnams dang / sbyin pa'i pha rol tu phyin pa la sogs pa 'jig rten las 'das pa'i chos rnams kun rdzob tu so so'i mtshan nyid gang yin pa shes par byas nas/ don dam par de dag gi mtshan nyid sems la mtshan mar 'dzin cing / 'di'i mtshan nyid ni 'di yin no snyam du sems la mi bsam mo zhes bstan pa ste/ de ltar mtshan mar mi 'dzin cing mi sems pa nyid byang chub sems dpa'i skyon med pa yin no zhes bya ba'i don to/ /byang chub kyi sems des kyang rlom sems su mi bya'o zhes bya ba la sogs pa ni/ chos thams cad la mtshan mar mi 'dzin cing rlom sems med pa/ byang chub sems dpa'i skyon med pa yin no zhes bshad pa de gnyis/ bla na med pa'i byang chub thob par 'gyur ba'i rgyu yin pas byang chub kyi sems zhes bya ste/ 'di ni byang chub kyi sems yin no snyam mam/ mi mnyam pa dang mnyam pa'i sems yin no snyam mam/ rlabs po che'i sems yin no snyam du 'du shes mi skyed cing rlom sems su mi bya'o zhes bstan pa ste/ de ltar byas na byang chub sems dpa'i skyon med par 'gyur ro zhes bya ba'i don to/ /de ci'i phyir zhe na/ 'di ltar sems de sems ma yin te/ sems kyi rang bzhin 'od gsal ba'i phyir ro zhes bya bas ni/ byang chub kyi sems la rlom sems su mi bya ba'i gtan tshigs bstan pa ste/ sems de zhes bya ba ni/ kun rdzob tu byang chub kyi sems zhes kun brtags pa ste/ don dam par rang bzhin yod par ma grub pas sems ma yin zhes gsungs so/ /sems kyi rang bzhin 'od gsal ba'i phyir ro zhes bya ba ni/ gzung ba dang 'dzin pa la sogs par rnam par rtog pa'i dri ma dang / sgrib pa med pa'i phyir ro zhes bya ba'i don to/ /smras pa/ tshe dang ldan pa rab 'byor sems kyi rang bzhin 'od gsal ba gang yin zhes bya ba nas/ 'di ni tshe dang ldan pa sha ra dwa ti'i bu byang chub sems dpa' sems dpa' chen po'i sems kyi rang bzhin 'od gsal ba'o zhes bya ba'i bar du ni/ gzung ba dang 'dzin pa la sogs pa'i dri ma med pa dang / rang bzhin gyis 'od gsal ba zhib tu bstan pa ste/ sems gang 'dod chags dang yang mi ldan ma bral zhes bya ba ni sems kyi de bzhin nyid rang bzhin gyis 'od gsal ba de ye nas dag pa yin pa'i phyir so so'i skye bo'i tshe na yang / 'dod chags la sogs pa dang mi ldan pa/ 'phags pa'i tshe na yang 'dod chags dang bral ba yang ma yin te/ de bzhin nyid kyi rang bzhin ni mi 'gyur ba yin pa'i phyir ro/ /de bzhin du gti mug la sogs pa lhag ma rnams dang mi ldan ma bral ba la yang ci rigs par sbyar bar bya'o/ /'dod chags zhe sdang gti mug gsum dang / kun nas ldang ba dang / bag la nyal ba dang / kun du sbyor ba dang / lta ba rnams kyi mtshan nyid ni sngar bshad zin to/ /sgrib pa dang gcod pa gnyis sngar bshad pas de gnyis da 'dir bshad par bya ste/ de la sgrib pa zhes bya ba ni shes bya dang / nyon mongs pa'i sgrib pa'o/ / gcod pa zhes bya ba ni bar du gcod pa rnam pa lnga ste/ 'dod pa'i 'dod chags dang / gnod sems dang / rmugs pa dang / gnyid dang / 'phyar ba dang / 'gyod pa dang / the tshom dang lnga ste/ rmugs pa dang gnyid gnyis gcig tu bgrang / 'phyar ba dang 'gyod pa gnyis gcig tu bgrang ngo / /bar du gcod pa 'di lnga mya ngan las 'das pa la bar du gcod pa'i phyir gcod pa zhes bya'o/ /nyan thos dang rang sangs rgyas dang mi ldan ma bral zhes bya ba ni/ nyan thos dang rang sangs rgyas kyi sems dman pa dang mi ldan ma bral ba'o/ /smras pa/ tshe dang ldan pa rab 'byor sems gang la sems ma yin no zhes bya ba de yod dam zhes bya ba ni don dam par sems kyi rang bzhin ma grub na/ sems ma yin no zhes bya ba yang dmigs su yod dam zhes 'phags pa shA ri'i bus dris pa'o/ /rab 'byor gyis smras pa/ tshe dang ldan pa sha ra dwa ti'i bu de ltar sems ma yin no/ /sems ma yin pa de la yod pa'am med pa dmigs pa'am yod par 'gyur ram zhes bya ba ni sems ma yin no zhes bya ba de yod dam zhes bya ba'i tshig gzung ste/ yod dam zhes bya ba nyid kyang don dam par mi 'thad pa'i phyir yod pa'am med pa don dam par dmigs pa'am/ yod par 'gyur ram zhes rab 'byor gyis shA ri'i bu la slar dris pa'o/ /smras pa/ tshe dang ldan pa rab 'byor de lta ma yin no zhes bya ba ni yod pa'am med pa zhes bya ba de yang / don dam par dmigs pa'am yod pa ma yin no zhes bya ba'i don to/ /gal te de ltar sems ma yin pa de la yod pa'am med pa zhes bya ba med cing mi dmigs na/ tshe dang ldan pa sha ra dwa ti'i bu khyod kyis de skad du/ sems gang la sems ma yin pa zhes bya ba de yod dam zhes phyir dris pa de 'thad par 'gyur ram zhes bya ba ni/ sha ra dwa ti'i bus smras pa'i tshig rab 'byor gyis bzlas te/ de ltar don dam par yod pa'am med pa mi dmigs na/ sems ma yin pa zhes bya ba yod dam zhes khyod kyis bdag la dris pa de yang rigs pa ma yin no zhes bya ba'i don to/ /smras pa/ tshe dang ldan pa rab 'byor sems ma yin pa gang yin zhes bya ba ni/ don dam par sems kyi mtshan nyid dmigs su med pa'i don gang yin pa dri ba las gleng bslang ste/ gzugs la sogs pa'i chos thams cad 'gyur ba med cing rnam par rtog pa med pa'i don zhib tu bshad pa'i skabs dbye ba'i phyir/ 'phags pa shA ri'i bus 'phags pa rab 'byor la dris pa'o/ /sems ma yin pa ni 'gyur ba med cing rnam par rtog pa med pa ste zhes bya ba ni/ don dam par sems ma yin pa zhes bya ba ni/ sems ma yin pa'i dngos po zhig gud na yod pa la mi bya'i/ sems kyi de bzhin nyid rang bzhin gyis 'od gsal ba/ gzung ba dang 'dzin pa la sogs par rnam par mi rtog cing mi sems la/ sems ma yin pa zhes bya'o zhes bstan pa'o/ /de ni chos thams cad kyi de bzhin nyid de/ de la ni sems med pa bsam gyis mi khyab pa zhes bya'o zhes bya ba ni gong du smos pa'i don nyid gsal bar bstan pa ste/ sems kyi de bzhin nyid mi 'gyur ba rang bzhin gyis 'od gsal ba de ni/ chos thams cad kyi de bzhin nyid dang rang bzhin dbyer med pa'i phyir/ chos thams cad kyi de bzhin nyid kyang de yin te/ rtog pa can gyi spyod yul ma yin pa'i phyir/ bsam gyis mi khyab pa zhes bya'o zhes bstan pa'o/ /smras pa/ tshe dang ldan pa rab 'byor ci/ ji ltar sems la 'gyur ba med cing rnam par rtog pa med pa de bzhin du/ gzugs la yang 'gyur ba med cing rnam par rtog pa med pa yin nam zhes bya ba nas/ de bzhin du rnam pa thams cad mkhyen pa nyid la yang 'gyur ba med cing rnam par rtog pa med pa yin nam zhes bya ba'i bar du ni sems kyi de bzhin nyid dang / gzugs la sogs pa'i chos thams cad kyi de bzhin nyid la 'gyur ba med cing rnam par rtog pa med par ro gcig pa dris pa'o/ /rab 'byor gyis smras pa/ tshe dang ldan pa sha ra dwa ti'i bu de de bzhin te/ ji ltar sems la 'gyur ba med cing rnam par rtog pa med pa de bzhin du gzugs la yang 'gyur ba med cing rnam par rtog pa med do zhes bya ba nas/ de bzhin du rnam pa thams cad mkhyen pa nyid la yang 'gyur ba med cing rnam par rtog pa med do zhes bya ba'i bar du ni/ 'phags pa shA ri'i bus dris pa'i la na/ 'phags pa rab 'byor gyis btab pa ste/ 'gyur ba med cing rnam par rtog pa med pa'i don ni sngar bshad zin to/ /de nas tshe dang ldan pa shA ri'i bus tshe dang ldan pa rab 'byor la legs so zhes bya ba byin te zhes bya ba la sogs pa ni chos thams cad kyi rang bzhin 'gyur ba med cing rnam par rtog pa med pa'i don legs par bshad do zhes bstod pa'o/ /khyod ni bcom ldan 'das kyi sras thugs las skyes pa zhes bya ba ni/ thugs kyi rang bzhin zhi gnas dang lhag mthong zung du 'brel pa las 'byung ba'i phyir ro/ /zhal nas byung ba zhes bya ba ni zhal nas gsungs pa'i chos bshad pa'i lung las byung ba'i phyir ro/ /chos las skyes pa zhes bya ba ni/ bsam pa dang bsgom pa'i rang bzhin sgrub pa'i chos las byung ba'i phyir ro/ /chos kyi sprul pa zhes bya ba ni lam gyi 'bras bu zag pa med pa'i chos rtogs pa las byung ba'i phyir ro/ /chos kyi bgo skal ba zhes bya ba ni mya ngan las 'das pa'i chos la dbang ba'i phyir ro/ /zang zing gi bgo skal ba ma yin zhes bya ba ni ser sna spangs pa'i phyir ro/ /chos rnams la mngon sum gyi mig dang ldan pa zhes bya ba ni chos kyi chos nyid las gzhan gyis mi phyed pa'i phyir ro/ /lus mngon du gyur pa zhes bya ba ni/ gzugs dang gzugs med pa'i bsam gtan dang / ting nge 'dzin gyi lus kyis mngon du byas pa'i phyir ro/ /nyan thos nyon mongs pa med pa rnam par spyod pa rnams kyi mchog ces bya ba ni/ nyon mongs pa'i gnyen por gyur pa'i ting nge 'dzin la gnas pa ni/ nyon mongs pa med pa la rnam par spyod pa zhes bya ste/ de dag gi nang na mchog tu gyur pa'i phyir de skad ces gsungs so/ /bstan pa 'di yang de'i tshul dang 'dra'o zhes bya ba ni/ khyod kyis chos bstan pa 'di yang don gyi tshul dang 'dra bar bstan pa de legs so zhes bya ba dang sbyar ro/ /tshe dang ldan pa rab 'byor byang chub sems dpa' sems dpa' chen pos kyang shes rab kyi pha rol tu phyin pa la de bzhin du bslab par bya'o zhes bya ba ni/ shes rab kyi pha rol tu phyin pa'i don rab 'byor gyis ji ltar zhib tu bstan pa/ de bzhin du byang chub sems dpa' rnams kyis kyang de bzhin du bslab par bya'o zhes bstan pa'o/ /byang chub sems dpa' sems dpa' chen po phyir mi ldog pa yang 'di las yongs su brtag par bya'o zhes bya ba ni/ de ltar slob na tshul de las byang chub sems dpa' de phyir mi ldog pa yin par rig par bya'o zhes bstan pa'o/ /de ltar na byang chub sems dpa' sems dpa' chen po shes rab kyi pha rol tu phyin pa dang ma bral bar shes par bya ste zhes bya ba ni/ de ltar spyod na byang chub sems dpa' de shes rab kyi pha rol tu phyin pa'i don dang mthun par spyod pa'i phyir shes rab kyi pha rol tu phyin pa dang ma bral ba zhes bya'o/ /tshe dang ldan pa rab 'byor nyan thos kyi sa la slob par 'dod pas kyang shes rab kyi pha rol tu phyin pa 'di nyid nan tan du mnyan par bya'o zhes bya ba nas/ sangs rgyas kyi sa la slob par 'dod pa'i byang chub sems dpa' sems dpa' chen pos kyang shes rab kyi pha rol tu phyin pa 'di nyid nan tan du mnyan par bya'o/ /gzung bar bya'o/ /bcang bar bya'o/ /bklag par bya'o/ /yongs su chub par bya'o/ /tshul bzhin du yid la bya'o zhes bya ba'i bar du nyan thos kyi sa dang / rang sangs rgyas kyi sa dang / byang chub sems dpa'i sa dang / yang dag par rdzogs pa'i sangs rgyas kyi sa dang / sa 'di rnams kun la bslab pa la yang shes rab kyi pha rol tu phyin pa 'di med du mi rung ste/ thams cad la phan 'dogs pa yin no zhes bstan pa'o/ /nan tan du mnyan par bya'o zhes bya ba ni mnyan pa'i shes rab kyis gzhan las legs par mnyan par bya'o zhes bstan pa'o/ /gzung bar bya'o zhes bya ba ni/ mnyan pa'i tshig kha ton du lobs shing zin par bya'o/ /bcang bar bya'o zhes bya ba ni/ lobs shing zin pa'i tshig dran pas phyi phyir ma brjed par bya'o/ / bklag par bya'o zhes bya ba ni/ glegs bam du bris te yi dam du klog pa'o/ /yongs su chub par bya'o zhes bya ba ni/ shes rab kyi pha rol tu phyin pa'i don zab mo ma lus par bsam pa'i shes rab kyis phyin ci ma log par rtogs shing mngon sum du bya'o/ / tshul bzhin du yid la bya'o zhes bya ba ni/ ji ltar rtogs pa'i don bsgom pa'i shes rab kyis yang dang yang du goms par bya ba'o/ /de ci'i phyir zhe na/ zhes bya ba la sogs pas ni/ de ltar shes rab rnam pa gsum gyis nan tan du bya ba'i gtan tshigs bstan pa ste/ nyan thos dang / rang sangs rgyas dang / byang chub sems dpa' rnams kyis theg pa gang la bslab par bya ba'i theg pa gsum char shes rab kyi pha rol tu phyin pa 'di las rgya cher bstan pa'i phyir/ shes rab kyi pha rol tu phyin pa 'di la de ltar bslab par bya'o zhes brtson pa'i phan yon mjug bsdus nas bstan pa ste/ 'di yan chad du brtson pa'i phan yon bshad zin to/ /shes rab kyi pha rol tu phyin pa 'bum pa rgya cher bshad pa las le'u bzhi pa'o// //da ni brtson par bya ba'i dngos po du yod pa bstan pa'i phyir brtson pa'i rab tu dbye ba bshad par bya ste/ brtson par bya ba rab tu dbye ba de yang nges par 'byung ba'i sgrub pa rnam pa drug 'og nas gzhung las bstan pa ste/ drug gang zhe na/ mtha' gnyis dang bral bar sgrub pa dang / mi gnas par sgrub pa dang / yongs su 'dzin pa med par sgrub pa dang / yongs su brtag pa'i sgrub pa dang / thabs la sgrub pa dang / myur du mngon par rdzogs par byang chub par sgrub pa ste/ sgrub pa 'di rnams kyis rnam pa thams cad mkhyen pa nyid du nges par 'byung ba'i phyir nges par 'byung ba zhes bya'o/ /nges par 'byung ba'i sgrub pa de dag la brtson par bya ba'i rab tu dbye ba bstan pa'i skabs dbye ba'i phyir/ 'phags pa rab 'byor gyis bcom ldan 'das de ltar bdag gis byang chub sems dpa' dang / shes rab kyi pha rol tu phyin pa ma dmigs ma 'tshal te zhes bya ba la sogs pa gsol te/ don dam par brtson par byed pa'i byang chub sems dpa' dang / brtson par bya ba'i shes rab kyi pha rol tu phyin pa gnyis ka yang mi dmigs na/ gang zag gang zhig chos gang la gdams shing rjes su bstan par bgyi zhe na/ gong du brtson pa la gdams pa bshad pa'i tshig dang / don de nyid bzung ste zhus pa'o/ /bcom ldan 'das de ltar bdag gis chos thams cad 'phel ba dang / 'grib pa ma dmigs ma 'tshal bar zhes bya ba nas/ de nyid bdag gis 'gyod par 'gyur ro zhes bya ba'i bar du/ chos dang gang zag gnyi ga don dam par de ltar mi dmigs bzhin du/ byang chub sems dpa' zhe'am/ shes rab kyi pha rol tu phyin pa zhes dngos por dmigs te gdams par bgyis na/ dngos po med pa las sgro btags shing skyed pa dang / dngos po yod pa'i zlas med pa yang 'grub pas/ skur pa btab par yang 'gyur te/ de ltar sgro btags shing skur pa btab par gyur na/ yod pa dang med pa'i mtha' gnyis la gnas pas shes rab kyi pha rol tu phyin pa'i gzhung dang 'gal ba'i phyir bdag gis 'gyod par 'gyur ro zhes gsol pa ste/ 'phel ba zhes bya ba ni don dam par dngos po med pa las bskyed de sgro btags pa'o/ /'grib pa zhes bya ba ni kun rdzob tu med pa ma yin pa las phri ste/ skur pa btab pa ste/ de ltar sgro 'dogs pa dang / skur pa 'debs pa'i mtha' gnyis la mi gnas pa ni/ gang zag dang chos la yod pa dang med pa'i mtha' gnyis dang bral ba'i sgrub pa bstan to/ /bcom ldan 'das ming de yang gnas pa ma mchis/ thug pa ma mchis/ byin gyis brlabs pa ma mchis te zhes bya ba la sogs pas byang chub sems dpa' zhes bya ba'am/ shes rab kyi pha rol tu phyin pa zhes bya ba'i ming de yang brjod par bya ba'i dngos por med pas/ gnas pa dang mi gnas pa'i mtha' gnyis spang ba bstan te/ dngos po zhig yod na ni/ gzugs la sogs pa 'dus byas kyi chos ltar yul dang phyogs na gnas pa'am/ nam mkha' la sogs pa 'dus ma byas pa'i chos ltar yul dang phyogs na mi gnas par 'gyur grang na/ ming de la dngos po med pas gnas pa yang med na/ mi gnas pa yang med do zhes bstan pa ste/ thug pa ma mchis zhes bya ba ni mi gnas pa yang ma mchis so zhes bya ba'i don to/ /byin gyis brlabs pa ma mchis zhes bya ba ni/ gnas pa dang mi gnas pa gnyis kyi mtha' spangs nas gnas pa yang ma yin mi gnas pa yang ma yin pa'i dngos pos byin gyis brlabs te/ gnas pa yang ma yin no zhes bstan pa'o/ / de ltar byang chub sems dpa' dang / shes rab kyi pha rol tu phyin pa gnyis la dngos po yod pa dang med pa'i sgo nas sgro 'dogs pa dang / skur pa 'debs pa'i mtha' spang ba dang / byang chub sems dpa'i ming dang / shes rab kyi pha rol tu phyin pa'i ming la gnas pa dang / mi gnas par 'dzin pa'i mtha' gnyis dang bral ba'i sgrub pa mdor bstan nas/ da ni phung po dang / khams dang / skye mched la sogs pa 'jig rten dang 'jig rten las 'das pa'i chos rnams dang / 'dus byas dang 'dus ma byas pa'i chos so sor phye ste/ mtha' gnyis dang bral ba'i sgrub pa zhib tu bstan pa'i phyir/ bcom ldan 'das bdag gis gzugs kyi 'phel ba dang / 'grib pa ma dmigs yang dag par rjes su ma mthong ste zhes bya ba la sogs pa gsungs te/ 'phel ba dang 'grib pa'i don ni sgro 'dogs pa dang / skur pa 'debs pa'i mtha' gnyis yin no zhes sngar bshad pa ste/ des ni sgro 'dogs pa dang skur pa 'debs pa'i mtha' gnyis dang bral ba'i sgrub pa bstan to/ /byang chub sems dpa' zhes gang la ming du gdags par bgyi zhes bya ba la sogs pas ni/ gzugs la sogs pa'i ming la gnas pa dang / mi gnas par rtog pa'i mtha' gnyis dang bral ba'i sgrub pa bstan pa ste/ gnas pa dang mi gnas pa'i mtha' gnyis su rtog pa dang bral ba'i don ni gong du bshad pa bzhin no/ /ji ltar gzugs la mtha' gnyis dang bral ba'i sgrub pa bshad pa de bzhin du tshor ba la sogs pa 'og ma thams cad la yang sbyar bar bya'o/ /de la bcom ldan 'das bdag gis gzugs kyi 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das rnam par shes pa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ phung po lnga'i 'phel ba dang / 'grib pa dang / gnas pa dang / mi gnas pa'i mtha' gnyis dang bral ba'i sgrub pa bstan te/ bcom ldan 'das bdag gis mig gi 'phel ba dang 'grib pa ma dmigs/ yang dag par rjes su mi mthong ste zhes bya ba nas/ bcom ldan 'das yid kyi rnam par shes pa'i ming de yang gnas pa ma mchis/ thug pa ma mchis/ byin gyis brlabs pa ma mchis so/ /de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ skye mched bcu gnyis dang / khams bcwa brgyad kyi dngos po dang / ming la mtha' gnyis su rtog pa dang bral ba'i sgrub pa bstan pa'o/ /bcom ldan 'das bdag gis mig gi 'dus te reg pa'i 'phel ba dang / 'grib pa ma dmigs yang dag par rjes su mi mthong ngo zhes bya ba nas/ bcom ldan 'das yid kyi 'dus te reg pa'i rkyen gyis tshor ba'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ reg pa drug dang / tshor ba drug gi dngos po dang / ming la sgro 'dogs pa dang / skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis sa'i khams kyi 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das rnam par shes pa'i khams kyi ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ sa'i khams la sogs pa khams drug rnams kyi dngos po dang / ming la sgro 'dogs pa dang / skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis ma rig pa'i 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das rga shi'i 'gag pa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ ma rig pa la sogs pa'i rten cing 'brel par 'byung ba'i yan lag bcu gnyis lugs bzhin 'byung ba dang / lugs las bzlog pa'i dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis 'dod chags kyi 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das gti mug gi ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ 'dod chags zhe sdang gti mug gsum gyi dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis lta ba'i rnam pa drug cu rtsa gnyis kyi 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das lta ba'i rnam pa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ lta ba'i rnam pa drug cu rtsa gnyis rnams kyi dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan pa ste/ lta ba'i rnam pa drug cu rtsa gnyis ni gzugs bdag yin/ bdag gzugs dang ldan pa yin/ bdag la gzugs gnas/ gzugs la bdag gnas zhes bdag tu lta ba'i rnam pa bzhi pa de/ tshor ba dang / 'du shes dang / 'du byed dang / rnam par shes pa dang / phung po lnga char la yang de bzhin du sbyar bar bya ste/ de ltar phung po lnga la bdag tu lta ba'i rnam pa bzhir sbyar na/ rnam pa nyi shur gyur pa de 'das pa dang / ma 'ongs pa dang / de ltar gyi dus dang / dus gsum la sbyar na/ drug cur gyur pa'i steng du log par lta ba dang / mthar 'dzin par lta ba gnyis kyis bsnan na/ drug cu rtsa gnyis su 'gyur te/ log par lta ba dang / mthar 'dzin par lta ba gnyis tshe snga phyi dang / las legs nyes kyi 'bras bu skyid sdug yod par mi lta bas dus gsum dang mi sbyar ro/ /bcom ldan 'das bdag gis/ bdag gi 'phel ba dang / 'grib pa ma dmigs yang dag par rjes su mi mthong ste zhes bya ba nas/ bcom ldan 'das mthong ba po'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ mu stegs can gyis btags pa'i bdag rnam pa bcu gsum gyi dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan to/ /de dag gis 'khor ba'i rgyur gyur pa nyon mongs pa'i phyogs su gtogs pa'i chos rnams la sgro 'dogs pa dang / skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis sbyin pa'i pha rol tu phyin pa'i 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das shes rab kyi pha rol tu phyin pa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ sbyin pa la sogs pa'i pha rol tu phyin pa drug rnams kyi dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis nang stong pa nyid kyi 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das dngos po med pa'i ngo bo nyid stong pa nyid kyi ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ stong pa nyid bcwa brgyad kyi dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis dran pa nye bar gzhag pa rnams kyi 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das 'phags pa'i lam yan lag brgyad pa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ byang chub kyi phyogs kyi chos sum cu rtsa bdun rnams kyi dngos po dang / ming la sgro 'dogs pa dang skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis rnam par thar pa'i sgo stong pa nyid kyi 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das rnam par thar pa'i sgo smon pa med pa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ rnam par thar pa'i sgo gsum gyi dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis bsam gtan bzhi'i 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das gzugs med pa'i snyoms par 'jug pa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi la sgro 'dogs pa dang skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis sangs rgyas rjes su dran pa'i 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das lha rjes su dran pa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ rjes su dran pa drug gi dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis lus kyi rnam pa rjes su dran pa'i 'phel ba dang / 'grib pa ma dmigs/ yang dag par rjes su ma mthong ste zhes bya ba nas/ bcom ldan 'das 'chi ba rjes su dran pa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ lus kyi rnam pa rjes su dran pa dang / skyo ba rjes su dran pa dang / dbugs phyi nang du rgyu ba rjes su dran pa dang / tshe 'pho ba rjes su dran pa'i dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan te/ lus kyi rnam pa rjes su dran pa dang / skyo ba rjes su dran pa dang / tshe 'pho ba rjes su dran pa gsum ni 'phags pa nyan thos rnams 'khor bas skyo bar bya ba'i phyir sgom pa ste/ lus kyi rnam pa rjes su dran pa zhes bya ba ni/ lus kyi mgo nas rting gi bar du phyi nang thams cad mi gtsang ba sna tshogs kyis gang bar rjes su dran par byed pa'o/ /skye ba rjes su dran pa zhes bya ba ni 'khor ba'i sdug bsngal rnam pa sna tshogs kyis skyo bar sems pa'o/ /tshe 'pho ba rjes su dran pa zhes bya ba ni/ lus mi rtag par sems pa'o/ /dbugs phyi nang du rgyu ba rjes su dran pa zhes bya ba ni/ 'phags pa nyan thos rnams bsam gtan dang / ting nge 'dzin sgom pa la sems las su rung bar bya ba'i phyir/ dbugs phyi nang du rgyu ba bgrang zhing dran par byed pa'o/ /bcom ldan 'das bdag gis sha'i mig gi 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das sangs rgyas kyi mig gi ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ spyan lnga'i dngos po dang ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis mngon par shes pa drug gi 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das sangs rgyas kyi chos ma 'dres pa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ mngon par shes pa drug dang / de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / byams pa chen po dang / snying rje chen po dang / sangs rgyas kyi chos ma 'dres pa bco brgyad rnams kyi dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis rmi lam lta bu'i nye bar len pa'i phung po lnga'i 'phel ba dang / 'grib pa ma dmigs/ yang dag par rjes su mi mthong ste zhes bya ba nas/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ mdo sde dag las/ chos thams cad rmi lam dang / sgyu ma dang / sgra brnyan dang / mig yor dang / gzugs brnyan dang / smig rgyu dang / chu zla dang / sprul pa lta bu'o zhes dpe rnam pa brgyad bstan pa'i dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan te/ de la rmi lam lta bu zhes bya ba ni/ rmi lam na mthong ba'i chos rnams gnyid sangs pa'i tshe/ de ltar mi snang ba bzhin du nye bar len pa'i phung po lnga la sogs pa'i kun brtags pa'i chos rnams kyang ma rig pa'i gnyid kyis log pa'i tshe snang ba rnams ma rig pa spangs te/ 'phags pa'i shes rab thob pa'i tshe de ltar mi snang ba'i phyir ro/ /sgyu ma lta bu zhes bya ba ni/ sgyu ma mkhan gyis byas pa'i rta dang glang po che la sogs pa/ rta dang glang po che'i dngos po ma yin yang / rta dang glang po che la sogs pa'i dngos por snang ba 'khrul pa yin pa de bzhin du chos thams cad kyang ji ltar snang ba'i dngos por yod pa ma yin pa la de ltar snang ba'i phyir ro/ /sgra brnyan lta bu zhes bya ba ni/ sgra sgrogs pa'i gzhi ma yin pa las sgra 'byung ba sgra la bdag pa ma yin pa de bzhin du/ chos thams cad kyang yang dag pa ma yin pa las snang zhing grag pa'i phyir ro/ /mig yor lta bu zhes bya ba ni/ mi la sogs pa'i dngos po ma yin pa la/ mi la sogs pa'i dngos por snang ba nor bar mthong ba de bzhin du/ chos thams cad kyang ji ltar snang ba'i dngos po ma yin pa las nor bar mthong ba'i phyir ro/ /gzugs brnyan lta bu zhes bya ba ni/ gzugs kyi dngos po ma yin pa la/ gzugs kyi rnam par snang ba de gzugs yang dag pa ma yin pa de bzhin du/ chos thams cad kyang ji ltar snang ba'i dngos por yod pa ma yin pa'i phyir ro/ /smig rgyu lta bu zhes bya ba ni/ dpyid tsha ba'i dus na smig rgyu'i rang bzhin chu ma yin pa las chur 'khrul pa snang ba de bzhin du chos thams cad kyang ji ltar snang ba'i rang bzhin du yod pa ma yin pa las/ dngos po yod pa lta bur snang ba'i phyir ro/ /chu zla lta bu zhes bya ba ni/ chu'i nang na snang ba'i zla ba yang dag pa ma yin yang / zla ba yang dag pa yin pa lta bur snang ba de bzhin du/ chos thams cad kyang ji ltar snang ba'i dngos por yang dag par yod pa ma yin yang / yang dag par yod pa lta bur snang ba'i phyir ro/ /sprul pa lta bu zhes bya ba ni/ sprul par byed pa'i sems kyi dbang gis dngos po rnam pa sna tshogs sprul pa rnams yang dag par yod pa ma yin pa las snang ba de bzhin du/ chos thams cad kyang phyi rol gyi dngos po yod pa ma yin pa las sems 'khrul pa'i dbang gis snang ba'i phyir ro/ /bcom ldan 'das bdag gis dben pa'i 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das rnam par byang ba ma mchis pa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ don dam par chos thams cad dben pa dang / zhi ba dang / skye ba med pa dang / 'gag pa med pa dang / 'byung ba med pa dang / mngon par 'du bya ba med pa dang / kun nas nyon mongs pa med pa dang / rnam par byang ba med pa'o zhes mdo las 'byung ba'i dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan pa ste/ de la dben pa zhes bya ba ni/ gzung ba dang 'dzin pa las dben pa'i phyir ro/ /zhi ba zhes bya ba ni/ rang bzhin gyis mya ngan las 'das pa yin pa'i phyir ro/ /skye ba med pa zhes bya ba ni/ rgyu dang rkyen gyis ma skyes pa'i phyir ro/ /'gag pa med pa zhes bya ba ni/ ma skyes pa nyid kyi phyir ro/ /'byung ba med pa zhes bya ba ni/ rgyu med pa las ma byung ba'i phyir ro/ /mngon par 'du byed pa med pa zhes bya ba ni/ don dam par dngos po yod pa ma yin pas bcos shing byi dor byar med pa'i phyir ro/ /kun nas nyon mongs pa med pas zhes bya ba ni/ kun nas nyon mongs par 'gyur ba'i dngos po dang kun nas nyon mongs pa nyid kyang don dam par dngos po med pa'i phyir ro/ /rnam par byang ba med pa zhes bya ba ni/ kun nas nyon mongs pa yod na de'i zlas rnam par byang ba yang 'grub na/ kun nas nyon mongs pa med pas rnam par byang ba yang mi 'grub pa'i phyir ro/ /bcom ldan 'das bdag gis chos kyi dbyings kyi 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das chos skyon med pa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ chos kyi dbyings dang / de bzhin nyid dang / yang dag pa'i mtha' dang / chos kyi gnas nyid dang / chos skyon med pa rnams kyi dngos po dang / ming la sgro 'dogs shing skur pa 'debs pa'i mtha' gnyis dang bral ba'i sgrub pa bstan pa ste/ de la chos kyi dbyings zhes bya ba ni de bzhin gshegs pa'i stobs bcu dang / mi 'jigs pa bzhi dang / sangs rgyas kyi chos ma 'dres pa bco brgyad la sogs pa thob par 'gyur ba'i rgyu'am gzhi yin pa'i phyir ro/ /de bzhin nyid ces bya ba ni yongs su dag pa'i rang bzhin gzhan du mi 'gyur zhing rtag tu de bzhin du gnas pa'i phyir ro/ /yang dag pa'i mtha' zhes bya ba ni/ phyin ci ma log par yongs su rdzogs pa'i mthar phyin pa'i phyir ro/ /chos kyi gnas nyid ces bya ba ni de rnams 'jig rten du byung yang rung ma byung yang rung / chos rnams kyi chos nyid ni ye nas de bzhin du gnas pa'o zhes 'byung ba lta bu ste/ stong pa nyid kyi rang bzhin du gnas pa'i phyir ro/ /chos skyon med ces bya ba ni/ sa dang po yan chad de bzhin nyid de rtogs pas/ byang chub sems dpa'i skyon med pa la zhugs te/ bla na med pa'i byang chub tu nges par 'gyur zhing phyir mi ldog par yongs su rdzogs pa'i phyir ro/ /bcom ldan 'das bdag gis dge ba dang mi dge ba'i chos kyi 'phel ba dang / 'grib pa ma dmigs yang dag par rjes su ma mthong ste zhes bya ba nas/ bcom ldan 'das 'das pa dang / ma 'ongs pa dang / da ltar byung ba'i chos rnams kyi ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ dge ba dang / mi dge ba'i chos dang / 'jig rten dang / 'jig rten las 'das pa'i chos dang / 'dus byas dang / 'dus ma byas pa'i chos dang / zag pa dang bcas pa dang / zag pa med pa'i chos dang / 'das pa dang / ma 'ongs pa dang / da ltar byung ba'i chos rnams la sgro 'dogs pa dang / skur pa 'debs pa'i mtha' gnyis dang bral ba'i sgrub pa bstan pa ste/ dge ba dang mi dge ba la sogs pa'i chos ming gis smos pa rnams kyi mtshan nyid ni 'og nas gzhung nyid las zhib tu 'chad pas skabs 'dir ma bshad do/ /bcom ldan 'das bdag gis 'das pa ma mchis pa dang / ma 'ongs pa ma mchis pa dang / da ltar byung ba ma mchis pa zhes bya ba nas/ 'dus ma bgyis pa de yang gang zhe na/ gang la skye ba ma mchis/ gnas pa ma mchis/ 'jig pa ma mchis pa ste zhes bya ba'i bar du ni/ 'dus ma byas pa'i mtshan nyid bstan pa ste/ 'dus ma byas pa ni dus gsum las 'das shing skye 'gag dang gnas pa yang med do zhes bya ba'i don to/ /bcom ldan 'das bdag gis ni/ bcom ldan 'das kyi 'phel ba dang / 'grib pa ma dmigs yang dag par rjes su ma mthong ngo zhes bya ba ni/ bcom ldan 'das shAkya thub pa nyid la dngos po yod pa dang med par sgro 'dogs shing skur pa 'debs pa'i mtha' gnyis dang bral ba'i sgrub pa bstan to/ /bcom ldan 'das bdag gis shar phyogs kyi 'jig rten gyi khams gang+gA'i klung gi bye ma snyed kyi de bzhin gshegs pa dgra bcom pa yang dag par rdzogs pa'i sangs rgyas nyan thos kyi dge 'dun dang bcas pa byang chub sems dpa' dang bcas pa'i 'phel ba dang 'grib pa yang ma dmigs yang dag par rjes su ma mthong ngo zhes bya ba nas/ bcom ldan 'das bdag gis steng gi phyogs kyi 'jig rten gyi khams gang+gA'i klung gi bye ma snyed kyi de bzhin gshegs pa dgra bcom pa yang dag par rdzogs pa'i sangs rgyas nyan thos kyi dge 'dun dang bcas pa/ byang chub sems dpa' dang bcas pa'i 'phel ba dang 'grib pa yang ma dmigs yang dag par rjes su ma mthong ngo zhes bya ba'i bar du ni/ phyogs bcu'i de bzhin gshegs pa 'khor nyan thos dang byang chub sems dpa'i dge 'dun dang bcas pa rnams la dngos po yod pa dang med par sgro 'dogs shing skur pa 'debs pa'i mtha' gnyis dang bral ba'i sgrub pa bstan pa'o/ /bcom ldan 'das de ltar bdag gis de bzhin gshegs pa dgra bcom pa yang dag par rdzogs pa'i sangs rgyas nyan thos kyi dge 'dun dang bcas pa byang chub sems dpa' dang bcas pa rnams kyi 'phel ba dang 'grib pa ma dmigs yang dag par rjes su ma mthong na zhes bya ba nas/ byang chub sems dpa'i ming de yang gnas pa ma mchis/ thug pa ma mchis/ byin gyis brlabs pa ma mchis te/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ phyogs bcu'i de bzhin gshegs pa 'khor nyan thos dang / byang chub sems dpa'i dge 'dun du bcas pa rnams kyi dngos po dang / ming rnams la 'phel ba dang 'grib pa med pas don dam par byang chub sems dpa' dang / shes rab kyi pha rol tu phyin pa gnyis ka yang yod par ma grub pa'i phyir gdams shing rjes su bstan pa gang yang med do zhes bstan pa'o/ /bcom ldan 'das bdag gis chos thams cad kyi de bzhin nyid kyi 'phel ba dang / 'grib pa ma dmigs yang dag par rjes su ma mthong ste zhes bya ba nas/ de ci'i slad du zhe na/ ming de ma mchis pas/ de ltar na ming de gnas pa ma mchis/ thug pa ma mchis/ byin gyis brlabs pa ma mchis so zhes bya ba'i bar du ni/ chos thams cad kyi de bzhin nyid stong pa nyid la sgro 'dogs shing skur pa 'debs pa'i mtha' gnyis dang bral ba'i sgrub pa bstan pa ste/ de ltar na 'dus byas pa'i chos thams cad smos nas/ de dag gi dngos po dang ming la 'phel ba dang 'grib pa dmigs su med pas/ don dam par yod pa ma yin pa la bskyed de sgro 'dogs pa dang / kun rdzob tu med pa ma yin pa la phri ste/ skur pa 'debs pa'i mtha' gnyis dang bral ba'i sgrub pa bstan to/ /da ni byang chub sems dpa' zhes bya ba'am/ shes rab kyi pha rol tu phyin pa zhes bya ba'i ming de brda tsam du gdags pa la sgro 'dogs pa dang / skur pa 'debs pa'i mtha' gnyis dang bral ba'i sgrub pa bstan pa'i phyir/ bcom ldan 'das gang yang 'di ltar 'di lta ste/ byang chub sems dpa' zhes chos kyi brdar bgyi ba dang / chos su btags pa de yang zhes bya ba la sogs pa gsungs te/ de la gzugs sam/ tshor ba'am/ 'du shes sam/ 'du byed dam/ rnam par shes pa'am zhes bya ba nas/ sangs rgyas kyi chos ma 'dres pa rnams kyi brjod du ma mchis pa ste/ chos su gdags pa tsam du bas so zhes bya ba'i bar du ni/ phung po dang khams dang skye mched la sogs pa 'jig rten pa'i chos rnams dang / sbyin pa'i pha rol tu phyin pa la sogs pa 'jig rten las 'das pa'i chos rnams gang gi dngos por yang byang chub sems dpa' dang / shes rab kyi pha rol tu phyin pa'i ming de don dam par brjod du med pas kun rdzob tu chos kyi brdar btags pa tsam du zad do zhes bstan pa'o/ /bcom ldan 'das 'di lta ste dper na/ rmi lam zhes bgyi ba'i ming ni gang gis kyang brjod du ma mchis so zhes bya ba nas/ de bzhin gshegs pa'i sprul pa zhes bgyi ba'i ming de ni gang gis kyang brjod du ma mchis so zhes bya ba'i bar du ni/ rmi lam dang sgyu ma la sogs pa 'jig rten na shin tu med par grags pa rnams kyi dpes/ byang chub sems dpa' dang / shes rab kyi pha rol tu phyin pa'i ming yang don dam par brjod du med par bstan to/ /bcom ldan 'das 'di lta ste dper na/ nam mkha' zhes bgyi ba'i ming ni gang gis kyang brjod du ma mchis so zhes bya ba nas/ rlung zhes bgyi ba'i ming ni gang gis kyang brjod du ma mchis so zhes bya ba'i bar du ni/ kun btags pa tsam gyi mtshan nyid du grags pa nam mkha'i khams dang / sa dang chu dang me dang rlung gi khams rnams don dam par dngos po yod par ma grub pas gang gi dngos por yang brjod du med do zhes bstan pa'o/ / de bzhin nyid ces bgyi ba'i ming ni gang gis kyang brjod du ma mchis so zhes bya ba nas/ yang dag pa'i mtha' zhes bgyi ba'i ming ni gang gis kyang brjod du ma mchis so zhes bya ba'i bar du ni/ yongs su grub pa'i mtshan nyid du grags pa de bzhin nyid dang / ma nor ba de bzhin nyid la sogs pa ming gis smos pa rnams kyi ming yang don dam par dngos po yod par ma grub pas/ dngos po gang gi ming du yang brjod du med do zhes bstan pa ste/ de bzhin nyid la sogs pa'i mtshan nyid kyang gong du bshad zin to/ /sbyin pa'i pha rol tu phyin pa zhes bgyi ba'i ming ni gang gis kyang brjod du ma mchis so zhes bya ba nas/ shes rab kyi pha rol tu phyin pa zhes bgyi ba'i ming ni gang gis kyang brjod du ma mchis so zhes bya ba'i bar du ni/ byang chub sems dpa'i chos nyid kyang grags pa/ pha rol tu phyin pa drug kyang don dam par dngos po yod par ma grub pas/ gang gi dngos por yang brjod du med do zhes bstan pa'o/ /tshul khrims zhes bgyi ba'i ming ni gang gis kyang brjod du ma mchis so zhes bya ba nas/ rang sangs rgyas kyi chos zhes bgyi ba'i ming ni gang gis kyang brjod du ma mchis so zhes bya ba'i bar du ni/ nyan thos dang rang sangs rgyas kyi chos su grags pa/ zag pa med pa'i phung po lnga la sogs pa dang / rgyun du zhugs pa la sogs pa'i 'bras bu rnams kyang don dam par dngos po yod par ma grub pas/ dngos po gang gi ming du yang brjod du med do zhes bstan pa'o/ /byang chub sems dpa' zhes bgyi ba'i ming ni gang gis kyang brjod du ma mchis so zhes bya ba la sogs pa ni byang chub sems dpa' dang / sangs rgyas bcom ldan 'das nyid dang / sangs rgyas kyi chos stobs bcu dang / mi 'jigs pa bzhi la sogs pa yang don dam par dngos po yod par ma grub pas/ dngos po gang gi ming du yang brjod du med do zhes bstan pa'o/ /yang dag par rdzogs pa'i sangs rgyas kyi chos zhes bgyi ba'i ming yang dge ba'am mi dge ba 'am zhes bya ba la sogs pa ni/ gong du smos pa'i chos rnams kyi ming gang gis kyang brjod du med do zhes bstan pa'i don de nyid dmigs kyis phye nas bkrol ba ste dge ba'am/ mi dge ba'am/ kha na ma tho ba dang bcas pa'am/ kha na ma tho ba med pa'o zhes bya ba la sogs par dngos po gang gi ming du yang brjod du med do zhes bstan pa'o/ /bcom ldan 'das bdag gis don gyi dbang de lta bu mthong ba'i slad du zhes bya ba nas/ bdag gis 'gyod par 'gyur zhes gsol to zhes bya ba'i bar du ni/ mtha' gnyis dang bral ba'i sgrub pa bshad pa'i mgo la smos pa'i tshig de nyid slar bzlas te/ don dam par chos gang gi dngos por yang ming du gdags su med pa las/ byang chub sems dpa' zhes bya ba'am/ shes rab kyi pha rol tu phyin pa zhes bya ba'i ming du btags te/ gdams pa'am rjes su bstan pa byas nas/ yang dag par yod pa ma yin pa la sgro btags pa'i skyon du 'gyur ba'i don gyi dbang de lta bu mthong ba'i phyir/ bdag gis 'gyod par 'gyur ro zhes gsol to zhes bya ba'i don to/ /bcom ldan 'das de ltar byang chub sems dpa' sems dpa' chen po shes rab kyi pha rol tu phyin pa brjod de zhes bya ba nas/ gnas pa zhes bgyi ba ni gnas pa ma mchis pa'i tshul lo zhes bya ba'i bar du ni/ de ltar mtha' gnyis dang bral ba'i sgrub pa gong du smos pa'i rim pas zhib tu bshad pa nyid mjug bsdus te bstan nas/ don de lta bu zab mo thos pas mi 'jigs mi dngang skrag par mi 'gyur na/ byang chub sems dpa' de byang chub sems dpa'i sa brgyad pa phyir mi ldog pa la gnas pa yin te/ rnam pa thams cad mkhyen pa nyid du nges par 'byung bar bstan pa ste/ rnam pa de dag dang / tshul 'di dag dang / mtshan ma 'di dag gis zhes bya ba ni gong du mtha' gnyis dang bral ba'i rnam pa dang / tshul dang mtshan mas chos zab mo bstan pa'i tshe/ sems zhum pa dang / 'gyod par mi 'gyur na phyir mi ldog pa'i sa la gnas shing / rnam pa thams cad mkhyen pa nyid du nges par 'byung bar 'gyur ro zhes 'og nas 'byung ba dang sbyar ro/ /de ltar mtha' gnyis dang bral ba'i sgrub pa bstan nas/ da ni mi gnas pa'i sgrub pa bstan pa'i phyir/ bcom ldan 'das gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ des gzugs la gnas par mi bgyi'o zhes bya ba la sogs pa gsungs so/ /mi gnas pa'i sgrub pa 'di yang rnam pa gnyis te/ chos la mi gnas pa dang / chos nyid la mi gnas pa'o/ /de la chos la mi gnas pa ni/ des gzugs la gnas par mi bgyi'o/ /des tshor ba la gnas par mi bgyi'o zhes bya ba nas/ bcom ldan 'das rnam grangs des na byang chub sems dpa' sems dpa' chen pos shes rab kyi pha rol tu phyin pa la spyod pa'i tshe/ gzungs kyi sgo thams cad la gnas par mi bgyi'o zhes bya ba'i bar du chos la mi gnas pa bstan pa ste/ de la chos la mi gnas pa de yang / des gzugs la gnas par mi bgyi'o/ /des tshor ba la gnas par mi bgyi'o zhes bya ba nas/ des skye ba la gnas par mi bgyi'o/ /des rga shi la gnas par mi bgyi'o zhes bya ba'i bar du ni/ phung po dang / khams dang / skye mched dang / reg pa drug dang / tshor ba drug dang / sa dang / chu dang / me dang / rlung dang / nam mkha' dang / rnam par shes pa'i khams rnams dang / rten cing 'brel par 'byung ba'i yan lag bcu gnyis rnams la gnas par mi bya ba bstan te/ de ci'i slad du zhe na/ bcom ldan 'das de ni 'di ltar gzugs gzugs kyis stong ste/ gzugs kyi stong pa nyid gang lags pa de yang gzugs ma lags/ gzugs las gud na yang stong pa nyid ma mchis te/ gzugs nyid kyang stong pa nyid stong pa nyid kyang gzugs so zhes bya ba la sogs pa ni/ gzugs la sogs pa la gnas par mi bya ba'i gtan tshigs bstan pa ste/ 'di la gzugs kyang rnam pa gsum ste/ kun brtags pa'i gzugs dang / rnam par brtags pa'i gzugs dang / chos nyid kyi gzugs so/ /de la byis pa so so'i skye bo rnams kyi gzugs su rung ba la sogs pa'i mtshan nyid du gzung ba dngos po'i gzugs gang yin pa de ni kun brtags pa'i gzugs so/ /gzugs de nyid rnam pa gang gi don du snang ba'i rnam par shes pa'i yul du gyur pa de la ni rnam par brtags pa'i gzugs zhes bya'o/ /kun brtags pa dang / rnam par brtags pa'i gzugs de gnyis kyi rnam pa dang bral ba yongs su grub pa de bzhin nyid tsam du zad pa gang yin pa de la ni chos nyid kyi gzugs zhes bya'o/ /de la yongs su grub pa chos nyid kyi gzugs gang yin pa de la ni/ kun brtags pa'i gzugs gzugs su rung ba'i mtshan nyid can dang / rnam par brtags pa'i gzugs yul gyi rnam par snang ba'i gzugs gnyis med pas na/ gzugs gzugs kyis stong ste zhes bya ba gsungs te/ chos nyid kyi gzugs yongs su grub pa mtshan nyid de gzung ba dang 'dzin pa'i mtshan nyid kun brtags pa dang / rnam par brtags pa'i gzugs kyis stong ngo zhes bstan pa'o/ /de skad bshad pa dang kun brtags pa'i gzugs dang / rnam par brtags pa'i gzugs kyis stong pa'i chos nyid gzugs gang yin pa de la gzugs zhes smos pas de la yang gzugs shig yod snyam du sems pa las bzlog pa'i phyir/ gzugs kyis stong pa nyid gang lags pa de yang gzugs ma lags zhes bya ba gsungs te/ kun brtags pa dang / rnam par brtags pa'i gzugs kyis stong pa gang yin pa de bzhin nyid yongs su grub pa'i mtshan nyid chos nyid kyi gzugs zhes bya ba de ni gzugs kyi ngo bo nyid ma yin te/ rnam pa thams cad du gzugs kyi rnam pa las dben pa'i phyir ro zhes bya ba'i don to/ /de skad bshad pa dang / de ltar gzugs rnam pa thams cad du med na/ gang gis stong pa na 'di la stong pa nyid ces bya/ dper na mar med pa'i bum pa ni mar gyis bum pa stong zhes byar rung gi bum pa dang mar gnyi ga med pa la stong zhes bya ba'i dmigs kyang med snyam du sems pa dang / chos las chos nyid gzhan pa yang mi rigs la chos nyid las chos gzhan pa yang mi rigs so snyam du the tshom za ba de'i phyir/ gzugs las gud na yang stong pa nyid ma mchis te zhes bya ba gsungs te/ don dam par gzugs kyi rang bzhin yod par ma grub pa nyid la stong pa nyid ces bya'i/ snod dang bcud ltar gcig gis gcig stong pa lta bu la mi bya'o zhes bstan pa'o/ /don de nyid gsal bar bstan pa'i phyir/ gzugs nyid kyang stong pa nyid stong pa nyid kyang gzugs so zhes bya ba gsungs te/ gzugs dngos po yod par ma grub pa nyid la stong pa nyid ces bya ste/ de las gud na stong pa nyid yod pa ma yin pa'i phyir/ chos dang chos nyid gnyis tha dad pa ma yin pa bzhin no zhes bstan pa ste/ de ltar kun brtags pa dang / rnam par brtags pa'i gzugs gnyis ni shin tu med pa dang / chos nyid kyi gzugs de bzhin nyid tsam du zad pa yongs su grub pa'i mtshan nyid la yang gnas su mi rung ba'i phyir/ gzugs la gnas par mi bya'o zhes bya ba gsungs so/ /de bzhin du tshor ba la sogs pa'i phung po rnams dang / khams bco brgyad dang / skye mched bcu gnyis dang / sa dang / chu dang / me dang / rlung dang / nam mkha' dang / rnam par shes pa'i khams rnams dang / rten cing 'brel par 'byung ba'i yan lag bcu gnyis rnams te/ 'khor ba'i rgyur gyur pa'i chos rnams dang / pha rol tu phyin pa drug dang / dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa dang / 'phags pa'i bden pa bzhi dang / bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / rnam par thar pa brgyad dang / mthar gyis gnas pa'i snyoms par 'jug pa dgu dang / rnam par thar pa'i sgo gsum dang / de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / byams pa chen po dang / snying rje chen po dang / sangs rgyas kyi chos ma 'dres pa bco brgyad rnams dang / yi ge rnams dang / mngon par shes pa rnams dang / ting nge 'dzin gyi sgo rnams dang / gzungs kyi sgo rnams dang / rnam par byang ba'i chos rnams la yang de bzhin du sbyar bar bya ste/ bcom ldan 'das rnam grangs des na byang chub sems dpa' sems dpa' chen pos shes rab kyi pha rol tu phyin pa la spyod pa'i tshe/ gzungs kyi sgo thams cad la gnas par mi bgyi'o zhes bya ba ni/ gzugs la sogs pa 'khor ba'i rgyur gyur pa'i chos rnams dang / rnam par byang ba'i chos rnams de dag gi rang bzhin gyis stong pas gnas par byar mi rung ba'i phyir de dag la gnas par mi bya'o zhes bstan pa'o/ /de la yi ge rnams la gnas par mi bgyi ste zhes bya ba ni/ yi ge a zhes bya ba la sogs pa yi ge'i 'bru rnams dngos po yod par lta bas gnas par mi bya'o/ /yi ge mngon par sgrub pa la gnas par mi bgyi zhes bya ba ni/ a zhes bya ba la sogs pa'i yi ge'i 'bru rnams la brten nas/ skye ba med pa'i don rtogs par byed pa'i gzungs kyi ye shes skye bar 'gyur ba de la yi ge mngon par sgrub pa zhes bya ste/ de la yang gnas par mi bya'o zhes bstan pa ste/ gzungs kyi ye shes de yang gzod ma nas ma skyes pa'i phyir/ a zhes bya ba ni chos thams cad kyi sgo'o zhes bya ba de lta bur brjod pa las mngon par 'grub bo/ /yi ge'i 'bru tshig tu brjod pa de yang byang chub sems dpa' dbang po rab tu rno ba kha cig gis ni skye ba med pa'i don gcig la brten te bsgoms na mngon par rdzogs pa'i byang chub 'thob pa'i rgyur 'gyur ro/ /dbang po bar ma rnams kyis ni yi ge gnyis la brten nas tshig tu brjod pa gnyis la goms par byas pa las mngon par rdzogs pa'i byang chub 'thob pa'i rgyur 'gyur ro/ /dbang po rtul po rnams kyis ni tshig tu brjod pa du ma la brten nas/ goms par byas nas mngon par rdzogs pa'i byang chub kyi rgyur 'gyur te/ de bas na gcig tu brjod pa la gnas par mi bgyi/ gnyis su brjod pa la gnas par mi bgyi/ tha dad du brjod pa la gnas par mi bgyi'o zhes bya ba gsungs te/ yi ge gcig dang / yi ge gnyis dang / yi ge mang po'i tshig brjod pa'i sgo nas/ gzugs kyi ye shes skye zhing mngon par rdzogs pa'i byang chub kyi rgyur 'gyur ba de lta bu la yang gnas par mi bya'o zhes bstan pa ste/ gnas par mi bya ba'i don ni snga ma bzhin no/ /de ltar chos la gnas par mi bya ba bstan nas/ da ni chos nyid la gnas par mi bya ba bstan pa'i phyir/ bcom ldan 'das gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gzugs mi rtag go zhes bgyi bar gnas par mi bgyi ste zhes bya ba la sogs pa gsungs te/ chos nyid la mi gnas pa de yang gzugs mi rtag go zhes bgyi bar gnas par mi bgyi ste zhes bya ba nas/ bcom ldan 'das rnam grangs des na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ yang dag pa'i mtha' la gnas par mi bgyi'o zhes bya ba'i bar gyis bstan te/ de la gzugs mi rtag pa nyid ces bya ba ni nyan thos dang / rang sangs rgyas rnams kyi mi rtag pa ni skye ba dang 'gag pa'i mtshan nyid de kun brtags pa'i rang bzhin no/ /byang chub sems dpa' rnams kyi mi rtag pa ni med pa'i mtshan nyid la brten nas med pa'i don to zhes bshad pa ste/ 'di ltar rtag tu yod pa la rtag pa zhes bya'o/ /de las bzlog na rtag tu med cing dus thams cad du med pa la ni byang chub sems dpa' rnams kyi mi rtag pa zhes bya'o/ /de bas na med pa'i mtshan nyid ni don dam par mi rtag pa nyid do/ /gzugs mi rtag pa nyid gzugs mi rtag pa nyid kyis stong ste zhes bya ba ni/ byang chub sems dpa' rnams kyi don dam pa'i mi rtag pa gang yin pa de nyan thos dang rang sangs rgyas kyi kun brtags pa'i skye ba dang / 'gag pa'i mtshan nyid kyis mi rtag pa'i ngo bo nyid med pa'i phyir ro/ /gzugs mi rtag pa nyid gzugs mi rtag pa nyid kyis stong ngo zhes bstan pa'o/ /gzugs mi rtag pa nyid kyi stong pa nyid gang lags pa de yang / gzugs mi rtag pa nyid ma lags zhes bya ba ni/ don dam pa'i gzugs mi rtag pa nyid kyi de bzhin nyid gang yin pa de kun brtags pa'i gzugs mi rtag pa nyid kyi ngo bo nyid ma yin no zhes bya ba'i don to/ /de lta na ni chos las chos nyid tha dad par 'gyur ro snyam pa la/ gzugs mi rtag pa nyid las gud na yang stong pa nyid ma mchis te/ gzugs mi rtag pa nyid kyang stong pa nyid stong pa nyid kyang gzugs mi rtag pa nyid do zhes bya ba gsungs te/ don dam pa'i mi rtag pa nyid de bzhin nyid las gud na/ kun brtags pa'i gzugs mi rtag pa nyid dngos po yod pa ma yin no zhes bstan pa ste/ de bzhin du tshor ba dang / 'du shes dang / 'du byed dang / rnam par shes pa'i phung po rnams la yang sbyar bar bya'o/ /bcom ldan 'das gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gzugs sdug bsngal lo zhes bgyi bar gnas par mi bgyi ste zhes bya ba nas/ bcom ldan 'das rnam grangs des na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ rnam par shes pa bzhi'o zhes bgyi bar gnas par mi bgyi'o zhes bya ba'i bar du ni/ phung po lnga'i rang bzhin sdug bsngal ba dang / bdag med pa dang / zhi ba'i chos nyid du shes par bya ba la gnas par mi bya ba'i sgrub pa bstan pa'o/ /bcom ldan 'das gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gzugs stong ngo zhes bgyi bar gnas par mi bgyi ste zhes bya ba nas/ bcom ldan 'das rnam grangs des na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ rnam par shes pa smon pa med do zhes bgyi bar gnas par mi bgyi'o zhes bya ba'i bar du ni/ gzugs la sogs pa'i phung po lnga la rnam par thar pa'i sgo stong pa nyid dang / mtshan ma med pa dang smon pa med pa'i chos nyid du shes par bya ba la mi gnas pa'i sgrub pa bstan pa'o/ /bcom ldan 'das gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gzugs dben no zhes bgyi bar gnas par mi bgyi ste zhes bya ba nas/ bcom ldan 'das rnam grangs des na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ rnam par shes pa dben no zhes bgyi bar gnas par mi bgyi'o zhes bya ba'i bar du ni/ gzugs la sogs pa'i phung po lnga la dben pa'i chos nyid shes par bya ba la mi gnas pa'i sgrub pa bstan pa ste/ dben pa zhes bya ba ni stong pa'i rnam grangs yin te/ gzung ba dang 'dzin pa gnyis las dben pa'i phyir ro/ /bcom ldan 'das gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ de bzhin nyid la gnas par mi bgyi ste zhes bya ba nas/ bcom ldan 'das rnam grangs des na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ yang dag pa'i mtha' la gnas par mi bgyi'o zhes bya ba'i bar du ni/ rnam par byang ba'i phyogs su gtogs pa'i chos de bzhin nyid dang / chos nyid dang / chos kyi dbyings dang / chos skyon med pa nyid dang / yang dag pa'i mtha' rnams la yon tan du lta ba'i sgo nas mi gnas pa'i sgrub pa bstan pa ste/ de bzhin nyid la sogs pa de dag kyang stong pa nyid kyi rnam grangs tsam du zad de/ de dag gi mtshan nyid ni sngar bshad pa bzhin no/ /de yan chad kyis chos nyid la mi gnas pa'i sgrub pa bshad zin to/ /da ni chos dang chos nyid la gnas na nyes pa'i dmigs su 'gyur ba bstan pa'i phyir/ bcom ldan 'das gal te byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ thabs mi mkhas pas bdag tu bgyi ba dang / bdag gir bgyi ba la gnas pa'i yid kyis gzugs la gnas na de gzugs mngon par 'du bgyi ba la spyod kyi/ shes rab kyi pha rol tu phyin pa la mi spyod do zhes bya ba nas/ bcom ldan 'das gal te byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ thabs mi mkhas pas bdag tu bgyi ba dang / bdag gir bgyi ba la gnas pa'i yid kyis yang dag pa'i mtha' la gnas na/ de yang dag pa'i mtha' mngon par 'du bgyi ba la spyod kyi/ shes rab kyi pha rol tu phyin pa la mi spyod do zhes bya ba'i bar gyis bstan te/ thabs mi mkhas pas zhes bya ba ni/ chos rnams don dam par dngos po med par dngos po la gnas pa'i sems kyis 'jig rten dang 'jig rten las 'das pa'i chos rnams la spyod pa'o/ /bdag tu bgyi ba dang bdag gir bgyi ba la gnas pa'i yid kyis gzugs la gnas na zhes bya ba ni/ bdag nyid gzugs kyi rang bzhin no snyam mam/ gzugs 'di dag bdag gi yin no snyam du bdag dang bdag gi ba'i dngos por lta ba'i sems kyis spyod pa la bya'o/ /de la gzugs mngon par 'du bgyi ba la spyod kyi/ shes rab kyi pha rol tu phyin pa la mi spyod do zhes bya ba ni/ gzugs dngos po yod par lta bas rgyu dang rkyen rnams kyis skye ba dang 'gag pa yod par lta ba yin gyi/ chos thams cad stong pa nyid du rtogs pa'i mtshan nyid shes rab kyi pha rol tu phyin pa la spyod pa ma yin no zhes bya ba'i don to/ /de bzhin du tshor ba la sogs pa lhag ma thams cad la yang sbyar bar bya'o/ /de ci'i slad du zhe na/ mngon par 'du bgyi ba la spyod pa'i byang chub sems dpa' sems dpa' chen pos ni shes rab kyi pha rol tu phyin pa yongs su zin par mi 'gyur zhes bya ba la sogs pas gzugs la sogs pa'i dngos po la gnas shing / mngon par 'du bya ba la spyod na nyes pa'i dmigs rnam pa bzhir 'gyur ba bstan te/ shes rab kyi pha rol tu phyin pa yongs su zin par mi 'gyur ba dang / shes rab kyi pha rol tu phyin pa'i rnal 'byor la snyoms par 'jug par mi 'gyur ba dang / shes rab kyi pha rol tu phyin pa yongs su rdzogs par mi 'gyur ba dang / rnam pa thams cad mkhyen pa nyid du 'byung bar mi 'gyur ba dang bzhi'o/ /de la yongs su zin par mi 'gyur zhes bya ba ni/ mos pas spyod pa'i sa la mnyan pa dang / bsam pa'i shes rab kyis tshig dang don yongs su zin par mi 'gyur ba'o/ /rnal 'byor la snyoms par 'jug par mi 'gyur zhes bya ba ni/ sa dang po la chos kyi dbyings rnam par dag pa mthong ba'i lam gyis rnal 'byor la snyoms par 'jug par mi 'gyur ba bstan to/ /yongs su rdzogs par mi 'gyur ba zhes bya ba ni/ sa gnyis nas sa bcu'i bar du bsgom pa'i lam gyis mi mthun pa'i phyogs spang ba dang / shes rab kyi pha rol tu phyin pa'i don sa gong nas gong du rgya cher rtogs par bya ba yongs su rdzogs par mi 'gyur ba bstan pa'o/ /rnam pa thams cad mkhyen pa nyid du 'byung bar mi 'gyur ro zhes bya ba ni/ sangs rgyas kyi sa la rnam pa thams cad mkhyen pa nyid thob par bya ba de thob par mi 'gyur ba'i nyes pa bstan to/ /de bzhin du skye mched bcu gnyis dang / khams bco brgyad dang / 'dus te reg pa'i rkyen gyis tshor ba drug dang / sa dang chu la sogs pa'i khams drug dang / rten cing 'brel par 'byung ba'i yan lag bcu gnyis dang / pha rol tu phyin pa drug dang / stong pa bco brgyad dang / byang chub kyi phyogs sum cu rtsa bdun dang / 'phags pa'i bden pa bzhi dang / bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / rnam par thar pa brgyad dang / mthar gyis gnas pa'i snyoms par 'jug pa dgu dang / rnam par thar pa'i sgo gsum dang / mngon par shes pa drug dang / ting nge 'dzin rnams dang / gzungs kyi sgo rnams dang / de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / byams pa chen po dang / snying rje chen po dang / sangs rgyas kyi chos ma 'dres pa bco brgyad dang / rgyun du zhugs pa la sogs pa'i 'bras bu bzhi dang / rang byang chub dang / thams cad shes pa nyid dang / lam gyi rnam pa shes pa nyid dang / rnam pa thams cad mkhyen pa nyid dang / de bzhin nyid dang / ma nor ba de bzhin nyid dang / gzhan ma yin pa de bzhin nyid dang / chos nyid dang / chos kyi dbyings dang / chos gnas pa nyid dang / chos skyon med pa nyid dang / yang dag pa'i mtha' la thug gi bar du 'jig rten dang / 'jig rten las 'das pa'i chos ming gis smos pa thams cad la yang sbyar bar bya'o/ /de ltar mi gnas pa'i sgrub pa bstan nas/ de'i 'og tu yongs su 'dzin pa med par sgrub par bshad par bya'o/ /yongs su 'dzin pa med par sgrub pa 'di yang rnam pa gsum gyis bstan te/ chos yongs su 'dzin pa med pa dang / mtshan ma yongs su 'dzin pa med pa dang / shes pa yongs su 'dzin pa med pa'o/ /de la de ci'i slad du zhe na/ bcom ldan 'das 'di ltar gzugs ni yongs su bzung ba ma mchis pa ste/ gzugs kyi yongs su bzung ba ma mchis pa gang lags pa de yang rang bzhin gyis stong pa'i slad du gzugs ma lags zhes bya ba nas/ ting nge 'dzin gyi dkyil 'khor de la spyod pa'i byang chub sems dpa' sems dpa' chen po ni rnam pa thams cad mkhyen pa nyid du 'gyur te/ rnam pa thams cad mkhyen pa de yang nang stong pa nyid nas dngos po med pa'i ngo bo nyid stong pa nyid kyi slad du yongs su bzung ba ma mchis pa'o zhes bya ba'i bar du ni/ chos yongs su 'dzin pa med par sgrub pa bstan pa ste/ de la de ci'i slad du zhe na/ bcom ldan 'das 'di ltar gzugs ni yongs su bzung ba ma mchis pa ste zhes bya ba ni/ don dam par gzugs kyi dngos po yod par ma grub pas yongs su gzung du med pa'i phyir ro/ /de skad bshad pa dang / 'ga' zhig 'di snyam du rtog ste/ kun brtags pa'i gzugs ni don dam par ma grub pas yongs su gzung du med mod kyi/ kun brtags pa'i gzugs yongs su gzung du med pa'i mtshan nyid yongs su grub pa'i gzugs ni yod do snyam du rtog pa de las bzlog pa'i phyir/ gzugs kyi yongs su bzung ba ma mchis pa gang lags pa de yang rang bzhin gyis stong pa'i slad du gzugs ma lags zhes bya ba bstan te/ yongs su grub pa'i gzugs zhes bya ba yang kun rdzob tu tha snyad kyi brdar btags shing brjod pa tsam du zad kyi dngos po yod pa ma yin no zhes bya ba'i don to/ /de bzhin du rnam pa thams cad mkhyen pa nyid kyi bar du 'jig rten dang 'jig rten las 'das pa'i chos thams cad la yang sbyar bar bya'o/ /bcom ldan 'das byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ de ltar na chos thams cad rang bzhin gyis stong pa nyid du yongs su brtag par bgyi ste/ ci nas kyang chos gang la yang yid rnam par mi rgyu ba de ltar yongs su brtag par bgyi'o zhes bya ba ni yongs su 'dzin pa med par sgrub pa'i don mdor bsdus nas bstan pa ste/ chos gang la yang dngos por mi gzung zhing rnam par mi rtog pa'i ting nge 'dzin bsgom par bya'o zhes bstan pa'o/ /bcom ldan 'das 'di ni byang chub sems dpa' sems dpa' chen po'i ting nge 'dzin gyi dkyil 'khor chos thams cad yongs su ma bzung ba zhes bgyi ba ste zhes bya ba la sogs pa ni/ chos thams cad yongs su 'dzin pa med par sgrub pa'i ting nge 'dzin gyi rang bzhin dang yon tan bstan pa ste/ ting nge 'dzin gyi dkyil 'khor zhes bya ba ni/ ting nge 'dzin rnams kyi snying por gyur pa'i phyir ro/ /rgya che ba zhes bya ba ni gang zag dang / chos gnyi ga la bdag med par rtogs shing bdag dang gzhan gyi don phun sum tshogs pa'i phyir ro/ /phul du bgyi ba zhes bya ba ni/ de'i gong na de las lhag pa med pa'i phyir ro/ /tshad ma mchis pa zhes bya ba ni/ de dang 'dra ba'i zla med pa'i phyir ro/ /tshad ma mchis par nges pa zhes bya ba ni/ bla na med pa yang dag par rdzogs pa'i byang chub nges par 'thob pa'i rgyu yin pa'i phyir ro/ /nyan thos dang rang sangs rgyas thams cad kyis mi 'phrogs pa zhes bya ba ni/ nyan thos dang rang sangs rgyas kyis sun 'byin par mi 'gyur ba'i phyir ro/ /de dag dang thun mong ma lags pa zhes bya ba ni/ nyan thos dang rang sangs rgyas rnams la ting nge 'dzin de lta bu med pa'i phyir ro/ /ting nge 'dzin gyi dkyil 'khor de la spyod pa'i byang chub sems dpa' sems dpa' chen po ni/ rnam pa thams cad mkhyen pa nyid du 'byung bar 'gyur te zhes bya ba ni/ ting nge 'dzin de la spyod pa'i byang chub sems dpa' rnams de bzhin gshegs pa'i go 'phang thob par 'gyur ba'i phan yon bstan pa'o/ /rnam pa thams cad mkhyen pa de yang nang stong pa nyid dang zhes bya ba la sogs pas ni/ don dam par rnam pa thams cad mkhyen pa nyid kyang yongs su bzung ba med par bstan pa'o/ /de ci'i slad du zhe na/ de ni mtshan mar brjod pa ma lags te zhes bya ba nas/ de ni 'di ltar des rang gi mtshan nyid kyis stong pa'i chos thams cad la yongs su 'dzin pa ma dmigs te zhes bya ba'i bar du ni/ mtshan mar yongs su mi 'dzin pa'i sgrub pa bstan to/ /de ni 'di ltar mtshan ma las nyon mongs par 'gyur te zhes bya ba ni gzugs la sogs pa'i chos la dngos po yod par lta zhing mtshan mar 'dzin pa nyid byang chub sems dpa'i sgrib pa yin te/ sems kyi rgyud nyon mongs par byed pa'i phyir nyon mongs pa zhes bya'o/ /mtshan ma de dag kyang gang zhe na/ gzugs ni mtshan ma'o/ /tshor ba ni mtshan ma'o zhes bya ba nas/ yi ge rnams ni mtshan ma'o/ /gcig tu brjod pa ni mtshan ma'o/ /gnyis su brjod pa ni mtshan ma'o/ /tha dad du brjod pa ni mtshan ma'o/ /de ni nyon mongs pa zhes bgyi'o zhes bya ba'i bar du 'jig rten dang / 'jig rten las 'das pa'i chos ming gis smos pa de dag la dngos por rtog cing mtshan mar 'dzin pa ni byang chub sems dpa'i nyon mongs pa yin no zhes bstan pa ste/ de la yi ge rnams ni mtshan ma'o zhes bya ba ni/ yi ge a la sogs pa ma skyes pa'i don ston pa'i sgo rnams la mtshan mar 'dzin pa'o/ /gcig tu brjod pa dang / gnyis su brjod pa dang / tha dad du brjod pa rnams kyang sngar bshad pa bzhin te/ de dag la dngos por rtog pa ni mtshan ma yin pa'i phyir ro/ /gal te de mtshan mar bzung ba zhig lags na ni/ kun du rgyu phreng ba can yang thams cad mkhyen pa'i ye shes 'di la dad pa thob par ma gyur to zhes bya ba ni/ mtshan ma med pa'i gtan tshigs dang dpe bstan pa ste/ mu stegs can kun du rgyu phreng ba can zhes bya ba mtshan ma med pa'i ting nge 'dzin la dga' ba zhig yod pas/ bcom ldan 'das las mtshan ma med pa'i chos thos nas/ thams cad mkhyen pa'i ye shes la dad par gyur pa'i dpes mtshan mar bzung ba ma yin pa'i gtan tshigs bstan pa ste/ shes rab kyi pha rol tu phyin pa la sogs pa gal te mtshan mar bzung ba zhig yin na/ bcom ldan 'das kyis kyang mtshan ma med pa'i chos mi bshad pa la/ kun du rgyu de yang mtshan ma med pa'i chos thos nas dad pa skyes par 'gyur ba mi rigs pa zhig na/ mtshan ma med pa'i chos bshad pa las dad pa skyes par gyur pa dang sbyar na/ mtshan ma med pa ni yang dag pa yin gyi/ mtshan mar rtog pa ni phyin ci log yin pas nyon mongs par 'gyur ro zhes bstan pa'o/ /dad pa de yang gang zhe na/ 'di lta ste/ shes rab kyi pha rol tu phyin pa la yid ches pa dang zhes bya ba la sogs pa ni/ kun du rgyu de chos gang la dad pa skyes pa'i dmigs dang / dad pa'i mtshan nyid dang rnam grangs bstan pa'o/ /de yang mtshan ma'i yul du ma lags zhes bya ba ni/ dad pa de yang don dam par mtshan ma can gyi tshul du skyes pa yang ma yin pa'o/ /mtshan ma mchis pa'i tshul du yang ma lags so zhes bya ba ni kun rdzob tu ming dang brdar gdags pa tsam du mtshan ma med pa yang ma yin no zhes bya ba'o/ /de ltar na de ni mtshan ma dang mtshan ma ma mchis par yongs su gzung ba ma mchis pas gzung ba ma lags te zhes bya ba ni/ mtshan mar mi 'dzin par sgrub pa'i don gong du bshad pa nyid mjug bsdus nas bstan pa ste/ mtshan ma can du yang mi 'dzin/ mtshan ma med par yang mi 'dzin par rtogs par bya'o zhes bstan pa'o/ /kun du rgyu phreng ba can des kyang thams cad mkhyen pa'i ye shes 'di la mos par gyur nas/ dad pa'i rjes su 'brang bas nyi tshe ba'i ye shes kyis zhugs te zhes bya ba ni/ kun du rgyu ba de sngon mtshan ma med par spyod pa la dad pas dad pa'i rjes su 'brang ba zhes bya/ chos thams cad cig car mtshan ma med par ni ma rtogs kyi/ gzugs la sogs pa re re nas mtshan ma med par rtogs pa'i phyir/ nyi tshe ba'i ye shes kyis zhugs zhes bya'o/ /de ltar zhugs nas gzugs yongs su ma bzung / tshor ba yongs su ma bzung zhes bya ba nas/ rnam par shes pa yongs su ma bzung ngo zhes bya ba'i bar du ni/ kun du rgyu ba des gzugs la sogs pa'i chos rnams la/ nyi tshe ba'i ye shes kyis so sor brtags nas mtshan ma med par rtogs pa bstan to/ /de ni 'di ltar des rang gi mtshan nyid kyis stong pa'i chos thams cad la yongs su 'dzin pa ma dmigs te zhes bya ba ni/ gzugs la sogs pa'i chos rnams la mtshan mar mi 'dzin pa'i gtan tshigs bstan pa ste/ kun du rgyu ba de la so sor brtags na gzugs la sogs pa'i chos rnams rang gi mtshan nyid kyis stong par rtogs nas/ mtshan mar gzung du rung ba ma mthong ba'i phyir mtshan mar yongs su ma bzung ngo zhes bstan pa'o/ /de ci'i slad du zhe na/ 'di ltar des ye shes de rtogs pa dang thob par bgyi ba'i tshul gyis nang du yang dag par rjes su ma mthong zhes bya ba nas/ chos skyon med pa nyid yongs su mi 'dzin pa dang / yang dag pa'i mtha' yongs su mi 'dzin pa 'di ni/ byang chub sems dpa' sems dpa' chen po'i shes rab kyi pha rol tu phyin pa'o zhes bya ba'i bar du ni shes pa yongs su mi 'dzin pa'i sgrub pa bstan pa ste/ gong du smos pa'i rim pas chos thams cad mtshan ma med par rtogs pa'i shes pa de yang bdag gis shes pa 'dis chos kyi khyad par ma rtogs pa rnams mngon par rtogs so snyam du sems pa'am/ ma thob pa rnams thob bo snyam du sems pa'i shes pa de yang don dam par dngos po med pa'i phyir/ de ltar yongs su mi 'dzin pa la shes pa yongs su mi 'dzin pa zhes bya'o/ /de la rtogs pa zhes bya ba ni/ chos rnams kyi don phyin ci ma log par khong du chud pa'o/ /thob pa zhes bya ba ni rgyun du zhugs pa'i 'bras bu la sogs pa sa'i rim pa dang / mngon par shes pa la sogs pa'i yon tan gyi khyad par thob pa la bya ste/ de ltar chos rnams rtogs pa dang / yon tan gyi khyad par 'thob pa'i rgyur gyur pa'i shes pa de yang don dam par bdag gi lus kyi nang na yod par yang mi mthong / phyi rol na yod par yang mi mthong / phyi nang gnyis ka na yang yod par mi mthong / phyi nang gnyis ka la ma gtogs pa gzhan 'ga' zhig na yod par yang ma mthong ngo zhes bstan pa'i phyir/ de ci'i slad du zhe na/ 'di ltar des ye shes de rtogs pa dang / thob par bgyi ba'i tshul gyis nang du yang dag par rjes su ma mthong ngo zhes bya ba la sogs pa gsungs te/ des zhes bya ba ni kun du rgyu ba chos thams cad mtshan ma med par shes pa des zhes bya ba'i don to/ /de ci'i slad du zhe na/ 'di ltar des chos gang gis rtogs par bgyi ba dang / gang rtogs par bgyid pa dang / gang rtogs par bgyi ba de lta bu'i chos yang dag par rjes su ma mthong ste zhes bya ba ni/ mtshan ma med par rtogs pa'i ye shes de don dam par gang zag gang rtogs par byed pa dang / shes pa gang gis rtogs par bya ba dang / chos gang rnam par rtogs par bya ba'i dngos po gsum mi dmigs pa bstan pa ste/ des chos gang gis rtogs par bgyi ba dang zhes bya ba ni shes pa la bya'o/ /gang rtogs par bgyid pa zhes bya ba ni gang zag la bya'o/ /gang rtogs par bgyi ba zhes bya ba ni shes par bya ba'i yul chos kyi don rtogs par bya ba dang / yon tan gyi khyad par thob par bya ba la bya ste/ de lta bu'i chos gang yang don dam par dmigs su med pas yang dag par rjes su ma mthong ngo zhes bstan pa'o/ /de ltar chos rnams kyi phyir rtogs pa dang / thob par byed pa'i shes pa de dag gi lus kyi nang dang / phyi rol dang / phyi nang gnyi ga dang / de dag las gzhan pa bzhi char na yang med par bstan nas/ gzugs dang tshor ba la sogs pa'i chos rnams re re la 'jug pa'i shes pa de yang nang dang / phyi rol dang / phyi nang gnyi ga dang / de dag las gzhan pa na yang med par bstan pa'i phyir/ des ye shes de gzugs kyi nang du yang dag par rjes su ma mthong / ye shes de gzugs kyi phyi rol du yang dag par rjes su ma mthong zhes bya ba la sogs pa gsungs te/ phung po dang / khams dang / skye mched la sogs pa 'jig rten pa'i chos rnams dang / pha rol tu phyin pa dang / byang chub kyi phyogs kyi chos la sogs pa 'jig rten las 'das pa'i chos yang dag pa'i mtha'i bar du so sor rtog cing 'jug pa'i shes pa de yang nang dang / phyi rol dang / phyi nang gnyis ka dang / de dag las gzhan na yang dag par rjes su ma mthong ngo zhes bstan pa'o/ /rnam grangs 'di la kun du rgyu phreng ba can mos par 'gyur te zhes bya ba ni shes pa yongs su mi 'dzin pa'i rnam grangs de kun du rgyu ba des rtogs nas kyang shes rab kyi pha rol tu phyin pa dang / rnam pa thams cad mkhyen pa nyid la kun du rgyu ba de yid ches shing dad par gyur to zhes bya ba'i don to/ /dad pa'i rjes su 'brang bas zhes bya ba ni sngar bshad pa bzhin no/ /chos nyid tshad mar bgyis te/ chos thams cad mi dmigs pa'i slad du/ rnam pa thams cad mkhyen pa nyid kyi ye shes la zhugs par gyur te zhes bya ba ni/ don dam par chos thams cad mtshan ma med par rtogs pa'i chos nyid de brtson par byas nas/ chos thams cad dmigs su med par rtogs pa nyid rnam pa thams cad mkhyen pa nyid kyi ye shes la zhugs pa yin no zhes bya ba'i don to/ /de de ltar mos par gyur nas zhes bya ba nas/ de ni mya ngan las 'das pas kyang rlom sems su 'gyur ba ma mchis so zhes bya ba'i bar du ni kun du rgyu ba des mtshan ma med pa'i chos rtogs pa'i yon tan bstan pa ste/ don dam par chos thams cad dngos po med cing mtshan ma dang bral bar rtogs pa dang / chos gang yang yid la mi byed cing gang la yang mi rtog pas mya ngan las 'das pa thob kyang des rlom sems su 'gyur ba med do zhes bstan pa'o/ /chos thams cad gzung du ma mchis gtang du ma mchis pa'i slad du yongs su gzung bar bgyi ba'am/ gtang bar bgyi ba de lta bu'i chos gang yang ma dmigs te zhes bya ba ni/ gzung du yod na ni gtang bar bya ba yang zlas 'grub na/ gong du bshad pa'i rim pas gzung du med pa'i phyir gtang ba yang mi 'grub ste/ gzung du med pa'i zlas btang du med pa yang zhar la bshad pa bstan to/ /bcom ldan 'das de ltar gang chos thams cad yongs su bzung ba ma mchis pa'i slad du gzugs yongs su mi 'dzin pa dang tshor ba yongs su mi 'dzin pa dang zhes bya ba nas/ chos thams cad yongs su gzung du ma mchis pa'i slad du yang dag pa'i mtha' yongs su mi 'dzin pa 'di ni pha rol ma mchis pa'i pha rol tu phyin pas/ byang chub sems dpa' sems dpa' chen po rnams kyi shes rab kyi pha rol tu phyin pa'o zhes bya ba'i bar du ni yongs su 'dzin pa med par sgrub pa 'di'i phan yon bstan pa ste/ 'jig rten dang 'jig rten las 'das pa'i chos ming gis smos pa thams cad dngos po yod par ma grub pas gang la yang dngos por yongs su mi 'dzin pa nyid byang chub sems dpa'i shes rab kyi pha rol tu phyin pa yin no zhes bstan pa ste/ pha rol ma mchis pa'i pha rol tu phyin pa zhes bya ba ni dngos po zhig yod na ni pha rol dang tshul rol zhes bya ba yang yod na/ 'di la chos thams cad dngos po med par rtogs pas pha rol zhes bya ba yang med de/ de ltar pha rol med par rtogs pa de nyid phul du phyin pa'am/ mthar phyin pa'i phyir pha rol tu phyin pa zhes bya'o/ /'on kyang smon lam yongs su ma rdzogs kyi bar du bar ma dor yongs su mya ngan las mi 'da' ste zhes bya ba nas/ sangs rgyas kyi chos ma 'dres pa bco brgyad yongs su ma rdzogs kyi bar du bar ma dor yongs su mya ngan las mi 'da'o zhes bya ba'i bar du ni kun du rgyu ba des chos thams cad mtshan ma med pa la mos shing sangs rgyas kyi rigs yin pa'i yon tan bstan pa ste/ don dam par chos thams cad yongs su gzung du med par rtog kyang / kun rdzob tu bsod nams dang ye shes kyi tshogs yongs su rdzogs par ma byas par nyan thos dang rang sangs rgyas ltar bar ma dor mya ngan las mi 'da' bar tshogs yongs su rdzogs par bya ba la brtson par bstan pa'o/ /de ci'i slad du zhe na/ 'di ltar smon lam rnams ni smon lam ma lags zhes bya ba nas/ sangs rgyas kyi chos ma 'dres pa bco brgyad ni sangs rgyas kyi chos ma lags te/ de dag ni chos kyang ma lags/ chos ma lags pa yang ma lags so zhes bya ba'i bar du ni/ bsod nams dang ye shes kyi tshogs ma rdzogs par bar ma dor mya ngan las mi 'da' ba'i rgyu bstan pa ste/ smon lam dang dran pa nye bar gzhag pa la sogs pa'i chos rnams don dam par dngos po yod na ni de dag gi mi mthun pa'i phyogs spangs shing gnyen po la brten te mya ngan las 'da' ba sgrub kyi/ chos de dag dang mya ngan las 'das pa nyid kyang don dam par dngos por yongs su mi 'dzin pa'i phyir bar ma dor yongs su mya ngan las mi 'da'o zhes bya ba'i don to/ /de dag gi chos kyang ma lags zhes bya ba ni smon lam la sogs pa'i chos de dag don dam par dngos po yod par ma grub pa'i phyir ro/ /chos ma lags pa yang ma lags so zhes bya ba ni kun rdzob tu smon lam la sogs pa'i chos de dag mya ngan las 'da' bar rgyu yin pa'i phyir ro/ /bcom ldan 'das de ltar chos thams cad yongs su ma bzung ba'i slad du gzugs yongs su mi 'dzin pa dang / tshor ba yongs su mi 'dzin pa dang zhes bya ba nas/ yang dag pa'i mtha' yongs su mi 'dzin pa 'di ni byang chub sems dpa' sems dpa' chen po'i shes rab kyi pha rol tu phyin pa'o zhes bya ba'i bar du ni yongs su 'dzin pa med par sgrub pa'i don mjug bsdus nas bstan pa ste/ de ltar 'jig rten dang 'jig rten las 'das pa'i chos thams cad don dam par dngos po yod par ma grub pa'i phyir gang yang dngos por yongs su mi 'dzin pa de nyid shes rab kyi pha rol tu phyin pa yin no zhes bya ba'i don to/ /de ltar yongs su 'dzin pa med par sgrub pa bstan nas/ de'i 'og tu yongs su brtag pa'i sgrub pa bstan pa'i phyir/ bcom ldan 'das gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ rnam pa 'di ltar shes rab kyi pha rol tu phyin pa ni gang zhes bya ba la sogs pa gsungs so/ /yongs su brtag pa'i sgrub pa 'di yang rnam pa bzhir bstan te/ shes rab kyi pha rol tu phyin pa ni gang zhes bya ba dang / shes rab kyi pha rol tu phyin pa 'di gang gi zhes bya ba dang / shes rab kyi pha rol tu phyin pa 'di ci zhig ces bya ba dang / ci'i phyir na de la shes rab kyi pha rol tu phyin pa zhes bya zhes yongs su brtag par bya'o/ /de la gang zhes yongs su brtag pa ni shes rab kyi pha rol tu phyin pa'i rang bzhin ji lta bu zhig yin zhes brtag pa'o/ /gang gi zhes bya ba ni gang dang 'brel ba zhes brtag pa'o/ /ci zhig ces bya ba ni rgyu ci zhig gis ni shes rab kyi pha rol tu phyin pa zhes bya zhes brtag pa'o/ /ci'i phyir na zhes bya ba ni ci zhig byed pa'i phyir/ shes rab kyi pha rol tu phyin pa zhes bya ba zhes brtag pa'o/ /de la byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gal te 'di ltar chos gang yod pa ma yin zhing mi dmigs pa de la shes rab kyi pha rol tu phyin pa yin nam zhes spyod na shes rab kyi pha rol tu phyin pa la mi spyod do zhes bya ba nas/ tshe dang ldan pa sha ra dwa ti'i bu byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gal te de ltar rtog cing sems pa dang / de ltar rtog cing sems pa'i tshe sems zhum pa med cing yongs su zhum pa med la/ mi 'jigs mi dngang skrag par mi 'gyur na byang chub sems dpa' sems dpa' chen po shes rab kyi pha rol tu phyin pa dang ma bral bar shes par bya'o zhes bya ba'i bar du ni gang zhes yongs su brtag pa'i don bstan pa ste/ 'jig rten dang 'jig rten las 'das pa'i chos thams cad rang bzhin med cing mi dmigs par rtog pa nyid shes rab kyi pha rol tu phyin pa'i rang bzhin no zhes bstan pa'o/ /chos gang yod pa ma yin zhing mi dmigs pa shes rab kyi pha rol tu phyin pa yin nam zhes spyod na/ shes rab kyi pha rol tu phyin pa la mi spyod do zhes bya ba ni/ gzugs la sogs pa'i chos thams cad dngos po med cing mi dmigs par rtog pa nyid shes rab kyi pha rol tu phyin pa yin no snyam du sems na yang de nyid mtshan mar 'dzin cing dngos por lta ba yin pas shes rab kyi pha rol tu phyin pa la spyod par mi chud do zhes bya ba'i don to/ /de nas tshe dang ldan pa sha ra dwa ti'i bus/ tshe dang ldan pa rab 'byor la 'di skad ces smras so/ /tshe dang ldan pa rab 'byor chos gang rnams med cing mi dmigs pa yin zhes bya ba ni chos thams cad med cing mi dmigs pa'i don 'khor rnams kyis rgya cher rtogs par bya ba'i phyir rab 'byor la gleng bslang zhing dris pa'o/ / rab 'byor gyis smras pa/ tshe dang ldan pa sha ra dwa ti'i bu nang stong pa nyid dang zhes bya ba la sogs pa ni/ chos thams cad med cing mi dmigs pa'i don rab 'byor gyis rgya cher bstan pa ste/ stong pa nyid bco brgyad gtan tshigs su smos nas 'di ltar stong pa'i phyir shes rab kyi pha rol tu phyin pa la sogs pa 'jig rten dang 'jig rten las 'das pa'i chos ming gis smos pa'i chos rnams med cing mi dmigs so zhes bstan pa'o/ /pha rol tu phyin pa drug las shes rab kyi pha rol tu phyin pa dang por smos pa ni shes rab kyi pha rol tu phyin pa'i rang bzhin gang yin pa yongs su brtag pa'i skabs yin pa'i phyir dang por smos so/ /sems zhum pa med pa dang / yongs su zhum pa med pa dang / mi 'jigs pa dang mi dngang ba dang skrag par mi 'gyur ba ni chos thams cad med cing mi dmigs par rtog cing sems pa'i tshe/ stong pas skrag par mi 'gyur ba'i rnam grangs tsam du zad do/ /shes rab kyi pha rol tu phyin pa dang ma bral bar shes par bya'o zhes bya ba ni/ de ltar chos thams cad dngos po med cing mi dmigs par rtog pa na med pas skrag par ma gyur cing / stong pa'i don rtogs pa nyid shes rab kyi pha rol tu phyin pa'i rang bzhin yin pas shes rab kyi pha rol tu phyin pa dang ma bral ba zhes bya'o/ /smras pa/ tshe dang ldan pa rab 'byor ci'i phyir na byang chub sems dpa' sems dpa' chen po shes rab kyi pha rol tu phyin pa dang ma bral bar shes par bya zhes bya ba nas/ yang dag pa'i mtha' la yang dag pa'i mtha'i rang bzhin med par shes par bya'o zhes bya ba'i bar du ni/ shes rab kyi pha rol tu phyin pa 'di gang gi zhes yongs su brtag par bshad pa ste/ rab 'byor gyis smras pa/ tshe dang ldan pa sha ra dwa ti'i bu gzugs ni gzugs kyi rang bzhin dang bral ba ste zhes bya ba la sogs pa ni/ shA ri'i bus ci'i phyir shes rab kyi pha rol tu phyin pa dang ma bral bar shes par bya zhes dris pa'i lan btab pa ste/ gzugs la sogs pa yang dag pa'i mtha' la thug pa'i bar gyi chos ming gis smos pa rnams/ don dam par de dag gi rang bzhin du yod pa ma yin par shes rab kyi pha rol tu phyin pa la spyod pa'i byang chub sems dpas phyin ci ma log par shes pa nyid shes rab kyi pha rol tu phyin pa'i rang bzhin yin pas de dang ma bral ba yin no zhes bstan pa'o/ /smras pa/ tshe dang ldan pa rab 'byor gzugs kyi rang bzhin ni ji lta bu/ tshor ba'i rang bzhin ni ji lta bu zhes bya ba la sogs pa ni gong du gzugs la sogs pa de dag gi rang bzhin dang bral ba'o zhes rab 'byor gyis smras pa'i tshig shA ri'i bus smos nas 'khor rnams kyi the tshom bsal ba'i phyir gzugs la sogs pa dang / de dag gi rang bzhin zhes bya ba'i chos shig yod na ni bral ba dang ma bral ba zhes byar yang rung na/ de dag gi rang bzhin ji lta bu zhig yod ces dris pa'o/ /rab 'byor gyis smras pa/ tshe dang ldan pa sha ra dwa ti'i bu/ gzugs kyi rang bzhin ni dngos po med pa'o zhes bya ba la sogs pas ni gzugs la sogs pa yang dag pa'i mtha'i bar gyi chos rnams kyi rang bzhin don dam par yod par ma grub ste/ dngos po med pa nyid la de dag gi rang bzhin dang bral ba zhes bya'i/ rang bzhin yod pa dang bral ba la ni mi bya'o zhes bstan pa'o/ /tshe dang ldan pa sha ra dwa ti'i bu rnam grangs des na 'di ltar gzugs la gzugs kyi rang bzhin med pa dang zhes bya ba la sogs pas ni gzugs la sogs pa gong du smos pa'i chos rnams kyi rang bzhin med pa nyid kyi don mjug bsdus nas bstan pa ste/ rnam grangs des na zhes bya ba ni gong du smos pa'i gzhung des na/ gzugs la sogs pa yang dag pa'i mtha'i bar gyi chos rnams rang bzhin med par shes par bya ste/ de ltar chos de dag thams cad don dam par gang yang rang bzhin med pa'i phyir chos 'di dang 'di shes pa la shes rab kyi pha rol tu phyin pa zhes bya'o zhes gang dang yang 'brel pa med pas/ shes rab kyi pha rol tu phyin pa 'di gang gi yin zhes brtag pa de gang gi yang ma yin no zhes bstan pa'o/ /tshe dang ldan pa sha ra dwa ti'i bu gzhan yang gzugs la gzugs kyi mtshan nyid med do/ /tshor ba la tshor ba'i mtshan nyid med do zhes bya ba nas/ byang chub sems dpa' sems dpa' chen po gang bslab pa 'di la slob pa de ni rnam pa thams cad mkhyen pa nyid du 'byung bar 'gyur ro zhes bya ba'i bar du ni/ shes rab kyi pha rol tu phyin pa 'di ci zhig ces brtag pa bshad pa ste/ gzugs la sogs pa nas yang dag pa'i mtha'i bar du 'jig rten dang 'jig rten las 'das pa'i chos thams cad kyi mtshan nyid rtogs pa'i phyir shes rab kyi pha rol tu phyin pa zhes bya na/ de ltar chos thams cad mtshan nyid med na chos gang gi mtshan nyid rtogs pa'i phyir shes rab kyi pha rol tu phyin pa zhes bya snyam du yongs su rtog pa la/ de ltar chos thams cad mtshan nyid med pas shes rab kyis rtogs par bya ba'i chos gang yang med pas chos gang gi mtshan nyid rtogs pa'i phyir yang shes rab kyi pha rol tu phyin pa zhes mi bya'o zhes bstan pa'o/ /mtshan nyid la yang mtshan nyid kyi rang bzhin med do zhes bya ba ni/ gong du chos rnams la mtshan nyid med do zhes smos la/ mtshan nyid de chos rnams la med pas logs shig na mtshan nyid kyi rang bzhin du yod snyam du sems pa las bzlog pa'i phyir mtshan nyid ces brjod pa yang kun rdzob tu brjod pa tsam du zad kyi/ don dam par mtshan nyid la yang rang bzhin med do zhes bstan pa'o/ /mtshan nyid kyi rang bzhin la yang mtshan nyid kyi rang bzhin med do zhes bya ba ni mtshan nyid la rang bzhin med do zhes gong du smos pa'i mtshan nyid la rang bzhin med du zin kyang / mtshan nyid kyi rang bzhin zhes bya ba zhig logs shig na yod do snyam du sems pa las bzlog pa'i phyir gsungs pa'o/ /smras pa/ tshe dang ldan pa rab 'byor byang chub sems dpa' sems dpa' chen po gang bslab pa 'di la slob pa de rnam pa thams cad mkhyen pa nyid du 'byung bar 'gyur ram zhes bya ba nas/ rnam pa thams cad mkhyen pa nyid du 'byung bar 'gyur ro zhes bya ba'i bar du ni/ chos thams cad mtshan nyid med par rtogs pa'i phan yon bstan pa ste/ de ltar yongs su rtog cing chos thams cad mtshan nyid med par rtogs par bya bar bslab pa 'di la slob pa'i byang chub sems dpa' de rnam pa thams cad mkhyen pa nyid du 'byung bar 'gyur ro zhes bstan pa ste/ rnam pa thams cad mkhyen pa nyid kyi go 'phang thob par 'gyur ro zhes bya ba'i don to/ /de ci'i phyir zhe na/ tshe dang ldan pa sha ra dwa ti'i bu de ni 'di ltar chos thams cad ma skyes ma byung ba'i phyir ro zhes bya ba nas/ tshe dang ldan pa sha ra dwa ti'i bu byang chub sems dpa' sems dpa' chen po shes rab kyi pha rol tu phyin pa la de ltar spyod pa ni rnam pa thams cad mkhyen pa nyid du nye bar gyur pa yin no zhes bya ba'i bar du ni/ ci'i phyir na de la shes rab kyi pha rol tu phyin pa zhes bya zhes yongs su brtag par bya ba bstan pa ste/ chos thams cad ma skyes ma byung ba'i phyir ro zhes bya ba don gong ma dang mtshams sbyar ba'i phyir gong du gang bslab pa de ni rnam pa thams cad mkhyen pa nyid du 'byung bar 'gyur ro zhes bya ba bshad pa de/ kun rdzob tu bstan pa tsam du zad kyi don dam par chos thams cad skye ba med pa dang / rnam pa thams cad mkhyen pa nyid du 'byung ba med pa'i phyir ni 'byung ba'i tshul gyis 'byung bar 'gyur ro zhes bstan pa'o/ /[(]smas [,]smras [)]pa/ tshe dang ldan pa rab 'byor ji ltar na chos thams cad ma skyes ma byung ba yin zhes bya ba ni/ gzugs la sogs pa'i chos thams cad kun nas nyon mongs pa'i tshe ji ltar ma skyes pa dang / rnam par byang ba'i tshe thams cad mkhyen pa nyid du ji ltar ma byung ba dris pa'o/ /rab 'byor gyis smras pa/ tshe dang ldan pa sha ra dwa ti'i bu gzugs gzugs kyis stong ste/ de la skye ba yang mi dmigs 'byung ba yang mi dmigs so zhes bya ba ni don dam par gzugs gzugs kyi rang bzhin gyis stong ste/ rang bzhin gyis stong pa de la kun nas nyon mongs pa'i tshe yang skye ba med la rnam par byang ba'i tshe yang rnam pa thams cad mkhyen pa nyid du 'byung ba med do zhes bstan pa ste/ chos thams cad dngos po yod na ni rnam pa thams cad mkhyen pa nyid du 'byung bar 'gyur ba yang yod pas/ ci'i phyir na de la shes rab kyi pha rol tu phyin pa zhes bya zhes yongs su brtags na/ rnam pa thams cad mkhyen pa nyid du 'byung bar byed pa'i phyir shes rab kyi pha rol tu phyin pa zhes byar yang rung na de ltar skye ba yang med la rnam pa thams cad mkhyen pa nyid du 'byung ba yang med pa'i phyir 'di la ci'i phyir yang shes rab kyi pha rol tu phyin pa'o zhes mi bya'o zhes bstan pa'o/ /de bzhin du tshor ba la sogs pa nas yang dag pa'i mtha'i bar du 'jig rten dang 'jig rten las 'das pa'i chos thams cad la yang sbyar bar bya'o/ /tshe dang ldan pa sha ra dwa ti'i bu byang chub sems dpa' sems dpa' chen po shes rab kyi pha rol tu phyin pa la de ltar spyod pa ni rnam pa thams cad mkhyen pa nyid dang nye ba yin te zhes bya ba ni/ ci'i phyir de la shes rab kyi pha rol tu phyin pa zhes bya zhes yongs su brtag pa'i mjug bsdus nas bstan pa ste/ don dam par ci'i phyir yang shes rab kyi pha rol tu phyin pa zhes mi bya mod kyi/ 'on kyang don de ltar rtogs na kun rdzob tu rnam pa thams cad mkhyen pa nyid dang nye bar gyur pa yin no zhes bstan pa'o/ /de ji lta ji ltar rnam pa thams cad mkhyen pa nyid du nye bar gyur pa de lta de ltar/ lus yongs su dag pa dang / ngag yongs su dag pa dang zhes bya ba la sogs pa ni de ltar chos thams cad stong par rtogs shing thams cad mkhyen pa nyid du nye bar gyur pa'i phan yon bstan pa'o/ /shes rab kyi pha rol tu phyin pa 'bum pa rgya cher bshad pa las le'u lnga pa'o/ / //de ltar yongs su brtag pa'i sgrub pa bstan nas/ de'i 'og tu thabs kyi sgrub pa bstan par bya ste/ de yang de nas tshe dang ldan pa rab 'byor gyis bcom ldan 'das la 'di skad ces gsol to/ /bcom ldan 'das gal te byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ thabs mi mkhas pas gzugs la spyod na mtshan ma la spyod do zhes bya ba nas/ gal te byang chub sems dpa' sems dpa' chen po de ltar shes rab kyi pha rol tu phyin pa la spyod pa'i tshe/ sems zhum pa med cing yongs su zhum pa med de/ mi 'jigs mi dngang skrag par mi 'gyur na/ tshe dang ldan pa sha ra dwa ti'i bu byang chub sems dpa' sems dpa' chen po de ni rnam pa thams cad mkhyen pa nyid du nye bar gyur par shes par bya'o zhes bya ba'i bar gyis bstan te/ thabs kyi sgrub pa 'di yang thabs mi mkhas pas dngang bar bya ba dang / thabs mkhas pa la brten par bya ba dang rnam pa gnyis su bstan to/ /thabs mi mkhas pa yang rnam pa gnyis te/ mtshan ma la spyod pa dang / mngon par 'du byed pa la spyod pa'o/ /de la thabs mi mkhas pas mtshan ma la spyod pa ni/ bcom ldan 'das gal te byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ thabs mi mkhas pas gzugs la spyod na mtshan ma la spyod do zhes bya ba nas/ bcom ldan 'das gal te byang chub sems dpa' sems dpa' chen po 'di snyam du gang de ltar spyod pa ni shes rab kyi pha rol tu phyin pa la spyod pa'o/ /de ni shes rab kyi pha rol tu phyin pa bsgom mo zhes bgyi bar spyod na yang mtshan ma nyid la spyod pa ste/ de ni byang chub sems dpa' sems dpa' chen po thabs mi mkhas par rig par bya'o zhes bya ba'i bar gyis bstan te/ de la thabs mi mkhas pas gzugs la spyod na mtshan ma la spyod do zhes bya ba la sogs pa ni phung po lnga la gzugs la sogs pa'i so so'i mtshan nyid gang yin pa'i mtshan mar rtog na de mtshan ma la spyod pa yin gyi/ shes rab kyi pha rol tu phyin pa la spyod pa ma yin no zhes bstan pa'o/ /bcom ldan 'das gal te byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ thabs mi mkhas pas gzugs rtag ces bgyi bar spyod na mtshan ma la spyod do zhes bya ba la sogs pa ni phung po dang khams la sogs pa 'jig rten gyi chos rnams dang / sbyin pa'i pha rol tu phyin pa la sogs pa sangs rgyas kyi chos ma 'dres pa bco brgyad kyi bar du 'jig rten las 'das pa'i chos rnams la rtag pa dang / mi rtag pa dang / bde ba dang / sdug bsngal ba dang / bdag yod pa dang / bdag med pa dang / zhi ba dang / ma zhi ba dang / dben pa dang / mi dben pa zhes bya bar mtshan mar 'dzin cing spyod na/ de mtshan ma la spyod pa yin gyi shes rab kyi pha rol tu phyin pa la spyod pa ma yin te/ de ltar spyod na byang chub sems dpa' de thabs mi mkhas pa yin pas thabs mi mkhas pa de spang bar bya'o zhes bstan pa'o/ /de nas tshe dang ldan pa sha ra dwa ti'i bus tshe dang ldan pa rab 'byor la 'di skad ces smras so/ /tshe dang ldan pa rab 'byor byang chub sems dpa' sems dpa' chen po'i thabs mi mkhas pa ji ltar rig par bya ba yin zhes bya ba nas/ tshe dang ldan pa sha ra dwa ti'i bu byang chub sems dpa' sems dpa' chen po de nyid nyan thos kyi sa'am/ rang sangs rgyas kyi sa yang mngon du bya ba'i skal ba med na/ bla na med pa yang dag par rdzogs pa'i byang chub tu mngon par 'tshang rgya ba lta ci smos te de ni gnas med do/ /tshe dang ldan pa sha ra dwa ti'i bu byang chub sems dpa' sems dpa' chen po shes rab kyi pha rol tu phyin pa la de ltar spyod na thabs mi mkhas par shes par bya'o zhes bya ba'i bar du ni/ thabs mi mkhas pas mngon par 'du byed pa la spyod pa bstan pa ste/ gzugs la mos shing zhes bya ba ni lta ba phyin ci log gis gzugs dngos po yod par lta zhing mos pa'o/ /'du shes de zhes bya ba ni 'du shes phyin ci log gis bzang ba dang ngan pa la sogs pa'i mtshan mar 'dzin pa'o/ /byin gyis rlob ces bya ba ni sems phyin ci log gis gzugs kyi dngos po la chags shing gnas pa'o/ /gzugs mngon par 'du byed pa la spyod de zhes bya ba ni de ltar lta ba phyin ci log pa dang / 'du shes phyin ci log pa dang / sems phyin ci log gis gzugs la dngos po yod par mthong zhing / de ltar spyod na gzugs skye ba dang 'gag par bya ba la sogs par mngon par 'du byed pa la spyod kyi/ shes rab kyi pha rol tu phyin pa la mi spyod do zhes bya ba'i don to/ /de ni skye ba dang / rga ba dang / na ba dang / tshe 'pho ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa las yongs su mi 'grol/ sdug bsngal chen po las yongs su mi 'grol bar brjod do zhes bya ba ni/ gzugs la mngon par 'du byed pa'i nyes pa'i dmigs bstan pa ste/ 'khor ba las grol zhing thar par mi 'gyur ro zhes bya ba'i don to/ /de bzhin du tshor ba la sogs pa nas sangs rgyas kyi chos ma 'dres pa bco brgyad kyi bar du yang sbyar bar bya'o/ /tshe dang ldan pa sha ra dwa ti'i bu byang chub sems dpa' sems dpa' chen po de ni nyan thos kyi sa'am/ rang sangs rgyas kyi sa yang mngon du bya ba'i skal ba med na/ bla na med pa yang dag par rdzogs pa'i byang chub tu mngon par 'tshang rgya ba lta ci smos zhes bya ba ni/ de ltar chos rnams la mngon par 'du bya bar spyod na rnam par grol ba'i 'bras bu thob par mi 'gyur ba'i nyes pa'i dmigs bstan pa'o/ /de ni gnas med do zhes bya ba ni de ltar chos rnams la dngos por 'dzin cing mngon par 'du byed pa la spyod pa de bla na med pa yang dag par rdzogs pa'i byang chub tu mngon par 'tshang rgya bar 'gyur ba mi srid do zhes bya ba'i don to/ /smras pa/ tshe dang ldan pa rab 'byor byang chub sems dpa' sems dpa' chen po shes rab kyi pha rol tu phyin pa la ji ltar spyod na thabs mkhas par shes par bya zhes bya ba la sogs pa ni thabs mkhas pas spyod pa'i sgrub pa bstan pa'o/ /de la thabs mkhas pas spyod pa la yang rnam pa gnyis te/ chos rnams la mi dmigs par spyod pa dang chos rnams kyi mtshan ma la mi dmigs par spyod pa'o/ /de la rab 'byor gyis smras pa/ tshe dang ldan pa sha ra dwa ti'i bu nam byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gzugs la mi spyod do zhes bya ba nas/ tshe dang ldan pa sha ra dwa ti'i bu byang chub sems dpa' sems dpa' chen po shes rab kyi pha rol tu phyin pa la de ltar spyod pa ni bla na med pa yang dag par rdzogs pa'i byang chub tu mngon par rdzogs par 'tshang rgya ba'i skal ba yod do zhes bya ba'i bar du ni/ thabs mkhas pas chos rnams la mi dmigs par spyod pa'i sgrub pa bstan pa ste/ gzugs la sogs pa 'jig rten pa'i chos rnams dang / sbyin pa'i pha rol tu phyin pa la sogs pa 'jig rten las 'das pa'i chos rnams la rtag pa dang / mi rtag pa dang / bde ba dang / sdug bsngal ba dang / bdag yod pa dang / bdag med pa dang / zhi ba dang / ma zhi ba dang / stong pa dang / mi stong ba dang / mtshan ma yod pa dang / mtshan ma med pa dang / smon pa yod pa dang / smon pa med pa dang / dben pa dang / mi dben pa'i dngos por 'dzin cing mi spyod pa nyid thabs mkhas pas spyod cing sgrub pa yin par bstan pa'o/ /de ci'i phyir zhe na/ tshe dang ldan pa sha ra dwa ti'i bu gzugs kyi stong pa nyid gang yin pa de gzugs ma yin/ stong pa nyid las gud na yang gzugs med/ gzugs las gud na yang stong pa nyid med de/ stong pa nyid kyang gzugs/ gzugs nyid kyang stong pa nyid do zhes bya ba la sogs pa ni/ gzugs la sogs pa'i chos rnams la mi dmigs par spyod pa'i gtan tshigs bstan pa ste/ gzugs la sogs pa'i chos rnams rang bzhin gyis stong pa'i phyir de ltar mi spyod do zhes bstan pa'o/ /gzugs dang stong pa nyid tha mi dad pa'i don ni sngar bshad pa bzhin no/ /byang chub sems dpa' sems dpa' chen po de ni shes rab kyi pha rol tu phyin pa la spyod kyang spyod do zhes bya bar mi dmigs so/ /mi spyod do zhes bya bar mi dmigs so zhes bya ba nas/ tshe dang ldan pa sha ra dwa ti'i bu byang chub sems dpa' sems dpa' chen po de ni rnam pa thams cad mkhyen pa nyid du nye bar gyur par shes par bya'o zhes bya ba'i bar du ni/ thabs mkhas pas sgrub pa la chos kyi mtshan ma la mi dmigs par spyod pa bstan pa ste/ don dam par byang chub sems dpa' nyid dang / shes rab kyi pha rol tu phyin pa yang dngos po yod par ma grub pas spyod pa'i byang chub sems dpa' dang / spyad par bya ba'i shes rab kyi pha rol tu phyin pa gnyis ka'i rang bzhin stong pa'i phyir spyod do zhes bya bar mi dmigs so/ /mi spyod do zhes bya bar mi dmigs so zhes bya ba ni spyod pa don dam par yod pa ma yin pas spyod pa'i zlas grub pa mi spyod pa yang mi 'grub pa'i phyir ro/ /spyod kyang spyod la mi spyod kyang mi spyod ces bya bar mi dmigs so zhes bya ba ni spyod pa dang mi spyod pa gnyis dngos po med pa'i phyir ro/ /spyod pa yang ma yin mi spyod pa yang ma yin zhes bya ba ni/ spyod pa dang mi spyod pa gnyis ka la ma gtogs pa'i dngos po gzhan du yang mi dmigs so zhes bya ba'i don to/ /rab 'byor gyis smras pa/ tshe dang ldan pa sha ra dwa ti'i bu de ni 'di ltar shes rab kyi pha rol tu phyin pa'i rang bzhin mi dmigs pa'i phyir te zhes bya ba la sogs pa ni de ltar mi dmigs pa'i gtan tshigs bstan pa ste/ spyod par bya ba'i shes rab kyi pha rol tu phyin pa nyid rang bzhin yod par ma grub pas dmigs su med pa'i phyir spyod pa'i byang chub sems dpa' yang mi dmigs pas spyod pa dang mi spyod pa la sogs pa'i rnam par rtog pa bzhi mi dmigs so zhes bstan pa'o/ /de ci'i phyir zhe na/ 'di ltar des chos thams cad dngos po med pa'i rang bzhin khong du chud de ma blangs pa'i phyir ro zhes bya ba ni/ spyod pa dang spyad par bya ba gnyis rang bzhin med par rtogs par ma zad kyi 'dus byas dang 'dus ma byas pa'i chos thams cad rang bzhin med par khong du chud pa'i phyir yang spyod pa dang mi spyod pa la sogs pa'i mtshan mar rnam par rtog pa bzhi mi 'byung ngo zhes bstan pa ste/ ma blangs so zhes bya ba ni mtshan mar ma bzung ngo zhes bya ba'i don to/ /gal te byang chub sems dpa' sems dpa' chen po de ltar shes rab kyi pha rol tu phyin pa la spyod pa'i tshe/ sems zhum pa med cing zhes bya ba la sogs pa ni de ltar chos thams cad dngos po med pa'i rang bzhin du rtogs shing dngos po med pas 'jigs shing skrag par ma gyur pa/ de'i phan yon rnam pa thams cad mkhyen pa nyid 'thob pa'i rgyur 'gyur ba bstan pa'o/ /de ltar thabs kyi sgrub pa bstan nas/ de'i 'og tu myur du mngon par rdzogs par 'tshang rgya ba'i sgrub pa bstan pa'i phyir rnam pa thams cad mkhyen pa nyid de yang chos thams cad dngos po med pa'i ngo bo nyid kyi phyir gnyis su med cing gnyis su byar med pa ste zhes bya ba la sogs pa gsungs so/ /sgrub pa 'di yang rnam pa bzhir bstan te/ ting nge 'dzin rnams la bslab pa dang / chos thams cad mi dmigs par bslab pa dang / sgyu ma lta bu la sogs par bslab pa dang / thabs la mkhas par bslab pa'o/ /de la rnam pa thams cad mkhyen pa de yang chos thams cad dngos po med pa'i ngo bo nyid kyi phyir gnyis su med cing gnyis su byar med pa ste zhes bya ba nas/ sangs rgyas kyi chos ma 'dres pa rnams la bslab par bya'o zhes bya ba'i bar du ni/ ting nge 'dzin rnams la bslab pa bstan to/ /de la ting nge 'dzin la bslab pa la yang rnam pa gnyis te/ ting nge 'dzin gyi ming bstan pa dang / rnam par mi rtog pa bstan pa'o/ /de la ting nge 'dzin gyi ming bstan pa ni/ /de ni byang chub sems dpa' sems dpa' chen po rnams kyi ting nge 'dzin chos thams cad skye ba med pa zhes bya ba ste zhes bya ba la sogs pa'o/ /de la rnam pa thams cad mkhyen pa nyid ces bya ba ni chos thams cad gnyis su med par rtogs pa la bya ste/ kun brtags pa'i chos thams cad la gzung ba dang / 'dzin pa dang / yod pa dang / med pa dang / rtag pa dang / mi rtag pa dang / bde ba dang / sdug bsngal ba dang / bdag dang / bdag med pa dang / 'dus byas dang / 'dus ma byas pa dang / zhi ba dang / ma zhi ba dang / stong pa dang / mi stong pa dang / mtshan ma yod pa dang / mtshan ma med pa dang / smon pa yod pa dang / smon pa med pa la sogs pa gnyis su 'dzin pa de dag thams cad ni kun brtags pa yin pas rnam pa thams cad mkhyen pa nyid la med pa'i phyir rnam pa thams cad mkhyen pa nyid ni gnyis su med pa zhes bya'o/ /gnyis su byar med ces bya ba ni gzung ba dang 'dzin pa la sogs par rtog pa'i rnam par rtog pas gnyis su bye brag tu dbyer med pa'i phyir ro/ /de ni byang chub sems dpa' sems dpa' chen po rnams kyi ting nge 'dzin chos thams cad skye ba med pa zhes bya ba ste zhes bya ba ni/ rnam pa thams cad mkhyen pa nyid chos thams cad dngos po med par rtogs pa gnyis su med cing gnyis su byar med pa de nyid chos thams cad skye ba med par rtogs pa'i phyir chos thams cad skye ba med pa'i ting nge 'dzin zhes bya'o/ /rgya che ba zhes bya ba la sogs pa ni/ ting nge 'dzin de'i yon tan bsngags pa ste rgya che ba zhes bya ba ni bdag dang gzhan gyi don rgya chen po'i rgyu yin pa'i phyir ro/ /mchog tu bya ba zhes bya ba ni nyan thos dang rang sangs rgyas rnams kyi ting nge 'dzin thams cad kyi phul du gyur pa'i phyir ro/ /tshad med par nges par zhes bya ba ni ting nge 'dzin de'i yon tan tshad gzung du med par nges pa'i phyir ro/ /nyan thos dang rang sangs rgyas thams cad kyis mi 'phrogs pa zhes bya ba ni nyan thos dang rang sangs rgyas rnams kyis sun mi phyin pa'i phyir ro/ /ting nge 'dzin des rnam par spyod pa'i byang chub sems dpa' sems dpa' chen po ni myur du bla na med pa yang dag par rdzogs pa'i byang chub tu mngon par 'tshang rgya'o zhes bya ba ni/ chos thams cad dngos po med cing gnyis su med par rtogs pa'i ting nge 'dzin de la gnas pa bla na med pa'i byang chub tu myur du mngon par 'tshang rgya ba'i yon tan bstan pa'o/ /smras pa/ tshe dang ldan pa rab 'byor ting nge 'dzin 'di 'ba' zhig gis rnam par spyod pa'i byang chub sems dpa' sems dpa' chen po myur du bla na med pa yang dag par rdzogs pa'i byang chub tu mngon par 'tshang rgya'am/ 'on tam de lta bu'i ting nge 'dzin gzhan dag kyang yod ces bya ba la sogs pa ni de las gzhan pa'i ting nge 'dzin mang po rnams kyi ming 'khor rnams la bstan pa'i phyir shA ri'i bus/ rab 'byor la dris nas/ rab 'byor gyis byang chub sems dpa'i ting nge 'dzin dpa' bar 'gro ba zhes bya ba la sogs pa ting nge 'dzin mang po'i ming rnams bstan pa ste/ ting nge 'dzin de dag gi ming don dang rjes su mthun pa ni 'og nas ting nge 'dzin gyi theg pa chen po'i le'u las gzhung nyid las 'chad do/ /de nas sangs rgyas kyi mthus tshe dang ldan pa rab 'byor gyis yang 'di skad ces smras so zhes bya ba la sogs pa ni/ ting nge 'dzin de dag la gnas pa'i byang chub sems dpa' rnams myur du bla na med pa'i byang chub tu mngon par 'tshang rgya bar dus gsum gyi sangs rgyas bcom ldan 'das phyogs bcu na bzhugs pa rnams kyis lung bstan pa'i yon tan bstan pa'o/ /byang chub sems dpa' sems dpa' chen po des ni ting nge 'dzin kyang yang dag par rjes su mi mthong ngo zhes bya ba la sogs pa ni rnam par mi rtog pa bstan pa ste/ don dam par ting nge 'dzin dang / ting nge 'dzin la snyoms par 'jug pa gnyi ga dmigs su med pa'i phyir ting nge 'dzin du yang dag par rjes su mi mthong zhing / bdag ni ting nge 'dzin la snyoms par zhugs pa'o snyam du sems pa mi 'byung ngo zhes bya ba'i don to/ /smras pa/ tshe dang ldan pa rab 'byor ting nge 'dzin 'di la gnas pa'i byang chub sems dpa' sems dpa' chen po la/ de bzhin gshegs pa dgra bcom pa yang dag par rdzogs pa'i sangs rgyas rnams kyis lung bstan pa yod dam zhes bya ba ni/ gong du ting nge 'dzin la gnas pa rnams dus gsum gyi sangs rgyas kyis lung bstan pa bshad pa dang / 'khor gyi nang na kha cig lung ston pa'i sangs rgyas dang / lung bstan par bya ba'i byang chub sems dpa' dang / ting nge 'dzin rnams don dam par dngos po yod snyam du rnam par rtog pa bsal ba'i phyir/ shA ri'i bus lung bstan pa yod dam zhes dris pa'o/ /rab 'byor gyis smras pa/ tshe dang ldan pa sha ra dwa ti'i bu de ni med do zhes bya ba la sogs pa ni don dam par lung ston pa dang / lung bstan par bya ba dang / ting nge 'dzin dang / shes rab kyi pha rol tu phyin pa rnams dngos po med pa'i ngo bo nyid du ro gcig ste/ tha dad pa med pa'i phyir lung bstan pa yang med do zhes bshad pa'o/ /smras pa/ tshe dang ldan pa rab 'byor gal te de ltar ting nge 'dzin kyang gzhan la byang chub sems dpa' yang gzhan zhes bya ba med/ byang chub sems dpa' yang gzhan la ting nge 'dzin kyang gzhan zhes bya ba med de/ chos thams cad mnyam pa nyid kyi phyir ting nge 'dzin nyid kyang byang chub sems dpa' byang chub sems dpa' nyid kyang ting nge 'dzin yin na/ de la ting nge 'dzin bstan par nus sam zhes bya ba ni/ de ltar byang chub sems dpa' dang / ting nge 'dzin gnyi ga yang don dam par dbyer med de tha mi dad na/ ci zhig gang la bstan par bya snyam nas dris pa ste bstan par nus sam zhes bya ba ni de ltar dmigs su med de dbyer med na/ ting nge 'dzin de byang chub sems dpa' la bstan du rung ngam zhes dris pa'o/ /rab 'byor gyis smras pa/ tshe dang ldan pa sha ra dwa ti'i bu de ni ma yin no zhes bya ba ni don dam par ting nge 'dzin dang / byang chub sems dpa' gnyis dbyer med pas ting nge 'dzin de byang chub sems dpa' la bstan du mi rung ngo zhes bya ba'i don to/ /smras pa/ tshe dang ldan pa rab 'byor rigs kyi bu de ting nge 'dzin de la 'du shes su byed dam zhes bya ba la sogs pa ni ting nge 'dzin du rnam par mi rtog pa'i gtan tshigs shA ri'i bus dris pa dang / rab 'byor gyis rnam par mi rtog pa'i gtan tshigs bstan pa ste/ don dam par chos thams cad dngos po med pa'i phyir ting nge 'dzin dang / byang chub sems dpa' gnyis ka dngos po med par ro gcig pas 'di ni ting nge 'dzin to/ /bdag ni ting nge 'dzin la mnyam par 'jog pa'o snyam du sems pa'i 'du shes dang / rnam par rtog pa mi 'byung ngo zhes bstan pa'o/ /de nas bcom ldan 'das kyis tshe dang ldan pa rab 'byor la legs so zhes bya ba gnang ste zhes bya ba nas/ sangs rgyas kyi chos ma 'dres pa rnams la mi dmigs pa'i tshul gyis slob bo zhes bya ba'i bar du ni/ de ltar ting nge 'dzin la rnam par mi rtog pa'i don/ rab 'byor gyis shA ri'i bu la bshad pa legs so zhes bcom ldan 'das kyis rab 'byor la bstod nas rnam par byang ba'i chos gzhan rnams la yang de ltar don dam par mi rtog pa dang / mi dmigs pa'i tshul gyis kun rdzob tu bslab par bya'o zhes bstan pa ste/ nyon mongs pa med pa la rnam par rtog pa'i nyan thos kyi nang na mchog tu bshad pa 'di yin no zhes bya ba ni/ nyan thos dgra bcom pa'i nang na rab 'byor nyon mongs pa med pa'i mchog tu bshad pa glengs nas bstod pa ste/ skabs 'dir ni nyon mongs pa zhes bya ba byang chub sems dpa' rnams kyi rnam par rtog pa la bya ste/ rab 'byor gyis rnam par mi rtog pa'i don rtogs shing bshad pa de nyon mongs pa med par bshad pa dang mthun pas rab 'byor khyod kyis rnam par mi rtog pa'i don de bshad pa legs so zhes bya ba dang sbyar ro/ /de ltar ting nge 'dzin rnams la bslab pa bstan nas/ de'i 'og tu chos thams cad mi dmigs par bslab pa bstan pa'i phyir/ bcom ldan 'das kyis bka' stsal pa/ sha ra dwa ti'i bu byang chub sems dpa' sems dpa' chen po de ltar slob pa ni/ shes rab kyi pha rol tu phyin pa la mi dmigs pa'i tshul gyis slob pa yin zhes bya ba nas/ dngos po med pa'i ngo bo nyid stong pa nyid mi dmigs pa'i tshul gyis rnam pa thams cad mkhyen pa nyid du 'byung bar shes par bya'o zhes bya ba'i bar du ni/ chos thams cad mi dmigs par bslab pa bstan pa'o/ /de ltar slob pa ni shes rab kyi pha rol tu phyin pa la mi dmigs pa'i tshul gyis slob pa yin zhes bya ba la sogs pa ni mi dmigs par bslab pa bstan pa ste/ sha ra dwa ti'i bus gsol pa/ bcom ldan 'das ci'i slad du mi dmigs pa lags/ bcom ldan 'das kyis bka' stsal pa/ sha ra dwa ti'i bu shin tu rnam par dag pa'i phyir bdag mi dmigs so zhes bya ba la sogs pa ni mi dmigs pa'i gtan tshigs bstan pa ste/ shin tu rnam par dag pa'i phyir zhes bya ba ni don dam par chos thams cad de bzhin nyid kyi ngo bo nyid yongs su dag pa yin pa'i phyir dmigs su med do zhes bya ba'i don te/ dmigs su med pa de dag kyang gang zhe na/ bdag dang sems can la sogs pa mu stegs can gyis bdag tu brtags pa rnams dang / phung po dang / skye mched dang / khams dang / rten cing 'brel par 'byung ba dang / khams gsum la sogs pa 'jig rten pa'i chos rnams dang / 'phags pa'i bden pa bzhi la sogs pa 'jig rten las 'das pa'i chos rnams so so'i skye bos dngos po yod par brtags pa lta bur dmigs su med do zhes bstan pa'o/ /gsol pa/ bcom ldan 'das rnam par dag pa gang lags zhes bya ba la sogs pa ni shin tu rnam par dag pa'i don gsal bar bstan pa'i phyir shA ri'i bus zhus pa dang / bcom ldan 'das kyis bshad pa ste/ don dam par chos thams cad dngos po yod par ma grub pas skye ba dang 'gag pa la sogs pa med pa nyid rnam par dag pa yin no zhes bstan pa'o/ /gsol pa/ bcom ldan 'das de ltar slob pa'i byang chub sems dpa' sems dpa' chen po chos gang dang gang la slob pa lags zhes bya ba ni/ gong du mi dmigs pa'i tshul gyis slob pa yin no zhes bshad pas 'khor gyi nang na kha cig bslab par bya ba'i chos 'ga' zhig yod dam snyam du sems pa'i the tshom bsal ba'i phyir zhus pa'o/ /chos gang la yang slob pa med do zhes bya ba ni/ don dam par chos gang yang dngos po yod par ma grub pas chos gang la yang slob pa med do zhes bstan pa'o/ /de ci'i phyir zhe na/ sha ra dwa ti'i bu chos 'di dag ni byis pa so so'i skye bos ji ltar mngon par chags par bya ba de lta bu'i rnam par yod pa ma yin no zhes bya ba ni chos gang yang slob pa med pa'i gtan tshigs bstan pa ste/ 'jig rten dang 'jig rten las 'das pa'i chos 'di dag so so'i skye bos dngos po yod par mthong zhing chags pa de lta bu'i dngos por don dam par yod pa ma yin no zhes bstan pa'o/ /gsol pa/ bcom ldan 'das 'o na chos 'di dag rnam pa gang gis mchis pa lags zhes bya ba ni don de nyid gsal bar bya ba'i phyir zhus pa'o/ /bcom ldan 'das kyis bka' stsal pa/ ji ltar med pa de ltar yod ces bya ba ni/ byis pa so so'i skye bo rnams kyis dngos po yod par phyin ci log tu mthong zhing chags pa de lta bu'i dngos por yod pa ma yin pa de lta bur yod do zhes bstan pa ste/ yod do zhes bya ba yang dngos por yod pa la ni mi bya'i/ ji ltar med pa de ltar bden no zhe'am/ de ltar yang dag pa nyid do zhes bya ba'i don to/ /de bas na don de nyid gsal bar bstan pa'i phyir/ de ltar yod pa ma yin pas de'i phyir med ces bya'o zhes bya ba gsungs so/ /gsol pa/ bcom ldan 'das ci'i slad du mchis pa ma lags pa la ma mchis zhes bgyi zhes bya ba ni/ gzugs la sogs pa'i chos rnams yod pa ma yin pa'i gtan tshigs rgya cher bstan pa'i phyir zhus pa'o/ /bcom ldan 'das kyis bka' stsal pa/ sha ra dwa ti'i bu gzugs nang stong pa nyid dang zhes bya ba la sogs pa ni gzugs la sogs pa'i chos rnams yod pa ma yin pa'i gtan tshigs su stong pa bco brgyad smos nas/ 'di ltar stong pa'i phyir yod pa ma yin no zhes bstan pa ste/ gzugs la ji lta ba de bzhin du tshor ba la sogs pa nas rga shi'i bar du 'jig rten pa'i chos rnams dang / sbyin pa'i pha rol tu phyin pa nas sangs rgyas kyi chos ma 'dres pa bco brgyad kyi bar du yod pa ma yin pa bstan to/ /de la byis pa so so'i skye bo rnams med pa la mngon par zhen pas/ sred pa la mngon par zhen te zhes bya ba nas/ sangs rgyas kyi chos ma 'dres pa rnams la mngon par zhen to zhes bya ba'i bar du ni/ de ltar chos rnams don dam par yod pa ma yin pa la/ byis pa so so'i skye bo rnams ma rig pa'i dbang gis phyin ci log tu mthong nas rtag pa dang chad pa'i mtha' la chags pas chos rnams la mngon par zhen par gyur pa bstan pa ste/ med pa la mngon par zhen pas sred pa la mngon par zhen te zhes bya ba ni/ phyin ci log gi dbang gis med pa la yod par mthong nas de la sred pa skyes shing mngon par chags par gyur to zhes bya ba'i don to/ /de dag gis med pa yongs su brtags pas zhes bya ba ni/ byis pa so so'i skye bo de dag gis med pa la yod par phyin ci log tu mthong nas dngos po dang mtshan ma rnam pa sna tshogs su yongs su brtag cing mngon par zhen to zhes bstan pa'o/ /chad pa dang rtag pa'i mtha' la chags pas de dag mi shes mi mthong ste zhes bya ba ni/ phyin ci log tu mthong ba'i dbang gis rtag pa dang chad pa la sogs pa'i mtha' gnyis la chags pas log par lta ba'i skyon du gyur pa bstan to/ /gang med pa'i chos de dag yongs su brtags nas ming dang gzugs la mngon par zhen zhes bya ba ni/ med pa las phyin ci log tu yod par mthong nas phung po lnga la sogs pa 'khor ba'i chos rnams la mngon par zhen pa bstan pa'o/ /ming dang gzugs zhes bya ba ni phung po lnga la bya ste/ tshor ba dang / 'du shes dang / 'du byed dang / rnam par shes pa dang bzhi ni gzugs med de ming tsam du zad pas ming zhes bya'o/ /gzugs kyi phung po ni gzugs su yod pas na gzugs zhes bya ste/ de bas na ming dang gzugs zhes bya ba ni phung po lnga la bya'o/ /de dag sbyin pa'i pha rol tu phyin pa la mngon par zhen to zhes bya ba la sogs pa ni byis pa so so'i skye bo de dag med pa la yod par phyin ci log tu mthong ba'i dbang gis rnam par byang ba'i chos rnams la dngos po yod par mthong zhing mngon par zhen pa bstan to/ /de dag de ltar mngon par zhen pas yod pa ma yin pa'i chos rnams la yongs su rtog ste/ de dag mi shes mi mthong ngo zhes bya ba nas/ nyan thos kyi sa nas 'byung ba ma yin no/ /rang sangs rgyas kyi sa nas 'byung ba ma yin no zhes bya ba'i bar du ni/ yod pa ma yin pa'i chos rnams la mngon par zhen pa'i dbang gis 'jig rten dang 'jig rten las 'das pa'i chos rnams yang dag pa ji lta ba nyid du ma rtogs shing khams gsum dang / nyan thos dang rang sangs rgyas kyi sa nas mi 'byung ba dang / byis pa so so'i skye bo'i grangs su yang 'gro ba bstan to/ /de dag ni yid mi ches pas ji ltar yid mi ches she na/ gzugs gzugs kyis stong zhes bya bar yid mi ches so zhes bya ba nas/ rnam pa thams cad mkhyen pa nyid rnam pa thams cad mkhyen pa nyid kyis stong zhes bya bar yid mi ches so zhes bya ba'i bar du ni/ de ltar yang dag pa'i don ma rtogs pa'i dbang gis don dam pa'i dbyings la ma dad pas gzugs la sogs pa 'jig rten pa'i chos rnams dang / sbyin pa'i pha rol tu phyin pa la sogs pa 'jig rten las 'das pa'i chos rnams rang bzhin gyis stong par yid mi ches pa bstan to/ /de dag ni gnas pa yang ma yin pa ste/ ji ltar gnas pa ma yin no zhe na/ sbyin pa'i pha rol tu phyin pa la gnas pa ma yin zhes bya ba nas/ sangs rgyas kyi chos ma 'dres pa rnams la gnas pa ma yin no zhes bya ba'i bar du ni/ de ltar chos thams cad rang bzhin gyis stong par yid mi ches pas thabs dang / shes rab tu mi ldan pa'i phyir sbyin pa'i pha rol tu phyin pa la sogs pa rnam par byang ba'i chos rnams la mi gnas pa bstan to/ /de dag ni mngon par zhen pa yin te/ ji ltar mngon par zhen pa yin zhe na/ gzugs la mngon par zhen pa yin zhes bya ba nas/ bla na med pa yang dag par rdzogs pa'i byang chub la mngon par zhen pa yin te/ de'i phyir byis pa zhes bya'o zhes bya ba'i bar du ni rnam par byang ba'i chos rnams la mi gnas pa'i skyon 'jig rten dang 'jig rten las 'das pa'i chos rnams la dngos por lta zhing mngon par chags par 'gyur ba bstan pa'o/ /gsol pa/ bcom ldan 'das de ltar slob pa'i byang chub sems dpa' sems dpa' chen po shes rab kyi pha rol tu phyin pa la mi slob cing / rnam pa thams cad mkhyen pa nyid du mi 'byung ba lags sam zhes bya ba nas/ sha ra dwa ti'i bu rnam grangs des na byang chub sems dpa' sems dpa' chen po de ni shes rab kyi pha rol tu phyin pa la mi slob pa yin/ rnam pa thams cad mkhyen pa nyid du mi 'byung ba yin no zhes bya ba'i bar du ni/ de ltar rnam par byang ba'i chos rnams la mi gnas shing dngos po la mngon par zhen pa de dag thabs mi mkhas pas shes rab kyi pha rol tu phyin pa la sogs pa rnam par byang ba'i chos rnams la dngos po yod par brtags shing / mngon par chags pa'i phyir shes rab kyi pha rol tu phyin pa la slob par yang mi chud la/ rnam pa thams cad mkhyen pa nyid du 'byung bar yang mi 'gyur ba bstan pa'o/ /gsol pa/ bcom ldan 'das de ltar lags na byang chub sems dpa' sems dpa' chen po shes rab kyi pha rol tu phyin pa la rnam pa gang gis slob par 'gyur ba lags zhes bya ba nas/ sha ra dwa ti'i bu byang chub sems dpa' sems dpa' chen po de ltar shes rab kyi pha rol tu phyin pa la spyod pa dang / de ltar shes rab kyi pha rol tu phyin pa la slob pa ni mi dmigs pa'i tshul gyis rnam pa thams cad mkhyen pa nyid du 'byung ngo zhes bya ba'i bar du ni/ thabs ji ltar bslabs na shes rab kyi pha rol tu phyin pa la slob par chud cing / rnam pa thams cad mkhyen pa nyid du 'byung bar 'gyur ba'i thabs bstan pa ste/ shes rab kyi pha rol tu phyin pa la sogs pa bslab par bya ba'i chos ming gis smos pa rnams don dam par dngos por mi dmigs shing yang dag par rjes su mi mthong bar byas la/ kun rdzob tu bslabs na shes rab kyi pha rol tu phyin pa la slob par chud cing rnam pa thams cad mkhyen pa nyid du 'byung bar 'gyur ba bstan pa'o/ /gsol pa/ bcom ldan 'das gang mi dmigs pa'i tshul gyis rnam pa thams cad mkhyen pa nyid du 'byung ba lags zhes bya ba nas/ dngos po med pa'i ngo bo nyid stong pa nyid mi dmigs pa'i tshul gyis rnam pa thams cad mkhyen pa nyid du 'byung bar shes par bya'o zhes bya ba'i bar du ni/ bslab par bya ba'i chos de mi dmigs shing yang dag par rjes su mi mthong ba'i gtan tshigs bstan pa'i ste/ stong pa nyid bco brgyad kyi tshul gyis mi dmigs shing yang dag par rjes su mi mthong ngo zhes bstan pa'o/ /shes rab kyi pha rol tu phyin pa 'bum pa rgya cher bshad pa las le'u drug pa'o/ / //de ltar chos thams cad mi dmigs par bslab pa bstan nas/ de'i 'og tu sgyu ma lta bu la sogs par slob pa bstan pa'i phyir/ de nas tshe dang ldan pa rab 'byor gyis bcom ldan 'das la 'di skad ces gsol to/ /bcom ldan 'das la la zhig 'di skad du 'dri zhing / ci sgyu ma'i skyes bu 'di shes rab kyi pha rol tu phyin pa la bslabs shing / rnam pa thams cad mkhyen pa nyid du 'byung bar 'gyur ram zhes bya ba la sogs pa gsungs te/ de la bcom ldan 'das la la zhig 'di skad du 'dri zhing / ci sgyu ma'i skyes bu 'di shes rab kyi pha rol tu phyin pa la bslabs shing / rnam pa thams cad mkhyen pa nyid du 'byung bar 'gyur ram/ rnam pa thams cad mkhyen pa nyid du thob par 'gyur ram zhes mchi na/ bcom ldan 'das de skad du 'dri ba de la ji skad du bstan par bgyi zhes bya ba nas/ bcom ldan 'das la la zhig 'di skad du 'dri zhing / ci sgyu ma'i skyes bu 'di sangs rgyas kyi chos ma 'dres pa rnams la bslabs shing / rnam pa thams cad mkhyen pa nyid du 'byung bar 'gyur ram/ rnam pa thams cad mkhyen pa nyid thob par 'gyur zhes mchi na/ bcom ldan 'das de skad du 'dri ba de la ji skad du bstan par bgyi zhes bya ba'i bar du ni/ gong du chos thams cad mi dmigs shing dngos po med