བོད་ཡིག

e-texts based on the ACIP/ALL Input

/ //rgya gar gyi mkhan po ka na ka wa rma dang / bod kyi lo tsA ba pa tshab nyi ma grags kyis bsgyur ba'o//[ ]@##/ /rgya gar skad du/ Ar+ya pradz+nyA pA ra mi ta na ya da sha TI kA/ bod skad du/ 'phags pa shes rab kyi pha rol tu phyin pa tshul brgya lnga bcu pa'i 'grel pa/ gsung rab 'di'i lo rgyus bshad na/ sngon sangs rgyas mi yul na lo brgyad cu bzhugs pa'i tshe na/ sarba bud+d+ha sa ma yo ga dang / guh+ya sa many+tsa la sogs pas 'dul zhing theg pa de dag gi snod du gyur pa 'dzam bu'i gling gi mi yul na med pas rgyal chen ris bzhi dang sum cu rtsa gsum dang / dga' ldan la sogs pa'i gnas na lha rnams dang bskal pa bzang po'i byang chub sems dpa' la sogs pa snod du gyur nas de'i tshe mdo sde de ni bzhugs so/ /slad kyis sangs rgyas mya ngan las 'das pa'i 'og tu za hor gyi rgyal po 'khor dang bcas pa ngo mtshar du chos la dad pa dag cig 'dug pa theg pa de'i 'dul skal du gyur cing snod du gyur nas/ sarba bud+d+ha sa ma yo ga la sogs pa sde chen po bco brgyad phyag na rdo rje'i byin gyi rlabs kyis za hor gyi yul du gshegs pa dang / za hor gyi rgyal po in+d+ra b+hU ti sa mdo sde dag bltas na brnga ma phrad nas sngon gyi las kyi dbang gis na mngon par shes pa thob pas bltas na yul gyi dbus yul ma la pa na A tsAr+ya ku ku ra nyin zhing khyi stong tsam la chos 'chad/ mtshan zhing ni khyi de dag la dam tshig longs spyod mdzad pa khyi'i slob dpon mdzad pa zhig bzhugs pa de theg pa'i snod du gyur la/ bdag gi 'dul skal du gyur pa yang 'dra nas rgyal pos pho nya btang ste slob dpon gshegs su gsol ba dang / slob dpon de yang sngon gyi las kyi dbang gis na mngon par shes pa lnga dang ldan nas/ rgyal po de bdag gi 'dul skal du 'bab bam mi 'bab mdo sde de dag gi snod du bdag gyur ram ma gyur brtags na/ bdag gi 'dul skal du yang 'bab/ bdag kyang mdo sde'i snod du yang gyur/ rgyal po'i the tshom yang sel bar 'gyur mod kyi/ 'on kyang mdo sde dag sngar ma bltas na brgya la rgyal po'i the tshom dag ma sol bar gyur na shin tu ma legs pas pho nya la slar spring ba/ mdo sde dag kho bos sngar blta 'tshal gyis tshur bskur cig ces spring ba dang / de nas mdo sde dag pas gshegs te bltas na mgo mjug gar lta ba'i cham mchis na de nyid du lus brdabs te mgon med do/ /skyabs med do zhes bos pa dang dpal rdo rje sems dpa' mngon par gshegs te khyod ci 'dod ces dris pa dang / bdag mdo sde zab mo 'di bltas pa tsam gyis shes par 'dod ces gsol ba dang / de bzhin gnang ngo zhes gsungs nas de nas sarba bud+d+ha sa ma yo ga la sogs pa'i glegs bam rnams ma phye bar de dag gi don yid la mngon sum du gsal bar gyur to/ /de nas slob dpon de za hor gyi yul du gshegs nas rgyal po 'khor dang bcas pa rnams la d+harmA de dag bshad de/ rdo rje sems dpas lung bstan nas rgyal po 'khor dang bcas pa rnams rdo rje dbyings kyi dkyil 'khor ltar sgom du stsal te dbus su rgyal po nyid/ btsun mo dam pa bzhi yum gyi sar bkod/ blon po bzhi rigs bzhi'i sar bkod/ sras mo rnams nang gi lha mo'i sar bkod/ btsun mo phal pa rnams phyi'i lha mo'i sar bkod/ blon po phal pa rnams sgo srung bzhi dang / bskal pa bzang po'i byang chub sems dpa' ltar bkod pa dang / rgyal pos bsams pa bdag cag 'khor dang bcas pa rig 'dzin gyi gnas su grub pa'i phyir dang dam pa'i chos 'di mi nub par bya ba'i phyir sras sha kra bu ti rgyal tshab tu dbang bskur nas/ A tsAr+ya ku ku pas lung dang man ngag bstan pa rgyal bu de la bstan te bzhag nas bsgoms pa dang / rgyal po 'khor dang bcas pa stong la gnas pa'i byang chub sems dpa'i rig 'dzin du grub bo/ /de'i sras sha kra pu tis kyang de bzhin du bsgoms pa dang / 'khor sgom pa bdun brgya dang yang rig 'dzin gyi gnas grub bo/ /yang rgyal bu sha kra pu tis sras ni chung ste sras mo go ba de byi la dpal dam pa'i nang nas tshul brgya lnga bcu pa bkod de bshams nas in+d+ra b+hU ti'i lung de sras mo yul dang sa 'dzin du stsal de la bstan pa las sras mo de yang 'khor dang bcas pa brgya dang yang rig 'dzin du grub bo/ /de nas sras mo des/ rgyal bu la lung dang man ngag bzhag pa las 'phel ba ni deng du 'di dag lags te/ mdo la 'di de rnams bsgrub ste tshun chad ni gsung rab 'di don khong du chud par byas te/ bsgrub pas sngon chad grub pa yang grangs med phyin chad kyang nan tan cher byas na gdon mi za bar grub par gzhung 'di nyid kyi nang nas shes pa yin no/ /gzhung las bcom ldan 'das ma shes rab kyi pha rol tu phyin pa la phyag 'tshal lo zhes byung ba ni/ bdud bzhi bcom ste yon tan drug dang ldan pa de bzhin gshegs pa thams cad 'byung ba'i yum shes rab kyi pha rol tu phyin pa la dpal dam pa phreng ba zhes bya ba 'di yin no/ /yum smos pa las na de bzhin gshegs pa'i yab kyang smos dgos te gang zhe na/ yab ni tan+t+ra ta ta twA saM gra ha/ zhes bya ba sngags kyi mdo sde zab mo yin par ston to/ /de bas na shes rab kyi pha rol tu phyin pa la phyag 'tshal zhes te/ de yang mdo zab mo 'di la dad cing mos nas gsung rab la 'jug pa'i phyir bsnyen bkur byas te phyag 'tshal na bsod nams kyi tshogs su 'gyur zhing 'phags pa kun gyi byin gyis rlob pas nyan cing sgrub pa nan tan du byed pa la bgegs dang bar chad du mi 'gyur ba'i phyir ro/ /gzhung las/ 'di skad bdag gis thos pa'i dus gcig na zhes 'byung mdo sde'i tan+t+ra mgo mjug tshang ba ni ma yin na ci'i phyir 'di skad smos she na/ gsung rab 'di yang mnyan cing gzung sla bar bya ba'i phyir tan+t+ra chen po'i nang nas gud du phyung mod kyi/ tan+t+ra 'di'i mgo la smos pas 'dir brjod pa 'gal ba med do/ /bcom ldan 'das rnam par snang mdzad mngon par byang chub pas gsungs pa'i don 'di skad du dpal rdo rje sems dpas mngon sum du thos kyis gzhan las brgyud pa ma yin pa'i phyir ro/ /de bzhin gshegs pas gsungs pa drang med mod kyi/ gzhung 'di gsungs pa thos pa de la dus gcig ces bya'o/ /gzhung las/ bcom ldan 'das de bzhin gshegs pa thams cad kyi rdo rje'i byin gyi rlabs dam tshig gi ye shes rnam pa tha dad pa'i bye brag gis ye shes dang ldan pa zhes 'byung ba ni/ bcom ldan 'das rnam par snang mdzad la sogs te phyogs bcu'i de bzhin gshegs pa thams cad tshogs 'dus pa yang stong pa nyid kyi ye shes dang / shes rab kyi pha rol tu phyin pa gnyis su med pa'i tshul mnyam pa nyid du sbyor zhing / lus dang ngag dang yid gsum rdo rje lta bu'i phyir rdo rje'i byin gyi rlabs kyis bdud dang bgegs la sogs pa bar chad du byed pa rnam pa thams cad du zil gyis mnan te rgol ba'i glags med pa'i phyir ro/ /spyi'i dam tshig ni byang chub kyi sems mi gtong ba dang / theg pa chen po'i chos mi gtong ba dang / sangs rgyas dang byang chub sems dpa' chen po mi gtong ba dang / sngags dang phyag rgya dang rdo rje mi gtong ba dang / rdo rje'i slob dpon rdo rje sems dpa' dang 'dra bar bsam pa dang / tshangs pa mtshungs par spyod pa ngan sems mi byed pa dang / dkyil 'khor du ma zhugs pa dang / bzhugs kyang dam tshig mi srung ba la sngags kyi gtam mi bya ba dang / don med pa'i phyogs su lus chus mi gnon cing nyon mi mongs pa la sogs pa'i rnam grangs kyang mang mod kyi skabs 'dir shes rab kyi pha rol tu phyin pa mnyam pa nyid du sbyor zhing tshul 'di ni mi gtong ba dam tshig lta bu yin te/ dam tshig gi khyad par thams cad mkhyen pa dang / sangs rgyas kyi ye shes chos kyi dbyings rnam par mi rtog pa mnyam pa nyid kyi ye shes dang / me long lta bu'i ye shes dang / chos so sor rtog pa'i ye shes dang / bya ba nan tan gyi ye shes lta bu rnam pa tha dad pa'i bye brag gi ye shes thams cad dang ldan pa'i phyir ro/ /gzhung las/ de bzhin gshegs pa thams cad kyis rin po che'i cod pan gyis khams gsum du chos kyi rgyal por dbang bskur ba thob ces 'byung ba dbang bskur ba'i dam tshig ni rin po che'i phreng bas dbang skur bar byed de/ dper na 'khor los sgyur ba'i rgyal po yang rin po che sna bdun gyis rgyal thabs chen por dbang bskur na gling bzhi la/ dbang byed par 'gyur te/ de dang 'dra bar de bzhin gshegs pa thams cad kyis bcom ldan 'das rnam par snang mdzad mngon par byang chub pa la de bzhin gshegs pa thams cad kyi rin po che'i cod pan gyis khams gsum chos kyi rgyal por dbang bskur te/ khams gsum thams cad la mnga' ba/ chos thams cad la longs spyod pa phyogs bcu thams cad du chos kyi 'khor lo bskor ba/ sems can thams cad yongs su smin par mdzod cig ces dbang chen bskur ba thob pa'i phyir ro/ /gzhung las/ de bzhin gshegs pa thams cad kyis thams cad mkhyen pa'i rdo rje ye shes rnal 'byor gyi dbang phyug chen po de bzhin gshegs pa thams cad kyi ye shes kyi phyag rgya chen po thob pa zhes 'byung ba ni de bzhin gshegs pa thams cad kyis thams cad mkhyen pa chos thams cad kyi dbyings stong pa nyid du mkhyen pas ma nor ma 'khrul pa'i chos nyid ji lta ba bzhin du mkhyen pa'i phyir rdo rje'i ye shes zhes bya'o/ /shes rab kyi pha rol tu phyin pa mnyam par sbyor ba la rgyun du 'jug pas rnal 'byor gyi dbang phyug chen po zhes kyang bya ste/ 'khor los sgyur ba'i rgyal po man chad kyi longs spyod dang yang ldan la/ chos kyi dbyings mnyam pa nyid las kyang mi 'gyur ba'i phyir chos so cog thams cad la dbang mdzad cing 'byor ba'i longs spyod chen po dang yang ldan pas na dbang phyug chen po zhes bya'o/ /yang rnam pa gcig tu na sku'i phyag rgya chen po dang rin po che'i cod pan la sogs pa'i dbang bskur ba'i dam tshig gi phyag rgya dang / gsung thams cad du yongs su dag pas chos kyi phyag rgya dang / lus dang ngag dang yid thams cad rdo rje nyid kyi las mnyam pa nyid du spyod pas las kyi phyag rgya ste 'di rnams kyi tshul du gnas pas rnal 'byor pa'i dbang phyug ces bya'o/ /stong pa nyid kyi ye shes kyi phyag rgya dang mtshan dang dpe byad bzang po dang ldan pa longs spyod rdzogs pa sku'i phyag rgya dang / lus kyi phyag rgya ni g.yon pa'i mdzub mo g.yas pa'i khu tshur nang du bcug ste rdo rje dang pad+ma'i dkyil 'khor sbyor ba bstan pa'i phyag rgya dang / shes rab kyi pha rol tu phyin pa gnyis su med pa'i tshul du spyod pa'i dam tshig gi phyag rgya dang / lus las 'od zer mang po 'phros te sangs rgyas kyi sku grangs med par sprul te las kyi phyag rgya dang / de bzhin gshegs pa thams cad kyi ye shes kyi phyag rgya chen po thob pa dang ldan pa'i phyir ro/ /gzhung las/ de bzhin gshegs pa thams cad kyi phyag rgya mnyam pa nyid thugs su chud cing bya ba sna tshogs mdzad pa na ma lus lus pa med pa'i sems dpa' dang / ngag sems thams cad rdo rje'i de bzhin gshegs pa zhes 'byung ba ni de bzhin gshegs pa thams cad kyi phyag rgya stong pa nyid kyi ye shes shes rab kyi pha rol tu phyin pa mnyam pa nyid du thugs su chud cing rdo rje dang pad+ma'i dkyil 'khor du sbyor ba'i don spyod pa sna tshogs ni sems can thams cad yongs su smin par mdzad pa yang / sems can thams cad bla na med pa'i byang chub tu bsgral ba'i thabs sna tshogs grangs med de bsam gyis mi khyab mod kyi/ skabs 'dir ni chos mnyam pa nyid du bstan pa dul ba'i sems can ma lus pa gdan lus pa med pa'i re ba thams cad yongs su bskang ba'i las mdzad pas thabs de lta bus 'dul ba'i thabs la bab pa'i sems can rnams smin par 'gyur ro/ /shes rab