བོད་ཡིག

e-texts based on the ACIP/ALL Input

@##/ /rgya gar skad du/ ma hA yA na pa tha kra ma/ bod skad du/ theg pa chen po'i lam gyi rim pa/ dpal 'jam pa'i mgon la phyag 'tshal lo/ /dpal ldan mgon po kun rang bzhin/ /rnam snang mdzad la phyag 'tshal te/ /skal chen dang ldan dga' ba'i phyir/ /theg chen lam rim bshad par bya/ /gang zhig mi khom gnas spangs te/ /chos spyod skal ba ldan pa'i tshe/ /bdag nyid brtson par mi byed pa/ /'chi ba'i sdug bsngal gyis nyen cing / /bzhin gyur mdangs yal bkrag bor tshe/ /bdag la 'gyod par cis mi 'gyur/ /'tsho ba phra mo'i ched dag tu/ /sdug bsngal chen po bzod gyur na/ /sdug bsngal kun dang bral 'dod pas/ /bzod pa chen po cis mi bsten/ /de bas sdug bsngal 'dor 'dod rnams/ /theg chen lam la brtson pa dang / /dge ba'i bshes la bsnyen bkur zhes/ /bdag ni khyed la de skad gdams/ /lnga brgya tha ma'i dus kyi tshe/ /snyigs ma lnga yi sems can rnams/ /theg chen skal ldan ngo mtshar che/ /de bas spro ba chen po bskyed/ /de la theg chen rnam gnyis te/ /pha rol phyin sogs theg chen dang / /theg pa chen po gsang sngags te/ /de don bsdus rgyas shin tu rgyas/ /ngo bo la sogs brjod par bya/ /dad sogs bcas rnams mnyan par gyis/ /gang zhig pha rol phyin 'dod pa/ /cho ga lnga yi rim pa yis/ /lam rnams la ni bgrod bya ste/ /pha rol phyin sogs ldan par ro/ /sems bskyed sdom pa nod pa dang / /de bsrung mtshan nyid shes bya dang / /sems bskyed spyod pa dag pa ste/ /'di ni cho ga lngar 'dod do/ /bsdus pa'i tshigs su bcad pa'o/ /da ni de nyid rgyas par bstan par bya ste/ de yang dang po rigs dang ldan pa'i gang zag gis/ yang dag pa'i dge ba'i bshes gnyen la/ byang chub mchog tu sems bskyed par bya zhing sdom pa nod par bya'o/ / de nas de mi nyams par bsrung ba la 'bad par bya'o/ /de ltar snod du rung ba dang thos pa'i shes rab kyis theg pa chen po shes rab kyi pha rol tu phyin pa la sogs pa mnyan nas/ spang bar bya ba dang / spong byed dang / spang ba'i thabs dang / spangs pa'i 'bras bu la sogs pa'i mtshan nyid shes par bya'o/ /de nas sems bskyed par bya ste/ de yang yan lag rnam pa lnga'o/ /de la yan lag lnga ni/ lam dang lam gyi grogs rgyud la bskyed pa dang / de'i yul dang / spang bar bya ba dang / spong pa'i thabs dang / lam des spangs pa'i 'bras bu'o/ /de la lam ni tshogs kyi lam dang / sbyor ba'i lam dang / mthong ba'i lam dang / bsgom pa'i lam mo/ /lam gyi yan lag ni zhi gnas dang / lhag mthong rnam pa gnyis so/ /yul ni 'jug pa'i yul dang / dmigs pa'i yul rnam pa gnyis so/ /spang bar bya ba ni nyon mongs pa'i sgrib pa dang / shes bya'i sgrib pa'o/ /spang ba'i thabs ni lam gyi rim pa bzhin du bya ste/ spang bya chen po gnyen po chung dus spang la/ spang bya chung ngu gnyen pos spong ba'o/ /spangs pa las 'bras bu rnam pa gnyis 'byung ngo / /spyod pa dag par bya ba ni rnam pa gnyis te/ 'gro ba la sogs pa'i gnas skabs dang / mnyam par ma bzhag pa'i gnas skabs so/ /de ltar rgyas par bstan nas shin tu rgyas par bstan par bya ba'i phyir/ byang chub tu sems bskyed pa'i ngo bo la sogs pa brjod par bya ste/ byang chub tu sems bskyed pa'i yul ni gzhan gyi don no/ /ngo bo yang dag par rdzogs pa'i byang chub 'dod pa'o/ / dbye ba ni rgyas par dbye na nyi shu dang gnyis so/ /bsdu na rnam pa bzhi'o/ /shin tu bsdu na rnam pa gnyis so/ /de la nyi shu rtsa gnyis ni chos thams cad mngon par byang chub 'dod pas/ 'dun pa sa lta bu dang / pha rol tu phyin pa drug gi spyod pa'i mtshan nyid de dus thams cad du mi 'gyur bar 'dod pas na bsam pa gser lta bu dang / byang chub kyi phyogs kyi chos la sogs pa de dag 'phel bar 'dod pas/ lhag pa'i bsam pa zla ba tshes pa lta bu dang / rnam par mi rtog pa'i ye shes mi'i khyad par dang 'dra ba rtogs pas sbyor ba me lta bu dang / sems can tshad med pa'i rgyud tshim par mdzad pas sbyin pa'i pha rol tu phyin pa gter lta bu dang / yon tan rin po che rnams de las 'byung bas na tshul khrims kyi pha rol tu phyin pa rin po che'i 'byung gnas lta bu dang / mi sdug pa'i mtshan ma thams cad kyis mi bskyod pas na bzod pa'i pha rol tu phyin pa rgya mtsho chen po lta bu dang / yang dag pa'i shes pa la brten pa mi phyed pa'i phyir brtson 'grus kyi pha rol tu phyin pa rdo rje lta bu dang / dmigs pa thams cad kyi rnam par g.yeng bas bsgul bar mi nus pas na bsam gtan gyi pha rol tu phyin pa ri bo lta bu dang / sgrib pa gnyis kyi nad rab tu zhi bar mdzad pas na shes rab kyi pha rol tu phyin pa sman lta bu dang / gnas skabs thams cad du sems can thams cad kyi don yongs su mi spong bas thabs kyi pha rol tu phyin pa bla ma lta bu dang / smon lam ji lta bu'i 'bras bus don mdzad pas na smon lam gyi pha rol tu phyin pa yid bzhin gyi nor bu lta bu dang / gdul bya'i skye bo rnams yongs su smin par byed pas na stobs kyi pha rol tu phyin pa nyi ma lta bu dang / gdul bya'i skye bo rnams kyi yid dga' bar byed pa'i chos ston pas na ye shes kyi pha rol tu phyin pa dbyangs snyan pa lta bu dang / mthu thogs pa med pa'i mngon par shes pa dang lhan cig par rtogs pa ni/ /gzhan gyi don lhur mdzad pas na rgyal po chen po lta bu dang / bsod nams dang ye shes kyi tshogs dang lhan cig par rtogs pa ni/ mdzod lta bu dang / byang chub kyi phyogs kyi chos dang lhan cig par rtogs pa ni/ 'phags pa thams cad kyi rjes su 'gro zhing bzhud pas lam chen po lta bu dang / /zhi gnas dang lhag mthong dang lhan cig par rtogs pa ni/ /'khor ba dang mya ngan las 'das par mi