བོད་ཡིག

e-texts based on the ACIP/ALL Input

@#/ /shes bar kyi pha rol tu phyin pa'i man ngag gi bstan bcos mngon par rtogs pa'i rgyan zhes bya ba bzhugs so/ / @##/ /rgya gar skad du/ a b+hi sa ma ya a laM kA ra nA ma pradz+nyA pA ra mi to pa de sha shAs+t+ra kA ri kA/ bod skad du/ shes rab kyi pha rol tu phyin pa'i man ngag gi bstan bcos mngon par rtogs pa'i rgyan zhes bya ba'i tshig le'ur byas pa/ sangs rgyas dang byang chub sems dpa' thams cad la phyag 'tshal lo/ /nyan thos zhi ba tshol rnams kun shes nyid kyis nyer zhir 'khrid mdzad gang yin dang / /'gro la phan par byed rnams lam shes nyid kyis 'jig rten don sgrub mdzad pa gang / /gang dang yang dag ldan pas thub rnams rnam pa kun ldan sna tshogs 'di gsungs pa/ /nyan thos byang chub sems dpa'i tshogs bcas sangs rgyas kyi ni yum de la phyag 'tshal/ /rnam pa thams cad mkhyen nyid lam/ /ston pas 'di rnams bshad pa gang / /gzhan gyis myong ba ma yin te/ /chos spyod bcu yi bdag nyid kyi/ /mdo don dran pa la bzhag nas/ /blo dang ldan pas mthong 'gyur phyir/ /bde blag tu ni rtogs pa zhes/ /bya ba rtsam pa'i dgos pa yin/ /shes rab pha rol phyin pa ni/ /dngos po brgyad kyis yang dag bshad/ /rnam kun mkhyen nyid lam shes nyid/ /de nas thams cad shes pa nyid/ /rnam kun mngon rdzogs rtogs pa dang / /rtse mor phyin dang mthar gyis pa/ /skad cig gcig mngon rdzogs byang chub/ /chos kyi sku dang de rnam brgyad/ /sems bskyed pa dang gdams ngag dang / /nges 'byed yan lag rnam bzhi dang / /sgrub pa yi ni rten gyur pa/ /chos kyi dbyings kyi rang bzhin dang / /dmigs pa dag dang ched dang ni/ /go cha 'jug pa'i bya ba dang / /tshogs ni nges par 'byung bcas rnams/ /thub pa'i rnam kun mkhyen pa nyid/ /mog mog por byed la sogs dang / /slob ma bse ru'i lam gang dang / /'di dang gzhan pa'i yon tan gyis/ /phan yon che ba mthong ba'i lam/ /byed pa dang ni mos pa dang / /bstod dang bkur dang bsngags pa dang / /bsngo dang rjes su yi rang ba/ /yid la byed pa bla med dag / sgrub dang shin tu dag pa zhes/ /bya ba 'di ni sgom pa'i lam/ /byang chub sems dpa' mkhas rnams kyi/ /lam shes nyid ni de 'drar bshad/ /shes pas srid la mi gnas shing / /snying rjes zhi la mi gnas dang / / thabs ma yin pas ring ba dang / /thabs kyis ring ba ma yin nyid/ /mi mthun gnyen po'i phyogs dag dang / /sbyor dang de yi mnyam nyid dang / /nyan thos la sogs mthong ba'i lam/ /de 'dra kun shes nyid du 'dod/ /rnam pa sbyor bar bcas rnams dang / /yon tan skyon ni mtshan nyid bcas/ /thar dang nges 'byed cha mthun dang / /slob pa phyir mi ldog pa'i tshogs/ /srid dang zhi ba mnyam nyid dang / /zhing dag bla na med pa ni/ /rnam kun mngon rdzogs rtogs pa ste/ /'di ni thabs mkhas bcas pa yin/ /de yi rtags dang rnam 'phel dang / / brtan dang sems kun gnas pa dang / /mthong zhes bya dang sgom pa zhes/ /bya ba'i lam ni so so la/ /rnam par rtog pa rnam bzhi yi/ /gnyen po rnam pa bzhi dang ni/ /bar chad med pa'i ting nge 'dzin/ /log par sgrub dang bcas pa ni/ /rtse mo'i mngon rtogs mthar gyis pa/ /rnam gsum rnam bcu skad cig ma/ /gcig gis mngon rdzogs byang chub pa/ /mtshan nyid kyis ni rnam pa bzhi/ /ngo bo nyid longs rdzogs bcas dang / /de bzhin gzhan pa sprul pa ni/ /chos sku mdzad pa dang bcas pa/ /rnam pa bzhir ni yang dag brjod/ / sems bskyed pa ni gzhan don phyir/ /yang dag rdzogs pa'i byang chub 'dod/ /de dang de ni mdo bzhin du/ /bsdus dang rgyas pa'i sgo nas brjod/ /de yang sa gser zla ba me/ /gter dang rin chen 'byung gnas mtsho/ /rdo rje ri sman bshes gnyen dang / /yid bzhin nor bu nyi ma glu/ /rgyal po mdzod dang lam po che/ /bzhon pa bkod ma'i chu dang ni/ /sgra brnyan chu bo sprin rnams kyis/ /rnam pa nyi shu rtsa gnyis so/ /sgrub dang bden pa rnams dang ni/ /sangs rgyas la sogs dkon mchog gsum/ /ma zhen yongs su mi ngal dang / / lam ni yongs su 'dzin pa dang / /spyan lnga dang ni mngon shes kyi/ /yon tan drug dang mthong lam dang / /bsgom zhes bya la gdams ngag ni/ /bcu yi bdag nyid shes par bya/ /dbang po rtul dang rnon po dang / /dad dang mthong thob rigs nas rigs/ /bar chad gcig par skyes nas dang / /byed dang byed min 'og min 'gro/ /'phar gsum srid rtse'i mthar thug 'gro/ /gzugs kyi chags bcom mthong ba yi/ /chos la zhi lus mngon sum byed/ /bse ru dang ni nyi shu'o/ /dmigs pa dang ni rnam pa dang / /sgyu dang yongs su 'dzin pa yis/ /byang chub sems dpa' skyob pa yi/ /drod sogs bdag nyid ji bzhin du/ /rnam rtog bzhi po ldan brten pa/ /chung dang 'bring dang chen po rnams/ /nyan thos bse ru lta bu dang / /bcas pa dag las khyad par 'phags/ /dmigs pa mi rtag la sogs pa/ / bden pa'i rten can de yi ni/ /rnam pa mngon zhen la sogs 'gog /theg pa gsum char 'thob pa'i rgyu/ /gzugs sogs 'du 'god gnas bral dang / /gnas dang brtags dang brjod du med/ /gzugs sogs mi gnas de dag ni/ /de yi ngo bo rang bzhin med/ /de dag gcig gi rang bzhin gcig / de mi rtag sogs par mi gnas/ /de rnams de yi ngo bos stong / /de dag gcig gi rang bzhin gcig /chos rnams mi 'dzin gang yin dang / /de dag mtshan mar mi mthong phyir/ /shes rab kyis ni yongs rtogs pa/ /thams cad dmigs su med par ro/ /gzugs sogs ngo bo