kyi pha rol tu phyin pa mnyam pa nyid du sbyor ba stong pa rnam par snang mdzad longs spyod rdzogs pa'i sku chen po ni chos kyi sku la bya'o/ /rnam pa gcig tu na shes rab kyi pha rol tu phyin pa gnyis su med pa'i tshul du sbyor ba yang rtag par dus gsum du mnyam pa 'di la snyoms par zhugs te/ de bzhin gshegs pa'i sku dang gsung dang sems can thams cad la 'khrul pa med pa'i yang dag pa ji lta ba bzhin gyi phyir na rdo rje de bzhin gshegs pa zhes bya'o/ /gzhung las/ de bzhin gshegs pa thams cad kyis rab tu bsngags shing bstod de zhes 'byung ba ni rnam par snang mdzad gnyis su med pa'i tshul gyis gsang ba'i dkyil 'khor mdzad de/ de bzhin gshegs pa'i rigs dang / rdo rje'i rigs dang / rin po che'i rigs dang / chos kyi rigs dang / las kyi rigs kyi gtso bo sangs rgyas dang / 'khor byang chub sems dpa' phyogs phyogs na bkod pa'i tshe dam tshig la ma zhugs pa rnams la gsang ba'i tshad ni byams pa byang chub sems dpa' yang nang na 'ong du mi gnang ngo zhes bcom ldan 'das rnam par snang mdzad kyis bka' stsal pa dang / byams pas gsol pa bdag ni tshe gcig gis thogs pa'i byang chub sems dpa' ste/ dus phyi ma la mngon par 'tshang rgya bar de bzhin gshegs pa thams cad kyis lung bstan na phyogs bcu'i sangs rgyas kyi zhing thams cad dang / de bzhin gshegs pa'i sku dang / gsung dang / thugs kyi yon tan bsam gyis mi khyab pa bdag gis mthong ste/ sangs rgyas kyis la dar las bsgribs pa tsam du bas te ci la yang gsang ba ma mchis na/ dkyil 'khor 'di mdzad pa la bdag la gsang du ci mchis zhes gsol ba dang / bcom ldan 'das kyis bka' stsal pa/ byams pa khyod kyis thams cad mthong gis kyang khyod kyis dkyil 'khor 'di'i dam tshig tu sngar ma zhugs pas bstan du mi rung ngo zhes bka' stsal nas/ phyis byang chub sems dpa' byams pa yang dkyil 'khor 'di nyid du zhugs pa'i tshe phyogs bzhi dang / dbus kyi gtso bo dang byang chub sems dpa' thams cad kyis shes rab kyi pha rol tu phyin pa gnyis su med pa'i sbyor ba la gnas/ 'dod pa rnam pa lnga sems kyis gtsang mar 'du shes te yon tan du blta ba dang / pany+tsa a mr-i tar yang khyad par med pa mnyam par spyod pa thob nas shin tu ngo mtshar du bzung ste/ sdangs nas ye shes kyis brtags na chos thams cad chos kyi dbyings stong pa nyid kyis khyab pas rnam pa sna tshogs su spyod kyang nyon mongs pa'i bcing ba yang med de/ rnam par dag pa'i spyod yul la rdul tsam yang 'gyur ba med la/ sems can gyi longs spyod chen po dang yang ldan zhing shin tu rgya che zhing yangs pa'i chos shes rab dang thabs kyi spyod yul gyi sgo khyad par du 'phags pa bzang bar mthong nas/ byang chub sems dpa' byams pa mgu rangs te mod la bstod pa/ sangs rgyas yon tan bsam mi khyab/ byang chub sems ni bsam mi khyab/ chos mnyam pa nyid du sbyor ba yang bsam gyis mi khyab ste shin tu ngo mtshar che zhing dge'o zhes bya ba la sogs pas rgyas par bstod de/ byams pa gcig bus bstod par yang ma zad de/ de bzhin gshegs pa thams cad kyang shin tu rgya che zhing yangs pa'i chos don chud mi za ba ma nor pa'i chos yin par rab tu bsngags shing bstod pa'i phyir ro/ /sangs rgyas dang byang chub sems dpa' sku'i tshul dang spyod lam chen po 'di lta bu yin/ dkyil 'khor du bzhugs pa'i gnas khang ci 'dra zhe na/ gzhung las/ bzhugs pa na nor bu rin po che chen pos rab tu spras pa/ dril bu sna tshogs brgyus shing dkrol ba/ kha dog sna tshogs kyi lda lI dres pa/ dar gyi ba dan mang po'i dril bu rlung gis bskyod pa/ me tog gi phreng ba dang / rnga yab dang / do shal dang / se mo do dang / zla ba lta bus shin tu mdzes par byas pa zhes 'byung ba ste/ dkyil 'khor gyi gnas khang gi yon tan ni 'di yin te/ rin po che sna tshogs kyis brgyan pa yang de bzhin gshegs pa'i rigs so so'i kha dog sna tshogs dang mthun pa/ rgyan thams cad kyang zla ba'i 'od dang 'dra zhing mdzes pa'i phyir ro/ /khang pa'i yon tan de 'dra na yul gyi tshul gang zhe na/ gzhung las/ 'dod pa'i khams thams cad la gzhan 'phrul dbang byed lha'i rgyal po'i gnas na zhes 'byung ba ste/ sems can gyi khams su ma gtogs pa ma yin gyi khams nyid ni dkyil 'khor chen po mdzad pas sems can so so na dkyil 'khor 'di mthong ba'i las yod pa rnams kyang zhugs shing dam tshig ma nor bas na don grub cing thar pa yang grangs med pa'i phyir ro/ /dkyil 'khor 'di'i tshe bcom ldan 'das rnam par snang mdzad nyag gcig gam/ 'khor byang chub sems dpa' dang bcas she na gzhung las/ byang chub sems dpa' bye ba phrag brgya dang / thabs cig tu bzhugs pa la 'di lta ste/ byang chub sems dpa' sems dpa' chen po lag na rdo rje/ spyan ras gzigs kyi dbang phyug dang / nam mkha'i snying po dang / rdo rje khu tshur dang / 'jam dpal dang / sems bskyed ma thag tu chos kyi 'khor lo bskor ba dang / nam mkha'i mdzod dang / bdud kyi stobs thams cad rab tu 'joms pa dang / de dag la sogs pa bye ba phrag brgya stong rnams kyis bskor zhing mdun gyis bdar te zhes 'byung ba ste/ sangs rgyas nyag gcig ma yin gyi 'khor byang chub sems dpa' de snyed yod par bstan to/ /byang chub sems dpa' de snyed kyi nang nas nyung zad kyi ming smos pa ci'i phyir zhe na/ rdo rje'i rigs kyi gtso bo dang / chos kyi rigs kyi gtso bo dang / rin po che'i rigs kyi gtso bo dang / las kyi rigs kyi gtso bo nyi tshe'i mtshan smos pa ste/ gzhan ni grangs tsam du bzhag pa'i phyir ro/ /byang chub sems dpa' de rnams kyang phyogs bzhir so so'i rigs ma 'dres par snam bu snam bur bkod de/ nang dang phyi rim du bdar nas kun gyis bcom ldan 'das rnam par snang mdzad kyi mdun du bdar te gral rim bzhin du gnas so/ /de'i tshe dkyil 'khor so so na bzhugs par zad dam chos kyang 'chad ce na/ gzhung las chos 'chad pa de thog mar dge /bar du yang dge / tha mar yang dge /don bzang po/ tshig 'bru bzang po ma 'dres pa/ kun du rdzogs pa/ yongs su dag pa/ yongs su byang ba/ tshangs par spyod pa 'ba' zhig yang dag par rab tu ston cing chos thams cad kyi ngo bo nyid rnam par dag pa'i sgo zhes bya ba shes rab kyi pha rol tu phyin pa'i tshul 'di bshad do zhes 'byung ba ste/ sangs rgyas dang byang chub sems dpas sems can gyi don gyi phyir dar ma dor sde bcu gnyis la sogs pa grangs med pa cig bshad mod kyi 'di skad du yang / stong pa nyid kyi ye shes shes rab kyi pha rol tu phyin pa gnyis su med pa'i don rgya cher ston pa dang / kr-i ya'i gzhung gi brtag pa dang / kha zas gtsang mar byed pa dang / dus gsum du 'dzin pa lta bu ma yin gyi/ gnas la mtshan mar mi 'dzin pas bdam du med/ kha zas la mtshan mar mi 'dzin pas gtsang sme mi 'byed/ dus la mtshan mar mi 'dzin pas dus thams cad du mnyam par 'jog pas dus gsum du dbyer med de thams cad du dge / shes rab dang thabs su 'brel pas bsod nams dang ye shes kyi tshogs yongs su rdzogs par 'gyur bas don bzang ba mnyam pa nyid ma nor bar ston pas tshig bzang ba/ don bzang po'i chos dang kr-i ya'i cho ga mang po dang / ma 'dres pas ma nyams par spyod pa 'di la chos gzhan gang gis kyang bsnan mi dgos pas kun du rdzogs pa yongs su dag pa'i chos nyid pas bkru bshal bya ba ma yin/ 'khrul pa med pas sgrib par mi 'gyur te yongs su byang ba yin/ gnyis su med pa'i sbyor ba'i yang sems mnyam pa dang / bsngo brgya che bas tshangs par spyod pa 'ba' zhig ste/ 'di ltar yang dag pa'i chos rgya chen po ston cing chos so cog thams cad ngo bo nyid dang rang bzhin gyis stong ste grub pa med pas rnam par dag pa'i sgo zhes bya ba shes rab kyi pha rol tu phyin pa mnyam par sbyor ba'i don bshad pa'i phyir ro/ /shes rab kyi pha rol tu phyin pa'i don ci yod ce na/ gzhung las 'di lta ste/ rab tu dga' ba'i rnam par dag pa'i tshig ni 'di lta ste byang chub sems dpa'i tshig go zhes 'byung ste/ sems can thams cad bla na med pa'i byang chub tu bsgral bar dga' ba'i phyir nyan thos la sogs pa sems rgya chung ngu'i chos las 'phags pa dang / chos thams cad stong pa nyid kyi ye shes kyi shes rab kyi pha rol tu phyin pa mnyam par sbyor bas shin tu grol zhing dag pa'i dga' ba dang / rdo rje pad+mo'i dkyil 'khor sbyor bas 'jig rten gyi dga' ba phun sum tshogs pas bdag gi lha dang phyogs bcu'i 'phags pa thams cad la yongs su bsngos na/ 'phags pa thams cad la yang bdag dang gzhan zhes dbyer med pa mnyam pa rab tu dga' ba/ yang bdag dang bdag gir bya ba med pa'i mnyam pas 'phags pa ma lus pa la yang bsngos pas bsod nams kyi tshogs su 'gyur te/ 'di lta bu'i spyod pa la gnas pa ni byang chub sems dpa'i spyod pa'o/ /don ji lta ba bzhin du bstan pa ni byang chub sems dpa'i tshig go/ /tshig gi rjes su 'brang zhing nan tan bsgrub pa ni byang chub tu 'gyur ro/ /gzhung las/ 'dod chags kyi mda' rnam par dag pa'i tshig de ni 'di lta ste/ byang chub sems dpa'i tshig go zhes 'byung ba sems can thams cad la phan pa dang bskyab pa'i yid kyi mda' sngon du btang ste/ rjes su bsgrub pa dang stong pa nyid kyi ye shes dang / shes rab kyi pha rol tu phyin pa mnyam par sbyor ba'i yid kyi mda' sngon du btang ste rjes su spyod pa dang / 'dod pa lnga'i yon tan dang bdud rtsi lnga la sogs te mtshungs par byed pa dang / mnyam pa nyid kyi mda' sngon du btang ste/ longs spyod du byed pa'i phyir ro/ /gzhung las/ sdug pa bcing ba'i rnam par dag pa'i tshig de ni 'di lta ste byang chub sems dpa'i tshig go zhes 'byung ba ni pha rol tu phyin pa dngos po bsnyen par bya ba'i phyir ni sdug pa'o/ /mi gtong ba'i phyir ni bcing ba ste/ bdag gi shes rab dang phrad nas mnyam pa nyid kyi gzugs bsngo ba dang dpyad pa ma nor bas rnam par dag pa'i phyir ro/ /gzhung las/ longs spyod thams cad kyi dbang phyug rnam par dag pa'i tshig de ni 'di lta ste byang chub sems dpa'i tshig go zhes 'byung ba ni/ 'jig rten gyi longs spyod thams cad dang ldan pa ni 'khor los sgyur ba'i rgyal po ste/ dbang phyug che bas na stong pa nyid kyi ye shes kyi shes rab kyi pha rol tu phyin pa mnyam par sbyor zhing 'dod pa lnga la mtshungs par spyod pa ni 'jig rten gyi longs spyod thams cad dang yang ldan la nyon mongs pa'i 'ching bar mi 'gyur ba'i phyir rnam par dag na/ 'khor los sgyur ba'i rgyal po la sogs pa'i 'jig rten pa'i longs spyod thams cad kyi yang mchog phul du byung ba'i phyir ro/ /gzhung las/ lta ba rnam par dag pa'i tshig de ni 'di lta ste byang chub sems dpa'i tshig go zhes 'byung ba ni/ stong pa nyid kyi ye shes kyis shes rab kyi pha rol tu phyin pa mnyam par spyor bas yang dag pa'i lta ba yin te/ rnam pa sna tshogs la spyod kyang nyon mongs pa'i 'ching bar mi 'gyur bas rnam par dag pa'i phyir ro/ /gzhung las/ dga' ba rnam par dag pa'i tshig de ni 'di lta ste byang chub sems dpa'i tshig go zhes 'byung ba ni rtag tu bshad pa dang mthun te/ mdor na chos thams cad stong pa nyid du ro gcig pa'i lta ba dang bsngo ba ma nor bas rnam par dag pa'i phyir ro/ /gzhung las/ srid pa rnam par dag pa'i tshig de ni 'di lta ste byang chub sems dpa'i tshig go zhes 'byung ba ni/ stong pa nyid ye shes kyi shes rab kyi pha rol tu phyin pa mnyam par spyod pa'i sred pa dang / bdud rtsi lnga dang 'dod pa'i yon tan lnga mtshan mar mi 'dzin pa dbyer med par mnyam par spyod pa'i sred pa dang / sems can thams cad bla