བོད་ཡིག

e-texts based on the ACIP/ALL Input

/rgya gar skad du/ Ar+ya aSh+Ta sa ha sri ka pradz+nyA pA ra mi tA pany+dzi ka sA rot+ta ma nA ma/ bod skad du/ 'phags pa shes rab kyi pha rol tu phyin pa brgyad stong pa'i dka' 'grel snying po mchog ces bya ba/ phyogs bcu mtha' yas pa na rnam par bzhugs pa'i sangs rgyas dang byang chub sems dpa' rnams la phyag 'tshal lo/ /gang zhig nyi ma mang po phun sum tshogs pa ji srid du/ /'char dang nub pas 'jig rten nyin dang mtshan mor 'gyur ba yin/ /yul rnams so sor khyab par byed pa dag ldan thogs med pa'i/ /sangs rgyas rtogs pa'i yon tan gces gter khyed la 'byung gyur cig / yi ge gang zhig rna lam du/ /cung zad 'dzin par byed pa yang / /byang chub sa bon 'gyur ba yi/ /rgyal ba'i yum 'di rgyal gyur cig /khyab bdag byams pa gang gi rgyan gyi rang bzhin grus ni gang zhig rgya chen po/ /mang po'i don gyi rgya mtsho mnyam par rang gi yan lag dag gis gtan la phab/ /shes rab pha rol phyin pa'i gzhung lugs chen po gang yin de ni brgyad stong pa/ / rin chen 'byung gnas dman pa'i tshig nyung shin tu gsal bas rnam par bshad par bya/ /ci ste yang ci'i phyir 'di bshad ce na/ bcom ldan 'das kyi gsung rab kyi nang na/ mdo sde rin po che nyid yin pa'i phyir te/ de'i phyir gsung rab ni bcu gnyis te/ mdo'i sde dang / dbyangs kyis bsnyad pa'i sde dang / lung bstan pa dang / tshigs su bcad pa dang / ched du brjod pa dang / gleng gzhi dang / rtog pa brjod pa dang / de lta bu byung ba dang / skyes pa'i rabs dang / shin tu rgyas pa dang / rmad du byung ba'i chos dang / gtan la dbab pa dag go/ /de la mdo'i sde gang zhe na/ gang tshig rkyang pas zab pa'i don ston pa'o/ /dbyangs kyis bsnyad pa gang zhe na/ mdo sde gang yin pa de la bar dang tha mar tshigs su bcad pa brjod pa'o/ /gang yang drang ba'i don gyi mdo sde de yang dbyangs kyis bsnyad pa yin te/ rtogs par bya ba yin pa'i phyir ro/ /lung bstan pa gang zhe na/ gang du nyan thos 'das shing dus byed par 'gyur ba skye ba'i lung bstan pa'o/ /gang yang nges pa'i don gyi mdo sde gsal bar dgongs pas bstan pa yang yin no/ /tshigs su bcad pa gang zhe na/ tshigs su bcad pa bshad pa gang yin pa ste/ tshig rkang gnyis dang / tshig rkang gsum dang / tshig rkang bzhi dang / tshig rkang lnga dang / tshig rkang drug go/ /ched du brjod pa gang zhe na/ /gang yi rang ba nas brjod pa'o/ /gleng gzhi gang zhe na/ gang bstan pa brjod pa'am/ byung ba dang bcas pa'i bslab pa bcas pa brjod pa'o/ /rtog pa brjod pa gang zhe na/ dpe dang bcas pa brjod pa'o/ /de lta bu byung ba gang zhe na/ sngon gyi sbyor ba dag dang ldan pa'o/ /skyes pa'i rabs gang zhe na/ byang chub sems dpa'i spyod pa dang ldan pa'o/ /shin tu rgyas pa gang zhe na/ byang chub sems dpa'i sde snod dang ldan pa ste/ sems can thams cad la phan pa dang / bde ba'i gnas yin pa'i phyir ro/ /rmad du byung ba'i chos gang zhe na/ gang du nyan thos dang / byang chub sems dpa' dang / sangs rgyas rnams kyi ngo mtshar rmad du byung ba'i chos bstan pa'o/ / gtan la dbab pa gang zhe na/ gang du phyin ci ma log pa'i chos kyi mtshan nyid bstan pa ste/ de ltar bstan pa de dag gi nang na 'di ni bcom ldan 'das kyi mdo sde rin po che ste/ skyes bu dam pa'i don sgrub pa dang / zab pa dam pa'i chos thams cad kyi rnam pa ston pa'i phyir ro/ / de nas ci tsam gyis 'di'i brjod par bya ba'i don te/ de yang gang yin zhes bya ba ni dri ba'o/ /bstan bcos las/ shes rab pha rol phyin pa ni/ /dngos po brgyad kyis yang dag bshad/ /rnam kun mkhyen nyid lam shes nyid/ /de nas thams cad mkhyen pa nyid/ rnam kun mngon rdzogs rtogs pa dang / /rtse mor phyin dang mthar gyis pa/ /skad cig gcig mngon rdzogs byang chub/ /chos kyi sku dang de rnams brgyad/ /de rnams zhes bya ba ni rnam pa rang gi don la d+hA'i rkyen bya ba yin te/ de dag ni brgyad po 'di dag go zhes bya ba'i don to/ /byang chub la mngon par phyogs shing yang dag par rtogs pa ni mngon par yang dag par rtogs pa'o/ /des na de nyid kyi phyir mngon par rtogs pa ste/ de dag gis ni rtogs pa'i don nyid kyi phyir ro/ /ji ltar 'di mngon par rtogs pa yin zhe na/ gang gi phyir rnam pa bdun gyis tha mi dad par 'gro zhing thob pa'i phyir ro/ /rtse mo ni rab kyi mtha'o/ /de thob pa ni rtse mor phyin pa'o/ /mthar gyis pa ni go rims te/ de dang ldan pa ni mthar gyis pa'o/ /gnyi gar yang mngon par rtogs pa zhes bya ba rjes su 'brang ngo / /yang 'di'i bsdus pa'i don drug yin pa'i phyir yang bstan bcos las/ mtshan nyid de yi sbyor ba dang / /de'i rab de ni go rims dang / /de'i mtha' de yi rnam smin ni/ /don bsdus gzhan te rnam pa drug /gang gi phyir dang po thams cad mkhyen pa nyid rnam pa gsum ni shes rab kyi pha rol tu phyin pa de'i mtshan nyid do/ /de nas bzhi ni 'di'i sbyor ba dang / sbyor ba'i rab dang / sbyor ba'i go rims dang / sbyor ba'i mthar thug pa'o/ /de nas chos sku mdzad pa dang bcas pa de ni 'di'i rnam par smin pa ste/ gtso bo'i 'bras bu zhes bya ba'i don to/ /yang bstan bcos las/ yul gyi rgyu ni gsum dag dang / /sbyor ba bzhi yi bdag nyid dang / /chos sku phrin las 'bras bu ni/ /don bsdus gzhan te rnam pa gsum/ /yang na 'di'i bsdus pa'i don gsum ste/ 'di ltar thams cad mkhyen pa nyid rnam pa gsum ni sbyor ba'i yul te de'i rgyu'o/ / yul can sbyor ba bzhi'i bdag nyid de/ rnam pa kun mngon par rtogs pa la sogs pa'o/ /rgyu de'i 'bras bu ni chos kyi sku ste de nyid las so/ /de nyid la brgyad dam/ drug gam/ gsum ni mdo 'di'i don to/ /kha cig ni thams cad kyang gtsor don gcig nyid do/ /gzhan du na ngag gcig tu yang mi 'gyur te/ le'u bcu la sogs pa'i tshig gi tshogs bzhin no/ /phan tshun yan lag gi don gyis mngon par rtogs pa gcig don du nye bar sbyor ba'i phyir te/ de bas na 'grel pa dang ldan pa dang / rjes su mthun pa'i thabs dang ldan pas yang dag par rdzogs pa'i byang chub ni 'dir gtso bo yin no zhes brjod do/ /de ni bden pa ma yin te/ gang gi phyir yang dag par rdzogs pa'i byang chub ni nyan thos kyi sde snod las kyang rab tu rtogs pa nyid de/ shes par 'dod pa'i phyir ro/ shes rab kyi pha rol tu phyin pa ni mi rtogs pa nyid do/ / shes par 'dod pa med pa'i phyir ro/ /de bas na de nyid gtso bor brjod par bya ba yin no/ /'di ni mos par dka' ba ste thob pa yin pa'i phyir bcom ldan 'das kyi bka' la yang mos par byed pa yin no/ /de'i phyir yang 'di gtsor bcom ldan 'das kyis gsungs par bya ba yin te/ ji lta ji ltar 'di la mos pa de lta de ltar byang chub la nye bar 'gyur te/ de bas na 'di gtsor brjod par bya ba yin no/ /mngon par rtogs pa brgyad po dag la snying po ji lta ba bzhin du 'di rgya cher brjod na ji ltar gtso bor brjod/ shes rab kyi pha rol tu phyin pa nyid ni yang dag par rdzogs pa'i byang chub kyi lam ste/ lhag ma yang de nyid lam du byed pa'i phyir ro/ /de bas na de ltar 'di brjod pas ni shin tu yang gtso bor brjod pa ma yin no/ /de ltar rgya cher spros pas ni chog go/ /de nyid kyi phyir shes rab kyi pha rol tu phyin pa ni mdo sde 'dir gtsor bstan pa yin te/ yang dag par rdzogs pa'i byang chub ni ma yin no/ /de ltar na shes rab kyi pha rol tu phyin pa 'di nyid la 'bras bu dang bcas pas/ sbyor ba dang bcas pa gtso bor gyur pa 'di mdo sde rin po che'i don to/ /'di ni de ltar nges par gnas pa yin no/ /gang yang tshad ma rnam 'grel las kyang skyes bu'i don ni thob par byed pa yin te/ de bas na der yang mngon par thob par byed pa zhes brjod kyi gtsor rjod par byed pa ni ma yin no zhes smos so/ /'di skad bdag gis thos zhes bya ba la sogs pa la/ ci ste gang gi tshig yin zhe na/ sdud pa po'i tshig ste/ sdud pa po nyid kyis 'jig rten pa yang dag par yid ches par byed pa'i don te/ de ci'i phyir ma gsungs pa smos she na/ ma yin te/ bcom ldan 'das kyi bka' nyid kyis de 'don pa'i phyir te/ bcom ldan 'das kyis chos yang dag par sdud pa'i mdo las/ dge slong dag 'di skad bdag gis thos pa zhes gyis la nga'i dam pa'i chos bsdu bar bya'o/ /zhes gsungs so/ /cis te 'dir sdud pa po gang yin zhe na/ gang gi phyir de ni lcang lo can na gnas pa'i byang chub sems dpa' sems dpa' chen po phyag na rdo rje bskal pa bzang po'i de bzhin gshegs pa rnams kyi gzugs kyi sku dang / chos kyi tshogs bsrung ba'i dbang du byas pa'i phyir gtsor rjes su 'brang bar brjod de/ phyag na rdo rje dbang bskur ba'i mdo sde las bstan pa gtad pa yin no/ /yang 'phags pa kun dga' bo la gtad pa de ni nyan thos kyi 'jig rten la bzhugs par bya ba'i phyir yin gyi/ sdud pa'i don du ni ma yin te/ ji ltar yang rtag tu bcom ldan 'das kyi zhabs 'bring du gnas pa'i phyir 'phags pa kun dga' bo ni ma lus pa thos pa thob pas nyan thos kyi sde snod sdud pa po yin te/ /de bzhin du phyag na rdo rje ni byang chub sems dpa'i sde snod kyi sdud pa po yin te de ltar rgya cher spros pas chog go/ /mngon par rdzogs par sangs rgyas nas chos bstan pa'i ston pa po las 'dir rang nyid kyis thos nas sdud pa yin te/ de nas sdud pa po mtshon pa'i don du thos pa zhes smos so/ /bdag gis zhes bya ba ma smos par sgrub pa ste/ rang nyid kyis ma thos pa'i chos bstan par mi nus pa nyid kyi phyir ro zhe na/ de'i phyir sgrub pa po smos pa ni nges par bya ba'i don te/ bdag nyid kyis bcom ldan 'das las thos kyi/ bdag gis bla ma la sogs pa las thos pa ni ma yin no/ /de bas na bdag nyid kyis zhes bya ba 'dis ni mngon sum du thos pa nyid do zhes ston to/ /des na 'dis ni sdud pa thos par gyur pa yid ches pa med pa'i dogs pa bsal to/ /gal te mngon sum thos kyang g.yeng ba dang / log par 'dzin pa yod na shin tu yang yid ches pa med par 'gyur zhe na/ de'i phyir de nyid bsal ba'i phyir 'di skad ces smos te/ ji ltar bshad pa de bzhin du bdag gis thos pa yin te/ rnam pa 'di nyid kyis gleng gzhi 'di nyid dang / skabs dang nye bar sbyar ba dang / mdo'i lus zhes bya ba'i don to/ /de la ston pa po la sogs pa 'byung ba ni gleng gzhi yin te/ yul gang du ston pa po dang / nyan pa po 'dus pa ste/ bcom ldan 'das zhes bya ba nas brtsams te/ kun dga' bo zhes bya ba'i bar du'o/ /de la skabs ni de nas dang / de skad ces bya ba la sogs pa'o/ /nye bar sbyar ba ni bcom ldan 'das kyis de skad ces bka' stsal nas zhes bya ba la sogs pa'o/ /lhag ma ni mdo'i lus yin no/ /ji tsam khyod kyis thos par byas zhes dris pa la/ dus gcig na zhes bya ba smos te/ dus gcig gi tshe na zhes pa'i don to/ /des ni gdul bya rnams chos la gus pa bskyed pa'i don te/ bcom ldan 'das kyis lan cig bstan pa dang / bdag nyid kyang thos pa 'dzin pa nyid du mtshon pa yin no/ /gang yang 'di skad bdag gis thos pa zhes gyis la nga'i chos yang dag par bsdu bar bya zhes mdo sde'i nang du gsungs pa la/ de ni tshig gi phyogs gcig gis tshig rnams mtshon pa yin te/ 'di skad bdag gis thos pa'i dus gcig na zhes pa'o/ /de yang ji ltar zan la zhugs zhes bya ba lta bu ste/ khyim du zhugs nas zan za bar rtogs par byed pa yin no/ /gleng gzhi med par ni ston pa med de/ de bas na gleng gzhi ni bcom ldan 'das zhes bya ba nas tshe dang ldan pa kun dga' bo zhes bya ba'i bar du ste/ bcom ldan 'das bzhugs so zhes bya bar sbyar ro/ /bdud bzhi bcom pas na bcom ldan 'das sam/ shes rab kyis bdud bzhi bcom pa dang ldan pas na bcom ldan 'das so/ /yang na 'di dag bstan pas na bcom ldan 'das te/ rgyu nyid byed pa nyid du brjod par 'dod pa'i phyir ro/ /de dag gang zhe na/ dbang phyug la sogs pa drug ste/ ji skad bshad pa'i rigs pa dang / /dbang phyug dang ni gzugs bzang dang / /dpal dang grags dang ye shes dang / /brtson 'grus phun sum tshogs pa ste/ /drug po de la ldan zhes bya/ /zhes bshad pa lta bu ste/ de la dbang phyug ni bcom ldan 'das te gzhan dbang ma yin pa'o/ /phun sum tshogs pa ni sgrib pa bag chags dang bcas pa spangs pa'i phyir ro/ /bcom ldan 'das kyi gzugs phun sum tshogs pa ste/ sku bla na med pa'i mtshan dang dpe byad kyis rnam par mdzes pa'i phyir ro/ /grags pa phun sum tshogs pa ni phyogs dang phyogs mtshams su sgra rnam par grags pa'i phyir ro/ /phun sum tshogs pa mang po gang gis bsten pa de ni dpal te/ bcom ldan 'das de'i phun sum tshogs pa dang 'jig rten dang 'jig rten las 'das pa'i phun sum tshogs pa'i rim pas brten pa yin pa'i phyir ro/ /ye shes phun sum tshogs pa ni shes bya thams cad ni rnam pa thams cad la ye shes dag pa chags pa med pa dang / thogs pa med pa'i phyir ro/ /brtson 'grus phun sum tshogs pa ni gzhan gyi don rnam pa thams cad la bya ba rgyun mi 'chad par byed pa'i phyir ro/ /bzhugs te zhes bya ba la yang na bzhugs zhes bya ba'i sgra da ltar gyi don yin yang 'og nas te zhes bya ba'i sgra 'das pa'i don la bzhugs pa'i dbang gis 'das pa'i don du 'gyur ro/ /lad sme zhes bya ba'i tshig gis lad ces pa da ltar gyi rkyen gong na yod la/ sme zhes pa 'das pa'i rkyen 'og tu 'byung na yod pa'i rkyen gtso bo yin pa'i phyir 'das pa'i don du sbyar ro/ /thun mong gi bzhugs pa ni sku gsung thugs mnyam par bzhag nas zhes bya ba'i don to/ /gzhan du na dge slong gi dge 'dun dang thabs cig ces bya ba'i mtshungs pa'i bzhugs pas lhan cig pa'i don du mi 'gyur ba'i phyir ro/ /khyad par du ni sangs rgyas kyi bzhugs pa bzhi ste/ spyod lam gyis bzhugs pa dang / 'chags pas bzhugs pa dang mnyam par gzhag pas bzhugs pa dang / nang du yang dag par 'jog gis bzhugs pa'o/ /de la sangs rgyas rnams kyi sku'i phrin las thams cad ni dang po'o/ /gsung gi phrin las thams cad ni gnyis pa'o/ /gang rang bzhin gyis mnyam par gzhag pa dang / gang ting nge 'dzin mngon du mdzad pa'i yid la byed pa ste/ de gnyis gsum pa'o/ /gang sangs rgyas kyi spyan gyis sems can rnams la gzigs pa dang / lha rnams nye bar 'ong bar bya ba'i yid la byed pa ste/ de gnyi ga yang bzhi pa'o/ /gang du bzhugs she na/ rgyal po'i khab ces bya ba smos te/ rgyal po'i khab ces bya ba ni ma ga d+hA'i grong khyer na rgyal po mang pos bkur ba'i pho brang 'khor ro/ /de'i phyogs gang du zhe na/ bya rgod kyi phung po'i ri la zhes smos so/ /de ci'i phyir rgyal po'i khab tu ston zhe na/ mdo sde 'di ni chos kyi rgyal po chen po'i gnas nyid du mtshon pa'i phyir ro/ /ci'i phyir bya rgod kyi phung po ston zhe na/ nyan pa rnams la yang 'di rnams rtogs par dka' ba bstan pa'o/ /dge slong gi dge 'dun chen po dang thabs cig ces pa la/ chen po ni grangs chen po dang / yon tan chen po nyid do/ /nyon mongs pa spangs pa'i dge slong dgra bcom pa de ni 'dir mi bzung ste/ 'phags pa kun dga' bo yang bzung bar thal bar 'gyur ba'i phyir ro/ /de bas na bsnyen par rdzogs pa'i dge slong de 'dir bzung ste/ de yang 'dir rnam pa gnyis te/ gsol ba dang / bzhi'i las dang /lnga pa ni tshur shog byas pa dang / ma byas pa'o/ /byas pa ni de bzhin gshegs pas dge slong tshur shog /tshangs par spyod cig ces byas pa dang / tshur shog ces pa ma byas pas de bzhin gshegs pas dgongs pa tsam gyis skra dang kha spu rang lhung ba dang / lus la chos gos gyon zhing dbang po zhi ba dang / spyod lam mdzes pa dang ldan par 'gyur ba'o/ /dge slong gi dge 'dun zhes bya ba la dge 'dun ni tshogs te/ de ji ltar dge 'dun yin zhe na/ mi phyed pas na dge 'dun te/ gang yang / sangs rgyas chos dang dge 'dun ni/ /bdud rnams bye ba brgya yis kyang / /gang phyir dbye bar mi nus pas/ /de phyir dge 'dun zhes bya'o/ /thabs cig ces bya ba ni lhan cig pa'i don to/ /de la grangs chen po ni stong nyis brgya lnga bcu'i dge slong gi dge 'dun te/ phyed kyis ma tshang ba'i brgya phrag bcu gsum mo/ /'dir thams cad kyang zhes bya ba la sogs pa smos pa'i tshig bco lnga pa ni yon tan chen po bstan pa ste/ dgra bcom pa nyid ni nyon mongs pa'i dgra rnams bcom pa dang ldan pas na dgra bcom pa'o/ /yang na mi skye zhing yang skye ba med pas na dgra bcom pa'o/ /yang na de bzhin gshegs pa la sgrub pa'i mchod pa yang dag par mchod pas mchod par byed pas na dgra bcom pa'o/ /yang na lha dang mi rnams kyis mchod pa dang / sbyin gnas su 'os pas na dgra bcom pa'o/ /de bas na mchod par 'os pa dang / sbyin gnas su gyur pa'i yon tan gyis zag pa zad pa zhes smos te/ skye ba dang / nyon mongs pa'i dge ba'i rtsa ba ni zag pa ste/ de dag ni 'dod pa'i zag pa dang / srid pa'i zag pa dang / ma rig pa'i zag pa dang / lta ba'i zag pa dang / rnam pa bzhi pa'o/ /de yang go rims ci lta ba bzhin du 'dod pa'i lnga dang / srid pa'i gsum dang / ma rig pa'i kun brtags pa dang / lhan cig skyes pa dang lta ba drug cu rtsa gnyis te/ zag pa 'di rnams zad pas na zag pa zad pa'o/ /de yang go rims bzhin du tshul khrims dang / ting nge 'dzin gyi phung po gnyis dang / rnam par grol ba'i phung po dang / rnam par grol ba'i ye shes mthong ba'i phung po dang / shes rab kyi phung po zag pa zad pa mngon sum du byed pa'o/ /yang yang dag pa'i ting nge 'dzin dang / /zad la mi skye ba'i ye shes dang / yang dag pa'i rnam par grol ba dang / yang dag pa'i lta ba'o/ /yang 'dod pa'i rgyu yongs su shes pa dang / phung po'i rgyu yongs su shes pa dang / 'du byed kyi rgyu yongs su shes pa dang / nyon mongs pa'i rgyu yongs su shes pa'o/ /yang sdug bsngal kun 'byung ba'i bden pa spang ba dang / 'gog pa'i bden pa mngon sum du bya ba dang / lam gyi bden pa bsgom pa dang / sdug bsngal gyi bden pa yongs su shes pa'o/ /de bas na zag pa zad pa nyid kyis rnam par dag pa'i yon tan ni nyon mongs pa med pa zhes bya ba smos te/ kun nas nyon mongs pa med pa zhes bya ba'i don to/ /kun nas nyon mongs pa med pa ni bzhi ste/ las kyi kun nas nyon mongs pa dang / rnam par smin pa'i kun nas nyon mongs pa dang / nyon mongs pa'i kun nas nyon mongs pa med pa dang / skye ba'i kun nas nyon mongs pa'o/ /gang gis kun nas nyon mongs shing sdug bsngal bar byed pa dang / gang kun nas nyon mongs par byed pa dang / gang gis kun nas nyon mongs par byed pa dang / gang kun nas nyon mongs pa'o/ /de la ma rig pa 'gags pas 'du byed 'gag pa ni las kyi kun nas nyon mongs pa med ces bsam pa'o/ /'du byed 'gags pas rnam par shes pa dang / ming dang gzugs dang / skye mched drug dang / reg pa dang / tshor ba 'gag pa ni rnam par smin pa'i kun nas nyon mongs pa med pa zhes bsam pa'o/ / tshor ba 'gags pas sred pa dang / len pa dang / sred pa 'gag pa ni nyon mongs pa'i kun nas nyon mongs pa med ces bsam pa'o/ /srid pa 'gags pas skye ba dang / rga ba dang / 'chi ba 'gag pa ni skye ba'i kun nas nyon mongs pa med ces bsam pa'o/ /kun nas nyon mongs pa ni sdug bsngal te/ de bas na nyon mongs pa med pas sdug bsngal med pa'i yon tan ni dbang du gyur pa zhes smos so/ /rdzu 'phrul la dbang ba dang / dbang po la dbang ba dang / ting nge 'dzin la dbang ba dang / shes rab la dbang ba'o/ /ji ltar de dag la dbang ba yin zhe na/ go rims ji lta ba bzhin du sems can dang snod kyi 'jig rten dag la khyad par du dbang du gyur pa dang / spyod pa la dbang thob pas 'jig rten dga' ba nyid kyis de dag dbang du 'gyur ba dang / de dag gi sems dbang du gyur pa nyid dang / nyon mongs pa dang / las dang rnam par smin pa thams cad bcad pas 'ching ba las grol ba bzhin du rang la dbang thob pa nyid do/ /sems shin tu rnam par grol ba zhes bya ba ni sems rnam par grol ba'o/ /shes rab shin tu rnam par grol ba zhes bya ba ni shes rab rnam par grol ba'o/ /de la srid pa'i phyogs kyi nyon mongs pa spangs pas ting nge 'dzin dang snyoms par 'jug pa thob pa ni sems rnam par grol ba'o/ /ma rig pa'i phyogs kyi nyon mongs pa dang / nye ba'i nyon mongs pa spangs pas thob pa dgra bcom pa thob pa'i lam gyi ye shes ni shes rab rnam par grol ba'o/ /cang shes pa zhes bya ba ni 'jigs pa med pa ste/ cang shes pa rnam pa lnga'o/ /'di ltar thog 'bab pa la sogs pa'i gnod pa'i dogs pa med pas khyu mchog cang shes pa'o/ /'thab mo'i 'jigs pa med pas rta cang shes dang / glang po cang shes pa'o/ /pha rol gyi gnod pa'i 'jigs pa med pas seng ge cang shes so/ /'chi ba'i 'jigs pa med pas dgra bcom pa cang shes so/ /de bzhin du 'dir yang 'jigs pa'i bag tsha ba bzhi ste/ sdug bsngal gyis bag tsha ba dang / 'jigs pas bag tsha ba dang / 'jig rten gyi chos kyis bag tsha ba dang / mi shes pas bag tsha ba'o/ /de dag med pas go rims bzhin du bde ba thob pa dang / mi skrag pa thob pa dang / mi 'jigs pa thob pa dang / dbugs dbyung ba thob pa zhes brjod do/ /de la mya ngan dang / smre sngags 'don pa dang / sdug bsngal ba dang / yid mi bde ba med pas sdug bsngal gyis bag tsha ba med do/ /bdag gis smad pa dang / gzhan gyis smad pa dang / ngan song dang / 'tsho ba med pa dang / chad pa dang / mya ngan dang / 'chi ba'i 'jigs pa med pas 'jigs pa'i bag tsha ba med do/ /rnyed pa dang / ma rnyed pa dang / grags pa dang / ma grags pa dang / bstod pa dang / smad pa dang / bde ba dang / sdug bsngal dag gis ma gos pas 'jig rten gyi chos kyis bag tsha ba med do/ /mi shes pa dang / the tshom gyi shes pa dang / log pa'i shes pa rnam pa med pas mi shes pa'i bag tsha ba med do/ /de bas na bag tsha ba med pa dang bral ba'i phyir cang shes pa'o/ /glang po chen po zhes bya ba ni gtso bo chen po ste/ kha cig ni gsum rig pa dang / kha cig ni so so yang dag par rig pa thob pa/ kha cig ni mngon par shes pa drug pa thob pa/ kha cig ni kun shes pa brda sprod pa/ kha cig ni gcig pur gnas pa thob pa ste/ mthar thug pa thub pa'i chos rnyed pa'i phyir glang po chen po'o/ /bya ba byas pa/ byed pa byas pa zhes bya ba ni rnam pa thams cad kyi sgrub pa yongs su rdzogs pa'o/ /de'i phyir tshul khrims dang / ting nge 'dzin dang / shes rab yongs su rdzogs pas sdug bsngal thams cad las rnam par thar pa ni bya ba ste nges par bya ba yin pa'i phyir ro/ /'dod pa chung bas 'tsho ba dang / chog shes pas 'tsho ba dang / sbyangs pa'i yon tan gyi mig gis 'tsho ba dang / yang dag par mgu bar byed pas 'tsho ba la sogs pa ni byed pa ste/ rang dgar spyod pa yin pa'i phyir ro/ /de gnyi ga yongs su rdzogs pa ni bya ba byas pa dang byed pa byas pa'o/ /khur bor ba zhes bya ba la khur ni bzhi ste/ phung po'i khur dang / nyon mongs pa'i khur dang / dam bca' ba'i khur dang / brtson pa'i khur ro/ /yongs su dor ba'i phyir dang / rab tu spang ba'i phyir dang / mthar phyin pa'i phyir dang / yongs su rdzogs par bya ba'i phyir/ de dag go rims bzhin du bor ba ste/ yongs su dor ba dang / spangs pa dang / mthar phyin pa dang / yongs su rdzogs pa'o/ /de yang sdug bsngal yongs su shes pa dang / kun 'byung ba spangs pa dang / lam bsgoms pa dang / 'gog pa mngon sum du byas pas so/ /de bor bas phung po med pa'i bde ba dang / rnam par grol ba'i bde ba dang / rdzogs pa'i byang chub kyi bde ba dang / nye bar zhi ba'i bde ba thob pa'o/ /de bas na khur bor ba nyid kyis khur bor ba'i bde ba thob pa'i yon tan bstan to/ /bdag gi don rjes su thob pa zhes bya ba ni rang gi don thob pa la rnam pa gnyis te/ gnod pa spangs pa dang / don thob pa'o/ /de la dang po ni ma rig pa spangs pas nyon mongs pa'i sgrib pa thams cad spangs pa'o/ /gang yang rig pa bskyod pas mya ngan las 'das pa thob pa ste/ de ni gnyis pa'o/ /srid par kun tu sbyor ba yongs su zad pa zhes bya ba ni srid par kun tu sbyor ba ni dgu ste/ skyes bu srid par sbyor bar byed pa dang / srid par 'ching bar byed pa'i phyir lta ba dang / mchog tu 'dzin pa dang / the tshom dang phrag dog dang / ser sna dang / khong khro dang / nga rgyal dang / ma rig pa dang / srid pa'i 'dod chags so/ /lta ba la sogs pa yang yin kun tu sbyor ba yang yin pas lta ba la sogs pa kun tu sbyor ro/ /'di dag yongs su zad pa gang yin pa de ni de skad du brjod do/ /yongs su zad pa ni rab tu nyams pa'o/ /de las dang po gsum ni zag pa med pa'i yang dag par lta bas zad pa'o/ /bar ma gsum dang dgu pa'i phyogs gcig 'dod pa'i khams kyi phyogs ni zag pa med pa'i ting nge 'dzin la snyoms par 'jug pas zad pa'o/ /lhag ma gsum ni dgra bcom pa'i lam gyi ye shes kyis zad pa'o/ /yang dag pa'i shes pas sems shin tu rnam par grol ba zhes bya ba la yang dag pa'i shes pa ni yang dag pa'i rtog pa des sems shin tu rnam par grol ba'o/ /yang dag par mos pa ste gang du mos she na dkon mchog gsum gyi yon tan dang / theg pa gsum dang ldan pa ston pa dag dang / bden pa bzhi dang / byang chub kyi phyogs kyi chos rnams la'o/ /sems kyi dbang thams cad kyi dam pa'i pha rol tu son pa thob pa zhes bya ba la sems gang gi ting nge 'dzin gyi dbang sgyur ba de ni sems kyi dbang ste/ thams cad kyang yin la de yang yin no/ /de dag la dam pa'i pha rol ni mtha'o/ /phyin pa ni 'gro ba ste/ e ma zhes bya ba ni 'gro ba'i don yin pa'i phyir ro/ /dam pa'i mthar 'gro ba'i phyir pha rol tu son pa'o/ /de ji ltar thob pa yin zhe na/ gang du 'dod pa dang / gang gi tshe 'dod pa dang / ji srid 'dod pa dang / lugs dang mthun pa dang / lugs las bzlog pa zhes bya ba la sogs pas mthar gyis gnas pa'i snyoms par 'jug pa dgu la snyoms par 'jug pa dang / gnas pa dang / ldang ba dang / 'gog pa la dbang ba'i phyir ro/ /thams cad kyang zhes bshad pa de la 'phags pa kun dga' bo yang de lta bu'i yon tan dang ldan nam zhe na ma yin te/ gang zag gcig ma gtogs pa ni zhes bya ba la sogs pa smos so/ /gcig ma gtogs pa zhes brjod mod ce na/ gang zag smos pa ni dge 'dun bsdu ba'i phyir te/ 'phags pa'i gang zag brgyad las gang yang rung ba cig yin pa'i phyir ro/ /de yang rgyun du zhugs pa nyid kyis ma gtogs pa yin te/ phyi rol du bzhag pa yin no/ /phyir bstan pa la khyad par du bstan pa'i don ni 'di lta ste zhes bya ba'i tshig gi phrad gnyis so/ /khyad par du bstan pa ni kun dga' bo yin no/ /tshe dang ldan pa zhes bya ba'i khyad par ni dga' bar bya ba'i phyir te/ 'jig rten ni tshe 'di 'dod pa yin no/ /de bas de dang ldan pa ni dga' ba yin no/ /de yan chad ni nyan thos kyi dge 'dun bstan te/ rab tu grags pa'i 'khor yin pa'i phyir ro/ /nges pa'i 'khor yin pa'i phyir te rab tu grags pa dang / rab tu byung ba yin pa'i phyir dang / nges par sangs rgyas kyi nye gnas su rtag tu gnas pa'i phyir ro/ /byang chub sems dpa' ni ma yin te/ khyim pa yin pa'i phyir dang 'di nas kyang phyogs bcu'i 'jig rten gyi khams dag tu 'gro ba dang de nas kyang 'dir 'ongs pa'i phyir te/ de bas byang chub sems dpa'i dge 'dun 'dir mdor bsdus pa'i dbang du byas pa yin pa'i phyir ma smos pa ste/ gang gi phyir 'di lta ste/ mdor bsdus te bstan pa yang brgyad stong pa 'di yin te/ de bas na gleng gzhi'i gzhung 'di yang mdor bsdus te bstan pa'i gleng gzhi yin no/ /de ni chos ston pa'i skabs kyis de la zhes bya ba la sogs pa smos te/ de la zhes bya ba ni yod pa'i bdun pa'o/ /der zhugs nas yod pa'i zhes bya ba'i don to/ /yang na bzhi'i don te/ 'dir dge 'dun gyi nang du gtogs pa zhes bya ba'i don to/ /yang na nges par gzung ba yin te/ dge slong de dag las zhes bya ba'i don to/ /dge slong gi tshogs las phyogs gcig gi ming nges par gzung ba ste/ rab 'byor zhes bya ba yin no/ /de yang ji ltar g.yul du 'jug pa'i nang nas 'jigs te khyer la shog ces bya ba lta bu'o/ /tshe dang ldan pa ces bya ba ni snga ma bzhin no/ /gnas brtan zhes smos pa ni mchod pa'i don te glang po chen po yin pa'i phyir ro/ /de yang dgra bcom pa nyid yod na nyon mongs pa med pa la gnas pa'i mchog yin pa'i phyir ro/ / bka' stsal te zhes bya ba ni rab tu sbyar ba'i phyir ro/ /ji ltar zhe na/ spobs par gyis shig /ces bya ba la sogs pa gsungs te/ rab 'byor zhes bya ba ni bod pa'i tshig go/ /de nyid la gsol ba gdab pa'i phyir/ spobs par gyis shig ces bya ba ni khyed kyi blo mngon du phyogs par gyis shig pa yin no/ /gal te yang bla ma la gsol ba gdab cing slob ma la ma yin pa de lta mod kyis/ gsol ba gdab pa de ni chos la gus pa bya ba nyid de/ de ltar yang gnas brtan rab 'byor ni shes rab kyi pha rol tu phyin pa la bya ba byas par gnas pa yin no/ /zhes 'chad par 'gyur bas so/ /gang gis dbang du byas she na/ gsungs pa shes rab kyi pha rol tu phyin pa las brtsams te/ zhes gsungs te/ shes rab kyi pha rol tu phyin pa'i 'bras bu yin pa'i phyir shes rab kyi pha rol tu phyin pa ste/ chos kyi sku mdzad pa dang bcas pa'o/ /de las brtsams pa ni skyes bu dam pa'i don nyid kyi phyir te/ thabs las byung ba nyid yin pas de bstan zhes bya ba'i don to/ /gang gi phyir spobs par byed ce na/ byang chub sems dpa' sems dpa' chen po rnams zhes gsungs te/ de rnams kyi don zhes bya ba'i don to/ /gang gi phyir de'i don gyi phyir rgyu mtshan dang / rgyu mtshan can gyi 'brel pa ste/ de bas 'brel pa tsam smra bar 'dod pa'i drug po khyad par brjod par 'dod pa na ni bzhi par 'gyur ro/ /de nas gang gi bdag nyid du spobs par bya zhe na/ gsungs pa/ ci nas zhes bya ba la sogs pa ste/ ci nas zhes bya ba ni bar du'o/ /thos pa dang bsam pa dang bsgom pa'i rang bzhin gyi shes rab kyi pha rol tu phyin pa thams cad mkhyen pa nyid rnam pa gsum yin te/ gang gi phyir de ni lam yin te/ lam yang 'gro ba'i gzhi ste/ nges par 'byung ba dang ma lus pa 'gro bar gyis shig pa'o/ /'gro ba des cir 'gyur zhe na/ sbyor ba dang / sbyor ba'i rab dang / sbyor ba'i go rims dang / sbyor ba'i mtha'o/ /de dag lus pa med par gyis shig pa'o/ /de ltar tshig gnyis po de ni mngon par rtogs pa brgyad rab tu ston cig pa'o/ /gang nges par 'byung bar 'gyur zhe na/ byang chub sems dpa' sems dpa' chen po zhes gsungs so/ /byang chub tu sems bskyed pa nyid ces bya ba'i don to/ /de'i phyir bstan bcos las/ sems bskyed pa dang gdams ngag dang / /nges 'byed yan lag rnam bzhi dang / /sgrub pa yi ni rten gyur pa/ /chos kyi dbyings kyi rang bzhin dang / /dmigs pa dag dang ched dang ni/ /cho ga 'jug pa'i bya ba dang / /tshogs ni nges par 'byung bcas rnams/ /thub pa'i rnam kun mkhyen pa nyid/ /thub pa ni de bzhin gshegs pa ste/ rnam pa thams cad mkhyen pa nyid do/ /de nyid kyis de mngon sum du mdzad pa'i phyir le'u dang po 'dir brjod par bya ste/ de yang dngos po bcu ste/ sems bskyed pa dang / gdams ngag dang / nges par 'byed pa'i cha dang / sgrub pa'i rten dang / dmigs pa dang / ched du bya ba dang sgrub pa'o/ sgrub pa yang gang bya ba'i dngos po shes pa'o/ /de yang rnam pa bzhi ste/ gang gi phyir de ni go cha dang 'jug pa ni bya ba gnyis so/ /tshogs dang nges par 'byung ba dang bcas pa ni gzhan gnyis so/ /de bas na bcom ldan 'das kyis dang po'i tshig gnyis po 'dis sems bskyed pa gsungs so/ /byang chub ni yang dag par rdzogs pa'i byang chub khyad par du gyur pa de la 'dis sems pa dang / bsam pa dang 'dod pa ni byang chub pa'o/ /sems can thams cad kyi mchog tu byed par 'dod pa gang yin pa de ni chen po ste/ sems can chen po ni 'dir sems dpa' chen po'o/ /de ltar yang bstan bcos las/ sems bskyed pa ni gzhan don phyir/ /yang dag rdzogs pa'i byang chub 'dod/ /sems bskyed pa zhes bya ba ni mtshan gzhi'o/ /lhag ma ni mtshan nyid do/ /sems ni yang dag par 'dod cing de lta na 'gro bar 'dod ces smra ba lta bu ste/ nga 'gro bar 'dod ces sems pa yin no/ /de'i bskyed pa ni sems bskyed pa'o/ /mngon par 'dod pa dang bskyed pa ni tha mi dad pa'i phyir bskyed pa smos pa ni khyad par yongs su gzung ba'i don to/ /gzhan gyi don gyi ched du yang dag par rdzogs pa'i sangs rgyas la dmigs pa sems bskyed pa ni sems bskyed pa ste/ de bas na 'di ni mtshan nyid do/ /gzhan gyi dbang du bstan pa ni gzhan gyi don gyi ched du yang dag par rdzogs pa'i byang chub 'dod pa'o/ /'di la yang dag par rdzogs pa'i byang chub 'dod pa 'di ni 'bru mang po pa ste/ de'i dngos po ni de nyid do/ /de ni 'dir sems bskyed pa ste/ bcom ldan 'das kyis 'dir bcu las dang po'i ngo bo nyid du gsungs te/ de tsam gyis dbang du byas nas thob pa'i phyir ro/ dbye ba ni ma gsungs kyang gnas skabs kyis yod pa thob pa'i phyir ro/ /de yang shes rab kyi pha rol tu phyin pa chen po las gsungs te/ de'i phyir bstan bcos las/ de yang sa gser zla ba me/ /gter dang rin chen 'byung gnas mtsho/ /rdo rje ri sman bshes gnyen dang / yid bzhin nor bu nyi ma glu/ /rgyal po mdzod dang lam po che/ /bzhon pa bkod ma'i chu dang ni/ /sgra brnyan chu bo sprin rnams kyis/ /rnam pa nyi shu rtsa gnyis so/ /de yang sems bskyed pa rnam pa nyi shu rtsa gnyis po'i dbye ba yang gang zhe na/ dpe ni sa gser zla ba la sogs pa ste/ sa gser zla ba la sogs pa dang chos mthun pa'i phyir sa gser zla ba la sogs pa'o/ /kha cig tu spyi'i sgra yang khyad par du rtogs par 'gyur te/ sems bskyed pa dang po sa dang 'dra ba ni byang chub la 'dun pa'i mtshan nyid skyes par gyur pa sa dang 'dra ba ste/ sangs rgyas kyi chos thams cad dang / de'i tshogs rab tu bskyed cing gnas pa'i phyir ro/ /bsam pa dang 'dra ba'i gser bzang po ni gser dang 'dra ba ste/ 'gyur ba med pa ston pa'i phyir ro/ /sbyor ba dang ldan pa ni zla ba ste yar ngo'i zla ba tshes pa dang 'dra zhing dge ba'i rtsa ba rnams skye zhing 'phel ba rnyed pa'i phyir ro/ /khyad par rtogs pa'i bsam pa ni lhag pa'i bsam pa yin te/ de dang ldan pa ni me ste/ me dang 'dra zhing des de khyad par du 'gro ba'i phyir bud shing gi khyad par dang phrad pa'i me bzhin no/ /sbyin pa'i pha rol tu phyin pa dang ldan pa ni gter te/ gter chen po dang 'dra ste/ zang zing gi longs spyod kyis sems can dpag tu med pa yang dag par tshim par byed pa dang mi zad pa'i phyir ro/ /tshul khrims kyi pha rol tu phyin pa dang ldan pa ni rin po che'i 'byung gnas te/ de dang 'dra bar yon tan rin po che thams cad de las 'byung ba'i phyir ro/ /rin po che'i 'byung gnas ni rin po che skye ba la sogs pa'o/ /bzod pa'i pha rol tu phyin pa dang ldan pa ni mtsho ste/ rgya mtsho dang 'dra bar mi 'dod pa 'bab pa thams cad kyis mi 'khrug pa'i phyir ro/ /brtson 'grus kyi pha rol tu phyin pa dang ldan pa ni rdo rje ste/ rdo rje dang 'dra bar sra ba dang mi phyed pa'i phyir ro/ /bsam gtan gyi pha rol tu phyin pa dang ldan pa ni ri bo yin te/ ri dang 'dra ba ni mi g.yo ba dang mi 'gul ba'i phyir ro/ /shes rab kyi pha rol tu phyin pa dang ldan pa ni sman gyi rgyal po dang 'dra bar sgrib pa thams cad rab tu zad par byed pa'i phyir ro/ /byams pa dang snying rje dang dga' ba dang btang snyoms tshad med pa dag dang ldan pa ni bshes gnyen yin te/ bshes gnyen chen po dang 'dra bar gnas skabs thams cad du 'brel pa btang snyoms su mi byed pa'i phyir ro/ /mngon par shes pa dang ldan pa ni nor bu yin te/ de dang 'dra ba ni ji ltar mos pa de bzhin du 'bras bu 'byor pas so/ /sbyin pa dang snyan par smra ba dang don spyod pa dang don mthun pa ni bsdu ba'i dngos po ste/ de dang ldan pa ni nyi ma yin te/ nyi ma dang 'dra ste/ gdul bya'i lo tog yongs su smin pa'i phyir ro/ /chos dang don dang / nges pa'i tshig dang / spobs pa rnams so sor rig pa de dang ldan pa ni glu yin te/ dri za dbyangs snyan pa dang 'dra ba ste/ gdul bya la chos ston pas mgu bar byed pa'i phyir ro/ /don la rton cing tshig 'bru legs par sbyar ba la sogs pa ni ma yin no/ /chos kyi rig pa de ni rjes su 'brang bar bya'i gnas brtan la sogs pa'i gang zag ni ma yin no/ /bsgoms pa las byung ba'i shes rab kyi ye shes de la rjes su 'brang bar bya'i rnam par shes pa'i shes rab la ni ma yin no/ /sangs rgyas bcom ldan 'das mchog tu tshad mar gyur pa des bstan pa nges pa'i don gyi mdo sde gang yin pa de la ston par bya'i drang ba'i don gyi mdo sde la ni ma yin te/ de dang ldan pa ni rgyal po ste rnam par nyams pa med pa'i rgyu yin pa'i phyir ro/ /bsod nams dang ye shes kyi tshogs dang ldan pa ni mdzod yin te/ bang mdzod dang 'dra ba ste/ bsod nams dang ye shes kyi tshogs mang po'i mdzod kyi gnas yin pa'i phyir ro/ /byang chub kyi phyogs kyi chos sum cu rtsa bdun de dang ldan pa ni lam po che yin te/ rgyal po'i lam dang 'dra ba ste/ 'phags pa'i gang zag thams cad dang rjes su gshegs pa nyid kyi phyir ro/ /zhi gnas dang lhag mthong dang ldan pa ni bzhon pa yin zhing bzhon pa dang 'dra ste/ bde bar 'gro ba'i phyir ro/ /gzungs dang spobs pa dang ldan pa ni bkod ma'i chu yin te/ bkod ma'i chu dang 'dra ba ste/ chu 'dzin pa dang / mi zad pa'i chu mig dang chos mthun pas/ thos pa dang ma thos pa'i chos kyi don 'dzin pa dang / mi zad pa'i chu mig dang 'dra ba'i phyir ro/ /'du byed thams cad mi rtag pa dang / zag pa dang bcas pa thams cad sdug bsngal ba dang / chos thams cad bdag med pa dang / mya ngan las 'das pa zhi ba ste/ chos kyi mdo bzhi po de dag dang ldan pa ni snyan par smra ba ste/ snyan par smra ba'i sgra dang 'dra zhing gdul bya thar pa 'dod pa rnams kyis thos pa na dga' ba'i phyir ro/ /mi skye ba'i chos la bzod pa thob pa'i byang chub sems dpa' ni tha dad pa med pa'i bya ba byed pa'i phyir bgrod pa gcig pa'i lam yin te/ de dang ldan pa ni chu bo yin la/ chu bo'i rgyun dang 'dra ba ste/ rang gi ngang gis 'bab pa'i phyir ro/ /dga' ldan gyi gnas su skye ba la sogs pa'i bstan pa'i thabs la mkhas pa de dang ldan pa ni sprin yin te/ sprin dang 'dra zhing sems can thams cad kyi don bgyi ba de las 'jug pas so/ / sprin la sogs pa ni snod kyi 'jig rten gyi phun sum tshogs pa'o/ /'dir 'phags pa blo gros mi zad pa'i mdo las shes par byed pa yin te/ 'di ltar bcom ldan 'das ma chen mo gnyis las sems bskyed pa nyi shu rtsa gnyis brjod pa yin te/ de la dang po ni 'dun pa'i mtshan nyid kyi khyad par ro/ /lhag ma ni de'i grogs kyi khyad par ro/ /de nyid sbyor ba dang bsam pa la sogs pa dang lhan cig pa yin pa'i phyir ro/ /'phags pa blo gros mi zad pa'i mdo las/ thams cad kyang go rims bzhin du mi zad pa brgyad cur brjod de dang po ni sems bskyed pa nyid do/ /lhag ma ni de'i grogs te/ sbyor ba dang bsam pa la sogs pa sna tshogs pa'o/ /dang po'i sems bskyed pa ni gzhi mi zad pa ste/ sbyor ba mi zad pa nas thabs la mkhas pa mi zad pa'i bar du'o/ /de lta mod kyi ji ltar brgyad cur bya ba yin zhe na/ sems bskyed pa bcu pa gnyis pa'i dbye bas lhan cig tu byas nas drug cu rtsa brgyad du bya'o/ /bcu dang lhan cig tshad med dang / /mngon shes bsdu dngos so sor rig /ston zung phyogs dang gnyis gnyis dang / /chos mdo bgrod dang lhan cig tu/ /rtsa gnyis sems bskyed bcu pa ni/ /gnyis pa'i dbye bas mi zad pa/ / phyogs dang lnga dang bzhi dang ni/ /gnyis gnyis gsum dang sems bskyed dag /de ltar bcom ldan 'das kyis gnas brtan la gsol ba btab nas de nyid kyis 'dir sngon gyi ston pas ni ma yin no zhes gang dag rtog par 'gyur ba la/ de bsal ba'i phyir sdud pa pos shes rab can gyi mchog shA ri'i bu rnam par rtog pa bskyed pa smras so/ /ma sha ri zhes bya ba yin pa dang rigs sha ra dwa ti yin pas na shA ri'i bu dang sha ra dwa ti'i bu zhes 'di'i ming rnam pa gnyis su byas so/ /'di snyam du sems te zhes bya ba ni brjod par 'gyur ba'i rnam par rtog pa'o/ /de nyid ci tshe dang ldan pa zhes bya bas smras so/ /bdag nyid zhes bya ba ni bdag nyid la yod pa'o/ /rang gi zhes bya ba ni rang la rag las pa'o/ /shes rab dang spobs pa ni shes rab kyi spobs pa'o/ /de nyid kyi stobs ni rang bzhin gyis de'i stobs kyis de'i bag chags su brjod do/ /de bskyed pa ni sngon bskyed pa'o/ /de nyid byin gyis brlabs pa ni rab tu sad pa'o/ /'on te zhes bya ba ni ci zhig yin zhes bya ba'o/ /sangs rgyas kyi mthus zhes bya ba ni byin gyis brlabs nas sangs rgyas kyi mthus so/ /de nas sangs rgyas kyi zhes bya ba la sogs pa ni rab 'byor gyi lan ston pa yin no/ /kun tu tshol ba'i yid kyi brjod pa ni rtog pa'o/ /sems nyid la gnas shing mi ston pa de nyid ni yongs su rtog pa'o/ /de bas na sems kyi rtog pa yongs su shes pa ni kun tu shes pa'o/ /sems kyis zhes bya ba ni sems kyis rnam grangs shes pa'i mngon par shes pas yin gyi tshig gis ni ma yin no/ /'di skad ces bya ba ni mngon par brjod par 'gyur ba'i lan no/ /smra ba zhes bya ba la sogs pa'i tshig drug ste/ de la dang po'i gsum gyis ni mdo la sogs pa'i tshig brjod do/ /smra ba ni bcom ldan 'das kyi 'khor rnams la mdo la sogs pa smra ba'o/ /ston pa ni de nyid du srid pa la sogs pa smra ba'o/ /lung 'bogs pa ni phyogs dag tu nye bar song nas gdul bya de dag la smra ba'o/ /de ltar gang dang gang nyid kyi dngos po bcom ldan 'das kyi 'khor la brjod pa ni bcom ldan 'das kyi 'khor la bstan pa'o/ /'chad pa ni de nyid du gzhan dag la bstan pa'o/ /yang dag par rab tu ston pa ni kun tu song nas rang nyid 'chad pa'o/ /smra ba la sogs pa de dag thams cad ni de bzhin gshegs pa'i skyes bu byed pa des byin gyis brlabs pa 'am mthu yin pa'i phyir nyan thos kyis ni ma yin te/ rang dbang med pas so/ /'di nyid du rgyu bshad par 'dod nas/ rang nyid 'dri bar byed pa ni/ de ci'i phyir zhe na/ zhes rgyu smras so/ /chos gang zhes bya ba la sogs pa smos pa la/ /chos gang zhes bya ba ni nyan thos kyi theg pa pa dang / theg pa chen po'o/ /bslabs nas zhes bya ba ni thos pa dang / bsams pa dang / bsgoms pa dag gis so/ /de zhes bya ba ni nyan thos so/ /chos nyid ces bya ba ni ji ltar thos pa'o/ /mngon sum du byas nas zhes bya ba ni nyan thos kyi theg pa'o/ /'dzin to zhes bya ba ni theg pa chen po'o/ /shes rab rnam pa gsum gyis shin tu rnam par dran pa'i sa bon bskyed pa'i phyir ro/ /chos nyid ni ji ltar thos pa ste/ de bzhin gshegs pa'i chos ston pa nyid ces bya ba ni ji ltar thos pa dang 'dra ba ni rgyu mthun pa ste/ chos nyid ji ltar thos pa'o/ /chos nyid ces bya ba ni rang gis bstan pa dang / de bzhin gshegs pas bstan pa'i rgyu mthun pa ste/ skyes bu'i byed par bstan to/ /mi 'gal zhes bya ba ni nyan thos kyi bdag nyid chen po dang gnyis kyis shA ri'i bu'i rnam par rtog pa dang / gang dag gis dogs pa bsal to/ /'di yan chad kun gyis ci zhig bstan ce na/ rnam pa thams cad kyi thams cad du chos thams cad don dam par gzigs pa/ bcom ldan 'das mchog tu tshad ma yin par bstan te/ gang gi slob ma 'di lta bu'i yon tan dang ldan pa ni des rtag tu byin gyis brlabs pa nyid de/ des byin gyis brlabs pa'i phyir 'di lta bu'i chos kyang yang dag par smra ba yin te/ gang gi phyir gang des bcom ldan 'das nyid dam/ nyan thos kyis bstan kyang de thams cad ni de bzhin te/ de bzhin du ma yin no/ /de nas gdams ngag gi skabs la babs nas/ gnas brtan rab 'byor gyis ji skad bshad pa bzhin sdud pa pos/ de nas sangs rgyas zhes bya ba la sogs pa smras so/ /byang chub sems dpa' sems dpa' zhes bya ba'i tshig gnyis ni de dang de yin zhes rtogs par byed pa ste/ dper na 'jigs pa 'jigs pa zhes bya ba gang 'jigs pa yin zhes bya ba lta bu'o/ /tshig bla dwags ni ming ngo / /chos ni dngos po'o/ /gang gis zhes bya ba ni gang gi yang dngos po bdag ma yin te/ gtan du med pa yin no zhes bsams so/ /nang gi gzugs yod de/ de nyid byang chub sems dpa' yin no zhe na/ bdag gis yang dag par rjes su ma mthong ngo zhes bya ba la sogs pa smos te/ chos de ni nang gi phung po la sogs pa'o/ /de la re zhig gzugs can de dag ni gcig dang du ma'i rang bzhin dang bral ba'i phyir dang / gzugs can dang gzugs can ma yin pa ni gzung ba dang / 'dzin pa'i khyad par yin na gzung ba ni med de shes pa las tha dad pa yod pa ni med pa'i phyir ro/ /'dzin pa yang med de gzung ba med na de yang med pas so/ /chos de yang zhes bya ba smos pa la/ de'i phyir byang chub sems dpa' mi dmigs pa dang / gang zag la bdag med pa'i ye shes de gnyis ka shes rab kyi pha rol tu phyin pa nyid de/ de yang gal te nye bar dmigs na ni gzung bar 'gyur la/ dmigs par byed pa yang 'dzin par 'gyur la/ shes rab kyi pha rol tu phyin pa ni gnyis nyid du med de/ de bas na gzugs can du mi dmigs kyi/ rang gi ngo bo nyid kho nar rang gsal ba yin te/ de nyid de'i gsal ba yang dag par rigs pa zhes brjod do/ /gang de'i gsal bzhin pa na gang zag dang / /chos kyi bag chags sngon bsgoms pa gang yod pa de la nges par brtags shing spangs pa na snang ba med pa ni gzugs med pa'i snyoms par 'jug pa bzhin no/ / de la de dag mi dmigs pa ni bdag med pa'i ye shes yin te/ dper na phyogs mthong ba ni gang de la skud pa dang bum pa mi snang ba'i shes pa skyes na de ma mthong ba'i ni mi snang ba mthong ba bzhin no/ /'di lta bu'i shes rab kyi pha rol tu phyin pa 'ga' zhig gcig tu dben par song ste/ lung gi don dpyod par byed pa skye ba de ni thos pa las byung ba'i shes rab bo/ /'on kyang gang zhig the tsom du gyur na rjes su dpag pa la sogs pa'i stobs kyis bskyed pa de ni rigs pa bsams pa las byung ba'i shes rab bo/ /de gnyis kyi the tshom rtsa ba nas bcad de 'bad pas ting nge 'dzin thob pa de ni bsgoms pa las byung ba'i shes rab tu 'gyur ro/ /de las dang po'i gnyis bstan par bya ba'i phyir/ de bdag gis zhes bya ba la sogs pa smos so/ /byang chub sems dpa'i chos zhes bya ba ni nang gi phung po la sogs pa'o/ /ma 'tshal zhes bya ba ni ma dmigs pa'o/ /tshad mas gnod pa yin pa'i phyir ri bong gi rwa bzhin no zhes bsams so/ /de nyid la gnas pa bstan pa ni mi dmigs pa yang dag par rjes su ma mthong zhes bya ba la/ mi dmigs zhes bya ba ni yid ches pa'i lung las skyes pa des mi dmigs shing gnod pa yin no/ /yang dag par rjes su ma mthong zhes bya ba ni mi slu ba dang mkhas pa'i skye bo dang thun mong yin pa'i phyir dang / lta ba'i rjes su 'gro ba'i rjes su dpag pa'i gnod pas yang dag par rjes su ma mthong ngo / /shes rab kyi pha rol tu phyin pa yang zhes bya ba ni 'dzin pa bkag cing med de de'i gzung ba med pa'i phyir ro/ /de nyid dgag pa med de gsal ba yang dag par de nyid la gsal ba med pa'i gnod pas so/ /gang zhig ces bya ba ni gang yang med pa ste/ tshad mas gnod pa'i phyir ro/ /gang la zhes bya ba ni gang yang med pa'o/ /de la yod pa nyid ni gtso bo ma yin pa'i phyir ro/ /rtog pa'i phyir smra ba ni gdams pa'o/ /rjes su sbyar ba'i phyir bstan pa ni rjes su bstan pa'o/ /'dir ma dmigs zhes bya bas ni thos pa las byung ba'i shes rab bstan to/ /yang dag par rjes su ma mthong zhes bya bas ni rigs pas bsams pa las byung ba'i shes rab bstan to/ /rigs pa ni sngar bstan to/ /shing rta chen po dag gis kyang de dang de dag tu rgya cher bstan to/ /de'i 'og tu bsgoms pa las byung ba'i shes rab brjod par bya ste/ de yang rnam pa dgur sgrub pa ni zhi gnas yin/ de dang lhan cig spyod pa lhag mthong ngo / /zhi gnas de yang gang zhe na/ ji skad du bcom ldan 'das kyis gsungs pa/ ji ltar byang chub sems dpa'i de'i nang nyid la sems 'jog pa dang / rgyun du 'jog pa dang / blan te 'jog pa dang / nye bar 'jog pa dang / dul bar byed pa dang / zhi bar byed pa dang / rnam par zhi bar byed pa dang / rtse gcig tu byed pa dang / sems mnyam par 'jog pa'o/ /dang po dang tha ma'i sems zhes smos pa ni bar du yang sbyar bar bya'o/ /de la 'jog pa ni ting nge 'dzin gyi dmigs pa la nges par gdags pa'o/ /rgyun du 'jog pa'i sems kyi rgyun du 'jug pa de bzhin du 'jog pa yin te/ gzhan du 'gro ba dgag pas so/ /blan te 'jog pa ni rang bzhin gyis g.yo ba'i phyir sems de ji ltar yang gzhan du 'gro ba na de blan nas legs par sdom pa'i phyir ro/ /nye bar 'jog pa ni de nas brtan par gyur pa dang / rang bzhin gyis rags pa nyid kyis gzhan dag tu rnam par 'phro ba na gong nas gong du phra bar byed pas de nyid du 'jog pa'i phyir ro/ /dul bar byed pa ni rang bzhin gyis g.yeng ba la dga' ba'i sems ting nge 'dzin la dga' bar byed pa'o/ /ting nge 'dzin gyi phan yon mthong ba'i phyir te/ ting nge 'dzin gyi phan yon ni yon tan thams cad kyi khyad par dang ldan pa de bzhin gshegs pa'i go 'phang thob pa'i bar du'o/ /zhi bar byed ces bya ba ni gal te de lta na yang ting nge 'dzin la dga' ba med cing de'i sems g.yeng ba la dga' bar gyur na des na de zhi bar byed pa yin te/ g.yeng ba'i skyon ni sdug bsngal thams cad yin te/ mnar med pa thob par byed pa'i bar du yang yin no/ /rnam par zhi bar byed pa zhes bya ba ni ldan pa'i dus su brnab sems dang / yid mi bde ba la sogs pa nye bar zhi bar byed pa ni sdug bsngal ba bzhin no/ /rtse gcig tu byed pa ni dmigs pa gcig la thags 'thag pa dang chos mthun pas rtse gcig tu de ltar byed pa rtse gcig tu byed pa'o/ /sems kyi nyes pa bdun gyis gsal nas 'bad pas de bzhin du rang gi ngang gis 'byung bar byed pa zhes bya ba'i don to/ /mnyam par 'jog pa zhes bya ba ni rang gi ngang gis 'byung ba goms par byas nas lhun gyis grub cing rang gi ngang gis 'byung bas yang dag pa'i dmigs pa la sems 'dzin par byed pa zhes bya ba'i don to/ /de yang mdo sde rgyan las/ dmigs pa la ni sems gtad nas/ /de rgyun rnam par g.yeng mi bya/ /rnam g.yeng myur du rtogs byas nas/ /de la slar ni blan par bya/ /blo ldan gong nas gong du yang / /sems ni nang du bsdu bar bya/ /de nas yon tan mthong ba'i phyir/ /ting nge 'dzin la sems 'dul lo/ /rnam g.yeng nyes pa mthong ba'i phyir/ /de la mi dga' zhi bar bya/ / des na sdom brtson can gyis ni/ /sems la mngon par 'du byed pas/ /rang gi ngang gis 'byung ba thob/ /de goms pa las 'du mi byed/ /zhi gnas grub pa yod na de dang lhan cig spyod pa'i shes rab skye bar 'gyur te/ lta ba dang / rig pa dang / blo dang / snang ba de ni lhag mthong yin te/ de gnyi ga yang bsgoms pa las byung ba'i shes rab yin te/ de bas de bstan pa'i phyir/ bcom ldan 'das 'on kyang zhes bya ba la sogs pa smos so/ /gal te zhes bya ba ni tshig gi phrad gzhan yin te/ gal te nyid ces bya ba'i don to/ /'di ltar zhes bya ba ni yang bdag gis zhes bya ba la sogs pa'o/ /bshad cing zhes bya ba ni dang por da ltar byung ba yin yang 'das pa'i yul dang nye bar 'gyur bas lad ces bya ba'i rkyen byas pas bshad na zhes bya ba yin no/ /bshad pa'i don dang bstan pas ni thos pa las byung ba'i shes rab kyi mtshan nyid do/ / lung 'bogs pa zhes bya ba ni bsams pa las byung ba'i shes rab kyi mtshan nyid de/ mngon sum du byas zhes bya ba ni tshig gi lhag ma'o/ /sems mi zhum pa zhes bya ba ni ji ltar thob pa de nyid la don la sems pa la sems khyad du mi gsod mi zhum ste/ de nyid du nges par brtag pa'i phyir ro/ / kun tu zhum par mi bgyid ces bya ba ni sems kyi rgyun du 'jug pa la yang rjes su mi 'brang zhing zhum par mi bgyid do/ /mi 'gong zhes bya ba ni sems rang bzhin gyis g.yo ba'i phyir/ gzhan du song ba la yang kun nas shes par byas nas sdud pa na skyo ba med pa yin no/ /mi gsod par mi 'gyur zhes bya ba ni sems shin tu brtan par gyur na yang rang bzhin gyis rtogs pa rags pa gzhan du mi 'phro ba'i phyir gong nas gong du phra mor byed pa na skyo ba med pa yin no/ /de'i zhes bya ba ni byang chub sems dpa'o/ /yid phyir phyogs par mi bgyid ces bya ba ni ting nge 'dzin la gnas par byas pa yin yang bar mar gnas pa'i phyir te/ de lta mod kyi de nyid du sems 'dul bar byed de/ ting nge 'dzin gyi yon tan rnams mthong bas so/ /bcom zhing phyir phyogs par mi 'gyur zhes bya ba ni de la dga' ba med pa dang / mos pa med pas rnam par g.yeng ba byed pa med par 'gyur te/ rnam par g.yeng ba'i skyon rnams mthong ba'i phyir ro/ /mi skrag ces bya ba ni brnab sems dang / yid mi bde ba la sogs pa skyes pa na yang mi skrag pa yin te/ 'on kyang de nyid 'joms pa ni yin te/ g.yeng ba'i skyon mthong ba'i phyir ro/ / mi dngang zhes bya ba ni sems skyon med pa rang gis ngang gis 'byung ba nyid kyi don gang yin pa'i 'du byed de la mi dngang zhing de byed pa zhes bya ba'i don to/ /dngang bar mi 'gyur zhes bya ba ni sems yang dag par 'gyur te/ 'bad pa med par rang gi 'byung bas dngang ba dang / yang dag par dngang ba de med pa yin te/ lhun gyis grub pa nyid ngang gis 'byung ba 'dzin zhes bya ba'i don to/ /don dam pa nyid kyi byang chub sems dpa' la sogs pa bstan par bya ba'i phyir 'di nyid ces bya ba la sogs pa gsungs so/ /ting nge 'dzin 'di nyid byang chub sems dpa' yin te/ sems kyi khyad par yin pa'i phyir ro/ /'di nyid ces bya ba ni de dang ldan pa nyid shes rab kyi pha rol tu phyin pa dang gdams pa yin no/ /gang de gnyis dang yang dag par ldan pa ni de ltar gnas na zhes bya ba la ting nge 'dzin 'di nyid la gnas na 'di mi gtong ba yin te/ de nyid gdams pa dang rjes su 'brel ba'i rjes su bstan pa'o/ /de bas na de ltar sems bskyed pa'i 'og nas de nas zhes bya ba la sogs pa nas gdams pa dang / rjes su bstan par bya ba'i bar gyis ni bsgrub pa la gdams pa bstan te/ ji ltar las dang po pas shes rab kyi pha rol tu phyin pa de la spyad par bya ba de'i spyod pa ni sgrub pa ste/ de la gdams pa ni bsgrub pa la gdams pa'o/ /'di nyid la bcom ldan 'das kyis mdor bsdus nas bka' stsal pa ni 'di tsam nyid de/ dgu po gzhan ni cha tsam gsungs pa yin no/ /shes rab kyi pha rol tu phyin pa chen po dag tu ni bcu char yang rgya cher gsungs so/ /de yang bstan bcos las/ bsgrub dang brten pa rnams dang ni/ /sangs rgyas la sogs dkon mchog gsum/ /ma zhen yongs su mi ral dang / /lam ni yongs su 'dzin pa dang / /spyan lnga dang ni mngon shes kyi/ /yon tan drug dang mthong lam dang / /bsgom zhes bya ba gdams ngag ni/ /bcu yi bdag nyid shes par bya/ /zhes bya ba gsungs te/ bsgrub pa la gdams pa yang pha rol tu phyin pa chen po dag las g.yeng ba'i rnam par rtog pa bcu po'i gnyen po rgya cher gsungs so/ /de bdag gis kyang dga' ldan nyid las rnam par bshad pa yin te/ 'dir ni ma brjod do/ /da ni 'di nyid brjod par bya ste/ de la gzugs la sogs pa ston pa nyid dang ldan pa ni gang gi tshe cung zad ldan pa dang / mi ldan pa yang dag par mi dmigs pa de'i tshe shes rab kyi pha rol tu phyin pa dang ldan pa yin no zhes brjod par bya ste/ de ni sdug bsngal gyi bden pa la gdams pa'o/ /gzugs la sogs pa skye ba dang / 'gag pa dang / kun nas nyon mongs pa dang / rnam par byang ba'i chos can yang dag par rjes su mi mthong ste/ rnam par shes pa nyid stong pa nyid stong pa nyid rnam par shes pa nyid de/ de ni kun 'byung gi bden pa la gdams pa'o/ /stong pa nyid ni 'phel ba med pa'i bar du'o/ /de la ni gzugs la sogs pa med/ sdug bsngal med/ kun 'byung med/ 'gog pa med/ lam med pa nas sangs rgyas med/ byang chub med ces bya ba ni 'gog pa'i bden pa la gdams pa'o/ /de la shes rab kyi pha rol tu phyin pa la spyod pa ni sbyin pa'i pha rol tu phyin pa la sogs pa dang / bdag nyid ldan pa 'am mi ldan pa zhes yang dag par rjes su mi mthong ste/ rnam pa thams cad mkhyen pa nyid kyi bar dang 'das pa la sogs pa'i dus gsum du mi sbyor te/ dus gsum po stong pa nyid la bstan pa'i phyir ro/ /'di ni lam gyi bden pa la gdams pa'o/ /phung po dang thams cad mkhyen pa nyid mi sbyor te/ gang gi phyir de nyid mi dmigs pa'i phyir ro/ /de bzhin du khams la ma yin/ skye mched la ma yin/ pha rol tu phyin pa la ma yin/ byang chub kyi phyogs la ma yin/ sangs rgyas la ma yin/ gang gi phyir de nyid mi dmigs pa'i phyir ro/ /de bzhin du de dang sangs rgyas su sbyor bar mi byed do/ /gang gi phyir de nyid mi dmigs pas de dang der yang ma yin te/ gang gi phyir de nyid mi dmigs pa'i phyir ro/ /de bzhin du byang chub la ma yin/ byang chub kyang de la ma yin no/ /de ltar na sangs rgyas nyid rnam pa thams cad mkhyen pa nyid de de nyid sangs rgyas so/ /byang chub nyid de'o/ /de nyid byang chub yin te/ de ni sangs rgyas dkon mchog la gdams pa'o/ /cung zad ci ltar yang sbyor bar mi byed/ ji ltar yang spyod par mi byed/ ji ltar gang gi ched du shes rab kyi pha rol tu phyin pa la spyod par mi byed pa de ltar byang chub sems dpa' rnams kyi rgya chen po'i bya ba ni sbyor ba dam pa yin te/ 'di lta ste/ stong pa nyid kyi rnal 'byor yin pas rnal 'byor gzhan thams cad zil gyis mnan nas gnas pa yin te/ de ni chos dkon mchog la gdams pa'o/ /'dir dge 'dun dkon mchog ni phyir mi ldog pa'i byang chub sems dpa'i tshogs te/ de yang gang zag nyi shu mdo las bstan te/ de bas na bstan bcos las/ dbang po rtul dang rnon po dag /dad dang mthong thob rigs nas rigs/ /bar chad gcig par skyes nas dang / /byed dang byed min 'og min 'gro/ /'phar gsum srid rtse'i mthar thug 'gro/ /gzugs kyi 'dod chags bcom pa dang / mthong chos zhi lus mngon sum byed/ /bse ru dang ni nyi shu'o/ /zhes bya ba la dad pas rjes su 'brang ba dang / chos kyis rjes su 'brang ba dang / dad pas mos pa dang / mthong bas thob pa dang / lha'i rigs nas rigs su skye ba dang / mi'i rigs nas rigs su skye ba dang / bar chad gcig pa dang bdun no/ /tshig rnams la tshig gi phyogs gcig kyang 'jug pa yin te/ dper na 'jigs sde la 'jigs sde zhes bya ba lta bu'o/ /spyi'i sgra la yang khyad par 'jug pa yin te/ dper na lhar skyes pa lta bu'o/ /des na bar ma dor yongs su mya ngan las 'das pa dang / skyes nas yongs su mya ngan las 'das pa dang / mngon par 'du byed pas mya ngan las 'das pa dang / mngon par 'du mi byed pas mya ngan las 'das pa dang rnam pa bzhi'o/ /'og min gyi bar du 'gro zhing de las gong du mthar thug par ma yin no/ /'og min gyi mthar zhes bya ba'i don to/ /'phar ba zhes bya ba'i mang po'i tshig ni mang po'i don to/ /'phar ba dang / phyed du 'phar ba dang / gnas thams cad du 'chi 'pho ba dang gsum mo/ /srid pa'i rtse mo'i mthar thug par 'gro ba dang / gzugs kyi 'dod chags dang bral ba dang / mthong ba'i chos la mya ngan las 'das pa dang / lus kyis mngon sum du byed pa dang / rang sangs rgyas dang lnga'o/ /'di dag kyang shes rab kyi pha rol tu phyin pa'i nang du 'dus pa'i phyir bsgrub pa la gdams par cha tsam bstan pa yin no/ /de ni dge 'dun dkon mchog la gdams pa yin te/ de ltar bstan pa ni dkon mchog gsum la gdams pa'o/ /byang chub sems dpa' lus ngag yid gsum gyis pha rol tu phyin pa drug la spyod cing / lus ngag yid gsum yang mi dmigs la/ pha rol tu phyin pa dag kyang mi dmigs te/ de ni ma zhen pa la gdams pa'o/ /gzugs la sogs pa mi shes pa nas bla na med pa yang dag par rdzogs pa'i byang chub mi shes pa'i bar du ni yongs su mi ngal ba la gdams pa'o/ /de phyogs re rer yang gang gA'i klung gi bye ma snyed kyi de bzhin gshegs pa mthong zhing de dag las chos bstan pa thob pa dang / dge 'dun la bsnyen bkur byed pa dang / sangs rgyas kyi zhing yongs su dag par mthong ba'o/ /de thams cad dang bdag dang gzhan yang dag par mi shes pa dang / pha rol tu phyin pa rnams la spyod pa dang / sangs rgyas kyi chos rnams kyi bar du yongs su rdzogs par byed pa de thams cad kyang mi shes pa yin te/ de ltar spyod pa kun nas yang dag par yongs su 'dzin pa'i phyir lam yongs su 'dzin pa la gdams pa'o/ /de nas spyan lnga dang mngon par shes pa drug thob par 'gyur te/ de dag mi shes te gang yang shes pa de dag thams cad kyang mi shes shing yang dag par mi dmigs so/ /de la spyan lnga ni sha'i spyan dang / lha'i spyan dang / shes rab kyi spyan dang / chos kyi spyan dang / sangs rgyas kyi spyan no/ /de la sha'i spyan gyis ni gzugs rnams mthong ba yin no/ /lha'i spyan gyis ni gzugs med pa rnams dang 'chi 'pho ba dang / skye ba mthong ba yin no/ /shes rab kyi spyan gyis ni chos thams cad mi dmigs pa'o/ /chos kyi spyan gyis ni 'phags pa'i gang zag dang de'i chos rnams yang dag par mi dmigs pa'o/ /sangs rgyas kyi spyan gyis ni chos thams cad rnam pa thams cad du mi dmigs pa yin te/ de ni spyan lnga la gdams pa'o/ /mngon par shes pa drug gang zhe na/ rdzu 'phrul gyi bya ba dang / lha'i rna ba dang / sems can thams cad kyi sems kyi spyod pa shes pa dang / sngon gyi gnas rjes su dran pa shes pa dang / lha'i mig dang zag pa zad pa shes pa'o/ /lha'i mig gi mngon par shes pas ni sems can rnams kyi 'chi 'pho dang skye ba shes pa'o/ /'di ni mngon par 'du byas pa yin la/ snga ma'i lha'i mig ni rnam par smin pa ma yin no/ /de ni mngon par shes pa drug la gdams pa'o/ /de nyid bsgrub pa'i ting nge 'dzin mngon du byas nas/ chos thams cad bdag med par nye bar brtag pa ni lhag mthong yin te/ de yongs su smin pa las lhun gyis grub pa spros pa med pa'i sems kyi khams mnyam par gzhag pa ni 'jig rten las 'das pa'i shes pa yin te/ des gang dang gang mthong ba'i don de mi snang ba yin te/ de ni mthong ba'i lam la gdams pa'o/ /gang mthong ba de nyid kyi rgyun shes pa de ni bsgom pa yin te/ de ni bsgom pa'i lam la gdams pa'o/ /de ltar na gdams ngag bstan pa yin no/ /nges par 'byed pa'i cha zhes bya ba la nges par rtogs pa ni nges par 'byed pa'o/ /de'i cha dang yan lag 'di ni nges par 'byed pa'i cha yin te/ gcig tu nges pa zhes bya ba'i don to/ /yang na nges par 'byed pa ni so sor 'byed pa ste/ de'i cha ni byed pa yin te/ nges par 'byed pa'i cha dang mthun pa de dag kyang so sor 'byed pa thob pa'i rgyu yin pa'i phyir brten pa dang / cha dang thob pa ni bzhi po 'di dag ste/ drod dang / rtse mo dang / bzod pa dang / 'jig rten chos kyi mchog go/ /'jig rten las 'das pa'i ye shes kyi me'i snga ltas yin pa'i phyir dro ba'o/ /yun ring po'i dge ba'i rtsa ba'i rtse mor gyur pa'i phyir rtse mo'o/ /'jig rten pa'i chos kyi mchog la bzod pas na bzod pa'o/ /'jig rten pa thams cad kyi chos kyi mchog yin pas na chos kyi mchog go/ /de dag ni bden pa bzhi la dmigs nas mi rtag pa dang / sdug bsngal ba la sogs pa'i rnam par nyan thos dang / rang sangs rgyas dag la yang yod de/ de dag las byang chub sems dpa' ni khyad par rnam pa lngas khyad par du 'phags par brjod par bya ste/ de bas na bstan bcos las/ dmigs pa dang ni rnam pa dang / /rgyu dang yongs su 'dzin pa yis/ /byang chub sems dpa' skyob pa yi/ /drod sogs bdag nyid ji bzhin du/ /rnam rtog bzhi po ldan brten pa/ /chung dang 'bring dang chen po rnams/ /nyan thos bse ru lta bu dang / /bcas pa dag las khyad par 'phags/ /sems can thams cad la skyob pa'i bsam pa yod pa'i phyir byang chub sems dpa' skyob pa yin te/ gang chung ngu dang / 'bring dang / chen po'i dro ba la sogs pa'o/ /gang nyan thos dang / rang sangs rgyas de dag gi dro ba la sogs pa dag las/ shin tu khyad par du gyur pa rnam pa lngas khyad par du gyur pa yin te/ dmigs pa dang rnam pa dang / theg pa gsum thob pa'i rgyu dang / yang dag par yongs su 'dzin pa dang / rnam par rtog pa bzhi dang ldan pa ste/ ji ltar rang gi dro ba la sogs pa 'di dag gi so so re re la yang chung ngu dang / 'bring dang / chen po'i dbye bas bcu gnyis su 'gyur ro/ /de la dro ba chung ngu'i dmigs pa ni bden pa bzhi la mi rtag pa la sogs par shes pa'o/ /de'i rnam pa ni mngon par zhen pa la sogs pa 'gog pa yin no/ /de yang bstan bcos las/ sdug bsngal gyi bden pa la gzugs mi rtag pa la sogs pa dmigs pa dang / kun 'byung ba'i bden pa la kun 'byung ba spang bar bya ba la sogs pa dang / 'gog pa'i bden pa la 'gog pa mngon sum du byas pa la sogs pa'o/ /rnam pa ni dmigs pa de dag la so sor mngon par zhen pa med pa dang / gnas pa med pa dang / bden pa ma yin par shes pa'o/ /mngon par zhen pa dang / gnas pa dang / bden pa'i shes pa ni 'gog pa'o/ /lam gyi bden pa yang gzugs shes par bya/ gzugs des kyang rlom sems su mi bya'o/ /zhes bya ba nas sangs rgyas kyi chos kyi bar du des kyang rlom sems su mi bya'o/ /chos thams cad shes pa ni dmigs pa'o/ /des rlom sems su mi bya ba ni rnam pa'o/ /de nyid gzhan yang zhes bya ba la sogs pas gsungs so/ /gzhan yang zhes smos pas ni gdams ngag la ltos pa'o/ /shes rab kyi pha rol tu phyin pa la spyod ces bya ba ni bden pa gsum dang 'brel ba'i mi rtag pa nyid la sogs pa ni dmigs pa'o/ /mngon par zhen pa med pa la sogs pa ni rnam pa ste/ mi dmigs par spyod pa'o/ /shes rab kyi pha rol tu phyin pa bsgom pas zhes bya ba smos pa ni rim gyis bsgom pa zhes bya ba'i don to/ /bden pa gsum gyi 'og tu lam gyi bden pa'i dmigs pa ni dmigs pa med pa'o/ /des rlom sems med pa ni rnam pa bsgoms pas shes par bya ba yin no/ /de ltar bslab par bgyi'o zhes bya ba ni mngon par zhen pa med cing rlom sems med pa de ltar bslab par bya'o/ /des kyang zhes bya bas ni gang de'i sems mnyam pa med pa yin te/ nyan thos dang / rang sangs rgyas la sogs pa dang thun mong ma yin pa'i phyir ro/ /sems rgya chen po rnam pa thams cad du dus chad pa med par sems can gyi don gyi bya ba rnams kyi 'byung gnas su gyur pa'i phyir ro/ /byang chub sems zhes bya ba ni byang chub kyi bdag nyid kyi sems so/ /kyang gi sgra ni lhag pa'i don to/ / de'i phyir byang chub sems dpa' rnams kyi sems ni sems can thams cad las khyad par du 'phags pa yod par 'dod de/ des kyang rlom sems su mi byed na tha mal pa'i sems kyis lta smos kyang ci dgos zhes bya ba'i don to/ /de ci'i slad du zhe na/ zhes bya ba ni rnam pa gang gis de la rlom sems med pa yin zhe na/ 'di ltar zhes bya ba la sogs pas lan smras so/ /sems de ni sems ma mchis pa zhes bya ba ni gzung ba dang 'dzin pa gnyis la de mi snang ba'i phyir ro/ /gal te sems med na 'on kyang de sems kyi rang bzhin ni 'od gsal ba zhes smos so/ /ji ltar 'od gsal ba yin zhe na/ gang gi phyir sems ni 'dod chags la sogs pa dang dang po nas mi ldan pa yin te/ de dag ni rang bzhin gyis glo bur ba yin pa'i phyir ro/ /de nyid kyi phyir phyis kyang bral ba med do/ /shA ri'i bus 'di skad ces smras so zhes bya ba ni de ltar shes kyang rab 'byor gyis ston par bya ba'i phyir dris so/ /de skad ces smras pa zhes bya ba la sogs pas ni rab 'byor gyis dris pa'i lan ston to/ /de ni med do zhes bya ba de ni mi dmigs pa ste/ sgrub par byed pa med pa'i phyir ro/ /de nyid pa yang ma yin te/ gnod par byed pa yod pa'i phyir ro/ /dngos po dang / dngos po med pa las yang dag par 'das pa ni gnod par byed pa yin no/ /yod dam zhes bya ba ni ci de med pa nyid ces bya ba'i don to/ /de tsam gyis kyang rab 'byor gyis bsams pas gsal por ma gyur nas/ gsal bar bya ba'i phyir dris pa ni de gang yin zhes bya'o/ /rab 'byor gyi lan ni sems med pa de ni 'gyur ba med pa rnam par rtog pa med pa zhes smos te/ sems rang bzhin gyis 'od gsal ba dang / 'gyur ba ma gos pa'i phyir 'gyur ba med pa'o/ /spros pa thams cad nye bar zhi ba dang / rnam pa thams cad kyi spyod yul ma yin pa'i phyir rnam par rtog pa med pa'o/ /de lta bas na de lta bu'i sems kyis kyang rlom sems su mi bya ste/ de la yang sems med pa tsam gyi phyir te/ sems stong pa nyid tsam las zhes bya ba'i don to/ /de ltar na sems de yang sems med pa yin te rang bzhin gyis 'od gsal ba ni dmigs pa'o/ /de la yang rlom sems med pa ni rnam pa'o/ /ji ltar sems la sems med pa ste nye bar gzugs la sogs pa yang gzugs la sogs pa med pa nyid du don gyis shes pa yin no/ /de nas zhes bya ba ni sems med par yang dag par bstan pa'i rjes thogs la'o/ / ji ltar yang zhes bya ba ni rab tu ston pa nyid ces bya ba'i don to/ /ji ltar ston pa yin zhe na/ /ji ltar bcom ldan 'das kyis mchog nyid du gsungs pa de ltar ston pa yin no/ /de gang gi mchog tu gyur pa yin zhe na/ nyon mongs pa med pa la gnas pa'i'o/ /nyon mongs pa med pa la snyoms par 'jug pa rnam pa gnyis la nyon mongs pa'i g.yul dang 'gal ba gcig po de ni 'dir mi bzung ste/ gnyis pa gnas skabs kyis de'i gnas pas gnas pa yin pa'i phyir ro/ /de bas na zhes bya ba ni de ltar na dmigs pa dang rnam pa'i khyad par dang ldan pa ni dro ba chung ngu'o/ / shes rab kyi pha rol tu phyin pa dang ma bral zhes bya ba des de'i gong nas gong du yang 'phel ba yin te/ de ni dro ba chung ngu'i dmigs pa dang rnam pa'i khyad par dag go/ /dro ba chung ngu'i skabs yin pa'i phyir phyi ma dag tu yang rjes su 'brang bar bya'o/ /rgyu'i khyad par bcu gnyis kyi dbang du yang bya ste/ thob pa'i rgyu ni byang chub sems dpa'i dro ba la sogs pa'o/ /bstan bcos las/ theg pa gsum char rgyu ba'o/ /zhes bshad do/ /gang yang nyan thos dang / rang sangs rgyas de dag gi rang gi byang chub nyid kyi rgyu yin no/ /'di nyid nyan thos kyi sa la slob par zhes bya ba la sogs pas bstan te/ 'di la yon tan yod pas na sa dang gzhi yin te/ rgyu mtshan gyi bdun pa yin no/ /sa la zhes bya ba ni rgyu mtshan gyi don to/ /slob par 'dod pas zhes bya ba ni sgrub par 'dod pas so/ /mnyen par bya ba ni gzhung nyan pa'o/ /gzung bar bya zhes bya ba ni bzlas par bya ba'o/ /bcang bar bya zhes bya ba ni sems la gzhag par bya ba'o/ /bklag par bya zhes bya ba ni mi brjed pa'i don du rjod par byed pa'o/ /kun chub par bya'o zhes bya ba ni don dang ldan pas thams cad shes pa nyid du bya ba'o/ /rab tu ston par bya ba'o/ /zhes bya ba ni gzhan dag la don dang gzhung gi don dag bstan pas bdag nyid kyi bsod nams kyi stobs kyis gzhan dag rjes su gzung ba ni byang chub pa'i don du gnas pa yin no/ /bslab par bya'o zhes bya ba ni sems dpas so/ /rnal 'byor du bya'o zhes bya ba la rnal 'byor ni zhi gnas dang lhag mthong ngo / /de bya'o zhes bya ba ni thob par bya ba'o/ /byang chub sems dpa'i sa la zhes bya ba ni rab tu dga' ba nas chos kyi sprin gyi bar rnam pa bcu'o/ /thabs mkhas pa ni 'og nas bshad pa'i rnam pa kun mngon par rdzogs par rtogs pa'i mjug nas 'byung ba'i rnam pa bcu'o/ /de dang ldan pa ni yod pa'o/ /yongs su bsgrubs pa ni kun nas mthar phyin pa'o/ /de dag ni rgyu nyid kyi khyad par ro/ /bstan bcos las/ gzugs sogs skye 'jig gnas bral dang / /gnas dang brtags dang brjod du med/ /ces bya ba ni gzugs la sogs pa'i skye ba dang 'jig pa med pa'i chos tsam du yang yod pa ma yin te/ de ni drod 'bring gi dmigs pa yin no/ /ming de yang gnas pa med pa dang bral ba med pa de ni rnam pa'o/ /gang yang 'di lta ste byang chub sems dpa' zhes bya ba chos kyi brda can brtags pa 'di ni drod chen po'i dmigs pa yin no/ /de ni phung po dang / khams dang / sangs rgyas kyi chos ma 'dres pa'i bar du gang gis kyang tshig gis brjod par ma nus pa ni rnam pa'o/ /de nyid de nas zhes bya ba la sogs pas gsungs so/ /bdag gis ma 'tshal zhes bya ba ni don las mi shes pa'o/ /bdag gis dngos po ma 'tshal zhes bya ba ni 'og ma'i tshig las so/ /bdag gis dngos po ma 'tshal zhes bya ba ni bstan pa'o/ /lhag ma ni nges par bshad pa'o/ /mi dmigs pa ni mngon sum gyis so/ /yang dag par rjes su mi mthong ba ni rjes su dpag pas so/ /glo ba la gcags pa'i dngos po nyid ni yid la gcags pa ste/ rigs pa ma yin pas byas pa nyid kyis so/ /'du ba dang 'jig pa zhes bya ba la sgra las rtogs pa ni 'du ba'o/ /sgra las gzhan gyi nges pa skyed pa ni 'jig pa'o/ /ming tsam gyis zhes bya ba ni don gyis stong pa'i ming ste/ 'di lta ste byang chub sems dpa' zhes bya ba lta bu'o/ gang dag 'du ba dang 'jig pa gal te bya ba dang / dgag pa yin par 'dod par gyur pa de'i tshe ni 'di lta ste/ byang chub sems dpa' byang chub sems dpa' ma yin zhes bya bar gsungs par 'gyur ro/ /'on kyang zhes bya ba ni skyon shin tu che bar mtshon pa yin no/ /de yang phyi nas brjod par bya ste phyi nas kyi don te yang yang gi sgra yin no/ /mi gnas zhes bya ba ni khyad par du 'gro ba ste/ ther zug tu gnas pas rtag pa med pa zhes pa'i don to/ /mi gnas pa la yang ma lags zhes bya ba ni 'gyur ba'i gnas pa dang / rgyun gyis rtag pas gnas pa ma yin zhes bya ba'i don to/ / rigs pa 'dis 'du ba dang 'jig pa yod pa ma yin no zhes bya bar bsams so/ /de bzhin du gnas pa med pa dang / gnas pa med pa ma yin pa'o/ /de ci'i slad du zhe na/ bzhi po de ga las she na/ lan du ming de ma mchis pa'i slad du zhes bya ba la sogs pa smos te/ de dag ni drod 'bring gi dmigs pa'i khyad par dag go/ /de ltar zhes bya ba ni don dang ming gnyis med pas so/ /mi gnas shing zhes bya ba ni de kho na nyid la rnam par gnas pa ma yin pa'o/ /mi gnas pa yang ma lags/ zhes bya ba ni gnas pa yang ma yin pa nyid tha snyad nges pa yin pa'i phyir de ni btags pa tsam ma yin/ zhes bsam pa yin no/ /rnam par gnas pa yang ma lags/ zhes bya ba la btags pa tsam de yang gzugs la rnam par gnas pa ma yin/ phung po dang / khams la sogs pa'i ngo bo rnam pa sna tshogs su gnas pa ma yin no/ /gang gi phyir des na brjod par bya ba ma yin no zhes bya bar bsams so/ /rnam par mi gnas pa yang ma yin te/ zhes bya ba ni gtan du rnam par mi gnas pa ma yin te/ gang zhig gis tha snyad tsam du brjod par nus pa'i phyir ro/ /de dag ni drod chen po'i dmigs pa dang rnam pa'i khyad par dag go/ /bcom ldan 'das zhes bya ba la sogs pa la de ltar zhes bya ba ni dmigs pa dang rnam pa ji ltar bshad pa ltar ro/ /zab mo zhes bya ba ni mos par dka' ba'o/ /shes rab kyi pha rol tu phyin pa zhes bya ba ni drod 'bring dang chen po'i mtshan nyid do/ /bshad pas ni tshig las so/ /ston pa ni don las so/ / nye bar ston pa ni don la'o/ /de yang shes pa skyes pas zhi gnas skyes par sems ma zhum zhes bya ba la sogs pas don snga ma bzhin du bshad do/ /bsams pa ni lhag pa'i bsam pa'o/ /des na gcig tu nges pa zhes bya ba'i don to/ /mos pa ni zhi gnas dang lhag mthong gi stobs kyis nges par skyes pa'o/ /ma bral bar zhes bya ba ni des gong nas gong du 'gro ba yin no/ /phyir mi ldog pa zhes bya ba la sogs pa smos pa la phyir mi ldog ces bya ba'i phyir mi ldog pa ni yang dag par rdzogs pa'i byang chub las ldog pa med par nges pa'o/ /de nyid la phan pas na phan pa'i rkyen can no/ /byang chub sems dpa'i sa ni go skabs te 'di la yon tan gyi tshogs yod pas na sa ste/ de la gnas pa'i legs pa zhes bya ba ni de nyid la yang dag par gnas pa'o/ /ji ltar zhe na/ gnas pa'i tshul gyis te/ gsum mi dmigs pa'i sbyor bas so/ /de ni drod chen po'i dmigs pa dang rnam pa'i khyad par dag go/ /rtse mo chung ngu brjod par bya ste/ de'i dbang du byas nas bstan bcos las/ gzugs sogs mi gnas de dag ni/ /de yi ngo bor rang bzhin med/ /de dag gcig gi rang bzhin gcig /de mi rtag sogs par mi gnas/ /de rnams de yi ngo bos stong / /de dag gcig gi rang bzhin gcig /ces gsungs so/ /gzugs la sogs pa rnam par rig pa'i ngo bo la gnas pa med pa ni mi gnas pa'o/ /de yang gang zhe na/ gzugs la sogs pa de nyid du rtog pa dang / gzugs la sogs pa bzung bar rnam par rtog pa'i ngo bos stong pa yin te/ rnam par rig pa'i ngo bos ni ma yin te/ rnam par rig pa de thams cad kyis thams cad du chud gson pa ni ma yin no/ /zhes rnam par mi rtog par 'jug pa'i gzungs las gsungs pas so/ /de bas na rnam par rig pa'i ngo bo la gang gzugs la sogs pa de dag nyid kyi stong par ston pa yin te/ de ni 'dir dmigs pa'o/ /gang yang de dag gcig gi rang bzhin zhes bya ba ni phan tshun gyi ngo bo nyid de/ /de ni de'i rnam pa'o/ /de ltar na gzugs la sogs pa nyid stong pa nyid de/ chos las chos nyid tha mi dad pa'i phyir stong pa nyid gzugs la sogs pa'o/ /gzugs la sogs pa yang yang dag par stong pa nyid kyi ngo bo yin te/ rnam par rig pa ni ma yin te zhes bya ba'i don to/ /de bzhin du de mi rtag pa la sogs par mi gnas zhes bya ba la gzugs la sogs pa de'i mi rtag pa la sogs par mi gnas pa yin te/ de yang gang zhe na/ de ni mi rtag pa sogs pa nyid ni mi dmigs pa'o/ /de dag gcig gi rang bzhin gcig /ces bya ba ni mi rtag pa nyid stong pa nyid do/ /stong pa nyid kyang mi rtag pa nyid de/ de ni rnam pa'o/ /de bzhin du gzugs la sogs pa de ni mi gnas pa yin te/ de nyid ni shes rab kyi pha rol tu phyin pa chen po dag las bcom ldan 'das kyis mi gnas pa yin no zhes rgya cher gsungs so/ /rnam pa gzhan du yang gsungs pa ni tshig de nyid dang yi ge de nyid kyi don mdor bstan pa ni bcom ldan 'das gzhan yang zhes bya ba la sogs pa gsungs so/ /shes rab kyi pha rol tu phyin pa la zhes bya ba ni rtse mo chung ngu'i mtshan nyid la'o/ /spyod cing zhes bya ba ni thos pa dang bsams pa dag gis so/ /de la bsgoms pas zhes bya ba ni zhi gnas dang lhag mthong dag gis so/ /gzugs la sogs pa la gnas par mi bgyi'o/ /de ci'i slad du zhe na/ zhes bya ba la de la mi gnas pa ga las shes she na/ gzugs mngon par 'du byed pa zhes bya ba ni gzugs la rnam par rtog pa'o/ /'di la spyod pa ma lags so zhes bya ba ni 'di la rnam par rtog pa nyid kyi phyir ro/ /de'i ci'i slad du zhe na zhes bya ba ni/ de la spyod pa ma lags pa ga las shes she na/ lan ni mngon par 'du byed pa rnams la spyod na zhes bya ba la sogs pa gsungs so/ /yongs su 'dzin pa ma lags zhes bya ba ni dmigs pa ma yin zhes bya ba'o/ /rtsod pa zhes bya ba ni rtse mo chung ngu yin no/ /yongs su rdzogs par bgyid pa yang ma lags zhes bya ba ni rtse mo 'bring yin no/ /nges par 'byung bar yang mi 'gyur zhes bya ba ni rtse mo chen po yin no/ /thams cad mkhyen pa nyid la zhes bya ba ni dngos po thams cad mkhyen pa'o/ /yongs su mi gzung ba zhes bya ba ni gzung bar bya ba ma yin pa'o/ /gzung bar bya ba ma yin pa ga las she na/ shes rab kyi pha rol tu phyin pa zhes bya ba la sogs pas lan gsungs te/ de ni gzugs ma lags zhes bya ba ni gzugs bzung ba ma yin te 'gal ba'i phyir ro/ /'di la zhes bya ba ni rtse mo chung ngu la'o/ /spyad par bgyi'o zhes bya ba ni rnal 'byor du bya ba'o/ /rnal 'byor ni ting nge 'dzin to/ /gal te gzugs la sogs pa la gnas na ni gzugs la sogs pa mngon par 'du byed pa la spyod kyi/ shes rab kyi pha rol tu phyin pa la spyod pa ma lags te/ yongs su mi bzung ba yongs su bzung bas gang gzugs la sogs pa la mi gnas pa na dmigs pa yin no/ /gzugs yongs su bzung ba med pa nas shes rab kyi pha rol tu phyin pa de yang yongs su bzung ba med pa'i bar ni yongs su mi bzung ba yin te/ gang yang gzugs la sogs pa yongs su mi 'dzin cing gzugs la sogs pa las gzhan yang mi 'dzin pa ni rnam pa'o/ /'di yang zhes bya ba la sogs pas ni ting nge 'dzin 'di'i ming gsungs so/ /gang la chos thams cad yongs su bzung ba med pa'i ting nge 'dzin de la de skad ces brjod do/ /dmigs pa yangs pas na yangs pa'o/ /sangs rgyas thams cad kyis bsngags pas mdun du ma bgyis pa'o/ /tshad med pa ni sangs rgyas nyid do/ /de la nges pa ni tshad med par nges pa'o/ /de ni rtse mo chung ngu'i dmigs pa dang rnam pa'i khyad par dag go/ /de yang bcom ldan 'das kyis 'dir ni mdor bstan par bzhed de 'dir yang 'jug pa rnam pa gsum ste/ de ni rgyas par bstan pa la dga' ba ste/ ma bshad par rtogs par mi nus pas tshig lhur len pa'o/ /gnyis pa ni 'bring du bshad pa la dga' ba ste phyed tsam du bstan na lhag ma rtogs par 'gyur bas rnam par spros te bshad nas go ba'o/ /gsum pa ni mdor bsdus pa la dga' ba yin te cung zad bstan na shin tu mang po rtogs par 'gyur bas mgo smos pas go ba'o/ /de dag la go rims bzhin du stong phrag brgya pa dang / stong phrag nyi shu rtsa lnga pa dang / stong phrag brgya pa dag bcom ldan 'das kyis gsungs te/ de la 'dir ni mdor bsdus par bzhed de rgyas par ni ma yin no/ /rtse mo 'bring gi dbang du byas te/ bstan bcos las/ chos rnams mi 'dzin gang yin dang / /de dag mtshan mar mi mthong zhing / /zhes gsungs so/ /gang chos thams cad yongs su mi 'dzin pa de ni 'dir dmigs pa'o/ /chos kyi mtshan ma mi mthong bar byed pa ni rnam pa'o/ /'di nyid thams cad mkhyen pa nyid de yang zhes bya ba la sogs pas gsungs te/ thams cad mkhyen pa ni dngos po thams cad mkhyen pa'o/ /'dzin pa med pas na/ yongs su bzung ba ma mchis pa'o/ /bzung ba ma mchis pa gang las she na/ mtshan mar gzung ba ma lags zhes bya ba la sogs pa gsungs so/ /chos rnams kyi mtshan ma ni khyad par gyi mtshan nyid de gzugs dang tshor ba dang zhes bya ba nas sangs rgyas kyi chos rnams zhes bya ba'i bar du'o/ /de nyid bstan par bya ba'i phyir gal te zhes bya ba la sogs pa gsungs so/ /kun tu rgyu sde can zhes bya ba ni kun tu rgyu'i ming ngo / /'di la zhes bya ba ni sangs rgyas kyi bstan pa'o/ /kun tu rgyu sde can ji lta bu la zhugs she na/ de yang thams cad mkhyen pa'i ye shes la ste/ rtse mo'i 'bring la'o/ /de ltar mos par byas nas de la yang dad pas rjes su 'brang ba yin no/ /gang gis zhugs pa yin zhe na/ spyi las phyogs gcig gis 'byung ba yin pas/ phyogs gcig gis ye shes te rtse mo 'bring la'o/ /de zhugs nas gang byas pa de bstan pa'i phyir gzugs la sogs pa yongs su mi 'dzin zhes gsungs te/ de'i mtshan ma yid la mi byed pa'i phyir ro/ /ting nge 'dzin las skyes pa'i dga' ba dang bde ba dang ldan pa shes pa de yang dag par rjes su mi mthong ngo / /shes pa de gzugs kyi nang na yang dag par rjes su mi mthong zhes bya ba la sogs pas kyang de'i mtshan ma yid la mi byed pa de nyid du bstan to/ /gzugs las gzhan du yang ma yin/ rnam par shes pa las gzhan du yang ma yin/ de'i mtshan ma yid la mi byed kyang de dag snang ba'i phyir ro/ /tshig gi rnam grangs 'di la zhes bya ba la tshig ni rtse mo'i'o/ /de'i rnam grangs ni rab tu dbye ba ste/ rtse mo 'bring gi zhes bya ba'i tha tshig go/ /mos so zhes bya ba ni gcig tu nges pa skyes pa yin no/ /'di la thams cad du zhes bya ba ni bstan pa'o/ /thams cad mkhyen pa'i ye shes la zhes bya ba ni rjes su bstan pa'o/ /thams cad du zhes bya ba ni rtse mo 'bring zhes bya ba'i don to/ /gang gis dad pa'i rjes su 'brang ba zhes bya zhe na/ chos nyid ces bya ba la sogs pa gsungs te/ ston pa'i bstan pa tshad mar byas nas de ltar mos pa zhes bya'o/ / dmigs pa zhes bya ba ni dngos po nyid du mthong ba'o/ /mya ngan las 'das pa ni chos thams cad kyi mchog tu gyur pa yin te/ de la yang dngos po nyid du rlom sems su mi byed cing / mya ngan las 'das pa la rlom sems med pa de ni rtse mo 'bring gi dmigs pa dang rnam pa'i khyad par dag go/ / rtse mo chen po'i dbang du byas te/ bstan bcos las/ thams cad dmigs pa med par ni/ /shes rab kyis ni yongs rtogs pa/ /zhes gsungs so/ /shes rab kyi pha rol tu phyin pa las yongs su rtogs pa ni 'di'i dmigs pa'o/ /chos thams cad mi dmigs pa ni rnam pa ste 'di nyid gzhan yang bcom ldan 'das zhes bya ba la sogs pa gsungs so/ /'di gang yin 'di gang gi yin zhes bya ba ni spyir bka' stsal pa'o/ /ci chos gang med pa dang mi dmigs pa de ni khyad par ro/ /de shes rab kyi pha rol tu phyin pa yin nam zhes bya ba la/ gal te de ltar zhes bya ba ni gal te med pa dang / mi dmigs pa la brtags pa ni rnam par dpyad pa'o/ /bsam pa ni nges par thob pa'o/ /ma zhum zhes bya ba ni ye shes la sbyar bar bya ba'o/ /lhag ma ni snga ma bzhin te rtse mo chen po'i dmigs pa dang rnam pa'i khyad par dag go/ /bzod pa chung ngu'i dbang du byas nas bstan bcos las/ gzugs sogs ngo bo nyid med nyid/ /de med pa nyid ngo bo nyid/ /ces gsungs so/ /gzugs la sogs pa dang bral ba'i ngo bo nyid kyis ni dmigs pa yin no/ /ngo bo nyid de'i ngo bo nyid ni rnam pa'o/ /de yang de nas tshe dang ldan pa shA ri'i bus zhes bya ba la sogs pa gsungs te/ gzugs nyid kyang gzugs kyi ngo bo nyid dang bral ba zhes bya ba nas ngo bo nyid kyang ngo bo nyid kyi mtshan nyid dang bral ba zhes bya ba ni dmigs pa'o/ /ngo bo nyid kyi don dang bral ba ni gzugs la sogs pa'i ngo bo nyid de ni rnam pa'o/ /gang 'di la slob par 'gyur ba 'di ni thams cad mkhyen pa nyid la nges par 'byung bar 'gyur ram zhes bya ba de ni bzod pa chung ngu'i dmigs pa dang rnam pa'i khyad par dag go/ /bzod pa 'bring gi dbang du byas nas bstan bcos las/ de dag skye med nges 'byung med/ /dag dang zhes bya ba gsungs so/ /chos thams cad skye ba med pa dang nges par 'byung ba med pa nyid de de ni 'di'i dmigs pa'o/ /de'i tshe yang byang chub sems dpa'i lus dang sems dang mtshan dang gzhi yongs su dag pa ni rnam pa'o/ /de nyid bstan pa'i phyir de ci'i phyir zhe na/ zhes bya ba nas gzhan yang tshe dang ldan pa rab 'byor gyis zhes bya ba la sogs pa'i bar gyis gsungs te/ de ni bzod pa 'bring gi dmigs pa dang rnam pa'i khyad par dag go/ /bzod pa chen po'i dbang du byas nas bstan bcos las/ de dag mtshan nyid med/ de yi mtshan mar mi brten pas/ /mos min 'du shes med pa yin/ /zhes gsungs so/ /de dag mtshan nyid med pa ni gzugs la sogs pa'i mtshan nyid kyis/ rnam par dben pa nyid de ni de'i dmigs pa'o/ /gzugs la sogs pa'i mtshan nyid la/ /gzugs la sogs pa zhes bya ba ni gang brten pa dang mos pa dang 'du shes te/ de dag las bzlog pa ni rnam pa'o/ /de la shin tu brtan par lhag par mos pa ni brten pa'o/ /nges pa ni mos pa'o/ /tha snyad ni 'du shes so/ /de nyid bstan pa'i phyir tshe dang ldan pa rab 'byor gyis zhes bya ba la sogs pa nas/ de la dang po mi mthun pa'i phyogs bstan pa ni thabs la mkhas par rig par bya'o/ /zhes bya ba'i bar gyis gsungs so/ /de bas na de nas zhes bya ba la sogs pa ni dngos su dmigs pa gsungs te/ mtshan ma la spyod pa bkag nas/ shes rab kyi pha rol tu phyin pa la spyad pa bstan pas so/ /mtshan ma la spyod pa bkag pa ni gzugs la sogs pa'i mtshan ma yin te/ gzugs la sogs pa la brten pa dang / mos pa dang / 'du shes kyi mtshan nyid de de bas na shugs kyis rnam pa yang bstan pa yin no/ /de spyod kyang zhes bya ba la sogs pas ni shes rab kyi pha rol tu phyin pa la spyod pa la rlom sems med pa rnam pa brgyad ston to/ /nye bar mi 'gro'o zhes bya ba ni mi 'dzin zhes bya ba'i tha tshig ste/ de ni bzod pa chen po'i dmigs pa dang rnam pa'i khyad par dag go/ /chos kyi mchog chung ngu'i dbang du byas nas bstan bcos las/ ting 'dzin de yi byed pa nyid/ /ces gsungs so/ /ting nge 'dzin chos thams cad la len pa med pa de ni 'di'i dmigs pa'o/ /de'i byed pa nyid ces bya ba ni rnam pa'o/ /de nyid de ci'i phyir zhe na/ zhes bya ba la sogs pa gsungs so/ /chos thams cad ni zhes bya ba la ni'i sgra ni gtan tshigs so/ /rjes su nye bar ma song ba zhes bya ba ni bstan pa'o/ /ma blangs pa zhes bya ba ni rjes su bstan pa'o/ /chos thams cad ni dngos po med pa'i ngo bo nyid yin no/ /zhes bya bar dgongs so/ /gang la chos thams cad kyi len pa med pa de la de skad ces bya ste/ 'di yan chad kyis ni dmigs pa bstan to/ /ting nge 'dzin 'di la gnas na zhes bya ba la sogs pas ni rnam pa bstan te/ de ni chos kyi mchog chung ngu'i dmigs pa dang rnam pa'i khyad par dag go/ /'bring gi dbang du byas nas bstan bcos las/ /lung ston pa dang rlom pa zad/ /ces bya ba gsungs pa yin no/ /ting nge 'dzin 'di la gnas nas sangs rgyas rnams kyis lung ston pa yin te 'di ni 'di'i dmigs pa'o/ / gang 'di'i ting nge 'dzin la rlom sems zad pa de ni rnam pa'o/ /de nyid de nas sangs rgyas kyi mthus zhes bya ba la sogs pa nas lung bstan to zhes bya ba'i bar gyis de'i dmigs pa bstan to/ /de nas de ni ting nge 'dzin zhes bya ba nas thams cad du ma mchis zhes bya ba'i bar gyis ni rnam pa bstan to/ / de lta bu zhes bya ba ni ji skad bshad pa'i rlom sems so/ /thams cad ces pa ni yang ma lus pa'o/ /thams cad nas zhes bya ba ni ting nge 'dzin chos thams cad len pa med pa yangs pa mdun du byas pa'o/ /bdag ni byang chub sems dpa'o/ /mnyam par gzhag pa'o zhes bya ba ni ldog pa med pa'o/ /bdag ting nge 'dzin la snyoms par 'jug ces bya ba ni zhag gsum pa dang bzhi pa la sogs par snyoms par 'jug par 'gyur ro/ /rnam pa thams cad kyi zhes bya ba ni chung ngu'i chung ngu'i bar gyi rnam par yang ngo / /thams cad du zhes bya ba ni ting nge 'dzin thob pa nas brtsams te/ des thams cad du med do zhes bya ba'i tha tshig ste/ de ni chos kyi mchog 'bring gi dmigs pa dang rnam pa'i khyad par ro/ /chen po'i dbang du byas nas bstan bcos las/ gsum po phan tshun ngo bo gcig /ting 'dzin rnam par mi rtog pa/ zhes gsungs so/ /ting nge 'dzin dang / shes rab kyi pha rol tu phyin pa dang byang chub sems dpa' ni gsum pa'o/ /de ni phan tshun gyi ngo bo nyid ni 'di'i dmigs pa'o/ /ting nge 'dzin rnam par mi rtog pa ni rnam pa'o/ /de skad ces gsol pa dang zhes bya ba la sogs pa nas byang chub tu lung bstan to zhes bya ba'i bar gyis ni dmigs pa gsungs so/ /de ltar na byang chub ni shes rab kyi pha rol tu phyin pa ste don dam par byang chub par byed pa'i phyir ro/ /de nyid sems dpa' ste/ 'di de'i bdag nyid yin te/ de bas na byang chub sems dpa'o/ /skabs kyis ni ting nge 'dzin chen po de nyid sems dpa' yin pas 'di nyid sems dpa' chen po'o/ /yang ji ltar na 'di byang chub sems dpa' nyid yin zhe na/ skabs yin pa'i phyir te/ des na gsum po 'di dag gi phan tshun gyi ngo bo nyid dang sa ni dmigs pa'o/ /ting nge 'dzin de bstan par nus sam zhes bya ba nas de nas bcom ldan 'das kyis zhes bya ba'i bar gyis rnam pa bstan to/ /bstan par nus sam zhes bya ba ni tshig gis rab tu bstan pa'o/ /ting nge 'dzin de yang mi shes/ /zhes bya ba ni gzung ba dang 'dzin pa yin pas de ltar mi snang ba yin pa'i phyir rnam par mi rtog pa'o/ /yang dag par mi shes zhes bya ba ni brjod par mi nus pa'i phyir rnam par mi rtog pa'o/ /lhag ma ni rtogs par sla'o/ /de ni 'jig rten chos kyi mchog chen po'i dmigs pa dang rnam pa'i khyad par dag go/ /de nas bstan bcos las/ de ltar nges 'byed cha mthun ni/ /chung dang 'bring dang chen po yin/ /nges 'byed cha mthun zhes bya ba ni nges par 'byed pa'i cha dang mthun pa bzhi po de dag yin te/ re re yang chung ngu dang 'bring dang chen po nyid kyis bcu gnyis su 'gyur ro/ /de ltar zhes bya ba ni dmigs pa dang rnam pa ji skad bstan pa nyid kyis bcu gnyis bdag gis ji skad bstan pa bzhin du sbyar bar bya'o/ /de rnam par rtog pa dang ldan par bshad par bya ba'i dbang du byas nas bstan bcos las/ gzung bar rtog pa rnam pa gnyis/ /gzhi dang de yi gnyen po yis/ /rmongs dang phung sogs bye brag gis/ /de ni so sor rnam pa dgu/ /zhes bya ba gsungs so/ /gzung bar rtog pa ni gzung bar rnam par rtog pa'o/ /de ni rnam pa gnyis te/ gcig ni dngos po la rnam par rtog pa yin te/ gang 'jig rten la grags pa'i dngos po la'o/ /cig shos ni de'i gnyen po ste/ de yang so sor rnam pa dgu'o/ /ji ltar rmongs pa dang phung po la sogs pa'i bye brag ni ma rig pa dang phung po la sogs pa'i bye brag ces bya ba'i tha tshig go/ /de nyid de nas bcom ldan 'das kyis tshe dang ldan pa rab 'byor la legs so zhes bya ba la sogs pas ni ston par mdzad pa yin no/ /de nas zhes bya ba ni bcom ldan 'das kyis de ltar slob na shes rab kyi pha rol tu phyin pa la slob pa yin no zhes gsungs pa de ma thag ces bya ba'i tha tshig go/ /de skad ces bka' stsal pa dang zhes bya ba ni/ gang bcom ldan 'das kyis bka' stsal pa de nyid bcom ldan 'das kyi bka' yin pas bstan par bya ba'i phyir skabs kyi shA ri'i bus gsol bar bya ba'i don du smras so/ /chos gang la slob pa lags zhes bya ba la/ spyi sgra dang / yon tan dang / gtso bo dang / skyes bu la sogs pa la zhes bya ba'am/ 'on te phung po dang khams dang / skye mched la sogs pa'i chos la dmigs nas bslab par bya/ zhes dgongs so/ /bcom ldan 'das kyis gang la yang mi slob bo zhes bka' stsal te/ chos thams cad bdag med pa nyid la slob pa'i phyir/ zhes dgongs so/ /de ci'i phyir zhe na/ zhes bya ba ni de chos thams cad la mi slob pa ga las she na/ lan ni shA ri'i bu zhes bya ba la sogs pa gsungs so/ /chos de ni zhes bya ba ni rdzas dang / yon tan dang las la sogs pa'o/ /de bzhin du zhes bya ba ni de'i ngo bo'o/ /ji ltar zhes bya ba ni ji lta bu'i ngo bos mngon par chags shing bden pa nyid du'o/ /so so'i skye bo ni 'phags pa ma yin pa ste de yang byis pa'o/ /gang gi phyir thos pa dang mi ldan pa ni thos pa mang po med pa'o/ 'o na da ji lta bur mchis zhes bya ba ni ji lta bur rnam pa zhes bya ba'i don to/ /ji ltar med pa zhes bya ba ni yod pa yin te/ gnod par byed pa yod pa'i phyir ro/ /de bzhin du yang dag par yod de zhes bya ba ni med pa'i phyir dang / brdzun pa'i ngo bos snang ba zhes bya ba'i don to/ /de ltar zhes bya ba ni bshad pa'i rigs pas so/ /med pa zhes bya ba ni brdzun pa'o/ /ma rig pa zhes bya ba ni ma rig pa'i khyad par yin pa'i phyir ma rig pa zhes bya ba'i don to/ /de dag la zhes bya ba la sogs pa la de ni yul gyi rnam par rtog pa bstan te/ de ni ma rig pa'i rnam par rtog pa dang po'o/ / de dag gis zhes bya ba ni byis pa so so'i skye bos so/ /chos thams cad ces bya ba ni phung po dang skye mched la sogs pa'o/ /med pa la zhes bya ba ni byis pas bzung ba'i dngos po yod pa'o/ /brtags so zhes bya ba ni de bzhin du dngos po nyid du bzung ba'o/ /de ni phung por brtags pa ste/ rnam par rtog pa gnyis pa'o/ /mtha' gnyis la zhes bya ba ni skye ba dang 'gag pa'o/ /zhen pas zhes bya ba ni kun nas gnas pa'o/ /ga las she na/ chos de dag ces bya ba la sogs pa gsungs te/ mi shes zhes bya ba ni de kho na nyid la nges par mi byed pa ste/ sbyor ba'i lam thob pa med pa'i phyir ro/ /mi mthong ste zhes bya ba ni 'jig rten las 'das pa'i lam gyi rtog pa med pa ste/ de ci'i phyir zhe na zhes bya ba la sogs pa nas mngon par chags te zhes bya ba'i bar gyis ni mjug bsdu ba'o/ /de ni mtha' gnyis la chags pa'i rtog pa ste gsum pa'o/ /mngon par chags pa zhes bya ba ni mtha' gnyis la gnas pa'o/ /de'i gzhis zhes bya ba ni rgyu'o/ /dmigs pa zhes bya ba ni log pa'i shes pa'o/ /gnas nas zhes bya ba ni rten pa'o/ /ming dang gzugs la mngon par zhen pas zhes bya ba ni ming ni gzugs can ma yin pa'i phung po gzugs ni gzugs kyi phung po yin te/ de gnyis ka ni ming dang gzugs so/ /de la mngon par zhen pa ste ming dang gzugs la mngon par zhen pa ste rnam par rtog pa bzhi pa'o/ /lnga po gzhan ni brtag par bya ba yin te/ gzugs la sogs pa 'di dag ni kun nas nyon mongs pa 'di dag ni rnam par byang ba'o zhes mi shes mi mthong ba yin no/ /nges par mi 'byung zhes bya ba ni khams gsum dang theg pa las so/ /de ni kun nas nyon mongs pa dang rnam par byang ba'i mi shes pa'i rnam par rtog pa ste lnga pa'o/ /de dag ni stong pa nyid la dad par mi byed cing pha rol tu phyin pa dag la mi gnas pa yin te/ de ni 'phags pa'i lam la mi gnas pa'i rnam par rtog pa ste drug pa'o/ /de pha rol tu phyin pa la sogs pa dag la dmigs pa ni nges par mi 'byung ste/ de ni lam la dmigs pa'i rnam par rtog pa ste bdun pa'o/ /de bdag dang chos la dmigs pa yin te/ de ni bdag la dmigs pa'i rnam par rtog pa ste brgyad pa'o/ /skye ba med pa dang / rab tu skye ba ma yin pa dang / mngon par 'du mi byed pa rnam par dag pa de ni rnam par dag pa'i rnam par rtog pa ste dgu po de ni dro bar rnam par rtog pa dgu po 'di dag ni srab mor ma byas pa dang / /ma spangs pa de bas na de dag dang ldan pa yin no/ /de'i rnam par rtog pa'i mun pa bsrabs par byas pa'i phyir/ snang ba thob pa'i ting nge 'dzin la brten pa zhes bya ba bstan te/ de ni gzung ba'i rnam par rtog pa dang po rnam pa dgu'o/ /gnyis pa'i dbang du byas nas de dag gis zhes bya ba la sogs pa gsungs te/ chos thams cad ces bya ba ni phung po la sogs pa'o/ /brtags so zhes bya ba ni phung po la sogs pa'i dbye bas rnam pa dgu gzung ba yin no/ /phung po la sogs pa'i dngos por brtags pa'i dbye bas phung po la sogs pas rnam par rtog pa ni rnam pa dgu'o/ /de la gzugs su rnam par rtog cing mngon par zhen pa nas rnam par shes pa'i bar du zhen pa de ni phung po'i don du rnam par rtog pa'o/ /mig tu rnam par rtog cing mngon par zhen pa nas chos kyi bar du mngon par zhen pa de ni skye ba'i sgo'i don du rnam par rtog pa'o/ /ming dang gzugs dang mig gi rnam par shes pa'i khams nas/ yid dang chos dang yid kyi rnam par shes pa'i khams kyi bar du mngon par zhen pa de ni rigs kyi don du rnam par rtog pa'o/ /ma rig pa nas rga shi'i bar ni skye ba'i don du rnam par rtog pa'o/ /nang stong pa nyid nas dngos po med pa'i ngo bo nyid stong pa nyid kyi bar de ni stong pa nyid kyi don du rnam par rtog pa'o/ /pha rol tu phyin pa drug po dag ni pha rol tu phyin pa'i don du rnam par rtog pa'o/ /byang chub kyi phyogs kyi chos sum cu rtsa bdun ni mthong ba'i lam gyi rnam par rtog pa'o/ /bsam gtan dang gzugs med pa dang snyoms par 'jug pa dag ni bsgom pa'i lam gyi rnam par rtog pa'o/ /de bzhin gshegs pa'i stobs bcu nas rnam pa thams cad mkhyen pa nyid kyi bar du ni mi slob pa'i lam gyi rnam par rtog pa'o/ /de dag gis zhes bya ba la sogs pa ni de dag gi skyon bstan to/ /lam yang dag pa ji lta ba bzhin zhes bya ba ni phyin ci ma log pa'i lam bdag med pa'i ye shes so/ /yang dag pa ni de kho na nyid do/ /mtha' ni mchog dang rtse mo ste/ yang dag pa'i mtha' stong pa nyid ces bya ba'i don to/ /grangs su zhes bya ba ni brtsis su'o/ /rnam par rtog pa dgu po 'di dag ni rtse mo'i'o/ /srab mor byas pa dang ma spangs pa de bas na de dag dang ldan pa ni snga ma'i rnam par rtog pa dgu spong ba nyid de/ de bas na snang ba mched pa'i ting nge 'dzin la gnas pa yin te/ de ni gzung ba'i rnam par rtog pa gnyis pa rnam pa dgu bstan pa yin no/ /'dzin pa'i rtog pa gnyis kyi dbang du byas nas bstan bcos las/ bdag sogs rang dbang ngo bo dang / /de bzhin phung sogs rten sgo nas/ /rdzas dang brtags pa'i rten can gyis/ /'dzin pa rnam pa gnyis su 'dod/ /'dzin pa ni 'dzin pa'i rnam par rtog pa'o/ /de ni rnam pa gnyis te/ rdzas la rten pa dang / brtags pa la rten pa'o/ /rten ni dmigs pa'o/ /de yang go rims bzhin du bdag la sogs pa rang dbang can dang / phung po la sogs pa la rten pa yin no/ /'dir yang de ni so sor rnam pa dgu zhes rjes su sbyar ro/ /de la dang po'i dbang du byas nas de dag chos bden pa la zhes bya ba la sogs pa smos te/ de dag ces bya ba ni byis pa so so'i skye bo'o/ /chos bden pa zhes bya ba ni yang dag pa'i bden pa'i don bdag med pa mthong ba'o/ /yid mi ches so zhes bya ba ni gus par mi byed pa ste/ bdag nyid rnam pa dgur rtog pa'o/ /yang zhes bya ba la sogs pa ni byang chub sems dpa' chos gang la yang zhen par mi byed pa yin te bdag nyid du dmigs par mi byed pa'i phyir ro/ /de nyid kyis na mi dmigs pa rnam pa dgu'i mi mthun pa nyid kyis rnam par rtog pa dgu'o/ /bdag dang sems can dang mthong ba po'i bar du bstan du med pa'i phyir mi dmigs pas de ni rang dbang gi bdag nyid du rnam par rtog pa'o/ /gzugs dang rnam par shes pa'i bar gyis bdag nyid du mi dmigs pas de ni gcig gi bdag nyid du rnam par rtog pa'o/ /mig nas yid kyi bar dang gzugs nas chos kyi bar mi dmigs pas de ni rgyu'i bdag nyid du rnam par rtog pa'o/ /mig dang gzugs dang mig gi rnam par shes pa nas/ yid dang chos dang yid kyi rnam par shes pa'i bar ni lta ba'i bdag nyid du rnam par rtog pa'o/ /rten cing 'brel par 'byung ba nas gzugs med pa'i khams kyi bar ni kun nas nyon mongs pa'i gzhi'i bdag nyid kyi rnam par rtog pa'o/ /bsam gtan dang po nas gzugs med pa'i snyoms par 'jug pa'i bar ni 'dod chags dang bral ba'i gzhi'i bdag nyid kyi rnam par rtog pa'o/ /'phags pa'i bden pa ni mthong ba po'i gzhi'i bdag nyid kyi rnam par rtog pa'o/ /rnam par thar pa brgyad dang / mthar gyis gnas pa'i snyoms par 'jug pa dgu ni bsgom pa'i gzhi'i rnam par rtog pa'o/ /stobs bcu dang rnam pa thams cad mkhyen pa nyid kyi bar la yang mi dmigs pas de ni don byas pa nyid kyi gzhi'i bdag nyid kyi rnam par rtog pa'o/ /bzod pa dgu po 'di dag srab par byed/ spong bar mi byed de/ de bas na 'di dag dang ldan pas ni snga ma de dag nyid spong bar byed pa nyid de de bas na gzung bar bya ba med pa gcig tu nges par yod pa'i phyir de kho na nyid kyi don la phyogs gcig tu zhugs pa'i ting nge 'dzin la gnas pa yin no/ /de skad ces bka' stsal pa dang zhes bya ba la sogs pas ni shA ri'i bus zur gyis zhus pa gsungs so/ /zhu ba ni 'di snyam du sems te/ gal te de thams cad mkhyen pa nyid la slob pa de'i tshe 'di la ji ltar mi dmigs pa yin zhe na/ bcom ldan 'das kyis bka' stsal pa/ de la yang mi slob pa ste/ dmigs pa'i tshul gyis zhes bya bar dgongs so/ /de ltar slob na zhes bya ba ni mi dmigs pa'i tshul gyis slob pa'o/ /chos thams cad la zhes bya ba ni sa thams cad kyi yon tan thob pa la'o/ /de ltar bstan pa 'di 'dzin pa'i rnam par rtog pa dang po rnam pa dgu'o/ /de nas bcom ldan 'das zhes bya ba la sogs pas ni ci sgyu ma'i skyes bu 'di zhes bya ba la sogs pa la/ 'dri ba'i bsam pa ni 'di yin te/ gal te chos kyi mchog 'di la byang chub la slob pa'i byang chub sems dpa' ni sgyu ma'i skyes bu dang 'dra ba yin te/ de lta na sgyu ma'i skyes bu yang slob par 'gyur zhing de nges par 'byung bar 'gyur ro zhes brjod par bya'o zhe na/ rab 'byor de bas na zhes bya ba la sogs pa gsungs te/ gal te sgyu ma'i skyes bu lta bu nyid du ni mi 'dod de rgyu de bas na'o/ /na zhes bya ba tshig gi rgyun du smras pa yin no/ /khyed nyid la dri bar byas zhes bya ba ni gang dris pa de nyid la dri bar byas pa'o/ /ci nus pa zhes bya ba ni ci 'dod pa'o/ /ston cig ces bya ba ni shod cig pa'o/ /ltar nyan pa dang zhes bya ba ni bdag gir byas pa'o/ /'di zhes bya ba ni tshig nye bar dgod pa'o/ /ji zhes bya ba ni dri ba'o/ /ji phung po gzhan la sgyu ma yang gzhan nam zhes bya ba ni dris pa'i don to/ /sgyu ma nyid kyang phung po zhes bya ba ni rab 'byor gyis dris pa'i lan no/ /don gang sgyu ma mkhan gyis sprul pa'i dngos po'i don bzhin du yang dag par snang ba ma yin te/ de ni 'dir sgyu ma'i sgra'i don to/ /de bas na sgyu ma nyid ces gsungs so/ /sgyu ma'i don bstan nas skyes bu'i don bstan pa'i phyir/ 'dir ni 'du shes kun shes pa brtags pa tha snyad yin no zhes bya ba la khyad par du dpyod par byed pa yin pa'i phyir 'du shes te/ shes pa dang blo zhes bya ba'i don to/ /byis pa rnams drang ba'i ched du brtags pa ni brtags pa ste de dag log pa nyid du mi shes pa'i phyir ro/ /'phags pa dang 'phags pa ma yin pa thams cad 'dis tha snyad du byed pas na tha snyad do/ /de la 'phags pas ni brtags pa log pa nyid du rtogs pas gzhan la rton par byed pa'o/ /'phags pa ma yin pas ni bden pa nyid du shes nas bdag nyid kyang 'jug par byed do/ /'dir zhes bya ba 'dis ni bstan pa'o/ /nye bar len pa'i phung po lnga la zhes bya ba ni ming la sogs pa rnams rjes su bstan pa'o/ /byang chub sems dpa' zhes bya ba ni dngos po med pa dang bdag med pa dag la byang chub sems dpa'o zhes btags pa'o/ /de bas na 'di ni sgyu ma'i skyes bu nyid do zhes bya ba ni spyi'i don yin no/ /bcom ldan 'das de de bzhin no/ /bde bar gshegs pa de de bzhin te zhes bya ba ni yongs su dga' ba'i phyir lan gnyis su brjod pa yin no/ /de bas na zhes bya ba la sogs pa ni byang chub sems dpa' sgyu ma'i skyes bu nyid du sgrub cing bstan par bya ba'i phyir bskal pa'i lan yongs su gsal bar btab par mtshan pa yin no/ /'di lta ste byang chub sems dpa' bslab par bya ba ni yang dag par rdzogs pa'i byang chub la'o/ /slob pas zhes bya ba ni slob par byed pa'i rgyu la ste/ dper na/ bung ba nyal nas 'phel byed la/ /pad+ma'i rtsa ba gnas nas skyes/ /zhes bya ba ste/ gang gi phyir de shes rab kyi pha rol tu phyin pa la slob pa ni sems dang ldan pa'i phyir la/ sgyu ma mkhan gyis sprul pa'i skyes bu ni yid med pa yin pa'i phyir ro/ /sgyu ma'i skyes bu ltar zhes bya ba ni sgyu ma mkhan gyis sprul pa'i skyes bu dang 'dra bar bdag nyid mthong ba zhes bya ba'i don to/ /de ci'i slad du zhe na zhes bya ba ni/ bdag nyid de ltar mthong ba ni dka' ba yin na/ de ji ltar shes she na/ sgyu ma mkhan gyis sprul pa'i dngos po'i don ni sgyu ma ste/ de dang 'dra ba'i skyes bu ni sgyu ma'i skyes bu'o/ /gzung bar bya'o zhes bya ba ni nges par bya'o/ /gzugs ni sgyu ma lta bu zhes bya ba ni gzung bar snang ba'i dngos po yin pa'i phyir ro/ /gang zhes bya ba ni nang dang 'dra ba'o/ /de zhes bya ba ni de dang 'dra ba'o/ /de dag ces bya ba ni de dag dang 'dra ba ste/ 'dzin pa'i dngos po yang med pa'i phyir zhes bya bar bsams pa'o/ /phung po dang skye mched la sogs pa med na 'di la sems dang ldan pa ci zhig ce na/ sems dang ldan pa'i phung po la sogs pa ni 'khrul pa nyid de/ phung po la sogs pa ni yod pa ma yin no/ /sprul pa'i skyes bu ni sprul pa yang med do/ /de bzhin du tshor ba la sogs pa'i gzhung dag la yang bshad par bya'o/ /skye mched drug la yang la lar skyes bu btags pa yod de de ni zhar la dbang po drug bzung ba yin no/ / skabs kyis ni phung po la sogs pa la skyes bur btags pa yin no/ /lhag ma ni ci rigs par btags par bya'o/ /de ltar na btags pa'i rnam par rtog pa dgu'o/ /sgyu ma nyid gzugs zhes bya ba nas rnam par shes pa'i bar du ni phung por btags pa'i rnam par rtog pa'o/ / sgyu ma nyid mig ces bya ba nas chos zhes bya ba'i bar ni skye mched rnams su btags pa'i rnam par rtog pa'o/ /sgyu ma nyid mig dang gzugs dang mig gi rnam par shes pa dang / sgyu ma nyid yid dang chos dang yid kyi rnam par shes pa'i bar dang / sgyu ma nyid nam mkha'i khams kyi bar dang / /sgyu ma nyid rnam par shes pa'i khams kyi bar ni khams su btags pa'i rnam par rtog pa'o/ /sgyu ma nyid rten cing 'brel par 'byung ba yin te/ sgyu ma nyid ma rig pa dang / sgyu ma nyid 'du byed/ sgyu ma nyid rga shi zhes bya ba'i bar du ni rten cing 'brel par 'byung bar btags pa'i rnam par rtog pa'o/ /sgyu ma nyid byang chub kyi phyogs kyi chos sum cu rtsa bdun zhes bya ba ni rnam par byang bar btags pa'i rnam par rtog pa'o/ /sgyu ma nyid stong pa nyid dang mtshan ma med pa dang smon pa med pa nyid ces bya ba ni mthong ba'i lam du btags pa'i rnam par rtog pa'o/ /sgyu ma nyid bsam gtan dang gzugs med pa'i snyoms par 'jug pa ni bsgom pa'i lam du btags pa'i rnam par rtog pa'o/ /sgyu ma nyid stong pa nyid thams cad ces bya ba ni khyad par gyi lam du btags pa'i rnam par rtog pa'o/ /sgyu ma nyid stobs bcu nas sgyu ma nyid byang chub ces bya ba'i bar ni mi slob pa'i lam du btags pa'i rnam par rtog pa'o/ /chos kyi mchog gis dgu po 'di dag srab par byed cing mi spong ba dang / de dag dang ldan pa ni snga ma'i rnam par rtog pa dgu spong bar byed de/ /de nas bar chad med pa'i ting nge 'dzin ston par byed de bar chad byed par nus pa ni bar chad do/ /bar chad byed par mi nus pa ni de ma thag pa'o/ /de dag las she na/ de'i de ma thag nyid du mthong ba'i lam skye ba yin te/ des ni 'dzin par rnam par rtog pa gnyis pa rnam pa dgu bstan to/ /de ltar na 'dis ni rnam par rtog pa bzhi dang ldan pa'i khyad par bstan pa yongs su 'dzin pa'i khyad par gyi dbang du byas nas bstan bcos las/ sems mi 'gong ba nyid la sogs/ /ngo bo nyid med sogs ston byed/ /de yi mi mthun phyogs bor ba/ /rnam pa kun tu yongs 'dzin yin/ /zhes gsungs te/ rnam pa kun tu zhes bya ba ni yongs su 'dzin pa rnam pa bzhi ste/ gang yongs su bzung bas byang chub sems dpa'i lam gyi rjes su 'gro zhing lam ma yin pas ma yin te/ 'di lta ste thabs mkhas pas dang / dge ba'i bshes gnyen dang de gnyis kyis kyang mi mthun pa'i phyogs yongs su spong ngo / /de la thabs mkhas pas ni sems mi 'gong ba nyid la sogs pa ste rgyu la 'bras bur btags pa'i phyir ro/ /ngo bo nyid med sogs ston byed pa ni dge ba'i bshes gnyen no/ /de nyid kyi skabs bstan pa'i phyir theg pa la gsar du zhugs pa zhes bya ba la sogs pa gsungs so/ /mngon du gyur pas 'jigs pa ni skrag pa'o/ /skrag zin pa ni dngangs pa'o/ /de nyid kyi rgyu ni shin tu dngangs pa'o/ /bstan pa 'di thos na zhes bya ba ni sgyu ma'i skyes bur bstan pa'o/ /gal te byang chub sems dpa'i lag tu song na ni zhes bya bar sbyar ro/ /ji lta bu'i lag tu song na zhe na/ sems dpa' chen po sdig pa'i grogs po'i lag tu song na'o/ /'dir 'am zhes bya ba'i sgra rtogs par bya ste/ sdig pa'i grogs po'i lag tu song bar gyur pa 'am zhes bya'o/ /des pa ma yin pa dang / mi mkhas pa dang / thabs mkhas pa ma yin pa ste/ sems dpa' chen po gang dag sems dpa' chen po'i lag tu ma yin pa de la de skad ces bya ste don gyis de ltar bstan pa yin no/ /thabs mi mkhas pa yongs su gtong ba dang / sdig pa'i grogs po yongs su spong ba rnams ni yongs su 'dzin pa rnam pa gnyis po dag go/ /de bas na rab 'byor gal te zhes bya ba la sogs pa gsungs te/ sems dpa' mdzangs pa thabs mkhas pa yin te/ de gang dag la chen po yod pa de dag la de skad ces bya ste/ dge ba'i bshes gnyen gyi lag tu song ba'o/ /'dir yang 'am zhes bya ba ni sgra rtogs par 'gyur ro/ /'di skad ston pa yin te/ thabs mkhas pa dang / dge ba'i bshes gnyen ni yongs su 'dzin pa gzhan gnyis yin no/ /de la gang chos thams cad ngo bo nyid med par nges shing bstan pa dang / rnam pa thams cad mkhyen pa nyid dang ldan pa'i mi dmigs pa'i ye shes kyis dge ba'i chos rnams spyod cing de dag yang dag par rdzogs pa'i byang chub tu yang dag par yongs su bsngo ba de ni thabs mkhas pa'o/ /de las bzlog pa ni thabs la mi mkhas pa'o/ /de skad ces bka' stsal pa dang zhes bya ba la sogs pa ni dge ba'i bshes gnyen gyi mtshan nyid zhus pa yin te/ zhu ba ni dge ba'i bshes gnyen gang rnams lags zhes bya ba la sogs pa'o/ /lan ni gang de la zhes bya ba la sogs pa gsungs te/ bdud kyi las nye bar ston pa ni 'dir bdud kyi nyes pa yang bdud kyi las yin te/ bdud kyi bya ba las byung ba'i phyir dang las yin pa'i phyir ro/ /ji ltar ston pa yin zhe na/ 'di lta bur zhes bya ba la sogs pa gsungs so/ /byang chub sems dpa' rnams la bdud kyis byin gyis brlabs nas byung ba'i lus la sogs pa'i bya ba ni bdud kyi nyes pa'o/ /de ltar de dag ni byang chub sems dpa'i spyod pa la bar chad byed pa nyid du rig par bya'o/ /bdud kyi nyes pa 'di dag ces bya ba ni gang ngas khyod la bshad pa'o/ /bdud kyi las zhes bya ba ni bdud rang nyid sangs rgyas la sogs pa'i cha byad du byas nas lam log par ston par byed pa'o/ /de bzhin du ston pa zhes bya ba de dag gis byang chub sems dpa'i spyod pa las dben pa nyid du rig par bya'o/ /'di ni zhes bya ba ni ngas khyod la bstan pa dag go/ /'di dag ces bya ba ni bdud kyi las rnam pa gnyis so/ /ston zhes bya ba ni de bzhin du zhes bya ba'i don to/ /de bzhin du ston pa zhes bya bar sbyar ro/ /'di ni zhes bya ba la sogs pa nas rig par sbyar ro zhes bya ba la sogs pa ni mjug sdud pa'o/ /gang 'di pha rol tu phyin pa las 'byed par byed cing gang gi phyir bdud kyi las mi ston pa de dag ni don gyis mi dge ba'i bshes gnyen du bstan par shes so/ /de ni yongs su 'dzin pa'i khyad par ro/ /nges par 'byed pa'i cha dang mthun pa rdzogs so// //sgrub pa yi ni rten gyur pa/ /zhes bya ba'i dbang du byas nas bstan bcos las/ rtogs pa yi ni chos drug dang / /gnyen po dang ni spong ba dang / de dag yongs su gtugs pa dang / /shes rab snying brtser bcas pa dang / /slob ma thun mong min nyid dang / /gzhan gyi don gyi go rims dang / /ye shes rtsol ba mi mnga' bar/ /'jug pa'i rten la rigs zhes bya/ /zhes bya ba gsungs te/ rten la rigs zhes bya bar sbyar ro/ /'dir rigs ni skabs kyi byang chub sems dpa'i rigs yin te/ so sor nges par gnas pa ni rten zhes bya'o/ /ji ste/ ci zhig gang gang gi rigs yin zhe na/ gang rang bzhin gyis rnam par dag pa glo bur gyi dri mas khebs pa de ni rigs yin te/ rdo'i rigs dag la dri ma thams cad sbyangs nas phyi zangs dang / lcags dang / gser dang / dngul dag gi rigs gsal bar 'byung ba bzhin no/ /ji ste rten pa'i chos de rnams gang dag yin zhe na/ rtogs pa yi ni chos drug dang / /zhes bya ba la sogs pa smos so/ /rtogs pa ni shes pa'o/ /de nyid chos de yang rnam pa drug ni dro ba dang / rtse mo dang / bzod pa dang / chos kyi mchog dang / mthong ba'i lam dang / bsgom pa'i lam mo/ /gnyen po dang ni spong ba dang / /zhes bya ba la gnyen po ni shes pa'o/ /spong ba ni mi mthun pa'i phyogs zad pa'o/ /de dag yongs su gtugs pa dang / /zhes bya ba ni de bzhin gshegs pa'i tshul khrims kyi phung po la sogs pa mthar thug par 'gro ba dang / tshul khrims 'chal ba la sogs pa mthar thug par spangs pa zhes bya ba'i don to/ /shes rab snying brtser bcas pa dang / /zhes bya ba ni shes rab dang snying rje dag ni nyi ma dang zla ba'i 'od lta bu gang yin pa dag go/ /slob ma thun mong min nyid dang / /zhes bya ba ni nyan thos dang rang sangs rgyas dang thun mong ma yin pa'i ye shes so/ /gzhan gyi don gyi go rims dang / /zhes bya ba ni dus chad pa med pa'o/ /lhun gyis grub par 'byung ba'i ye shes kyang yin te/ gang 'di dag gi rten du gyur pa de dag nyid kyang byang chub sems dpa'i rigs te/ de yang chos kyi dbyings nyid do/ /'di ltar bstan bcos las/ rgol bar byed pa ni/ chos kyi dbyings la dbyer med phyir/ /rigs ni tha dad rung ma yin/ /tha dad pa de med pa'i phyir rigs kyi dbye ba 'di ni sangs rgyas kyi rigs so/ /'di ni rang sangs rgyas kyi rigs so/ /'di ni nyan thos kyi rigs so zhes bya ba 'di rung ba ma yin no zhe na/ 'dir lan ni bstan bcos las/ brten pa'i chos kyi bye brag gis/ /de yi dbye ba'ang yongs su brjod/ /ces bya ba gsungs so/ /brten pa ni sangs rgyas la sogs pa'i chos tha dad pa yin te/ de bas na de'i dbye bas rigs kyi dbye ba yin no/ /nam mkha' tha dad pa med kyang lam gyi dbye bas tha dad de/ dbye ba'i lam dang / bya'i lam dang / nyi ma'i lam bzhin no/ /de ltar 'di thams cad mdor bsdus nas rab 'byor gyis zhus pa ste/ de skad ces gsol pa dang zhes bya ba la sogs pas ni de nyid ston to/ /byang chub sems dpa' sems dpa' chen po zhes bgyi ba de la zhes bya ba la/ theg pa chen po thams cad du zhes bya ba lhag ma yin no/ /de la zhes bya ba ni tshig gnyis la'o/ /byang chub sems dpa' zhes bgyi ba zhes bya ba ni gang la byang chub kyi sgra'i tshig gi don du brjod ces bya ba dang / tshig gi don gang lags zhes bya bar rjes su sbyar ro/ /'dir rigs kyi don gyi dngos po gang yin zhes bya ba'i don to/ /gang la byang chub sems dpa'i rigs yod pa gang yin pa de ni byang chub sems dpa'o/ /de yang bde bar gshegs pa'i byang chub la yin gyi rigs med pa ni byang chub kyi rten ma yin no/ /byang chub sems dpa'i sgra de nyid kyis byang chub kyi rigs brjod par bya ba'i phyir 'phags pa rab 'byor gyis 'di zhus so/ /bcom ldan 'das kyis bka' stsal pa ni/ rab 'byor tshig don med pa ni byang chub sems dpa'i tshig don zhes smos te/ byang chub kyi rigs gang yin pa de nyid do/ / des na byang chub sems dpa'i tshig gi don zhes bya ba gsungs te/ de ni tshig gi don med pa dang / rigs kyi dngos por med pa ste chos dbyings zhes bya ba'i don to/ /byang chub sems dpa'i 'di'i tha snyad kyi yul ni gang gi phyir gang phung po la sogs pa'i stong pa nyid dang / chos nyid de ni de'i chos kyi dbyings te/ de nyid dag cing mthar thug pa ni byang chub ces brjod do/ /de bas na rigs yin na yang dngos por yod pa ni ma yin te dngos po med pa'i mtshan nyid kyi stong pa nyid do/ /yang na byang chub kyi rigs yin yang rten ni ma yin te snga phyi tha mi dad pas so/ /rten dang brten pa'i dbye ba ni dngos po la rtogs par byed pa'i phyir ro/ /de ci'i phyir zhe na zhes bya ba ni chos kyi dbyings de rigs nyid du gang las shes she na/ rab 'byor byang chub sems dpa' zhes bya ba la sogs pas ni lan gsungs so/ /gang gi phyir chags pa med pa la bslab pa de'i phyir chos kyi dbyings nyid byang chub kyi rigs nyid de/ chos thams cad ces bya ba ni chos bco lnga po yin te/ rtogs pa yi ni chos drug dang / /zhes bya ba la sogs pa gsungs so/ /chags pa med pa zhes bya ba la/ gnas pa ni yang dag pa ma yin pa'i dngos po la dmigs pa'i phyir mi mthun pa'i phyogs yin la/ de dang 'gal ba yin pa'i phyir chags pa med de chos de rnams la'o/ /ci rigs par de'i gnyen po yin pa'i phyir ram de dang 'gal ba'i phyir ro/ /de dag la chags pa med par slob pa ni dge bar 'gyur ba yin no/ /de bas na des rnam par rtog pa ma lus pa'i dri ma sel ba yin pa'i phyir ro/ / chos kyi dbyings shin tu rnam par dag pa mngon par 'byung ba na byang chub grub pa yin te/ de bas na de nyid byang chub kyi rigs yin gyi/ cig shos ni ma yin no/ /chos de dag gi ji ltar rten yin zhe na/ rigs med pa dang / rigs dman pa de dag gi ni rten ma yin pa'i phyir ro/ /de lta mod kyi 'on kyang gzugs med pa'i chos kyi dbyings ji ltar de dag gi rten yin zhe na/ gzugs med pa'i nam mkha' ni zla ba dang nyi ma'i 'od dang / mun pa dang de zad pa'i rten yin no zhes bstan pa lta bu'o/ /de ni bsgrub pa'i rten yin no/ /dmigs pa'i dbang du byas nas bstan bcos las/ dmigs pa chos rnams thams cad de/ /de yang dge la sogs pa yin/ /'jig rten pa yi rtogs pa dang / /gang dag 'jig rten 'das 'dod dang / /zag bcas zag pa med chos dang / /gang dag 'dus byas 'dus ma byas/ /slob ma thun mong chos rnams dang / /gang dag thub pa'i thun mong min/ / zhes bya ba gsungs so/ /dge ba la sogs pa zhes bya ba ni dge ba dang / mi dge ba dang / lung du ma bstan pa'o/ /'jig rten pa yi rtogs pa dang / /zhes bya ba rtogs par bya ba yin pas rtogs pa ste dge ba'o/ /'jig rten pa dang 'jig rten las 'das pa'i dge ba zhes bya ba'i don to/ / lhag ma ni go sla'o/ /de nyid rab 'byor byang chub sems dpa' sems dpa' chen po zhes bya ba la sogs pa gsungs so/ /mngon par rtogs pa bdun gyi go rims kyis rtogs par bya ba ni khong du chud pa ste/ de nyid kyi don gyi thabs so/ /'dis don rtogs par byas pa des na chos thams cad la ma chags pa yod na yang dag par rdzogs pa'i byang chub tu 'tshang rgya bar 'gyur ro/ /ni zhes bya ba ni gang gi phyir gyi don te/ gang gi phyir chos thams cad la dmigs pa ni grub pa'i dmigs pa'o/ /ched du bya ba'i dbang du byas nas bstan bcos las/ sems can kun mchog nyid sems dang / /spong dang rtogs dang gsum po la/ /chen po gsum gyis rang 'byung gi/ /ched du bya ba 'di zhes bya/ /zhes bya ba 'di gsungs so/ /rang 'byung bar 'gyur bas na rang 'byung ba ste byang chub sems dpa'o/ /de ni 'di'i ched du bya ba'o/ /ched du bya ba gang gis yang dag par rdzogs pa'i byang chub thob par 'gyur te/ 'di lta ste sems can thams cad kyi mchog nyid theg pa gsum gyis bsdus pa'i gnas pa yin te/ ji lta bu'i ched du zhe na/ chen po gsum dag gis grangs su byas pas na chen po nyid de/ sems dang spong ba dang rtogs pa'o/ /de nyid ni gsum ste/ de yang 'di skad ston te/ chen po'i ched kyi ye shes la sogs pa ni ched du bya ba chen po ste chen po'i byed kyi yul yin pa'i phyir ro/ /sems can thams cad la sems pa'i sems dpa' chen po 'di la yod pas na sems