བོད་ཡིག

e-texts based on the ACIP/ALL Input

/rgya gar skad du/ Ar+ya many+dzu shrI nA ma sang+gI ti br-it+ti nA ma/ bod skad du/ 'phags pa 'jam dpal gyi mtshan yang dag par brjod pa zhes bya ba'i 'grel pa/ 'jam dpal gzhon nur gyur pa la phyag 'tshal lo/ /gnyis med gnyis snang chos rnams kyi/ /dang po'i sangs rgyas nang gnas pa/ /srid dang mya ngan 'das 'khor lo'i/ /dbang phyug ye shes skur btud nas/ / gang gis zab mo'i rim pa 'di/ /yongs su nyams par mi 'gyur bar/ /mtshan brjod la ni gus pa yis/ /bla ma'i gdams pas rnam par dbye/ /de la brjod par bya ba ni gang / dgos pa dang dgos pa'i dgos pa ni gang / 'brel pa ni gang yin zhe na/ rten dang brten pa'i dbye ba tha dad pa sku gsum gyi bdag nyid bcom ldan 'das 'jam dpal ni rgyud kyi brjod par bya ba yin no/ /bstan pa ni dgos pa'o/ /'jig rten dang thun mong dang / mchog gi dngos grub ni dgos pa'i dgos pa'o/ /'brel pa ni thabs dang thabs las byung ba'o/ /'dir bcom ldan 'das rnam par snang mdzad shAkya thub pa sprul par bzhed pa rdzogs ldan gyi dus su gtsang ma'i gnas dang 'brel pa'i gzhan 'phrul dbang byed kyi gnas na byang chub sems dpa'i tshogs chen po dang / rig pa'i lha mo rnams dang / khro bo'i rgyal po rnams dang / bran pho dang / bran mo dang / pho nya dang / pho nya mo dang / phyag brnyan dang / phyag brnyan mo rnams kyis yongs su bskor cing mdun gyis bltas te/ thog ma dang tha ma dang / bar du dge ba sgyu 'phrul dra ba stong phrag drug cu ba gsungs pa'i rjes la ting nge 'dzin dra ba'i le'u gsungs pas na/ de nas zhes bya ba la sogs pa gsungs pa yin no/ /de yang sbyor ba dang dngos gzhi dang rjes rnam pa gsum du 'gyur te/ de la sbyor ba la bzhi ste/ tshigs su bcad pa bcu drug gis gsol ba btab pa dang / tshigs bcad drug gis skabs dbye ba dang / tshigs bcad gnyis kyis rigs drug la gzigs pa dang / sngags dang bcas pa'i tshigs bcad gsum gyis 'khor lo drug bskyed pa'i sgyu 'phrul dra ba mngon par byang chub pa bstan pa'o/ /'dir yang gsol ba 'debs pa ni mi bskyod pa'i sprul pa khams gsum rnam par rgyal ba dang sdud pa po lcang lo can gyi phyag na rdo rjes re zhig dang por gsol ba 'debs pa'i dbang du byas nas/ de nas zhes bya ba la sogs pa gsungs te/ sgyu 'phrul dra ba'i rgyud du rigs drug gi 'khor lo sprul pa'i rjes thogs la'o/ /gang gis gsol ba 'debs she na/ dpal ldan te bsod nams dang ye shes kyi tshogs dang ldan pa'o/ /rdo rje 'chang zhes bya ba ni/ mi bskyod pa'i rigs yin pa'i phyir ro/ /gdul dka' ba ni lha la sogs pa ste/ dbang phyug chen po dang / khyab 'jug dang / tshangs pa dang / gzhon nu gdong drug dang / brgya byin dang / gza' rnams la nyi ma dang / zla ba dang / spen pa dang / mig dmar dang / rtag tu myos nas glang sna dang / rdo rje phreng ba dang / rgyal ba dang / rnam par rgyal ba dang / sa la gnas pa las me dang / rlung dang / sa bdag dang / gnod sbyin dang / sa 'og pa rnams las/ phag dang gshin rje dang / bgegs kyi gtso bo dang / chu rnams 'dul bar mdzad pa'o/ /mchog ni 'khor rnams las gtso bor gyur pas so/ /dpa' bo ni rnal 'byor ma'i rgyud kyi bdag po yin par bstan to/ /'jig rten gsum las rgyal ni sa 'og dang sa steng dang / bar snang gi 'jig rten gsum las rgyal ba'o/ /rdo rje ni mi bskyod pa'i rigs te/ de rnams kyi dbang phyug go/ /gsang ba'i rgyal ni/ dbang bskur ba'i mtshan ma 'dzin pas na rin chen 'byung ldan gyi rang bzhin no/ /pad+ma dkar po rgyas 'dra'i spyan ni/ spyan gyi phyag rgya'i sgo nas snang ba mtha' yas kyi rang bzhin du bstan to/ /pad+ma rgyas 'dra'i zhal mnga' ba ni/ zhal gyi phyag rgya'i sgo nas don yod grub pa'i rang bzhin du bstan to/ /rang gi lag gis rdo rje mchog ni phyag rgya'i sgo nas so/ /yang nas yang du gsor byed pa ni rnam par snang mdzad la mchod pa'o/ /su dang lhan cig tu zhe na/ khro gnyer rim par ldan la sogs pa gtso bor gyur pa gang yin ba de ni rdo rje gtsug phud dang / rdo rje gtsug tor dang / rdo rje mdzod spu dang / rdo rje rigs mchog dang / 'dod pa'i rgyal po dang / gshin rje gshed dang / rdo rje ske rags dang / rdo rje lcags kyu dang / rdo rje zhags pa dang / rdo rje kI li kI la dang / rdo rje snyems pa dang / rdo rje 'ching ba dang / rdo rje khu tshur dang / rdo rje sde dang / rdo rje spyi gtsug dang / rdo rje rab tu 'dud pa dang / rdo rje srung ba dang / rdo rje rkang gdub dang / rdo rje lcags sgrog dang / rdo rje rnon po dang / rdo rje shugs te nyi shu rtsa gcig go/ /rang rang gi 'khor mtha' yas pas na/ lag na rdo rje mtha' yas pa'o/ /dpa' bo de rnams kyang gtso bo bzhin du gdul dka' ba'o/ / gdul bya'i bsam pa'i dbang gis 'jigs su rung ba dang dpa' byad can te/ dpa' ba dang / mi sdug pa dang / 'jigs su rung ba dang / dpa' byad can gyi nyams bzhi ni don dam par yod pa ma yin no/ /rdo rje rtse mo rab 'phro ba ni gsol ba 'debs pa'i rjes su 'jug pas rdo rje bye ba spros nas sangs rgyas la mchod pa byed do zhes bya ba'i don to/ /ci'i phyir gsol ba 'debs she na/ snying rje che dang shes rab la sogs pa'o/ /thabs kyis zhes bya ba ni zhi gnas so/ /'gro ba'i don byed pa ni 'jig rten dang thun mong dang mchog gi dngos grub bo/ /spyod lam ji lta bu zhe na/ dga' mgu rangs pa'i bsam pa can dang ngo / /'gro ba'i don byed pa dang rjes su 'jug pa ni sbyor ba dang dngos gzhi dang mjug gi rim gyis sam/ snying rje chen po dang / shes rab dang thabs kyi rjes su 'jug pas na dga' mgu rangs pa'i bsam pa can no/ /khro bo'i lus kyi gzugs ldan pa ni snga ma bzhin no/ /khro bo'i gzugs dang ldan pa'i 'bras bu ni sangs rgyas phrin las byed pa'i mgon te/ sangs rgyas kyi bka'i rjes su 'jug pa'i phyir ro/ /lus btud rnams dang lhan cig tu ni phyag 'tshal ba'i yang gtso bo'i rjes su 'brangs pa yin no zhes bya ba'i don to/ / gang la phyag 'tshal zhe na/ de bzhin gshegs pa bcom ldan 'das/ /rdzogs sangs rgyas la'o/ /ci zhig byas nas she na/ phyag 'tshal nas te/ phyogs bzhi nas bya zhes bya ba'i don to/ /thal mo sbyar nas zhes bya bas gsol ba 'debs pa'i sbyor ba bstan nas/ gsol ba gdab pa dngos ni/ khyab bdag bdag la sman pa dang / /zhes bya ba la sogs pa smos te/ sman pa ni mngon par mtho ba'o/ /bdag don ni nges par legs pa'o/ /thugs brtse'i phyir ni phan pa'i don la rab tu sbyor ba'o/ /dkyil 'khor gyi 'khor lo'i bdag nyid phyi rol du dkyil 'khor drug sprul pa'i sgyu 'phrul dra ba de'i mngon par rdzogs par byang chub pa ni thos pa dang bsam pa dang bsgom pa'i mngon sum du mdzod cig pa'o/ /rang gi don 'ba' zhig ma yin par bstan pa ni/ nyon mongs pas ni sems dkrugs shing / /zhes bya ba ste/ kun 'byung ba'i bden pa'i nang du gtogs pa zhes bya ba'i don to/ /mi shes 'dam du bying ba yi/ /zhes bya ba ni sdug bsngal gyi bden pa'o/ /sman pa ni 'jig rten dang thun mong gi dngos grub po/ /bla med 'bras bu ni 'jig rten las 'das pa'i dngos grub po/ /rdzogs pa'i sangs rgyas bcom ldan 'das ni shin tu rnam par dag pa'i phyir rnam par snang mdzad do/ /ston pa ni mi bskyod pa ste me long lta bu'i yin pa'i phyir ro/ /'gro ba'i bla ma ni cod pan gso ba bas na rin chen 'byung ldan gyi rang bzhin yin pa'i phyir ro/ /dam tshig chen po ni rdo rje 'dzin pa ste mi 'da' bas so/ /de nyid mkhyen pa ni snang ba mtha' yas te so sor rtog pas so/ /dbang po bsam pa mkhyen mchog ni don yod grub pa ste bya ba nan tan grub pas so/ /yul gang la gsol ba 'debs she na/ ye shes sku ni me long lta bu'o/ /gtsug tor chen po ni mnyam pa nyid do/ /tshig gi bdag po ni so sor kun du rtog pa'o/ /ye shes sku ni bya ba nan tan no/ /rang byung ba ni shin tu rnam par dag pa'o/ /'jam dpal ye shes sems dpa' yi/ /ming ni yang dag brjod pa'i mchog /ces bya bar sbyar ro/ /gang 'dir 'khor gyi ming brjod pa de lta na yang stong pa nyid bsgom pa la sogs pa rgyur gyur pa ni 'bras bu'i gnas skabs na yang yongs su rdzogs pa rdo rje sgeg mo la sogs pas kyang de nyid brjod pa yin pas mi 'thad pa ni cung zad kyang med do/ /don zab pa ni don zab pa'i bden pa la 'jug pa'o/ /rgya che ba ni kun rdzob tu sku mdog dang phyag mtshan dang dbyibs la sogs pa bstan pa'o/ /de dag ni brjod par bya ba'o/ /don chen po ni dngos grub gsum ste ye shes phun sum tshogs pa'o/ /mtshungs pa med pa ni yon tan phun sum tshogs pa'o/ /rab zhi ba ni spong ba phun sum tshogs pa ste/ de gsum ni 'bras bu'o/ /thog ma bar dang mthar dge ba ni thos ba dang bsam pa dang bsgom pa'i dad pa'i rgyur gyur pa'am/ bslab pa rnam pa gsum mam/ dbang bskur ba dang / sgrub ba dang / dngos grub sgrub ba de thabs so/ /ngas bstan pas ci zhig bya snyam na/ 'das pa'i sangs rgyas rnams zhes bya ba la sogs pa gsungs te/ 'das pa'i sangs rgyas rnams kyis gsang ba'i theg pa gsungs pa dgag par bshad pa ni sprul pa'i sku la dgongs pa yin pas nyes pa med do/ /rdo rje 'chang chen po ni ston pa'o/ /gsang sngags 'chang ba ni sdud pa po la sogs pa'i 'khor dpag tu med pa'o/ /bka' bzhin du ni theg pa gzhan las khyad par du gyur pa'i bde ba'i don to/ /skabs su phyag na rdo rjes gsol ba 'debs pa ni/ mgon po rdzogs sangs rgyas kun gyi/ /zhes bya ba smos te/ 'jig rten gsum las rnam par rgyal ba 'ba' zhig gsol ba 'debs pa ni ma yin te/ phyag na rdo rje bdag gis kyang gzung bar bya ste/ bsdus nas rgyun chags par bya ba'i phyir ro/ /de nyid smras pa ni sangs rgyas kun gyi gsang ba 'dzin pa'o/ /ji ltar 'dzin zhe na/ sems can rnams la bshad par 'tshal ba'i phyir ro/ /bsam pa'i khyad par ji bzhin zhes bya ba ni/ 'ga' zhig la pha rol tu phyin pa'i theg pa dang / gzhan dag la phyi dang nang dang gsang ba'i theg pa'i bye brag gis so/ /de ltar gsol ba btab pas gnyis ka'i gsol ba btab pa'i mjug bsdus pa yin no/ /gsang sngags ni 'jig rten gsum las rnam par rgyal ba'o/ /lag na rdo rje ni lcang lo can gyi'o/ /'di dang zhes bya bas blta bar bya'o/ /lus btud nas ni spyan sngar 'dug / ces pas ni rjes las thob pa bstan to/ /tshigs su bcad pa drug gis zhal gyis bzhes pa bstan pa ni/ de nas zhes bya ba la sogs pa smos te/ tshigs su bcad pa phyed dang gsum gyis bshad pa'i yan lag las ljags brkyang bar mdzad pa dang / 'jig rten gsum po snang bar mdzad pa dang / bdud bzhi'i dgra rnams 'dul bar mdzad pa dang / 'dzum pa'i 'od zer gyis ngan song gsum sbyong bar mdzad pa dang / tshangs pa'i gsung snyan pa'i mgur gsal bas 'jig rten gsum po bkang ba'o/ /ljags brkyang bas ni 'jig rten gsum po bkang ba'i dgos pa'o/ /cig car 'dod pa dang / gzugs dang / gzugs med pa'i gdul bya rnams 'dul ba la nye bar mkho ba'i 'jig rten gsum po kun bkang ba'i 'jig rten gsum snang bar byed pa rjes su mthun pa rig par bya'o/ /la la ni 'jig rten gsum bkang bas mi nye ba'i 'khor rnams 'gugs pa yin no zhes zer ro/ /tshangs pa'i gsung ni yan lag drug cu dang ldan pa'o/ /lag na rdo rje stobs po che/ /gsang dbang la ni zhes bya ba ni gsol ba 'debs pa gnyis dang rjes su mthun pa'i lan gsungs pa yin no/ /'gro la phan pa'i don du zhes bya ba ni 'gro la phan pa dang 'gro ba'i don zhes bya ba gnyis su sbyor ro/ /bdag don bdag la thugs brtse'i phyir/ /zhes bya ba ni sngar rang gi