par bstan nas/ dngos po med pa'i chos rnams la bslabs na/ rnam pa thams cad mkhyen pa nyid du 'byung ngo zhes bstan pa rab 'byor gyis thos nas/ de ltar chos thams cad mi dmigs shing dngos po med pa la bslabs te/ rnam pa thams cad mkhyen pa nyid du 'byung bar 'gyur na ni shin tu dngos po med par 'dra bas sgyu ma'i skyes bus kyang sgyu mar byas pa'i dngos po rnams la bslabs na rnam pa thams cad mkhyen pa nyid du 'byung bar 'gyur zhing / rnam pa thams cad mkhyen pa nyid thob par 'gyur ba'i rigs na/ de ltar 'gyur ba yang mi srid do snyam nas/ de'i don ji lta bu yin pa 'khor rnams la zhib tu bstan cing 'khor rnams kyi the tshom bsal ba'i phyir shes rab kyi pha rol tu phyin pa nas sangs rgyas kyi chos ma 'dres pa rnams kyi bar la sgyu ma'i skyes bus bslabs na/ sgyu ma'i skyes bu de rnam pa thams cad mkhyen pa nyid du 'byung bar 'gyur ram/ sgyu ma'i skyes bu de rnam pa thams cad mkhyen pa nyid thob par 'gyur ram zhes 'ga' zhig gis dris na de la lan ji skad gdab par bgyi zhes zhus pa'o/ /de skad ces gsol pa dang / bcom ldan 'das kyis tshe dang ldan pa rab 'byor la 'di skad ces bka' stsal to/ /rab 'byor de lta bas na de khyod nyid la dris/ khyod kyis ji ltar bzod pa de ltar lung ston cig ces bya ba nas/ bcom ldan 'das kyis bka' stsal pa/ rab 'byor de ji snyam du sems/ byang chub kyang gzhan la sgyu ma yang gzhan zhig yin snyam mam/ gsol pa/ bcom ldan 'das de lta ma lags so zhes bya ba'i bar du ni/ chos thams cad mi dmigs par bslabs na rnam pa thams cad mkhyen pa nyid du 'byung ngo zhes sngar bstan pa ni kun rdzob tu bstan gyi/ don dam par bslab par bya ba'i chos rnams dang / slob pa dang / rnam pa thams cad mkhyen pa nyid kyang dngos po yod par ma grub pas stong pa nyid du ro gcig ste/ sgyu ma'i rang bzhin du 'dra bar dgongs nas gzugs la sogs pa nas sangs rgyas kyi chos ma 'dres pa rnams dang byang chub kyi bar du 'jig rten pa dang 'jig rten las 'das pa'i chos rnams kyang gzhan la/ sgyu ma yang gzhan yin snyam mam zhes bcom ldan 'das kyis rab 'byor la dris pa'o/ /bcom ldan 'das gzugs kyang gzhan ma lags sgyu ma yang gzhan ma lags te/ gzugs nyid kyang sgyu ma sgyu ma nyid kyang gzugs so zhes bya ba nas/ bcom ldan 'das rnam pa thams cad mkhyen pa nyid kyang gzhan ma lags/ sgyu ma yang gzhan ma lags te/ rnam pa thams cad mkhyen pa nyid kyang sgyu ma sgyu ma nyid kyang rnam pa thams cad mkhyen pa nyid do zhes bya ba'i bar du ni/ bcom ldan 'das kyis dris pa'i lan rab 'byor gyis btab pa ste/ chos de dag thams cad sgyu ma dang 'dra'o zhes gsol pa'o/ /bcom ldan 'das kyis bka' stsal pa/ rab 'byor de ji snyam du sems/ sgyu ma la skye ba'am 'gag pa yod dam zhes bya ba nas/ de ci'i slad du zhe na/ bcom ldan 'das de ni 'di ltar phung po lnga po rnams ni dngos po ma mchis pa'i rang bzhin te/ dngos po ma mchis pa'i rang bzhin de ni dmigs su ma mchis so zhes bya ba'i bar du ni/ chos rnams don dam par dngos po med de/ sgyu ma dang 'dra ba la skye ba dang / 'gag pa dang / kun nas nyon mongs pa med pa dang / rnam par byang ba med pa dang / de ltar dngos po med pas don dam par shes rab kyi pha rol tu phyin pa la slob par 'gyur ba dang / rnam pa thams cad mkhyen pa nyid du 'byung bar 'gyur ba dang / rnam pa thams cad mkhyen pa nyid thob par 'gyur ba yang med pa dang / don dam par nye bar len pa'i phung po lnga la byang chub sems dpa' zhes bya bar brda dang tha snyad la sogs par gdags su yang med pa dang / de ltar byang chub sems dpa' zhes bya bar brda dang tha snyad la sogs par gdags pa med pa de kun nas nyon mongs pa dang / rnam par byang ba yang med pas don dam par shes rab kyi pha rol tu phyin pa la bslab pa dang / rnam pa thams cad mkhyen pa nyid du 'byung bar 'gyur ba dang / rnam pa thams cad mkhyen pa nyid thob par 'gyur ba yang med pa bstan pa'o/ /bcom ldan 'das kyis bka' stsal pa/ rab 'byor de ltar byang chub sems dpa' sems dpa' chen po shes rab kyi pha rol tu phyin pa la bslabs shing / mi dmigs pa'i tshul gyis rnam pa thams cad mkhyen pa nyid du 'byung ngo / / rnam pa thams cad mkhyen pa nyid thob par 'gyur ro zhes bya ba ni/ don dam par chos thams cad dngos po med du zin kyang / shes rab kyi pha rol tu phyin pa la mi dmigs pa'i tshul gyis bslabs na kun rdzob tu rnam pa thams cad mkhyen pa nyid du mi 'byung ba'am/ rnam pa thams cad mkhyen pa nyid thob par mi 'gyur ba yang ma yin no zhes bya ba'i don to/ /gsol pa/ bcom ldan 'das kyis ji skad du gsungs pa'i don bdag gis 'tshal te zhes bya ba la sogs pa ni/ chos thams cad sgyu ma lta bur bshad pa'i don rab 'byor gyis legs par [(]rtags [,]rtogs [)]pa'i don mjug bsdus nas bstan pa ste/ shes rab kyi pha rol tu phyin pa la bslab pa'i byang chub sems dpa' dang / bslab par bya ba bla na med pa yang dag par rdzogs pa'i byang chub kyang sgyu ma lta bur bdag gis rtogs te gzhan gyis kyang de lta bur bslab par bya'o zhes bstan pa'o/ / de ci'i slad du zhe na/ bcom ldan 'das de ni 'di lta ste/ phung po lnga po de nyid sgyu ma'i skyes bur rig par bgyi ba sha stag go zhes bya ba la sogs pa ni sgyu ma lta bu yin pa'i gtan tshigs bstan pa de zhib tu brtags shing gtan la phab na/ don dam par dngos po med pa las phung po la sogs pa yod pa lta bur snang ba ni sgyu ma lta bu yin par nges so zhes bya ba'i don to/ /bcom ldan 'das kyis bka' stsal pa/ rab 'byor de ji snyam du sems/ rmi lam lta bu'i phung po lnga po de dag shes rab kyi pha rol tu phyin pa la bslabs shing / rnam pa thams cad mkhyen pa nyid du 'byung bar 'gyur ram zhes bya ba nas/ rnam par shes pa ni smig rgyu lta bu ste/ rnam par shes pa gang yin pa de ni dbang po drug go/ /de ni phung po lnga'o/ /de dag ni nang stong pa nyid kyi phyir mi dmigs so zhes bya ba dang / dngos po med pa'i ngo bo nyid stong pa nyid kyi phyir mi dmigs so zhes bya ba'i bar du ni/ phung po lnga po rmi lam lta bu dang / sgyu ma lta bu dang / sgra brnyan lta bu dang / mig yor lta bu dang / chu zla lta bu dang / smig rgyu lta bu dang / sprul pa lta bu'i dpes don dam par dngos po med par bstan pa dang / dngos po med pa'i gtan tshigs su stong pa bco brgyad smos te/ de ltar phung po de dag rang bzhin gyis stong pa'i phyir don dam par shes rab kyi pha rol tu phyin pa la bslabs shing / rnam pa thams cad mkhyen pa nyid du 'byung bar 'gyur ba med pa bstan pa ste/ rnam par shes pa gang yin pa de ni dbang po drug go/ /de ni phung po lnga'o zhes bya ba ni ji ltar rnam par shes pa sgyu ma la sogs pa bzhin du dngos po med pa de bzhin du dbang po drug dang / phung po lnga yang sgyu ma la sogs pa bzhin du dngos po med pa'i ngo bo nyid du rang bzhin gcig ste tha mi dad do zhes bya ba'i don to/ /de ltar sgyu ma lta bu la sogs par bslab pa bstan nas/ de'i 'og tu thabs mkhas par bslab pa bstan pa'i phyir/ gsol pa/ bcom ldan 'das de lta lags na/ byang chub sems dpa' sems dpa' chen po theg pa la gsar du zhugs pas bstan pa 'di thos nas 'jigs shing dang ba dang / skrag par mi 'gyur ba lags grang zhes bya ba sogs pa gsungs te/ rab 'byor gal te byang chub sems dpa' sems dpa' chen po theg pa la gsar du zhugs pa yang yin la zhes bya ba nas/ bstan pa 'di thos na mi 'jigs mi dngang mi skrag pa'i shes rab kyi pha rol tu phyin pa la thabs mkhas pa de gang lags zhes bya ba'i bar du thabs mkhas par bslab pa zhib tu bstan pa'i skabs dbye ba'i phyir rab 'byor gyis zhus pa dang / bcom ldan 'das kyis lan bka' stsal pa ste/ byang chub sems dpa' theg pa la gsar du zhugs la/ shes rab kyi pha rol tu phyin pa la thabs kyang mi mkhas shing dge ba'i bshes gnyen dang yang mi ldan na chos zab mo 'di bstan pa thos nas 'jigs shing dngang ba dang skrag par 'gyur gyi/ theg pa chen po la zhugs nas yun ring la/ shes rab kyi pha rol tu phyin pa la thabs mkhas shing dge ba'i bshes gnyen dang yang ldan na 'jigs shing dngang ba dang skrag par mi 'gyur ro zhes bstan pa ste/ 'jigs pa dang / dngang ba dang / skrag pa gsum smos pa 'jigs pa'i shes rab rab 'bring gsum du bshad pa ste/ dang po nyan pa'i tshe ni cung zad 'jigs pa ni 'jigs pa'o/ /de'i 'og tu sems pa'i tshe 'bring du 'jigs pa ni dngang ba'o/ /tha mar bsgom pa'i tshe rab tu 'jigs pa ni skrag pa zhes bya'o/ /thabs mkhas bar bslab pa 'di yang rnam pa bzhir bstan te/ chos thams cad la so sor rtog pa'i thabs la mkhas pa dang / pha rol tu phyin pa drug yongs su rdzogs par bya ba'i thabs la mkhas pa dang / dge ba'i bshes gnyen la brten pa'i thabs la mkhas pa dang / sdig pa'i grogs po spang ba'i thabs la mkhas pa'o/ /de la bcom ldan 'das kyis bka' stsal pa/ rab 'byor 'di la byang chub sems dpa' sems dpa' chen pos shes rab kyi pha rol tu phyin pa la spyod pa'i tshe/ rnam pa thams cad mkhyen pa nyid dang ldan pa'i sems kyis gzugs mi rtag ces bya bar rtog ste de mi dmigs so zhes bya ba nas/ rnam pa thams cad mkhyen pa nyid dang ldan pa'i yid la bya bas rnam par shes pa dben pa'i rnam par rtog par byed de de mi dmigs so/ /rab 'byor 'di ni byang chub sems dpa' sems dpa' chen po shes rab kyi pha rol tu phyin pa la spyod pa'i thabs mkhas pa'o zhes bya ba'i bar du ni/ chos thams cad la so sor rtog pa'i thabs la mkhas pa bstan te/ chos rnams la so sor rtog pa'i thabs la mkhas pa de yang rnam pa thams cad mkhyen pa nyid dang ldan pa'i sems kyis gzugs la sogs pa'i phung po lnga la/ mi rtag pa dang / sdug bsngal ba dang / bdag med pa dang / zhi ba dang / stong pa nyid dang / mtshan ma med pa dang / smon pa med pa dang / mngon par 'du bya ba med pa dang / dben par kun rdzob tu rnam par rtog ste/ de yang don dam par ni mi dmigs par slob pa'o/ /de la rnam pa thams cad mkhyen pa nyid dang ldan pa'i sems kyis zhes bya ba ni/ kun rdzob tu rnam pa thams cad mkhyen pa nyid thob par bya ba'i bsam pa dang ldan pas/ phung po lnga la mi rtag pa la sogs par rtog cing de yang don dam par mi dmigs par slob pa'o/ /'di la rnam pa thams cad mkhyen pa nyid dang ldan pa'i sems kyis gzugs mi rtag ces bya bar rtog ste/ de mi dmigs so zhes bya ba la sogs pa'i 'gres dang / rnam pa thams cad mkhyen pa nyid dang ldan pa'i yid la bya bas gzugs mi rtag pa'i rnam par rtog par byed de/ de mi dmigs so zhes bya ba la sogs pa'i 'gres gnyis lan gnyis su zlos pa 'dra ba la/ rnam pa thams cad mkhyen pa nyid dang ldan pa'i sems kyi gzugs mi rtag ces bya bar rtog ste zhes bya ba la sogs pa'i 'gres snga ma ni 'jig rten pa'i sems rtsing ge ma mnyam par ma bzhag pas gzugs la sogs pa la mi rtag pa la sogs pa so sor rtog pa'o/ /rnam pa thams cad mkhyen pa nyid dang ldan pa'i yid la bya bas gzugs mi rtag pa'i rnam par rtog par byed de zhes bya ba'i 'gres phyi ma ni 'jig rten las 'das pa'i sems zhib mo bsam gtan dang ting nge 'dzin la mnyam par bzhag pas gzugs la sogs pa la mi rtag pa la sogs pa'i rnam par rtog par byed pa yin pas lan gnyis su mi zlos te khyad par de yod do/ /rab 'byor byang chub sems dpa' sems dpa' chen po de ltar rtog pa de 'di snyam du sems te/ sems can thams cad la gzugs mi rtag ces bya bar de mi dmigs pa'i tshul gyis chos bstan to zhes bya ba sogs pa ni pha rol tu phyin pa drug yongs su rdzogs par bya ba'i thabs la mkhas pa bstan pa ste/ de la sems can thams cad la gzugs mi rtag ces bya bar de mi dmigs pa'i tshul gyis chos ston te zhes bya ba nas/ rab 'byor 'di ni byang chub sems dpa' sems dpa' chen po'i sbyin pa'i pha rol tu phyin pa ste/ de yod pas byang chub sems dpa' sems dpa' chen po de mi 'jigs mi dngang skrag par mi 'gyur ro zhes bya ba'i bar du ni/ sbyin pa'i pha rol tu phyin pa yongs su rdzogs par bya ba'i thabs la mkhas pa bstan pa ste/ sbyin pa'i nang na chos kyi sbyin pa mchog yin la/ de yang sems can thams cad la mi dmigs pa'i tshul gyis chos ston pa ni sbyin pa'i pha rol tu phyin pa yongs su rdzogs par bya ba'i thabs la mkhas pa yin no/ /de yod pas byang chub sems dpa' sems dpa' chen po mi 'jigs mi dngang skrag par mi 'gyur ro zhes bya ba ni/ sbyin pa'i pha rol tu phyin pa yongs su rdzogs par bya ba'i thabs la mkhas pa de dang ldan na chos zab mo bstan pa thos kyang 'jigs shing dngang ba dang skrag par mi 'gyur ro zhes bstan pa'o/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ nyan thos dang rang sangs rgyas kyi yid la bya ba dang mi ldan pas gzugs gang mi rtag pa'i rnam par yid la byed pa de mi dmigs pa'i tshul gyis yid la byed do zhes bya ba nas/ rab 'byor 'di ni byang chub sems dpa' sems dpa' chen po'i tshul khrims kyi pha rol tu phyin pa mnyam pa med pa ste/ de yod pas byang chub sems dpa' sems dpa' chen po de mi 'jigs mi dngang skrag par mi 'gyur ro zhes bya ba'i bar du ni/ tshul khrims kyi pha rol tu phyin pa yongs su rdzogs par bya ba'i thabs la mkhas pa bstan pa ste/ nyan thos dang rang sangs rgyas kyi yid la bya ba dang mi ldan pas zhes bya ba ni chos la bdag med pa ma rtogs pas dmigs pa can gyi bsam pa dang / nyan thos dang / rang sangs rgyas kyi mya ngan las 'das pa tsam gyis chog par 'dzin cing / rnam pa thams cad mkhyen pa nyid kyi go 'phang thob par bya ba la mi brtson pa'i bsam pa rgya chung ngu de lta bu dang mi ldan pa la bya ste/ nyan thos dang rang sangs rgyas kyi sems rgya chung zhing dmigs pa can de lta bu spong ba dang / mi dmigs pa'i tshul gyis rnam pa thams cad mkhyen pa nyid yid la byed pa ni byang chub sems dpa' sems dpa' chen po'i tshul dang mi 'gal bar tshul khrims kyi pha rol tu phyin pa yongs su rdzogs par bya ba'i thabs la mkhas pa yin no zhes bstan pa'o/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ chos de dag la mi rtag pa'i rnam pa dang zhes bya ba nas/ 'di ni byang chub sems dpa' sems dpa' chen po'i bzod pa'i pha rol tu phyin pa ste/ de yod pas byang chub sems dpa' sems dpa' chen po mi 'jigs mi dngang skrag par mi 'gyur ro zhes bya ba'i bar du ni/ bzod pa'i pha rol tu phyin pa yongs su rdzogs par bya ba'i thabs la mkhas pa bstan te/ chos de dag la zhes bya ba ni gong du smos pa'i chos phung po lnga po de dag la bya ste/ chos de dag la mi rtag pa'i rnam par rtog pa nas dben pa'i rnam par rtog pa'i bar du chos zab mo la rtog pa'i tshe stong pas mi skrag cing chos zab mo la bzod pa dang / chos zab mo la mos shing dad pa nyid bzod pa'i pha rol tu phyin pa yongs su rdzogs par bya ba'i thabs la mkhas pa'o/ /dben pa zhes bya ba ni yod pa dang med pa dang / gzung ba dang 'dzin pa la sogs pa'i mtha' dang bral ba la bya'o/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ rnam pa thams cad mkhyen pa nyid dang ldan pa'i yid la bya bas gzugs mi rtag ces bya bar de mi dmigs pa'i tshul gyis rab tu rtog go zhes bya ba nas/ de ltar de dag la rnam pa thams cad mkhyen pa nyid dang ldan pa'i yid la bya bas mi gtong zhing brtson 'grus mi 'dor ba 'di ni byang chub sems dpa' sems dpa' chen po de'i brtson 'grus kyi pha rol tu phyin pa ste/ de yod pas byang chub sems dpa' sems dpa' chen po de mi 'jigs mi dngang skrag par mi 'gyur ro zhes bya ba'i bar du ni/ brtson 'grus kyi pha rol tu phyin pa yongs su rdzogs par bya ba'i thabs la mkhas pa bstan te/ phung po lnga la sogs pa'i chos rnams la mi dmigs pa'i tshul gyis so sor rtog pa mi gtong ba dang / rnam pa thams cad mkhyen pa nyid yid la bya ba mi 'dor ba nyid brtson 'grus kyi pha rol tu phyin pa yongs su rdzogs par bya ba'i thabs la mkhas pa yin no zhes bstan pa'o/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ nam rnam pa thams cad mkhyen pa nyid dang ldan pa'i yid la bya bas gzugs mi rtag ces bya ba de mi dmigs pa'i tshul gyis rtog cing nyan thos dang / rang sangs rgyas dang ldan pa'i yid la bya ba dang / mi dge ba'i chos de ma yin pa/ byang chub kyi bgegs su 'gyur ba gzhan gyi skabs mi 'byed pa dang zhes bya ba nas/ 'di ni byang chub sems dpa' sems dpa' chen po'i bsam gtan gyi pha rol tu phyin pa ste/ de yod pas byang chub sems dpa' sems dpa' chen po de mi 'jigs mi dngang skrag par mi 'gyur ro zhes bya ba'i bar du ni/ bsam gtan gyi pha rol tu phyin pa yongs su rdzogs par bya ba'i thabs la mkhas pa bstan te/ bsam gtan zhes bya ba ni dmigs pa gzhan la sems mi g.yeng bar bsgom pa'i dmigs pa gang yin pa la sems rtse gcig tu 'jog pa la bya ste/ 'di yang kun rdzob tu rnam pa thams cad mkhyen pa nyid thob par bya ba'i phyir bsgom pa las/ yid la byed pa gzhan pa nyan thos dang rang sangs rgyas kyi yid la byed pa dmigs pa dang bcas shing rgya chung ba dang / bla na med pa yang dag par rdzogs pa'i byang chub thob par bya ba la sgrib cing bar du gcod pa'i chos mi dge ba gzhan dag la mi g.yeng zhing de dag gi go skabs 'byed pa nyid bsam gtan gyi pha rol tu phyin pa yongs su rdzogs par bya ba'i thabs la mkhas pa yin no zhes bstan pa'o/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ nam rnam pa thams cad mkhyen pa nyid dang ldan pa'i yid la bya bas rnam pa 'di ltar rab tu rtog ste/ gzugs kyi stong pa nyid kyis gzugs stong pa ma yin gyi/ gzugs nyid kyang stong pa nyid do/ /stong pa nyid kyang gzugs so zhes bya ba nas/ rab 'byor 'di ni byang chub sems dpa' sems dpa' chen po shes rab kyi pha rol tu phyin pa la spyod pa'i thabs mkhas pa'o/ /thabs mkhas pa de dang ldan pa'i byang chub sems dpa' sems dpa' chen po ni bstan pa 'di thos nas mi 'jigs mi dngang skrag par mi 'gyur ro zhes bya ba'i bar du ni/ shes rab kyi pha rol tu phyin pa yongs su rdzogs par bya ba'i thabs la mkhas pa bstan pa ste/ gzugs kyi stong pa nyid kyis gzugs stong pa ma yin gyi zhes bya ba ni/ gzugs kyi chos nyid stong pa nyid yongs su grub pa'i rang bzhin gyis rgyu byas te/ kun brtags pa'i gzugs kyi rang bzhin stong par 'gyur ba ma yin gyi/ gzugs nyid rang bzhin gyis stong ngo zhes bstan pa ste/ de bas na gzugs nyid kyang stong pa nyid do/ /stong pa nyid kyang gzugs so zhes bya bar gsungs te/ gzugs nyid rang bzhin gyis stong pas gzugs dang stong pa tha mi dad do zhes bya ba'i don to/ /gzugs la ji lta ba bzhin du tshor ba nas sangs rgyas kyi chos ma 'dres pa bco brgyad kyi bar du 'jig rten dang 'jig rten las 'das pa'i chos thams cad la yang de bzhin du sbyar bar bya ste/ de ltar don dam par chos thams cad stong pa nyid du ro gcig par rtogs shing kun rdzob kyi rnam pa thams cad mkhyen pa nyid thob par byed pa'i yid la bya ba dang ldan pa de ni shes rab kyi pha rol tu phyin pa yongs su rdzogs par bya ba'i thabs la mkhas pa yin no zhes bstan pa'o/ /rab 'byor gyis gsol pa/ bcom ldan 'das dge ba'i bshes gnyen gyis yongs su zin pa'i byang chub sems dpa' sems dpa' chen pos shes rab kyi pha rol tu phyin pa bstan pa 'di thos na mi 'jigs mi dngang skrag par mi 'gyur ba'i dge ba'i bshes gnyen de gang lags zhes bya ba nas/ rab 'byor 'di ni byang chub sems dpa' sems dpa' chen po'i dge ba'i bshes gnyen du shes par bya ste/ dge ba'i bshes gnyen des yongs su zin pa'i byang chub sems dpa' sems dpa' chen po ni shes rab kyi pha rol tu phyin pa 'di thos na mi 'jigs mi dngang skrag par mi 'gyur ro zhes bya ba'i bar du ni/ dge ba'i bshes gnyen la brten pa'i thabs la mkhas pa bstan te/ dge ba'i bshes gnyen de yang phung po dang / skye mched dang / khams dang / reg pa drug dang / reg pa las byung ba'i tshor ba drug dang / rten cing 'brel te 'byung ba dang / pha rol tu phyin pa rnams dang / stong pa nyid rnams dang / dran pa nye bar gzhag pa rnams dang / yang dag par spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams dang / 'phags pa'i lam rnams dang / 'phags pa'i bden pa rnams dang / bsam gtan rnams dang / tshad med pa rnams dang / gzugs med pa'i snyoms par 'jug pa rnams dang / rnam par thar pa rnams dang / mthar gyis gnas pa'i snyoms par 'jug pa rnams dang / rnam par thar pa'i sgo rnams dang / mngon par shes pa rnams dang / ting nge 'dzin rnams dang / gzungs kyi sgo rnams dang / de bzhin gshegs pa'i stobs rnams dang / mi 'jigs pa rnams dang / so so yang dag par rig pa rnams dang / snying rje chen po dang / sangs rgyas kyi chos ma 'dres pa rnams dang / rnam pa thams cad mkhyen pa nyid dang / bla na med pa'i byang chub kyi bar du 'jig rten dang 'jig rten las 'das pa'i chos rnams mi rtag pa dang / sdug bsngal ba dang / bdag med pa dang / zhi ba dang / stong pa nyid dang / mtshan ma med pa dang / smon pa med pa dang / mngon par 'du bya ba med pa dang / dben pa'i rang bzhin yin no zhes kun rdzob tu chos ston cing don dam par de dag thams cad kyang mi dmigs pa'i tshul du chos bstan nas/ de ltar chos bstan cing mnyan pa'i dge ba'i rtsa ba de yang kun rdzob tu nyan thos dang / rang sangs rgyas kyi sa thob par bya ba'i phyir yongs su bsngor mi 'jug par rnam pa thams cad mkhyen pa nyid thob par bya ba'i phyir yongs su bsngor 'jug pa ste/ de lta bu'i dge ba'i bshes gnyen la bsnyen bkur byas nas chos mnyan pa dang shes rab kyi pha rol tu phyin pa'i don zab mo 'di thos nas 'jigs shing dngang ba dang skrag par mi 'gyur ro zhes bstan pa'o/ /phung po dang khams la sogs pa 'jig rten pa'i chos rnams dang / pha rol tu phyin pa drug dang / stong pa bco brgyad rnams bshad pa'i skabs su bsgom pa'i phyir chos ston zhes mi 'byung la/ dran pa nye bar gzhag pa la sogs pa yan chad bsgom pa'i phyir chos ston zhes 'byung ba phung po dang / khams la sogs pa 'jig rten pa'i chos rnams ni mi rtag pa la sogs pa'i rnam par shes par byas nas spang bar bya ba yin pa'i phyir bsgom pa'i phyir chos ston zhes bya ba ma smos so/ /pha rol tu phyin pa drug dang / stong pa bco brgyad ni byang chub sems dpa' rnams kyis thog ma nas rang bzhin gyis goms par 'gyur ba'i phyir chos ston zhes ma smos so/ /dran pa nye bar gzhag pa la sogs pa byang chub kyi phyogs sum cu rtsa bdun dang / 'phags pa'i bden pa bzhi dang / bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / rnam par thar pa brgyad dang / mthar gyis gnas pa'i snyoms par 'jug pa dgu dang / rnam par thar pa'i sgo gsum dang / mngon par shes pa drug rnams ni nyan thos dang rang sangs rgyas dang byang chub sems dpa' rnams kyi thun mong gi chos yin la/ bsgom par bya ba'i chos kyang yin pa'i phyir bsgom pa'i phyir chos ston zhes smos so/ /ting nge 'dzin rnams dang / gzungs kyi sgo rnams ni nyan thos dang rang sangs rgyas dang thun mong ma yin du zin kyang / byang chub sems dpa' dang / sangs rgyas bcom ldan 'das rnams kyi thun mong gi chos yin la/ byang chub sems dpas bsgoms nas thob par bya ba yang yin pa'i phyir bsgom pa'i phyir chos ston pa zhes bya ba smos so/ /de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / snying rje chen po dang / sangs rgyas kyi chos ma 'dres pa bco brgyad rnams ni de bzhin gshegs pa'i spyod yul yin la/ 'bras bu'i chos yin te/ byang chub sems dpas thob par bya ba yin pas bsgom pa'i phyir chos ston zhes smos so/ /rnam pa thams cad mkhyen pa nyid dang byang chub la mi rtag pa la sogs pa ma smos la/ bsgom pa 'ba' zhig smos pa ni de gnyis de bzhin nyid kyi rang bzhin yin pas mi rtag pa la sogs pa mi srid pa'i phyir ro/ /rab 'byor gyis gsol pa/ bcom ldan 'das ji ltar na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ shes rab kyi pha rol tu phyin pa bstan pa 'di thos na 'jigs shing dngang la skrag par 'gyur zhing thabs mi mkhas te/ sdig pa'i grogs po'i lag tu ltung zhing dge ba'i bshes gnyen gyis yongs su spangs pa lags zhes bya ba nas/ de ltar byang chub sems dpa' sems dpa' chen pos sdig pa'i grogs po rnams rig par bya ste/ de ltar shes nas kyang yongs su spang bar bya'o zhes bya ba'i bar gyis ni/ sdig pa'i grogs po yongs su spang ba'i thabs la mkhas pa bstan pa ste/ de la bcom ldan 'das kyis bka' stsal pa/ rab 'byor 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ rnam pa thams cad mkhyen pa nyid dang ldan pa'i yid la bya ba med par shes rab kyi pha rol tu phyin pa bsgom zhing dmigs te/ shes rab kyi pha rol tu phyin pa des rlom sems su byed pa dang zhes bya ba nas/ sbyin pa'i pha rol tu phyin pa bsgom zhing dmigs te/ sbyin pa'i pha rol tu phyin pa des rlom sems su byed pa de lta bu ni/ rab 'byor byang chub sems dpa' sems dpa' chen po shes rab kyi pha rol tu phyin pa la spyod pa'i thabs la mi mkhas par rig par bya'o zhes bya ba'i bar du ni/ pha rol tu phyin pa drug la bsgom pa'i thabs mi mkhas pa bstan pa ste/ de ltar thabs mi mkhas par gyur pa yang dge ba'i bshes gnyen dang mi ldan zhing sdig pa'i grogs po la brten pa las gyur pas de ltar 'gyur ba'i sdig pa'i grogs po spang ba'i thabs la mkhas par bya'o zhes bstan pa'o/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ rnam pa thams cad mkhyen pa nyid dang ldan pa'i yid la bya ba med par gzugs nang stong pa zhes bya bar yid la byed de/ dmigs pa'i tshul gyis nang stong pa nyid kyang dmigs la/ stong pa nyid kyis kyang rlom sems su byed de zhes bya ba nas/ de shes rab kyi pha rol tu phyin pa la spyod pa'i tshe/ rnam pa thams cad mkhyen pa nyid dang ldan pa'i yid la bya ba med par rga shi dngos po med pa'i ngo bo nyid stong pa nyid ces bya bar yid la byed de/ dmigs pa'i tshul gyis dngos po med pa'i ngo bo nyid stong pa nyid kyang dmigs la/ stong pa nyid kyis kyang rlom sems su byed do zhes bya ba'i bar du ni/ phung po lnga dang / skye mched bcu gnyis dang / khams bco brgyad dang / reg pa drug dang / reg pa'i rkyen gyis tshor ba drug dang / sa'i khams la sogs pa khams drug dang / rten cing 'brel bar 'byung ba bcu gnyis rnams re re la yang stong pa nyid bco brgyad dang sbyar te/ stong pa nyid rnams la dmigs pa'i tshul gyis dngos por lta ba dang / stong pa nyid kyis kyang rlom sems su byed cing thabs mi mkhas pas dge ba'i rtsa ba yang rnam pa thams cad mkhyen pa nyid thob par bya ba'i phyir sngo bar mi byed pa bstan te/ de ltar gyur pa yang dge ba'i bshes gnyen dang mi ldan zhing sdig pa'i grogs po la brten pa las gyur pas de ltar 'gyur ba'i sdig pa'i grogs po spang ba'i thabs la mkhas par bya'o zhes bstan pa'o/ /rab 'byor gzhan yang byang chub sems dpa' sems dpa' chen po de shes rab kyi pha rol tu phyin pa la spyod pa'i tshe/ rnam pa thams cad mkhyen pa nyid dang ldan pa'i yid la bya ba med par dran pa nye bar gzhag pa rnams bsgom ste/ dmigs pa'i tshul gyis dran pa nye bar gzhag pa de dag kyang dmigs la/ de dag gis kyang rlom sems su byed do zhes bya ba nas/ de shes rab kyi pha rol tu phyin pa la spyod pa'i tshe/ rnam pa thams cad mkhyen pa nyid dang ldan pa'i yid la bya ba med par sangs rgyas kyi chos ma 'dres pa rnams bsgom ste/ dmigs pa'i tshul gyis sangs rgyas kyi chos ma 'dres pa de dag kyang dmigs la/ sangs rgyas kyi chos ma 'dres pa de dag gis kyang rlom sems su byed do zhes bya ba'i bar du ni/ rnam par byang ba'i chos dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa dang / 'phags pa'i bden pa bzhi dang / bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / rnam par thar pa brgyad dang / mthar gyis gnas pa'i snyoms par 'jug pa dgu dang / rnam par thar pa'i sgo gsum dang / mngon par shes pa drug dang / ting nge 'dzin rnams dang / gzungs kyi sgo rnams dang / de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / snying rje chen po dang / sangs rgyas kyi chos ma 'dres pa bco brgyad rnams bsgom pa'i tshe/ dge ba'i bshes gnyen dang mi ldan zhing sdig pa'i grogs po la brten pas chos de dag la dngos po dmigs pa dang / chos de dag gis kyang rlom sems su byed cing thabs mi mkhas pas dge ba'i rtsa ba yang rnam pa thams cad mkhyen pa nyid du sngo bar mi byed pa bstan te/ de ltar 'gyur ba'i sdig pa'i grogs po spang bar bya ba'i thabs la mkhas par bya'o zhes bstan pa'o/ /gsol pa/ bcom ldan 'das ji ltar na byang chub sems dpa' sems dpa' chen po sdig pa'i grogs pos yongs su zin cing / shes rab kyi pha rol tu phyin pa bstan pa 'di thos nas 'jigs shing dngang la skrag par 'gyur te/ sdig pa'i grogs po'i sug par lhung ba lags zhes bya ba nas/ 'di dag ni gzhan la bstan par mi bya'o zhes zer ba 'di ni rab 'byor byang chub sems dpa' sems dpa' chen po'i sdig pa'i grogs por rig par bya'o zhes bya ba'i bar du ni/ theg pa chung ngu bdag byang chub sems dpa' pha rol tu phyin pa drug la spyod pa las zlog par byed pa'i sdig pa'i grogs po bstan pa'o/ /rab 'byor gzhan yang byang chub sems dpa' sems dpa' chen po'i sdig pa'i grogs po ni 'di ltar bdud sdig to can sangs rgyas kyi cha byad du byas pa dag / byang chub sems dpa' sems dpa' chen po'i drung du 'ongs nas pha rol tu phyin pa drug las bzlog cing mos pa med par byed de zhes bya ba nas/ sbyin pa'i pha rol tu phyin pa bsgoms pas khyod la ci zhig bya zhes zer ba 'ong ngo zhes bdud kyi las mi ston/ bdud kyi nyes pa mi ston pa 'di ni rab 'byor byang chub sems dpa' sems dpa' chen po'i sdig pa'i grogs por rig par bya'o zhes bya ba'i bar du ni/ bdud sdig to can dag sangs rgyas kyi cha byad du bsgyur nas byang chub sems dpa' pha rol tu phyin pa drug bsgom pa las bzlog pa dag 'ong ngo zhes bdud kyi las de lta bu dag / byang chub sems dpa' la snga nas mi ston cing mi 'chad pa nyid dge ba'i bshes gnyen ma yin pas sdig pa'i grogs po yin no zhes bstan pa'o/ /rab 'byor gzhan yang bdud sdig to can dag sangs rgyas kyi cha byad du byas shing byang chub sems dpa' sems dpa' chen po'i drung du phyin te/ nyan thos dang ldan pa'i mdo dang / dbyangs kyis bsnyad pa dang zhes bya ba nas/ bdud kyi las rnam pa 'di lta bu dag mi smra mi ston pa ni byang chub sems dpa' sems dpa' chen po'i sdig pa'i grogs por rig par bya'o zhes bya ba'i bar du ni/ bdud sdig to can dag sangs rgyas kyi cha byad du bsgyur cing byang chub sems dpa' nyan thos kyi theg par gtogs pa'i gsung rab yan lag bcu gnyis zhib tu ston cing / theg pa chen po'i las zlog par byed pa de lta bu'i bdud kyi las dag 'byung ngo zhes mi ston pa yang dge ba'i bshes gnyen ma yin pas de nyid sdig pa'i grogs po yin par bstan pa ste/ de la mdo zhes bya ba ni sangs rgyas kyis bshad pa yang rung / sangs rgyas kyis gnang ste nyan thos kyis bshad pa yang rung / don mdo tsam du ston pa'o/ /dbyangs kyis bsnyad pa zhes bya ba ni mdo sde bshad pa'i don dbyangs kyis brjod pa la yang bya/ yang rnam pa gcig tu na mdo sde las 'byung ba'i tshig gzu bor ma gsungs te/ drang ba'i don du gsungs pa dag da dung bshad cing dgrol dgos pa gzhan yang yod pas/ de'i don bsnyad cing bshad dgos pa'i phyir dbyangs kyis bsnyad pa zhes bya'o/ /lung bstan pa zhes bya ba ni byang chub sems dpa' dang / nyan thos la sogs pa 'das pa dang / ma 'ongs pa dang / da ltar gyi cir gyur pa dang / cir 'gyur ba la sogs pa bye brag tu lung ston pas na lung ston pa zhes bya'o/ /tshigs su bcad pa zhes bya ba ni mdo sde'i don de nyid tshigs bcad rtsa ba gnyis pa dang / gsum pa dang / bzhi pa dang / lnga pa dang / drug par sbyar te bshad pas na tshigs su bcad pa zhes bya'o/ /ched du brjod pa zhes bya ba ni gang zag 'ga'i phyir bshad pa ma yin gyi/ sangs rgyas kyi bstan pa yun ring du gnas par bya ba'i phyir gzhan gyis ma bskul ma gsol bar ched du brjod cing gsungs pa la bya ste/ dper na phyi dro'i dus kyi tshe bcom ldan 'das nang du yang dag 'jog las bzhengs te/ gdan la bzhugs nas dge slong gi dge 'dun rnams la ched du brjod do zhes mdo las gsungs pa lta bu'o/ /gleng gzhi zhes bya ba ni mdo sde dang 'dul ba la sogs pa thog ma ci las glengs te bshad pa dang / gzhi 'di dang skabs 'di dang / byung ba 'di'i tshe bslab pa bcas so zhes bya ba lta bu'o/ /'di ltar 'das pa dang zhes bya ba ni sngon byung ba'i gtam bzlas shing bshad pa la bya'o/ /skyes pa'i rabs zhes bya ba ni bcom ldan 'das sngon byang chub sems dpa'i spyad pa spyod pa'i tshe gang dang gang du skyes pa dang / dka' ba ci dang ci mdzad pa bstan pa'o/ /shin tu rgyas pa zhes bya ba ni mdo sde'i don spros shing shin tu rgyas par bshad pa'o/ /chos rmad du byung ba zhes bya ba ni sangs rgyas dang byang chub sems dpa' dang / nyan thos rnams kyi mkhyen pa dang / rdzu 'phrul dang byin gyi rlabs ngo mtshar rmad du byung ba rnams ston pa'o/ /rtogs pa brjod pa zhes bya ba ni chos nyan pa rnams kyis go zhing rtogs par bya ba'i phyir sngon brtags par byung ba gzhan yang smos te dpes brjod cing rtogs par byed pa'o/ /gtan la dbab pa bstan pa zhes bya ba ni mdo sde'i don bshad pa'i rgyus zhib mor gtan la phab ste/ rjes su mthun par 'chad pa ste/ chos mngon pa lta bu la bya'o/ /ston to 'grel to rnam par 'byed do/ /gsal bar byed do yongs su ston to zhes bya ba ni de lta bu'i mdo sde nyan thos kyi theg par gtogs pa rnams 'chad pa'i rnam grangs la bya'o/ /de ltar rnam grangs su smos pa yang 'khor rnams las la la cis go / la la cis go bar 'gyur ba'i phyir ro/ /rab 'byor gzhan yang bdud sdig to can dag sangs rgyas kyi cha byad du byas shing byang chub sems dpa' sems dpa' chen po'i drung du phyin te/ 'di skad du rigs kyi bu khyod la ni byang chub kyi sems kyang cung zad kyang med ces bya ba la sogs pa ni bdud sdig to can kha cig ni sangs rgyas kyi cha byad du bsgyur zhing / byang chub sems dpa' la byang chub kyi sems kyang med cing phyir mi ldog pa yang ma yin pas bla na med pa yang dag par rdzogs pa'i byang chub tu mngon par 'tshang rgya bar mi nus kyis thong shig ces zer ba'i bdud kyi las de lta bu dag mi ston pa yang sdig pa'i grogs po yin par bstan pa'o/ /rab 'byor gzhan yang bdud sdig to can dag sangs rgyas kyi cha byad du byas shing byang chub sems dpa' sems dpa' chen po'i drung du phyin te/ 'di skad du rigs kyi bu mig ni bdag gam bdag gis stong ngo zhes bya ba nas/ sangs rgyas kyi chos ma 'dres pa rnams ni bdag gam bdag gis stong ngo / /de ltar bdag gam bdag gis stong na bla na med pa yang dag par rdzogs pa'i byang chub tu mngon par sangs rgyas te yang ci zhig bya zhes zer ba de lta bu'i bar du bdud kyi las dag mi smra/ mi ston pa 'di ni byang chub sems dpa' sems dpa' chen po'i sdig pa'i grogs por rig par bya'o zhes bya ba'i bar du ni bdud sdig to can la la sangs rgyas kyi cha byad du bsgyur zhing byang chub sems dpa' sems dpa' chen po la/ dge ba'i bar chad bya ba'i phyir mig la sogs pa 'jig rten pa'i chos rnams dang / pha rol tu phyin pa la sogs pa 'jig rten las 'das pa'i chos thams cad bdag dang bdag gi ba med de/ stong na bla na med pa'i byang chub tu mngon par 'tshang rgya bar yang ci zhig yod ces zer zhing slu bar byed pa de lta bu'i bdud kyi las dag ni ston pa yang sdig pa'i grogs po yin par bstan pa'o/ /rab 'byor gzhan yang bdud sdig to can dag sangs rgyas kyi cha byad du byas shing byang chub sems dpa' sems dpa' chen po'i drung du phyin te/ 'di skad du rigs kyi bu shar phyogs ni sangs rgyas bcom ldan 'das dang / byang chub sems dpa' dang / nyan thos rnams kyis stong ste zhes bya ba la sogs pa ni bdud sdig to can la la sangs rgyas kyi cha byad du bsgyur zhing byang chub sems dpa' la dge ba'i bar chad bya ba'i phyir phyogs bcu kun na yang sangs rgyas dang / byang chub sems dpa' dang / nyan thos rnams med de khyod kyis dge ba spyad kyang sangs rgyas la sogs par gyur pa'i gnas gang med do zhes zer ba'i bdud kyi las de lta bu dag mi ston pa yang sdig pa'i grogs po yin par bstan pa'o/ /rab 'byor gzhan yang bdud sdig to can dag nyan thos kyi cha byad du byas shing zhes bya ba la sogs pa ni bdud sdig to can la la nyan thos kyi cha byad du bsgyur zhing byang chub sems dpa' rnam pa thams cad mkhyen pa nyid thob par byed pa las bzlog ste/ nyan thos dang rang sangs rgyas kyi sa thob par bya ba la 'doms shing rjes su ston pa dag kyang 'byung ste/ de lta bu'i bdud kyi las dag kyang sdig pa'i grogs po yin par bstan pa'o/ /rab 'byor gzhan yang bdud sdig to can dag mkhan po dang slob dpon gyi cha byad du byas shing zhes bya ba nas/ bla na med pa yang dag par rdzogs pa'i byang chub kyis khyod la ci zhig bya zhes zer ba de lta bu'i bdud kyi las dag mi smra mi ston pa 'di ni/ byang chub sems dpa' sems dpa' chen po'i sdig pa'i grogs por rig par bya'o zhes bya ba'i bar du ni/ bdud sdig to can kha cig mkhan po dang slob dpon gyi cha byad du bsgyur zhing / byang chub sems dpa'i spyod pa dang / rnam pa thams cad mkhyen pa nyid yid la byed pa las bzlog ste/ nyan thos dang rang sangs rgyas kyi yid la bya bas theg pa chung ngu'i byang chub kyi phyogs la sogs pa la spyod du 'jug cing nyan thos dang rang sangs rgyas kyi sa thob par gyis shig / theg pa chen pos khyod la ci zhig bya zhes zer ba de lta bu'i bdud kyi las dag mi ston pa yang sdig pa'i grogs po yin par bstan pa'o/ /rab 'byor gzhan yang bdud sdig to can dag pha dang ma'i cha byad du byas shing zhes bya ba nas/ dgra bcom pa'i 'bras bu mngon sum du byar yod pa de la brtson par gyis shig ces zer ba de lta bu'i bdud kyi las dag mi smra mi ston pa 'di ni byang chub sems dpa' sems dpa' chen po'i sdig pa'i grogs por rig par bya'o zhes bya ba'i bar du ni/ bdud sdig to can la la byang chub sems dpa' la dge ba'i bar chad bya ba'i phyir byang chub sems dpa'i spyad pa bya dka' ba spyod pa 'khor ba na yun ring du gnas pa dang / lus dang srog mi phangs par bya dgos pa la sogs pas bsdigs nas/ de lta bu'i dka' ba spyad pas kyang yun ring pos thob par 'gyur ba'i bla na med pa'i byang chub des khyod la ci zhig bya/ de bas sla ba nyan thos kyi lam gyis rgyun du zhugs pa'i 'bras bu la sogs pa myur du thob par 'gyur ba de lta bu la brtson par gyis shig ces zer ba de lta bu'i bdud kyi las dag mi ston pa de yang sdig pa'i grogs po yin no zhes bstan pa'o/ /rab 'byor gzhan yang bdud sdig to can dge slong gi cha byad du byas shing zhes bya ba nas/ sangs rgyas kyi chos ma 'dres pa rnams dben zhes bya bar dmigs pa'i tshul gyis ston pa de lta bu'i bdud kyi las kyi rnam pa dag mi smra mi ston pa 'di ni byang chub sems dpa' sems dpa' chen po'i sdig pa'i grogs por rig par bya'o zhes bya ba'i bar du ni/ bdud sdig to can kha cig dge slong gi tshul du bsgyur zhing / byang chub sems dpa' la dge ba'i bar chad bya ba'i phyir phung po lnga la sogs pa 'jig rten pa'i chos rnams dang / pha rol tu phyin pa drug la sogs pa 'jig rten las 'das pa'i chos rnams la mi rtag pa dang / sdug bsngal ba dang / bdag med pa dang / zhi ba dang / stong pa nyid dang / mtshan ma med pa dang / smon pa med pa dang / mngon par 'du bya ba med pa dang / dben pa zhes bya bar dmigs pa'i tshul gyis chos ston cing / rnam pa thams cad mkhyen pa nyid yid la byed pa las bzlog pa ste/ theg pa chung ngu'i lta ba la 'jug par byed pa de lta bu'i bdud kyi las dag mi ston pa de yang sdig pa'i grogs po yin no zhes bstan pa ste/ 'di yan chad du brtson pa'i rab tu dbye ba bshad zin to/ /shes rab kyi pha rol tu phyin pa 'bum pa rgya cher bshad pa las le'u bdun pa'o/ / //de'i 'og tu bshad pa 'di gtan la dbab pa de bstan par bya ste/ bshad pa 'di zhes bya ba yang dang por/ sha ra dwa ti'i bu 'di la byang chub sems dpa' sems dpa' chen po chos thams cad rnam pa thams cad du mngon par rdzogs par 'tshang rgya bar 'dod pas shes rab kyi pha rol tu phyin pa la brtson par bya'o zhes bya ba la sogs pa gsungs pa'i tshig dang don zhib tu gtan la phab ste bstan pa'o/ /gtan la dbab pa de yang rnam pa gnyis te/ tshig gi don gtan la dbab pa dang / mtshan nyid gtan la dbab pa'o/ /de la tshig gi don gtan la dbab pa ni/ de nas tshe dang ldan pa rab 'byor gyis bcom ldan 'das la 'di skad ces gsol to/ /bcom ldan 'das byang chub sems dpa' byang chub sems dpa' zhes bgyi ba'i tshig 'di'i don gang lags zhes bya ba la sogs pa gsungs pa ste/ de la rab 'byor byang chub sems dpa'i tshig gi don ni tshig gi don med pa ste zhes bya ba ni byang chub sems dpa' zhes bgyi ba'i tshig gi don 'di gang lags zhes rab 'byor gyis zhus pa'i lan du/ byang chub sems dpa' nyid don dam par dngos po yod par ma grub pas/ de'i tshig gi don kyang don dam par yod pa ma yin no zhes mdor bstan pa'o/ /de ci'i phyir zhe na/ byang chub kyang ma skyes la/ sems can kyang ma skyes pa'i phyir te zhes bya ba ni/ byang chub sems dpa'i tshig gi don med pa'i gtan tshigs bstan pa ste/ don dam par chud par bya ba'i byang chub kyang ma skyes la/ chud par byed pa'i sems can kyang ma skyes pa'i phyir byang chub sems dpa' zhes bya ba med do zhes bstan pa'o/ /rab 'byor byang chub sems dpa' la yang tshig med/ sems can la yang tshig med pas de'i phyir byang chub sems dpa'i tshig gi don ni tshig gi don med pa'o zhes bya ba ni/ tshig gi don med pa'i gtan tshigs bstan pa ste/ rgya gar gyi skad du/ ba da zhes bya ba tshig la yang bya/ gzhi la yang bya/ gnas la yang bya ste/ byang chub dang sems dpa' gnyi ga don dam par dngos po yod par ma grub pas de ston pa'i tshig gam/ de'i gnas sam gzhi yang med pa'i phyir byang chub sems dpa' zhes bya ba'i tshig gi don med do zhes bstan pa'o/ /rab 'byor 'di lta ste dper na/ nam mkha' la bya'i rjes med do zhes bya ba la sogs pa ni/ de ltar byang chub sems dpa'i tshig gi don med pa'i dpe rnam pa bcu gcig bstan pa ste/ nam mkha' la bya'i rjes med pa ni dpe dang po ste/ ji ltar nam mkha' la bya'i rjes snang ba'i gzhi med pa de bzhin du byang chub sems dpa' zhes bya ba yang don dam par dngos po yod pa ma yin pas tshig gis brjod par bya ba'i don gyi gzhi'am gnas med do zhes bstan pa'o/ /rab 'byor 'di lta ste dper na/ rmi lam la gnas med do zhes bya ba la sogs pa ni rmi lam dang / sgyu ma dang / smig rgyu dang / chu zla dang / sgra brnyan dang / mig yor dang / gzugs brnyan dang / sprul pa dang brgyad kyis byang chub sems dpa'i tshig gi don med pa'i dpe gnyis pa bstan te/ ji ltar rmi lam la sogs pa de dag yang dag par yod pa ma yin pa de bzhin du/ byang chub sems dpa'i tshig gi don kyang yod pa ma yin no zhes bstan pa'o/ / rab 'byor 'di lta ste dper na/ yang dag pa'i mtha' la gnas med do zhes bya ba la sogs pa ni yang dag pa'i mtha' dang / de bzhin nyid dang / ma nor ba de bzhin nyid dang / gzhan ma yin pa de bzhin nyid dang / chos nyid dang / chos kyi dbyings nyid dang / chos kyi gnas nyid dang / chos skyon med pa nyid dang brgyad kyis byang chub sems dpa'i tshig gi don med pa'i dpe gsum pa bstan te/ ji ltar yang dag pa'i mtha' la sogs pa 'dus ma byas pa'i dngos po 'di dag don dam par dngos po yod pa ma yin pa de bzhin du byang chub sems dpa'i tshig gi don kyang don dam par yod pa ma yin no zhes bstan pa'o/ /rab 'byor 'di lta ste dper na/ sgyu ma'i skyes bu'i gzugs la gnas med do zhes bya ba nas/ rab 'byor 'di lta ste dper na/ sgyu ma'i skyes bu sangs rgyas kyi chos ma 'dres pa bco brgyad la spyod pa'i tshig gi don med do/ / rab 'byor de bzhin du byang chub sems dpa' sems dpa' chen po shes rab kyi pha rol tu phyin pa la spyod pa'i byang chub sems dpa'i tshig gi don med do zhes bya ba'i bar du ni/ sgyu ma'i skyes bu'i phung po dang / skye mched dang / khams dang / reg pa drug dang / reg pa'i rkyen gyis tshor ba drug dang / ma rig pa la sogs pa nang gi rten cing 'brel par 'byung ba yan lag bcu gnyis la gnas med pa dang / sgyu ma'i skyes bu de nyid pha rol tu phyin pa drug la spyod pa dang / stong pa nyid bco brgyad la spyod pa dang / byang chub kyi phyogs sum cu rtsa bdun la spyod pa dang / 'phags pa'i bden pa bzhi la spyod pa dang / bsam gtan bzhi la spyod pa dang / tshad med pa bzhi la spyod pa dang / gzugs med pa'i snyoms par 'jug pa bzhi la spyod pa dang / rnam par thar pa brgyad la spyod pa dang / mthar gyis gnas pa'i snyoms par 'jug pa dgu la spyod pa dang / rnam par thar pa'i sgo gsum la spyod pa dang / mngon par shes pa drug la spyod pa dang / ting nge 'dzin rnams la spyod pa dang / de bzhin gshegs pa'i stobs bcu la spyod pa dang / mi 'jigs pa bzhi la spyod pa dang / so so yang dag par rig pa bzhi la spyod pa dang / byams pa chen po la spyod pa dang / snying rje chen po la spyod pa dang / sangs rgyas kyi chos ma 'dres pa bco brgyad la spyod pa la tshig gi don med pa'i dpes byang chub sems dpa'i tshig gi don med pa bstan pa ste/ de ni sgyu ma'i skyes bu'i dpe ste bzhi pa'o/ /rab 'byor 'di lta ste dper na/ de bzhin gshegs pa dgra bcom pa yang dag par rdzogs pa'i sangs rgyas kyi gzugs la gnas med do zhes bya ba nas/ rab 'byor 'di lta ste dper na/ de bzhin gshegs pa dgra bcom pa yang dag par rdzogs pa'i sangs rgyas kyi sangs rgyas kyi chos ma 'dres pa bco brgyad la gnas med do/ /de ci'i phyir zhe na/ sangs rgyas kyi chos ma 'dres pa de dag med pa'i phyir te/ rab 'byor de bzhin du byang chub sems dpa' sems dpa' chen po shes rab kyi pha rol tu phyin pa la spyod pa'i byang chub sems dpa'i tshig gi don med do zhes bya ba'i bar du ni/ de bzhin gshegs pa'i chos kyi sku'i gzugs la sogs pa phung po lnga dang / skye mched bcu gnyis dang / khams bco brgyad dang / reg pa drug dang / reg pa'i rkyen gyis tshor ba drug dang / nang gi rten cing 'brel par 'byung ba yan lag bcu gnyis dang / pha rol tu phyin pa drug dang / stong pa bco brgyad dang / byang chub kyi phyogs sum cu rtsa bdun dang / 'phags pa'i bden pa bzhi dang / bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / rnam par thar pa brgyad dang / mthar gyis gnas pa'i snyoms par 'jug pa dgu dang / rnam par thar pa'i sgo gsum dang / mngon par shes pa drug dang / ting nge 'dzin rnams dang / gzungs kyi sgo rnams dang / de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / snying rje chen po dang / sangs rgyas kyi chos ma 'dres pa bco brgyad rnams la gnas med pa'i dpes/ byang chub sems dpa'i tshig gi don med pa bstan pa ste/ ji ltar de bzhin gshegs pa'i chos kyi sku la phung po la sogs pa'i chos ming gis smos pa rnams la yod pa ma yin te/ de dag gi gnas med pa de bzhin du byang chub sems dpa'i tshig gi don kyang med do zhes bstan pa ste/ de ni de bzhin gshegs pa'i chos kyi sku'i dpe ste lnga pa'o/ /rab 'byor 'di lta ste dper na/ 'dus ma byas kyi dbyings la 'dus byas kyi khams kyi gnas med do zhes bya ba ni/ ji ltar mya ngan las 'das pa la 'khor ba'i gnas med pa de bzhin du byang chub sems dpa'i gnas med do zhes bstan pa ste/ de ni 'dus ma byas la 'dus byas med pa'i dpe ste drug pa'o/ /'dus byas kyi khams la 'dus ma byas kyi dbyings kyi gnas med do zhes bya ba ni ji ltar 'khor ba la mya ngan las 'das pa'i gnas med pa de bzhin du byang chub sems dpa' la yang byang chub kyi gnas med do zhes bstan pa ste/ de ni 'dus byas la 'dus ma byas med pa'i dpe ste bdun pa'o/ /rab 'byor 'di lta ste dper na/ skye ba med pa la gnas med do zhes bya ba nas/ rab 'byor 'di lta ste dper na/ mi dmigs pa la gnas med do/ /rab 'byor de bzhin du byang chub sems dpa' sems dpa' chen po shes rab kyi pha rol tu phyin pa la spyod pa'i byang chub sems dpa'i tshig gi don med do zhes bya ba'i bar du ni/ ji ltar skye ba med pa dang / 'gag pa med pa dang / kun nas nyon mongs pa med cing rnam par byang ba med pa dang / mngon par 'du bya ba med pa dang / 'byung ba med pa dang / mi dmigs pa rnams la gnas med pa de bzhin du byang chub sems dpa' la yang tshig gi don med do zhes bstan pa ste/ de ni skye ba med pa la sogs pa'i dpe ste brgyad pa'o/ /gsol pa/ bcom ldan 'das gang gi skye ba ma mchis pa la gnas ma mchis zhes bya ba nas/ sangs rgyas kyi chos ma 'dres pa rnams mi dmigs pa la gnas med do zhes bya ba'i bar du ni/ phung po lnga dang / skye mched bcu gnyis dang / khams bco brgyad dang / reg pa drug dang / reg pa'i rkyen gyis tshor ba drug dang / sa'i khams la sogs pa khams drug dang / rten cing 'brel par 'byung ba'i yan lag bcu gnyis dang / pha rol tu phyin pa drug dang / stong pa nyid bco brgyad dang / byang chub kyi phyogs sum cu rtsa bdun dang / 'phags pa'i bden pa bzhi dang / bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / rnam par thar pa brgyad dang / mthar gyis gnas pa'i snyoms par 'jug pa dgu dang / rnam par thar pa'i sgo gsum dang / mngon par shes pa drug dang / ting nge 'dzin rnams dang / gzungs kyi sgo rnams dang / de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / byams pa chen po dang / snying rje chen po dang / sangs rgyas kyi chos ma 'dres pa bco brgyad rnams so sor phye ste smos nas/ de rnams re re la yang skye ba med pa dang / 'gag pa med pa dang / kun nas nyon mongs pa med cing rnam par byang ba med pa dang / mngon par 'du bya ba med pa dang / mi dmigs pa rnams la gnas med pa'i dpes/ byang chub sems dpa'i tshig gi don med pa bstan pa ste/ de ni chos rnams so sor phye ste bstan pa'i skye ba med pa la sogs pa la gnas med pa'i dpe ste dgu pa'o/ /rab 'byor 'di lta ste dper na/ gzugs shin tu rnam par dag pa la mtshan ma'i gnas med do zhes bya ba nas/ rab 'byor 'di lta ste dper na de bzhin gshegs pa dgra bcom pa yang dag par rdzogs pa'i sangs rgyas kyi rnam par grol ba'i ye shes gzigs pa la rnam par grol ba'i ye shes ma gzigs pa'i gnas med do/ /rab 'byor de bzhin du byang chub sems dpa' sems dpa' chen po shes rab kyi pha rol tu phyin pa la spyod pa'i byang chub sems dpa'i tshig gi don med do zhes bya ba'i bar du ni/ gzugs la sogs pa phung po lnga dang / skye mched bcu gnyis dang / khams bco brgyad dang / reg pa drug dang / reg pa'i rkyen gyis tshor ba drug dang / sa'i khams la sogs pa khams drug dang / rten cing 'brel par 'byung ba'i yan lag bcu gnyis dang / pha rol tu phyin pa drug dang / stong pa nyid bco brgyad dang / byang chub kyi phyogs sum cu rtsa bdun dang / 'phags pa'i bden pa bzhi dang / bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / rnam par thar pa brgyad dang / mthar gyis gnas pa'i snyoms par 'jug pa dgu dang / rnam par thar pa'i sgo gsum dang / mngon par shes pa drug dang / ting nge 'dzin rnams dang / gzungs kyi sgo rnams dang / de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / sangs rgyas kyi chos ma 'dres pa bco brgyad dang / mu stegs can gyis brtags pa'i bdag ming gis smos pa rnams don dam par dngos po med cing shin tu rnam par dag pa la mtshan ma'i gnas med pa'i dpe dang / nyi ma 'char ba'i tshe mun pa'i gnas med pa dang / bskal pa'i me 'bar ba'i tshe rtsi shing la sogs pa skye ba'i gnas med pa dang / de bzhin gshegs pa'i tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes gzigs pa rnams la mi mthun pa'i phyogs rnams med pa'i dpes byang chub sems dpa'i tshig gi don med pa bstan pa ste/ de ni rnam par dag pa'i dpe ste bcu pa'o/ /rab 'byor 'di lta ste dper na/ nyi ma dang zla ba'i 'od la gnas med do zhes bya ba nas/ rab 'byor 'di lta ste dper na/ de bzhin gshegs pa dgra bcom pa yang dag par rdzogs pa'i sangs rgyas rnams kyi 'od la gnas med do/ /rab 'byor de bzhin du byang chub sems dpa' sems dpa' chen po shes rab kyi pha rol tu phyin pa la spyod pa'i byang chub sems dpa'i tshig gi don med do zhes bya ba'i bar du ni nyi ma dang / zla ba dang / gza' dang / skar ma dang / nor bu rin po che dang / glog rnams kyi 'od la gnas med pa dang / 'dod pa'i khams kyi lha'i ris rnams dang / gzugs kyi khams kyi lha'i ris rnams kyi 'od la gnas med pa'i dpe dang / byang chub sems dpa' rnams dang / de bzhin gshegs pa'i 'od la gnas med pa'i dpes byang chub sems dpa'i tshig gi don med pa bstan pa ste/ de ni 'od la gnas pa'i dpe ste bcu gcig pa'o/ /de ci'i phyir zhe na/ rab 'byor 'di ltar byang chub gang yin pa dang / byang chub sems dpa'i tshig gi don gang yin pa'i chos de dag thams cad kyang ldan pa yang ma yin mi ldan pa yang ma yin te zhes bya ba nas/ chos thams cad kyang byang chub sems dpa' sems dpa' chen pos rig par bya'o zhes bya ba'i bar du ni byang chub sems dpa'i tshig gi don med pa'i gtan tshigs bstan pa ste/ chos de dag thams cad kyang ldan pa yang ma yin mi ldan pa yang ma yin zhes bya ba ni byang chub sems dpa' dang / tshig gi don zhes bya ba'i chos de dag don dam par rang bzhin gyis stong pas kun nas nyon mongs pa'i mtshan nyid ma yin pa'i phyir ldan pa yang ma yin no/ /rnam par byang ba'i mtshan nyid ma yin pa'i phyir mi ldan pa yang ma yin no zhes bya ba'i don to/ /gzugs med pa zhes bya ba ni mig la sogs pa'i rnam par shes pas gzung ba'i yul ma yin no zhes bstan pa'o/ / bstan du med pa zhes bya ba ni tshig gis bstan cing brjod pa'i yul ma yin pas 'dzin pa'i rang bzhin ma yin pa zhes bya ba'i don to/ /thogs pa med pa zhes bya ba ni yul dang dbang po ltar thogs pa dang bcas pa'i rang bzhin ma yin no zhes bstan pa'o/ /'di ltar mtshan nyid med par mtshan nyid gcig pa sha stag ste zhes bya ba ni mtshan nyid thams cad dang bral ba'i rang bzhin stong pa nyid du ro gcig pa'o zhes bya ba'i don to/ /rab 'byor byang chub sems dpa' sems dpa' chen pos chos thams cad kyi med pa yang dag pa nyid la bslab par bya'o zhes bya ba ni gong du bshad pa lta bu'i tshul gyis don dam par chos thams cad yod pa ma yin par mnyan pa dang / bsam pa'i shes rab kyis bslab par bya'o zhes bstan pa'o/ /chos thams cad kyang byang chub sems dpa' sems dpa' chen pos rig par bya'o zhes bya ba ni/ de ltar chos thams cad don dam par yod pa ma yin par bsgom pa'i shes rab kyis khong du chud par bya'o zhes bstan pa'o/ /gsol pa/ bcom ldan 'das chos thams cad ni gang lags/ bcom ldan 'das byang chub sems dpa' sems dpa' chen pos ni ma mchis pa yang dag pa nyid la ji ltar bslab par bgyi zhes bya ba la sogs pa ni gong du chos thams cad kyi med pa yang dag pa nyid la bslab par bya'o/ /chos thams cad rig par bya'o zhes bcom ldan 'das kyis bka' stsal pa la/ 'khor gyi nang na kha cig chos thams cad ces bya ba gang dang gang la bya snyam the tshom za ba dang / chos de dag med par ji ltar bslab par bya snyam the tshom za ba dang / chos de dag ji ltar rig par bya snyam du the tshom za ba'i the tshom de bsal ba'i phyir bcom ldan 'das la rab 'byor gyis chos thams cad ni gang lags/ chos thams cad ma mchis pa la ni ji ltar bslab par bgyi/ chos thams cad ni ji ltar rig par bgyi zhes zhus pa dang / /bcom ldan 'das kyis chos thams cad ces bya ba ni dge ba dang / mi dge ba dang / lung du ma bstan pa la sogs pa so sor phye ste 'di dag yin no zhes bstan pa'o/ /de la bcom ldan 'das kyis bka' stsal pa/ rab 'byor chos thams cad ces bya ba ni zhes bya ba nas/ rab 'byor de dag ni chos thams cad ces bya ba ste zhes bya ba'i bar du ni/ chos thams cad ces bya ba'i ming mdor bsdus te bstan pa'o/ /bcom ldan 'das kyis bka' stsal pa/ rab 'byor 'jig rten pa'i chos dge ba zhes bya ba ni zhes bya ba nas/ de dag ni 'jig rten pa'i chos dge ba'o zhes bya ba'i bar du ni 'jig rten pa'i dge ba dang / 'jig rten las 'das pa'i dge ba rnam pa gnyis yod pa las/ 'jig rten pa'i dge ba'i chos rnams logs shig tu phye ste bstan pa'o/ /gsol pa/ bcom ldan 'das 'jig rten pa'i chos mi dge ba gang lags zhes bya ba nas/ rab 'byor de dag ni 'jig rten pa'i chos mi dge ba'o zhes bya ba'i bar du ni mi dge ba'i chos rnams logs shig tu phye ste bstan pa'o/ /gsol pa/ bcom ldan 'das lung du ma bstan pa'i chos gang lags zhes bya ba nas/ rab 'byor de dag ni lung du ma bstan pa'i chos so zhes bya ba'i bar du ni lung du ma bstan pa'i chos rnams logs shig tu phye ste bstan pa ste/ de la lus kyi las ni lung du ma bstan pa'o/ / ngag gi las ni lung du ma bstan pa'o/ /yid kyi las ni lung du ma bstan pa'o/ /lus dang ngag dang yid kyi las la dge ba dang mi dge ba yang yod pas thams cad la lung du ma bstan pa zhes mi bya'i/ lus dang ngag dang yid kyis byas pa'i las dge ba nyid dang / mi dge ba nyid du lung bstan du mi mngon pa rnams la lung du ma bstan pa zhes bya'o/ /'byung ba chen po bzhi la sogs pa gzhan rnams ni rnam par smin pa yin pa'i phyir lung du ma bstan pa zhes bya ste/ de bas na rnam par smin pa thams cad ni lung du ma bstan pa'o zhes gsungs so/ /gsol pa/ bcom ldan 'das 'jig rten pa'i chos gang lags zhes bya ba nas/ 'jig rten las 'das pa'i chos ma gtogs par de ma yin pa'i 'jig rten pa'i chos gang ji snyed yod pa de dag ni 'jig rten pa'i chos zhes bya ba'i bar du ni 'jig rten pa'i chos rnams bstan pa ste/ bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / mngon par shes pa lnga dang / 'jig rten las 'das pa yang yod mod kyi/ skabs 'dir 'jig rten pa'i gang zag 'phags pa ma yin pa rnams kyi rgyud du gtogs pa la bya'o/ / de bas na 'jig rten las 'das pa'i chos ma gtogs pa zhes bya ba gsungs so/ /gsol pa/ bcom ldan 'das 'jig rten las 'das pa'i chos gang lags zhes bya ba nas/ de dag ni 'jig rten las 'das pa'i chos zhes bya ba'i bar du ni 'jig rten las 'das pa'i chos rnams phye ste bstan pa ste/ chos de dag nam 'phags pa rnams kyis bsgom pa'i tshe/ 'khor ba'i rgyur mi 'gyur ba'i phyir 'jig rten las 'das pa zhes bya'o/ /gsol pa/ bcom ldan 'das zag pa dang bcas pa'i chos gang lags zhes bya ba nas/ de dag ni zag pa dang bcas pa'i chos zhes bya'o zhes bya ba'i bar du ni zag pa dang bcas pa'i chos rnams phye ste bstan pa ste/ bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / mngon par shes pa lnga rnams nam 'jig rten pa'i gang zag rnams bsgom pa'i tshe 'khor ba ma spangs pas srid pa gcig nas gcig tu rgyu zhing zag par 'gyur ba'i phyir zag pa dang / bcas pa'i chos zhes bya'o/ /gsol pa/ bcom ldan 'das zag pa ma mchis pa'i chos gang lags zhes bya ba nas/ de dag ni zag pa med pa'i chos zhes bya'o zhes bya ba'i bar du ni zag pa med pa'i chos rnams phye ste bstan pa ste/ dran pa nye bar gzhag pa la sogs pa ming gis smos pa'i chos de rnams mos pas spyod pa'i sa la gnas pas bsgoms na yang 'khor ba spong zhing mya ngan las 'da' ba'i rgyur 'gyur ba dang / 'phags pas bsgoms na yang mya ngan las 'da' ba 'thob ste/ 'khor bar rgyu zhing zag par mi 'gyur ba'i phyir zag pa med pa zhes bya'o/ /gsol pa/ bcom ldan 'das 'dus byas kyi chos gang lags zhes bya ba nas/ de dag ni 'dus byas kyi chos zhes bya'o zhes bya ba'i bar du ni 'dus byas kyi chos rnams phye ste bstan pa ste/ dran pa nye bar gzhag pa la sogs pa 'phags pa'i chos ming gis smos pa 'di rnams lam bsgom pa'i tshe bsgom pa'i shes rab kyis goms par byed pa na sems dang sems las byung ba rnams 'dus shing tshogs pas mngon sum du byas shing thob par bya ba'i phyir 'dus byas kyi chos zhes bya'o/ /gsol pa/ bcom ldan 'das 'dus ma byas kyi chos gang lags zhes bya ba nas/ rab 'byor de dag ni 'dus ma byas kyi chos zhes bya ba'i bar du ni 'dus ma byas kyi chos rnams phye ste bstan pa ste/ skye ba med pa dang / 'jig pa med pa la sogs pa'i chos 'di rnams ye nas de bzhin te/ de ltar sus kyang ma byas pa'i phyir 'dus ma byas pa zhes bya'o/ /gsol pa/ bcom ldan 'das thun mong gi chos gang lags zhes bya ba nas/ de dag ni byis pa so so'i skye bo rnams dang thun mong gi chos zhes bya'o zhes bya ba'i bar du ni thun mong gi chos rnams phye ste bstan pa ste/ bsam gtan dang / tshad med pa la sogs pa'i chos 'di rnams 'jig rten pa byis pa so so'i skye bos kyang bsgom du rung / 'phags pa nyan thos dang / rang sangs rgyas dang / byang chub sems dpa' rnams kyang bsgom pa'i phyir thun mong gi chos zhes bya'o/ /gsol pa/ bcom ldan 'das thun mong ma lags pa'i chos gang lags zhes bya ba nas de dag ni thun mong ma yin pa'i chos zhes bya'o zhes bya ba'i bar du ni/ thun mong ma yin pa'i chos rnams phye ste bstan pa ste/ dran pa nye bar gzhag pa la sogs pa ming gis smos pa'i chos 'di rnams 'jig rten pa rnams mi sgom gyi mos pas spyod pa'i sa la gnas pa dang / 'phags pa rnams bsgom pa'i phyir thun mong ma yin pa'o zhes bstan pa ste/ dge ba dang mi dge ba la sogs pa'i chos ming gis smos pa 'di rnams kyi so so'i mtshan nyid ni 'og nas theg pa chen po bstan pa'i le'u las gzhung nyid las zhib tu 'chad pas 'dir ma bshad do/ /de la byang chub sems dpa' sems dpa' chen po shes rab kyi pha rol tu phyin pa la spyod pas rang gi mtshan nyid kyis stong pa'i chos thams cad la rtog pa med pas chags par mi bya'o zhes bya ba ni/ de ltar chos rnams ris ris su phye ste bstan pa de dag thams cad kyang rang gi mtshan nyid kyis stong pas dngos po yod par rtog cing chags par mi bya'o zhes bstan pa'o/ /chos thams cad gnyis su med pa'i tshul gyis rtog pa med cing / rnam par rtog pa med pa'i phyir chos thams cad khong du chud par bya'o zhes bya ba ni de ltar chos thams cad rang gi mtshan nyid kyis stong pas stong pa nyid du ro gcig ste/ rtog pa dang rnam par rtog pa'i yul ma yin par khong du chud par bya'o zhes byang chub sems dpa' zhes bya ba'i tshig gi don med pa mjug bsdus te bstan pa'o/ /de ltar byang chub sems dpa' zhes bya ba'i tshig gi don bstan nas/ da ni sems dpa' chen po zhes bya ba'i tshig gi don bstan pa'i phyir/ de nas tshe dang ldan pa rab 'byor gyis bcom ldan 'das la 'di skad ces gsol to/ /bcom ldan 'das gang 'di byang chub sems dpa' sems dpa' chen po zhes bgyi ba de ci'i slad du byang chub sems dpa' sems dpa' chen po zhes bgyi zhes bya ba la sogs pa gsungs te/ sems dpa' chen po'i tshig gi don bshad pa 'di yang rnam pa bzhi ste/ bcom ldan 'das kyis bshad pa dang / 'phags pa shA ri'i bus bshad pa dang / rab 'byor gyis bshad pa dang / gang pos bshad pa dang bzhi ste/ de la bcom ldan 'das kyis sems dpa' chen po'i tshig gi don bshad pa ni/ bcom ldan 'das kyis bka' stsal pa/ rab 'byor sems can gyi phung po chen po nges pa'i phul byed par 'gyur bas de'i phyir byang chub sems dpa' sems dpa' chen po zhes bya'o zhes bya ba nas/ rab 'byor chos de dag la gnas shing byang chub sems dpa' sems dpa' chen po shes rab kyi pha rol tu phyin pa la spyod pa'i sems can gyi phung po chen po nges pa'i phul byed pas de'i phyir byang chub sems dpa' sems dpa' chen po zhes bya'o zhes bya ba'i bar du gsungs pa ste/ de la rab 'byor sems can gyi phung po chen po nges par phul byed par 'gyur bas de'i phyir byang chub sems dpa' sems dpa' chen po zhes bya'o zhes bya ba ni sems can nyan thos kyi ris su nges pa dang / rang sangs rgyas kyi ris su nges pa dang / byang chub sems dpa'i ris su nges pa mang po rnams kyi phul byed pa'i phyir sems dpa' chen po zhes bya'o zhes bstan pa'o/ /rab 'byor sems can gyi phung po chen po zhes bya ba ni zhes bya ba nas/ byang chub sems dpa' sems dpa' chen po ni de lta bu'i phul byed par 'gyur ro zhes bya ba'i bar du ni/ sems can gyi phung po chen po gang dang gang yin pa bstan pa ste/ de la rigs kyis zhes bya ba ni mos pas spyod pa'i sa 'jig rten gyi chos mchog la gang zag dang chos la bdag med pa'i bzod pa thob pas byang chub gsum 'thob pa'i rigs dang ldan pas na rigs kyi sa zhes bya'o/ /brgyad pa zhes bya ba ni dgra bcom pa'i 'bras bu thob pa'i gral dang po nas yas bgrangs na rgyun du zhugs pa'i 'bras bu mngon sum du bya ba'i phyir 'jug pa grangs brgyad pa 'bab pas na brgyad pa zhes bya ste/ de ltar brgyad pa dang / rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa rnams ni nyan thos kyi rigs su nges pa'i sems can gyi tshogs so/ /rang sangs rgyas kyi sa dang zhes bya ba ni rang sangs rgyas kyi rigs su nges pa'i sems can gyi tshogs so/ /sems dang po bskyed pa'i byang chub sems dpa' nas phyir mi ldog pa'i sa la gnas pa'i byang chub sems dpa' sems dpa' chen po'i bar dag ste zhes bya ba ni byang chub sems dpa'i rigs su nges pa'i sems can gyi tshogs chen po yin no zhes bstan pa'o/ /de bas na rab 'byor de ni sems can gyi phung po nges pa zhes bya ste zhes bya ba gsungs te/ de ltar rigs so sor nges pa'i sems can gyi tshogs chen po rnams la sems can gyi phung po nges pa zhes bya'o/ /byang chub sems dpa' sems dpa' chen po ni de lta bu'i phul byed par 'gyur ro zhes bya ba ni/ sems can gyi tshogs chen po gong du smos pa de lta bu dag gi phul byed par 'gyur ba'i phyir/ byang chub sems dpa' sems dpa' chen po zhes bya'o zhes bstan pa ste/ byang chub sems dpa' sa dgu pa dang / sa bcu pa la sems dpa' chen po zhes bya ba'i ming du chud par rig par bya'o/ /sems can gyi tshogs chen po de dag gi phul du gyur pa de yang bsam pa rgya che ba dang / sgrub pa rgya che ba gnyis kyis 'gyur te/ de la bsam pa rgya che ba ni/ de la byang chub sems dpa' sems dpa' chen pos rdo rje lta bu'i sems bskyed de sems can gyi phung po chen po nges pa'i phul bya'o zhes bya ba nas/ rab 'byor 'di ni byang chub sems dpa' sems dpa' chen po'i phan pa dang bde ba'i sems te/ de la gnas shing sems can gyi phung po chen po nges pa'i phul mi dmigs pa'i tshul gyis byed do zhes bya ba'i bar gyis bstan te/ bsam pa rgya che ba de yang / rdo rje lta bu'i sems bskyed pa yon tan lnga dang ldan pa ste lnga gang zhe na/ nges par 'joms pa'i yon tan dang / rin che ba'i yon tan dang / skyon med pa'i yon tan dang / mi phyed pa'i yon tan dang / don sgrub nus pa'i yon tan dang lnga'o/ /de la nges par 'joms pa'i yon tan ni shes rab kyi dbang gis yon tan brgyad dang ldan pa'i phyir nges par 'joms pa zhes bya ste/ de la rab 'byor 'di la byang chub sems dpa' sems dpa' chen po 'di ltar sems bskyed de/ 'khor ba dpag tu med par sems can thams cad kyi don du bdag gis go cha bgo bar bya'o/ /bdag gis bdog pa thams cad yongs su gtang bar bya'o zhes bya ba ni ser sna nges par gzhom pa'i phyir/ 'khor ba mtha' yas pa thams cad du sems can gyi don du brtson 'grus kyi go cha bgos te bdog pa thams cad yongs su gtong ba ni ser sna nges par 'joms pa'i yon tan te dang po'o/ /bdag gis sems can thams cad la sems mnyam pa nyid bskyed par bya'o zhes bya ba ni sems can thams cad la byams pa dang / khro ba nges par 'joms pa'i yon tan bstan pa ste gnyis pa'o/ /bdag gis sems can thams cad theg pa gsum gyis yongs su mya ngan las bzla bar bya'o/ /de ltar sems can thams cad yongs su mya ngan las bzlas kyang sems can gang yang yongs su mya ngan las bzlas pa m ed do zhes bya ba ni sems can thams cad theg pa gsum gyi sgo nas yongs su mya ngan las bzlas kyang sems can du 'du shes skye ba med pas sems can gang yang yongs su mya ngan las bzlas so snyam du mi sems pa'i phyir sems can du lta ba la sogs pa lta ba'i nyes pa thams cad nges par 'joms pa'i yon tan bstan pa ste/ nges par 'joms pa'i yon tan gsum pa'o/ /chos thams cad skye ba med pa dang / 'gag pa med pa bdag gis shes par bya'o zhes bya ba ni chos thams cad la dngos por rtog pa nges par 'joms pa'i yon tan bstan pa ste bzhi pa'o/ / bdag gis ma 'dres pa'i rnam pa thams cad mkhyen pa nyid kyi sems kyi pha rol tu phyin pa drug la spyad par bya'o zhes bya ba ni/ nyan thos dang rang sangs rgyas kyi sems dang ma 'dres par rnam pa thams cad mkhyen pa nyid kyi sems kyi pha rol tu phyin pa drug la spyad pas theg pa dman pa'i sems nges par 'joms pa'i yon tan bstan pa ste lnga pa'o/ /bdag gis chos rtogs pa thams cad kyi rjes su 'gro ba phun sum tshogs pa la bslab par bya'o zhes bya ba ni/ byang chub sems dpa'i sa dang po la chos kyi dbyings rnam par dag pa rtogs pa ni stong pa nyid kyis thams cad du khyab pa'i phyir thams cad kyi rjes su 'gro ba zhes bya ste/ de lta bu'i chos rtogs pa dang ldan pa ngan 'gror mi ltung bas ngan 'gro thams cad nges par 'joms pa'i yon tan bstan pa ste drug pa'o/ /bdag gis chos kyi tshul gcig tu bsgrub pa khong du chud par bya'o zhes bya ba ni/ chos thams cad stong pa'i rang bzhin du ro gcig par rtogs pa la tshul gcig tu bsgrub pa khong du chud pa zhes bya ste/ de ltar rtogs pas 'khor ba'i rnam par rtog pa thams cad nges par 'joms pa bstan pa ste bdun pa'o/ /bdag gis chos dpag tu med pa thams cad yongs su bsgrub par bya'o snyam du sems bskyed de zhes bya ba ni byang chub kyi phyogs kyi chos la sogs pa sangs rgyas kyi chos ma 'dres pa'i bar du dkar po'i chos thams cad don dam par rang bzhin gcig par bsgrub par rtogs pa dang / de dag bsgom pa yongs su rdzogs par bya ba rtogs pas rnam par byang ba'i rnam par rtog pa thams cad nges par 'joms pa bstan pa ste/ de ni nges par 'joms pa'i yon tan brgyad pa'o/ /rab 'byor de ni byang chub sems dpa' sems dpa' chen po'i sems bskyed pa rdo rje lta bu ste de la gnas shing byang chub sems dpa' sems dpa' chen po sems can gyi phung po chen po nges pa'i phul mi dmigs pa'i tshul gyis byed do zhes bya ba ni sems bskyed pa rdo rje lta bu ser sna la sogs pa nges par 'joms pa'i yon tan brgyad dang ldan pa mjug bsdus nas bstan pa ste/ de lta bu'i bsam pa rgya chen po dang ldan pas sems can gyi tshogs chen po'i phul byed pa'i phyir byang chub sems dpa' sems dpa' chen po zhes bya'o zhes sems dpa' chen po'i tshig gi don bstan pa'o/ /de ltar sems bskyed pa rdo rje lta bu de nges par 'joms pa'i yon tan brgyad dang ldan pa bstan nas/ de'i 'og tu sems bskyed pa rdo rje lta bu de snying rje dang ldan pas rin che ba bstan pa'i phyir/ rab 'byor gzhan yang byang chub sems dpa' sems dpa' chen po 'di ltar sems bskyed de/ sems can dmyal ba pa dang / byol song gi skye gnas pa dang / gshin rje'i 'jig rten pa'i sems can ji snyed cig ces bya ba la sogs pa gsungs te/ sems can dmyal ba pa dang / byol song gi skye gnas pa dang / gshin rje'i 'jig rten pa'i sems can ji snyed cig sdug bsngal gyi tshor ba nyams su myong bar gyur pa'i sdug bsngal gyi tshor ba de dag thams cad sems can de dag gi don du bdag gis nyams su myong bar bya'o snyam du sems bskyed do zhes bya ba ni snying rje'i dbang gis ngan song rgyud gsum na gnas pa'i sems can rnams kyi sdug bsngal bdag gis nyams su myong bar bya ste/ sems can de dag ngan song gi sdug bsngal de dag las thar bar bya'o snyam du spyir bskyed pa bstan pa'o/ / de la byang chub sems dpa' sems dpa' chen pos gong du sems 'di ltar bskyed par bya ste zhes bya ba nas/ de nas gzod bdag gi don du dge ba'i rtsa ba bskyed de/ bskal pa bye ba khrag khrig brgya stong du mas byang chub kyi tshogs mang po bsags te/ bla na med pa yang dag par rdzogs pa'i byang chub mngon par rdzogs par 'tshang rgya bar bya'o snyam du sems bskyed par bya ste zhes bya ba'i bar du ni/ de bas kyang snying rje shas che zhing thabs mkhas pas ngan song gi sems can re re'i don du yang yun ring por sdug bsngal myong bar byed cing / sems can de dag kyang sdug bsngal de dag las thar bar byas nas bla na med pa'i byang chub tu mya ngan las ma 'das kyi bar du mi gtong zhing de dag yongs su mya ngan las 'das nas gdod bdag gi don byed pa'i sgo nas sems bskyed pa rdo rje lta bu de snying rje dang ldan pa'i rin che ba bstan pa'o/ /rab 'byor gzhan yang byang chub sems dpa' sems dpa' chen pos rtag tu rgyun mi 'chad par rlabs po che'i sems gang gis sems can thams cad kyi phul du 'gyur ba de lta bu'i sems rlabs po che bskyed par bya'o zhes bya ba nas/ sems rlab po che des rlom sems su mi bya'o zhes bya ba'i bar du ni/ sems bskyed pa rdo rje lta bu de skyon med pa bstan pa ste/ byang chub sems dpa'i sa dang po thob ste sems dang po bskyed phyin chad 'dod chags dang / zhe sdang dang / gti mug dang / sems can la 'tshe ba'i sems mi skyed cing / nyan thos dang rang sangs rgyas kyi sems dman pa mi skyed par bla na med pa'i byang chub kyi sems rlab po che bskyed pas sems can thams cad kyi phul byed kyang sems rlabs po che des rlom sems su mi 'gyur ba de ni skyon med pa ste/ de'i phyir byang chub sems dpa' sems dpa' chen po zhes bya ba'i tshig gi don bstan pa'o/ /rab 'byor gzhan yang byang chub sems dpa' sems dpa' chen pos mi sgul ba'i sems dang ldan par bya ste zhes bya ba nas/ 'di ni byang chub sems dpa' sems dpa' chen po'i sems mi sgul ba'o zhes bya ba'i bar du ni/ sems bskyed pa rdo rje lta bu de cis kyang mi phyed pa'i yon tan bstan pa ste rnam pa thams cad mkhyen pa nyid dang ldan pa'i yid la byed pa dang ma bral bas bdud la sogs pa mi mthun pa'i phyogs rnams kyis bar du mi phyed cing mi sgul ba'i phyir ro/ /rab 'byor gzhan yang byang chub sems dpa' sems dpa' chen pos sems can thams cad la phan pa dang bde ba'i sems bskyed par bya'o zhes bya ba nas/ rab 'byor 'di ni byang chub sems dpa' sems dpa' chen po'i phan pa dang / bde ba'i sems te de la gnas shing sems can gyi phung po chen po nges pa'i phul mi dmigs pa'i tshul gyis byed do zhes bya ba'i bar du ni/ sems bskyed pa rdo rje lta bu de sems can thams cad kyi don sgrub pa'i yon tan bstan pa ste/ bsam pa rgya che ba dang ldan pas sems can thams cad la phan pa dang bde ba rnam pa sna tshogs sgrub cing sems can yongs su skyob pas mi skyo ste/ sems can yongs su mi gtong ba'i bsam pa rgya che bas sems can gyi tshogs chen po'i phul byed pa'i phyir byang chub sems dpa' sems dpa' chen po zhes bya'o zhes sems dpa' chen po'i tshig gi don bstan to/ /de ltar bsam pa rgya che ba bstan nas/ sgrub pa rgya che ba bstan pa'i phyir/ rab 'byor gzhan yang byang chub sems dpa' chen sems dpa' chen pos rtag tu rgyun mi 'chad par chos 'dod par bya'o zhes bya ba la sogs pa gsungs te/ sgrub pa rgya che ba de yang chos la dga' bar gnas pa dang / stong pa nyid la gnas pa dang / dran pa nye bar gzhag pa la sogs pa dkar po'i chos la gnas pa dang / ting nge 'dzin la gnas pa dang rnam pa bzhis bstan to/ /de la chos la dga' bar gnas pa ni rtag tu rgyun mi 'chad par chos 'dod par bya'o zhes bya ba nas/ 'di ni chos la mos pa'i rnal 'byor la brtson pa zhes bya'o zhes bya ba'i bar du ni/ chos la dga' bar gnas pa'i sgrub pa bstan pa ste/ de la chos 'dod pa dang / chos la dga' ba ni nyan pa'i tshe chos la dga' bar gnas pa'o/ /chos la mos pa ni sems pa'i tshe chos la dga' bar gnas pa'o/ /chos la mos pa'i rnal 'byor la brtson pa ni bsgom pa'i tshe chos la dga' bar gnas pa'o/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pas nang stong pa nyid la gnas zhes bya ba nas/ dngos po med pa'i ngo bo nyid stong pa nyid la gnas te/ sems can gyi phung po chen po nges pa'i phul du 'gyur bar bya'o zhes bya ba'i bar du ni stong pa nyid la gnas pa'i sgrub pa bstan to/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pas dran pa nye bar gzhag pa rnams la gnas zhes bya ba nas/ sangs rgyas kyi chos ma 'dres pa bco brgyad la gnas te/ sems can gyi phung po nges pa'i phul du mi dmigs pa'i tshul gyis 'gyur bar bya'o zhes bya ba'i bar du ni/ dran pa nye bar gzhag pa la sogs pa dkar po'i chos rnams la gnas pa bstan to/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pas dpa' bar 'gro ba'i ting nge 'dzin la gnas zhes bya ba nas/ nam mkha' ltar chags pa med pas rnam par grol zhing gos pa med pa'i ting nge 'dzin la gnas te/ sems can gyi phung po chen po nges pa'i phul du mi dmigs pa'i tshul gyis 'gyur bar bya'o zhes bya ba'i bar du ni ting nge 'dzin la gnas pa'i sgrub pa bstan te/ ting nge 'dzin 'di rnams kyi mtshan nyid ni 'og nas ting nge 'dzin gyi theg pa chen po'i skabs nas zhib tu 'chad do/ /rab 'byor chos de dag la gnas shing byang chub sems dpa' sems dpa' chen po shes rab kyi pha rol tu phyin pa la spyod pas sems can gyi phung po chen po nges pa'i phul byed pas/ de'i phyir byang chub sems dpa' sems dpa' chen po zhes bya'o zhes bya ba ni byang chub sems dpa' sems dpa' chen po zhes bya ba'i tshig gi don bcom ldan 'das kyis bshad par mjug bsdus te bstan pa'o/ /de'i 'og tu 'phags pa shA ri'i bus byang chub sems dpa' sems dpa' chen po zhes bya ba'i tshig gi don bshad pa bstan pa'i phyir/ tshe dang ldan pa sha ra dwa ti'i bus bcom ldan 'das la 'di skad ces gsol to/ /bcom ldan 'das don gang gi slad du byang chub sems dpa' sems dpa' chen po zhes bgyi ba 'di la bdag kyang spobs pa skye'o zhes bya ba la sogs pa gsungs te/ byang chub sems dpa' sems dpa' chen po zhes bya ba'i tshig gi don 'phags pa shA ri'i bus bshad pa'i don ni gang zag dang chos gnyi ga la bdag med pa'i don chen po rtogs nas bdag tu lta ba la sogs pa spang ba dang / phung po la sogs pa chos su lta ba spang ba'i phyir sems can mang po la gang zag dang / chos la bdag med pa'i don chen po ston pas byang chub sems dpa' sems dpa' chen po zhes bya'o zhes bshad pa ste/ de la byang chub sems dpa' nyid kyis gang zag la bdag med par rtogs nas sems can rnams gang zag la bdag tu lta ba spang ba'i phyir/ gang zag la bdag med pa'i don chen po ston pa ni/ bcom ldan 'das bdag tu lta ba rab tu spang ba'i slad du sems can rnams la chos ston pa dang zhes bya ba nas med par lta ba rab tu spang ba dang zhes bya ba'i bar gyis bstan te/ mu stegs can rnams kyis phyin ci log tu mthong nas lus dang sems kyi bya ba byed pa'i bye brag las/ bdag dang sems can dang srog dang gang zag la sogs pa bdag gi rnam pa du mar brtags pa rnams la phyir gang zag la bdag tu lta ba zhes bya ste/ byang chub sems dpa' gang zag la bdag tu lta ba med par rtogs nas sems can rnams la gang zag bdag med pa'i chos don chen po ston pa'i phyir byang chub sems dpa' sems dpa' chen po zhes bgyi'o zhes bya ba 'og nas 'byung ba dang sbyar ro/ /phung por lta ba rab tu spang ba dang / khams su lta ba rab tu spang ba dang zhes bya ba nas/ yongs su mya ngan las 'da' bar lta ba rab tu spang ba'i slad du sems can rnams la chos ston par bgyid kyang de mi dmigs pa'i tshul gyis bgyid de/ de'i slad du byang chub sems dpa' sems dpa' chen po zhes bgyi'o zhes bya ba'i bar du ni/ chos la bdag med pa'i don chen po ston pa'i phyir byang chub sems dpa' sems dpa' chen po zhes bya ba'i tshig gi don bstan pa'o/ /de nas tshe dang ldan pa rab 'byor gyis tshe dang ldan pa sha ra dwa ti'i bu la 'di skad ces smras so/ /tshe dang ldan pa sha ra dwa ti'i bu ci'i phyir na byang chub sems dpa' sems dpa' chen po gzugs su lta bar 'gyur ba yin zhes bya ba nas/ yongs su mya ngan las 'das par lta bar 'gyur ba yin zhes bya ba'i bar du ni/ byang chub sems dpa' sems dpa' chen po sems can rnams la lta ba spang ba'i phyir chos ston pa ni sems can phal la mi ston gyi/ rigs kyi sa nas phyir mi ldog pa'i sa la gnas pa man chad la sems can gyi tshogs chen po nges pa zhes bya ste/ de dag la chos ston cing de dag gi phul byed pa'i phyir sems dpa' chen po zhes bya na/ sems can gyi tshogs chen po de dag las rigs kyi sa la gnas pa la sogs pa nyan thos dang rang sangs rgyas rnams ni chos la bdag med pa ma rtogs pas phung po la sogs pa la chos su lta ba 'byung ba yang srid na/ sa dang po la gnas pa yan chad kyis chos la bdag med pa rtogs pas phung po la sogs pa chos su lta ba ci'i phyir 'byung ba zhes dris pa'o/ / smras pa/ tshe dang ldan pa rab 'byor 'di la byang chub sems dpa' sems dpa' chen po shes rab kyi pha rol tu phyin pa la spyod cing / thabs mi mkhas pas gzugs su dmigs shing dmigs pa'i tshul gyis lta ba skyed do zhes bya ba nas/ yongs su mya ngan las 'da' bar dmigs shing dmigs pa'i tshul gyis lta ba skyed do zhes bya ba'i bar du ni/ rab 'byor gyis dris pa'i lan btab pa ste/ byang chub sems dpa' de dag thabs la mi mkhas pas gzugs la sogs pa 'jig rten dang 'jig rten las 'das pa'i chos rnams la dngos por dmigs pas lta ba skyed do zhes bstan pa'o/ /tshe dang ldan pa rab 'byor de'i phyir byang chub sems dpa' sems dpa' chen po gzugs su lta bar 'gyur ba yin zhes bya ba nas yongs su mya ngan las 'da' bar lta bar 'gyur ba yin te zhes bya ba'i bar du ni/ de ltar thabs mi mkhas pas gzugs la sogs pa la dmigs pa'i tshul gyis lta ba skyed par gyur pa de'i phyir gzugs la sogs pa 'jig rten pa dang 'jig rten las 'das pa'i chos rnams la dngos por lta bar 'gyur ba yin no zhes bstan pa'o/ /de la byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ thabs mkhas pas lta ba'i rnam pa de dag spang ba'i phyir mi dmigs pa'i tshul gyis chos ston to zhes bya ba ni/ byang chub sems dpa' sems dpa' chen po'i tshig gi don mjug bsdus nas bstan pa ste/ byang chub sems dpa' sems dpa' chen po gang zag dang / chos la bdag med pa rtogs pa dag ni gang zag dang chos su dmigs pa'i tshul gyis lta ba rnams spang ba'i phyir gang zag dang chos la bdag med pa'i don chen po ston pas byang chub sems dpa' sems dpa' chen po zhes bya'o zhes bstan pa'o/ /de nas tshe dang ldan pa rab 'byor gyis bcom ldan 'das la 'di skad ces gsol to/ /bcom ldan 'das don gang gi slad du byang chub sems dpa' sems dpa' chen po zhes bgyi ba de la bdag kyang spobs pa skye'o zhes bya ba la sogs pa ni byang chub sems dpa' sems dpa' chen po zhes bya ba'i tshig gi don la 'phags pa rab 'byor gyis bshad pa bstan pa ste/ bcom ldan 'das byang chub kyi sems mi mnyam pa dang mnyam pa'i sems nyan thos dang rang sangs rgyas thams cad dang thun mong ma lags pa'i sems de lta bu la yang chags pa ma mchis pas de'i slad du byang chub sems dpa' sems dpa' chen po zhes bgyi'o zhes bya ba ni/ bla na med pa'i byang chub chos kyi dbyings rnam par dag pa rtogs pa'i byang chub kyi sems de lta bu la yang chags pa med de/ de ltar chags pa med pa'i sems che ba'i phyir sems dpa' chen po zhes bya'o zhes bstan pa'o/ /mi mnyam pa dang mnyam pa'i sems zhes bya ba la mi mnyam pa ni bla na med pa'i byang chub la bya ste/ bla na med pa'i byang chub gang dang mi mnyam pa dang mnyam pa'i phyir byang chub kyi sems de la mi mnyam pa dang mnyam pa zhes bya'o/ /nyan thos dang rang sangs rgyas thams cad dang thun mong ma lags pa zhes bya ba ni chos kyi dbyings rnam par dag pa rtogs pa'i byang chub kyi sems de lta bu nyan thos dang rang sangs rgyas thams cad la med pa'i phyir ro/ /de ci'i slad du zhe na zhes bya ba nas/ sems dpa' chen po'i grangs su mchi'o zhes bya ba'i bar du ni byang chub kyi sems de la chags pa med pa'i gtan tshigs bstan pa ste/ thams cad mkhyen pa nyid kyi sems zhes bya ba ni byang chub kyi sems de thams cad mkhyen pa nyid thob pa'i rgyu yin pa'i phyir ro/ /zag pa ma mchis shing khong du chud pa ma mchis pa zhes bya ba ni thams cad mkhyen pa nyid thob par byed pa'i byang chub kyi sems de rang bzhin gyis stong pa yin pa'i phyir ro/ /nyon mongs pa'i zag pa med cing khams gsum gang du yang ma gtogs te/ de ltar dngos po med pa'i phyir de la ma chags so zhes bstan pa ste/ de ltar byang chub kyi sems mi mnyam pa dang mnyam pa de lta bu la yang ma chags pa'i phyir/ byang chub sems dpa' phal pa ma yin pas byang chub sems dpa' sems dpa' chen po'i grangs su chud do zhes bstan pa'o/ /de nas tshe dang ldan pa sha ra dwa ti'i bus tshe dang ldan pa rab 'byor la 'di skad ces smras so zhes bya ba la sogs pa ni/ byang chub kyi sems mi mnyam pa dang mnyam pa de nyid 'khor rnams la gsal bar bstan pa'i phyir 'phags pa shA ri'i bus dris pa dang / rab 'byor gyis lan btab pa bstan pa ste/ sems dang po bskyed phyin chad chos gang yang skye bar yang dag par rjes su mi mthong zhes bya ba la sogs pa ni/ byang chub sems dpa'i sa dang po la rnam par mi rtog pa'i byang chub kyi sems skyes pa na chos thams cad dngos po med par rtogs pas skye ba dang / 'gag pa dang / 'phel ba dang / 'grib pa la sogs pa gang yang med par rtogs pa de nyid mi mnyam pa dang mnyam pa'i byang chub kyi sems yin te/ nyan thos dang rang sangs rgyas thams cad dang thun mong ma yin pa'o zhes bstan pa'o/ /smras pa/ tshe dang ldan pa rab 'byor gang khyod kyis 'di skad du thams cad mkhyen pa nyid kyi sems zag pa med pa khong du chud pa med pa de lta bu'i sems la yang chags pa med do zhes smras pa ni de lta yin te/ tshe dang ldan pa rab 'byor de bas na gzugs kyang chags pa med do zhes bya ba la sogs pa ni byang chub sems dpa' chen po de thams cad mkhyen pa nyid kyi sems zag pa med cing khong du chud pa med pa de lta bu la chags pa med pa 'ba' zhig tu ma zad kyi/ gzugs dang tshor ba la sogs pa nas rten cing 'brel par 'byung ba'i yan lag bcu gnyis kyi bar du 'jig rten pa'i chos rnams dang / sbyin pa'i pha rol tu phyin pa la sogs pa nas/ rnam pa thams cad mkhyen pa nyid kyi bar du 'jig rten las 'das pa'i chos rnams kyang de bzhin du chags pa med do zhes bstan pa'o/ /rab 'byor gyis smras pa/ tshe dang ldan pa sha ra dwa ti'i bu de de bzhin te gzugs kyang chags pa med do zhes bya ba nas/ rnam pa thams cad mkhyen pa nyid kyang chags pa med do zhes bya ba'i bar du ni/ 'phags pa shA ri'i bus chos thams cad chags pa med par bshad pa nyid 'phags pa rab 'byor gyis bden no de bzhin no zhes smras pa ste/ khyod kyis ji skad smras pa bzhin te 'jig rten dang 'jig rten las 'das pa'i chos thams cad kyang don dam par chags pa med pa'i rang bzhin te/ de ltar chos thams cad chags pa med pa'i rang bzhin du rtogs shing ci la yang chags pa'i phyir byang chub sems dpa' sems dpa' chen po zhes bya'o zhes bya ba dang sbyar ro/ /smras pa/ tshe dang ldan pa rab 'byor khyod kyis 'di skad du thams cad mkhyen pa nyid kyi sems de yang zag pa med cing khong du chud pa med do zhes smras pa 'di de lta yin te/ tshe dang ldan pa rab 'byor der yang ma zad de byis pa so so'i skye bo rnams kyi sems kyang rang bzhin stong pa nyid kyi phyir zag pa med cing khong du chud pa med do zhes bya ba la sogs pa ni don dam par thams cad mkhyen pa nyid thob par byed pa'i byang chub kyi sems de 'ba' zhig zag pa med cing khong du chud pa med par ma zad kyi byis pa so so'i skye bo'i sems dang / nyan thos dang rang sangs rgyas kyi sems dang / sangs rgyas bcom ldan 'das kyi thugs kyang don dam par rang bzhin stong pa nyid yin pa'i phyir zag pa med cing khong du chud pa med do zhes bstan pa ste/ zag pa med cing khong du chud pa med pa'i don ni gong du bshad zin to/ /rab 'byor gyis smras pa/ de bzhin te zhes bya ba nas sangs rgyas bcom ldan 'das rnams kyi thugs kyang rang bzhin stong pa nyid kyi phyir zag pa med cing khong du chud pa med do zhes bya ba'i bar du ni/ 'phags pa shA ri'i bus ji skad du smras pa de bzhin no zhes don mthun par smras pa'o/ /smras pa/ tshe dang ldan pa rab 'byor de lta yin na/ gzugs kyang rang bzhin stong pa nyid kyi phyir zag pa med cing khong du chud pa med do zhes bya ba nas/ rnam pa thams cad mkhyen pa nyid kyang rang bzhin stong pa nyid kyi phyir zag pa med cing khong du chud pa med do zhes bya ba'i bar du ni ji ltar byis pa so so'i skye bo'i sems dang / nyan thos dang rang sangs rgyas kyi sems dang / sangs rgyas bcom ldan 'das kyi thugs rang bzhin stong pa nyid yin pa'i phyir/ zag pa med cing khong du chud pa med pa de bzhin du gzugs la sogs pa rnam pa thams cad mkhyen pa nyid la thug gi bar gyi chos thams cad kyang don dam par rang bzhin stong pa nyid yin pa'i phyir zag pa med cing khong du chud pa med pa yin no zhes bstan pa'o/ /rab 'byor gyis smras pa/ tshe dang ldan pa sha ra dwa ti'i bu/ ji skad du smras pa de bzhin te/ gzugs kyang rang bzhin stong pa nyid kyi phyir zag pa med cing khong du chud pa med do zhes bya ba nas/ rnam pa thams cad mkhyen p a nyid kyang rang bzhin stong pa nyid kyi phyir zag pa med cing khong du chud pa med do zhes bya ba'i bar du ni shA ri'i bus ji skad smras pa de bzhin te don dam par 'jig rten dang 'jig rten las 'das pa'i chos thams cad rang bzhin stong pa nyid kyi phyir zag pa med cing khong du chud pa med pa de bzhin no zhes rab 'byor gyis shA ri'i bu dang mthun par smras pa bstan pa'o/ /smras pa/ tshe dang ldan pa rab 'byor gang yang khyod kyis 'di skad du sems med pa'i phyir sems de yang chags pa med do zhes smras pa ni de lta yin te/ tshe dang ldan pa rab 'byor der yang ma zad de zhes bya ba ni sems med pa de sems kyi rang bzhin med pa'i phyir ci la yang chags pa med do zhes smras pa de 'ba' zhig tu ma zad kyi/ gzugs med pa la sogs pa yang gzugs la sogs pa la chags pa med do zhes bstan pa ste/ de la sems med pa zhes bya ba ni yongs su grub pa'i mtshan nyid chos nyid kyi sems la kun brtags pa'i sems med pa'i phyir sems med pa zhes bya'o/ /gzugs med pa yang gzugs la chags pa med do zhes bya ba la gzugs med pa zhes bya ba ni yongs su grub pa'i mtshan nyid chos nyid kyi gzugs kun brtags pa'i gzugs yod pa ma yin pa'i phyir gzugs med pa zhes bya ste/ yongs su grub pa'i rang bzhin gzugs med pa de kun brtags pa'i gzugs la chags pa med do zhes bstan pa'o/ /de bzhin du tshor ba la sogs pa nas rga shi'i bar du 'jig rten pa'i chos rnams dang / sbyin pa'i pha rol tu phyin pa la sogs pa nas rnam pa thams cad mkhyen pa nyid kyi bar du 'jig rten las 'das pa'i chos rnams la yang sbyar bar bya'o/ /smras pa/ tshe dang ldan pa sha ra dwa ti'i bu de de bzhin te/ gzugs med pa yang gzugs la chags pa med pa'o zhes bya ba nas/ rnam pa thams cad mkhyen pa nyid med pa yang rnam pa thams cad mkhyen pa nyid la chags pa med do zhes bya ba'i bar du ni/ 'phags pa shA ri'i bus bshad pa'i don nyid rab 'byor gyis bzlas te smras nas de de bzhin no zhes don mthun par bstan pa'o/ /tshe dang ldan pa sha ra dwa ti'i bu byang chub sems dpa' sems dpa' chen po shes rab kyi pha rol tu phyin pa la de ltar spyod pa ni zhes bya ba nas/ de'i phyir byang chub sems dpa' sems dpa' chen po zhes bya'o zhes bya ba'i bar du ni chags pa med par gnas pa'i don mjug bsdus nas bstan pa ste/ de ltar byang chub kyi sems mi mnyam pa dang / mnyam pa thun mong ma yin pa la sogs pa chos thams cad la chags pa med pa'i phyir/ byang chub sems dpa' sems dpa' chen po zhes bya'o zhes sems dpa' chen po'i tshig gi don bstan pa'o/ /de ltar 'phags pa rab 'byor gyis sems dpa' chen po zhes bya ba'i tshig gi don bstan nas/ de'i 'og tu 'phags pa gang pos sems dpa' chen po zhes bya ba'i tshig gi don bshad pa skabs dbye ba'i phyir/ de nas tshe dang ldan pa byams gang gi bus bcom ldan 'das la 'di skad ces gsol to/ /bcom ldan 'das don gang gi slad du byang chub sems dpa' sems dpa' chen po zhes bgyi ba de la bdag kyang spobs pa skye'o zhes bya ba la sogs pa bshad de/ go cha chen po bgos pa dang / theg pa chen po la zhugs pa dang / theg pa chen po la gnas pa'i phyir byang chub sems dpa' sems dpa' chen po zhes bya'o zhes bstan pa'o/ /bcom ldan 'das de ni go cha chen po bgos pa'i sems can lags te zhes bya ba ni go cha chen po bgos pa bstan te/ sems can mang po'i don du byang chub sems dpa'i spyad pa la rtsom pa'i brtson 'grus kyi go cha chen po bgo ba'i phyir bsam pa rgya che ba bstan to/ /bcom ldan 'das de ni theg pa chen po la yang dag par zhugs pa'i sems can lags la zhes bya bas ni sgrub pa rgya che ba bstan te/ theg pa chen po la zhugs nas bdag dang gzhan gyi don rgya chen po sgrub pa'i phyir ro/ /de ni theg pa chen po la yang dag par gnas pa'i sems can lags pas zhes bya ba ni byang chub sems dpa'i lam 'bras bu dang bcas pa la theg pa chen po zhes bya ste/ de la gnas pa ni 'bras bu rgya che ba bstan to/ /de nas tshe dang ldan pa sha ra dwa ti'i bus tshe dang ldan pa byams gang gi bu la 'di skad ces smras so/ /tshe dang ldan pa gang po ji tsam gyis na byang chub sems dpa' sems dpa' chen po go cha chen po bgos pa zhes bya ba nas go cha chen po bgos pa'i don zhib tu bshad pa'i skabs dbye ba'i phyir dris pa'o/ /gang pos smras pa/ tshe dang ldan pa sha ra dwa ti'i bu 'di la byang chub sems dpa' sems dpa' chen po ni sems can nyung zad nyi tshe zhig gi don du sbyin pa'i pha rol tu phyin pa la gnas shing sbyin pa yongs su gtong ba ma yin gyi sems can thams cad kyi don du sbyin pa'i pha rol tu phyin pa la spyod cing / sbyin pa yongs su gtong ngo zhes bya ba la sogs pas go cha chen po bgos pa'i don 'phags pa gang pos bshad pa ste/ go cha chen po bgos pa yang rnam pa gnyis te/ bsam pa rgya che ba dang / sgrub pa rgya che ba'o/ /bsam pa rgya che ba yang rnam pa gsum ste/ yul yongs su chad pa med pa dang / sems can yongs su chad pa med pa dang / sbyor ba yongs su chad pa med do/ /de la yul yongs su chad pa med pa ni gang pos smras pa/ tshe dang ldan pa sha ra dwa ti'i bu 'di la byang chub sems dpa' sems dpa' chen po sems can nyung zad nyi tshe zhig gi don du sbyin pa'i pha rol tu phyin pa la gnas shing sbyin pa yongs su gtong ba ma yin gyi/ sems can thams cad kyi don du sbyin pa'i pha rol tu phyin pa la spyod cing sbyin pa yongs su gtong ngo zhes bya ba nas/ sems can nyung zad nyi tshe zhig gi phyir shes rab kyi pha rol tu phyin pa la gnas shing shes rab sgom pa ma yin gyi/ sems can thams cad kyi don du shes rab kyi pha rol tu phyin pa la spyod cing shes rab sgom mo zhes bya ba'i bar gyis bstan te/ sa phyogs 'di tsam tshun chad kyi sems can rnams kyi don du pha rol tu phyin pa drug la spyod pa ma yin gyi/ phyogs bcu mtha' yas mu med pa'i sems can thams cad kyi don du pha rol tu phyin pa drug la spyod do zhes bya ba'i don to/ /byang chub sems dpa' sems dpa' chen po ni sems can 'di snyed cig phung po ma lus pa'i mya ngan las 'das pa'i dbyings su yongs su mya ngan las bzla bar bya'o zhes bya ba nas/ byang chub sems dpa' sems dpa' chen po ni sems can thams cad kyi don du go cha chen po gyon to zhes bya ba'i bar du ni sems can yongs su chad pa med pa'i sgo nas go cha chen po bgos pa bstan pa ste/ sems can gyi grangs 'di snyed cig phung po'i lhag ma ma lus pa'i mya ngan las 'das pa'i dbyings su yongs su mya ngan las bzla'o snyam du mi sems kyis/ sems can grangs med dpag tu med pa rnams phung po'i lhag ma ma lus pa'i mya ngan las 'das pa'i dbyings su yongs su mya ngan las bzla'o snyam du sems te/ de ltar bsam pa rgya che zhing go cha chen po bgos pa'i phyir byang chub sems dpa' sems dpa' chen po zhes bya'o zhes bstan pa'o/ /de 'di snyam du sems te bdag gis kyang sbyin pa'i pha rol tu phyin pa yongs su rdzogs par bya'o/ /sems can thams cad kyang sbyin pa'i pha rol tu phyin pa la sbyor bar bya'o zhes bya ba nas bdag kyang sangs rgyas kyi chos ma 'dres pa bco brgyad la gnas par sbyar bar bya'o/ / sems can thams cad kyang sangs rgyas kyi chos ma 'dres pa bco brgyad la sbyar bar bya'o zhes bya bar sems bskyed de/ tshe dang ldan pa sha ra dwa ti'i bu de tsam gyis na byang chub sems dpa' sems dpa' chen po go cha chen po bgos pa zhes bya'o zhes bya ba'i bar ni sbyor ba yongs su chad pa med pa'i bsam pa brgya che ba bstan pa ste/ bdag nyid kyang pha rol tu phyin pa drug la sogs pa sangs rgyas kyi chos ma 'dres pa bco brgyad kyi bar la gnas shing / sems can thams cad kyang chos de rnams la sbyor bar byed pa'i bsam pa rgya chen po dang ldan pa'i go cha chen po bgos pa'i phyir byang chub sems dpa' sems dpa' chen po zhes bya'o zhes bstan pa'o/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe sbyin pa gang yongs su gtong ba de dag nyan thos dang rang sangs rgyas dang ldan pa'i yid la bya bas ma yin gyi/ rnam pa thams cad mkhyen pa nyid dang ldan pa'i yid la bya bas yongs su gtong ste zhes bya ba nas/ steng gi phyogs kyi 'jig rten gyi khams gang gA'i klung gi bye ma snyed dag na sangs rgyas bcom ldan 'das bzhugs pa rnams kyang ched du brjod pa ched du brjod cing / ming yongs su sgrog par mdzad de/ 'jig rten gyi khams che ge mo zhig na byang chub sems dpa' sems dpa' chen po go cha chen po bgos pa 'di lta bu zhig sems can yongs su smin par byed do/ /sangs rgyas kyi zhing yongs su dag par byed do/ /rdzu 'phrul gyis rnam par rtse'o zhes sgra brjod pa mdzad cing dbyangs rjes su sgrog go zhes bya ba'i bar du ni sgrub pa rgya che ba bstan te/ pha rol tu phyin pa drug yongs su rdzogs par spyod pa na pha rol tu phyin pa gcig gi nang du yang pha rol tu phyin pa drug car 'dus pa sgrub pa'i phyir sgrub pa rgya che ba'i go cha chen po bgos pa zhes bya'o/ /de la tshe dang ldan pa sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe sbyin pa yongs su gtong ba zhes bya ba nas/ tshe dang ldan pa sha ra dwa ti'i bu nam byang chub sems dpa' sems dpa' chen po rnam pa thams cad mkhyen pa nyid dang ldan pa'i yid la bya bas pha rol tu phyin pa de dag la mtshan mar mi dmigs pa de'i tshe/ byang chub sems dpa' sems dpa' chen po shes rab kyi pha rol tu phyin pa la spyod pa'i go cha chen po bgos par shes par bya'o zhes bya ba'i bar du ni sbyin pa'i pha rol tu phyin pa yongs su rdzogs par sgrub pa'i tshe pha rol tu phyin pa drug car yongs su rdzogs par byed pa'i go cha bgos pa bstan pa'o/ /de la yang sbyin pa yang rnam pa gsum ste/ chos sbyin pa dang / mi 'jigs pa sbyin pa dang / zang zing sbyin pa'o/ /de la chos sbyin pa ni dam pa'i chos kyi tshig dang don rnams ston pa dang / glegs bam du bris te sbyin pa la sogs pa'o/ /mi 'jigs pa'i sbyin pa ni srog gi bar chad du 'gyur ba la sogs pa'i 'jigs pa las skyabs su byed pa'o/ /zang zing gi sbyin pa ni nor dang 'bru la sogs pa bdog pa'i dngos po rnams 'khor gsum yongs su dag par gtong ba'o/ /de ltar sbyin pa yongs su gtong ba'i tshe sbyin pa'i 'bras bu de yang bdag 'ba' zhig gi phyir yongs su mi bsngo'i/ sems can thams cad dang thun mong du byas te/ bla na med pa yang dag par rdzogs pa'i byang chub tu yongs su bsngo ba ni sbyin pa yongs su gtong ba'i sbyin pa'i pha rol tu phyin pa'i go cha yin no/ /de bzhin du sbyin pa yongs su gtong ba na sbyin pa'i 'bras bu rnam pa thams cad mkhyen pa nyid du yongs su bsngo bar yi dam bcas pa la/ nyan thos dang rang sangs rgyas kyi sa'i don du mi bsngo zhing / yi dam ma nyams pa nyid sbyin pa yongs su gtong ba'i tshe tshul khrims kyi pha rol tu phyin pa'i go cha bgos pa yin no/ /de bzhin du sbyin pa yongs su gtong ba'i tshe sbyin par byed pa dang / sbyin par bya ba dang / len pa rnams dmigs su med pa'i chos zab mos mi skrag pa nyid sbyin pa yongs su gtong ba'i tshe bzod pa'i pha rol tu phyin pa'i go cha bgos pa yin no/ /de bzhin du sbyin pa yongs su gtong ba'i tshe 'khor gsum yongs su dag pa'i sbyin pa byed pa la snyom las med pa dang / sbyin pa'i 'bras bu rnam pa thams cad mkhyen pa nyid thob par bya ba la yun ring du 'bad kyang mi skyo zhing brtson 'grus nyams par mi byed pa nyid sbyin pa yongs su gtong ba'i tshe brtson 'grus kyi pha rol tu phyin pa'i go cha bgos pa yin no/ /de bzhin du sbyin pa yongs su gtong ba'i tshe nyan thos dang rang sangs rgyas dang ldan pa'i sems skye ba rnams kyis sems ma yengs shing rnam pa thams cad mkhyen pa nyid la sems rtse gcig tu dmigs pa nyid sbyin pa yongs su gtong ba'i tshe bsam gtan gyi pha rol tu phyin pa'i go cha bgos pa yin no/ /de bzhin du sbyin pa yongs su gtong ba'i tshe shes rab kyis chos thams cad sgyu ma lta bur rtogs pas don dam par sbyin par bya ba dang / gtong ba dang len pa rnams mi dmigs pa nyid sbyin pa yongs su gtong ba'i tshe shes rab kyi pha rol tu phyin pa'i go cha bgos pa yin no/ /tshe dang ldan pa sha ra dwa ti'i bu nam byang chub sems dpa' sems dpa' chen po rnam pa thams cad mkhyen pa nyid dang ldan pa'i yid la bya bas pha rol tu phyin pa de dag la mtshan mar mi byed cing mi dmigs pa de'i tshe/ byang chub sems dpa' sems dpa' chen po shes rab kyi pha rol tu phyin pa la spyod pa'i go cha chen po bgos par shes par bya'o zhes bya ba ni pha rol tu phyin pa drug car yang shes rab kyi pha rol tu phyin pas yongs su zin na 'khor gsum yongs su dag pas pha rol tu phyin pa'i ming thob par 'gyur ba bstan pa ste/ de ltar sbyin pa yongs su gtong ba'i tshe pha rol tu phyin pa drug dang ldan yang de dag la mtshan mar mi 'dzin pa dang / kun rdzob tu 'dzin pa'i 'bras bu sems can thams cad dang thun mong du bya ste/ bla na med pa yang dag par rdzogs pa'i byang chub tu yongs su bsngo yang / don dam par de dag gi mtshan mar mi dmigs pa ni shes rab kyi pha rol tu phyin pas yongs su zin pa zhes bya ste/ de ltar grub pa ni shes rab kyi pha rol tu phyin pa la spyod pa na grub pa rgya che ba'i go cha chen po bgos par shes par bya'o zhes bstan pa'o/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po tshul khrims kyi pha rol tu phyin pa la spyod cing zhes bya ba nas/ tshe dang ldan pa sha ra dwa ti'i bu byang chub sems dpa' sems dpa' chen po tshul khrims kyi pha rol tu phyin pa la de ltar spyod pa ni pha rol tu phyin pa drug po thams cad yongs su 'dzin te/ de'i phyir go cha chen po bgos pa zhes bya'o zhes bya ba'i bar du ni tshul khrims kyi pha rol tu phyin pa yongs su rdzogs par sgrub pa'i tshe/ sbyin pa la sogs pa pha rol tu phyin pa drug yongs su rdzogs par sgrub pa bstan pa ste/ de la tshe dang ldan pa sha ra dwa ti'i bu gzhan yang byang chub sems dpa' sems dpa' chen po tshul khrims kyi pha rol tu phyin pa la spyod cing rnam pa thams cad mkhyen pa nyid dang ldan pa'i yid la bya bas sbyin pa gang yongs su gtong ba de sems can thams cad dang thun mong du byas shing / bla na med pa yang dag par rdzogs pa'i byang chub tu mi dmigs pa'i tshul gyis yongs su bsngo ba 'di ni byang chub sems dpa' sems dpa' chen po tshul khrims kyi pha rol tu phyin pa la spyod pa'i sbyin pa'i pha rol tu phyin pa'o zhes bya ba ni byang chub sems dpa'i tshul khrims la rnam pa gsum ste/ sdom pa'i tshul khrims dang / dge ba'i chos sdud pa'i tshul khrims dang / sems can gyi don byed pa'i tshul khrims so/ /de la sdom pa'i tshul khrims ni srog mi gcod pa dang / ma byin par mi len pa la sogs pa'o/ /dge ba'i chos sdud pa'i tshul khrims ni dam pa'i chos nyan pa dang / sems pa dang bsgom pa la sogs pa'o/ /sems can gyi don byed pa'i tshul khrims ni sbyin pa la sogs pa bsdu ba rnam pa bzhis sems can gyi don byed pa ste/ tshul khrims de dag yongs su rdzogs par bya ba'i phyir sbyin pa yongs su gtong ba ni tshul khrims kyi pha rol tu phyin pa la spyod pa'i sbyin pa'i pha rol tu phyin pa zhes bya'o/ /rnam pa thams cad mkhyen pa nyid dang ldan pa'i yid la bya bas/ sems can thams cad dang thun mong du bya ba dang / bla na med pa yang dag par rdzogs pa'i byang chub tu mi dmigs pa'i tshul gyis yongs su bsngo ba ni sngar bshad pa bzhin no/ /de bzhin du tshul khrims kyi pha rol tu phyin pa la spyod pa'i tshe/ nyan thos dang rang sangs rgyas kyi sa la mos pa ma skyes shing / rnam pa thams cad mkhyen pa nyid thob par bya ba'i yi dam blangs pa ma nyams pa nyid tshul khrims kyi pha rol tu phyin pa yin no/ / de bzhin du tshul khrims kyi pha rol tu phyin pa la spyod pa'i tshe tshul khrims srung ba dang / tshul khrims dang bsrung bar bya ba'i dngos po rnams mi dmigs pa'i chos de dag la bzod cing mos pa dang / brten pa ni tshul khrims kyi pha rol tu phyin pa la spyod pa'i bzod pa'i pha rol tu phyin pa'o/ /de bzhin du brtson 'grus nyams par mi byed pa dang / nyan thos dang rang sangs rgyas kyi sems kyi go mi 'byed cing rnam pa thams cad mkhyen pa nyid la sems rtse gcig tu dmigs pa las gzhan du mi g.yeng ba dang / chos thams cad sgyu mar byas pa'i 'du shes nye bar gnas pa la sogs pa brtson 'grus dang / bsam gtan dang / shes rab kyi pha rol tu phyin pa'i go cha bgos pa yin par bshad pa ni sbyin pa'i pha rol tu phyin pa'i skabs su bshad pa bzhin no/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po bzod pa'i pha rol tu phyin pa la spyod cing zhes bya ba nas/ tshe dang ldan pa sha ra dwa ti'i bu byang chub sems dpa' sems dpa' chen po bzod pa'i pha rol tu phyin pa la de ltar sbyong ba ni pha rol tu phyin pa drug po thams cad yongs su 'dzin te/ de'i phyir go cha chen po bgos zhes bya'o zhes bya ba'i bar du ni bzod pa'i pha rol tu phyin pa yongs su rdzogs par sgrub pa'i tshe pha rol tu phyin pa drug yongs su rdzogs par sgrub pa'i go cha bgos pa bstan pa'o/ /de la bzod pa'i pha rol tu phyin pa yang rnam pa gsum ste/ sdug bsngal nyams su len pa'i bzod pa dang / gzhan gyis gnod par byas pa la bzod pa dang / chos la nges par rtogs pa'i bzod pa'o/ /de la sdug bsngal nyams su len pa'i bzod pa ni bla na med pa yang dag par rdzogs pa'i byang chub thob par bya ba'i phyir dka' ba spyod pa'i tshe/ na ba dang / tsha ba dang / grang ba dang / bkres pa dang / skom pa la sogs pa'i sdug bsngal rnams la ji mi snyam pa'o/ /gzhan gyis gnod pa byas pa la bzod pa ni gzhan gyis spyos pa la slar mi gshe ba dang / gzhan gyis mtshang brus pa la slar mtshang mi 'bru ba dang / gzhan gyis brdegs pa la slar mi brdeg pa la sogs pa'o/ /chos la nges par rtog pa'i bzod pa ni/ dam pa'i chos nyan pa dang / sems pa dang bsgom pa'i tshe chos bdag med pa'i don zab mo skye ba dang / 'gag pa med pa la sogs pas mi 'jigs mi skrag pa'o/ /de la gzhan gyis gnod pa byas pa la bzod cing slar gnod pa mi byed pa nyid sems can rnams la mi 'jigs pa sbyin pa yin pa'i phyir bzod pa'i pha rol tu phyin pa yongs su rdzogs par sgrub pa'i tshe/ sbyin pa'i pha rol tu phyin pa yongs su rdzogs pa yin no/ /de bzhin du bzod pa'i pha rol tu phyin pa yongs su rdzogs par sgrub pa'i tshe/ nyan thos dang rang sangs rgyas kyi sa thob par bya bar ni mi sems shing / rnam pa thams cad mkhyen pa nyid thob par bya bar sems pa'i yid dam ma nyams pa nyid tshul khrims kyi pha rol tu phyin pa yongs su rdzogs pa yin no/ /de bzhin du bzod pa'i pha rol tu phyin pa yongs su rdzogs par sgrub pa'i tshe/ bzod pa byed pa dang / bzod pa'i dngos po dang / bzod par bya ba'i yul rnams don dam par mi dmigs pa dang / rnam pa thams cad mkhyen pa nyid yid la bya ba'i don zab mos mi skrag pa nyid bzod pa'i pha rol tu phyin pa yongs su rdzogs pa yin no/ /de bzhin du bzod pa'i pha rol tu phyin pa yongs su rdzogs par sgrub pa'i tshe brtson 'grus nyams par mi byed pa dang / nyan thos dang rang sangs rgyas kyi yid la byed par ma yengs shing / rnam pa thams cad mkhyen pa nyid yid la bya ba la sems rtse gcig tu gyur pa dang / chos thams cad sgyu mar byas pa'i 'du shes nye bar gnas shing bzod pa de la rlom sems su mi byed pa rnams ni brtson 'grus dang / bsam gtan dang / shes rab kyi pha rol tu phyin pa yongs su rdzogs pa yin no/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po brtson 'grus kyi pha rol tu phyin pa la spyod cing zhes bya ba nas/ tshe dang ldan pa sha ra dwa ti'i bu byang chub sems dpa' sems dpa' chen po brtson 'grus kyi pha rol tu phyin pa la de ltar spyod pa ni pha rol tu phyin pa drug po thams cad yongs su 'dzin te/ de'i phyir go cha chen po bgos zhes bya'o zhes bya ba'i bar du ni brtson 'grus kyi pha rol tu phyin pa yongs su rdzogs par sgrub pa'i tshe pha rol tu phyin pa drug yongs su rdzogs par byed pa'i go cha bgos pa bstan pa'o/ /de la brtson 'grus kyang rnam pa gsum ste/ go cha'i brtson 'grus dang / dge ba la sbyor ba'i brtson 'grus dang / sems can gyi don spyod pa'i brtson 'grus so/ /de la go cha'i brtson 'grus ni bdag dang gzhan gyi don phun sum tshogs par bya ba'i sems dang po bskyed cing cha ba'o/ /dge ba la sbyor ba'i brtson 'grus ni dam pa'i chos nyan pa dang / sems pa dang / bsgom pa dang / mchod rten gyi las byed pa la sogs pa'o/ /sems can gyi don spyod pa'i brtson 'grus ni sbyin pa la sogs pa bsdu ba'i dngos po bzhis sems can rnams la phan 'dogs pa ste/ de ltar brtson 'grus rtsom pa'i tshe sbyin pa yongs su gtong bas sems can gyi don byed pa ni brtson 'grus kyi pha rol tu phyin pa la spyod pa'i sbyin pa'i pha rol tu phyin pa yongs su rdzogs pa yin no/ /de ltar brtson 'grus rtsom pa'i tshe nyan thos dang rang sangs rgyas dang ldan pa'i yid la bya bas ma yin gyi/ rnam pa thams cad mkhyen pa nyid dang ldan pa'i yid la bya ba mi gtong ba nyid bla na med pa yang dag par rdzogs pa'i byang chub thob par bya ba'i yid dam bcas pa las ma nyams pa'i phyir tshul khrims kyi pha rol tu phyin pa yongs su rdzogs pa yin te snga ma bzhin no/ /de ltar brtson 'grus rtsom pa'i tshe brtson 'grus rtsom pa dang brtson 'grus su bya ba'i chos rnams mi dmigs pa la bzod pa dang / mos pa dang / de la brten cing mi 'jigs mi skrag pa nyid bzod pa'i pha rol tu phyin pa yin no/ /de bzhin du brtson 'grus rtsom pa'i tshe sems can thams cad kyi don du brtson 'grus rtsom pa nyams par yang mi byed/ ha cang brtun ngas par yang mi byed pa nyid brtson 'grus kyi pha rol tu phyin pa yin no/ /de bzhin du brtson 'grus rtsom pa na nyan thos dang rang sangs rgyas dang ldan pa'i yid la bya bas sems ma yengs shing rnam pa thams cad mkhyen pa nyid la sems rtse gcig tu gyur pa nyid bsam gtan gyi pha rol tu phyin pa yongs su rdzogs pa yin no/ /de bzhin du brtson 'grus rtsom pa na shes rab kyis chos thams cad la sgyu mar byas pa'i 'du shes nye bar gnas pa dang / brtson 'grus des rlom sems su mi byed pa dang / brtson 'grus de yang mi dmigs pa dang / dge ba'i rtsa ba de yang sems can thams cad dang thun mong du byas shing / bla na med pa yang dag par rdzogs pa'i byang chub tu yongs su bsngo ba nyid shes rab kyi pha rol tu phyin pa yongs su rdzogs pa yin no/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po bsam gtan gyi pha rol tu phyin pa la spyod cing zhes bya ba nas/ tshe dang ldan pa sha ra dwa ti'i bu byang chub sems dpa' sems dpa' chen po bsam gtan gyi pha rol tu phyin pa la de ltar spyod pa ni pha rol tu phyin pa drug po thams cad yongs su 'dzin te/ de'i phyir go cha chen po bgos zhes bya'o zhes bya ba'i bar du ni bsam gtan gyi pha rol tu phyin pa yongs su rdzogs par sgrub pa'i tshe pha rol tu phyin pa drug yongs su rdzogs par byed pa'i go cha bgos pa bstan pa'o/ /de la bsam gtan yang rnam pa gsum ste/ rnam par mi rtog cing sems zhi ba dang / rab tu zhi bas nyon mongs pa'i gnyen po bsgom pa'i bsam gtan dang / yon tan mngon par sgrub pa'i bsam gtan dang / sems can gyi don mngon par sgrub pa'i bsam gtan no/ /de la rnam par mi rtog cing sems zhi ba dang / rab tu zhi bas nyon mongs pa'i gnyen po bsgom pa'i bsam gtan ni rnam par mi rtog pa'i ting nge 'dzin la gnas te/ 'dod chags la sogs pa'i nyon mongs pa rnams la g.yeng ba'i sems rnams zhi bar byas nas nyon mongs pa'i gnyen po mi sdug pa dang / byams pa dang / rten cing 'brel par 'byung ba la sogs pa bsgom pa'o/ /yon tan mngon par sgrub pa'i bsam gtan ni ting nge 'dzin rtse gcig tu bzhag pa'i bsam gtan bsgom pa las mngon par shes pa la sogs pa'i yon tan khyad par can rnams thob par 'gyur ba'o/ /sems can gyi don sgrub pa'i bsam gtan ni bsgom pa'i mthus nam mkha' las rin po che la sogs pa nor sna tshogs char bzhin du 'bab pa la sogs pas sems can rnams kyi re ba yongs su bskang ba'o/ /de ltar bsam gtan byed pa'i tshe sems can gyi don mngon par sgrub pa'i bsam gtan sbyin pa byas pas/ sems can rnams kyi re ba yongs su rdzogs par byed pa nyid bsam gtan gyi pha rol tu phyin pa yongs su sgrub pa ni sbyin pa'i pha rol tu phyin pa yongs su rdzogs pa yin no/ /de bzhin du bsam gtan bsgom pa'i tshe nyan thos dang rang sangs rgyas kyi sa thob par mi sems shing / rnam pa thams cad mkhyen pa nyid thob par bya ba'i yid dam bcas pa las ma nyams pa nyid tshul khrims kyi pha rol tu phyin pa yongs su rdzogs pa yin te snga ma bzhin no/ / de bzhin du bsam gtan byed pa'i tshe chos zab mos mi skrag pa dang / gzhan gyis gnod pa byas pa la ji mi snyam pa dang / sdug bsngal thams cad nyams su len pa nyid/ bsam gtan gyi pha rol tu phyin pa bsgom pa'i tshe/ bzod pa'i pha rol tu phyin pa yongs su rdzogs pa'o/ /de bzhin du bsam gtan bsgom pa'i tshe/ le lo'i dbang du ma gyur cing brtson 'grus ma nyams pa nyid brtson 'grus kyi pha rol tu phyin pa yongs su rdzogs pa'o/ /de bzhin du bsam gtan gong du smos pa rnam pa gsum las gang yang rung ba cig bsgom pa'i tshe/ rnam pa thams cad mkhyen pa nyid yid la bya ba'i sems rtse gcig tu gzhag pa las ma nyams shing / nyan thos dang / rang sangs rgyas kyi yid la byed pas sems gud du ma yengs pa nyid bsam gtan gyi pha rol tu phyin pa yongs su rdzogs pa'o/ /de bzhin du bsam gtan bsgom pa'i tshe/ chos thams cad sgyu ma lta bur 'du shes nye bar 'jog cing / bsam gtan nyid kyang mi dmigs la/ bsam gtan des rlom sems su yang mi byed pa nyid bsam gtan gyi pha rol tu phyin pa la spyod pa'i shes rab kyi pha rol tu phyin pa yin no/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po shes rab kyi pha rol tu phyin pa la spyod cing zhes bya ba nas/ tshe dang ldan pa sha ra dwa ti'i bu nam byang chub sems dpa' sems dpa' chen po rnam pa thams cad mkhyen pa nyid dang ldan pa'i sems kyi pha rol tu phyin pa 'di dag dang / sems can dang / byang chub la mtshan mar mi byed/ mi dmigs pa 'di ni byang chub sems dpa' sems dpa' chen po/ shes rab kyi pha rol tu phyin pa la spyod pa'i pha rol tu phyin pa drug gi go cha chen po'o zhes bya ba'i bar du ni shes rab kyi pha rol tu phyin pa la spyod pa'i tshe/ pha rol tu phyin pa drug yongs su rdzogs par sgrub pa'i go cha bgos pa'i bstan pa'o/ /de la shes rab kyang rnam pa gsum ste/ kun rdzob kyi bden pa la dmigs pa dang / don dam pa'i bden pa la dmigs pa dang / sems can gyi don la dmigs pa'o/ /de la kun rdzob kyi bden pa la dmigs pa ni phung po dang / khams dang / skye mched la sogs pa 'jig rten dang / 'jig rten las 'das pa'i chos rnams kyi rang gi mtshan nyid dang / spyi'i mtshan nyid rtogs pa'o/ /don dam pa la dmigs pa'i shes rab ni rnam par mi rtog pa'i shes rab bo/ /sems can gyi don la dmigs pa'i shes rab ni/ sems can rnams thabs gang gis 'dul ba'i dmigs shes rab kyis brtags nas sbyin pa la sogs pa bsdu ba'i dngos po bzhis sems can rnams bsdus shing phan 'dogs pa'o/ /de ltar shes rab kyi pha rol tu phyin pa yongs su rdzogs par sgrub pa na/ sbyin pas sems can yongs su bsdus te/ 'khor gsum yongs su dag pa'i sbyin pa gtong ba nyid sems can gyi don la dmigs pa'i shes rab kyi pha rol tu phyin pa ste/ sbyin pa'i pha rol tu phyin pa yongs su rdzogs pa yin no/ /de bzhin du shes rab kyi pha rol tu phyin pa yongs su rdzogs par sgrub pa na rnam pa thams cad mkhyen pa nyid thob par bya bar bsam pa'i yid dam ma nyams shing / nyan thos dang / rang sangs rgyas kyi sa thob par bya bar mi sems pa nyid tshul khrims kyi pha rol tu phyin pa yongs su rdzogs pa yin pa dang / rnam pa thams cad mkhyen pa nyid yid la bya ba'i chos zab mo dmigs su med pa la bzod pa nyid bzod pa'i pha rol tu phyin pa yin pa dang / shes rab kyi pha rol tu phyin pa rnam pa gsum po sgrub pa'i brtson 'grus ma nyams pa nyid brtson 'grus kyi pha rol tu phyin pa yin pa dang / rnam pa thams cad mkhyen pa nyid yid la byed pa las nyan thos dang / rang sangs rgyas kyi sa yid la byed pas sems gud du ma yengs pa nyid bsam gtan gyi pha rol tu phyin pa yin pa dang / de ltar shes rab kyi pha rol tu phyin pa rnam pa gsum sgrub pa'i tshe chos thams cad sgyu mar byas pa'i 'du shes nye bar gnas shing shes rab kyi pha rol tu phyin pa de nyid kyang don dam par dngos po med par rtogs pas des rlom sems su mi byed pa dang / kun rdzob tu de ltar shes rab kyi pha rol tu phyin pa rnam pa gsum bsgrubs pa'i dge ba'i rtsa ba de yang bla na med pa yang dag par rdzogs pa'i byang chub tu yongs su bsngo ba la mkhas pa nyid shes rab kyi pha rol tu phyin pa'i go cha bgos pa yin par bshad pa ni snga ma bzhin no/ /tshe dang ldan pa sha ra dwa ti'i bu nam byang chub sems dpa' sems dpa' chen po rnam pa thams cad mkhyen pa nyid dang ldan pa'i sems kyis pha rol tu phyin pa 'di dag dang zhes bya ba nas/ pha rol tu phyin pa re re la gnas shing pha rol tu phyin pa drug po thams cad yongs su rdzogs par byed do zhes bya ba'i bar du ni/ pha rol tu phyin pa gcig gi nang du pha rol tu phyin pa drug bsdu ba'i don mjug bsdus nas bstan pa ste/ shes rab kyi pha rol