ltung bar bde blag tu 'gro bas bzhon pa lta bu dang / /gzungs dang spobs pa dang lhan cig par rtogs pa ni/ bstan pa mtha' yas pa 'dzin cing mi zad pas bkod ma lta bu dang / chos kyi dbyings dang lhan cig par rtogs pa ni/ thar pa 'dod pa rnams kyis thos na dga' ba yin pas sgra brnyan lta bu dang / bgrod pa gcig pa'i lam dang lhan cig par rtogs pa ni/ thams cad kyi rgyu gcig pu yin pa'i phyir/ rang gi ngang gis 'jug pa'i phyir chu bo'i rgyun lta bu dang / chos kyi sku dang lhan cig par rtogs pa ni/ /don gyi bya ba thams cad de la rig las pas sprin lta bu'o/ /de ltar nyi shu rtsa gcig po de nyid bzhir bsdu ste/ de yang 'dun pa la sogs pa gsum ni/ las dang po pa'i gnas skabs te/ chung dang 'bring dang chen pa'o/ /sbyor ba ni nges par 'byed pa'i gnas skabs so/ /sbyin pa la sogs pa bcu ni rgyu'i gnas skabs so/ /mngon par shes pa la sogs pa brgyad kyis ni 'bras bu ste/ de yang dang po lnga ni khyad par gyi lam mo/ /'og ma gsum ni sbyor ba dang / dngos dang mjug gi sgo nas sangs rgyas kyi sas bsdus pa ste/ sems gang gis dang po'i las la mngon par sbyor ba dang / gang gi las rdzogs par byed pa dang / las rdzogs par byas pa las legs par byas pas so zhes bya ba la sogs pa dang go rims bzhin no/ /de dag nyid gnyis su bsdus te/ /dang po gsum ni smon pa'i sems so/ /lhag ma bcu dgu ni 'jug pa'i sems te/ de la smon pa ni don du gnyer ba'i rgyu ste/ /des na 'dir gzhan gyi don gyi phyir sangs rgyas su 'grub par gyur cig ces gsol ba 'debs pa ni smon pa'o/ /'jug pa'i sems ni sdom pa 'dzin pa sngon du 'gro bas sbyin pa la sogs pa nyams su len pa ni 'jug pa'i don yin no/ /de la sdom pa'i sems pa ste/ lnga kun du 'gro ba'i sems pa nyid do/ /de'i mtshan nyid ni bstan du med pa thogs pa med pa'o/ /dbye ba ni thun mong ste/ srog gcod pa spong ba la sogs pa dang / thun mong ma yin pa ste/ gnod sems la sogs pa spong zhing gzhan gyi don la 'bad pa la sogs pa thams cad do/ /sdom pa'i sems pa des lus ngag yid gsum bya ba ma yin pa'i las la mi 'jug pas sdom pa'o/ /sems bskyed cing sdom pa mnod pa yang / bla ma byang chub tu sems bskyed cing / sdom pa la gnas pa mkhas pa nus pa dang ldan pa las blang ngo / /de med na sangs rgyas dang byang chub sems dpa' rnams yid kyis dmigs la blang bar bya'o/ /sems bskyed cing sdom pa nod pa'i cho ga'o/ /de nas bsrung bar bya ste srog gi phyir yang sdom pa nyams par mi bya ste/ bdag nyid shi ba ni bla'i tshe rabs thams cad du sha bsags na ni ri rab pas che la/ khrag bsags na ni rgya mtsho bas mang zhing / rus bsags par gyur na ni rtsi shing bas mang zhing / don med par 'khyams nas tshe 'di'i bar du mi gtsang ba'i phung po sna tshogs pa blangs shing / 'khor ba'i sdug bsngal chen po yang dang yang du nyams su myong bar gyur pas/ /sdom pa ni nyams par mi bya'o/ /sdom pa yang ji ltar bla ma las blangs pa bzhin du bsrung ba la 'bad par bya'o/ /de mi nyams par bsrung ba'i cho ga'o/ /de ltar theg pa chen po'i snod du rung ba de theg pa chen po'i gdams ngag mnyan nas/ theg pa thun mong gi chos dang / thun mong ma yin pa'i chos kyi spang bya la sogs pa'i mtshan nyid thams cad shes par bya ste/ mtshan nyid ma shes par ni bsgrub par mi nus te/ dmus long gis mar la sogs pa bzhin no/ /de bas na thos pa'i shes rab sngon du song bas mtshan nyid shes par bya'o/ /mtshan nyid yongs su shes par bya ba'i cho ga'o/ /de ltar snod du rung zhing mtshan nyid shes par byas pa des sems sbyang ba'i phyir ting nge 'dzin bskyed par bya ste/ thos pa tsam gyis 'grub par mi 'gyur ro/ /de bas na bsgom pa'i shes rab kyis sems sbyang bar bya'o/ /de yang yan lag rnam pa lnga ste/ rigs dang ldan pa'i gang zag gis lam rgyud la bskyed pa dang / de yi yul dang / spang bar bya ba dang / spang ba'i thabs dang / spangs pa'i 'bras bu'o/ /lam rgyud la bskyed pa la yang lam gyi grogs zhi gnas dang / /lhag mthong la bslab pa dang / /de nas lam dngos te thabs dang shes rab la bslab pa'o/ /de la zhi gnas ni dngos po gang yang rung ba cig la nges par bya ste/ sems kyi rgyun gyi skad cig ma de nyid du yang dang yang gtad par bya'o/ /gang gi yul de la sems gnas par gyur pa de'i tshe/ zhi gnas rdzogs pa yin par shes par bya'o/ /lhag mthong ni zhi gnas kyi 'bras bu yin te/ don de nyid la dpyod pa'o/ /lhag mthong gi 'bras bu ni zung du 'brel ba ste/ yul gang la yang mi gnas pas yul de nyid bye brag tu mthong la/ de nyid kyi tshe sems rtse gcig tu gyur pas dmigs pa du ma la rgyug pa rab tu zhi bar gnas pa'o/ /gal te rnal 'byor pa de 'dod chags la sogs pas sems g.yeng bar gyur na 'dod chags kyi gnyen por ni mi sdug pa ste/ mi gtsang ba la sogs pa sgom pa'o/ /de bzhin du zhe sdang gi gnyen por ni byams pa'o/ /gti mug gi gnyen por ni rten cing 'brel par 'byung ba'o/ /nga rgyal gyi gnyen por ni khams kyi rab tu dbye ba'o/ /bying ba'i gnyen por snang ba'i 'du shes dang / sangs rgyas la sogs pa'i yon tan yid la byed pa'o/ /rgod pa'i gnyen por ni mi rtag pa yid la byed pas sngon dgod pa dang rtse zhing dga' ba rjes su dran pa de yang zhi bar bya'o/ /sems der mi dga' bar gyur pa'i tshe ni mi dga' ba'i skyon bsam zhing ting nge 'dzin gyi yon tan la bsams pas de yang zhi bar bya'o/ /bying rgod la sogs pa dang bral nas sems cha mnyam par 'jug cing gnas par gyur pa'i tshe/ /bsgrims pa glod la btang snyoms su bya ste/ sems mnyam par 'jug pa la bsgrims par byas na g.yeng bar 'gyur ro/ /de ltar zhi gnas dang lhag mthong