na med par bsgral bar bya ba'i thabs la sred pas na rnam par dag pa'i phyir ro/ /gzhung las/ nga rgyal rnam par dag pa'i tshig de ni 'di lta ste byang chub sems dpa'i tshig go zhes 'byung ba ni stong pa nyid kyi ye shes dang / shes rab kyi pha rol tu phyin pa yang phyag rgya chen po dang ldan mod kyi/ nyon mongs pa'i 'ching bar mi 'gyur te/ chos thams cad rang bzhin gyis mnyam pa nyid pas rnam par dag pa'i phyir ro/ /gzhung las/ rgyan rnam par dag pa'i tshig de ni 'di lta ste byang chub sems dpa'i tshig go zhes 'byung ba ni bdag nyid phyag rgya chen po'i sku mnyam pa nyid yin pas nor bu dang gos la sogs te/ bzang po'i bya ba'i rgyan thams cad kyang 'phags pa bdag gi lha nyid la yon du phul ba dang / bdag gi lha dang phyogs bcu'i sangs rgyas su yang khyad par dbyer med de/ 'phags pa thams cad la mnyam par bsngos pas bsod nams kyi tshogs su 'gyur gyi nyon mongs pa'i 'ching bar mi 'gyur bas rnam par dag pa'i phyir ro/ /gzhung las/ 'dod chags rnam par dag pa'i tshig de ni 'di lta ste byang chub sems dpa'i tshig go zhes 'byung ba ni/ rtag tu 'dod chags kyi mda' bshad pa dang 'dra ste/ mdor na stong pa nyid kyi ye shes dang shes rab kyi pha rol tu phyin pa mnyam pa nyid du sbyor ba'i dus na 'dod chags su snang ba'i rnam pa sna tshogs ci spyod kyang sems can gyi ma rig pa'i spyod pa dang 'dra ste/ nyon mongs pa'i 'ching bar mi 'gyur bas rnam par dag pa'i phyir ro/ / gzhung las/ zhe sdang rnam par dag pa'i tshig de ni 'di lta ste byang chub sems dpa'i tshig go zhes 'byung ba ni/ chos thams cad stong pa nyid kyi ye shes dang / shes rab kyi pha rol tu phyin pa mnyam par sbyor bas spyod pa byed pa'i tshe/ sems can ma rungs pa 'dul ba dang / sdug bsngal gyi gnas na sdod cing bskyed pa'i bsngo bas zhe sdang du snang ba'i chos spyod kyis kyang sems can ma rig pa'i spyod pa dang mi 'dra ste/ nyon mongs pa'i 'ching bar mi 'gyur bas rnam par dag pa'i phyir ro/ /gzhung las/ gti mug rnam par dag pa'i tshig 'di lta ste/ byang chub sems dpa' tshig go zhes 'byung ba ni/ stong pa nyid kyi ye shes dang mnyam pa nyid du sbyor te/ bdag dang gzhan du khyad par gyi mtshan mar mi 'dzin pas rnam pa sna tshogs su spyod kyang phyin ci log gi gti mug ma yin gyi mi shes pa'i tshul gyis shes pas rnam par dag pa'i phyir ro/ / gzhung las/ thams cad rnam par dag pa'i tshig de ni 'di lta ste byang chub sems dpa'i tshig go zhes 'byung ba ni/ chos thams cad stong pa nyid kyi ye shes dang / shes rab kyi pha rol tu phyin pa mnyam par sbyor ba'i dus na dbang po drug yul drug la sogs te thams cad la spyod kyang / yang dag pa'i lta ba dang bsngo ba ma nor bas nyon mongs pa'i 'ching bar mi 'gyur te/ spyod do cog kyang bsod nams kyi tshogs su 'gyur bas rnam par dag pa'i phyir ro/ /gzhung las/ mda' rnam par dag pa'i tshig de ni 'di lta ste byang chub sems dpa'i tshig go zhes 'byung ba ni/ stong pa nyid kyi ye shes dang shes rab kyi pha rol tu phyin pa mnyam par spyod pas byang chub sems dpa' de bzhin gshegs pa'i sku dang mchod pa sna tshogs 'od zer las skye ste/ mchod pa bstod pa dang dga' ba phul bas nyon mongs pa'i 'ching bar mi 'gyur te rnam par dag pa'i dga' ba'i phyir ro/ /rnam pa gcig tu na tshul 'di ltar spyod pa'i 'bras bu yang btsun pa rig 'dzin byang chub kyi gnas par 'gyur ro/ /gzhung las/ mtshan nyid rnam par dag pa'i tshig de ni 'di lta ste/ byang chub sems dpa'i tshig go zhes 'byung ba ni/ stong pa nyid kyi ye shes dang shes rab kyi pha rol tu phyin pa mnyam pa nyid du gnas pa'i dus na chos thams cad kyi spyi'i mtshan nyid dang rang gi mtshan nyid ci la spyod kyang de nyid dbyer med par mnyam pa nyid pas mtshan mas bcings pa'i nyon mongs par mi 'gyur te rnam par dag pa'i phyir ro/ /gzhung las/ yid rnam par dag pa'i tshig de ni 'di lta ste byang chub sems dpa'i tshig go zhes 'byung ba ni/ stong pa nyid kyi ye shes dang / shes rab kyi pha rol tu phyin pa mnyam pa nyid du sbyor ba la phyag rgya chen po'i sku bas yid mgu ba dang rangs pa kun kyang bdag gi lha nyid la mchod pa dang yang 'dra/ bdag gi lha dang de bzhin gshegs pa thams cad du yang dbyer med pa thams cad du yang dbyer med pas 'phags pa thams cad la yang mchod par bsngo/ yid dga' ba dang mgu ba'i longs spyod sems can thams cad kyis kyang myong bar bsngos na bdag gi yid dga' ba dang nyon mongs pa'i 'ching bar mi 'gyur bas su dga' bar byed pa rkyen po yang bsod nams thob par 'gyur bas rnam par dag pa'i phyir ro/ /gzhung las/ snang ba rnam par dag pa'i tshig de ni 'di lta ste/ byang chub sems dpa'i tshig go zhes 'byung ba ni/ stong pa nyid kyi ye shes dang shes rab kyi pha rol tu phyin pa mnyam par sbyor ba'i phyag rgya chen po'i sku bas gzugs snang ba thams cad kyang bdag gi lha'i gzugs mthong ba ste/ nyon mongs pa'i 'ching bar mi 'gyur bas rnam par dag pa'i phyir ro/ /gzhung las lus bde ba rnam par dag pa'i tshig de ni 'di lta ste byang chub sems dpa'i tshig go zhes 'byung ba ni/ stong pa nyid kyi ye shes dang shes rab kyi pha rol tu phyin pa mnyam par sbyor ba'i dus na lus nyid bdag gi lha'i gzugs pas sdug bsngal dang nyon mongs pa thams cad rang bzhin gyis med pas na lus shin tu bde ba yin te/ lus kyi spyod pa thams cad de bzhin gshegs pa'i phyag rgyas bsgyur bas nyon mongs pa'i 'ching bar mi 'gyur te rnam par dag pa'i phyir ro/ /gzhung las/ ngag rnam par dag pa'i tshig de ni 'di lta ste/ byang chub sems dpa'i tshig go zhes 'byung ba ni/ stong pa nyid kyi ye shes dang / shes rab kyi pha rol tu phyin pa mnyam pa nyid du sbyor ba'i dus na ngag gi rang bzhin thams cad ngo bo nyid kyis stong ste/ de bzhin gshegs pa'i sku'i byin gyis smras so cog thams cad sngags su gyur pas nyon mongs pa'i 'ching bar mi 'gyur gyi rnam par dag pa'i phyir ro/ /gzhung las yid rnam par dag pa'i tshig de ni 'di lta ste/ byang chub sems dpa'i tshig go zhes 'byung ba ni/ chos thams cad stong pa nyid kyi ye shes dang / shes rab kyi pha rol tu phyin pa mnyam par sbyor ba'i dus na yid kyi rnam par rtog pa ci byung yang chos thams cad rang bzhin gyis stong pa nyid pas bsngo ba ma nor na nyon mongs pa'i 'ching bar mi 'gyur te rnam par dag pa'i phyir ro/ /gzhung las/ gzugs rnam par dag pa'i tshig de ni 'di lta ste/ byang chub sems dpa'i tshig go zhes 'byung ba ni/ stong pa nyid kyi ye shes dang / shes rab kyi pha rol tu phyin pa mnyam par sbyor ba'i dus na gzugs so cog thams cad rang bzhin gyis stong pa'i phyir gzugs dang kha dog dang / dbyibs ji ltar mthong ba phyag rgya chen po'i sku nyid la mchod par bsngo ba ma nor bas sems can nyon mongs pa'i 'ching bar mi 'gyur gyi rnam par dag pa'i phyir ro/ /gzhung las/ sgra rnam par dag pa'i tshig de ni 'di lta ste/ byang chub sems dpa'i tshig go zhes 'byung ba ni/ stong pa nyid kyi ye shes dang / shes rab kyi pha rol tu phyin pa mnyam par sbyor ba'i dus na sgra bo cog rang bzhin med pas tshig dang ro kun snyan mi snyan dbyer med par thams cad rol mo'i sil snyan sna tshogs kyis bdag nyid lha'i gzugs la mchod par bsngos na sgra thams cad kyi nang na spyod kyang nyon mongs pa'i 'ching bar mi 'gyur te rnam par dag pa'i phyir ro/ /gzhung las dri rnam par dag pa'i tshig de ni 'di lta ste/ byang chub sems dpa'i tshig go zhes 'byung ba ni/ stong pa nyid kyi ye shes dang / shes rab kyi pha rol tu phyin pa mnyam par sbyor ba'i dus na dri thams cad ngo bo nyid kyis stong pa'i phyir dri zhim pa dang / mi zhim pa khyad par du mi byed par dri mchog gis lha nyid la mchod par byed pas bsngos na nyon mongs pa'i 'ching bar mi 'gyur gyi bsod nams su 'gyur bas rnam par dag pa'i phyir ro/ /gzhung las ro rnam par dag pa'i tshig de ni 'di lta ste/ byang chub sems dpa'i tshig go zhes 'byung ba ni stong pa nyid kyi ye shes dang / shes rab kyi pha rol tu phyin pa mnyam pa nyid du sbyor ba'i dus na ro thams cad rang bzhin gyis stong pas na kha zas zhim po dang mi zhim pa dang / gtsang ba dang / sme ba med de thams cad kyang zil mngar bdud rtsi lta bu'i lha la mchod par bsngos na nyon mongs pa'i 'ching bar mi 'gyur gyi rnam par dag pa'i phyir ro/ /gzhung las reg bya rnam par dag pa'i tshig de ni 'di lta ste/ byang chub sems dpa'i tshig go zhes 'byung ba ni/ chos thams cad kyi ye shes dang / shes rab kyi pha rol tu phyin pa mnyam p a nyid du sbyor ba'i dus na bde ba dang sdug bsngal gnyi ga ma yin pa'i lus kyi reg bya thams cad rang bzhin gyis stong pas na bde mi bde'i khyad par gyi dbye ba thams cad kyang bde ba'i mchog gis bdag gi lha nyid la mchod par bsngos na nyon mongs pa'i 'ching ba mi 'gyur gyi bsod nams su 'gyur bas rnam par dag pa'i phyir ro/ /gzhung las chos rnam par dag pa'i tshig de ni 'di lta ste/ byang chub sems dpa'i tshig go zhes 'byung ba ni/ stong pa nyid kyi ye shes dang / shes rab kyi pha rol tu phyin pa mnyam pa nyid du sbyor ba'i dus na chos thams cad ngo bo nyid kyis mi skye mi 'gag rang bzhin gyis stong pa yin pas chos thams cad du spyod pa la 'jug gis byang chub kyi spyod pa la 'jug pa yin gyi nyon mongs pa'i 'ching bar mi 'gyur bas rnam par dag pa'i phyir ro/ /de bzhin du skye mched bcu gnyis la sogs pa chos kun la spyod pa'i tshe stong pa nyid kyi ye shes dang shes rab kyi pha rol tu phyin pa mnyam pa nyid la sbyor ba ni de bzhin gshegs pa'i ye shes kyi tshogs su 'gyur te/ chos rnam pa sna tshogs la spyod cing bsngo ba ma nor ba ni bsod nams kyi tshogs yongs su rdzogs par 'gyur ro/ /gzhung las/ de ci'i phyir zhe na/ 'di ltar chos thams cad rang bzhin gyis stong pas ngo bo nyid rnam par dag ste/ chos thams cad ngo bo nyid stong pa nyid kyi phyir/ shes rab kyi pha rol tu phyin pa rnam par dag pa'o zhes 'byung ba ni/ rtag tu smos pa'i chos kyi rnam grangs de la ma rtogs pa'i chos zhes bya ba gud na med de/ 'phags pa'i spyod yul dang byis pa ma rab kyi spyod yul yang chos nyid 'di la spyod par bzang de/ chos kyi mtshan nyid shes pa dang / mi shes pa'i khyad par gyi nyon mongs pa'i 'ching ba dang / rnam par dag par gyur pas bzang ngo / /de'i phyir na/ rtag tu smos pa'i chos so cog thams cad rang bzhin gyis stong pa ste/ chos nyid kyi rnam par dag pas na/ shes rab kyi pha rol tu phyin pa nyid kyang ji ltar chos thams cad rang bzhin gyis stong pa bzhin du shes rab kyi pha rol tu phyin pa yang stong pa'i mtshan nyid de rnam par dag pa zhes bya ba'i mtshan ma sna tshogs la spyod pa yang stong pa nyid kyi ye shes dang ldan pas shes rab dang thabs dbyer med pa'i 'brel pas spyod do cog kyang chud mi zos shing bsod nams dang ye shes kyi tshogs yongs su rdzogs shing de bzhin gshegs pa'i sku gsum thob par 'gyur ro/ /gzhung las/ lag na rdo rje gsang ba'i bdag po su la las chos thams cad kyi ngo bo nyid rnam par dag par bsgrub pa'i sgo/ shes rab kyi pha rol tu phyin pa'i tshul 'di lan cig thos na yang byang chub kyi snying po'i bar du sgrib pa dang / mchod pa thams cad dang / nyon mongs pa'i sgrib pa dang / las kyi sgrib pa dang / chos kyi sgrib pa la sogs pa sgrib pa chen po mang du bsags kyang sems can dmyal ba dang