tu phyin pas yongs su zin cing / pha rol tu phyin pa drug dang sems can dang / bla na m ed pa'i byang chub kyang don dam par dmigs su med pas de dag la mtshan mar mi 'dzin cing mi dmigs pa nyid pha rol tu phyin pa drug car 'khor gsum yongs su dag par don gcig pa'i phyir pha rol tu phyin pa drug po thams cad yongs su rdzogs par byed pa yin no zhes bshad pa'o/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po bsam gtan dang / tshad med pa dang / gzugs med pa'i snyoms par 'jug pa rnams la yang mnyam par 'jog ste zhes bya ba nas/ tshe dang ldan pa sha ra dwa ti'i bu de ltar na byang chub sems dpa' sems dpa' chen po go cha chen po bgos pa zhes bya'o zhes bya ba'i bar du ni de ltar shes rab kyi pha rol tu phyin pa yongs su rdzogs par sgrub pa'i tshe shes rab kyis chos thams cad dmigs su med par rtogs la/ thabs kyis bsam gtan dang / tshad med pa dang / gzugs med pa'i snyoms par 'jug pa rnams la mnyam par 'jog kyang / 'jig rten pa dang / nyan thos dang rang sangs rgyas ltar bsam gtan la sogs pa'i dbang du mi 'gyur ba bstan pa ste/ bsam gtan dang / tshad med pa dang / gzugs med pa'i snyoms par 'jug pa rnams kyi ro yang myong bar mi byed do zhes bya ba ni bsam gtan dang po la sogs pa bsam gtan bzhi dang / byams pa la sogs pa tshad med pa bzhi dang / nam mkha' mtha' yas skye mched la sogs pa gzugs med pa'i snyoms par 'jug pa bzhi la mnyam par gzhag pa'i bde ba la yang chags par mi byed do zhes bya ba'i don to/ /bsam gtan dang / tshad med pa dang / gzugs med pa'i snyoms par 'jug pa de dag gis kyang mi 'phrogs zhes bya ba ni bsam gtan dang / tshad med pa dang / gzugs med pa'i snyoms par 'jug pa rnams kyi ting nge 'dzin grub kyang / des chog par mi 'dzin par gong nas gong du byang chub sems dpa'i spyod pa rgya chen po rnams la spyod cing sgrub po zhes bya ba'i don to/ /bsam gtan dang / tshad med pa dang / gzugs med pa'i snyoms par 'jug pa'i dbang gis kyang mi skye'o zhes bya ba ni 'jig rten pa rnams 'jig rten pa'i lam gyis bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi bsgrubs nas/ de dag grub pa'i 'bras bu gzugs kyi khams dang / gzugs med pa'i khams su skye bar mi byed kyi/ de bas kyang gong nas gong du 'phar zhing bla na med pa'i byang chub thob par byed do zhes bstan pa'o/ /tshe dang ldan pa sha ra dwa ti'i bu 'di ni byang chub sems dpa' sems dpa' chen po'i shes rab kyi pha rol tu phyin pa thabs mkhas pa dang 'grogs pa'o zhes bya ba ni de ltar bsam gtan dang / tshad med pa dang / gzugs med pa'i snyoms par 'jug pa rnams kyang grub la/ shes rab kyis de dag sgyu ma la sogs pa bzhin du rtogs pas de dag gi dbang du ma gyur pa nyid shes rab kyi pha rol tu phyin pa thabs mkhas pa dang ldan pa'o zhes bya ba'i don to/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po bsam gtan dang / tshad med pa dang / gzugs med pa'i snyoms par 'jug pa dag la dben pa mthong ba dang / stong pa nyid dang / mtshan ma med pa dang / smon pa med pa mthong bas mnyam par 'jog ste zhes bya ba la sogs pa ni sgrub pa rgya che ba'i go cha chen po bgos pa'i don mjug bsdus nas bstan pa ste/ de ltar bsam gtan dang / tshad med pa dang / gzugs med pa'i snyoms par 'jug pa rnams la mnyam par 'jog kyang shes rab kyi dbang gis de dag sgyu ma lta bur rtogs pas don dam par dngos por mi 'dzin pa'i phyir dben pa mthong ba dang / de ltar dben par mthong bas rnam par thar pa'i sgo gsum dang ldan pa'i phyir 'jig rten pa ltar bsam gtan la sogs pa'i dbang gis khams gsum du yang mi skye ba dang / nyan thos dang rang sangs rgyas ltar mya ngan las 'das pa yang dag pa'i mtha' yang mngon sum du mi byed pa dang / de ltar yang dag pa'i mtha' mngon du mi byed pas sgrub pa rgya che ba'i phyir/ nyan thos dang rang sangs rgyas thams cad zil gyis gnon te/ de bas na sgrub pa rgya che ba'i go cha chen pos bgos pa yin no zhes bstan pa'o/ /tshe dang l dan pa sha ra dwa ti'i bu byang chub sems dpa' sems dpa' chen po de ltar go cha bgos pa la shar phyogs kyi 'jig rten gyi khams gang gA'i klung gi bye ma snyed dag na sangs rgyas bcom ldan 'das bzhugs pa rnams ched du brjod cing ming yongs su sgrog pa mdzad de zhes bya ba nas/ steng gi phyogs kyi 'jig rten gyi khams gang gA'i klung gi bye ma snyed dag na sangs rgyas bcom ldan 'das bzhugs pa rnams kyang ched du brjod pa ched du brjod cing ming yongs su sgrog pa mdzad de/ 'jig rten gyi khams che ge mo zhig na byang chub sems dpa' sems dpa' chen po go cha chen po bgos pa 'di lta bu zhig sems can yongs su smin par byed do/ /sangs rgyas kyi zhing yongs su dag par byed do/ /rdzu 'phrul gyis rnam par rtse'o zhes sgra brjod pa mdzad cing dbyangs rjes su sgrog go zhes bya ba'i bar du ni de ltar sgrub pa rgya chen po la spyod cing / go cha chen po bgos pa'i byang chub sems dpa' la phyogs bcu'i sangs rgyas bcom ldan 'das gang gA'i klung gi bye ma snyed rnams byang chub sems dpa' de'i yon tan bsngags pa'i phan yon bstan pa'o/ /de ltar g o cha chen po bgos pa'i phyir byang chub sems dpa' sems dpa' chen po zhes bya ba'i tshig gi don bshad nas de'i 'og tu theg pa chen po la yang dag par zhugs pa'i byang chub sems dpa' sems dpa' chen po zhes bya ba'i tshig gi don bshad pa'i skabs dbye ba'i phyir/ smras pa/ tshe dang ldan pa gang po ji tsam gyis na byang chub sems dpa' sems dpa' chen po theg pa chen po la yang dag par zhugs zhes bya/ byang chub sems dpa' sems dpa' chen po'i theg pa chen po ni gang yin zhes bya ba la sogs pa bshad do/ /de la theg pa chen po dang theg pa chen po la yang dag par zhugs pa yang rnam pa dgus bstan te/ gang pos smras pa/ tshe dang ldan pa sha ra dwa ti'i bu 'di la byang chub sems dpa' sems dpa' chen po pha rol tu phyin pa drug la spyod de/ sbyin pa'i pha rol tu phyin pa la spyod cing zhes bya ba nas/ tshe dang ldan pa sha ra dwa ti'i bu de ltar na byang chub sems dpa' sems dpa' chen po theg pa chen po la yang dag par zhugs pa zhes bya'o zhes bya ba'i bar du ni pha rol tu phyin pa drug yongs su rdzogs par sgrub pa'i zhar la gzugs kyi khams kyi bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi rnams theg pa chen po'i tshul du bsgom pa ni byang chub sems dpa' theg pa chen po la yang dag par zhugs pa yin la/ de ltar spyod pa nyid theg pa chen po yin no zhes bstan pa ste dang po'o/ /de la smras pa/ tshe dang ldan pa gang po ji tsam gyis na byang chub sems dpa' sems dpa' chen po theg pa chen po la yang dag par zhugs pa zhes bya/ byang chub sems dpa' sems dpa' chen po'i theg pa chen po ni gang yin zhes bya ba ni gong du 'phags pa gang pos bcom ldan 'das de ni theg pa chen po la yang dag par zhugs pa'i sems can lags la zhes mdor smras pa'i don 'khor rnams la zhib tu bshad pa'i skabs dbye ba'i phyir 'phags pa shA ri'i bus dris pa'o/ /gang pos smras pa/ tshe dang ldan pa sha ra dwa ti'i bu 'di la byang chub sems dpa' sems dpa' chen po pha rol tu phyin pa drug la spyod de/ de sbyin pa'i pha rol tu phyin pa la spyod cing 'dod pas dben sdig to mi dge ba'i chos kyis dben pa zhes bya ba la sogs pa ni byang chub sems dpa' pha rol tu phyin pa drug las sbyin pa'i pha rol tu phyin pa lhur blangs te spyod pa'i zhar la bsam gtan dang / tshad med pa dang / gzugs med pa'i snyoms par 'jug pa rnams bsgoms pas theg pa chen po la yang dag par zhugs pa yin pa bstan to/ /de la 'dod pas dben sdig to mi dge ba'i chos kyis dben pa rtog pa dang bcas pa/ dpyod pa dang bcas pa/ dben pa las skyes pa dga' ba dang / bde ba can bsam gtan dang po la nye bar bsgrubs te gnas so zhes bya ba ni bsam gtan dang po'i rang bzhin dang / yon tan bshad pa ste/ de la 'dod pas dben zhes bya ba ni 'dod chags la sogs pa'i nyon mongs pa rnams dang / 'dod pa'i khams kyi gzugs dang sgra dang dri dang ro dang / reg bya la sogs pa 'dod pa'i yon tan lnga rnams la chags pa dang bral ba'i phyir ro/ /sdig to mi dge ba'i chos kyis dben pa zhes bya ba ni nyon mongs pa dang 'dod pa'i rgyu las byung ba'i lus dang ngag dang yid kyis nyes par spyod pa/ chad pas gcod pa dang mtshon gyis 'debs pa dang / 'thab pa dang rtsod pa dang / g.yo ba'i tshig dang gnod par byed pa dang / brdzun du smra ba la sogs pa las dben pa'o/ / rtog pa dang bcas pa dpyod pa dang bcas pa zhes bya ba ni 'dod pa'i khams kyi nyon mongs pa rnams la sun 'byin pa'i rnam par rtog pa sbom po dang rnam par dpyod pa phra mo gnyis ma spangs pa'i phyir ro/ /dben pa las skyes pa zhes bya ba ni 'dod pa'i 'dod chags dang sgrib pa rnams las dben pa las skyes pa'i phyir ro/ /dga' ba dang bde ba can zhes bya ba ni lus dang sems shin tu sbyangs shing las su rung bar gyur pa'i phyir ro/ /bsam gtan dang po la nye bar bsgrubs te gnas so zhes bya ba ni yon tan de lta bu dang ldan pa'i bsam gtan de rdzogs par byas te gnas so zhes bya ba'i don to/ /de rnam par rtog pa dang rnam par dpyod pa nye bar zhi nas nang yongs su dang ste/ sems kyi rgyud gcig tu gyur pas rnam par rtog pa med pa rnam par dpyod pa med pa/ ting nge 'dzin las skyes pa/ dga' ba dang bde ba can bsam gtan gnyis pa la nye bar bsgrubs te gnas so zhes bya ba ni bsam gtan gnyis pa'i rang bzhin dang yon tan bstan pa ste/ bsam gtan dang po'i rnam par rtog pa dang / rnam par dpyod pa gnyis skyon du mthong nas/ rnam par rtog pa dang / rnam par dpyod pa gnyis spang ba'i phyir/ rnam par rtog pa dang rnam par dpyod pa nye bar zhi ba zhes bya'o/ /nang yongs su dang ste sems kyi rgyud gcig tu gyur pas zhes bya ba ni de ltar rnam par tog pa dang / rnam par dpyod pa spangs shing sems ci la yang mi yengs par ting nge 'dzin rtse gcig tu gyur pas sems gsal ba la bya'o/ /rnam par rtog pa dang dpyod pa med pa ni gong du bshad pa bzhin no/ /ting nge 'dzin las skyes pa zhes bya ba ni de ltar rtog pa dang dpyod pa med cing sems rtse gcig tu gyur pa nyid la bya'o/ /dga' ba dang bde ba can zhes bya ba ni snga ma bzhin no/ /de dga' ba las 'dod chags dang bral bas dran pa dang ldan zhing shes bzhin du btang snyoms su gnas te/ bde ba lus kyis myong la 'phags pa rnams kyis de dran pa dang ldan pa/ bde ba la rnam par spyod pa btang snyoms pa'o zhes brjod pa ste/ dga' ba med pa'i bsam gtan gsum pa la nye bar bsgrubs te gnas so zhes bya ba ni bsam gtan gsum pa'i rang bzhin dang yon tan bstan pa ste/ de dga' ba las 'dod chags bral bas zhes bya ba ni bsam gtan dang po dang gnyis pa la lus dang sems rab tu sbyangs shing las su rung ba'i dga' bas sems g.yeng ba 'byung gi bsam gtan gsum pa 'di la de lta bu'i dga' ba la chags pa'i sems g.yeng ba phra mo yang spangs pa'i phyir ro/ /dran pa dang ldan zhing shes bzhin du btang snyoms su gnas te zhes bya ba ni dran pa dang shes bzhin gnyis kyis dga' ba la chags pa'i sems g.yeng ba 'byung ba'i go skabs med par byas nas/ dga' ba'i g.yeng ba 'byung bar dogs pa med de/ sems lhun gyis grub par gyur pa la btang snyoms su gnas pa zhes bya'o/ / bde ba lus kyis myong ba zhes bya ba ni de ltar lus dang sems las su rung zhing shin tu sbyangs pas lus bag yangs su 'gyur ba'i bde ba nyams su myong ba la bya'o/ /'phags pa rnams kyis de la dran pa dang ldan pa/ bde ba la rnam par spyod pa btang snyoms pa'o zhes brjod pa ste zhes bya ba ni sangs rgyas kyi nyan thos rnams kyis bsam gtan pa de la dran pa dang ldan zhing bde la spyod pa btang snyoms su gnas pa'o zhes yon tan bsngags shing brjod pa'i phyir ro/ /dga' ba med pa'i bsam gtan gsum pa la nye bar bsgrubs te gnas so zhes bya ba ni dga' ba la chags pa dang bral ba'i mtshan nyid sngar bshad pa de lta bu dang ldan pa'i bsam gtan yongs su rdzogs par byas te gnas so zhes bya ba'i don to/ /de bde ba yang spangs sdug bsngal ba yang spangs shing / yid bde ba dang yid mi bde ba snga nas kyang nub pas/ bde ba yang med sdug bsngal yang med pa dang btang snyoms dang dran pas bsam gtan bzhi pa la nye bar bsgrubs te gnas so zhes bya ba ni bsam gtan bzhi pa'i rang bzhin dang / yon tan bstan pa ste/ de la bde ba yang spangs zhes bya ba ni bsam gtan gsum pa la bde ba lus kyis myong ba zhes bya ba de la chags pa dang bral ba'i phyir ro/ /sdug bsngal yang spangs zhes bya ba ni bsam gtan gnyis pa la nang yongs su dang zhing / sems kyi rgyud gcig tu gyur te/ sdug bsngal spangs zin pas bsam gtan bzhi pa 'di la med pa'i phyir ro/ /yid bde ba dang yid mi bde ba snga nas kyang nub pas zhes bya ba ni bsam gtan gsum pa la dga' ba la chags pa dang bral zhes 'byung bas/ yid bde ba zhes bya ba ni dga' ba la bya ste/ yid bde ba de bsam gtan gsum pa la spangs zin pas bsam gtan bzhi pa 'di la med pa dang / bsam gtan gnyis pa la nang yongs su dang zhing sems kyi rgyud gcig tu gyur te/ yid mi bde ba med par gyur zin pas bsam gtan bzhi pa 'di la spang mi dgos pa'i phyir yid bde ba dang yid mi bde ba snga nas kyang nub pas zhes bya ba bshad do/ /bde ba yang med sdug bsngal yang med pa/ btang snyoms dang dran pa yongs su dag pas zhes bya ba ni de ltar snga nas bde ba dang sdug bsngal spangs te/ bsam gtan gyi skyon rnams kyis gos par dogs shing bag tsha ba med de/ sems lhun gyis grub pas btang snyoms yongs su dag pa dang / dran pa yongs su dag pa dang ldan no zhes bya ba'i don to/ /de byams pa dang ldan pa'i sems rgya chen po shin tu yangs pa zhes bya ba nas/ 'jig rten chos kyi dbyings kyis klas pa nam mkha'i mthas gtugs pa'i phyogs bcu rgyas par bkang ste mos par byas shing rnam par spyod do zhes bya ba'i bar du ni sbyin pa'i pha rol tu phyin pa yongs su rdzogs par bsgrub pa'i zhar la byams pa la sogs pa tshad med pa bzhi yongs su rdzogs par bsgom pa'i phyir theg pa chen po la yang dag par zhugs pa bstan pa ste/ de la tshad med pa zhes bya ba ni sems can tshad med pa la dmigs pa dang / bsod nams dang ye shes kyi tshogs tshad med pa'i rgyur gyur pa dang / de bzhin gshegs pa'i stobs bcu dang / mi 'jigs pa bzhi la sogs pa sangs rgyas kyi chos tshad med pa rnams 'thob pa'i rgyur gyur pa'i phyir tshad med pa zhes bya'o/ /de la byams pa la rnam pa gsum ste/ sems can la dmigs pa dang / chos la dmigs pa dang / dmigs pa med pa'i byams pa'o/ /de la sems can la dmigs pa'i byams pa ni/ mos pa sa spyod pa'i sa la sems can rnams la dmigs shing byams pa bsgom pa'o/ /chos la dmigs pa byams pa ni sa dang po nas sa bdun pa'i bar du de bzhin nyid la dmigs shing 'khor gsum yongs su dag par byams pa bsgom pa'o/ /dmigs pa med pa'i byams pa ni sa brgyad yan chad mtshan ma med cing rtsol ba med de/ rnam par mi rtog pa lhun gyis grub pas de bzhin nyid tsam la yang mi dmigs par 'khor gsum yongs su dag par byams pa bsgom pa'o/ /de byams pa dang ldan pa'i sems rgya chen po zhes bya ba la sogs pas ni byams pa'i yon tan bstan pa ste/ de la rgya chen po zhes bya ba ni bsam gtan rgya che ba'i phyir ro/ /shin tu yangs pa zhes bya ba ni phyogs bcu'i 'jig rten gyi khams kyi sems can thams cad la byams pa je yangs je yangs su spel zhing bsgom pa'i phyir ro/ /mi gnyis pa zhes bya ba ni byams pa'i rang bzhin rnam par mi rtog pa'i bdag nyid ro gcig pa'i phyir ro/ /tshad med pa zhes bya ba ni sems can tshad med pa la dmigs pa'i phyir ro/ /gcugs med pa zhes bya ba ni nang gi sems kyi gnod par bya ba'i bsam pa med pa'i phyir ro/ /ltod pa med pa zhes bya ba ni phyi rol gyi nor rdzas la sogs pa la chags shing ltod pa las gnod par byed pa med pa'i phyir ro/ /yongs su rdzogs pa shin tu bsgom pa zhes bya ba ni kun rdzob tu sems can la sogs pa la dmigs pa dang / don dam par 'khor gsum yongs su dag par bsgom pa goms par byas pa'i phyir ro/ /'jig rten chos kyi dbyings kyis klas pa/ nam mkha'i mthas gtugs pa'i phyogs bcu rgyas par bkang ste/ mos par byas shing rnam par spyod do zhes bya ba ni sems can la dmigs pa'i byams pa bsgom pa na/ dang po sems ma goms pa'i tshe bdag gang la byams pa'i mi de la sngon pas kyang lhag par byams pa bsgoms la/ de'i 'og tu de bas 'bring du byams pa la rab tu byams par bsgom/ de'i 'og tu cung zad byams pa la 'bring du byams par bsgom/ de'i 'og tu cung zad kyang mi byams pa la cung zad byams par bsgom ste/ de bzhin du khyim gang gi mi dang / grong khyer gcig gi mi dang / yul gcig gi mi dang / khams gcig gi mi dang / rgyal khams gcig gi mi dang / gling gcig gi mi dang / gling bzhi dang / stong gsum gyi stong chen po'i 'jig rten gyi khams nas phyogs bcu 'jig rten gyi khams mtha' yas mu med pa'i sems can thams cad la byams pa rgya je che je cher spel zhing bsgom mo zhes bstan pa'o/ /de snying rje dang ldan pa'i sems rgya chen po shin tu yangs pa zhes bya ba la sogs pa ni snying rje tshad med pa bsgom pa bstan pa'o/ / snying rje la yang rnam pa gsum ste/ sems can la dmigs pa dang / chos la dmigs pa dang / dmigs pa med pa dang gsum ste/ sa'i rim pas rnam pa gsum du dbye ba dang / rgya chen po dang / shin tu yangs pa la sogs pa'i yon tan dang / sems can la dmigs pa goms pa'i rgya je che je cher spel ba ni gong ma bzhin no/ /de dga' ba dang ldan pa'i sems rgya chen po zhes bya ba la sogs pa ni dga' ba tshad med pa bsgom pa bstan pa'o/ /dga' ba la yang rnam pa gsum ste/ sems can bde zhing 'byor pa rnams la dmigs nas dga' ba dang / bdag gi bsod nams dang ye shes kyi tshogs yongs su rdzogs pas dga' ba dang / dam pa'i chos rtogs shing nyams 'og tu chud pa'i dga' ba'o/ /de mi dmigs pa'i tshul gyis btang snyoms dang ldan pa'i sems rgya chen po zhes bya ba la sogs pas ni btang snyoms tshad med pa bsgom pa bstan pa'o/ /btang snyoms la yang rnam pa gsum ste/ sems can gyi don byed pa na/ skal ba dang mi ldan pa'i sems can rnams la re zhig btang snyoms su 'jog pa dang / rnyed pa dang ma rnyed pa dang / bstod pa dang smad pa dang / grags pa dang ma grags pa dang / bde ba dang sdug bsngal te 'jig rten gyi chos brgyad kyis ma gos pa'i btang snyoms dang / rnam par mi rtog pa'i btang snyoms te/ rgya chen po la sogs pa'i yon tan rnams dang / phyogs bcu thams cad du khyab par bsgom pa ni dga' ba dang btang snyoms gnyi ga yang gong du bshad pa bzhin no/ /de rnam pa thams cad du gzugs kyi 'du shes las yang dag par 'das te zhes bya ba nas/ 'di ni byang chub sems dpa' sems dpa' chen po'i sbyin pa'i pha rol tu phyin pa'o zhes bya ba'i bar du sbyin pa'i pha rol tu phyin pa yongs su rdzogs par sgrub pa'i zhar la gzugs med pa'i snyoms par 'jug pa bzhi bsgom pa bstan pa ste/ de rnam pa thams cad du gzugs kyi 'du shes las yang dag par 'das te zhes bya ba ni kha dog dang dbyibs kyi gzugs kyi rang bzhin la dmigs pa'i 'du shes kyis skyo zhing ma chags pas nam mkha' lta bur mos pa bskyed de gzugs kyi 'du shes dang bral ba la bya'o/ /thogs pa'i 'du shes rnams nub par gyur cing zhes bya ba ni de ltar gzugs kyi 'du shes dang bral cing nam mkha' lta bu'i bsgom pa goms pas/ ri dang rtsig pa la sogs pa thogs pa dang sgrib pa rnams med par gyur to zhes bya ba'i don to/ /sna tshogs kyi 'du shes yid la mi byed pas zhes bya ba ni de ltar gzugs kyi 'du shes dang bral bas bza' ba dang btung ba dang / gzhon pa dang gos dang rgyan la sogs pa dngos po sna tshogs kyi 'du shes yid la byed pa mi 'byung ba'i phyir ro/ /nam mkha' mtha' yas so zhes te/ /nam mkha' mtha' yas skye mched la nye bar bsgrubs te gnas so zhes bya ba ni de ltar gzugs kyi 'du shes thams cad dang bral bas nam mkha' lta bur mos pa goms par bya ste/ nam mkha' de yang mtha' yas so snyam pa'i 'du shes bsgom pa la gnas so zhes bya ba'i don to/ /de rnam pa thams cad du nam mkha' mtha' yas skye mched las yang dag par 'das te/ rnam par shes pa mtha' yas so zhes rnam shes mtha' yas skye mched la nye bar bsgrubs te gnas so zhes bya ba ni nam mkha' mtha' yas par bsgom pa'i 'du shes de yang dngos po rags pa la dmigs pa yin par sun phyung nas/ 'di dag thams cad rnam par shes pa tsam du zad de/ rnam par shes pa de yang mtha' yas so snyam pa'i 'du shes la gnas shing bsgom mo zhes bstan pa'o/ /de rnam pa thams cad du rnam shes mtha' yas skye mched las yang dag par 'das te/ cung zad ma yod do zhes cung zad med pa'i skye mched la nye bar bsgrubs te gnas so zhes bya ba ni de ltar rnam shes mtha' yas skye mched la goms par byas pas rnam par shes pa ma gtogs pa'i dngos po gzhan gzugs can nam gzugs med pa gang yang med par rtogs nas/ rnam par shes pa mtha' yas so snyam pa'i 'du shes de yang spangs te/ cung zad kyang med do snyam pa'i 'du shes tsam la gnas shing bsgom mo zhes bya ba'i don to/ /de rnam pa thams cad du cung zad med pa'i skye mched las yang dag par 'das te/ 'du shes med 'du shes med min skye mched las mi dmigs pa'i tshul gyis nye bar bsgrubs te gnas so zhes bya ba ni cung zad med do snyam du sems pa'i 'du shes de yang 'du shes rags pa yin par sun phyung nas/ de lta bu'i 'du shes rags pa la mi dmigs pa'i phyir 'du shes med ces bya'o/ /'gog pa'i snyom par 'jug pa ltar 'du shes rnam pa thams cad du bkag pa ni ma yin gyi/ mtshan ma med pa'i 'du shes phra mo 'byung ba'i phyir 'du shes med min zhes bya ste/ de lta bu'i snyoms par 'jug pa la bsgom zhing gnas so zhes bya ba'i don to/ /mi dmigs pa'i tshul gyis zhes bya ba ni de lta bu'i snyoms par 'jug pa yang kun rdzob tu sems sbyang ba'i phyir sgom pa tsam du zad kyi/ nyan thos dang rang sangs rgyas ltar snyoms par 'jug pa de dag la dngos por dmigs pa ni ma yin no zhes bya ba'i don to/ /mi dmigs pa'i tshul gyis zhes bya ba'i tshig 'di snyoms par 'jug pa gong ma dag la ma smos kyang kun gyi mjug tu smos pas thams cad la sbyar bar bya'o/ /'di ni byang chub sems dpa' sems dpa' chen po'i bsam gtan te zhes bya ba la sogs pa ni sbyin pa'i pha rol tu phyin pa yongs su rdzogs par sgrub pa'i zla la/ bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi mi dmigs pa'i tshul gyis bsgom par mjug bsdus nas bstan pa ste/ nam mkha'i rnam pa dang / tshul dang mtshan mas mnyam par 'jog cing zhes bya ba ni ji ltar nam mkha' la kha dog dang dbyibs la sogs pa'i rnam pa dang / tshul dang mtshan ma med pa de bzhin du bsam gtan dang / tshad med pa dang / gzugs med pa'i snyoms par 'jug pa 'di dag la yang don dam par rnam pa dang tshul dang / mtshan mar mi 'dzin pa mnyam par 'jog go zhes bya ba'i don to/ /rnam par ldang ba'i tshe yang rnam pa thams cad mkhyen pa nyid du yongs su bsngo ba zhes bya ba ni ting nge 'dzin las langs pa'i tshe kun rdzob kyi bden pa la gnas te/ bsam gtan dang / tshad med pa dang / snyoms par 'jug pa bsgom pa'i dge ba'i rtsa ba de yang sems can thams cad dang thun mong du bya ste/ rnam pa thams cad mkhyen pa nyid du yongs su bsngo ba de nyid thabs dang shes rab zung du 'brel cing / 'khor gsum yongs su dag pa'i phyir sbyin pa'i pha rol tu phyin pa yongs su rdzogs pa yin no zhes bstan pa'o/ /de tshul khrims kyi pha rol tu phyin pa la spyod cing zhes bya ba nas/ 'di ni byang chub sems dpa' sems dpa' chen po'i shes rab kyi pha rol tu phyin pa ste/ tshe dang ldan pa sha ra dwa ti'i bu de ltar na byang chub sems dpa' sems dpa' chen po theg pa chen po la yang dag par zhugs pa zhes bya'o zhes bya ba'i bar du tshul khrims dang / bzod pa dang / brtson 'grus dang / bsam gtan dang / shes rab kyi pha rol tu phyin pa rnams yongs su rdzogs par bsgrub pa'i zhar la bsam gtan dang / tshad med pa dang / gzugs med pa'i snyoms par 'jug pa rnams bsgom pa bstan pa ste/ de dag gi don ni sbyin pa'i pha rol tu phyin pa'i skabs su bshad pa bzhin no/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po byams pa dang ldan pa'i sems rgya chen po shin tu yangs pa zhes bya ba nas/ 'di ni byang chub sems dpa' sems dpa' chen po'i shes rab kyi pha rol tu phyin pa ste/ tshe dang ldan pa sha ra dwa ti'i bu 'di ni byang chub sems dpa' sems dpa' chen po shes rab kyi pha rol tu phyin pa la spyod pa'i theg pa chen po'o zhes bya ba'i bar du ni/ tshad med pa bzhi dang / bsam gtan bzhi dang / gzugs med pa'i snyoms par 'jug pa bzhi bsgom pa'i zhar la pha rol tu phyin pa drug yongs su rdzogs par bsgom pa theg pa chen po la yang dag par zhugs pa yin par bstan pa ste gnyis pa'o/ /de la tshe dang ldan pa sha ra dwa ti'i bu gzhan yang byang chub sems dpa' sems dpa' chen po byams pa dang ldan pa'i sems rgya chen po shin tu yangs pa zhes bya ba nas/ 'di ni byang chub sems dpa' sems dpa' chen po'i sbyin pa'i pha rol tu phyin pa'o zhes bya ba'i bar du ni bsam gtan dang / tshad med pa dang / gzugs med pa'i snyoms par 'jug pa rnams la bdag kyang bsgom zhing / de dag gi rang bzhin dang yon tan la sogs pa gzhan la yang ston pa ni/ chos kyi sbyin pa yin pas bsam gtan dang / ting nge 'dzin dang / gzugs med pa'i snyoms par 'jug pa rnams bsgom pa'i zhar la sbyin pa'i pha rol tu phyin pa yongs su rdzogs par sgrub pa bstan pa ste/ bsam gtan dang / tshad med pa dang / gzugs med pa'i snyoms par 'jug pa rnams kyi don ni gong du bshad pa bzhin no/ /'di ni byang chub sems dpa' sems dpa' chen po'i ting nge 'dzin te zhes bya ba ni de ltar bsam gtan dang / tshad med pa dang / gzugs med pa'i snyoms par 'jug pa rnams mi dmigs pa'i tshul gyis bsgom pa de nyid byang chub sems dpa'i ting nge 'dzin yin no zhes bstan pa'o/ /byang chub sems dpa' sems dpa' chen po de rnam pa thams cad mkhyen pa nyid dang ldan pa'i sems snying rje chen po sngon du 'gro bas nyon mongs pa rab tu spong ba'i phyir zhes bya ba ni bsam gtan dang / tshad med pa dang / gzugs med pa'i snyoms par 'jug pa de dag gzhan la ston pa'i rgyu bstan pa ste/ byang chub sems dpa' de rnam pa thams cad mkhyen pa nyid thob par 'dod pa'i sems dang ldan zhing snying rje chen po'i dbang du gyur pas sems can thams cad kyi nyon mongs pa spong ba'i phyir/ bsam gtan dang / ting nge 'dzin dang / gzugs med pa'i snyoms par 'jug pa de dag gzhan la ston to zhes bya ba'i don to/ /de la de dag gzhan la brjod cing zhes bya ba ni bsam gtan la sogs pa de dag gi ming tsam zhig gzhan la brjod pa'o/ /'chad pa dang zhes bya ba ni nges pa'i tshig rnams 'chad pa'o/ /ston cing zhes bya ba ni don dang tshig gnyi ga ston pa'o/ /'grel pa la zhes bya ba ni bsam gtan la sogs pa'i tshig dang don mdor bsdus pa rnams zhib tu 'grel pa'o/ /rnam par 'byed cing zhes bya ba ni bsam gtan la sogs pa'i yan lag rnams so sor phye ste ston pa'o/ /gsal bar byed de zhes bya ba ni slon dpon 'chab pa med pa'i tshul gyis brda phrad par byed pa'o/ /de dag gi ro dang zhes bya ba ni bsam gtan la sogs pa'i ro la chags pa spang ba'i phyir thabs ston pa'o/ /de dag gi skyon dang zhes bya ba ni bsam gtan la sogs pa'i ro la chags na de dag gi dbang gis gzugs dang / gzugs med pa'i khams su skye ba'i nyes pa'i dmigs ston pa'o/ /'byung ba yang tshul bzhin du ston pa zhes bya ba ni bsam gtan la sogs pa 'di dag don dam par mi dmigs par ston pa nyid de dag gi ro la chags pa la sogs pa mtshan mar 'dzin pa las thar bar 'gyur ba'i phyir 'byung ba tshul bzhin du ston pa zhes bya'o/ /bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi las skabs 'dir go rims bsnor te/ tshad med pa bzhi dang por bshad pa ni byams pa dang snying rje'i dbang gis sbyin pa'i pha rol tu phyin pa la 'jog pa'i phyir ro/ /nam byang chub sems dpa' sems dpa' chen po rnam pa thams cad mkhyen pa nyid dang ldan pa'i yid la bya ba de dag gis bsam gtan dang / tshad med pa dang / gzugs med pa'i snyoms par 'jug pa de dag la mnyam par gzhog cing rnam par ldang yang 'di lta ste/ nyan thos dang rang sangs rgyas kyi sa yang rung ste/ sems bskyed pa gzhan gyi go mi 'byed pa de ni byang chub sems dpa' sems dpa' chen po'i tshul khrims kyi pha rol tu phyin pa ma nyams pa'o zhes bya ba ni bsam gtan dang / tshad med pa dang / gzugs med pa'i snyoms par 'jug pa rnams bsgom pa'i zhar la tshul khrims kyi pha rol tu phyin pa yongs su rdzogs par sgrub pa bstan pa ste/ bsam gtan la sogs pa bsgom pa'i tshe rnam pa thams cad mkhyen pa nyid thob par bya ba'i yid dam bcas pa las/ nyan thos dang rang sangs rgyas kyis thob par byed pa'i sems mi skyed pa nyid byang chub sems dpa' yid dam ma nyams pa'i phyir tshul khrims kyi pha rol tu phyin pa yin no zhes bstan pa'o/ / de ltar byang chub sems dpa' sems dpa' chen po rnam pa thams cad mkhyen pa nyid dang ldan pa'i yid la bya bas zhes bya ba nas/ 'di ni byang chub sems dpa' sems dpa' chen po'i bzod pa'i pha rol tu phyin pa'o zhes bya ba'i bar du ni/ bsam gtan dang / tshad med pa dang / gzugs med pa'i snyoms par 'jug pa rnams bsgom pa'i zhar la bzod pa'i pha rol tu phyin pa yongs su rdzogs par sgrub pa bstan pa ste/ yid la bya ba de dag la bzod pa dang mos pa dang / rtogs pa dang sems shing khong du chud par byed pa zhes bya ba ni rnam pa thams cad mkhyen pa nyid thob par bya ba'i yid la bya ba dang / sems can thams cad kyi nyon mongs pa zad par bya ba'i phyir chos bstan to snyam du sems shing yid la byed pa de dag bzod cing dang du len pa'i rnam grangs so/ /nam byang chub sems dpa' sems dpa' chen po rnam pa thams cad mkhyen pa nyid dang ldan pa'i yid la bya bas/ bsam gtan dang / tshad med pa dang / gzugs med pa'i snyoms par 'jug pa de dag gis rnam par spyod pa'i tshe sems can thams cad kyi don dang / rnam pa thams cad mkhyen pa nyid kyi phyir brtson 'grus nyams par mi byed pa 'di ni byang chub sems dpa' sems dpa' chen po'i brtson 'grus kyi pha rol tu phyin pa'o zhes bya ba ni/ bsam gtan dang / tshad med pa dang / gzugs med pa'i snyoms par 'jug pa de rnams bsgom pa'i zhar la brtson 'grus kyi pha rol tu phyin pa yongs su rdzogs par sgrub pa bstan pa'o/ /nam byang chub sems dpa' sems dpa' chen po rnam pa thams cad mkhyen pa nyid dang ldan pa'i yid la bya bas/ bsam gtan dang / rnam par thar pa dang / ting nge 'dzin dang / snyoms par 'jug pa rnams la mnyam par gzhog cing rnam par ldang yang nyan thos kyi sa'am rang sangs rgyas kyi sar mi ltung ba 'di ni byang chub sems dpa' sems dpa' chen po'i bsam gtan gyi pha rol tu phyin pa'o zhes bya ba ni bsam gtan dang / tshad med pa dang / gzugs med pa'i snyoms par 'jug pa rnams bsgom pa'i zhar la bsam gtan gyi pha rol tu phyin pa yongs su rdzogs par bsgrub pa bstan pa ste/ de ltar bsam gtan la sogs pa bsgom pa'i tshe rnam pa thams cad mkhyen pa nyid yid la byas/ nyan thos dang rang sangs rgyas kyi yid la bya bas sems gzhan du ma yengs pa nyid bsam gtan gyi pha rol tu phyin pa yin par bstan pa'o/ /'dir yang bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi ste/ chos gnyis po 'di rnams bsgom pa'i zhar la pha rol tu phyin pa drug yongs su rdzogs par sgrub pa'i skabs yin pas rnam par thar pa dang / ting nge 'dzin ces 'byung ba rnam par thar par bya ba'i phyir tshad med pa bzhi'i ting nge 'dzin bsgom pa la bya ba las tshad med pa bzhi bsgom pa yin par rig par bya'o/ / nam byang chub sems dpa' sems dpa' chen po rnam pa thams cad mkhyen pa nyid dang ldan pa'i yid la bya bas bsam gtan dang po'i yan lag dang zhes bya ba nas/ 'di ni byang chub sems dpa' sems dpa' chen po'i shes rab kyi pha rol tu phyin pa ste/ tshe dang l dan pa sha ra dwa ti'i bu 'di ni byang chub sems dpa' sems dpa' chen po shes rab kyi pha rol tu phyin pa la spyod pa'i theg pa chen po'o zhes bya ba'i bar du ni bsam gtan la sogs pa chos bcu gnyis po de dag bsgom pa'i zhar la shes rab kyi pha rol tu phyin pa yongs su rdzogs par sgrub pa bstan pa ste/ bsam gtan bzhi la sogs pa chos bcu gnyis po de dag la shes rab kyi kun rdzob tu mi rtag pa dang / sdug bsngal ba la sogs pa'i rnam par rtog cing don dam par de dag mi dmigs pa dang / de dag gis rlom sems su mi 'gyur ba nyid shes rab kyi pha rol tu phyin pa yin no zhes bstan pa'o/ /de la bsam gtan dang po'i yan lag ni rtog pa dang bcas pa dang / dpyod pa dang bcas pa dang / dga' ba dang / bde ba dang / sems rtse gcig pa dang lnga'o/ /bsam gtan gnyis pa'i yan lag ni nang yongs su dang ba dang / dga' ba dang / bde ba dang / sems rtse gcig pa dang bzhi'o/ /bsam gtan gsum pa'i yan lag ni btang snyoms dang / dran pa dang / shes bzhin dang / bde ba dang / sems rtse gcig pa dang lnga'o/ / bsam gtan bzhi pa'i yan lag ni sdug bsngal yang med bde ba yang med pa dang / btang snyoms dang / dran pa dang / sems rtse gcig pa dang bzhi'o/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po'i theg pa chen po ni rnam pa thams cad du dran pa nye bar gzhag pa bzhi bsgom pa dang zhes bya ba nas/ rnam pa thams cad du rnam pa thams cad mkhyen pa nyid bsgom pa ste/ tshe dang ldan pa sha ra dwa ti'i bu 'di ni byang chub sems dpa' sems dpa' chen po'i theg pa chen po'o zhes bya ba'i bar du ni dran pa nye bar gzhag pa bzhi nas/ rnam pa thams cad mkhyen pa nyid kyi bar du rnam par byang ba'i chos ming gis smos pa rnams rnam pa thams cad du bsgom pa theg pa chen po yin pa dang / theg pa la yang dag par zhugs pa yin no zhes bstan pa ste gsum pa'o/ / rnam pa thams cad du bsgom pa zhes bya ba ni kun rdzob tu dran pa nye bar gzhag pa la sogs pa'i chos rnams kyi rang dang spyi'i mtshan nyid phyin ci ma log par rtogs shing don dam par de dag la dngos por mi dmigs pa'o/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po byams pa'i ting nge 'dzin la mnyam par gzhog cing bdag gis sems can thams cad yongs su bskyab par bya'o zhes de la gzhol bar byed do zhes bya ba nas/ 'di ni byang chub sems dpa' sems dpa' chen po'i shes rab kyi pha rol tu phyin pa ste/ tshe dang ldan pa sha ra dwa ti'i bu 'di ni byang chub sems dpa' sems dpa' chen po'i theg pa chen po'o zhes bya ba'i bar du ni tshad med pa bzhi lhur blangs te bsgom pa'i zhar la pha rol tu phyin pa drug yongs su rdzogs par sgrub pa theg pa chen po yin pa dang / theg pa chen po la yang dag par zhugs pa yin par bstan pa ste bzhi pa'o/ /de la byams pa'i ting nge 'dzin la mnyam par gzhog cing zhes bya ba nas/ 'di ni byang chub sems dpa' sems dpa' chen po tshad med pa rnams la spyod pa'i sbyin pa'i pha rol tu phyin pa'o zhes bya ba'i bar du ni/ tshad med pa rnams lhur blangs te bsgom pa'i zhar la sbyin pa'i pha rol tu phyin pa yongs su rdzogs par sgrub pa bstan pa ste/ sems can thams cad yongs su bskyab par bya'o zhes de la gzhol bar byed do zhes bya ba ni byams pa'i dbang gis dgra la sogs pa'i 'jigs pa las skyob cing mi 'jigs pa sbyin pa'o/ /sems can rnams la snying rje ba dang / snying brtse ba'i nyams su byed do zhes bya ba ni snying rje'i dbang gis na ba dang / tshe 'pho ba las skyob cing mi 'jigs pa sbyin pa'o/ /bdag nyid kyis dgrol bar bya'o zhes sems can rnams la sems so zhes bya ba ni dga' ba'i dbang gis mu ge dang / 'tsho ba'i yo byad la sogs pas phongs pa las thar bar byed cing mi 'jigs pa sbyin pa'o/ /sems can rnams kyi zag pa bzod pa bya ba la rab tu gzhol bar byed de zhes bya ba ni sems can rnams kyi zhe sdang la sogs pa'i nyon mongs pas bdag la gnod pa byed kyang btang snyoms kyi dbang gis dang du blangs nas/ bzod cing slar gnod pa mi byed pas mi 'jigs pa sbyin pa ste/ skabs 'dir ni sbyin pa'i pha rol tu phyin pa zhes spyir smos su zin kyang mi 'jigs pa sbyin pa la bya'o/ /nam byang chub sems dpa' sems dpa' chen po bsam gtan dang / tshad med pa rnams kyis rnam pa dang zhes bya ba nas/ tshul khrims kyi pha rol tu phyin pa yongs su ma nyams pa'o zhes bya ba'i bar du ni tshad med pa rnams lhur blangs te bsgom pa'i zhar la tshul khrims kyi pha rol tu phyin pa yongs su rdzogs par sgrub pa bstan pa ste/ rnam pa thams cad mkhyen pa nyid thob par bya ba'i yid dam bcas pa las ma nyams shing / nyan thos dang rang sangs rgyas kyi sa thob par mi byed pa nyid tshul khrims kyi pha rol tu phyin pa yongs su ma nyams pa yin no/ /tshad med pa bzhi'i rnam pa dang / tshul dang mtshan ma ni rgya che ba dang / shin tu yangs pa la sogs pa sngar bshad pa'o/ /nam byang chub sems dpa' sems dpa' chen po bsam gtan dang / tshad med pa dang / gzugs med pa'i snyoms par 'jug pa de dag gis ma 'dres par rnam par spyod cing sa gnyis po nyan thos kyi sa'am rang sangs rgyas kyi sar 'dod pa mi skyed kyi rnam pa thams cad mkhyen pa nyid du mos shing dga' ba 'di ni byang chub sems dpa' sems dpa' chen po tshad med pa rnams la spyod pa'i bzod pa'i pha rol tu phyin pa'o zhes bya ba ni tshad med pa bzhi lhur blangs te bsgom pa'i zhar la bzod pa'i pha rol tu phyin pa yongs su rdzogs par sgrub pa bstan pa ste/ skye ba med pa'i chos zab mos mi skrag cing ma skyes pa'i chos la bzod pa thob pas nyan thos dang rang sangs rgyas kyi sa la 'dod pa mi skye bar rnam pa thams cad mkhyen pa nyid du mos shing dga' ba nyid bzod pa'i pha rol tu phyin pa yin no zhes bstan pa'o/ /nam byang chub sems dpa' sems dpa' chen po rnam pa thams cad mkhyen pa nyid dang ldan pa'i sems bskyed pas/ mi dge ba'i chos rnams rab tu spong ba dang / dge ba'i chos phun sum tshogs par bya ba'i don du brtson 'grus mi gtong bas rnam par spyod pa 'di ni byang chub sems dpa' sems dpa' chen po tshad med pa rnams la spyod pa'i brtson 'grus kyi pha rol tu phyin pa'o zhes bya ba ni tshad med pa bzhi lhur blangs te bsgom pa'i zhar la brtson 'grus kyi pha rol tu phyin pa yongs su rdzogs par sgrub pa bstan pa ste/ /rnam pa thams cad mkhyen pa nyid du sems bskyed pa las bar ma dor sems zhum par mi byed pa dang / mi mthun pa'i phyogs kyi chos rnams spang ba dang / gnyen po'i chos rnams goms par bya ba'i brtson 'grus mi gtong ba nyid brtson 'grus kyi pha rol tu phyin pa yin no zhes bstan pa'o/ /nam byang chub sems dpa' sems dpa' chen po bsam gtan dang / tshad med pa dang / gzugs med pa'i snyoms par 'jug pa 'di dag la yang mnyam par gzhog la zhes bya ba nas 'di ni byang chub sems dpa' sems dpa' chen po tshad med pa rnams la spyod pa'i bsam gtan gyi pha rol tu phyin pa'o zhes bya ba'i bar du ni tshad med pa bzhi lhur blangs te bsgom pa'i zhar la bsam gtan gyi pha rol tu phyin pa yongs su rdzogs par sgrub pa bstan pa ste/ bsam gtan dang / tshad med pa dang / gzugs med pa'i snyoms par 'jug pa rnams kyi dbang gis skye bar mi 'gyur ba dang / bsam gtan la sogs pa'i bde ba'i ro la myong zhing chags par mi byed pa dang / bsam gtan la sogs pa'i dbang du gyur nas rnam pa thams cad mkhyen pa nyid yid la bya ba las sems gzhan du yengs par ma gyur pa nyid bsam gtan gyi pha rol tu phyin pa yin no zhes bstan pa'o/ /nam byang chub sems dpa' sems dpa' chen po rnam pa thams cad mkhyen pa nyid dang ldan pa'i yid la bya ba zhes bya ba nas/ tshe dang ldan pa sha ra dwa ti'i bu 'di ni byang chub sems dpa' sems dpa' chen po'i theg pa chen po'o zhes bya ba'i bar du ni tshad med pa bzhi lhur blangs te bsgom pa'i zhar la shes rab kyi pha rol tu phyin pa yongs su rdzogs par sgrub pa bstan pa ste/ shes rab kyi dbang gis bsam gtan la sogs pa de dag nyan thos kyi theg pa'i tshul du mi rtag pa dang sdug bsngal ba dang / bdag med pa dang / zhi ba dang / stong pa nyid dang / mtshan ma med pa dang / smon pa med pa'i rnam par yang rtog la/ nyan thos dang rang sangs rgyas kyi sa thob par yang mi byed pa nyid shes rab kyi pha rol tu phyin pa yin no zhes bstan pa'o/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po'i theg pa chen po ni nang stong pa nyid shes kyang dmigs pa'i tshul gyis ma yin zhes bya ba nas/ dngos po med pa'i ngo bo nyid stong pa nyid shes kyang dmigs pa'i tshul gyis ma yin pa ste/ tshe dang ldan pa sha ra dwa ti'i bu 'di ni byang chub sems dpa' sems dpa' chen po'i theg pa chen po'o zhes bya ba'i bar du ni stong pa nyid bco brgyad kun rdzob tu shes par byas nas/ don dam par mi dmigs pa theg pa chen po yin pa dang / de ltar spyod pa nyid theg pa chen po la yang dag par zhugs pa yin par bstan pa ste lnga pa'o/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po'i theg pa chen po ni chos thams cad la sems rnam par mi 'khrug cing mnyam par gzhag par shes pa ste/ tshe dang ldan pa sha ra dwa ti'i bu 'di ni byang chub sems dpa' sems dpa' chen po'i theg pa chen po'o zhes bya ba ni chos thams cad la mtshan mar mi 'dzin pas sems ma yengs shing mnyam par gzhag pa nyid theg pa chen po yin la/ de ltar spyod pa nyid theg pa chen po la yang dag par zhugs pa yin no zhes bstan pa ni drug pa ste/ 'dir chos thams cad ces bya ba ni rnam par byang ba'i chos rnams la bya ste/ sems rnam par mi 'khrug cing zhes bya ba ni rnam par byang ba'i chos rnams la yang mtshan mar mi 'dzin cing sems mi g.yeng ba la bya'o/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po'i theg pa chen po ni rtag ces bya bar shes par mi 'jug ces bya ba nas/ tshe dang ldan pa sha ra dwa ti'i bu 'di ni mi dmigs pa'i tshul du byang chub sems dpa' sems dpa' chen po'i theg pa chen po'o zhes bya ba'i bar du ni/ rtag pa dang mi rtag pa la sogs pa'i mtha' gnyis su mi 'dzin pa theg pa chen po yin pa dang / de ltar spyod pa nyid theg pa chen po la yang dag par zhugs pa yin par bstan pa ste bdun pa'o/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po'i theg pa chen po ni 'dod pa'i khams su shes pa 'jug par mi byed/ gzugs dang gzugs med pa'i khams su shes pa 'jug par mi byed la/ 'dod pa dang / gzugs dang / gzugs med pa'i khams mi shes pa yang med pa ste/ tshe dang ldan pa sha ra dwa ti'i bu 'di yang de mi dmigs pa'i tshul gyis byang chub sems dpa' sems dpa' chen po'i theg pa chen po'o zhes bya ba ni don dam par khams gsum mnyam pa nyid du rtogs pa dang / kun rdzob tu khams gsum gyi mtshan nyid mi shes pa yang ma yin pa nyid theg pa chen po yin la/ de ltar spyod pa nyid theg pa chen po la yang dag par zhugs pa yin no zhes bstan pa ste brgyad pa'o/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po'i theg pa chen po ni zhes bya ba nas/ tshe dang ldan pa sha ra dwa ti'i bu 'di yang de mi dmigs pa'i tshul du byang chub sems dpa' sems dpa' chen po'i theg pa chen po'o zhes bya ba'i bar du ni 'jig rten dang 'jig rten las 'das pa'i chos rnams dang / zag pa dang bcas pa dang / zag pa med pa'i chos rnams dang / 'dus byas dang / 'dus ma byas pa'i chos rnams la shes pa mi 'jug la/ kun rdzob tu chos rnams so so'i rang dang spyi'i mtshan nyid mi shes pa yang ma yin pa/ theg pa chen po yin pa dang / de ltar spyod pa nyid theg pa chen po la yang dag par zhugs pa yin par bstan pa ste dgu pa'o/ /de ltar theg pa chen po la yang dag par zhugs pa'i phyir byang chub sems dpa' sems dpa' chen po zhes bya'o zhes bya ba'i tshig gi don 'phags pa gang pos bstan pa dang / ji tsam gyis na theg pa chen po la yang dag par zhugs pa yin pa dang / theg pa chen po gang yin pa 'phags pa sha ra dwa ti'i bus dris pa la/ 'phags pa gang pos theg pa chen po dang / theg pa chen po la yang dag par zhugs pa rnam pa dgus lan btab pa bstan nas/ de'i 'og tu theg pa chen po la yang dag par gnas pa'i don zhib tu bstan pa'i skabs dbye ba'i phyir/ smras pa/ tshe dang ldan pa gang po ji tsam gyis na byang chub sems dpa' sems dpa' chen po theg pa chen po la gnas zhes bya zhes bya ba dris so/ /gang pos smras pa/ tshe dang ldan pa sha ra dwa ti'i bu 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ sbyin pa'i pha rol tu phyin pa la yang dag par gnas kyang zhes bya ba nas/ de ltar na tshe dang ldan pa sha ra dwa ti'i bu byang chub sems dpa' sems dpa' chen po theg pa chen po la yang dag par gnas zhes bya'o zhes bya ba'i bar gyis byang chub sems dpa' sa brgyad pa yan chad la gnas pa rnam par mi rtog pa'i spyod pa rnam pa drug bstan te de ltar rnam par mi rtog pa la spyod pa ni theg pa chen po la yang dag par gnas pa yin no zhes bstan to/ /de la rnam par mi rtog pa'i spyod pa rnam pa drug ni gang pos smras pa/ tshe dang ldan pa sha ra dwa ti'i bu 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ sbyin pa'i pha rol tu phyin pa la yang dag par gnas kyang zhes bya ba nas/ de ltar na byang chub sems dpa' sems dpa' chen po mi dmigs pa'i tshul gyis shes rab kyi pha rol tu phyin pa la yang dag par gnas zhes bya'o zhes bya ba'i bar du rnam par mi rtog par pha rol tu phyin pa drug la spyod pa bstan pa ste dang po'o/ /de la sbyin pa yang mi dmigs/ sbyin pa'i pha rol tu phyin pa yang mi dmigs/ byang chub sems dpa' yang mi dmigs/ len pa yang mi dmigs zhes bya ba ni sbyin pa dang / byang chub sems dpa' dang / len pa gsum mi dmigs zhes smos pas ni 'khor gsum yongs su dag pa'i sbyin pa'i pha rol tu phyin pa bstan pa'o/ / sbyin pa'i pha rol tu phyin pa yang mi dmigs zhes smos pas ni/ sbyin pa'i pha rol tu phyin pa nyid la yang don dam par mtshan mar mi 'dzin pa bstan pa'o/ /yid la bya ba de dag kyang mi dmigs te zhes bya ba ni 'khor gsum yongs su dag par bya ba'i yid la bya ba yang don dam par mi dmigs pa bstan pa'o/ /de bzhin du tshul khrims kyi pha rol tu phyin pa la sogs pa lhag ma lnga rnams la yang sbyar bar bya'o/ /dge ba dang mi dge ba la sogs pa'i chos rnams mi dmigs pa smos pas ni shes rab kyis shes par bya ba'i yul rnams mi dmigs pa bstan to/ tshe dang ldan pa sha ra dwa ti'i bu gzhan yang byang chub sems dpa' sems dpa' chen po rnam pa thams cad mkhyen pa nyid dang ldan pa'i yid la bya ba ma 'dres par bsgom pa rnam par bsgom pa'i don du de mi dmigs pa'i tshul gyis nang stong pa nyid bsgom mo zhes bya ba nas/ rnam pa thams cad mkhyen pa nyid dang ldan pa'i yid la bya ba ma 'dres par bsgom pa rnam par bsgom pa'i don du de mi dmigs pa'i tshul gyis dngos po med pa'i ngo bo nyid stong pa nyid bsgom mo zhes bya ba'i bar du ni/ stong pa nyid bco brgyad rnam par mi rtog pa bsgom pa'i spyod pa bstan pa ste gnyis pa'o/ /de la rnam pa thams cad mkhyen pa nyid dang ldan pa'i yid la bya ba ma 'dres pas zhes bya ba'i don ni nyan thos dang rang sangs rgyas kyi yid la bya ba dang / rnam par mi rtog pa'i yid la bya ba dang ma 'dres pa la bya'o/ /bsgom pa rnam par bsgom pa'i don du zhes bya ba ni de ltar bsgom pa nyid don dam par dngos po med par bsgom pa'i phyir zhes bya ba'i don to/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po rnam pa thams cad mkhyen pa nyid dang ldan pa'i yid la bya ba ma 'dres par bsgom pa rnam par bsgom pa'i don du de mi dmigs pa'i tshul gyis dran pa nye bar gzhag pa bzhi bsgom mo zhes bya ba nas/ de mi dmigs pa'i tshul gyis sangs rgyas kyi chos ma 'dres pa bco brgyad bsgom mo zhes bya ba'i bar du ni dran pa nye bar gzhag pa la sogs pa dkar po'i chos thams cad rnam par mi rtog par bsgom pa'i spyod pa bstan pa ste gsum pa'o/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen pos 'di ltar byang chub sems dpa' dmigs su med pa'i phyir 'di lta ste/ byang chub sems dpa' zhes bya ba 'di ni tha snyad tsam du zad do zhes bya bar shes so zhes bya ba nas sangs rgyas dmigs su med pa'i phyir sangs rgyas zhes bya ba 'di ni ming tsam du zad do zhes bya bar yang dag par shes te/ tshe dang ldan pa sha ra dwa ti'i bu de ltar na byang chub sems dpa' sems dpa' chen po theg pa chen po la yang dag par gnas zhes bya'o zhes bya ba'i bar du ni 'jig rten dang 'jig rten las 'das pa'i chos thams cad kun rdzob tu ming dang tha snyad tsam du brjod par zad kyi/ don dam par gang yang dmigs su med par shes pas de dag la rnam par mi rtog pa'i spyod pa bstan pa ste bzhi pa'o/ /tshe dang ldan pa sha ra dwa ti'i bu gzhan yang byang chub sems dpa' sems dpa' chen po sems dang po bskyed pa nas snying po byang chub la 'dug gi bar du mngon par shes pa thams cad yongs su rdzogs par byas shing / sems can yongs su smin par byed do zhes bya ba nas/ de lta bu'i lus phyed du bsams shing yongs su 'dzin to zhes bya ba'i bar du ni rdzu 'phrul la dbang thob pa dang / skye ba la dbang thob pas sangs rgyas mnyes par bya ba dang / sangs rgyas kyi chos yongs su smin par bya ba dang / sangs rgyas kyi zhing yongs su dag par bya ba dang / sems can yongs su smin par bya ba la rnam par mi rtog pa'i spyod pa bstan pa ste lnga pa'o/ /de gnyis su med pa'i sa la gnas shing zhes bya ba ni sa brgyad pa la rnam par mi rtog pa lhun gyis grub pa'i phyir gnyis su med pa'i sa zhes bya'o/ /de rnam pa thams cad mkhyen pa nyid kyi ye shes thob par ma gyur gyi bar du theg pa de dang nam du yang mi 'bral te zhes bya ba nas/ chos kyi 'khor lo rab tu bskor ro zhes bya ba'i bar du ni mngon par rdzogs par sangs rgyas nas bla na med pa'i chos kyi 'khor lo bskor ba rnam par mi rtog pa'i spyod pa bstan pa ste drug pa'o/ /de rnam pa thams cad mkhyen pa nyid kyi ye shes thob par ma gyur gyi bar du theg pa de dang nam du yang mi 'bral te zhes bya ba ni sa brgyad pa la gnas pa'i byang chub sems dpa' de phyir mi ldog pa yin par bstan pa ste/ theg pa chen po la yang dag par gnas par gyur pa de las nyams par mi 'gyur ro zhes bya ba'i don to/ / de bla na med pa yang dag par rdzogs pa'i byang chub tu mngon par rdzogs par sangs rgyas nas/ shar phyogs kyi 'jig rten gyi khams gang gA'i klung gi bye ma snyed dag na sangs rgyas bcom ldan 'das bzhugs pa rnams yon tan brjod pa mdzad cing zhes bya ba nas/ de ltar na tshe dang ldan pa sha ra dwa ti'i bu byang chub sems dpa' sems dpa' chen po theg pa chen po la yang dag par gnas zhes bya'o zhes bya ba'i bar du ni theg pa chen po la yang dag par gnas pa'i byang chub sems dpa' la phyogs bcu'i sangs rgyas bcom ldan 'das rnams yon tan bsngags pa mdzad pa'i phan yon bstan pa'o/ /de nas tshe dang ldan pa rab 'byor gyis bcom ldan 'das la 'di skad ces gsol to zhes bya ba la sogs pa ni go cha chen po bgos pa'i don bcom ldan 'das kyis bshad pa'i skabs dbye ba'i phyir rab 'byor gyis zhus pa ste/ go cha chen po bgos pa'i don bcom ldan 'das kyis bshad pa'i 'gres dgu dang / bcom ldan 'das kyi dgongs pa dang sbyar te/ rab 'byor gyis bshad pa'i 'gres gnyis dang / 'gres bcu gcig gis skabs 'dir go cha chen po bgos pa bstan pa/ bcom ldan 'das go cha chen po bgos so/ /go cha chen po bgos so zhes bgyi na bcom ldan 'das ji tsam gyis na byang chub sems dpa' sems dpa' chen po go cha chen po bgos zhes bgyi ba lags zhes bya ba nas/ de ci'i phyir zhe na rab 'byor sgyu ma'i chos nyid nye bar bzung na chos rnams kyi chos nyid kyis de bzhin pa'i phyir te/ rab 'byor de ltar na byang chub sems dpa' sems dpa' chen po go cha chen po bgos zhes bya'o zhes bya ba'i bar du ni pha rol tu phyin pa drug la sogs pa dkar po'i chos thams cad kyi go cha bgos shing / rdzu 'phrul lhun gyis grub pas phyogs bcu'i 'jig rten gyi khams snang bas khyab par bya ste/ rnam pa drug tu g.yos par byas nas phyogs bcu'i 'jig rten gyi khams kyi ngan 'gro rnam pa gsum rab tu zhi bar byas la sgyu ma lta bu'i dpe dang bcas par bstan pa ste 'gres dang po'o/ /rab 'byor gzhan yang byang chub sems dpa' sems dpa' chen po ni go cha chen po bgos pas ni sbyin pa'i pha rol tu phyin pa la gnas shing / stong gsum gyi stong chen po'i 'jig rten gyi khams bai DUr+ya'i rgyu las byung ba mngon par sprul pa byed do zhes bya ba nas/ rab 'byor de lta bu'i byang chub sems dpa' sems dpa' chen po ni go cha chen po bgos pa zhes bya'o zhes bya ba'i bar du sbyin pa'i pha rol tu phyin pa'i go cha chen po bgos pa sgyu ma lta bu'i dpe dang bcas par bstan pa ste 'gres gnyis pa'o/ /rab 'byor gzhan yang byang chub sems dpa' sems dpa' chen po tshul khrims kyi pha rol tu phyin pa la gnas shing zhes bya ba nas/ rab 'byor de lta bu'i byang chub sems dpa' sems dpa' chen po go cha chen po bgos pa zhes bya'o zhes bya ba'i bar du ni bdag kyang tshul khrims kyi pha rol tu phyin pa la gnas shing sems can rnams kyang dge ba bcu la sogs pa dkar po'i chos thams cad la bkod pa'i go cha chen po bgos pa sgyu ma lta bu'i dpe dang bcas pa bstan pa ste 'gres gsum pa'o/ /rab 'byor gzhan yang byang chub sems dpa' sems dpa' chen po bzod pa'i pha rol tu phyin pa la gnas te zhes bya ba nas/ rab 'byor de lta bu'i byang chub sems dpa' sems dpa' chen po ni go cha chen po bgos pa zhes bya'o zhes bya ba'i bar du ni bdag kyang bzod pa'i pha rol tu phyin pa la gnas shing sems can thams cad kyang bzod pa'i pha rol tu phyin pa la 'god pa'i go cha chen po bgos pa sgyu ma lta bu'i dpe dang bcas pa bstan pa ste 'gres bzhi pa'o/ /rab 'byor gzhan yang byang chub sems dpa' sems dpa' chen po brtson 'grus kyi pha rol tu phyin pa la gnas shing zhes bya ba nas/ rab 'byor de lta bu'i byang chub sems dpa' sems dpa' chen po ni go cha chen po bgos pa zhes bya'o zhes bya ba'i bar du ni bdag kyang brtson 'grus kyi pha rol tu phyin pa la gnas shing / sems can rnams kyang brtson 'grus kyi pha rol tu phyin pa la 'god pa'i go cha chen po bgos pa sgyu ma lta bu'i dpe dang bcas pa bstan pa ste 'gres lnga pa'o/ /rab 'byor gzhan yang byang chub sems dpa' sems dpa' chen po bsam gtan gyi pha rol tu phyin pa la gnas shing zhes bya ba nas/ rab 'byor de lta bu'i byang chub sems dpa' sems dpa' chen po ni go cha chen po bgos pa zhes bya'o zhes bya ba'i bar du ni bdag kyang bsam gtan gyi pha rol tu phyin pa la gnas shing / sems can rnams kyang bsam gtan gyi pha rol tu phyin pa la 'god pa'i go cha chen po bgos pa sgyu ma lta bu'i dpe dang bcas pa bstan pa ste 'gres drug pa'o/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la gnas shing zhes bya ba nas/ rab 'byor de lta bu'i byang chub sems dpa' sems dpa' chen po ni go cha chen po bgos pa zhes bya'o zhes bya ba'i bar du ni bdag kyang shes rab kyi pha rol tu phyin pa la gnas shing / sems can rnams kyang shes rab kyi pha rol tu phyin pa la 'god pa'i go cha chen po bgos pa sgyu ma lta bu'i dpe dang bcas pa bstan pa ste 'gres bdun pa'o/ /rab 'byor gzhan yang byang chub sems dpa' sems dpa' chen po go cha chen po bgos shing zhes bya ba nas/ rab 'byor de ltar na byang chub sems dpa' sems dpa' chen po go cha chen po bgos pa zhes bya'o zhes bya ba'i bar du ni phyogs bcu'i sems can thams cad pha rol tu phyin pa drug la 'god pa'i go cha chen po sgyu ma lta bu'i dpe dang bcas pa bstan pa ste 'gres brgyad pa'o/ /rab 'byor gzhan yang byang chub sems dpa' sems dpa' chen po go cha chen po bgos pa ni rnam pa thams cad mkhyen pa nyid dang ldan pa'i sems kyis zhes bya ba nas/ rab 'byor de ltar na byang chub sems dpa' sems dpa' chen po go cha chen po bgos zhes bya'o zhes bya ba'i bar du ni sems can tshad med grangs med pa rnams pha rol tu phyin pa drug la sogs pa rnam pa thams cad mkhyen pa nyid kyi bar du dkar po'i chos thams cad la 'god pa bsam pa rgya che ba'i go cha chen po bgos pa sgyu ma lta bu'i dpe dang bcas pa bstan pa ste 'gres dgu pa'o/ /de la sems bskyed pa gzhan gyi go mi 'byed de zhes bya ba ni rnam pa thams cad mkhyen pa nyid thob par bya ba'i sems bskyed pa las/ nyan thos dang rang sangs rgyas kyi sems bskyed pa'i go skabs mi 'byed pa dang / sems can tshad med grangs med pa rnams dkar po'i chos rnams la dgod par sems pa'i bsam pa rgya chen po las/ sems can nyung zad nyi tshe zhig dkar po'i chos rnams la 'god pa'i bsam pa rgya chung ngu'i go skabs mi 'byed pa la bya'o/ /de ltar bcom ldan 'das kyis go cha chen po bgos pa'i don 'gres dgus bstan nas/ de'i 'og tu bcom ldan 'das kyis go cha chen po bgos pa gong du bshad pa rnams sgyu ma lta bu'i dpes bstan pa dang sbyar na/ go cha med pa dang ma bcings ma grol ba'i don du rab 'byor gyis rtogs nas rab 'byor nyid kyis rtogs pa'i don go cha med par bstan pa'i 'gres dang / ma bcings ma grol bar bstan pa'i 'gres gnyis bstan pa'i phyir/ rab 'byor gyis gsol pa/ bcom ldan 'das bdag gis bcom ldan 'das kyis gsungs pa'i don 'tshal te/ byang chub sems dpa' sems dpa' chen po ni rang gi mtshan nyid stong pa nyid kyi slad du go cha ma mchis pa'i go cha bgos par rig par bgyi'o zhes bya ba la sogs pa gsungs te/ de la ci'i slad du zhe na/ bcom ldan 'das de ni 'di ltar gzugs gzugs kyis stong ngo zhes bya ba nas go cha chen po yang go cha chen pos stong ste/ bcom ldan 'das rnam grangs des na byang chub sems dpa' sems dpa' chen pos go cha ma mchis pa'i go cha bgos par rig par bya'o zhes bya ba'i bar du ni rab 'byor gyis go cha med pa'i gtan tshigs bstan pa ste/ dngos po zhig yod na ni dngos po de sgrub pa'i phyir go cha bgos pa yang yod na don dam par gang gi phyir go cha bgo ba dang / gang go cha gyon pa dang / go cha nyid kyang rang gi mtshan nyid kyis stong pa'i phyir go cha med de/ de ltar go cha med par rtogs pa nyid chos kyi chos nyid dang mi 'gal bas go cha bgos pa yin no zhes bya ba'i don to/ /bcom ldan 'das kyis bka' stsal pa/ rab 'byor ji skad du smras pa bzhin te/ de de bzhin no/ /de bzhin te/ de ci'i phyir zhe na/ rab 'byor de ni rnam pa thams cad mkhyen pa nyid kyang ma byas/ rnam par ma byas/ mngon par ma byas zhes bya ba la sogs pa ni go cha med pa'i don rab 'byor gyis bshad pa dang mthun par bka' stsal pa ste/ 'jig rten na go cha bgos pa ni dngos po 'ga' zhig bya ba'am/ gzhig pa'am bcos pa'i phyir go cha bgo bar byed na/ rnam pa thams cad mkhyen pa nyid ni don dam par rang bzhin gyis stong pas byar yang med/ gzhig tu yang med/ bcos su yang med la sems can gang gi don du go cha bgo bar bya ba'i sems can de dag kyang don dam par rang gi mtshan nyid kyis stong pas byar yang med/ gzhig tu yang med bcos su yang med de/ de ltar rtogs pa nyid dngos por mi 'dzin pas go cha chen po bgos pa yin no zhes bstan pa'o/ /de la ma byas zhes bya bas ni dngos po med pas byar med pa bstan pa'o/ /rnam par ma byas zhes bya bas ni gzhig tu med pa bstan par blta'o/ /mngon par ma byas zhes bya bas ni bcos su med pa bstan to/ /rab 'byor byed pa dmigs su med pa'i phyir rnam pa thams cad mkhyen pa nyid ma byas/ rnam par ma byas/ mngon par ma byas so zhes bya ba la sogs pas ni ma byas pa dang / ma bshig pa dang / ma bcos pa'i gtan tshigs bstan pa'o/ /de ci'i phyir zhe na/ rab 'byor 'di ltar gzugs mi byed rnam par mi byed/ mngon par mi byed do zhes bya ba la sogs pa ni byed pa dmigs su med pa'i gtan tshigs bstan pa ste/ byed pa po zhig yod na yang gzugs la sogs pa 'jig rten pa'i chos rnams sam/ sbyin pa'i pha rol tu phyin pa la sogs pa rnam pa thams cad mkhyen pa nyid la thug gi bar du 'jig rten las 'das pa'i chos shig yin grang na/ kun rdzob tu de dag so so'i mtshan nyid la brtags na yang byed pa'i mtshan nyid mi 'grub la/ don dam par yang de dag shin tu mi dmigs pa'i phyir byed pa mi dmigs so zhes bstan pa'o/ /rab 'byor de ltar na byang chub sems dpa' sems dpa' chen po go cha chen po bgos pa ni go cha med pa'i go cha bgos zhes bya'o zhes bya ba ni go cha med pa'i don mjug bsdus te bstan pa'o/ /gsol pa/ bcom ldan 'das bdag gis bcom ldan 'das kyis gsungs pa'i don 'tshal te/ bcom ldan 'das gzugs ni ma bcings ma grol ba'o zhes bya ba la sogs pa ni ma bcings ma grol ba'i don bstan pa ste/ bcom ldan 'das kyis gsungs pa'i don bdag gis 'tshal te zhes bya ba ni go cha chen po bgos pa'i dpe sgyu ma lta bu bcom ldan 'das kyis bshad pa'i don dang sbyar na/ don dam par go cha med pa yin la/ gzugs la sogs pa'i phung po lnga po rnams dang don dam par dngos po med pa'i phyir so so'i skye bo'i tshe ni nyon mongs pa rnams kyis bcings la/ 'phags par gyur pa'i tshe ni nyon mongs pa rnams las grol lo zhes byar yang mi rung ngo zhes bstan pa'i phyir gzugs ni ma bcings ma grol ba'o zhes bya ba la sogs pa gsungs so/ /de nas tshe dang ldan pa byams gang gi bus tshe dang ldan pa rab 'byor la 'di skad ces smras so/ /tshe dang ldan pa rab 'byor gzugs ma bcings ma grol ba yin nam zhes bya ba la sogs pa ni phung po lnga ma bcings ma grol ba'o zhes pa rab 'byor gyis bstan pa'i don dang tshig slar brtag pa'i phyir de lta yin nam zhes dris pa'o/ /smras pa/ tshe dang ldan pa gang po de de bzhin te/ tshe dang ldan pa gang po gzugs ni ma bcings ma grol ba'o zhes bya ba la sogs pa ni phung po lnga po ma bcings ma grol ba yin no zhes rab 'byor gyis lan btab pa'o/ /gang pos smras pa/ tshe dang ldan pa rab 'byor de ltar ma bcings ma grol ba'i gzugs gang yin zhes bya ba la sogs pa ni phung po lnga rnams rmi lam la sogs pa lta bur gyur pa rnams ma bcings ma grol ba yin par bstan pa'i skabs dbye ba'i phyir dris pa'o/ /smras pa/ tshe dang ldan pa gang po gang 'di rmi lam lta bu'i gzugs de ni ma bcings ma grol ba'o zhes bya ba la sogs pa ni phung po lnga rnams rmi lam dang / sgyu ma dang / sgra brnyan dang / mig yor dang / gzugs brnyan dang / smig rgyu dang / sprul pa lta bu yin te/ de lta bu'i gzugs la sogs pa ni yang dag par yod pa ma yin pas bcings pa dang grol ba yang med do zhes bstan pa'o/ /tshe dang ldan pa gang po 'das pa'i gzugs ni ma bcings ma grol ba'o zhes bya ba la sogs pa ni/ dus gsum gyi phung po lnga yang ma bcings ma grol ba'o zhes bstan pa'o/ /de ci'i phyir zhe na/ tshe dang ldan pa gang po gzugs med pa'i phyir gzugs ma bcings ma grol ba'o zhes bya ba la sogs pa ni dus gsum gyi phung po lnga gong du smos pa rnams ma bcings ma grol ba'i gtan tshigs bstan pa ste/ dus gsum gyi phung po lnga yang don dam par dngos po med pa dang / dben pa dang / ma skyes pa'i phyir ma bcings ma grol ba'o zhes bstan pa'o/ /tshe dang ldan pa gang po dge ba'i gzugs ni ma bcings ma grol ba'o zhes bya ba la sogs pa ni dge ba dang mi dge ba dang / lung du ma bstan pa'i rigs su gtogs pa'i phung po lnga rnams kyang ma bcings ma grol ba'o zhes bstan pa ste/ de la dge ba ni 'dod chags dang / zhe sdang dang / gti mug dang mi ldan pa'o/ / mi dge ba ni 'dod chags dang / zhe sdang dang / gti mug dang ldan pa'o/ /lung du ma bstan pa ni 'dod chags dang / zhe sdang dang / gti mug dang mi ldan pas gcig kho nar dge bar 'gyur bar lung bstan du yang mi mngon la/ 'dod chags dang / zhe sdang dang / gti mug dang ma bral bas gcig kho nar mi dge bar 'gyur bar lung bstan du yang mi mngon te/ bzo byed pa dang / spyod lam bzhi la gnas pa'i phung po lnga lta bu'o/ /tshe dang ldan pa gang po 'jig rten pa'i gzugs ni ma bcings ma grol ba'o zhes bya ba la sogs pa ni 'jig rten pa dang / 'jig rten las 'das pa dang / zag pa dang bcas pa dang / zag pa med pa'i khongs su gtogs pa'i phung po lnga yang ma bcings ma grol ba'i zhes bstan pa ste/ de la 'jig rten pa ni gang zag dang chos la bdag med par rtogs pa goms par byed pa la ma gtogs pa khams gsum du skye zhing 'bor ba'i khongs su gtogs pa rnams so/ /'jig rten las 'das pa ni gang zag dang chos la bdag med par rtogs pa goms par byed pa khams gsum du skye zhing 'khor bar mi 'gyur ba rnams so/ /zag pa dang bcas pa ni khams gsum gyi nyon mongs pa rnams dang bcas pa'o/ /zag pa med pa ni khams gsum gyi nyon mongs pa rnams dang mi ldan pa'o/ /tshe dang ldan pa gang po de ci'i phyir zhe na/ gzugs med pa'i phyir gzugs ma bcings ma grol ba'o zhes bya ba la sogs pa ni dge ba dang mi dge ba dang / lung du bstan pa dang / lung du ma bstan pa dang / 'jig rten pa dang / 'jig rten las 'das pa dang / zag pa dang bcas pa dang / zag pa med pa'i phung po lnga rnams ma bcings ma grol ba'i gtan tshigs bstan pa ste/ med pa dang / dben pa dang / ma skyes pa'i don ni snga ma bzhin no/ /tshe dang ldan pa gang po chos thams cad kyang ma bcings ma grol ba ste/ med pa'i phyir ma bcings ma grol ba'o/ /dben pa'i phyir ma bcings ma grol ba'o/ /ma skyes pa'i phyir ma bcings ma grol ba ste zhes bya ba ni 'dus byas dang 'dus ma byas pa'i chos thams cad mdor bsdus te/ ma bcings ma grol ba gtan tshigs dang bcas te bstan pa'o/ /tshe dang ldan pa gang po sbyin pa'i pha rol tu phyin pa ni ma bcings ma grol ba'o zhes bya ba la sogs pa ni pha rol tu phyin pa drug la sogs pa yang dag pa'i mtha' dang / 'dus ma byas pa la thug gi bar du dkar po'i chos thams cad ma bcings ma grol ba gtan tshigs rnam pa gsum dang bcas te bstan pa ste/ dkar po'i chos thams cad tshar gcig tu mi smos par ris ris su bcad cing med pa dang / dben pa dang / ma skyes pa'i gtan tshigs rnam pa gsum bstan pa ni 'dul ba'i skye bo kha cig la de ltar ris ris su bcad de bstan na go sla zhing dad pa skye bar 'gyur ba yang srid pa'i phyir ro/ /tshe dang ldan pa gang po 'di ni byang chub sems dpa' sems dpa' chen po rnams kyis ma bcings ma grol ba zhes bya ba'i chos kyi sgo ste zhes bya ba ni chos thams cad ma bcings ma grol bar rtogs na rnam pa thams cad mkhyen pa nyid 'thob pa'i sgo'am rgyur gyur pa'i phyir chos kyi sgo zhes bya'o/ de ni sbyin pa'i pha rol tu phyin pa ma bcings ma grol ba'o zhes bya ba nas/ yang dag pa'i mtha' ma bcings ma grol ba'o/ /'dus ma byas ma bcings ma grol ba ste zhes bya ba'i bar du ni dkar po'i chos thams cad ma bcings ma grol ba'i chos kyi sgo yin par nges par gtan la phab ste bstan pa'o/ /de ma bcings ma grol ba'i sbyin pa'i pha rol tu phyin pa la gnas zhes bya ba nas/ tshe dang ldan pa gang po de ltar na byang chub sems dpa' sems dpa' chen po ma bcings ma grol ba'i theg pa chen po'i go cha bgos par rig par bya'o zhes bya ba'i bar du ni de ltar ma bcings ma grol ba'i go cha chen po bgos pa'i byang chub sems dpa' de sems can yongs su smin par byed pa la sogs pa byang chub sems dpa'i spyod pa rlabs chen po spyod nus pa dang / sangs rgyas bcom ldan 'das rnams dang nam yang 'bral bar mi 'gyur ba la sogs pa'i phan yon bstan pa'o/ /tshe dang ldan pa gang po de ltar na byang chub sems dpa' sems dpa' chen po ma bcings ma grol ba/ pha rol tu phyin pa drug po ma bcings ma grol bas med pa dang / dben pa dang / skye ba med pa nye bar bzung zhing / chos thams cad khong du chud par byed do zhes bya ba la sogs pa ni ma bcings ma grol ba'i don mjug bsdus nas bstan pa ste/ mdor na don dam par byang chub sems dpa' nyid dang / pha rol tu phyin pa drug la sogs pa chos thams cad kyang med pa dang / dben pa dang / ma skyes pa'i phyir ma bcings ma grol bar khong du chud cing kun rdzob tu yang de la ma chags ma zhen par sems can yongs su smin par bya ba la sogs pa'i las rnams mi byed pa yang ma yin la/ sangs rgyas bcom ldan 'das rnams dang nam yang 'bral bar mi 'gyur ba la sogs pa'i phan yon rnams thob par mi 'gyur ba yang ma yin no zhes bstan pa'o/ /de ltar bcom ldan 'das kyis go cha chen po bgos pa'i don bstan zin pa dang / de'i 'og tu yang 'phags pa rab 'byor gyis theg pa chen po la yang dag par zhugs pa zhes bya ba'i tshig sngar smos pa las gleng bslangs nas/ theg pa chen po'i don rnam pa lnga zhu ba'i phyir/ de nas tshe dang ldan pa rab 'byor gyis bcom ldan 'das la 'di skad ces gsol to zhes bya ba la sogs pa smos te zhu ba rnam pa lnga ni theg pa chen po gang yin pa dang / ji tsam gyis na theg pa chen po la yang dag par zhugs par chud pa dang / theg pa de gang nas 'byung ba dang / theg pa de gang du gnas par 'gyur ba dang / theg pa des su zhig 'byung bar 'gyur zhes zhu ba dang lnga'o/ /de skad ces gsol pa dang / bcom ldan 'das kyis tshe dang ldan pa rab 'byor la 'di skad ces bka' stsal to zhes bya ba la sogs pa ni rab 'byor gyis zhu ba rnam pa lnga zhus pa las/ theg pa chen po gang lags zhes zhus pa'i lan du/ bcom ldan 'das kyis theg pa chen po zhes bya ba rnam pa nyi shu rtsa gcig tu phye ste bshad pa'o/ /de la theg pa chen po rnam pa nyi shu rtsa gcig ni pha rol tu phyin pa drug theg pa chen po yin pa dang / stong pa bco brgyad theg pa chen po yin pa dang / ting nge 'dzin rnams theg pa chen po yin pa dang / dran pa nye bar gzhag pa rnams theg pa chen po yin pa dang / yang dag par spong ba rnams theg pa chen po yin pa dang / rdzu 'phrul gyi rkang pa rnams theg pa chen po yin pa dang / dbang po lnga theg pa chen po yin pa dang / stobs lnga theg pa chen po yin pa dang / byang chub kyi yan lag bdun theg pa chen po yin pa dang / 'phags pa'i lam yan lag brgyad pa theg pa chen po yin pa dang / rnam par thar pa brgyad theg pa chen po yin pa dang / shes pa bcu theg pa chen po yin pa dang / dbang po gsum theg pa chen po yin pa dang / rnam par thar pa'i sgo gsum theg pa chen po yin pa dang / rjes su dran pa drug theg pa chen po yin pa dang / snyoms par 'jug pa rnams theg pa chen po yin pa dang / stobs bcu theg pa chen po yin pa dang / mi 'jigs pa bzhi theg pa chen po yin pa dang / so so yang dag par rig pa bzhi theg pa chen po yin pa dang / sangs rgyas kyi chos ma 'dres pa bco brgyad theg pa chen po yin pa dang / gzungs kyi sgo rnams theg pa chen po yin par bstan pa dang nyi shu rtsa gcig go/ /de la rab 'byor pha rol tu phyin pa drug ni byang chub sems dpa' sems dpa' chen po'i theg pa chen po ste zhes bya ba nas/ 'di ni byang chub sems dpa' sems dpa' chen po'i shes rab kyi pha rol tu phyin pa ste/ de ni rab 'byor byang chub sems dpa' sems dpa' chen po'i theg pa chen po'o zhes bya ba'i bar du ni pha rol tu phyin pa drug theg pa chen po yin par bstan pa'o/ /de la don du gnyer ba zhes bya ba ni phongs shing 'dod pa la bya'o/ /phyi nang gi dngos po zhes bya ba la/ phyi'i dngos po ni gser dngul dang / dar zab la sogs pa bdag gi lus la ma gtogs pa'i nor rdzas rnams so/ /nang gi dngos po ni lus dang mgo la sogs pa yan lag dang nying lag rnams yongs su gtong ba'o/ /de ltar pha rol tu phyin pa drug rnam pa thams cad mkhyen pa nyid dang ldan pa'i sems kyis yongs su rdzogs par byed cing de'i bsod nams kyang sems can thams cad dang thun mong du byas te/ de mi dmigs pa'i tshul gyis bla na med pa yang dag par rdzogs pa'i byang chub tu yongs su bsngo ba nyid gang zag dang chos la bdag med par rtogs shing bdag dang gzhan gyi don phun sum tshogs pa yin pas theg pa chen po zhes bya'o/ /sbyin pa'i pha rol tu phyin pa'i skabs su sems can thams cad dang thun mong du byas shing / bla na med pa yang dag par rdzogs pa'i byang chub tu yongs su bsngo ba ni bstan/ sems can pha rol po sbyin pa la yang dag par bskul ba dang / gzhog pa dang / rab tu dgod pa la bstan la/ pha rol tu phyin pa gzhan rnams la sems can pha rol po rnams kyang tshul khrims la sogs pa la yang dag par bskul ba dang / gzhog pa dang / rab tu dgod pa bstan la/ sems can thams cad dang thun mong du byas shing bla na med pa yang dag par rdzogs pa'i byang chub tu yongs su bsngo bas ma bstan du zin yang / sems can pha rol po rnams yang dag par bskul ba yang sbyin pa'i pha rol tu phyin pa'i skabs su sbyar zhing / bla na med pa yang dag par rdzogs pa'i byang chub tu yongs su bsngo ba yang tshul khrims kyi pha rol tu phyin pa la sogs pa la sbyar ba don gyis rig par bya'o/ /yang dag par bskul ba ni dang po spyod du 'jug pa'o/ /gzhog pa ni pha rol tu phyin pa rnams la gnas shing nyams su len du 'jug pa'o/ /pha rol tu dgod pa ni de bas kyang bstan par byas nas pha rol tu phyin pa drug spyod pa las mi nyams shing 'bras bu thob par byed pa'o/ /rab 'byor gzhan yang byang chub sems dpa' sems dpa' chen po'i theg pa chen po ni 'di lta ste/ nang stong pa nyid dang zhes bya ba nas/ rab 'byor 'di ni byang chub sems dpa' sems dpa' chen po'i theg pa chen po'o zhes bya ba'i bar du ni stong pa nyid bco brgyad theg pa chen po yin pa bstan pa ste/ de la nang stong pa nyid gang zhe na zhes bya ba la sogs pa ni nang stong pa nyid bstan pa ste/ mig dang yid kyi bar du nang gi dbang po drug rnams bdag gi lus dang sems kyis zin pa'i phyir nang gi chos zhes bya'o/ /mi rtag mi 'jigs pa'i phyir mig mig gis stong zhes bya ba ni mig dngos po zhig yod na rtag pa'i rang bzhin rnams mi rtag pa'i rang bzhin zhig yin grang na/ don dam par mig dngos po med pas rtag pa'i rang bzhin ma yin pa'i phyir mi rtag pa'o/ /mi rtag pa'i rang bzhin ma yin pa'i phyir mi 'jig pa'o/ /de ltar dngos po med cing mi rtag mi 'jig pa'i phyir mig de mig gi dngos pos stong pas na/ mig mig gis stong ngo zhes bya ba gsungs so/ /de ci'i phyir zhe na/ de'i rang bzhin de yin pa'i phyir ro zhes bya ba ni mig la mig gi dngos po med pa nyid de'i rang bzhin yin gyi/ rgyu gzhan gyis bshig ste stong par byas pa ni ma yin no zhes bya ba'i don to/ /de bzhin du rna ba la sogs pa 'og ma thams cad la yang sbyar bar bya'o/ /de la phyi stong pa nyid gang zhe na zhes bya ba la sogs pa ni phyi stong pa nyid bstan pa ste/ gzugs la sogs pa chos kyi bar du yul drug po de rnams phyi rol du dmigs pa'i yul yin la/ bdag gi lus dang sems kyis yongs su ma zin pa'i phyir phyi rol gyi chos rnams zhes bya ste/ de dag stong pa nyid kyi don ni snga ma bzhin no/ /de la phyi nang stong pa nyid gang zhe na zhes bya ba la sogs pa ni phyi nang stong pa nyid bstan pa ste/ nang gi chos rnams phyi'i chos kyis stong / phyi'i chos rnams nang gi chos kyis stong ste zhes bya ba ni phyi nang gi skye mched bcu gnyis rnams kyi so so'i rang bzhin gyis stong pa sngar bshad zin pas skabs 'dir nang gi skye mched rnams la yang phyi'i skye mched kyi rang bzhin med pa dang / phyi'i skye mched rnams la yang nang gi skye mched rnams kyi rang bzhin med pa'i phyir phyi nang stong pa nyid do zhes bstan to/ /de la stong pa nyid stong pa nyid gang zhe na zhes bya ba la sogs pa ni stong pa nyid stong pa nyid bstan pa ste/ chos rnams kyi stong pa nyid gang yin pa'i stong pa nyid des stong pa nyid do zhes bya ba ni chos rnams stong ngo zhes bya ba'i stong pa nyid gang yin pa de yang / stong pa nyid kyi rang bzhin du yod pa ma yin te/ de rang bzhin gyis stong pa la stong pa nyid ces bya'o/ /de la chen po stong pa nyid gang zhe na zhes bya ba la sogs pa ni chen po stong pa nyid bstan pa ste/ snod kyi 'jig rten phyogs bcu la sogs pa tha gru yangs shing gzhi che ba rnams rang bzhin med pa la chen po stong pa nyid ces bya'o/ /de la don dam pa stong pa nyid gang zhe na zhes bya ba la sogs pa ni don dam pa stong pa nyid bstan pa ste/ mya ngan las 'das pa de don du sgrub pa'i nang na mchog dam pa yin pa'i phyir don dam pa zhes bya'o/ /rnam pa gnyis su na ye shes dam pa'i dmigs pa'i yul lam don yin pa'i phyir don dam pa zhes bya ste/ mya ngan las 'das pa de'i rang bzhin med pa la don dam pa stong pa nyid ces bya'o/ /de la 'dus byas stong pa nyid gang zhe na zhes bya ba la sogs pa ni 'dus byas stong pa nyid bstan pa ste/ khams gsum du skye zhing gnas pa'i chos rnams ni las dang nyon mongs pa la sogs pa rgyu dang rkyen rnams 'dus shing tshogs pas byas shing bskyed pa yin pa'i phyir 'dus byas zhes bya ste/ de dag gi rang bzhin med pa ni 'dus byas stong pa nyid ces bya'o/ /de la 'dus ma byas stong pa nyid gang zhe na zhes bya ba la sogs pa ni 'dus ma byas stong pa nyid bstan pa'o/ /gang la skye ba med pa dang / 'gag pa med pa dang / gnas pa las gzhan du 'gyur ba med pa 'di ni 'dus ma byas zhes bya ste zhes bya ba ni 'dus ma byas pa'i rang bzhin bstan pa ste/ las dang nyon mongs pa la sogs pa rgyu dang rkyen rnams tshogs shing 'dus pas ma byas ma bskyed pa'i phyir/ skye ba dang 'gag pa dang gnas pa las gzhan du 'gyur ba med pa'i chos de rnams ni 'dus ma byas pa zhes bya ste/ de dag kyang nam mkha' dang / de bzhin nyid dang / so sor brtags pas 'gog pa dang / so sor brtag pa ma yin pas 'gog pa ste/ chos de dag rang bzhin med pa ni 'dus ma byas stong pa nyid ces bya'o/ /de la mtha' las 'das pa stong pa nyid gang zhe na zhes bya ba la sogs pa ni mtha' las 'das pa stong pa nyid bstan pa ste/ rtag pa'i mtha' dang / chad pa'i mtha' la sogs pa'i mtha' gnyis mi dmigs pa nyid mtha' las 'das pa zhes bya ste/ de'i rang bzhin med pa ni mtha' las 'das pa stong pa nyid ces bya'o/ /de la thog ma dang tha ma med pa stong pa nyid gang zhe na zhes bya ba la sogs pa ni thog ma dang tha ma med pa stong pa nyid bstan pa ste/ gang la thog ma mi dmigs shing / tha ma mi dmigs pa de la 'gro ba mi dmigs 'ong ba mi dmigs te zhes bya ba ni/ 'khor ba la thog ma yang mi dmigs tha ma yang mi dmigs te/ thog ma dang tha ma gnyis med pas dbus kyang mi dmigs so/ /de ltar mtha' gnyis dang dbus kyang med pa'i phyir 'gro ba dang 'ong ba mi dmigs te/ de ltar 'khor ba'i rang bzhin med pa nyid thog ma dang tha ma med pa stong pa nyid ces bya'o/ /de la dor ba med pa stong pa nyid gang zhe na zhes bya ba la sogs pa ni/ dor ba med pa stong pa nyid bstan pa'o/ /gang la gang yang dor ba med pa ste zhes bya ba ni phung po'i lhag ma ma lus pa'i mya ngan las 'das pa la bya ste/ dor ba zhes bya ba ni zag pa dang bcas pa'i phung po lnga la bya'o/ /phung po lnga po de dag phung po'i lhag ma ma lus pa'i mya ngan la 'das pa'i tshe med par gyur pa'i phyir dor ba med pa zhes bya ste/ dor ba med pa'i rang bzhin mya ngan las 'das pa de de'i rang bzhin gyis stong pa la dor ba med pa stong pa nyid ces bya'o/ /don dam pa stong pa nyid kyi skabs su mya ngan las 'das pa yin par bshad pa ni phung po'i lhag ma dang bcas pa'i mya ngan las 'das pa nyon mongs pa dang bral ba'i mtshan nyid las dgongs te gsungs so/ /'dir ni phung po'i lhag ma ma lus pa'i mya ngan las 'das pa la dgongs te gsungs pas zlos par mi 'gyur ro/ / de la rang bzhin stong pa nyid gang zhe na zhes bya ba la sogs pa ni rang bzhin stong pa nyid bstan pa ste/ 'dus byas sam 'dus ma byas pa'i chos thams cad kyi rang bzhin ye nas stong pa nyid yin pas nyan thos dang / rang sangs rgyas dang / byang chub sems dpa' dang / de bzhin gshegs pa rnams kyis kyang yod pa'am med par ma byas pas rang bzhin gyis stong pa'i phyir rang bzhin stong pa nyid ces bya'o/ /de la chos thams cad stong pa nyid gang zhe na zhes bya ba la sogs pa ni chos thams cad stong pa nyid bstan pa ste/ de la chos thams cad ces bya ba ni phung po lnga dang / skye mched bcu gnyis dang / khams bco brgyad dang / 'dus te reg pa drug dang / 'dus te reg pa'i rkyen gyis tshor ba drug dang / gzugs yod pa dang / gzugs med pa dang / 'dus byas dang / 'dus ma byas pa'i chos rnams te/ chos de dag gi rang bzhin yod pa ma yin pa ni chos thams cad stong pa nyid ces bya'o/ /de la rang gi mtshan nyid stong pa nyid gang zhe na zhes bya ba la sogs pa ni rang gi mtshan nyid stong pa nyid bstan pa ste/ 'dus byas dang 'dus ma byas pa'i chos rnams don dam par yod pa ma yin pas de dag gi rang gi mtshan nyid kyang med pa'i phyir rang gi mtshan nyid stong pa nyid ces bya'o/ /mtshan nyid gzhan ni rang log tu zad pas bshad mi dgos so/ /bshad dgos pa nyi tshe zhig bshad par bya ste/ khams ni gdug pa'i mtshan nyid ces bya ba ni khams bco brgyad 'khor ba'i rgyu yin pa'i phyir ro/ /tshul khrims kyi pha rol tu phyin pa ni yongs su gdung ba med pa'i mtshan nyid ces bya ba ni tshul khrims dang ldan pa la nyes pa mi 'byung bas phyis mi 'gyod cing sems la gdung ba med pa'i phyir ro/ / brtson 'grus kyi pha rol tu phyin pa ni thub pa med pa'i mtshan nyid ces bya ba ni brtson 'grus dang ldan pa la bdud la sogs pa bar du gcod pa rnams kyis mi brdzi zhing mi thub pa'i phyir ro/ /bsam gtan gyi pha rol tu phyin pa ni yang dag par 'dus pa'i mtshan nyid ces bya ba ni bsam gtan dang ldan pa sems rtse gcig tu 'dus shing bsam gtan gyi 'bras bu rdzu 'phrul la sogs pas sems can yongs su smin par byed cing dge ba'i rtsa ba 'dus pa'i phyir ro/ /shes rab kyi pha rol tu phyin pa ni chags pa med pa'i mtshan nyid ces bya ba ni shes rab kyis chos thams cad rang bzhin med par rtogs nas/ ci la yang ma chags par 'gyur ba'i phyir ro/ /bsam gtan dang / tshad med pa bzhi dang / gzugs pa'i snyoms par 'jug pa rnams ni/ 'khrug pa med pa'i mtshan nyid ces bya ba ni/ bsam gtan la sogs pa 'di rnams sems g.yeng zhing 'khrug pa med pa'i phyir ro/ /byang chub kyi phyogs kyi chos sum cu rtsa bdun ni 'byung ba'i mtshan nyid ces bya ba ni dran pa nye bar gzhag pa bzhi la sogs pa/ byang chub kyi phyogs kyi chos sum cu rtsa bdun rnams 'khor ba nas 'byung zhing mya ngan las 'das pa thob par 'gyur ba'i rgyu yin pa'i phyir ro/ /rnam par thar pa'i sgo stong pa nyid ni dben pa'i mtshan nyid ces bya ba ni chos thams cad stong par rtogs shing dngos po gang dang yang ma 'dres pa'i phyir ro/ /rnam par thar pa'i sgo mtshan ma med pa ni zhi ba'i mtshan nyid ces bya ba ni mtshan ma sna tshogs su mi 'dzin pa nyid zhi ba yin pa'i phyir ro/ /rnam par thar pa'i sgo smon pa med pa ni sdug bsngal sel ba'i mtshan nyid ces bya ba ni khams gsum gyi bde ba la ma chags shing mi smon pas/ de thob par bya ba'i sdug bsngal med pa'i phyir ro/ /rnam par grol ba rnam par 'grel ba'i mtshan nyid ces bya ba ni rnam par thar pa brgyad la rnam par grol ba zhes bya ste/ de dag khams gsum gyi lus la sogs pa la ma chags pa las grol zhing thar bar byed pa'i phyir ro/ /stobs rnams ni shin tu rtogs pa'i mtshan nyid ces bya ba ni gnas dang gnas ma yin pa shes pa la sogs pa de bzhin gshegs pa'i stobs bcu rnams ni shes pa'i rang bzhin yin pa'i phyir shin tu rtogs pa'i mtshan nyid ces bya'o/ /mi 'jigs pa rnams ni shin tu bstan pa'i mtshan nyid ces bya ba ni mi 'jigs pa bzhi dang ldan na bdud la sogs pa phas kyi rgol ba rnams kyis zil gyis mi non cing bsgyur du mi tshugs pa'i phyir ro/ /so so yang dag par rig pa rnams ni mi chod pa'i mtshan nyid ces bya ba ni chos so so yang dag par rig pa la sogs pa bzhi dang ldan na bdud la sogs pas bar chad bya mi nus pa'i phyir ro/ /dga' ba chen po ni rab tu dga' ba'i mtshan nyid ces bya ba ni sems can rnams kyis 'jig rten dang / 'jig rten las 'das pa'i phun sum tshogs pa thob na byang chub sems dpa' bdag nyid kyis thob pa dang 'dra bar rab tu dga' bar 'gyur ba'am/ byang chub sems dpa'i sa dang po thob pa'i tshe na chos kyi dbyings rnam par dag pa rab tu rtogs pa'i tshe dga' ba'i shugs chen po 'byung ba la bya'o/ /btang snyoms chen po ni 'dre ba med pa'i mtshan nyid ces bya ba ni dgra dang zin gnyis la byams sdang med par sems snyoms pas byams pa dang sdang ba'i sems la snyoms pa dang ma 'dres pa'i phyir ro/ /sangs rgyas kyi chos ma 'dres pa bco brgyad ni mi 'phrogs pa'i mtshan nyid ces bya ba ni de bzhin gshegs pa la 'khrul pa mi mnga' ba la sogs pa bdud dang mu stegs can la sogs pas 'grib pa'am nyams par bya mi nus pa'i phyir ro/ /rnam pa thams cad mkhyen pa nyid kyi ye shes ni mngon sum gyi mtshan nyid de zhes bya ba ni rnam pa thams cad mkhyen pa nyid kyi ye shes de shes par bya ba'i yul thams cad la skyu ru ra'i 'bras bu lag mthil du bzhag pa bzhin du sgrib pa dang thogs pa med par mngon sum du gsal bar thugs su chud pa'i phyir ro/ /mi rtag mi 'jig pa'i phyir/ 'dus byas kyi chos rnams kyi mtshan nyid gang yin pa dang / 'dus ma byas kyi chos rnams kyi mtshan nyid gang yin pa'i rang rang gi mtshan nyid de dag gi chos de dag thams cad kyis stong ste zhes bya ba ni rang gi mtshan nyid stong pa nyid kyi don mdor bsdus nas bstan pa ste/ mdor na 'dus byas dang 'dus ma byas pa'i chos thams cad don dam par dngos po med pas de dag gi mtshan nyid kyang yod pa ma yin pa'i phyir stong ngo zhes bya ba'i don to/ /de la mi dmigs pa stong pa nyid gang zhe na zhes bya ba la sogs pa ni mi dmigs pa stong pa nyid bstan pa ste/ 'das pa ni dngos po med par gyur zin pa dang / ma 'ongs pa ni da dung dngos por ma red pa dang / da ltar byung ba ni skad cig gi tshul gyis gnas pa ma grub pa'i phyir mi dmigs pa zhes bya ste/ mi dmigs pa zhes bya ba de nyid kyang dngos po yod pa ma yin pa'i phyir/ mi dmigs pa stong pa nyid ces bya'o/ /de la dngos po med pa'i ngo bo nyid stong pa nyid gang zhe na zhes bya ba la sogs pa ni dngos po med pa'i ngo bo nyid stong pa nyid bstan pa ste/ chos thams cad rten cing 'brel bar 'byung ba'i phyir 'dus pa'i ngo bo nyid med de zhes bya ba ni chos thams cad skye ba na rgyu dang rkyen rnams 'dus shing tshogs pa'i mthu las skye'i gzhan la mi ltos pa'i rang skye ba ni med de/ gang rgyu dang rkyen gzhan gyi dbang gis skyes pa de ni yang dag par skyes pa ma yin te/ 'dus pa las skyes pa ni ngo bo nyid med do zhes bya ba'i don to/ /de bas na 'dus pa 'dus pas stong ngo zhes bya ba gsungs te/ rgyu rkyen 'dus pa las byung ba rnams ni yang dag par skyes pa ma yin pas 'dus pa'i rang bzhin gyis stong ngo zhes bstan pa'o/ /rab 'byor gzhan yang dngos po ni dngos pos stong ngo zhes bya ba la sogs pa ni dngos po med pa'i ngo bo nyid stong pa nyid rnam pa gzhan du bshad pa ste/ dngos po med pa zhes smos pa dang / dngos po yod pa yang zlas 'grub/ dngos po yod med gnyis smos pa dang / bdag gi dngos po dang gzhan gyi dngos po gnyis kyang zhar la brtag dgos te/ de bas na dngos po ni dngos pos stong ngo / / dngos po med pa ni dngos po med pas stong ngo / /rang bzhin ni rang bzhin gyis stong ngo / /gzhan gyis dngos po ni gzhan gyi dngos pos stong ngo zhes bya ba rnam pa bzhir phye ste gsungs so/ /de la dngos po dngos po zhes bya ba gang zhe na zhes bya ba la sogs pa ni dngos po dang dngos po med pa la sogs pa rnam pa bzhir phye ste/ bstan pa stong pa nyid yin par bshad pa ste/ dngos po dang dngos po med pa gnyis stong par bshad pa ni rang log tu zad do/ /ji ltar na rang bzhin rang bzhin gyis stong zhe na zhes bya ba la sogs pa ni rang gi dngos po stong pa nyid yin par bstan pa ste/ rang gi dngos po de yang rang bzhin med pa'i phyir byar rung ba ma yin pas/ shes pas ma byas mthong bas ma byas zhes gsungs te/ shes pa ni rnam par mi rtog pa'i ye shes la bya'o/ /mthong ba'i rnam par mi rtog pa'i ye shes kyi rjes las byung ba dag pa 'jig rten pa'i ye shes la bya ste/ shes pa dang mthong ba des kyang ma byas pa'i phyir stong ngo zhes bya ba'i phyir ro/ /de la gzhan gyi dngos po stong pa nyid gang zhe na zhes bya ba la sogs pa ni gzhan gyi dngos po stong pa nyid bstan pa ste/ chos kyi gnas nyid dang / chos nyid la sogs pa de bzhin nyid kyi rnam grangs su gtogs pa 'di rnams de bzhin gshegs pa rnams 'jig rten du byung yang rung ma byung yang rung ste/ chos rnams kyi chos nyid ni ye nas de bzhin du gnas pa ste/ de dag la phung po la sogs pa chos gzhan rnams kyi dngos po med pa de nyid gzhan gyi dngos po stong pa nyid ces bya'o/ /rab 'byor gzhan yang byang chub sems dpa' sems dpa' chen po'i theg pa chen po ni 'di lta ste/ dpa' bar 'gro ba zhes bya ba'i ting nge 'dzin dang zhes bya ba la sogs pa ni ting nge 'dzin rnams theg pa chen po yin pa bstan pa ste/ de la ting nge 'dzin rnams kyi spyi'i don ni sangs rgyas dang byang chub sems dpa' rnams kyi rnam par mi rtog pa'i ye shes sems rtse gcig pa'i mtshan nyid du mnyam par gzhag pa las sngon gyi spyod pa dang smon lam gyi mthus sems can yongs su smin par bya ba dang / sangs rgyas kyi zhing yongs su dag par bya ba la sogs pa mthu rnam pa sna tshogs lhun gyis grub pa nyid du 'byung ba tha dad pa las ming rnam pa sna tshogs su btags te bstan to/ /de la dpa' bar 'gro ba zhes bya ba'i ting nge 'dzin dang zhes bya ba nas/ nam mkha' ltar chags pa med pas rnam par grol zhing gos pa med pa'i ting nge 'dzin to zhes bya ba'i bar du ni ting nge 'dzin rnams kyi ming bstan pa'o/ /shes rab kyi pha rol tu phyin pa 'bum pa rgya cher bshad pa las le'u brgyad pa'o// //de la dpa' bar 'gro ba zhes bya ba'i ting nge 'dzin gang zhe na zhes bya ba la sogs pa ni ting nge 'dzin rnams kyi ming don dang rjes su mthun par bshad pa ste/ de la dpa' bar 'gro ba zhes bya ba'i ting nge 'dzin gang zhe na/ ting nge 'dzin de ni ting nge 'dzin thams cad kyi spyod yul la spyod pa ste zhes bya ba ni ji ltar mi dpa' bo de bdag gi yul yang srung nus la/ gzhan gyi yul yang srung nus pa bzhin du ting nge 'dzin 'di la mnyam par gzhag na/ bdag gi spyod yul dang ting nge 'dzin gzhan thams cad kyi spyod yul don dam par chos thams cad skye ba med par rtogs pa dang / kun rdzob tu ting nge 'dzin gyi 'bras bu sems can gyi don rnam pa sna tshogs spyod nus pa'i mthu yod pa'i phyir dpa' bar 'gro ba dang 'dra bas dpa' bar 'gro zhes bya ste/ 'gro ba zhes bya ba'i tshig ni skabs 'dir rtogs pa'am dpyod pa la bya'o/ / de la rin chen phyag rgya zhes bya ba'i ting nge 'dzin gang zhe na/ ting nge 'dzin des ting nge 'dzin thams cad rgyas btab pa lta bur 'gyur ba ste zhes bya ba ni ting nge 'dzin de la mnyam par bzhag na/ bdag dang gzhan gyi rgyud la yod pa'i ting nge 'dzin thams cad so so'i spyod yul las mi 'gyur zhing rgyas btab pa bzhin du gnas pa'i mthu dang ldan pa la rin chen phyag rgya zhes bya ste/ rin che ba de ni ting nge 'dzin de lta bu thams cad kyi spyod yul ma yin zhing dkon pa'i phyir ro/ /de la seng ge rnam par rtse ba zhes bya ba'i ting nge 'dzin gang zhe na/ ting nge 'dzin de la gnas shing ting nge 'dzin thams cad kyis rnam par rtse ba ste zhes bya ba ni ji ltar seng ge gcan gzan thams cad kyis 'jigs pa med cing / gcan gzan dang ri dgas thams cad zil gyis mnan te rgyu ba de bzhin du ting nge 'dzin de la mnyam par bzhag na nyan thos dang rang sangs rgyas thams cad zil gyis mnan nas thams cad la spyod pa'i mthu dang ldan pa la seng ge rnam par rtse ba zhes bya ste/ rtse ba zhes bya ba ni skabs 'dir spyod pa la bya'o/ /de la zla ba bzang po zhes bya ba'i ting nge 'dzin gang zhe na/ ting nge 'dzin de la gnas shing ting nge 'dzin thams cad snang bar byed pa ste zhes bya ba ni ji ltar zla ba'i 'od kyis mun pa thams cad bsal te/ gsal zhing bzang bar snang ba de bzhin du ting nge 'dzin de la mnyam par bzhag na ma rig pa'i mun pa thams cad bsal nas ting nge 'dzin gzhan thams cad kyi don du bya ba rnams la thags thogs med cing gsal bar rtogs te/ zla ba ltar mdzes shing bzang ba'i phyir zla ba bzang po zhes bya'o/ /de la zla ba'i rgyal mtshan dpal zhes bya ba'i ting nge 'dzin gang zhe na/ ting nge 'dzin de ni ting nge 'dzin thams cad kyi rgyal mtshan 'dzin pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi sgrib pa dang / bar du gcod pa bsal zhing zla ba ltar 'od gsal ba nyid rtags sam mtshan ma yin pa'i phyir zla ba'i rgyal mtshan dpal zhes bya ste/ dpal ni rgyal mtshan gyi tog la bya'o/ /de la chos thams cad las shin tu 'phags pa zhes bya ba'i ting nge 'dzin gang zhe na/ ting nge 'dzin de la gnas shing ting nge 'dzin thams cad kyis mngon par 'phags pa ste zhes bya ba ni ting nge 'dzin de la mnyam par gzhag na ting nge 'dzin thams cad kyi mthus 'khor ba'i chos thams cad las mngon par 'phags par 'gyur ba'i phyir chos thams cad las shin tu 'phags pa zhes bya'o/ /de la spyi gtsug rnam par lta ba zhes bya ba'i ting nge 'dzin gang zhe na/ ting nge 'dzin de la gnas shing ting nge 'dzin thams cad kyi spyi gtsug rnam par lta ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi don gyi mtha' khyad par du rtogs pa la/ spyi gtsug rnam par lta ba zhes bya ste/ spyi gtsug ces bya ba ni skabs 'dir mtha' 'am rtse mo la bya'o/ /de la chos kyi dbyings su nges pa zhes bya ba'i ting nge 'dzin gang zhe na/ ting nge 'dzin de la gnas shing chos kyi dbyings su rtogs par 'gro ba ste zhes bya ba ni ting nge 'dzin de la mnyam par bzhag na chos kyi dbyings nges par rtogs par 'gyur ba'i phyir chos kyi dbyings nges pa zhes bya ste/ rtogs par 'gro ba zhes bya ba ni skabs 'dir rtogs par khong du chud pa la bya'o/ /de la nges pa'i rgyal mtshan dpal zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi rgyal mtshan nges par 'dzin pa ste zhes bya ba ni ting nge 'dzin de la mnyam par bzhag na ting nge 'dzin gzhan thams cad kyi yon tan gyi mtshan ma dang / nges par ldan par 'gyur ba la/ nges pa'i rgyal mtshan dpal zhes bya ste/ rgyal mtshan dpal zhes bya ba skabs 'dir ni mtshan ma'am rtags la bya'o/ /de la rdo rje zhes bya ba'i ting nge 'dzin gang zhe na/ ting nge 'dzin de la gnas shing ting nge 'dzin thams cad 'jig par mi 'gyur ba ste zhes bya ba ni ting nge 'dzin de la mnyam par bzhag na ting nge 'dzin gzhan thams cad so so'i mi mthun pa'i phyogs kyis mi shigs par 'gyur ba'i phyir rdo rje dang 'dra bas rdo rje zhes bya'o/ /de la chos thams cad la 'jug pa'i phyag rgya zhes bya ba'i ting nge 'dzin gang zhe na/ ting nge 'dzin de la gnas shing chos thams cad kyi phyag rgya la 'jug pa ste zhes bya ba ni ting nge 'dzin de la mnyam par bzhag na chos thams cad skye ba med pa dang / 'gag pa med par rtogs par 'gyur ba'i phyir chos thams cad la 'jug pa'i phyag rgya zhes bya ste/ chos thams cad skye ba med pa dang / 'gag pa med pa nyid tshad ma'i rtags sam mtshan ma yin pa'i phyir phyag rgya zhes bya'o/ /de la ting nge 'dzin la rgyal po ltar rab tu gnas pa zhes bya ba'i ting nge 'dzin gang zhe na/ ting nge 'dzin de la gnas shing ting nge 'dzin thams cad la rgyal po ltar rab tu gnas pa ste zhes bya ba ni dper na rgyal po chen po yul sa ma thob pa rnams ni thob par byed/ thob pa rnams ni ma zhig ma nyams par srung zhing yongs su skyong bar byed pa de bzhin du ting nge 'dzin de la mnyam par bzhag na ting nge 'dzin gzhan ma thob pa rnams ni thob par byed thob pa rnams ni nyams par mi 'gyur bar byed pa'i phyir ting nge 'dzin la rgyal po ltar rab tu gnas pa zhes bya'o/ /de la 'od zer rab tu 'gyed pa zhes bya ba'i ting nge 'dzin gang zhe na/ ting nge 'dzin de la gnas shing ting nge 'dzin thams cad kyi 'od zer rab tu 'gyed pa ste zhes bya ba ni ting nge 'dzin de la mnyam par bzhag na de'i mthus ting nge 'dzin gzhan gyi rdzu 'phrul 'od zer bkye ba las sems can gyi don byed pa la sogs pa 'byung ba'i mthu yod pa'i phyir 'od zer rab tu 'gyed pa zhes bya'o/ /de la dpung rnam par bkod pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi stobs rnam par dgod pa ste zhes bya ba ni ting nge 'dzin de la mnyam par bzhag na ting nge 'dzin gzhan thams cad kyi mthu dang rdzu 'phrul sems can gyi don bya ba la sogs pa 'byung zhing ston par nus la/ de'i mi mthun pa'i phyogs bar du gcod pa rnams kyis mi tshugs par 'gyur ba la dpung rnam par bkod pa zhes bya'o/ /de la yang dag par 'phags pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad yang dag par 'phags par 'gyur ba ste zhes bya ba ni ting nge 'dzin de la mnyam par bzhag na/ ting nge 'dzin gzhan thams cad kyang yang dag par 'grub cing mngon sum du 'gyur ba la yang dag par 'phags pa zhes bya ste/ yang dag par 'phags pa zhes bya ba ni skabs 'dir mngon par 'byung ba yang gsal bar 'gyur ba'am/ mngon sum du 'gyur ba lta bu la bya'o/ /de la nges pa'i tshig la gdon mi za bar 'gyur ba zhes bya ba'i ting nge 'dzin gang zhe na ting nge 'dzin de la gnas shing / ting nge 'dzin thams cad kyi nges pa'i tshig bstan pa la 'jug pa ste zhes bya ba ni ting nge 'dzin de la mnyam par gzhag na ting nge 'dzin thams cad kyi ming dang don rjes su mthun par 'chad cing ston nus pa'i mthu dang ldan par 'gyur ba la nges pa'i tshig la gdon mi za bar 'jug pa zhes bya'o/ /de la tshig bla dgas la yang dag par 'jug pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi t shig bla dgas la 'jug pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi ming kun rdzob tu brda dang tha snyad tsam du bla thabs su btags pa 'chad cing ston nus pa'i mthu yod par 'gyur ba la tshig bla dgas la yang dag par 'jug pa zhes bya'o/ /de la phyogs rnam par lta ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi phyogs rnam par lta ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi spyod yul don dam par de bzhin nyid la sems rtse gcig tu dmigs pa dang / kun rdzob tu ting nge 'dzin gyi mthus lhun gyis grub pa nyid du sems can gyi don bya ba la sogs pa shes shing byed nus par 'gyur ba la phyogs rnam par lta ba zhes bya ste/ phyogs rnam par lta ba zhes bya ba ni skabs 'dir ting nge 'dzin rnams kyi spyod yul rtogs shing de'i bya ba byed nus pa la bya'o/ /de la phyag rgya yongs su 'dzin pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi phyag rgya yongs su 'dzin pa ste zhes bya ba ni ting nge 'dzin de la mnyam par bzhag na/ ting nge 'dzin thams cad kyi don chos thams cad thog ma nas ma skyes pa'o zhes bya ba rtogs par 'gyur ba ste/ ji ltar rtogs pa'i don de las gzhan du mi 'gyur te/ rgyas btab pa dang 'dra ba'i phyir phyag rgya yongs su 'dzin pa zhes bya'o/ /de la nyams pa med ces bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad nyams par mi 'gyur ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi mthu nyams par mi 'gyur ba'am/ ting nge 'dzin thams cad kyi don rtogs pa las dran pa nyams par mi 'gyur ba la nyams pa med pa zhes bya'o/ /de la chos thams cad yang dag par 'du ba rgya mtsho'i phyag rgya zhes bya ba'i ting nge 'dzin gang zhe na/ ting nge 'dzin de la gnas pas ting nge 'dzin thams cad 'du z hing khong du chud par 'dod pa ste zhes bya ba ni ji ltar rgya mtsho chen po'i nang du chu bran thams cad 'du zhing lan tshwa bro ba'i ro gcig tu 'gyur ba de bzhin du ting nge 'dzin la mnyam par bzhag na ting nge 'dzin thams cad kyis rtogs par bya ba'i don chos thams cad skye ba med par ro gcig tu rgyas btab pa bzhin du de las gzhan du mi 'gyur ba'i phyir chos thams cad yang dag par 'du ba rgya mtsho'i phyag rgya zhes bya'o/ /de la nam mkha' rgyas par 'gengs pa zhes bya ba'i ting nge 'dzin gang zhe na/ ting nge 'dzin de la gnas shing ting nge 'dzin thams cad kyis nam mkha' rgyas par 'gengs pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi mthu dang cho 'phrul rnam pa sna tshogs kyis nam mkha' rgyas par 'gengs pa'am/ ting nge 'dzin de'i mthus ting nge 'dzin thams cad la nam mkha' bzhin du rgyas shing khyab par byed pa'i phyir nam mkha' rgyas par 'gengs pa zhes bya'o/ /de la rdo rje dkyil 'khor zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi dkyil 'khor yongs su 'dzin pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi tshogs rdo rje dang 'dra ba bdud la sogs pa bar du gcod pa rnams kyis mi tshugs pa thob par 'gyur ba'i phyir rdo rje dkyil 'khor zhes bya ste/ dkyil 'khor zhes bya ba ni skabs 'dir tshogs sam mang po 'dus pa la bya'o/ /de la rgyal mtshan gyi rtse mo'i dpung rgyan zhes bya ba'i ting nge 'dzin gang zhe na/ ting nge 'dzin de la gnas shing / ji ltar rgyal mtshan dam pa bzhin du ting nge 'dzin thams cad las 'phags te zhes bya ba ni ting nge 'dzin de la mnyam par bzhag na/ rgyal mtshan gyi rtse mo la rin po che'i dpung rgyan btags pa'i ru mtshon dmag gi dpung gi tshogs thams cad las 'phags te/ gsal bar snang zhing dgra'i dpung thams cad zil gyis gnon pa bzhin du ting nge 'dzin thams cad kyi don 'phags par gsal bar snang zhing / ting nge 'dzin gyi mi mthun pa'i phyogs thams cad zil gyis gnon par 'gyur ba la rgyal mtshan gyi rtse mo'i dpung rgyan gyi ting nge 'dzin zhes bya'o/ /de la dbang po'i dbal zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi dbang dam pa thob pa ste zhes bya ba ni ting nge 'dzin de la mnyam par bzhag na lha'i dbang po brgya byin gyi rgyal mtshan mthong ba tsam gyis lha ma yin gyi dgra thams cad ring du bros pas lha'i dbang po brgya byin lha rnams la dbang byed pa bzhin du shes bya dang nyon mongs pa'i sgrib pa thams cad ring du spangs nas ting nge 'dzin thams cad la dbang thob par 'gyur ba la dbang po'i dpal gyi ting nge 'dzin zhes bya ste/ dpal zhes bya ba ni rgyal mtshan nam ru mtshon la bya'o/ /de la rgyun gyi rjes su song ba zhes bya ba'i ting nge 'dzin gang zhe na/ ting nge 'dzin de la gnas shing / rgyun gyi rjes su ma log par yang dag par zhugs pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi don rgyun chags par dran zhing / ting nge 'dzin thams cad las mthar gyis rgyun mi chad par lugs dang mthun par snyoms par 'jug nus par 'gyur ba la rgyun gyi rjes su song ba'i ting nge 'dzin zhes bya'o/ /de la seng ge rnam par bsgyings pa zhes bya ba'i ting nge 'dzin gang zhe na/ ting nge 'dzin de la gnas shing rdul dang dri ma thams cad rab tu spang ba'i dbang du gyur cing ji ltar seng ge'i rgyal po bzhin dbang thob pas bsgyings pa lta bu ste zhes bya ba ni ting nge 'dzin de la mnyam par bzhag na nyon mongs pa'i rdul dang dri ma thams cad spang bar bya ba la dbang du gyur cing / ting nge 'dzin thams cad dang / chos thams cad la spobs pa phun sum tshogs pas seng ge'i rgyal po bzhin du bag tsha ba med par seng ge'i sgra sgrogs pa la seng ge rnam par bsgyings pa'i ting nge 'dzin zhes bya'o/ /de la snrel zhi zhes bya ba'i ting nge 'dzin gang zhe na/ ting nge 'dzin de la gnas shing 'khor ba'i chos rnams rgyun gcod par byed pa ste zhes bya ba ni ting nge 'dzin de la gnas na ting nge 'dzin thams cad la dbang du gyur pas go rims med par ting nge 'dzin thams cad la ci dga' mgur snyoms par 'jug cing 'khor ba'i chos thams cad rgyun bcad de/ mya ngan las 'das pa'i lam sgom par byed pa la snrel zhi'i ting nge 'dzin zhes bya ste/ snrel zhi zhes bya ba ni go rims med par thod rgal du 'jug pa'am/ rgyun mi mthun pa zlog pa lta bu la bya'o/ /de la nyon mongs pa spong ba zhes bya ba'i ting nge 'dzin gang zhe na/ ting nge 'dzin de la gnas shing / nyon mongs pa thams cad kyi dri ma rab tu sel ba ste zhes bya ba ni ting nge 'dzin de la mnyam par bzhag na 'dod chags la sogs pa nyon mongs pa thams cad kyi dri ma spangs par 'gyur ba'i phyir nyon mongs pa spong ba zhes bya'o/ /de la rnam par snang ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad la lham me lhan ne lhang nger byed pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi rtogs par bya ba'i don rnams gsal bar khong du chud par 'gyur ba la rnam par snang ba zhes bya ste/ lham me lhan ne lhang nge zhes bya ba ni gsal bar snang ba'i rnam grangs so/ /de la tshol ba med pa zhes bya ba'i ting nge 'dzin gang zhe na/ ting nge 'dzin de la gnas shing / chos gang yang tshol ba med pa ste zhes bya ba ni ting nge 'dzin de la mnyam par bzhag na/ chos gang la yang rtog pa dang dpyod pa med par 'gyur ba la tshol ba med pa zhes bya ste/ tshol ba zhes bya ba ni skabs 'dir rtog pa'am dpyod pa la bya'o/ /de la gnas la brten pa med pa zhes bya ba'i ting nge 'dzin gang zhe na/ ting nge 'dzin de la gnas shing / chos gang yang gnas la brten par yang dag par rjes su mi mthong ba ste zhes bya ba ni ting nge 'dzin de la mnyam par bzhag na chos thams cad dngos po med par rtogs pas chos gang yang gnas la brten pa med par khong du chud par 'gyur ba la gnas la brten pa med pa zhes bya'o/ /de la sems med pa zhes bya ba'i ting nge 'dzin gang zhe na/ ting nge 'dzin de la gnas shing sems kyang mi 'byung / sems las byung ba rnams kyang mi rgyu ba ste zhes bya ba ni ting nge 'dzin de la mnyam par bzhag na rnam par mi rtog pa grub cing / sems dang sems las byung ba rnams rgyu bar mi 'gyur ba la sems med pa zhes bya'o/ /de la dri ma med pa'i sgron ma zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi sgron ma dri ma med par byed pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi ye shes gsal bar 'gyur ba la dri ma med pa'i sgron ma zhes bya'o/ /sgron ma zhes bya ba skabs 'dir shes pa la bya'o/ /ji ltar sgron ma la gsal bar snang bas mun pa bsal zhing blta bar bya ba'i dngos po gsal bar mthong ba de bzhin du ye shes dri ma med pa des kyang mi shes pa'i mun pa bsal zhing / shes par bya ba'i don yang dag pa nyid gsal bar mthong ba'i phyir de skad ces bya'o/ /de la 'od mtha' yas pa zhes bya ba'i ting nge 'dzin gang zhe na/ ting nge 'dzin de la gnas shing 'od mtha' yas par byed pa ste zhes bya ba ni ting nge 'dzin de la mnyam par bzhag pa'i mthus 'jig rten gyi khams mtha' yas par khyab pa'i 'od mtha' yas pa 'byung ba la 'od mtha' yas pa zhes bya'o/ /de la 'od byed pa zhes bya ba'i ting nge 'dzin gang zhe na/ ting nge 'dzin 'di thob ma thag tu ting nge 'dzin thams cad kyi 'od byed pa ste zhes bya ba ni ting nge 'dzin de thob pa'i mthus ting nge 'dzin gzhan thams cad kyi cho 'phrul 'od snang ba 'byung bar byed pa'i phyir 'od byed pa zhes bya'o/ /de la kun du snang ba zhes bya ba'i ting nge 'dzin gang zhe na/ ting nge 'dzin de thob m a thag tu ting nge 'dzin thams cad kyi sgo snang bar byed pa ste zhes bya ba ni ting nge 'dzin de thob pa'i mthus ting nge 'dzin thams cad la 'jug pa'i sgo gzod ma nas ma skyes pa'i phyir a ni chos thams cad kyi sgo'o zhes bya ba la sogs pa yi ge'i 'bru re re'i sgo nas ting nge 'dzin rnams la 'jug par 'gyur ba'i sgo de lta bu shes pas gsal bar byed pa'i phyir kun du snang ba zhes bya'o/ /de la dag pa dam pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi dag pa mnyam pa nyid thob pa ste zhes bya ba ni chos kyi dbyings rnam par dag pa ting nge 'dzin thams cad kyi spyod yul du mnyam pa nyid du gyur pa thob par gyur pa la dag pa dam pa zhes bya'o/ /de la 'od dri ma med pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi dri ma sel ba ste zhes bya ba ni ting nge 'dzin de la mnyam par bzhag na/ ting nge 'dzin thams cad kyi mi mthun pa'i phyogs rtogs pa dang / nyon mongs pa la sogs pa'i sgrib pa ye shes kyi 'od gsal bas sel bar byed pa la 'od dri ma med pa zhes bya'o/ /de la dga' ba byed pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi dga' ba nyams su myong bar 'gyur ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi don dam pa'i chos rtogs pa'i dga' ba nyams su myong bar 'gyur ba la dga' ba byed pa zhes bya'o/ /de la glog gi sgron ma zhes bya ba'i ting nge 'dzin gang zhe na/ ting nge 'dzin de la gnas shing ting nge 'dzin thams cad kyi sgron ma byed pa ste zhes bya ba ni ting nge 'dzin de la mnyam par bzhag pa'i mthus ting nge 'dzin thams cad kyi cho 'phrul 'od zer gyi sgron ma glog dang 'dra ba 'byung bar byed pa la glog gi sgron ma zhes bya'o/ /de la zad mi shes pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad zad shes pa dang / zad mi shes pa yang dag par rjes su mi mthong ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi mthu nyams shing zad par mi 'gyur ba dang / zad pa dang mi zad par rtogs pa yang mi 'byung ba la zad mi shes pa zhes bya'o/ /de la gzi brjid yod pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi gzi brjid dpal gyis 'bar bar 'gyur ba ste zhes bya ba ni ting nge 'dzin de la mnyam par bzhag na ting nge 'dzin gzhan thams cad kyi mthu bdud la sogs pa bar du gcod pa rnams kyis zil gyis mi gnon pa'i gzi byin dang / 'jig rten las 'das pa'i phun sum tshogs pa thams cad kyi dpal dang ldan par gyur pa la gzi brjid yod pa zhes bya'o/ /de la zad pa dang bral ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad zad mi shes par rjes su mthong nas/ rdul tsam yang yang dag par rjes su mi mthong ba ste/ de ltar mthong ba ste zhes bya ba ni ting nge 'dzin de la mnyam par bzhag na ting nge 'dzin thams cad don dam par dngos po med par rtogs pas dngos po med pa la zad pa zhes bya ba yang mi srid pa'i phyir zad mi shes par rjes su mthong ngo / /de bas na dngos po med par rtogs pa nyid gsal bar bstan pa'i phyir rdul tsam yang / yang dag par rjes su mi mthong ba de ltar mthong ba ste zhes bya ba gsungs te/ dngos po cung zad kyang med par rtogs pa nyid zad mi shes par rjes su mthong ba yin no zhes bya ba'i don to/ /de la mi g.yo ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad mi g.yo mi 'gul rab tu mi 'byed rlom sems su mi byed pa ste zhes bya ba ni ting nge 'dzin de la mnyam par bzhag na ting nge 'dzin thams cad la yang rnam par mi rtog pa lhun gyis grub par 'gyur ba la mi g.yo ba zhes bya ste/ mi g.yo mi 'gul rab tu mi 'byed rlom sems su mi byed pa zhes bya ba ni rnam par mi rtog pa'i rnam grangs so/ /de la 'jig pa med pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad 'jig par yang dag par rjes su mi mthong ba ste zhes bya ba ni ting nge 'dzin de la mnyam par bzhag na ting nge 'dzin thams cad las nyams par mi 'gyur ba la 'jig pa med pa zhes bya'o/ /de la nyi ma'i sgron ma zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi sgo snang bar byed pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi don rtogs par byed pa'i sgo mnyan pa dang bsam pa'i shes rab nyi ma dang 'dra ba'i sgron ma gsal bar 'gyur ba la nyi ma'i sgron ma zhes bya'o/ /de la zla ba dri ma med pa zhes bya ba'i ting nge 'dzin gang zhe na/ ting nge 'dzin thams cad mun pa med par byed pa ste zhes bya ba ni ji ltar zla ba sprin gyis ma bsgribs pa'i 'od kyis mun pa bsal te snang ba gsal bar byed pa de bzhin du ting nge 'dzin de la mnyam par bzhag na ting nge 'dzin thams cad kyi sgrib pa bsal zhing so so'i dmigs pa'i yul gsal bar byed pa la zla ba dri ma med pa zhes bya'o/ /de la snang ba gsal ba zhes bya ba'i ting nge 'dzin gang zhe na/ ting nge 'dzin de la gnas shing ting nge 'dzin thams cad kyi so so yang dag par rig pa bzhi rab tu 'thob pa ste zhes bya ba ni ting nge 'dzin de la mnyam par bzhag na so so yang dag par rig pa bzhi ye shes kyi snang bas chos dang / don dang / nges pa'i tshig dang / spobs pa rnams gsal bar byed nus par 'gyur ba la snang ba gsal ba zhes bya'o/ /de la snang ba byed pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin de thams cad kyi sgo snang bar byed pa ste zhes bya ba ni ting nge 'dzin de la mnyam par bzhag na ting nge 'dzin thams cad la 'jug pa'i sgo chos bdag med par rtogs pa goms par byed pa'i shes rab gsal bar byed pa la snang bar byed pa zhes bya'o/ /de la bya ba byed pa zhes bya ba'i ting nge 'dzin gang zhe na/ ting nge 'dzin de la gnas shing ting nge 'dzin thams cad kyi bya ba rnams byed pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi mthus sems can yongs su smin par bya ba dang / rnam par grol bar byed pa'i thabs sna tshogs byed nus par 'gyur ba la bya ba byed pa zhes bya'o/ /de la ye shes dpal zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi ye shes dpal yang dag par rjes su mthong ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi don rtogs par byed par nus pa'i ye shes 'byung bar 'gyur ba la ye shes dpal zhes bya'o/ /dpal zhes bya ba skabs 'dir rgyal mtshan gyi tog la bya'o/ /ye shes de rgyal mtshan gyi tog dang 'dra bar mtho zhing btsan pa'am/ don rtogs pa'i mtshan ma 'am/ rtags su 'gyur ba'i phyir rgyal mtshan gyi tog dang 'dra bas dpal zhes bya'o/ /de la rdo rje lta bu zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi ting nge 'dzin nyid kyang yang dag par rjes su mi mthong bar khong du chud par byed pa ste zhes bya ba ni ting nge 'dzin de la mnyam par bzhag na chos thams cad stong pa nyid du rtogs pa'i ye shes rdo rje lta bu 'byung ste/ ye shes des ting nge 'dzin thams cad kyi rang bzhin sems rtse gcig pa'i mtshan nyid so so rang gis rig pa tsam yang yang dag par rjes su mi mthong bar nus pa la rdo rje lta bu zhes bya'o/ /de la sems gnas pa zhes bya ba'i ting nge 'dzin gang zhe na/ ting nge 'dzin de la gnas na sems mi g.yo rnam par mi g.yo/ /rnam par mi ldog /yongs su yi chad par mi 'gyur/ nyams su mi bde ba med la/ de la sems zhes bya ba 'di yin zhes bya bar sems mi 'byung ba ste zhes bya ba ni ting nge 'dzin de la mnyam par bzhag na rnam par mi rtog pa lhun gyis grub cing sems mi g.yo bar gnas par 'gyur ba la sems gnas pa zhes bya ste/ sems mi g.yo ba dang / rnam par mi g.yo ba dang / sems zhes bya ba 'di yin zhes bya bar sems mi 'byung ba zhes bya ba ni rnam par mi ldog pa'i rnam grangs so/ / rnam par mi ldog pa dang / yongs su yi chad par mi 'gyur ba dang / nyams su mi bde ba med pa zhes bya ba ni ting nge 'dzin de lhun gyis grub pas skyo zhing gtong 'dod par mi 'gyur ba'i rnam grangs so/ /de la kun du lta ba zhes bya ba'i ting nge 'dzin gang zhe na/ ting nge 'dzin de la gnas shing / thams cad du lta bar yang dag par rjes su mthong ba ste zhes bya ba ni ting nge 'dzin de la mnyam par gzhag pa'i mthus phyogs bcu thams cad du snang ba gsal bar 'byung ba mthong bar 'gyur ba la kun du lta ba zhes bya'o/ /de la rab tu gnas pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad la rab tu gnas par 'gyur ba ste zhes bya ba ni ting nge 'dzin de la mnyam par bzhag na/ ting nge 'dzin thams cad la mnyam par bzhag cing gnas par 'gyur ba la rab tu gnas pa zhes bya'o/ /de la rin chen mtha' zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad rin chen mtha' ltar kun nas snang ba ste zhes bya ba ni ting nge 'dzin de la mnyam par bzhag pa'i mthus ting nge 'dzin gzhan thams cad kyi cho 'phrul 'od zer rin po che'i rtse mo ltar snang bar 'gyur ba la rin chen mtha' zhes bya'o/ /rin chen mtha' zhes bya ba skabs 'dir rin po che'i rtse mo 'bar ba la bya ste/ ting nge 'dzin gyi cho 'phrul 'od zer 'bar ba 'byung ba rin po che'i rtse mo 'bar ba 'dra ba'i phyir rin chen mtha' zhes bya'o/ /de la chos dam pa'i phyag rgya zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad phyag rgya med pa'i mtha' phyag rgyas btab pa nye bar bzung bas phyag rgyas btab par 'gyur ba ste zhes bya ba ni ting nge 'dzin de la mnyam par bzhag na ting nge 'dzin thams cad chos kyi dbyings rnam par dag pa'i rang bzhin las mi 'gyur bar byed nus pa ste/ chos dam pa zhes bya ba ni chos kyi dbyings la bya'o/ /phyag rgya zhes bya ba ni chos kyi dbyings las mi 'gyur zhing ma nyams pa la bya'o/ /phyag rgya med pa'i mtha' phyag rgyas btab pa nye bar bzung bas zhes bya ba ni chos kyi dbyings kyi phyag rgya de yang don dam par phyag rgya med pa'i phyir phyag rgyas btab pa zhes bya ste/ mtha' zhes bya ba ni med pa'i mthas gtugs pa'am phul du gyur pa la bya'o/ /nye bar bzung bas zhes bya ba ni phyag rgya med pa'i mtha' phyag rgyas btab pa'i phyir zhes bya ba'i don to/ /de ltar dngos po med par rtogs pa nyid chos dam pa chos kyi dbyings kyi phyag rgyas btab pa yin no zhes bstan pa'o/ /de la chos thams cad mnyam pa nyid ces bya ba'i ting nge 'dzin gang zhe na/ ting nge 'dzin de la gnas shing / chos gang yang mnyam pa nyid du ma chud pa med par yang dag par rjes su mthong ba ste zhes bya ba ni ting nge 'dzin de la mnyam par bzhag na 'jig rten dang 'jig rten las 'das pa'i chos thams cad chos kyi dbyings mnyam pa nyid kyi khong du ma chud pa med par rtogs pa la chos thams cad mnyam pa nyid kyi ting nge 'dzin zhes bya'o/ /de la dga' ba spong ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad dang chos thams cad kyi dga' ba spong ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi ro la chags pa'i dga' ba dang / chags par 'gyur ba'i chos thams cad la chags shing dga' ba med par 'gyur ba la dga' ba spong ba zhes bya'o/ /de la chos kyis 'phags pa zhes bya ba'i ting nge 'dzin gang zhe na/ ting nge 'dzin de la gnas shing / chos thams cad kyi mun pa sel ba dang / ting nge 'dzin thams cad kyi mngon par 'phags par gyur pa ste zhes bya ba ni ting nge 'dzin de la mnyam par bzhag na shes par bya ba'i chos thams cad la sgrib pa med cing ting nge 'dzin thams cad kyis shes par bya ba'i yul rnams gsal bar khong du chud pa la chos kyis 'phags pa zhes bya'o/ /de la rnam par 'thor ba zhes bya ba'i ting nge 'dzin gang zhe na/ ting nge 'dzin de la gnas shing / chos thams cad rnam par 'thor ba ste zhes bya ba ni ting nge 'dzin de la mnyam par bzhag na