la slob pa'i gang zag des gong nas gong du gyur pa'i las ni mtshan ma med pa'i zhi gnas so sor rtog pa'i shes rab las mtshan ma med pa'i lhag mthong rnam par mi rtog pa'i ye shes skye bar 'gyur ro/ /de yang lam dngos te thabs dang shes rab bsgoms pas so/ /bsgom pa yang rnam par dbye bas lnga ste/ tshogs kyi lam dang / sbyor ba'i lam dang / mthong ba'i lam dang / sgom pa'i lam sa gnyis pa nas bdun pa dang / brgyad pa nas bcu pa ste/ mos pas spyod pa'i sa gsum mo/ /'dir mos pa zhes bya ba'i sgra ni/ bdag dang gzhan gyi don la mos pa dang / brtson pa che thang du byed pas mos pa ste/ sbyor ba'i lam ni ma yin par dgongs so/ /khyad par gyi lam ste/ rdo rje lta bu'i ting nge 'dzin te/ /de la thabs ni sbyin pa la sogs pa'i pha rol tu phyin pa gzhan rnams dang / tshad med pa dang / dge ba'i chos thams cad do/ /shes rab ni thabs de phyin ci ma log par byed pa ste/ chos thams cad skye ba med pa stong pa nyid kyi rang bzhin shes pa'o/ /de la tshogs kyi lam thar pa'i cha dang mthun pa'i skabs su/ lus dran pa nye bar gzhag pa dang / de bzhin du tshor ba dang / sems dang chos dran pa nye bar gzhag pa bzhi bsgom pa ste/ dran pa nye bar gzhag pa bzhi dang / mi dge ba'i chos thams cad skyes pa med par byas pa dang / ma skyes pa mi skyed pa dang / dge ba'i chos ma skyes pa rnams bskyed par bya ba dang / skyes pa rnams 'phel bar bya ste/ yang dag par spongs ba bzhi dang / 'dun pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa dang / de bzhin du brtson 'grus dang / sems dang dpyod pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa bzhi bsgom par bya'o/ /de nas sbyor ba'i lam nges par 'byed pa'i skabs su dbang po lnga dang / stobs lnga ste/ de yang drod dang rtse mo'i dus su dad pa dang / brtson 'grus dang / dran pa dang / ting nge 'dzin dang / shes rab kyi dbang po ste lnga'o/ /de'i 'og tu bzod pa dang / chos kyi mchog gi dus su dad pa la sogs pa de nyid stobs dang ldan par 'gyur ba la stobs zhes bya ste/ dad pa'i stobs la sogs pa bsgom par bya'o/ /de'i 'og tu mthong ba'i lam ste/ byang chub kyi yan lag gis phye ba'o/ /de yang dran pa yang dag byang chub kyi yan lag dang / de bzhin du chos rnam par 'byed pa dang / brtson 'grus dang / dga' ba dang / shin tu sbyangs pa dang / ting nge 'dzin dang / btang snyoms yang dag byang chub kyi yan lag ste/ de la sdug bsngal gyi bden pa dang / kun 'byung gi bden pa dang / 'gog pa'i bden pa dang / lam gyi bden pa ste/ bden pa rnam pa bzhi chos bcu drug tu dmigs pa med par bsgoms pas shes bzod bcu drug tu rtogs nas mthong ba'i lam thob pa'o/ /de'i 'og tu bsgom pa'i lam ste/ lam gyi yan lag rnams so/ /de yang yang dag pa'i lta ba dang / de bzhin du yang dag pa'i rtog pa dang / ngag dang las kyi mtha' dang / 'tsho ba dang rtsol ba dang dran pa dang yang dag pa'i ting nge 'dzin te/ bsgom pa'i lam sa gnyis nas bcu pa'i bar du rtogs pa'o/ /de dag kyang kun rdzob sgyu ma tsam du spyod pa ni thabs so/ /don dam par de dag kyang rang bzhin med par bsgom pa ni shes rab po/ /de bar chad med pa'i lam rdo rje lta bu'i ting nge 'dzin zhes kyang bya/ ming gi rnam grangs gzhan yang kun du bzang po zhes bya ba la sogs pa skyed par byed pa'o/ /lam zhes bya ba'i ngo bo ni yid kyi rnam par shes pa sems las byung ba dang bcas pa ste/ de yang shes rab la sogs pa'o/ /'phags pa thams cad gshegs pa'am/ yang na 'phags pa'i sar phyin par byed pa'i phyir lam zhes bya'o/ /de la dran pa nye bar gzhag pa ni shes rab kyi rang bzhin no/ /'di dag gis dran pa nye bar gnas pas dran pa nye bar gzhag pa'o/ /yang dag par spong ba ni brtson 'grus kyi rang bzhin no/ /mi mthun pa'i phyogs yang dag par spong ba ste/ 'dis nang gi sems yang dag par 'jog pas na yang dag par spong ba ste/ spang bya'i ming spong byed la'o/ /rdzu 'phrul gyi rkang pa ni ting nge 'dzin gyi rang bzhin no/ /rdzu 'phrul gyi rgyur gyur pas rdzu 'phrul gyi rkang pa ste/ mngon par shes pa la sogs pa'i rgyu zhes bya'o/ /nges par 'byed pa'i cha dang mthun pa rnams ni ting nge 'dzin dang shes rab mtshungs par ldan pa'i rang bzhin no/ /thar pa'i cha dang mthun pa'i dge ba'i rtsa ba bskyed pa la dbang byed pas dbang po'o/ /mi mthun pa'i phyogs bsrabs pa'i phyir de dag nyid stobs so/ /de la mi mthun pa'i phyogs ni ma dad pa dang / le lo dang / brjed ngas pa dang / rnam par g.yeng ba dang / shes bzhin med pa rnams so/ /dbang po'i skabs ni ma bsrabs pas 'dre'o/ /'di ni 'dre ba med pa'o/ /de yang dad pa la sogs pa ni gsum ste/ chung ngu dang / 'bring po dang / chen po'o/ /de yang chung ngu ni drod kyi gnas skabs so/ /'bring po'i rtse mo'i dus so/ /chen po yang bzhir dbye ste/ chung ngu dang / 'bring po dang / chen po'i bzod pa chung ngu dang / 'bring dang / chen po dang / go rims su sbyar ro/ /shin tu yang chen po ni 'jig rten chos kyi mchog go/ /de la dro bar gyur pa ni/ dper na gtsub shing gtsubs pa las thog mar me'i mtshan ma dro ba 'byung ngo / /de bzhin du 'phags pa'i me lta bu skye ba'i dang po yin pas dro ba zhes bya ste/ dpe'i sgo nas so/ /dge ba'i rtsa brgya chen po g.yo ba'i rtse mor phyin pas rtse mo'o/ /bden pa'i don la bzod pas bzod pa'o/ /zag pa dang bcas pas 'jig rten no/ /zag pa dang bcas pa gzhan pas mchog tu gyur pas mchog ste/ de ma thag tu mthong ba'i lam skye bas so/ /mthong ba'i lam ni ma dmigs pa'i ting nge 'dzin la sogs pa byang chub kyi yan lag dang mtshungs pa nyid rang bzhin