nyid med nyid/ /de med pa nyid ngo bo nyid/ /de dag skye med nges 'byung med/ /dag dang de dag mtshan ma med/ /de yi mtshan mar mi brten pas/ /mos min 'du shes med pa yin/ /ting 'dzin de yi byed pa nyid/ /lung ston pa dang rlom pa zad/ /gsum po phan tshun ngo bo gcig /ting 'dzin rnam par mi rtog pa/ /de ltar nges 'byed cha mthun ni/ /chung dang 'bring dang chen po yin/ /gzhi dang de yi gnyen po yis/ /gzung bar rtog pa rnam pa gnyis/ /rmongs dang phung sogs bye brag gis/ /de ni so sor rnam pa dgu/ /rdzas dang brtags pa'i rten can gyis/ /'dzin pa'ang rnam pa gnyis su 'dod/ /rang dbang bdag sogs ngo bo dang / /phung sogs rten las de bzhin no/ /sems mi 'gong ba nyid la sogs/ /ngo bo nyid med sogs ston byed/ /de yi mi mthun phyogs bor ba/ /rnam pa kun tu yongs 'dzin yin/ /rtogs pa yi ni chos drug dang / /gnyen po dang ni spong ba dang / /de dag yongs su gtugs pa dang / /shes rab snying brtser bcas pa dang / /slob ma thun mong min nyid dang / /gzhan gyi don gyi go rims dang / / ye shes rtsol ba mi mnga' bar/ /'jug pa'i rten la rigs shes bya/ /chos kyi dbyings la dbyer med phyir/ /rigs ni tha dad rung ma yin/ /rten pa'i chos kyi bye brag gis/ /de yi dbye ba yongs su brjod/ /dmigs pa chos rnams thams cad de/ /de yang dge la sogs pa yin/ /'jig rten pa yi rtogs pa dang / /gang dag 'jig rten 'das 'dod dang / /zag bcas zag pa med chos dang / /gang dag 'dus byas 'dus ma byas/ /slob mthun mong chos rnams dang / /gang dag thub pa'i thun mong min/ /sems can kun mchog nyid sems dang / /spangs dang rtogs dang gsum po la/ /chen po gsum gyi rang byung gi /ched du bya ba 'di shes bya/ /de dag so sor sbyin la sogs/ /rnam pa drug tu bsdus pa yis/ /go cha'i sgrub pa gang yin de/ /drug tshan drug gis ji bzhin bshad/ /bsam gtan gzugs med sbyin sogs dang / /lam dang byams la sogs pa dang / /dmigs pa med dang ldan pa dang / /'khor gsum rnam par dag pa dang / /ched du bya dang mngon shes drug /rnam kun mkhyen pa'i tshul la ni/ /'jug pa'i sgrub pa theg chen la/ /'dzegs pa yin par shes par bya/ /brtse dang sbyin la sogs pa drug /zhi gnas lhag mthong bcas pa dang / /zung du 'brel ba'i lam gang dang / /thabs la mkhas pa gang yin dang / /ye shes dang ni bsod nams dang / /lam dang gzungs dang sa bcu dang / /gnyen po tshogs kyi sgrub pa yi/ /rim pa yin par shes par bya/ /yongs su sbyong ba rnam bcu yis/ /sa ni dang po 'thob 'gyur te/ /bsam dang phan pa'i dngos nyid dang / /sems can rnams la sems mnyam nyid/ /gtong dang bshes gnyen bsten pa dang / /dam chos dmigs pa tshol ba dang / /rtag tu nges 'byung sems nyid dang / /sangs rgyas skur 'dod dga' ba dang / /chos ston pa dang bden pa yi/ /tshig ni bcu pa yin par 'dod/ /'di dag rang bzhin mi dmigs pas/ /yongs su sbyong bar shes par bya/ /tshul khrims byas pa gzo dang bzod/ /rab tu dga' dang snying brtse che/ /bkur sti bla ma la gus nyan/ /brgyad pa sbyin la sogs la brtson/ /thos pas mi ngoms nyid dang ni/ /zang zing med par chos sbyin dang / /sangs rgyas zhing kun sbyong ba dang / / 'khor bas yongs su mi skyo dang / /ngo tsha khrel yod ces bya ba/ /rlom med bdag nyid de rnam lnga/ /nags gnas 'dod chung chog shes dang / /sbyangs pa yang dag sdom bsten dang / /bslab pa yongs su mi gtong dang / /'dod pa rnams la smod pa dang / /mya ngan 'das dang bdog kun gtong / /mi zhum pa dang lta ba med/ /'dris dang khyim la 'khren pa dang / /'du 'dzir gyur pa'i gnas dang ni/ /bdag bstod gzhan la brnyas pa dang / /mi dge'i las kyi lam bcu dang / /rlom pas khengs dang phyin ci log /blo ngan dang ni nyon mongs bzod/ /bcu po 'di ni rnam spangs na/ /sa lnga pa ni yang dag 'thob/ /sbyin dang tshul khrims bzod brtson 'grus/ /bsam gtan shes rab rab rdzogs pas/ /slob ma dang ni bse ru la/ /dga' dang skrag pa'i sems spangs pa/ /bslangs na mi zhum bdog pa kun/ / btang yang mi dga' med pa dang / /dbul yang slong ba mi spong bas/ /sa ni drug pa yang dag 'thob/ /bdag dang sems can 'dzin pa dang / /srog dang gang zag chad rtag dang / /mtshan ma rgyu dang phung po dang / /khams dang skye mched dag dang ni/ /khams gsum po la gnas dang chags/ /sems ni kun tu zhum pa dang / /dkon mchog gsum dang tshul khrims la/ /der lta ba yi mngon zhen dang / /stong pa nyid la rtsod pa dang / /de dang 'gal ba'i nyes pa ni/ /nyi shu gang la rnam chad pa/ /de yis sa ni bdun pa 'thob/ /rnam thar sgo gsum shes pa dang / /'khor gsum rnam par dag nyid dang / /snying rje dang ni rlom med dang / /chos mnyam nyid dang tshul gcig shes/ /mi skye ba dang bzod shes dang / /chos rnams rnam pa gcig tu ston/ /rtog pa kun tu 'joms pa dang / /'du shes lta dang nyon mongs spong / /zhi gnas nges par sems pa dang / /lhag mthong la ni mkhas pa dang / /sems dul ba dang thams cad la/ /thogs pa med pa'i ye shes dang / /chags pa'i sa min gar 'dod par/ /zhing gzhan du ni mnyam 'gro dang / /kun tu bdag gi ngo bo ni/ /ston pa nyid dang nyi shu'o/ /sems can kun yid shes pa dang / /mngon par shes pas brtse ba dang / /sangs rgyas zhing bzang sgrub pa dang / /yongs su brtag phyir sangs rgyas brten/ /dbang po shes dang rgyal ba yi/ /zhing sbyong