nyon mongs pa'i phyogs su gtogs pa'i chos spong bar bya ba rnams gtor ba bzhin du spang bar 'gyur ba la rnam par 'thor ba zhes bya'o/ /de la chos thams cad kyi tshig rab tu 'byed pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad dang / chos thams cad kyi tshig rab tu 'byed pa ste zhes bya ba ni ting nge 'dzin de la mnyam par bzhag pa'i mthus ting nge 'dzin thams cad bshad pa'i tshig dang / chos thams cad bshad pa'i tshig rnams bye brag tu 'byed cing 'chad nus pa la chos thams cad kyi tshig rab tu 'byed pa zhes bya'o/ /de la yi ge mnyam par 'god pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi yi ge mnyam pa nyid rab tu thob pa ste zhes bya ba ni ting nge 'dzin de la mnyam par bzhag na ting nge 'dzin thams cad ston pa'i yi ge rnams ting nge 'dzin so so'i don dang rjes su mthun par spyod cing ston nus pa la/ yi ge mnyam par 'god pa zhes bya'o/ /de la yi ge dang bral ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi yi ge gcig kyang dmigs pa med pa ste zhes bya ba ni ting nge 'dzin de la mnyam par bzhag na ting nge 'dzin thams cad ston pa'i yi ge rnams mtshan mar mi 'dzin cing / dngos por mi dmigs pa'i shes rab 'thob par 'gyur ba la yi ge dang bral ba zhes bya'o/ /de yang dmigs pa gcod pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi dmigs pa 'chad par 'gyur ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi so so'i dmigs pa'i yul rnams la mtshan mar mi 'dzin pa'i dmigs pa mi 'byung ba la dmigs pa gcod pa zhes bya'o/ /de la 'gyur ba med pa zhes bya ba'i ting nge 'dzin gang zhe na/ ting nge 'dzin de la gnas shing / chos thams cad 'gyur ba mi dmigs pa ste zhes bya ba ni ting nge 'dzin de la mnyam par bzhag na/ chos thams cad de bzhin nyid kyi rang bzhin du rtogs te/ skye ba dang 'jig pa la sogs pa 'gyur ba med par khong du chud pa la 'gyur ba med pa zhes bya'o/ /de la rnam pa med pa zhes bya ba'i ting nge 'dzin gang zhe na/ ting nge 'dzin de la gnas shing / chos thams cad kyi rnam pa tsam yang dmigs su med pa ste zhes bya ba ni ting nge 'dzin de la mnyam par gzhag na phung po dang khams dang skye mched la sogs pa'i chos rnams rnam pa sna tshogs su bye brag tu 'byed pa'i mtshan mar dmigs pa med par 'gyur ba la rnam pa med pa zhes bya'o/ /de la ming nges par 'jug pa'i ting nge 'dzin gang zhe na/ ting nge 'dzin de la gnas shing / nges pa'i tshig thams cad ni yang dag par dmigs su med cing tha snyad la ltos pa tsam mo zhes rtogs par 'jug pa ste zhes bya ba ni ting nge 'dzin de la mnyam par bzhag na ting nge 'dzin thams cad dang / chos thams cad kyi ming nges pa rnams don dam par dngos po med par rtogs la/ kun rdzob tu 'jig rten gyi tha snyad tsam du nges pa'i tshig rnam par dbye bas nges par rtogs par byed pa la ming nges par 'jug pa'i ting nge 'dzin zhes bya'o/ /de la gnas med par spyod pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi gnas dmigs pa med pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi dmigs pa'i yul rnams med par rtogs pa ste/ gnas zhes bya ba ni skabs 'dir ting nge 'dzin rnams kyi dmigs pa'i yul lam rten la bya'o/ /de la rab rib med pa zhes bya ba'i ting nge 'dzin gang zhe na/ ting nge 'dzin de la gnas shing / chos thams cad kyi rab rib rnam par sel ba ste zhes bya ba ni ting nge 'dzin de la mnyam par bzhag na/ 'jig rten dang 'jig rten las 'das pa'i chos rnams shes par bya ba bsgrib pa 'am/ thags thogs med par shes par 'gyur ba la rab rib med pa zhes bya'o/ /de la spyod pa dang ldan pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi spyod pa yang dag par rjes su mi mthong ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi spyod pa cho 'phrul sna tshogs bstan pas sems can yongs su smin pa dang / rnam par grol ba zhes bya ba la sogs pa don dam par dngos po med par rtogs pa ste/ de ltar spyod pa dngos po med par rtogs pa nyid don dam pa'i spyod pa yin pas spyod pa dang ldan pa zhes bya'o/ /de la g.yo ba med pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad g.yo ba med par yang dag par rjes su mthong ba ste zhes bya ba ni ting nge 'dzin de la mnyam par bzhag na ting nge 'dzin gzhan thams cad kyang so so'i dmigs pa la sems rtse gcig tu bzhag pa las mi 'gyur zhing mi g.yo bar 'gyur ba la g.yo ba med pa zhes bya'o/ /de la yul las brgal ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi yul las yang dag par 'da' ba ste zhes bya ba ni ting nge 'dzin de la mnyam par gzhag na ting nge 'dzin thams cad kyi dmigs pa'i yul dang / sgrub pa'i don rnams dngos po med par rtogs shing de dag la mtshan mar 'dzin pa las 'das pa la yul las brgal ba zhes bya'o/ / de la yon tan thams cad kyi tshogs su gyur pa zhes bya ba'i ting nge 'dzin gang zhe na/ ting nge 'dzin de la gnas shing / chos thams cad dang ting nge 'dzin thams cad kyi yon tan gyi tshogs rjes su 'thob pa ste zhes bya ba ni ting nge 'dzin de la mnyam par bzhag na byang chub kyi phyogs dang / pha rol tu phyin pa la sogs pa 'jig rten las 'das pa'i chos rnams kyi yon tan mang po dang / ting nge 'dzin thams cad kyi yon tan chos bdag med par rtogs pa dang / sems can gyi don sna tshogs byed nus pa rnams thob par 'gyur ba la/ yon tan thams cad kyi tshogs su gyur pa zhes bya'o/ /de la sems med par gnas pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad la sems mi 'jug pa ste zhes bya ba ni ting nge 'dzin de la mnyam par bzhag na dmigs pa gang la sems rtse gcig tu bzhag pa las ting nge 'dzin gzhan la sogs pa'i dmigs pa gzhan la sems mi g.yeng zhing rtog pa med par 'gyur ba la sems med par gnas pa zhes bya'o/ /de la dge ba'i me tog rgyas shing gsal ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi dge ba'i me tog rgyas shing gsal ba rab tu thob pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi mthu bsod nams dang ye shes kyi tshogs me tog kha bye ba bzhin du rgyas shing gsal bar 'gyur ba la dge ba'i me tog rgyas shing gsal ba zhes bya'o/ /de la byang chub kyi yan lag yod pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin t hams cad kyi byang chub kyi yan lag bdun rab tu 'thob pa ste zhes bya ba ni ting nge 'dzin de la mnyam par bzhag na ting nge 'dzin gzhan gang la mnyam par gzhag kyang rung ste mnyam par bzhag ma thag tu dran pa byang chub kyi yan lag la sogs pa byang chub kyi yan lag bdun thob par 'gyur ba la byang chub kyi yan lag yod pa zhes bya'o/ /de la spobs pa mtha' yas pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad la spobs pa mtha' yas pa rab tu 'thob pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi tshig dang don rnams so sor phye ste gzhan la bstan pa la spobs pa mtha' yas pa thob par 'gyur ba la spobs pa mtha' yas pa zhes bya'o/ /de la mi mnyam pa dang mnyam pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad la mi mnyam pa dang mnyam pa rab tu 'thob pa ste zhes bya ba ni ting nge 'dzin de la mnyam par bzhag na ji ltar sangs rgyas bcom ldan 'das ting nge 'dzin thams cad la dbang du gyur pa de bzhin du ting nge 'dzin thams cad la dbang du 'gyur ba thob pa la mi mnyam pa dang mnyam pa zhes bya ste/ mi mnyam pa dang mnyam pa zhes bya ba ni sangs rgyas bcom ldan 'das la bya'o/ /de dang mnyam par gyur pa la mi mnyam pa dang mnyam pa 'thob pa zhes bya'o/ /de la chos thams cad las 'da' ba zhes bya ba'i ting nge 'dzin gang zhe na/ ting nge 'dzin de la gnas shing / khams gsum pa thams cad las yang dag par 'da' ba ste zhes bya ba ni ting nge 'dzin de la mnyam par bzhag na khams gsum du skye zhing 'khor bar mi 'gyur zhing 'dus ma byas pa'i dbyings la rab tu gnas par 'gyur ba la chos thams cad las 'da' ba zhes bya'o/ /de la yongs su gcod par byed pa zhes bya ba'i ting nge 'dzin gang zhe na/ ting nge 'dzin de la gnas shing / chos thams cad dang ting nge 'dzin thams cad kyi rgyu mthong ba ste zhes bya ba ni ting nge 'dzin de la mnyam par bzhag na 'jig rten dang 'jig rten las 'das pa'i chos thams cad dang / ting nge 'dzin thams cad kyi so so'i rang bzhin dang spyi'i mtshan nyid shes rab kyis rtogs shing yongs su gcod nus pa la yongs su gcod par byed pa zhes bya'o/ /de la nem nur rnam par sel ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad dang chos thams cad la nem nur rnam par sel ba rab tu 'thob pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi don dang tshig la the tshom med par 'gyur ba dang / 'jig rten dang 'jig rten las 'das pa'i chos thams cad kyi don dam pa dang kun rdzob kyi mtshan nyid la the tshom med par 'gyur ba la nem nur rnam par sel ba zhes bya'o/ /de la gnas su bya ba med pa zhes bya ba'i ting nge 'dzin gang zhe na/ ting nge 'dzin de la gnas shing / chos thams cad kyi gnas yang dag par rjes su mi mthong ba ste zhes bya ba ni ting nge 'dzin de la mnyam par bzhag na chos thams cad dngos po med par rtogs pas de dag gi gnas kyang med par rtogs par 'gyur ba la gnas su bya ba med pa zhes bya'o/ /de la gcig tu rnam par bkod pa zhes bya ba'i ting nge 'dzin gang zhe na/ ting nge 'dzin de la gnas shing / chos gang yang gnyis su yang dag par rjes su mi mthong ba ste zhes bya ba ni ting nge 'dzin de la mnyam par bzhag na chos thams cad de bzhin nyid kyi rang bzhin du gcig par rtogs shing rtag pa dang chad pa dang / yod pa dang med pa la sogs pa'i mtha' gnyis su lta bar mi 'gyur ba la/ gcig tu rnam par bkod pa zhes bya'o/ /de la rnam pa mngon par sgrub pa zhes bya ba'i ting nge 'dzin gang zhe na/ ting nge 'dzin de la gnas shing / chos thams cad ting nge 'dzin thams cad kyi rnam pa mngon par sgrub pa yang dag par rjes su mi mthong ba ste zhes bya ba'i ting nge 'dzin de la mnyam par bzhag na chos thams cad kyi kha dog dang dbyibs la sogs pa'i rnam pa dang / ting nge 'dzin thams cad kyi rang bzhin sems rtse gcig tu gyur pa'i rnam pa la yang rnam par mi rtog ste/ de ltar mi rtog pa'i rnam par gyur pa nyid la rnam pa mngon par sgrub pa zhes bya'o/ /de la rnam pa gcig tu gyur pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi rnam pa yang dag par rjes su mi mthong ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi rnam pa so so'i dmigs pa la sems rtse gcig par gyur pa'i mtshan nyid rnams don dam par stong pa'i rnam pa gcig pur gyur par rtogs pa la/ rnam pa gcig tu gyur pa zhes bya'o/ /de la rnam pa 'dor ba med pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad gnyis su med par yang dag par rjes su mthong ba ste zhes bya ba ni ting nge 'dzin de la mnyam par bzhag na/ ting nge 'dzin thams cad rnam par mi rtog pa'i rang bzhin du gcig cing gnyis su med par rtogs pa la rnam par 'dor ba med pa zhes bya ste/ rnam par mi rtog pa'i rnam pa de mi 'dor zhing de dang ma bral ba la rnam par 'dor ba med pa zhes bya'o/ /de la rtogs pas srid pa'i gzhi thams cad khong du chud pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad rtogs par byed pa'i ye shes la zhugs nas de la zhugs pa'i phyir khong du mi chud pa gang yang med pa ste zhes bya ba ni ting nge 'dzin de la mnyam par bzhag na ting nge 'dzin thams cad kyi dmigs pa'i yul don dam par chos thams cad stong par rtogs par bya ba dang / kun rdzob tu khams gsum gyi dngos po thams cad kyi mtshan nyid shes par byed pa'i ye shes thob par 'gyur ba la rtogs pas srid pa'i gzhi thams cad khong du chud pa zhes bya ste/ srid pa'i gzhi zhes bya ba ni khams gsum gyi dngos po la bya'o/ /de la brda dang sgra la 'jug pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi brda dang sgra la 'jug pa ste zhes bya ba ni ting nge 'dzin de la mnyam par bzhag pas ting nge 'dzin thams cad kyi ming dang brda dang sgrar btags pa rnams don dang rjes su mthun par shes par 'gyur ba la brda dang sgra la 'jug pa zhes bya'o/ /de la sgra dbyangs kyi yi ge dang bral ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad yi ge dang bral ba rjes su mthong ba ste zhes bya ba ni ting nge 'dzin de la mnyam par bzhag na ting nge 'dzin thams cad don dam par yi ge dang sgras brjod du med par rtogs par 'gyur ba la sgra dbyangs kyi yi ge dang bral ba zhes bya'o/ /de la sgron ma 'bar ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad gzi brjid kyis lham me lhan ne lhang nger byed pa ste zhes bya ba ni ting nge 'dzin de la mnyam par bzhag na ye shes kyi sgron ma snang bas ting nge 'dzin thams cad kyis shes par bya ba'i don gsal bar shes shing snang bar 'gyur ba la/ sgron ma 'bar ba zhes bya ste/ lham me lhan ne lhang nge zhes bya ba ni gsal bar snang ba'i rnam grangs so/ /de la mtshan nyid yongs su sbyong ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi mtshan nyid yongs su dag par 'gyur ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi spyi'i mtshan nyid dang / so so'i mtshan nyid yongs su dag par byed pa ste/ ting nge 'dzin thams cad kyi spyi'i mtshan nyid ni dmigs pa la sems rtse gcig tu gnas pa'o/ /so so'i mtshan nyid ni sems can gyi don du cho 'phrul rnam pa sna tshogs 'byung ba la sogs pa ste/ de dag yongs su dag par byed pa ni de dag gi mi mthun pa'i phyogs sgrib pa med par byed pa'o/ /de la mngon par dmigs pa med pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad mngon par dmigs pa med par rjes su mthong ba ste zhes bya ba ni ting nge 'dzin de la mnyam par bzhag na don dam par ting nge 'dzin thams cad mtshan mar bzung zhing / dmigs pa med par rtogs par 'gyur ba mngon par dmigs pa med pa zhes bya'o/ /de la rnam pa'i mchog thams cad dang ldan pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad rnam pa'i mchog thams cad dang ldan par 'gyur ba ste zhes bya ba ni ting nge 'dzin de la mnyam par bzhag na/ ting nge 'dzin thams cad kyi mthu dang / yon tan gyi rnam pa mchog thams cad dang ldan par 'gyur ba la rnam pa'i mchog thams cad dang ldan pa zhes bya'o/ /de la bde ba dang sdug bsngal thams cad la mngon par dga' ba med pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad bde ba dang sdug bsngal yang dag par rjes su mi mthong ba ste zhes bya ba ni ting nge 'dzin de la mnyam par bzhag na/ ting nge 'dzin thams cad la bde ba dang sdug bsngal du mi rtog cing mtshan mar mi 'dzin pa la/ bde ba dang sdug bsngal thams cad la mngon par dga' ba med pa zhes bya'o/ /de la zad mi shes pa'i za ma tog ces bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad zad par rung bar yang dag par rjes su mi mthong ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi yon tan zad mi shes pa'i snod du gyur pa la/ zad mi shes pa'i za ma tog ces bya'o/ /de la gzungs kyi blo gros zhes bya ba'i ting nge 'dzin gang zhe na/ ting nge 'dzin de la gnas shing / gzungs thams cad yongs su 'dzin pa ste zhes bya ba'i ting nge 'dzin de la mnyam par bzhag na don dang tshig 'dzin nus pa'i gzungs thams cad kyi shes rab dang ldan par 'gyur ba la gzungs kyi blo gros zhes bya'o/ /de la yang dag pa dang log pa thams cad yang dag par sel ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad yang dag pa dang / log pa dang yang dag par rjes su mi mthong ba ste zhes bya ba ni ting nge 'dzin de la mnyam par bzhag na/ ting nge 'dzin thams cad la yang dag pa dang / log par rnam par rtog pa mi 'byung ba la yang dag pa dang / log pa thams cad rnam par sel ba zhes bya'o/ /de la 'gal ba dang 'gog pa thams cad yang dag par zhi bar byed pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad la 'gal ba dang / 'gog pa yang dag par rjes su mi mthong ba ste zhes bya ba'i ting nge 'dzin de la mnyam par bzhag na ting nge 'dzin thams cad kyi sgrib pa dang bgegs rnams med par 'gyur ba la/ 'gal ba dang 'gog pa yang dag par zhi bar byed pa zhes bya ste/ 'gal ba ni ting nge 'dzin gyi mi mthun pa'i phyogs sgrib pa la bya'o/ /'gog pa ni ting nge 'dzin gyi bar du gcod pa'i bgegs la bya'o/ /de la mthun pa dang 'gal ba med pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad la mthun pa dang 'gal ba yang dag par rjes su mi mthong ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi gnyen po dang mi mthun pa'i phyogs gnyi ga la mi dmigs shing mtshan mar mi 'dzin par 'gyur ba la mthun pa dang 'gal ba med pa zhes bya'o/ /de la 'od dri ma med pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi 'od kyi dkyil 'khor mi dmigs pa ste zhes bya ba ni ting nge 'dzin de la mnyam par bzhag na rnam par mi rtog pa'i lhun gyis grub par 'gyur bas ting nge 'dzin thams cad kyi ye shes kyi 'od kyi dkyil 'khor snang ba dang / ting nge 'dzin gyi mthus lus las 'od kyi dkyil 'khor 'byung ba yang mi dmigs par 'gyur ba ste/ de ltar mi dmigs pa nyid/ rnam par mi rtog pa'i ye shes kyi 'od skyon med pa yin pa'i phyir 'od dri ma med pa zhes bya'o/ /de la snying po dang ldan pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi snying po yang dag par rjes su mi mthong ba ste zhes bya ba ni ting nge 'dzin de la mnyam par bzhag na ting nge 'dzin thams cad la don dam par snying po med par mthong ba ste/ de ltar snying po med par rtogs pa nyid mchog dam pa yin pa'i phyir snying po dang ldan pa zhes bya'o/ /de la zla ba dri ma med par rgyas pa'i 'od ces bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad 'di lta ste dper na zla ba nya ba'i dkyil 'khor ltar yongs su rgyas par 'gyur ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi yon tan dang / ye shes kyi 'od gsal ba yongs su rdzogs par 'gyur ba la/ zla ba dri ma med par rgyas pa'i 'od ces bya ste/ zla ba nya ba 'dra ba'i dpe ni yongs su rdzogs pa'i dpe'o/ /de la glog gi 'od ces bya ba'i ting nge 'dzin gang zhe na/ ting nge 'dzin de la gnas shing / dag cing bsil ba'i 'od kyis sems can gyi ris snang bar byas shing mun pa mun nag gi tsha bas gdung ba sel bar byed pa ste zhes bya ba ni ting nge 'dzin de la mnyam par bzhag na 'od glog bzhin du 'byung ba dag cing bsil bar sems can gyi ris tshim zhing snang bar bya ste/ mun pa mun nag dang / nyon mongs pa'i gdung ba bsal nas rnam par rig par byed pa la glog gi 'od kyi ting nge 'dzin zhes bya'o/ /de la rgyan chen po zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad rgyan chen po dang ldan par 'gyur ba ste zhes bya ba ni ting nge 'dzin de la mnyam par bzhag na ting nge 'dzin thams cad kyi yon tan rnam pa sna tshogs dang yang ldan par 'gyur ba la rgyan chen po zhes bya ste/ ting nge 'dzin rnams kyi yon tan sems can yongs su smin par bya ba dang / rnam par grol bar bya ba'i phyir rdzu 'phrul dang mthu rnam pa sna tshogs gzhan gyis zil gyis mi non par ston pa nyid rgyan chen po zhes bya'o/ /de la rnam pa thams cad du 'od byed pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad snang bar byed pa ste zhes bya ba ni ting nge 'dzin de la mnyam par bzhag na/ ting nge 'dzin gzhan thams cad kyi dmigs pa'i yul gsal bar rtogs par 'gyur ba la/ rnam pa thams cad du 'od byed pa zhes bya'o/ /de la ting nge 'dzin mnyam pa nyid ces bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad la 'khrug pa yang mi dmigs/ rtse gcig kyang mi dmigs pa ste zhes bya ba ni ting nge 'dzin de la mnyam par bzhag na chos thams cad mnyam pa nyid du rtogs pa'i dbang gis ting nge 'dzin thams cad kyi mi mthun pa'i phyogs sems g.yeng ba dang / de'i gnyen po sems rtse gcig tu gyur pa gnyi ga yang mnyam pa nyid du rtogs pas g.yeng ba dang / sems rtse gcig pa gnyi gar mi dmigs shing so so'i mtshan mar mi 'dzin pa la/ ting nge 'dzin mnyam pa nyid ces bya'o/ /de la rdul med pa'i rdul dang bral ba'i tshul dang ldan pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin dang chos thams cad rdul can dang rdul dang bral ba mnyam pa nyid du rtogs pa ste zhes bya ba ni ting nge 'dzin de la mnyam par bzhag na chos thams cad stong pa nyid du rtogs pas ting nge 'dzin la yang dngos por mi lta/ chos thams cad la yang mtshan mar mi 'dzin te/ skyon dang skyon med pa gnyi ga mnyam pa nyid du lta ba la/ rdul med cing rdul dang bral ba'i tshul dang ldan pa zhes bya'o/ /de la nyon mongs pa med par yang dag par gzhol ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad nyon mongs pa med par 'gyur ba ste zhes bya ba ni ting nge 'dzin de la mnyam par bzhag na/ ting nge 'dzin thams cad kyi mi mthun pa'i phyogs sems g.yeng zhing rnam par rtog pa thams cad med par 'gyur ba la nyon mongs pa med par yang dag par gzhol ba zhes bya ste/ nyon mongs pa zhes bya ba ni skabs 'dir ting nge 'dzin rnams kyi mi mthun pa'i phyogs sems g.yeng ba dang / rnam par rtog pa la bya'o/ /de la nyon mongs pa dang bcas pa thams cad nyon mongs pa med par yang dag par gzhol ba zhes bya ba'i ting nge 'dzin gang zhe na/ ting nge 'dzin de la gnas shing / nyon mongs pa dang bcas pa thams cad nyon mongs pa med par yang dag par gzhol ba 'thob par 'gyur ba ste zhes bya ba ni ting nge 'dzin de la mnyam par bzhag na nyon mongs pa dang bcas pa'i chos thams cad yongs su dag cing nyon mongs pa med par 'gyur bar nus pa la/ nyon mongs pa dang bcas pa thams cad nyon mongs pa med par yang dag par gzhol ba zhes bya'o/ /de la gnas dmigs su med pa la brtson pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi kun gzhi nye bar mi dmigs pa ste zhes bya ba ni ting nge 'dzin de la mnyam par bzhag na/ ting nge 'dzin thams cad kyi gzhi kun gzhi rnam par shes pa gnas gyur pa'i ye shes gzung ba dang 'dzin pa spangs shing yongs su dag pa la yang mi dmigs par 'gyur ba la/ gnas dmigs su med pa la brtson pa zhes bya'o/ /de la de bzhin nyid la gnas shing sems med pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi de bzhin nyid las phyir mi ldog pa ste zhes bya ba ni ting nge 'dzin de la mnyam par bzhag na/ ting nge 'dzin thams cad kyi don chos kyi dbyings rnam par dag pa de bzhin nyid kyi rang bzhin la rnam par mi rtog pa'i rang bzhin du sems rtse gcig tu gyur pa las nyams par mi 'gyur ba la/ de bzhin nyid la gnas shing sems med pa zhes bya'o/ /de la lus kyi skyon yang dag par sel ba zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi lus mi dmigs pa ste zhes bya ba ni ting nge 'dzin de la mnyam par bzhag pa'i mthus sems can gyi don du lus rnam pa sna tshogs su sprul pa 'byung ba rnams la mtshan mar mi 'dzin cing / rnam par mi rtog pa la lus kyi skyon yang dag par sel ba zhes bya ste/ lus kyi skyon zhes bya ba ni skabs 'dir lus sna tshogs su sprul pa la/ mtshan mar 'dzin cing dngos por rtog pa la bya'o/ /de la ngag gi skyon rnams 'jig pas nam mkha' ltar gyur pa zhes bya ba'i ting nge 'dzin gang zhe na/ ting nge 'dzin de la gnas shing / ting nge 'dzin thams cad kyi ngag gi las mi dmigs pa ste zhes bya ba ni ting nge 'dzin de la mnyam par bzhag pa'i mthus sems can gyi don du sgra skad rnam pa sna tshogs kyis chos ston pa rnams la mtshan mar mi 'dzin cing / dngos por mi rtog pa la ngag gi skyon rnam par 'jig pas nam mkha' ltar gyur pa zhes bya'o/ /de la nam mkha' ltar chags pa med pas rnam par grol zhing gos pa med pa zhes bya ba'i ting nge 'dzin gang zhe na/ ting nge 'dzin de la gnas shing / chos thams cad nam mkha' ltar chags pa med pas rnam par grol zhing gos pa med pa 'thob pa ste zhes bya ba ni ting nge 'dzin de la mnyam par bzhag na chos thams cad sgyu ma lta bur rtogs te/ de la ma chags pas nyon mongs pa dang shes bya ba'i sgrib pa las grol zhing nam mkha' ltar cis kyang gos pa med par 'gyur ba la/ nam mkha' ltar chags pa med pas rnam par grol zhing gos pa med pa zhes bya'o/ /rab 'byor 'di ni byang chub sems dpa' sems dpa' chen po shes rab kyi pha rol tu phyin pa la spyod pa'i theg pa chen po'o zhes bya ba ni ting nge 'dzin gyi theg pa chen po mjug bsdus nas bstan pa ste/ gong du smos pa'i ting nge 'dzin de rnams la mnyam par bzhag na/ bla na med pa yang dag par rdzogs pa'i byang chub chen po 'thob pa'i lam mam/ rgyur 'gyur ba'i phyir ting nge 'dzin de rnams la theg pa chen po zhes bya'o/ /shes rab kyi pha rol tu phyin pa 'bum pa rgya cher bshad pa las le'u dgu pa'o/ / //de ltar ting nge 'dzin gyi theg pa chen po bstan nas/ de'i 'og tu dran nye bar gzhag pa bzhi theg pa chen po yin par bstan pa'i phyir/ rab 'byor gzhan yang byang chub sems dpa' sems dpa' chen po'i theg pa chen po ni 'di lta ste/ dran pa nye bar gzhag pa bzhi ste zhes bya ba la sogs pa gsungs te/ de la lus dran pa nye bar gzhag pa gang zhe na zhes bya ba nas/ 'jig rten gyi chags sems dang / yid mi bde ba rnam par bsal zhing / rnam par spyod kyang lus dang ldan pa'i rnam par rtog pa rnam par mi rtog go zhes bya ba'i bar du ni lus dran pa nye bar gzhag pa bstan pa ste/ de la nang gi lus zhes bya ba ni bdag gi lus sems dang sems las byung ba rnams dang ldan pa la bya'o/ /phyi'i lus zhes bya ba ni mi tshe 'phos pa'i lus la sogs pa sems dang sems las byung ba rnams dang mi ldan pa la bya'o/ /phyi nang gi lus zhes bya ba ni sems can gzhan gyi lus la bya ste/ bdag gi lus la ma gtogs pas phyi'i lus zhes bya'o/ /sems dang sems las byung ba rnams dang ldan pa'i phyir nang gi lus zhes bya ste/ de ltar phyi dang nang gnyi ga dang ldan pa'i phyir phyi nang gi lus zhes bya'o/ /de mi dmigs pa'i tshul gyis zhes bya ba ni nang dang phyi dang phyi nang gi lus gsum char yang don dam par dngos po yod par ma grub pas de la dngos por mi lta ba la bya'o/ /lus kyi rjes su lta zhing zhes bya ba ni kun rdzob tu ji ltar snang ba'i lus la brten nas/ bdag dang bdag gi med par rtogs pa la bya'o/ /brtson 'grus can zhes bya ba ni de ltar don dam par mi dmigs pa dang / kun rdzob tu lus kyi rjes su lta ba la rtag tu rgyun mi 'chad pa dang / nan tan cher bya ste brtson pa la bya'o/ /shes bzhin dang ldan pa zhes bya ba ni shes rab dang bag byed pa dang ldan par yid la byed pa'o/ /dran pa dang ldan pa zhes bya ba mi dmigs pa'i yul la dran pa mi rmongs pa dang / mi mthun pa'i phyogs kyis mi tshugs par srung bar dran pa dang mi yengs par byed pa'i dran pa dang ldan pa la bya'o/ /'jig rten gyi chags sems dang / yid mi bde ba rnam par bsal zhing zhes bya ba ni brtson 'grus dang / shes bzhin dang dran pa dang ldan pa'i yon tan bstan pa ste/ 'jig rten gyi chos brgyad spangs pa la chags sems dang / yid mi bde ba bsal ba zhes bya'o/ /de la rnyed pa dang grags pa dang / bde ba dang / bstod pa rnams la mi chags pa 'byung ngo / /ma rnyed pa dang / ma grags pa dang / sdug bsngal ba dang / smad pa rnams la ni yid mi bde ba 'byung ste/ 'jig rten gyi chos de rnams spangs pa la 'jig rten gyi chags sems dang / yid mi bde ba rnams par bsal zhes bya'o/ /lus dang ldan pa'i rnam par rtog pa rnams la rnam par mi rtog go zhes bya ba ni kun rdzob tu de ltar lus kyi rjes su lta yang don dam par de ltar mi dmigs so zhes bya ba'i don to/ /rjes su lta ba dang / brtson 'grus dang / shes bzhin dang ldan pa dang / 'jig rten gyi chags sems dang / yid mi bde ba rnam par bsal ba la sogs pa bshad pa'i don ni 'og ma thams cad la yang de bzhin du sbyar bar bya'o/ /nang gi tshor ba la de mi dmigs pa'i tshul gyis zhes bya ba nas/ tshor ba dang ldan pa'i rnam par rtog pa rnams la rnam par mi rtog go zhes bya ba'i bar du ni tshor ba dran pa nye bar gzhag pa bstan pa ste/ de la nang gi tshor ba zhes bya ba ni bdag gi lus la dmigs pa las byung ba'i tshor ba bde ba dang sdug bsngal dang btang snyoms pa'o/ /phyi'i tshor ba ni phyi rol gyi dngos po sems dang sems las byung ba dang mi ldan pa rnams la dmigs pa las byung ba'i tshor ba rnam pa gsum mo/ /phyi nang gi tshor ba ni sems can gzhan gyi lus la dmigs pa las byung ba'i tshor ba rnam pa gsum mo/ /nang gi sems la de mi dmigs pa'i tshul gyis sems kyi rjes su lta zhing zhes bya ba nas/ sems dang ldan pa'i rnam par rtog pa rnams la rnam par mi rtog go zhes bya ba'i bar du sems dran pa nye bar gzhag pa bstan pa ste/ phyi dang nang dang / phyi nang gi tshor ba'i skabs su bshad pa bzhin no/ /sems zhes bya ba ni 'dod chags dang bcas pa'i sems dang / 'dod chags med pa dang / zhe sdang dang bcas pa dang / zhe sdang med pa dang / gti mug dang bcas pa dang / gti mug med pa la sogs pa la rjes su lta ba'o/ /nang gi chos la mi dmigs pa'i tshul gyis chos kyi rjes su lta zhing zhes bya ba nas/ chos dang ldan pa'i rnam par rtog pa rnams la rnam par mi rtog go zhes bya ba'i bar du ni chos dran pa nye bar gzhag pa bstan pa ste/ nang dang phyi dang phyi nang dang ni gong du bshad pa bzhin no/ /chos zhes bya ba ni phung po dang / khams dang / skye mched la sogs pa 'jig rten pa'i chos dang byang chub kyi phyogs la sogs pa 'jig rten las 'das pa'i chos rnams la bya'o/ /de ltar byang chub sems dpa'i theg pa'i tshul gyis dran pa nye bar gzhag pa bzhi bstan nas/ de'i 'og tu nyan thos kyi theg pa las byung ba'i tshul gyis lus dran pa nye bar gzhag pa bstan pa'i phyir/ /rab 'byor ji ltar na byang chub sems dpa' sems dpa' chen po nang gi lus la lus kyi rjes su lta zhing rnam par spyod pa yin zhe na zhes bya ba la sogs pa gsungs so/ /rab 'byor 'di la byang chub sems dpa' sems dpa' chen po 'gro na 'gro zhes bya ba rab tu shes so zhes bya ba nas/ rab 'byor de ltar na byang chub sems dpa' sems dpa' chen po shes rab kyi pha rol tu phyin pa la spyod pa'i tshe nang gi lus la de mi dmigs pa'i tshul gyis lus kyi rjes su lta zhing / brtson 'grus can shes bzhin dang ldan pa dran pa dang ldan pas 'jig rten gyi chags sems dang / yid mi bde ba bsal zhing rnam par spyod do zhes bya ba'i bar du ni spyod lam bzhi'i sgo nas lus dran pa nye bar gzhag pa bstan pa'o/ /de la spyod lam la yang rnam pa gnyis te/ spyod lam chen po dang / spyod lam phra mo'o/ /de la spyod lam chen po ni lam ring por 'gro ba na/ 'gro ba dang / 'greng ba dang / 'dug pa dang / nyal ba'i tshe lus kyi spyod lam gang la spyod pa de lam yengs par dran pa nye bar 'jog pa ste/ de yang rab 'byor 'di la byang chub sems dpa' sems dpa' chen po 'gro na 'gro zhes bya bar rab tu shes so zhes bya ba nas/ 'jig rten gyi chags sems dang / yid mi bde ba rnam par bsal zhing rnam par spyod do zhes bya ba'i bar gyis bstan to/ /rab 'byor gzhan yang byang chub sems dpa' sems dpa' chen po nang gi lus la de mi dmigs pa'i tshul gyis lus kyi rjes su lta zhing rnam par spyod de/ 'gro'am 'ong yang shes bzhin du spyod pa yin zhes bya ba nas/ nang du yang dag par 'jog pa la yang shes bzhin du spyod pa yin te zhes bya ba'i bar du ni spyod lam phra mo bstan pa ste/ grong nas grong du 'gro ba dang / gnas gcig na 'dug pa'i tshe nye 'khor du 'gro zhing 'dug pa la sogs pa'i spyod lam la bag yod cing dran pa nye bar 'jog pa la spyod lam phra mo zhes bya ba ste/ 'gro'am 'ong ngam zhes bya ba gong ma ni grong nas grong du 'gro ba dang 'ong ba la bya'o/ /'gro ba dang 'ong ba dang zhes bya ba 'og ma ni nye 'khor na spyod pa'i tshe 'gro ba dang 'ong ba la bya'o/ /nang du yang dag par 'jog pa zhes bya ba ni zhi gnas dang lhag mthong zung du 'brel pa'i bsam gtan la mnyam par 'jog cing dben pa na gnas pa la bya'o/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ dran zhing dbugs nang du rgyu na yang dran zhing dbugs nang du rgyu'o zhes bya bar rab tu shes so zhes bya ba nas/ rab 'byor de ltar na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ nang gi lus la de mi dmigs pa'i tshul gyis lus kyi rjes su lta zhing / brtson 'grus can shes bzhin dang ldan pa/ dran pa dang ldan pas 'jig rten gyi chags sems dang / yid mi bde ba rnam par bsal zhing rnam par spyod do zhes bya ba'i bar du ni nang gi lus la dbugs phyi nang du rgyu ba'i tshe dran pa nye bar gzhag pa bstan pa ste/ bsam gtan pa sems mi yengs shing bsam gtan la sems las su rung bar sbyang ba'i phyir dbugs phyi nang du ring thung du rgyu ba'i tshe/ dran pa dang shes bzhin gnyis kyis dran zhing tshor bar bya ste/ gzugs la sogs pa phyi nang gi dngos po gzhan la sems ma yengs shing mi rtog par dbugs phyi nang du rgyu ba la brtag cing sems sbyangs nas/ de ltar sbyangs te sems las su rung na lus kyang las su rung ste/ dbugs phyi nang du rgyu ba yang je bde je chung je phrar 'gyur ro/ /de ltar dbugs je bde je chung je phrar gyur na sems kyi g.yeng ba dang / rtog pa yang je bde je nyung je phrar 'gyur te/ gang la dmigs pa de la sems rtse gcig tu 'du bar 'gyur ro/ / de'i phyir dbugs phyi nang du rgyu ba la dran pa nye bar gzhag pa bstan to/ /rab 'byor 'di lta ste dper na 'khor ba'i 'khor lo bskor ba'am/ 'khor ba'i 'khor lo bskor ba'i mchan bu mkhas pa zhes bya ba'i rdza mkhan rdza byed pa'i 'khor lo bskor ba na/ rdza che chung gi bye brag las 'khor lo yun ring thung du bskor ba'i nyams drod rdza mkhan la yod pa'i dpes bsam gtan pa sems sbyong ba'i tshe/ dbugs phyi nang du rgyu ba yun ring thung ji srid du rgyu ba'i nyams drod yod par bya ba bstan pa'o/ /rdza mkhan gyi mkhan po dang / mchan bu'i dpes smos pa ni bsam gtan pa'i mkhan po dang / slob ma bsam gtan goms pa dang ma goms pa'i khyad par bstan pa'o/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ lus 'di la sa'i khams kyang yod do zhes bya ba nas/ rab 'byor de ltar na byang chub sems dpa' sems dpa' chen po shes rab kyi pha rol tu phyin pa la spyod cing 'greng ngam 'dug ste/ de mi dmigs pa'i tshul gyis lus kyi rjes su lta zhing brtson 'grus can shes bzhin dang ldan pa/ dran pa dang ldan pas 'jig rten gyi chags sems dang / yid mi bde ba rnam par bsal zhing rnam par spyod do zhes bya ba'i bar du ni sa'i khams la sogs pa khams bzhi la brtag pa'i sgo nas nang gi lus dran pa nye bar gzhag pa bstan pa ste/ lus 'di 'byung ba chen po bzhi'i rang bzhin yin la/ 'byung ba chen po bzhi yang mi rtag pa'i rang bzhin yin pas don dam par dngos po yod pa ma yin par rtogs na de la chags par mi 'gyur bar bya ba'i phyir khams kyi sgo nas brtag pa bstan to/ /ba lang gi shan pa'i dpe bstan pa ni shan pas phyugs bshas pa'i sha rnams mngon sum du mthong zhing bye brag phyed pa bzhin du bsam gtan pas kyang bdag gi lus 'byung ba chen po bzhi'i rang bzhin yin par mngon sum du rtogs par bya ba bstan pa'o/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ lus 'di la rkang pa'i mthil yan chad ces bya ba nas/ rab 'byor de ltar na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ nang gi lus la de mi dmigs pa'i tshul gyis lus kyi rjes su lta zhing / brtson 'grus can shes bzhin dang ldan pa/ dran pa dang ldan pas 'jig rten gyi chags sems dang / yid mi bde ba bsal zhing rnam par spyod do zhes bya ba'i bar du ni nang gi lus la mi gtsang ba sna tshogs yod par brtag pa'i sgo nas lus dran pa nye bar gzhag pa bstan pa ste/ de ltar lus la mi gtsang ba sna tshogs kyis gang bar brtags na lus la ma chags par 'gyur ba bstan pa'o/ /chun pa'i snod 'bru sna tshogs kyis gang ba'i dpe bstan pa ni zhing pa 'bru'i rgyus la mkhas pa/ 'bru sna tshogs la mngon du lta zhing / 'bru'i bye brag phyed pa de bzhin du/ bsam gtan pa lus mi gtsang bar bsgom pa yang lus mi gtsang ba sna tshogs kyis gang ba mngon sum du gyur par byed pa bstan pa'o/ /rab 'byor gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ nam dur khrod na yod pa'i gzugs sna tshogs dur khrod du bor ba ro'i mal du bsnyal ba zhes bya ba la sogs pa ni phyi'i lus la dmigs pa'i sgo nas lus dran pa nye bar gzhag pa bsgom pa bstan pa ste/ phyi'i lus dur khrod na 'dug pa gsar rnying mi sdug pa gsar rnying sna tshogs dang ldan pa mthong nas bdag gi lus kyang de lta bu'i rang bzhin can yin par brtags nas lus la ma chags par bya ba la bstan pa'o/ /rab 'byor de ltar na byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ nang gi lus la de mi dmigs pa'i tshul gyis lus kyi rjes su lta zhing zhes bya ba la sogs pa ni theg pa chung ngu'i gzhung las 'byung ba'i tshul gyis lus dran pa nye bar gzhag pa bsgom pa mjug bsdus nas bstan pa ste/ nang dang phyi dang phyi nang gi lus ni sngar bshad pa bzhin no/ /nang gi tshor ba la de mi dmigs pa'i tshul gyis tshor ba'i rjes su lta zhing zhes bya ba la sogs pa ni theg pa chung ngu'i gzhung las 'byung ba'i tshul gyis tshor ba dang sems dang chos rnams la dran pa nye bar gzhag pa bsgoms pa bstan pa ste/ de dag gi don kyang snga ma bzhin no/ /rab 'byor 'di yang byang chub sems dpa' sems dpa' chen po'i theg pa chen po'o zhes bya ba'i theg pa chung ngu'i gzhung las 'byung ba'i tshul gyis dran pa nye bar gzhag pa bzhi bsgom pa 'di yang byang chub s ems dpa' shes rab kyi pha rol tu phyin pa la spyod pas gang zag dang chos gnyi ga la bdag med par rtogs par byas nas de mi dmigs pa'i tshul gyis bsgoms na bla na med pa'i byang chub theg pa chen po 'thob pa'i rgyur 'gyur ba'i phyir theg pa chen po zhes bya'o zhes bstan pa'o/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar yang dag par spong ba bzhi ste zhes bya ba la sogs pa ni yang dag par spong ba bzhi theg pa chen po yin par bstan pa ste/ brtson 'grus kyis sdig pa mi dge ba'i chos ma skyes pa rnams mi bskyed pa dang / skyes pa rnams spangs pa dang / dge ba'i chos ma skyes pa rnams bskyed pa dang / skyes pa rnams gnas pa dang / phyir zhing 'phel ba dang / yongs su rdzogs par bya ba'i phyir 'bad pa la yang dag par spong ba zhes bya'o/ /de la brtson 'grus la yang rnam pa bzhi ste/ go cha'i brtson 'grus dang / sbyor ba'i brtson 'grus dang mi skyo ba'i brtson 'grus dang / thabs kyi brtson 'grus so/ /de la mos pa bskyed cing zhes bya ba ni dang po 'di ltar bya'o zhes sems mos shing 'dun pa bskyed pa ste/ go cha'i brtson 'grus so/ /rtsol lo zhes bya ba ni de ltar go cha bgos pa'i brtson 'grus dang mthun par sdig pa'i chos spang ba dang / dge ba'i chos skyed pa la sbyor bas sbyor ba'i brtson 'grus zhes bya'o/ /brtson 'grus rtsom mo zhes bya ba ni mi skyo ba'i brtson 'grus te/ bya dka' zhing tshegs che ba byung du zin kyang sems mi skyo ba'i brtson 'grus rtsom pas na mi skyo ba'i brtson 'grus zhes bya'o/ /sems kyi mthu skyed do/ /yang dag par smon lam 'debs te zhes bya ba ni thabs kyi brtson 'grus te/ bsam gtan dang ting nge 'dzin sgom pa'i tshe sems bying bar gyur na thabs kyis sems kyi mthu skyed cing gsal bar byed pa dang / sems rgod par gyur na thabs kyis sems rtse gcig tu 'jog pa la thabs kyi brtson 'grus zhes bya'o/ /yang dag par smon lam 'debs zhes bya ba ni skabs 'dir sems legs par 'jog cing mi g.yengs par 'dzin pa la bya'o/ /theg pa chen po'i don ni sngar bshad pa bzhin no/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar rdzu 'phrul gyi rkang pa bzhi ste zhes bya ba la sogs pa ni rdzu 'phrul gyi rkang pa bzhi theg pa chen po yin par bstan pa ste/ rdzu 'phrul gyi rkang pa zhes bya ba ni 'jig rten las 'das pa'i rdzu 'phrul rnams thob par byed pa'i rgyu'am/ gzhi'am rten yin pa'i phyir ting nge 'dzin rnam pa bzhi la rdzu 'phrul gyi rkang pa zhes bya ste/ ting nge 'dzin rnam pa bzhi ni mos pa dang sems dang / brtson 'grus dang / dpyod pa'i ting nge 'dzin to/ /de la mos pa'i ting nge 'dzin ni dge ba'i chos sgom pa la mos pa cher skyes nas mos pa'i dbang gis sems mnyam par gzhag cing rtse gcig tu gyur pa la mos pa'i ting nge 'dzin zhes bya'o/ /spong ba'i 'du shes dang ldan pa zhes bya ba ni de ltar ting nge 'dzin bsgoms pa'i mthus spong ba'i 'du byed brgyad dang ldan par 'gyur te/ brgyad gang zhe na/ 'dun pa dang / brtson 'grus dang / dad pa dang / shin tu sbyangs pa dang / dran pa dang / shes bzhin dang / sems pa dang / btang snyoms dang brgyad de/ chos 'di brgyad kyis nyon mongs pa spong bar byed pa'i phyir spong ba'i 'du byed ces bya'o/ /de la 'dun pa ni 'jig rten dang 'jig rten las 'das pa'i bsam gtan dang / ting nge 'dzin rnams la snyoms par 'jug 'dod pa'o/ /brtson 'grus ni mi dge ba'i chos thams cad nges par sel bar rtsol zhing 'bad pa'o/ /dad pa ni rgyun du zhugs pa'i 'bras bu la sogs pa 'bras bu bzhi dang / sa bcu la sogs pa sangs rgyas dang byang chub sems dpa'i yon tan rnams thob par 'dod pa'o/ /shin tu sbyangs pa'i bsam gtan dang ting nge 'dzin la snyoms par zhugs pa'i tshe/ lus dang sems las su rung ba'o/ /dran pa ni bsam gtan dang ting nge 'dzin la sems ma rmongs pa'o/ /shes bzhin ni shes rab kyi dbang gis mi mthun pa'i phyogs kyi chos rnams mi 'byung bar bag byed pa'o/ /sems pa ni sems yongs su sbyong ba'i mtshan nyid sems mngon par 'du byed pa'o/ /btang snyoms ni sems bying ba dang / rgod pa med cing mnyam pa nyid du lhun gyis grub pa ste/ chos de brgyad dang ldan na nyon mongs pa la sogs pa ni mi mthun pa'i phyogs kyi chos rnams spong bar byed pa'i phyir spong ba'i 'du byed dang ldan pa zhes bya'o/ /dben pa la gnas pa zhes bya ba ni mos pa'i ting nge 'dzin de phyi dang nang gi 'du 'dzi dang bral bar gnas pa la bya'o/ /'dod chags dang bral ba la gnas pa zhes bya ba ni khams gsum gyi nyon mongs pa rnams dang bral ba la gnas pa'o/ /'gog pa la gnas pa zhes bya ba ni sdug bsngal rnams 'gog par gyur pa'o/ /rnam par spong bas yongs su grub pa zhes bya ba ni nye bar len pa'i phung po lnga rnams yongs su spangs par gyur pa'o/ /brtson 'grus kyi ting nge 'dzin zhes bya ba ni mi dge ba'i chos spong ba la brtson pa dang / dge ba'i chos spel ba la brtson pa'i brtson 'grus lhur blangs pa'i dbang gis sems mnyam par gzhag cing rtse gcig tu gyur pa'o/ /sems kyi ting nge 'dzin zhes bya ba ni zhi gnas dang lhag mthong zung du 'brel par sems sbyong ba lhur blangs nas mnyam par 'jog cing sems rtse gcig tu gyur to/ /dpyod pa'i ting 'dzin zhes bya ba ni shes rab kyi gnyen po dang mi mthun pa'i phyogs kyi chos rnams rnam par dpyad pa lhur blangs nas mnyam par gzhag cing sems rtse gcig tu gyur pa la bya ste/ spong ba'i 'du byed dang ldan pa dang / dben pa la gnas pa la sogs pa ni gong du bshad pa bzhin no/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar dbang po lnga ste zhes bya ba la sogs pa ni/ dbang po lnga theg pa chen po yin par bstan pa ste/ dad pa dang / brtson 'grus dang / dran pa dang / ting 'dzin dang / shes rab dang chos 'di lnga dang ldan pa'i dbang gis 'jig rten las 'das pa'i chos rgyun du zhugs pa la sogs pa'i 'bras bu bzhi dang / sa dang po la sogs pa 'thob pa'i rgyur 'gyur ba'i phyir dbang po zhes bya'o/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar stobs lnga ste zhes bya ba la sogs pa ni stobs lnga theg pa chen po yin par bstan pa ste/ dad pa la sogs pa'i dbang po lnga po de dag nyid yang dang yang du bsgoms pa'i mthus brtan zhing mthu dang ldan par gyur pa na nyon mongs pa la sogs pa mi mthun pa'i phyogs kyi chos rnams kyis mi tshugs shing zil gyis mi non pa'i phyir stobs rnams zhes bya'o/ /dbang po lnga dang stobs lnga po de dag bsgoms na nges par 'byed pa'i cha dang mthun pa'i dge ba'i rtsa ba bzhi dang ldan par 'gyur te/ bzhi gang zhe na dro bar gyur pa dang / rtse mo dang / bzod pa dang / 'jig rten pa'i chos kyi mchog go/ /de la dro bar gyur pa dang / rtse mor gyur pa'i tshe na dad pa la sogs pa la dbang po lnga zhes bya'o/ /bzod pa dang 'jig rten pa'i chos kyi mchog dang ldan pa'i tshe ni stobs lnga zhes bya'o/ /de la nges par 'byed pa zhes bya ba ni byang chub sems dpa'i sa dang po la chos kyi dbyings de kho na nyid nges par rtogs shing bye brag phyed pas na nges par 'byed pa zhes bya'o/ /dbang po lnga dang stobs lnga bsgoms te/ dro bar gyur pa dang / rtse mo dang / bzod pa dang / 'jig rten pa'i chos kyi mchog rnams dang ldan par gyur na nges par 'byed pa zhes bya ba sa dang po'i cha dang mthun zhing / sa dang po 'thob pa'i rgyur 'gyur ba'i phyir/ nges par 'byed pa'i cha dang mthun pa'i dge ba'i rtsa ba zhes bya'o/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar byang chub kyi yan lag bdun te zhes bya ba la sogs pa ni byang chub kyi yan lag bdun theg pa chen po yin par bstan pa ste/ de la byang chub ces bya ba ni sa dang po la byang chub kyi rang bzhin chos kyi dbyings de bzhin nyid rtogs pa la bya'o/ /dran pa la sogs pa chos bdun po 'di dag byang chub kyi rang bzhin de rtogs par bya ba'i grogs su gyur pa'am/ rgyu'am yan lag tu gyur pa'i phyir byang chub kyi yan lag ces bya ste/ de yang dran pa dang / chos rnam par 'byed pa dang / brtson 'grus dang / dga' ba dang / shin tu sbyangs pa dang / ting nge 'dzin dang / btang snyoms yang dag byang chub kyi yan lag rnams so/ /de la dran pa ni dmigs pa'i dngos po ma brjed cing sems gsal ba'o/ /brtson 'grus ni chos kyi dbyings nyid rtogs par bya ba la sems spro zhing sgrim pa dang / lhod par ma gyur pa'o/ /dga' ba ni chos kyi dbyings rnam par dag pa sngon ma mthong zhing nyams su ma myong ba/ sa dang po thob pa'i tshe mthong zhing chos kyi dga' ba nyams su myong ba la bya'o/ /shin tu sbyangs pa ni de ltar chos kyi dbyings rtogs shing / chos kyi dga' ba'i nyams su myong ba'i tshe lus dang sems shin tu sbyangs shing bsam gtan la las su rung ba'o/ /ting nge 'dzin ni chos kyi dbyings su sems rtse gcig tu gnas pa'o/ /btang snyoms ni mi mthun pa'i phyogs kyis zil gyis mi non par chos kyi dbyings rtogs pa la sems lhun gyis grub pa ste/ chos bdun po de dag chos kyi dbyings byang chub kyi rang bzhin de rtogs par bya ba'i yan lag yang dag pa yin pa'i phyir yang dag byang chub kyi yan lag ces bya'o/ /dben pa la gnas pa dang / 'dod chags dang bral ba la gnas pa dang / 'gog pa la gnas pa dang / rnam par spong bas yongs su grub pa ni/ rdzu 'phrul gyi rkang pa'i skabs su bshad pa bzhin no/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar 'phags pa'i lam yan lag brgyad pa ste zhes bya ba la sogs pa ni 'phags pa'i lam yan lag brgyad pa theg pa chen po yin par bstan pa ste/ 'phags pa nyan thos rgyun du zhugs pa yan chad dang / byang chub sems dpa' sa dang po thob pa yan chad 'phags pa rnams bsgom pa'i lam gyis spang bar bya ba'i nyon mongs pa phra mo rnams spang bar bya ba dang / rnam par grol ba'i sa thob par bya ba'i phyir yang dag pa'i lta ba la sogs pa 'di brgyad bsgom ste/ 'di rnams bsgoms pas nyon mongs pa phra mo rnams spangs shing rnam par grol ba'i 'bras bu 'thob pa'i rgyu'am/ lam yin pa'i phyir 'phags pa'i lam yan lag brgyad pa zhes bya'o/ /de la yang dag pa'i lta ba ni 'jig rten pa'i log par lta ba spangs nas/ shes rab kyi mig gis chos kyi dbyings phyin ci ma log par mthong ba'o/ /yang dag pa'i rtog pa ni chos kyi dbyings nyid la phyin ci ma log par rtogs shing gtan la 'bebs pa'o/ /yang dag pa'i ngag ni chos kyi dbyings rtogs pa'i rgyus brdzun du smra ba la sogs pa log pa'i tshig rnams mi 'byung zhing chos nyid dang mi 'gal ba'i tshig gis gzhan la chos ston pa'o/ /yang dag pa'i las kyi mtha' ni tshul khrims la skyon med pas mi bya ba'i las rnams mi byed pa'o/ /yang dag pa'i 'tsho ba ni 'dod pa chung zhing chog shes pa tsam sgyu la sogs pa log pas 'tsho ba med pa'o/ /yang dag pa'i rtsol ba'i bsgom pa'i lam gyis spang bar bya ba'i nyon mongs pa rnams spang bar bya ba dang de'i gnyen po sgom pa la brtson pa'o/ /yang dag pa'i dran pa ni bsgom pa'i lam gyis spang bar bya ba'i nye ba'i nyon mongs pa bying ba dang / rgod pa gnyis kyi dbang du mi 'gyur bar dran pa nye bar 'jog pa'o/ /yang dag pa'i ting nge 'dzin ni chos kyi dbyings nyid la rnam par mi rtog pa'i sems rtse gcig tu 'jog pa de'i dbang gis mngon par shes pa la sogs pa'i yon tan rnams 'thob par byed pa'o/ /dben pa la gnas pa dang / 'dod chags dang bral ba la gnas pa dang / 'gog pa la gnas pa dang / rnam par spang bas yongs su grub pa rnams ni snga ma bzhin no/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar ting nge 'dzin gsum ste zhes bya ba la sogs pa ni rnam par thar pa'i sgo gsum theg pa chen po yin par bstan pa ste/ rnam par thar pa'i sgo gsum la ting nge 'dzin gsum zhes kyang bya ste/ stong pa nyid dang / mtshan ma med pa dang / smon pa med pa'i ting nge 'dzin gsum bsgoms na nyon mongs pa'i sgrib pa dang / shes bya'i sgrib pa las grol zhing thar pa'i mtshan nyid mya ngan las 'das par 'jug pa'i sgor 'gyur ba'i phyir rnam par thar pa'i sgo zhes bya'o/ /de la stong pa nyid kyi ting nge 'dzin gang zhe na/ chos thams cad rang gi mtshan nyid stong pa nyid du rtogs pa'i tshe sems gnas pa de ni stong pa nyid rnam par thar pa'i sgo ste zhes bya ba ni byis pa so so skye bo'i spyod yul du gyur pa kun brtags pa'i mtshan nyid dang bral ba/ yongs su grub pa'i mtshan nyid brjod du med cing stong pa'i rang bzhin du rtogs shing sgom pa'i tshe/ sems rtse gcig tu gyur pa la stong pa nyid kyi ting nge 'dzin zhes bya'o/ /de la mtshan ma med pa'i ting nge 'dzin gang zhe na/ chos thams cad mtshan ma med par rtogs pa'i tshe sems gnas pa de ni mtshan ma med pa rnam par thar pa'i sgo ste zhes bya ba ni de ltar stong pa nyid kyi ting nge 'dzin la sogs pas kun brtags pa'i chos rnams la mtshan mar mi 'dzin cing / rnam par mi rtog par gyur pa la mtshan ma med pa'i ting nge 'dzin zhes bya'o/ /de la smon pa med pa'i ting nge 'dzin gang zhe na/ chos thams cad mngon par 'du bya ba med do zhes mngon par 'du mi byed pa'i tshe/ sems gnas pa de ni smon pa med pa rnam par thar pa'i sgo ste zhes bya ba ni de ltar chos thams cad rang gi mtshan nyid stong pa dang / mtshan ma med par rtogs pas ci la yang ma chags shing mi smon te/ tshe phyi ma la khams gsum du skye zhing khams gsum gyi bde ba thob par bya ba'i phyir khams gsum du skye ba'i rgyur 'gyur ba'i las nyon mongs pa dang bcas pa rnams mngon par 'du mi byed cing sems rtse gcig tu gnas par sgom pa la smon pa med pa'i ting nge 'dzin zhes bya'o/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar ye shes bcu gcig ste zhes bya ba la sogs pa ni ye shes bcu gcig theg pa chen po yin par bstan pa ste/ de la sdug bsngal shes pa gang zhe na/ sdug bsngal mi skye bar shes pa'o zhes bya ba ni nye bar len pa'i phung po lnga sdug bsngal ba'i rang bzhin can don dam par skye ba med par shes pa'o/ /de la kun 'byung ba shes pa gang zhe na kun 'byung ba spang bar shes pa'o zhes bya ba ni sdug bsngal gyi phung po kun 'byung ba'i rgyu las dang nyon mongs pa rnams rang bzhin med par rtogs pas phyis mi 'byung bar shes pa nyid la kun 'byung ba spang bar shes pa zhes bya'o/ /de la 'gog pa shes pa gang zhe na/ sdug bsngal 'gog par shes pa'o zhes bya ba ni mya ngan las 'das pa thob par 'gyur ba'i tshe 'khor ba'i sdug bsngal thams cad rgyun chad par gyur pa shes pa'o/ /de la lam shes pa gang zhe na/ 'phags pa'i lam yan lag brgyad pa shes pa'o zhes bya ba ni 'gog pa mthong ba'i rgyur gyur pa 'phags pa'i lam yan lag brgyad pa don dam par dngos po med par shes pa'o/ /kun rdzob tu mya ngan las 'das pa 'thob pa'i rgyu dang lam yin par shes pa'o/ /de la zad pa shes pa gang zhe na/ 'dod chags dang / zhe sdang dang / gti mug zad par shes pa'o zhes bya ba ni nyan thos dgra bcom pa'i sa dang byang chub sems dpa' sa brgyad 'thob pa yan chad kyis 'dod chags la sogs pa'i nyon mongs pa rnams zad par shes pa'o/ /de la mi skye ba shes pa gang zhe na/ srid pa'i rgyud skye ba med par shes pa'o zhes bya ba ni 'phags pa dgra bcom pa dang / byang chub sems dpa' sa brgyad pa yan chad la gnas pa de dag nyid de ltar nyon mongs pa zad par gyur pas phyis nyon mongs pa'i dbang gis srid pa phyi ma mi len par shes pa'o/ /de la chos shes pa gang zhe na/ phung po lnga sgyu mar yongs su rtogs shing shes pa'o zhes bya ba ni rnam par grol ba mngon sum du byed pa'i tshe phung po lnga la sogs pa'i chos rnams yang dag par yod pa ma yin pa las snang ba ni sgyu ma la sogs pa bzhin no zhes mngon sum du rtogs shing shes pa'o/ /de la rjes su rtogs pa'i shes pa gang zhe na zhes bya ba nas rga shi mi rtag ces bya bar shes pa'o zhes bya ba'i bar du ni rjes su rtogs pa shes pa bstan pa ste/ rjes su dpag pa'i shes pas mig la sogs pa'i skye mched bcu gnyis dang khams bco brgyad dang / sa'i khams la sogs pa khams drug dang / ma rig pa la sogs pa rten cing 'brel bar 'byung ba bcu gnyis rnams mi rtog par shes pa la rjes su rtogs pa shes pa zhes bya'o/ /de la kun rdzob tu shes pa gang zhe na/ sems can gzhan dang gang zag gzhan gyi sems sems kyis shes pa'o zhes bya ba ni shes pa gzhan yang kun rdzob tu shes pa yin mod kyi/ don dam par dmigs su med par yang shes par 'gyur bas/ so so'i dmigs pa'i yul gang yin pa las sdug bsngal shes pa zhes bya ba la sogs pa ming gzhan du btags so/ /gzhan gyi sems shes pa ni sems can pha rol po ci sems pa la dmigs nas 'dod chags dang ldan pa'am/ mi ldan pa la sogs pa shes pa ste/ gcig kho nar kun brtags pa'i rang bzhin la dmigs pa'i phyir kun rdzob shes pa zhes bya'o/ /de la 'dris pa shes pa gang zhe na/ gang gis lam shes pa dang / yongs su byang ba shes pa'o zhes bya ba ni byang chub sems dpa' 'phags pa'i lam sgom pa dang / bsam gtan dang ting nge 'dzin la sogs pa sgom pa'i tshe/ nyan thos ltar mya ngan las 'da' ba mngon sum du bya ba'i phyir ni mi sgom gyi sems can gyi don du chos rnams la 'dris shing yongs su byang bar bya ba'i phyir sgom zhing sbyor ba la 'dris pa shes pa zhes bya'o/ /sgra ji bzhin shes pa gang zhe na/ de bzhin gshegs pa'i rnam pa thams cad mkhyen pa nyid kyi ye shes te zhes bya ba ni rnam pa thams cad mkhyen pa'i ye shes kyis sems can thams cad kyi skad rnam pa sna tshogs ji lta ba bzhin du mkhyen pa la sgra ji bzhin shes pa zhes bya'o/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar dbang po gsum ste zhes bya ba la sogs pa ni dbang po gsum theg pa chen po yin par bstan pa ste/ de la yongs su ma shes pa yongs su shes par bya'o zhes bya ba'i dbang po gang zhe na/ slob ma'i gang zag mngon par rtogs par ma gyur pa rnams kyi dad pa'i dbang po dang zhes bya ba la sogs pa ni nyan thos rgyun du 'jug pa dang / byang chub sems dpa' mos pas spyod pa'i sa la gnas pa rnams la slob ma'i gang zag ces bya ste/ gang zag de rnams rgyun du zhugs pa'i 'bras bu dang / sa dang po ma thob pa thob par bya ba'i phyir slob cing rgyun du zhugs pa'i 'bras bu dang / sa dang po'i chos nyid dang / yon tan sngon mi shes pa las shes shing mngon sum du bya ba'i phyir sgom zhing sbyong ba na dad pa la sogs pa'i dbang po lnga rnams la yongs su ma shes pa yongs su shes par bya'o zhes bya ba'i dbang po zhes bya'o/ /yongs su snang bar ma gyur pa zhes bya ba ni mos pas spyod pa'i sa nas sa dang po la 'jug pa'i tshe/ gzung ba dang 'dzin pa la sogs pa kun brtags pa'i chos rnams dmigs shing snang bar mi 'gyur ba la bya'o/ /de la yongs su shes pa'i dbang po gang zhe na/ gang zag slob pa yongs su shes par gyur pa rnams kyi zhes bya ba la sogs pa ni nyan thos dang rgyun du zhugs pa'i 'bras bu thob pa yan chad dang / byang chub sems dpa' sa dang po thob pa yan chad dgra bcom pa'i 'bras bu dang / sangs rgyas kyi sa thob par bya ba'i phyir sgom zhing sbyong bas na gang zag de dag la yang slob pa zhes bya'o/ /yongs su shes par gyur pa zhes bya ba ni 'phags pa'i sa thob cing chos kyi dbyings shes par bya ba sa dang po yan chad rtogs par gyur pa la bya ste/ de dag gi sa la sogs pa'i dbang po lnga la yongs su shes pa'i dbang po zhes bya'o/ /de la yongs su shes pas rtogs pa'i dbang po gang zhe na/ gang zag mi slob pa dgra bcom pa dang / rang sangs rgyas dang / byang chub sems dpa' dang / de bzhin gshegs pa rnams kyi zhes bya ba la sogs pa ni 'phags pa nyan thos dgra bcom pa rnams dang / rang sangs rgyas rnams dang / byang chub sems dpa' sa bcu pa rnams dang / de bzhin gshegs pa rnams kyis shes par bya ba dang / thob par bya ba'i chos dang / yon tan thams cad yongs su rdzogs par mkhyen cing mthar phyin pas de yan chad bslab mi dgos pa'i phyir mi slob pa zhes bya ste/ de dag gi dad pa la sogs pa dbang po lnga la yongs su shes par rtogs pa'i dbang po zhes bya'o/ /'phags pa de dag la slob pa dang / mi slob pa'i gang zag ces bya ba ni bsod nams dang ye shes kyi tshogs la sogs pa dge ba'i chos rnams kyis gang zhig 'dod chags la sogs pa nyon mongs pa dang / mi dge ba'i chos rnams zag cing byang ste/ med par 'gyur ba'i phyir gang zag ces bya'o/ /rab 'byor gzhan yang byang chub sems dpa' sems dpa' chen po'i theg pa chen po ni ting nge 'dzin gsum ste zhes bya ba la sogs pa ni gzugs kyi khams kyi bsam gtan bzhi dang / gzugs med pa'i khams kyi snyoms par 'jug pa bzhi dang / 'gog pa'i snyoms par 'jug pa rnams sems kyi rgyu ba rags pa dang / 'bring dang phra mo'i khyad par las ting nge 'dzin gsum du btags te/ de la rtog pa dang bcas dpyod pa dang bcas pa'i ting nge 'dzin gang zhe na/ rab 'byor 'di la byang chub sems dpa' sems dpa' chen po 'dod pas dben sdig to mi dge ba'i chos kyis dben pa/ rtog pa dang bcas dpyod pa dang bcas pa/ dben pa las skyes pa'i dga' ba dang / bde ba can bsam gtan dang po la nye bar bsgrubs shing gnas te/ 'di ni rtog pa dang bcas shing dpyod pa dang bcas pa'i ting nge 'dzin to zhes bya ba ni bsam gtan dang po la mnyam par 'jog pa'i tshe/ sems kyi rtog pa dang rgyu ba rags par 'byung ba'i phyir rtog pa dang bcas shing dpyod pa dang bcas pa zhes bya'o/ /'dod pas dben pa dang sdig to mi dge ba'i chos kyis dben pa dang / dben pa las skyes pa'i dga' ba dang / bde ba can zhes bya ba ni sngar bshad pa bzhin no/ /de la rtog pa med pa la dpyod pa tsam gyi ting nge 'dzin gang zhe na/ bsam gtan dang po dang / bsam gtan gnyis pa'i bar te zhes bya ba ni bsam gtan dang po las 'das nas/ bsam gtan gnyis pa la 'jug pa'i bar la bya ste/ bsam gtan de la mnyam par gzhag pa'i tshe/ sems kyi rtog pa rags pa ni spangs/ rtog pa phra mo dpyod pa tsam zhig yod pa la rtog pa med pa la dpyod pa tsam gyi ting nge 'dzin zhes bya'o/ /de la rtog pa med cing dpyod pa med pa'i ting nge 'dzin gang zhe na/ bsam gtan gnyis pa dang zhes bya ba la sogs pa ni bsam gtan gnyis pa yan chad 'gog pa'i snyoms par 'jug pa man chad la rtog pa dang dpyod pa med cing sems kyi rgyu ba phra bar 'dra bas rtog pa dang dpyod pa med pa'i ting nge 'dzin gcig tu bsdus so/ /gzugs dang gzugs med pa'i khams kyi bsam gtan dang / ting nge 'dzin rnams 'jig rten pa'i yin du zin gyis kyang byang chub sems dpa' gang zag dang chos la bdag med par rtogs pas mi dmigs pa'i tshul gyis bsgoms na theg pa chen por 'gyur ba'i phyir ting nge 'dzin gsum theg pa chen po zhes bya'o/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar rjes su dran pa bcu ste zhes bya ba la sogs pa ni rjes su dran pa bcu theg pa chen po yin par bstan pa ste/ de la sangs rgyas rjes su dran pa zhes bya ba ni kun rdzob dang / don dam pa'i tshul du rjes su dran pa ste/ de la kun rdzob tu rjes su dran pa ni longs spyod rdzogs pa'i sku dang / sprul pa'i sku mtshan dang dpe byad kyis brgyan pa dang rig pa dang zhabs su ldan zhing skyes bu 'dul ba dang / kha lo sgyur ba la sogs pa'i yon tan rnams rjes su dran par byas nas de la dad cing gus pa bskyed pa'o/ / don dam par rjes su dran pa ni chos kyi sku rnam par mi rtog pa'i dbyings la bsam gtan du byed cing sems rtse gcig tu gnas pa'o/ /chos rjes su dran pa zhes bya ba ni chos la rnam pa gnyis te/ lung gi chos dang / thob par bya ba'i chos so/ /de la lung gi chos ni zhal nas gsungs pa'i mdo sde gsung rab yan lag bcu gnyis la bya ste/ de dag gi yon tan dang / don rjes su dran pa'o/ /thob par bya ba'i chos ni/ rgyun du zhugs pa la sogs pa'i 'bras bu bzhi dang / sa bcu dang mi 'jigs pa bzhi la sogs pa las 'phags pa'i yon tan rnams thos par bya ba'i phyir de dag gi don dang yon tan rjes su dran zhing goms par byed pa'o/ /dge 'dun rjes su dran pa zhes bya ba ni dge 'dun la rnam pa gsum ste/ byang chub sems dpa'i dge 'dun dang / rgyun du zhugs pa la sogs pa 'phags pa nyan thos kyi dge 'dun dang / so so'i skye bo'i dge 'dun te/ dge 'dun de dag bsod nams kyi zhing yin pa dang / sbyin gnas yin pa dang / de bzhin gshegs pa'i bstan pa la legs par zhugs pa yin pa dang / tshogs shing 'dus pa'i nang na mchog yin par yon tan du lta zhing rjes su dran pa'o/ /tshul khrims rjes su dran pa zhes bya ba ni tshul khrims la rnam pa gsum ste/ sdom pa'i tshul khrims dang / dge ba'i chos la sogs pa'i tshul khrims dang / sems can don bya ba'i tshul khrims so/ / de la sdom pa'i tshul khrims ni srog gcod pa la sogs pa mi dge ba'i chos spyod pa las ldog pa'o/ /dge ba'i chos la sogs pa'i tshul khrims ni dam pa'i chos nyan pa dang / sems pa dang sgom pa la sogs pa la 'jug pa'o/ /sems can gyi don bya ba'i tshul khrims ni sems can yongs su ma smin pa rnams smin par byed pa dang / rnam par ma grol ba rnams grol bar byed pa ste/ de lta bu'i tshul khrims ni mtho ris dang / mya ngan las 'da' ba 'thob pa'i rgyu yin par yon tan du lta zhing / rjes su dran par byed pa'o/ / gtong ba rjes su dran pa zhes bya ba ni gtong ba la rnam pa gsum ste/ zang zing dang mi 'jigs pa dang chos sbyin pa'o/ /de lta bu'i sbyin pa byas na 'jig rten dang 'jig rten las 'das pa'i longs spyod phun sum tshogs pa 'thob pa'i rgyur gyur pa yin par yon tan du lta zhing rjes su dran par byed pa la gtong ba rjes su dran pa zhes bya'o/ /lha rjes su dran pa zhes bya ba ni 'jig rten dang 'jig rten las 'das pa'i lha rnams sngon las bzang po spyod spyod pa'i 'bras bu yin pa dang / lha de dag dang mthun par spyad cing mnyes par byas na 'jig rten dang 'jig rten las 'das pa'i dngos grub 'thob par 'gyur ba'i rgyu yin par yon tan du lta zhing rjes su dran pa'o/ /dbugs phyi nang du rgyu ba rjes su dran pa zhes bya ba ni bsam gtan dang ting nge 'dzin sgom pa la sems mi g.yeng zhing las su rung bar bya ba'i phyir dbugs phyi nang du rgyu ba dran par bya ba la yon tan du lta ba ste/ dbugs phyi nang du rgyu ba ni sngar bshad pa bzhin no/ /skyo ba rjes su dran pa zhes bya ba ni 'khor ba la ma chags shing skyo bar bya ba la yon tan du lta zhing rjes su dran pa'o/ / 'chi ba rjes su dran pa zhes bya ba ni lus mi rtag par sems shing / lus dang longs spyod la ma chags par bya ba rjes su dran pa'o/ /lus kyi rnam pa rjes su dran pa zhes bya ba ni lus kyi mgo nas rting gi bar du mi gtsang ba sna tshogs kyis gang bar sems kyang lus la ma chags par byed pa rjes su dran pa'o/ /rjes su dran pa 'di rnams theg pa chung ngu pa yang sgom mod kyi/ byang chub sems dpas don dam par mi dmigs par thugs su chud par byas nas kun rdzob tu sems can yongs su smin par bya ba/ sems la dbang du gyur par bya ba'i phyir bsgoms na theg pa chen po zhes bya'o/ /rab 'byor gzhan yang byang chub sems dpa' sems dpa' chen po'i theg pa chen po ni 'di lta ste/ bsam gtan bzhi dang zhes bya ba la sogs pa ni bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / rnam par thar pa brgyad dang / mthar gyis gnas pa'i snyoms par 'jug pa dgu rnams theg pa chen po yin par bstan pa ste/ bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi rnams kyi mtshan nyid dang / yon tan ni go cha chen po bgos pa'i skabs su sngar bshad zin to/ /de la rnam par thar pa brgyad gang zhe na/ gzugs can gyi gzugs rnams mthong ba 'di rnam par thar pa dang po'o zhes bya ba ni bsam gtan pa bdag gi lus kyi kha dog la sogs pa la chags pa spang ba'i gnyen por bdag gi lus la klad pa'i rgyas nas rting ba'i bar du mi gtsang ba sna tshogs kyis gang ba'i gzugs can du lta zhing bsam gtan byed pa la gzugs can zhes bya'o/ /gzugs rnams mthong ba zhes bya ba ni de ltar nang gi gzugs la mi gtsang bar lta ba'i ting nge 'dzin grub pa'i 'og tu phyi rol gyi gzugs rnams la rnam par bam pa dang / rnam par bsngos pa la sogs par lta zhing mi sdug pa sgom pa'i ting nge 'dzin grub pa la gzugs rnams mthong ba zhes bya'o/ /nang g zugs med pa'i 'du shes dang ldan pas phyi rol gyi gzugs rnams mthong ba 'di ni rnam par thar pa gnyis pa'o zhes bya ba ni bsam gtan pa la la bdag gi lus la mi gtsang ba sna tshogs kyis gang bar 'du shes pa'i bsam gtan mi byed par phyi rol gyi gzugs rnams la rnam par dam pa dang / rnam par bsngos pa la sogs par 'du shes shing bsam gtan sgom pa'o/ /bzang bar mos pa 'di ni rnam par thar pa gsum pa'o zhes bya ba ni bsam gtan pa la phyi nang gi gzugs mi sdug par sgom bsgoms pas sems spa gong z hing zhum par gyur pa sems rtsa gso zhing gzengs bstod pa'i phyir gzugs bzang po la dmigs pa'am mi sdug pa bsgom bsgoms pa las gzugs bzang po la mos shing bltas nas kha dog la sogs pa la chags shing sems gzhan du 'gyur ram mi 'gyur sad pa'i phyir kha dog bzang po la sogs pa la lta zhing bsam gtan sgom pa'o/ /nam mkha' mtha' yas skye mched la sogs pa gzugs med pa'i snyoms par 'jug pa bzhi ni snga ma bzhin no/ /'du shes dang tshor ba 'gog pa'o zhes bya ba ni 'gog pa'i snyoms par 'jug pa la bya ste/ 'phags pa nyan thos phyir mi 'ong ba dang / dgra bcom pa rnams phung po'i lhag ma dang bcas pa'i mya ngan las 'das pa'i bde ba la gnas par bya ba'i phyir 'du shes dang tshor ba la sogs pa rnam par rtog pa rnams mi 'byung bar bkag ste/ lus dang sems mnyam par 'jog pa la bya ste/ de ltar rnam par thar pa dang po gsum dang / gzugs med pa'i snyom par 'jug pa bzhi dang / 'gog pa'i snyoms par 'jug pa dang / brgyad po 'di rnams bsgoms na mya ngan las 'das pa rnam par thar pa'i rang bzhin 'thob pa'i rgyu yin pa'i phyir rnam par thar pa zhes bya'o/ /rnam par thar pa brgyad po de dag nyan thos dang rang sangs rgyas rnams ni dmigs pa dang bcas par bsgom/ byang chub sems dpas de dag mi dmigs pa'i tshul gyis bsgoms na bla na med pa'i byang chub 'thob pa'i rgyur 'gyur ba'i phyir theg pa chen po zhes bya'o/ /de la nye bar bsgrubs shing gnas zhes bya ba ni rdzogs par byas shing sgom pa zhes bya ba'i don to/ /de la mthar gyis gnas pa'i snyoms par 'jug pa dgu gang zhe na zhes bya ba nas/ de dag gi mthar gyis gnas pa'i snyoms par 'jug pa dgu'o zhes bya ba'i bar du ni mthar gyis gnas pa'i snyoms par 'jug pa dgu theg pa chen po yin par bstan pa ste/ byang chub sems dpa' sems sbyang ba'i phyir bsam gtan bzhi dang / gzugs med pa'i snyoms par 'jug pa bzhi dang / 'gog pa'i snyoms par 'jug pa dgu la mthar gyis gnas shing rim gyis bsgom pa la mthar gyis gnas pa'i snyoms par 'jug pa dgu zhes bya ste/ de dag gi mtshan nyid dang theg pa chen po'i don ni snga ma bzhin no/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar de bzhin gshegs pa'i stobs bcu ste zhes bya ba la sogs pa ni de bzhin gshegs pa'i stobs bcu theg pa chen po yin par bstan pa ste/ gnas dang gnas ma yin pa la yang gnas dang gnas ma yin par yang dag pa ji lta ba bzhin du rab tu shes so zhes bya ba ni las dge ba spyad pa'i 'bras bu rnam par smin pa bde ba myong bar 'gyur ba ni gnas yin no/ /las dge ba spyad pa'i 'bras bu rnam par smin pa sdug bsngal myong bar 'gyur ba ni gnas ma yin no/ /las mi dge ba spyad pa'i 'bras bu rnam par smin pa sdug bsngal myong bar 'gyur ba ni gnas ma yin no/ /las mi dge ba spyad pa'i 'bras bu rnam par smin pa bde ba myong bar ' gyur ba ni gnas ma yin no zhes bya ba la sogs pa las legs nyes kyi rgyu dang 'bras bu mthun zhing rigs pa dang mi mthun zhing mi rigs pa rnam pa thams cad mkhyen pa'i ye shes sgrib pa med pas phyin ci ma log par mkhyen pa la gnas dang gnas ma yin pa mkhyen pa'i stobs zhes bya'o/ /'das pa dang ma 'ongs pa dang da ltar byung ba'i las dang / las yongs su len pa'i rnam par smin pa gnas pa dang / rgyu'i rnam par yang dag pa ji lta ba bzhin du rab tu shes so zhes bya ba ni sems can rnams kyi lus dang ngag dang / yid kyi sgo nas las legs nyes sngon ci byas pa dang / da ltar ci byed pa dang / phyis ci byed par 'gyur ba rnams kyang mkhyen cing las de dag gi rnam par smin pa cir 'gyur ba yang phyin ci ma log par mkhyen pa la/ las kyi rnam par smin pa mkhyen pa'i stobs zhes bya ste/ las yongs su len pa zhes bya ba ni da ltar gyi dus na bde la/ phyis sdug bsngal nyams su myong bar 'gyur ba len pa'am/ da ltar gyi dus na mi bde la phyis bde ba myong bar 'gyur ba len pa la sogs pa mkhyen pa'o/ / gnas kyi rnam pa dang zhes bya ba ni sems can rnams kyi las sa phyogs dang / yul gang du byas pa dang / sa phyogs dang yul gang du rnam par smin par 'gyur ba la gnas kyi rnam pa zhes bya'o/ /rgyu'i rnam pa zhes bya ba ni las byed pa'i rgyu dge ba'i rtsa ba dang ldan pa'i sems sam/ mi dge ba'i rtsa ba dang ldan pa'i sems la rgyu'i rnam pa zhes bya'o/ /'jig rten gyi khams sna tshogs can te/ 'jig rten gyi khams du ma pa'o zhes bya bar yang dag pa ji lta ba bzhin du rab tu shes so zhes bya ba ni 'jig rten mi rtag pa la gnas shing brten pa'i phyir sems can la 'jig rten zhes bya'o/ /khams zhes bya ba ni sems can rnams kyi bsam pa'am/ rang bzhin la bya ste sems can rnams kyi bsam pa'am/ rang bzhin rnam pa mang po sna tshogs bsam gyis mi khyab pa nyan thos dang / rang sangs rgyas la sogs pas mi mkhyen pa rnams de bzhin gshegs pas so so'i bsam pa dang / bag la nyal ba ji lta ba bzhin du phyin ci ma log par mkhyen nas de dang mthun par chos ston pa mdzad pa la khams sna tshogs mkhyen pa'i stobs zhes bya'o/ /sems can gzhan dang gang zag gzhan gyi mos pa sna tshogs pa dang / mos pa du ma yang dag pa ji lta ba bzhin du rab tu shes so zhes bya ba ni sems can rnams kyi dad pa dang mos pa rab dang / 'bring dang / tha ma tha dad pa ji lta ba bzhin du phyin ci ma log par mkhyen nas de dang mthun par chos ston pa mdzad pa la mos pa sna tshogs mkhyen pa'i stobs zhes bya'o/ /sems can gzhan dang gang zag gzhan gyi dbang po rab dang / tha ma shes par bya ba yang dag pa ji lta ba bzhin du rab tu shes so zhes bya ba ni sems can rnams kyi dbang po rno rtul rab 'bring gsum dang / dad pa la sogs pa dbang po lnga rnams kyi shas che chung phyin ci ma log par mkhyen nas de dang rjes su mthun par chos ston pa mdzad pa ni dbang po rab dang tha ma mkhyen pa'i stobs zhes bya'o/ / kun du 'gro ba'i lam yang dag pa ji lta ba bzhin du rab tu shes so zhes bya ba ni sems can gyi rigs yang dag par nges pa dang / log par nges pa dang / ma nges pa dang ldan pa las so so'i rigs dang mthun par lam la 'jug cing 'bras bu thob par 'gyur ba la kun tu 'gro ba'i lam zhes bya ste/ de la yang dag par nges pa ni 'phags pa'i lam la 'jug pa'i rigs dang ldan pa'o/ /log par nges pa ni 'jig rten pa'i lta ba la 'jug pa'i rigs dang ldan pa'o/ /ma nges pa ni gcig tu chad pa med de/ gar yang drang du rung ba ste/ de lta bu phyin ci ma log par mkhyen pa la kun du 'gro ba'i lam mkhyen pa'i stobs zhes bya'o/ /dbang po dang / stobs dang / byang chub kyi yan lag dang / bsam gtan dang / rnam par thar pa dang / ting nge 'dzin dang / snyoms par 'jug pa dang / kun nas nyon mongs pa dang / rnam par byang ba dang / rnam par dgod pa dang / yang dag pa ji lta ba bzhin du rab tu shes so zhes bya ba ni dad pa la sogs pa'i dbang po lnga dang / stobs lnga dang / dran pa yang dag byang chub kyi yan lag la sogs pa byang chub kyi yan lag bdun dang / bsam gtan dang po la sogs pa bsam gtan bzhi dang / gzugs can gyi gzugs rnams mthong ba la sogs pa rnam par thar pa brgyad dang / rtog pa dang bcas dpyod pa dang bcas pa'i ting nge 'dzin la sogs pa ting nge 'dzin gsum dang / gzugs med pa'i snyoms par 'jug pa bzhi dang / mthar gyis gnas pa'i snyoms par 'jug pa dgu rnams kyi mtshan nyid dang / yon tan shes pa dang / de dag gi nyon mongs pa tshul bzhin ma yin pa yid la byed pas bsam gtan la sogs pa bsgoms pa'i 'bras bu 'khor ba'i longs spyod thob par bsngo ba dang / bsam gtan la sogs pa'i ro la chags pa dang / dmigs pa can du lta ba la sogs pa'i skyon shes pa dang / bsam gtan la sogs pa'i rnam par byang ba lhag mthong gis sems can yongs su smin par bya ba'i phyir sgom pa dang / mngon par shes pa mngon par sgrub pa dang / mi dmigs pa yid la byed pa rnams kyi yon tan rnams so sor bye brag tu 'byed cing rnam par dgod pa rnams phyin ci ma log par mkhyen pa la bsam gtan dang / rnam par thar pa dang / ting nge 'dzin dang / snyoms par 'jug pa dang / kun nas nyon mongs pa dang / rnam par byang ba rnam par dgod pa mkhyen pa'i stobs zhes bya'o/ /de rnam pa du mar sngon gyi gnas rjes su dran te zhes bya ba nas gtan tshigs dang bcas par rnam pa du mar sngon gyi gnas rjes su dran no zhes bya ba'i bar du ni sngon gyi gnas rjes su dran pa mkhyen pa'i stobs bstan pa ste rang log tu zad do/ /lha'i mig rnam par dag pa mi las 'das pas sems can 'chi 'pho dang skye ba dag kyang mthong ngo zhes bya ba nas/ de'i rgyu de'i rkyen gyis lus zhig nas bde 'gro mtho ris kyi lha'i nang du skye'o zhes bya bar rab tu shes so zhes bya ba'i bar du ni tshe 'pho ba dang skye ba mkhyen pa'i stobs bstan pa ste/ rang log tu zad do/ /zag pa rnams zad pa'i phyir sems rnam par grol ba dang / shes rab rnam par grol ba zag pa med pa rang gi mngon par shes pas mngon sum du bya ste nye bar bsgrubs shing rnam par spyod do zhes bya ba la sogs pa ni zag pa zad pa mkhyen pa'i stobs bstan pa ste/ zag pa zad pa'i phyir sems rnam par grol ba dang / shes rab rnam par grol ba zag pa med pa rang gis mngon par shes pas mngon du bya ste/ nye bar bsgrubs shing rnam par spyod do zhes bya ba ni 'dod chags la sogs pa nyon mongs pa'i zag pa rnams spangs pas sems dang shes rab rnam par grol ba'i mtshan nyid zag pa med pa mya ngan las 'das pa'i dbyings thob par byas nas gnas so zhes bya ba'i don to/ /bdag gi skye ba ni zad do zhes bya ba ni phung po lhag ma dang bcas pa'i mya ngan las 'das pa thob pa'i rjes las byung ba'i ye shes kyis phyin chad 'khor bar mi skye bar shes pa'o/ /bdag gis tshangs par spyod pa ni spyad do zhes bya ba ni tshangs pa zhes bya ba ni mya ngan las 'das pa 'thob pa'i rgyu tshul khrims bsrungs pa la sogs pa mthar phyin par bsrungs zin to zhes bya ba'i don to/ /bya ba byas so zhes bya ba ni bsod nams dang ye shes kyi tshogs bsags pa la sogs pa don du sgrub pa rnams bsgrubs zin to zhes bya ba'i don to/ /rnam pa 'di lta bu gzhan ni med do zhes bya bar rab tu shes so zhes bya ba ni phung po 'di lta bu phyis len par mi 'gyur ro zhes bya bar rjes su dpag pa las byung ba'i ye shes kyis mkhyen pa la bya ste/ mkhyen pa 'di rnams la stobs zhes bya ba ni sems can gyi don bya ba thams cad la rnam pa thams cad du mthu phun sum tshogs pa dang ldan pa dang / bdud kyi stobs thams cad rab tu zil gyis gnon pa dang / bdud dang phas kyi rgol ba la sogs pa mi mthun pa'i phyogs rnams kyis zil gyis mi non pa'i phyir stobs zhes bya'o/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar mi 'jigs pa bzhi ste zhes bya ba la sogs pa ni mi 'jigs pa bzhi theg pa chen po yin par bstan pa ste/ de la bdag gis yang dag par rdzogs par sangs rgyas so zhes dam bcas na zhes bya ba nas/ chos dang ldan par sus kyang bskor bar mi nus pa bdag gis rab tu bskor bar bya'o zhes bya ba'i bar du ni mngon par rdzogs par sangs rgyas pa la mi 'jigs pa bstan pa ste/ de bzhin gshegs pas gang zag dang chos la bdag med par thugs su chud nas bla na med pa yang dag par rdzogs pa'i byang chub mngon par rdzogs par sangs rgyas par gyur pa la/ dge sbyong dang bram ze la sogs pa'i 'jig rten na shes rab rno zhing mthu dang rdzu 'phrul du ldan pa rnams kyis mngon par rdzogs par sangs rgyas so zhes rgol ba 'byung bar dogs pa mi 'byung zhing bsnyengs pa mi mnga' ba mngon par rdzogs pa'i byang chub pa la mi 'jigs pa zhes bya'o/ /dam bcas na zhes bya ba ni de ltar mngon par sangs rgyas par gyur pa la bdag sangs rgyas yin no zhes zhal gyis 'ches pa la bya'o/ /chos dang ldan par rgol ba zhes bya ba ni dge sbyong dang bram ze la sogs pa so so'i chos dang gzhung lugs gang yin pa la brten nas chos de dang ldan par rgol ba'o/ /rgyu yang dag par rjes su mi mthong ste zhes bya ba ni dge sbyong dang bram ze la sogs pas brgal ba'i dmigs sam/ skyon nam 'gal ba'i rgyu'am mtshan ma tsam yang med do zhes bya ba'i don to/ /de la bdag bde ba thob pa dang zhes bya ba la sogs pa ni de ltar mi dmigs pa'i yon tan bstan pa ste/ bde ba thob pa ni sku'i phrin las rnam par dag pa'i phyir/ sku bag 'khums pa la sogs pa mi mnga' ba'i bde ba dang ldan pa'o/ /bag tsha ba med pa 'thob pa dang zhes bya ba ni gsung gi phrin las rnam par dag pa'i phyir tshig gi skyon 'byung bar bag tsha ba med pa'o/ /mi 'jigs pa thob par rnam par spyod do zhes bya ba ni thugs kyi phrin las rnam par dag pa'i thugs zhum pa la sogs pa'i skyon med pa bstan pa'o/ /khyu mchog rlabs po che'i gnas su dam bca'o zhes bya ba ni bde ba thob pa'i 'bras bu bstan pa ste/ ji ltar glang khyu mchog lce 'bab pa dang / ser ba la sogs pas mi 'jigs pa bzhin bde ba thos pas snyems pa dang bcas par bstan pa'o/ /'khor gyi nang na seng ge'i sgra sgrog go zhes bya ba ni bag tsha ba med pa thob pa'i 'bras bu bstan pa ste/ gsung ba la skyon ni mnga' bas ji ltar gcan gzan gyi rgyal po seng ge'i sgra thos pa tsam gyis gcan gzan dang / ri dgas thams cad spa gong zhing zil gyis non pa bzhin du/ bcom ldan 'das kyi gsung thos pa tsam gyis bdud dang mu stegs can la sogs pa phas kyi rgol ba thams cad spa gong zhing zil gyis gnon pa'i sgra sgrog go zhes bya ba'i don to/ /tshangs pa'i 'khor lo 'jig rten na dge sbyong 'am/ bram ze'am lha'am bdud dam tshangs pa'am gzhan su yang rung ste/ chos dang ldan par bskor bar mi nus pa bdag gis rab tu bskor bar bya'o zhes bya ba ni mi 'jigs pa thob pa'i 'bras bu bstan pa ste/ thugs kyi phrin las yongs su dag pas bla na med pa'i chos kyi 'khor lo sus kyang bskor bar mi nus pa bskor ro zhes bya ba'i don to/ /bdag zag pa zad do zhes dam bcas na zhes bya ba nas tshangs pa'i 'khor lo bdag gis rab tu bskor bar bya'o zhes bya ba'i bar du zag pa zad pa la mi 'jigs pa bstan pa ste/ de bzhin gshegs pas 'dod chags la sogs pa nyon mongs pa'i zag pa rnams bag chags yan chad ma lus par spangs te/ zag par byas pa la dge sbyong dang bram ze la sogs pas zag pa rnams zad par ma gyur to zhes rgol du dogs pa mi 'byung zhing bsnyengs pa mi mnga' ba ste/ rgyu yang dag par rjes su mi mthong ba la sogs pa'i tshig gi don gzhan ni snga ma bzhin no/ /gang yang bdag gis bar chad kyi chos su bstan pa de dag la brten na/ bar chad kyi chos su mi 'gyur ba de lta bu'i gnas med de zhes bya ba nas/ tshangs pa'i 'khor lo rab tu bskor bar bya ba'o zhes bya ba'i bar du ni bar du gcod pa'i chos rnams gzhan du mi 'gyur bar nges pa'i mi 'jigs pa bstan pa ste/ 'dod chags la sogs pa'i nyon mongs pa rnams mya ngan las 'das pa'i bar du gcod par 'gyur ro zhes bshad pa la/ dge sbyong dang bram ze la sogs pa phas rgol ba rnams 'dod chags la sogs pa nyon mongs pa'i chos la brten kyang bar du gcod par mi 'gyur ro zhes rgol ba dogs pa mi 'byung zhing bsnyengs pa mi mnga' ba bstan pa ste/ tshig gzhan ni snga ma bzhin no/ /gang yang bdag gis 'phags pa'i lam 'byung ba rtogs par 'gyur ba zhes bya ba nas/ rab 'byor 'di yang de mi dmigs pa'i tshul gyis byang chub sems dpa' sems dpa' chen po'o zhes bya ba'i bar du ni phun sum tshogs pa thams cad thob par 'gyur ba nges par 'byung ba'i lam de bzhin du 'gyur ba la mi 'jigs pa bstan pa ste/ de bzhin gshegs pas 'phags pa'i lam rnams bstan pa de dag la nan tan byas na/ sdug bsngal zad par gyur nas mya ngan las 'das pa thob par 'gyur ro zhes bstan pa la/ dge sbyong ngam bram ze la sogs pa phas rgol ba rnams 'phags pa'i lam de la nan tan byas kyang sdug bsngal zad cing mya ngan las 'da' ba thob par mi 'gyur ro zhes rgol bar dogs pa mi 'byung zhing bsnyengs pa mi mnga' ba bstan pa ste/ 'phags pa'i lam 'byung ba zhes bya ba ni 'phags pa'i lam yan lag brgyad pa de 'khor ba las thar zhing mya ngan las 'da' bar 'byung bar 'gyur ba'i phyir 'byung ba zhes bya'o/ /rtogs par 'gyur ba zhes bya ba ni 'phags pa'i lam de bsgoms na chos kyi dbyings rtogs par 'gyur ba'i phyir ro/ /de byed pa'i sdug bsngal yang dag par zad par 'gyur ba zhes bya ba ni 'phags pa'i lam de bsgoms na/ lam sgom par byed pa'i mi'i sdug bsngal yang dag par zad par 'byung ba'i phyir tshig gzhan ni snga ma bzhin no/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar so so yang dag par rig pa bzhi ste zhes bya ba la sogs pa ni so so yang dag par rig pa bzhi theg pa chen po yin par bstan pa ste/ de la don so so yang dag par rig pa zhes bya ba ni de bzhin gshegs pa'i gsung rab yan lag bcu gnyis kyis bstan par bya ba'i don byang chub sems dpa'i pha rol tu phyin pa la sogs pa byang chub sems dpas sgrub cing thob par bya ba'i don rnam pa sna tshogs rnams phyin ci ma log par mkhyen pa'o/ /chos so so yang dag par rig pa zhes bya ba ni lung gi chos su gtogs pa de bzhin gshegs pa'i gsung rab mdo'i sde dang / dbyangs kyis bsnyad pa'i sde la sogs pa phyin ci ma log par mkhyen pa'o/ /nges pa'i tshig so so yang dag par rig pa zhes bya ba ni lha dang / mi dang / lha ma yin dang / gnod sbyin dang / dri za la sogs pa sems can thams cad kyi so so'i skad rnam pa sna tshogs rnams phyin ci ma log par mkhyen pa'o/ /spobs pa so so yang dag par rig pa zhes bya ba ni nges pa'i tshig sna tshogs mkhyen pa de nyid kyis sems can rnams so so'i bsam pa dang / bag la nyal ba dang / mthun par skad sna tshogs kyis tshig dang don du ldan par chos ston pa la thogs pa med cing spobs pa rgyun mi 'chad la/ shes rab gsal ba gzhan gyis zil gyis mi non pa mkhyen pa la/ spobs pa so so yang dag par rig pa zhes bya'o/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar sangs rgyas kyi chos ma 'dres pa bco brgyad de zhes bya ba la sogs pa ni sangs rgyas kyi chos ma 'dres pa bco brgyad theg pa chen po yin par bstan pa ste/ gang gis nam la de bzhin gshegs pa bla na med pa yang dag par rdzogs pa'i byang chub tu mngon par rdzogs par sangs rgyas pa dang / gang gis nam la lha dang bcas pa'i 'jig rten bdud dang bcas pa dang / tshangs pa dang bcas pa dang / dge sbyong dang / bram zer bcas pa'i skye dgu dang / lha dang / mi dang / lha ma yin du bcas pa'i sdug bsngal zad par 'gyur ba'i lam gyis rjes su bstan te/ phung po ma lus pa'i mya ngan las 'das pa'i dbyings su yongs su mya ngan las 'das par gyur pa de'i bar du de bzhin gshegs pa la 'khrul pa mi mnga'o zhes bya ba ni sangs rgyas bcom ldan 'das dang po mngon par sangs rgyas nas mtha' yongs su mya ngan las 'das pa'i bar du de bzhin gshegs pa la 'khrul pa mi mnga' ba la sogs pa bstan pa ste/ de la de bzhin gshegs pa la 'khrul pa mi mnga'o zhes bya ba ni sku dang gsung dang thugs kyi phrin las mdzad pa la 'khrul pa mi mnga' ste/ ji ltar 'phags pa nyan thos dgra bcom pa rnams sngon gyi bag chags ma byang ba'i dbang gis lus dang ngag dang yid kyi spyod pa la 'khrul pa dang mi mdzes pa 'byung ba de lta bu mi 'byung ba la 'khrul pa mi mnga' ba zhes bya'o/ /ca co mi mnga'o zhes bya ba ni ji ltar 'phags pa nyan thos dgra bcom pa rnams nags dgon pa na lam stor nas sngon gyi bag chags kyi dbang gis ku co'i sgra chen po 'byin cing gcig la gcig 'bod pa de lta bu'i ca co de bzhin gshegs pa la mi mnga' ba'o/ /dgongs pa nyams pa mi mnga'o zhes bya ba ni ji ltar 'phags pa nyan thos dgra bcom pa rnams ched du ma dgongs pa bsnyel zhing don bsgrub pa rnams lus te/ ma byas pa dang dus las yol ba la sogs pa 'byung ba de lta bu'i bsnyel ba de bzhin gshegs pa la mi mnga'o/ /'du shes sna tshogs mi mnga'o zhes bya ba ni ji ltar 'phags pa dgra bcom pa rnams 'khor ba dang mya ngan las 'das pa gnyis tha dad par lta ba dang / nyon mongs pa dang rnam par byang ba'i chos la sogs pa la tha dad du lta zhing / 'du shes sna tshogs 'byung ba de lta bu de bzhin gshegs pa la mi mnga' ste/ de bzhin gshegs pa ni rtag tu sems can mnyam pa nyid dang / chos mnyam pa nyid thugs su chud pas sems can tshul khrims dang ldan pa'am/ tshul khrims dang mi ldan pa'am/ gnod par byed pa'am/ phan 'dogs pa la sogs la 'du shes sna tshogs mi 'byung ba dang / 'khor ba dang mya ngan las 'das pa'am/ nyon mongs pa dang rnam par byang ba'i chos rnams la sogs pa la tha dad du gzigs pa mi 'byung ba'i phyir 'du shes sna tshogs mi mnga' ba zhes bya'o/ /thugs mnyam par ma bzhag pa mi mnga'o zhes bya ba ni ji ltar dgra bcom pa dag nam ting nge 'dzin la snyoms par zhugs pa de nyid kyi tshe sems mnyam par bzhag par 'gyur gyi snyoms par ma zhugs pa'i tshe sems mnyam par gzhag par mi 'gyur ba de lta bu ni ma yin gyi/ de bzhin gshegs pa ni snyoms par zhugs kyang rung ma zhugs kyang rung / dus thams cad du mnyam par bzhag pa nyid yin pa'i phyir thugs mnyam par ma bzhag pa mi mnga' zhes bya'o/ /ma brtags pa'i btang snyoms mi mnga'o zhes bya ba ni ji ltar 'phags pa nyan thos dgra bcom pa rnams shes rab kyis so sor ma brtags par sems can gyi don yal bar 'dor ba de lta bu ni ma yin gyi/ de bzhin gshegs pa ni sems can gyi don mdzad pa la/ sems can skal ba yod pa dang / skal ba med pa dang / dus la 'bab pa dang / dus la mi 'bab pa so sor brtags nas skal ba med cing dus la mi 'bab na/ gdod btang snyoms mdzad cing yal bar 'dor gyi skal ba yod cing dus la bab na btang snyoms su mi 'jog pa la ma brtags pa'i btang snyoms mi mnga' zhes bya'o/ /mos pa yongs su nyams pa mi mnga'o zhes bya ba ni ji ltar 'phags pa nyan thos dgra bcom pa rnams rang gi sa thob pa las gong du sangs rgyas kyi sa dang sangs rgyas kyi mdzad pa rgya chen po la mos pa mi skye ba lta bu ni ma yin gyi/ de bzhin gshegs pa rnams ni dus thams cad du sems can gyi don rgya chen po mdzad pa la sogs pa la mos shing 'dun pa rgyun mi 'chad par lhun gyis grub pa nyid du 'byung ba la mos pa yongs su nyams pa mi mnga'o zhes bya'o/ /brtson 'grus yongs su nyams pa mi mnga'o zhes bya ba ni de bzhin gshegs pa sems can gyi don du sku dang / gsung dang / thugs kyi phrin las mdzad pa la/ bsnyel ba mi mnga' ste/ sems can gcig gi don du yang bskal pa du mar brtson 'grus mi gtong ba la/ brtson 'grus nyams pa mi mnga' zhes bya'o/ /dgongs pa yongs su nyams pa mi mnga'o zhes bya ba ni/ de bzhin gshegs pa'i dran pa'i dbang po yongs su dag pa'i mthus 'das pa dang / ma 'ongs pa dang / da ltar byung ba'i sems can rnams kyi spyod pa dang / bsam pa dang / bag la nyal ba la sogs pa gsal bar dgongs shing de dag dang mthun par don mdzad pa'i thabs rnam pa sna tshogs la bsnyel ba mi mnga' ba la dgongs pa yongs su nyams pa mi mnga' ba zhes bya'o/ /ting nge 'dzin yongs su nyams pa mi mnga'o zhes bya ba ni de bzhin gshegs pa ni rtag tu mnyam par gzhag pa ste snyoms par zhugs kyang rung ma zhugs kyang rung / de bzhin nyid la sems rtse gcig tu gyur pa'i ting nge 'dzin las nyams par mi 'gyur ba la/ ting nge 'dzin yongs su nyams pa mi mnga' ba zhes bya'o/ /shes rab yongs su nyams pa mi mnga'o zhes bya ba ni de bzhin gshegs pa'i shes rab kyi dbang po yongs su dag pas sems can gyi spyod pa mkhyen pa mi zad pa dang / so so yang dag par rig pa mi zad pa la sogs pa dang ldan pa la/ shes rab yongs su nyams pa mi mnga' ba zhes bya'o/ /rnam par grol ba yongs su nyams pa mi mnga'o zhes bya ba ni nyan thos dang / rang sangs rgyas rnams ni nyon mongs pa'i sgrib pa las rnam par grol ba tsam du zad kyi/ de bzhin gshegs pa ni nyon mongs pa dang / shes bya'i sgrib pa gnyis ka bag chags yan chad byang ste/ sgrib pa cung zad kyang mi mnga' zhing rnam pa thams cad du rnam par grol ba la rnam par grol ba yongs su nyams pa mi mnga' ba zhes bya'o/ /rnam par grol ba'i ye shes gzigs pa yongs su nyams pa mi mnga'o zhes bya ba ni/ de ltar nyon mongs pa dang / shes bya'i sgrib pa las rnam par grol nas mi gnas pa'i mya ngan las 'das pa brnyes pa'i tshe rnam par mi rtog pa'i rjes las byung ba dag pa 'jig rten pa'i ye shes kyis nyon mongs pa dang / shes bya'i sgrib pa las rnam par grol bar mkhyen cing gzigs pa lhun gyis grub par 'byung zhing sgrib pa med pa la rnam par grol ba'i ye shes gzigs pa yongs su nyams pa mi mnga'o zhes bya'o/ /rnam par grol ba dang / rnam par grol ba'i ye shes gzigs pa gnyis rnam par grol ba'i rang bzhin du tha mi dad pa'i phyir gcig tu bgrang ngo / /sku'i phrin las thams cad ye shes sngon du 'gro ste/ ye shes kyi rjes su 'brang ngo zhes bya ba ni 'phags pa nyan thos dgra bcom pa dag sngon gyi bag chags ma byang ba'i dbang gis sems dang mi ldan par ma tshor bzhin du bya ba dag byed pa de lta bu ni ma yin gyi/ de bzhin gshegs pa'i sku'i phrin las thams cad la yengs pa dang / ma tshor bar mdzad pa mi 'byung gi /mkhyen bzhin du mdzad pa la ye shes sngon du 'gro zhing ye shes kyi rjes su 'brang zhes bya ste/ de la ye shes sngon du 'gro zhes bya ba ni mkhyen pa sngar gtang ba'i rgyu las byung ba'i phyir ro/ /ye shes kyi rjes su 'brang zhes bya ba ni mkhyen pa dang ma bral te/ mkhyen bzhin du mdzad ces bya ba'i don to/ /gsung gi phrin las thams cad ye shes sngon du 'gro ste/ ye shes kyi rjes su 'brang ngo zhes bya ba ni de bzhin gshegs pa'i gsung gi phrin las kyang don med par mi gsung zhing / sems can rnams kyi bsam pa dang / bag la nyal ba dang / rjes su mthun par chos ston pa dang / don sna tshogs sgrub pa sha stag 'byung ngo / /thugs kyi phrin las thams cad ye shes sngon du 'gro ste/ ye shes kyi rjes su 'brang ngo zhes bya ba ni de bzhin gshegs pa'i thugs kyi phrin las kyang sgrib pa'i bag chags thams cad dang bral bas byams pa chen po dang / thugs rje chen po'i ngang du gyur pa sems can gyi don sgrub pa 'ba' zhig 'byung ngo / /ye shes sngon du 'gro ba dang / ye shes kyi rjes su 'brang ba ni snga ma bzhin no/ /'das pa'i dus la ma thogs ma chags pa'i ye shes gzigs pa 'jug go zhes bya ba la sogs pa ni de bzhin gshegs pa'i ye shes dus gsum la sgrib pa med pa bstan pa ste/ 'phags pa nyan thos dgra bcom pa dag 'das pa'i dus yun ring po na sems can dang / sems can ma yin pa'i dngos po cir gyur pa rnams mi mkhyen pa dang / ma 'ongs pa'i dus yun ring po na cir 'gyur ba rnams mi mkhyen pa dang / da lta'i dus na yang gang la dgongs shing dmigs pa nyi tshe mkhyen gyi ched du ma dgongs pa rnams la lhun gyis grub pa'i mkhyen pa mi 'byung ba lta bu ni ma yin gyi/ de bzhin gshegs pa ni 'das pa dang / ma 'ongs pa'i dus yun ring po dang / da ltar byung ba'i dngos po brtag dka' ba dang / yul thag ring po na gnas pa rnams la sgrib pa dang thogs pa med par mkhyen pa gsal zhing lhun gyis grub pa nyid du 'byung ba la/ 'das pa dang ma 'ongs pa dang / da ltar byung ba'i dus la ma thogs ma chags pa'i ye shes gzigs pa 'jug ces bya'o/ /rab 'byor gzhan yang byang chub sems dpa' sems dpa' chen po'i theg pa chen po ni 'di ltar gzungs kyi sgo rnams te zhes bya ba la sogs pa ni gzungs kyi sgo rnams theg pa chen po yin par bstan pa ste/ de la gzungs zhes bya ba ni yang dag pa nyid kyi don dang / tshig phyin ci ma log par rtogs shing mi brjed par 'dzin pa la gzungs zhes bya ste/ shes rab kyis yang dag pa'i don dang tshig phyin ci ma log par rtogs nas dran pas gzungs su gzung ste ma brjed par byed pa'i phyir dngos su na shes rab dang dran pa gnyis la gzungs shes bya'o/ /shes rab dang dran pa gnyis kyis shes shing dran par bya ba'i dmigs pa'i yul sngags kyi tshig /a ra pa tsa zhes bya ba la sogs pa yang gzungs zhes bya ste/ gzungs de dag gis gzungs 'di'i don ston pa'i gzhi'i yi ge a la sogs pa la brten nas chos thams cad ma skyes pa la sogs pa'i don rtogs par byed cing / shes rab dang dran pa skye bar byed pa'i sgo yin pa'i phyir yi ge rnams la gzungs kyi sgo zhes bya'o/ /yi ge mnyam pa nyid dang brjod pa mnyam pa nyid ces bya ba ni yi ge a la sogs pa la brten nas ma skyes pa la sogs pa'i don rtogs par gyur pa'i tshe don ston par byed pa'i yi ge dang / brjod cing bstan par bya ba'i chos rnams ma skyes pa la sogs par rtogs te/ de bzhin nyid kyi rang bzhin du ro gcig cing mnyam pa nyid du gyur pa la/ yi ge mnyam pa nyid dang brjod pa mnyam pa nyid ces bya'o/ /yi ge'i sgo dang yi ge 'jug pa ste zhes bya ba ni yi ge a la sogs pa'i sgo nas ma skyes pa la sogs pa mnyam pa nyid kyi don rtogs par 'gyur te/ de lta bu'i don la 'jug pa'i sgo yi ge rnams yin pa'i phyir yi ge'i sgo dang yi ge la 'jug pa zhes bya'o/ /de bas na don de gnyis gsal bar bya ba'i phyir/ de la yi ge'i sgo dang / yi ge 'jug pa gang zhe na/ a zhes bya ba ni ma skyes pa'i phyir chos thams cad kyi sgo'o zhes bya ba la sogs pa gsungs te/ ma skyes pa la rgya gar gyi skad du a nut+pan+na zhes bya ste/ de ltar ma skyes pa'i don yi ge a'i sgo nas rtogs par 'gyur ba'i phyir yi ge a ni chos thams cad ma skyes par ston pa'i sgo yin no/ /ra zhes bya ba ni rdul dang bral ba'i phyir chos thams cad kyi sgo'o zhes bya ba ni rdul dang bral ba la rgya gar gyi skad du ra dza a pa ga ta zhes bya ste/ yi ge ra'i sgo nas chos thams cad rdul dang bral bar rtogs par 'gyur ba'i phyir yi ge ra ni chos thams cad rdul dang bral ba ston pa'i sgo yin no/ /pa zhes bya ba ni don dam pa ston pa'i phyir chos thams cad kyi sgo'o zhes bya ba ni don dam pa la/ rgya gar skad du pa ra mAr+tha zhes bya ba ste/ yi ge pa'i sgo nas don dam pa rtogs par 'gyur ba'i phyir/ yi ge pa ni don dam par chos thams cad ro gcig par rtogs par byed pa'i sgo yin no/ /tsa zhes bya ba ni 'chi 'pho dang skye ba mi dmigs pa'i phyir/ chos thams cad 'chi 'pho dang skye ba med pas chos thams cad kyi sgo'o zhes bya ba ni tshe 'pho ba dang skye ba la rgya gar gyi skad du ts+ya pa no pa pat+ti zhes bya ste/ yi ge tsa'i sgo nas chos thams cad tshe 'pho ba dang / skye ba med par rtogs par 'gyur ba'i phyir yi ge tsa ni chos thams cad tshe 'pho ba dang / skye ba med par ston pa'i sgo yin no/ /na zhes bya ba ni ming dang bral zhing ming gi rang bzhin ma thob ma stor bas chos thams cad kyi sgo'o zhes bya ba ni ming dang bral ba la rgya gar gyi skad du nA ma a pa ga ta zhes bya ste/ chos thams cad ming dang bral zhing ming gi rang bzhin med par yi ge na'i sgo nas rtogs par 'gyur ba'i phyir/ yi ge na ni don dam par chos thams cad ming dang bral ba ston pa'i sgo yin no/ /ming gi rang bzhin ma thos ma stor zhes bya ba ni ming du gdags par bya ba'i chos dang / ming nyid kyang don dam par dngos po yod par ma grub ste/ ming du gdags su yang med pas ma thob ces bya'o/ /ming dor du yang med pas ma stor zhes bya'o/ /de ltar sngags kyi tshig yi ge 'bru lnga'o/ /a ra pa tsa na zhes bya ba yi ge 'bru re re'i sgo nas don dam par chos thams cad ma skyes pa la sogs par rtogs par 'gyur ba'i shes rab dang [(]ngan [,]dran [)]pa'i gzungs skye bar 'gyur ba'i sgo yin par bstan nas/ de bzhin du gzungs sngags kyi tshig gzhan rnams kyang yi ge re re'i sgo nas chos thams cad don dam par dngos po med par ston pa'i sgo yin par bstan pa'i phyir/ la zhes bya ba ni 'jig rten las 'das shing sred pa'i 'khri shing rgyu dang rkyen yang dag par bcom pa'i phyir chos thams cad kyi sgo'o zhes bya ba la sogs pa gsungs te/ 'jig rten las 'das pa la/ rgya gar gyi skad du lo kot+ta ra zhes bya ste/ don dam par rang bzhin de bzhin nyid ni yongs su dag pa yin pas 'jig rten las 'das pa yin par yi ge la'i sgo nas rtogs par 'gyur ba dang sred pa'i 'khri shing zhes bya ba la rgya gar gyi skad du/ tr-iSh+Na la ta zhes bya ste/ yi ge la'i sgo nas chos thams cad don dam par sred pa'i 'ching ba dang bral bar rtogs par 'gyur ba'i phyir yi ge la ni chos thams cad kyi sgo yin no/ /da ces bya ba ni dul ba dang dul ba'i gnas su yongs su nges pa'i phyir chos thams cad kyi sgo'o zhes bya ba ni dul ba la rgya gar gyi skad du dAn ta zhes bya ste/ ma dul bar byed pa'i nyon mongs pa dang / las rnams don dam par dngos po med par yi ge nga'i sgo nas rtogs par 'gyur te/ de ltar ma dul ba dngos po med par rtogs na dul ba dang dul ba'i gnas su yongs su nges par 'gyur ba'i phyir/ yi ge de ni chos thams cad kyi sgo yin no/ /ba zhes bya ba ni bcings pa dang bral ba'i phyir chos thams cad kyi sgo'o zhes bya ba ni bcings pa la rgya gar gyi skad du ban d+ha na zhes bya ste/ yi ge pa'i sgo nas don dam par chos thams cad bcings pa dang bral bar rtogs par 'gyur ba'i phyir/ yi ge pa ni chos thams cad kyi sgo yin no/ /Da zhes bya ba ni dkrugs ma dang bral ba'i phyir chos thams cad kyi sgo zhes bya ba ni dkrugs ma la rgya gar gyi skad du Da ma zhes bya ste/ yi ge Da'i sgo nas don dam par chos thams cad dkrugs ma'am/ 'khrug pa med par rtogs par 'gyur ba'i phyir/ yi ge Da ni chos thams cad dkrugs ma med par rtogs pa'i sgo yin no/ /sa zhes bya ba ni chags pa mi dmigs par chags par mi 'gyur/ 'ching bar mi 'gyur ba'i phyir chos thams cad kyi sgo'o zhes bya ba ni chags pa la rgya gar gyi skad du sang ga zhes bya ste yi ge sa'i sgo nas chos thams cad chags pa med par rtogs par 'gyur te/ chags pa med na nyon mongs pa'i 'ching ba yang med par rtogs par 'gyur ba'i phyir/ yi ge sa ni chos thams cad chags pa med pa dang / 'ching ba med par 'gyur ba'i sgo yin no/ /ba zhes bya ba ni ngag gi lam dang sgra yang dag par chad pa'i phyir chos thams cad kyi sgo'o zhes bya ba ni ngag gi lam la rgya gar gyi skad du bAg pa thA zhes bya ste/ yi ge ba'i sgo nas don dam par chos thams cad ngag gi lam dang bral zhing / sgrar brjod du med par rtogs par 'gyur ba'i phyir/ yi ge ba ni chos thams cad ngag gi lam dang bral bar rtogs par 'gyur ba'i sgo yin no/ /gong du bcings pa dang bral ba'i skabs su yi ge ba smos pa ni yi ge ba'i ris kyi ba yin no/ /ngag gi lam dang bral ba'i skabs su smos pa'i yi ge bA 'di ni yi ge ba'i ris su gtogs pa'i yi ge pa yin pas lan gnyis su zlos par yang mi 'gyur la yi ge pa 'og ma ni yi ge wa'i yang sbyar ba'i phyir bye brag ni de yod do/ /ta zhes bya ba ni de bzhin nyid las ma g.yos pa'i phyir chos thams cad kyi sgo'o zhes bya ba ni de bzhin nyid la rgya gar gyi skad du ta thA ta zhes bya ste/ yi ge ta'i sgo nas don dam par chos thams cad de bzhin nyid kyi rang bzhin du ro gcig cing / de las mi 'gyur bar rtogs par 'gyur ba'i phyir/ yi ge ta ni chos thams cad de bzhin nyid las ma g.yos par rtogs par 'gyur ba'i sgo yin no/ /ya zhes bya ba ni yang dag pa ji lta ba bzhin du dmigs su med pa'i phyir chos thams cad kyi sgo'o zhes bya ba ni yang dag pa ji lta ba bzhin la rgya gar gyi skad du/ ya thA bad ces bya ste/ yi ge ya'i sgo nas chos thams cad yang dag pa ji lta ba bzhin du rig pas brtags shing gtan la phab na don dam par dmigs su med par rtogs par 'gyur ba'i phyir yi ge ya ni chos thams cad yang dag pa ji lta ba bzhin du dmigs su med par rtogs par 'gyur ba'i sgo yin no/ /sta zhes bya ba ni khengs pa dmigs su med pa'i phyir chos thams cad kyi sgo'o zhes bya ba ni khengs pa la rgya gar gyi skad du stam b+ha zhes bya ste/ yi ge sta'i sgo nas don dam par chos thams cad la nga rgyal las gyur pa'i khengs pa med par rtogs par 'gyur ba'i phyir/ yi ge sta ni chos thams cad khengs pa dmigs su med par rtogs par 'gyur ba'i sgo yin no/ /ka zhes bya ba ni byed pa po dmigs su med pa'i phyir/ chos thams cad kyi sgo'o zhes bya ba ni byed pa po la rgya gar gyi skad du ka ra ka zhes bya ste/ yi ge ka'i sgo nas don dam par chos thams cad la mu stegs can gyis brtags pa'i byed pa po dmigs su med par rtogs par 'gyur ba'i phyir yi ge ka ni chos thams cad la byed pa po mi dmigs par rtogs par 'gyur ba'i sgo yin no/ / sa zhes bya ba ni mnyam pa nyid mi dmigs pas mnyam pa nyid las mi 'da' ba'i phyir chos thams cad kyi sgo'o zhes bya ba ni mnyam pa nyid la rgya gar gyi skad du sa ma ta zhes kyang bya ste/ yi ge sa'i sgo nas mnyam pa nyid kyang dmigs su med par rtogs par 'gyur te/ de ltar mnyam pa nyid du rnam par rtog pa med pa nyid mnyam pa nyid las mi 'da' ba zhes bya'o/ /de bas na yi ge sa ni chos thams cad la mnyam pa nyid mi dmigs pa dang / mnyam pa nyid las mi 'da' bar rtogs par 'gyur ba'i sgo yin no/ /ma zhes bya ba ni bdag gir bya ba mi dmigs pa'i phyir chos thams cad kyi sgo'o zhes bya ba ni bdag gir bya ba la rgya gar gyi skad du ma ma ka ra zhes bya ste/ yi ge ma'i sgo nas don dam par chos thams cad bdag gir bya ba med par rtogs par 'gyur ba'i phyir/ yi ge ma ni chos thams cad bdag gir bya ba mi dmigs par rtogs par 'gyur ba'i sgo yin no/ /ga zhes bya ba ni 'gro ba mi dmigs pa'i phyir chos thams cad kyi sgo'o zhes bya ba ni 'gro ba la rgya gar gyi skad du ga ma ni zhes bya ste/ yi ge ga'i sgo nas don dam par chos thams cad dngos por ma grub par 'gro ba yang dmigs su med par rtogs par 'gyur ba'i phyir/ yi ge ga ni chos thams cad 'gro ba mi dmigs par rtogs par 'gyur ba'i sgo yin no/ /tha zhes bya ba ni gnas mi dmigs pa'i phyir/ chos thams cad kyi sgo'o zhes bya ba ni gnas la rgya gar gyi skad du tha na zhes bya ste/ yi ge tha'i sgo nas chos thams cad dngos po med pas gnas kyang med par rtogs par 'gyur ba'i phyir/ yi ge tha ni chos thams cad gnas mi dmigs par rtogs par 'gyur ba'i sgo yin no/ /dza zhes bya ba ni skye ba mi dmigs pa'i phyir chos thams cad kyi sgo'o zhes bya ba ni skye ba la rgya gar gyi skad du dza ti zhes bya ste/ yi ge dza'i sgo nas don dam par chos thams cad skye ba med par rtogs par 'gyur ba'i phyir yi ge dza ni chos thams cad skye ba mi dmigs par rtogs par 'gyur ba'i sgo yin no/ /sha zhes bya ba ni dbugs dmigs su med pa'i phyir chos thams cad kyi sgo'o zhes bya ba ni dbugs la rgya gar gyi skad du shwa sa zhes bya ste/ yi ge sha'i sgo nas don dam par chos thams cad la dbugs kyi rang bzhin med par rtogs par 'gyur ba'i phyir/ yi ge sha ni chos thams cad la dbugs dmigs su med par rtogs par 'gyur ba'i sgo yin no/ d+ha zhes bya ba ni chos kyi dbyings dmigs su med pa'i phyir chos thams cad kyi sgo'o zhes bya ba ni chos kyi dbyings la rgya gar gyi skad du d+harma d+ha tu zhes bya ste/ yi ge d+ha'i sgo nas don dam par chos kyi dbyings nyid kyang mtshan mar bzung zhing dmigs su med par rtogs par 'gyur ba'i phyir/ yi ge d+ha ni chos thams cad chos kyi dbyings kyi rang bzhin du yang dmigs su med par rtogs par 'gyur ba'i sgo yin no/ /sha zhes bya ba ni zhi gnas dmigs su med pa'i phyir chos thams cad kyi sgo'o zhes bya ba ni zhi gnas la rgya gar gyi skad du sha ma tha zhes bya ste/ yi ge sha'i sgo nas don dam par zhi gnas zhes bya ba yang dmigs su med par rtogs par 'gyur ba'i phyir/ yi ge sha ni chos thams cad la zhi gnas dmigs su med par rtogs par 'gyur ba'i sgo yin no/ /kha zhes bya ba na nam mkha' dang mnyam pa dmigs su med pa'i phyir chos thams cad kyi sgo'o zhes bya ba ni nam mkha' dang mnyam pa la rgya gar gyi skad du kha sa ma zhes bya ste/ yi ge kha'i sgo nas don dam par nam mkha' dang mnyam mo zhes bya bar rtog cing / mtshan mar bzung ba yang med par rtogs par 'gyur ba'i phyir/ yi ge kha ni chos thams cad nam mkha' dang mnyam pa dmigs su med par rtogs par 'gyur ba'i sgo yin no/ /k+Sha zhes bya ba ni zad pa mi dmigs pa'i phyir chos thams cad kyi sgo'o zhes bya ba ni zad pa la rgya gar gyi skad du k+Sha ya zhes bya ste/ yi ge k+Sha'i sgo nas don dam par chos thams cad la mi rtag pa'i mtshan nyid zad pa zhes bya ba dmigs su med par rtogs par 'gyur ba'i phyir yi ge k+Sha ni chos thams cad la zad pa mi dmigs par rtogs par 'gyur ba'i sgo yin no/ /sta zhes bya ba ni bstod pa mi dmigs pa'i phyir chos thams cad kyi sgo'o zhes bya ba ni bstod pa la rgya gar gyi skad du sto t+t+ra zhes bya ba ste/ yi ge sta'i sgo nas don dam par chos thams cad la bstod pa mi dmigs par 'gyur ba'i phyir/ yi ge sta ni chos thams cad la bstod pa mi dmigs par rtogs par 'gyur ba'i sgo yin no/ /dz+nyA zhes bya ba ni ye shes dmigs su med pa'i phyir chos thams cad kyi sgo'o zhes bya ba ni ye shes la rgya gar gyi skad du dz+nyA na zhes bya ste/ yi ge dz+nyA'i sgo nas don dam par shes pa'i don chos dmigs su med par shes par byed pa'i ye shes kyang dmigs su med par rtogs par 'gyur ba'i phyir/ yi ge dz+nyA ni chos thams cad la ye shes dmigs su med par rtogs par 'gyur ba'i sgo yin no/ /rta zhes bya ba ni nyon mongs pa mi dmigs pa'i phyir chos thams cad kyi sgo'o zhes bya ba ni nyon mongs pa'am mi bde ba la rgya gar gyi skad du arti zhes bya ste/ yi ge rta'i sgo nas don dam par chos thams cad dngos po med par nyon mongs pa'am mi bde ba yang dmigs su med par rtogs par 'gyur ba'i phyir yi ge rta ni chos thams cad nyon mongs pa la mi dmigs par rtogs par 'gyur ba'i sgo yin no/ / ha zhes bya ba ni rgyu mi dmigs pa'i phyir chos thams cad kyi sgo'o zhes bya ba ni rgyu la rgya gar gyi skad du he tu zhes bya ste/ yi ge ha'i sgo nas don dam par chos thams cad rgyu dang bral bar rtogs par 'gyur ba'i phyir yi ge ha ni chos thams cad la rgyu mi dmigs par rtogs par 'gyur ba'i sgo yin no/ /b+ha zhes bya ba ni 'jig pa med pa'i phyir chos thams cad kyi sgo'o zhes bya ba ni 'jig pa la rgya gar gyi skad du b+hang ga zhes bya ste/ yi ge b+ha'i sgo nas don dam par chos thams cad skye ba med pas 'jig pa yang med par rtogs par 'gyur ba'i phyir yi ge b+ha ni chos thams cad 'jig pa med par rtogs par 'gyur ba'i sgo yin no/ /tsha zhes bya ba ni mdog mi dmigs pa'i phyir chos thams cad kyi sgo'o zhes bya ba ni mdog la rgya gar gyi skad du tsha bi zhes bya ste/ yi ge tsha'i sgo nas don dam par chos thams cad dngos po med pas mdog bzang ngan yang dmigs su med par rtog par 'gyur ba'i phyir/ yi ge tsha ni chos thams cad mdog mi dmigs par rtog par 'gyur ba'i sgo yin no/ /sma zhes bya ba ni dran pa mi dmigs pa'i phyir chos thams cad kyi sgo'o zhes bya ba ni dran pa la rgya gar gyi skad du sma ra Na zhes bya ste/ yi ge sma'i sgo nas don dam par chos thams cad dngos po med pas dran pa zhes bya ba sems las byung ba'i tshor ba de yang mi dmigs par rtogs par 'gyur ba'i phyir yi ge sma ni chos thams cad mi dmigs par rtogs par 'gyur ba'i sgo yin no/ /ha zhes bya ba ni bod pa mi dmigs pa'i phyir chos thams cad kyi sgo'o zhes bya ba ni bod pa la rgya gar gyi skad du a ba ha na zhes bya ste/ yi ge ha'i sgo nas don dam par chos thams cad dngos po med pas med par bya ba'i dngos po dang bod pa'i ming yang dmigs su med par rtogs par 'gyur ba'i phyir/ yi ge ha ni chos thams cad bod pa mi dmigs par rtogs par 'gyur ba'i sgo yin no/ /tas zhes bya ba ni mos pa mi dmigs pa'i phyir chos thams cad kyi sgo'o zhes bya ba ni mos pa'am spro ba la rgya gar gyi skad du/ u sa ta zhes bya ste/ yi ge ta dang sar sbyar ba'i sgo nas don dam par chos thams cad dngos po med pas mos pa'am/ spro ba yang mi dmigs par rtogs par 'gyur ba'i phyir yi ge tas ni chos thams cad mos pa mi dmigs par rtogs par 'gyur ba'i sgo yin no/ /g+ha zhes bya ba ni stug po mi dmigs pa'i phyir chos thams cad kyi sgo'o zhes bya ba ni stug po la rgya gar gyi skad du/ g+ha na zhes bya ste/ yi ge g+ha'i sgo nas don dam par chos thams cad la stug po'am/ stug por rtog pa med par rtogs par 'gyur ba'i phyir/ yi ge g+ha ni chos thams cad stug po mi dmigs par rtogs par 'gyur ba'i sgo yin no/ /tha zhes bya ba ni sgrub pa mi dmigs pa'i phyir chos thams cad kyi sgo'o zhes bya ba ni sgrub pa la rgya gar gyi skad du/ bi tha pa na zhes bya ste/ yi ge tha'i sgo nas don dam par bsgrubs par bya ba'i chos thams cad dngos po med par rtogs par 'gyur ba'i phyir/ yi ge tha ni chos thams cad sgrub pa mi dmigs par rtogs par 'gyur ba'i sgo yin no/ /Na zhes bya ba ni nyon mongs pa med pas gang 'gro ba med cing 'ong ba med de/ gnas pa med cing 'dug pa med la/ nyal bar 'gyur ba med pas rnam par mi rtog pa'i phyir chos thams cad kyi sgo'o zhes bya ba ni nyon mongs pa la rgya gar gyi skad du ra Na zhes bya ste/ yi ge Na'i sgo nas don dam par nyon mongs pa yang dngos po med pas nyon mongs pa'i dbang gis dngos po gang yang 'gro ba dang / 'ong ba dang / gnas pa dang / 'dug pa dang / nyal bar 'gyur ba yang med la rnam par rtog pa yang med par rtogs par 'gyur ba'i phyir/ yi ge Na ni chos thams cad nyon mongs pa dang / 'gro ba dang / 'ong ba dang / gnas pa dang / 'dug pa dang / nyal bar 'gyur ba dang / rnam par rtog pa med par rtogs par 'gyur ba'i sgo yin no/ /pha zhes bya ba ni 'bras bu dmigs su med pa'i phyir/ chos thams cad kyi sgo'o zhes bya ba ni 'bras bu la rgya gar gyi skad du/ pha la zhes bya ste/ yi ge pha'i sgo nas don dam par chos thams cad dngos po med pa/ 'bras bu yang dmigs su med par rtogs par 'gyur ba'i phyir/ yi ge pha ni chos thams cad 'bras bu med par rtogs par 'gyur ba'i sgo yin no/ /ska zhes bya ba ni phung po dmigs su med pa'i phyir/ chos thams cad kyi sgo'o zhes bya ba ni phung po la rgya gar gyi skad du skan d+ha zhes bya ste/ yi ge ska'i sgo nas don dam par phung po rnams dmigs su med par rtogs par 'gyur ba'i phyir yi ge ska ni chos thams cad phung po dmigs su med par rtogs par 'gyur ba'i sgo yin no/ /yas zhes bya ba ni mi bde ba mi dmigs pa'i phyir chos thams cad kyi sgo'o zhes bya ba ni mi bde ba la rgya gar gyi skad du yas kar zhes bya ste/ yi ge ya dang sar sbyar ba'i sgo nas don dam par chos thams cad dngos po med pas mi bde ba yang dmigs su med par rtogs par 'gyur ba'i phyir/ yi ge yas ni chos thams cad mi bde ba mi dmigs par rtogs par 'gyur ba'i sgo yin no/ /tsa zhes bya ba ni spyod pa mi dmigs pa'i phyir chos thams cad kyi sgo'o zhes bya ba ni spyod pa la rgya gar gyi skad du tsAr+ya zhes bya ste/ yi ge tsa'i sgo nas don dam par chos thams cad dngos po med pas lus dang ngag dang yid kyi spyod pa yang dmigs su med par rtogs par 'gyur ba'i phyir yi ge tsa ni chos thams cad la spyod pa mi dmigs par rtogs par 'gyur ba'i sgo yin no/ /Ta zhes bya ba ni sdug bsngal mi dmigs pa'i phyir chos thams cad kyi sgo'o zhes bya ba ni sdug bsngal la rgya gar gyi skad du Ta da ka ra zhes bya ste/ yi ge Ta'i sgo nas don dam par chos thams cad dngos po med pas sdug bsngal ba'am gnod pa yang dmigs su med par rtogs par 'gyur ba'i phyir/ yi ge Ta ni chos thams cad sdug bsngal ba'am gnod pa mi dmigs par rtogs par 'gyur ba'i sgo yin no/ /D+ha zhes bya ba ni g.yogs pa mi dmigs pas mthar thug par gnas par 'chi 'pho med cing skye ba med pa'i phyir/ /chos thams cad kyi sgo'o zhes bya ba ni g.yogs pa la rgya gar gyi skad du D+hA ka na zhes bya ste/ yi ge D+ha'i sgo nas don dam par chos thams cad dngos po med pas nyon mongs pa'i sgrib pas g.yogs shing nyon mongs pa'i dbang gis 'khor ba'i mtha' la thug gi bar du/ tshe 'pho ba dang skye ba med par rtogs par 'gyur ba'i phyir/ yi ge D+ha ni chos thams cad g.yogs pa mi dmigs pa dang / tshe 'pho ba dang skye ba med par rtogs par 'gyur ba'i sgo yin no zhes bstan pa'o/ /yi ge'i 'bru 'di rnams ka la sogs pa'i go rims bzhin du ma smos pa ni/ gzungs sngags rnams las go rims med par 'byung ba'i phyir ro/ /de ltar gzungs sngags kyi tshig rnams las 'byung ba'i yi ge'i 'bru re re'i tshig gi don la brtags shing / bsgoms na chos thams cad ma skyes pa la sogs pa'i don rtogs par 'gyur ba'i gzungs zhes bya ba shes rab dang dran pa skye bar 'gyur ba'i sgo yin pa'i phyir/ yi ge de dag la gzungs kyi sgo zhes bya'o/ /de yan chad ni yi ge'i tha snyad med do zhes bya ba ni yi ge'i sgo nas don rtogs par bya ba'i yi ge rnams ni der zad do/ /de las lhag pa gzhan med do zhes bya ba'i don to/ /de ci'i phyir zhe na/ de ni 'di ltar gang la yang gang gi tha snyad du bya ba dang / gang gis brjod pa dang zhes bya ba la sogs pa ni yi ge'i tha snyad du bya ba de las lhag pa gzhan med pa'i gtan tshigs bstan pa ste/ tshig dang yi ger brjod pa'i sgo nas tha snyad du bya ba dang / brjod pa dang / gzhan la bstan pa dang / yi ger bri ba dang / snang zhing gsal bar bya ba dang / bklag par bya ba thams cad ni/ de dag tu zad do/ /de lta bu'i ming du bya ba thams cad 'di'i khongs su 'dus te/ de las lhag pa gzhan gang yang med do zhes bya ba'i don to/ /rab 'byor 'di lta ste dper na nam mkha' bzhin du chos thams cad khong du chud par bya ste zhes bya ba ni gzungs kyi yi ge de rnams kun rdzob tu sgra dang tha snyad du brjod pa'i sgo nas chos thams cad la khyab pa dang / don dam par mnyam pa nyid du ro gcig pa'i dpe bstan pa'o/ / rab 'byor byang chub sems dpa' sems dpa' chen po gang gis a la sogs pa'i yi ge la mkhas par bya ba 'di yongs su shes na/ de ni sgra la yang chags par mi 'gyur te zhes bya ba la sogs pa ni gzungs kyi sgo 'di la mkhas pa'i yon tan bstan pa ste/ sgra gang la yang chags par mi 'gyur zhes bya ba ni yi ge brjod cing bstan pa'i don rnams ma skyes pa la sogs par khong du chud pas dngos po de dag la chags par mi 'gyur ba bstan pa'o/ /de bas na don de nyid gsal bar bstan pa'i phyir/ thams cad chos nyid kyis yang dag par sgrub par 'gyur zhes bya ba gsungs te/ tshig dang yi ges brjod do cog thams cad yi ge a la sogs pa'i sgo nas don dam par chos thams cad gzod ma nas ma skyes pa la sogs par rtogs nas stong pa nyid kyi chos nyid du sgom par 'gyur ro zhes bya ba'i don to/ /sgra shes par bya ba la mkhas pa thob par 'gyur ro zhes bya ba ni yi ges tshig tu brjod pa'i sgra thams cad la kun rdzob dang don dam pa'i tshul du mkhas par 'gyur bar bstan pa'o/ /rab 'byor byang chub sems dpa' gang gis a la sogs pa'i yi ge la 'jug pa'i phyag rgya 'di dang zhes bya ba la sogs pa ni gzungs kyi sgo 'di dag thos pa dang / nyams su len pa dang / gzhan la yang ston pa'i phan yon rnam pa nyi shu yod pa bstan pa ste/ phyag rgya zhes bya ba ni a la sogs pa yi ge'i 'bru re re yang ma skyes pa la sogs pa'i don ston pa'i rtags dang mtshan ma yin pa'i phyir ro/ /phyag rgya'i tshig ces bya ba ni yi ge mang po bsdoms pa las sngags kyi tshig tu brjod du rung ba la bya'o/ /phan yon nyi shu ni dran pa dang blo gros nas spobs pa dang ldan pa'i bar du phan yon gcig tu bgrang ngo / /gzungs kyi sgo 'di yang nyon mongs pa med par thob cing zhes bya ba nas/ tshul bzhin du gnas par 'gyur ba dang zhes bya ba'i bar du yang phan yon gcig tu bgrang ngo / /sgra la mkhas pa la sogs pa man chad ni re rer bgrangs na phan yon nyi shur 'gyur ro/ /theg pa chen po'i don ni sngar bshad pa bzhin no/ /shes rab kyi pha rol tu phyin pa 'bum pa rgya cher bshad pa las/ le'u bcu pa'o// //de ltar theg pa chen po gang lags zhes bcom ldan 'das la/ rab 'byor gyis zhus pa'i lan/ bcom ldan 'das kyis theg pa chen po rnam pa nyi shu rtsa gcig bstan nas/ de'i 'og tu ji ltar na theg pa chen po la yang dag par zhugs pa lags zhes zhus pa'i don bstan pa'i phyir/ rab 'byor gang yang khyod 'di skad du ji ltar na byang chub sems dpa'i theg pa chen po la yang dag par zhugs pa yin zhes zer ba ni zhes bya ba la sogs pa gsungs te/ rab 'byor 'di la byang chub sems dpa' sems dpa' chen po pha rol tu phyin pa drug la spyod cing sa nas sar 'phar te zhes bya ba ni byang chub sems dpa'i sa bcu re re la yang pha rol tu phyin pa drug yongs su rdzogs par byed cing sa gong nas gong du 'phar ba ni theg pa chen po la yang dag par zhugs pa yin no