don du bstan pa gang yin pa de go rims tsam du rjes su bstan pa yin te/ rang gi don nyid gzhan gyi don yin pa'i phyir ro/ /'di ni gzhan gyi don gyi mjug sdud pa yin pas 'gal ba med do/ /don che ba ni zab pa dang rgya che ba'i don mdzad par bya'o/ /dag par byed pa ni thog ma dang dbus dang tha mar dge ba ste 'grub pa'i thabs so/ /sdig sel ba ni don che ba dang mtshungs pa med pa dang rab tu zhi ba ste 'bras bu'o/ /legs so dpal ldan rdo rje 'chang / /zhes bya ba ni mi bskyod pa'i sprul pa khams gsum rnam par rgyal ba'o/ /lag na rdo rje khyod legs so/ /zhes bya ba ni lcang lo can gyi bdag po'o/ /gsang ba'i bdag po zhes bya ba ni gsang ba byang phyogs kyi gnod sbyin gyi bdag po phyag na rdo rje'o/ /rdo rje 'chang ba yang gsang ba'i bdag po yin pas thun mong du bstan to/ /bcom ldan de ni legs zhes gsol/ /zhes bya ba ni ji ltar bka' stsal pa de ltar bskyang bar bgyi'o zhes gsol ba btab pa'i rjes la rab tu sbyor ba'o/ /de nas zhes bya ba'i tshigs su bcad pa gnyis kyis ming gi rnam grangs bstan pa'i don du rigs drug la gzigs pa'i bdag nyid sgyu 'phrul dra ba mngon par byang chub pa gsungs so/ /gsang sngags rigs chen thams cad dang / /zhes bya ba ni rigs drug gi bdag nyid can zhes bya ba'i don to/ /gsang sngags rig sngags 'chang ba'i rigs/ /zhes bya ba ni chos kyi dbyings kyi bdag nyid rdo rje sems dpa'i rigs so/ /rigs gsum la ni rnam par gzigs/ /zhes bya ba ni sku gsung thugs kyi bdag nyid rnam par snang mdzad kyi rigs so/ /'jig rten 'jig rten 'das pa'i rigs ni snang ba mtha' yas kyi rigs te 'gro ba 'dul ba'i phyir ro/ /'jig rten snang byed rigs chen dang / /zhes bya ba ni mi bskyod pa'i rigs te/ me long lta bu'i ye shes kyis 'jig rten gzigs pa'i phyir ro/ /phyag rgya chen po'i rigs mchog dang / /zhes bya ba ni don yod grub pa'i rigs te bya ba nan tan grub pa'i rang bzhin yin pa'i phyir ro/ /rigs chen gtsug tor cher gzigs nas/ /zhes bya ba ni cod pan gyi dbang bskur bas rin chen 'byung ldan no/ /a ra pa tsa na dang / shes rab ye shes lus can dang / rdo rje rnon po dang / sdug bsngal gcod pa dang / ye shes sku dang gsung gi dbang phyug ste/ drug dang go rims bzhin du sbyar ro/ /tshig gi bdag po zhes bya ba la sogs pa tshigs su bcad pa gsum gyis ni 'khor lo drug bskyed par bskul ba'i sgyu 'phrul dra ba mngon par byang chub pa bstan to/ / re zhig yi ge'i don ni/ gsang sngags rgyal po drug ldan pas/ /zhes bya bas 'khor lo rtsibs drug gi rtsibs lnga la sngags dgod par bya'o/ /de ltar tha dad pa'i rigs drug dang ldan pa'o/ /gnyis su med par 'byung ba dang / /zhes bya ba ni tha dad pa med pa'i rigs drug gi bdag nyid do/ /mi skye chos can 'di gsungs pa ni rten cing 'brel bar 'byung ba'i bdag nyid dbyangs dang sbyar ba'o/ /'dir ngag gi don ni 'di yin te/ bdun rnam dag byas nas yi ge hUM las khro bo bcu spros te/ bgegs la phur bus btab nas hUM gi 'od zer 'phros pa nyid las rdo rje ra ba la sogs pa phyi rol du bsrung ba byas la/ byams pa la sogs pa bsgom pa sngon du song ba'i stong pa nyid rnam par bsgoms la/ rlung dang me dang chu dang sa dang ri rab kyi steng du yi ge b+h+rUM yongs su gyur pa las gzhal yas khang gi dbus su seng ge dang glang po che dang rta dang rma bya dang mkha' lding rnams la de bzhin gshegs pa rnams las dbus su rnam par snang mdzad chen po sku mdog dkar po zhal bzhi pa mnyam par gzhag pa'i phyag rgya 'dzin pa thugs kar d+hIHlas pad+ma/ a las zla ba'i dbus su d+hIH'i sa bon las dang po'i sangs rgyas zhal dbus ma nag po g.yas ser po rgyab dmar po g.yon ljang gu steng ma dkar po'o/ /g.yas pa dang g.yon pa'i phyag brgyad na ral gri dang po ti brgyad bsnams pa'o/ /de'i thugs kar yang a la sogs pa'i dbyangs yig bcu gnyis kyis mtshan pa'i 'khor lo rtsibs bcu gnyis pa'o/ /phyi rol mu khyud la gsal byed kyis bskor ba'o/ /de'i nang gi mu khyud la oM sarba d+har+m+mA b+hA ba/ zhes bya ba la sogs pa'i sngags kyis bskor ba'o/ /de'i dbus su 'khor lo gnyis pa rtsibs drug pa de'i phyi rol du dbyangs yig bcu gnyis kyis bskor ba de'i nang gi mu khyud la oM sarba ta thA ga ta zhes bya bas bskor ba'o/ /de'i rtsibs kyi rim pa la oM badzra tIk+Sh+Da ya te na maHzhes bya ba la sogs pa'i sngags drug bkod la de'i lte ba la gnyis su med pa'i 'jam pa'i dbyangs zhal drug phyag drug pa dkar po'o/ /gnyis kyis ut+pal bsnams shing gnyis kyis po ti dang ral gri 'dzin pa gnyis mnyam par gzhag pa'i phyag rgya can no/ /de'i don 'di skad ston pa yin te/ s+thi to hr-i di dz+nyA na mUrti ra haM bud+d+ho bud+d+hA nAM t+r+ya d+h+wa bar+t+tI naM/ thugs kar gnas pa ni dang po'i sangs rgyas so/ /ye shes sku'i sangs rgyas bdag nyid do/ /yin no zhes bya ba ni gnyis su med pa'i 'jam pa'i dbyangs so/ /dus gsum gyi sangs rgyas rnams zhes bya ba ni de bzhin gshegs pa'i rigs drug go/ /gnyis su med pa'i 'jam pa'i dbyangs ji lta ba de bzhin du rigs drug gi rjes su 'gro bas rdo rje rnon po la sogs pa drug go/ /rnam par snang mdzad chen po rdo rje sems dpa' la sogs pa'o/ /de la rdo rje sems dpa' ni zhal gcig phyag gnyis sku mdog dkar po rdo rje dang dril bu bsnams pa'o/ /rnam par snang mdzad ni zhal gcig phyag gnyis pa sku mdog ser po 'khor lo dang dril bu 'dzin pa'o/ /pad+ma gar gyi dbang ni sku mdog dmar po zhal gcig phyag gnyis pa pad+ma dang dril bu bsnams pa'o/ /rdo rje hUM mdzad ni sku mdog nag po zhal gcig phyag gnyis pa'am/ zhal bzhi phyag brgyad pa khams gsum rnam par rgyal ba'i phyag rgyas rdo rje dril bu 'dzin pa'am phyis 'byung ba'i phyag mtshan brgyad po/ rdo rje nyi ma ni sku mdog ser po rin po che dang dril bu bsnams pa'o/ /rta mchog sku mdog ljang gu sna tshogs rdo rje dang dril bu bsnams pa'o/ /de drug ka'i thugs kar dang po'i sangs rgyas drug go/ /rdo rje sems dpa' dang po'i sangs rgyas kyi thugs kar snga ma bzhin du 'khor lo rtsibs bcu gnyis pa dang / de'i steng du 'khor lo rtsibs brgyad pa la a ra pa tsa nA ya te na maHsa mtshan pa de'i dbus su zla ba'i dkyil 'khor gyi steng du a ra pa tsa na sku mdog dkar po po ti dang ral gri bsnams pa'o/ /rnam par snang mdzad dang po'i sangs rgyas kyi thugs kar gzhi'i 'khor lo'i steng du rten gyi 'khor lo rtsibs bcu pa pradz+nyA dz+nyA na mUrta ye ya te na maHsa mtshan pa'o/ /de'i dbus su zla ba'i gdan la shes rab ye shes spyi gtsug ral gri dang 'khor lo bsnams pa'o/ /pad+ma gar gyi dbang phyug gi dang po'i sangs rgyas kyi thugs kar gzhi'i 'khor lo la rten gyi 'khor lo rtsibs brgyad pa la badzra tIk+Sh+Na na ya te na maHsa mtshan pa'o/ /de'i dbus su zla ba'i gdan la rdo rje rnon po pad+ma dang ral gri bsnams pa'o/ /rdo rje hUM mdzad kyi dang po'i sangs rgyas kyi thugs kar gzhi'i 'khor lo dang rten gyi 'khor lo rtsibs brgyad pa la duHkha ts+tshe da ya te na maHsa mtshan pa'o/ /de'i dbus su zla ba'i gdan la sdug bsngal gcod pa'i ral gri dang rdo rje bsnams pa'o/ /rdo rje nyi ma'i dang po'i sangs rgyas kyi thugs kar gzhi'i 'khor lo la rten gyi 'khor lo rtsibs brgyad pa la wA gI shwa rA ya te na maHsa mtshan pa'o/ /de'i dbus su zla ba'i gdan la gsung gi dbang phyug ral gri dang rin po che bsnams pa'o/ /rta mchog gi dang po'i sangs rgyas kyi thugs kar gzhi'i dkyil 'khor la rten gyi 'khor lo rtsibs brgyad pa la oM dz+nyA na kA yA ya te na maHsa mtshan pa'o/ /de'i lte ba la zla ba'i gdan la ye shes sku can ral gri dang sna tshogs rdo rje bsnams pa'o/ /rnam par snang mdzad chen po longs spyod rdzogs pa'i sku dang / sprul pa'i sku rigs drug la rang dang mthun pa'i ye shes sems dpa' mdun na bzhugs pa dang / yi ge gsum gyi sku gsung thugs byin gyis brlabs pa dang / dbang bskur ba byas la bsgom pa dang bzlas pa dang mchod par bya'o/ /gzhi dang rten gyi 'khor lo rnams la dbyangs dang gsal byed kyi sngags gnyis kyis mu khyud bzhi la bskor bar bya'o/ /'khor rnams ni rang rang gi dkyil 'khor du bskor bar 'chad par 'gyur ro/ /de ltar sbyor ba rdzogs nas dngos gzhi bstan par bya ste/ de yang rnam pa drug ste/ theg pa chen po'i tshul gyi mchog / ces bya ba'i bar gyis rdo rje dbyings kyi dkyil 'khor bstan to/ /sna tshogs gzugs can skyed pa po/ /mchod cing rjod 'os drang srong che/ /zhes pa'i bar gyis rnam par snang mdzad kyi dkyil 'khor bstan to/ /nam mkha'i mtha' klas sgra sgrogs pa/ /sgra dang ldan pa rnams kyi mchog gi bar gyis rdo rje hUM mdzad kyi dkyil 'khor bstan to/ /dpal ldan 'byor pa kun byed pa/ /sangs rgyas kun gyi mngon sum pa/ /ye shes me lce 'od rab gsal gyi bar gyis pad+ma gar gyi dbang phyug gi dkyil 'khor bstan to/ /gzugs rnams sna tshogs kun du ston/ /nor bu chen po rin chen tog gi bar gyis ni rdo rje nyi ma'i dkyil 'khor bstan to/ /dpal ldan 'byor pa kun byed pa/ /'jam dpal dpal dang ldan pa'i mchog gi bar gyis ni rta mchog gi dkyil 'khor bstan to/ /de la re zhig dkyil 'khor gyi bdag po dang bcas pa bskyed pa'i sa bon gyi dbang du mdzad nas/ 'di ltar sangs rgyas bcom ldan 'das/ /zhes bya ba gsungs so/ /ji lta bar rang rang gi sa bon rnams a nyid kyi rjes su 'brangs pas a las byung ba dang / a ni yig 'bru kun gyi mchog /ces gsungs so/ /don chen yi ge dam pa yin/ / zhes bya ba ni don che ba dang yi ge dam pa yin pas kun rdzob tu don dam pa'i bden pa brjod du med pa'i phyir ro/ /khong nas 'byung ba ni khyab pa'i phyir ro/ /skye ba med pa ni stong pa nyid du brjod pa'o/ /de rnam par dag pa'i rdo rje sems ma phyag gnyis kyis rdo rje dril bu bsnams pa sku mdog sngon mo'o/ /tshig tu brjod pa spangs pa ste ni mtshan ma med pa'i rnam par dag pa rdo rje rin chen ma sku mdog ser mo rin po che dang dril bu bsnams pa'o/ /brjod pa kun gyi rgyu yi mchog ste smon pa med pa nyid kyis so sor kun du rtog pa'i mchog rdo rje chos ma sku mdog dmar mo pad+ma dang dril bu bsnams pa'o/ /bya ba nan tan grub pa'i/ tshig kun rab tu gsal bar byed/ /'od gsal ba'i rang bzhin rnam par dag pa rdo rje las ma ljang gu sna tshogs rdo rje dang dril bu bsnams pa ste rig pa'i lha mo rnams so/ /mchod pa che zhes bya ba ni mchod pa chen pos dbugs 'byin pa ste/ 'jig rten gyi 'dod chags kyi gnyen po yin pa'i phyir 'dod chags chen po'o/ /des na sems can dbugs 'byin pa'i rgyu yin pa'i phyir/ sems can thams cad dga' bar byed pa ste 'dod chags rnam par dag pa ni 'od dpag tu med pa'o/ / 'jig rten pa'i zhe sdang gi gnyen po yin pa'i phyir zhe sdang chen po'o/ /de nyid ni/ nyon mongs kun gyi dgra che ba/ /zhes bya ba gsungs te/ zhe sdang rnam par dag pa mi bskyod pa'o/ /'jig rten gyi gti mug gi gnyen po yin pa'i phyir gti mug chen po'o/ /de nyid ni/ gti mug blo ste gti mug sel/ /zhes bya ba ste/ gti mug rnam par dag pa ni rnam par snang mdzad do/ /'jig rten pa'i phrag dog gi gnyen po yin pa'i phyir khro ba che ba'o/ /de nyid/ khro ba chen po sgra che ba ste phrag dog rnam par dag pa don yod grub pa'o/ /'jig rten pa'i chags pa'i gnyen po yin pa'i phyir chags pa che ba'o/ /de bas na/ chags pa thams cad sel bar byed/ /ces bya ba ser sna rnam par dag pa rin chen 'byung ldan no/ /de bzhin gshegs pa rnams kyi