sgyu ma ltar gnas dang / /bsams bzhin srid pa len pa dang / /las ni rnam pa 'di brgyad bshad/ /smon lam dag ni mtha' yas dang / /lha la sogs pa'i skad shes dang / /spobs pa chu bo lta bu dang / /mngal du 'jug pa mchog dang ni/ /rigs dang rus dang cho 'brang dang / /'khor dang skye ba dag dang ni/ /nges 'byung byang chub shing rnams dang / /yon tan phun sum tshogs pa yin/ /sa dgu 'das nas ye shes ni/ /gang gis sangs rgyas sar gnas pa/ /de ni byang chub sems dpa'i sa/ /bcu pa yin par shes par bya/ /mthong dang sgom pa'i lam dag la/ /gzung dang 'dzin pa'i rnam rtog rnams/ /nye bar zhi bar bya ba'i phyir/ /gnyen po rnam pa brgyad ces bya/ /ched du bya dang mnyam nyid dang / /sems can don dang 'bad med dang / /mtha' las 'das par nges 'byung dang / /thob pa'i mtshan nyid nges 'byung dang / /rnam pa thams cad mkhyen nyid dang / /lam gyi yul can nges 'byung ste/ /rnam pa brgyad kyi bdag nyid 'di/ /nges 'byung sgrub pa yin zhes bya/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan gyi tshig le'ur byas pa las/ skabs dang po'o/ / //lha rnams rung bar bya ba'i phyir/ /'od kyis mog mog por mdzad dang / /yul nges pa dang khyab pa dang / /rang bzhin dang ni de yi las/ /lam shes nyid kyi tshul la ni/ /'phags pa'i bden pa bzhi dag gi/ /rnam pa mi dmigs sgo nas ni/ /nyan thos lam 'di shes par bya/ /'phags pa nyan thos lam la ni/ /gzugs la sogs pa stong pa'i phyir/ /stong pa nyid rnams dbyer med pas/ /dro ba de dag mi dmigs pas/ /rtse mor gyur pa dag tu 'dod/ /de la rtag la sogs tshul gyis/ /gnas pa bkag pas bzod pa rnams/ /sa bcu dag las brtsams nas ni/ /mi gnas rgyas par bstan pa yis/ /chos kyi mchog tu 'gyur bshad de/ /ci phyir zhe na sangs rgyas kyis/ /mkhyen nas chos rnams ma gzigs phyir/ /rang byung bdag nyid rtogs pa'i phyir/ /gzhan gyis bstan yang mi dgos la/ /bse ru lta bu'i ye shes ni/ /zab pa nyid du mngon par brjod/ /gang gang don ni gang gang la/ /ji lta ji ltar nyan 'dod pa/ /de de la don de dang de/ /sgra med kyang de de ltar snang / /gzung don rtog pa spong phyir dang / / 'dzin pa mi spong phyir dang ni/ /rten gyis bse ru lta bu'i lam/ /yang dag bsdus par shes par bya/ /btags pa'i chos nyid mi 'gal bar/ /ston pa'i rnam pa dror gyur pa/ /rtse mor gyur pa gzugs la sogs/ /'grib pa med la sogs pas phye/ /nang stong nyid la sogs pa yis/ /gzugs sogs mi 'dzin phyir bzod pa/ /gzugs sogs skye ba med sogs kyi/ /rnam pa can ni chos kyi mchog /bden dang bden la bzod pa dang / /shes pa'i skad cig rnam bzhi yis/ /lam shes nyid la mthong ba'i lam/ /phan yon bcas pa 'di bshad do/ /de bzhin nyid dang sangs rgyas dag /phan tshun rten pa rten med phyir/ /rnam grangs khas mi len pa dang / /chen po tshad ma med bcas dang / /tshad med pa dang mtha' med dang / /der gnas gzugs la sogs pa la/ /sangs rgyas nyid du nges 'dzin dang / / blang med dor ba med sogs dang / /byams la sogs pa stong nyid dang / /sangs rgyas nyid ni 'thob pa dang / /rnam par byang kun yongs bsdus dang / /nyam nga ba dang nad kun sel/ /mya ngan 'das 'dzin zhi nyid dang / /sangs rgyas rnams kyis bsrung la sogs/ /srog mi gcod pa la sogs pa/ /rnam pa kun mkhyen tshul la ni/ /bdag nyid gnas te sems can dag /'god dang sbyin pa la sogs pa/ /rdzogs pa'i byang chub tu bsngo ba/ /lam shes nyid kyi skad cig ma/ /kun nas zhi dang thams cad la/ /bdud dang nyon mongs las rgyal dang / /gnod pas brdzi ba med nyid dang / /byang chub dang ni rten mchod nyid/ /mos pa rang gi don dang ni/ /rang gzhan don dang gzhan don dang / /rnam gsum shes bya de yang ni/ /chung dang 'bring dang chen po ste/ /so sor rnam pa gsum du 'dod/ /chung ngu'i chung sogs dbye ba yis/ /de yang rnam gsum de ltar na/ /rnam pa nyi shu bdun du 'dod/ /shes rab pha rol phyin pa la/ /mos pa'i gnas skabs rnams la ni/ /dgu tshan gsum gyis bstod pa dang / /bkur ba dang ni bsngags par 'dod/ /yongs su bsngo ba khyad par can/ /de yi byed pa mchog yin no/ /de ni dmigs med rnam pa can/ /phyin ci ma log mtshan nyid do/ /dben dang sangs rgyas bsod nams tshogs/ /rang bzhin dran pa'i spyod yul can/ /thabs bcas mtshan ma med pa dang / /sangs rgyas rjes su yi rang dang / /khams gsum rtogs pa ma yin dang / /chung dang 'bring dang chen po yi/ /bsngo ba gzhan ni rnam gsum po/ /bsod nams che 'byung bdag nyid do/ /thabs dang mi dmigs pa dag gis/ /dge ba'i rtsa la yi rang ba/ /rjes su yi rang yid byed pa/ /bsgom pa yin par 'dir brjod do/ /de yi ngo bo nyid mchog nyid/ /kun la mngon par 'du mi byed/ /chos rnams dmigs su med par ni/ /gtod par byed pa don chen nyid/ /sangs rgyas bsten dang sbyin sogs dang / /thabs la mkhas pa gang yin pa/ /'di la mos pa'i rgyu dag yin/ /chos kyis phongs pa'i rgyu dag ni/ /bdud kyi thibs kyis non pa dang / /zab mo'i chos la ma mos dang / /phung po la sogs mngon zhen dang / /sdig pa'i grogs pos yongs zin pa'o/ /'bras bu dag pa gzugs la sogs/ /dag pa nyid de gang gi phyir/ /de gnyis tha dad ma yin zhing / /bcad du med pas dag par brjod/ /nyon mongs shes bya lam gsum gyi/ /nyams phyir slob ma bse ru dang / /rgyal sras rnams kyi dag pa ste/ /sangs rgyas rnam kun shin tu ba/ /sa dgu la ni chen po yi/ /chen po la sogs dri ma yi/ /gnyen po chung ngu'i chung ngu la/ /sogs pa'i lam ni dag pa yin/ /de la klan ka spangs pa yis/ /lam ni 'jal dang gzhal bya dag /mnyam pa nyid kyis khams gsum gyi/ /gnyen po nyid du 'dod pa yin/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan gyi tshig le'ur byas pa las/ skabs gnyis pa'o// //tshu rol pha rol mtha' la min/ /de dag bar na mi gnas pa/ /dus rnams mnyam pa nyid shes phyir/ /shes rab pha rol phyin par 'dod/ /de ni mtshan mar dmigs sgo nas/ /thabs ma yin pas ring ba ste/ /de ni thabs la mkhas pa yis/ /yang dag nye ba nyid du bshad/ /gzugs sogs phung po stong nyid dang / /dus gsum rtogs pa'i chos rnams dang / /sbyin sogs byang chub phyogs rnams la/ /spyod pa'i 'du shes mi mthun phyogs/ /sbyin la sogs la ngar 'dzin med/ /gzhan dag de la 'dzud byed pa/ /de ni chags pa'i mtha' 'gog pas/ /rgyal la sogs la chags pa phra/ /chos kyi lam ni rang bzhin gyis/ /dben pa'i phyir na de zab nyid/ /chos rnams rang bzhin gcig par ni/ /shes pas chags pa spong ba yin/ / mthong ba la sogs bkag pa yis/ /de ni rtogs par dka' bar bshad/ /gzugs la sogs par mi shes phyir/ /de ni bsam mi khyab par 'dod/ /de ltar kun shes nyid lugs la/ /mi mthun gnyen po'i phyogs dag gi /rnam par dbye ba ma lus pa/ /ji skad bshad pa 'dir shes bya/ /gzugs sogs de mi rtag sogs dang / /de ma rdzogs dang rab rdzogs dang / /de la chags pa med nyid la/ /spyod pa bkag pa'i sbyor ba dang / /mi 'gyur byed po med nyid dang / /bya dka' rnam gsum sbyor ba dang / /skal ba ji bzhin 'bras thob pas/ /'bras yod 'dod pa de dang ni/ /gzhan la rag las med gang dang / /snang ba rnam bdun shes byed do/ /gzugs la sogs la rlom med pa/ /rnam bzhi de yi mnyam pa nyid/ /sdug bsngal la sogs bden pa la/ /chos shes rjes su shes pa dang / /bzod shes skad cig bdag nyid 'di/ / kun shes tshul la mthong ba'i lam/ /gzugs rtag ma yin mi rtag min/ /mtha' las 'das dang rnam dag dang / /ma skyes ma 'gags la sogs dang / /mkha' 'dra chags pa spangs pa dang / /yongs su 'dzin las grol ba dang / /ngo bo nyid kyis brjod med dang / / gang phyir 'di don brjod pa yis/ /gzhan la sbyin du med pa dang / /dmigs pa med par byed pa dang / /shin tu rnam dag nad mi 'byung / /ngan song chad dang 'bras bu ni/ /mngon du bya la mi rtog nyid/ /mtshan ma dag dang ma 'brel dang / /dngos dang ming dang gnyis po la/ /shes pa skye ba med pa ni/ /kun shes nyid kyi skad cig ma/ /de ltar 'di dang yang 'di dang / /yang 'di yin te rnam gsum po/ /'di ni gnas skabs gsum po dag /rdzogs par yongs su bstan pa yin/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan gyi tshig le'ur byas pa las/ skabs gsum pa'o// //gzhi shes pa yi bye brag rnams/ /rnam pa zhes bya mtshan nyid de/ /kun mkhyen nyid ni rnam gsum phyir/ /de ni rnam pa gsum du 'dod/ /med pa'i rnam pa nas bzung ste/ /mi g.yo ba yi rnam pa'i bar/ /bden pa so so la bzhi dang / /lam la de ni bco lngar bshad/ /rgyu dang lam dang sdug bsngal dang / /'gog pa la ni go rims bzhin/ /de dag brgyad dang bdun dang ni/ /lnga dang bcu drug ces bsgrags so/ / dran pa nyer gzhag nas bzung ste/ /sangs rgyas rnam pa'i mthar thug rnams/ /lam gyi bden pa'i rjes mthun par/ /kun mkhyen gsum du phye bas na/ /slob ma byang chub sems dpa' dang / /sangs rgyas rnams la rim bzhin du/ /sum cu bdun dang sum cu bzhi/ /sum cu rtsa dgu dag tu bzhed/ /sangs rgyas rnams la lhag par byas/ /de la dge ba'i rtsa ba bskrun/ /dge ba'i bshes kyi mgon bcas pa/ /'di mnyan pa yi snod yin no/ /sangs rgyas bstan dang kun 'dri dang / /sbyin dang tshul khrims sogs spyod pas/ /len dang 'dzin la sogs pa yi/ /snod du dam pa rnams bzhed do/ /gzugs la sogs la mi gnas phyir/ /de la sbyor ba bkag pa'i phyir/ /de yi de bzhin nyid zab phyir/ /de rnams gting dpag dka' ba'i phyir/ /de dag tshad ni med phyir dang / /tshegs chen yun ring rtogs pa'i phyir/ /lung bstan phyir mi ldog nyid dang / /nges 'byung bar chad med bcas dang / /byang chub nye dang myur ba dang / /gzhan don 'phel med 'grib med phyir/ /chos dang chos min sogs mi mthong / /gzugs sogs bsam mi khyab mi mthong / /gzugs sogs de yi mtshan ma dang / /de yi ngo bor rnam mi rtog /'bras bu rin chen sbyin byed dang / /de ni dag pa mtshams dang bcas/ /bdud kyi mthu bcom la sogs pa/ /yon tan rnam pa bcu bzhi'o/ /skyon ni bcu tshan bzhir bcas pa/ /drug tu nges par rtogs par bya/ /gang gi mtshon te mtshan nyid du/ /shes bya de yang rnam pa gsum/ /shes pa khyad par byed pa ste/ /ngo bo nyid gang mtshon bya yang / /de bzhin gshegs pa 'byung ba dang / /'jig rten 'jig med bdag nyid dang / /sems can sems kyi spyod pa dang / /de bsdus pa dang phyir ltas dang / /mi bzad pa yi rnam pa dang / /chags bcas sogs dang rgya chen dang / /chen por gyur dang tshad med dang / /rnam shes bstan du med pa dang / /sems bltar med dang shes pa de/ / g.yo ba la sogs shes bya dang / /de las gzhan yang de dag ni/ /de bzhin nyid kyi rnam par shes/ /thub pas de bzhin nyid rtogs te/ /gzhan la bstan pa zhes bya 'di/ /thams cad shes pa nyid skabs kyi/ /shes pa'i mtshan nyid bsdus pa yin/ /stong nyid mtshan