ngan song du skye ba nam yang mi 'gyur/ sdig pa yang byas ma thag tu sdug bsngal med par 'gyur ro zhes 'byung ba ni/ rdo rje rigs kyi gtso bo lag na rdo rje la bshad de/ su la la zhig chos rgya chen po 'di la dad pas 'jug na chos 'di ni rnam par dag pa'i chos/ 'di ni 'ching ba'i chos/ 'di ni spyod pa'i chos/ 'di ni mi spyod pa'o zhes rnam par dbye ba med do/ /chos thams cad ngo bo nyid kyis dag pa ni stong pa nyid de ye shes dang gnyis su med par mnyam par sbyor ba ni rnam par dag pa'i sgo mo yin te/ chos rgya chen po 'di lan cig thos na yang nam byang chub kyi snying po'i bar du nyon mongs pa'i sgrib pa dang / shes bya'i sgrib pa dang / yang dag pa'i ye shes kyi bar du gcod pa la sogs te sgrib par mi 'gyur zhes bya ba'i chos thams cad kyi nang du bzhugs te spyod kyis kyang stong pa nyid kyi ye shes dang / shes rab kyi pha rol tu phyin pa mnyam pa nyid dang ldan pas sgrib ces bya ba'i chos thams cad ngo bo nyid ma bskyed par rang bzhin stong pas na nyon mongs pa'i 'ching ba dang / 'bras bu med pas dmyal ba dang ngan song du nams kyang skye bar mi 'gyur zhes gsungs pa yin no/ /sdig pa nyid kyi rang bzhin med pas spyod pa nyid kyi tshe na 'ching bar mi 'gyur te/ sdig pa byas ma thag tu sdug bsngal med pa'i phyir ro/ /shes rab kyi pha rol tu phyin pa bsgom pa dang nan tan ji ltar byas na 'grub ce na/ gzhung las/ gang 'dzin pa dang / nyin re zhing klog pa dang / kha ton byed pa dang / tshul bzhin du yid la byed pa na zhes 'byung ba ste/ bcangs te mnyan nas gzungs su 'dzin pa dang 'dris par byed pa dang / stong pa nyid dang gnyis su med pa'i sbyor ba nan gtan du byed pa'i phyir ro/ /shes rab kyi pha rol tu phyin pa mnyam par sbyor ba'i chos bsgrub pa'i don ji lta bu thob par 'gyur zhe na/ gzhung las des tshe 'di nyid la chos thams cad mnyam pa nyid kyi rdo rje'i ting nge 'dzin rab tu thob pas chos thams cad la rab tu dbang bar 'gyur/ mos pa dang / dga' ba dang / rab tu dga' ba thams cad myong / byang chub sems dpa' tshe bcu drug gis de bzhin gshegs pa'i rdo rje'i ting 'dzin rab tu thob par 'gyur ro/ /hUM zhes 'byung ba ste/ stong pa nyid kyi ye shes dang / shes rab kyi pha rol tu phyin pa nyid du sbyor ba thams cad nan tan du byed pa ni thams cad mnyam pa nyid kyi rdo rje'i ting nge 'dzin rab tu 'dzin pas chos so cog thams cad ni chos kyi dbyings las tha mi dad pas sems bskyed pa'i phyir dge ba dang sdig pa'i chos mtshungs par spyod kyis kyang 'ching ba'i nyes par mi 'gyur bas chos thams cad la dbang ba yin/ 'jig rten gyi longs spyod thams cad myong bar 'gyur kyang 'ching ba'i nyes par mi 'gyur bas dus thams cad du gnod pa'i mi bde ba med pas tshe bcu drug gis de bzhin gshegs pa'am rdo rje 'dzin rab tu thob par 'gyur ba yang tshe shin tu ring ba'i gnas nas bsgrub pa yin/ hUM zhes bya ba ni chos thams cad bsdus pa'i don te/ thog ma med pa'i tshun chad nyon mongs pa'i las kyi bag chags thams cad bsdus nas med par bya ba'i don to/ /yang rnam pa gcig tu na rdo rje'i rigs kyi snying po ste/ rdo rje byang chub sems dpa' thams cad sa bon 'di las bskyed pa'i phyir bsod nams kyi tshogs thams cad sdud pa'i phyir ro/ /yang rnam pa gcig tu na rdo rje lta bu drag shul che ba'i snying po bas sems can gdul dka' ba ma rungs pa thams cad bsdus nas 'joms shing 'jig par byed pa'i don to/ /gzhung las/ de nas bcom ldan 'das de bzhin gshegs pa thams cad kyi theg pa chen po zhes 'byung ba nas/ badzra hUM zhes bya ba'i bar du ste/ 'dir yang rdo rje rigs kyi dkyil 'khor gyi tshul ston te/ de bzhin gshegs pa thams cad kyi ye shes dang / shes rab kyi pha rol tu phyin pa mnyam par sbyor ba/ chos thams cad kyi rang bzhin sngon thugs su chud pa gnyis su med pa'i sbyor ba'i dam tshig dang ldan pa/ dkyil 'khor thams cad ma lus pa'i rdo rje 'dzin te sems can kun las 'phags pa'i phyir na mchog go/ /'dod pa'i khams dang gzugs kyi khams dang gzugs med pa'i khams thams cad las rnam par rgyal ba/ sems can gyi khams thams cad ma lus par 'dul zhing mnyam pa nyid du sbyor ba'i don la sems can thams cad btsud nas sangs rgyas dang byang chub sems dpa' dang rig 'dzin gyi gnas thob par byas pa dang / bdag nyid sangs rgyas kyi ye shes thams cad dang ldan pas sgrib pa med pa'i phyir don thams cad grub pa ni lag na rdo rje ste/ dam tshig thams cad dang yang ldan la mnyam par sbyor ba'i dam tshig chen po yang mi gtong ba'i tshul du gzhugs shing zhabs 'bring ba 'khor yang rdo rje gnod sbyin mang pos byas nas shes rab kyi pha rol tu phyin pa mnyam pa nyid kyi tshul gyi don bstan pas sems can yang de la 'dzud par mdzad de/ sems can thams cad chos rgya chen po 'di la zhugs pa rnams don chud mi za bar thugs su chud pas shin tu dgyes pa'i tshul gyis zhal 'dzum ste/ rdo rje chen po de bzhin gshegs pa lnga'i rigs dang yum lnga'i mtshan nyid dang ldan pa lag pa g.yon pas gsor te/ cis kyang mi 'jigs mi skrag pa'i bsnyems pas rang gi snying gar stod pa'i tshul gyis 'dzin cing bsod nams dang ye shes chen po'i tshogs mnga' ba bde ba chen po'i longs spyod phun sum tshogs pa gnyis su med par sbyor ba'i dam tshig sems can thams cad yongs su smin par 'gyur ba'i don yod pa'i chos thugs su chud nas rang gi de kho na nyid kyi snying por gsungs te/ badzra hUM zhes bya ba ni rdo rje rigs kyi snying po brtan par bya ba'i don bstan nas/ badzra swa bsnan to/ /gzhung las/ de nas bcom ldan 'das rnam par snang mdzad ces bya ba nas myur du bla na med pa yang dag par rdzogs pa'i byang chub tu mngon par 'tshang rgya'o/ /A zhes 'byung ba'i bar du ste/ bcom ldan 'das rnam par snang mdzad kyi zhi ba'i dkyil 'khor thams cad rdzogs par bstan te/ rigs lnga'i dkyil 'khor stong pa nyid kyi ye shes dang / shes rab kyi pha rol tu phyin pa mnyam par sbyor ba'i tshul du zhugs pa'i dkyil 'khor gyi tshul bshad do/ /rdo rje'i rigs kyi dkyil 'khor te/ rdo rje'i mtshan nyid ni sra ba'i phyir phyag mtshan rdo rje bsnams te/ stong pa nyid kyi ye shes dang / shes rab kyi pha rol tu phyin pa mnyam par sbyor ba'i rdo rje rigs kyi gtso bo dang / gtso mo'i mtshan nyid lta bu ste mnyam par gnas so/ /rin po che'i rigs kyi dkyil 'khor te rin po che'i don ni dbang bskur ba yin te/ phyag mtshan yang rin po che bsnams te chos stong pa nyid kyi ye shes dang / shes rab kyi pha rol tu phyin pa mnyam par sbyor ba yang rin po che'i rigs kyi gtso bo dang gtso mo'i mtshan nyid dang ldan pa ste/ 'khor los sgyur ba'i rgyal po rin po che lngas dbang bskur na gling bzhi la dbang byed pa bzhin du de bzhin gshegs pa thams cad kyis kyang dngos grub thams cad sbyin pa'i dbang gis byang chub sems dpa' rnams kyang rin po che'i cod pan la sogs pas dbang bskur ba'i dam tshig gi don mdzad cing mnyam par rdzogs pa'i gnas so/ /chos kyi rigs kyi dkyil 'khor te/ chos thams cad rnam par dag pa'i phyir pad+ma 'dam gyis ma gos pa bzhin te/ phyag mtshan pad+ma bsnams te/ stong pa nyid kyi ye shes dang / shes rab kyi pha rol tu phyin pa mnyam par sbyor bar yang chos kyi gtso bo dang gtso mo'i mtshan nyid du ldan pa mnyam pa nyid du rdzogs par gnas so/ / las kyi rigs kyi dkyil 'khor te/ chos so cog thams cad dbyings kyis khyab ste ngo bo nyid kyis rnam par rtogs pa'i phyir ro/ /dngos grub kyi bya ba sna tshogs mdzad pas phyag mtshan yang las kyi rdo rje rgya gram bsnams te/ stong pa nyid kyi ye shes dang / shes rab kyi pha rol tu phyin pa mnyam pa nyid du sbyor ba yang las kyi rigs kyi gtso bo dang gtso mo'i mtshan nyid dang ldan pas gnas te/ de ltar so so'i rigs kyi dkyil 'khor yang longs spyod kyi tshul 'di ltar bzhugs/ dkyil 'khor 'dir 'jug 'dod pa rnams kyang chos stong pa nyid dang / shes rab kyi pha rol tu phyin pa mnyam par sbyor ba la goms par bya ste/ mngon par grub pa bzhi po 'di dag nyan thos la sogs pas nan tan du byas na chos so cog thams cad stong pa nyid kyi phyir thams cad spyod kyang nyon mongs pa'i bcing bar mi 'gyur bas snying po byang chub la 'dug gi bar du ngan song thams cad las 'das par 'gyur/ chos nyid la gnas pas rnam par dag pa'i spyod yul te/ bsod nams dang ye shes kyi tshogs rdzogs shing bla na med pa'i byang chub tu mngon par rdzogs pa 'tshang rgya'o/ /A zhes bya ba ni de bzhin gshegs pa'i snying po ste/ chos thams cad ma skyes pa spros pa med pa stong pa nyid kyi don ston pa'i phyir ro/ /gzhung las/ de nas de skad ces bka' stsal zhes bya ba nas/ badzra aM aH/ zhes bya ba'i bar du ste zhes 'byung ba rtag tu bstan pa'i dkyil 'khor bcom ldan 'das kyis bka' stsal pa lus dang ngag yid gsum rdo rje ye shes kyi khu tshur yongs su 'dzin pa zhes bya bas chos mnyam pa nyid kyi don bcom ldan 'das kyis bstan pa yang sems can yongs su smin pa'i don du 'gyur bas 'dzum mul te/ stong pa nyid kyi ye shes dang shes rab kyi pha rol tu phyin pa mnyam par sbyor ba nyid kyi phyir snying po/ / badzra a aH/ zhes gsungs te/ stong pa ma skyes pa'i don aH'di la brten par bya ba'i phyir ro/ /a zhes bya ba'i don lta ba'i tshig go/ /gzhung las thams cad 'dul ba na zhes bya ba nas yang dag par rdzogs pa'i byang chub mngon par 'tshang rgya'o/ /hUM zhes bya ba'i bar du ste/ bcom ldan 'das shAkya thub pas yang sems can gyi don gyi phyir stong pa nyid kyi ye shes dang / shes rab kyi pha rol tu phyin pa mnyam pa nyid du sbyor ba'i don ni 'jig rten thams cad las rnam par rgyal ba bsod nams dang ye shes kyi tshogs bsdu ba'i dkyil 'khor rgya chen po yangs pa 'di bshad do/ / rdo rje'i rigs kyi dkyil 'khor de bzhin gshegs pa rigs lnga yab yum lnga mnyam par gnas pa yang chos thams cad stong pa nyid kyi phyir 'dod chags kyi nyon mongs pa'i 'ching ba med pas 'dod chags spros pa med pa'i phyir bdag dang gzhan du lta ba med par mnyam pas na zhe sdang mi 'byung bas zhe sdang spros pa med do/ /rin po che'i rigs kyi dkyil 'khor te/ snying rje chen po'i gzugs kyis sems can ma rungs pa 'dul ba dang / gnas bde bar bskyed par bya ba'i phyir mngon spyod kyi dbang byed de/ chos thams cad rang bzhin gyis stong pas na stong pa nyid kyi ye shes dang / shes rab kyi pha rol tu phyin pa mnyam par sbyor bas zhe sdang gi las dang nyon mongs pa'i 'ching bar mi 'gyur bas zhe sdang spros pa med pa'i phyir ro/ /ci'i phyir zhe na/ gti mug gi gzung ba med pa'i phyir spyod pas gti mug spros pa med do/ /gti mug gi gzung ba'i 'dod chags dang zhe sdang ni bcing bar 'gyur gti mug med pa'i 'dod chags dang zhe sdang gi las spyod pa ni rnam par grol bar 'gyur ba'i phyir ro/ /chos kyi rigs kyi dkyil 'khor te/ chos thams cad stong pa nyid kyi ye shes dang / shes rab kyi pha rol tu phyin pa mnyam par spyod do/ /rnam par mi rtog pa nyid pas mi shes pa'i tshul gyis shes pa ste/ gti mug gi rang bzhin med pas gti mug spros pa med pa'i phyir chos so cog thams cad spros pa med do/ /las kyi rigs kyi dkyil 'khor te chos so cog thams cad chos kyi dbyings kyis khyab pas na gnyis su med pa'i mnyam pa'i tshul du sbyor zhing dngos grub thams cad kyi las byed kyang / nyon mongs pa'i 'ching ba med pas chos thams cad spros pa med pa'i phyir