zhes bstan pa'o/ /'di lta ste chos thams cad 'pho ba med pas chos gang yang 'ong ba med cing 'gro ba med de/ 'pho ba'am nye bar 'pho ba med do zhes bya ba ni de ltar sa nas sar 'phar ba yang kun rdzob tu bstan par zad kyi/ don dam par ni chos thams cad mnyam pa nyid du ro gcig pas byang chub sems dpa' sa dang 'phar bar byed pa'i byang chub sems dpa' yang mi dmigs pa'i phyir sa nas sar 'phar zhing 'gro ba dang 'pho ba med do zhes bstan pa ste/ 'ong ba dang 'gro ba dang 'pho ba dang / nye bar 'pho ba zhes bya ba ni 'phar zhing 'gro ba'i rnam grangs so/ /'on kyang chos thams cad kyis gang yin pa de la rlom sems su byed pa'am sems pa med de zhes bya ba ni de ltar don dam par chos thams cad mnyam pa nyid du ro gcig ste/ 'pho ba med pas 'phar zhing 'pho bar bya ba'i gnas kyis rlom sems su 'gyur ba'am mtshan mar 'dzin pa med do zhes bstan pa'o/ /sa yongs su sbyong ba yang mi byed pa ma yin la zhes bya ba ni kun rdzob tu byang chub sems dpa'i sa bcu'i yon tan rnams thob par mi byed pa'am/ mi mthun pa'i phyogs kyi skyon rnams mi sel ba yang ma yin no zhes bya ba'i don to/ /sa de yang yang dag par rjes su mi mthong ngo zhes bya ba ni de ltar thabs mkhas pas kun rdzob tu sa yongs su sbyong yang don dam par sa de la dngos por mi lta'o zhes bya ba'i don to/ /de la byang chub sems dpa' sems dpa' chen po'i sa yongs su sbyang ba gang zhe na/ rab 'byor sa dang po la gnas pa'i byang chub sems dpa' sems dpa' chen pos yongs su sbyang ba bcu po 'di dag bya ste zhes bya ba la sogs pa ni byang chub sems dpa' sems dpa' chen po sa dang po la gnas pas sems yongs su sbyang ba bcu dang ldan na theg pa chen po la yang dag par zhugs pa yin par bstan pa ste/ bcu gang zhe na de mi dmigs pa'i tshul gyis lhag pa'i bsam pa la sogs pa yongs su sbyang ba dang zhes bya ba ni sa dang po la gnas pa'i byang chub sems dpas thog mar bsam pa yongs su dag par bya ste/ bsam pa yongs su dag pa yang rnam pa thams cad mkhyen pa nyid dang ldan pa'i sems bskyed pas bsod nams dang ye shes kyi tshogs su gyur pa'i dge ba'i rtsa ba mang po bsags shing sems yongs su sbyong ba ni lhag pa'i bsam pa yongs su sbyang ba zhes bya'o/ /sogs pa'i tshig gis byang chub sems dpa'i sa bcu'i yon tan thob par bya ba dang / skyon rnams spong ba'i phyir sems sbyong ba'o/ /mtshan mi dmigs pa'i phyir phan pa'i dngos po yongs su sbyong zhing sems can mi dmigs pa'i phyir sems can thams cad la sems mnyam pa nyid yongs su sbyang ba dang zhes bya ba ni sems can rnams thams cad la nye ring dang / byams sdang med par sems mnyam par byas nas/ bsdu ba rnam bzhi'i dngos pos phan 'dogs shing byams pa dang / snying rje dang / dga' ba dang / btang snyoms dang / tshad med pa bzhi sgrub cing phan gdags pa'i mtshan ma dang / sems can du dmigs pa yang med par sems can yongs su sbyong ba ni sems can thams cad la sems mnyam pa nyid yongs su sbyang ba zhes bya'o/ /sbyin pa dang gtong ba dang len pa mi dmigs pa'i phyir gtong ba yongs su sbyang ba dang zhes bya ba ni kun rdzob tu thabs la mkhas pas sbyin pa yongs su btang yang don dam par sbyin pa'i dngos po dang / gtong ba po dang / len pa po gsum la dngos por mi lta zhing mtshan mar mi 'dzin pa ni sbyin pa yongs su sbyang ba'o/ /des rlom sems su mi bya ba'i phyir dge ba'i bshes gnyen bsten pa yongs su sbyang ba dang zhes bya ba ni gang rnam pa thams cad mkhyen pa nyid thob par bya ba'i phyir/ dge ba la yang dag par bskul ba dang / dge ba la 'jog pa dang / bzhag nas kyang dge ba las nyams par mi byed pa'i dge ba'i bshes gnyen de lta bu la bsnyen bkur bya ba dang / rim gror bya ba dang / bkur stir byas shing bla mar bya ste/ bsten kyang des rlom sems su mi byed cing mi bsnyems pa ni/ dge ba'i bshes gnyen bsten pa yongs su sbyang ba'o/ /chos thams cad mi dmigs pa'i phyir chos btsal ba yongs su sbyang ba dang zhes bya ba ni rnam pa thams cad mkhyen pa nyid thob par bya ba'i phyir dge ba'i gshes gnyen de las theg pa chen po'i chos mnyan pa dang / bsam pa dang / bsgom pa'i lung nod cing nyan thos dang / rang sangs rgyas kyi sar mi ltung bar byed la/ don dam par chos de dag mi dmigs pa ni/ chos btsal ba yongs su sbyang ba'o/ /khyim mi dmigs pa'i phyir yang dang yang 'byung ba yongs su sbyang ba dang zhes bya ba ni khyim gyi 'du 'dzi spangs te/ tshe rabs thams cad du de bzhin gshegs pa'i bstan pa la rab tu 'byung zhing de la bar chad med par yang byed la/ don dam par 'du 'dzi'i gnas spang bar bya ba'i khyim nyid kyang mi dmigs pa ni/ yang dang yang 'byung ba yongs su sbyang ba'o/ /mtshan dang dpe byad bzang po'i mtshan ma mi dmigs pa'i phyir sangs rgyas kyi sku la mos pa yongs su sbyang ba dang zhes bya ba ni sangs rgyas kyi sku mtshan dang dpe byad kyis brgyan pa mthong nas nam rnam pa thams cad mkhyen pa nyid ma thob kyi bar du sangs rgyas yid la bya ba dang mi 'bral bar byed kyang / don dam par mtshan dang dpe byad kyi mtshan ma mi dmigs pa ni sangs rgyas kyi sku la mos pa yongs su sbyang ba'o/ /chos kyi rnam pa mi dmigs pa'i phyir chos rnam par 'byed pa yongs su sbyang ba dang zhes bya ba ni/ sems can yongs su smin par bya ba'i phyir de bzhin gshegs pa'i gsung rab yan lag bcu gnyis rnams kun rdzob tu rnam par phye zhing ston la/ don dam par chos de dag kyang mi dmigs pa ni chos rnam par dbye ba yongs su sbyang ba'o/ /chos kyi yang dag pa nyid mi dmigs pa'i phyir nga rgyal dang khengs pa bsal ba yongs su sbyang ba dang zhes bya ba ni nga rgyal dang khengs pa skye ba'i rgyu dbang phyug dang / mang du thos pa la sogs pa'i chos rnams yang dag par yod pa ma yin par shes nas nga rgyal dang khengs pa spangs pas nam yang rigs dma' bar mi skye bar byed pa ni/ nga rgyal dang khengs pa bsal ba yongs su sbyang ba'o/ /tshig mi dmigs pa'i phyir bden pa'i tshig yongs su sbyang ba ste zhes bya ba ni kun rdzob tu ji skad du smras pa de bzhin du byed de/ brdzun du mi smra zhing sems can mi slu ba dang / don dam par tshig mi dmigs pa ni bden pa'i tshig yongs su sbyang ba'o/ /rab 'byor yongs su sbyang ba bcu po de dag ni byang chub sems dpa' sems dpa' chen po sa dang po la gnas pas bya ba dag go zhes bya ba ni byang chub sems dpa' sa dang po la gnas pas yongs su sbyang ba bcu po de dag yongs su sbyong na theg pa chen po la yang dag par zhugs pa yin no zhes bstan pa'o/ /rab 'byor gzhan yang byang chub sems dpa' sems dpa' chen po sa gnyis pa la gnas pas chos brgyad po 'di dag yang dang yang du yid la bya ste/ de la nan tan du bya'o zhes bya ba la sogs pa ni sa gnyis pa la gnas pa'i byang chub sems dpas chos brgyad yang dang yang du yid la bya zhing nan tan du bya ba bstan pa ste/ brgyad gang zhe na/ 'di lta ste/ tshul khrims yongs su dag pa dang zhes bya ba ni byang chub sems dpa' sa gnyis pa la gnas pas/ tshul khrims kyi pha rol tu phyin pa yongs su rdzogs par bya ba'i phyir tshul khrims yongs su dag par bya ste/ tshul khrims yongs su dag pa de yang nyan thos dang / rang sangs rgyas kyi sems yid la mi byed pa dang / bla na med pa'i byang chub la bar chad du 'gyur ba 'chal ba'i tshul khrims kyi chos rnams yid la mi byed pa'o/ /byas pa shes shing drin du gzo ba zhes bya ba ni sems can thams cad la byams pa spel ba'i phyir phan pa cung zad cig byas kyang 'khor ba'i mtha' la thug gi bar du dran zhing byas pa chud mi gson na phan pa chen po byas pa lta ci smos te/ drin du gze zhing phan pa'i lan ldon pa'o/ /bzod pa'i mthu la gnas pa dang zhes bya ba ni sems can rnams kyi nyes pa la mi lta ba dang / sems can rnams la gnod sems med cing 'tshe ba med pa'o/ /rab tu dga' zhing spro ba myong bar bya ba dang zhes bya ba ni sems can thams cad theg pa gsum la btsud de yongs su smin par byas na/ bdag gis sems can rab tu dga' zhing spro ba tshim par 'gyur ba'o/ /sems can thams cad yongs su mi gtang ba dang zhes bya ba ni byang chub sems dpa' sems can gyi don sgrub pa'i phyir/ sems can thams cad la phan 'dogs shing yongs su skyob pa mi gtong ba'o/ /snying rje chen po mngon du bya ba dang zhes bya ba ni byang chub sems dpa' bdag bde ba phun sum tshogs pa la gnas kyang sems can sdug bsngal ba mthong na snying rje chen pos gdung ste/ sems can sdug bsngal ba 'di dag sdug bsngal las thar bar bya ba'i phyir/ bdag bskal pa du mar sems can dmyal ba'i sdug bsngal yang bzod par bya ste/ sems can de dag sangs rgyas kyi ye shes ma thob kyi bar du snying rje chen po mngon du byas nas/ sems can gyi don la spro zhing skyo ba med pa'o/ /bla ma bsnyen bkur zhing dad pas gus par bya ba dang zhes bya ba ni dam pa'i chos ston pa'i mkhan po dang / slob dpon la dad pa dang gus pa bskyed de bsnyen bkur byed pa'o/ /pha rol tu phyin pa rnams la brtson zhing tshol ba ste zhes bya ba ni sems can yongs su smin par bya ba dang / byang chub kyi phyogs yongs su rdzogs par bya ba'i phyir pha rol tu phyin pa drug spyod pa la brtson zhing don sgrub pa'o/ /rab 'byor chos brgyad po de dag ni byang chub sems dpa' sems dpa' chen po sa gnyis pa la gnas pas yang dang yang du yid la bya zhing de dag la nan tan du bya ba dag go zhes bya ba ni chos brgyad po de dag yang dang yang du yid la byed cing de dag la nan tan du byed na theg pa chen po la yang dag par zhugs pa yin no zhes bstan pa'o/ /rab 'byor gzhan yang byang chub sems dpa' sems dpa' chen po sa gsum pa la gnas pas/ chos lnga la gnas par bya ste zhes bya ba la sogs pa ni sa gsum pa la gnas pa'i byang chub sems dpa' gnas par bya ba'i chos lnga bstan pa ste/ mang du thos pas mi ngoms shing de la yang yi ge la mngon par ma zhen pa dang zhes bya ba ni/ byang chub sems dpa' sa gsum pa rang bzhin gyis mang du thos pa tshol te/ dam pa'i chos tshigs su bcad pa gcig mnyan pa'i phyir yang / stong gsum gyi stong chen po'i 'jig rten gyi khams me ma mur gyis gang ba yang / brgal zhing 'gro ba lta bur kun rdzob tu mang du thos pas chog mi shes par byed kyang / don dam par tshig dang yi ge la mtshan mar mi 'dzin cing chags par yang mi byed pa'o/ /zang zing med par chos kyi sbyin pa rnam par byed cing / des kyang rlom sems su mi 'gyur ba dang zhes bya ba ni/ de ltar mang du thos pa bstsags nas gzhan la chos ston pa'i tshe/ chos bstan pa de'i 'bras bu bla na med pa'i byang chub thob par bya bar yang mi sems na 'jig rten gyi rnyed pa dang bkur sti thob par bya bar sems pa lta ci smos te/ de ltar chos kyi sbyin pa byas pa'i 'bras bu la re ba med cing / chos kyi sbyin pa des kyang rlom sems su mi byed pa ni zang zing med par chos kyi sbyin pa byed pa'o/ /sangs rgyas kyi zhing yongs su dag par bya ba'i dge ba'i rtsa ba bskyed cing yongs su bsngo yang des rlom sems mi 'gyur ba dang zhes bya ba ni sangs rgyas kyi zhing yongs su dag par 'gyur ba'i dge ba'i rtsa ba rnams bskyed pa'i tshe/ dge ba'i rtsa ba 'dis nam bdag sangs rgyas su gyur pa'i tshe bdag gi sangs rgyas kyi zhing yongs su dag par gyur cig ces yongs su bsngo zhing des kyang rlom sems su mi byed cing mtshan mar mi 'dzin pa'o/ /dpag tu med pa'i 'khor bas yongs su skyo ba med cing des kyang rlom sems su mi 'gyur ba dang zhes bya ba ni dge ba'i rtsa ba gang gis sems can yongs su smin par 'gyur ba dang / sangs rgyas kyi zhing yongs su dag par 'gyur ba'i dge ba'i rtsa ba de lta bu bskyed pa la rnam pa thams cad mkhyen pa nyid yongs su rdzogs par ma gyur gyi bar du 'khor ba la gnas shing / 'khor ba yun ring pos mi skyo bar dge ba'i rtsa ba bskyed kyang des rlom sems su mi 'gyur ba'o/ /ngo tsha shes shing khrel yod pa la gnas kyang des rlom sems su mi 'gyur ba ste zhes bya ba ni byang chub sems dpas bya ba mi rigs pa rnams byas na ngo tsha zhing khrel gyis dogs par 'gyur ba ste/ byang chub sems dpas bla na med pa'i byang chub tu sems bskyed la/ de'i 'og tu nyan thos dang rang sangs rgyas kyi sems bskyed na byang chub sems dpa' la khrel ba dang ngo tsha bar 'gyur te/ de bas na nyan thos dang rang sangs rgyas kyi sems mi bskyed pa ni byang chub sems dpa' ngo tsha shes shing khrel yod pa la gnas pa'o/ /rab 'byor chos lnga po de dag ni byang chub sems dpa' sems dpa' chen pos gsum pa la gnas par bya ba dag go zhes bya ba ni chos lnga po de dag la gnas na/ theg pa chen po la yang dag par zhugs pa yin no zhes bstan pa'o/ /rab 'byor gzhan yang byang chub sems dpa' sems dpa' chen po sa bzhi pa la gnas pas chos bcu po 'di dag yongs su blangs shing gnas par bya'o/ /de la yongs su gtang bar mi bya'o zhes bya ba la sogs pa ni byang chub sems dpa' sa bzhi pa la gnas pas spyad par bya ba bstan pa ste/ dgon pa la gnas pa dang zhes bya ba ni nags tshogs dgon pa na gnas pa 'ba' zhig la mi bya'i/ nyan thos dang rang sangs rgyas kyi yid la bya ba dman pa dang ma 'dres par gang zag dang chos gnyi ga la bdag med par rtogs shing chos gang la yang dngos por mi 'dzin pa nyid sems dben pa la gnas pas dgon pa la gnas pa yin no/ /'dod pa chung ba rnams dang zhes bya ba ni byang chub sems dpa' bla na med pa yang dag par rdzogs pa'i byang chub la yang chags pa dang 'dod pa mi skyed na/ 'jig rten gyi lus dang longs spyod la lta smos kyang ci dgos te/ de ltar 'jig rten dang 'jig rten las 'das pa'i lus dang longs spyod la ma chags shing 'dod pa mi skye ba ni 'dod pa chung ba'o/ /chog shes pa dang zhes bya ba ni byang chub sems dpa' rnam pa thams cad mkhyen pa nyid brnyas kyang de la dngos por mi 'dzin cing des rlom sems su mi 'gyur na/ 'jig rten gyi lus dang longs spyod pa chags shing de bas lhag pa gzhan tshol ba lta ci smos te/ de ltar snga ma rnyed pa tsam gyis chog gis gzhan lhag pa mi tshol ba la chog shes pa zhes bya'o/ /sbyangs pa'i yon tan gyi sdom pa mi gtong ba dang zhes bya ba ni chos zab mo rtogs nas chos rnams la mtshan mar 'dzin cing rnam par rtog pa mi 'byung bar sdom pa mi gtong ba ste/ de ltar rnam par rtog pa sbyangs pa'i yon tan dang ldan pa la sbyangs pa'i yon tan gyi sdom pa yongs su mi gtong ba zhes bya'i phyag dar khrod pa la sogs pa 'ba' zhig la ni mi bya'o/ /bslab pa yongs su mi gtang ba dang zhes bya ba la byang chub sems dpas bslab pa don du sgrub pa ni rnam par mi rtog par bslab pa ste/ nyan thos dang rang sangs rgyas la sogs pa'i bslab pa rnam par rtog pa dang bcas pa rnams yid la mi byed pa'o/ /'dod pa'i yon tan la smad pa dang zhes bya ba ni 'dod pa'i yon tan lnga rnams la skyon du mthong zhing chags pa'i sems mi bskyed pa'o/ /mya ngan las 'da' ba dang ldan pa'i sems bskyed pa dang zhes bya ba ni 'khor ba'i rgyur 'gyur ba'i chos rnams la mngon par 'du mi byed cing rnam par mi rtog pa'o/ /rdzas thams cad yongs su gtang ba dang zhes bya ba ni phyi nang dngos po thams cad la mtshan mar mi 'dzin cing dngos por mi lta ba nyid du yongs su gtong ba'o/ /sems zhum pa med pa dang zhes bya ba ni rnam par shes pa rnams kyi yul la sems mi 'brang zhing ma chags pa la sems zhum pa med pa zhes bya'o/ /dngos po thams cad la ltos pa med pa ste zhes bya ba ni phyi nang gi dngos po thams cad dngos por mi lta zhing yid la mi byed pa'o/ /rab 'byor chos bcu po de dag ni byang chub sems dpa' sems dpa' chen po sa bzhi pa la gnas pas yongs su gtong bar mi bya zhing / yang dag par blangs te gnas par bya ba dag go zhes bya ba ni sa bzhi pa la gnas pa'i byang chub sems dpas chos bcu po de dag la gnas shing yongs su ma btang na theg pa chen po la yang dag par zhugs pa yin no zhes bstan pa'o/ /rab 'byor gzhan yang byang chub sems dpa' sems dpa' chen pos sa lnga pa la gnas pas chos drug po 'di dag yongs su spang bar bya ste zhes bya ba la sogs pa ni byang chub sems dpa' sa lnga pa la sogs pas/ byang chub sems dpa'i skyon du 'gyur ba'i chos rnams yongs su spang bar bya ba bstan pa ste/ khyim pa dang bsten pa yongs su spang bar bya ba dang zhes bya ba ni skabs 'dir khyim pa dang lhan cig tu 'grogs pa spang bar bya ba 'ba' zhigs la ni mi bya'i/ khyim gyi gnas 'du 'dzi can spangs te/ rab tu byung nas skra dang kha spu bregs shing gos ngur smrig bgos te/ sems can gyi don spyad par bya ba'i khyim gyi gnas bsten par mi bya'o zhes bstan pa'o/ /dge slong ma dang bsten pa dang zhes bya ba ni 'dod pa'i 'dod chags la chags pa dang / gos la sogs pa zang zing la chags pa'i sems kyis dge slong ma dang se gol gtogs pa tsam yang lhan cig tu gnas par mi bya ba bstan pa'o/ /rigs la ser sna med pa dang zhes bya ba ni byang chub sems dpa' bdag nyid rgyal rigs dang / bram ze dang / khyim bdag gi rigs gang gi khyim du chud cing rnyed pa dang / bkur sti byas pa'i khyim der gzhan dag chud cing rnyed pa dang / bkur sti byas na 'di ltar sems bskyed par bya ste/ sems can 'di dag bdag gis bde ba'i yo byad thams cad sbyar ba'i rigs pa las/ sems can de dag bdag cag rang rang gi bsod nams kyis bde bar 'gyur na de la bdag gis ser sna dang phrag dog mi bya'o snyam du sems shing phrag dog mi bskyed pa'o/ /'du 'dzi'i gnas dang zhes bya ba ni skabs 'dir mi mang po'i 'du 'dzi spang ba 'ba' zhig la mi bya'i/ gang na nyan thos dang rang sangs rgyas yod pa'am/ nyan thos sam rang sangs rgyas kyi theg pa'i gtam zer ba yod pa'am/ nyan thos dang rang sangs rgyas kyi theg pa'i sems bskyed par 'gyur ba'i gnas de lta bur byang chub sems dpa' gnas par bya ba la 'du 'dzi'i gnas yongs su spang ba zhes bya'o/ /gnod sems dang zhes bya ba ni byang chub sems dpas sems can rnams la gnod pa dang 'tshe bar 'gyur ba'i sems sam/ thab mo dang rtsod par 'gyur ba'i sems mi bskyed pa la gnod sems yongs su spang ba zhes bya'o/ /bdag bstod cing gzhan smod pa zhes bya ba ni don dam par chos thams cad mnyam pa nyid du rtogs pas bdag dang gzhan du bye brag tu mi 'byed cing tha dad du mi lta ba'o/ /chos drug po de dag ni yongs su spang bar bya'o zhes bya ba ni sa lnga pa la gnas pa'i byang chub sems dpas chos drug po de dag yongs su spangs na theg pa chen po la yang dag par zhugs pa yin no zhes bstan pa'o/ /yang chos bco brgyad yongs su spang bar bya ste zhes bya ba ni sa lnga pa la gnas pas spang bar bya ba'i chos drug po de dag tu ma zad kyi/ gzhan yang mi dge ba bcu'i las kyi lam rnams dang / lhag pa'i nga rgyal la sogs pa chos bco brgyad kyang yongs su spong bar bya'o zhes bstan pa'o/ / 'di ltar mi dge ba bcu'i las kyi lam rnams yongs su spang bar bya'o zhes bya ba ni lus kyis srog gcod pa dang / ma byin par len pa dang / 'dod pas log par spyod pa dang / ngag gis brdzun du smra ba dang / phra ma zer ba dang / ngag rtsub mo dang / tshig khyal pa zer ba dang / yid kyis log par lta ba dang / gnod sems dang / chags sems bskyed pa ste/ chos bcu po 'di dag spyad na bde 'gro thob par bya ba la yang bar du gcod par 'gyur na/ 'phags pa'i lam dang / bla na med pa yang dag par rdzogs pa'i byang chub 'thob par bya ba lta smos kyang ci dgos snyam nas/ mi dge bcu'i las kyi bag chags yan chad kyang yongs su spong ba'o/ /lhag pa'i nga rgyal dang zhes bya ba ni rigs btsun pa dang / mang du thos pa la sogs pa yon tan gang gis nga rgyal skye bar 'gyur ba'i chos de lta bu don dam par gang yang dngos po yod par mi lta bas de'i phyir bdag yon tan 'di lta bus gzhan las lhag go snyam pa'i nga rgyal skye ba med pa la/ lhag pa'i nga rgyal yongs su spang ba zhes bya'o/ /khengs pa dang zhes bya ba ni sems can gzhan la brnyas pa'i sems kyis khengs pa skyes te/ de ltar brnyas par bya ba'i dngos po de lta bu don dam par mi dmigs pa'i phyir/ khengs pa yongs su spong ba'o/ /phyin ci log rnams dang zhes bya ba ni chos thams cad stong pa'i rang bzhin yin pa las dngos po yod par lta ba ni byang chub sems dpa'i phyin ci log yin te/ chos thams cad la dngos po yod par mi lta ba ni phyin ci log yongs su spong ba'o/ /the tshom dang zhes bya ba ni de bzhin nyid dang / bla na med pa yang dag par rdzogs pa'i byang chub la yid gnyis mi za ba'o/ /'dod chags dang / zhe sdang dang / gti mug nyams rangs su mi 'dor ba zhes bya ba ni dngos po gang la chags pa dang / zhe sdang dang / gti mug par 'gyur ba'i dngos po dang / 'dod chags dang / zhe sdang dang / tig mug nyid kyang yang dag par rjes su mi mthong bas de dag nyams rangs su mi gtong ba'o/ /chos bco brgyad po dag ni byang chub sems dpa' sems dpa' chen po sa lnga pa la gnas pas yongs su spang bar bya'o zhes bya ba ni/ byang chub sems dpa' sa lnga pa la gnas pas skyon du 'gyur ba'i chos bco brgyad po 'di rnams yongs su spangs na theg pa chen po la yang dag par zhugs pa yin no zhes bstan pa'o/ /rab 'byor gzhan yang byang chub sems dpa' sems dpa' chen po sa drug pa la gnas pas chos drug yongs su rdzogs par bya ste zhes bya ba la sogs pa ni/ sa drug pa la gnas pa'i byang chub sems dpas pha rol tu phyin pa drug yongs su rdzogs par bya ba dang / chos drug yongs su spang bar bya ba bstan pa ste/ 'di ltar pha rol tu phyin pa drug gi zhes bya ba ni pha rol tu phyin pa drug yongs su rdzogs par byas na/ shes par bya ba thams cad kyi mthar thug par 'gyur ba'i phyir pha rol tu phyin pa drug yongs su rdzogs par bya'o/ /gzhan yang chos drug yongs su spang bar bya ste zhes bya ba ni sa drug pa la gnas pa'i byang chub sems dpas pha rol tu phyin pa drug yongs su rdzogs par bya ba 'ba' zhig tu ma zad kyi/ byang chub sems dpa'i skyon du 'gyur ba'i chos drug kyang yongs su spang bar bya'o zhes bstan pa ste/ de dag kyang rang log tu zad do/ /rab 'byor gzhan yang byang chub sems dpa' sems dpa' chen po sa bdun pa la gnas pas chos nyi shu mi bya ste zhes bya ba la sogs pa ni byang chub sems dpa' sa bdun pa la gnas pas bya ba ma yin pa dang / yongs su rdzogs par bya ba'i chos rnams bstan pa ste/ de la bdag tu 'dzin pa dang / srog tu 'dzin pa dang / gang zag tu 'dzin pa bzhi mi bya'o zhes smos pa ni mu stegs can gyi bdag tu lta ba rnams ni sa dang po la spangs zin pas skabs 'dir de dag spong ba la ni mi bya'i/ sa bdun pa'i byang chub sems dpa' mtshan ma med pa la gnas pa yin pa'i phyir/ 'jig rten gyi tha snyad tsam du yang bdag tu lta ba la sogs pa'i mtshan mar bzung bar mi bya ba bstan pa'o/ /chad par 'dzin pa dang / rtag par 'dzin par mi bya ba ni chos thams cad skye ba dang / 'gag pa med par rtogs pa'i phyir ro/ /mtshan ma'i 'du shes su mi bya'o zhes bya ba ni sa bdun pa la gnas pa'i byang chub sems dpa' mtshan ma med pa la gnas pa yin pas mtshan ma'i 'du shes byung na byang chub sems dpa'i nyon mongs par 'gyur ba'i phyir ro/ /rgyur lta ba dang zhes bya ba ni rgyu las 'bras bu 'byung bar lta ba'i mtshan ma dang yang bral ba'i phyir ro/ /ming dang / gzugs dang / phung po dang / khams dang / skye mched dang / khams gsum la mngon par chags par mi bya ba ni don dam par de dag dngos po yod par ma grub pa'i phyir ro/ /khams gsum la mngon par chags pa dang / mngon par zhen pa dang / brten pa dang / gnas pa ni mngon par chags pa'i rnam grangs su zad do/ /sangs rgyas la brten pa'i lta ba la mngon par chags pa dang zhes bya ba ni sangs rgyas kyi gzugs kyi sku mtshan dang dpe byad du ldan pa la dngos por lta ba la brten pas/ sangs rgyas mthong bar mi 'gyur te sangs rgyas ni chos nyid du blta'o zhes 'byung ba'i phyir ro/ /chos la brten pa'i lta ba la mngon par chags par mi bya ba ni lung gi chos gsung rab yan lag bcu gnyis dang thob par bya ba'i chos stobs dang / mi 'jigs pa la sogs pa la dngos por lta bas chos kyi chos nyid mthong bar mi 'gyur te/ de bas na chos la brten pa'i lta ba la mngon par chags par mi bya'o/ /dge 'dun la brten pa'i lta ba la mngon par chags pa dang zhes bya ba ni 'phags pa'i dge 'dun dang / so so'i skye bo'i dge 'dun la dngos por lta ba la chags na mtshan mar 'dzin pa la chags pas yang dag par dge 'dun mthong bar mi 'gyur gyi/ kun rdzob tu sgyu ma tsam du bltas la don dam par de la yang dngos po dang mtshan mar mi 'dzin par bya'o zhes bstan pa'o/ /tshul khrims la brten pa'i lta ba la mngon par chags pa dang zhes bya ba ni byang chub sems dpa'i sdom pa dang / nyan thos kyi sdom pa rnams la dngos por lta zhing mtshan mar 'dzin na tshul khrims rnam par dag par mi 'gyur gyi/ kun rdzob tu sgyu ma tsam du bltas la/ don dam par de la yang dngos por mi lta zhing mtshan mar mi 'dzin na tshul khrims rnam par dag par 'gyur te/ de bas tshul khrims la brten pa'i lta ba la mngon par chags par mi bya'o/ /chos thams cad stong ngo zhes zhum par 'gyur ba dang zhes bya ba ni don dam par chos thams cad dngos po med de stong yang las legs nyes kyi 'bras bu skyid sdug kyang med do snyam nas stong pas skrag cing sems zhum par mi bya ste/ kun rdzob tu sgyu ma tsam du med pa ma yin pa'i phyir ro/ /stong pa nyid dang 'gal ba ste zhes bya ba ni stong pa nyid ces bya ba'i chos shig gud na yod na ni/ /chos thams cad stong pa zhes bya ba de stong pa nyid kyi rang bzhin med pa ma yin pas 'gal bar yang 'gyur na/ chos thams cad stong pa nyid ces bya ba'i nang du stong pa nyid kyang med par 'dus pas/ chos thams cad stong pa nyid ces bya ba la 'gal ba med de/ de bas na stong pa nyid dang 'gal bar mi byed do/ /rab 'byor chos nyi shu po de dag ni bya ba ma yin pa'o zhes bya ba ni/ sa bdun pa la gnas pa'i byang chub sems dpas chos nyi shu po de dag ma byas na theg pa chen po la yang dag par zhugs pa yin no zhes bstan pa'o/ /des chos nyi shu po 'di dag yongs su rdzogs par bya ste zhes bya ba la sogs pa ni sa bdun pa la gnas pa'i byang chub sems dpas chos nyi shu yongs su rdzogs par bya ba bstan pa ste/ stong pa nyid rdzogs par bya ba dang zhes bya ba ni stong pa nyid kyi rang gi mtshan nyid kyang yod par mi lta'o/ /mtshan ma med pas mngon du bya ba dang zhes bya ba ni de ltar chos thams cad rang gi mtshan nyid kyis stong pas mtshan ma gang yang yid la mi byed pa'o/ /smon pa med pa zhes bya ba dang zhes bya ba ni khams gsum gyi chos thams cad la ma chags shing mi smon pa'o/ /'khor gsum yongs su dag pa dang zhes bya ba ni/ skabs 'dir lus dang / ngag dang yid gsum gyi sgo nas nyes pa dang / skyon mi 'byung bar dge ba bcu yongs su rdzogs par byed pa'o/ /sems can thams cad la snying rje zhing snying brtse ba dang zhes bya ba ni byang chub sems dpa'i snying rje chen po dang ldan pa'o/ /sems can de dag la brnyas par mi bya ba zhes bya ba ni byang chub sems dpa'i byams pa chen po dang ldan pas sems can thams cad la brnyas shing smad par mi byed pa'o/ /chos thams cad mnyam pa nyid du lta ba dang zhes bya ba ni 'khor ba dang mya ngan las 'das pa gnyis bye brag tu mi 'byed cing blang dor med par lta ba'o/ /yang dag pa'i tshul rab tu rtogs shing des rlom sems su mi bya ba dang zhes bya ba ni chos thams cad don dam par dngos po med pa'i rang bzhin du tshul gcig tu rtogs shing / de ltar rtogs par bya ba dang / rtogs par byed pa gnyis dmigs su med par rtogs pa med par shes pa'o/ /mi skye ba la bzod pa dang zhes bya ba ni chos thams cad skye ba med pa dang / 'gag pa med par rtogs par nus shing skye ba med pa dang / 'gag pa med pas mi skrag pa'o/ /mi skye ba shes pa dang zhes bya ba ni chos thams cad mi skye bar bzod pa'i 'og tu chos thams cad mi skye bar shes pa'i ye shes lhun gyis grub pa 'byung ba'o/ /chos thams cad tshul gcig tu bstan pa dang zhes bya ba ni chos thams cad de bzhin nyid kyi rang bzhin du tshul gcig ste/ yod pa dang / med pa dang / rtag pa dang / mi rtag pa la sogs pa mtha' gnyis su mi ston pa'o/ /rtog pa yang dag par bsal ba dang zhes bya ba ni rnam par rtog pa ni byang chub sems dpa'i nyon mongs pa yin pa'i phyir/ chos thams cad kyang rnam pa thams cad la mtshan mar 'dzin cing rnam par rtog pa med pa'o/ /lta ba rnam par zlog pa dang zhes bya ba ni nyan thos dang rang sangs rgyas kyi lta ba dman pa las ldog pa'o/ /nyon mongs pa rnam par zlog pa dang zhes bya ba ni nyon mongs pa'i bag chags kyi dbang gis 'khor bar skye ba'i nying mtshams sbyor ba med pa'o/ /zhi gnas dang lhag mthong gi sa dang zhes bya ba ni rnam pa thams cad mkhyen pa nyid kyi ye shes kyi ting nge 'dzin las kyang ma nyams la/ lhag mthong gis chos thams cad kyang rnam pa thams cad du mkhyen pa'o/ /dul ba'i sems dang zhes bya ba ni khams gsum gyi dngos po la sems ma yengs shing ma chags pa'o/ /zhi ba'i sems dang zhes bya ba ni dbang po drug yul drug la ma 'phros shing ma yengs pa'o/ /thogs pa med pa dang zhes bya ba ni sangs rgyas kyi spyan gyis 'jig rten dang / 'jig rten las 'das pa'i chos rnams la thags thogs med par mkhyen pa'o/ /byams pa'i skabs shes pa dang zhes bya ba ni so so'i skye bo'i byams pa ltar phyogs gcig la byams la phyogs gcig la sdang ba ni ma yin gyi/ sems can thams cad la sems snyoms shing btang snyoms su 'jug pa'o/ /gang du 'dod pa'i zhing du 'gro ba ste zhes bya ba ni sangs rgyas kyi zhing gang na de bzhin gshegs pa'i 'khor gyi dkyil 'khor yongs su dag pa yod pa de dag gis lus ston cing 'gro ba'o/ /rab 'byor chos nyi shu po de dag ni byang chub sems dpa' sems dpa' chen pos bdun pa la gnas pas yongs su rdzogs par bya'o zhes bya ba ni byang chub sems dpa' sa bdun pa la gnas pas/ chos de dag yongs su rdzogs par byas na theg pa chen po la yang dag par zhugs pa yin no zhes bstan pa'o/ /rab 'byor gzhan yang byang chub sems dpa' sems dpa' chen po sa brgyad pa la gnas pas chos bzhi po 'di dag yongs su rdzogs par bya ste zhes bya ba la sogs pa ni/ sa brgyad pa la gnas pa'i byang chub sems dpas yongs su rdzogs par bya ba'i chos rnams bstan pa ste/ sems can thams cad kyi sems khong du chud pa dang zhes bya ba ni byang chub sems dpa'i sems gcig gis sems can thams cad kyi sems dang sems las byung ba rnams skad cig thang cig la dus gcig tu shes pa'o/ /mngon par shes pas rnam par rtse ba dang zhes bya ba ni mngon par shes pa'i dbang gis sangs rgyas kyi zhing nas sangs rgyas kyi zhing du rdzu 'phrul gyis rgyu zhing sangs rgyas rnams lta ba'i phyir 'gro ba'o/ /sangs rgyas kyi zhing lta zhing sangs rgyas kyi zhing ji ltar mthong ba de dag yongs su sgrub pa dang zhes bya ba ni/ byang chub sems dpa' bdag nyid sangs rgyas kyi zhing gcig na 'dug cing / sangs rgyas kyi zhing dpag tu med pa rnams mthong bar byas nas ji ltar mthong ba'i sangs rgyas kyi zhing de dag sgrub pa'i phyir/ stong gsum gyi stong chen po'i 'jig rten gyi khams kyi rgyal srid kyang yongs su btang nas/ sangs rgyas kyi zhing de dag tu gnas par byed pa'o/ /sangs rgyas la bsnyen bkur zhing sangs rgyas kyi sku yang dag pa ji lta ba bzhin du brtags pa ste zhes bya ba ni sems can thams cad la phan gdags pa'i phyir/ dam pa'i chos yongs su smin par byed cing / chos kyi sku yang dag pa ji lta ba bzhin du rtogs par byed pa'o/ /rab 'byor bzhi po de dag ni yongs su rdzogs par bya ba'i chos so zhes bya ba ni byang chub sems dpa' sa brgyad pa la gnas pas chos de bzhi yongs su rdzogs par byas na theg pa chen po la yang dag par zhugs pa yin no zhes bstan pa'o/ /rab 'byor gzhan yang byang chub sems dpa' sems dpa' chen po sa brgyad pa la gnas pas chos bzhi yongs su rdzogs par bya ste zhes bya ba la sogs pa ni byang chub sems dpa' sa brgyad pa la gnas pas/ gzhan yang chos rnam pa bzhi yongs su rdzogs par bya ba bstan pa ste/ dbang po rab dang tha ma shes pa dang zhes bya ba ni de bzhin gshegs pa'i stobs bcu yongs su rdzogs pa la gnas shing sems can yongs su smin par byed pa'i tshe/ sems can chos zab mo'i snod du gyur tam/ ma gyur pa'i dbang po rab dang tha ma rab tu rtog pa la mkhas pa'o/ /sangs rgyas kyi zhing yongs su sbyang ba dang zhes bya ba ni sems can thams cad sangs rgyas su 'gyur ba'i gzhi'am rgyu yin pa'i phyir sems can gyi sems yongs su dag par byed pa la sangs rgyas kyi zhing yongs su sbyong ba zhes bya ba'o/ /sgyu ma lta bu'i ting nge 'dzin la yang dang yang du mnyam par gzhag par bya ba dang zhes bya ba ni/ byang chub sems dpas chos thams cad sgyu ma lta bur thugs su chud pas phyi rol gyi dngos po mi brtsan par ting nge 'dzin la mnyam par gzhag pa tsam gyis/ sems kyi dbang du gyur pas bya ba thams cad byed nus pa'o/ /sems can rnams kyi dge ba'i rtsa ba ji lta ji ltar 'grub par 'gyur ba de lta de ltar lus yongs su sgrub pa'i phyir ched du bsams shing srid pa nye bar lan pa ste zhes bya ba ni byang chub sems dpa' lha dang mi dang / lha ma yin la sogs pa'i lus gang gis sems can rnams kyi lus sgrub nus shing / sems can gyi dge ba 'phel bar 'gyur ba de lta bu'i lus ched du bsams shing blangs te sems can gyi don mdzad pa'o/ /rab 'byor chos bzhi po de dag ni byang chub sems dpa' sems dpa' chen po sa brgyad pa la gnas pas yongs su rdzogs par bya ba'o zhes bya ba ni/ byang chub sems dpa' sa brgyad pa la gnas pas chos bzhi po 'di dag kyang yongs su rdzogs par byas na/ theg pa chen po la yang dag par zhugs pa yin no zhes bstan pa'o/ /rab 'byor gzhan yang byang chub sems dpa' sems dpa' chen po sa dgu pa la gnas pas chos bcu gnyis yongs su rdzogs par bya ste zhes bya ba la sogs pa ni byang chub sems dpa' sa dgu pa la gnas pas yongs su rdzogs par bya ba bstan pa ste/ 'di ltar smon lam mtha' yas pa yongs su gzung ba ste/ ji lta ji ltar smon pa de lta de ltar phun sum tshogs par 'gyur ba dang zhes bya ba ni sa dgu pa la gnas pa'i byang chub sems dpas pha rol tu phyin pa drug yongs su rdzogs par bya bas byang chub sems dpa'i smon lam rgya chen po bdag dang gzhan gyi don phun sum tshogs par bya ba'i phyir/ ji ltar smon pa de bzhin du 'grub pa'o/ /lha dang klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po'i skad shes pa zhes bya ba ni nges pa'i tshig so so yang dag par rig pas/ lha dang / klu la sogs pa sems can thams cad kyi skad shes shing de dag gi skad du chos ston pa'o/ /yongs su rdzogs pa'i spobs pa nges par bstan pa shes pa dang zhes bya ba ni spobs pa so so yang dag par rig pa dang ldan pas/ bdud dang mu stegs can la sogs pa phas rgol ba rnams thul ba dang / rgyal rigs che zhing btsun pa la sogs pa'i 'khor du chos ston pa la spa mi 'gong zhing zil gyis mi non pa'i spobs pa dang ldan pa'o/ /ma'i mngal du 'gro ba phun sum tshogs pa dang zhes bya ba ni sa dgu pa la gnas pa'i byang chub sems dpa' sems can gyi don du 'khor bar skye na yang / nyon mongs pa'i dbang gis ma'i mngal du mi skye bar tshe rabs thams cad du rdzus te skye ba'o/ /rigs phun sum tshogs pa dang zhes bya ba ni dam pa'i chos spyod nus pa'i snod du gyur pa'i rigs bzang por skye ba'o/ /rgyud phun sum tshogs pa dang zhes bya ba ni rgyal rigs che zhing mtho ba dang bram ze'i rigs che zhing mtho ba'i rgyud du skye ba'o/ /rus phun sum tshogs pa dang zhes bya ba ni rus dang rigs gang gi nang du sngon byang chub sems dpa' byung bar gyur pa'i rigs der skyes pa'o/ /'khor phun sum tshogs pa dang zhes bya ba ni byang chub sems dpa' sems can thams cad bla na med pa'i byang chub tu sems bskyed cing byang chub la bkod pas byang chub sems dpa'i 'khor dang ldan par gyur pa'o/ /tshe phun sum tshogs pa dang zhes bya ba ni sa dgu pa'i byang chub sems dpa' ni skyes ma thag tu sngon gyi bsod nams kyi mthus 'jig rten gyi khams mtha' yas pa rnams 'od kyi snang bas khyab cing / 'jig rten gyi khams de dag rnam pa drug tu g.yo bar 'gyur ba'o/ / mngon par 'byung ba phun sum tshogs pa dang zhes bya ba ni byang chub sems dpa' de rab tu 'byung ba'i tshe/ sems can bye ba khrag khrig brgya stong du ma dang lhan cig tu rab tu 'byung ste/ rab tu byung ba'i sems can de dag kyang theg pa gsum la nges par gnas par 'gyur ba'o/ / byang chub kyi shing gi rgyan phun sum tshogs pa dang zhes bya ba ni byang chub sems dpa' de byang chub kyi shing drung du mngon par 'tshang rgya ba'i byang chub kyi shing gi rtsa ba ni gser gyi rgyu las byas pa/ lhun ni bai DUr+ya'i rang bzhin du 'dug pa/ yal ga ni rin po che sna bdun las grub pa/ me tog dang lo ma ni rin po che sna tshogs las byas pa yin la/ shing de'i dri zhim po dang 'od bzang pos ni 'jig rten gyi khams mtha' yas pa khyab par 'gyur ba'o/ /yon tan thams cad yongs su rdzogs par phun sum tshogs pa ste zhes bya ba ni byang chub sems dpa' sems can yongs su smin par bya ba dang / sangs rgyas kyi zhing yongs su dag par bya ba'i yon tan thams cad dang ldan pa'o/ /rab 'byor chos bcu gnyis po de dag ni byang chub sems dpa' sems dpa' chen po sa dgu pa la gnas pas yongs su rdzogs par bya ba'o zhes bya ba ni sa dgu pa la gnas pa'i byang chub sems dpas chos bcu gnyis po de dag yongs su rdzogs par byas na theg pa chen po la yang dag par zhugs pa yin no zhes bstan pa'o/ /rab 'byor sa bcu pa la gnas pa'i byang chub sems dpa' sems dpa' chen po ni de bzhin gshegs pa nyid du brjod do zhes bya ba las sa bcu pa la gnas pa'i byang chub sems dpa' ni pha rol tu phyin pa bcu yongs su rdzogs shing de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / snying rje chen po dang / sangs rgyas kyi chos ma 'dres pa bco brgyad dang / rnam pa thams cad mkhyen pa nyid kyi ye shes la sogs pa sangs rgyas kyi yon tan thams cad dang ldan la/ shes bya dang nyon mongs pa'i sgrib pa bag chags yan chad spangs pas sangs rgyas dang 'dra ba'i phyir de bzhin gshegs pa nyid du brjod do zhes gsungs so/ /de skad ces bka' stsal pa dang / tshe dang ldan pa rab 'byor gyis bcom ldan 'das la 'di skad ces gsol to zhes bya ba la sogs pa ni gang du sa bcu po re re la yongs su sbyong zhing rdzogs par bya ba dang / spang bar bya ba'i chos rnams mdor smos pa de dag re re nas zhib tu dgrol ba'i phyir zhus pa'o/ /bcom ldan 'das byang chub sems dpa' sems dpa' chen po'i lhag pa'i bsam pa la sogs pa yongs su sbyong ba gang lags zhes bya ba ni dang por lhag pa'i bsam pa la sogs pa yongs su sbyong ba mdor bshad pa de nyid zhib tu bshad pa'i phyir/ lhag pa'i bsam pa la sogs pa de dag ji ltar yongs su sbyang bar bgyi zhes bcom ldan 'das la rab 'byor gyis zhus pa'o/ /de la bcom ldan 'das kyis bka' stsal pa/ rab 'byor byang chub sems dpa' sems dpa' chen po rnam pa thams cad mkhyen pa nyid dang ldan pa'i sems bskyed pas dge ba'i rtsa ba mang po yang dag par sdud pa 'di ni/ rab 'byor byang chub sems dpa' sems dpa' chen po'i lhag pa'i bsam pa la sogs pa yongs su sbyong ba'o zhes bya ba nas/ rab 'byor de dag ni byang chub sems dpa' sems dpa' chen po sa dang po la gnas pa'i yongs su sbyang ba bcu po zhes bya ba'i bar du ni byang chub sems dpa' sa dang po rab tu dga' ba la gnas pas yongs su sbyang bar bya ba'i chos bcu gang du mdor smos pa'i 'grel pa ste/ de dag gi don ni sngar bshad pa bzhin no/ /de la byang chub sems dpa' sems dpa' chen po'i tshul khrims yongs su dag pa gang zhe na zhes bya ba nas/ 'di ni byang chub sems dpa' sems dpa' chen po'i pha rol tu phyin pa rnams la brtson zhing tshol ba'o zhes bya'i bar du ni/ sa gnyis pa la gnas pa'i byang chub sems dpas chos brgyad yid la bya ba gong du mdor smos pa'i 'grel pa'o/ /de la byang chub sems dpa' sems dpa' chen po'i mang du thos pas ma ngoms pa gang zhe na zhes bya ba nas/ 'di ni byang chub sems dpa' sems dpa' chen po'i ngo tsha shes shing khrel yod pa la gnas pa'o zhes bya ba'i bar du ni byang chub sems dpa' sa gsum pa la gnas pas chos lnga la gnas par bya ba gong du mdor smos pa'i 'grel pa'o/ /de la byang chub sems dpa' sems dpa' chen po'i dgon pa na gnas pa yongs su mi gtong ba gang zhe na zhes bya ba nas/ 'di ni byang chub sems dpa' sems dpa' chen po dngos po thams cad la ltos pa med pa'o zhes bya ba'i bar du ni byang chub sems dpa' sa bzhi pa la gnas pas chos bcu yongs su blangs shing gnas par bya ba mdor smos pa'i 'grel pa'o/ /de la byang chub sems dpa' sems dpa' chen po'i khyim pa dang brten pa yongs su spang bar bya ba gang zhe na zhes bya ba nas/ 'di ni byang chub sems dpa' sems dpa' chen po'i 'dod chags dang / zhe sdang dang / gti mug nyams rangs su mi 'dor ba'o zhes bya ba ni byang chub sems dpa' sa lnga pa la gnas pas chos drug dang bco brgyad yongs su spang bar bya ba gong du mdor smos pa'i 'grel pa'o/ /de la sa drug la chos drug yongs su rdzogs par bya ba gang zhe na zhes bya ba nas/ 'di ltar de ni byang chub kyi lam ma yin pas thog ma sems bskyed nas kha za yag gi sems su mi bya'i/ sbyin pa yongs su gtang bar bya'o zhes bya ba'i bar du ni/ byang chub sems dpa' sa drug pa la gnas pas chos drug yongs su rdzogs par bya ba dang / chos drug yongs su spang bar bya ba mdor smos pa'i 'grel pa ste/ gzhan gyi gong du bshad pa bzhin no/ /shes par bya ba lnga'i rgya mtsho'i pha rol tu phyin par gyur to zhes bya ba la sogs pa ni dus gsum gyi sangs rgyas bcom ldan 'das dang / nyan thos dang rang sangs rgyas rnams kyang pha rol tu phyin pa drug yongs su rdzogs par byas pa las shes par bya ba thams cad la thogs pa med pa'i ye shes brnyes par gyur te/ shes par bya ba'i nang na yang 'das pa dang ma 'ongs pa'i dus yun ring po nas sems can dang sems can ma yin pa'i dngos po rnams sngar cir gyur pa dang / phyis cir 'gyur ba dang / da ltar gyi dngos po brtag cing blta dka' ba rnams dang / don dam pa'i dbyings tshig gis brjod pa'i yul ma yin pa dang / 'dus ma byas pa'i dbyings dang / shes par bya ba'i dngos po 'di lnga zab cing brtag dka' ste/ gzhan gyis mthar phyin par mi nus pa'i phyir rgya mtsho dang 'dra bas shes par bya ba lnga'i rgya mtsho zhes bya'o/ /nyan thos dang rang sangs rgyas rnams kyis shes par bya ba lnga'i rgya mtsho'i mthar phyin par bshad pa yang nyan thos dang rang sangs rgyas kyi sa la gnas pa'i tshe la mi bya'i/ theg pa gcig tu bshad pa'i tshul gyis bla na med pa yang dag par rdzogs pa'i byang chub mngon par rdzogs par sangs rgyas pa'i tshe la bya'o/ /kha za yag gi sems su mi bya zhes bya ba ni stong pa'am don med par mi bya'o zhes bya ba'i don to/ /de la ji ltar na byang chub sems dpa' sems dpa' chen pos bdag tu 'dzin par mi bya zhe na zhes bya ba nas/ de la byang chub sems dpa' sems dpa' chen po gang du 'dod pa'i zhing du 'gro ba gang zhe na/ 'khor gyi dkyil 'khor de dang de dag tu lus ston pa'o zhes bya ba'i bar du ni byang chub sems dpa' sa bdun pa la gnas pas bdag tu 'dzin pa la sogs pa chos nyi shu mi bya ba dang / stong pa nyid yongs su rdzogs par bya ba la sogs pa chos nyi shu yongs su rdzogs par bya ba gong du mdor smos pa'i 'grel pa'o/ /de la byang chub sems dpa' sems dpa' chen po'i sems can thams cad kyi sems khong du chud pa gang zhe na zhes bya ba nas/ de la ji ltar na byang chub sems dpa' sems dpa' chen po ched du bsams shing sred pa nye bar len pa yin zhe na/ 'di lta ste sems can yongs su smin par bya ba'i phyir ro zhes bya ba'i bar du ni byang chub sems dpa' sa brgyad pa la gnas pas chos bzhi po rnam gnyis yongs su rdzogs par bya ba gong du mdor smos pa'i 'grel pa'o/ /de la ji ltar na byang chub sems dpa' sems dpa' chen po ji lta ji ltar smon pa de lta de ltar phun sum tshogs par 'gyur ba yin zhe na zhes bya ba nas/ 'di ni byang chub sems dpa' sems dpa' chen po'i yon tan thams cad yongs su rdzogs pa phun sum tshogs pa'o zhes bya ba'i bar du ni byang chub sems dpa' sa dgu pa la gnas pas chos bcu gnyis yongs su rdzogs par bya ba gong du mdor smos pa'i 'grel pa'o/ /de la byang chub sems dpa' sems dpa' chen pos bcu pa la gnas pa de bzhin gshegs pa nyid ces bya ba gang zhe na zhes bya ba nas/ rab 'byor de ltar na byang chub sems dpa' sems dpa' chen po sa bcu pa la gnas pa ni de bzhin gshegs pa nyid ces bya'o zhes bya ba'i bar du ni sa bcu pa la gnas pa'i byang chub sems dpa' de bzhin gshegs pa nyid du brjod do zhes gong du mdor smos pa'i 'grel pa ste/ de dag gi don kyang gong du mdor smos pa'i skabs nyid du bshad zin to/ /rab 'byor de la byang chub sems dpa' sems dpa' chen po'i sa bcu gang zhe na zhes bya ba nas/ rab 'byor 'di dag ni byang chub sems dpa' sems dpa' chen po'i sa bcu'o zhes bya ba'i bar du ni sa bcu la gnas pa'i byang chub sems dpa' de bzhin gshegs pa nyid du brjod do zhes gong du smos pa sa bcu la ji ltar gnas pa dang / ji ltar de bzhin gshegs pa nyid du brjod par bya ba'i don bstan pa ste/ byang chub sems dpa' thabs mkhas pas pha rol tu phyin pa drug dang / stong pa nyid bco brgyad dang / byang chub kyi phyogs sum cu rtsa bdun la sogs pa sangs rgyas kyi chos ma 'dres pa bco brgyad kyi bar dag la spyod pa'i tshe nyan thos kyi sa dang / rang sangs rgyas kyi sa dang / byang [(]chub [,]chub sems [)]dpa'i sa dgu dag las 'das nas byang chub sems dpa'i sa bcu pa la gnas pa ni sangs rgyas kyi sa la gnas pa yin no zhes bstan pa'o/ /de la dkar po rnam par mthong ba'i sa zhes bya ba ni mos pas spyod pa'i sa la gnas pa'i tshe drod dang rtse mo zhes bya ba'i ting nge 'dzin thob pa na dang por rnam par byang ba'i chos dkar po rnams mthong ba'i phyir dkar po mthong ba'i sa zhes bya ba'o/ /rigs kyi sa zhes bya ba ni bzod pa dang / 'jig rten gyi chos kyi mchog ces bya ba'i ting nge 'dzin thob pa'i tshe chos dang gang zag la bdag med par rtogs pas byang chub gsum 'thob pa'i rigs dang ldan pas na rigs kyi sa zhes bya'o/ /brgyad pa'i sa zhes bya ba ni dgra bcom pa'i 'bras bu thob pa'i sa nas yas bgrangs na rgyun du zhugs pa'i 'bras bu la 'jug pa la grangs brgyad pa la 'bab pas na rgyun du zhugs pa'i 'bras bu la 'jug pa'i sa la brgyad pa zhes bya'o/ /mthong ba'i sa zhes bya ba ni rgyun du zhugs pa'i 'bras bu la gnas pas chos kyi de kho na nyid phyin ci ma log par rtogs shing mthong bas na mthong ba'i sa zhes bya'o/ /bsrabs pa'i sa zhes bya ba ni lan cig phyir 'ong bas 'dod pa'i khams kyi 'dod chags srab mor byas pas na bsrabs pa'i sa zhes bya'o/ /'dod chags dang bral ba'i sa zhes bya ba ni phyir mi 'ong ba'i sa la gnas pas 'dod pa'i khams kyi 'dod chags ma lus par spangs pa'i phyir/ 'dod chags dang bral ba'i sa zhes bya'o/ /byas pa rtogs pa'i sa zhes bya ba ni dgra bcom pa'i sa la gnas pas khams gsum gyi nyon mongs pa thams cad spangs shing dgra bcom pa'i yon tan yongs su rdzogs par byas pa rnam par grol ba mthong ba'i ye shes kyis bya ba ni byas zin/ tshangs par spyad pa ni spyad zin te/ 'di las srid pa gzhan myong bar mi 'gyur ro zhes rtogs par 'gyur bas na dgra bcom pa'i sa la byas pa rtogs pa'i sa zhes bya'o/ /de ltar nyan thos kyi sa rnams dang / byang chub sems dpa'i sa dang po la sogs pa sa dgu rnams las yongs su 'das nas sa bcu la gnas pa ni byang chub sems dpa'i sa bcu pa yin no zhes bstan pa ste/ sangs rgyas kyi sa la gnas zhes bya ba ni byang chub sems dpa' sa bcu pa la gnas pas bsod nams dang ye shes kyi tshogs yongs su rdzogs pas na sangs rgyas dang 'dra ba'i phyir sangs rgyas kyi sa la gnas zhes bya'o/ /rab 'byor de ltar na byang chub sems dpa' sems dpa' chen po theg pa chen po la yang dag par zhugs par rig par bya'o zhes bya ba ni sa dang po nas sa bcu pa'i bar du byang chub sems dpa'i skyon rnams yongs su spong ba dang / yon tan rnams yongs su rdzogs par byed cing byang chub sems dpa'i sa bcu yongs su sbyong ba de dag theg pa chen po la yang dag par zhugs par rig par bya'o zhes theg pa chen po la yang dag par zhugs pa'i don gong du bshad pa rnams mjug bsdus te bstan pa'o/ /rab 'byor khyod kyis gang yang 'di skad du theg pa de gang nas 'byung bar 'gyur zhes smras pa zhes bya ba la sogs pa ni gang du rab 'byor gyis theg pa de gang nas 'byung bar 'gyur zhes bcom ldan 'das la zhus pa'i tshig de nyid smos nas/ theg pa chen po de kun rdzob tu ni khams gsum nas byung nas rnam pa thams cad mkhyen pa nyid du gnas par 'gyur ba dang / don dam par khams gsum nas 'byung ba yang med la/ rnam pa thams cad mkhyen pa nyid du gnas pa yang med pa bstan pa ste/ de la mi dmigs pa'i tshul gyis khams gsum nas 'byung bar 'gyur ro/ /rnam pa thams cad mkhyen pa nyid du gnas par 'gyur ro zhes bya ba ni theg pa chen po de kun rdzob tu khams gsum nas byung ste/ rnam pa thams cad mkhyen pa nyid du gnas par 'gyur ba bstan pa'o/ /de ci'i phyir zhe na/ rab 'byor de ni 'di ltar theg pa chen po gang yin pa dang / rnam pa thams cad mkhyen pa nyid gang yin pa'i chos de gnyis ka yang ldan pa ma yin mi ldan pa yang ma yin zhes bya ba la sogs pas don dam par theg pa chen po dang / rnam pa thams cad mkhyen pa nyid tha dad du dbyer med pas khams gsum nas 'byung ba dang / rnam pa thams cad mkhyen pa nyid du gnas par 'gyur ba dbyer med pa bstan pa ste/ chos de gnyis ldan pa yang ma yin mi ldan pa yang ma yin zhes bya ba'i don dam par theg pa chen po dang / rnam pa thams cad mkhyen pa nyid gcig pa dang tha dad pa'i mtshan nyid med par bstan pa ste/ ldan pa yang ma yin zhes bya bas ni gcig pa'i mtshan nyid med pa bstan to/ /mi ldan pa yang ma yin zhes bya bas ni tha dad pa'i mtshan nyid med pa bstan to/ /gzugs med pa bstan du med pa/ thogs pa med pa ste/ 'di ltar mtshan nyid med par mtshan nyid gcig pa'o zhes bya ba ni don dam par theg pa chen po dang / rnam pa thams cad mkhyen pa nyid la tha dad du dbyer med pa'i gtan tshigs bstan pa'o/ /de ci'i phyir zhe na/ rab 'byor mtshan nyid med pa'i chos ni 'byung ba'am 'byung bar 'gyur ba'am/ byung bar gyur pa med de zhes bya ba ni de ltar theg pa chen po dang / rnam pa thams cad mkhyen pa nyid don dam par dngos po med de/ mtshan nyid med par mtshan nyid gcig pa'i phyir khams gsum nas da ltar byung ba yang med/ phyis 'byung bar 'gyur ba yang med/ sngon byung bar 'gyur ba yang med do zhes bstan pa'o/ /rab 'byor gang mtshan nyid med pa'i chos rnams 'byung bar 'dod pa de ni chos kyi dbyings 'byung bar 'dod du zad do zhes bya ba nas/ rab 'byor gang mtshan nyid med pa'i chos rnams 'byung bar 'dod pa de ni 'gog pa'i dbyings 'byung bar 'dod du zad do zhes bya ba'i bar du ni chos kyi dbyings stong pa nyid kyi rang bzhin gyi rnam grangs su gtogs pa de bzhin nyid dang / yang dag pa'i mtha' la sogs pa smos te/ de dag la don dam par khams gsum nas 'byung ba yang med la/ rnam pa thams cad mkhyen pa nyid du gnas par 'gyur ba yang med pa de bzhin du theg pa chen po dang / rnam pa thams cad mkhyen pa nyid kyang dngos po med pas khams gsum nas 'byung zhing rnam pa thams cad mkhyen pa nyid du gnas par 'gyur ba med do zhes bstan pa'o/ /rab 'byor gang mtshan nyid med pa'i chos rnams 'byung bar 'dod pa de ni gzugs stong pa nyid 'byung bar 'dod du zad do zhes bya ba nas/ yid kyi 'dus te reg pa'i rkyen gyis tshor ba yid kyi 'dus te reg pa'i rkyen gyis tshor bas stong pa'i phyir ro zhes bya ba'i bar du ni phung po lnga la sogs pa 'jig rten pa'i chos ming gis smos pa rnams de dag gi rang bzhin gyis stong pa'i gtan tshigs smos nas/ de dag khams gsum nas 'byung ba yang med la/ rnam pa thams cad mkhyen pa nyid du gnas pa yang med pa de bzhin du theg pa chen po zhes bya ba don dam par mtshan nyid med pa'i chos de'ang khams gsum nas 'byung ba yang med la/ rnam pa thams cad mkhyen pa nyid du gnas pa yang med do zhes bstan pa'o/ /rab 'byor gang mtshan nyid med pa'i chos rnams 'byung bar 'dod pa de ni rmi lam 'byung bar 'dod du zad do zhes bya ba nas/ de bzhin gshegs pa'i sprul pa ni de bzhin gshegs pa'i sprul pas stong pa'i phyir ro zhes bya ba'i bar du ni rmi lam la sogs pa shin tu mtshan nyid med pa'i chos ming gis smos pa rnams khams gsum nas 'byung ba med cing / rnam pa thams cad mkhyen pa nyid du gnas pa med pa de bzhin du theg pa chen po zhes bya ba don dam par mtshan nyid med pa'i chos de yang khams gsum nas 'byung ba med cing / rnam pa thams cad mkhyen pa nyid du gnas pa med do zhes bstan pa'o/ /rab 'byor gang mtshan nyid med pa'i chos rnams 'byung bar 'dod pa de ni sbyin pa'i pha rol tu phyin pa 'byung bar 'dod du zad do zhes bya ba nas/ sangs rgyas kyi chos ma 'dres p a'i ngo bo nyid ni sangs rgyas kyi chos ma 'dres pa'i ngo bo nyid kyis stong pa'i phyir ro zhes bya ba'i bar du ni sbyin pa'i pha rol tu phyin pa la sogs pa sangs rgyas kyi chos ma 'dres pa la thug gi bar du rnam par byang ba'i chos ming gis smos pa rnams don dam par de dag gi ngo bo nyid kyis stong pa'i gtan tshigs smos nas/ chos de dag don dam par khams gsum nas 'byung ba med cing / rnam pa thams cad mkhyen pa nyid du gnas pa med pa de bzhin du theg pa chen po zhes bya ba don dam par mtshan nyid med pa'i chos de yang khams gsum nas 'byung ba med cing rnam pa thams cad mkhyen pa nyid du gnas pa med do zhes bstan pa'o/ /rab 'byor gang mtshan nyid med pa'i chos rnams 'byung bar 'dod pa de ni dgra bcom pa zag pa zad pa skye bar 'dod du zad do zhes bya ba nas/ de bzhin gshegs pa'i ngo bo nyid ni de bzhin gshegs pa'i ngo bo nyid kyis stong pa'i phyir ro zhes bya ba'i bar du ni nyan thos dgra bcom pa dang / rang sangs rgyas dang / byang chub sems dpa' dang / de bzhin gshegs pa rnams don dam par ngo bo nyid kyis stong pa'i phyir khams gsum nas 'byung ba med cing / rnam pa thams cad mkhyen pa nyid du gnas pa med pa de bzhin du theg pa chen po zhes bya ba don dam par mtshan nyid med pa'i chos de yang khams gsum nas 'byung ba med cing / rnam pa thams cad mkhyen pa nyid du gnas pa med do zhes bstan pa'o/ /rab 'byor gang mtshan nyid med pa'i chos rnams 'byung bar 'dod pa de ni/ rgyun du zhugs pa'i 'bras bu 'byung bar 'dod du zad do zhes bya ba nas/ rnam pa thams cad mkhyen pa nyid ni rnam pa thams cad mkhyen pa nyid kyi ngo bo nyid kyis stong pa'i phyir zhes bya ba'i bar du ni nyan thos dang rang sangs rgyas dang / byang chub sems dpa' dang / de bzhin gshegs pa rnams kyis thob par bya ba'i chos nyan thos kyi rgyun du zhugs pa la sogs pa 'bras bu bzhi dang / rang sangs rgyas kyi 'bras bu rang byang chub dang / byang chub sems dpa'i 'bras bu lam gyi rnam pa shes pa nyid dang / de bzhin gshegs pa'i 'bras bu rnam pa thams cad mkhyen pa nyid rnams don dam par ngo bo nyid kyis stong pa'i phyir khams gsum nas 'byung ba med cing rnam pa thams cad mkhyen pa nyid du gnas pa med pa de bzhin du theg pa chen po zhes bya ba don dam par mtshan nyid med pa'i chos de yang khams gsum nas 'byung ba med cing / rnam pa thams cad mkhyen pa nyid du gnas pa med do zhes bstan pa'o/ /rab 'byor gang mtshan nyid med pa'i chos rnams 'byung bar 'dod pa de ni mi 'byung bar 'dod du zad do zhes bya ba nas/ gdags pa stong pa nyid gdags pa stong pa nyid kyis ngo bo nyid stong pa'i phyir ro zhes bya ba'i bar du ni ming dang mtshan ma dang / brda dang tha snyad dang gdags pa rnams don dam par de dag gi rang bzhin gyis stong pa'i phyir khams gsum nas 'byung ba med cing / rnam pa thams cad mkhyen pa nyid du gnas pa med pa de bzhin du theg pa chen po zhes bya ba don dam par mtshan nyid med pa'i chos de'ang khams gsum nas 'byung ba med cing / rnam pa thams cad mkhyen pa nyid du gnas pa med pa bstan to/ /rab 'byor gang mtshan nyid med pa'i chos rnams 'byung bar 'dod pa de ni skye ba med pa 'byung bar 'dod du zad do zhes bya ba nas/ mngon par 'du bya ba med pa ni mngon par 'du bya ba med pa'i ngo bo nyid kyis stong pa'i phyir ro zhes bya ba'i bar du ni yongs su grub pa'i mtshan nyid du gtogs pa skye ba med pa dang / 'gag pa med pa dang / kun nas nyon mongs pa med pa dang / rnam par byang ba med pa dang / mngon par ' du bya ba med pa rnams don dam par de dag gi rang bzhin gyis stong pa'i phyir khams gsum nas 'byung ba med cing rnam pa thams cad mkhyen pa nyid du gnas pa med pa de bzhin du theg pa chen po zhes bya ba don dam par mtshan nyid med pa'i chos de yang khams gsum nas 'byung ba med cing / rnam pa thams cad mkhyen pa nyid du gnas pa med do zhes bstan pa'o/ /rab 'byor de ltar rnam grangs 'dis ni/ 'di ltar theg pa chen po ni khams gsum nas byung nas rnam pa thams cad mkhyen pa nyid du gnas par shes par bya ste zhes bya ba ni de ltar don dam par chos thams cad rang bzhin gyis stong pa'i phyir chos gang yang khams gsum nas 'byung ba med cing / rnam pa thams cad mkhyen pa nyid du gnas pa med par rtogs pa nyid du kun rdzob tu khams gsum nas 'byung nas rnam pa thams cad mkhyen pa nyid du gnas par rig par bya'o zhes bstan pa'o/ /gnas de ni bskyod du med pa'o zhes bya ba ni rnam pa thams cad mkhyen pa nyid kyi gnas de la gnas na mi mthun pa'i phyogs rnams kyis bskyod du mi nus pa'i phyir ro/ /rab 'byor gzhan y ang khyod kyis gang 'di skad du theg pa chen po de gang du gnas par 'gyur zhes smras pa de ni theg pa chen po de gang du yang gnas par 'gyur ba med de zhes bya ba la sogs pa ni gong du bcom ldan 'das la rab 'byor gyis theg pa chen po de gang du gnas par 'gyur zhes zhus pa'i lan du/ don dam par theg pa chen po de gang du yang gnas par 'gyur ba med do zhes bstan pa'o/ /de ci'i phyir zhe na/ 'di ltar chos thams cad ni gnas mi dmigs pa'i phyir mi gnas pa ste zhes bya ba ni theg pa chen po de don dam par gang du yang gnas pa med pa'i gtan tshigs bstan pa ste/ don dam par 'dus byas dang 'dus ma byas kyi chos thams cad dngos po yod par ma grub pas gnas mi dmigs pa'i phyir gang du yang mi gnas pa de bzhin du theg pa chen po de yang gang du yang mi gnas pa'o zhes bstan pa'o/ /rab 'byor de ltar theg pa chen po de ni mi dmigs pa'i tshul gyis gnas so zhes bya ba ni de ltar chos thams cad don dam par dngos po med de/ gang du yang gnas pa med mod kyi/ kun rdzob du tha snyad tsam du gnas so zhes bstan pa'o/ /rab 'byor 'di lta ste dper na/ chos kyi dbyings ni gnas pa yang ma yin mi gnas pa yang ma yin no zhes bya ba nas/ 'gog pa'i dbyings kyi rang bzhin gyis stong pa'i phyir ro zhes bya ba'i bar du ni 'dus ma byas pa'i chos ming gis smos pa rnams rang bzhin gyis stong pa'i phyir gnas pa dang mi gnas pa med pa de bzhin du theg pa chen po de la yang gnas pa dang mi gnas pa'i mtha' gnyis med do zhes bstan pa'o/ /rab 'byor 'di lta ste dper na gzugs stong pa nyid ni gnas pa yang ma yin mi gnas pa yang ma yin no zhes bya ba nas/ yid kyi 'dus te reg pa'i rkyen gyis tshor ba yid kyi 'dus te reg pa'i rkyen gyis tshor bas stong pa'i phyir ro zhes bya ba'i bar du phung po lnga la sogs pa 'dus byas kyi chos rnams de dag gi rang bzhin gyis stong pa'i phyir/ gnas pa'am mi gnas pa med pa de bzhin du/ theg pa chen po de la yang gnas pa'am mi gnas pa med pa bstan pa'o/ /rab 'byor 'di lta ste dper na/ rmi lam ni gnas pa yang ma yin/ mi gnas pa yang ma yin no zhes bya ba nas/ de bzhin gshegs pa'i sprul pa de bzhin gshegs pa'i sprul pas stong pa'i phyir ro zhes bya ba'i bar du ni rmi lam la sogs pa shin tu med pa'i chos rnams la gnas pa dang mi gnas pa med pa de bzhin du theg pa chen po de la yang don dam par gnas pa dang mi gnas pa med do zhes bstan pa'o/ /rab 'byor 'di lta ste dper na/ sbyin pa'i pha rol tu phyin pa ni gnas pa yang ma yin mi gnas pa yang ma yin no zhes bya ba nas/ rnam pa thams cad mkhyen pa nyid kyi ngo bo nyid rnam pa thams cad mkhyen pa nyid kyi ngo bo nyid kyis stong pa'i phyir zhes bya ba'i bar du ni rnam par byang ba'i chos rnams de dag gi ngo bo nyid kyis stong pa'i phyir gnas pa dang mi gnas pa med pa de bzhin du theg pa chen po de la yang don dam par gnas pa dang / mi gnas pa med do zhes bstan pa'o/ /rab 'byor 'di lta ste dper na/ ming ni gnas pa yang ma yin/ mi gnas pa yang ma yin no/ /rab 'byor de bzhin du theg pa chen po de yang gnas pa yang ma yin/ mi gnas pa yang ma yin no zhes bya ba nas/ gdags pa'i ngo bo nyid gdags pa'i ngo bo nyid kyis stong pa'i phyir ro zhes bya ba'i bar du ni ming dang mtshan ma la sogs pa 'jig rten gyi tha snyad du btags pa rnams don dam par dngos po med de/ rang bzhin gyis stong pa'i phyir gnas pa dang mi gnas pa med pa de bzhin du theg pa chen po de la yang don dam par gnas pa dang mi gnas pa med pa bstan pa'o/ /rab 'byor 'di lta ste dper na/ skye ba med pa ni gnas pa yang ma yin/ mi gnas pa yang ma yin no zhes bya ba nas/ de ci'i phyir zhe na/ rab 'byor de ni 'di ltar mngon par 'du bya ba med pa'i ngo bo nyid mngon par 'du bya ba med pa'i ngo bo nyid kyis stong pa'i phyir ro zhes bya ba'i bar du ni/ chos thams cad kyi skye ba med pa dang / 'gag pa med pa dang / kun nas nyon mongs pa med pa dang / rnam par byang ba med pa dang / mngon par 'du bya ba med pa rnams don dam par de dag gi ngo bo nyid kyis stong pa'i phyir gnas pa dang mi gnas pa med pa de bzhin du theg pa chen po de la yang gnas pa dang mi gnas pa med par bstan pa'o/ /rab 'byor rnam grangs des na/ theg pa de ni mi gnas par gnas pa'i tshul dang / bskyod du med pa'i tshul gyis gang du yang gnas par 'gyur ba med do zhes bya ba la/ mi gnas par gnas pa'i tshul zhes bya ba ni theg pa chen po don dam par dngos po med pas mi gnas la/ kun rdzob tu rnam pa thams cad mkhyen pa nyid du gnas par 'gyur ba med do/ /bskyod du med pa'i tshul gyis zhes bya ba ni/ theg pa chen po de don dam par ngo bo nyid kyis stong pa'i phyir gang du gnas pa med pa de bzhin nyid kyi rang bzhin las mi 'gyur bas mi mthun pa'i phyogs rnams kyis gzhan du bsgyur zhing bskyod mi nus pa'i phyir ro/ /gang du yang gnas par 'gyur ba med do zhes bya ba ni theg pa chen po de don dam par ngo bo nyid kyis stong pa'i phyir gang du yang gnas pa med pa'i don mjug bsdus te bstan pa'o/ /rab 'byor gang yang khyod kyis 'di skad du theg pa des su zhig 'byung bar 'gyur zhes smras pa ni theg pa des su'ang 'byung bar 'gyur ba med do zhes bya ba la sogs pa ni/ bcom ldan 'das la rab 'byor gyis theg pa chen po des su zhig 'byung bar 'gyur zhes zhus pa'i lan du/ theg pa chen po nyid dang des 'byung bar 'gyur ba'i byang chub sems dpa' la sogs pa don dam par dngos po med cing dmigs su med pa'i phyir theg pa des su'ang 'byung bar 'gyur ba med do zhes bcom ldan 'das kyis bka' stsal pa ste/ de ci'i phyir zhe na/ rab 'byor de ni 'di ltar theg pa de gang yin pa dang zhes bya ba la sogs pa ni 'byung bar 'gyur ba med pa'i gtan tshigs bstan pa ste/ theg pa de gang yin pa dang zhes bya ba ni theg pa gang gis 'byung bar 'gyur ba'i theg pa chen po de la bya'o/ /gang 'byung bar 'gyur ba dang zhes bya ba ni theg pa des gang 'byung bar 'gyur ba'i byang chub sems dpa' la bya'o/ /gang gis 'byung bar 'gyur ba dang zhes bya ba ni chos dang gang zag la bdag med par rtogs par sgrub pa'i chos gang la gnas na 'byung bar 'gyur ba la bya'o/ /gang nas 'byung bar 'gyur ba zhes bya ba ni khams gsum la bya'o/ /chos de dag thams cad med cing mi dmigs pa'i phyir te zhes bya ba ni theg pa chen po dang / byang chub sems dpa' dang / sgrub pa'i chos dang / khams gsum po de dag don dam par dngos po med cing dmigs su med pa'i phyir chos gang zhig chos gang gis 'byung bar 'gyur zhes bya ba dang sbyar te 'byung bar byed pa dang / 'byung bar bya ba dang / gang nas 'byung ba'i chos de dag don dam par med cing mi dmigs pas gang yang 'byung bar 'gyur ba med do zhes don mdor bstan pa'o/ /de ci'i phyir zhe na/ rab 'byor de ni 'di ltar bdag shin tu rnam par dag pa dang zhes bya ba la sogs pa ni mu stegs can gyis bdag tu brtags pa rnams dang / chos kyi dbyings la sogs pa 'dus ma byas pa'i chos rnams dang / phung po dang / khams la sogs pa nyon mongs pa'i phyogs su gtogs pa'i chos rnams dang pha rol tu phyin pa la sogs pa rnam par byang ba'i chos thams cad kyang dmigs su med pa'i phyir chos gang gis kyang gang yang 'byung bar 'gyur ba med do zhes bstan pa ste/ de la bdag shin tu rnam par dag pa dang zhes bya ba nas/ mthong ba po dmigs su med do zhes bya ba'i bar du ni mu stegs can gyis brtags pa'i bdag rnams yang dag par dngos po med de/ shin tu rnam par dag pa'i phyir dmigs su med pas gang gis kyang 'byung bar 'gyur ba med cing / gang yang 'byung bar 'gyur ba med pa de bzhin du byang chub sems dpa' de yang don dam par theg pa chen po des 'byung bar 'gyur ba med do zhes bstan pa ste/ shin tu rnam par dag pa'i phyir zhes bya ba ni shin tu stong pa'i phyir ro zhes bya ba'i don to/ /shin tu rnam par dag pa'i phyir chos kyi dbyings dmigs su med do zhes bya ba nas/ bsam gyis mi khyab pa'i dbyings dmigs su med do zhes bya ba'i bar du ni stong pa nyid kyi rnam grangs su gtogs pa'i chos rnams dmigs su med pa bstan pa'o/ /shin tu rnam par dag pa'i phyir phung po rnams dmigs su med do zhes bya ba nas/ rten cing 'brel par 'byung ba dmigs su med do zhes bya ba'i bar du ni nyon mongs pa'i phyogs su gtogs pa'i chos rnams dmigs su med pa bstan pa'o/ /shin tu rnam par dag pa'i phyir sbyin pa'i pha rol tu phyin pa dmigs su med do zhes bya ba nas/ shin tu rnam par dag pa'i phyir rnam pa thams cad mkhyen pa nyid dmigs su med do zhes bya ba'i bar du ni rnam par byang ba'i chos rnams dmigs su med pa bstan pa'o/ /shin tu rnam par dag pa'i phyir skye ba med pa dmigs su med do zhes bya ba nas/ mngon par 'du bya ba med pa dmigs su med do zhes bya ba'i bar du ni chos kyi dbyings kyi rnam grangs su gtogs pa skye ba med pa dang / 'gag pa med pa la sogs pa dmigs su med pa bstan to/ /shin tu rnam par dag pa'i phyir sngon gyi mtha' dmigs su med do zhes bya ba nas/ shin tu rnam par dag pa'i phyir 'phel ba dmigs su med do zhes bya ba'i bar du ni dus gsum dang 'ong ba dang 'gro ba dang gnas pa dang tshe 'pho ba dang / skye ba dang / 'grib pa dang / 'phel ba rnams don dam par rang bzhin stong pa nyid yin pas/ shin tu rnam par dag pa'i phyir dmigs su med pa bstan pa'o/ / gang mi dmigs pas thams cad dmigs su med pa yin zhe na zhes bya ba ni gang du smos pa'i chos rnams dmigs su med par bshad pa chos de dag gi rgyu mi dmigs pas dmigs su med dam/ 'on te chos de dag gi rang bzhin mi dmigs pas dmigs su med snyam du 'khor gyi nang na kha cig the tshom za ba bsal ba'i phyir gang mi dmigs pas thams cad dmigs su med pa yin zhes bcom ldan 'das nyid kyis glengs pa'o/ /chos kyi dbyings mi dmigs pas chos kyi dbyings dmigs su med do zhes bya ba ni don dam par chos kyi dbyings kyi rang bzhin dngos po med de mi dmigs pas chos kyi dbyings dmigs su med pa yin no zhes bstan pa'o/ /de ci'i phyir zhe na/ rab 'byor chos kyi dbyings dmigs su med pa ni dmigs pa yang ma yin/ mi dmigs pa yang ma yin no/ / zhes bya ba ni dmigs pa dang mi dmigs pa dag dngos po yod pa las brjod kyi/ dngos po med pa la dmigs pa dang / mi dmigs pa zhes bya ba'i tha snyad gdags su med de/ de'i phyir chos kyi dbyings dmigs su med pa la/ dmigs pa dang mi dmigs pa'i tha snyad gdags su med do zhes bstan pa'o/ /chos kyi dbyings la ji ltar bshad pa de bzhin du de bzhin nyid dang yang dag pa'i mtha' la sogs pa 'grib pa dang / 'phel ba dmigs su med pa la thug gi bar du sbyar bar bya'o/ /sa dang po mi dmigs pas sa dang po dmigs su med do zhes bya ba nas/ de ci'i phyir zhe na/ rab 'byor sa bcu pa dmigs su med pa ni dmigs pa yang ma yin/ mi dmigs pa yang ma yin no zhes bya ba'i bar du ni dkar po rnam par mthong ba'i sa la sogs pa yang don dam par dngos po med pas dmigs pa dang mi dmigs pa'i tha snyad gdags su med do zhes bstan pa'o/ /sa dang po ni gang zhes bya ba la sogs pa ni gang du sa dang po nas sa bcu'i bar du dmigs su med do zhes bshad pa sa bcu la rnam pa gnyis te/ byang chub sems dpa'i sa dang po rab tu dga' ba nas sa bcu pa chos kyi sprin gyi bar la yang sa bcu zhes bya/ dkar po rnam par mthong ba'i sa la sogs pa la sa bcu zhes bya na/ skabs 'dir sa bcu gang la bya snyam du 'khor gyi nang na kha cig the tshom za ba'i the tshom bsal ba'i phyir bcom ldan 'das nyid kyis dkar po rnam par mthong ba'i sa la sogs pa ming gis brjod pa bstan pa'o/ /de la dkar po rnam par mthong ba'i sa zhes bya ba ni mos pas spyod pa'i sa la dang po shes rab kyis rnam par byang ba'i chos rnams mthong ba'i gnas skabs la bya'o/ /rigs kyi gnas kyi sa zhes bya ba ni mos pas spyod pa'i sa la drod dang / rtse mo dang / bzod pa dang / 'jig rten gyi chos kyi mchog la gnas pa'i tshe byang chub gsum gyi rigs dang ldan pa'i phyir rigs kyi sa zhes bya'o/ / brgyad pa'i sa zhes bya ba ni dgra bcom pa'i 'bras bu thob pa'i gral dang po nas yas bgrangs na/ rgyun du zhugs pa'i 'bras bu mngon sum du bya ba'i phyir 'jug pa grangs brgyad la 'bab pas na brgyad pa zhes bya'o/ /mthong ba'i sa zhes bya ba ni rgyun du zhugs pa'i 'bras bu la gnas pas 'jig rten las 'das pa'i lam gang zag la bdag med pa'i chos mthong ba'i phyir mthong ba'i sa zhes bya'o/ /bsrabs pa'i sa zhes bya ba ni lan cig phyir 'ong bas 'dod pa'i 'dod chags srab mor byas pa'i phyir lan cig phyir 'ong ba'i sa la bsrabs pa'i sa zhes bya'o/ /'dod chags dang bral ba'i sa zhes bya ba ni phyir mi 'ong bas 'dod pa'i 'dod chags dang / gnod sems spangs pa'i phyir/ phyir mi 'ong ba'i sa la 'dod chags dang bral ba'i sa zhes bya'o/ /byas pa rtogs pa'i sa zhes bya ba ni dgra bcom pas bdag gis bya ba byas so/ /'di las srid pa gzhan med do zhes bya ba la sogs par rtogs pa'i phyir dgra bcom pa'i sa la byas pa rtogs pa'i sa zhes bya ste/ sa de dag las dkar po rnam par mthong ba'i sa ni mos pas spyod pa'i sa la gnas pa'i byang chub sems dpa'i sa'o/ /rigs kyi sa ni mos pas spyod pa'i sa la nyan thos dang / byang chub sems dpa' thun mong gi sa'o/ /brgyad pa'i sa dang / mthong ba'i sa dang / bsrabs pa'i sa dang / 'dod chags dang bral ba'i sa dang / byas pa rtogs pa'i sa rnams ni nyan thos kyi sa'o/ /rang sangs rgyas kyi sa zhes bya ba ni gzhan gyi lung la mi rten par rang gi blos rten cing 'brel par 'byung ba'i don zab mo rtogs nas 'khor dang lhan cig tu gnas pa dang / bse'i rwa ltar gcig pu yan gar du gnas pa la rang sangs rgyas kyi sa zhes bya'o/ /byang chub sems dpa'i sa zhes bya ba ni byang chub sems dpa'i sa rab tu dga' ba la sogs pas bcu la bya'o/ /sangs rgyas kyi sa zhes bya ba ni sangs rgyas kyi sa kun du 'od la bya'o/ /nang stong pa nyid kyi phyir sa dang po dmigs su med do zhes bya ba nas dngos po med pa'i ngo bo nyid stong pa nyid kyi phyir/ sa bcu pa dmigs su med do zhes bya ba'i bar du ni dkar po rnam par mthong ba'i sa la sogs pa sa bcu po de dag re re yang stong pa nyid bco brgyad dang sbyar te/ de ltar stong pa'i phyir sa de dag dmigs su med do zhes bstan pa'o/ /de ci'i phyir zhe na/ rab 'byor shin tu rnam par dag pa'i phyir sa dang po dmigs su med pa ni dmigs pa yang ma yin/ mi dmigs pa yang ma yin no zhes bya ba nas/ shin tu rnam par dag pa'i phyir sa bcu pa dmigs su med pa ni dmigs pa yang ma yin/ mi dmigs pa yang ma yin no zhes bya ba'i bar du ni/ sa bcu po de dag de ltar stong ste/ dmigs su med pas ni/ shin tu rnam par dag pa'i phyir dmigs pa dang / mi dmigs pa'i mtha' gnyis dang bral ba bstan pa'o/ / shin tu rnam par dag pa nye bar bzung na nang stong pa nyid kyi phyir sems can yongs su smin par bya ba dmigs su med do zhes bya ba nas/ shin tu rnam par dag pa nye bar bzung na dngos po med pa'i ngo bo nyid stong pa nyid kyi phyir mig lnga dmigs su med do zhes bya ba'i bar du ni sems can yongs su smin par bya ba dang / sangs rgyas kyi zhing yongs su dag par bya ba dang / de bzhin gshegs pa'i spyan lnga yang don dam par dngos po med de/ shin tu rnam par dag cing stong pa nyid bco brgyad dang sbyar na dmigs su med do zhes bstan pa'o/ /rab 'byor de ltar byang chub sems dpa' sems dpa' chen po shes rab kyi pha rol tu phyin pa la spyod cing / chos thams cad mi dmigs pa'i tshul gyis theg pa chen pos rnam pa thams cad mkhyen pa nyid la gnas par 'gyur ro zhes bya ba ni theg pa des su zhig 'byung bar 'gyur zhe na/ rab 'byor gyis zhus pa'i lan mjug bsdus nas bstan pa ste/ gong du bshad pa'i rim pa ltar shes rab kyi pha rol tu phyin pa la spyod pa'i byang chub sems dpa' de khams gsum nas byung ste/ rnam pa thams cad mkhyen pa nyid du gnas par 'gyur ro zhes bstan pa'o/ /shes rab kyi pha rol tu phyin pa 'bum pa rgya cher bshad pa las/ le'u bcu gcig pa'o// //de nas tshe dang ldan pa rab 'byor gyis bcom ldan 'das la 'di skad ces gsol to/ /bcom ldan 'das theg pa chen po theg pa chen po zhes bgyi ba ni/ lha dang mi dang / lha ma yin du bcas pa'i 'jig rten zil gyis mnan te 'byung bar 'gyur ba de'i slad du theg pa chen po zhes bgyi'o zhes bya ba la sogs pa ni theg pa de gang nas kyang 'byung bar 'gyur zhes bya ba la sogs pa'i don sngar bshad pa las gleng nas theg pa chen po'i nges pa'i tshig dang / theg pa chen po'i chos gang yin pa zhib tu bshad pa ste/ de la lha dang mi dang lha ma yin du bcas pa'i 'jig rten zil gyis mnan te 'byung bar 'gyur bas de'i slad du theg pa chen po zhes bgyi'o zhes bya ba ni theg pa chen po zhes bya ba'i nges pa'i tshig bshad pa ste/ rgya gar gyi skad ya na zhes bya ba theg pa la yang bya/ 'byung ba la yang bya/ 'gro ba la yang bya ste/ skabs 'dir lha dang / mi dang / lha ma yin du bcas pa'i 'jig rten thams cad zil gyis mnan te 'byung bas/ 'byung ba che ba'i phyir theg pa chen po zhes bya'o zhes bstan pa'o/ /bcom ldan 'das theg pa chen po de ni nam mkha' dang mnyam pa ste zhes bya ba la sogs pa ni nam mkha'i dpes theg pa de che ba yin par bstan pa ste/ skabs 'byed pa che ba dang / 'gro ba dang / 'ong ba dang / gnas pa med pa dang / dus gsum med pas che ba nyid bstan pa'o/ /de la ji ltar nam mkha' sems can grangs dang tshad ma mchis pa'i go 'byed pa de bzhin du theg pa chen po 'di yang sems can grangs dang tshad ma mchis pa'i go 'byed pas/ bcom ldan 'das rnam grangs des na/ byang chub sems dpa' sems dpa' chen po rnams kyi theg pa chen po ste zhes bya ba ni skabs 'byed pa che ba bstan pa ste/ ji ltar n am mkha' la sems can thams cad ji ltar 'dod pa'i spyod lam thams cad kyis gnas kyang dog pa med pa'i go skabs 'byed pa che ba de de bzhin du theg pa chen po 'di la yang sems can thams cad skad cig gcig la cig car zhugs nas rnam pa thams cad mkhyen pa nyid kyang dog pa med pa'i phyir theg pa chen po zhes bya'o zhes bstan pa'o/ /theg pa chen po de la 'gro ba dang 'ong ba zhes bgyi ba'am/ gnas pa yang ma mchis zhes bya ba dang / sngon gyi mtha' dang / phyi ma'i mtha' dang / dbus zhes bgyi ba yang ma mchis so zhes bya ba ni 'gro ba dang / 'ong ba dang / gnas pa med pa dang / dus gsum med pa'i mdo bstan pa'o/ /bcom ldan 'das 'di lta ste dper na/ nam mkha' la 'gro ba'am 'ong ba zhes bgyi ba yang ma mchis la/ gnas pa yang ma mchis pa de bzhin du theg pa chen po 'di la yang 'gro ba mi dmigs 'byung ba mi dmigs gnas pa mi dmigs so zhes bya ba ni ji ltar nam mkha' la 'gro ba dang / 'ong ba dang / gnas pa med pa de bzhin du theg pa chen po la yang 'gro ba dang 'ong ba mi dmigs so zhes bstan pa'o/ /bcom ldan 'das 'di lta ste/ dper na nam mkha' ni dus gsum mnyam pa nyid kyi slad du zhes bya ba nas/ bcom ldan 'das 'di lta ste theg pa chen po 'di ni dus gsum mnyam pa nyid kyi theg pa'am/ de'i slad du theg pa chen po theg pa chen po zhes bgyi'o zhes bya ba'i bar du ni dus gsum dmigs su med pa'i phyir theg pa chen po yin par bstan pa'o/ /bcom ldan 'das kyis bka' stsal pa/ rab 'byor de de bzhin no/ /de de bzhin te/ 'di lta ste/ pha rol tu phyin pa drug po 'di dag ni byang chub sems dpa' sems dpa' chen po'i theg pa chen po ste zhes bya ba la sogs pa ni rab 'byor gyis theg pa chen po de nam mkha' dang mnyam par bshad pa de bden te/ de bzhin no zhes bstod pa dang / 'khor gyi nang nas kha cig theg pa chen po de gang yin snyam du the tshom za ba bsal ba'i phyir pha rol tu phyin pa drug po 'di dag la sogs pa theg pa chen po yin no zhes bstan pa'o/ /de la pha rol tu phyin pa rnams dang / ting nge 'dzin rnams dang / stong pa nyid rnams dang / byang chub kyi phyogs kyi chos la sogs pa sangs rgyas kyi chos ma 'dres pa'i bar gyi chos de rnams kyi mtshan nyid ni sngar bshad pa bzhin no/ /rab 'byor gang yang khyod kyis 'di skad du theg pa de ni lha dang mi dang lha ma yin du bcas pa'i 'jig rten zil gyis mnan te/ 'byung bar 'gyur ro zhes smras pa na zhes bya ba la sogs pa ni gong du rab 'byor gyis theg pa chen po de lha dang / mi dang / lha ma yin du bcas pa'i 'jig rten zil gyis mnan te 'byung bar 'gyur ro zhes smras pa dang / theg pa de nam mkha' dang mnyam mo zhes smras pa dang / nam mkha'i dpes sems can grangs med tshad med pa rnams kyi go skabs 'byed pa dang / nam mkha'i dpes theg pa chen po de la 'gro ba dang / 'ong ba dang / gnas pa med pa smras pa dang / dus gsum med pa smras pa'i tshig rnams smos te/ de dag re re'i don zhib tu bshad pa'o/ /lha dang mi dang lha ma yin du bcas pa'i 'jig rten gang zhe na/ 'di lta ste 'dod pa'i khams dang / gzugs kyi khams dang / gzugs med pa'i khams te zhes bya ba ni lha dang mi dang lha ma yin du bcas pa'i 'jig rten gyi khams gang yin snyam du the tshom za ba bsal ba'i phyir/ 'dod pa'i khams dang / gzugs kyi khams dang / gzugs med pa'i khams nyid lha dang / mi dang lha ma yin du bcas pa'i 'jig rten yin no zhes bstan pa'o/ /rab 'byor gal te 'dod pa'i khams de bzhin ma nor ba de bzhin/ gzhan ma yin pa de bzhin te zhes bya ba la sogs pa ni 'dod pa'i khams de yongs su rdzogs pa'i mtshan nyid dang / bden pa'i mtshan nyid dang / 'dus ma byas pa'i mtshan nyid du yang dag par yod pa zhig yin na ni theg pa chen pos lha dang mi dang lha ma yin du bcas pa'i 'jig rten zil gyis mnan te 'byung bar 'gyur ba'i yang mi rigs na/ 'dod pa'i khams de rnam par brtags pa dang / rgyu dang rkyen gyis bskyed pa/ mi rtag cing mi brtan pa/ 'gyur ba'i chos can yin te/ spang bar 'os pa'i phyir theg pa chen po des lha dang mi dang lha ma yin du bcas pa'i 'jig rten zil gyis mnan te 'byung bar 'gyur ro zhes bstan pa'o/ /'dod pa'i khams la ji ltar bshad pa de bzhin du gzugs kyi khams dang / gzugs med pa'i khams dang / phung po lnga dang / skye mched bcu gnyis dang / rnam par shes pa drug dang / 'dus te reg pa drug dang / 'dus te reg pa'i rkyen gyis tshor ba drug dang / sa la sogs pa'i khams drug dang / rten cing 'brel par 'byung ba yan lag bcu gnyis la yang sbyar bar bya'o/ /rab 'byor gal te sbyin pa'i pha rol tu phyin pa dngos po yod pa zhig yin te/ dngos po med pa ma yin na ni theg pa chen po 'dis kyang lha dang mi dang lha ma yin du bcas pa'i 'jig rten zil gyis mnan cing 'byung bar mi 'gyur te zhes bya ba la sogs pa ni pha rol tu phyin pa drug dang / stong pa nyid bco brgyad dang / byang chub kyi phyogs kyi chos sum cu rtsa bdun la sogs pa'i sangs rgyas kyi chos 'dres pa bco brgyad la thug gi bar du rnam par byang ba'i chos rnams dang / rigs kyi sa nas sangs rgyas kyi sa'i bar gyi chos rnams dang / rigs kyi sa la gnas pa'i gang zag la sogs pa yang dag par rdzogs pa'i sangs rgyas kyi bar dang / chos kyi dbyings la sogs pa bsam gyis mi khyab pa'i dbyings kyi bar gyi chos rnams don dam par dngos po yod pa ma yin par rtogs pa'i phyir theg pa chen po de lha dang / mi dang lha ma yin du bcas pa'i 'jig rten zil gyis mnan te 'byung bar 'gyur ro zhes bstan pa'o/ /rab 'byor gal te lha dang mi dang lha ma yin du bcas pa'i 'jig rten dngos po yod pa zhig yin te zhes bya ba la sogs pa'i bcud kyi 'jig rten rnams dngos po med par rtogs pas theg pa de 'byung bar 'gyur ba bstan pa'o/ /rab 'byor gal te byang chub sems dpa' sems dpa' chen pos sems dang po bskyed phyin chad snying po byang chub tu 'dug gi bar du zhes bya ba la sogs pa ni byang chub sems dpa'i sa dang po nas sa bcu'i bar du ni/ byang chub sems dpa'i sa re re la yang sems bskyed pa'i khyad par re re 'byung ba ji snyed yod pa de dag thams cad dngos po med par rtogs pa'i phyir theg pa chen po de lha dang mi dang lha ma yin du bcas pa'i 'jig rten zil gyis mnan te 'byung bar 'gyur ba bstan pa'o/ /rab 'byor gal te byang chub sems dpa' sems dpa' chen po'i ye shes rdo rje lta bu dngos po yod pa zhig yin te zhes bya ba la sogs pa ni byang chub sems dpa'i sa bcu nas 'phar te/ sangs rgyas kyi sa la 'jug pa'i tshe nyon mongs pa'i sgrib pa dang / shes bya'i sgrib pa bag chags phra mo yan chad ma lus par spong ba'i ye shes la bya'o/ /bag chags kyi mtshams sbyor ba'i nyon mongs pa thams cad dngos po med par khong du chud cing zhes bya ba ni shes bya dang / nyon mongs pa'i sgrib pa'i bag chags nyid nyon mongs pa'i phyi ma skyed pa'i rgyur 'gyur ba'i phyir bag chags kyi mtshams sbyor ba zhes bya'o/ /rab 'byor gal te byang chub sems dpa' sems dpa' chen po'i mtshan sum cu rtsa gnyis dngos po yod pa zhig yin te/ dngos po med pa ma yin na ni zhes bya ba la sogs pa ni byang chub sems dpa'i mtshan sum cu rtsa gnyis dang / de bzhin gshegs pa'i mtshan sum cu rtsa gnyis dngos po med par rtogs pa bstan pa ste/ skyes bu chen po'i mtshan sum cu rtsa gnyis ni 'og nas gzhung nyid las zhib tu 'chad do/ / rab 'byor gal te de bzhin gshegs pa dgra bcom pa yang dag par rdzogs pa'i sangs rgyas kyi 'od dngos po yod pa zhig yin te zhes bya ba la sogs pa na sangs rgyas bcom ldan 'das kyi 'od dngos po med par rtogs par bstan pa ste/ 'od de dngos po zhig yod na ni thogs pa dang bcas pa yin pas stong gsum gyi stong chen po'i 'jig rten gyi khams gang gA'i klung gi bye ma snyed snang bas rgyas par byar yang mi rung gi / don dam par 'od de la dngos po med kyang kun rdzob tu de bzhin gshegs pa'i byin gyi rlabs kyis 'jig rten gyi khams mtha' yas pa snang bas khyab par mdzad do zhes bstan pa'o/ /rab 'byor gal te de bzhin gshegs pa dgra bcom pa yang dag par rdzogs pa'i sangs rgyas kyi gsung yan lag drug cu dang ldan pa dngos po yod pa zhig yin te zhes bya ba la sogs pa ni de bzhin gshegs pa'i gsung yan lag drug cu dang ldan pa don dam par dngos po med pa bstan pa ste/ gal te gsung de dngos po yod pa zhig yin na ni sgra'i rang bzhin thogs pa dang bcas pa yin pas phyogs bcu'i 'jig rten gyi khams gang gA'i klung gi bye ma snyed gsung gis mngon par go bar mdzad du yang mi rung gi / gsung de don dam par dngos po med pa las kun rdzob tu de bzhin gshegs pa'i byin gyi rlabs kyis phyogs bcu'i 'jig rten gyi khams gang gA'i klung gi bye ma snyed gsung gis mngon par go bar mdzad do zhes bstan pa'o/ /de bzhin gshegs pa dgra bcom pa yang dag par rdzogs pa'i sangs rgyas kyi gsung yan lag drug cu dang ldan pa ni de bzhin gshegs pa'i gsang ba'i mdo las 'di skad du zhi ba'i blo gros gzhan yang de bzhin gshegs pa'i gsung yan lag drug cu dang ldan pa 'byung ste/ mnyen pa dang / 'jam pa dang / yid du 'ong ba dang / yid du 'thad pa dang / dag pa dang / dri ma med pa dang / gsal gsal ba dang / snyan cing 'jebs pa dag dang / mnyan par 'os pa dang / mi tshugs pa dang / snyan pa dang / dul ba dang / mi rtsub pa dang / mi brlang ba dang / rab tu dul ba dang / rnar snyan pa dang / lus sim par byed pa dang / sems tshim par byed pa dang / snying dga' bar byed pa dang / dga' ba dang bde ba bskyed pa dang / yongs su gdung ba med pa dang / kun shes par bya ba dang / rnam par rig par bya ba dang / rnam par byang ba dang / dga' bar byed pa dang / mngon par dga' bar byed pa dang / kun shes par byed pa dang / rnam par rig par byed pa dang / rigs pa dang / 'brel pa dang / zlos pa'i skyon med pa dang / seng ge'i shugs dang / glang po che'i sgra skad dang / 'brug gi sgra dbyangs dang / klu'i dbang po'i sgra dang / dri za'i glu dbyangs dang / bya ka la ping ka'i sgra dbyangs bsgrags pa dang / tshangs pa'i sgra dbyangs bsgrags pa dang / shang shang te'u'i sgra dbyangs su grags pa dang / lha'i dbang po'i sgra dbyangs ltar snyan pa dang / rnga'i sgra dang / ma khengs pa dang / mi dma' ba dang / sgra thams cad kyi rjes su zhugs pa dang / tshig zur chag med pa dang / ma tshang ba med pa dang / ma zhum pa dang / mi zhan pa dang / rab tu dga' ba dang / khyab pa dang / chub pa dang / rgyun chags pa dang / 'bel ba dang / sgra thams cad rdzogs par byed pa dang / dbang po thams cad tshim par byed pa dang / ma smad pa dang / mi 'gyur ba dang / ma brtags pa dang / 'khor kun tu grags pa dang / rnam pa thams cad kyi mchog dang ldan pa zhes bya ba gsungs pa lta bu'o/ /de la mnyen pa ni khams dang / dge ba'i rtsa ba thams cad nye bar ston pa'i phyir ro/ /'jam pa ni tshe 'di nyid la bde ba la reg par byed pa'i phyir ro/ /yid du 'ong ba ni don bzang ba'i phyir ro/ /yid du 'thad pa ni tshig 'bru bzang ba'i phyir ro/ /dag pa ni 'jig rten las 'das pa bla na med pa'i rjes las byung ba'i phyir ro/ /dri ma med pa ni nyon mongs pa'i bag la nyal ba dang / bag chags thams cad dang bral ba'i phyir ro/ /gsal gsal ba ni tshig dang yi ge grags pa'i phyir ro/ /snyan cing 'jebs pa ni mu stegs can thams cad kyi log pa'i blo gros dang / lta ba 'jig pa'i yon tan dang ldan pa'i phyir ro/ /mnyan par 'os pa ni bsgrubs pas nges par 'byin pa'i phyir ro/ /mi tshugs pa ni phas kyi rgol ba thams cad kyis bar mi chod pa'i phyir ro/ /snyan pas ni dga' bar byed pa'i phyir ro/ /dul ba ni 'dod chags kyi gnyen por 'gyur ba'i phyir ro/ /mi rtsub pa ni bslab pa bcas pa thabs sla ba'i phyir ro/ /mi brlang ba ni de las 'das pa dag yang dag par 'byung ba ston par byed pa'i phyir ro/ /rab tu dul ba ni theg pa gsum gyis 'dul ba ston pa'i phyir ro/ / rnar snyan pa ni g.yeng ba'i gnyen por gyur pa'i phyir ro/ /lus sim par byed pa ni ting nge 'dzin thob par byed pa'i phyir ro/ /sems tshim par byed pa ni lhag mthong gis mchog tu dga' ba thob par byed pa'i phyir ro/ /snying dga' bar byed pa ni the tshom gcod pa'i phyir ro/ /dga' ba dang bde ba bskyed pa ni log par nges pa sel ba'i phyir ro/ /yongs su gdung ba med pa ni bsgrub pa la 'gyod pa med pa'i phyir ro/ /kun shes par bya ba ni thos pa las byung ba'i shes pa phun sum tshogs pa'i gzhir gyur pa'i phyir ro/ /rnam par rig par bya ba ni bsam pa las byung ba'i shes pa phun sum tshogs pa'i gzhir gyur pa'i phyir ro/ /rnam par gsal ba ni slob dpon gyis chos kyi dpe mkhyud med pa las byung ba'i phyir ro/ /dga' bar byed pa ni bdag gi don rjes su thob pa rnams dga' bar byed pa'i phyir ro/ /mngon par dga' bar byed pa ni bdag gi don ma thob pa rnams re bar byed pa'i phyir ro/ /kun shes par byed pa ni bsam gyis mi khyab pa'i chos yang dag par ston pa'i phyir ro/ /rnam par rig par byed pa ni bsam du yod pa'i chos yang dag par ston pa'i phyir ro/ /rigs pa ni tshad ma dang mi 'gal ba'i phyir ro/ /'brel pa ni ci rigs par 'dul ba la ston pa'i phyir ro/ /zlos pa'i skyon med pa ni don med pa ma yin pa'i phyir ro/ /seng ge'i sgra'i shugs ni mu stegs can gyi tshogs thams cad skrag par byed pa'i phyir ro/ /glang po che'i sgra skad ni sgra gsang mtho ba'i phyir ro/ /'brug sgra'i sgra dbyangs ni zab pa'i phyir ro/ /klu'i dbang po'i sgra ni gzung bar 'os pa'i phyir ro/ /dri za'i glu'i dbyangs ni snyan pa'i phyir ro/ / bya ka la ping ka'i sgra dbyangs bsgrags pa ni myur du 'gyur ba'i ngang tshul can gyi phyir ro/ /tshangs pa'i sgra dbyangs bsgrags pa ni rgyang ring du grags pa'i phyir ro/ /shang shang te'u'i sgra dbyangs su grags pa ni grub pa thams cad thob par 'gyur ba'i ltas bzang po yin pa'i phyir ro/ /lha'i dbang po'i sgra dbyangs ltar snyan pa ni 'gal bar bya ba ma yin pa'i phyir ro/ /rnga'i sgra ni bdud phyir rgol ba thams cad pham par bya ba la thog mar 'gro ba'i phyir ro/ /ma khengs pa ni bstod pas khengs par mi 'gyur ba'i phyir ro/ /mi dma' ba ni smad pas zhum par mi 'gyur ba'i phyir ro/ /sgra thams cad kyi rjes su zhugs pa ni rnam par bsgrub pa thams cad dang / sgra'i mtshan nyid rnam pa thams cad kyi rjes su zhugs pa'i phyir ro/ /tshig zur chag med pa ni brjed bzhin du mi smra ba'i phyir ro/ /ma tshang ba med pa ni 'dul ba'i bya ba la dus thams cad du sbyor ba'i phyir ro/ /ma zhum pa ni rnyed pa dang bkur sti la mi brten pa'i phyir ro/ /mi zhan pa ni 'jigs pa med pa'i phyir ro/ /rab tu dga' ba ni thos na rab tu dga' bar 'gyur ba'i phyir ro/ /khyab pa ni rig pa'i gnas thams cad la mkhas pa'i rjes su zhugs pa'i phyir ro/ /byang chub pa ni sems can rnams kyi don mtha' dag sgrub pa'i phyir ro/ /rgyun chags pa ni rgyun mi 'chad pa'i phyir ro/ /'bel ba ni rnam pa sna tshogs su 'bel ba'i phyir ro/ /sgra thams cad rdzogs par byed pa ni sgra gcig las sgra'i rnam par rig pa du ma 'byung ba'i phyir ro/ /dbang po thams cad tshim par byed pa ni tshig gcig gis don du ma rig par byed pa'i phyir ro/ /ma smad pa ni dam bcas pa bzhin du byed pa'i phyir ro/ /mi 'gyur ba ni ma 'ongs pa'i dus na de bzhin du mi 'gyur ba'i phyir ro/ /ma brtags pa ni rtab rtab por mi smra ba'i phyir ro/ /'khor kun tu grags pa de ni 'khor nye ring la mtshungs par grags pa'i phyir ro/ /rnam pa thams cad kyi mchog dang ldan pa ni 'jig rten pa dang / 'khor las 'das pa'i don dang dpe'i chos thams cad kyi mchog dang ldan pa'i phyir ro/ /rab 'byor gal te de bzhin gshegs pa dgra bcom pa yang dag par rdzogs pa'i sangs rgyas kyi chos kyi 'khor lo dngos po yod pa zhig yin te zhes bya ba la sogs pa ni de bzhin gshegs pa'i chos kyi 'khor lo bskor ba don dam par dngos po med par rtogs pa bstan pa ste/ chos kyi 'khor lo bskor ba dngos po zhig yod na ni dge sbyong dang / bram ze dang / lha dang / bdud dang / tshangs pa la sogs pa chos thams cad kyi dngos po yod par lta ba rnams kyis kyang chos kyi 'khor lo bskor nus pa'i rigs na/ dngos po yod par lta ba rnams kyis bskor ma nus pa las na/ de bzhin gshegs pas don dam par chos kyi 'khor lo bskor ba dngos po med par thugs su chud nas kun rdzob tu sgyu ma lta bu'i tshul gyis sus kyang bskor ma nus pa'i chos kyi 'khor lo bskor to zhes bstan pa'o/ /rab 'byor gal te de bzhin gshegs pa dgra bcom p a yang dag par rdzogs pa'i sangs rgyas kyis gang gi don du chos kyi 'khor lo bskor ba'i sems can de dag dngos po yod pa zhig yin te zhes bya ba la sogs pa ni sems can gang gi phyir chos kyi 'khor lo bskor bar bya ba'i sems can de dag don dam par dngos po med par rtogs pas theg pa chen po des lha dang mi dang lha ma yin du bcas pa'i 'jig rten zil gyis mnan te 'byung bar 'gyur ba bstan pa ste/ sems can de dag dngos po yod pa zhig yin na ni sems can gyi dngos po las nams kyang mi 'gyur bas s ems can de dag phung po ma lus pa'i mya ngan las 'das pa'i dbyings su yongs su mya ngan las 'dar yang mi rung ba zhig na sems can de dag don dam par dngos po med la kun rdzob tu 'khrul pa'i dbang gis sgyu ma tsam du snang ba'i phyir sems can de dag chos kyi 'khor lo bskor ba des phung po'i lhag ma ma lus pa'i mya ngan las 'das pa'i dbyings su yongs su mya ngan las 'das par gyur to zhes bstan pa'o/ /de ltar chos de dag dngos po med par rtogs pa'i phyir ro/ /theg pa chen po des lha dang mi dang lha ma yin du bcas pa'i 'jig rten zil gyis mnan cing 'byung bar gyur to zhes bya ba'i tshig ni gong ma rnams la yang sbyar bar bya'o/ /rab 'byor gang yang khyod kyis 'di skad du theg pa de ni nam mkha' dang mnyam pa'o zhes smras pa ni/ de de bzhin no zhes bya ba la sogs pa ni gong du rab 'byor gyis theg pa chen po nam mkha' dang mnyam mo zhes smras pa'i don bcom ldan 'das kyis spros nas bshad pa ste/ kun brtags pa'i dngos po rnams ni rnam pa nyi shu rtsa bzhir rnam par gzhag ste/ theg pa chen po 'di la de lta bu'i rnam par gzhag pa med pa'i phyir nam mkha' dang mnyam par rig par bya'o/ /de la rnam pa nyi shu rtsa bzhi ni phyogs rnam par gzhag pa dang / dbyibs rnam par gzhag pa dang / kha dog rnam par gzhag pa dang / dus gsum rnam par gzhag pa dang / 'phel 'grib rnam par gzhag pa dang / kun nas nyon mongs pa dang / rnam par byang ba rnam par gzhag pa dang / skye ba dang 'gag pa la sogs pa rnam par gzhag pa dang / dge ba dang mi dge ba la sogs pa rnam par gzhag pa dang / mthong ba dang thos pa la sogs pa rnam par gzhag pa dang / shes par bya ba dang / shes par mi bya ba la sogs pa rnam par gzhag pa dang / rnam par smin pa la sogs pa rnam par gzhag pa dang / khams gsum gyi khongs su chud pa rnam par gzhag pa dang / 'dod chags dang ldan pa la sogs pa rnam par gzhag pa dang / sems dang po bskyed pa la sogs pa rnam par gzhag pa dang / dkar po rnam par mthong ba'i sa la sogs pa rnam par gzhag pa dang / rgyun tu zhugs pa la sogs pa'i 'bras bu rnam par gzhag pa dang / nyan thos dang rang sangs rgyas kyi sa la sogs pa rnam par gzhag pa dang / gzugs dang gzugs med pa la sogs pa rnam par gzhag pa dang / rtag pa dang mi rtag pa la sogs pa rnam par gzhag pa dang / stong pa dang mi stong pa la sogs pa rnam par gzhag pa dang / zhi ba dang ma zhi ba la sogs pa rnam par gzhag pa dang / snang ba dang mun par rnam par gzhag pa dang / dmigs su yod pa dang dmigs su med pa rnam par gzhag pa pa dang / brjod du yod pa dang / brjod du med pa rnam par gzhag pa'o/ /de la rab 'byor 'di lta ste dper na/ nam mkha' la ni shar phyogs dmigs su med do zhes bya ba la sogs pa ni nam mkha' la phyogs rnam par gzhag pa med pa'i dpes theg pa chen po de nam mkha' dang mnyam pa bstan pa'o/ /rab 'byor 'di lta ste dper na/ nam mkha' ni ring po ma yin thung ngu ma yin zhes bya ba la sogs pa ni dbyibs rnam par gzhag pa med pa bstan pa'o/ /rab 'byor 'di lta ste dper na/ nam mkha' ni sngon po ma yin ser po ma yin zhes bya ba la sogs pa ni kha dog rnam par gzhag pa med pa bstan pa'o/ /rab 'byor 'di lta ste dper na/ nam mkha' la ni 'das pa ma yin zhes bya ba la sogs pa ni dus gsum rnam par gzhag pa med pa bstan pa'o/ /rab 'byor 'di lta ste dper na/ nam mkha' la ni 'grib pa med do zhes bya ba la sogs pa ni 'phel 'grib med pa bstan pa ste/ 'grib pa ni chen po las chung ngur 'gyur ba'o/ /'bri ba ni rgyun 'chad pa'o/ /rab 'byor 'di lta ste dper na/ nam mkha' la kun nas nyon mongs pa med do zhes bya ba la sogs pa ni kun nas nyon mongs pa dang / rnam par byang ba rnam par gzhag pa med pa bstan pa'o/ /rab 'byor 'di lta ste dper na/ nam mkha' la skye ba med do zhes bya ba la sogs pa ni skye ba dang 'gag pa la sogs pa rnam par gzhag pa med pa bstan pa ste/ 'gag pa ni skad cig re re la 'jig pa'o/ /mtha' thug pa med pa ni rgyun chad de mi snang ba la bya'o/ /rab 'byor 'di lta ste/ dper na/ nam mkha' ni dge ba ma yin zhes bya ba la sogs pa ni dge ba dang mi dge ba la sogs pa rnam par gzhag pa med pa bstan pa'o/ /rab 'byor 'di lta ste dper na/ nam mkha' ni mthong ba ma yin zhes bya ba la sogs pa ni/ mthong ba dang thos pa la sogs pa rnam par gzhag pa med pa bstan pa'o/ /rab 'byor 'di lta ste/ dper na/ nam mkha' ni shes par bya ba ma yin zhes bya ba la sogs pa ni shes par bya ba dang / shes par mi bya ba la sogs pa rnam par gzhag pa med pa bstan pa ste/ de la shes par bya ba yang ma yin zhes bya ba ni sgo lnga'i rnam par shes pa'i yul ma yin pa'o/ /rnam par shes par mi bya ba yang ma yin zhes bya ba ni yid kyi rnam par shes pa'i yul ma yin pa'o/ /yongs su shes par bya ba yang ma yin zhes bya ba ni sdug bsngal gyi bden pa ltar yongs su shes par bya ba ma yin pa'o/ /mngon du bya ba yang ma yin zhes bya ba ni 'gog pa'i bden pa ltar mngon sum du bya ba yang ma yin pa'o/ /spang ba ma yin zhes bya ba ni kun 'byung ba'i bden pa ltar spang bar bya ba yang ma yin pa'o/ /bsgom pa yang ma yin no zhes bya ba ni lam gyi bden pa ltar bsgom par bya ba yang ma yin no zhes bya ba'i don to/ /rab 'byor 'di lta ste dper na/ nam mkha' ni rnam par smin pa yang ma yin no zhes bya ba la sogs pa ni rnam par smin pa la sogs pa rnam par gzhag pa med pa bstan pa ste/ rnam par smin pa ni 'bras bur gyur pa la bya'o/ /rnam par smin pa'i chos can ni gdod 'bras bur 'gyur ba la bya'o/ /rab 'byor 'di lta ste dper na/ nam mkha' ni 'dod pa'i khams kyi khongs su chud pa ma yin zhes bya ba la sogs pa ni khams gsum gyi khongs su chud pa rnam par gzhag pa med pa bstan pa'o/ /rab 'byor 'di lta ste dper na/ nam mkha' ni 'dod chags dang ldan pa ma yin zhes bya ba la sogs pa ni 'dod chags dang ldan pa la sogs pa rnam par gzhag pa med pa bstan pa'o/ /rab 'byor 'di lta ste dper na/ nam mkha' la ni sems dang po bskyed pa med do zhes bya ba la sogs pa ni sems dang po bskyed pa la sogs pa rnam par gzhag pa med pa bstan pa'o/ /rab 'byor 'di lta ste dper na/ nam mkha' la ni dkar po rnam par mthong ba'i sa med do zhes bya ba la sogs pa ni dkar po rnam par mthong ba'i sa la sogs pa rnam par gzhag pa med pa bstan pa'o/ /rab 'byor 'di lta ste dper na/ nam mkha' la ni rgyun du zhugs pa'i 'bras bu med do zhes bya ba la sogs pa ni rgyun du zhugs pa la sogs pa'i 'bras bu rnam par gzhag pa med pa bstan pa'o/ /rab 'byor 'di lta ste dper na/ nam mkha' la ni nyan thos kyi sa med do zhes bya ba la sogs pa ni nyan thos dang rang sangs rgyas kyi sa la sogs pa rnam par gzhag pa med pa bstan pa'o/ /rab 'byor 'di lta ste dper na/ nam mkha' ni gzugs dang ldan pa ma yin zhes bya ba la sogs pa'i gzugs dang gzugs med pa la sogs pa rnam par gzhag pa med pa bstan pa'o/ /rab 'byor 'di lta ste dper na/ nam mkha' ni rtag pa ma yin mi rtag pa ma yin zhes bya ba la sogs pa ni rtag pa dang mi rtag pa la sogs pa rnam par gzhag pa med pa bstan pa'o/ /rab 'byor 'di lta ste dper na/ nam mkha' ni stong pa ma yin mi stong pa ma yin zhes bya ba la sogs pa ni stong pa dang mi stong pa la sogs pa rnam par gzhag pa med pa bstan pa'o/ /rab 'byor 'di lta ste dper na/ nam mkha' ni zhi ba ma yin ma zhi ba ma yin zhes bya ba la sogs pa ni zhi ba dang ma zhi ba la sogs pa rnam par gzhag pa med pa bstan pa'o/ /rab 'byor 'di lta ste dper na/ nam mkha' ni snang ba ma yin mun pa ma yin no zhes bya ba la sogs pa ni snang ba dang mun pa rnam par gzhag pa med pa bstan pa'o/ /rab 'byor 'di lta ste dper na/ nam mkha' ni dmigs su yod pa ma yin/ dmigs su med pa ma yin zhes bya ba la sogs pa ni dmigs su yod pa dang / dmigs su med pa rnam par gzhag pa med pa bstan pa'o/ /rab 'byor 'di lta ste dper na/ nam mkha' ni brjod du yod pa yang ma yin/ brjod du med pa yang ma yin no zhes bya ba la sogs pa ni brjod du yod pa dang / brjod du med pa rnam par gzhag pa med pa bstan pa'o/ /rab 'byor rnam grangs des kyang theg pa de ni nam mkha' dang mnyam pa ste/ 'di ltar theg pa chen po'o zhes bya ba ni kun brtags pa'i dngos po rnams la rnam par gzhag pa nyi shu rtsa bzhi yod pa de lta bur nam mkha' la rnam par gzhag pa med pa'i dpes theg pa chen po de nam mkha' dang mnyam par bshad pa'i don mjug bsdus te bstan pa'o/ /rab 'byor gang yang khyod kyis 'di skad du/ ji ltar nam mkha' sems can tshad med grangs med pa'i go 'byed pa de bzhin du theg pa de yang sems can tshad med grangs med pa'i go 'byed do zhes smras pa ni/ de de bzhin no zhes bya ba la sogs pa ni gong du rab 'byor gyis nam mkha' las dpe blangs te/ go skabs 'byed pa che ba'i phyir theg pa chen po'o zhes bgyi'o zhes bshad pa'i don bcom ldan 'das kyis mdor smos pa/ de bden no zhes bstod nas theg pa chen po de sems can tshad med grangs med pa'i go 'byed pa'i don 'gres nyi shu rtsa gnyis kyis zhib tu bshad pa ste/ de ci'i phyir zhe na/ rab 'byor sems can med pa'i phyir nam mkha' med par rig par bya'o zhes bya ba la sogs pa ni go 'byed pa che ba'i phyir/ theg pa chen po'o zhes bya ba'i gtan tshigs bstan pa ste/ /'jig rten pas phyin ci log tu brtags pa ltar sems can dang / nam mkha' dang / theg pa chen po rnams dngos po yod na ni gcig gi go gcig gis chod pas de ltar go skabs chen po 'byed par yang mi 'gyur gyi/ de dag thams cad dngos po med cing mi dmigs pas gcig la gcig thogs pa med de/ go skabs chen po 'byed pa'i phyir theg pa chen po yin no zhes bstan pa'o/ /de ci'i phyir zhe na/ rab 'byor de ni 'di ltar sems can gang yin pa dang / nam mkha' gang yin pa dang / theg pa chen po gang yin pa de dag thams cad kyang dmigs su med pa'i phyir ro zhes bya ba ni sems can dang / nam mkha' dang / theg pa chen po rnams med pa'i gtan tshigs bstan pa ste/ de gsum char yang don dam par dmigs su med pa'i phyir dngos po yod pa ma yin no zhes bstan pa'o/ /de ci'i phyir zhe na/ rab 'byor sems can tshad med pa'i phyir nam mkha' tshad med par rig par bya'o/ /nam mkha' tshad med pa'i phyir theg pa chen po tshad med par rig par bya ste/ rab 'byor rnam grangs 'dis kyang theg pa chen po de sems can tshad med grangs med pa'i go 'byed do zhes bya ba ni sems can dang nam mkha' dang / theg pa chen po de dag dmigs su med pa'i gtan tshigs bstan pa ste/ dngos po zhig yod na ni tshad 'di tsam mo zhes tshad gzung du yang rung na/ de dag dngos po med pa'i phyir tshad med do zhes bstan pa'o/ /de ci'i phyir zhe na/ rab 'byor de ni 'di ltar sems can gang yin pa dang / nam mkha' gang yin pa dang / theg pa chen po gang yin pa de dag thams cad kyang dmigs su med pa'i phyir zhes bya ba ni sems can dang / nam mkha' dang / theg pa chen po tshad med pa'i gtan tshigs bstan pa ste/ de dag 'di ltar dmigs su med pa'i phyir tshad bzung du med do zhes bya ba'i don to/ /de ci'i phyir zhe na/ rab 'byor sems can dpag tu med pa'i phyir nam mkha' dpag tu med par rig par bya'o/ /nam mkha' dpag tu med pa'i phyir theg pa chen po dpag tu med par rig par bya ste/ rab 'byor rnam grangs 'dis kyang theg pa chen po de sems can tshad med grangs med pa'i go 'byed do zhes bya ba sems can dang / nam mkha' dang / theg pa chen po de dag dmigs su med pa'i gtan tshigs dpag tu med pas bstan pa ste/ dngos po zhig dmigs su yod na ni 'di tsam mo zhes dpag tu yang rung na/ dngos por dmigs su med pa'i phyir dpag tu med do zhes bstan pa'o/ /de ci'i phyir zhe na/ rab 'byor de ni 'di ltar sems can gang yin pa dang / nam mkha' gang yin pa dang / theg pa chen po gang yin pa de dag thams cad kyang dmigs su med pa'i phyir ro zhes bya ba ni dpag tu med pa'i gtan tshigs bstan pa ste/ sems can dang nam mkha' dang theg pa chen po de dag 'di ltar dmigs su med pa'i phyir dpag tu med do zhes bstan pa ste/ /de dag ni 'gres dang po'o/ /rab 'byor gzhan yang sems can med pa'i phyir chos kyi dbyings med par rig par bya'o zhes bya ba nas/ chos thams cad med pa gang yin pa de dag thams cad kyang dmigs su med pa'i phyir ro zhes bya ba'i bar du ni sems can dang / nam mkha' dang / theg pa chen po med pa'i steng du chos kyi dbyings dang / mi 'jal ba dang / mi 'grangs pa dang / mi dpogs pa dang / chos thams cad med pa'i gtan tshigs kyis bsnan te/ theg pa chen po de go skabs 'byed pa nye bar bstan pa ste 'gres gnyis pa'o/ / de la mi 'jal ba ni dngos po gang yang med pas bre srang gis gzhal du med pa'i phyir ro/ /mi 'grangs pa ni grangs gcig gnyis la sogs par bgrang du med pa'i phyir ro/ /mi dpogs pa ni rjes su dpag pa'i tshad mas thog tu mi phebs pa'i phyir ro/ /rab 'byor gzhan yang sems can med pa'i phyir de bzhin nyid med par rig par bya'o zhes bya ba nas/ chos thams cad gang yin pa de dag thams cad kyang dmigs su med pa'i phyir ro zhes bya ba'i bar du ni chos kyi dbyings kyi skabs su de bzhin nyid smos pa'i 'gres te gsum pa'o/ /rab 'byor gzhan yang bdag med pa'i phyir/ sems can med par rig par bya'o zhes bya ba nas/ chos thams cad gang yin pa de dag thams cad kyang dmigs su med pa'i phyir ro zhes bya ba'i bar du ni de bzhin nyid kyi skabs su mu stegs can gyis brtags pa'i bdag nyid rnams dang / yang dag pa'i mtha' smos nas/ de dag dngos po med par bstan pa'i 'gres bzhi pa'o/ /rab 'byor gzhan yang bdag med pa'i phyir/ sems can med par rig par bya'o zhes bya ba la sogs pa ni yang dag pa'i mtha'i skabs su bsam gyis mi khyab pa'i dbyings dang / phung po lngas bsnan te de dag dmigs su med pa bstan pa'i 'gres te lnga pa'o/ /de bzhin du nang gi skye mched drug dang sbyar ba'i 'gres ni drug pa'o/ /phyi'i skye mched drug dang sbyar ba'i 'gres ni bdun pa'o/ /rnam par shes pa drug dang sbyar ba'i 'gres ni brgyad pa'o/ /'dus te reg pa drug dang sbyar ba'i 'gres ni dgu pa'o/ /reg pa'i rkyen gyis tshor ba drug dang sbyar ba'i 'gres ni bcu pa'o/ /sa'i khams la sogs pa khams drug dang sbyar ba'i 'gres ni bcu gcig pa'o/ /ma rig pa la sogs pa rten cing 'brel par 'byung ba'i yan lag rnams dang sbyar ba'i 'gres ni bcu gnyis pa'o/ /pha rol tu phyin pa drug dang sbyar ba'i 'gres ni bcu gsum pa'o/ /stong pa nyid bco brgyad dang sbyar ba'i 'gres ni bcu bzhi pa'o/ /byang chub kyi phyogs sum cu rtsa bdun dang sbyar ba'i 'gres ni bco lnga pa'o/ /'phags pa'i bden pa bzhi nas gzungs kyi sgo rnams kyi bar gyi chos rnams dang sbyar ba'i 'gres ni bcu drug pa ste/ chos de rnams ris gcig tu smos pa ni nyan thos dang byang chub sems dpa' rnams thun mong gi chos yin pa'i phyir ro/ /de bzhin gshegs pa'i stobs rnams dang / mi 'jigs pa rnams dang / so so yang dag par rig pa dang / snying rje chen po dang / sangs rgyas kyi chos ma 'dres pa bco brgyad rnams dang sbyar ba'i 'gres ni bcu bdun pa'o/ /rigs kyi sa dang brgyad pa'i sa dang / mthong ba'i sa dang / bsrabs pa'i sa dang / 'dod chags dang bral ba'i sa dang / byas pa rtogs pa'i sa rnams dang sbyar ba'i 'gres ni bco brgyad pa'o/ /rgyun tu zhugs pa la sogs pa'i 'bras bu bzhi dang sbyar ba'i 'gres ni bcu dgu pa'o/ /rang sangs rgyas dang / yang dag par rdzogs pa'i sangs rgyas dang sbyar ba'i 'gres ni nyi shu pa'o/ /theg pa gsum dang / rnam pa thams cad mkhyen pa nyid dang sbyar ba'i 'gres ni nyi shu gcig pa'o/ /mya ngan las 'das pa'i dbyings kyi dpe bstan pa'i 'gres ni nyi shu gnyis pa ste/ /de ltar chos de dag thams cad don dam par dngos po yod par ma grub ste/ dmigs su med pas nam mkha' dang 'dra ba'i phyir theg pa chen po de sems can tshad med grangs med dpag tu med pa'i go skabs 'byed pa che ba'i phyir theg pa chen po'o zhes bya'o zhes bstan pa'o/ /rab 'byor gang yang khyod kyis 'di skad du theg pa chen po de la 'ong ba'am 'gro ba zhes bya ba'ang med/ gnas pa zhes bya ba'ang med do zhes smras pa ni rab 'byor de de bzhin no zhes bya ba la sogs pa ni gang du rab 'byor gyis theg pa de la 'ong ba dang / 'gro ba med pa'i phyir theg pa chen po zhes bya'o zhes bshad pa'i don bcom ldan 'das kyis mdor smos nas/ de bden no zhes bstod de/ theg pa chen po de la 'ong ba'ang med de/ 'gro ba med cing gnas pa med pa'i don zhib tu bshad pa ste/ de ci'i phyir zhe na/ rab 'byor chos thams cad ni g.yo ba med pa ste/ de dag gang nas kyang 'ong ba med do/ /gang du yang 'gro ba med do/ /gar yang gnas par 'gyur ba med do zhes bya ba nas theg pa chen po de la 'ong ba dang 'gro ba med pa'i gtan tshigs bstan pa ste/ don dam par chos thams cad dngos po med pa'i phyir de bzhin nyid kyi rang bzhin la g.yo ba med de gzhan du mi 'gyur bas 'ong ba dang 'gro ba dang / gnas pa med do zhes bstan pa'o/ /de ci'i phyir zhe na/ rab 'byor de ni 'di ltar gzugs ni gang nas kyang 'ong ba med do/ /gong du yang 'gro ba med do/ /gang yang gnas par 'gyur ba med do zhes bya ba la sogs pa ni gong du chos thams cad g.yo ba med pa ste/ 'ong ba dang 'gro ba med par bshad pa ni chos thams cad gang yin pa ming gis smos te bstan pa'o/ /de ci'i phyir zhe na/ rab 'byor gzugs kyi rang bzhin ni gang nas kyang 'ong ba med ces bya ba la sogs pa na don dam par gzugs dngos po med pa'i rang bzhin stong pa nyid ni gang nas kyang 'ong ba med gang du yang 'gro ba med/ gar yang gnas par 'gyur ba med do zhes bstan pa ste/ gzugs kyi rang bzhin dang / de bzhin nyid dang / ngo bo nyid dang / mtshan nyid ces bya ba ni stong pa nyid kyi rnam grangs su zad do/ /gzugs la ji lta ba de bzhin du tshor ba la sogs pa 'jig rten pa'i chos rnams dang / pha rol tu phyin pa drug la sogs pa 'dus ma byas pa la thug gi bar du 'jig rten las 'das pa'i chos rnams la yang sbyar bar bya'o/ /rab 'byor gang yang khyod kyis 'di skad du theg pa de la sngon gyi mtha' 'ang mi dmigs so/ /phyi ma'i mtha' 'ang mi dmigs so/ /dbus kyang mi dmigs te zhes bya ba la sogs pa ni gong du rab 'byor gyis theg pa de dus gsum las 'das pa'i phyir theg pa chen po zhes bya'o zhes bshad pa'i don bcom ldan 'das kyis mdor smos te de bzhin bden no zhes bstod nas theg pa de dus gsum las 'das shing dus gsum mnyam pa nyid kyi don zhib tu bshad pa'o/ / de ci'i phyir zhe na/ rab 'byor de ni 'di ltar 'das pa'i dus kyang 'das pa'i dus kyis stong ngo zhes bya ba la sogs pa ni dus gsum mnyam pa nyid dmigs su med pa'i gtan tshigs bstan pa ste/ don dam pa 'das pa dang / ma 'ongs pa dang / da ltar byung ba zhes bya ba de dag rang bzhin gyis stong pa dang / dus gsum mnyam pa nyid ces bya ba yang tha snyad du btags pa tsam du zad kyi don dam par mnyam pa nyid kyi rang bzhin med pa dang / theg pa chen po dang theg pa chen po la gnas pa'i byang chub sems dpa' yang don dam par dngos po med pa'i phyir dus gsum zhes grangs gcig gnyis la sogs par bgrang zhing tha dad du dbyer med do zhes bstan pa'o/ /de bas na 'di ni byang chub sems dpa' sems dpa' chen po rnams kyi mnyam pa nyid kyi theg pa ste/ de la mnyam pa dang mi mnyam pa mi dmigs so zhes bya ba ni mnyam pa dang mi mnyam pa ces tha dad du mi 'byed pa nyid mnyam pa nyid kyi theg pa yin no zhes bstan pa'o/ /de la 'dod chags dang / 'dod chags dang bral bar yang mi dmigs so zhes bya ba nas/ 'khor ba dang mya ngan las 'das pa yang mi dmigs so zhes bya ba'i bar du ni 'dod chags la sogs pa'i chos rnams kyi ming smos nas/ de dag yod pa dang med pa'i mtha' gnyis tha dad du mi dmigs pa nyid mnyam pa nyid yin par bstan pa'o/ /de ci'i phyir zhe na/ 'di ltar de'i rang bzhin mi dmigs pa'i phyir te zhes bya ba ni 'dod chags la sogs pa'i chos ming gis smos pa de dag gi rang bzhin don dam par dmigs su med pas de'i phyir de dag la yod pa dang / med pa'i mtha' gnyis tha dad du dbyer med de mnyam pa nyid du zhes bstan pa'o/ / rab 'byor 'das pa'i gzugs ni 'das pa'i gzugs kyis stong ngo / /de ci'i phyir zhe na/ stong pa nyid las 'das pa'i gzugs dmigs su med do/ /stong pa nyid kyang stong pa nyid kyis stong pas dmigs su med na/ stong pa nyid las 'das pa'i gzugs dmigs par 'gyur ba lta ci zhig smos zhes bya ba ni don dam par 'das pa'i gzugs kyi rang bzhin stong pa dang / stong pa nyid ces bya ba yang tha snyad du brjod pa tsam du zad kyi/ don dam par dmigs su med pa'i phyir 'das pa'i gzugs kyang rang bzhin gyis stong la/ stong pa nyid la yang 'das pa'i gzugs dmigs su med do zhes bstan pa'o/ /de bzhin du tshor ba la sogs pa phung po lnga char yang dus gsum dmigs su med pa'i don sbyar bar bya'o/ /rab 'byor sbyin pa'i pha rol tu phyin pa ni sngon gyi mthar mi dmigs zhes bya ba la sogs pa ni pha rol tu phyin pa drug la sogs pa sangs rgyas kyi chos ma 'dres pa bco brgyad kyi bar du rnam par byang ba'i chos thams cad la dus gsum dmigs su med pa bstan pa'o/ /rab 'byor gzhan yang so so'i skye bo ni sngon gyi mtha' mi dmigs so zhes bya ba nas/ de bzhin gshegs pa ni dus gsum mnyam pa nyid la mi dmigs te/ de ci'i phyir zhe na/ sems can dmigs su med pa'i phyir zhes bya ba'i bar du ni so so'i skye bo'i gang zag dang / 'phags pa'i gang zag rnams la dus gsum dmigs su med pa bstan pa'o/ /rab 'byor de ltar byang chub sems dpa' sems dpa' chen po shes rab kyi pha rol tu phyin pa la gnas te/ dus gsum mnyam pa nyid la bslabs shing rnam pa thams cad mkhyen pa nyid yongs su rdzogs par bya ste zhes bya ba la sogs pa ni theg pa de dus gsum mnyam pa nyid kyi phyir theg pa chen po zhes bya ba dang / theg pa de la gnas pa'i byang chub sems dpa' lha dang mi dang lha ma yin du bcas pa'i 'jig rten zil gyis mnan te/ rnam pa thams cad mkhyen pa nyid du 'byung bar 'gyur ba'i don mjug bsdus te bstan pa'o/ /de nas tshe dang ldan pa rab 'byor gyis bcom ldan 'das la 'di skad ces gsol to/ /bcom ldan 'das bcom ldan ' das kyis de ltar byang chub sems dpa' sems dpa' chen po rnams kyi theg pa chen po dus gsum mnyam pa nyid ces bgyi ba 'di legs par gsungs pa ni legs shing dge ste zhes bya ba la sogs pa ni dus gsum mnyam pa nyid kyi theg pa chen po de la kun rdzob tu dus gsum gyi sangs rgyas dang / byang chub sems dpa' rnams kyis bslabs na/ rnam pa thams cad mkhyen pa nyid thob par 'gyur ba'i phan yon bstan pa'o/ /shes rab kyi pha rol tu phyin pa 'bum pa rgya cher bshad pa las/ le'u bcu gnyis pa'o/ / //de nas byams gang gi bus bcom ldan 'das la 'di skad ces gsol to/ /bcom ldan 'das gnas brtan rab 'byor 'di ni de bzhin gshegs pa dgra bcom pa yang dag par rdzogs pa'i sangs rgyas kyis shes rab kyi pha rol tu phyin pa'i slad du bsko ba mdzad pas/ 'di ni theg pa chen po bstan pa tsam du sems so zhes bya ba ni gdams pa dang rjes su bstan pa'i skabs su bcom ldan 'das kyis rab 'byor khyod byang chub sems dpa' sems dpa' chen po rnams la shes rab kyi pha rol tu phyin pa las brtsams te/ ci nas kyang byang chub sems dpa' sems dpa' chen po rnams shes rab kyi pha rol tu phyin pa la 'byung bar 'gyur bar spobs pa skyed cig ces sngar bka' stsal te/ rab 'byor shes rab kyi pha rol tu phyin pa la bskos pa'i tshig gang pos smos nas/ shes rab kyi pha rol tu phyin pa dang / theg pa chen po tha mi dad pa'i chos zhib tu bshad pa'i skabs dbye ba'i phyir 'di ni theg pa chen po bstan pa tsam du sems so zhes gsol ba'o/ /de nas tshe dang ldan pa rab 'byor gyis bcom ldan 'das la 'di skad ces gsol to/ /bcom ldan 'das bdag gam gcig gis shes rab kyi pha rol tu phyin pa dang 'gal bar theg pa chen po bstan par ma gyur lags grang zhes bya ba ni rab 'byor bdag theg pa chung ngu ba yin pa las/ bcom ldan 'das kyis shes rab kyi pha rol tu phyin par chad du bcug pa 'di theg pa chen po dang 'gal bar 'gyur grang snyam du dogs pa skyes nas bcom ldan 'das la zhus pa ste/ de ltar zhus pa yang shes rab kyi pha rol tu phyin pa dang 'gal bar ma gyur pas/ 'og nas bcom ldan 'das kyis bshad pas 'khor rnams rab 'byor gyi tshig tshad mar 'dzin du gzhug pa'i phyir/ bcom ldan 'das kyis bka' stsal pa/ rab 'byor de ltar gyur pa'ang med de/ rab 'byor khyod ni shes rab kyi pha rol tu phyin pa dang rjes su mthun par theg pa chen po ston to zhes bya ba ni shes rab kyi pha rol tu phyin pa'i don theg pa chen po dang mi 'gal bar rab 'byor gyis bshad pa bstan pa ste/ de skad ces bka' stsal pa yang rab 'byor gzengs stod cing spro ba bskyed pa dang / rab 'byor gyis bshad pa la 'khor rnams yid ches par bya ba'i phyir ro/ /de ci'i phyir zhe na/ rab 'byor de ni 'di ltar dge ba'i chos gang yang rung ste/ nyan thos kyi chos sam/ rang sangs rgyas kyi chos sam/ byang chub sems dpa'i chos sam/ sangs rgyas kyi chos de dag thams cad kyang shes rab kyi pha rol tu phyin pa'i nang du 'dus shing khongs su chud do zhes bya ba ni/ shes rab kyi pha rol tu phyin pa dang rjes su mthun par theg pa chen po ston pa'i gtan tshigs bshad pa ste/ theg pa gsum du gtogs pa'i chos thams cad kyang shes rab kyi pha rol tu phyin pa'i nang du ma 'dus pa med de/ shes rab kyi pha rol tu phyin pas yongs su zin na chos de dag thams cad kyang theg pa chen po nyid du 'gyur ro zhes bstan pa'o/ /rab 'byor gyis gsol pa/ bcom ldan 'das dge ba'i chos byang chub kyi phyogs gang shes rab kyi pha rol tu phyin pa'i nang du 'dus shing khongs su chud pa de lta bu'i