med bcas pa dang / /smon pa rnam par spangs pa dang / /skye med 'gag pa med sogs dang / /chos nyid rnam par 'khrug med dang / /'du mi byed dang rnam mi rtog /rab dbye mtshan nyid med nyid la/ /lam shes nyid kyi skabs kyis ni/ /shes pa'i mtshan nyid yin par bzhed/ / de ni nyid kyi chos bsten nas/ /gnas dang gus par bya ba dang / /bla ma nyid dang mnyes pa dang / /de la mchod dang byed med dang / /kun tu 'jug mkhyen gang yin dang / /ma mthong ston par mdzad pa dang / /'jig rten stong nyid rnam pa dang / /brjod dang shes mdzad mngon sum mdzad/ /bsam mi khyab dang zhi nyid ston/ /'jig rten 'du shes 'gog pa la/ /rnam pa kun mkhyen tshul la ni/ /shes pa'i mtshan nyid ces bshad do/ /bsam mi khyab sogs khyad par gyis/ /khyad zhugs bden pa'i spyod yul can/ /skad cig ma ni bcu drug gis/ /khyad par mtshan nyid bshad pa yin/ /bsam mi khyab dang mi mnyam dang / /gzhal dang bgrang las yang dag 'das/ /'phags pa kun bsdus mkhas pa yis/ /rig bya thun mong min shes nyid/ /shes myur bri dang gang med dang / /sgrub dang yang dag 'grub pa dang / /dmigs pa brtan dang bcas pa dang / /mtha' dag pa dang yongs 'dzin dang / /ro myang med dang khyad par ni/ /bcu drug bdag nyid ces bya ste/ /gang gis lam ni gzhan dag las/ /khyad du 'phags pas khyad par lam/ /phan dang bde dang skyob pa dang / /mi rnams kyi ni skyabs dag dang / /gnas dang dpung gnyen gling dang ni/ /yongs 'dren pa zhes bya ba dang / /lhun gyis grub dang theg gsum gyis/ /'bras bu mngon sum mi byed dag /tha ma rten gyi mdzad pa ste/ /'di ni byed pa'i mtshan nyid yin/ /nyon mongs rtags dang mtshan ma dang / /mi mthun phyogs dang gnyen po dag /dben dang dka' dang nges pa dang / /ched du bya dang mi dmigs dang / /mngon par zhen pa bkag pa dang / /dmigs pa zhes bya gang yin dang / /mi mthun thogs pa med dang de/ / gzhi med 'gro med skye med dang / /de bzhin nyid ni mi dmigs dang / /ngo bo nyid bcu drug bdag nyid/ /mtshon bya lta bur mtshon pas na/ /mtshan nyid bzhi par bzhed pa yin/ /mtshan med rab tu sbyin la sogs/ /yang dag sgrub la mkhas pa ni/ /rnam pa thams cad rtogs 'di la/ /thar pa'i cha dang mthun par 'dod/ /sangs rgyas sogs dmigs dad pa dang / /sbyin sogs spyod yul brtson 'grus dang / /bsam pa phun tshogs dran pa dang / /rnam par mi rtog ting 'dzin dang / /chos rnams rnam pa thams cad du/ /shes pa'i shes rab dang rnam lnga/ /rdzogs pa'i byang chub rnon po yis/ /rtogs sla rtul pos rtogs dkar bzhed/ /dro ba rnams kyi dmigs pa 'dir/ /sems can thams cad yin par bsngags/ /de dag nyid la sems mnyam sogs/ /rnam pa dag ni bcur bshad do/ /bdag nyid sdig pa las ldog cing / /sbyin la sogs la gnas pas gzhan/ /de dag la ni 'god pa dang / /bsngags pa brjod dang mthun pa nyid/ /rtser gyur de bzhin bzod pa ni/ /rang gzhan rten can bden shes pa/ /chos mchog de bzhin sems can rnams/ /smin byed sogs kyis shes par bya/ /nges 'byed yan lag nas bzung ste/ /mthong dang sgom pa'i lam dag la/ /byang chub sems dpa' gang dag gnas/ /de 'dir mi ldog pa yi tshogs/ /gzugs la sogs las ldog sogs rtags/ /rnam pa nyi shur brjod pa yis/ /nges 'byed yan lag la gnas pa'i/ /phyir mi ldog pa'i mtshan nyid 'di/ /gzugs la sogs las ldog pa dang / /the tshom mi ngal zad pa dang / /bdag nyid dge ba la gnas shing / /gzhan dag de la 'god pa dang / /gzhan gyi rten can sbyin sogs dang / /zab mo'i don la'ang som nyi med/ /byams lus sogs dang sgrib pa ni/ /rnam pa lnga dang mi 'grogs dang / /bag la nyal kun 'joms pa dang / /dran pa dang ni shes bzhin dang / /gos la sogs pa gtsang ba dang / /lus la srin bu rnams mi 'byung / /gya gyu med sems sbyangs pa ni/ /len dang ser sna med sogs dang / /chos nyid ldan par 'gro nyid dang / /sems can don du dmyal tshol dang / /gzhan gyis bkri bar mi btub dang / /lam gzhan nye bar ston bdud la/ /bdud ces bya bar rtogs pa dang / /sangs rgyas dgyes pa'i spyod pa ste/ /rtags ni nyi shu de dag gis/ /drod dang rtse mo bzod bcas dang / /chos mchog rnams la gnas pa ni/ /rdzogs pa'i byang chub las mi ldog /mthong ba'i lam la bzod pa dang / /shes pa'i skad cig bcu drug ni/ /byang chub sems dpa' mi ldog pa'i/ /mtshan nyid yin par shes par bya/ /gzugs sogs 'du shes ldog pa dang / /sems brten theg pa dman dag las/ /rnam log bsam gtan la sogs pa'i/ /yan lag yongs su zad pa dang / /lus sems yang ba nyid dang ni/ /'dod la spyod la thabs mkhas dang / /rtag tu tshangs par spyod nyid dang / /'tsho ba rnam par dag nyid dang / /phung sogs bar chad byed rnams dang / /tshogs dang dbang sogs bcas pa yi/ /g.yul 'gyed ser sna la sogs la/ /sbyor dang rjes su sbyor ba yi/ /gnas pa so sor bkag pa dang / /chos ni rdul tsam mi dmigs nyid/ /rang gi sa la nges pa nyid/ /sa gsum la ni gnas pa dang / /chos kyi don du srog gtong ba/ /de 'dra'i skad cig bcu drug ni/ /blo ldan mthong ba'i lam gnas pa'i/ /phyir mi ldog pa'i rtags dag yin/ / sgom pa'i lam ni zab pa ste/ /zab mo stong pa nyid la sogs/ /zab pa de ni sgro 'dogs dang / /skur pa'i mtha' las grol ba nyid/ /nges 'byed yan lag dang mthong ba'i/ /lam dang sgom pa'i lam nyid la/ /yang dang yang du sems pa dang / /'jal dang nges rtog sgom