zhes bya ste/ de ltar chos so cog thams cad rang bzhin gyis stong ste spros pa med pa'i phyir shes rab kyi pha rol tu phyin pa mnyam par sbyor ba yang 'grib par mi 'gyur bas spros pa med par rig par bya'o/ / 'di ltar zhal nas gsungs pa'i dkyil 'khor 'di'i don la 'jug cing / shes rab kyi pha rol tu phyin pa mnyam par spyod pa'i tshul 'di nyan pa la sogs pa nan tan du byed na de 'dul ba'i dbang gi phyir chos so cog thams cad stong pa nyid pas khams gsum du skyes pa'i sems can thams cad bsad kyang ngan song du mi 'gro bar 'gyur te/ myur du bla na med pa yang dag par rdzogs pa'i byang chub tu mngon par rdzogs par 'tshang rgya'o/ /ci'i phyir zhe na/ chos nyid kyi sdig pa rang bzhin yod la sbras bu bsags na sems can gcig gsad pa'i sdig pa bzhin du mang du bsad pa tshogs che bar yang mngon na/ stong pa nyid kyi ye shes dang / shes rab kyi pha rol tu phyin pa mnyam par sbyor ba'i dus na chos kyi dbyings kyis khyab pas sems can gyi rang bzhin med pa'i phyir sdig pa'i rang bzhin yang med de 'dul ba'i dbang gi phyir sdig pa'i 'ching bar mi 'gyur gyi bsod nams kyi tshogs rnam par dag par 'gyur ba'i phyir/ hUM zhes bya ba'i don 'di lhag ma dang 'dra'o/ /gzhung las/ de nas bcom ldan 'das lag na rdo rje zhes bya ba nas/ badzra hUM zhes bya ba'i bar du ste/ rtag tu gsungs pa'i dkyil 'khor gyi don bstan par bya ba'i phyir/ bcom ldan 'das lag na rdo rje chos mnyam par spyod pa'i don sems can bstan pa yan chud mi za zhing rnam par dag par 'gyur ba'i phyir zhal 'dzum ste/ 'jig rten gsum las rnam par rgyal bar 'gyur zhes bya ba'i phyag rgya bcings nas lus gzi brjid chen po gzhan thams cad skrag cing spa bkong ba'i tshul du 'gyur te/ badzra hUM zhes bya ba gsungs so/ /badzra hUM gi don ni rtag tu bshad pa dang 'dra/ gzhung las/ de nas bcom ldan 'das de bzhin gshegs pa yongs su dag pa'i chos nyid ces pa nas/ mngon par rdzogs par 'tshang rgya'o/ /hUM zhes 'byung ba'i bar du ste/ chos kyi rigs kyi byang chub kyi gtso bo 'phags pa spyan ras gzigs kyis bstan te/ stong pa nyid kyi ye shes dang / shes rab kyi pha rol tu phyin pa mnyam par sbyor ba'i chos rgya chen po yangs pa ye shes kyi phyag rgya zhes bya ba'i tshul 'di ston to/ /rdo rje rigs kyi dkyil 'khor de stong pa nyid kyi ye shes dang / shes rab kyi pha rol tu phyin pa mnyam par sbyor ba'i dus na 'dod chags kyi spyod yul thams cad rnam par dag par 'gyur ba yin gyi 'dod chags kyi nyon mongs pas bcings par mi 'gyur te/ stong pa nyid dang mnyam par sbyor ba'i chos dag pa'i mtshan nyid pas nyon mongs pa'i dus thams cad kyis gnod par mi nus pa'i phyir rdo rje'i rigs kyi dkyil 'khor zhes bya'o/ /rin po che'i rigs kyi dkyil 'khor te/ 'dod chags kyi ngo bo nyid kyi stong pa'i phyir bdag gi phyogs mi 'dzin pas zhe sdang mi 'byung mod kyi snying rje chen po'i gzugs kyis sems can ma rungs pa 'dul ba dang / sdug bsngal gyi gnas ngan pa las gnod pa'i dbang mdzad mod kyi/ zhe sdang gi nyon mongs par mi 'gyur bas zhe sdang rnam par dag pa zhes bya ste/ thams cad la dbang du spyod pas na rin po che'i rigs kyi dkyil 'khor gyi mtshan nyid ces bya'o/ /chos kyi rigs kyi dkyil 'khor yin te/ zhe sdang gi mtshan nyid rang bzhin gyis stong ste/ nyon mongs pa'i 'bras bur mi 'gyur bas sgrib pa med pas chos nyid stong pa nyid kyi dbyings yin pas dri ma thams cad rnam par dag pa zhes bya'o/ /chos nyid kyi ngo bos chos kyi rigs kyi dkyil 'khor gyi mtshan nyid bstan to/ /las kyi rigs kyi dkyil 'khor gyi mtshan nyid de dri ma'i chos nyid ngo bo nyid kyi stong ste/ sdig pa'i tshogs su mi 'gyur bas sdig pa'i chos rnam par dag pa ste/ dngos grub kyi chos thams cad la spyod cing grub pas las kyi rigs kyi dkyil 'khor gyi mtshan nyid ces bya'o/ / rdo rje rigs kyi yum gyi dkyil 'khor gyi mtshan nyid de sdig pa'i chos thams cad chos nyid kyis stong ste/ nyon mongs pa'i 'ching bar mi 'gyur bas chos thams cad rnam par dag ces bya ste/ chos thams cad yongs su dag na nyon mongs pa'i 'ching ba'i bdud thams cad las rgyal ba'i phyir rdo rje'i rigs kyi yum gyi dkyil 'khor zhes bya'o/ /rin po che'i rigs kyi yum gyi dkyil 'khor gyi mtshan nyid de chos thams cad chos kyi dbyings kyis khyab ste rang bzhin gyis dag pas chos la sems can tha dad pa med de/ sems can thams cad rnam par dag par 'gyur ro/ /chos stong pa nyid kyis sems can dag pa'i dbang du byed pa'i rin po che'i rigs kyi yum gyi dkyil 'khor zhes bya'o/ /chos kyi rigs kyi yum gyi dkyil 'khor gyi mtshan nyid de sems can thams cad rang bzhin gyis ma grub ste/ ngo bo nyid rnam par dag pas na sems can dang / ye shes stong pa nyid kyi mtshan nyid du dbyer med pas ye shes rnam par dag pa zhes bya ste/ chos thams cad dbyings su mnyam pas chos kyi rigs kyi yum gyi dkyil 'khor zhes bya'o/ /las kyi rigs kyi yum gyi dkyil 'khor te/ stong pa nyid kyi ye shes rnam par dag pa'i mtshan nyid pas na shes rab kyi pha rol tu phyin pa mnyam par sbyor ba yang ngo bo nyid kyis dag pa ste/ 'ching ba med pas dngos grub thams cad grub par byed pa'i longs spyod pa'i phyir las kyi rigs kyi yum gyi dkyil 'khor zhes bya'o/ /de lta bas na chos thams cad stong pa'i rang bzhin du grub pa med pa'i phyir ni shes rab kyi pha rol tu phyin pa mnyam par sbyor ba/ shes rab kyi pha rol tu phyin pa mnyam par sbyor ba nyid kyis kyang chos thams cad stong pa nyid du chud cing rnam par grol ba yang dag pa'i spyod yul du 'gyur ro/ /'di gnyis kyang gcig gis gcig bskyed pa yin te/ chos kyi phyag rgya chen pos mnyam par don 'di nyan pa la sogs te/ grub pa nan tan du byas na 'dod chags la sogs pa chos sna tshogs kyi nang na 'dug kyang nyon mongs pa'i dri mas gos par mi 'gyur te pad+ma 'dam gyis mi chags pa bzhin no/ /de lta bas na stong pa nyid kyi ye shes gnyis su med par mnyam par sbyor ba'i dus na chos thams cad kyi mtshan nyid shes pas nyon mongs pa gsum yang mi spang ba'i dam tshig tu blang zhes 'byung ngo / /sna tshogs la spyod kyang sgrib par mi 'gyur bas myur du bla na med pa yang dag par rdzogs pa'i byang chub tu mngon par 'tshang rgya'o/ /hrIHzhes bya ba ni pad+mo'i rigs kyi snying po ste/ pad+mo'i rigs kyi byang chub sems dpa' thams cad sa bon 'di las skyes pa'i phyir te/ don mi skye mi 'gag spros pa med pa rang bzhin gyis stong pa'i mtshan nyid du blta'o/ /gzhung las/ de nas byang chub sems dpa'i zhes bya ba nas badzra hrIH/ zhes bya ba'i bar du ste/ 'phags pa spyan ras gzigs kyi dbang pos rtag tu gsungs pa'i don bstan par bya ba'i phyir yang gsungs te/ chos rgya chen po'i spyod yul 'di sems can rnam par dag pa'i don du 'gyur bas 'dzum mul te/ pad+ma 'dam gyis mi chags pa bzhin du chos mnyam pa nyid du sbyor ba la nyon mongs pa'i dri mas mi gos par mkhyen te/ snying po badzra ha zhes gsungs so/ /gzhung las/ de nas bcom ldan 'das de bzhin gshegs pa zhes bya ba nas/ bde ba thob par 'gyur ro/ /trAM zhes bya ba'i bar du ste/ de bzhin gshegs pa rin po che'i rigs kyi gtso bos stong pa nyid kyi ye shes dang / shes rab kyi pha rol tu phyin pa mnyam par sbyor bas khams gsum thams cad kyi dbang pos dbang bskur ba'i dkyil 'khor bstan to/ /rdo rje'i rigs kyi dkyil 'khor te/ bcom ldan 'das rnam par snang mdzad mngon par byang chub pa na de bzhin gshegs pa thams cad kyi khams gsum chos kyi rgyal por dbang bskur ba thob pas khams gsum thams cad kyi chos la mnga' mdzad pa/ log par lta ba thams cad kyi gnyen po ste mthu che ba'i phyir rdo rje dang dra bas rdo rje rigs kyi dkyil 'khor zhes bya'o/ /rin po che'i rigs kyi dkyil 'khor te/ sems can thams cad don dam pa man chad ci nas kyang phan pa dang bde ba thob par bya ba'i don sbyin pa'i dbang mdzad de sems can re ba thams cad ji ltar 'dod pa yid bzhin du thob par 'gyur bas rin po che'i rigs kyi dkyil 'khor zhes bya'o/ /chos kyi rigs kyi dkyil 'khor te/ chos thams cad stong pa ma skyes pa'i don shes rab dang pha rol tu phyin pa mnyam pa nyid du sbyor ba'i sems can thams cad la ston to/ /chos kyi sbyin pas kun kyang dkyil 'khor dam pa 'di la 'jug cing stong pa nyid kyi ye shes dang gnyis su med pa'i mnyam par sbyor ba thob par 'gyur ba'i phyir chos kyi rigs kyi dkyil 'khor zhes bya'o/ /las kyi rigs kyi dkyil 'khor te chos thams cad stong pa nyid kyi ye shes dang / shes rab kyi pha rol tu phyin pa mnyam par sbyor bas dngos grub kyi las thams cad thob par byed pas yid bzhin gyi rin po che las nor rdzas sna tshogs 'byung zhing rdzas kyi sbyin pa chen po zhes bya ste/ sems can dbul phongs pa thams cad lus dang ngag dang sems bde ba thob par 'gyur bas na las kyi rigs kyi dkyil 'khor zhes bya'o/ /so so'i dkyil 'khor 'di rnams su zhugs shing stong pa nyid kyi ye shes dang chos mnyam pa nyid du nan tan gyis spyad na dkyil 'khor gyi yon tan 'di rnams kyang thob cing dbang byed par 'gyur ro/ /traM zhes bya ba ni rin po che'i rigs kyi snying po ste/ 'di'i sa bon las rin po che'i rigs kyi byang chub sems dpa' thams cad 'byung ba'i phyir te/ mi skye mi 'gag spros pa med pa stong pa nyid kyi don to/ /gzhung las/ de nas byang chub sems dpa' nam mkha'i snying po zhes bya ba nas/ dam tshig rin po che'i snying pos smras so/ /badzra traM zhes bya ba'i bar du te/ rin po che'i rigs byang chub kyi gtso bo nam mkha'i snying pos rtag tu bshad pa'i don 'di bstan par bya ba'i phyir te dkyil 'khor dam pa 'di bstan na don yod par mkhyen pas bzhin 'dzum ste/ rang gi mgo bo rin po che'i phreng ba 'ching ba yang gzhan thams cad la dbang du byed pa'i tha tshig ste/ stong pa nyid kyi ye shes dang shes rab kyi pha rol tu phyin pa'i tshul bshad do/ /rdo rje'i rigs kyi dkyil 'khor te/ chos thams cad du stong par byas pas stong par 'gyur ba ma yin gyi/ chos nyid kyis stong pas na yang dag par ma nor bas mtshan nyid la sus kyang mi 'gyur ba'i phyir rdo rje lta bu ste/ shes rab kyi pha rol tu phyin pa mnyam pa nyid du spyod pa rdo rje'i rigs kyi dkyil 'khor zhes bya'o/ /rin po che'i rigs kyi dkyil 'khor te/ chos thams cad mtshan ma med par byas pas mtshan ma med pa ma yin gyi/ chos nyid kyi mtshan ma med pas shes rab kyi pha rol tu phyin pa mnyam par spyod pa'i dbang du byed pas rin po che'i rigs kyi dkyil 'khor zhes bya'o/ /chos kyi rigs kyi dkyil 'khor te/ chos thams cad smon pa med par byas pas smon pa med pa ma yin gyi/ chos nyid kyi smon pa med de/ gnyis su med pa'i mnyam par sbyor ba yang rang bzhin gyis stong pa'i chos nyid pas chos kyi rigs kyi dkyil 'khor zhes bya'o/ /las kyi rigs kyi dkyil 'khor te/ chos thams cad rang bzhin gyis stong bas na/ shes rab kyi pha rol tu phyin pa mnyam par sbyor ba yang yongs su dag pas chos nyid kyis dri ma med pa'i phyir de bzhin gshegs pa'i sku man chad dngos grub thob par byed pas na las kyi rigs kyi dkyil 'khor zhes bya'o/ /a'i don ni rtag tu smos pa dang 'dra/ gzhung las/ de nas bcom ldan 'das la 'jam dpal gzhon nur gyur pas zhes bya ba nas/ badzra a zhes bya ba'i bar du ste/ bcom ldan 'das 'jam dpal gzhon nur gyur pas kyang rtag tu bshad pa'i dkyil 'khor 'di shin tu rgya che ba'i phyir bzhin 'dzum