go rims 'dis rdo rje rnon po la sogs pa'i go rims kyang rig par bya'o/ /rnam par snang mdzad kyi rdo rje sems dpa' la sogs pa'i 'khor bshad nas/ mi bskyod pa'i 'khor gsungs pa ni 'dod pa chen po zhes bya ba la sogs pa smos te/ sdom pa'i tshul khrims kyi byang chub sems bzung ba yin pa'i phyir/ 'dod pa chen po bde ba che ni rdo rje sems dpa' sku mdog dkar po rdo rje dang dril bu bsnams pa/ bsdu ba'i dngos pos sems can thams cad yongs su smin par byed pa'i phyir bde ba chen po ste/ rdo rje rgyal po sku mdog ser po rdo rje dang lcags kyu bsnams pa'o/ /tshad med pas sems can rnams smin cing grol bar byed pa'i sems yin pa'i phyir dga' ba chen po ste rdo rje chags pa sku mdog dmar po mda' dang gzhu bsnams pa'o/ /pha rol tu phyin pa yongs su rdzogs pa'i dge ba'i chos sdud pa'i sems yin pa'i phyir mgu ba che ste rdo rje legs pa sku mdog sngon po khu tshur gyi legs par sbyor ba mdzad pa'o/ /rin chen 'byung ldan gyi 'khor gsungs pa gzugs che zhes bya ba la sogs pa ste/ zang zing gi sbyin pa yongs su rdzogs pa'i 'bras bu phun sum tshogs pa yin pa'i phyir ro/ /gzugs che lus kyang che ba ste/ /zhes bya ba la zang zing gi sbyin pa rnam par dag pa rdo rje rin chen sku mdog ser po rin po che dang dril bu bsnams pa'o/ / mi 'jigs pa byin pa'i 'bras bu kha dog phun sum tshogs pa yin pa'i phyir/ kha dog che zhing lus bong che ba ste mi 'jigs pa'i rnam par dag pa rdo rje nyi ma nyi ma'i mdog /g.yas pa nyi ma bsnams shing g.yon pa gdan la brten pa'o/ /byams pa'i sbyin pas thams cad du snyan par grags pa'i phyir ro/ /ming yang che zhing rgya che ba ste rdo rje rgyal mtshan sku mdog sngon dmar g.yas pa rgyal mtshan bsnams shing g.yon pa gdan la brten pa'o/ /chos kyi sbyin pas 'khor gyi dkyil 'khor yangs par 'gyur ba'i phyir/ dkyil 'khor chen po yangs pa yin/ / zhes bya ba ste/ rdo rje bzhad pa dkar po g.yas pa'i phyag gis so'i phreng ba bsnams shing g.yon pa snga ma bzhin no/ /snang ba mtha' yas kyi 'khor gsungs pa ni shes rab mtshon chen zhes bya ste/ lhag mthong gi shes rab mtshon chen po 'chang ba'i ting nge 'dzin gyi shes rab po/ / rdo rje chos sku mdog dmar po phyag gnyis kyis pad+ma bsnams pa'o/ /nyon mongs gcod pa'i shes rab ni/ /nyon mongs lcags kyu che ba'i mchog ni rdo rje rnon po sku mdog sngon po po ti dang ral gri 'chang ba'o/ /rdzu 'phrul gyi shes rab ni/ grags chen snyan grags chen po ste/ / rdo rje 'khor lo sku mdog ser po g.yas pas 'khor lo bsnams shing g.yon pa gdan la brten pa'o/ /chos dang so so yang dag par rig pa ni snang ba chen po'o/ /nges pa'i tshig dang spobs pa so so yang dag par rig pa ni gsal ba ste/ rdo rje gsung ba zangs ma'i mdog can phyag g.yas pa rdo rje bsnams shing g.yon pa gdan la brten pa'o/ /don yod grub pa'i 'khor gsungs pa ni mkhas pa zhes bya ba la sogs pa gsungs te/ sbyor ba'i brtson 'grus kyi sgyu 'phrul 'chang ba'i rdo rje las sku mdog ljang gu sna tshogs rdo rje dang dril bu bsnams pa'o/ /sgrub pa'i brtson 'grus kyi sgyu 'phrul chen po'i don grub pa ni 'dir srung ba ste/ rdo rje srung ba sku mdog ser po phyag na go cha bsnams pa'o/ /sgyu 'phrul chen po la so sor rtog pa'i brtson 'grus kyi dga' bas dga' ba rdo rje gnod sbyin sku mdog nag po phyag gnyis na mche ba bsnams pa'o/ /sgyu 'phrul chen po la rang dbang thob pa'i mig 'phrul can zhes bya ba sgrub pa nan tan du byed pa brtson 'grus kyis skyu ru ra lag mthil du bzhag pa lta bu'i rdo rje khu tshur ser po phyag gnyis kyis rdo rje bsdams pas rdo rje bsnams pa'o/ /mtshams kyi lha mo bstan pa ni/ / sbyin bdag chen po gtso bo ste/ /zhes bya ba la sogs pa gsungs te/ sbyin pa'i pha rol tu phyin pa'i rang bzhin rdo rje sgeg mo sku mdog dkar mo phyag gnyis kyis rdo rje bsgyings te bsnams pa'o/ /tshul khrims chen po 'chang ba'i mchog ni tshul khrims kyi rang bzhin phreng ba ma ser mo phyag gnyis kyis rin po che'i phreng ba bsnams pa'o/ /bzod chen 'chang ba brtan pa po ni bzod pa'i rang bzhin rdo rje glu ma dmar mo phyag gnyis pi wang brdung ba'o/ /brtson 'grus chen po brtul ba yin ni brtson 'grus rnam par dag pa'i rang bzhin rdo rje gar ma ljang gu phyag gnyis kyis rdo rje bsnams te gar byed pa'o/ /nang gi phyogs kyi mtshams la gnas pa'o/ /yang phyi'i mtshams la gnas pa ni/ bsam gtan chen po ting 'dzin gnas/ /zhes bya ba la sogs pa gsungs te/ bsam gtan chen po ni zhi gnas so/ /ting 'dzin gnas pa ni zung du 'jug pa'o/ /bsam gtan gyi pha rol tu phyin pa'i rang bzhin rdo rje bdug pa ma sku mdog dkar mo phyag gnyis kyis spos khang bsnams pa'o/ /shes rab chen po lus 'chang ba ni shes rab kyi pha rol tu phyin pa'i rang bzhin me tog gi snod bsnams pa'o/ /stobs po che la thabs che ba ni stobs dang thabs kyi pha rol tu phyin pa'i rang bzhin rdo rje mar me ma dmar mo phyag gnyis na mar me'i mchod sdong bsnams pa'o/ /smon lam ye shes rgya mtsho ste ni smon lam dang ye shes kyi pha rol tu phyin pa'i rang bzhin dri chab ma ljang gu dri'i dung chos bsnams nas 'thor ba'o/ /bskal pa bzang po'i gsungs pa ni/ byams chen rang bzhin zhes bya ba la sogs pa gsungs te/ ji lta ba'i ming bzhin du don dang ldan pas na byams pa'o/ /blo'i mchog gi snying rje chen po dang ldan pas 'jam dpal lo/ /shes rab chen po'i blo snying rje chen po dang ldan pas spos kyi glang po'o/ /ye shes phun sum tshogs pa'i thabs chen po dang mkhas pa'i byed pa chen po dang ldan pas ye shes tog go/ /mi bskyod pa'i 'khor te thams cad kyang mdog dkar po rdo rje dang dril bu bsnams pa shar phyogs na bzhugs so/ /rdzu 'phrul chen po stobs chen ldan/ / zhes bya ba ni rdzu 'phrul gyi stobs kyis sems can thams cad skyob pas na bzang skyong ngo / /rgya mtsho chen po bzhin du shugs kyis blo che zhing mgyogs pa che bas blo gros rgya mtsho'o/ /rdzu 'phrul chen po'i mthu ni ye shes phun sum tshogs pa cher grags pa mi zad pas na blo gros mi zad pa'o/ /stobs chen pha rol gnon pa ni spobs pa'i stobs kyis pha rol pos gzhig par mi nus pas na spobs pa brtsegs pa'o/ /thams cad kyang ser po rin po che dang dril bu bsnams pa'o/ /thams cad kyang lho'i phyogs su bzhugs pa'o/ /rin chen 'byung ldan gyi 'khor ro/ /rang gi stobs kyis srid pa'i ri bo chen po 'joms par mdzad pas mthu chen po thob pa'o/ /srid pa'i gzeb mkhregs shing ngan song du 'gro ba 'dzin cing 'dren pas na/ srid pa'i ri bo chen po 'joms/ /zhes bya'o/ /la las/ mkhregs shing rdo rje chen po 'chang / /zhes bya ba ni gzhig par dka' zhing mkhregs pa'i ngan song 'dren pas na ngan song kun 'dren no/ /'khor ba'i nyes pas ma gos pa'i phyir drag po chen po ste mi shes pa'i mun pa'i gnyen po yin pa'i phyir/ drag shul che ba la mya ngan dang mun pa nges par 'joms pa zhes bya'o/ /'jigs pa thams cad kyi mthu'i 'od zer gyis 'jigs pa sel bas na/ 'jigs chen 'jigs par byed pa ste dra ba can gyi 'od do/ /thams cad kyang dmar po pad+ma dang dril bu bsnams pa nub phyogs su bzhugs pa snang ba mtha' yas kyi 'khor ro/ / rig pa rnam pa gsum gyis tshim pas sems can skar ma lta bu'i mgon byed pas na mgon po rigs mchog chen po ste zla 'od gzhon nu'o/ /bla ma gsang sngags che ba'i mchog /ces bya ba ni gsung gi bdag po 'od dpag tu med pa'o/ /theg pa chen po spros pa med pa nam mkha'i tshul la gnas shing skyes pas nam mkha'i snying po'o/ /theg pa chen po'i tshul gyis sgrib pa thams cad 'gegs pa'i mchog yin pas na sgrib pa rnam par sel ba'o/ /thams cad kyang sku mdog ljang gu sna tshogs rdo rje dang dril bu bsnams pa byang phyogs su bzhugs pa don yod grub pa'i 'khor ro/ /sgo ba ni phyis 'chad par 'gyur ro/ /de ltar sh+lo ka bcu bzhi pa ni a ra pa tsa na'i bdag nyid rdo rje sems dpa'i 'khor los sgyur ba'i rdo rje dbyings kyi dkyil 'khor ro// //rnam par snang mdzad kyi dkyil 'khor gyi dbang du byas na/ sangs rgyas rnam par snang mdzad che/ /zhes bya ba smos te/ rnam par snang mdzad nyid do/ /thub pa chen po ni rnam par rtog pa'i g.yeng ba med pas stong pa nyid kyi ting nge 'dzin rdo rje sems ma'o/ /lus ngag yid gsum gyi thub pa chen po dang ldan pas mtshan ma med pa'i ting nge 'dzin rdo rje rin chen ma'o/ /gsang sngags tshul chen las byung ba ni so sor rtog pa'i smon pa med pa'i ting nge 'dzin las byung ba rdo rje chos ma'o/ /bya ba nan tan grub pas 'od gsal bar byed pas na/ gsang sngags tshul can bdag nyid can te rdo rje las ma'o/ /pha rol phyin bcu thob pa ste/ /zhes bya ba bcu rnam par dag pa'i lha mo rang dang 'dra ba'i sku mdog dang phyag mtshan gyi dbyibs dang ldan pas bskor ba'i rdo rje sems dpa' ste/ byang chub sems bzang po pha rol tu phyin pa bcus yongs su bskor ba'i phyir ro/ /pha rol phyin pa bcu la gnas/ /zhes bya ba ni pha rol tu phyin pa bcu'i lam rnam par dag pa rang dang 'dra ba'i lha mo bcus yongs su bskor ba'i rdo rje rgyal po ste/ bsdu ba'i dngos po'i sems kyis sems can yongs su smin par byed pa'i phyir pha rol tu phyin pa nyid bsdu ba'i dngos po yin pa'i phyir ro/ /pha rol phyin bcu dag pa ste/ /zhes bya ba ni snga ma bzhin du lha mo bcus yongs su bskor ba'i rdo rje chags pa'o/ /tshad med pa rnams pha rol tu phyin pa rnam par dag pas dmigs nas sems can la dmigs pa'i phyir dang sems can dpag tu med pa rnams smin cing grol ba'i sems yin pa'i phyir ro/ /pha rol phyin pa bcu yi tshul/ /zhes bya ba ni snga ma bzhin du lha mo bcus yongs su bskor ba'i rdo rje legs pa'o/ /dge ba'i chos sdud pa'i byang chub tu sems bskyed pa'i bdag nyid can yin pa'i phyir dang / dge ba'i chos sdud pa ni pha rol tu phyin pa bcu'i yul can yin pa'i phyir ro/ /mgon po sa bcu'i dbang phyug ste/ /zhes bya ba ni lha mo bcus yongs su bskor ba'i rdo rje rin chen ste sa bcu'i lam gyi bdag nyid la gnas pa'i phyir ltung ba phra mo'i kun du spyod pa dang bral bas mi 'jigs pa ste snga ma bzhin du lha mo bcus bskor ba ni rdo rje nyi ma'o/ /bden pa bzhi shes pa dang chos dang rjes su shes pa dag dang / kun rdzob dang don dam pa shes pa dag dang / zad pa dang mi skye ba shes pa dag ni shes pa bcu pa ste/ de rnams kyang rnam par dag pa ni sems can la dmigs pa'i byams pa de'i bdag nyid yin pa'i phyir snga ma bzhin du lha mo bcus bskor ba'i rdo rje rgyal mtshan no/ /shes pa bcu dang mthun pa'i chos kyi sbyor ba dang rang bzhin rnam par dag pa 'chang ba po ni snga ma bzhin du lha mo bcus bskor ba'i rdo rje bzhad pa'o/ /phung po khams dang skye mched dang rten 'brel dang / gnas dang gnas ma yin pa dang / bdag dang dus gsum dang bden pa bzhi dang / theg pa gsum dang 'dus byas dang 'dus ma byas kyi bdag nyid la mkhas pa gcig pu dang / za ba la sogs pa'i gnyen po rnam pa bcu'o/ /de nyid bdag tu 'dzin pa'i gnyen po ni zhi gnas gnyen po'i yan lag ting nge 'dzin gyi shes rab rdo rje chos ni rnam pa bcu'i lha mos bskor ba ste snga ma bzhin no/ /mkhas pa bcu'i spang bya bcu ni gcig pu dang / rgyu dang / zab pa dang / byed pa dang / dbang dang ldan pa dang / bdag po dang / rtog pa dang / kun nas nyon mongs pa dang rnam par byang ba dang / sgom pa po dang / bcings pa dang