pa'i lam/ /de ni rgyun chags yin pa'i phyir/ /chung dang 'bring dang chen po rnams/ /chung ngu'i chung sogs dbye ba yis/ /rnam pas rnam pa dgur bzhed do/ /grangs med la sogs bstan pa rnams/ /dam pa'i don du bzod ma yin/ / kun rdzob tu ni thugs brtse bas/ /rgyu mthun de dag thub pa bzhed/ /dngos po brjod du med pa la/ /nyams pa dang ni 'phel mi rung / /sgom zhes bya ba'i lam gyis ni/ /ci zhig nyams shing ci zhig 'thob/ /byang chub ji lta de bzhin du/ /'di ni 'dod pa'i don sgrub byed/ /byang chub de bzhin nyid mtshan nyid/ /de yang de yi mtshan nyid bzhed/ /sems ni snga mas byang chub par/ /rigs min phyi mas kyang ni min/ /mar me'i dpe yi tshul gyis ni/ /zab mo'i chos nyid rnam pa brgyad/ /skye ba dang ni 'gag pa dang / /de bzhin nyid dang shes bya dang / /shes dang spyod dang gnyis med dang / /thabs mkhas pa la zab pa nyid/ /chos rnams rmi lam 'dra ba'i phyir/ /srid dang zhi bar mi rtog pa/ /las med la sogs klan ka yi/ /lan ni ji skad bshad par zad/ /sems can 'jig rten de bzhin du/ /snod kyi 'jig rten ma dag pa/ /de la dag par sgrub pa yis/ /sangs rgyas zhing ni dag pa nyid/ /yul dang sbyor ba can 'di ni/ /dgra rnams las ni 'das pa dang / /mi shes ji bzhin shugs dang ni/ /thun mong ma yin mtshan nyid dang / /ma chags pa dang mi dmigs dang / /mtshan ma smon lam zad pa dang / /de yi rtags dang tshad med pa/ /thabs la mkhas pa rnam pa bcu/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan gyi tshig le'ur byas pa las/ skabs bzhi pa'o// // rmi lam na yang chos rnams kun/ /rmi lam lta bur lta la sogs/ /rtse mor phyin par sbyor ba'i rtags/ /rnam pa bcu gnyis dag tu bzhed/ /'dzam bu'i gling gi skye bo rnyed/ /sangs rgyas mchod pa'i dge la sogs/ /rnam mang du ni dper mdzad nas/ /rnam 'phel bcu drug bdag nyid do/ /kun mkhyen nyid gsum chos rnams kyi/ /yongs su rdzogs pa bla med pa/ /sems can don yongs mi gtong ba/ /bstan pa zhes ni mngon par brjod/ /gling bzhi pa dang stong dag dang / /stong gnyis gsum dag dper mdzad nas/ /bsod nams mang po nyid kyis ni/ /ting 'dzin yongs su bsgrags pa yin/ /'jug pa dang ni ldog pa la/ /gzung ba'i rnam rtog so sor de/ /dgu yi bdag nyid ji bzhin yul/ /min pa'i bdag nyid dag shes bya/ /so so'i skye bo 'phags dbye bas/ /sems can rdzas dang btags yod par/ /rnam rtog 'dzin pa dag tu 'dod/ /de dag so sor dgu bdag nyid/ /gal te gzung don de bzhin med/ /de dag gang gi 'dzin par 'dod/ /de ltar de dag 'dzin pa yi/ /ngo bos stong pa'i mtshan nyid do/ /ngo bo nyid dang rigs dang ni/ /lam ni yang dag 'grub pa dang / /shes pa'i dmigs pa ma 'khrul dang / /mi mthun phyogs dang gnyen po dang / /rang gis rtogs dang byed pa dang / /de yi las bya'i 'bras bu la/ /'jug pa'i phyogs kyi rten can gyi/ /rnam rtog de ni rnam dgur 'dod/ /srid dang zhi bar ltung ba'i phyir/ / rtogs pa dman pa nyid dang ni/ /yongs su 'dzin pa med pa dang / /lam gyi rnam pa ma tshang dang / /gzhan gyi rkyen gyis 'gro ba dang / /ched du bya ba log pa dang / /nyi tshe ba dang sna tshogs nyid/ /gnas dang 'jug la rmongs pa dang / /rjes la 'gro zhes bya ba la/ / rnam rtog dgu yi bdag nyid 'di/ /ldog pa'i phyogs kyi rten can te/ /nyan thos la sogs yid la 'byung / /'dzin pa dang ni 'dor ba dang / /yid la byed dang khams rnams ni/ /gsum po dag dang nye 'brel dang / /gnas dang mngon par zhen pa dang / /chos kyi dngos po brtags pa dang / /chags pa dang ni gnyen po dang / /ji ltar 'dod bzhin 'gro nyams la/ /'dzin pa dang por shes par bya/ /ched bzhin nges par mi 'byung dang / /lam la lam min nges 'dzin dang / /'gag dang bcas pa'i skye ba dang / /dngos po ldan dang mi ldan dang / /gnas dang rigs ni 'dzin pa dang / /don du gnyer dang rgyu med dang / /phyir rgal ba ni dmigs pa la/ /'dzin pa'i rnam rtog gzhan yin no/ /byang chub la gzhan ston pa dang / /de yi rgyu ni yongs gtod dang / /de thob bar chad med pa'i rgyu/ /bsod nams mang po'i mtshan nyid do/ /dri ma zad dang mi skye ba'i/ /ye shes byang chub ces brjod do/ /zad med skye med phyir de dag /go rims bzhin du shes par bya/ /'gog pa med pa'i rang bzhin la/ /mthong zhes bya ba'i lam gyis ni/ / rnam par rtog rigs ci zhig zad/ /skye med rnam pa ci zhig 'thob/ /gzhan gyis chos rnams kyang yod la/ /shes bya la yang ston pa yi/ /sgrib pa zad par brjod pa gang / /de la kho bos mtshar du brtsis/ /'di las bsal bya ci yang med/ /gzhag par bya ba cung zad med/ /yang dag nyid la yang dag lta/ /yang dag mthong na rnam par grol/ /sbyin pa la sogs re rer ni/ /de dag phan tshun bsdus pa gang / /skad cig gcig pa'i bzod pa yis/ /bsdus pa de 'dir mthong ba'i lam/ /de nas seng ge rnam bsgyings pa'i/ / ting nge 'dzin la snyoms zhugs nas/ /rten cing 'brel 'byung lugs mthun dang / /lugs mi mthun la rtog par byed/ /'gog dang bcas pa'i snyoms 'jug dgur/ /rnam pa gnyis su song 'ongs nas/ /'dod par gtogs pa'i rnam par shes/ /mnyam gzhag min pa'i mtshams bzung ste/ /thod rgal du ni snyoms 'jug pa/ /gcig dang gnyis gsum bzhi dang lnga/ /drug dang bdun dang brgyad rgal nas/ /'gog pa'i bar du mi 'drar 'gro/ /mdor bsdus rgyas dang sangs rgyas kyi/ /bstang bas yongs su ma bzung dang / /dus