te/ de yang rnam par grol ba ni byang chub po/ /chos rnam par 'byed pa ni byang chub kyi yan lag ste/ bar chad med pa'i lam du gtogs pa'o/ /dran pa la sogs pa drug ni byang chub dang mthun pa'i phyir byang chub kyi yan lag go/ /de la dran pa ni gnas kyi yan lag chos rnam par 'byed pa ni rang bzhin gyi yan lag /brtson 'grus ni nges par 'byung ba'i yan lag /dga' ba ni phan yon gyi yan lag /shin tu sbyangs pa ni nyon mongs pa med pa'i gzhi'i yan lag / ting nge 'dzin ni nyon mongs pa med pa'i gnas kyi yan lag /btang snyoms ni nyon mongs pa med pa'i ngo bo'i yan lag ste/ go rims bzhin du ste/ dmigs pa de las mi g.yeng ba'i phyir dang / byang chub ni shes pa rnam par grol ba'i ngo bo nyid yin pa'i phyir dang / so so'i skye bo'i sa las 'da' ba'i phyir dang / lus dang sems la phan 'dogs pa'i phyir dang / kun nas nyon mongs pa'i gzhi'i gnyen por gyur pa'i phyir dang / sems mnyam par bzhag na yang dag pa ji lta ba bzhin shes pa nyon mongs pa spong ba'i phyir dang / bying ba dang rgod pa'i gnyen po ste/ sems mnyam pa dang / rnal du 'jug pa dang / lhun gyis grub pa'i phyir ro/ /de la mthong ba'i lam skad cig ma bcu drug ste/ yon tan gyi sgo nas so/ /skad cig ma bzhi ste chos tsam gyis so/ /skad cig ma gcig ste ngo bo nyid kyi sgo nas so/ /de la skad cig ma bcu drug ni/ sdug bsngal dang / kun 'byung dang / 'gog pa dang lam rnams la chos shes pa'i bzod pa dang / chos shes pa dang / rjes su shes pa'i bzod pa dang / rjes su chos shes pa ste/ bzhi bzhir byas pas bcu drug go/ /de yang sdug bsngal gyi chos ni mi rtag pa la sogs pa'o/ kun 'byung gi chos ni rgyu la sogs pa'o/ /'gog pa ni zhi ba la sogs pa'o/ /lam ni rigs pa la sogs pa ste/ de dag la rtag pa dang / mi rtag pa dang / sdug bsngal ba dang / sdug bsngal yang ma yin pa dang / stong pa dang / mi stong pa dang / bdag dang bdag med pa mi dmigs pa dang / de bzhin du kun 'byung ba dang / kun 'byung ba ma yin pa la sogs pa mi dmigs pa'i rnam par shes shing bzod pas so/ /chos shes pa ni bdag gis spang bya spangs nas thob bya thob snyam ste/ rnam par grol ba mngon du byed pa'o/ /rjes kyi bzod shes gnyis kyis ni ji ltar na yul mi dmigs pa bzhin du/ de la mi dmigs pa'i shes pa yang de bzhin du shes shing bzod pa dang / shes pa de nges par 'dzin pa ste/ bden par rtogs pa'o/ /mdor na dang po gnyis ni yul la dmigs pa'i sgo nas yul mi dmigs pa'i rnam par mthong ba dang de nges par 'dzin pa'o/ / rjes kyi gnyis kyis ni yul ji lta ba'i rjes su yul can yang de bzhin du rtogs pa dang / de nges par 'dzin pa'o/ /mthong ba'i lam skad cig ma bzhi ni/ dag pa dang / dag pa brtan pa dang / grol ba dang / grol ba 'dzin pa ste/ shes bzod bzhi dang go rims bzhin no/ /gcig ni chos kyi mchog gi skad cig ma gcig la mthong ba'i lam mngon du gyur pa'o/ /spyir sbyor ba dang / mnyam par gzhag pa dang / rjes kyi shes pa'am/ ye shes zhes gsum du shes par bya'o/ /sngon du de kho na nyid ma mthong ba gzod mthong bas so/ /nges par 'byed pa'i gnas skabs na ni dar las chod pa lta bur bden pa rnams rtogs so/ /mthong ba'i lam gyis ni de bsal ba lta bur rtogs so/ /bsgom pa'i lam gyis ni mi dmigs pa'i ting nge 'dzin yang dag pa'i lta ba la sogs pa dang mtshungs par bcas pa'o/ /bsgom pa'i lam chung ngu dang / 'bring po dang chen po'i dbye bas rnam pa dgu'o/ /de yang yang dag pa'i lta bas ni mthong ba'i lam gyis rtogs pa'i don bdag gis 'di lta bu rtogs so zhes dpyod cing / mthong ba'i lam la lta bas yang dag par lta ba'o/ /yang dag pa'i rtog pa ni ji ltar rtogs pa bzhin du rnam par 'jog pa ste/ yang dag pa'i ngag kun nas slong bas gzhan la rtogs pa'i don de nyid ston pa'o/ /las kyi mtha' la sogs pas ni srog gi phyir yang bya ba ma yin pa mi byed pas/ tshul khrims rnam par dag pa dang / gos la sogs pa rigs pa dang / tshod zin par tshol ba dang / mi mthun pa'i gnyen por lam bsgom pa dang / dran pa shin tu nye bar gnas pa dang / bying rgod med pa dang / mngon par shes pa la sogs pa yon tan gyi rang bzhin gyi mi mthun pa'i phyogs spang ba ste/ go rims bzhin no/ /mthong ba'i don nyid gong nas gong du bsgom pa'o/ /khyad par gyi lam ni spyir kun du yang brtsi bar bya ste/ de yang sbyor ba'i lam dang bar chad med pa'i lam dang / khyad par gyi lam ste bzhi'o/ /de la gang gis nyon mongs pa spang bar sbyor ba dang / spang ba la bar chad med pa dang / spangs nas rnam par grol ba mngon du byed pa dang / de nyid sngon pas khyad par du gyur pa yin pa ste go rims bzhin no/ /'on kyang 'di ni rdo rje lta bu'i ting nge 'dzin gyi skabs mos pas spyod pa'i sa bzhi pa dang sbyar bar bya'o/ /yul ni rnam pa gnyis te/ 'jug pa'i yul dang / dmigs pa'i yul lo/ /de la 'jug pa'i yul ni ston pa'i byung tshul la spyod pa'o/ /dmigs pa'i yul yang rnam pa gnyis te/ thun mong ste bden pa bzhi dang / thun mong ma yin pa ni gnyis te/ mtshan ma can dang / de bzhin nyid kyi ngo bo'o/ /spang bar bya ba ni/ nyon mongs pa can ma yin pa'i mi shes pa dang / nyon mongs pa mang ba'o/ / de yang sngar ni spang bya chen po la sogs pa gnyen po chung ngu la sogs pas rim pa bzhin du spangs nas/ tha mar rdo rje lta bu'i ting nge 'dzin gyis phra mo'i yang phra mo spang ba ste ming gi dbye ba med do/ /gnyis pa ni ming gi dbye ba yang yod la/ gnas skabs kyis spang bar bya ba yang yod de/ de yang dran pa nye bar gzhag pas ni log par lta ba ste/ gtsang ba dang / rtag pa dang yod pa ste/ bdag dang bde bar lta ba la