dpa' chen po'o/ /mngon par rtogs pa'i rgyan gyi tshig 'di ni bcom ldan 'das kyis shes rab kyi pha rol tu phyin pa chen po dag las de ltar ched du sems can thams cad kyi mchog tu gyur pa ni de'i sems chen po ye shes chen po yin no zhes gsungs te/ 'dir yang ched du bya ba ni sems can gyi phung po chen po dang / sems can gyi ris chen po'i gtso bo byed par 'gyur bas na sems dpa' chen po zhes bcom ldan 'das kyis gsungs so/ /shA ri'i bus zhus pas ni spong ba chen po bstan to/ /rab 'byor gyis zhus pas ni rtogs pa chen po bstan to/ /de bas na mngon par rtogs pa'i rgyan gyi tshig gzhan du byas te/ sems can kun tshogs mchog dang ni/ /spong dang rtogs dang gsum po la/ /chen po gsum gyi rang 'byung gi/ /ched du bya ba 'di shes bya/ /zhes bya ba gsungs so/ /de nyid kyi phyir skabs su bcom ldan 'das kyis byang chub kyi don gyi zhes bya ba la sogs pa gsungs so/ /ni zhes bya ba ni nges par bzung ba'o/ /byang chub don du gnyer bas na don dang 'dod pa'o/ /de'i ched du sems pa nyid yin pas na sems dpa' chen po zhes brjod do/ /de bas na sems dpa' chen po'i sgra ni ched du brjod pa yin pas so/ /'phags pa rab 'byor gyis zhus pa ni rab 'byor gyis gsol pa zhes bya ba la sogs pa'o/ /bcom ldan 'das kyis bka' stsal pa/ sems can gyi phung po chen po dang zhes bya ba la sogs pa ni bstan pa'o/ /sems can gyi ris zhes bya ba ni rjes su bstan pa'o/ /de'i gtso bo nyid ni theg pa gsum gyis yang dag par btul ba'i sa yin te ched du bya ba'o/ /sems can gyi phung po'i gtso bo nyid ni chen po nyid de/ de sems can gyi phung po chen po nyid kyi zhes bya bar 'gyur te de ltar na sems can gyi phung po chen po nyid do/ /de nas bcom ldan 'das zhes bya ba la sogs pa la dus la zhes bya ba ni skabs so/ /bdag tu lta ba la sogs pa la don gcig go/ /de dag gi lta ba ni grub pa'i mtha'i bye brag gis de'i dngos por mngon par zhen pa'o/ /'byung ba ni 'khor ba'o/ /'jig pa ni mya ngan las 'das pa'o/ /de gnyis kyi lta ba ni gtso bo nyid du nges pa'o/ /mya ngan las 'das pa thob pa ni chad pa yin no zhes bya ba ni chad par lta ba'o/ /bdag ni rtag par gnas pa yin no zhes bya ba ni rtag par lta ba'o/ /lus ni phung po dang / khams dang / skye mched la sogs pa'o/ /de dag gi ngo bo nyid med pa la ngo bo nyid du mngon par zhen pa ni rang gi lus la lta ba'o/ /'di lta bu zhes bya ba ni ji skad du bstan pa'o/ /sogs pa zhes bya ba ni tshul khrims dang brtul zhugs mchog tu 'dzin pa la sogs pa log pa'i lta ba rnams kyang rtogs par bya ba yin no/ /chos zhes bya ba ni lam la rigs pa ste de ni spong ba chen po nyid do/ /de nas bcom ldan 'das la zhes bya ba la sogs pa gsungs so/ /byang chub kyang yin sems kyang yin pa'o/ /thams cad mkhyen pa yang yin sems kyang yin no/ /zag pa med pa ni bag chags dang bcas pa'i zag pa thams cad nges par sbyangs pa'o/ /so so'i skye bo thams cad mi mnyam pa ni mnyam pa med pa'o/ /mnyam pa med pa'i sangs rgyas de dang mnyam pa ni mi mnyam pa dang mnyam pa'o/ /ma chags pa ni bstan pa'o/ /yongs su ma zin pa ni rjes su bstan pa'o/ /de la yang rlom sems med pa'i phyir zhes bya bar bsams pa'o/ /yang gi sgra ni gzhan lta ci smos zhes pa'o/ /lhag ma ni rtogs par sla ste/ bshad pa dang 'dra ba nyid de de ni rtogs pa chen po nyid do/ /sgrub pa'i ched du bya ba rdzogs so// //sgrub pa nyid bshad par bya ste/ de yang rnam pa bzhi ste/ go cha'i sgrub pa dang / 'jug pa'i sgrub pa dang / tshogs kyi sgrub pa dang / nges par 'byung ba'i sgrub pa'o/ /de la dang po go cha'i sgrub pa bshad par bya ba ste/ de ltar na gnas brtan shes rab chen pos sems dpa' chen po'i rgyu mtshan de nyid bstan pa'i phyir de nas tshe dang ldan pa shA ri'i bus zhes bya ba la sogs pa smras so/ /'jug pa nyid ni 'dzeg pa yin te gang gi phyir/ 'jug pa'i sgrub pa theg chen la/ /'dzeg pa yin par shes par bya/ /zhes bya ba'i tshig gis so/ /go cha chen po bgo bar sems dpas na sems dpa' chen po'o/ /theg pa chen po la gnas par sems dpas na sems dpa' chen po ste/ bar gyi tshig mi mngon par byas pa yin pa'i phyir zhes bya bar bsams pa'o/ /de la pha rol tu phyin pa drug la so sor go cha nye bar sbyar bar bya ste/ go cha'i sgrub pa ni shes rab kyi pha rol tu phyin pa chen po dag las byis pa rnams kyis go cha bzhin du bstan to/ /de'i dbang du byas nas bstan bcos las/ sbyin pa la sogs rnam drug la/ /de dag so sor bsdus pa yis/ /go cha'i sgrub pa gang yin te/ /drug tshan drug gis ji bzhin bshad/ /ces bya ba yin te ji ltar mdo las drug tshan drug gis bstan pa de bzhin du zhes bya ba'i don to/ /bcom ldan 'das ma 'dir ni bstan bcos kyi don gzhan du brjod par bya ste/ go cha khrab dang bsrungs pa dang / /gang phyir sgrub pa dbu ma yin/ /rnam kun rnam pa thams cad kyis/ /ji skad bstan pas pha rol gnon/ /zhes bya ba yin te/ de bas go cha'i mtshan nyid rab 'byor gyis zhus pa na/ bcom ldan 'das kyis bka' stsal pa/ byang chub sems dpa' sems dpa' chen po 'di snyam du zhes bya ba ni 'di ltar sems dpa'o/ /ji ltar zhe na/ sems can dpag tu med pa zhes bya ba la sogs pa smras so/ /yul phyogs dang grong phyogs su chad pa med pa yin te dpag tu med pa dang / grangs med pa yongs su mya ngan las 'da' bar bya ba ni lam bstan pas mya ngan las 'das pa thob par bya ba'o/ /'di tsam gyis ni ji skad bstan pas pha rol gnon cing skur pa 'debs pa'i gnyen po bstan pa'o/ /bdag gis sems can grangs med pa/ /zhes bya ba la sogs pa ni sgro btags pa'i gnyen po'i sgo nas gsungs te/ byed pa dang las bkag pas bya ba bkag pa yang rtogs pa yin no/ /de ltar mtha' gnyis kyi gnyen po'i sgo nas dbu ma'i lam yin no/ /ji ltar mya ngan las bzla ba'i bsam pa'i dus su yang de ltar yin no zhes bstan pa'i phyir/ sems can de dag ces bya ba la sogs pa nas gang yang med do snyam du sems so zhes bya ba'i bar te/ des ni thos pa las byung ba'i shes rab kyi go cha bstan nas/ bsams pa las byung ba'i shes rab dri bar bya ba'i phyir/ de ci'i phyir zhe na zhes bya ba la sogs pa gsungs so/ /de mtha' gnyis dang bral ba gang las shes ji ltar rigs she na/ rigs pa'i rgyu chos rnams kyi chos nyid 'di yin te zhes bya ba smos so/ /chos rnams ni phung po la sogs pa'o/ / de dag ni mtha' gnyis dang bral ba nyid de 'di ni chos nyid kyi rang bzhin yin no/ /ji ltar zhe na/ sgyu ma'i chos nyid nye bar bzung na zhes smos te/ de ltar na chos rnams kyi ngo bo nyid ni gsum ste/ dang po ni btags pa ste gzung ba dang 'dzin pas bsdus pa phung po la sogs pa'o/ / gnyis pa ni gzhan gyi dbang yin te rgyu'i dbang du gyur pa rdzas su yod pa btags pa'i gzhi'o/ gsum pa ni yongs su grub pa ste de bzhin du rtag tu yod cing de yang gzhan gyi dbang las btags pas stong pa nyid do/ /sgyu ma mkhan gyis rde'u la sogs pa la sngags btab pa'i bya bas glang po che la sogs pa'i gzugs med kyang rnam pa ni 'dir sgyu ma yin te/ de dang chos mthun par rnam par rig pa tsam nyid yang dag par yod kyang 'khrul pa'i dbang gis phung po la sogs pa'i ngo bor snang ba ni sgyu ma zhes brjod do/ /de'i chos nyid nye bar bzung ba ni shes pa'o/ /de la chos rnams kyi chos nyid ces brjod kyi phung po la sogs pa brdzun pa la ni ma yin te gang gi phyir brdzun pa'i chos rnams nyid yin na ni de yang brdzun pa nyid du 'gyur te/ don dam par ni ma yin no/ /rnam par rig pa tsam yang med na ni rgyu med par yang ye shes dam pa skye bar mi 'gyur te/ gang gi phyir de'i yul du gyur pa'i phyir don dam pa yang yod par 'gyur ro/ /gal te rnam par rig pa yod kyang de nyid kyi chos nyid med na ni de'i tshe de'i bdag nyid med pas yang dag pa'i ye shes skyes kyang rig par mi 'gyur te/ de bas na sangs rgyas dang byang chub sems dpa' rnams kyis don dam pa gzigs par mi 'gyur ro/ /gzhan yang skyes bu rnam pa nyid kyi rnam par rig pa rang nyid la yod cing phung po la sogs pa'i rnam pa gal te mi snang na ni de'i tshe skyes bu rnams kyis mthong bar mi 'gyur te/ 'brel pa med pa'i phyir ro/ /yang na gang gcig mthong bar 'gyur ba des thams cad kyang mthong bar 'gyur bas thal ches par 'gyur ro/ /de bas na rnam par rig pa ni yod cing phung po la sogs pa'i ngo bos ni med do zhes brjod na ni mtha' gnyis dang bral ba grub po/ /'di nyid 'jig rten gyi grags pa'i dpes kyang rtog par bya ba yin pa'i phyir zhes bya ba la sogs pa gsungs so/ /yin pa ni 'di ma yin pa ma yin no/ /'di lta ste dper na zhes bya ba la dper na zhes bya ba ni/ de nyid ji ltar zhes bya ba'i don to/ /de nyid rab tu grags pa'i dpe bstan pa ni 'di lta'i sgra'o/ /mkhas pa ni mdzangs pa'o/ /sgyu ma byed pa ni sgyu mas 'tsho ba'o/ / de'i nye gnas ni gang de'i slob ma yin gyi sgyu mas 'tsho ba ni ma yin pa'o/ /skye bo'i tshogs ni skye bo'i phung po'o/ /mi snang bar byas pa ni yang dag par ma mthong ste/ sprul pa nye bar bsdus pa'i phyir ro/ /de ji snyam du sems zhes bya ba ni spyir dris nas khyad par 'dri ba'o/ /de la yang gang ni 'on kyang zhes bya ba'i don to/ /bsad pa zhes bya ba ni gzhan gyis bsad pa'o/ /shi ba ni rang shi ba'o/ /bshig pa ni mthong bar byas pa'o/ /mi snang bar byas pa ni rang nyid mi snang bar byas pa'o/ /bsams pa las byung ba'i shes rab bstan nas/ bsgoms pa las byung ba'i shes rab bstan par bya ste/ bsgom pa yang rnam pa gsum ste/ zhi gnas dang / lhag mthong dang / zhi gnas dang lhag mthong zung du 'brel par 'jug pa'o/ /de la zhi gnas kyi dbang du byas nas gal te zhes bya ba la sogs pa gsungs so/ /'di ltar bstan pa zhes bya ba ji skad thos pa bsams pa las byung ba'i don to/ /'di zhes bya ba ni rab 'byor 'di la byang chub sems dpa' sems dpa' chen po 'di snyam du zhes bya ba la sogs pa rgya cher bstan to/ /de la mi skrag ces bya ba ni dmigs pa rnam drug gis so/ /sems yang dag par bsdus kyang brnab sems dang yid mi bde ba la dmigs pa 'byung ba na/ mi skrag cing de nyid sel bar byed de g.yeng ba'i nyes pa mthong ba'i phyir ro/ /ming dang zhes bya ba ni sems la skyon med cing rang gi ngang gis 'byung ba'i don mngon par 'du byed pas mi dngang ste/ de byed ces bya ba'i tha tshig go/ /shin tu dngang bar mi 'gyur bas zhes bya ba ni lhun gyis grub cing rang gi ngang gis 'byung ba'i mnyam par gzhag pa'i sems kyis 'bad par mi byed pas shin tu dngang bar mi 'gyur ba'o/ /'di tsam gyis zhes bya ba ni zhi gnas 'dis sems can thams cad yongs su mya ngan las 'da' ba la go cha bstan pas so/ /de nas bcom ldan 'das la zhes bya ba la sogs pas ni lhag mthong gsungs te/ de yang dngos po la mi dmigs pa dang / don dam pa'i stong pa nyid do/ /stong pa nyid ni mthong ba med pa yin/ gang dag la gang gi rnam pas yongs su mya ngan las 'das par yang ma mthong ba'o/ / don bdag gis 'tshal te zhes bya ba ni don dam par bdag gis 'tshal te/ go cha ma mchis pa'i go cha bgos pa'o/ /kye ma zhes bya ba'i sgra ni don dam pa mnyan pa'i 'os su 'gyur ba'i phyir ro/ /rab 'byor zhes bya ba la sogs pa la/ thams cad mkhyen pa nyid ces bya ba ni chos kyi dbyings nyid rnam par dag pa'o/ /de'i rang bzhin nyid yin te/ de bas na de kho na bzhin du btags pas ma byas pa'o/ /rnam par ma byas pa'o/ /rnam par ma byas zhes bya ba ni 'dod chags la sogs pa'i skyon gyis dri mar ma byas pa nyid do/ /mngon par 'du ma byas pa/ zhes bya ba ni gnyen pos dag par ma byas pa nyid do/ /sems can de dag kyang zhes bya ba ni de dag kyang don dam pa nyid du chos kyi dbyings kyi ngo bo nyid kyi phyir ro/ /de ci'i phyir zhe na/ bcom ldan 'das 'di ltar zhes bya ba la sogs pa ni rab 'byor gyis zung du 'brel par 'jug pa'i lam bstan pa'i phyir smras pa'o/ /dang po 'dir lhag mthong nyid kyi skabs yin pa'i phyir te/ 'on kyang btags pa dang / yongs su grub pa'i ngo bo dag gis 'ching ba dang thar pa'i dngos po med par mthong ba'i phyir lhag mthong ngo / /gzhan dbang la de gnyis kyi ngo bor mthong ba'i phyir zhi gnas so/ /de la phung po nyid brtags pa nyid de ngo bo nyid kyis med pa yin na/ de dag de bzhin nyid du ga la yod/ des na de dang de yang ma bcings ma grol ba ste/ yang dag par med pa'i phyir dang skye ba med pa'i phyir ro/ /de nas tshe dang ldan pa gang po zhes bya ba la sogs pa ni zhi gnas kyi skabs bstan to/ /de skad ces smras pa dang zhes bya ba la sogs pa ni rab 'byor gyis zhi gnas ston pa yin te/ sgyu ma'i skyes bu zhes bya ba'i tshig gis so/ /'di ltar glang po la sogs pa'i gzugs su snang ba'i shing rta dang rde'u la sogs pa ni sgyu ma'o/ /'di yang de dang chos mthun pa'i phyir rnam par rig pa nyid phung po la sogs pa'i gzugs su ston pa ni sgyu ma nyid du brjod do/ /sgyu ma yang yin skyes bu yang yin pa dang / sems dang ldan pa'i phyir te/ de bas na sgyu ma'i skyes bu'o/ /de'i ngo bo nyid bzhin du zhi gnas kyang ma bcings ma grol ba zhes bya ba'i don to/ /'dis ni zhes bya ba la sogs pa nas go cha chen po'o zhes bya ba'i bar gyis ni zhi gnas kyi mjug sdud do/ /go cha med pa'o zhes bya ba 'dis ni lhag mthong gi mjug sdud do/ /de bas na 'di ni zung du 'brel ba'i lam mo/ /'dir theg pa chen po la yang dag par zhugs pa dang / theg pa chen po la yang dag par gnas pa zhes bya ba'i tshig gis ni theg pa la zhugs pa'i dus nas yang go cha yongs su ma btang ba'i phyir ro/ /byams ma'i bu cang mi smra bar gyur to zhes bya ba ni gtam yongs su rdzogs pa'o/ /de ni go cha'i sgrub pa'o/ /de nas bcom ldan 'das zhes bya ba la sogs pas ni/ rab 'byor gyis theg pa chen po la ji ltar zhugs pa dang / theg pa chen po la gnas pa 'di nyid dpyad pa'i phyir de gang lags zhes bya ba la sogs pa smos so/ /'di dag gi dri ba drug go/ /'dis 'gro bas na theg pa'o/ /theg pa chen po de dag gang lags zhes bya ba ni dri ba dang po'i don to/ /de gang ltar yang dag par 'jug pa zhes bya ba ni rab tu gnas pa ste rab kyi sgra gang na yod na 'gro ba la 'jug pa yin no/ /gang gis 'gro ba de ni theg pa ste/ 'gro ba ni bya ba'o/ /des na gang gis bya ba des 'gro bar 'gyur ro zhes bya ba'i don to/ /'gro ba ni nges par 'byung ba'i don to/ /des na gang nas nges par 'byung bar 'gyur zhes bya bar dri ba yin no/ /'gro ba ni gang zhig gi mtshan nyid yin pas des na de gang gis 'jug par 'gyur zhes dris pa yin no/ /'gro zhing song nas la lar gnas pa'i don yin pas des na gang du gnas par 'gyur ba zhes dris pa yin no/ /'dis dman pa'i rigs nges par 'byung ba ma yin te/ des na des gang zhig nges par 'byung bar 'gyur zhes dris pa yin no/ /de skad ces gsol pa dang zhes bya ba la sogs pas ni bcom ldan 'das kyis lan bka' stsal pa yin no/ /theg pa chen po zhes bya ba la 'di ni theg pa chen po gzung ngo / /dpag tu med pa'i tshig bla dgas zhes bya ba ni rjod par byed pa'o/ /tshad med pa zhes bya ba ni dpag tu med pa nyid dang ldan pa'o/ /de la dang po ni dge ba'i chos thams cad kyi rang bzhin yin pa'i phyir ro/ /gnyis pa ni gus pa dang dus ring por rgyun mi 'chad pa la sogs pa yin pa'i phyir ro/ /yang dag par 'jug pa zhes bya ba ni go cha bgos nas rab tu gnas pa yin pas yang dag par 'jug pa'o/ /des na go cha ni 'og nges par 'byung ba'i ni gong du 'gro ba 'ang de ni yang dag par gnas pa'i sgrub pa'o/ /yang dag par gnas pa de yang rnam pa gnyis te/ yang dag par 'jug pa'i sgrub pa dang / tshogs kyi sgrub pa'o/ /de la 'gro bar rtsom pa ni chas pa'o/ /lhag par byas pa dag ni lci ba'i phyir khur te rnam pa thams cad kyi khur yin pas tshogs so/ /de gnyis kas pha rol tu phyin pa drug po thams cad yang dag par bsdus pa'i phyir dang / pha rol tu phyin pa de'i ngo bo yin pa'i phyir dang / pha rol tu phyin pa dang rjes su mthun pa'i phyir ram/ pha rol tu phyin pa'i 'bras bu yin pa'i phyir ci rigs par sbyar ro/ /khams gsum nas zhes bya ba ni gang cung zad nyon mongs pa can nam nyon mongs pa can ma yin pa'i mi shes pa de ni 'dir khams gsum pa yin te/ yang dag ma yin kun rtog ni/ /sems dang sems byung khams gsum pa/ /zhes bshad pas so/ /des na nges par 'byung bar 'gyur ba ni nyan thos kyi theg pa ni nyon mongs pa can nyid la nges par 'byung ba'o/ /dmigs pa med pa ni mi dmigs pa nyid de chos kyi dbyings so/ /de'i mtshan nyid kyis yang dag par 'byung ba ni shing dang lha khang la sogs pa sngar ma mthong ba'i grong du 'byung ba yin no/ /lan drug po 'di dag gis theg pa chen po rnam pa drug tu smras so/ /dpag tu med pa'i chen po nyid dang / yang dag par 'jug pa'i chen po nyid dang / nges par 'byung ba'i chen po nyid dang / mtshan nyid chen po nyid dang / thob pa'i chen po nyid dang / gnas kyi chen po nyid do/ /yang na rnam pa bdun te gzhal du med pa dang / dpag tu med pa'i dbye bas so/ /skur pa 'debs pa'i gnyen po bstan nas sgro 'dogs pa'i gnyen po bstan pa'i phyir/ 'on kyang gang nas zhes bya ba la sogs pa nas de skad ces bka' stsal pa dang zhes bya ba'i bar gyis gsungs so/ /pha rol tu phyin pa la yang dag par zhugs pa zhes bstan pa la de dag gi mtshan nyid ni rnam pa lnga bshad par bya ste/ go rims bzhin du rigs dang / smon lam dang / lhag pa'i bsam pa dang / gzhi dang ngo bo nyid de/ rigs ni chos nyid do/ /gzhi ni yul lo/ /lhag ma ni rtogs par sla'o/ /gang byang chub sems dpa'i chos nyid la gnas te byang chub kyi sems kyis snying rje sngon du 'gro ba'i bsam pas dngos po thams cad gtong ba dang / /de bzhin du spong ba thams cad cig car srung ba dang / de bzhin du rnam pa thams cad du sdug bsngal thams cad la ji mi snyam pa'i bzod pa dang / de bzhin du lus dang ngag dang yid kyi las dge ba'i chos thams cad kyi tshogs sgrub par byed pa nyid ni go rims ji lta ba bzhin du sbyin pa dang / /tshul khrims dang / bzod pa dang / brtson 'grus kyi pha rol tu phyin pa nyid do/ /de bzhin du las thams cad la lus dang ngag dang yid rnam pa thams cad du dbang du byas nas rnam pa thams cad du sems gnas pa dang / chos thams cad kyi rnam pa la rab tu rnam par 'byed pa ste/ de dag ni go rims bzhin du bstan pa dang / shes rab kyi pha rol tu phyin pa'o/ /de la 'jug pa'i sgrub pa'i dbang du byas nas bstan bcos las/ bsam gtan gzugs med sbyin sogs dang / /lam dang byams la sogs pa dang / /dmigs pa med dang ldan pa dang / /'khor gsum rnam par dag pa dang / ched du bya dang mngon shes drug /rnam pa kun mkhyen tshul la ni/ /'jug pa'i sgrub pa theg chen la/ /'dzeg pa yin par shes par bya/ /zhes bya ba gsungs te/ de dag ni sgrub pa rnam pa dgu ste/ yul gyi dbye bas so/ /yul gyi bdun pa yin te bsam gtan gzugs med ces bya ba la sogs pa gsungs so/ /de la bsam gtan bzhi las dang po la yan lag lnga ste/ rtog pa dang dpyod pa ni gnyen po'i yan lag go/ /dga' ba dang bde ba ni phan yon gyi yan lag go/ /sems rtse gcig pa nyid ni zhi gnas kyi yan lag go/ /gnyis pa ni yan lag bzhi ste/ nang rab tu dang ba ni gnyen po'i yan lag go/ /lhag ma ni snga ma bzhin no/ /gsum pa ni yan lag lnga ste/ btang snyoms dang / dran pa dang / shes bzhin ni gnyen po'i yan lag go/ /bde ba ni phan yon gyi yan lag go/ /lhag ma ni snga ma bzhin no/ /bzhi pa ni yan lag bzhi ste/ btang snyoms yongs su dag pa dang / dran pa yongs su dag pa ni gnyen po'i yan lag go/ /sdug bsngal yang ma yin pa'i tshor ba ni phan yon gyi yan lag go/ /lhag ma ni snga ma bzhin no/ /gzugs med pa ni rnam pa bzhi ste/ rnam pa thams cad du gzugs kyi 'du shes las yang dag par 'das nas thogs pa'i 'du shes rnams nub par gyur cing sna tshogs kyi 'du shes yid la mi byed pas nam mkha' mtha' yas so snyam pa ni nam mkha' mtha' yas skye mched do/ /nam mkha'i 'du shes las yang dag par 'das nas rnam par shes pa mtha' yas so snyam pa ni rnam shes mtha' yas skye mched do/ /shes bya dang shes pa'i 'du shes dag las yang dag par 'das nas ci yang med do snyam pa ni ci yang med pa'i skye mched do/ /ci yang med pa'i 'du shes las kyang yang dag par 'das phra ba ni 'du shes med pa dang 'dra ba yang dag par spyod pa'i phyir 'du shes med 'du shes med min skye mched de srid pa'i rtse mo'o/ /de dag ni bsam gtan dang gzugs med pa'i 'jug pa'o/ /sbyin sogs zhes bya ba ni sngar bshad pa'i pha rol tu phyin pa drug po dag nyid de dag ni pha rol tu phyin pa'i 'jug pa'o/ /lam dang zhes bya ba la lam ni byang chub kyi phyogs kyi chos sum cu rtsa bdun gyi chos te/ de dag bsgom pa ni lam gyi 'jug pa'o/ /byams pa la sogs pa zhes bya ba la tshad med pa'i sems can thams cad la dmigs pa'i phyir tshad med pa'o/ /de la rnam pa bzhi ste/ byams pa dang / snying rje dang / dga' ba dang / btang snyoms dang / de dag gi go rims bzhin du bde ba dang ldan par 'dod pa dang / sdug bsngal dang bral bar 'dod pa dang / bde ba dang mi 'bral bar 'dod pa dang / kun nas nyon mongs pa med par 'dod pa'o/ /kye ma sems can thams cad ni bde ba dang ldan par gyur cig snyam pa dang / sdug bsngal dang bral bar gyur cig snyam pa dang / bde ba dang mi 'bral bar gyur cig snyam pa dang / kun nas nyon mongs pa dang bral bar gyur cig snyam pa'o/ /de lta bu'i rnam pa'i ting nge 'dzin te de dag ni tshad med pa'i 'jug pa'o/ /stong pa nyid nyi shus chos thams cad la mi dmigs pa'i tshul gyis bsgom pa ni mi dmigs pa dang ldan pa'i 'jug pa'o/ /sbyin pa'i pha rol tu phyin pa la spyod pa ni sbyin par bya ba dang / sbyin pa po dang / len pa po mi dmigs pa nas/ shes rab kyi pha rol tu phyin pa la spyod pa dang / byang chub sems dpa' dang yid la byed pa mi dmigs pa'i bar de ni 'khor gsum yongs su dag pa'i 'jug pa'o/ /sgom pa po'am/ bsgom par bya ba'am/ sgom pa gang yang med pa de ni sgom pa mi dmigs pa ste sgom pa rnam par 'jig pa'o/ /de'i don dang de'i ched du gang dge ba'i chos thams cad bsgom pa de ni ched du bya ba'i 'jug pa'o/ /mngon par shes pa drug gi sangs rgyas kyi zhing sna tshogs su 'gro zhing der sangs rgyas rnams la mchod pa dang / de dag la theg pa chen po'i chos nyan cing sems can rnams la yongs su smin par byed pa dang / rang gi sangs rgyas kyi zhing yongs su sbyong ba ni mngon par shes pa drug gi 'jug pa'o/ /rnam pa thams cad mkhyen pa nyid rjes su thob cing 'khor lo bskor ba dang / phyogs bcu'i sangs rgyas thams cad kyis bsngags pa ni rnam pa kun mkhyen pa'i 'jug pa ste/ 'jug pa'i sgrub pa yang rdzogs so/ /tshogs kyi sgrub pa'i dbang du byas nas bstan bcos las/ rtse dang sbyin la sogs pa drug / zhi gnas lhag mthong bcas pa dang / /zung du 'brel ba'i lam gang dang / /thabs la mkhas pa gang yin dang / /sems pa dang ni bsod nams dang / /lam dang gzungs dang sa bcu dang / /gnyen po'i tshogs kyi sgrub pa yi/ /rim pa yin par shes par bya/ /zhes bya ba gsungs te/ tshogs rnams kyi mthar ji ltar srid pa'i chos nyid gang yin pa la so sor rtog pa ni brtse ba la sogs pa'i tshogs so/ /de la dmyal ba dang yi dwags dang / dud 'gror skyes pa dag la sdug bsngal thams cad rab tu zhi ba dang / sangs rgyas rnams la dad pa dang / lha dang mi rnams su skye bar 'dod pa ni skye ba'i tshogs so/ /sbyin pa la sogs pa'i tshogs drug gi pha rol tu phyin pa drug po de dag nyid do/ /zhi gnas dang lhag mthong dang zung du 'brel ba'i tshogs gsum pa ni go cha'i sgrub pa dang 'dra'o/ /gang yang rnam pa thams cad mkhyen pa nyid dang ldan pa'i yid la byed pas mi dmigs pa'i tshul gyis pha rol tu phyin pa dag la spyod pa gzhan dag la yang dag par 'dzin du 'jug pa de ni thabs la mkhas pa'i tshogs so/ /gang stong pa nyid nyi shu dag yongs su shes pa de ni ye shes kyi tshogs so/ /de dag kyang bcom ldan 'das yum chen mo dag las rgya cher gsungs te/ nang stong pa nyid dang / phyi stong pa nyid dang / phyi nang stong pa nyid dang / stong pa nyid stong pa nyid dang / chen po stong pa nyid dang / don dam pa stong pa nyid dang / 'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang / dor ba med pa stong pa nyid dang / rang bzhin stong pa nyid dang / chos thams cad stong pa nyid dang / rang gi mtshan nyid stong pa nyid dang / mi dmigs pa stong pa nyid dang / dngos po med pa'i ngo bo nyid stong pa nyid dang / dngos po stong pa nyid dang / dngos po med pa stong pa nyid dang / rang gi ngo bo nyid stong pa nyid dang / gzhan gyi ngo bo nyid stong pa nyid de/ 'di dag re re'i rigs pa yang ther zug tu gnas pa med pa dang / 'jig pa med pa'i phyir ro/ /de ci'i phyir zhe na/ de'i rang bzhin de yin pa'i phyir zhes gsungs pa yin no/ /gang gi phyir 'di dag ji ltar rigs par rang gi ngo bo gang yin pa de nyid kyis stong pa nyid de rtag pa'i ngo bo yin pa'i phyir ro/ /rtag pa yang ther zug tu gnas pa dang / 'jig pa'i chos can ma yin te de dag gi rang bzhin ni rnam pa gnyis po de dag go/ /de bas na de ni de'i stong pa nyid do/ /de ci'i phyir zhe na zhes bya ba ni des de'i stong pa nyid de gang las skyes zhes bya ba'i tha tshig go/ /'di'i rang bzhin zhes bya ba la sogs pas ni gang las kyang mi skye ba zhes ston to/ /de la nang gi chos rnams ni mig la sogs pa drug ste/ de dag gis ni nang stong pa nyid do/ /phyi'i chos rnams ni gzugs la sogs pa drug ste/ de de dag gis stong pa nyid stong pa nyid do/ /mig la sogs pa ni gzugs la sogs pa de dag gi stong pa nyid de/ de'i yul nyid kyis stong pa zhes bya ba'i don to/ /gzugs la sogs pa yang mig la sogs pas stong pa nyid de de'i yul can nyid kyis stong pa zhes bya ba'i don to/ /chos thams cad kyi stong pa nyid gang yin pa de nyid stong pa nyid de de ni stong pa nyid stong pa nyid do/ /chen po stong pa nyid ni phyogs rnams kyi stong pa nyid do/ /don dam pa ni mya ngan las 'das pa ste de des stong pa ni don dam pa stong pa nyid do/ /'dus byas ni 'dod pa dang gzugs dang gzugs med pa'i khams te de dag gis stong pa ni 'dus byas stong pa nyid do/ /gang skye ba med pa dang 'gag pa med pa dang / gnas pa med pa dang / mi 'gyur ba nyid de ni 'dus ma byas te de'i stong pa nyid ni 'dus ma byas stong pa nyid do/ /gang gi mtha' mi dmigs pa de ni mtha' las 'das pa ste/ de mtha' las 'das pa stong pa nyid do/ /gang la thog ma dang tha ma med pa de la dbus kyi dngos po 'ong ba dang 'gro ba med pas thog ma dang bar dang tha ma yang med de/ dang po dang bar ma dang thams stong pa de ni thog ma dang tha ma med pa stong pa nyid do/ /gang la spangs pa de ni dor ba ste/ des stong pa ni dor ba med pa stong pa nyid do/ /gang la chos thams cad ni rang bzhin gyis nyan thos la sogs pas ma byas pas mi 'gyur ba nyid do/ /des stong pa ni rang bzhin stong pa nyid do/ /chos thams cad chos thams cad kyis stong pa ni chos thams cad stong pa nyid do/ /gzugs su rung ba ni gzugs kyi mtshan nyid do/ / tshor ba'i mtshan nyid ni myong ba'o/ /'du shes kyi mtshan nyid ni mtshan mar 'dzin pa'o zhes shes par bya ste/ chos de dag thams cad rang gi mtshan nyid kyis stong pa ni rang gi mtshan nyid stong pa nyid do/ /mi dmigs pa stong pa nyid ni 'das pa dang ma 'ongs pa dang da ltar byung ba rnams phan tshun mi dmigs pa yin te thog ma nas rnam par dag pa'i phyir ro/ /gang rten cing 'brel par 'byung ba de ni dngos po med pa'i ngo bo nyid yin te de ltar na yang dag par sbyor ba las byung ba'i chos rnams kyi rang gi ngo bo nyid ni yod pa ma yin te/ rten cing 'brel par 'byung ba nyid yin pas yang dag par sbyor bas stong pa ni dngos po med pa'i ngo bo nyid stong pa nyid do/ /dngos po ni nye bar len pa'i phung po lnga ste des stong pa ni dngos po stong pa nyid do/ /dngos po med pa ni 'dus ma byas te des stong pa ni dngos po med pa stong pa nyid do/ /rang gi ngo bo yin pas na rang gi ngo bo ste des stong pa ni rang gi ngo bo stong pa nyid do/ /gzhan gyi ngo bo ni chos nyid de chos kyi dbyings so/ /des stong pa ni gzhan gyi ngo bo stong pa nyid do/ /dpa' bar 'gro ba dang rin chen phyag rgya dang seng ge rnam par rol pa la sogs pa ni ting nge 'dzin gyi tshogs so/ /lam gyi tshogs ni byang chub kyi phyogs rnam pa mang po yin pas de bshad par bya'o/ /de yang dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / /'phags pa'i lam yan lag brgyad de de ni byang chub kyi phyogs kyi chos rnams so/ /de la gang gi rjes su lta bas dran pa nye bar gnas pa de ni dran pa nye bar gzhag pa'o/ /dmigs pa'i bye brag gis ni bzhi ste/ lus dran pa nye bar gzhag pa dang / tshor ba dran pa nye bar gzhag pa dang / sems dran pa nye bar gzhag pa dang / chos dran pa nye bar gzhag pa'o/ /de la nang gi lus la lus kyi rjes su lta zhing gnas pa dang / lus dang ldan pa'i rnam par rtog pas rnam par rtog par yang mi byed de de yang mi dmigs pa'i tshul gyis brtun pa shes bzhin can dran pa dang ldan pas so/ /de bzhin du phyi'i lus dang / de bzhin du nang dang phyi'i lus dang / de bzhin du nang dang phyi dang phyi nang gi tshor ba dang sems dang / /chos dang tshor ba'i rjes su lta ba nas/ chos kyi rjes su lta zhing gnas so zhes bya ba'i bar du ste/ chos dang ldan pa'i rnam par rtog pas rnam par rtog par yang mi byed la/ de yang mi dmigs pa'i tshul gyis brtun pa shes bzhin can dran pa dang ldan pas 'jig rten la phan pa'i sems dang / yid mi bde ba rnam par bsal nas so/ /'dir nang gi lus ni rang gi mig la sogs pa drug go/ /phyi rol gyi lus ni rang gi lus las phyi rol gyi 'dus byas so/ /phyi nang gi lus ni lhag ma 'byung ba dang 'byung ba las gyur pa rang gi lus su gtogs pa'o/ /tshor ba la sogs pa yang lus la dmigs pa'i dbye bas rnam pa gsum ste/ tshor ba ni bde ba dang sdug bsngal dang bde ba yang ma yin sdug bsngal ba yang ma yin pa'o/ /chos ni sems las byung ba dge ba dang mi dge ba'o/ /lus la sogs pa la rjes su lta ba ni lus la sogs pa'i chos nyid la rjes su lta ba'o/ / lus la sogs pa dang ldan pa ni lus la sogs pa'i ming dang ldan pa'o/ /'di ni bdag gi lus te bdag gi lus la rtag pa dang mi rtag pa dang bde ba dang sdug bsngal ba zhes bya ba la sogs pas rtog pa ni rnam par rtog pa'o/ /de la yang mi dmigs pa'i tshul gyis rjes su lta ba ni rnam par mi rtog pa'o/ /gus par byed pa dang rtag tu byed pa'i sbyor ba yin pas na brtun pa'o/ /rjes su lta ba dang shes bzhin gyi sbyor bas na shes bzhin no/ /mi brjed pa'i bdag nyid dang / rgyun tu srung bar byed pa'i bdag nyid dang / phyi rol du mi g.yeng bar byed pa'i bdag nyid kyi dran pa dang ldan pa'o/ /'di dag nyid brtson 'grus dang shes rab dang dran pa yin te/ 'di dag gi phan yon bstan pa'i phyir 'jig rten la brnab sems dang / yid mi bde ba bsal te zhes bya ba gsungs so/ /bsal te zhes bya ba ni spangs pa'o/ /'jig rten ni 'jig rten gyi chos la'o/ /rnyed pa dang grags pa dang bde ba dang bstod pa la ni brnab sems so/ /ma rnyed pa dang ma grags pa dang sdug bsngal ba dang smad pa la ni yid mi bde ba'o/ /'di dag ye shes yang dag par 'dzin pas na yang dag par 'dzin pa'o/ /yang na yang dag par spang ba'o/ /de ni rnam pa bzhi ste/ 'di lta ste/ mi dge ba'i chos skyes pa rnams spang ba'i phyir 'dun pa skyed do/ /'bad do/ /brtson 'grus rtsom mo/ /ye shes rab tu 'dzin to/ /yang dag par rab tu 'jog go zhes bya ba dang / de bzhin du sdig pa mi dge ba'i chos rnams ma skyes pa mi bskyed pa'i phyir 'dun pa skyed do zhes bya ba la sogs pa dang / de bzhin du dge ba'i chos ma skyes pa rnams skyes pa'i phyir zhes bya ba dang / de bzhin du dge ba'i chos skyes pa rnams gnas pa dang phyir zhing 'byung ba'i phyir 'dun pa skyed do zhes bya ba la sogs pa'o/ /de la go cha'i brtson 'grus kyis 'di ltar bya'o snyam pa'i 'dun pa skyed do zhes bya ba'o/ /sbyor ba'i brtson 'grus kyis ni 'bad de/ skyo ba med pa'i brtson 'grus kyis ni brtson 'grus rtsom mo/ /thabs kyi brtson 'grus kyis ni ye shes rab tu 'dzin to/ /yang dag par rab tu 'jog go/ /de la bying ba la ni sems rab tu 'dzin pas mtho bar byed do/ /rgod pa la ni mngon par bsdus pas sems yang dag par rab tu 'jog go/ /rdzu 'phrul ni 'jig rten las 'das pa'i chos rnams ni rdzu 'phrul gyi gnas yin pa'i phyir rdzu 'phrul gyi rkang pa'o/ /de yang bzhi ste/ 'dun pa'i ting nge 'dzin dang / brtson 'grus kyi ting nge 'dzin dang / sems kyi ting nge 'dzin dang / dpyod pa'i ting nge 'dzin to/ /'di ltar la la ni 'dun pa drag po dang ldan pas rtse gcig pa'i mtshan nyid kyi ting nge 'dzin skye ba'o/ /la la ni yang dag par spong ba'i brtson 'grus kyis mi dge ba'i tshogs mi skyed pa nyid dang len par bstan to/ /la la ni zhi gnas dang rab tu 'dzin pa dang btang snyoms kyi mtshan nyid kyis sems yongs su 'dzin to/ /la la ni mi dge ba'i las phra mo yang dag par spyod dam 'on te yang dag par mi spyod ces gang bdag nyid yongs su dpyod pa des ni yang dag par nges par spong ngo / /de dag gis kun nas dkris pa thag ring du gyur nas bag la nyal spang ba'i phyir gong du yang dag par spong ba bzhi po dag gis brtson 'grus rtsom pa na spong ba'i 'du byed brgyad mngon par 'byung ba yin te/ 'dun pa dang / brtson 'grus dang / dad pa dang / shin tu sbyangs pa dang / dran pa dang / shes bzhin dang / sems pa dang / btang snyoms so/ /de la nam zhig bdag la 'jig rten dang 'jig rten las 'das pa'i snyoms par 'jug pa skye bar 'gyur zhes bya ba ni 'dun pa'o/ /mi dge ba'i chos thams cad nges par 'joms pa ni brtson 'grus so/ /gong ma'i chos rtogs par bya ba la dad pa ni dad pa'o/ /de sngon du 'gro ba ni shin tu sbyangs pa'o/ /de la zhi gnas kyi phyogs ni dran pa'o/ /lhag mthong gi phyogs ni shes bzhin no/ /de la sems mngon par 'du shes pa ni sems pa'o/ /kun nas nyon mongs pa ma yin pa ni btang snyoms so/ /'dun pa la sogs pa'i ting nge 'dzin spong ba'i 'du byed dang ldan pa rdzu 'phrul gyi rkang pa de dben pa la gnas pa dang / 'dod chags dang bral ba la gnas pa dang / /'gog pa la gnas pa dang / rnam par spong bas yongs su bsgyur ba sgom par byed do/ /de la dben pa ni nyon mongs pa las so/ /'dod chags dang bral ba ni sred pa las so/ /'gog pa ni sdug bsngal lo/ /rnam par spong ba ni phung po thams cad spangs pa ste/ de ni rnam par spong bas yongs su bsgyur ba'o/ /dbang byed pa ni dbang po ste dad pa la sogs pa lnga yin no/ /'jig rten las 'das pa'i chos bskyed pa la dbang thob pa'i phyir dbang po rnams su 'gyur ba yin te/ dad pa'i dbang po nas shes rab kyi dbang po'i bar du'o/ /rdzu 'phrul gyi rkang pa dang ldan pa'i rtags mthong bas gong du khyad par gyi chos 'byung ba la re ba skyes te ston pa dang nyan thos kyi theg pa la yid ches pa skye'o/ /yid ches pa de gang du 'jig rten las 'das pa'i chos 'byung ba la dbang byed pas dad pa'i dbang po zhes bya'o/ /dbang po'i stobs kyis kyang brtson 'grus la sogs pa shin tu lhag par skye ste/ des de bzhin du 'jig rten las 'das pa'i chos 'byung ba la dbang byed pas brtson 'grus la sogs pa'i dbang po zhes bya'o/ /des na dbang po lngar 'gyur ro/ /dbang po lnga bsgom pa la ji ltar bdud la sogs pa mi mthun pa'i phyogs kyis mi tshugs shing thub par dka' bas de ltar 'phel bas stobs zhes bya ba mang du 'gyur te/ dad pa'i stobs nas shes rab kyi stobs kyi bar ro/ / mthong ba'i lam la yang dag pa ji lta ba bzhin du rtogs na byang chub dang yang dag par rdzogs pa'i byang chub bo/ /de'i yan lag ni yang dag par rdzogs pa'i byang chub kyi yan lag bdun te/ dran pa yang dag byang chub kyi yan lag dang / chos rnam par 'byed pa yang dag byang chub kyi yan lag dang / brtson 'grus yang dag byang chub kyi yan lag dang / dga' ba yang dag byang chub kyi yan lag dang / shin tu sbyangs pa yang dag byang chub kyi yan lag dang /ting nge 'dzin yang dag byang chub kyi yan lag dang / btang snyoms yang dag byang chub kyi yan lag go/ /de la chos rnam par 'byed pa yang dag byang chub kyi yan lag la sogs pa gsum ni lhag mthong gi phyogs so/ /shin tu sbyangs pa dang / ting nge 'dzin dang / btang snyoms ni zhi gnas kyi phyogs so/ /de dag thob pas bdag gis nyon mongs pa mthong bas spang bar bya ba spangs par mthong nas/ bsgom pas spang bar bya ba de dag spang ba'i phyir 'phags pa'i lam phung po gsum du sgom par byed de/ yang dag pa'i lta ba dang /yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin to/ /de la dngos po gnyis dang yang dag par rtsol ba ni shes rab kyi phung po'o/ /yang dag pa'i dran pa dang / yang dag pa'i ting nge 'dzin ni ting nge 'dzin gyi phung po'o/ /lhag ma ni tshul khrims kyi phung po ste/ de yang dbus dang mtha' rnam par 'byed pa las/ rang bzhin yan lag gnas yan lag /gsum pa nges 'byung yan lag ste/ /bzhi pa phan yon yan lag yin/ /rnam gsum nyon mongs med yan lag /'di la gzhi dang gnas dang ni/ /ngo bo nyid du brtags pa yin/ /zhes bya ba gsungs so/ /de la dran pa ni byang chub kyi gnas so/ /chos rnam par 'byed pa ni rang bzhin no/ /brtson 'grus ni nges par 'byung ba'o/ /dga' ba ni phan yon no/ /kun nas nyon mongs pa'i gnas ngan len gyi rgyu las byung ba'i phyir shin tu sbyangs pa ni kun nas nyon mongs pa med pa'i gzhi ste de ni de'i gnyen po yin pa'i phyir ro/ /ting nge 'dzin ni gnas so/ /btang snyoms ni ngo bo nyid do/ /yongs su gcod dang go byed dang / /rnam gsum gzhan yid ches par byed/ /mi mthun phyogs kyi gnyen por ni/ /lam gyi yan lag de brgyad do/ /lta dang tshul khrims yo byad bsnyungs/ /gzhan la rnam par rig byed 'dod/ /nyon mongs nye ba'i nyon mongs dang / /mi mthun phyogs kyi gnyen po'o/ /de la mthong ba'i lam la yongs su gcod pa ni yang dag pa'i lta ba'o/ /gzhan gyis go bar byed pa ni yang dag pa'i rtog pa'o/ /yang dag pa'i ngag kun nas slong bar go bar byed pa'i phyir ro/ / gzhan yid ches par byed pa'i yan lag ni rnam pa gsum ste/ yang dag pa'i ngag dang / yang dag pa'i las kyi mtha' dang / 'tsho ba'o/ /de dag gis ni go rims bzhin du gsum la yid ches par 'gyur ro/ /gtam dang 'bel ba'i gtam rnam par nges pas shes rab la yid ches par 'gyur ro/ /mi bya ba mi byed pa'i phyir ni tshul khrims so/ /chos kyi rim par chos gos la sogs pa tshol ba ni yo byad bsnyungs pa'o/ /mi mthun pa'i gnyen po'i yan lag ni rnam pa gsum ste/ yang dag pa'i rtsol ba dang / yang dag pa'i dran pa dang / yang dag pa'i ting nge 'dzin to/ / de dag ni go rims bzhin du bsgom pas spang bar bya ba'i nyon mongs pa dang / nye ba'i nyon mongs pa bying ba dang / rgod pa dang / mi mthun pa'i phyogs khyad par can gyi yon tan mngon par sgrub pa la gegs byed pa'i gnyen po'i don to/ /de dag ni dran pa nye bar gzhag pa la sogs pa re re'i dbye ba yin te byang chub kyi phyogs kyi chos sum cu rtsa bdun du 'gyur ro/ /zad la mi skye ba'i ye shes ni byang chub po/ /de'i phyogs ni rjes su mthun pa ste de dag ni byang chub kyi phyogs so/ /de dag ni 'di la lam yin te thams cad kyang lam gyi tshogs te/ ci rigs par brtson 'grus dang / bsam gtan dang / shes rab kyi pha rol tu phyin pas yang dag par bsdus pa yin no/ /gzungs zhes bya ba gcig gis tshig tu byas pa ni rigs kyi dbang du byas pa yin te/ gzungs rnams ma lus gzungs kyi tshig go/ /a ra pa tsa na la sogs pa'i yi ge de dag la de'i don de bzhin nyid du 'jug par sgom pa na bsgom pa yongs su rdzogs pa na de'i don la bzod pa bskyed par 'gyur te/ de ni bzod pa'i gzungs so/ /de nas phyogs bcu'i sangs rgyas dang byang chub sems dpas bstan pa'i chos kyi phung po 'dzin pa'i rgyur gyur pa ni chos kyi gzungs so/ /de nas de'i don 'dzin pa'i rgyu ni don gyi gzungs so/ /de nas sems can yongs su bskyab pa'i phyir sngags don yod pa ston pa la dbang ba ni sngags kyi gzungs te/ de la a ni chos thams cad kyi sgo ste thog ma nas skye ba med pa'i phyir ro zhes bya ba la/ a'i sgo ni thabs te/ chos thams cad yang dag pa ji lta ba bzhin du rtogs pa'i phyir ro/ /ji ltar shes she na chos thams cad thog ma nas skye ba med pa'i phyir ro/ /gang gi phyir chos thams cad kyi de bzhin nyid nam mkha' dang mnyam ste/ des ni skye ba med cing dang po nyid nas dri ma dang bcas pa'i gnas skabs nyid nas kyang skye ba med pa yin te/ de bas na de bzhin nyid la skye ba med pa nyid kyis yi ge a'i don to/ /yi ge ra'i sgo ni chos thams cad rdul dang bral ba'i phyir te/ de bas na ji ltar nam mkha' la rdul gyis mi gos pa de bzhin du de yang nyon mongs pa'i rdul gyis te/ 'di ni yi ge ra'i don to/ /yi ge pa ni chos thams cad kyi sgo ste don dam par khyad par med pa'i phyir/ 'di ni chos thams cad don dam par khyad par med do/ /de yang de bzhin nyid du de lta bu yin te/ de ni med pa'i don to/ /yi ge tsa ni chos thams cad kyi sgo ste/ 'chi 'pho dang skye ba mi dmigs pas 'di ni de bzhin nyid la 'chi ba dang skye ba med pa'i phyir tsa'i don to/ /yi ge na ni chos thams cad kyi sgo ste ming dang bral bas na bdag gi ming med pa'i phyir na'i don to/ /de bzhin du yi ge la la sogs pa la yang de bzhin du rig par bya ste/ de ni gzungs kyi tshogs so/ /sa bcu dang zhes bya ba ni/ byang chub sems dpa' 'phags pa rnams kyi sa ni bcu ste/ de dag ni sa'i tshogs so/ /de yang rab tu dga' ba dang / dri ma med pa dang / 'od byed pa dang / 'od 'phro ba dang / sbyang dka' ba dang / mngon du gyur pa dang / ring du song ba dang / mi g.yo ba dang / legs pa'i blo gros dang / chos kyi sprin no/ /de la gang gi phyir dang po la bdag dang gzhan gyi don sgrub pa 'jig rten las 'das pa'i lam thob pas rab tu dga' ba ste/ des byang chub sems dpa' 'di rab tu dga' ba'o/ /de nas 'di la tshul khrims 'chal pa'i dri ma dang bral ba de bas na dri ma med pa'o/ /gang gi phyir 'di la ting nge 'dzin ma nyams pa la brten nas chos snang ba de bas na 'od byed pa'o/ /gang gi phyir 'di la byang chub kyi phyogs kyis nyon mongs pa'i bud shing sreg pa de bas na 'od 'phro ba'o/ /gang gi phyir 'jig rten las 'das pa'i ma rig pa dang bden pa'i shes pa phan tshun 'gal ba dka' bas sbyong bar byed pa de bas na sbyang dka' ba'o/ /gang gi phyir 'di la rten cing 'brel par 'byung ba rab tu rnam par 'byed pa'i phyir chags pa med pa'i bde ba zhes bya ba'i shes rab kyi pha rol tu phyin pa mngon du 'gyur zhing gnas pa de bas na mngon du gyur pa'o/ /gang gi phyir 'di la byang chub kyi phyogs dang / bden pa dang / rten cing 'brel par 'byung ba la dmigs nas mtshan ma med pa la gnas shing rtsol ba dang bcas pa de bas na ring du song ba'o/ /gang gi phyir 'di la de nyid rang gi ngang gis 'byung ba'i phyir mi g.yo ba ste/ de bas na mi g.yo ba'o/ /gang gi phyir 'di la so so yang dag par rig pa dag gis byang chub sems dpa' legs par ston pas legs pa'i blo gros so/ /gang gi phyir 'di la byang chub sems dpa' rgyal tshab du dbang bskur ba de bas na chos kyi sprin no/ /'di dag re re yang pha rol tu phyin pa drug gis yang dag par bsdus pa yin no/ /de la go rims bzhin du pha rol tu phyin pa bcur yang bya ba yin te bcu gang zhe na/ sbyin pa dang / tshul khrims dang / bzod pa dang / brtson 'grus dang / bsam gtan dang / shes rab dang / thabs dang / smon lam dang / stobs dang / ye shes te 'di dag ni pha rol tu phyin pa bcu'o/ /de la pha rol tu phyin pa drug gi sgo nas nye bar bsags pa dge ba'i rtsa ba bla na med pa yang dag par rdzogs pa'i byang chub la yang dag par yongs su bsngo ba ni thabs kyi pha rol tu phyin pa ste/ thabs des de mi zad par byed pa'i phyir ro/ /de yang / byang chub bsngos pa'i dge ba ni/ /byang chub bar du zad pa med/ /rgya mtshor chu thigs gtor ba yang / /'jig pa'i bskal par gnas pa bzhin/ /zhes smos so/ /bzang po spyod pa'i smon lam la sogs pa dang / gang gi skye ba thams cad du pha rol tu phyin pa drug la spyod pa ni smon lam gyi pha rol tu phyin pa'o/ /sgom pa'i stobs dang / so sor brtags pa'i stobs dang / gang yang nyin re 'am/ skad cig re re la de dag spyod pa ni stobs kyi pha rol tu phyin pa'o/ / dgongs pa ji lta ba bzhin nam sgra ji bzhin pa ma yin par theg pa chen po yongs su shes pa ni ye shes kyi pha rol tu phyin pa'o/ /sa rnams ni sa bcu pa la sogs pa las rgyas par bstan to/ /sa sbyong ba ni yang bcom ldan 'das yum chen mo dag la brtags pa dang / rjes su bstan pa yin no/ / sa rnams sbyong ba'i dbang du byas nas/ bstan bcos las tshigs su bcad pa nyi shu gsungs te/ de dag kyang sa ji lta ba bzhin du so sor bshad par bya ste/ yongs su sbyang ba rnam bcu yis/ /sa ni dang po 'thob 'gyur te/ /bsam dang phan pa'i dngos nyid dang / /sems can rnams la sems mnyam nyid/ /gtong dang bshes gnyen bsten pa dang / /dam chos dmigs pa tshol ba dang / /rtag tu nges 'byung sems nyid dang / /sangs rgyas bkur bstod dga' ba dang / /chos bstan pa dang bden pa yi/ /tshig ni bcu pa yin par 'dod/ /'di dag rang bzhin mi dmigs pas/ /yongs su sbyong bar shes par bya/ /zhes bya ba la rnam pa bcu ni rnam pa bcu ste/ de yang bsam pa la sogs pa ste/ bsam pa ni dad pa dang 'dun pa'o/ /phan pa'i dngos po ni thams cad la phan par 'dod pa'i rgyu nyid ni 'di la sems can rnams la sems mnyam pa nyid do/ /gtong ba ni sbyin pa'i pha rol tu phyin pa'o/ /tshol ba ni yongs su tshol ba'o/ /de yang dam pa'i chos rnams la dmigs pa ste/ chos yongs su tshol ba zhes bya ba'i don to/ /nges par 'byung ba ni khyim gyi gnas nas nges par 'byung ba'o/ /nges par 'byung ba de la sems pa nyid de 'dod pa nyid do/ /dga' ba zhes bya ba la yang 'dir rtag tu zhes bya ba rjes su sbyor ro/ /bden pa'i tshig ces bya ba ni bden pa'i ngag ste de dag ni bcu'o/ /'di dag ces bya ba ni bsam pa la sogs pa'o/ /tshul khrims byas pa gzo dang bzod/ /rab tu dga' dang snying brtse che/ /bkur sti gus par nyan pa dang / /brgyad pa sbyin la sogs la brtson/ /zhes bya ba la tshul khrims ni tshul khrims yongs su dag pa'o/ /bzod pa ni bzod pa'i stobs so/ /rab tu dga' ba nyid ni rab tu dga' ba'o/ /sems can thams cad yongs su ma btang ba ni snying brtse ba chen po'o/ /bkur sti ni bkur bar bya bar 'os pa'o/ /gus par nyan pa ni dge ba'i bshes gnyen rnams la brten pa'i 'du shes so/ /sbyin pa la sogs pa ni pha rol tu phyin pa dag la'o/ /brgyad pa smos pa de ni yongs su sbyangs pa gnyis pa nyid brgyad yin no/ /thos pas mi ngoms nyid dang ni/ /zang zing med par chos sbyin dang / /sangs rgyas zhing kun sbyong ba dang / /'khor bas yongs su mi skyo dang / /ngo tsha khrel yod ces bya ba/ /rlom med bdag nyid de rnam lnga/ /zhes bya ba la thos pas zhes bya ba ni mang du thos pas so/ /zhing kun sbyong zhes bya ba ni yongs su dag par ro/ / de la de dag nyid bsod nams yongs su bsngo bas rlom sems med pa'i bdag nyid de des rlom pa med pas de rnam lnga zhes bya ba'i tshig gis so/ /yongs su sbyong ba lnga pa nyid ni gsum pa yin no/ /nags gnas 'dod chung chog shes dang / /sbyangs pa yang dag sdom bsten dang / /bslab pa yongs su mi gtong dang / /'dod pa rnams la smod pa dang / /mya ngan 'das dang bdog kun gtong / /mi zhum pa dang lta ba med/ /ces bya ba la/ nags gnas ni dgon pa na gnas pa 'am yang na de byed pa'o/ /chog shes pa ni yang dag par dga' ba'o/ /sbyangs pa yang dag sdom bsten dang / /zhes bya ba ni mi gtong ba'o/ /smod pa zhes bya ba ni skyo ba'o/ /bdog kun gtong zhes bya ba ni bdog pa thams cad gtong ba'o/ /mi zhum pa dang lta ba med/ /ces bya ba ni ma zhum pa'i sems nyid dang dngos po thams cad la ltos pa med pa ste/ zhum pa med pa dang bag 'khums pa med pa'i phyir/ rnam pa bcu po 'og nas bshad pa dag kyang 'dis rjes su 'brang ste/ des na yongs su sbyong ba bcu po nyid ni bzhi pa yin no/ /'dris dang khyim la 'khren pa dang / /'du 'dzir gyur pa'i gnas dang ni/ /bdag bstod gzhan la brnyas pa dang / /mi dge las kyi lam bcu dang / /rlom pas khengs dang phyin ci log /yid gnyis dang ni nyon mongs bzod/ /bcu po 'di ni rnam spangs na/ /sa lnga pa ni yang dag 'thob/ ces bya ba la/ 'dris pa ni khyim pa dang rab tu byung ba dag dang / khyim la 'khren pa ni khyim du song nas ser sna byed pa'o/ /'du 'dzir gyur pa ni gtam mi 'dra ba sna tshogs so/ /bstod pa ni stod par byed pa'o/ /brnyas pa ni smod pa'o/ /las kyi lam ni las lam mo/ /rlom pa ni mtho bar sems pa'o/ /khengs pa ni bla ma rnams la lus kyis mi 'dud pa'o/ /phyin ci log ni phyin ci log gi don 'dzin pa'o/ /yid gnyis ni the tshom mo/ /nyon mongs pa bzod pa ni 'dod chags dang zhe sdang dang gti mug gi bag chags lhag par bsgo ba ste/ de dag ni 'dris pa la sogs pa'o/ /sbyin dang tshul khrims bzod brtson 'grus/ /bsam gtan shes rab rab rdzogs pas/ /slob ma dang ni bse ru la/ /dga' dang skrag pa'i sems spangs pa/ /bslangs na mi zhum bdog pa kun/ /btang yang mi dga' med pa dang / /dbul yang slong ba mi spong las/ /sa ni drug pa yang dag 'thob/ /ces bya ba la/ pha rol tu phyin pa drug po re res rab tu rdzogs pa zhes bya ba ni drug go/ /nyan thos la dga' ba dang / rang sangs rgyas la dga' ba dang / skrag pa'i sems yongs su spangs pa de dag ni gsum mo/ /bslangs nas mi zhum pa'i sems nyid dang / bdog pa kun btang yang mi dga' ba nyid dang / dbul yang slong ba mi spong ba de ni gsum ste chos bcu gnyis po de dag gis ni sa drug pa thob pa yin no/ /bdag dang sems can 'dzin pa dang / /srog dang gang zag chad rtag dang / /mtshan ma rgyu dang phung po dang / /khams dang skye mched dag dang ni/ /khams gsum pa dang chags gnas dang / /sems ni kun tu zhum pa dang / /dkon mchog gsum dang tshul khrims dang / /der lta ba la mngon zhen dang / / stong pa nyid la rtsod pa dang / /de dang 'gal ba'i nyes pa ni/ /nyi shu gang la rnam chad pa/ /de yis sa ni bdun pa 'thob/ /rnam thar sgo gsum shes pa dang / /'khor gsum rnam par dag nyid dang / /snying rje dang ni rlom sems med/ /chos mnyam nyid dang tshul gcig shes/ /mi skye ba dang bzod shes dang / /chos rnams rnam pa gcig tu ston/ /rtog pa kun tu 'joms pa dang / /'du shes lta dang nyon mongs spong / /zhi gnas nges par sems pa dang / /lhag mthong la ni mkhas pa dang / /sems dul ba dang thams cad la/ /thogs pa med pa'i ye shes dang / /chags pa'i sa min gang 'dod par/ /zhing gzhan du ni mnyam 'gro dang / /kun tu bdag gi ngo bo ni/ /ston pa nyid dang nyi shu'o/ /gnyis pa nyi shu'i sgra la ni yon tan nyi shus lhag pa yin te/ yongs su rdzogs pa zhes bya ba ni lhag ma ste/ bdag tu 'dzin pa la sogs pa nyes pa nyi shu'o/ /nyes pa ni dri ma'o/ / gang la rnam par chad pa ni rab tu nyams pa'o/ /rnam thar sgo gsum shes pa dang / zhes bya ba la sogs pa yang yon tan nyi shu yongs su rdzogs pas ni sa bdun pa thob pa yin no zhes mdor bsdus pa'i don to/ /'dzin pa zhes bya ba ni mngon par zhen pa'o/ /de'i khyad par ni bdag la sogs pa nas skye mched kyi bar du'o/ /rtag pa zhes bya ba ni gcig tu bsdu ba'i dbye ba yin te/ rnam par dbye ba bdun par byas so/ /dkon mchog gsum dang zhes bya ba la sogs pa la sangs rgyas dkon mchog la sogs pa nas sangs rgyas dkon mchog la sogs pa la lta ba'i bar du'o/ / de la mngon par zhen pa ni nges pa'o/ /yid 'byung ba ni skyo ba'o/ /de dang 'gal ba ni stong pa nyid la gnod pa'o/ /mnyam pa ni lhan cig pa'i don to/ /de la nyes pa bstan pa'i don ni bdag tu 'dzin pa dang sems can du 'dzin pa dang / srog tu 'dzin pa dang / gang zag tu 'dzin pa dang / chad par 'dzin pa dang / rtag par 'dzin pa dang / mtshan mar 'dzin pa dang / rgyur 'dzin pa dang / phung por 'dzin pa dang / khams su 'dzin pa dang / skye mched du 'dzin pa dang / khams gsum pa la rnam par gnas pa dang / khams gsum la chags pa dang / sangs rgyas la lta ba la gnas pa dang / chos la lta ba la gnas pa dang / dge 'dun la lta ba la gnas pa dang / tshul khrims la lta ba la gnas pa dang / stong pa nyid kyi chos nyid la yid 'byung ba dang / stong pa nyid la 'gal ba dag go/ /yon tan rjes su ston pa'i don ni ston pa nyid yongs su rdzogs pa dang / mtshan ma med pa mngon sum du byed pa dang / smon pa med pa shes pa dang / 'khor gsum yongs su dag pa dang / snying rje ni sems can thams cad la brtse ba'o/ /de dag la yang rlom sems med pa'o/ /chos thams cad mnyam pa nyid du lta ba dang / theg pa yang dag par rab tu rtogs pa dang / mi skye ba la bzod pa'i shes pa dang / theg pa gcig tu ston pa dang / chos thams cad kyi rtog pa kun tu 'joms pa dang / 'du shes dang / lta ba spong ba dang / nyon mongs pa spong ba dang / zhi gnas la nges par sems pa dang / lhag mthong la mkhas pa dang / sems dul ba dang / thams cad du thogs pa med pa'i ye shes dang / chags pa med pa'i sa ma yin pa dang / ji ltar 'dod pa'i sangs rgyas kyi zhing du 'gro ba dang / sangs rgyas kyi 'khor gyi dkyil 'khor der yang bdag gi ngo bo yang dag par ston pa'o/ /sems can kun yid shes pa dang / /mngon par shes pas brtse ba dang / /sangs rgyas zhing bzang sgrub pa dang / /yongs su brtag phyir sangs rgyas brten/ /dbang po shes dang rgyal ba yi/ /zhing sbyong sgyu ma ltar gnas dang / /bsams bzhin srid pa len pa dang / /las ni rnam pa 'di brgyad bshad/ /bzang sgrub ces bya bar sbyar te yongs su dag pa zhes bya ba'i don to/ /rnam brgyad ces bya ba'i tshig gis ni rnam pa brgyad nyid de yongs su sbyangs pa brgyad pa'o/ /'di lta ste/ sems can thams cad kyi sems shes pa'i rjes su 'jug pa dang / mngon par shes pas rnam par brtse ba dang / sangs rgyas kyi zhing sgrub pa dang / sangs rgyas rnams la brten pa dang / yongs su brtag pa gcig tu byas pa dang / dbang po mchog dang mchog ma yin pa mkhyen pa dang / sangs rgyas kyi zhing yongs su sbyong ba dang / sgyu ma lta bu'i ting nge 'dzin la yang dang yang du snyoms par 'jug pa dang / srid par bsams bzhin du skye ba'o/ /sangs rgyas kyi zhing ni rnam pa gnyis te/ dang po ni snod kyi 'jig rten phyi ma ni sems can gyi 'jig rten no/ /smon lam dag ni mtha' yas dang / /lha la sogs pa'i skad shes dang / /spobs pa chu bo lta bu dang / /mngal du 'jug pa mchog dang ni/ /rigs dang rus dang cho 'brang dang / /'khor dang skye ba dag dang ni/ /nges 'byung byang chub shing rnams kyi/ /yon tan phun sum tshogs pa yin/ /brgyad kyi 'og tu dgu pa yin te/ de'i yongs su sbyong ba ni bcu gnyis te/ smon lam mtha' yas pa dang / lha la sogs pa'i skad shes pa dang / spobs pa chu bo lta bu dang / mngal du 'jug pa phun sum tshogs pa dang / rigs phun sum tshogs pa dang / rus phun sum tshogs pa dang / cho 'brang phun sum tshogs pa dang / 'khor phun sum tshogs pa dang / skye ba phun sum tshogs pa dang / nges par 'byung ba phun sum tshogs pa dang / byang chub kyi shing phun sum tshogs pa dang / yon tan phun sum tshogs pa'o/ /sa dgu 'das nas ye shes ni/ /gang gi sangs rgyas sar gnas pa/ /de ni byang chub sems dpa'i sa/ /bcu pa yin par shes par bya/ /sa dgu ni rigs la sogs pa'i sa'o/ /de la rigs kyi sa ni mya ngan las 'das pa'i rigs can no/ /brgyad pa'i sa ni rgyun du zhugs pa'i 'bras bu la zhugs pa'o/ /mthong ba'i sa ni rgyun du zhugs pa'o/ /bsrabs pa'i sa ni lan cig phyir 'ong ba'i 'bras bu'o/ /'dod chags dang bral ba'i sa ni phyir mi 'ong ba'o/ /bya ba byas so zhes khong du chud pa'i phyir de'i sa ni byas pa rtogs pa can gyi sa'o/ /nyan thos kyi sa ni nyan thos kho na rnam pa drug pa'o/ /rang sangs rgyas kyi sa ni rang sangs rgyas kyi sa'o/ /byang chub sems dpa'i sa ni sngar bshad pa'i sa rnams so/ /sa dgu po 'di dag 'das nas byang chub sems dpa'i ye shes gang gis sangs rgyas kyi sa la gnas par 'gyur ba de ni byang chub sems dpa'i sa bcu pa'o/ /de dag ni sa'i tshogs so/ /gnyen po'i tshogs kyi dbang du byas nas bstan bcos las/ mthong dang goms pa'i lam dag la/ /gzung dang 'dzin pa'i rnam rtog rnams/ /nye bar zhi bar bya ba'i phyir/ /gnyen po rnam pa brgyad ces bya/ /zhes bya ba gsungs te/ goms pa ni sgom pa'o/ /gzung ba ni mthong ba'i lam la gzung ba'i rnam par rtog pa gnyis te/ dngos po tsam la gnas pa dang / gnyen po la gnas pa'o/ /'dzin pa'i rnam par rtog pa gnyis te/ gang zag rdzas la brten pa dang / /gang zag rdzas la btags pa'i gzhi la brten pa'o/ /de dag ni bsgom pa'i lam la yang ngo / /brgyad po 'di dag spang ba'i phyir gnyen po brgyad ni gnyen po'i tshogs so/ /de la mthong ba'i lam ni de bzhin nyid la sogs pa dang / gzugs la sogs pa dang / rmi lam la sogs pa'i gzung ba'i dngos po yang dmigs pa ni rnam par rtog pa ste/ de'i chos nyid la dmigs pa'i mtshan nyid mi dmigs pa ni de'i gnyen po'o/ /sbyin pa la sogs pa nas sangs rgyas kyi chos rnams kyi bar gyi gnyen po'i dngos po la dmigs pa ni rnam par rtog pa'o/ /mi dmigs pa ni gnyen po'o/ /dgra bcom pa'i sbyin pa la sogs pa dang gang zag gi rdzas rnams la dmigs pa ni rnam par rtog pa'o/ /mi dmigs pa ni gnyen po'o/ /ming dang brda dang tha snyad la sogs pa la dmigs pa ni rnam par rtog pa'o/ /mi dmigs pa ni gnyen po'o/ /bsgom pa'i lam la gnas pa med pa dang gnas pa med pa ma yin pa ni chos thams cad gnas pa med pa'i tshul gyis te chos kyi dbyings kyi tshul gyis zhes bya ba'i don to/ /de dag ni gzung ba'i dngos po mi dmigs pa'o/ /sbyin pa la sogs pa'i gnyen po'i dngos po ni mi dmigs pa'o/ /rgyun tu zhugs pa la sogs pa gang zag gi rdzas mi dmigs pa dang / rgyun tu zhugs pa la sogs pa la zhugs pa dang / rgyun tu zhugs pa'i 'bras bu la sogs pa gang zag btags pa'i gzhi rnams la dmigs pa ste/ de dag ni gnyen po'i tshogs so/ /tshogs kyi sgrub pa rdzogs so// //'dir nges par 'byung bas na nges par 'byung ba'i sgrub pa'i skabs so/ /de'i dbang du byas nas bstan bcos las/ ched du byas dang mnyam nyid dang / /sems can don dang 'bad med dang / /shin tu nges par 'byung ba dang / /thob pa'i mtshan nyid nges 'byung dang / /rnam pa thams cad mkhyen nyid dang / /nges 'byung lam gyi spyod yul can/ /rnam pa brgyad kyi bdag nyid 'dir/ /nges 'byung sgrub pa yin zhes bya/ /zhes bya ba gsungs so/ /'di nyid de skad ces bka' stsal pa dang zhes bya ba la sogs pa gsungs so/ /rab 'byor gyis gsol pa zhes bya ba ni ci zhig gsol pa yin zhe na/ theg pa chen po zhes bya ba la sogs pa smos so/ /gang gi phyir 'dis lha dang mi dang lha ma yin du bcas pa'i 'jig rten zil gyis mnan nas byang chub sems dpa' nges par 'byung bar gyur to/ /de'i phyir theg pa 'di theg pa chen po zhes brjod do/ /de ci'i phyir 'jig rten thams cad zil gyis gnon par 'gyur zhe na/ des bdag nyid chen po mi thob pa thob pa'i phyir ro/ /de yang gang yin zhe na/ sems can gyi tshogs kyi mchog nyid du sgrub pa yin te/ sems chen po nyid dang / spong ba chen po nyid dang / rtogs pa chen po nyid kyi chen po yin te de ltar 'di ni ched du bya ba'i nges par 'byung ba'o/ /nam mkha' dang mnyam pa nyid kyis de theg pa chen po yin te/ de bas na theg pa de ni theg pa chen po zhes brjod do zhes sbyor ro/ / nam mkha' dang mnyam pa nyid ces bya ba la ji ltar mnyam pa nyid yin zhe na/ ji ltar nam mkha' la phyogs kyi bye brag med de kha dog ma yin/ dbyibs ma yin/ thogs pa med pa/ bstan du med pa/ mtha' med pa/ dbus med pa/ bri ba med pa/ 'phel ba med pa/ skye ba med pa/ 'gag pa med pa/ 'dod pa'i khams su gtogs pa ma yin/ gzugs kyi khams su gtogs pa ma yin/ gzugs med pa'i khams su gtogs pa ma yin no/ /theg pa chen po yang de bzhin te/ de bas na nam mkha' dang mnyam pa nyid kyis de ni theg pa chen po yin te/ de'i phyir mnyam pa nyid kyis nges par 'byung ba'o/ /ji ltar nam mkha' la zhes bya ba la sogs pas ni nam mkha' ni go skabs 'byed pa yin te/ theg pa chen po la go skabs yod pa des na de dag 'byed pa'i phyir 'jig rten gyi khams dang / grangs dang / phyogs su yongs su chad pa med pas tshad med grangs med dpag tu med pa ste/ rnam grangs 'dis zhes bya ba'i rnam pa 'dis so/ /'di ltar sems can 'di snyed kyi go skabs 'byed pa yin zhe na/ gang gi phyir sems can med pas nam mkha' med do/ /nam mkha' med pas theg pa chen po med do/ /theg pa chen po med pas chos thams cad med do/ /de bas na sems can dang / nam mkha' dang / theg pa chen po dang / chos thams cad kyi gzugs su med pa/ bstan du med pa/ thogs pa med pa/ mtshan nyid gcig pas 'di lta ste/ mtshan nyid med pa'o/ /de ltar de snyed kyi sems can rnams kyi go 'byed pa na theg pa chen po yin te/ de bas de ni sems can gyi don gyi nges par 'byung ba'o/ /'di la zhes bya ba la sogs pa la/ 'ong bas na 'ong ba'o/ /nges par 'gro bas na nges par 'gro ba'o/ /gnas pa ni 'gro ba las ldog pa'o/ /theg pa chen po la gsum po de dag med pa'o/ /gang gi phyir chos thams cad ni g.yo ba med pa ste/ gang gi phyir de dag rang bzhin gyis gang du yang 'gro ba med cing gang nas kyang 'ong ba med gang du yang gnas par 'gyur ba med de/ g.yo ba dang 'gul ba des 'bad pa med pa'i nges par 'byung ba'o/ /bcom ldan 'das zhes bya ba la sogs pa la/ 'di ltar zhes bya ba ni nam mkha' nyid do/ /'di la zhes bya ba ni theg pa chen po la'o/ /sngon gyi mtha' zhes bya ba ni 'das pa'i dus so/ /phyi ma'i mthar zhes bya ba ni ma 'ongs pa'i dus su'o/ /dbus zhes bya ba ni da ltar byung ba'o/ /gsum po 'di yang theg pa chen po la mi dmigs te/ de ni dus gsum mnyam pa nyid kyi theg pa ste de bas na theg pa chen po'o/ /ji ltar dus gsum mnyam pa nyid yin zhe na/ gang gi phyir 'das pa'i dus kyang 'das pa'i dus kyis stong / ma 'ongs pa'i dus kyang ma 'ongs pa'i dus kyis stong / da ltar byung ba'i dus kyang da ltar byung ba'i dus kyis stong ste/ dus gsum mnyam pa nyid kyis so/ /theg pa chen po yang theg pa chen pos stong / byang chub sems dpa' yang byang chub sems dpas stong / stong pa nyid la ni 'das pa'am/ ma 'ongs pa'am/ da ltar byung ba med do/ /kun nas nyon mongs pa med do/ /rnam par byang ba med do/ /'khor ba med do/ /mya ngan las 'das pa med do/ /de bas na theg pa de ni dus gsum mnyam pa nyid de/ de ni bstan du med pas shin tu nges par 'byung ba'o/ /de nas bcom ldan 'das zhes bya ba la sogs pa gsungs so/ /'dir rab 'byor gyis theg pa chen po'i sgra'i don bstan pa la/ bcom ldan 'das kyis legs so zhes bya ba byin nas/ 'di la bslabs pas zhes bya ba la sogs pas ni thob pa'i mtshan nyid kyis nges par 'byung ba'i skabs ston to/ /'dir thams cad mkhyen pa nyid ces bya ba ni thams cad mkhyen pa nyid do/ /de nas bcom ldan 'das la zhes bya ba la sogs pas ni shes rab kyi pha rol tu phyin pa'i dbang du byas nas theg pa chen po'i ston pa ni skabs ma yin pa nyid kyis gzhan dag gis dogs pa spang ba'i phyir/ gang pos sangs rgyas kyi mthus bcom ldan 'das zhes bya ba la sogs pas ni lan no/ /rjes su mthun par ston to zhes bya ba ni gang gi phyir khyod kyis chos thams cad dang theg pa chen po'i ngo bo nyid ston pa ni dngos po med pa'i ngo bo nyid kyi ye shes te/ de dag kyang shes rab kyi pha rol tu phyin pa nyid de/ de bas na rjes su mthun par ston to zhes bya bar dgongs so/ /gzhan yang zhes bya ba la sogs pa'i skabs nyid kyis ni thob pa'i mtshan nyid kyis nges par 'byung ba'i dbang du byas nas/ de la thob pa rnam pa bcu gnyis kyi bye brag gis tshig bcu gnyis smras so/ /de nas de gnyis kyi khyad par bstan pa'i don du ni yang gi sgra'o/ /de la gzhan yang zhes bya ba la sogs pas ni dang po'i tshig bstan to/ /de ci'i slad du zhe na zhes bya ba la sogs pas ni gnyis pa'o/ /gzugs byang chub sems dpa'o zhes bya ba la sogs pas ni gsum pa'o/ /bcom ldan 'das de ltar zhes bya ba la sogs pas ni bzhi pa'o/ /bcom ldan 'das sangs rgyas zhes bgyi ba 'di ni zhes bya ba la sogs pas ni lnga pa'o/ /ji ltar bdag ces bgyi ba la sogs pas ni drug pa'o/ /chos rnams ngo bo nyid ma mchis pa zhes bya bas ni bdun pa'o/ /gang gzung du ma mchis pa zhes bya ba la sogs pas ni brgyad pa'o/ /de ltar chos de dag zhes bya ba la sogs pas ni dgu pa'o/ /de ci zhes bya ba la sogs pas ni bcu pa'o/ /bcom ldan 'das mngon par ma grub pa las gud na zhes bya ba la sogs pas ni bcu gcig pa'o/ /gal te de ltar zhes bya ba la sogs pas ni bcu gnyis pa'o/ /brtags pa la mngon par zhen pa'i goms pa mthar thug pa ni mngon par zhen pa skye ba ni gzhan gyi dbang ste/ de rnam pa thams cad du ldog pa ni rnam pa thams cad mkhyen pa ni byang chub sems dpa' thob pa yin te/ de ni spyi'i don to/ /yan lag gi don brjod par bya ste/ 'dir yang bcom ldan 'das kyi theg pa chen po 'di la 'das pa dang / ma 'ongs pa dang da ltar byung ba'i byang chub sems dpa' sems dpa' chen po rnams kyis bslabs nas thams cad mkhyen pa nyid rjes su thob po/ /rjes su 'thob par 'gyur ro/ /rjes su thob bo zhes gsungs so/ /de la sngon gyi mtha' dang phyi ma'i mtha' dang dbus mi dmigs pa ste/ de bas na sems can med pa dang / chos thams cad med pa dang / byang chub sems dpa' med pa yin te/ de ltar sems can med pa dang / chos thams cad med pa dang / byang chub sems dpa' med pa ni sngon gyi mtha' dang / phyi ma'i mtha' dang / dbus 'di dag thams cad gnyis su byar med de de bas na sngon gyi mtha' la sogs pa la byang chub sems dpa' nye bar ma mchis zhes bya ba 'di ni dang po'i don to/ /de ci'i slad du zhe na zhes bya ba la sngon gyi mtha' zhes bya ba la sogs pa la de gang las she na/ gtan tshigs ni gzugs su ma mchis zhes bya ba la sogs pas gsungs te/ gzugs la sogs pa ni nam mkha' dang mnyam pa yin te/ gang gi phyir gzugs kyi stong pa nyid la brten pa des na 'di dag ni mu ma mchis pa ste/ sngon gyi mtha' dang phyi ma'i mtha' dang dbus kyi mtha' dang bral ba nyid do/ /de ltar byang chub sems dpa' zhes bya ba ni gnyis pa'i don to/ /gzugs byang chub sems dpa' zhes bya ba la sogs pa la/ nye bar mi mchi zhes bya ba ni nye bar mi 'gro ba ste/ gang gi phyir 'di dag kyang med cing mi dmigs te/ gzugs la sogs pa stong pa nyid la brten pa gang gi phyir stong pa nyid dang gzugs la sogs pa spang ba yod pa ma yin zhing byang chub sems dpa' yang yod pa ma yin no zhes bya ba ni gsum pa'i don to/ /de ltar zhes bya ba ni gzugs su snang ba na'o/ /byang chub sems dpa'i chos zhes bya ba ni byang chub sems dpa' zhes bya ba'i gzugs la sogs pa'o/ /thams cad ces bya ba ni phung po dang khams la sogs pa'i sde tshan gyi bye brag gis thams cad do/ /thams cad nas zhes bya ba ni ji lta ba bzhin thams cad de yan lag thams cad yongs su rdzogs pa'i sde tshan no/ /yang thams cad ces bya ba ni sde tshan de thams cad la re re zhing yang thams cad do/ /rnam pa thams cad ces bya ba ni rang rang gi phan tshun thams cad mi dmigs pa ste de dag stong pa nyid kyi phyir ro/ /thams cad mkhyen pa nyid kyang zhes bya ba ni rnam pa thams cad mkhyen pa nyid kyang ngo / /bcom ldan 'das de zhes bya ba la sogs pa la chos de zhes bya ba ni skabs kyi byang chub sems dpa' zhes rtogs par byed pa yin no/ /shes rab kyi pha rol tu phyin pa zhes bya ba ni rnam pa thams cad mkhyen pa nyid kyang ngo / /chos gang zhes bya ba ni byang chub sems dpa' zhes bya ba'o/ / chos gang gis zhes bya ba ni shes rab kyi pha rol tu phyin pa zhes bya bas so/ /chos gang la zhes bya ba ni rnam pa thams cad mkhyen pa nyid ces bya ba thob par bya ba'o/ /gdams par bgyi zhes bya ba ni thob par bya ba'i phyir te/ gang zhig gang gis gang du zhes bya ba'i don to/ /de bzhin du gdams pa med pas rjes su sgrub pa med pa'i phyir/ gang zhig gang la gang du thob pa med/ /ces bya ba ni bzhi pa'i don to/ /sangs rgyas zhes bya ba ni sangs rgyas nyid de rnam pa thams cad mkhyen pa nyid ces bya ba'i don to/ /ming tsam zhes bya ba ni don gyis stong pa ni ming ste/ de'i phyir don med pa'i ngo bo ni ming yin te/ brda'i snga rol du don tsam du mthong ba'i phyir ro/ /ming la yang don gyi rang gi ngo bo med de don mi shes pa yang ming tsam shes pa yod do/ /don med kyang sgra sbyor ba'i phyir ming don med do/ /de nyid kyi phyir ming de yang mngon par ma grub ste/ ming nyid mngon par ma grub po/ /des na byang chub sems dpa'i ming mngon par ma grub pa dang / rnam pa thams cad mkhyen pa nyid kyi ming mngon par ma grub pas thob pa yin no zhes bya ba ni lnga pa'i don to/ /de ltar re zhig tshig lngas ni chos bdag med pa'i sgo dang / ming tsam gyi sgo nas btags pa'i byang chub sems dpa'i thob pa dgag pa yin no/ /gang zag la bdag med pa'i sgo nas de dgag pa'i phyir ni tshig drug pa yin te/ ji ltar bcom ldan 'das bdag bdag la zhes gsungs pa dang / bcom ldan 'das bdag shin tu mngon par ma grub pa zhes bya ba la/ shin tu zhes bya ba ni tshig tu mngon par ma grub pa yin te de ni yang dag par yod pa ma yin te/ mtshan nyid ji lta ba bzhin du med pa de bzhin du sgra dang skabs kyis rtogs pa yin no/ /de bzhin du chos thams cad dang byang chub sems dpa' yang med pa yin no/ /gzhan gyi dbang gi ngo bo med pa'i dbang du byas nas/ tshig bdun pa smras te/ de bzhin du chos rnams ngo bo nyid ma mchis pa la zhes bya ba la 'di gang las shes she na/ gang gi phyir bcom ldan 'das ma chen mo dag las rab 'byor gyi tshig bcu gnyis kyis bstan te/ des na bcu gnyis po 'di dag gi ming dang rgyu thob pa la/ shA ri'i bus dri ba byas pa la gnas brtan rab 'byor gyis gtan tshigs kyi rim pas bshad pa ni tshig bdun pa la/ rgyu gang gis tshig rnams ngo bo nyid med pa 'dri ba la rjes su dris pa ni ngo bo nyid med pas gtan tshigs bstan nas/ shA ri'i bus rnam grangs 'dis chos thams cad dngos po med pa'i ngo bo nyid med pa yin no zhes mjug bsdu bar byas so/ /de nas 'dir yang shes par bya ba ni 'dri ba dang / rjes su dris pa dang / gtan tshigs brjod pa dang / de'i mjug bsdu ba'o/ /de ni don gyis shes par bya ba yin gyi ched du bstan pa ni ma yin no/ /ched du bstan na ni bdun pa'i tshig phal cher nyams par 'gyur te/ gang gi phyir tshig bdun pa nyams pa rnam pa gsum du 'gyur te/ dus kyis byung ba ni tshig 'og ma dang tshig gcig tu 'gyur ba ni nyams pa dang po'o/ /tshig tu byas pa'i don la rnam par dbye ba dang po bsal nas drug pa'i rnam par dbye ba byas pa ni nyams pa gnyis pa'o/ /dngos po med pa'i ngo bo nyid ces bya ba bsal nas ngo bo nyid ma mchis pa zhes brjod pa ni nyams pa gsum pa'o/ /don bshad par bya ste/ de bzhin du zhes bya ba ni gzhan dbang gi ngo bos so/ /'di dag la dngos po med pa'i ngo bo yin pa ni dngos po med pa'i ngo bo nyid de chos thams cad do/ /gang yang gsungs pa/ 'dus pa las byung ba'i rang gi ngo bo ni med de rten cing 'brel par 'byung ba yin pa'i phyir ro/ /rgyu nye bar gnas pa ni 'dus pa'o/ /de la gang yang yod pa de ni 'dus pa las byung ba'o/ /'dus pa las byung ba gang yin pa de ni rang gi ngo bo med de rgyu dang bral ba yod na med pa'i phyir ro/ /gzhan yang rten cing 'brel par 'byung ba de ni mi rtag pa'i phyir ro/ /phyi nas med de yod pa dag ni phyi nas med par mi rigs te 'gal ba de bas na skad cig gcig nyid la dngos po gang yin pa de ni skad cig las gzhan du rang gi ngo bo med de/ de bas na dngos po med pa de dag gi rang gi ngo bo yin no/ /gzhan yang gang mi rtag pa de ni sdug bsngal ba yin la/ sdug bsngal ba la yang spang bar bya ba yin no/ /des na yang 'di dag ni dngos po med pa'i ngo bo yin te/ de'i phyir gzhan gyi dbang gis rang gi ngo bos kyang byang chub sems dpa' rnams kyis rnam pa thams cad mkhyen pa nyid thob par mi 'gyur ro zhes bya ba 'di nyid ni bdun pa'i don yin no/ /dngos po med pa'i rang gi ngo bo nyid brtags pa 'dis kyang gzugs la sogs pa thob pa ma yin nam/ gang gi phyir rdza mkhan gyis bum pa dang / tha ga pas ras la sogs pa bskyod par snang ngo zhe na/ des na gzugs de gang lags zhes bya ba la sogs pa smras so/ /brtags pa'i gzugs la sogs pa gang mngon par grub pa de gang lags zhes bya ba ni/ ci yang med pa nyid de/ brtag pa thams cad ni 'dus ma byas zhes bya ba'i don to/ / de nyid kyi phyir rjes su bstan pa'i tshig ni rab 'byor gyis rigs pa smras pa yin te/ chos thams cad ni 'dus ma byas yin te 'di ni 'du byed med pa'i phyir ro/ /rdza mkhan dang tha ga pa la sogs pa yang brtags pa yin pas med pa yin no zhes bya ba'i don to/ /de bas na brtags pa la skye ba dang / 'gag pa la sogs pa bkag pa yin no zhes bya ba ni brgyad pa'i don to/ /bcom ldan 'das ma 'di las ni brtags pa'i gzung ba yang bkag pa yin te/ de ni byis pas gzung ba yin pa'i phyir ro/ /brgyad pa'i 'og tu tshig gsum gyis yongs su grub pa'i rang bzhin gyi ngo bo'i dbang du byas nas de ltar zhes bya ba la sogs pa smras so/ /de ltar zhes bya ba 'di ltar brtags pa'i rang gi ngo bos so/ /de dag gi zhes bya ba ni gzhan gyi dbang gi ngo bos so/ /gang rang gi ngo bo nyid med pa'i stong pa nyid gang yin pa de ni mngon par ma grub pa'o/ /de ni yongs su ma grub pa'i rang gi ngo bo nyid ces bya ba'i don to/ /gal te de lta na de'i tshe chos nyid las chos can tha dad pa med pa'i 'khrul par zad na stong pa nyid kyang zad pa yin la/ ci ste stong pa nyid ni brtag pa yin na de'i tshe de dang tha mi dad pas 'khrul pa 'khrul par yang brtag par 'gyur ro zhe na/ gang yang zhes bya ba la sogs pa smras so/ /gang yang yongs su grub pa'i ngo bo de ni 'khrul pa'i rang gi ngo bo ma yin te/ de nyid kyi phyir stong pa nyid dang / gzhan dbang tha mi dad pa bkag pa ni dgu pa'i don to/ /de ci zhes bya ba la sogs pas tha mi dad pas tha dad pa'i phyir te ci zhes smos te/ de'i tshe ji ltar mngon par ma grub pa zhes bya ba ni stong pa nyid tsam gyi byang chub sems dpas so/ /mngon par ma grub pa la zhes bya ba ni stong pa nyid tsam gyi shes rab kyi pha rol tu phyin pa la gdams par bgyi zhing gang gis kyang ma yin pa'o/ /gang gi phyir skye ba med pa la gdams par mi nus so zhes bya ba'i don to/ /shes rab kyi pha rol tu phyin pa la tha dad pa bkag pa ni bcu pa'i don to/ /gzhan dbang gi ngo bo ni 'khrul ba nyid de'i 'khrul pa ldog pa de'i tshe stong pa nyid kyi gzhi ci zhig yin/ ci ste gzhi med na de ltar na gang zhig chos nyid yin/ ri bong gi rwa dang 'di khyad par ci zhig yod/ ri bong gi rwa dang 'dra ba'i byang chub sems dpa'i thob pa ni gang zhig yin zhe na/ de'i phyir bcom ldan 'das mngon par ma grub pa las gud na zhes bya ba la sogs pa gsungs so/ /chos thams cad dam zhes bya ba ni phung po la sogs pa shes par bya ba rnams so/ /sangs rgyas kyi chos sam zhes bya ba ni stobs dang mi 'jigs pa la sogs pa thob pa'o/ /byang chub sems dpa'i chos sam zhes bya ba ni sngar thob pa'i yon tan rnams so/ /gang yang byang chub kyi phyir spyod pa yang zhes bya ba ni byang chub sems dpa'o/ /'di dag thams cad ni thob pa'i dus na mngon par ma grub pa las gud na stong pa nyid tha dad par mi dmigs te/ shin tu rnam par dag pa'i shes pa las tha mi dad cing thams cad stong pa nyid bzhin du de'i tshe snang ngo zhes bya ba'i don to/ /'di yang 'dis ston pa yin te/ gang 'di'i sangs rgyas kyi byang chub dang / sems can dang / so so'i skye bo'i gnas skabs dang rjes su 'jug pa'i phyir chos kyi dbyings bzhin du rtag par snang ba yin te/ de'i chos nyid de ni ji srid gzhan gyi dbang yod pa de srid du chos nyid ces brjod do/ /phyi nas gzhan na sangs rgyas kyi chos nyid kyi rang gi ngo bo nyid kyi sku sangs rgyas brjod do/ /de ni 'dir bcu gcig pa'i don to/ /bcu gnyis pa'i tshig ni gal te zhes bya ba nas brtsams nas/ de ci'i slad du zhe na zhes bya ba'i bar gyis bstan te/ 'dir sems mi zhum zhes bya ba la sogs pa'i tshig lngas ni zhi gnas rnam pa lnga bstan to/ /ci'i phyir bcom par mi bgyid ces bya ba'i tshig gcig gis rnam pa bzhi brjod de zhi bar byed/ nye bar zhi bar byed/ rgyun gcig tu byed sems mnyam par 'jog par byed pa'o/ /ting nge 'dzin gyi sems la 'di dag med na yan lag lngar thal bar 'gyur bas des na bzhi po de nyid kyi phyir bcom pa bkag pas yid phyir bcom par mi bgyid ces bya ba yin te/ de ltar tshig drug gis zhi gnas rnam pa dgu bstan to/ /yang dag pa la so sor rtog pa'i snang ba ni gsal ba'o/ /gsal ba de la skrag par mi byed pa ni mi skrag pa ste/ de 'gog par byed pa'o/ /des ni mi skrag ces bya ba'i tshig gcig gis ni lhag mthong bstan to/ /mi dngang shin tu dngang bar mi 'gyur zhes bya ba'i tshig gnyis kyis ni zung du 'brel ba'i lam bstan to/ /de'i phyir mi dngang ba zhes bya ba ni ting nge 'dzin las mi dngang ba yin te/ de med pa'i phyir de ni zhi gnas kyi yan lag go/ /yang dag pa'i ye shes las dngangs pa ni shin tu dngangs pa'o/ /de mi skye ba ni lhag mthong gi yan lag go/ /'di ni shes rab kyi pha rol tu phyin pa la spyod pa'o zhes bya ba ni bstan pa'o/ /lhag ma ni rjes su brtag pa'o/ /bsgom pa'o zhes bya ba ni zhi gnas kyis so/ /nye bar dmigs pa'o zhes bya ba ni nye bar rtog pa ni nges par sems pa yin te/ zung du 'brel pa'i lam gyis so/ /de ni bcu gnyis pa'i don to/ /'di'i 'thad par sgrub pa'i phyir tshig bcu gsum pas bstan pa ni/ de ci'i slad du zhe na zhes bya ba ni bris pa'o/ /lan ni bcom ldan 'das gang gi tshe zhes bya ba la chos 'di dag ces bya ba ni chos thams cad do/ /shes rab kyi pha rol tu phyin pa la zhes bya ba ni mngon sum du gyur pa'o/ /gzugs brtags pa nas rnam par shes pa'i bar dang / sangs rgyas kyi chos kyi bar du nye bar mi 'gro zhes bya ba ni nye bar mi dmigs pa ste/ des snang ba med pa'i phyir nye bar mi 'gro ba'o/ /nye bar mi rig ces bya ba ni rnam par rtog par mi byed pa ste/ rnam par rtog pa med pa'i phyir ro/ /de ni shes rab kyi pha rol tu phyin pa la ngo bo nyid kyi rnam par rtog pa bkag pa yin no/ /khyad par gyi rnam par rtog pa dgag pa'i phyir gzugs la sogs pa skye ba dang 'gag pa med de gzugs la sogs pa sngar ni skyes pa dang da ltar ni 'gag pa yin no zhes mi mthong ste/ gang gi phyir brtag pa ni mtshan nyid ji lta ba bzhin du med pa'i phyir skye ba dang 'gag pa med de de bas na gnyis ka yang mi mthong ngo / /gzhan dbang ldog pa med par lan btab pa bkag pa yin nam/ brtags par rab tu snang bas ni de nye bar mi 'gro ba gang las yin zhe na/ /de nas tshig drug gis ni brtags pa la mngon par zhen pa na skye ba yin la/ mi rten pa dang mngon par zhen pa med pa de'i tshe ni ldog par 'dod do/ /sngon skye ba med pa'i phyir dang / snga ma ni rang gi ngang gis 'jig pa'i phyir de ltar na de dag ni skye ba med pa dang 'jig pa med pa de'i ngo bo nyid do/ /chos thams cad ni dngos po med pa'i ngo bo nyid do zhes bya ba'i tshig gzhan dbang gi rang gi ngo bo'i dbang du byas pa yin no snyam pa 'di/ thams cad sems la bzhag nas dri ba ni/ de ci'i slad du zhe na zhes bya ba smos so/ /lan ni 'di ltar zhes bya ba la sogs pa smras te/ gang gzugs la sogs pa skye ba med pa dang / 'jig pa med pa de dag ni de'i dngos po med pa dag ste/ dngos po med pa yang skye ba dang / 'jig pa'i dngos po'i ngo bo ma yin te/ 'gal ba'i phyir ro/ / gang yang dngos po med pa'i rang gi ngo bo gzhan dbang yin no zhes gsungs pa ni dngos po med pa gnyis med na ni 'byung ba'i don gyis te/ de las gcig tu 'gal ba'i phyir ro/ /de ltar na tha mi dad pa bkag nas tha dad pa yang dag par smras pa/ de ni skye ba med pa dang / 'jig pa dang / gzugs la sogs pas 'di ni gnyis su ma mchis shing gnyis su bgyir ma mchis pa'o/ /gzugs la sogs pa med par gyur pa de'i tshe gnyis su bgyir ma mchis zhes bya ba mi rigs pa ma yin nam zhe na/ 'dir de'i phyir gang yang 'di skad du zhes bya ba la sogs pas 'di smras so/ /gzhan gyi dbang ni gzugs la sogs pa mi bzung ste/ ji ltar zhe na/ gang gnyis su med pa ni skye ba dang 'jig pa dang bral ba yongs su grub bo zhes bya ba'i don to/ /gang gi phyir yongs su grub pa ni chos thams cad kyi rang gi ngo bo brtags pa med pa'i mtshan nyid de/ skye ba med pa dang / 'jig pa yang chos thams cad kyi ngo bo med pa'i mtshan nyid do/ /des na gsum po 'di dag ni gnyis su med pa'i ngo bo yin zhes bsams te de ni thob pa'i mtshan nyid kyi nges par 'byung ba'o/ /da ni rnam pa thams cad mkhyen pa nyid kyi nges par 'byung ba'i mtshan nyid kyi dbang du byas nas brjod par bya ste/ de la dang po chos bzhi nye bar dri bar bya ste byang chub sems dpa' gang yin/ rnam pa thams cad mkhyen pa gang yin/ shes rab kyi pha rol tu phyin pa gang yin/ nye bar yongs su rtog pa gang yin zhe na/ de la byang chub nyid sems dpa' ste des na byang chub sems dpa'o/ /des chos thams cad rtogs pa gang yin pa de ni rnam pa thams cad kyi ye shes te mngon par zhen pa med pa ni rnam pa thams cad mkhyen pa nyid do/ /rnam par rtog pa las srung bar byed pas nad pa ste/ rnam par rtog pa'i gnyen po'i chos rnams so/ / rnam par rtog pa dag las chags pa med pa ni a pa ra mi ta ste/ chags pa dang bral ba'o/ /de dag ni pha rol tu phyin pa'i don te/ 'dir shes rab kyang yin la pha rol tu phyin pa yang yin pas na shes rab kyi pha rol tu phyin pa'o/ /gang chos thams cad rtag pa dang bde ba dang / gtsang ba dang / bdag dang spong ma ma yin pa dang / mtshan ma med pa dang / smon pa dang / mi dben pa dang / so sor yang de las bzlog pa rnam pa bcu drug gis bzlog cing bkag pas nye bar rtog pa'o/ /de la 'dir nye bar brtag pa 'di bcom ldan 'das yum chen mo dag las gsungs te/ de'i 'og tu nye bar brtag pa gzhan yang de dag las gsungs so/ /de nyid 'di las bstan pa'i phyir bcom ldan 'das de bzhin du zhes bya ba la sogs pa nas/ de nas tshe dang ldan pa shA ri'i bu zhes bya ba la sogs pa smras te/ don ni snga ma bzhin no/ /de nas tshe dang ldan pa zhes bya ba la sogs pa la/ de ci'i phyir zhes bya ba ni gang gi phyir 'di gnyis su med pa'i grangs su byas pa ste/ gnyis su med pa yang chos kyi dbyings yin te/ rgyu des na byang chub sems dpa' yang skye ba med pa yin te/ skye ba dang bral ba'i phyir chos kyi dbyings zhes bya ba'i don to/ /gzhan dbang gi rang gi ngo bo ni 'dir ma grub ste/ de ni don dam pa ma yin pa'i phyir la/ 'di ni don dam pa'i dbang du byas pa'i phyir ro/ /gal te 'dir nyes pa cir 'gyur zhe na/ tshe dang ldan pa rab 'byor gal te yang zhes bya ba la sogs pa smras so/ /dka' ba'i las la spyod pa ni spyod pa'o/ /de ci'i phyir spyod ce na sbyor ba'i brtson 'grus kyis so/ /sbyor ba'i brtson 'grus lta zhog /sems can rnams kyi phyir lag pa dang / rkang pa dang / mgo dang lus sbyin pa la sogs pa'i sdug bsngal gang zhes bya ba ni sems can thams cad kyi don gyi phyir ro/ /de dag so sor myong bar bya ba'i phyir du ci'i phyir spro bar byed ce na/ go cha'i brtson 'grus kyis sbyor bar byed pa yin te des na dka' ba'i spyod pa mi byed pa ste/ de la brtson pa ma yin no/ /de'i rgyu gzhan dbang nyid kyis don dam pa ma yin pa'i phyir la/ don dam pa ma yin pa la ni goms par mi byed cing khyad par du yang dka' ba spyod par mi byed ces rgol ba la/ de skad ces smras pa dang zhes bya ba la sogs pa ni rab 'byor gyi lan no/ /de la dang po'i tshig gis ni khas mi len pa dang / tshe dang ldan pa shA ri'i bu zhes bya ba la sogs pa smras so/ / gang dka' ba spyod par 'dod pa de ni de la mi 'dod pa sgrub pa zhes bya ba'i skyon du 'gyur na/ bdag mi 'dod de gang las mi 'dod par byed ce na/ dka' ba'i 'du shes kyi dka' ba spyod na ni yid la gcags par 'gyur te/ yang dag par rdzogs pa'i byang chub las bzlog par 'gyur ba'i phyir ro/ /byang chub sems dpa' sems dpa' chen po yang zhes bya ba la sogs pas ni gnyis pa'i lan yin te/ mi spyod ces bya ba ni spyod par mi 'gyur ba dang / zin par mi 'gyur zhes bya ba'i don to/ /'on kyang zhes bya ba la sogs pa gnyis pa'i lan no/ /tshe dang ldan pa shA ri'i bu gzhan yang zhes bya ba la sogs pas ni bzhi pa'i lan no/ /ci nas kyang bdag thams cad kyang zhes bya ba la sogs pa sdug bsngal thams cad las zhes bya ba ni zag pa dang bcas pa'i phung po thams cad las so/ /de dag thams cad la yongs su thar par bya'o/ /thams cad nas zhes bya ba ni khams dang 'gro ba dang / skye gnas kyi bye brag thams cad nas so/ /thams cad ces bya ba ni thams cad ji lta ba'i sdug bsngal gsum las so/ /rnam pa thams cad kyi zhes bya ba ni rtsol ba thams cad las so/ /thams cad du zhes bya ba ni ma lus pa mtha' dag las thar par bya ba'o/ /sdug bsngal gyi phung po zhes bya ba ni sdug bsngal gyi tshogs so/ /gnod sems ni khong khro ba'o/ /ji ltar bdag med ce na thams cad nas zhes bya ba ni bdag dang / sems can dang / srog dang / gso ba dang / skyes bu la sogs pa'i dbye ba thams cad nas so/ /yang thams cad ces bya ba ni ji ltar mthong ba dang ma mthong ba'i bye brag gis yod pa'o/ /rnam pa thams cad kyi zhes bya ba ni phung po la sogs pa'i dbye ba'am dbye ba ma yin pas so/ ji ltar dbye ba ma yin zhe na/ thams cad du zhes bya ba ni/ ji lta yod pa'i sde tshan bsdus pa 'am/ tha dad pa ste/ ji ltar bdag de ltar chos thams cad med pa yin no/ /yang thams cad nas zhes bya ba ni phung po dang / khams la sogs pa'i sde tshan gyi dbye ba thams cad do/ /thams cad ni ji ltar yod pa'i sde tshan rnams yongs su rdzogs pa'i yan lag gi phyir ro/ /rnam pa thams cad ji ltar yod pa'i sde tshan so so de dag thams cad ces bya ba'i don to/ /thams cad du zhes bya ba ni thams cad kyi bye brag gis bdag dang gzhan dag la bsdus pa'am tha dad pa zhes bya ba'i don to/ / de bas na de ltar dka' ba spyod pa med par thal bar 'gyur ba la lan bzhi smras pa yin no/ /lan bzhi pa la 'di ltar yang bstan pa yin te/ dka' ba spyod pa yang skye ba med pa nyid kyi de bzhin nyid mthong nas/ de spyod par bya ste/ gang gi phyir de nus pa dang 'bras bu chen por 'gyur ba'i phyir ro/ /skye ba med pa la ni sdug bsngal thams cad snang ba med pa dang / de nyid mthong ba dang / rnam pa thams cad kyi chos thams cad la rnam par rtog pa bkag pas so/ /tshe dang ldan pa gnas brtan shA ri'i bus gang yang zhes bya ba nas brtsams nas/ de skad ces smras pa dang zhes bya ba'i bar gyis bstan to/ /'dir thams cad mkhyen pa nyid kyang zhes bya ba ni rnam pa thams cad mkhyen pa dang / sangs rgyas dang zhes bya ba'i don to/ /de nas thob pa'i rnam par rtog pa dgag pa'i phyir de skad ces smras pa dang / zhes bya ba nas tshe dang ldan pa shA ri'i bu de bzhin du so sor snang ba nyid do zhes bya ba'i bar du smras so/ /thams cad mkhyen pa nyid kyang zhes bya ba ni rnam pa thams cad mkhyen pa nyid kyang ngo / /rjes su thob pa nyid ces bya ba ni dang po nyid nas chos thams cad chos kyi dbyings nyid kyi phyir te/ chos kyi dbyings rang bzhin nyid kyis rnam par dag pa'i phyir ro zhes bsams so/ /de skad ces smras pa dang zhes bya ba la sogs pa ni rab 'byor gyi lan ni/ /skye ba med pa'i chos zhes bya ba ni byang chub sems dpa' zhes bya ba'i chos kyi dbyings so/ /thob par byed ces bya ba ni thob par ro/ /kho bo mi 'dod do zhes bya ba ni rtog pa med pa'o/ /gal te thob par 'dod na ni de'i tshe kho bo skye bar 'dod pa yin te thob par 'gyur na de ni mi 'dod de/ rigs pa med pas thob par thal bar 'gyur ro/ /rigs pa med pa'i phyir chos kyis kyang zhes bya ba la sogs pa smras te/ chos thams cad nyid la skye ba med pa dang zhes bya ba'i phyogs la ni thal ba 'di yin te/ de la skye ba med pa'i byang chub sems dpa' skye ba med pa'i rnam pa thams cad mkhyen pa nyid thob par 'gyur te rigs pa med pa'i phyir ro zhes bsams pa'o/ /gnyis ka yang thog ma med pa nas thob pa med pa'i phyir ro/ /tshe dang ldan pa rab 'byor yang ci zhes bya ba la sogs pa la gang gnyis ka yang skye ba med pa nyid yin pas mi rigs pa'o/ /de ci gnyis po gang yang rung ba las skye na ni rigs so zhes bya ba'i don to/ /rab 'byor gyi gnyis po gang yang rung ba las skyes pa'i phyogs bsal ba'i phyir tshe dang ldan pa shA ri'i bu yang ci zhes bya ba la sogs pa smras so/ /nyid ni rim pa gzhan du gang gi mthar yang sbyar bar bya'o/ /skye ba med pa'i chos phyis skye bar 'gyur ba'am phyis ma skyes pa nyid de bzhin du 'gyur ba'o/ /de la rnam par rtog pa gnyis pa la ji ltar gzhan du skye bar 'gyur ba dang / rnam par rtog pa dang po la ni chos kyi dbyings la ni skye ba 'gal ba yin no zhes bya bar bsams te/ de bas na gnyis ka yang skye ba med pa yin pa'i phyir legs par smras pa yin no/ /skye ba med pa ni chos kyi skye ba med pa'i chos thob par yang mi rigs te/ /de ni thob pa'i rnam par rtog pa dgag pa ste/ de bas na chos thams cad don dam par chos kyi dbyings so/ /de yang rang bzhin gyis 'od gsal ba'i phyir dang / thog ma dang tha ma med pa'i phyir thob pa yang med pa la/ thob par bya ba yang med par blta bar bya ba kho na'o/ /gang de nyid ni kun brtags kyi chos rnams mi dmigs pa nyid de/ de nyid shes rab kyi pha rol tu phyin pa lhag pa'o/ /des kun brtags pa'i mngon par zhen pa zad pa de ni mngon par zhen pa'i rgyu zad pa/ sgrib pa thams cad bsdus pa dang ldan pa yang dag pa ma yin pa'i kun tu rtog pa thams cad kyi gzhan dbang zhes bya ba zad par 'gyur te/ snga ma dag rang gi ngang gis 'gags la rgyu med pas gzhan skye ba med pa'i phyir ro/ /des na rang bzhin gyis 'od gsal ba yang byang chub sems dpa' zhes bya ba'i chos kyi dbyings la/ glo bur gyi sgrib pa'i dri mas dri ma can du byas pa la des de dag zad pa yod na/ de zad pa'i mtshan nyid kyi rnam par dag pa ni snga na med pa thob par 'gyur te/ dper na rang bzhin gyis rnam par dag pa'i nam mkha' la glo bur gyis gtse ba dang / rdul dang / mun pa dang / sprin dang / du ba la sogs pa'i sgrib pa'i dri mas dri ma can du byas pa bzhin te/ phyi nas de'i thob kyi mtshan nyid kyis rnam par dag pa des thob par 'gyur te/ 'khrul pa thams cad ldog pa na shin tu rnam par dag par chos thams cad kyi chos nyid kyi ye shes kyi mtshan nyid rnam pa thams cad mkhyen pa nyid kyang snga na med pa byang chub sems dpas thob par 'gyur te/ de nyid de'i rnam par dag pa'i bdag nyid do/ /yang dag par rigs pa'i phyir thob pa'i mngon par rtogs pa grub pa yin te/ de ni grub pa'i mtha'o/ /de la de ni glo bur gyi sgrib pa rnam par dag par bya ba'i phyir gnas brtan gnyis kyis brjod par bya ba ni de la shA ri'i bu las brtsams nas shA ri'i bus smras pa zhes bya ba la sogs pa smras te/ skyes pas na skye ba yin te/ gzhan dbang gi rang gi ngo bo'o/ /yang de ci phyi nas ma skyes par 'gyur ba'i rgyu med pa'i phyir skye ba med pa'i phyogs gcig go/ /'on te ma skyes pa la thams cad mkhyen pa nyid ces bya ba'i chos sngar ma skyes pa yin pa phyis skye bar 'gyur ram zhes bya ba ni gnyis pa'i phyir ro/ /de la dang po ni skye ba med pa'i rnam pa thams cad mkhyen pa nyid la ni thob pa ga la yod/ gnyis pa'i phyogs la ni rnam pa thams cad mkhyen pa nyid kyi rgyu brjod par bya ste/ yang dag pa ma yin pa'i kun tu rtog pa yang rtag pa yin pas zad pa med do zhes bya bar bsams so/ /rab 'byor gyis smras pa zhes bya ba ni lan smras pa'o/ /skye ba ni skyes pa'i chos te rnam pa thams cad pa nyid kyi'o/ /mi skye ba ni skye ba'i chos te/ yang dag pa ma yin pa'i kun tu rtog pa yin te/ 'di gnyis kyi dbye ba yin no/ /de ni mi spobs so zhes bya ba ni smra bar te brjod par mi 'dod pa'o/ /chos thams cad kyi stong pa nyid kyi sems kyi rgyud la dmigs pa na 'khrul pa thams cad ldog par 'gyur ba gang yin pa de ni rnam pa thams cad mkhyen pa nyid skye ba'o/ / des na 'di la rgyu med par brjod par bya ba ma yin no/ /'di la yang dag pa ma yin pa'i kun tu rtog pas rtog pa yang med do zhes bya bar bsams pa'o/ /shA ri'i bus smras pa zhes bya ba ni smra ba'i rnam par rtog pa dgag pa'i phyir smras pa'o/ /skye ba med pa'i chos la yang zhes bya ba la sogs pa la skye ba med pa ni tshad mas grub pa yin pa'i phyir spobs par 'dod pa nyid de/ smra bar nus pa yin pas de yang smra bar nus so/ /gang gi phyir spobs par mi nus zhes bya ba ni zur gyis dris pa'o/ /smras so zhes bya ba ni rab 'byor gyis lan smras so/ /skye ba med pa nyid ces bya ba la sogs pa la smra ba zhes bya ba ni yid kyi sgra'o/ /spobs pa zhes bya ba ni smra ba'i brjod pa'i dngos po'o/ /yang spobs pa zhes bya ba ni yang dag par smra ba'i blo'o/ /rnam pa thams cad mkhyen pa nyid la ni gsum po 'di dag kyang skye ba med pa nyid de/ chos kyi ngo bo nyid kho na chos thams cad de la so sor snang ngo zhes bsams so/ /de bzhin du so sor snang ngo zhes bya bas ni mjug sdud pa yin no/ /de ni rnam pa thams cad mkhyen pa nyid kyi nges par 'byung ba'o/ /de skad ces smras pa dang zhes bya ba la sogs pa'o/ /shA ri'i bu skabs nyid kyis rab 'byor gyi tshig la bstod nas lam gyi nges par 'byung ba'i skabs ston par byed de/ gzhag par bya'o zhes bya ba ni the tsom med par bgrang bar bya'o/ /gang dag gang nyid la zhes bya ba ni/ gang de'i gnas las nges par 'byung ba dang / rgal ba dang / mi g.yo ba dang / mi nyams pa dang / 'gal bar mi byed pa dang / 'khrug par mi byed pa'o/ /de skad ces smras pa dang zhes bya ba ni de ltar skabs 'byed pa yin no/ /'di skad ces bya ba ni lam gyi nges par 'byung ba'o/ /mi gnas pa ni gang la yang mngon par zhen pa med pa'i chos de la de skad ces bshad do/ /mi 'da'o zhes bya ba ni mi nyams pa'o/ /de skad ces smras pa dang zhes bya ba la sogs pa la chos thams cad la mi dmigs pa ni grol ba'o/ /'di zhes bya ba ni 'das ma thag tu bstan pa'o/ /chos thams cad la mi gnas pa yang yin/ pha rol tu phyin pa yang yin pa'i phyir pha rol tu phyin pa'o/ /gang yin zhes bya ba ni pha rol tu phyin pa drug gi nang nas gang yin zhes pa'o/ /theg pa thams cad la zhes bya ba ni theg pa gsum gyi thun mong ngo / /gal te 'di shes rab kyi pha rol tu phyin pa nyid yin no/ de lta na gzhan ni ma yin no zhe na/ chos thams cad mi gnas pa'i phyir zhes bya ba la sogs pa ni rtogs par sla'o/ /de ltar na zhes bya ba ni gang gi phyir de bas na zhum par 'gyur ba zhes bya ba ni sems zhum par 'gyur ba'o/ /nem nur du 'gyur zhes bya ba ni the tshom du 'gyur ba'o/ /rmongs par 'gyur ba ni rtog pa med pa'o/ /gzhan du gyur pa ni rgyab kyis phyogs pa'o/ /yid la byed pa zhes bya ba ni rnam par rtog pa med pa'i yid kyis so/ /tshe dang ldan pa ji ltar yid la byed pa dang ma bral bar 'gyur zhes bya ba la/ shA ri'i bus yid la byed pa rnam par rtog pa yin par shes nas dris pa 'di ni yid la byed pa la gnas pa yin no zhes bya ba'i bar du'o/ /de'i 'og tu de skad ces smras pa dang zhes bya ba la sogs pas ni/ rab 'byor gyis legs so zhes bya ba'i tshig sngon du 'gro ba ste de ni rgyas par 'dri ba yin pa'i phyir legs so zhes bya ba byin pa yin no/ /'on kyang zhes bya ba la sogs pa ni lan no/ /don de nyid ces bya ba ni 'di 'dod pa nyid de 'dod pa nyid mtshan nyid kyi phyir lan no/ /yang dag pa'i tshig tu brjod pas zhes bya ba ni rnam par rtog pa yid la byed pa'i mi mthun pa yang dag pa'i tshig ste yang dag pa'i dngos po'o/ /de'i brjod pa ni rgyas pa dang bcas pa'o/ /nges par 'byung ba yang ma yin pa la ni rgol ba'o/ /nges par brjod pa zhes bya ba ni dris pa'o/ /de ni rigs pa ston par 'dod pa yin te/ rang nyid 'dri ba ste/ de ci'i phyir zhe na zhes bya ba smras te/ yang dag pa'i tshig de gang las shes she na/ sems can ni bdag ste de ni 'dir dpe'o/ /yid la byed pa ni rnam par rtog pa des de ni dpe can no/ /ngo bo nyid med par rig par bya'o zhes bya ba ni bsgrub par bya ba'i gtan tshigs brtag par bya'o/ /de la ngo bo nyid med pa ni rang gi mtshan nyid dang stong pa nyid kyi mtshan nyid 'di dag gis 'dzin par byed pa nyid do/ /des na yang ji ltar bdag ngo bo nyid med pa de bzhin du yid la byed pa yang 'dzin pa med pa'i phyir ro zhes bya ba ni gtan tshigs so/ /lhag ma rnams la yang ngo bo nyid med pa zhes bya ba'i gtan tshigs su sbyar ro/ /dngos po yod pa ni dngos po nyid do/ /de dang bral ba ni med pa nyid do/ /dben pa ni dngos po nyid do/ /bsam gyis mi khyab pa ni de'i bsam par bya ba'i yul med pa'i phyir ro/ /mngon par byang chub pa ni yang dag pa'i ye shes kyi yul ma yin pa nyid do/ /yang dag pa ji lta ba bzhin ma yin pa nyid kyi don gyis te/ mngon par byang chub pa ni yang dag pa'i ye shes kyi yin te yang dag pa ji lta ba bzhin gyi don ma yin pa ni sla ba nyid kyi phyir ro/ /'di lta bu zhes bya ba ni 'di skad bstan pa'o/ /yang 'di lta bus zhes bya ba ni yang dag pa'i don la so sor rtog pas so/ /gnas pa zhes bya ba ni zhi gnas kyi tshul gyis so/ /'dod do zhes bya ba'i sgras ni le'u yongs su rdzogs pa'i don to/ /rnam pa thams cad mkhyen pa nyid kyi spyad pa spyod pa sems bskyed pa la sogs pa bcu'i don to/ /de gsal bar byed pa'i le'u ni le'u'o/ /'phags pa shes rab kyi pha rol tu phyin pa brgyad stong pa'i dka' 'grel snying po mchog ces bya ba slob dpon rin chen 'byung gnas zhi bas rnam par sbyar ba las le'u dang po'o/ / //rnam pa thams cad mkhyen pa nyid bstan pa 'di nas brtsams te lam shes pa brjod par bya ste/ de yang dngos po bcu gcig gis bstan te/ gang gi phyir bstan bcos las/ mog mog por byed la sogs dang / / slob ma bse ru'i lam gang dang / /'di dag gzhan pa'i yon tan gyi/ /phan yon che ba mthong ba'i lam/ /byed pa dang ni mos pa dang / /bstod dang bkur dang bsngags pa dang / /bsngo dang rjes su yi rang ba/ /yid la byed pa bla med dag /sgrub pa shin tu dag pa zhes/ /bya ba 'di ni bsgom pa'i lam/ /byang chub sems dpa' mkhas rnams kyi/ /lam shes nyid ni de 'drar bshad/ /ces bya ba gsungs te/ nyan thos kyi lam dang / rang sangs rgyas kyi lam dang / phan yon che ba byang chub sems dpa'i mthong ba'i lam dang / bsgom pa'i lam gyi byed pa dang / mos pa yid la byed pa dang / bstod pa dang / bkur ba dang / bsngags pa dang / bsngo ba yid la byed pa dang / rjes su yi rang ba yid la byed pa dang / sgrub pa dang / shin tu dag pa ste dngos po bcu gcig po de dag ni lam shes pa nyid de de yang byang chub sems dpa'i yin no zhes bya ba'i don to/ /de la dang por/ mog mog por byed la sogs dang / /zhes bya ba la gang gi phyir bstan bcos las/ lha rnams rung bar bya ba'i phyir/ /'od kyis mog mog por mdzad dang / /yul nges pa dang khyab pa dang / /rang bzhin dang ni de yi las/ /zhes bya ba gsungs te/ rung bar bya ba zhes bya ba ni sems bskyed pa ste/ don dang po'o/ /phyir zhes bya ba ni de'i don du'o/ /mog mog por mdzad ces bya ba ni lha rnams kyi 'od dman pa'o/ /'od kyis zhes bya ba ni bcom ldan 'das kyi rang bzhin gyi 'od kyis te de ni don gnyis pa'o/ /yul nges pa zhes bya ba ni de nyid kyi yul so sor nges pa ste don gsum pa'o/ /yul la khyab pa ni bzhi pa'o/ /rang bzhin ni lnga pa'o/ /las ni drug pa'o/ /gal te 'di dag don drug yin na ji ltar dngos po gcig yin zhe na/ 'di lam shes pa'i gzhi ni sems skyes pa ste/ de dang bral na de mi rung ba'i phyir ro/ /des na de nyid rung ba zhes brjod de de nyid ni de la gtso bo yin no/ /lhag ma ni de'i 'khor ro/ /gtso bo yang dngos po gcig la gtsor 'dogs pa yin no/ /de la mog mog por mdzad pa'i dbang du byas nas yang de'i tshe zhes bya ba gsungs so/ /de'i tshe zhes bya ba ni de'i dus so/ /yang zhes bya ba'i sgra ni khyad par gyi don mngon par rtogs pa'i don gyi bye brag go/ /'dus te zhes bya ba ni tshogs pa'o/ /'khod pa ni 'dug pa'o/ /sum cu rtsa gsum ris zhes bya ba ni sde tshan no/ / de'i dngos po ni sum cu rtsa gsum pa'o/ /rgyal po chen po bzhi ni rnam thos sras dang / yul 'khor skyong dang / 'phags skyes po dang / spyan mi bzang la sogs te byang la sogs pa'i phyogs rnams kyi'o/ /de dag gi tshogs kyi dngos po ni ris so/ /stong gsum gyi 'jig rten gyi khams 'di nyid mi mjed de de'i bdag po ni tshangs pa'o/ /de'i tshogs ni de'i ris so/ /bsam gtan bzhi pa'i ris kyi gong du gnas gtsang ma lnga ste/ mi che ba dang / mi gdung ba dang / gya nom snang ba dang / shin tu mthong ba dang / 'og min no/ /gtsang ma'i gnas gang zhe na/ 'phags pa rnams 'di nyid du skye ba'i phyir ro/ /de dag ni rigs lnga dag las stong phrag lnga yin te/ gzugs khams kyi lha'i ris las 'di tsam nyid de/ gong ma ji lta ba bzhin du 'od dang nus pa las khyad par du gyur pa yin no/ /gang yang zhes bya ba la sogs pa smos pa la/ de yang 'khod pa ste/ gang de dag gi 'od de yang zil gyis mnan te zhes bya ba ni mog mog por byas par gyur pa'o/ /gang yang de zhes bya ba ni dus mnyam pa nyid ces bya ba'i don to/ /gang gi phyir rung bar bya ba yin zhe na/ sems bskyed pa de'i don du mog mog por byed pa'o/ / bcom ldan 'das kyis thams cad mngon par zil gyis mnan par shes pa ni de la thams cad kyang dad pa skye ba'i phyir ro/ /'di ni snang ba'o/ /rang gi las kyi rnam par smin pa ni rnam par smin pa'o/ /de la skyes pa ni lhan cig skyes pa ste/ mngon par 'dus ma byas pa zhes bya ba'i don to/ /gang gi rgyus zil gyis mnan pa yin zhe na/ sangs rgyas kyi byin gyi rlabs kyis so/ /byed pa gang gis she na/ sangs rgyas kyi gzi brjid kyis te sangs rgyas bcom ldan 'das kyi rang bzhin gyi 'od kyis so/ /de dag kyang mthu chen po yin na ci'i phyir slar zil gyis gnon par byed pa ma yin zhe na sangs rgyas kyi mthus zhes gsungs te/ sangs rgyas kyi mthu ni thams cad pas mthu che ba yin te/ de dag gi mthu zil gyis gnon par byed do zhes bya bar bsams te/ de ni mog mog por byed pa nyid do/ /yang de'i tshe zhes bya ba la sogs pa la/ drung nas zhes bya ba ni nye ba las so/ /shes rab kyi pha rol tu phyin pa zhes bya ba ni byang chub sems dpa' sems dpa' chen po zhes bya ba 'di dang sbyar te lam shes pa zhes bya ba'i don to/ /man ngag ces bya ba ni nye bar ston pa de nyid kyi don te/ rtogs pa'i phyir smra ba ni man ngag go/ /de dang rjes su 'brel bar bya ba'i phyir bstan pa ni rjes su bstan pa'o/ /de dang lhan cig pa'i bstan pa ni rjes su bstan pa zhes tshig bsdus pa'o/ /gnas par bgyi zhes bya ba ni thos pa las byung ba'i shes rab bo/ /bslab par bgyi zhes bya ba ni bsams pa las byung ba'o/ /rnal 'byor du bgyi zhes bya ba ni bsgoms pa las byung ba'o/ /mthu zhes bya ba la sogs pa 'od la sogs pa'i rnam grangs so/ /de la mthu zhes bya ba ni bstan pa'o/ /cig shos gnyis ni rjes su bstan pa'o/ /gzi brjid ces bya ba ni spobs pa dang nus pa skyed par byed pa'i 'od kyis so/ /byin gyi rlabs ni rab tu zad par byed pa'o/ /de yan chad kyi tshig gis ni rung ba nyid kyi skabs su byas nas/ byang chub sems dpa' gang gis zhes bya ba la sogs pa gsungs te/ sems bskyed par bya'o zhes bya ba ni rung ba nyid do/ /gang yang zhes bya ba la sogs pa gsungs te/ dman pa'i lam gyis thob pa'i mya ngan las 'das pa ni yang dag pa nyid do/ /de yang nges pa ni yang dag pa nyid du nges pa'o/ /de la zhugs pa ni thob pa'o/ /mtshams bcad pa ni zam pa bcad pa'o/ /gang yang dper na rgyun du zhugs pa srid pa lan bdun pa dang / skye ba gnyis pa dang / gsum pa 'khor bar rigs nas rigs su skye ba de la ni bla na med pa yang dag par rdzogs pa'i byang chub kyi rgyu mtshan gyi sems bskyed pa'i skal ba med de/ de ni nyan thos zhi ba gcig tu nges pa'i theg pas byang chub par byed mi nus te/ nam yang 'dod pa med pa'i phyir rung ba nyid kyis yul nges pa'o/ /'on kyang zhes bya ba la sogs pa nas rjes su yi rang bar bya'o zhes bya ba'i bar gyis khyab pa bstan to/ /nyan thos kyi byang chub rjes su bzung nas yang dag par rdzogs pa'i byang chub tu sems bskyed pa'i phyir ro/ /de dag gis rang gi byang chub rtogs par byas nas kyang sangs rgyas dang byang chub sems dpa'i 'jig rten las 'das pa'i 'byor pa mthong nas rang nyid kyis bslus pa bzhin du sems pa na de bzhin gshegs pa rnams kyis byin gyis brlabs te/ byang chub tu sems bskyed nas mi g.yo ba'i sa bcu pa'i byang chub sems dpa' bzhin du sprul pa'i gzugs dang ldan pas byang chub sems dpa'i spyod pa spyad nas byang chub mchog rtogs pa ni khyab pa'o/ /de dag gi dge ba'i phyogs la kho bo bar chad mi byed do zhes bya ba ni rang bzhin no/ /dge ba'i phyogs de ni dge ba'i tshogs te dge ba'i chos yang dag par sdud pa'i phyir bskyed pa ste de'i phyir dge ba'i phyogs skye bar rung ba nyid kyi rang bzhin no/ /khyad par du 'phags pa'i chos rnams las ches khyad par du 'phags pa'i chos rnams la lhag par dmigs par zhes smos pa ni de'i las so/ /khyad par du 'phags pa las zhes bya bar sbyar te des ni byang chub kyi sems bzung ste de las byung bas ni rgyu'i lnga pa'o/ /chos rnams las zhes bya ba ni 'bras bu dang rgyur gyur pa'i theg pa chen po'i chos bzung ba yin no/ /dmigs par bya zhes bya ba ni thob par bya'o/ /de bas na kho bo bar chad mi byed do zhes bya ba ni gang gi phyir gyi sgra'i don to/ /theg pa chen po ni rnam pa gnyis ka thob par bya ba yin te/ /de yang byang chub kyi sems kyis so/ /byang chub kyi sems de nyid bskyed pa'i phyir spro bar byed pa ni sngar byang chub tu sems bskyed pa la yang dag par mgu bar byed pa yin no/ /de ltar byang chub tu sems bskyed pa de gnyis ka yang sems dpa' sems dpa' chen por 'gyur ba yin la/ lam shes pa nyid la spro bar byed pa yin te des na des de nas bcom ldan 'das zhes bya ba la sogs pa gsungs so/ /khyod legs so zhes bya ba ni gzhan gyi don chen po byed pa'i phyir ro/ /bcom ldan 'das kyi bka' d rin gzo bar bgyi zhes bya ba ni ji ltar bcom ldan 'das kyi sngon gyi nyan thos rnams kyis rgyal ba'i sras la bkur sti mang du byas pa de bzhin du bcom ldan 'das kyi nyan thos bdag cag gis kyang byang chub sems dpa' rnams la bkur sti bya'o zhes bya ba ni byas pa gzo ba'o zhes bya ba'i don to/ /de ci'i slad du zhe na zhes bya ba ni byas pa gzo ba de nyid rgyu gang gis so/ /sngon zhes bya ba ni snga ma'o/ /tshangs pa ni mya ngan las 'das pa'o/ /de'i phyir spyod pa ni tshangs par spyod pa'o/ /de spyod pa ni byang chub kyi phyir te/ de bas na byang chub kyi phyir byang chub kyi spyod pa spyad ces bya ba'i don to/ /gzhan dag gis zhes bya ba ni rnam par dbye ba dang 'dra ba'i tshig gi phrad de ji ltar gyi don to/ /rjes su gzung bar bgyi'o zhes bya ba ni gdams par bya ba'o/ /rjes su yongs su gzung bar bgyi'o zhes bya ba ni rjes su bstan par bya'o/ /tshig 'og ma dag las sam zhes bya ba'i sgra ni yang dag pa'i don to/ /bdag cag gis kyang zhes bya ba ni nyan thos kyis kyang ngo / /bdag cag ces bya ba ni rigs mthun pa dag gi nang gi tha snyad do/ /legs par nyon la zhes bya ba ni rtse gcig par nyon cig pa'o/ /shin tu zhes bya ba ni rtse gcig pa'i yid kyis so/ /yid la zung shig ces bya ba ni bsams pa dang bsgoms pa las byung ba'o/ /shes rab kyi pha rol tu phyin pa la gnas par bya ba'o zhes bya ba ni lam shes par bya ba la spyad par bya ba'o/ /de la dang po nyan thos kyi lam la mthong ba'i lam gyi dbang du byas nas/ kau shi ka byang chub sems dpa' sems dpa' chen pos zhes bya ba la sogs pa gsungs so/ /stong pa nyid la gnas pa zhes bya ba ni bden pa bzhi ni phyin ci ma log pa yin pa'i phyir 'phags pa rnams la bden pa nyid kyis so sor snang gi byis pa rnams la ni de lta ma yin no/ /de'i phyir de nyid 'phags pa'i bden pa yin te/ sdug bsngal dang / kun 'byung dang / 'gog pa dang / lam mo/ /de la sdug bsngal ni 'khor bar gtogs pa'i phung po rnams so/ /sdug bsngal gyi rgyu ni kun 'byung ngo / /sdug bsngal zad pa ni 'gog pa'o/ /de thob par byed pa'i shes pa ni lam mo/ /'phags pa'i bden pa bzhi po 'di'i rnam pa gang yin pa de dag gi stong pa nyid la gnas pa ni stong pa nyid la gnas pa'o/ /de lta bu'i stong pa nyid mthong nas shes rab kyi pha rol tu phyin pa la gnas par bya zhes bya ba ni nyan thos kyi mthong ba'i lam la gnas par bya ba ste mnyam par gzhag pa'i sems kyis so/ /stong pa nyid mthong ba yang mi dmigs pa'o/ /de bzhin du bstan bcos las/ lam shes nyid kyi tshul la ni/ /'phags pa'i bden pa bzhi dag gi/ /rnam pa mi dmigs sgo nas ni/ /nyan thos lam ni shes par bya/ /zhes bya ba gsungs te/ nyan thos kyi sde snod la bden pa'i rnam pa bcu drug tu brjod de/ 'di lta ste sdug bsngal ni mi rtag pa ste/ sdug bsngal ba dang / bdag med pa dang / stong pa de ni shes par bya ba'o/ /kun 'byung ba ni rgyu dang / kun 'byung ba dang / rab tu skye ba dang / rkyen dang / 'gog pa ni 'gog pa dang / /zhi ba dang / gya nom dang / nges par 'byung ba dang / lam ni lam dang / rigs pa dang / sgrub pa dang / nges par 'byin pa'o/ /de dag ni spangs pa dang / mngon sum du bya ba dang / bsgom pa dag go rims bzhin te/ de dag ni 'dir mi bzung ngo / /gang yang bcom ldan 'das ma chen mo dag las gsungs pa de 'dir bzung ste/ nyan thos kyi byang chub de ni myur du thob par byed pa'i phyir ro/ /de la sdug bsngal la rnam pa bzhis yid la byed pa yin pa ni snga ma bzhin te/ mi rtag pa dang / sdug bsngal ba dang / bdag med pa dang stong pa dang bzhi pa'o/ /rim pa bzhin du skye ba dang 'jigs pa dang 'brel ba'i phyir dang / mi mthun pa'i phyir dang / bdag gi mtshan nyid ma yin pa'i phyir dang / bdag gis stong pa'i phyir dang / gang gi phyir bdag nyid kyis stong pa ni zhi ba ste shi ba'i ro bzhin no/ /kun 'byung la rnam pa bcu gcig tu mdzad nas bstan te/ des na rnam pa bzhi spang bar bya ba'i don du nad dang shu ba dang / zug rngu dang / sdig pa'o/ /sdug bsngal gyi rgyu nyid kyi phyir dang / sdug bsngal gyi khyad par can gyi rgyu nyid kyi phyir dang / de dbyung dka' ba'i phyir dang / 'di dang phyi ma'i sdug bsngal gyi rgyu nyid kyi sdig pa dang chos mthun pa'o/ /yang bzhis bden pa nyid yongs su shes pa'i don du dgra dang / 'jig pa'i chos nyid dang / g.yo ba dang / rab tu 'jig pa las so/ /gang gi phyir bdag 'jig par nus pas dgra'o/ /skad cig re re la 'jig pa'i phyir 'jig pa'i chos nyid do/ /dgra bcom pas lam gyi rang bzhin gyis rtsa ba nas bton pa'i phyir g.yo ba'o/ /'jig par byed pa'i phyir rab tu 'jig pa'o/ /rtun pa'i don yang rnam pa gsum ste/ 'jigs pa dang / 'tshe ba dang / 'go ba'i nad de thog 'bab pa la sogs pa 'jigs pa'i rgyur gyur pa'i phyir dang / 'byung po dang / srin po la sogs pa dang chos mthun pa'i phyir dang / mu ge dang / pha rol gyi dmag tshogs la sogs pa dang chos mthun pa'i phyir ro/ /rten cing 'brel par 'byung ba'i lugs las bzlog pa ma rig pa 'gags pas 'du byed 'gag pa nas brtsams nas/ de bzhin du sdug bsngal gyi phung po chen po 'ba' zhig 'di 'gag par 'gyur ro zhes bya ba'i bar du de la 'gog pas na 'gog pa ste 'gog pa'i bden pa'o/ /'dis 'gog pas na 'gog pa ste lam gyi bden pa'o/ /de la 'gog pa'i bden pa ni rnam pa bdun te/ bdag med pa dang / zhi ba dang / rnam par dben pa dang / stong pa nyid dang / mtshan ma med pa dang / smon pa med pa dang / mngon par 'dus ma byas pa'o/ /gang gi phyir rnal 'byor pa'i bdag nyid ni sdug bsngal gyi phung po'i bdag nyid do/ /de nas sdug bsngal med pas bdag med pa'o/ /nyon mongs pa nye bar zhi bas zhi ba'o/ /sdug bsngal dang nyon mongs pa ni mi gtsang ba'o/ /de dag nye bar zhi bas rnam par dben pa ste gtsang ba zhes bya ba'i don to/ /bdag dang bdag gi dang bral bas na stong pa nyid de/ 'dus byas thams cad kyi rgyu mtshan med pas mtshan ma med pa'o/ /khams gsum du smon pa ni smon pa ste de zad pa ni smon pa med pa'o/ /ma 'ongs pa'i las mngon par 'du byed pa med pa'i phyir mngon par 'du mi byed pa'o/ /'gog pa thob par byed pa'i lam gyi bden pa yang rnam pa bdun po de nyid de des na bdag med pa dang / zhi ba dang / rnam par dben pa la sogs pa thob par byed pas lam la yang bdag med pa dang / zhi ba dang / rnam par dben pa dang / stong pa nyid dang / mtshan ma med pa dang / smon pa med pa dang / mngon par 'du mi byed pa ste/ rnam pa nyi shu rtsa dgu po de dag dang ldan pas/ nyan thos kyi lam gyi byang chub myur du thob par byed pa'i phyir ro/ /de dag ni rnam pa thams cad mi dmigs pas/ lam shes pa nyid la 'jug par 'gyur te des na kau shi ka de'i phyir zhes bya ba ni gang gi phyir theg pa dman pa'i lam bsgoms pas byang chub sems dpa' thabs la mi mkhas pas dman pa'i byang chub tu ltung bar 'gyur ro zhes dogs par byas nas/ kau shi ka de'i phyir lam shes pa 'di la go cha chen po thabs la mkhas pa chen po'o/ /de gyon pa ni gos pa na bdag nyid srung ba'i don du'o/ /de la go cha chen po ni 'di lta ste/ rnam pa thams cad mkhyen pa nyid dang ldan pa'i yid la byed pas sgom par byed pa'o/ / langs nas kyang dge ba'i rtsa ba thams cad bla na med pa yang dag par rdzogs pa'i byang chub tu bsngo bar bya ste/ de yang mi dmigs pa'i tshul gyis so/ /de ni nyan thos kyi mthong ba'i lam mo/ /'di'i 'og tu nges par 'byed pa'i cha dang mthun pa bshad par bya ste/ gzugs la gnas par mi bya'o zhes bya ba nas brtsams nas/ 'dis gnas shing yid la byed pa 'di dang ma bral ba yin no zhes bya ba'i bar gyis bstan to/ /de la sangs rgyas nyid la gnas par mi bya'o zhes bya ba'i bar gyis ni dro ba bstan to/ /de'i 'og tu sangs rgyas nyid la gnas par mi bya'o zhes bya ba'i bar gyis ni rtse mo bstan to/ / de nas rnam par shes pa stong pa'o zhes dmigs pas gnas par mi bya'o zhes bya ba'i bar gyis ni bzod pa bstan to/ /lhag mas ni chos kyi mchog go/ /de la gzugs la sogs pa la gnas pa med pa la mngon par zhen pa med pas dro ba'o/ /gzugs la sogs pa de dag gi mtshan nyid mi dmigs pa ni rtse mo'o/ /gzugs la sogs pa la gnyis su mi dmigs pa ni bzod pa'o/ /dmigs par byed pas na dmigs pa de bas na stong pa nyid la dmigs pa nyid kyang gnyis so/ /rgyun du zhugs pa'i 'bras bu la sogs pa'i khyad par dag la mi gnas pa ni chos kyi mchog go/ /bcom ldan 'das yum de dang des bstan bcos gzhan du drang bar bya ste/ gzugs sogs mi gnas pa ni drod/ /de bzhin zhes gang rtse mo yin/ /gzugs sogs rtag dang mi rtag ces/ /mi gnas de ni bzod pa yin/ /'dir ni skyes bu 'phags 'bras dang / /khyad par dag la mi gnas pa/ /de nyid chos mchog ces bya ste/ /'phags pa nyan thos lam yin no/ /'dir mig gi 'dus te reg pa la gnas par mi bya'o zhes bya ba ni/ dbang po dang yul dang rnam par shes pa tshogs pa gang yin pa'i bde ba la sogs pa dang mthun pa'i dbang po'i 'gyur ba yongs su gcod pa 'dra ba tsam gyis de bde ba la sogs pa skyed pa'i sems las byung ba'i reg pa la brjod do/ /dbang po'i 'gyur ba dang reg pa zhes bya ba nas/ des na dbang po'i dbye bas mig gi 'dus te reg pa nas yid kyi 'dus te reg pa'i bar du yin te/ de yang chos mngon pa las gsum 'dus pa las dbang po'i 'gyur ba yongs su gcod pa ni reg pa ste/ tshor ba skyed pa'i las can no zhes gsungs so/ /sdug pa zhes bya ba ni gtsang ba'o/ /mi sdug pa ni mi gtsang ba'o/ /'dus ma byas kyis rab tu phye ba zhes bya ba ni nyon mongs pa ma rig pa zad pa nas 'dus ma byas nyid kyi phyir ro/ /'jig rten 'dir zhes bya ba ni 'dod pa'i khams su'o/ /de nyid du zhes bya ba ni de nyid du skye ba'o/ /phung po'i lhag ma ma lus pa zhes bya ba ni phung po ni tshogs so/ /de lhag ma yin pas phung po'i lhag ma'o/ /de las bzlog pa'i phyir phung po'i lhag ma med pa'o/ /sangs rgyas kyi mya ngan las 'da' ba zhes bya ba ni 'khor ba dang mya ngan las 'das pa la mi gnas pa yin te/ rim pa bzhin du kun nas nyon mongs pa yongs su zad pas zag pa med pa'i chos la 'gro ba mtha' yas pa'i don du nam mkha'i mthas gtugs pa'i bar du gnas pa'o/ /bzhengs pa yang ma yin no zhes bya ba ni thob pa nyams pa med pa'i phyir ro/ /mi gnas shing mi gnas pa yang ma yin zhes bya ba ni gnas pa med pa'i yid nyid kyi phyir dang bzhengs pa med pa'i phyir ro/ /rnam par mi gnas shing rnam par mi gnas pa yang ma yin pa zhes bya ba ni spong ba'i tshul gyis snga ma bzhin no/ /lhag ma ni rtogs par sla ste de ni chos kyi mchog go/ /de ltar nyan thos kyi lam la nges par 'byed pa'i cha dang mthun pa bzhi bshad pa yin no/ /sangs rgyas kyi mthus bse ru'i lam gyi gnas skabs la lha'i bu kha cig rnam par rtog pa 'di lta bur gyur te/ de'i dbang du byas nas de nas 'khor de'i nang nas zhes bya ba la sogs pa gsungs so/ / kha cig ces bya ba ni gang rab 'byor gyis bstan pa'i nyan thos kyi lam yang zab par bsams pa'o/ /ji ltar gnod sbyin rnams zhes bya ba ni de dag gis brjod pa'o/ /ji ltar gnod sbyin rnams kyis brjod pa ni bstan pa ste/ de dag gis skad kyis so/ /de la sgra de dag dang zhes bya ba ni bstan pa'o/ / lhag ma ni rjes su bstan pa'o/ /tshig ni ngag gi tshogs so/ /smra ba ni ngag gi tshogs kyis so/ /bshad pa ni rtogs par byed pa'o/ /de nas tshe dang ldan pa zhes bya ba la sogs pa la/ 'di ni zhes bya ba ni skabs la bab pa'i phyir blo la gnas pa'i bse ru'i lam ston par byed do/ /shes par mi rung shes par mi rung zhes bya ba'i tshig gnyis ni nges par bzung ba'i don to/ /srid pa tha ma gzhan las rnam par shes pa ni bse ru ste/ bse ru'i theg pa de dag la ni gzhan gyis bstan pa med de/ gang gi phyir de dag ni rang byung ba nyid kyis rang gi mngon sum du 'gyur ba yin te/ de bas na gzhan gyis bstan pa don med do/ /'di ltar zhes bya ba ni 'di nyid chos rnams kyi chos nyid do/ /ji lta bu zhe na/ 'di la cung zad kyang zhes bya ba la/ 'di la zhes bya ba ni bse ru'i theg pa la'o/ /phung po dang / khams dang / skye mched la sogs pa cung zad kyang smos pa med de zhes bya ba ni stong pa nyid kyi chos gang yang med pas so/ /thos pa ni nyan pa po ste/ chos thams cad rang rang gi ngo bo med pa ste/ dper na sangs rgyas kyi sprul pas sprul pa'i 'khor rnams la chos bshad pa na cung zad kyang smos pa med pa/ sus kyang ston pa med cing gang yang nyan pa med pa bzhin no/ /de nas lha'i bu de dag la sogs pa zhes gsungs so/ /gsal ba ni zab pa ma yin pa'o/ /lan gnyis brjod pa ni dga' bas so/ /'di ni zhes bya ba ni bdag cag gi rnam par rtog pa'o/ /'phags pa ma yin pa'i spyod yul ma yin pa nyid kyis ring ba'i phyir dang / spros pa med pa nyid kyis phra ba'i phyir ro/ / gzung bar dka' ba nyid kyis zab go/ /nyan thos kyi lam gyi ye shes kyi sems dpas ches ring ba dang / ches phra ba dang / ches zab pas rab tu 'jug pa'o/ /ston pa ni tshig gis so/ /'chad pa ni don gyis so/ /'di ltar 'di la cung zad kyang smos pa med de zhes gsungs pa de ni shes pa zab pa nyid du bstan te/ des na bstan bcos las/ gzhan gyis bstan yang mi dgos la/ /rang byung bdag nyid rtogs pa'i phyir/ /bse ru lta bu'i ye shes ni/ /zab pa nyid du mngon par brjod/ /ces gsungs so/ /de nas sangs rgyas kyi mthus tshe dang ldan pa rab 'byor gyis zhes bya ba nas/ bzod pa 'di la ma brten par zhes bya ba dang / de ltar 'di la cung zad kyang smos pa med de zhes bya ba la sogs pa gsungs pas ni shes pa'i gzung ba med pas thob pa med pa nyid thob pa zhes bya ba'i don te/ des na nyan thos shes pa yang blang bar bya ba yin/ de bzhin gshegs pa'i yang blang bar bya ba yin/ bse ru lta bu'i yang shin tu rtogs par bya ba yin no zhes bsams so/ /de ni bse ru lta bu'i gzung ba'i rnam par rtog pa spang ba'o/ /de nas yang lha'i bu de dag 'di snyam du sems te zhes bya ba la sogs pa la sngags la sogs pa'i stobs kyis log pa'i skyes bu so sor snang ba ni sgyu ma'o/ /'dra bar ston pa ni sprul pa ste de gnyis lta bu'o/ /de gnyis dang 'dra ba ni sgyu ma dang 'dra ba'i sems can de sgyu ma nyid ni ma yin no/ /log pa nyid ni sgyu ma nyid du bsams so/ /yang rab 'byor gyis bsam pa ni log pa'i khyad par gyi sgyu ma dang rmi lam ste/ de gnyis dang 'dra ba ni log pa nyid do/ /de bas na sgyu ma dang sems can ni log pa nyid du gnyis su med pa yin te khyad par med pa yin no/ /de nyid kyis sgyu ma'i skyes bu'i bzhin du skyes bu'i rdzas med pa bstan to/ /chos thams cad kyang zhes bya ba ni skyes bu'i chos thams cad kyang sgyu ma dang 'dra ba ste/ skyes bu de'i rdzas med na chos kyang med pa'i phyir ro/ /de nas tshe dang ldan pa shA ri'i bu dang zhes bya ba la sogs pa nas/ 'di la yang dag par 'dzin pa su yang mi 'byung ngo zhes bya ba'i bar gyis ni gnas brtan rab 'byor gyis chos nyan pa bzhin yang dag par 'dzin pa yang med do zhes bstan to/ /rab tu 'dzin par byed pas yang dag par 'dzin pa'o/ /de med pa ni yang dag par 'dzin pa'i rdzas med pa'i phyir ro/ /ma smos pa zhes bya ba ni gsal bar ma bshad pa'o/ /yongs su snang ba zhes bya ba ni gsal ba'o/ /bcas pa zhes bya ba ni ston pa dang nyan pa'i tha snyad do/ /de bas na rnam pa thams cad du skyes bu'i rdzas ni med de nang gi phung po la sogs pa ma 'dres pa nyid la skyes bur bstan te/ des na skyes bu btags pa la brten pa phung po la sogs pa la 'dzin pa 'di dag yod pa yin gyi/ bse ru lta bu'i 'dzin pa'i rnam par rtog pa spangs pa ni ma yin no/ /de nas lha'i dbang po brgya byin 'di snyam du sems te zhes bya ba nas/ gang ma skyes pa ni me tog kyang ma yin no zhes bya ba'i bar gyis ni bse ru lta bu'i rigs brjod do/ /'dir chos kyi rnam grangs 'di zhes bya ba ni chos kyi bye brag bse ru'i lam mo/ /rab 'byor la mngon par gtor ro zhes bya ba ni chos 'chad pa la mchod pas ni chos la mchod pa'i phyir ro/ /brgya byin la rjes su brjod pa'i phyir zhes bya ba ni rnam par rtog pa shes nas bshad pa'i phyir ro/ /'di snyam du sems te zhes bya ba ni 'og nas brjod pa'i phyir rnam par rtog pa la sems pa'o/ /'di dag ni zhes bya ba ni de ltar bgyi'o/ /me tog ni dri ma med pa nyid kyis me tog dang chos mthun pa'i phyir te/ bse ru lta bu'i lam gyis yang dag par bsdus pa'i dge ba rnams so/ /lha'i gnas na yod pa zhes bya ba ni srid pa'o/ /ma mthong zhes bya ba ni zag pa med pa nyid kyis khams gsum du lhung ba med pa'i phyir ro zhes bsams so/ /mngon par gtong ba zhes bya ba ni 'khor rnams la sprul pa'i me tog mtshon pa yin no/ /sprul pa ni ji ltar snang ba bzhin du med pa'i phyir ro/ /ga las she na/ 'di dag ni zhes bya ba la sogs pa gsungs so/ /yid las byung ba zhes bya ba ni mjug sdud pa yid kyis sprul pa zhes bya ba'i don to/ /brgya byin gyi yid las byung ba nyid kyang dgag pa'i phyir 'di dag ni ma byung ba ste zhes bya ba la sogs pa smras so/ /ji ltar bzung ba'i shing la sogs pa med de/ de bas de dag las byung ba yang ma yin la de bzhin du yid kyang med de 'dzin pa med pa'i phyir ro/ /de bas na de las byung ba yang ma yin no/ /rab 'byor gyis smras pa/ kau shi ka gang ma skyes pa ni me tog kyang ma yin no zhes bya ba ni gang dang de ni rtag tu 'brel pa yin pa'i phyir de ni me tog kyang ma yin bse ru'i lam yang ma yin no zhes bya ba'i don to/ /'di snyam du sems te khyad par med par byung ba ni skye ba'o/ /des na 'bras bu ni rigs 'dra ba la brten pa yin te rgyu la gnas pas bse ru'i rten ni bse ru'i lam mo/ /bse ru ni 'dus byas kyi chos kyi lam la brten par rigs pa yin te zag pa dang bcas pa ni rigs mi 'dra ba nyid kyi phyir ro/ /'dus byas kyang zag pa med par ldan pa ni de dang ldan pa'i phyir dang po nyid nas zag pa med pa yang skye bar thal bar 'gyur ro/ /de bas na zag pa med pa nyid kyi rigs 'dra ba ni bse ru'i chos kyi dbyings nyid de/ bse ru'i lam ni gnas dang / gzhi dang / rten dang / rigs yin te de ni bse ru'i lam gyi rten yin no/ /'dir bstan bcos las/ gzung ba'i rtog pa nyams phyir dang / /'dzin pa mi spong phyir dang ni/ /rten gyi bse ru lta bu'i lam/ /yang dag bsdus par shes par bya/ /zhes gsungs so/ /de nas bse ru rnams ni ji ltar gzhan gyi don byed pa yin zhe na/ 'dod pa tsam gyis de 'grub pa yin no/ /de dag las ji ltar nyan par byed ce na/ gus par nyan pa tsam gyis te/ gang gi phyir bstan bcos las/ gang gang don ni gang gang las/ /ji lta ji ltar nyan 'dod dang / /de la sgra med kyang don de/ /de ni de lta de ltar snang / /zhes gsungs so/ /gang dang gang zhes bya ba ni gdul bya la'o/ /don gang dang gang la zhes bya ba ni nges par 'byed pa'i cha 'am 'phags pa'i lam nyid do/ /ji lta ji ltar zhes bya ba ni gang dang gang gi rnams so/ /de nas lha'i dbang po brgya byin 'di snyam du sems te zhes bya ba nas/ de nas lha'i dbang po brgya byin gyis tshe dang ldan pa rab 'byor la 'di skad ces smras so zhes bya ba'i bar gyis ni nges par 'byed pa'i cha dang mthun pa bstan pa yin te/ de la gang sangs rgyas kyi chos dpag tu med pa tshad med pa la slob bo zhes bya ba'i bar gyis ni dri ba bstan to/ /ming dang tshig tu btags pa zhes bya ba ni tha snyad do/ /de ston pa dang 'gal bar mi byed pa dang / de nyid gsal bar byed pa dang / de nyid nye bar ston pa ste/ de ltar chos thams cad btags pa tsam nyid du ston pa yin te de ni drod do/ / sangs rgyas kyi chos tshad med dpag tu med pa la slob bo zhes bya ba nas/ de rnam par shes pa 'phel bar bya ba dang / 'grib par bya ba'i phyir mi slob bo zhes bya ba'i bar gyis ni rtse mo bstan to/ /ji ltar mi slob pa yin zhe na/ dmigs pa med pa'i phyir te/ de ni rtse mo'o/ /gang gzugs 'phel bar bya ba dang / 'grib par bya ba'i phyir mi slob pa dang zhes bya ba nas tshe dang ldan pa shA ri'i bus zhes bya ba'i bar gyis ni bzod pa bstan to/ /de la gzugs la sogs pa yongs su gzung ba med pa'i rigs ni bcom ldan 'das ma chen po las bstan to/ /nang stong pa nyid nas dngos po med pa'i ngo bo nyid kyi bar la bstan pa de ni bzod pa'o/ /de nas tshe dang ldan pa shA ri'i bu zhes bya ba nas lha'i dbang po brgya byin gyis tshe dang ldan pa shA ri'i bu la 'di skad ces smras so zhes bya ba'i bar gyis ni chos kyi mchog ston to/ /de ltar zhes bya ba ni blo la gnas pa'i rgyu 'dren par byed pa'o/ /de ltar yang bcom ldan 'das ma chen po las gsungs te/ des gzugs kyi skye ba mi mthong / 'gag pa mi mthong / blang ba mi mthong / dor ba mi mthong / kun nas nyon mongs pa mi mthong / rnam par byang ba mi mthong / 'phel ba mi mthong / 'grib pa mi mthong / stsogs pa mi mthong / 'bri ba mi mthong zhes bya ba 'byung ba ni chos kyi mchog go/ / de ltar yang bstan bcos las/ btags pa'i chos nyid mi 'gal bar/ /ston pa'i rnam pa drod gyur pa/ /rtse mor gyur pa gzugs la sogs/ /'grib pa med la sogs pas phye/ /nang stong nyid la sogs pa yis/ /gzugs sogs mi 'dzin phyir bzod pa/ /gzugs sogs skye ba med sogs kyi/ / rnam pa can ni chos kyi mchog /ces bstan te rang sangs rgyas kyi lam mo/ /byang chub sems dpa'i lam bshad par bya ste/ de'i dbang du byas nas bstan bcos las/ bden dang bden la bzod pa dang / /shes pa'i skad cig rnam bzhi yis/ /lam shes nyid la mthong ba'i lam/ /phan yon bcas pa 'di bshad do/ /zhes bya ba gsungs so/ /'di'i mdor bsdus pa'i don ni bden pa re re la bzod pa gnyis dang shes pa gnyis te/ sdug bsngal la chos shes pa'i bzod pa dang / sdug bsngal la chos shes pa dang / sdug bsngal la rjes su shes pa'i bzod pa dang / sdug bsngal la rjes su shes pa dang / de bzhin du kun 'byung dang / 'gog pa dang lam la yang sbyar ro/ /bden pa rnam pa mang po'i skad cig ma ni byang chub sems dpa'i mthong ba'i lam gyi lam shes pa nyid du brjod do/ /phan yon dang bcas pa'i skad cig ma 'di dag gi khyad par gyi mtshan nyid kyi dbang du byas nas/ bstan bcos las tshigs su bcad pa lnga ste/ de bzhin nyid dang sangs rgyas dag /phan tshun rten pa rten med phyir/ /rnam grangs khas mi len pa dang / /chen po tshad med nyid dang bcas/ /dpag med mtha' nyid med pa dang / /der gnas gzugs la sogs pa la/ / sangs rgyas nyid du nges 'dzin dang / /blang dang dor ba med sogs dang / /byams la sogs dang stong nyid dang / /sangs rgyas nyid ni 'thob pa dang / /rnam par byang kun yongs bsdus dang / /nyam nga ba dang nad kun sel/ /mya ngan 'das 'dzin zhi nyid dang / /sangs rgyas rnams kyis bsrung la sogs/ /srog mi gcod pa la sogs pa/ /rnam pa kun mkhyen tshul la ni/ /bdag nyid gnas te sems can dang / /'god dang sbyin pa la sogs pa/ /rdzogs pa'i byang chub tu bsngo ba/ /lam shes nyid kyi skad cig ma/ /zhes gsungs te/ lam nyid byang chub sems dpa'i mthong ba'i lam gyi skad cig ma zhes bya ba'i don to/ /yul 'di'i dbang du mdzad nas dang po'i tshig rkang pa gsum don gzhan du byas pa ni dang po'i skad cig ma tshig rkang pa gnyis kyis so/ /dam pa'i don du gzugs la sogs/ /shes pa ma yin gzhan tshig min/ /zhes bya ba ni shes rab kyi pha rol tu phyin pa yin te de ni gzugs la sogs pa las mtshan nyid kyi dbye bas tha dad pa ma yin te/ don dam par tha dad pa ma yin pa yang ma yin no/ /de ltar na gang shes rab kyi pha rol tu phyin pa dang / gzugs la sogs pa nang yin pa de ni de de bzhin nyid/ gang yang chos 'di dag thams cad yongs su 'tshal na ni yang dag par ldan pa yang ma yin/ yang dag par mi ldan pa yang ma yin/ gzugs med pa/ bstan du med pa/ thogs pa med pa/ 'di lta ste/ mtshan nyid med par mtshan nyid dang ldan pa'o/ /yang dag pa dang ldan pa yang ma yin/ yang dag par mi ldan pa yang ma yin zhes bya ba ni gcig pa yang ma yin pa dang tha dad pa yang ma yin pa ste/ brtags pa rnams ni med pas gzugs la sogs pa'i chos thams cad ni tha dad pa dang / tha dad pa ma yin pa med pa'i rang gi ngo bo nyid yin pa'i phyir ro/ /de nyid de bas na gzugs kyi phung po med pa nas gzugs med pa'o/ /mig gi rnam par shes pa med pa'i phyir bstan du med pa'o/ /rang dang gzhan gyi skyon 'byung ba'i 'ching ba med pa'i phyir thogs pa med pa'o/ /bye brag so sor snang ba nub pa'i phyir mtshan nyid dang ldan pa ste/ 'di ltar mtshan nyid med pa yin te/ de ni de bzhin nyid tsam gyi mtshan nyid do/ /des na 'di'i dang po mtshan nyid kyi skabs bstan pa ni de nas lha'i dbang po brgya byin gyis tshe dang ldan pa rab 'byor la 'di skad ces smras so zhes pa nas/ de ci'i phyir zhe na zhes bya ba'i bar dang / de'i 'og tu dang po'i skad cig ma de skad smras pa dang / lha'i dbang po zhes bya ba'i bar gyis ni sdug bsngal la chos shes pa'i bzod pa bstan to/ /skad cig ma de dag gi khyad par gyi mtshan nyid ni bstan bcos las/ chen po tshad med nyid dang bcas/ /dpag dang mtha' nyid med pa dang / /de dag gzugs la sogs par sbyor/ /zhes bya ba la chen po dang tshad med pa dang lhan cig pa ni chen po tshad med pa 'di dang bcas pa'o/ /de nyid chen po tshad med pa zhes bya ba'i don to/ /mtha' gnyis ni mtha' kho na'o/ /dpag pa dang mtha' gnyis ni dpag pa dang mtha' dag go/ /de gnyis med pa ni dpag tu med pa dang mtha' med pa zhes bya ba'i don to/ /de zhes bya ba ni shes rab kyi pha rol tu phyin pa ste/ chen po la sogs pa ni gang gzugs la sogs pa dang sbyar ro/ /gzugs la sogs pa de dag la chen po la sogs pa dmigs pa na/ shes rab kyi pha rol tu phyin pa yang chen po la sogs pas pha rol tu phyin pa chen po nyid dang / tshad med pa'i pha rol tu phyin pa nyid dang / dpag tu med pa'i pha rol tu phyin pa nyid dang / mtha' yas pa'i pha rol tu phyin pa zhes bya ba'i don to/ /'di yang pha rol tu phyin pa chen po la sogs pa'i shes pa ni mngon par zhen pa med par blta bar bya'o/ /de ltar pha rol tu phyin pa chen po zhes bya ba ni kau shi ka de bzhin du pha rol tu phyin pa'o zhes mngon par chags par mi byed do zhes bya ba la sogs pa mdo'i tshig gis gsungs so/ /de nas de skad ces smras pa dang / lha'i dbang po zhes bya ba la sogs pas ni brgya byin gyis bstan to/ /gnas brtan rab 'byor zhes bya ba la sogs pas rab 'byor gyis brjod pa rjes su brjod pa yin no/ /de bas na rab 'byor nyid kyi rjes su bstan pa ni/ de ci'i phyir zhe na zhes bya ba la sogs pa smras so/ /de la gzugs la sogs pa chen po nyid ni dus 'di la yod do/ /dus 'di la med do zhes bya ba nyid ni dus yongs su chad pa med pa nyid do/ /de la mi dmigs pa'i phyir de ni chen po nyid yin te de bas na sdug bsngal la chos shes pa'o/ /de bzhin nyid kyi rang bzhin ni nam mkha' lta bu ste/ tshad kyis yongs su bcad du med pa'i phyir tshad med pa yin te/ de ni sdug bsngal la rjes su shes pa'i bzod pa'o/ /grangs yongs su bcad pa med pa ni dpag tu med pa yin te/ de ni sdug bsngal la rjes su shes pa'o/ /yul phyogs yongs su bcad pa med pa'i phyir mtha' yas pa 'am dmigs pa mtha' yas so/ /gang gi phyir dmigs pa ni chos de dag thams cad kyi mtha' yod pa ma yin te/ grangs las 'das pa'i phyir ro/ /gzhan yang chos thams cad ni med pa nyid kyi mtha' yas pa yin te/ /de dag ni skye ba dang / 'jig pa'i mtha' gnyis med pa'i phyir ro/ / dmigs pa de gnyis ka yang bdag med pa'i shes pa ste/ sems can la dmigs pa ni bdag med pa gnyis ka yin te/ de yang mtha' yas pa'o/ /brgya byin gyis smras pa/ de ji ltar mtha' yas pa yin zhe na/ rab 'byor gyis smras pa ni bgrang ba'i tshul gyis kyang ma yin/ bgrang ba mang pos kyang ma yin zhes bya ba ni bgrang ba las 'das pa nyid kyis kyang ma yin/ grangs mtha' yas pas kyang ma yin zhes bya ba'i don to/ /'o na ji ltar zhes bya ba la/ 'o na zhes bya ba'i sgra ni mi gzigs/ chos kyi tshig bla dwags pas kyang ma yin zhes bya ba la chos ni bdag gi rdzas so/ /de'i tshig bla dgas ma yin pa ni de med pa'i phyir te/ chos nyid kyi rang gi don mi bsgrub pas na chos kyi tshig bla dwags ma yin no/ /ming du btags pa zhes bya ba ni rmongs pa dang ldan pas so/ /de ga las she na/ gang gi phyir glo bur du byung ba yin te/ rnam par dpyod pa yod na g.yo ba nyid kyi phyir ro/ /gang gi phyir dngos po med pa ni bdag gi rdzas med pas so/ /bdag dang 'brel pa yod na ni bdag ces cung zad brjod na de yang med na bdag ces bya ba gtan du med pa'i phyir de ni bdag med pa'o/ /yang na bdag tu btags pa'i yul phung po la sogs pa ni bdag gi yin na de yang med pas bdag gi med do/ /yang na ming dang 'du shes so/ /gang de'i 'du shes de med pa'i phyir bdag gi med pa'o/ /dmigs pa'i yul de med pa'i phyir dmigs su med pa'o/ /'di la zhes bya ba ni ston pa'i bstan pa'o/ /de yang yid ches pa'i lung gis kyang bdag med pa grub par bstan pa'i ched du gang la sems can mtha' yas pa yod dam zhes smras te/ bgrang ba las 'das pa nyid kyi gong yang med do zhes bsams so/ /bdag med pa tshad mas grub pa yin yang yid ches pa'i lung gis kyang bdag med pa grub pa yin no zhes bstan pa'i don du/ kau shi ka gal te zhes bya ba la sogs pa gsungs so/ /bzhugs te zhes bya ba ni ngal bso ba med pa'o/ /gsung zhes bya ba ni tshig gis so/ /mtha' yas pa zhes bya ba ni 'jig rten no/ /go bar byed pa zhes bya ba ni don go bar byed pa'i dbyangs de sgra de gang la yod pa de la de skad ces bya ba'o/ /'brug sgra lta bu ni zab pa'o/ /dbyangs ni rol mo'i dbyangs bzhin du sna tshogs pa'o/ /gang la de lta bu'i sgra yod pa de la de skad ces bya'o/ /zin kyang zhes bya ba ni 'on kyang ngo / /thog ma nas dag pa'i phyir zhes bya ba ni dang po nyid nas sems can med pa'o/ /yongs su dag pa'i phyir zhes bya ba ni thams cad du sems med pa'o/ /rnam grangs 'dis kyang zhes bya ba ni rnam pas so/ /mtha' yas pa'i pha rol tu phyin pa zhes bya ba la de gang yin zhe na/ /de ni sems can mtha' yas pa'i phyir zhes bya bas ni sems can rnams skye ba dang / 'gag pa dang bral ba'i phyir sems can mtha' yas pa'o/ /de ltar yang zhes bya ba ni de bzhin du grangs las 'das pa'o/ /de ni kun 'byung la chos shes pa'i bzod pa'o/ /der gnas gzugs la sogs pa la/ /sangs rgyas nyid du nges 'dzin dang / /zhes bya ba la shes rab kyi pha rol tu phyin pa la gnas pa gang yin pa de la sangs rgyas nyid du nges par bzung ba de nyid sangs rgyas su blta bar bya ba ste/ 'di ni skad cig ma drug pa'o/ /de'i skabs ni de nas sangs rgyas bcom ldan 'das kyis dbang por bcas pa zhes bya ba la sogs pa gsungs so/ /dbang po ni brgya byin no/ /tshangs pa ni mi mjed kyi bdag po'o/ /skye dgu'i bdag po ni 'jig rten skyong ba rnams so/ /khyad par gyi chos thos nas rab tu dga' ba'i phyir 'bad pa med par 'byung ba'i tshig ni ched du brjod pa'o/ /ched du brjod de zhes bya ba ni brjod par gyur pa'o/ e ma ho zhes bya ba ni ngo mtshar to/ /chos zhes bya ba ni bshad pa'i chos so/ /yang chos ni chos rab tu ston pa ste mthong ba'i lam mo/ /de nyid kyi chos nyid de de bzhin gshegs pa 'byung ba ste/ 'di ni smra ba ni de bzhin gshegs pa gang yin pa'o/ /'byung ba ni skye ba ste zag pa med pa'i shes pa'i mtshan nyid do/ /smra ba zhes bya ba ni de'i tshig dang po cung zad tsam shes pa'o/ /de nas rim gyis gsal ba dang / rab tu gsal ba dang / shin tu gsal bar rtag tu rtogs pa yin te/ brjod cing bstan te bshad la rab tu bzhag pa'o/ /bcom ldan 'das slan chad ces bya ba la sogs pas ni skad cig ma drug pa nyid smras so/ /da slan chad ces bya ba ni da nas gzung ba'o/ /'dzin to zhes bya ba ni nges par gzung ba'o/ /ma bral ba ni thob pa ma nyams so/ /gnas pa ni mngon sum du gyur pas so/ /de bzhin gshegs pa lags par 'dzin to zhes gang gsungs pa ni/ de bzhin gshegs pa yin no zhes khyad par gyi blo thob pa'i phyir ro/ /de thob pas kyang lung bstan pa yin te/ des lha'i bu dag gang gi tshe zhes bya ba la sogs pa gsungs so/ /na tshod chung zhing gtsang ba gang yin pa de ni bram ze'i khye'u zhes brjod do/ /de la bod pa ni bram ze'i khye'u'o/ /sangs rgyas bcom ldan 'das su 'gyur ro zhes bya ba ni rang nyid mngon par byang chub pas sam/ blo khyad par du 'phags pa 'di la yod pas na sangs rgyas so/ /de lta bu ni sangs rgyas dag la yang yod do zhe na/ rnam par bcad pa'i phyir bcom ldan 'das zhes smos so/ /skal ba drug dang ldan pa'i don gyis bcom ldan no/ /de ni byang chub sems dpa' la yang yod do zhe na/ de rnam par bcad pa'i phyir sangs rgyas zhes smos te de ni mngon par sangs rgyas pa'i phyir ro/ /chos ji lta ba de bzhin du gsungs pas na de bzhin gshegs pa'o/ / nyon mongs pa'i dgra bcom pas na dgra bcom pa'o/ /yang dag pa ni phyin ci ma log pa'am/ thams cad de sangs rgyas 'dis yang dag par rdzogs par sangs rgyas pa'o/ /'dis ni ston pa nyid phun sum tshogs par bstan pa'o/ /mi ston pa 'am phyin ci log tu ston pa ni ston pa ma yin te/ phyin ci log gi tshig gis nyon mongs pa'am mi shes pa'i dbang gis kyang 'byung na/ de gnyis ka yang 'di la med de go rims bzhin du dgra bcom pa yang dag par sangs rgyas pa'i phyir ro/ /'khor ba na bzhugs pas 'di ltar ji lta bu'i nus pa yod ce na bde bar gshegs pa zhes gsungs te/ gshegs pa ni srid pa las grol ba'o/ /bde ba'i sgra ni rab tu bsngags pa dang / yang ldog pa'i don to/ /phyi rol pa dang / slob pa dang / mi slob pa rnam par gcad pa'i phyir go rims bzhin du gzugs bzang po lta bu dang / rims nad legs par byang ba lta bu dang / bum pa legs par gang ba lta bu yin par sbyar ro/ /de la 'jig rten las 'das pa'i lam gyis gshegs pa'i phyir/ rab tu bsngags pa'i gshegs pa ni bde bar gshegs pa'o/ /phyi rol gyi thar pa de ni tshad mar bcad pa nyid kyis tha ma yin pa'i phyir ro/ /skye dang skyon ni yang dag 'byung / /slar ldog pa zhes bstan pa yin/ / de gnyis ni slob pa yin no/ /de bas na ldog pa med par gshegs pa ni bde bar gshegs pa'o/ /nyon mongs pa'i nad kyis lhag ma med pa ste lam bstan pas sku gsung thugs kyi skyon spangs pa'i phyir ro/ /mi slob pa yin na de ni theg pa dman pa'i dgra bcom pa nyid las ji lta ba bzhin du yod pa yin la/ bcom ldan 'das ni de yod pa ma yin te/ des ni lhag ma med par gshegs pa'i phyir bde bar gshegs pa'o/ /su'i dgra gcig gi gsum du ji ltar 'gyur zhe na/ tha ga pa'i thabs kyis rigs pa smras pa/ dper na/ shwe to tra ba ti/ a lam bu yA nAM ya te/ zhes bya bas dkar po rgyugs te song ngo zhes bya ba dang / khyi 'di nas rgyugs te song ngo zhes bya ba dang / ku ba'i grong du song ngo zhes bya ba dang / phub ma'i grong du ma 'gro zhes bya ba lta bu'o/ /ji ltar bde bar gshegs pa yin zhe na/ gang gi phyir rig pa dang zhabs su ldan pa zhes smos te/ rig pa ni lhag pa'i shes rab kyi bslab pa'o/ /lhag pa'i tshul khrims dang sems ni rkang pa'o/ /rig pa ni rkang pa de gnyis kyi sngon du 'gro ba yin te des na rig pa'i mig gnyis kyis blta zhing cig shos gnyis kyi rkang pas 'gro ba ltar de bzhin gshegs pas na bde bar gshegs pa'o/ /de la tshig gnyis po 'dis ni ston pa phun sum tshogs pa nyid kyi rgyu bstan to/ /'jig rten rig pa zhes bya ba ni 'jig rten gyi gdul ba'i dus la sogs pa yongs su mkhyen pas na 'jig rten rig pa'o/ /skyes bu nyid 'dul ba yin pas skyes bu 'dul ba'o/ /de ni kha lo sgyur ba ni yang dag par 'dul ba'o/ /de dang 'dra ba kha lo sgyur ba nyid gzhan yang yod de bde bar gshegs pa'o/ /de las lhag pa med do zhes bstan pa'i phyir bla na med pa skyes bu 'dul ba'i kha lo sgyur ba zhes smos so/ /tshig gnyis po 'dis ni ston pa phun sum tshogs pa'i lam bstan to/ /ci ste 'di las kyi yul ngan song gi 'gro ba yang yin nam zhe na/ de ni ma yin te lha dang mi rnams kyi ston pa zhes smos so/ /de ni kun 'byung la chos shes pa'o/ /de nas bcom ldan 'das kyis lha'i bu de dag ces bya ba ni skad cig ma bdun pa gsungs te/ ji srid ces bya bas ni yongs su mthar thug pa'i bar te sbyin pa'i pha rol tu phyin pa dang / tshul khrims kyi pha rol tu phyin pa dang / kun mkhyen pa dang / rnam pa thams cad mkhyen pa nyid kyi bar zhes bya ba'i don to/ /yongs su sdud pa zhes bya ba ni 'dren pa'o/ /rjes su yongs su 'dzin pa zhes bya ba la rjes su zhes bya ba ni mthun pa'i don to/ /mthun pa ni rigs pa dang 'thad pa'o/ /ngo mtshar to zhes bya ba ni yongs su sdud pa'o/ /shin tu ngo mtshar to zhes bya ba ni rjes su yongs su sdud pa'o/ /blang ba med pa dang dor ba med pa dang ldan pa ni/ blang ba med pa dang dor ba med pa dag gi lhan cig pa dang / mthun pas len pa med pa ste/ de ni blang ba med pa'o/ /dper na ji ltar yongs su mi len mi gtong ba de ltar yongs su len pa zhes bya ba'i don to/ /'dir bstan bcos las/ blang med dor ba med sogs dang / /zhes gsungs so/ /dang po ni ming la sogs pa yongs su len pa'o/ /blang med ni rnam par rtog pa'i blang ba med pa'i don to/ /dor ba med pa nyid ni dor ba med pa'o/ /'di ni dor ba med pa'i don to/ /byang chub sems dpa' rnams yongs su len par byed pa'i bcom ldan 'das ma de yongs su len par byed do/ /de ni kun 'byung la rjes su shes pa'i bzod pa'o/ /brgya byin gyi skabs yin pa'i phyir des rjes su mtshon pa'i le'u ni brgya byin gyi le'u'o/ /'phags pa shes rab kyi pha rol tu phyin pa brgyad stong pa'i dka' 'grel slob dpon rin chen 'byung gnas zhi bas rnam par sbyar ba snying po mchog ces bya ba las le'u gnyis pa'o/ / //bstan bcos las/ byams pa la sogs pa zhes bya ba ni byams pa dang / snying rje dang / dga' ba dang / btang snyoms dang / tshad med pa bzhi po de dag ni byams pa la sogs pa'o/ /de dag ni bdag med nyid mthong ba ni skad cig ma brgyad pa zhes bya ba'i don to/ /de dag ston pa'i gleng gzhi ni de nas bcom ldan 'das kyis zhes bya ba nas bka' stsal pa zhes bya ba'i bar gyis ni sdud pa pos smras pa yin no/ /skad cig ma brgyad pa mngon sum du bya ba la theg pa dman par ltung ba'i gnyen po la lhag par gus pa bskyed pa'i phyir skad cig de nyid la bcom ldan 'das kyis/ lha'i bu dag rigs kyi bu'am rigs kyi bu mo zhes bya ba la sogs pa gsungs so/ /shes rab kyi pha rol tu phyin pa zhes bya ba ni skabs kyi mthong ba'i skad cig ma'i shes rab bo/ /de nyid kyi pha rol tu son pa ni pha rol tu phyin pa'o/ /gang gi pha rol zhe na/ theg pa dman par ltung ba'i sa'i'o/ /de yang gang yin zhe na/ tshad med pa bzhi'i bdag nyid mthong ba'o/ /de ltar na byang chub sems dpa' de dag thob na de sems can thams cad la bdag dang mnyam pa nyid du mthong nas skyabs kyi 'os su gyur pa yin te/ bdag nyid kho na la phan par spyod pa ni ma yin no/ /theg pa dman pa gang du ltung ba la byams pa la sogs pa'i ngo bo mthong tsam shes rab kyi pha rol tu phyin pa yin te/ de nyid skad cig ma brgyad pa'o/ /gang la la de 'dzin tam zhes bya ba nas kun chub par byed pa zhes bya ba'i bar gyis ni mngon sum du byed pas so/ /rab tu 'don par byed na zhes bya ba ni gzhan dag la rab tu 'don pa'i phyir des de 'dzin pas na rab tu 'don par byed na/ zhes bya ba'i bar du'o/ /de la bdud dam bdud kyi ris kyi lha dag gis glags rnyed par mi 'gyur ro zhes bya ba nas rab tu 'don par 'gyur zhes bya ba'i bar gyis ni phan yon bstan te/ de ni kun 'byung la rjes su shes pa'o/ /bstan bcos las stong nyid thob pa ni stong pa nyid bcu drug gis mthong bas gang thob pa'i thabs kyis mthong ba de ni skad cig ma dgu pa'i don to/ /de yang lha'i bu dag kyang rigs kyi bu'am rigs kyi bu mo zhes bya ba nas/ mi 'byung mi skye zhes bya ba'i bar du gsungs so/ /'dir yang mthong ba'i skad cig 'di la yang shes rab kyi pha rol tu phyin pa zhes bya ba la gang gis pha rol tu phyin pa yin zhe na/ stong pa nyid bcu drug po 'di dag mthong bas so/ /'dir phan yon ni de nas bcom ldan 'das la zhes bya ba gnyis pa'i sgra'i dbang du byas pas so/ /bkab pa med pa'i phyogs ni bla gab med pa'o/ /nyal ba ni gnyid log pa'o/ /'byung ba ni rgyun gyis 'jug pa'o/ /bsrung ba dang / bskyab pa dang / lhan cig pa'i sba ba ni bsrung ba dang bskyab pa dang sba ba'o/ /sngags la sogs pas ni bsrung ba'o/ /gzhan la bsgo bas ni bskyab pa'o/ /rang nyid nye bar song nas byin gyis rlob pa ni sba ba'o/ /yang na lus kyis bde ba'i yo byad thams cad nye bar sbyor ba ni bsrung ba'o/ /phyi rol gyi nye bar 'tshe ba bzlog pa ni bskyab pa'o/ /nang gi nad la sogs pa bzlog pa ni sba ba'o/ /de dag bya ba ni tshig gam yid kyis yang dag par sbyor ba'o/ /de ni 'gog pa la chos shes pa'i bzod pa'o/ /sangs rgyas nyid kyis yongs su bzung ba ste sangs rgyas kyi dngos po ni sangs rgyas nyid do/ /gang gis sangs rgyas su gyur pa des yongs su bzung ba ste/ mtshan dang 'od dang ting nge 'dzin dang gzugs la sogs pa'i phun sum tshogs pa'am/ sangs rgyas mi bzhugs pa'i sangs rgyas kyi zhing dag tu sangs rgyas kyi sku'i bdag nyid ston pa'o/ /de nyid de nas bcom ldan 'das la lha'i dbang po zhes bya ba la sogs pa smras so/ /shes rab kyi pha rol tu phyin pa zhes bya ba ni mthong ba'i lam gyi skad cig ma bcu pa'o/ /yon tan 'di zhes bya ba ni mtshan phun sum tshogs pa la sogs pa'o/ /'di dag ces bya ba ni mngon par mthong ba rnams so/ /mthong ba'i chos zhes bya ba ni skye bas thob pa ste de la yod pa'o/ /'thob pa ni bstan pa'o/ /yongs su 'jig pa ni rjes su bstan pa'o/ /de ni 'gog pa la chos shes pa'o/ /rnam par byang ba kun zhes bya bas ni skad cig ma bcu gcig bstan te/ 'dis rnam par byang bar byed pas ni rnam par byang ba yin te/ sbyin pa'i pha rol tu phyin pa la sogs pa thams cad yongs su gzung ba yin te/ de bstan pa'i phyir bcom ldan 'das yang ci zhes bya ba nas kau shi ka gzhan yang zhes bya ba'i bar gyis gsungs te/ de ni 'gog pa la rjes su shes pa'i bzod pa'o/ /nyam nga ba dang nad kun sel/ /zhes bya ba la nyam nga ba ni phongs pa'o/ /mu stegs can dang mngon pa'i nga rgyal can dang lhan cig rtsod pa dang / rgol ba dang / 'gal bar byed pa de dag sel ba'o/ /de bzhin du de ji ltar bsal nas de yang 'di thos pa dang / theg pa gsum gyi nyon mongs pa dang / ngan song dang 'khor ba'i nad rnams zad par 'gyur te/ de bas na/ nyam nga ba dang nad kun sel/ /zhes bya bas ni mthong ba'i lam gyi skad cig ma bcu gcig bstan to/ / de nyid bstan pa'i phyir kau shi ka gzhan yang zhes bya ba la sogs pa nas/ gnas par mi 'gyur ro zhes bya ba'i bar gyis so/ /chos zhes bya ba ni bstan pa'o/ /rtsod pa ni sun dbyung bas so/ /rgol ba ni thob pas so/ /'gal bar byed pa ni phan tshun zhe sdang gis so/ /de dag gi bsam pa ni rtsod pa la sogs pa'i bsam pa'o/ /de ni 'di ltar 'gyur te zhes bya ba ni gang gi phyir 'di nyid kyi chos nyid ces bya ba'i don to/ /'di zhes bya ba ni skad cig ma bcu gnyis pa'i mtshan nyid do/ /rtsi zhes bya ba la u sha ni bus pa'o/ /de 'dzin pa ni bus pa 'dzin pa ste rtsi ma gi'o/ /gdug pa ni sbrul gyi gdug pa ste che ba'o/ / de'i dug 'di la yod pa ni sbrul gdug pa'o/ /skye bo zhes bya ba ni lus can no/ /srog chags su gyur pa ni dud 'gro'i bye brag go/ /gzi brjid ces bya ba ni nus pas so/ /stobs ni gnod par byed pa nyid kyis so/ /mthu ni gnod pa med pa nyid kyis so/ /stobs bskyed pas zhes bya ba ni de'i sbyor bas de'i nus pa skyes pa'i phyir te de ni 'gog pa la rjes su shes pa'o/ /mya ngan 'das 'dzin zhi nyid dang / /zhes bya ba la 'dzin pa ni mngon par zhen pa'o/ /'di nyid bstan pa'i phyir de ci'i phyir zhe na zhes bya ba la sogs pa gsungs so/ /shes rab kyi pha rol tu phyin pas zhes bya ba ni skad cig ma bcu gnyis nyid bstan te/ de ni lam la chos shes pa'i bzod pa'o/ /sangs rgyas rnams kyis bsrung ba zhes bya ba la sogs pa ni sangs rgyas rnams kyis bsrung ba'o/ /sogs pa'i sgras ni lha la sogs pa yin te/ 'di nyid bstan pa'i phyir rgyal po chen po zhes bya ba nas/ byang chub sems dpa' thams cad kyang zhes bya ba'i bar gyis bstan to/ /shes rab kyi pha rol tu phyin pa zhes bya ba ni skad cig ma bcu bzhi pa bstan to/ /de ni lam la chos shes pa'o/ /srog mi gcod pa la sogs pa/ /rnam pa kun mkhyen tshul la ni/ /bdag nyid gnas te sems can dag /'god dang zhes bya ba la/ srog gcod pa spang ba ni srog mi gcod pa'o/ /de'i dbang du byas nas pha rol tu phyin pa drug la sogs pa thams cad mkhyen pa nyid kyi bar du gnas pa dang / de nyid la gang gzhan dag 'god pa de ni skad cig ma bco lnga pa'o/ /'di nyid bstan pa'i phyir/ kau shi ka gzhan yang zhes bya ba la sogs pa gsungs so/ /shes rab kyi pha rol tu phyin pa zhes bya ba ni skad cig ma bco lnga pa'o/ /pha rol tu phyin pa la sogs pa gzhan dag la ston pa'i tshig go/ /gzung bar 'os pa ni gzung bar 'os par 'gyur ro/ /rang nyid kyang de la gnas pa yin pas de bas na gzung bar 'os pa'i tshig go/ /'di la 'jam zhing snyan pa'i tshig yod pa ni tshig 'jam pa'o/ /sbyin pa la sogs pa de dag la yang gnas shing de dag ni bsngags pa smra bas ni tshig rim par smra ba nyid do/ /tshig 'chal pa med pa ni phan pa dang mi phan pa 'dra ba'i tshig mi smra ba yin no/ /de ni lam la rjes su shes pa'i bzod pa'o/ /sbyin pa la sogs pa yang dag par rdzogs pa'i byang chub tu bsngo ba ni lam shes pa nyid kyi skad cig ma bcu drug pa'o/ /de nyid bshad pa'i phyir khro bas zil gyis gnon par mi 'gyur zhes bya ba la sogs pa nas kha ton byed par 'gyur ba'i bar gyis gsungs so/ /yongs su 'dul bar byed ces bya ba ni khro ba yongs su 'dul ba'i phyir dang / khengs pa'i mtshan nyid kyi nga rgyal zad par byed pa'i phyir ro/ /khon du 'dzin pa ni 'dud par mi 'dzin pa'o/ /gnod sems ni sems can la zhe sdang ba'o/ /bag la nyal ba ni khon du 'dzin pa'o/ /dran pa dang byams pa zhes bya ba de gnyis la dran pa bshad pa'i phyir de ni 'di snyam du zhes bya ba la sogs pa gsungs te/ des zhes bya ba ni gnod sems kyis so/ /'khrug pa zhes bya ba ni rnam par 'gyur ba'o/ /'dis ni zhe sdang nga rgyal 'khor dang bcas pa spong bar bstan te/ gang gi phyir zhe sdang gis ni gzhan dag rjes su 'dzin par mi byed pa'i phyir ro/ /de med kyang nga rgyal can gyis ni bdag dang mnyam par rjes su 'dzin par mi byed de/ de bas na gnyis ka yang spangs pa'i phyir ro/ /bdag gis theg pa gsum gyi sbyin pa la sogs pa'i dge ba'i rtsa ba sems can thams cad yongs su mya ngan las 'da' bar bya ba'i don du bla na med pa yang dag par rdzogs pa'i byang chub tu yongs su bsngo ba ni mthong ba'i lam gyi skad cig ma tha ma bcu drug par bstan pa yin te/ de ni byang chub sems dpa'i mthong ba'i lam du bstan pa yin no/ /'jig rten las 'das pa'i mthong ba'i lam nyid bsgom pa'i lam yang yin te/ de yang rnam pa gnyis te/ 'jig rten pa dang / 'jig rten las 'das pa'o/ / de gnyis ka yang go rims bzhin phyi nas brjod par bya ste/ dang po nyid du 'jig rten las 'das pa'i bsgom pa'i lam gyi byed pa ni tshig nyung bar brjod par bya ste/ de ni bstan bcos las/ kun nas zhi dang thams cad nas/ /'dud dang nyon mongs las rgyal dang / /gnod pas brdzi ba med nyid dang / byang chub dang ni rten mchod nyid/ /ces gsungs so/ /'dud pa ni 'dud pa'o/ /thams cad nas zhes bya ba ni rjes su'i sgra'i don te/ yongs su zhi ba dang / yongs su 'dud pa'i don to/ /de gnyis ka yang go rims bzhin du zhe sdang dang / nga rgyal dag yongs su zad pa'i phyir te/ de gnyis kyang de skad ces bka' stsal pa dang zhes bya ba nas/ nye bar gnas pa ngo mtshar to zhes bya ba'i bar gyis smras so/ /pha rol tu phyin pa 'di dag gi nang nas shes rab kyi pha rol tu phyin pa'i sgras ni byang chub sems dpa' rnams kyi bsgom pa'i lam ston te/ gang zhes bya ba'i don to/ /de ni yongs su zhi ba dang / yongs su 'dud pa'i las so/ /thams cad nas nyon mongs pa thams cad las rgyal ba ni nyon mongs pa las shin tu rgyal ba'i phyir te/ de nyid bstan pa'i phyir bcom ldan 'das kyis bka' stsal pa zhes bya ba la sogs pa nas/ 'di ni gnas ma yin no zhes bya ba'i bar gyis gsungs so/ /srog gi bar chad du 'gyur ba zhes bya ba ni de dag la mtshon gyis btab pa'o/ /gzhan gyis gnod par byed pas zhes bya ba ni ri dwags la sogs pa'i nang du song ba na gzhan gyis gnod pa byas pa gang yin pa ni gzhan gyis so/ /gang gi phyir des ni bcom ldan 'das ma des bdag dang gzhan gyi nyon mongs pa las rgyal ba ste/ de ni 'di'i rgyu mthun pa yin zhes gsungs so/ /'di ni nyon mongs pa las rgyal ba'i las so/ /srog gi bar chad bya ba'i phyir gzhan gyis gnod pa bya bar mi nus pa de bas na gnod pas brdzi ba med pa nyid do/ /de nyid bstan pa'i phyir/ kau shi ka yang gal te zhes bya ba la sogs pa nas/ gnyis ka la gnod par bya bar yang mi sems so zhes bya ba'i bar gyis gsungs so/ /de la zhes bya ba ni lus la'o/ /de ci'i phyir zhe na zhes bya ba ni lus la phog par mi 'gyur bas ga las shes zhes bya ba'i tha tshig go/ /lan ni rig sngags chen mo zhes bya ba la sogs pa gsungs so/ /dus thams cad du yul thams cad la mi mthun pa'i phyogs thams cad thogs pa med pa'i mthu yod pas na go rims bzhin du chen po dang / tshad med pa dang / gzhal du med pa'o/ /de bas kyang lhag ma'i mthu yod pa'i phyir bla na med pa'o/ /mnyam pa med pas na mi mnyam pa'o/ /mnyam pa med pa dang mnyam pas na mi mnyam pa'o/ /mnyam pa dang mnyam pa ni mnyam pa dang mnyam pa ste cung zad dma' ba'o/ /de yang med pa ni mi mnyam pa dang mnyam pa'o/ /bdag la gnod pa ni nye bar gnod par byed pa'o/ /de bzhin du gzhan dag dang gnyis ka la yang ngo / /de nus kyang mi sems pa ni sems kyi bya ba ma yin no/ /de bas na gzhan gyi gnod pas brdzi ba med pa nyid ni 'di'i las yin te/ de ni gnod pas brdzi ba med pa'i las kyis so/ /byang chub dang ni zhes bya ba ni bla na med pa yang dag par rdzogs pa'i byang chub yin te las lnga'o/ /de bstan pa'i phyir gnyis ka la mi sems pa ni 'og nas zhes pa nas gzhan yang kau shi ka shes rab kyi pha rol tu phyin pa zhes bya ba la sogs pa'i bar gyis gsungs so/ /de zhes bya ba ni rnam pa thams cad mkhyen pa'i sems so/ /rnam par lta bar 'gyur ro zhes bya ba ni gdul bya la sogs pa'i don du'o/ /de ci'i phyir zhe na zhes bya ba ni rnam pa thams cad mkhyen pa'i ye shes te/ de dag las shes she na/ gang ma thob pa de ni gang yang med de zhes bya ba ni gang gi phyir sangs rgyas kyi chos thams cad thob par bya ba'i phyir te/ de yang so sor rang gis rig pa yin no/ /gal te 'dis thob par ma gyur na ni 'di thams cad mkhyen pa'i sngags dang yang ldan par mi 'gyur na/ gang gi phyir 'dis ma thob par gyur pa de gang yang yod pa ma yin pa de'i phyir thams cad shes pa yin te/ des na gang 'dis shes par ma gyur pa de ni gang yang yod pa ma yin te/ de ltar mi shes pa yang ma yin no/ /rab kyi mthar phyin pa dang / mngon sum gyi shes pa 'dir bzung ste/ des na gang 'dir mngon sum du ma byas par gyur pa de gang yang med do zhes gsungs so/ /lam gyi sgra ni phan tshun rnam par rtog pa la stong pa'i don to/ /de'i phyir de ni thams cad mkhyen pa dang / ye shes thams cad dang / de nyid yang dag par rdzogs pa'i byang chub ces bya ste/ de ltar na thams cad shes pa ni rdzogs pa'i byang chub po/ /yang dag pa zhes bya ba ni mngon sum du byed pa yin te/ de nyid mi mthun pa'i phyogs kyi gnyen po yin pa'i phyir ro/ /thams cad las khyad par du gyur pa'i phyir yang dag par rdzogs pa'i byang chub dang thams cad mkhyen pa'i ye shes rnams ni tha snyad tsam du tha dad pa yin gyi dngos po ni ma yin no/ /mngon par rdzogs par sangs rgyas pa zhes bya ba ni thob pa'o/ /de ni yang dag par rdzogs pa'i byang chub kyi las so/ /rten mchod ni zhes bya ba la/ rten ni rnam pa gnyis te/ gcig ni glegs bam du byas pa'o/ /de las gzhan pa ni 'dzin pa nas kha ton byed par 'gyur zhes bya ba'i bar ro/ /de bas na mchod pa nyid de de ltar na de ni rnam pa gnyis so/ /der phyogs pa'i sems can gzhan dag la rnam par mi 'tshe ba yin te/ de gnyis kyang go rims bzhin du gnas pa kau shi ka zhes bya ba'i tshig gnyis po'i phan yon 'di dag kyang yongs su 'dzin to zhes bya ba'i bar gyis gsungs so/ /chung ngu na zhes bya ba ni mchog tu ma gus pa'o/ /bzhag pa ni 'og tu bkur sti mi byed pa'o/ /glags ni mthong ba dang skabs so/ /ma gtogs zhes bya ba ni skye ba snga ma'i lan grangs gzhan la myong ba dang / myong bar ma nges pa'i rnam par smin pa'i mi dge ba'i las ni sngon gyi las so/ /de'i rnam par smin pa ni mi 'dod pa'i 'bras bu'o/ /'di la zhes bya ba ni ji skad bstan pa'o/ /dper na zhes bya ba la sogs pa ni dpe'o/ /de bzhin du zhes bya ba la sogs pas ni dpe dang ldan par bstan to/ /byang chub kyi snying po'i nang na 'dug pa zhes bya ba la/ byang chub kyi don du snying po ni byang chub kyi snying po'i snying po sra ba ste de la bzhugs nas byang chub rtogs pa'i phyir ro/ /gang gis sra ba yin zhe na/ gser gyi rang bzhin gyis so/ /de ltar na bskal pa dang po chags pa ni gser gyi rang bzhin gyi sa gzhi dang / rin po che sna bzhi'i ri rab dang / gser gyi ri bdun dang / rol pa'i mtsho bdun grub ste/ phyi rol du ni rgya mtsho chen po dang / lcags kyi ri mngon par grub bo/ /gser gyi rang bzhin gyi sa la rdo rje'i rang bzhin gyi sra ba grub bo/ /gang sa'i rang bzhin gyi gling bzhi dang gling phran dang brgyad grub pa'o/ /nang na 'dzam bu'i gling gi lte bar gyur pa yin te/ de yang rdo rje'i rang bzhin yin pa'i phyir dang / byang chub pa'i gnas yin pas rdo rje'i gdan zhes brjod do/ /byang chub kyi snying po der 'dug pa ni phyin pa'o/ /kun gyi dngos po ni kun nas so/ /khor yug ni kun nas yongs su 'khor ba'o/ /nang na zhes bya ba ni dbus so/ /byang chub kyi phyir gyi shing ni byang chub kyi shing ngo / /de'i drung na bzhugs nas byang chub rtogs pa'i phyir ro/ /de'i rtsa ba'i nye 'khor de na 'dug go/ /'am gyi sgra ni rnam par rtog pa'i don du phan tshun ltos pa yin no/ /kyal ka zhes bya ba ni rnam par 'tshe ba'o/ /gsod pa zhes bya ba ni gzugs la sogs pa'i gnyen po yin pa'i phyir ro/ / gnod par byed pa zhes bya ba ni 'byung po dang / sha za la sogs pas gnod par byed pa'i phyir ro/ /mi 'jigs pa dang / kho na med pa dang / mi skrag pa ni byams pa chen po'i ming can gyi tshad med pa'o/ /ston pa zhes bya ba ni bdud dpung dang bcas pa yod bzhin du rnam par gnon pa'i phyir ro/ /brjod pa zhes bya ba ni sgrub par byed pa'o/ /mchod rten du gyur pa zhes bya ba la/ de dang 'dra bar gyur pa ni der gyur pa'o/ /dri ma med par bya ba la sogs pas bsal bar 'os pa'i phyir ni gsol ba'o/ /gang gi phyir mchod rten du gyur pa des na der 'dug pa la gzhan gyis klan ka mi byed do/ /gang gi phyir skyabs la sogs pa yin pa des na der 'dug pa la gnod pa med par 'gyur ro/ /der nye bar gnas pa la skyabs med pas na skyob pa'o/ /'jigs pas nyen te nye bar 'ongs pa ni skyabs so/ /mi 'jigs pa'i don du 'dir gnas pas na gnas so/ /mchog tu bgrod pa'i gnas yin pas na dpung gnyen te mchog tu bgrod pa'o/ /de ni rten gyi mchod pa ste las drug go/ /'jig rten pa'i bsgom pa'i lam dang po brjod par bya ste/ dang po yin pa'i phyir ro/ /de yang rnam pa gnyis te/ mos pa yid la byed pa dang / bsngo ba yid la byed pa dang / rjes su yi rang ba yid la byed pa'o/ /de la mos pa yid la byed pa'i dbang du byas nas bstan bcos las/ /mos pa rang gi don dang ni/ /rang gzhan don dang gzhan don dang / /rnam gsum shes bya zhes bya ba la/ rang ni rang nyid do/ /rang dang gzhan dang gzhan kho na'i zhes bya ba'i don to/ /don dang gtso bo dang bsam pa gang la yod pa de ni go rims bzhin du rang gi don dang / rang dang gzhan gyi don dang gzhan gyi don nyid do/ /bstan bcos las/ de yang so sor rnam pa gsum/ /chung dang 'bring dang chen po ste/ /'dod ces gsungs so/ /de yang zhes bya ba rang gi don la sogs pa'o/ /rnam pa gsum zhes bya ba ni gsum gyi dbye bas so/ /de yang bstan bcos las/ chung ngu'i chung sogs dbye ba yis/ zhes smos te/ de yang rnam pa gsum ste/ chung ngu'i chung ngu la sogs pa so sor chung ngu'i chung ngu la sogs pa'i dbye ba ste/ dper na rang gi don la mos pa la yang chung ngu'i chung ngu dang / chung ngu'i 'bring dang / chung ngu'i chen po dang / 'bring gi chung ngu dang / 'bring gi 'bring dang / 'bring gi chen po dang / chen po'i chung ngu dang / chen po'i 'bring dang / chen po'i chen po dang / de bzhin du rang dang gzhan gyi don dang / de bzhin du gzhan gyi don la yang gsum gsum du sbyar te/ de ltar de yang nyi shu rtsa bdun du 'dod pa yin no/ /de yang zhes bya ba ni de ltar na gsum yin te gsum du dbye bas nyi shu rtsa bdun du 'dod do/ /mos pa zhes bya ba ni dad pa dang 'dun pa ste/ rigs pa dang ldan pa'i mtshan nyid la mos pa'o/ /mdo dang mdo'i don gyi ngo bo ni bcom ldan 'das ma dang de'i dpyad pa'i yi ge 'dri ba la sogs pa'i lus dang / de la mchod pa me tog la sogs pa rnam pa mang po dag gis so/ /spyod pa dang mchod pa las byung ba'i bsod nams ni mdo ji lta ba bzhin du ste/ de la dang po ni de skad ces bka' stsal pa dang / bcom ldan 'das la lha'i dbang po brgya byin gyis zhes bya ba la sogs pa nas/ shes rab kyi pha rol tu phyin pa la sogs pa mchod pas mchod par 'gyur zhes bya ba'i bar gyis gsungs so/ /bris nas zhes bya ba ni rang gis so/ /glegs bam du chud par bgyis pa ni gzhan gyis so/ /lha'i zhes bya ba ni khyad par du gyur pa ste/ /dri ngan pa la sogs pa spang ba'i phyir te/ me tog ni sil ma'o/ /phreng ba ni me tog gi phreng ba'o/ /dri ni shing dri can no/ /byug pa ni sbyar ba'i dris byugs pa'o/ /phye ma ni a ga ru dang tsan dan la sogs pa'o/ /na bza' ni gos kyi bye brag go/ /mchod pa mang po ni zhal zas la sogs pa'o/ / rnam pa mang po ni bza' ba dang / stan la sogs pa'i bye brag dag gis so/ /me tog la sogs pa dag gis bkur sti bgyis zhes bya bar sbyar te/ mchod par byas zhes bya ba'i don to/ /bla mar bgyis pa dang zhes bya ba ni gus pa'o/ /ri mor bgyis zhes bya ba ni dang bas so/ /mchod pa zhes bya ba ni rab tu 'dud pa dang / thal mo sbyar ba dang bstod pa la sogs pa dag gis so/ /rjed pa ni g.yas phyogs su bskor ba'o/ /gsol ba ni me tog rnyis pa la sogs pa 'phyags pa dang gsol ba'o/ /sku zhes bya ba ni sku gdung ngo / /mchod rten gyi nang du zhes bya ba ni mchod pa'i gnas kyi nang du'o/ /stsal te zhes bya ba ni bzhag pa'o/ /yongs su 'dzin cing zhes bya ba ni za ma tog la sogs pa'i nang du bcug pa'o/ /bcang ba yang za ma tog la sogs par bcug pa bcangs shing bkur ba'o/ /de dag la yang zhes bya ba ni mchod pa dang bcas za ma tog la sogs pa'o/ / gang 'di thams cad mkhyen pa nyid kyi sku zhes bya ba ni thams cad mkhyen pa'i bdag nyid kyi dngos po'o/ /de mngon par grub pa lam gang la bslabs pas mngon par rdzogs par sangs rgyas zhes bya ba'i bar du'o/ /thams cad mkhyen pa nyid de gang yin zhe na/ bla na med pa yang dag par rdzogs pa'i byang chub dang thams cad mkhyen pa nyid mngon par grub pa zhes smras so/ /mngon par grub pa zhes bya ba'i don gang yin zhe na/ mngon par rdzogs par sangs rgyas zhes bya ba smras so/ /'di'i don yang ma skyes zhes bya ba smras so/ /'di nyid ces bya ba ni de kho na la'o/ /bdag gi dngos po yang yin la bdag tu btags pa yang yin pa'i sku ni gzugs kyi sku'o/ /de bzhin gshegs pa 'gro ste gang du 'gro zhe na/ de bzhin gshegs pa zhes bya ba'i grangs su 'gro ba'i phyir ro/ /shes rab kyi pha rol tu phyin pa dang thabs la mkhas pa gnyis las byung ba yin na ni rab tu dbye gzhi ston pa yin te/ rab tu dbye ba ni 'jig rten la grags pa'o/ /'di nyid ni bcom ldan 'das la mchod pa byed pa'o/ /de'i gzhi las zhes bya ba ni de bzhin gshegs pa'i sku la mchod pa byed pa la'o/ /lhag ma rtogs par sla'o/ /de ni rang gi don la mos pa chung ngu'o/ /de skad ces bka' stsal pa dang / bcom ldan 'das la lha'i dbang po brgya byin gyis zhes bya ba la sogs pa nas/ shes rab dman pa zhes bya ba'i bar gyis ni gnyis pa bstan to/ /'dri bar zhes bya ba nas rab tu 'don par bgyid ces bya ba'i bar du rang gi don to/ /de'i 'og tu gzhan gyi don ni de la 'chad par byed pa ni bstan pa'o/ / gsum gyis ni rjes su bstan pa'o/ /'chad par byed pa ni don las so/ /lung nod par bgyid ces bya ba ni gdams ngag tu byed pa'o/ /nye bar ston pa ni tshig las so/ /kha ton du byed ces bya ba ni kha ton du goms par byed pa'o/ /ma bgyis na de ltar 'gyur na ni 'bras bu che ba nyid du 'gyur ba'o/ /rtogs par ma gyur pa ni thob par ma gyur pa ste sgra las so/ /rig par ma gyur zhes bya ba ni glegs bam las ma thob pa'o/ /'on te zhes bya ba ni phyogs gzhan rtogs par byed pa'o/ /rig par byed ces bya ba la shes pas na rig pa ste don rig pa'o/ /de byed pas na shes par byed pa'o/ /rtogs nas zhes bya ba ni 'jig rten las 'das pa'i shes pa bden pa rnams shes nas so/ /dad pa ni sems la yod pa'i chos te/ gang gis sems la shin tu dri ma med par byed pa chu rnyog pa can la rnyog pa dang bral bar byed pa'i nor bu bzhin no/ /rgyun tu zhugs pa nyid rgyun tu zhugs pa'i 'bras bu'o/ /lan cig phyir 'ong ba dang phyir mi 'ong ba'i 'bras bu nyid lam mo/ /dgra bcom pa'i dngos po ni dgra bcom pa nyid de 'bras bu bzhi pa'o/ /bdag gcig pu so sor rtog pas ni rang sangs rgyas so/ /rgyas par bya ba ni 'phel bar bya ba'o/ / phyir mi ldog pa la phan pa ni phyir mi ldog pa'o/ /bsgrub dka' ba ni rnyed par dka' ba'o/ /brtson 'grus ni dge ba'i las la brtson pa'o/ /le lo ni las ngan pa la zhen pa'o/ /sems stobs ni brtan pa'o/ /ting nge 'dzin ni ting nge 'dzin to/ /'du shes ni dran pa'o/ /mos pa ni dad pa'o/ / de kho na nyid rnam par 'byed pa ni shes rab bo/ /dad pa la sogs pa'i dbang po nyam chung ba ni brtson 'grus zhan pa la sogs pa'i tshig tu brjod do/ /de la brtson 'grus zhan pa dang le lo ni brtson 'grus kyi dbang po nyam chung ba'o/ /sems stobs zhan pa dang / sems dman pa ni ting nge 'dzin gyi dbang po'o/ /'du shes dman pa ni dran pa'i dbang po'o/ /mos pa dman pa ni dad pa'i dbang po'o/ /shes rab dman pa ni shes rab kyi dbang po'o/ /'thad pa dang bcas pas bcom ldan 'das ma rtogs par dka' ba'i shes pa ni dpyod pa shas che ba'o/ /bsod nams shas che ba ni brtag par bya ba ste/ lhag ma ni snga ma bzhin no/ /de ni rang gi don la mos pa chung ngu'i 'bring ngo / /kau shi ka de bas na zhes bya ba la sogs pa nas rab tu 'brang bar bya'o zhes bya ba'i bar gyis ni gsum pa'o/ /rgyun mi 'chad par mnyan par bya ba la sogs pa nas yongs su 'dri bar byed ces bya ba'i bar yang the tsom chad pa'i don te/ rab tu 'brang bar bya'o zhes bya ba'i mtha' na 'dug pa yang 'thad pa dang bcas pa'i shes pa ste/ de ni dpyod pa lhag ma'o/ /bsod nams lhag pa ni brtag par bya ba ste/ lhag ma ni snga ma bzhin te/ de ni rang gi don la mos pa chung ngu'i chen po'o/ / kau shi ka de bas na zhes bya ba la sogs pa nas/ bsod nams mang du skyed do zhes bya ba gnyis pa'i bar gyis ni bzhi pa bstan to/ /rin po che sna bdun dag ni gser dang / dngul dang / bai DUr+ya dang / mu sa la garba dang / pad+ma rA ga dang / mu tig dang / ke ke ru'o/ /de'i gzhi las zhes bya ba ni de'i rgyu las so/ /bcom ldan 'das ma la dad cing mos pa ni sems dang ba'o/ /lhag pa'i bsam pa ni sems bskyed pa'o/ /nyan pa la sogs pa dang / 'di'i don rnam par 'grel pa dang / yid kyis rjes su rtog pa dang / yongs su dpyod pa dang / glegs bam du chud par byas pa dang / dam pa'i chos yun ring du gnas par bya ba dang / tshul dang ma bral bas bzhag pa ni spyod pa lhag pa'o/ /bsod nams lhag pa ni gzhung ji lta ba bzhin te/ lhag ma ni snga ma bzhin te/ de ni rang gi don du mos pa 'bring gi chung ngu'o/ /kau shi ka rin po che sna bdun gyi mchod rten lta zhog ces bya ba nas bsod nams mang du bskyed do zhes bya ba gnyis pa'i bar gyis ni bsngo ba bstan to/ /gling rdza rnga chen po tsam gyi 'bras bu yod pa'i shing 'dzam bus mtshon pa'i phyir 'dzam bu'i gling ngo / /de'i gzhi zhes bya ba ni 'di las skye ba gang la yod pa de la de skad ces bya'o/ / lhag ma ni rtogs sla'o/ /'di la sogs pa gang du phan yon brjod pa ni spyod pa lhag pa'o/ /de la gang ji skad bstan pa'i phan yon gyis dad pa lhag par bskyed pa de ni spyod pa lhag pa ste/ de ni rang don la mos pa 'bring gi 'bring ngo / /kau shi ka gling chen po bzhi pa lta zhog gi zhes bya ba la sogs pa nas/ bsod nams mang du bskyed do zhes bya ba gnyis pa'i bar gyis ni drug pa bstan to/ /'di la gling chen po yod pas na gling chen po bzhi pa'o/ /'jig rten 'dzin pas na 'jig rten gyi khams so/ /lhag ma ni snga ma bzhin te/ de ni rang gi don la mos pa 'bring gi chen po'o/ / kau shi ka stong spyi phud kyi 'jig rten gyi khams lta zhog gi zhes bya ba la sogs pa nas bsod nams mang du bskyed do zhes bya ba gnyis pa'i bar gyis ni bdun pa'o/ /'di la gling bzhi pa stong gi tshad yod pa de ni gling bzhi pa stong ngo / /de nyid tshad pas spyi phud dang ldan pa'i phyir spyi phud de/ de ni rang gi don la mos pa chen po'i chung ngu'o/ /de gnyis ni brgyad pa'o/ /'di la stong gnyis kyi tshad yod pa/ de ni stong gnyis pa ste/ stong spyi phud stong zhes bya ba'i don to/ /de ni bar ma yin te/ stong chung ngu dang / stong chen po'i bar yin pa'i phyir ro/ /de ni rang gi don la mos pa chen po'i 'bring ngo / /de nas de'i 'og tu ni dgu pa'o/ /'di la stong gsum yod pa ni stong gsum ste/ stong gnyis pa stong pa zhes bya ba'i don te/ de nyid stong chen po yin te/ de ni rang gi don la mos pa chen po'i chen po'o/ /kau shi ka stong gsum gyi stong chen po lta zhog gi zhes bya ba la sogs pa nas gsol bar gyur to zhes bya ba'i bar gyis ni bcu pa bstan to/ /stong gsum gyi 'jig rten gyi khams na sems can thams cad mi lus thob pa'o/ /'di la snga ma med pa dang / phyi ma med pa ni snga phyi med pa ste/ lhan cig ces bya ba'i don to/ /sems can snga phyi med par lhan cig skye bar rjes su shes pa'o/ /lhag pa yongs su zhes bya ba ni ji srid 'tsho'i bar du mchod rten la mchod pa byed pa'o/ /'dir yang bskal pa'am/ bskal pa las lhag par 'di la yang sil snyan dang / glu dbyangs thams cad dang / gar la sogs pa dang / me tog la sogs pa thams cad kyis mchod rten la mchod pa lhag pa'o/ /bcom ldan 'das ma la sogs pa'i bsod nams lhag pa dang / rigs pa'i shes pa'i mtha'i bar gyis bstan to/ /de ni 'dir spyod pa dang mchod pa lhag pa ste/ de ni rang dang gzhan gyi don la mos pa chung ngu'i chung ngu'o/ /bcom ldan 'das rnam grangs 'di lta bu lta zhog gi zhes bya ba nas shes rab kyi pha rol tu phyin pa'i rgya mtsho chen po 'di las skyes so zhes bya ba'i bar gyis ni bcu gcig pa bstan te/ stong gsum gyi gang gA'i klung gi bye ma snyed kyi zhes bya ba ni mchod rten la mchod pa'i khyad par ro/ /lhag ma ni bcu pa bzhin no/ /bcom ldan 'das ma la spyod pa dang mchod pa rigs pa dang bcas pa'i phan yon rgya chen po yongs su shes pa ni lhag pa'o/ /'di lta bu nyid du bsam pa las 'das pa'i phyir bsam gyis mi khyab pa'o/ /'dra ba med pa'i phyir mtshungs pa med pa'o/ /mngon par 'du byed pa zhes bya ba ni bsod nams kyi las so/ / brgya'i char yang zhes bya ba la sogs pa nas stong gi char yang nye bar mi 'gro'o zhes bya ba'i bar gyis tshig la yang cha zhes bya bar sbyar ba'i don to/ /'dir cha ni cha shas so/ /nye bar mi 'gro zhes bya ba ni mi thob pa'i don to/ /char yang nye bar mi 'gro bar ma zad kyi/ 'on kyang mtshungs pa'i don du grangs dang char yang nye bar mi 'gro ba yin no/ /yang gi sgra ni phan tshun ltos pa'i bsdu ba'o/ /ji ltar char yang nye bar mi 'gro zhes bstan pa ltar ji ltar grangs su nye bar mi 'gro zhe na/ grangs las lhag par yang mtshungs pa med pas so/ /bsod nams snga ma des brgya stong dang bye ba brgya stong gis kyang phyi ma'i bsod nams dang mtshungs par mi bzod pa yin no/ /grangs ni bgrang ba ste skye 'bri la sogs pa'o/ /ji ltar mi 'gro zhe na/ de shin tu shas che yang mnyam pa med pa'i phyir ro/ /snga ma'i bsod nams des lnga phrag gam/ bcu phrag gam/ nyi shu phrag gam/ 'bum phrag gam/ bye ba brgya phrag gis kyang phyi ma'i bsod nams la mnyam par mi bzod pa'o/ /dpe dang / dpes bstan par bya ba dang / rgyur yang nye bar mi bzod do zhes bya bar sbyar ro/ /dpe yin pas dper yang ngo / /de nyid dpes zhes bya ba ni dpes bstan par bya ba'o/ /rgyu nyid ni rgyu nyid do/ /dpe tha dad pas na dpe'o/ /grangs kyi dpe ni dpes bstan par bya'o/ /grangs kyi dpe yin pas rgyu'o/ /de dag gsum gyis kyang mnyam pa med pa ni mi bzod pa'o/ /dper na bcu'i grangs kyi dpe 'am/ bcu ldab la sogs pa'i grangs kyi dpe 'am/ bskal pa'i grangs kyi dpes kyang mnyam par mi bzod pas so/ /rgyur yang nye bar mi bzod do zhes bya ba ni de ltar shin tu mtshungs pa med pas mnyam pa'i don du mtshungs pa med pa gnas pa ste/ de la yang rigs pa ma yin no zhes bya ba'i don to/ /grogs po zhes bya ba ni jo bo zhes bya ba'i don to/ /sems kyi rgyu ba zhes bya ba ni bsam pa'o/ /dran par byos shig ces bya ba ni dran pa'o/ /kha ton du byos shig ces bya ba ni yid kyis brjod pa'o/ /rig sngags chen mo zhes bya ba la sogs pa'i tshig gsum ni sngar bshad zin to/ /des na rig pa 'di las lhag pa med pa'i phyir bla na med pa'o/ /chos 'di las lhag pa med pa'i phyir gong na med pa'o/ /rig pa 'di dang mtshungs pa med pa'i phyir mnyam pa med pa'o/ /mi mnyam pa de bzhin gshegs pa rnams te/ de dang mnyam pa'i phyir mi mnyam pa dang mnyam pa'o/ /rab tu 'byed do zhes bya ba ni rab tu ston pa'o/ /byang chub kyi yan lag bdun dang yang dag par ldan pa zhes bya ba ni/ de la brten pa'i phyir des yongs su bzung ba dang gnyis pa'o/ /sangs rgyas rnams kyi shes pa ni ye shes so/ /rang nyid 'byung bas rang 'byung ngo / /bsam pa las 'das pa'i phyir bsam gyis mi khyab pa'o/ /sngon thos pa'i zhes bya ba ni sngon thos pa las byung ba de'i spyod pa'o/ /sman dang skar ma zhes bya ba ni sman dang skar ma dag go/ /snang bar byed ces bya ba ni gsal bar byed pa dag go/ /chos ni mya ngan las 'das pa ste/ chos thams cad kyi nang na mchog tu gyur pa'i phyir ro/ /de nyid mtshungs pa ste nyon mongs pa dang sdug bsngal zhi bar byed pa'i phyir te/ de ni spyod pa'o/ /dge ba ni bzang po ste de'i spyod pa'o/ /ya nga ba ma spangs pas 'chi ba de'i rgyu spangs pa ni ya nga ba yongs su spangs pa 'di ni bstan pa'o/ /lhag ma ni rjes su bstan pa'o/ /dbyig pas zhes bya ba ni dbyug pa la sogs pa'o/ / yongs su bzung ba'i zhes bya ba ni rab tu bzung ba'i phyir ro/ /nye bar gnas par 'gyur zhes bya ba ni de'i mthus de ltar 'gyur ba'i phyir ro/ /gdug pa ni ri dgas gdug pa'o/ /sdig sbrul zhes bya ba ni sbrul te/ yon por 'gro bas te de dag gi dgon pa'o/ /ma gtogs par zhes bya ba ni gang sngon gyi las kyi rnam par smin pa nyid la sogs pa bor ba'o/ /dran pas bsams pa zhes bya ba ni yid la bya bas so/ /zhe 'gras pa'i sems kyis zhes bya ba ni sems can la zhe sdang ba'i sems kyis so/ /mig mi rtsol ba ni yid la byed pa'o/ /dpung gi tshogs ni dmag gi phung po'o/ /de ni glang po dang / rta dang / rkang thang dang / shing rta ste rnam pa bzhi'o/ /bkod pa ni 'dus pas so/ /gzugs can snying po ni ma ga d+hA'i bdag po'o/ /gsal rgyal ni mnyan yod kyi bdag po'o/ /shAkya ni shAkya'i rigs su skyes pa'o/ /lits+tsha bI ni rgyal rigs yangs pa can gyi bdag po'o/ /slar log pa ni log par gyur pa'o/ /bar snang gi nam mkha' la 'dug nas zhes bya ba ni nam mkha' nas nam mkhar 'dug pa'o/ /yun ring mo ni yun ring mo zhig gis so/ /nang du byung ngo zhes bya ba ni yang byung ba'o/ /ngan ngon ma yin pa ni bskal par bsags pa'i dge ba'i rtsa bas so/ /ji ltar shes rab kyi pha rol tu phyin pa de bzhin du yin pas na de bzhin nyid du'o/ /shes rab kyi pha rol tu phyin pa de bzhin du tshel ba las zhes bya ba ni rang dang gzhan gyi don la mos pa chung ngu'i 'bring ngo / /de nas bcom ldan 'das la tshe dang ldan pa kun dga' bos zhes bya ba la sogs pa nas yongs su 'dren pa gnyis pa'i bar gyis ni bcu gnyis pa bstan to/ /pha rol tu phyin pa drug gi nang na 'dren pa la sogs pa nyid kyis zhes pa rigs pa dang bcas pa ni spyod pa lhag pa yin no/ /bsod nams lhag pa ni brtag par bya ba ste lhag ma ni snga ma bzhin te/ yon tan ni bstod pa 'am bsngags pa'o/ /sngon du 'gro ba ni thog mar 'gro ba'o/ /'dren pa zhes bya ba ni yang dag par sdud par byed pa'o/ /yongs su 'dren pa zhes bya ba ni yang dag par 'phel bar byed pa'o/ /pha rol tu phyin pa zhes bya ba ni rang nyid mchog tu gyur pa nyid pas pha rol tu phyin pa'o/ / gzhan dag ni thams cad mkhyen pa nyid du bsngos pa nyid kyis so/ /lhag ma ni rtogs par sla ste/ de ni rang dang gzhan gyi don la mos pa chung ngu'i chen po'o/ /de nas bcom ldan 'das la lha'i dbang po brgya byin zhes bya ba la sogs pa nas/ yon tan ngas bshad par bya'o zhes pa'i bar gyis bcu gsum pa bstan to/ /gang 'di glegs bam du chud par byas te/ dam pa'i chos yun ring du gnas par bya ba'i phyir gzhan la mchod pa byed pa 'di thams cad ni phan yon te/ de ltar shes pa tsam ni spyod pa lhag pa yin te/ 'di ni rang dang gzhan gyi don la mos pa 'bring gi chung ngu'o/ / de skad ces bka' stsal pa dang zhes bya ba la sogs pa nas gzhan yang zhes bya ba la sogs pa gnyis ka'i bar gyis ni bcu bzhi pa bstan to/ /spyod pa lhag pa ni mdo ji lta ba bzhin du shes par bya'o/ /'di ni rang dang gzhan gyi don la mos pa 'bring gi 'bring ngo / /gzhan yang zhes bya ba la sogs pa yang kau shi ka sa phyogs gang du yang zhes bya ba'i bar gyis ni bco lnga pa bstan to/ /brgal ba zhes bya ba ni dri ba yin te/ 'di ni rang dang gzhan gyi don la mos pa 'bring gi chen po bstan to/ /yang kau shi ka sa phyogs gang du zhes bya ba la sogs pa nas de skad ces bka' stsal pa dang zhes bya ba la sogs pa'i bar gyis ni bcu drug pa bstan to/ /lha la sogs pa thams cad dad pa dang ldan pas 'ongs nas de rnams la chos kyi sbyin pa mdzad pa ni spyod pa lhag pa'o/ /'dir rang dang gzhan gyi don la mos pa chen po'i chung ngu'o/ /de skad ces bka' stsal pa dang zhes bya ba la sogs pa nas tshe 'di la yon tan 'di dag yongs su 'dzin par 'gyur ro zhes bya ba'i bar gyis ni bcu bdun pa bstan to/ /lha la sogs pa 'ongs pa nas mchod par shes pa dang / dga' ba skyes pa dang / dad pa la sogs pa ni bcom ldan 'das ma'i mthu yin te de ni spyod pa lhag pa'o/ /mthong na zhes bya ba ni yang dag par mthong ba'o/ /nges par zhes bya ba ni gdon mi za bar ro/ /rtogs par bya'o zhes bya ba ni shes par bya'o/ /mi ma yin pa'i dri zhes bya ba la mi nyid kyi dngos po ni mi'o/ /de ma yin pa ni mi ma yin pa'o/ /mi gtsang ba med pa ni ngo tsha ba phyed pa'o/ /me tog la sogs pa dang ldan pa'i phyir gtsang sbra'o/ /'byor par sems pa ni 'gro bar sems pa'o/ /ngal ba ni gnod pa'o/ /rgya chen po zhes bya ba ni shin tu rgya che ba'o/ /bde bar 'gro bar 'gyur zhes bya ba ni bde ba dang 'da' bar 'gyur ba'o/ /brkam pa ni mngon par 'dod pa'o/ /'du shes ni dran pa'o/ /'di ni rang dang gzhan gyi don la mos pa chen po'i 'bring ngo / /kau shi ka gzhan yang zhes bya ba la sogs pa nas le'u rdzogs kyi bar gyis ni bco brgyad pa bstan to/ /spyod pa lhag pa ni mdo ji lta ba bzhin du sbyar te 'di ni rang dang gzhan gyi don la mos pa chen po'i chen po'o/ /dpag tu med pa zhes bya ba la sogs pa la 'dir mchod rten ni mchod pa'i gnas so/ /pha rol tu phyin pa ni shes rab kyi pha rol tu phyin pa'o/ /'dzin pa ni rnam pa gsum ste/ glegs bam du chud par byas nas gang bsrung zhing dam pa'i chos yun ring du gnas par bya ba'i phyir bzhag pa dang / gang 'dzin pa dang 'chang ba la sogs pas bdag nyid la bzhag pa ni gnyis pa'o/ /gang la dpag tu med pa'i yon tan 'dzin pa de la de skad ces bya'o/ /de skad du gsungs pa'i 'bru mang po pa ni pha rol tu phyin pa yang yin te de dang mchod rten zlas dbye bar bya'o/ /de gnyis ka la bsnyen bkur ba me tog la sogs pas mchod pa'o/ /de brjod pa'i le'u ni dpag tu med pa yon tan bzung ba dang / pha rol tu phyin pa dang mchod rten la ri mor bya ba'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u gsum pa'o/ / //mos pa'i dbang du byas nas de la bdag gi don dgu dang / bdag dang gzhan gyi don dgu bstan to/ /le'u 'dir yang bdag gi don dgu bshad par bya ste/ de la dang po de bzhin sku gdung de dag la zhes bya ba'i bar gyis ni bcu dgu pa bstan to/ /shes rab kyi pha rol tu phyin pa nyid chos kyi sku yin pa'i phyir lhag pa'i chos kyi phyir de ltar gzugs kyi sku la ni ma yin te/ 'jig tshogs yin pa'i phyir ro/ /'di ltar des na don de la dad pa dang / dad pa shugs kyis lhag par rtogs pa yin te/ de ni 'dir spyod pa lhag pa'o/ /de bzhin gshegs pa'i sku ni gdung dag go/ /drug pa ni byas pa'i drug par byas te de byur bur gtams pa'o/ /ji de gnyis mnyam pa 'am zhe na/ ma yin te byur bur zhes smras so/ /bzhag ste zhes bya ba ni nye bar 'god pa'o/ /'di gnyis las gcig khyer cig ces bya ba ni sems la khyer cig pa'o/ /ri mor bgyi zhes bya ba ni lhag par gus pa'o/ /de dag las bcom ldan 'das ma ni bla ma dam pa yin te/ gang gi phyir 'di'i sku ni shes rab kyi pha rol tu phyin pa'o/ /yang dag pa'i don ni de kho na nyid kyi don te de dang ldan pa ni yang dag pa'i don can no/ /'jig tshogs ni gzugs kyi sku ste/ 'jig pas na 'jig pa ste mi rtag pa'o/ /'jig pa yang yin/ tshogs pa yang yin pas na 'jig tshogs de gzugs kyi sku'o/ /chos kyi sku yongs su rdzogs pa'o zhes bya ba la 'dir chos ni 'phags pa'i lam ste de yang rab kyi mthar phyin pa'i shes rab kyi pha rol tu phyin pa nyid ni mi rtag pa yang ma yin te/ rgyun rtag pa'i phyir ro/ /yang dag pa'i mtha' rab tu phye ba la yang dag pa ni de kho na nyid do/ /de dag gi mtha' ni rtse'o/ /de las lhag pa'i de kho na nyid ni med pas de nyid kyis rab tu phye ba la de'i bdag nyid du tha snyad btags pa'i phyir ro/ /sku gang yin zhe na/ 'di lta ste zhes pa la sogs pa gsungs so/ /de bzhin nyid tsam gyi don dam pa ni shes rab kyi pha rol tu phyin pa ste/ de las lhag pa ni ma yin no zhes bsams so/ /de bzhin gshegs pa sku gdung nyid la ri mor mi bgyid pa nyid ma yin nam zhe na/ bcom ldan 'das bdag de bzhin gshegs pa'i sku gdung la zhes bya ba la sogs pa ni rtogs par sla ste/ 'di ni gzhan gyi don la mos pa chung ngu'i chung ngu'o/ /'on kyang bcom ldan 'das zhes bya ba la sogs pa nas/ yang bcom ldan 'das 'dzam bu'i gling bltams pa lta zhog ces bya ba'i bar gyis ni nyi shu pa bstan to/ /'on te zhes bya ba ste khyad par gyi don ji ltar yang bdag de dag la ri mor byed pa de lta mod kyi zhes bya ba'i don to/ /yang zhes bya ba'i sgra ni sngar yang khyad par bstan pa'i phyir ro/ /skyes te zhes bya ba ni khyad par gyis kyang gtan tshigs su gtogs te/ skyes pa'i phyir ro zhes bya ba'i don to/ /'di lta ste dper na zhes bya ba la sogs pas ni dpe bstan to/ /lha rnams 'du ba'i dbang du byas pa'i phyir lha'i 'dun pa ste gnas chen po'o/ /gang la 'dug nas brgya byin sum cu rtsa gsum pa'i lha rnams la chos ston pa ste/ 'dir de nyid la chos bzangs zhes brjod do/ /de yang grong khyer blta na sdug gi lho nub kyi phyogs kyi cha na yod do/ /i sha ni skyes bu chen po'o/ /de'i grags pa dang so sor snang ba dang 'dod pa dang / de la chen po 'di la yod pas ni mthu che ba ste/ sems dpa' chen po zhes bya ba'i don to/ /de yang 'dir shes pa'i bdag nyid yang dag par rdzogs pa'i byang chub rgyu dang rkyen du gyur pa rgyu'i ngo bo dang / rkyen gyi ngo bo des na de nyid kyi phyir de bzhin gshegs pa zhes bya ba la sogs pa gsungs so/ /de la thams cad mkhyen pa'i ye shes ni brgya byin dang 'dra ste de bzhin gshegs pa'i sku gdung dag ni rgyu dang rkyen du gyur pa ma yin te/ brgya byin de'i bstan pa bzhin du gzugs kyi sku ni sngar chos kyi sku'i gzhir gyur pa nyid yin na zhes bstan te/ 'dir yang mthu che ba'i ye shes kyi sku'i rten dang 'dra ba yin te/ 'di ltar 'di'i don la dad pa dang / dad pa gang yin pa de ni spyod pa lhag pa ste/ 'di ni gzhan gyi don la mos pa chung ngu'i 'bring ngo / /yang bcom ldan 'das 'dzam bu'i gling byur bur bltams pa lta zhog ces bya ba nas/ de bzhin gshegs pa'i sku gdung de dag la zhes bya ba'i bar gyis ni nyi shu rtsa gcig pa bstan to/ /bcom ldan 'das ma'i bdag nyid chen po 'dir bstan pas 'dod pa dang / dang ba skyes pa yin pa de nyid 'dir spyod pa lhag pa yin te 'di ni gzhan gyi don la mos pa chung ngu'i chen po'o/ /'on kyang de bzhin gshegs pa'i sku gdung dag ni zhes bya ba la sogs pa nas de bzhin gshegs pa'i sku gdung de dag ces bya ba'i bar gyis ni nyi shu rtsa gnyis pa bstan to/ /gang gi phyir de bzhin gshegs pa ni 'jig rten thams cad las mngon par 'phags pa'i phyir mchod pa'i 'os shin tu mchod par bya ba yin la de la thams cad mkhyen pa'i ye shes yin no/ /de bas na gang gi tshe sku gdung ni de'i gzhir gyur pa'i phyir mchod pa yin pa de'i tshe de skyed par byed pa ni de bas kyang mchod par bya ba yin te/ sku gdung rnams ni de lta ma yin no/ /don 'di la lhag par dad pa ni spyod pa lhag pa yin te/ 'di ni gzhan gyi don la mos pa 'bring gi chung ngu'o/ /'on kyang bcom ldan 'das shes rab kyi pha rol tu phyin pa zhes bya ba la sogs pa nas/ thams cad mkhyen pa'i ye shes kyi snod du gyur pa'o zhes bya ba'i bar gyis ni nyi shu rtsa gsum pa bstan to/ /shes rab kyi pha rol tu phyin pa thams cad mkhyen pa'i ye shes kyi yon tan 'dir bstan pa ni nor bu rin po che dang 'dra bar shes par bya ste/ rin po che de phyung yang nor bu rin po che'i za ma tog gang la re ba skye ba yin te/ de bzhin du sangs rgyas dang / de'i yum gyi yon tan gyis bcom ldan 'das yongs su mya ngan las 'das kyang sku gdung rnams mchod par 'gyur te de ni 'di la dad pa lhag pa dang / spyod pa lhag pa yin te/ gzhan gyi don la mos pa 'bring gi 'bring ngo / /bcom ldan 'das yang ji ltar sangs rgyas zhes bya ba la sogs pa nas/ bcom ldan 'das de bzhin gshegs pa'i sku gdung de dag la zhes bya ba'i bar gyis ni nyi shu rtsa bzhi pa bstan to/ /de ltar shes rab kyi pha rol tu phyin pa las skyes pa'i phyir chos bstan to/ /gzhan chos ston pa na yang mchod par 'gyur te/ rgyal ba'i skyes bu rgyal po'i mthu gang las kyang mi 'jigs par kun gyis mchod pa yin te/ de bzhin du shes rab kyi pha rol tu phyin pa las skyes pa'i phyir de'i mthus sku gdung rnams kyang mchod pa yin te/ de ltar na 'dir 'di'i don bsod nams yod pa la dad pa lhag pa dang spyod pa lhag pa yin no/ /'di ni gzhan gyi don la mos pa 'bring gi chen po'o/ /bcom ldan 'das thams cad mkhyen pa nyid ni zhes bya ba la sogs pa nas mchod par 'gyur ro zhes bya ba'i bar gyis ni nyi shu rtsa lnga pa bstan to/ /bcom ldan 'das ma la mchod pas ni dus gsum gyi de bzhin gshegs pa thams cad la mchod par 'gyur ro/ /des na 'di'i don la dad pa la sogs pa ni spyod pa lhag pa yin te/ 'di ni gzhan gyi don la mos pa chen po'i chung ngu'o/ /gzhan yang bcom ldan 'das 'jig rten gyi khams zhes bya ba la sogs pa nas yang dag par mthong ba gnyis pa'i bar gyis ni nyi shu rtsa drug pa bstan to/ /dus gsum gyi de bzhin gshegs pa thams cad kyis chos nyid mthong bar byed pa yang bcom ldan 'das ma yin te/ don 'di la dad pa la sogs pa spyod pa lhag pa'o/ /chos nyid ces bya ba la sogs pas ni chos kyi sku'o/ /de yang shes rab kyi pha rol tu phyin pa nyid yin no zhes gsungs so/ /brgya byin gyi tshig ma rdzogs pa nyid du bcom ldan 'das kyis de de bzhin no zhes bya ba la sogs pa nas da ltar nga yang mngon par rdzogs par sangs rgyas so zhes bya ba'i bar gyis gsungs so/ /brten nas zhes bya ba ni thob pa'i rgyur byas pa'o/ /gzhung 'di tsam gyis ni bcom ldan 'das ma yang dag par rdzogs pa'i sangs rgyas kyi rgyur bstan to/ /chos kyi sku ni ma yin pa'i phyir ro/ /de bstan pa'i phyir yang brgya byin gyis bcom ldan 'das 'di lta ste/ shes rab kyi pha rol tu phyin pa 'di ni zhes bya ba la sogs pa smras so/ /yang dag par rab tu mkhyen to zhes bya ba ni/ spros pa med pa'i ye shes kyis mkhyen to zhes bya ba'i don to/ /yang dag par gzigs so zhes bya ba ni rnam pa thams cad du gzigs pa'i don to/ /'dir gsal bar bya ba'i phyir bcom ldan 'das kyis de de bzhin no zhes bya ba la sogs pa gsungs so/ /'di ni don la mos pa chen po'i 'bring bstan to/ /de nas bcom ldan 'das la lha'i dbang po brgya byin gyis zhes bya ba la sogs pa nas le'u rdzogs pa'i bar gyis ni nyi shu rtsa bdun pa bstan to/ /theg pa chen po de dag thams cad ni pha rol tu phyin pa rnams kyis yang dag par sdud pa yin la/ bcom ldan 'das ma ni gtso bo yin te/ de dag gi sngon du 'gro ba'i phyir dang / yang dag par bsdus pa yin pa'i phyir ro/ /'di'i don la dad pa la sogs pa ni spyod pa lhag pa yin no/ /thabs mkhas pas yongs su zin pa zhes bya ba ni bstan pa'o/ /shes rab kyi pha rol tu phyin pa dang rnam pa thams cad mkhyen pa nyid dang yongs su bsngos pa rnams la zhes bya ba ni rjes su bstan pa'o/ /de la pha rol tu phyin pa rnams kyi rang bzhin gyi dpe ni me tog la sogs pa'i shing rnams so/ /grib ma ni 'dir de dag gi grib ma ro gcig pa ste/ de dag ni thabs mkhas pas yongs su zin pa'i dpe'o/ /'di ni gzhan gyi don la mos pa chen po'i chen po'o/ /yon tan ni skabs kyis shes rab kyi pha rol tu phyin pa yin te/ de dag yongs su rdzogs pa'i le'u las de skad ces smras so/ 'phags pa shes rab kyi pha rol tu phyin pa brgyad stong pa'i dka' 'grel slob dpon rin chen 'byung gnas zhi bas rnam par sbyar ba snying po mchog ces bya ba las le'u bzhi pa'o/ / //byed pa dang mos pa bstan nas/ bstod pa dang bkur ba dang bsngags pa brjod par bya ste/ bstod pas na bstod pa'o/ /bkur bas na bkur ba'o/ /bsngags pas na bsngags pa ste de gang la yod pa ni bsngags pa ste/ rab tu bsngags pa'i don no/ /des na bstan bcos las/ shes rab pha rol phyin pa la/ /mos pa'i gnas skabs dag la ni/ /dgu tshan gsum gyis bstod pa dang / /bkur ba dang ni bsngags par 'dod/ /ces bya ba gsungs te/ shes rab kyi pha rol tu phyin pa la mos pas ni gang sngar bshad pa ste/ rang gi don dang gnyis ka'i don dang gzhan gyi cha'i dbye bas dgu tshan gsum gyis rim pa bzhin du bstod pa dang / bkur ba dang bsngags par 'dod pa yin te/ 'dod pa zhes bya ba ni bstod pa la sogs pa re re la sbyar bar bya'o/ /de la yon tan brjod pa ni chung ngu dang 'bring dang chen po'i dbye bas bstod pa dang bkur ba dang bsngags pa yin te/ de dag tu yang so sor chung ngu'i chung ngu la sogs pa dang chen po'i chen po la sogs pa'i bar gyis dbye bas dgu tshan gsum zhes bya ba'i don to/ /de dag las byang chub sems dpa'i rgyu ni rnam pa gnyis te/ gzhan gyi don byed pa'i nus pa dang / gzhan gyi don byed pa la gtso ba'o/ /de las dang po de nas bcom ldan 'das la lha'i dbang po brgya byin gyis zhes bya ba la sogs pa nas/ gzhan yang kau shi ka rigs kyi bu 'am rigs kyi bu mo gang dag ces bya ba'i bar gyis ni dang po bstan to/ /'dis ni gzhan gyi don byed pa'i nus pa dngos po gsum la mos pa shin tu brtan par bya ba ste/ gzhan gyi bya ba lung 'bogs pa dang / bcom ldan 'das ma'i yon tan dang / rang nyid de nyid byed pa la'o/ /de la dang po bcom ldan 'das la lha'i dbang po brgya byin gyis 'di skad ces gsol to zhes bya ba la sogs pa nas/ lhag par mos shing zhes bya ba'i bar gyis ni bcom ldan 'das rigs kyi bu 'am rigs kyi bu mo shes rab kyi pha rol tu phyin pa 'di la mngon par dad cing rtog la mos te zhes bya bar sbyar ro/ /gang gis mos par bya zhe na/ 'di la mngon par dad cing zhes bya ba la sogs pa nas/ tshul dang ma bral bas byang chub sems dpa' rnams la phan gdags pa bsgrub par bgyis par 'gyur bar zhes bya ba'i bar gyis gsungs so/ /ji ltar gsungs she na byang chub kyi phyir te/ byang chub tu sems bskyed pa'o/ /ji lta bu zhe na/ 'di la sems dang ba nyid kyis so/ / ji ltar mos pa yin zhe na/ 'di phyin ci ma log pa nyid kyis rab tu gzung bar bya ba'i phyir te/ de yang dad pas yin no zhes bstan par bya ba'i phyir mngon par dad cing rtog la zhes bya ba gsungs te/ de ni de nyid de 'di nyid la dad pas zhes bya ba'i don to/ /'di la dge ba'i chos rnams gnas pas na lhag pa'i bsam pa ste chu'i gnas bzhin no/ /de yang dad pa dang 'dun pa'o/ /lhag pa dang khyad par gyi bsam pa ni lhag pa'i bsam pa'o/ /des nyan pa ni tshig dang don las so/ /'dzin pa ni zlos pa las so/ /'chang ba ni sems la bzhag pas so/ /klog pa ni tshig tu brjod pas so/ /kun chub par bgyid pa ni rnam pa thams cad du rtogs par byed pa'o/ /'di dag gis ni rang gi don bstan to/ /rab tu 'don tam zhes bya ba ni gzhan dag 'don du 'jug pa'o/ /'di ni bstan pa'o/ /gzhan ni rjes su bstan pa'o/ /ston tam zhes bya ba ni tshig las ston pa'o/ / nye bar ston tam zhes bya ba ni don las so/ /lung nod dam zhes bya ba ni gdams pas so/ /'di dag ni gzhan gyi don to/ /kha ton bgyid dam zhes bya ba ni shin tu goms pa yang nas yang du rang gi don byed pas so/ /gzhan dag la yang rgya cher yang dag par ston tam zhes bya ba la rtag tu tshig tu ston pa dang / rgya cher zhes bya ba ni mang po dag ston pa'i phyir ro/ /rnam par 'grel pa zhes bya ba ni rgya cher zhes bya bar sbyar ro/ /yid kyi rjes su rtog pa zhes bya ba ni sems brtags nas lta ba la yang dag par sbyar ba ste/ de ni zhi gnas skyed pa'i phyir ro/ /yongs su dpyod par bgyid cing zhes bya ba ni rnam par dpyod pa ste/ lhag mthong skyed pa'i phyir ro/ /'di dag gis ni spyod pa bstan to/ /'di med na phyogs gzhan gyi glegs bam du chud par bya ba la sogs pa gsungs te/ 'di nyid kyis na chung ngu na zhes smos so/ /'chang ngam zhes bya ba ni mi 'jig par bya ba'i phyir ro/ /'jog par zhes bya ba ni rang gi khyim la sogs par ro/ /bsngags pa gsum dang ldan pa ni dam pa ste 'phags pa'o/ /'di ni chos kyi lam ni dam pa'i chos so/ /de yun ring du gnas pa ni de'i rgyu dang de'i don no/ /gang gi phyir 'di ni thun mong gi dam pa'i chos yin te/ de ni 'di'i yon tan dang po'o/ / 'phags pa thams cad kyi dbang du byas nas/ sangs rgyas zhes bya ba ni 'jig rten gyi bla ma rnams so/ /de dag la bdag gis byas pa gzo bar byas te/ de dag gi tshul 'di ni byang chub thob par byed pa ste shes rab po/ /de dag gis bskal pa grangs med pa gsum gyis tshad med pa'i sangs rgyas bskyed nas ma 'ongs pa'i skye bo rnams kyi don du rang gi rigs gzhag pa nyid de/ bdag gi bar du yang nye bar gnas pa yin no/ /de bas na sangs rgyas kyi tshul rgyun chad par ma gyur cig ces 'di yang 'jog pa yin te 'di ni 'di'i phyogs gnyis te sangs rgyas kyi dbang du byas pa'o/ /byang chub sems dpa' rnams la phan gdags pa bsgrub par bgyis pa'o/ /de yang 'dis 'gyur ba dang 'jog pa dang / tshul dang ma bral bas shes par bya bas so/ /'di yang 'di ltar 'jog pa zhes bya ba ni 'di'i phan yon gsum pa ste/ byang chub sems dpa'i dbang du byas pa'o/ /bas zhes bya ba'i sgra ni gong mar yang sbyar ro/ /ma gyur zhes bya ba 'di ni rnam pa gnyis kyi bya ba bstan to/ /de ltar bstan pa zhes bya bas ni bya ba bstan pa dang / 'di ltar don che ba la sogs pa smos so/ /che ba'i don dang 'bras bu 'di la yod pa ni don che ba ste 'di ni bstan pa'o/ /gzhan ni rjes su bstan pa'o/ /phan yon che ba ni ji skad bstan pa'i phan yon rnams kyis so/ /'bras bu che ba ni rgyun tu zhugs pa'i 'bras bu dang / lan cig phyir 'ong ba dang / lan cig phyir mi 'ong ba dang / dgra bcom pa dang / rang sangs rgyas dang / yang dag par rdzogs pa'i sangs rgyas so/ / rnam par smin pa che ba ni 'phags pa thams cad kyi 'byor pa dag gis so/ /ston pa mang po dang ldan pa nye bar bsgrub pa ste/ 'di tsam gyis ni bcom ldan 'das ma'i yon tan bstan to/ /mi gtang ngo zhes bya ba ni yongs su gzung ba dang mi spong ba'i phyir ro/ /bsrung bar bya'o zhes bya ba ni me dang byi ba la sogs pa rnams so/ /btsa' bar byas pa ni chom rkun la sogs pas so/ /gang gi phyir gang rnyed par dka' bas 'di tsam gyis ni bdag nyid kyi bya bar bstan to zhes bya ba ni dngos po gsum po 'di la lhag par mos pa ste/ de bzhin du rnam par 'dzin pas so/ /rab tu 'jug pa med par ni mos pa brtan par mi 'gyur te/ des ni 'di tsam gyis don byed nus par bstan to/ /de yod kyang gang gzhan gyi don nyung zad byed pa'am nyung zad kyang mi byed pa de ni bsod nams dman pa yin no/ /de las gzhan pa de ni bsod nams shin tu mang ba yin te/ 'di ni 'di'i bstod pa dang bkur ba dang bsngags pa yin te/ de bas na bdag nyid shes rab kyi pha rol tu phyin pa 'di nyid la zhes bya ba la sogs pa nas/ rigs kyi bu 'am rigs kyi bu mo bsod nams mang du bskyed do zhes bya ba'i bar gyis ni bstod pa dang po bstan to/ /bdag nyid kyang zhes bya ba la bdag nyid kyang ni gang zhes bya ba 'dir yang rjes su 'dren pa'i don to/ /gzhan mchod pa byed du 'jug pa ni ma yin gyi/ bdag nyid byed pa ni rang nyid kyi don to/ /don nye bar 'tshal ba ni don du nye bar 'tshal ba ste mchod par 'dod pa'o/ /de dang ldan pas ni don du gnyer bar 'tshal ba'o/ /lhag pa'i bsam pa de dang ldan pa ni 'dun pa can no/ /slong ba ni bcom ldan 'das ma la mchod pa'i don du gnyer ba'i phyir ro/ /brtsal ba zhes bya ba ni dang du blangs pa'o/ /nye bar sprad pa zhes bya ba ni mdun du bstabs pa'o/ /gtad pa zhes bya ba ni len du bcug pa'o/ /yongs su gtad pa zhes bya ba ni yongs su btang nas kyang yid la gcags pa med pa'i phyir ro/ /tha na zhes bya ba ni chung ngu na zhes bya ba'i don to/ /glegs bam du chud par byas nas zhes bya ba ni rang gis bris sam/ gzhan gyis bris sam/ de'i rang gis sam rin ma yin pas bris kyang rung ba'o/ /yongs su gtong ba ni sbyin pa'o/ /de la 'dod pa'i blo yod pa de ni blo dang ldan pa'o/ /yang dag par ston par byed ces bya ba ni ston kyang rang gi ngo bo las so/ /stsol zhing zhes bya ba ni mchod pa'i phyir yang dag par 'ged pa ni mang du shas cher yod na mnyam par sbyin pa'o/ /rgyas pa ni spangs pa'o/ / des spyod pa ni rgyas par byed pa'o/ /bdag nyid so so nas zhes bya ba ni bdag nyid na'o/ /lhag ma ni rtogs par sla ste/ 'di ni chung ngu'i chung ngu'i bstod pa'o/ /gzhan yang kau shi ka rigs kyi bu 'am rigs kyi bu mo gang dag ces bya ba nas/ gzhan yang kau shi ka rigs kyi bu 'am rigs kyi bu mo zhes pa gnyis pa'i bar gyis ni spyod pa gnyis pa bstan to/ /de bas zhes bya ba ni bstod pa dang po las so/ /'di ni chung ngu'i 'bring gi bstod pa'o/ /gzhan yang kau shi ka rigs kyi bu 'am zhes bya ba la sogs pa nas yang kau shi ka bsod nams lta zhog ces bya ba'i bar gyis ni gsum pa bstan to/ /yang dag par btsud cing zhes bya ba ni yang dag par 'dzin du 'jug pa'o/ /bkod na zhes bya ba ni 'da' ba med par ro/ /mngon par dang bas zhes bya ba ni bcom ldan 'das ma'i yon tan dag la'o/ /gzhan du yang dag par rjes su ma yin par 'gyur ro/ /mngon par dad par byed ces bya ba ni gzhan du na snod ma yin par 'gyur ro/ /de bzhin du 'og ma dag la yang shes par bya'o/ /le lo ni ngan pa la brtson pa ste/ le lo ma yin pa ni brtson pa'o/ /de bsgrub pa ni ji skad bshad pa bzhin du bya'o/ /nye bar brtson pa ni mngon par brtson pa dang ldan pas byang chub sems dpa' 'di bcom ldan 'das ma 'dzin du 'jug pa'o/ /de yang byang chub bsgrub pa nyid du ston par byed pa'i phyir ro/ /byang chub de bzhin du rigs pa dag gis yang dag par ston pa ste/ de nas yang dag par 'god pa ni klog pa dang mchod pa la sogs pa la gzhug pa'o/ /zhugs pa dag la ni yang dag par gzengs bstod pa dang / spro bar bya ste/ brtson 'grus dang / le lo gnyis kyi yon tan dang skyon bsgrags pa'o/ /brtson 'grus brtsams pa ni bstod pa dag gis yang dag par dga' bar bya'o/ /'di dag la 'jig rten dag ni phyin ci log pa yin te 'di ston par nus pa ma yin no zhe na/ tshig la mtshon pa dang zhes bya ba la sogs pa gsungs te/ 'jig rten ni rnam pa gsum ste/ dad pa dang ldan pa dang / dad pa med pa dang btang snyoms pa'o/ /de la dad pa la ni tshig gnyis kyis 'grub pa yin te/ de ni yang dag par bshad pa'i tshig nyid kyis rtogs par 'gyur ro/ /dad pa med pa la ni rnam par mtshon pas rnam par rtogs par 'gyur te lta ba ngan pa dag la rigs pas gnod par byas pa'i phyir ro/ /btang snyoms pa la ni rjes su mtshon pas rtogs par 'gyur te/ rjes su dga' bar byed cing bcom ldan 'das ma de'i yon tan bstan pas so/ /de ltar snod du byas pa'i phyir 'di'i don de la yang dag par ston pa yin te/ de ltar yang zhes bya ba ni yang dag par bstan pa 'di'i sems sbyong bar byed de lta ba ngan pa las bzlog pa'i phyir ro/ /'on kyang the tshom can rnams the tshom med par byed de/ rigs pa gzhan dag gis so/ /slobs shig ces bya ba ni bslab pa rnam pa gsum gyis so/ /'di la zhes bya ba la sogs pas ni de nyid gsungs so/ /bslabs shing zhes bya ba ni sems kyis so/ /spyad de zhes bya ba ni zhi gnas kyis so/ /'bad na zhes bya ba ni lhag mthong gis so/ /sems can gyi khams zhes bya ba ni sems can gyi phung po'o/ /gtan du yin pa'i phyir bla na med pa'o/ /phung po ni tshogs te zag pa dang bcas pa 'am zag pa med pa de dag zad pa ni thams cad zad pa ste de'i ched du'o/ /mngon par gnas pa ni sgrib pa thams cad zad pa'i phyir ro/ /yang dag pa'i mthar rab tu 'byed do zhes bya ba ni de tsam gyis lhag par yod pas so/ /yongs su gtong ba'i blo dang ldan pa zhes bya ba ni rnam pa thams cad kyis gtong ba'i blo dang ldan pa'o/ /de bas kyang zhes bya ba ni bstod pa gnyis pa'i bstod pas dge ba bcu'i las kyi lam la yang dag par bkod pa yin pa'i phyir te/ de ni chung ngu'i chen po'i bstod pa'o/ /de'i 'og tu bstod pa lnga ni kau shi ka rnam grangs 'dis gling bzhi pa'i zhes bya ba la sogs pa nas/ yang dag par btsud cing bkod pa dang zhes bya ba'i bar gyis ni dang po'i cha dang de'i 'og tu kau shi ka de ji snyam du sems zhes bya ba nas/ gzhan yang kau shi ka 'dzam bu'i gling zhes bya ba'i bar gyis ni gnyis pa'i cha bstan to/ /mdo 'di dag las gsungs pa ni bsod nams lhag pas ni dad pa la sogs pa skye ba yin te/ shugs kyis rtogs pa ni bsod nams kyi cha lhag pas spyod pa lhag pa yin no/ /rnam grangs 'dis zhes bya ba ni rnam pa ste/ dngos po gsum la mos pa zhes bya ba ni gnas pa zhes bya ba'i don to/ /'di ni rim pa bzhin 'bring gi chung ngu dang / 'bring gi 'bring dang / 'bring gi chen po dang / chen po'i chung ngu dang / chen po'i 'bring gi bstod pa'o/ /gzhan yang kau shi ka 'dzam bu'i gling na zhes bya ba la sogs pa nas gzhan yang kau shi ka 'dzam bu'i gling na zhes bya ba'i bar ni lta zhog ces bya ba lnga yod pas bstod pa lnga pa bstan to/ /gcig po de nyid dgu pa'i rim pas 'chad pa'i phyir te/ de lta mod kyi brgyad pa las khyad par chen po med pa yin nam zhe na/ 'di la ni nyes pa med de/ 'jig rten gyi khams gcig gang gA'i klung gi bye ma snyed kyi 'jig rten gyi khams bzhin no/ /mdo las gsungs pa'i bsod nams lhag pa ni dad pa la sogs pa lhag pa'o/ /de las ni spyod pa lhag pa yin no/ /tshig nyams pas phyi la bskang bar bya'o/ /bsam gtan bzhi la zhes bya ba la/ 'dir mdo las 'dod pa dag las dben pa/ sdig pa mi dge ba'i chos las dben pa rtog pa dang bcas dpyod pa dang bcas pa dben pa las skyes pa'i dga' ba dang bde ba can bsam gtan dang po nye bar bsgrubs te gnas so/ /de rtog pa dang dpyod pa nye bar zhi zhing nang yongs su dang ste sems kyi rgyud gcig tu gyur pas rtog pa med pa/ dpyod pa med pa'i ting nge 'dzin las gyur pa'i dga' ba dang / bde ba can bsam gtan gnyis pa nye bar bsgrubs te gnas so/ /de dga' ba'i 'dod chags dang bral bas dran pa dang shes bzhin can yin te bde ba lus kyis myong la 'phags pa rnams kyis gang de dran pa dang ldan pa bde ba la gnas pa btang snyoms pa'o zhes brjod pa ste dga' ba med pa'i bsam gtan gsum pa nye bar bsgrubs te gnas so/ /de bde ba yang spangs yid bde ba dang yid mi bde ba yang nub pas/ bde ba yang ma yin sdug bsngal ba yang ma yin pa btang snyoms dang dran pa yongs su dag pa bsam gtan bzhi pa nye bar bsgrubs te gnas so/ /'dod pa dag las dben pa zhes bya ba ni nyon mongs pa'i 'dod pa dang mi ldan pa'i phyir dang / dngos po'i 'dod pa dag la dmigs pa med pa'i phyir ro/ /sdig pa mi dge ba'i chos rnams las dben pa zhes bya ba ni nyon mongs pa'i 'dod pa'i rgyu las byung ba'i lus dang / ngag dang yid kyis nyes par spyod pa'o/ /rnam par rtog pa dang bcas dpyod pa dang bcas zhes bya ba ni 'dod pa'i gnyen po rnam par rtog pa dang / dpyod pa dag dang ldan pa'i phyir ro/ /dben pa las skyes pa'i zhes bya ba ni 'dod pa las dben pa las skyes pa'o/ /dga' ba dang bde ba ni 'dod pa'i don grub pa ste gnas so zhes bya ba lus dang ngag dang yid gsum shin tu sbyangs pa'i dga' ba dang bde ba dang ldan pa'o/ /bsam gtan dang po nye bar bsgrubs te zhes bya ba ni bsgrubs nas gnas pa ste/ nye bar bsgrubs pa ni yang dag par bsgrubs pa'o/ /gnas so zhes bya ba ni rjes su myong ba'o/ /de zhes bya ba ni rnal 'byor pa de nyid rnam par rtog pa dang / rnam par dpyod pas sems 'khrug pa nyid kyi skyon mthong ba ste/ de las bzlog nas ting nge 'dzin la gnas pa'o/ /rtog pa dang dpyod pa nye bar zhi zhing zhes bya ba ni ting nge 'dzin gyi stobs kyis sems gcig tu gyur pa'i phyir te/ de ni rnam par rtog pa dang dpyod pa rgyun mi 'chad par 'jug pa med pa'o/ /rnam par rtog pa med pa dpyod pa med pa zhes bya ba ni de dag thams cad kyi thams cad du 'dzin pa med pas so/ /dga' ba'i 'dod chags zhes bya ba ni rigs pa nyid kyi phyir de btang snyoms yin te/ rnam par rtog pa dang rnam par dpyod pa la dga' ba la yang btang snyoms pa'i phyir ro/ /dran pa dang shes bzhin can zhes bya ba ni dga' ba'i go skabs mi sbyin zhing shes rab lan mang du byed pa'i phyir ro/ / bde ba ni myong ba'i bde ba dang / shin tu sbyangs pa'i bde ba'o/ /lus kyis zhes bya ba ni gzugs kyi lus dang / yid kyi lus so/ /'phags pa ni nyan thos dang rang sangs rgyas so/ /bde ba la gnas pa ni bsam gtan pa 'di nyid yin no zhes bya ba ni lhag ma'o/ /de la bde ba spong bar byed pa ni bsam gtan bzhi pa'o/ /sdug bsngal dang pos so/ /des na 'di nyid snga nas zhes bya ba smras so/ /yid bde ba ni gsum pas so/ /yid mi bde ba ni gnyis pas so/ /snga nas shes pa ni 'dir yang sbyar ro/ /btang snyoms ni 'dir tshor ba ste/ de bas na bde ba yang ma yin sdug bsngal ba yang ma yin pa zhes smras so/ /btang snyoms dang dran pa yongs su dag pa zhes bya ba ste gnyis 'dir gtan du rnam par dag pa thob pas so/ /de la bsam gtan dang po la ni yan lag lnga ste/ rnam par rtog pa dang / rnam par dpyod pa ni gnyen po'i yan lag go/ /dga' ba dang bde ba ni phan yon gyi yan lag go/ /sems rtse gcig pa ni de gnyis ka'i yan lag go/ /gnyis pa la ni yan lag bzhi ste/ nang yongs su dang ba ni gnyen po'i yan lag go/ /yan lag lhag ma ni snga ma bzhin no/ /gsum pa'i yan lag ni lnga ste/ btang snyoms dang dran pa dang / shes bzhin ni gnyen po'i yan lag go/ /bde ba ni phan yon gyi yan lag go/ /gnas kyi yan lag ni snga ma bzhin no/ /bzhi pa'i yan lag ni bzhi ste/ btang snyoms yongs su dag pa dang / dran pa yongs su dag pa ni gnyen po'i yan lag go/ /bde ba yang ma yin sdug bsngal ba yang ma yin pa'i tshor ba ni phan yon gyi yan lag go/ /gnas kyi yan lag ni snga ma bzhin no/ /bsam gtan bzhi po 'di dag la bkod pa'o/ /lhag ma ni snga ma bzhin te/ de ni chen po'i chen po'i bstod pa'o/ /gzhan yang kau shi ka 'dzam bu'i gling na zhes bya ba nas rab tu 'byed pa la 'bul bar 'gyur ro zhes bya ba'i bar gyis ni bkur ba dang po bstan to/ /ma tshang ba bskang ba ni snga ma bzhin du bya ste/ bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / mngon par shes pa lnga la bkod pa dang / bsam gtan dang / tshad med pa dang / gzugs med pa'i snyoms par 'jug pa dang / mngon par shes pa thams cad kyi bar la bkod na zhes bya ba ni bsam gtan rnams ni bstan zin to/ /byams pa la sogs pa ni 'dod pa na spyod pa'i sems can la dmigs pa'i tshangs pa'i gnas bzhi yin te/ sems can tshad med pa la dmigs pas na tshad med pa yin te/ byams pa dang / snying rje dang / dga' ba dang / btang snyoms so/ /kye ma'o sems can thams cad bde ba dang ldan par smon pa dang / sdug bsngal dang bral bar smon pa dang / bde ba dang mi 'bral bar smon pa dang / kun nas nyon mongs pa las grol bar smon pa zhes bya ba'i rnam pa ste/ bde ba dang ldan pa'i bsam pa dang / sdug bsngal dang bral ba'i bsam pa dang / bde ba dang mi 'bral ba'i bsam pa dang / kun nas nyon mongs pa med pa'i bsam pa'o/ /mos pas spyod pa'i sa la ni bzhi char yang sems can la dmigs pa'o/ /rab tu dga' ba la sogs pa bdun pa ni de bzhin nyid la dmigs pa'o/ /mi g.yo ba la sogs pa la ni dmigs pa med pa'o/ /tshad med pa rnams la mdo las byams pa dang ldan pa'i sems yangs pa/ rgya che ba/ mi gnyis pa/ tshad med pa/ gcugs pa med pa/ lhod pa med pa/ sgrib pa med pa/ gnod pa med pa/ thams cad du 'gro ba/ shin tu bsgoms pa 'jig rten chos kyi dbyings kyis klas pa/ nam mkha'i khams kyi mthas gtugs pa'i thams cad dang ldan pa'i 'jig rten phyogs gcig khyab par byas te/ yongs su rdzogs par byas nas gnas te/ phyogs bcu khyab par byas nas rdzogs par byas te gnas so zhes bya ba'i bar du'o/ /de bzhin du snying rje dang ldan pa dang / de bzhin du dga' ba dang ldan pa dang / de bzhin du btang snyoms dang ldan pa la yang sbyar ro/ /de la byams pa dang ldan pa'i sems zhes bya bas ni yon tan can bstan to/ /lhag mas ni yon tan bstan to/ /yangs pa zhes bya bas ni bsam pa rgya che ba bstan to/ /rgya che ba zhes bya ba ni 'phel bas so/ /tshad med pa zhes bya ba ni dmigs pa las so/ /gnyis su med pa zhes bya ba ni gcig gi bdag nyid kyi rnam par mi rtog pa'i phyir ro/ /gcugs pa med pa ni mi mthun pa'i phyogs spangs pa'i phyir ro/ /de la byams pa la sogs pa'i mi mthun pa'i phyogs ni rim pa bzhin du gnod sems dang / rnam par 'tshe ba dang / mi dga' ba dang / rjes su chags pa dang / khong khro ba'o/ / lhod pa med pa zhes bya ba ni gnyid dang rmugs pa nye bar zhi ba'i phyir ro/ /sgrib pa med pa zhes bya ba ni rgod pa dang 'gyod pa nye bar zhi bas so/ /gnod pa med pa zhes bya ba ni gsum po 'di dag nyid kyis sems dri mar ma byas pas so/ /thams cad du 'gro ba zhes bya ba ni mdza' bo dang bar ma dang / dgra bo gsum la yang rab tu 'jug pa'o/ /shin tu bsgoms pa zhes bya ba ni dus gsum la yang mnyam por 'jug pa'i phyir ro/ /de ltar bstan pa'i rnam pas khyab pa ni rgyas par ro/ /'jig rten ni sems can gyi 'jig rten no/ /thams cad dang ldan pa ni lha dang klu dang gnod sbyin la sogs pa'i dbye bas thams cad dang ldan pas so/ /phyogs gcig ni phyogs kyi cha'o/ /gang du zhe na/ 'jig rten zhes smos te snod kyi 'jig rten no/ /chos kyi dbyings kyis klas pa zhes bya ba ni chos ni dbyings dang 'dra ba'i mtha'o/ /'di la nam mkha' dang 'dra ba'i mtha' yod pa de la de skad ces bya'o/ /nye bar bsgrubs te gnas so zhes bya ba ni sems ting nge 'dzin la gnas pa ste/ 'phags pa'i gnas pas so/ /phyogs bcu zhes bya ba ni phyogs bcu'i rnam pa ste/ lhag ma ni rtogs par sla'o/ /gzugs med pa'i snyoms par 'jug pa ni gzugs med pa rnam pa bzhi ste/ de dag kyang mdo las de rnam pa thams cad du gzugs kyi 'du shes las yang dag par 'das te/ thogs pa'i 'du shes rnams nub par gyur cing / sna tshogs kyi 'du shes yid la mi byed pas nam mkha' mtha' yas so zhes te/ nam mkha' mtha' yas skye mched nye bar bsgrubs te gnas so/ /de rnam pa thams cad du nam mkha' mtha' yas skye mched kyi 'du shes las yang dag par 'das te/ rnam par shes pa mtha' yas so zhes rnam shes mtha' yas skye mched la nye bar bsgrubs te gnas so/ /rnam pa thams cad du rnam shes mtha' yas skye mched kyi 'du shes las yang dag par 'das te/ ci yang med do zhes ci yang med pa'i skye mched la nye bar bsgrubs te gnas so/ /de rnam pa thams cad du ci yang med pa'i skye mched kyi 'du shes las yang dag par 'das te/ 'du shes med 'du shes med min skye mched la nye bar bsgrubs te gnas so/ /gzugs kyi 'du shes ni sngon po dang ser po la sogs pa'i 'du shes te/ de la ma chags pa ni thams cad du nam mkha'i 'du shes pas so/ /de las yang dag par 'das pa ni so sor snang ba med pas so/ /thogs pa'i 'du shes ni rtsig pa dang ra ba la sogs pa'i sgrib pa'i 'du shes so/ /sna tshogs pa'i 'du shes ni khang bzangs dang / skyed mos tshal dang / ri dang / mtsho dang / zla ba dang / nyi ma la sogs pa'i 'du shes so/ /nam mkha' mtha' yas so zhes de ltar 'di la nam mkha' mtha' yas skye mched du dmigs pa yod pa de la de skad ces bya'o/ /ji ltar nam mkha' mtha' yas skye mched las yang dag par 'da' bar bya zhe na/ de shes pa gang gis nam mkha' mtha' yas skye mched la mos pa dang ldan pa mtha' yas pa de nyid la mos par byas nas/ thams cad du nam mkha'i 'du shes las bzlog pa'i phyir ro/ /rnam shes mtha' yas skye mched las yang dag par 'das nas zhes bya ba ni/ de de las bskyod nas cung zad kyang dmigs par mi mthong ste/ don med pa dang / rnam par shes pa med de cung zad tsam nyid du dmigs par byas nas thob pa'o/ /cung zad med pa'i skye mched kyi 'du shes las kyang 'dod chags dang bral nas de yang bzlog pa yin te/ cung zad med pa'i skye mched ni sngar log pa de nas 'du shes med pa yang ma yin te/ 'du shes ni rab tu phra bar 'jug pa kho na ste/ des na 'du shes med pa ni 'du shes med pa nyid ma yin te/ gang du 'du shes med pa yang ma yin pa'i skye mched kyi ting nge 'dzin la de skad ces bya'o/ /mngon par shes pa lnga la rdzu 'phrul gyi bya ba shes pa dang / lha'i rna ba dang / gzhan gyi sems shes pa dang / sngon gyi gnas rjes su dran pa shes pa dang / lha'i mig go/ /'dir mdo las de rdzu 'phrul gyi rnam pa du ma nyid du myong bar byed de sa yang g.yo bar byed/ gcig tu gyur cing mang por 'gyur ba dang / mang por yang gyur nas gcig tu gyur pa dang / steng du 'byung ba dang nub pa yang nyams su myong bar byed do/ /thad kar rtsig pa dang / thad kar ra ba dang / thad kar ri la yang thogs pa med par 'gro'o/ /nam mkha' la yang 'gro'o/ /sa la yang 'byung ba dang byi zul byed do/ /chu la yang sa bzhin du 'gro'o/ /du ba 'thul bar byed/ 'bar bar yang byed do zhes rgyas par yang brjod do/ /de lha'i rna ba'i khams kyis mi las 'das pa'i sgra yang thos te lha dang mi dag go/ /de sems can gzhan dang gang zag gzhan gyi sems sems kyis yang dag pa ji lta ba bzhin du rab tu shes te/ de 'dod chags dang bcas pa'i sems la 'dod chags dang bcas pa'i sems zhes yang dag pa ji lta ba bzhin du rab tu shes so/ /de bzhin du 'dod chags dang bral ba dang / zhe sdang dang bcas pa dang / zhe sdang dang bral ba dang / gti mug dang bcas pa dang / gti mug dang bral ba'i sems so zhes yang dag pa ji lta ba bzhin du rab tu shes pa nas/ bla na med pa'i sems la bla na med pa'i ye shes so zhes yang dag pa ji lta ba bzhin du rab tu shes so zhes bya ba'i bar gyis bstan to/ /de skye ba gcig rjes su dran pa nas gnyis dang gsum nas bye ba phrag bcu dang / brgya phrag stong gi bar du yang rjes su dran no/ /nyi ma gcig nas gnyis dang / gsum nas bskal pa bye ba phrag bcu dang / brgya phrag stong gi bar du yang rjes su dran no/ /bdag ni che ge mo zhig na gnas/ ming ni 'di zhes bya/ de bzhin du rus dang / de bzhin du rigs dang / de bzhin du zas dang / de bzhin du gnas pa'i yun ring thung dang / de bzhin du tshe'i mtha'o/ /de nas bdag shi 'phos nas che ge mor skyes so zhes bya ba nas de nas 'dir skyes so zhes bya ba'i bar dang / rnam pa dang bcas/ yul phyogs dang bcas/ dan rtags dang bcas pa rnam pa du ma shes pa'i bar du ni sngon gyi gnas rjes su dran pa'o/ /de lha'i mig rnam par dag pa mi'i las 'das pas sems can rnams kyi 'chi ba dang / skye ba dang / skyes pa dang / kha dog bzang po dang / kha dog ngan pa dang / dman pa dang / gya nom pa dang / bde 'gro dang / ngan 'gro dang / sems can las ji lta ba bzhin du nye bar 'gro ba mthong zhing rab tu shes pa yin te/ sems can 'di dag ni lus kyis legs par spyod pa dang / ngag gis legs par spyod pa dang / yid kyis legs par spyod pa dang ldan pa 'phags pa rnams la skur pa mi 'debs pa dang / yang dag pa'i lta ba dang ldan pa dag ste/ lus dang ngag dang yid kyis legs par spyod pa'i rgyus lus zhig nas bde 'gro mtho ris kyi 'jig rten du skye bar 'gyur ro/ /yang sems can 'di dag ni lus kyis nyes par spyod pa dang / ngag gis nyes par spyod pa dang / yid kyis nyes par spyod pa dang ldan pa/ 'phags pa rnams la skur ba 'debs pa log par lta ba dag ste/ de dag la log par lta ba'i las yang dag par blangs pa'i rgyus lus zhig pa'i 'og tu shi nas kyang gang ngan 'gro log par ltung ba sems can dmyal bar skye bar 'gyur ro/ /de ltar lha'i mig mi las 'das pas phyogs bcu'i 'jig rten gyi khams thams cad chos kyi dbyings kyis klas pa/ nam mkha'i khams kyi mthas gtugs pa'i 'gro ba rigs drug gi sems can rnams kyi skye ba dang / 'chi ba yang dag pa ji lta ba bzhin du rab tu shes pa yin te/ bsam gtan dang / tshad med pa dang / gzugs med pa'i snyoms par 'jug pa dang / mngon par shes pa so so dang / tha dad pa 'di dag la rab tu bkod pa zhes bya bar sbyar ro/ /lhag ma ni rtogs par sla ste 'di ni bkur ba dang po'o/ /de'i 'og tu kau shi ka 'dzam bu'i gling gi sems can thams cad rnam grangs 'di lta bur bkod pa lta zhog ces bya ba nas bsam gtan bzhi pa la bkod na zhes bya ba'i bar dang / so so'i mthar yang de ji snyam du sems zhes bya ba la sogs pa nas yang dag pa'i mtha' rab tu 'byed pa la 'dul bar 'gyur ro zhes bya ba'i bar dang bcas pa'i go rims bzhin du gnyis pa dang / gsum pa dang / bzhi pa dang / lnga pa dang / drug pa'i bkur ba'o/ /de ni chung ngu'i 'bring dang / chung ngu'i chen po dang / 'bring gi chung ngu dang / 'bring gi 'bring dang / 'bring gi chen po'i bkur ba'o/ / gzhan yang kau shi ka zhes bya ba la sogs pa nas/ gzhan yang zhes bya ba'i bar gyis ni bdun pa bstan to/ /bcom ldan 'das ma gzhan dag la byin pa ni snga ma dag la yang yod de 'dir ni rang nyid klog pa dang / gzhan dag la byin nas kyang lhag pa yin te/ de ni chen po'i chung ngu'i bkur ba'o/ /gzhan yang kau shi ka rigs kyi bu 'am rigs kyi bu mo don la mkhas pa zhes bya ba la sogs pa nas gzhan yang kau shi ka zhes bya ba'i bar gyis ni brgyad pa bstan to/ /'di'i don rnam par 'grel pa dang zhes gang sngar gsungs pa dang / don la mkhas pa zhes bya ba de gnyis las snga ma ni shes rab kyi pha rol tu phyin pa la sogs pa las sems nyams pa rags pa'i ngo bor 'dzin pa dag la dang ba bskyed par bsams pa yin la/ 'dir ni mtha' gsum du mi dmigs pa la sogs pa don dam par bsams pa yin te/ de la don la mkhas pa'i tshig ni don yid la byed pa'i tshig gis so/ /don dang bcas pa pa ni de nyid kyi don dang ldan pa'o/ /tshig 'bru dang bcas pa ni de nyid kyi don gyi tshig 'bru dang ldan pa'o/ /bstan pa ni de'i don mdor yang dag par ston pas so/ /yongs su gsal bar byed pa ni rigs pa dag gis so/ /'di zhes bya ba ni brgyad pa'i spyod pa lhag pa ste/ 'di ni brgyad pa'i skabs yin pas so/ /de bas zhes bya ba ni bdun pa'i spyod pa las so/ /'di yang bstan par bgyi ba lags so zhes bya ba ni zur gyis sam/ lus kyi brdas dris pa ste/ bstan par bya ba ni ma yin te gsal ba'i phyir ro zhes bsams so/ /khong du ma chud pa dag la zhes bya ba ni shes pa blun pa ste/ de ni rigs pa dang lung dag gis yang dag par ma zin pa gzhan gyi tshig gi g.yo bar byed pa'i phyir ro/ /'di gang gis g.yo bar byed ce na/ de nyid bstan pa'i phyir/ de ci'i phyir zhe na zhes bya ba smras so/ /'dir lan ni kau shi ka ma 'ongs pa'i dus na zhes bya ba gsungs so/ /bcom ldan 'das ma nyid phyin ci log pa'i don ston pa gang yin pa de ni de'i gzugs brnyan yin te/ de nyid kyis na blun pa'i dad pa dang ldan pa'i tshig gis so/ /de la zhes bya ba ni de ltar thos nas chud zos par gyur na mi rung ngo zhes smos pa rdzogs pa'i byang chub kyi lam las rab tu nyams pa dang / zhig par mi 'gyur ba'i don du'o/ /ji ltar yang 'di las gzugs brnyan du 'gyur ba dang / ji ltar yang mi 'gyur ba de gnyis ka bcom ldan 'das ma chen po dag las rgya cher gsungs te gzugs dang tshor ba la sogs pa nas rnam pa thams cad mkhyen pa nyid kyi bar ni mi rtag pa dang / sdug bsngal ba dang / bdag med pa dang / mi gtsang ba ni rnam pa dang / mtshan ma dang / dmigs pa'i tshul gyis shes rab kyi pha rol tu phyin pa sgom par byed de/ des na byang chub sems dpa'i sa dang po nas sa bcu pa'i bar dang / bla na med pa yang dag par rdzogs pa'i byang chub kyi bar du thob par 'gyur ro zhes gang de ltar ston pa de ni gzugs brnyan du ston pa yin no/ /ji ltar mi rtog pa yin zhe na/ gzugs ni rang bzhin gyis stong pa nyid de/ gang yang gzugs kyi rang bzhin de ni dngos po med pa'i ngo bo nyid yin te/ de ni shes rab kyi pha rol tu phyin pa yin na de la gzugs nyid med na de la rtag pa 'am mi rtag pa ga la yod de zhes bya ba la sogs pa'o/ /gang la de ltar ston pa de ni gzugs brnyan ston pa ma yin no/ /de nas bcom ldan 'das shes rab kyi pha rol tu phyin pa'i gzugs brnyan zhes bya ba la sogs pas ni gzugs brnyan yongs su shes par bya ba'i phyir brgya byin gyis zhus pa'o/ /kau shi ka ma 'ongs pa'i dus na zhes bya ba la sogs pas ni lan bka' stsal to/ /gzugs can gyi dbang po lnga ni lus kyis yang dag par bsdus pa'i phyir ro/ /yang na rdul phra rab bsags pa'i lus so/ /de dag ma bsgoms pa ni gang dag la ma goms pa dang / ma bsdams pa yod pa de dag la de skad ces brjod do/ /dbang po ma bsdams pa'i phyir tshul khrims ma bsgoms pa'o/ /des na sems ma bsgoms pa ni ting nge 'dzin ma goms pa'o/ /des na shes rab ma bsgoms pa ni mnyam par gzhag pa'i sems kho nas yang dag pa ji lta ba bzhin du mi shes pa'o/ / des na shes rab 'chal pa ni phyin ci log tu mthong ba'o/ /des na lug ltar lkugs pa ni gzhan las legs par gsungs pa mi nyan pa'i phyir dang / rang nyid legs par gsungs pa mi 'chad pa'i phyir ro/ /des na shes rab nyams pa ni yang dag pa'i lta ba nyams pa'i phyir ro/ /gzugs mi rtag pa ni mtshon pa tsam yin te/ sdug bsngal la sogs pa la yang blta bar bya'o/ /theg pa chen po'i rtag pa med pa ni mi rtag pa'o zhes gsungs so/ /de rnam par bcad pa'i don du 'jig pa zhes smos la/ 'jig pa'i mtshan nyid ni mi rtag pa'i don de gang gi phyir med pa 'am ma skyes pa la ni 'jig pa yang yod pa ma yin no/ /de bas na 'jig pa ston par byed pa ni dngos po gsum mi dmigs pa yin te/ yod pa dang / skye ba dang / 'gag pa'o/ /de bas na de ltar rtag pa la sogs pa phyin ci log bzhi'i gnyen por theg pa dman par bsdus pa'i yang dag pa'i lta bas shes rab kyi pha rol tu phyin pa nyid du gang stong pa de la gzugs brnyan du ston pa ma yin no/ /ci ste gzugs la sogs pa 'di mi rtag pa dang / sdug bsngal la sogs par byang chub sems dpas bsgoms pa ma yin nam zhe na bsgoms pa ma yin te/ yang kau shi ka zhes bya ba la sogs pa gsungs so/ /blta'o zhes bya ba ni bsgom par bya'o zhes bya ba'i don to/ /gal te bsgoms pas skyon cir 'gyur zhe na/ de'i phyir gal te zhes bya ba la sogs pa gsungs so/ /gzugs brnyan la zhes bya ba ni theg pa dman pa zhes bya ba'i don to/ /de ltar bcom ldan 'das ma'i gzugs brnyan mdor bsdus pa bstan nas/ de'i spyod pa ni rab tu grags pa yin no/ /ji ltar gzugs brnyan ma yin pa de ni gong nyid du don la mkhas pas bklag par bya'o zhes bya ba la sogs pa bstan to/ /gang yang rang gi ngo bo nyid med pa la sogs pa stong pa nyid kyi tshig rnams la gnas pa med pa de ni theg pa chen po la goms pa dag gi gnyen po ste/ chos kyi sku'i mdzad pa'i rab tu byed pa la phyin ci ma log pa'i mdzad par bcom ldan 'das ma chen mo dag laso gsungs so/ /bcom ldan 'das ma 'di las ni phyin ci ma log pa'i mtha' dag nges par 'byung ba brgyad las thob pa'i nges par 'byung ba dang / thams cad mkhyen pa nyid du nges par 'byung ba nyid du zab pa dang / yongs su gsal bar bstan te de bas na de la nges par gzung bar bya'o/ /de ni bkur ba chen po'i 'bring ngo / gzhan yang kau shi ka rigs kyi bu 'am rigs kyi bu mo gang zhes bya ba la sogs pa nas lta zhog ces bya ba lnga po'i 'og gi gzhan yang zhes bya ba'i bar gyis ni bkur ba dgu pa bstan to/ /rgyun du zhugs pa nyid ni 'bras bu yin no/ /rab tu 'byed do zhes bya ba ni sdug bsngal gyi bden pa grub pa de'i bar du zhes bya ba ni bkur ba chen po'i chen po'o/ /gzhan yang kau shi ka rigs kyi bu 'am rigs kyi bu mo gang gis zhes bya ba nas/ gzhan yang kau shi ka rigs kyi bu 'am rigs kyi bu mo gang la la zhes bya ba'i bar gyis ni bsngags pa dang po bstan to/ /lan cig phyir 'ong ba'i 'bras bu zhes bya bas ni bsngags pa chung ngu'i chung ngu bstan to/ /gzhan yang kau shi ka 'dzam bu'i gling na zhes bya ba la sogs pa nas/ gzhan yang kau shi ka 'dzam bu'i gling na zhes bya ba'i bar gyis lta zhog ces bya ba lnga pa ni bsngags pa gnyis pa bstan to/ /phyir mi 'ong ba'i 'bras bu zhes bya bas ni bsngags pa chung ngu'i 'bring bstan to/ /gzhan yang kau shi ka 'dzam bu'i gling na zhes bya ba la sogs pa nas/ gzhan yang kau shi ka 'dzam bu'i gling gi zhes bya ba'i bar gyis lta zhog ces bya ba lngas ni bsngags pa gsum pa bstan to/ /dgra bcom pa nyid ni dgra bcom pa nyid kyi dngos po'o/ /de ni bsngags pa chung ngu'i chen po'o/ /gzhan yang kau shi ka 'dzam bu'i gling gi zhes bya ba la sogs pa nas 'du byed pa lta zhog / ces bya ba'i bar gyis ni bsngags pa bzhi pa bstan to/ /rang nyid mngon par rdzogs par sangs rgyas pa'i phyir sangs rgyas so/ /bdag nyid gcig pu sangs rgyas pas na rang sangs rgyas so/ /de ni bsngags pa 'bring gi chung ngu'o/ /gzhan yang kau shi ka 'dzam bu'i gling gi sems can thams cad ces bya ba la sogs pa nas lta zhog ces bya ba lngas ni bsngags pa lnga pa bstan te/ de ni bsngags pa 'bring gi 'bring ngo / /gzhan yang kau shi ka 'dzam bu'i gling gi sems can zhes bya ba nas 'du byed pa lta zhog ces bya ba'i bar gyis ni bsngags pa drug pa bstan te/ gang la la zhig ces bya bas ni dang po bstan to/ /gzhan gang zhig ces bya bas ni gnyis pa bstan to/ /gang gi zhes bya bas ni gsum pa bstan to/ /nye bar gtad de zhes bya bas ni byin pa'o/ /bsam pa gang gis she na/ shes rab kyi pha rol tu phyin pa 'di la zhes bya ba la sogs pa gsungs te/ 'phel ba la sogs par gyur pa ni thob pa'o/ /'di zhes bya ba ni gsum pa'o/ /de bas ni zhes bya ba ni dang po dang gnyis pa ste de ni bsngags pa 'bring gi chen po'o zhes bya ba la sogs pa lngas ni bsngags pa bdun pa bstan te/ de ni bsngags pa chen po'i chung ngu'o/ /gzhan yang kau shi ka zhes bya ba la sogs pa nas bsod nams mang du bskyed do zhes bya ba'i bar gyis ni bsngags pa brgyad pa bstan te/ bcom ldan 'das grangs bzung bar zhes bya ba la sogs pa la/ de la grangs ni snga ma las phyi ma'i bsod nams lnga dang / bcu dang / brgyad dang / stong ldab la sogs pa'o/ /bgrang bar mang zhes bya ba ni/ bcu dang brgya ldab la sogs pa'o/ /dpe ni gang gA'i bye ma ldab la sogs pa'o/ /zla ni gang gA'i klung bcu'i bye ma ldab la sogs pa'o/ /rgyu ni bcu ldab brgya'i gang gA'i klung gi bye ma ldab la sogs pa'o/ /shin tu tshad med pa ma yin pa'i phyir nye bar mi 'gro ba ste/ nye ba na yod pa nye ba'i rgyu'o/ / de yang gzung sla bar ma yin no/ /'di ni bsngags pa chen po'i 'bring ngo / /lta zhog ces bya ba la sogs pa lngas ni bsngags pa dgu pa bstan to/ /ji lta ji ltar zhes bya ba la sogs pa ni kau shi kas bsod nams lhag pa'i rigs pa smras pa yin no/ /legs so legs so zhes bya ba ni rab 'byor gyis rigs pa dang bcas pa spro ba skyed pa yin te/ de ni bsngags pa chen po'i chen po'o/ /bsod nams kyi rnam grangs ni 'di rab tu dbye ba ste/ de gsal bar byed pa'i le'u ni de'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel snying po mchog ces bya ba slob dpon rin chen 'byung gnas zhi bas sbyar ba las le'u lnga pa'o/ / //bstod pa dang bkur ba dang bsngags pa bstan pa/ yongs su bsngo ba yid la byed pa bshad par bya ste/ de'i dbang du byas nas bstan bcos las/ yongs su bsngo ba khyad par can/ /de yi byed pa mchog yin no/ /de ni dmigs med rnam pa can/ /phyin ci ma log mtshan nyid de/ /dben dang sangs rgyas bsod nams tshogs/ /rang bzhin dran pa'i spyod yul can/ /thabs mkhas mtshan ma med pa dang / /sangs rgyas rjes su yi rang dang / /khams gsum gtogs pa ma yin dang / /chung dang 'bring dang chen po yi/ /bsngo ba gzhan ni rnam gsum dang / /bsod nams che 'byung bdag nyid do/ /zhes bya ba gsungs te/ sems can thams cad kyi sbyin pa dang / tshul khrims dang / bsgoms pa las byung ba'i bsod nams de las 'di mchog tu byed pas na khyad par can no/ /de yang 'di yang dag par rdzogs pa'i byang chub kyi dbang du byas pa'i phyir sems can thams cad kyi mchog nyid kyi don yin te yum chen mo dag las sems can thams cad dang thun mong du byas nas bla na med pa yang dag par rdzogs pa'i byang chub tu yongs su sngo bar byed cing de yang mi dmigs pa'i tshul gyis so zhes gsungs pa'i phyir ro/ /khyad par des yongs su bsngo ba ni yongs su bsngo ba khyad par can no/ /de yang de nas byang chub sems dpa' sems dpa' chen po byams pa zhes bya ba la sogs pa gsungs te/ byang chub sems dpa' zhes bya ba ni/ byang chub tu sems bskyed pa dang ldan pa ste/ ji skad du bshad pas so/ /khyad par gyis khyad par can du gyur pa ni sems dpa' chen po ste/ 'di la yongs su bsngo ba'i 'bad pa lhag pa yod pa ni sems dpa' chen po'o/ /rjes su yi rang ba dang ldan pa'i dge ba'i rtsa ba ni rjes su yi rang ba yin no/ / de yang dang por 'di la mi dmigs pa'i yongs su bsngo ba bstan te/ rgya cher 'og nas 'chad de de dang ldan pa ni de'i yongs su bsngo ba'o/ /'di nyid ces bya ba ni bsod nams bya ba'i dngos po'i sgra dang sbyar ro/ /de dag las zhes bya ba ni sems can thams cad kyi sbyin pa la sogs pa las byung ba'i bsod nams kyi bdag nyid las so/ /dam pa zhes bya'o zhes bya ba nas mi mnyam pa dang mnyam pa zhes bya ba la ci'i phyir dam pa zhes bya zhe na 'bras bu mchog la sogs pa'i rgyu'i phyir ro/ /de yang gang las shes she na/ de yang rim pa bzhin du bdag dang gzhan gyi don phun sum tshogs pa'i rgyu nyid yin pa'i phyir/ rab tu dga' ba la sogs pa sa bcu gcig pa yang dag par bsdus pa yin no/ /rnam grangs yin yang thams cad gzung ba'i shugs kyis mi mnyam pa'i sangs rgyas de dag dang thun mong du gyur pa'i khyad par gyis mi mnyam pa dang mnyam pa ste/ 'di ni kun tu 'od kyi sa'o/ /ji ltar chos kyi sprin mi mnyam pa zhes bya zhe na/ mi mnyam pa dang mnyam pa dang chos mthun pa ste/ sa bcu'i dbang phyug gi byang chub sems dpa' ni sangs rgyas su blta bar bya ste/ yang dag par rdzogs pa'i sangs rgyas nyid ni ma yin no zhes bya ba'i tshig gis so/ /de nyid dam pa la sogs pa'i tshig snga ma'i gzhung gis yongs su bsngo ba'i khyad par bstan nas/ dam pa la sogs pa'i tshig de nyid ni byed pa mchog yin te de ni yongs su bsngo ba'i khyad par can byed pa dang bcas pa'o/ /de skad ces smras pa dang zhes bya ba la sogs pas ni mi dmigs pa'i yongs su bsngo ba gsungs te/ 'di la phyogs bcu yod pas de ni phyogs bcu'i 'jig rten te/ nam mkha'i tshad kyi snod kyi 'jig rten no/ /thams cad du zhes bya ba ni phyogs thams cad du'o/ /thams cad gtogs pa zhes bya ba ni khyab pa ste/ bar med pa zhes bya ba'i don to/ /dpag tu med pa zhes bya ba la sogs pa zlos pa ni phyogs re re dang 'brel pa'i don to/ /mtha' yas mu med pa dag tu zhes bya ba ni mtha' yas mu med pa zhes bya ba'i don to/ /de dag ni 'dir don lhag pa las bzlas pa yin te sgra las ni ma yin no/ /de dag ni 'dir phyogs ring bas ma chags pa'i phyir tshad med cing grangs med pas grangs med pa'o/ /phyogs yangs pas yongs su ma chad pa'i phyir gzhal du med pa'o/ /so sor bsam par mi nus pa'i phyir bsam gyis mi khyab pa'o/ /bsam par bya ba de dag la bsam par mi nus pas na mtha' yas pa'o/ /de ltar phyogs ma lus par so sor stong gsum gyi mtha' yas pa dag la phyogs re rer yang stong gsum gang yin pa ste/ de la dpag tu med pa'i yang dpag tu med pa nas mtha' yas mu med pa'i bar gyis de bzhin gshegs pa rnams zhes bya bar sbyar ro/ /'dir yang bzlas pa so sor stong gsum dang 'brel bar bya ba yin no/ /stong gsum gcig nyid la ni de bzhin gshegs pa dpag tu med pa ma yin no zhe na/ 'das pa'i dus na zhes bya ba gsungs te/ deng de bzhin gshegs pa gcig tu thams cad ma yin yang 'das pa'i dus la thog ma med pa'i phyir dpag tu med pa'o/ /des na 'jig rten gyi khams gcig yin yang 'das pa'i dus su de bzhin gshegs pa tshad med pa ste/ dus ring bas yongs su ma chad pa'i phyir ro/ /grangs kyang de tsam du yongs su ma chad pas grangs med pa'o/ /yid kyis thad ka dang / dbyibs yangs pa yongs su ma chad pas na gzhal du med pa'o/ /re re nas bsam du med pas bsam gyis mi khyab pa'o/ re re nas bsam pa mtha' yas shing rtogs pa med pas na mtha' yas pa'o/ /'di lta bu'i de bzhin gshegs pa rnams mya ngan las 'das pa zhes bya ba ni bzhugs pa ma yin pa'o/ / nyon mongs pa'i dgra rnams des bcom pa dang ldan pas dgra bcom pa'o/ /phyin ci ma log par thams cad mkhyen pa ni yang dag par rdzogs pa'i sangs rgyas so/ /tshig gnyis po 'dis ni spangs pa dang ye shes phun sum tshogs pa bstan to/ /'khor ba'i lam yin pa'i phyir lam ste nga'o snyam pa'i nga rgyal lo/ /'khor ba'i lam yin pa'i phyir 'jug pa ni srid pa ste/ ji skad du/ pha ni nga snyam nga rgyal te/ /ma ni srid pa yin par brjod/ /ces bstan to/ /de dag rtsad nas bcad pa'i phyir lam chad pa dang 'jug pa chad pa'o/ /spros pa ni gnyis su rnam par rtog pa'o/ /srid pa ni 'khor ba'o/ /de dag lhag par 'dren pa ni chos la lta ba dang gang zag tu lta ba'o/ /de dag yongs su zad pa'i phyir spros pa dang srid par 'dren pa chad pa'o/ /mchi ma zad pa zhes bya ba ni srid pa med pas yang gnyen ni med cing mya ngan med de/ des na mchi ma yongs su zad pa'o/ /tsher ma dang chos mthun pa'i phyir tsher ma ste lta ba ngan pa'o/ /de dag spangs pa ni tsher ma bcom pa'o/ /lhag ma ni gling gzhi nyid du bstan to/ dang po sems bskyed pa ni gangs dang 'dra ba'o/ /de gzung ba ni de nas brtsams pa'o/ /de'i bar zhes bya ba ni tsam gyi skabs su'o/ /tshul khrims la sogs pa'i phung po ni tshul khrims la sogs pa'i tshogs so/ /byang chub sems dpa' rnams la yang stobs la sogs pa yod mod kyi de dag pha rol tu phyin pa ni ma yin te/ des na de rnam par bcad pa'i phyir pha rol tu phyin pa smos so/ /zag pa med pa'i lam yongs su shes pa ni thams cad mkhyen pa'i ye shes te/ sngon gyi yang dag par rdzogs pa'i sangs rgyas kyi yon tan la sogs pa dang yang dag par ldan pas na ldan pa'o/ /gang yin zhes bya ba la sogs pas ni sangs rgyas kyi yon tan la sogs pa yang gsungs so/ /yang dag par rdzogs pa'i byang chub nyid bde ba ste nye bar zhi ba'i bde ba yin pa'i phyir ro/ /chos thams cad la dbang phyug ni dbang bas so/ /rdzu 'phrul mngon par 'du byed pa yang ngo / /dag pa nyid kyi phyir sgrib pa med pa'o/ /ltos pa med pa nyid kyi phyir ma chags pa'o/ /thams cad du shes pa'i rnam pa thams cad la 'jug pas thogs pa med pa'o/ / rjes su dpag pa'i don du dpe'i khyad par med pa'i phyir dpe med pa'o/ /yongs su rnam par bcad pa ni dpag pa'o/ /khyad par gyi bye brag ma lus pa'i ngo bo gsal bar 'dzin pa ni mngon sum mo/ /gzhan dag ni des de la dpag par bya ba ma yin te shi ba