grol ba dag tu 'dzin pa bcu'o/ / de dag gcod pa'i lhag mthong gi bdag nyid tshol ba'i nyon mongs pa gcod pa'i rdo rje rnon po ste snga ma bzhin lha mo bcus yongs su bskor ba'o/ /thub dbang zhes bya ba ni dbang po'i don te sha la sogs pa'i spyan lnga dang / dad pa la sogs pa'i dbang po lnga'i rdzu 'phrul gyi rkang pa'i mthu thob pas na thub pa'i dbang po bdag nyid ni rdo rje 'khor lo ste snga ma bzhin du lha mo bcus bskor ba'i so so yang dag par rig pa'i bdag nyid kyi stobs bcu'i rang bzhin rdo rje gsung ba'o/ /snga ma bzhin du lha mo bcus yongs su bskor ba'o/ /khyab pa'i bdag nyid ni zil gyis gnon pa'i skye mched brgyad kyi steng du nam mkha' dang rnam par shes pa'i zil gyis gnon pa'i skye mched bcu dang ldan pas sbyor ba'i brtson 'grus kyi zil gyis gnon pa'i skye mched la 'jug pa ni rdo rje las so/ /snga ma bzhin du lha mo bcus yongs su bskor ba'o/ /kun gyi don ni ma lus byed/ / ces bya ba ni zad par bcu ston pa yin te/ don sna tshogs pa mdzad pas sgrub par byed pa'i brtson 'grus ni srung ba ste/ snga ma bzhin du lha mo bcus bskor ba'o/ /rnam pa bcu ni de kho na nyid bcu ste/ rtsa ba dang / mtshan nyid dang / phyin ci ma log pa dang / rgyu 'bras dang / phra mo dang / rgya che ba dang / grub pa dang / grub pa'i yul dang / bsdu ba dang / 'dzin pa dang / mkhas pa de kho na nyid de so sor rtog pa'i sbyor ba rnam pa bcu dang ldan pas rdo rje gnod sbyin te/ snga ma bzhin du lha mo bcus bskor ba'o/ /dbang ldan che ba po ni dbang bcus te sgrub pa nan tan du byed pa'i brtson 'grus dang ldan pas rdo rje khu tshur yang snga ma bzhin du lha mo bcus bskor ba'o/ /de skad du yang / lha rnams ji ltar rigs par ni/ /yon tan bcu yis yongs su bskor/ /de yi lha mo bcu po ni/ /rdo rje skyil krung phyed pas bzhugs/ /zhes gsungs so// //da ni tshigs su bcad pa brgyad kyis rdo rje sems dpa' la sogs pa de nyid bstan pa ni thog ma med pa zhes bya ba la sogs pa smos te/ kun gzhi rnam par shes pa gnas gyur pa me long lta bu'i ye shes so/ /spros pa med pa'i bdag nyid ni spros pa mi mnyam pa yin la spros pa med pas na mnyam pa nyid do/ /de bzhin nyid dag ni rang bzhin gyis rnam par dag pa dang / dag pa'i bdag ni dri ma med pa'i bdag nyid rdo rje sems dpa'o/ /bden par smra zhing ni so sor rtog pa'o/ /tshig mi 'gyur ni mnyam pa nyid do/ /ji skad smras pa de bzhin byed ni me long lta bu dang bya ba nan tan grub ba ste rdo rje rgyal po'o/ /gnyis med ces pa ni gzung ba dang 'dzin pa dang bral ba'i me long lta bu'i ye shes so/ /gnyis su med pa rtog pa ni so sor kun du rtog pa'o/ /bya ba nan tan grub pa'i yang dag pa'i mtha' las rnam par gnas pa mnyam pa nyid de rdo rje chags pa'o/ /bdag med seng ge'i sgra dang ldan pa ni me long lta bu ste/ mdo sde rgyan las kyang / me long lta bu bdag med pa/ /zhes gsungs so/ /so sor rtog pa dang bya ba nan tan grub pas/ mu stegs ri dwags ngan 'jigs byed pa ste rdo rje legs pa'o/ /kun du 'gro ba ni me long lta bu'o/ /de skad du yang me long lta bu ni bdag med pa yongs su chad pa med pa rtag tu 'gro'o zhes gsungs so/ /chos thams cad la mnyam par 'jug pas don yod par 'gro bas mnyam pa nyid do/ /de bzhin gshegs pa'i yid ltar mgyogs/ /zhes bya ba ni so sor rtog pa dang bya ba nan tan dang ldan pa ste rdo rje rin chen no/ /bral ba'i 'bras bu yin pa'i phyir rgyal ba ni me long lta bu'o/ /rnam rgyal dgra las rgyal ni 'bras bu'i sgo nas mnyam pa nyid do/ /rang gi ngo bo'i sgo nas so sor kun du rtog pa'o/ /'khor los sgyur rgyal stobs po che/ /zhes bya ba ni 'khor lo dang ngo bo'i bya ba nan tan grub pa ste rdo rje nyi ma'o/ /ye shes kun gyi rten yin pa'i phyir/ tshogs kyi slob dpon tshogs kyi bdag ste me long lta bu'o/ /tshogs rje ni mnyam pa nyid do/ /tshogs bdag ni so sor kun du rtog pa'o/ /dpal dang ldan pa ni bya ba nan tan te rdo rje rgyal mtshan no/ /mthu chen ni me long lta bu'o/ /gces par 'dzin pa ni mnyam pa nyid do/ /gzhan gyi dring mi 'jog ni so sor rtog pa'o/ /tshul chen ni theg pa gsum la 'jug pas na bya ba grub pa ste rdo rje bzhad pa'o/ /tshig rje ni me long lta bu'o/ /tshig bdag ni mnyam pa nyid do/ /smra mkhas pa ni so sor rtog pa'o/ /tshig la dbang ba ni bya ba grub pa'o/ /tshig mtha' yas ni chos kyi dbyings kyi ye shes rdo rje chos so/ /tshig bden pa ni so sor rtog pa'o/ /bden par smra ba ni me long lta bu mnyam pa nyid do/ /bden pa bzhi ni ston pa po ni bya ba grub pa ste rdo rje rnon po'o/ /phyir mi ldog pa ste btags pas na me long lta bu'o/ /phyir mi 'ong ba ni thogs pa med pas na mnyam pa nyid do/ /bse ru'i tshul ni thun mong ma yin pa'i phyir so sor kun du rtog pa'o/ /so so'i 'khor rnams 'dren pas na bya ba nan tan te rdo rje 'khor lo'o/ /nges 'byung sna tshogs las byung ba ni so sor rtog pa'o/ /'byung ba chen po rgyu gcig pa ni bya ba nan tan te rdo rje srung ba'o/ /dgra bcom zag pa zad ni nyon mongs pa dang shes bya'i sgrib pa zad pas na me long lta bu'o/ /dge slong ni bya ba nan tan to/ /'dod chags bral ba ni mnyam pa nyid do/ /dbang po thul ni so sor rtog pa ste rdo rje las so/ /bde bar rnyed pa ni mnyam pa nyid do/ /'jigs med thob pa ni spong ba phun sum tshogs pa ste me long lta bu'o/ /bsil bar gyur pa ni so sor kun du rtog pa'o/ /rnyog pa med pa ni rnyog pa med par byed pa ste bya ba nan tan te rdo rje srung ba'o/ /rig pa dang ni rkang par ldan/ /zhes bya ba ni thams cad mkhyen pa ste me long lta bu'o/ /bde bar gshegs pa zhes bya ba ni rab tu mi gnas pas na mnyam pa nyid do/ /'jig rten rig pa ni so sor rtog pa'o/ /mchog ni rdo rje gnod sbyin te bya ba nan tan to/ /bdag gir mi 'dzin ni me long lta bu'o/ /ngar mi 'dzin ni mnyam pa nyid do/ /bden pa gnyis kyi tshul la gnas/ /zhes bya ba ni don dam pa la gnas pa so sor rtog pa dang / kun rdzob la gnas pa bya ba nan tan te rdo rje khu tshur ro/ /'khor ba'i pha rol mthar son pa/ /zhes bya ba la sogs pa tshig rkang bcu drug gis bskal ba bzang po rnams bstan to/ /'khor ba'i sems can pha rol thams cad kyi mthar byams pas ston pas na byams pa'o/ / shes rab kyi bya ba byas na 'jam pa'i skam sar dpal gyi gnas pas na 'jam dpal lo/ /mya ngan las 'das pa'i ye shes 'ba' zhig gi dri las byung bas thugs rje chen po'o/ /'byung gnas khyab pas na spos kyi glang po'o/ /shes rab mtshon chen gyi ye shes kyi bdag nyid kyis nyon mongs pa 'joms pa'i tog yin pas na ye shes tog go/ /dam pa'i chos bzang po'i chos kyi rgyal srid gsal bar ldan zhing skyong bas na bzang skyong ngo / /'khor ba 'jig rten gyi rgya mtsho blos snang bar byed pa'i mchog yin pas na blo gros rgya mtsho'o/ /chos kyi dbang phyug ni mi zad cing chos kyi rgyal srid ni blo dang ldan pas na blo gros mi zad pa'o/ /ji ltar bsams pa bzhin du legs pa'i lam gyi spobs pa dang ldan zhing ston pa pos brtsegs pas na spobs pa brtsegs pa'o/ /don grub pa chen po'i bsam pa ni blo dang ldan pas na mthu chen thob pa'o/ /ngan song gi rnam par rtog pa thams cad spangs nas kun 'dren zhing mi gtong bas na ngan song kun no/ /rnam par mi rtog pa ni mya ngan dang mun pa med pa'o/ /dbyings mi zad pa ni nges par 'joms pa'o/ /chos kyi dbyings dam pa'i dran pa dang ldan zhing zad mi shes pa'i 'od mnga' bas na dra ba can gyi 'od do/ /bsod nams dang ldan pa'i zla bas sems can tshim zhing bsod nams mchog gi sku gzhon nu mnga' bas na zla 'od gzhon nu'o/ /so sor kun du rtog pa'i ye shes ni 'od do/ /ye shes 'byung gnas che ni 'od dpag tu med pa'o/ /ye shes ldan pa yod med shes/ /zhes bya ba ni yod med la khyab pa'i ye shes dang ldan pa'i skye gnas mnga' bas na nam mkha'i snying po'o/ /sa gnyis bsags pas tshogs gnyis kyi mthus sgrib pa thams cad sel bas na sgrib pa sel ba'o/ /rtag pa kun rgyal zhes bya ba la sogs pa tshigs su bcad pa gnyis kyis de bzhin gshegs pa lnga bstan te/ rtag pa ni rnam par snang mdzad do/ /kun rgyal ni me long lta bu'o/ /rnal 'byor can ni mnyam pa nyid do/ /bsam gtan bsam bya ni bya ba nan tan to/ /blo ldan mchog ni so sor kun du rtog pa'o/ /so so rang rig mi g.yo ba/ /mchog gi dang po zhes bya ba ni dang po'i sangs rgyas so/ /de la dkyil 'khor drug pa la dang po'i sangs rgyas yod pa'i phyir mi g.yo ba'o/ /de nyid ni dang po'i sangs rgyas te mchog gi dang po'o/ /so so rang rig ces bya ba ni ye shes sku ste de ni rnam par snang mdzad dang dang po'i sangs rgyas dang ye shes kyi sku'i bdag nyid chos dang longs spyod rdzogs pa'i dang / sprul pa'i sku gsum 'chang bas sku gsum 'chang ba'o/ /sangs rgyas sku lnga'i bdag nyid can ni rnam pa'i sgo nas me long lta bu'i ye shes te mi bskyod pa'o/ /khyab bdag ye shes lnga'i bdag ni ye shes sems dpa'i so sor rtog pas na 'od dpag tu med pa'o/ /sangs rgyas lnga bdag cod pan can ni bdag nyid sangs rgyas lnga'i cod pan 'chang ba'i rin chen 'byung ldan no/ /spyan sngar bya ba byas pa la chags pa med pas don yod grub pa'o/ /de bzhin gshegs p a rnams ni dkar po dang sngon po dang dmar po dang ser po dang ljang gu'i sku mdog can zhal lnga pa phyag brgyad pa thams cad kyang dang po na 'khor lo dang rdo rje dang pad+ma dang rin po che dang sna tshogs rdo rje bsnams pa g.yas kyi tha ma gsum thams cad ral gri bsnams pa g.yon gyi dang po thams cad rang rang gi mtshan ma dril bu bsnams pa/ g.yon lhag ma gsum pa thams cad glegs bam bsnams pa rnam par snang mdzad ni g.yas sngo ba rgyab dmar ba g.yon ljang ba steng ser ba'o/ /mi bskyod pa ni g.yas dkar ba dang rgyab dmar ba g.yon ljang ba ste snga ma bzhin no/ /snang ba mtha' yas ni g.yas dkar ba rgyab sngo ba g.yon ljang ba ste snga ma bzhin no/ /rin chen 'byung ldan ni g.yas dkar ba rgyab dmar ba g.yon ljang ba ste snga ma bzhin no/ /don yod grub pa ni g.yas dkar ba rgyab dmar ba g.yon sngo ba ste ser ba'o/ /sangs rgyas thams cad skyed pa po/ /zhes tshigs su bcad pa gnyis kyis ni 'khor los sgyur ba brgyad bstan te/ thams cad gser gyi mdog can g.yas na 'khor lo bsnams pa g.yon gdan la brten pa seng ge'i steng na nyi ma la rdo rje skyil mo krung rin po che'i cod pan can no/ /yang dag pa'i lta bas sangs rgyas thams cad skyed pas na dang po rdo rje 'khor los sgyur ba'o/ /yang dag pa'i rtog pas sangs rgyas kyi sras po dam pa rnams skyed pas na mchog ste gnyis pa rin po che'i 'khor los sgyur ba'o/ /yang dag pa'i ngag ni rab tu mi gnas pa'i bdag nyid shes rab sred par 'byung ba'i skye gnas med pas gsum pa pad+ma'i 'khor los sgyur ba'o/ /yang dag pa'i las kyi mtha' chos las byung ba'i lam gyi mya ngan las 'das pas srid pa sel bas na bzhi pa las kyi 'khor los sgyur ba'o/ /yang dag pa'i 'tsho bas stong pa nyid la gcig tu mkhregs pa'i zhi gnas dang lhag mthong gi rdo rje'i bdag nyid lnga pa phyag rgya chen po'i 'khor los sgyur ba'o/ /yang dag pa'i rtsol bas skyes ma thag tu skad cig ma la bya ba grub pa'i sprul pa 'gro ba'i bdag po drug pa dam tshig gi phyag rgya'i 'khor los sgyur ba'o/ /yang dag pa'i dran pa nam mkha' las byung ba'i mtshan ma med pa la gnas pas rang bzhin gyis 'od gsal ba'i me las