sogs pa spang ngo / /yang dag par spang bas le lo spang ngo / /rdzu 'phrul gyi rkang pas ni nyes pa lnga spong ste/ le lo dang / brjed ngas pa dang / bying rgod dang / skyon byung ba'i tshe mngon par 'du mi byed pa dang / skyon med pa'i tshe mngon par 'du byed pa ste/ skyon ni bying rgod gnyis so/ /de spong ba'i gnyen po ni brgyad de/ le lo'i gnyen po ni brtson 'grus so/ /de'i gnas ni 'dun pa'o/ /'dun pa'i rgyu ni dad pa'o/ /brtson 'grus kyi 'bras bu ni shin tu sbyangs pa ste/ yid ches pas ni 'dod pa skye la/ 'dod pas ni brtson 'grus brtsams la/ brtson 'grus kyis ting nge 'dzin khyad par can brtsams pas ni/ lus dang sems gnyis las su rung ba ste/ de ltar bzhi'o/ /dran pa ni brjed ngas pa'o/ /shes bzhin ni bying rgod kyi'o/ /sems pa ni 'du mi byed pa'i'o/ /btang snyoms ni 'du byed pa'i'o/ /de yang dran pa nye bar gnas pas shes bzhin dang ldan la/ de sems mngon par 'du byed cing nyes pa med nas btang snyoms su gnas pa ste go rims bzhin no/ /dbang po dang stobs kyis ni ma dad pa la sogs pa lnga'o/ /mthong ba'i lam la sdug bsngal ba dang / kun 'byung dang / 'gog pa dang / lam gyi bden pas 'dod khams na spang bya bcu bcu yod pas bzhi bcu'o/ /de bzhin khams gong ma gnyis na/ khong khro ba med pas dgu dgu ste bdun cu rtsa gnyis te spyir brgya rtsa bcu gnyis spong ngo / /bsgom pa'i lam gyis ni 'dod khams na 'jig tshogs la lta ba dang / mthar 'dzin par lta ba lhan cig skyes pa dang / 'dod chags dang / khong khro ba dang / nga rgyal dang / ma rig pa dang drug spong ngo / /de ltar khams gong ma gnyis na khong khro ma gtogs pa lnga lnga ste bcu spong ngo / /de ltar mdor bsdu na bsgom pas spang bar bya ba ni nyon mongs pa bcu drug go/ /spang ba'i thabs ni gong du bstan pa'i lam des rim pa bzhin du spong ste/ lhan cig tu mi gnas pa'i 'gal ba snang ba dang mun pa'i tshul du gnyen po chung dus spang bya chen po spong zhing / gnyen po chen pos spang bya chung ngu spang ba'o/ /spangs pa'i 'bras bu ni/ de ltar rdo rje lta bu'i ting nge 'dzin gyis bag chags cha phra mo spangs pa'i skad cig ma gnyis pa la ni sangs rgyas zhes bya'o/ /de nas skad cig ma gsum pa la yang dag par rdzogs pa'i sangs rgyas zhes bya ste/ chos kyi sku yon tan thams cad ni rdzogs pa nus pa thams cad dang ldan par 'gyur ro/ /de las sngon gyi smon lam dang thugs rjes gzugs sku rnam pa gnyis su byung / de yang 'og min gyi gnas stug po bkod pa'i zhing khams na/ longs spyod rdzogs pa'i sku bstan pa dang / sprul pa'i sku ci la cis 'dul ba bzhin du rnam pa sna tshogs pa'i sku bstan pa ste/ de la snga ma ni 'khor nye ba la dgongs pa'o/ /phyi ma ni ring ba la dgongs pa'o/ /spyod pa dag par bya ba ni gnyis te/ 'gro ba la sogs pa'i dus su dran pa bzhin du 'gro ba la sogs pa dang / gnas skabs su bya ba'i cho ga la phyag 'tshal ba la sogs pa dang / bskor ba bya ba dang / maN+Dal la sogs pa bya ba'o/ /theg pa chen po lam gyi rim pa las/ pha rol tu phyin pa'i lam gyi rim pa'i le'ur phye ba ste dang po'o/ / //pha rol phyin pa'i theg pa yi/ /lam gyi rim pa bstan byas nas/ /gsang sngags theg pa'i lam gyi ni/ /rim pa yang dag bshad par bya/ /de la theg chen gsang sngags ni/ /khyad par gyur phyir khyad par te/ /thabs mang dka' ba med pa dang / /dbang po rnon po mchog gyur dang / /don gcig phyir na'ang ma rmongs pas/ /sngags kyi bstan bcos khyad par 'phags/ /de phyir dam tshig sogs ldan gzhug /dam tshig mi ldan spang bar bya/ /dam tshig dang ldan bzlog pa ni/ /mkha' 'gro ma yis 'tshe ba dang / /dus ma yin par 'chi ba dang / /shi nas dmyal bar 'gro ba'o/ /dam tshig mi ldan bcug pa yang / /tshul de nyid du shes par bya/ /theg chen sngags kyi spyod pa la/ /skyon 'dogs smod par byed pa ni/ /mkha' 'gro ma yis myur du gsod/ /de nas dmyal bar skye bar 'gyur/ /de bas zab mo'i spyod pa la/ /skyon 'dogs smod pa spang bya ste/ /skal pa dang ldan gang zag gis/ /bla ma dam par gyur pa la/ /sems bskyed sdom blang dbang nod cing / /de nyid bsrung dang mtshan nyid shes/ /sems sbyang spyod pa dag pa dang / /cho ga lnga yi mtshan nyid de/ /theg pa dman la'ang yod pa ste/ /skabs ma yin pas 'di mi brjod/ /bsdus pa'i tshigs su bcad pa'o/ /da ni de nyid rgyas par bstan par bya ste/ /de yang dang por skal ba dang ldan pa'i gang zag gis/ bla ma dam pa theg pa mtha' dag gi grub pa'i mtha' la ma rmongs shing / rgyud kyi dgongs pa shes pa dang / /dkyil 'khor gyi cho ga la sogs pa la mkhas shing / snying rje chen po dang ldan pa bla ma'i bka' thob pa la tshogs kyi dga' ston bya ste/ yon phul nas gsol ba gdab par bya'o/ /de ltar gsol ba btab pa dang / bla mas kyang bsnyen pa dang / sa'i cho ga dang / lhag par gnas pa'i cho ga dang / dkyil 'khor gyi cho ga rgyas pa dang / 'jug pa dang / dbang bskur ba dang / yon blang bar bya'o/ /de nas srung ba la 'bad par bya ste/ bsrungs pa'i yon tan dang / ma bsrungs pa'i skyon ni gzhan las gsal bas bdag gis brjod do/ /de ltar snod du rung ba dang / bla ma dam pa las sngags kyi mtshan nyid shes par bya'o/ /de shes nas sems sbyang bar bya ste/ sems ma sbyangs par ni byang chub mi 'grub la/ de ma grub par ni gzhan gyi don mi 'grub pas sems sbyang bar bya'o/ /de yang yan lag rnam pa lnga ste/ lam rgyud la bskyed pa dang / de'i yul dang / spang bar bya ba dang / spang ba'i thabs dang / spangs pa'i 'bras bu'o/ /de la lam la rnam pa gsum ste/ /lam dngos dang / de'i grogs dang / nye ba'i grogs so/ /de la lam dngos ni