bzhin no/ /de bzhin gshegs pa rnams kyi yang dag pa'i lta ba'i ye shes ni yang dag pa'i ye shes so/ /de nyid stobs yin te thams cad zil gyis gnon pa nyid kyi phyir ro/ /gang sangs rgyas kyi ye shes kyi stobs zhes bya ba la sangs rgyas kyi ye shes kyi stobs ni nus pa ste/ dus chad pa med par don sna tshogs rnam pa thams cad byed pa'i phyir ro/ /stobs ni gang sangs rgyas kyi ye shes mthong zhing thob pa mngon sum du byed pa'o/ /mi 'jigs pa bzhis legs par khong du chud pa ni rang gi chos dang / gang yang chos rnams khong du chud par zhes bya bar sbyar ro/ /de ji ltar zhe na chos thams cad don dam par yang dag pa'i ye shes kyis mngon par bsgrub cing bsgrubs pa'o/ /'jig rten las 'das pa'i ye shes kyi chos lan gsum rnam pa bcu gnyis su bskor ba de nyid 'khor lo ste/ lha dang mi rnams la 'pho ba'i phyir ro/ /de bskor ba ni phyogs bcu dag tu'o/ /de ni bstan pa'o/ /'di'i bshad pa ni lan dgu ste/ chos de nyid gsal por byed pa'i tshig ni chos kyi sgron ma'o/ /de thogs pa ni yid la rnam par gzhag pa'o/ /tshig de nyid ni chos kyi rnga bo che ste/ de yang dag par brdung ba ni gdul bya'i skye bos nyan pa'o/ /tshig de nyid ni chos kyi dung ste yid 'gengs pa'o/ /de 'bud pa ni gdul bya nyid kyis shes pa'o/ /de'i dung sgrogs pa ni de nyid la dmigs nas de'i don yid la byed cing yid la byed pa na bsams pa dang / bsgoms pa'i don yongs su rdzogs par 'gyur ro/ /bsgoms pa'i stobs las byung ba'i 'jig rten las 'das pa'i ye shes de nyid chos kyi ral gri ste de 'debs pa ni nyon mongs pa rnams rnam par 'joms pa'o/ /de nyid sems can mang po la 'bebs pas na chos kyi char te de rab tu 'bebs pa'o/ /de nyid gtan pa med pa'i phyir mchod sbyin te de la mchod pa'o/ /de la chos kyi sbyin pas ni sems can thams cad tshim pa'o/ /yang dag par rtogs pa ni yongs su stobs pa'o/ /btul ba ni bden pa dag la bkod pas dran pa nye bar gzhag pa'o/ /bslab pa ni yang dag par spong ba dang / rdzu 'phrul gyi rkang pa dag la'o/ /mos pa ni dbang po dang stobs dag la'o/ /gcig tu nges pa ni nges par gyur pa'o/ / sangs rgyas rnams kyi 'khor zhes bya ba ni tha dad pa'i dbang du byas pa'i drug pa'o/ /mya ngan las 'das pa zhes bya ba ni skabs par byed pa'o/ /sangs rgyas la sogs pa la brten pa ni zhing du byas pa'o/ /yid kyis bsgoms pa ni bsgoms pa'o/ /de la phan pa ni yid la bsgoms te/ dang bar byed pa zhes bya ba'i don to/ /ma lus pa mngon par bsdus pa ni ma lus pa la rjes su yi rang ngo zhes bya bar sbyar ro/ /gcig tu zhes bya ba ni phung po gcig gis so/ /mngon par bsdus zhes bya ba'i rnam par 'grel pa ni bsdoms pa'o/ /gzhal nas zhes bya ba ni mnyam par gzhag pa'i sems kyis nges par brtags pa'o/ /rjes su yi rang ba zhes bya ba ni dga' bar dmigs par byas pas so/ /rjes su yi rang zhes bya ba ni dga' ba skyed par byed pa'o/ /mchog ni rab mchog go/ /de ltar na ji ltar tshig bcu gcig gis yin zhe na/ dmigs pa rnam pa bcu gcig tu khyad par du gyur pa yin pas so/ /de ga las shes she na/ dbus dang phyogs bcu'i de bzhin gshegs pa de dag 'khor dang bcas pa'i dge ba'i rtsa ba de la de dmigs par byed pa'i phyir ro/ /ji ltar yongs su sngo bar byed ce na/ de'i phyir byang chub sdud par gyur cig ces smos te 'dren par gyur cig ces bya ba'i don to/ /de nyid gnas brtan rab 'byor gyis byang chub sems dpa'i ji ltar yi rang ba dang / ji ltar yongs su sngo bar byed pa ni de skad ces smras pa dang zhes bya ba la sogs pa rgya cher bstan to/ /ji ltar yang de la dmigs pa'i sbyor ba bya ba de nyid nye bar bstan pa'i phyir/ byams pa de la zhes bya ba la sogs pa dris te dngos po gang dag gis zhes bya ba ni phyogs bcu'i de bzhin gshegs pa de dag gis so/ /dmigs pa gang dag gis zhes bya ba ni de dag gi dge ba'i rtsa ba dag gis so/ /rnam pa gang gis zhes bya ba ni ting nge 'dzin gyi phung po la sogs pa dag gis so/ /sems de zhes bya ba ni rjes su yi rang ba'i sems so/ /mtshan mar byas pa zhes bya ba ni rtogs par byed pa ste/ gzhan du na rjes su yi rang ba'i yongs su bsngo ba'i 'brel pa med pa'i phyir ro/ /'on kyang dmigs par nus sam zhes bya ba ni dri ba'o/ /byang chub sems dpa' sems dpa' chen po byams pas btsun pa rab 'byor zhes bya ba la sogs pa smras so/ /de ltar na phyin ci log tu 'gyur te/ med pa la mtshan mar 'dzin pa dang / 'jig pa dang / nges par rtogs pa dang / go rims bzhin du 'du shes dang / sems dang lta ba phyin ci ma log pa yin te/ 'di dag bsgrub pa'i phyir 'dod chags kyi dpe bstan te/ 'di ltar yang zhes bya ba ni gzhan gyi gzhung 'dod pa la rtogs par byed de/ gnod sbyin ji lta ba bzhin du gtor ma yang de bzhin no zhes bya bar bsams so/ /sems zhes bya ba ni yongs su bsngo ba'i sems so/ /chos thams cad kyang zhes bya ba ni bstan pa'o/ /khams thams cad ces bya ba ni bshad pa'o/ /gal te dngos po ji lta ba zhes bya ba la sogs pas ni skyon bstan to/ /dngos po de gang yin zhes bya ba la sogs pa ni rjes su yi rang ba'i sems dang ldan pa'o/ /sems zhes bya ba ni yongs su bsngo ba'i sems so/ /de yang ngo bo nyid med pa nyid kyi phyir gang zhig gang la yongs su bsngo ba'i phyir ro zhes bya bar bsams so/ /de nyid kyi phyir 'phags pa byams pas 'phags pa rab 'byor zhes bya ba la sogs pa smras so/ /gang yang rjes su yi rang ba dang ldan pa yongs su bsngo ba la sogs pa yod par gyur kyang ngo / /brtsam zhes smos pa ni bsgrub pa rnam par bcad pa'i phyir ro/ /dad pa'i ni yang dag par yid ches pa'o/ /dga' ba ni mgu ba'o/ /dang ba ni rnyog pa dang bral ba'o/ /gus pa ni srid zhu'o/ /nye bar bstan pa ni bstan par byas pa'o/ /sems zhum par mi 'gyur ba ni bag mi 'khums pa'o/ /yang dag par zhum pa ni kun tu zhum pa'o/ /yi gsod pa ni skyo ba'o/ /yi gsod pa thob pa ni skyo ba'i rab tu gdung ba'o/ /skrag par brtson pa ni skrag pa'o/ /kun nas skrag pa ni dngang ba'o/ /de'i rgyu ni shin tu dngang ba yin no/ /de ltar zhes bya ba ni zhum pa la sogs pa yod pa ma yin pa'o/ /gang gis zhes bya ba la sogs pa la gang zhes bya ba ni rjes su yi rang ba'i sems so/ /zad pa zhes bya ba ni bstan pa'o/ /'gag pa ni rnam par zhig pa nyid kyi phyir ro/ /bral ba ni yod pa ma yin pa nyid kyi phyir ro/ /rnam par gyur pa zhes bya ba ni yang skye ba med pa'o/ /gang yang zhes bya ba ni ci yang med de rang gi ngo bo nyid med pa nyid kyi phyir ro/ /'grogs pa ni dus mnyam pa nyid do/ /sems 'gas kyang sems kyi chos nyid ther zug pa yin no zhe na/ sems kyi rang bzhin zhes bya ba la sogs pa gsungs te/ de ni 'dus ma byas pas yongs su bsngo ba dang bral ba'o/ /legs par gzung ba'i tshig ni nyes par gzung ba log par yongs su bsngos pa nyid dang bral ba nyid kyi phyir ro/ /brtsams te zhes bya ba ni dbang du byas pa'o/ /ji ltar zhe na/ gzhir bya ste zhes bya ba smos te dri ba'i gzhir byas pa'o/ /ji ltar zhe na/ byams pa 'di las zhes bya ba ni gcod pa'i tshig ste/ byams pa la zhes bya ba nas brtsams te ji ltar lta ba phyin ci log par mi 'gyur zhes bya ba'i bar gyis bstan to/ /de ltar dris pa la 'phags pa byams pas lan du 'phags pa rab 'byor gal te zhes bya ba la sogs pa smos te/ sems gang gis gang yongs su bsngo ba zhes bya ba ni/ sems gang gis gang yongs su sngo bar byed pa'o/ /de la zhes bya ba ni gnyis ka la'o/ /ji ltar zhes bya ba ni legs par yongs su gzung ba nyid kyi phyir ro/ /yongs su bsngo ba zhes bya ba ni legs par yongs su bsngos pa yin no/ /de gnyis gsal bar bya ba'i phyir nam zhes bya ba la sogs pa gsungs so/ /de ltar na zhes bya ba la sogs pa ni mjug bsdu ba'o/ /de ltar na gang gi tshe phyin ci log tu gyur zhe na/ de'i phyir ji ste zhes bya ba la sogs pa gsungs te/ de yan chad kyis ni phyin ci log tu thal bar 'gyur bar rgol ba la lan gdab par byas nas mi dmigs pa bstan par bya ba'i phyir gal te zhes bya ba la sogs pa gsungs te/ 'di ltar shes shing zhes bya ba ni bstan pa'o/ /'di ltar sems te zhes bya ba ni bshad pa ste/ phyin ci ma log pa'i sems kyi yid la byed pa zhes bya ba'i don to/ /de zhes bya ba la sogs pa la sems de nyid bsams pa zhes bya ba dang sbyar ro/ /'das pa nyid kyi phyir zad pa'o/ /zad pa la zhes bya ba la sogs pa'i rnam grangs kyis yid la byed pa'o/ /de mi nus zhes bya ba ni ri bong gi rwa bzhin du med pa'i phyir ro/ /de nyid kyi chos nyid ces bya ba ni ngo bo nyid med pa nyid do/ /chos gang dag gis zhes bya ba ni sems las byung ba dag gis so/ /chos gang dag la zhes bya ba ni sangs rgyas kyi chos rnams la'o/ /gal te zhes bya ba la sogs pa ni mjug sdud pa'o/ /de ltar zhes bya ba ni mi dmigs pa ste thams cad du stong pa nyid du ro gcig par yid la byed par zhes bya ba'i don to/ /de ltar de ni 'phags pa byams pas 'das pa'i sangs rgyas rnams kyi dbang du byas nas bstan pa yin no/ /ma byon pa'i sangs rgyas rnams kyi dbang du byas nas gzhan yang 'phags pa rab 'byor zhes bya ba la sogs pa gsungs so/ /da ltar byung ba'i dbang du byas nas gzhan yang 'phags pa rab 'byor zhes bya ba la sogs pa gsungs so/ /'di ni mi dmigs pa'i yongs su bsngo ba ste gnyis pa'o/ /gzhan yang 'phags pa rab 'byor zhes bya ba la sogs pa gsungs pa la/ dus gsum gyi sangs rgyas la sogs pa'i bsod nams la rjes su yi rang ba ni 'dir mdor bsdus pa'o/ /mchog la sogs pa ni snga ma bzhin no/ /'dir phyin ci ma log par bstan par bya ba'i phyir ji ltar zhes bya ba la sogs pa gsungs te/ 'di snyam du sems te zhes bya ba ni sems pa ste yang dag par yid la byed pa'o/ /chos de dag ces bya ba ni gang yongs su bsngo bar bya ba dag go/ /chos de yang mi zad pa'o zhes bya ba ni bla na med pa yang dag par rdzogs pa'i byang chub ni chos nyid shin tu rnam par dag pa'i mtshan nyid do/ /de ltar yongs su bsngo ba yin no zhes bya ba ni phyin ci ma log pa yin no zhes dgongs so/ /chos 'di ni chos la yongs su mi bsngo'o zhes bya ba ni chos thams cad ngo bo nyid med pa'i phyir ro/ /'di ltar zhes bya ba ni de ltar yang ste snga ma bzhin no/ /de nyid kyi phyir btsun pa rab 'byor zhes bya ba la sogs pa gsungs so/ /gal te zhes bya ba la sogs pas ni rnam pa gsungs so/ /'di ni zhes bya ba la sogs pa ni mjug sdud pa'o/ /'di phyin ci ma log par yongs su bsngo ba ste gsum pa'o/ /gal te zhes bya ba la sogs pa ni bsod nams mngon par 'du byed pa ni bsod nams kyi las so/ /mngon par chags pa ni 'du shes pa'o/ /'o na ji ltar yongs su sngo bar byed ce na/ gal te zhes bya ba la sogs pa gsungs te/ dben pa dang zhi ba ni go rims bzhin du rang dang gzhan dang / rang dang gzhan gyi mtshan nyid kyang stong pa nyid kyi phyir ro/ /gal te yang zhes bya ba la sogs pa gsungs pa la de nyid bstan pa'i phyir gsungs pa/ dben pa dang zhi ba nyid du shes na yang gal te mngon par zhen pa yod par gyur na de'i tshe yang dag par yongs su sngo bar byed pa ma yin no/ /de ni zhes bya ba mjug bsdu ba'o/ /de nyid yang dag pa'i yongs su bsngo ba yin pa'i phyir shes rab kyi pha rol tu phyin pa zhes bya ba'i tshig smos so/ /'di ni dben pa'i yongs su bsngo ba ste bzhi pa'o/ /gang yang zhes bya ba la sogs pa ni dran par byed pa'o/ /ji 'dra ba bzhin du zhes bya ba la sogs pas ni rtag pa ste/ gang 'dra ba nyid du yongs su bsngo ba ni bla na med pa yang dag par rdzogs pa'i byang chub tu chos kyi dbyings kyi ngo bor ro/ /de 'dra ba nyid ces bya ba ni gang dang de gnyis rtag tu 'brel pas chos kyi dbyings kyi ngo bo nyid de zhes bya ba'i don to/ /de 'dra ba de ni dge ba'i rtsa ba yin te/ gang rjes su yi rang ba dang ldan pa'o/ /gang gis kyang zhes bya ba ni yongs su bsngo ba'i sems kyis so/ /de'i rigs can zhes bya ba ni de nyid rigs te gang gis spyi'o/ /de'i mtshan nyid can zhes bya ba ni gang ci de nyid mtshan nyid do/ /de'i rigs zhes bya ba ni de'i tshogs so/ /de'i rang bzhin zhes bya ba ni de'i ngo bo nyid can no/ /gal te de ltar shes na zhes bya ba ni gal te 'dis kyang de 'dra ba nyid la sogs par de kho na nyid du mngon par zhen na/ de'i tshe yang dag pa'i yongs su bsngo ba ma yin no/ /gang 'das pa zhes bya ba la sogs pas ni de kho na'i rnam par rtog pa gzhan du gsungs te/ ma phyin pa ni ma skyes pa'o/ /gnas pa ni yod pa ma yin te rang bzhin gyis 'jig pa nyid kyi phyir ro/ /de'i phyir gsum tshar yang mi dmigs te de bas na yod pa ma yin no/ /gang gi phyir zhe na mtshan ma yang ma yin te rgyu med pa'i phyir ro/ /rgyu med pa ni yul yang ma yin no/ /gal te zhes bya ba la sogs pa la de ltar zhes bya ba ni zad pa nyid la sogs pa'o/ /des na de mtshan mar byed cing nye bar dmigs na de'i tshe yang dag par sems pa ma yin/ yang dag par yid la byed pa ma yin pa ste de'i tshe yang dag par sngo bar byed pa ma yin no/ /de lta na gang gi tshe khong du ma chud pa 'am dran pa dang bral bas mtshan mar mi byed pa de'i tshe/ yang dag pa'i yongs su bsngo bar 'gyur ro zhe na de ste zhes bya ba la sogs pa'o/ /de ltar na zhes bya ba ni de ltar mtshan mar mi byed pa yongs su sngo bar byed pa ma yin no/ /yongs su bsngo ba tsam yang med do zhes bya bar dgongs so/ /'o na gang gi tshe yang dag par yongs su bsngo ba yin zhe na de ste zhes bya ba la sogs pa gsungs te/ de ste zhes bya ba'i sgra ni gal te zhes bya ba'i don to/ /de la zhes bya ba ni de 'dra ba nyid la sogs pa ste/ mtshan ma med pa dang yul med pa'o/ /mtshan ma zhes bya ba ni shes pa la yang dag par dmigs pa dang / yang dag par sems pa yin te de ni yang dag par yid la byed pa'o/ /mtshan mar mi 'dzin zhes bya ba ni yang dag par mi shes shing mngon par ma zhen pa'o/ /de ltar na zhes bya ba la sogs pa ni mjug bsdu ba'o/ /de bzhin du sangs rgyas kyi bsod nams kyi tshogs rjes su yi rang ba la sogs kyi ngo bo nyid gang yin pa'i chos nyid gang yin pa rjes su dran pa de ni sangs rgyas kyi bsod nams kyi rang bzhin rjes su dran pa'i yongs su bsngo ba ste lnga pa'o/ /'di la zhes bya ba la sogs pa la 'di la zhes bya ba ni gang de gnyis ka ste de gnyis yid la byed cing mtshan mar mi byed pa'o/ /de zhes bya ba'i sgra ni rab tu grags pa ste/ thabs la mkhas pa gang yin pa de rab tu grags pa'o/ /gang zhes bya ba la sogs pas ni phan yon gsungs so/ /ji ste 'dir thabs la mkhas pa'i thabs gang yin zhe na/ de'i phyir 'dir zhes bya ba la sogs pa gsungs te/ 'di nyid ces bya ba ni mdo'i bdag nyid do/ /thos pa dang mi ldan pa zhes bya ba ni 'di ma thos pa zhes bya ba ni lhag ma'o/ /shes rab kyi pha rol tu phyin pa yongs su bsngo ba bsod nams bya ba de nyid de 'di la 'jug pa dang / 'dzin par mi nus zhes bya bar sbyor te/ de la ni de ltar yin na yang de skad ma zer cig ces brjod par bya bar rigs so/ /gang la zhe na/ gang 'di skad du zhes bya ba la sogs pa gsungs so/ /de ni thabs dang bcas pa'i yongs su bsngo ba ste drug pa'o/ /ci'i phyir zhes bya ba la sogs pa gsungs te/ de 'di zhes bya ba la sogs pa gang gsungs pa la/ de ni gang gi phyir zhes bya ba'i don to/ /lus ni bdag nyid kyi dngos po'o/ /'du byed ni dge ba'i rtsa ba dag go/ /de'i phyir de dag ni zhi ba dben pa ste ngo bo nyid med pa zhes bya ba'i don to/ /de'i phyir yang dmigs pa dang bral ba ni mi dmigs pa zhes bya ba'i don to/ /gzhan du na zhes bya ba ni gal te yang dmigs pa de lta na yang ngo / /yang dag pa ji lta ba ni phyin ci ma log pa dang / 'gag pa la sogs pa'o/ /mtshan mar byas shing zhes bya ba ni 'dzin pa'o/ /rnam par rtog pa zhes bya ba ni mngon par zhen pa'o/ /yang dag pa ji lta ba ma yin pa ni rnam par rtog pa'i snang ba'o/ /yang dag pa ji lta ba ni 'gags pa la sogs pa'o/ /dmigs pa'i bdag nyid kyi 'du shes kyi mi dmigs par bla na med pa yang dag par rdzogs pa'i byang chub tu yongs su sngo bar byed na des cir 'gyur zhe na/ de zhes bya ba la sogs pa gsungs te/ yongs su mya ngan las 'das pa zhes bya ba la/ yang gi sgra ni lhag pa'i zhes bya ba'i don te de ni shin tu yang mtshan mar byed pa mi rigs pa'i phyir ro/ /dug dang bcas zug rngu dang bcas zhes bya ba ni de dang chos mthun pa'i phyir ro/ /de ni mtshan ma med pa'i yongs su bsngo ba ste bdun pa'o/ /'di lta ste zhes bya ba la sogs pa la/ bzang po ni kha dog la sogs pa khyad par du gyur pa'i phyir ro/ /de yang zhes bya ba ni gal te yang zhes bya ba'i don to/ /'on kyang zhes bya ba ni de lta mod kyi zhes bya ba'i don to/ /sems te zhes bya ba ni kha dog la sogs pa la chags pa'i phyir ro/ /myang ba ni myang ba ste yongs su longs spyod pa'i phyir ro/ /zhu ba'i tshe zhes bya ba ni tha mar gyur pa'o/ /rnam par smin pa ni 'bras bu'o/ /log par zin pa zhes bya ba ni log par thos pas so/ /log par rig pa zhes bya ba ni rnam par ma rtogs pa'o/ /log par kha ton du ma byas pa zhes bya ba ni log par goms pas so/ /legs par gsungs pa de ni sangs rgyas kyis gsungs pa'o/ /na zhes bya ba ni yongs su rdzogs pa'i don du'o/ /de de ltar zhes bya ba ni gang 'di gsungs pa'o/ /spang bar 'gyur te zhes bya ba ni 'dir phung khrol byed pa ste dug go/ /des na zhes bya ba ni mjug sdud pa'o/ /ji ltar zhes bya ba la sogs pa ni dri ba'o/ /'di la zhes bya ba la sogs pa ni lan no/ /skur pa gdab pa ni smod pa ste yang dag pa ma yin pa'i smra bas brjod pa'i phyir/ yongs su gzung bar bya zhes bya ba la sogs pa'i tshig smos pa ni rjes su yi rang ba mtshon te bar ma chad par byung ba nyid kyi phyir ro/ /sangs rgyas kyi ye shes mkhyen pa zhes bya ba ni sangs rgyas kyi spyan gyis gzigs pa zhes bya bar sbyar ro/ /de lta na de'i zhes bya ba la sogs pa ni mjug sdud pa yin te/ dug med pa zhes bya ba la sogs pa thams cad ga las shes she na/ lhag pa'i bsam pas shes pa la sogs pa gsungs so/ /de ni sangs rgyas kyis rjes su gnang ba'i yongs su bsngo ba ste brgyad pa'o/ /gzhan yang rigs kyi bu 'am rigs kyi bu mo zhes bya ba la sogs pa la/ tshul khrims la sogs pa ni de bzhin gshegs pa'i tshul khrims la sogs pa'i phung po'o/ /ma gtogs pa ma 'dus pa ste dus gsum dang / khams gsum du ma gtogs pa nyid kyi phyir te/ de dag gi tshul khrims la sogs pa la chos kyi dbyings tsam nyid kyi phyir ro zhes dgongs so/ /yongs su bsngo ba yang zhes bya ba ni yongs su bsngo ba'o/ /chos 'di la yang zhes bya ba ni yang dag par rdzogs pa'i byang chub la'o/ /chud ma zos par zhes bya ba ni ma nyams pa'o/ /sangs rgyas kyis gnang ba dang ma gtogs pa yongs su bsngo ba dag gis chos kyi dbyings dang yongs su bsngo ba mnyam pa nyid du bstan pa'i phyir de la zhes bya ba la sogs pa gsungs te/ 'di ni zhes bya ba'i sgra ni gnyis pa ni yang gi don du rtogs par bya'o/ /gang chos kyi dbyings dang mnyam pa'i yongs su bsngo ba 'di ni yang dag pa'i yongs su bsngo ba ste/ 'di ni yang dag pa'i yongs su bsngo ba yin no zhes sbyar ro/ /gang zhe na 'dis ni zhes bya ba smos te 'das ma thag tu bstan te/ ma gtogs pa'i yongs su bsngo ba zhes bya ba'i don to/ /ji ltar sangs rgyas bcom ldan 'das zhes bya ba la sogs pa la/ gang sangs rgyas kyis gnang ba'i yongs su bsngo ba zhes bya ba'i don to/ /de ltar yang zhes bya ba la sogs pa ni mjug sdud pa'o/ /'di ni khams gsum du ma gtogs pa'i yongs su bsngo ba ste dgu pa'o/ /de nas zhes bya ba la sogs pa la gang yin pa zhes bya ba de ni zhes bya ba ni gang ma gtogs pa ma yin par bstan pa'o/ /'di la yang zhes bya ba nas yongs su bsngo ba zhes bya ba'i bar gyis sangs rgyas kyis rjes su gnang ba'i yongs su bsngo ba bstan pa yin no/ /'dir zhes bya ba ni 'dir chos kyi dbyings kyi yongs su bsngo ba dang gnyis kyi'o/ /mchog ces bya ba ni rab tu dga' ba la sogs pa sa bcu gcig gi khyad par du gyur pa nyid kyi phyir ro/ /lhag ma mngon par shes pa lnga thob par 'gyur ba zhes bya ba'i bar ni go sla'o/ /'dir bstan pa bsod nams chen po 'byung ba'i rgyur gyur pa dad pa la sogs pa ni snga ma bas khyad par du gyur pa'i rgyu yin no/ /'di ni bsod nams chen po 'byung ba'i yongs su bsngo ba chung ngu ste bcu pa'o/ /bsod nams mngon par 'du byed pa lta zhog ces bya ba nas/ rang sangs rgyas su 'gyur ro zhes bya ba'i bar ni rtogs par sla'o/ /'di bsten pa'i bsod nams lhag pas dad pa la sogs pa snga ma bas khyad par du gyur pa yin te/ de ni bsod nams chen po 'byung ba'i yongs su bsngo ba 'bring ste bcu gcig pa'o/ /yang rab 'byor zhes bya ba la sogs pa nas sbyin pa byin la zhes bya ba'i bar ni bstan pa'o/ / rnam grangs de lta bur zhes bya ba nas byin la zhes bya ba'i bar ni bshad pa'o/ /de lta bu zhes bya ba ni 'chad par 'gyur bas so/ /na ba ni nad do/ /de'i gso sman ni de'i rkyen no/ /yo byad ni chu tshags la sogs pa'o/ /bde ba'i rgyu dag ni bde ba'o/ /de dag sbyar ba ni bstabs pa'o/ /bde ba la reg pa ni bde ba yongs su myong ba'o/ /des gang gnas pa ni 'chags pa la sogs pa'o/ /de sems can re re la yang so sor bzhag pa ste rim gro byed par brtag go/ /byang chub sems dpa' de dag kyang re rer yongs su brtag ste zhes bya ba'i rjes su 'jug ste/ byang chub sems dpa' re re bsnyen bkur ba nyid du so sor bzhag pa ste de ni nye bar gnas zhes bya bar sbyar ro/ /ci'i phyir nye bar gnas she na rang bzhin gyis sems can thams cad la byang chub sems dpa' re res sems can re re la zhes bya ba ni nges par gzung ba'i drug pa'o/ /de dag ni nang du re res sems can de dag thams cad nyid la sbyin pa byin pa'o/ /yun ring du de tsam du bsams pa zhes bya ba ni dus yun ring po de tsam du bsags pa'o/ /de ltar rgya cher yang dag par bsdus pa zhes bya ba ni rgya cher bskyed pa zhes bya ba'i bar du'o/ /lha'i bu dag ces bya ba la sogs pa la 'jig rten gyi khams gang gA'i klung gi bye ma snyed dag na yod pa'i byang chub sems dpa' ni bsnyen bkur byed pa'o/ /'jig rten gyi khams gang gA'i klung gi bye ma snyed dag na sems can ji snyed yod pa de dag re re nas bsnyen bkur byed pa'o/ /'dir bsnyen bkur byed pa'i byang chub sems dpa' de snyed dang / 'jig rten gyi khams gang gA'i klung gi bye ma snyed kyi sems can re re zhes bya ba ni lhag ma'o/ /sems can thams cad re re yang de snyed dang / byang chub sems dpa' thams cad yongs su brtag pa ni snga ma bzhin no/ /lhag ma ni rtogs par sla'o/ /'di ni bsod nams chen po 'byung ba'i yongs su bsngo ba chen po'o/ /bsod nams chen po 'byung ba'i yongs su bsngo ba ste bcu gnyis pa'o/ /yongs su bsngo ba'i yid la byed pa rdzogs nas/ rjes su yi rang ba'i yid la byed pa bshad par bya ste/ de'i dbang du byas nas bstan bcos las/ thabs dang mi dmigs pa dag gis/ /dge ba'i rtsa ba yi rang ba/ /rjes su yi rang yid byed pa/ /bsgom pa yin par 'dir brjod do/ /zhes bya ba gsungs te/ 'di nyid de nas bcom ldan 'das zhes bya ba la sogs pa gsungs te/ ma lus pa zhes bya ba ni lus pa med par byed pa'o/ /mchog nyid la sogs pa bcu bzhi pa gsungs pa ji tsam gyis ni mchog tu gyur zhes bya ba ni dris pa'o/ /de tsam gyis na mchog tu 'gyur zhes bya ba ni lan no/ /'dir bsam pa gang yin zhe na/ bsam pa 'di yin te/ phyogs nyid la sogs pa ni phyogs bcu dang / dbus dang dus gsum gyi dge ba'i rtsa ba dmigs nas rnam pa bcu bzhir 'gyur ba yin no/ /de ltar gang du tshig gsum yod pa der yang phyogs bcu dang dus gsum gyi dbye bas rnam pa bcu gsum du 'gyur ro/ /der dbus kyi 'jig rten gyi khams ji ltar 'dus she na/ dbus de ni tshar bcad pa byas nas 'dus pa'i phyir ro/ /'jig rten gyi khams ni phyogs gcig la yang 'jig rten gyi khams zhes tha snyad 'dogs te dper na zla ba brgyad dam dgu 'das nas bu btsa' bar 'gyur ro zhes bya ba lta bu'o/ /gang gi tshe zhag sum cu la zla ba yin pa de'i tshe zla ba brgyad pa yin la/ gang gi tshe phyogs gcig la zla ba yin pa de'i tshe ni dgu yin no/ /mi 'dzin pa ni gzung ba nyid du so sor mi snang ba'i phyir ro/ /rlom sems su mi byed pa ni dngos po nyid du mi snang ba'i phyir ro/ /mi dmigs pa ni rang gi ngo bo nyid mi snang ba'i phyir ro/ /mi rtog pa ni spyi'i mtshan nyid kyis so/ /rnam par mi rtog pa ni khyad par gyi mtshan nyid dag gis so/ /mi mthong ba ni mthong yang mngon par zhen pa med pa'i phyir ro/ /yang dag par rjes su mi mthong ba ni rgyun la mngon par zhen pa med pa'i phyir ro/ /brtags pa ni yang dag pa ma yin par kun tu rtog pa'o/ /des rnam par bsgrubs pa ni yang dag par ston pa'o/ /ma skyes pa ni sa bon med pa'i phyir ro/ /nges par ma skyes pa ni grub pa med pa'o/ /'ong ba med pa ni ma 'ongs pa'i dus sam 'jig rten snga ma nas so/ /'gro ba med par ni 'das par ro/ /de bzhin du 'gag pa yang med do zhes bya ba la ngo bo nyid med pa dang / yongs su brtags pa'i phyir zhes bya ba ni gtan tshigs so/ /de bzhin zhes bya ba ni yongs su brtags pa'i ngo bo nyid kyis de lta bur gyur pa'o/ /chos de dag ces bya ba ni dge ba'i chos gzhan gyi dbang gi ngo bo'o/ /chos nyid ni byis pa'i blo'i spyod yul gyi ngo bo stong pa nyid do/ /rjes su yi rang ba'i skabs yin na yang de ltar rjes su yi rang ba nas de bzhin du yongs su sngo bar byed ces bya ba'i tshig gis nges par yongs su bsngo bar bya ba nyid yin pa'i phyir ro/ /lhag ma rgyur mi bzod do zhes bya ba'i bar ni bshad pa nyid do/ /de ni mi dmigs pa'i rjes su yi rang ba ste dang po'o/ /gzhan yang rab 'byor zhes bya ba la sogs pa la rnam par grol ba ni mya ngan las 'das pa ste/ de yang chos kyi dbyings sgrib pa thams cad rnam par dag pa don dam pa nyid do/ /sbyin pa la sogs pa thams cad kyang de bzhin no zhes bya ba'i don to/ /chags pa ni srid pa'o/ /de med pa ni ma chags pa'o/ /srid pa'i rgyu can gyi skye ba med pas na ma bcings pa ma grol ba'o/ /mi bsngo ba'i tshul gyis zhes bya ba ni mi dmigs pa'i phyir ro/ /de ji ltar zhe na/ mi 'pho ba dang mi 'jig pa zhes gsungs so/ /de ltar na gnas skabs gzhan du 'pho ba 'am snga ma 'jig cing phyi ma skye ba ni yongs su bsngo ba yin na chos kyi dbyings ni gnas skabs de lta bu yang ma yin te 'pho ba med cing 'jig pa med pa'i phyir ro/ /yang dag par blangs te zhes bya ba ni bla ma dam pa de las yang dag par blangs pa'o/ /spyos pa ni kha zer ba'o/ /brdegs pa ni bsnun pa'o/ /brgyad pa ni yang dag pa dang yang dag pa ma yin pa'i skyon brjod pa'o/ /bcas pa ni ldan pa zhes bya ba'i don to/ /rmugs pa nyid kyi zil gyis gnon par zhes bya bar sbyar ro/ /de la rmugs pa ni sems las su mi rung zhing zhum pa ste sems las su mi rung zhing gang zhum pa'i mtshan nyid can ni rang gi dmigs pa mi rtogs pa ste rmugs pa'o/ /gnyid ni 'jug pa rang dbang med par sems sdud pa ste/ sems sdud pa yang mig la sogs pa'i dbang po'i sgo nas 'jug pa med pa'o/ /sems 'jug pa rang dbang med pa de ni gnyid nyid do/ /lhag ma le'u rdzogs pa'i bar ni rtogs par sla'o/ /thabs ni rnam par grol ba dang 'dra'o/ /des na chos kyi dbyings la mi dmigs pa'i rjes su yi rang ba 'di ni thabs kyi rjes su yi rang ba ste gnyis pa'o/ /rjes su yi rang ba dang yongs su bsngo ba ni de dag go/ /de rjod par byed pa'i le'u ni rjes su yi rang ba dang yongs su bsngo ba'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel slob dpon rin chen 'byung gnas zhi bas rnam par sbyar ba snying po mchog ces bya ba las le'u drug pa'o/ / //'jig rten pa'i bsgom pa'i lam yid la byed pa rnam pa gsum bshad nas 'jig rten las 'das pa'i bsgom pa'i lam bsgrub pa dang / shin tu dag pa zhes bya ba sngar yang bstan nas/ de la bsgrub pa'i rang gi ngo bo'i dbang du byas nas bstan bcos las/ de yi ngo bo nyid mchog nyid/ /kun la mngon du mi byed dang / /chos dbyings dmigs pa med par ni/ /gtod par byed pa don chen nyid/ /ces bya ba gsungs te/ sgrub pa de'i yan lag ni lnga ste/ bsgom pa'i lam gyi shes rab kyi pha rol tu phyin pa'i khyad par thams cad mkhyen pa'i ye shes yongs su bsgrub pa la sogs pa dang / chos kyi 'khor lo bskor ba la sogs pa ni de'i ngo bo nyid do/ /mchog nyid ni pha rol tu phyin pa drug mngon par bsgrub pa'o/ /chos thams cad la mngon par 'du byed pa ni kun la mngon par 'du mi byed pa'o/ /chos thams cad la mi dmigs par gtod par byed pa ni gtod par byed pa'o/ /chos thams cad mi dmigs pa nyid kyi byang chub 'thob pa ni don chen po nyid do/ /de'i phyir de nas bcom ldan 'das zhes bya ba la sogs pa gsungs te/ 'di la bsgom pa'i lam gyi rang gi ngo bo'i shes rab kyi pha rol tu phyin pa nyid ji lta bu yin zhe na/ bcom ldan 'das zhes bya ba la sogs pa gsungs te/ gang las thams cad mkhyen pa'i ye shes yongs su rdzogs pa de la de skad ces bya'o/ /thams cad mkhyen pa nyid ces bya ba ni sgrib pa thams cad kyi bag chags kyi mtshams sbyor ba spangs pa'i ye shes te/ spangs pa phun sum tshogs pa dang ldan pa dang / ye shes phun sum tshogs pa zhes bya ba'i don to/ /de yang thams cad mkhyen pa nyid de de nyid kyi rig pa ni 'dir gsal bar byed pa lags so zhes bya ba yin te/ sgrib pa mun pa thams cad spangs pa ni gsal ba ste de byed pa'o/ /'di spangs pa phun sum tshogs pa'o/ /chos thams cad don dam par snang ba ni gsal ba ste/ de byed pa ni ye shes phun sum tshogs pa'o/ /des na de la phyag 'tshal lo/ /zhes bya ba ni da ltar gyi dus so/ /phyag bgyi bar 'os pa zhes bya ba ni rgyun du ma 'ongs pa'i dus su'o/ / tshig gcig po des ni phun sum tshogs pa gnyis bstan to/ /da ni tshig gnyis kyis spangs pa phun sum tshogs pa gsungs te/ ma gos pa zhes bya ba ni sgrib pa'i dri ma thams cad zad pa'i phyir ro/ /'jig rten thams cad kyi gos pa dang bral ba zhes bya ba ni khams gsum pa'i dri ma thams cad zad pa'o/ /de ni tshig gnyis kyis ye shes phun sum tshogs pa gsungs te/ chos thams cad don dam par snang ba'i snang ba ste byed pa'o/ /tshig 'og ma gnyis ni gtan tshigs gsungs te rab rib ni mi shes pa'o/ /de las bzlog pa ni rab rib dang bral ba ste/ ye shes zhes bya ba'i don to/ /thams cad ni ma lus pa'o/ /khams gsum gyi don dam pa de la rab rib dang bral bar byed pa de ni dmigs pas khyab pa'o/ /nyon mongs pa dang lta ba de dag nyid mun pa ste thams cad kyang yin de dag kyang yin pas de dag thams cad do/ /de dag sel ba ni mi mthun pa'i phyogs thams cad zad pa'o/ /'di thams cad kyis ni rang gi don phun sum tshogs pa bstan to/ /gzhan gyi don phun sum tshogs pa'i dbang du byas nas bcom ldan 'das zhes bya ba la sogs pa gsungs te/ bstan par bgyi ba lags so zhes bya ba ni rnam pa thams cad mkhyen pa'i go 'phang thob par 'dod pas so/ /mchog gi tshig gis ni rgyun du zhugs pa dang / lan cig phyir 'ong ba'i 'bras bu dang / rang byang chub kyi bar du de byed pa'o/ /de dag gi thabs ni byang chub kyi phyogs sum cu rtsa bdun no/ /de dag bde bar bgyid pa ni bar chad sel ba'i phyir ro/ /ji srid 'jig rten las 'das pa'i ye shes ma thob pa de srid du ldongs pa'o/ /de dag gis de skyed par byed pa'i phyir snang bar bgyid pa'o/ /'jigs pa dang nye bar 'tshe ba thams cad rab tu spong bar byed pa de ni snang ba ste/ 'jig rten las 'das pa'i bsgom pa'i lam nyid do/ /'di tsam gyis ni theg pa dman pa'i don bstan to/ /byang chub sems dpa'i don gyi dbang du byas nas/ bcom ldan 'das zhes bya ba la sogs pa gsungs te/ gzhan gyi don gyi phyir gtso bo ste de la de nyid sgrub pa ni dmigs pa'i bye brag gi spyan lnga ste 'khor ro/ /tha mi dad pas ni de nyid spyan te chos thams cad don dam par gzigs pa'i phyir ro/ /khyab par gzigs pa la bar chad gsum ste/ gti mug dang / mun pa dang / rab rib bo/ /de la gti mug ni mi shes pa'o/ /mun pa ni mun nag go/ /rab rib ni mig gi nad do/ /de dag rab rib ma mchis par bgyi ba ni rnam par 'jig par byed do/ /rab rib dang bral bar bgyid pa ni mdor bsdus pa ste/ thun mong yin pa'i phyir ro/ /ci zhig skyed par byed pa yin zhe na/ de'i phyir bcom ldan 'das zhes bya ba la sogs pa gsungs so/ /chos thams cad ni phung po dang khams dang skye mched do/ /de dag gi ngo bo nyid gsum ste kun brtags pa dang / gzhan dbang dang / yongs su grub pa'o/ /brtags pa ni mi byed pa ste/ de ni mtshan nyid ji lta ba bzhin du med pa'i phyir ro/ /gzhan dbang ni yang dag pa ma yin pa la kun tu rtog pa ste/ de'i gnyen po nyid yin pa'i phyir de mi byed pa'o/ /yongs su grub pa ni chos kyi dbyings te/ thog ma dang tha ma med pa nyid kyi phyir de yang mi byed pa'o/ /gal te yang dag pa'i shes pa byed pa yin no zhe na/ ma yin te/ thog ma med pa nas sems kyi rgyud la 'khrul pa ldog pa nyid na yang dag pa'i ye shes grub bo/ /'o na ci zhig byed ce na/ bcom ldan 'das zhes bya ba la sogs pa gsungs so/ /lam log par kun tu rtog pa de dag lam rab tu bsgoms pas chos bdag med pa'i ye shes la 'dzud par byed do/ /gang gi lam zhe na/ thams cad mkhyen pa nyid kyi'o/ /'di tsam gyis thams cad mkhyen pa'i ye shes gang yin pa ste rdzogs so zhes bstan to/ / de ni gzhan gyi don du yang bstan to/ /thams cad mkhyen pa nyid ces bya ba gsungs pa de ni gzhan gyi don du yang thams cad mkhyen pa nyid ces bya ba la sogs pa gsungs te/ gang gis bag chags kyi mtshams sbyor ba spangs pa de'i tshe de ni thams cad mkhyen pa nyid ces bya ba'i don to/ /'o na shes rab kyi pha rol tu phyin pa de ni skyed pa dang 'gog par byed cing skye ba dang 'gag pa yin no zhe na ma yin te/ bcom ldan 'das zhes bya ba la sogs pa gsungs te/ chos thams cad mi skyed pa zhes bya ba ni rnam par dag pa'o/ /chos thams cad mi 'gog pa zhes bya ba ni kun nas nyon mongs pa dag ste don dam par skye ba dang 'gog pa med pa ni bdag nyid ji lta ba bzhin du snang ba'o zhes bya bar dgongs so/ /de dag don dam par ni chos kyi dbyings te/ de'i phyir byis pa la snang ba'i dngos po de dag ni thog ma med pa nas gtan du med pas skye ba dang 'gag pa de dag ni med de de'i phyir de nyid rang gi mtshan nyid stong pa nyid nye bar bzung ste/ yang de dag rten cing 'brel par 'byung ba'i ngo bo nyid gsum pa gsungs nas bcom ldan 'das zhes bya ba la sogs pa gsungs te/ yum ni skyed par byed pa'o/ /gang gi phyir zhe na/ chos rin po che de dag nyid thams cad sbyin pa nyid kyi phyir ro/ /de nyid rgyu'i gnas skabs ma lus par byang chub sems dpa'i ngo bo nyid de sbyin par byed pa gang yin pa de ni bskyed pa'o/ /sangs rgyas ma smos pa de ni sangs rgyas skyed par byed pa nyid du don gyis shes te/ yang de tsam gyis sangs rgyas kyi yum ni khyad par du rtogs pas so/ /de'i phyir yang yon tan gyi khyad par de nyid stobs bcu zhes bya ba la sogs pa gsungs te/ de ni de bzhin gshegs pa'i stobs bcu byed pa'o/ /gang zhe na bcu ste/ gnas dang gnas ma yin pa mkhyen pa'i stobs dang / las dang rnam par smin pa mkhyen pa'i stobs dang / khams sna tshogs mkhyen pa'i stobs dang / mos pa sna tshogs mkhyen pa'i stobs dang / dbang po mchog dang mchog ma yin pa mkhyen pa'i stobs dang / thams cad du 'gro ba'i lam mkhyen pa'i stobs dang / bsam gtan dang rnam par thar pa dang / ting nge 'dzin dang snyoms par 'jug pa dang nyon mongs pa dang rnam par byang ba dang ldan pa gsal bar mkhyen pa'i stobs dang / sngon gyi gnas rjes su dran pa mkhyen pa'i stobs dang / 'chi 'pho ba dang skye ba mkhyen pa'i stobs dang / zag pa zad pa mkhyen pa'i stobs dang / de dag gi mtshan nyid ni bcom ldan 'das yum chen mo dag las ji skad du gsungs pa lta bu'o/ / de la srid pa dang mi srid pa ni gnas dang gnas ma yin pa ste dper na nyes par spyod pa dag las rnam par smin pa mi 'dod pa ni gnas yin la/ 'dod pa ni gnas ma yin pa lta bu'o/ /las dang rnam par smin pa ni las dang rnam par smin pa'o/ /khams sna tshogs ni bsod nams dang bsod nams ma yin pa la sogs pa skyed par byed pa'i bsam pa'o/ /mos pa sna tshogs ni 'di lta ste 'dod chags dang zhe sdang la sogs pa la dga' bar ro/ /dbang po ni dad pa dang brtson 'grus dang / dran pa dang / ting nge 'dzin dang / shes rab ste de dag gi mchog dang mchog ma yin pa nyid 'di ni dbang po rnon po'o/ /'di ni dbang po 'bring ngo zhes bya ba la sogs pa'o/ /thams cad du 'gro ba'i lam ni 'di ni 'dod chags kyi gnyen po'i lam mo/ /'di ni zhe sdang gi gnyen po'i lam mo zhes bya ba la sogs pa'o/ /bsam gtan bzhi dang / rnam par thar pa brgyad dang / rtog pa dang bcas shing dpyod pa dang bcas pa la sogs pa'i ting nge 'dzin gsum dang / gzugs med pa'i snyoms par 'jug pa bzhi dang / mthar gyis gnas pa'i snyoms par 'jug pa dgu dang / kun nas nyon mongs pa la sogs pa ste/ de la kun nas nyon mongs pa ni ro myang ba la sogs pa'o/ /rnam par byang ba ni mi dmigs pa la sogs pa'o/ /sdong ba ni seng ge rnam par bsgyings pa'am 'dug pa'o/ /sngon gyi gnas ni sngon gyi skye ba 'am/ de rjes su dran pa ni dran pa'o/ /'chi 'pho ba dang skye ba ni sems can rnams kyi 'chi ba dang skye ba'o/ / zag pa ni nyon mongs pa'o/ /gang de dag las gang gis zad par byed pa dang / de gnyis ka ni zag pa zad pa'o/ /sems can 'di dag ni gnas dang gnas ma yin pa la sogs pa thams cad du yang dag par shes pa ni 'dir gnas dang gnas ma yin pa la sogs pa mkhyen pa'o/ /de nyid stobs te gzhan gyis mi gnod cing zil gyis gnon par mi nus pa gang las she na/ mi 'jigs pa bzhi bgyis pa'i slad du'o zhes gsungs te/ rig pa smra ba las seng ge ltar shin tu 'jigs pa med pa ste/ de'i dngos po ni mi 'jigs pa nyid do/ /mi 'jigs pa ni bzhi ste/ mngon par rdzogs par byang chub pa la mi 'jigs pa dang / zag pa zad pa la mi 'jigs pa dang / bar du gcod pa la mi 'jigs pa dang / nges par 'byung ba'i chos rnams la mi 'jigs pa'o/ /mngon par rdzogs par byang chub pa ni de bzhin gshegs pa'i ye shes phun sum tshogs pa'o/ /zag pa zad pa ni spangs pa phun sum tshogs pa ste de gnyis ni rang gi don to/ /bar du gcod pa'i chos ni mya ngan las 'das pa'i mi mthun pa'i phyogs so/ /nges par 'byung ba'i chos ni mya ngan las 'das pa thob par byed pa ste/ 'di gnyis ni gzhan gyi don te gzhan la de dag ston pa'i phyir ro/ /mi 'jigs pa ni de'i dam bcas pa de dag las 'jog pa zhes bya ba'i don te de byed pa'o/ /mgon med pa ni sems can thog ma med pa nas sdug bsngal gyi rgya mtshor 'khyams pa de dag tu yang skye ba med pas de dag gi mgon dang / skyabs ni sangs rgyas bcom ldan 'das rnams te/ de mdzad pa'o/ /'di tsam ni thams cad mkhyen pa'i ye shes yongs su rdzogs pa 'di sgrub pa yin no/ /'di nyid kyis thams cad mkhyen pa'i ye shes nyid bsgrub pa'i phyir/ bcom ldan 'das zhes bya ba la sogs pa gsungs te/ 'khor ba ni zag pa dang bcas pa'i phung po rnams so/ /de'i gnyen po ni 'joms pa'o/ /chos kyi dbyings nyid de'i bdag nyid chen po ma yin nam zhe na/ ther zug tu gnas pa ma mchis pa'o zhes bya ba gsungs te/ gal te chos kyi dbyings gnyen po yin na ni ther zug tu gnas pa thog ma dang tha ma med par ngo bo gcig pa nyid kyi phyir de'i tshe dang po nyid nas 'khor ba med par 'gyur ro/ /shes rab kyi pha rol tu phyin pa ni thog ma yod pa yin te gong nas gong du khyad par du 'gro ba yin pas sems de'i gnyen po yin no/ /'dis ni spangs pa phun sum tshogs pa bstan nas/ ye shes phun sum tshogs pa bstan pa'i phyir bcom ldan 'das zhes bya ba la sogs pa gsungs te/ chos thams cad kyi ngo bo nyid ni don dam pa'o/ /de bstan pa ni de snang bar byed pa'i phyir te/ rang dang gzhan gyi don to/ /gzhan gyi don gyi dbang du byas nas bcom ldan 'das zhes bya ba la sogs pa gsungs te/ gcig gis nyams su myong ba med pa'i phyir yongs su rdzogs pa'o/ /chos kyi 'khor lo lan gsum rnam pa bcu gnyis su bskor ba'i chos ni bstan pa'o/ /de nyid ni 'khor lo ste gdul bya'i rgyud la 'pho ba'i phyir ro/ /de bskor ba ni skor bar byed pa ste/ sangs rgyas rnams kyis de nyid der bskor ba'o/ /de la chos kyi 'khor lo ni bden pa bzhi'o/ /de lan gsum du bskor ba ste/ 'di ni sdug bsngal lo/ /'di ni sdug bsngal kun 'byung ba'o/ /'di ni sdug bsngal 'gog pa'o/ /'di ni sdug bsngal 'gog par 'gro ba'i lam ste/ bden pa bzhi'i ngo bo nyid yongs su gcod pa ste bskor ba dang po'o/ /de nyid go rims bzhin shes par bya ba dang / spang bar bya ba dang / mngon sum du bya ba dang / bsgom par bya ba yongs su gcod pa ni bskor ba gnyis pa'o/ /de nyid bdag gis yongs su shes pa nyid dang / spangs pa dang / mngon sum du byas pa dang / bsgoms par yongs su gcod pa ni yongs su bskor ba gsum pa'o/ /sdug bsngal gyi bden pa'i ngo bo dang / sdug bsngal nyid du shes par bya ba dang / sdug bsngal nyid du shes pa de ni rnam pa gsum mo/ /kun 'byung gi bden pa'i ngo bo nyid dang / spang bar bya ba nyid dang / spangs pa nyid de ni rnam pa gsum mo/ /'gog pa bden pa'i ngo bo nyid dang / mngon du bya ba nyid dang / mngon sum du byas pa nyid de ni rnam pa gsum mo/ /lam gyi bden pa de'i ngo bo nyid dang / bsgom par bya ba nyid dang / bsgoms pa nyid de ni rnam pa gsum ste/ de'i phyir rnam pa bcu gnyis so/ /rten cing 'brel par 'byung ba'i ngo bo nyid la yang kun nas nyon mongs pa ni 'gog pa yang ma yin te/ 'jig pa'i rgyu rnams kyis cung zad kyang byas pa med pa'i phyir ro/ /rnam par byang ba rnams bskyed pa yang med de log pa'i shes pa log pas sems tsam nyid kyi yang dag pa'i ye shes nyid skye ba ma yin nam zhe na/ mtha'i skad cig ma skyes pa nyid kyis rgyun 'gog pa nyid kyi phyir te mi 'gag pa bzhin no/ /shes rab kyi pha rol tu phyin pa de nyid log pa'i shes pa sngar 'gog pa na yang dag pa'i ye shes nyid kyi rgyu nyid yin pa'i phyir/ 'gog pa dngos po med pa la rgyu nyid mi rigs pa'i phyir la sems nyid mi mthun pa'i phyogs 'gag pa ni yang dag pa'i ye shes kyi phyir ro/ /gzhan du 'khrul pa thams cad log pa'i dus su yang dag pa'i shes pa med par 'gyur ro/ /de ni bsgom pa'i lam gyi ngo bo nyid do/ /bcom ldan 'das ji ltar zhes bya ba la sogs pa nas mkhyen pa thob pa zhes bya ba'i bar gyis ni mchog bstan to/ /gnas par bgyi zhes bya ba ni mchod pa dag gis 'jug par bya'o/ /yid la bgyi zhes bya ba ni bla mar rjes su dran pa'o/ /phyag 'tshal bar bgyi zhes bya ba ni lus dang ngag dang yid kyis so/ /gzhi ni skabs so/ /'dri ba ni gtan tshigs so/ /bcom ldan 'das ma mchog nyid ni byang chub sems dpa'i rjes su yi rang ba dang ldan pa'i bsod nams shes rab kyi pha rol tu phyin pa'i thabs mkhas pas yongs su zin pa ni dmigs pa can dag gi rjes su yi rang ba dang ldan pa'i bsod nams pha rol tu phyin pa lnga'i bdag nyid kyi bsod nams las khyad par du gyur pa ni mchog ste/ gzhi de ma thag tu bcom ldan 'das kyis bstan pa'i phyir ro/ /gang gi phyir 'di ni de dag gi yongs su 'dren pa ste de ni mchog nyid kyi rgyu'o/ /yongs su 'dren pa med pa zhes bya ba ni yongs su 'dren pa dang bral ba'o/ /skal ba med pa ni mi rung ba'o/ /dmus long ni de dang 'dra ba'o/ /lhag ma ni rtogs par sla ste de ni mchog nyid do/ /de nas bcom ldan 'das la tshe dang ldan pa shA ri'i bus zhes bya ba la sogs pa nas bka' stsal pa gnyis pa yan chad kyis mngon par sgrub pa bstan te/ shes rab kyi pha rol tu phyin pa ni bsgom pa'i lam mo/ /gang phung po lnga nas chos thams cad kyi bar du mngon par 'du mi byed pa ni mngon par sgrub pa'o/ /yan lag gi don ni rtogs par sla'o/ /de ni mngon par 'du mi byed pa ni sgrub pa'o/ /de skad ces bka' stsal pa dang zhes bya ba nas grangs su 'gro'o zhes bya ba la/ chos gang zhes bya ba ni zag pa med pa'o/ /chos gang yang thob par byed pa med ces bya ba ni chos rnams mi dmigs pas thob par byed pa ni gtod pa'o/ /de nas bcom ldan 'das la zhes bya ba nas shA ri'i bu zhes bya ba yan chad kyis ni don chen po bstan te/ gal te chos gang yang thob par mi byed na/ 'o na ni thams cad mkhyen pa nyid kyang thob pa ma yin no zhes bsams nas/ bcom ldan 'das ci'i slad du zhes bya ba la sogs pa smos so/ /ji ltar thob par mi byed pa de rnam grangs 'ga' zhig gis thob par byed pa'o zhes bcom ldan 'das kyis kau shi ka ji ltar zhes bya ba la sogs pa gsungs so/ /dmigs pa ni byis pas gzung ba'i dngos po'o/ /ming ni 'du shes so/ /'du byed ni rtag pa'o/ /ji ltar thob par byed pa de zhus pa ni 'o na zhes bya ba la sogs pa'o/ /lan ni kau shi ka ji ltar zhes bya ba la sogs pa'o/ /ji ltar thob par mi byed pa de ltar chos rnams thob pa ste/ gang yang rnam par mi rtog pa'i phyir ro/ /de ltar zhes bya ba ni rnam par mi rtog par ro/ /bcom ldan 'das ji ltar zhes bya ba la sogs pa la/ chos rnams skye ba la sogs pa rnam par rtog pa'i phyir zhes bya bar dgongs so/ / mi skye ba dang mi 'gog pa zhes bya ba ni skye ba med pa dang 'gag pa med pa zhes bya ba'i don to/ /des na gnas pa yang ma lags pa zhes bya ba ni cung zad kyang byed pa med pa'i phyir ro/ /de lta bur yang zhes bya ba ni thams cad mkhyen pa nyid thob pa nyid du ma 'tshal bar bgyid pa'o/ /ring du bgyid ces bya ba ni yang dag par mngon sum du mi byed pa'i phyir ro/ /gsog tu bgyid ces bya ba ni mngon sum du gyur kyang ye shes de'i mtshan nyid med pa'i phyir ro/ /gsob tu bgyid ces bya ba ni de'i 'bras bu med pa'i phyir ro/ /mi bgyid ces bya ba ni skyed par mi byed pa'o/ /rnam grangs 'di yod do zhes bya ba ni ji ltar khyod kyis bstan pa ltar ro/ /de ci'i phyir zhe na zhes bya ba ni de ring du byed pa la sogs pa ga las zhes bya ba'o/ /yongs su gsal bar zhes bya ba ni bstan pa ste/ gzugs nas sangs rgyas nyid kyi bar du gsal bar byas pa ma yin pa'i phyir ro/ /gzugs nas sangs rgyas nyid kyi bar du ma yin zhes bya ba ni chos gang yang med do zhes bya ba'i don to/ /de bas na chos cung zad mthong na ni ring du byed par 'gyur te/ mi bgyid par 'gyur ro zhes bya ba'i bar du'o/ /rnam grangs gang gis zhes bya ba ni chen po nyid gang lags zhes bya bar bsams pa'o/ /rab 'byor gyis bcom ldan 'das zhes bya ba la sogs pa zhus pa ni chos thams cad ngo bo nyid kyis skye ba med pa'i phyir ro zhes bsams pa'o/ /ma g.yengs pa zhes bya ba ni gnyis su med pa'i phyir ro/ /de ltar yang zhes bya ba ni don chen po nyid yin na yang ngo / /yang gi sgra ni lhag pa'i bsam pa'i don to/ /'di ltar zhes bya ba la sogs pa smras so/ /rgyu mthun pa zhes bya ba ni de'i rjes las skyes pa'i nges pa'i shes pa ste/ gang sems can la dmigs pa zhes bya ba dang sbyar ro/ /sems can dang / gang zag dang / rdzas de dang 'dra bar ngo bo nyid med pa'i rang bzhin can te/ ngo bo nyid ni mtshan nyid do/ /rang bzhin ni skye ba ste de dag med pa'o/ /sems can ngo bo nyid med pa zhes bya ba la sogs pa ni 'di nyid kyi bshad pa'o/ /sems can gyi rang bzhin skye ba med pa des na lhag ma gzhan yang rtogs par sla'o/ /dben pa zhes bya ba ni stong pa'o/ /bsam pa ni dmigs pa'o/ /mngon par rdzogs par 'tshang rgya ba ni mngon sum du'o/ /de med pa ni mngon par rdzogs par 'tshang mi rgya ba nyid do/ /don ji lta ba ni yang dag par yod pa'i don to/ /de mngon par rdzogs par 'tshang mi rgya ba ni mi 'dzin pa'o/ /de bzhin du shes rab kyi pha rol tu phyin pa'o/ /ji ltar sems can stobs yang dag par sgrub pa ni stobs rdzogs pa cung zad kyang med de/ de bzhin du de bzhin gshegs pa'i shes rab kyi pha rol tu phyin pa yang ngo / /mngon par sgrub pa'i yan lag lnga bstan nas/ drug pa mos pa'i rgyu dang / bdun pa spong ba'i rgyu yang bstan te de'i dbang du byas nas bstan bcos las/ sangs rgyas bstan dang sbyin sogs dang / /thabs la mkhas pa gang yin pa/ /'di la mos pa'i rgyu dag yin/ /chos kyis phongs pa'i rgyu dag ni/ /bdud kyis thibs kyis non pa dang / /zab mo'i chos la ma mos dang / /phung po la sogs mngon zhen dang / /sdig pa'i grogs pos zin pa'o/ /zhes gsungs te/ tshig gsum gyis ni mos pa'i rgyu gsum bstan to/ /tshig gzhan lnga ni spong ba ste chos kyis phongs pa'i rgyu bzhi bstan to/ /ma mos pa ni mos pa'o/ /'di la mos pa ni bsgom pa'i lam 'di nyid la mos pa'o/ /de nyid de nas bcom ldan 'das la zhes bya ba la sogs pa nas rmongs par mi 'gyur zhes bya ba'i bar gyis gsungs te/ mos pa zhes bya ba ni nges pa'i dngos po nyid la de bzhin du yin gyi/ gzhan du ni ma yin no zhes bya ba ni mos pa ste de byed par 'gyur ro zhes bya ba'i don to/ /tshig gsum gyis rnam pa gzhan bkag pas de la mos pa'i mtshan nyid gsungs te/ de la nem nur ni gnod pa ste gnod par bya ba dang / gnod par byed pa med pa'i phyir nem nur med pa'o/ /the tshom ni yid gnyis so/ /rmongs pa ni mi shes pa'o/ /de ni rnam pa gzhan gsum ste de ni mos pa'o/ /mos pa'i rgyu ni gsum ste/ de la dran pa gnyis ni gang nas shi 'phos nas 'dir skyes pa dang / yun ji srid cig tu spyad pa'o/ /de zhes bya ba ni gang mos par byed pa dang / mos pa dang / mos par bya ba'i mtshon pa'o/ /de'i phyir de bcom ldan 'das zhes bya ba la sogs pa gsungs te/ don nyid ces bya ba ni mngon par rtogs pa brgyad po dag go/ /don gyi tshul zhes bya ba ni ji ltar de dag gi rang nyid kyi dngos po rnams so/ /chos nyid ces bya ba ni ming dang tshig dang yi ge 'di rnams nyid kyis so/ / chos kyi tshul zhes bya ba ni bsdus pa dang rgyas pa la sogs pa rnams kyis so/ /rjes su rtogs pa'i phyir rjes su 'gro ba'o/ /de bzhin du shes pa'i phyir rjes su 'tshal ba'o/ /rdzogs par bgyi ba zhes bya ba'i de kho na bzhin du gzhan rnams la'o/ /de ci'i phyir zhe na zhes bya ba ni rtags gang gi phyir ro/ /shA ri'i bu zhes bya ba la sogs pas ni rtags gsungs te/ bdag gis mthong ngo zhes bya ba ni bdag gis mthong ba'o/ /brjod par 'dod pa dag la 'brel pa'i drug pa yin te/ dper na legs par bshad pa'i slob pa dang / mi rnams kyis shing gi mi cog ces bya ba lta bu'o/ /rna blags pa zhes bya ba ni rtse gcig pa dang ldan par byed pa'o/ /gus par bya ste zhes bya ba la gus pa 'am 'dod pa nyid do/ /rnam par bcad par mi byed pa'i phyir bar chad mi byed pa'o/ /shA ri'i bu zhes bya ba la sogs pas ni mjug sdud pa'o/ /'di la bsrung ba'i ngang tshul yod pas na yun ring por spyad pa can no/ /gang gis sangs rgyas mang po la bsnyen bkur byas pa yod pa de la de skad ces bya'o/ /de ni sangs rgyas la brten pa dang / sbyin pa la sogs pa la spyad pa dag go/ /mos pa'i rgyu gsum thabs la mkhas pa ni/ de nas bcom ldan 'das zhes bya ba la sogs pa nas/ gnas brtan rab 'byor zhes bya ba'i bar gyis gsungs te/ nus sam zhes bya ba ni zur gyis dris pa'o/ /mnyan pa ni tshig las so/ /rtogs pa ni don las so/ /bsam pa ni dus phyi mar dran pa'o/ /bskyed pa ni bsam pa'i dus so/ /sgom dus su sems la brtan par byed pa'i phyir nye bar gzung ba'o/ /'di'i zhes bya ba ni so sor snang ba'o/ /de 'di na zhe 'am zhes bya ba ni snang ba na'o/ /'dis ni zhes bya ba ni so sor snang bas so/ /rnam pa ni mtshon pas so/ /dper na ba lang gi lkog shal la sogs pa dang ldan pas so/ /rtags ni bcos pa'i mtshon pa ste/ dper na ba lang bum pa la sogs pa dang ldan pas so/ /mtshan ma ni ngo bo nyid kyis mtshon pa ste/ dper na ba lang dkar po nyid la sogs pa'o/ /bstan pa ni gzhan dag la'o/ /mnyan pa ni gzhan dag las so/ /bcom ldan 'das kyis bka' stsal pa/ rab 'byor de lta ma yin no zhes bya ba la sogs pas ni lan gsungs so/ /phung po zhes bya ba la sogs pas ni phung po la sogs pa rnams kyis so/ /yang na gzugs kyi phung po nas/ chos kyi skye mched kyi bar zhes bya ba'i don to/ /de ci'i phyir zhe na/ chos thams cad dben pa nyid kyi phyir zhes bya ba gsungs so/ /de yang ga las she na/ de dag rang gi ngo bo nyid med pa'i phyir kun brtags pa'i chos kyi ngo bo nyid ces bya bar dgongs so/ /gzhan yang med pa zhes bya ba la gzhan na med pa de ni don dam pa nyid kyi phyir ro zhes bya bar dgongs so/ /de nyid kyi phyir de ci'i phyir zhe na zhes bya ba ni dris pa'o/ /phung po zhes bya ba la sogs pa ni lan no/ /phung po la sogs pa nyid rnam par rig pa'i ngo bo ste phung po la sogs pa'i ngo bo nyid du rnam par kun tu brtags pa ni stong pa'o/ /de la des stong pa nyid rnam par rig pa tsam ste de ni shes rab kyi pha rol tu phyin pa nyid do/ /de bas na 'di ni gnyis su med cing gnyis su byar med do/ /de la stong pa nyid kyi mtshan nyid 'di ni shes rab kyi pha rol tu phyin pa ma yin no zhe na/ stong zhing dben pa zhes bya ba la sogs pa gsungs te/ dmigs su med pa ni phung po la sogs pa'i mtshan nyid ji lta ba bzhin du'o/ /gang chos thams cad mi dmigs pa zhes bya ba la bya ba gsal ba tsam ni mi dmigs pa'i mtshan nyid do/ /de la log pa tsam ni mi dmigs pa'o/ /gang yang rtogs par bya ba dang / rtogs par byed pa'i rgyu nyid du mi 'gyur ro zhes bya ba'i tshig gis so/ /gang mi dmigs pa de ni shes rab kyi pha rol tu phyin pa ste phul du byung ba'i shes pa nyid kyi phyir dang / pha rol tu phyin pa nyid kyi phyir ro/ /'on kyang de shes rab kyi pha rol tu phyin pa ma yin na ni gal te phung po la sogs pa'i stong pa nyid nyams su myong yang phung po la sogs pa shes par 'gyur te/ nya phyis mthong na dngul la sogs pa shes pa bzhin no/ /'di nyid bstan pa'i phyir gang gi tshe zhes bya ba la sogs pa gsungs te/ gang gi tshe phung po dang / khams dang / skye mched mi dmigs pa ji ltar nyams su myong zhing nges pa skyes pa de'i tshe shes rab kyi pha rol tu phyin pa nyid de/ tshad mas grub pa yin pa'i phyir de grub pas phung po la sogs pa med par nges so/ /nya phyis mthong nas nya phyis la nges pa the tshom skyes pa bzhin te/ de nyid gang ji ltar yod pa dang / med pa dang / shes rab kyi pha rol tu phyin pa yang ji ltar yod pa dang / mos pa de thams cad yang dag par rtogs pa ni thabs la mkhas pa ste/ mos pa'i rgyu gsum pa'o/ /chos kyis phongs pa brjod par bya ste/ de yang yang dag pa'i chos spong ba'o/ /ga las she na/ chos kyis phongs pa'i rgyu nyid kyi phyir ro/ /chos kyis phongs pa ni rgud pa ste/ ngan song du yun ring por gnas pas de thos pa med de/ yun ring por ngan song du gnas pa'i rgyu nyid kyi phyir chos kyis phongs pa'i rgyu nyid do/ /de'i phyir chos kyis phongs pa'o/ /de nyid ni chos kyis phongs par 'gyur ba las so/ /der 'gyur ba ni des byas pa'o/ /skabs de nyid ni gnas brtan rab 'byor zhes bya ba la sogs pa gsungs te/ shes rab kyi pha rol tu phyin pa nyid ni bsgom pa'i lam mo/ /de la rnal 'byor du bgyid pa ni mnyam par gzhag pa thob pa'o/ /rnam par phye ste zhes bya ba la ji ltar rnam par dbye zhe na/ gang dag yun ring po ji srid cig nas spyod pa dang / gang dag mi spyod pa'o/ /ga las shes she na/ dad pa la sogs pa'i dbang po'i rim pa sna tshogs pas so/ /de nyid rab 'byor zhes bya ba la sogs pa gsungs te/ 'di la ma dad pa de dag 'byung ngo zhes bya bar sbyar ro/ /sangs rgyas rnams kyi drung du zhes bya ba de ni nye ba na zhes bya ba'i don to/ /ma dad pa zhes bya ba ni ma gus pa nyid do/ / ma dad pas ni bcom ldan 'das ma la bsnyen bkur mi byed pa'o/ /mi 'dri ba nyid ni sangs rgyas rnams la'o/ /de'i phyir zhes bya ba ni dad pa dang bral ba'i phyir ro/ /chos kyis phongs par 'gyur ba'i las byas pa ni dam pa'i chos spong ba ste lan cig byas pa'o/ /bsags pa ni yang nas yang du byed pa'i phyir ro/ /kun nas bsags pa ni yongs su rdzogs pa'o/ /nye bar bsags pa ni rnam par smin pa 'byin pa'i nus pa thob pa'o/ /lus kyis nyan du 'gro ba ni mthun par mi byed pa'o/ /sems kyis zhes bya ba ni rnam par g.yengs pa'o/ /ngag gis ni skabs ma yin pa'i tshig brjod pa'o/ /de ltar mthun pa zhes bya ba ni yang dag par nyan pa'o/ /mi mthong ba ni don no/ /khong du mi chud pa ni ngo bo nyid gsum gyi dbye ba'o/ /des ni mi rig go zhes bya ba ni phyin ci log tu rtogs pa'o/ /ma dad pa zhes bya ba la sogs pa gang gsungs pa de dag gi mjug sdud pa ni de dag chos kyis phongs par 'gyur zhes bya ba la sogs pa gsungs so/ /spangs par 'gyur zhes pa ni yid kyis yongs su dor ba'o/ /dbang gzas pa ni tshig gis so/ /mi snyan par brjod pa ni smod pa'o/ /ma rungs par byas pa ni sun par byas pa'o/ /bsregs pa ni dge ba'i rtsa ba bsregs pa'i phyir ro/ /mos pa ni dbang du byed pa'o/ /de zlog pa ni lhod pa'o/ /de'i phyir mos pa zlog pa ni lhod par byed pa'i phyir ro/ /'bral bar byed ces bya ba ni yid kyis gtong bar byed pa'o/ /ldog par byed pa ni yang mi 'dzin pa'i phyir ro/ /'di yan chad kyis ni spangs par 'gyur ba bstan to/ /dbang gzas par 'gyur ba ni 'di la zhes bya ba la sogs pa gsungs so/ /mi snyan par brjod par 'gyur ba ni 'di ni zhes bya ba la sogs pa gsungs so/ /'byor bar 'gyur ba dang / yongs su 'phangs par 'gyur ba dang / phyi rol du 'gyur ba zhes bya ba ni don gcig go/ /thams cad ji lta ba dang / de bzhin du thams cad kyi yan lag dang / thams cad ji lta ba yin pa dang / de bzhin du rnam pa thams cad do/ /nye bar gnas pa ni byas pa'o/ /kun nas bslang ba ni nye bar bsags pa'o/ /sdud pa ni rab tu 'jig pa ste/ 'og gi mnar med pa nas tshangs pa'i 'jig rten gyi bar du mes zad pa'o/ /'dor ba ni de mes 'jig pa na srid pa bar ma do'i lus kyis so/ /skye ba ni bar ma do'i lus kyis so/ /lhan cig tu zhes bya ba ni yod pa'o/ /gang la sdug bsngal chen po myong bar 'gyur ba la de skad ces bya'o/ /gzugs brnyan la sogs pa'i tshig gsum ni don mthun no/ /de dag las gang gi don du rnyed pa dang bkur sti byin pa'o/ /de ci'i slad du zhe na zhes bya ba ni de dag la mi lta ba de gang gi phyir zhes bya ba'i don to/ /lo 'dab sham pa ka zhes bya ba yongs su smin pa na/ des reg pa'i lo ma rnams kyang nyams par byed do/ /rang bzhin ni skye ba'o/ /gang la sham pa ka lta bu'i rang bzhin yod pa ni sham pa ka lta bu'i rang bzhin can no/ /nag po ni rtswa'i khyad par ro/ /tha mal pa'i skad du ni ka Na Na zhes bya'o/ /de yang zhing las ma bsal na ni zhing rlag par byed do/ /rang bzhin can ni grub pa'o/ /de dag la nag po dang 'dra ba yod pas na nag po'i rang bzhin can no/ /sbrul nag po ni sbrul nag po ste dug dang bcas pa'o/ /des reg pa dang bltas pa tsam gyis gsod pa'o/ /tshul ma yin pas zhes bya ba ni dad pa dang / mnyan pa la sogs pa'i lam ma yin pas so/ /brlag pa ni dmyal ba la sogs pa'i sdug bsngal lo/ /mi bzad pa dang nad ces bya ba ni chen po dang nad do/ /'gyur ba zhes bya ba ni reg pa'o/ /reg pa ni thob par byed pa zhes bya ba'i don to/ /snang ba ni skabs kyi las kyi rnam par smin pa shes pa'o/ /dkar po'i skal ba can ni dge ba'i rtsa ba'i cha'o/ /de dang ldan pa ni dkar po'i skal ba can no/ /phrad pa ni ldan pa'o/ /lhag ma ni rtogs par sla ste de ni chos kyis phongs pa'o/ /de skad ces bka' stsal pa dang zhes bya ba la sogs pa la de'i phyir bdud kyis byin gyis brlabs pa zhes bya ba ni bdud kyis byin gyis brlabs pa gsungs so/ /chos zab mo dag la ma mos pa ni de dag la dad pa dang dang ba med par bstan to/ /gzhan yang rab 'byor zhes bya ba la sogs pas ni rgyu rnam pa bzhi gsungs te/ bdag la bstod pa dang / gzhan la smod pa dang / nyes pa'i klan ka tshol ba tshoms gcig tu byas te/ de nyid kyi phyir rnam pa bzhi po de dag dang ldan pa zhes bya ba la sogs pa gsungs so/ /de la phongs pa'i rgyu ni drug tu gsungs pa las bstan bcos las ni mdor bsdus nas bzhir bstan te/ lhag ma ni phung po la sogs pa la mngon par zhen pa'i nang du 'dus pa'i phyir ro/ /'di ni sgrub pa'i le'u yin te sgrub pa'i yan lag bdun ston par byed pa'i phyir ro/ /de lta mod kyi dmyal ba'i gzhung shas che ba'i phyir dmyal ba'i le'u zhes brjod do/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u bdun pa'o/ / //'jig rten las 'das pa'i bsgom pa'i lam gyi sgrub pa'i le'u bdun pa bstan nas/ brgyad pa dag la bshad par bya ste/ de'i dag pa ni re zhig de'i dag pa shin tu mos par dka' ba de ni/ de nas bcom ldan 'das la zhes bya ba la sogs pa gsungs te/ mi 'dod pa zhes bya ba ni mos pa dman pa'o/ /nye bar bstan pa zhes bya ba ni gegs byas pa'o/ /srid zhu chung ba dang mi 'dri ba'i rang bzhin can zhes bya ba ni dge ba'i bshes gnyen dag la'o/ /rab 'byor gyis zhus pa ni bcom ldan 'das e ma zhes bya ba la sogs pa'o/ /ji tsam du zab pa/ zhes bya ba ni gang gi phyir mos par dka' ba zhes bya ba'i don to/ /rab 'byor gzugs ni zhes bya ba la sogs pa ni bcom ldan 'das kyi lan te/ gzugs la sogs pa ni gzugs la sogs pa rnams kyi sngon dang / phyi ma dang da ltar byung ba'i mtha' ma bcings ma grol ba'o/ / yang na rang bzhin gyis dus gsum du ngo bo nyid med ces bya ba'i don to/ /shin tu mos par dka'o zhes bya ba ni mchog tu zab pa nyid kyi phyir ro zhes bya bar dgongs so/ /sngar 'jug pa yin pa'i phyir 'ching ba ste/ snga ma dag go/ /phyis de log pa'i mtshan nyid ni thar pa'o/ /dag pa zhes bya ba ni rab tu grags pa'o/ /'dir ni 'ching ba dang grol ba dag gtan du med de/ dag pa zhes bya ba ni shin tu zab pa'o/ /shin tu rnam par dag pa ni bstan bcos las/ 'bras bu dag pa gzugs la sogs/ /dag pa nyid de gang gi phyir/ /de gnyis tha dad ma yin zhing / /gcad du med pas dag par brjod/ /ces bya ba gsungs te/ 'bras bu rnam par dag pa ni bsgrub par bya ba ste/ de yang gzugs la sogs pa'i dag pa nyid do/ /gang gi phyir de gnyis tha mi dad cing gcad du med pa ni dag pa zhes brjod do/ /dag pa'i mtshan nyid kyang mdo las gsungs te/ dag pa yang gang zhe na/ gang la mos par dka' ba'i mtshan nyid mdo las gsungs pa la/ de ci'i phyir zhes bya ba ni/ de la 'di'i mos par dka' ba nyid ga las shes zhes bya ba'i don to/ /rab 'byor zhes bya ba la sogs pa ni lan te/ 'di lta ste/ 'di ni de'i mtshan nyid ces bya bar dgongs so/ /de'i bdag nyid kyi phyir gnyis su med pa'o/ /'khrul pa med pa'i phyir gnyis su byar med pa'o/ /'di nyid kyis ni tha dad pa ma yin zhing gcad du med pa bstan to/ /gang zhes bya ba ni brjod pa'o/ /de zhes bya ba ni bya ba'o/ /brjod pa ni chos yin la bya ba ni nges pa yin no zhes brjod do/ /des na gzhi mthun pa yin pa'i phyir de gnyis tha mi dad pa'o/ /gcig la gcig nges pa'i phyir phan tshun 'khrul pa med de de'i phyir de gnyis mchod pa'o/ /de'i phyir de ltar gang phung po la sogs pa rnam par dag pa de nyid 'bras bu rnam par dag pa'o/ /'bras bu rnam par dag pa de nyid phung po la sogs pa rnam par dag pa'o/ /phan tshun 'khrul pa med pa'i phyir gcig la gcig rtags su gyur pa yin no/ /'khrul pa med pa de yang de'i bdag nyid yin pa'i phyir ro/ /de'i phyir rab 'byor de ltar zhes bya ba la sogs pa nas/ /gzhan yang rab 'byor zhes bya ba yan chad kyis rnam par dag pa'i mtshan nyid gsungs so/ /bcom ldan 'das ma chen mo las thams cad yang dag par bsdu ba'i phyir/ rnam par dag pa bzhi'i dbye ba gsungs la byang chub sems dpa'i lam gyi dbang du byas pa'i phyir 'dir ni ma gsungs so/ / lam gyi rnam par dag pa brjod par bya ste/ de yang sa dang sa nas nyes pa chen po'i chen po la sogs pa'i rnam par dbye ba dgu dang / gnyen po chung ngu'i chung ngu la sogs pa'i rnam par dbye ba dgu nyid kyis sa rnam par dag par byed pa ste de yang dgu nyid de/ gzugs dang gzugs med pa brgyad dang / 'dod pa'i khams so/ /de'i phyir bstan bcos las/ sa dgu pa ni chen po yi/ /chen po la sogs dri ma yi/ /gnyen po'i sgo nas chung ngu yi/ /chung ngu la sogs lam yin no/ /zhes bya ba gsungs te/ de'i lam rnam pa dgu pa gzhan yang rab 'byor zhes bya ba la sogs pa nas/ /shin tu skye ba ma mchis pa'o zhes bya ba'i bar du gsungs pa la/ thams cad mkhyen pa nyid ces bya ba ni rnam pa thams cad mkhyen pa nyid do/ /de'i rnam par dag pa ni rnam pa gnyis te/ phung po la sogs pa so sor rnam par dag pa dang / pha rol tu phyin pa rnams kyi rnam par dag pa ste/ de ni rnam pa thams cad mkhyen pa nyid rnam par dag pa'o/ /gang yang de ni de dag gi ste gcig go/ /rnam pa thams cad mkhyen pa nyid rnam par dag pa dang / nang stong pa nyid la sogs pa dang / phung po la sogs pa nas sangs rgyas kyi chos ma 'dres pa zhes bya ba'i bar du gang so sor rnam par dag pa dang / gang shes rab kyi pha rol tu phyin pa dang / gang rnam pa thams cad mkhyen pa nyid rnam par dag pa 'di thams cad ni tha mi dad de ma chad pa'o zhes bya ba ni gnyis pa'o/ /gang rnam pa thams cad mkhyen pa nyid rnam par dag pa 'dir ma bstan kyang nye bar mtshon pa'i phyir de ni gzung bar bya'o/ /de ni lam chung ngu'i chung ngu dang chung ngu'i 'bring ngo / /de nas bcom ldan 'das zhes bya ba la sogs pa la/ de nas bzung nas shes rab kyi pha rol tu phyin pa zhes bya ba ji snyed smos pas ni shes rab kyi pha rol tu phyin pa rnam par dag pa zhes bya ba'i don to/ /de zab pa ni rtogs par dka' ba ste chos thams cad rnam par dag pa nyid kyi phyir dang / shin tu stong pa nyid kyi phyir ro/ /de ni lam chung ngu'i chen po'o/ /bsal bar bgyid pa ni mun pa sel ba ste chos thams cad rnam par dag pa'i phyir ro/ /de ni lam 'bring gi chung ngu'o/ /de snang ba ni mthong ba ste rnam par dag pa nyid kyi phyir ro/ /de ni lam 'bring gi 'bring ngo / /de mtshams sbyar ba ma mchis pa ni srid pa bar ma dor 'pho ba med pa ste/ rnam par dag pa nyid kyi phyir ro/ /de dag ni lam 'bring gi chen po'o/ /de kun nas nyon mongs pa ma mchis pa ni rnam par dag pa'i phyir ro/ /chos thams cad rang bzhin gyis kun nas nyon mongs pa med pa'o/ /de ni lam chen po'i chung ngu'o/ /de thob pa ma mchis pa dang / mngon par rtogs pa ma mchis pa rnam par dag pa nyid kyi phyir/ chos thams cad thob pa med pa dang / mngon par rtogs pa med pa nyid do/ /'di ni lam chen po'i 'bring ngo / /de mngon par grub pa ma mchis pa ni rnam par dag pa med pa nyid kyi phyir/ chos thams cad mngon par grub pa med pa nyid do/ /de ni lam chen po'i chen po'o/ /shA ri'i bus gsol pa zhes bya ba nas shin tu skye ba ma mchis pa zhes bya ba la sogs pa de ni lam shes pa nyid yongs su rdzogs pa ston te/ 'dir bstan bcos las/ khams gsum pa yi gnyen po nyid/ /gzhal dang gzhal bya mnyam nyid dang / /klan ka yongs su spangs pa yis/ /lam ni de yi gnyen por 'dod/ /ces bya ba gsungs te/ de ni khams gsum gyi gnyen po nyid de/ gang shin tu skye ba ma mchis pa'o zhes gsungs pa la/ shes rab kyi pha rol tu phyin pa ni 'dod pa'i khams la sogs par rnam par dag pa'i phyir 'dod khams pa ngo bo nyid kyis skye ba med de khams gsum pa'i gnyen po'o/ /'dir yang shA ri'i bus gsol pa zhes bya ba la sogs pa gsungs te/ ma 'tshal zhes bya ba ni mi 'dzin pa'o/ /yang dag par ma 'tshal zhes bya ba ni rnam par mi rtog pa'o/ /de nyid gsal bar byed pa ni bcom ldan 'das zhes bya ba la sogs pas zhus so/ /gzugs la sogs pa zhes bya ba ni lan no/ /shin tu rnam par dag pa'i phyir ro zhes bya ba ni shin tu med pa'i phyir ro/ /ji ltar shes par bya ba de nyid 'dzin pa po ma yin pa de bzhin du 'di yang de'i 'dzin par byed pa ma yin te de bas na shes bya dang shes pa mnyam pa nyid do/ /gang rnam par dag pa'i mtshan nyid 'di na bsgom pa'i lam du rigs pa ma yin no zhe na/ gang gi phyir 'di la skyon brgyad du rtogs pa de'i phyir/ klan ka yongs su spangs pa yis/ /lam ni de yi gnyen por 'dod/ /ces bya ba gsungs te/ de ni zhes bya ba ni nges par gzung ba dang / rim pa bzhin du sbyar ba'o/ /klan ka zhes bya ba ni rigs kyi dbang du byas nas gcig gi tshig go/ /bsgom pa'i lam kho na de'i gnyen por 'dod de/ 'di man chad ni rgol ba de rnams kyi lan zhes bya ba'i don to/ /'dir yang grub pa'i mtha' pa nyid kyis dgos pa de ci'i phyir zhes bya ba ni gtan tshigs la ltos pa dang bcas pas rgol ba ston pa ni klan ka'o/ /grub pa'i mtha' pa'i gtan tshigs ni lan no/ /de la gnyis ni shA ri'i bu'i dri ba'o/ /drug pa ni rab 'byor gyi'o/ /lan brgyad ni bcom ldan 'das kyi'o/ /gnod par yang mi bgyid phan par yang mi bgyid ces bya ba ni grub pa'i mtha'o/ /de ci'i phyir zhe na/ gal te ci yang mi byed na ji ltar lam du 'gyur zhes bya ba ni rgol ba'o/ /rnam par dag pa'i phyir ro zhes bya ba ni lan no/ /thams cad mkhyen pa nyid dang chos kyi dbyings ni rnam par dag pa ste/ de rnam par dag pa yang rang bzhin gyis rnam par dag pa'o/ /de'i phyir 'di la cung zad kyang mi byed pa ste/ glo bur gyi sgrib pa zad par byed pa kho na'o/ /yongs su mi 'dzin pa dang / yongs su mi gtong ba grub pa'i mtha'o/ /de ga las shes she na/ gal te yongs su 'dzin na ni rnam par rtog par 'gyur ba'i phyir ro/ /ji ste mi 'dzin na ni shes rab nyams par 'gyur ba'i phyir ro zhes bya ba ni dri ba'o/ /rnam par dag pa'i phyir ro zhes bya ba ni lan no/ /de ltar na gang gi phyir chos de nyid chos kyi mtshan nyid du mi mthong ba des na de nyid chos nyid mthong ba yin no/ /de nyid rnam par dag pa ste rnam par dag pa'i phyir mi 'dzin mi gtong ba yin te de bas na phung po rnam par dag pa dang / 'bras bu rnam par dag pa dang / rnam pa thams cad mkhyen pa nyid rnam par dag pa zhes gsungs so/ /de dag gi rnam par dag pa de yang bdag rnam par dag pa ste/ ji ltar bdag rnam par dag pa ni gtan du med pa nyid kyi phyir ro/ /de ltar de rnams kyi yod pa ni grub pa'i mtha'o/ /de ci'i phyir zhe na/ de ga las shes she na/ gal te phung po dang / 'bras bu dang / thams cad mkhyen pa nyid rnams shin tu med na ni de bas 'di cung zad med par 'gyur ro zhes bya ba ni rgol ba'o/ /shin tu rnam par dag pa'i phyir ro zhes bya ba ni lan te/ rang gi mtshan nyid shin tu med pa kho na'i chos stong pa nyid kyi chos nyid 'di kho na yod do zhes bya ba'i don to/ /bdag rnam par dag pas thob pa yang ma mchis/ mngon par rtogs pa yang ma mchis zhes bya ba ni grub pa'i mtha'o/ /dris pa ni snga ma bzhin no/ /shin tu rnam par dag pa'i phyir ro zhes bya ba ni lan no/ /gang gi phyir chos kho na'i mtshan nyid kyi chos ni med de de nyid kyi chos nyid ni yod do/ de yang rang bzhin kho nas rnam par dag pa ste/ de rnam par dag pa nyid kyang thams cad mkhyen pa nyid do/ /de'i phyir thob pa yang med/ mngon par rtogs pa yang med ces bya ba'i don to/ /bdag mu ma mchis pas gzugs la sogs pa mu ma mchis par zhes bya ba ni grub pa'i mtha'o/ /de ga las shes shing mthong ste phung po la sogs pa mu med pa de ji ltar mu med pa yin zhes bya ba ni rgol ba'o/ /shin tu rnam par dag pa'i phyir ro zhes bya ba ni lan te/ ji ltar bdag shin tu med pa de bzhin du gzugs la sogs pa rnams kyang rang gi mtshan nyid kyis med na de rnams kyi mu ji ltar yod/ gal te chos nyid du yod do zhe na/ de ni shin tu yang mu med de chos thams cad kyi spyi'i mtshan nyid kyi phyir ro/ /gzugs la sogs pa'i bye brag ni don dam pa ma yin pa nyid kyi phyir gzugs la sogs pa'i rnam par dag pa de nyid 'bras bu rnam par dag pa dang / thams cad mkhyen pa nyid rnam par dag pa dang / shes rab kyi pha rol tu phyin pa rnam par dag pa zhes bya ba'i don to/ /gang de ltar chos thams cad gtan du med pa de bzhin du rtogs pa de ni shes rab kyi pha rol tu phyin pa'o zhes bya ba ni grub pa'i mtha'o/ /de ga las shes te/ gal te de ni de ltar rtogs mod kyi de ni rnam par dag pa ma yin no zhes bya ba ni rgol ba'o/ / shin tu rnam par dag pa'i phyir ro zhes bya ba ni lan no/ /'di la de nyid shin tu rnam par dag pa ste/ gang 'di la chos thams cad shin tu med par rtogs pa dang / snang ba dang / gsal bar ston pa ste/ chos thams cad shin tu med par nges pa skye zhing dngos por rtogs pa med ces bya ba ni rgol ba'i lan no/ /bsgom pa'i lam shin tu rnam par dag pa'i lam gyi dbang du byas pa rdzogs so// //le'u dang por rnam pa thams cad mkhyen pa nyid bstan nas/ le'u phyed dang bdun gyis ni lam shes pa nyid bstan to/ /le'u brgyad pa'i phyed dang dgu pa'i phyed kyis ni thams cad shes pa nyid bshad par bya ste/ de la ni brgyad yod de/ de ji srid du sngar/ shes pas srid la mi gnas shing / /snying rjes zhi la mi gnas te/ /thabs ma yin pas ring ba dang / /thabs kyis ring ba ma yin nyid/ /mi mthun gnyen po'i phyogs dag dang / /sbyor dang de yi mnyam nyid dang / /nyan thos la sogs mthong ba'i lam/ /de 'dra kun shes nyid du 'dod/ /ces gsungs te de'i phyir bstan bcos las/ pha rol tshu rol mtha' la min/ /de dag bar na mi gnas pa/ /dus rnams mnyam pa nyid shes phyir/ /shes rab pha rol phyin par 'dod/ /ces bya ba gsungs te/ shes rab kyi pha rol tu phyin pa zhes bya ba ni thams cad mkhyen pa nyid do/ /tshu rol mtha' la min zhes bya ba ni 'khor ba la'o/ /pha rol mtha' la min zhes bya ba ni mya ngan las 'das pa'o/ /de dag bar na mi gnas pa ste/ gsum po mi dmigs zhes bya ba'i don to/ /de ci'i phyir zhe na/ dus gsum mnyam pa nyid shes phyir/ /zhes bya ba smos te/ chos nyid kyis dus gsum mnyam pa nyid de/ chos nyid thams cad kyi mtshan nyid ni ji lta bu yang mi dmigs pa'i phyir ro/ /'di nyid gsol pa/ bcom ldan 'das zhes bya ba la sogs pa gsungs te/ de la zhes bya ba ni sngar spyir bstan pa'o/ /'di la zhes bya ba ni thams cad shes pa nyid kyi khyad par bstan par bya ba nyid brjod pa'o/ /de nyid kyi phyir rgyang ring po zhes bya ba gsungs te/ khyad par la 'jug pa 'am khyad par gyi skabs nyid yin pa'i phyir ro/ /yang na gang gi phyir mi gnas she na/ rgyang ring ba'i phyir te gsum po mi dmigs pas gnod pa'o/ /bcom ldan 'das kyis shin tu rnam par dag pa'i phyir zhes bya ba la sogs pas gtan tshigs gsungs te/ chos thams cad rang gi mtshan nyid kyis med pa'i mtshan nyid kyis shin tu rnam par dag pa zhes bya ba'i don to/ /nyan thos rang gi sdug bsngal zad pa tsam tshol ba ni 'khor bar yongs su rtog pa la shin tu skyo zhing / mya ngan las 'das par yongs su rtog pa la ni shin tu mos te/ myur ba myur bar yongs su mya ngan las 'da' bar byed do/ /byang chub sems dpa' ni de lta ma yin te/ sems can thams cad kyi don du bla na med pa'i byang chub 'dod pas gnas pa'o/ /bstan bcos las/ de ni mtshan bcas dmigs sgo nas/ /thabs ma yin pas ring ba ste/ /zhes bya ba gsungs te/ mtshan ma dang bcas par dmigs pa ni thabs ma yin pa ste/ des de rgyang ring ba yin no/ /de ni rab 'byor zhes bya ba la sogs pa gsungs so/ /de skad ces bya ba ni ming dang mtshan ma las kyang ngo / /'dor bar 'gyur ro zhes bya ba ni spangs pa ste ming la chags par 'gyur ba'o/ /rgyang ring du byed par 'gyur ro zhes bya ba ni mtshan ma la ste/ de las rgyang ring du 'gyur ba'o/ /bstan bcos las/ de ni thabs la mkhas pa yis/ / yang dag nye ba nyid du bshad/ /ces bya ba la yang dag par chags pa med par 'jug pa ni thabs la mkhas pa yin te des na nye bar 'gyur te/ de ni de skad ces bka' stsal pa dang zhes bya ba la sogs pa gsungs pa la/ chags pa ni ming dang mtshan ma la zhen pa'o/ /de ni kun tu rtogs pa'o/ / de dag gi don yang dag par med pa'i phyir ro/ /legs par bshad pa ni mthong ba'i lam skad cig ma bcu drug gis so/ /legs par bstan pa ni sbyor ba bcu gnyis kyis so/ /shin tu mthar gtugs pa ni 'khor ba dang mya ngan las 'das pa la mi gnas pa nyid kyi phyir ro/ /shin tu yongs su dag pa ni chags pa'i mtha' rnams spangs pa'i phyir ro/ /gang la zhes bya ba ni de la'o/ /ni zhes bya ba ni tshig gi rgyan no/ /ming zhes bya ba ni ngo mtshar ro/ /'di yang zhes bya ba ni chags pa ste de yang 'og nas 'chad par 'gyur ro/ /chags pa spangs pa ni thabs la mkhas pa ste de'i phyir nye bar 'gyur ro/ /chags pa'i thun mong gi ngo bo yang bstan nas khyad par brjod par bya ste/ de'i phyir bstan bcos las/ gzugs sogs phung po stong nyid dang / /dus gsum rtogs pa'i chos rnams dang / /sbyin sogs byang chub phyogs rnams la/ /spyod pa'i 'du shes mi mthun phyogs/ / zhes bya ba gsungs te/ gzugs la sogs pa ni chos thams cad do/ /phung po ni tshogs te de'i stong pa nyid do/ /dus gsum ni dus gsum gyi chos rnams la'o/ /spyad pa'i sgra ni spyod pa'i rnam grangs so/ /pha rol tu phyin pa dang / byang chub kyi phyogs kyi yul rnams la gang spyod pa'i 'du shes sam mtshan ma de ni mi mthun pa'i phyogs so/ /mi mthun pa'i phyogs de ni chags pa dang bcas pa zhes bya ba'i don to/ /de nyid de nas tshe dang ldan pa shA ri'i bu zhes bya ba la sogs pa gsungs so/ /bcom ldan 'das ma 'dir ni spyod pa'i 'du shes rgya cher mi ston te/ de ni nye bar mtshon pa brjod pas rtogs par 'gyur te/ sbyin pa'i pha rol tu phyin pa dang zhes bya ba nas shes rab kyi pha rol tu phyin pa zhes bya ba'i bar dang / dran pa nye bar gzhag pa nas 'phags pa'i lam yan lag brgyad pa'i bar la bdag spyod do snyam pa'i 'du shes ni chags pa'o zhes bya ba lta bu'o/ /'dir chags pa mang du gsungs shing 'di tsam zhig ces bya ba la sogs pas chags pa gsungs na/ ji ltar chags pa de ma gsungs te/ de bas na lha'i dbang po brgya byin gyis dris pa ni 'phags pa rab 'byor zhes bya ba la sogs pa gsungs te/ rnam grangs zhes bya ba ni rnam pas so/ /'di ni de'i byang chub kyi sems dang po'o zhes bya ba 'di ni chags pa'i rnam par rtog pa dang po'o/ /byang chub tu yongs su bsngo'o zhes bya ba 'di ni chags pa'i rnam par rtog pa gnyis pa'o/ /de gnyis ji ltar chags pa yin zhe na/ sems 'das pa de ni med pa nyid kyi phyir dang / ma 'ongs pa ni ma byung ba nyid kyis so/ /gal te sems kyi rang bzhin ni rtag tu yod do zhe na/ sems kyi rang bzhin zhes bya ba la sogs pa gsungs te/ mi nus so zhes bya ba ni rtag pa la ni yongs su bsngo ba mi rigs pa'i phyir te/ de'i phyir gnyis ka yang yang dag pa ma yin pa'i kun tu rtog pa'o/ /lhag ma ni ji ltar chags pa de bzhin du sngar bstan to/ /thos pa byas pas chags pa de dag spong ba ni shugs kyis bstan pa yin te de'i phyir bstan bcos las/ sbyin la sogs la ngar 'dzin med/ /gzhan dag de la sbyor byed pa/ /'di ni chags pa'i mtha' 'gog pa/ / zhes bya ba la sogs pa gsungs te/ sbyin pa la sogs pa la ngar 'dzin med pa sngar shugs kyis bstan to/ /gzhan de dag la sbyor bar byed pa zhes bya ba ni de bas na zhes bya ba la sogs pa gsungs so/ /de bas na zhes bya ba ni rang gi chags pa rnam par spong bar byed pas so/ /de ltar na zhes bya ba ni gzhan dag la ston pa la sogs pa'i dus so/ /yang dag par ston pa zhes bya ba ni sngon ma thos pa dag la thos pa dang ldan par byed pa'o/ /yang dag par 'dzud par byed pa ni sgrub pa yang dag par 'dzin par byed pa'o/ /yang dag par gzengs bstod pa ni ser sna can spro ba skyed par byed pa'o/ /rab tu dga' bar byed pa zhes bya ba ni brtson 'grus brtsams pa rnams la legs so zhes bya ba sbyin pa'o/ /yang dag pa nyid rjes su rtogs pa ni chags pa spangs pa'o/ /yang dag par 'dzud pa gzhan gyi don du bstan pa'i ched du de ltar na zhes bya ba la sogs pa gsungs te/ gnod par mi byed ces bya ba ni sangs rgyas la gnod par mi byed pa'o/ /rang nyid yang dag par rjes su rtogs pa'i phan yon ni rigs kyi bu zhes bya ba la sogs pa gsungs so/ /gang sbyin pa la sogs pa de nyid la ngar 'dzin pa med pa dang / gzhan dag de la sbyor ba rnams 'di gnyis ni chags pa'i mtha' rags pa 'gog pa'o/ /de nas bstan bcos las/ rgyal la sogs la chags pa phra/ /zhes bshad pa la gang sangs rgyas la sogs pa la chags pa de ni phra ba ste/ de nyid de nas bcom ldan 'das zhes bya ba la sogs pa gsungs te/ de ni yongs su bsngo bar nus so zhes bya ba ni dus gsum yod par thal bar 'gyur ba'i phyir ro/ /mtshan mar byar mi rung / dmigs par mi rung zhes bya ba ni sngon ma byung ba nyid kyi phyir dang / rtogs par dka' ba nyid kyi phyir ro/ /gang gi phyir de mthong ba dang / thos pa dang / rtogs pa dang / rnam par rig pa ma yin pa mig dang / rna ba dang / sna dang / lce dang / lus dang / yid kyis shes pa nyid kyi phyir te go rims bzhin te/ zab pa ni dben pa nyid kyi phyir ro/ /rang bzhin gyis zab pa ni rang bzhin gyis dben pa nyid kyi phyir ro/ /de'i phyir phyag 'tshal bar 'os pa yin no/ /chos thams cad kyang rang bzhin gyis dben pa ste gang de dag rang bzhin gyis dben pa nyid de ni shes rab kyi pha rol tu phyin pa'o/ /gang gi phyir bcom ldan 'das ni ma byas par mngon par rdzogs par sangs rgyas pa ste/ de'i phyir mngon par rdzogs par sangs rgyas pa'o/ /gang gi phyir de ni rang bzhin gyis gang yang med de 'di'i rang bzhin gang yin pa de ni med do/ /gang rang bzhin med pa de ni de dag gi rang bzhin te 'di lta ste/ mtshan nyid med par mtshan nyid gcig pa nyid kyi phyir ro/ /de ltar na chags pa'i mtha' ma lus par spangs par 'gyur ba yin no/ /bsam gyis mi khyab pa zhes bya ba ni gzugs nas sangs rgyas kyi chos kyi bar du med pa de ni bsam pa las 'das pa nyid kyi phyir ro/ /lhag ma ni rtogs par sla'o/ /mthong ba dang thos pa dang / rtogs pa dang rnam par rig pa yang med pa ni ji skad bstan pa'o/ /'dir bstan bcos las/ chos kyi lam gyi rang bzhin gyis/ /dben pa'i phyir na de zab nyid/ /chos rnams rang bzhin gcig par ni/ /shes pas chags pa spong ba yin/ /mthong ba la sogs bkag pa yis/ / de ni rtogs pa dka' bar bshad/ /gzugs la sogs par mi shes phyir/ /de ni bsam mi khyab par 'dod/ /ces bya ba gsungs te/ dben pa'i phyir zhes bya ba ni rnam par dben pa nyid kyi phyir ro/ /chos kyi lam zhes bya ba ni chos kyi phung po ste/ chos rnams shes pa zhes bya ba dang sbyar ro/ / gang la rang bzhin gcig pa yod par ston pa de dag la de skad ces bya'o/ /mi mthun pa dang gnyen po bstan par bya ba'i phyir/ chags pa dang ma chags pa gang gi phyir ston par byed ce na/ bstan bcos las/ de ltar kun shes nyid lugs la/ /mi mthun phyogs dang gnyen po dag /rnam par dbye ba ma lus pa/ /ji skad bshad pa 'di shes bya/ /zhes bya ba gsungs te/ de ltar zhes bya ba ni chags pa dang ma chags pa dang / ston par byed pa'o/ /ji skad bshad pa ni gang rnam par dbye ba'i bshad pa'o/ /kun shes nyid lugs la zhes bya ba ni mi mthun pa'i phyogs dang gnyen po 'di thams cad shes par bya'o/ /de ltar na chags pa ni dmigs pa'i rnam par rtog pa'o/ /ma chags pa ni mi dmigs pa dang / shes rab kyi pha rol tu phyin pa ste/ de'i phyir chags pa ni mi mthun pa'i phyogs so/ /ma chags pa ni gnyen po ste/ de ni mi mthun pa dang gnyen po'i phyogs so/ /sbyor ba dang de'i mnyam pa nyid bshad par bya ste/ de'i phyir bstan bcos las/ gzugs sogs de mi rtag sogs dang / /de ma rdzogs dang rab rdzogs dang / /sbyor ba bkag pas spyod pa ni/ /de la chags pa med nyid dang / /mi 'gyur byed po med nyid dang / /sbyor ba bkag pa rnam gsum dang / /skal ba ji bzhin 'bras thob pas/ /de yi 'bras bu yod 'dod dang / /gzhan la rag las min gang dang / /shes byed rnam bdun snang ba la/ /zhes bya ba gsungs te/ de ni mi rtag la sogs zhes bya ba ni/ gzugs la sogs pa dang mi rtag pa la sogs pa'o/ / ma chags pa'i mi mthun pa'i phyogs yin pas/ de la zhes bya ba'i sgras ni chags pa gzung ngo / /gcig tu bsdus pa'i zlas dbye ba yin pas chags pa dang / ma chags pa zhes bya ba'i don to/ /gzugs la sogs pa dang / gzugs la sogs pa'i mi rtag pa'i don nyid la sogs pa ste/ gzugs la sogs pa yongs su ma rdzogs pa dang / rab tu rdzogs pa nyid dag ste/ gzugs la sogs pa la chags pa dang / ma chags pa'o/ /spyod pa ni spyad pa ste/ de bkag pas shes rab kyi pha rol tu phyin pa la spyod pa'o/ /sbyor ba ni gzugs la sogs pa dang / mi rtag pa la sogs pa rnam pa bzhi po 'di dag dang / 'og nas brgyad de/ mi 'gyur ba dang byed pa med pa dang / ched du bya bar dka' ba dang / sbyor ba dka' ba dang / byed pa dka' ba dang / 'bras bu yod pa dang / gzhan la rag las pa ma yin pa dang / shes par bya ba rnam pa bdun du snang ba ste/ rnam pa bcu gnyis so/ /de'i sbyor ba dris pa ni de ltar zhes bya ba la sogs pa gsungs te/ ji ltar spyad par bgyi zhes bya ba ni sbyor ba ji ltar bya ba'o/ /'dir gzugs la sogs pa ni chos thams cad de phung po nye bar mtshon pa'o/ /gzugs nas rnam par shes pa'i bar la mi spyod pa zhes bya ba ni gzugs la sogs pa yang dag par mi shes pa zhes bya ba'i don te/ de'i tshe shes rab kyi pha rol tu phyin pa la spyod pa'o/ /de ni gzugs la sogs pa'i sbyor ba'o/ /gal te gzugs nas rnam par shes pa'i bar du mi rtag ces bya ba dang / de bzhin du rtag pa dang / sdug bsngal ba dang / bde ba dang / stong pa dang mi stong pa dang / bdag dang bdag med pa dang / sdug pa dang mi sdug pa la mi spyod na de'i tshe shes rab kyi pha rol tu phyin pa la spyod do/ /de ni gzugs la sogs pa mi rtag pa la sogs pa'i sbyor ba'o/ /rab 'byor gal te gzugs nas rnam par shes pa'i bar du ma rdzogs pa dang / yongs su rdzogs pa ste/ gang yongs su ma rdzogs pa dang / yongs su rdzogs pa de gnyis la mi spyod na de'i tshe 'di la spyod pa yin no/ /de ni ma rdzogs pa dang yongs su rdzogs pa'i sbyor ba'o/ /de skad ces bka' stsal pa dang zhes bya ba ni bzhi pa'i skabs te/ bcom ldan 'das kyis bka' stsal pa ste gzugs la chags pa dang bcas pa zhes bya ba ni de la spyod par byed pa'o/ /'dir de ltar spyod na zhes bya ba la sogs pa ni de la spyod par byed pa'o/ /'dir de ltar spyod na zhes bya bas ni phan yon gsungs te/ ma chags pa zhes bya ba la sogs pa la/ chags pa thams cad med pa ni ma chags pa'o/ /de ltar zhes bya ba la sogs pa ni mjug bsdu ba'o/ /de ni gzugs la chags pa dang ma chags pa'i sbyor ba'o/ /rab 'byor gyis gsol pa zhes bya ba la sogs pa nas 'phel bar mi 'gyur ro zhes bya ba'i bar gyis ni lnga pa bstan te/ 'grib pa dang 'phel ba med pas mi 'gyur ba ste/ nam mkha' bzhin no/ /bsngags pa ni yon tan te/ de ni mi 'gyur ba'i sbyor ba'o/ /rab 'byor 'di lta ste zhes bya ba nas/ de snyed du zad do zhes bya ba'i bar gyis ni drug pa'o/ /dang po'i kun nas nyon mongs pa'i sgra'i don ni 'grib par 'gyur ro/ /gnyis pa ni rjes su chags pa'o/ /bstan pas 'grib pa dang / 'phel bar mi byed pa ni byed pa med pa'i sbyor ba'o/ /gnas brtan rab 'byor gyis gsol pa zhes bya ba la sogs pa nas/ 'tshang rgya bar 'tshal ba zhes bya ba'i bar gyis ni bdun te/ bcom ldan 'das ma bsgom pa ni dka' ba rnam pa gsum bstan te/ /dka' ba byed pa'i phan yon gsungs pa ni ched du bya ba la sogs pa de la gnas pa'i 'o/ /spyod pa zhes bya ba ni nus pa'o/ /zhum pa ni bying ba'o/ /yang ba ni rgod pa'o/ /phyir mi log ni zhes bya ba ni nam mkha' bsgom pa ste/ mtshan nyid gcig par snang ba'i phyir ro/ /go cha 'di zhes bya ba ni sems can thams cad kyi phyir yang dag par rdzogs pa'i byang chub tu'o/ /nam mkha' zhes bya ba ni nam mkha' lta bu'i tshul gyis te/ de mi gtong ba'i phyir ro/ /de bas na dka' ba spyod pa ni sems can mi dmigs pa dang / mtha' yas pa'i phyir ro/ /de'i slad du go cha 'tshal ba ni thams cad kyi don gyi ched du byang chub pa'o/ /de ni ched du bya ba dka' ba'i sbyor ba'o/ /nam mkha' yongs su thar par 'tshal/ /zhes bya ba ni go cha chen po thob pa lags so zhes bya ba'i bar gyis ni brgyad pa ste/ yongs su thar pa ni gong du 'gro ba la gegs byed cing ltung ba lags so/ / gyen du khyer ba ni 'degs pa'o/ /sems can de snyed kyi don du sbyor ba de yang dka' ba byed pa ste/ nam mkha' bzhin du sems can gyi tshogs mtha' yas pa'i phyir dang / gzugs med pa'i phyir dang / rdzas su med pa nyid kyi phyir ro/ /de ni sbyor ba dka' ba'i sbyor ba'o/ /de nas bcom ldan 'das la zhes bya ba nas/ 'gog par mi bgyid do zhes bya ba'i bar gyis ni dgu pa ste/ sbyor ba'i 'bras bu ni byed pa ste/ kun nas nyon mongs pa dang bcas pa'i chos spong ba dang / rnam par byang ba'i chos bskyed pa'o/ /de gnyis ka yang dka' ba ste/ bcom ldan 'das ma ni de dag mi byed pa'i phyir ro/ /de ni byed par dka' ba'i sbyor ba'o/ /de nas tshe dang ldan pa rab 'byor zhes bya ba la sogs pa nas/ 'dod do zhes bya ba'i bar gyis ni bcu pa ste/ gang 'di la rnal 'byor du byed pa zhes bya ba ni rgyu'i gnas skabs so/ /de ci la zhes bya ba ni 'bras bu'i gnas skabs dag las so/ / nam mkha' la zhes bya ba ni skar ma'i lam gyi nam mkha' la'o/ /'di ni de dang chos mthun pa'i phyir bla na med pa'i byang chub bo/ /bla gab med pa zhes bya ba ni sa bla ste ma bkab pa'i phyogs kyi gnas so/ /'dir ni de dang chos mthun pa'i phyir dman pa'i byang chub ste/ de gnyi ga 'bras bu'o/ /de ni skal ba ji lta ba bzhin du 'bras bu thob pa'i sbyor ba'o/ /de nas zhes bya ba la sogs pa nas glags rnyed par 'gyur ro zhes bya ba'i bar gyis ni bcu gcig pa ste/ brgya byin gyis byang chub sems dpa' la bsrung ba dang / bskyab pa dang / sbed par 'dod pa dang / bsrung ba dang bskyab pa gnyis dang ldan pas sbed pa de la de skad ces bya'o/ /de la rab 'byor gyis ji de khyod kyis mthong ngam zhes smras te/ des ma yin no zhes smras so/ /des na ci zhig tu 'gyur zhe na/ gal te de ltar zhes bya ba la sogs pa gsungs te/ de ltar zhes bya ba ni chos thams cad mi dmigs pas so/ /lhag ma ni rtogs par sla ste/ de ltar rjes su 'gro ba dang / ldog pa dag gis rjes su brjod pa na de la srung ba ni shes rab kyi pha rol tu phyin pa kho na la rag las kyi/ gzhan la rag las pa ni ma yin no/ /de ni gzhan dag la rag las pa'i sbyor ba'o/ /kau shi ka gzhan yang zhes bya ba nas yongs su shes pa'o zhes bya ba'i bar gyis ni bcu gnyis pa ste/ bcom ldan 'das ma chen mo las ni rnam pa bdun du ston cing brjod de/ chos thams cad ni sgyu ma dang / smig rgyu dang / rmi lam dang / brag ca dang / mig yor dang / gzugs brnyan dang / dri za'i grong khyer lta bu'o/ / zhes bya ba gsungs te/ gang yang rnam pa bdun bstan pa de ni chos thams cad gnyis kyi ngo bos stong par gnas pa la/ gnyis su snang ba ni gzhan gyi dbang gi ngo bo nyid do/ /de ni dpe gcig gis ston par nus te/ ji ltar sgra yod na sgra brnyan med kyang snang ba ltar/ de bzhin du gnyis kyis stong pa 'dir rang gi ngo bo'i chos yod kyang gnyis su med pa'i ngo bo'i chos snang ba yin no/ /de bas bcom ldan 'das ma 'di las ni brag ca lta bu kho nar brjod do/ /de'i phyir bstan bcos 'di las ni tshig gzhan du brjod par bya ste/ shes byed gzhan du snang ba la/ /zhes bya bar ro/ /shes rab kyi pha rol tu phyin pa ni rnam pa gnyis te/ 'jig rten las 'das pa dang / dag pa 'jig rten pa ste/ 'di ltar rnam par mi rtog par 'jug pa'i gzungs las/ rnam par mi rtog pa'i dbyings la gnas pa'i byang chub sems dpas ni/ chos thams cad ces bya ba dang / khyad par med pa'i ye shes kyis/ chos thams cad nam mkha'i dbyings dang mtshungs par mthong ngo / /de'i rjes las thob pa'i shes pas ni chos thams cad sgyu ma dang / smig rgyu dang / rmi lam dang / mig yor dang / brag ca dang / gzugs brnyan dang / chu zla dang / sprul pa dang mtshungs par mthong ngo zhes gsungs pa lta bu'o/ /de'i phyir 'jig rten las 'das pa'i dbang du byas nas/ nam mkha' zhes bya ba la sogs pa gsungs so/ /dag pa 'jig rten pa'i dbang du byas nas de ji snyam du sems zhes bya ba la sogs pa gsungs te/ yongs su shes pa zhes bya ba ni des na de la ji snang ba ni brdzun pa nyid yin pa'i phyir ro zhes bya bar dgongs so/ /de ni shes byed gzhan du snang ba'i sbyor ba'o/ /sbyor ba bshad nas sbyor ba'i mnyam pa nyid brjod par bya ste/ de'i dbang du byas nas bstan bcos las/ gzugs la sogs pa rlom med pa/ /rnam bzhi de yi mnyam pa nyid/ /ces bya ba gsungs te/ gzugs la sogs pa'i gnas rnam pa bzhi la rlom pa med pa'i sbyor ba ni mnyam pa nyid ces bya ba'i don to/ /ji skad du bcom ldan 'das ma chen mo las ji skad du gzugs rlom sems su mi byed/ gzugs kyis rlom sems su mi byed/ gzugs la bdag gi zhes rlom sems su mi byed/ gzugs la rlom sems su mi byed ces bya ba gsungs te/ de bzhin du tshor ba la sogs pa la yang sbyar bar bya'o/ /bcom ldan 'das ma 'dir ni bstan bcos las/ gzugs la sogs pa rlom med pa/ /rnam brgyad de yi mnyam pa nyid/ / ces tshig gzhan du brjod par bya'o/ /'dzin pa'i rnam par rtog pa rnam pa bzhi dang / gzung ba'i rnam par rtog pa bzhi ni sbyor ba'i mnyam pa nyid ces bya ba'i don to/ /de yang de bas na zhes bya ba nas/ spyod do zhes bya ba'i bar gyis gsungs te/ de bas na zhes bya ba ni gang gi phyir chos thams cad brag ca lta bu de'i phyir ro/ /de la zhes bya ba ni chos thams cad la'o/ /rlom sems su mi byed ces bya ba ni dngos po la mngon par zhen pa'o/ /yang dag par rjes su mi mthong ba la'o/ /mi shes pa ni gzung ba la'o/ /kun tu mi shes pa zhes bya ba ni rtog pa la ste/ 'dzin pa'i rnam par rtog pa rnam pa bzhi'o/ /gzung ba'i rnam par rtog pa bzhi ni chos de dag kyang zhes bya ba la sogs pa gsungs te/ med ces bya ba ni yod par rlom sems med pa'o/ /yang dag par mi snang zhes bya ba ni mthong ba la'o/ /yang dag par med cing zhes bya ba ni 'dzin pa med pa'o/ /mi dmigs pa zhes bya ba ni rnam par rtog pa med pa ste/ de ltar gzung ba dang 'dzin par rtog pa med pa rnam pa brgyad kyis so/ /gnas pa zhes bya ba ni chos thams cad la spyod pa'o/ /des cir 'gyur zhes bya ba ni gal te zhes bya ba la sogs pa gsungs te/ rtogs par sla'o/ /de ni sbyor ba'i mnyam pa nyid do/ /'di'i sbyor ba'i mnyam pa nyid kyi zhar la/ chos ston pa'i mnyam pa nyid kyang bstan te/ mngon par yid ches par bya ba'i phyir de nas sangs rgyas kyi mthus zhes bya ba la sogs pa nas/ le'u rdzogs kyi bar gyis gsungs te/ 'jig rten gyi khams na zhes bya ba ni mi mjed 'di nyid na/ sangs rgyas stong zhes bya ba ni gang mi mjed 'di nyid du bskal pa bzang po 'di la mngon par rdzogs par byang chub pa'o/ /de la dang po log par dad sel dang / gser thub dang / 'od srung dang / shAkya thub pa bzhi mngon par rdzogs par sangs rgyas te/ de dag gis thams cad mkhyen pa nyid du ston pa la mnyam pa nyid du ston pa'i phyir ming 'di dag nyid ces bya ba la sogs pa gsungs so/ /byams pa yang zhes bya ba la/ yang gi sgra ni de'i phyi ma gzhan dgu brgya dgu bcu rtsa lnga yang bsdus te/ 'di nyid bstan pa mnyam pa nyid do/ /gtsor rnam par dag pa ston cing brjod pa'i le'u ni rnam par dag pa'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas sbyar ba snying po mchog ces bya ba las le'u brgyad pa'o// //le'u brgyad par thams cad mkhyen pa nyid ston pa'i mnyam pa nyid bstan nas/ 'di nyid du bskal pa bzang po'i chos ston pa gsal bar bya ba'i phyir/ le'u 'dir rab 'byor gyis gang bshad pa de/ de nas bcom ldan 'das la zhes bya ba la sogs pa gsungs so/ /ming tsam mo zhes bya ba ni ming yin gyi don ma yin te/ ming dang don ni 'brel ba med pa nyid kyis de dag las don rtogs pa med do/ /gzhan du na bdag nyid ni lha yin no zhes smras na/ lha nyid du 'gyur ba thal bar 'gyur ro/ /de lta mod kyi ming tsam na yod do zhe na/ de'i phyir ming de yang zhes bya ba la sogs pa gsungs so/ /'di zhes bya ba ni ming tsam nyid kyis so/ /mi dmigs pa zhes bya ba ni don gyis stong pa'i sgra la mi rigs pa'i phyir ro/ /de ci'i phyir zhe na/ ngag gis dngos po zhes bya ba ni rjod par byed pa brjod par bya ba'i don dang bcas zhes bya ba'i don to/ /don dang bcas kyang rung don med kyang rung ste/ ming de nyid mi rigs te med par grub bo/ / shes rab kyi pha rol tu phyin pa ni yod do zhe na/ de yang ma mchis zhes bya ba gsungs te/ de ci'i phyir zhe na/ mi dmigs zhes bya ba smos te/ gang gi phyir zhes bya ba ni lhag ma'o/ /ji ltar de mi dmigs she na/ shes rab kyi pha rol tu phyin pa la ming dang don ni med de shes rab kyi pha rol tu phyin pa dang 'gal ba'i phyir ro/ /de la de'i don kyang med de/ don dang 'brel pa med pa'i sgra las ni don rtogs pa med de/ gal te dngos po dang 'grel ba med pa'i phyir don ni med pa yin no zhe na/ de ltar na sgra las dngos po gos par mi 'gyur te/ don gyi dngos po la yang 'jug par mi 'gyur ro/ /de'i phyir shes rab kyi pha rol tu phyin pa ni ming dang don med pa ste/ don mi dmigs pa ni shes rab kyi pha rol tu phyin pa mi dmigs pa'o/ /de'i phyir 'di gnyis mnyam pa nyid du bstan pa'i phyir ming ji lta ba zhes bya ba la sogs pa gsungs te/ ji ltar 'di gnyis mnyam pa nyid yin zhe na/ de'i phyir chos 'di gnyis zhes bya ba la sogs pa gsungs so/ /de ltar shes rab kyi pha rol tu phyin pa nyid du bsgrubs te/ ston pa mnyam pa nyid gsal bar bya ba'i phyir ro/ /bcom ldan 'das ci'i slad du zhes bya ba gsungs te/ ci'i slad du zhes bya ba ni rnam pa gang gis mngon par rdzogs par sangs rgyas nas/ ming 'di nyid ces bya ba la sogs pas 'chad par 'gyur te/ gang gis kyang ma yin zhes bya ba'i don te/ med pa la ni mngon par rdzogs par 'tshang rgya bar mi nus so zhes bya bar dgongs so/ /de skad ces gsol pa dang zhes bya ba la sogs pas ni bcom ldan 'das kyis lan gsungs te/ ji ltar khyod kyis chos rnams stong pa nyid du bstan pa de kho na bzhin du/ de mngon par rdzogs par sangs rgyas nas ston par 'gyur ro zhes bya ba ni 'di ltar zhes bya ba'i sgra'i don to/ /de'i phyir mthong ba'i lam gyi dbang du byas nas/ bstan bcos las/ sdug bsngal la sogs bden pa la/ / chos shes rjes su shes bzod dang / /shes pa'i skad cig bdag nyid 'di/ /kun shes tshul la mthong ba'i lam/ /zhes bya ba gsungs te/ 'di ni kun shes pa'i tshul la mthong ba'i lam skad cig ma bcu drug gi bdag nyid do/ /gang sdug bsngal la sogs pa'i bden pa la/ so sor skad cig ma bzhi'i bdag nyid do/ /chos shes pa dang rjes su shes pa ni chos dang / rjes su bzod pa dang shes pa'o/ /de nyid kyi skad cig ma ni de'i bdag nyid de/ sdug bsngal la chos shes pa'i bzod pa dang / sdug bsngal la chos shes pa dang / sdug bsngal la rjes su shes pa'i bzod pa dang / sdug bsngal la rjes su shes pa'o/ /kun 'byung ba dang / 'gog pa dang / lam la yang de bzhin no/ /de nyid ni skad cig ma bcu drug ste/ go rims bzhin du bstan bcos las/ /gzugs rtag ma yin mi rtag min/ /mtha' las 'das dang rnam dag dang / /ma skyes ma 'gags la sogs dang / /mkha' 'dra chags pa spangs pa dang / /yongs su 'dzin las grol ba dang / /ngo bo nyid kyis brjod med dang / /gang phyir 'di'i don brjod pa yis/ /gzhan la sbyin du med pa dang / /dmigs pa med par byed pa dang / /shin tu rnam dag nad mi 'byung / /ngan song chad dang 'bras bu ni/ /mngon du byas la mi rtog nyid/ /mtshan ma dag dang ma 'brel dang / /dngos dang ming dang gnyis po la/ /shes pa skye ba med pa ni/ /kun shes nyid kyi skad cig ma/ /zhes bya ba gsungs te/ de la/ rtag pa ma yin mi rtag min/ /zhes bya ba ni skad cig ma dang po'o/ /mtha' las 'das pa ni shin tu rnam par dag pa zhes bya ba ste gnyis pa'o/ /rnam par dag pa ni yongs su dag pa zhes bya ba ste gsum pa'o/ /ma skyes pa dang ma 'gags pa zhes bya ba la sogs pa ni bzhi pa'o/ /nam mkha' dang 'dra zhes bya ba ni lnga pa'o/ /chags pa spangs pa zhes bya ba ni drug pa'o/ / yongs su 'dzin pa las grol ba zhes bya ba ni bdun pa'o/ /ngo bo nyid kyis brjod du med pa zhes bya ba ni brgyad pa'o/ /brjod du med pa dang grol ba zhes bya ba'i rjes su 'brang ste/ ga las she na/ gang phyir 'di'i gzhan dag la sbyin du med pa zhes bya ba de ni dgu pa'o/ / dmigs pa med par byed pa ni bcu pa'o/ /shin tu rnam par dag pa zhes bya ba ni bcu gcig pa'o/ /nad mi 'byung ba zhes bya ba ni bcu gnyis pa'o/ /ngan song chad pa dang mi rtog pa zhes bya ba la ngan song chad pa ni bcu gsum pa'o/ /mi rtog pa ni bcu bzhi pa'o/ /'bras bu mngon sum du bya ba rtogs pa dang / mtshan ma dag dang ma 'brel pa ni bco lnga pa'o/ /dngos po dang ming gnyis la shes pa skye ba med pa ni/ de dag ni kun shes pa nyid kyi bdag nyid mthong ba'i lam gyi skad cig ma bcu drug go/ /de la dang po 'di ltar zhes bya ba la sogs pas ni skad cig ma gnyis gsungs te/ gzugs la sogs pa rtag pa yang ma yin/ mi rtag pa yang ma yin/ bcings pa yang ma yin grol ba yang ma yin te/ rang nyid med pa de la ni rtag pa la sogs pa mi rigs te/ de ni sdug bsngal la chos shes pa'i bzod pa'o/ /gzugs la sogs pa ni rtag tu shin tu rnam par dag pa de ni sdug bsngal la chos shes pa'o/ /de skad ces bka' stsal pa dang zhes bya ba nas yongs su dag pa'o zhes bya ba'i bar gyis ni skad cig ma gsum pa ste/ shes rab kyi pha rol tu phyin pa yongs su dag pa zhes bya ba ni chos thams cad yongs su dag pa'i phyir te/ de ni sdug bsngal yongs su shes pa'i bzod pa'o/ /rab 'byor gzugs skye ba med pa dang zhes bya ba nas/ yongs su dag pa'o zhes bya ba'i bar gyis ni bzhi pa ste/ de yang de dag rnam par dag pas skye ba dang / 'gag pa dang / kun nas nyon mongs pa dang / rnam par byang ba med pa'i mtshan nyid de/ de ni sdug bsngal la rjes su shes pa'o/ / rab 'byor nam mkha' zhes bya ba nas yongs su dag pa'o zhes bya ba'i bar gyis ni lnga pa ste/ chos thams cad nam mkha' ltar skye ba la sogs pa med de/ nam mkha' ltar rnam par dag pa'i phyir shes rab kyi pha rol tu phyin pa yongs su dag pa'o/ /de ni kun 'byung la chos shes pa'i bzod pa'o/ /rab 'byor gzugs gos pa med pa zhes bya ba nas/ yongs su dag pa'o zhes bya ba'i bar gyis ni drug pa dang bdun pa ste/ chos thams cad nam mkha' ltar gos pa med pa ste/ nam mkha' ltar gos pa med pa'i phyir shes rab kyi pha rol tu phyin pa yongs su dag pa'o/ /de ni kun 'byung la chos shes pa'o/ /chos thams cad nam mkha' ltar yongs su 'dzin pa med pa'i phyir// shes rab kyi pha rol tu phyin pa yongs su dag pa ste/ de ni kun 'byung la rjes su shes pa'i bzod pa'o/ /nam mkha' dang brag ca zhes bya ba nas yongs su dag pa'o zhes bya ba'i bar gyis ni brgyad pa dang dgu pa dang bcu pa bstan te/ tshig tu med pa dang / brjod du med pa ni ji ltar brag ca ni ri dang / ri sul du nam mkha' ltar cung zad kyang brjod pa med pa'o/ /de bzhin du chos thams cad kyang nam mkha' ltar brjod du med pa ste/ de ni shes rab kyi pha rol tu phyin pa yongs su dag pa'o/ /de ni kun 'byung la rjes su shes pa'o/ /rtogs par byed pa ni brjod pa ste/ brjod pa gang gis pha rol la don rtogs par byed pa ni brjod pa'o/ /brag ca ni nam mkha' ltar cung zad kyang brjod pa med pa de bzhin du chos thams cad kyang nam mkha' ltar brjod du med pa des na shes rab kyi pha rol tu phyin pa yongs su dag pa'o/ /de ni 'gog pa la chos shes pa'i bzod pa'o/ /gang mi dmigs pa de ni dmigs su med pa ste/ 'dir brag ca'i sgra ni sgra dang sgra brnyan gnyi ga la 'jug ste/ 'di'i dbye ba ston par mi byed pa'i phyir ro/ /tshig gi med pa yang yin la brjod du med pa yang yin zhes bsdu'o/ /brag ca yang yin la tshig med pa yang yin brjod du med pa yang yin zhes gsum yang bsdu bar bya'o/ /de dag kyang yin la dmigs pa yang yin zhes bsdu bar bya'o/ /gang gi phyir nam mkha' yang de dag dang 'dra ste/ de ni mtshon cha sngo bsangs kyi bsdu ba bzhin no/ /de dag gi dngos po ni de nyid do/ /des yongs su dag pa ste/ de'i phyir ji ltar nam mkha' ni cung zad kyang dmigs su med pa nyid yin pa de bzhin du chos thams cad kyang dmigs su med na/ des nam mkha' ltar dmigs su med pas yongs su dag pa ste/ de ni 'gog pa la chos shes pa'o/ /rab 'byor zhes bya ba nas pha rol tu phyin pa yongs su dag pa'o zhes bya ba'i bar gyis ni bcu gcig pa bstan te/ kun nas nyon mongs pa'i chos kyis gos pa ni nye bar gos pa'o/ /rnam par byang ba'i chos kyis ma gos pa ni gos pa med pa'o/ /nye bar gos pa dang gos pa med pa ni nye bar gos pa dang gos pa med pa'o/ /de dag kyang yin la chos kyang yin pas na chos de dag go/ /chos kyang yin la thams cad kyang yin pas chos thams cad do/ /de dag gis gos pa med pa ni gos pa med pa'o/ /gnyi ga dmigs pa ni mi dmigs pa yin te/ gnyi ga mi dmigs pa ni gnyi ga yongs su dag pa ste/ de dag ni 'gog pa la rjes su shes pa'i bzod pa'o/ /de skad ces bka' stsal pa zhes bya ba nas/ dus mi bgyid do zhes bya ba'i bar gyis ni bcu gnyis pa bstan te/ gang gi phyir rnyed pa legs par rnyed pa yin zhe na/ rna lam du zhes bya ba la sogs pa gsungs te/ dus zhes bya ba ni 'chi ba'o/ /de ni 'gog pa la rjes su shes pa'o/ /de dag la lha'i bu zhes bya ba nas/ dgra je lji bar 'gyur te zhes bya ba'i bar gyis ni bcu gsum pa bstan te/ yum chen mo dag la ni rnam par dbye ba bdun par brjod la/ 'dir gnyis par byas pa yin te/ de yang shin tu dang ba dang ldan na gnyis pa zhes bya bar kha cig 'dod do/ /dus dang dngos po dang las dang 'gro ba na ni las ma yin yang las kyi ming can te/ las ma yin yang las kyi ming du 'gro'o zhes la la dag 'dod do/ /de bas kyang zhes bya ba ni bla na med pa'i rin po che bsrung bas kyang ngo / /rin po che chen po 'di nyid bsrung ba chen po yin gyi/ 'di las gzhan pa'i bsrung ba ni med pa ma yin nam zhe na/ de'i phyir yang rab 'byor zhes bya ba la sogs pa gsungs so/ /gal te yang rin po che chen po de lta yin pa yang gi sgra'i don to/ /dgra ni phyir rgol ba'o/ /ci tsam du gces pa zhes bya ba ni/ ji ltar khyad par du gyur pa'o/ /'dir bsod nams khyad par du gyur pa bstan pas ni ngan song chad par don gyis bstan par 'gyur te/ de ni lam la chos shes pa'i bzod pa'o/ /rab 'byor 'di lta ste zhes bya ba la sogs pa nas/ med cing mi dmigs so zhes bya ba'i bar gyis ni bcu bzhi pa bstan te/ ci'i phyir bla na med pa zhes bya zhe na/ phan pa dang bde ba'i phyir zhugs par gyur pa zhes bya ba gsungs te/ 'di nyid kyi rnam par 'grel pa ni chos thams cad ces bya ba la sogs pa'o/ /mi 'jigs pa'i tshul gyis zhes bya ba ni rtag pa'i tshul gyis so/ /nye bar gnas pa ni nye bar gnas pa'o/ /gal te phan pa dang bde ba'i phyir nye bar gnas na de lta na ni rnam par rtog par 'gyur ro zhe na/ rab 'byor shes rab kyi pha rol tu phyin pa zhes bya ba la sogs pa gsungs te/ zhum par mi 'gyur zhes bya ba ni mngon par zhen pa med pa'o/ /mi sbyor zhes bya ba ni mi gnas pa'o/ /yongs su mi 'dzin zhes bya ba ni yang dag par mi shes pa ste/ de'i phyir rnam par mi rtog pa ni rnam pa gsum du rnam par mi rtog pa'o/ /de ni lam la chos shes pa'o/ /'bras bu mngon du bya ba la mtshan ma dag dang ma 'brel pa de ni skad cig ma bco lnga pa ste/ de'i dbang du byas nas rab 'byor ma skyes pa zhes bya ba nas ma gos pa'o zhes bya ba'i bar gyis gsungs te/ 'bras bu skyes pa la mi dmigs pa ni ma skyes pa'o/ /rgyu des na bcom ldan 'das ma ni 'bras bu skyes pa'i mtshan ma'i dri mas ma gos pa'o/ /'di ci zhig gis ma gos pa yin zhe na/ rab 'byor zhes bya ba la sogs pa gsungs te zhes bya ba ni gtan tshigs so/ /gang gi phyir ma gos pa de'i phyir 'di ni shes rab kyi pha rol tu phyin pa ste/ rnam par rtog pa'i pha rol tu phyin pa nyid kyi phyir ro/ /gal te nye bar gos par gyur na ni shes rab kyi pha rol tu phyin pa nyid du mi 'gyur ro/ /ji ltar ma gos pa yin zhe na/ de'i phyir rab 'byor 'di ltar zhes bya ba la sogs pa gsungs te/ 'bras bu rnams skye ba na yang chos thams cad kyi mtshan ma'i dri ma nub pa'i phyir ma gos pa'o/ /de ni lam la rjes su shes pa'i bzod pa'o/ /dngos dang ming dang gnyis po la shes pa skye ba med pa de ni skad cig ma bcu drug pa ste/ de'i dbang du byas nas gal te zhes bya ba nas spyod do zhes bya ba'i bar gyis gsungs te/ de ltar yang zhes bya ba ni shin tu phra ba'i dngos po dang ming gnyis la 'du shes pa'o/ /de ltar zhes bya ba ni mdor bsdus pa'i don ston par byed pa'o/ /bcom ldan 'das ma chen mo dag las ni 'di nyid rgyas par ston to/ /de ltar yang mi shes/ de yang rnam par mi rtog / de ltar yang mi dmigs/ de ltar yang spros par mi byed na shes rab kyi pha rol tu phyin pa la spyod do zhes bya ba nas/ thams cad shes pa nyid thob par yang mi byed do zhes bya ba'i bar gyis gsungs te/ de la de ltar yang mi shes zhes bya ba ni chos nyid tsam snang gi chos thams cad snang ba yang ma yin pa'i phyir te/ de ni dngos po shes pa mi skyed pa'o/ /de ltar yang rnam par mi rtog ces bya ba ni brjod pa thams cad snang ba med pas/ ming gi shes pa mi skyed pa'o/ /ma 'dres pa dri ma med pa/ nam mkha' ltar mtha' yas pa chos nyid shes pa la ni rig par bya ba dang / rig par byed pa'i bye brag mi snang ba ste/ gzung ba dang 'dzin par shes pa skye ba med do/ /dngos po dang ming dang / gnyis su snang ba 'di gsum yang phyin ci log yin pa'i phyir spang bar bya ba ste/ phyin ci log ni spros pa'o/ /de'i phyir de dag med pa nyid kyang spros par mi 'gyur ro zhes gsungs so/ /lhag ma ni rtogs par sla ste/ de ni lam la rjes su shes pa'o/ /thams cad shes pa nyid 'di yang 'khor ba dang mya ngan las 'das pa la mi gnas pa nyid la sogs pa'i tshul yod na ni/ byang chub sems dpa' rnams kyi yin la/ de med na ni nyan thos la sogs pa rnams kyi thams cad shes pa nyid kyi dbang du byas pa rdzogs so/ / //de ltar thams cad shes pa nyid gsum gyi mtshan nyid bstan nas/ mjug bsdu ba'i phyir thob par byed pa med do zhes bya ba'i bar du gsungs te/ shes rab kyi pha rol tu phyin pa zhes bya ba ni rnam pa thams cad mkhyen pa nyid dang / lam shes pa nyid dang / thams cad shes pa nyid do/ /de zhes bya ba ni de nyid rnam pa gsum mo/ /'di dag ni le'u rnam pa dgus rgya cher bstan te/ le'u gcig dang phyed dang bdun dang / phyed dang gnyis ni go rims bzhin du bstan to/ /chos gang yang zhes bya ba ni sems dang sems las byung ba mtshungs par ldan pa'o/ /'jug par byed pa ni dmigs pa la nye bar 'jog par byed pa'o/ /nges par 'jog par byed pa ni de nyid la 'jog cing zhi gnas skyed par byed pa'o/ /yang dag par ston par byed pa ni lhag mthong skyed par byed pa'o/ /nges par ston par byed pa ni mngon sum du byed pas so/ /yongs su thob par byed pa ni 'bras bur gyur pa'i chos thob par byed pa'o/ /nges par thob par byed pa ni de nyid mthar phyin par 'dren pa ste/ thams cad kyang med do zhes bya ba dang sbyar ro/ /de thams cad ga las she na/ chos thams cad mi dmigs pa'i phyir ro/ /'di ston pa thos nas lha rnams kyis gang byas pa de ni/ de nas lha'i bu zhes bya ba la sogs pa gsungs so/ /skye bo mang po'i tshogs dag dga' ba skyes nas ca co ni ku co'o/ /de nyid ni ga zha yin te/ skad shin tu mthon por 'byin pa'o/ /'di ni chos kyi 'khor lo lan gnyis su bskor ba ma yin te/ gnyi ga yang dmigs su med pa'i phyir ro/ /chos gang la yang med do zhes bya ba ni/ chos kyi 'khor los gzhan pa yang ngo / /gang las chos thams cad la chags pa med pa zhes bya ba ni chags pa'i dmigs pa dang bral ba'i phyir ro/ /gang bla na med pa zhes bya ba la sogs pa ni rtogs par sla'o/ /chos thams cad ni dmigs pa med de/ gang gi phyir byang chub par 'gyur ba'i chos gang yin pa de yang med do zhes ston to/ /gang gi phyir rnam par byang ba'i chos gang zhig gang la ston par 'gyur ba ni med do/ /mngon par ma grub pa ni ma skyes pa'o/ /chos gang yang zhes bya ba ni kun nas nyon mongs pa'o/ / stong pa nyid la sogs pa'i ting nge 'dzin gsum ni rnam par byang ba rnams kyi dper brjod pa'o/ /bstan pa ni don dam pa bstan pa'o/ /sus kyang bstan pa med ces bya ba la sogs pa nas/ sbyin pa'i gnas su byas pa med do zhes bya ba ga las shes she na/ gang zag gi dngos po 'di nyid med pa'i phyir ro zhes dgongs so/ /thams cad mkhyen pa nyid rnam pa gsum gyi mtshan nyid bstan nas/ sbyor ba bstan par bya ste/ de yang rnam pa kun mngon par rdzogs par rtogs pa yin la/ de bstan pa'i ched du bstan bcos las/ rnam pa sbyor ba bcas pa dang / /yon tan skyon ni mtshan nyid bcas/ /thar dang nges 'byed cha mthun dang / /slob ma phyir mi ldog pa'i tshogs/ /srid dang zhi ba mnyam nyid dang / /zhing dag bla na med pa ni/ /rnam kun mngon rdzogs rtogs pa ste/ /'di ni thabs mkhas bcas pa yin/ /zhes bya ba gsungs pa yin te/ rnam pa dag dang / sbyor ba dag dang / yon tan dag dang / skyon dag dang / mtshan nyid dag dang / thar pa'i cha dang mthun pa dang / nges par 'byed pa'i cha dang mthun pa dang / phyir mi ldog pa'i dge 'dun dang / 'khor ba dang mya ngan las 'das pa mnyam pa nyid dang / sangs rgyas kyi zhing yongs su dag pa dang / thabs la mkhas pa ste/ dngos po bcu gcig ni rnam pa kun mngon par rdzogs par rtogs pa'o/ /ji ltar bstan pa bshad pa la/ dang po'i rnam pa bshad pa ni bstan bcos las/ gzhi dang ye shes rnam pa yi/ /rnam pa shes bya mtshan nyid do/ /kun mkhyen nyid ni rnam gsum phyir/ /de ni rnam pa gsum du 'dod/ /ces bya ba gsungs te/ gzhi ni mi dmigs pa ste/ 'phags pa'i bden pa bzhi la sogs pa'o/ /de'i ye shes de nyid kyi rnam pa ni rnam pa gang gis de yongs su shes par bya'o/ /de dag gi rnam pa zhes bya ba'i mtshan nyid ni ming ngo / /rnam pa thams cad mkhyen pa rnams zhes bya ba mang po'i tshig yin yang / rigs kyi dbang du byas nas thams cad mkhyen pa nyid ces bya ba'i don to/ /de rnam pa gsum ji ltar yin zhe na/ thams cad shes pa nyid dang / lam shes pa nyid dang / rnam pa thams cad mkhyen pa nyid do/ /de la dang po thams cad shes pa nyid kyi rnam pa nyi shu rtsa bdun te/ 'dir bstan bcos las/ med pa'i rnam pa nas bzung ste/ /mi g.yo ba yi rnam pa'i bar/ /bden pa so so la bzhi dang / /lam la de ni bco lngar bshad/ /ces gsungs te/ 'di ni ma mchis pa'i pha rol tu phyin pa'o zhes bya ba med pa'i rnam pa nas brtsams nas/ mi g.yo ba'i pha rol tu phyin pa zhes bya ba ni mi g.yo ba'i rnam pa'i bar ro/ /de dag las sdug bsngal dang / kun 'byung ba dang / 'gog pa dag la bzhi bzhi dang / lam gyi bden pa la ni lhag ma bco lnga'o/ /ma mchis pa yang yin la pha rol tu phyin pa yang yin pas na/ ma mchis pa'i pha rol tu phyin pa'o/ /de bzhin du 'og ma dag la yang sbyar ro/ /de la sdug bsngal gyi gzhi ni med pa dang / mnyam pa nyid dang / dben pa dang / mi rdzi ba'o/ /nam mkha' ma mchis pa zhes bya ba ni nam mkha' ma mchis pa bzhin du gzugs la sogs pa med pa ste/ ji ltar nam mkha' gzugs can gyi rdzas med pa'i mtshan nyid yin pa de bzhin du/ gzugs la sogs pa rang gi mtshan nyid med pa'o/ /chos thams cad dmigs su ma mchis pa dang mnyam pa zhes bya ba bde ba dang / sdug bsngal gyi chos thams cad dmigs su med par mnyam pa nyid do/ /shin tu stong pa zhes bya ba ni gang zag gi ngo bos stong pa nyid ces bya ba'i don to/ /gnod par byed pa ni sdug bsngal lo/ /gnod par byar rung ba yin pa'i phyir brdzi ba'i bdag nyid do/ /mi brdzi ba'i bdag nyid ni bdag med pa ste/ de'i rnam pa yin pa'i phyir mi brdzi ba'i pha rol tu phyin pa ste/ chos thams cad gnod par bya ba dang / gnod par byed pa rnams dmigs su med pa nyid kyis mi dmigs pa nyid do/ /kun 'byung gi gzhi ni/ 'di ltar gnas ni rgyu ste/ sngon gyi phung po rnams so/ /ngo bo nyid ni bdag nyid kyi dngos po ste/ lus kyi las so/ /brjod pa ni ngag gi las so/ /ming ni yid kyi las dang nyon mongs pa'o/ /'di dag med pa'i go rims bzhin du gnas med pa dang / ngo bo nyid med pa dang / brjod pa med pa dang / ming med pa ste/ de dag gi ngo bo nyid med pa'i phyir pha rol tu phyin pa'o/ /ming ma mchis shing lus ma mchis pa zhes bya ba la/ ming ni gzugs can ma yin pa'i phung po'o/ /lus ni gzugs can gyi phung po ste/ de gnyis med pa ni ming med cing lus med pa'o/ /'gro ba dang 'ong ba ni lus kyi las so/ /de med pa ni 'gro ba dang 'ong ba med pa'o/ /brjod pa'i rgyu ni rtogs pa'o/ /de med pa ni rtogs pa med pa'o/ /'gog pa'i gzhi ni 'di ltar 'gro ba'am/ zad pa'am/ skye ba 'di dag med pa ni go rims bzhin du 'gro ba med pa dang / gzung ba med pa dang / zad pa med pa dang / skye ba med pa ste de'i ngo bo nyid med pa'i phyir pha rol tu phyin pa'o/ /chos thams cad 'gro ba med pa ste/ 'gro ba med pa nyid kyi phyir ro/ /chos thams cad ni gzung du med pa ste/ chos kyis chos mi 'dzin pa'i phyir ro/ /zad pa nyid ni chos te rgyu dang mi ldan pa'i phyir ro/ /de mi ldan pa ni mi zad pa dang ldan pa'i phyir ro/ /mngon par grub pa ni skyes pa ste/ de med pa ni mngon par ma grub pa'o/ /lam gyi bco lnga ni byed pa po dang / shes pa po dang / mthong ba po med pa dang / 'pho ba med pa dang / 'jig pa med pa dang / rmi lam dang / sgra brnyan dang / mig yor dang / smig rgyu dang / sgyu ma dang / kun nas nyon mongs pa med pa dang / rnam par byang ba med pa dang / gos pa med pa dang / spros pa med pa dang / rlom pa med pa dang / g.yo ba med pa ste byed pa po med pa la sogs pa ni byed pa po med pa'i phyir de ni pha rol tu phyin pa'o/ /lam ni byed pa po med pa ste des byed pa po mi dmigs pa'i phyir ro/ /lam ni shes pa po dang mthong ba po med pa ste des shes pa po dang mthong ba po dmigs su med pa'i phyir ro/ /lam ni 'pho ba med pa ste des 'chi 'pho dang skye ba med pa mthong ba'i phyir ro/ /lam ni 'jig pa med pa ste dus gsum gyi chos rnams rang bzhin gyis 'jig pa med par rtogs pa'i phyir ro/ /rmi lam la sogs pa dang 'dra ba'i phyir rmi lam la sogs pa'o/ /lam ni rmi lam ste mthong bar bya ba med kyang don mthong ba'i phyir ro/ /lam ni brag ca ste sgra med kyang sgrar dmigs pa'i phyir ro/ /lam ni mig yor te gzugs brnyan no/ /de ni don med kyang don mthong ba'i phyir ro/ /lam ni smig rgyu ste chu'i phung po med kyang / skom gyis gdungs pa'i 'jig rten rnams la snang ba'i phyir ro/ /lam ni sgyu ma ste mtshan ma med kyang snang ba'i phyir ro/ /skye ba ma mchis shing rnam par go bar mi bgyid pa zhes bya ba ni gang gi phyir lam ni lnga po dag kyang skye ba med par ston pa ste/ snang ba'i rgyu med par yang de lta de ltar snang ba'i phyir ro/ /lam ni kun nas nyon mongs pa med pa ste des 'dod chags la sogs pa mi dmigs pa'i phyir ro/ /lam ni rnam par byang ba med pa ste des kun nas nyon mongs pa'i sems can mi dmigs pa'i phyir ro/ /lam ni gos pa med pa ste des nam mkha' ltar chos rnams la gos pa med par mthong ba'i phyir ro/ /lam ni spros pa med pa ste spros pa'i gnyen po yin pa'i phyir ro/ /lam ni rlom sems med pa ste rlom sems can thams cad yang dag par bcom pa nyid kyi phyir ro/ /lam ni g.yo ba med pa ste chos kyi dbyings kyi ngo bo nyid pas rtag pa nyid kyi phyir ro/ /de ni thams cad shes pa nyid kyi rnam pa'o/ /de nas lam shes pa nyid kyi rnam pa sum cu rtsa drug ni gang bstan bcos las/ rgyu dang lam dang sdug bsngal dang / /'gog pa la ni go rims bzhin/ /de dag brgyad dang bdun dang ni/ /lnga dang bcu drug ces bsgrags so/ /zhes bya ba gsungs te/ rgyu ni kun 'byung ste/ de bas kun 'byung ba dang / lam dag ni dang por bstan te/ 'bras bu'i thabs nyid yin pa'i phyir ro/ /sdug bsngal dang 'gog pa ni phyis bstan te 'bras bu nyid yin pa'i phyir ro/ /de dag gi rnam pa ni go rims bzhin du brgyad dang / bdun dang / lnga dang / bcu drug tu bsgrags pa ni gsungs pa ste/ mdo las so/ /de la kun 'byung gi brgyad ni 'dod chags dang bral ba dang / kun nas ldang ba med pa dang / zhi ba dang / skyon med pa dang / nyon mongs pa med pa dang / sems can med pa'o/ /ji lta yin zhe na/ skyon med pa zhes bya ba ni 'dod chags med pa dang / zhe sdang med pa dang / gti mug med pa gsum yin pa'i phyir ro/ / kun 'byung ni sngon gyi phung po lnga rnams so/ /yongs su brtags