byung ba'i bdun pa chos kyi phyag rgya'i 'khor los sgyur ba'o/ /yang dag pa'i ting nge 'dzin ni lhag mthong shes rab ye shes kyi me chen po'i ting nge 'dzin la snyoms par zhugs pas nyon mongs pa dang shes bya'i sgrib pa sreg pa'i brgyad pa las kyi phyag rgya'i 'khor los sgyur ba'o/ /'khor los sgyur ba brgyad ni rnam par snang mdzad kyi phyogs bzhir gnyis gnyis bzhugs la/ mtshams su spyan ma la sogs pa yum bzhi dgod par bya'o/ /'od chen rnam par snang bar byed/ /ces bya ba la sogs pa'i tshigs bcad gnyis kyis mchod pa'i lha mo brgyad bstan te/ gzugs chen po'i 'od phun sum tshogs pa snang bar byed pa sgeg mo'o/ /'khor gsum rnam par dag pa'i tshul khrims kyi ye shes snang bas lham mer mdzad pas na phreng ba ma'o/ / 'gro ba mi 'khrugs pa'i bzod pa'i mar me ye shes kyi sgron ma glu ma'o/ /gzi brjid chen po'i go cha brtson 'grus kyi stobs kyis le lo'i gnyen por 'od gsal ba'i phyir na gar ma'o/ /zhi gnas kyi sngags kyis nyon mongs pa'i dug zhi par byed pa'i rig sngags kyi rgyal mo ni bdug pa ma'o/ /sngags kyi rgyal po shes rab kyis mya ngan las 'das pa'i don chen po byed pas me tog ma'o/ /gtsug tor chen po'i thabs dang stobs kyis rmad du byung ba'i zag pa med pa'i phung po lnga'i gtsug tor mnga' bas na dri chab ma'o/ /smon lam gyi stobs kyis gzugs sna tshogs ston pa dang ye shes kyi nam mkha'i bdag po mdzad pas na mar me ma'o/ /sangs rgyas kun gyi sku bsgom pa'i dad pa'i mchog ste rdo rje lcags kyu ni dkar po rdo rje lcags kyu bsnams pa'o/ /kun du dga' ba'i brtson 'grus kyi mig dang ldan pas rdo rje zhags pa ni ser po zhags pa bsnams pa'o/ /sna tshogs pa'i gzugs can dran pa'i dbang pos 'gro ba la phan pa bskyed pa rdo rje lcags sgrog bsnams pa'o/ /shes rab kyi dbang pos mchod cing bstod de ting nge 'dzin gyi dbang pos drang srong chen por gyur pa ni rdo rje 'bebs pa ljang gu ste dril bu bsnams pa'o/ /sh+lo ka nyi shu rtsa gsum gyis rnam par snang mdzad kyi dkyil 'khor bstan te/ shes rab ye shes lus 'chang ba ni rnam par snang mdzad kyi 'khor los sgyur ba'o// //da ni rdo rje hUM mdzad kyi dkyil 'khor gyi sgo nas bstod par bzhed pas/ rigs gsum 'chang ba zhes bya ba la sogs pa gsungs te/ dang po'i tshigs bcad gcig gis rnam par snang mdzad ston pa la/ rigs gsum 'chang ba ni rin chen 'byung ldan gyi yon tan no/ /gsang sngags can ni don yod grub pa'i yon tan no/ /dam tshig chen po ni mi bskyod pa'i'o/ /gsang sngags 'chang ba ni snang ba mtha' yas kyi'o/ /gtso bo ni rnam par snang mdzad de/ rang dang po'i sangs rgyas dang ye shes kyi sku'i bdag nyid dkon mchog gsum 'dzin pa'o/ /theg pa mchog gsum ni chung ngu dang 'bring dang chen po gsum ston pa'o/ /rdo rje hUM mdzad kyi dbang du byas na/ don yod zhags pa ni mda' dang gzhu 'dzin pa'o/ /rnam par rgyal ba ni 'jig rten gsum las rnam par rgyal ba'i phyag rgyas rdo rje dang dril bu 'dzin pa'o/ /'dzin pa chen po ni ral gri'i yu ba 'dzin pas na ral gri bsnams pa'o/ /rdo rje zhags pa ni zhags pa nyid do/ /rdo rje lcags kyu ni lcags kyu nyid do/ /zhags pa chen po ni lcags sgrog go/ /rdo rje 'jigs byed ni dbang phyug chen po dang u ma 'jigs par byed pa'o/ /rin chen hUM mdzad bshad pa ni/ khro bo'i rgyal po gdong drug 'jigs ni mdog ser po mig drug ni spyan drug tshan gsum mo/ / lag drug stobs dang ldan pa ni 'jig rten gsum las rgyal ba'i phyag rgya spangs pa'i snga ma drug go/ /pad+ma hUM mdzad bshad pa ni/ keng rus mche ba gtsigs pa po ste keng rus ltar mche ba gtsigs pa'o/ /ha la ha la ni dug nag po brtsegs pas mgrin pa sngon po'o/ /gdong brgya pa ni sprul pa gdong brgya 'gyed pas kha dog dmar po rnam rgyal gyi phyag rgyas dril bu dang pad+ma bsnams pa'o/ /las kyi hUM mdzad bshad pa/ gshin rje gshed po bgegs kyi rgyal te sku mdog ljang gu sna tshogs rdo rje dang dril bu bsnams pa phyag lhag ma bzhi gshin rje dang mtshungs pa/ ral gri dang gtun shing dang lcags kyu dang zhags pa bsnams pa/ rdo rje shugs can gyi phrin las rnam pa bzhis gzhan 'jigs par byed pa'o/ /rdo rje sems ma bshad pa rdo rje ni stong pa nyid yin la/ grags pa ni snyan par grags pas na rdo rje sems ma'o/ /rdo rje ni mtshan ma med pa'o/ /snying po ni skye gnas te rdo rje rin chen ma'o/ /smon pa med pa'i sgyu 'phrul ni rdo rje chos ma'o/ /rdo rje ni 'od gsal ba'i gsus ba che bas khyab pas na rdo rje las ma'o/ /rin chen hUM mdzad kyi 'khor gyi dbang du mdzad nas bshad pa/ rdo rje las skyes ni mnyam pa nyid de rdo rje'i bdag nyid rdo rje rin chen no/ /rdo rje snying po mkha' 'dra ba/ /zhes pa ni nam mkha' dang 'dra ba'i 'od mnga' bas na rdo rje nyi ma'o/ /byams pa chen po mi g.yo ba'i khro bo'i ral pa gcig gis bsgyings pas na rdo rje rgyal mtshan no/ /chos kyi sbyin pas glang po che'i ko ba snying rjes brlan pas na ngo tsha shes pa'i gos su mnabs shing so'i phreng ba 'chang ba'o/ /las kyi hUM mdzad kyi 'khor bshad pa/ sbyor ba'i brtson 'grus kyi ha ha zhes sgrogs pa ni rdo rje las so/ /hi hi sgrogs shing 'jigs par byed pa brtson 'grus kyi go cha mnabs pas na rdo rje srung ba'o/ /so sor rtog pa'i brtson 'grus kyi/ gad mo chen po'i gad rgyangs can ni rdo rje gnod sbyin no/ /sgrub pa nan tan gyi brtson 'grus kyi/ /rdo rje gad mo cher sgrogs pas na rdo rje khu tshur ro/ /rdo rje hUM mdzad kyi 'khor bshad pa ni/ rdo rje sems dpa' sems dpa' che/ /zhes bya ba ni rdo rje sems dpa' nyid do/ /rdo rje rgyal po bde ba che ni rdo rje rgyal po nyid do/ /rdo rje drag po dga' ba che ni chags pa yin pas rdo rje chags pa'o/ /rdo rje spro ba ni hUM ste hUM gi sgra sgrogs pa ni rdo rje legs pa'o/ /chos kyi hUM mdzad kyi 'khor bshad pa ni/ mtshon du rdo rje'i mda' thogs pa ni pad+ma'i mda' dang gzhu thogs pa'i rdo rje chos so/ /rdo rje ral gris ma lus gcod ni rdo rje rnon po'o/ /rdo rje kun 'chang ni rdzu 'phrul gyis kun du spro ba'i rdo rje 'chang bas na rdo rje 'khor lo'o/ /rdo rje gcig pus lce la mtshan pa so so yang dag par rig pas pha rol gyi g.yul sel bas na rdo rje smra ba'o/ /rdo rje lcags kyu 'bar ba dang mig mi bzad pa 'chang bas na rdo rje lcags kyu'o/ /skra yang rdo rje 'bar bas zhags pa'o/ /ting nge 'dzin gyi mig brgya mnga' zhing mngon par shes pa drug gi rdo rje'i mig mnga' bas na lcags sgrog go/ /rdo rje 'bebs pa 'bebs pa che ni rdo rje 'bebs pa'o/ /lus ni rdo rje'i ba spu can/ /zhes bya ba'i tshigs su bcad pa gnyis kyis mchod pa'i lha mo ston te/ sbyin pa la sbyor ba bstan pas rdo rje bzhin du/ lus ni rdo rje'i ba spu can ni sgeg mo'o/ /tshul khrims la sbyor ba mi phyed pas rdo rje'i ba spu ste gcig pu lus kyi phreng ba ma'o/ /bzod pa la mi phyed pas na sen mo skyes pa rdo rje ste rdo rje glu ma'o/ /brtson 'grus la mi phyed pa'i sbyor ba/ rdo rje snying po pags pa mkhregs te rdo rje gar ma'o/ /zhi gnas kyi bsam gtan gyi rdo rje phreng ba thogs shing zung du 'jug pa'i dpal dang ldan pas bdug pa'o/ /lhag mthong 'ba' zhig gi rgyan gyis brgyan pas na me tog ma'o/ /stobs ston pa'i gad rgyangs nges par sgrogs pas na rdo rje mar me ma'o/ /mi phyed pa'i smon lam gyi rdo rje sgra 'byin cing oM wA gI shwa ri muM/ rdo rje sgra 'don pas na rdo rje dri chab ma'o/ /bskal pa bzang po'i mtshan nyid gsungs pa/ 'jam dbyangs chen po sgra chen po ste shar phyogs nye bar mtshon pa'o/ /spobs pas 'jig rten gsum na sgra gcig sgrogs pa ste/ spobs pa brtsegs pas lho phyogs mtshon pa'o/ /nam mkha'i mtha' klas sgra sgrogs pa ni rdo rje snying po nyid de byang phyogs nye bar mtshon pa'o/ /sgra dang ldan pa rnams kyi mchog ni mya ngan dang mun pa'i dgra 'joms pa'i mchog ni mya ngan dang mun pa sel bar 'joms pa ste nub phyogs nye bar mtshon pa'o/ /de ltar tshigs su bcad pa bcu gnyis kyis khams gsum rnam par rgyal ba'i dkyil 'khor gyis bstan pa'i 'khor los sgyur ba ni sdug bsngal gcod pa dang bcas pa'o/ / //da ni pad+ma gar gyi dbang phyug gi dkyil 'khor la 'jug pa ni rig pa'i lha mo la bstod pa gsungs pa ni/ yang dag bdag med de bzhin nyid de chos bdag med pa nyid dang / yang dag mtha' ste gang zag gi bdag med pa la yi ges brjod du med pa ni pad+ma rigs kyi rdo rje sems ma'o/ /mtshan ma med pa'i stong pa nyid smra ba'i khyu mchog ste/ snying rjes zab pa dang rgya che ba sgra sgrogs pas na pad+ma'i rigs chen mo'o/ /smon pa med pa'i dang por dge ba'i chos kyi dung gi sgra chen ldan pa dang tha mar dge ba'i sgra chen dang ldan pa ste rdo rje chos ma'o/ /'od gsal ba'i mi gnas pa'i mya ngan las 'das pa'i phyogs bcur brtson 'grus kyi chos kyi rnga bo che brdungs pas na chos kyi las ma'o/ /mchod pa'i las ma rnams bshad pa/ don dam par gzugs med cing kun rdzob tu sbyin pa'i gzugs dam pa ste/ sna tshogs pa'i gzugs can yid las skyes pas na pad+ma'i sgeg mo'o/ /dge ba'i chos sdud pa'i gzugs snang ba'i dpal du gyur cing phreng ba'i gzugs brnyan gyi don du ma lus 'chang bas na pad+ma'i phreng ba'o/ /khros pas gzhan gyi don mi 'jigs pa'i 'od zer gyis tshugs pa med cing cher grags pa'i bzod pa khams gsum gyi 'khor gyis bskor ba'o/ /che ba'i che bas na pad+ma'i glu ma'o/ /byang chub sems dpa'i lam ni shin tu mtho ba la gnas shing dar ba chen po'i brtson 'grus kyi stobs bsnyems pas na pad+ma'i gar ma'o/ /'jig rten du gzhon nu'i lus bzung nas yon tan phun sum tshogs pa'i bsam gtan yun ring po'i gnyen po'i skye dgu'i bdag po ni pad+ma'i bdug pa ma'o/ /shes rab kyi stobs kyis 'khor ba'i nyes pas ma gos shing lhag mthong gis mi zad pas na sum cu rtsa gnyis kyi mtshan 'chang bas na pad+ma'i me tog ma'o/ /ye shes dang smon lam gyi stobs kyis/ 'jig rten shes legs slob dpon te/ /mi 'jigs pa bzhi mnga' ba'i slob dpon 'jigs pa med pa ni pad+ma'i mar me ma'o/ /thams cad kyi mgon pos skyob cing 'jig rten gsum na yid gcugs pas/ 'das pa bskyabs pa dang da ltar bskyabs nas ma 'ongs pa skyob pas na bla na med pa ste pad+ma'i dri ma'o/ /rnam par snang mdzad kyi dbang du mdzad nas ye shes rnams la chags pa dang thogs pa mi mnga' zhing thams cad mkhyen pa'i dri ma med pa'i ye shes rgya mtsho sdug bsngal gyi ma rig pa'i sgo nga'i sbubs 'byed cing / kun gyi srid pa'i dra ba bcom nas gzhan gyi rgyud nyon mongs pa ma lus pa zhi bar mdzad cing 'bras bu 'khor ba'i rgya mtsho'i pha rol tu phyin nas rang dang gzhan gyi don phun sum tshogs pa'i ye shes dbang bskur cod pan ni rin po che'i cod pan can no/ /rdzogs pa'i sangs rgyas rgyan du thogs pa ni sangs rgyas nyi shu rtsa gcig gi do shal mnga' ba rnam par snang mdzad do/ /snying rjes 'du byed kyi sdug bsngal ba dang / 'gyur ba'i sdug bsngal ba dang / sdug bsngal gyi sdug bsngal zhi bar mdzad cing byams pas khams gsum gyi sgrib pa bsal nas theg pa gsum gyis rnam par grol ba thob pa klu shing bsnams pa ni byams pa'o/ /sgrib pa kun las nges par grol ba'i ral gri bsnams shing nam mkha' ltar mnyam pa'i po ti bsnams pa ni 'jam dpal lo/ /nyon mongs pa'i sgrib pa kun las 'das pa'i dung bsnams shing kun rdzob kyi dus gsum don dam par dus med par rtogs pa'i chu bsnams pa ni spos kyi glang po'o/ /sems can