nyan thos kyi chos dang / rang sangs rgyas kyi chos de dag gang lags zhes bya ba ni theg pa gsum gyi chos gang du mdor smos pa rnams 'khor rnams la zhib tu bshad pa'i skabs dbye ba'i phyir zhus pa'o/ /bcom ldan 'das kyis bka' stsal pa/ 'di lta ste/ dran pa nye bar gzhag pa bzhi dang zhes bya ba la sogs pa ni theg pa gsum du gtogs pa'i chos rnams 'di dag yin no zhes dran pa nye bar gzhag pa bzhi la sogs pa sangs rgyas kyi chos ma 'dres pa bco brgyad la thug gi bar du ming gis smos te bstan pa'o/ /mi nyams pa'i chos nyid ces bya ba ni de bzhin gshegs pa'i yon tan nyams par mi 'gyur ro/ /rtag tu btang snyoms kyi rnam par spyod pa zhes bya ba ni de bzhin gshegs pa'i ting nge 'dzin lhun gyis grub pa ste/ rtag tu mnyam par gzhag pas mi mthun pa'i phyogs kyis 'dres par mi thogs pa'i btang snyoms pa bya'o/ /rab 'byor de la theg pa chen po gang yin pa dang / shes rab kyi pha rol tu phyin pa gang yin pa dang zhes bya ba nas/ mya ngan las 'das pa'i dbyings gang yin pa'i chos de dag thams cad ni ldan pa yang ma yin mi ldan pa yang ma yin te/ grangs med pa bstan du med pa thogs pa med pa 'di ltar mtshan nyid med par mtshan nyid gcig pa sha stag ste/ rab 'byor rnam grangs 'dis na/ khyod shes rab kyi pha rol tu phyin pa dang mthun par theg pa chen po ston to zhes bya ba'i bar du ni 'jig rten dang / 'jig rten las 'das pa'i chos ming gis smos pa 'di dag thams cad don dam par stong pa nyid du ro gcig cing / mtshan nyid med par mtshan nyid gcig pa sha stag ste/ tha dad pa med pa'i phyir chos de dag gang bstan kyang shes rab kyi pha rol tu phyin pas yongs su zin pas theg pa chen po shes rab kyi pha rol tu phyin pa dang mthun par ston pa'i gtan tshigs bstan pa ste/ chos de dag las zil gyis [(]mnon [,]gnon [)]pa'i skye mched brgyad dang / rgyas pa'i skye mched bcu'i mtshan nyid ni phyis 'chad do/ / gzhan rnams kyi mtshan nyid ni sngar bshad zin to/ /de ci'i phyir zhe na/ theg pa chen po yang gzhan la/ shes rab kyi pha rol tu phyin pa yang gzhan zhes bya ba med de/ de ltar na theg pa chen po dang / shes rab kyi pha rol tu phyin pa yang gnyis su med de/ gnyis su byar med do zhes bya ba nas/ rab 'byor rnam grangs des na theg pa chen po bstan pas shes rab kyi pha rol tu phyin pa bstan par 'gyur ro/ /shes rab kyi pha rol tu phyin pa bstan pas theg pa chen po bstan par 'gyur ro zhes bya ba'i bar du ni chos de dag thams cad mtshan nyid med par mtshan nyid gcig pa'i gtan tshigs bstan pa ste/ gnyis su med de zhes bya ba ni theg pa chen po dang / shes rab kyi pha rol tu phyin pa la sogs pa sangs rgyas kyi chos ma 'dres pa bco brgyad la thug gi bar gyi chos de dag thams cad don dam par stong pa nyid du ro gcig pa'i phyir gnyis su med ces bya'o/ /gnyis su byar med ces bya ba ni de ltar stong pa nyid du ro gcig pas/ tha dad du dbyer mi nus so zhes bya ba'i don to/ /de bas na theg pa chen po bstan pas shes rab kyi pha rol tu phyin pa bstan par 'gyur/ shes rab kyi pha rol tu phyin pa bstan pas theg pa chen po bstan par 'gyur te/ shes rab kyi pha rol tu phyin pa dang mthun par theg pa chen po ston to zhes gang du smos pa dang sbyar ro/ / de nas tshe dang ldan pa rab 'byor gyis bcom ldan 'das la 'di skad ces gsol to/ /bcom ldan 'das 'di ltar yang byang chub sems dpa' ni sngon gyi mthar mi dmigs so/ /byang chub sems dpa' ni phyi ma'i mthar mi dmigs so/ /byang chub sems dpa' ni dbus su mi dmigs te zhes bya ba ni gang la shes rab kyi pha rol tu phyin pa'i don gdams shing rjes su bstan par bya ba'i byang chub sems dpa' yang dag par rjes su ma mthong ma dmigs na/ byang chub sems dpa' gang zhig shes rab kyi pha rol tu phyin pa la gdams shing rjes su bstan par bgyi zhes 'og nas 'byung ba'i don gleng bslang ba'i phyir byang chub sems dpa' dus gsum du mi dmigs pa bstan pa'o/ /gzugs kun du mtha' yas pa'i slad du byang chub sems dpa' kun tu mtha' yas par rig par bgyi'o zhes bya ba nas/ rnam par shes pa kun tu mtha' yas pa'i slad du byang chub sems dpa' kun tu mtha' yas par bgyi ste zhes bya ba'i bar du ni byang chub sems dpa' dus gsum du mi dmigs pa'i gtan tshigs bstan pa ste/ gzugs la sogs pa'i phung po lnga rnams don dam par rang bzhin gyis stong pas dus gsum gyi mtha' gzung du med de/ mtha' yas pa'i phyir byang chub sems dpa' la yang dus gsum dmigs su med de/ mtha' yas par rig par bya'o zhes bstan pa'o/ /gzugs byang chub sems dpa' zhes bgyi ba de lta bu yang ma mchis mi dmigs so zhes bya ba nas/ rnam par shes pa byang chub sems dpa' zhes bgyi ba de lta bu yang ma mchis mi dmigs te zhes bya ba'i bar du ni de ltar gzugs kun tu mtha' yas pa'i phyir byang chub sems dpa' kun tu mtha' yas par rig par bya na/ 'o na ni gzugs la sogs pa byang chub sems dpa' yin par 'gyur ro snyam du sems pa bsal ba'i phyir gzugs byang chub sems dpa' zhes bgyi ba de lta bu yang ma mchis mi dmigs so zhes bya ba la sogs pa bstan pa'o/ /bcom ldan 'das de ltar bdag gis byang chub sems dpa' thams cad rnam pa thams cad du thams cad yang dag par rjes su ma mthong ste zhes bya ba la sogs pa ni gong du bshad pa'i rim pa de lta bur byang chub sems dpa' yong ye rnam pa thams cad du ma mthong ma dmigs na/ byang chub sems dpa' gang zhig shes rab kyi pha rol tu phyin pa la gdams shing bstan par bgyi zhes bya ba 'og nas 'byung ba dang sbyar ro/ /bcom ldan 'das byang chub sems dpa' zhes bgyi ba 'di ni ming tsam du bas te zhes bya ba nas/ mngon par ma grub pa mngon par ma grub pa'i shes rab kyi pha rol tu phyin pa la gdags su mchis sam zhes bya ba'i bar du ni byang chub sems dpa' zhes bya ba kun rdzob tu ming dang tha snyad tsam du brjod du zad kyi don dam par dngos po yod par ma grub pa'i dpe mu stegs can gyis brtags pa'i dpag tu med pa las blangs te bstan pa'o/ /gal te de ltar bstan pa'i tshe byang chub sems dpa' sems dpa' chen po'i sems mi 'jum yongs su mi 'jum/ 'gyod par mi 'gyur zhing yid mi 'jigs mi dngang skrag par mi 'gyur na byang chub sems dpa' sems dpa' chen po de ni shes rab kyi pha rol tu phyin pa la spyod do zhes bya ba ni de ltar dmigs su med pa'i chos zab mo bstan pa'i tshe sems zhum zhing skrag par ma gyur na/ shes rab kyi pha rol tu phyin pa la yang dag par spyod par chud do zhes zab mo la bzod pa'i rjes su bsngags pa bstan pa'o/ /de nas tshe dang ldan pa sha ra dwa ti'i bus tshe dang ldan pa rab 'byor la 'di skad ces smras so zhes bya ba nas/ tshe dang ldan pa rab 'byor ci'i phyir na de skad du/ gal te de ltar bstan pa'i tshe byang chub sems dpa' sems dpa' chen po'i sems mi 'jum/ yongs su mi 'jum/ 'gyod par mi 'gyur zhing yid mi 'jigs mi dngang skrag par mi 'gyur na byang chub sems dpa' sems dpa' chen po de ni shes rab kyi pha rol tu phyin pa la spyod do z hes smra zhes bya ba'i bar du ni chos thams cad dus gsum du mi dmigs pa'i don 'og nas zhib tu bshad pa'i skabs dbye ba'i phyir gong du rab 'byor gyis byang chub sems dpa' dus gsum du dmigs su med pa la sogs pa bshad pa'i tshig de dag nyid shA ri'i bus bzlas te/ rab 'byor khyod ci'i phyir de skad zer zhes dris pa'o/ /de skad ces smras pa dang / tshe dang ldan pa rab 'byor gyis tshe dang ldan pa sha ra dwa ti'i bu la 'di skad ces smras so/ /tshe dang ldan pa sha ra dwa ti'i bu sems can med pa'i phyir byang chub sems dpa' sngon gyi mthar mi dmigs so zhes bya ba la sogs pa ni byang chub sems dpa' dus gsum du dmigs su med pa'i don rab 'byor gyis zhib tu bshad pa ste/ sems can med pa'i phyir byang chub sems dpa' sngon gyi mthar mi dmigs so zhes bya ba ni mu stegs can gyis brtags pa'i bdag sems can zhes bya ba la sogs pa de dag yang dag par yod pa ma yin te/ de dag 'das pa dang / ma 'ongs pa dang / da ltar gyi dus gsum char na dmigs su med pa de bzhin du byang chub sems dpa' yang don dam par dus gsum du dmigs su med do zhes bstan pa ste/ sems can stong pa dang / sems can dben pa dang / sems can rang bzhin med pa'i phyir zhes bya ba ni mu stegs can gyis brtags pa'i bdag yang dag par yod pa ma yin pa'i rnam grangs bstan pa'o/ / tshe dang ldan pa sha ra dwa ti'i bu de ci'i phyir zhe na/ sems can med pa dang zhes bya ba la sogs pa ni sems can dang / byang chub sems dpa' dang / dus gsum kun kyang stong pa nyid du ro gcig pas tha mi dad pa'i phyir gnyis su med de gnyis su byar med pa'i gtan tshigs bstan pa ste/ des ni gang zag la bdag med pa bshad pa'i sgo nas byang chub sems dpa' dus gsum du dmigs su med pa bstan pa'o/ /tshe dang ldan pa sha ra dwa ti'i bu gzugs med pa'i phyir byang chub sems dpa' sngon gyi mtha' mi dmigs so zhes bya ba la sogs pa ni chos la bdag med pa bshad pa'i sgo nas byang chub sems dpa' dus gsum du dmigs su med pa bstan pa ste/ tshig gi don bshad pa ni gong ma dang 'dra'o/ /gzugs la ji lta ba de bzhin du tshor ba la sogs pa 'jig rten pa'i chos rnams dang / pha rol tu phyin pa drug la sogs pa thams cad mkhyen pa la thug gi bar du 'jig rten las 'das pa'i chos thams cad dus gsum du dmigs su med pa bshad pa la byang chub sems dpa' dus gsum du dmigs su med pa bstan pa'o/ /tshe dang ldan pa sha ra dwa ti'i bu gang yang 'di skad du/ ci'i phyir zhe na/ gzugs kun du mtha' yas pa'i phyir byang chub sems dpa' kun du mtha' yas par rig par bya'o zhes zer ba ni zhes bya ba la sogs pas gong du shA ri'i bus rab 'byor la k hyod ci'i phyir gzugs kun du mtha' yas pa'i phyir byang chub sems dpa' kun du mtha' yas par rig par bya zhes zer zhes dris pa'i tshig rab 'byor gyis bzlas nas gzugs la sogs pa sangs rgyas kyi chos ma 'dres pa bco brgyad la thug gi bar du 'jig rten dang / 'jig rten las 'das pa'i chos thams cad nam mkha'i dpes kun du mtha' yas pa'i don zhib tu bshad pa ste/ ji ltar nam mkha' de dngos po yod pa ma yin zhing rang bzhin gyis stong pa'i phyir de la sngon gyi mtha' dang / phyi ma'i mtha' dang / dbus med de/ kun du mtha' yas pa de bzhin du phung po lnga la sogs pa 'jig rten gyi chos rnams dang / pha rol tu phyin pa drug pa la sogs pa sangs rgyas kyi chos ma 'dres pa bco brgyad kyi bar du 'jig rten las 'das pa'i chos thams cad kyang rang bzhin gyis stong ste/ nam mkha' dang 'dra ba de dag la sngon gyi mtha' dang / phyi ma'i mtha' dang / dbus dmigs su med pa'i phyir kun du mtha' yas so/ /byang chub sems dpa' yang de lta bur stong pa nyid kyi rang bzhin yin pa'i phyir kun du mtha' yas par rig par bya'o zhes bstan pa'o/ /tshe dang ldan pa sha ra dwa ti'i bu gang yang 'di skad du/ ci'i p hyir na gzugs byang chub sems dpa' zhes bya ba de lta bu yang med cing mi dmigs na zhes bya ba la sogs pa ni gong du shA ri'i bus rab 'byor la khyod ci'i phyir gzugs byang chub sems dpa' zhes bya ba de lta bu yang med cing mi dmigs zhes zer zhes dris pa'i tshig rab 'byor gyis bzlas nas gzugs la sogs pa'i chos thams cad byang chub sems dpa' ma yin pa'i gtan tshigs zhib tu bshad pa ste/ tshe dang ldan pa sha ra dwa ti'i bu gzugs ni gzugs kyis stong ste/ de ci'i phyir zhe na/ stong pa nyid la gzugs med byang chub sems dpa' med do zhes bya ba ni don dam par gzugs rang bzhin gyis stong pas de ltar stong pa la gzugs zhes bya ba'am/ byang chub sems dpa' zhes bya ba med de/ de'i phyir gzugs byang chub sems dpa' zhes bya ba de lta bu yang med cing mi dmigs so zhes bdag gis smras so zhes bshad pa'o/ /gzugs la ji ltar bshad pa de bzhin du tshor ba nas de bzhin gshegs pa la thug gi bar du 'jig rten dang 'jig rten las 'das pa'i chos thams cad la yang sbyar bar bya'o/ /tshe dang ldan pa sha ra dwa ti'i bu gang yang 'di skad du bdag gis/ byang chub sems dpa' thams cad du thams cad rnam pa thams cad du thams cad mi dmigs na zhes bya ba la sogs pa ni/ gong du shA ri'i bus rab 'byor la khyod ci'i phyir/ byang chub sems dpa' rnam pa thams cad du mi dmigs na/ byang chub sems dpa' gang zhig shes rab kyi pha rol tu phyin pa gang zhig la gdams shing rjes su bstan par bya zhes zer zhes rab 'byor la dris pa'i tshig rab 'byor gyis bzlas nas de'i don rab 'byor gyis zhib tu bshad pa ste/ gzugs ni gzugs la med cing mi dmigs so/ /gzugs ni tshor ba la med cing mi dmigs so zhes bya ba la sogs pa ni byang chub sems dpa' rnam pa thams cad du med cing mi dmigs pas gdams shing rjes su bstan pa med pa'i gtan tshigs zhib tu bshad pa ste/ gzugs la sogs pa 'jig rten dang 'jig rten las 'das pa'i chos nyan thos dang rang sangs rgyas dang / de bzhin gshegs pa la thug gi bar du chos de dag thams cad don dam par bdag gi dngos por yang med la/ gzhan gyi dngos por yang med pa'i phyir byang chub sems dpa' rnam pa thams cad du med cing mi dmigs pas byang chub sems dpa' gang yang shes rab kyi pha rol tu phyin pa gang la yang gdams shing rjes su bstan du med do zhes bshad pa'o/ /de la gzugs ni gzugs la med cing mi dmigs so zhes bya bas ni bdag gi dngos por med pa bstan to/ /gzugs ni tshor ba la med cing mi dmigs so zhes bya bas ni gzhan gyi dngos por yang med pa bstan pa ste/ de bzhin du chos thams cad la yang bdag gi dngos por med pa dang / gzhan gyi dngos por med pa ci rigs su sbyar bar bya'o/ /tshe dang ldan pa sha ra dwa ti'i bu gang yang 'di skad du/ ci'i phyir na 'di lta ste/ byang chub sems dpa' zhes bya ba 'di ni ming tsam yin zhes zer ba ni zhes bya ba la sogs pa ni gong du shA ri'i bus rab 'byor la khyod ci'i phyir byang chub sems dpa' zhes bya ba 'di ni ming tsam yin no zhes zer zhes dris pa'i tshig rab 'byor gyis bzlas te/ de'i don zhib tu bshad pa ste/ tshe dang ldan pa sha ra dwa ti'i bu 'di lta ste/ byang chub sems dpa' zhes bya ba 'di ni glo bur du ming du btags pa ste/ de'i phyir na 'di lta ste/ byang chub sems dpa' zhes bya ba 'di ming tsam zhes bya ba ni don dam par byang chub sems dpa' zhes bya ba ni dngos po yod par ma grub ste/ de ltar dngos po med pa las byang chub sems dpa' zhes ming du brjod pa ni/ kun rdzob tu glo bur du tha snyad btags par zad de/ de ltar byang chub sems dpa' yang dag par med na/ byang chub sems dpa' gang zhig shes rab kyi pha rol tu phyin pa la gdams shing rjes su bstan par bya zhes gang du smos pa'i don dang sbyar ro/ /tshe dang ldan pa sha ra dwa ti'i bu 'di lta ste/ gzugs zhes bya ba dang / tshor ba zhes bya ba dang / 'du shes zhes bya ba dang / 'du byed ces bya ba dang / rnam par shes pa zhes bya ba ni glo bur du ming du btags pa ste zhes bya ba la sogs pa ni byang chub sems dpa' zhes bya ba 'ba' zhig don dam par med pa las glo bur du ming du btags par ma zad kyi/ phung po lnga la sogs pa chos thams cad kyang don dam par yod pa ma yin pa las glo bur du ming du btags par zad do zhes bstan pa'o/ /'di ltar ming ni gang nas kyang ma 'ong gang du yang mi 'gro gang na yang mi gnas so zhes bya ba ni phung po lnga rnams yang dag par yod pa ma yin pa las glo bur du ming du btags pa'i gtan tshigs bstan pa ste/ gzugs la sogs pa'i phung po de dag don dam par dngos po med pas skye ba'i tshe yang gang nas kyang mi 'ong / /'gag pa'i tshe yang gang du yang mi 'gro/ /skad cig ma'i rang bzhin yin pas gang na yang mi gnas so zhes bstan pa'o/ /ming tsam zhes bya ba gang yin pa de ni gzugs ma yin/ de ni tshor ba ma yin/ de ni 'du shes ma yin/ de ni 'du byed ma yin/ de ni rnam par shes pa ma yin no zhes bya ba ni yang dag par yod pa ma yin pa las glo bur du ming tsam du btags pa de ni yang dag par phung po lnga'i rang bzhin ma yin no zhes bstan pa'o/ /de ci'i phyir zhe na/ 'di ltar ming ni ming gi rang bzhin gyis stong ngo / /stong pa gang yin pa de ni ming ma yin te zhes bya ba ni glo bur du btags pa'i ming de phung po lnga'i rang bzhin ma yin pa'i gtan tshigs bstan pa ste/ ming de rang bzhin gyis stong pa'i phyir phung po lnga'i rang bzhin ma yin no zhes bya ba'i don to/ /phung po lnga la ji ltar bshad pa de bzhin du phyi nang gi skye mched bcu gnyis dang / rnam par shes pa drug dang / 'dus te reg pa drug dang / reg pa'i rkyen gyis tshor ba drug dang / sa'i khams la sogs pa khams drug dang / ma rig pa la sogs pa rten cing 'brel par 'byung ba bcu gnyis la yang sbyar bar bya'o/ /tshe dang ldan pa sha ra dwa ti'i bu gzhan yang 'di lta ste/ sbyin pa'i pha rol tu phyin pa 'di ni ming tsam ste/ ming la yang sbyin pa'i pha rol tu phyin pa dang / sbyin pa'i pha rol tu phyin pa la yang ming de med do zhes bya ba la sogs pa ni pha rol tu phyin pa drug la sogs pa rnam pa thams cad mkhyen pa nyid la thug gi bar du rnam par byang ba'i chos thams cad kyang don dam par yod pa ma yin pas ming tsam du btags par zad pa'i phyir byang chub sems dpa' zhes bya ba yang ming tsam du btags par zad do zhes bstan pa'o/ /tshe dang ldan pa sha ra dwa ti'i bu gang yang 'di skad du dper na bdag bdag ces bya ba ste/ bdag shin tu mngon par ma grub po zhes bya ba la sogs pa ni gong du shA ri'i bus rab 'byor la khyod ci'i phyir dper na bdag bdag ces bya ste/ bdag shin tu mngon par ma grub po zhes bya ba la sogs pa zer zhes dris pa'i tshig rab 'byor gyis bzlas nas/ mu stegs can gyis brtags pa'i bdag la sogs pa shin tu mngon par ma grub pa'i don zhib tu bstan pa ste/ de la tshe dang ldan pa sha ra dwa ti'i bu bdag shin tu med cing mi dmigs na/ de mngon par 'grub par 'gyur ba lta ga la yod ces bya ba nas/ mthong ba po shin tu med cing mi dmigs na de mngon par 'grub par 'gyur ba lta ga la yod ces bya ba'i bar du ni mu stegs can gyis phyin ci log tu btags pa'i bdag rnams byed pa po la sogs pa'i dngos por yod pa ma yin te/ de med cing mi dmigs pas de dag nyid mngon par 'grub par 'gyur ba'am/ de dag las gzhan rnams mngon par grub cing 'byung bar 'gyur ba lta ga la yod ces bshad pa ste/ des ni gang zag la bdag med par bstan to/ /gzugs shin tu med cing mi dmigs na/ de mngon par 'grub par 'gyur ba lta ga la yod ces bya ba nas/ de bzhin gshegs pa dgra bcom pa yang dag par rdzogs pa'i sangs rgyas shin tu med cing mi dmigs na/ de mngon par 'grub par 'gyur ba lta ga la yod ces zhes bya ba'i bar du ni phung po lnga la sogs pa 'jig rten pa'i chos rnams dang / pha rol tu phyin pa drug la sogs pa 'jig rten las 'das pa'i chos thams cad don dam par dngos po yod pa ma yin te/ shin tu med cing mi dmigs na/ de dag mngon par 'grub par 'gyur ba lta ga la yod ces bstan pa ste/ de ni chos la bdag med pa bstan to/ /tshe dang ldan pa sha ra dwa ti'i bu rnam grangs des na bdag ces kyang bya ste/ bdag shin tu mngon par 'grub pa med do zhes bya ba ni gong du smos pa'i don mjug bsdus nas bstan pa ste/ gong du bshad pa'i tshul des na gang zag dang chos gnyi ga shin tu med cing mi dmigs pa'i phyir mngon par 'grub par 'gyur ba med do zhes bstan pa'o/ /tshe dang ldan pa sha ra dwa t i'i bu gzhan yang gang chos thams cad kyang de bzhin du dngos po med pa'i ngo bo nyid yin nam zhes zer ba de ni zhes bya ba la sogs pa ni gong du shA ri'i bus rab 'byor la chos thams cad kyang de bzhin du dngos po med pa'i ngo bo nyid yin na zhes dris pa'i tshig rab 'byor gyis bzlas nas chos thams cad dngos po med pa'i ngo bo nyid yin pa'i don zhib tu bshad pa ste/ de ci'i phyir zhe na/ 'di ltar tshe dang ldan pa sha ra dwa ti'i bus 'du ba las byung ba'i ngo bo nyid med do zhes bya ba ni chos thams cad dngos po med pa'i ngo bo nyid yin pa'i gtan tshigs bstan pa ste/ gzugs la sogs pa'i chos thams cad ni kun rdzob tu rgyu dang rkyen 'dus pa las 'byung ste/ rgyu dang rkyen 'dus pa las byung ba gang yin pa de dag ni don dam par ngo bo nyid med pa yin no zhes bshad pa'o/ /sha ra dwa ti'i bus smras pa/ tshe dang ldan pa rab 'byor gang la 'du ba las byung ba'i ngo bo nyid med pa yin zhes bya ba ni 'du ba las byung ba'i ngo bo nyid med do zhes gong du spyir smos pa chos gang dang gang dag 'du ba las byung ba'i ngo bo nyid med pa yin no zhes so sor phye ste dris pa'o/ /smras pa gzugs la 'du ba las byung ba'i ngo bo nyid med do zhes bya ba nas/ sangs rgyas kyi chos ma 'dres pa rnams la 'du ba las byung ba'i ngo bo nyid med do zhes bya ba'i bar du ni rab 'byor gyis 'jig rten dang 'jig rten las 'das pa'i chos rnams so sor phye ste ming gis smos nas chos 'di rnams la 'du ba las byung ba'i ngo bo nyid med do zhes bstan pa'o/ /tshe dang ldan pa sha ra dwa ti'i bu gzhan yang chos thams cad ni mi rtag pa ste/ gang dang yang bral bas ma yin no zhes bya ba la sogs pa ni mi rtag pa'i sgo nas chos thams cad dngos po med pa'i ngo bo nyid yin par bstan pa'o/ /smras pa tshe dang ldan pa rab 'byor chos thams cad ni mi rtag pa ste/ gang dang yang bral bas ma yin pa de dag gang yin zhes bya ba ni gong du rab 'byor gyis chos thams cad mi rtag pa ste/ gang dang yang bral bas ma yin no zhes spyir smras pa chos de dag gang dang gang yin pa so sor phye ste 'chad du gzhug pa'i phyir sha ra dwa ti'i bus rab 'byor la dris pa'o/ /smras pa/ tshe dang ldan pa sha ra dwa ti'i bu gzugs mi rtag pa ste gang dang yang bral bas ma yin no zhes bya ba ni gzugs la sogs pa'i phung po lnga nas sangs rgyas kyi chos ma 'dres pa bco brgyad kyi bar du 'jig rten pa dang / 'jig rten las 'das pa'i chos thams cad mi rtag pa ste/ gang dang yang bral bas ma yin no zhes bstan pa'o/ /de la mi rtag pa zhes bya ba nyan pa ni gzugs la sogs pa nyan thos kyi theg pa'i tshul gyis ni dngos po skyes pa las zhig pa la bya'o/ /theg pa chen po 'di la ni mi rtag pa'i mtshan nyid de lta ma yin par ston te/ chos thams cad gzod ma nas ma skyes shing rang bzhin gyis stong pa la mi rtag pa zhes bya ste/ rtag tu dngos po yod par ma grub cing dus thams cad du med pa nyid la mi rtag pa zhes bya'o/ /gang dang yang bral bas ma yin no zhes bya ba ni de ltar dngos po yod pa ma yin pas yod pa'i dngos po gang yang zhig par gyur pa ma yin no zhes bya ba'i don to/ /de ci'i phyir zhe na/ tshe dang ldan pa sha ra dwa ti'i bu 'di ltar mi rtag pa gang yin pa de ni dngos po med pa dang zad de zhes bya ba ni mi rtag pa'i don dngos po med par bstan pa'i gtan tshigs bstan pa ste/ gang rtag tu yod pa ma yin pa la mi rtag pa zhes bya ste/ de bas na mi rtag pa'i don ni dngos po med pa dang zad pa la bya'o zhes bya ba'i don te/ zad pa zhes bya na yang med pa'i rnam grangs so/ /tshe dang ldan sha ra dwa ti'i bu gzhan yang chos thams cad ni sdug bsngal ba ste/ gang dang yang bral bas ma yin no zhes bya ba la sogs pa ni sdug bsngal ba'i sgo nas chos thams cad dngos po med pa'i ngo bo nyid yin par bstan pa ste/ gang gi tshe gzugs la sogs pa kun brtags pa'i chos thams cad la dngos po yod par mngon par zhen pa de'i tshe sdug bsngal gyi rgyur 'gyur bas sdug bsngal ba zhes bya'o/ /gang gi tshe kun brtags pa'i chos de dag don dam par dngos po med par rtogs shing / mngon par zhen par ma gyur pa de'i tshe sdug bsngal med par 'gyur te/ de bas na sdug bsngal ba ni dngos po med pa las yod par phyin ci log tu mthong ba las gyur te/ gang phyin ci log tu mthong ba las byung ba de yang dag par yod pa ma yin pa'i phyir chos thams cad ni sdug bsngal ba'o zhes bya bas chos thams cad dngos po med par bstan par rig par bya'o/ /gang dang yang bral bas ma yin no zhes bya ba ni bde ba la sogs pa'i dngos po yod pa gang dang yang bral bas sdug bsngal bar gyur pa ni ma yin gyi/ dngos po med pa las phyin ci log tu mthong ba las sdug bsngal bar gyur to zhes bya ba'i don to/ /'dir yang gzugs la sogs pa'i phung po lnga nas sangs rgyas kyi chos ma 'dres pa bco brgyad kyi bar du 'jig rten pa dang 'jig rten las 'das pa'i chos thams cad la yang don gcig tu sbyar bar bya'o/ /de ci'i phyir zhe na/ tshe dang ldan pa sha ra dwa ti'i bu 'di ltar sdug bsngal gang yin pa de ni dngos po med pa dang zad pa ste zhes bya ba ni de ltar chos thams cad dngos po med pa las phyin ci log tu mthong ste/ yod par brtags pa las sdug bsngal bar gyur pa de ni don dam par dngos po yod pa ma yin pas dngos po med pa dang zad pa'o zhes bstan pa'o/ /tshe dang ldan pa sha ra dwa ti'i bu gzhan yang chos thams cad ni bdag med pa ste/ gang dang yang bral bas ma yin no zhes bya ba la sogs pa ni bdag med pa'i sgo nas thams cad dngos po med pa'i ngo bo nyid yin par bstan pa ste/ gzugs la sogs pa'i phung po lnga nas sangs rgyas kyi chos ma 'dres pa bco brgyad kyi bar du bdag med pa zhes bya ba ni de dag gi rang bzhin med de/ stong pa la bdag med pa zhes bya'i mu stegs can gyis brtags pa'i bdag dang bral bas ni ma yin no zhes bya ba'i don to/ /tshe dang ldan pa sha ra dwa ti'i bu gzhan yang chos thams cad ni tshig zhi ba ste gang dang yang bral bas ma yin no zhes bya ba la sogs pa ni zhi ba'i sgo nas chos thams cad dngos po med pa'i ngo bo nyid yin par bstan pa ste/ gzugs la sogs pa'i phung po lnga nas sangs rgyas kyi chos ma 'dres pa bco brgyad kyi bar gyi chos de dag thams cad don dam par ngo bo nyid med cing gzod ma nas zhi ba'i phyir zhi ba zhes bya'o/ /dngos po yod pa las mi mthun pa'i phyogs dang bral nas zhi bar gyur pa ni ma yin no zhes bstan pa'o/ /tshe dang ldan pa sha ra dwa ti'i bu gzhan yang chos thams cad ni stong pa ste gang dang yang bral bas ma yin no zhes bya ba la sogs pa ni rnam par thar pa'i sgo stong pa nyid dang / mtshan ma med pa dang / smon pa med pa bstan pa'i sgo nas chos thams cad dngos po med pa'i ngo bo nyid yin par bstan pa ste/ gzugs la sogs pa'i phung po lnga nas sangs rgyas kyi chos ma 'dres pa bco brgyad kyi bar gyi chos de dag thams cad don dam par rang bzhin yod par ma grub pa stong pa dang / mtshan ma med pa dang / smon pa med pa yin gyi/ dngos po gzhan dang bral bas stong pa dang / mtshan ma dang bral bas mtshan ma med pa dang / smon pa dang bral bas smon pa med pa ma yin te/ rang bzhin gyis stong pa dang / rang bzhin gyis mtshan ma med pa dang / rang bzhin gyis smon pa med pa'i phyir chos thams cad dngos po med pa'i ngo bo nyid yin no zhes bstan pa'o/ /tshe dang ldan pa sha ra dwa ti'i bu gzhan yang chos thams cad ni dge ba ste/ gang dang yang bral bas ma yin no zhes bya ba la sogs pa dge ba'i sgo nas gzugs la sogs pa sangs rgyas kyi chos ma 'dres pa'i bar du dngos po med pa'i ngo bo nyid yin par bstan pa ste/ gang dang yang bral bas ma yin no zhes bya ba ni mi dge ba'i dngos po 'ga' zhig yod pa las de dang bral bas dge ba zhes btags pa ni ma yin gyi chos thams cad dngos po med cing stong ste/ rang bzhin gyis 'od gsal ba'i phyir dge ba yin no zhes bya ba'i don to/ /de ci'i phyir zhe na/ tshe dang ldan pa sha ra dwa ti'i bu 'di ltar gang dge ba'i dngos po med pa dang zad pa ste zhes bya ba ni dge ba zhes bya ba'i don dngos po med cing rang bzhin gyis 'od gsal ba la bya ba yin par mjug bsdus te bstan pa'o/ /tshe dang ldan pa sha ra dwa ti'i bu gang chos thams cad ni kha na ma tho ba med pa ste/ gang dang yang bral bas ma yin no zhes bya ba la sogs pa ni kha na ma tho ba med pa'i sgo nas gzugs la sogs pa sangs rgyas kyi chos ma 'dres pa bco brgyad kyi bar du dngos po med pa'i ngo bo nyid yin par bstan pa ste/ gang dang yang bral bas ma yin no zhes bya ba ni kha na ma tho ba zhes bya ba'i chos shig yod pa las de dang bral bas kha na ma tho ba med pa zhes bya ba ni ma yin gyi/ rang bzhin gyis stong zhing gtsang ba la kha na ma tho ba med pa zhes bya'o zhes bstan pa'o/ /tshe dang ldan pa sha ra dwa ti'i bu gzhan yang chos thams cad ni zag pa med pa ste/ gang dang yang bral bas ma yin no zhes bya ba la sogs pa ni zag pa med pa'i sgo nas gzugs la sogs pa sangs rgyas kyi chos ma 'dres pa bco brgyad kyi bar du dngos po med pa'i ngo bo nyid yin par bstan pa ste/ 'khor ba'i rgyur gyur pa'i chos zag pa dang bcas pa rnams dang bral bas zag pa med pa zhes bya ba ni ma yin gyi/ gzod ma nas dag pa'i phyir zag pa med pa zhes bya ste/ de'i phyir dngos po med pa'i ngo bo nyid yin no zhes bstan pa'o/ /tshe dang ldan pa sha ra dwa ti'i bu gzhan yang chos thams cad ni nyon mongs pa med pa ste/ gang dang yang bral bas ma yin no zhes bya ba la sogs pa ni nyon mongs pa med pa'i sgo nas chos thams cad dngos po med pa'i ngo bo nyid yin par bstan pa ste/ 'dod chags la sogs pa'i nyon mongs pa rnams dang bral bas nyon mongs pa med par gyur pa ni ma yin gyi/ gzod ma nas zhi ba'i phyir nyon mongs pa med pa yin no zhes bstan pa'o/ /tshe dang ldan pa sha ra dwa ti'i bu gzhan yang chos thams cad ni rnam par byang ba ste/ gang dang yang bral bas ma yin no zhes bya ba la sogs pa ni rnam par byang ba'i sgo nas/ chos thams cad dngos po med pa'i ngo bo nyid yin par bstan pa ste/ mi mthun pa'i phyogs su gtogs pa'i dri ma dang bral bas rnam par gyur pa ni ma yin gyi/ rang bzhin gyis dag pa'i phyir ro zhes bstan pa'o/ /tshe dang ldan pa sha ra dwa ti'i bu gzhan yang chos thams cad ni 'jig rten las 'das pa ste/ gang dang yang bral bas ma yin no zhes bya ba la sogs pa ni 'jig rten las 'das pa'i sgo nas chos thams cad dngos po med pa'i ngo bo nyid yin par bstan pa ste/ 'jig rten pa'i chos yongs su ma dag pa rnams dang bral bas 'jig rten las 'das par gyur pa ni ma yin gyi/ chos thams cad ngo bo nyid kyis stong pas skye ba dang 'jig pa med pa'i phyir 'jig rten las 'das pa yin no zhes bstan pa'o/ /tshe dang ldan pa sha ra dwa ti'i bu gzhan yang chos thams cad ni 'dus ma byas pa ste/ gang dang yang bral bas ma yin no zhes bya ba la sogs pa ni 'dus ma byas pa'i sgo nas chos thams cad dngos po med pa'i ngo bo nyid yin par bstan pa'o/ /'dus byas kyi dngos po zhig yod la/ de dang bral bas 'dus ma byas par gyur pa ni ma yin gyi/ chos thams cad de bzhin nyid kyi rang bzhin yin pa'i phyir 'dus ma byas pa'o zhes bstan pa'o/ /tshe dang ldan pa sha ra dwa ti'i bu gzhan yang chos thams cad ni rtag pa ma yin 'jig pa ma yin no zhes bya ba la sogs pa ni rtag pa ma yin pa dang / 'jig pa ma yin pa'i sgo nas chos thams cad dngos po med pa'i ngo bo nyid yin par bstan pa ste/ kun brtags pa'i chos 'di dag thams cad yod pa zhig yin na ni rtag pa'i rang bzhin te/ ther zug tu gnas pa zhig gam/ mi rtag pa'i rang bzhin te 'jig pa'i chos can zhig yin grang na/ don dam par chos 'di dag thams cad dngos po yod par ma grub pas rtag pa dang 'jig pa'i rang bzhin ma yin no zhes bstan pa'o/ /de ci'i phyir zhe na/ de'i rang bzhin ni de bzhin no zhes bya ba ni gzugs rtag pa ma yin 'jig pa ma yin pa'i gtan tshigs bstan pa ste/ rang bzhin gyis stong pa'i phyir gzugs rtag pa ma yin 'jig pa ma yin no zhes bstan pa'o/ /de bzhin du tshor ba la sogs pa zag pa med pa'i chos la thug gi bar du thams cad la sbyar bar bya'o/ /tshe dang ldan pa sha ra dwa ti'i bu gang yang 'di skad du ci'i phyir gzugs mngon par ma grub ces bya ba la sogs pa ni gong du shA ri'i bus rab 'byor la gzugs la sogs pa'i chos rnams ci'i phyir mngon par ma grub ces zer zhes dris pa'i tshig rab 'byor gyis bzlas nas/ gzugs la sogs pa'i phung po lnga rnams mngon par 'du ma byas pa'i phyir mngon par ma grub po zhes bstan pa'o/ /de ci'i phyir zhe na/ 'di ltar gzugs la mngon par 'du byed pa med ces bya ba la sogs pa ni chos rnams mngon par 'du ma byas pa'i gtan tshigs bstan pa ste/ chos thams cad rang bzhin gyis stong pas mngon par 'du byed pa po med pa'i phyir mngon par 'dus ma byas pa'o zhes bstan pa'o/ /gzugs la ji lta ba bzhin du sangs rgyas kyi chos ma 'dres pa bco brgyad la thug gi bar du sbyar bar bya'o/ /tshe dang ldan pa sha ra dwa ti'i bu rnam grangs des na gzugs mngon par ma grub bo/ /tshor ba mngon par ma grub bo/ /'du shes mngon par ma grub bo/ /'du byed mngon par ma grub bo/ /rnam par shes pa mngon par ma grub bo zhes bya ba ni de ltar chos thams cad mngon par 'du byed pa'i byed pa po med pa'i phyir mngon par ma grub pa'i don rab 'byor gyis mjug bsdus te bstan pa'o/ /tshe dang ldan pa s ha ra dwa ti'i bu gang yang 'di skad du ci'i phyir tshe dang ldan pa rab 'byor gang mngon par ma grub pa de gzugs ma yin zhes bya ba la sogs pa ni gong du shA ri'i bus rab 'byor la ci'i phyir gang mngon par ma grub pa de gzugs ma yin zhes bya ba la sogs pa dris pa'i tshig rab 'byor gyis bzlas nas/ de'i lan du gzugs la sogs pa sangs rgyas kyi chos ma 'dres pa bco brgyad kyi bar gyi chos rnams rang bzhin gyis stong pas skye ba dang 'jig pa med cing gnas pa las gzhan du 'gyur ba yang med de/ de'i phyir gang mngon par ma grub pa de gzugs la sogs pa'i rang bzhin ma yin no zhes bstan pa'o/ /tshe dang ldan pa sha ra dwa ti'i bu rnam grangs des na/ gang mngon par 'dus ma byas pa de gzugs ma yin no zhes bya ba nas/ gang mngon par 'dus ma byas pa de rnam pa thams cad mkhyen pa nyid ma yin no zhes bya ba'i bar du ni de ltar chos thams cad rang bzhin gyis stong pas skye ba dang 'jig pa med pa'i phyir mngon par 'dus ma byas pa ste/ de ltar mngon par 'dus ma byas shing mngon par ma grub pa de gzugs la sogs pa'i phung po lnga nas rnam pa thams cad mkhyen pa nyid la thug gi bar gyi chos de dag gang gi rang bzhin yang ma yin no zhes mngon par ma grub pa'i don mjug bsdus te bstan pa'o/ /tshe dang ldan pa sha ra dwa ti'i bu gang yang 'di skad du ci'i phyir na/ mngon par ma grub pa shes rab kyi pha r ol tu phyin pa la ji ltar gdams shing rjes su bstan par bya zhes smras zhes zer ba ni zhes bya ba la sogs pa ni gong du rab 'byor gyis mngon par ma grub pa'i byang chub sems dpa' de shes rab kyi pha rol tu phyin pa mngon par ma grub pa la ji ltar gdams shing rjes su bstan par bya zhes smras pa la/ shA ri'i bus khyod ci'i phyir de skad zer zhes rab 'byor la dris pa'i lan/ shA ri'i bu la rab 'byor gyis smras pa ste/ tshe dang ldan pa sha ra dwa ti'i bu 'di ltar mngon par ma grub pa gang yin pa de shes rab kyi pha rol tu phyin pa'o/ /shes rab kyi pha rol tu phyin pa gang yin pa de ni mngon par ma grub pa ste/ de ltar mngon par ma grub pa dang / shes rab kyi pha rol tu phyin pa zhes bya ba'i chos de gnyis ni gnyis su med de gnyis su byar med do zhes bya ba ni shes rab kyi pha rol tu phyin pa la gdams shing rjes su bstan par bya ba'i byang chub sems dpa' dang / shes rab kyi pha rol tu phyin pa gnyi ga yang don dam par dngos por med de/ mngon par ma grub par rang bzhin gcig pas tha dad du dbyer med do zhes bstan pa'o/ /tshe dang ldan pa sha ra dwa ti'i bu rnam grangs nges na 'di skad du mngon par ma grub pa de shes rab kyi pha rol tu phyin pa la ji ltar gdams shing rjes su bstan par bya zhes smras so zhes bya ba ni gong du smos pa'i tshul gyis na byang chub sems dpa' dang / shes rab kyi pha rol tu phyin pa gnyis ka yang don dam par mngon par ma grub ste/ stong pa nyid du ro gcig cing tha dad du dbyer med pa la ji ltar gdams shing rjes su bstan par bya zhes smras so zhes don mjug bsdus te bstan pa'o/ /tshe dang ldan pa sha dwa ti'i bu gang yang 'di skad du/ ci'i phyir na mngon par ma grub pa ma gtogs par gang byang chub tu spyod pa'i byang chub sems dpa' de lta bu mi dmigs so zhes zer na ni zhes bya ba la sogs pa ni gong du/ shA ri'i bus rab 'byor la khyod ci'i phyir mngon par ma grub pa ma gtogs par gang byang chub tu spyod pa'i byang chub sems dpa' de lta bu mi dmigs so zhes zer zhes dris pa'i tshig de nyid rab 'byor gyis bzlas nas de'i don zhib tu bstan pa ste/ don dam par mngon par ma grub pa zhes bya ba dang / byang chub sems dpa' zhes bya ba tha dad du dbyer med de stong pa nyid du ro gcig par bstan pa'o/ / ji ltar mngon par 'grub pa dang byang chub sems dpa' gnyis don dam par stong pa nyid du ro gcig pas tha dad du dbyer med de/ gnyis su byar med pa de bzhin du gzugs la sogs pa phung po lnga nas rnam pa thams cad mkhyen pa nyid la thug gi bar du sbyar bar bya'o/ / tshe dang ldan pa sha ra dwa ti'i bu gang yang 'di skad du ci'i phyir na/ de ltar bstan pa'i tshe byang chub sems dpa' sems dpa' chen po gal te mi 'jigs mi dngang skrag par mi 'gyur na byang chub sems dpa' sems dpa' chen po shes rab kyi pha rol tu phyin pa la spyod ces smras zhes zer ba ni zhes bya ba la sogs pa ni gong du/ shA ri'i bus rab 'byor la khyod ci'i phyir/ shes rab kyi pha rol tu phyin pa'i don zab mo de ltar bstan pa'i tshe/ gal te mi 'jigs mi dngang skrag par mi 'gyur na/ shes rab kyi pha rol tu phyin pa la spyod do zhes smras zhes dris pa'i tshig rab 'byor gyis bzlas nas/ de'i don zhib tu bstan pa ste/ tshe dang ldan pa sha ra dwa ti'i bu de ltar byang chub sems dpa' sems dpa' chen pos chos thams cad byed pa med par yang dag par rjes su mthong la/ chos thams cad rmi lam dang 'dra bar yang dag par rjes su mthong zhes bya ba la sogs pa ni don dam par chos thams cad skye ba dang 'jig par byed pa'i rgyu gang yang med par rtogs nas/ rmi lam dang / sgyu ma dang / smig rgyu dang / sgra brnyan dang / mig yor dang / sprul pa dang 'dra bar yang dag par rjes su mthong bas de'i phyir skye ba dang / 'jig pa med pa'i chos zab mo thos nas 'jigs shing skrag par mi 'gyur ro zhes bstan pa'o/ /de nas tshe dang ldan pa rab 'byor gyis bcom ldan 'das la 'di skad ces gsol to/ /bcom ldan 'das gang gi tshe byang chub sems dpa' sems dpa' chen po shes rab kyi pha rol tu phyin pa la spyod pa na/ chos de dag la yongs su rtog pa'i tshe 'di ni gzugs zhes bgyi bar gzugs la mi dmigs shing mi len mi gnas te mngon par zhen par mi bgyid la/ 'dogs par mi bgyid do zhes bya ba la sogs pa ni gong du chos thams cad tha dad du dbyer med cing stong pa nyid du ro gcig par rtogs pa'i 'bras bu gzugs la sogs pa'i chos thams cad la ma chags par gyur pa bstan pa ste/ chos de dag la 'di ltar yongs su rtog pa'i tshe zhes bya ba ni 'jig rten dang / 'jig rten las 'das pa'i chos gong du smos pa de dag la stong pa nyid du ro gcig par yongs su rtog pa'i tshe zhes bya ba'i don to/ /'di ni gzugs zhes bgyi bar gzugs la mi dmigs shing zhes bya ba ni 'du shes kyis mtshan mar mi 'dzin pa'o/ /mi len zhes bya ba ni yid kyis dngos por mi rtog pa'o/ /mi gnas te zhes bya ba ni shes rab kyis stong par rtogs nas de la mi gnas pa'o/ /mngon par zhen par mi bgyid la zhes bya ba ni lta bas mngon par zhen par mi byed pa'o/ /'dogs par mi bgyid do zhes bya ba ni tshig gis ming dang brdar btags shing gzhan la mi ston to zhes bya ba'i don to/ /de bzhin du tshor ba la sogs pa 'jig rten pa'i chos rnams dang / sangs rgyas kyi chos ma 'dres pa bco brgyad la thug gi bar du sbyar bar bya'o/ /bcom ldan 'das gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe 'di ni ting nge 'dzin dang / gzungs kyi sgo zhes bgyi bar ting nge 'dzin dang / gzungs kyi sgo thams cad la mi dmigs shing / mi len mi gnas te mngon par zhen par mi bgyid la/ 'dogs par mi bgyid do zhes bya ba ni ting nge 'dzin gyi sgo dang / gzungs kyi sgor gyur pa'i yi ge a la sogs pa yi ge'i 'bru rnams la yang mtshan mar mi 'dzin cing mngon par zhen par mi 'gyur ba bstan pa'o/ /de ci'i slad du zhe na/ 'di ltar byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gzugs yang dag par rjes su mi mthong zhes bya ba la sogs pa ni de ltar gong du smos pa'i rim pas 'jig rten pa dang / 'jig rten las 'das pa'i chos thams cad la mtshan mar mi 'dzin cing mngon par ma chags pa'i gtan tshigs bstan pa ste/ gzugs la sogs pa rnam pa thams cad mkhyen pa nyid la thug gi bar du chos de dag don dam par dngos po yod par ma grub pas dngos por yang dag par rjes su ma mthong ba'i phyir de dag la mtshan mar mi 'dzin cing mngon par ma chags so zhes bstan pa'o/ /bcom ldan 'das de ci'i slad du zhe na/ de ni 'di ltar gzugs kyi ma skyes pa gang lags pa de gzugs ma lags te/ de ltar na gzugs dang ma skyes pa de gnyis su ma mchis te/ gnyis su bgyir ma mchis so zhes bya ba la sogs pa ni gong du chos thams cad yang dag par rjes su ma mthong bas bshad pa'i gtan tshigs bstan pa ste/ don dam par gzugs ma skyes pa yin pas ma skyes pa la gzugs kyi rang bzhin med pa'i phyir yang dag par rjes su ma mthong ngo zhes bstan pa'o/ /de ltar na gzugs dang ma skyes pa de gnyis su ma mchis te/ gnyis su bgyir ma mchis so zhes bya ba ni gzugs dang ma skyes pa gnyis don dam par dngos po med par ro gcig pa'i phyir tha dad du dbyer med do zhes bya ba'i don to/ /de ci'i slad du zhe na/ bcom ldan 'das de ni 'di ltar ma skyes pa ni gcig ma lags/ gnyis ma lags/ mang ba ma lags/ tha dad pa ma lags te zhes bya ba ni ma skyes pa zhes bya ba don dam par dngos po med pa la bya ste/ dngos po med pa la ni grangs kyis bgrang ba'am/ tha dad du dbyer med do zhes bstan pa'o/ /de ci'i slad du zhe na/ gzugs kyi ma skyes pa gang lags pa de gzugs ma lags so zhes bya ba ni ma skyes pa la gzugs kyi rang bzhin med pa'i phyir don mjug bsdus te bstan pa'o/ /de bzhin du tshor ba nas rnam pa thams cad mkhyen pa nyid kyi bar du 'jig rten pa dang / 'jig rten las 'das pa'i chos thams cad la yang sbyar bar bya'o/ /bcom ldan 'das g zugs kyi 'grib pa gang lags pa de ni gzugs ma lags te zhes bya ba la sogs pa ni gzugs la sogs pa'i chos thams cad don dam par dngos po yod pa ma yin pa las phyin ci log tu yod par brtags pa ni phyis gzhan du 'gyur zhing nyams par 'gyur ba'i phyir 'grib pa zhes bya ba ste/ de ltar yang dag par ma yin pa las kun brtags pa'i gzugs 'grib pa'i rang bzhin can de don dam par gzugs yang dag pa ma yin no zhes bya ba'i don to/ /de ltar na gzugs dang 'grib pa de gnyis su ma mchis te/ gnyis su bgyir ma mchis so zhes bya ba ni don dam par de gnyis stong pa nyid du ro gcig pas tha dad du dbyer med do zhes bya ba'i don to/ /de ci'i slad du zhe na/ bcom ldan 'das de ni 'di ltar 'grib pa ni gcig ma lags gnyis ma lags zhes bya ba la sogs pa ni gnyis su med pa'i gtan tshigs bshad pa ste/ gzugs kyi dngos po med pa las phyin ci log ni yod par rtag pa 'grib pa'i rang bzhin can de ni don dam par dngos po yod pa ma yin pas gcig dang du ma la sogs par tha dad du dbyer med do zhes bstan pa'o/ /de bzhin du tshor ba la sogs pa rnam pa thams cad mkhyen pa nyid la thug gi bar du 'jig rten dang 'jig rten las 'das pa'i chos thams cad la sbyar bar bya'o/ /bcom ldan 'das gang yang gzugs zhes bgyi ba 'di ni gnyis su ma mchis shing nyams pa ma mchis pa'i chos kyi g rangs su bgyis pa'o zhes bya ba la sogs pa ni gzugs kyi phung po nas rnam pa thams cad mkhyen pa nyid la thug gi bar du 'jig rten dang 'jig rten las 'das pa'i chos ming gis smos pa rnams kun rdzob tu gzugs so tshor ba'o zhes bya ba la sogs par gdams shing brjod pa tsam du zad kyi/ don dam par ni de dag thams cad dngos po med pa'i ngo bo nyid du ro gcig cing de bzhin nyid las nyams par mi 'gyur ba'i phyir gnyis su ma mchis shing nyams pa ma mchis pa'i chos kyi grangs su bgyis pa'o zhes/ bcom ldan 'das la rab 'byor gyis gsol pa ste/ grangs su bgyis pa'o zhes bya ba ni gnyis su med cing nyams pa med pa'i rang bzhin nam gnyis su med pa'i rang ris su gtogs so zhes bya ba'i don to/ /shes rab kyi pha rol tu phyin pa 'bum pa rgya cher bshad pa las/ le'u bcu gsum pa'o// //de nas tshe dang ldan pa sha ra dwa ti'i bus/ tshe dang ldan pa rab 'byor la 'di skad ces smras so/ /tshe dang ldan pa rab 'byor byang chub sems dpa' sems dpa' chen po shes rab kyi pha rol tu phyin pa la spyod pa'i tshe chos 'di dag la ni ji ltar yongs su rtog / tshe dang ldan pa rab 'byor byang chub sems dpa' ni gang shes rab kyi pha rol tu phyin pa ni gang / yongs su brtag pa ni gang zhes bya ba ni gong du bcom ldan 'das la rab 'byor gyis/ bcom ldan 'das gang gi tshe byang chub sems dpa' sems dpa' chen po shes rab kyi pha rol tu phyin pa la spyod pa na/ chos de la 'di ltar yongs su rtog pa de'i tshe 'di ni gzugs zhes bgyi bar gzugs la mi dmigs shing mi len mi gnas te mngon par zhen par mi bgyid la/ 'dogs par mi bgyid do zhes bya ba la sogs pa rnam par mi rtog pa'i 'bras bu bstan pa de nyid zhib tu bshad pa'i skabs dbye ba'i phyir/ shA ri'i bus rab 'byor la byang chub sems dpa' gang yin pa dang / shes rab kyi pha rol tu phyin pa gang yin pa dang / yongs su brtag pa gang yin pa dang / don rnam pa gsum dris pa'o/ /de skad ces smras pa dang / tshe dang ldan pa rab 'byor gyis tshe dang ldan pa sha ra dwa ti'i bu la 'di skad ces smras so zhes bya ba la sogs pa ni rab 'byor gyis de'i lan/ byang chub sems dpa' gang yin pa la sogs pa zhib tu bshad pa ste/ tshe dang ldan pa sha ra dwa ti'i bu gang 'di skad du/ byang chub sems dpa' gang zhes zer ba ni gang gi phyir sems can byang chub yin pa de'i phyir byang chub sems dpa' zhes bya'o zhes bya ba ni sems can thams cad chos kyi sku'i byang chub ces bya ba'i rang bzhin yin pa'i phyir byang chub sems dpa' zhes bya'o zhes bstan pa'o/ /byang chub des kyang chos thams cad kyi rnam pa shes pa ste/ chos de dag la mngon par chags pa med do zhes bya ba ni de ltar byang chub kyi rang bzhin can gyi sems pa des kun rdzob tu 'jig rten dang / 'jig rten las 'das pa'i chos thams cad kyi mtshan nyid kyang shes la/ don dam par chos de dag thams cad stong pa nyid du rtogs pas chos de dag la mngon par chags pa med pa'i byang chub sems dpa' yin no zhes bstan pa'o/ /chos gang gi rnam pa shes she na/ gzugs kyi rnam pa shes te/ de la mngon par chags pa med do zhes bya ba la sogs pa ni gzugs la sogs pa sangs rgyas kyi chos ma 'dres pa bco brgyad la thug gi bar du 'jig rten dang / 'jig rten las 'das pa'i chos gang dang gang gi rnam pa shes shing / de dag la mngon par ma chags pa bstan pa'o/ /smras pa/ tshe dang ldan pa rab 'byor chos thams cad kyi rnam pa gang yin zhes bya ba ni gong du chos thams cad kyi rnam pa shes pa ste/ de la mngon par chags pa med do zhes smos pa chos thams cad kyi rnam pa gang yin pa bshad pa'i skabs dbye ba'i phyir/ shA ri'i bus rab 'byor la dris pa'o/ /rab 'byor gyis smras pa/ tshe dang ldan pa sha ra dwa ti'i bu/ rnam pa gang dang / tshul gang dang / mtshan ma gang gis chos rnams rnam pa yod par bya ba ste zhes bya ba la sogs pa ni 'dus byas dang / 'dus ma byas pa'i chos rnams rnam pa dang / tshul dang mtshan ma gang gis 'di ni gzugs so/ /'di ni sgra'o/ /'di ni dri'o/ /'di ni ro'o/ /'di reg go/ /'di ni chos so zhes bya bar phyi nang gi chos thams cad la kun rdzob tu chos rnams so so'i mtshan nyid phyin ci ma log par shes pa las chos rnams kyi rnam pa shes zhes bya'o zhes bstan pa'o/ /tshe dang ldan pa sha ra dwa ti'i bu gang yang 'di skad du shes rab kyi pha rol tu phyin pa gang zhes zer ba ni zhes bya ba la sogs pa ni shes rab kyi pha rol tu phyin pa gang yin zhes gong du/ shA ri'i bus rab 'byor la shes rab kyi pha rol tu phyin pa gang yin zhes dris pa'i don bshad pa ste/ tshe dang ldan pa shwa ra dwa ti'i bu gang la shes rab kyi pha rol tu phyin pa zhes bya ba de ni ring du song ba ste zhes bya ba ni 'jig rten dang 'jig rten las 'das pa'i chos thams cad la kun rdzob dang don dam pa'i mtshan nyid rnam pa thams cad du shes pa'i mthar phyin pa la ring du song ba zhes bya'o/ /de ci'i phyir ring du song ba zhe na/ tshe dang ldan pa sha ra dwa ti'i bu/ phung po rnams las ring du song bas na/ de'i phyir ring du song ba zhes bya'o zhes bya ba la sogs pa ni/ phung po dang / khams dang / skye mched dang / nyon mongs pa rnams dang / lta ba'i rnam pa thams cad dang / 'gro ba rgyud drug dang / pha rol tu phyin pa drug dang / stong pa nyid bco brgyad la sogs pa rnam pa thams cad mkhyen pa nyid la thug gi bar du 'jig rten dang 'jig rten las 'das pa'i chos thams cad kun rdzob dang / don dam par shes pa'i mthar phyin cing chos de dag lam chags te/ chos de dag las ring du gyur pa'i phyir shes rab kyi pha rol tu phyin pa zhes bya'o zhes bstan pa'o/ / tshe dang ldan pa sha ra dwa ti'i bu rnam grangs des na/ 'di lta ste/ shes rab kyi pha rol tu phyin pa yang ring du song ba'o zhes bya ba ni de ltar chos thams cad shes pa'i mthar phyin pa dang / chos de dag la ma chags te ring du song ba'i phyir shes rab kyi pha rol tu phyin pa zhes bya'o zhes gong du smos pa'i don mjug bsdus te bstan pa'o/ /tshe dang ldan pa sha ra dwa ti'i bu gang yang 'di skad du yongs su brtag pa gang zhes zer ba ni zhes bya ba la sogs pa ni/ gong du shA ri'i bus rab 'byor la yongs su brtag pa gang yin pa zhes dris pa'i lan zhib tu bshad pa ste/ phung po lnga la sogs pa 'jig rten pa'i chos rnams dang / pha rol tu phyin pa drug la sogs pa rnam pa thams cad mkhyen pa nyid la thug gi bar du/ 'jig rten las 'das pa'i chos rnams don dam par dngos po med par rtogs pas de dag la rtag pa dang / mi rtag pa dang / bde ba dang / sdug bsngal ba dang / bdag dang bdag med pa dang / sdug pa dang / mi sdug pa dang / stong pa dang mi stong pa dang / mtshan ma yod pa dang / mtshan ma med pa dang / smon pa yod pa dang / smon pa med pa dang / zhi ba dang ma zhi ba dang / dben pa dang / mi dben zhes bya ba'i mtha' gnyis su mi 'dzin cing / mi rtog pa nyid yang dag par yongs su rtogs pa yin no zhes bstan pa'o/ /smras pa/ tshe dang ldan pa rab 'byor ci'i phyir na/ de skad du gzugs kyi ma skyes pa gang yin pa de ni gzugs ma yin zhes bya ba nas/ rnam pa thams cad mkhyen pa nyid kyi ma skyes pa gang yin pa de ni rnam pa thams cad mkhyen pa nyid ma yin zhes zer zhes bya ba'i bar du ni gong du rab 'byor gyis gzugs kyi ma skyes pa de ni gzugs ma yin no zhes bya ba la sogs pa bshad pa'i don zhib tu bshad pa'i skabs dbye ba'i phyir shA ri'i bus rab 'byor la khyod ci'i phyir de skad du gzugs la sogs pa'i chos de rnams kyi ma skyes pa gang yin pa de gzugs la sogs pa ma yin zhes zer zhes de'i gtan tshigs dris pa'o/ /rab 'byor gyis smras pa/ tshe dang ldan pa sha ra dwa ti'i bu gzugs ni gzugs kyis stong ste/ gang stong pa de ni gzugs ma yin te skye ba med do zhes bya ba la sogs pa ni shA ri'i bus dris pa'i lan rab 'byor gyis zhib tu bshad pa ste/ gzugs ni don dam par gzugs kyi rang bzhin gyis stong ste/ yod pa ma yin pas de ni gzugs ma yin zhing skye ba yang med de/ de'i phyir gzugs kyi ma skyes pa gang yin pa de gzugs ma yin no zhes smras so zhes bstan pa'o/ /gzugs la ji ltar bshad pa de bzhin du rnam pa thams cad mkhyen pa nyid la thug gi bar du 'jig rten dang 'jig rten las 'das pa'i chos thams cad la sbyar bar bya'o/ /smras pa/ tshe dang ldan pa rab 'byor ci'i phyir na de skad du gzugs kyi 'grib pa gang yin pa de ni gzugs ma yin zhes bya ba nas rnam pa thams cad mkhyen pa nyid kyi 'grib pa gang yin pa de ni rnam pa thams cad mkhyen pa nyid ma yin zhes zer zhes bya ba'i bar du ni gong du rab 'byor gyis gzugs la sogs pa'i 'grib pa gang yin pa de ni gzugs la sogs pa ma yin no zhes bshad pa'i don zhib tu bshad pa'i skabs dbye ba'i phyir/ shA ri'i bus rab 'byor la khyod ci'i phyir de skad du gzugs la sogs pa'i 'grib pa gang yin pa gzugs la sogs pa ma yin no zhes zer zhes de'i gtan tshigs dris pa'o/ /rab 'byor gyis smras pa/ tshe dang ldan pa sha ra dwa ti'i bu 'di ltar 'grib pa gang yin pa dang / gzugs gang yin pa dang / gnyis su med pa gang yin pa dang zhes bya ba la sogs pa ni shA ri'i bus dris pa'i don rab 'byor gyis zhib tu bshad pa ste 'grib pa dang gzugs dang / gnyis su med pa zhes bya ba ni kun rdzob tu tha snyad tsam du brjod du zad kyi don dam par chos de dag thams cad ldan pa yang ma yin mi ldan pa yang ma yin/ gzugs med pa bstan du med pa thogs pa med pa ste/ 'di ltar mtshan nyid med par mtshan nyid gcig ste/ dngos po med pa ma yin pa'i phyir gzugs kyi 'grib pa gang yin pa de ni gzugs ma yin no zhes smras so zhes bstan pa'o/ /gzugs la sogs pa'i phung po lnga la ji ltar bshad pa de bzhin du rnam pa thams cad mkhyen pa nyid la thug gi bar du 'jig rten dang 'jig rten las 'das pa'i chos thams cad la yang sbyar bar bya'o/ /tshe dang ldan pa sha ra dwa ti'i bu rnam grangs des na gzugs kyi 'grib pa gang yin pa de yang gzugs ma yin zhes bya ba nas/ rnam pa thams cad mkhyen pa nyid kyi 'grib pa gang yin pa de yang rnam pa thams cad mkhyen pa nyid ma yin no zhes bya ba'i bar du ni/ gong du bshad pa'i don nyid mjug bsdus te bstan pa'o/ /smras pa/ tshe dang ldan pa rab 'byor ci'i phyir na de skad du gang 'di gzugs zhes bya ba de ni gnyis su med pa'i grangs su byas pa'o zhes bya ba nas/ gang 'di rnam pa t hams cad mkhyen pa nyid ces bya ba de ni gnyis su med pa'i grangs su byas pa'o zhes zer zhes bya ba'i bar du ni gong du rab 'byor gyis gzugs la sogs pa'i chos rnams gnyis su med pa'i grangs su byas pa'o zhes smras pa'i don zhib tu bshad pa'i skabs dbye ba'i phyir khyod ci'i phyir gzugs la sogs pa gnyis su med pa'i grangs su byas zhes zer zhes de'i gtan tshigs shA ri'i bus rab 'byor la dris pa'o/ /rab 'byor gyis smras pa/ tshe dang ldan pa sha ra dwa ti'i bu 'di ltar gzugs kyang gzhan ma yin/ ma skyes pa yang gzhan ma yin te/ ma skyes pa nyid kyang gzugs/ gzugs nyid kyang ma skyes pa ste/ tshe dang ldan pa sha ra dwa ti'i bu/ rnam grangs des na gang 'di gzugs zhes bya ba de ni gnyis su med pa'i grangs su byas pa'o zhes bya ba nas/ 'di ltar rnam pa thams cad mkhyen pa nyid kyang gzhan ma yin ma skyes pa yang gzhan ma yin te/ ma skyes pa nyid kyang rnam pa thams cad mkhyen nyid rnam pa thams cad mkhyen pa nyid kyang ma skyes pa nyid de/ tshe dang ldan pa sha ra dwa ti'i bu rnam grangs des na gang 'di rnam pa thams cad mkhyen pa nyid ces bya ba de ni gnyis su med pa'i grangs su byas pa'o zhes bya ba'i bar du ni shA ri'i bus dris pa'i lan gnyis su med pa'i gtan tshigs rab 'byor gyis bshad pa ste/ gzugs la sogs pa rnam pa thams cad mkhyen pa nyid la thug gi bar gyi chos rnams ma skyes pa'i rang bzhin du ro gcig ste/ tha mi dad pa'i phyir gnyis su med pa'i grangs su byas so zhes bstan pa'o/ /de nas tshe dang ldan pa rab 'byor gyis/ bcom ldan 'das la 'di skad ces gsol to/ /bcom ldan 'das gang gi tshe byang chub sems dpa' sems dpa' chen po shes rab kyi pha rol tu phyin pa la spyod cing / chos de dag la de ltar yongs su rtog pa de'i tshe/ shin tu rnam par dag pa'i slad du gzugs kyi ma skyes pa mthong bar 'gyur zhes bya ba nas/ shin tu rnam par dag pa'i slad du rnam pa thams cad mkhyen pa nyid kyi ma skyes pa mthong bar 'gyur zhes bya ba'i bar du ni gong du bshad pa'i rim pa ltar chos thams cad don dam par stong pa nyid du ro gcig pas gnyis su med par yongs su rtog pa'i tshe/ 'jig rten dang 'jig rten las 'das pa'i chos thams cad shin tu rnam par dag par rtogs pas chos thams cad ma skyes pa nyid du mthong bar 'gyur ro zhes gnyis su med par yongs su rtog pa'i phan yon bstan pa'o/ /shin tu rnam par dag pa'i slad du so so'i skye bo'i ma skyes pa mthong bar 'gyur zhes bya ba la sogs pa yang gnyis su med par yongs su rtog pa'i phan yon bstan pa ste/ de la so so'i skye bo'i ni 'phags pa'i chos rnams ma thob pa la bya'o/ /so so'i skye bo'i chos ni 'jig rten pa'i chos brgyad la sogs pa la bya'o/ /rgyun du zhugs pa ni gang zag rgyun du zhugs pa'i 'bras bu la gnas pa la bya'o/ /rgyun du zhugs pa'i chos ni 'jig tshogs la lta ba dang / tshul khrims dang brtul zhugs mchog tu 'dzin pa dang / the tshom rnams mthong ba'i lam gyis spangs shing dkar po'i chos thams cad mngon sum du mthong ba'o/ /lan cig phyir 'ong ba ni gang zag lan cig phyir 'ong ba'i 'bras bu la gnas pa lha dang mi'i nang du skye ba gcig cig len pa'o/ /lan cig phyir 'ong ba'i chos ni bsgom pa'i lam gyis 'dod chags la sogs pa'i nyon mongs pa rnams srab mor byas pa'o/ /phyir mi 'ong ba ni gang zag phyir mi 'ong ba'i 'bras bu la gnas pa'o/ /phyir mi 'ong ba'i chos ni gang zag phyir mi 'ong ba des bsgom pa'i lam gyis 'dod chags la sogs pa'i nyon mongs pa thams cad spang ba'i rang bzhin can no/ /dgra bcom pa ni gang zag dgra bcom pa'i 'bras bu la gnas pa nyid do/ /dgra bcom pa'i chos ni khams gsum gyi nyon mongs pa thams cad ma lus par spangs pas bya ba byas/ khur bor/ 'di las srid pa gzhan med do zhes bya ba la sogs pa'i chos can no/ /rang sangs rgyas ni rnam pa gnyis te/ 'khor dang lhan cig spyod pa dang / bse ru ltar gcig pu yan gar du gnas pa'o/ /rang sangs rgyas kyi chos ni gzhan las lung nod mi dgos par bdag rang gi blos rten cing 'brel te 'byung ba'i chos rtogs nas/ tshig gis chos mi 'chad par rdzu 'phrul bstan pas sems can gyi don byed pa'i rang bzhin can no/ /byang chub sems dpa' ni sa dang po nas sa bcu'i bar la gnas pa dag go/ /byang chub sems dpa'i chos ni gang zag dang chos gnyi ga la bdag med par rtogs shing 'khor ba'i mtha' ji srid yod kyi bar du sems can gyi don gtso bor byed pa'i rang bzhin can no/ /sangs rgyas ni ma rig pa'i gnyid sangs shing blo rgyas pas chos thams cad thugs su chud pa'i rang bzhin can te/ sangs rgyas kyi sa la gnas pa'o/ / sangs rgyas kyi chos ni ye shes bzhi la sogs pa de bzhin gshegs pa'i yon tan gyi chos rnams te/ chos de dag kyang don dam par dngos po yod par ma grub cing shin tu rnam par dag pa'i phyir de dag gi ma skyes pa mthong bar 'gyur ro zhes bstan pa ste/ ma skyes pa khong du chud cing rtogs par 'gyur ro zhes bya ba'i don to/ /de nas tshe dang ldan pa sha ra dwa ti'i bus tshe dang ldan pa rab 'byor la 'di skad ces smras so/ /bdag gis tshe dang ldan pa rab 'byor gyis smras pa'i don shes pa ltar na/ gzugs kyang ma skyes la tshor ba yang ma skyes pa zhes bya ba nas/ sangs rgyas kyang skye ba med pa sangs rgyas kyi chos kyang skye ba med pa ni zhes bya ba'i bar du ni gong du rab 'byor gyis chos thams cad ma skyes pa'i rang bzhin du ro gcig ste/ tha mi dad par bshad pa'i don dang tshig shA ri'i bus bzlas te/ khyod kyis de skad du bshad pa'i don bdag gis 'jal te/ de ltar chos thams cad ma skyes pa'i rang bzhin du ro gcig cing tha mi dad na/ chos gcig rtogs pas thams cad rtogs par 'gyur bas nyan thos la sogs pas rgyun du zhugs pa la sogs pa'i 'bras bu thob zin par 'gyur ro zhes bya ba'i tshig 'og nas 'byung ba dang sbyar ro/ /nyan thos kyi theg pa pa rnams kyis kyang rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa nyid thob zin par 'gyur ro/ /rang sangs rgyas kyi theg pa pa rnams kyis kyang rang sangs rgyas kyi byang chub thob zin par 'gyur ro/ /byang chub sems dpa' sems dpa' chen pos kyang rnam pa thams cad mkhyen pa nyid thob zin par 'gyur ro zhes bya ba ni de ltar gong du bshad pa'i rim pas chos thams cad stong pa nyid du ro gcig ste/ tha mi dad na gzugs la sogs pa'i chos rnams dang / rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa'i 'bras bu rnams dang / rang byang chub dang / rnam pa thams cad mkhyen pa nyid rnams stong pa nyid kyi rang bzhin du ro gcig ste/ tha mi dad gzugs la sogs pa'i chos rnams mthong zhing rtogs pa nyid kyis rgyun du zhugs pa la sogs pa'i 'bras bu rnams kyang rtogs shing thob par 'gyur ba'i rigs na/ ci'i phyir de ltar mi 'gyur zhes shA ri'i bus rab 'byor la dris pa'o/ /'gro ba lnga rnams kyang tha mi dad par 'gyur ro zhes bya ba'i bar du ni de ltar chos thams cad stong pa'i rang bzhin du ro gcig ste/ tha mi dad na lha dang / mi dang dud 'gro dang yi dags dang / sems can dmyal ba'i 'gro ba 'di dag yang tha dad du dbyer med par 'gyur ro zhes smras pa'o/ /byang chub sems dpa' sems dpa' chen pos kyang byang chub lnga thob zin par 'gyur ro zhes bya ba ni rgyun du zhugs pa la sogs pa'i 'bras bu bzhi dang / rang byang chub dang byang chub lnga po 'di rnams kyang bla na med pa'i byang chub dang / rang bzhin tha mi dad pas byang chub sems dpas byang chub lnga po de dag ma bsgoms ma bsgrubs par yang thob zin par 'gyur ro zhes smras pa'o/ /tshe dang ldan pa rab 'byor gal te chos thams cad ma skyes pa yin na/ ci'i phyir na rgyun du zhugs pas ni kun du sbyor ba gsum spang ba'i phyir lam bsgoms zhes bya ba ni de ltar chos thams cad stong pa nyid kyi rang bzhin du gcig ste tha mi dad na nyan thos rgyun du zhugs pas kun du sbyor ba gsum spang ba'i phyir 'phags pa'i lam bsgom du yang ci zhig yod ces smras pa ste/ kun du sbyor ba gsum ni 'jigs tshogs la lta ba dang / tshul khrims dang brtul zhugs mchog tu 'dzin pa dang / the tshom dang gsum mo/ /de la 'jig tshogs la lta ba ni bdag tu lta ba ste/ bdag tu lta ba la chags na gang zag la bdag med pa'i chos rnam par thar pa mi 'dod par 'gyur ro/ /tshul khrims dang brtul zhugs mchog tu 'dzin na tshul khrims dang brtul zhugs tsam gyis chog par 'dzin te/ 'phags pa'i lam mi sgom par 'gyur ro/ /the tshom gyis ni 'phags pa'i lam la yid gnyis za bar 'gyur te/ chos 'di gsum 'phags pa'i lam gyi mi mthun pa'i phyogs yin la/ 'khor ba rnams su skye bar sbyor ba rgyu yin pa'i phyir kun du sbyor ba zhes bya'o/ /lan cig phyir 'ong bas ni 'dod chags dang / zhe sdang dang / gti mug srab pa'i phyir lam bsgom zhes bya ba ni de ltar chos thams cad dngos po med pa'i rang bzhin du tha mi dad na nyan thos lan cig phyir 'ong bas 'dod chags dang / zhe sdang dang / gti mug srab mor bya ba'i phyir 'phags pa'i lam sgom du yang ci zhig yod/ gzugs la sogs pa'i chos rnams mthong ba nyid kyis 'phags pa'i lam bsgoms zin pa'i phyir ro zhes bya ba'i don to/ /phyir mi 'ong bas ni don dam pa ma yin pa'i cha can gyi kun du sbyor ba lnga spang ba'i phyir lam bsgoms zhes bya ba ni de ltar chos thams cad skye ba med cing stong pa nyid kyi rang bzhin du tha mi dad na/ dam pa ma yin pa'i cha can gyi kun du sbyor ba lnga spang ba'i phyir/ 'phags pa'i lam bsgom mi dgos so zhes smras pa ste/ dam pa ma yin pa zhes bya ba ni 'dod pa'i khams la bya ste/ gzugs dang gzugs med pa'i khams gong ma gnyis pas ngan cing dman pa'i phyir ro/ /dam pa ma yin pa'i cha can gyi kun tu sbyor ba lnga zhes bya ba ni 'dod pa'i khams su gtogs pa'i nyon mongs pa lnga la bya ste/ kun du sbyor ba lnga ni 'jig tshogs la lta ba dang / tshul khrims dang brtul zhugs mchog tu 'dzin pa dang / 'dod pa'i 'dod chags dang / gnod sems dang lnga'o/ /kun du sbyor ba'i don ni sngar bshad pa bzhin no/ /dgra bcom pas ni bla ma'i cha can gyi kun du sbyor ba rnams spang ba'i phyir lam bsgoms zhes bya ba ni de ltar chos thams cad skye ba med cing stong pa nyid kyi rang bzhin ni tha mi dad na 'phags pa dgra bcom pas gzugs dang / gzugs med pa'i khams kyi nyon mongs pa rnams spang ba'i phyir 'phags pa'i lam bsgom du yang ci zhig yod ces smras pa ste/ bla ma'i cha can gyi kun du sbyor ba zhes bya ba ni gzugs dang gzugs med pa'i khams kyi nyon mongs pa lnga la bya ste/ de dag kyang gzugs kyi khams kyi 'dod chags dang / gzugs med pa'i khams kyi 'dod chags dang / rgod pa dang / nga rgyal dang / ma rig pa rnams te kun du sbyor ba'i don ni sngar bshad pa bzhin no/ /rang sangs rgyas kyi theg pa la zhugs pas ni rang byang chub kyi don du lam bsgoms zhes bya ba la sogs pa ni rang sangs rgyas kyis rang byang chub kyi 'bras bu thob par bya ba'i phyir lam bsgom pa dang / byang chub sems dpa' sems can gyi don du dka' ba spyad pa dang / de bzhin gshegs pas bla na med pa'i byang chub mngon par rdzogs pas sangs rgyas par bya ba dang / chos kyi 'khor lo bskor du yang ci zhig yod ces smras pa'o/ /de skad ces smras pa dang / tshe dang ldan pa rab 'byor gyis/ tshe dang ldan pa sha ra dwa ti'i bu la 'di skad ces smras so zhes bya ba nas/ ma skyes pa la rang sangs rgyas yod par mi 'dod do/ /rang byang chub yod par mi 'dod do zhes bya ba'i bar du ni nyan thos rgyun du zhugs pa la sogs par gdags shing rnam par gzhag pa ni kun rdzob kyi tha snyad tsam du gdags par zad kyi don dam par de dag yod par mi 'dod do zhes bstan pa ste/ 'thob pa dang khong du chud pa zhes bya ba la 'thob pa ni rgyun du zhugs pa'i 'bras bu la sogs pa 'thob par bya ba la bya'o/ /khong du chud pa ni 'phags pa'i lam gyi rang bzhin rtogs pa la bya ste/ don dam par 'thob pa dang / khong du chud pa de dag kyang yod par mi 'dod do zhes bstan pa'o/ /tshe dang ldan pa sha ra dwa ti'i bu bdag ni byang chub sems dpa' sems dpa' chen po dka' ba spyad pa spyod pa yod par mi 'dod do zhes bya ba ni byang chub sems dpa' mi skye ba'i chos la bzod pa thob pas dka' ba spyad pa'i dngos po yod par mi lta ba'i phyir ro/ /don de nyid gsal bar bstan pa'i phyir byang chub sems dpa' sems dpa' chen po yang dka' ba spyod pa'i 'du shes kyis mi spyod do zhes bya ba la sogs pa bshad de/ don dam par dka' ba spyad pa'i dngos po yod par mi lta ba dang / kun rdzob tu yang snying rje chen pos sems can thams cad la pha ma la sogs pa'i 'du shes bskyed pas dka' ba'i 'du shes mi 'byung ba'i phyir ro zhes bstan pa'o/ /byang chub sems dpa' sems dpa' chen po ni 'di ltar sems bskyed de/ de ltar bdag bdag ces bya ba yang de ni thams cad rnam pa thams cad du med cing mi dmigs pa de bzhin du/ phyi nang gi chos rnams la yang 'du shes bskyed de de ltar 'du shes bskyed kyang dka' ba'i 'du shes mi skyed do zhes bya ba ni don dam par chos thams cad dmigs su med par rtogs pas dka' ba'i 'du shes mi skye ba'i thabs bstan pa ste/ mu stegs can gyis bdag tu brtags pa rnams gang zag la bdag med par rtogs pa'i tshe bdag tu brtags pa de dag thams cad rnam pa thams cad du yong ye med pa de bzhin du/ chos la bdag med par rtogs pa'i tshe yang phung po dang khams dang skye mched la sogs pa phyi nang gi chos rnams kyang rnam pa thams cad du med cing mi dmigs par shes par byas la dka' ba'i 'du shes kyang mi skyed do zhes bstan pa'o/ /de ci'i phyir zhe na/ 'di ltar de ni chos gang yang mi lan mi dmigs pa'i phyir ro zhes bya ba ni dka' ba'i 'du shes mi skye ba'i gtan tshigs bstan pa ste/ don dam par dka' ba'i 'du shes skye bar 'gyur ba'i chos gang yang mtshan mar mi 'dzin cing mi dmigs pa'i phyir ro zhes bstan pa'o/ /tshe dang ldan pa sha ra dwa ti'i bu bdag ni ma skyes pa la de bzhin gshegs pa yod par mi 'dod do/ /bla na med pa yang dag par rdzogs pa'i byang chub kyang yod par mi 'dod do zhes bya ba ni don dam par chos thams cad ma skyes pa/ de bzhin gshegs pa dang bla na med pa yang dag par rdzogs pa'i byang chub kyang ma skyes pa'i rang bzhin yin pa'i phyir dngos po yod par mi 'dod do zhes bstan pa'o/ /de bzhin gshegs pas chos kyi 'khor lo bskor ba ltar na/ ma skyes pa'i chos kyis 'thob pa'am 'thob par bya ba med do zhes bya ba ni bcom ldan 'das kyis chos thams cad thog ma nas ma skyes pa'o zhes bshad pa dang sbyar na don dam par ma skyes pa'i chos kyis rgyun du zhugs pa la sogs pa'i 'bras bu thob par byed pa'ang ma skyes la/ thob par bya ba'i 'bras bu de rnams kyang ma skyes pa'i phyir 'thob pa'am 'thob par bya ba med do zhes bya bstan pa'o/ /smras pa tshe dang ldan pa rab 'byor khyod chos skyes pas 'thob pa dang / 'thob par bya ba 'dod dam zhes bya ba'i rgyun du zhugs pa la sogs pa'i gang zag rnams dngos po yod pas rgyun du zhugs pa'i 'bras bu la sogs pa dngos po med pa'i rang bzhin thob par 'dod dam zhes shA ri'i bus rab 'byor la dris pa'o/ /'on tam ma skyes pa'i chos kyis 'thob par 'dod ces bya ba ni rgyun du zhugs pa la sogs pa'i gang zag dngos po med pa zhig gis rgyun du zhugs pa'i 'bras bu la sogs pa dngos po yod pa rnams 'thob par 'dod ces dris pa ste/ dngos po yod pas dngos po med pa 'thob pa dang / dngos po med pas dngos po yod pa 'thob pa gnyi ga la yang mi rigs par mthong nas gal bzung ste dris pa'o/ /rab 'byor gyis smras pa/ tshe dang ldan pa sha ra dwa ti'i bu bdag ni de ltar mi 'dod do/ /ma skyes pa'i chos kyis kyang 'thob par mi 'dod do zhes bya ba ni dngos po yod pas dngos po med pa 'thob pa dang / dngos po med pas dngos po yod pa 'thob pa gnyi ga yang mi rigs pas de ltar mi 'dod do zhes smras pa'o/ / smras pa/ tshe dang ldan pa rab 'byor 'o na thob pa med pa/ mngon par rtogs pa med dam zhes bya ba ni de ltar rnam pa gnyi gar mi 'dod na rgyun du zhugs pa la sogs pa'i gang zag rnams kyis rgyun du zhugs pa'i 'bras bu la sogs pa 'thob pa dang / lam sgom zhing mngon par rtogs pa yang med dam zhes dris pa'o/ /rab 'byor gyis smras pa/ tshe dang ldan pa sha ra dwa ti'i bu 'thob pa yang yod mngon par rtogs pa yang yod de de gnyis kyis ni/ ma yin gyi zhes bya ba ni 'thob pa dang mngon par rtogs pa dag nyon mongs pa dang / shes bya'i sgrib pa spong ba tsam la 'jig rten gyi tha snyad du btags pa tsam du yod par 'dod kyi/ dngos po yod pas med pa 'thob pa dang / dngos po med pas yod pa 'thob pa gnyis kyi tshul gyis ni ma yin no zhes bstan pa'o/ /don de nyid gsal bar bshad pa'i phyir/ tshe dang ldan pa sha ra dwa ti'i bu 'thob pa'ang mngon par rtogs pa ni 'jig rten gyi tha snyad kyis gdags pa'o zhes bya ba la sogs pa bstan te/ rgyun du zhugs pa'i gang zag la sogs pa 'thob par byed pa rnams dang rgyun du zhugs pa'i 'bras bu la sogs pa 'thob par bya ba rnams ni kun rdzob tu btags pa tsam du zad kyi don dam par yod pa ma yin no zhes bstan pa'o/ /smras pa tshe dang ldan pa rab 'byor thob pa dang / mngon par rtogs par bya ba 'jig rten gyi tha snyad du yod pa de bzhin du 'gro ba lnga dag kyang 'jig rten gyi tha snyad du tha dad du yod kyi/ don dam par ma yin nam zhes bya ba ni gong du 'gro ba lnga rnams kyang tha mi dad par 'gyur ro zhes brgal ba'i don zhib tu bshad pa'i gleng bslang ba'i phyir/ ji ltar thob pa dang mngon par rtogs pa 'jig rten gyi tha snyad du yod kyi/ don dam par med par de bzhin du 'gro ba lnga yang 'jig rten gyi tha snyad du tha dad kyi don dam par tha mi dad dam zhes dris pa'o/ /smras pa/ tshe dang ldan pa sha ra dwa ti'i bu de de bzhin te/ ji ltar thob pa dang / mngon par r togs pa 'jig rten gyi tha snyad du yod pa de bzhin du 'gro ba lnga dag kyang 'jig rten gyi tha snyad du tha dad kyi don dam par ni ma yin no zhes bya ba ni don dam par de dag thams cad ma skyes pa'i rang bzhin du ro gcig pas tha dad du dbyer med pa las kun rdzob tu sems can rnams drang zhing bkri ba'i phyir ming dang mtshan mar bzung zhing tha snyad du btags pa tsam du zad do zhes bstan pa'o/ /de ci'i phyir zhe na/ tshe dang ldan pa sha ra dwa ti'i bu don dam par ni las kyang med/ las kyi rnam par smin pa yang med skye ba yang med/ 'gag pa yang med/ kun nas nyon mongs pa'ang med/ rnam par byang ba'ang med do zhes bya ba ni 'gro ba lnga rnams don dam par tha mi dad pa'i gtan tshigs bstan pa ste/ 'gro ba lnga zhes bya ba ni las legs par spyad pa dang / nyes par spyad pa'i rnam par smin pa las lha dang / mi dang / dud 'gro dang / yi dags dang / sems can dmyal ba dang lngar tha dad du dbye zhing gdags pa tsam du zad kyi/ don dam par ni las dang las kyi rnam par smin pa la sogs pa med pas na 'gro ba lnga tha dad du dbyer med do zhes bstan pa'o/ /smras pa tshe dang ldan pa rab 'byor ma skyes pa'i chos skye bar 'gyur ba'am/ 'on tam skyes pa'i chos skye bar 'gyur ram zhes bya ba ni 'jig rten dang 'jig rten las 'das pa'i chos rnams ma skyes pa las kyang mi skye ba dang / skyes pa las mi skye ba'i gtan tshigs zhib tu 'chad du gzhug pa'i phyir shA ri'i bus rab 'byor la dris pa ste/ ma skyes pa'i chos ni dngos po med pa ste/ ri bong gi rwa dang 'dra bas skye bar 'gyur ba'i mi rigs pa dang / skyes pa'i chos ni dngos po yod par gyur zin pas gdod skye mi dgos pa'i phyir de skad dris pa'o/ /rab 'byor gyis smras pa/ tshe dang ldan pa sha ra dwa ti'i bu bdag ni ma skyes pa'i chos kyang skye bar mi 'dod/ skyes pa'i chos kyang skye bar mi 'dod do zhes bya ba ni don dam par skyes pa dang ma skyes pa gnyi ga rang bzhin gyis stong pa'i phyir gnyi ga yang skye bar mi 'dod do zhes mdor smras pa'o/ /smras pa tshe dang ldan pa rab 'byor ma skyes pa'i chos skye bar mi 'dod pa gang yin zhes bya ba ni ma skyes pa'i chos zhes bya ba gang yin pa ming gis smos te 'chad du gzhug pa'i skabs dbye ba'i phyir shA ri'i bus rab 'byor la dris pa'o/ /rab 'byor gyis smras pa/ tshe dang ldan pa sha ra dwa ti'i bu bdag ni gzugs ma skyes pa/ rang bzhin gyis stong pa skye bar mi 'dod do zhes bya ba nas/ tshe dang ldan pa sha ra dwa ti'i bu bdag ni rnam pa thams cad mkhyen pa nyid ma skyes pa rang bzhin gyis stong pa skye bar mi 'dod do zhes bya ba'i bar du ni ma skyes pa'i chos skye bar mi 'dod pa gang yin zhes shA ri'i bus dris pa'i lan rab 'byor gyis bshad pa ste/ phung po lnga la sogs pa 'jig rten pa'i chos rnams dang / pha rol tu phyin pa drug la sogs pa rnam pa thams cad mkhyen pa nyid la thug gi bar du 'jig rten las 'das pa'i chos de dag thams cad kyang don dam par rang bzhin gyis stong pa'i phyir skye bar mi 'dod do zhes bstan pa'o/ /smras pa tshe dang ldan pa rab 'byor chos skyes pa skye bar mi 'dod pa gang zhes bya ba ni chos skyes pa yang skye bar mi 'dod do zhes rab 'byor gyis gong du smras pa de chos gang yin pa ming gis smos te 'chad du gzhug pa'i phyir shA ri'i bus rab 'byor la dris pa'o/ /smras pa tshe dang ldan pa sha ra dwa ti'i bu/ bdag ni gzugs skyes pa rang bzhin gyis stong pa skye bar mi 'dod do zhes bya ba nas/ tshe dang ldan pa sha ra dwa ti'i bu bdag ni rnam pa thams cad mkhyen pa nyid kyi skyes pa/ rang bzhin gyis stong pa skye bar mi 'dod do zhes bya ba'i bar du ni chos skyes pa skye bar mi 'dod pa gang yin zhes dris pa'i lan du phung po lnga la sogs pa 'jig rten pa'i chos rnams dang / pha rol tu phyin pa drug la sogs pa rnam pa thams cad mkhyen pa nyid la thug gi bar du/ 'jig rten las 'das pa'i chos thams cad kun rdzob tu skyes par rnam par brtags pa de dag thams cad kyang don dam par rang bzhin gyis stong pa'i phyir skye bar mi 'dod do zhes bstan pa'o/ /de ltar gzugs la sogs pa 'jig rten dang / 'jig rten las 'das pa'i chos skye ba dang / mi skye ba'i chos can rnams don dam par skye ba med pa bstan na/ de'i 'og tu skye ba zhes bya ba dang / mi skye ba zhes bya ba'i chos nyid kyang skye ba med par bstan pa'i phyir/ smras pa tshe dang ldan pa rab 'byor skye ba skye'am/ 'on tam mi skye ba skye zhes bya ba shA ri'i bus rab 'byor la dris pa'o/ /smras pa tshe dang ldan pa sha ra dwa ti'i bu skye ba yang mi skye/ mi skye ba yang mi skye'o zhes bya ba ni skye ba dang mi skye ba zhes bya ba de dag kun rdzob tu tha snyad tsam du brjod du zad kyi/ don dam par de gnyi ga yang dngos po yod par ma grub pas mi skye'o zhes bstan pa'o/ /de ci'i phyir zhe na/ tshe dang ldan pa sha ra dwa ti'i bu 'di ltar skye ba gang yin pa dang / skye ba med pa gang yin pa'i chos de gnyi ga yang ldan pa yang ma yin/ mi ldan pa yang ma yin/ gzugs med pa bltar med pa/ thogs pa med pa ste/ 'di ltar mtshan nyid med par mtshan nyid gcig pa dag go zhes bya ba ni skye ba dang mi skye ba zhes bya ba'i chos de dag don dam par dngos po yod par ma grub cing mi skye ba'i gtan tshigs bstan pa ste/ ldan pa yang ma yin zhes bya ba ni sems las byung ba'i dngos po bltar yod pa ma yin no zhes bstan pa'o/ /mi ldan pa yang ma yin zhes bya ba ni sems dang mi ldan pa'i 'du byed kyi dngos po bltar yod pa yang ma yin no zhes bya ba'i don to/ /gzugs med pa zhes bya ba ni gzugs kyi phung po ltar dngos po yod pa ma yin no zhes bstan pa'o/ /bltar med pa zhes bya ba ni kha dog dang dbyibs kyi rang bzhin du bstan du med pa'o zhes bya ba'i don to/ / thogs pa med pa zhes bya ba ni mig gi dbang po la sogs pa ltar thogs pa dang bcas pa'i dngos po yod pa yang ma yin no zhes bstan pa'o/ /'di ltar mtshan nyid med par mtshan nyid gcig pa dag go zhes bya ba ni de ltar ldan pa dang mi ldan pa dang / gzugs la sogs pa gang gi mtshan nyid kyang ma yin zhing don dam par stong pa nyid kyi rang bzhin du mtshan nyid gcig go zhes bya ba'i don to/ /tshe dang ldan pa sha ra dwa ti'i bu rnam grangs des na skye ba yang mi skye/ mi skye ba yang mi skye'o zhes bya ba ni rab 'byor gyis gong du bshad pa'i don mjug bsdus nas bstan pa mi skye ba'i gtan tshigs de lta bu yin pa'i phyir skye ba zhes bya ba dang / mi skye ba zhes bya ba'i chos de dag la don dam par skye ba med do zhes bstan pa'o/ /sha ra dwa ti'i bus smras pa/ tshe dang ldan pa rab 'byor ma skyes pa'i chos ma skyes pa'i chos zhes bya ba brjod pa khyod kyis spobs sam zhes bya ba ni de ltar skye ba dang mi skye ba zhes bya ba'i chos de dag don dam par dngos po med de/ mi skye ba yin na ma skyes zhes bya ba'i tshig gis brjod du yang ci yod ces dris pa'o/ /tshe dang ldan pa rab 'byor chos ma skyes pa rnams kyi skye ba med pa yang brjod du spobs par 'gyur ram zhes bya ba ni gzugs la sogs pa'i chos skye ba med pa'i chos can rnams kyang don dam par dngos po med de skye ba med pa yin na/ de ltar dngos po med pa la skye ba med do zhes brjod du yang rung ngam zhes dris pa'o/ /rab 'byor gyis smras pa/ tshe dang ldan pa sha ra dwa ti'i bu ma skyes pa'i chos ma skyes pa'i chos zhes bya ba brjod par khyod kyis spobs sam zhes zer ba ni tshe dang ldan pa sha ra dwa ti'i bu ma skyes pa'i chos/ ma skyes pa'i chos zhes bya ba brjod pa la bdag gis spobs pa med do zhes bya ba ni shA ri'i bus dris pa gong ma'i lan btab pa ste/ skye ba dang mi skye ba zhes bya ba'i chos don dam par dngos po med pa de dag mi skye'o/ /zhes bdag gis brjod pa ni kun rdzob tu tshig gis don bstan pa'i phyir brjod pa tsam du zad kyi don dam par brjod pa spobs pa med do zhes bstan pa'o/ /tshe dang ldan pa sha ra dwa ti'i bu chos ma skyes pa rnams kyi skye ba med pa yang bdag gis ni brjod par spobs pa med de zhes bya ba [(]ni ni [,]ni [)]shA ri'i bus dris pa/ 'og ma'i lan btab pa ste/ gzugs la sogs pa skye ba med pa'i chos can rnams skye ba med do zhes brjod pa yang kun rdzob tu tshig gis don bstan pa'i phyir brjod pa tsam du zad kyi don dam par ni brjod par spobs pa med do zhes bya ba'i don to/ de ci'i phyir zhe na/ tshe dang ldan pa sha ra dwa ti'i bu 'di ltar ma skyes pa'i chos gang yin pa dang / skye ba med pa gang yin pa dang / spobs pa gang yin pa dang / brjod pa gang yin pa dang / mi skye ba'i chos de dag thams cad kyang ldan pa yang ma yin/ mi ldan pa yang ma yin/ gzugs med pa bltar med pa thogs pa med pa ste/ 'di ltar mtshan nyid med par mtshan nyid gcig pa dag go zhes bya ba ni ma skyes pa'i chos zhes bya bar brjod par spobs pa med pa'i gtan tshigs bstan pa ste/ gzugs la sogs pa'i chos ma skyes pa zhes bya ba dang / skye ba med pa zhes bya ba'i chos nyid dang / spobs pa med pa brjod pa gang yin pa de dag thams cad kyang kun rdzob tu tha snyad tsam du btags par zad kyi/ don dam par dngos po yod pa ma yin pa'i phyir ro zhes bstan pa ste/ ldan pa dang mi ldan pa la sogs pa'i don ni gong du bshad pa bzhin no/ /smras pa tshe dang ldan pa rab 'byor brjod pa ni skye ba med ces bya ba yin te/ spobs pa yang skye ba med la chos kyang skye ba med de/ gang las brtsams shing brjod par spobs pa'i chos de dag kyang skye ba med pa yin nam zhes bya ba ni brjod pa dang / spobs pa dang / skye ba dang / mi skye ba zhes bya ba'i chos dang / gzugs la sogs pa'i chos gang las brtsams te brjod pas spobs par 'gyur ba'i chos de dag ldan pa yang ma yin/ mi ldan pa yang ma yin/ gzugs med pa bltar med pa/ thogs pa med pa yin par 'jal na/ ci de dag skye ba med pa yang yin nam zhes shA ri'i bus dris pa'o/ /rab 'byor gyis smras pa/ tshe dang ldan pa sha ra dwa ti'i bu de de bzhin te/ brjod pa ni ma skyes pa'o zhes bya ba la sogs pa ni brjod pa la sogs pa chos ming gis smos pa de dag don dam par ma skyes pa yin no zhes bstan pa'o/ /de ci'i phyir zhe na/ tshe dang ldan pa sha ra dwa ti'i bu de ni 'di ltar gzugs skye ba med do tshor ba skye ba med do zhes bya ba la sogs pa ni brjod pa dang spobs pa la sogs pa 'di dag 'ba' zhig don dam par skye ba med par ma zad kyi/ gzugs la sogs pa rnam pa thams cad mkhyen pa nyid la thug gi bar du 'jig rten dang / 'jig rten las 'das pa'i chos thams cad kyang skye ba med do zhes bstan pa'o/ /tshe dang ldan pa sha ra dwa ti'i bu rnam grangs des na brjod pa ni skye ba med pa ste/ spobs pa yang skye ba med la/ chos kyang skye ba med de/ gang las brtsams shing brjod par spobs pa'i chos de dag kyang skye ba med do zhes bya ba ni gong du bshad pa'i don mjug bsdus nas bstan pa ste/ de ltar gzugs la sogs pa rnam pa thams cad mkhyen pa nyid la thug gi bar du chos de dag thams cad don dam par skye ba med pa yin te/ brjod pa la sogs pa yang chos de dag gi nang du gtogs pas de'i phyir brjod pa la sogs pa 'di dag kyang don dam par skye ba med pa yin no zhes bstan pa'o/ /smras pa tshe dang ldan pa rab 'byor ni chos smra ba'i nang nas mchog tu bya bar 'os te/ de ci'i phyir zhe na/ 'di ltar gnas brtan rab 'byor ni gang dang gang yongs su dris pa de dang de la thogs pa med do zhes bya ba ni shA ri'i bus rab 'byor la bstod pa ste/ chos thams cad skye ba med pa la sogs pa'i don gang dang gang dris pa de dag gi lan thags thogs med par thebs pas/ de'i phyir 'phags pa nyan thos chos 'chad pa rnams kyi nang na rab 'byor khyod mchog tu gyur to zhes bya ba'i don to/ /rab 'byor gyis smras pa/ tshe dang ldan pa sha ra dwa ti'i bu de ni bcom ldan 'das kyi nyan thos chos thams cad la gnas pa med pa dag gi chos nyid de/ de dag ni gang dang gang yongs su dris pa de dang de la thogs pa med do zhes bya ba ni chos thams cad mi gnas pa'i don 'og nas 'byung ba gleng bslang ba'i phyir rab 'byor gyis smras pa ste/ bcom ldan 'das kyi nyan thos chos thams cad la gnas pa med pa dag gi chos nyid de zhes bya ba ni 'phags pa nyan thos dgra bcom pa bcom ldan 'das kyi byin gyi rlabs kyis chos thams cad rang bzhin gyis stong par rtogs pas chos de dag gang la yang mi gnas shing / ma chags par gyur pa rnams kyi rang bzhin yin no zhes bstan pa'o/ /de ci'i phyir zhe na/ 'di ltar chos thams cad mi gnas pa'i phyir ro zhes bya ba ni bcom ldan 'das kyi nyan thos rnams chos thams cad la gnas pa med pa'i gtan tshigs bstan pa ste/ 'jig rten dang 'jig rten las 'das pa'i chos thams cad don dam par rang bzhin gyis stong pas phyi nang gang la yang mi gnas pa'i phyir 'phags pa nyan thos de dag kyang chos thams cad la gnas pa med do zhes bstan pa'o/ /smras pa tshe dang ldan pa rab 'byor ji ltar na thams cad mi gnas pa yin zhes bya ba ni gzugs la sogs pa'i chos thams cad ji ltar mi gnas pa'i gtan tshigs zhib tu bshad du gzhug pa'i phyir shA ri'i bus rab 'byor la dris pa'o/ /rab 'byor gyis smras pa/ tshe dang ldan pa sha ra dwa ti'i bu gzugs rang bzhin gyis stong pa ste/ de ni nang na yang mi gnas/ phyi rol na yang mi gnas/ gnyis ka med par yang mi gnas so zhes bya ba ni don dam par gzugs kyi rang bzhin med pas nang gi dbang po rnams la yang mi gnas/ phyi rol gyi yul sa rnams la yang mi gnas/ phyi nang gnyis la ma gtogs pa'i dngos po gzhan yang med pas de la yang mi gnas so zhes bstan pa'o/ /gzugs la ji lta ba bzhin du tshor ba la sogs pa'i rnam pa thams cad mkhyen pa nyid la thug gi bar du sbyar bar bya'o/ /tshe dang ldan pa sha ra dwa ti'i bu rnam grangs des na chos thams cad ni rang bzhin gyis stong pa nyid kyi phyir mi gnas pa'o zhes bya ba ni 'jig rten dang 'jig rten las 'das pa'i chos thams cad don dam par rang bzhin gyis stong pa nyid kyi phyir phyi nang gang la yang mi gnas so zhes gong du bshad pa'i don mjug bsdus te bstan pa'o/ /tshe dang ldan pa sha ra dwa ti'i bu byang chub sems dpa' sems dpa' chen po pha rol tu phyin pa drug la spyod pas de ltar gzugs yongs su sbyang bar bya'o zhes bya ba nas/ rnam pa thams cad mkhyen pa nyid yongs su sbyang bar bya'o zhes bya ba'i bar du ni de ltar 'jig rten dang 'jig rten las 'das pa'i chos thams cad phyi nang gang la yang mi gnas par rtogs pa nyid gzugs la sogs pa'i chos thams cad yongs su dag pa'i rang bzhin du rtogs pa yin te/ de de ltar gong du bshad pa'i tshul gyis gzugs la sogs pa rnam pa thams cad mkhyen pa nyid la thug gi bar du yongs su sbyang bar bya'o zhes bstan pa ste/ de ltar yongs su dag par rtogs par bya'o zhes bya ba'i don to/ /de nas tshe dang ldan pa sha ra dwa ti'i bus/ tshe dang ldan pa rab 'byor la 'di skad ces smras so/ /tshe dang ldan pa rab 'byor ji ltar na byang chub sems dpa' sems dpa' chen po pha rol tu phyin pa drug la spyod pa'i tshe/ byang chub kyi lam yongs su sbyong ba yin zhes bya ba ni de ltar chos thams cad gnas pa med pa'i don bstan nas byang chub kyi lam yongs su sbyang ba'i thabs bstan pa'i phyir ji ltar byang chub kyi lam yongs su sbyong ba yin zhes shA ri'i bus rab 'byor la dris pa'o/ /rab 'byor gyis smras pa/ tshe dang ldan pa sha ra dwa ti'i bu sbyin pa'i pha rol tu phyin pa ni 'jig rten pa yang yod/ 'jig rten las 'das pa yang yod ces bya ba la sogs pa ni pha rol tu phyin pa drug 'khor gsum yongs su ma dag par spyod pa dang / 'khor gsum yongs su dag par spyod pa'i bye brag zhib tu phye ste bstan nas gang 'khor gsum yongs su ma dag par sbyin pa la sogs pa pha rol tu phyin pa drug spyod pa ni 'jig rten pas byang chub kyi lam yongs su sbyong ba ma yin gyi/ 'khor gsum yongs su dag par pha rol tu phyin pa drug spyod pa ni 'jig rten las 'das pa yin pas byang chub kyi lam yongs su sbyong ba yin no zhes bstan pa'o/ /smras pa tshe dang ldan pa rab 'byor 'jig rten pa'i sbyin pa'i pha rol tu phyin pa ni gang / 'jig rten las 'das pa ni gang zhes bya ba ni gong du rab 'byor gyis pha rol tu phyin pa drug 'jig rten pa dang / 'jig rten las 'das pa yang yod do zhes mdor smos pa/ shA ri'i bus 'jig rten pa ni gang / 'jig rten las 'das pa ni gang zhes bye brag tu phye ste dris pa'o/ /rab 'byor gyis smras pa/ tshe dang ldan pa sha ra dwa ti'i bu 'di la byang chub sems dpa' sems dpa' chen po sbyin pa byed cing sbyin bdag tu gyur pa zhes bya ba la sogs pa ni rab 'byor gyis 'jig rten gyi sbyin pa'i pha rol tu phyin pa bshad pa ste/ dge sbyong dang / bram ze dang / phongs pa dang / ltogs pa dang / 'dron pa dang / slong ba zhes bya ba ni sbyin pa'i gnas len pa po'i dmigs bstan pa'o/ /zas 'dod pa la ni zas/ skom 'dod pa la ni skom zhes bya ba la sogs pa ni zang zing gi sbyin pa'i rdzas bstan pa'o/ /zang zing gi sbyin pa la yang rnam pa gsum ste/ sbyin pa tha mal pa dang / sbyin pa chen po dang / dka' ba'i sbyin pa'o/ /de la sbyin pa tha mal pa ni/ zas 'dod pa la ni zas/ skom 'dod pa la ni skom zhes bya ba ni mi'i yo byad gzhan ci yang rung ba'i bar du yongs su gtong ste zhes bya ba'i bar gyis bstan te/ theg pa zhes bya ba ni bzhon pa la bya'o/ /sbyin pa chen po ni/ bu pho 'dod pa la ni bu pho yongs su gtong / bu mo 'dod pa la ni bu mo yongs su gtong / chung ma 'dod pa la ni chung ma yongs su gtong / rgyal srid 'dod pa la ni rgyal srid yongs su gtong zhes bya bas bstan to/ / dka' ba'i sbyin pa ni/ mgo 'dod pa la ni mgo yongs su gtong / mig 'dod pa la ni mig yongs su gtong / yan lag dang nying lag 'dod pa la ni yan lag dang nying lag yongs su gtong / sha dang khrag dang rkang 'dod pa la ni sha dang khrag dang rkang yongs su gtong zhes bya bas bstan to/ /de yang gnas shing yongs su gtong ba zhes bya ba ni 'khor gsum yongs su ma dag cing dmigs pa dang bcas par sbyin pa yongs su gtong zhes bya ba'i don to/ /de 'di snyam du bdag ni yongs su gtong ba'o/ /'di ni len pa'o zhes bya ba nas/ 'di ni 'jig rten pa'i sbyin pa'i pha rol tu phyin pa zhes bya'o zhes bya ba'i bar du ni 'khor gsum yongs su ma dag cing dmigs pa can gyi sems kyis sbyin pa yongs su gtong ba bstan to/ de ci'i phyir 'jig rten pa'i sbyin pa'i pha rol tu phyin pa zhes bya zhe na/ de ni 'di ltar 'jig rten las mi g.yo/ mi 'phags mi 'da' bas de'i phyir 'jig rten gyi sbyin pa'i pha rol tu phyin pa zhes bya'o zhes bya ba ni de ltar 'khor gsum yongs su ma dag cing dmigs pa can gyi sems kyis sbyin pa yongs su gtong ba'i sbyin pa'i pha rol tu phyin par 'gyur ba'i gtan tshigs bstan pa ste/ 'jig rten las mi g.yo zhes bya ba ni bdag tu 'du shes pa la chags pa'i phyir ro/ /mi 'phags zhes bya ba ni gzhan du 'du shes pa la chags pa'i phyir ro/ /mi 'da' bas zhes bya ba ni sbyin par 'du shes pa la chags pa'i phyir te/ de ltar 'khor gsum yongs su ma dag cing dmigs pa dang bcas pa'i sems kyis sbyin pa byas pa ni 'jig rten las mi 'da' ste/ 'khor ba'i longs spyod kyi rgyur 'gyur ba'i phyir 'jig rten pa'i sbyin pa'i pha rol tu phyin pa zhes bya'i/ 'jig rten las 'das pa'i sbyin pa'i pha rol tu phyin par mi chud pas byang chub kyi lam yongs su sbyong ba ma yin no zhes bya ba'i don to/ / sems can thams cad dang thun mong du byas shing bla na med pa yang dag par rdzogs pa'i byang chub tu yongs su bsngos pa'i phyir pha rol tu phyin pa zhes bya'o/ /dmigs pa dang bcas shing 'khor gsum yongs su ma dag pa'i phyir 'jig rten las 'das par ma chud do/ /de la 'jig rten las 'das pa'i sbyin pa'i pha rol tu phyin pa gang zhe na/ 'di ltar 'khor gsum yongs su dag pa ste zhes bya ba la sogs pas ni 'jig rten las 'das pa'i sbyin pa'i pha rol tu phyin pa bye brag tu phye ste bstan pa ste/ sbyin pa de sems can thams cad la yongs su gtong ste zhes bya ba ni/ 'khor gsum yongs su dag par sbyin pa byas pa'i bsod nams kyang kun rdzob tu sems can thams cad yongs su bsngo'o zhes bya ba'i don to/ /de ci'i phyir 'jig rten las 'das pa'i sbyin pa'i pha rol tu phyin pa zhes bya zhe na/ de ni 'di ltar 'jig rten las g.yo zhing 'phags la 'das pas/ de'i phyir 'jig rten las 'das pa'i sbyin pa'i pha rol tu phyin pa zhes bya'o zhes bya ba ni bdag mi dmigs pa'i phyir 'jig rten las g.yo'o/ /gzhan mi dmigs pa'i phyir 'jig rten las 'phags so/ /sbyin pa mi dmigs pa'i phyir 'jig rten las 'da'o/ /de bzhin du tshul khrims kyi pha rol tu phyin pa la sogs pa gzhan la yang sbyar bar bya'o/ /tshe dang ldan pa sha ra dwa ti'i bu de ltar na byang chub sems dpa' sems dpa' chen po pha rol tu phyin pa drug la spyod cing / byang chub kyi lam yongs su sbyong ba yin no zhes bya ba ni ji ltar na byang chub sems dpa' sems dpa' chen po pha rol tu phyin pa drug la spyod pa'i tshe/ byang chub kyi lam yongs su sbyong ba yin zhes shA ri'i bus rab 'byor la dris pa'i don mjug bsdus nas bstan pa ste/ de ltar gong du bshad pa'i rim pas 'jig rten las 'das pa'i pha rol tu phyin pa drug spyod pa ni bla na med pa yang dag par rdzogs pa'i byang chub thob par 'gyur ba'i rgyu yongs su dag par byed pa yin pa'i phyir byang chub kyi lam yongs su sbyong ba yin no zhes bstan pa'o/ /'jig rten pa'i pha rol tu phyin pa drug rnams ni dngos po kho nar byang chub kyi lam yongs su sbyong bar mi chud kyang 'jig rten las 'das pa'i pha rol tu phyin pa'i rgyur 'gyur ba'i phyir byang chub kyi lam yongs su sbyong ba nyid nas brgyud pa'i rgyu yin par rig par bya'o/ /smras pa tshe dang ldan pa rab 'byor byang chub sems dpa' sems dpa' chen po'i byang chub kyi lam gang yin zhes bya ba ni gong du pha rol tu phyin pa drug la 'khor gsum yongs su dag par spyod pa byang chub kyi lam yongs su sbyong ba yin no zhes bshad pa pha rol tu phyin pa drug po de dag byang chub kyi lam sbyong ba yin na/ byang chub kyi lam nyid gud na yod dam snyam du sems pa'i the tshom bsal ba'i phyir shA ri'i bus rab 'byor la dris pa'o/ /rab 'byor gyis smras pa/ tshe dang ldan pa sha ra dwa ti'i bu sbyin pa'i pha rol tu phyin pa ni byang chub sems dpa' sems dpa' chen po'i byang chub kyi lam mo zhes bya ba nas/ sangs rgyas kyi chos ma 'dres pa bco brgyad ni byang chub sems dpa' sems dpa' chen po'i byang chub kyi lam mo zhes bya ba'i bar du ni byang chub kyi lam zhes bya ba gzhan ma yin gyi/ pha rol tu phyin pa drug la sogs pa sangs rgyas kyi chos ma 'dres pa bco brgyad la thug gi bar du rnam par byang ba'i chos rnams 'khor gsum yongs su dag par byed pa nyid bla na med pa yang dag par rdzogs pa'i byang chub 'thob par 'gyur ba'i rgyu yin pa'i phyir byang chub kyi lam zhes bya'o/ /de las gud na byang chub kyi lam med de/ 'di dag nyid byang chub kyi lam yin no zhes bstan pa'o/ /smras pa tshe dang ldan pa rab 'byor legs so legs so de la pha rol tu phyin pa gang gi mthu yin zhes bya ba ni de ltar rnam par byang ba'i chos rnams 'khor gsum yongs su dag par spyod pa nyid byang chub kyi lam du 'gyur bar bshad pa legs so zhes bstod nas/ de ltar 'gyur ba pha rol tu phyin pa drug gi nang na gang gi mthu yin zhes shA ri'i bus rab 'byor la dris pa'o/ /rab 'byor gyis smras pa/ tshe dang ldan pa sha ra dwa ti'i bu/ de ni shes rab kyi pha rol tu phyin pa'i mthu ste zhes bya ba ni pha rol tu phyin pa drug gi nang na shes rab kyi pha rol tu phyin pa mig dang 'dra ste/ gtso bo yin pas shes rab kyi pha rol tu phyin pa dang ldan na 'khor gsum yongs su dag par 'gyur ba'i phyir byang chub kyi lam yongs su sbyong ba ni shes rab kyi pha rol tu phyin pa'i mthu yin no zhes bstan pa'o/ /de ci'i phyir zhe na/ tshe dang ldan pa sha ra dwa ti'i bu de ni 'di ltar shes rab kyi pha rol tu phyin pa ni nyan thos kyi chos dang / rang sangs rgyas kyi chos dang / byang chub sems dpa'i chos dang / sangs rgyas kyi chos dang / dge ba'i chos thams cad skye'o zhes bya ba la sogs pa ni pha rol tu phyin pa rnams kyi nang na shes rab kyi pha rol tu phyin pa gtso bo yin zhing de'i mthu yin pa'i gtan tshigs bstan pa ste/ skyed pa'o zhes bya ba ni dge ba'i chos theg pa gsum du gtogs pa thams cad yongs su rdzogs par byed pa'i rgyu yin no zhes bya ba'i don to/ /yongs su sdud cing yang dag par sdud pa'o zhes bya ba ni theg pa gsum du gtogs pa'i dge ba'i chos thams cad shes rab kyi pha rol tu phyin pas yongs su zin cing yongs su khyab pa'o zhes bya ba'i don to/ /tshe dang ldan pa sha ra dwa ti'i bu sngon gyi de bzhin gshegs pa dgra bcom pa yang dag par rdzogs pa'i sangs rgyas rnams kyis kyang shes rab kyi pha rol tu phyin pa 'di la spyad de/ bla na med pa yang dag par rdzogs pa'i byang chub tu mngon par sangs rgyas so zhes bya ba la sogs pas ni/ shes rab kyi pha rol tu phyin pa dus gsum gyi sangs rgyas bcom ldan 'das rnams bla na med pa yang dag par rdzogs pa'i byang chub tu mngon par 'tshang rgya ba'i rgyu'i gtso bo yin par bstan pa'o/ /tshe dang ldan pa sha ra dwa ti'i bu gal te shes rab kyi pha rol tu phyin pa bshad pa'i tshe/ byang chub sems dpa' sems dpa' chen po nem nur 'am rmongs par mi 'gyur na/ tshe dang ldan pa sha ra dwa ti'i bu byang chub sems dpa' sems dpa' chen po de ni 'di ltar sems can thams cad bskyab pa dang / sems can thams cad yongs su mi gtong ba'i phyir de mi dmigs pa'i tshul gyis rnam par spyod pa 'dis rnam par spyod par shes par bya'o zhes bya ba ni pha rol tu phyin pa drug la sogs pa rnam par byang ba'i chos rnams 'khor gsum yongs su dag par spyad na byang chub kyi lam yongs su sbyong ba yin par bshad pa'i chos zab mo de bshad pa'i tshe dad cing yid ches pas nem nur med pa dang / shes rab rno bas rmongs par ma gyur na byang chub sems dpa' de shes rab kyi pha rol tu phyin pa zab mo 'di la rnam par spyod par shes par bya ste/ kun rdzob tu yang sems can thams cad bskyab pa dang / sems can thams cad yongs su mi gtong bar nus par shes par bya'o zhes bya ba'i don to/ /byang chub sems dpa' sems dpa' chen po de ni 'di lta ste/ snying rje chen po yid la bya ba'i yid la bya ba de dang ma bral bar shes par bya'o zhes bya ba ni de ltar shes rab kyi pha rol tu phyin pa'i don zab mo la rnam par spyod cing sems can thams cad bskyab pa dang sems can thams cad yongs su mi gtong ba de ni byang chub sems dpa'i snying rje chen po yid la byed pa dang ldan par shes par bya'o zhes bstan pa'o/ /smras pa tshe dang ldan pa rab 'byor rnam par spyod pas rnam par spyod cing 'di lta ste/ snying rje chen po yid la bya ba'i yid la bya ba de dang ma bral bas byang chub sems dpa' sems dpa' chen por 'dod na/ tshe dang ldan pa rab 'byor de ltar na ni sems can thams cad kyang byang chub sems dpar 'gyur ro/ /de ci'i phyir zhe na/ tshe dang ldan pa rab 'byor sems can thams cad kyang yid la bya ba dang ma bral lo zhes bya ba ni snying rje chen po yid la bya ba dang ma bral ba rab 'byor gyis bstod pa la shA ri'i bus don dam pa las bsams nas brgal ba ste/ yid la byed pa ni rnam par rtog pa ste/ rnam par rtog pa dang bcas na chos kyi dbyings rnam par dag par rtogs par mi nus pas de la byang chub sems dpa' zhes mi bya'o/ /de ste yid la byed pa dang ma bral zhing rnam par rtog pa dang bcas pa yang byang chub sems dpar 'dod na ni sems can thams cad yid la byed pa dang ma bral zhing / rnam par rtog pa dang bcas pas byang chub sems dpar 'gyur ba'i rigs na/ de ltar 'gyur ba yang mi srid pas yid la bya ba dang ma bral ba la de skad bstod pa'i mi rigs so zhes brgal ba'o/ /rab 'byor gyis smras pa/ tshe dang ldan pa sha ra dwa ti'i bu legs so legs so/ /dri'o dri'o snyam pa'i don de nyid/ tshe dang ldan pa sha ra dwa ti'i bus yang dag pa'i tshig brjod pas yongs su bzung ngo zhes bya ba ni shA ri'i bus brgal ba'i don dmigs su phebs te dris zhing brgal bar 'os pa'i don thog tu phebs shing legs pa dris so zhes bstod pa'o/ /de ci'i phyir zhe na/ de ni 'di ltar tshe dang ldan pa sha ra dwa ti'i bu sems can med pa'i phyir yid la byed pa med par rig par bya'o zhes bya ba ni don dam par sems can dngos po yod par ma grub pas sems can de dag la snying rje chen po 'byung ba'i yid la bya ba yang don dam par med pa las yid la byed pa 'byung ba mi rigs pas gal bzung ste dris pa dmigs su phebs te legs so zhes bya ba dang sbyar ro/ / sems can dngos po med pa dang / sems can rang bzhin med pa dang / sems can stong pa nyid dang / sems can dben pa zhes bya ba yang med pa'i don gyi rnam grangs su zad do/ /sems can mngon par 'tshang mi rgya ba'i phyir yid la byed pa mngon par 'tshang mi rgya bar rig par bya'o/ / zhes bya ba ni de ltar sems can med pas don dam par sems can de dag mngon par 'tshang rgya ba yang med cing / yid la byed pa yang don dam par med pas yid la byed pa des mngon par 'tshang rgya bar 'gyur ba yang don dam par med do zhes bya ba'i don to/ /sems can med pa dang / sems can dngos po med pa dang / sems can rang bzhin med pa dang / sems can stong pa nyid dang / sems can dben pa dang / sems can mngon par rdzogs par 'tshang mi rgya ba zhes bya ba de dag gis ni gang zag la bdag med par bstan pa'o/ /tshe dang ldan pa sha ra dwa ti'i bu gzugs med pa'i phyir yid la bya ba med par rig par bya'o zhes bya ba nas/ tshe dang ldan pa sha ra dwa ti'i bu rnam grangs des na byang chub sems dpa' sems dpa' chen po 'di lta ste/ snying rje chen po yid la byed pa nyid dang mi 'bral bar rig par bya'o zhes bya ba'i bar du ni gzugs la sogs pa 'jig rten pa'i chos rnams dang / pha rol tu phyin pa drug la sogs pa rnam pa thams cad mkhyen pa nyid dang / bla na med pa'i byang chub la thug gi bar du 'jig rten las 'das pa'i chos thams cad kyang med pa dang / dngos po med pa dang / rang bzhin med pa dang / stong pa nyid dang / dben pa dang / mngon par rdzogs par 'tshang mi rgya ba'i don gong ma bzhin du sbyar bar bya ste/ de ni chos la bdag med pa'i don bstan te/ de ltar don dam par gang zag dang chos gnyi ga la bdag med par rtogs pa nyid kyi mthu dang byin gyi rlabs kyis yid la byed pa med cing rnam par mi rtog par lhun gyis grub pa nyid du sems can thams cad bskyab pa dang / sems can thams cad yongs su mi gtong bar gyur pa nyid snying rje chen po yid la byed pa dang ma bral bar rig par bya'o zhes bstan pa'o/ /de nas bcom ldan 'das kyis t she dang ldan pa rab 'byor la legs so zhes bya ba gnang ba ste zhes bya ba la sogs pas ni shes rab kyi pha rol tu phyin pa'i don zab mo de lta bu rab 'byor gyis shA ri'i bu la bshad pa'i don 'khor rnams the tshom med par 'dzin du gzhug pa'i phyir de bzhin gshegs pa'i mthu dang byin gyi rlabs kyis khyod kyis de ltar bshad pa legs kyis gzhan gyis kyang de ltar bstan cing bslab par bya'o zhes bstan pa'o/ /shes rab kyi pha rol tu phyin pa'i le'u 'di tshe dang ldan pa rab 'byor gyis smras pa'i tshe/ stong gsum gyi stong chen po'i 'jig rten gyi khams 'di rnam pa drug tu g.yos te zhes bya ba la sogs pa ni shes rab kyi pha rol tu phyin pa phyin ci ma log par bshad pa'i rtags su mthu dang cho 'phrul bstan pa'o/ /de nas bcom ldan 'das kyis de'i tshe 'dzum pa mdzad do zhes bya ba la sogs pas ni phyogs bcu'i 'jig rten gyi khams tshad med grangs med pa dag na yang sangs rgyas bcom ldan 'das rnams byang chub sems dpa' rnams la shes rab kyi pha rol tu phyin pa 'di nyid ston pa mdzad do zhes bstan pa ste/ de skad bstan pa dang 'khor rnams shes rab kyi pha rol tu phyin pa 'di nyid la dad pa bskyed cing rjes su yi rang du gzhug pa'i phyir/ shes rab kyi pha rol tu phyin pa bstan pa 'di bshad pa'i tshe lha dang mi'i skye dgu bye ba khrag khrig phrag bcu gnyis mi skye ba'i chos la bzod pa skyes so zhes bya ba la sogs pas ni shes rab kyi pha rol tu phyin pa bshad pa'i don med pa ma yin zhing / 'bras bu chen po dang bcas pa yin par bstan pa ste/ de yan chad kyis ni 'bring du bshad pas 'dul ba'i gdul bya rnams kyi don du/ shes rab kyi pha rol tu phyin pa'i don 'bring du bshad pa bstan zin to/ /shes kyi pha rol tu phyin pa 'bum pa rgya cher bshad pa las/ las kyi le'u ste bcu bzhi pa'o/ / //'di man chad ni shes rab kyi pha rol tu phyin pa 'di rgyas par bshad pa 'byung ste/ rgyas par bshad pa de yang 'dul ba'i 'gro ba yongs su ma smin pa rnams kyi the tshom skyes pa bsal bas yongs su smin par byas nas yongs su smin pa rnams de kho na nyid kyi don rtogs par bya ba'i phyir kun rdzob dang don dam pa'i tshul rnam pa gnyis kyis bstan to/ /de nas stong gsum gyi stong chen po'i 'jig rten gyi khams 'di na rgyal po chen po ji snyed yod pa de dag thams cad kyang lha bye ba khrag khrig brgya stong du ma dang lhan cig 'khor de nyid 'dus par gyur zhes bya ba la sogs pa ni rgyal po chen po bzhi dang / sum cu rtsa gsum pa'i lha la sogs pa 'dod pa'i khams dang / gzugs kyi khams kyi lha'i gtso bo rnams chos 'chad pa'i 'khor de nyid na 'khod par bstan/ lha de dag 'khor de na 'khod par bstan pa yang shes rab kyi pha rol tu phyin pa rgyas par bshad pa 'di 'jig rten pa'i lha yongs su ma smin pa rnams yongs su smin par bya ba'i phyir brtsams pa'i phyir ro/ /rgyal chen bzhi'i ris kyi lha rnams kyi las kyi rnam par smin pa las skyes pa'i lus kyi 'od gang yin pa dang zhes bya ba la sogs pa ni de bzhin gshegs pa'i sku'i yon tan dang mthu bstan pa ste/ de yang 'dod pa'i khams dang / gzugs kyi khams kyi lha rnams rang bzhin gyis lus bzang zhing 'od gsal ba snyems pa rnams de bzhin gshegs pa'i rang bzhin gyi 'od kyis zil gyis mnan nas de dag nga rgyal bcag ste/ de bzhin gshegs pa la chos gus par nyan du gzhug pa'i phyir ro/ /de nas lha'i dbang po brgya byin gyis/ tshe dang ldan pa rab 'byor la 'di skad ces smras so zhes bya ba la sogs pa ni shes rab kyi pha rol tu phyin pa rgya cher bshad pa gleng bslang ba'i phyir brgya byin gyis smras pa'o/ /byang chub sems dpa' sems dpa' chen pos ni ji ltar shes rab kyi pha rol tu phyin pa la gnas par bya zhes bya ba ni byang chub sems dpas chos thams cad la mi gnas pa'i tshul gyis gnas par bya ba 'og nas zhib tu bshad pa dris pa'o/ /byang chub sems dpa' sems dpa' chen po'i shes rab kyi pha rol tu phyin pa ni gang yin zhes bya ba ni nyan thos dang rang sangs rgyas kyi tshul gyis 'jug pa dang / byang chub sems dpa'i tshul gyis 'jug pa'i shes rab kyi pha rol tu phyin pa 'og nas zhib tu bshad pa dris pa'o/ /byang chub sems dpa' sems dpa' chen pos shes rab kyi pha rol tu phyin pa la ni ji ltar bslab par bya zhes bya ba ni don dam par chos gang la yang bslab tu med pa'i tshul gyis bslab par bya ba 'og nas zhib tu bshad pa dris pa'o/ /de skad ces smras pa dang / tshe dang ldan pa rab 'byor gyis lha'i dbang po brgya byin la 'di skad ces smras so zhes bya ba la sogs pa ni shes rab kyi pha rol tu phyin pa gang yin pa dang / ji ltar gnas par bya ba dang / ji ltar bslab par bya ba dang / lha'i bu gang dag gis bla na med pa yang dag par rdzogs pa'i byang chub tu sems ma bskyed pa de dag gis kyang bla na med pa yang dag par rdzogs pa'i byang chub tu sems bskyed par bya ba rnams sangs rgyas kyi mthu dang / sangs rgyas kyi byin gyi rlabs kyis bstan par byas/ legs par nyon la yid la gyis shig ces bya ba'i tshig gong ma dang sbyar ro/ /gang yang dag pa skyon med par zhugs par gyur pa de dag ni bla na med pa yang dag par rdzogs pa'i byang chub tu sems bskyed pa'i mthu med de zhes bya ba ni 'phags pa nyan thos rgyun du zhugs pa yan chad la yang dag par skyon med par zhugs pa zhes bya ste/ de ltar theg pa chung ngu la sems nges par gyur pa de dag ni byang chub sems dpa' ltar bla na med pa yang dag par rdzogs pa'i byang chub tu sems bskyed mi nus so zhes bya ba'i don to/ /de ci'i phyir zhe na/ de dag gis 'khor ba'i rgyud kyi mtshams bcad pa'i phyir te zhes bya ba ni nyan thos rnams bla na med pa'i byang chub tu sems bskyed mi nus pa'i gtan tshigs bstan pa ste/ byang chub sems dpa' rnams ni sems can gyi don du 'khor ba mi spong bar 'dul ba'i dbang gis 'khor bar skye zhing 'khor ba na gnas te/ byang chub sems dpa'i spyod pa rlabs chen po rnams yun ring du spyad de/ bla na med pa'i byang chub tu mngon par 'tshang rgya bar byed kyi/ nyan thos rnams ni 'khor ba'i sdug bsngal gyis skrag nas 'khor ba spangs te/ myur du zhi ba phyogs gcig pa'i mya ngan las 'da' ba la 'khor ba'i rgyud kyi mtshams bcad pa zhes bya ste/ de'i phyir bla na med pa'i byang chub tu sems bskyed pa'i mthu med do zhes bstan pa'o/ /'on kyang gal te de dag bla na med pa yang dag par rdzogs pa'i byang chub tu sems bskyed na/ de dag la yang rjes su yi rang ngo zhes bya ba ni 'phags pa nyan thos rnams la yang bla na med pa'i byang chub tu 'grub par 'gyur ba'i skal ba yod pa bstan pa ste/ nyan thos zhi ba phyogs gcig pa la gnas pa las skal ba dang sbyar nas de bzhin gshegs pa'i 'od kyis bskul nas bla na med pa'i byang chub tu sems bskyed cing byang chub sems dpa'i spyod pa la 'jug pa dag kyang yod de/ de dag la yang shes rab kyi pha rol tu phyin pa 'di bstan to zhes bya ba'i don to/ /khyad par du 'phags pa'i chos rnams las khyad par du 'phags pa'i chos rnams thob par 'gyur bas/ de dag gi dge ba'i phyogs la bdag ni bar chad mi byed do zhes bya ba ni 'phags pa nyan thos rnams 'jig rten pa phal dang / mu stegs can rnams las khyad par du 'phags pa yin la/ nyan thos las kyang byang chub sems dpa'i khyad par du 'phags pa yin te/ de ltar nyan thos las byang chub sems dpa'i spyod pa la 'jug pa srid pas de dag la yang shes rab kyi pha rol tu phyin pa 'di bstan par bya'i/ / nyan thos rnams bkol te gzhag par ni mi bya'o zhes bya ba'i don to/ /kau shi ka de la byang chub sems dpa' sems dpa' chen po'i shes rab kyi pha rol tu phyin pa gang zhe na/ kau shi ka 'di la byang chub sems dpa' sems dpa' chen pos rnam pa thams cad mkhyen pa nyid dang ldan pa'i sems bskyed pas de mi dmigs pa'i tshul gyis gzugs ni mi rtag pa yid la bya'o zhes bya ba la sogs pas ni/ gong du brgya byin gyis byang chub sems dpa' sems dpa' chen po'i shes rab kyi pha rol tu phyin pa ni gang yin zhes dris pa'i lan du rab 'byor gyis nyan thos dang rang sangs rgyas kyi sa'i tshul gyis shes rab kyi pha rol tu phyin pa la 'jug pa bstan pa ste/ rnam pa thams cad mkhyen pa nyid dang ldan pa'i sems bskyed pas gzugs la sogs pa'i chos rnams la mi rtag pa dang sdug bsngal ba la sogs par yid la byas na thams cad shes pa nyid kyi phyogs su gtogs pa'i shes rab kyi pha rol tu phyin pa yin no zhes bstan pa'o/ /de la gzugs ni mi rtag par yid la bya'o zhes bya ba ni ma byung ba las byung ba dang / byung nas kyang med par 'gyur ba'i phyir mi rtag pa zhes bya'o/ /gzugs ni sdug bsngal bar yid la bya'o zhes bya ba ni gnod pa sna tshogs dang ldan pa'i phyir ro/ /gzugs ni bdag med par yid la bya'o zhes bya ba ni mu stegs can gyis brtags pa'i bdag gi mtshan nyid dang mi ldan pa'i phyir ro/ /gzugs ni zhi bar yid la bya'o zhes bya ba ni don dam par sdug bsngal thams cad zhi ba'i phyir ro/ /gzugs ni dben par yid la bya'o zhes bya ba ni don dam par nyon mongs pa dang bral ba'i phyir ro/ /gzugs ni nang du yid la bya'o zhes bya ba ni rkyen du mas gso dgos pa dang / lus dang yid kyi sdug bsngal 'byung ba'i rgyu yin pa'i phyir nad du yid la bya'o/ /gzugs ni shu bar yid la bya'o zhes bya ba ni sdug bsngal gyi gnod pa dang ldan pa dang / nyon mongs pa'i rnag khrag zag pa'i phyir shu ba dang 'dra bas shu bar yid la bya'o/ /gzugs ni zug rngur yid la bya'o zhes bya ba ni phyi nang gi gnod pas zug par byed cing bcos bka' ba'i phyir zug rngu dang 'dra bas zug rngur yid la bya'o/ /gzugs ni sdig par yid la bya'o zhes bya ba ni smad par bya ba dang / ma rung bar 'gyur ba'i phyir sdig pa dang 'dra bas sdig par yid la bya'o/ /gzugs ni na bar yid la bya'o zhes bya ba ni yun ring po'i gnod pa dang ldan pa'i phyir nad rnying na ba dang 'dra bas na bar yid la bya'o/ /gzugs ni dgrar yid la bya'o zhes bya ba ni mi bde ba dang gnod pa sna tshogs 'byung ba'i rgyu yin pa'i phyir dgra dang 'dra bas dgrar yid la bya'o/ /gzugs ni 'jig pa'i chos can du yid la bya'o zhes bya ba ni nad dang / rgas pa dang / 'chi ba rnams kyis rab tu 'jig pa'i rang bzhin yin pa'i phyir 'jig pa'i chos can zhes bya'o/ /gzugs ni mi brtan par yid la bya'o zhes bya ba ni skye ba dang rgas pa la sogs pa'i gnas skabs dang / gzhan du 'gyur zhing mal gcig na mi gnas pa'i phyir mi brtan pa'o/ /gzugs ni 'jig par yid la bya'o zhes bya ba ni rang gi ngang gis 'jig pa dang / 'jig par byed pa'i rkyen rnams kyis 'jig pa'i phyir 'jig pa'o/ /gzugs ni 'jigs par yid la bya'o zhes bya ba ni phyi'i dgra dang nang gi nad la sogs pa'i 'jigs pa kun gyi rgyu yin pa'i phyir ro/ /gzugs ni 'go ba'i nad du yid la bya'o zhes bya ba ni gnod pa rnam pa mang po dang 'dre ba dang / 'go ba'i nad dang 'dra ba'i phyir 'go ba'i nad do/ /gzugs ni stong pa nyid du yid la bya'o zhes bya ba ni nang gi byed pa po med pa'i phyir stong pa'o/ /gzugs ni bdag gi ba med par yid la bya'o zhes bya ba ni tshor ba la sogs pa'i chos rnams la bdag gi bar 'dzin pa'i lta ba med pa'i phyir ro/ /gzugs ni yid brtan du mi rung bar yid la bya'o zhes bya ba ni yang dag pa ma yin pa las kun brtags pa yin te/ 'gyur zhing mi brtan pa'i chos can yin pa'i phyir ro/ /gzugs ni gnod par yid la bya'o zhes bya ba ni lus dang sems la mi bde ba dang / gnod pa sna tshogs 'byung ba'i rgyu yin pa'i phyir gnod par yid la bya'o zhes bstan pa'o/ /rnam pa thams cad mkhyen pa nyid dang ldan pa'i sems bskyed pas de mi dmigs pa'i tshul gyis tshor ba ni mi rtag par yid la bya'o zhes bya ba nas/ rga shi ni gnod par yid la bya'o zhes bya ba'i bar du yang mi rtag pa la sogs pa'i don de bzhin du sbyar bar bya ste/ de dag gis ni nyan thos dang rang sangs rgyas kyi theg pa'i tshul gyis thams cad shes pa nyid kyi phyogs su gtogs pa'i shes rab kyi pha rol tu phyin pa bstan to/ /kau shi ka gzhan yang byang chub sems d pa' sems dpa' chen po ni rnam pa thams cad mkhyen pa nyid dang ldan pa'i sems bskyed pas mi dmigs pa'i tshul gyis sbyin pa'i pha rol tu phyin pa la spyod do zhes bya ba la sogs pa ni byang chub sems dpa' rnams kyi spyod pa lam gyi rnam pa shes pa nyid kyi phyogs su gtogs pa'i shes rab kyi pha rol tu phyin pa bstan pa ste/ rnam pa thams cad mkhyen pa nyid dang ldan pa'i sems bskyed pas mi dmigs pa'i tshul gyis sbyin pa'i pha rol tu phyin pa la spyod do zhes bya ba nas shes rab kyi pha rol tu phyin pa la spyod do zhes bya ba'i bar du ni kun rdzob tu bdag dang / sems can thams cad rnam pa thams cad mkhyen pa nyid thob par gyur cig ces bya ba'i sems bskyed pas pha rol tu phyin pa drug la spyod la/ don dam par de yang mi dmigs par spyod pa ni lam gyi rnam pa shes pa nyid kyi phyogs su gtogs pa'i shes rab kyi pha rol tu phyin pa yin no zhes bstan pa'o/ /kau shi ka gzhan yang byang chub sems dpa' sems dpa' chen po ni rnam pa thams cad mkhyen pa nyid dang ldan pa'i sems bskyed pas mi dmigs pa'i tshul gyis dran pa nye bar gzhag pa bzhi sgom mo zhes bya ba nas/ sangs rgyas kyi chos ma 'dres pa bco brgyad sgom mo zhes bya ba'i bar du ni dran pa n ye bar gzhag pa bzhi la sogs pa rnam par byang ba'i chos rnams sgom pa'i tshe kun rdzob tu bdag dang sems can thams cad rnam pa thams cad mkhyen pa nyid thob par gyur cig ces yongs su bsngo ba'i sems bskyed pa dang ldan pas sgom zhing don dam par de'ang mi dmigs par sgom pa nyid lam gyi rnam pa shes pa nyid kyi phyogs su gtogs pa'i shes rab kyi pha rol tu phyin pa yin no zhes bstan pa'o/ /kau shi ka gzhan yang byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ 'di ltar so so yang dag par slob ste zhes bya ba la sogs pa lam gyi rnam pa shes pa nyid kyi phyogs su gtogs pa'i shes rab kyi pha rol tu phyin pa'i chos dang gang zag la bdag med pa'i rang bzhin la yang dag par rtog cing slob pa bstan pa ste/ 'di ltar chos rnams mngon par brlan par byed pa dang / yongs su brlan par byed pa dang / yongs su rdzogs par byed pa dang / yongs su rgyas par byed pa dang / yongs su dpyod par byed pa de dag ni chos kho nar zad de/ de la bdag gam bdag gi med do zhes bya ba ni gang zag la bdag med pa brtag pa'i sgo nas shes rab kyi pha rol tu phyin pa bstan pa ste/ byang chub sems dpa' byang chub tu sems bskyed nas byams pa dang / snying rje'i dbang gis sems can 'dod chags dang zhe sdang dang gti mug gis gdungs pa rnams kyi sems kyi rgyud byams pa dang / snying rje la sogs pa'i rang bzhin can du byas te/ dul zhing zhi ba'i sems su byed pa ni byang chub kyi sems dang / dge ba'i rtsa ba dang / yongs su bsngo ba'i sems kyi chos nyid tsam du zad kyi mu stegs can gyis yongs su brtags pa'i byed pa po bdag la sogs pa gang yang med do zhes bstan pa'o/ /chos rnams mngon par brlan par byed pa zhes bya ba ni sems can rnams kyi sems kyi rgyud 'dod chags la sogs pas gdungs shing khengs pa rnams byang chub kyi sems dang dge ba'i rtsa ba dang yongs su bsngo ba'i sems kyis byams pa dang / snying rje la sogs pas mngon par brlan cing dul bar byas nas dang po sbyin pa la sogs pa bsdu ba rnam pa bzhi la 'jug pa'i sems bskyed pa'o/ /yongs su brlan par byed pa zhes bya ba ni de ltar sems bskyed nas sbyin pa la sogs pa dngos su byed du 'jug pa'o/ /yongs su rdzogs par byed pa zhes bya ba ni sbyin pa la sogs pa de dag 'khor gsum yongs su dag cing mthar phyin par byed pa'o/ /yongs su rgyas par byed pa zhes bya ba ni yongs su bsngo ba'i sems kyis bdag dang sems can thams cad bla na med pa'i byang chub tu 'grub par yongs su bsngo zhing khyab par byed pa'o/ /yongs su dpyod par byed pa zhes bya ba ni de ltar sbyin pa la sogs pa byed pa'i sngon rol lam/ byas zin pa'i 'og tu shes rab kyis sbyin pa byed pa dang / sbyin pa'i rdzas dang / len pa po rnams mi dmigs par dpyod pa'o/ /de dag ni chos kho nar zad de de la bdag gam bdag gi med do zhes bya ba ni de ltar mngon par brlan par byed pa la sogs pa ni byang chub kyi sems