pa'i ngo bo nyid kyi chos rnams la chags pa ni 'dod chags te/ gang las 'dod chags dang bral ba ni 'dod chags dang bral ba ste kun 'byung ngo / /chos thams cad ma log pa'i de bzhin nyid kyi slad du zhes bya ba la/ log pa nyid du brtags pa'i ngo bo nyid kyis stong pa'o/ /kun nas ldang ba ni nyon mongs pa'i rgyu rnam par rtog pa'o/ /de 'di la yod pa ma yin pas kun nas ldang ba med pa ste kun 'byung ngo / /chos thams cad rnam par mi rtog pa zhes bya ba ni 'dzin pa med pa nyid kyi phyir ro/ /zhi ba ni kun 'byung 'gog pa zhes bya ba'i don to/ /de ga las she na/ chos thams cad kyi mtshan ma ni chos thams cad mi snang ba ste don dam par snang ba mi dmigs pa'i phyir ro/ /de nyid kyi phyir 'dod chags med pa'i pha rol tu phyin pa dang / zhe sdang med pa'i pha rol tu phyin pa dang / gti mug med pa'i pha rol tu phyin pa'o/ / yon tan gyi pha rol tu phyin pa zhes bya ba ni 'dod chags dang / zhe sdang dang / gti mug zad pa'i pha rol tu phyin pa'o/ /nyon mongs pa thams cad med pa ni nyon mongs pa med pa ste kun 'byung ngo / /yongs su rtog pa ma mchis zhes bya ba ni nyan thos kyis yod par rtogs so/ /gzhan yang sems can nyid ni nyon mongs pa dang / sdug bsngal bar 'gyur ba yin te/ de med pas na sems can med pa'o/ /yang dag pa'i mtha' zhes bya ba ni chos dang zang zing gi stong pa nyid do/ /lam gyi bdun ni tshad med pa dang / mtha' gnyis su mi rtog pa dang / tha mi dad pa dang / mchog tu mi 'dzin pa dang / mi rtog pa dang / dpag tu med pa dang / chags pa med pa'o/ /lam ni tshad med pa ste chos thams cad kyi kun nas ldang ba'i kun nas ldang ba med pa ni brdzun pa nyid yin pa'i phyir ro/ /lam ni mtha' gnyis su mi rtog pa ste chos thams cad la mngon par ma chags pa zhes bya ba de ni ji ltar snang ba de'i stong pa nyid snang zhing rtogs pa'o/ /tha dad pa med pa ni lam mo/ /dbyer ma mchis pa zhes bya ba ni dbye ba mi dmigs pa'i phyir ro/ /lam ni mchog tu mi 'dzin pa ste/ des dman pa'i theg pa la mi reg pa'i phyir ro/ /mi rtog pa ni lam mo/ / rnam par rtog pa mnyam pa nyid ces bya ba ni rnam par rtog pa mi dmigs pa'i phyir ro/ /dpag tu med pa ni lam mo/ /chos nyid tshad ma mchis pa nyid kyi slad du zhes bya ba ni chos nyid tshad med pa la dmigs pa'i phyir ro/ /chags pa med pa ni lam mo/ /chos thams cad la ma chags pa zhes bya ba ni dmigs pa med pa'o/ /sdug bsngal gyi lnga ni mi rtag pa dang / sdug bsngal ba dang / stong pa dang / bdag med pa dang / mtshan nyid med pa ste/ sdug bsngal ni zag pa dang bcas pa'i phung po lnga'o/ /de la mi rtag pa ni rtag pa ma yin pa'o/ /sdug bsngal ni sdug bsngal te/ bde ba'i mi mthun pa'i phyogs nyid yin pa'i phyir nam mkha' bzhin no/ /sdug bsngal ni stong pa nyid de chos thams cad mi dmigs pa'i phyir ro/ /sdug bsngal ni bdag med pa nyid de ji ltar snang ba'i chos thams cad la mngon par chags pa med pa'i phyir ro/ /'dus byas kyi chos gsum ni skye ba dang / rga ba dang / mi rtag pa'o/ /de med pa ni mtshan nyid med pa ste sdug bsngal lo/ /mngon par ma grub pa zhes bya ba ni ji ltar snang ba dang / ji ltar don dam pa ni 'dus ma byas pa'i phyir ro/ /'gog pa'i ni bcu drug ste/ de'i phyir 'gog pa ni stong pa nyid kyi rnam par dag pa yin te/ stong pa nyid dang tha mi dad cing tha dad par byed pa mi dmigs pa'i phyir ro/ /de bas na nam mkha' bzhin du mtha' yas mu med pa'o/ /dus gsum dang rgya cher yongs su ma chad pa'i phyir stong pa nyid bcu drug yin la/ des na go rims bzhin du sbyar te/ de ni 'dir ro gcig pa yin no/ /de'i phyir stong pa nyid thams cad kyi pha rol tu phyin pa ste mtha' yas mu med pa'i phyir ro zhes gsungs pa la/ de ni nang stong pa nyid dang / phyi stong pa nyid nas dngos po med pa'i ngo bo nyid stong pa nyid kyi bar gyi pha rol tu phyin pa'i don to/ /de bas na 'gog pa'i bden pa ni rnam pa bcu drug yin te/ de ni lam shes pa'i rnam pa'o/ /rnam pa thams cad mkhyen pa'i rnam pa ni brgya rtsa bcu ste/ gang gi phyir bstan bcos las/ kun mkhyen nyid gsum bye brag gis/ /lam gyi bden pa dang mthun par/ /dran pa nyer gzhag nas bzung ste/ /tha ma sangs rgyas nyid rnam par/ /slob ma byang chub sems dpa' dang / /sangs rgyas rnams la rim bzhin te/ /sum cu bdun dang sum cu bzhi/ /sum cu rtsa dgu dag tu bzhed/ /ces bya ba gsungs te/ de'i dbang du byas nas/ bcom ldan 'das byang chub kyi phyogs rnams zhes bya ba la sogs pa nas le'u rdzogs pa'i bar gyis gsungs so/ / 'di ni dran pa nye bar gzhag pa la sogs pa byang chub kyi phyogs rnams kyi pha rol tu phyin pa zhes bya ba la/ dran pa nye bar gzhag pa la sogs pa sde tshan rnam pa bdun re re nas phye bas/ byang chub kyi phyogs sum cu rtsa bdun du 'gyur te/ de dag re re la yang mi dmigs pa'i rnam pa ni pha rol tu phyin pa'o/ /lus dran pa nye bar gzhag pa'i pha rol tu phyin pa'o zhes bya ba nas yang dag pa'i ting nge 'dzin zhes bya ba'i bar gyis pha rol tu phyin pa'o zhes bya ba ni nyan thos kyi lam la brten pa'o/ /rnam pa thams cad mkhyen pa'i rnam pa sum cu rtsa bdun no/ /de nas rnam par thar pa'i sgo gsum ni stong pa nyid kyi pha rol tu phyin pa dang / mtshan ma med pa'i pha rol tu phyin pa dang / smon pa med pa'i pha rol tu phyin pa yin te/ rnam par thar pa'i sgo mi dmigs pa'i phyir ro/ /rnam par thar pa brgyad ni dang po'i rnam par thar pa'i pha rol tu phyin pa dang / gnyis pa'i rnam par thar pa'i pha rol tu phyin pa dang / sdug pa'i rnam par thar pa'i pha rol tu phyin pa dang / nam mkha' mtha' yas skye mched kyi rnam par thar pa'i pha rol tu phyin pa dang / rnam shes mtha' yas skye mched kyi rnam par thar pa'i pha rol tu phyin pa dang / cung zad med pa'i skye mched kyi rnam par thar pa'i pha rol tu phyin pa dang / 'du shes med 'du shes med min skye mched kyi rnam par thar pa'i pha rol tu phyin pa dang / 'du shes dang tshor ba 'gog pa'i rnam par thar pa'i pha rol tu phyin pa yin te/ rnam par thar pa brgyad mi dmigs pa'i phyir ro/ /mthar gyis gnas pa'i snyoms par 'jug pa dgu ni de'i phyir bsam gtan dang po la gnas pa'i pha rol tu phyin pa nas bsam gtan bzhi pa la gnas pa'i pha rol tu phyin pa zhes bya ba'i bar dang / nam mkha' mtha' yas skye mched la gnas pa'i pha rol tu phyin pa nas 'du shes dang tshor ba 'gog pa la gnas pa'i pha rol tu phyin pa zhes bya ba yin te/ bsam gtan dang po la sogs pa mi dmigs pa'i phyir ro/ /sdug bsngal gyi pha rol tu phyin pa dang / kun 'byung gi pha rol tu phyin pa dang / 'gog pa'i pha rol tu phyin pa dang / lam gyi pha rol tu phyin pa dang / bden pa bzhi mi dmigs pa'i phyir ro/ pha rol tu phyin pa bcu ste/ de'i phyir sbyin pa'i pha rol tu phyin pa nas thabs dang smon lam dang / stobs dang ye shes kyi pha rol tu phyin pa yin te/ de dag gi mi mthun pa'i phyogs de mi dmigs pa'i phyir ro/ /de ni byang chub sems dpa'i lam la gnas pa'i rnam pa sum cu rtsa bzhi'o/ /stobs kyi pha rol tu phyin pa ni stobs bcu ste de'i phyir gnas dang gnas ma yin pa mkhyen pa'i stobs kyi pha rol tu phyin pa nas zag pa zad pa mkhyen pa'i stobs kyi pha rol tu phyin pa'i bar du'o/ /mi brdzi ba'i slad du'o zhes bya ba de ni yang stobs kyi don to/ /mi 'jigs pa'i pha rol tu phyin pa ni rnam pa bzhi ste/ mngon par rdzogs par byang chub pa la mi 'jigs pa'i pha rol tu phyin pa dang / zag pa zad pa la mi 'jigs pa'i pha rol tu phyin pa dang / nges par 'byung ba'i chos rnams la mi 'jigs pa'i pha rol tu phyin pa dang / bar du gcod pa'i chos rnams la mi 'jigs pa'i pha rol tu phyin pa'i shin tu ma zhum pa zhes bya ba ni mi 'jigs pa'i don to/ /so so yang dag par rig pa ni chos so so yang dag par rig pa'i pha rol tu phyin pa dang / don so so yang dag par rig pa'i pha rol tu phyin pa dang / nges pa'i tshig so so yang dag par rig pa'i pha rol tu phyin pa dang / spobs pa so so yang dag par rig pa'i pha rol tu phyin pa'o/ /chos thams cad dang / don dang / nges pa'i tshig dang / spobs pa rnams shes shing yang dag par rig pa'o/ /de la chags pa med pa dang / thogs pa med pa zhes bya ba ni de la chags pa med pa dang / thogs pa med par nus pa'o/ /de ni so so yang dag par rig pa'i don to/ /sangs rgyas kyi chos ma 'dres pa thams cad kyi pha rol tu phyin pa zhes bya ba la/ sangs rgyas kyi chos kyang yin la ma 'dres pa yang yin pas na/ sangs rgyas kyi chos ma 'dres pa'o/ /gzhan dag dang thun mong ma yin pa'i phyir de ni sangs rgyas kyi chos ma 'dres pa'o/ /thams cad kyang yin la sangs rgyas kyi chos ma 'dres pa thams cad do/ sangs rgyas kyi chos ma 'dres pa bco brgyad ces bya ba'i don to/ /de dag gi rnam pa nyid kyi phyir pha rol tu phyin pa'o/ /'di lta ste/ 'khrul pa med pa dang / ca co med pa dang / dran pa nyams pa med pa zhes bya ba pha rol tu phyin pa gsum dang / thugs mnyam par ma bzhag pa mi mnga' ba dang / tha dad pa'i 'du shes mi mnga' ba dang / so sor ma brtags pa'i btang snyoms mi mnga' ba'i pha rol tu phyin pa gsum dang / 'dun pa dang / brtson 'grus dang / dran pa dang / ting nge 'dzin dang / shes rab dang / rnam par grol ba nyams pa mi mnga' ba'i pha rol tu phyin pa drug dang / lus dang ngag dang / yid kyi las thams cad ye shes sngon du 'gro zhing ye shes kyi rjes su 'brang ba gsum dang / dus gsum thams cad la ma chags ma thogs pa'i ye shes 'jug pa'i pha rol tu phyin pa gsum ste de ni sangs rgyas kyi chos ma 'dres pa bco brgyad kyi pha rol tu phyin pa'o/ /bgrang ba'i tshul las shin tu 'das pa zhes bya ba la 'dra bar sems pa ni bgrang ba'o/ /de'i tshul ni ldan pa ste 'dres pa'o/ /de las shin tu 'das pa ni 'das pa ste/ de ni ma 'dres pa'i don to/ /ji lta ba'i chos de kho na bzhin du gsungs pas na de bzhin gshegs pa'o/ /de'i de bzhin nyid ni de bzhin gshegs pa nyid de de'i ngo bo nyid de ni pha rol tu phyin pa'o/ /chos thams cad ni sangs rgyas thams cad kyi bka'o/ /de dag gis ma log pa de bzhin nyid ni bden pa nyid kyi phyir ro/ /rang byung gi pha rol tu phyin pa zhes bya ba la byung zhes bya ba'i sgra ni 'jug pa'i don la 'jug ste/ don gzhan la 'jug pa zhes bya ba'i khongs su gtogs pa'i don to/ /rang zhes bya ba ni bdag nyid de sems zhes bya ba'i don to/ /sems kyi chos thams cad la 'jug par byed pa'i phyir rang 'byung ngo / /de'i ngo bo nyid ni de'i pha rol tu phyin pa'o/ /de nyid kyi phyir yum chen mo las chos thams cad la dbang bsgyur ba'i phyir zhes gsungs te/ 'di'i don bstan pa ni don gzhan rnam par bcad pa'i phyir/ bcom ldan 'das ma las gtan tshigs 'di gsungs so/ /chos thams cad ngo bo nyid ma mchis pa'i slad du zhes bya ba la chos thams cad ngo bo nyid med pa ni rang gi ngo bo nyid med pa nyid do/ /gal te 'di ngo bo nyid yod par gyur na ni de'i tshe sems phyin ci log par mi 'gyur na/ gang gi phyir sems phyin ci log pa de bas na de bzhin gshegs pa rnams dbang bsgyur ro zhes bsams so/ /thams cad mkhyen pa'i ye shes ni sangs rgyas nyid ces bya ste don gcig go/ /de'i phyir yum chen mo dag las sangs rgyas nyid kyi rnam pa zhes tha mar gsungs so/ /'dir ni rnam pa thams cad mkhyen pa'i pha rol tu phyin pa'o zhes bstan te/ /chos thams cad kyi ngo bo nyid dang / rnam pa thams cad ni chos thams cad kyi ngo bo nyid kyi rnam pa thams cad do/ /de dag mkhyen pa ni de'i ngo bo ste/ de nyid de de'i slad du'o/ /sangs rgyas kyi lam la brten pa sum cu rtsa dgu ni rnam pa thams cad mkhyen pa'i rnam pa'o/ /rnam kun mkhyen nyid rnam pa la/ /gcig tu bsdus na brgya dang bcu/ / thams cad mkhyen nyid rnam gsum la/ /brgya dang bdun cu rtsa gsum mo/ /bcom ldan 'das ma la rnam pa 'di rnams kyis bstod de des na bstod pa'i don gyi le'u ni bstod pa'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel slob dpon rin chen 'byung gnas zhi bas rnam par sbyar ba snying po mchog ces bya ba las le'u dgu pa'o/ / //rnam pa bstan nas de dag gi sbyor ba bshad par bya ste/ de la bcom ldan 'das ma thos pa yang rnyed par dka' na/ rab tu sbyor bar bya ba lta smos kyang ci dgos zhes bstan par bya ba'i phyir bstan bcos las/ sangs rgyas rnams la bkur sti byas/ /de las dge ba'i rtsa ba bskrun/ /dge ba'i bshes kyis mgon bcas pa/ /'di mnyan pa yi snod yin no/ /sangs rgyas bsten dang kun 'dri dang / /sbyin dang tshul khrims sogs spyod pas/ /len dang 'dzin pa la sogs pa'i/ /snod du dam pa rnams bzhed do/ /zhes bya ba gsungs te/ gang dag sngon gyi sangs rgyas la lhag par bya ba byas shing bsod nams bsags pa dang / /tshul khrims dang thos pa la sogs pas dge ba'i rtsa ba bskyed pa dang / dge ba'i bshes gnyen gyis yongs su bzung ba de nyid ni bcom ldan 'das yum 'di nyan pa la thos pa snang ba'i snod yin gyi gzhan ni ma yin no/ /gang yang sngon gyi skye ba dag tu sangs rgyas mang po la bsnyen bkur dang / yongs su 'dris pa dang ldan pa dang / pha rol tu phyin pa drug la spyod pas de bzhin du bcom ldan 'das yum 'dzin pa nas de bzhin nyid du sgrub pa'i bar gyi snod du 'gyur ba yin gyi gzhan ni ma yin no/ /de nyid kyi phyir bcom ldan 'das yum 'di 'dzin pa nas de bzhin nyid du rna lam du grag cing rtogs pa ni nges par de dag gis lhag par bya ba byas pa la sogs pa yon tan gsum dang ldan pa yin no/ /de dag 'dzin pa la sogs pa snang ba dang / de bzhin nyid du sgrub pa de dag ni lhag par bya ba byas pa la sogs pa yon tan gsum dang ldan pa dang / sangs rgyas la bsnyen bkur byas pa la sogs par nges pa yin te/ de nas lha'i dbang po brgya byin 'di snyam du sems te zhes bya ba nas/ de ltar shes rab kyi pha rol tu phyin pa 'di la rnal 'byor du bya'o zhes bya ba'i bar gang gsungs pa la/ de bzhin nyid du slob pa dang zhes bya ba ni zhi gnas kyis so/ /bsgrub pa dang zhes bya ba ni lhag mthong gis so/ /rnal 'byor du byed pa zhes bya ba ni zhi gnas dang lhag mthong gis so/ /dad pa ma mchis pa zhes bya ba la sogs pa la de bzhin gshegs pas gsungs pa yin pa'i phyir ro/ /de kho na nyid ma yin par yang dag par yid ches pa ni dad pa'o/ /'dzin par 'dod pa ni bzod pa'o/ /spong bar mi 'dod pa ni bzod pa'o/ /tshig dang don nyan par 'dod pa ni 'dun pa'o/ /brtson 'grus ni spro ba'o/ /dge ba'i rtsa ba'i bar du gcod pa chags pa dang / zhe sdang dang / gti mug dang / le lo'i gnyen po ni bag yod pa'o/ /mngon sum dang / rjes su dpag pa dang / yid ches pa'i lung gis nges pa'i dngos po la 'di nyid yin gyi gzhan du ni ma yin no zhes nges par 'dzin pa ni mos pa'o/ /mi 'phrogs pa'i rten byed pa'i las can te/ de gtso bor byed pa ni pha rol rgol ba la sogs pas mi 'phrogs pa'i phyir ro/ /yongs su dris pa dang / yongs su dri bar bgyis pa zhes bya ba ni the tshom gyi gnas thams cad yongs su dris pa dang / gang gis the tshom gyi lan de byas pas ni yongs su dris par byas pa'o/ /de ltar ngo mtshar ci che zhes bya ba ni 'dir ci zhig ngo mtshar du gyur pa'o/ /'di la mos par mi 'gyur ba zhes bya ba gang yin pa de dang sbyar ro/ /de ltar shes rab kyi pha rol tu phyin pa zhes bya ba la de ltar zhes bya ba ni shes rab kyi pha rol tu phyin pa dang thams cad mkhyen pa phan tshun rgyu nyid du nges par bstan pa la phyag bya ba'i don te de ni rnyed par dka' ba nyid do/ /de nas bcom ldan 'das zhes bya ba nas spobs pa skyes so zhes bya ba'i bar gyis ni sbyor ba'i skabs 'byed do/ /sbyor ba'i dbang du byas nas bstan bcos las/ gzugs la sogs la mi gnas phyir/ /de la gnas pa bkag pa'i phyir/ /de yi de bzhin nyid zab phyir/ / de rnams gting dpag dka' ba'i phyir/ /de dag tshad ni med phyir dang / /tshegs chen yun ring rtogs pa'i phyir/ /lung bstan phyir mi ldog nyid dang / /nges 'byung bar chad med bcas dang / /byang chub nyid dang myur ba dang / /gzhan don 'phel med 'grib med phyir/ /chos dang chos min sogs mi mthong / /gzugs sogs bsam mi khyab mi mthong / /gzugs sogs de yi mtshan ma dang / /de yi ngo bor rnam mi rtog /'bras bu rin chen sbyin byed dang / /de ni dag pa'i mtshams dang bcas/ /zhes bya ba gsungs te/ de ni zhes bya ba ni sbyor ba ste/ rnam pa bstan nas de nyid kyi skabs yin pa'i phyir ro/ /gzugs la sogs pa la mi gnas pa ni sbyor ba ste/ de la bkag pa gnas pa'i phyir ro/ /gzugs la sogs pa la mi sbyor ba ni sbyor ba de la sbyor ba bkag pa'i phyir ro/ /de bzhin nyid kyang zab pa'i phyir zab pa'i sbyor ba'o/ /de bzhin du gzugs la sogs pa la gting dpag dka' ba'i sbyor ba'o/ /de bzhin nyid du tshad med pa yin pa'i phyir tshad med pa'i sbyor ba'o/ /dang zhes bya ba ni de la sbyor ba bkag pa'i phyir zhes bya ba dang sbyor ro/ /de la zhes bya ba ni zab pa'i phyir dang / rtogs par dka' ba'i phyir dang / tshad med pa'i phyir de dag la sbyor ba bkag pa'i sbyor ba gsum ste/ zab pa nyid du mi sbyor ba'i sbyor ba dang / rtog par dka' ba nyid du mi sbyor ba'i sbyor ba dang / tshad med pa nyid du mi sbyor ba'i sbyor ba'o/ /gang sbyor ba zab pa la sogs pas spangs pa'i phyir ngan song du yun ring du gnas nas tshegs chen pos yun ring po nas mngon par rtogs pa ni de ni tshegs chen pos yun ring po nas mngon par rtogs pa'i sbyor ba'o/ /lung bstan pa zhes bya ba ni gang gi phyir sbyor bas ring po mi thogs par lung bstan pa thob par 'gyur te/ de ni lung bstan pa thob pa'i sbyor ba'o/ /phyir mi ldog pa nyid dang zhes bya ba ni gang gi phyir/ phyir mi ldog pa nyid thob pa de ni phyir mi ldog pa'i sbyor ba'o/ /nges 'byung zhes bya ba ni yun ring por bar du gcod pa'i sa las nges par 'das pa'i sbyor ba ni/ nges par 'byung ba'i sbyor ba'o/ /bar chad dang ldan pa ni bar chad dang bcas pa'i sbyor ba'o/ /bar chad med par lung bstan pa ni bar chad med pa'i sbyor ba'o/ /byang chub nye dang zhes bya ba ni gang gi phyir nye bar rtogs pa de ni nye bar mngon par rdzogs par byang chub pa'i sbyor ba'o/ /myur ba zhes bya ba ni byang chub ces bya bar sbyar te/ gang gi phyir ring po mi thogs par 'dis byang chub 'di rtogs par 'gyur te/ de ni myur bar rdzogs par byang chub pa'i sbyor ba'o/ /gzhan gyi don gyi sbyor ba ni gzhan gyi don gyi sbyor ba'o/ /gang du phung po la sogs pa rnams kyi 'phel ba dang / 'grib pa med par mthong ba de ni 'phel ba dang / 'grib pa med pa'i sbyor ba'o/ /chos dang chos min sogs mi mthong / /zhes bya ba ni gang gi tshe chos la sogs pa nyid kyis chos rnams mi mthong ba de'i tshe ni chos la sogs pa mi dmigs pa'i sbyor ba'o/ /gzugs sogs bsam mi khyab mi mthong / /zhes bya ba ni gzugs bsam gyis mi khyab pa nas rnam pa thams cad mkhyen pa nyid bsam gyis mi khyab pa'i bar de dag mi mthong ba ni gzugs bsam gyis mi khyab pa la sogs pa mi mthong ba'i sbyor ba'o/ /gzugs sogs de yi mtshan ma dang / /de yi ngo bor rnam mi rtog /ces bya ba ni gzugs la sogs pa ma 'ongs pa'i bdag nyid kyi ngo bo ni de'i ngo bo'o/ /gsum po 'di dag la stong pa nyid dang / mtshan ma med pa dang / smon pa med pa rnam par mi rtog pa ni rnam par mi rtog pa'i sbyor ba'o/ /'bras bu rin chen sbyin byed dang / /zhes bya ba ni rgyun du zhugs pa'i 'bras bu nas yang dag par rdzogs pa'i byang chub ces bya ba'i 'bras bu rin po che de dag sbyin par byed pa ni bcom ldan 'das yum 'di nyid kyi sbyor ba ste/ 'bras bu rin po che sbyin pa'i sbyor ba'o/ /dag pa zhes bya ba ni bcom ldan 'das ma 'di nyid dag pa'i phung po'i sbyor ba ste/ rnam par dag pa'i sbyor ba'o/ /mtshams dang bcas zhes bya ba'i sbyor ba ni dus ji tsam gyis bcom ldan 'das yum bris pa la sogs pa 'grub pa de de tsam gyis 'grub pa'o/ /brtson 'grus brtan pa gang gis sbyor ba byed pa ni mtshams dang bcas pa'i sbyor ba'o/ /de ltar 'di dag ni sbyor ba nyi shu rtsa gsum mo/ /kau shi ka byang chub sems dpa' sems dpa' chen po zhes bya ba la sogs pas ni de dag rim gyis gsungs te/ spyod pa zhes bya ba ni yid la byed pa'o/ /gzugs la mi gnas so zhes bya ba la sogs pa ni bstan pa'o/ /gzugs mi gnas so zhes bya ba la sogs pa ni bshad pa ste mngon par zhen pa zhes bya ba'i don to/ /gang gi phyir mi gnas pa de'i phyir rnal 'byor du byed pa ni sbyor ba thob pa'o/ /de ni gzugs la sogs pa la mi gnas pa la sbyor ba'o/ /kau shi ka gzugs zhes bya ba la sogs pa la mi sbyor ba ming dang mtshan ma dag la'o/ /de ltar na mi gnas so zhes bya ba ni yang dag par mi shes so zhes bya ba'i don to/ /shes rab kyi pha rol tu phyin pa la de ltar mi gnas so zhes bya ba ni rnam par mi rtog pa'i phyir ro/ /'di ni gzugs la sogs pa la mi sbyor ba'i sbyor ba'o/ / de nas bcom ldan 'das zhes bya ba la sogs pa nas zab mo zhes bya ba yan chad kyis ni zab pa'i sbyor ba gsungs te/ 'dir bcom ldan 'das shes rab kyi pha rol tu phyin pa zab mo zhes bya ba la/ gzugs la sogs pa zab pa ni de bzhin nyid kyis zab pa'i phyir ro zhes bya bar dgongs so/ / 'di ni zab pa'i sbyor ba'o/ /bcom ldan 'das shes rab kyi pha rol tu phyin pa ni rtogs par dka'o zhes bya ba ni gzugs la sogs pa rtogs par dka' ba'i phyir ro zhes dgongs so/ /shes rab kyi pha rol tu phyin pa ni nges par rtogs par nus pa ma yin nam/ ci'i phyir rtogs par dka' zhe na/ gzung bar dka'o zhes bya ba la sogs pa gsungs te/ gang gi phyir nges pa las ni mtshan mar 'dzin pa'o/ /de las ni rnam par rtog pa ste/ shes rab kyi pha rol tu phyin pa ni rnam par mi rtog pa ste/ de'i phyir rtogs par dka' ba'o/ /'di ni rtogs par dka' ba'i sbyor ba'o/ /bcom ldan 'das shes rab kyi pha rol tu phyin pa tshad ma mchis pa zhes bya ba ni gzugs la sogs pa tshad med pa'i phyir te/ de bas na tshad med pa'i sbyor ba'o/ /gzugs zab po zhes bya ba la sogs pa nas de skad ces bka' stsal pa dang zhes bya ba'i bar gyis ni zab pa la mi sbyor ba'i sbyor ba'o/ /'dir mi gnas so zhes bya ba ni mngon par zhen pa med pa'o/ /rnal 'byor du mi byed pa zhes bya ba ni yang dag par mi shes pa'o/ /rnal 'byor du byed pa zhes bya ba ni sbyor ba ste/ de ni zab pa las mi sbyor ba'i sbyor ba dang / de bzhin du rtogs par dka' ba la mi sbyor ba'i sbyor ba dang / de bzhin du tshad med pa la mi sbyor ba'i sbyor ba'o/ /de skad ces bka' stsal pa dang zhes bya ba la sogs pa nas nyes pa cir 'gyur zhes bya ba'i bar gyis ni tshegs chen pos yun ring po nas rtogs pa'i sbyor ba gsungs so/ /'dir nyes pa cir 'gyur zhes bya ba ni dris pa'o/ /lan ni yum chen mo dag las gsungs pa dran par byed de de nyid kyi don bsdus nas bshad pa ni de thos nas ma dad cing spong ste des na ngan song du yun ring bas tshegs chen pos mngon par rdzogs par byang chub po/ /de ni tshegs chen pos yun ring po nas mngon par rtogs pa'i sbyor ba'o/ /de skad ces smras pa dang zhes bya ba la sogs pa nas lung bstan pa thob par 'gyur bar rig par bgyi'o zhes bya ba'i bar gyis ni lung bstan pa'i sbyor ba gsungs te/ de'i phyir gcig gam gnyis zhes bya ba ni yang dag par brjod pa'o/ /gcig gam gnyis ma yin zhes bya ba ni log pa'i brjod pa'o/ /mnyes par byed par 'gyur zhes bya ba ni thob par 'gyur ba'o/ /thugs dbyung bar byed par mi 'gyur zhes bya ba ni mgu bar byed par 'gyur ro/ /ji srid thob pa zhes bya ba la phyis zhes bya ba ni lhag ma ste rtogs par sla'o/ /de ni lung bstan pa dang bcas pa'i sbyor ba'o/ /gang shes rab kyi pha rol tu phyin pa zab mo zhes bya ba nas bsags pa legs so zhes bya ba'i bar gyis ni phyir mi ldog pa'i sbyor ba gsungs te/ rnyed par 'gyur ba ni thob par 'gyur ba'o/ /phal cher zhes bya ba ni mang du'o/ /mi mthun pa zhes bya ba ni rgyab kyis phyogs pa'o/ /g.yos par 'gyur ro zhes bya ba ni ldog par 'gyur ba'o/ /rab tu 'jug pa'i zhes bya ba ni 'jug pa'i tshul gyis sbyor bar byed pa'o/ /rtog pa med pa ni rab tu gnon pa'o/ /de ltar sems rab tu 'jug pa dang / rab tu gnon pa ste 'di ni phyir mi ldog pa'i sbyor ba'o/ /bcom ldan 'das 'di lta ste/ dper na zhes bya ba nas thob pa'i slad du zhes bya ba'i bar gyis ni nges par 'byung ba'i sbyor ba gsungs te/ 'di la dpag tshad brgya'i tshad yod pas na dpag tshad brgya pa'o/ /lhag ma ni rtogs par sla'o/ /'di ni nges par 'byung ba'i sbyor ba'o/ /de skad ces gsol pa dang zhes bya ba nas mnyan pa thob pa'i slad du zhes bya ba'i bar chad med pa dang bcas pa'i sbyor ba gsungs te/ ldum bu ni yal ga'o/ /ldum bu dang dri dag gis mtshan pa ni rtse mo la sogs pa'o/ /gang yang zhes bya ba ni gal te yang zhes bya ba'i don to/ /bsnyen te zhes bya ba ni nges par phyin pa 'am thob pa'o/ /mi ring ngo zhes bya ba yang ngo / /lhag ma ni rtogs par sla'o/ / 'di ni bar chad med pa'i sbyor ba'o/ /bcom ldan 'das 'di lta ste zhes bya ba nas mgu ba skyes par 'gyur ro zhes bya ba'i bar gyis ni byang chub dang nye ba'i sbyor ba gsungs te/ lo ma dang 'dab ma lhags pa ni rnyings pa ste/ gang dag la lo ma lhags pa yod pa de la de skad ces bya'o/ /lhag ma ni rtogs par sla'o/ /'di ni byang chub dang nye ba'i sbyor ba'o/ /bcom ldan 'das 'di lta ste/ dper na zhes bya ba la sogs pa nas khyod spobs par gyur to zhes bya ba'i bar gyis ni myur du mngon par rdzogs par byang chub pa'i sbyor ba gsungs te/ sbrum ma ni sbrum ma'i bud med do/ /bskyod na zhes bya ba ni skyo ba'o/ /snyom pa zhes bya ba ni na ba'o/ /smra ba nyid ni smra ba'o/ /yang na smra bar byed pa'o/ /stobs ni mthu'o/ /sdug bsngal ni tshor ba'o/ /'grogs pa ni skyes pa dang lhan cig nyal ba'o/ /ji ltar 'grogs pa la dad che bar mi 'gyur zhe na/ sngon gyi tshul bzhin zhes bya ba la sogs pa gsungs so/ /tshul bzhin ma yin pa'i yid la byed pa zhes bya ba ni 'dod chags dang bcas pa'i rgyu'i rnam par rtog pa'o/ /kun du bstan pa zhes bya ba ni de bskyed pa'i phyir ro/ /nges par bstan pa zhes bya ba ni 'dod chags la spyod pa'o/ /bsgoms pa zhes bya ba ni yang dag par phrad pa'i phyir ro/ /mang du byas pas zhes bya ba ni yang dang yang du de ltar byed pa'i phyir ro/ /dga' ba ni rab tu dga' ba'o/ /lhag ma ni rtogs par sla'o/ /de ni myur du mngon par rdzogs par byang chub pa'i sbyor ba'o/ /de nas bcom ldan 'das la zhes bya ba la sogs pa nas chos ston par 'dod do zhes bya ba'i bar gyis ni gzhan gyi don gyi sbyor ba gsungs te/ gang gi phyir gzhan dag la phan 'dogs pa ngo mtshar du gyur pa ste/ ci zhig la ngo mtshar du gyur pa yin zhe na/ 'di ltar 'di dag kho na ma yin gyi yang dag par ston pa dang / yang dag par 'dzin du bcug pa dang / yang dag par gzengs bstod pa dang / yang dag par byed pa nas legs par yongs su 'dzin pa zhes bya ba ni rjes su gzung ba'i phyir dang / yang dag par bdag gir bya ba'o/ /legs par sbyangs pa ni byang chub sems dpa' chen po dag las mnyan pa'i phyir yang dag par gtod pa la sbyor bar byed pa'o/ /legs par yongs su gtad pa ni de la de dag bslab pa'i phyir sbyor bar byed pa ste/ snying brtse ba'i phyir zhes 'og nas 'byung ba dang sbyor ro/ /lhag ma ni rtogs par sla ste/ de ni gzhan gyi don gyi sbyor ba'o/ /rab 'byor gyis gsol pa zhes bya ba nas shes rab kyi pha rol tu phyin pa la spyod do zhes bya ba'i bar gyis ni 'phel ba dang 'grib pa med pa'i sbyor ba'o/ /chos yang dag par rjes su mi mthong zhes bya ba nas bsgoms pa yongs su rdzogs par 'gyur ro zhes bya ba'i bar gyis ni chos dang chos ma yin pa la sogs pa mi mthong ba'i sbyor ba gsungs te/ chos dang chos ma yin pa ni mtshon pa ste/ dge ba dang mi dge ba dang / lung du ma bstan pa la sogs pa'i chos rnams kyang yang dag par rjes su mi mthong ste/ de ni stong pa dang / gsog yin pa'i phyir ro zhes bya ba'i don te 'di ni chos dang chos ma yin pa la sogs pa'i sbyor ba'o/ / rab 'byor gyis gsol pa zhes bya ba nas pha rol tu phyin pa la spyod do zhes bya ba'i bar gyis ni bsam gyis mi khyab pa'i phyir mthong ba med pa'i sbyor ba'o/ /de nas bcom ldan 'das la tshe dang ldan pa shA ri'i bus zhes bya ba la sogs pa nas shes rab kyi pha rol tu phyin pa ni rin po che'i phung po'o zhes bya ba'i bar gyis ni rnam par mi rtog pa'i sbyor ba gsungs te/ sangs rgyas kyi chos kyang thams cad mkhyen pa thams cad mkhyen pa'i chos kyang zhes bya la/ kyang gi sgra ni chos gzhan rnams lta ci smos zhes pa'o/ /chos gzhan rnams la mi rtog ces bya ba ni rnam par mi rtog pa ste/ gzugs la sogs pa'i gzung bar bya ba rnams mi rtog pa'i phyir dang / de'i mtshan ma mi snang ba'i phyir dang / gzugs la sogs pa don du gnyer ba mi mthong ba'i phyir te/ stong pa nyid dang / mtshan ma med pa dang / smon pa med pa'i rnam par thar pa'i sgo rnams brtags pa dang / yongs su grub pa dang / gzhan gyi dbang gi ngo bo nyid rnams yang dag par rig pa dang / go rims bzhin no/ /de nas bcom ldan 'das la zhes bya ba la sogs pas ni 'di nyid zab pa nyid du bstan te 'di ni rnam par mi rtog pa'i sbyor ba'o/ /bcom ldan 'das shes rab kyi pha rol tu phyin pa ni rin po che'i phung po'o zhes bya ba ni 'bras bu rin po che ni yang dag par rdzogs pa'i byang chub nas/ chos kyi 'khor lo bskor ba'i bar gyi rgyu yin pa'i phyir te/ 'di ni 'bras bu rin po che sbyin par byed pa'i sbyor ba'o/ /bcom ldan 'das zhes bya ba nas dag pa'i phung po'o zhes bya ba'i bar gyis ni rnam par dag pa'i sbyor ba gsungs te/ de dag nyid 'bras bu yin te nam mkha' bzhin du rnam par dag par mthong ba'i phyir ro/ /'di ni rnam par dag pa'i sbyor ba'o/ /bcom ldan 'das rigs kyi bu 'am zhes bya ba nas bar chad mi nus so zhes bya ba'i bar gyis ni sa mtshams dang bcas pa'i sbyor ba gsungs te/ bris sam zhes bya ba ni bri bar nus pa'o/ /bri bar bya zhes bya ba ni de tsam nyid kyi dus kyis bri bar bya ba yin no/ /yi dam la brten par byas na bgegs med do zhes bya bar dgongs so/ /de ci'i phyir zhe na zhes bya ba ni rtogs pa 'di ga las zhes bya ba'i don to/ /'di lta bu zhes bya ba la sogs pa ni lan no/ /'di lta bu ni chos nyid do zhes bya bar dgongs so/ /'on kyang zhes bya ba ni gal te yang ngo / /mi nus so zhes bya ba ni mi nus pa med pa'o/ /yi dam ma nyams pa'i zhes bya ba ni yi dam ma zhig pa yin te de ni byang chub las ma 'das pa nyid kyi phyir ro/ /'di ni mtshams dang bcas pa'i sbyor ba'o/ /sbyor ba bstan nas yon tan brjod par bya ste/ de'i dbang du byas nas bstan bcos las/ bdud kyi mthu bcom la sogs pa/ /yon tan rnam pa bcu bzhi'o/ /zhes bya ba gsungs te/ yon tan ni sbyor ba'i yon tan te bdud kyi mthu bcom pa la sogs pa phan yon bcu bzhi'o/ /de nas bcom ldan 'das la zhes bya ba nas yongs su gzung bar 'gyur te zhes bya ba'i bar gyis ni dang po gsungs te/ sangs rgyas kyi mthus zhes bya ba ni des bdud kyi mthu rnam par 'joms pa'i phyir ro zhes bya bar dgongs so/ /nye bar mthong ba med pas 'dri ba ni de ci'i phyir zhe na zhes bya ba'o/ /dgongs par 'gyur zhes bya ba ni mi bsnyel bar 'gyur ba'o/ /yongs su gzung bar 'gyur zhes bya ba ni rjes su mthun pas bzhugs pa'i phyir te/ 'di ni bdud kyi mthu 'joms pa'i yon tan yin no/ /shA ri'i bu zhes bya ba nas mi nus so zhes bya ba'i bar gyis ni sangs rgyas kyi ye shes kyi dgongs pa'i yon tan gsungs so/ /de skad ces bka' stsal pa dang zhes bya ba nas sangs rgyas kyi spyan gyis rnam par gzigs te zhes bya ba'i bar gyis ni sangs rgyas kyi spyan gyis rnam par gzigs pa'i yon tan gsungs te/ sangs rgyas kyi mthu ni stobs so/ / byin gyi rlabs ni nus pa lhag par bskyed pa'o/ /yongs su bzung ba ni bdag gir byed pa'o/ /sangs rgyas kyi byin gyi rlabs dang / sangs rgyas kyi yon tan yongs su gzung ba de dag gang gi phyir zhe na/ de'i phyir de dag ni mkhyen to zhes bya ba la sogs pa gsungs te/ mkhyen pa ni yang dag par dgongs pa'o/ /byin gyis brlabs pa ni bdag gir mdzad pa'o/ /gzigs pa ni sha'i spyan gyis so/ /rnam par gzigs pa ni sangs rgyas kyi spyan gyis so/ /'di ni sangs rgyas kyi rnam par gzigs pa'i yon tan no/ /byang chub sems dpa' sems dpa' chen po gang dag ces bya ba nas nye bar 'gyur ro zhes bya ba'i bar gyis ni byang chub dang nye bar 'gyur ba'i yon tan gsungs te/ de bzhin du zhes bya ba ni yang dag par rdzogs pa'i byang chub kyi lam gyi don du'o/ /'di ni yang dag par rdzogs pa'i byang chub dang nye ba'i yon tan no/ /shA ri'i bu gang dag ces bya ba nas nye bar gnas so zhes bya ba'i bar gyis ni don chen po la sogs pa'i yon tan gsungs te/ don chen po zhes bya ba ni phyi ma la byang chub sems dpa'i sa'o/ /phan yon chen po ni byang chub sems dpa'i phun sum tshogs pa'o/ /'bras bu chen po ni phyi nas bla na med pa'i byang chub po/ /rnam par smin pa chen po ni srid pa tha ma la rigs dang dus kyi mtshan nyid la sogs pa phun sum tshogs pa'o/ /'bad pa ni sgrub pa'o/ /yongs su g.yo ba ni bya ba'o/ /'di ni don chen po la sogs pa'i yon tan no/ /shA ri'i bu shes rab kyi pha rol tu phyin pa dang ldan pa'i mdo sde 'di dag ni zhes bya ba nas/ ches nyung bar 'gyur te zhes bya ba'i bar gyis ni yul dpyad pa'i yon tan gsungs te/ mdo sde zhes bya ba ni shes rab kyi pha rol tu phyin pa la sogs pa'o/ /'das nas zhes bya ba ni yongs su mya ngan las 'das pa'o/ /ba ra ta ni zhes bya ba ni shar phyogs so/ /yul dbus kyi grong khyer chen po bcu drug tu bcom ldan 'das kyis chos bstan na/ de las gzhan du ji ltar 'byung zhe na/ de'i snying po gsar du zhes bya ba la sogs pa gsungs te/ snying po gsar pa ni mngon par gsar pa'o/ /gdul bya 'dis chos 'dul ba de thob par 'gyur ba de la de skad ces bya'o/ /bstan pa'i chos nyid yin pa'i phyir chos kyang yin/ nyon mongs pa la sogs pa 'dul ba'i phyir 'dul ba yang yin pas chos 'dul ba'o/ /bcom ldan 'das yongs su mya ngan las 'das nas dam pa'i chos gnas pa'i dus ni lo lnga stong ngo / /de'i phyir nub pa'i dus ni de'i dus dang nye ba'o/ /de las cir 'gyur zhe na dgongs so zhes bya ba gsungs so/ /byang phyogs zhes bya ba ni phyogs gzhan rnam par dpyad pa'i phyir ro/ /byang phyogs kyi gnas zhes bya ba ni de'i yang dbus kyi char ro/ /rgyas par spyod pa ni rgyas par 'gyur ba'o/ /byang phyogs pa zhes bya ba'i tshig gis lho phyogs pa la sogs pa rnam par dpyad pa'i phyir ro/ /mang ngam zhes bya ba ni nyung ngu'i phyogs la ltos pa'o/ /shin tu mang ba zhes bya ba ni khyad par du mang ba'o/ /ji ltar yang zhes bya ba ni gal te yang ngo / /lhag ma ni rtogs sla'o/ /'dir rgyu zhes bstan pa 'grib par bshad de/ bcom ldan 'das mya ngan las 'das pa dang / snying po gsar du thob pa dang / nub pa'i dus dang nye ba dang ston par byed pa nyung ba'o/ /de lta mod kyi 'di ni bstan pa'i stobs ni 'bri ba ma yin no/ /'di ni bstan pa'i stobs kyi yon tan no/ /theg pa la yun ring mo nas zhugs pa zhes bya ba nas skye bo mang po'i don byed par 'gyur ro zhes bya ba'i bar gyis ni dkar po'i chos yongs su rdzogs pa'i yon tan gsungs te/ dris pa ni zhus pa'o/ /yongs su dris pa ni de'i rgyu'o/ /yongs su dri ba byas pa ni yongs su shes par byas pa'o/ /yongs su shes par 'dri ba ni yongs su 'dri ba ste/ de bzhin du byed pa'i phyir yongs su dri ba nyid do/ /dris pa'i lan btab par byas pa ni yongs su 'dri bar byas pa'o/ /tshul khrims dag ces bya ba la/ mang po'i tshig ni tshogs pa'i don te/ tshul khrims la sogs pa zhes bya ba'i don to/ /'di ni dkar po'i chos yongs su rdzogs pa'i yon tan no/ /de ci'i phyir zhes bya ba nas dga' bar 'gyur zhes bya ba'i bar gyis ni/ smra ba'i skyes bu'i yon tan gsungs te/ tshe rabs 'phos kyang zhes bya ba ni tshe 'di dang tshe rabs phyi ma 'das kyang yang dag par spyod pa la sbyor ro/ /mngon par dga' ba ni mngon par 'dod pa'o/ /lhag ma ni rtogs sla'o/ /'di ni smra ba'i skyes bu'i yon tan no/ /shes rab kyi pha rol tu phyin pa zhes bya ba nas dbye ba lta ci smos zhes bya bas ni mi phyed pa'i yon tan gsungs te/ 'dun pa 'am sngags kyis zhes bya ba ni bsam pa 'am tshig gis so/ /lhag ma ni rtogs sla'o/ /'di ni mi phyed pa'i yon tan no/ /de ci'i phyir zhes bya ba nas dge ba'i rtsa ba bskyed par 'gyur ro zhes bya ba'i bar gyis ni skye bo mang po'i don dge ba'i rtsa ba bskyed pa'i yon tan gsungs so/ /de ci'i phyir zhes bya ba nas rjes su yi rang bar byas so zhes bya ba'i bar gyis ni dam bcas pa bzhin du gzhan gyi don sgrub pa'i yon tan gsungs te/ de ltar zhes bya ba ni yang dag par gzung bar bya'o zhes bya ba ni gzhug pa tsam mo/ /yang dag par rab tu dbye bar bgyi'o zhes bya ba ni bsgom pa rab kyi mthar bsgrub pa'i phyir ro/ /gzhag par bgyi'o zhes bya ba ni bstan par bya ba'o/ /lhag ma ni rtogs sla'o/ /'di ni dam bcas pa bzhin du pha rol gyi don sgrub pa'i yon tan no/ /de ltar zhes bya ba nas ldan pa yin no zhes bya ba'i bar gyis ni 'bras bu rgya chen po yongs su 'dzin pa'i yon tan gsungs te/ de ltar zhes bya ba ni ji skad bshad pa'i pha rol gyi don sgrub pa yod na'o/ /mos pa rgya chen po dang ldan par 'gyur ro zhes bya ba ni ji ltar yum chen mo las bshad pa ji lta bu ste/ de nyid mdor bsdus nas bshad pa ni de mos pa rgya chen po dang ldan par 'gyur zhes bya ba'o/ /gzugs dang / sgra dang / dri dang / ro dang / reg bya'i chos rgya chen po dang ldan pa'i sbyin pa byin pa dag ni dge ba'i rtsa ba rgya chen po mngon par 'dus byas pas/ rnam par smin pa rgya chen po yongs su 'dzin pa ni sems can gyi don du rnam par smin pa yongs su 'dzin par 'gyur ba'o/ /'di ni 'bras bu rgya chen po yongs su 'dzin pa'i yon tan no/ /de dag gi sangs rgyas kyi zhing zhes bya ba nas phyir mi ldog par 'gyur ro zhes bya ba'i bar gyis ni rgya chen po bsgrub pa'i yon tan gsungs te/ gang zhes bya ba ni gang gi phyir mos pa rgya chen po dang ldan pa'i phyir ro/ /lhag par dmigs pa zhes bya ba ni kun tu 'gro ba'o/ /lhag ma ni rtogs sla'o/ /'di ni rgya chen po sgrub pa'i yon tan no/ /de skad ces bka' stsal pa dang zhes bya ba nas le'u rdzogs pa'i bar gyis ni pha rol tu phyin pa drug nges par thob pa'i yon tan gsungs te/ pha rol tu phyin pa dag gi phyir zhes bya ba ni de'i don du ste/ de dag yongs su dag pa'i ched du'o/ /don du zhes bya ba ni phan pa'i ched du'o/ /tshol zhing zhes bya ba ni shes rab kyi pha rol tu phyin pa 'di ga las rnyed snyam pa'o/ /yongs su tshol ba zhes bya ba ni phan tshun kun tu song nas so/ /tshol bar 'gyur zhes bya ba ni 'di nas rnyed par 'gyur ba'o/ /mdo mngon par brjod pa ni yang dag par brjod pa'o/ /nye bar 'ong ba ni thag nye ba'o/ /thob par 'gyur ro zhes bya ba ni 'bad pa yod na thob par 'gyur ba'o/ /gzhol bar 'gyur ro zhes bya ba ni 'bad pa med par thob par 'gyur ba'o/ /lhag ma ni rtogs sla'o/ /'di ni pha rol tu phyin pa drug nges par thob pa'i yon tan no/ /de ltar yon tan bstan nas de skad bshad pa'i sbyor ba la sems gzhag pa ni 'dzin pa'o/ /de'i yon tan ni phan yon te bcu bzhi pa'o/ /'di ni de dag yongs su brjod pa yang yin la le'u yang yin pas na yongs su brjod pa'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u bcu pa'o/ / //sbyor ba'i bar du gcod pa'i skyon brjod par bya ste/ de'i dbang du byas nas bstan bcos las/ skyon ni bcu tshan bzhir bcas pa/ /drug tu nges par rtogs par bya/ /zhes bya ba gsungs te/ skyon bzhi bcu rtsa drug ces bya ba'i don te/ de'i phyir de nas bcom ldan 'das zhes bya ba la sogs pa gsungs so/ /ci tsam zhes bya ba ni don gyi rnam pa gang zhes zur gyis 'dri ba ste/ don gyi tshig gi sgra ni brjod par bya ba ma yin no/ /mang du 'byung bar 'gyur ro zhes bya ba ni sbyor ba gsungs pa yin no/ /khyad par shes par 'dod nas zhus pa ni/ bcom ldan 'das zhes bya ba la sogs pa'o/ /rab 'byor zhes bya ba la sogs pa ni lan te/ 'chad par 'gyur ba'i bzhi bcu rtsa drug go zhes bya bar dgongs so/ /'chad pa zhes bya ba ni sems can gyi spyod pa nye bar mtshon pa'o/ /spobs pa ring mo zhig na 'byung bar 'gyur ro zhes bya ba ni yun ring mo zhig nas pha rol tu phyin pa rtogs par 'gyur ba'o/ /de ni spobs pa yun ring po'i skyon no/ /rab 'byor zhes bya ba la sogs pa nas/ g.yeng bar 'gyur ba zhes bya ba ni rgod par 'gyur ba'o/ /spobs pa ha cang myur du skye ba ni thabs la mi mkhas pa'i dge ba'i rtsa bas nga rgyal skye ste/ des na byang chub sems dpa' gzhan la brnyas pas 'di'i dge ba'i rtsa ba yang mi skye zhing byang chub kyang yun ring po kho nar 'gyur ro/ /'di ni spobs pa myur ba'i skyon no/ /glal ba zhes bya ba ni kha gdangs pa lus brkyang ba'o/ /dgod pa zhes bya ba ni gad rgyangs byed pa'o/ /steg pa zhes bya ba ni dga' bas langs par byed pa ste/ 'di ni lus kyi las kyi skyon no/ /sems rnam par g.yeng ba zhes bya ba ni mnyam par ma bzhag pa'o/ /rnam par shes pa phan tshun chags pa dang ldan pa zhes bya ba ni gzhan rnams ni dran par byed pa la/ rang la ni dran pa mi 'thob ste/ lam ma yin pa tha dad pa dag la yang 'jug cing bstan pa brjod pa de 'di ni sems kyi skyon no/ /rab 'byor phan tshun zhes bya ba la sogs pa la/ co 'dri ba zhes bya ba ni phan tshun slong bar byed pa'o/ /mig g.yeng ba ni phan tshun du'o/ /mi mthun par gyur na zhes bya ba ni ji srid glegs bam len pa 'ongs pa de srid na tshogs pa dang ldan no zhes zer ba'o/ /'di ni rigs pa ma yin pas byas pa'o/ /kha ton la sogs pa'i skyon no/ /rab 'byor bdag gis zhes bya ba nas rig par bya'o zhes bya ba'i bar gyis gsungs te/ dang po sems bskyed pa de lta de ltar zhes bya ba ni sngar bshad pa'o/ /nges par mi 'byung ba ni thob par 'gyur ba'o/ /'di ni phyir phyogs pa'i rgyu mtshan 'dzin pa'i skyon no/ /gzhan yang rab 'byor zhes bya ba nas 'jug par sems so zhes bya ba'i bar gyis gsungs pa la/ lus dang ngag gi nges par 'byung ba'i bslab pa mthar phyin par 'gro ba spangs nas sems dben pa'o/ /'di ni rgyu mtshan nyams pa'i skyon no/ /rab 'byor 'di lta ste dper na zhes bya ba nas/ /rlom sems su mi bya'o zhes bya ba'i bar gyis gsungs pa la zan ni zas so/ /btang ste zhes bya ba ni dor ba'o/ /kham zhes bya ba ni kham gcig go/ /lo ma dang 'dab ma zhes bya ba ni lo ma'i tshogs so/ /'dab ma lta bu'i mdo sde dag la mngon par brtson pa'o/ /dul bar bya ba ni dbang po lnga dul bar bya ba'i phyir ro/ /zhi bar bya ba ni sems dul ba'i phyir ro/ /yongs su mya ngan las 'das par bya ba ni yang srid pa zad pa'i phyir ro/ /dge ba'i rtsa ba mngon par 'du byed pa ni rgyu mthun pas so/ /de'i don du sbyor ba ni bya ba'o/ /des kyang rlom sems su mi byed ces bya ba ni de'i bdag nyid la dmigs pa med pa'i phyir ro/ /'di ni gya nom pa'i ro myang ba las nyams pa'i skyon no/ /rab 'byor 'di lta ste zhes bya ba nas de lta bu bdud kyi las su rig par bya ba'i bar du gsungs pa la/ snang ba ga la ba ni snang ba dang bcas pa'o/ /brtags te zhes bya ba ni mthong ba'o/ /kha dog dang dbyibs zhes bya ba ni mdog dang rnam pa'o/ /'di ni theg pa mchog las nyams pa'i skyon no/ /rab 'byor 'di lta ste zhes bya ba nas bdud kyi las su rig par bya'o zhes bya ba gsungs pa la/ bdag gcig pu dul ba dang / zhi ba dang yongs su mya ngan las 'da' ba zhes bya ba ni bsngags pa bya ba'i rjes su 'brang ngo / /'di yang zhes bya ba la sogs pa la nang du yang dag par 'jog pa ni ting nge 'dzin to/ /de ni zhes bya ba ni bdag nyid dul ba dang / zhi ba dang / yongs su mya ngan las 'das pa'i bsngags pa 'byung ba'o/ /de'i 'og ma rnams ni rtogs sla'o/ /tshe 'di nyid la zhes bya ba la sogs pa la/ tshe 'di nyid ni thob pa'i skye ba'o/ /len pa med pa zhes bya ba ni cung zad kyang yongs su mi 'dzin pa'o/ /skye bo so so la yod pa'i phyir rtag tu'o/ / nyin re zhing yod pa'i phyir rgyun mi 'chad pa ste de ni rtag tu rgyun mi 'chad pa'i phyir ro/ /lhag ma ni rtogs par sla ste/ de ni ched du bya ba nyams pa'i skyon no/ /'di ni bcu tshan dang po'o/ /rab 'byor 'di lta ste dper na zhes bya ba nas rig par bya'o zhes bya ba'i bar du gsungs pa la/ shing mkhan zhes bya ba ni thig skud 'chad pa'o/ /ri rab kyi steng na grong khyer blta na sdug ces bya ba gser las grub pa de'i dbus na brgya byin gyi khang bzangs rnam par rgyal ba zhes bya ba yod de/ ngos re re la yang dpag tshad nyis brgya lnga bcu yod pa mtha' skor du dpag tshad stong yod do/ /nyi ma dang zla ba ni ri rab kyi phyi rol gyi phyed nas nam mkha' la 'gro ste/ shel gyi rang bzhin gyi gzhal med khang zlum po go rims bzhin du dpag tshad lnga bcu rtsa gcig dang / lnga bcu ste/ dbus thig gis bcal na de dag gi dbus pas rnam par rgyal ba'i khang bzangs kyi sa'i tshad ni shin tu che ste/ de'i tshad kyang bor nas de dag gi gzhal med khang gi tshad ni brjod par bya'o/ /sprul pa ni khyad par can du bya ba'o/ /thob par byed pa ni mngon du byed pa'o/ /'di ni thabs la rmongs pa'i skyon no/ /rab 'byor 'di lta ste dper na zhes bya ba nas de ma lags so zhes bya ba'i bar du gsungs pa la/ 'jig rten du 'khor lo bskor bas na 'khor los sgyur ba'o/ /'khor lo de yang lcags kyi ngo bo rtsibs stong dang ldan pa/ lte ba dang / mu khyud dang bcas pa nam mkha' la 'gro ba ste/ lcags sam/ zangs ma 'am/ dngul lam/ gser ci rigs par ro/ /kha dog ni 'dzam bu na da'i 'od lta bu'o/ /dbyibs ni skyes bu chen po'i mtshan sum cu rtsa gnyis dang ldan pa'o/ /gzi brjid ni mi thams cad zil gyis gnon pa'i 'od dang 'od kyi dkyil 'khor ro/ /rdzu 'phrul ni phun sum tshogs pa'o/ /rin po che sna bdun gyi khyad par ni 'khor lo rin po che dang / glang po rin po che dang / rta rin po che dang / bud med rin po che dang / blon po rin po che dang / khyim bdag rin po che dang / nor bu rin po che'o/ /bul ba ni rmongs pa ste/ yongs su mi gsal ba'i phyir dang / blo chung ba'i phyir te/ de ni bul ba'i rgyu gang las byang chub 'byung ba de ni byang chub yang dag par 'byung ba'o/ /thob pa ni rnyed pa tsam gyis so/ /bsgrubs pa ni thob pa la sogs pa'o/ /bor ba ni spangs pa ste rgyab kyis bltas par gyur pa'o/ /de ni 'khor los sgyur ba dang chos mthun pa'i phyir dang / sprul pa'i sku las nyams pa'i skyon no/ /bcom ldan 'das kyis bka' stsal pa zhes bya ba nas bdud kyi las su rig par bya'o zhes bya ba'i bar du gsungs pa la/ ro ni rdzas drug gi dbye ba ste phan tshun 'dus pa las brgyar 'gyur ro/ /de ni kha zas ro brgya pa'o/ /drug cu pa zhag drug cus smin pa'o/ /de'i cha ni zhag drug cu'i 'bras chan no/ /btang ba ni sems kyis so/ /bor ba ni lus kyis te de ni kha zas ro brgya pa dang chos mthun pa'i phyir longs spyod rdzogs pa'i las nyams pa'i skyon no/ /rab 'byor 'di lta ste dper na zhes bya ba nas bdud kyi las su rig par bya'o zhes bya ba'i bar du gsungs pa la/ don dam pa'i mchog yin pa'i phyir zab pa'o/ /mchog tu dri ma med par snang ba'i phyir 'od gsal ba'o/ /'di ni rin thang med pa'i nor bu rin po che dang chos mthun pa'i phyir chos sku las nyams pa'i skyon no/ /de'i 'og tu bcom ldan 'das ma las/ tshig rkang pa gnyis kyis phyin ci log lnga bkag ste/ gzhan yang rab 'byor zhes bya ba nas/ bdud kyi las su rig par bya'o zhes bya ba'i bar du gsungs pa la/ spobs pa mang po zhes bya ba ni gzugs nas rnam pa thams cad mkhyen pa nyid kyi bar la spobs pa rnams so/ bcom ldan 'das mang po'i phyir sems 'khrug par byed pa de ni de dang de'i dngos po la spobs pa'i skyon no/ /de skad ces bka' stsal pa dang zhes bya ba nas bdud kyi las su rig par bya'o zhes gsungs pa la/ gang su dag shes rab kyi pha rol tu phyin pa yig 'brur zhes bya ba dang / med pa dag yi ge dang yi ge med pa dag la chags pa de thams cad ni bdud kyi las so/ /'di ltar de bri bar ni mi bya ste gzugs la sogs pa dang bral ba'i phyir ro/ /med pa ma yin te don dam par yod pa nyid kyi phyir ro/ /yi ge ni med de chos thams cad la yi ge med pa nyid kyi phyir ro/ /yi ge med pa yang ma yin te/ yi ge 'di dag gis de skyed par byed pa'i phyir te/ 'di dag nyid kyis kyang de ston par byed pa'i phyir dang / 'di dag nyid kyis don du gnyer ba dang / khong du chud par bya ba'i phyir ro/ /de nyid ni yi ger 'dri ba la mngon par zhen pa dang / med pa la mngon par zhen pa dang / yi ge la mngon par zhen pa dang / yi ge med pa la mngon par zhen pa zhes bya ba ni skyon bzhi'o/ /gzhan yang zhes bya ba la sogs pa la yul ni mang ba la sogs pa yul brgya phrag stong gi grangs dang ldan pa'o/ /grong ni khyim dang skyed mos tshal gnas pa'o/ /stong ngam grangs bzung ba na dam pa rnams gnas pa ni grong khyer ro/ /grong khyer nyid kyi tshong pa'i lam ni grong rdal lo/ /yul ka shi ka la sogs pa ni ljongs so/ /de'i tshogs ni yul 'khor ro/ /rgyal po bzhugs pa'i grong khyer ni rgyal po'i pho brang ngo / /kun bstan pa ni tshigs su bcad pa sbyar ba'i snyan dngags so/ /la gcan ni sho gam gyi gnas so/ /srang ni lam po che'o/ /khyogs ni bzhon pa'i gzhi'o/ /'tsho ba'i don gyi yo byad ni 'tsho ba'i yo byad do/ /de lta bu byung ba ni sngon byung ba'o/ /lhag ma ni rtogs sla'o/ /'di ni 'di ltar bya'o zhes bya ba ni don sna tshogs yid la byed pa rnam par g.yeng ba'i skyon no/ /'di ni bcu tshan gnyis pa'o/ /gzhan yang rab 'byor rgyal po zhes bya ba nas bdud kyi las su rig par bya'o zhes bya ba'i bar gyis ni rnam par g.yeng ba'i skyon bstan to/ /gzhan yang rab 'byor zhes bya ba la sogs pas/ me la sogs pa thob par bya ba yid la byed pa ni rnam par g.yeng ba'i skyon no/ /gzhan yang rab 'byor zhes bya ba nas gzhan yang rab 'byor zhes bya ba'i bar du gsungs pa la/ bar du gcod pa ni bgegs so/ /rnyed pa ni chos gos la sogs pa thob pa'o/ /bkur sti ni gus par byed pa'o/ /tshigs su bcad pa ni snyan pa'o/ /de myong bar byed pa ni dga' ba'o/ /sems la gdung ba ni chos gos la sogs pa'i bar chad bya ba 'di ni gdung ba dang nyams su myong ba'i skyon no/ /gzhan yang rab 'byor zhes bya ba nas bdud kyi las su rig par bya'o zhes bya ba'i bar du gsungs pa la/ gzhan yang zhes bya ba ni gang yang ngo / /thabs mkhas pa zhes bya ba ni gang gis dman pa'i byang chub la lhung ba med pa'o/ /de dag thabs la mkhas pa dang bral na mdo sde zab mo dag dang ldan yang lam de spangs pa'i skyon yin no/ /de'i 'og tu phal cher tshogs pa dang mi ldan pa brjod par bya ste/ de dag ni chos 'chad pa dang nyan pa de lhan cig tshogs pa med pa'o/ /chos smra ba ni ston par byed pa'i bla ma'o/ /'di dag la chos nyan pa'i dgongs pa yod pa de ni chos nyan pa ste slob ma'o/ /tshogs pa'i dngos po tshogs pa'o/ /de la tshig gnyis ka'i yang snyom pa zhes bya ba ni le lo'o/ /bya ba mang po dang ldan pa ni khyim gyi ste/ de yang le lo nyid do/ /'dun pa dang snyom las kyis tshogs pa dang mi ldan pa'o/ /de nas gzhan yang zhes bya ba'i tshig gnyis gsungs pa la tha na zhes bya ba ni gzhan med kyang ye shes rtse bar 'dod pa'o/ /sgra shes pa'i phyir rtogs pa dang ldan pa'o/ /don shes pa'i phyir blo dang ldan pa'o/ /gnyis ka 'dzin pa'i phyir dran pa dang ldan pa'o/ /btang ba zhes bya ba ni 'gro bar 'gyur ro zhes bya ba'i don to/ /spyi smos pa byas na khyad par shes pa'i phyir mgo smos pas go ba'o/ /cung zad rnam par bshad pas ma lus par shes pa'i phyir rnam par spros pas go ba'o/ /mi shes pa ni tshig lhur len pa ste/ des kyang gang brjod pa de nyid shes kyi lhag ma ni ma yin pa'o/ /tshogs dang mi ldan pa ni bzhi ste/ yul gzhan du 'gro bar 'dun pas tshogs pa dang mi ldan pa dang / mgo smos pas go ba ma yin pas tshogs pa dang mi ldan pa dang / rnam par spros pas go ba ma yin pas tshogs pa dang mi ldan pa dang / mngon par mi shes pa ma yin pas tshogs pa dang mi ldan pa'o/ /'di ni bcu tshan gsum pa'o/ /gzhan yang rab 'byor zhes bya ba la sogs pa la/ zang zing ni rdzas so/ /de lhur len pa ni zang zing 'di dag la 'du ba ni lhur len pa'o/ /chos gos la sogs pa lhur len pa yang de bzhin no/ /ci tsam gyis rang nyid 'tsho ba de tsam 'dod pa ni 'dod pa chung ba'o/ /chog shes pa ni nor mi 'dod pa'o/ /khyim na gnas pa dang 'brel pa med pa'i phyir rab tu dben pa'o/ /de yan chad kyis ni rab tu byung ba la sbyin pa'i nus pa med pa bstan to/ /yang na sbyin par mi 'dod pa zhes bya ba ni ser snas bzung ba'i phyir nor yod kyang ngo / /de ni zang zing don du gnyer la sbyin pa don du mi gnyer ba'i tshogs pa dang mi ldan pa'o/ /gzhan yang rab 'byor zhes bya ba nas bdud kyi las su rig par bya'o zhes bya ba'i bar du gsungs pa la/ /dad pa ni dad par 'gyur ba'o/ /de las nyan par byed pa ni sgra'o/ /khong du chud par byed pa ni don no/ /nor sbyin par 'dod pa ni nor yongs su gtong bar 'dod pa ste/ ltos pa ni med par sbyin pa'i phyir ro/ /chos smra ba ni 'chad par mi 'gyur te/ dad pa med pa nyid kyi phyir ram nor mi 'dod pa nyid kyi phyir ram/ /chos la ser sna byed pa'i phyir ro/ /gsum po 'di dag ni tshogs pa dang mi ldan pa ste/ dad pa med pas tshogs pa dang mi ldan pa dang / sbyin pa don du gnyer ba la len pa don du mi gnyer ba'i tshogs pa dang mi ldan pa dang / nyan par 'dod pa la chos chen po la ser sna byed pas tshogs pa dang mi ldan pa'o/ /gzhan yang rab 'byor zhes bya ba la sogs pa gsungs pa la/ mdo sde dag ces bya ba ni gang mnyan par 'dod pa'o/ /chos kyi bar chad ces bya ba ni chos kyis phongs pa ste/ skye ba snga mar dam pa'i chos spong ba de 'di la yod pa'i phyir ro/ /chos kyi bar chad du gyur pa de'i dngos po ni de nyid do/ /med pa zhes bya ba ni yang dag par med pa'o/ /mi 'jug pa ni gzhan 'ong bar mi 'gyur ba'o/ /chos smra ba la ma thob pa zhes bya ba ni chos smra ba la thob par ma gyur pa'o/ /bzlog pa ni gtang ba'o/ /mdo sde med na de don du gnyer bas tshogs pa dang mi ldan pa'o/ /gzhan yang rab 'byor zhes bya ba la sogs pa gsungs pa la/ gang nyan mi 'dod par 'gyur zhes bya ba ni chos gzhan la chags pas so/ /de'i phyir 'dir ni 'dun pa dang le los tshogs pa dang mi ldan pa ste/ gzhan la 'dun pa dang mi 'dun pa'i tshogs pa dang mi ldan pa'o/ /de nas gzhan yang rab 'byor zhes bya ba'i tshig gnyis kyis ni gnyid dang lus lci ba'i 'dun pas tshogs pa dang mi ldan pa'o/ /gzhan yang rab 'byor zhes bya ba la sogs pa'i tshig gis ni ngan song gi sdug bsngal gyis 'jig pas srid pa'i sdug bsngal gyi skyon no/ /gzhan yang rab 'byor zhes bya ba la sogs pa'i tshig gsungs pa la/ bde 'gro'i bde ba yang sdug bsngal ba'i phyir srid pa la rgyab kyis ma bltas pa'i skyon no/ /de nas gzhan yang rab 'byor zhes bya ba la sogs pa'i tshig gis ni gcig pu dang 'khor lhur len pa'i tshogs pa dang mi ldan pa dang / bsnyen par mi byed pa de dag la skabs mi 'byed pa'i tshogs pa dang mi ldan pa dang / mu ge la sogs pa'i phyogs su 'gro ba dang / mi 'gro ba'i tshogs pa dang mi ldan pa'o/ /de la gcig pu dang 'khor lhur len pa'i tshogs pa dang mi ldan pa ni bcu tshan bzhi pa'o/ /gzhan yang rab 'byor zhes bya ba'i tshig gcig gis ni 'jigs pa dang bcas pa'i phyogs su 'gro ba dang / mi 'gro ba'i tshogs pa dang mi ldan pa gsungs so/ /gzhan yang rab 'byor dge slong chos smra ba zhes bya ba la sogs pa ni khyim la lta ba dang / bya ba mang bas chos nyan pa spong ba'i skyon gsungs so/ /de ltar de la sogs pa'i bdud kyi las mang po rtogs par byas nas rnam par spang bar byas te/ bdud de dag kyang de dag la mngon par brtson par 'gyur ro zhes bstan pa'i phyir/ gzhan yang rab 'byor de ltar zhes bya ba la sogs pas ni dge sbyong gi cha byad kyis gzhung lugs 'bral bar byed pa'i skyon gsungs so/ /gzhan yang rab 'byor zhes bya ba la sogs pas ni bdud rang nyid kyis dge slong gi dge 'dun dang bcas pa'i sangs rgyas kyi cha byad du sprul nas zab mo'i chos spyod pa rnams byang chub dman par lung ston pa'i skyon gsungs so/ /rab 'byor de ltar zhes bya ba nas le'u rdzogs kyi bar gyis ni don bzhi gsungs te/ bdud kyi las mang po dang / de'i rgyu rnams dang bdud la sogs pa las nyan pa dang / blo chung ngu la sogs pa yid ches par byed pa dang / bdud ji ltar de dag la mngon par brtson par byed pa de ltar sangs rgyas dang byang chub sems dpa' rnams kyang yongs su 'dzin par mdzad pa ma yin no/ /de ni bdud kyi las bzhi bcu rtsa drug ste/ bdud kyi las nyid bar du gcod pa'o/ /de gsal bar byed pa'i le'u ni de'i le'u 'o/ /'phags pa shes rab kyi pha rol tu phyin pa brgyad stong pa'i dka' 'grel slob dpon rin chen 'byung gnas zhi bas rnam par sbyar ba snying po mchog ces bya ba las le'u bcu gcig pa'o/ / //skyon bstan nas/ mtshan nyid bshad par bya ste de'i dbang du byas nas/ bstan bcos las/ gang gis mtshon te mtshan nyid du/ /shes bya de yang shes pa dang / /khyad par byed dang rnam gsum dang / /mtshon bya ngo bo nyid gang yang / /zhes bya ba gsungs te/ gang gis mtshon par byed pa de ni mtshan nyid do/ /de yang rnam pa gsum ste/ shes pa dang / khyad par dang / byed pa'o/ /ngo bo nyid kyi mtshan nyid dang rnam pa bzhi ste/ de las dang po shes pa brjod par bya ste/ de la re zhig thams cad shes pa'i dbang du byas nas/ de bzhin gshegs pa 'byung ba dang / /'jig rten 'jig med bdag nyid dang / /sems can sems kyi spyod pa dang / /de bsdus pa dang phyir bltas dang / /mi zad pa yi rnam pa dang / /chags bcas sogs dang rgya chen dang / /chen por gyur dang tshad med dang / /rnam shes bstan du med pa dang / /sems ltar med dang shes pa de/ /g.yo ba la sogs shes bya dang / /de las gzhan yang de dag ni/ /de bzhin nyid kyi rnam par shes/ /thub pa de bzhin nyid rtog dang / /gzhan bstan pa zhes bya ba 'di/ /thams cad shes pa nyid skabs kyis/ /shes pa'i mtshan nyid bsdus pa yin/ /zhes gsungs te/ shes pa smos pa ni de bzhin gshegs pa 'byung ba zhes bya ba la sogs pa dang sbyar ro/ /bcom ldan 'das ma las de bzhin gshegs pa'i ye shes skyes te de'i phyir de nas bcom ldan 'das kyis zhes bya ba la sogs pa nas 'jig rten kun rdzob ston par byed do zhes bya ba'i bar gyis gsungs so/ /de la dang po dpe ni bdag gir byed do zhes bya ba'i bar du gsungs so/ /man bar gyur na zhes bya ba ni man bar gyur pa yod na'o/ /reg pa la gnas pa ni reg pa la spyod pa'o/ /mi bde ba ni yid du mi 'ong ba ste/ sdug bsngal gyi rgyu yin pa'i phyir ro/ /legs par bzung bas 'dzin pa ni gso ba legs par goms pa ci nas kyang nyams brta bar 'gyur ba'o/ /sba ba ni srung ba'o/ /bcos pa ni dag par byed pa ste nad sel ba'i phyir ro/ /sdug bsngal gyi reg pa 'am zhes pa la dbang po dang yul dang rnam par shes pa'i 'dus pa las byung ba ni reg pa ste/ de yang sdug bsngal gyi rgyu yin pas sdug bsngal lo/ /mig la zhes bya ba ni lnga pa'o/ /ye 'drog ni mi rnams kyi phyi nas 'byung ba'i glog la sogs pa'o/ /bdag gir byed pa ni bdag gir byed pas so/ / dgongs te zhes bya ba de ga las shes she na/ gang yang de dag ces bya ba la sogs pa gsungs te/ de bzhin gshegs pa ni shAkya thub pa'o/ /gang zhes bya ba shAkya thub pa de kho na ma yin pa'o/ /bzhugs te zhes bya ba ni yod pa'o/ /'tsho ba ni yang dag par gnas pa'o/ /gzhes pa ni sku tshe ji srid yod pa'i bar du'o/ /dgyes pa thob cing dgos pa ji lta bu zhe na/ ji nas kyang zhes bya ba la sogs pa gsungs so/ /yum ji lta bu zhe na/ de'i phyir skyed pa zhes gsungs te/ thams cad mkhyen pa 'di'i ston pa ni thob par byed pa'o/ /de ltar zhes bya ba ni skyed pa nyid do/ / 'di ni de bzhin gshegs pa 'byung ba shes pa ste dang po'o/ /'jig rten 'di ston par byed pa'o zhes gsungs pa las de'i phyir zhus pa ni/ de nas bcom ldan 'das bya ba la sogs pa gsungs so/ /lan ni de skad ces gsol pa dang zhes bya ba la sogs pa'o/ /'jig rten zhes gsungs pa ni 'jig rten pa ni rnam par 'jig pa'o/ /skad cig ma yin pa'i phyir 'jig pa dang rab tu 'jig pa ni rgyun 'gag pa ste/ 'jig rten no/ /ji ltar 'jig rten ston pa yin/ gal te 'jig pa de 'jig rten yin na/ de 'di las khyad par ci zhig yod ces bya bar dgongs so/ /ji ste de yang ston par byed pa zhes bya ba 'jig rten pa'i don las gzhan pa gang gi phyir lhag pa zhes bya ba'i don to/ /lam ni rab 'byor mi 'jig ces bya ba la sogs pa gsungs so/ /'o na 'di phan tshun 'gal ba nyid ma yin nam zhe na/ mi 'jig rab tu mi 'jig pas na zhes bya ba gsungs te/ de bas na 'jig rten dang 'gal ba med de/ gang gi phyir 'di yang sbyar bar bya ste/ 'jig rten na ni phung po lnga po de dag go/ /de bzhin gshegs pa rnams kyi pha rol tu phyin pa ni mi 'jig rab tu mi 'jig pa yin no zhes ston pa'o/ /de ci'i phyir zhe na zhes bya ba la sogs pa ni zhus pa'o/ /rab 'byor phung po lnga po rnams ni zhes bya ba la sogs pa ni lan no/ /stong pa nyid ji lta ba bzhin du rab 'byor mtshan ma med pa zhes bya ba la sogs pa gsungs so/ /ji ltar mi 'jig ces gsungs pa la/ de'i phyir de bzhin du zhes bya ba la sogs pas ni mjug bsdu ba'o/ /'jig rten shes pa de ni gnyis pa'o/ /sems can sems kyi spyod pa zhes bya ba 'dis ni sems can dpag tu med pa tshad med pa'i spyod pa shes pa bstan te/ sems can dpag tu med pa shes pa med par ni de med de/ de bas na rab 'byor gzhan yang zhes bya ba la sogs pas ni sems can tshad med dpag tu med pa shes pa bstan nas/ gzhan yang rab 'byor zhes bya ba la sogs pas ni ye shes de'i spyod pa shes pa gsungs te/ de la ji ltar sems can tshad med dpag tu med pa shes pa yin zhe na/ gang gi phyir de kho na nyid ni dngos po med pa yin pas tshad med grangs med pa'o/ /ji ltar sems kyi spyod pa mkhyen pa yin zhe na/ sems can med pa de dag gi spyod pa'i phyir ro/ /sems can rnams kyi 'jig rten yin pa'i phyir 'jig rten ston par byed pa'o/ /sems can tshad med dpag tu med pa'i spyod pa shes pa de ni gsungs pa'o/ /de bsdus pa dang phyir bltas dang / /zhes bya ba la/ phyir bltas pa ni rnam par g.yeng ba'o/ /de'i sems bsdus pa dang bcas pa'i phyir bltas pa ni de bsdus pa dang phyir bltas pa'o/ /de'i phyir sems kyis bsdus pa dang rnam par g.yeng ba shes pa'o/ /gzhan yang rab 'byor zhes bya ba la sogs pa'i tshig gnyis gsungs pa la/ bsdus pa ni zad pa'o/ /g.yengs pa ni mi zad pa ste de yang dag pa ji lta ba bzhin shes pa'o/ /bsdus pa ni ye shes kyi rang bzhin du gnas pa ste de yang zad pa nyid do/ /sems kyi rang bzhin de yang mi zad pa ste mi zad pa nyid kyi phyir ro/ /de bas na de bzhin gshegs pas bsdus pa ni zad pa nyid du/ g.yengs pa ni mi zad pa nyid du/ yang dag pa ji lta ba bzhin du mkhyen to/ /chos nyid ces bya ba la sogs pa la chos nyid la ltos nas rnam par g.yeng ba ste/ phyi rol du bltas pa'i phyir ro/ /rab tu mkhyen pa ni rang gi mtshan nyid la ltos pa'o/ /de ji lta bu zhe na mi zad pa zhes bya ba la sogs pa gsungs te/ mi zad pa ni zad pa med pa'o/ / rnam par mi zad pa yang ma yin te/ de bas na sems bsdus pa med pa ni rnam par g.yengs pa ste de med do/ /g.yengs pa med pa yang ga las shes na/ mtshan nyid med pa zhes gsungs te/ gang gi phyir rang gi mtshan nyid kyis stong pa zhes bya ba'i don to/ /sems bsdus pa dang g.yengs pa shes pa de ni bzhi pa'o/ /mi zad pa'i rnam pa dang zhes bstan bcos las 'don pa ni/ yum chen mo dag las bshad do/ /'di ni dpag tu med pa dang / tshad med pa dang / mi zad pa zhes bya brjod de/ sems dpag tu med pa dang / mi zad pa zhes bya ba 'di'i bshad pa ni gzhan las rab 'byor zhes bya ba la sogs pa gsungs te/ ji ltar na zhes bya ba ni dris pa'o/ /rab 'byor de'i zhes bya ba la sogs pa ni lan no/ /byin gyi rlabs zhes bya ba ni nam yang mi gnas pa ma yin pa ste chos nyid ni thog ma dang tha ma med pa nas zhes bya ba'i don du dgongs so/ /de nyid kyi phyir 'dus byas kyi mtshan nyid med pas skye ba dang 'gag pa med pa'o/ /gnas med pa dang / rten med pa ni de la dbang po drug gi bya ba med pa'i phyir ro/ /tshad med pa'i phyir gzhal du med pa'o/ /zad pa med pa'i phyir mi zad pa'o/ /gang gis zhes bya ba ni byin gyi rlabs la sogs pa'o/ /nam mkha' zhes bya ba la sogs pa la ji ltar nam mkha' dpag tu med cing mi zad pa ni de bzhin du sems kyang ngo / /rab 'byor de ltar zhes bya ba la sogs pa mjug bsdu ba'o/ /gzhal du med pa dang mi zad pa shes pa de ni lnga pa'o/ /gzhal du med pa dang mi zad pa zhes bya ba'i sgras ni ma gsungs pa sdud pa'i don te/ des na kun nas nyon mongs pa dang / kun nas nyon mongs pa ma yin pa shes pa dang / zhum pa dang yongs su 'dzin pa shes pa dang / zag pa dang bcas pa dang / zad pa med pa shes pa yongs su bzung ngo / /de la dang po gzhan yang rab 'byor zhes bya ba la sogs pa gnyis kyis ni kun nas nyon mongs pa dang / nyon mongs pa can ma yin pa gsungs te/ kun nas nyon mongs pa can ni kun nas nyon mongs pa'o/ /nyon mongs pa'i chos kyis dri ma can du byas pa ni kun nas nyon mongs pa'o/ /kun nas nyon mongs pa med pa ni kun nas nyon mongs pa med pa'o/ /gang gi phyir kun nas nyon mongs pa rnams ni des na gnas med pa ste sems kyi chos nyid de la yang dag par gnas med de/ de dag ni glo bur ba nyid yin pa'i phyir ro/ /rang bzhin gyis 'od gsal ba zhes bya ba la sogs pa la/ sems kyi chos nyid rang bzhin kho nas 'od gsal ba ni dri ma med pa'o/ /'di ni sems kun nas nyon mongs pa ma yin pa shes pa ste drug pa'o/ /gzhan yang rab 'byor zhes bya ba la sogs pa gnyis kyis ni gnyis pa gsungs te/ gzhi med pa zhum zhes bya ba la gzhi med pa ni gnas med pa'o/ /gzhi med pa nyid zhum pa'o/ /sems zhum pa la ni rang bzhin med de sems kyi rang bzhin la ni skye ba med pa dang 'gag pa med pa'i phyir ro/ /gzung du med pa ni sems de dag gzung bar bya ba ma yin pa'i phyir ro/ /mi gzung ba ni gzung du med pa'o/ /rab kyi sgra ni dgag pa'i don nyid yin pa'i phyir ro/ /'jug pa 'am skye ba zhes bya bar dgongs so/ /'di ni sems zhum pa dang gzung ba med par shes pe ste bdun pa'o/ / gzhan yang rab 'byor zhes bya ba'i tshig gnyis kyis ni gsum pa gsungs te/ ngo bo nyid med pa ni dngos po med pa nyid de/ de med pa ni ngo bo nyid med pa'o/ /'di dag gi sems 'dzag par byed pas na zag pa ste/ yod pa ma yin pa la kun du rtog pa'o/ /de dang ldan pas na zag pa dang bcas pa'o/ /ci'i phyir zhe na/ gang gi phyir yod pa ma yin pa'i kun du rtog pa ni 'dod pa dang / gzugs dang / gzugs med pa rnams la rtog pa'i phyir ro/ /dngos po med pa'i ngang tshul zhes bya ba la sogs pa la dngos po med pa stong pa nyid do/ /'di la de lta bu'i ngang tshul yod pa de la de skad ces bya ste de'i phyir lhun gyis grub pa'o/ /'dod pa dang / gzugs dang / gzugs med pa'i srid pa rnams su zag pa dang bral ba'i phyir/ des na zag pa dang bral ba zhes gsungs so/ /'di ni zag pa dang bcas pa dang zag pa med pa'i sems shes pa ste brgyad pa'o/ / chags bcas la sogs dang zhes bya ba la tshogs pa dang bcas pa dang / 'dod chags dang bral ba shes pa dang / zhe sdang dang bcas pa dang / zhe sdang dang bral ba shes pa dang / gti mug dang bcas pa dang / gti mug dang bral ba shes pa'o/ /de la rab 'byor gzhan yang zhes bya ba la sogs pa'i tshig dang po gnyis ni sems kyi 'dod chags dang bcas pa zhes bya ba la sogs pa gsungs pa la/ sems kyi 'dod chags dang bcas pa ni sems kyi rang bzhin ma yin te/ de bas na 'dod chags med pa ni 'dod chags dang bcas pa'i don to/ /gang sems kyi bral ba zhes bya ba la sogs pa la bral ba ni stong pa nyid do/ /de ni 'dod chags dang bcas pa ma yin te de nyid 'dod chags dang bral ba zhes bya ba'i don te 'di ni sems 'dod chags dang bcas pa dang 'dod chags dang bral ba'i shes pa ste dgu pa'o/ /gzhan yang rab 'byor zhes bya ba la sogs pa'i tshigs gnyis gsungs pa la de ni rtogs par sla'o/ /'di ni zhe sdang dang bcas pa dang zhe sdang dang bral ba'i sems shes pa ste bcu pa'o/ /gzhan yang rab 'byor zhes bya ba la sogs pa'i tshig gnyis kyis ni gsum pa bstan te/ 'di ni sems gti mug dang bcas pa dang / gti mug dang bral ba shes pa ste bcu gcig pa'o/ /rgya chen dang / chen por gyur dang / tshad med pa dang zhes bstan bcos las gsungs so/ /rgya chen po ni yangs pa ste 'dod pa'i khams thams cad la dmigs pa'i gnas la sogs pa'o/ /chen por gyur pa ni gzugs la dmigs pa ste 'dod pa'i khams las gzugs kyi khams khyad par du gyur pa'i phyir ro/ /gzugs med pa la dmigs pa dang / rnam pa gsum du dmigs pa dang mi dmigs pa ni tshad med pa'o/ /de'i phyir gsum du shes pa ni yum chen mo las sems rgya chen por shes pa dang / sems chen por gyur pa shes pa dang / sems tshad med pa shes pa'o zhes gsungs so/ /bcom ldan 'das ma 'dir ni tshad med pa zhes bya ba'i dbang gis ma gsungs pa bsdus te/ 'di la brten te zhes bya bar sbyar ro/ /rgya che ba dang / rgya che ba ma yin pa dang / chen por gyur pa dang / chen por gyur pa ma yin pa dang / tshad med pa de ni 'dir shes pa gsum ste/ rgya che ba dang rgya che ba ma yin pa'i shes pa dang / chen por gyur pa dang / chen por gyur pa ma yin pa'i shes pa dang / tshad med pa'i shes pa'o/ /gzhan yang rab 'byor de bzhin gshegs pas zhes bya ba la sogs pa'i tshig dang po gnyis gsungs pa la/ yongs su mi ldong ba ni rgya che ba'o/ /de dang ldan pa dgag pa ni mi ldan pa'i tshul lo/ /so sor 'brang ba ma yin pa bkag pas yongs su mi ldang ba'i nang du gtogs par ni chos nyid kyis te/ de bas na rgya che ba ma yin pa'o/ /sems de dag mi 'bri zhes bya ba la sogs pa gsungs pa la/ mi 'bri ba ni 'grib pa med pa ste/ de bas na rgya mi che ba ma yin pa'o/ /mi 'phel ba ni 'phel ba med pa ste/ de bas na rgya che ba ma yin pa'o/ /rnam par grol ba med pa ni khyad par du mi 'gro ba ste/ de bas na rgya che ba ma yin pa dang / rgya mi che ba ma yin pa'o/ /rnam par grol ba med pas zhes bya ba ni 'gyur ba med pa kho na'i phyir ro/ /sems ni sems kyi chos nyid kyis so/ /'di ni sems rgya che ba dang / rgya che ba ma yin pa shes pa ste bcu gnyis pa'o/ /gzhan yang rab 'byor zhes bya ba la sogs pa'i tshig gnyis gsungs pa la/ 'ong ba ni thag ring po nas nye bar 'ong ba'o/ /nye ba nas thag ring por 'gro ba ni 'gro ba'o/ /'di dag rnam par dgag pa ni chen por zhugs pa ma yin pa'o/ /mnyam pa nyid kyis mnyam pa zhes bya ba la sogs pa la/ sems kyi mnyam pa nyid ni chos nyid kyis te/ mnyam pa nyid de dag kyang rang bzhin gyis yod pa de'i phyir ngo bo nyid mnyam pa nyid de de bas na chen por gyur pa'o/ /'di ni sems chen por gyur pa dang / chen por gyur pa ma yin pa shes pa ste bcu gsum pa'o/ /gzhan yang rab 'byor zhes bya ba la sogs pa'i tshig gis ni bcu bzhi pa gsungs te/ rten med pas tshad med pa zhes bya ba la/ gang bum pa la brten cing bum pa'i khongs su gtogs pa'i bum pa de dag ni dpag par bya ba yin na/ sems kyi chos nyid ni nam mkha' dang mnyam pa'i phyir gang du yang brten pa med de de bas na tshad med pa yin no/ /'di ni ye shes tshad med pa shes pa ste bcu bzhi pa'o/ /rnam shes bstan du med pa dang zhes bya ba la rnam par shes pa ni sems so/ /yi ge dag gis ni shes pa lnga bzung ste/ sems bstan du yod pa dang bstan du med pa shes pa dang / sems thogs pa dang bcas pa dang thogs pa med pa shes pa dang / sems bla na yod pa dang bla na med pa shes pa dang / sems mnyam par ma bzhag pa dang mnyam par bzhag pa shes pa dang / sems rnam par ma grol ba dang rnam par grol ba shes pa'o/ /de la gzhan yang rab 'byor zhes bya ba la sogs pa'i tshig dang po gnyis gsungs pa la/ mnyam par ston pa zhes bya ba ston pa dang nges par ston pa ni don gcig go/ /de bas na mnyam par ston pa'o/ /de ga las shes she na/ gang gi phyir sems kyi ngo bo nyid ni sems kyi chos nyid do/ /de nyid kyi ngo bo nyid 'di la yod pa de la de skad ces bya ste/ bar gyi tshig mi mngon par byas pa'o/ /mtshan nyid med pa zhes bya ba la sogs pa la sems kyi mtshan nyid ni 'dzin par byed pa nyid de/ de med pa'i phyir ro/ /don ni rdzas kyi ngo bo nyid do/ /des rnam par dben pa'i phyir sems kyi snang ba'o/ /sems la mi snang ba'i don yang 'dir spyan gsum la snang bar ma gyur pa zhes bya ba gsungs te/ gsum ni sha'i dang / lha'i dang / shes rab kyi spyan no/ /thams cad la zhes bya bas ni chos dang sangs rgyas kyi spyan yang bsdu'o/ /'di ni sems bstan du yod pa dang bstan du med pa shes pa ste bco lnga pa'o/ /gzhan yang rab 'byor zhes bya ba la sogs pa'i tshig gnyis gsungs pa la/ med pa la kun brtags pa zhes bya ba gsungs pa la/ med pa la kun brtags pa 'di dag gis de gsungs pa la de skad ces brjod de de nyid kyi phyir stong pa'o/ /dmigs pa nyid dbang du gyur pa ste gso ba dag go/ /tshad mas gnod pa'i phyir khong khro ba med pa'o zhes dgongs so/ /gnyis su med pa la sogs pa la gnyis ni gzung ba dang 'dzin pa'i rnam par rtog pa gnyis te/ de med par gyur pa dang ma skyes pa'o/ /gyur pa ni gnyis kyis stong pa nyid do/ /'dis kun du 'byung ba ni de las zhes bya ba'i don to/ /de bas na tshad mas gnod pa byed pa'i phyir/ khong khro ba med pa yin te 'di ni sems khong khro ba dang bcas pa dang khong khro ba med pa shes pa ste bcu drug pa'o/ /gzhan yang rab 'byor zhes bya ba la sogs pa'i tshig gnyis kyis ni gsum pa gsungs te/ rab 'byor zhes bya ba la sogs pa la bla na yod pa ma yin pa ni de la rlom sems med do/ /rdul phra mo yang zhes bya ba la sogs pa la/ mi dmigs pa khyad par du gyur pa'i phyir bla na med pa ni spros pa med pa ste/ bar gyi tshig mi mngon par byas pas so/ /'di ni sems bla na yod pa dang bla na med pa shes pa ste bcu bdun pa'o/ /rab 'byor gzhan yang zhes bya ba la sogs pa'i tshig gnyis kyis ni bzhi pa gsungs te/ rab 'byor sems de dag ni zhes bya ba la sogs pa la/ mnyam pa ni chos kyi dbyings so/ / de dang mnyam pa ni de nyid du 'jug pa'o/ /de ltar ma yin pa ni mi mnyam pa dang / mnyam pa'o/ /mnyam par ma bzhag pa ni byis pa rnams la mnyam par bzhag pa med pa'i phyir te de bas na mnyam par ma bzhag pa'o/ /mnyam pa dang mnyam zhing zhes bya ba la sogs pa ni rtogs par sla ste 'di ni sems mnyam par ma bzhag pa dang mnyam par bzhag pa shes pa ste bco brgyad pa'o/ /gzhan yang rab 'byor zhes bya ba'i tshig gnyis kyis ni lnga pa gsungs te/ rang bzhin zhes bya ba la sogs pa la rang bzhin gyis rnam par grol ba ni tshig 'og ma'i don te/ ngo bo nyid med pa ni med pa zhes bya ba'i don to/ /sems kyang zhes bya ba la sogs pa de bzhin gshegs pas ma dmigs pa'i phyir med pa ste/ de bas na rnam par grol ba nyid do/ /'di ni sems rnam par grol ba dang rnam par ma grol ba shes pa ste bcu dgu pa'o/ /bstan bcos las/ sems ltar med dang shes pa ste/ /zhes bya ba la sogs pa de yang / gzhan yang rab 'byor zhes bya ba la sogs pa gsungs te/ med pa nas zhes bya ba la sogs pa ni rtogs par sla'o/ /'jig rten ni sems can gyi 'jig rten no/ /'di ni sems kyi snang ba shes pa ste nyi shu pa'o/ /bstan bcos las/ g.yo ba la sogs zhes bya dang / /zhes bya ba la sems de g.yo ba la sogs pa'i 'du shes ni g.yo ba la sogs pa zhes bya ste/ shes pa zhes bya ba dang sbyar ro/ /g.yo ba la sogs pa bzhi ni bcom ldan 'das yum chen mo las gsungs te/ de la phye ba ni bya ba'o/ /btsums pa ni dgag pa'o/ /de gnyis yang dag par phye ba ni bsdu ba'o/ /de gnyis brkyang ba ni dgag pa ste/ dper na 'byung ba dang / mi 'byung ba dang / 'byung yang 'byung ba dang / mi 'byung yang mi 'byung ba'o/ /bcom ldan 'das ma las ni 'dir dang po dang gsum pa bkag pa yin te/ 'byung ba dang / 'byung yang 'byung zhes bya ba'o/ /bcom ldan 'das ma 'di las dang po dang gsum pa la bya ba yod pas na phye ba yin no/ /gnyis pa dang bzhi pa la bya ba med pas na btsums pa yin no/ /de'i phyir gzhan yang rab 'byor de bzhin gshegs pa zhes bya ba la sogs pa'i tshig gis phye ba dang / btsums pa shes pa gsungs pa la/ de thams cad ni phung po lnga la brten pa yin te/ de bas na yang dag pa ji lta ba bzhin du rab tu mkhyen to zhes bya ba'i don to/ /rab 'byor ji ltar zhes bya ba la sogs pa ni zhus pa'o/ /de bzhin song ba shi phan chad zhes bya ba la sogs pa ni lan no/ /lhag ma ni rtogs par sla ste/ 'di ni phye ba dang btsums pa shes pa ste nyi shu rtsa gcig pa'o/ /bstan bcos las/ yang de dag ni de bzhin nyid rnam par shes pa zhes bya ba gsungs pa la/ de dag ni phye ba dang btsums pa dag ste/ de'i ngo bo nyid ces bya ba'i don to/ /gzhan yang rab 'byor zhes bya ba la sogs pa'i tshig gis ni rab tu mkhyen pa'i gsum pa'i bar du gsungs te/ 'di ni de bzhin nyid ji lta bar phye ba dang / btsums pa shes pa ste nyi shu rtsa gnyis pa'o/ /de las gzhan thub pa de bzhin nyid rtogs pa/ gzhan bstan pa shes pa zhes bya ba dang sbyar ro/ /de bzhin shes pa ni mchog go/ /thub pa ni de bzhin gshegs pa'o/ /gang mngon par byang chub pa de gzhan la bstan pa yang shes pa'i don to/ /de ni rab 'byor 'di ltar zhes bya ba la sogs pa nas mi zad pa nyid du bstan to zhes bya ba'i bar gyis gsungs so/ /de bzhin nyid ces bya ba ni shes rab kyi pha rol tu phyin pa ste/ de bzhin nyid gcig tu rnam par bzhag pa yin no/ /gang yin pa ni gang kho na zhes bya ba'i don to/ /de bzhin nyid gcig ste zhes bya ba ni de ltar rgya cher bstan pa'i de bzhin nyid ni gcig pa kho na'o/ /ci 'di la gcig pa nyid ni tha dad pa med pa la bya'am bye brag tsam zhig yin nam/ 'on te ri 'bigs byed bzhin du gcig gi grangs kyis yin zhe na de'i phyir du ma'i dngos po dang / dngos po med pa dang / bral ba zhes gsungs te/ du ma'i dngos po dang dngos po med pa ni du ma nyid dang / gcig nyid dang / de dag dang bral ba ni de dag rdzas kyi chos nyid yin pa'i phyir te/ tha dad pa med pa tsam de'i gcig pa nyid ces bya ba'i don to/ /de dag gi las she na/ du ma nyid yin pa'i phyir dang / sna tshogs pa nyid yin pa'i phyir te/ de gnyis ka yang rdzas kyi chos yin pa'i phyir ro/ /mi zad pa'i phyir zhes bya ba ni gnyis ka med pa'o/ /de dang ldan pa la mi dang / glang po che dang / rta la sogs pa'i dbye ba yod par 'gyur na/ de bzhin nyid nam mkha' dang 'dra ba la ni de med do/ /gnas skabs kyi bye brag gis tha dad pa dang tha dad pa ma yin pa yod do zhe na/ 'gyur ba med pa'i phyir dang / gnyis su med pa'i phyir zhes gsungs te/ dngos po dben pa'i mtshan nyid de las dngos po'i chos kyi dbye ba med pa'i phyir ro/ /dbyings gcig yin yang gcad na du mar 'gyur ba bzhin du/ phung po la sogs pa bcom ldan 'das kyis de bzhin nyid kyang yin no zhe na/ gnyis su med pa'i phyir zhes bya ba gsungs so/ /ngo bo nyid med pa'i phyir gcod pa mi rigs so zhes dgongs so/ /rab 'byor de ltar zhes bya ba la sogs pas ni mngon par rdzogs par byang chub pa'i ye shes gsungs so/ /rab 'byor de ltar na zhes bya ba la sogs pa 'dis ni de gzhan bstan pa'i shes pa gsungs so/ /lhag ma rtogs sla'o/ /'di ni de bzhin nyid mngon par rdzogs par byang chub pa gzhan bstan pa ste nyi shu rtsa gsum pa'o/ /bstan bcos las/ thams cad shes pa nyid skabs kyis/ /shes pa'i mtshan nyid bsdus pa yin/ /zhes bya ba smos pas ni mjug bsdu ba'o/ /'di tsam ni rgyas par bsdus te/ gang gis she na/ thams cad shes pa nyid kyi dbang du byas nas shes pa'i mtshan nyid de'i zhes bya ba'i don to/ /stong nyid mtshan ma med bcas dang / /smon pa rnam par spangs pa dang / /skye med 'gag pa med sogs dang / /chos nyid dang ni 'khrug med dang / /'du mi byed dang rnam mi rtog /rab dbye mtshan nyid med nyid la/ /lam shes nyid kyi skabs kyis ni/ /shes pa'i mtshan nyid bsdus pa yin/ /zhes bya ba gsungs te/ lam shes pa nyid kyi shes pa ni rnam pa dgu ste/ 'di dag ni shes pa la ltos pas bdun pa'i mtha' can no/ /'di nyid ni de nas lha'i dbang po brgya byin zhes bya ba la sogs pa gsungs te/ chos zhes bya ba ni ye shes rnams so/ /'di la zhes bya ba ni lam shes pa nyid kyi shes pa'i mtshan nyid rnams so/ /'dir shes pa dag brjod par bya ba yin yang de'i dmigs pa dag brjod de de brjod pas kyang de rtogs pa'i phyir ro/ /de la/ stong nyid mtshan ma med bcas dang / /smon pa rnam par spangs pa dang / /zhes bya ba ni rnam par thar pa'i sgo gsum shes pa'o/ /de ni lha'i bu dag ces bya ba la sogs pa gsungs te/ stong pa zhes bya ba la sogs pas ni gcig gi tshig ste dmigs pa ni gcig yin pa nyid kyi phyir ro/ /mtshan nyid ces bya ba ni mang po'i tshig ste/ ye shes ni mtshan nyid tha dad pas tha dad pa'i phyir ro/ /gzhag go zhes bya ba ni rnam par bzhag pa ste/ 'jig rten gyi tha snyad kyis yin gyi don dam par ni ma yin no/ /'di ni stong pa nyid dang mtshan ma med pa dang smon pa med pa shes pa dag go/ /skye med 'gag pa med sogs dang / /zhes bya ba de ni lha'i bu dag skye ba med pa'o/ /'gag pa med pa'o/ /kun nas nyon mongs pa med pa'o/ /rnam par byang ba med pa'o/ /dngos po med pa'o/ /mya ngan las 'das pa'o/ /chos kyi dbyings so/ /de bzhin nyid do zhes 'di la mtshan nyid gzhag go zhes bya ba la skye ba med pa la sogs pa brgyad gcig tu byas pa ni stong pa nyid tsam gyi phyir ro/ /stong pa nyid ni ngo bo nyid med pa nyid do/ /ngo bo nyid med pa la skye ba 'am 'gag pa 'am kun nas nyon mongs pa 'am/ rnam par byang ba 'am/ dngos po med do/ /dngos po med pa nyid ni mya ngan las 'das pa'o/ /stong pa nyid chos kyi dbyings te/ gang gi phyir chos rnams kyi rgyu nyid yin pa'i phyir ro/ /mi 'gyur ba nyid kyi phyir rtag tu de kho na bzhin du gnas pa ni de bzhin nyid do/ /ji ste mtshan nyid dag la phyogs bzung ste/ mi rtag pa dang / sdug bsngal ba dang / stong pa la sogs pa spangs pas ci zhig bya zhes blo dman pas dris pa ni de ci'i phyir zhe na zhes bya ba smos te/ 'dir stong pa nyid la sogs pa'i mtshan nyid de nyid ci'i phyir 'dod ces bya ba'i don to/ /lha'i bu dag ces bya ba la sogs pa ni lan te/ ni zhes bya ba ni gang gi phyir zhes bya ba'i don to/ /gang gi phyir mi gnas pa dang / nam mkha' dang 'dra ba dang / sus kyang ma bzhag pa'i phyir ro/ /de la nam mkha' dang 'dra ba nyid du bsgrub pa'i phyir mtshan nyid 'di dag ni zhes bya ba la sogs pa gsungs te/ gzugs su bgrang ba zhes bya ba ni gzugs la sogs pa'i mtshan nyid rnams su'o/ /mi gnas pa nyid du rab tu bsgrub pa'i phyir mtshan nyid 'di dag ni zhes bya ba la sogs pa gsungs te/ gzugs la sogs pa la brten pa yang ma yin te/ gzugs la sogs pa rnams kyang rang bzhin gyis med pa'i phyir dang / de dag la yang gzugs la sogs pa'i mtshan nyid med pa nyid kyi phyir te/ nam mkha' dang 'dra ba'i 'gog pa ni nam mkha' bzhin no/ /ma bzhag pa nyid rab tu bsgrub pa'i phyir mtshan nyid 'di dag ni zhes bya ba la sogs pa gsungs te/ gzugs la sogs pa ni ngo bo nyid med pa'i phyir gnas med pa ste/ mi rtag pa dang sdug bsngal ba la sogs pa 'di ni de dang 'dra bar yod pa ma yin te/ byis pas kun brtags pa'i phyir de dag la gus par bya ba ma yin no/ /'di ni skye ba med pa dang / 'gag pa med pa la sogs pa shes pa ste bzhi pa'o/ /chos nyid dang ni 'khrug med dang / /zhes bya ba 'di ni mtshan nyid dag ni zhes bya ba la sogs pa gsungs te/ bskyod par zhes bya ba ni rnam par 'khrug pa dang / rtogs pa zhes bya ba'i don to/ /mtshan nyid 'di dag kho nar zhes bya ba ni de ltar mkhyen pa'o/ /gang dang gang mtshan nyid de dang de las bzlog pa de ni gnod par byed pa yin na/ mtshan nyid de ni de lta bu ma yin no/ /'di ni chos nyid dang 'khrug pa med pa shes pa ste lnga pa'o/ /'du mi byed ces bya ba 'di'i dbang du byas nas/ mtshan nyid 'di dag ni zhes bya ba la sogs pa gsungs te/ sus kyang ma bzhag go zhes bya ba ni dam bca' ba'o/ /'dus ma byas nyid kyi phyir zhes bya ba ni gtan tshigs so/ /nam mkha' bzhin no zhes bya ba ni dpe'o/ /gal te de dag de bzhin gshegs pas ma bzhag na/ de ltar na des ji ltar rang gi don dang gzhan gyi don mdzad de de bzhin gshegs pa yang ji ltar yin zhe na de'i phyir de nas bcom ldan 'das zhes bya ba la sogs pa gsungs te rtogs par sla'o/ /'di ni 'du mi byed pa shes pa ste drug pa'o/ /rnam par mi rtog ces bya ba'i dbang du byas nas/ de nas bcom ldan 'das la zhes bya ba nas sangs rgyas so zhes bya ba'i bar gsungs pa la/ mngon par rdzogs par sangs rgyas pa dag ni rnam par mi rtog pa rnams te/ de'i phyir zab pa'o/ /'di ni rnam par mi rtog pa shes pa ste bdun pa'o/ /rab dbye mtshan nyid med nyid la/ /zhes bya ba ni mtshan nyid kyi rab tu dbye ba shes pa dang / mtshan nyid med pa nyid shes pa zhes bya ba'i don to/ /de la mtshan nyid kyi rab tu dbye ba'i dbang du byas nas/ 'di lta ste zhes bya ba la sogs pa gsungs te/ thams cad du thogs pa med pa'i ye shes ni chags pa med pa'i ye shes so/ /gang gi phyir de dag nyid kyis chos thams cad kyi mtshan nyid rab tu dbye ba byas pa yin no/ /'di ni rab tu dbye ba shes pa ste brgyad pa'o/ /mtshan nyid med pa nyid kyi dbang du byas nas/ chags pa ma mchis pa'i ye shes zhes bya ba nas/ ston pa yin no zhes bya ba'i bar du gsungs pa la/ chags pa med pa'i ye shes ni dmigs pa med pa'o/ /de'i spyod yul ni shes rab kyi pha rol tu phyin pa ste/ de nyid la gnas pa rnams kyis ni gzugs su rung ba'i mtshan nyid gzugs sam/ nyams su myong ba'i mtshan nyid tshor ba'am/ mngon sum gyi mtshan nyid rnam pa thams cad mkhyen pa'i ye shes zhes bya ba'i bar du mtshan nyid thams cad la mi dmigs pa'i phyir ro/ /lhag ma ni rtogs sla'o/ /'di ni mtshan nyid med pa nyid shes pa ste dgu pa'o/ /lam shes nyid kyi skabs kyis ni/ /shes pa'i mtshan nyid bsdus pa yin/ /zhes bya ba ni mjug bsdu ba'o/ /de ni nyid kyis chos brten nas/ /gnas dang gus par bya ba dang / /bla ma nyid dang mnyes pa dang / / de la mchod dang byad med dang / /kun tu 'jug mkhyen gang yin dang / /ma mthong ston par mdzad pa dang / /'jig rten stong nyid rnam pa dang / /brjod dang shes mdzad mngon sum dang / /bsam pa'i khyad dang zhi nyid ston/ /'jig rten 'du shes 'gog pa la/ /rnam pa kun mkhyen tshul la ni/ /shes pa'i mtshan nyid ces bshad do/ /zhes bya ba gsungs te/ 'di ni rab 'byor ji ltar zhes bya ba nas le'u rdzogs pa'i bar gyis gsungs te/ 'di yang shes pa la ltos pas bdun par sbyar ro/ /chos 'di la zhes bya ba ni bstan pa'o/ /shes rab kyi pha rol tu phyin pa zhes bya ba ni bshad pa'o/ /chos gnas pa'i gzhi ni rdzas yin te/ nam mkha' ni ma yin no/ /de'i phyir chos kho na la brten cing gnas pa'o/ /'di nyid ni chos la brten cing gnas pa'i shes pa'o/ /chos la bkur sti mdzad ces bya ba ni gus par byed pa'i shes pa'o/ /bla mar mdzad ces bya ba ni bla mar mdzad pa'i shes pa'o/ /ri mor mdzad ces bya ba ni mnyes par byed pa'i shes pa'o/ /de la mchod dang byed med pa/ /zhes bya ba ni de la mchod pa dang byed pa med pa nyid de/ /de la mchod pa shes pa ni mchod do zhes bya ba nas brtsams te/ byas pa tshor bar rig par bya'o zhes bya ba'i bar gyis gsungs te/ ci ste 'di la de bzhin gshegs pa rnams 'di la bkur sti mdzad pa'i rgyu ci zhig yin zhe na/ de'i phyir rab 'byor shes rab kyi pha rol tu phyin pa zhes bya ba la sogs pa gsungs pa la/ de ci'i phyir zhe na zhes bya ba ni gal te yang de nyid chos rnams kyi chos nyid yin pa de lta mod kyi rtag tu 'di la bkur sti mdzad ces bya ba nas/ gsol ba mdzad ces bya ba'i bar du bsams so/ /rab 'byor zhes pa la sogs pa ni lan te/ rab tu 'byed pa ni yongs su rdzogs pa'o/ /gal te yang 'di las rab tu 'byed pa de lta mod kyi ci ste 'di la bkur sti mdzad ce na de'i phyir byas pa gzo ba zhes bya ba la sogs pa gsungs te/ rab 'byor gang zhes bya ba la sogs pas ni de dag nyid byas pa gzo ba nyid kyis rab tu bsgrub pa'o/ /de bzhin gshegs pa la ni zhes bya ba ni nges par gzung ba'o/ /de'i byas pa gzo ba nyid ji lta bu zhe na/ de'i phyir rab 'byor zhes bya ba la sogs pa gsungs te rtogs sla'o/ /'di ni de la mchod pa shes pa'o/ /byed med nyid ces bya ba ni rab 'byor gzhan yang zhes bya ba la sogs pa gsungs te/ chos rnams ma byas pa shes pa des na byas pa gzo ba dang / byas pa tshor ba zhes bya ba nges pa'i tshig gis na dgag pa phyi ma yin no zhes dgongs so/ /'di ni byed pa med pa nyid shes pa'o/ /rab 'byor zhes bya ba la sogs pa nas/ 'jig rten ston pa'o zhes bya ba'i bar gyis ni thams cad du 'gro ba shes pa bstan to/ /de skad ces bka' stsal pa dang zhes bya ba nas nye bar gnas so zhes bya ba'i bar du gsungs pa la chos thams cad stong pa de'i phyir shes pa po dang / mthong ba po med pa'o/ /gang yang shes pa'i gnas yod pa yin na ni shes pa po dang / mthong ba por yang 'gyur na chos thams cad ni gnas med pa ste/ yod pa dang / med pa la mi gnas pa'i phyir ro/ /de'i phyir yang chos thams cad ni shes pa po med pa dang / mthong ba po med pa'o/ /de ltar na zhes bya ba ni shes pa po med pa dang / mthong ba med pa de nyid de lhag ma ni rtogs par sla'o/ /'di ni ma mthong ba ston pa'i shes pa'o/ /chos ston par byed pas ye shes gang gis 'dul bar bya ba'i 'jig rten kha cig la stong pa nyid kyi rnam pas ston par byed pa ni brjod pa ste/ thos pa las byung ba'i shes pa skye'o/ /kha cig la ni shes mdzad de bsams pa las byung ba skye'o/ /kha cig la ni mngon sum ste bsgoms pa las byung ba skye'o/ /'di'i shes pa ni bstan bcos las/ 'jig rten stong nyid rnam pa dang / /brjod dang shes mdzad mngon sum dang / /zhes bya bas bstan to/ /de'i phyir rab 'byor gyis gsol pa/ bcom ldan 'das zhes bya ba la sogs pa ni dris pa'o/ /'dir 'jig rten stong pa'o zhes bya ba dang / 'jig rten ston pa'o zhes bya ba dang / de ltar 'jig rten smos so zhes bya ba dang / yang dag par ston to zhes bya ba ni lan no/ /'jig rten zhes bya ba ni phung po lnga'i mtshan nyid do/ /stong pa zhes bya ba ni ngo bo nyid med pa'o/ /de bzhin du de ltar 'jig rten ston pa dang / de ltar 'jig rten smos pa dang / de ltar yang dag par ston to/ /'di ni 'jig rten stong pa nyid kyi rnam pa dang brjod pa dang / shes par mdzad pa dang mngon sum du shes pa'o/ /de ltar 'jig rten bsam gyis mi khyab ces bya ba ni bsam gyis mi khyab par mthong ba'i shes pa'o/ /de ltar 'jig rten zhi ba'o zhes bya ba ni zhi bar mthong ba'i shes pa'o/ /bstan bcos las/ 'jig rten 'du shes 'gog pa dang / /zhes bya ba de ni de ltar 'jig rten dben pa dang zhes bya ba la sogs pa gsungs te/ de ltar 'jig rten dben pa ni stong pa'o/ /de ltar rigs pa 'dis 'jig rten smos pa dang / shes par mdzad pa dang / yang dag par ston pa ste snga ma bzhin no/ /rgyu gang gis na 'jig rten rnam par dag pa yin zhe na/ 'dir 'jig rten gyi sgras 'jig rten gyi ming du bstan pa'i phyir de'i rnam par dag pa ni 'gog pa ste/ 'di ltar 'jig rten ni stong pa yin pas 'jig rten 'di dang / 'jig rten pha rol 'di'i bye brag gzung du yod pa ma yin te/ mnyam pa nyid du mthong ba'i phyir ro/ /'di ni 'jig rten gyi 'du shes 'gog pa shes pa'o/ /bstan bcos las/ rnam pa kun mkhyen tshul la ni/ /shes pa'i mtshan nyid ces bshad do/ /zhes bya ba ni 'jug pa ste/ rnam pa thams cad mkhyen pa nyid kyi shes pa'i mtshan nyid ni rnam pa bcu gnyis zhes bya ba'i don to/ /shes rab kyi pha rol tu phyin pa la de bzhin gshegs pa rnams kyi 'jig rten ston pa ni 'jig rten ston pa ste/ de gsal bar byed pa'i le'u la de skad ces brjod do/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u bcu gnyis pa'o// //shes pa'i bdag nyid kyi mtshan nyid bshad nas khyad par gyi mtshan nyid brjod par bya ste/ de'i phyir bstan bcos las/ bsam mi khyab sogs khyad par gyis/ /khyad zhugs bden pa'i spyod yul can/ /skad cig ma ni bcu drug gis/ /khyad par mtshan nyid bshad pa yin/ /zhes bya ba ni bsam gyis mi khyab pa la sogs pa 'chad par 'gyur ba'i khyad par gyis de lam gzhan dag las khyad par du gyur pa bden pa bzhi'i yul can skad cig ma bcu drug gi khyad par gyi mtshan nyid bshad pa'i mdor bstan pa'o/ /bsam gyis mi khyab pa la sogs pa yang gang zhe na/ /bsam mi khyab dang mi mnyam dang / /gzhal dang bgrang las yang dag 'das/ /'phags pa kun sdud mkhas pa yis/ /reg bya thun mong min shes nyid/ / shes myur bri dang gang med dang / /sgrub dang yang dag 'grub pa dang / /dmigs pa rten dang bcas pa dang / /mtha' dag pa dang yongs 'dzin dang / /ro myang med dang khyad par ni/ /bcu drug bdag nyid shes bya ste/ /gang gi lam ni gzhan dag las/ /khyad du 'phags pa khyad par las/ /zhes bya ba gsungs te/ de la dang po sdug bsngal gyi bden pa la dmigs pa'i mthong ba'i lam gyi skad cig ma ni bzhi ste/ sdug bsngal la chos shes pa'i bzod pa dang / sdug bsngal la chos shes pa dang / sdug bsngal la rjes su shes pa'i bzod pa dang / sdug bsngal la rjes su shes pa'o/ /'di rnams kyi khyad par bzhi ni go rims bzhin du bsam gyis mi khyab pa nyid dang / /mi mnyam pa nyid dang / gzhal du med pa nyid dang / bgrang ba las yang dag par 'das pa nyid do/ /tshad las yang dag par 'das pa ni gzhal du med pa nyid do/ /grangs las yang dag par 'das pa ni bgrang ba las 'das pa'o/ /'di dag ni de nas zhes bya ba la sogs pa gsungs so/ /zab ces bya ba la sogs pa 'di ga las shes she na/ bya ba chen pos nye bar gnas so zhes bya ba la sogs pa gsungs te/ gang gi phyir bya ba chen pos nye bar gnas pa de'i phyir zab pa'o/ /kye ma'i sgra ni dga' ba'o/ /gang gis she na/ de'i phyir bsam gyis mi khyab pa zhes bya ba la sogs pa gsungs te/ gang gi phyir bsam gyis mi khyab pa la sogs pa'i bya ba dang bcas pa mi mnyam pa dang mnyam pa'i bya ba ni lnga pa'i khyad par ro/ /de de bzhin no zhes bya ba la sogs pa ni zhal gyis bzhes so/ /don 'chad par bzhed nas rang nyid kyis rab 'byor ji ltar zhes bya ba la sogs pas dris pa'o/ /bsam gyis mi khyab pa dang zhes bya ba la sogs pas 'chad de de bzhin gshegs pa nyid ces bya ba la sogs pa'i tshig gis ni 'di'i bya ba rab tu ston par byed de/ de la de bzhin gshegs pa nyid ni chos ji lta ba bzhin du gsungs pa'o/ /sangs rgyas nyid ni rang nyid mngon par rdzogs par byang chub pa'o/ /rang byung nyid ni chos thams cad la dbang bsgyur ba nyid do/ /thams cad mkhyen pa nyid ni chos thams cad kyi rnam pa thams cad la dag pa dang thogs pa med pa'i ye shes so/ /de ltar na zhes bya ba ni de lta bus so/ /ji ltar 'di bya ba bsam gyis mi khyab pa yin zhe na/ 'di ni sems kyis zhes bya ba la sogs pa gsungs te/ 'di ni sems las zhes bya ba la sogs pa yul gang la sems pa de ni nges par sems pa la sogs pa'i yul yin no/ /'di ni sems kyis bsam par mi nus so zhes bya ba'i tshig gis sems la rag las pa nyid du bstan pa'i phyir sems smos kyi/ yang gzhan rnam par bcad pa bsgrub pa yod pa ni ma yin no/ /'di la sems sam zhes bya ba la sogs pa la sems ni rnam par shes pa'o/ /de ni rnam pa gnyis te/ mngon sum dang cig shos so/ / de la 'jig rten gyi mngon sum ni de bzhin gshegs pa nyid la mi 'jug gi cig shos ni 'gyur ro/ /de yang de'i rang gi ngo bo mi 'dzin te/ gang yang sems kyi yul la sems pa la sogs pa dang / mtshungs par ldan pa'i sems kyis bsam pa 'am/ gzhal bar mi nus so/ /yang bsam pa zhes smos pa ci'i phyir zhe na/ gang bsam par yang mi nus pa de ni shin tu yang gzhal bar mi nus so zhes bstan pa'i phyir ro/ /de la gzhal du med pa la sogs pas dris pa la yang lan de bzhin du shes par bya'o/ /de nyid bsam gyis mi khyab pa'i 'bras bu yin pa'i phyir bsam gyis mi khyab pa nyid kyi mthong ba'i lam gyi skad cig ma bstan nas/ bsam gyis mi khyab pa'i dmigs pa nyid kyi phyir yang de brjod par bya ba la/ gnas brtan rab 'byor zhes bya ba la sogs pas skabs te rab tu ston te/ rab 'byor chos thams cad ni tshad med pa'i phyir ro zhes bya ba ni gzugs dang tshor ba la sogs pa re re yang zhes bya ba'i don to/ /gzhan du na bsgrub par bya ba dang / sgrub par byed pa tha mi dad par 'gyur ro/ /nam mkha' dang mnyam pa'i phyir zhes bya ba ni mi mnyam pa dang mnyam pa'i gtan tshigs so/ /de nyid bsam gyis mi khyab pa la sogs pa'i gtan tshigs su bstan pa'i phyir rab 'byor de ji snyam du sems zhes bya ba la sogs pa gsungs so/ /'di dag ces bya ba la sogs pas ni yang gzhan chos thams cad bsam gyis mi khyab pa nyid sgrub par byed do/ /'di dag ces bya ba ni gzugs la sogs pa 'di dag go/ /'dis kyang zhes bya ba ni de bzhin gshegs pa'i chos nyid kyis kyang ngo / /de bzhin gshegs pa'i chos bsam gyis mi khyab pa nyid kyang ma grub pa yin no zhe na/ chos 'di dag ni zhes bya ba la sogs pa gsungs so/ /de ni shes mod kyi ji ltar grub pa yin zhe na/ bsam gyis mi khyab pa dang / gzhal du med pa zhes bya ba la sogs pa gsungs so/ /rnam par shes par gyur pa zhes bya ba ni tshad mas grub pa'o/ /de bzhin du zhes bya ba ni bsam gyis mi khyab pa dang / gzhal du med pa de bzhin du'o/ /bsam gyis mi khyab pa dang / gzhal du med pa nyid kyi gtan tshigs bstan gyi dpag tu med pa la sogs pa nyid kyi gtan tshigs ni ma bstan to zhe na/ dpag tu med pa dang zhes bya ba la sogs pa gsungs so/ /'di nyid sgras bstan pa tsam nyid yin gyi tshad ma ni ma yin no zhe na/ nam mkha' mi mnyam pa dang zhes bya ba la sogs pa gsungs so/ /'di ltar dgongs te/ chos kyi dbyings shin tu rnam par dag pa'i ngo bo nyid yin pa'i phyir/ de bzhin gshegs pa'i chos thams cad ni nam mkha' lta bu'o/ /de bas na nam mkha' lta bur mnyam pa med pa dang / grangs med pa dang / dpag tu med pas chos 'di dag ni mi mnyam pa dang mnyam pa dang / grangs med pa dang / dpag tu med pa'o/ /de bzhin du nam mkha' gzhal du med pa dang / mi 'phrad pa zhes bya ba ni lan gyi rigs pa'o/ /'dis 'di mnyam pa zhes bya ba gnyis nye ba na yod na ni/ yod par 'gyur na nye ba na yod pa de yang med de de bas ni mi mnyam pa'o/ /rab 'byor de lta bas na zhes bya ba la sogs pas ni mjug bsdu ba'i phyir nam mkha' bsam gyis mi khyab pa zhes bya ba la sogs pa gsungs so/ /'di la chos bstan pa na gang dang gang gis sems can gyi don du 'gyur ba de bstan pa'i phyir/ de nas bcom ldan 'das zhes bya ba la sogs pa gsungs so/ /zag pa ni nyon mongs pa rnams so/ /de dag las sems rnam par grol ba ni grol ba'o/ / len pa med pa ni nyon mongs pa'i sa bon spangs pa nyid kyis so/ /chos rnams la zhes bya ba ni bden pa bzhi po dag la'o/ /chos kyang yin la lam yang yin pa dang / mig kyang yin zhing mthong ba yang yin pa'i phyir chos kyi mig 'di ni mthong ba'i lam mo/ /de'i bzod pa'i skad cig la ni rdul med pa'o/ /shes pa'i skad cig la ni dri ma dang bral ba rnam par dag pa'o/ /mi skye ba'i chos la bzod pa zhes bya ba ni chos thams cad la zag pa med par shes pa ni bzod pa'o/ /de thob par gyur pa ni sa brgyad pa ste/ 'dis bya ba chen po byas pa ni sngar bstan to/ /yang khyad par bstan par bya ba la de'i phyir/ de nas bcom ldan 'das la tshe dang ldan pa rab 'byor gyis zhes bya ba'i bar gyis skabs ston par byed do/ /de nas bcom ldan 'das kyis bka' stsal pa ni/ 'di ni thams cad mkhyen pa zhes bya ba la sogs pas gsungs pa la/ 'di ni yang dag par ldan no zhes bya ba ni de dang rab tu 'brel pa'o/ /'di lta ste dper na zhes bya ba ni dpe'o/ /rab 'byor de bzhin du zhes bya ba ni des mtshon par byed pa'o/ /rnam grangs 'dis zhes bya ba la sogs pa ni mjug sdud pa'o/ /'di ni bsam gyis mi khyab pa la sogs pa'i khyad par gyis sdug bsngal gyi skad cig ma bzhi'o/ /gzugs yongs su mi bzung zhing mngon par ma chags pa zhes bya ba la sogs pa ni shes rab kyi pha rol tu phyin pa nye bar gnas pa zhes 'og ma dang sbyar bar bya'o/ /bcom ldan 'das ji ltar zhes bya ba la sogs pa ni zhus pa'o/ /de ji snyam du sems zhes bya ba la sogs pa ni lan no/ / gang la yongs su 'dzin pa 'am/ mngon par chags par byed pa zhes bya ba la yongs su 'dzin pa ni yod par shes pa'o/ /mngon par chags pa ni dngos por shes pa'o/ /de ni gnyis kyi ngo bo bstan pa ni dgra bcom pa nyid ces gsungs te/ de ltar dgra bcom pa nyid ce na thams cad mkhyen pa nyid la sogs pa'i chos thams cad la yongs su 'dzin pa med pa dang / mngon par chags pa med pa dag gis yang dag par 'dzin pa'i phyir ro/ /'di ni 'phags pa kun sdud pa'i khyad par gyis kun 'byung ba'i skad cig ma dang po'o/ /rab 'byor gyis gsol pa zhes bya ba la sogs pa 'di dag gis ni skal ba med pa rnams bstan to/ /'on kyang zhes bya ba la sogs pas ni skal ba dang ldan par bstan to/ /rgyu phun sum tshogs pa zhes bya ba ni rigs dang ldan pa'o/ /sngon gyi rgyal ba la bgyi ba bgyis zhes bya ba ni phan pa'i bsod nams byas pa'o/ /yun ring po ni dus yun ring po'o/ /bskrun pa ni bsags pa'o/ /dge ba'i rtsa ba ni bcom ldan 'das yum thob pa la sogs pa'o/ /gang gis de dag bstan pa de la de skad ces bya'o/ /'di nyid de nas bcom ldan 'das zhes bya ba la sogs pa gsungs so/ /ci'i phyir zab ce na/ de'i phyir blta dka' ba zhes gsungs te/ blta dka' bas bsgrub par bya ba ma yin pa'i phyir 'di yang dag pa'i lta ba'o/ /rtogs par dka' ba ni shes par dka' ba'i phyir mi shes pa'o/ /de lta mod kyi gang gi phyir rgyu dang ldan pa la sogs pa'i yon tan yod na mkhas pa 'di nyid la mos par 'gyur te/ de ni mkhas pas rig par bya ba nyid kyi khyad par gyis kun 'byung gi skad cig ma gnyis pa'o/ /bcom ldan 'das gal te zhes bya ba la sogs pa la dad pas rjes su 'brang ba ni nges par 'byed pa'i cha dang mthun pa dag go/ /de'i sa ni sa'o/ /bskal pa bas lhag pa dang bcas pa ni bskal pa'i lhag ma'o/ /bzod pa ni zag pa med pa'i shes rab po/ /sred pa ni mngon par 'dod pa'o/ /tshol ba ni de ji ltar yod ces pa'o/ /sems pa ni rigs pa rnam pa bzhis so/ /'jal ba ni yongs su gcod pa'o/ /nye bar rtog pa ni so sor rtog pa'o/ /nye bar sems pa ni mang du byed pa'o/ /'di nyid de dag pas mchog tu 'gyur ro zhes bya ba ni thun mong ma yin pa'i shes pa ste/ shes pa ni shes pa'o/ /thun mong ma yin pa yang de'i khyad par nyid kyi phyir dang / shes pa ni mthong ba nyid kyi phyir te/ de ni thun mong ma yin pa'i shes pa'o/ /de'i dngos po ni thun mong ma yin pa'i shes pa'i dngos po nyid de/ 'di ni thun mong ma yin pa'i shes pa'i khyad par gyis skad cig ma gsum pa'o/ /de skad ces gsol pa dang zhes bya ba la sogs pa nas/ lhag par spyod pa de dag gis ni ma yin no zhes bya ba'i bar du gsungs pa la des ni zhes bya ba ni byang chub sems dpa' dam pa des so/ /rdzogs pa'i byang chub ces myur bar mya ngan las 'da' ba la re bar bya zhes bya ba ni thob par bya'o/ /'di ni myur bar mngon par shes pa nyid kyi khyad par gyis kun 'byung gi skad cig ma bzhi pa'o/ /de nas 'dod pa na spyod pa'i lha'i bu zhes bya ba la sogs pa gsungs pa la/ pha rol tu phyin pa chen po zhes bya ba ni nam mkha' dang mnyam pa nyid kyis so/ /'di nyid bstan pa'i phyir zhes gsol nas zhes bya ba la sogs pa gsungs te/ mi ring ba zhig tu phyin nas bya ba ni rkang pa gnyis kho nas so/ /mi snang bar gyur te zhes bya ba ni nub par gyur pa ste/ nam mkha' kho nar snang ba'i phyir ro/ /'dod pa na spyod pa'i lha'i bu rnams ni zhes bya ba la sogs pas ni de dag rang rang gi gnas su phyin pa bstan te/ de la 'dis ni ji ltar de dag nam mkha' la mi snang zhing rang rang gi gnas su phyin pa ni nam mkha' la bri ba'am/ gang ba med pa de bzhin du shes rab kyi pha rol tu phyin pa mi snang ba ni theg pa mchog dang dman pa'i byang chub thob pa ni bri ba 'am/ gang ba med pa nyid do/ /'di ni bri ba dang gang ba med pa'i khyad par gyis te 'gog pa'i skad cig ma dang po'o/ /bsam gyis mi khyab pa la sogs pa'i le'u ni bsam gyis mi khyab pa'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u bcu gsum pa'o/ / //de nas bcom ldan 'das la zhes bya ba la sogs pa nas/ yon tan 'di dag dang ldan par rig par bya ste zhes bya ba gsungs pa la/ thos ma thag ni thos par 'gyur ba'o/ /mos pa ni mos par 'gyur ba'o/ /zhum par mi 'gyur ba ni lam ma yin pa la mi spro ba'o/ /kun du zhum par mi 'gyur ba ni spro ba med pa ma yin pa'o/ /rnam par gnas par mi 'gyur ba ni ldog par mi 'gyur ba'o/ /rmongs pa ni nges pa med pa'o/ /the tshom ni yid gnyis so/ /som nyi ni phyin ci log go/ /'di dag med pa'i phyir rmongs par mi 'gyur ba dang / the tshom du mi 'gyur ba dang / som nyi za bar mi 'gyur ba'o/ /mngon par dga' ba ni mngon par 'dod pa'o/ /mi spong ba ni mi 'dor ba'o/ /phyir phyogs pa ni rgyab kyis bltas pa'o/ /'dod pa'i phyir mos pa skyed par 'gyur ba ni ji ltar mos par rjes su 'jug pa'i phyir ro/ /rjes su 'brang zhing zhes bya ba ni rjes su bstan pa'o/ /phyi bzhin 'gro ba zhes bya ba ni nges par bstan pa'o/ /be'u gzhon nu ni btsas ma thag pa'o/ /lus la thogs pa ni snying ga'i phyogs su thogs pa'o/ /btsams pa zhes bya ba ni dbang du byas pa'o/ /de ltar byang chub sems dpa'i rigs rnam pa gsum gyi sgrub pa 'di ni rjes su sgrub pa'i khyad par du 'grub pa yin no/ /'di ni sgrub pa'i khyad par gyis te 'gog pa'i skad cig ma gnyis pa'o/ /yang rab 'byor byang chub sems dpa' gang gis zhes bya ba nas gcig tu re bar bya'o zhes bya ba'i bar du gsungs pa la yongs su ma 'dres pa zhes bya ba la sogs pa la yongs su'i sgra ni yang dag pa'i don to/ /g.yengs pa zhes bya ba ni 'phro ba'o/ /ras bal gyi 'dab ma bzhin du zhes bya ba ni dge sbyong gi mgo 'dra ba'i rtswa lta bu'o/ /'dzin pa ni shes pa'o/ /'jug pa ni rjes su sgrub pa'o/ /'khor ni pha rol tu phyin pa lnga'i 'khor dang bcas pa'o/ /de dag gi rjes su zhes bya ba'i sgra ni rjes su 'jug pa zhes bya ba'i don to/ /gang 'di nyid brjod pa ni snga ma ni sangs rgyas kyi sa kho nar rtogs par 'gyur ro/ /sa gsum yang dag par bsgrubs pa'i 'bras bu nyid yin pa'i phyir/ 'di ni yang dag par sgrub pa'i khyad par gyis te 'gog pa'i skad cig ma gsum pa'o/ /rab 'byor 'di lta ste dper na zhes bya ba nas gnas par 'gyur ro zhes bya ba'i bar du gsungs pa la mi 'ju ba shin tu mi 'ju ba'o/ /dus byed par 'gyur ba zhes bya ba ni 'chi bar 'gyur ba'o/ / bde ba zhes bya ba'i sgra ni tshig gi phrad de bde ba zhes bya ba'i don to/ /bar chad med pa ni bgegs kyi dngos po med pa'o/ /ma smas pa zhes bya ba ni dum bur ma gyur pa'o/ /ma smad pa ni 'tshe ba'i dngos po gzhan med pa'i phyir ro/ /yid la byed pa med pa'i phyir shes rab kyi pha rol tu phyin pa la ma 'jus pa'o/ /nyam nga ba'i lam gyi dbus ni bar ma do'o/ /rnam par 'jig par 'gyur ba ni yang dag par ldan pa'o/ /bcom ldan 'das ma la dad pa la sogs pa yod pa zhes bya ba la brtson pa mi 'dor ba yod pa ni mngon par rdzogs par byang chub pa'i khur mi 'dor ba'o/ /de dag kyang shes rab kyi pha rol tu phyin pa la de ltar 'jug par byed pa yod na/ de dag dad pa yod pa nas brtson pa mi 'dor ba'i bar 'dis rdzogs pa'i byang chub 'thob cing thams cad mkhyen pa nyid la gnas par 'gyur ro/ /'di ni dmigs pa'i khyad par gyis te/ 'gog pa'i skad cig ma bzhi pa'o/ /rab 'byor 'di lta ste dper na zhes bya ba nas/ rang sangs rgyas kyi sa'o zhes bya ba'i bar du gsungs pa la/ gzhi dang lhan cig pa ni rten no/ /thabs la mkhas pa zhes bya ba ni pha rol tu phyin pa lnga yongs su bzung ba'i phyir ro/ /bum pa legs par so btang ba lta bu ni sems so/ /chu lta bu ni dad pa la sogs pa'o/ /khyer ba ni de bzhin du 'jig par mi 'gyur zhing rnam pa thams cad mkhyen pa nyid la gnas par 'gyur ro/ /'di ni rten dang bcas pa'i khyad par gyis te lam gyi skad cig ma dang po'o/ /rab 'byor 'di lta ste dper na skyes bu shes rab 'chal pa zhes bya ba nas rang sangs rgyas kyi sar mi sgrub po zhes bya ba'i bar du gsungs pa la/ legs par zhes bya ba ni ma lus par bshad pa ste bya ba thams cad byas pa'o/ /mthun pa'i rlung ni rjes su mthun pa'i rlung ngo / /gru ni gru nyid do/ /shes rab kyi pha rol tu phyin pa dang thabs mkhas pa ma lus pa dag yin te/ 'di ni mtha' dag gi khyad par gyis te/ lam gyi skad cig ma gnyis pa'o/ /rab 'byor 'di lta ste zhes bya ba nas le'u rdzogs kyi bar du gsungs pa la/ 'di la nyi shu dang bcas pa'i lo brgya'i tshad yod pa de ni lo brgya nyi shu lon pa'o/ /mang po nyid la brgya ma yin nam zhe na/ skye gnas zhes bya ba ni btsas nas zhes bya ba'i don to/ /skyes nas lo 'di tsam mo zhes bya ba ni bsdus pa'i don to/ /gzhan gyis legs par bsten cing zhes bya ba ni gzhan gyis yongs su bzung ba'o/ /khri ni khri'o/ /'gro ba ni 'gro ba'o/ /bcom pa ni zad pa'o/ /gang du zhes bya ba ni phyogs gang du'o/ /'gro bar bya ba ni ci tsam ring bar ro/ /gnas der zhes bya ba ni grong khyer der ro/ /lhag ma ni rtogs sla'o/ /'di ni yongs su 'dzin pa'i khyad par gyis te lam gyi skad cig ma gsum pa'o/ /dpe ni dpe nyid de rgya mtsho dang gru la sogs pa'o/ /de'i don gyi le'u ni dpe'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u bcu bzhi pa'o// //de nas bcom ldan 'das la tshe dang ldan pa zhes bya ba la sogs pa gsungs pa la/ gnas par bgyi zhes bya ba ni bsgrub par bya ba'o/ /bslab par bgyi zhes bya ba ni yongs su shes par bgyi ba'o/ /bstan par bgyi zhes bya ba ni yongs su mi gtong ba'o/ /bsnyen bkur bgyi zhes bya ba ni mnyes par bya ba'o/ /des ci zhig bya zhe na/ gang dag ces bya ba la sogs pa gsungs so/ /'di'i dge ba'i bshes gnyen yang gang zhig yin zhe na/ de'i phyir de dag ni zhes bya ba la sogs pa gsungs so/ /'di la de dag ji ltar don lung 'bogs pa yin zhe na/ de'i phyir shes rab kyi pha rol tu phyin pa'i don 'di ltar zhes bya ba la sogs pa gsungs te/ 'di ltar zhes bya ba ni rnam pa 'dis so/ /rigs kyi bu tshur shog ces bya ba nas/ rang sangs rgyas kyis la 'dod par ma byed cig ces bya ba'i bar du gsungs pa la/ rnal 'byor ni rab tu sbyor ba'am/ mngon par sbyor ba'o/ /de la ma bsnyems shig ces bya ba ni de'i dngos po la ma 'dzin cig ces pa'o/ /mi bsnyems pa ni chos thams cad la rnam par mi rtog pa'o/ /yongs su sbyangs pa ni goms pa'o/ /de ltar zhes bya ba la sogs pas ni mjug bsdu ba'o/ /yang dag par rdzogs pa'i byang chub la yang dag par yongs su bsngo ba ni ro myang ba med pa ste 'di ni ro myang ba med pa'i khyad par gyis te lam gyi skad cig ma bzhi pa'o/ /khyad par rnam pa bcu drug bstan nas byed pa rnam pa bcu bshad par bya ste/ de la bstan bcos las/ phan dang bde dang skyob pa dang / /mi rnams kyi ni skyabs dag dang / /gnas dang dpung gnyen gling dang ni/ /yongs su 'dren pa zhes bya dang / /lhun gyis grub dang theg gsum gyi/ /'bras bu mngon sum mi byed dag /tha ma rten gyi mdzad pa ste/ /'di ni byed pa'i mtshan nyid yin/ /zhes bya ba gsungs te/ 'di nyid bstan pa'i phyir/ rab 'byor gyis gsol pa zhes bya ba la sogs pa nas dka' ba spyod pa zhes bya ba'i bar gyis ni rab 'byor gyis skabs ston par byed do/ /de de bzhin no zhes bya ba la sogs pas ni bcom ldan 'das kyis gsungs so/ /'jig rten la phan pa'i phyir zhugs pa zhes bya ba ni byang chub tu mngon par rdzogs par byang chub nas 'gro ba lnga'i sems can rnams la yongs su grol bar bya ste/ de dag 'jigs pa med pa'i mya ngan las 'das pa la gnas par byed pa'i phyir te/ de ni de'i byed pa'o/ /'jig rten la bde ba'i phyir dang / 'jig rten la snying brtse ba'i phyir zhes bya ba ni byang chub sems dpa' byang chub mngon par rdzogs par sangs rgyas nas sems can rnams sdug bsngal ba dang / yid mi bde ba dang / 'khrug pa dag las yongs su bkrol te de dag mya ngan las 'das pa'i bde ba la gnas par byed pa de ni bde ba'i byed pa'o/ / 'jig rten gyi skyob par gyur par bya'o zhes bya ba la sogs pa la/ skyob pa la sogs pa byed pa ni bstan pa'o/ /de lta bu'i ngo bo'i brtson 'grus rtsom mo zhes bya ba dang sbyar bar bya'o/ /ji ltar bstan pa bzhin du tshig rnam pa brgyad ji ltar bshad par bya zhe na/ de dag las zhes bya ba ni sdug bsngal de rnams las so/ /'di zhes bya ba ni 'jig rten no/ /'bad par zhes bya ba ni go cha gyon par byed pa'o/ /brtson 'grus ni rab tu sbyor ba'o/ /skyob par 'gyur ro zhes bya ba ni skyob par byed pa'i phyir te/ 'di ni skyob pa'i byed pa'o/ /skye ba la sogs pa nyid ni chos te/ de dang ldan pas skye ba la sogs pa'i chos can no/ /skyabs su 'gyur zhes bya ba ni skyabs kyi byed pa'o/ /gang 'brel pa med pa ni sbyor ba med pa'o/ /gang sbyor ba med pa de ni 'brel pa med pa ste/ gnyi ga phan tshun tha mi dad par smras nas/ 'brel pa med pa'i mtshan nyid skye ba med pa dang / 'gag pa med pa zhes gsungs te/ skye ba med pa ni dang po nyid nas ma skyes pa'i phyir ro/ /skye ba med pa nyid kyi phyir 'gag pa med pa'o/ /de bas skye ba dang 'gag pa med pas sbyor ba med do/ /de dag 'brel pa med pa nyid de chos nyid tsam nyid kyi phyir ro zhes dgongs so/ /de ltar na shes pa mthong bas sbyor ba byed par 'gyur ro zhes bya ba la sbyor bas na sbyor ba'o/ /de'i phyir zhum par byed pas na gnas te ston par byed pa ni gnas su 'gyur te/ 'di ni gnas kyi byed pa'o/ /gzugs kyi pha rol zhes bya ba ni gzugs kyi stong pa nyid do/ /de ni gzugs ma yin zhes bya ba ni 'gal ba'i phyir ro/ /gzugs kyi pha rol ji lta ba zhes bya ba ni gzugs kyi stong pa nyid do/ /gzugs kyang de bzhin te zhes bya ba ni de nyid gzugs kyi don dam pa'o/ /de bzhin du tshor ba la sogs pa dang / chos thams cad kyang de bzhin no/ /rab 'byor gyis gsol pa zhes bya ba la sogs pa gsungs pa la/ gal te ji ltar chos thams cad kyi pha rol chos thams cad kyi de bzhin nyid yin na de nyid shes nas byang chub sems dpa' rnams yang dag par rdzogs pa'i byang chub thob par 'gyur te/ chos nyid kyis rnam par mi rtog pa'i phyir ro/ /'di yang zhes bya ba la sogs pa ni bcom ldan 'das kyi lan no/ /de ltar na ji ltar shes par 'gyur zhe na/ de'i phyir de bzhin du bdag gis kyang zhes bya ba la sogs pa gsungs so/ /rab 'byor de ltar na zhes bya ba la sogs pas ni mjug bsdu ba'o/ /dpung gnyen ni shes pa ste/ de nyid chos ston par byed pa'i phyir/ dpung gnyen du 'gyur ba ste 'di ni dpung gnyen gyi byed pa'o/ /sngon gyi mtha' ni skye ba'o/ /phyi ma'i mtha' ni 'gag pa'o/ /'di dag yongs su chad pa ni chos thams cad yongs su spangs pa ste/ don dam par chos nyid tsam nyid kyi phyir ro/ /gang gi phyir de dag gis de dag yongs su bcad pa 'di ni zhi ba ste/ sdug bsngal nye bar zhi ba'i phyir ro/ /mi gtsang ba dang 'brel pa nye bar zhi ba'i phyir 'di ni gya nom pa'o/ /yang srid pa zad pa'i phyir mya ngan las 'das pa'o/ /don dam pa nyid yin pa'i phyir 'di ni ji lta ba bzhin no/ /phyin ci log med pa ni phyin ci ma log pa ste/ dmigs pa med pa nyid kyi phyir ro/ /de nyid gling dang chos mthun pa'i phyir gling ste/ chos kyi dbyings ston par byed pas na gling ngo / /'di ni gling gi byed pa'o/ /'dir sgo nga'i phyi rol ma yin pa'i cha ni sbubs te 'dir gzhag par bya ba dang / spyad par bya ba'i gnas su byas pa'i phyir ro/ /de nyid ling tog ste mthong ba dang 'gal bar byed pa nyid kyi phyir ro/ /ma rig pa nyid sgo nga'i sbubs dang ling tog ste/ des yongs su khebs pa ni g.yogs pa'o/ /mun pa ni gti mug go/ /des zil gyis non pa ni log par byas pa'o/ /snang bar byed pa ni gsal bar byed pa'o/ /med par byed pa ni 'jig par byed pa'o/ /de ltar snang bar byed pa'i phyir snang bar 'gyur ba yin te/ 'di ni snang ba'i byed pa'o/ /skye ba med pa dang / 'gag pa med pa ni gcig tu bsdu ba'i zlas dbye ba'o/ /rang bzhin ni chos thams cad kyi chos nyid do/ /des de dag skye ba med pa dang / 'gag pa med par rtogs pa'i don du chos ston pas na/ yongs su 'dren pa ste/ kun nas bla na med pa zhes bya ba'i don dam par rtogs par byed pa'o/ /'di ni yongs su 'dren pa'o/ /lhun gyis grub dang theg gsum gyis/ /'bras bu mngon sum byed pa'i bdag /tha ma rten gyi mdzad pa ste/ /zhes bya ba la theg pa gsum gyis lhun gyis grub pa'i 'bras bu mngon du byed pa ni rten gyi byed pa zhes bya ba'i don to/ /gang gi phyir grong du 'gro ba phyin pa bzhin du lhun gyis grub pa'i 'gro bas theg pa gsum gyi 'bras bu yang thob par 'gro ba nyid do/ /de yang lhun gyis grub pa yin te lus kyi gzugs kyis sam/ sems kyis song nas de thob pa ni ma yin gyi/ 'on kyang lhun gyis grub pa kho nas so/ /'di ltar chos thams cad ni nam mkha'i rten can te/ nam mkha' la ni 'ong ba'am/ 'gro ba med de/ 'di ni rang gi ngo bo nyid kho nas gnas so/ /de'i phyir nam mkha' rten can no/ /nam mkha' dang mnyam pa ga las she na/ ji ltar nam mkha' zhes bya ba la sogs pas gsungs te/ skye ba med pa nyid kyi phyir ma byas pa'o/ /gnas skabs gzhan du skye ba med pa'i phyir rnam par ma byas pa'o/ /rgyu dang rkyen 'dus pas ma byas pa ste mngon par 'dus ma byas pa'o/ /gnas pa ni skye ba'i 'jug pa'o/ /yang dag par gnas pa ni kun nas gnas pas so/ /rnam par gnas pa ni kha cig nyid du gnas pas so/ /'di dag bzlog pa'i phyir mi gnas pa dang / yang dag par mi gnas pa dang / rnam par mi gnas pa dang / mkha' brtags pa'i phyir rnam par mi rtog pa dang / lhun gyis grub pa ste/ chos rnams kyi chos nyid tsam nyid do zhes dgongs so/ /ji ltar nam mkha'i rten can yin pa de bzhin du stong pa nyid la sogs pa'i yang rten can dang de nyid 'gro ba'i rten can no/ /de ltar chos thams cad ston cing rtogs par 'gyur ba yin te/ 'di ni rten gyi byed pa'o/ /byed pa rnam pa bcu bshad nas/ ngo bo nyid bshad par bya ste/ de'i dbang du byas nas bstan bcos las/ nyon mongs rtags dang mtshan ma dang / /mi mthun phyogs dang gnyen po dang / /dben dang dka' dang nges pa dang / /ched du bya dang mi dmigs dang / /mngon par zhen pa bkag pa dang / /dmigs pa zhes bya gang yin dang / /mi mthun thogs pa med dang de/ /gzhi med 'gro med skye med dang / /de bzhin nyid ni mi dmigs dang / /ngo bo nyid bcu drug bdag nyid/ /mtshan gzhi lta bur mtshon pas na/ /mtshan nyid bzhi par bzhed pa yin/ /zhes bya ba gsungs te/ gang ngo bo nyid kyang mtshan nyid bzhi par 'dod do/ /de ni rnam pa bcu drug ste/ de yang las su bsgrubs nas mtshan nyid de mtshon par bya ba yin pa'i phyir mtshan gzhi zhes gsungs te/ bshad pa gzhan yang gsungs pa la/ mtshan gzhi zhes bya ba ni mtshan nyid dang ldan pas mtshan gzhi ste/ mtshan nyid dang ldan pa la mtshan nyid ces bya ba'i don to/ /ji ltar bcu drug gi bdag nyid yin zhe na/ de'i phyir nyon mongs rtags dang zhes bya ba la sogs pa gsungs te/ de'i phyir 'di'i skabs rab 'byor gyis gsol pa zhes bya ba nas/ rang bzhin can no zhes bya ba'i bar gyis gsungs te/ spyad pa ni pha rol tu phyin pa drug srung bar byed pa'o/ /spyad pa de gang yin zhe na/ gang 'di zhes bya ba la sogs pa gsungs pa la/ ngo bo nyid ji lta bu zhes bya ba'i tshig 'dis ni ngo bo nyid zhus pa'o/ /bcom ldan 'das kyis bka' stsal pa zhes bya ba la sogs pas ni len no/ /'dul ba ni tshul ma yin pa de 'dul bar 'os pa'o/ /de dag la 'dis rnam par dben pa'i ngo bo nyid yod pas na de skad ces brjod do/ /'di tsam gyis ni ngo bo nyid bzhi brjod do/ /nyon mongs pas