rnams kyi nang na ye shes kyi gtso bo yon tan thod can rnams kyi cod pan me tog gi phreng ba dang bcas pa bsnams pa ni ye shes tog go/ /nyon mongs pa'i lus kun las rnam par grol zhing nam mkha' la gnas pa'i gter gyi mdzod phyag na bsnams pa ni bzang skyong ngo / /yid bzhin nor bu 'chang zhing sems can kun la khyab pas rin po che'i mdzod ster bas blo gros rgya mtsho'o/ /dpag bsam gyi shing dang bum pa bzang po phyag na bsnams pas blo gros mi zad pa'o/ /so sor rtog pa'i byed pas sems can kun gyi don byed pa'i pad+ma dang phan 'dogs pa'i po ti bsnams pas/ sems can gyi dge ba'i bshes gnyen te spobs pa brtsegs pa'o/ /las rgyu 'bras bzang ngan shes shing sems can 'dul ba'i dus shes pa la phyir mi ldog pa'i dam tshig shes pa'i ral gri phyag na bsnams pa'i dam tshig dang ldan pa ni mthu chen thob pa'o/ /dus gsum mkhyen cing 'dul ba'i sems can gyi dbang po rab 'bring shes shing theg pa gsum gyis rnam par grol ba la mkhas pa'i rgyal mtshan bsnams pa ni ngan song kun 'dren pa'o/ /rang nyid yon tan dang ldan zhing gzhan gyi yon tan shes shing mya ngan dang bral ba'i chos shes pa'i bkra shis las byung ba'i dpal gyi be'u phyag na bsnams pa ni mya ngan dang mun pa nges par 'joms pa'i blo gros so/ /bkra shis kun gyi bkra shis pa ni g.yung drung 'khyil pa phyag na bsnams pa/ sems can la phan pa'i grags pa'i tshogs gnyis rdzogs pa'i bkra shis dang sgrib pa gnyis spangs pa'i snyan grags dge ste dra ba can gyi 'od do/ /phyir mi ldog pas na dbugs 'byin chen po ste/ sems can rnams dga' bar byed pas na dga' ston che ste/ zla bas mtshan pa'i gdugs kyi rol mo chen po 'chang bas na zla 'od gzhon nu'o/ /so sor rtog pa'i bkur sti dang rim gro phun sum tshogs pa 'od dpag tu med pa mnga' zhing mchog tu dga' ba'i pad+ma'i steng na grags pa'i bdag nyid kyi dpal gyi ral gri bsnams pa ni 'od dpag tu med pa'o/ /nam mkha' mdzod mchog dang ldan zhing rin po che'i mdzod kyi mchog phyag na bsnams pa'i gtso bo ste/ skyabs rnams kyi mchog nam mkha'i snying po'o/ /'jigs pa chen po brgyad ni dgra ste/ de skyob pa'i sna tshogs rdo rje rab kyi mchog dang 'jigs pa ma lus sel ba'i ral gri phyag na bsnams pa ni sgrib pa rnam par sel ba'o/ /mi bskyod pa'i 'khor dang bcas pa'i dbang du byas nas tshigs su bcad pa drug ste/ de la/ gtsug phud phud pu lcang lo can gyi rma bya'i mdongs bzhin du dbu lcang lo bcings pa'o/ /muny+dzas bcings pa'i ral pa'i cod pan ni gdong lnga gtsug phud lnga dang ldan ni gdong lnga la cod pan nyi shu mnga' ba'o/ /zur phud lnga pa me tog thod ni cod pan gyi bar nas me tog phreng ba'o/ /mgo zlum brtul zhugs chen po 'chang / /tshangs par spyod pa brtul zhugs mchog ni zhal steng ma rab tu byung ba'i cha lugs can no/ /de ltar zhal lnga ni ye shes lnga'i rnam par dag pa'o/ /sems can la phan pa'i smon lam mthar phyin cing 'khor ba ji srid par dam bcas pas na dka' thub che ba'o/ /zhal steng ma de ji lta bu zhe na/ gtsang gnas dam pa gau ta ma'i rigs su 'khrungs pa'o/ / bram ze tshangs pa ni lam gzhan las bstod pa'o/ /tshangs pa shes ni lam mkhyen pa'o/ /mya ngan 'das pa thob pa ni slob pa'i lam me long lta bu thob pa'o/ /grol ba ni nyon mongs pa'i sgrib pa lags so/ /rnam par grol ba'i lus ni snyoms par 'jug pa'i sgrib pa las so/ /grol ba ni nyan thos kyi'o/ /zhi ba theg pa chen po ste de'i bdag nyid rdo rje sems dpa'o/ /mya ngan 'das pa ni nyon mongs pa'i sgrib pa las so/ /mya ngan 'das pa ni shes bya'i sgrib pa las so/ /legs par ni thugs rje'o/ /mya ngan 'das pa ni shes rab kyis so/ / nye ba ni rab tu mi gnas pa la nye ba'o/ /bde sdug sel ba'i mthar gyur pa ni srid pa dang zhi ba la mi gnas pa'o/ /chags bral ni sgrib pa las so/ /lus las 'das pa ni bag la nyal ba spangs pa ste rdo rje rgyal po'o/ /thub pa med pa ni ser sna spangs pa'o/ /dpe med pa ni 'chal pa'i tshul khrims spangs pa'o/ /mi mngon pa ni khong khro ba spangs pa'o/ /mi snang ba ni le lo dang bral ba'o/ /gsal byed min ni g.yeng ba med pa'o/ /mi 'gyur ba ni 'chal ba'i shes rab dang bral ba'o/ /theg pa gsum 'gro ba la smin cing grol ba la khyab pa po ste/ chos kyi dbyings kyi rang bzhin gyis mdangs phra zhing zag pa sa bon dang bral ba ni rdo rje chags pa'o/ /rdul med ni sbyin pa'o/ /rdul bral ni tshul khrims so/ /dri ma med pa ni bzod pa'o/ /nyes pa spangs pa skyon med pa ni brtson 'grus so/ /rdo rje se gol gyi sgras de bzhin gshegs pa shin tu sad par byed pas na bsam gtan no/ /ji snyed pa kun shes shing ji lta ba kun rig mnga' ba ni shes rab dam pa ste/ pha rol tu phyin pa'i spyod pa ste rdo rje legs pa'o/ /rin chen gtsug tor gyi dbang du mdzad nas bshad pa/ rnam par shes pa'i chos nyid 'das/ /zhes bya ba ni rnam par shes pa gnas 'gyur ba'i 'od gsal ba'o/ /gnyis med ye shes tshul 'chang ba ni zung 'jug gi'o/ /rnam par mi rtog lhun gyis grub ni rin chen gtsug phud sku mdog ser po zhal lnga pa'o/ /dus gsum sangs rgyas las byed pa ni da ltar gyi sangs rgyas kyi bdag nyid rin chen gtsug phud dang / dang po'i sangs rgyas thugs kar bzhugs pa dang / ma byon pa'i sangs rgyas wA gI shwa ra'o/ /sangs rgyas thog ma tha ma med/ /dang po sangs rgyas rgyu med pa ni thugs kar zhal lnga phyag brgyad pa'o/ /ye shes mig gcig dri ma med/ /ye shes lus can de bzhin gshegs/ /zhes bya ba ni gnyis su med pa'i spyan gcig dang ldan pa'i wA gI shwa ra'o/ /rdo rje bzhad pa'i dbang du mdzad nas/ tshig gi dbang phyug ni yang dag pa'i lta ba'o/ /smra ba chen po ni yang dag pa'i rtog pa'o/ /smra ba'i skyes mchog ni yang dag pa'i ngag go/ /smra ba'i rgyal ni yang dag pa'i las kyi mtha'o/ /smra ba'i dam pa ni yang dag pa'i 'tsho ba'o/ /mchog gi gnas ni yang dag pa'i rtsol ba'o/ /smra ba'i seng ge ni yang dag pa'i dran pa'o/ /tshugs pa med pa ni yang dag pa'i ting nge 'dzin te/ rdo rje bzhad pa zhal bcu gcig pa'o/ /kun du lta ba ni seng ge'i 'jigs pa las skyob pa'o/ /mchog tu dga' ba ni glang po'i 'jigs pa las so/ /gzi brjid phreng ba ni me'i 'jigs pa las so/ /lta na sdug pa ni sbrul gyi 'jigs pa las so/ /'od 'bar ba ni mtshon gyi 'jigs pa las so/ /dpal gyi be'u ni rkun mo'i 'jigs pa las so/ /lag na 'od 'bar ba ni sha za'i 'jigs pa las so/ /snang ba po ni rgya mtsho'i rba rlabs kyi 'jigs pa las skyob pas na 'jig rten pa'i 'jigs pa brgyad skyob pa'o/ /'jig rten las 'das pa'i 'jigs pa las skyob pa ni/ sman pa che mchog gtso bo ste/ /shes bya'i sgrib pa gso ba'o/ /nyon mongs pa'i zug rngu 'byin pa ste bla na med pa'o/ /nyon mongs pa dang shes bya'i bag la nyal ba ma lus pa 'joms pas na/ sman rnams ma lus ljon pa'i shing ngo / /lam lnga'i nyon mongs pa ma lus pa spong bas na/ nad do cog gi dgra che ba ste/ lha nyi ma'i gzugs can no/ /sdu gu 'jig rten gsum na mdzes ni phun sum tshogs pa'o/ /dpal ldan rgyu skar dkyil 'khor can ni rgyu skar nyi shu rtsa brgyad kyis bskor ba'o/ /phyogs bcu nam mkha'i mtha' gtugs pa/ /chos kyi rgyal mtshan legs par 'dzugs pa ni byams pa'i 'bras bu'o/ /'gro na gdugs gcig yangs pa ste/ /byams dang snying rje'i bdag nyid can ni snying rje dang byams pa'i bdag nyid do/ /dpal ldan ni zla ba'i gzugs can pad+ma ni 'dir ku mu da ste steng na gar mdzad pa'o/ /khyab bdag chen po rin chen gdugs ni phyag mtshan te zla ba'i rgyal mtshan no/ /sangs rgyas kun gyi gzi brjid che ni sangs rgyas lnga'i cod pan mnga' ba'o/ /sangs rgyas kun gyi sku 'chang ba ni sku'i sgo nas so/ /rnal 'byor che ni thugs kyi sgo nas so/ /bstan pa gcig ni gsung gi sgo nas so/ /rdo rje rin chen dbang bskur dpal ni ming gi dbang bskur ba'i sgo nas so/ /rin chen kun bdag dbang phyug ste/ /rin po che'i rigs kyi 'khor los sgyur ba'i sgo nas so/ /'jig rten dbang phyug kun gyi bdag ni sems can kun la dbang bskur ba'o/ /rdo rje 'chang ba kun gyi rje ni de bzhin gshegs pa kun la dbang bskur ba'i bdag po ste rdo rje rin chen no/ /snang ba mtha' yas pad+ma'i ting nge 'dzin gyi dbang du mdzad nas/ sangs rgyas kun gyi thugs che ba ni dang po'i sangs rgyas thugs la gnas pa'o/ /sangs rgyas kun gyi sku che ba/ /sangs rgyas kun gyi gsung yang yin/ /thugs ka'i badzra tIk+Sh+Na'o/ /rdo rje nyi ma snang ba che ni rang nyid nyi ma'i 'od mnga' ba'o/ /rdo rje zla ba dri med ni dang po'i sangs rgyas zla ba'i 'od mnga' ba'o/ /chags bral ni mya ngan las 'das pa las so/ /sogs pas bsdus pa ni chags pa ste 'khor ba'o/ /chags pa ni gnyis ka la mi gnas pa'o/ /kha dog sna tshogs 'bar ba ni sku mdog dmar po 'od zer dmar ba'o/ /rdo rje skyil krung ni bzhugs stangs so/ /'gro ba'i chos 'dzin pa ni pad+ma bsnams pa ste/ sems can la dmigs pa'i snang ba mtha' yas so/ /rdo rje chos bshad pa/ sangs rgyas skyes ni snang ba mtha' yas las skyes pa'o/ /kun mkhyen ye shes mdzod 'dzin pa ni g.yon pas pad+ma'i yu ba bzung nas g.yas pas 'byed pa'o/ /rgyal po sgyu 'phrul sna tshogs 'chang ni 'gro ba 'dul ba kun gzugs so/ /che ba sangs rgyas snang ba mtha' yas rig sngags kyi bdag po dbu la 'chang ba ste pad+ma'i sgrol ma'o/ /rdo rje rnon po'i tshig bcad gcig ni go sla'o/ /khyab 'jug gi gzugs can rdo rje zab mo dzi na dzika ste bla na med pa'i rgyal bas rgyal ba'o/ /rdo rje blo gros don bzhin rig ni rdzu 'phrul rnam par 'phrul pa mkhyen pa'o/ /pha rol phyin pa kun rdzogs pa ni pha rol phyin pa bcu rdzogs pa'i sa bcu rdzogs pas na rgyan dang ldan pa ste rdo rje 'khor lo'o/ / rnam par dag pa bdag med chos ni chos so so yang dag par rig pa'o/ /yang dag ye shes zla 'od bzang ni spobs pa'o/ /brtson chen sgyu 'phrul dra ba ni nges pa'i tshig go/ /rgyud kun gyi ni bdag po mchog ni don so so yang dag par rig pa ste/ tshangs pa'i gzugs can gyis gsungs ba'o/ /don yod grub pa'i pad+ma'i nges pa'i dbang phyug gi dbang du mdzad nas/ rdo rje gdan ni ma lus ldan ni rdo rje skyil mo krung ngo / /ye shes sku rnams ma lus 'chang ni dz+nyA na kA ya'o/ /kun du bzang po blo gros bzang ni thams cad la khyab pa'i phyir dang po'i sangs rgyas so/ /sa yi snying po 'gro ba 'dzin ni bya ba nan tan gyis 'gro ba rnams mi gtong ba ste don yod grub pa'o/ /sangs rgyas kun gyi snying po che ste sbyor ba'i brtson 'grus kyi ngo bo yin pas na/ sprul pa'i 'khor lo sna tshogs 'chang ste zhi ba dang rgyas pa dang dbang dang mngon spyod kyi 'khor lo sna tshogs 'chang ba rdo rje las so/ /dngos po kun gyi rang bzhin 'chang ni sgrub pa'i brtson 'grus te phrin las thams cad kyi rang bzhin 'dzin pa'i bsrung ba'o/ /so sor rtog pa skye ba med pa'i chos mkhyen nas 'gro ba sna tshogs don du gnyer ba'i chos kun gyi ngo bo nyid 'chang ba'i gnod sbyin no/ /nan tan byed pa'i shes rab chen po skad cig la chos kun gyi 'od gsal ba thugs su chud pa'i khu tshur ro/ /dad pa'i dbang pos chos kun khong du chud pas thub pa'i blo mchog ste lcags kyu'o/ /brtson 'grus kyi dbang pos mi g.yo bas sangs rgyas kyi byang chub tu 'jug cing 'chang bas na zhags pa'o/ /dran pa'i dbang pos sangs rgyas kun gyi mngon sum du byed pas na lcags sgrog go/ /ye shes me lce 'od 'bar gsal/ /'bebs pas ni dril bu'o/ /de ltar tshigs su bcad pa bzhi bcu rtsa gnyis kyis pad+ma gar gyi dbang phyug gi dkyil 'khor badzra tIk+Sh+Na dang ldan pa'i 'khor los sgyur ba'o/ / //don thams cad grub pa'i dkyil 'khor gyi dbang du byas nas 'dod pa'i don grub ces bya ba la sogs pa gsungs te/ 'jig rten dang thun mong dang mchog gi dngos grub sgrub pa'i mchog tu gyur pas dam pa ste rnam par snang mdzad do/ /ngan song thams cad rnam sbyong ba ni rab tu byung ba'i cha byad can gyi chos kyi 'khor lo bskor ba'i phyag rgya mnga' ba'o/ /mgon po sems can kun gyi mchog ni thugs ka'i dang po'i sangs rgyas so/ /sems can thams cad rab sgrol byed ni 'khor lo gnyis kyi steng du pradz+nyA dz+nyA na mUrti'o/ /don grub kyi mi bskyod pa'i dbang du byas nas/ nyon mongs g.yul du gcig dpa' ba ste/ nyon mongs pas kun nas bslang ba'i g.yul gyi nang na rdo rje bsnams nas gcig pu dpa' ba nyon mongs pa dang / shes bya'i sgrib pa'i nga rgyal dang bcas pa dregs pas sa gnon gyi phyag rgyas 'joms pa'o/ /dpal ldan ni zung du 'jug pa'o/ /blo ni me long lta bu'i ye shes so/ /de las byung ba'i sgeg par ldan pa ni zhal khro 'dzum dang ldan pa'o/ /cung zad mche ba gtsigs shing bdud kyis mi bskyod pa brtan po'i khro bo mi sdug pa'i gzugs 'chang ba'o/ /rin chen gtsug phud kyi dbang du mdzad nas 'od zer gyis sprul pa'i lag pa brgya po kun du bskyod ni g.yas brkyang dang g.yon brkyang gi gom pa'i stobs kyis gar byed pa'o/ /dpal ldan ni bcom ldan 'das rin chen gtsug tor gyi ngo bo lag pa brgyas sprul pa'i phyag gis longs spyod pa ni nam mkha' khyab par sems can la dbang bskur nas gar byed pa ni ci dga' bar rol pa'o/ /rin chen ting nge 'dzin gyi dbang du mdzad nas yi ge laM yongs su gyur pa'i sa'i dkyil 'khor gyi steng du pad+ma'i lte bar rkang pa g.yas pa'i mthil gyis gnon cing zhabs g.yon pa'i rkang pa'i mtheb sen mo'i khyon gyis bsam gtan dang po'i tshangs pa'i yul sa rtse nas gnon pa ste phyag gnyis kyis pad+ma bsnams pa'o/ /rin chen char 'bebs kyi dbang du mdzad nas/ don gcig ces bya ba la sogs pa gsungs te/ don gcig ni stong pa nyid do/ /gnyis med ni mtshan ma med pa'o/ /chos kyi don ni smon pa med pa'o/ /dam pa'i don ni 'od gsal ba'o/ /'jigs med ni chos kyi dbyings so/ /rnam rig sna tshogs gzugs don can ni me long lta bu'o/ / sems ni kun gzhi gnas 'gyur ba'o/ /rnam shes rgyud dang ldan ni yid kyi rnam par shes pa gnas gyur pa'i so sor rtog pa'i ye shes so/ /dngos don ma lus ni stong pa nyid do/ /dga' ba ni rdo rje sems ma'o/ /stong pa nyid dga' ni mtshan ma med pa'o/ /'dod chags blo ni rin chen ma'o/ /srid pa'i 'dod chags sogs spangs pa ni smon pa med pa ste chos ma'o/ /srid gsum dga' ba chen po ni 'od gsal ba ste las ma'o/ /sprin dkar dag pa bzhin du dkar ni tshul khrims rnam par dag pas dkar mo'o/ /sku mdog ser mo yin yang 'od zer ston ka'i zla ba'i 'od mnga' ba'i rin chen sems ma'o/ /rgyal po bshad pa nyi ma'i 'od mnga' bas na/ nyi ma shar ka'i dkyil ltar mdzes pa'o/ /sen mo'i 'od ni shas cher dmar bas mtshan bzang po sum cu rtsa gnyis mtshon pa'o/ /rin chen chags pa gsungs pa/ sangs rgyas lnga'i cod pan bzang po in+d+ra nI la'i mdog can gyi zur phud kyi rtse mo can no/ /des na/ skra mchog mthon ka'i rtse mo can/ /zhes bya'o/ /nor bu legs par bshad pa/ nor bu chen po 'od chags dpal te 'od zer kha dog lnga pa can dang / sprul pa'i sangs rgyas lnga'i dbu rgyan can no/ /rin chen khro gnyer bshad pa zhabs g.yon brkyang nas 'jig rten gyi khams kun du bskyod cing / zhabs g.yas pas rdzu 'phrul gyi rkang pa'i stobs kyis gzugs kyi khams gnon pa'o/ /rin chen 'od bshad pa/ de nyid dran pa chen po 'chang / /zhes bya ste lus dang tshor ba dang sems dang chos kyi dran pa 'chang bas dran pa chen po stong pa nyid kyi ting nge 'dzin gyi rgyal po'o/ /rin chen dpal gsungs pa/ byang chub yan lag me tog spos/ /zhes bya ste dran pa dang chos rnam par 'byed pa dang brtson 'grus dang dga' ba dang ting nge 'dzin shin tu sbyangs pa dang btang snyoms byang chub kyi yan lag ste/ de rnams mnga' ba'i spos kyi dris de bzhin gshegs pa'i yon tan rgya mtsho khyab pa'i byams pa'o/ /rin chen bshad pa/ lam gyi yan lag brgyad tshul rig ste yang dag pa'i lta ba dang rtog pa dang ngag dang las dang 'tsho ba dang rtsol ba dang ting nge 'dzin dang dran pa dang byang chub kyi yan lag ste yang dag pa'i sangs rgyas kyi lam gyi chos kyi sbyin pa'o/ /rin chen chos kyi dbang du mdzad nas/ sems can kun la shas cher chags te byams pa'i ting nge 'dzin gyi bde bar mdzad pas na chags pa'o/ /nam mkha' lta bu'i stong pa nyid mkhyen pa'i shes rab kyis ni chags pa'o/ /rin chen rnon po bshad pa/ sems can kun gyi yid la 'jug /ces bya ste thugs rjes sems can la 'jug cing shes rab kyis sems can gyi nyon mongs pa bcad nas yid ltar mgyogs pas na rnon po'o/ /rin chen 'khor lo bshad pa/ sems can kun gyi dbang don shes te rdzu 'phrul gyi cho 'phrul gyis sems can kun gyi don mkhyen pa'o/ /dga' ba'i stobs kyis sems can kun gyi yid 'phrog pas 'khor lo'o/ /rin chen gsung ba bshad pa/ phung po lnga don ni don so so yang dag par rig pa'o/ /de nyid shes pa ni spobs pa so so yang dag par rig pa'o/ /phung po lnga ni chos so so yang dag par rig pa'o/ /rnam dag 'chang ba ni nges pa'i tshig so so yang dag par rig pa ste/ btang snyoms chen po'i ljags bsnams pa'o/ /rin chen las bshad pa 'bras bu'i dbang du mdzad nas/ nges 'byung kun gyi mtha' la gnas/ /zhes smos so/ /nges par 'byung ba kun la mkhas ni theg pa gsum gyi rgyu la mkhas pa ste sna tshogs rdo rje bsnams pa'o/ /rin chen srung ba bshad pa/ nges 'byung kun gyi lam la gnas/ /zhes bya ste nges par 'byung ba theg pa gsum gyi mi mthun pa'i phyogs las bsrung zhing gnas pa'i rgyu sems can la nges par 'byung ba kun ston pa ni 'bras bu ste go cha bsnams pa'o/ /rin chen gnod sbyin bshad pa/ yan lag bcu gnyis srid rtsa bton/ /zhes bya ba smos te/ lugs su 'byung ba'i rten 'brel bcu gnyis bag chags dang bcas pa spangs pa'o/ /lugs las bzlog pa'i rnam par dag pa bcu gnyis 'chang bas na mche ba 'dzin pa'o/ /rin chen khu tshur bshad pa/ bden bzhi'i tshul gyi rnam pa can te sdug bsngal dang kun 'byung dang 'gog pa dang lam gyi rnam pa nyid kyi rnam pa can gyi shes pa bzhi dang rjes su shes pa bzhi ste/ brgyad kyi rtog pa gcig tu sdug cing khu tshur 'chang ba'o/ /bskal pa bzang po'i dbang du mdzad nas/ bden don rnam pa bcu gnyis ldan/ /zhes bya ste sdug bsngal shes/ kun 'byung spangs pa/ 'gog pa mngon du byas pa/ lam bsgoms pa/ sdug bsngal shes par bya/ kun 'byung spang bar bya/ 'gog pa mngon du bya/ lam bsgom par bya/ sdug bsngal shes par byar med/ kun 'byung spang du med/ 'gog pa mngon du byar med/ lam bsgom du med par yul du byas par 'chang ba ni byams pa'o/ /de nyid rnam pa bcu drug rig ni bden pa bzhi la shes bzod bcu drug rig pa'i 'jam dpal lo/ /rnam pa nyi shus byang chub pa ni bzod pa brgyad dang shes pa brgyad dang ye shes bzhi ste nyi shus byang chub pa ni spos kyi glang po'o/ /rnam pa sangs rgyas kun gyi ye shes lnga rig nas mchog tu gyur pas na tog ste ye shes tog go/ /sangs rgyas kun gyi sprul pa'i sku/ /bye ba mtha' yas pa bzang po dpag tu med pa 'gyed cing skyong bas na bzang skyong ngo / /skad cig ma thams cad kyi blos mngon par rtogs pas na blo gros rgya mtsho'o/ /sems 'od gsal ba'i skad cig ma'i don mi zad pa kun rig pas na blo gros mi zad pa'o/ /theg pa sna tshogs kyi thabs kyi tshul gyis spobs pa mnga' zhing 'gro ba'i mngon par mtho ba dang nges par legs pa'i don la rtog pas na brtsegs pa ste spobs pa brtsegs pa'o/ /khams gsum las theg pa gsum gyis nges par 'byung ba'i mthu chen po mnga' zhing theg pa gcig gi 'bras bur gnas pa'i mthu chen po brnyes pas na mthu chen po thob pa'o/ /nyon mongs khams rnams dag pa'i bdag ni ngan song kun 'dren no/ /las kyi khams kyi mya ngan dang bral ba'i sdug bsngal zad par byed pas na mya ngan mun pa nges par 'joms pa'o/ /'dod chags dang zhe sdang dang gti mug gi chu'i rgya mtsho kun las brgal ba'i ye shes kyi dra ba mnga' bas dra ba can gyi 'od do/ /sbyor ba'i dgon pa las byung ba ni gnyen po'i rnal 'byor zla ba tshes pa lta bu 'gro ba kun 'khor ba'i dgon pa las dbyung nas ye shes kyi lang tsho bskyod pas na zla 'od gzhon nu'o/ /'od dpag tu med pa'i ye shes kyi nyon mongs pa dang / nye ba'i nyon mongs pa'i bag chags dang bcas pa spangs pas na 'od dpag tu med do/ /snying rje chen po dang shes rab kyi thabs nam mkha' lta bu skye gnas las dngos grub gsum don yod par mdzad pas na nam mkha'i snying po'o/ /bdag dang bdag gir lta ba'i sgrib pa'i 'du shes kyi don spangs shing rnam par shis pa'i don gyi gzugs 'dzin sel cing 'gog par byed pas na sgrib pa rnam par sel ba'o/ /lha mo brgyad kyi dbang du mdzad nas/ phyag gnyis kyis yid bzhin gyi nor bu rin po che bsnams pas na/ sems can kun yid yul dang ldan te rin chen sgeg mo'o/ /phyag gnyis kyis rin po che'i phreng ba bsnams pas sangs rgyas kyi thugs rig cing dgyes pa ste phreng ma'o/ /rin po che'i pi wang brdung ba'i gzhu bsnams pas na sems can kun gyi yid la gnas te glu ma'o/ /rin po che rtse gcig pa bsnams nas gar bskor bas sems can de dag gi sems dang mthun par 'jug pa ste gar ma'o/ /rin po che'i bdug pas sems can kun tshim par byed pas na rin chen bdug pa ma'o/ /rin po che'i me tog gi za ma tog bsnams pas na sems can kun gyi yid dga' ba ste me tog ma'o/ / mar me'i mchod sdong bsnams nas 'khrul pa'i mun pa sel bas na mar me ma'o/ /dri'i dung chos bsnams nas gzugs 'dzin gyi nor ba thams cad spong bas na dri chab ma'o/ /bde ba dang sdug bsngal dang btang snyoms kyi don la the tshom med cing shes bya kun gyi don la sku gsung thugs kyi yon tan gyi bdag nyid bsnyems pas rin chen lcags kyu ma'o/ /phung po lnga dang dus gsum du chos kyi dbyings skad cig thams cad la don dam par bye brag phyed pa ste zhags pa ma'o/ /skad cig ma gcig gis rdzogs pa'i sangs rgyas dran pa'i lcags sgrog gis bcings nas sangs rgyas kun gyi rang bzhin bdag gi lus la 'chang bas na rin chen lcags sgrog ma'o/ /lus med lus te sangs rgyas kun gyi thugs so/ /lus kyi mchog ste gsung rnams so/ /lus kyi mtha' ni rten yin pas na sku ste/ gcig tu 'bebs pa rtog pas na rin chen dril bu'o/ /thams cad kyi sku mdog dang rgyan dang phyag mtshan ji lta bu zhe na/ gzugs rnams sna tshogs kun du ston te dbyibs du ma can no/ /nor bu chen po ni kun gyi kha dog ser po'o/ /rin chen tog ni phyag mtshan dang / cod pan la rin po che'i tog mnga' ba'o/ /de ltar tshigs su bcad pa nyi shu rtsa bzhis don thams cad grub pa'i dkyil 'khor gyi 'khor los sgyur ba don thams cad grub pa ni wA gI shwa ra dang bcas pa'o// //rta mchog gi dkyil 'khor thog mar tshig rkang pa lngas 'bras bu'i dbang du byas nas bshad pa ni/ sangs rgyas kun gyis rtogs bya ba ni sangs rgyas gzhan gyis shes par bya'o/ /sangs rgyas byang chub bla na med ni chos kyi sku'o/ /longs spyod rdzogs pa'i sku'i dbang du mdzad nas don dam par ni yi ge med pa yin la/ kun