la sogs pa'i chos rnams kyis byas par zad kyi bdag la sogs pa'i byed pa po gang gis kyang byas pa med do zhes gang zag la bdag med pa'i don mjug bsdus te bstan pa'o/ /de ci'i phyir zhe na/ de ni 'di ltar byang chub sems dpa' sems dpa' chen po'i yongs su bsngo ba'i sems gang yin pa de yang byang chub kyi sems dang 'grogs pa ma yin/ byang chub kyi sems gang yin pa de yang yongs su bsngo ba'i sems dang 'grogs pa ma yin te zhes bya ba ni chos la bdag med par rtogs pa'i shes rab kyi pha rol tu phyin pa bstan pa ste/ byang chub sems dpa'i byang chub kyi sems dang / dge ba'i rtsa ba yongs su bsngo ba'i sems kyis sems can rnams kyi sems kyi rgyud mngon par brlan pa la sogs pa byed pa'i byang chub kyi sems dang / yongs su bsngo ba'i sems de gnyi ga yang don dam pa'i dngos po med pas gcig la gcig gnas pa'am/ phan tshun 'phrad cing 'grogs pa med do zhes bstan pa'o/ /kau shi ka yongs su bsngo ba'i sems gang yin pa de ni byang chub kyi sems la med cing mi dmigs/ byang chub kyi sems gang yin pa de ni yongs su bsngo ba'i sems la med cing mi dmigs te zhes bya ba ni byang chub kyi sems dang / yongs su bsngo ba'i sems gnyis phan tshun du mi 'phrad cing mi 'grogs pa'i gtan tshigs bstan pa ste/ don dam par de gnyis ka'i dngos po med cing mi dmigs pa'i phyir gcig la gcig rten cing 'grogs pa yang med do zhes bya ba'i don to/ /kau shi ka gang de ltar chos thams cad la yang rab tu rtog la/ chos gang la yang rnam par rgyu ba med pa 'di ni byang chub sems dpa' sems dpa' chen po'i shes rab kyi pha rol tu phyin pa'o zhes bya ba ni kun rdzob tu gang zag dang chos la bdag med par rtog kyang don dam par chos gang la yang mtshan mar mi 'dzin cing chags pa med pa de nyid shes rab kyi pha rol tu phyin pa yin no zhes bstan pa'o/ /de skad ces smras pa dang / lha'i dbang po brgya byin gyis gnas brtan rab 'byor la 'di skad ces smras so/ /btsun pa rab 'byor ji ltar na yongs su bsngo ba'i sems byang chub kyi sems dang 'grogs pa ma yin/ ji ltar na byang chub kyi sems yongs su bsngo ba'i sems dang 'grogs pa ma yin/ ji ltar na yongs su bsngo ba'i sems byang chub kyi sems la med cing mi dmigs/ ji ltar na byang chub kyi sems yongs su bsngo ba'i sems la med cing mi dmigs zhes bya ba ni yongs su bsngo ba'i sems dang / byang chub kyi sems gnyis don dam par dngos po med cing bsam gyis mi khyab pa'i don zhib tu bshad pa'i skabs dbye ba'i phyir brgya byin gyis rab 'byor la dris pa'o/ /rab 'byor gyis smras pa/ kau shi ka yongs su bsngo ba'i sems gang yin pa de ni sems ma yin/ byang chub kyi sems gang yin pa de yang sems ma yin te/ de ltar na sems ma yin pa gang yin pa de ni bsam gyis mi khyab pa'o/ /bsam gyis mi khyab pa gang yin pa de ni sems ma yin pa ste/ sems ma yin pa de ni sems ma yin par yongs su bsngo ba med/ bsam gyis mi khyab pa yang bsam gyis mi khyab par yongs su bsngo ba med de/ de ltar na sems ma yin pa gang yin pa de ni bsam gyis mi khyab pa'o/ /bsam gyis mi khyab pa gang yin pa de ni sems ma yin pa ste/ kau shi ka 'di ni byang chub sems dpa' sems dpa' chen po'i shes rab kyi pha rol tu phyin pa'o zhes bya ba ni dge ba'i rtsa ba yongs su bsngo ba'i sems dang / byang chub kyi sems gnyi ga yang don dam par yod par ma grub pas sems ma yin te/ de ltar sems ma yin pa de ni bsam gyis mi khyab pa yin no/ /de ltar bsam gyis mi khyab cing sems ma yin pa de la yongs su bsngo ba med par yongs su rtogs nas rnam par mi rtog par gyur pa de nyid byang chub sems dpa'i shes rab kyi pha rol tu phyin pa yin no zhes bstan pa'o/ /de nas bcom ldan 'das kyis tshe dang ldan pa rab 'byor la bka' stsal pa/ rab 'byor khyod de ltar byang chub sems dpa' sems dpa' chen po rnams la shes rab kyi pha rol tu phyin pa ston cing mos pa bskyed pa legs so legs so/ /rab 'byor legs so zhes bya ba ni gong du rab 'byor gyis shes rab kyi pha rol tu phyin pa'i don zab mo bstan pa legs so zhes bstod pa dang / bka' drin dran par bya ba'i tshig 'og nas 'chad pa gleng bslang ba'i phyir gsungs pa'o/ /rab 'byor gyis gsol pa/ bcom ldan 'das bdag gis ni bka' drin dran par bgyi ste/ bka' drin mi dran par mi bgyi'o zhes bya ba la sogs pa ni bcom ldan 'das kyis rab 'byor la khyod de ltar byang chub sems dpa' sems dpa' chen po rnams la shes rab kyi pha rol tu phyin pa ston cing mos pa skyed pa legs so zhes bstod pa'i lan du/ bdag 'di ltar byang chub sems dpa' rnams la shes rab kyi pha rol tu phyin pa ston pa 'di sngon gyi de bzhin gshegs pa rnams sngon byang chub sems dpar gyur pa'i tshe yang sngon gyi nyan thos dgra bcom pa rnams kyis pha rol tu phyin pa drug la gdams pa dang / rjes su bstan pa bgyis pa las byang chub sems dpa' de dag gis bla na med pa yang dag par rdzogs pa'i byang chub tu mngon par sangs rgyas par gyur te/ de bzhin du bdag gis kyang byang chub sems dpa' rnams pha rol tu phyin pa drug la gdams pa dang / rjes su bstan pa la sogs pa bgyis na byang chub sems dpa' de dag kyang de'i rim pas bslabs te/ bla na med pa yang dag par rdzogs pa'i byang chub tu mngon par 'tshang rgya bar 'gyur zhing / de ltar bdag gis bstan na sngon gyi 'phags pa nyan thos dgra bcom pa rnams dang spyod pa mthun par spyad pas sngon gyi 'phags pa rnams kyi rjes su bslab pa nyid bka' drin dran par byas shing / drin la lan lon pa yin no zhes bstan pa'o/ /de la gdams pa ni/ sdig pa mi dge ba'i chos la sogs pa byar mi rung ba rnams ma byed cig ces dang po gdams pa'o/ /rjes su bstan pa ni/ dge ba'i chos 'di dag byos shig ces dge ba la gzud pa'o/ /dgyes par byas pa ni nan tan du sgrub pa'i dmigs mi shes pa la sgrub cing sgom pa'i dmigs bstan pas dga' bar byas pa'o/ / yang dag par bskul ba ni sgom zhing sgrub pa la zhugs pa'i tshe lung dang man ngag legs par ma thob pas 'khrul cing log par sgom pa las ma 'khrul cing yang dag par sgom pa la sbyor ba'o/ /legs par gzengs bstod pa ni le lo la sogs pa'i skyon gyis sgrub pa dang / sgom pa la mi brtson pa rnams spro ba bskyed cing brtson 'grus rtsom du 'jug pa'o/ /rab tu dgyes par byas pa na/ legs par sgrub cing phyin ci ma log par sgom pa la legs so zhes bstod nas sgom pa la spro zhing dga' ba skyed pa'o/ /bkod pa dang zhes bya ba ni de ltar bsgrubs shing bsgoms pa'i tha mar 'phags pa'i lam la bkod pa'o/ /shin tu brtan pa bgyis pas zhes bya ba ni lam bsgoms pa'i 'bras bu thob par byas shing de la brtan par gnas par byas so zhes bya ba'i don to/ /de nas tshe dang ldan pa rab 'byor gyis lha'i dbang po brgya byin la 'di skad ces smras so/ /kau shi ka de'i phyir shin tu legs par nyon la yid la zung shig dang / ji ltar byang chub sems dpa' sems dpa' chen pos shes rab kyi pha rol tu phyin pa la gnas par bya ba dang / ji ltar mi gnas par bya ba bdag gis bshad do zhes bya ba la sogs pa ni/ gong du lha'i dbang po brgya byin gyis rab 'byor la/ byang chub sems dpa' sems dpa' chen pos shes rab kyi pha rol tu phyin pa la ji ltar gnas par bya zhes dris pa'i lan du/ byang chub sems dpa' sems dpa' chen pos shes rab kyi pha rol tu phyin pa la ji ltar gnas par bya ba'i don rab 'byor gyis zhib tu bshad pa ste/ kau shi ka gzugs ni gzugs kyis stong ngo zhes bya ba la sogs pa ni gzugs la sogs pa phung po lnga nas rnam pa thams cad mkhyen pa nyid la thug gi bar du 'jig rten dang / 'jig rten las 'das pa'i chos ming gis smos pa rnams don dam par de dag gi rang bzhin gyis stong la/ de ltar stong par rtogs par byed pa'i byang chub sems dpa' yang don dam par byang chub sems dpa'i ngo bo nyid kyis stong ste/ gzugs la sogs pa'i chos rnams kyi stong pa nyid dang / byang chub sems dpa'i stong pa gang yin pa de dag stong pa nyid du ro gcig ste tha mi dad pas de dag la gnyis su med cing gnyis su byar med par rtogs shing gnas pa nyid byang chub sems dpa' sems dpa' chen po shes rab kyi pha rol tu phyin pa la gnas pa yin no zhes bstan pa'o/ /de nas lha'i dbang po brgya byin gyis gnas brtan 'byor la 'di skad ces smras so/ /btsun pa rab 'byor ji ltar na byang chub sems dpa' sems dpa' chen po shes rab kyi pha rol tu phyin pa la gnas par bya/ rab 'byor gyis smras pa/ kau shi ka 'di la byang chub sems dpa' sems dpa' chen pos shes rab kyi pha rol tu phyin pa la spyod pa'i tshe/ dmigs pa'i tshul gyis gzugs la gnas par mi bya'o zhes bya ba la sogs pa ni gnas par mi bya ba yongs su spang ba'i sgo nas shes rab kyi pha rol tu phyin pa la gnas par bya ba bstan pa ste/ gnas par mi bya ba yang gzugs la sogs pa rnam pa thams cad mkhyen pa nyid la thug pa'i bar gyi chos rnams la dmigs pa'i tshul gyis mi gnas pa nyid shes rab kyi pha rol tu phyin pa la gnas pa ma yin no zhes bstan pa'o/ /dmigs pa'i tshul gyis gzugs zhes bya bar gnas par mi bya'o zhes bya ba nas/ dmigs pa'i tshul gyis rnam pa thams cad mkhyen pa nyid ces bya bar gnas par mi bya'o zhes bya ba'i bar du ni gzugs la sogs pa'i chos rnams kyi mtshan nyid la dmigs pa'i tshul gyis mi gnas pa nyid shes rab kyi pha rol tu phyin pa la gnas pa yin no zhes bstan pa ste/ gzugs la sogs pa'i chos rnams kyi mtshan nyid kyang gzugs kyi mtshan nyid ni gzugs su rung zhing thogs pa dang bcas pa'o/ /tshor ba'i mtshan nyid ni bde ba dang / sdug bsngal myong ba'i rang bzhin can no zhes bya ba la sogs pa chos rnams so so'i mtshan nyid gang yin pa la ji ltar rigs par sbyar ro/ /dmigs pa'i tshul gyis gzugs rtag ces bya ba dang mi rtag ces bya bar gnas par mi bya'o zhes bya ba la sogs pa ni gzugs la sogs pa'i chos nyid la dmigs pa'i tshul gyis gnas par mi bya ba nyid shes rab kyi pha rol tu phyin pa la gnas pa yin pa bstan pa ste/ chos nyid la dmigs pa'i tshul gyis gnas par mi bya ba yang thams cad shes pa nyid kyi phyogs su gtogs pa dang / lam gyi rnam pa shes pa nyid kyi phyogs su gtogs pa dang / rnam pa thams cad mkhyen pa nyid kyi phyogs su gtogs pa dang gsum mo/ /de la dmigs pa'i tshul gyis gzugs rtag ces bya ba dang / mi rtag ces bya bar gnas par mi bya'o zhes bya ba nas/ de bzhin gshegs pa dgra bcom pa yang dag par rdzogs pa'i sangs rgyas sbyin pa'i gnas zhes bya bar dmigs pa'i tshul gyis gnas par mi bya'o zhes bya ba'i bar du ni thams cad shes pa nyid kyi phyogs su gtogs pa'i chos nyid la gnas par mi bya ba bstan pa ste/ thams cad shes pa nyid kyi phyogs su gtogs pa zhes bya ba yang nyan thos dang rang sangs rgyas rnams theg pa chung ngu'i tshul gyis thams cad shes pa nyid thob par bya ba'i phyir/ gzugs la sogs pa rnam pa thams cad mkhyen pa nyid la thug gi bar gyi chos rnams la rtag pa dang / mi rtag pa dang / bde ba dang / sdug bsngal ba dang / bdag dang bdag med pa dang / sdug pa dang mi sdug pa dang / zhi ba dang ma zhi ba dang / dben pa dang mi dben pa dang / stong pa dang mi stong pa dang / mtshan ma yod pa dang / mtshan ma med pa dang / smon pa yod pa dang / smon pa med pa'i chos nyid du dmigs pa'i tshul gyis rtog cing gnas te/ byang chub sems dpa' shes rab kyi pha rol tu phyin pa la spyod pas de ltar gnas par mi bya'o zhes bstan pa'o/ /kau shi ka gzhan yang rgyun du zhugs pa'i 'bras bu 'dus ma byas pa las gdags zhes bya bar dmigs pa'i tshul gyis gnas par mi bya'o zhes bya ba nas/ bla na med pa yang dag par rdzogs pa'i byang chub tu 'dus ma byas pa las gdags zhes bya bar dmigs pa'i tshul gyis gnas par mi bya'o zhes bya ba'i bar du yang rgyun du zhugs pa la sogs pa'i chos la gnas par mi bya ba bstan pa ste/ rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa dang / rang byang chub dang / bla na med pa yang dag par rdzogs pa'i byang chub rnams kyi chos nyid ni mya ngan las 'das pa 'dus ma byas pa zhes bya ba la dmigs shing bsgom bsgom pa las rgyun du zhugs pa la sogs pa'i 'bras bu thob par gyur pa la/ rgyun du zhugs pa'i 'bras bu la sogs pa 'dus ma byas pa la gdags so zhes bya bar dmigs pa'i tshul gyis gnas par mi bya'o zhes bstan pa'o/ /rgyun du zhugs pa sbyin pa'i gnas zhes bya bar dmigs pa'i tshul gyis gnas par mi bya'o zhes bya ba nas/ de bzhin gshegs pa dgra bcom pa yang dag par rdzogs pa'i sangs rgyas sbyin pa'i gnas zhes bya bar dmigs pa'i tshul gyis gnas par mi bya'o zhes bya ba'i bar du yang rgyun du zhugs pa la sogs pa'i chos nyid la dmigs pa'i tshul gyis gnas par mi bya ba bstan pa ste/ rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa dang / rang byang chub dang / de bzhin gshegs pa dgra bcom pa yang dag par rdzogs pa'i sangs rgyas rnams kyi chos nyid ni sbyin pa'i gnas yin no zhes bya bar dmigs pa'i tshul gyis gnas par mi bya'o zhes bstan pa'o/ /kau shi ka gzhan yang byang chub sems dpa' sems dpa' chen pos sa dang po la dmigs pa'i tshul gyis gnas par mi bya'o zhes bya ba nas/ byang chub sems dpa' sems dpa' chen pos sems can tshad med grangs med pa bla na med pa yang dag par rdzogs pa'i byang chub tu dgod par bya'o zhes bya bar dmigs pa'i tshul gyis gnas par mi bya'o zhes bya ba'i bar du ni lam gyi rnam pa shes pa nyid kyi phyogs su gtogs pa'i spyod pa la gnas par mi bya ba bstan pa ste/ lam gyi rnam pa shes pa nyid ces bya ba yang byang chub sems dpa' rnams sa bcu la rim pas gnas pa dang / pha rol tu phyin pa drug yongs su rdzogs par bya ba dang / byang chub kyi phyogs kyi chos sum cu rtsa bdun yongs su rdzogs par bya ba dang / byang chub sems dpa'i skyon med pa la 'jug pa dang / phyir mi ldog pa'i sa la gnas par bya ba dang / mngon par shes pa lnga yongs su rdzogs par bya ba dang / sangs rgyas bcom ldan 'das rnams la bsnyen bkur bya zhing chos mnyan pa dang / chos thos pa rnams gzhan la bstan par bya ba'i phyir sangs rgyas kyi zhing tshad med grangs med par 'gro bar bya ba dang / sangs rgyas de dag gi sangs kyi zhing ci 'dra ba de 'dra ba nyid du yongs su bsgrub par bya ba dang / sems can rnams byang chub tu smin par bya ba dang / 'jig rten gyi khams tshad med grangs med par song ste/ de bzhin gshegs pa dgra bcom pa yang dag par rdzogs pa'i sangs rgyas rnams la me tog dang / phreng ba la sogs pas mchod cing rim gror bya ba dang / sems can tshad med grangs med pa bla na med pa yang dag par rdzogs pa'i byang chub tu dgod par byas nas byang chub sems dpa'i lam gyi rnam pa shes pa thob par byed pa de dag la dmigs pa'i tshul gyis gnas par mi bya ba nyid shes rab kyi pha rol tu phyin pa la gnas pa yin no zhes bstan pa'o/ /mig lnga bsgrub par bya ste zhes bya ba nas/ byang chub sems dpa' sems dpa' chen pos lus la dpe byad bzang po brgyad cu yongs su bsgrub par bya'o zhes bya bar dmigs pa'i tshul gyis gnas par mi bya'o zhes bya ba'i bar du ni rnam pa thams cad mkhyen pa nyid kyi phyogs su gtogs pa'i spyod pa la gnas par mi bya ba bstan pa ste/ rnam pa thams cad mkhyen pa nyid ces bya ba yang sangs rgyas kyi sa la gnas pa'i ye shes la bya ste/ ye shes de thob par bya ba'i phyir de bzhin gshegs pa'i spyan lnga sgrub pa dang / ting nge 'dzin rnams sgrub pa dang / ting nge 'dzin rnams kyis rnam par rtse ba dang / gzungs kyi sgo rnams sgrub pa dang / de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / byams pa chen po dang / snying rje chen po dang / sangs rgyas kyi chos ma 'dres pa bco brgyad dang / skyes bu chen po'i mtshan sum cu rtsa gnyis dang / dpe byad bzang po brgyad cu rnams yongs su bsgrubs nas rnam pa thams cad mkhyen pa nyid thob par bya'o snyam du de dag la dmigs pa'i tshul gyis gnas par mi bya ba nyid shes rab kyi pha rol tu phyin pa la gnas pa yin no zhes bstan pa'o/ /dad pa'i rjes su 'brang ba'o zhes bya bar dmigs pa'i tshul gyis gnas par mi bya'o zhes bya ba la sogs pa ni nyan thos dang rang sangs rgyas kyi gang zag dang / byang chub sems dpa'i gang zag dang / de bzhin gshegs pa'i gang zag rnams la dmigs pa'i tshul gyis gnas par mi bya ba nyid shes rab kyi pha rol tu phyin pa la gnas pa yin par bstan pa ste/ de yang thams cad shes pa nyid kyi phyogs su gtogs pa dang / lam gyi rnam pa shes pa nyid kyi phyogs su gtogs pa dang / rnam pa thams cad mkhyen pa nyid kyi phyogs su gtogs par rig par bya'o/ /de la dad pa'i rjes su 'brang ba'o zhes bya bar dmigs pa'i tshul gyis gnas par mi bya'o zhes bya ba nas/ rang sangs rgyas so zhes bya bar dmigs pa'i tshul gyis gnas par mi bya'o zhes bya ba'i bar du ni nyan thos dang rang sangs rgyas kyi gang zag la dmigs pa'i tshul gyis gnas par mi bya ba bstan pa ste/ de la dad pa'i rjes su 'brang ba zhes bya ba ni nyan thos shes rab rtul po rgyun du zhugs pa'i 'bras bu mngon sum du bya ba'i phyir zhugs pa la bya ste/ gang zag de dbang po rtul bas bdag nyid kyi blos rtogs pa ni med kyi/ lung las thos pa bzhin du dad pas 'phags pa'i lam gyi rjes su 'jug pas na/ dad pa'i rjes su 'brang ba zhes bya'o/ /chos kyi rjes su 'brang ba zhes bya ba ni rgyun du zhugs pa'i 'bras bu mngon sum du bya ba'i phyir zhugs par gang zag dbang po rnon po la bya ste/ de dag dbang po rno bas gzhan gyi dring la mi 'jog cing chos kyi tshul dang mthun par rig pa dang / sbyor bas chos kyi rjes su 'brang ba zhes bya'o/ / brgyad pa zhes bya ba ni rgyun du zhugs pa'i 'bras bu mngon sum du bya ba'i phyir zhugs pa'i gang zag dgra bcom pa'i 'bras bu nas yas bgrangs na rim pa brgyad kyi tha ma la 'bab pas brgyad pa zhes bya'o/ /rgyun du zhugs pa zhes bya ba ni rgyun du zhugs pa'i 'bras bu dang po thob pa'i gang zag la bya'o/ /de ltar thogs na srid pa lan bdun pa zhes bya ba ni rgyun du zhugs pa'i 'bras bu thob pa'i gang zag bsgom pas spang bar bya ba'i nyon mongs pa ma zad pas mi dang lha'i nang du 'khor ba'i srid par re ltar thogs na lan bdun skye ba la/ re ltar thogs na srid pa lan bdun pa zhes bya'o/ /rigs nas rigs su 'gro ba zhes bya ba ni rgyun du zhugs pa'i 'bras bu thob pa'i gang zag la la tshe gnyis sam gsum gyi bar du 'khor ba na gnas shing lha dang mi'i rigs bzang por skye ba la bya'o/ /gcig gis chod pa'o zhes bya ba ni rgyun du zhugs pa'i 'bras bu la gnas pa'i gang zag lan cig phyir 'ong ba'i 'bras bu thob par bya ba la skye ba gcig gis bar chod pa la bya'o/ /rnam pa gcig tu na mya ngan las 'das pa thob pa la skye ba gcig gis bar chod pa la yang bya ste/ mya ngan las 'das pa la tshe phyi ma 'ba' zhig gis thogs pa'o zhes bya ba'i don to/ /gang zag mgo mnyam pa zhes bya ba ni rgyun du zhugs pa'i 'bras bu la gnas pa'i gang zag tshe dang las dang nyon mongs pa rnams dus gcig tu mgo mnyam du zad nas/ thal byung du phung po'i lhag ma med pa'i mya ngan las 'das pa'i dbyings su yongs su mya ngan las 'da' ba la bya'o/ /tshe zad pa'o zhe'am nyon mongs pa zad pa'o zhes bya ba ni rgyun du zhugs pa'i 'bras bu la gnas pa'i gang zag la la tshe dang nyon mongs pa snga phyir zad par 'gyur ba la bya'o/ /rgyun du zhugs pa zhes bya ba ni rgyun du zhugs pa'i 'bras bu la gnas pa'i gang zag lan cig phyir 'ong ba'i 'bras bu mngon sum du bya ba'i phyir zhugs pa lan cig phyir 'ong ba'i 'bras bu thob tu nye ba la bya'o/ /log par ltung ba med pa'i chos can no zhes bya ba ni rgyun du zhugs pa'i 'bras bu la gnas pa'i gang zag ngan song gsum du ltung ba'i las mi byed cing sngon ngan song gsum du ltung ba'i las byas pa yang gnyen po bsgoms pa las de'i 'bras bu rnam par smin par mi 'gyur ba'i chos can la bya'o/ /lan cig phyir 'ong ba ste/ 'jig rten 'dir lan cig phyir 'ongs nas sdug bsngal mthar dbyung ngo zhes bya ba ni lan cig phyir 'ong ba'i 'bras bu la gnas pa'i gang zag lha'i 'jig rten nas mi yul gyi 'jig rten 'dir mi'i nang du lan cig skyes nas mya ngan las 'das pa mngon sum du byed pa la bya'o/ /phyir mi 'ong ba'i 'bras bu mngon du bya ba'i phyir zhugs pa zhes bya ba ni lan cig phyir 'ong ba'i gang zag de nyid phyir mi 'ong ba'i 'bras bu thob tu nye ba la/ phyir mi 'ong ba'i 'bras bu mngon sum du bya ba'i phyir zhugs pa zhes bya'o/ /phyir mi 'ong ba ste/ de nyid du yongs su mya ngan las 'da' bar bya'o zhes bya ba phyir mi 'ong ba'i 'bras bu la gnas pa'i gang zag gang du skyes pa'i gnas de nyid du tshe de nyid la yongs su mya ngan las 'da' bar 'gyur ba la bya'o/ /dgra bcom pa'i 'bras bu mngon du bya ba'i phyir zhugs pa'o zhes bya ba ni phyir mi 'ong ba'i 'bras bu la gnas pa'i gang zag de nyid dgra bcom pa'i 'bras bu thob tu nye ba'i tshe/ dgra bcom pa'i 'bras bu mngon du bya ba'i phyir zhugs pa zhes bya'o/ /dgra bcom pa ste/ tshe 'di nyid la phung po ma lus pa'i mya ngan las 'das pa'i dbyings su yongs su mya ngan las 'da' bar bya'o zhes bya ba ni dgra bcom pa'i gang zag dgra bcom pa'i phung po de nyid la gnas pa'i tshe/ khams gsum gyi nyon mongs pa thams cad ma lus par spangs nas phung po de bor ma thag tu phung po ma lus pa'i mya ngan las 'da' bar 'gyur ba la bya'o/ /rang sangs rgyas so zhes bya ba ni rang sangs rgyas la rnam pa gnyis te/ 'khor dang lhan cig tu gnas pa dang / bse ru ltar gcig pu yan gar du gnas pa la bya ste/ de lta bu'i nyan thos dang rang sangs rgyas kyi gang zag thams cad shes pa nyid kyi phyogs su gtogs pa rnams la dmigs pa'i tshul gyis gnas par mi bya ba nyid shes rab kyi pha rol tu phyin pa la gnas pa yin no zhes bstan pa'o/ /nyan thos kyi sa dang rang sangs rgyas kyi sa las 'das te/ byang chub sems dpa'i sa la gnas par bya'o zhes bya bar dmigs pa'i tshul gyis gnas par mi bya'o zhes bya ba nas/ sangs rgyas kyi bya ba byas te/ 'jig rten gyi khams tshad med grangs med par song ste/ sems can rnams yongs su mya ngan las 'da' bar bya'o zhes bya bar dmigs pa'i tshul gyis gnas par mi bya'o zhes bya ba'i don du ni lam gyi rnam pa shes pa nyid kyi phyogs su gtogs pa'i gang zag la gnas par mi bya'o zhes bya ba bstan pa ste/ lam gyi rnam pa shes pa nyid kyi phyogs su gtogs pa'i gang zag ni byang chub sems dpa' rnams la bya ste byang chub sems dpa' rnams kyi spyod pa dang bsam pa nyan thos dang rang sangs rgyas kyi sa las bzlas te/ byang chub sems dpa'i sa la gnas par bya ba dang / lam gyi rnam pa shes pa nyid kyi ye shes thob par bya ba dang / rnam pa thams cad mkhyen pa nyid kyi ye shes thob par bya ba dang / rnam pa thams cad du chos thams cad mngon par rdzogs par sangs rgyas nas bag chags kyi mtshams sbyor ba'i nyon mongs pa thams cad zad par bya ba dang / bla na med pa yang dag par rdzogs pa'i byang chub tu mngon par rdzogs par sangs rgyas nas chos kyi 'khor lo bskor bar bya ba dang / sangs rgyas kyi bya ba byas te/ 'jig rten gyi khams tshad med grangs med par 'gro ba dang / sems can rnams yongs su mya ngan las 'da' bar bya ba'i spyod pa dang / bsam pa de lta bu dag la mtshan mar 'dzin cing dmigs pa'i tshul gyis gnas par mi bya ba nyid shes rab kyi pha rol tu phyin pa la gnas pa yin no zhes bstan pa'o/ /rdzu 'phrul gyi rkang pa bzhi la gnas te/ ting nge 'dzin rnams gang la snyoms par zhugs pas bskal pa gang gA'i klung gi bye ma snyed du gnas par 'gyur bde lta bu'i ting nge 'dzin la mnyam par gzhog go zhes bya ba la sogs pa ni rnam pa thams cad mkhyen pa nyid kyi phyogs su gtogs pa'i gang zag la dmigs pa'i tshul gyis gnas par mi bya ba bstan pa ste/ rnam pa thams cad mkhyen pa nyid kyi phyogs su gtogs pa'i gang zag ces bya ba yang sangs rgyas bcom ldan 'das la bya ste/ sangs rgyas bcom ldan 'das kyi mthu dang yon tan ting nge 'dzin la dbang thob pa la sogs pa la mtshan mar 'dzin cing dmigs pa'i tshul gyis gnas par mi bya ba bstan pa ste/ de la rdzu 'phrul gyi rkang pa bzhi la gnas te/ ting nge 'dzin rnams gang la snyoms par zhugs pas bskal pa gang gA'i klung gi bye ma snyed du gnas par 'gyur ba de lta bu'i ting nge 'dzin la mnyam par gzhog go zhes bya bar dmigs pa'i tshul gyis gnas par mi bya'o zhes bya ba ni de bzhin gshegs pas ting nge 'dzin la dbang du gyur pa bstan pa ste/ 'dun pa la sogs pa rdzu 'phrul gyi rkang pa bzhi ting nge 'dzin gyi rang bzhin can la gnas te/ ting nge 'dzin la dbang du gyur pas bskal pa du mar yang ting nge 'dzin las nyams par mi 'gyur zhing sems can gyi don kyang lhun gyis grub pa nyid du mdzad par 'gyur ba de lta bu'i mthu dang yon tan mnga' ba'i gang zag sangs rgyas bcom ldan 'das la yang dmigs pa'i tshul gyis gnas par mi bya'o zhes bstan pa'o/ /bdag gi tshe ni tshad med par gyur cig ces bya bar dmigs pa'i tshul gyis gnas par mi bya'o zhes bya ba ni de bzhin gshegs pas tshe la dbang thob pa'i yon tan de lta bu thob par bya ba la yang byang chub sems dpa' dmigs pa'i tshul gyis gnas par mi bya'o zhes bstan pa'o/ /bdag gi skyes bu chen po'i mtshan sum cu rtsa gnyis las mtshan re re zhing yang / bsod nams brgyas yongs su sgrub par gyur cig ces bya bar dmigs pa'i tshul gyis gnas par mi bya'o zhes bya ba ni/ de bzhin gshegs pa'i skyes bu chen po'i mtshan sum cu rtsa gnyis las re re yang bsod nams kyi tshogs chen po'i rgyu las byung bar gyur pa de lta bu bdag gis kyang thob par gyur cig ces dmigs pa'i tshul gyis gnas par mi bya ba bstan pa'o/ /shar phyogs kyi 'jig rten gyi khams gang gA'i klung gi bye ma snyed la rgya ji tsam yod pa dang zhes bya ba nas/ nub byang gi 'jig rten gyi k hams gang gA'i klung gi bye ma snyed la rgya ji tsam yod pa de tsam gyi tha grur bdag gis sangs rgyas kyi zhing gcig bsgrubs so zhes bya bar dmigs pa'i tshul gyis gnas par mi bya'o zhes bya ba'i bar du ni sangs rgyas kyi zhing rgya chen po de lta bu bdag gis grub par gyur cig ces dmigs pa'i tshul gyis gnas par mi bya ba bstan pa'o/ /bdag gis stong gsum gyi stong chen po'i 'jig rten gyi khams rdo rje'i rgyu las grub par gyur cig ces bya bar dmigs pa'i tshul gyis gnas par mi bya'o zhes bya bas ni bdag gi sangs rgyas kyi zhing bdud dang phas rgol ba la sogs pas sun mi phyin cing mi shigs par gyur cig ces bya bar dmigs pa'i tshul gyis gnas par mi bya'o zhes bstan pa'o/ /bdag gi byang chub kyi shing las dri sems can gang gis tshor yang rung ste/ de dag la 'dod chags dang / zhe sdang dang / gti mug gi g nod pa med par gyur cig ces bya bar dmigs pa'i tshul gyis gnas par mi bya'o zhes bya ba ni bdag nam byang chub kyi shing drung du mngon par 'tshang rgya ba'i tshe byang chub kyi shing las spos kyi dri zhim po byung ba sems can gang gis tshor ba'i sems can de dag kyang 'dod chags la sogs pa'i nyon mongs pa'i gnod pa dang bral zhing byang chub kyi skal ba dang ldan par gyur cig ces bya bar smon lam du gdab cing bsngo ba yang kun rdzob tu byar zad kyi/ don dam par de la yang dmigs pa'i tshul gyis gnas par mi bya ba bstan pa'o/ /nyan thos kyi sems dang / rang sangs rgyas k yi sems skyed par ma gyur cig ces bya bar dmigs pa'i tshul gyis gnas par mi bya'o zhes bya ba ni byang chub kyi shing de'i dri tshor ba'i sems can de dag nyan thos dang rang sangs rgyas kyi sems skyed par ma gyur cig ces smon lam du btab pa la yang dmigs pa'i tshul gyis gnas par mi bya'o zhes bstan pa'o/ /de dag thams cad kyang bla na med pa yang dag par rdzogs pa'i byang chub tu nges par gyur cig ces bya bar dmigs pa'i tshul gyis gnas par mi bya'o zhes bya ba ni byang chub kyi shing de'i dri tshor ba'i sems can de dag thams cad kyang bla na med pa yang dag par rdzogs pa'i byang chub tu nges par gyur cig ces smon lam du gdab pa de la yang dmigs pa'i tshul gyis gnas par mi bya ba bstan pa'o/ /sems can gang dag byang chub kyi shing gi dri tshor bar gyur pa de dag gi lus sam sems la nad gang yang med par gyur cig ces bya bar dmigs pa'i tshul gyis gnas par mi bya'o zhes bya bas ni/ bdag mngon par sangs rgyas pa'i tshe byang chub kyi shing de'i dri tshor ba'i sems can de dag gi lus dang / sems la nad gang yang med par gyur cig ces smon lam du gdab pa de la yang don dam par dmigs pa'i tshul gyis gnas par mi bya ba bstan pa'o/ / bdag gi sangs rgyas kyi zhing der gzugs kyi sgra yod par ma gyur cig ces bya bar dmigs pa'i tshul gyis gnas par mi bya'o zhes bya ba nas/ sangs rgyas kyi sgra yod par ma gyur cig ces bya bar dmigs pa'i tshul gyis gnas par mi bya'o zhes bya ba'i bar du ni/ bdag mngon par sangs r gyas pa'i sangs rgyas kyi zhing der don dam par phung po lnga la sogs pa sangs rgyas kyi bar la thug gi bar du 'jig rten dang 'jig rten las 'das pa'i chos rnams la mtshan mar 'dzin pa'i sgo nas sgra yang yod par ma gyur cig ces smon lam du gdab pa de la yang dmigs pa'i tshul gyis gnas par mi bya ba bstan pa'o/ /de ci'i phyir zhe na/ 'di ltar de bzhin gshegs pa dgra bcom pa yang dag par rdzogs pa'i sangs rgyas kyis bla na med pa yang dag par rdzogs pa'i byang chub tu mngon par rdzogs par sangs rgyas kyang chos thams cad mi dmigs pa'i phyir ro zhes bya bas ni gong du chos thams cad la dmigs pa'i tshul gyis gnas par mi bya ba bshad pa'i gtan tshigs bstan pa ste/ 'jig rten dang 'jig rten las 'das pa'i chos rnams las 'ga' zhig dngos po yod cing dmigs su yod na ni de dag la dmigs pa'i tshul gyis gnas par yang rigs na de bzhin gshegs pas bla na med pa yang dag par rdzogs pa'i byang chub tu mngon par rdzogs par sangs rgyas pa'i tshe yang don dam par chos gang yang dngos po yod par mi dmigs te/ de'i phyir dmigs pa'i tshul gyis gnas par mi bya'o zhes bstan pa'o/ /kau shi ka de ltar byang chub sems dpa' sems dpa' chen pos shes rab kyi pha rol tu phyin pa la dmigs pa'i tshul gyis gnas par mi bya'o zhes bya bas ni dmigs pa'i tshul gyis gnas par mi bya ba'i don rab 'byor gyis mjug bsdus nas brgya byin la bstan pa ste/ de ltar chos gang la yang mi gnas pa nyid shes rab kyi pha rol tu phyin pa la gnas pa yin no zhes bstan pa'o/ /de nas tshe dang ldan pa sha ra dwa ti'i bu 'di snyam du ji ltar byang chub sems dpa' sems dpa' chen pos shes rab kyi pha rol tu phyin pa la gnas par bya snyam pa dang zhes bya ba ni gang du gzugs la sogs pa'i chos thams cad la gnas par mi bya'o zhes kyang bshad pa shes rab kyi pha rol tu phyin pa la gnas par bya'o zhes kyang bshad pa stong pa nyid la ni gnas su yang mi rung na/ ji ltar shes rab kyi pha rol tu phyin pa la gnas par bya snyam du rtogs par gyur pa'o/ /de nas tshe dang ldan pa rab 'byor gyis/ tshe dang ldan pa sha ra dwa ti'i bu'i sems kyi rnam par rtog pa sems kyis yongs su shes nas/ tshe dang ldan pa sha ra dwa ti'i bu la smras pa/ tshe dang ldan pa sha ra dwa ti'i bu de ji snyam du sems/ de bzhin gshegs pa dgra bcom pa yang dag par rdzogs pa'i sangs rgyas ci zhig la gnas zhes bya ba ni ci la yang mi gnas pa nyid shes rab kyi pha rol tu phyin pa la gnas pa yin par bstan pa'i phyir rab 'byor gyis sha ra dwa ti'i bu la de bzhin gshegs pa ci la gnas zhes dris pa ste/ de bzhin gshegs pa dgra bcom pa yang dag par rdzogs pa'i sangs rgyas kyis kyang don dam par chos thams cad dngos po med par thugs su chud nas chos gang la yang dmigs pa'i tshul gyis mi gnas pa nyid shes rab kyi pha rol tu phyin pa la gnas pa yin no zhes bstan pa'o/ /smras pa/ tshe dang ldan pa rab 'byor de bzhin gshegs pa ni ci la yang gnas pa ma yin no zhes bya bas ni de bzhin gshegs pa ci zhig la gnas zhes rab 'byor gyis dris pa'i lan shA ri'i bus btab pa ste/ chos gang la yang mi gnas so zhes bya ba'i don to/ /tshe dang ldan pa rab 'byor de bzhin gshegs pa dgra bcom pa yang dag par rdzogs pa'i sangs rgyas kyi thugs ni mi gnas pa ste zhes bya bas ni/ ci la yang mi gnas pa'i gtan tshigs bstan pa ste/ /de bzhin gshegs pa'i thugs ni chos gang la yang mtshan mar mi 'dzin cing / dmigs pa'i tshul gyis gnas pa ma yin no zhes bstan pa'o/ /de gzugs la mi gnas/ tshor ba la mi gnas zhes bya ba nas/ rnam pa thams cad mkhyen pa nyid la mi gnas so zhes bya ba'i bar du ni de bzhin gshegs pa'i thugs ci la yang mi gnas zhes bya ba de chos gang dang gang la mi gnas pa'i dmigs bstan pa ste/ gzugs la sogs pa'i rnam pa thams cad mkhyen pa nyid la thug gi bar gyi chos de dag thams cad don dam par dngos po yod par ma grub pas chos de dag la de bzhin gshegs pa'i thugs dmigs pa'i tshul gyis mi gnas so zhes bya ba'i don to/ /rab 'byor gyis smras pa/ tshe dang ldan pa sha ra dwa ti'i bu/ byang chub sems dpa' sems dpa' chen pos ni ji ltar de bzhin gshegs pa dgra bcom pa yang dag par rdzogs pa'i sangs rgyas gzugs la gnas pa yang ma yin/ mi gnas pa yang ma yin zhes bya ba nas/ rnam pa thams cad mkhyen pa nyid la gnas pa yang ma yin/ mi gnas pa yang ma yin pa de ltar shes rab kyi pha rol tu phyin pa la gnas par bya ste zhes bya ba'i bar du ni gnas pa dang mi gnas pa'i mtha' gnyis spang ba bstan pa ste/ ji ltar de bzhin gshegs pa dgra bcom pa yang dag par rdzogs pa'i sangs rgyas gzugs la sogs pa'i chos rnams la gnas pa yang ma yin/ mi gnas pa yang ma yin pa de de ltar bya'o zhes bstan pa'o/ /gnas pa yang ma yin zhes bya ba ni don dam par gzugs la sogs pa'i chos thams cad rang bzhin gyis stong ste/ gnas par byar mi rung ba'i phyir ro/ /mi gnas pa yang ma yin zhes bya ba ni kun rdzob tu 'jig rten gyi tha snyad tsam du brjod cing gdags pa la sogs pa la gnas pa'i phyir mi gnas pa yang ma yin no/ /tshe dang ldan pa sha ra dwa ti'i bu/ byang chub sems dpa' sems dpa' chen pos shes rab kyi pha rol tu phyin pa la de ltar dmigs pa'i tshul gyis bslab par bya'o gnas par bya'o zhes bya bas ni mtha' gnyis dang bral ba'i don gong du bstan pa mjug bsdus nas bshad pa ste/ ji ltar de bzhin gshegs pas gnas pa dang / mi gnas pa'i mtha' gnyis spangs te/ gnas pa yang ma yin mi gnas pa yang ma yin pa de ltar byang chub sems dpas kyang bslab cing gnas par bya'o zhes bstan pa'o/ /de nas 'khor de'i nang nas lha'i bu kha cig 'di snyam du sems par gyur te zhes bya ba la sogs pas ni shes rab kyi pha rol tu phyin pa'i don zab mo tshig gis thog tu mi phebs shing brjod du med pa yin par bstan pa ste/ gang gnod sbyin rnams kyi gnod sbyin gyi tshig dang / gnod sbyin gyi skad dang / gnod sbyin gyi sgra dang / gnod sbyin gyi brjod pa de dag ni smras par gyur na shes par rung gi / gang 'phags pa rab 'byor shes rab kyi pha rol tu phyin pa 'chad pa dang / brjod pa dang / ston pa dang / rnam par 'byed pa dang / gsal bar byed pa dang / gtan la dbab par ston pa de ni shes par mi rung ngo zhes bya bas ni chos thams cad la gnas pa yang ma yin/ mi gnas pa yang ma yin pa nyid shes rab kyi pha rol tu phyin pa la gnas pa yin pas/ de ltar mi dmigs pa'i tshul gyis gnas par bya'o zhes rab 'byor gyis bshad pa'i 'khor gyi nang nas lha'i bu kha cig gis thos nas rab 'byor gyis shes rab kyi pha rol tu phyin pa'i don bshad pa'i tshig zab cing rtogs par bya dka'o snyam du rtog par gyur pa ste/ gnod sbyin gyi tshig dang / gnod sbyin gyi skad la sogs pa mi'i tshig dang skad ma yin pa rnams kyang bslabs na lobs shing shes par rung gi /ci la yang mi gnas pa nyid shes rab kyi pha rol tu phyin pa la gnas pa yin no zhes bshad pa dang / chos thams cad ni gnas pa yang ma yin mi gnas pa yang ma yin no zhes rab 'byor gyis bshad pa'i tshig gi don shes par mi rung ngo zhes bya ba'i don to/ /de nas tshe dang ldan pa rab 'byor gyis/ lha'i bu de dag gi sems kyi rnam par rtog pa sems kyis yongs su shes nas/ lha'i bu de dag la smras pa/ lha'i bu dag gang smras pa de shes par mi rung ngam zhes bya ba ni gong du lha'i bu dag rtogs pa skyes pa de tshig tu ma smras kyang rab 'byor gyi sems kyis rtogs nas ci bdag gis shes rab kyi pha rol tu phyin pa'i don bshad pa'i tshig de dag shes par mi rung ngam zhes slar brtag cing dris pa'o/ /lha'i bu rnams kyis smras pa/ 'phags pa rab 'byor shes par mi rung ngo zhes bya ba ni brjod du med pa'i don rab 'byor 'chad du gzhug pa'i phyir smras pa'o/ /rab 'byor gyis smras pa/ lha'i bu de dag ni 'di ltar yi ge gcig kyang ma brjod kyis/ gang mi brjod pa de ni thos par mi rung ngo / /gang thos par mi rung ba de ni shes par mi rung ngo zhes bya ba ni bdag gis shes rab kyi pha rol tu phyin pa bshad pa ni sems can rnams dkri zhing drang ba'i phyir kun rdzob tu tshig dang yi ge rnams kyis sgro btags te bshad par zad kyi/ don dam par ni tshig dang yi ge brjod pas thog tu phebs par mi 'gyur ba'i phyir yi ge gcig kyang ma brjod de/ de ltar tshig dang yi ge ma brjod pa de thos pa dang shes par yang mi rung ngo zhes bstan pa'o/ /de ci'i phyir zhe na/ shes rab kyi pha rol tu phyin pa ni yi ge ma yin te/ de la su yang ston pa dang / nyan pa dang shes par byed pa med do zhes bya ba ni yi ge gcig kyang ma brjod pa'i gtan tshigs bstan pa ste/ shes rab kyi pha rol tu phyin pa ni tshig dang yi ge'i rang bzhin yang ma yin la/ tshig dang yi ges bstan par bya ba yang ma yin no zhes bya ba'i don to/ /de ci'i phyir zhe na/ lha'i bu dag de bzhin gshegs pa dgra bcom pa yang dag par rdzogs pa'i sangs rgyas rnams kyi byang chub ni yi ge med pa'o zhes bya bas ni/ shes rab kyi pha rol tu phyin pa tshig dang yi ge'i rang bzhin ma yin pa dang / tshig dang yi ges bstan du mi rung ba'i gtan tshigs bstan pa ste/ bla na med pa'i byang chub kyang tshig dang yi ge'i rang bzhin yang ma yin la/ tshig dang yi ges bstan pas thog tu phebs pa yang ma yin gyi/ 'phags pa rnams kyis so so rang gis rig pa'i rang bzhin yin pa'i phyir don dam par yi ge gcig kyang ma brjod do zhes bstan pa'o/ /lha'i bu dag 'di lta ste dper na/ de bzhin gshegs pa dgra bcom pa yang dag par rdzogs pa'i sangs rgyas kyis sprul pa zhig sprul te zhes bya ba la sogs pas ni sprul pa dang rmi lam dang sgra brnyan dang sgyu ma'i dpes don dam par chos thams cad tshig dang yi ges bstan cing brjod du med pa bstan pa'o/ /de nas lha'i bu de dag 'di snyam du sems par gyur te/ kye ma gnas brtan rab 'byor 'di ni gsal bar byed pa ste zhes bya ba ni/ sprul pa la sogs pa'i dpes shes rab kyi pha rol tu phyin pa'i don tshig dang yi ges brjod cing bstan pa dang / thog tu mi phebs pa bshad pas lha'i bu rnams mgu nas gnas brtan rab 'byor 'di shes rab kyi pha rol tu phyin pa'i don gsal bar ston pa'o zhes rab 'byor la bstod pa'o/ /kye ma 'phags pa rab 'byor 'di ni shes rab kyi pha rol tu phyin pa gsal bar byed kyang zab pa bas kyang shin tu zab pa ston phra ba bas kyang shin tu phra ba la 'jug go zhes bya ba ni de ltar gsal bar byed du zin kyang shes rab rno la blo zab cing phra bas shes rab kyi pha rol tu phyin pa'i don shin tu zab pa ston cing shin tu phra ba la 'jug go zhes bstod pa ste zab pa bas kyang shin tu zab pa ston zhes bya ba ni shes rab kyi pha rol tu phyin pa'i don zab cing gting dpag dka' ba nyan thos dang rang sangs rgyas la sogs pas rtogs par mi nus pa gzhan la ston to zhes bya ba'i don to/ /phra ba bas kyang shin tu phra ba la 'jug go zhes bya ba ni shes rab kyi pha rol tu phyin pa'i don phra la brtags dka' ba rnam par mi rtog pa'i ye shes kyi spyod yul du gyur pa la/ so so rang gis rig pa'i tshul du bdag gi blo 'jug go zhes bstan pa'o/ /de nas tshe dang ldan pa rab 'byor gyis/ lha'i bu de dag gi sems kyi rnam par rtog pa sems kyis yongs su shes te/ lha'i bu de dag la 'di skad ces smras so/ /lha'i bu dag gzugs ni zab pa ma yin/ phra ba ma yin zhes bya ba la sogs pa ni gong du lha'i bu rnams 'phags pa rab 'byor 'di ni shin tu zab pa ston cing / shin tu phra ba la 'jug go snyam du sems shing rtog pa tshig tu ma smras kyang / rab 'byor gyi sems kyis shes nas zab cing phra ba nyid kyang don dam par dngos po med cing brjod du med pa yin par bstan pa ste/ zab cing phra ba zhes bya ba zhig yod na ni gzugs la sogs pa 'jig rten gyi chos rnams sam/ pha rol tu phyin pa drug la sogs pa 'jig rten las 'das pa'i chos rnams shig yin grang na/ gzugs kyi phung po nas rnam pa thams cad mkhyen pa nyid la thug gi bar gyi chos de dag thams cad rang bzhin gyis stong ste/ gang rang bzhin gyis stong pa de ni zab pa yang ma yin/ phra ba yang ma yin no zhes bstan pa'o/ /de nas lha'i bu de dag 'di snyam du sems par gyur te/ chos bstan pa 'di la ni gzugs su btags pa med do zhes bya ba la sogs pa ni gang du sprul pa la sogs pa'i dpes shes rab kyi pha rol tu phyin pa 'di don dam par sus kyang bstan pa med de/ sus kyang thos pa med sus kyang shes pa med do zhes bshad pa dang / gzugs la sogs pa'i chos thams cad zab pa yang ma yin phra ba yang ma yin par bshad pa 'khor gyi nang na 'khod pa'i lha'i bu de dag gis thos nas/ de ltar chos thams cad smra bsam las 'das te brjod du med pa yin na ni shes rab kyi pha rol tu phyin pa'i chos bstan pa 'di la/ gzugs la sogs pa nas sangs rgyas dang / byang chub dang / yi ge rnams su yang btags pa med dam ci snyam du sems pa bstan pa'o/ / de nas tshe dang ldan pa rab 'byor gyis lha'i bu de dag la 'di skad ces smras so/ /lha'i bu dag de de bzhin no/ /de de bzhin te/ de bzhin gshegs pa'i byang chub ni brjod du med do/ /smrar med do/ /de ni sus kyang bstan pa med do/ /sus kyang thos pa med do/ /sus kyang shes pa med do zhes bya ba ni de bzhin gshegs pas bla na med pa'i byang chub thugs su chud pa'i byang chub gang yin pa de don dam par chos gang gi rang bzhin yang ma yin pas tshig dang yi ge la sogs par brjod cing bstan du yang med la/ tshig dang yi ge la sogs pa'i sgo nas sus kyang thos shing shes par byar rung ba yang ma yin te/ gzugs la sogs pa'i chos thams cad kyang don dam par byang chub kyi rang bzhin dang tha mi dad pas gzugs la sogs par btags pa med do zhes bstan pa'o/ /lha'i bu dag de lta bas na la la zhig rgyun du zhugs pa'i 'bras bu la gnas par 'dod cing rgyun du zhugs pa'i 'bras bu mngon sum du bya bar 'dod na yang bzod pa 'di la mi rten du mi rung ngo zhes bya ba la sogs pa ni rgyun du zhugs pa'i 'bras bu bzhi dang / rang byang chub dang bla na med pa yang dag par rdzogs pa'i byang chub thob par 'dod pas gzugs la sogs pa'i chos thams cad don dam par skye ba med pas smra bsam las 'das shing tha snyad du gdags pa'i bzod pa 'di la ma brtan par theg pa gsum gyi 'bras bu thob par mi 'gyur gyi/ chos zab mo rtogs pa'i bzod pa 'di la brten na gdod theg pa gsum gyi 'bras bu thob par 'gyur ro zhes bstan pa'o/ /lha'i bu dag de ltar byang chub sems dpa' sems dpa' chen pos sems dang po bskyed pa nas brjod pa dang mnyan du med pa'i phyir/ shes rab kyi pha rol tu phyin pa la gnas par bya'o zhes bya ba ni de ltar gong du smos pa'i tshul gyis chos thams cad smra bsam las 'das shing tshig dang yi ger bral bar rtogs te/ mtshan ma gang la yang mi gnas pa nyid shes rab kyi pha rol tu phyin pa la gnas pa yin gyis/ sems dang po bskyed nas de ltar shes rab kyi pha rol tu phyin pa la gnas par bya'o zhes bstan pa'o/ / shes rab kyi pha rol tu phyin pa 'bum pa rgya cher bshad pa las/ le'u bco lnga pa'o// //de nas lha'i bu de dag 'di snyam du sems par gyur te/ gnas brtan rab 'byor la chos nyan pa rnams la ji lta bu dag btsal bar bya snyam pa dang zhes bya ba ni sems dang po bskyed pa nas brjod pa dang mnyan du med pa'i phyir shes rab kyi pha rol tu phyin pa la gnas par bya'o zhes gong du rab 'byor gyis bshad pa lha'i bu rnams kyis thos nas de ltar chos thams cad brjod du med pa yin no/ /chos 'chad pa dang / chos nyan pa yang med pas chos bshad pa yang med par 'gyur na/ gnas brtan rab 'byor gyis chos bshad pa rnam pa ji lta bu zhig yod par 'gyur snyam du the tshom skyes pa'o/ /de nas tshe dang ldan pa rab 'byor gyi sems kyis/ lha'i bu de dag gi sems kyi rnam par rtog pa yongs su shes nas lha'i bu de dag la 'di skad ces smras so/ /lha'i bu dag bdag gi chos bstan pa ni sgyu ma lta bu ste/ lha'i bu dag bdag la chos nyan pa la yang sgyu ma lta bur btsal bar bya'o zhes bya ba ni chos ston pa dang / chos nyan pa dang / chos bshad par bya ba rnams ni kun rdzob tu brjod par zad kyi/ don dam par de dag thams cad kyang dngos po med de/ dngos po med pa las yod pa lta bur snang ba ni/ sgyu ma lta bu yin par rig par bya'o zhes bstan pa lha'i bu dag bdag gi chos bstan pa ni sprul pa la bya ste/ bdag la chos nyan pa yang sprul pa lta bur btsal bar bya ste/ de dag ni ci 'ang nyan pa med cing mngon du byed pa med do zhes bya ba ni ston pa dang nyan pa dang / bshad par bya ba gsum char don dam par yod pa ma yin pa'i dpe sprul pa las blangs nas bstan pa ste/ de dag ni ci'ang nyan pa med cing zhes bya ba ni thos pa'i shes rab kyis gang yang mnyan pa med do zhes bstan pa'o/ /mngon du byed pa med do zhes bya ba ni bsgoms pa'i shes rab kyis 'bras bu mngon sum du byas pa gang yang med do zhes bstan pa'o/ /de nas lha'i bu de dag gis tshe dang ldan pa rab 'byor la 'di skad ces smras so/ /btsun pa rab 'byor ci sems can de dag sgyu ma lta bu ste/ chos nyan pa de dag sgyu ma lta bu yin nam sems can de dag sprul pa lta bu ste/ chos nyan pa de dag sprul pa lta bu yin nam zhes bya ba ni chos thams cad sgyu ma lta bu dang / sprul pa lta bu dang / rmi lam lta bu yin par 'chad du gzhug pa'i skabs dbye ba'i phyir chos nyan pa'i sems can de dag dang / bshad par bya ba'i chos de dag kyang sgyu ma lta bu dang sprul pa lta bu yin nam zhes lha'i bu rnams kyis rab 'byor la dris pa'o/ /rab 'byor gyis smras pa/ lha'i bu de de bzhin no/ /de de bzhin te/ sems can de dag ni sgyu ma lta bu ste/ chos nyan pa de dag ni sgyu ma lta bu'o/ / sems can de dag ni sprul pa lta bu ste/ chos nyan pa de dag ni sprul pa lta bu'o zhes bya ba ni gong du lha'i bu rnams kyis dris pa'i don de lta bu yin no zhes rab 'byor gyis lan btab pa'o/ /lha'i bu dag sems can de dag ni rmi lam lta bu'o/ /lha'i bu dag sems can de dag ni sgyu ma lta bu'o/ / lha'i bu dag gzugs kyang rmi lam lta bu sgyu ma lta bu'o zhes bya ba nas/ lha'i bu dag yang dag par rdzogs pa'i byang chub kyang rmi lam lta bu sgyu ma lta bu'o zhes bya ba'i bar du ni chos ston pa dang / nyan pa dang / bshad par bya ba'i chos rnams 'ba' zhig rmi lam lta bu dang sgyu ma lta bu yin par ma zad kyi/ phung po lnga la sogs pa yang dag par rdzogs pa'i byang chub la thug gi bar du 'jig rten dang / 'jig rten las 'das pa'i chos thams cad kyang rmi lam lta bu dang / sgyu ma lta bu yin no zhes bstan pa'o/ /de nas lha'i bu de dag gis tshe dang ldan pa rab 'byor la 'di skad ces smras so/ /btsun pa rab 'byor byang chub kyang rmi lam lta bu sgyu ma lta bur bshad na/ mya ngan las 'das pa yang rmi lam lta bu sgyu ma lta bur bshad dam zhes bya ba ni theg pa chung ngu ba la sogs pa kha cig mya ngan las 'das pa dngos po yod par 'dzin pa gsal ba'i phyir dris pa'o/ /rab 'byor gyis smras pa/ lha'i bu dag bdag ni mya ngan las 'das pa yang rmi lam lta bu sgyu ma lta bur smras te/ de bas na gal te mya ngan las 'das pa las khyad par du 'phags pa'i chos gzhan zhig yod pa na yang de la bdag ni rmi lam lta bu sgyu ma lta bur smra'o zhes bya ba ni mya ngan las 'das pa zhes bya ba bshad cing brjod pa ni kun rdzob tu tha snyad tsam du btags par zad kyi/ don dam par mya ngan las 'das pa zhes bya ba dngos po yod par ma gyur te/ dngos po med pa las yod pa skad du bshad pa ni rmi lam dang sgyu ma lta bur mngon no zhes pa'i don to/ /gal te mya ngan las 'das pa las khyad par du 'phags pa'i chos gzhan zhig yod na yang de la bdag ni rmi lam lta bu sgyu ma lta bur smra'o zhes bya ba ni la dor ba'i tshig ste/ mya ngan las 'das pa las khyad par du 'phags pa'i chos gzhan lta med mod kyi/ gal te brgya la de lta bu zhig yod na de yang kun rdzob tu yod par btags su zad kyi/ don dam par dngos po yod par ma grub pas de yang rmi lam lta bu sgyu ma lta bu yin na mya ngan las 'das pa lta ci smos zhes bya ba'i don to/ /de ci'i phyir zhe na/ de ni 'di ltar rmi lam lta bu dang / sgyu ma lta bu dang / mya ngan las 'das pa de la gnyis su med cing gnyis su byar med do zhes bya ba ni ji ltar rmi lam dang / sgyu ma dag yang dag par yod pa ma yin pa de bzhin du mya ngan las 'das pa yang kun rdzob tu brjod pa tsam du zad kyi/ don dam par dngos po med pa yin te/ de lta bas na rmi lam dang sgyu ma dang / mya ngan las 'das pa gsum char yang / dngos po med par ro gcig pas tha dad du dbyer med do zhes bstan pa'o/ /de nas tshe dang ldan pa sha ra dwa ti'i bu dang / tshe dang ldan pa maud gal gyi bu chen po dang / tshe dang ldan pa mdzod ldan chen po dang / tshe dang ldan pa kA t+yA'i bu chen po dang / tshe dang ldan pa byams gang gi bu dang / tshe dang ldan pa 'od srungs chen po dang / byang chub sems dpa' stong phrag du mas/ tshe dang ldan pa rab 'byor la 'di skad ces smras so/ /btsun pa rab 'byor shes rab kyi pha rol tu phyin pa 'di ltar zab pa/ 'di ltar blta dka' ba/ 'di ltar rtogs par dka' ba/ 'di ltar zhi ba/ 'di ltar gsal ba/ 'di ltar phra ba/ 'di ltar bzang ba 'di la su dag yid ches par 'gyur zhes bya ba ni de ltar chos thams cad rmi lam lta bu dang / sgyu ma lta bur ston pa'i shes rab kyi pha rol tu phyin pa 'di lta bu zab cing rgya che ba 'di kun rdzob tu su dag yid ches par 'gyur ba dang / don dam par su yang yid ches par 'gyur ba med pa'i don zhib tu bshad pa'i skabs dbye ba'i phyir 'phags pa nyan thos chen po dgra bcom pa rnams dang / byang chub sems dpa' mang po rnams kyis rab 'byor la dris pa ste/ shes rab kyi pha rol tu phyin pa 'di ltar zab pa zhes bya ba ni theg pa chung ngu pa blo zhan pa dang / mu stegs can bdag tu lta ba'i rtog pa'i rtsing ge ma rnams kyis blos gting dpag dka' ba'i phyir zab pa'o/ /'di ltar blta dka' ba zhes bya ba ni mig la sogs pa'i rnam par shes pa lnga'i yul ma yin pa'i phyir blta dka' ba'o/ /'di ltar rtogs par dka' ba zhes bya ba ni yid kyi rnam par shes pa'i yul ma yin pa'i phyir rtogs par dka' 'o/ /'di ltar zhi ba zhes bya ba ni nyon mongs pa dang nye ba'i nyon mongs pa thams cad nye bar zhi ba'i phyir zhi ba'o/ /'di ltar gsal ba zhes bya ba ni chos thams cad yang dag pa ji lta ba bzhin du rtogs par byed pa la mkhas shing gsal bar byed pa'i rgyu yin pa'i phyir gsal ba'o/ /'di ltar phra ba zhes bya ba ni rnam par rtog pa'i spros pa thams cad nye bar zhi ba'i phyir phra ba'o/ /'di ltar bzang ba zhes bya ba ni sdug bsngal thams cad nye bar zhi ba'i phyir bzang ba'o zhes bya ba'i don to/ /de nas tshe dang ldan pa rab 'byor gyis nyan thos chen po de dag dang / byang chub sems dpa' sems dpa' chen po de dag la 'di skad ces smras so/ /tshe dang ldan pa dag phyir mi ldog pa'i byang chub sems dpa' sems dpa' chen po rnams shes rab kyi pha rol tu phyin pa 'di ltar zab pa/ 'di ltar brtag dka' ba/ 'di ltar brtag pa'i spyod yul ma yin pa/ 'di ltar phra ba/ 'di ltar gsal ba/ 'di ltar blta dka' ba/ 'di ltar rtogs par dka' ba/ 'di ltar zhi ba/ 'di ltar bzang ba/ 'di ltar shin tu 'phags pa/ 'di ltar mkhas shing shes pas rig par bya ba 'di la yid ches par 'gyur ro zhes bya ba ni shes rab kyi pha rol tu phyin pa'i don 'di zab cing rgya che ba de la/ sa brgyad pa la gnas pa'i byang chub sems dpa' phyir mi ldog pa rnams yid ches par 'gyur ro zhes bstan pa ste/ zab pa dang / phra ba dang / gsal ba dang / blta dka' ba dang / rtogs par dka' ba dang / zhi ba dang bzang ba'i don ni gong du bshad pa bzhin no/ /'di ltar brtag dka' ba zhes bya ba ni so so rang gis rig pa yin pa'i phyir brtag dka' ba'o/ /'di ltar brtag pa'i spyod yul ma yin pa zhes bya ba ni sems kyis bsam pas thog tu mi phebs pa'i phyir brtag pa'i spyod yul ma yin pa'o/ /'di ltar shin tu 'phags pa zhes bya ba ni 'jig rten las 'das pa'i chos rtogs par 'gyur ba'i gnas kyi mchog yin pa'i phyir shin tu 'phags pa'o/ /'di ltar mkhas shing shes pas rig par bya ba zhes bya ba ni mtshan mar 'dzin cing rtog pa dang bcas pa rnams kyis shes par bya ba ma yin gyi/ phyir mi ldog pa'i byang chub sems dpa' la sogs pa mkhas shing shes pa rnams kyis thog tu phebs shing rig par bya ba yin pa'i phyir mkhas shing shes pas rig par bya ba yin no zhes bya ba'i don to/ /de lta bur zab cing rgya che ba'i shes rab kyi pha rol tu phyin pa de la yid ches pa med pa ma yin gyi phyir mi ldog pa'i byang chub sems dpa' rnams de la yid ches par 'gyur ro zhes bstan pa'o/ / bden pa mthong ba'i gang zag pa'am/ dgra bcom pa zag pa zad pa bsam pa yongs su rdzogs pa'am zhes bya ba ni/ 'phags pa nyan thos kyi nang na yang rgyun du zhugs pa la sogs pa 'phags pa'i bden pa bzhi yang dag pa ji lta ba bzhin du mthong ba dang / 'phags pa dgra bcom pa zag pa zad pa/ bya ba byas pa/ khur bor ba rnams las kyang kha cig shes rab kyi pha rol tu phyin pa zab cing rgya che ba 'di la yid ches par 'gyur ba dag yod do zhes bya ba dang sbyar ro/ /sngon gyi rgyal ba la bya ba byas pa'i sems can sangs rgyas bye ba mang po la dge ba'i rtsa ba bskyed bskyed pa dag dang zhes bya ba ni so so'i skye bo'i nang na yang tshe rabs snga ma la sangs rgyas mang po la bsnyen bkur byas shing / zab cing rgya che ba'i chos nyan pa'i 'phro yod pa de dag kyang shes rab kyi pha rol tu phyin pa zab cing rgya che ba 'di la yid ches nas dad cing nyams su len pa yang yod do zhes bya ba'i don to/ /rigs kyi bu dang rigs kyi bu mo de dge ba'i bshes gnyen gyis yongs su zin pa gang zhes bya ba ni so so'i skye bo'i nang nas kha cig sngon gyi sangs rgyas la dge ba'i rtsa ba bskyed pa'i las kyi 'phro med kyang tshe 'di nyid la dge ba'i bshes gnyen la brten pa'i yon tan gyis shes rab kyi pha rol tu phyin pa 'di ltar zab cing brtag bka' ba la yid ches shing spyod par 'gyur ba yod do zhes bstan pa'o/ /de dag ni gzugs stong zhes bya bar rnam par rtog par mi 'gyur/ stong pa nyid gzugs zhes bya bar rnam par rtog par mi 'gyur zhes bya ba la sogs pa ni phyir mi ldog pa'i byang chub sems dpa' dang nyan thos dang bden pa mthong ba dang / dgra bcom pa dang so so'i skye bo sngon gyi bsod nams kyi 'phro yod pa dang / so so'i skye bo dge ba'i bshes gnyen gyis yongs su zin pa gang dag shes rab kyi pha rol tu phyin pa 'di ltar zab cing brtag dka' ba la dad cing yid ches par 'gyur ba yang kun rdzob tu dad cing yid ches par 'gyur du zad kyi/ don dam par ni gzugs la sogs pa'i chos gang la yang dngos por 'dzin cing rnam par rtog par 'gyur ba med do zhes bstan pa ste/ skabs 'dir yang gzugs la sogs pa'i phung po lnga la stong pa nyid dang / mtshan ma med pa dang / smon pa med pa dang / skye ba med pa dang / 'gag pa med pa dang / zhi ba dang / dben par rnam par rtog par mi 'gyur la/ stong pa nyid la sogs pa de dag kyang gzugs la sogs pa yin par rnam par rtog par mi 'gyur ba ni gzugs la sogs pa'i phung po lnga dang / stong pa nyid dang / mtshan ma med pa dang / smon pa med pa dang / skye ba med pa dang / 'gag pa med pa dang / dben pa rnams kyang gzugs la sogs pa yin par rnam par rtog par mi 'gyur ba ni don dam par de dag thams cad dngos po med pa'i phyir ro/ /gzugs la sogs pa'i phung po lnga la/ stong pa nyid la sogs pa'i chos bdun dang sbyar te/ ji ltar bshad pa de bzhin du mig la sogs pa phyi nang gi skye mched bcu gnyis dang / rnam par shes pa drug dang / 'dus te reg pa drug dang / reg pa las byung ba'i tshor ba drug dang / sa'i khams la sogs pa khams drug dang / ma rig pa la sogs pa rten cing 'brel par 'byung ba'i yan lag bcu gnyis dang / pha rol tu phyin pa drug dang / stong pa nyid bco brgyad dang / dran pa nye bar gzhag pa bzhi la sogs pa byang chub kyi phyogs sum cu rtsa bdun dang / 'phags pa'i bden pa bzhi dang / bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / rnam par thar pa brgyad dang / mthar gyis gnas pa'i snyoms par 'jug pa dgu dang / rnam par thar pa'i sgo gsum dang / mngon par shes pa rnams dang / ting nge 'dzin rnams dang / gzungs kyi sgo rnams dang / de bzhin gshegs pa'i stobs bcu dang / mi 'jigs pa bzhi dang / so so yang dag par rig pa bzhi dang / byams pa chen po dang / snying rje chen po dang / sangs rgyas kyi chos ma 'dres pa bco brgyad dang / rgyun du zhugs pa la sogs pa'i 'bras bu bzhi dang / rang byang chub dang / lam gyi rnam pa shes pa nyid dang / rnam pa thams cad mkhyen pa nyid dang / 'dus byas kyi khams dang / 'dus ma byas kyi khams la thug gi bar du 'jig rten dang 'jig rten las 'das pa'i chos thams cad la yang sbyar bar bya'o/ /lha'i bu dag rnam grangs 'dis na shes rab kyi pha rol tu phyin pa de ltar zab pa de ltar brtag tu mi rung ba/ de ltar brtag tu mi rung ba'i spyod yul/ de ltar phra ba/ de ltar gsal ba/ de ltar blta dka' ba/ de ltar rtogs par dka' ba/ de ltar zhi ba/ de ltar bzang ba/ de ltar shin tu 'phags pa/ de ltar mkhas shing shes pas rig par bya ba de la yid ches par byed pa su yang med de zhes bya ba ni de ltar chos thams cad la rnam par rtog par mi 'gyur bas shes rab kyi pha rol tu phyin pa zab cing brtag dka' ba 'di yang don dam par rnam par rtog pa'i yul ma yin pa'i phyir don dam par yid ches par byed pa su yang med do zhes bstan pa'o/ /de ci'i phyir zhe na/ de ni 'di ltar 'di dag la chos gang yang ma brjod ma bshad do zhes bya ba ni rnam par rtog par mi 'gyur zhing / yid ches par byed pa su yang med pa'i gtan tshigs bstan pa ste/ don dam par shes rab kyi pha rol tu phyin pa 'di la chos gang yang mdor brjod pa yang med/ zhib tu bshad pa yang med pa'i phyir yid ches par byed pa su yang med do zhes bya ba'i don to/ /ji ltar 'di la chos gang yang ma brjod ma bshad pa de bzhin du 'di la sems can gang yang yid ches par byed pa med do zhes bya ba ni ji ltar yid ches par bya ba'i chos thams cad don dam par dngos po med pas ma brjod ma bshad pa de bzhin du yid ches par byed pa'i sems can yang don dam par med do zhes bya ba'i don to/ /de nas tshe dang ldan pa sha ra dwa ti'i bus/ tshe dang ldan pa rab 'byor la 'di skad ces smras so/ /tshe dang ldan pa rab 'byor 'o na shes rab kyi pha rol tu phyin pa 'di las theg pa gsum po nyan thos kyi theg pa dang / rang sangs rgyas kyi theg pa dang / yang dag par rdzogs pa'i sangs rgyas kyi theg pa rnams kyang rgya cher rnam par ma bkod dam zhes bya ba la sogs pa ni gang du rab 'byor gyis 'di la chos gang yang ma brjod ma bshad do zhes smras te/ chos ston pa dang / nyan pa gnyi ga med par bstan pa gzhung las ni theg pa gsum la sogs pa rgya cher rnam par bkod cing bshad la/ rab 'byor gyis ni chos gang yang ma brjod ma bshad do zhes smras pa gzhung dang 'gal ba'i gal bzung ste dris pa'o/ /byang chub sems dpa' sems dpa' chen po rnams yongs su bzung ba yang ma bstan tam zhes bya ba ni byang chub sems dpa'i lam sa dang po nas sa bcu pa'i bar du pha rol tu phyin pa drug la sogs pa yongs su rdzogs par bya ba bstan pa la/ byang chub sems dpa' sems dpa' chen po rnams yongs su bzung ba zhes bya ba ste/ de nyid gsal bar bstan pa'i phyir/ sems dang po bskyed pa nas/ sems bcu pa bskyed pa'i bar gyi byang chub sems dpa'i lam 'di lta ste/ sbyin pa'i pha rol tu phyin pa dang zhes bya ba la sogs pa gsungs te/ sems dang po bskyed pa zhes bya ba ni sa dang po thob pa la bya'o/ /sems bcu pa ni byang chub sems dpa'i sa bcu pa la bya'o/ /de ltar sa dang po nas sa bcu pa yongs su rdzogs kyi bar du pha rol tu phyin pa drug la sogs pa sangs rgyas kyi chos ma 'dres pa bco brgyad kyi bar gyi chos de dag kyang ma bstan tam zhes rab 'byor la dris pa'o/ /byang chub sems dpa' sems dpa' chen po rnams kyi mngon par shes pa dang / rdzu 'phrul gyis rnam par rtse ba rnams kyang ma bstan tam zhes bya ba nas/ 'jig rten thams cad las mngon par 'phags shing / khyad zhugs pa'i spobs pa dang ldan par 'gyur zhes bya ba'i bar du ni byang chub sems dpa'i yon tan mngon par shes pa dang / rdzu 'phrul gyis rnam par rtse ba dang / shes rab kyi pha rol tu phyin pa la spyod pa rdzus te skye bar 'gyur ba dang / mngon par shes pa rnams yongs su nyams pa med pa'i chos can du 'gyur ba dang / sangs rgyas kyi zhing nas sangs rgyas kyi zhing du 'dong ba dang / sangs rgyas bcom ldan 'das rnams la mchod cing bkur sti byed nus pa'i dge ba'i rtsa ba phun sum tshogs pa dang / sangs rgyas bcom ldan 'das de dag las chos thams cad thos pa yang rnam pa thams cad mkhyen pa nyid thob par ma gyur gyi bar du mi brjed cing / rgyun 'chad par mi 'gyur ba dang / rtag tu sems mnyam par gzhag pa dang / spobs pa thams cad phun sum tshogs pa dag kyang gzhung las ma bshad dam zhes dris pa ste/ de la thogs pa med pa'i spobs pa zhes bya ba ni shes rab kyi pha rol tu phyin pa dang dran pa phun sum tshogs pas chos ston pa'i tshe don dang tshig gnyi ga la thags thogs med pa'o/ /rgyun chad pa med pa'i spobs pa zhes bya ba ni bdud la sogs pas bar chad bya mi nus pa'o/ /mnyam par gzhag pa'i spobs pa zhes bya ba ni dran pa nyams pa med cing 'dod chags la sogs pa'i yul la g.yeng ba med par chos ston pa'i spobs pa dang ldan pa'o/ /rigs pa'i spobs pa zhes bya ba ni tshad ma dang mi 'gal bar chos ston pa'i spobs pa dang ldan pa'o/ /'brel pa'i spobs pa zhes bya ba ni lung dang mi 'gal zhing don dang tshig snga phyi 'brel bar chos ston pa'i spobs pa dang ldan pa'o/ /don dang ldan pa'i spobs pa zhes bya ba ni 'phags pa'i lam gyi 'bras bu thob par 'gyur ba'i don dang ldan par chos ston pa'i spobs pa dang ldan pa'o/ /'jig rten thams cad las mngon par 'phags shing khyad zhugs pa'i spobs pa zhes bya ba ni 'jig rten pa'i lam las 'phags shing 'jig rten las 'das pa'i lam khyad par can ston pa'i spobs pa dang ldan pa'o/ /rab 'byor gyis smras pa/ tshe dang ldan pa sha ra dwa ti'i bu de de bzhin no ji skad du smras pa de bzhin te shes rab kyi pha rol tu phyin pa 'di las theg pa gsum po nyan thos kyi theg pa dang / rang sangs rgyas kyi theg pa dang / yang dag par rdzogs pa'i sangs rgyas kyi theg pa rnams kyang rgya cher bstan to zhes bya ba nas/ 'jig rten thams cad las mngon par 'phags shing khyad zhugs pa'i spobs pa dang ldan par 'gyur ro zhes bya ba'i bar du ni/ shA ri'i bus gong du dris pa'i chos de dag thams cad rab 'byor gyis bzlas nas chos de dag gzhung las bshad pa ni bden na kun rdzob tu bstan pa tsam du zad kyi don dam par ni chos de dag thams cad dmigs su med de/ de ltar don dam par dmigs su med pa las kun rdzob tu sgro btags te bshad pa ni yang dag par brjod pa'am bshad pa ma yin no zhes bstan pa'o/ /gang mi dmigs pa'i tshul gyis she na/ bdag mi dmigs pa'i tshul dang zhes bya ba nas/ rnam pa thams cad mkhyen pa nyid mi dmigs pa'i tshul gyis rnam pa de lta bur 'gyur ro zhes bya ba'i bar du ni theg pa gsum la sogs pa'i chos gzhung las bshad pa de dag don dam par med cing mi dmigs pa bstan pa ste/ mu stegs can gyis brtag pa'i bdag dang sems can la sogs pa'i gang zag rnams dang / gzugs la sogs pa rnam pa thams cad mkhyen pa nyid la thug gi bar gyi chos rnams don dam par med cing mi dmigs pa las sems can rnams drang ba'i phyir kun rdzob tu sgro btags te brjod cing bshad pa tsam du zad kyi yang dag par brjod cing bshad pa gang yang med do zhes bstan pa'o/ /de nas tshe dang ldan pa sha ra dwa ti'i bus/ tshe dang ldan pa rab 'byor la 'di skad ces smras so/ /tshe dang ldan pa rab 'byor ci'i phyir na shes rab kyi pha rol tu phyin pa 'di las mi dmigs pa'i tshul gyis theg pa gsum rgya cher bstan zhes bya ba nas/ 'jig rten thams cad las mngon par 'phags shing khyad zhugs pa'i spobs pa dang yang ldan pa yin zhes bya ba'i bar du ni theg pa gsum la sogs pa'i chos gong du smos pa de dag ci'i phyir mi dmigs pa'i tshul gyis bstan pa'i gtan tshigs dris pa'o/ /de skad ces smras pa dang / tshe dang ldan pa rab 'byor gyis/ tshe dang ldan pa sha ra dwa ti'i bu la 'di skad ces smras so/ /tshe dang ldan pa sha ra dwa ti'i bu nang stong pa nyid kyi phyir mi dmigs pa'i tshul gyis theg pa gsum rgya cher bstan to zhes bya ba nas/ dngos po med pa'i ngo bo nyid stong pa n yid kyi phyir mi dmigs pa'i tshul gyis theg pa gsum rgya cher bstan to zhes bya ba'i bar du ni stong pa nyid bco brgyad dang sbyar te de ltar stong pa'i phyir mi dmigs pa'i tshul gyis theg pa gsum rgya cher bstan to zhes theg pa gsum mi dmigs pa'i tshul gyis rgya cher bstan pa'i gtan tshigs bstan pa'o/ /nang stong pa nyid kyi phyir byang chub sems dpa' sems dpa' chen po yongs su bzung ba bstan to zhes bya ba la sogs pa ni byang chub sems dpa' rnams la phan gdags pa'i phyir chos bstan pa dang / sa dang po nas sa bcu pa'i bar du byang chub sems dpa'i lam gyi chos pha rol tu phyin pa drug nas sangs rgyas kyi chos ma 'dres pa bco brgyad la thug gi bar rnams bstan pa dang / byang chub sems dpa'i yon tan mngon par shes pa dang / rdzu 'phrul gyis rnam par rtse ba dang / rdzus te skye bar 'gyur ba dang / mngon par shes pa rnams yongs su nyams pa med pa'i chos can du 'gyur ba dang / sangs rgyas kyi zhing nas sangs rgyas kyi zhing du 'dong ba dang / sangs rgyas bcom ldan 'das rnams la mchod cing bkur sti la sogs pa byed nus pa'i dge ba'i rtsa ba phun sum tshogs par 'gyur ba dang / sangs rgyas bcom ldan 'das de dag la chos thos pa yang rnam pa thams cad mkhyen pa nyid thob par ma gyur gyi bar du mi brjed cing rgyun chad par mi 'gyur ba dang / rtag tu sems mnyam par gzhag pa dang / spobs pa thams cad phun sum tshogs par 'gyur ba dag nang stong pa nyid la sogs pa stong pa bco brgyad re re dang sbyar te/ de ltar stong pa'i phyir chos de dag mi dmigs pa'i tshul gyis bstan to zhes mi dmigs pa'i tshul gyis bstan pa'i gtan tshigs bshad pa'o/ /shes rab kyi pha rol tu phyin pa 'bum pa rgya cher bshad pa las/ le'u bcu drug pa'o// //de nas lha'i dbang po brgya byin 'di snyam du sems par gyur te/ gnas brtan rab 'byor gyis de ltar chos kyi char pa 'di phab ste bstan na/ de la bdag gis kyang shes rab kyi pha rol tu phyin pa 'di la mchod pa bya ba'i phyir/ me tog mngon par sprul pa bya ste/ sangs rgyas bcom ldan 'das dang / byang chub sems dpa' sems dpa' chen po rnams dang / dge slong gi dge 'dun rnams dang / gnas brtan rab 'byor la gtor bar bya'o/ /mngon par gtor bar bya'o/ /rab tu gtor bar bya'o snyam mo zhes bya ba la sogs pa ni gong du smos pa'i rim pas mi dmigs pa'i tshul gyis chos zab mo bshad pa la/ lha'i dbang po brgya byin dang / stong gsum gyi stong chen po'i 'jig rten gyi khams 'di'i 'dod pa'i khams dang / gzugs kyi khams kyi lha rnams shes rab kyi pha rol tu phyin pa 'di la dad pa skyes nas/ shes rab kyi pha rol tu phyin pa 'di la mchod pa bya ba'i phyir shes rab kyi pha rol tu phyin pa 'di ston pa dang / nyan pa la mchod pa bya bar sems pa bstan pa ste/ gtor bar bya'o/ /mngon par gtor bar bya'o/ /rab tu gtor bar bya'o zhes lan gsum smos pa ni dad pa'i shugs kyis me tog lan gsum du bzlas te gtor bar bstan pa'o/ /de nas lha'i dbang po brgya byin dang / stong gsum gyi stong chen po'i 'jig rten gyi khams kyi rgyal chen bzhi'i ris kyi lha dang zhes bya ba la sogs pa ni lha'i dbang po brgya byin dang / 'dod pa'i khams dang / gzugs kyi khams kyi lha rnams kyis de ltar sems bskyed pa'i 'og tu lha rdzas kyi me tog man dA ra ba mang po mngon par sprul te mchod pa byas pa bstan pa ste/ de ltar shes rab kyi pha rol tu phyin pa la dad pa skyes nas shes rab kyi pha rol tu phyin pa ston pa dang / nyan pa la mchod pa bya ba bstan pa dang / ma 'ongs pa'i dus kyi skye bo rnams shes rab kyi pha rol tu phyin pa dang / de ston cing nyan pa la mchod pa dang / rim gro bskyed du gzhug pa'i phyir ro/ /me tog de dag gis gtor ma thag tu stong gsum gyi stong chen po'i 'jig rten gyi khams 'di gzhi me tog gis khengs par gyur nas/ steng gi bar snang la yang me tog gi khang pa brtsegs pa stong gsum gyi stong chen p o'i 'jig rten gyi khams tsam mdangs dga' zhing yid du 'ong ba kun nas gnas par gyur to zhes bya ba ni de ltar lha rnams dad pa skyes nas me tog sprul pa phul ba sems la sgyu med cing bsam pa dag pas phul ba'i rtags su stong gsum gyi stong chen po'i 'jig rten gyi khams kyi gzhi me tog gis khengs par gyur pa dang / steng gi bar snang la me tog gi khang pa brtsegs pa stong gsum gyi stong chen po'i 'jig rten gyi khams tsam du gyur par bcom ldan 'das kyis byin gyi rlabs bstan pa ste/ da ltar bstan pa yang shes rab kyi pha rol tu phyin pa dang / de ston pa dang nyan pa la mchod pa byas pa don med par mi 'gyur ba'i rtags bstan pa'o/ /de nas gnas brtan rab 'byor 'di snyam du sems par gyur te zhes bya ba la sogs pa ni de ltar lha rnams kyis mngon par sprul pa'i me tog de rnams de ltar rgya che zhing grangs mang la bzang ba 'jig rten na yod pa mi srid de/ me tog de dag ldum bu las skyes pa'am chu dang thang las skyes pa ni ma yin gyi sprul pa ste/ yid las byung ba yin no snyam du sems par gyur pa bstan pa'o/ /de nas lha'i dbang po brgya byin gyis/ gnas brtan 'byor la 'di skad ces smras so/ /btsun pa rab 'byor me tog 'di dag ni ma byung ba ste/ me tog 'di dag yid las byung ba ma yin no/ /ldum bu las byung ba ma yin no zhes bya ba ni gong du rab 'byor gyis me tog 'di dag bzang la dkon pa bsngags pa'i phyir sprul pa ste/ yid las byung ba yin par bsngags pa brgya byin gyis don dam pa dang sbyar te/ me tog de dag ni yang dag par ma byung bas yid las byung ba yang ma yin na ldum bu las byung ba ma yin pa lta smos kyang ci dgos zhes bstan pa'o/ /rab 'byor gyis smras pa/ kau shi ka de skad du me tog 'di dag ma skyes pa ste/ me tog 'di dag yid las byung ba ma yin/ ldum bu las byung ba ma yin zhes zer ba ni/ kau shi ka de ltar ma skyes pa ni me tog kyang ma yin no zhes bya ba ni brgya byin gyis don dam par me tog de dag ma skyes par bstan pas kyang lhag par zab pa bstan pa ste/ de ltar ma skyes pa yin na ma skyes pa ni dngos po med pa yin pas me tog kyang ma yin pa zhes bstan pa'o/ /brgya byin gyis smras pa/ btsun pa rab 'byor me tog 'di dag nyi tshe ma byung bar zad dam/ 'on tam gzugs kyang ma byung zhes bya ba la sogs pa ni gzugs la sogs pa'i chos thams cad ma byung zhing dngos po med par bstan pa'i gleng bslang ba'i phyir de skad ces dris pa'o/ /rab 'byor gyis smras pa/ kau shi ka 'di dag nyi tshe ma byung bar ma zad kyi/ kau shi ka gzugs kyang ma byung ba ste gang ma byung ba de ni gzugs ma yin no zhes bya ba la sogs pa ni gzugs la sogs pa'i phung po lnga nas de bzhin gshegs pa la thug gi bar gyi chos ming gis smos pa de dag thams cad kyang don dam par ma byung ba ste/ ma byung ba gang yin pa de ni don dam par gzugs la sogs pa'i chos rnams kyi rang bzhin yang ma yin no zhes bstan pa'o/ /de nas lha'i dbang po brgya byin 'di snyam du sems par gyur te/ kye ma gnas brtan rab 'byor 'di de ltar btags pa dang yang mi 'gal/ chos nyid kyang ston pa de ni shes rab zab po zhes bya ba ni gong du rab 'byor gyis chos thams cad ma byung ma skyes par bstan nas/ ma byung ma skyes pa gang yin pa de ni gzugs la sogs pa chos thams cad kyi rang bzhin ma yin no zhes bstan pa'i don brgya byin gyis rtogs nas rab 'byor de ltar shes rab zab pa ngo mtshar du gyur pa bstan pa ste/ btags pa dang yang mi 'gal la/ chos nyid kyang ston zhes bya ba ni kun rdzob tu chos thams cad kyi mtshan nyid dang yang mi 'gal bar ston la/ don dam par chos de dag ma byung ma skyes shing dngos po med par bstan pa ni chos nyid kyang ston pa zhes bya'o/ /de nas bcom ldan 'das kyis lha'i dbang po brgya byin la bka' stsal pa/ de de bzhin te/ kau shi ka de de bzhin no/ /gnas brtan rab 'byor 'di ni shes rab zab mo dang ldan pa ste/ de ltar btags pa dang yang mi 'gal la/ chos nyid kyang ston to zhes bya ba ni brgya byin gyis bsam pa'i don de bden no zhes bka' stsal pa'o/ /de nas lha'i dbang po brgya byin gyis bcom ldan 'das la 'di skad ces gsol to/ /bcom ldan 'das ji ltar na gnas brtan rab 'byor 'di btags pa dang yang mi 'gal la/ chos nyid kyang ston pa lags zhes bya ba ni btags pa dang yang mi 'gal la chos nyid kyang ston pa'i don 'khor thams cad kyis shes par bya ba'i phyir/ bcom ldan 'das la zhus pa'o/ /de skad ces gsol pa dang / bcom ldan 'das kyis lha'i dbang po brgya byin la 'di skad ces bka' stsal to/ /kau shi ka gzugs ni btags pa tsam mo/ /btags pa tsam gang yin pa de ni chos nyid de/ de ni gnas brtan rab 'byor gyis mi 'gal bar bstan to zhes bya ba la sogs pa ni phung po lnga nas yang dag par rdzogs pa'i sangs rgyas la thug gi bar gyi chos thams cad kun rdzob tu tha snyad du btags pa tsam du zad la/ tha snyad tsam du btags pa gang yin pa de don dam par dngos po yod pa ma yin te/ de ltar don dam par dngos po med pa de nyid chos rnams kyi chos nyid yin pas yang dag pa nyid yin no/ /de lta bu'i yang dag pa nyid dang mi 'gal bar bstan pa ni sgro 'dogs pa dang skur pa 'debs pa med par bstan to zhes bya ba'i don to/ /kau shi ka de ci'i phyir zhe na/ chos rnams kyi chos nyid gang yin pa de ni mi 'gal rnam par mi 'gal lo zhes bya ba ni dngos po zhig yod na ni dngos po de gnyis mtshan nyid mi mthun pas phan tshun du 'gal ba yang srid na/ don dam par chos de dag dngos po med par ro gcig pas phan tshun du 'gal ba dang rnam par 'gal ba med do zhes bstan pa'o/ / gang mi 'gal rnam par mi 'gal ba de gnas brtan 'byor gyis bstan te 'gal ba med do zhes bya ba ni gnas brtan rab 'byor gyis de ltar kun rdzob dang don dam pa gnyis phan tshun mi 'gal bar chos bstan pa dang / don dam par yang 'gal ba'i dngos po med do zhes bstan pa'o/ /kau shi ka de ltar na gnas brtan rab 'byor ni btags pa dang yang 'gal bar mi byed la/ chos nyid kyang ston to zhes bya ba ni de ltar rab 'byor gyis kun rdzob dang don dam pa gnyis kyi tshul 'gal ba med par bshad pa'i don mjug bsdus te bstan pa'o/ /de ltar byang chub sems dpa' sems dpa' chen pos shes rab kyi pha rol tu phyin pa la ji ltar gnas par bya zhes dris pa'i lan du/ gzugs la sogs pa'i chos thams cad la mi dmigs pa'i tshul gyis gnas par mi bya ba nyid shes rab kyi pha rol tu phyin pa la gnas pa yin pa bstan nas/ de'i 'og tu shes rab kyi pha rol tu phyin pa la ji ltar bslab par bya zhes dris pa'i lan du/ shes rab kyi pha rol tu phyin pa la ji ltar bslab par bya ba'i don zhib tu bshad pa'i phyir/ de nas tshe dang ldan pa rab 'byor gyis/ lha'i dbang po brgya byin la 'di skad ces smras so zhes bya ba la sogs pa bstan te/ kau shi ka de de bzhin no/ /de de bzhin te/ bcom ldan 'das kyis kyang chos thams cad ni btags pa tsam du bstan to zhes bya ba ni gong du lha'i dbang po brgya byin gyis/ kye ma gnas brtan rab 'byor 'di de ltar btags pa dang yang mi 'gal la chos nyid kyang ston pa ni shes rab zab po snyam du bsams pa'i don rab 'byor gyis shes nas/ bdag gis chos thams cad btags pa dang yang mi 'gal bar bshad pa la chos nyid kyang bstan pa ni bden te/ de de bzhin no zhes smras pa ste/ de ltar chos thams cad btags pa tsam du bshad cing chos nyid kyang bstan pa ni bdag gis rang bzo byas pa ma yin gyi/ sangs rgyas bcom ldan 'das kyis kyang chos thams cad btags pa tsam du bstan pa'i phyir ro zhes bya ba'i don to/ /kau shi ka byang chub sems dpa' sems dpa' chen pos kyang de ltar chos thams cad btags pa tsam du rig par bya ste/ shes rab kyi pha rol tu phyin pa la bslab par bya'o zhes bya ba ni/ shes rab kyi pha rol tu phyin pa la ji ltar bslab par bya ba'i thabs bstan pa ste/ don dam par chos thams cad dngos po med pa las kun rdzob tu 'jig rten gyi tha snyad du btags pa tsam du zad par shes par bya ste/ de dag la dngos por mi lta zhing ma chags par byas la/ shes rab kyi pha rol tu phyin pa la bslab par bya'o zhes bstan pa'o/ /kau shi ka byang chub sems dpa' sems dpa' chen po de ltar slob pa ni gzugs la mi slob ste/ de ci'i phyir zhe na/ 'di ltar des gang la bslab par bya ba'i gzugs de yang dag par rjes su mi mthong ngo zhes bya ba la sogs pa ni de ltar chos thams cad btags pa tsam du rig par byas nas shes rab kyi pha rol tu phyin pa la slob pa'i byang chub sems dpa' des gzugs la sogs pa rnam pa thams cad mkhyen pa nyid la thug gi bar du chos thams cad don dam par dngos po med par rtogs te/ dngos po yod par yang dag par rjes su mi mthong ba'i phyir gzugs la sogs pa'i chos de dag la dngos por 'dzin pa'i tshul gyis mi slob pa nyid shes rab kyi pha rol tu phyin pa la slob pa yin no zhes bstan pa'o/ /de nas lha'i dbang po brgya byin gyis gnas brtan rab 'byor la 'di skad ces smras so/ /btsun pa rab 'byor byang chub sems dpa' sems dpa' chen pos ci'i phyir na gzugs yang dag par rjes su mi mthong zhes bya ba la sogs pa ni gzugs la sogs pa rnam pa thams cad mkhyen pa nyid la thug gi bar du ci'i phyir yang dag par rjes su mi mthong ba'i gtan tshigs dris pa'o/ /rab 'byor gyis smras pa/ kau shi ka de ni 'di ltar gzugs gzugs kyis stong ngo zhes bya ba la sogs pa ni gzugs la sogs pa rnam pa thams cad mkhyen pa nyid la thug gi bar gyi chos rnams don dam par chos de dag rang bzhin gyis stong pa'i phyir yang dag par rjes su mi mthong ngo zhes bstan pa'o/ /kau shi ka gzugs stong pa nyid kyis gzugs stong pa nyid yang dag par rjes su mi mthong ngo zhes bya ba la sogs pa ni gzugs la sogs pa mthong bar bya ba dang / mthong bar byed pa gnyi ga rang bzhin gyis stong pa'i phyir yang dag par rjes su ma mthong ngo zhes bstan pa'o/ /kau shi ka de ltar gang stong pa nyid 'di la mi slob pa de ni stong pa nyid gnyis su med pas stong pa nyid la slob ste zhes bya ba ni de ltar gzugs la sogs pa'i chos thams cad stong pa nyid kyi rang bzhin te/ don dam par yang dag par rjes su mi mthong bas dngos por 'dzin pa'i tshul gyis mi slob pa nyid don dam pa'i mtshan nyid stong pa nyid la slob pa yin no zhes bstan pa'o/ /de gnyis su byar med par gzugs stong pa nyid la slob bo zhes bya ba la sogs pa ni gzugs la sogs pa rnam pa thams cad mkhyen pa nyid la thug gi bar gyi chos de dag la mtshan ma dang / dngos po yod par lta zhing mi slob pa nyid gzugs la sogs pa'i stong pa nyid la slob pa yin no zhes bstan pa'o/ /kau shi ka gzugs stong pa nyid la gang gnyis su byar med par slob pa dang zhes bya ba la sogs pa ni de ltar gzugs la sogs pa rnam pa thams cad mkhyen pa nyid la thug gi bar gyi chos rnams stong pa nyid la gnyis su med par slob pa gang yin pa de ni pha rol tu phyin pa drug la sogs pa rnam pa thams cad mkhyen pa nyid la thug gi bar du rnam par byang ba'i chos thams cad la gnyis su byar med cing 'khor gsum yongs su dag pas slob pa yin no zhes bstan pa'o/ /gnyis su byar med par sbyin pa'i pha rol tu phyin pa la gang slob pa dang zhes bya ba nas/ de ni gnyis su byar med par sangs rgyas kyi chos grangs med tshad med pa la slob bo zhes bya ba'i bar du ni de ltar pha rol tu phyin pa drug la sogs pa rnam pa thams cad mkhyen pa nyid la thug gi bar gyi chos rnams la/ gnyis su byar med par slob pa gang yin pa de'i phan yon bstan pa ste/ sbyin pa la sogs pa'i chos ming gis smos pa rnams la de ltar gnyis su byar med par bslabs na de las gzhan pa'i sangs rgyas kyi chos rgya chen po tshad med grangs med pa rnams la yang bslab par 'gyur ro zhes bstan pa ste/ chos rgya chen po de dag rtogs par 'gyur ro zhes bya ba'i don to/ /gnyis su byar med par sangs rgyas kyi chos tshad med grangs med pa la gang slob pa de ni gzugs 'phel bar bya ba dang / 'grib par bya ba'i phyir mi slob bo zhes bya ba la sogs pa ni de ltar sangs rgyas kyi chos rgya chen po tshad med grangs med pa la gnyis su byar med par slob pa gang yin pa des ni chos thams cad stong pa nyid du ro gcig cing / gnyis su dbyer med par rtogs pas gzugs la sogs pa rnam pa thams cad mkhyen pa nyid la thug gi bar gyi chos rnams la yang dkar po'i phyogs 'phel bar bya ba dang / nag po'i phyogs 'grib par bya ba'i phyir dngos por dmigs shing mi slob bo zhes bstan pa'o/ /de ltar na gang gzugs 'phel bar bya ba dang / 'grib par bya ba'i phyir mi slob pa dang zhes bya ba nas/ gzugs la sogs pa rnam pa thams cad mkhyen pa nyid la thug gi bar gyi chos rnams yongs su gzung ba dang / med par bya ba'i phyir mi slob bo zhes bya ba'i bar du ni chos thams cad 'phel ba dang / 'grib pa med par rtogs pa gang yin pa de ni chos thams cad blang dor med par rtogs pas gzugs la sogs pa nas rnam pa thams cad mkhyen pa nyid la thug gi bar gyi chos rnams las bzang po rnams ni yongs su gzung zhing blang ba dang / ngan pa rnams spang zhing med par bya ba'i phyir mi slob bo zhes bstan pa'o/ /de nas tshe dang ldan pa sha ra dwa ti'i bus tshe dang ldan pa rab 'byor la 'di skad ces smras so/ /tshe dang ldan pa rab 'byor de ltar slob pa'i byang chub sems dpa' sems dpa' chen po gzugs yongs su gzung ba dang med par bya ba'i phyir mi slob pa yin nam zhes bya ba la sogs pa ni yongs su gzung ba dang med par bya ba'i phyir mi slob pa'i gtan tshigs zhib tu 'chad du gzhug pa'i phyir gzugs la sogs pa rnam pa thams cad mkhyen pa nyid la thug gi bar du de ltar yongs su gzung ba dang / med par bya ba'i phyir mi slob pa yin nam zhes shA ri'i bus rab 'byor la dris pa'o/ / rab 'byor gyis smras pa/ tshe dang ldan pa sha ra dwa ti'i bu/ de ltar slob pa'i byang chub sems dpa' sems dpa' chen po ni gzugs yongs su gzung ba dang / med par bya ba'i phyir mi slob bo zhes bya ba la sogs pa ni gzugs la sogs pa rnam pa thams cad mkhyen pa nyid la thug gi bar du yongs su gzung ba dang / med par bya ba'i phyir de ltar mi slob bo zhes shA ri'i bu la rab 'byor gyis smras pa'o/ /smras pa/ tshe dang ldan pa rab 'byor byang chub sems dpa' sems dpa' chen po ci'i phyir na/ gzugs yongs su gzung ba dang / med par bya ba'i phyir mi slob pa yin zhes bya ba la sogs pa ni gzugs kyi phung po nas rnam pa thams cad mkhyen pa nyid la thug gi bar du yongs su gzung ba dang / med par bya ba'i phyir de ltar mi slob pa ci'i phyir mi slob pa'i gtan tshigs dris pa'o/ /rab 'byor gyis smras pa/ tshe dang ldan pa sha ra dwa ti'i bu de ni 'di ltar gzugs la yongs su 'dzin pa med de/ phyi nang stong pa nyid kyi phyir gzugs la gzugs yongs su mi 'dzin to zhes bya ba la sogs pa ni yongs su 'dzin pa dang med par bya ba'i phyir mi slob pa'i gtan tshigs rab 'byor gyis bshad pa ste/ gzugs la sogs pa rnam pa thams cad mkhyen pa nyid la thug gi bar gyi chos de dag thams cad don dam par phyi nang gnyis ka rang bzhin gyis stong ste/ gzung ba'i rang bzhin kyang med la/ 'dzin pa'i rang bzhin kyang med pas yongs su gzung ba dang med par bya ba'i phyir de ltar mi slob bo zhes bstan pa'o/ /tshe dang ldan pa sha ra dwa ti'i bu de ltar na byang chub sems dpa' sems dpa' chen po chos thams cad la yongs su 'dzin pa med pa'i tshul gyis rnam pa thams cad mkhyen pa nyid du 'byung ngo zhes bya ba ni de ltar chos thams cad rang bzhin gyis stong pa'i phyir/ gzung ba dang 'dzin pa med par rtogs pas chos gang la yang mtshan mas mi 'dzin pa'i byang chub sems dpa' de rnam pa thams cad mkhyen pa thob par 'gyur ro zhes 'dzin pa med pa'i phan yon bstan pa'o/ /smras pa tshe dang ldan pa rab 'byor de ltar slob pa'i byang chub sems dpa' sems dpa' chen po shes rab kyi pha rol tu phyin pa la bslabs shing / rnam pa thams cad mkhyen pa nyid du 'byung ba yin nam zhes bya ba ni gong du rab 'byor gyis rnam pa thams cad mkhyen pa nyid du 'byung ngo zhes 'dzin pa med pa'i phan yon bstan pa/ 'khor rnams bstan pa 'dzin du gzhug pa'i phyir de ltar yin nam zhes shA ri'i bus dris pa'o/ /rab 'byor gyis smras pa/ tshe dang ldan pa sha ra dwa ti'i bu de ltar slob pa'i byang chub sems dpa' sems dpa' chen po shes rab kyi pha rol tu phyin pa la bslabs shing / chos thams cad yongs su 'dzin pa med pa'i tshul gyis rnam pa thams cad mkhyen pa nyid du 'byung ngo zhes bya ba ni shA ri'i bus de ltar slob pa'i byang chub sems dpa' rnam pa thams cad mkhyen pa nyid du 'byung ba yin nam zhes dris pa'i lan du/ de ltar slob pa ni rnam pa thams cad mkhyen pa nyid du 'byung bar 'gyur te/ de yang mtshan mar yongs su 'dzin pa'i tshul gyis ni ma yin pa zhes bstan pa'o/ /smras pa tshe dang ldan pa rab 'byor de ltar slob pa'i byang chub sems dpa' sems dpa' chen po chos thams cad yongs su gzung ba dang med par bya ba med pa'i phyir bslabs shing rnam pa thams cad mkhyen pa nyid du ji ltar 'byung bar 'gyur zhes bya ba ni de ltar chos thams cad la gzung ba dang / 'dzin pa med par bslabs pa'i phan yon rnam pa thams cad mkhyen pa nyid thob par 'gyur ba de thabs ji ltar 'gyur zhes gtan tshigs dris pa'o/ /rab 'byor gyis smras pa/ tshe dang ldan pa sha ra dwa ti'i bu 'di la byang chub sems dpa' sems dpa' chen po shes rab kyi pha rol tu phyin pa la spyod pa'i tshe/ gzugs kyi skye ba mi mthong 'gag pa mi mthong zhes bya ba la sogs pa ni rnam pa thams cad mkhyen pa nyid du 'byung bar 'gyur ba'i gtan tshigs bstan pa ste/ gzugs la sogs pa'i chos thams cad don dam par dngos po med pas/ dngos po med pa la skye ba dang 'gag pa dang / blang ba dang / dor ba dang / kun nas nyon mongs pa dang / rnam par byang ba dang / sogs pa dang / bri ba dang / 'grib pa dang / 'phel ba yang med pa'i phyir skye ba dang 'gag pa la sogs pa yod par mi lta zhing mtshan mar mi 'dzin te/ de dag gang la yang ma chags pa'i phyir rnam pa thams cad mkhyen pa nyid du 'byung bar 'gyur ro zhes bstan pa'o/ / de la gzugs kyi skye ba mi mthong zhes bya ba ni don dam par gzugs dngos po med pas skye ba yang mi srid pa'i phyir ro/ /'gag pa mi mthong zhes bya ba ni skye ba med pas 'gag pa yang med pa'i phyir ro/ /blang ba mi mthong zhes bya ba ni don dam par gzugs kyi dngos po med pas blang ba'am thob par bya ba med pa'i phyir ro/ /dor ba mi mthong ngo zhes bya ba ni de ltar blang ba med pas blang ba'i zlas 'grub pa'i dor ba yang med pa'i phyir ro/ /kun nas nyon mongs pa mi mthong zhes bya ba ni de ltar dor ba med pas skyon dang bcas pa'i dngos po kun nas nyon mongs pa'i rang bzhin can spang bar bya ba med pa'i phyir ro/ / rnam par byang ba mi mthong zhes bya ba ni de ltar kun nas nyon mongs pa med pas de'i zlas 'grub pa'i rnam par byang ba yang med pa'i phyir ro/ /sogs pa mi mthong zhes bya ba ni don dam par gzugs kyi dngos po med pas rdul phra rab la sogs pa bsags shing brtsegs pa las phung por 'gyur ba med pa'i phyir ro/ /'bri ba mi mthong zhes bya ba ni de ltar sogs pa med pas de'i zlas 'grub pa'i 'bri ba yang med pa'i phyir ro/ /'grib pa mi mthong zhes bya ba ni nyon mongs pa'i rang bzhin can gyi gzugs kyi dngos po med pas nyon mongs pa'i dbang gis yon tan la sogs pa 'grib cing nyams par 'gyur ba med pa'i phyir ro/ /'phel ba mi mthong ste zhes bya ba ni don dam par rnam par byang ba'i dngos po med pas yon tan la sogs pa 'phel zhing rgyas par 'gyur ba yang med pa'i phyir ro/ /de ci'i phyir zhe na/ de ni 'di ltar gzugs gzugs kyi rang bzhin gyis med cing mi dmigs so zhes bya ba ni gzugs kyi skye ba dang 'gag pa la sogs pa med pa'i gtan tshigs bstan pa ste/ don dam par gzugs kyi rang bzhin med cing mi dmigs pa'i phyir ro zhes bstan pa'o/ /de bzhin du tshor ba la sogs pa rnam pa thams cad mkhyen pa nyid la thug gi bar du yang sbyar bar bya'o/ /tshe dang ldan pa sha ra dwa ti'i bu de ltar na byang chub sems dpa' sems dpa' chen po chos thams cad skye ba med pa dang / 'gag pa med pa dang / blang ba med pa dang / dor ba med pa dang / kun nas nyon mongs pa med pa dang / rnam par byang ba med pa dang / sogs pa med pa dang / 'bri ba med pa dang / 'grib pa med pa dang / 'phel ba med pa'i phyir mi slob mi 'byung ba'i tshul gyis shes rab kyi pha rol tu phyin pa la bslabs shing rnam pa thams cad mkhyen pa nyid du 'byung ngo zhes bya ba ni gong du chos kyi skye ba dang 'gag pa la sogs pa mi mthong zhing mtshan mar mi 'dzin na rnam pa thams cad mkhyen pa nyid du 'byung bar 'gyur ro zhes bshad pa'i don mjug bsdus nas bstan pa ste/ de ltar chos thams cad rang bzhin gyis med cing / mi dmigs pa'i chos de dag skye ba dang 'gag pa la sogs pa med par shes rab kyi pha rol tu phyin pa la bslabs shing / rnam pa thams cad mkhyen pa nyid du 'byung bar 'gyur ba yang don dam par bslabs pa dang / 'byung ba gnyi ga mi dmigs pa'i tshul gyis 'byung ngo zhes bstan pa'o/ /de nas lha'i dbang po brgya byin gyis tshe dang ldan pa sha ra dwa ti'i bu la 'di skad ces smras so/ / btsun pa sha ra dwa ti'i bu byang chub sems dpa' sems dpa' chen po rnams kyis shes rab kyi pha rol tu phyin pa gang nas btsal bar bya zhes bya ba ni shes rab kyi pha rol tu phyin pa la bslabs na rnam pa thams cad mkhyen pa nyid du 'byung ngo zhes gong du bshad pa'i don brgya byin gyis rtogs na de ltar rnam pa thams cad mkhyen pa nyid thob par 'gyur ba'i shes rab kyi pha rol tu phyin pa de lta bu gang nas btsal bar bya zhes dris pa'o/ /sha ra dwa ti'i bus smras pa/ lha'i dbang po byang chub sems dpa' sems dpa' chen po rnams kyi shes rab kyi pha rol tu phyin pa ni/ rab 'byor gyi le'u las btsal bar bya'o zhes bya ba la/ rab 'byor gyi le'u zhes bya ba ni shes rab kyi pha rol tu phyin pa 'bring du bshad pa thams cad la rab 'byor gyi le'u zhes bya ste/ gong du rab 'byor gyi le'u de las rnam pa thams cad mkhyen pa nyid thob par 'gyur ba'i shes rab kyi pha rol tu phyin pa'i don zab mo bshad pa'i phyir rab 'byor gyi le'u de las shes rab kyi pha rol tu phyin pa btsal bar bya'o zhes bstan pa ste/ shes rab kyi pha rol tu phyin pa'i don zab mo ni der brtag par bya'o zhes bya ba'i don to/ /de nas lha'i dbang po brgya byin gyis tshe dang ldan pa rab 'byor la 'di skad ces smras so/ /btsun pa rab 'byor 'phags pa sha ra dwa ti'i bus 'di skad du/ byang chub sems dpa' sems dpa' chen po rnams kyis shes rab kyi pha rol tu phyin pa ni rab 'byor gyi le'u las btsal bar bya'o zhes smras te/ de ni khyod kyi mthu'o/ /khyod kyi byin gyi rlabs so zhes bya ba ni shA ri'i bus shes rab kyi pha rol tu phyin pa rab 'byor gyi le'u las btsal bar bya'o zhes smras pa de/ rab 'byor gyis shes rab kyi pha rol tu phyin pa 'bring du bshad pa'i don/ shA ri'i bus rtogs nas khungs der bstan pa ni rab 'byor gyis shes rab kyi pha rol tu phyin pa'i don shA ri'i bu la legs par bshad pa'i mthu dang byin gyi rlabs kyis shA ri'i bus de skad smras so zhes rab 'byor la bstod pa'o/ /rab 'byor gyis smras pa/ kau shi ka de ni de bzhin gshegs pa'i mthu'o/ /de ni de bzhin gshegs pa'i byin gyi rlabs so zhes bya ba ni bdag gis shes rab kyi pha rol tu phyin pa'i don zab mo bshad pa yang de bzhin gshegs pa'i mthu dang / byin gyi rlabs kyis bshad do zhes bya ba'i don to/ /brgya byin gyis smras pa/ btsun pa rab 'byor chos thams cad byin gyi rlabs med na/ ci'i phyir de skad du 'di ni de bzhin gshegs pa'i mthu'o/ /'di ni de bzhin gshegs pa'i byin gyi rlabs so zhes smras zhes bya ba la/ mthu dang byin gyi rlabs zhes bya ba ni dngos po 'ga' zhig yod na de'i mthu dang byin gyi rlabs kyis chos bshad pa la sogs pa 'byung na/ chos thams cad don dam par dngos po med cing / byin gyi rlabs kyang dngos po med na ci'i phyir de skad smra zhes brgya byin gyis rab 'byor la smras pa'o/ /byin gyi rlabs med pa'i chos nyid las gud na yang de bzhin gshegs pa yod par mi dmigs la zhes bya ba ni don dam par byin gyi rlabs med pa'i chos nyid dang / de bzhin gshegs pa gnyi ga yang stong pa nyid du ro gcig pas tha dad du dbyer med do zhes bya ba'i don to/ /de bzhin nyid las gud na yang de bzhin gshegs pa yod par mi dmigs so zhes bya ba ni de ltar don dam par chos thams cad tha dad du dbyer med pa nyid de bzhin nyid kyi rang bzhin yin te/ de bzhin gshegs pa yang de bzhin nyid kyi rang bzhin yin no zhes bstan pa'o/ / rab 'byor gyis smras pa/ kau shi ka de de bzhin no/ /de de bzhin te/ byin gyi rlabs med pa'i chos nyid las gud na yang de bzhin gshegs pa yod pa mi dmigs la/ de bzhin nyid las gud na yang de bzhin gshegs pa yod par mi dmigs so zhes bya ba ni byin gyi rlabs med pa'i chos nyid dang / de bzhin nyid dang / de bzhin gshegs pa rnams don dam par stong pa nyid du ro gcig ste/ tha dad du dbyer med pa'i don brgya byin gyis bshad pa de bzhin no zhes smras pa'o/ /byin gyi rlabs med pa'i chos nyid la yang de bzhin gshegs pa mi dmigs la/ de bzhin gshegs pa la yang byin gyi rlabs med pa'i chos nyid mi dmigs so/ /de bzhin nyid la yang de bzhin gshegs pa mi dmigs so/ /de bzhin gshegs pa la yang de bzhin nyid mi dmigs so zhes bya ba ni byin gyi rlabs med pa'i chos nyid dang / de bzhin nyid dang / de bzhin gshegs pa rnams tha mi dad pa yang gcig la gcig gnas dang rten pa'i tshul gyis gnas shing dmigs pa ni ma yin gyi/ stong pa nyid du ro gcig pa'i tshul gyis tha mi dad do zhes bstan pa'o/ /gzugs kyi de bzhin nyid la yang de bzhin gshegs pa mi dmigs so de bzhin gshegs pa la yang gzugs kyi de bzhin nyid mi dmigs so zhes bya ba la sogs pa ni gzugs la sogs pa'i de bzhin nyid dang / chos nyid dang / de bzhin gshegs pa rnams kyang gcig la gcig gnas pa dang rten pa'i tshul gyis gnas shing dmigs pa ni ma yin gyi/ de bzhin nyid dang chos nyid kyi tshul gyis stong pa nyid du ro gcig ste/ tha dad pa ma yin no zhes bstan pa'o/ /gzugs la sogs pa'i phung po lnga la ji ltar bshad pa de bzhin du rnam pa thams cad mkhyen pa nyid la thug gi bar du yang rig par bya'o/ /kau shi ka de bzhin gshegs pa gang yin pa de ni gzugs kyi de bzhin nyid dang ldan pa yang ma yin bral ba yang ma yin no zhes gzugs kyi chos nyid dang ldan pa yang ma yin bral ba yang ma yin no/ /gzugs kyi de bzhin nyid ma yin pa gzhan dang ldan pa yang ma yin bral ba yang ma yin no/ /gzugs kyi chos nyid ma yin pa gzhan dang ldan pa yang ma yin bral ba yang ma yin no zhes bya ba la/ de bzhin gshegs pa zhes bya ba ni don dam par chos kyi sku'i ngo bo nyid la bya ste/ chos kyi sku'i ngo bo nyid ni dngos por dmigs su med la/ gzugs kyi de bzhin nyid dang / gzugs kyi chos nyid dang / dngos po med pa la bya ba'i phyir de dag tha dad du dbyer med pas ldan pa yang ma yin bral ba yang ma yin no zhes bshad pa'o/ /gzugs kyi de bzhin nyid ma yin pa gzhan dang ldan pa yang ma yin bral ba yang ma yin pa dang / gzugs kyi chos nyid ma yin pa gzhan dang ldan pa yang ma yin bral ba yang ma yin zhes bya ba yang / de bzhin gshegs pa zhes bya ba chos kyi sku'i rang bzhin yin te/ dngos po med pa'i ngo bo nyid yin pas gzugs kyi de bzhin nyid dang gzugs kyi chos nyid ma yin pa gzhan pa'i chos lta don dam par med mod kyi/ brgya la de lta bu zhig yod du zin na yang de dang yang ldan pa yang ma yin/ bral ba yang ma yin no zhes bstan pa'o/ /gzugs la ji ltar bshad pa de bzhin du rnam pa thams cad mkhyen pa nyid la thug gi bar du yang sbyar bar bya'o/ /kau shi ka 'di ni gang chos 'di dag thams cad dang ldan pa yang ma yin bral ba yang ma yin pa de'i mthu ste/ byin gyi rlabs med pa de'i tshul gyis de'i byin gyi rlabs so zhes bya ba ni gong du 'di lta bu'i chos zab mo bshad pa de dag gi mthu ma yin gyi/ de bzhin gshegs pa'i mthu dang byin gyi rlabs yin no zhes rab 'byor gyis bshad pa'i de bzhin gshegs pa de yang don dam par de bzhin nyid dang chos kyi sku'i rang bzhin te/ chos gang dang yang tha mi dad cing ldan pa yang ma yin mi ldan pa yang ma yin pa de'i mthu dang de'i byin gyi rlabs yin no zhes bstan pa'o/ /kau shi ka gang yang 'di skad du byang chub sems dpa' sems dpa' chen pos shes rab kyi pha rol tu phyin pa ni gang nas btsal bar bya zhes zer ba ni kau shi ka gzugs las kyang btsal bar mi bya/ gzugs las gzhan du yang btsal bar mi bya'o zhes bya ba la sogs pa ni gong du brgya byin gyis shes rab kyi pha rol tu phyin pa gang nas btsal bar bya zhes dris pa'i lan/ shA ri'i bus rab 'byor gyi le'u las btsal bar bya'o zhes khungs bstan pa'i don rab 'byor gyis zhib tu bshad pa ste/ shes rab kyi pha rol tu phyin pa zhes bya ba ni rnam par mi rtog pa'i shes rab la bya ste/ rnam par mi rtog pa'i shes rab de yang don dam par dngos po yod pa ma yin pas gzugs la sogs pa las btsal du med do zhes bstan pa'o/ /de ci'i phyir zhe na/ kau shi ka de ni 'di ltar gzugs gang yin pa dang / tshor ba gang yin pa dang / 'du shes gang yin pa dang / 'du byed gang yin pa dang / rnam par shes pa gang yin pa dang / byang chub sems dpa' gang yin pa dang / shes rab kyi pha rol tu phyin pa gang yin pa dang / btsal ba gang yin pa'i chos de dag thams cad ni ldan pa yang ma yin mi ldan pa yang ma yin/ gzugs med pa/ bltar med pa/ thogs pa med pa mtshan nyid gcig pa ste/ 'di ltar mtshan nyid med pa'o zhes bya ba ni shes rab kyi pha rol tu phyin pa gzugs la sogs pa las btsal du med pa'i gtan tshigs bstan pa ste/ gzugs la sogs pa'i phung po lnga dang / tshol bar byed pa'i byang chub sems dpa' dang / btsal bar bya ba'i shes rab kyi pha rol tu phyin pa dang / chos de dag thams cad dngos po med pa'i phyir ldan pa yang ma yin mi ldan pa yang ma yin/ gzugs med pa/ bltar med pa/ thogs pa med pa/ mtshan nyid gcig pa ste/ 'di ltar mtshan nyid med pa'o zhes bya ba bstan pa ste/ de la ldan pa yang ma yin zhes bya ba ni chos de dag don dam par dngos po med pas gzhi dang rten pa'i tshul du mi gnas pa'i phyir ldan pa yang ma yin no/ /mi ldan pa yang ma yin zhes bya ba ni/ de ltar dngos po med pas ldan pa'i zlas 'grub pa'i mi ldan pa med pa'i phyir mi ldan pa yang ma yin no/ /gzugs med pa zhes bya ba ni de ltar don dam par dngos po med pas gzugs kyi mtshan nyid dang mi ldan pa'i phyir gzugs med pa'o/ /bltar med pa zhes bya ba ni de ni 'di yin no zhes bstan du mi rung ba'i phyir bltar med pa'o/ /thogs pa med pa zhes bya ba ni gzugs can gyi mtshan nyid ma yin pa'i phyir ro/ /mtshan nyid gcig pa ste/ 'di ltar mtshan nyid med pa'o zhes bya ba ni chos de dag don dam par rang bzhin med par ro gcig pa'i phyir/ mtshan nyid med pa'i rang bzhin du mtshan nyid gcig go zhes bya ba'i don to/ /gzugs la sogs pa'i phung po lnga la ji ltar bshad pa de bzhin du rnam pa thams cad mkhyen pa nyid la thug gi bar du yang sbyar bar bya'o/ /de ci'i phyir zhe na/ kau shi ka de ni 'di ltar gzugs kyang shes rab kyi pha rol tu phyin pa ma yin zhes bya ba la sogs pa ni gong du gzugs la sogs pa'i chos rnams ldan pa yang ma yin/ mi ldan pa yang ma yin pa bstan pa'i gtan tshigs bshad pa ste/ don dam par gzugs dang shes rab kyi pha rol tu phyin pa gnyi ga dngos po yod par ma grub pas shes rab kyi pha rol tu phyin pa zhes bya ba gzugs la sogs pa'i chos de dag thams cad dang ldan pa yang ma yin mi ldan pa yang ma yin no zhes bstan pa ste/ de la gzugs kyang shes rab kyi pha rol tu phyin pa ma yin zhes bya ba ni shes rab kyi pha rol tu phyin pa zhes bya ba de kun brtags pa'i gzugs kyi rang bzhin ma yin no zhes bya ba'i don to/ /gzugs las gud na yang shes rab kyi pha rol tu phyin pa med do zhes bya ba ni don dam par de gnyis dngos po med par ro gcig pas tha dad du dbyer yang med do zhes bstan pa'o/ /gzugs kyi de bzhin nyid kyang shes rab kyi pha rol tu phyin pa ma yin zhes bya ba ni gzugs kyi yongs su grub pa'i mtshan nyid kyang shes rab kyi pha rol tu phyin pa ma yin no zhes bya ba'i don to/ /gzugs kyi de bzhin nyid las gud na yang shes rab kyi pha rol tu phyin pa med do zhes bya ba ni gzugs kyi de bzhin nyid dang / shes rab kyi pha rol tu phyin pa gnyi ga yang don dam par stong pa nyid du ro gcig pas tha dad du dbyer med do zhes bstan pa'o/ /gzugs kyi chos nyid kyang shes rab kyi pha rol tu phyin pa ma yin zhes bya ba ni gzugs kyi chos nyid stong pa nyid kyi rang bzhin yang shes rab kyi pha rol tu phyin pa ma yin no zhes bya ba'i don to/ /gzugs kyi chos nyid las gud na yang shes rab kyi pha rol tu phyin pa med do zhes bya ba ni/ gzugs kyi chos nyid ces bya ba stong pa nyid dang / shes rab kyi pha rol tu phyin pa gnyi ga yang stong pa nyid du ro gcig pas tha dad du dbyer med do zhes bstan pa'o/ /de bzhin du tshor ba la sogs pa rnam pa thams cad mkhyen pa nyid la thug gi bar du yang sbyar bar bya'o/ /de ci'i phyir zhe na/ kau shi ka de ni 'di ltar chos de dag thams cad med cing mi dmigs pa ste/ de ltar chos de dag t hams cad med cing mi dmigs pas na gzugs kyang shes rab kyi pha rol tu phyin pa ma yin zhes bya ba la sogs pa ni gong du gzugs kyang shes rab kyi pha rol tu phyin pa ma yin gzugs las gud na yang shes rab kyi pha rol tu phyin pa med do zhes bya ba la sogs pa bstan pa ci'i phyir de skad du bstan pa'i gtan tshigs bshad pa ste/ kun brtags pa'i gzugs dang / gzugs kyi de bzhin nyid dang / gzugs kyi chos nyid dang / shes rab kyi pha rol tu phyin pa la sogs pa'i chos de dag thams cad don dam par med cing mi dmigs pa'i phyir gzugs kyang shes rab kyi pha rol tu phyin pa ma yin/ gzugs las gud na yang shes rab kyi pha rol tu phyin pa med do zhes bya ba la sogs pa rnam pa thams cad mkhyen pa nyid la thug gi bar du gong du smos pa'i tshig rnams bzlas te bstan pa'o/ /de la chos de dag med cing zhes bya ba ni don dam par gzugs la sogs pa'i chos de dag gi rang bzhin yod par ma grub pa'i phyir ro/ /mi dmigs zhes bya ba ni rnam par shes pa drug gis dmigs par bya ba'i yul ma yin no zhes bya ba'i don to/ /de nas lha'i dbang po brgya byin gyis gnas brtan rab 'byor la 'di skad ces smras so/ /btsun pa rab 'byor byang chub sems dpa' sems dpa' chen po rnams kyi pha rol tu phyin pa 'di ni che ba ste/ 'di ltar shes rab kyi pha rol tu phyin pa'o zhes bya ba la sogs pa ni gong du bshad pa'i tshul gyis shes rab kyi pha rol tu phyin pa de don dam par gang nas kyang btsal du med la/ chos gang gi dngos po yang ma yin du zin kyang kun rdzob tu de la bslabs nas dus gsum gyi nyan thos dang rang sangs rgyas dang / byang chub sems dpa' rnams kyi so so'i 'bras bu khyad par can thob par 'gyur bas na shes rab kyi pha rol tu phyin pa 'di rgya che ba dang / tshad med pa dang / mtha' yas pa yin no zhes ngo mtshar du bzang ba'i yon tan bstan pa ste/ de la bslabs shing rgyun du zhugs pa rnams kyis ni rgyun du zhugs pa'i 'bras bu thob bo 'thob po/ /thob par 'gyur ro zhes bya ba nas/ bla na med pa yang dag par rdzogs pa'i byang chub tu mngon par rdzogs par sangs rgyas so/ /mngon par rdzogs par 'tshang rgya'o/ /mngon par rdzogs par 'tshang rgya bar 'gyur ro zhes bya ba'i bar du ni dus gsum gyi 'phags pa nyan thos dang / rang sangs rgyas dang / byang chub sems dpa' rnams kyis shes rab kyi pha rol tu phyin pa 'di la bslabs na so so'i 'bras bu khyad par can rnams thob par 'gyur ba'i yon tan bstan pa'o/ / rab 'byor gyis smras pa/ kau shi ka de de bzhin no/ /de de bzhin te zhes bya ba nas/ bla na med pa yang dag par rdzogs pa'i byang chub tu mngon par rdzogs par sangs rgyas so/ /mngon par rdzogs par 'tshang rgya bar 'gyur ro zhes bya ba'i bar du ni brgya byin gyis bshad pa'i don dang tshig rnams 'khor rnams yid ches par bya ba'i phyir/ rab 'byor gyis bzlas te shes rab kyi pha rol tu phyin pa 'di rgya che ba dang / tshad med pa dang / mtha' yas pa'o zhes zer ba de bden no zhes bstan pa'o/ /kau shi ka gzugs rgya che ba'i phyir byang chub sems dpa' sems dpa' chen po rnams kyi pha rol tu phyin pa rgya che ba yin te/ de ci'i phyir zhe na/ kau shi ka de ni 'di ltar gzugs kyi sngon gyi mtha' mi dmigs phyi ma'i mtha' mi dmigs dbus mi dmigs so zhes bya ba nas/ kau shi ka rnam grangs des na byang chub sems dpa' sems dpa' chen po rnams kyi pha rol tu phyin pa 'di ni rgya che ba ste/ 'di ltar shes rab kyi pha rol tu phyin pa'o zhes bya ba'i bar du ni shes rab kyi pha rol tu phyin pa rgya che ba'i gtan tshigs bstan pa ste/ gzugs la sogs pa'i rnam pa thams cad mkhyen pa nyid la thug gi bar gyi chos rnams don dam par dngos po yod par ma grub pas dngos po med pa la sngon gyi mtha' dang phyi ma'i mtha' dang / dbus mi dmigs te/ gang de ltar mtha' dang dbus mi dmigs pa'i chos rnams dang / shes rab kyi pha rol tu phyin pa gnyis don dam par stong pa nyid du ro gcig cing tha mi dad pas gzugs la sogs pa la dus gsum dmigs su med cing yongs su chad pa med de/ rgya che ba de bzhin du shes rab kyi pha rol tu phyin pa la yang dus gsum dmigs su med pa'i phyir rgya che ba yin no zhes bstan pa'o/ /kau shi ka gzugs tshad med pa'i phyir byang chub sems dpa' sems dpa' chen po rnams kyi pha rol tu phyin pa 'di tshad med pa ste zhes bya ba nas/ kau shi ka rnam grangs des na byang chub sems dpa' sems dpa' chen po rnams kyi pha rol tu phyin pa de ni tshad med pa ste/ 'di ltar shes rab kyi pha rol tu phyin pa'o zhes bya ba'i bar du ni shes rab kyi pha rol tu phyin pa tshad med pa yin pa'i gtan tshigs bstan pa ste/ gzugs la sogs pa rnam pa thams cad mkhyen pa nyid la thug gi bar gyi chos rnams don dam par dngos po yod par ma grub pas de dag gi tshad 'di tsam mo zhes tshad gzung du med pa de bzhin du shes rab kyi pha rol tu phyin pa yang don dam par chos de dag dang tha mi dad pa'i phyir dpe nam mkha' las blangs te tshad med pa yin no zhes bstan pa'o/ /kau shi ka gzugs mtha' yas pa'i phyir byang chub sems dpa' sems dpa' chen po rnams kyi pha rol tu phyin pa 'di mtha' yas pa ste zhes bya ba nas/ rnam pa thams cad mkhyen pa nyid mtha' yas pa'i phyir mtha' yas pa ste/ de ni 'di ltar shes rab kyi pha rol tu phyin pa'o zhes bya ba'i bar du ni shes rab kyi pha rol tu phyin pa mtha' yas pa'i gtan tshigs bstan pa ste/ gzugs la sogs pa rnam pa thams cad mkhyen pa nyid la thug gi bar gyi chos rnams don dam par dngos po yod par ma grub pas de dag la skye ba'i mtha' dang / 'gag pa'i mtha' yang med la/ mtha' gnyis ma grub pas dbus kyang dmigs su med pa de bzhin du shes rab kyi pha rol tu phyin pa yang don dam par chos de dag dang tha mi dad pa'i phyir mtha' yas pa'o zhes bstan pa'o/ /kau shi ka gzhan yang dmigs pa mtha' yas pa'i phyir/ byang chub sems dpa' sems dpa' chen po rnams kyi shes rab kyi pha rol tu phyin pa 'di mtha' yas pa ste/ de ni 'di ltar shes rab kyi pha rol tu phyin pa'o zhes bya ba la sogs pa ni rnam pa thams cad mkhyen pa nyid la dmigs pa mtha' yas pa dang / chos kyi dbyings la dmigs pa mtha' yas pa dang / de bzhin nyid la dmigs pa mtha' yas pa dang / sems can mtha' yas pa'i phyir shes rab kyi pha rol tu phyin pa mtha' yas pa bstan pa ste/ brgya byin gyis smras pa/ btsun pa rab 'byor de rnam pa gang gis na dmigs pa mtha' yas pa'i phyir byang chub sems dpa' sems dpa' chen po rnams kyi pha rol tu phyin pa 'di mtha' yas pa ste/ 'di ltar shes rab kyi pha rol tu phyin pa yin zhes bya/ zhes bya ba ni dmigs pa mtha' yas pa'i phyir shes rab kyi pha rol tu phyin pa mtha' yas pa'o zhes rab 'byor gyis bshad pa'i gtan tshigs dris pa'o/ /rab 'byor gyis smras pa/ kau shi ka rnam pa thams cad mkhyen pa nyid dmigs pa mtha' yas pa'i phyir byang chub sems dpa' sems dpa' chen po rnams kyi pha rol tu phyin pa 'di mtha' yas pa ste/ de ni 'di ltar shes rab kyi pha rol tu phyin pa'o zhes bya ba ni ci'i phyir dmigs pa mtha' yas pa'i phyir shes rab kyi pha rol tu phyin pa mtha' yas pa yin pa'i gtan tshigs bstan pa ste/ byang chub sems dpa' rnams kyis dmigs par bya ba'i yul rnam pa thams cad mkhyen pa nyid don dam par dngos po med pa'i rang bzhin yin te/ de la skye ba'i mtha' 'am/ 'gag pa'i mtha' med pas mtha' yas pa ste/ shes rab kyi pha rol tu phyin pa yang don dam par de dang tha mi dad pa'i phyir shes rab kyi pha rol tu phyin pa yang mtha' yas pa'o zhes bstan pa'o/ /kau shi ka gzhan yang chos dmigs pa mtha' yas pa'i phyir byang chub sems dpa' sems dpa' chen po rnams kyi pha rol tu phyin pa 'di mtha' yas pa ste/ de ni 'di ltar shes rab kyi pha rol tu phyin pa'o zhes bya ba la sogs pa ni chos kyi dbyings la dmigs pa mtha' yas pa'i phyir shes rab kyi pha rol tu phyin pa mtha' yas pa bstan pa ste/ byang chub sems dpa' rnams kyis dmigs par bya ba'i yul chos kyi dbyings rnam par mi rtog pa de don dam par dngos po med pa'i ngo bo nyid yin pas de la skye ba dang 'gag pa'i mtha' med pa de bzhin du shes rab kyi pha rol tu phyin pa yang de dang tha mi dad pa'i phyir mtha' yas pa'o zhes bstan pa'o/ /kau shi ka gzhan yang de bzhin nyid dmigs pa mtha' yas pa'i phyir byang chub sems dpa' sems dpa' chen po rnams kyi pha rol tu phyin pa 'di mtha' yas pa ste/ de ni 'di ltar shes rab kyi pha rol tu phyin pa'o zhes bya ba la sogs pa ni de bzhin nyid la dmigs pa mtha' yas pa'i phyir shes rab kyi pha rol tu phyin pa mtha' yas pa bstan pa ste/ byang chub sems dpa' rnams kyis dmigs par bya ba'i yul de bzhin nyid ces bya ba de don dam par dngos po med pa'i ngo bo nyid yin pas/ de la skye ba'i mtha' dang 'gag pa'i mtha' med pa de bzhin du shes rab kyi pha rol tu phyin pa yang de dang tha mi dad pa'i phyir mtha' yas pa'o zhes bstan pa'o/ /kau shi ka gzhan yang sems can mtha' yas pa'i phyir byang chub sems dpa' sems dpa' chen po rnams kyi shes rab kyi pha rol tu phyin pa 'di mtha' yas so zhes bya ba la sogs pa ni/ sems can mtha' yas pa'i phyir shes rab kyi pha rol tu phyin pa mtha' yas pa bstan pa ste/ byang chub sems dpa' rnams kyis sems can gang gi don du shes rab kyi pha rol tu phyin pa la spyad par bya ba'i sems can de dag thams cad don dam par dngos po med pas de la sngon gyi mtha' 'am/ phyi ma'i mtha' med de mtha' yas pa de bzhin du shes rab kyi pha rol tu phyin pa yang don dam par dngos po med pa'i ngo bo nyid yin pa'i phyir mtha' yas pa'o zhes bstan te/ rab 'byor gyis smras pa/ kau shi ka de ji snyam du sems/ 'di lta ste/ sems can sems can zhes bya ba de chos gang gi tshig bla dgas yin zhes bya ba ni don dam par sems can dngos po med pa'i gtan tshigs 'chad du gzhug pa'i phyir brgya byin la dris pa'o/ /brgya byin gyis smras pa/ btsun pa rab 'byor de ni chos kyi tshig bla dgas kyang ma yin/ chos ma yin pa'i tshig bla dgas kyang ma yin te/ 'di ltar sems can sems can zhes bya ba 'di ni glo bur du ming du btags pa/ dngos po med par ming du btags pa/ dmigs pa med par ming du btags pa'o zhes bya ba ni don dam par sems can dngos po med pa'i phyir mtha' yas pa'i gtan tshigs bstan pa ste/ chos zhes bya ba'i dngos po 'ga' zhig yod na chos de'i tshig bla dgas so zhes byar yang rung na/ don dam par chos zhes bya ba'i dngos po gang yang med pas sems can 'di dag chos de'i tshig bla dgas yin no zhes byar yang mi rung la/ de ltar chos yod par ma grub pas de'i zlas 'grub pa chos ma yin pa yang med pa'i phyir chos ma yin pa'i tshig bla dgas yin no zhes byar yang mi rung ste/ de bas na sems can zhes bya ba 'di dag ni don dam par dngos po med cing dmigs su med pa las/ kun rdzob tu glo bur du ming du btags pa tsam du zad do zhes bstan pa'o/ /rab 'byor gyis smras pa/ kau shi ka de ji snyam du sems/ shes rab kyi pha rol tu phyin pa 'di las sems can du bshad pa gang yang yod dam zhes bya ba la sogs pa ni shes rab kyi pha rol tu phyin pa 'di las kyang don dam par sems can yod par ma bshad do zhes bya ba'i don to/ /rab 'byor gyis smras pa/ kau shi ka gang la sems can du bshad pa gang yang med pa de la/ sems can mtha' yas pa yod do zhes bya ba ni de ltar shes rab kyi pha rol tu phyin pa 'di las sems can dngos po yod par ma bshad pa nyid dngos po med pa yin pas mtha' yas pa yin no zhes bstan pa'o/ /kau shi ka gal te de bzhin gshegs pa dgra bcom pa yang dag par rdzogs pa'i sangs rgyas bskal pa gang gA'i klung gi bye ma snyed du bzhugs te/ sems can sems can zhes gsung du brjod na kau shi ka de ji snyam du sems/ de la sems can gang yang skye ba'am 'gag par 'gyur ba yod dam zhes bya ba ni sems can zhes bya ba kun rdzob tu tshig tu brjod pa tsam gyis yang dag par dngos po yod pa ma yin pa'i don bstan pa'i phyir/ brgya byin la dris pa'o/ /smras pa btsun pa rab 'byor de ni med de/ de ci'i phyir zhe na/ sems can thog ma nas rnam par dag pa'i phyir ro zhes bya ba ni don dam par sems can rang bzhin gyis stong ste/ rang bzhin gyis stong pa gang yin pa de ni thog ma nas rnam par dag pa'i phyir skye ba'am 'gag par 'gyur ba med do zhes bstan pa'o/ /rab 'byor gyis smras pa/ kau shi ka de ltar rnam grangs des na sems can mtha' yas pa'i phyir shes rab kyi pha rol tu phyin pa mtha' yas par rig par bya'o zhes bya ba ni de ltar sems can dngos po med pas skye ba dang 'gag pa'i mtha' gnyis kyang med de/ de ltar sems can mtha' yas pa'i phyir shes rab kyi pha rol tu phyin pa yang dngos po med pa yin pas mtha' yas par rig par bya'o zhes/ shes rab kyi pha rol tu phyin pa mtha' yas pa'i don mjug bsdus te bstan pa'o/ /de nas dbang po dang bcas pa'i lha rnams dang / tshangs pa dang bcas pa'i lha rnams dang zhes bya ba la sogs pa ni shes rab kyi pha rol tu phyin pa'i don zab mo bshad pa lha'i dbang po brgya byin dang / tshangs pa la sogs pa chos 'chad pa'i 'khor na 'khod pa'i lha dang mi rnams kyis don dang tshig rnams rtogs nas dad pa skyes shing ngam ste de bzhin gshegs pa'i mthu dang byin gyi rlabs kyis rab 'byor gyis chos zab mo bshad pa de legs par bshad do zhes ched du brjod pa bstan pa ste/ ched du brjod pa zhes bya ba ni mgu ches nas ngam ste/ sus kyang smrar ma bcug par dga' zhing mgu ba'i shugs kyis tshig tu brjod pa'o/ /de bzhin gshegs pa 'byung ba'i don du zhes bya ba ni shes rab kyi pha rol tu phyin pa'i don zab mo thos shing rtogs pa las de bzhin gshegs pa nyid du 'byung ba'i phyir ro/ /bshad cing brjod de bstan pa zhes bya ba la/ bshad pa ni mdor bshad pa'o/ /brjod pa ni 'bring du bshad pa'o/ /bstan pa ni rgya cher bshad pa'o/ /chos 'di ni kye ma legs par bshad do/ /kye ma chos 'di ni legs par bshad do zhes bya ba ni shes rab kyi pha rol tu phyin pa'i mdo sde 'di'i tshig gi rang bzhin gyi chos 'di legs par bshad do zhes mgu ba'i shugs kyis lan gnyis su bzlas te smras pa'o/ /kye ma chos kyi chos nyid ni legs par bshad do zhes bya ba ni shes rab kyi pha rol tu phyin pa'i don de bzhin nyid legs par bshad do zhes bya ba'i don to/ /bcom ldan 'das bdag gis byang chub sems dpa' sems dpa' chen po gang shes rab kyi pha rol tu phyin pa 'di dang ma bral ba de ni de bzhin gshegs pa nyid du gzung bar bgyi'o zhes bya ba ni de ltar zab cing rgya che ba'i shes rab kyi pha rol tu phyin pa 'di mnyan pa dang / bsams pa dang / bsgoms pa'i shes rab kyis don rtogs pa'i sgo nas ma bral ba'i byang chub sems dpa' de dag ni gdon mi za bar de bzhin gshegs pa'i go 'phang thob par 'gyur ba'i phyir de bzhin gshegs pa nyid du gzung bar bya'o zhes dbang po la sogs pa'i lha dang mi rnams kyis smras pa'o/ /chos gang yang dmigs su ma mchis te/ gzugs sam tshor ba'am zhes bya ba nas/ theg pa gsum rnam par dgod pa mchis te zhes bya ba'i bar du ni rab 'byor gyis shes rab kyi pha rol tu phyin pa'i chos 'di thabs dang shes rab du ldan pas legs par bshad pa'i gtan tshigs bstan pa ste/ shes rab kyis gzugs la sogs pa rnam pa thams cad mkhyen pa nyid la thug gi bar gyi chos thams cad don dam par dmigs su med par rtogs kyang / thabs kyis kun rdzob tu theg pa gsum sems can gyi yid dang sbyar te bshad pa legs par bshad do zhes dbang po dang bcas pa'i lha rnams kyis smras pa'o/ /de nas bcom ldan 'das kyis lha'i bu dbang po dang bcas pa rnams la bka' stsal pa/ lha'i bu dag de de bzhin no/ /ji ltar smras pa de de bzhin te zhes bya ba nas/ chos gang yang mi dmigs mod kyi theg pa gsum rnam par dgod pa yang yod do zhes bya ba'i bar du ni dbang po dang bcas pa'i lha rnams kyis smras pa'i tshig rnams 'khor thams cad