bzhin du bstan te/ badzra a zhes gsungs so/ /'jam dpal gzhon nur gyur pa'i sku'i mtshan nyid dang phyag rgya'i mtshan nyid ni shes rab chen pos chos thams cad la gcod pa'i ral gri lta bu yin pas na shes rab zab mo'i don 'di de bzhin gshegs pa thams cad kyis dgongs shig gsungs shig pa'i bskul ba'i tha tshig pas ral gris de bzhin gshegs pa thams cad la bde bas zhes bya'o/ /gzhung las/ de nas de bzhin gshegs pa thams cad 'khor lo'i nang du chud pa zhes bya ba nas traM zhes bya ba'i bar du ste/ dkyil 'khor gyi nang du chud pa'i de bzhin gshegs pa thams cad kyis stong pa nyid kyi ye shes dang / shes rab kyi pha rol tu phyin pa mnyam par sbyor ba'i dkyil 'khor mdzad pa la 'jug pa'i don to/ /rdo rje rigs kyi dkyil 'khor te/ chos thams cad stong pa'i mtshan nyid du mthong la gnyis su med par sbyor ba la mnyam par 'jug pa ni cis kyang tshugs par mi 'gyur te/ rdo rje dang 'dra ba'i rdo rje rigs kyi dkyil 'khor la 'jug par 'gyur ro/ /rin po che'i rigs kyi dkyil 'khor te chos thams cad stong pa nyid du mthong ste/ gnyis su med par sbyor ba'i chos mnyam pas sems can ma lus pa'i don thams cad mi gtong ba'i dbang du byed pa ni rin po che'i rigs kyi dkyil 'khor la 'jug par 'gyur ro/ /rnam pa gcig tu na rin po che'i ni dbang bskur ba'i las byed pas dbang bskur ba yang 'ga' tsam la ma yin gyi sems can thams cad la dbang bskur bas na mnyam pa zhes bya'o/ /chos kyi rigs kyi dkyil 'khor te/ chos thams cad stong pa nyid de gnyis su med par mnyam par sbyor ba'i dus thams cad du chos nyid du mnyam pas na chos kyi rigs kyi dkyil 'khor la 'jug par 'gyur ro/ /las kyi rigs kyi dkyil 'khor te/ chos thams cad stong pa nyid kyi ye shes dang / gnyis su med pa mnyam par sbyor bas mnyam pa nyid du dngos grub kyi las thams cad du 'jug pas dkyil 'khor thams cad du 'jug par 'gyur ro/ /traM zhes bya ba ni rtag tu bshad pa'i don dang mthun no/ /gzhung las/ de nas byang chub sems dpa' sems bskyed ma thag tu zhes bya ba nas/ badzra tsakra hUM zhes bya ba'i bar du ste/ byang chub sems dpa' sems bskyed ma thag tu chos kyi 'khor lo bskor bas rtag tu bshad pa'i dkyil 'khor gyi don shin tu rgya che bar mthong nas bzhin 'dzum bzhin du 'khor lo yongs su bskor ba'i dkyil 'khor thams cad la 'jug pa zhes bya ba'i snying po gsungs pa yin no/ /badzra tsakra hUM zhes bya ba'i don rdo rje'i dkyil 'khor du bsdus pa zhes bya'o/ /gzhung las/ de nas bcom ldan 'das de bzhin gshegs pa zhes bya ba nas mchod pa'i cho ga rgyas pa'o/ /trAM zhes bya ba'i bar du ste rig pa'i lha mo rnams kyis sangs rgyas dang byang chub sems dpa' thams cad kyi dkyil 'khor la mchod par bya ba'i phyir shes rab dang pha rol tu phyin pa mnyam par sbyor ba'i tshul 'di bshad do/ /rdo rje rigs kyi dkyil 'khor la mchod pa ste/ gnyis su med pa mnyam par sbyor ba las byang chub kyi sems bskyed pa las de bzhin gshegs pa'i sku dang mchod pa sna tshogs de'i rgyu las 'byung ste/ byang chub kyi sems kyang shin tu rgya che la yangs te/ mthu che ba bsam gyis mi khyab cing 'jig rten thams cad zil gyis mnan pa'i phyir rdo rje'i rigs kyi dkyil 'khor la mchod pa'i cho ga rgyas pa'o/ /rin po che'i rigs kyi dkyil 'khor mchod pa ste/ gnyis su med pas mnyam par sbyor ba las 'od zer mang po phyogs bcur 'phros te/ sems can thams cad kyi mgon dang skyabs kyi dbang du byed pa dang / sems can ma rungs pa thams cad 'dul zhing gnas bde ba bskyed de/ snying rje chen po'i dbang du byed pas rin po che'i rigs kyi dkyil 'khor mchod pa'i cho ga rgyas pa'o/ /chos kyi rigs kyi dkyil 'khor la mchod pa ste/ stong pa nyid kyi ye shes dang mnyam par sbyor bar dam pa'i chos yongs su 'dzin pa ni chos kyi rigs kyi dkyil 'khor la mchod pa'i cho ga rgyas pa'o/ / las kyi rigs kyi dkyil 'khor la mchod pa ste/ shes rab dang pha rol tu phyin pa mnyam par sbyor ba'i las byed pa dang / shes rab kyi pha rol tu phyin pa yi ger 'dri ba la sogs pa ni las kyi rigs kyi dkyil 'khor la mchod pa'i cho ga rgyas pa'o/ /traM zhes bya ba'i don ni rtag tu bstan pa'o/ /gzhung las/ de nas byang chub sems dpa' zhes bya ba nas/ oM ga ga na swa b+hA ba badzra oM zhes bya ba'i bar du ste/ dkyil 'khor 'di lta bu bstan pa'i don 'di dang byang chub sems dpa' nam mkha' mdzod don de dang mthun par bsnan te smras pa'o/ /gzhung las/ de nas bcom ldan 'das de bzhin gshegs pa zhes bya ba nas/ sems can thams cad 'dul ba ni byang chub ho ha ha zhes bya ba'i bar du ste/ de bzhin gshegs pas sems can thams cad 'dul nus pa rdo rje'i khu tshur yongs su 'dzin pas shes rab kyi pha rol tu phyin pa dang mnyam par sbyor ba'i don 'di bshad do/ /rdo rje'i rigs kyi dkyil 'khor te/ sems can thams cad rang bzhin gyis grub pa med do/ /stong pas mnyam pa'i phyir khro ba yang mnyam pa ste chos stong pa khro ba stong pa sems can stong pa bas chos nyid kyi don ma nor ba'i mtshan nyid kyis mthu che ba'i phyir rdo rje'i dkyil 'khor lta bus 'dul lo/ /rin po che'i dkyil 'khor te/ sems can thams cad chos kyis 'dul zhing bla na med pa'i byang chub tu dgrol ba'i dbang du byas pas khro ba 'dul te/ stong pa nyid gnyis su med par mnyam par sbyor ba'i phyir sems can sna tshogs kyi don gyi phyir khro ba spyod kyang nyon mongs pa'i 'ching bar mi 'gyur te/ rin po che'i rigs kyi dkyil 'khor zhes bya'o/ /chos kyi rigs kyi dkyil 'khor te/ sems can thams cad stong pa'i chos nyid kyi phyir khro ba yang chos nyid de/ chos kyi don ji lta ba bzhin du ma nor ba'i mtshan nyid pas na chos kyi rigs kyi dkyil 'khor zhes bya'o/ /las kyi rigs kyi dkyil 'khor te/ sems can thams cad kyang bzod pa mu med pas rdo rje dang 'dra/ khro bas 'dul ba yang de bzhin du sems can rgya che bas khro ba yang rgya che ste sems can khro ba gnyis kyang dbyer med pa'i phyir mnyam pa nyid du sbyor zhing sems can gyi don chu'i rgyun dang 'dra bar dus thams cad du byed pas las kyi rigs kyi dkyil 'khor zhes bya'o/ /ha ha zhes bya ba'i don ni sems can thams cad yongs su dga' ba'i phyir spro ba'i las byed pas mgu ba'am rangs pa'i tha tshig ste dgod pa'i mtshan mas ha ha zhes bya'o/ /gzhung las de nas byang chub sems dpa' zhes bya ba nas/ badzra kro d+ha ha ha zhes bya ba'i bar du ste/ rtag tu bshad pa'i dkyil 'khor 'di yang sems can thams cad smin par 'gyur ba'i don yin pas lus chud mi za bar dga' ba bsnan pa'i phyir/ rdo rje gnod sbyin gyi gzugs shin tu pha rol 'jigs skrag par byed pa'i gzugs su bsgyur nas/ rdo rje khro bo zhes bya'i gang mo snying po 'di smras so/ /gzhung las de nas bcom ldan 'das zhes bya ba nas/ shes rab kyi pha rol tu phyin pa las su rig par bya nas hri zhes bya ba'i bar du ste/ de bzhin gshegs pa chos thams cad stong pa nyid kyi ye shes dang / shes rab dang pha rol tu phyin pa mnyam pa nyid la gnas pas chos thams cad mnyam pa nyid kyi phyogs zhes bya ba bshad do/ /de bzhin gshegs pa rigs kyi dkyil 'khor de sems can thams cad ngo bo nyid kyis stong ste/ rang bzhin gyi mnyam pas shes rab dang pha rol tu phyin pa mnyam par sbyor ba yang stong pa nyid do/ /sangs rgyas kyi sku'i mtshan nyid pas de bzhin gshegs pa'i rigs kyi dkyil 'khor zhes bya'o/ /rdo rje'i rigs kyi dkyil 'khor te/ chos so cog thams cad rang bzhin gyis stong ste/ dbyer med cing mnyam pa'i phyir shes rab dang pha rol tu phyin pa dngos por grub pa med pas stong pa'i mtshan nyid de mnyam pa nyid du 'byor zhing chos thams cad la spyod kyang nyon mongs pa'i 'ching bar mi 'gyur te/ bgegs thams cad las rgyal po'i phyir rdo rje lta bur mthu che bas na rdo rje'i rigs kyi dkyil 'khor zhes bya'o/ / rin po che'i rigs kyi dkyil 'khor te/ rin po che'i phreng bas dbang bskur te don byed pa yang sems can 'ga' la byed pa ma yin gyi dbri bkol med par sems can thams cad kyi don du byed pas na shes rab dang pha rol tu phyin pa mnyam par sbyor ba yang sems can gyi don gyi phyir na rin po che'i rigs kyi dkyil 'khor zhes bya'o/ /chos kyi rigs kyi dkyil 'khor te/ chos so cog thams cad chos kyi dbyings nyid las gzhan ma yin pas shes rab dang pha rol tu phyin pa mnyam par sbyor ba yang chos kyi dbyings te chos nyid pas chos kyi rigs kyi dkyil 'khor zhes bya'o/ /las kyi dkyil 'khor te chos thams cad stong pa'i phyir/ chos thams cad spyod do cog kyang las zhes bya ste/ shes rab dang pha rol tu phyin pa mnyam pa nyid du sbyor ba yang dngos grub la sogs te rnam pa sna tshogs grub kyis kyang nyon mongs pa'i 'ching ba dang sgrib par mi 'gyur bas las kyi rigs kyi dkyil 'khor zhes bya'o/ /hrI zhes bya ba'i don ni rtag tu bshad pa dang mthun no/ /gzhung las de nas bcom ldan 'das lag na rdo rjes zhes bya ba nas/ badzra a mo g+ha hUM/ zhes bya ba'i bar du ste/ bcom ldan 'das lag na rdo rjes de bzhin gshegs pa byang chub sems dpa' thams cad kyi don 'dod pa'i dam tshig ces bya ba stong pa nyid kyi ye shes dang / pha rol tu phyin pa mnyam par sbyor ba'i dam tshig mi gtong ba ste/ 'di lta bu'i dkyil 'khor byin gyis brlabs nas mnyam par sbyor ba'i ting nge 'dzin la bdag dang gzhan zhes bya ba med pa'i snyoms par zhugs nas sems can thams cad yongs su smin par byed pa'i don yod pa thams cad kyi dam tshig ces bya ba rang gi snying po smras so/ /badzra a mo g+ha hUM/ zhes bya ba ni rdo rje'i gdon mi za bar btus pa zhes bya'o/ /gzhung las de nas bcom ldan 'das de bzhin gshegs pa rnam par snang mdzad ces bya ba nas traM zhes bya ba'i bar du ste/ bcom ldan 'das rnam par snang mdzad mngon par byang chub pas stong pa nyid kyi ye shes dang / shes rab dang pha rol tu phyin pa mnyam par sbyor ba'i ting nge 'dzin la snyoms par zhugs nas sems can thams cad la byin gyis rlob pa zhes bya ba 'di bshad do/ / rdo rje'i rigs kyi dkyil 'khor te/ sems can thams cad rnam par snang mdzad kyi sku dang thugs thams cad dang ldan pas stong pa nyid kyi ye shes dang / shes rab dang pha rol tu phyin pa mnyam par sbyor ba la gzhug nas kun kyang bla na med par mngon par 'tshang rgya bas na sems can thams cad de bzhin gshegs pa'i sku las gzhan ma yin pas de bzhin gshegs pa'i mthu dang rlabs che bas rdo rje'i rigs kyi dkyil 'khor zhes bya'o/ /rin po che'i rigs kyi dkyil 'khor te/ rin po che'i phreng bas khams gsum gyi chos kyi rgyal por dbang bskur ba bzhin du shes rab kyi pha rol tu phyin pas mnyam par sbyor ba'i rdo rje'i snying pos dbang bskur nas/ sems can thams cad kyang de'i spyod lam 'jug cing mnyam par sbyor ba'i rdo rje'i snying pos dbang byed par 'gyur ro/ /dam tshig rin po che'i dbang bskur ba yin te/ lag tu rdo rje byin nas las thams cad spyod du 'jug pa'i dbang sbyin par byed pa sems can thams cad rdo rje'i snying po zhes bya ste rin po che'i rigs kyi dkyil 'khor zhes bya'o/ /chos kyi rigs kyi dkyil 'khor te/ chos kyi dbyings kyi ye shes dang shes rab dang pha rol tu phyin pa'i don bstan pa 'jug pas/ sems can thams cad ni chos kyi snying po ste/ chos kyi rigs kyi dkyil 'khor zhes bya'o/ /las kyi rigs kyi dkyil 'khor te stong pa nyid kyi ye shes dang / shes rab kyi pha rol tu phyin pa mnyam par sbyor bas sems can thams cad bya ba byed pa la rab tu sbyor