dben pa dang / rtags kyis dben pa dang / nyon mongs pa'i mtshan mas dben pa dang / mi mthun pa'i phyogs dang gnyen pos dben pa'o/ /de la nyon mongs pa ni 'dod chags la sogs pa'o/ /nyon mongs pa'i rtags ni nyon mongs pas byas pa'i lus la sogs pa'i gnas ngan len no/ /nyon mongs pa'i mtshan ma ni/ tshul bzhin ma yin pa'i yid la byed pa la sogs pa'o/ /mi mthun pa dang gnyen po ni 'dod chags dang 'dod chags bral ba dang / zhe sdang dang zhe sdang med pa dang / gti mug dang gti mug med pa'o/ /rab 'byor gyis gsol pa zhes bya ba nas/ rten du 'gyur ro zhes bya ba'i bar du gsungs pa la/ 'di nyid kyi ngo bo nyid ni rten te gang mngon par rdzogs par sangs rgyas nas ston par 'gyur ba ni sems can rnams kyi rten du 'gyur ba yin no/ /rab 'byor gyis gsol pa zhes bya ba nas/ sangs rgyas kyis zhes bya ba'i bar du gsungs pa la/ 'dir gzugs la sogs pa dang 'brel pa yang ma yin zhes bya ba ni/ gzugs la sogs pa'i ngo bo nyid med pa'o/ /gang yang byang chub kyi don du gzugs la sogs pa'i don du yang ma yin zhes bya ba ni/ gzugs la sogs pa'i ngo bo nyid rnams kyi don thams cad kyi don du ma yin no/ /de bzhin du gang yang byang chub kyi don dus gsum gyi ngo bo nyid ma yin/ byang chub gsum gyi ngo bo nyid sems can rnams kyi don du yang ma yin no/ /de ci'i phyir zhe na zhes bya ba ni dri ba'o/ /rab 'byor kye ma zhes bya ba la sogs pa ni lan te re bar mi bgyi'o zhes bya ba ni thob pa med pa nyid du blta bar bya'o/ /de'i phyir gsum la blta bar mi bya'o/ /de bzhin du gnas par blta bar bya'o zhes dgongs so/ /'di ni dka' ba'i ngo bo nyid do/ /dka' ba dang bcas pa'i nges pa ni dka' ba dang nges pa'o/ /de skad ces gsol pa dang zhes bya ba nas ma yin gyi bar du gsungs pa la/ mngon par 'dod pa na don gyi dbang ngo / /de yang bcom ldan 'das nyid kyis gnas ma yin zhes bya ba la sogs pa gsungs te/ sangs rgyas kyi sa nyid la nges pa'o/ /'on kyang gang gis sems can thams cad kyi don du go cha chen po bgos pa zhes bya ba ni ched du bya ba'i ngo bo nyid do/ /rab 'byor gyis gsol pa zhes bya ba nas/ brtag par bya zhes bya ba'i bar du gsungs pa la zab mo zhes bya ba ni dam bca' ba'o/ /'og ma bzhis ni gtan tshigs te bsgom pa mi dmigs pa'i phyir/ dus gsum du bsgom pa mi dmigs pa'i phyir dang / bsgom par bya ba shes rab kyi pha rol tu phyin pa'i dngos po mi dmigs pa'i phyir dang / de'i dmigs pa mi dmigs pa'i phyir ro/ /gtan tshigs ma grub pa'i lan bstan pa'i phyir zhes bya ba dris so/ /ma mchis pa'i slad du zhes bya ba ni lan te yongs su grub pa'i dngos por gyur pa'o/ /nam mkha' sgom pa 'di ni chos thams cad mi bsgom pa ste/ chos nyid tsam mthong ba'i phyir dang / chos thams cad mi dmigs pa'i phyir ro/ /de nyid kyi phyir ma chags pa bsgom pa dang / mtha' yas pa bsgom pa 'di ni chos thams cad la thogs pa med cing mtha' yas pa'i phyir ro/ /dngos po ma mchis pa bsgom pa ni gzung ba mi dmigs pa bsgom pa nyid kyi phyir ro/ /yongs su bzung ba ma mchis pa bsgom pa de ni 'dzin pa mi dmigs par bsgom pa'i phyir te/ nye bar brtag par rig par bya'o/ /'di ni mi dmigs pa'i ngo bo nyid do/ /rab 'byor byang chub sems dpa' sems dpa' chen po zhes bya ba nas mi byed pa'i phyir ro zhes bya ba'i bar gyis ni mngon par zhen pa bkag pa'i ngo bo nyid do/ /rab 'byor gyis gsol pa zhes bya ba nas thams cad mkhyen pa nyid do zhes bya ba'i bar du gsungs pa la/ bye brag tu brtags pa zhes bya ba ni dmigs pa'o/ /gzhol ba dang / 'bab pa dang / bab pa'i sgra ni gzhi'i don to/ /de dag dang lhan cig 'bru mang por bya'o/ /sems kyi rgyud ni rgyun no/ /nam mkha' la gzhol ba zhes bya ba ni nam mkha' dang 'dra ba nyid kyi phyir ro/ /thams cad mkhyen pa nyid la 'di bye brag tu brtags pa ni shes rab kyi pha rol tu phyin pa zhes bya ba lhag ma'o/ /de ci'i phyir zhes bya ba ni nam mkha' lta bu nyid de ga las she na'o/ /rab 'byor zhes bya ba la sogs pas ni lan no/ /yul dang dus las dpag par mi nus pa'i phyir dpag tu med pa'o/ /de kho na bzhin du tshad dang bral ba'i phyir tshad med pa'o/ / de ni gzugs nas phyogs gang du yang mi gnas so zhes bya ba'i bar gyis ni/ 'di dag thams cad la yul dang / dus kyis khyab pa'i tshad med pa'i phyir dang / gzugs can du mi rigs pa'i phyir dpag tu med pa'o/ /gzhan du na zhes bya ba la sogs pa la de ni zhes bya ba dang sbyor ro/ /sus kyang zhes bya ba ni gzugs la sogs pa'i ngo bo nyid gang gis kyang ste/ gzugs la sogs pa ni tshad med pa'i phyir ro zhes dgongs so/ /de ci'i phyir zhe na zhes bya ba ni 'dri ba'o/ /rab 'byor gzugs nyid ces bya ba la sogs pa ni lan no/ /gzugs la sogs pa'i sgra ni 'dir chos nyid la brjod do/ /de'i phyir 'gal ba med do/ /gzugs la sogs pa tha dad kyang chos nyid ni tha dad pa ma yin te gzugs la sogs pa brdzun pa nyid kyis tha dad par byed na de'i tshe mi snang bar 'gyur ro/ /'di ni dmigs pa'i ngo bo nyid do/ /de nas lha'i dbang po brgya byin zhes bya ba nas/ le'u rdzogs pa'i bar du gsungs pa la mos par dka' ba nyid kyi phyir zab pa'o/ /gting dpag dka' ba ni bsams pa las byung ba'i shes rab kyis so/ /blta dka' ba ni 'jig rten pa'i bsgoms pa las byung bas so/ /rtogs par dka' ba ni 'jig rten las 'das pas so/ /brtson pa chung ba ni byed par mi 'dod pa'o/ / gzhol ba ni 'jug pa'o/ /gang du sus kyang zhes bya ba la sogs pas ni dus gsum gyi dgag pa'o/ /nam mkha' zhes bya ba la sogs pas ni las dgag pa'o/ /chos thams cad ni thob pa'i 'ong ba med pa dang / dor ba'i 'gro ba med pa'i phyir zab po/ /mi mthun pa zhes bya ba ni phyin ci log go/ /rnam par mi rtog pa'i phyir mi 'jug pa'i slad du'o/ /'jig rten dag ni chos 'di 'dzin pa la spyod do/ /'jig rten ni phyin ci log la nges shing rnam par nges pa'i phyir ro/ /'di ni mi mthun pa'i ngo bo nyid do/ /brgya byin la sogs pa'i lha rnams kyis nye bar mtshon pa'i le'u ni lha'i le'u'o/ / 'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u bco lnga pa'o// //de nas bcom ldan 'das zhes bya ba la sogs pa gsungs pa la/ 'di ni gang la yang thogs pa ma mchis zhes bya ba ni thams cad du gnod pa med pa'i phyir ro/ /de'i phyir thogs pa med pa'i mtshan nyid ni thogs pa med pa'i ngo bo nyid do/ /nam mkha' dang mtshungs pa zhes bya ba ni gang gis nam mkha' dang 'dra bar de bzhin du rtogs pa med pa'o/ /mtshungs pa de ga las she na/ de'i phyir gnas thams cad ces bya ba gsungs te/ dngos po thams cad dmigs su med pa'i phyir ro/ /mtshungs pa ma mchis pa ni dpe med pa'o/ /gnyis su ma mchis pa'i slad du zhes bya ba ni 'dra ba med pa'i phyir ro/ /'di la gnod par byed pa'i mtshan nyid yod pa ni do zla'i mtshan nyid do/ /de med pa'i phyir do zla ma mchis pa'i mtshan nyid do/ /rgol ba ma mchis pa'i slad du zhes bya ba ni 'gal bar byed pa med pa'i phyir ro/ /'di ni thogs pa med pa'i ngo bo nyid do/ /rjes su ni bzhi ste/ bde 'gro dang / ngan 'gro dang / mya ngan las 'das pa rnams so/ /de med pa ni rjes med pa'o/ /mngon par grub pa ma mchis pa'i slad du zhes bya ba la/ mngon par grub pa med pa ni gang du yang gnas pa med do/ /ci'i phyir mngon par grub pa med pa yin zhe na/ gang gi phyir 'byung ba ma mchis pa ni 'byung ba dang bral ba'o/ /ci'i phyir 'byung ba med pa yin zhe na/ skye ba thams cad skye ba med pa'i phyir ro/ /skyes zin pa yang skye ba'i mtshan nyid du rigs pa'i phyir dang / med pa yang med pa nyid kyi phyir/ mi rigs te bong bu'i rwa bzhin no/ /ngan 'gro'i lam dang / bde 'gro'i lam dang / mya ngan las 'das pa'i lam ni lam mo/ /de med pa ni lam med pa'o/ /de nyid kyi phyir lam thams cad mi dmigs pa'i phyir zhes bya ba gsungs so/ /'di ni gzhi med pa'i ngo bo nyid do/ /de nas lha'i dbang po brgya byin dang zhes bya ba la sogs pa gsungs pa la rjes su mthun par skyes so zhes bya ba ni snga ma'i rjes su skyes pa ni byed pa dang ldan pa'i las so/ /las skyed par byed pa'o/ /rjes su mthun pa ste/ de'i phyir ka ta ni byed pa po'i rkyen du bya ba'o/ /las kyi drug pas 'brel pa smra bar 'dod nas bcom ldan 'das kyi rjes su mthun par skyes pa ni rab 'byor ro/ /de ci'i slad du zhe na zhes bya ba ni de de'i rjes su skyes pa ga las she na/ bcom ldan 'das zhes bya ba la sogs pas ni lan gsungs te/ bcom ldan 'das nyid kyis sras dang 'dra bar stong pa nyid smra ba'i phyir ro zhes dgongs so/ /de nas bcom ldan 'das la zhes bya ba la sogs pa gsungs pa la ma skyes pa'i phyir zhes bya ba ni rjes su mthun par skyes pa'o/ /de nyid kyi phyir gtan tshigs gsungs pa ni ma skyes pa nyid yin yang pha dang / bu gnyis su 'dra ba'i phyir ro zhes dgongs so/ /gal te ma skyes na de nyid ji ltar pha dang bu 'dra zhe na/ kun rdzob tu yin no zhes dgongs so/ /rjes su song ba zhes bya ba la sogs pas ni gtan tshigs gzhan gsungs so/ /rjes su song ba ni de bzhin gshegs pa'i de bzhin nyid kyi rjes su song ba'o/ /de bas na yang rjes su skyes pa ni de bzhin gshegs pa'i rjes su 'gro zhing skyes pa ni rjes su mthun par skyes pa'o zhes dgongs so/ /gal te gtan tshigs ma grub pa yin no zhe na ji ltar zhes bya ba la sogs pa gsungs te/ 'ongs pa yang med ces bya ba ni skye ba med pa'o/ /song ba yang med ces bya ba ni 'jig pa med pa'o/ /yang ci dgra bcom pa nyid thob nas rjes su mthun par skyes sam/ ci dang po nyid nas yin zhe na/ de'i phyir gnas brtan rab 'byor 'di ni dang po nyid nas zhes bya ba la sogs pa gsungs te/ de bzhin nyid ma yin te zhes bya ba ni de bzhin ni sgras brjod par bya ba ma yin pa'i phyir ro/ /de ltar na zhes bya ba la sogs pas ni mjug sdud pa'o/ /'gro ba dang mi 'gro ba ni 'gro ba'o/ /de bkag pa'i phyir 'gro ba med pa'i ngo bo'o/ /rjes su mthun par skyes pa'i gtan tshigs gzhan bstan pa'i phyir de bzhin gshegs pa'i de bzhin nyid ces bya ba la sogs pa gsungs pa la/ de bzhin nyid kyi chos rnams ni gnas pa ste 'da' bar bya ba ma yin pa nyid kyi phyir de nyid gnas pa nyid do/ /gtan tshigs gzhan bstan pa'i phyir ji ltar zhes bya ba la sogs pa gsungs pa la/ snga ma'i rang gi ngo bo'i rjes su 'jug pa ni 'gyur ba med pa'o/ /rang gi ngo bo gzhan gyi rjes su 'jug pa ni rnam par 'gyur ba med pa'o/ /rnam par rtog pa med pa ni rtog pa med pa'o/ /rnam par rtog pa dang / rnam par rtog pa med pa'i spyod yul ma yin pa'i phyir rnam par rtog pa med pa'o/ /gtan tshigs gzhan yang ji ltar zhes bya ba la sogs pa gsungs te/ thams cad du 'gro ba med pa'i phyir gang yang thogs pa med pa'o/ /de ci'i phyir zhe na zhes bya ba ni thams cad du thogs pa med pa ste ga las te/ 'di ltar gang las 'ongs pa'i de bzhin nyid ni de na yod de de las gzhan na ni med pa nyid do zhe na/ de bzhin gshegs pa zhes bya ba nas gnyis su byar med do zhes bya ba'i bar gyis lan te/ 'di ni gcig ste zhes bya ba ni dam bca' ba'o/ /de rigs gcig pa'i phyir gcig pa nyid yin nam zhe na/ gnyis su med pa zhes bya ba gsungs te/ gnyis ni tha dad pa'o/ /de med pa ni gnyis su med pa ste/ gcig gi sgra'i don to/ /gal te gcig pa yin yang 'brel pa can tha dad pas tha dad par 'gyur te/ dper na shar phyogs kyi nam mkha' dang / gzhan gyi nam mkha' bzhin no/ /de bzhin du gzugs kyi de bzhin nyid dang / tshor ba dang / 'du shes dang / 'du byed kyi de bzhin nyid la sogs pa don tha dad par 'gyur ro zhe na/ gnyis su byar med ces bya ba gsungs te/ de'i phyir yang gnyis su med pa'i de bzhin nyid ni rtag tu de kho na nyid du yod pa'i de bzhin nyid do/ /gnyis su med pa yang rang bzhin nyid tha dad pa med pa'i de bzhin nyid dang / gzhan las kyang tha dad pa med pa'i phyir gnyis su med pa'i de bzhin nyid do/ /gang du yang zhes bya ba la sogs pas ni gtan tshigs gsungs te/ gang dang gang gi gzhi dang rgyu ni de dang de'i rgyur 'gyur te dper na khron pa'i chu dang / nas kyi myu gu lta bu'o zhe na de bzhin nyid ni gang du yang ma yin gang na yang ma yin te de'i phyir gang du yang 'brel pa med pa nyid kyi phyir/ gang gi yang ma yin no/ /gang gi phyir de gang yang ma yin pa de'i phyir de gnyis su byar med na gnyis su byar med pa'i de bzhin nyid yin pa de bas na thogs pa med pa'o/ /de bas na rab 'byor ni de bzhin gshegs pa dang rjes su mthun par skyes pa'o zhes bya bar grub po/ /de ltar na gnas brtan zhes bya ba la sogs pas ni gtan tshigs gzhan gsungs pa la/ de ltar na zhes bya ba ni de gnyis gsungs te/ ma byas pa'i de bzhin nyid ces bya ba ni ma byas pa yang yin la rtag tu yod pa'i de bzhin nyid kyang yin pas na ma byas pa'i de bzhin nyid do/ /de ni nam yang de bzhin nyid ma yin te rtag tu de kho na nyid du 'gyur ro/ /de bas na de ni gnyis su med pa'i phyir te/ dus tha dad pas kyang tha dad pa med pa nyid kyi phyir ro/ /de bzhin gshegs pa zhes bya ba ni las kyi gnyis pa'o/ /ji ltar zhes bya ba la sogs pas ni gtan tshigs gzhan gsungs te/ thams cad du zhes bya ba ni 'jig rten gyi khams thams cad du'o/ /chos thams cad du zhes bya ba ni dngos po thams cad pa'o/ /mi rtog pa ni de dag la rnam par mi rtog pa'i phyir ro/ /rnam par mi rtog pa ni de nyid kyis rnam par rtog pa thams cad spangs pa'i phyir ro/ /de bzhin du zhes bya ba ni thams cad la mi rtog pa dang / rnam par mi rtog pa des so/ /gzhig tu med pa ni gcad du med pa'o/ /de ltar na zhes bya ba la sogs pa ni mjug bsdu ba'o/ /ji ltar zhes bya ba la sogs pas ni gtan tshigs gzhan gsungs te/ gud na med do zhes bya ba ni gzhan du tha dad par mi dmigs pa'o/ /gnyis su med pa'i phyir 'di ni gzhan ma yin pa yang yin la de bzhin nyid kyang yin pas na gzhan ma yin pa'i de bzhin nyid do/ /de'i rjes su 'gro ba ni des kun rdzob tu de bzhin gshegs pa'i rjes su song ba'o/ /don dam pa ni 'di la gang yang zhes bya ba la sogs pas gsungs te/ 'di la zhes bya ba ni 'di la rjes su 'gro ba ni rab 'byor ram gang yang med do/ /gang du yang zhes bya ba ni de bzhin gshegs pa'o/ /'di la rjes su 'gro bas nye bar song ba'o/ / de ltar na gang zag dang chos la bdag med par mthong ba yin no zhes dgongs so/ /de ltar na zhes bya ba la sogs pas ni mjug sdud pa'o/ /ji ltar na zhes bya ba la sogs pas ni gtan tshigs gzhan gsungs so/ /de ltar na zhes bya ba la sogs pas ni mjug sdud pa'o/ /'di ni skye ba med pa'i ngo bo nyid do/ /de bzhin gshegs pa'i de bzhin nyid ces bya ba nas/ sangs rgyas pa'i de bzhin nyid ces bya ba'i bar du gsungs pa la/ 'dir thams cad kyi de bzhin nyid ni tha dad pa dang tha dad pa med par tha dad du mthong ba'i bkag pa yin no/ /gzugs la sogs pa 'di thams cad kyi de bzhin nyid ni mi dmigs pa'o/ /'di ni mi dmigs pa'i ngo bo nyid de bcu drug pa'o/ /de bzhin nyid 'di'i bdag nyid chen po ni de 'di ni zhes bya ba la sogs pa gsungs so/ /gshegs pa ni shes pa'i don te/ de bzhin gshegs pas ni de'i phyir de bzhin gshegs pa zhes dgongs so/ /'di bstan pa na gang g.yo bar gyur pa de ni yang de bzhin gshegs pas zhes bya ba la sogs pas gsungs te/ ltas chen po drug gam bco brgyad du ji ltar 'gyur ba de ltar g.yos pa nas kun du rab tu shig shig pa'i bar du gsungs pa la/ 'dir gsum ni g.yo ba'i don to/ / gsum ni sgra'i don te drug gis khyab pa chung ngu dang / 'bring dang / chen por byas pa'i dbye bas ltas chen po bco brgyad du 'gyur te/ de la g.yos pa ni phyogs gcig las so/ /'gul ba ni thams cad las so/ /kun nas 'gul ba ni ldeg pa'o/ /chem chem ni dbyug pas bsnun pa'i khar ba bzhin no/ /'ur 'ur ni sgra'o/ /shig shig ni 'brug sgra chen po bzhin no/ /rnam pa drug ni dper na sa'i shar phyogs mtho na nub phyogs dma'/ nub phyogs mtho na shar phyogs dma' ba dang / lho phyogs mtho na byang phyogs dma' ba dang / byang phyogs mtho na lho phyogs dma' ba dang / dbus mtho na mtha' dma' ba dang / mtha' mtho na dbus dma' ba'o/ /gang gi tshe zhe na/ de'i tshe zhes bya ba la sogs pa gsungs pa la/ de ltar zhes bya ba ni de bzhin gshegs pa mngon par sangs rgyas bzhin du rab 'byor gyis de bzhin nyid bstan pa na ltas chen po bco brgyad byung ngo / /rnam pa gzhan gyis kyang mnyam par bstan pa ni gzhan yang gnas brtan zhes bya ba nas mi dmigs zhes bya ba'i bar gyis gsungs pa la yod pa ma yin te zhes bya ba ni dam bca' ba'o/ /nye bar mi dmigs so zhes bya ba ni gtan tshigs so/ /gang gis zhes bya ba ni rang gi chos kyis so/ /rjes su skye ba ni byed pa po'i don to/ / gang zhes bya ba ni de bzhin gshegs pa'i chos so/ /rjes su skye ba ni las so/ /de ltar zhes bya ba ni mjug sdud pa'o/ /ji ltar de bzhin nyid spyad par bya zhe na/ gnas skabs de tsam gyis so/ /de nas de bzhin nyid ces bya ba la sogs pa rtogs par sla'o/ /'on kyang zhes bya ba ni gal te yang ngo / / sum cu rtsa gsum pa zhes bya ba ni bral ba'i don gyi lnga pa'o/ /bya de lus che ba nyid kyis nus par sems pa'o/ /bar der sems pa zhes bya ba ni nam mkha' dang sa'i bar du sems pa'o/ /'di ji snyam du sems zhes bya ba ni rnam par rtog pa 'di lta bu 'byung ba'o/ /lhag ma ni rtogs par sla'o/ / 'dir shes pa dang khyad par dang byed pa dang ngo bo nyid kyi mtshan nyid bstan nas/ byang chub sems dpa' rnams kyi thar ba'i cha dang mthun pa brjod par bya ste/ de yang byang chub sems dpa' rnams de dang bral na dgra bcom pa thob pa'i rgyu bstan cing mtshon par bya ba de gsal bar bstan pa'i phyir shA ri'i bus gsol pa zhes bya ba la sogs pa gsungs so/ /shes rab kyi pha rol tu phyin pa bsgom par bgyi zhes bya ba ni chos thams cad don dam par shes pa'i phyir dang / sbyin pa la sogs pa'i pha rol tu phyin pa la mtshan ma med par sbyor bar byed pa'i don to/ /thabs la mkhas pa zhes bya ba la/ de la thabs ni rnam pa thams cad mkhyen pa nyid kyi sems rtag tu mi gtong ba dang / bsod nams thams cad byang chub tu yang dag par bsngo ba ste/ de ni bsngo ba dang rjes su yi rang ba'i le'u bstan to/ /de'i phyir bstan bcos las/ mtshan nyid brjod par bya yin pas/ /mtshan med rab tu sbyin la sogs/ /yang dag bsgrub la mkhas pa ni/ /rnam pa thams cad rtogs 'di la/ /thar pa'i cha dang mthun par 'dod/ /ces bya ba gsungs te/ de'i dbye ba lnga ni bcom ldan 'das yum chen mo dag las gsungs te/ de ltar bstan bcos las/ sangs rgyas sogs dmigs dad pa dang / /sbyin sogs spyod yul brtson 'grus dang / /bsam pa phun tshogs dran pa dang / /rnam par mi rtog ting 'dzin dang / /chos rnams rnam pa thams cad du/ /shes bu shes rab dang rnam lnga/ /zhes gsungs so/ /'di nyid bcom ldan 'das kyis de skad ces bka' stsal pa dang zhes bya ba la sogs pa gsungs te/ de yang bstan bcos las/ rdzogs pa'i byang chub rnon po yis/ /rtogs sla rtul pos rtogs dka' bzhed/ /ces bya ba gsungs te/ de nas lha'i dbang po brgya byin zhes bya ba la sogs pas 'di'i skabs 'byed par byed de/ 'di tshegs chen pos 'byung bas na 'byung bar dka' ba'o/ /'di dag ni khyad par bstan pa yin no/ /de nas bcom ldan 'das zhes bya ba la sogs pas ni gang zag gi khyad par gsungs te/ shes rab 'chal pa zhes bya ba la sogs pa gsungs pa la/ 'chal pa'i shes rab ces bya ba la sogs pa'i tshig gis ni thar pa'i cha dang mthun pa rtul po'i khyad par bstan to/ /thar pa'i cha dang mthun pa rnon pos ni yang dag par rdzogs pa'i byang chub rtogs par sla ste/ de'i phyir de bstan par 'dod nas de nas bcom ldan 'das zhes bya ba la sogs pa gsungs so/ /de skad ces gsol pa dang zhes bya ba la sogs pa ni bcom ldan 'das kyis lan no/ /chos thams cad yod pa ma yin pa la/ byang chub sla'o zhes rab 'byor gyis smras pa mi rigs te/ gang gi phyir gal te de tsam gyis 'byung bar sla bar gyur na/ sems can thams cad dang po nyid nas de ltar 'gyur ro/ /de'i phyir bsgrubs pas thob pa ste/ de yang thar pa'i cha dang mthun pa rtul po gang dag yin pa de dag la ni med do zhe na/ de'i phyir 'byung ba med pa'i phyir mi 'thob pas 'byung bar dka'o zhes gsungs so/ /'o na mngon par shes pa de dag gis thos pa dang / bsams pa dang / bsgoms pa la sogs pa'i stobs kyis yang dag par rdzogs pa'i byang chub ci'i phyir mi 'thob ce na/ rab 'byor yang dag pa ma yin pa'i phyir zhes bya ba la sogs pa gsungs te/ de ni byis pas gzung ba'i don nyid byang chub tu sems na de yang yang dag pa ma yin pa'i phyir dang / brdzun pa'i phyir thob pa ma yin no zhes dgongs so/ /'di ltar rnam par rtog pa la byang chub tu sems pa'am/ rnam par rtog pa'i mtshan ma la byang chub sems dpa'i phyogs gnyi ga rigs pa ma yin te/ byang chub la rnam par rtog pa med pa'i phyir dang / byang chub rnam par rtog pas ma bsgrubs pa'i phyir ro/ /'di nyid bstan pa'i phyir rab 'byor rnam par mi rtog pa'i phyir zhes gsungs so/ /de nas zhes bya ba la sogs pas ni gnas brtan la shA ri'i bu'i lan no/ /de stong pa yin pa'i phyir mngon par 'byung ba zhes bya ba 'di ni 'gal ba'i gtan tshigs yin no snyam du bsams nas/ tshe dang ldan pa rab 'byor zhes bya ba la sogs pa gsungs pa la/ nam mkha' dang mtshungs pa'i phyir zhes bya ba la/ nam mkha' dang mtshungs pa ni gtan tshigs te/ gang dag gang de kho na nyid de nyid kyis de dag mngon par rdzogs par byang chub par mi 'gyur ro zhes dgongs so/ /de ltar 'gal bar bstan nas rjes su dpag pas gnod pa smra bar 'dod nas thal bar 'gyur ba ni tshe dang ldan pa rab 'byor gal te zhes bya ba la sogs pa gsungs pa la/ mi ni ma yin pa'o/ /gang gi phyir zhes bya ba la sogs pas ni bzlog ste gsungs so/ /yang na 'di ni gzhan gyi gtan tshigs sun dbyung ba dang rang gi phyogs bsgrub pa nyid do/ /de skad ces smras pa dang zhes bya ba la sogs pas ni rab 'byor gyis thal ba rgya cher sel bar byed de/ yang dag par rdzogs pa'i byang chub las phyir ldog pa ni yang dag par rdzogs par byang chub par bya ba'i rnam par rtog pas so/ /phyir ldog pa'i chos de gang yin zhes smras nas phyir mi ldog pa nyid bsgrub pa'i phyir de gang zhes bya ba la sogs pa gsungs pa la/ chos thams cad la mi gnas pa'i tshul zhes bya ba la chos thams cad la mi gnas pa'i tshul ni rigs pa'o/ /des na chos nyid la gnas pa med pa'i chos nyid kho na byang chub dag pa'o/ /de yang rang bzhin gyis rnam par dag pa'o zhes bsams so/ /de skad ces smras pa dang zhes bya ba ni shA ri'i bu'i tshig ste/ chos kyi tshul gyis rnam par zhes bya ba ni chos rnams kyi de kho na nyid kyi rnam pa'o/ /gang yang zhes bya ba la sogs pas khyad par gsungs te/ yang gi sgra ni sgra'i don to/ /de nas tshe dang ldan pa gang po zhes bya ba la sogs pas ni gang pos rab 'byor la dran par byed do/ /lhag ma rab 'byor bla na med pa yang dag par rdzogs pa'i byang chub kyis byang chub sems dpa' sems dpa' chen po 'di ni/ byang chub tu nges par 'byung bar rig par bya'o zhes bya ba'i bar [(]glub [,]grub [)]pa'i mtha' 'jog pa'i tshig ni rtogs par sla'o/ /de'i phyir rgyas par bstan pa dang ldan pa de yan chad kyis ni dbang po rnon po'i thar pa'i cha dang mthun pas yang dag par rdzogs pa'i byang chub 'byung sla'o/ /zhes thar pa'i cha dang mthun pa bstan to/ /thar pa'i cha ni bsten cing thob par bya ba'o/ /de la phan pa ni thar pa'i cha dang mthun pa ste/ de dag bstan nas nges par 'byed pa'i cha dang mthun pa brjod par bya ste/ nges par 'byed pa ni so sor rtogs pa'i mthong ba'i lam mo/ /de'i cha ni 'thob par bya'o/ /de la phan pa ni nges par 'byed pa'i cha dang mthun pa'o/ /de ni rnam pa bzhi ste/ drod dang / rtse mo dang / bzod pa dang / chos kyi mchog go/ /de la dang po'i dbang du byas nas bstan bcos las/ dro ba rnams kyi dmigs pa 'dir/ /sems can thams cad yin par bsngags/ /de dag nyid la sems mnyam sogs/ /rnam pa dag ni bcur bshad do/ /zhes gsungs te/ de'i phyir de nas bcom ldan 'das zhes bya ba la sogs pa nas/ bdag mgon du gyur par bya'o zhes bya ba'i bar du gsungs pa la/ gnas par bgyi zhes bya ba ni reg par bya bas so/ /bslab par bgyi zhes bya ba ni goms par bya bas so/ /mnyam par gnas par bya zhes bya ba la sogs pas ni sems rnam pa bcu gsungs te/ mnyam pa'i sems dang / byams pa'i sems dang / phan pa'i sems dang / g.yo ba med pa'i sems dang / nga rgyal bcag pa'i sems dang / khong khro ba med pa'i sems dang / snying rje'i sems dang / mtho btsams pa med pa'i sems dang / ma dad pa la sogs pa'i sems dang / bu dang bu mo la sogs pa'i 'du shes so/ /mgon ni mgon dang bcas pa ste/ de ni dro bar gyur pa'o/ / bdag nyid sdig pa las ldog cing / /sbyin la sogs la gnas pas gzhan/ /de dag la ni dgod pa dang / /bsngags pa brjod dang mthun pa nyid/ /brtser gyur zhes gsungs so/ /'di nyid bdag nyid kyang zhes bya ba la sogs pas gsungs so/ /sdig pa ni mi dge ba bcu'o/ /de dag spong ba ni ldog pa'o/ /yongs su rgyal bar bya ba ni goms par bya ba'o/ /ma rig pa'i rkyen gyis 'du byed/ 'du byed kyi rkyen gyis rnam par shes pa zhes bya ba la sogs pa ni lugs dang mthun pa'o/ /ma rig pa 'gags pas 'du byed 'gag ces bya ba ni rten cing 'brel par 'byung ba lugs dang mi mthun pa'o/ /gzhan dag ces bya ba ni pha rol dag la'o/ /yang dag par bskul ba ni yang dag par 'dzin du 'jug pa'o/ /bsngags pa brjod pa ni yon tan brjod pa'o/ /rjes su mthun pa ni yang dag par rjes su mthun pa'o/ /de ni rtse mor gyur pa'o/ /de bzhin bzod pa ni/ rang gzhan rten can bden shes pa/ /chos mchog de bzhin sems can rnams/ /smin byed sogs kyis shes par bya/ /rang yang bden pa shes pa dang / /gzhan dag kyang de la yang dag par bskul ba dang / /de'i bsngags pa brjod pa dang / rjes su mthun pa ni bzod par gyur pa'o/ /bdag nyid kyang sems can yongs su smin par byed pa dang / sangs rgyas kyi zhing yongs su sbyang ba la sogs pa dang / gzhan dag kyang de la yang dag par bskul ba dang / de'i bsngags pa brjod pa dang / rjes su mthun pa ni chos kyi mchog tu gyur pa'o/ /de gnyis ka ni de bzhin du bden pa zhes bya ba la sogs pas gsungs te/ bden pa zhes bya ba ni sdug bsngal la sogs pa'i bden pa'i yul te/ go rims bzhin du yongs su shes pa dang / spang ba dang / mngon sum du bya ba dang / bsgom pa'o/ /rgyun du zhugs pa la sogs pa 'bras bu lnga la shes pa mngon sum du bya ba ni byang chub sems pa'i skyon med pa la 'jug pa'i bar gyis so/ /de bzhin du sems can yongs su smin pa la sogs pa la gnas nas gzhan dag kyang de la yang dag par bskul ba dang / de'i bsngags pa brjod pa dang / de la mthun par dga' bar byed pa'o zhes bya bas ni bzod par gyur pa dang / chos kyi mchog tu gyur pa'o/ /de ltar 'dod cing zhes bya ba la sogs pa ni nges par 'byed pa'i cha dang mthun pa'i 'bras bu gsungs te/ sgrib pa med pa'i gzugs dang / tshor ba dang / 'du shes dang / 'du byed nas dam pa'i chos gnas pa dang / sgrib pa med pa'i rang bzhin du 'gyur ba'o/ /de bzhin nyid gtso bor gyur pa'i le'u ni de bzhin nyid kyi le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u bcu drug pa'o// //thar dang nges 'byed cha mthun dang / /slob pa phyir mi ldog pa'i tshogs/ /zhes gong du bstan pa de las gnyis bstan nas gsum pa brjod par bya ste/ de'i phyir bstan bcos las/ nges 'byed yan lag nas bzung nas/ /mthong dang bsgom pa'i lam dag la/ /byang chub sems dpa' gang dag gnas/ /de 'dir phyir mi ldog pa'i tshogs/ /zhes bya ba gsungs te/ 'dir zhes bya ba ni theg pa chen por ro/ /phyir mi ldog pa'i tshogs 'di'i mtshan nyid la phyir mi ldog pa'i ched du 'byung ba ni phyir mi ldog pa'o/ /ldog pa ma yin pa de ni phyir mi ldog pa'o/ /de nas nges par 'byed pa'i cha dang mthun pa la gnas pa 'di'i rtags du zhig yod ce na/ de'i phyir/ gzugs la sogs las ldog sogs rtags/ /rnam pa nyi shu bskyed pa yis/ nges 'byed yan lag gnas pa yi/ /phyir mi ldog pa'i mtshan nyid 'di/ /zhes bya ba gsungs te/ phyir mi ldog pa nyid ni yongs su shes pa zhes bya ba'i don to/ /ci ste gzugs la sogs pa la ldog pa la sogs pa gang zhe na/ gzugs la sogs pa las ldog pa dang / /the tshom mi dal zad pa dang / /bdag nyid dge ba la gnas shing / /gzhan dag de la dgod pa dang / /gzhan gyi rten can sbyin sogs dang / /zab mo'i don la'ang som nyi med/ /byams lus sogs dang sgrib pa ni/ /rnam pa lnga dang mi 'grogs dang / /bag la nyal kun 'joms pa dang / /dran pa dang ni shes bzhin dang / /gos la sogs pa gtsang ba dang / /lus la srin bu rnams mi 'byung / /gya gyu med sems sbyangs pa ni/ /len dang ser sna med la sogs/ /chos nyid ldan par 'gro nyid dang / /sems can don du dmyal tshol dang / /gzhan gyis bkri bar mi btub dang / /lam gzhan nye bar ston bdud la/ /bdud ces bya bar rtogs pa dang / /sangs rgyas dgyes pa'i spyod pa ste/ /rtags ni nyi shu 'di dag gis/ /drod dang rtse mo bzod bcas dang / /chos mchog rnams la gnas pa ni/ /rdzogs pa'i byang chub las mi ldog / ces bya ba gsungs te/ de'i phyir de nas bcom ldan 'das la zhes bya ba la sogs pa gsungs te/ 'di dag gis snang zhing gsal bar byed pas na rnam pa'o/ /'di dag gis mtshon par byed cing rtogs par byed pas na rtogs so/ /'di dag gis nges par dpog cing rtogs par byed pas na mtshan ma'o/ /don gcig pa nyid yin yang gsum du gzung ba ni don gzhan du brtags pa de rnam par bcad pa'i phyir ro/ /gal te bstan pa'i don 'di la'am/ gzhan gang yin pa ji ltar zhes bya ba la sogs pa la/ de nyid kyi phyir 'am gyi sgra ni ji ltar yang ste rnam pa gang gis 'tshal bar bgyi zhes bya ba dang sbyar ro/ /rtags shin tu mang po yod pa las de la re zhig dang po ni rab 'byor so so'i skye bo'i sa gang yin pa dang zhes bya ba la sogs pa gsungs te/ so so'i skye bo'i dang / nyan thos dang / rang sangs rgyas dang / yang dag par rdzogs pa'i sangs rgyas kyis te/ rnam pa bzhi po 'di 'ang de bzhin nyid kyis zhes brjod do/ /ci'i phyir zhe na/ 'di thams cad ni zhes bya ba la sogs pas gsungs te/ /ni'i sgra ni gtan tshigs te/ gang gi phyir 'di thams cad ni de bzhin nyid la gnyis su med do/ /gzugs la sogs pa'i chos thams cad ni mtshan nyid ji lta ba bzhin du ma grub pa'i phyir de dag ni de bzhin nyid kho na'o/ /de bzhin nyid kyang gcig kho na ste/ gnyis sam mang po ni ma yin no/ /de'i phyir de bzhin nyid 'di ni gnyis su med cing tha mi dad de gnyis su byar med cing ma chad pa'o/ /rnam par rtog pa'i ngo bo nyid dang bral ba'i phyir rtog pa med pa'o/ /rnam par rtog pa'i spyod yul ma yin pa'i phyir rnam par rtog pa med pa'o zhes bya ba ni de lta bu'i mtshan nyid gang yin pa'i de bzhin nyid de la chos kyi de bzhin nyid du 'jug pa'o/ /ji ltar 'jug pa yin zhe na/ de bzhin nyid la zhes bya ba la sogs pa gsungs te/ gnas pa ni de la mthong ba'o/ /mi rtog pa ni yang dag par ro/ /rnam par mi rtog pa ni log par ro/ /de bzhin du 'jug pa zhes bya ba ni de ltar yod pas 'jug pa'o/ /ji tsam gyis zhugs pa yin zhe na/ de bzhin du zhugs pas zhes bya ba gsungs te/ brjod pa'i rim pa zhugs nas so/ /ji lta ba zhes bya ba ni ji tsam thos pa'o/ /thos nas kyang zhes bya ba ni thos pa'i 'og tu yang ngo / /de las kyang 'das nas zhes bya ba ni de nas dus phyi mar yang ngo / /nem nur mi byed ces bya ba ni gnod par mi byed ces bya ba dang sbyar ro/ /yid gnyis ni yid rnam pa sna tshogs pa ste/ de mi byed pa de nyid de bzhin de ni yang ma yin pa zhes pa ni the tshom mo/ /de med pa ni the tshom du mi byed pa'o/ /rmongs par mi byed ces bya ba ni rtog pa med cing dgag pa'o/ /ci zhig byed pa yin zhe na/ 'on kyang 'di ni zhes bya ba la sogs pa gsungs te/ de bzhin nyid kho na la ni gzugs la sogs pa thams cad yin zhes mos pa ni dad pas so/ /khong du chud pa ni shes rab kyis so/ /rtags kyi gtso bo ni thams cad shes pa'o/ /yan lag ni gyin da zhes bya ba la sogs pas gsungs so/ /yan lag ni ltos nas rtags 'di dag dang zhes bya ba la sogs pa mang po'i tshig tu smos pa yin no/ /thams cad de bzhin nyid kho nar shes pa ni gzugs la sogs pa las ldog pa yin te/ de ni nges par 'byed pa'i cha dang mthun pa la/ phyir mi ldog pa'i rtags dang po'o/ /gzhan yang rab 'byor zhes bya ba la sogs pa gsungs pa la/ gzhan dag gis zhes bya ba ni 'di las phyi rol pa'i chos rnams kyi'o/ /dge sbyong ni rab tu byung ba rnams la'o/ /ngor lta ba ni 'dud pas lta ba'o/ /ci zhig la lta ba yin zhe na/ 'di dag ni zhes bya ba la sogs pa gsungs pa la shes pa ni 'jig rten pa'i shes pas so/ /mthong ba ni 'jig rten las 'das pa'i shes pas so/ /sbyin par sems pa ni gus pa'i sbyin pa'o/ /rten pa zhes bya ba ni rten pa 'am/ skyabs su 'gro ba'o/ /bden pa dang / dkon mchog la yid gnyis dang / the tshom de zad pa yod na/ 'di dag thams cad mi byed de/ 'di ni the tshom zad pa ste/ de dag la rtags gnyis pa'o/ /rab 'byor 'di yang zhes bya ba la sogs pa la gsungs pa la/ ngan song ni dmyal ba dang / yi dags dang / dud 'gro'o/ /bud med kyi dngos po ni bud med nyid do/ /de yang mi khom pa lhag ma nye bar mtshon pa'o/ /'di ni mi khom pa zad pa ste/ de dag de la rtags gsum pa'o/ /gzhan yang rab 'byor zhes bya ba la sogs pa gsungs pa la/ bdag nyid kyang dge ba bcu la gnas shing / gzhan rnams kyang de la 'dzud cing bstan par byed pa 'di ni de dag la rtags bzhi pa'o/ /rab 'byor gzhan yang zhes bya ba la sogs pa gsungs pa la chos gang dang gang shes pa ni mdo'i sde la sogs pa'o/ /sbyin pa ni gzhan dag la'o/ / 'di dag la phan pa dang bde bar gyur cig ces bya ba ni de dag nyid la phan pa dang / bde ba'i slad du ste/ de ni ye shes kyi rgyu thun mong du byed pa'o/ /chos kyi sbyin pa ji lta bar gzhan sbyin pa dang / tshul khrims la sogs pa yang de bzhin no/ /'di ni gzhan gyi rten can gyi sbyin pa la sogs pa ste/ de ni de dag la rtags lnga pa'o/ /gzhan yang rab 'byor zhes bya ba la sogs pa nas/ rmongs par mi 'gyur zhes bya ba'i bar gyis ni zab mo'i don la som nyi la sogs pa med pa ste/ de ni de dag la rtags drug pa'o/ /byams lus sogs zhes bya ba ni lus la sogs pa'i las te/ de ni de phan pa'i tshig dang ldan par 'gyur zhes bya ba la sogs pas gsungs te/ nye bar mtshon pa'i phyir ro/ /'di ni byams pa'i lus la sogs pa ste/ de ni de dag la rtags bdun pa'o/ /sgrib pa ni rnam pa lnga dang mi 'grogs pa dang zhes bya ba la sgrib pa ni 'dod pa lnga la 'dun pa dang / gnod sems dang / rmugs pa dang / gnyid dang / rgod pa dang /'gyod pa dang / the tshom mo/ /de dag dang mi 'grogs pa ni mi ldan pa'o/ /de ni rmugs pa dang / gnyid chung bar 'gyur zhes bya ba la sogs pa gsungs te/ de ni nye bar mtshon pa tsam gyi phyir ro/ /'di ni sgrib pa lnga dang mi 'grogs pa ste/ de ni de dag la rtags brgyad pa'o/ /thams cad la ji ltar yod pa de bzhin du zhe sdang dang rjes su 'brel pa'i bag la nyal 'joms pa ni bag la nyal kun 'joms pa ste/ de ni bag la nyal med par 'gyur zhes bya ba la sogs pa gsungs so/ /de ni de dag la rtags dgu pa'o/ /dran pa dang ni shes bzhin dang zhes bya ba ni dran pa dang lhan cig pa'i shes bzhin no/ /de ni de 'gro ba 'am zhes bya ba la sogs pas gsungs te 'gro ba ni phar 'gro ba'o/ /phyir ldog pa ni 'ong ba'o/ /bslad pa ni rnam par g.yeng ba'o/ /thogs par mi byed pa zhes bya ba'am/ thogs pa ni rnam par g.yeng ba'i phyir ro/ /gya tshom zhes bya ba ni ma brtags par sa la 'gro ba'o/ /de ni mtshon pa tsam yin gyi 'chag pa dang / langs pa dang 'dug pa dang / nyal ba ni mi g.yeng ba'o/ /'di ni dran pa dang shes bzhin te/ de ni de dag la rtags bcu pa'o/ /yang rab 'byor zhes bya ba nas skyon nyung bar 'gyur ro zhes bya ba'i bar gyis gsungs pa la/ shig dang ldan pas na shig can no/ /gtsang gdang ba ni gtsang gdang ba'o/ /gnod pa ni nad do/ /skyon ni 'tshe ba'o/ /'di ni gos la sogs pa gtsang ba ste/ de ni de dag la rtags bcu gcig pa'o/ /sems can gzhan dag gis zhes bya ba nas/ 'phags pa yin no zhes bya ba'i bar gyis gsungs pa/ 'byung ba ni skye ba ste bza' ba'i don du'o/ /mngon par 'phags pa ni khyad par du 'phags pa'o/ /'di ni lus la srin bu rnams mi 'byung ba ste/ de ni de dag la rtags bcu gnyis pa'o/ /ji lta ji lta bur zhes bya ba nas/ gzung bar bya'o zhes bya ba'i bar du gsungs pa la/ sems la bya ba nyung ba ni 'dod pa chung ba dang / rnam par mi g.yeng ba'i phyir ro/ /sems gya gyu ni gya gyu nyid do/ /gang skyon sbed par byed pa de ni g.yo'o/ /gang gzhan slu bar byed pa de ni yon po'o/ /gzhan slu ba'i phyir don du yon tan med pa ston pa ni rgyu'o/ /de dag spangs pa ni go rims bzhin du sems gya gyu med pa nyid dang / sems g.yo med pa nyid dang / sems yon po med pa nyid dang / sems g.yo ba med pa nyid do/ /lhag ma ni rtogs sla'o/ /'di ni sems gya gyu med pa'i sems te/ de ni de dag la rtags bcu gsum pa'o/ /gzhan yang rab 'byor zhes bya ba la sogs pa gsungs pa la/ 'dir rnyed pa la sogs pa lhur byed pa nyid bkag pas sbyangs pa len pa yang nye bar mtshon te/ 'di ni sbyangs pa'i yon tan yang dag par len pa ste/ de ni de dag la rtags bcu bzhi pa'o/ /phrag dog dang ser sna mang ba ma yin no zhes bya ba ni ser sna bzung bas ni pha rol tu phyin pa drug gi mi mthun pa'i phyogs nye bar mtshon pa yin no/ /'di ni ser sna med pa la sogs pa ste/ de ni de dag la rtags bco lnga pa'o/ /chos zab dag ces bya ba la sogs pa nas gzung bar bya'o zhes bya ba'i bar gsungs pa la/ /sbyor ba ni yang dag par sbyor ba'o/ /chos nyid dang ldan par thams cad du 'gro bar byed de/ 'di ni chos nyid dang ldan par 'gro ba ste/ de ni de dag la rtags bcu drug pa'o/ /gzhan yang rab 'byor zhes bya ba nas/ phyir mi ldog par gzung bar bya'o zhes bya ba'i bar dag gsungs pa la/ phyir bshags par gyis shig ces bya ba ni sdig pa dang sdig pa bshags par gyis shig pa'o/ /so sor spongs shig ces bya ba ni so sor nges pas bsten pa nyid du yongs su spongs shig pa'o/ /de ltar byas nas zhes bya ba ni byang chub kyi sems btang ba yod na'o/ /de ltar yang zhes bya ba ni de lta bur bdud kyis bstan pa na'o/ /lhag ma ni rtogs sla'o/ /sems can don du dmyal tshol ba'ang rtogs par sla'o/ /'di ni sems can gyi don du dmyal ba tshol ba ste de ni de dag la rtags bcu bdun pa'o/ /gzhan yang rab 'byor zhes bya ba nas phyir mi ldog par gzung bar bya'o zhes bya ba'i bar du gsungs pa la/ gang shes rab kyi pha rol tu phyin pa la sogs pas so sor bshags par gyis shig pa ni so so so sor cig pa'o/ /gang yongs su bzung ba'i sems dang byang chub kyi sems dang pha rol tu phyin pa gang yin pa de dag yongs su spongs shig /yang dag pa ma yin pa rnam pa sna tshogs smras pa ni snyan dngags mkhan no/ /de'i las ni snyan dngags so/ /phyir mi ldog pa'i khams ni rang bzhin no/ /phyir mi ldog pa ni chos can du zhes bya ba 'og ma dang sbyar ro/ /lhag ma ni rtogs sla'o/ /'di ni gzhan gyis bkri bar mi btub pa ste de ni de dag la rtags bco brgyad pa'o/ /gzhan yang rab 'byor zhes bya ba nas gzung bar bya'o zhes bya ba'i bar du gsungs pa la/ 'khor ba na spyod pa zhes bya ba la sogs pa'i byang chub sems dpa'i lam ston par byed de/ khyod 'di nyid du zhes bya ba la sogs pas ni nyan thos la sogs pa'i lam du 'dzin par byed do/ /mi 'grub par 'gyur zhes bya ba ni tshe zad pa'o/ /ni zhes bya ba'i sgras ni rnam par rtog pas te/ 'di nyid du zhes bya ba la sogs pa 'chad par 'gyur ba'am/ yang na kye ma zhes bya ba la sogs pa'o/ /sems mi 'khrugs mi g.yo zhes bya ba ni bdud kyis smras pa nyid du shes pa'i phyir ro/ /de'i phyir 'di ni lam gzhan nye bar ston pa'i bdud la bdud ces bya bar rtogs pa ste/ de ni de dag la rtags bcu dgu pa'o/ /gal te zhes bya ba nas gzung bar bya'o zhes bya ba'i bar gyis gsungs pa la/ 'bral bar byed pa ni theg pa chen po gtong ba'o/ /de'i don gyi tshig dag ni 'bral bar byed pa'i tshig go/ /de gzhan las zhes bya ba ni bdud la sogs pa las so/ /thos nas sems yongs su mi nyams te zhes bya ba dang sbyar te/ mi g.yo ba zhes bya ba'i don to/ /gang las she na/ chos nyid las zhes bya ba ste/ chos nyid ni chos nyid do/ /theg pa chen po ni spyod pa'o/ /de las mi ldog pa zhes bya ba ni rgyab kyis bltas par mi 'gyur ba'o/ /gzhan du mi 'gyur ba ni phyin ci log pa ste/ theg pa dman pa las gud par mi byed pa zhes bya ba'i don to/ /de dag ces bya ba ni 'bral bar byed pa'i tshig rnams so/ /na zhes bya ba'i sgra ni gtan tshigs te/ gang gi phyir bdud kyi las rnams shes na gnas ma yin zhes bya ba 'og ma dang sbyar ro/ /de ltar zhes bya ba ni sangs rgyas kyis bsngags pa'o/ /lhag ma ni rtogs par sla'o/ /de ni sangs rgyas dgyes pa'i spyod pa ste/ de ni de dag la rtags nyi shu pa'o/ /rtags ni nyi shu de dag gis/ /drod dang rtse mo bzod bcas dang / /chos mchog rnams la gnas pa ni/ /rdzogs pa'i byang chub las mi ldog /ces bya ba ni mjug yin te/ drod la sogs pa nges par 'byed pa'i cha dang mthun pa la gnas pa gang rtags nyi shu po 'di dag gis mtshon pa de ni rdzogs pa'i byang chub las ni mi ldog pa yin te/ de ni phyir mi ldog pa zhes bya ba'i don to/ /mthong ba'i lam la gnas pa'i dbang du byas nas bstan bcos las/ mthong ba'i lam la bzod pa dang / /shes pa'i skad cig bcu drug ni/ /byang chub sems dpa' mi ldog pa'i/ /mtshan nyid yin par shes par bya/ /zhes bya ba gsungs te/ de gang yin zhe na/ bzod pa'i skad cig dang / shes pa'i skad cig bcu drug go/ /bcu drug gang zhe na/ gzugs sogs 'du shes ldog pa dang / /sems brtan theg pa dman dag las/ /rnam log bsam gtan la sogs pa'i/ /yan lag yongs su zad pa dang / /lus sems yang ba nyid dang ni/ /'dod la spyod pa thabs mkhas dang / /rtag tu tshangs par spyod nyid dang / /'tsho ba rnam par dag nyid dang / /phung sogs bar chad byed rnams dang / /tshogs dang dbang sogs bcas pa yi/ /g.yul 'gyed ser sna la sogs la/ /sbyor dang rjes su sbyor ba yi/ /gnas pa so sor bkag pa dang / /chos ni rdul tsam mi dmigs nyid/ /rang gi sa la nges pa nyid/ /sa gsum la ni gnas pa dang / /chos kyi don du srog gtong ba/ /de 'dra'i skad cig bcu drug ni/ /blo ldan mthong ba'i lam gnas kyi/ /phyir mi ldog pa'i rtags dag yin/ /zhes bya ba gsungs te/ gzhan yang rab 'byor zhes bya ba nas/ phyir mi ldog par gzung bar bya'o zhes bya ba'i bar du gsungs pa la/ mngon par 'du byed pa zhes bya ba ni skyed par byed ces bya ba'i don to/ /chos de yang zhes bya ba ni gzugs la sogs pa ste/ mi dmigs pa zhes bya ba la sogs pa'o/ /'dir ni dmigs pa nyid mngon par 'du byed pa'o/ /de nyid mi skyed pa ste/ 'di la mi skyed pa shes pa'i bzod pa yod pa zhes 'bru mang po par bya'o/ /gzugs la sogs pa'i 'du shes las ldog pa ste/ 'di ni mthong ba'i lam gyi sdug bsngal la chos shes pa'i bzod pa'i rtags te dang po'o/ /gzhan yang rab 'byor zhes bya ba nas gzung bar bya'o zhes bya ba'i bar gyis gsungs pa la/ mos pa ldog par byed ces bya ba ni mos pa dang bral bar byed pa'o/ /shes par 'gyur zhes bya ba ni 'jig rten las 'das pa'i ye shes kyis so/ /nyon mongs pa ni rnam par nyams pa'o/ /bral bar byed pa ni byang chub kyi sems dang bral bar byed pa'o/ /de la zhes bya ba ni yang dag par rdzogs pa'i byang chub la'o/ / sems brtan pa zhes bya ba ni yang dag par rdzogs pa'i byang chub la sems brtan pa'o/ /'di ni mthong ba'i lam gyi sdug bsngal la chos shes pa'i rtags te gnyis pa'o/ /rab 'byor gzhan yang zhes bya ba nas 'gyur ba yin no zhes bya ba'i bar du gsungs te/ 'di ni theg pa dman pa las rnam par ldog ste/ de ni mthong ba'i lam gyi sdug bsngal la rjes su shes pa'i bzod pa'i rtags te gsum pa'o/ /de dag 'dod na zhes bya ba nas rig par bya'o zhes bya ba'i bar du gsungs pa la/ 'di ni bsam gtan la sogs pa'i yan lag yongs su zad pa ni 'dod par skyed pa'i bgegs nyam chung bar byed pa ste/ de ni mthong ba'i lam gyi sdug bsngal la rjes su shes pa'i rtags bzhi pa'o/ /gzhan yang rab 'byor zhes bya ba nas/ dran bzhin du 'gro zhes bya ba'i bar du gsungs pa la/ 'dir ming la ched cher 'dzin pa ma yin zhes bya bas ni sems yang ba nyid do/ /de 'gro 'am zhes bya ba la sogs pas ni lus yang ba nyid do/ /de gnyi ga ni mthong ba'i lam gyi kun 'byung la chos shes pa'i bzod pa'i rtags te lnga pa'o/ /de gal te khyim na zhes bya ba nas/ /yongs su spyod do zhes bya ba'i bar du gsungs pa la/ ji ltar ji skad gsungs pa'i 'du shes ni thabs te/ / thabs de dang ldan pas 'dod pa la spyod pa de ni mthong ba'i lam gyi kun 'byung la chos shes pa'i rtags te drug pa'o/ /'dod pa'i yon tan lnga po zhes bya ba nas gzung bar bya'o zhes bya ba'i bar du gsungs pa la/ yid bde ba lhag par skyed par byed pas na dga' ba'i rang bzhin can no/ /bde ba lhag par skyed par byed pas na bde ba'i rang bzhin can no/ /don du mi gnyer zhes bya ba ni gzugs med pa la rab tu chags pa med pa ltar rtag tu don du mi gnyer ba'o/ /mnyam pa dang mi mnyam pas 'tsho bar mi byed ces bya ba ni rigs pa dang / rigs pa ma yin pas mi byed pa'o/ /ji ltar 'tsho bar byed ce na/ chos 'ba' zhig ces bya ba gsungs te/ /gnod pa ni sdug bsngal lo/ /thar pa'i cha dang mthun pa lnga dang / nges par 'byed pa'i cha dang mthun pa bzhi dang / mthong ba'i lam gyi skad cig ma bdun gyis skyes bu dam pa la sogs pa tshig bcu drug go/ /'di ni rtag tu tshangs par spyod pa nyid de/ de ni mthong ba'i lam gyi kun 'byung la rjes su shes pa'i bzod pa'i rtags te bdun pa'o/ /gzhan yang rab 'byor zhes bya ba nas gzung bar bya'o zhes bya ba'i bar du gsungs pa la sngags kyi rigs ni sngags kyi khyad par te lha pho rnams kyi'o/ /rtsi ni 'bras bu smin pa'i mtha' 'o/ /lha mo'i sngags ni rig sngags so/ /sman ni sman no/ /sogs pa'i sgras ni 'khrul 'khor dang / rgyud la sogs pa yongs su gzung ngo / /rtsod pa ni lus kyi rtsod pa'o/ /rgol ba ni ngag gi las so/ /'di ni 'tsho ba rnam par dag pa ste/ de ni mthong ba'i lam gyi kun 'byung ba la rjes su shes pa'i rtags te brgyad pa'o/ /dgu pa la sogs pa skad cig ma lnga'i dbang du byas te bstan bcos las/ /phung sogs bar chad byed rnams dang / /tshogs dang dbang sogs bcas pa yi/ /g.yul 'gyed ser sna la sogs la/ / sbyor dang rjes su sbyor ba yi/ /gnas pa so sor bkag pa dang / /zhes bya ba gsungs te/ sbyor ba ni mngon par zhen pa dang bcas pa mngon par sgrub pa'o/ /rjes su sbyor ba ni mngon par zhen pa med pa la 'jug pa'o/ /de la gnas pa ni de dag la gnas pa'o/ /de dang ldan pa'i ting nge 'dzin de bkag pa'o/ /ma yin zhes bya ba ni dgag pa dang / 'brel ba'i don te de yang gnas pa'o/ /phung po la sogs pa ni dngos po'o/ /bar chad byed pa ni gnyis pa'o/ /tshogs ni gsum pa'o/ /dbang po la sogs pa'i g.yul 'gyed pa ni bzhi pa'o/ /ser sna la sogs pa ni lnga pa'o/ /de la re zhig bzhi ni/ gzhan yang rab 'byor zhes bya ba nas ma bral bar gnas te zhes bya ba'i bar du gsungs pa la/ de dag phung po zhes bya ba la sogs pa la/ sbyor ba dang rjes su sbyor ba ni sbyor ba dang rjes su sbyor ba'o/ /de dang rjes su sbyor ba ni de dang lhan cig sbyor ba ste/ rjes su'i sgra ni lhan cig pa'i don to/ /de ni mi gnas so zhes bya ba dang sbyar ro/ /'dir thar pa ni yum chen mo dag las 'di ltar stong pa nyid la gnas nas chos gang la yang dman pa nyid dam khyad par du 'phags par yang dag par rjes su mi mthong ngo zhes gsungs so/ / 'di las tshig gnyis kyis gsungs pa la kun nas nyon mongs pa'i phyogs la nyon mongs pa med par 'os na 'du 'dzi'i gtam la dga' ba ste/ gtam gyi yul yin pa'i phyir 'du 'dzi la dga' ba nyid do/ /de nyid med de gtam tsam yin pa'i phyir gtam mo/ /lhag ma ni snga ma bzhin no/ /khyad par gyur pa'i phyir kun nas nyon mongs pa 'gog pa'i rgyal po'o/ /de nyid gtam yin te mngon sum du bya ba ma yin pas gtam tsam yin pa'i phyir gtam mo/ /'di nyid kyi gtam gyi don ci rigs par 'dir yang sbyar ro/ /phung po la sogs pa'i sbyor ba dang / rjes su sbyor ba la gnas pa dang / bral ba ste/ de ni mthong ba'i lam gyi 'gog pa la chos shes pa'i bzod pa'i rtags te dgu pa'o/ /sgrib pa lnga ni rkun po ste/ dge ba'i nor 'phrog pa'i phyir ro/ /lhag ma ni snga ma bzhin no/ /'di ni mthong ba'i lam gyi 'gog pa la chos shes pa'i rtags te bcu pa'o/ /dge ba'i chos ni tshogs te lhag ma ni snga ma bzhin no/ /'di ni mthong ba'i lam gyi 'gog pa la rjes su shes pa'i bzod pa'i rtags te bcu gcig pa'o/ /dmag des mi mthun pa'i gnod par byed pa'i 'thab mo'o/ /lhag ma ni snga ma bzhin no/ /'thab pa yod na 'gog pa 'thob ste/ 'gog pa ni mya ngan las 'das pa'i grol ba'o/ /de yang gang zhe na/ lus dang gnas dang / longs spyod du snang ba'i rnam par rig pa rnams log pa'o/ /de bas na lus la sogs pa la rnam par mi rtog pa'i/ /grong dang / grong khyer dang / grong rdal dang / ljongs dang / yul 'khor dang / rgyal po'i pho brang 'khor gyi gtam gyi sbyor ba la brtson par mi gnas zhes bya ba'am/ de la mig la sogs pa lnga'i lus ni grong ste/ dbang po'i grong nyid yin pa'i phyir ro/ /lus kyi gzhi yin pa'i phyir gnas ni grong khyer ro/ /dbang po drug gis rtogs par bya ba yin pa'i phyir grong rdal ni longs spyod de yul lnga'o/ /ljongs la sogs pa ni gnas kyi khyad par ro/ /bdag dang bdag gi rnam par rtog pa zad pa yod na thar pa ste/ de'i phyir bdag gi rnam par rtog pa'i dbang du byas nas/ bdag gi gtam gyi zhes bya ba la sogs pa gsungs so/ /bdag gi ba'i rnam par rtog pa'i dbang du byas nas/ blon po'i zhes bya ba la sogs pa gsungs so/ /'di man chad gtam gsum gyis ni ci rigs par bdag gi ba'i rnam par rtog pa dang / longs spyod kyi rnam par rtog pa dang / gnas kyi rnam par rtog par rig par bya'o/ /gal te de lta de ltar gnas par mi bya na/ 'o na ji ltar gnas par bya zhe na/ gzhan du na zhes bya ba la sogs pa gsungs te/ shes rab kyi pha rol tu phyin pa nyid kyi gtam la so sor brtag par bya ba'o/ /lhag ma ni snga ma bzhin no/ /thams cad du chos nyid dang mnyam pa nyid du sbyor ba dang / rjes su sbyor ba dang ldan pa nyid du gnas par bya'o zhes bya ba'i don to/ /thams cad mkhyen pa nyid dang ldan pa'i yid la byed pa zhes bya ba ni byang chub kyi sems dang ldan pas so/ /'di ni dbang po dang yul gyi gtam gyi sbyor ba dang rjes su sbyor ba dang ldan pa'i gnas pa dang bral ba ste/ de ni mthong ba'i lam gyi 'gog pa la rjes su shes pa'i rtags te bcu gnyis pa'o/ /bstan bcos las/ ser sna la sogs pa zhes bya ba ni yum chen mo dag las sbyin pa'i pha rol tu phyin pa dag la spyod na/ ser sna'i gtam gyi sbyor ba dang / rjes su sbyor ba la brtson par mi gnas zhes bya bas ni shes rab kyi pha rol tu phyin pa la spyod na 'chal pa'i shes rab kyi gtam gyi sbyor ba dang / rjes su sbyor ba la brtson par mi gnas zhes bya ba gsungs so/ /de 'dir ni de dag 'thab mo dang / mtshang 'dru ba dang / rtsod pa dang rgol ba'i gtam gyi sbyor ba dang / rjes su sbyor ba la brtson par mi gnas so zhes gsungs te/ ser sna la sogs pa ni mi mthun pa'i phyogs yin pa'i 'thab mo'o/ /mtshang 'dru ba la sogs pa ni gnyen po'i phyogs yin pa'i phyir sbyin pa la sogs pa'o/ /gang gi tshe 'di gnyi ga la yang sems la stobs mnyam par spyod pa de'i tshe rtsod pa'o/ /gang gi tshe gnyen pos mi mthun pa'i phyogs nyam chung bar byas pa de'i tshe rgol ba'o/ /rtsod pa dang / rgol ba de dag nyid kyang gtam ste/ rnam par rtog pa nyid yin pa'i phyir te/ de la sbyor ba dang / rjes su sbyor ba la brtson par mi gnas pa'o/ /mi 'byed pa ni mnyam pa nyid du shes pas so/ /'byed pa ni sna tshogs nyid du rnam par rtog pas so/ /chos smra zhing mdza' bar 'dod pa zhes bya ba nas gzung bar bya'o zhes bya ba'i bar du ni rtogs par sla'o/ /'di ni mthong ba'i lam gyi chos shes pa'i bzod pa'i rtags te bcu gsum pa'o/ /rab 'byor gzhan yang zhes bya ba nas lung ma bstan par rig par bya ba'i bar du gsungs pa la/ 'dis ni chos ni rdul tsam mi dmigs nyid/ rang gis la nges pa nyid ces bya ba de gsungs te/ des chos rdul tsam yang dag par rjes su mi mthong ste/ gang gi phyir ldog pa de ni rang gi sa la phyir mi ldog gam de lta ma yin zhes the tshom med de/ the tshom ni som nyi'o/ /yang dag par zhum pa zhes bya ba ni spro ba med pa'o/ /mtshams med pa'i sems zhes bya ba la/ mtshams med pa ni mtshams med pa lnga'o/ /gsal ba ni rnam pa thams cad du btang ba'o/ /gnod pa ni nyam chung bar byas pa'o/ /phyir mi ldog pa'i sems ni bdag nyid phyir mi ldog pa nyid du nges pa'o/ /mi 'phrogs pa ni gzhan gyis mi bkri ba'o/ /'di ni rang gi sa la phyir mi ldog pa nyid du bstan zhing nges pa nyid de/ de ni mthong ba'i lam la chos shes pa'i rtags te bcu bzhi pa'o/ /sa gsum la ni gnas pa dang / bdud kyi las dang de bzhin gshegs pa'i gsung gzhan ma yin pa nyid dang / bdag nyid yang dag par rdzogs pa'i byang chub tu 'gyur ba ste/ gnas gsum ni sa gsum mo/ /de la lhag par yang dag par nges pa ni/ gal te zhes bya ba la sogs pa nas/ rig par bya'o zhes bya ba'i bar du gsungs pa la/ 'di nyid du zhes bya ba ni tshe 'di la'o/ /'di ni de bzhin gshegs pa ma yin no zhes bya ba ni snga ma bzhin no/ /de zhes bya ba'i sgra ni de bzhin zhes bya ba 'og ma dang sbyar bar bya'o/ /de las gzhan du ma yin zhes bya ba ni bla na med pa yang dag par rdzogs pa'i byang chub tu mngon par byang chub par 'gyur ro zhes don gyis rtogs par 'gyur ba kho na'o/ /sangs rgyas kyis byin gyis brlabs pa ni sangs rgyas kyi sprul pa'o/ /yod pa las na kho na nyid kyi don to/ /'di ni sa gsum la gnas te/ de ni mthong ba'i lam la rjes su shes pa'i rtags bco lnga pa'o/ /gzhan yang rab 'byor zhes bya ba nas le'u rdzogs kyi bar du gsungs pa la/ bdag gi lus kyang yongs su gtong ba ni 'tsho ba la sogs pa'o/ /srog kyang yongs su gtong ba ni 'chi ba'o/ /sangs rgyas bcom ldan 'das kyis bshad pa'i chos ni dam pa'i chos te stong pa nyid do/ /skyes bu gti mug can kha cig ni 'dor bar byed do/ /'di ni bdag dang gzhan yongs su gzung ba'i phyir/ srog kyang yongs su gtong bar byed pa de ni gang sangs rgyas la dga' ba dang gus par byed pa de bzhin du chos la yang byed de/ de bzhin gshegs pa ni chos kyi sku'o zhes shes par byed pa'i phyir te bdag nyid kyang sangs rgyas pa nyid du mthong ba'i phyir ro/ /nyan thos chos ston pa la yang zhes bya ba yang mtshon pa ste/ byang chub sems dpa' dang / lha la sogs pa yang ngo / /lhag ma ni rtogs par sla'o/ /'di ni chos kyi don du srog gtong ba ste/ de ni mthong ba'i lam gyi lam la rjes su shes pa'i rtags bcu drug pa'o/ /'di 'dra'i skad cig bcu drug ni/ /blo ldan mthong ba'i lam gnas kyi/ /phyir mi ldog pa'i rtags dag yin/ /zhes bya ba ni mjug bsdu ba'o/ /phyir mi ldog pa'i rnam pa dang / rtags dang mtshan ma gang yin pa de dag gsal bar byed pa'i le'u ni le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u bcu bdun pa'o/ / //nges par 'byed pa'i cha dang mthun pa dang / mthong ba'i lam gang gi phyir mi ldog pa'i rtags dang grangs kyi khyad par bstan nas/ bsgom pa'i lam ni zab pa yin pa de la gnyi ga yang brjod par mi nus te/ de'i phyir bstan bcos las/ bsgom pa'i lam ni zab pa ste zhes pa 'di nyid de nas bcom ldan 'das zhes bya ba nas rang sangs rgyas kyis mi 'phrogs so zhes bya ba'i bar du gsungs pa la/ bcom ldan 'das ngo mtshar to zhes bya ba ni tshig gcig gis so/ /ji zhig ngo mtshar ba yin zhe na yon tan chen po zhes bya ba la sogs pa gsungs te/ /yon tan chen po ni tshogs te mchog tu zab pas bskal pa grangs med pa gnyis su rgyun ma chad par 'bad pas thob pas so/ /de nyid kyi khyad par shes par mi nus pa nyid kyi phyir tshad ma mchis pa'o/ /grangs shes par mi nus pa nyid kyi phyir dpag tu ma mchis pa'o/ /byang chub sems dpa' sems dpa' chen po zhes bya ba ni bsgom pa'i lam la gnas pa'i phyir mi ldog pa'o/ /phyir mi ldog pa zhes bya ba ni/ bsgom pa'i lam la gnas pa'o/ /grangs las 'das pas mtha' yas pa'o/ /mchog tu rgya che ba'i phyir mu med pa'o/ /mi 'phrogs pa ni yang dag pa'i ye shes nyan thos dang / rang sangs rgyas kyis kyang bzung ba ma yin no/ /'di ni bsgom pa'i lam zab pa'o/ /rab 'byor gyis gsol pa zhes bya ba la sogs pa gsungs pa la/ spyod pa ni nus pa'o/ /ston kyang sems can gyi don du mi 'gyur ro zhes dgongs so/ /de las ci zhig ston zhe na/ de kho na'i slad du zhes bya ba la sogs pa gsungs te/ kho na ni rim pa bzhin du sbyar te de'i phyir gnas shes pa'i 'og tu blta bar bya'o/ /zab mo zab ces bya ba ni zlos pa'i don te/ gnas zhes bya ba ni bsgom pa'i lam gyi dmigs pa ste/ shes rab kyi pha rol tu phyin pa dang ldan pa ste/ de'i rten zhes bya ba'i don to/ /ston to zhes bya ba ni bstan par bya'o/ /'di ni rab 'byor gyis gsol ba btab pa'o/ /de skad ces gsol pa dang zhes bya ba la sogs pa dang / brtsams pa ni zhes bya ba ni dang por ston pa'o/ /shes par bya bar 'dod ces bya ba ni bsgom pa'i lam la sbyor bar 'dod pa'o/ /'di ni bcom ldan 'das kyis zhal gyis bzhes pa'o/ /des bstan bcos las/ /zab mo stong pa nyid la sogs/ /zab pa de ni sgro 'dogs dang / /skur pa'i mtha' las grol ba nyid/ /ces bya ba gsungs te/ de'i zab pa ni zab pa'i dngos po'i ste/ gang gi phyir de zab mor 'gyur ba de yang stong pa nyid dang / mtshan ma med pa la sogs pa lam gyi dmigs pa zab pa ni zab ces bya bar dgongs so/ /de'i dmigs pa ni stong pa nyid la sogs pa ste/ stong pa nyid la sogs pa yang zab pa nyid de/ gang la sgro 'dogs pa'i mtha' dang skur pa 'debs pa'i mtha' dang bral ba nyid do/ /bcom ldan 'das kyis zhal gyis bzhes pa bstan pa'i phyir rab 'byor zab ces bya ba la sogs pa gsungs te/ ji ltar snang ba'i chos thams cad ni med la/ de kho na nyid ji lta ba bzhin du yod pa ni stong pa nyid do/ /de nyid ni mtshan ma med pa ste/ de rig pas mtshan ma 'gog pa'i phyir ro/ /de nyid ni smon pa med pa ste de rig pas khams gsum du smon pa med pa'i phyir ro/ /de nyid ni mngon par 'du mi byed pa ste/ de dag kyang srid pa'i don du las mi byed pa'i phyir ro/ /de nyid ma byung ba ste/ de dag de las mi skyed pa'i phyir ro/ /de nyid ma skyes pa ste/ rang bzhin gyis skye ba med pa nyid shes pa'i phyir ro/ /de nyid ni dngos po med pa ste/ /rdzas su med pa nyid kyi phyir ro/ /de nyid 'dod chags dang bral ba ste/ de rig pas nyon mongs pa'i bag la nyal mi skyed pa'i phyir ro/ /de nyid ni 'gog pa ste/ de dag gi yang srid pa 'gog pa'i phyir ro/ /de nyid ni mya ngan las 'das pa ste/ /de'i bag chags 'gog pa'i phyir ro/ /de nyid ni med par gyur pa ste/ de dag gi zag pa dang bcas pa'i phung po zhig pa'i phyir ro/ /'di ni stong pa nyid la sogs pa'o/ /rab 'byor gyis gsol pa zhes bya ba ni zur gyis zhus pa'i don to/ /chos zhes bya ba ni stong pa nyid la sogs pa rnams so/ /chos thams cad ces bya ba ni phung po dang / khams la sogs pa'o/ /byis pas gzung bar bya ba'i gzugs la sogs pa de ji ltar zab ce na rang nyid kyis dris pa ni/ rab 'byor ji ltar gzugs zab ces bya ba la sogs pa'o/ /rab 'byor de bzhin nyid ji lta ba bzhin du zhes bya ba ni lan no/ /gang gi de bzhin nyid yin zhe na/ de la zhes bya ba la sogs pa gsungs so/ /gsal bar bya ba'i phyir rab 'byor gang la zhes bya ba la sogs pa gsungs te/ gang la zhes bya ba ni gang gzugs la sogs pa'i de bzhin nyid yod pa la ste/ brtags pa'i gzugs la sogs pa las gzhan ma yin no/ /'di ni gzugs la sogs pa'i zab pa nyid do/ /chos zhes bya ba ni stong pa nyid la sogs pa'i chos rnams so/ /yang dag par bstan pas dga' ste/ rab 'byor gyis gsol pa ni bcom ldan 'das ngo mtshar to zhes bya ba la sogs pa'o/ /zhib mor bya ba ni mkhas shing rig pas so/ /mya ngan las 'das pa bstan pa ni bsgom pa'i lam la gnas pa'i phyir mi ldog pa la kun du brtags pa thams cad mi snang ba'i phyir ro/ / gzugs la sogs pa las bzlog pa de dag ni don dam par snang ba'i phyir ro/ /de la mya ngan las 'das pas ni gzugs la sogs pa sgro btags pa'i mtha' las grol ba nyid do/ /gzugs la sogs pa las bzlog pas ni gzugs la sogs pa de nyid la skur pa 'debs pa'i mtha' las grol ba nyid do/ /'di ni stong pa nyid la sogs pa'i zab pa nyid do/ /de nas bstan bcos las/ nges 'byed yan lag dang mthong ba'i/ /lam dang bsgom pa'i lam nyid la/ /yang dang yang du sems pa dang / /mjal dang nges rtog bsgom pa'i lam/ /zhes bya ba gsungs so/ /yang dang yang zhes bya ba ni rgyun no/ /de bas na rgyun dang ldan pa'i sems pa dang / mjal ba dang / nges par rtog pa'i rang gi ngo bo ni bsgom pa'i lam mo/ /dmigs pa ni stong pa nyid la sogs pa ste/ stong pa nyid la sogs pa ni nges par 'byed pa'i cha dang mthun pa dang / mthong ba'i lam dang bsgom pa'i lam gyi rten yin no/ /gal te bsgom pa'i lam de nyid ji ltar yul yin zhe na/ de ni rgyun chags yin pa'i phyir/ bsgom pa'i lam ni rgyun chags yin par 'dod de de la snga ma ni yul yin la/ phyi ma ni yul can yin pas de ni 'gal ba med do/ /'dir mdo ni bcom ldan 'das kyis bka' stsal pa zhes bya ba la sogs pa ste/ 'di skad ces bya ba ni ji skad du gsungs pa'i stong pa nyid la sogs pa'o/ /shes rab kyi pha rol tu phyin pa 'di lta bu dang ldan pa zhes bya ba ni rnam par rtog pa'i pha rol tu phyin pa thob pa shes rab kyi pha rol tu phyin pa ste/ mthong ba'i lam dang / bsgom pa'i lam dang / nges par 'byed pa'i cha dang mthun pa gsum zhes bya ba'i don to/ /de la shes rab kyi pha rol tu phyin pa 'di lta bu dang ldan pa ni 'brel pa ste/ 'di'i gzhi zhes bya ba'i don to/ /gang 'di dag sems par 'gyur nges par rtog par 'gyur zhes bya ba dang sbyar ro/ /ji ltar zhe na de'i phyir de bzhin du bdag gis zhes bya ba la sogs pa gsungs te/ gnas par bya zhes bya ba ni sems gcig tu nges par byas pas so/ /bslab par bya'o zhes bya ba ni mjal bas zhi gnas bskyed pas so/ /bsgrub par bya'o zhes bya ba ni nges par rtog pas lhag mthong bskyed pas so/ /bstan pa zhes bya ba ni gzhung thos pas so/ /bstan pa ni don thos pa las so/ /bstan pa ni gsal ba bsgrags pas so/ /rigs pa ni bzhi ste/ ltos pa'i rigs pa ni rgyu thams cad la ltos nas 'bras bu skye ba'o/ /bya ba byed pa'i rigs pa ni de dag las so sor 'bras bu'i khyad par bskyed pa'o/ /'thad pa sgrub pa'i rigs pa ni tshad mas gang dag gi don sgrub par byed pa'o/ /chos nyid kyi rigs pa ni ngo bo nyid kyis nges pa'i chos rnams te/ me nyid ni sreg par byed pa dang / chu nyid ni gsher bar byed pa nyid la sogs pa lta bu'o/ / 'di dag gis ting nge 'dzin gyi dmigs pa la skyil mo krung bcas te/ mi g.yeng bar gus par byed pa dang / rtag tu spyod pa ni sems pa'o/ /de nyid la zhi gnas rnam pa dgus sems mnyam par byed pa ni 'jam pa'o/ /chos rnam par 'byed pa dang / rtag tu rnam par 'byed pa dang / rab tu rnam par 'byed pa dang / yongs su rtog pa dang / yongs su dpyod pa la zhugs pa'i lhag mthong rnam pa bzhi ni nges par rtog pa'o/ /de la phung po lnga la sogs pa ji snyed yod pa shes pa ni rnam par 'byed pa'o/ /'di thams cad stong pa la sogs pa ji lta ba bzhin du yod par shes pa ni/ rab tu rnam par 'byed pa'o/ /shes rab dang bcas pa rnam par mi rtog pa'i yid kyis mtshan mar byed pa ni yongs su rtog pa'o/ /nges par rtog pa ni yongs su dpyod pa ste/ 'di ni bsgom pa'i lam gyi ngo bo nyid do/ /rnam pas rnam pa dgur bzhed do/ /zhes bya ba ni bsgom pa'i lam de ni rnam pa'i dbye bas rnam pa dgur 'gyur ro/ /yang zhes bya bas mthun pa'i phyogs kyang rnam pa dgu'o/ /ji lta zhe na/ de'i phyir/ chung dang 'bring dang chen po rnams/ /chung ngu'i chung sogs dbye ba yis/ /zhes bya ba gsungs te/ /chung ngu'i chung ngu dang / chung ngu'i 'bring dang / chung ngu'i chen po dang / 'bring gi chung ngu dang / 'bring gi 'bring dang / 'bring gi chen po dang / chen po'i chung ngu dang / chen po'i 'bring dang / chen po'i chen po ste/ des na mi mthun pa'i phyogs kyang rnam pa dgu nyid do/ /de la lam nyid kyi rnam pa ni rjes su mthun par skye bar 'gyur ro/ /mi mthun pa'i phyogs de dag ni mi mthun par 'gag par 'gyur ro/ /chen po'i chen po dang / chen po'i 'bring nas/ chung ngu'i chung ngu'i bar du'o/ /mi mthun pa'i phyogs de yang bsgom pa'i lam gyis spang bar bya ba ste/ nyon mongs pa'i rnam par rtog pa'o/ /ci rigs par dri ma rags par sngar bsal nas/ phyi nas phra ba sel to/ /de bzhin du sems kyi yang yin te/ de la dang po ni de bzhin du zhes bya ba la sogs pas gsungs so/ /gnyis pa ni de ltar zhes bya ba la sogs pas bstan to/ /de nas lnga ni gzhan yang zhes bya ba lnga nas ches mang du bskyed do zhes bya ba lnga'i bar gyis gsungs so/ /de nas gnyis ni gzhan yang zhes bya ba gcig nas/ rab 'byor gyis gsol pa zhes bya ba'i bar du gsungs so/ /de bzhin du zhes bya ba ni ji skad gsungs pa'i rim pas so/ /bsgrub pa na zhes bya ba ni zhi gnas kyis so/ /nye bar sems pa na zhes bya ba ni lhag mthong gis so/ /yongs su rtog pa zhes bya ba ni gnyi ga dag gis so/ /rab tu sbyor ba zhes bya ba ni zhi gnas la sogs pas so/ /rtsol ba zhes bya ba ni lhag mthong la brtson pas so/ /'bad par byed pa ni gnyi ga la brtson pas so/ /bcom ldan 'das rang nyid kyis dris pa ni las ci tsam zhig byed par 'gyur zhes bya ba'o/ /nyid kyis lan bka' stsal pa ni 'di lta ste/ dper na zhes bya ba la sogs pa'o/ /dang po'i don du 'gyur ba ni mdzes pa'o/ /gzhan gyis yongs su zin pa zhes bya ba ni gzhan gyi dbang ngo / /dbang med pa zhes bya ba ni nus pa med pa'o/ /'khor ba la zhes bya ba ni skye ba'i rgyun 'byung ba la'o/ /'dor ba zhes bya ba ni spangs pa la'o/ /rgyab kyis phyogs pa ni ma 'ongs pa mi 'byung ba'i phyir ro/ /mthar 'byin par byed do zhes bya ba ni sngon gyi mtha' dang / phyi ma'i mthar 'byin par byed do/ /ji skad gsungs pa zhes bya ba ni snga ma bzhin no/ /ji ltar bshad pa dang / ji ltar nye bar bstan pa zhes bya ba ni bshad pa dang bstan pa'o/ /slob pa ni zhi gnas la'o/ /rtog pa ni lhag mthong gis so/ /nye bar sems pa ni gnyi gas so/ /de ltar rnal 'byor du byed pa ni bsgom pa la zhugs pa'o/ /'di tsam gyis ni las gcig bstan to/ /gnyis pa ni nyes pa gang dag gis zhes bya ba nas/ rnam par spong ngo zhes bya ba'i bar gyis gsungs te/ 'di ni bsgom pa'i lam chung ngu'i chung ngu'o/ /rab 'byor de ltar na zhes bya ba la sogs pa gsungs pa la/ de ltar zhes bya ba ni bshad ma thag pa bzhin no/ /las ji tsam zhes bya ba la sogs pa ni bskal pa shin tu mang po'i mthar phyin par byed pa dang / yang dag par rdzogs pa'i byang chub las ldog pa'i nyes pa spong bar byed pa'o/ /byang chub sems dpa' gang zhes bya ba nas khyad du 'phags so zhes bya ba'i bar gyis ni khyad par du gsungs te/ de bas na zhes bya ba ni sbyin par byed pas so/ /'di nyid khyad du 'phags pa ni bsod nams mang pos khyad du 'phags so/ /gang zhe na de'i phyir gang 'di zhes bya ba la sogs pa gsungs so/ /'di ni bsgom pa'i lam gyi chung ngu'i 'bring ngo / /gzhan yang rab 'byor zhes bya ba la sogs pa gsungs pa la sbyin pa ni gtong ba'o/ /rab tu 'god pa zhes bya ba ni yid la gcags pa med pa'o/ /'di ni bsgom pa'i lam gyi chung ngu'i chen po'o/ /gzhan yang rab 'byor zhes bya ba la sogs pa la/ yid la byed pa ni gnas pa'o/ /'di ni bsgom pa'i lam gyi 'bring gi chung ngu'o/ /gzhan yang rab 'byor zhes bya ba la sogs pa gnyis ni rtogs sla'o/ /gzhan yang rab 'byor zhes bya ba la sogs pa la/ chos kyi sbyin pa de yang shes rab kyi pha rol tu phyin pa las gsungs pa'i yongs su bsngo bas yongs su bsngo ba'o/ /'di ni bsgom pa'i lam chen po'i chung ngu'o/ /rab 'byor gzhan yang zhes bya ba la sogs pa la/ chos kyi sbyin pa de shes rab kyi pha rol tu phyin pa las gsungs pa'i yongs su bsngo bas yongs su bsngo zhing / bsngos nas yang nang du yang dag 'jog la rnal 'byor du byed pa'o/ /'di ni bsgom pa'i lam chen po'i 'bring ngo / /gang yang de nang du yang dag 'jog pa ni shes rab kyi pha rol tu phyin pa dang ma bral ba'o/ /'di ni bsgom pa'i lam chen po'i chen po'o/ /rab 'byor gyis gsol pa zhes bya ba gsungs pa la/ 'dir bsod nams mang du bskyed do zhes mang du gsungs pa la/ de'i phyir rab 'byor gyi dri ba ni mngon par 'du byed pa ni rnam par rtog pa yin la/ de bzhin du bsod nams mngon par 'du byed pa yang rnam par rtog pas te/ de'i phyir bsod nams ches mang ba yang rtog pa ches mang ngo zhes gsung bar 'gyur ro zhe na/ lan bcom ldan 'das kyis bka' stsal pa ni/ rab 'byor zhes bya ba nas dpag tu med pa bskyed do zhes bya ba'i bar du ste/ 'dir bsgom pa'i lam mtshan nyid ji lta ba bzhin du med pa'i phyir stong pa ste/ byis pas mi shes pa ni stong pa'o/ /kho na ni nyid do/ /de bzhin du snang ba zhes bya ba la/ rab tu snang ba ni snang ba'o/ /mi snang ba las snang bar 'gyur ba ni snang ba ste/ rab tu snang ba zhes bya ba'i don to/ /de bzhin du 'og ma dag la yang blta bar bya'o/ /bdag po med pa'i phyir gsog go/ /gzung bar bya ba ma yin pa'i phyir gsob bo/ /'dzin pa med pa'i phyir snying po med pa'o/ /de ltar zhes bya ba ni snying po nyid la sogs pa'o/ /lhag ma ni rtogs par sla'o/ /bsod nams grangs med pa bskyed pa dris pa'i lan no/ /rab 'byor gyis gsol pa zhes bya ba la sogs pa la khyad par ni bye brag go/ /rnam par bcad pa ni tha dad pa ni tha dad du byed pa'o/ /de dag rnam par bcad pa'i don du gnyi ga gzung ba yin no/ /tshad med ces bya ba ni rags pa yongs su bcad pa'o/ /grangs ni bgrang ba'o/ /zad par mi nus pa ni mi zad pa'o/ /bcom ldan 'das gang gzugs kyang zhes bya ba la sogs pa ni rtogs sla'o/ /lhag ma'i tshig ni tshig bla dgas te tshig gtso bo zhes bya ba'i don to/ /mi zad pa zhes bya ba ni nam mkha' dang 'dra ba'o/ /dpag tu med pa zhes bya ba yang nam mkha' dang 'dra ba nyid do/ /chos de dag ni zhes bya ba ni mi zad pa dang / dpag tu med pa dang / stong pa dang / mtshan ma med pa la sogs pa'o/ /brjod pa ni sgra dang 'dra ba yang rnam pa sna tshogs pa'o/ /de ltar na don gcig yin yang cha yis rnam par bcad pa tha dad do zhes dgongs so/ / de nyid kyi phyir 'dir ni bstan pa mngon par bsgrub pa zhes bya ba gsungs te/ bstan pa ni 'dis bstan pas na bstan pa ste/ snying rje'o/ /de mngon par bsgrub pa ni rgyu mthun pa'o/ /de yang yin bstan pa yang yin pas na bstan pa mngon par bsgrub pa'o/ /'dir bstan bcos las/ grangs med la sogs bstan pa rnams/ /dam pa'i don du bzod ma yin/ /kun rdzob de dag thugs brtse ba'i/ /rgyu mthun gyur par thub pa bzhed/ /ces bya ba gsungs te bzod ma yin zhes bya ba ni mi rigs pa'o/ /de ni grangs med pa la sogs pa bstan pas rgol ba'i lan no/ /rab 'byor gyis gsol pa zhes bya ba nas mod kyi 'on kyang zhes bya ba'i bar du gsungs pa la/ brjod du ma mchis pa zhes bya ba ni gang gi spyod yul ma yin pa'i phyir ro/ /shes rab kyi pha rol tu phyin pa'i don zhes bya ba ni stong pa nyid kyi mtshan nyid do/ /'dir bstan bcos las/ dngos po brjod du med pa las/ nyams pa dang ni 'phel mi rung / /bsgom zhes bya ba'i lam gyis ni/ /ci zhig nyams shing ci zhig 'thob/ /ces bya ba gsungs te/ 'di ni brjod du med pa la nyams pa dang / 'phel ba med pa'i dngos po'o/ /'o na ji ltar byang chub 'thob par 'gyur zhe na/ de'i phyir 'on kyang zhes bya ba nas le'u rdzogs kyi bar du gsungs pa la de sbyin pa sbyin par byed cing yid la byed pa de dag dang sems bskyed pa de dag ces bya ba ni gang gis sbyin pa sbyin par byed pa'o/ /dge ba'i rtsa ba de dag ces bya ba ni gang sems bskyed pa de dag dang ldan pa'o/ /byang chub ji lta ba de bzhin du de ni 'dod pa'i don du sngo bar byed do/ /gzhan du na de'i yongs su bsngo bas byang chub par mi 'gyur ro/ /de bzhin du 'og ma dag la yang sbyar bar bya'o/ /ji ltar bla na med pa yang dag par rdzogs pa'i byang chub ces bya ba gsungs pa la/ de'i phyir de nas bcom ldan 'das zhes bya ba la sogs pas dris so/ / bcom ldan 'das kyis bka' stsal pa ni rab 'byor bla na med pa yang dag par rdzogs pa'i byang chub 'di ni de bzhin nyid de zhes bya ba la sogs pa'o/ /rgyun mi chad pa zhes bya ba ni yang nas yang du'o/ /mang du zhes bya ba ni rgyun du'o/ /de ltar zhes bya ba la sogs pa ni mjug bsdu ba'o/ /'dir bstan bcos las/ byang chub ji ltar de bzhin du/ /'di nyid 'dod pa'i don sgrub byed/ /byang chub de bzhin nyid mtshan nyid/ /de yang de yi mtshan nyid bzhed/ /ces bya ba gsungs te/ de dang de'i zhes bya ba ni bsgom pa'i lam mo/ /stong pa nyid gtso bor ston pa'i le'u ni stong pa nyid kyi le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u bcwa brgyad pa'o// //de nas bcom ldan 'das la zhes bya ba nas/ sogs par 'gyur zhes bya ba'i bar du gsungs pa la/ sems snga ma dang / phyi ma de dag dang / byang chub 'brel pa med pa'i phyir ro zhes bya ba ni rgol ba'o/ /de skad ces gsol pa dang zhes bya ba nas 'tshang yang rgya'o zhes bya ba de yan chad kyis ni mar me'i dpes lan btab pa'o/ /'dir bstan bcos las/ sems ni snga mas byang chub par/ /rigs min phyi mas kyang ma yin/ /zhes bya ba'i rgol ba'o/ /mar me'i dpe'i tshul gyis ni byang chub pa zhes bya bar sbyar ro/ /'di ni lan btab pa'o/ /de nas bstan bcos las/ zab mo'i chos nyid rnam pa brgyad/ /byang chub ces bya bar sbyar ro/ /de bzhin nyid kyi mtshan nyid kyi byang chub 'ba' zhig le'u bco brgyad par bstan nas/ gang yang byang chub kyi mtshan nyid 'khor dang bcas pa ni zab pa rnam pa brgyad do/ /de ji ltar rnam pa brgyad yin zhe na/ skye ba dang ni 'gag pa dang / /de bzhin nyid dang shes bya dang / shes dang spyod yul gnyis med dang / / thabs mkhas pa la zab pa nyid/ /ces bya ba gsungs te/ gnyis su med pa dang thabs la mkhas pa ni gcig tu bsdu ba'i zlas dbye ba'o/ /de'i phyir de skad ces bka' stsal pa dang zhes bya ba nas rten cing 'brel par 'byung ba 'di zab lags so zhes bya ba'i bar gyis ni rab 'byor gyis zab pa nyid kyi skabs ston par byed do/ /gzhan las zhes bya ba ni de dag ma yin pa'o/ /de skad ces gsol pa dang zhes bya ba nas/ thabs la mkhas pa'o zhes bya ba'i bar gyis ni zab pa rnam pa brgyad gsungs te/ sems gang zhes bya ba ni yang dag pa ma yin pa'i kun tu rtogs pa 'khrul pa'i bdag nyid do/ /'gag pa zhes bya ba ni rgyun zad pa'i phyir 'gag pa'o/ /ma lags pa zhes bya ba ni ma yin pa'i don te/ 'khrul pa'i rgyu gnyis su mngon par zhen pa zad pa'i phyir ro zhes dgongs so/ /'di ni skye ba zad pa'o/ /sems gang skye ba zhes bya ba ni 'khrul pa med pa ste/ 'khrul pa chad pas sems la rag las pa nyid kyi phyir sems skye ba'o zhes dgongs so/ /'gag pa'i chos can zhes bya ba ni skad cig ma re re la zhes dgongs so/ /'gag pa zhes bya ba ni rgyun 'gag pa zhes dgongs so/ /ma lags so zhes bya ba ni rang gi ngang gis skye ba ste/ smon lam la sogs pa'i khyad par dang bcas pas 'gag pa med par byas pa nyid kyi phyir ro zhes dgongs so/ /sems gang ma byung zhes bya ba ni skye ba zab pa gang gsungs pa'o/ /gang 'gag pa'i chos can zhes bya ba ni 'das ma thag par gang bstan pa'o/ /gang 'gag pa'i chos zhes 'dir yang brjod pa ni de bzlas par 'gyur ba'o/ /gang sems zhes bya ba ni gang sems kyi rgyun no/ /ma byung ma 'gags pa'i chos can zhes bya ba ni thog ma dang tha ma med pa nas so/ /chos gang zhes bya ba ni mya ngan las 'das par brjod pa'i 'gog pa'o/ /ngo bo nyid kyis 'gag pa zhes bya ba ni rang bzhin gyis 'gag pa'o/ /chos nyid ces bya ba ni stong pa nyid do/ /'di ni 'gag pa zab pa'o/ /de bzhin du gnas sam zhes bya ba ni nam ji srid nam mkha' gnas pa de srid du de bzhin nyid ther zug par mi 'gyur ram zhe na/ ma lags so zhes bya ba smos te/ rgyun gyis brtags pa'i phyir ro zhes dgongs so/ /de bzhin nyid zab ces bya ba ni yang dag pa'i ye shes kyang phra ba nyid kyi phyir ro/ /'di ni de bzhin nyid zab pa'o/ /de bzhin nyid la sems yod dam zhes bya ba ni de shes pa nyid kyi phyir de'i rten yin no/ /ma lags so zhes bya ba ni shes pa las shes bya tha dad pa nyid du mi rigs pa'i phyir ro/ /sems de de bzhin nyid yin nam zhes bya ba ni/ mtshan nyid gcig pa nyid kyi phyir ro zhes dgongs so/ /de bzhin nyid las gud na yod dam zhes bya ba ni mtshan nyid tha dad pa nyid kyis so/ /ma lags so zhes bya ba ni mtshan nyid tha dad kyang de'i bdag nyid kyis so/ /de'i phyir gzung bar bya ba yin yang de bzhin nyid ces bya ba ma yin te/ 'di ni shes bya zab pa'o/ /yang dag par rjes su mthong ngam zhes bya ba ni sems kyi ngo bo'o/ /ma lags so zhes bya ba ni 'dzin par byed pa ma yin pa nyid kyi phyir ro/ /de nyid kyi phyir 'dzin par byed pa ma yin yang sems ni rig par byed pa ste/ 'di ni shes pa zab pa'o/ /zab mo la spyod dam zhes bya ba ni shes rab kyi pha rol tu phyin pa'i don la'o/ /yongs su rgyu ba ni dmigs pa'i mtshan ma la'o/ /mi 'jug pa ni mi 'byung ba'o/ /rgyu bar 'gyur ba ma mchis pa ni mi snang ba'o/ /'di ni spyod pa zab pa'o/ /mtshan ma la spyod dam zhes bya ba ni gnyis kyi mtshan ma 'am/ gnyis ma yin pa'i mtshan ma la'o/ /ma lags so zhes bya ba ni gnyis kyi mtshan ma med pa dang / gnyis ma yin pa'i mtshan ma med pa'o/ /mtshan ma zhes bya ba ni gnyis dang gnyis ma yin pa'i mtshan ma'o/ /ma bsgoms sam zhes bya ba ni ma spangs pa'o/ /ma lags so zhes bya ba ni spangs pa nyid ces bya'o/ /'di ni gnyis su med pa'i zab pa'o/ /ji ltar zhes bya ba ni ji ltar yang ngo / /mtshan ma rnam par bshig par 'gyur zhes bya ba ni sangs rgyas kyi chos thams cad yongs su ma rdzogs par zhes bya bar dgongs so/ /rab 'byor gyis lan gsol pa ni bcom ldan 'das zhes bya ba la sogs pa gsungs te/ 'di nyid du zhes bya ba ni skye ba nyid du'o/ /ci'i phyir zhe na yang gal te zhes bya ba la sogs pa gsungs te/ nyan thos su 'gyur ro zhes bya ba ni yang dag par rdzogs pa'i byang chub tu mi 'gyur ba'o/ /bcom ldan 'das zhes bya ba la sogs pa ni mjug bsdu ba'o/ /mtshan nyid gang lags pa'i mtshan ma zhes bya ba ni gang chos kyi mtshan ma dang / gang chos nyid kyi mtshan ma de thams cad shes pa'o/ /yongs su 'dris pa ni goms pa tsam byed pa'o/ /'di ni thabs la mkhas pa'i zab pa'o/ /de la zab pa brgyad ni byang chub dang rgyang ring ba yin la/ lhag ma ni nye ba yin no zhes zab pa brgyad bstan to/ /slob pa phyir mi ldog pa'i tshogs bstan nas/ srid pa dang zhi ba mnyam pa nyid brjod par bya ste/ de'i phyir bstan bcos las/ chos rnams rmi lam 'dra ba'i phyir/ / srid pa zhi ba mi rtog pa/ /zhes gsungs pa la 'di ni 'khor ba dang / 'di ni mya ngan las 'das pa zhes tha dad par brtags pa 'khor ba dang / mya ngan las 'das pa mnyam pa nyid du shes pa bsgom pa'i lam ste/ de dag mi dmigs pa'i phyir chos thams cad rmi lam lta bur mthong ngo / /yang dag pa ma yin pa kun du rtog pa ni 'khor ba yin par der yang 'khrul pa tsam ste/ 'khrul pa zad na mya ngan las 'das pa ma yin nam gang gi tshe de dag mnyam pa nyid du shes/ gal te bsgom pa'i lam mngon du gyur pa na chos thams cad bdag med par yang dag par shes pa la sogs pa yin no zhe na/ 'di ni mthong ba'i lam la yang med na de las bsgom pa'i lam khyad par ci zhig yod/ de bas na de la khyab pas de ni mnyam pa nyid du shes par gzung ngo zhe na/ de yang mi dmigs te ldang ba'i shes pa ni 'khrul pa ste/ rmi lam dang 'dra ba nyid kyi phyir rmi lam mo/ /bsgom pa'i lam gyi yang dag pa'i ye shes ni nyin par dang 'dra ba ni nyid kyi phyir nyin par ro/ /de gang gi tshe ldan par 'gyur zhe na/ nyin par khyad par du goms par gyur na/ rmi lam du yang shes rab kyi pha rol tu phyin pa rnam par 'phel te/ de ni mdo las de nas tshe dang ldan pa shA ri'i bu zhes bya ba nas/ rnam par 'phel lam zhes bya ba'i bar gyis dris so/ /rab 'byor gyis smras pa zhes bya ba nas/ rgyas par 'gyur ro zhes bya ba'i len te/ rnam par mi rtog pa zhes bya ba ni rnam par mi rtog pa'i khyad par te/ /rnam par mi rtog pa dang khyad par med pa'o/ /shes rab kyi pha rol tu phyin pa la goms pa zhes bya ba ni bsgoms pa'i lam la goms pa'o/ /'dir ni 'khor ba dang mya ngan las 'das pa mnyam pa nyid du shes pa'o/ /shA ri'i bus smras pa zhes bya ba la sogs pa la/ 'dir rmi lam gyi sgras ni rmi lam nyid brjod do/ /zad pa'i 'du shes zhes bya ba la zad pa ni mya ngan las 'das pa ste/ de'i 'du shes su brjod do/ /yang dag pa'i don du rtog pa ni rtog pa'o/ /log pa ni rnam par rtog pa'o/ /de bzhin du zhes bya ba ni nam mkha' dang 'dra ba dang / de bzhin gshegs pa dang 'dra ba'o/ /sems dang sems pa dang / blo dang rnam par rtog pa zhes bya ba ni don gcig go/ /dben pa zhes bya ba ni ngo bo nyid med pa'o/ /blo 'khrul pas med pa nyid la mtshan mar byas nas dmigs par byed do/ /sems pa zhes bya ba ni rtogs par sla'o/ /lus kyi mngon sum du zhes bya ba ni lus kyi rten no/ /de'i phyir log pa ni lus kyi mngon sum du gyur pa'o/ /lus kyang mngon sum du gyur pas don 'di zhes bya ba ni rgol ba'o/ /lan ldon par 'gyur ro zhes bya ba ni lan 'debs par 'gyur ba'o/ /ma pham pa ni byams pa zhes bya ba'i rnam grangs so/ /chos gang lan ldon par byed pa zhes bya ba ni byams pa'o/ /lan glan par bya ba zhes bya ba ni dris pa'o/ /chos gang gis zhes bya ba ni tshig go/ / chos gang gi zhes bya ba ni shA ri'i bu'i'o/ /skrag pa skyes pa ni skrag pa skyes pa'o/ /yang dag par skrag pa skyes pa ni dngang ba'o/ /skrag pa de rgyun skyes pa ni shin tu dngang ba'o/ /stobs bskyed pa ni bsgom pa'i stobs kyis bag chags so/ /'dir bstan bcos las/ las med la sogs klan ka yi/ /lan ni ji skad bshad par zad/ /ces bya ba gsungs te/ 'di ni 'khor ba dang mya ngan las 'das pa mnyam pa nyid la rgol ba'i lan no/ /zhing dag pa bla na med pa brjod par bya ste/ de'i phyir bstan bcos las/ sems can 'jig rten de bzhin du/ snod kyi 'jig rten ma dag pa/ /de la dag pa sgrub pa yis/ /sangs rgyas zhing ni dag pa nyid/ /ces bya ba gsungs te/ gang gi tshe gang du sangs rgyas gcig 'byung ba de ni sangs rgyas kyi zhing ste/ de dag pa ni yongs su dag pa'o/ /de gang du 'byung zhe na/ dag pa'i 'jig rten snang bar ro/ /gang ma dag pa de ni gcan gzan dang / chom rkun la sogs pa'o/ /gang de bzhin du snod kyi 'jig rten ma dag pa ni gcan gzan gyi dgon pa la sogs pa'o/ /de la rang gi sangs rgyas kyi zhing yongs su dag par sangs rgyas par bsgrub pa'i phyir/ yum chen mo dag las bdag gi sangs rgyas kyi zhing rnam pa thams cad du 'di lta bur ma gyur cig ces 'di dag rgyas par gsungs so/ /'dir mdor bsdus pa ni gzhan yang shA ri'i bu zhes bya ba nas/ yongs su rdzogs par bya'o zhes bya ba'i bar du gsungs pa la/ skrag pa la sogs pa dgag pa bstan nas de nyid la ltos te gzhan yang zhes bya ba'i sgra brjod par bya ste/ bgrod dka' ba'i sa ni dgon pa'o/ /gcan gzan gyis mtshon pa'i dgon pa ni gcan gzan gyi dgon pa'o/ /chus sbangs pa'i dgon pa ni chu'i dgon pa'o/ /gal te 'am 'on te'i sgra ni gal te'i don to/ /lha'i longs spyod ces bya ba la sogs pa ni bdag gi sangs rgyas kyi zhing du thams cad ces bya ba dang sbyar te/ khrag la sogs pa'i bza' ba btsal bar bstan pa yin no/ /bdog pa thams cad nyid yongs su gtong ba'i dge ba'i rtsa ba'o/ /gang 'di na zhes bya ba ni snod kyi 'jig rten no/ /bde ba dang ldan pa zhes bya ba ni bde ba yod pa'o/ /bde ba dang phrad pa 'di dag la ni bde ba gtong ba yod pa ni bde ba dang phrad par 'gyur ba'o/ /thams cad ni thams cad du'o/ /nad kyi dgon pa ni 'go ba'i nad do/ /de tsam zhes bya ba ni sems kyi skad cig pa'i tshad do/ /sngon gyi mtha' med pa ni 'di lta ste mtha' med pa'o/ /cha shas med pa'i skad cig ma la ni mtha' yod pa ma yin pa'o/ /de 'di zhes pa ni gang yang zhes bya ba'i don to/ /ma byung ba ni sngon med pa ste/ shes rab kyi pha rol tu phyin pa stong phrag brgya pa las gsungs so/ /'di ni sangs rgyas kyi zhing yongs su dag pa'o/ /de nas 'khor der zhes bya ba nas le'u rdzogs kyi bar gyis ni de la bstan pa las byung ba de gsungs pa la/ chags pa med pa zhes bya ba ni ma reg par bar snang la'o/ /nam mkha' zhes bya ba ni nam mkha' kho na la'o/ /yongs su grub pa dbang du gyur pa'o/ /tshad yod pa ni tshad nges pa'o/ /ma legs par 'gyur ba zhes bya ba ni sdug bsngal gyis gnod pa'o/ /lhag ma ni rtogs sla'o/ /sring mo gang gA'i lha mos mtshon pa ni de'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u bcu dgu pa'o// // zhing yongs su dag pa bstan nas/ thabs la mkhas pa brjod par bya ste/ de'i phyir bstan bcos las/ 'di yi yul dang sbyor ba ste/ /dgra rnams las ni 'das pa dang / /mi gnas ji bzhin shugs dang ni/ /thun mong ma yin mtshan nyid dang / /ma chags pa dang mi dmigs dang / mtshan ma smon lam zad pa dang / de yi rtags dang mtshan med pa/ /thabs la mkhas pa rnam pa bcu/ /zhes bya ba gsungs te/ thabs la mkhas pa 'di'i yul ni thog mar brjod par bya ste/ de nas thog mar goms par bya ba'i sbyor ba'o/ /de nas rab tu dbye ba rnam pa bcu ste/ dgra rnams las 'das pa la sogs pa'o/ /gang la mtshan ma dang smon lam zad pa yod pa de dag la de skad ces bya'o/ /de nas bcom ldan 'das la zhes bya ba nas mngon sum du mi byed do zhes bya ba'i bar gyis yul gsungs so/ /stong pa nyid kyi ting nge 'dzin zhes bya bas ni mtshan ma med pa dang / smon pa med pa dang / byang chub kyi phyogs la sogs pa nye bar mtshon pa'i phyir/ stong pa nyid ces bya ba ni stong pa nyid kyi ting nge 'dzin to/ /ting nge 'dzin ni rgyun no/ /ji ltar brtag par bya zhe na/ gzugs zhes bya ba gsungs te/ de zhes bya ba ni stong pa nyid do/ /chos nyid ces bya ba ni chos kyi rang bzhin no/ / chos nyid kyis zhes bya ba ni chos kyi snying por gyur pas so/ /yang dag pa'i mtha' zhes bya ba ni stong pa nyid 'ba' zhig tu gyur pa ni yang dag pa'i mtha' 'o/ /'di ni thabs la mkhas pa'i yul lo/ /de skad ces bka' stsal pa dang zhes bya ba nas mngon sum du mi byed do zhes pa'i bar gyis gsungs pa la/ mnyam par ma bzhag pa zhes pa ni mngon sum du bya ba la mi 'jug pa nyid do/ /skabs der zhes bya ba ni 'di'i sangs rgyas kyi chos rnams yongs su ma smin pa'i bar du'o/ /de ltar zhes bya ba ni gsungs pa'i rim pas so/ /bskyed pa ni nye bar bsags pa'o/ /lhag ma ni rtogs sla'o/ /'di ni thabs la mkhas pa'i sbyor ba'o/ /rab 'byor 'di lta ste dper na zhes bya ba nas/ mngon sum du byas pa ma yin no zhes bya ba'i bar du gsungs pa la/ dpa' ba ni 'jigs pa med pa'o/ /rtsal che ba ni spro ba'o/ /brtan pa ni rab tu gnas pa'o/ /spobs pa ni smra bar nus pa'o/ /nan tan ni bsgrub pa'o/ /gang du yul la sogs pa gsungs pa de shes pa ni yul la sogs pa shes pa'o/ /mthar phyin pa ni lus dang / ngag dang / yid las su rung ba'o/ /der gyur pa ni thob pa'o/ /mtshon cha dang go cha zhes bya ba ni khrab la sogs pa'o/ / dran pa dang ldan par gyur pa ni brjed pa med pa'o/ /blo gros ni rtogs pa'o/ /rtogs pa chen po ni shes pa'o/ /'jigs pa med pa ni mkhas pa'o/ /'di ni dgra nyid yin pas na dgra ste bar du gcod pa'o/ /de dag las 'das pa ni tshad med pa rnam pa bzhis so/ /'di ni thabs la mkhas pa dang po'o/ /rab 'byor 'di lta ste dper na zhes bya ba nas mi ltung ngo zhes bya ba'i bar gyis gsungs pa la/ rgyu ba zhes bya ba ni 'gro ba'o/ /sa la mi ltung zhes bya ba ni brten pa dang gnas pa'o/ /ci la mi rten zhes bya ba ni gnas pa dang brten pa la 'gog pa'o/ /gnas pa zhes bya ba ni 'dug pa'o/ /de la yang mi brten mi gnas so zhes bya ba ni thob pa 'gog pa'o/ /de la yang zhes bya ba ni gnas pa la mi rten pa'o/ /mi ltung ngo zhes bya ba ni gnas pa med pa'i phyir te/ mi ltung ngo zhes bya ba ni gnas pa med pa zhes bya ba'i don to/ /'di ni brten pa dang / gnas pa bkag pas mi gnas pa'i thabs so/ /rab 'byor 'di lta ste dper na zhes bya ba nas/ mngon sum du mi bya'o zhes bya ba'i bar gyis gsungs pa la/ bzlog pa zhes bya ba ni nam mkha' nyid la 'jog pa'o/ /ltung du mi ster zhes bya ba ni ldog tu mi ster ba'o/ /mda' 'phangs pa'i shugs kyis yun ring por lhung du mi ster ba'o/ /de bzhin du 'di ni sangs rgyas kyi chos yongs su ma smin par bar ma dor rtogs pa de sems dang sems gzhan gyi shugs kyis mngon sum du mi byed do/ /de las 'da' ba'i tshul gyi shugs kyis thabs la mkhas pa'o/ /de skad ces bka' stsal pa dang zhes bya ba nas/ yang dag pa'i mtha' mngon sum du mi byed do zhes bya ba'i bar gyis gsungs pa la/ spyod cing zhes bya ba ni zhi gnas kyis so/ /gnas te zhes bya ba ni lhag mthong gis so/ /ting nge 'dzin la mnyam par gzhog cing zhes bya ba ni gnyi ga dag gis so/ /bdag gis zhes bya ba ni rang gis so/ /mngon par bsgrub pa zhes bya ba ni rjod par byed pa'o/ /ting nge 'dzin yang yin la rnam par thar pa'i sgo yang yin pas rnam par thar pa'i sgo'i ting nge 'dzin te/ grol ba'i sgo yin pa'i phyir ro/ /sems bskyed pa ni sems mngon par bsgrub pa'o/ /'dis na 'di dka' ba byed pa'o/ /de ltar nyan thos dang rang sangs rgyas thun mong ma yin pa nyid kyi phyir thun mong ma yin pa'i thabs mkhas pas so/ /gzhan yang rab 'byor nam zhes bya ba nas 'thob par 'gyur ro zhes bya ba'i bar gyis gsungs pa la sems can ni bdag dang skyes bu'o/ /dbang po rnams ni tha dad pa la sogs pa'o/ /stobs rnams kyang lnga nyid do/ /byang chub kyi yan lag rnams ni bdun nyid do/ /lam ni yan lag brgyad do/ /sems can du lta ba ni chags pa'o/ /sems can rnams kyis de spang ba'i phyir mngon par rdzogs par sangs rgyas nas dam pa'i chos bstan par bya'o zhes chags pa med pa'i stong pa nyid la sogs pa la snyoms par zhugs pa'i phyir ma chags pa'o/ /de dang ldan pa yin pa'i phyir ma chags pa'i thabs la mkhas pa'o/ /gzhan yang rab 'byor zhes bya ba nas 'thob par 'gyur ro zhes bya ba'i bar gyis gsungs pa la/ chos kyi 'du shes zhes bya ba ni khams la sogs pa thams cad kyi 'du shes so/ /de ni dmigs pa'o/ /de dag spang ba'i phyir zhes bya ba la sogs pa ni snga ma bzhin no/ /de yang stong pa nyid la sogs pa la snyoms par zhugs pa'i mi dmigs pa'o/ /de dag dang ldan pa ni mi dmigs pa'i thabs la mkhas pa'o/ / gzhan yang rab 'byor zhes bya ba nas/ thob par 'gyur ro zhes bya ba'i bar gyis gsungs pa la/ bud med dang / skyes pa dang / gzugs dang sgra rnams ni 'du shes kyi mtshan ma'o/ /de dag spang bar bya ba'i phyir zhes bya ba ni snga ma bzhin no/ /de bzhin du mtshan ma med pa la snyoms par zhugs pa ni mtshan ma med pa'o/ /de dang ldan pa ni mtshan ma med pa'i thabs la mkhas pa'o/ /gzhan yang rab 'byor zhes bya ba nas 'thob par 'gyur ro zhes bya ba'i bar gyis gsungs pa la/ lha dang brgya byin dang 'khor los sgyur bar gyur cig ces bya ba la sogs pa'i srid pa'i longs spyod 'dod pa ni smon pa'o/ /de'i rtsa ba ni phyin ci log rnam pa bzhi'o/ /phyin ci log de ldang ba'i phyir zhes bya ba la sogs pa ni snga ma bzhin no/ /de ni smon pa ste de dang ldan pa ni smon pa med pa'i thabs la mkhas pa'o/ /rab 'byor zhes bya ba nas/ go skabs med do zhes bya ba'i bar gyis gsungs pa la/ mi dmigs pa la sogs pa'i thabs la mkhas pa rnam par thar pa'i sgo gsum gyi yul bstan nas/ 'di'i mngon par 'du mi byed pa la sogs pa'i khyad par gyi yul rdzogs te/ da ni de brjod par bya ste/ mngon par 'du mi byed par ltung zhes bya ba ni dman pa'i byang chub tu'o/ /khams gsum pa dang zhes bya ba ni 'khor ba nyid do/ /rab 'byor de bzhin du zhes bya ba nas/ mi gnod pa'i phyir ro zhes bya ba'i bar gyis gsungs pa la/ yang dag par rdzogs pa'i byang chub mngon par rdzogs par 'tshang rgya bar 'dod pa'i byang chub sems dpas byang chub sems dpa' mngon par shes pa la dri bar bya ba ni yang dag par rdzogs pa'i byang chub 'di ltar bsgrub pa dang / ji ltar 'dris par bya ba zhes gal te de skad ces 'dri na stong pa nyid la sogs pa nyid la bsgom pa dang / yongs su 'dris par gyis la mngon sum du ni ma byed cig /de yang thabs la mkhas pas sems can yongs su mi gtong ba la sogs pa'i sems kyis so/ /de ltar ston pa de ni phyir mi ldog pa'i rtags so/ /de'i phyir 'di la de'i rtags ston pa ni de'i rtags kyi thabs la mkhas pa'o/ /rab 'byor gyis gsol pa zhes bya ba nas mi 'phrogs pa'o zhes bya ba'i bar gyis gsungs pa la/ byang chub kyi phyir spyod pa mang yang de ltar shes shing lan ldon pa gang yin pa de dag ni nyung ngo / /de dag ni phyir mi ldog par lung bstan pas/ /lha dang mi dang / lha ma yin du bcas pa'i 'jig rten gyis mi 'phrogs te/ gang gi phyir nyung ba de'i phyir tshad yod pa'o/ /'di ni tshad med pa'i thabs la mkhas pa'o/ /de bas na de ltar dgu pa'i phyed nas bzung nas/ /nyi shu pa'i phyed snga ma'i bar gyi bcu gcig gis ni rnam pa kun mngon par rdzogs par rtogs pa'o/ /de'i 'og tu rtse mo'i mngon par rtogs pa brjod par bya ste/ de'i phyir/ de yi rtags dang rnam 'phel dang / /brtan dang sems kun gnas pa dang / / mthong zhes bya dang bsgom pa zhes/ /bya ba'i lam ni so so la/ /rnam par rtog pa rnam bzhi yi/ /gnyen po rnam pa bzhi dang ni/ /bar chad med pa'i ting nge 'dzin/ /log par bsgrub dang bcas pa ni/ /rtse mo'i mngon rtogs zhes bya ba/ /tshigs su bcad pa gnyis dang / /yi ge drug gis 'di sngar mdor bstan to/ /de la dngos po ni brgyad do/ /rtags dang / rnam par 'phel ba dang / brtan pa dang / sems kun du gnas pa dang / mthong ba'i lam gyi mi mthun pa'i phyogs kyi gnyen po dang / bsgom pa'i lam gyi mi mthun pa'i phyogs kyi gnyen po dang / bar chad med pa'i ting nge 'dzin dang / log par lta ba'o/ /de la rtags kyi dbang du byas nas bstan bcos las/ rmi lam na yang chos rnams kun/ /rmi lam lta bur lta la sogs/ /rtse mor phyin pa'i sbyor ba rnams/ /rnam pa bcu gnyis dag tu bzhed/ /ces bya ba gsungs te/ rtse mor phyin pa zhes bya ba ni rab kyi mthar phyin pa'o/ / sbyor ba zhes bya ba ni thams cad mkhyen pa nyid kyi sbyor ba'o/ /yang rab 'byor gal te zhes bya ba nas rig par bya'o zhes bya ba'i bar gyis gsungs pa/ rmi lam gyi nang na yang zhes bya ba ni chos thams cad rmi lam dang 'dra bar mthong ba'o/ /mngon sum du mi byed do zhes bya ba ni rtags dang po'o/ /gzhan yang rab 'byor zhes bya ba nas mtshan nyid du rig par bya'o zhes bya ba'i bar gyis gsungs pa la/ rmi lam gyi nang na yang nyan thos kyi sa 'am/ rang sangs rgyas kyi sa 'am/ khams gsum la 'dod par mi byed pa 'di gnyis pa'o/ /gzhan yang rab 'byor zhes bya ba nas/ mtshan nyid du rig par bya'o zhes bya ba'i bar gyis gsungs pa la/ rmi lam gyi nang na yang gnyi ga'i dge 'dun gyi 'khor chen pos yongs su bskor cing / bdag nyid de bzhin gshegs par mthong ba 'di ni gsum pa'o/ /gzhan yang rab 'byor zhes bya ba nas/ mtshan nyid du rig par bya'o zhes bya ba'i bar gyis gsungs pa la/ rmi lam na yang nam mkha' la mngon par 'phags te/ sems can rnams la chos ston par byed cing / 'jig rten gyi khams gzhan dag tu sangs rgyas kyi mdzad pa byed cing / dge slong dag mngon par sprul te/ bdag nyid de bzhin gshegs par shes pa 'di ni bzhi pa'o/ / gzhan yang zhes bya ba nas rig par bya'o zhes bya ba'i bar gyis gsungs pa la/ rmi lam na yang bdag nyid dam/ gzhan dag la gsod pa dang / bcing ba dang / mgo bcad pa la sogs par mthong na skrag par mi 'gyur te/ sad nas kyang 'di ltar khams gsum pa 'di dag ni rmi lam lta bu ste/ bdag mngon par rdzogs par byang chub nas de lta bu'i chos bstan par bya'o zhes bya ba 'di ni lnga pa'o/ /gzhan yang rab 'byor zhes bya ba nas rig par bya'o zhes bya ba'i bar gyis gsungs pa la/ rmi lam na yang dmyal ba la sogs pa'i sems can mthong nas/ /'di snyam du 'di nas bdag mngon par rdzogs par sangs rgyas pa'i sangs rgyas kyi zhing der/ ngan song thams cad mi 'byung ba de ltar bya'o zhes bya ba ni drug pa'o/ /gzhan yang rab 'byor zhes bya ba nas rig par bya'o zhes bya ba'i bar gyis gsungs pa la/ rmi lam na gal te grong tshig par mthong na/ sad nas 'di snyam du sems te/ ji ltar ngas rmi lam du phyir mi ldog pa'i rtags kyi mtshan nyid mthong nas/ bden pa 'dis grong tshig pa la sogs pa zhi bar gyur cig ces bya ba nas gal te zhi bar gyur na de ni rtags bdun pa'o/ /gzhan yang rab 'byor zhes bya ba nas le'u rdzogs kyi bar gyis gsungs pa la/ gal te sems can la la mi ma yin pas zin cing non pa ni nang du zhugs pa'i phyir ro/ /de la byang chub sems dpa'i byin gyis brlabs byed pa ni gal te bdag sngon gyi sangs rgyas rnams kyis bla na med pa'i byang chub tu lung bstan cing mngon par rdzogs par byang chub la/ bdag gi lhag pa'i bsam pa yongs su dag na/ sangs rgyas bcom ldan 'das rnams la ji ltar mi mkhyen pa cung zad kyang med pas/ bden pa 'dis mi ma yin pa 'di gud du song shig ces byas nas/ gal te bden pa'i byin gyi rlabs des gzhan du song ba de ni rtags brgyad pa'o/ /thabs la mkhas pa la dpyad pa ni yongs su shes pa'o/ /de'i don gyi le'u ni le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u nyi shu pa'o// //yang rab 'byor de la zhes bya ba la sogs pa de ni bdud kyi las kyi le'u ste nyi shu rtsa gcig pa/ de dag gi skabs gang yin zhe na/ theg pa la gsar du zhugs pa'i byang chub sems dpa' bden pa'i byin gyi rlabs kyis 'bras bu sgrub par byed pa na log pa'i nga rgyal bskyed pa'i bdud mang po 'byung bar 'gyur te/ de ni 'di'i skabs so/ /de la zhes bya ba ni 'das ma thag tu bstan pa'i byin gyi rlabs so/ /brtson par byed do zhes bya ba ni bdud kyi rang bzhin gyi skabs bya ba de'i ched du spro ba'o/ /stobs ni spro ba dang nus pa'o/ /gzi brjid ni stobs kyi nus pa'o/ /brtson pa ni bdag nyid kyi nga rgyal mang ba'o /brnyas pa zhes bya ba la sogs pa la brnyas pa ni ma gus pa'o/ /'phya ba ni khong nas bzhad gad byed pa'o/ /'thing slad byed pa ni yid kyis brnyas par byed pa'o/ /smod pa ni nyes par mthong ba'o/ /bshung bar byed pa ni skyon brjod pa'o/ /lung bstan to zhes bya ba'i sgra ni gtan tshigs so/ /nga rgyal bskyed pa par 'gyur zhes bya ba la sogs pa la/ 'dir yang dag pa'i sgra ni thams cad de zhes bya ba'i don to/ /bskyed par 'gyur zhes bya ba ni skyed par byed pa'o/ /'phel bar byed pa ni sngon du 'gro bar byed pa'o/ /ston par byed pa ni ston par byed pa'o/ /rgyas par byed pa ni rgya che bar byed pa'o/ /'byung bar byed pa ni mthong bar byed pa'o/ /de nga rgyal zhes bya ba la sogs pa la/ gzhan dag las sems lhag par mtho ba nyid du byed pa ni nga rgyal gyi spyi ste/ de ni sngar bstan to/ /'dir ni de dag gi khyad par brjod par bya ste/ gang de dman pa las mtho bar sems pa de ni nga rgyal lo/ /gang mnyam pa las lhag par sems pa de ni lhag par nga rgyal lo/ /gang khyad par du 'phags pa las nga rgyal ba ni nga rgyal las kyang nga rgyal lo/ /phyir mi ldog pa nyid ma thob par bdag gis thob po zhes sems mtho ba de ni mngon pa'i nga rgyal lo/ /gang yang phyir mi ldog pa'i yon tan ma yin pa la/ bdag la yon tan yod do zhes pa de ni log pa'i nga rgyal lo/ /de lta bu'i sems can chen po mthong na zhes 'og ma dang sbyar bar bya'o/ /lhag ma ni de dag nyid kyi khyad par ro/ /bdud kyis bcings pa de nyid ces bya ba ni nga rgyal lo/ /gzhan yang rab 'byor zhes bya ba la sogs pa gsungs pa la/ ming ston pa ni ming brjod pa'o/ /zhan pa ni dbang po rtul po'o/ /dgon pa pa zhes bya ba la sogs pa ni sbyangs pa'i yon tan dag go/ /grong las phyi rol rgyang grags kyi pha rol du ni dgon pa'o/ /der gnas pa na dgon pa pa'o/ /de bsod snyoms kho na za bas na bsod snyoms pa'o/ /de'i phyag dar kho na gyon pas na phyag dar khrod pa'o/ /nyi ma phyed dang nye ba kho na za bas na/ phyis mi len pa'o/ /stan gcig kho na la za bas na/ stan gcig pa'o/ /lan cig bting ba'i stan la rtag tu nyal bas na/ gzhi ji bzhin pa'o/ /chos gos gsum las lhag pa med pas na/ chos gos gsum pa'o/ /dur khrod dang nye ba kho na na gnas pas na dur khrod pa'o/ /shing drung kho na na gnas pas na shing drung pa'o/ /mtshan mo cog pur gnas pas na cog pu pa'o/ /ma bkag cing go skabs yod pas bla gab med pa'o/ /bal gos nyid gyon pa'i phyir phying pa pa'o/ /zas nyung ngu za bas na 'dod pa chung ba'o/ /ngan ngon tsam gyis dga' ba ni chog shes pa'o/ /gcig pu nyid yin pas na rab tu dben pa'o/ /mthong ba'i chos 'di la skyes par gyur pa ni mthong ba'i chos so/ /de ston pa ni rjod par byed pa'o/ /ji ltar zhe na/ khyod ni sngon yang zhes bya ba la sogs pa gsungs te/ yang gi sgra ni de'i phyir gyi don to/ /byin gyis brlabs pa ni zil gyis gnon pa'o/ /sbyangs pa'i yon tan gyis yo byad bsnyungs pa 'dren par byed do/ gzhu 'dren pa bzhin no/ /rlom sems bskyed pa zhes bya ba 'di ni nga rgyal zhes bya ba'i don to/ /lhag ma sbyangs pa'i yon tan de lta bu dag yod do zhes bya ba ni rtogs sla'o/ /de nas yang rab 'byor zhes bya ba la sogs pa gsungs pa la/ ming gis byin gyis brlabs zhes bya ba la 'dir ming ci zhig yin zhe na/ phyir mi ldog pa'i sgra dang / de'i yon tan gyi sgra'o/ /khengs pa'i zil gyis non pa zhes bya ba la/ khengs pa ni bla ma la ma gus pa'o/ /gang des zhes bya ba ni byang chub sems dpas so/ /rjes su brtags shing zhes bya ba ni rjes su rnam par sems pa'o/ /'di nyid rjes su bstan pa ni 'og ma rjes su bstan pa dang / rjes su brtags pa la yang sbyar te/ bdag gi ming ci zhig tu 'gyur zhes bya ba'o/ / rjes su dpyad pa ni bdag gi ming ni 'dir 'gyur ro zhes bya ba'o/ /lung ston to zhes bya ba ni 'chad par 'gyur ba ste bdud do/ /rjes su 'brang ba ni 'dod par byed pa'o/ /mtshungs par gyis zhes bya ba ni mi slu bas so/ /ci zhig gang gis slu bar byed ce na/ de'i phyir ming dang ming du zhes gsungs so/ /de las ci zhig tu 'gyur zhe na/ rgyu zhing 'khor nas zhes bya ba gsungs te/ de dang de dag tu ngan song du skye ba'o/ /gal te yang zhes bya ba'i yang gi sgra ni bsdus pa'i don to/ phra mo ni phra ba zhes bya ba ni rig par dka' ba'o/ /dgon pa ni sngar ji skad bstan pa bzhin no/ / nags 'dab dang / ri'i phug dang / dur khrod dang / sog ma'i phung po zhes bya ba ni phan tshun ldan pa'i zlas dbye ba'o/ /sogs pa'i sgras ni shing drung la sogs pa'o/ /dgon pa zhes bya ba ni dgon pa na yod pas dgon pa'o/ /'di nyid kyi phyir bas mtha' dang / yul mi byed pa zhes bya ba ni yul mi byed pa'i gnas so/ /dben pa ni stong pa'o/ /dben par gyur zhes bya ba ni bral ba'o/ /grong gi nang na zhes bya ba ni nye ba 'am phyogs gcig na'o/ /yid la byed pa nyid dben pa'o/ /rten pa ni mngon par zhen pa chung ba'o/ /zhen pa ni 'bring ngo / /chags pa ni chen po'o/ /de nyid kyis bdag nyid ni brtan par byed pa'i phyir te/ lhag par chags par zhugs pa'o/ /'dres pa zhes bya ba ni khyim pa dang rab tu byung ba'o/ /kun tu 'dres pa ni rab tu byung ba nyid dang ngo / /byang chub sems dpa' gdol pa zhes bya ba ni de dang 'grogs par bya ba ni ma yin pa'i phyir ro/ /byang chub sems dpa' sun 'byin pa ni rang gi skyon gyis de dag sun 'byin par byed pa'i phyir ro/ /byang chub sems dpa' gzugs brnyan ni gzugs 'dra ba'i phyir ro/ /byang chub sems dpa' 'dra bar 'chos pa ni dad pa mang po'i nang na nag po nyid lta bu'o/ /rkun ma ni dge sbyong gi cha byad kyis chos rku ba'o/ /byang chub sems dpa'i nang na rkun po ni 'dod par bya ba ma yin pa'o/ /lha dang bcas pa'i 'jig rten na rkun po ni log pa'i sbyin gnas yin pa'i phyir ro/ /de lta bu'i rang bzhin can zhes bya ba la sogs pa la/ de lta bu ni dam pa rnams kyis bsnyen par bya ba ni ma yin zhes rgyas par gsungs te/ mthu ni stobs so/ /'phags pa ma yin pa ni sdig pa'o/ /skyo ba ni 'jigs pa'o/ /re zhig de dag la yang zhes bya ba ni de 'dra ba la yang bskyab par bya na/ sems can thams cad la lta ci smos/ byams pa la sogs pa 'di dag gis ni byams pa la sogs pa bzhi'i yul gyi khyad par tha dad par gsungs so/ /'di ltar zhes bya ba la sogs pa ni smon lam mo/ /'di yang zhes bya ba ni de nas yang zhes bya ba la sogs pa thams cad do/ /mngon par rig pa zhes bya ba ni mngon par brtags pa'o/ /brtul ba zhes bya ba ni skyes bu byed pa'o/ /'di yang zhes bya ba la sogs pas ni bdud kyi las phyi ma mjug bsdu ba'o/ /bdud kyi las mngon par brjod pa'i le'u de la de skad ces brjod do/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u nyi shu rtsa gcig pa'o/ / //de nas yang bcom ldan 'das kyis zhes bya ba nas/ phan 'dogs par 'gyur ba yin no zhes bya ba'i bar gyis gsungs pa la/ shes rab kyi pha rol tu phyin pa nyid ces bya ba ni gtso bor nges par gzung ba'o/ /ji ltar gcig de'i yin pa de bzhin du lhan cig drug kyang yin pa de'i phyir/ 'di thams cad ces bya ba gsungs so/ /ga las shes she na/ pha rol tu phyin pa drug ni ston pa'o zhes bya ba la sogs pa gsungs so/ /de nyid du 'jug pa dang / shes pa dang ston pa ste gang 'bras bu dam pa'o/ /de'i phyi ma nyid ni lam mo/ /snang ba ni 'jig rten las 'das pa'i shes pa ste/ rab tu dga' ba'o/ /de nyid ni sgron ma ste/ de yang 'bad pas bgrod pa'i lam/ dri ma med pa la sogs pa'i sa drug go/ /de nyid ni 'od de nyin par mi snang ba'o/ /de yang 'bad pa med pas bgrod pa'i lam/ mi g.yo ba la sogs pa'i sa'o/ /de'i phyir de nyid ni dkon mchog gsum ste/ des ni zhes bya ba ni skyabs so/ /gling zhes bya ba'i bar gyi tshig gi don ni snga ma bzhin no/ /de nyid lam 'dzin pa dang gso ba'i phyir ma'o/ /de nyid srog 'dzin pa'i phyir pha'o/ /shes pa'i phyir zhes bya ba ni mthong ba'i lam gyi phyir ro/ /rtogs pa'i phyir zhes bya ba ni bsgom pa'i lam gyi phyir ro/ /de ci'i phyir zhe na zhes bya ba ni shes rab kyi pha rol tu phyin pa'i yon tan ji skad gsungs pa/ gzhan la med pa ci'i phyir zhe na bya ba'i don to/ /rab 'byor 'di la zhes bya ba la sogs pa'i don ni lan no/ /dus gsum gyi sangs rgyas rnams kyi thams cad mkhyen pa nyid kyang 'di las skyes so zhes bstan pa'i phyir/ rab 'byor gang zhes bya ba la sogs pa gsungs te/ skyes pa ni grub pa'o/ /'dus shing zhes bya ba ni ci rigs par nang du 'dus pa'o/ /sangs rgyas kyi ye shes zhes bya ba la sogs pa ni sngar bshad pa nyid de/ sems can thams cad la phan 'dogs par ro zhes bya ba dang sbyar ro/ /nam zhes bya ba la sogs pa 'di ni dge ba'i bshes gnyen la brten pa ste/ rtags dgu pa'o/ /rab 'byor zhes bya ba nas/ 'di nyid la bslab par bya'o zhes bya ba la sogs pa gsungs pa la/ gang gi phyir 'di nyid rab tu 'dren pa yin pa de lta bas na/ gzhan gyi dring mi 'jog pa zhes bya ba la sogs pa'o/ /'di ni gzhan gyi dring mi 'jog pa nyid de rtags bcu pa'o/ /rab 'byor gyis gsol pa zhes bya ba nas rnam par byang bar yang snang ngo zhes bya ba'i bar gyis gsungs pa la/ chags pa med pa'i mtshan nyid dmigs pa med pa'i mtshan nyid yin pa'i phyir te/ chos thams cad kyi rang gi mtshan nyid mi dmigs pa'i phyir ro/ /rab 'byor de bzhin du gzugs la sogs pa yang stong pa nyid kyi phyir dang / rnam par dben pa'i phyir ro/ /bcom ldan 'das gal te zhes bya ba la sogs pa ni dri ba'o/ /yang mi 'gyur zhes bya ba ni yang ma yin no zhes bya ba'i don to/ /mngon par zhen pa ni dngos po nyid du 'dzin pa'o/ /bcom ldan 'das yum gyi chos ni ma chags pa'i mtshan nyid de nyid do/ /de lta mod kyi kun nas nyon mongs pa dang rnam par byang ba ni yod do/ /'di ni rtags bcu gcig pa'o/ /rab 'byor gyis gsol pa zhes bya ba nas 'tshang rgya bar 'gyur ro zhes bya ba'i bar gyis gsungs pa la/ mi brdzi bar 'gyur ro zhes bya ba ni mi 'phrogs pa'o/ /de lta bu zhes bya ba ni chos thams cad rnam par dben pa zhes bya ba la sogs pa'o/ /mi brdzi ba nyid thob pa'i phyir rtags bcu gnyis pa ste/ 'di ni rtags bstan pa'o/ /rnam par 'phel ba brjod par bya ste/ de'i phyir bstan bcos las/ 'dzam bu'i gling gi skye bo snyed/ /sangs rgyas mchod pa'i dge la sogs/ /dper mdzad nas ni rnam mang du/ /rnam 'phel bcu drug bdag nyid do/ /zhes bya ba gsungs te/ rnam par 'phel ba bcu drug ni mdo las gsungs te/ ci zhig byas nas she na/ dper mdzad nas so/ /ji lta bu zhe na/ 'dzam bu gling gi skye bo sems can gang ji snyed yod pa de dag mdo las gsungs pa'i bdag nyid chen pos mir gyur cing / sems bskyed pa'i mtshan nyid kyis/ gang sangs rgyas la mchod pa'i dge ba'i bsod nams gang yin pa de dag la sogs pa ni dpe'o/ /de la sogs pa'i sgras ni nor bu rin po che chen po rnyed nas/ ston pa la sogs pa yongs su bzung ngo / /rnam pa mang zhes bya ba la/ rnam pa mang po gsungs pa ni dpe med par yang ngo / /de la dang po ni rab 'byor yang gal te zhes bya ba nas/ de ltar bya'o zhes bya ba'i bar gyis gsungs pa la/ nam 'tsho'i bar du zhes bya ba ni tshe ji srid par ro/ /sbyin pa de zhes bya ba ni gang sangs rgyas dang / gang sems can rnams la'o/ /yid la byed pa la gnas na zhes bya ba ni 'phel ba yang dag par gzung ngo / /ma gtogs pa zhes bya ba ni dpe'o/ /de dag tu de ma gtogs pa de ci'i phyir zhe na zhe'o/ /gsad par gtogs pa bzhin du zhes bya ba'i gsad pa'i gnas la gtogs pa bzhin du'o/ /chud gzon pa zhes bya ba ni mi thob pa'o/ /de ltar shes rab kyi pha rol tu phyin pa dang ldan pa'i yid la byed pas nyin mtshan 'da' bar byed pas/ de ni rnam par 'phel ba dang po'o/ /rab 'byor 'di lta ste dper na zhes bya ba nas de mi 'phel mi 'grib bo zhes bya ba'i bar gyis gsungs pa la/ shes rab kyi pha rol tu phyin pa zhes bya ba ni de srid du btsal bar bya'o zhes bya ba dang sbyar ro/ /ji lta bus she na/ thams cad mkhyen pa nyid dang ma bral ba'i sems kyis so/ /kha cig tu ma bral ba zhes bya ba la/ yid la byed pa'i sgra'i sngon rol du 'don pa de ni mi rigs te/ de 'am gzhan yang rung ste/ glegs bam tha dad pa'i phyir ro/ /shes rab kyi pha rol tu phyin pa dang ldan pa yid la byed pa dang / skad cig kyang mi 'bral ba'i phyir/ 'di ni rnam par 'phel ba gnyis pa'o/ /rab 'byor gyis gsol pa zhes bya ba nas/ 'di ni gnas med do zhes bya ba'i bar gyis gsungs pa la/ mi skye ba'i chos la bzod pa thob pas/ lung bstan pa thob pa 'di ni rnam par 'phel ba gsum pa'o/ /rab 'byor gyis gsol pa zhes bya ba nas/ le'u ma rdzogs kyi bar gyis ni/ mngon par rdzogs par byang chub par lung bstan pa la rlom sems med pa nyid kyi phyir/ 'di ni rnam par 'phel ba bzhi pa'o/ /dge ba'i bshes gnyen la sogs pa'i le'u ni dge ba'i bshes gnyen gyi le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u nyi shu rtsa gnyis pa'o// //yang de'i tshe lha rnams kyi zhes bya ba nas/ 'byin par 'gyur ro zhes bya ba'i bar gyis gsungs pa la/ lha dang / mi dang / lha ma yin du bcas pa'i 'jig rten nyan thos dang / rang sangs rgyas thams cad kyi theg pa can dang / thabs la mi mkhas pa'i byang chub sems dpa' rnams zil gyis gnon par 'gyur ro/ /de dag gis ni zil gyis gnon par mi 'gyur ba de ni rnam par 'phel ba lnga pa'o/ /byang chub sems dpa' sems dpa' chen po zhes bya ba nas/ le'u rdzogs kyi bar gyis gsungs pa la/ 'jig rten skyong ba bzhi dang / brgya byin dang / de las gzhan pa'i lha de dag der nye bar 'ong bar 'gyur ba zhes bya ba la sogs pa dang / 'brel pa ni drug pa'o/ /brgya byin gyis bstan pa'i le'u ni brgya byin gyi le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u nyi shu rtsa gsum pa'o/ / //de nas yang bcom ldan 'das zhes bya ba nas/ gnas par bya'o zhes bya ba'i bar gyis gsungs pa la/ sbyor bar 'gyur zhes bya ba ni rjes su sbyor bar 'gyur ba'o/ /ji lta zhe na/ 'di dag ces bya ba la sogs pa nas/ yongs su rdzogs par byed do zhes bya ba'i bar gyis gsungs so/ /mi rnyed ces bya ba la sogs pa ni ji ltar de bzhin gshegs pas mdo sde gzhan las gsungs pa'i rigs pa 'dis ni de ltar de ni med do zhes bya ba'i don to/ /gting ni rab tu gnas pa'o/ /ro ni myang ba'o/ /ming dang rus smos pa dang / sbyangs pa'i yon tan brjod pa ni snga ma bzhin no/ /zad par mi 'gyur ba ni 'phel ba'o/ /tshogs ni phung po'o/ /'di ni 'phel ba bdun pa'o/ /kun dga' bo zhes bya ba nas le'u rdzogs kyi bar thams cad ni rtogs par sla ste/ rnam par 'phel ba brgyad pa'o/ /byang chub sems dpa'i phyir mi ldog pa'i mngon pa'i nga rgyal gang yin pa ni phung khrol mang po'i rgyu yin la de la mtshon par byed pa'i le'u ni mngon pa'i nga rgyal gyi le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u nyi shu rtsa bzhi pa'o// //de nas bcom ldan 'das la zhes bya ba nas pha rol tu 'gro'o zhes bya ba'i bar gyis gsungs pa la/ gang la bslabs na thams cad mkhyen pa nyid la slob ces bya ba ni dris pa'o/ /zad pa dang / mi 'byung ba dang / 'gag pa med pa dang / skye ba med pa dang / dngos po med pa dang / dben pa dang / 'dod chags dang bral ba dang / nam mkha' dang / chos kyi dbyings dang / mya ngan las 'das pa la slob pa zhes bya ba ni lan no/ /'dir 'thad pa ni gang gi phyir de bzhin gshegs pa'i de bzhin nyid gang yin pa de'i de bzhin gshegs pa ni mi zad pa ste/ mi zad pa nyid kyi phyir zad pa'o/ /de'i 'byung ba dang / 'gag pa dang / skye ba dang / dngos po dang / dben pa dang / 'dod chags dang / nam mkha'i ngo bo dang / chos kyi ngo bo dang / mya ngan las 'das pa de yang yod pa ma yin te/ de ltar slob na shes rab kyi pha rol tu phyin pa la slob pa yin no/ /de la 'dis ni lam gsungs pa yin no/ /sangs rgyas kyi sa la slob po zhes bya ba la sogs pas ni 'bras bu gsungs pa yin no/ /bdud rtsi dbyings kyi sgo ni rnam par thar pa'i mgon por 'dod pa zhes bya ba ni mgon po nyid du 'dod pa'o/ /mngon par 'phags pa ni khyad par du 'phags pa'o/ /bya gsod pas na bya pa'o/ /rngon pa ni gsod pa'o/ /nya gsod pa ni nya pa'o/ /lug ni lug ste/ de gsod pa ni shan pa'o/ /mig med pa ni long ba'o/ /mi thos pa ni 'on pa'o/ /zhar ba ni mig gcig pa'o/ /rdum po ni lag pa ma tshang ba'o/ /sgur po ni rgyab nyams pa'o/ /zha bo ni lag ngar nyams pa'o/ /'theng po ni pus mo gshibs nas 'gro ba'o/ /grum po ni 'gro ba med pa'o/ /lkugs pa ni smra mi nus pa'o/ /dig pa ni tshig mi brtan pa'o/ /ldib pa ni lce mi bde ba'o/ /rna ba mi gsal ba ni sgra chen po thos pa'o/ /yan lag nyams pa ni smad pa'i yan lag go/ /yan lag ma tshang ba ni yan lag chung ba'o/ /yan lag mi sdug pa ni mi'i yan lag dang mi 'dra ba'o/ /'gyur zhes bya ba ni rdzogs par byed pa'o/ /de 'thob par 'gyur zhes bya ba ni stobs la sogs pa yongs su dag pa bskyed pa'o/ /lhag ma ni rtogs sla'o/ /gang pha rol tu 'gro ba 'di ni rnam par 'phel ba dgu pa'o/ /rab 'byor 'di lta ste zhes bya ba nas/ shin tu mang po zhes bya ba'i bar gyis gsungs pa la/ gser dang sa le sbram zhes bya ba ni ba dang glang gi tshul gyis so/ /ba tsha can ni ba tsha dang bcas pa'i sa'o/ / gram sa ni dgon dung ngo / /rtswa ni bi ra Na la sogs pa'o/ /sdong dum ni shing skam gyi tshal pa'o/ /tsher ma can ni po son cha la sogs pa'o/ /gang la rnam pa sna tshogs yod pa de la de skad ces bya'o/ /lhag ma ni rtogs sla'o/ /'di ni rnam par 'phel ba bcu pa'o/ /gzhan yang rab 'byor zhes bya ba nas/ shin tu mang po zhes bya ba'i bar gyis gsungs pa la/ 'di las 'khor los sgyur ba'i rgyal srid thob pas na de thob pa'o/ /'di ni rnam par 'phel ba bcu gcig pa'o/ /gzhan yang rab 'byor zhes bya ba nas/ shin tu mang po zhes bya ba'i bar gyis gsungs pa la/ 'di las brgya byin thob pa gang yin pa de ni thob pa'o/ /'di ni bcu gnyis pa'o/ /gzhan yang zhes bya ba nas rnal 'byor du bya'o zhes bya ba'i bar gyis gsungs pa la/ 'di las tshangs pa thob pa yod pas na thob pa ste/ 'di ni bcu gsum pa'o/ /gzhan yang rab 'byor zhes bya ba nas/ 'dus par 'gyur ro zhes bya ba'i bar gyis ni dge ba'i lo tog skye ba dang 'gal ba/ 'dod chags dang / zhe sdang dang / gti mug ni tha ba'o/ /the tshom ni bden pa dang dkon mchog la yid gnyis za ba'o/ /phrag dog ni gzhan gyi phun sum tshogs pa la khong nas 'khrug pa'o/ /lhag ma pha rol tu phyin pa drug gi mi mthun pa'i phyogs so/ /lhag ma ni rtogs sla'o/ /'di ni bcu bzhi pa'o/ /rab 'byor 'di lta ste zhes bya ba nas/ byang chub la nye bar 'gyur ro zhes bya ba'i bar gyis gsungs pa la/ mi shes pa zhes bya ba ni pha rol tu phyin pa'i mi mthun pa'i phyogs so/ /bsod nams kyi mchog yin pas na bsod nams kyi mchog go/ /sangs rgyas kyi yul ni sangs rgyas kyi chos thams cad do/ /dbang bsgyur ba ni khyu mchog ste/ de'i dngos po ni de nyid do/ /rnam par rol pas zhes bya ba ni/ rdzu 'phrul gyi cho 'phrul gyis so/ /seng ge'i sgra sgrogs pa ni rjes su bstan pa'i cho 'phrul gyis so/ /sangs rgyas kyi phun sum tshogs pa ni gnyi ga'i 'phags pa'i dge 'dun gyi dbang phyug go/ /rnam par dpyad pa ni yongs su shes pa'i phyir ro/ /'gal bar ni mi byed do zhes bya ba ni de dag la mi gnas pa'i phyir ro/ /lhag ma ni rtogs par sla ste/ /'di ni bco lnga pa'o/ /yang gal te zhes bya ba nas le'u rdzogs kyi bar du gsungs pa la/ de ste de yang dag par mi shes zhes bya ba ji ltar zhe na/ 'di ni zhes bya ba la sogs pa nas/ sdud pa'o zhes bya ba'i bar gyis gsungs so/ /de ltar yang zhes bya ba ni rnam pa 'di gsum nyid kyis so/ /gal te de ltar spyod na zhes bya ba ni de bzhin nyid du yang dag par mi shes yang dag par rjes su mi mthong na'o/ /'di ni 'phel ba bcu drug pa'o/ /bslab pa ston par byed pa'i le'u yin pas na bslab pa'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u nyi shu rtsa lnga pa'o/ / //rnam par 'phel ba bshad nas/ brtan pa brjod par bya ste/ de'i phyir bstan bcos las/ sems can don yongs mi gtong ba/ /kun mkhyen nyid gsum chos rnams kyi/ /yongs su rdzogs pa bla med pa/ /nges pa zhes ni mngon par brjod/ /ces gsungs te/ thams cad mkhyen pa nyid gsum gyis/ yang dag par bsdus pa'i chos ni kun mkhyen nyid gsum gyi chos so/ /bsgral ba dang / dgrol ba dang / dbugs dbyung ba ni yongs su mya ngan las 'das pa rnams ni sems can gyi don no/ /de'i phyir mdo las/ de nas lha'i dbang po brgya byin zhes bya ba nas/ bgyid pa legs so zhes bya ba'i bar gyis gsungs pa la/ spyod pa nyid kyang zhes bya ba gang du spyod pa yin zhe na/ rnam par 'phel ba la'o/ /ci zhig spyod pa yin zhe na/ sbyin pa tshogs pa la'o/ /sems 'jug pa zhes bya ba ni 'gro ba ste dang ba zhes bya ba'i don to/ /sems bskyed pa zhes bya ba ni kye ma'o bdag gis 'di rtogs par bya'o zhes bya ba'o/ /khyer bar gyur pa zhes bya ba ni 'chi bar 'gyur ba'o/ /mnyam pa ni rigs pa'o/ /pha rol ni skyon med pa'o/ /'gram ni mya ngan las 'das pa'o/ /de dag 'byor bar gyur cig ces bya ba ni sems bskyed pa dang sbyar ro/ /'tshal ba ni dga' bar byed pa nyid kyi phyir ro/ /yongs su bsams pa ni yang dang yang du bskyed pa'i phyir ro/ /yongs su bzung ba ni yongs su mi gtong ba'i tshul gyis so/ /sangs rgyas kyi chos rnams zhes bya ba la/ sangs rgyas ni thams cad mkhyen pa'o/ /de'i chos zhes bya ba ni bstan pa'o/ /'di'i bshad pa ni