gsum yon tan med pa dang / /legs pa'i lam ni rnam gsum la/ /bzung ba'i rnam rtog 'di gcig ste/ /sbyor ba'i rnam pa'i spyod yul can/ /gnyis pa sems dang sems byung rnams/ /'jug pa'i yul can yin bzhed de/ /sems mi skye dang byang chub kyi/ /snying po yid la mi byed dang / /theg pa dman pa yid byed dang / /rdzogs pa'i byang chub yid mi byed/ /sgom dang sgom pa med pa dang / /de dag las ni bzlog nyid dang / /ji bzhin don min rnam rtog pa/ /sgom pa'i lam la shes par bya/ /sems can btags pa'i spyod yul dang / /chos btags pa dang stong min nyid/ /chags dang rab 'byed bdag nyid dang / /dngos por byed dang theg gsum dang / /yon ni dag pa ma yin dang / /spyod pa rnam par 'khrug pa la/ /'dzin par byed pa dang por te/ /shes par bya ba bsgrags pa yin/ /sems can btags dang de'i rgyu yi/ /yul can de yis rnam 'joms pas/ /sgom pa'i lam dang 'brel pa yi/ /mi mthun phyogs gzhan rnam pa dgu/ /bdag nyid ji bzhin kun mkhyen ni/ /gsum gyi sgrib pa rnam gsum dang / /zhi lam de bzhin nyid sogs dang / /mtshungs par ldan dang mi ldan dang / /mi mnyam sdug bsngal la sogs dang / /nyon mongs rnams kyi rang bzhin dang / /gnyis su med dang kun rmongs la/ /rnam par rtog pa tha mar bzhed/ / yams nad 'di rnams zad nas ni/ /yun ring lon nas dbugs phyin ltar/ /rnam pa kun tu 'gro ba yi/ /bde sgrub yon tan phun tshogs kun/ /rgya mtsho che la chu bo bzhin/ /'bras bu mchog gis spa ba yis/ /sems dpa' chen po de la ni/ /rnam pa kun du rten par byed/ /stong gsum skye bo nyan thos dang / /bse ru'i rtogs pa phun tshogs dang / /byang chub sems dpa'i skyon med la/ /bkod pa'i dge ba dper mdzad nas/ /bsod nams mang po nyid kyis ni/ /sangs rgyas nyid kyi bar med de/ /bar chad med pa'i ting nge 'dzin/ /de ni rnam pa kun mkhyen nyid/ /'di yi dmigs pa dngos med de/ /bdag po dran pa yin par bzhed/ /rnam pa zhi nyid 'di la ni/ /rab tu smra rnams brgyud par rgol/ /dmigs pa 'thad dang de yi ni/ /ngo bo nyid nges bzung ba dang / /rnam kun mkhyen nyid ye shes dang / /dam pa'i don dang kun rdzob dang / /sbyor dang dkon mchog gsum po dang / /thabs bcas thub pa'i rtogs pa dang / /phyin ci log ni lam bcas dang / /gnyen po mi mthun phyogs dag dang / /mtshan nyid dang ni sgom pa la/ /smra ba rnams kyis log rtog pa/ /rnam pa kun mkhyen nyid rten can/ /rnam pa bcu drug dag tu bzhed/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan gyi tshig le'ur byas pa las/ skabs lnga pa'o// // sbyin pa shes rab bar dag dang / /sangs rgyas la sogs dran dang chos/ /dngos med ngo bo nyid kyis de/ /mthar gyis pa yi bya bar bzhed/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan gyi tshig le'ur byas pa las/ skabs drug pa'o/ / //sbyin pa la sogs re res kyang / /zag med chos kun bsdus pa'i phyir/ /thub pa'i skad cig gcig pa yis/ /rtogs pa 'di ni shes par bya/ /ji ltar skyes bus zo chun rgyud/ /rdog thabs gcig gis bskyod pa na/ /thams cad cig car 'gul ba ltar/ /skad cig gcig shes de bzhin no/ /gang tshe chos dkar thams cad kyi/ /rang bzhin shes rab pha rol phyin/ /rnam smin chos nyid gnas skabs skyes/ /de tshe skad cig gcig ye shes/ /sbyin la sogs pa'i spyod pa yis/ / chos kun rmi lam 'drar gnas nas/ /chos rnams mtshan nyid med pa nyid/ /skad cig ma ni gcig gis rtogs/ /rmi lam dang ni de mthong nyid/ /gnyis kyi tshul du mi mthong ltar/ /chos rnams gnyis su med pa yi/ /de nyid skad cig gcig gis mthong / / shes rab kyi pha rol tu phyin pa'i man ngag gi bstan bcos mngon par rtogs pa'i rgyan gyi tshig le'ur byas pa las/ skabs bdun pa'o// //thub pa'i ngo bo nyid sku ni/ /zag pa med pa'i chos gang dag /thob gyur rnam kun rnam dag pa/ /de dag rang bzhin mtshan nyid can/ /byang chub phyogs mthun tshad med dang / /rnam par thar dang mthar gyis ni/ /snyoms 'jug dgu yi bdag nyid dang / /zad par bcu yi bdag nyid dang / /zil gyis gnon pa'i skya mched ni/ /rab tu dbye bas rnam brgyad dang / / nyon mongs med dang smon mkhyen dang / /mngon shes so so yang dag rig /rnam pa thams cad dag bzhi dang / /dbang bcu dang ni stobs bcu dang / /mi 'jigs pa ni bzhi dag dang / /bsrung ba med pa rnam gsum dang / /dran pa nyer gzhag rnam gsum dang / /bsnyel ba mi mnga'i chos nyid dang / /bag chags yang dag bcom pa dang / /skye la thugs rje chen po dang / /thub pa kho na'i ma 'dres chos/ /bco brgyad bshad pa gang yin dang / /rnam pa thams cad mkhyen nyid dang / /chos kyi sku zhes brjod pa yin/ / nyan thos nyon mongs med pa'i lta/ /nyan thos nyon mongs yongs spong nyid/ /grong sogs su de'i nyon mongs rnams/ /rgyun gcod rgyal ba'i nyon mongs med/ /sangs rgyas smon nas mkhyen pa ni/ /lhun gyis grub dang chags spangs dang / /thogs pa med dang rtag gnas dang / /dri ba kun lan 'debs par bzhed/ /rgyu ni yongs su smin gyur nas/ /gang dang gang la gang dang ni/ /gang tshe bya ba phan gyur pa/ /de dang de la de snang ngo / /lha yi rgyal pos char phab kyang / /sa bon mi rung mi 'khrungs ltar/ /sangs rgyas rnams ni byung gyur kyang / /skal ba med pas bzang mi myong / /de ltar mdzad pa rgya che'i phyir/ /sangs rgyas khyab par nges par brjod/ /de nyid zad pa med pa'i phyir/ /rtag pa zhes kyang