gyis kyang nyon mongs pa'i 'ching bar mi 'gyur bas sems can thams cad las kyi snying po ste dngos grub thams cad mngon du spyod pas na las kyi rigs kyi dkyil 'khor zhes bya'o/ /traM zhes bya ba'i don ni rin po che'i rigs kyi sangs rgyas dang byang chub sems dpa' thams cad bskyed pa'i sa bon te/ rin po che'i rigs kyi dkyil 'khor zhes bya'o/ /gzhung las de nas phyi rol gyi rdo rje'i rigs rnams zhes bya ba nas/ badzra hrI byo swA hA/ zhes bya ba'i bar du ste/ dkyil 'khor gyi phyi rim dang ra ba'i byang chub sems dpa' rnams kyang khyad par med de/ mtshungs shing 'dra bas rgya cher bstan nas snying po tshogs sngags rnams byin te/ de yang gnyis su med pa mnyam par sbyor bas longs spyod chen po dang ldan pa'i dbang phyug chen pos rang gi snying po gsungs so/ /gzhung las/ de nas de bzhin gshegs pa mtha' yas mu med ces bya ba nas/ b+h+yo badzra oM sarba d+harma ta/ a pra pa ni tsa/ hi li hi li/ sarba d+harmata/ mi lI mi lI/ sarba d+harma ta/ a nu rA ga gI ni swA hA/ zhes bya ba'i bar du ste/ bcom ldan 'das de bzhin gshegs pa mtha' yas mu med thug pa med pa'i chos kyang stong pa nyid kyi ye shes dang / shes rab dang pha rol tu phyin pa mnyam par sbyor ba'i longs spyod chen po dang ldan par mdzad pas cho ga 'di yang de bzhin gshegs pa'i mdzad pa dang mthun pa'i phyir cho ga 'di yang mtha' yas mu med thug pa med par yongs su byin gyis brlab pa'i phyir chos thams cad stong pa nyid dang mnyam par sbyor bas spyod yul thams cad du rnam par dag pa'i tshul 'di bshad do/ /rdo rje'i rigs kyi dkyil 'khor te/ shes rab dang pha rol tu phyin pa mnyam par sbyor ba bsam gyis mi khyab mtha' yas pas de bzhin gshegs pa thams cad kyang mtha' yas te/ ci'i phyir zhe na/ de bzhin gshegs pa thams cad kyi dgongs spyod chen po nyid yin pas de bzhin gshegs pa'i sku ni bdud thams cad las rgyal ba'i phyir/ rdo rje'i rigs kyi dkyil 'khor zhes bya'o/ /rin po che'i rigs kyi dkyil 'khor te shes rab dang pha rol tu phyin pa mnyam par sbyor ba'i chos thams cad du mnyam ste/ rdo rje lta bu'i mthu dang 'dra ba med cing gzhan gyi zil gyis mi gnon to/ /dbang grub pas rin po che'i rigs kyi dkyil 'khor zhes bya'o/ /chos kyi rigs kyi dkyil 'khor te/ shes rab dang pha rol tu phyin pa mnyam par sbyor ba ni du ma'i don ma yin te/ mnyam pa nyid gcig tu zad pas chos thams cad kyang shes rab dang pha rol tu phyin pa mnyam pa nyid gcig tu zad de dbyer med pas na chos kyi rigs kyi dkyil 'khor zhes bya'o/ /las kyi rigs kyi dkyil 'khor te stong pa nyid kyi ye shes dang / shes rab dang pha rol tu phyin pa mnyam pa nyid du sbyor ba chos mtshan ma sna tshogs kyi spyod yul la zhugs kyis kyang nyon mongs pa'i 'ching ba dang sgrib par mi 'gyur bas shes rab dang pha rol tu phyin pa mthar thug pas na chos thams cad kyang mthar thug pa yin no zhes bya ba yin te/ dngos grub thams cad sbyin par byed pas las kyi rigs kyi dkyil 'khor zhes bya'o/ /gzhung las/ gang la la shes rab kyi pha rol tu phyin pa zhes bya ba nas/ rdo rje 'dzin par myur du 'gyur/ badzra b+h+yo zhes bya ba'i bar du ste/ shes rab dang pha rol tu phyin pa mnyam par sbyor ba'i tshul 'di mnyan pa la sogs te bsgom pa'i bar du nan tan byas nas/ sangs rgyas dang byang chub sems dpa'i spyod pa dag pa'i mthar phyin te/ chos mtshan ma sna tshogs kyi sgor zhugs kyis kyang mnyam ba nyid kyi don gyis sgrib pa thams cad zad nas de bzhin gshegs pa'am/ rdo rje 'dzin par 'gyur ro zhes bya ba yin no/ /gzhung las de bzhin gshegs pa thams cad la phyag 'tshal lo/ /rdo rje 'dzin pa thams cad la phyag 'tshal lo zhes bya ba ni/ de bzhin gshegs pa dang / rdo rje 'dzin pa ni khams gsum gyi sems can thams cad skyob pa dge ba'i bshes gnyen yin pas de dang nam du yang mi 'bral bar bya ba'i phyir gus pa zhes ri mor bya ba'i phyir phyag 'tshal lo zhes bya ba yin no/ /gzhung las/ oM b+ha ga bAn nA rdo pa raM bid shad+ha ya swA hA/ zhes bya ba nas/ oM zhes bya ba ste sngags kyi yi ge 'bru drug po 'di rnams ni dkyil 'khor kyi nang na bzhugs pa'i byang chub sems dpa' so so'i rigs kyi snying po 'di'i don ni spyod pa thams cad kyi thog mar 'gro ba'i don yin no/ /rig pa chen po'i snying po 'di bshad pa'i tshe de bzhin gshegs pa thams cad kyi byin gyi rlobs kyis shes rab dang pha rol tu phyin pa mnyam par sbyor ba'i don te/ ma nor bar bton pa'i dam tshig gi sgra dang sngags kyi snying po yi ge 'bru drug brjod pa bar snang la grag go/ /sngags kyi snying po 'di rnams ni rig 'dzin thams cad kyi rtag tu bsnyen bkur bya zhing rjes su dran par bya'o/ /de bzhin gshegs pa thams cad 'dus te chos kyi rnam grangs snying po bstan pa 'di dngos grub thams cad thob par byed pa'i don yod pas de bzhin gshegs pa kun kyang myur du 'grub par byin gyis brlabs nas legs so zhes bya ba byin no/ /oM zhes bya ba'i don ni de bzhin gshegs pa rnam par snang mdzad kyi sku lta bu'o/ /bar ma ni k+Sho b+h+ya dang / rat+na sam+b+ha ba dang / a mo g+ha sid+d+hi 'dus pa'i sku lta bu'o/ /tha ma ni chos kyis a mi tA b+ha lta bur blta'o/ /yang rnam pa gcig tu na thog ma ni pha rol tu phyin pa tha ma ni rab/ bar ni byang chub kyi sems lta bu yin no/ /gzhung las sems dpa' chen po zhes bya ba nas blo gros chen po legs so zhes bya ba'i bar du ste/ rigs kyi yum rnams kyis mnyam par sbyor ba'i dkyil 'khor so so'i yon tan rdo rje rigs kyi dkyil 'khor la bstod pa ni sems dpa' chen po legs so zhes bya ste/ rdo rje sems dpa' ni khams gsum pa thams cad kyi slob dpon lta bu ste/ stong pa nyid dang shes rab kyi pha rol tu phyin pa mnyam par sbyor zhing bdud la sogs pa log par lta ba thams cad zil gyis gnon par mdzad de ma rungs pa thams cad 'dul ba'i gnyen po bas de'i phyir rdo rje zhes bya ste/ chos thams cad stong pa nyid mnyam pa las ma 'gyur bar 'jig rten gyi chos dang longs spyod thams cad la yang mngon par spyod pas yon tan phun sum tshogs pa bsam gyis mi khyab pas legs so zhes bya bas bstod do/ /rin po che'i rigs kyi dkyil 'khor la bstod pa ni bde ba chen po legs so zhes bya ba yin no/ /chos kyi rigs kyi dkyil 'khor la bstod pa stong pa nyid kyi ye shes dang / shes rab kyi pha rol tu phyin pa mnyam par sbyor bas don dam pa'i bden pa dang kun rdzob kyi bden pa dang yang ldan/ thabs dang shes rab zung du 'brel te mnyam pas bsod nams ye shes kyi tshogs rdzogs par 'gyur bas theg pa chen po'i chos kyi dkyil 'khor te/ yon tan bsam gyis mi khyab pas theg pa chen po legs so zhes bya ba yin no/ /las kyi rigs kyi dkyil 'khor la bstod pa ste/ stong pa nyid kyi ye shes dang / shes rab kyi pha rol tu phyin pa mnyam par sbyor bas dngos grub kyi las sna tshogs mdzad kyis kyang mnyam pa nyid kyi chos nyid las mi 'gyur bas ji ltar bstod pa bzhin du yang grub la/ shes rab dang thabs chen po chud mi zabs shin tu blo gros dang ldan pa yin pas yon tan bsam gyis mi khyab pa'i phyir blo gros chen po legs so zhes bya ba yin no/ /gzhung las/ cho ga 'di ni dge bar smras/ /zhes bya ba nas/ bshad pa la ni mngon par bstod/ /ces bya ba'i bar du ste/ stong pa nyid kyi ye shes dang shes rab kyi pha rol tu phyin pa mnyam par sbyor bas/ 'jig rten gyi chos thams cad la 'dzem pa med par spyod/ shes rab dang thabs kyi spyod yul yang ngo bo nyid kyis mnyam pa ste/ bsod nams dang ye shes kyi tshogs yongs su rdzogs par 'gyur ba'i sgo/ sems can thams cad kyang mos shing dad par 'gyur ba'i chos chen po yin pas dge bar smras so zhes bya'o/ /dkyil 'khor chen po mdzad pa'i tshe de bzhin gshegs pa phyogs bcu'i sangs rgyas thams cad kyang phyag na rdo rje bsnams te/ shes rab dang pha rol tu phyin pa nyid du zhugs nas/ mdo sde zab mo 'di yang de bzhin gshegs pas dkyil 'khor mdzad pa'i tshul du bstan pa ste/ de bzhin gshegs pa thams cad kyi rdo rjer byin gyis brlabs pa zhes bya'o/ /chos thams cad rang bzhin gyi stong pa nyid yin gyis kyang kun rdzob tu rgyu dang 'bras bur sbyar ba ste/ de bas na mdo sde'i don 'di bstan pas thob pa'i shes rab bskyed de chos nyid kyi rig pa la brten nas bsam pa'i shes rab kyis don gang yin pa la gzhig par byas nas mnyam par sbyor ba'i don la bsgoms na/ 'bras bu byang chub kyi rig 'dzin la sogs te bla na med pa'i sa man chad dngos grub ci 'dod pa thob par 'gyur te 'bras bu yod pas sems can kun kyang dam pa'i chos spyod pas 'di la 'jug cing sgom par 'gyur bas 'dul ba'i mchog ces bya'o/ /mnyam par sbyor ba'i sgo yangs pa 'di la kun kyang mos shing dad par gyur la longs spyod dang ldan bzhin du bla na med pa thob par 'gyur bas thob pa'i rgyal po ste/ shes rab dang thabs gnyis mnyam par spyod pas lhag pa'i chos gud na med pas sangs rgyas kyis thob pa'i sa che ba las bsgrub tu med pas bla na med pas bla na med pa zhes bya'o/ /sems can gang yang rung ste/ dam pa'i chos spyod lam 'di la nyan pa dang sems pa dang bsgom pa la sogs te nan tan du byed pa la ni gdon dang bgegs la sogs pa thams cad kyis spyod pa'i bar chad du mi 'gyur ba dang 'tshe bar byed mi nus so/ /sangs rgyas dang byang chub sems dpa'i sa thob par bya ba dang / dngos grub dam pa ci 'dod pa thams cad sangs rgyas kun gyis ring por mi thogs par ster bar 'gyur ro zhes gsungs pa yang mi 'gal bar myur du thob par 'gyur ro/ /stong pa nyid kyi ye shes dang mnyam pa'i chos chen po de bzhin gshegs pa thams cad kyis gsungs pa yang de bzhin gshegs pa thams cad kyis chos mnyam pa nyid kyi sbyor ba byin gyis brlabs pas gsang ba'i don 'di yang rdo rje can gyis grub par 'gyur ro/ /theg pa chen po'i chos yangs pa shin tu rgya che la longs spyod dang ldan bzhin du grub pa'i chos bshad pa 'di la don chen po yod par mthong nas mngon par dga' zhing bstod do/ /gzhung las de nas bcom ldan 'das rnam par snang mdzad ces bya ba nas/ swa badzra oM zhes bya ba'i bar du ste/ bcom ldan 'das rnam par snang mdzad chen po ni khams gsum thams cad kyi chos kyi rgyal por dbang bskur ba yin pas gsang ba'i chos nyid pas na stong pa nyid kyi ye shes dang gnyis su med par mnyam par sbyor ba spros pa med pa bde ba chen po'i don yod pa m nyam par sbyor ba mi gtong ba'i dam tshig dang ldan pa chos yangs shing rgya che ba'i sgo 'di thog ma dad pas rtsom pa nas zhugs nas mjug bla na med pa thob kyi bar du nyon mongs pa med par sgrib pa thams cad spangs pas na thog ma dang tha ma dang dbus kyi khyad par med par dus thams cad du bde ba mnyam pa'i chos gsungs so/ /mur thug la sogs pa chos zab mo'i don ma mthong ba stong pa nyid kyi ye shes dang / gnyis su med pa'i mnyam par sbyor ba'i chos nyid mi shes pa rnams kyis ni dka' thub pa nyon mongs pa spyad kyis kyang 'bras bu bde ba thob par mi 'gyur ro/ /des na spyod pa kun las 'phags pa'i chos kyang thugs rje can gyis bstan par zad do/ /de bzhin gshegs pa'i rigs kyi dkyil 'khor te/ byang chub sems dpa' chen po rnams stong pa nyid kyi ye shes gnyis su med par mnyam par sbyor bas longs spyod dang ldan zhing / bla na med pa'i dngos grub thob pa sems can thams cad kyang byang chub tu sgrol bar byed pas thog ma dad pa la zhugs nas tha ma bla na med pa la sgrol ba la thug gi bar du dus thams