gsum ste/ thams cad mkhyen pa nyid kyi thams cad mkhyen pa nyid kyi dngos po ste/ gang gi phyir thams cad mkhyen par 'gyur ba'i thams cad mkhyen pa nyid dang / rang byung nyid dang / mi 'phrogs pa nyid do/ /de la rnam pa thams cad mkhyen pa nyid kyi chos thams cad yang dag par shes pa ni rnam pa thams cad mkhyen pa nyid do/ /'di'i chos rang nyid kyi sems kho na las 'byung bas na rang 'byung ste/ chos thams cad la dbang bsgyur ba zhes bya ba'i don to/ /de'i chos ni rang 'byung nyid kyis gang yang dag par bsdus pa'o/ /'di la mi 'phrogs pa yod pas na mi 'phrogs pa ste/ bag chags dang bcas pa'i sgrib pa thams cad las grol ba zhes bya ba'i don to/ /de'i chos ni gang mi 'phrogs pa nyid kyis yang dag par bsdus pa ste/ de dag thams cad yongs su rdzogs par gyur cig pa'o/ /'di tsam gyis ni yongs su rdzogs par bstan to/ /sems can gyi don yongs su mi gtong ba ni/ bcom ldan 'das bdag ni zhes bya ba la sogs pa gsungs te/ 'di dag ces gsungs pa gang zhe na/ ci nas zhes bya ba la sogs pa gsungs te/ ci nas zhes bya ba ni ji ltar zhes bya ba'i don to/ /'di ni nges pa'o/ /sems kun du gnas pa brjod par bya ste/ ting nge 'dzin zhes bya ba'i don to/ /de'i phyir bstan bcos las/ gling bzhi pa dang stong dag dang / stong gnyis gsum dag dper mdzad nas/ bsod nams mang po nyid kyis ni/ /ting 'dzin yongs su bsgrags pa yin/ /zhes bya ba gsungs te/ mdo las ni bsod nams mang po nyid kyis ting nge 'dzin bstan gyi/ mngon sum ni ma yin no/ /ji ltar zhe na gling bzhi pa dang / stong dang / stong gnyis dang / stong gsum gyi dpes so/ /gzhung gang gis she na/ bcom ldan 'das gang zhes bya ba nas mngon par bsgrub par 'gyur ro zhes bya ba'i bar gyis gsungs pa la/ de dag la zhes bya ba ni thams cad la'o/ /de dag la zhes bya ba ni 'dra ba la'o/ /chos nyid ni chos kyi tshogs sam ngo bo nyid do/ /srang grangs ni srang gi tshad do/ /tshad gzung bar zhes bya ba ni srang 'di tsam zhes bya bar ro/ /ci ste 'di dpe gang gis yin zhe na/ bsod nams kyi tshad ni 'dzam bu gling la sogs pa'i tshad de/ bstan bcos la yang nye bar gdags par bya'o/ /rjes su yi rang ba tsam la 'di tsam gyis bsod nams kyi tshad yin gyi/ ting nge 'dzin la ni ma yin nam zhe na/ rjes su yi rang ba'i bsod nams las rjes su dpag na bsod nams mang ba nyid na zhes bsams pas nyes pa med de/ rjes su yi rang yongs su rdzogs par bya ba'i phyir ro/ /de ltar mi byed pa la smad par bya ba'i phyir/ de skad ces bka' stsal pa dang zhes bya ba la sogs pa gsungs so/ /bdud kyis byin gyis brlabs pa zhes bya ba ni bdud kyis thabs mang pos spro ba med par byas pa'o/ /mi mnyam pa ni sgra las so/ /mi 'tshal ba ni don las so/ /ma mthong ba ni gus pas so/ /mi sems pa ni mngon du mi byed pa'o/ /bdud kyi phyogs kyi dngos po bdud kyi phyogs su gyur pa'o/ /de lta bu ni sems can gyi don chen po 'joms par byed pa'i phyir ro/ /bdud kyi gnas nas shi 'phos pa zhes bya ba ni bdud kho na dang de shin tu chos mthun pa'i phyir ro/ /mngon par bsgrub pa zhes bya ba ni bskyed pa'o/ /gang gis she na sems bskyed pa zhes bya ba la sogs pa ste/ yongs su bsngos pa zhes bya ba ni rjes su yi rang ba'o/ /rjes su yi rang ba'am zhes bya ba ni 'ba' zhig ma yin zhes bya ba lhag ma'o/ /gang yin zhe na rjes su yi rang ba zhes bya ba gsungs so/ /gang la gang gis she na/ bcom ldan 'das zhes bya ba la sogs pa dang / bcom ldan 'das gang gis zhes bya ba la sogs pa gsungs so/ /de skad ces gsol pa dang zhes bya ba nas/ rjes su yi rang bar bya'o zhes bya ba'i bar gyis ni brgya byin la ston pa'o/ /kau shi ka zhes bya ba nas/ rjes su yi rang ba'i phyir ro zhes bya ba'i bar gyis ni theg pa chen po la zhugs pa'i rjes su yi rang ba'i phan yon no/ /gang gis zhes bya ba la sogs pas ni dang po sems pa yang ngo / /rjes su yi rang 'ba' zhig ma yin gyi/ rang gi rgyud la bskyed pa dang / sgrub par yang 'gyur te/ rjes su yi rang ba yang nges par bsngo bar bya ba yin te/ ji ltar rjes su yi rang bar byas pa de ltar bsngo ba yongs su 'jug par rig par bya'o/ /ji skad du yum chen mo dag las rjes su yi rang ba'i dge ba'i rtsa ba de dag bla na med pa yang dag par rdzogs pa'i byang chub tu yongs su bsngo bar bya ste/ de ltar bsngo bar bya ba yang sems kyis sems spyod pa yang ma yin/ sems las gzhan du yang ma yin no zhes bya ba la sogs pa gsungs te/ de nyid rjes su yi rang ba dang ldan pa'i dge ba'i rtsa ba de nyid ni ting nge 'dzin 'di'i dmigs pa'o/ /yang dag par rdzogs pa'i byang chub tu yongs su bsngo ba ni rnam pa'o/ /sems kun du gnas pa ni ngo bo nyid do/ / kun du gnas pa'i ngo bo nyid gang yin zhe na/ sems ni 'dzin pa'i mtshan nyid ni ma yin te/ gzhan du yang ma yin zhes bya ba ni chos thams cad la ma yin pa'o/ /'on kyang chos thams cad kyi de bzhin nyid gnyis su med pa de lta bu la sems kun du gnas pa'o/ /mthong bas spang bar bya ba'i rnam par rtog pa gnyen po dang bcas pa brjod par bya ste/ de'i dbang du byas nas bstan bcos las/ 'jug pa dang ni ldog pa dang / /gzung ba'i rnam rtog so sor de/ /dgu yi bdag nyid ji bzhin yul/ /min pa'i bdag nyid dag ces bya/ /zhes bya ba gsungs te/ de la re zhig rnam par rtog pa ni gnyis su gzung ste/ gzung ba'i rnam par rtog pa ni gnyis yin pa'i phyir ro/ /ji ltar rnam par rtog pa dag yin zhe na/ gang gi phyir de dag gi yul ji lta ba bzhin ma yin pa'i bdag nyid la rtog pas na/ rnam par rtog pa'o zhes bya ba nas/ de dag gi yul yang gang yin zhe na/ 'jug pa'i phyogs dang ldog pa'i phyogs la'o/ /so sor zhes bya ba ni gnyis ka'i phyogs la yang ngo / /dgu'i bdag nyid ni dbye ba dgu'o/ /sems can btags dang rdzas yod par/ /rnam rtog 'dzin pa dag tu 'dod/ /so so'i skye bo 'phags byed pas/ /so sor de dag dgu'i bdag nyid/ /ces bya ba gsungs te/ gzhan rnam pa gnyis ni 'dzin pa'i rnam par rtog pa yin pa'i phyir/ ji ltar gnyis yin zhe na/ go rims bzhin du rdzas su yod pa dang / btags par yod pa ste/ sems can gyi rnam par rtog pa yin pa'i phyir ro/ /de la dang po ni so so'i skye bo rnams kyi'o/ /gnyis pa ni 'phags pa rnams kyi'o/ /de dag kyang so sor dgu'i bdag nyid do/ /ji ltar de dag 'dzin pa'i rtog pa yin zhe na/ yod pa ma yin pa kho na la 'dzin par rtog pa'i phyir/ ji bzhin ma yin pa ni rnam par rtog pa'o/ 'di nyid/ gal te gzung don de bzhin med/ /de dag gi ni 'dzin par 'dod/ /de ltar de dag 'dzin pa yi/ /ngo bos stong pa'i mtshan nyid do/ /zhes bya ba gsungs te/ 'dzin pa'i ngo bos zhes bya ba ni 'dzin pa yod pa'i ngo bos so/ /de dag ces bya ba ni 'dzin pa'i rnam pa dag go/ /rnam par rtog pa bzhi po 'di dag kyang yul gyi dbye bas so sor rnam pa dgu ste/ de la dang po'i dbang du byas nas bstan bcos las/ ngo bo nyid dang rigs dang ni/ /lam ni yan lag 'grub pa dang / /shes pa'i dmigs pa ma 'khrul ba/ /mi mthun phyogs dang gnyen po dang / /rang gis rtogs dang byed pa dang / /de yi las bya 'bras bu la/ /'jug pa'i phyogs kyi rten can gyi/ /rnam rtog de ni rnam dgur 'dod/ /ces bya ba gsungs te/ byed pa dang / de'i las dang bya ba'i 'bras bu ni byed pa dang / de'i las dang / bya ba'i 'bras bu'o/ /de'i ngo bo nyid la sogs pa dgu ni 'jug pa'i phyogs te/ byang chub sems dpas blang bar bya ba nyid yin pa'i phyir ro/ /de la brten pa 'di ni rnam par rtog pa ste/ des ni dang po'o/ /de'i phyir rnam par rtog pa'i dbang du byas nas/ mdo las tshig rnam pa dgu'o/ /de la dang po'i dbang du byas pa'i mdo'i tshig ni/ rab 'byor gyis gsol ba/ bcom ldan 'das sems sgyu ma lta bu zhes bya ba nas/ spyod do zhes bya ba'i bar gyis gsungs pa la/ sgyu ma mkhan gyis sprul pa'i glang po la sogs pa'i sgyu ma'o/ /de bzhin du gzhan yang gang snang yang yod pa ma yin te de ni sgyu ma lta bu'o/ /de bzhin du sems kyang 'dzin pa'i mtshan nyid yin pa'i phyir la 'dzin pa'i mtshan nyid kyang yod pa ma yin pa'i phyir te/ gzung ba med par 'dzin pa mi rigs so/ /gal te gzung ba'i dngos po ltar med ce na/ gal te shes pa la don snang bar 'gyur na ni gzung bar bya ba nyid yin na snang ba yang med de/ snang ba dang snang bar 'gal ba'i phyir ro/ /ji ste don bdag nyid kyis snang ba yin na ni/ shes pa des ci zhig bya/ de'i phyir sems ni sgyu ma lta bu'o/ /de med na ni ji ltar mngon par rdzogs par byang chub ces bya ba ni dri ba'o/ /bcom ldan 'das de ni ma lags so zhes bya ba ni lan te/ med pa'i phyir ro zhes dgongs so/ /gud na zhes bya ba ni lan no/ /chos de zhes bya ba ni bdag nyid do/ /ma lags so zhes bya ba ni de ni gtan du med pa nyid kyi phyir ro zhes dgongs so/ /'di nyid gsal bar bya ba'i phyir/ bcom ldan 'das bdag gis zhes bya ba la sogs pa gsungs te/ yod pa dang med pa zhes bya ba bstan par mi nus te/ rnam par shes pa'i ngo bo yod pa ma yin la zhes bya ba dang / dgag pa dag 'brel pa med pa'i phyir ro zhes dgongs so/ /chos gang la yang zhes bya ba ni rtogs par sla'o/ /'on kyang de lta bas na zhes bya ba la sogs pa la/ /'on kyang zhes bya ba ni mi bzod pa'o/ /de lta bas na zhes bya ba ni 'dzin pa'i mtshan nyid yin pa'i phyir la/ 'dzin pa'i mtshan nyid kyang mi rigs pa'i phyir ro/ /shin tu smos pas ni 'di ltar ston to/ /ji ltar 'dzin pa'i rang gi mtshan nyid kyis stong pa nyid de bzhin du mtshungs par ldan pa thams cad kyang ngo / /de dag kyang 'dzin pa'i mtshan nyid yin pa'i phyir ro/ /dmigs par gyur pa chos thams cad kyang dmigs pa ni gzung ba'i mtshan nyid yin pa'i phyir te/ chos thams cad kyang ci rigs par gzung bar bya ba dang / 'dzin pa'i mtshan nyid yin pa'i phyir ro/ /yang ji ltar gzung bar bya ba dang / 'dzin pa med ce na/ tha mi dad pa'i phyir gzung bar bya ba dang / 'dzin pa ni mi rigs te/ sor mo bzhin no/ /skyes pa tha dad pa ni pha rol la snang ba mi rigs pa'i phyir dang / ma skyes pa ni rang nyid kyis snang ba med pa'i phyir de ni bsgom par bya ba ma yin te/ yang dang yang du blo mi 'jug pa nyid na bong bu'i rwa bzhin no/ /de chos zhes bya ba la sogs pa la chos gang yang zhes bya ba ni yang dag par rdzogs pa'i byang chub la sogs pa'o/ / thob par bgyid pa ni skyed par byed pa'o/ /spong bar bgyid pa ni 'dor bar byed pa'o/ /med pa la ni cung zad kyang bya ba med pa'i phyir ro/ /gal te byang chub sems dpa' rten cing 'brel par 'byung ba 'di nyid la brten pa rdzogs par byang chub par 'gyur ro zhe na/ bcom ldan 'das ji ltar zhes bya ba la sogs pa gsungs te/ med pa la ni thob pa med do zhes bya ba bsams nas/ bla na med pa zhes bya ba la sogs pa la shes rab kyi pha rol tu phyin pa bzhin du shin tu dben par ji ltar 'gyur zhes bya ba ni mi 'gyur ba ste/ shin tu med pa ni bsgrub par bya ba dang / sgrub par byed pa mi rigs so zhes bsams so/ /de skad ces gsol pa dang zhes bya ba la sogs pa la/ gang gi phyir dang de'i phyir zhes bya ba ni 'bras bu ni rgyu dang rjes su mthun pa nyid kyi phyir ro zhes bya ba ni don to/ /rab 'byor gal te zhes bya ba la sogs pas ni gtan tshigs yongs su rdzogs par byed de/ gal te yang dag par shes pa ni rnam par rtog par 'gyur bas shes rab kyi pha rol tu phyin pa ma yin no/ /rab 'byor de ltar na zhes bya ba la sogs pas ni mjug bsdu ba ste/ mngon par rdzogs par 'tshang mi rgya ste zhes bya ba ni mngon par rdzogs par 'tshang mi rgya ba ni rnam par mi rtog pa'o zhes bsams so/ /mngon par rdzogs par 'tshang yang rgya ste zhes bya ba la sogs pa la/ kun du brtags pa'i ngo bor ni gsum po 'di dag med de/ des stong pa'i rnam par rig pa'i ngo bor ni yod do zhes dgongs so/ /de lta mod kyi kun rdzob ji ltar snang ba nyid med pa nyid kyi phyir stong pa nyid ni don dam pa'o/ /don zab mo la spyod do zhes bya ba ni gang gi phyir don la gzhan gyis spyod par mi nus pas dka' ba'i byed pa ste/ gang gi phyir de bcom ldan 'das kyis de mngon sum du mdzad par spyod kyang mngon sum du mdzad pa ni sems can gyi don gyi dbang gis so/ /bka' stsal pa'i don zhes bya ba ni mngon par dgongs pa'i don to/ /dka' ba ni gzhan dag la'o/ /sla ba ni byang chub sems dpa'o zhes bsams so/ /ci'i phyir sla zhe na/ thabs la mkhas pa nyid kyi phyir te/ thabs de yang shes rab kyi pha rol tu phyin pa nyid do/ /de'i phyir de nyid ni bcom ldan 'das 'di ltar zhes bya ba la sogs pa gsungs te/ gang zhes bya ba ni byang chub sems dpa'o/ /gang zhes bya ba ni zab mo'i don to/ /gang gis zhes bya ba ni shes rab kyi pha rol tu phyin pa zhes bya bas so/ /ci ste shes rab kyi pha rol tu phyin pa la spyod na de tsam gyis spyod par 'gyur zhe na/ de'i phyir bcom ldan 'das gal te zhes bya ba la sogs pa gsungs te/ mi zhum pa ni mi brdzi ba ste/ 'di ni bstan pa'o/ /mi 'gong ba la sogs pa drug po 'di ni bshad pa'o/ /mi 'gong ba dang / yang dag par mi 'gong ba ni 'di la dga' ba med pa'o/ /rgyab kyis phyogs pa ma yin zhes bya ba ni dga' ba med pa ma yin pa'o/ /mi skrag ces bya ba ni 'di gtong bar 'dod pa ma yin pa'o/ /mi dngang ba ni mi gtong ba'o/ /dngang bar mi 'gyur ba ni rgyun du mi gtong ba'o/ /de nyid ni nyams pa rnam pa drug 'gog par rtogs par byed de/ gang 'di mngon du gyur pa la shin tu dga' ba de ni 'di la spyod do/ /gzhan yang gal te zhes bya ba la sogs pa dang / gzhan yang gal te bdag ces bya bar nye bar gyur to zhes bya ba la sogs pa dang / gzhan yang bdag gi nyan thos zhes bya ba la sogs pas ni 'dir ngo bo nyid la sogs pa'i don dgu ni 'jug pa'i phyogs te/ byang chub sems dpa' blang bar bya ba nyid yin pa'i phyir ro/ /de la rnam par rtog pa ni kun du rmongs pa'i yang dag pa ma yin pa'i shes pa'o/ /de la dang po ni ngo bo nyid kyi rnam par rtog pa'o/ /ngo bo nyid kyang bdag bla na med pa yang dag par rdzogs pa'i byang chub tu lhag par 'gro'o snyam pa'o/ /de'i lam ni byang chub kyi sems zhes bya ba'i don to/ /de la rnam par rtog pa ni bdag nyid kyi byang chub dang / shes rab kyi pha rol tu phyin pa dang / stong pa nyid la gang mi shes pa dang / mnyam par ma bzhag pa'i shes pa dang / mnyam par bzhag pa'i shes pa gsum la rlom sems pa'o/ /bdag spyod do zhes bya ba dang / bdag byang chub chen po dang nye'o snyam pa dang / bdag byang chub dman pa las ring ngo snyam pa'o/ /'di'i gnyen po ni bcom ldan 'das sgyu ma lta bu'i sems zhes bya ba nas brtsams nas/ 'di lta ste zhes bya ba'i bar gyis te/ 'di ni ngo bo nyid kyi rnam par rtog pa'o/ /bcom ldan 'das 'di lta ste zhes bya ba la sogs pa la bdag ni yang dag par rdzogs pa'i byang chub dang ni nye la/ byang chub dman pa dang ni ring ste/ gang gi phyir bdag ni sangs rgyas kyi rigs yin no zhes bya ba ni kun du rmongs pa'o/ /'di'i gnyen po ni rigs te de ni rnam par mi rtog pa'i shes rab kyi pha rol tu phyin pa ste/ nam mkha' dang 'dra ba nyid kyi phyir ro/ /'di ni rigs kyi rnam par rtog pa'o/ /bcom ldan 'das 'di lta ste zhes bya ba la sogs pa la/ bdag la lam dag par 'grub pa ni yod de/ de bas na bdag byang chub chen po dang ni nye'o/ /dman pa'i byang chub dang ni ring ngo snyam pa ni kun tu rmongs pa'o/ /yang dag par 'grub pa 'di'i gnyen po ni de bzhin du rnam par mi rtog pa'i shes rab kyi pha rol tu phyin pa ste/ sgyu ma'i skyes bu dang 'dra ba nyid kyi phyir ro/ /'di ni gnyen po yang dag par 'grub pa'i rnam par rtog pa'o/ /bcom ldan 'das 'di lta ste zhes bya ba la sogs pa la/ gzugs brnyan ni snang ba'o/ /shes pa'i snang ba ni snang ba nyid du yin gyi/ shes pa dmigs pa ni ma yin no/ /shes pa'i dmigs pa de ni ma 'khrul pa ste/ de bdag las skyes so/ /des na bdag byang chub chen po dang nye la/ dman pa'i byang chub dang ni ring ngo snyam pa ni kun tu rmongs pa'o/ /'di'i gnyen po ni rnam par mi rtog pa'i shes rab kyi pha rol tu phyin pa ste/ gzugs brnyan dang 'dra ba nyid kyi phyir ro/ /'di ni dmigs pa ma 'khrul pa'i rnam par rtog pa'o/ /bcom ldan 'das 'di lta ste zhes bya ba la sogs pa la/ 'joms par byed pa ni gnyen po'i phyogs so/ /spang bar bya ba ni mi mthun pa'i phyogs so snyam pa ni kun du rmongs pa'o/ /'di'i gnyen po ni de bzhin du rnam par mi rtog pa'i shes rab kyi pha rol tu phyin pa la spyod pa yang ste/ de ji ltar de bzhin gshegs pa la sdud pa dang mi sdud pa mi mnga' ba bzhin no/ /'di ni gnyen po dang mi mthun pa'i phyogs kyi rnam par rtog pa'o/ /bcom ldan 'das ji ltar zhes bya ba la sogs pa la/ yang dag pa ma yin pa la rtog pas na rtog pa'o/ /de dang bral ba'i rtog pa yin pa'i phyir rnam par rtog pa'o/ /ji ltar de bzhin gshegs pas de dag spangs pa de bzhin du rnam par mi rtog pa'i shes rab kyi pha rol tu phyin pa la spyod pa yang de bzhin no/ /de la rtog pa dang bral ba ni rnam par rtog pa ste/ rang gi rtog pa la rmongs pa'o/ /'di'i gnyen po ni rtog pa dang rnam par rtog pa spangs pa'i shes rab kyi pha rol tu phyin pa'o/ /'di ni rang gi rtog pa la rnam par rtog pa'o/ /bcom ldan 'das 'di lta ste zhes bya ba la sogs pa la/ de byang chub sems dpa' shes rab kyi pha rol tu phyin pa la sgom zhes bya ba la sogs pa la/ bdag gis shes rab kyi pha rol tu phyin pa bsgom par bya zhes bya ba'o/ / des na bdag byang chub chen po dang ni nye la/ /dman pa'i byang chub dang ni ring ngo snyam pa ni byed pa la kun tu rmongs pa'o/ /de'i gnyen po ni de bzhin du shes rab kyi pha rol tu phyin pa la rnam par mi rtog pa ste/ de bzhin gshegs pas mdzad pa'i sprul pa dang 'dra ba nyid kyi phyir ro/ / 'di ni byed pa'i rnam par rtog pa'o/ /bcom ldan 'das 'di lta ste zhes bya ba la sogs pa la/ de bzhin gshegs pa'i sprul pa de yang gang gi don du sprul pa de'i bya ba byed cing bya ba de la yang rnam par rtog par mi byed de/ de bzhin du byang chub sems dpa' shes rab kyi pha rol tu phyin pa sgom par byed kyang / rnam par rtog par mi byed pa de ni gnyen po'o/ /rnam par rtog pa ni 'di'i las kyi rnam par rtog pa'o/ /bcom ldan 'das 'di lta ste zhes bya ba nas le'u rdzogs kyi bar gyis gsungs pa la/ gang gi don du shing las byas pa'i 'khrul 'khor la skyes pa'i gzugs byas na de bya ba de byed kyang rnam par rtog pa ni med do/ /de bzhin du byang chub sems dpa' byang chub kyi don du sgom par byed cing byang chub thob kyang bsgom pa la sogs pa rnam par rtog pa med de de ni gnyen po'o/ /byang chub kyi rtog pa ni/ bya ba'i 'bras bu'i rnam par rtog pa'o/ /sgyu ma lta bu'i sems nye bar mtshon pa'i le'u ni sgyu ma lta bu'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u nyi shu rtsa drug pa'o// // sgyu ma lta bu'i le'u rdzogs pa ni gzung ba'i rnam par rtog pa dang po gsungs nas/ rnam par rtog pa gzhan gsum ni snying po'i le'u brjod par bya ste/ de la gzung ba'i rnam par rtog pa gnyis pa'i dbang du byas nas/ bstan bcos las/ srid dang zhi bar ltung ba'i phyir/ /rtog pa dman pa nyid dang ni/ /yongs su 'dzin pa med pa dang / /lam gyi rnam pa ma tshang dang / /gzhan gyi rkyen gyis 'gro ba dang / /ched du bya ba log pa dang / /nyi tshe ba dang sna tshogs nyid/ /gnas dang 'jug dang rmongs pa dang / /rjes la 'gro zhes bya ba la/ /rnam rtog dgu yi bdag nyid 'di/ / ldog pa'i phyogs kyi rten can de/ /nyan thos la sogs yid las byung / /zhes bya ba gsungs te/ rtog pa dman pa la sogs pa'i skyon ni byang chub sems dpa'i spang bar bya ba yin pa'i phyir/ rnam pa dgu ni ldog pa'i phyogs kyi rten can te/ nyan thos la sogs pa'i yid las byung ba des na spang ba nyid yin pa'i phyir ro/ /'di nyid ni de nas tshe dang ldan pa shA ri'i bus zhes bya ba nas shes rab kyi pha rol tu phyin pa la spyod pa'o zhes bya ba'i bar du gsungs pa la/ de la gcig ni shA ri'i bus smras so/ /gcig ni rab 'byor gyis smras so/ /de nas gsum ni lha'i bus so/ /yang bzhi ni rab 'byor gyis so/ /'di'i yang gnyen po brjod par bya ste/ de las bzlog pas ni rnam par rtog pa rtogs par 'gyur ro/ /kye ma snying po zhes bya ba la/ kye ma'i sgra ni dga' ba ste/ 'bras bu khyad par du gyur pa yang dag par rdzogs pa'i byang chub de ni 'dir snying po ste/ byang chub sems dpa'i ched du spyod pa'o/ / de gang zhe na/ gang zhes bya ba la sogs pa gsungs so/ /da 'dir shes rab kyi pha rol tu phyin pa dang / bdag med pa gnyis shes pa gsungs so/ /de la spyod pa ni 'khor bas shin tu skyo ba dang / mya ngan las 'das pas shin tu dga' ba med do/ /de gnyi ga mi dmigs pa'i phyir ro/ /de bas na 'di ni bla na med pa'i byang chub tu 'gro bar byed pas gnyen po'o/ /gzhan du na pha rol tu phyin pa rnam pa lngas 'khor bar ltung ba 'am/ gang zag la bdag med par shes pas mya ngan las 'das par 'gyur te/ de nyid kyi phyir shes rab kyi pha rol tu phyin pa dang bral bas byang chub sems dpa' byang chub sems dpa' zhes bya ba'i ming 'thob par mi 'gyur te/ 'di lta ste dper na/ 'khor los sgyur ba'i bu legs par dbang bskur yang / rin po che sna bdun dang bral na 'khor los sgyur ba bya ba'i ming med de/ 'di ni rtog pa dang dman pa nyid kyi rnam par rtog pa'o/ / 'gro bas na snying po ste las kyis chos su rtogs par byed de/ thub par sla ba zhes bya ba'i don to/ /de las bzlog pa ni snying po ma yin pa ste/ thub par dka' ba nyid do/ /de'i phyir thub par dka' ba'i pha rol tu phyin pa la spyod pa ni/ shes rab kyi pha rol tu phyin pa la spyod pa'o/ /de ni de dag yongs su 'dzin pa'i nus pa dang ldan te/ dper na skyes bu mtshon cha thogs pas gzhan med pa'i grong khyer gyi lam du bud med bzung ba bzhin no/ /'di ni gnyen po'o/ /gzhan du na thub par sla bar 'gyur te/ 'di ni yongs su 'dzin pa med pa'i rnam par rtog pa'o/ /de nas 'dod pa na zhes bya ba nas/ rig par bya'o zhes bya ba'i bar du gsungs pa la/ phyag bya ba ci'i phyir zhe na/ sgrub pa ma lus pa'i phyir dang / gzhan gyi rkyen gyis mi 'gro ba nyid kyi phyir dang / ched du bya ba ma log pa'i phyir ro/ /'di nyid ni gang zhes bya ba la sogs pa thams cad kyis gsungs te/ mngon par sgrub pa ni pha rol tu phyin pa lngas nan tan du byed pa'o/ /'di la spyod ces bya ba ni bdag med pa gnyi ga shes pa'o/ /de nyid kyi phyir zab mo zhes bya ba ni gnyen po'o/ /de la mi spyod pa ni lam gyi rnam pa ma tshang bar 'gyur te/ des na de bdud la sogs pas tshugs par sla ba ste/ go cha ma bgos pa bzhin du 'thab pa'i zla bos tshugs par 'gyur ro/ /'di ni lam gyi rnam pa ma tshang ba'i rnam par rtog pa'o/ /de ltar spyod kyang zhes bya ba la sogs pa la/ gang zhes bya ba 'dir yang sbyar ro/ /de ltar zhes bya ba ni shes rab kyi pha rol tu phyin pa la gtsor byas pa'i pha rol tu phyin pa rnams la spyod pa yin te/ de ltar spyod ces bya ba ni don to/ /de ci zhig tu 'gyur zhe na/ yang dag pa'i mtha' zhes bya ba la sogs pa gsungs te/ ji ltar 'khor los sgyur ba ni gtso bo chen po yin pa'i phyir mkhar gyi rgyal po de'i rjes su 'brang ba de bzhin du shes rab kyi pha rol tu phyin pa gtso bo des 'khor ba dang mya ngan las 'das pa mi dmigs pa'i phyir ro/ /ji ltar de dag pha rol tu phyin pa de rnams kyis 'khor bar mi ltung ba de bzhin du/ gang zag la bdag med pa'i ye shes kyis mya ngan las 'das pa mngon sum du mi byed do/ /gal te gtso bo shes rab kyi pha rol tu phyin pa med pa de'i tshe ni dman pa'i byang chub mngon sum du mi byed do/ /rnam grangs 'dis zhes bya ba la sogs pa la/ 'dis ni zhes bya ba ni 'chad par 'gyur bas so/ /de nyid ni gang chos rnams kyi zhes bya ba la sogs pa gsungs so/ /mngon sum du mi byed ces bya ba ni de ci'i phyir zhe na/ ched du bya ba mi ldog pa ste/ ched du bya ba ni yang dag par rdzogs pa'i byang chub thob par 'dod pa'o/ /de las mi ldog pa ci'i phyir zhe na/ gang gi phyir ji srid du shes rab kyi pha rol tu phyin pa las ma log pa de'i bar du de de kho na'i don la spyod pa'i phyir ro/ / gzhan dag kyang mi spyod pa ma yin te/ de'i khongs su 'dus pa'i phyir/ dper na chu bran thams cad chu bo chen po'i nang du 'dres nas/ rgya mtsho chen por 'gro ste mi ldog pa bzhin no/ /'di ni ched du bya ba log pa'i rnam par rtog pa'o/ /rnam par rtog pa dgu po 'di dag kyang yum chen mo las rang gi don phun sum tshogs pa'i dbang du byas nas sbyar te/ de'i phyir nyi tshe ba dang / sna tshogs nyid kyi rnam par rtog pa de dag ji ltar gsungs pa de bzhin du re zhig brjod par bya ste/ pha rol tu phyin pa lnga ni lag pa g.yon pa dang 'dra la drug pa ni lag pa g.yas pa dang 'dra'o/ / gnyi ga ni bya ba thams cad la dgongs pa 'grub pa yin no zhes bya ba ni gnyen po'o/ /gal te yang lag pa g.yas pa dang 'dra ba'i drug pa de med pa'i tshe ni nyi tshe ba'i bya bar 'gyur te/ 'di ni nyi tshe ba'i rnam par rtog pa'o/ /de ltar ro sna tshogs pa'i chu bran ni chu bo dang / rgya mtsho chen por zhugs na ro gcig tu 'gyur ba de bzhin du rigs tha dad pa'i pha rol tu phyin pa lnga yang / drug par zhugs na mtshan nyid gcig par 'gyur ro zhes bya ba ni gnyen po'o/ /pha rol tu phyin pa 'di dag mtshan nyid sna tshogs pa de bzhin du yang dag par rdzogs pa'i byang chub kyang ngo / /'di ni sna tshogs pa nyid kyi rnam par rtog pa'o/ /'dir yang bcom ldan 'das kyis don dam pa'i go cha'i dbang du byas nas rnam par rtog pa 'di gnyis de nas tshe dang ldan pa rab 'byor zhes bya ba la sogs pa gsungs te/ de la go cha bgos pa zhes bya ba 'dis ni dka' ba nyid du bstan te/ sems can mtha' yas pa'i don byed par mi nus pa'i phyir ro/ /de lta mod kyi de bzhin du go cha ni bgo bar bya ba yin te/ 'di lta bu'i bsam pa chen po med par bdag dang gzhan gyi don bya bar mi nus pa'i phyir ro zhes bya ba ni gnyen po'o/ /sems can thams cad kyi don gang yang mi byed pas bdag nyid dul bar bya ba'i don du go cha med pa 'di ni nyi tshe ba'i rnam par rtog pa'o/ /sna tshogs pa nyid kyi rnam par rtog pa'i gnyen po ni mnyam pa nyid do/ /de nyid mi mthun pa'o/ /mchog tu dka' ba byed pa nyid ni sems can rnams ni zhes bya ba la sogs pa gsungs so/ /gdul bar bya ba zhes bya ba ni gdul bar 'os pa'i sems can rnams so/ /de lta mod kyi gang la dka' ba byed pa yin zhe na/ de'i phyir de ltar na zhes bya ba la sogs pa gsungs so/ /dpes bstan par bya ba'i phyir lha'i bu dag gang zhes bya ba la sogs pa gsungs so/ /de ci'i phyir zhe na zhes bya ba ni chos mthun pa ga las zhes bya ba'i don to/ /de'i phyir lha'i bu dag ces bya ba la sogs pa ni lan no/ /lha'i bu dag ces bya ba la sogs pa ni mjug bsdu ba'o/ /yang bstan par bya ba'i phyir lha'i bu dag gang zhes bya ba gsungs pa la/ sems can nam mkha' dang 'dra'o zhes bya ba'i don to/ /ci'i phyir rtsod pa yin zhe na/ byang chub sems dpa' zhes bya ba nas rig par bya'o zhes bya ba'i bar gyis gsungs so/ /yang zhes bya ba'i sgra ni gtan tshigs so/ /rtsod pa ni 'thab mo ste 'di sems can 'dul bar mi 'dod pa'am/ sems can de dag yongs su gtong ba ni 'thab mo'o/ /de ltar gdul bar bya ba la sogs pa la/ ji ltar gdul bar bya ba de bzhin du gdul bar bya ba yang ngo / /de bas na de med pas shin tu yang mchog tu dka' ba byed pa yin no/ /gang gi phyir bdag dang gzhan gyi don byed par nus pa'i phyir/ de ltar byang chub sems dpas sems can thams cad mnyam pa nyid du blta bar bya'o/ /de yang 'dir ji ltar na spyod pa yin par shes par bya zhe na/ gal te 'di ltar zhes bya ba la sogs pa gsungs te/ zhum par ma gyur pa ni mi skyo ba ste/ shin tu yang dga' ba zhes bya ba'i don to/ /de ci'i phyir zhe na zhes bya ba ni de shes rab kyi pha rol tu phyin pa de la spyod pa na/ gtan tshigs gang yin/ gang yang ma yin te/ chos bdag med pa mthong ba'i phyir ro zhes bsams so/ /de'i phyir sems can dben pa'i zhes bya ba la sogs pa ni lan no/ /lha'i bu dag de ltar na zhes bya ba nas/ blta bar bya'o zhes bya ba'i bar gyis mjug bsdu ba'o/ /chos thams cad dben zhing mnyam pa nyid ces bya bas ni gnyen po rgya cher bstan to/ /sems can sna tshogs pa dang / chos sna tshogs pa dben pa de bas na/ shes rab kyi pha rol tu phyin par ro gcig pa ma yin no snyam pa ni sna tshogs pa'i rnam par rtog pa'o/ /lha'i bu dag gal te zhes bya ba la sogs pa la de ltar bshad pa la zhes bya ba la/ de ltar na de'i bshad pa ni nye bar bstan pa'o/ /chos thams cad dben pa nyid ces bya ba ni spyod pa'i dus su mthong na/ byang chub sems dpa' zhum par mi byed ces bya ba dang sbyar ro/ /zhum par mi byed ces bya ba ni gnas pa dang / 'jug pa la ma rmongs pa ste/ gang nas 'gro bar bya ba dang / gang du gnas par bya ba la'o/ /de nyid kyis chos thams cad mnyam pa nyid du yang dag par rig cing / shes rab kyi pha rol tu phyin pa de dag la ma rmongs pa'i phyir ro/ /de ltar na gang gis byang chub der 'gro bar bya ba dang / gnas pa de nyid rang nyid la rag las pa'i rgyu dang 'bras bu'i gnas skabs so/ /des gang gis der 'gro ba dang / gang du gnas pa ni der yongs su bsngos pa'i pha rol tu phyin pa lnga yang de nyid du 'gro zhing de nyid du gnas pa yin te/ dper na 'khor los sgyur ba'i 'khor lo rin po che gang nas 'gro ba dang / gang du gnas pa der dpung gi tshogs thams cad de nas 'gro zhing de nyid du gnas pa de lta bu ste gnyen po'o/ /pha rol tu phyin pa lnga'i ma rig pa ni drug pa'i snang ba med pa des na/ gnas pa dang 'jug pa la nges pa med pas gnas pa dang 'jug pa la rmongs pa'i rnam par rtog pa'o/ /'di ltar zhes bya ba la sogs pa la/ zhum par mi byed pa des rtogs pa ni shes rab kyi pha rol tu phyin pa'o/ /snga ma bzhin du 'dir tshig lhag ma ste/ gzhan du ni phyir zhum par mi byed/ dper na 'khor los sgyur ba'i 'khor lo rin po che sngon du 'gro ba'i phyi nas dpung gi tshogs 'gro ba lta bu ste/ 'di ni gnyen po'o/ /pha rol tu phyin pa lnga ni yul rags pa yin pa'i phyir sngon du 'gro ba'o/ /drug pa ni yul phra ba nyid kyi phyir rjes su 'gro ba'o/ /'di ni rjes la 'gro ba'i rnam par rtog pa'o/ /gzung ba'i rnam par rtog pa gnyis pa'i rnam pa dgu bstan nas/ 'dzin pa'i rnam par rtog pa dang po'i dbang du byas nas/ bstan bcos las/ 'dzin dang so sor thar pa dang / /yid la byed dang khams rnams ni/ /gsum char nye bar 'brel ba dang / /gnas dang mngon par zhen pa dang / /chos kyi dngos po btags pa dang / /chags pa dang ni gnyen po dang / /ji ltar 'dod bzhin 'gro nyams la/ /'dzin pa dang por shes par bya/ /zhes bya ba gsungs te/ bdag rdzas su yod pa ni 'dzin pa dang po ste/ de shes rab kyi pha rol tu phyin pa bzhin du yod de/ de ni cung zad ni 'dzin to/ /cung zad ni 'dor te/ 'di ni 'dzin pa dang tha dad pa'i rnam par rtog pa'o/ /de yang mi 'dzin pa dang mi gtong ba 'di ni gnyen po'o/ /'dzin pa nyid kyi chos de gang dag yid la byed pa'i rnam par rtog pa'o/ /chos de dag yid la mi byed pa ni gnyen po'o/ /yid la byed pa nyid khams gsum dang 'brel ba'i phyir ro snyam pa ni khams gsum dang 'brel ba'i rnam par rtog pa'o/ /khams gsum dang ma 'brel ba ni gnyen po'o/ /khams gsum na gnas pa na ji ltar de la 'brel pa med do snyam pa ni gnas pa'i rnam par rtog pa'o/ /de gang la yod pa ni gnyen po'o/ /mngon par zhen pa yod na ji ltar mi gnas snyam pa ni mngon par zhen pa'i rnam par rtog pa'o/ /de la mngon par zhen pa cung zad kyang med pa ni gnyen po'o/ /byang chub sems dpa'i sbyin pa'i pha rol tu phyin pa dang / tshul khrims kyi pha rol tu phyin pa nas rnam pa thams cad mkhyen pa nyid kyi bar gyi chos kyi dngos po rnams btags par yod pa ste/ 'di ni chos kyi dngos po btags pa yod pa'i rnam par rtog pa'o/ /de yang 'di la med pa 'di ni gnyen po'o/ /chags pa nyid kyi yang dag par rdzogs pa'i byang chub de la mngon par rdzogs par 'tshang rgya ste/ gzhan du na rgyab kyis phyogs pa'i phyir ro snyam pa ni chags pa'i rnam par rtog pa'o/ /chos thams cad la chags pa med na/ yongs su 'dzin pa med cing ma chags na cung zad kyang mngon par rdzogs par 'tshang rgya ba med do/ /gal te de ltar spyod na shes rab kyi pha rol tu phyin pa la spyod pa'o zhes bya ba ni gnyen po'o/ /sbyin pa'i pha rol tu phyin pa stong pa ma yin/ tshul khrims kyi pha rol tu phyin pa stong pa ma yin zhes bya ba la sogs pa ni gnyen po'i rnam par rtog pa'o/ /de thams cad stong pa'o zhes bya ba ni gnyen pa'o/ /chos thams cad kyi rnam pa thams cad dmigs pa ni ji ltar 'dod pa bzhin du 'gro ba nyams pa'i rnam par rtog pa'o/ /byang chub sems dpa' la de yod pa ma yin pa ni gnyen po'o/ /rnam pa dgu po 'di dag ni yum chen mo dag las gsungs so/ /'dir ni spyir rdzas su yod pa'i 'dzin pa'i rnam par rtog pa gnyen po dang bcas pa ni/ de nas bcom ldan 'das zhes bya ba nas zhum par mi bgyid de zhes bya ba'i bar gyis gsungs pa la mkhyen bzhin du zhes bya ba ni/ gang gi phyir bcom ldan 'das kyis mi mkhyen pa ni cung zad kyang med pa'o/ /byang chub sems dpa' sems dpa' chen po zhes bya ba ni 'jig rten la grags pa'i rdzas su yod pa'i gang zag gi ngo bo/ /de rgyu gang gis zhum par mi 'gyur zhes bya ba ni rdzas su yod pa'i 'dzin pa'i rnam par rtog pa'o/ /de'i gnyen po ni mi dmigs pa'o/ /de nyid ni bcom ldan 'das dben pa zhes bya ba la sogs pas gsungs te/ med pa'i phyir zhes bya ba'i don te/ de nyid rang nyid med par zhum par ga la 'gyur zhes bya ba'o/ /gang 'dzin pa'i rnam par rtog pa gnyis pa'i dbang du byas nas/ bstan bcos las/ ched bzhin nges par mi 'byung dang / /lam dang lam min nges 'dzin dang / /'gog dang bcas pa'i skye ba dang / /dngos po ldan dang mi ldan dang / /gnas dang rigs dang 'jig pa dang / /don du gnyer dang rgyu med dang / /phyir rgol ba ni dmigs pa la/ /'dzin pa'i rnam rtog gzhan yin no/ /zhes bya ba gsungs te/ so so'i skye bo rnams kyi ni dang po nyid yin pa'i phyir rnam par rtog pa dgu po 'di ni de dag gi chos ma yin no/ /'on kyang 'phags pa nyan thos dang / rang sangs rgyas rnams kyi chos yin te/ de dag gis spang bar bya ba nyid yin pa'i phyir ro/ /de dag gi gnyen po ni mdo las ji ltar kha lo sgyur bas rta rnams la yang dag pa'i lam ston pa ltar/ drug las kyang lnga po rnams la de bzhin no zhes bya ba ni gnyen po'o/ /drug pa med par ni kha lo sgyur ba med do/ /'di ni ched du bya ba ji lta ba bzhin du nges par mi 'byung ba'i rnam par rtog pa'o/ /rnam pa thams cad mkhyen pa nyid kyi lam ni byang chub sems dpa' rnams kyi lam yin la/ dman pa'i byang chub kyi lam ni de dag gi lam ma yin te/ de dag nyid nges par 'dzin pa zhes bya ba ni drug pa kho na ste gnyen po'o/ /de med pa'i lam dang lam ma yin pa nges par 'dzin pa'i rnam par rtog pa'o/ /'di ni chos gang la yang bskyed pa 'am 'gog pa ma yin te/ chos 'di tshad mar byas nas zhes bya ba'i gnyen po'o/ /bskyed pa ni sangs rgyas kyi chos rnams so/ /'gog pa ni de'i sgrib pa rnams te/ 'di ni skye ba dang / 'gog pa'i rnam par rtog pa'o/ /chos thams cad dang ldan pas yang ma yin/ mi ldan pas yang ma yin no zhes bya ba ni gnyen po'o/ /ldan pa dang mi ldan pa snyam pa 'di ni ldan pa dang mi ldan pa'i rnam par rtog pa'o/ /gzugs la sogs pa nas rnam pa thams cad mkhyen pa nyid kyi bar la gnas par mi bya'o zhes rnal 'byor du byed cing chos thams cad gang la yang mi gnas pa'i phyir ro zhes bya ba ni gnyen po'o/ /gzugs nas rnam pa thams cad mkhyen pa nyid kyi bar la gnas par bya'o snyam pa ni gnas pa'i rnam par rtog pa'o/ /ji ltar 'bras bu 'dod pas sa bon btab nas yongs su smin pa ni dpyod par byed do/ /de bzhin du byang chub chen po 'dod pas pha rol tu phyin pa dag la bslabs nas/ de dag gis sems can yongs su bzung zhing 'khor ba las yongs su bsgral bar bya'o zhes bya ba ni gnyen po'o/ /byang chub tu sems bskyed nas/ sems can btang snyoms byed pa 'di ni rigs rnam par 'jig pa'i rnam par rtog pa'o/ /don du gnyer ba ni dgos pa don du gnyer ba ste/ chos thams cad la dbang bsgyur ba rjes su thob par 'dod par drug pa la bslab par bya'o zhes bya ba ni gnyen po'o/ /de la bslab par mi bya'o snyam pa ni don du mi gnyer ba'i rnam par rtog pa'o/ /drug pa ni sangs rgyas kyi chos thams cad kyi rgyu ste/ rin po che thams cad kyi rgya mtsho bzhin no/ /de yongs su bsgoms na dkar po'i chos sangs rgyas kyi chos rnams 'byung ba yin no zhes bya ba ni gnyen po'o/ /drug pa med pa na rgyu med pa'i phyir ro snyam pa ni rgyu med pa'i rnam par rtog pa'o/ /de shes rab kyi pha rol tu phyin pa la spyod na/ dus gsum gyi sangs rgyas rnams dgongs par mdzad de/ gzugs la sogs pa nas/ rnam pa thams cad mkhyen pa nyid kyi bar du yang ma yin zhing / 'on kyang 'dir gzugs nas rnam pa thams cad mkhyen pa nyid kyi bar ma yin pa de bzhin du dgongs pa mdzad do/ /'di ni gnyen po'o/ /gzugs nas rnam pa thams cad mkhyen pa nyid kyi bar la dgongs pa mdzad de snyam pa ni phyir rgol ba'i chos la dmigs pa'i rnam par rtog pa'o/ /dbye ba rnam pa dgu po 'di dag kyang bcom ldan 'das yum chen mo dag las gsungs so/ /'dir ni spyir btags par yod pa'i 'dzin pa'i rnam par rtog pa gnyen po dang bcas pa/ bcom ldan 'das chos gang yang zhes bya ba nas/ chos de yang dmigs su med do zhes bya ba'i bar gyis gsungs te/ chos gang yang zhes bya ba ni/ phung po la sogs pa'i yul la bdag tu btags pa'o/ /zhum par 'gyur ba ma mchis pa ni rang nyid med pa'i phyir ro/ /de nyid kyi phyir/ de ci'i phyir zhes bya ba la sogs pa gsungs te/ chos gang yang zhes bya ba ni phung po la sogs pa'am sems so/ /chos gang gis zhes bya ba ni sems kyis so/ /chos gang zhes bya ba ni byang chub sems dpa'o/ /de de bzhin no zhes bya ba ni zhal gyis bzhes pa'o/ /'di tsam gyis ni sems can rdzas su yod pa dang / ngar 'dzin pa'i yul phung po la sogs pa dang / sems byang chub sems dpa' med pa ni gnyen por gsungs so/ /'di ni btags par yod pa'i 'dzin pa'i rnam par rtog pa ste bzhi pa'o/ /de ltar bcom ldan 'das kyis rnam par rtog pa bzhi po'i gnyen po bcom ldan 'das yum las rgya cher bstan to/ /de la byang chub sems dpa' spyod pa ni/ ji ltar shes par bya ba de ni/ yang rab 'byor byang chub sems dpa' zhes bya ba la sogs pa gsungs te/ brjod pa ni tshig go/ /bshad pa ni don to/ /bstan pa ni khyad par med par brjod pa'i phyir bstan pa'o/ /gsang bar brjod pa'i phyir nye bar bstan pa'o/ /zhum par mi 'gyur zhes bya ba ni dman par mi 'gyur ba'o/ /yi mi gsod ces bya bas ni skyo bas so/ /yi mi gsod pas mi 'gyur zhes bya ba ni rgyun du skyo bas so/ /kun tu zhum par mi 'gyur zhes bya ba ni sems kyi rlom pas so/ /yang dag par zhum par mi 'gyur ba ni rgyun du rlom par mi 'gyur bas so/ /phyir phyogs pa ni rgyab kyis phyogs pa'o/ /yid phyir phyogs par mi byed pa ni yang mngon du phyogs par mi byed pa'o/ /mi skrag pa ni skrag pa la mngon du bltas pas so/ /mi dngang ba ni yang dag par mi dngang bas so/ /dngang bar mi 'gyur ba ni rtag pa nyid kyis so/ /de'i phyir shes rab kyi pha rol tu phyin pa 'di spyod par rig par bya'o/ /de la mi spyod na ni zhum pa la sogs par nges par 'gyur ro/ /rab 'byor gyis gsol pa zhes bya ba nas/ spyod do zhes bya ba'i bar ni rab 'byor gyis khas blangs pa'o/ /de ltar spyod pa'i zhes bya ba la sogs pas ni khyad par can gyi phan yon gsungs so/ /phan 'dogs pa ni khyad par du bdag gir mdzad pa'o/ /dgongs par mdzad pa ni dran par mdzad pa ste/ de yang sangs rgyas bcom ldan 'das chos ston par mdzad pa zhes bya ba dang sbyar ro/ /ji ltar zhe na/ dge slong gi dge 'dun zhes bya ba la sogs pas gsungs te/ ji lta bu zhe na/ shes rab kyi pha rol tu phyin pa la spyod cing zhes bya ba la sogs pa la/ ming dang zhes bya ba ni ming du btags pa'o/ /rus ni shAkya la sogs pa'o/ /stobs ni lus kyi stobs dang / rdzu 'phrul gyi stobs so/ /kha dog ni pags pa'i yon tan/ gzugs ni kha dog dang dbyibs te/ 'di dag yongs su brjod pa'o/ /khyad par gyi khyad par du gyur pa ni gzugs so/ /ched du brjod pa ni yon tan la dga' ba las byung ba'i tshigs su bcad pa'o/ /ched du brjod do zhes bya ba ni rjod par byed pa ste/ gang gi yon tan zhe na/ de dag gi zhes bya ba la sogs pa gsungs so/ /'di lta ste dper na zhes bya ba ni dpe bstan to/ /de bzhin du zhes bya ba la sogs pas ni don bstan to/ /rab 'byor gyis gsol pa zhes bya ba la sogs pas ni zhus pa'o/ /rab 'byor de ni ma yin te zhes bya ba la sogs pas ni lan no/ /thams cad ces bya ba ni thams cad yang dag pa med pa la dmigs pa'i phyir ro/ /rab 'byor gyis gsol pa zhes bya ba la sogs pas ni yang dris pa'o/ /bcom ldan 'das kyis bka' stsal pa zhes bya ba la sogs pa ni lan no/ /'di dag ni zhes bya ba la sogs pas mjug bsdu ba'o/ /gzhan yang rab 'byor zhes bya ba la sogs pas gsungs so/ /rab 'byor 'di dag ni zhes bya ba la sogs pas ni mjug bsdu ba'o/ /gzhan yang rab 'byor zhes bya ba la sogs pa gsungs pa la/ phyir mi ldog pa rnams kyis dbang po de thob pa ni thob pa'o/ /de non pa ni rab tu zhugs pa'o/ /sangs rgyas kyi ming la sogs pa bstan pa'i phan yon ni yang dag gang zhes bya ba nas/ gnas par 'gyur ro zhes bya ba'i bar gyis gsungs so/ /ji ltar mos par 'gyur zhe na/ ji ltar zhes bya ba la sogs pas gsungs te/ de dag las kyang zhes bya ba ni mi bskyod pa 'ba' zhig ma yin pa'o/ /gang dag ce na gang zhes bya ba la sogs pa gsungs so/ /de dag gis zhes bya ba ni mi bskyod pa dang de'i byang chub sems dpa' rnams so/ /de ltar zhes bya ba la sogs pas ni thos pa'i phan yon mjug bsdu ba dang / de bzhin du sgrub pa la sogs pa'i phan yon khyad par du gyur pa gsungs so/ /de ltar phan yon khyad par du gyur pa gsungs nas/ skabs su bab pa'i shes rab kyi pha rol tu phyin pa'i khyad par le'u rdzogs pa'i bar gyis bstan te/ rab 'byor gyis skabs de ston pa ni rab 'byor gyis gsol pa zhes bya ba la sogs pa gsungs te/ de bzhin nyid ma gtogs par zhes bya ba ni de bzhin nyid tsam kho na ma gtogs pa'i phyir dang / kun du brtags pa rnam pa sna tshogs pa snang ba med pa'i phyir chos gang yang dmigs su med do/ /de'i tshe chos gang zhig ces bya ba la sogs pa ni rtogs par sla'o/ /rab 'byor de bzhin nyid kyang re zhig dmigs su med na zhes bya ba la/ de ni gzung bar bya ba ma yin pa nyid kyi phyir ro/ /gang de bzhin nyid la gnas par 'gyur ba ni byang chub sems dpa'o/ /thogs pa zhes bya ba ni rtugs pa zhes bya ba'i don to/ /brtsams pa zhes bya ba ni dbang du byas pa'o/ / chos smras pa zhes bya ba ni rigs pa smra ba'o/ /chos ni sangs rgyas kyi mya ngan las 'das pa'o/ /rjes su mthun pa'i chos ni rjes su mthun pa'i lam mo/ /lung bstan pa ni brda sprod pa'o/ /lung ston pa ni lung ston par byed pa'o/ /chos thams cad dben pa'i stong pa nyid do/ /de la gnas pa ni ting nge 'dzin te/ chos thams cad mi dmigs pa de la gnas pa'o/ /kau shi ka gang yang zhes bya ba la sogs pas ni rab 'byor gyis gnas pa las byang chub sems dpa'i gnas pa khyad par du gyur pa ston par byed do/ /kau shi ka zhes bya ba la sogs pas ni 'thad pa gsungs te/ spyod pa ni ting nge 'dzin grub pa'i don du'o/ /gnas pa ni ting nge 'dzin grub pa'o/ /lhag ma ni rtogs sla'o/ /rtogs par dka' ba ni gong nyid du bshad do/ /snying po la sogs pa'i le'u ni snying po'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel/ slob dpon rin chen 'byung gnas zhi bas rnam par sbyar ba snying po mchog ces bya ba las le'u nyi shu rtsa bdun pa'o// //sgyu ma lta bu dang snying po'i le'u dag tu mthong bas spang bar bya ba'i rnam par rtog pa bstan nas mthong ba'i lam la sogs pa'i shes rab kyi pha rol tu phyin pa la gnas na nges par byang chub thob par ston te/ de'i phyir de nyid kyi rgyu gsum ni le'u 'dis dang po brjod par bya ba la/ phyi nas ni byang chub kyi mtshan nyid do/ /de'i phyir rgyu gsum gyi dbang du byas nas/ bstan bcos las/ byang chub gzhan las ston pa dang / /de yi rgyu ni yongs gtong dang / /de thob bar chad med pa'i rgyu/ /bsod nams mang po'i mtshan nyid do/ /zhes bya ba gsungs te/ ji skad bshad pa'i shes rab kyi pha rol tu phyin pa la gnas na byang chub de thob pa ni thob pa'o/ /de'i bar chad med pa ni med na mi 'byung ba'o/ / rgyu ni shes par byed pa ste rnam pa gsum gsungs so/ /mdo las byang chub ston pa ni gang gzhan dag la lung ston pa ste de ni rgyu dang po'o/ /ma 'ongs pa'i byang chub kyi rgyur 'phags pa kun dga' bo la yongs su gtad pa ni rgyu gnyis pa'o/ /bsod nams mang po'i mtshan nyid ni rgyu gsum pa'o/ /de'i phyir mdo las/ de nas de'i tshe zhes bya ba la sogs pa gsungs pa la/ me tog bkram pa zhes bya bar lung ston pa la/ de nas lha rnams kyi me tog dag blangs nas/ lung bstan par bya ba rnams kyis gtor ba dang / de nas 'od zer byung ste slar zhugs pa na kun dga' bos zhus pa dang / bcom ldan 'das kyis de dag lung bstan te/ des de dag lung bstan pas/ 'jig rten gyi khams gzhan du yang mtshon te/ 'jig rten gyi khams zhes bstan pa'i phyir dang / tshe dang dam pa'i chos gnas pa'i dus kyang ring ba nyid kyi phyir ro/ /de'i 'og tu kun dga' bo de lta bas na zhes bya ba nas/ gnas par bya'o zhes bya ba'i bar gyis ni mjug bsdu ba'o/ /'di ni skabs kyi gnas pas ni byang chub thob pa'i rgyu dang po'o/ /kun dga' bo byang chub sems dpa' sems dpa' chen po gang su dag ces bya ba nas/ mngon du gyur pa yin par rtogs par bya'o zhes bya ba'i bar gyis ni/ shes rab kyi pha rol tu phyin pa'i yon tan bstan to/ /kun dga' bo gang zhes bya ba la sogs pa nas/ rig par bya'o zhes bya ba'i bar gyis ni gang 'di dag mnyan nas mi spong ba de dag gi yon tan gsungs te/ smod par byed pa ni yid kyis smod pa'o/ /'gal bar byed pa ni yid kyis btang ba'o/ /'khrug par byed pa ni de las 'khrug pa'o/ /'jig par byed pa ni sbas nas 'jig par byed pa'o/ /spong bar byed pa ni yang dag pa ma yin pa'i gnod par byed pa brjod pa'o/ /'gog par byed pa ni snying po med par brjod pa'o/ /'dud pa ni de dag la zhen pa'o/ /kun dga' bo 'di ltar yang zhes bya ba nas spyad par rig par bya'o zhes bya ba'i bar gyis ni rgyu gnyis gnyis gsungs te/ /slu ba med pa'i smon lam dang byas pa gzo ba'o/ /de nyid gang su dag ces bya ba la sogs pas rgya cher dri bar byas nas/ kun dga' bo de lta bas na zhes bya ba la sogs pas ni gtad pa gsungs te/ gtad pa ni yang dag par gtad pa'o/ /de nyid rjes su 'brel pa ni rjes su gtad pa'o/ /yi ge 'dus pa zhes bya ba la sogs pa la/ yi ge 'dus pa ni yi ge'i tshogs so/ /de ci'i phyir zhe na/ 'dzin pa dang zhes bya ba la sogs pa gsungs te/ ci'i phyir gtad pa yin zhe na/ 'di ci nas kyang nub par mi 'gyur bzhes bya ba gsungs te/ ji ltar nub par mi 'gyur ba de ltar khyod kyis gyis shig pa'i don to/ /kun dga' bo gal te zhes bya ba nas/ sangs rgyas kyis gsungs so zhes bya ba'i bar gyis ni gnyis pa'i gleng gzhi brjod nas/ kun dga' bo de lta bas na zhes bya ba nas ni gtad pa gnyis pa ste/ 'dir phyis zhes bya bas ni phyi nas so/ /chud gsan pa ni nyams par byas pa'o/ /gtad pa ni myur bar rjes su mi gtang ba'o/ /dran par mi nus pa ni brjod pa'o/ /mgu bar byas pa dang / mnyes par byas pa ni dgyes par ro/ /yum ni sa bon bskyed pa'o/ /skyed pa ni sa bon rgyas par byed pa'o/ /'byin pa ni skyed par byed pa'i phyir ro/ /kun dga' bo shes rab kyi pha rol tu phyin pa zhes bya ba nas/ ston pa yin no zhes bya ba'i bar gyis ni gleng gzhi brjod nas/ kun dga' bo de lta bas na zhes bya ba nas/ rjes su bstan pa'o zhes bya ba'i bar gyis ni gtad pa gsum pa ste/ 'dir nges pa'i tshig bzang po ni legs par brjod pa'o/ /chos kyi sku nyid ces bya ba ni shes rab kyi pha rol tu phyin pa 'di nyid chos kyi sku'o/ /de'i ngo bo nyid ni de nyid de 'chad par 'gyur ba'i bya ba rnams dang sbyar bar bya'o/ /de la bya ba ni bkur sti la sogs pa'o/ /dbul ba ni me tog la sogs pa'o/ /bsam par bya ba ni ston pa la sogs pa'o/ /dge ba zhes bya ba ni bsod nams 'dod pas so/ /reg par gnas pa ni de nyid mngon du byed pa'i phyir ro/ /yon tan dang ldan pa zhes bya ba ni dge ba la sogs pas so/ /'dir thub par bshad pa ni gsungs pa'o/ /bskal pa'i mtha' 'am/ de bas lhag par yang bshad du yod mod kyi/ 'on kyang kun dga' bo la ji ltar zhes bya ba la sogs pas mdor bsdus nas bshad do/ /de nas yang kun dga' bo gang la la zhes bya ba nas/ thob par byed pa zhes bya ba'i bar gyis gleng gzhi brjod nas/ kun dga' bo de lta bas na zhes bya ba nas rjes su gtad do zhes bya ba'i bar gyis ni gtad pa bzhi pa gsungs te/ bzhi pa zhes brjod par bya ba la gnyis pa zhes brjod pa ni brjod pa dang / rjod pa'i spyis gsum gcig tu byas pa'i phyir ro/ /gtad pa dang rjes su gtad pa ni gtad pa zhes bya ba don gcig go/ /de ltar gtad pa rnam pa bzhi ni rgyu gnyis pa'o/ /de nas kun dga' bo 'di lta ste zhes bya ba la sogs pas gleng gzhi brjod nas/ kun dga' bo gal te khyod kyis zhes bya ba nas/ 'di ni gnas pa ma yin no zhes bya ba'i bar gyis gsungs pa la/ 'dir dus kyi mtha' ni skad cig pa'o/ /skad cig ma brgya nyi shu la ni de'i skad cig go/ / de'i skad cig drug cu la thang cig go/ /thang cig sum cu la ni yud tsam mo/ /de sum cu la ni chu tshod do/ /'di ni bsod nams mang po nyid do/ /rgyu gsum pa'o/ /de nas bcom ldan 'das zhes bya ba la sogs pas ni bcom ldan 'das mi bskyod pa'i sangs rgyas kyi zhing 'khor dang bcas pa bstan pa dang / mi snang bar byas pa ni dpe'o/ /'dir rgya mtsho lta bu zhes bya ba ni rgya che ba nyid kyi phyir ro/ /zad pa nyid ni bsam gtan phun sum tshogs pa'o/ /mi bskyod pa nyid ni shes rab phun sum tshogs pa'o/ /don la sbyar bar bya ba'i phyir kun dga' bo de ltar zhes bya ba la sogs pa gsungs pa chos thams cad ces bya ba la sogs pas ni rigs pa gsungs so/ /dgos pa byed nus pa ma yin no zhes bya ba ni dam bca' ba gzhan no/ /byed pa med pa la sogs pa'i rigs pa ni smras zin to/ /kun dga' bo byang chub sems dpa' zhes bya ba nas/ pha rol tu phyin pa la slob po zhes bya bas ni phan yon bstan to/ /chags pa med pa nyid ni dmigs pa nyid dam/ thogs pa med pa'i ye shes nyid do/ /tshad ni rgya nges pa'o/ /zad pa ni dus nges pa'o/ /mtha' ma ni grangs nges pa'o/ /tshad chad pa ni tshad kyis yongs su bcad pa'o/ /tshad med pa'i phyir zhes bya ba ni mi dmigs pa'i phyir ro/ /zad pa ni 'bring ngo / /yongs su zad pa ni med pa'o/ /nam mkha' mi zad pa'i phyir zhes bya ba ni nam mkha' bzhin du zad pa med pa'i phyir ro/ /gang gi phyir zhes bya ba ni chos thams cad skye ba med pa zhes gsungs so/ /gang gi phyir chos thams cad skye ba med pa des na de dag dmigs pa med pa'i mtshan nyid de/ shes rab kyi pha rol tu phyin pa yang nam mkha' bzhin du mi zad pa'o/ /mngon par bsgrub pa zhes bya ba ni mngon sum du byas pa'o/ / gzugs la sogs pa zad pa med pa nyid ces bya ba ni de dag skye ba med pas so/ /de bzhin du ma rig pa la sogs pa yang ngo / /de la 'di ni zhes bya ba ni phung po rnams dang / ma rig pa la sogs pa yang mi zad pa nyid kyis so/ /mtha' gnyis ni skye ba dang 'jig pa'o/ / dbus ni skye ba gnas pa'o/ /ma 'dres pa ni de dang thun mong ma yin pa'o/ /chos gang yang ma mthong ngo zhes bya bas ni phung po rnams yongs su gzung ba'o/ /gang gi phyir zhe na/ rten cing 'brel bar 'byung ba mthong bas so/ /rtag pa zhes bya ba ni thog ma dang tha ma med pa'o/ / brtan pa ni gnas pa'o/ /ther zug pa ni mtha' ma med pa'o/ /byed pa po'am/ tshor ba po zhes bya ba ni spyod pa po dang / len pa po med pa'o/ /rab 'byor 'di ni zhes bya ba nas/ gting rnyed par mi 'gyur ro zhes bya ba'i bar ni rtogs par sla'o/ /'di man chad kyis ni zad pa dang / mi skye ba shes pa'i byang chub kyi mtshan nyid gsungs te/ bstan bcos las/ dri ma zad dang mi skye ba'i/ /ye shes byang chub ces brjod de/ /zad med skye med phyir de dag /go rims bzhin du shes par bya/ /zhes bya ba gsungs te/ dri ma ni nyon mongs pa'i rnam par rtog pa'o/ /de dag zad pa dang / mi skye ba'i ye shes ni byang chub ste/ ye shes de yang zad pa med pa dang / skye ba med pa de dag la go rims bzhin du rig par bya'o/ /zad pa gtan du med par shes pa ni zad pa shes pa dang / gtan du skye ba med par shes pa nyid kyis skye ba med par shes pa'o zhes dgongs so/ /ji ste byang chub kyi mtshan nyid gzhan yod kyang de'i phyir 'di bshad ce na/ mthong ba'i lam gyis rnam par rtog pa rnams zad pa na/ zad pa dang mi skye bar rnam par lta ba'i don to/ /de nyid/ 'gog pa med pa'i rang bzhin la/ /mthong zhes bya ba'i lam gyis ni/ /rnam par rtog rigs ci zhig zad/ /skye med rnam pa ci zhig 'thob/ /ces bya ba gsungs te/ rnam par rtog pa rnams kyi rang bzhin ni de bzhin nyid de/ nam yang de la zad pa dang skye ba med do/ /rigs nyid ni rigs te rnam pa'o/ /de bas na mthong ba'i lam gyis rnam par rtog pa'i rnam pa gang yang zad pa'am/ skye bar 'dor ba med do/ /gzhan dag ni/ zad pa shes pa bden rnams la/ /yongs su shes la sogs pa yin/ /yang shes pa ni byar med sogs/ / mi skye ba yi chos 'dod do/ /zhes smra'o/ /de dag ni phung po bden pa bzhi rnams yod par sems te/ de la mdor na nyon mongs pa dang / sdug bsngal zad pa dang / yang mi skye ba thob ste/ de dag thob pa'i ye shes gang yin pa de ni zad pa dang / mi skye ba shes pa'o/ /gtso bor ni de bzhin gshegs pa shes bya'i sgrib pa rnams kyang spangs pa yin te/ de dag gi nyon mongs pa can ma yin pa'i mi shes pa yang zad pa'i phyir ro zhe na/ de bsal bar bya ba'i phyir/ bstan bcos las/ chos rnams kyang yod ces bya dang / /shes bya la yang sgrib zad par/ /ston pa gzhan gyis brjod pa gang / /'di la kho bos mtshar du rtsis/ /'di la bsal bya ci yang med/ /bsnan par bya ba'ang cung zad med/ /yang dag nyid la yang dag lta/ /yang dag mthong na rnam par grol/ /zhes bya ba gsungs te zhes bya ba'i sgra ni mi bzod pa'o/ /de la kho bos mtshar du rtsis/ /zhes bya ba ni mi mthun pa dang gnyen po dag tu mi rigs pa'i phyir ro zhes bya bar dgongs so/ /de'i phyir/ 'di la bsal bya gang yang med/ /ces bya ba ni gang zag dang chos rang nyid med pa'i phyir ro/ /bsnan par bya ba cung zad med/ /ces bya ba ni/ gang zag dang chos la bdag med pa dag thog ma dang tha ma med pa nyid kyi phyir ro/ /'on kyang de gnyi ga la yang dag pa nyid du yang dag pa nyid blta bar bya'o/ /gang gi phyir gang zag la bdag med pa'i yang dag pa mthong na nyon mongs pa'i sgrib pa las rnam par grol la/ chos la bdag med pa'i yang dag pa mthong na shes bya'i sgrib pa las rnam par grol bar 'gyur ro/ /de yang sgyu ma lta bu dang / snying po'i le'u las mthong bas spang bar bya ba'i rnam par rtog pa rnams spong bar bstan to/ /de bas na gang gi phyir mthong ba'i lam gyis mthong bas spang bar bya ba'i rnam par rtog pa spong ba ni rab 'byor de lta bas na zhes bya ba la sogs pa gsungs pa la/ de lta bas na zhes bya ba ni gtan tshigs so/ /de lta na zhes bya ba ni mthong ba'i dus na'o/ / shes rab kyi pha rol tu phyin pa ni mthong ba'i lam gyi bdag nyid de de la spyod pa'o/ /de ci'i phyir zhe na zhes bya ba ni mthong ba'i lam gyi mtshan nyid kyi gtan tshigs dris pa'o/ /'dir shes rab kyi pha rol tu phyin pa ni bsam gtan gyi pha rol tu phyin pa zhes bya ba 'dir yang gi don gyis rtogs par bya ste/ des na ma smos pa bsdus pa yin no/ /shes rab kyi pha rol tu phyin pa ga las shes she na/ rab 'byor zhes bya ba la sogs pa gsungs te/ bsgom pa yongs su rdzogs pa ni pha rol tu phyin pa drug ces bya ba dang sbyar ro/ /thams cad ces bya ba ni so so re re la yang tshogs pa yod pa ste/ re rer drug 'dus so zhes dgongs so/ /de bas na drug tshan drug gi pha rol tu phyin pa ni mthong ba'i lam mo/ /bcom ldan 'das yum 'dir ni mdor bsdus pa yin pas de'i phyir mtshan nyid tsam 'dir gsungs pa yin te/ re rer yang thams cad ji lta ba bzhin du 'dus so/ /de rgyas par ni yum chen mo dag las gsungs so/ /'dir bstan bcos las/ sbyin pa la sogs re re la/ /de dag phan tshun bsdus pa gang / /skad cig gcig pa'i bzod pa yis/ /bsdus pa de 'dir bsdu ba'i lam/ /zhes bya ba gsungs te/ re re nyid yin pas re re ste/ de'i dngos po ni re re nyid do/ /des ni sbyin pa la sogs re re la zhes bya ba ni sbyin pa la sogs pa rnams la'o/ /sbyin pa la sogs pa de dag gi phan tshun ni gcig la gcig ste/ gang 'di la bsdus pa yod pa ni mthong ba'i lam gyi rtse mo'i mngon par rtogs pa'o/ /de yang skad cig gcig yin gyi/ bcu drug ni ma yin no/ /de yang bzod pas yang dag par bsdus pa yin te/ bzod pa brgyad dang shes pa brgyad ni ma yin no/ /'di ni mthong ba'i lam gyi rtse mo'i mngon par rtogs pa'o/ /de nas bsgom pa'i lam ni thabs la mkhas pa thams cad ces bya ba la sogs pa gsungs pa ste/ thabs dag dang mkhas pa yin pas ni thabs la mkhas pa'o/ /seng ge rnam par bsgyings pa dang / thod rgal gyi ting nge 'dzin ni thabs te/ de ni rten nyid yin pa'i phyir ro/ /mkhas pa ni rten cing 'brel bar 'byung ba lugs dang mthun pa dang / lugs las bzlog pa las rnam par lta ba ste/ ma rig pa'i rkyen gyis 'du byed/ 'du byed kyi rkyen gyis rnam par shes pa zhes bya ba nas/ skye ba'i rkyen gyis rga shi'i bar dang mya ngan dang smre sngags 'don pa dang / sdug bsngal ba dang / yid mi bde ba dang 'khrug pa rnams 'byung bar 'gyur zhes bya ba ni lugs dang mthun pa'o/ /ma rig pa 'gags pas 'du byed 'gag/ 'du byed 'gags pas rnam par shes pa 'gag ces bya ba nas skye ba 'gags pas rga shi dang mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa'i bar du 'gag pa 'di ni lugs las bzlog pa'o/ /de la seng ge rnam par bsgyings pa'i ting nge 'dzin ni 'di lta ste bsam gtan dang po la snyoms par zhugs nas gnyis pa dang gsum pa dang bzhi pa dang nam mkha' mtha' yas skye mched dang / rnam shes mtha' yas [(]skyed [,]skye [)]mched dang / ci yang med pa'i skye mched dang / 'du shes med 'du shes med min skye mched dang / 'gog pa'i snyom par 'jug pa la snyoms par 'jug go/ /'gog pa'i snyoms par 'jug pa las langs nas/ 'du shes med 'du shes med min skye mched la snyoms par 'jug go/ /de nas ci yang med pa'i skye mched la'o/ /de nas rnam shes mtha' yas skye mched la'o/ /de nas nam mkha' mtha' yas skye mched la'o/ /de nas bsam gtan bzhi pa dang / gsum pa dang / gnyis pa dang / dang po la snyoms par zhugs pa yin no/ /thod rgal gyi ting nge 'dzin ni 'di lta ste/ bsam gtan dang po la snyoms par zhugs nas gnyis pa dang / gsum pa dang / bzhi pa dang / nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched dang / 'gog pa la snyoms par zhugs te/ de las langs nas bsam gtan dang po la'o/ /de nas 'gog pa la'o/ /de nas bsam gtan gnyis pa la'o/ /de nas 'gog pa la'o/ /de nas bsam gtan gsum pa la'o/ /de nas 'gog pa la'o/ /de nas bsam gtan bzhi pa la'o/ /de nas 'gog pa la'o/ /de nas nam mkha' mtha' yas skye mched la'o/ /de nas 'gog pa la'o/ / de nas rnam shes mtha' yas skye mched la'o/ /de nas 'gog pa la'o/ /de nas ci yang med pa'i skye mched la'o/ /de nas 'gog pa la'o/ /de nas 'du shes med 'du shes med min skye mched la'o/ /de nas 'gog pa la'o/ /de nas mnyam par ma bzhag pa'i sems la gnas so/ /de nas 'gog pa'i snyoms par zhugs so/ /de nas mnyam par ma bzhag pa'i sems la gnas so/ /de nas 'du shes med 'du shes med min skye mched la'o/ /de nas mnyam par ma bzhag pa la'o/ /de nas ci yang med pa'i skye mched la'o/ /de nas mnyam par ma bzhag pa la'o/ /de nas rnam shes mtha' yas skye mched la'o/ /de nas mnyam par ma bzhag pa la'o/ /de nas nam mkha' mtha' yas skye mched la'o/ /de nas mnyam par ma bzhag pa la'o/ /de nas bsam gtan bzhi pa la'o/ /de nas mnyam par ma bzhag pa la'o/ /de nas bsam gtan gsum pa la'o/ /de nas mnyam par ma bzhag pa la'o/ /de nas bsam gtan gnyis pa la'o/ /de nas mnyam par ma bzhag pa la'o/ /de nas bsam gtan dang po la'o/ /de nas mnyam par ma bzhag pa la sems gnas so/ /de la dang po'i 'gro ba la ni gnas pa dgu'o/ /gnyis pa la ni bcu bdun no/ /'ong ba la ni bco brgyad do/ /'dir bstan bcos las/ de nas seng ge rnam bsgyings pa'i/ /ting nge 'dzin la snyoms zhugs nas/ /rten cing 'brel 'byung lugs mthun dang / /lugs mi mthun la rtogs par byed/ /'gog dang bcas pa'i snyoms 'jug dgur/ /rnam pa gnyis su song 'ongs nas/ /'dod par gtogs pa'i rnam par shes/ /mnyam bzhag min pa'i mtshams bzung ste/ /thod rgal gyi ni snyoms 'jug pa/ /gcig dang gnyis gsum bzhi dang lnga/ /drug dang bdun dang brgyad rgal nas/ /'gog pa'i bar du mi 'drar 'gro/ /zhes bya ba gsungs te/ seng ge rnam par bsgyings pa ni mdo ji lta ba bzhin no/ /thod rgal ni zab pa yin pas des na de'i mtshan nyid bshad de thod rgal la snyoms par 'jug par bya ba yin no/ /ji ltar zhe na/ smras pa snyoms par 'jug pa dgu ni rnam pa gnyis te/ 'gro ba dang / phyi nas 'ong ba'o/ /dang po ji ltar 'gro zhe na/ 'gog pa'i bar du zhes bya ba ni 'gog pa la snyoms par 'jug pa mthar byas pa'o/ /gzhan ni brgyad de/ sngar rim zhes bya ba'i don to/ /yang ji ltar 'gro ba yin zhe na/ de'i phyir/ gcig dang gnyis gsum bzhi dang lnga/ /drug dang bdun dang brgyad rgal bas/ /zhes bya ba gsungs so/ /'gog pa dang bcas par byas nas gzhan brgyad la snyoms par 'jug pa'o/ /'dod pa na spyod pa'i mnyam par ma bzhag pa'i sems mtshams su byas nas mthar 'gro bar byed ces bya ba'i don to/ /phyi nas ji ltar 'ong ba ma yin zhe na/ de'i phyir mi 'drar 'gro zhes bya ba gsungs te/ mi 'drar 'gro zhes bya ba ni mnyam par ma bzhag pa las mnyam par bzhag pa dang / mnyam par bzhag pa las mnyam par ma bzhag pa zhes bya ba'i don to/ /'dir yang / 'dod par gtogs pa'i rnam par shes/ /mnyam bzhag min pa'i mtshams bzung ste/ /zhes bya ba dang sbyar ro/ /des na 'di ni mnyam par ma bzhag pa'i sems la sogs pas 'ong zhing / mthar yang mnyam par ma bzhag pa'i sems nyid du 'gro zhing 'dug go/ /'di ni 'gog pa'i lam gyi rtse mo'i mngon par rtogs pa'o/ /thabs la mkhas pa thams cad yongs su rdzogs par 'gyur ba bshad nas/ yang ji skad sgom pa de dag yongs su rdzogs par 'gyur zhe na/ gal te bsgom pas spang bar bya ba'i rnam par rtog pa dgu tshan bzhi zad na'o/ /de dag gi gnyen po nyid/ de nas bcom ldan 'das yum chen mo dag las gsungs pa/ de dag shugs kyis rtogs par 'gyur ro/ / kho bos de'i yan lag mdor bsdus nas brjod par bya ste/ de la rnam par rtog pa dang po dgu'i dbang du byas nas/ bstan bcos las/ mdor bsdus rgyas dang sangs rgyas kyi/ /bstang bas yongs su ma bzung dang / /dus gsum yon tan med pa dang / /legs pa'i lam ni rnam gsum la/ /gzung ba'i rnam rtog 'di gcig ste/ /sbyor ba'i rnam pa'i spyod yul can/ /zhes bya ba gsungs te/ gcig ces bya ba ni dang po'o/ /sbyor ba'i rnam pa'i spyod yul can zhes bya ba ni/ shes rab kyi pha rol tu phyin pa'i sbyor ba'i khyad par gyi yul lo/ /rgyas dang mdor bsdus zhes brjod par bya'o zhe na/ sdeb sbyor gyi dngos byas nas gzhan brjod pa yin no/ /rgyas pa la rmongs pa la ni rgyas pa'i rnam par rtog pa'o/ /de'i gnyen po ni sbyin pa nas stobs dang mi 'jigs pa la sogs pa'i bar gyi gnas mang po dag la byang chub sems dpas bslab par bya'o/ /mdor bsdus pa smos pa ni mdor bsdus pa'i rnam par rtog pa ste/ de'i gnyen po ni gang la yang bslab par mi bya'o zhes bya ba dang / mang po la yang de dag gis bslab par mi bya ste/ stong pa nyid du ro gcig pa'i phyir ro/ /yang dag par rdzogs pa'i sangs rgyas kyis bstangs shing gang yongs su bzung ba de med pa'i rnam par rtog pa ni rnam par rtog pa'o/ /de'i gnyen po ni gang shes rab kyi pha rol tu phyin pa la bslab par byas nas/ sbyin pa'i pha rol tu phyin pa nas/ rnam pa thams cad mkhyen pa nyid rjes su thob par byed de/ des na phyogs bcu'i sangs rgyas thams cad kyis bstangs shing bdag yongs su bzung nas/ rang nyid kyi yum la de dag byas pa gzo ba yin no zhes de ltar shes par bya ba yin no/ /yon tan med pa ni phan yon med pa'o/ /sbyor ba dang mthong ba dang / bsgom pa'i dus gsum yin pa'i phyir dus gsum mo/ /de dus gsum la rnam par sbyar ba ni rtog pa gsum mo/ /de'i gnyen po ni phan yon no/ /rgyas pas khyad par du gsungs pa 'di ni shes rab kyi pha rol tu phyin pa la spyod pa dang / shes rab kyi pha rol tu phyin pa mngon par bsgrub pa dang / shes rab kyi pha rol tu phyin pa la bsgom pa'i phan yon no/ /'di dag ni go rims bzhin du sbyor ba dang / mthong ba dang / bsgom pa'i lam gyis dus kyi yon tan med pa'i rnam par rtog pa gsum mo/ /legs pa'i lam zhes bya ba ni mya ngan las 'das pa'i lam sbyor ba la sogs pa'i dbye bas rnam pa gsum la rmongs pa'i rnam par rtog pa gsum mo/ /de rnams kyi gnyen po ni go rims bzhin du gzugs dang / tshor ba la sogs pa zhi ba dang / rag las pa dang / gsog dang / snying po med pas de la spyod par bya ba dang / nam mkha' stong pa nyid du mngon par sgrub pas mngon par bsgrub par bya ba dang / nam mkha' stong pa nyid du sgom pas 'di bsgom par bya ba ste/ 'di ni sbyor ba la sogs pa byang chub kyi lam gsum la kun du rmongs pa'i rnam par rtog pa'o/ /'dis ni rnam par rtog pa dgu tshan dang po bstan to/ /dgu tshan gnyis pa ni rnam par rtog pa'i dbang du byas nas/ bstan bcos las/ gnyis pa sems dang sems byung rnams/ /'jug pa'i yul can yin bzhed de/ /sems mi skye dang byang chub kyi/ snying po yid la byed pa dang / /theg pa dman pa yid byed dang / /rdzogs pa'i byang chub yid mi byed/ /bsgom dang sgom pa med pa dang / /de dag las ni bzlog nyid dang / /ji bzhin don min rnam rtog pa/ /bsgom pa'i lam 'di shes par bya/ /zhes bya ba gsungs te/ gzung ba'i rnam par rtog pa gnyis pa ni sems dang / sems las byung ba 'jug pa de'i yul can no/ /'di yun ring po ji srid spyad na spyod par 'gyur zhes bya ba ni dris pa'o/ /dang po sems bskyed pa nas bzung nas zhes bya ba ni lan te/ 'di ni sems bskyed pa'i rnam par rtog pa'o/ / byang chub kyi snying po'i bar du yid la byed pa ni 'di ji ltar spyad par bya mngon par bsgrub par bya bsgom par bya zhes bya ba ste/ 'di ni byang chub kyi snying po yid la byed pa'i rnam par rtog pa'o/ /theg pa dman pa yid la byed pa'i go skabs mi 'byed pa 'di ni theg pa dman pa dag yid la byed pa'i rnam par rtog pa'o/ /rnam pa thams cad mkhyen pa nyid yid la byed pa mi 'dor bas chos nyid gang yin pa la spyad pa dang / ji ltar sems dang sems las byung ba mi 'jug pa de ltar spyad par bya'o/ /'di ni rdzogs pa'i byang chub yid la mi byed pa'i rnam par rtog pa'o/ /ci bsgoms pas rnam pa thams cad mkhyen pa nyid rjes su thob par 'gyur ba dang / ci ma bsgoms pas rnam pa thams cad mkhyen pa nyid rjes su thob par 'gyur ba dang / bsgom pa yang med/ bsgom pa med pa ma yin pa'i rnam par rtog pa'o/ /ma bsgoms pas de rjes su thob pa ni ji ltar de bzhin nyid dang / yang dag pa'i mtha' dang / chos kyi dbyings lta bu ste/ 'di ni don ji lta ba bzhin ma yin pa'i rnam par rtog pa'o/ /'di ni gzung ba'i rnam par rtog pa gnyis pa'o/ /dgu tshan gsum pa'i rnam par rtog pa'i dbang du byas nas/ bstan bcos las/ sems can btags pa'i spyod yul dang / /chos btags pa dang stong min dang / /chags dang rab 'byed bdag nyid dang / /dngos por byed dang theg gsum dang / /yon ni dag pa ma yin dang / /spyod pa rnam par 'khrug pa la/ /'dzin par byed pa dang po de/ /shes par bya ba bsgrags pa yin/ /zhes bya ba gsungs te/ sems can du gdags par bya ba ma yin te/ mi dmigs pa'i phyir ro/ /'di dag ni sems can du btags pa'i rnam par rtog pa'o/ /chos thams cad du btags pa ma yin pa 'di ni chos su btags pa'i rnam par rtog pa'o/ /chos thams cad kyi rang gi mtshan nyid stong par mthong ba 'di ni stong pa ma yin pa'i rnam par rtog pa'o/ /chos dang chos mi dmigs pa la spyad pa de yang mi dmigs pa ste/ 'di ni chags pa'i rnam par rtog pa'o/ /chos rnams la rab tu rnam par dbye ba byas pa de yang mi dmigs pa'i tshul gyis zhes bya ba ni rab tu rnam par 'byed pa'i bdag nyid kyi rnam par rtog pa'o/ /dngos po'i don du spyod pa ma yin te/ gang gi phyir ma byas pa dang / rnam par ma byas pa dang / mngon par 'dus ma byas pa ni chos thams cad de/ 'di ni dngos po'i ched du byed pa'i rnam par rtog pa'o/ /gal te chos thams cad ni ma byas pa rnam par ma byas pa/ mngon par 'dus ma byas pa de lta bu yin mod kyi/ ji ltar de bzhin gshegs pas/ gang la la zhig mngon par sprul te/ mngon par rdzogs par sangs rgyas shing chos kyi 'khor lo bskor ba dang / theg pa gsum gyis sems can yongs su grol bar mdzad pa ni 'jig rten gyi tha snyad du yin gyi don dam par ni ma yin no/ /de bzhin du de bzhin gshegs pa yang ste/ 'di ni theg pa gsum gyi rnam par rtog pa'o/ /gal te yang de bzhin gshegs pa dang / sprul pa la khyad par med pa de ltar yang yon yongs su dag par 'gyur te/ 'di ltar de bzhin gshegs pa la phul ba'i yon ni phung po'i lhag ma med pa'i mya ngan las 'das pa'i bar du yang zad par mi 'gyur te/ de bzhin du sprul pa la yang ngo / /de bzhin du de bzhin gshegs pa la nam mkha' la me tog gtor ba'am/ de bzhin du sangs rgyas la phyag 'tshal lo zhes smra ba'am/ yid la byed pa'am/ mtshan mar byed pa ste/ gang sprul pa yang de bzhin gshegs pa dang / chos kyis 'dra'o/ /'di ni yon yongs su ma dag pa'i rnam par rtog pa'o/ /spyod pa ni pha rol tu phyin pa la sogs pa'o/ /de ni rnam par 'khrug pa ni phye ba'o/ /ga las she na/ chos nyid las te/ sbyin pa'i pha rol tu phyin pa nas/ shes rab kyi pha rol tu phyin pa nyid dang / chos thams cad kyi chos nyid ces bya ba'i bar du'o/ /de ltar na bcom ldan 'das kyi chos rnams ji ltar rnam par 'khrug pa yin zhe na/ ji ltar gzhan dag 'jug par 'gyur snyam nas/ ming dang mtshan mas chos rnams mtshon te/ chos rnams ston pa yin gyi/ chos rnams kyi chos nyid rnam par 'khrug pa ni ma yin no/ /'di ni chos nyid 'khrug pa la rnam par rtog pa'o/ /dgu tshan bzhi pa'i rnam par rtog pa'i dbang du byas nas/ bstan bcos las/ sems can btags dang de rgyu yi/ /yul can bsgom pa'i lam 'brel pa/ /de la gnod pa byed pa yis/ /mi mthun phyogs gzhan rnam pa dgu/ /thams cad mkhyen nyid gsum dag gi/ /bdag nyid ji bzhin sgrib rnam gsum/ /zhi lam de bzhin nyid sogs dang / /mtshungs par ldan dang mi ldan dang / /mi mnyam sdug bsngal la sogs dang / /nyon mongs rnams kyi rang bzhin dang / /gnyis su med la kun rmongs la/ /rnam par rtog pa tha mar bzhed/ /ces bya ba gsungs te/ rnam pa dang rtags dang / mtshan ma gang gis mtshon pa'i chos de dag ni de bzhin gshegs pas rjes su mkhyen te/ des na de bzhin gshegs pa ni rnam pa thams cad mkhyen pa nyid ces brjod do/ /'di ni rnam pa thams cad mkhyen pa nyid la rmongs pa'i rnam par rtog pa'o/ /yang gang dag nyan thos dang / rang sangs rgyas kyi lam dang / yang gang dag byang chub sems dpa'i lam de dag /byang chub sems dpas yongs su rdzogs par byas shing lam gyi bya ba de dag byas te/ smon lam yongs su ma rdzogs pa dang / sems can yongs su ma smin pa dang / sangs rgyas kyi zhing yongs su ma sbyangs par yang dag pa'i mtha' mngon sum du mi byed de/ des na byang chub sems dpas lam gyi rnam pa shes pa zhes brjod de/ 'di ni lam shes pa la rmongs pa'i rnam par rtog pa'o/ /phyi dang nang gi chos 'di thams cad de yang nyan thos dang / rang sangs rgyas dag gis shes te/ lam thams cad dang / rnam pa thams cad ni ma yin no/ /des na nyan thos dang / rang sangs rgyas la thams cad shes pa zhes brjod de/ 'di ni thams cad shes pa la rmongs pa'i rnam par rtog pa'o/ /chos thams cad kyi pha rol tu mya ngan las 'das par song ba'am/ 'phags pa thams cad 'dis gshegs pas na/ shes rab kyi pha rol tu phyin pa'o/ /yang na de bzhin gshegs pas chos thams cad pha rol don dam pa tha dad pa med pa de kho na nyid 'di gzigs pa'o/ /gzhan yang 'di'i khongs su de bzhin nyid dang / yang dag pa'i mtha' dang / chos kyi dbyings su gtogs pa des na shes rab kyi pha rol tu phyin pa zhes brjod de/ 'di ni zhi ba'i lam la rmongs pa'i rnam par rtog pa'o/ /'di ni de bzhin nyid la sogs pa dang ldan pa yang ma yin/ mi ldan pa yang ma yin pa de bzhin du 'di ni gzugs med pa/ bstan du med pa/ thogs pa med pa ste/ 'di lta ste/ mtshan nyid med par mtshan nyid gcig pa'i phyir ro/ /'di ni de bzhin nyid la sogs pa dang ldan pa dang / mi ldan pa'i rnam par rtog pa'o/ /gang gis kyang 'di dpyad par mi nus pa de'i phyir/ thun mong ma yin pa ste 'di ni mi mnyam pa la rmongs pa'i rnam par rtog pa'o/ /'di la spyod pa ni sdug bsngal dang / kun 'byung ba dang / 'gog pa dang / lam gyi don la spyad par bya'o zhes bya ba ste/ 'di ni sdug bsngal la sogs pa la rmongs pa'i rnam par rtog pa'o/ /'dod chags la sogs pa don kyang ma yin don med pa yang ma yin pa 'di ni rang bzhin la rmongs pa'i rnam par rtog pa'o/ /'di ltar gnyis su med pa dang / gnyis su byar med pa ma yin pa'i chos dmigs pa de bzhin du/ gnyis kyi chos rjes su thob pa med pa yin te/ 'di ni gnyis kyi dngos po la rmongs pa'i rnam par rtog pa'o/ /de ltar bsgom pas spang bar bya ba'i rnam par rtog pa sum cu rtsa drug bstan to/ /de ltar re zhig skyon rnams zad na yang yon tan rnams ji ltar 'byung zhe na/ de'i phyir bstan bcos las/ yams nad 'di dag zad nas ni/ /yun ring lon nas dbugs phyin ltar/ /rnam pa kun du 'gro ba yi/ /bde sgrub yon tan phun tshogs kun/ /rgya mtsho che la chu bo bzhin/ /'bras bu mchog gis spa ba yi/ /sems dpa' chen po de la ni/ /rnam pa kun du ston par byed/ /ces bya ba gsungs te/ yon tan ni rang bzhin gyis grub pa yin te/ skyon gyis zil gyis mi non pa 'ba' zhig tu zad do/ /yun ring po nas skyon zad na/ /bos pa bzhin du de ni byang chub sems dpa' sten par byed do/ /skyon thams cad spangs pa ni spa ba'o/ /rnam pa ni thams cad du'o/ /lhag ma ni rtogs sla'o/ /byang chub sems dpa' sems dpa' chen po zhes bya ba nas/ spong bar 'gyur ro zhes bya ba'i bar gyis ni bsgom pa'i lam gyi phan yon no/ /bar chad med pa'i ting nge 'dzin brjod par bya ste/ de'i dbang du byas nas/ bstan bcos las/ stong gsum skye bo nyan thos dang / /bse ru'i rtogs pa phun tshogs dang / /byang chub sems dpa' skyon med la/ /bkod pa'i dge rnams dper mdzad nas/ /bsod nams mang po nyid kyis ni/ /sangs rgyas nyid kyi bar med de/ /bar chad med pa'i ting nge 'dzin/ /de ni rnam pa kun mkhyen nyid/ /ces bya ba gsungs te/ bar du gcod par nus pa ni bar chad do/ /de med pa ni bar chad med pa'o/ /bar chad med pa'i ting nge 'dzin ni mdo las gsungs te/ bar chad med pa dang bar chad kyi rgyu ni ji ltar gsungs she na/ bsod nams mang po nyid kyis so/ /de yang ji ltar gsungs she na/ dge ba ni bsod nams te/ de nyid dper mdzad nas dge ba ji lta bu zhe na/ ci stong gsum gyi 'jig rten gyi khams kyi sems can nyan thos dang / rang sangs rgyas dang / byang chub sems dpa'i skyon med pa gang la bkod pa'o/ /nyan thos ni slob ma rnams so/ /bse ru ni rang sangs rgyas rnams te/ de dag gi rtogs pa'o/ /sngar skyon med pa la zhugs pa'i byang chub sems dpa'i rtogs pa phun sum tshogs pa ni byang chub sems dpa'i skyon med pa'o/ /bsod nams mang po nyid kyang gang du gsungs she na/ bcom ldan 'das ma chen mo dag las so/ /'di ji ltar gsungs she na/ dmigs pa can gyi byang chub sems dpa' gang gA'i klung gi bye ma snyed kyi bskal par byas pa'i sbyin pa las byung ba'i bsod nams de dag pas ting nge 'dzin 'di la se gol gtogs pa srid du snyoms par 'jug pa 'di ches bsod nams mang du bskyed do/ /'di rab tu byed pa 'di las ji ltar gsungs she na/ yang med kyang yang gi don du 'gro ste/ yang ni ma gsungs pa'i don bsdu ba nyid kyi phyir ro/ /de ni rnam pa kun mkhyen nyid/ /ces bya ba ni de yang sangs rgyas nyid de thams cad mkhyen pa nyid kyi mtshan nyid do/ /'di yi dmigs pa dngos med de/ /bdag po dran pa yin par bzhed/ /rnam pa bzhi nyid ces bya ba gsungs pa la bar chad med pa'i ting nge 'dzin 'di'i dmigs pa ni chos thams cad dngos po med pa'o/ /bdag po'i rkyen ni dran pa'o/ /rnam pa ni zhi ba nyid de/ chos thams cad kyi rnam pa nub pa'o/ /rnam pa thams cad mkhyen pa nyid 'di la/ rab tu smra ba rnams brgyud mar rgol te/ rgol ba ni smra ba dang smra ba'i mtshon chas 'debs pa'i tshul yod pa de ni brgyud mar rgol ba ste/ ji ltar dbyig pa dang dbyig pas lta bu'o/ /de'i phyir mdo las/ rab 'byor thabs la mkhas pa thams cad yongs su rdzogs par 'tshal ba'i zhes bya ba la sogs pa gsungs pa la thob par bya ba ma yin pas thabs te/ rnam pa thams cad mkhyen pa nyid do/ /de la mkhas pa ni log par rtog pa rnams sel ba ste/ de dag 'thob par 'dod pa'o/ /shes rab kyi pha rol tu phyin pa zhes bya bar ni bar chad med pa'i ting nge 'dzin gyi mtshan nyid do/ /spyad par bya ba ni sbyor ba dang / sgrub pa dang / sgom pa'o/ /bsgom pa zhes bya ba ni bar chad med pa'i ting nge 'dzin gyi rnam pa thams cad mkhyen pa nyid thob pas na/ log par rtog pa thams cad zad pa'i phyir ro zhes dgongs so/ / mngon par grub par byed pa zhes bya ba ni dmigs pa ji lta ba dang / bdag po ji lta ba dang / rnam pa ji lta ba bzhin du mngon du byed pa'o/ /mngon par bsgrub pa zhes bya ba ni rang gi ngang gis sgrub par byed pa'o/ /'das pa zhes bya ba ni mtshams bcad pa'o/ /rab 'byor zhes bya ba la sogs pas ni de bzhin gshegs pas dgongs pa'i phan yon gzhan gsungs pa yin te/ bar chad med pa'i ting nge 'dzin gyis snyoms par zhugs pa ni ma yin no/ /bar chad med pa'i ting nge 'dzin thob pa de ni/ yang ngan 'gro 'am/ bde 'gror 'gro ba med do/ /lhag ma le'u rdzogs pa'i bar du ni rtogs sla'o/ /log par rtog pa'i dbang du byas nas/ bstan bcos las/ dmigs pa 'thad dang de yi ni/ /ngo bo nyid nges gzung ba dang / /rnam kun mkhyen nyid ye shes dang / /dam pa'i don dang kun rdzob dang / /sbyor dang dkon mchog gsum pa dang / /thabs bcas thub pa'i rtog pa dang / /phyin ci log ni lam bcas dang / /gnyen po mi mthun phyogs dag dang / /mtshan nyid dang ni sgom pa la/ /smra ba rnams kyi log rtog pa/ /rnam pa kun mkhyen nyid rten can/ /rnam pa bcu drug dag tu bzhed/ /ces bya ba gsungs te/ drug dang bcu ni bcu drug ces bya ba'i don to/ /ci'i phyir bcu drug yin zhe na/ gang gi phyir dmigs pa 'thad pa la sogs pa'i don bcu drug po de dag la'o/ /de ltar na ji ltar rnam pa thams cad mkhyen pa nyid kyi rten can yin zhe na/ dmigs pa la sogs pa ni de dag gi yul la'o/ /yul dang 'brel pa'i phyir rnam pa thams cad mkhyen pa nyid la yul du nye bar gdags te/ dper na rgyal po'i bus nyes pa byas na/ rgyal pos nyes pa byas par 'gyur ba lta bu'o/ /log par rtog pa rnams ni phal cher gnyen pos gnod par rtog par byas pa'i/ de la log par rtog pa dang po ni gang de ltar na rnam pa thams cad mkhyen pa nyid kyi dmigs pa dngos po med pa de gang yin/ gal te gang gi phyir chos rnams kyi kun du brtags pa'i ngo bo de nyid yin na ni 'khrul par 'gyur te/ kun gzhi rnam par shes pa bzhin no/ /ci ste gzhan gyi dbang de ji ltar med ce na/ 'dir lan ni gang la ngo bo nyid med pa de ni med pa ste/ chos rnams kyi rang gi ngo bo med pa'i phyir sbyor ba las byung ba ni med do/ /gzhan yang chos thams cad kyi ngo bo nyid med de 'di ni dmigs pa 'thad pa la log par rtog pa'o/ /gal te chos thams cad dngos po med pa yin na/ las dang po pa thabs la mkhas pa gang gis sbyin pa la sogs pa la spyod ce na/ sbyin par bya ba dang / len pa dang / sbyin bdag ngo bo nyid med par nges par gzung ba nyid ni de'i thabs la mkhas pa yin no/ /'di ni de'i ngo bo nyid med par nges par gzung ba la log par rtog pa'o/ /de lta na bden pa mthong ba'i thabs la mkhas pa ci zhig yin zhe na/ des ni chos rnams 'phags pa'i spyan gyis gzigs pa yin te/ gzhan gyi dbang gi ngo bo nyid kyi dngos po yang mi dmigs te/ sbyor ba las byung ba'i ngo bo nyid dam/ kun du brtags pa de yang med pa'i phyir ro/ /dngos po gzhan kun brtags pa'i ngo bo nyid lta ci smos te/ de ni shin tu med pa nyid kyi phyir ro/ /de sbyin pa la sogs pa la spyod pa na sbyin par bya ba dang / len pa dang / sbyin bdag so sor med do zhes yang dag par shes pa yin te/ dngos po dang dngos po med pa mi dmigs pa ni ji ltar med par shes pa yin zhe na/ kun rdzob tu yin gyi don dam par ni ma yin no/ /'dir sbyin pa la sogs pa thams cad ni lam gyi rnam pa ste/ rnam pa thams cad shes pa de ni dngos po dang / dngos po med pa mi dmigs pa'o/ /de la mthar phyin pa'i ye shes kyi ngo bo nyid du 'du shes pa ni rnam pa thams cad mkhyen pa nyid kyi ye shes la log par rtog pa'o/ /gang kun rdzob nyid don dam pa ste/ gang gi phyir de dag de bzhin nyid du gcig pa nyid do/ /'on kyang phung po rnams la mngon par 'du shes pa de dag la lan gdab pa'i don du kun rdzob kyi bden pa la brten nas/ dngos po med pa zhes bya ba dang / dngos por 'du shes la dngos po'o zhes bstan te/ don dam par ni dngos po dang / dngos po med pa yang mi dmigs so/ /'di ni bden pa gnyis la log par rtog pa'o/ /sbyor ba ni spyod pa'o/ /chos thams cad stong pa yin na/ ji ltar spyod ce na/ sbyin pa la sogs pa thams cad kyi stong pa nyid yin pa la/ thams cad 'khor gsum mi dmigs pa'o/ /'di ni sbyor ba la log par rtog pa'o/ /sangs rgyas zhes bya ba las kyi rkyen dang sbyar na shes bya thams cad sangs rgyas su 'gyur ro/ /ji ste byed pa'i rkyen dang sbyar nas rtogs pa dang ldan pa sangs rgyas yin na ni sems dang ldan pa thams cad sangs rgyas su 'gyur ro zhe na/ 'dir lan ni yang dag pa'i don sangs rgyas zhes bya ba yin pa'am/ yang dag pa'i chos mngon par rtogs pa zhes bya ba yin nam/ yang dag pa'i don rab tu rnam par rtog pa zhes bya ba yin pa'am/ 'di la chos thams cad ji lta ba bzhin du mngon par sangs rgyas pa zhes bya ba yin pa ste/ phyogs bzhi char la yang 'bru mang po par byas nas/ nges par tshig gi byang chub par bya'o/ /yang dag pa'i don zhes bya ba la don ni shes bya'o/ /de dang 'brel pa'i rtog pa ni bsdu ba'i don to/ /gang la yang dag pa nyid kyi don rtogs pa yod pa de ni sangs rgyas so/ /gzhan dag pa ni nges par kha cig tu 'khrul pa yod do/ /ji ltar yang dag pa'i don sangs rgyas yin zhe na/ bud+d+ha'i gnas su ni bud bzhag la/ ar+tha'i gnas su ni d+ha bzhag la/ sangs rgyas su 'gyur ro zhes bsams la/ yang dag pa'i chos mngon par rtogs pa zhes bya ba ni yang dag pa dang / yang dag pa'i don ma yin pa'i don shes par byed pa nyid ni skyes bu dang 'brel ba pa'o/ /'dir ni rab kyi mthar phyin pa'i mngon par rdzogs par rtogs par byas pa yin te/ de rab tu bstan pa'i phyir mngon par rdzogs par sangs rgyas pa smos te/ 'di'i bsdu ba'i don ni tshig gnyis kho na la yin te/ de la bud d+ha'i sgra la ni bud bya la/ d+harmA'i sgra la ni yi ge gnyis pa'i phyi'o/ /yang dag pa'i don rab tu rnam par rtog pa zhes bya ba ni mngon sum gyi don te/ tshig gsum ni 'bru mang po par bya ba yin te/ d+ha'i sgra la ni snga ma kun la ni bu bzhag go/ /'di la chos thams cad ji lta ba bzhin du mngon par rdzogs par sangs rgyas pa ni blo dang / rtogs pa dang / mchod pa'i don la de ltar byung ba'i rkyen bya'o/ /de ltar byung ba'i rkyen byed pa pa yin pas drug par bya ste/ dang po'i tshig la ni bu bya/ gnyis pa la da bya/ gsum pa la ni d+ha'i sgra'o/ /'di ni sangs rgyas dkon mchog la log par rtog pa'o/ /de nas chos dkon mchog gang zhe na/ chos thams cad las khyad par du gyur pa nyid do/ /de la gal te chos las chos nyid tha dad par bzhag ste/ chos dang chos nyid 'di gnyis ni yang dag par bsdu ba'i phyir ro zhes bya ba'i tshig las te/ de'i tshe ni de bzhin gshegs pa'i ye shes la byang chub tu bzhag ste/ byang chub ni ngo bo'i rkyen dang ldan pa'i phyir ro/ /yang na chos ni chos nyid kyang yin te/ /chos kyi rang bzhin nyid yin pa'i phyir ro/ /de'i tshe ni de nyid chos dkon mchog ste/ yang dag pa'i mtha' yin pa'i phyir te/ de kho na nyid kyi mthar thug pa'i phyir ro zhes bya ba'i don to/ /de'i tshe ni byang chub kyi las kyi rkyen dang ldan pa'o/ /byang chub gnyi ka yang de bzhin gshegs pa'i ye shes la 'jug ste/ khyad par du gyur pa'i phyir ro/ /de la chos nyid kyi phyogs kyi dbang du byas nas/ byang chub ni stong pa nyid dang / de bzhin nyid dang / yang dag pa'i mtha' dang / chos nyid dang / chos kyi dbyings zhes gsungs te/ de la stong pa nyid ni mtshan nyid kyi phyir ro/ /rnam par mi 'gyur ba'i phyir de bzhin nyid do/ /de kho na nyid kyi mthar thug pa'i phyir/ yang dag pa'i mtha'o/ /chos rnams kyi rang bzhin yin pa'i phyir chos nyid do/ /'phags pa rnams kyi rgyu nyid yin pa'i phyir chos kyi dbyings so/ /yang byang chub ming tsam mo zhes gsungs te/ ming gi don gyis stong pa nyid ni byang chub ces bya ba'i bar du'o/ /yang dbyer med pa'i don ni byang chub kyi don du'o zhes gsungs te/ thams cad mkhyen pa'i ye shes la de bzhin nyid tsam snang ba'i phyir ro/ /ye shes kyi phyogs kyi dbang du byas nas/ byang chub kyi de bzhin nyid dang / ma nor ba'i de bzhin nyid dang / gzhan ma yin pa'i de bzhin nyid dang / gzhan du mi 'gyur ba'i byang chub bo zhes gsungs te/ de la byang chub kyi de bzhin nyid ces bya ba ni rtogs par bya ba'i de bzhin nyid de/ de kho na bzhin du rtogs par bya ba'i dngos po'i ngo bo yin gyi/ brdzun pa'i ngo bo ni ma yin no/ /ma nor ba zhes bya ba ni ma 'khrul ba'o/ /gzhan ma yin pa'i de bzhin nyid ces bya ba la/ byang chub las gzhan pa ni brdzun pa ste/ de'i de bzhin nyid byang chub kyi ngo bo nyid do/ /med pa de ni ngo bo byang chub nyid la snang ba'i phyir te/ de dang bral ba ni gzhan ma yin pa'i de bzhin nyid do/ /gzhan du mi 'gyur ba'i ngo bo zhes bya ba ni byang chub kyi rang bzhin rang gi bdag nyid kyis gsal ba ste/ de las gzhan pa'i dngos po ni brdzun pa'i bdag nyid du snang ba'o/ /de dang bral ba ni gzhan du mi 'gyur ba ste/ de yang 'khrul pas dben pa'i ye shes ni byang chub ces bya ba'i don to/ /yang ming dang mtshan ma tsam 'di ni byang chub po zhes bya ba gsungs pa la zhes bya ba'i sgra ni rim pa gzhan du sbyar te/ ming dang mtshan ma tsam 'di zhes bya ba gang rtogs pa de ni byang chub ces bya ba'i don to/ /sbyor ba nyid byang chub tu mtshon pa yin gyi/ 'di byang chub ni ma yin te/ de ni rnam par mi rtog pa'i phyir ro/ /de la ming ni gzugs can ma yin pa'i phung po'o/ /de dag ni brdzun pa ste/ don 'dra ba'i rnam pa ni mtshan ma'o/ /yang sangs rgyas rnams kyi rtogs pa yin pa de bas na/ byang chub ces gsungs te/ khyad par du gyur pa yin no zhes dgongs so/ /yang sangs rgyas rnams kyis mngon par rdzogs par sangs rgyas pa de bas na byang chub ces gsungs pa la/ tshig 'di don gtso bo yin gyi/ sgra ni ma yin te/ sangs rgyas rnams kyi rtogs pa yin pa de bas na/ byang chub ces bya ba'i don to/ /drug pa'i bsdu ba byas nas/ tshig snga ma la ni bo bya la/ tshig 'og ma la ni d+hi gzhag go/ /'di ni chos dkon mchog la log par rtog pa'o/ /tshogs yin pa'i phyir dge 'dun te/ mi phyed pa dang mi 'phrogs pa zhes bya ba'i don te/ gang las mi phyed pa dang / gang gis mi phyed pa ni yang dag par rdzogs pa'i byang chub las mi phyed pa dang / lha dang bcas pa bdud dang bcas pa dang / dman pa byang chub sgrub pa'i chos dang / mi dge ba'i chos kyis mi phyed pa'o/ / 'di ni dge 'dun dkon mchog la log par rtog pa'o/ /thabs bcas thub pa'i rtogs pa dang / /zhes bya ba ni rab tu byed pa'i tshig ste/ thabs la mkhas pa ni thabs kyis bstan te/ yul gyis yul can bstan pa'i phyir ro/ /rtogs pa zhes bya ba ni mngon par rtogs pa bstan te/ yang dag pa'i don mngon sum du rtogs pas na mngon par rtogs pa ste/ log pa'i shes pa dang / mi shes pa ma yin no zhes bya bar bsams so/ /thub pa zhes bya ba ni dngos po gtso bo'i rkyen byas te/ sangs rgyas nyid ces bya ba'i don to/ /thabs mkhas pa la byang chub mngon par rtogs pa zhes bya ba ni bsdu ba'i don to/ /'khor gsum mi dmigs pa thams cad mkhyen pa nyid dang ma bral ba'i sems kyis sbyin pa la sogs pa'i rnam par smin pa la re ba mi byed de/ 'on kyang sems can thams cad dgrol ba'i phyir yang dag par rdzogs pa'i byang chub tu yongs su sngo bar byed de/ de la sogs pa thabs la mkhas pa rgya cher gsungs so/ /'di ni thabs la mkhas pa la log par rtog pa'o/ /spros pa dang bral ba'i mngon par rtogs pa ni yod de/ gang la dngos po med pa dang / dngos po med pa ma yin pa'o/ /'di ni mngon par rtogs pa la log par rtog pa'o/ /mdo las ni spros pa'i sgra dang / bstan bcos las ni phyin ci log gi sgra brjod na gnyi ga yang don gcig pa nyid kyi phyir ro/ /gzugs rtag pa dang / mi rtag pa dang / bde ba dang / sdug bsngal ba dang / bdag dang / bdag med pa la sogs pa gang yin pa'i phyin ci log ni rab tu mang ste/ mdor bsdus na rnam par rtog pa ji snyed pa de thams cad ni spros pa'o/ /mi spro 'phro bar mi byed ces bya ba ni gnyen po'o/ /mi 'phro ba ni chos kyi dbyings te/ rnam par mi rtog pa nyid kyi phyir ro/ /de 'phro bar mi byed pa ni rnam par rtog par mi byed pa'o/ /'di ni phyin ci log gi log par rtog pa'o/ /'dir byang chub sems dpas ngan song gi lam rgyu dang 'bras bur bcas par shes par bya/ de dag las sems can rnams bzlog par bya ba nas/ mi dang mi'am ci dang / nam mkha' lding dang / dri za la sogs pa'i lam dang / de bzhin du rgyal chen bzhi'i ris dang / sum cu rtsa gsum pa nas/ 'du shes med 'du shes med min skye mched kyi bar dang / de bzhin du rgyun du zhugs pa'i lam nas/ dgra bcom pa'i lam gyi bar dang / rang sangs rgyas kyi lam dang / byang chub sems dpa'i lam dang / sangs rgyas kyi lam rgyu dang 'bras bu dang bcas par shes par bya'o/ /gang yang 'bras bu de la gzhag par 'os pa ni de dag de la rnam par 'jog par byed pas na/ sangs rgyas kyi bar du'o/ /bdag nyid theg pa dman pa'i sa las 'das te/ thams cad mkhyen pa mthong bas byang chub sems dpa'i skyon med pa la zhugs pa'o/ /'di ni lam la log par rtog pa'o/ /'dir 'phags pa'i gang zag thams cad nyid ni nyon mongs pa dang / nye ba'i nyon mongs pa dang / 'dod pa dang / gzugs dang / gzugs med pa'i khams dang / byang chub kyi phyogs dang / pha rol tu phyin pa la sogs pa dang / de'i 'bras bu dang / 'phags pa'i chos thams cad dang ldan pa yang ma yin bral ba yang ma yin/ gzugs med pa bstan du med par 'di ltar mtshan nyid med par mtshan nyid gcig pa ste/ gang de ltar mi shes pa de la kun rdzob tu byang chub kyi phyogs byang chub sgrub par byed pa bstan pa yin no/ /'di ni mi mthun pa'i phyogs dang gnyen po la log par rtog pa'o/ / bcom ldan 'das ma las sems can rnams gzung bar bya ba'i don du kun rdzob kyi bden pa la brten nas/ chos rnams kyi rang gi mtshan nyid rgya cher bstan te/ don dam par ni mtshan nyid dang mtshan nyid med pa la bslab par mi bya ste/ gang gi phyir mtshan nyid med pa'i dbyings 'di ni rtag tu gnas pa'o/ /'di ni mtshan nyid la log par gol te/ pha rol tu phyin pa la sogs pa'i chos rnams mtshan nyid med pa yin na/ de ltar mtshan nyid med pa de dag sgom par 'gyur zhe na/ rab 'byor dngos po'i 'du shes can la dngos po med pa'i ngo bo nyid kyi chos shes rab kyi pha rol tu phyin pa sgom pa ni med de/ phyin ci log pa'i phyir ro/ /'on kyang dngos po'i 'du shes can gyis chos thams cad rnam par 'jig pa ni shes rab kyi pha rol tu phyin pa sgom pa'o/ /de bzhin du dngos po'i 'du shes can la sbyin pa'i pha rol tu phyin pa sgom pa med de/ 'di la 'di bdag gis sbyin no zhes bya ba de lta bu ni dngos po'i 'du shes can no/ /de bzhin du byang chub kyi phyogs la sogs pa la yang brjod par bya'o/ /bden pa mthong ba rnams ni chos rnams dngos po med pa'i ngo bo nyid 'ba' zhig sgom par byed de/ dngos po'i 'du shes su yang ma yin/ dngos po med pa'i 'du shes su yang ma yin te/ 'du shes ni spros pa yin la shes rab kyi pha rol tu phyin pa ni spros pa med pa yin pas so/ /'di ni sgom pa la log par rtog pa'o/ /byang chub sems dpa'i gnas skabs 'di la me tog bkram pa zhes bya ba'i de bzhin gshegs par lung bstan te/ des na des mtshon pa'i le'u ni de'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel slob dpon rin chen 'byung gnas zhi bas rnam par sbyar ba snying po mchog ces bya ba las le'u nyi shu rtsa brgyad pa'o/ / //da ni mthar gyis pa'i mngon par rtogs pa brjod par bya ste/ de'i dbang du byas nas bstan bcos las/ sbyin pa'i shes rab bar dag dang / /sangs rgyas la sogs dran dang chos/ /dngos med ngo bo nyid kyis te/ /mthar gyis pa yi bya bar bzhed/ /ces bya ba gsungs te/ mthar gyis bya ba dang / mthar gyis bslab pa dang / mthar gyis bsgrub pa ni sngar bstan nas/ da ltar ni de bshad par bya ste/ bzhed pa ni 'dod pa'o/ /gang zhe na/ sbyin pa zhes bya ba la sogs pa smos te/ sbyin pa zhes bya ba ni sbyin pa'i pha rol tu phyin pa'o/ /shes rab bar dag ces bya ba ni shes rab kyi pha rol tu phyin pa'i bar dag go/ bar smos pas ni tshul khrims kyi pha rol tu phyin pa dang / bzod pa'i pha rol tu phyin pa dang / brtson 'grus kyi pha rol tu phyin pa dang / bsam gtan gyi pha rol tu phyin pa'o/ /sangs rgyas la sogs dran pa dang / /zhes bya ba ni sangs rgyas la sogs pa'i yul la rjes su dran pa'o/ /dang zhes bya ba ni rim pa bzhin du sbyar te/ chos dngos po med pa'i ngo bo nyid kyis kyang zhes bya bas ni dngos po gtso bor ston te/ chos rnams dngos po med pa'i ngo bo nyid kyis kyang zhes bya ba'i don to/ /bar ni de ltar de 'dod pa'o/ /de'i phyir mdo las/ gzhan yang rab 'byor zhes bya ba la sogs pa la/ 'di ltar zhes bya ba ni 'chad par 'gyur ba'i tshig gsum gyis so/ / shes rab kyi pha rol tu phyin pa zhes bya ba ni mthar gyis pa'i bya ba'o/ /rjes su rig par bya'o zhes bya ba ni rtogs par bya ba'o/ /ji ltar zhe na/ chos thams cad chags pa med pa'i phyir shes rab kyi pha rol tu phyin par rjes su rig par bya'o/ /chos thams cad dbyer med pa'i phyir shes rab kyi pha rol tu phyin par rjes su rig par bya'o/ /chos thams cad 'byung ba med pa'i phyir shes rab kyi pha rol tu phyin pa rjes su rig par bya'o zhes gsungs te/ de la dang po'i chos thams cad ni pha rol tu phyin pa drug yin te/ de dag nyid byang chub kyi lam nyid yin pa'i phyir ro/ /chos kyi sgra yang 'dir lam gyi tshig yin pa'i phyir ro/ /chos thams cad chags pa med pa ni ma chags pa ste/ bgegs med pa nyid do/ /rim gyis sems can yongs su grol bar bya ba'i phyir byang chub sems dpa' des de rjes su rig par bya'o/ /de ji ltar dang po sems bskyed pa nas nye bar bzung ste/ sbyin pa'i pha rol tu phyin pa la spyod/ bdag nyid kyang sbyin pa gtong zhing gzhan dag kyang sbyin pa'i pha rol tu phyin pa la 'jog par byed de/ sbyin pa'i bsngags pa yang rjod par byed/ gzhan gang dag sbyin pa'i pha rol tu phyin pa la spyod pa de dag gi bsngags pa brjod cing rjes su mthun par byed de/ de sbyin pa des longs spyod kyi phung po chen po thob po/ /ser sna dang bral ba'i sems kyis bza' ba dang / btung ba dang / gos dang / byug pa dang / mal cha dang / gnas dang / gzhan yang bde ba'i yo byad de 'dod pa rnams la sbyin par byed do/ /de sbyin pa des sems can rnams tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes mthong ba la 'jog par byed do/ /de tshul khrims la sogs pa'i phung po dang ldan pa de nyid kyis nyan thos la sogs pa'i sa las 'da' bar byed/ byang chub sems dpa'i skyon med pa la 'jug par byed/ sangs rgyas kyi zhing yongs su sbyong bar byed/ sems can rnams yongs su smin par byed/ rnam pa thams cad mkhyen pa nyid thob par byed/ chos kyi 'khor lo rab tu skor bar byed/ sems can rnams theg pa gsum la 'god cing 'khor ba las yongs su grol bar byed de/ de ltar sbyin pas mthar gyis bya ba byed kyang de dang sems can rnam la mi dmigs so/ /de ltar 'di la ngo bo nyid med de gang la ngo bo nyid med pa de ni dngos po med do/ /'di ni sbyin pa'i pha rol tu phyin pa'i mthar gyis pa'i bya ba'o/ /de bzhin du tshul khrims la sogs pa drug kyang pha rol tu phyin pa drug gis mthar gyis pa'i bya ba'o/ /chos thams cad dbyer mi phyed pa'i phyir shes rab kyi pha rol tu phyin par rjes su rig par bya'o zhes bya ba la chos thams cad ni rjes su dran pa drug go/ /de rnams ji ltar chos yin zhe na/ sems 'dzin pa'i phyir ro/ /gzhan yang bsod nams kyang 'jig rten na chos su brjod la de yang bsgoms pa las byung ba'i bsod nams yin no/ /chos thams cad dbyer mi phyed pa ni tha mi dad pa'i mnyam pa nyid de/ dngos po med pa'i ngo bo nyid yin pa'i phyir ro/ /des rjes su rig par bya ba ni snga ma bzhin no/ /de ltar na byang chub sems dpa' dang po sems bskyed pa la brten nas/ rnam pa thams cad mkhyen pa nyid dang ldan pa'i yid la byed pas/ dngos po med pa'i ngo bo nyid kyi chos rnams la mos shing rjes su dran pa drug sgom par byed de/ de dag rang yang sgom par byed cing / gzhan dag kyang de rnams la 'jog par byed/ gzhan gang dag de la spyod par byed pa de dag gi yang bsngags pa brjod cing rjes su mthun par byed do/ /de de dag la de ltar dngos po med pa'i ngo bo nyid kyi tshul gyis bsgoms pa na/ byang chub kyi phyogs kyi chos sum cu rtsa bdun nam/ rnam pa thams cad mkhyen pa nyid kyi bar du yongs su rdzogs par byed cing / de dngos po med pa'i ngo bo nyid kyis chos thams cad mngon par rdzogs par byang chub nas/ chos kyi 'khor lo bskor ba nas/ sems can yongs su smin pa'i bar du byed do/ /de la sangs rgyas bcom ldan 'das ni gzugs la sogs pa'i phung po ma yin/ mtshan dang dpe byad ma yin/ tshul khrims la sogs pa'i phung po ma yin/ stobs bcu dang / mi 'jigs pa dang / so so yang dag par rig pa ma yin/ snying rje chen po ma yin/ byams pa chen po ma yin/ ma 'dres pa'i chos bco brgyad ma yin/ rten cing 'brel bar 'byung ba la sogs pa yang ma yin par yid la byed do/ / de ci'i phyir zhe na/ de dag ni dngos po med pa'i ngo bo nyid yin pa'i phyir/ dran pa med cing yid la byed pa med pa 'di ni sangs rgyas rjes su dran pa'o/ /de shes rab kyi pha rol tu phyin pa la spyod pa na/ dge ba'i chos rnams dang / 'dus byas dang / 'dus ma byas kyi chos rnams kyi bar du yid la mi byed de/ de dag dngos po med pa'i ngo bo nyid yin pa'i phyir ro/ /yid la mi byed pa 'di ni chos rjes su dran pa'o/ /gang de bcom ldan 'das kyi nyan thos kyi dge 'dun skyes bu gang zag bzhi dang / skyes bu gang zag chen po brgyad po ni/ ngo bo nyid kyis med de gang ngo bo nyid kyis med pa'i chos de ni med de/ yid la mi byed pa 'di ni dge 'dun rjes su dran pa'o/ /de shes rab kyi pha rol tu phyin pa la spyod pa na ma ral ba ma zhig pa ma 'dres pa mchog tu 'dzin pa ma yin pa mthu dang ldan pa mkhas pas bsngags pa/ ting nge 'dzin la snyoms par 'jug pa thob pa'i tshul khrims la gnas nas/ tshul khrims dngos po med par yid la byed do/ /yid la byed pa 'di ni tshul khrims rjes su dran pa'o/ /de shes rab kyi pha rol tu phyin pa la spyod pa na zang zing dang / chos dang / yan lag dang nying lag thams cad gtong na dngos po med pa'i ngo bo nyid du yid la bya'o/ /yid la mi byed pa 'di ni gtong ba rjes su dran pa'o/ /de shes rab kyi pha rol tu phyin pa la spyod pa na gang rgyal chen bzhi'i ris nas/ gzhan 'phrul dbang byed kyi bar du skyes pa'i rgyun du zhugs pa'i lha de dag ni med de/ dngos po med pa'i ngo bo nyid do/ /yid la byed par rjes su dran pa 'di ni lha rjes su dran pa'o/ /'di ni rjes su dran pa drug pa ste/ rjes su dran pa drug gi mthar gyis pa'i bya ba'o/ /chos thams cad 'byung ba med pa'i phyir shes rab kyi pha rol tu phyin par rjes su rig par bya'o zhes bya ba la rang gi mtshan nyid 'dzin pa'i phyir chos te phung po dang khams dang / skye mched dang / byang chub kyi phyogs dang / pha rol tu phyin pa nas/ rnam pa thams cad mkhyen pa'i ye shes kyi bar ni chos thams cad do/ /de dag 'byung ba med pa'i phyir zhes bya ba ni 'byung ba med par shes pa'i phyir ro/ /mthar gyis pa'i bya bar rig par bya ste/ 'byung ba med pa ni 'byung ba med pa'i ngo bo nyid de/ de ltar na de dag ni med pa'i ngo bo nyid de/ gang la ngo bo nyid med pa de ni dngos po med pa'o/ /de shes rab kyi pha rol tu phyin pa la spyod pa na/ dang po sems bskyed pa la brten nas/ dngos po med pa'i ngo bo nyid kyi chos rnams la mos par byas te/ dran pa nye bar gzhag pa bzhi dang / yang dag par spong ba bzhi nas/ rnam pa thams cad mkhyen pa nyid kyi bar la sgom par byed do/ /dngos po med pa'i ngo bo nyid kyi chos rnams yang dag par rtogs nas/ chos kyi 'khor lo skor bar byed cing / theg pa gsum gyis 'khor ba las sems can yongs su sgrol bar byed de/ 'di ni chos rnams dngos po med pa'i ngo bo nyid kyi mthar gyis pa'i bya ba ste bcu gsum pa bstan to/ /de'i 'og tu rgol ba rang gis brtags nas lan brjod par bya ste/ gal te dngos po med pa'i ngo bo nyid kyis shes rab kyi pha rol tu phyin pa la sogs pa sgom par byed na/ de sgom pa ni 'bras bu med de rta'i rwa bzhin no zhes bya ba ni rgol ba'o/ /chos thams cad 'gyur ba med pa dang / mnyam pa med ces bya ba la sogs pa lan gsungs te/ 'gyur ba med pa ni chos dbyings so/ /de dang mnyam pa ni chos thams cad de/ ma bsgoms pa tsam gyis ni ma yin zhing chos kyi dbyings la dmigs nas/ 'phags pa rnams kyi rgyur 'gyur ba yin te/ de nyid chos kyi dbyings zhes brjod na/ de'i phyir 'bras bu med par 'gyur/ so so rang rig pa zhes bya bas bdag dang / rnam par rig pa yod pa ma yin nam/ de'i phyir 'dzin pa yod pas gzung ba yang yod de/ des na chos thams cad ni dngos po med pa'o zhes bya ba de mi rigs so zhes bya ba ni rgol ba'o/ /chos thams cad bdag med pa dang / rnam par rig pa med par shes rab kyis rjes su rtogs pas zhes bya ba la sogs pas ni lan gsungs te/ bdag med pa dang rnam par rig pa med pa zhes bya ba la/ bdag gi mtshan nyid dang bral ba'i phyir bdag med pa'i rnam pa'o/ /gzung ba dang 'dzin pa dang bral ba'i phyir rnam par rig pa med pa'o/ /shes rab kyis rjes su rtogs pas zhes bya ba ni tshad mas yid ches pa'i phyir ro/ /bdag ni rtag pa gcig pa'i ngo bo shes pa yin la/ gzugs la sogs pa ni de lta bur gyur pa ma yin no/ /de'i phyir bdag med pa nyid du 'grub po/ /gzung ba dang 'dzin pa dang bral ba de nyid kyis phyir yang rnam par rig pa'i rnam pa yang ma grub ste/ de ni 'dzin pa'i mtshan nyid yin pa'i phyir ro/ /'dzin pa med pa'i phyir gzung ba yang med de/ des na chos thams cad dngos po med par grub po/ /gzugs la sogs pa'i sgras brjod par bya ba de nyid ni gzugs la sogs pa yin te/ de dag brjod pa 'jig rten na yang yod la nyan pa rnams la yang mi slu ba'i tha snyad yod na chos thams cad dngos po med pa de ga las zhes bya ba ni rgol ba'o/ /chos thams cad ming tsam zhes bya ba la sogs pas ni lan gsungs so/ /don gyis stong pa'i ming ni ming tsam mo/ /des chos de dag thams cad brjod pa na blo'i rnam pa de dag la don med do/ /phyi rol nyid du rtogs pas phyi rol nyid du 'jug pa'i yang phyir ro/ /phyi rol gyi don nyid kyang med de/ phyi rol med kyang sgra las don rtogs pa'i phyir ro/ /gal te blo nyid sgra las phyi rol gyi dngos por rtogs so zhe na/ de dag ni de la don gyi dngos po med de gzhan du tha dad pa'i phyir ro/ /tha mi dad na ni blo dang ldan pas kyang don thob pas mi slu bar 'gyur ro/ /de'i phyir don gyi dngos po med pas ming tsam dang tha snyad gdags pa tsam gyis brjod do/ /gal te re zhig tha snyad tsam ni yod do zhe na/ tha snyad gdags pa zhes bya ba la sogs pa gsungs te gang du yang med ces bya ba ni don med pa'i phyir lus dang ngag dang / yid kyang ma yin te/ brjod par bya ba dang / rjod par byed pa mi dmigs pa'i phyir ro/ /chos thams cad ces bya ba la sogs pa ni mjug bsdu ba'o/ /tha snyad med pa brjod du med pa zhes bya ba ni de rnams la de dag med pa'i phyir ro/ /de nyid kyi sgras med pa dang tshig med pa'o/ /gzugs la sogs pa rnams tshad dang ldan pa nyid kyi phyir de'i stong pa nyid la sogs pa yang tshad dang ldan pa yin zhing de'i phyir de la dmigs pa'i shes rab kyi pha rol tu phyin pa yang tshad dang ldan par 'gyur ba yang / mi 'dod pa ma yin nam zhes bya ba ni rgol ba'o/ /chos thams cad tshad med pa'i phyir zhes bya bas ni lan gsungs te/ chos thams cad tshad med pa zhes bya ba ni tshad med pa nyid kyi phyir te/ ji ltar dngos po med pa'i mtshan nyid yin pa'i phyir chos rnams la tshad med do/ /nam mkha' la dngos po med pa'i ngo bo nyid kyi mtshan nyid med pa de bzhin du stong pa nyid de la yang tshad med de gcod par byed pa med pa'i phyir ro/ /des na shes rab kyi pha rol tu phyin pa yang tha mi dad do/ /gal te de lta na gzugs la sogs pa'i sngon po la sogs pa 'di dag kyang ji ltar snang zhe na 'di dag ni chos kyi mtshan ma yin gyi chos kyi dngos po ni ma yin no/ /gcig dang du ma'i ngo bo dang bral ba'i phyir dang / mi snang ba bdag nyid snang ba mi rigs pa'i phyir ro/ /chos rnams kyi mtshan ma yang chos rnams kyi 'khrul pa'i rnam pa yin te/ de yang snang ba'i ngo bo yin pa'i phyir snang ba ni de dag med pa yin yang snang ste/ 'khrul pa rnams la ni med pa'i mtshan nyid snang ba yin pa'i phyir/ gal te de lta na shes rab kyi pha rol tu phyin pa yang mi 'grub ste de ni 'khrul pa yang ma yin la rnam pa dang bcas pa'i blo ni 'khrul pa yin zhing rnam pa med pa'i blo ni rmi lam na yang nyams su myong ba ma yin no zhes bya ba ni rgol ba'o/ /chos thams cad mtshan ma med pa'i phyir zhes bya ba la sogs pas ni lan gsungs te/ chos thams cad kyi mtshan ma nub ste/ shes pa snang ba dang rnam pa med do/ /des na rnam pa spangs pa'i phyir shes rab kyi pha rol tu phyin par rig par bya ste/ gzugs med pa'i snyoms par 'jug pa bzhin no zhes bsams so/ /'o na rnam par rtog pa'i mtshan ma 'di spangs pa'i phyir chos kyi dbyings yang dag par yid la byed pa ma yin na shes rab kyi pha rol tu phyin pa ma yin no zhes bya ba ni rgol ba'o/ /chos thams cad nges par 'byed pa'i phyir zhes bya bas ni lan gsungs te/ nges par 'byed pa ni 'dir so sor rtog pa gsungs te/ chos thams cad yongs su grub pa'i ngo bo so sor rtog pa'i ye shes kyis mngon sum du byas te/ de ni de dag gi nges par 'byed pa'o/ /des na 'di ni de'i mtshan nyid kyis shes rab kyi pha rol tu phyin pa zhes bya ba'i don to/ /de ltar na de nyid legs par yid la byed pa'i thos pa dang / bsams pa dang / bsgoms pa'i rim gyis lhun gyis grub pa mngon par 'du mi byed pa yid la byed cing chos thams cad kyi de bzhin nyid la spros pa med pa'i shes pa yang skye ba yin te/ /de ni de la so sor rtog pa'o/ /ji ste shes rab kyi pha rol tu phyin pa'i don gang yin/ dag pa yin no zhe na/ de ni mi rigs te 'di ltar de'i tshe dag pa gang yin/ bdag ni med pas mi 'dod la/ skad cig re re la 'jig pa'i phyir sems ni ma yin no/ /ji ste sems kyi rgyun la yin no zhe na/ de yang rang bzhin gyis ma dag pa'am/ dag pa cig yin grang na/ phyogs dang po ltar na de ni dag pa ma yin te/ sol ba bdar ba bzhin no/ /phyogs gnyis pa ltar na don med do/ /ji ste sems kyi chos nyid dag pa yin no zhe na/ de yang mi rigs te de la ni rnam par 'gyur ba med pa'i phyir ro zhes bya ba ni rgol ba'o/ /chos thams cad rang bzhin gyis rnam par dag pa'i phyir ro zhes bya ba la sogs pas ni lan gsungs te/ chos thams cad rang bzhin gyis yongs su dag pa de'i phyir dgongs pa des na shes rab kyi pha rol tu phyin pa la rjes su rig par bya/ rjes su gnas par bya'o/ /de ni rnam par 'gyur ba med pa'i phyir de yang mi rigs so zhes smras pa ma yin nam zhe na/ 'di ni smras kyang 'on kyang mi rigs te/ gtan tshigs nges pa nyid kyi phyir ro/ /de ni rang bzhin kho nas rnam par dag kyang / de'i rang bzhin ma yin pa'i phyir glo bur gyi sgrib pa'i dri mas dri ma can du byas pa yin te/ sprin dang / mun pa dang / khug rna la sogs pas bsgribs pas nam mkha' bzhin no/ /phyis shes rab kyi pha rol tu phyin pas de dag bsal bas rnam par dag par 'gyur te/ sprin la sogs pa bsal ba'i nam mkha' bzhin no/ /shes rab kyi pha rol tu phyin pa yang bcom ldan 'das kyis bstan la/ bstan pas mtshan ma dang bcas pa'i shes pa skyed par byed do/ /de'i phyir shes rab kyi pha rol tu phyin pa ni mtshan ma dang bcas pa ma yin nam zhes bya ba ni rgol ba'o/ /chos thams cad tshig med pa'i phyir zhes bya ba la sogs pas ni lan gsungs te/ chos thams cad ni tshig med pa'i phyir/ tshig gis rang gi ngo bo mi ston te/ mtshon pa 'ba' zhig tu zad do/ /des na shes rab kyi pha rol tu phyin pa ni don dam pa ston pa'i don du rjes su rig par bya'o/ /gal te las zad cing nyon mongs pa zad kyang / yang srid du 'gyur ba'am/ ji ste zad pas skye ba yang zad de/ de 'du byed lhag ma tshe ji srid kyi bar du gnas nas rang nyid 'gag par 'gyur te/ des na byang chub kho nar 'gyur gyi/ bla na med pa yang dag par rdzogs pa'i byang chub tu ni ma yin te/ de'i khyad par ni brjod par bya ba ma yin nam zhe na zhes bya ba ni rgol ba'o/ /tshig gsum gyis ni lan gsungs te/ /chos thams cad 'gog pa med pa zhes bya ba ni zad pa med pa'i chos rnams mi zad pa'i phyir shes rab kyi pha rol tu phyin par rjes su rig par bya'o/ /ji ltar 'gog pa med ce na/ spang ba dang mnyam pa ni nges pa med pas spang ba dang / khyad par med pa'i phyir ro/ /chos thams cad ces bya ba ni kun nas nyon mongs pa'i chos thams cad ni mya ngan las 'das pa thob pa'i phyir shes rab kyi pha rol tu phyin par rjes su rig par bya'o/ /ji ltar de dag gi de bzhin nyid de kho na bzhin du shes pa ni de bzhin nyid dang mnyam pa'o/ /de ltar de dag de bzhin nyid dang mnyam pa yin zhe na/ chos thams cad mi 'ong zhes bya ba la sogs pa gsungs te/ mi 'ong zhes bya ba ni ma 'ongs pa'i dus nas so/ /mi 'gro zhes bya ba ni 'das pa'i dus su'o/ /gang nas 'ong bar bya ba dang / gang du 'gro bar bya ba de dag med pa'i phyir ro/ /gang yang mi shes pa ni rang rig pa tsam gyis dus mi shes pa'i phyir ro/ /mi shes pa'i phyir dang 'gro ba dang 'ong ba ni shes pa sngon du 'gro ba'i phyir ro/ /de bas na mi skye shin tu mi skye zhes bya ba yin no/ /'di tsam gyis na byang chub sems dpa' rnams kyi rang gi don phun sum tshogs pa bstan to/ /'di rang gi don phun sum tshogs pa yin na yang / 'jig rten na rang gi don la rang bzhin gyis dga' ba'i phyir de'i don du dka' ba yang 'bad par byed do/ /gzhan gyi don ni dka' ste/ sems can rnams mtha' yas pa'i phyir dang / gzhan nyid yin pa'i phyir dang / log par rtog pa mang ba'i phyir ro zhes bya ba ni rgol ba'o/ /bdag dang gzhan du mi lta ba'i phyir zhes bya ba lan gsungs te/ bdag dang gzhan zhes bya ba ni dbye ba'o/ /de mi mthong ba'i phyir sems can thams cad dang bdag mnyam pa nyid du lta'o zhes bya ba'i don to/ /de ltar yang 'phags pa dri ma med par grags pa'i mdo las/ 'jig tshogs la lta ba ri rab dang mnyam pa bskyed kyang / byang chub kyi sems bskyed cing de las sangs rgyas kyi chos thams cad skye'o zhes gsungs pa lta bu'o/ /de'i 'og tu dka' ba'i 'du shes kyi gnyen po ji lta ji ltar so sor brtag par bya ba de ni chos thams cad 'phags pa dgra bcom pa zhes bya ba nas/ khong khro ba med pa'i phyir shes rab kyi pha rol tu phyin par rjes su rig par bya'o zhes bya ba'i bar gyis gsungs so/ /de la dang po sems can rnams dgra bcom pa nyid la sogs par dka' ba'i 'du shes bsal ba'i phyir/ chos thams cad 'phags pa dgra bcom pa zhes bya ba la sogs pa gsungs so/ /chos thams cad ni sems can tha snyad du gdags pa'i yul te/ 'phags pa dgra bcom pa'o/ /gang gi phyir rang bzhin gyis rnam par dag pa'i chos nyid tsam yin pa'i phyir ro/ /khur mi khyer ba zhes bya ba ni dngos po med pa'i ngo bo nyid kyi phyir khur mi khyer ba'o/ /sems can gdul bar bya ba'i don du phyogs bcur sangs rgyas kyi zhing du 'gro ba na/ dka' ba'i 'du shes bsal ba'i phyir/ chos thams cad yul med cing phyogs med pa zhes bya ba la sogs pa gsungs te/ yul med pa'i phyir dang / phyogs med pa'i phyir ro/ /rang bzhin gyi ngo bo nyid kyis zhes bya ba ni gzugs la sogs pa'i rang bzhin de ni de bzhin nyid ngo bo nyid de/ de ni yul na med de/ gnas pa med pa'i chos nyid yin pa'i phyir ro/ /phyogs kyang med de/ cha med pa'i phyir nam mkha' bzhin no/ /'khor ba'i sdug bsngal spang bar dka' ba'i 'du shes bsal ba'i phyir gsungs pa ni 'khor ba'i chos thams cad 'gag pa na rab tu sim par byed pa nyid kyis bde ba'i 'du shes skyed pa nyid de/ de'i phyir shes rab kyi pha rol tu phyin par rjes su rig par bya'o/ /kye ma 'du byed rnams mi rtag /skye zhing 'jig pa'i chos can yin/ /skyes nas 'gag par 'gyur ba ste/ /de dag myur du zhi ba bde/ /zhes pa'o/ /'o zhes bya ba'i sgra ni nyan thos kyi 'dul ba rdzogs pa'i don to/ /byang chub sems dpa'i 'dul ba'i dbang du byas nas/ dga' ba med cing dga' ba dang bral ba med pa'i phyir zhes bya ba la sogs gsungs te/ dga' ba ni mya ngan las 'das pa la shin tu dga' ba'o/ /dga' ba dang bral ba ni shin tu 'khor ba la skyo ba'o/ /de med pa ni byang chub sems dpa' rnams kyi dga' ba dang bral ba med pa'o/ /de dag ni shes rab kyi pha rol tu phyin pa med pa ste/ 'di ni 'khor ba dang / mya ngan las 'das pa la mi gnas pa'i so sor rtog pa'o/ /'dod chags med ces bya ba la sogs pa ni 'dod chags dang bral ba la so sor rtog pa'o/ /chos thams cad la chags pa dang bral ba zhes bya ba ni mngon par ma zhen pa'o/ /chags pa dang ma chags pa dang / de'i gnyen po de dang bral ba dang / gsum mi dmigs pa'i phyir 'di ni rnam par rtog pa spang ba la so sor rtog pa'o/ /chos thams cad ni lam thams cad de/ mngon par rtogs pa bdun no/ /de nyid byang chub ste/ byang chub thob par byed pa nyid kyi phyir ro/ /de nyid kyi phyir sangs rgyas kyi ye shes khong du chud pa zhes gsungs te/ khong du chud pa ni thob pa ste/ de ni byang chub ste/ legs par rtogs pa thob pa la so sor rtog pa'o/ /rang gi mtshan nyid 'dzin pa'i phyir chos thams cad de/ de ni stong pa nyid dang / mtshan ma med pa dang / smon pa med pa ste/ rnam par rig pa tsam nyid kyi don dang bral ba'i phyir dang / mtshan ma thams cad nub pa'i phyir dang / 'khrul pa'i ngo bo'i khams gsum pa la smon pa med pa nyid kyi phyir te go rims bzhin no/ /'di ni lam la so sor rtog pa'o/ /gal te de dag rnam par thar pa'i sgo'i lam la'ang sgom pa de'i tshe'ang dman pa'i byang chub tu ltung bar 'gyur ro zhe na/ de'i phyir byams pa chen po zhes bya ba la sogs pa gsungs te/ chos thams cad ni byang chub sems dpa'i lam thams cad do/ /sman zhes bya ba ni theg pa dman pa la dga' ba'i nad chen po sel ba'o/ /gang gis she na/ byams pa chen po sngon du 'gro ba zhes bya ba la sogs pa gsungs te/ gang gi phyir byams pa chen po ni de dag gi sngon du 'gro ba'o/ /gzhan yang de dag tshad med pa bzhi dang / lhan cig gnas pa'i phyir byams pa la sogs pa la gnas pa'o/ /tshangs pa lta bur gyur pa zhes bya ba ni tshangs pa dang 'dra ba'o/ /de bzhin du zhe sdang mi len pa'i phyir zhes bya ba ni bstan pa'o/ /zhe sdang thams cad mi len pa zhes bya ba ni bshad pa'o/ /zhe sdang thams cad byams pa la sogs pa'i mi mthun pa'i phyogs te/ go rims bzhin du gnod sems dang rnam par 'tshe ba dang / mi dga' ba dang / khong khro ba dang / rjes su chags pa'o/ /smon pa med pa zhes bya ba ni mya ngan las 'das pa la dga' ba dang bral ba'i phyir ro/ /khong khro ba med pa zhes bya ba ni 'khor ba la shin tu skyo ba med pa'i phyir ro/ /'di ni mthar gyis pa'i mngon par rtogs pa bcu gsum phan yon dang bcas pa'o/ /skad cig ma'i gcig pa'i mngon par rtogs par brjod par bya ste/ skad cig gcig mngon rdzogs byang chub/ /mtshan nyid kyis ni rnam pa bzhi/ /zhes bya ba la chos thams cad zag pa med pa sems kyi skad cig ma gcig gis mngon par rtogs pa dang / zag pa dang bcas pa dang / zag pa med pa'i chos thams cad rnam par smin pa las skyes pa'i sems kyi skad cig ma gcig gis mngon par rtogs pa dang / chos thams cad mtshan nyid med par sems kyi skad cig ma gcig gis rtogs pa dang / chos thams cad gnyis su med par sems kyi skad cig ma gcig gis rtogs pa'o/ /de la dang po'i dbang du byas nas bstan bcos las/ sbyin la sogs pa re res kyang / /zag med chos kun bsdus pa'i phyir/ /thub pa'i skad cig gcig pa yi/ /rtogs par 'di ni shes par bya/ /ji ltar skyes bus zo chun rgyud/ /rdog thabs gcig gis bskyod pa na/ /thams cad cig car 'gul ba ltar/ /skad cig gcig shes de bzhin no/ /zhes bya ba gsungs te/ byang chub sems dpa' shes rab kyi pha rol tu phyin pa la spyod pa ni/ sems kyi skad cig ma gcig gis 'jug pa na sbyin pa la sogs pa re res kyang / zag pa med pa'i chos kun bsdus pa'i phyir te/ 'dren pa'i phyir ro/ /skad cig ma gcig pa'i rtogs pa ste/ sems kyi skad cig ma gcig gis rtogs pa'o/ /'di ni zhes bya ba dang po'o/ /de ltar na ji ltar skyes bus rdog thabs gcig gis bskyod pa na/ zo chun gyi rgyud thams cad cig car 'gul ba de bzhin du/ sbyin pa la sogs pa'i sems dang ldan pa ni/ zag pa med pa'i chos thams cad kyi tshogs cig car 'dren par byed do zhes bya ba'i don to/ /de'i phyir [(]med [,]mdo [)]las/ rgya mtsho mu med pa'i phyir shes rab kyi pha rol tu phyin pa mu med par rjes su rig par bya'o zhes gsungs te/ 'dir shes rab kyi pha rol tu phyin pa yongs su bsdu ba'i phyir dang / de rnam pa thams cad mkhyen pa nyid yid la byed pa dang / ma bral ba'i phyir zab cing rgya che ba ste/ sbyin pa la sogs pa re re'i sems kyi skad cig ni shes rab kyi pha rol tu phyin pa zhes brjod do/ /de'i mu med pa ni mu med pa ste/ zag pa med pa'i chos rnams 'dren pa nyid de/ de dag phan tshun 'brel pa ni yun ring du yongs su 'dres pa nyid kyi phyir ro/ /de rjes su rig par bya ba ni shes par bya'o/ /de ji ltar zhe na/ rgya mtsho mu med pa'i phyir zhes bya ba gsungs te/ zab cing rgya che ba'i rgya mtsho ni mu med de/ mu med pa ni cig car chu bo'i chu 'dren pa de nyid de/ de dag phan tshun 'dren pa nyid kyi phyir ro/ /rgya mtsho mu med pa'i dpe des de bzhin du zhes bya ba'i don to/ /'di ni zag pa med pa'i chos sems kyi skad cig gcig gis mngon par rtogs pa ste dang po'o/ /gnyis pa'i dbang du byas nas bstan bcos las/ gang tshe chos dkar thams cad kyi/ /rang bzhin shes rab pha rol phyin/ /rnam smin chos nyid gnas skabs skyes/ de yi skad cig gcig ye shes/ /zhes bya ba gsungs te/ rnam par smin pa las