kyi yid ches par bya ba'i phyir bcom ldan 'das kyis tshig de dag nyid bzlas te/ de de bzhin no zhes bka' stsal pa'o/ /lha'i bu dag byang chub sems dpa' sems dpa' chen po gang mi dmigs pa'i tshul gyis shes rab kyi pha rol tu phyin pa 'di dang ma bral ba de ni/ de bzhin gshegs pa nyid du gzung bar bya'o zhes bya ba ni gong du lha rnams kyis byang chub sems dpa' sems dpa' chen po gang shes rab kyi pha rol tu phyin pa 'di dang ma bral ba de ni bdag cag gis/ de bzhin gshegs pa nyid du gzung bar bya'o zhes smras pa'i don 'khor thams cad kyi yid ches par bya ba'i phyir bcom ldan 'das kyis tshig de nyid bzlas te bka' stsal pa'o/ /de ci'i phyir zhe na/ de ni 'di ltar shes rab kyi pha rol tu phyin pa 'di las theg pa gsum rgya cher bstan te zhes bya ba ni/ shes rab kyi pha rol tu phyin pa dang ma bral ba'i byang chub sems dpa' de bzhin gshegs pa nyid du gzung bar bya ba'i gtan tshigs bstan pa ste/ shes rab kyi pha rol tu phyin pa 'di las theg pa gsum rgya cher bstan pa 'di lta bu dang ma bral na de bzhin gshegs pa nyid du gdon mi za bar 'gyur ba'i phyir byang chub sems dpa' de dag de bzhin gshegs pa nyid du gzung bar bya'o zhes bstan pa'o/ /sbyin pa'i pha rol tu phyin pa las gzhan du yang de bzhin gshegs pa mi dmigs so zhes bya ba nas/ rnam pa thams cad mkhyen pa nyid las gzhan du yang de bzhin gshegs pa mi dmigs so zhes bya ba'i bar du ni de bzhin gshegs pa nyid du gzung bar bya ba'i byang chub sems dpa' de dag kyang don dam par pha rol tu phyin pa drug la sogs pa rnam pa thams cad mkhyen pa nyid la thug gi bar du sangs rgyas kyi chos kyi ming gis smos pa de rnams dang tha mi dad de/ de bzhin nyid du ro gcig pa'i phyir sangs rgyas kyi chos de rnams las gzhan du btsal du med do zhes bstan pa'o/ /lha'i bu dag byang chub sems dpa' sems dpa' chen po ni chos 'di dag thams cad la slob ste/ sbyin pa'i pha rol tu phyin pa la slob bo zhes bya ba nas/ lha'i bu dag de bas na byang chub sems dpa' sems dpa' chen po gang shes rab kyi pha rol tu phyin pa 'di dang mi 'bral bar spyod pa ni de bzhin gshegs pa nyid ces bya ste zhes bya ba'i bar du ni shes rab kyi pha rol tu phyin pa dang ma bral ba'i byang chub sems dpa' de dag de bzhin gshegs pa nyid du gzung bar bya ba dang / de bzhin gshegs pa de yang sangs rgyas kyi chos rnams las gzhan du mi dmigs so zhes gong du bshad pa'i gtan tshigs bstan pa ste/ byang chub sems dpa' de dag sbyin pa'i pha rol tu phyin pa la sogs pa rnam pa thams cad mkhyen pa nyid la thug gi bar gyi sangs rgyas kyi chos ming gis smos pa rnams la slob pa'i phyir shes rab kyi pha rol tu phyin pa dang ma bral ba yin la/ don dam par sangs rgyas kyi chos de rnams dang de la slob pa'i byang chub sems dpa' rnams kyang de bzhin nyid du ro gcig ste tha mi dad pas chos kyi sku'i rang bzhin gyi de bzhin gshegs pa nyid du rig par bya'o zhes bstan pa'o/ /lha'i bu dag gang gi tshe nga de bzhin gshegs pa dgra bcom pa yang dag par rdzogs pa'i sangs rgyas mar me mdzad kyi zha 'bring byed cing rgyal po'i khab pad mo yod pa'i nang gi tshong 'dus kyi dbus na 'dug pa'i tshe/ sbyin pa'i pha rol tu phyin pa dang bral bar ma gyur to zhes bya ba la sogs pa ni byang chub sems dpa' sangs rgyas kyi chos la gsar du slob cing / shes rab kyi pha rol tu phyin pa dang ma bral ba rnams kyang gdon mi za bar sangs rgyas nyid du 'gyur bar de bzhin gshegs pa mar me mdzad kyis/ sangs rgyas shAkya thub pa sngon bram ze'i khye'u mdzad pa'i tshe sbyin pa'i pha rol tu phyin pa la sogs pa sangs rgyas kyi chos rnams dang ma bral bar gyur pa gzigs nas lung bstan pa'i dpe bshad pa ste/ nga sngon bram ze'i khye'u byed pa'i tshe sbyin pa'i pha rol tu phyin pa la sogs pa sangs rgyas kyi chos rnams mnyan pa dang / sems pa dang sgom pa'i sgo nas ma bral bar de bzhin gshegs pa mar me mdzad kyis gzigs nas/ nga la khye'u khyod ma 'ongs pa'i dus kyi bskal pa grangs med pa na shAkya thub pa zhes bya ba de bzhin gshegs par 'gyur ro zhes lung bstan pa dang sbyar na/ byang chub sems dpa' gang shes rab kyi pha rol tu phyin pa 'di dang ma bral ba de yang gdon mi za bar de bzhin gshegs pa nyid du 'gyur ba'i phyir de bzhin gshegs pa nyid du gzung bar rig par bya'o/ /de la bskal pa bzang po zhes bya ba ni sangs rgyas shAkya thub pa mngon par rdzogs par sangs rgyas pa'i tshe bskal pa bzang po 'di la bya'o/ /'jig rten gyi khams 'di nyid du zhes bya ba ni mi mjed kyi 'jig rten gyi khams 'di nyid la bya'o/ /shAkya thub pa zhes bya ba ni shAkya'i rigs las byung zhing mi rigs pa mi byed par thub pa la bya'o/ /de bzhin gshegs pa zhes bya ba ni sngon gyi sangs rgyas rnams kyis chos thams cad kyi rang bzhin de bzhin nyid ji lta ba bzhin du mkhyen nas/ bla na med pa'i byang chub tu gshegs shing phyin pa de bzhin du gshegs pa'i phyir de bzhin gshegs pa zhes bya'o/ /dgra bcom pa zhes bya ba ni nyon mongs pa'i dgra rnams bcom pa'i phyir ro/ /yang dag par rdzogs pa'i sangs rgyas zhes bya ba ni gti mug gi gnyid las sangs te/ blo rgyas pas chos thams cad ma lus par thugs su chud pa la bya'o/ /mkhyen pa dang rkang par ldan pa zhes bya ba la mkhyen pa ni chos thams cad yang dag pa ji lta ba bzhin du mkhyen pa lhag pa'i shes rab dang ldan pa'o/ /rkang pa ni lhag pa'i tshul khrims dang / ting nge 'dzin gyi rang bzhin lhag pa'i sems dang ldan pa la bya ste/ shes rab kyi mig gis chos thams cad yang dag pa ji lta ba bzhin du mthong nas tshul khrims dang ting nge 'dzin gyi rkang pas bla na med pa'i byang chub tu phyin par byed pa'i phyir mkhyen pa dang rkang par ldan pa zhes bya'o/ /bde bar gshegs pa zhes bya ba ni bla na med pa'i byang chub thob par byed pa'i lam bde bar zhugs te/ phyir mi ldog pa'i tshul du gshegs pas na bde bar gshegs pa zhes bya'o/ /'jig rten mkhyen pa zhes bya ba ni 'jig rten pa rnams la gzigs shing skal ba yod pa dang / skal ba med pa dang / 'dul ba'i dus la bab ma bab mkhyen nas sems can rnams kyi don mdzad pa thog tu bab par mkhyen pa la bya'o/ /bla na med pa/ skyes bu 'dul ba/ kha lo sgyur ba zhes bya ba ni sems can 'dod chags kyi shas che ba dang / zhe sdang gi shas che ba dang / gti mug gi shas che ba rta rgod dang 'dra ba gdul dka' ba rnams thabs bzang zhing sla bas so so'i thabs thabs bzhin du btul nas don du bsgrub pa'i mchog mya ngan las 'das pa la gnas par kha lo sgyur zhing 'jog pa'i mchog yin pa'i phyir ro/ /lha dang mi rnams kyi ston pa zhes bya ba ni lha dang mi rnams la yang dag pa'i chos ston cing / lha dang mi rnams kyis kyang ston pa'am mkhan por gzung ba'i phyir ro/ /bcom ldan 'das zhes bya ba ni bdud bzhi bcom zhing gzugs dang grags pa dang / dbang phyug dang / dpal dang / ye shes dang / brtson 'grus te/ legs pa 'di drug dang ldan pa la/ 'jig rten pa'i ston pa rnams kyi yon tan thams cad las 'phags shing 'das pa'i phyir bcom ldan 'das zhes bya'o/ /de nas lha'i bu de dag gis/ bcom ldan 'das la 'di skad ces gsol to/ /bcom ldan 'das byang chub sems dpa' sems dpa' chen po rnams kyi shes rab kyi pha rol tu phyin pa 'di de ltar gzugs mi len mi 'dor ba'i tshul dang zhes bya ba nas/ rnam pa thams cad mkhyen pa nyid mi len mi 'dor ba'i tshul gyis byang chub sems dpa' sems dpa' chen po rnams kyi rnam pa thams cad mkhyen pa mthun par yongs su 'dzin pa ni ngo mtshar che'o zhes bya ba'i bar du ni de ltar shes rab kyi pha rol tu phyin pa dang ma bral ba/ bla na med pa yang dag par rdzogs pa'i byang chub tu lung bstan pa lha'i bu rnams kyis thos nas/ shes rab kyi pha rol tu phyin pa 'di'i don rtogs na don dam par gzugs la sogs pa'i chos thams cad blang dor med par yang rtogs la/ kun rdzob tu rnam pa thams cad mkhyen pa nyid yongs su 'dzin cing 'thob par 'gyur ba ngo mtshar che'o zhes lha'i bu rnams kyis shes rab kyi pha rol tu phyin pa la bstod pa'o/ /de nas bcom ldan 'das kyis dge slong dang / dge slong ma dang / dge bsnyen dang / dge bsnyen ma'i 'khor bzhi dang zhes bya ba la sogs pa ni/ shes rab kyi pha rol tu phyin pa 'di nyan cing bsgom pa la sogs pa'i phan yon bdud la sogs pas bar chad bya mi nus pa bstan pa ste/ de la 'dzin pa ni gzhan las mnyan te/ don dang tshig rnams ma brjed par 'dzin pa'o/ /'chang ba ni glegs bam du bris te mchod cing 'chang ba'o/ /klog pa ni glegs bam du bris pa la klog pa'o/ / kun chub par byed pa ni bsams pa'i shes rab kyis don rtogs par byed pa'o/ /bsgom pa ni sgom pa'i shes rab kyis yang dang yang du goms par byed pa'o/ /gzhan rgya cher 'chad pa ni dam pa'i chos mi nub cing yun ring du gnas pa dang / rgya cher 'phel bar bya ba'i phyir don dang tshig zhib tu bshad pa'o/ /tshul bzhin du yid la byed pa ni mi mthun pa'i phyogs kyi bsam pa ngan pa dang ma 'dres shing / 'phags pa'i lam dang mthun par yid la byed pa'o/ /rnam pa thams cad mkhyen pa nyid kyi sems dang ma bral ba ni de ltar mnyan pa dang bsams pa la sogs pa'i 'bras bu 'jig rten pa'i longs spyod pa dang / theg pa dman par mi bsngo bar/ bla na med pa'i byang chub tu yongs su bsngo ba'o/ /de ci'i phyir zhe na/ de ni 'di ltar rigs kyi bu dang / rigs kyi bu mo de dag gis gzugs stong pa nyid shin tu byin gyis brlabs par 'gyur zhes bya ba la sogs pa ni de ltar bdud kyis glags rnyed par mi 'gyur ba'i gtan tshigs bstan pa ste/ glags btsal bar bya ba dang / glags tshol bar byed pa gnyis ka yang gzugs la sogs pa'i phung po lnga las gud na med de/ phung po lnga po de dag stong pa nyid du shin du goms par byas pa'i phyir glags btsal ba dang / glags tshol ba gnyis ka mi dmigs pa'i phyir ro zhes bstan pa'o/ /de ci'i phyir zhe na/ de ni 'di ltar stong pa nyid kyis stong pa nyid la glags mi rnyed/ mtshan ma med pas mtshan ma med pa la glags mi rnyed/ smon pa med pas smon pa med pa la glags mi rnyed do zhes bya ba ni glags btsal ba dang / glags tshol ba gnyis ka stong pa nyid dang mtshan ma med pa dang smon pa med pa'i rang bzhin du ro gcig pa'i phyir de ltar glags btsal du med do zhes bstan pa'o/ /gzugs la sogs pa'i phung po lnga la ji ltar bshad pa de bzhin du mig la sogs pa nang gi skye mched drug nas rnam pa thams cad mkhyen pa nyid la thug gi bar du sbyar bar bya'o/ /de ci'i phyir zhe na/ de ni 'di ltar gang gis glags rnyed par 'gyur ba dang / gang du glags rnyed par 'gyur ba dang / gang la glags rnyed par 'gyur ba de dag gi ngo bo nyid med do zhes bya ba ni glags btsal ba dang glags tshol ba dang / glags btsal ba'i gnas gsum char don dam par dngos po med par bstan pa ste/ gang gis glags rnyed par 'gyur ba dang zhes bya ba ni bdud kyis glags rnyed par 'gyur ba'i las dang / bdud nyid dngos po med par bstan pa'o/ /gang du glags rnyed par 'gyur ba dang zhes bya ba ni lha yul lam mi yul gyi gnas gang du bdud kyis glags rnyed par 'gyur ba'i gnas de yang dngos po med do zhes bstan pa'o/ /gang la glags rnyed par 'gyur zhes bya ba ni/ rigs kyi bu'am rigs kyi bu mo shes rab kyi pha rol tu phyin pa la spyod pa de nyid kyang don dam par dngos po med pa'i phyir glags mi rnyed do zhes bya ba'i don to/ / kau shi ka rigs bu dang rigs bu mo de dag la ni mi'am mi ma yin pa glags lta zhing glags tshol ba dag gis glags rnyed par mi 'gyur ro zhes bya ba ni shes rab kyi pha rol tu phyin pa la spyod pa mi dang mi ma yin pas gnod pa bya mi nus pa'i phan yon bstan pa'o/ /de ci'i phyir zhe na/ de ni 'di ltar rigs kyi bu dang rigs kyi bu mo de dag gis de mi dmigs pa'i tshul gyis sems can thams cad la byams pa dang snying rje dang dga' ba dang btang snyoms shin du bsgoms pa'i phyir ro zhes bya ba ni shes rab kyi pha rol tu phyin pa la spyod pa mi dang mi ma yin pas glags mi rnyed pa'i gtan tshigs bstan pa ste/ shes rab kyi pha rol tu phyin pa la nyan cing sems pa la sogs pa'i sgo nas spyod pa gang yin pa de ni gdon mi za bar tshad med pa bzhi dang ldan par 'gyur bas/ de'i phyir mi dang mi ma yin pa dag gis gnod par bya ba'i glags rnyed par mi 'gyur ro zhes bstan pa'o/ /rigs kyi bu dang rigs kyi bu mo de dag ni nyam nga ba ma spangs par dus byed par yang mi 'gyur ro zhes bya ba ni shes rab kyi pha rol tu phyin pa la spyod pa de ni dug dang mtshon la sogs pa'i gnod pas dus ma yin par tshe 'pho bar 'gyur ba med pa'i phan yon bstan pa'o/ /de ci'i phyir zhe na/ de ni 'di ltar rigs kyi bu dang rigs kyi bu mo sbyin pa'i pha rol tu phyin pa la spyod pa de dag gis sems can thams cad la yang dag par spang bas bsnyen bkur byas pa'i phyir ro zhes bya ba ni shes rab kyi pha rol tu phyin pa la spyod pa de ni gdon mi za bar sbyin pas kyang sems can thams cad tshim par byed cing / dug dang mtshon la sogs pa sems can la gnod par 'gyur ba rnams legs par spangs shing / gnod par ma byas pa'i phyir nyam nga ba ma spangs par dus byed par mi 'gyur ro zhes bstan pa'o/ /kau shi ka gang yang stong gsum gyi stong chen po'i 'jig rten gyi khams na rgyal chen bzhi'i lha dang zhes bya ba nas/ rnam pa thams cad mkhyen pa nyid kyi sems dang yang ma bral bar bya'o zhes bya ba'i bar du ni de ltar shes rab kyi pha rol tu phyin pa 'di mnyan cing bsams na bdud dang mi dang mi ma yin pa dag gis glags mi rnyed cing / nyam nga ba ma spangs par dus byed par mi 'gyur ba'i phan yon dang ldan pa'i phyir/ 'dod pa'i khams dang / gzugs kyi khams kyi lha bla na med pa'i byang chub tu zhugs shing / shes rab kyi pha rol tu phyin pa sngon mnyan zhing bsam pa la sogs pa byas pa rnams kyis kyang da rung yang mnyan cing bsams pa la sogs pa bya'o/ /lha'i bu gang dag gis shes rab kyi pha rol tu phyin pa de sngon ma thos ma bsams pa de dag gis kyang rnam pa thams cad mkhyen pa nyid kyi sems dang ldan par bya ste/ mnyan cing bsam pa la sogs pa bya'o zhes bstan pa'o/ /kau shi ka gzhan yang rigs kyi bu'am/ rigs kyi bu mo gang shes rab kyi pha rol tu phyin pa 'di 'dzin cing 'chang ba dang zhes bya ba nas/ dngos po med pa'i ngo bo nyid stong pa nyid de mi dmigs pa'i tshul gyis shin tu bsgoms so zhes bya ba'i bar du ni shes rab kyi pha rol tu phyin pa 'di 'dzin cing 'chang ba dang / khyim stong pa la sogs pa 'jigs pa'i gnas ngan pa na 'dug kyang de dag gis nang stong pa nyid la sogs pa stong pa nyid bco brgyad mi dmigs pa'i tshul gyis shin tu bsgoms pas 'jigs pa'i mtshan ma dang bral ba'i phyir 'dre gdon la sogs pas 'jigs par mi 'gyur ba'i phan yon bstan pa'o/ /de nas de'i tshe stong gsum gyi stong chen po'i 'jig rten gyi khams na rgyal chen bzhi'i ris kyi lha dang zhes bya ba nas/ bcom ldan 'das rnam grangs des na lha dang mi dang lha ma yin du bcas pa'i 'jig rten gyis byang chub sems dpa' sems dpa' chen po bsrung ba dang bskyang ba dang bskyab par bgyi'o zhes bya ba'i bar du ni/ shes rab kyi pha rol tu phyin pa nyan cing sems pa la sogs pa'i byang chub sems dpa' yod na de'i phan yon 'jig rten du ngan song gsum rgyun chad par 'gyur ba dang / lha dang mi'i nang na mi bde ba dang nad la sogs pa gnod pa thams cad rgyun chad par 'gyur ba dang / dge ba bcu la sogs pa'i rnam pa thams cad mkhyen pa nyid la thug gi bar du dkar po'i chos thams cad 'jig rten du 'byung bar 'gyur ba dang / rgyal rigs che zhing mtho ba la sogs pa 'dod pa'i khams kyi mi ya rabs dang lha rnams dang / gzugs khams kyi lha rnams 'byung bar 'gyur ba dang / rgyun du zhugs pa la sogs pa sangs rgyas bcom ldan 'das la thug gi bar du 'jig rten las 'das pa'i 'phags pa rnams dang / 'phags pa'i mthu dang / yon tan rnams 'byung bar lha rnams kyis rtogs nas shes rab kyi pha rol tu phyin pa nyan cing sems pa'i byang chub sems dpa' la lha rnams kyis rtag tu bsrung ba dang / bskyang ba dang bskyab par khas blangs par bstan pa ste/ de srung ba ni phyi rol gyi gnod pa mi 'byung bar bsrung ba'o/ /bskyang ba ni lus kyi bde ba thams cad sgrub pa'o/ /bskyab pa ni nang gi nad la sogs pa las skyob pa'o/ /de skad ces gsol pa dang / bcom ldan 'das kyis lha'i dbang po brgya byin la 'di skad ces bka' stsal pa zhes bya ba nas/ de bas na lha dang mi dang / lha ma yin du bcas pa'i 'jig rten gyis byang chub sems dpa' sems dpa' chen po la rim gro bya'o/ /bkur stir bya'o/ /phu dud du bya'o/ /mchod par bya'o/ /rtag tu rgyun mi 'chad par de la bsrung ba dang bskyang ba dang bskyab par bya'o zhes bya ba'i bar du ni lha rnams kyis gsol pa'i tshig bcom ldan 'das kyis bzlas te bka' stsal nas/ shes rab kyi pha rol tu phyin pa nyan pa dang / sems pa la sogs pa'i byang chub sems dpa' yod na 'jig rten du phan yon de dag 'byung ba bden gyis byang chub sems dpa' de la rim gro la sogs pa bya zhing bsrung ba bya ba'i rigs so zhes bka' stsal pa ste/ de la rim gro bya ba ni bza' ba dang / bgo ba la sogs pa sbyin pas rim gror bya ba'o/ /bkur stir bya ba ni ngag nyan cing bya ba thams cad la g.yog bya bas bkur stir bya ba'o/ /phu dud du bya ba ni stan las ldang zhing phyag bya ba la sogs pa'o/ /mchod par bya ba ni dri dang me tog la sogs pas mchod pa'o/ /kau shi ka gang byang chub sems dpa' sems dpa' chen po la rim gror bya ba dang / bkur stir bya ba dang / phu dud du bya ba dang / mchod par bya bar sems pa de ni nga la rim gror bya ba dang / bkur stir bya ba dang / phu dud du bya ba dang / mchod par bya bar sems so zhes bya ba la sogs pas ni shes rab kyi pha rol tu phyin pa 'di la mnyan cing sems pa la sogs pa'i sgo nas nan tan du byed cing / nyams su len pa'i byang chub sems dpa' de gdon mi za bar de bzhin gshegs par 'gyur ba'i phyir de la rim gro la sogs pa byas na de bzhin gshegs pa la rim gro byas pa dang 'dra'o zhes bstan pa'o/ /kau shi ka stong gsum gyi stong chen po'i 'jig rten gyi khams 'di lta ste/ dper na 'dam bu'i tshal lam zhes bya ba la sogs pa ni/ shes rab kyi pha rol tu phyin pa 'di la nyan pa dang sems pa la sogs pa'i sgo nas nyams su len pa'i byang chub sems dpa' nyan thos dang / rang sangs rgyas rnams las yon tan khyad par du 'phags pa bstan pa'o/ /shes rab kyi pha rol tu phyin pa 'bum pa rgya cher bshad pa las le'u bcu bdun pa'o/ / //de nas lha'i dbang po brgya byin gyis bcom ldan 'das la 'di skad ces gsol to/ /bcom ldan 'das de ltar byang chub sems dpa' sems dpa' chen po shes rab kyi pha rol tu phyin pa 'di 'dzin pa dang 'chang ba dang zhes bya ba la sogs pa ni shes rab kyi pha rol tu phyin pa 'di nyan pa dang / sems pa la sogs pa'i yon tan dang phan yon tshe 'di la thob par 'gyur ba brgya byin gyis 'khor rnams spro ba bskyed pa'i phyir bstan pa ste/ de yang tshe 'di nyid la sems can yongs su smin par bya nus pa dang / sangs rgyas kyi zhing yongs su dag par bya nus pa dang / sangs rgyas bcom ldan 'das rnams la bsnyen bkur bya ba'i phyir sangs rgyas kyi zhing nas sangs rgyas kyi zhing du 'gro nus pa dang / sangs rgyas bcom ldan 'das de dag la/ rim gro dang bkur sti bya nus pa'i dge ba'i rtsa ba phun sum tshogs par 'gyur ba dang / sangs rgyas bcom ldan 'das de dag las chos thos pa yang mngon par sangs ma rgyas kyi bar du brjed par mi 'gyur ba dang rigs phun sum tshogs pa la sogs pa dang ldan par 'gyur ba bstan pa ste/ de la rigs phun sum tshogs pa ni rgyal rigs che zhing mtho ba la sogs pa'i rigs su skye bar 'gyur ba'o/ / skye ba phun sum tshogs pa ni byang chub sems dpa'i yum mchog dam pa'i lhums nas skye ba ste/ dper na bcom ldan 'das shAkya thub pa'i yum sgyu ma'i lha mo lta bu'o/ /tshe phun sum tshogs pa ni tshe ring zhing glo bur du tshe mi 'pho ba'o/ /'khor phun sum tshogs pa ni byang chub sems dpa' de'i 'khor dam pa'i chos la phyogs shing zhi ba dang dul ba sha stag ste/ dper na bcom ldan 'das shAkya thub pa'i 'khor 'phags pa kun dga' bo la sogs pa lta bu'o/ /mtshan phun sum tshogs pa ni skyes bu chen po'i mtshan sum cu rtsa gnyis dang ldan pa'o/ 'od phun sum tshogs pa ni/ dper na bcom ldan 'das shAkya thub pa'i 'od 'dom gang ba dang ldan pa lta bu'o/ /mig phun sum tshogs pa ni de bzhin gshegs pa'i spyan lnga dang ldan par 'gyur ba'o/ /dbyangs phun sum tshogs pa ni de bzhin gshegs pa'i gsung dbyangs kyi yan lag drug cu dang ldan pa'o/ /ting nge 'dzin phun sum tshogs pa ni dpa' bar 'gro ba'i ting nge 'dzin la sogs pa dang ldan pa'o/ /gzungs phun sum tshogs pa ni don dang tshig mi brjed pa'i dran pa dang shes rab kyi gzungs dang ldan pa'o/ /thabs mkhas pas bdag kyang sangs rgyas kyi skur mngon par sprul cing / 'jig rten gyi khams nas 'jig rten gyi khams su mchi ba dang / gang du sangs rgyas bcom ldan 'das rnams skye zhing 'byung bar ma gyur pa de dang / de dag tu mchis shing sbyin pa'i pha rol tu phyin pa'i yon tan brjod pa dang zhes bya ba nas/ thabs mkhas pas sems can rnams la chos ston pa dang / sems can rnams nyan thos kyi theg pa dang / rang sangs rgyas kyi theg pa dang / sangs rgyas kyi theg pa dang / theg pa gsum la 'dul ba ni ngo mtshar che'o zhes bya ba'i bar du ni thabs mkhas pas sangs rgyas mi bzhugs pa'i 'jig rten gyi khams su song zhing / sems can rnams la pha rol tu phyin pa drug la sogs pa rnam par byang ba'i chos thams cad ston nus pa'i phan yon bstan pa'o/ /de nas lha'i dbang po brgya byin gyis bcom ldan 'das la 'di skad ces gsol to/ /bcom ldan 'das de ltar shes rab kyi pha rol tu phyin pa 'di yongs su bzung na pha rol tu phyin pa drug po thams cad yongs su gzung bar 'gyur ba dang zhes bya ba nas/ rnam pa thams cad mkhyen pa nyid yongs su gzung bar 'gyur ba yang ngo mtshar che'o zhes bya ba'i bar du ni shes rab kyi pha rol tu phyin pa la mnyan cing bsam pa la sogs pa'i nan tan byas na rnam par byang ba'i chos thams cad la nan tan byas shing yongs su gzung bar 'gyur ba'i phan yon bstan pa'o/ /de skad ces gsol pa dang / bcom ldan 'das kyis lha'i dbang po brgya byin la 'di skad ces bka' stsal to zhes bya ba nas/ rnam pa thams cad mkhyen pa nyid yongs su gzung bar 'gyur ba zhes bya ba'i bar du ni brgya byin gyis shes rab kyi pha rol tu phyin pa'i phan yon bsngags pa'i 'khor rnams brtan par yid ches par bya ba'i phyir/ de de bzhin no zhes bzlas te bka' stsal pa'o/ /kau shi ka gzhan yang shes kyi pha rol tu phyin pa 'di bzung ba dang / yongs su bzung ba dang zhes bya ba la sogs pa ni shes rab kyi pha rol tu phyin pa 'di nyan pa dang / sems pa la sogs pa'i sgo nas nan tan byed pa la/ bdud dang mu stegs can la sogs pas tshe 'di la bar chad bya mi nus pa'i phan yon bstan pa'o/ /brgal ba zhes bya ba ni dmag 'gyed cing 'thab mor rgol ba'o/ /bral ba zhes bya ba ni shes rab kyi pha rol tu phyin pa 'di la spyod du mi ster cing bral bar byed pa'o/ /rtsod pa zhes bya ba ni mu stegs can gyi gzhung la brten nas shags su rgol ba'o/ /brgal bar 'dod pa zhes bya ba ni shes rab kyi pha rol tu phyin pa la gal dang skyon 'dzin cing sun 'byin pa'o/ /de ci'i phyir zhe na/ kau shi ka de ni 'di ltar byang chub sems dpa' sems dpa' chen po yun ring por sbyin pa'i pha rol tu phyin pa la spyod pa dang zhes bya ba la sogs pa ni bdud dang mu stegs can la sogs pas bar chad bya mi nus pa'i rgyu bstan pa ste/ shes rab kyi pha rol tu phyin pa la spyod pa'i byang chub sems dpa' des yun ring por pha rol tu phyin pa drug la spyod pa'i tshe/ sems can rnams kyi don du sbyin pa la sogs pa pha rol tu phyin pa drug gi mi mthun pa'i phyogs 'thab pa dang / rtsod pa dang / 'khrug pa dang / shags su 'gyur ba'i phyi nang gi chos rnams yongs su btang ste/ sems can thams cad pha rol tu phyin pa la rab tu bkod pa'i phyir de lta bu'i bar chad byed pa rnams mi 'byung ngo zhes bstan pa'o/ /kau shi ka gang gi don du sems can de dag 'di lta ste/ bag la nyal ba dang kun nas ldang bas 'khor ba na 'khor bar gyur pa'i bag la nyal ba dang / kun nas ldang ba de dag byang chub sems dpa' sems dpa' chen pos rnam par bcil te/ sems can de dag bsam gtan bzhi la yang dag par bskul ba'i phyir ro zhes bya ba nas/ bla na med pa yang dag par rdzogs pa'i byang chub la yang dag par bskul ba'i phyir ro zhes bya ba'i bar du yang shes rab kyi pha rol tu phyin pa 'di la spyod pa'i byang chub sems dpa' la/ bdud dang mu stegs can la sogs pas bar chad byed mi nus pa'i phan yon gyi rgyu bstan pa ste/ shes rab kyi pha rol tu phyin pa la spyod pa'i byang chub sems dpa' des sems can rnams la 'thab cing rtsod par 'gyur ba'i rgyu 'dod chags la sogs pa'i nyon mongs pa rnams mi ldang bar bcil te/ sems can de dag thams cad bsam gtan bzhi la sogs pa rnams par byang ba'i chos thams cad la yang dag par bskul te spyod yul du bcug pa'i phyir bdud la sogs pas bar chad byed nus par 'gyur ro zhes bstan pa ste/ de la bag la nyal ba zhes bya ba ni 'dod chags la sogs pa'i nyon mongs pa bag chags kyi tshul du gnas pa'o/ /kun nas ldang ba zhes bya ba ni nyon mongs pa de dag mngon du 'byung ba'o/ /kau shi ka de ltar byang chub sems dpa' sems dpa' chen po byang chub sems dpa'i spyad pa spyod pa'i tshe 'di la yon tan de dag 'byung ba zhes bya ba ni bdud la sogs pas bar chad bya mi nus pa'i phan yon tshe 'di la 'byung ba gong du smos pa rnams mjug bsdus te bstan pa'o/ /tshe rabs gzhan la yang bla na med pa yang dag par rdzogs pa'i byang chub mngon par rdzogs par sangs rgyas nas zhes bya ba la sogs pa ni shes rab kyi pha rol tu phyin pa 'di la spyod pa'i phan yon tshe rabs phyi ma dag la 'byung ba bstan pa'o/ /kau shi ka gzhan yang sa'i phyogs gang na rigs kyi bu'am rigs kyi bu mo shes rab kyi pha rol tu phyin pa 'di 'dzin cing 'chang ba dang zhes bya ba la sogs pa ni shes rab kyi pha rol tu phyin pa 'di la spyod pa'i phan yon bdud dang mu stegs can la sogs pas phyogs tsam du yang nye bar 'ong mi nus pa dang / tshe rabs gzhan la theg pa gsum gyis byung nas sdug bsngal mthar 'byin pa'i phan yon rtsi'i dpe dang bcas par bstan pa'o/ /de ci'i phyir zhe na/ kau shi ka de ni 'di ltar shes rab kyi pha rol tu phyin pa ni sdig to mi dge ba'i chos thams cad nye bar zhi bar byed pa ste zhes bya ba la sogs pa ni de ltar phan yon che ba'i rgyu shes rab kyi pha rol tu phyin pa sdig pa mi dge ba'i chos thams cad zhi bar byed pa'i mthu dang ldan pa bstan pa ste/ sdig to mi dge ba'i chos zhes bya ba yang 'dod chags la sogs pa nyon mongs pa'i phyogs su gtogs pa'i chos rnams dang / pha rol tu phyin pa drug la sogs pa rnam pa thams cad mkhyen pa dang mya ngan las 'das pa la thug gi bar gyi chos rnams la dngos po yod par lta zhing mtshan mar 'dzin pa rnams kyang bla na med pa'i byang chub thob par bya ba la sgrib par 'gyur ba'i phyir sdig pa mi dge ba'i chos kyi nang du bgrang ngo / /kau shi ka stong gsum gyi stong chen po'i 'jig rten gyi khams na rgyal po chen po bzhi dang / lha'i dbang po brgya byin dang zhes bya ba nas/ mi dmigs pa'i tshul gyis rnam pa thams cad mkhyen pa nyid kyis rnam par 'phel bar 'gyur gyi/ yongs su 'grib par mi 'gyur ro zhes bya ba'i bar du ni shes rab kyi pha rol tu phyin pa 'di la spyod pa'i byang chub sems dpa' la rgyal po chen po bzhi la sogs pa 'jig rten gyi lha rnams kyis rtag tu bsrung zhing bskyab par 'gyur ba dang / phyogs bcu'i sangs rgyas bcom ldan 'das rnams kyis kyang rtag tu bsrung zhing bskyab par 'gyur ba dang / mi dge ba'i chos rnams yongs su spangs shing / pha rol tu phyin pa drug la sogs pa rnam pa thams cad mkhyen pa nyid la thug gi bar du dge ba'i chos rnams dang ldan par 'gyur zhing / dge ba'i chos de dag gis byang chub sems dpa' de dar bar 'gyur gyi nams kyang rgud par mi 'gyur ba'i phan yon bstan pa'o/ /de'i tshig blang bar 'os pa dang ldan par 'gyur ro zhes bya ba nas/ bdag kyang rnam pa thams cad mkhyen pa nyid thob par 'gyur/ gzhan yang rnam pa thams cad mkhyen pa nyid thob par bya ba la yang dag par bskul bar 'gyur/ rnam pa thams cad mkhyen pa nyid kyi legs pa brjod par 'gyur/ gzhan yang rnam pa thams cad mkhyen pa nyid thob par byed na yang de dag gi legs pa brjod cing rjes su dga' bar 'gyur ro zhes bya ba'i bar du ni/ shes rab kyi pha rol tu phyin pa 'di la spyod pa'i byang chub sems dpa' ngag dang yid kyi skyon rnams med par 'gyur ba dang / bdag kyang mi dge ba bcu'i las rnams spangs shing / dge ba bcu'i las dang ldan par 'gyur ba la/ gzhan rnams kyang mi dge ba bcu'i las spangs te/ dge ba bcu'i las la 'dzud nus par 'gyur ba dang / bdag kyang pha rol tu phyin pa drug la sogs pa rnam pa thams cad mkhyen pa nyid la thug gi bar gyi chos rnams la spyod par 'gyur zhing / gzhan rnams kyang chos de dag la spyod du 'dzud nus par 'gyur ba'i phan yon bstan pa'o/ /de pha rol tu phyin pa drug la spyod pa'i tshe sbyin pa yongs su gtong yang de sems can thams cad dang thun mong du byas shing mi dmigs pa'i tshul gyis bla na med pa yang dag par rdzogs pa'i byang chub tu yongs su bsngo bar 'gyur ro zhes bya ba nas/ kau shi ka de ltar rigs kyi bu'am rigs kyi bu mo gang shes rab kyi pha rol tu phyin pa 'di 'dzin cing 'chang ba dang / klog cing kun chub par byed pa dang / tshul bzhin du yid la byed cing rnam pa thams cad mkhyen pa nyid kyi sems dang mi 'bral ba de dag gis tshe 'di dang tshe rabs gzhan la yon tan 'di dag thob par 'gyur ro zhes bya ba'i bar du ni shes rab kyi pha rol tu phyin pa 'di la spyod pa'i byang chub sems dpa' pha rol tu phyin pa drug yongs su rdzogs par spyod cing / de'i bsod nams kyang sems can thams cad dang thun mong du byas te/ mi dmigs pa'i tshul gyis bla na med pa yang dag par rdzogs pa'i byang chub tu yongs su bsngo bar 'gyur ba dang / pha rol tu phyin pa drug yongs su rdzogs par ma byas na nyes dmigs gang dang gang du 'gyur ba shes shing / de lta bu'i dran pa skye bar 'gyur ba'i phan yon tshe 'di dang tshe rabs gzhan la thob par 'gyur ba bstan pa'o/ /brgya byin gyis gsol pa/ bcom ldan 'das shes rab kyi pha rol tu phyin pa 'di de ltar byang chub sems dpa' sems dpa' chen po rnams yongs su 'dul ba dang / nga rgyal ma mchis par 'gyur ba'i don du nye bar gnas pa ngo mtshar che'o zhes bya ba ni shes rab kyi pha rol tu phyin pa 'di la spyod pa'i byang chub sems dpa' tshe 'di dang / tshe rabs gzhan la thob par 'gyur ba'i phan yon rnams brgya byin gyis rtogs nas de lta bu'i yon tan rnams thob par gyur kyang / yon tan de dag gis dregs shing nga rgyal skye bar mi 'gyur ba'i don zhib tu bshad pa'i gleng bslang ba'i phyir/ shes rab kyi pha rol tu phyin pa 'di de ltar byang chub sems dpa' sems dpa' chen po rnams yongs su 'dul ba dang / nga rgyal ma mchis par 'gyur ba'i don du nye bar gnas pa ngo mtshar che'o zhes gsol pa'o/ /bcom ldan 'das kyis bka' stsal pa/ kau shi ka ji ltar na shes rab kyi pha rol tu phyin pa 'di byang chub sems dpa' sems dpa' chen po rnams yongs su 'dul ba dang nga rgyal med pa'i don du nye bar gnas pa yin zhes bya ba ni de brgya byin nyid 'chad du gzhug pa'i phyir dris pa'o/ /brgya byin gyis gsol pa/ bcom ldan 'das 'di la byang chub sems dpa' sems dpa' chen po 'jig rten pa'i sbyin pa'i pha rol tu phyin pa la spyod pa'i tshe zhes bya ba nas/ bcom ldan 'das byang chub sems dpa' sems dpa' chen po de ltar 'jig rten pa'i chos rnams la spyod pa'i tshe bdag tu bgyi ba la mngon par chags pas nga rgyal du 'gyur te/ de la ni shes rab kyi pha rol tu phyin pa yongs su 'dul ba dang / nga rgyal ma mchis pa'i slad du nye bar gnas so zhes bya ba'i bar du ni/ pha rol tu phyin pa drug la sogs pa rnam pa thams cad mkhyen pa nyid la thug gi bar gyi chos rnams la 'khor gsum yongs su ma dag par spyod pa ni/ yongs su ma dul zhing nga rgyal can du gyur pa ste/ de la shes rab kyi pha rol tu phyin pa'i don zab mo 'di rtogs na 'khor gsum yongs su dag par spyod pas yongs su 'dul ba dang nga rgyal med par byed pa yin no zhes bstan pa'o/ /bcom ldan 'das 'di la byang chub sems dpa' sems dpa' chen po 'jig rten las 'das pa'i sbyin pa'i pha rol tu phyin pa la spyod pa'i tshe zhes bya ba nas/ de rnam pa thams cad mkhyen pa nyid sgom yang shes rab kyi pha rol tu phyin pa shin tu bsgoms pa'i slad du dmigs pa ma mchis te/ bcom ldan 'das de ltar na shes rab kyi pha rol tu phyin pa ni byang chub sems dpa' sems dpa' chen po yongs su 'dul ba dang / nga rgyal ma mchis pa'i slad du nye bar gnas so zhes bya ba'i bar du ni 'jig rten pa'i pha rol tu phyin pa la sogs pa mtshan ma dang bcas shing 'khor gsum yongs su ma dag par spyod pa'i gnyen po pha rol tu phyin pa drug la sogs pa 'khor gsum yongs su dag par spyod pa nyid mtshan ma can du spyod pa yongs su 'dul ba dang nga rgyal med par byed pa yin no zhes bstan pa'o/ /shes rab kyi pha rol tu phyin pa 'bum pa rgya cher bshad pa las le'u bco brgyad pa'o/ / //de nas bcom ldan 'das kyis lha'i dbang po brgya byin la 'di skad ces bka' stsal to/ /kau shi ka rigs kyi bu'am rigs kyi bu mo gang shes rab kyi pha rol tu phyin pa zab mo 'di 'dzin cing 'chang ba dang zhes bya ba nas/ kau shi ka rnam grangs des na rigs kyi bu'am rigs kyi bu mo de g.yul du phyin pa'i tshe lus la mtshon tam mdas phog cing zug par mi 'gyur ro zhes bya ba'i bar du ni shes kyi pha rol tu phyin pa 'di 'dzin cing 'chang ba la sogs pa'i sgo nas nan tan du byed cing / g.yul ngor 'gro ba'i tshe yang shes rab kyi pha rol tu phyin pa 'di skabs gang yang rung ba nas ci lobs pa kha ton du byas te song na de dgra las rgyal zhing mtshon gyis mi phog pa'i phan yon bstan pa'o/ /kau shi ka gzhan yang gal te rigs kyi bu'am rigs kyi bu mo shes rab kyi pha rol tu phyin pa zab mo 'di 'dzin cing 'chang ba dang zhes bya ba nas/ da ltar byung ba'i phyogs bcu'i de bzhin g shegs pa dgra bcom pa yang dag par rdzogs pa'i sangs rgyas tshad med grangs med pa de dag kyang rig sngags 'di nyid la bslabs pas bla na med pa yang dag par rdzogs pa'i byang chub tu mngon par rdzogs par sangs rgyas so zhes bya ba'i bar du ni shes rab kyi pha rol tu phyin pa 'di 'dzin cing 'chang ba la sogs pa'i sgo nas nyams su blangs te/ sngags kyi tshul du dmigs shing brten te bcangs na gzhan gyis dug dang mtshon la sogs pa'i gnod pa sna tshogs byas kyang gnod pa de dag thams cad kyis mi tshugs pa'i phan yon bstan pa'o/ /kau shi ka gzhan yang shes rab kyi pha rol tu phyin pa 'di bzung bar ma byas/ kha ton ma byas klag pa dang kun chub par ma byas tshul bzhin yid la ma byas kyang gang na bris shing 'chang ba'i khyim mam/ grong ngam/ grong rdal lam/ grong khyer der/ mi'am mi ma yin pa glags lta bas glags rnyed par mi 'gyur ro zhes bya ba nas/ kau shi ka de ltar gang la las shes rab kyi pha rol tu phyin pa 'di bris te bcangs n a de la yang tshe 'di'i yon tan dang legs pa de dag yod par 'gyur ro zhes bya ba'i bar du ni shes rab kyi pha rol tu phyin pa 'di bklag cing mnyan pa la sogs pa'i nan tan ma byas par glegs bam du bris te bcangs pa tsam gyis kyang mi dang mi ma yin pa gnod pa bya bar glags lta ba rnams kyis glags mi rnyed pa'i phan yon bstan pa'o/ /kau shi ka 'di lta ste dper na snying po byang chub pa'am snying po byang chub kyi 'khor tam zhes bya ba nas/ kau shi ka de ci'i phyir zhe na/ shes rab kyi pha rol tu phyin pa 'di nyid sa'i phyogs de sems can thams cad kyi mchod rten du byas pas me tog dang phreng ba dang spos dang byug pa dang phye ma dang / na bza' dang / gdugs dang / rgyal mtshan mang pos phyag bya ba dang 'dud pa dang phu dud du bya ba dang / rim gro bya ba dang / bkur stir bya bar gyur to zhes bya ba'i bar du ni mi dang mi ma yin pas glags mi rnyed pa'i dpe bstan pa ste/ byang chub kyi snying po gang du dus gsum gyi de bzhin gshegs pa rnams mngon par rdzogs par sangs rgyas shing / sems can gyi don sna tshogs mdzad par gyur pa'i sa phyogs de'am/ de'i nyan kor na 'khod pa'i sems can byol song gi skye gnas su gtogs pa yan chad la yang / mi'am mi ma yin pa la sogs pas gnod par bya mi nus pa de bzhin du shes rab kyi pha rol tu phyin pa 'di glegs bam du bris te bzhag pa'i khyim mam/ grong der yang mi dang mi ma yin pas glags rnyed par mi 'gyur ro zhes bstan pa'o/ /brgya byin gyis gsol pa/ bcom ldan 'das rigs kyi bu'am rigs kyi bu mo gang la las shes rab kyi pha rol tu byin pa 'di bris shing glegs bam du bgyis te/ bcangs la zhes bya ba nas/ de bzhin gshegs pa dgra bcom pa yang dag par rdzogs pa'i sangs rgyas rnams kyi rnam pa thams cad mkhyen pa nyid kyang 'di las byung ngo zhes bya ba'i bar du ni de bzhin gshegs pa yongs su mya ngan las 'das pa'i sku gdung rin po che sna bdun gyi mchod rten du bcug gam/ rin po che sna bdun gyi snod du bcug ste/ mchod cing rim gro byas pa bas kyang / shes rab kyi pha rol tu phyin pa 'di bris te bzung ba dang / bcangs pa la sogs pa'i sgo nas nan tan byas pa lhag par bsod nams che ba'i phan yon bstan pa'o/ /brgya byin gyis gsol pa/ bcom ldan 'das 'dzam bu'i gling gi mi gang shes rab kyi pha rol tu phyin pa 'di la rim gror mi bgyid/ bkur stir mi bgyid/ phu dud du mi bgyid/ mchod par mi bgyid pa de dag gis shes rab kyi pha rol tu phyin pa la mchod pa de ltar mthu che bar ma 'tshal tam zhes bya ba nas/ de bas kyang bla na med pa yang dag par rdzogs pa'i byang chub tu mngon par 'tshang rgya bar 'dod pa de lta bu ni ches nyung ngo zhes bya ba'i bar du ni 'dzam bu'i gling 'di na shes rab kyi pha rol tu phyin pa 'di la mchod cing bkur stir byed pa dang / sangs rgyas dang chos dang dge 'dun la dad pa che ba dang / nem nur med pa dang / shin tu rton pa'i sems can dge ba ni nyung shes rab kyi pha rol tu phyin pa la mchod cing rim gror mi byed pa dang / dkon mchog gsum la ma dad cing the tshom za ba dang / mi rten pa'i sems can dman pa mang ba gtan tshigs dang bcas te bstan pa ste/ de la kun du sbyor ba gsum zhes bya ba ni 'jig tshogs la lta ba dang / tshul khrims dang brtul zhugs mchog tu 'dzin pa dang / the tshom dang gsum la bya ste/ nyon mongs pa de gsum gyis sems can rnams grol thar bar mi 'gyur zhing 'khor bar kun du sbyor ba'i phyir kun du sbyor ba zhes bya'o/ /dam pa ma yin pa'i cha kun du sbyor ba lnga ni 'jig tshogs la lta ba dang / tshul khrims dang brtul zhugs mchog tu 'dzin pa dang / the tshom dang / 'dod pa la 'dun pa dang / gnod sems rnams so/ /bla ma'i cha kun du sbyor ba lnga ni gzugs kyi khams kyi 'dod chags dang / gzugs med pa'i khams kyi 'dod chags dang / rgod pa dang / nga rgyal dang / ma rig pa rnams so/ /kau shi ka ngas 'di nas sangs rgyas kyi spyan bsgribs pa med pas shar phyogs kyi 'jig rten gyi khams gang gA'i klung gi bye ma snyed dag ni sems can tshad med grangs med pa bla na med pa yang dag par rdzogs pa'i byang chub tu spyod kyang / shes rab kyi pha rol tu phyin pa'i thabs mkhas pa dang mi ldan pas de las gcig gam gnyis shig phyir mi ldog pa'i sa la gnas par 'gyur gyi/ de las phal cher nyan thos dang / rang sangs rgyas kyi sa la gnas par 'gyur ba mthong ngo zhes bya ba nas/ kau shi ka ngas 'di nas sangs rgyas kyi spyan bsgribs pa med pas steng gi phyogs kyi 'jig rten gyi khams gang gA'i klung gi bye ma snyed dag na sems can tshad med grangs med pa bla na med pa yang dag par rdzogs pa'i byang chub tu spyod kyang / shes rab kyi pha rol tu phyin pa'i thabs mkhas pa dang mi ldan pas de las gcig gam gnyis shig phyir mi ldog pa'i sa la gnas par 'gyur gyi/ de las phal cher nyan thos dang rang sangs rgyas kyi sa la gnas par 'gyur ba mthong ngo / /de ci'i phyir zhe na/ kau shi ka bla na med pa yang dag par rdzogs pa'i byang chub ni le lo can brtson 'grus med pa/ bsam pa zhan pa/ mos par dka' ba/ shes rab 'chal ba can rnams kyis bsgrub par dka'o zhes bya ba'i bar du ni/ phyogs bcu'i 'jig rten gyi khams na yang theg pa chung ngu la spyod pa ni mang gi/ shes rab kyi pha rol tu phyin pa'i thabs dang ldan par theg pa chen po la spyod pa nyung zhing dkon pa bstan pa'o/ /kau shi ka de bas na rigs kyi bu'am/ rigs kyi bu mo gang bla na med pa yang dag par rdzogs pa'i byang chub tu yang dag par zhugs pa de dag myur zhing bde bar bla na med pa yang dag par rdzogs pa'i byang chub tu mngon par rdzogs par 'tshang rgya bar 'dod na/ yang dang yang du shes rab kyi pha rol tu phyin pa 'di la nyan par bya'o zhes bya ba nas/ sangs rgyas kyi chos ma 'dres pa bco brgyad dang / gzhan yang sangs rgyas kyi chos tshad med pa gang ji snyed shes rab kyi pha rol tu phyin pa 'di'i nang du 'dus pa de dag kyang gzung bar bya'o/ /bcang bar bya'o/ /bklag par bya'o/ /kun chub par bya'o/ /tshul bzhin du yid la bya'o zhes bya ba'i bar du ni/ de ltar shes rab kyi pha rol tu phyin pa 'di phan yon che ba'i phyir yang dang yang du mnyan pa dang gzung ba dang / bcang ba la sogs pa bya'o zhes bstan pa'o/ /de ci'i phyir zhe na/ kau shi ka de ni 'di ltar rigs kyi bu'am/ rigs kyi bu mo de dag 'di ltar shes par 'gyur te zhes bya ba nas/ rgyun du zhugs pa rnams kyis kyang pha rol tu phyin par gyur to/ /pha rol tu phyin to/ /pha rol tu phyin par 'gyur ro zhes bya bar shes par 'gyur ro zhes bya ba'i bar du ni shes rab kyi pha rol tu phyin pa 'di la mnyan pa la sogs pa bya ba'i gtan tshigs bstan pa ste/ dus gsum gyi sangs rgyas bcom ldan 'das rnams dang nyan thos dang rang sangs rgyas rnams kyis kyang / shes rab kyi pha rol tu phyin pa 'di dang 'di'i nang du gtogs pa'i sangs rgyas kyi chos rnams la bslabs pas sangs rgyas kyi chos thams cad kyi mthar phyin par 'gyur bar shes par 'gyur te/ de'i phyir shes rab kyi pha rol tu phyin pa 'di dang 'di'i nang du 'dus pa'i sangs rgyas kyi chos thams cad la mnyan pa la sogs pa bya'o zhes bstan pa'o/ /kau shi ka de bas na rigs kyi bu'am rigs kyi bu mo de dag gis de bzhin gshegs pa bzhugs kyang rung / de bzhin gshegs pa yongs su mya ngan las 'das kyang rung ste/ shes rab kyi pha rol tu phyin pa 'di la brten par bya'o zhes bya ba nas/ de dag gi rnam pa thams cad mkhyen pa nyid la brten par bya ste/ de ci'i phyir zhe na/ kau shi ka rnam pa thams cad mkhyen pa nyid 'di ni nyan thos dang / rang sangs rgyas dang / byang chub sems dpa' sems dpa' chen po thams cad kyi rten yin te/ lha dang mi dang lha ma yin gyi skye dgu'i bar gyi rten yin no zhes bya ba'i bar du ni de ltar gong du smos pa'i rim pas shes rab kyi pha rol tu phyin pa 'di dang sangs rgyas kyi chos thams cad de bzhin gshegs pa dang / nyan thos dang rang sangs rgyas rnams kyis bstan pa yin la/ dam pa'i chos spyod pa rnams kyi ston pa yin te/ chos 'di dag la slob slob pas chos thams cad kyi mthar phyin par gyur pa de'i phyir shes rab kyi pha rol tu phyin pa la sogs pa rnam pa thams cad mkhyen pa nyid la thug gi bar gyi chos 'di rnams la brten par bya'o zhes nyan thos dang rang sangs rgyas dang / byang chub sems dpa' dang lha dang mi dang lha ma yin gyi 'jig rten du bcas pa'i rten yin pa'i phyir gtan tshigs dang bcas te bstan pa'o/ /kau shi ka rigs kyi bu'am rigs kyi bu mo gang la la zhig gis de bzhin gshegs pa yongs su mya ngan las 'das nas mchod pa'i phyir rin po che sna bdun gyi mchod rten 'phang du dpag tshad tsam la rgyar dpag tshad phyed par byas te zhes bya ba nas de ni sangs rgyas bcom ldan 'das rnams kyis bstan pa ste/ de la bslabs shing 'das pa dang / ma byon pa dang / da ltar byung ba'i nyan thos dang / rang sangs rgyas dang / sangs rgyas bcom ldan 'das kyi chos thams cad kyi pha rol tu phyin par gyur to/ / phyin to/ /phyin par 'gyur ro zhes bya ba'i bar du ni rin po che sna bdun gyi mchod rten 'phang du dpag tshad tsam la/ rgyar dpag tshad phyed pa gcig byas te/ mchod pa dang rin po che sna bdun gyi mchod rten de lta bus 'dzam bu'i gling bkang ste mchod pa byas pa dang / stong gcig gi 'jig rten gyi khams bkang ste mchod pa byas pa dang / stong gnyis kyi 'jig rten gyi khams bkang ste mchod pa byas pa dang / stong gsum gyi 'jig rten gyi khams bkang ste mchod pa byas pa dang / stong gsum gyi stong chen po'i 'jig rten gyi khams na sems can ji snyed yod pa de dag re res mchod rten de snyed byas te mchod pa dang / phyogs bcu'i 'jig rten gyi khams gang gA'i klung gi bye ma snyed na sems can ji snyed yod pa de dag re res kyang de snyed kyi mchod rten byas te/ bskal pa'am/ bskal pa bas kyang yun ring du mchod pa sna tshogs byas pa bas kyang / shes rab kyi pha rol tu phyin pa 'di bris shing 'dzin pa la sogs pa dang / mchod pa sna tshogs byas pa bsod nams che ba bstan pa'o/ /shes rab kyi pha rol tu phyin pa 'bum pa rgya cher bshad pa las le'u bcu dgu pa'o// //de nas bcom ldan 'das kyis lha'i dbang po brgya byin la 'di skad ces bka' stsal to/ /kau shi ka de de bzhin no/ / de de bzhin te/ rigs kyi bu'am rigs kyi bu mo de dag gi bsod nams mang du 'phel lo zhes bya ba nas/ bsod nams mngon par 'du bya ba 'di la/ bsod nams mngon par 'du bya ba snga mas brgya'i char yang nye bar mi 'gro/ /stong gi cha dang / brgya phrag stong gi cha dang / bye ba'i cha dang / bye ba brgya'i cha dang / bye ba stong gi cha dang / bye ba brgya phrag stong gi cha dang / grangs dang / cha dang / bgrang ba dang / dper yang nye bar mi 'gro/ /rgyur yang nye bar mi bzod do zhes bya ba'i bar du ni gong du bsod nams che bar bshad pa'i gtan tshigs su shes rab kyi pha rol tu phyin pa 'di las sangs rgyas kyi chos thams cad byung ba smos nas rin po che sna bdun gyi mchod rten mang po byas shing / mchod pa'i bsod nams snga ma bas shes rab kyi pha rol tu phyin pa 'di bris shing bcangs pa la sogs pa'i bsod nams rab tu che ba'i don mjug bsdus te bstan pa'o/ /de ci'i phyir zhe na/ kau shi ka shes rab kyi pha rol tu phyin pa 'di ji srid du 'dzam bu'i gling na gnas pa de srid du sangs rgyas dkon mchog nub par mi 'gyur ro zhes bya ba nas/ sems can yongs su smin pa yod do/ /sangs rgyas kyi zhing yongs su dag pa yod do zhes bya ba'i bar du ni/ gong du shes rab kyi pha rol tu phyin pa bris shing bcang ba la sogs pa'i bsod nams che ba'i gtan tshigs gzhan bstan pa ste/ shes rab kyi pha rol tu phyin pa 'di bris shing bcang ba la sogs pa byas nas mchod pa byas te/ ji srid du 'jig rten na gnas pa de srid du dkon mchog gsum yang 'jig rten na gnas shing nub par mi 'gyur la/ dge ba bcu la sogs pa sangs rgyas kyi chos thams cad 'jig rten du 'byung ba dang / rgyal rigs che zhing mtho ba la sogs pa 'jig rten gyi mi ya rabs rnams dang / rgyal chen bzhi'i lha la sogs pa 'dod pa'i khams dang / gzugs kyi khams kyi lha rnams dang / rgyun du zhugs pa la sogs pa 'jig rten las 'das pa'i 'phags pa rnams 'jig rten du 'byung zhing gnas par 'gyur ba'i phan yon bstan pa'o/ /de nas stong gsum gyi stong chen po'i 'jig rten gyi khams 'di'i rgyal chen bzhi'i ris kyi lha rnams dang zhes bya ba nas/ bla na med pa yang dag par rdzogs pa'i byang chub 'jig rten du 'byung bar 'gyur ro zhes bya ba'i bar du ni lha'i dbang po brgya byin gyis rgyal chen bzhi'i ris kyi lha la sogs pa la shes rab kyi pha rol tu phyin pa 'di gzung ba dang bcang ba la sogs pa byas na/ sangs rgyas kyi bstan pa 'jig rten na yun ring du gnas shing sangs rgyas kyi chos thams cad 'jig rten du 'byung bar 'gyur gyi/ khyed kyis kyang shes rab kyi pha rol tu phyin pa 'di bzung ba la sogs pa byos shig ces bskul ma btab pa bstan pa'o/ /de nas bcom ldan 'das kyis lha'i dbang po brgya byin la bka' stsal pa/ kau shi ka khyod kyis shes rab kyi pha rol tu phyin pa 'di zung shig chongs shig ces bya ba nas/ de ci'i phyir zhe na/ kau shi ka de ni de ltar shes rab kyi pha rol tu phyin pa 'di'i nang du nyan thos kyi chos sam/ rang sangs rgyas kyi chos sam/ byang chub sems dpa'i chos sam/ sangs rgyas kyi chos kyang rung ste/ byang chub kyi phyogs kyi chos thams cad 'dus so zhes bya ba'i bar du ni shes rab kyi pha rol tu phyin pa 'di bzung zhing bcang ba la sogs pa byas na/ lha ma yin gyi dgra slar ldog par 'gyur ba dang / lha'i bu dang lha'i bu mo dag tshe 'pho ba'i tshe ngan song du skye ba'i ltas byung na yang / ngan song du mi skye bar mtho ris su skye bar 'gyur ba dang / shes rab kyi pha rol tu phyin pa 'di thos pa tsam gyi dge ba'i rtsa bas kyang rim gyis bla na med pa yang dag par rdzogs pa'i byang chub kyi rgyur 'gyur ba dang / dus gsum gyi de bzhin gshegs pa 'khor dang bcas pa rnams kyis kyang shes rab kyi pha rol tu phyin pa 'di nyid la bslabs nas/ yongs su mya ngan las 'das par 'gyur ba'i phan yon rnams smos nas/ phan yon de lta bu dang ldan pa'i phyir brgya byin khyod kyis kyang shes rab kyi pha rol tu phyin pa 'di bzung ba dang bcang ba la sogs pa byos shig ces brgya byin la gtad pa bstan pa'o/ /brgya byin gyis gsol pa/ bcom ldan 'das 'di lta ste/ shes rab kyi pha rol tu phyin pa 'di ni rig sngags chen mo'o zhes bya ba nas/ rnam pa thams cad mkhyen pa nyid 'jig rten na yod pa yin zhes bya ba'i bar du ni ji ltar sngags kyi mthus dug dang mtshon la sogs pas mi tshugs shing / dgra las rgyal bar 'gyur ba de bzhin du shes rab kyi pha rol tu phyin pa 'di bzung ba la sogs pa byas pa'i mthus dug dang mtshon la sogs pas mi tshugs shing / dgra las rgyal bar 'gyur bas na shes rab kyi pha rol tu phyin pa 'di nyid rig sngags yin zhing mthu che ba'i phan yon bstan pa ste/ de la rig sngags chen mo zhes bya ba ni tshe 'di dang tshe phyi ma la phan pa'i dngos grub thams cad thob par byed do/ /bla na med pa'i rig sngags zhes bya ba ni rig sngags de'i gong na de dang 'dra ba gzhan med pa'i phyir ro/ /mi mnyam pa dang mnyam pa'i rig sngags zhes bya ba la/ mi mnyam pa ni bla na med pa'i byang chub la bya ste/ bla na med pa'i byang chub ci dang yang mi mnyam pa de thob par byed cing / de dang mnyam par 'gyur ba'i mthu dang ldan pa'i phyir mi mnyam pa dang mnyam pa zhes bya'o/ /kau shi ka byang chub sems dpa' yod na dge ba bcu'i las kyi lam rnams 'jig rten na gdags su yod pa yin zhes bya ba nas/ de bzhin gshegs pa dgra bcom pa yang dag par rdzogs pa'i sangs rgyas 'jig rten na gdags su yod pa yin no zhes bya ba'i bar du ni shes rab kyi pha rol tu phyin pa la spyod pa'i byang chub sems dpa'i mthu dang yon tan che ba bstan pa ste/ shes rab kyi pha rol tu phyin pa la spyod pa'i tshe byang chub sems dpa' gang na gnas pa'i yul phyogs de na dge ba bcu la sogs pa sangs rgyas kyi chos thams cad spyod cing dar bar 'gyur ro zhes bya ba'i don to/ /kau shi ka 'di lta ste dper na zla ba'i dkyil 'khor yod na rtsi dang rgyu skar dang skar ma thams cad gdags su yod do zhes bya ba nas/ rnam pa thams cad mkhyen pa nyid rjes su thob par byed pa'i thabs mkhas pa de yang shes rab kyi pha rol tu phyin pa las 'byung bar rig par bya'o zhes bya ba'i bar du ni zla ba'i dkyil 'khor gyi dpes byang chub sems dpa'i mthu dang yon tan che ba bstan pa ste/ zla ba'i dkyil 'khor ni/ bdud rtsi'i rang bzhin can yin la/ gza' dang rgyu skar la sogs pa'i rgyal po yang yin pas zla ba'i dkyil 'khor gyi mthu dang byin gyis rtsi dang sman rnams kyang mthu che bar 'gyur zhing / gza' dang skar ma rnams kyang mthu dang gzi brjid che bar 'gyur ba de bzhin du byang chub sems dpa' shes rab kyi pha rol tu phyin pa'i thabs mkhas pa dang ldan pa yod na dkar po'i phyogs su gtogs pa'i chos thams cad 'jig rten na gnas shing dar bar 'gyur ro zhes bstan pa'o/ /kau shi ka gzhan yang rigs kyi bu'am rigs kyi bu mo gang shes rab kyi pha rol tu phyin pa 'di 'dzin pa dang / 'chang ba dang / klog pa dang / kun chub par byed pa dang / tshul bzhin du yid la byed pa de ni tshe 'di'i yon tan 'di dag dang / tshe rabs gzhan gyi yon tan 'di dag dang yang ldan par 'gyur ro zhes bya ba nas/ de dag ni bla na med pa yang dag par rdzogs pa'i byang chub tu mngon par rdzogs par sangs rgyas kyi bar du tshe 'di'i yon tan dang / tshe rabs gzhan gyi yon tan de dag dang ldan par 'gyur ro zhes bya ba'i bar du ni shes rab kyi pha rol tu phyin pa 'di 'dzin cing 'chang ba la sogs pa'i nan tan byed pa tshe 'di la dug dang mtshon la sogs pa'i gnod pas dus byed par mi 'gyur ba dang / rgyal po'i chad pa'i 'jigs pa med cing / rgyal po'i 'khor gyi mi rnams dga' bar 'gyur ba la sogs pa'i phan yon thob par 'gyur ba dang / tshe rabs gzhan la dge ba bcu la sogs pa dkar po'i chos thams cad dang bral bar mi 'gyur ba dang / ngan song du mi ltung ba dang / yan lag nyams par mi 'gyur ba dang / mi dbul po la sogs pa rigs dman pa rnams su mi skye ba dang / skyes bu chen po'i mtshan phun sum tshogs pa dang / rdzus te skye ba dang / sangs rgyas kyi zhing nas sangs rgyas kyi zhing du 'gro ba dang / sems can yongs su smin par bya ba dang / sangs rgyas kyi zhing yongs su dag par bya nus pa la sogs pa'i yon tan rnams thob par 'gyur ba'i phan yon bstan pa'o/ /shes rab kyi pha rol tu phyin pa 'bum pa rgya cher bshad pa las le'u nyi shu pa'o// //de nas mu stegs can gzhan dang kun du rgyu ba dang / glags lta ba'i bsam pa can brgya tsam zhig bcom ldan 'das ga na ba de logs su dong ba dang zhes bya ba nas/ steng gi phyogs kyi 'jig rten gyi khams gang gA'i klung gi bye ma snyed dag na sangs rgyas bcom ldan 'das nyan thos kyi dge 'dun dang bcas pa ji snyed cig bzhugs pa dang / rang sangs rgyas dang / byang chub sems dpa' sems dpa' chen po dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po gang ji snyed cig yod pa de dag thams cad kyis kyang shes rab kyi pha rol tu phyin pa 'di yongs su bzung ngo / /de ci'i phyir zhe na/ 'di ltar de dag thams cad ni shes rab kyi pha rol tu phyin pa las byung ba sha stag go zhes bya ba'i bar du ni/ shes rab kyi pha rol tu phyin pa 'di bzung zhing kha ton du byas na mu stegs can chos kyi bar chad byed par glags lta ba rnams kyis mi tshugs pa'i phan yon gtan tshigs dang bcas pa bstan pa'o/ /de nas bdud sdig to can 'di snyam du sems par gyur to zhes bya ba nas/ lha'i dbang po brgya byin gyis ji lta ji ltar shes rab kyi pha rol tu phyin pa 'di gsal bar brjod pa de lta de ltar bdud sdig to can de dag lam de nyid dang sgo de nyid nas phyir log go zhes bya ba'i bar du ni/ shes rab kyi pha rol tu phyin pa 'di legs par bsams te kha ton du byas na bdud kyis bar chad bya bar mi nus pa'i phan yon bstan pa'o/ /de nas 'khor der rgyal chen bzhi'i ris kyi lha'i bu dang / 'og min gyi lha'i bar du ji snyed cig 'khod pa de dag gis zhes bya ba nas/ phyogs de ni mgon dang bcas shing mun pa dang bral bar ngas shes so zhes bya ba'i bar du ni/ shes rab kyi pha rol tu phyin pa 'di 'dzam bu'i gling na ji srid du spyod pa de srid du/ dkon mchog gsum nub par mi 'gyur zhing / byang chub sems dpa'i spyod pa khyad par can dar bar 'gyur ba dang / yul phyogs gang na shes rab kyi pha rol tu phyin pa 'di glegs bam du bris te/ 'chang ba'i yul phyogs de bkra shis shing byin can du 'gyur ba'i phan yon bstan pa'o/ /de nas lha'i bu de dag gis lha rdzas kyi me tog mang po mngon par sprul nas/ bcom ldan 'das gang na ba der mngon par gtor te 'di skad kyi tshig brjod do zhes bya ba nas/ de ni ston pa'am ston pa dang mtshungs pa tsam du bdag cag sems so zhes bya ba'i bar du ni shes rab kyi pha rol tu phyin pa 'di 'dzin cing 'chang ba la sogs pa byed pa'i mi la lha rnams kyis ston par 'du shes bskyed de/ rtag tu bsrung zhing bskyab par khas 'ches pa'i phan yon bstan pa'o/ /de nas lha'i dbang po brgya byin gyis bcom ldan 'das la 'di skad ces gsol to zhes bya ba la sogs pa ni/ shes rab kyi pha rol tu phyin pa 'di 'dzin cing 'chang ba la sogs pa byed pa'i mi de dge ba'i rtsa ba cung zad tsam gyis 'dzin cing 'chang ba la sogs pa byed nus par 'gyur ba ma yin gyi/ sngon gyi rgyal ba rnams la dge ba'i rtsa ba bskrun pa dang / sangs rgyas mang po la bsnyen bkur byas pa dang / sngon dge ba'i bshes gnyen gyis yongs su zin pa rnams kyis shes rab kyi pha rol tu phyin pa 'di 'dzin cing 'chang ba la sogs pa byed nus par 'gyur ba'i phan yon bstan pa ste/ bcom ldan 'das de ci'i slad du zhe na/ 'di lta ste/ shes rab kyi pha rol tu phyin pa 'di las rnam pa thams cad mkhyen pa nyid btsal bar bgyi'o zhes bya ba ni kun rdzob tu shes rab kyi pha rol tu phyin pa 'di la goms par byas pa las rnam pa thams cad mkhyen pa nyid kyi ye shes thob par 'gyur ro zhes bya ba'i don to/ /bcom ldan 'das 'di lta ste/ rnam pa thams cad mkhyen pa nyid las shes rab kyi pha rol tu phyin pa btsal bar bgyi'o zhes bya ba ni rnam pa thams cad mkhyen pa nyid kyi ye shes rnam par mi rtog pa la dmigs pa la shes rab yongs su dag par 'gyur ba'i phyir ro/ /de ci'i slad du zhe na/ bcom ldan 'das de ni 'di ltar shes rab kyi pha rol tu phyin pa yang gzhan la rnam pa thams cad mkhyen pa nyid kyang gzhan ma lags zhes bya ba la sogs pa ni don dam par shes rab kyi pha rol tu phyin pa dang / rnam pa thams cad mkhyen pa nyid kyi rang bzhin du ro gcig cing tha dad du dbyer med pa'i phyir ro/ /bcom ldan 'das kyis bka' stsal pa/ kau shi ka de de bzhin no/ /de de bzhin te zhes bya ba la sogs pa ni gong du brgya byin gyis kun rdzob tu shes rab kyi pha rol tu phyin pa dang / rnam pa thams cad mkhyen pa nyid gcig gi rgyu gcig yin par bstan pa dang / don dam par de gnyis tha dad du dbyer med pa bstan pa'i tshig bcom ldan 'das kyis bzlas nas de de bzhin no zhes bka' stsal pa'o/ /shes rab kyi pha rol tu phyin pa 'bum pa rgya cher bshad pa las le'u nyi shu gcig pa'o// //de nas tshe dang ldan pa dga' bos bcom ldan 'das la 'di skad ces gsol to/ /bcom ldan 'das kyis ji ltar shes rab kyi pha rol tu phyin pa'i ming yongs su brjod pa mdzad pa/ de ltar sbyin pa'i pha rol tu phyin pa'i ming yang yongs su brjod pa ma mdzad ces bya ba nas/ de ltar sangs rgyas kyi chos ma 'dres pa bco brgyad kyi ming yang yongs su brjod pa ma mdzad do zhes bya ba'i bar du ni shes rab kyi pha rol tu phyin pa 'di sangs rgyas kyi chos thams cad kyi gtso bo yin par bstan pa'i gleng bslang ba'i phyir/ bcom ldan 'das la kun dga' bos ci'i slad du bcom ldan 'das kyis shes rab kyi pha rol tu phyin pa 'ba' zhig gi yon tan bsngags la/ sangs rgyas kyi chos gang gzhan rnams kyi yon tan de tsam du mi bsngags zhes zhus pa'o/ /bcom ldan 'das kyis bka' stsal pa/ dga' bo shes rab kyi pha rol tu phyin pa ni 'di lta ste/ pha rol tu phyin pa lnga dang / stong pa nyid thams cad dang zhes bya ba nas/ sangs rgyas kyi chos ma 'dres pa bco brgyad dag gi thog mar 'gro ba'o/ /kun du 'dren pa'o zhes bya ba'i bar du ni/ de ltar shes rab kyi pha rol tu phyin pa 'ba' zhig gi yon tan bsngags te/ sangs rgyas kyi chos gzhan rnams kyi yon tan de tsam du ma bsngags pa ni/ shes rab kyi pha rol tu byin pa 'di sangs rgyas kyi chos thams cad kyi gtso bo yin pa'i phyir ro zhes bstan pa'o/ /dga' bo de ji snyam du sems rnam pa thams cad mkhyen pa nyid du yongs su ma bsngos pa'i sbyin pa sbyin pa'i pha rol tu phyin pa yin nam zhes bya ba nas/ rnam pa thams cad mkhyen pa nyid du yongs su ma bsngos pa'i shes rab shes rab kyi pha rol tu phyin pa yin nam zhes bya ba'i bar du ni shes rab kyi pha rol tu phyin pa dang mi ldan na sbyin pa la sogs pa byas kyang 'khor gsum yongs su ma dag cing / rnam pa thams cad mkhyen pa nyid du yongs su ma bsngos pas pha rol tu phyin par mi 'gyur gyi/ shes rab kyi pha rol tu phyin pa dang ldan na gdod sbyin pa la sogs pa yang pha rol tu phyin par 'gyur bas na/ shes rab kyi pha rol tu phyin pa ni sbyin pa'i pha rol tu phyin pa la sogs pa thams cad kyi gtso bo yin no zhes bstan pa'o/ /gsol pa/ bcom ldan 'das de ni ma lags na/ bcom ldan 'das rnam pa thams cad mkhyen pa nyid du ji ltar yongs su bsngos pa'i sbyin pa sbyin pa'i pha rol tu phyin pa lags zhes bya ba nas/ rnam pa thams cad mkhyen pa nyid du ji ltar yongs su bsngos pa'i shes rab shes rab kyi pha rol tu phyin pa lags zhes bya ba'i bar du ni sbyin pa la sogs pa ji ltar 'khor gsum yongs su dag cing pha rol tu phyin par 'gyur ba'i thabs zhus pa'o/ /bcom ldan 'das kyis bka' stsal pa/ dga' bo gnyis su med pa'i tshul gyis rnam pa thams cad mkhyen pa nyid du yongs su bsngos pa'i sbyin pa ni sbyin pa'i pha rol tu phyin pa yin no zhes bya ba nas/ mi skye ba'i tshul dang / mi dmigs pa'i tshul gyis rnam pa thams cad mkhyen pa nyid du yongs su bsngos pa'i shes rab ni/ shes rab kyi pha rol tu phyin pa yin no zhes bya ba'i bar du ni sbyin pa la sogs pa byed pa'i tshe don dam par chos thams cad skye ba med cing dmigs su med pas stong pa nyid du ro gcig ste/ gnyis su med par rtogs pas gtong ba dang / len pa dang / sbyin pa'i dngos po dang gsum char la mtshan mar mi 'dzin par byas nas/ kun rdzob du rnam pa thams cad mkhyen pa nyid du yongs su bsngos na pha rol tu phyin par 'gyur ro zhes bstan pa'o/ /gsol pa/ bcom ldan 'das ji ltar gnyis su ma mchis pa'i tshul dang / ji ltar mi skye ba'i tshul dang / mi dmigs pa'i tshul gyis rnam pa thams cad mkhyen pa nyid du yongs su bsngos pa'i sbyin pa sbyin pa'i pha rol tu phyin pa lags zhes bya ba nas/ ji ltar gnyis su ma mchis pa'i tshul dang / ji ltar mi skye ba'i tshul dang / mi dmigs pa'i tshul gyis rnam pa thams cad mkhyen pa nyid du yongs su bsngos pa'i shes rab ni shes rab kyi pha rol tu phyin pa lags zhes bya ba'i bar du ni don dam par chos thams cad skye ba med cing dmigs su med pas gnyis su med par rtogs par bya ste/ 'khor gsum yongs su dag par sbyin pa la sogs pa byas na pha rol tu phyin par 'gyur ba thabs ji ltar byas na 'gyur zhes bcom ldan 'das la dga' bos zhus pa'o/ /bcom ldan 'das kyis bka' stsal pa/ gzugs gnyis su med pa'i tshul dang zhes bya ba nas/ bla na med pa yang dag par rdzogs pa'i byang chub gnyis su med pa'i tshul gyis so zhes bya ba'i bar du ni gzugs la sogs pa bla na med pa yang dag par rdzogs pa'i byang chub la thug gi bar gyi chos thams cad don dam par stong pa nyid du ro gcig ste/ gnyis su med par rtogs par byas na/ kun rdzob tu rnam pa thams cad mkhyen pa nyid du yongs su bsngos pa'i sbyin pa la sogs pa pha rol tu phyin par 'gyur ro zhes bstan pa'o/ /gsol pa/ bcom ldan 'das ji ltar gzugs gnyis su ma mchis pa'i tshul dang zhes bya ba nas/ ji ltar bla na med pa yang dag par rdzogs pa'i byang chub gnyis su ma mchis pa'i tshul gyis lags zhes bya ba'i bar du gnyis su med pa'i tshul zhes bya ba nyid chos gang dang gang dag stong zhing / ji ltar gnyis su med pa'i don zhib tu bshad pa'i phyir/ bcom ldan 'das la dga' bos zhus pa'o/ /bcom ldan 'das kyis bka' stsal pa/ 'di ltar gzugs ni gzugs kyis stong ste/ de ci'i phyir zhe na/ de ni 'di ltar gzugs dang pha rol tu phyin pa 'di dag gnyis su med de gnyis su byar med do zhes bya ba nas/ bla na med pa yang dag par rdzogs pa'i byang chub ni bla na med pa yang dag par rdzogs pa'i byang chub kyis stong ste/ de ci'i phyir zhe na/ de ni 'di ltar bla na med pa yang dag par rdzogs pa'i byang chub dang / pha rol tu phyin pa 'di dag gnyis su med de gnyis su byar med do zhes bya ba'i bar du ni/ ji ltar gnyis su ma mchis pa'i tshul gyis lags zhes dga' bos zhus pa'i lan bka' stsal pa ste/ don dam par gzugs la sogs pa bla na med pa'i byang chub la thug gi bar gyi chos de dag thams cad chos de dag gi rang bzhin gyis stong la/ pha rol tu phyin pa rnams kyang rang bzhin gyis stong ste/ rang bzhin gyis stong par ro gcig pa rnams la tha dad du dbye zhing gnyis su med pa'i phyir chos de dag la mtshan mar mi 'dzin cing / 'khor gsum yongs su dag par sbyin pa la sogs pa byas nas/ pha rol tu phyin par 'gyur ro zhes bstan pa'o/ /dga' bo de lta bas na pha rol tu phyin pa lnga po 'di dag gi thog mar 'gro ba ni shes rab kyi pha rol tu phyin pa nyid do zhes bya ba nas/ rnam pa thams cad mkhyen pa nyid kyi thog mar 'gro ba ni shes rab kyi pha rol tu phyin pa nyid do zhes bya ba'i bar du ni/ de ltar chos thams cad don dam par rang bzhin gyis stong zhing gnyis su dbyer med par rtogs te/ 'khor gsum yongs su dag par sbyin pa la sogs pa byed pa ni/ shes rab kyi pha rol tu phyin pa yin pas/ shes rab kyi pha rol tu phyin pa pha rol tu phyin pa lnga la sogs pa/ sangs rgyas kyi chos thams cad kyi thog mar 'gro ba yin no zhes shes rab kyi pha rol tu phyin pa'i yon tan lhag par bsngags pa sngar bshad pa'i don mjug bsdus te bstan pa'o/ /dga' bo 'di lta ste dper na/ sa chen po la sa bon btab pa rgyu rkyen tshogs par gyur na rnam par 'phel bar 'gyur ba yang sa chen po ni de dag gi gnas te/ sa chen po 'di la brten cing sa bon de dag skye bar 'gyur ro/ /de bzhin du shes rab kyi pha rol tu phyin pa la brten cing / pha rol tu phyin pa lnga po 'di dag rnam par 'phel lo zhes bya ba nas rnam pa thams cad mkhyen pa nyid rnam par 'phel te zhes bya ba'i bar du ni shes rab kyi pha rol tu phyin pa sangs rgyas kyi chos thams cad skye zhing 'phel bar 'gyur ba'i dpe sa chen po las blangs te bstan pas/ shes rab kyi pha rol tu phyin pa 'di sangs rgyas kyi chos thams cad kyi rgyu'i gtso bo yin par bstan to/ /dga' bo rnam pa thams cad mkhyen pa nyid la brten cing pha rol tu phyin pa lnga rnam par 'phel lo zhes bya ba nas/ rnam pa thams cad mkhyen pa nyid la brten cing rnam pa thams cad mkhyen pa nyid rnam par 'phel lo zhes bya ba'i bar du ni/ shes rab kyi pha rol tu phyin pas yongs su bsgrubs pa'i 'bras bu rnam pa thams cad mkhyen pa nyid la dmigs par bya ba'i yul gyi tshul gyis brten na sangs rgyas kyi chos thams cad rnam par 'phel bar 'gyur ba bstan pa'o/ /dga' bo de lta bas na shes rab kyi pha rol tu phyin pa nyid ni pha rol tu phyin pa lnga po 'di dag yongs su bsgrubs pa'o zhes bya ba nas/ rnam pa thams cad mkhyen pa nyid yongs su bsgrub pa'o zhes bya ba'i bar du ni shes rab kyi pha rol tu phyin pa 'di sangs rgyas kyi chos thams cad kyi thog mar 'gro ba dang / yongs su 'dren pa dang / yongs su sgrub pa yin no zhes sngar bshad pa'i don mjug bsdus te bstan pa'o/ /de nas lha'i dbang po brgya byin gyis bcom ldan 'das la 'di skad ces gsol to/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas kyis shes rab kyi pha rol tu phyin pa'i yon tan gang bdag gis bcom ldan 'das las thos te/ rigs kyi bu'am rigs kyi bu mo gang shes rab kyi pha rol tu phyin pa 'di 'dzin pa dang 'chang ba dang / klog pa dang yongs su chub par bgyid pa dang / tshul bzhin du yid la bgyid pa'i yon tan gang ji snyed cig mchis pa dang / shes rab kyi pha rol tu phyin pa 'di'i yon tan gang ji snyed cig bdag gis bcom ldan 'das las bzung ste/ bcangs pa dang / bklags pa dang / kun chub par bgyis pa dang / spel ba de dag thams cad bka' ma stsal te zhes bya ba ni shes rab kyi pha rol tu phyin pa'i yon tan dang / phan yon gong du bshad pa las kyang rgya che zhing grangs mang ba dang / dpag tu med pa bshad pa'i skabs dbye ba'i phyir/ shes rab kyi pha rol tu phyin pa 'di'i yon tan 'dir yang ma bas na/ bcom ldan 'das kyis yon tan de dag thams cad bdag la bka' ma stsal te/ de zhib tu bshad pa'i rigs so zhes bcom ldan 'das la brgya byin gyis glengs shing bskul ba'o/ /bcom ldan 'das shes rab kyi pha rol tu phyin pa 'di bzung ba dang / bcangs pa dang / bklags pa dang / spel ba dang / tshul bzhin du yid la bgyis pas ni dge ba bcu'i las kyi lam rnams 'jig rten du 'byung bar 'gyur ro zhes bya ba nas/ de bzhin gshegs pa dgra bcom pa yang dag par rdzogs pa'i sangs rgyas kyang 'jig rten du 'byung bar 'gyur ro zhes bya ba'i bar du ni shes rab kyi pha rol tu phyin pa 'di bzung ba dang bcang ba la sogs pa byas pa'i yon tan dang phan yon dge ba bcu la sogs pa sangs rgyas kyi chos thams cad 'jig rten du 'byung bar 'gyur ba dang / rgyal rigs che zhing mtho ba la sogs pa mi dang lha'i rigs chen po rnams 'jig rten na yod par 'gyur ba dang / rgyun du zhugs pa la sogs pa 'phags pa rnams 'jig rten na bzhugs par 'gyur ba rnams brgya byin gyis mgo tsam zhig glengs te bstan pa'o/ /bcom ldan 'das kyis bka' stsal pa/ kau shi ka rigs kyi bu'am rigs kyi bu mo gang gis shes rab kyi pha rol tu phyin pa 'di bzung ba dang / bcangs pa dang / bklags pa dang / kun chub par byas pa dang / tshul bzhin du yid la byas pa de'i yon tan ni der zad par yang ma bshad de zhes bya ba la sogs pas ni gong du brgya byin gyis bcom ldan 'das la shes rab kyi pha rol tu phyin pa'i yon tan thams cad bka' ma stsal to zhes gsol ba'i lan du/ shes rab kyi pha rol tu phyin pa'i yon tan dang phan yon gong du bshad par yang ma zad de/ de bzhin gshegs pa'i zag pa med pa'i phung po lnga la sogs pa dang ldan par 'gyur ba'i yon tan dang phan yon gzhan yang tshad med grangs med pa dang ldan par 'gyur ba bstan pa ste/ kau shi ka de ci'i phyir zhe na/ rigs kyi bu'am rigs kyi bu mo gang shes rab kyi pha rol tu phyin pa 'di 'dzin pa dang / 'chang ba dang / klog pa dang / kun chub par byed pa dang / tshul bzhin du yid la byed pa dang / rnam pa thams cad mkhyen pa nyid kyi sems dang ma bral bar byed pa de dag ni tshul khrims kyi phung po tshad med pa dang ldan par 'gyur ro zhes bya ba nas/ de dag ni de bzhin gshegs pa'i don du zhugs par rig par bya'o zhes bya ba'i bar du ni shes rab kyi pha rol tu phyin pa 'di 'dzin cing 'chang ba la sogs pa byas na de bzhin gshegs pa'i spyod pa la zhugs pa yin pas de [(]gzhin [,]bzhin [)]gshegs pa'i tshul khrims kyi phung po dang / ting nge 'dzin gyi phung po dang / shes rab kyi phung po dang / rnam par grol ba'i phung po dang / rnam par grol ba'i ye shes mthong ba'i phung po tshad med pa dang ldan par 'gyur ba'i phan yon bstan pa ste/ tshul khrims kyi phung po la sogs pa'i mtshan nyid ni sngar bshad zin to/ /kau shi ka nyan thos dang rang sangs rgyas thams cad kyi tshul khrims kyi phung po dang zhes bya ba nas/ dper yang nye bar mi 'gro/ /rgyur yang mi bzod do zhes bya ba'i bar du ni shes rab kyi pha rol tu phyin pa 'di 'dzin cing 'chang ba la sogs pa'i rgyus de bzhin gshegs pa'i zag pa med pa'i phung po lnga thob par gyur pa la/ nyan thos dang rang sangs rgyas kyi zag pa med pa'i phung po lngas brgya stong du ma'i char yang nye bar mi 'gro ste/ shin tu khyad par che ba bstan pa'o/ /de ci'i phyir zhe na/ de ni 'di ltar rigs kyi bu'am rigs kyi bu mo de dag nyan thos dang rang sangs rgyas kyi sa las sems rnam par grol yang chos gang yang yongs su shes pa med de zhes bya ba ni shin tu khyad par che ba'i gtan tshigs bstan pa ste/ de dag kun rdzob tu nyan thos dang rang sangs rgyas kyi lta ba dman pa las kyang sems rnam par grol la/ don dam par theg pa chen po'i chos la yang mtshan mar mi 'dzin pa'i phyir/ de ltar khyad par che bar gyur to zhes bstan pa'o/ /kau shi ka rigs kyi bu dang rigs kyi bu mo gang shes rab kyi pha rol tu phyin pa 'di bris shing 'dzin pa dang zhes bya ba la sogs pa ni shes rab kyi pha rol tu phyin pa 'di bris shing 'dzin pa la sogs pa byed pa'i mi de dag la/ mchod cing bkur stir byed pa'i mi de dag kyang 'dzin cing 'chang ba la sogs pas thob par 'gyur ba'i yon tan de dag nyid dang ldan par 'gyur ro zhes bstan to/ /brgya byin gyis gsol pa/ bcom ldan 'das rigs kyi bu'am rigs kyi bu mo gang shes rab kyi pha rol tu phyin pa 'di 'dzin pa dang / 'chang ba dang zhes bya ba la sogs pa ni shes rab kyi pha rol tu phyin pa 'dzin cing 'chang ba la sogs pa'i mi de dag la brgya byin gyis rtag tu bsrung ba la sogs pa bya bar yi dam bcas pa bstan pa'o/ /bcom ldan 'das kyis bka' stsal pa/ kau shi ka rigs kyi bu'am rigs kyi bu mo shes rab kyi pha rol tu phyin pa 'di kha don du byed pa'i tshe zhes bya ba nas/ tshe 'di'i yon tan 'di yang yongs su zin par 'gyur ro zhes bya ba'i bar du ni shes rab kyi pha rol tu phyin pa 'di kha ton du byed pa'i tshe lha'i bu brgya stong mang po dag spobs pa skye bar mthu gtong ba dang / shes rab kyi pha rol tu phyin pa'i chos 'di smra zhing ston nus pa rnams snyom las byed cing 'chad mi 'dod par gyur na yang lha'i bu mang po de dag chos kyi mkhan po de la spobs pa skyed cing chos 'chad par spro ba'i mthu ston pa'i phan yon bstan pa'o/ /kau shi ka gzhan yang rigs kyi bu dang rigs kyi bu mo de dag 'khor bzhi las shes rab kyi pha rol tu phyin pa ston pa'i tshe zhes bya ba nas/ de la sus kyang glags lta ba med do zhes bya ba'i bar du ni shes rab kyi pha rol tu phyin pa 'di ston pa'i mkhan po la bdud dang mu stegs can la sogs pas glags mi rnyed pa'i phan yon bstan pa ste/ de yang shes rab kyi pha rol tu phyin pa 'di nyid kyis byin gyis brlabs pa dang / shes rab kyi pha rol tu phyin pa 'di'i nang du chos thams cad 'dus pa dang / chos bstan pa'i mi de nyid kyang chos thams cad stong pa nyid du rtogs pas glags tshol ba dang / glags lta ba'i skyon dang / glags lta bar bya ba'i mi de nyid kyang yang dag par rjes su mi mthong ba'i phyir glags lta bar 'gyur du 'ong ngo zhes bya bar sems zhum par 'gyur ba med do zhes bstan pa'o/ /kau shi ka gzhan yang rigs kyi bu'am rigs kyi bu mo shes rab kyi pha rol tu phyin pa 'dzin cing 'chang ba dang / klog pa dang zhes bya ba nas/ de dag gis tshe 'di'i yon tan 'di dag yongs su zin par 'gyur zhes bya ba'i bar du ni shes rab kyi pha rol tu phyin pa 'di 'dzin cing 'chang ba la sogs pa byed pa dang / glegs bam du bris te mchod cing bkur sti la sogs pa byed pa de nyan thos dang / rang sangs rgyas kyi theg pa dman pa la 'jug pa'i sems zhum pa mi skye ba'i phan yon bstan pa'o/ /kau shi ka gzhan yang rigs kyi bu'am/ rigs kyi bu mo la la shes rab kyi pha rol tu phyin pa 'di 'dzin cing 'chang ba dang zhes bya ba nas/ des tshe 'di'i yon tan 'di dag kyang yongs su zin par 'gyur ro zhes bya ba'i bar du ni shes rab kyi pha rol tu phyin pa 'di 'dzin cing 'chang ba la sogs pa byed pa la pha ma dang gnyen bshes dang / rgyal po dang blon po la sogs pa byams par 'gyur ba dang / phyogs bcu'i 'phags pa rnams kyi spyan ras kyis btsa' bar 'gyur ba dang / 'jig rten gyi lha dang lha ma yin la sogs pa thams cad 'go bar 'gyur ba dang / spobs pa phun sum tshogs pa dang / pha rol tu phyin pa drug la sogs pa sangs rgyas kyi chos thams cad la gzhan gyis bar chad bya mi nus pa dang / bdud dang mu stegs can la sogs pa phas kyi rgol ba thams cad thub par 'gyur ba'i mthu phun sum tshogs pa dang ldan par 'gyur ba'i phan yon bstan pa'o/ /kau shi ka gzhan yang rigs kyi bu'am rigs kyi bu mo gang shes rab kyi pha rol tu phyin pa 'di bris shing glegs bam du byas te/ 'chang ba der stong gsum gyi stong chen po'i 'jig rten gyi khams kyi rgyal chen bzhi'i ris kyi lha'i bu bla na med pa yang dag par rdzogs pa'i byang chub tu yang dag par zhugs pa dang zhes bya ba nas/ de ci'i phyir zhe na/ kau shi ka de ni 'di ltar rigs kyi bu'am rigs kyi bu mo de dag ni/ bla na med pa yang dag par rdzogs pa'i byang chub tu yang dag par zhugs pa ste/ sems can thams cad bskyab pa dang / sems can thams cad yongs su smin par bya ba dang / sems can thams cad la phan pa dang bde ba'i don du nye bar gnas pa'i phyir ro zhes bya ba'i bar du ni shes rab kyi pha rol tu phyin pa 'di gang na bris shing glegs bam du byas te 'chang ba der stong gsum gyi stong chen po'i 'jig rten gyi khams kyi lha rnams dang / phyogs bcu'i 'jig rten gyi khams kyi lha rnams lhags shing shes rab kyi pha rol tu phyin pa 'di bklag pa dang / bzung ba la sogs pa byas nas slar 'dong bar sems pa'i phan yon dang / shes rab kyi pha rol tu phyin pa 'di bris te 'jog pa'i mi des kyang lha de dag la chos kyi sbyin pa bya ba'i bsam pa bskyed pa dang / shes rab kyi pha rol tu phyin pa 'di bris shing 'chang ba'i mi de la lha de dag bsrung ba bya bar sems pa dang / gnod pa byed pa rnams kyis glags mi thod pa'i phan yon tshe 'di la thob par 'gyur ba bstan pa'o/ /brgya byin gyis gsol pa/ bcom ldan 'das rigs kyi bu'am/ rigs kyi bu mo des 'dir phyogs bcu kun gyi 'jig rten gyi khams nas/ shes rab kyi pha rol tu phyin pa 'di bklag pa dang / gzung ba dang kun chub par bya ba dang / phyag bya ba dang / 'dud pa dang / rim gror bya ba dang / bkur stir bya ba dang / phu dud du bya ba dang / mchod pa'i phyir rgyal chen bzhi'i ris kyi lha rnams 'ongs so zhes bgyi ba dang zhes bya ba nas/ rigs kyi bu'am rigs kyi bu mo des 'dir ni lha mthu bo che rdzu 'phrul che ba gzi brjid che ba dag shes rab kyi pha rol tu phyin pa 'di bklag pa dang / bcang ba dang / kun chub par bya ba dang / phyag bya ba dang / 'dud pa bya ba dang / rim gror bya ba dang / bkur sti bya ba dang / phu dud du bya ba dang / mchod pa'i phyir lhags so zhes bya bar nges par khong du chud par bya'o zhes bya ba'i bar du ni shes rab kyi pha rol tu phyin pa 'di bris shing glegs bam du byas te gzhag pa'i phyogs der phyogs bcu'i lha mthu chen po rnams klog cing mchod pa byed du 'ong ba'i ltas bstan pa'o/ /kau shi ka gzhan yang gal te rigs kyi bu'am rigs kyi bu mo gtsang sbra'i spyod pa dang ldan na de'i gtsang sbra'i spyod pa des lha de dag kyang nye bar 'ongs shing zhes bya ba nas/ rigs kyi bu'am rigs kyi bu mo des ni sems bde ba dang / sems yang ba dang sems gsal ba yang nyams su myong bar 'gyur ro zhes bya ba'i bar du ni shes rab kyi pha rol tu phyin pa 'di klog pa'i mi de khrus dang gtsang sbra byas te bklags na lha mthu chen po rnams 'ong zhing 'go bar 'gyur ba dang / lha phra mo gnod par sems pa rnams gud du 'dong bar 'gyur ba dang / lha mthu chen po rnams lhags ni der ma klog par mi mos pa rgya chen po dang ldan par 'gyur ba dang / shes rab kyi pha rol tu phyin pa 'di klog pa'i sa phyogs gtsang sbra cher byas te mchod pa dang / rgyan sna tshogs bri ba dang / lha rnams lhags shing gtsang sbra dang / mchod pa de ltar byas na klog pa'i mi de lus dang sems las su rung ba'i phan yon rnams bstan pa'o/ /de nas nub mo nyal na yang shes rab kyi pha rol tu phyin pa 'di la bsam pas mos par byas na sdig to'i rmi lam mthong bar mi 'gyur ro zhes bya ba nas/ kau shi ka de ltar rigs kyi bu'am/ rigs kyi bu mo de dag gis rmi lam bzang po de lta bu dag mthong bar 'gyur te zhes bya ba'i bar du ni shes rab kyi pha rol tu phyin pa 'di la gtsang sbra dang mchod pa dang / bkur sti cher byas te/ bsam pa dag pas bklags na rmi lam ngan pa mi rmi zhing / rmi lam bzang po mthong bar 'gyur ba'i phan yon bstan pa ste/ rmi lam bzang po yang sangs rgyas bcom ldan 'das skyes bu chen po'i mtshan dang dpe byad kyis brgyan pa dam pa'i chos ston pa mthong ba dang / de bzhin gshegs pa de las pha rol tu phyin pa drug la sogs pa sangs rgyas kyi chos ma 'dres pa bco brgyad la thug gi bar du mdor bshad pa dang / rgyas par bshad pa bdag gis thos pa rmi lam du mthong ba dang / byang chub kyi shing dang byang chub sems dpa' byang chub kyi shing drung du 'gro ba dang / byang chub sems dpa' de dag mngon par 'tshang rgya ba dang / mngon par sangs rgyas nas chos kyi 'khor lo bskor ba dang / chos rnam pa sna tshogs bgro ba mdzad pa rmi lam du mthong ba dang / phyogs bcu'i sangs rgyas bcom ldan 'das rnams chos ston pa'i sgra thos par 'gyur ba dang / phyogs bcu'i sangs rgyas mang po yongs su mya ngan las 'da' ba dang / yongs su mya ngan las 'das pa'i mchod rten la mchod pa byed pa de dag rmi lam du mthong bar 'gyur ba bstan pa'o/ /de dag bde bar nyal zhing bde bar 'gyur ro zhes bya ba la sogs pa ni shes rab kyi pha rol tu phyin pa 'di klog cing 'chang ba'i mi lus kyi nyams bde ba mang po myong bar 'gyur ba dang / zas dang gos la sogs pa'i yo byad rnams la chags pa'i shas chung bar 'gyur ba dang / shar phyogs nas steng gi phyogs kyi bar du phyogs bcu'i sangs rgyas dang / byang chub sems dpa' dang / lha dang klu la sogs pa mthu gtong zhing gzi mdangs skyed par 'gyur ba'i phan yon bstan pa'o/ /kau shi ka rigs kyi bu'am rigs kyi bu mo tshe 'di nyid la yon tan 'di dag yongs su bzung bar 'dod pas shes rab kyi pha rol tu phyin pa 'di nyid nan tan du mnyan par bya'o zhes bya ba la sogs pa ni/ de ltar shes rab kyi pha rol tu phyin pa 'di phan yon che bas bklag pa dang mnyan pa la sogs pa nan tan du bya'o zhes gdams ngag tu bstan pa'o/ /shes rab kyi pha rol tu phyin pa 'bum pa rgya cher bshad pa las le'u nyi shu gnyis pa'o// //de nas bcom ldan 'das kyis lha'i dbang po brgya byin la bka' stsal pa/ kau shi ka khyod kyis 'dzam bu'i gling de bzhin gshegs pa'i sku gdung gis byur bus gang ba zhig kyang rnyed/ shes rab kyi pha rol tu phyin pa 'di glegs bam du bris pa zhig kyang la las byin na/ de las gang blang bar bya zhes bya ba nas/ de bzhin gshegs pa'i sku gdung 'di dag shes rab kyi pha rol tu phyin pa las byung ba lags pas na/ lha dang mi dang lha ma yin du bcas pa'i 'jig rten gyis rim gror bgyi ba lags/ bkur stir bgyi ba lags/ phu dud du bgyi ba lags/ mchod par bgyi ba lags/ bsrung zhing rim gro dang bkur sti dang phu dud dang / mchod par bgyid do zhes bya ba'i bar du ni 'dzam bu'i gling de bzhin gshegs pa'i sku gdung gis gang ba rnyed de/ de la mchod cing bkur sti la sogs pa byas pa'i bsod nams kyang shes rab kyi pha rol tu phyin pa 'di glegs bam du bris pa la mchod cing bkur sti la sogs pa byas pa'i bsod nams che ba bstan pa ste/ de bzhin gshegs pa'i sku gdung ni sangs rgyas kyi chos thams cad sgrub pa'i rgyu ma yin gyi/ shes rab kyi pha rol tu phyin pa ni sangs rgyas kyi chos thams cad sgrub pa'i rgyu'i gtso bo yin te/ de bzhin gshegs pa'i sku gdung rnams kyang shes rab kyi pha rol tu phyin pa 'di las byung ba'i phyir sku gdung bas shes rab kyi pha rol tu phyin pa brgya byin gyis gdams pa bstan pa'o/ /de nas tshe dang ldan pa sha ra dwa ti'i bus lha'i dbang po brgya byin la 'di skad ces smras so zhes bya ba nas/ rnam pa thams cad mkhyen pa nyid nye bar bsgrub pa ma yin no zhes bya ba'i bar du ni gong du brgya byin gyis 'dzam bu'i gling de bzhin gshegs pa'i sku gdung gis gang ba bas shes rab kyi pha rol tu phyin pa'i glegs bam gdams la/ don dam par shes rab kyi pha rol tu phyin pa'i rang bzhin la/ bzang ngan du 'byed cing blang dor med pa las/ brgya byin gyis blang dor can gyi chos su byas pa mi rigs par gal bzung nas/ ci'i phyir de ltar blang dor can du sems zhes dris pa'o/ /brgya byin gyis smras pa/ btsun pa sha ra dwa ti'i bu de de bzhin no/ /de de bzhin te zhes bya ba nas/ sbyin pa'i pha rol tu phyin pa ni gnyis su shes par bya ba ma yin te/ sbyin pa'i pha rol tu phyin pa ni mi gnyis pa'o zhes bya ba'i bar du ni gong du shA ri'i bus don dam par shes rab kyi pha rol tu phyin pa chos gang la yang bzang ngan mi phyed cing / blang dor med pa'i yon tan bstan pa'i tshig brgya byin gyis bzlas te/ de de bzhin no zhes smras nas don dam par shes rab kyi pha rol tu phyin pa la sogs pha rol tu phyin pa drug car stong pa nyid du ro gcig pa la gnyis su med de bzang ngan dbye zhing blang dor can du shes par bya ba ma yin no zhes bstan pa'o/ /de nas bcom ldan 'das kyis lha'i dbang po brgya byin la legs so zhes bya ba gnang ste/ kau shi ka legs so legs so de de bzhin te/ ji skad smras pa de bzhin no zhes bya ba nas/ de ci'i phyir zhe na/ kau shi ka de ni 'di ltar sbyin pa'i pha rol tu phyin pa dang / bsam gyis mi khyab pa'i dbyings de la gnyis su med de gnyis su byar med do zhes bya ba'i bar du ni shes rab kyi pha rol tu phyin pa la bzang ngan du dbyer med pa dang / blang dor med pa'i don brgya byin gyis bshad pa la bcom ldan 'das kyis de de bzhin no zhes bstod nas de'i don 'khor rnams kyis bstan par shes par bya ba'i phyir chos kyi dbyings dang / de bzhin nyid dang yang dag pa'i mtha' dang bsam gyis mi khyab pa'i dbyings rnams la gnyis su dbyer med de/ stong pa nyid du ro gcig pa de bzhin du shes rab kyi pha rol tu phyin pa la sogs pa pha rol tu phyin pa drug car la yang gnyis su med pa'i phyir blang dor med pa yin no zhes bcom ldan 'das nyid kyis brnan te bstan pa'o/ /de nas lha'i dbang po brgya byin gyis bcom ldan 'das la 'di skad ces gsol to/ /bcom ldan 'das shes rab kyi pha rol tu phyin pa 'di ni lha dang mi dang lha ma yin du bcas pa'i 'jig rten gyis phyag bgyi bar 'os pa ste zhes bya ba la sogs pa ni de ltar gong du smos pa'i rim pas don dam par shes rab kyi pha rol tu phyin pa la blang dor dang bzang ngan du 'byed pa med du zin kyang / kun rdzob tu shes rab kyi pha rol tu phyin pa la bslabs na/ byang chub sems dpa' rnams dus gsum du mngon par rdzogs par 'tshang rgya bar 'gyur ba dang / lha'i dbang po brgya byin gyi stan la lha rnams mchod cing rim gro byed du 'ong ba'i dpes shes rab kyi pha rol tu phyin pa 'di gang na bris shing 'chad pa la sogs pa byed pa'i phyogs der phyogs bcu'i lha dang klu la sogs pa yang de bzhin gshegs pa dang / nyan thos dang rang sangs rgyas rnams kyang shes rab kyi pha rol tu phyin pa 'di las byung la/ sems can thams cad kyi bde ba'i yo byad thams cad kyang shes rab kyi pha rol tu phyin pa 'di las byung ngo zhes nas mchod cing phyag 'tshal bar 'gyur ba dang / de bzhin gshegs pa'i sku gdung rnams la mchod par 'os par 'gyur ba yang shes rab kyi pha rol tu phyin pa las byung ba'i phyir mchod par 'os par gyur pa dang / byang chub sems dpa' rnams kyis thams cad mkhyen pa'i ye shes brnyes par gyur pa yang shes rab kyi pha rol tu phyin pa 'di bslabs pa las gyur pa'i phyir shes rab kyi pha rol tu phyin pa 'di bris shing bcangs pa la sogs pa bya ba dang / mchod cing rim gro la sogs pa bya bar rigs pa'i gtan tshigs bstan pa ste/ bcom ldan 'das de lta bas na cha de gnyis las bdag ni shes rab kyi pha rol tu phyin pa 'di nyid len to zhes bya ba ni gong du 'dzam bu'i gling de bzhin gshegs pa'i sku gdung gis bkang ba zhig kyang rnyed la/ la la zhig gis shes rab kyi pha rol tu phyin pa 'di glegs bam du bris te byin na de gnyis las gang blang zhes dris pa'i lan mjug bsdus te/ de gnyis las kun rdzob tu shes rab kyi pha rol tu phyin pa 'di nyid len to zhes shes rab kyi pha rol tu phyin pa 'di bris shing bzung ba la sogs pa byas nas bsod nams khyad par du 'phags par che ba'i phan yon bstan pa'o/ /bcom ldan 'das gang gi tshe bdag gis shes rab kyi pha rol tu phyin pa 'di blangs te chos kyi khongs su gtogs pa'i yid kyis kha ton bgyid pa de'i tshe 'jigs pa'am bag tsha ba'i mtshan ma tsam yang / yang dag par rjes su mi mthong ngo zhes bya ba la sogs pa ni shes rab kyi pha rol tu phyin pa 'di blangs te chos zab mo la dad cing yid ches pa'i bsam pas bklags shing kha ton byas na 'jigs shing bag tsha bar 'gyur ba'i rgyu'am mtshan ma tsam yang mi 'byung ba'i phan yon bstan pa ste/ de ltar 'jigs shing bag tsha ba tsam yang mi 'byung ba ni shes rab kyi pha rol tu phyin pa 'di la don dam par mtshan ma dang / rtags dang / brjod pa dang / smos pa med pa'i phyir te/ de la mtshan ma med pa ni rnam par rtog pa'i spros pa thams cad dang bral ba'i phyir ro/ /rtags med pa ni dngos po'i rang bzhin mtshan nyid dang bral ba'i phyir ro/ /brjod du med pa ni tshig gi spyod yul ma yin pa'i phyir ro/ /smos su med pa ni sgra'i rang bzhin ma yin pa'i phyir ro/ /de bzhin du bsam gtan gyi pha rol tu phyin pa la sogs pa rnam pa thams cad mkhyen pa nyid kyi bar du yang sbyar bar bya'o/ /bcom ldan 'das gal te shes rab kyi pha rol tu phyin pa mtshan ma mchis pa zhig lags te mtshan ma mchis pa lags na ni zhes bya ba la sogs pa ni shes rab kyi pha rol tu phyin pa la sogs pa'i chos thams cad mtshan ma med pa'i gtan tshigs bstan pa ste/ de bzhin gshegs pas bla na med pa'i byang chub tu mngon par rdzogs par sangs rgyas pa yang chos thams cad mtshan ma med par rtogs nas sangs rgyas la/ sems can rnams la yang mtshan ma med pa'i chos bstan pa dang sbyar na shes rab kyi pha rol tu phyin pa 'di mtshan ma med par mngon no zhes bstan pa'o/ /bcom ldan 'das de lta bas na shes rab kyi pha rol tu phyin pa 'di ni lha dang mi dang lha ma yin du bcas pa'i 'jig rten gyis zhes bya ba la sogs pa ni de ltar gong du bshad pa'i tshul gyis shes rab kyi pha rol tu phyin pa 'di mtshan ma med pa yin pas 'di 'dzin cing klog pa la sogs pa byed pa la/ 'jigs shing bag tsha ba'i mtshan ma tsam yang mi 'byung ba ste/ de'i phyir lha dang mi dang lha ma yin du bcas pa'i 'jig rten gyis mchod cing bkur sti la sogs pa bya bar 'os pa'i yon tan dang ldan pa bstan pa'o/ /bcom ldan 'das gang la la zhig shes rab kyi pha rol tu phyin pa 'di 'dzin cing 'chang ba dang zhes bya ba nas/ sangs rgyas kyi zhing nas sangs rgyas kyi zhing du mchi bar 'gyur ro zhes bya ba'i bar du shes rab kyi pha rol tu phyin pa 'di 'dzin cing 'chang ba la sogs pa byas pa dang / glegs bam du bris te mchod cing bkur sti byas na ngan song rgyud gsum du mi ltung ba dang / theg pa dman pa'i lta ba can du mi 'gyur ba dang / de bzhin gshegs pa mngon sum du mthong bar 'gyur ba dang / sems can yongs su smin par byed nus pa'i mthu dang ldan par 'gyur ba dang / de bzhin gshegs pa rnams la mchod pa dang / bkur sti byed cing sangs rgyas kyi zhing nas sangs rgyas kyi zhing du 'gro nus pa'i mthu dang ldan par 'gyur ba'i phan yon bstan pa'o/ /bcom ldan 'das gzhan yang gal te stong gsum gyi stong chen po'i 'jig rten gyi khams 'di de bzhin gshegs pa'i sku gdung gis byur bur bltams pa zhig kyang stsal la/ shes rab kyi pha rol tu phyin pa 'di yang bris te stsal na/ bcom ldan 'das dkon mchog de gnyis las bdag ni shes rab kyi pha rol tu phyin pa 'di nyid len to zhes bya ba ni stong gsum gyi stong chen po'i 'jig rten gyi khams de bzhin gshegs pa'i sku gdung gis bkang ste mchod pa'i bsod nams pas kyang shes rab kyi pha rol tu phyin pa 'di bris te mchod pa'i bsod nams che ba'i phan yon bstan pa'o/ /bcom ldan 'das de ci'i slad du zhe na 'di las byung ba ni de bzhin gshegs pa rnams dang / de bzhin gshegs pa'i sku gdung rnams te zhes bya ba nas shes rab kyi pha rol tu phyin pa dang de bzhin gshegs pa gnyis su ma mchis te/ gnyis su bgyir mchis so zhes bya ba'i bar du de bzhin gshegs pa rnams dang / de bzhin gshegs pa'i sku gdung rnams mchod par 'os par gyur pa yang shes rab kyi pha rol tu phyin pa las byung ba'i phyir mchod par 'os par gyur la de bzhin gshegs pa dang / de bzhin gshegs pa'i sku gdung la mchod pa byed pa'i rigs kyi bu'am/ rigs kyi bu mo de dag kyang ngan song du mi ltung zhing mtho ris kyi longs spyod myong nas theg pa gsum gyis yongs su mya ngan 'da' bar 'gyur na/ de dag 'byung ba'i rgyu shes rab kyi pha rol tu phyin pa la mchod cing rim gro byas pa lta smos kyang ci dgos te/ shes rab kyi pha rol tu phyin pa mthong ba ni de bzhin gshegs pa mthong ba dang 'dra ba'i phan yon bstan pa'o/ /bcom ldan 'das gzhan yang gang de bzhin gshegs pa dgra bcom pa yang dag par rdzogs pa'i sangs rgyas kyi cho 'phrul rnam pa gsum la zhugs te zhes bya ba la sogs pa ni de bzhin gshegs pas gsung rab yan lag bcu gnyis bshad pa dang / shes rab kyi pha rol tu phyin pa 'di gzung zhing kun chub par byas te/ gzhan la bstan pa'i bsod nams dang yon tan mtshungs par 'gyur ba'i phan yon bstan pa ste/ de la cho 'phrul gsum ni gzhan gyi yid la ci sems pa mkhyen nas de dang rjes su mthun par chos ston pa dang / rdzu 'phrul sna tshogs kyis sems can rnams yid ches par bya ste chos ston pa dang / bden pa gnyis kyi sgo nas chos thams cad gtan la dbab par bkrol te gdams pa dang tshar bcad pa'i tshul gyis phan pa la gzud pa dang gnod pa las bzlog pa'i phyir chos ston pa ste/ rnam pa 'di gsum ngo mtshar che zhing rmad du byung bas sems can mang po dad cing 'dun par mdzad pas na cho 'phrul gsum zhes bya'o/ /bcom ldan 'das gzhan yang shar phyogs kyi de bzhin gshegs pa dgra bcom pa yang dag par rdzogs pa'i sangs rgyas dang zhes bya ba la sogs pa ni phyogs bcu'i sangs rgyas bcom ldan 'das gang gA'i klung gi bye ma snyed kyis cho 'phrul gsum la gnas te/ gsung rab yan lag bcu gnyis bshad pa dang / rigs kyi bu'am rigs kyi bu mo gang la las shes rab kyi pha rol tu phyin pa 'di la bzung zhing kun chub par byas te/ gzhan la bstan pa gnyis bsod nams mtshungs par 'gyur ba'i phan yon bstan pa'o/ /bcom ldan 'das gzhan yang phyogs bcu'i phyogs re re zhing gang gA'i klung gi bye ma snyed kyi 'jig rten gyi khams kyi de bzhin gshegs pa dgra bcom pa yang dag par rdzogs pa'i sangs rgyas de dag la zhes bya ba nas/ de ci'i slad du zhe na/ 'di las byung ba ni de bzhin gshegs pa dgra bcom pa yang dag par rdzogs pa'i sangs rgyas rnams so zhes bya ba'i bar du ni phyogs bcu'i phyogs re re zhing yang de bzhin gshegs pa gang gA'i klung gi bye ma snyed la mchod pa sna tshogs byas pa dang / shes rab kyi pha rol tu phyin pa 'di glegs bam du bris te mchod pa sna tshogs byas pa gnyis bsod nams mtshungs par 'gyur ba'i phan yon bstan pa'o/ /bcom ldan 'das gzhan yang rigs kyi bu'am rigs kyi bu mo gang shes rab kyi pha rol tu phyin pa 'di 'dzin cing 'chang ba dang / klog cing kun chub par byed pa dang / tshul bzhin yid la bgyid cing gzhan la yang rgya cher ston pa des ni sems can dmyal ba'i rgyud kyi dogs pa ma mchis par bgyi'o zhes bya ba nas/ nad thams cad rab tu sel ba'o zhes bya ba'i bar du ni shes rab kyi pha rol tu phyin pa 'di 'dzin cing 'chang ba la sogs pa byed pa mi tha mal pa ma yin gyi/ sngon gyi dge ba'i rtsa ba bsags pas phyir mi ldog pa'i sa la gnas pa yin par rig par bya ste/ de ni ngan song rgyud gsum dang theg pa dman par mi ltung zhing 'jigs pa thams cad dang nad thams cad sel ba'i phan yon bstan pa'o/ /bcom ldan 'das gzhan yang rigs kyi bu'am rigs bu mo gang shes rab kyi pha rol tu phyin pa 'di bris shing 'dzin pa dang zhes bya ba nas/ 'di las byung ba ni de bzhin gshegs pa'i rnam pa thams cad mkhyen pa nyid kyi bar du ste zhes bya ba'i bar du ni shes rab kyi pha rol tu phyin pa 'di bris shing 'dzin pa la sogs pa byas na 'jigs pa med par 'gyur ba'i dpe mi phyug po rgyal po la bstan pa las blangs te bstan pa dang / de bzhin gshegs pa'i sku gdung dang de bzhin gshegs pa'i thams cad mkhyen pa'i ye shes la sogs pa yang shes rab kyi pha rol tu phyin pa las byung bar mchod pa'i gnas su gyur pa'i phyir de dag gang bas kyang shes rab kyi pha rol tu phyin pa 'di nyid mchog tu gyur pa'i phan yon bstan pa'o/ /bcom ldan 'das grong ngam grong khyer ram/ grong rdal lam zhes bya ba nas/ 'jig rten gyi khams der ni sangs rgyas 'byung ba dang 'dra bar blta'o zhes bya ba'i bar du ni shes rab kyi pha rol tu phyin pa 'di yul phyogs gang na bris te 'chang ba la sogs pa byed pa'i yul phyogs der mi'am mi ma yin pa la sogs pa'i gnod pa mi 'byung ba dang / 'dzin cing 'chang ba'i mi de theg pa gsum gyis yongs su mya ngan las 'da' ba'i skal ba can du 'gyur ba dang / shes rab kyi pha rol tu phyin pa 'di sems can rnams la sangs rgyas kyi don sgrub par mdzad pa dang / shes rab kyi pha rol tu phyin pa 'di gang na bzhugs pa'i 'jig rten gyi khams de na sangs rgyas mngon sum du bzhugs pa dang 'dra ba'i phan yon rnams bstan pa'o/ / bcom ldan 'das 'di lta ste/ dper na nor bu rin po che chen po mi dpogs rin chen bgyi ba mchis te zhes bya ba nas/ bcom ldan 'das shes rab kyi pha rol tu phyin pa 'di yang lha rdzas kyi nor bu rin po che chen po de dang 'dra bar yon tan thams cad kyi 'byung gnas su gyur pa ste sdig p a thams cad sel ba'o zhes bya ba'i bar du ni de ltar gong du smos pa'i rim pas shes rab kyi pha rol tu phyin pa 'di sangs rgyas 'jig rten du byung ba dang 'dra bar sems can gyi don rnam pa sna tshogs phun sum tshogs par 'gyur ba'i dpe lha rdzas kyi nor bu rin po che las blangs te bstan pa ste/ lha rdzas kyi nor bu rin po che de gang du bzhag pa'i sa phyogs der mi ma yin pa'i gnod pa thams cad kyis mi tshugs pa dang / nor bu rin po che de mthong na nad rnam pa sna tshogs dang / mi dge ba rnam pa sna tshogs med par 'gyur ba dang / nor bu rin po che de gang du bzhag par mun pa las snang bar 'gyur ba dang / tsha ba las bsil bar 'gyur ba dang / grang ba las dro bar 'gyur ba dang / sems can gdug pa rnams med par 'gyur ba dang / chu'i nang du bcug na yang chu'i rnyog ma thams cad dngas par 'gyur ba dang / nor bu rin po che de gos sna tshogs kyis dkris te chur bcug na yang nor bu rin po che de'i mthu dang byin gyis chu de gos de dang kha dog 'dra bar 'gyur ba de bzhin du shes rab kyi pha rol tu phyin pa 'di yang sems can thams cad kyi gnod pa thams cad sel ba yin no zhes bstan pa'o/ /de nas tshe dang ldan pa dga' bos lha'i dbang po brgya byin la 'di skad ces smras so zhes bya ba nas/ 'dzam bu'i gling gi nor bu rin po che de dag gis ni lha rdzas kyi nor bu rin po che de'i grangs sam cha'am/ bgrang bar ram/ dpe'am rgyur nye bar mi 'gro'o zhes bya ba'i bar du ni shes rab kyi pha rol tu phyin pa yon tan phun sum tshogs pa'i dpe nor bu rin po che las blangs pa mi yul gyi nor bu rin po che phal ma yin gyi lha rdzas kyi nor bu rin po che ste/ nor bu rin po che de phal las khyad par du 'phags pa bstan pas shes rab kyi pha rol tu phyin pa 'di yang sbyin pa'i pha rol tu phyin pa la sogs pa sangs rgyas kyi chos thams cad las khyad par du 'phags shing / sems can thams cad kyi don sgrub pa yin no zhes bstan pa'o/ /de nas lha'i dbang po brgya byin gyis bcom ldan 'das la 'di skad ces gsol to/ /bcom ldan 'das nor bu rin po che de snod la la zhig tu stsal ba las/ snod de nas byung yang snod de ni nor bu rin po che de'i yon tan gyis yid du mchi bar 'gyur te/ gzhan yang snod de la mos pa skyed do zhes bya ba nas/ bcom ldan 'das de bzhin gshegs pa'i sku gdung de dag ni pha rol tu phyin pa rin po che'i snod de/ de bas na de bzhin gshegs pa'i sku gdung de dag ni mchod pa mnga'o zhes bya ba'i bar du ni shes rab kyi pha rol tu phyin pa la sogs pa rtag tu btang snyoms la gnas pa dang / mi nyal ba'i chos nyid la thug gi bar gyi sangs rgyas kyi chos rnams kyi yon tan tshad med cing brjod kyis mi lang bas chos de dag gi gzhi dang snod du gyur pa de bzhin gshegs pa'i sku gdung yang mchod par 'os pa yin na chos de dag nyid lta smos kyang ci dgos zhes nor bu rin po che'i snod las dpe blangs te shes rab kyi pha rol tu phyin pa'i yon tan che ba bstan pa'o/ /bcom ldan 'das de bzhin gshegs pa'i sku gdung de dag ni pha rol tu phyin pa kun nas nyon mongs pa ma mchis pa dang / rnam par byang ba ma mchis pa'i snod de zhes bya ba nas/ de bas na de bzhin gshegs pa mya ngan las 'das kyang / de bzhin gshegs pa'i sku gdung de dag ni mchod pa mnga'o zhes bya ba'i bar du ni de bzhin gshegs pa'i sku gdung de dag shes rab kyi pha rol tu phyin pa kun nas nyon mongs pa dang rnam par byang ba med pa dang / skye ba dang 'gag pa med pa dang / blang ba dang dor ba med pa dang / dbri ba dang bsnan pa med pa dang / 'ong ba dang 'gro ba med pa dang / chos nyid kyi rang bzhin du gyur pa zab mo de lta bu'i snod dang gzhi yin zhing chos zab mo de lta bu'i bag chags yod pa'i phyir de bzhin gshegs pa mya ngan las 'das kyang sku gdung de dag la mchod pa'i gnas su gyur pa bstan pa'i sgo nas shes rab kyi pha rol tu phyin pa zab cing gnyis su med pa'i yon tan bstan pa'o/ /gzhan yang stong gsum gyi stong chen po'i 'jig rten gyi khams de bzhin gshegs pa'i sku gdung gis byur bur yongs su bltams pa lta zhog gi zhes bya ba nas/ de bzhin gshegs pa'i sku gdung rnams la yang rim gro dang / bkur sti dang phu dud dang mchod pa bgyis par 'gyur ro zhes bya ba'i bar du ni phyogs bcu'i 'jig rten gyi khams gang gA'i klung gi bye ma snyed de bzhin gshegs pa'i sku gdung gis byur bur bkang ste/ mchod cing bkur sti byas pa bas/ shes rab kyi pha rol tu phyin pa 'di bzung zhing bcangs pa la sogs pa'i bsod nams dang phan yon che ba gtan tshigs dang bcas par bstan pa ste/ de bzhin gshegs pa'i sku gdung rnams kyang shes rab kyi pha rol tu phyin pa las byung ba yin la/ de bzhin gshegs pa'i sku gdung la mchod cing bkur sti byas pas ni/ lha dang mi'i bde ba phun sum tshogs pa myong nas/ dge ba'i rtsa ba yongs su ma rdzogs par mya ngan las 'da' bar gyur pa tsam du zad kyi/ shes rab kyi pha rol tu phyin pa 'di bzung zhing bcang ba la sogs pa'i phan yon ni pha rol tu phyin pa drug la sogs pa sangs rgyas kyi chos thams cad yongs su rdzogs par 'gyur ba dang lha dang mi'i bde ba phun sum tshogs pa myong nas/ sems can yongs su smin par bya ste/ nyan thos dang rang sangs rgyas kyi sa las 'das nas/ byang chub sems dpa'i sa la 'jug pa dang / byang chub sems dpa'i spyod pa mngon par shes pa la sogs pa yongs su rdzogs par byed cing sangs rgyas kyi zhing nas sangs rgyas kyi zhing du 'gro ba dang / sangs rgyas kyi chos thams cad kyi rgyu shin tu bstsags pa dang / lha dang mi'i phun sum tshogs pa thams cad dang ldan la/ de bzhin gshegs pa'i sku gdung rnams la yang mchod cing bkur sti byas par 'gyur te/ de ltar shes rab kyi pha rol tu phyin pa bzung zhing bcangs pa la sogs pa'i phan yon ni sangs rgyas kyi chos thams cad yongs su rdzogs par 'gyur ba dang / bdag dang gzhan gyi don phun sum tshogs par 'gyur ba'i phyir che'i de bzhin gshegs pa'i sku gdung la mchod cing bkur sti byas pa ni bdag 'ba' zhig gi don du 'gyur bas/ de lta ma yin no zhes bstan pa'o/ /bcom ldan 'das gzhan yang phyogs bcu'i 'jig rten gyi khams tshad dang grangs ma mchis pa dag na zhes bya ba nas/ de bas na rigs kyi bu'am rigs kyi bu mo shes rab kyi pha rol tu phyin pa la spyod pa des chos nyid du sangs rgyas rjes su dran pa bsgom par bgyi'o zhes bya ba'i bar du ni shes rab kyi pha rol tu phyin pa 'di bzung zhing bcang ba la sogs pa byas na/ phyogs bcu'i 'jig rten gyi khams tshad med grangs med pa dag na bzhugs pa'i de bzhin gshegs pa rnams kyi sku rnams mthong ba dang / mchod pa byas par 'gyur ba'i phan yon bstan pa ste/ de la chos kyi sku ni chos kyi dbyings rnam par mi rtog pa'i rang bzhin no/ /gzugs kyi sku ni longs spyod rdzogs pa'i sku dang sprul pa'i sku'o/ /ye shes kyi sku ni me long lta bu'i ye shes dang mnyam pa nyid kyi ye shes dang / so sor rtog pa'i ye shes dang / bya ba grub pa'i ye shes kyi rang bzhin no/ /chos nyid du sangs rgyas rjes su dran pa bsgom par bgyi'o zhes bya ba ni shes rab kyi pha rol tu phyin pa zab mo 'di bsgoms na sangs rgyas kyi chos kyi sku dang / ye shes kyi sku bsgom par 'gyur ro zhes bstan pa'o/ /bcom ldan 'das gzhan yang rigs kyi bu'am rigs kyi bu mo de bzhin gshegs pa dgra bcom pa yang dag par rdzogs pa'i sangs rgyas de dag mthong bar 'tshal bas zhes bya ba nas/ 'dus ma byas chos rnams kyi chos nyid do zhes bya ba'i bar du ni gong du chos nyid du sangs rgyas rjes su dran pa bsgom par bgyi'o zhes brgya byin gyis smras pa chos nyid gang yin pa zhib tu bshad pa'i gleng bslang ba'i phyir brgya byin gyis smras pa'o/ /bcom ldan 'das gnyis po 'di dag ni chos nyid de gnyis gang zhe na/ 'dus byas chos rnams kyi chos nyid dang / 'dus ma byas chos rnams kyi chos nyid do zhes bya ba ni chos nyid ces bya ba de yang ye shes kyi rang bzhin gyi 'dus byas kyi mtshan nyid dang / chos thams cad skye ba dang 'gag pa med pa'i rang bzhin stong pa nyid kyi chos nyid kyi mtshan nyid yin no zhes bya ba mdor bstan pa'o/ /bcom ldan 'das de la 'dus byas chos rnams kyi chos nyid gang lags she na/ nang stong pa nyid kyi ye shes dang zhes bya ba nas 'jig rten las 'das pa'i chos thams cad kyi ye shes gang lags pa de ni 'dus byas chos rnams kyi chos nyid ces bya'o zhes bya ba'i bar du ni ye shes kyi rang bzhin 'dus byas kyi chos nyid bstan pa ste/ stong pa nyid bco brgyad la sogs pa sangs rgyas kyi chos thams cad dang / dge ba dang mi dge ba dang / zag pa dang bcas pa dang / zag pa med pa dang / 'jig rten dang 'jig rten las 'das pa'i chos rnams la dmigs pa'i ye shes rnam par rtog pa dang bcas pa la 'dus byas kyi chos nyid ces bya'o zhes bstan pa'o/ /de la 'dus ma byas chos rnams kyi chos nyid gang lags she na zhes bya ba nas 'di ni 'dus ma byas chos rnams kyi chos nyid ces bgyi'o zhes bya ba'i bar du ni 'dus ma byas kyi chos nyid bstan pa ste/ don dam par chos thams cad skye ba dang 'gag pa la sogs pa med pa nyid 'dus ma byas kyi chos nyid ces bya'o zhes bstan pa'o/ /bcom ldan 'das kyis bka' stsal pa/ kau shi ka de de bzhin no/ /de de bzhin te zhes bya ba nas/ rang byang chub thob po 'thob po 'thob par 'gyur ro zhes bya ba'i bar du ni de ltar shes rab kyi pha rol tu phyin pa 'di bzung zhing bcangs na chos nyid du sangs rgyas rjes su dran par 'gyur ba de bden te/ dus gsum gyi sangs rgyas bcom ldan 'das rnams dang / nyan thos dang rang sangs rgyas rnams kyis so so'i 'bras bu thob par 'gyur ba yang shes rab kyi pha rol tu phyin pa 'di nyid la brten te thob par gyur to zhes bstan pa'o/ /de ci'i phyir zhe na/ 'di ltar shes rab kyi pha rol tu phyin pa 'di las theg pa gsum po thams cad rgya cher bstan te zhes bya ba nas/ de yang 'jig rten gyi tha snyad kyi tshul gyis bstan gyi don dam par ni ma yin no zhes bya ba'i bar du ni dus gsum gyi sangs rgyas bcom ldan 'das la sogs pas shes rab kyi pha rol tu phyin pa 'di la brten te so so'i 'bras bu thob par yang shes rab kyi pha rol tu phyin pa 'di'i don mtshan ma med pa dang / dmigs su med pa la sogs par rtogs nas so so'i 'bras bu thob par gyur to zhes bstan pa'o/ /de ci'i phyir zhe na/ shes rab kyi pha rol tu phyin pa 'di ring du song ba ma yin zhes bya ba nas/ so so'i skye bo'i chos rnams 'dor ba ma yin no zhes bya ba'i bar du ni shes rab kyi pha rol tu phyin pa 'di don dam par pha rol dang tshu rol la sogs pa'i mtshan ma thams cad dang bral ba bstan pa'o/ /brgya byin gyis gsol pa bcom ldan 'das shes rab kyi pha rol tu phyin pa 'di ni pha rol tu phyin pa chen po ste zhes bya ba nas/ shes rab kyi pha rol tu phyin pa ni dmigs pa'i tshul du nye bar gnas pa ma lags so zhes bya ba'i bar du ni shes rab kyi pha rol tu phyin pa 'di la spyod pa bas kun rdzob tu sems can thams cad kyi sems dang spyod pa thams cad kyang shes la/ don dam par sems can dang / sems can du gdags pa'i tha snyad la sogs par yang dmigs pa med par 'gyur te/ de ltar bdag dang sems can la sogs pa mu stegs can gyis brtags pa'i gang zag rnams la bdag med par rtogs te/ gang zag du mi dmigs pa dang gzugs la sogs pa'i chos thams cad la bdag med par rtogs pas chos su mi dmigs te/ de ltar gang zag dang chos gnyi ga la bdag med par rtogs shing / mi dmigs pa'i rgyu yang yin la/ kun rdzob tu sems can thams cad kyi sems dang spyod pa thams cad shes par 'gyur ba'i rgyu yang yin te/ kun rdzob dang don dam pa gnyi ga'i yon tan che ba'i phyir/ shes rab kyi pha rol tu phyin pa 'di pha rol tu phyin pa chen po yin no zhes bstan pa'o/ /de ci'i slad du zhe na/ de ni 'di ltar gang gis dmigs par bgyi ba dang / gang la dmigs par bgyi ba dang / gang du dmigs par bgyi ba de lta bu'i ngo bo nyid de la ma mchis so zhes bya ba ni gang zag dang chos gnyi ga la mi dmigs pa'i gtan tshigs bstan pa ste/ mtshan mar 'dzin cing dmigs par byed pa'i byang chub sems dpa' gang yin pa dang / gang la dmigs par bya ba'i shes rab kyi pha rol tu phyin pa dang / 'jig rten gyi khams gang du dmigs par bya ba'i dngos po de lta bu don dam par med pa'i phyir shes rab kyi pha rol tu phyin pa ni dmigs pa'i tshul du nye bar gnas pa ma lags so zhes bya ba dang sbyar ro/ /bcom ldan 'das kyis bka' stsal pa/ kau shi ka de de bzhin te/ de de bzhin no/ /byang chub sems dpa' sems dpa' chen po des mi dmigs pa'i tshul du shes rab kyi pha rol tu phyin pa yun ring por spyad pas des byang chub kyang mi dmigs na/ sangs rgyas lta ci smos/ sangs rgyas kyi chos lta yang ci smos zhes bya ba ni gong du brgya byin gyis chos thams cad dmigs su med pa'i don bshad pa de bden no zhes bstod nas/ byang chub sems dpa' shes rab kyi pha rol tu phyin pa la spyod pa des tshe rabs snga ma la yang dmigs su med pa'i don yun ring du bshad pas/ byang chub sems dpa' rnams kyis don du gnyer ba'i mchog bla na med pa'i byang chub kyang mi dmigs na/ de las gzhan yang sangs rgyas dang / sangs rgyas kyi chos la sogs pa gzhan la mi dmigs pa lta smos kyang ci dgos zhes chos thams cad la mi dmigs pa'i don mjug bsdus te bstan pa'o/ /brgya byin gyis gsol pa/ bcom ldan 'das byang chub sems dpa' sems dpa' chen po shes rab kyi pha rol tu phyin pa la spyod kyi/ de ma lags pa'i pha rol tu phyin pa gzhan la mi spyod dam zhes bya ba ni/ gong du shes rab kyi pha rol tu phyin pa'i yon tan cher bshad pa brgya byin gyis thos nas/ 'khor rnams kyi the tshom bsal ba dang / pha rol tu phyin pa drug car 'khor gsum yongs su dag par spyad pa'i gleng bslang ba'i phyir brgya byin gyis zhus pa'o/ /bcom ldan 'das kyis bka' stsal pa/ kau shi ka byang chub sems dpa' sems dpa' chen po ni pha rol tu phyin pa drug po kun la yang de mi dmigs pa'i tshul gyis spyod do zhes bya ba nas shes rab kyang mi dmigs/ shes rab dang ldan pa yang mi dmigs/ shes rab 'chal ba yang mi dmigs so zhes bya ba'i bar du ni pha rol tu phyin pa drug car la 'khor gsum yongs su dag par spyod kyi/ shes rab kyi pha rol tu phyin pa 'ba' zhig la spyod pa ma yin no zhes brgya byin gyis zhus pa'i lan bcom ldan 'das kyis bka' stsal pa'o/ /kau shi ka 'on kyang shes rab kyi pha rol tu phyin pa ni gzugs mi dmigs pa'i tshul dang zhes bya ba nas shes rab kyi pha rol tu phyin pa ni/ byang chub sems dpa' sems dpa' chen po chos rnam par lta ba'i shes rab kyi pha rol tu phyin pa yongs su rdzogs par bya ba la sngon du 'gro ba'o zhes bya ba'i bar du ni pha rol tu phyin pa drug 'khor gsum yongs su dag pas yongs su rdzogs par byed pa yang shes rab kyis chos thams cad mi dmigs par rtogs par 'gyur bas na shes rab kyi pha rol tu phyin pa ni pha rol tu phyin pa kun gyi gtso bo yin par bstan pa'o/ /kau shi ka 'di lta ste dper na 'dzam bu'i gling gi shing rnams lo ma sna tshogs can zhes bya ba nas khyad par ram bye brag mi dmigs so zhes bya ba'i bar du ni shes rab kyi pha rol tu phyin pa/ pha rol tu phyin pa gzhan pas gtso bo yin pa'i dpe shing dang grib ma las blangs te bstan pa ste/ shing gi kha dog dang dbyibs la sogs pa sna tshogs las ni/ shing gi ming dang / rigs bye brag tu dbyer rung gi / shing de dag la brten te 'byung ba'i grib ma rnams la ni/ shing gi rigs dang ming gi bye brag dbyer mi rung ba de bzhin du shes rab kyi pha rol tu phyin pa ni shing dang 'dra ste gtso bo yin gyi/ pha rol tu phyin pa gzhan rnams ni grib ma dang 'dra ste/ shes rab kyi pha rol tu phyin pa'i rgyu las byung ba'o zhes bstan pa'o/ / brgya byin gyis gsol pa/ bcom ldan 'das shes rab kyi pha rol tu phyin pa ni yon tan thams cad yongs su rdzogs par bgyid pa'i slad du/ yon tan chen po dang ldan pa'o zhes bya ba nas/ yon tan kun du mtha' yas pa dang ldan pa'o zhes bya ba'i bar du ni de ltar shes rab kyi pha rol tu phyin pa de pha rol tu phyin pa thams cad kyi gtso bo yin pas/ yon tan chen po dang ldan pa dang / yon tan tshad med pa dang ldan pa dang / yon tan kun du mtha' yas pa dang ldan pa bstan pa'o/ /bcom ldan 'das rigs kyi bu'am rigs kyi bu mo la la zhig gis shes rab kyi pha rol tu phyin pa 'di bris shing glegs bam du bgyis te zhes bya ba nas/ gang la las shes rab kyi pha rol tu phyin pa 'di bris te/ chos kyi dga' bas gzhan la byin na rigs kyi bu'am/ rigs kyi bu mo de'i bsod nams cher 'phel bar 'gyur ro zhes bya ba'i bar du ni/ shes rab kyi pha rol tu phyin pa 'di bris shing glegs bam du byas te/ bdag gis bcangs shing spyad pa bas kyang / glegs bam du bris te gzhan la byin pa bsod nams che ba de bzhin gshegs pa'i sku gdung la bdag gis mchod pa byas pa bas/ gzhan la byin te mchod pa byed du bcug na/ bsod nams che ba las dpe blangs nas shes rab kyi pha rol tu phyin pa 'di gzhan la byin te spyod du bcug pa bsod nams che ba bstan pa'o/ /kau shi ka gzhan yang rigs kyi bu'am rigs kyi bu mo la las shes rab kyi pha rol tu phyin pa ji skad du bstan pa bzhin du gzhan gyi drung du song ste/ bshad cing bstan pa dang zhes bya ba nas shes rab kyi pha rol tu phyin pa 'di bris te/ me tog dang / phreng ba dang / spos dang / byug pa dang / phye ma dang / na bza' dang / gdugs dang / rgyal mtshan dang / ba dan dang / sil snyan sna tshogs kyis rim gror bya'o/ /bkur stir bya'o/ /phu dud du bya'o/ /mchod par bya'o zhes bya ba'i bar du ni shes rab kyi pha rol tu phyin pa 'di 'dzin cing 'chang ba la sogs pa byas pa dang / glegs bam du bris te/ gzhan la byin pa'i bsod nams dang phan yon snga ma bas kyang don dang tshig gzhan la bstan cing bkrol te gsal bar byas pa'i phan yon bsod nams dang phan yon che ba bstan pa ste/ de ltar ston pa phan yon che ba'i gtan tshigs kyang de ltar ston pa'i byang chub sems dpa' de sangs rgyas bcom ldan 'das dang 'dra bar ston pa'i bya ba byed pa dang / don dam par bstan par bya ba'i shes rab kyi pha rol tu phyin pa dang / ston par byed pa'i byang chub sems dpa' de gnyis tha mi dad pa bstan pa dang / shes rab kyi pha rol tu phyin pa 'di la bslabs pas/ dus gsum gyi sangs rgyas dang / byang chub sems dpa' dang / nyan thos dang / rang sangs rgyas rnams kyis so so'i 'bras bu thob par gyur pa yang / shes rab kyi pha rol tu phyin pa 'di bstan cing bshad pa las thob par gyur pa'i phyir/ de ltar bshad pa bsod nams cher 'phel lo zhes bstan pa'o/ /kau shi ka ngas don de nyid kyi dbang yang dag par mthong ste/ bla na med pa yang dag par rdzogs pa'i byang chub tu mngon par rdzogs par sangs rgyas nas zhes bya ba nas/ nyan thos kyi theg pa pa'i rigs kyi bu'am/ rigs kyi bu mo dang / rang sangs rgyas kyi theg pa pa'i rigs kyi bu'am/ rigs kyi bu mo de dag gis shes rab kyi pha rol tu phyin pa 'di nyid la me tog dang / phreng ba dang / spos dang / byug pa dang / phye ma dang / na bza' dang / gdugs dang / rgyal mtshan dang / ba dan dang / sil snyan sna tshogs kyis rim gror bya ba dang / bkur stir bya ba dang / phu dud du bya ba dang / mchod par bya ba lta ci smos zhes bya ba'i bar du ni/ de bzhin gshegs pa mngon par sangs rgyas pas chos gang la mchod cing brten par bya snyam du dgongs na yang / shes rab kyi pha rol tu phyin pa 'di la brten te/ bdag gis mngon par sangs rgyas par gyur pas/ 'di nyid la ngas rim gro dang / bkur sti la sogs pa bya'o snyam du bsams te/ 'jig rten nang dang 'dra ba'am/ nga las lhag pa su yang med de/ nga lta bu yang shes rab kyi pha rol tu phyin pa 'di la rim gro dang / bkur sti bya bar sems na de las gzhan pa bla na med pa'i byang chub thob par 'dod pa dang / nyan thos dang / rang sangs rgyas kyi theg pa la zhugs pa rnams kyis mchod cing / bkur sti la sogs pa bya ba lta smos kyang ci dgos te/ de lta bu'i don chen po gzigs nas/ don de nyid dbang du bya ste/ shes rab kyi pha rol tu phyin pa 'di la/ mchod cing rim gro la sogs pa lhag par bya ba bstan pa'o/ /de ci'i phyir zhe na/ shes rab kyi pha rol tu phyin pa las byung ba ni/ byang chub sems dpa' sems dpa' chen po rnams so zhes bya ba nas/ rang sangs rgyas kyi theg pa pa rnams kyis/ rang sangs rgyas kyi byang chub thob bo 'thob bo/ /'thob par 'gyur ro zhes bya ba'i bar du'o/ /shes rab kyi pha rol tu phyin pa 'di theg pa gsum char gyi/ rgyu'i gtso bo yin pas/ de'i phyir mchod cing bkur sti la sogs pa byas na bsod nams lhag par che'o zhes bstan pa'o/ /shes rab kyi pha rol tu phyin pa 'bum pa rgya cher bshad pa las le'u nyi shu gsum pa'o// //

CLOSE WINDOW