brjod pa yin/ / mtshan ni sum cu rtsa gnyis dang / /dpe byad brgyad cu'i bdag nyid 'di/ /theg chen nye bar longs spyod phyir/ /thub pa'i longs spyod rdzogs skur bzhed/ /phyag zhabs 'khor lo'i mtshan dang rus sbal zhabs/ /phyag dang zhabs sor dra bas 'brel pa dang / /phyag ni zhabs bcas 'jam zhing gzhon sha chags/ /'di yi sku ni bdun dag mtho ba dang / /sor mo ring dang rting yangs sku che drang / /zhabs 'bur mi mngon spu ni gyen du phyogs/ /byin pa e na ya'i 'dra phyag ring mdzes/ /mdoms kyi sba ba sbubs su nub pa'i mchog /pags pa gser mdog pags pa srab pa dang / /spu ni re re nas g.yas legs 'khrungs dang / /zhal mdzod spus brgyan ro stod seng ge 'dra/ /'di yi dpung pa'i mgo zlum thal gong rgyas/ /'di la ro mi zhim pa ro mchog snang / /sku ni n+ya gro d+ha ltar chu zheng gab/ /gtsug tor dbur ldan ljags ring mdzes pa dang / /tshangs dbyangs 'gram pa seng ge'i 'dra dang tshems/ /shin tu dkar dang tshed mnyam thags bzang dang / /grangs ni bzhi bcu tham par tshang ba dang / /spyan ni mthon mthing spyan rdzi ba mchog gi /'dra ba 'di dag sum cu rtsa gnyis mtshan/ /'di la mtshan ni gang gang gis/ /sgrub par byed pa'i rgyu gang yin/ /de dang de ni rab rdzogs pas/ /mtshan ni 'di dag yang dag 'grub/ /bla ma skyel la sogs pa dang / /yang dag blangs pa brtan pa dang / /bsdu ba bsten dang gya nom pa'i/ /dngos po sbyin dang gsad bya ba/ /thar bar byed dang dge ba ni/ /yang dag blangs pa spel la sogs/ /sgrub byed rgyu yi mtshan nyid de/ /mdo las ji skad 'byung ba bzhin/ /thub pa'i sen mo zangs mdog dang / /mdog snum mtho dang sor mo rnams/ /zlum rgyas byin gyis phra ba dang / /rtsa mi mngon dang mdud pa med/ /long bu mi mngon zhabs mnyam dang / /seng ge glang chen bya dang ni/ /khyu mchog stabs gshegs g.yas phyogs dang / /mdzes gshegs drang dang 'khril bag chags/ /byi dor byas 'dra rim par 'tsham/ /gtsang dang 'jam dang dag pa'i sku/ /mtshan ni yongs su rdzogs pa dang / / sku yi kho lag yangs shing bzang / /gom snyoms pa dang spyan gnyis ni/ /dag dang gzhon sha can nyid dang / /sku zhum med dang rgyas pa dang / /shin tu grims pa'i sku nyid dang / /yan lag shin tu rnam 'byes dang / /gzigs pa sgrib med dag pa dang / / dku zlum skabs phyin ma rnyongs dang / /phyang nge ba dang lte ba ni/ /zab dang g.yas phyogs 'khyil ba dang / /kun nas blta na sdug pa dang / /kun spyod gtsang dang sku la ni/ /sme ba gnag bag med pa dang / /phyag ni shing bal ltar 'jam dang / / phyag ris mdangs yod zab ring dang / /zhal ni ha cang mi ring dang / /mchu ni bim+pa ltar dmar dang / /ljags mnyen pa dang srab pa dang / /dmar dang 'brug gi sgra nyid dang / /gsung mnyen 'jam dang mche ba zlum/ /rno dang dkar dang mnyam pa dang / /byin gyis phra dang shangs mtho dang / /mchog tu dag pa dag dang ni/ /spyan yangs pa dang rdzi ma stug /pad+ma'i 'dab ma 'dra ba dang / /smin tshugs ring dang 'jam pa dang / /snum dang spu ni mnyam pa dang / /phyag ring rgyas dang snyan mnyam dang / /nyams pa rnam par spangs pa dang / /dpral ba legs par 'byes pa dang / /dbyes che ba dang dbu rgyas dang / /dbu skra bung ba ltar gnag dang / /stug dang 'jam dang ma 'dzings dang / /mi bshor dri zhim skyes bu yi/ /yid ni 'phrog par byed pa dang / /dpal gyi be'u dang bkra shis ni/ /g.yung drung 'khyil bas brgyan pa ste/ /sangs rgyas dpe byad bzang por bzhed/ /gang gi srid pa ji srid par/ /'gro la phan pa sna tshogs dag /mnyam du mdzad pa'i sku de ni/ /thub pa'i sprul sku rgyun mi 'chad/ /de bzhin 'khor ba ji srid 'di'i/ /las ni rgyun mi 'chad par 'dod/ /'gro rnams zhi ba'i las dang ni/ /bsdu rnam bzhi la 'god pa dang / /kun nas nyon mongs bcas pa yi/ /rnam par byang ba rtogs pa dang / /sems can rnams don ji bzhin gyi/ /don dang pha rol phyin drug dang / /sangs rgyas lam dang rang bzhin gyis/ /stong pa nyid dang gnyis zad dang / /brda dang dmigs pa med pa dang / /lus can rnams ni yongs smin dang / /byang chub sems dpa'i lam dang ni/ /mngon par zhen pa zlog pa dang / /byang chub thob dang sangs rgyas zhing / /rnam par dag dang nges pa dang / /sems can don ni tshad med dang / /sangs rgyas rten sogs yon tan dang / /byang chub yan lag las rnams ni/ /chud mi za dang bden mthong dang / /phyin ci log ni spangs pa dang / /de gzhi med pa'i tshul dang ni/ /rnam par byang dang tshogs dang ni/ /'dus byas 'dus ma byas pa la/ /tha dad yongs su mi shes dang / /mya ngan 'das la 'god pa ste/ /chos kyi sku yi phrin las ni/ /rnam pa nyi shu bdun du bzhed/ /shes rab kyi pha rol tu phyin pa'i man ngag gi bstan bcos mngon par rtogs pa'i rgyan gyi tshig le'ur byas pa las/ skabs brgyad pa'o// //mtshan nyid de yi sbyor ba dang / / de rab de yi go rims dang / /de mtha' de yi rnam smin ni/ /don bsdus gzhan de rnam pa drug /yul ni rnam pa gsum po rgyu/ /sbyor ba bzhi yi bdag nyid dang / /chos sku phrin las 'bras bu ni/ /don bsdus gzhan te rnam pa gsum/ / 'phags pa shes rab kyi pha rol tu phyin pa'i man ngag gi bstan bcos mngon par rtogs pa'i rgyan zhes bya ba'i tshig le'ur byas pa rdzogs so// //paN+Di ta go mi 'chi med dang / lo tsA ba blo ldan shes rab kyi 'gyur/ / //

CLOSE WINDOW