skyes pa'i chos ni rnam smin gyi chos so/ /de'i dngos po ni de nyid do/ /de'i gnas skabs 'di la yod pa de la de skad ces bya ste/ shes rab kyi pha rol tu phyin pa'o/ /chos dkar thams cad kyi zhes bya ba ni dge ba'i chos thams cad do/ /gang dag zag pa dang bcas pa dang / zag pa med pa'i chos thams cad 'dis sngon ngo bo nyid med par bsgoms pas/ de dag kyang phyis rnam par smin pa las skyes pa'o/ /des na rang bzhin nyid kyis de dag ngo bo nyid med par yang dag par rig ste/ de'i phyir dkar po thams cad kyi rang bzhin no/ /'di lta bu de gang gi tshe skyes pa ni phun sum tshogs pa ste/ de'i tshe sems kyi skad cig ma gcig gis de dag thams cad la lhun gyis grub par shes so/ /zag pa med pa thams cad la 'bad pa dang bcas pa 'di ni dang po'o/ /zag pa dang bcas pa dang / zag pa med pa la lhun gyis grub pa ni gnyis pa ste/ de'i phyir mdo las/ nam mkha' mu med pa'i phyir shes rab kyi pha rol tu phyin pa mu med par rjes su rig par bya'o zhes bya ba gsungs te/ shes rab kyi pha rol tu phyin pa zhes bya ba ni gang rnam par smin pa'i chos nyid kyi gnas skabs dang / dkar po'i chos thams cad kyi rang bzhin no/ /de nyid kyi phyir mu med pa ni de dag thams cad kyang ngo bo nyid med par ro gcig pa'o/ /lhun gyis grub pa ni rnam par smin pa las skyes pa nyid kyi phyir te/ de'i mu med pa nyid du rig par bya'o/ /ji ltar zhe na/ nam mkha' mu med pa nyid kyi dpes gsungs so/ /nam mkha' ni nam mkha' ste/ de'i gzugs kyi rdzas kyi dngos po med par gcig pa'o/ /mu med pa ni lhun gyis grub pa ste/ g.yo ba med pa'o/ /de'i phyir gnyi ga mu med pa ji lta bu 'di ni rnam par smin pa las skyes pa dkar po'i chos thams cad sems kyi skad cig ma gcig gis mngon par rtogs pa ni gnyis pa'o/ /gsungs pa'i dbang du byas nas bstan bcos las/ sbyin la sogs pa'i spyod pa yis/ /chos kun rmi lam 'drar gnas nas/ /chos rnams mtshan nyid med pa nyid/ /skad cig ma ni gcig gis rtogs/ /zhes bya ba gsungs te/ rmi lam lta bu zhes bya ba nas/ dri za'i grong khyer zhes bya ba'i bar ni yum chen mo/ las gsungs pa/ bstan bcos las/ tshig gcig smos pa ni thams cad gcig pa nyid kyi phyir ro/ /de yang don rnam pa sna tshogs pa'i mtshan nyid kyis so/ /'di dag so sor snang ba ni ji lta bu'i mtshan nyid med pa'i phyir mtshan nyid med pa'o/ /des na sgyu ma lta bu nyid kyi phyir chos thams cad mtshan nyid med pa la gnas nas/ pha rol tu phyin pa drug yongs su rdzogs par byed cing / chos thams cad mtshan nyid med par skad cig ma gcig gis rtogs shing shes te/ khams kyi don ni sna tshogs pa nyid kyis na rtogs pa'i don ni shes pa la 'jug go/ /'di ltar ri rab sna tshogs pa'i phyir/ shes rab kyi pha rol tu phyin pa sna tshogs pa nyid du rjes su rig par bya'o/ /sgyu ma lta bu'i chos thams cad mtshan nyid med par gang ro gcig par shes pa 'di ni shes rab kyi pha rol tu phyin pa'o/ /de'i phyir ro gcig pa yin yang gang chos thams cad sgyu ma lta bur rnam pa sna tshogs su snang ba 'di ni ri rab sna tshogs pa nyid kyi dpes rig par bya'o/ /ji ltar nam mkha' gzugs med pa'i phyir yod pa ma yin yang / ri rab kyi rnam pa sna tshogs su bstan te/ ri rab kyi logs bzhi'i kha dog gi phyogs kyang de dang 'dra ba'i kha dog tu snang ste/ de ni de bzhin no/ /chos thams cad mtshan nyid med par sems kyi skad cig gcig gis mngon par rtogs pa ni gsum pa'o/ /bzhi pa'i dbang du byas nas/ bstan bcos las/ rmi lam dang ni de mthong nyid/ /gnyis kyi tshul du mi mthong ltar/ /chos rnams gnyis su med pa yi/ /de nyid skad cig gcig gis mthong / /zhes bya ba gsungs te/ gsum pa la ni chos thams cad rmi lam lta bu'i rnam par so sor snang ba'o/ /bzhi pa la ni de dag nub pa'i phyir/ ston ka'i nyi ma phyed kyi nam mkha' dang 'dra bar bslad pa thams cad dang bral ba'o/ /de la rmi lam du mthong ba ni mi dang glang po dang / rta la sogs pa ste/ rmi lam mo/ /de mthong ba ni bdag nyid kyis so/ /de dag nub pa'i phyir gang de dag mi mthong ba ni gnyis kyi tshul du tha dad pa med pa'o/ /de ni gzung ba dang 'dzin pa gnyis med pa'i stong pa ste/ chos rnams kyi de kho na nyid don dam pa skad cig ma gcig gis mthong ba'o/ /de nyid gzugs mu med pa'i phyir zhes bya ba la sogs pa gsungs te/ 'dir shes rab kyi pha rol tu phyin pa ni skad cig ma gcig gis mngon par rtogs pa bzhi pa'o/ /de'i mu med pa nyid ni chos thams cad don dam pa dri ma med pa'i nam mkha' kho na ltar des yang dag par rig pas na/ de rig par bya'o/ /ji ltar zhe na/ gzugs la sogs pa mu med pa'i phyir zhes bya ba gsungs so/ /ji ltar de dag mu med pa yin zhe na/ gnyis su snang ba nub pa'i phyir te/ ji srid du 'di mu yod pa de srid du ni gzhan gyi mtshan ma nyid yin pa'i phyir ro/ /gzugs dang de'i 'dzin pa dag nub kyang mu med pa ma yin te/ de ci'i phyir zhe na/ gzugs nyid ces gsungs pa ma yin nam zhe na/ de lta mod kyi 'on kyang gzugs nas rnam par shes pa'i bar du gsungs pas so/ /de lta mod kyi 'dzin pa zhes gsungs pa ma yin nam zhe na/ ma yin te der yang phung po nyid bsdus pa'i phyir te/ snang ba med par 'dzin pa'i bdag mi rigs pa'i phyir ro/ /chos thams cad gnyis su med par sems kyi skad cig ma gcig gis mngon par rtogs pa ni bzhi pa'o/ /skad cig ma gcig gis mngon par rtogs pa ste bdun pa'o/ /mngon par rtogs pa brgyad pa ni chos kyi sku'o/ /de'i dngos po yang bzhi ste/ sku gsum dang mdzad pa'o/ /de ltar sngar/ ngo bo nyid longs rdzogs bcas dang / /de bzhin gzhan ni sprul pa dang / /chos sku mdzad par bcas pa ste/ /rnam pa bzhir ni yang dag brjod/ /ces gang gsungs pa'o/ /chos ni lam ste/ de yang 'dir khyad par du 'gro ba'i phyir/ skabs kyi mngon par rtogs pa bdun gyi mtshan nyid do/ /de na chos kyis thob pa'i sku ni chos kyi sku ste/ sku ni lus so/ /sangs rgyas rnams kyi lus gsum ni sku gsum mo/ /bcom ldan 'das yum chen mo las rnam pa thams cad du yongs su dag pa/ zag pa med pa'i chos thams cad kyi rang bzhin gang yin pa de ni/ de bzhin gshegs pa dgra bcom pa yang dag par rdzogs pa'i sangs rgyas su rig par bya'o/ /gzhan yang chos de dag nyid rtogs pas/ bla na med pa yang dag par rdzogs pa'i byang chub tu mngon par rdzogs par sangs rgyas pa'i phyir/ mtshan sum cu rtsa gnyis dang / dpe byad bzang pos brgyan pa'i sku/ de bzhin gshegs pa dgra bcom pa yang dag par rdzogs pa'i sangs rgyas kyis byang chub sems dpa' rnams la theg pa'i mchog gi chos bla na med pa'i dga' ba dang / bde ba dang / rab tu dga' ba'i bde ba la longs spyad par bya ba'i phyir chos ston to/ /gzhan yang chos de dag nyid rtogs pas bla na med pa yang dag par rdzogs pa'i byang chub tu mngon par rdzogs par sangs rgyas te/ de bzhin gshegs pa dgra bcom pa yang dag par rdzogs pa'i sangs rgyas kyi sprul pa sna tshogs kyi sprin gyis phyogs bcu'i 'jig rten gyi khams mtha' yas mu med pa dag tu dus thams cad du sems can rnams kyi don mdzad do zhes gsungs so/ /mdo sde rgyan las/ sku gsum dag gis sangs rgyas kyi/ /sku bsdus par ni shes bya ste/ /sku gsung dag gis rang gzhan gyi/ /don 'di rten dang bcas par bstan/ /zhes gsungs so/ /de bas na sku gsum dang / mdzad pa'i dbye bas rnam pa bzhi ni chos kyi sku bstan te/ de la ngo bo nyid ni rang bzhin te ngo bo nyid kho na ngo bo nyid do/ /yang na de nyid la ngo bo nyid du 'gyur ba'i rnam par dag pa rab kyi mthar phyin pa ni ngo bo nyid kyi sku'o/ /longs spyod rdzogs pa'i don du 'gyur ba yin pas/ longs spyod rdzogs bcas so/ /sprul pa ni sprul pa'o/ /der grub pa'i sku ni sprul pa nyid do/ /de la ngo bo nyid kyi sku'i dbang du byas nas/ bstan bcos las/ /thub pa'i ngo bo nyid sku ni/ /zag pa med pa'i chos kun du/ /rnam par dag gyur gang dag yin/ /de dag rang bzhin mtshan nyid can/ /zhes bya ba gsungs te/ de dag gi rang bzhin ni chos nyid de/ chos kyi dbyings so/ /chos kyi dbyings ni de bzhin gshegs pa ma yin te/ shin tu thal bar 'gyur ba'i phyir ro/ /'on kyang chos kyi dbyings rnam par dag pa yin te/ de ltar yang sangs rgyas kyi sa las shin tu 'das sangs rgyas kyis ni rnam pa lngas bsdus te/ lnga gang zhe na/ chos kyi dbyings rnam par dag pa dang / me long lta bu'i ye shes dang / mnyam pa nyid kyi ye shes dang / so sor kun du rtog pa'i ye shes dang / bya ba nan tan gyi ye shes yin no zhes gsungs so zhe na/ chos kyi dbyings rnam par dag pa ni chos kyi dbyings shin tu rnam par dag pa ste/ chos kyi dbyings shin tu rnam par dag pa dang / chos nyid tha dad pa gang yang med pa'i phyir ro/ /de'i phyir mdo las nyi ma'i 'od zer gyi dkyil 'khor mu med par snang ba'i phyir/ shes rab kyi pha rol tu phyin pa mu med par rjes su rig par bya'o zhes bya ba la/ skrag pa nyid la sogs pa'i skyon thams cad spangs pa ni shel dag pa lta bu'o/ /de la zla ba dang / nyi ma dag las gzhan pa ni nyan thos dang / rang sangs rgyas kyi rnam par grol ba'i sku'i dpe'o/ /zla ba dang / nyi ma shel sgong dag pa lta bu de dag pas 'di lhag pa yin te/ gang gi phyir phyogs bcur 'od zer gyi dra ba spros pa des shes bya'i yul mtha' yas pa dag la shes pa mtha' yas pa skyed pa'i sangs rgyas rnams kyi rnam par grol ba'i sku'i dpe'o/ /de nyid kyi phyir de ni chos kyi sku zhes kyang brjod de/ gang gi phyir chos mtha' yas pa brten pa nyid kyi phyir ro/ /de ni 'dir chos kyi dbyings rnam par dag pa las skyes pa'i ye shes mtha' yas pa ni shes rab kyi pha rol tu phyin pa'o/ /nyi ma'i 'od zer gyi dkyil 'khor snang ba'i dpes de ni shes bya mu med pa la snang bar rig par bya'o/ /de ltar na sangs rgyas kyi chos rnams kyi dag pa ni chos kyi dbyings te/ nyi ma dang 'dra'o/ /de yang shes rab kyi pha rol tu phyin pa yin te/ nyi ma'i 'od zer gyi dkyil 'khor dang 'dra'o/ /gang des mu med par snang ba de la 'od zer gyi dkyil 'khor mu med par snang ba dang 'dra'o/ /de la 'dis ni sangs rgyas rnams kyi shin tu rnam par dag pa'i chos kyi dbyings kyi ngo bo nyid ni ngo bo nyid kyi sku'o/ /de yang shes bya thams cad la shes pa dbang du bya ba dang / de nyid sems can gyi don dbang du byed pa dang / khyab par byed pa dang / rtag pa nyid kyi dbang du byas nas/ bstan bcos las/ rgyu ni yongs su smin gyur nas/ /gang dang gang la gang dang ni/ /gang tshe bya ba phan 'gyur ba/ /de dang de la de snang ngo / /lha yi rgyal pos char phab kyang / /sa bon mi rung mi 'khrungs ltar/ /sangs rgyas rnams ni byon gyur kyang / /skal ba med pas bzang mi myong / /de ltar mdzad pa rgya che'i phyir/ /sangs rgyas khyab par nges par brjod/ /de nyid zad pa med pa'i phyir/ /rtag pa zhes kyang brjod pa yin/ /zhes bya ba gsungs te/ de zhes bya ba ni ngo bo nyid kyi sku'o/ /snang ngo zhes bya ba ni sprul pa ste bsod nams las so/ /gang dang gang zhes bya ba ni de dang de dag ces bya bar rtogs par bya ba'o/ /de dang de zhes bya bas ni phan par byed pa zhes don gyis rtogs par bya'o/ /ci'i phyir de dang de la zhes gsungs she na/ lha'i rgyal pos zhes bya ba la sogs pa gsungs so/ /mdzad pa rgya che ba ni skal ba dang ldan pa thams cad la mdzad pa'o/ /de nyid kyi mdzad pa ste/ 'di nyid ni nyid kyi sku'o/ /longs spyod rdzogs pa'i sku la ni brjod par bya ba mang du yod de de la longs spyod rdzogs pa'i dbang du byas nas/ sgra thams cad mu med pa'i phyir shes rab kyi pha rol tu phyin pa mu med par rjes su rig par bya'o zhes gsungs te/ ston pas bstan nas/ byang chub sems dpa' rnams kyis mnyan te/ theg pa mchog gi chos yang dag par rtogs pa gang yin pa de ni 'dir shes rab kyi pha rol tu phyin pa'o/ / de nyid longs spyod rdzogs pa ste/ longs spyod rdzogs pa'i rgyu nyid yin pa'i phyir ro/ /gang yang mkhas pa rnams kyi yid bde ba'i mtshan nyid chung ngu dang / 'bring dang / chen po ste/ dga' ba dang / bde ba dang / rab tu dga' ba'i bde ba nyams su myong bar byed pa de ni dngos kyi longs spyod rdzogs pa'o/ /de'i shes rab kyi pha rol tu phyin pa ni mu med par rjes su rig par bya'o/ /ji ltar zhe na/ sgra thams cad mu med pa'i phyir zhes bya ba ni gtan tshigs gsum pa'o/ /gang gi phyir longs spyod rdzogs pa de gnyis dang go rims bzhin du mu med par ston pa'i sgra dang / bskyed par bya ba dang / skyed par byed par sbyar ro/ /thams cad ces ci'i phyir smos she na gdul bya rnams sna tshogs pa thams cad la snang ba'i phyir ro/ /ji ltar mu med pa yin zhe na/ mtha' ma med par sku des ston pa la dus tshad med pa'i phyir ro/ /de bzhin gshegs pa'i yang dag pa'i byang chub kyang mu med pa nyid do/ /ci'i phyir zhe na/ sangs rgyas kyi chos thams cad yang dag par bsgrub pa mu med pa'i phyir shes rab kyi pha rol tu phyin pa mu med par rjes su rig par bya'o zhes gsungs so/ /ji skad du ston pa nyid kyis theg pa chen po'i mchog yang dag par rtogs pa ni 'dir shes rab kyi pha rol tu phyin par gsungs so/ /de'i mu med pa ni de'i rgyu ste/ sangs rgyas thams cad kyi chos yang dag par sgrub pa mu med pa zhes bya ba'i don to/ /chos de yang bcom ldan 'das yum chen mo las gsungs te/ byang chub kyi phyogs kyi chos sum cu rtsa bdun dang / rnam par thar pa brgyad dang / /mthar gyis gnas pa'i snyoms par 'jug pa dgu dang / zad par gyi skye mched bcu dang / zil gyis gnon pa'i skye mched brgyad dang / nyon mongs pa med pa'i ting nge 'dzin dang / smon nas shes pa dang / so so yang dag par rig pa bzhi dang / rnam pa thams cad yongs su dag pa bzhi dang / dbang bcu dang / stobs bcu dang mi 'jigs pa bzhi dang / bsrung ba med pa gsum dang / dran pa nye bar gzhag pa gsum dang / bsnyel ba mi mnga' ba'i chos nyid dang / bag chags yang dag par bcom pa dang / thugs rje chen po dang / sangs rgyas kyi chos ma 'dres pa bco brgyad dang / rnam pa thams cad mkhyen pa nyid do/ /de'i phyir bstan bcos las/ byang chub phyogs mthun tshad med dang / /rnam par thar dang mthar gyis ni/ /snyoms 'jug dgu yi bdag nyid dang / /zad par bcu yi bdag nyid dang / /zil gyis gnon pa'i skye mched ni/ /rab tu dbye ba rnam brgyad dang / /nyon mongs med par smon mkhyen dang / /mngon shes so sor yang dag rig /rnam pa thams cad dag bzhi dang / /dbang bcu dang ni stobs bcu dang / /mi 'jigs pa ni bzhi dag dang / /bsrung ba med pa rnam gsum dang / /dran pa nyer gzhag rnam gsum dang / /bsnyel ba mi mnga' chos nyid dang / /bag chags yang dag bcom pa dang / /skye la thugs rje chen po dang / /thub pa kho na'i ma 'dres chos/ /bco brgyad bshad pa gang yin dang / /rnam pa thams cad mkhyen nyid dang / /chos kyi sku zhes brjod pa yin/ /zhes gsungs so/ /byang chub kyi phyogs dang tshad med pa zhes zlas dbye bar bya'o/ /mthar gyis zhes bya ba ni 'og ma dang sbyar bar bya'o/ /bsrung ba med pa zhes bya ba ma yin pa las bsrung ba'i phyir/ bsrung ba med pa zhes bya ba'i don te rnam pa gsum mo/ /chos kyi sku zhes bya ba ni sangs rgyas rnams kyi zag pa med pa'i chos kyi tshogs so/ /skabs ji lta ba bzhin du bdag gis mang du bshad de lhag ma yang bdag gis bshad par bya'o/ /rnam par thar pa brgyad ces bya ba ni gzugs can gzugs rnams la lta ba zhes bya ba ni kha dog bzang ba dang / kha dog ngan pa dang / sngon po dang / ser po dang / dmar po dang / dkar po ni rnam par thar pa dang po'o/ /nang gzugs med par 'du shes pas phyi rol gyi gzugs rnams la lta ba 'di ni snga ma bzhin te 'di ni gnyis pa'o/ /sdug pa'i rnam par thar pa lus kyis mngon sum du byas shing rdzogs par byas nas gnas pa 'di ni gsum pa'o/ /nam mkha' mtha' yas skye mched la sogs pa bzhi dang / 'du shes dang / tshor ba 'gog pa zhes bya ba dang brgyad de/ 'di dag gis sgrib pa las rnam par grol bas na rnam par thar pa'o/ /de la gsum ni mya ngan las 'das pa la sgrib pa las rnam par thar pa'o/ /lhag ma ni zhi bar gnas pa la snyoms par 'jug pa'i sgrib pa las rnam par thar pa'o/ /yang gsum ni gzugs can no/ /lnga ni gzugs can ma yin pa'o/ /brgyad pa ni sgrib pa rab tu zhi ba'o/ /gzugs can ni bdag la gzugs su 'du shes pa'o/ /lta ba ni yid kyis mos shing sprul nas lta ba'o/ /sdug pa'i rnam par thar pa ni sdug pa dang / mi sdug pa'i gzugs de dag sprul nas mi 'byed pa'i 'du shes thob pas go rims bzhin du mthun pa dang mi mthun pa spang ba'i phyir ro/ /'du shes dang / tshor ba 'gog pa ni brgyad pa ste/ sems dang sems las 'byung ba nyon mongs pa can gyi yid kyis bsdus pa sngar kun nas ldang ba las de 'gog pa'o/ /dmigs pa'i sgom pa zil gyis gnon pa'i skye mched sems la gnas pa'i phyir zil gyis gnon pa'i skye mched de/ de dag ni brgyad do/ /de la dang po'i rnam par thar pa las ni gnyis sgrub po/ /gnyis pa las kyang gnyis so/ /gsum pa las ni bzhi'o/ /nang gzugs su 'du shes pas phyi rol gyi gzugs chung ngu la kha dog ngan pa dang / kha dog bzang po dang / dman pa dang / gya nom par lta ba'o/ /gzugs de dag zil gyis mnan nas shes shing / de ltar 'du shes par 'gyur ba 'di ni dang po'o/ /nang gzugs su 'du shes pas phyi rol gyi gzugs chen po la kha dog bzang po dang kha dog ngan par lta zhing de bzhin du shes par 'gyur ba 'di ni gnyis pa'o/ /nang gzugs med par 'du shes pas phyi rol gyi gzugs chung ngu la sogs par lta ba ni gsum pa'o/ /nang gzugs med par 'du shes pas phyi rol gyi gzugs la chen po la sogs par lta bu ni bzhi pa'o/ / rnam par thar pa gsum pa las ni bzhi mngon par sgrub po/ /nang gzugs su 'du shes pas phyi rol gyi gzugs rnams la lta ba ni sngon po/ /kha dog sngon po/ /sngon por ston pa/ sngon por snang ba/ dper na zar ma'i me tog gam/ /yul bA rA Na sI'i ras phun sum tshogs pa sngon po/ /kha dog sngon po/ sngon por ston pa/ sngon por snang ba de bzhin du/ gzugs de dag kyang zil gyis mnan nas/ de ltar 'du shes par 'gyur zhing lta ba 'di ni lnga pa'o/ /de bzhin du ser po la sogs pa ni dper na dong ka'i me tog ces bya ba la sogs pa ni drug pa'o/ /de bzhin du dmar po la sogs pa ni dper na ban du dzi ba ka'i me tog ces bya ba la sogs pa ni bdun pa'o/ /de bzhin du dkar po zhes bya ba la sogs pa ni/ dper na skar ma pa ba sangs zhes bya ba la sogs pa la brgyad pa'o/ /de la chung ngu zhes bya ba ni sems can gyi grangs su ston pa yin te/ tshad chung ba yin pa'i phyir ro/ /kha dog bzang po dang / ngan pa ni sdug pa dang / mi sdug pa nyid kyi phyir ro/ /dman pa dang / gya nom pa ni lha la yod pa dang / mi la yod pa'o/ /rnam par thar pa de dag la mos par byas nas/ zil gyis mnan pa'i skye mched kyis zil gyis gnon par byed do/ /yang dang yang du mi mthong zhing mi snang bar byas pa'i phyir zil gyis gnon pa'o/ /shes pa ni zhi gnas kyis so/ /mthong ba ni lhag mthong gis so/ /de ltar 'du shes par 'gyur ba ni mngon pa'i nga rgyal med pa nyid kyi phyir ro/ /chen po ni sems can ma yin par ston pa ste/ de dag ni khyim dang gzhal med khang dang / ri la sogs pa ste/ tshad chen po yin pa'i phyir ro/ /sngon po zhes bya ba ni bstan pa'o/ /lhag ma ni bshad pa'o/ /kha dog sngon po zhes bya ba ni lhan cig skyes pa'i kha dog go/ /sngon por ston pa zhes bya ba ni sbyor ba las byung ba'i kha dog go/ /sngon por snang ba ni gnyi ga'i kha dog tu snang ba'o/ /o ma ka ni zar ma'o/ /kar ma ka ni dong ka'o/ /ban du dzi ba ka ni ban du ka'o/ /pa ba sangs ni tho rangs shar ba'i skar ma'o/ /zad par bcu'i bdag nyid ces bya ba ni/ zil gyis gnon pa'i skye mched kyis zil gyis mnan nas/ sa la sogs pa thams cad kun du khyab par byas pa'i phyir zad par gyi skye mched ces brjod do/ /kha cig ni zil gyis gnon pa'i skye mched de ni zad par gyi skye mched du brjod do/ /kha cig ni sa la sogs pa dag gis khyad par du ston te/ zad par sa dang / zad par chu dang / zad par me dang / zad par rlung dang / zad par sngon po dang / zad par ser po dang / zad par dmar po dang / zad par dkar po dang / zad par nam mkha' mtha' yas skye mched dang / zad par rnam shes mtha' yas skye mched do/ /rnam pa thams cad dag pa bzhi zhes bya ba ni rten yongs su dag pa dang / dmigs pa yongs su dag pa dang / thugs yongs su dag pa dang / ye shes yongs su dag pa'o/ /de la bag chags dang bcas pa'i nyon mongs pa'i phyogs rnams kyi gnas ngan len rten las gtan du bral zhing rang gi bdag nyid kyi dngos po ji ltar 'dod pa bzhin du skye ba dang / gang du gnas pa dang 'chi 'pho la dbang bsgyur ba'i rnam pa thams cad yongs su dag pa'i rten yongs su dag pa'o/ /sprul pa dang / yongs su bsgyur ba dang / dmigs pa thams cad la rnam pa thams cad du dbang bsgyur ba ni dmigs pa yongs su dag pa'o/ /snga ma bzhin du sems kyi gnas ngan len thams cad dang bral bas/ sems la rnam pa thams cad du dge ba'i rtsa ba 'phel ba ni/ rnam pa thams cad du thugs yongs su dag pa'o/ /snga ma bzhin du ma rig pa'i phyogs kyi gnas ngan len thams cad dang bral bas shes pa dang shes bya thams cad la dbang bsgyur ba ni rnam pa thams cad kyi ye shes yongs su dag pa'o/ /dbang bcu ni bcu la dbang ba ste/ tshe la dbang ba ni ji ltar 'dod par tshe la gnas pa dang spang ba la'o/ /sems la dbang ba ni ji ltar 'dod par bsam gtan la snyoms par 'jug pa'i phyir ro/ /yo byad la dbang ba ni ji ltar 'dod par 'tshog chas nye bar gnas par byed pa'i phyir ro/ /las la dbang ba ni ji ltar 'dod par lus dang ngag gi las grub pa'o/ / skye ba la dbang ba ni ji ltar 'dod pa rnams su skye bar byed pa'o/ /rdzu 'phrul la dbang ba ni ji ltar 'dod pa'i mngon par shes pa'o/ /smon lam la dbang ba ni smon lam thams cad yang dag par 'byor ba'o/ /mos pa la dbang ba ni gang ji ltar mos pa de bzhin du 'gyur ba'o/ /ye shes la dbang ba ni gang kho na shes par 'dod pa de nyid shes pa'o/ /chos la dbang ba ni mdo la sogs pa chos rnam par 'jig pa la mkhas pa'o/ /bsrung ba med pa gsum na de bzhin gshegs pa ni sku'i spyod pa yongs su dag pa ste/ de la yongs su ma dag pa ni sku'i spyod pa mi mnga' bas/ gzhan la las shes su 'ong ngo zhes bcas pa'i dgongs pa gang yang mi mnga' ba 'di ni bsrung ba med pa dang po'o/ /de bzhin du gsung gi phrin las ni gnyis pa'o/ /de bzhin du thugs kyi phrin las ni gsum pa'o/ /dran pa nye bar gzhag pa gsum ni ji ltar mdo las gsungs pa bzhin te/ de bzhin gshegs pas chos bstan pa na/ gcig tu gus par nyan cing brtun te/ bka' sems la nye bar 'jog cing / chos kyi rjes su chos nye bar sgrub pa na/ des de bzhin gshegs pa dgyes par mi 'gyur thugs yeng yeng por mi 'gyur ba dang / gzhan dag gus par mi nyan cing / rna ba'i 'dud pa la sogs pa la des de bzhin gshegs pa thugs khong khro bar mi 'gyur/ mi bzod par mi 'gyur/ thugs mi mnyes par mi 'gyur ba dang / gcig tu gus par nyan pa dang gcig tu gus par mi nyan pa de dag la des de bzhin gshegs pa de dag dgyes pa'am/ khong khro ba gnyis su mi 'gyur bar thams cad du dran pa dang / shes bzhin du ldan pas btang snyoms su bzhugs pa'o/ /bsnyel ba mi mnga' ba'i chos nyid ni sangs rgyas rnams kyi sems can gyi don mdzad pa la dus las mi 'da' ba ste/ de nyid kyi phyir 'di ni bya ba'i mdzad pa gzhan mi mnga' bar rig pa yin no/ /bag chags yang dag par bcom pa ni gang nyon mongs pa spangs kyang ma spangs pa ltar spyod pa de ni nyon mongs pa'i bag chags so/ /de yang de bzhin gshegs pa la mi mnga' ste/ de bas na bcom ldan 'das ni bag chags yang dag par bcom pa zhes bya'o/ /thugs rje chen po ni bcom ldan 'das kyis ji ltar dus thams cad du phan pa'i dgongs pas 'jig rten la lan drug tu gzigs pa ste su ni nyams/ su ni 'phel zhes bya ba la sogs pa'o/ /rnam pa thams cad mkhyen pa nyid ces bya ba ni chos thams cad kyi ngo bo nyid dang / khyad par gyi dbye ba mtha' yas pa mkhyen pa zhes bya ba'i don to/ /nyon mongs pa ni 'thab pa dang / rtsod pa la sogs pa'o/ /'dir ni rtsod pa'i rgyu'i nyon mongs pa la nyon mongs pa 'di dag gis bdag la dmigs nas nyon mongs pa skye bar mi 'gyur bar/ ting nge 'dzin la snyoms par 'jug pa gang yin pa ste/ gang gi phyir gzhan dag gi grong la sogs par 'jug pa na bdag la dmigs nas de dag gi nyon mongs pa mi skye ba ni nyan thos la yang yod/ sangs rgyas la yang yod/ de ni thun mong yin no/ /de dag gi mdzad pa'i khyad par de'i ting nge 'dzin de dbang du byas nas/ bstan bcos las/ nyan thos nyon mongs med pa'i lha/ /mi yi nyon mongs spong nyid dang / /rgyal ba'i grong sogs de dag gi/ /nyon mongs rgyun gcod nyon mongs med/ / ces bya ba gsungs te/ nyan thos kyi nyon mongs pa med pa ni nyon mongs pa'i rgyu mthong ba spong bar byed de/ nyon mongs pa mngon sum du spong ba ni ma yin no/ /bde bar gshegs pas ni sngar bshad pa'i nyon mongs pas rgyun bcad pa'i phyir yin gyi mthong ba ni ma yin no zhes bya ba'i don to/ /'jig rten gyi spyod pa la sogs pa 'di shes par bya'o zhes smos pa byas nas snyoms par zhugs te shes pa bskyed pa de ni nyan thos kyi smon nas shes pa'o/ /de bzhin gshegs pa'i dbang du byas nas bstan bcos las/ sangs rgyas smon nas mkhyen pa ni/ /lhun gyis grub dang chags spangs dang / /thogs pa med dang rtag gnas dang / /'dri ba kun len 'debs par bzhed/ /ces bya ba gsungs te/ lhun gyis grub pa ni rnam par mi rtog pa'i phyir ro/ /thogs pa med pa ni thams cad du thogs pa med pa'i phyir ro/ /rtag gnas ni rtag tu sems ting nge 'dzin la gnas pa'i phyir ro/ /'dri ba kun lan 'debs pa zhes bya ba ni dris pa thams cad sel ba'o/ /de yang longs spyod rdzogs pa'i skus rang gi zhing yongs su dag par skyes te/ ji srid nam mkha' gnas kyi bar du bzhugs so/ /de ci'i phyir sangs rgyas kyi zhing zhes bya zhe na/ gtsor ni de nyid der skyes pa'i phyir ro/ /'jig pa dang rab tu 'jig pas na 'jig rten te/ skye dgu dang de'i snod do/ /de bas na 'jig rten gyi khams ni gnyis te/ sems can gyi 'jig rten dang / snod kyi 'jig rten no/ /de la sems can gyi 'jig rten yongs su dag pa'i dbang du byas nas/ sems can gyi khams thams cad bsod nams dang / ye shes kyi tshogs mu med pa'i phyir shes rab kyi pha rol tu phyin pa mu med par rjes su rig par bya'o zhes gsungs te/ bcom ldan 'das gang shes rab kyi pha rol tu phyin pas yongs su smin par byas pa'i sems can ji srid nam mkha' gnas kyi bar du der skye bar 'gyur te/ skyes nas kyang gang gi phyir byang chub kyi don du yongs su smin par byed pa 'dir shes rab kyi pha rol tu phyin pa yin te/ de mu med par rjes su rig par bya'o/ /ji ltar zhe na/ sems can gyi khams thams cad ces bya ba gsungs te/ gang su dag der skyes pa'i sems can de dag ni byang chub sems dpa'i sa rnams thob pa dag go/ /de thams cad ni sems can gyi khams te sems can gyi tshogs so/ /de'i bsod nams dang ye shes kyi tshogs dag ni mu med pas so/ /sa'i khams mu med pa'i phyir shes rab kyi pha rol tu phyin pa mu med par rjes su rig par bya'o/ /de bzhin du chu'i khams dang / me'i khams dang / rlung gi khams dang / nam mkha'i khams dang / rnam par shes pa'i khams mu med pa'i phyir shes rab kyi pha rol tu phyin pa mu med par rjes su rig par bya'o zhes gsungs pa la/ de bzhin du snod kyi 'jig rten ni sa gzhi lag mthil ltar mnyam pa/ khang bzangs dang / skyed mos tshal dang / dpag bsam gyi shing la sogs pa yo byad dang gnas thams cad kyang rin po che sna bdun mchog tu 'bar ba'i rang bzhin 'jig rten gyi khams gzhan du ma dag tu yang 'od zer chen po rab tu 'phro bar byed la/ steng gi nam mkha' la yang rjes su mthun par snang ba yin no/ /sems can yang khams drug pa ste/ dge slong dag skyes bu 'di dag ni khams drug pa can no zhes bya ba'i tshig gis so/ / de'i phyir de dag gi lus kyang gzi brjid dang ldan pa dang / 'od kyi dkyil 'khor sa gzhi dang / rjes su mthun pa'i kha dog dang / dbyibs dang de na gnas pa'i sems can rnams kyi longs spyod dang / kun spyod pa yang lha thams cad las khyad par du 'phags pa yin te gang dag gi longs spyod gcig tu bzang ba dang / gcig tu bde ba dang / gcig tu kha na ma tho ba med pa dang / gcig tu dbang bsgyur ba'o/ /'di lta bu'i khams drug yongs su dag pa mu med pa ni mtshams chad pa med pa nyid kyi phyir dang / mngon par spangs pa nyid kyi phyir ro/ /de bas na de mu med pas de'i rgyur gyur pa'i phyir/ bcom ldan 'das kyis shes rab kyi pha rol tu phyin par rjes su rig par bya'o/ /der skyes pa'i byang chub sems dpa' rnams 'jig rten gyi khams mtha' yas par song nas/ de na gnas pa'i sems can gyi mi dge ba bsags pa dang / de'i gnyen po dge ba bsags pa yang rab tu shes te/ de dag tshad med pas de dag yongs su gcod par byed pa'i shes rab kyang tshad med par rjes su rig par bya'o zhes bya ba 'di nyid dge ba dang mi dge ba'i chos bsags pa tshad med pa'i phyir shes rab kyi pha rol tu phyin pa tshad med par rjes su rig par bya'o zhes bya ba gsungs so/ /byang chub sems dpa' de dag la dge ba'i chos ji snyed pa'i phyir chos ston par byed de/ de ni chos thams cad bsags pa ste/ de tshad med pas de dag 'jog par byed pa'i shes rab de dag kyang tshad med par rig par bya ste/ 'di ni chos thams cad bsags pa tshad med pa'i phyir shes rab kyi pha rol tu phyin pa tshad med par rjes su rig par bya'o zhes gsungs so/ /chos thams cad kyi ting nge 'dzin mu med pa thob pa'i phyir shes rab kyi pha rol tu phyin pa mu med par rjes su rig par bya'o zhes bya ba gsungs pa la/ chos ni gzungs rnams so/ /ting nge 'dzin ni sems gnas pa'o/ /chos dang ting nge 'dzin ni chos kyi ting nge 'dzin te/ de dag mu med pa'o/ /de thob pa ni de rnyed pa'o/ /gang de byang chub sems dpa' rnams kyi thob pas bcom ldan 'das kyis shes rab kyi pha rol tu phyin pa yang mu med par rjes su rig par bya'o zhes bya ba'i don to/ /sangs rgyas kyi chos thams cad mu med pa'i phyir shes rab kyi pha rol tu phyin pa mu med par rjes su rig par bya'o zhes gsungs pa la/ de la sangs rgyas ni longs spyod rdzogs pa'i sku'o/ / de'i chos thams cad ni sangs rgyas kyi chos thams cad de/ skyes bu chen po'i mtshan sum cu rtsa gnyis dang / dpe byad bzang po brgyad cu'o/ /de dag mu med pa ni yongs su bcad du med pa'o/ /gang gis yongs su bcad du med ce na mnyam pa ste/ de bzhin gshegs pa las gzhan pa de lta bu med pa'i phyir ro/ /des na bcom ldan 'das kyis shes rab kyi pha rol tu phyin pa de lta bu nyid kyang mu med par rig par bya ste/ gang gis de dag gi rgyu thams cad yang dag par shes pa dang / yang dag par grub pa'o/ /de'i phyir bstan bcos las/ mtshan ni sum cu rtsa gnyis dang / /dpe byad brgyad cu'i bdag nyid 'di/ /theg chen nye bar longs spyod phyir/ /thub pa'i longs spyod rdzogs skur bzhed/ /ces bya ba gsungs te/ theg chen nye bar longs spyod phyir/ /zhes bya ba'i tshig gis ni/ /longs spyod rdzogs pa'i sku gsungs so/ / de la dang po'i lnga ni dbang po'i rdo rje'i mtshan nyid do/ /phyag zhabs 'khor lo'i mtshan dang rus sbal zhabs/ /phyag dang zhabs sor dra bas 'brel ba dang / /phyag ni zhabs bcas 'jam zhing gzhon sha can/ /'di yi sku ni bdun dag mtho ba dang / /sor mo ring dang rting yangs sku che drang / /zhabs long mi mngon spu ni gyen du phyogs/ /byin pa e na ya'i 'dra phyag ring mdzes/ /mdoms kyi sba ba sbubs su nub pa'i mchog /pags pa gser mdog pags pa srab pa dang / /spu ni re re nas g.yas legs 'khrungs dang / /zhal mdzod spus brgyan ro stod seng ge'i 'dra/ /'di yi dpung pa'i mgo zlum thal gong rgyas/ /'di la ro mi zhim pa ro mchog snang / /sku ni n+ya gro d+ha ltar chu zheng gab/ /gtsug tor yar 'phags ljags ring mdzes pa dang / /tshangs dbyangs 'gram pa seng ge'i 'dra dang tshems/ /shin tu dkar dang tshad mnyam thags bzangs dang / /grangs ni bzhi bcu tham par tshang ba dang / /spyan ni mthon mthing spyan rdzi ba mchog gi/ /'dra ba 'di dag sum cu rtsa gnyis mtshan/ /zhes bya ba gsungs te/ zhabs ni rkang pa'o/ /'di la 'khor los mtshan pa'i phyag dang / zhabs yod pas na phyag dang zhabs 'khor lo'i mtshan no/ /'di zhabs rus sbal ltar shin tu gnas pa yod pa'i phyir rus sbal zhabs so/ /de dag ni las 'dzin pa'i bsdu ba'o/ /'di la phyag dang zhabs kyi sor mo dra bar 'brel pa yod pas na/ phyag dang zhabs kyi sor mo dra bas 'brel ba'o/ / phyag ni zhabs bcas 'jam zhing gzhon sha can/ /'di zhes bya ba 'og ma dang sbyar ro/ /'di yi sku ni bdun dag mtho ba dang / /zhes bya ba ni mtshon pa'i gsum pa'o/ /sku ni rten no/ /bdun mtho bas mtshon pa'i sku zhes bya ba'i don to/ /'di dag gis ni mtshan lnga bstan te phyag dang zhabs 'khor los mtshan pa dang zhabs shin tu gnas pa dang / phyag dang zhabs dra bar 'brel pa dang / phyag dang zhabs 'jam zhing gzhon sha chags pa dang / bdun mtho ba'o/ /sor mo ring dang rting yangs sku che drang / /zhabs long mi mngon spu ni gyen du phyogs/ /byin pa e na ya'i 'dra phyag ring mdzes/ /mdoms kyi sba ba sbubs su nub pa'i mchog /ces bya ba la sor mo ring ba dang / rting pa yangs pa zhes bya ba ni gcig tu bsdu ba'i zlas dbye'o/ /sku drang zhes bya ba ni sku che ba dang drang ba'o/ /zhabs long bu mi mngon pa yang yin la/ spu gyen du phyogs pa yin pas/ zhabs long mi mngon gyen du phyogs pa ste/ long bu dang pus mo'i lha nga mdzes par mi mngon pa ni mi mngon pa'o/ /de'i phyir ung gi sgra ni khyad par dang mi mngon pa'i don to/ /dung gi sgra ni pus mo'i lha nga dang / long bu'i rus pa'i don te/ brla'i rtsa ba man chad kun la zhabs zhes rtogs par bya'o/ /'di la mdoms kyi sba ba mchog tu nub pa yod pa de la de skad ces bya'o/ /'dis mtshan brgyad bstan te/ sor mo ring ba dang / rting pa yangs pa dang / sku che zhing drang ba dang / zhabs kyi long bu mi mngon pa dang / spu gyen du phyogs pa dang / /byin pa ri dgas e na ya'i lta bu dang / phyag dang brla ring zhing grims pa dang / mdoms kyi sba ba sbubs su nub pa'o/ /pags pa gser mdog pags pa srab pa dang / /spu ni re re nas g.yas legs 'khrungs dang / /zhal mdzod spus brgyan ro stod seng ge'i 'dra/ /'di la dpung pa mgo zlum thal gong rgyas/ /'di la ro stod seng ge 'dra ba ni ro stod seng ge dang 'dra ba'o/ /mgo zlum pa zhes bya ba ni mi zlum pa ma yin te/ mgur ma byang zhing kun nas zlum pa nyid kyi phyir ro/ /thal gong dag gi bar ni dbus te brang ngo / / de rgyas pa 'di la yod pas thal gong rgyas pa'o/ /'dir ni mtshan sum cu bstan te/ pags pa mdog gser lta bu dang / pags pa srab pa dang / spu re re nas g.yas su legs par 'khrungs pa dang / zhal mdzod spus brgyan pa dang / ro stod seng ge'i 'dra ba dang / dpung mgo zlum pa dang / thal gong rgyas pa'o/ /'di la ro mi zhim pa ro mchog snang / /sku ni n+ya gro d+ha ltar chu zheng gab/ /gtsug tor yar 'phags ljags ring mdzes pa dang / /tshangs dbyangs 'gram pa seng ge'i 'dra dang tshems/ /shin tu dkar dang tshad mnyam thags bzangs dang / /grangs ni bzhi bcu tham pa tshang ba dang / /spyan ni mthon mthing spyan rdzi ba mchog gi/ /'dra ba 'di mchog sum cu rtsa gnyis mtshan/ /zhes bya ba la/ tshigs su bcad pa gnyis po 'dis ni mtshan sum cu rtsa gnyis bstan te/ ro bro ba'i mchog nyid dang / n+ya gro d+ha ltar chu zheng gab pa nyid dang / gtsug tor gyen du 'phags pa nyid dang / ljags ring zhing mdzes pa nyid dang / tshangs pa'i dbyangs nyid dang / 'gram pa seng ge'i 'dra ba nyid dang / tshems shin tu dkar ba nyid dang / tshems mnyam pa nyid dang / tshems thags bzang ba nyid dang / tshems bzhi bcu tshang ba nyid dang / spyan mthon mthing nyid dang / spyan gyi rdzi ma ba'i lta bu nyid dang / ba mchog ni be'u gzhon nu'o/ /yang na ba mchog ni khyu mchog go/ /'di thams cad gcig tu byas pas ni mtshan sum cu rtsa gnyis bstan to/ /'di dag gis bshad pa dang / rgyu dang / snga ltas dang / chos kyi sbyin pa ni mdo ji lta ba bzhin te/ 'di la mtshan nyid gang gang gi/ /sgrub par byed pa'i rgyu gang yin/ /de dang de ni rab rdzogs pas/ /mtshan ni 'di dag yang dag 'grub/ /'dir gang gi mtshan gang gi rgyu gang sgrub par byed pa de dang / de ni rab tu rdzogs pas thob pa'i mtshan nyid de/ 'di ni longs spyod rdzogs pa'i sku'o/ /yang gang gi rgyu gang yin zhe na/ bla ma skyel la sogs pa dang / /yang dag blangs la brtan pa dang / /bsdu brten dang gya nom pa'i/ / dngos po sbyin dang gsad bya ba/ /thar bar byed dang dge ba ni/ /yang dag blangs pa spel la sogs/ /sgrub byed rgyu yi mtshan nyid de/ /mdo las ji skad 'byung ba bzhin/ /zhes bya ba la bla ma la bskyal ba dang / bsu ba dag dang / chos mnyan pa dang / mchod rten la me tog gis mchod pa dang / bskor ba la sogs pa dang / g.yog 'khor phul bas ni phyag dang zhabs 'khor lo'i mtshan dang ldan pa yin no/ /bsdu ba'i dngos po rnams kun tu bsten pas ni phyag dang zhabs dra bas 'brel ba yin no/ /bza' ba dang btung ba la sogs pa gya nom pa byin pas ni phyag dang zhabs gzhon sha can dang bdun mtho ba nyid do/ /gsad par bya ba thar byed dang / /zhes bya ba'i tshig ni sogs pa'i don to/ /gsad pa thar bar byas pa dang / srog rjes su gzung ba byas pa dang / srog gcod pa las ldog pa kun du bsten pas/ sor mo ring ba nyid dang / rting pa yangs pa nyid dang / sku che zhing drang ba nyid do/ /dge ba'i chos yang dag par blangs pa dang / rnam par spel bas na zhabs kyi long bu mi mngon pa nyid dang / spu gyen du phyogs pa nyid do/ /sogs pa zhes bya ba ni de la sogs pa'o/ /mdo las 'di skad 'byung ba bzhin zhes bya ba ni ji skad 'chad par 'gyur ba'i chos kyi sbyin pa'o/ /de bzhin gshegs pa dang / byang chub sems dpa' ni skyes bu chen po'i byed pa dang ldan pa nyid kyi phyir skyes bu chen po ste/ de dag gsal bar byed pa ni skyes bu chen po'i mtshan te sum cu rtsa gnyis so/ /de dag mdzes par byed pa'i phyir dpe byad bzang po brgyad cu ste/ de dag gi dbang du mdzad nas tshigs su bcad pa ni bcu gnyis [(]ste[,]te[)]/ thub pa'i sen mo zangs mdog dang / /mdog snum mtho dang sor mo rnams/ /zlum rgyas byin gyis phra ba dang / /rtsa mi mngon dang mdud pa med/ /ces bya ba 'dis ni dpe byad bzang po brgyad cu bstan te/ sen mo zangs kyi mdog nyid dang / sen mo snum pa nyid dang / sen mo mtho ba nyid dang / sor mo zlum pa nyid dang / sor mo rgyas pa nyid dang / sor mo byin gyis phra ba dang / rtsa mi mngon pa nyid dang / mdud pa med pa nyid do/ /long bu mi mngon zhabs mnyam dang / /seng ge glang chen bya dang ni/ /khyu mchog stabs gshegs g.yas phyogs dang / /mdzes gshegs drang dang 'khril bag chags/ /byi dor byas 'dra rim par 'tsham/ /zhes bya ba ni tshig rkang gcig lhag pa'i tshigs su bcad pas ni bcu gnyis te/ long bu mi mngon pa nyid dang / zhabs mi mnyam pa med pa nyid dang / seng ge'i stabs su gshegs pa nyid dang / glang po'i stabs su gshegs pa nyid dang / ngang pa'i stabs su gshegs pa nyid dang / khyu mchog gi stabs su gshegs pa nyid dang / g.yas phyogs su ldog cing gshegs pa nyid dang / mdzes par gshegs pa nyid dang / sku drang ba nyid dang / sku 'khril bag chags pa nyid dang / sku byi dor byas pa nyid dang / sku rim par 'tsham par nyid dang / gtsang dang 'jam dang dag pa'i sku/ /mtshan ni yongs su rdzogs pa dang / /sku yi kho lag yangs shing bzang / /zhes bya ba'i tshig rkang gsum gyis ni dpe byad bzang po lnga nyid de/ sku gtsang ba nyid dang / sku 'jam pa nyid dang / sku rnam par dag pa nyid dang / mtshan rdzogs pa nyid dang / sku kho lag yangs shing mdzes pa nyid do/ /gom snyoms spyan ni dag pa dang / /shin tu gzhon mdog can nyid dang / /sku zhum med dang rgyas pa dang / /shin tu grims pa'i sku nyid dang / /zhes bya ba 'di ni drug ste/ gom pa snyoms pa nyid dang / spyan rnam par dag pa nyid dang / sku gzhon sha can nyid dang / sku zhum pa med pa nyid dang / sku rgyas pa nyid dang / sku shin tu grims pa nyid do/ /yan lag shin tu rnam 'byes dang / /gzigs pa rab rib dag pa dang / /dku zlum skabs phyin ma rnyongs dang / /phyang nge ba dang lte ba ni/ /zab dang g.yas phyogs 'khyil ba dang / / kun nas blta na sdug pa dang / /zhes bya ba'i tshigs su bcad pa phyed dang gnyis po 'dis ni dgu ste/ yan lag dang nying lag rnam par shin tu 'byes pa nyid dang / gzigs pa rab rib med cing dag pa nyid dang / dku zlum pa nyid dang / dku skabs phyin pa nyid dang / dku ma rnyongs pa nyid dang / phyal phyang nge ba nyid dang / lte ba zab pa nyid dang / lte ba g.yas phyogs su 'khyil pa nyid dang / kun nas mdzes pa nyid do/ /kun spyod gtsang dang sku la ni/ /sme ba gnag bag med pa dang / /phyag ni shing bal ltar 'jam dang / /phyag ris mdangs yod zab ring dang / /zhal ni ha cang mi ring dang / /zhal gzugs gzugs brnyan 'byung ba dang / /zhes bya ba la/ zhal 'di la gzugs kyi gzugs brnyan 'byung ba yod pa gang yin pa de la de skad ces bya'o/ /zhal ni zhal gdong ste/ zhal gdong la gzugs kyi gzugs brnyan 'byung ba'o/ /tshigs su bcad pa phyed dang gnyis pa 'dis ni brgyad de/ kun du spyod pa gtsang ba nyid dang / sku la sme ba gnag bag med pa nyid dang / phyag shing bal ltar 'jam pa nyid dang / phyag gi sor mo mdangs yod pa nyid dang / phyag gi ri mo zab pa nyid dang / phyag gi ri mo ring ba nyid dang / zhal ha cang mi ring ba nyid dang / zhal gdong la gzugs kyi gzugs brnyan snang ba nyid do/ /ljags mnyen pa dang srab pa dang / dmar dang 'brug gi sgra nyid dang / /gsung mnyen 'jam dang mche ba zlum/ /rno dang dkar dang mnyam pa dang / /byin gyis phra dang shangs mtho dang / /mchog tu dag pa dag dang ni/ /zhes bya ba la/ mchog ni dam pa zhes bya ba'i don to/ /tshigs su bcad pa phyed dang gnyis po 'dis ni bcu gnyis te/ ljags mnyen pa nyid dang / ljags srab pa nyid dang / ljags dmar ba nyid dang / glang po'i nga ro dang / 'brug gi sgra dang ldan pa nyid dang / gsung snyan cing mnyen la 'jam pa nyid dang / mche ba zlum pa nyid dang / mche ba rno ba nyid dang / mche ba dkar ba nyid dang / mche ba mnyam pa nyid dang / mche ba byin gyis phra ba nyid dang / shangs mtho ba nyid dang / shangs gtsang ba nyid do/ /spyan yangs pa dang rdzi ma stug /pad+ma'i 'dab ma 'dra ba dang / smin tshugs ring dang 'jam pa dang / /snum dang spu ni mnyam pa dang / /phyag ring rgyas dang snyan mnyam dang / /nyams pa rnam par spangs pa dang / 'phral ba legs par 'byes pa dang / /dbyes che ba dang dbu rgyas dang / /zhes bya ba'i tshigs bcad gnyis po 'dis ni bcu gsum mo/ /spyan yangs pa nyid dang / rdzi ma stug pa nyid dang / spyan dkar nag 'byes shing pad+ma'i 'dab ma lta bu nyid dang / smin tshugs ring ba nyid dang / smin ma snum pa nyid dang / smin ma'i spu mnyam pa nyid dang / phyag ring zhing rgyas pa nyid dang / snyan mnyam pa nyid dang / 'phral ba legs par 'byes pa nyid dang / 'phral ba dbyes che ba nyid dang / dbu shin tu rgyas pa nyid dang / dbu skra bung ba ltar gnag dang / /stug 'jam ma 'dzings ngo bo dang / /dbu skra mi gshor nyid dang ni/ /dbu skra skyes bu yid 'phrog dang / /dpal gyi be'u dang bkri shis ni/ /g.yung drung 'khyil pas brgyan pa ste/ /sangs rgyas dpe byad bzang por bzhed/ /ces bya ba'i tshigs su bcad pa'i phyed dang gnyis po 'dis ni bdun te/ dbu skra bung ba ltar gnag pa nyid dang / dbu skra stug pa nyid dang / dbu skra 'jam pa nyid dang / dbu skra ma 'dzings pa nyid dang / dbu skra mi gshor ba nyid dang / dbu skra dri zhim pa nyid dang / phyag dang zhabs kyi mthil bkra shis dang g.yung drung 'khyil pas brgyan pa nyid do/ /thams cad gcig tu byas pa ni sangs rgyas rnams kyi dpe byad bzang po brgyad cu'o/ /'di ni long spyod rdzogs pa'i sku'o/ /sprul pa'i sku'i dbang du byas nas bstan bcos las/ gang gi srid pa mi srid par/ /'gro la phan pa sna tshogs dag / mnyam pa mdzad pa'i sku de ni/ /thub pa'i sprul sku rgyun mi 'chad/ /de bzhin de las 'khor ba'i bar/ /rgyun mi 'chad par bzhed pa yin/ /zhes bya ba gsungs te/ de'i phyir mdo las/ chos thams cad mu med pa'i phyir shes rab kyi pha rol tu phyin pa mu med pa rjes su rig par bya'o zhes bya ba la ji srid sa la spyod pa dang / bar snang la spyod pa'i 'gro ba dang / gnas pa'i sems can rnams kyi lus dang / ngag gi bsdus pa ni chos te/ sems can rnams gdul ba'i phyir/ bcom ldan 'das kyis 'jig rten gyi khams mtha' yas pa dag tu sprul pa de dag ni chos thams cad de/ de dag mu med par rig par bya'o/ /de gang zhe na/ gang gi sprul pa de dag go/ /stong pa nyid mu med pa'i phyir/ shes rab kyi pha rol tu phyin pa mu med par rjes su rig par bya'o zhes bya ba la ji ltar sprul pa'i sku de dag mu med pa de bzhin du de dag gi stong pa nyid kyang mu med do/ /gang gis stong zhe na/ sems dang sems las byung ba la rag las pa ste/ sgyu ma'i skyes bu bzhin no/ /de'i phyir de yang mu med pas mu med pa ste/ snga ma bzhin no/ /ji ltar yang de dag lus dang ngag gi sprul pa de bzhin du sems dang sems las 'byung ba yang ci'i phyir mi sprul zhe na/ de la nye bar len pa'i rgyu med pa'i phyir dang / sngon med pa'i sems can mi 'byung ba'i phyir ro/ /sangs rgyas rnams kyi sprul pa ni/ sems dang sems las byung ba la yang 'dod pa ma yin nam zhe na/ sku gsung thugs kyi sprul pa ni/ /sbyor ba'i thabs kyi las can yin/ /zhes bya ba'i tshig las so/ /'on kyang nye bar len pa yod na yod par 'gyur te/ lhas byin gyis brlabs nas rmi lam du bstan pa lta bu 'am/ tshig las tshig gi don go ba bzhin no/ /de'i phyir sems dang sems las byung ba mu med pa'i phyir/ shes rab kyi pha rol tu phyin pa mu med par rjes su rig par bya'o zhes gsungs so/ /'jig rten gyi khams sna tshogs pa dag tu sems can gyi khams mu med pa'i spyod pa mu med pa la rnam par gzigs nas/ bcom ldan 'das kyis sprul pa sna tshogs kyis chos ston pa yin te/ de'i phyir sems kyi spyod pa mu med pa'i phyir shes rab kyi pha rol tu phyin pa mu med par rjes su rig par bya'o zhes gsungs so/ /sems can de dag gis kyang ji ltar bstan pa'i chos la dmigs nas gnyen po'i dge ba'i chos skye bar 'gyur te/ des kyang de dag gi mi mthun pa'i phyogs mi dge ba'i chos rnams spong bar 'gyur te/ de'i phyir dge ba dang mi dge ba'i chos gzhal du med pa'i phyir/ shes rab kyi pha rol tu phyin pa gzhal du med par rjes su rig par bya'o zhes gsungs so/ /ji ste gang sprul pa de ltar bcom ldan 'das kyi sku yin/ gal te bcom ldan 'das kyis sprul pa'i phyir ro zhe na/ de ltar na ni sgyu ma mkhan gyis sprul pa'i glang po la sogs pa yang sgyu ma mkhan gyi lus su 'gyur ro zhe na/ rang gi skur byin gyis brlabs pa der sprul pa'i phyir nyid kyi sku bzhin du gshegs pa dang / dka' ba spyod pa dang / bya ba la sogs pa mdzad pa de yang de'i sku yin no/ /de la 'di ni bcom ldan 'das kyis sprul pa'i sku bstan te/ de dag ni sku gsum mo/ /da ni mdzad pa mdor bsdus nas bshad par bya ste/ de yang seng ge'i sgra sgrogs pa'i phyir/ shes rab kyi pha rol tu phyin pa rjes su rig par bya'o zhes gsungs te/ ri dgas rnams kyi mchog ni seng ge'o/ /de dang chos mthun pa'i phyir skyes bu dam pa ni skyes bu seng ge zhes brjod do/ /'di ni khyad par du gyur pa ste/ lha dang mi rnams la sogs pa skyes bu thams cad kyi dam pa ni de bzhin gshegs pa ste/ de la seng ge zhes brjod do/ /de'i chos ni bsam pa thams cad yongs su rdzogs par byed pa dang / gzhan pha rol rgol ba'i ri dgas thams cad 'jigs par mdzad pas seng ge'i sgra zhes brjod do/ /seng ge'i rgyal mtshan bzhin no/ /de sgrog pa ni ston pa'o/ /de'i dngos po ni de nyid de/ de'i phyir bcom ldan 'das kyi shes rab ni/ bgrod par bya ba'i shes rab kyi pha rol tu phyin pas pha rol tu phyin par rig par bya'o zhes bya ba'i don to/ /de yang seng ge'i sgra ste/ mdzad pa nyi shu rtsa bdun ston pa ste/ de ni rgyas par yum chen mo dag las blta bar bya'o/ /de'i dbang du byas nas bstan bcos las/ 'gro rnams zhi ba'i las dang ni/ /bsdu rnams bzhi la dgod pa dang / /kun nas nyon mongs bcas pa yi/ /rnam par byang ba rtogs pa dang / /sems can rnams don ji bzhin gyi/ /don dang pha rol phyin drug dang / /sangs rgyas lam dang rang bzhin gyis/ /stong pa nyid gnyis mi zad dang / /brda dang dmigs pa med pa dang / /lus can rnams ni yongs smin dang / /byang chub sems dpa'i lam dang ni/ /mngon par zhen pa bzlog pa dang / /byang chub thob dang sangs rgyas zhing / /rnam par dag dang nges pa dang / /sems can don ni tshad med dang / /sangs rgyas rten sogs yon tan dang / /byang chub yan lag las rnams ni/ /chud mi za dang bden mthong dang / /phyin ci log ni spang ba dang / /de gzhi med pa'i tshul dang ni/ /rnam par byang dang tshogs dang ni/ /'dus byas 'dus ma byas pa la/ /tha dad yongs su mi shes dang / /mya ngan 'das la dgod pa ste/ /chos kyi sku yi phrin las 'di/ /rnam pa nyi shu bdun du bzhed/ /ces bya ba gsungs te bcom ldan 'das kyi sprul pa'i sku gang gis dmyal ba rnams kyi dmyal ba'i me zhi bar 'gyur ba 'di ltar chos ston pa dang / de bzhin du dud 'gro dag la yang rang gi khrag la sogs pa'i sbyin pa dang / de bzhin du yi dags rnams la yang bza' ba dang / btung ba la sogs pa byin nas chos bstan te/ sems dad par 'dzin pa dang / mngon par dad pa des rang gi 'gro ba las shi 'phos te/ lha dang mi rnams su skye bar mdzad de/ lha rnams la yang theg pa dman pa la mos shing dang bar 'gyur ba'i chos bstan te/ mi rnams su skye bar byas nas nyan thos kyi byang chub dang rang sangs rgyas kyi byang chub kyi bar la gnas par byed pa 'di ni 'gro ba rnams zhi ba'i phrin las so/ /yang gang dag mi rnams kyi phyi nang gi zang zing gi sbyin pa dang / 'jig rten pa dang / 'jig rten las 'das pa'i chos kyi sbyin pa dang / tshig snyan pa dang / don spyod pa dang / don mthun pa la slob par byed pa 'di ni bsdu ba'i dngos po la dgod pa'i phrin las so/ /kun nas nyon mongs pa ni nyon mongs pa'i sgrib pa dang / shes bya'i sgrib pa'o/ /de gnyis nub pa ni rnam par byang ba'o/ /de yang gang zag dang / chos la bdag med par shes pa'i phyir 'di ni kun rdzob bo/ /don dam par chos kyi dbyings las gzhan med de/ 'di ni kun nas nyon mongs pa dang / rnam par byang ba shes pa la dgod pa'i phrin las so/ /ji ltar sgyu ma mkhan gyis bza' ba dang / bca' ba la sogs pa'i bar gyi dngos po sna tshogs kyis 'jig rten dga' bar byed de/ de yang 'jig rten gyi dngos po 'di thams cad med par shes pa ni ma yin no/ /gang yang shes rab kyi pha rol tu phyin pa la spyod pa ni chos kyi dbyings la ma gtogs par cung zad kyang mthong ba med de/ sems can yang ma yin/ sems can du btags pa yang ma yin no/ /chos rnams kyang bdag med pa yin pa'i phyir ro/ /'di ni sems can rnams kyi don ji lta ba bzhin gyi bdag nyid la dgod pa'i phrin las so/ /de bdag nyid kyang sbyin par byed/ gzhan yang sbyin pa la sbyor bar byed/ sbyin pa'i bsngags pa rjod par byed/ gang gzhan dag sbyin pa sbyin par byed pa de dag gi bsngags pa brjod cing mthun par byed do/ /de bzhin du bdag nyid kyang tshul khrims srung bar byed ces bya ba la sogs pa brjod par bya ste/ 'di ni pha rol tu phyin pa drug la dgod pa'i phrin las so/ /bdag nyid kyang dge ba bcu'i las kyi lam yang dag par blangs nas 'jug par byed pa dang / bdag nyid kyang bslab pa'i gzhi lnga nas/ skyes bu chen po'i mtshan sum cu rtsa gnyis dang / dpe byad bzang po brgyad cu rdzogs par bya'o zhes bya ba'i bar gyis te/ 'di ni sangs rgyas kyi lam la dgod pa'i phrin las so/ /'dir byang chub sems dpa' sems can thams cad pha rol tu phyin pa la rdzogs pa'i chos ston pa na/ de dag gi 'khor gsum dag pa'i 'bras bu yang rang bzhin gyis stong par ston par byed de/ de dag de bzhin du bsgoms pas lhag par khyad par du 'gro ste/ des na de dag stong pa nyid kyi rang bzhin la lan mang du sgom par byed pas/ bla na med pa'i byang chub kyi bar du khyad par 'gro bar byed de/ 'di ni stong pa nyid la dgod pa'i phrin las so/ /rang bzhin gyis stong pa nyid kyi chos thams cad de/ rang bzhin gyis stong pa yang gzhan ma yin no/ /chos thams cad kyang gzhan ma yin te/ 'on kyang rang bzhin gyis stong pa nyid chos so/ /de nyid rang bzhin gyis stong pa nyid de/ 'di ni gnyis su med pa'i chos la dgod pa'i phrin las so/ /bcom ldan 'das kyis yang dag par rdzogs pa'i byang chub thob pa'i chos ni gang yang med de/ gang yang mngon par rdzogs par sangs rgyas nas/ phung po dang khams la sogs pa nas/ rnam pa thams cad mkhyen pa nyid kyi bar du chos ston pa de ni 'jig rten gyi tha snyad yin te/ 'di ni brdar btags pa shes pas dgod pa'i phrin las so/ /gal te pha rol tu phyin pa la sogs pa'i chos thams cad la bslabs pa de lta na yang / yang dag par rdzogs pa'i byang chub thob par mi nus la gal te yang de dag la yang spyod cing / 'khor gsum gyi 'bras bu de dag la yang mi dmigs pa de'i tshe ni yang dag par rdzogs pa'i byang chub thob par nus te/ 'di ni dmigs pa med pa la dgod pa'i phrin las so/ /gal te byang chub sems dpa' yang shes rab kyi pha rol tu phyin pa la spyod pa na/ sems can dang sems can du brtags pa yang mi dmigs te/ 'on kyang de kun rdzob mthong nas sems can rnams dngos por dmigs pas/ kun nas nyon mongs par gyur pa na/ des de dag gi de rnams spang ba'i phyir/ theg pa gsum la yongs su smin par byed de/ 'di ni sems can yongs su smin par byed pa la dgod pa'i phrin las so/ /de pha rol tu phyin pa re re la sogs pa la spyod pa ni/ sems can rnams dge ba'i chos thams cad dang / chos thams cad stong pa nyid la slob par byed de/ 'di ni byang chub sems dpa'i lam la dgod pa'i phrin las so/ /de de ltar nye bar rtog pa na/ chos thams cad stong pa nyid de/ stong pa nyid la yang mngon par zhen par mi byed do/ /de bas na chos thams cad la mngon par zhen pa med par bsgom par bya zhing / sbyin pa la sogs pa la spyad par bya ste/ 'khor gsum po de dag la yang rlom sems su mi bya'o/ /'di ni mngon par zhen pa thams cad spangs pa la dgod pa'i phrin las so/ /lam gyis byang chub thob pa la yang ma yin/ lam ma yin pas kyang ma yin te/ gang gi phyir byang chub nyid lam mo/ /lam nyid byang chub bo/ /gal te de lta na byang chub sems dpa' nyid sangs rgyas su 'gyur ro zhe na/ gang gi tshe byang chub sems dpas sangs rgyas kyi chos thams cad yongs su rdzogs par byas shing / rdo rje lta bu'i ting nge 'dzin la gnas nas/ skad cig gcig dang ldan pa'i shes rab kyis/ yang dag par rdzogs pa'i byang chub thob pa de'i tshe/ de nyid de bzhin gshegs pa ste/ thams cad gzigs pa dang ldan pa'i thams cad mkhyen pa'o zhes ston te/ 'di ni byang chub thob pa la dgod pa'i phrin las so/ /de bdag dang gzhan dag gi tshul khrims 'chal pa la mi dge ba bcu'i las kyi lam gyis yang dag par bsdus pa dang / pha rol tu phyin pa drug gi mi mthun pa'i phyogs dang / theg pa dman pa'i 'bras bu lnga mngon sum du byed cing reg pa dag gi skabs mi 'byed cing phung po dang / khams la sogs pa zag pa dang bcas pa dang / zag pa med pa'i chos thams cad kyi 'du shes kyi gnas ngan len bsal nas/ rang yang pha rol tu phyin pa la sogs pa'i dge ba'i chos rnams la gnas par byed la/ gzhan yang de dag la 'god par byed cing / bdag gi dge ba'i rtsa ba de dag kyang sems can thams cad dang thun mong du byas te/ yang dag par rdzogs pa'i byang chub dang / rnam pa thams cad mkhyen pa dang / rang gi sangs rgyas kyi zhing yongs su dag par yongs su sngo bar byed cing / sangs rgyas kyi zhing yongs su dag par bya ba'i phyir smon lam yang mdo ji lta ba bzhin du 'debs par byed de/ 'di ni sangs rgyas kyi zhing rnam par dag pa la dgod pa'i phrin las so/ /gal te byang chub sems dpa' dang po sems bskyed pa nyid nas yang dag par rdzogs pa'i byang chub tu nges par 'gyur ba yin zhing / nges pa ji ltar na ngan song du skye bar 'gyur zhe na/ gang yang dag par rdzogs pa'i byang chub tu sems bskyed de/ pha rol tu phyin pa drug dang tshad med pa bzhi la spyod cing mi dge ba bcu'i las kyi lam spang ba'i phyir gnas pa de dag la mi khom pa brgyad kyang 'byung bar mi 'gyur na/ ngan song du skye ba lta smos kyang ci dgos de lta mod kyi 'on kyang de dag dud 'gro'i skye gnas su skyes pa ni zag pa dang bcas pa dang / zag pa med pa'i dge ba'i rtsa ba'i chos thams cad dang ldan pas/ sems can gyi don gyi dbang gis bsams bzhin du skye'o/ /dud 'gro'i sdug bsngal myong ba ni ma yin te/ dper na de bzhin gshegs pa mchog tu dbang thob pas 'jig rten gyi khams thams cad du bdag nyid kyi ngo bo mtha' yas pa gzhan gyi don du cig car sprul pa lta bu'o/ /'di ni yang dag par rdzogs pa'i byang chub tu nges pa la dgod pa'i phrin las so/ /de shes rab kyi pha rol tu phyin pa la gnas nas/ phyogs bcu'i 'jig rten gyi khams gang gA'i klung gi bye ma snyed dag tu sems can gyi don mdzad kyang skyon gyis mi gos te/ 'di ltar gang reg pa dang / gang gis reg pa dang / gang la reg pa'i chos gsum po de dag 'di la mi dmigs shing stong pa nyid la dmigs na/ dkar po'i chos thams cad la gnas par 'gyur te/ de nyid kyis de dag bsdus pa'i phyir ro/ /de ltar na chos thams cad ni chos thams cad kyis stong ste/ des na stong pa nyid du 'dus pa yin no/ /'di ni sems can gyi don tshad med pa la dgod pa'i phrin las so/ /de 'di ltar dpyod par byed de/ gang phyogs bcu'i 'jig rten gyi khams gang gA'i klung gi bye ma snyed dag na bzhugs pa'i de bzhin gshegs pa thams cad ni ngo bo nyid kyis stong ste/ ming dang brda tsam kho nas brtags pa yin la/ btags pa de yang ngo bo nyid kyis stong ngo / /gal te yang 'ga' zhig yod de/ mi stong par gyur na gang gi phyir nyi tshe ba ma yin pa de'i phyir/ chos thams cad ni chos thams cad kyis stong pa kho na ste/ de nyid shes rab kyi pha rol tu phyin pa la gnas nas mngon par shes pa drug bsgrubs te/ gang dag la gnas nas phyogs bcu'i de bzhin gshegs pa thams cad kyi drung du 'gro zhing bsnyen bkur byas te/ de dag la chos mnyan pa de dag las kyang mngon par zhen pa med pa'i dge ba'i rtsa ba bskyed cing stong pa nyid la mngon par zhen pa med do/ /des lha'i mig gis phyogs bcu'i 'jig rten gyi khams kyi sems can rnams la bltas nas rdzu 'phrul gyi mngon par shes pas der song ste/ de dag la chos ston par byed do/ /lha'i rna bas phyogs bcu'i sangs rgyas thams cad kyi chos ston pa thos nas de dag la ston par byed do/ /sems can rnams kyi sems kyi rnam grangs shes par byas nas/ sems ji lta ba bzhin du de dag la chos ston par byed do/ /des bdag dang gzhan gyi sngon gyi rnam pa du ma rjes su dran te/ sngon gyi de bzhin gshegs pas bstan pa'i chos rjes su dran nas/ gdul bar bya ba'i sems gang yin pa dag la de ston par byed do/ /des zag pa zad pa shes pas sems can rnams la rjes su mthun par chos ston to/ /des mngon par shes pa dag gis sems can rnams kyi don du bdag nyid kyi dngos po gang dang gang gzung bar 'dod pa de dang / de nyid so sor len par byed par 'dod do/ /der yang bde ba dang sdug bsngal la rjes su chags pa dang / khong khro bas mi gos so/ /'di ni phyogs bcu'i sangs rgyas bstan pa la sogs pa la dgod pa'i phrin las so/ / yang byang chub sems dpa'i byang chub kyi yan lag gang zhe na/ pha rol tu phyin pa drug dang / /bsam gtan bzhi nas/ sangs rgyas kyi chos ma 'dres pa'i bar te/ de dag la spyod na 'khor gsum dag pas de dag la yang mi dmigs shing / bdag nyid yang dag par rdzogs pa'i byang chub dang / sems can thams cad kyi mchog gi don du yang dag par rdzogs pa'i byang chub tu yongs su sngo bar byed do/ /gal te 'di rnams byang chub sems dpa'i chos yin na/ de lta na sangs rgyas kyi chos rnams gang yin zhe na/ gal te 'di dag gis rnam pa thams cad mkhyen pa nyid du mngon par rdzogs par sangs rgyas te/ bag chags kyi mtshams sbyor ba thams cad spangs par 'gyur zhing skad cig gcig dang ldan pa'i shes rab kyis chos thams cad mngon par rdzogs par sangs rgyas pa 'di nyid de/ de lta bu byang chub sems dpa'i ni ma yin no/ /'di ni byang chub kyi yan lag la dgod pa'i phrin las so/ /ji ltar yang chos thams cad rang gi mtshan nyid kyis stong pa nyid yin pa de lta mod kyi las kyang yod/ de dag gi 'bras bu yang yod de/ sems can rnams kyis rang gi mtshan nyid kyis stong pa'i chos rnams mi shes so/ /mi shes pas chos dang gang zag tu btags nas dge ba dang mi dge ba'i las mngon par 'du byed cing nye bar spyod pas ngan song gsum du 'gro bar byed la legs par spyod pas lha dang mir skye ba yin no/ /yang kha cig ni gang zag dang chos la bdag med par yongs su shes nas/ bde 'gro dang ngan 'gro yongs su spangs pa'i phyir mya ngan las 'das pa thob par byed do/ byang chub sems dpa' ni pha rol tu phyin pa la sogs pa dge ba'i chos yongs su rdzogs par byas nas/ rim gyis sa bcu thob par byas te/ skad cig gcig dang ldan pa'i shes rab kyis chos thams cad mngon par rdzogs par sangs rgyas te/ sangs rgyas bcom ldan 'das su 'gyur te/ 'di ni las dang 'bras bur 'brel pa chud mi za ba la dgod pa'i phrin las so/ /byang chub sems dpa' bden pa dang / bden pa mthong bas mya ngan las mi 'da' ste/ de lta mod kyi 'on kyang bden pa bzhi mnyam pa nyid de/ gang de dag de bzhin nyid dang mnyam zhing ngo bo nyid med pas des chos gang yang dmigs pa med cing bden pa'i rnam grangs kyis rlom sems su mi byed la/ de'i phyir chos thams cad stong pa nyid du mthong nas/ skyon med pa la zhugs te rigs kyi sa la gnas par 'gyur zhing / bsam gtan dang / tshad med pa dang / gzugs med pa'i snyoms par 'jug pa bskyed de/ des 'dir zhi gnas kyi sa la gnas par byas nas/ sdug bsngal yongs su shes par byed/ kun 'byung spong bar byed/ 'gog pa mngon sum du byed/ lam sgom par byed kyang / bden pa la dmigs pa'i sems skyed par mi byed/ byang chub la gzhol ba'i sems kho nas rang gi mtshan nyid kyis stong pa'i chos thams cad mthong ngo / /des lhag mthong gi chos thams cad stong pa nyid du mthong nas/ thabs la mkhas pas kyang chos ston par byed do/ /'di ni bden pa bzhi mthong ba la dgod pa'i phrin las so/ /byams pas gsol pa/ bcom ldan 'das gal te chos thams cad dngos po ma mchis pa'i ngo bo nyid lags na/ ji ltar byang chub sems dpa' gzugs nas sangs rgyas kyi chos rnams kyi bar la bslab par bgyi ba lags/ bcom ldan 'das kyis ming tsam nyid do zhes bka' stsal pa dang / gsol pa/ 'du byed kyi mtshan ma'i dngos po dngos po med pa'i ming ni ming tsam mo/ /'du byed ni rnam par rtog pa'o/ /de'i mtshan ma ni yul te/ gang la 'di ltar 'di ni gzugs so/ /'di ni tshor ba'o zhes bya ba nas 'di dag ni sangs rgyas kyi chos rnams so zhes bya ba'i bar du dgongs so/ /bcom ldan 'das kyis bka' stsal pa/ ming tsam mo zhes bya ba 'di ni glo bur du btags pa ste/ 'di ni gzugs so zhes bya ba'i bar du ming tha dad pas ming gi don du rtogs pa ni ma yin no/ /de'i phyir sgra'i don ni brdzun te/ tha snyad tsam yin gyi/ dngos po ni ma yin no/ /gsol pa/ gzugs kyi ngo bo nyid tha snyad tsam nyid do zhes bya ba ni gzugs kyi ngo bo nyid thob par 'gyur ba'o/ /bcom ldan 'das kyis bka' stsal pa/ de la skye ba dang 'gag pa med de/ de bas na de rang gi ngo bo med do/ /gsol pa yang bcom ldan 'das rnam pa thams cad kyi thams cad du rang gi mtshan nyid gzugs la sogs pa nas/ sangs rgyas kyi chos thams cad kyi bar du yod pa lags sam zhes so/ /bcom ldan 'das kyis bka' stsal pa/ 'jig rten gyi brda dang tha snyad du yod kyi don dam par ni ma yin no/ /gsol pa/ bcom ldan 'das kyis bka' stsal pa'i don bdag gis 'tshal ba ltar na/ don dam brjod du ma mchis pa'i dbyings nyid de/ gal te 'du byed kyi mtshan ma'i dngos po brjod du ma mchis pa'i dbyings lags te tha snyad kyang 'di nyid do/ /bcom ldan 'das kyis bka' stsal pa/ nam khyod brjod du med pa'i dbyings la shes rab spyod par 'gyur zhing / dmigs pa 'di nyid kyi rnam pa ni mtshan ma'i dngos po'o/ /gsol pa/ bcom ldan 'das ma lags so/ /bcom ldan 'das kyis bka' stsal pa/ 'di ltar de nyid kyi phyir de nyid kyang ma yin gzhan pa yang ma yin no/ /gal te gzhan yin par gyur na ni de ci'i phyir 'jig par mi 'gyur ji ste gzhan ma yin na ni ci'i phyir mi dmigs/ gzhan yang gal te 'di 'du byed kyi mtshan ma las gzhan yin par gyur na ni de lta na byis pa so so'i skye bo thams cad kyang yongs su mya ngan las 'da' zhing / yang dag par rdzogs pa'i byang chub tu mngon par rdzogs par 'tshang rgya bar 'gyur ro/ /ji ste gzhan ma yin par gyur na yang / de ltar na mtshan ma de yang dmigs su med par 'gyur ro/ /gsol pa/ brjod du med pa'i dbyings dang / nye bar 'brel ba'i shes rab kyi spyod pa la gnas pa na/ 'du byed kyi mtshan ma'i dngos po gang la dmigs su ma mchis na/ de ci lags mchis pa las dmigs su ma mchis sam/ bcom ldan 'das kyis bka' stsal pa/ gang gi tshe rnam par rtog pas gzung zhing rtogs pa'am/ ma rtogs pa de'i tshe ni de rnam par rtog pa tsam mo/ /de la 'di ni yod pa dang med pa yang ma yin pa'o/ /gsol pa/ bcom ldan 'das rnam pa dus chos yongs su gdags par bgyi/ byams pa rnam pa gsum gyis te/ 'di ltar kun du brtags pa'i gzugs dang / rnam par brtags pa'i gzugs dang / chos nyid kyi gzugs so/ /sangs rgyas kyi chos rnams kyi bar du kun du brtags pa dang / rnam par brtags pa'i sangs rgyas kyi chos dang / chos nyid kyi sangs rgyas kyi chos so/ /de la gang 'du byed kyi mtshan ma'i dngos po gzugs zhes bya ba'i ming dang gdags pa dang tha snyad du bya ba la brten nas/ gzugs kyi ngo bo nyid du yongs su brtags pa gang yin pa de ni kun brtags pa'i gzugs so/ /'du byed kyi mtshan ma'i dngos po de dang de dag la gnas pa de ni rnam par brtags pa'i gzugs so/ /kun du brtags pa'i gzugs gang yin pa des rnam par brtags pa'i gzugs de la/ dus rtag tu ngo bo nyid med cing bdag med pa dang de bzhin nyid dang / yang dag pa'i mtha' gang yin pa de ni chos nyid kyi gzugs so/ /de bzhin du kun du brtags pa'i gzugs nas/ rnam par brtags pa'i gzugs dang chos nyid kyi gzugs kyi bar du sangs rgyas kyi chos rnams dang sbyar ro/ /de la yongs su brtags pa'i gzugs ni rdzas su med do/ /rnam par brtags pa'i gzugs ni rdzas su yod de/ rnam par rtog pa rdzas su yod par blta'i rang dbang du 'jug pa ni ma yin no/ /chos nyid kyi gzugs ni rdzas med pa yang ma yin/ rdzas yod pa yang ma yin te/ chos nyid kyis rab tu phye ba'o/ /de bzhin du sangs rgyas kyi chos rnams kyi bar du'o/ /gsol pa/ gang bcom ldan 'das kyis bka' stsal pa/ gang 'di ltar gzugs gnyis su ma mchis par bgrang ba zhes bya ba nas/ sangs rgyas kyi chos rnams zhes bya ba'i bar du de ji ltar zhes bya ba'o/ /bcom ldan 'das kyis bka' stsal pa/ gang yongs su brtags pa'i gzugs de ni gzugs ma yin te/ dngos po med pa'i phyir dang / tha snyad du yang gzugs ma yin pa'i phyir ro/ /gang rnam par brtags pa'i gzugs de ni gzugs ma yin te/ rang dbang du mi 'gyur ba'i phyir ro/ /gzugs ma yin pa rnam par brtags pa'i gzugs yin pa'i phyir ro/ /gang chos nyid kyi gzugs de ni gzugs ma yin te/ gzugs kyis dben pa'i phyir ro/ /gzugs ma yin pa yang don dam pa'i gzugs yin pa'i phyir ro/ /de'i phyir 'di ni gnyis su med pa'i grangs su bgrangs so zhes bya ba ni sangs rgyas kyi chos rnams kyi bar du sbyar ro/ /gsol pa/ de ltar mtha' gnyis spangs nas dbu ma'i lam la zhugs pas/ gzugs nas sangs rgyas kyi chos rnams kyi bar dag ji ltar mtshan nyid yongs su shes pa dang / mtshan nyid spangs pa dang / mtshan nyid mngon du bgyi ba dang / ji ltar mtshan nyid bsgom pa'o/ /bcom ldan 'das kyis bka' stsal pa/ gang gzugs yongs su shes pa yang ma yin/ yongs su mi shes pa yang ma yin pa de nyid de'i yongs su shes pa'o/ /de bzhin du bsgom pa yang ma yin mi bsgom pa yang ma yin zhes bya ba nas/ de bzhin du sangs rgyas kyi chos rnams zhes bya ba'i bar du sbyar ro/ /gsol pa/ byang chub sems dpa' de ltar yongs su shes pa dang ldan pa'i mya ngan las 'das pa gang lags/ bcom ldan 'das kyis bka' stsal pa/ mya ngan las 'das pa ni zab bo/ /gang gi phyir mya ngan las 'das pa de ji ltar zab ce na/ gang gi phyir gzhan gyi don las brtsams nas 'khor ba yongs su gtong ba 'di ni mya ngan las 'das pa'o/ /bdag gi don las brtsams te/ mya ngan las 'das pa yongs su ma gtang ba'i phyir mya ngan las 'das pa'o/ /gcig ma btang na cig shos btang ba ni rigs kyi/ gnyi ga ma btang na ni mi rigs so zhe na/ gnyi ga la rnam par mi rtog pas/ gnyi ga la yang mi skyo ste/ de bas na gnyi ga yongs su ma btang ba yang rigs so/ /de ltar na de ni 'khor bar yang 'gyur/ mya ngan las 'das par yang 'gyur bar yang mi rigs so zhe na/ gang byang chub sems dpa' sems la dbang thob cing thabs la mkhas pas 'khor ba bstan pa'i phyir 'khor ba yongs su mi gtong ngo / /gang stong pa nyid dmigs su med pa la gnas pa'i phyir 'dis mya ngan las 'das pa yang mi gtong ngo / /gsol pa/ rnam par mi rtog pa'i mtshan nyid thams cad ji ltar blta bar bgyi/ bcom ldan 'das kyis bka' stsal pa/ gang yang gzugs la sogs pa'i chos thams cad dang / de dag gi stong pa nyid dang / gang yang de dag gi dngos po dang / dngos po med pa gnyis su med pa dang / gang yang spros pa med pa 'di ni rnam par mi rtog pa thams cad kyi mtshan nyid do/ /gsol pa/ bcom ldan 'das ci lags/ nyan thos thams cad phyogs gcig pa'i mya ngan las 'das pa lags/ bcom ldan 'das kyis bka' stsal pa/ 'jig rten dag ni khams sna tshogs pa/ sems can gyi rigs dang / rang bzhin rab tu mang po yod de/ rigs dang / rus dang po nas/ bzang po'i khyad par 'dod cing de dag thob pa yang yod do/ /khyad par ngan pa 'dod cing de nyid thob pas/ de nyid kyis mgu bar 'gyur ba yang yod de/ nyan thos dgra bcom pa phyis bzang po'i khyad par 'dod cing byang chub tu bsngos nas/ yun ring po nas yang dag par rdzogs pa'i byang chub thob par byed do/ /de thob par bya ba'i phyir skye ba na/ las dang nyon mongs pa'i dbang gis skye ba ni ma yin no/ /'on kyang dgra bcom pa mya ngan las 'das pa thob pa ni bsam gyis mi khyab pa'i skye bar gdags te/ gang de la dang po ni byang chub sems dpa' rnams kyi rigs dang rus so/ /gsol pa/ bcom ldan 'das byang chub sems dpa' bsam pa rgya che ba dang / bdag nyid chen po bsam pa ni ngo mtshar to/ /bcom ldan 'das kyis bka' stsal pa/ gang 'di brgya byin nyid dang / 'jig rten skyong ba nyid dang / 'khor los sgyur ba la sogs pa 'jig rten gyi phun sum tshogs pa mi 'dod cing gang yang de dag la chags pa med cing 'dzin pa med par dge ba'i rtsa ba bla na med pa'i byang chub tu yongs su bsngo ba 'di ni rgya che ba'i bsam pa'o/ /gang yang de chags pa med pa'i bde ba dang 'dzin pa med pa'i bde ba dang / mya ngan las 'das pa'i bde ba thams cad sems can thams cad dang thun mong du bya bar 'dod pas/ dge ba'i rtsa ba bla na med pa yang dag par rdzogs pa'i byang chub tu yongs su sngo bar byed cing 'khor ba yongs su mi gtong bas/ 'di ni de dag gi bdag nyid chen po'i bsam pa yin no/ /gsol pa/ bcom ldan 'das byang chub sems dpa' rnams kyi ngo mtshar rmad du byung ba'i chos so/ /de thob par 'dod pas bla na med pa'i byang chub tu sems bskyed par bgyi'o/ /de'i 'og tu rab 'byor gyis gsol pa chos thams cad dngos po med pa'i ngo bo nyid lags na/ ji ltar las dang 'bras bu rnam par gzhag ce na/ bcom ldan 'das kyis bka' stsal pa/ chos thams cad kyi dngos po med pa'i ngo bo nyid ma shes sam/ sems can rnams phyin ci log las yang dag par byung ba'i rnam par rtog pa las byas nas/ las ji lta ba bzhin du 'bras bu thob par byed do/ /de la phyin ci log ni bzhi ste/ gang zag la bdag med pa dang / mi mthun pa'i phyogs dang / dngos po la mngon par zhen pa mi mthun pa'i phyogs dang / chos la bdag med pa'o/ /'dir byams pas zhus pa'i lan gyis phyin ci log mang po yang bsal cing rab 'byor gyis zhus pa'i lan gyis phyin ci log mang po yang bsal nas/ rab 'byor gyis zhus pa'i lan cung zad kyang bsal ba 'di ni phyin ci log spong ba la dgod pa'i phrin las so/ /sems can rnams phyin ci log rnams las mngon par 'du byed de/ de las kun nas nyon mongs par 'gyur ba de yang 'jig rten gyi tha snyad du yin gyi/ don dam par ni ma yin pa'i phyir te/ gang du gnas pa'i las kyi bya ba'i dngos po skra'i rtse mo'i tshad tsam gzhag pa ci yang yod pa ma yin te/ dper na rmi lam dang sgyu ma la sogs pa lta bu'o/ /'di ni phyin ci log bzhi med par shes pa la dgod pa'i phrin las so/ /gang chos thams cad kyi mnyam pa nyid dang / de bzhin nyid dang / yang dag pa'i mtha' dang / mya ngan las 'das pa de yang 'jig rten gyi tha snyad du yin gyi don dam par ni ma yin no/ /brjod du med pa'i phyir ro zhes bya ba 'di ni rnam par byang ba la dgod pa'i phrin las so/ /chos thams cad gzhi med cing rmi lam dang / sgyu ma lta bu yin pa de lta mod kyi/ de ma shes pas sems can mngon par zhen cing las byas nas bde 'gro dang / ngan 'gror 'gyur te/ des na de dag gi phyin ci log spang ba'i phyir/ byang chub sems dpa' sems dpa' chen pos byang chub tu sems bskyed de/ tshogs rnams la spyod cing / mngon par rdzogs par byang chub nas/ sems can yongs su smin par mdzad pa'i bar 'di ni tshogs la dgod pa'i phrin las so/ /bcom ldan 'das kyis bka' stsal pa/ gnyis kyis kyang mngon par rtogs par 'gyur ba med/ gnyis med pas kyang mngon par rtogs par 'gyur ba med pa 'di nyid ni gang la gnyis med pa dang / gnyis med pa'i mngon par rtogs pa'o/ / de ci'i phyir zhe na/ gang 'di mngon par rtogs pa'o zhes bya ba ni spros pa ste/ chos mnyam pa nyid la spros pa med de/ spros pa med pa ni mnyam pa nyid do/ /de nyid chos thams cad do/ /de nyid so so'i skye bo thams cad dang / 'phags pa'i gang zag go/ /de nyid sangs rgyas dkon mchog dang / chos dkon mchog dang / dge 'dun dkon mchog go/ /mnyam pa nyid ni chos nyid de/ chos nyid la yang tha dad pa ni med do/ /rab 'byor gyis gsol pa/ ci chos nyid 'dus bgyis pa lags sam/ 'dus ma bgyis pa lags/ bcom ldan 'das kyis bka' stsal pa/ 'dus byas kyang ma yin/ 'dus ma byas kyang ma yin no/ /gang yang 'dus byas kyi khams dang / gang yang 'dus ma byas kyi khams 'di gnyi ga ldan pa yang ma yin/ mi ldan pa yang ma yin te/ gzugs med pa bstan du med pa thogs pa med pa mtshan nyid gcig pa ste 'di ltar mtshan nyid med pa'o/ /'di ni 'dus byas dang 'dus ma byas kyi chos tha dad pa med par shes pa la dgod pa'i phrin las so/ /bcom ldan 'das kyis bka' stsal pa/ rab 'byor chos thams cad ni rang bzhin gyis stong ste/ de ni nyan thos kyis ma byas/ rang sangs rgyas kyis ma byas/ byang chub sems dpas ma byas/ sangs rgyas kyis ma byas te/ gang yang ngo bo nyid kyis stong pa gang yin pa de ni mya ngan las 'das pa'o/ /'di ni mya ngan las 'das pa la dgod pa'i phrin las so/ /mdzad pa'i khyad par nyid du bstan pa'i phyir chos thams cad 'khrug pa med pa'i phyir shes rab kyi pha rol tu phyin pa 'khrug pa med par rjes su rig par bya ste/ /mdzad pa ni spyod pa'o/ /spyod pa ni chos te/ rig pa dang / rnam par mi 'tshe ba dang / dpe dang / ngo bo dang / chos shes pa'i tshig gis te chos thams cad mdzad pa nyi shu rtsa bdun po dag go/ /de 'khrug pa med pa ni gnod pa med pa nyid de/ phyogs bcu'i 'jig rten gyi khams dag na gnas pa'i sems can thams cad la rnam pa thams cad kyis gnod pa ji lta bzhin du rgyun mi 'chad par nam mkha' snyed du 'jug pa'o/ / de skyed par byed pa'i bcom ldan 'das kyis shes rab kyi pha rol tu phyin pa yang 'khrug pa med par rjes su rig par bya'o zhes bya ba 'di ni chos kyi sku'i phrin las so/ /rgya mtsho mu med pa zhes bya ba nas/ chos thams cad 'khrug pa med pa zhes bya ba'i bar gyis ni shes rab kyi pha rol tu phyin pa'i khyad par gang dag gsungs nas/ de dag don dam par shes pa rim bzhin du bstan par 'dod nas/ de ci'i phyir zhe na zhes bya bas dris te/ skad cig ma gcig gis mngon par rtogs pa dang / chos kyi sku dang 'brel pa'i rtog pa'i tshig gang gsungs pa de dag thams cad kyi gtan tshigs ni gang ste/ rgyu gang zhes bya ba'i don to/ /rab 'byor gzugs ni zhes bya ba la sogs pa ni len te/ 'dir rgya mtsho mu med pa ni stong pa nyid tsam yin pa nyid kyi phyir te/ de yang tshad med pa'i phyir ro/ /de bzhin du gzugs la sogs pa'i phung po lnga yang rgya mtsho dang mtshungs so/ /shes rab kyi pha rol tu phyin pa yang de bzhin no/ /de ltar gang yang gzugs la sogs pa dang / gang yang de dag gis stong pa nyid dang / gang yang shes rab kyi pha rol tu phyin pa 'di thams cad ni ldan pa yang ma yin mi ldan pa yang ma yin/ gzugs med pa dang / bstan du med pa dang / mtshan nyid gcig pa ste/ 'di ltar mtshan nyid med pa'o zhes dgongs so/ /gzugs ni nam mkha' dang mtshungs pa'o zhes bya ba nas mi dmigs pa'i bar du'o zhes bya ba'i bar du yang de bzhin du shes par bya'o/ /mi dmigs pa ni nyon mongs pa can ma yin pa'i mi shes pa'o/ /rab 'byor de ltar na zhes bya ba la sogs pa ni ji ltar na mngon par rtogs pa brgyad le'u dang bcas par bstan pa de ltar rjes su rig par bya'o zhes bya ba gsungs te/ rjes su rig par bya'o/ /ci zhig bya ba yin zhe na/ rab 'byor gang gi tshe zhes bya ba la sogs pa gsungs te/ rjes su rig par byed pa zhes bya ba ni yi ge'i tshogs kyis nyan par byed pa'o/ /rnam par dpyod pa zhes bya ba ni don gyi ngo bos so/ /'jug pa dang rtog par byed pa zhes bya bas ni rab tu shes par byed pas so/ /rigs pa rnam pa bzhi dang ldan pas 'di lta bu nyid yin gyi gzhan du ma yin no zhes sems pa ni sems pa'o/ /yang byis pa nus pa zad pas skyo ba dang / smyos pa dang / brgyal ba'am/ 'chi bar 'gyur ba'i gnas de dag mi bsam par gang yang gnas la sems pa de dag ni 'jal bar byed pa'o/ / ji ltar 'di dag ni bcom ldan 'das rnal 'byor gyi dbang phyug dam pas gzigs pa ste/ bdag gis ni 'di dag bsam par bya ba ma yin te/ rtog pa can gyi spyod yul yin pa'i phyir ro zhes bya ba 'di ni nye bar rtog par 'gyur ba'o/ /'di lta bu'i the tshom thams cad chad pa'i phyir 'di ni yin no zhes nges par 'dzin par byed pa'o/ /de ltar the tshom thams cad shin tu chad na/ sgom pa la dbang du 'gyur te/ de'i phyir sgom par 'gyur ba zhes gsungs so/ /sgom pa ni rnam pa bzhi te/ zhi gnas dang / lhag mthong dang / de gnyi ga dang / zhi gnas dang / lhag mthong la mngon par dga' ba'o/ /ji lta bur yid la byed pa yin zhe na/ sgyu dang g.yo thams cad ces bya ba la sogs pa gsungs pa la/ bdag ces bya ba dang / bdag gi zhes bya ba dang / gzugs zhes bya ba dang / tshor ba zhes bya ba la sogs pa thams cad la/ mngon par zhen pa thams cad ni rlom sems thams cad do/ /phas kyi rgol ba thams cad dang / bdud la sogs pa dang / nyon mongs pa gang bskyod pa ni thams cad bskul ba'o/ /de'i tshe de la zhes bya ba la sogs pa la/ yon tan thams cad ni byang chub sems dpa'i yon tan no/ /sangs rgyas kyi zhing gi zhes bya ba ni yon tan no/ /yongs su rdzogs pa zhes bya ba ni 'gyur ba ste/ lhag ma ni rtogs par sla'o/ /mdo'i don ni mngon par rtogs pa brgyad de/ bstan bcos kyi dang por bstan nas/ de rgyas par bshad do/ /yang bstan bcos las/ mtshan nyid de yi sbyor ba dang / /de rab de yi go rims dang / /de mtha' de yi rnam smin ni/ /don bsdus gzhan te rnam pa drug /ces bya ba gsungs te/ yang na mdo'i don ni drug ste/ rnam pa thams cad mkhyen pa nyid dang / lam shes pa nyid dang / thams cad shes pa nyid gsum po 'di ni shes rab kyi pha rol tu phyin pa'i mtshan nyid de/ gang gi phyir de ni rnam pa gsum mo/ /bzhi pa rnam pa kun mngon par rdzogs par rtogs pa ste/ 'di ni de la sbyor ba'o/ /lnga pa rtse mo'i mngon par rtogs pa 'di ni sbyor ba'i rab bo/ /drug pa mthar gyis pa'i mngon par rtogs pa 'di ni sbyor ba'i go rims te/ mthar gyis sbyor zhes bya ba'i don to/ /bdun pa skad cig ma gcig gis mngon par rtogs pa 'di ni sbyor ba'i mthar phyin pa'o/ /brgyad pa chos kyi sku 'di ni de'i rnam par smin pa ste 'bras bu'i gtso bo zhes bya ba'i don to/ /yang bstan bcos las/ yul gyi rgyu ni gsum dag dang / /sbyor ba bzhi yi bdag nyid dang / /chos sku phrin las 'bras bu ni/ /don bsdus gzhan te rnam pa gsum/ /zhes bya ba gsungs te/ yang na mdo'i don ni gsum ste/ rgyu dang / sbyor ba dang / 'bras bu'o/ /de la sbyor ba'i yul ni rgyu rnam pa gsum ste/ rnam pa thams cad mkhyen pa nyid dang / lam shes pa nyid dang / thams cad shes pa nyid do/ /thun mong ma yin pa'i phyir bzhi ni sbyor ba'i don te/ rnam pa kun mngon par rdzogs par rtogs pa dang / rtse mo'i mngon par rtogs pa dang / mthar gyis pa'i mngon par rtogs pa dang / skad cig ma gcig gis mngon par rdzogs par rtogs pa'o/ /chos kyi sku ni 'bras bu'o/ /phrin las dang zhes bya ba'i sgra med kyang gang gi don du rtogs par bya'o/ /don bsdus ni mdo'i don rnams bsdus pa ste/ de la dang po ni brgyad do/ / gnyis pa ni drug go/ /gsum pa ni rnam pa gsum mo/ /rjes su rig par byed pa'i tshig gi le'u ni rjes su rig pa'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel slob dpon rin chen 'byung gnas zhi bas rnam par sbyar ba snying po mchog ces bya ba las le'u nyi shu rtsa dgu pa'o/ / //bcom ldan 'das kyis bstan pa'i mngon par rtogs pa brgyad po de ji ltar btsal bar bya ba de ma gsungs te/ de'i phyir bcom ldan 'das de 'chad par bzhed nas/ gzhan yang rab 'byor zhes bya ba la sogs pa gsungs te/ yongs su btsal bar bya zhes bya ba ni 'dod pa'i sbyor ba'o/ /lus ngal ba la sogs pa'i yid la byed pa dgag pa ni brtson 'grus lhag pa zhes bya ba'i don to/ /gang la yang sems smon par ma byed cig ces bya ba ni rnam par g.yeng ba dgag pa'o/ /smon par ma byed cig ces bya ba ni zhen par ma byed cig pa'o/ /gang la yang zhes bya ba ni bstan pa'o/ /nang dang phyi rol zhes bya ba ni bshad pa'o/ /bdag gis dbang du byas pa'i don ni nang ste/ rnam par dbye ba bdun pa'i zad par mi 'gyur ba'i bsdu ba'o/ /phyi rol zhes bya ba ni phyi'o/ /ma byed cig pa ni song zhig pa dang sbyar ro/ /g.yon dang g.yas zhes bya ba ni logs zhes dgongs so/ /shar zhes bya ba la sogs pa ni phyogs bstan to/ /phyogs mtshams zhes bya ba ni mtshams so/ /yang zhes bya ba ni mtshams dang mtshams zhes bya bar zlos pa'i don to/ /phyogs mtshams la yang zad par mi 'gyur ba'i bsdu ba bya'o/ /rigs kyi bu ci nas zhes bya ba la sogs pa ni de kho na nyid ma yin pa'i yid la byed pa dgag pa'o/ /bdag las ma yin 'jig tshogs las kyang ma yin zhes bya ba la/ 'jig pas ni 'jig pa'o/ /lus yin pas na tshogs te mi rtag pa'i gzugs la sogs pa la 'jig tshogs zhes brjod do/ /'jig tshogs la gang zag tu 'dogs so/ /des na bdag las ma yin/ 'jig tshogs las kyang ma g.yos zhes bya ba ni gang zag rdzas su yod pa yang ma yin btags par yod pa yang ma yin te/ gnyi ga yang mi dmigs pa'i phyir ro zhes bya ba'i don to/ /ci nas gzugs la sogs pa la ma yin te zhes bya ba la/ gzugs la sogs pa'i phung po'i chos rnams kyang mi dmigs so zhes dgongs so/ /de'i phyir g.yos pa zhes bya ba ni 'di dag gis g.yos pa'o/ /'di dag la sgro 'dogs pa ni rnam par nyams par 'gyur te/ ldog pa'o/ /lhag ma ni rtogs sla'o/ /de bzhin du zhes bya ba'i sgra ni de bzhin du nges par gzung ba zhes bya ba'i don to/ /snang bar byed pa zhes bya ba ni thar pa'i lam ston pa'o/ /sgrub par 'dod pa zhes bya ba ni bdag nyid la yang dag par skyes par 'dod pa'o/ /mos pa bskyed la zhes bya ba ni de bzhin du 'di nges par gzung ba gang las she na/ chos thams cad la'o/ /ji lta bu zhe na/ stong pa nyid dang / mtshan ma med pa dang / smon pa med pa dag la ste/ ji ltar snang ba don med pa'i stong pa dag la'o/ /de yang 'khrul pa snang ba'i mtshan ma rang bzhin gyis 'gag pa'i phyir ro/ /mtshan ma med pa de dag la'o/ /des na 'khrul pa tsam du mthong ba'i khams gsum pa dag la smon pa med pa'i phyir smon pa med pa dag la'o/ /kha cig tu stong pa nyid kyi sgra 'don te/ der ni rang gi don la dngos po'i rkyen bya'o/ /mtshan ma yongs su spangs pa zhes bya ba ni bstan pa'o/ /'khrul pa'i mtshan ma can gyis dngos po la mngon par zhen pa de ni 'dir mtshan ma ste/ de yongs su spangs pas so/ /dngos po yongs su spangs pa dang / sems can du lta ba yongs su spangs pa zhes bya ba ni bshad pa'o/ /dngos po ni chos su lta ba'o/ /sems can du lta ba ni bdag tu lta ba ste/ de dag yongs su spangs pa zhes bya ba'i don to/ /dge ba'i bshes gnyen gang zhes bya ba la sogs pa la gang zhes bya ba ni chos ston pa zhes bya ba dang sbyar ro/ /stong pa nyid dang / mtshan ma med pa dang / smon pa med pa ni snga ma bzhin no/ /dngos po med pa ni ma byung ba dang / ma skyes pa dang / ma 'gags pa'o/ /gang ma byung ba dang / ma skyes pa dang / ma 'gags pa de ni dngos po med pa ste/ de bas na ma byung ba dang / ma skyes pa dang / ma 'gags pa dang / dngos po med pa'i chos rnams so/ /de ltar chos ston pa gang yin pa de dag ni dge ba'i bshes gnyen yin te/ de las bzlog pa'i chos ston pa ni sdig pa'i grogs por don gyis rtog par bya'o/ /bsgrubs na zhes bya ba ni gnas na'o/ /byas pa gzo ba ni thos pa byas pa'i phyir ro/ /byas pa tshor ba ni thos pa'i 'bras bu shes pa'i phyir ro/ /yongs su rtogs la zhes bya ba ni sems pas so/ /'jig rten gyi zang zing zhes bya ba ni bza' ba dang / btung ba dang / gos la sogs pa'o/ /ldan pa zhes bya ba ni de mngon par 'dod par bya ba'o/ /'brang bar bya'o zhes bya ba ni rjes su 'gro bar bya ba'o/ /yod de zhes bya ba ni 'di yod pa'o/ /bsnyen pa la sogs tshig gsum gyis ni kun nas bsten pa zhes bya ba'i don to/ /zil gyis mnan nas zhes bya ba ni nyes pa med par byas pas so/ /sems can gdul bya zhes bya ba ni sems can rnams kyi sems bsrung ba'i phyir ro/ /rab tu gzung ba'i phyir zhes bya ba ni yongs su gzung ba'i don to/ /chags pa ni sred pa'o/ /sgrib pa ni dmigs pa'o/ /yang dag pa'i tshul ni don dam pa'i bye brag go/ /kun nas nyon mongs pa med pas na kun nas nyon mongs pa ma yin no/ /rnam par byang ba med pas na/ rnam par byang ba ma yin no/ /chos thams cad ni sems can med pa zhes bya ba la sogs pa'i tshig gis ni gang zag la bdag med pa gsungs so/ / sgyu ma lta bu la sogs pa'i tshig gis ni chos la bdag med pa gsungs so/ /phyir bsngo ba zhes bya ba ni lan gyi tshig go/ /yid mi skyo ba zhes bya ba ni mi skyo ba'o/ /bstan pa zhes bya ba ni nye bar bstan pa'o/ /ngu zhing ni mchi ma 'byin pas so/ /chos de ni dman pa'i sgras so/ /mya ngan ni 'dod pa'i yid do/ /smra ba ni rnam pa sna tshogs smra ba'o/ /rjes su 'brang ba ni ldan pas so/ /bskor ba ni yongs su bskor ba'o/ /'obs ni 'obs so/ /'byor pa ni nor phun sum tshogs pa'o/ /rgyas pa ni shing dang skyed mos tshal la sogs pas so/ /bde ba ni 'tshe ba med pa'i phyir ro/ /lo legs pa ni bza' ba dang / btung ba rnyed sla ba'i phyir ro/ /gang ba ni rgya che ba'o/ /mang po ni skye bo rnam pa sna tshogs so/ /gang dag la 'khor de lta bu yod pa de la de skad ces bya'o/ /gang na mi de lta bu yod pa de la de skad ces bya'o/ /bar ni nang ngo / /srang ni nyo tshong gi gnas te/ de ni srang lnga brgya dag gis nges par gtams pa ni ma lus par gtams pa ste/ lam srang ra ba'i mthar thug par ri mor bris pa lta bur gtams pa'o/ /ri mo yang yin la bris pa yang yin pas ri mor bris pa'o/ /bris pa ni ngo mtshar ba nyid kyi phyir ro/ /bzhin du zhes bya ba ni grong dang rjes su mthun par ro/ /des nyam mi nga ba na mnyam zhing gsal ba'o/ /skye bo dang / khri dang bzhon pa rnams 'dus nas 'gro ba'i gnas ni yang dag par 'dus nas 'gro ba'i gnas te/ lam srang rgya che ba'o/ /de dag gzhag pa ni gnas pa'o/ /legs par bsgrubs pa zhes bya ba ni legs par brgyan pa'o/ /de la skye bo la sogs pa ni 'jig rten no/ /khri ni khyogs so/ /bzhon pa ni shing rta'o/ /gong na med pa'i phyir dang / phan tshun mnyam pa'i phyir mnyam zhing mtshungs pa'o/ /mda' yab rnams ni ka zhu la sogs pa'o/ /mtho ba ni ra ba las shin tu rgya che ba cung zad mtho zhing phyir 'dor ba'o/ /tshad dang ldan pa zhes bya ba ni yangs shing mtho ba'o/ /rnam pa sna tshogs zhes bya ba ni gzhan dang gzhan rnam pa sna tshogs pa'o/ /mda' yab las skyes pa'i shing thams cad kyang mda' yab gnyis pa'i shing gzhan dang ji ltar yod pa de bzhin du 'brel pa'o/ /thams cad dang ldan pa zhes bya ba ni 'di la thams cad yod pas na thams cad dang ldan pa'o/ /g.yer ka'i dra ba zhes bya ba ni ra ba'i ngos bzhi'i mda' yab dang 'brel pa'i shing nor bu'i skud pa bzhis sbrel ba la nor bu'i skud pa rnam pa sna tshogs 'phyang ba'o/ /'jam pa ni rnar snyan pa'i phyir ro/ /yid du 'ong ba ni sems bde ba nyid kyi phyir ro/ /snyan pa ni yid 'phrog pa nyid kyi phyir ro/ /yan lag lnga pa ni pi wang dang gling bu la sogs pa'o/ /mkhas pa ni glu mkhan sna tshogs so/ /rtse ba ni rna bas so/ /dga' ba ni sems kyis so/ /rab tu rgyu pa ni lus dang ngag gi kun du g.yo ba'o/ /'obs ni 'obs so/ /chu rjes su mthun par 'bab pa zhes bya ba ni rlung la sogs pa dang rjes su mthun pa'i chu'i rgyun dang ldan pa'o/ /pad+ma ni pad+ma dmar po'o/ /puN+Da rI ka ni pad+ma dkar po'o/ /rigs che zhing che ba zhes bya ba ni gya nom pa bas gya nom pa'o/ /dri zhim po'i sgra ni dri zhim po'i rnam grangs so/ /rdzing bu de dag ces bya ba ni skyed mos tshal gyi rdzing bu'o/ /khor yug gi tshad ces bya ba ni chos thams cad du'o/ /rgyang grags rgyang grags zhes bya ba ni bzlas pa'o/ /mthing ga la sogs pa'i tshig ni snga ma bshad pa'o/ /sgra 'byin pa ni sgra sgrogs pa'o/ /sangs rgyas kyi tshul ni shes rab kyi pha rol tu phyin pa'o/ / de la gus par byed pa ni mchog tu dang ba ste/ des rjes su 'gro ba'o/ /gang dag la bde bar gshegs pa dag las thos pa bsams pa dag la ste/ de ltar de rnams kyi'o/ /grong khyer gyi dbus na bzhi mdo zhes bya bar sbyar ro/ /khor yug ces bya ba ni ngos so sor ro/ /khang pa'i longs spyod ni bskor ba'o/ /ci'i phyir zhe na/ nye bar longs spyod pa dang / yongs su longs spyod pa'o/ /nye bar longs spyod pa ni 'bras bu dang / me tog la sogs pa'o/ /yongs su longs spyod pa ni ma lus pa ste/ 'chag sar 'chag pa la sogs pa'o/ /bar zhes bya ba ni mtshams te/ phyi nang gi skabs so/ /ldan pa ni 'byor pa'o/ /'dod pa'i yon tan lnga po de dag gis dbang po thams cad rjes su 'dzin pas na dbang ngo / /de dang ldan pa ni dbang du gyur pa'o/ /rtse ba ni ngag gis so/ /dga' ba ni yid kyis so/ /kun du spyod pa ni lus kyis so/ /dus re zhig ces bya ba ni dus thung ba'o/ /de nas zhes bya ba ni rtse ba la sogs pa'i dus kyi 'og tu'o/ /dus gsum zhes bya ba ni snga dro dang / nyi ma phyed dang / phyi dro dag tu'o/ /khri'i khyad par ni gser gyi rkang pa dang zhes bya ba nas 'phang du rgyang grags phyed yod pa bsham par bya ba'i bar gyis gsungs so/ /shing bal bting ba'am/ go Ni ka'i stan nas zhes bya ba la/ go Ni ka ni rgya'i gos kyi stan no/ /'di la steng na yod pas ni steng snying po can du byas pa'o/ /ka shi ka'i gos bting ba ni ka shi ka'i gos sam lha'i gos so/ /'di la de lta bu yod pas na de skad ces bya'o/ /mnyam pa ni ji lta ba bzhin yin te/ de ltar 'dzin par byed pas na ka ba tshad dang ldan pa'o/ /lhan cig pa ni ma lus pa'o/ /nyams dga' ba ni rtse gcig tu'o/ /ji ltar zhe na/ ji 'di legs par gnas pa'o zhes gsungs so/ /ci'i phyir zhe na/ legs par yang dag par smras pa zhes bya ba la sogs pa gsungs so/ /mu tig gi phreng bas brgyan pa zhes bya ba ni mtha' ma dag tu dra ba dang / dra phyed 'phyang ba dang / dbus su mu tig 'brum bu'i rigs gang la yod pa'o/ /mngon par gtor ba ni mdun nas so/ /rab tu gtor ba ni logs gsum nas so/ /yang dag par gtor ba ni yang sgo bzhi'i ngos nas so/ /chos kyi bsam pa rnam par dag pas zhes bya ba ni chos la gang de dag dad pa dang 'dun pa dag pa'o/ /chos la gus pa ni dge ba'i bshes gnyen nyid yin pa'i phyir ro/ /bsten pa ni yang dag par bsten pa nyid do/ /dad par 'os pa la dad pa dang ldan pa'o/ /log par ltung ba ni ngan 'gror 'gro ba'o/ /gnas pa ni rgyun chad par ro/ /dga' ba ni mgu pas so/ /mgu ba zhes bya ba ni mgu ba des ro stod mtho bar gyur par byed pa'o/ /de nyid la gcig tu sems pa'i phyir yi rangs pa'o/ /dga' ba khyad par du gyur pa ni rab tu mgu ba'o/ /dga' ba dang ldan pa'i dang ba ni dga' ba dang yid bde ba'o/ /skyes pa 'di la yod pa de skad ces bya ste thos so zhes bya ba dang sbyar ro/ /chos thams cad mi gnas pa'i 'du shes zhes bya ba ni ji ltar bdag chos 'phags chos ston par snang ba dang / nye bar mi dmigs pa de bzhin du/ chos thams cad kyi rgyu nges par mi gnas pa zhes bya ba 'di la 'du shes shin tu mnyam par gzhag pa'o/ /'du shes 'di'i mthu ci zhig 'byung zhe na/ de ting nge 'dzin zhes bya ba la sogs pa gsungs te/ ting nge 'dzin nyid sgo ste thabs chen po yin pa'i phyir ro/ /chos thams cad kyi ngo bo nyid ni mtshan nyid thams cad do/ /de dag la lta ba ni rnam par lta ba'o/ / de mi dmigs pa ni med par nges pa'o/ /de dag gi shes pa la nges par 'byung ba ni gtan du med par nges pa'o/ /chos thams cad tha dad pa med pa ni mnyam pa nyid de rang gi mtshan nyid kyis med pa'i phyir te/ de la dmigs pa'i ting nge 'dzin la de skad ces bya'o/ /mnyam pa nyid de yang de bzhin nyid do/ /des chos thams cad 'byung ba med par mthong ba yin te/ de bas na thams cad 'gyur ba med par mthong ba'o/ /de bzhin du de bzhin gshegs pa thams cad mthong ba zhes bya ba'i ting nge 'dzin gyi bar du rig par bya'o/ /ting nge 'dzin de dag la gnas pa zhes pa ni ting nge 'dzin la rim gyis gnas pa'o/ /'di la phyogs bcu yod pas phyogs bcu'i 'jig rten te/ 'jig rten gyi khams thams cad ces bya ba'i don te/ deng sangs rgyas bcom ldan 'das grangs med tshad med pa dag mthong ba'o/ /gal te dus gcig tu de bzhin gshegs pa du ma ni ma yin te/ gcig kho nar sems can thams cad kyi don mdzad par spyod pa yin no zhe na/ rtag tu sangs rgyas gcig kho nas sku tshe mtha' yas par byin gyis rlob pa yod na/ ci'i phyir mi 'dod/ gal te rgyu'i stobs kyis gzhan yang 'byung bar 'gyur ro zhe na/ de lta na ni rgyu'i stobs kyis 'jig rten gyi khams mtha' yas pa dag tu de bzhin gshegs pa mtha' yas pa dag cig car 'byung ba la 'gal ba ci yod/ dper na 'khor los sgyur ba gnyis gling bzhi pa gcig tu cig car mi skye ste/ the tshom med par gcig gi las byed pa'i phyir ro/ /de bzhin du stong gsum gyi 'jig rten gyi khams gcig tu de bzhin gshegs pa gcig 'byung bar shing rta chen po rnams kyis brtags nas gzhag go/ /rtogs par khong du chud ces bya ba ni rtogs pa ni thogs pa med par de khong du chud pa'o/ /bslabs so zhes bya ba ni bslab par byas pa'o/ /ji skad bsgo zhes bya ba ni des sngar khyod la gang byas pa bzhin du zung shig ces bya ba ni sems la brjed pa med par bya ba'o/ /mgo'i gos ni gos so/ /de'i thod ni mgo'i gos kyi thod do/ /rab tu gdung ba ni mya ngan no/ /mi dga' bar 'gyur ba ni sdug bsngal bar gnas pa'o/ /mthar phyin pa'i dga' ba ni rangs pa'o/ /yon tan dang ldan pas sems rnyog pa med pa ni dang ba'o/ /de'i yon tan la ngo mtshar du gyur pa ni ri mo byed pa'o/ /gus pa ni mchod pa'o/ /sgra ji lta bus she na/ /mi su 'dod ces bya ba la sogs pas so/ /bar chad bya'o snyam mo zhes bya ba ni de'i phyir zhes bya ba'i don to/ /de lta bur yongs su bsgribs so zhes bya ba ni g.yeng bar byas pa'o/ /ji ltar na ci nas kyang zhes bya ba'i don to/ /sems bde zhes bya ba ni dga' ba de nyid kyis sems las su rung ba'o/ /de las nyis 'gyur du gyur pa'i dga' ba yin pa'i phyir sems rab tu dga' ba'o/ /yon tan gyi rnam pa mi rnams kyi yon tan gyi spyi'o/ /yon tan gyi khyad par ni mi'i las 'das pa'o/ /bzod do zhes bya ba ni rang nyid byed par yang 'dod pa'i phyir ro/ /yul zhes bya ba ni nus pa'o/ /bsam pa rig par byas nas brtson pa chung bar gyis shig ces bya ba la sogs pa smras so/ /brtson pa chung ba ni brtson 'grus chung ba'o/ /gang skad cig de nyid dang thang cig de nyid dang / yul tsam nyid la yang zhes bya ba ni nyan pa rnams kyi dad pa'i bye brag gis gsum smos pa yin no/ /spobs pa med par gyur te zhes bya ba ni bstan pa'o/ /byang chub sems dpa' sems dpa' chen po rtag tu ngu zhes bya ba la sogs pa ni bshad pa'o/ /lan glan pa zhes bya ba ni rgyu mtshan gyi bdun pa'o/ /spobs pa ma skyes pa ni spobs pa med pa'o/ /mang po ni rnam pa mang po'o/ /rgya che ba ni rnam pa mang po mtha' yas pa'i phyir ro/ /longs spyod ni nor ro/ /'jig rten thams cad las khyad par du 'phags pa ni 'jig rten las 'das pa'o/ /spyi bo'i steng ni dbu'i steng ngo / /gyur te zhes bya ba ni gnas pa'i don to/ /nam mkha' la zhes bya ba ni bar snang la'o/ /mdun du byas pa'i thal mo ni thal mo'o/ /khyab pa ni thob pa'o/ /mthong ma thag ces bya ba ni mthong ba'i rgyus mthong ba dang / lhan cig gcig ces bya ba'i don to/ /rtag tu ngus mtshon pa'i le'u ni de'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel slob dpon rin chen 'byung gnas zhi bas rnam par sbyar ba snying po mchog ces bya ba las le'u sum cu pa'o// //de skad ces smras pa dang zhes bya ba la sogs pa ni dam bca' ba'o/ /de bzhin nyid las ma g.yos so zhes bya ba ni gtan tshigs so/ /gal te ci de bzhin gshegs pa rnams byon pa yin nam zhe na/ de bzhin du 'og ma'i gtan tshigs dag kyang 'thad pa dang bcas par rig par bya ste/ gtan tshigs 'di thams cad stong pa nyid kyi rnam grangs mtshan ma'i dbye bas phye ba'o/ /nam mkha'i khams ni de bzhin nyid de/ nam mkha' dang chos mthun pa'i phyir ro/ /skyes bu chen po'i mtshan sum cu rtsa gnyis dang / dpe byad bzang po brgyad cus rnam par brgyan pa'i sku ni de bzhin gshegs pa yin pas de bzhin nyid la sogs pa ni ma yin nam zhe na/ rigs kyi bu chos de dag ces bya ba la sogs pa gsungs te/ de bzhin nyid kho na shin tu rnam par dag pa'i de bzhin gshegs pa'o zhes dgongs te/ de ni de dag gi ngo bo nyid kyi sku yin no zhes bya ba'i rigs pa'o/ /de ltar de bzhin nyid dang de bzhin gshegs pa dag tha mi dad pa bstan nas/ shin tu tha dad pa ma yin par bstan pa'i phyir rigs kyi bu zhes bya ba la sogs pa gsungs te/ chos 'di dag ces bya ba ni de bzhin nyid la sogs pa ste/ de bzhin nyid ces bya ba ni kun brtags pa'i ngo bos stong pa nyid do/ / chos thams cad kyang zhes bya ba ni phung po dang khams la sogs pa nas de bzhin gshegs pa zhes bya ba'i bar du'o/ /de bzhin nyid gcig pa ste zhes bya ba ni bstan pa'o/ /rigs kyi bu zhes bya ba la sogs pa ni bshad pa'o/ /'di lta ste/ med pa'i phyir zhes bya ba la sogs pa ni gtan tshigs gsungs te/ /rdzas su med pa'i phyir yin gyi/ mtshan nyid ji lta ba bzhin du med pa ni ma yin no zhes dgongs so/ /yang de bzhin gshegs pa la byon pa dang / bzhud pa med par ni ji ltar btags pa ltar med pa nyid kyi phyir ro/ /dngos por rtogs pa yang 'du shes phyin ci log pa la sogs pa'i dpes bsgrub par bya ba'i phyir 'di lta ste/ dper na zhes bya ba la sogs pa gsungs te/ nyi ma gung gi dus la bab pa'i tshe zhes bya ba la/ 'di ni nyi ma gung yang yin la dus kyang yin pas nyi ma gung gi dus so/ /de la bab pa 'ong ba na 'jug pa'o/ /de bzhin gshegs pa la gzugs su mngon par chags par byed pa zhes bya ba la sogs pa la/ chos kyi sku ni chos nyid kyi sku'o/ /glang po che'i tshogs zhes bya ba la sogs pa la tshogs ni 'dus pa'o/ /grub pa zhes bya ba ni yang dag pa nyid do/ /de ni brdzun pa dang chos mthun pa'i phyir slu ba zhes bya ba'i don to/ /de nyid kyi phyir yang dge ba ma yin zhes gsungs so/ /don yod pa ni sbyin pa po'i 'bras bu chen po'i rgyu nyid yin pa'i phyir ro/ /de nyid kyi phyir sbyin gnas so/ /rab tu dbye ba ni dmigs pa'o/ /sku mngon par 'grub pa ni srid pa tha ma 'dzin pa'o/ /gang du 'gro ba ni yongs su mya ngan las 'da' ba'i dus na ste/ mya ngan las 'das par 'gro ba'i gnas ni gang na yang yod pa ma yin no/ /rgyu ni nye bar len pa ni rgyu'o/ /rkyen ni lhan cig byed pa'o/ /de la sgra'i nye bar len pa ni sgra'i rdul phra rab bo zhes kha cig zer ro/ /gzhan dag ni rlung gi rdul phra rab po zhes zer ro/ /de la shing bu zhes bya ba ni rgyud dkri ba'i shing bu'o/ /rgyud rten ni rgyud kyi gtso bo'o/ /dang po dang tha ma las sgra ma byung ba zhes bya ba'i tshig gis ni bar ma dag tu 'ang sbyar ba'i don to/ /yang dag par dkrogs pa ni yang dag par rab tu bskyod pa'o/ /spa bkong ba ni gzi byin nyams par byas pa'o/ /'thor zhing zhes bya ba ni 'thor bar byed pa'o/ /bar snang ni nam mkha'o/ /bdag gi lus kyis chos 'phags mngon par bkab ste zhes bya ba ni de'i mdun du lus thams cad kyis sa la phab pa zhes bya ba'i don to/ /de'i dus ji tsam gyi bar du zhe na/ lo bdun gyi bar du zhes bya ba gsungs so/ /dus 'da' bar byed ces bya ba ni snyoms par zhugs pas so/ /gang bdag kyang zhes bya ba ni gang gi tshe bdag kyang ngo / /rjes su 'jug pa zhes bya ba ni rjes su byed pa'o/ /lha'i zhes bya ba ni nam mkha' las byung ba'o/ /sems gzhan nyid du zhes bya ba'i sa phyogs chag chag gdab pa la rgyab kyis phyogs pa'o/ /de ltar bsams nas zhes bya ba ni de ltar nges par brtags nas so/ /de dag thams cad kyis kyang zhes bya ba ni bu mo lnga brgya po dag go/ /de dang de dag ces bya ba ni mtshon gyi khyad par ro/ /glags ni skabs so/ /byin gyis brlabs zhes bya ba ni byas pa'o/ /'dir dris khyab bo zhes bya ba ni byin gyi rlabs so zhes bya ba dang sbyar ro/ /yongs su tshol ba ni kun du tshol ba'o/ /'phags pa chos 'phags chos ji lta bu ston pa yin zhe na/ de la byang chub sems dpa' sems dpa' chen po zhes bya ba la sogs pa gsungs te/ rtogs sla'o/ /'di lta ste zhes bya ba la sogs pa la/ 'di lta ste'i sgras ni spyir bstan pa khyad par du gsal bar byed/ sum cu po 'di dag rnam pa zhes bya ba'i don to/ /de nyid kyi phyir 'di la thob pa'i stobs kyis skyes pa sum cu pa'o/ /rnam pa 'di dag nyid kyis ni byang chub sems dpa' rtag tu ngu la skyes pa'i ting nge 'dzin bstan to/ /chos thams cad la shes rab kyi pha rol tu phyin pa mnyam pa nyid de/ ci'i phyir zhe na/ chos thams cad mnyam pa nyid pas te/ de ni chos thams cad la dmigs pa med pas de yang mnyam pa'o/ /chos thams cad la shes rab kyi pha rol tu phyin pa dben pa nyid de/ ci'i phyir zhe na/ chos thams cad dben pa nyid kyi phyir ro/ /gang gi phyir chos thams cad rang gi mtshan nyid kyis rnam par dben pa de'i phyir/ gal te nam zhig na rang gi mtshan nyid snang ba 'di las g.yos par 'gyur ro zhe na/ shes rab kyi pha rol tu phyin pa g.yo ba med pa nyid do zhes gsungs te/ ci'i phyir zhe na/ chos thams cad g.yo ba med pa ste/ gang gi phyir chos thams cad rnam par dben pas na g.yo ba med pa nyid do/ /de bas na de yang rnam par dben pa las mi g.yo ba nyid do/ /gal te rlom sems kyis g.yos par 'gyur ro zhe na/ shes rab kyi pha rol tu phyin pa rlom sems med pa nyid ces bya ba gsungs te/ ci'i phyir zhe na/ chos thams cad rlom sems med pa nyid las so/ /rlom sems med pa ni chos thams cad de/ de dag la ni rlom sems cung zad kyang med de/ ngo bo nyid med pa nyid kyi phyir ro/ /des na de la yang rlom sems med do/ /gal te yang 'di ci zhig gis khengs par byas pas g.yo ba med pa yin no zhe na/ shes rab kyi pha rol tu phyin pa khengs pa med pa nyid do zhes gsungs so/ /ci'i phyir zhe na/ chos thams cad khengs pa med pa nyid pas so/ /chos thams cad dben pa las g.yo ba med de/ gang gis kyang khengs pa med do/ /'on kyang rang bzhin kho nas dben par gnas pa yin te/ des na shes rab kyi pha rol tu phyin pa dben par gnas pa yin no/ /dang por mnyam pa nyid tsam bstan gyi/ ro gcig pa nyid ma yin pas de'i phyir chos thams cad shes rab kyi pha rol tu phyin par ro gcig pa nyid de/ ci'i phyir zhe na/ chos thams cad ro gcig pa nyid pas te/ chos thams cad ni de bzhin nyid du ro gcig pa yin te/ rang gi mtshan nyid rnams med pa'i phyir ro/ /de bzhin du shes rab kyi pha rol tu phyin pa yod ste/ rang gi mtshan nyid mi snang ba'i phyir ro/ /shes rab kyi pha rol tu phyin pa mu med pa nyid de/ ci'i phyir zhe na/ chos thams cad mu med pa nyid pas te/ 'di ltar mu ni gnyis te/ sngon gyi mu dang / phyi ma'i mu'o/ /de dag med de chos thams cad kyi 'das pa dang / ma 'ongs pa med pa nyid kyi phyir ro/ /de'i phyir chos thams cad mu med pa'o/ /de bzhin du shes rab kyi pha rol tu phyin pa yang ngo / /shes rab kyi pha rol tu phyin pa skye ba med pa nyid de/ ci'i phyir zhe na/ chos thams cad ni skye ba med pa nyid pas te/ de ni chos thams cad ngo bo nyid med pa ste/ de'i phyir skye ba med de ri bong gi rwa bzhin no/ /de'i phyir skye ba med pa'o/ /de bzhin du shes rab kyi pha rol tu phyin pa yang ngo / /shes rab kyi pha rol tu phyin pa 'gag pa med pa nyid dang mu med pa nyid de/ dpe gang gis she na nam mkha' mu med pas so/ /de ltar na phyogs bcu'am dus gsum du nam mkha' la mu med pa'o/ /de bzhin du shes rab kyi pha rol tu phyin pa la phyogs bcu dus gsum gyi chos thams cad kyi de bzhin nyid tsam snang ba'i phyir ro/ /ji ltar nam mkha' mu med pa de bzhin du/ phyogs bcu'i 'jig rten gyi khams kyang mu med na/ phyogs bcu'i 'jig rten gyi khams kyi rgya mtsho mu med pa lta smos kyang ci dgos/ de bas na rgya mtsho mu med pa yang grub ste/ de bzhin du shes rab kyi pha rol tu phyin pa yang ste/ 'di ltar gang rgya mtsho de dag gi de bzhin nyid dang / gang chos thams cad kyi de bzhin nyid dang / gang shes rab kyi pha rol tu phyin pa'i de bzhin nyid 'di ni gcig ste/ de bzhin nyid la dmigs pa yang shes rab kyi pha rol tu phyin pa'o/ /de'i phyir rgya mtsho mu med pas shes rab kyi pha rol tu phyin pa mu med pa zhes bya bar grub po/ /rnam par shes pa yang rmi lam lta bu yin la shes rab kyi pha rol tu phyin pa yang nam mkha' lta bu yin na/ de sngar rnam pa sna tshogs su snang ba dang / ji ltar don gcig par 'gyur ba ma yin nam zhe na/ de'i phyir ri rab sna tshogs nyid yin pas shes rab kyi pha rol tu phyin pa sna tshogs pa nyid do zhes gsungs te/ ji ltar nam mkha' ro gcig pa'i rang bzhin yin pa de bzhin du ri rab kyi ngos rnam pa sna tshogs pa mu med kyang rnam pa sna tshogs su snang ngo / /de bzhin nyid ni ro gcig pa ste/ de ltar rnam pa sna tshogs ni ma yin no/ /de bzhin nyid las dmigs pa ni shes rab kyi pha rol tu phyin pa'o/ /gang yang rmi lam la sogs par snang ba'i shes pa rnam pa sna tshogs su snang ba de ni yang dag pa ma yin pa'i chos la kun du rtog pa'o/ /de'i phyir rmi lam dang / sgyu ma lta bu la sogs pa'i shes pa ni kun rdzob ste/ snang ba med pa don dam pa'i shes pa la sems can gzud par bya ba'i phyir bstan pa yin no/ /yang na snang ba med pa'i rjes las byung ba'i rnam par rtog pa gang myong ba nges par bya ba'i don du'o/ /de'i phyir 'dod pa'i don grub ste/ ri rab sna tshogs pas shes rab kyi pha rol tu phyin pa sna tshogs pa nyid ces bya'o/ /snang ba med pa'i shes rab kyi pha rol tu phyin pa de nyid rang gis myong ba na don dam par chos thams cad dngos po med pa'i ngo bo nyid yin no zhes ston par byed pa yin no/ /de ji ltar rnam par mi rtog pa yin zhe na/ de'i phyir nam mkha' rtog pa med pas shes rab kyi pha rol tu phyin pa rtog pa med pa nyid do zhes gsungs te/ shes rab kyi pha rol tu phyin pa la rtog pa med pas de la rnam par rtog pa cung zad kyang med de pha rol tu phyin pa nyid yin pa'i phyir ro/ /gal te dper na blun pa nyid kyi phyir de ji ltar rnam par mi rtog pa yin zhe na/ de'i phyir nam mkha' la dngos por rnam par rtog pa yin na/ shes rab kyi pha rol tu phyin pa ni blun pa ma yin na ji ltar rtog par mi byed ce na/ 'dir rnam par rtog pa ni 'khrul pa yin la/ de ni 'khrul pa ma yin no zhes bstan to/ /gzugs mu med pas shes rab kyi pha rol tu phyin pa mu med pa nyid do zhes bya ba la/ 'di ltar nam mkha' mu med pa de bzhin du gzugs kyi phung po yang ngo / /gang yang gzugs las gzhan med pa de la nges par snang ba dang mun pa yang med do/ /de bzhin du de'i de bzhin nyid snang ba na shes rab kyi pha rol tu phyin pa mu med pa nyid do/ /ji ltar bdag gis rgya mtsho mu med pas shes rab kyi pha rol tu phyin pa mu med par bshad pa de bzhin du gzhan sems can thams cad kyi tshor ba mu med pa nyid dang / 'du shes mu med pa nyid dang / 'du byed mu med pa nyid dang / rnam par shes pa mu med pa nyid dang / sa'i khams mu med pa nyid dang / chu'i khams mu med pa nyid dang / me'i khams mu med pa nyid dang / rlung gi khams mu med pa nyid dang / nam mkha'i khams mu med pa nyid dang / rnam par shes pa'i khams mu med pa nyid kyang bshad par bya'o/ /ji ste gang rnam par shes pa'i phung po mu med pa nyid dang / rnam par shes pa'i khams mu med pa de dag la khyad par ci yod ce na/ phung po dang khams kyi sgra dag gis bye brag tu byas pa yin no/ /rdo rje lta bu'i chos mnyam pa nyid pas shes rab kyi pha rol tu phyin pa mnyam pa nyid do zhes bya ba la/ sems 'dzin pas na chos te ting nge 'dzin to/ /rdo rje lta bu'i chos ni rdo rje lta bu'i ting nge 'dzin to/ /de chos thams cad la mnyam pa nyid ni chos thams cad sgyu ma lta bu 'dis shes rab kyi pha rol tu phyin pa mnyam pa nyid do/ /chos thams cad ma 'dres pa nyid pas shes rab kyi pha rol tu phyin pa ma 'dres pa nyid do zhes bya ba la/ chos thams cad kyi ma 'dres pa nyid ni ma 'dres pa ste/ 'byed par byed pa'i rang gi mtshan nyid rnams med pa'i phyir ro/ /de bzhin du shes rab kyi pha rol tu phyin pa yang ma 'dres pa ste/ de dag gi 'dres pa nyid kyi ngo bo de la med pa'i phyir ro/ /chos thams cad dmigs su med pa nyid pas shes rab kyi pha rol tu phyin pa dmigs su med pa nyid do zhes bya ba la chos thams cad la ni cung zad kyang dmigs pa med de/ gzugs ni blun pa nyid kyi phyir ro//lhag ma yang rang ngam gzhan la 'dzin pa mi rigs te/ mi dmigs shing 'dzin pa med pa'i phyir ro/ /de bzhin du shes rab kyi pha rol tu phyin pa yang dmigs par bya ba dang / dmigs par byed pa ma yin te/ de'i phyir de dag dang de mi dmigs so/ /chos thams cad rnam par 'jig pa mnyam pa nyid pas shes rab kyi pha rol tu phyin pa rnam par 'jig pa mnyam pa nyid do zhes bya ba la rnam par 'jig pa ni gzhan dag la tshig gis ston pa de chos thams cad la med de/ de'i phyir rnam par 'jig pa med pas de dag mnyam pa nyid do/ /de bzhin du dmigs pa thams cad la shes rab kyi pha rol tu phyin pas rnam par 'jig pa med pa ni mnyam pa nyid do/ /chos thams cad byed pa med pa nyid pas shes rab kyi pha rol tu phyin pa byed pa med pa nyid do zhes bya ba la byed pa med pa zhes bya ba ni byed pa ni 'dir bya ba ste/ chos thams cad bya ba med pa'o/ /de ltar na gang zhig ji ltar skye bar 'gyur zhe na/ 'di yod pa'i rkyen tsam gyis 'di yod na ni 'di 'byung la 'di med na ni 'di mi 'byung zhes bya ba 'di tsam gyis rgyu dang 'bras bu'i dngos po'o/ /de'i phyir 'di rnams ni byed pa med pa ste/ de bzhin du shes rab kyi pha rol tu phyin pa yang ngo / / chos thams cad bsam gyis mi khyab pa nyid pas shes rab kyi pha rol tu phyin pa bsam gyis mi khyab pa nyid du rig par bya'o zhes bya ba la/ ji ltar chos ni gzhan dag la bstan du med de/ tshig gi yul med pa'i phyir ro/ /de bzhin du rang gis kyang bsam du med cing brtag tu med pa ste/ de dag dang rnam par rtog pa dang don gcig pa'i phyir ro/ /de bzhin du shes rab kyi pha rol tu phyin pa yang bsam gyis mi khyab pa'o/ /rig par bya'o zhes gang mthar brjod pa de ni chos thams cad mnyam pa nyid la sogs pa'i tshig dag la sbyar te/ med na mi 'byung ba nyid kyi phyir ro/ /de nas byang chub sems dpa' zhes bya ba la sogs pa gsungs pa la/ de nas zhes bya ba ni bstan pa yongs su rdzogs pa'o/ /de ltar 'dug bzhin du zhes bya ba ni thos pa'i stan las ma langs par ro/ /de nas zhes bya ba la sogs pa ni bstan pa'o/ /de'i tshe zhes bya ba la sogs pa ni bshad pa'o/ /de'i tshe zhes bya ba ni rim pa gang dang rnam pa gang nyid kyis shes rab kyi pha rol tu phyin pa bstan pa'i rim pa de nyid dang rnam pa de nyid kyis ting nge 'dzin sum cu skyes so zhes bya ba ni bsdus pa'i don to/ /de la chos thams cad mnyam pa nyid kyi rnam pa nyid kyi phyir ting nge 'dzin du yang bstan na/ ji ltar 'di dag rnam pa yin zhe na/ rnam pa 'di dag gis te/ bzhi dang ye shes rnam pa yi/ /rnam pa zhes bya mtshan nyid de/ /zhes bya ba gsungs te/ de lta mod kyi rang rang gi dmigs pa ni de nyid kyi gzhi ji lta ba bzhin no/ /yang na chos thams cad mnyam pa nyid la sogs pa nyid dmigs pa ste/ de'i dmigs pa ni ting nge 'dzin de'i dmigs pa yin pa'i phyir de skad ces brjod do/ /gzhi la gnas pa mtshan ma med pa la sogs pa ni rang rang gi ji lta ba'i rnam pa'o/ /de dag la sogs pa zhes bya ba ni ting nge 'dzin sum cu la sogs pa'o/ /ji ltar de dag la sogs pa yin zhe na/ 'di dag nyid kyis lhag ma bsdus pa'i phyir te/ brgya phrag stong zhes bya ba ni 'bum mo/ /chos 'phags kyis mtshon pa'i le'u ni de'i le'u'o/ /'phags pa shes rab kyi pha rol tu phyin pa brgyad stong pa'i dka' 'grel slob dpon rin chen 'byung gnas zhi bas rnam par sbyar ba snying po mchog ces bya ba las le'u sum cu rtsa gcig pa'o// //thob ma thag tu zhes bya ba la sogs pa ni 'dis thob pa'i ting nge 'dzin rnams kyi phan yon de'i dus su skyes pa ni de nyid kyi phyir de ma thag pa'i sgras ni dus mnyam du thob po zhes brjod de/ thob pa yod na'o/ /tshul 'di lta bu nyid kyis zhes bya ba ni ji skad bshad pa'i mngon par rtogs pa brgyad kyi dngos pos so/ /ming 'di nyid ces bya ba ni rnam pa thams cad mkhyen pa nyid la sogs pas so/ /gar skyes pa thams cad du sangs rgyas dang mi 'bral bar 'gyur zhes bya ba ni bstan pa'o/ /'di ni 'og tu bstan pa'i gzhung las 'bral bar mi 'gyur ro zhes bya ba'i bar ni bshad pa'o/ /des zhes bya ba la sogs pas ni yongs su gtad pa'i gleng bslang ba'o/ /des rnam grangs 'dis kyang zhes bya ba ni rtag tu ngu'i ji ltar byung bas kyang ngo / /kun dga' bo de lta bas na zhes bya ba nas/ 'di ni nga'i gdams ngag go zhes bya ba'i bar ni gtad pa dang po'o/ /'dir de bzhin gshegs pa'i byin gyi rlabs zhes bya ba'i tshig ci'i phyir zhe na/ don chen po yin pa'i phyir/ bcom ldan 'das yum la bar du gcod pa ni mang du yod pas sangs rgyas kyi byin gyi rlabs med par bri bar yang mi nus so zhes bstan to/ /'di ni nga'i gdams ngag go zhes bya ba la 'di ni nga'i gtad pa ste/ ji ltar 'di nyan pa la sogs pas rgyun mi 'chad par de ltar khyod kyis bya'o zhes bya ba'i don to/ /de ci'i phyir zhe na zhes bya ba ni de yongs su gtad pa la dgos pa ci yod ces bya ba'i don to/ /de'i phyir shes rab kyi pha rol tu phyin pa 'di las zhes bya ba la sogs pa gsungs so/ /de ci'i phyir zhe na zhes bya ba la sogs pas ni gtad pa gnyis pa'i gleng bslang ba'o/ /gnas pa 'di la zhes bya ba ni sku 'di la'o/ /de bzhin du zhes bya ba ni dga' ba la sogs pa 'di dag go/ /gleng bslang ba 'di dag byas nas yongs su gtad pa'i phyir kun dga' bo zhes bya ba la sogs pa gsungs te/ lan gnyis lan gsum du zhes bya ba la yongs su gtad do zhes bya ba ni yang dag par gtad pa'o/ /rjes su yongs su gtad do zhes bya ba ni mthun par yongs su gtad pa'o/ /ji ltar yongs su gtad pa yin zhe na/ de'i phyir ci nas kyang zhes bya ba la sogs pa gsungs so/ /skyes bu tha ma zhes bya ba ni ma gus pa'o/ /gang gi phyir 'di la dga' ba dang gus par bya zhe na/ de'i phyir kun dga' bo gang shes rab kyi pha rol tu phyin pa zhes bya ba nas/ de bzhin gshegs pa'i drung ni spyod par rig par bya'o zhes bya ba'i bar gyis gsungs so/ /bcom ldan 'das yum yongs su rdzogs par gsal bar bya ba'i phyir sdud pa pos bcom ldan 'das zhes bya ba la sogs pa gsungs te/ de skad ces bya ba ni shes rab kyi pha rol tu phyin pa'i mdo'o/ /bka' stsal pa dang zhes bya ba ni gsungs pa'o/ /bcom ldan 'das ni ston pa'o/ /gzhan gyi don la dgyes pa ni de bzhin gshegs pa'o/ /gzhan gyi don mchog tu mdzad pa ni bcom ldan 'das kyis bstan pa'o/ /de'i phyir yi rangs te zhes gsungs te/ bla na med pa'i chos bstan pas dga' bar gyur pa zhes bya ba'i don to/ /nyan pa pos ci zhig byas pa yin zhe na/ de'i phyir bcom ldan 'das kyis gsungs pa la mngon par bstod do zhes gsungs so/ /bstod pa'i sngon rol du mngon par 'brel pa ni las dang bcas pa yin te/ de ni la lar ni 'dod pa la 'jug la/ la lar ni dga' ba la 'jug pa ste/ de la dmigs pa nyid ni 'dir las yin te las de yang bcom ldan 'das kyis gsungs pa'i bstan pa 'di nyid do/ /nyan pa po dag kyang gang zhe na/ byang chub sems dpa' sems dpa' chen po zhes bya ba la sogs pa gsungs so/ /'jig rten ni sems can gyi tshogs so/ /nyan pa po dag kyang rgyal po'i khab kyi skabs yin pa'i phyir mi'i tshogs so/ /'di 'ba' zhig gis rtog pa rnam par bcad pa'i phyir khyad par du byas pa ni lha dang / mi dang / lha ma yin dang / dri zar bcas pa zhes gsungs te/ byang chub sems dpa' la sogs pa dang / lha la sogs pa'i 'jig rten zhes bsdus so/ /yongs su gtad pa brjod pa'i le'u ni yongs su gtad pa'i le'u'o/ /'khrul pa'i dri ma sna tshogs rnam bral gzung dang 'dzin pa rnam par spangs/ /'gro ba gang dag de bzhin nyid du ro gcig de ni rnam par mdzes/ /rnam rtog las sgrol shes rab pha rol phyin de byang chub sems dpa'i blo/ /de nyid rnam par dag pa'i mthar phyin dpa' bo de bzhin gshegs zhes brjod/ /gang zhig mngon rtogs brgyad dang stong phrag brgyad du bstan pa yi/ /rgyud dang mdo ni bdag gis rnam phyes thob pa'i bsod nams kyi/ /phung po'i 'bras bu des ni skye dgu ci rigs grol gyur cig /bdag kyang sna tshogs bya ba rgyun mi 'chad pa'i dbang thob shog /ji srid 'dir ni mar me'i snying po chen po rdzogs yod gyur/ /skye bo rnams kyi yid kyi nang der snang ba 'byung 'gyur te/ / yon tan dpe med ston cing ma lus dri med bsngags pa yi/ /gau ta ma'i gsung des srid pa'i mun pa sel gyur cig /shes rab pha rol phyin bsdus pa/ /brgya phrag bcu pa brgyad dag gi/ /dka' 'grel snying po mchog ces pa/ /tshig gsal 'di ni bdag gis byas/ /'phags pa shes rab kyi pha rol tu phyin pa brgyad stong pa'i dka' 'grel snying po mchog ces bya ba rgyal po'i slob dbon mkhas pa chen po rin chen 'byung gnas zhi ba'i zhal snga nas kyis mdzad pa rdzogs so/ / //paN+Di ta su b+hU ti shAn ti dang / lo tsA ba shAkya blo gros kyis bsgyur ba'o// //

CLOSE WINDOW