bya ba'i rgyud dang / spyod pa'i rgyud dang / rnal 'byor gyi rgyud kyis ni mtshan ma dang bcas pa'i sgrub pa'i thabs dang mtshan ma med pa'i sgrub pa'i thabs zhes bya bar gsungs so/ /rnal 'byor chen pos ni bskyed pa'i rim pa dang / rdzogs pa'i rim pa zhes bya ste/ de nyid ni lam mo/ /grogs ni lnga ste/ bdag dang gzhan gyi bar chad nye bar zhi bar bya ba'i phyir gtor ma'i cho ga dang / lha tshim zhing bgegs la sogs pa zhi bar bya ba la sogs pa'i phyir sbyin sreg gi cho ga dang / dngos grub myur zhing lha la sogs pa khyad par du bya ba'i phyir rab gnas kyi cho ga dang / bsod nams khyad par can bsags pa'i phyir tsha tsha'i cho ga dang / bag chags sbyang ba dang / dbang bskur ba'i phyir bum pa'i cho ga bya'o/ /nye ba'i grogs kyang lnga ste/ sgrub pa'i gnas dang / shis pa'i dus dang / mtshan dang ldan pa'i grogs dang / gzhung dang mthun pa'i rdzas dang / chos dang mthun pa'i 'tsho ba'i yo byad dang lnga'o/ /rdzas la gsum ste/ mchod rdzas dang / sngags rdzas dang / sgrub rdzas so/ /yul ni rnam pa gnyis te/ 'jug pa'i yul dang / dmigs pa'i yul lo/ /de la 'jug pa'i yul ni pha rol tu phyin pa dang mthun no/ /dmigs pa'i yul ni rnam pa gnyis te/ yi ge la sogs pa mtshan ma can dang / mtshan ma med pa ste/ stong pa nyid kyi rang bzhin la dmigs pa med pa'i tshul gyis dmigs pa'o/ /spang bar bya ba ni rnam pa gnyis te/ ngan rtog dang / bzang rtog go/ /spang ba'i thabs ni ngan rtog ni bzang rtog gis spong la/ bzang rtog ni mi rtog pas spang bar bya'o/ /spangs pa'i 'bras bu ni gnyis te/ thun mong dang / thun mong ma yin pa'o/ /de la thun mong ba ni mngon par shes pa la sogs so/ /thun mong ma yin pa la gnyis te/ mthar thug ste sku gsum dang mthar thug ma yin pa ste/ phyag rgya chen po'i dngos grub ste/ mthong ba'i lam skyes pa'o/ /spyod pa ni gnyis te/ 'gro ba la sogs pa'i dus su lha'i rnam par bya ba dang / gnas skabs su bya ba'o/ /lha'i rnam par bya ba la yang lhag pa'i lha'am/ rigs gsum mam/ lnga'am/ gzugs kyi rdo rje ma la sogs par bya ba'o/ /gnas skabs su bya ba ni/ khrus byas nas phyag 'tshal ba la sogs pa dang / bskor ba dang / maN+Dal dbul ba dang / yi dam bklags pa la sogs pa bya ba'o/ /de ltar rgyas par bshad nas shin tu rgyas par bya ba'i phyir/ cho ga'i rim pa dang / don gyi rim pa dang / dgos pa'i rim pa dang / ngo bo dang / nges tshig dang / dbye ba la sogs pa bshad par bya ste/ de yang dang por bla ma dam pa las sdom pa la sogs pa thob pa des bsrung ba la 'bad cing / gdams ngag mnyan par bya'o/ /de nas gnas yid du 'ong bar grogs chos dang mthun pa'am/ bdag nyid gcig pu dus tshigs bzang po la 'dug la/ gtor ma bya ba dang / sAts+tsha gdab pa dang / sbyin sreg dang / yi dam bklag par yang bya'o/ /de nas khrus byas nas/ maN+Dal byas la me tog bkram nas srung ba'i 'khor lo bsgom par bya'o/ /de nas snying rje bsgom par bya'o/ /sems can thams cad sdug bsngal dang bral bar 'dod pa'o/ /de nas byams pa ste/ sems can thams cad bde ba dang ldan par 'dod pa'o/ /de nas dga' ba ste/ bdag gis byang chub chen po thob par byas la/ sems can gyi don bya'o zhes spro bar bya'o/ /de nas btang snyoms te/ de gsum mi dmigs par bsgom pa'o/ /de yang snying rje ni rtsa ba lta bu'o/ /byams pa ni sdong bu lta bu'o/ /dga' ba ni yal ga lta bu'o/ /tshogs gnyis ni lo ma lta bu'o/ /rnal 'byor gzhan rnams ni me tog lta bu'o/ /rnal 'byor pa rgyud yongs su smin pa ni 'bras bu lta bu ste/ rtsa ba med par sdong bu la sogs pa mi 'byung ba dang 'dra bar snying rje med par byams pa la sogs pa mi 'byung ngo / /de nas lha dang bla ma sprul pa la phyag 'tshal ba la sogs pa bya ste/ bsod nams kyi tshogs so/ /de nas stong pa nyid kyi sngags brjod pa'i sgo nas stong pa nyid kyi rang bzhin mngon du bya ba ste/ ye shes kyi tshogs so/ /de nas so so'i gzhung bzhin du bdag dam tshig sems dpar bskyed pa dang / mdun du dam tshig sems dpa' sprul pa dang / ye shes sems dpa' spyan drangs pa la sogs pa byas nas/ mchod pa dang bstod pa byas la/ yi ge'am/ phyag mtshan nam/ sku'am thig le'am/ phra mo'am/ spro bsdu la sogs pa la dmigs nas bsgom par bya'o/ / skyo bar gyur na ngag gis bzlas pa bya'o/ /shin tu skyo bar gyur na lha mo la sogs pas mchod pa la sogs pa byas nas spyan drangs pa rnams gshegs su gsol bar bya'o/ /sprul pa rnams ni bsdu bar bya'o/ /yang na bdag nyid lhar bskyed la 'khor gyi dkyil 'khor sprul nas mar me'i 'od gyes pa'i tshul du gnyis su byas la/ gcig dkyil 'khor gyi gtso bor snang la/ gcig las kyi lhar byas la mchod pa la sogs pa de bzhin du thams cad bya'o/ /yang na bdag lhar byas nas ye shes sems dpa' spyan drang ba la sogs pa bdag nyid la byas la/ bdag gi snying ga nas lha mo sprul pa'am/ 'khor gyi lha mos bdag la mchod bstod byas nas/ yang bdag gi snying ga'am/ sku la bsdus la gong du bstan pa ltar bya'o/ /bzlas pa'i dus su thabs ni/ mgal me bskor ba lta bu'am/ thag mdung 'phen pa lta bu'am/ sgo'i chun po lta bu'am/ thi gu bsgril ba lta bu'am/ lcags sgrog sbrel ba lta bu bya ste/ skabs kyi stobs kyis shes par bya'o/ /de ltar bsgoms pa las mtshan ma brtan po 'byung bar 'gyur ro/ /mtshan ma thob nas mtshan ma med pa bsgom par bya'o/ /mtshan ma med pa mngon du gyur pa la ni phyag rgya chen po'i dngos grub ces bya'o/ /de yan chad lam gyi thun mong ste gnyis su med do/ /cho ga'i rim pa'o/ /don gyi rim pa ni de bzhin gshegs pas tshad med pa bsgoms pa dang / tshogs gnyis bsags pa dang / bdud thams cad 