cad du bde bas 'dod chags chen po'i dngos grub dam pa ni de bzhin gshegs pa thams cad kyi bde ba chen po'i dngos grub dam pa zhes bya ste/ de bzhin gshegs pa'i sku'i spyod yul du bstan nas de bzhin gshegs pa'i rigs kyi dkyil 'khor zhes bya'o/ /chos kyi rigs kyi dkyil 'khor te stong pa nyid kyi ye shes dang shes rab dang pha rol tu phyin pa mnyam par sbyor ba las longs spyod tshad chen po dang ldan zhing bde ba 'di yang thams cad chos kyi dbyings la khyab te/ don dam pa'i mtshan nyid pas chos kyi rigs kyi dkyil 'khor zhes bya'o/ /rin po che'i rigs kyi dkyil 'khor te/ stong pa nyid kyi ye shes dang gnyis su mnyam par sbyor bas bdud kyi stobs thams cad rab tu 'joms pa'i dngos grub dam pa yang de bzhin gshegs pa rnam par snang mdzad mngon par byang chub pa phyogs bcu'i sangs rgyas thams cad kyi rin po che'i phreng bas khams gsum gyi rgyal por dbang skur bar byed pas na rin po che'i rigs kyi dkyil 'khor zhes bya'o/ /las kyi rigs kyi dkyil 'khor te/ stong pa nyid kyi ye shes dang mnyam par sbyor bas khams gsum pa thams cad kyi bdag po byed pas sems can gyi khams ma lus pa thams cad dag pa'i spyod yul la dgod pa'i phyir 'khor ba'i nang na gnas shing sems can gyi don la brtson kyang 'khor ba'i nyon mongs pas mi chags pas mi gnas pa'i mya ngan las 'das te/ sems can thams cad kyi don chu'i rgyun dang 'dra ba'i las 'jug cing dngos grub dam pa thams cad thob pa'i las spyod pas na las kyi rigs kyi dkyil 'khor zhes bya'o/ /dkyil 'khor gsungs pa yang / dkyil 'khor la lar ni lngar gsungs la/ la lar ni bzhir gsungs/ la lar ni gsum du gsungs pa ji lta bu zhe na/ dkyil 'khor lngar gsungs pa ni de bzhin gshegs pa'i rigs dang / rdo rje'i rigs dang / rin po che'i rigs dang / chos kyi rigs dang / las kyi rigs te 'di rnams kyi mtshan nyid dang yon tan te/ de bzhin gshegs pa lnga dang yum lnga'i don bstan to/ /dkyil 'khor bzhir bstan pa ni rdo rje'i rigs kyi nang du de bzhin gshegs pa'i rigs bsdus te dkyil 'khor bzhir bstan to/ /gsung rab kha cig las dkyil 'khor gsum du bstan te/ de bzhin gshegs pa'i rigs kyi nang du rdo rje rigs bsdu/ las kyi rigs kyi nang du rin po che'i rigs sdud pa dang / chos kyi rigs kyi dkyil 'khor te/ 'di ltar gsungs pa/ de ci dang 'dra zhe na/ phyin ci log gi dbang gis lus dang ngag dang yid kyi spyod yul 'dod chags dang zhe sdang dang gti mug gsum byung ste/ sems can nyon mongs pas bcings pas 'khor ba'i nang du sdug bsngal ba yang lus dang ngag dang yid gsum 'khrul pa'i dbang gis gyur to/ /phyin ci log med stong pa nyid kyi ye shes dang pha rol tu phyin pa mnyam par sbyor ba'i dag pas lus rdo rje zhes bya ste/ de bzhin gshegs pa'i sku phyag rgya chen po dkyil 'khor zhes bya'o/ /ngag rdo rje ste don dam pa'i chos kyi dbyings dang mthun pas de bzhin gshegs pas chos kyi dbyings kyi dkyil 'khor zhes bya'o/ /yid rdo rje zhes bya ba ni de bzhin gshegs pa'i ye shes dang ldan pa yin pas na sems can gyi don bya ba sna tshogs mdzad pa dngos grub kyi las thams cad mngon par spyod pa'i dbang du byed cing las rnams la spyod pas de bzhin gshegs pa rin po che'i rigs dang / de bzhin gshegs pa las kyi rigs gcig tu bsdus pa'i dkyil 'khor zhes bya ste/ lus dang ngag dang yid gsum rdo rjer 'gyur bas 'dod chags ni de bzhin gshegs pa rdo rje'i rigs kyi dkyil 'khor gyi mtshan nyid du gyur/ zhe sdang ni de bzhin gshegs pa rin po che'i rigs kyi dkyil 'khor gyi mtshan nyid du 'gyur/ gti mug ni de bzhin gshegs pa chos kyi rigs kyi dkyil 'khor du gyur pas na 'dod chags zhe sdang gti mug rnams kyang de bzhin gshegs pa'i sku'i mtshan nyid du bshad pas nyon mongs pa'i chos zhes gzhan gud na med pas chos so cog thams cad rnam par dag pa'i rang bzhin yin par mngon no/ /dkyil 'khor phyogs bzhi dbus lnga dang / sangs rgyas dang byang chub pa'i ye shes dang spyod yul sngar so sor 'gyur te/ gcig tu na spyod yul gcig las med pa ma yin gyi/ rigs kyi dkyil 'khor la yang rigs kyi lnga char gyi mtshan nyid yon tan dang spyod yul dang tshogs shing dang ldan pas ming tsam du dkyil 'khor yang lnga'i mtshan nyid du dbye bar zad do/ /dkyil 'khor lnga yang de bzhin gshegs pa'i sku ste chos kyi dbyings nyid yin/ rigs kyi yum dang gtso bo nyid las sprul to/ /mchod pa'i lha mo bcu drug kyang rigs kyi yum las gzhan ma yin no/ /swa badzra oM zhes bya ba'i swAM ni dpal dang ldan pa'am bkra shis pa'i mtshan nyid/ badzra ni rdo rje'i mtshan nyid/ oM ni de bzhin gshegs pa'i mtshan nyid do/ /de bzhin gshegs pa thams cad kyi yum zhes bya ba nas swa zhes bya ba'i bar du ste/ de bzhin gshegs pa thams cad kyi yum shes rab kyi pha rol tu phyin pa mnyam par sbyor ba'i bde ba chen mo de bzhin gshegs pa thams cad dang tha mi dad pa mnyam par sbyor ba'i chos don ji lta ba bzhin du mkhyen pa'i chos/ chos thams cad kyi dbyings las tha mi dad pa'i phyir don thams cad bsgrub par gsungs te/ swA hA zhes bya ba ni zhi ba dang rgyas pa dang bkra shis kyi don yin/ hUM dang phaT ces bya ba ni mngon spyod dang dgug pa dang 'jigs par bya ba'i don yin te/ 'di rigs kyi yum gyi chos thams cad dge zhing bkra shis par gsungs pa'i phyir zhes brjod do/ /gzhung las/ ci'i phyir zhe na/ ji srid 'khor ba'i gnas su ni/ /zhes bya ba nas dngos grub kyi phyogs kyang tshe 'di la thob par 'gyur ro/ /hUM zhes bya ba'i bar du ste/ rigs kyi yum gyi stong pa nyid kyi ye shes dang / shes rab dang pha rol tu phyin pa mnyam par sbyor ba la mkhas pa'i mchog thob par 'gyur zhing / sems can 'khor ba'i mtha' med pa de srid du don mdzad pas na de bzhin gshegs pa dang byang chub sems dpa' ma gtogs par shes rab dang pha rol tu phyin pa mnyam par sbyor ba'i rgya chen po 'di la don chud mi za ba mkhyen nas tshigs bcad du bstod pa yin no/ /'khor ba thog ma dang tha ma med pa'i phyir mtha'i mtha' yang med de/ ji tsam du 'khor ba mtha' med pa'i bar du stong pa nyid dang nyan thos dang rang sangs rgyas kyis ni de dang mnyam par sbyor ba ma yin no/ /de ltar 'khor ba mtha' med pa'i don la sems dang p o bskyed pa nas zhugs pas ni bla na med pa'i byang chub tu mngon par sangs rgyas kyis kyang thog ma snying rje chen po dang smon lam chen pos sems can gyi don la 'jug par bya ba'i shugs kyis sems can gyi don tshul rgyun dang 'dra bar mdzad pas nyan thos dang rang sangs rgyas dang rang bzhin du phung po'i lhag ma ma lus pa'i mya ngan las 'da' bar mi mdzad do/ /shes rab ces bya ba ni chos thams cad stong pa mnyam pa nyid du shes pa yin te/ pha rol tu phyin pa zhes bya ba ni chos thams cad kyi dbyings kyi mtshan nyid de/ de shes rab dang dbyings gnyis su sbyor te mnyam par gyur pa'i dus na/ shes rab dang yongs su rdzogs pa'i mthar phyin pa'i phyir shes rab kyi pha rol tu phyin pa zhes bya'o/ /thabs ni shes rab dang pha rol tu phyin pa mnyam pa nyid la byang chub kyi sems skyes te/ sems de las sangs rgyas dang byang chub sems dpa' thams cad bskyed pa dang / de bzhin gshegs pa thams cad kyi mchod pa phun sum tshogs pa bskyed pa dang / dngos grub dam pa thams cad bskyed pa dang / sems can la phan pa dang bde ba'i don byas pas na/ shes rab kyi pha rol tu phyin pa thabs su 'brel pa thabs kyis gzung ba'i shes rab pas shes rab kyang thabs shes rab kyis gzung ba'i thabs pas na thabs kyang shes rab ste/ de ltar shes rab dang thabs dus thams cad du mnyam pa'i dus na ye shes kyi byin gyis brlabs pa'i sa pas chos so cog thams cad rnam par dag pa'i rang bzhin du gyur pas na rang bzhin med pas dag par 'gyur/ ji srid du sems can 'khor ba'i mtha' med pa'i bar du 'jig rten gyi sdig pa'i chos thams cad dang / 'dod chags kyi nyon mongs pa'i 'ching bar mi 'gyur gyis rnam par dag pa'i spyod yul du gyur pas na de bas na sems can thams cad kyang mnyam par sbyor ba la 'dzud cing sgrib pa med par byed pa'i phyir/ ji srid 'khor ba de tsam gyi bar du sems can 'dul zhing dge ba'i bshes gnyen byed do/ /chos thams cad nam mkha'i mtshan nyid dang mtshungs pa rang bzhin gyis grub pa med de ci la yang mi gnas pa'o/ /nam mkha' zhes bya ba yang sems can phyin ci log gis las kyi 'bras bu la nam mkha' yang dngos po mi snang ba'i phyir med par 'dzin gyis/ chos thams cad rang bzhin gyis stong ste mnyam pa'i dus kyi nam mkha' la ci zhig med na med ces bya ste/ med par lta ba yang mi 'byung bas na de bas na nam mkha' la yang mtshan grub pa med pa'i phyir ro/ /chos so cog thams cad kyang nam mkha' bzhin te grub pa med pas mnyam/ rang bzhin gyis dag pa'i phyir nyon mongs pa'i 'ching bar mi 'gyur bas na kun gyi mchog mngon pa nyid rdzogs zhes bya'o/ /dper na pad+ma tshogs kyis bsgyur yang sman gyi kha dog gis mi 'gyur ba bzhin du stong pa nyid kyi ye shes dang gnyis su med pa'i mnyam par sbyor bas 'gro ba la phan pa'i don byed kyi nyes pas 'ching bar mi 'gyur ro/ /shes rab pha rol phyin pa mnyam par sbyor bas longs spyod chen po'i nang du bzhugs te/ sems can thams cad 'khor ba las sgrol ba'i don byed kyang rnam par dag pa'i spyod yul du gyur pas na longs spyod chen po dang yang mi 'bral ba'i phyir na don che/ stong pa nyid kyi ye shes dang mnyam par sbyor ba la gnas pas sdug bsngal dang nyon mongs pa med pa'i phyir ni bde ba che ste/ de ltar na spyod pa la bsod nams dang ye shes kyi tshogs su rdzogs te/ sku gsum lhun gyis grub pas/ bcom ldan 'das dpal rnam par snang mdzad mngon par rdzogs par sangs rgyas nas sems can thams cad yongs su smin par mdzad pas na sems can gyis hA zhes bya ba ni chos rgya chen po 'dis sems can smin par 'gyur bas dga' ste dgod pa'i tha tshig go/ /stong pa nyid kyi ye shes dang / mnyam par sbyor ba'i chos ni nyan pa la sogs te bsgom pa nan tan chen por byas na bde ba thams cad thob pa dang dngos grub kyi mchog kyang tshe 'di nyid la thob par 'gyur ro/ /hUM zhes bya ba'i don ni rtag tu bshad pa dang mthun no/ /gzhung las/ bcom ldan 'das lag na rdo rje zhes bya ba nas de bzhin gshegs pa thams cad kyi gsang ba'i dngos grub kyi dam pa rdo rje 'dzin chen po dang de bzhin gshegs par 'gyur ro zhes bya ba'i bar du'o/ /oM de bzhin gshegs pa'i sku'i mtshan nyid du byin gyis brlabs pa yin/ de bzhin gshegs pa ni sems can gyi mig chos kyi mtshan nyid rnam par dag pa yongs su ston pas na/ oM ni chos thams cad la dbang byed pa'i phyir thog mar 'gro zhes bya'o/ /de man chad ni tshig gi mjug rgyan te/ yi ge'i nang nas dngos su zer bar zad do/ /zhal nas gsungs pa'i dgongs pa ni ma rab kun la bka' yis kyang tshig go cog gi don de ni de bzhin gshegs pa'i byin gyi rlabs kyis byin gyis brlabs pa yin no bar gzhung las mngon sum du gsungs pa'i phyir sems can gyi phyir bstan pa rnams ma nor ba tsam mo/ /'phags pa shes rab kyi pha rol tu phyin pa tshul brgya lnga bcu ba'i 'grel ba/ rgya gar gyi mkhan po dz+nyA na mi tras mdzad pa rdzogs so/ /[ ]@##/ /rgya gar skad du/ sha tAk+Sha ra bi d+hiH/ bod skad du/ yi ge brgya pa'i cho ga /dpal rdo rje sems dpa' la phyag 'tshal lo/ /rdo rje sems dpa'i dkyil 'khor dang / /de bzhin rnam par snang mdzad dang / /khams gsum rnam rgyal nyid dang ni/ /

CLOSE WINDOW