'dul ba dang / thams cad la ma chags pa dang / snga phyir byang chub tu sems bskyed pa dang / thos pa'i shes rab dang / bsams pa'i shes rab dang / bsgoms pa'i shes rab mthar phyin pa rnams byin gyis brlabs nas/ go rims bzhin du tshad med pa dang / tshogs gnyis dang / srung ba'i 'khor lo dang / pad+ma dang / zla ba dang / yi ge dang / phyag mtshan dang / skur gyur pa bstan to/ /yang de bzhin gshegs pas tshogs kyi lam dang / sbyor ba'i lam dang / mthong ba'i lam dang / bsgom pa'i lam dang / mi slob pa'i lam dang / gzhan gyi don du gzugs rnam pa gnyis byung ba de nyid byin gyis brlabs nas rim pa bzhin du bsod nams kyi tshogs bsags pa dang / ye shes kyi tshogs bsags pa dang / yi ge'am/ zla ba tshes pa'am/ zla ba rgyas pa'am/ yi ge'i 'phro 'du'am/ zla ba'am/ zla ba gnyis pa dang / phyag mtshan dang / sku dag tu bstan to/ /de bzhin gshegs pa'i 'du ba mdzad pa ni spro ba dang / bsdu ba dang / byin gyis brlab par bstan to/ /don gyi rim pa'o/ /dgos pa'i rim pa ni/ dang por de bzhin gshegs pas bden pa gnyis lam bzhir bsgoms shing / tshogs bsags pas sku gsum thob pa de bzhin du/ de ltar rnal 'byor pas thun gcig la bsgoms pas kyang tshul de bzhin du snang la/ goms pa las phyis de bzhin du 'grub par 'gyur te/ de bas na thabs khyad par can 'bras bu lam du gyur pa zhes bya'o/ /dgos pa'i rim pa'o/ / da ni sngags la sogs pa'i rang gi ngo bo la sogs pa brjod par bya ste/ de la ngo bo ni thams cad kyi mthun par thabs dang shes rab gnyis so/ /gzhan du ni bden pa gnyis kyi ming can no/ /de la thabs ni kun rdzob sgyu ma tsam du snang ba'o/ /shes rab ni don dam par skye ba med pa ste/ stong pa nyid kyi rang bzhin no/ /gzhan dag gi ngo bo la sogs pa brjod pa ni/ don gyi phyogs re tsam gzung ba ste/ bdag gis ni khyab pa spyir btang ba'o/ /nges pa'i tshig ni skyob pa'i phyir na sngags te/ yid skyob par byed pa'i don to/ /dbye na rnam pa gnyis te/ don dam pa'i sngags dang / kun rdzob kyi sngags so/ /de la don dam pa'i sngags ni gnyis su med pa'i rang bzhin stong pa chen po'i ye shes dang / de yul du byed pa'i ye shes te/ de nges par rtogs pas 'khor ba las skyob pa'i phyir ro/ /de la ngo bo'i dbang du byas na dbye ba med do/ /yul can gyi dbang du dbye ba yod de/ rnal 'byor pa'i shes pa'i dbye bas gzhag go/ /yul can gyi sgo nas dbye na de yang rnam pa gnyis te/ gzungs sngags dang / rig sngags so/ /gzungs la bzhi ste/ bzod pa thob pa'i rgyur gyur pa'i gzungs dang / gsang sngags kyi gzungs dang / chos kyi gzungs dang / don gyi gzungs so/ /de la bzod pa'i gzungs ni/ bskyed pa'i rim pa mthar phyin pa'i rnal 'byor pa'am/ mtshan ma dang bcas pa'i rnal 'byor mthar phyin pas rdzogs pa'i rim pa'am/ mtshan ma med pa'i rnal 'byor gyi skabs su yi ge a la sogs pa de dag brjod bya dang / rjod byed rang bzhin med par sems so/ /de ltar des rang bzhin med pa de rtogs pa la ni dga' ba dang / mchog tu dga' ba chen po skyes te gzungs thob pa zhes bya'o/ /dran pa dang shes rab gcig tu byas pas bzod pa 'dzin par byed pas na gzungs zhes bya'o/ / gzungs thob pa des de ma thag tu phyag rgya chen po'i ye shes skye ba dang mthun pa'i bzod pa chen po skye ste/ don dam pa'i chos rnams la bzod pas na bzod pa'o/ /bzod pa de skyes nas ring po mi thogs par phyag rgya chen po'i ye shes 'thob par 'gyur ro/ /de bas na gzungs de ni rdzogs pa'i rim pa'am/ mtshan ma med pa bsgom pa'i skabs so/ /pha rol tu phyin pa'i gzhung ltar na nges par 'byed pa'i skabs so/ /bskyed pa'i rim pa'am mtshan ma dang bcas pa'i rnal 'byor ni thar pa'i cha dang mthun pa'o/ /gzungs gsum ni phyag rgya chen po thob pa yan chad du 'thob pa'o/ /de yang phyag rgya chen po thob pa de yan chad des ting nge 'dzin dang / sngon gyi smon lam gyi stobs bskyed pas gsang sngags kyi tshig de dag gis sems can thams cad kyi nad la sogs pa med par gyur cig ces ting nge 'dzin gyi dbang gi stobs kyis sems can rnams kyi yams kyi nad la sogs pa med cing byin gyis brlabs pa ltar 'grub par 'gyur ro/ /de bas na ting nge 'dzin gyi dbang de ltar gyur pas gsang sngags rnams 'dzin par byed pas na gsang sngags kyi gzungs zhes bya'o/ /gsang zhes bya ba ni snod ma yin pa la thabs de gsang ba'i phyir ram/ rtogs par dka' ba'i phyir gsang ba'o/ /chos kyi gzungs ni phyag rgya chen po thob pa'am/ pha rol tu phyin pa'i ltar na sa dang po thob pa yan chad kyis sangs rgyas dang byang chub sems dpa' 'am/ mkha' 'gro ma la chos nyan pas sngon ma thos shing mi shes pa'i chos tshad med pa grangs med pa dpag tu med pa thos pa tsam gyis mi brjed par 'dzin pa'i dran pa dang / shes rab ni chos kyi gzungs zhes bya'o/ /don gyi gzungs ni de bzhin du gsungs pa'i chos de dag gi don gang dang gang yin pa de dag mi brjed par 'dzin pa'i dran pa dang shes rab ni don gyi gzungs so zhes bya'o/ /de la rig sngags ni stong pa chen po'i ye shes des yul du byas shing rtogs pas ma rig pa spong zhing rig pa skyed pa'i phyir rig sngags zhes bya'o/ /yang na stong pa chen po'i ye shes de nyid la gzungs zhes bya ste/ gnod pa'i 'tshe ba thams cad nub pas na mi bzod pa med pas bzod pa dang / de rnam par mi rtog pa'i ye shes ma rtogs pa rtog pa can gyi yul ma yin pas gsang ba dang / tshig dang yi ge dang ming du brjod pa thams cad de rtogs pa las byung ba'i phyir chos dang / bzod pa thams cad kyi don shes par bya ba'i don gyi ngo bo de yin pa'i phyir don zhes bya'o/ /gzungs ni 'dzin pa'i phyir zhes bya ste/ thams cad mkhyen pa'i sangs rgyas bcom ldan 'das man chad nas/ dmyal ba'i sems can yan chad kun des khyab cing 'dzin pas so/ /yang na dran pa dang shes rab gnyis kyis 'dzin cing mi brjed par bya bas na gzungs so/ /de bas na yul de ltar grub pas yul can la yang grub la/ de rtogs pa'i thabs la yang grub pa de ston par byed pa'i tshig la grub ste/ gcig gi ming gcig la btags pa'o/ /kun rdzob kyi sngags ni de thob pa'i thabs te/ de yang sngags kyi gzungs dang / sngags kyi ming dang / brda dang / tshig la sogs pa thams cad do/ /rgyud ces bya ba ni 'brel ba'i phyir rgyud de/ de yang gzhi dang / thabs dang / 'bras bu rnam pa gsum 'brel pa'i phyir ro/ /dbye ba rnam pa gnyis te/ tshig gi rgyud dang / don gyi rgyud do/ /tshig ni sgra'o/ /don la rnam pa gsum ste/ gzhi'i rgyud dang / thabs kyi rgyud dang / 'bras bu'i rgyud do/ /de la gzhi'i rgyud ni bden pa gnyis kyi rang bzhin du gnas pa'o/ /thabs ni sgrub pa'i rim pa gnyis so/ /'bras bu ni sku gnyis te/ chos kyi sku dang / gzugs kyi sku'o/ /de bas na gzhi la brten nas thabs bsgoms/ /'bras bu thob pas na 'brel pa'i phyir rgyud ces de la bya'o/ /bskyed pa ni zla ba la sogs pa bskyed pas na bskyed pa'o/ /gzhan ni rim pa'o/ /rdzogs pa ni stong pa chen po'i ye shes te/ de ni thabs la rdzogs par yod pa'am/ yang na de rdzogs pas yon tan rdzogs pa'i phyir rdzogs pa'o/ /gzhan ni rim pa'o/ /ma chags par gtong bas ni gtor ma'o/ /rtog pa la sogs pa sreg cing gang 'dod pa'i don sbyin pas na sbyin sreg go/ /mchod pa'i yul du gyur pas na sAts+tsha'o/ /khyad par du gyur pas na rab tu gnas pa'o/ /yon tan thams cad 'dus pas na dgos pa byed pa'i phyir bum pa'o/ /dga' bar byed pas na mchod pa'o/ /yon tan brjod pas na bstod pa'o/ /gtor ma ni gnyis te/ 'byung po spyi'i gtor ma dang / so so'i gtor ma'o/ /sbyin sreg la yang gnyis te/ don dam pa'i sbyin sreg mi rtog pa bsgom pa dang / kun rdzob kyi sbyin sreg go/ /de la rnam pa gnyis te/ nang gi dang phyi'i'o/ /nang gi ni kha thab khung du bsam pa la sogs pa de nyid do/ /phyi'i sbyin sreg la yang gnyis te/ las thams cad pa'i sbyin sreg dang / las so so'i sbyin sreg go/ /so so'i sbyin sreg ni mos pa dang / rigs dang / las dang dbang du byas pas ci rigs su brtsi bar bya'o/ /sAts+tsha yang rnam pa gnyis te/ cho ga rgyas pa dang / 'phral du bya ba'o/ /rab tu gnas pa ni rnam pa gsum ste/ de bzhin gshegs pa'i sku'am rten rab gnas bya ba dang / glegs bam rab tu gnas par bya ba dang / rdo rje la sogs pa rab tu gnas pa'o/ /bum pa la gnyis te/ gnas skabs su bya ba dang / dkyil 'khor bzhengs pa'i dus su bya ba'o/ /dkyil 'khor byed pa'i dus su ni bum pa gsum ste/ dbang gi bum pa dang / khrus kyi bum pa dang / mchod pa'i bum pa'o/ /spyir bum pa ni mang ste/ phyi'i bum pa dang / nang gi bum pa dang / gsang ba'i bum pa zhes rgyal po in+d+ra b+hU ti la sogs pas bshad pas der shes par bya'o/ /bdag gis mi spro'o/ /mchod pa ni so so'i gzhung gis mi mthun te/ 'on kyang rnam pa gsum du 'dus so/ /de yang dngos su bshams pa dang / yongs su gzung ba med pa dang / ting nge 'dzin gyis sprul pa'o/ /de ltar ngo bo la sogs pa bdag gis spyir khyab che bar brjod pa ni/ bla ma'i man ngag bzung zhing rgyud thams cad dang mthun par bya ste/ bdag gis rtogs pa tsam ni ma yin no/ /slob dpon gzhan dag gis gzhan du brjod pa ni don gyi phyogs re tsam blangs nas gsungs te/ 'on kyang bdag gis bla ma'i man ngag brgyud nas brjod pa'i nang du 'dus pas 'gal ba med par shes par bya'o/ /de ltar skal ba dang ldan pa rnams kyis shes par byas la 'jug par bya'o/ /de ci'i phyir zhe na/ gang zhig yul gzhan mthong 'dod pas/ /ma grol bar du mthong mi 'gyur/ /de bzhin nad rnams sel ba yang / /sman sogs med par sel mi nus/ /de bzhin bdag gzhan don 'dod pas/ /dngos grub rnam gnyis ma thob par/ /don rnams grub par mi 'gyur te/ /de bas dngos grub gnyis la 'bad/ /de rgyu thabs ni rnam pa gnyis/ /de rgyu gdams ngag thob pa'o/ /de rgyu 'jug pa la sogs pa/ /de rgyu snying rje chen po yin/ /gang zhig shes rab snying rje med/ /theg pa dman pa spang bar bya/ /shes rab snying rje cha ldan pa/ /theg pa che ste gzung bar bya/ /spyir na theg pa gnyis med do/ /sems dang sems byung khyad par ro/ /gang zhig shes rab snying rje med/ /sdom dang dam tshig la mi gnas/ /'jug dang dbang bskur ma thob la/ /gsang sngags brjod par mi bya'o/ /de bzhin dbang bskur med pa dang / /dbang bskur dman de mi gnas pas/ /las rnams mkhas kyang mi bya ste/ /'bras bu med cing bdag la 'tshe/ /de bas sdom gnas dbang thob ni/ /gces par sangs rgyas kun dag dang / /bla ma kun gyis mthun par gsungs/ /dad sogs ldan rnams shes par mdzod/ /theg pa chen po'i lam gyi rim pa las sngags kyi lam gyi rim pa bstan pa'i le'ur phye ba ste gnyis pa'o// //bdag gis dad sogs snod ldan phyir/ /theg chen lam rim mdor bsdus byas/ /'di yi bsod nams gang yin pas/ /kun gyis byang chub thob par shog /theg pa chen po lam gyi rim pa zhes bya ba slob dpon skal ba bzang po'i rdo rje zhes bya bas mdzad pa rdzogs so// //rgya gar gyi mkhan po ga ya d+ha ra dang / sgra bsgyur gyi lo tsA ba 'brog mi shAkya ye shes kyis bsgyur cing zhus te gtan la phab pa'o/ /[ ]@##/ /rgya gar skad du/ man+ta a ba ta ra/ bod skad du/ gsang sngags la 'jug pa/ 'phags pa 'jam dpal gzhon nur gyur pa la phyag 'tshal lo/ /dngos po'i de nyid rang bzhin 'od gsal mngon mdzad nas/ /gdul bya'i dbang gis sku yi cha byad sna tshogs dang /

CLOSE WINDOW