rdzob tu bya ba dang spyod p a gnyis ka dang rnal 'byor dang rnal 'byor ma'i sku gsang sngags las byung ba'i byang chub sems dpa' rnams kyi snang ba gsang sngags chen po sku gsung thugs kyi rigs gsum 'chang ba'i sprul pa'i sku'i dbang du mdzad nas gsang sngags don gyi dkyil 'khor gyi lha kun sprul cing bskyed pa'o/ /de sgrub pa'i thabs ni/ thig le chen po zhes bya ba la sogs pa ste/ thig le chen po ni srog gi rlung ngo / /yi ge med pa'i don rang gi mtshan nyid yin pas rtog pa dang bral ba'o/ /stong pa chen po ni chos kyi dbyings so/ /de'i yi ge ni mi 'gyur bas na ye shes lnga'o/ /thig le stong pa ni rlung bsten pa'i stong pa nyid rtogs pas yi ge brgya ste mi 'gyur ba'i yi ge brgya'o/ /'di lta ste/ 'byung ba lnga dang / phung po lnga dang / dbang po lnga dang / yul lnga dag la re re zhing ye shes lnga'i bdag nyid yin pa'i phyir rigs brgya'o/ / de ltar phyi rol gyi spros pa dang bral ba zhi gnas kyi rang bzhin rnam pa kun dang ldan zhing lhag mthong gi chos don dam par dngos po med pa'o/ /de nyid kyi phyir na/ bcu drug phyed phyed thig le can te/ kun rdzob tu 'byung ba chen po bzhi la re re zhing rnal 'byor dang / rjes su rnal 'byor dang / shin tu rnal 'byor dang / rnal 'byor chen po'o/ /de'i dbye ba bcu drug yin la/ de yang snang ba dang / snang ba mched pa dang / snang ba thob pa dang / 'od gsal ba'i bsam gtan bzhi la/ stong pa dang / shin tu stong pa dang / stong pa chen po dang / rnam pa thams cad pa'i stong pa brgyad yin la/ de'i phyed kun rdzob kyi rnam pa bzhi spangs pa'i stong pa nyid bzhi bsgoms nas de dag la rang gi ngang gis zung du 'jug pa'i thig le can no/ /de'i sku gsung thugs kyi yan lag med pa bgrang ba'i rtsis las 'das pa de snang ba dang / snang ba mched pa dang / snang ba thob pa dang / 'od gsal ba'i bsam gtan bzhi'i rtse mo can dang / de nyid kyis na bsam gtan zhi gnas dang / yan lag lhag mthong kun shes shing / ting nge 'dzin gyi rigs thams cad mkhyen cing sa bcu'i rgyud thams cad rig pas/ ting 'dzin lus can lus kyi mchog / ces bya ste chos kyi sku thob par gyur pa dang / longs spyod rdzogs pa'i sku dang sprul pa'i sku yang thob par 'gyur ba'o/ /sku gsum po de las sangs rgyas sprul pa'i rgyud nyid kyis phyogs bcur ji ltar mos pa'i 'gro ba'i don byed par 'gyur ro/ /rta mchog gi dpa' bo gcig pu'i dbang du mdzad nas/ lha'i bdag po zhes bya ba la sogs pa gsungs te/ lha'i dbang po brgya byin no/ /lha'i lha ni tshangs pa'o/ /lha'i bdag po ni 'dod pa'i lha'o/ /lha min bdag ni khyab 'jug go/ /'chi med ni nyi ma'o/ /lha'i lha ni pa ba sangs so/ /'joms byed ni gzhon nu gdong drug go/ /'joms byed dbang phyug ni lha chen po'o/ /srid pa'i dgon pa las brgal ba ni bde sogs ma la sogs pa'i lha mo brgyad 'phrogs nas lha brgyad gdan du bting ba'o/ /de nyid kyis na/ ston pa gcig pu 'gro ba'i bla/ /zhes bya'o/ /de bzhin gshegs pa lnga'i rta mchog gi dkyil 'khor gyi dbang du mdzad nas/ 'jig rten phyogs bcu zhes bya ba la sogs pa smos te/ phyogs bcur grags pa'i mi bskyod pa bdud bzhi las rgyal ba'i chos kyi sbyin bdag che ba ste sku mdog dkar po rdo rje bsnams pa'o/ /mchog sbyin pa'i phyag rgyas byams pa'i go chas bcings shing snying rje'i ya lad bgos pas sku mdog ser po rin po che bsnams pa'o/ /phyag bzhis shes rab kyi po ti dang ral gri dang mda' gzhu bsnams pa/ nyon mongs pa mi shes pa'i g.yul ngo sel ba sku mdog dmar po 'od dpag med do/ /gdon mi za bar grub pa nyon mongs pa dang phung po dang 'chi bdag dang / lha'i bu'i bdud bzhi'i dgra bdag nyid kyis btul zhing gzhan gyi bdud bzhi'i 'jigs pa sel bar mdzad pa'i sna tshogs rdo rje bsnams pa skyabs sbyin mdzad pa ljang gu'o/ /srod la bdud bzhi btul nas tho rangs kha mngon par rdzogs par sangs rgyas pa sku mdog dkar po byang chub mchog gi phyag rgya can 'jig rten 'dren pa'o/ /de dag la mchod pa'i lha mo dang / bstod pa'i lha mo dang / phyag 'tshal ba'i lha mo dang / rim gro byed pa'i lha mo dang / bsnyen bkur byed pa'i lha mo dang / rjed par byed pa'i lha mo dang / gus pas phyag bya ba'i lha mo dang / bla mar byed pa'i lha mo ste/ sgeg mo la sogs pa brgyad kyis bskor ba'o/ /rigs gsum gyi rta mchog gi dbang du mdzad nas/ 'jig rten gsum po zhes bya ba la sogs pa smos te/ 'jig rten gsum gyi gang+gA'i klung gi bye ma snyed kyi shar phyogs su gom pa gcig bzhag nas nub phyogs su gom pa gcig gis bgrod cing / dper nam mkha' ltar mtha' med rnam par gnon pa'o/ /gsum rig pa ni bdag nyid dang yum gnyis mkhyen pa ste lha mo gtsang ma dkar ba dang pad+ma sngon mo dang sna tshogs rdo rje bsnams pa'o/ /dag pa ni dmar mo pad+ma dkar po dang sna tshogs rdo rje bsnams pa'o/ /mngon shes drug ldan ni lha'i mig dang / rna ba dang / rdzu 'phrul gyi yul dang / 'chi ba dang / skye ba dang / gzhan gyi sems dang / zag pa zad pa mkhyen pas dbang po drug sems dpa' drug gis byin gyis brlabs shing / rjes dran drug ni yul drug lha mo drug gis byin gyis brlabs pa'o/ /byang chub sems dpa' sems dpa' che/ / rdzu 'phrul chen po 'jig rten 'das ni sku mdog ljang gu ral gri dang pad+ma dang mda' gzhu bsnams pa'o/ /mgos bsam gtan bzhi par phyin pa'o/ /grub pa'i mtha'i dbang du byas nas bshad pa/ shes rab pha rol phyin pa'i mtha'/ /zhes bya ba smos te/ mthar ni phung po lhag bcas dang lhag med kyi mya ngan las 'das pa ste/ de 'dod pa ni bye brag tu smra ba'o/ /shes rab kyi de kho na nyid rnam par shes pa'i chos thob pa ni mdo sde pa'o/ /bdag nyid kyang rig pa gzhan la rig pa yin pa la/ khams gsum po shes pa yin pas na sems tsam mo/ /sems can kun la snying rjes phan pa'i mchog tu gyur pas na/ dper bya thams cad kyi mtha' gnyis las 'das pas na dbu ma'o/ /shes pa ni bya ba gtso bor gyur pa na bya ba'i rgyud do/ /lus dang ngag gi spyod pa ni bdag po'am mchog tu byed pas na spyod pa'i rgyud do/ /gnyis ka'i rgyud gtso bor byas nas chos kyi sbyin bdag mdzad pas na gnyis ka'i rgyud bstan pa'o/ /phyag rgya chen po dang dam tshig dang chos dang las kyi don ston pa'i 'gro ba rnams kyis 'dod pa'i yon tan gyi bsnyen bkur gyi gnas kyi mchog mya ngan las 'das pa 'thob pa'i rnal 'byor gyi rgyud do/ /theg pa gsum gyi nges par 'byung ba'i zab pa dang rgya che ba'i bgrod pa la zab mo mthar thug rdzogs pa'i rim pa ni bde ba dam pa zung 'jug ste/ don gyi dam pa rnam dag dpal yin la de 'jig rten gyi nang na skal ba bzang zhing che ba rnams kyi 'jig rten dang thun mong dang mchog gi dngos grub kyi/ dpal ldan 'byor pa kun byed pa'o/ /de su zhig yin zhe na/ 'jam dpal dpal dang ldan pa'i mchog go/ //de ltar tshigs su bcad pa bco lngas dz+nyA na kA ya dang bcas pa'i 'khor los sgyur ba don yod grub pa'o/ /de ltar 'khor lo rnam pa drug bsgoms nas dkyil 'khor drug la ye shes sems dpa' bcug nas/ dbang bskur ba mdzad nas de kho na nyid gsum gyis sku gsung thugs byin gyis brlabs la bdag nyid thams cad kyi mchod pa bya'o/ /de la gang zag bzhi pa sgrub par byed pa ste/ dang por de bzhin gshegs pa'i rigs can bsgom par mos pas dkyil 'khor drug byas la slob ma dbang bskur bar 'dod pa na yang dbang bskur bar bya'o/ /rang rgyal ba'i rigs dang rjes su mthun pa'i dkyil 'khor bsgoms la zhi ba dang rgyas pa dang dbang dang mngon spyod kyi las dang rjes su mthun pa'i sbyin sreg bya'o/ /nyan thos dang rjes su mthun pa'i gang zag gis dkyil 'khor drug bsgoms la rang rang gi dkyil 'khor du gang dang gang la mos pa'i lha'i thugs kar 'khor lo'i dbus su yi ge bkod la sdig pa zad par bya'o/ / byang chub sems dpa'i rigs can gyi 'khor lo drug bsgoms la sems can gyi don bya ba'i phyir/ dkyil 'khor dang bcas pa dang / dpa' bo gcig pu'i cho ga bzhin du bsnyen pa dang sta gon dang dkyil 'khor la rab tu gnas pa byas la phyag rgya bzhi'i sgo nas dngos grub don du gnyer nas phan yon dang rjes su mthun par sems can thams cad kyi don bya'o/ /rjes kyi don rnam pa bzhi'i dbang du mdzad nas bshad pa/ bsgom pa dang bzlas pa zin pa'i rjes la mchod pa dang bstod pa bya'o/ /de la bstod pa ni 'di yin te/ mchog sbyin rdo rje mchog ces bya ba'i tshigs bcad phyed kyis rdo rje sems dpa'i dkyil 'khor la bstod pa dang / stong nyid las byung zhes bya ba'i tshigs bcad phyed kyis rnam snang la bstod pa'o/ /sangs rgyas chags pa zhes bya ba'i tshigs bcad gcig gis mi bskyod pa la bstod pa'o/ /sangs rgyas 'dzum pa zhes bya ba tshigs su bcad pa gcig gis snang ba mtha' yas kyi dkyil 'khor la bstod pa'o/ /med pa las byung zhes bya ba'i tshigs bcad gcig gis rin chen 'byung ldan gyi dkyil 'khor la bstod pa'o/ /sgyu 'phrul dra ba zhes bya ba la sogs pa'i tshigs bcad gcig gis rta mchog gi dkyil 'khor la bstod pa'o/ /yang na tshigs su bcad pa 'di lnga ni rnam pa nyi shus byang chub ces bya ba snang ba/ 'jam dpal dpal dang ldan pa'i mchog la de bzhin gshegs pa bzhi dang / sems dpa' bcu drug gis bskor ba bsgoms la bstod pa bya'o zhes slob dpon ye shes grags pa bzhed do/ /phan yon gyi dbang du mdzad nas/ kye'i lag na rdo rje 'chang zhes sdud pa po la bos nas/ 'di ni zhes bya ba ni rnam par snang mdzad kyi dkyil 'khor gyi dbang du mdzad pa'o/ /bcom ldan 'das kyi ye shes sku ni bzhi pa'i sangs rgyas so/ / de bzhin gshegs pa thams cad kyi ye shes kyi sku ni dang po'i dpa' bo'i sangs rgyas so/ /'jam dpal ye shes sems dpa' ni a ra pa tsa na'o/ /de gsum gyi mtshan bsgoms pa'i rjes la yang dag par brjod na/ 'bras bu dga' ba dang / dang ba dang mgu ba 'jig rten thun mong dang mchog gi dngos grub bskyed pa'o/ /lag na rdo rje 'chang zhes bya ba nas yongs su byang ba zhes bya ba'i bar du mi bskyod pa'i spong ba dang ye shes kyi phan yon bshad pa'o/ /bla na med pa zhes bya ba la sogs pas rin chen 'byung ldan gyi phan yon bstan to/ /ma thob pa thob pa ni snang ba mtha' yas kyi phan yon no/ /de bzhin gshegs pa thams cad kyi zhes bya ba ni don yod grub pa'i phan yon bstan to/ /rnam par snang mdzad kyi yon tan dag bshad cing mi bskyod pa'i yang dag par bstan la/ rin chen 'byung ldan gyi bkrol te snang ba mtha' yas kyi rnam par phye nas don yod grub pa'i yon tan gsal bar byed la/ dran cing 'don pa'i sems can de la ngas byin gyis brlab par bya'o/ /thams cad kyi chos nyid byin gyis brlabs zhes bya ba ni sdud pa po nas ma 'ongs pa'i sems can gyi bar du ye shes sems dpa' bcug nas byin gyis brlabs pa'o/ /dkyil 'khor gnyis pa'i dbang du mdzad nas/ lag na rdo rje 'chang zhes bos nas gzhan yang dkyil 'khor gnyis pa bsgom zhing ming yang dag par brjod pa 'di ni zhes bya ba gsungs so/ /thams cad mkhyen pa'i ye shes ni gzhi'i sangs rgyas so/ /dag cing zhes bya ba ni dang po'i sangs rgyas so/ /sangs rgyas dang byang chub ni pradz+nyA dz+nyA na mUrti'o/ /mngon par rtogs pa ni mi bskyod pa'o/ /bla na med pa ni rin chen 'byung ldan no/ /thugs su chud pa ni snang ba mtha' yas so/ /phan par mdzad pa ni don yod grub pa'o/ /stobs bcu'i stobs ni rdo rje sems ma'o/ /thams cad mkhyen pa ni rin chen ma'o/ /lung ni chos ma'o/ /bsgrub pa ni las ma'o/ /shin tu dag pa ni rdo rje sems ma'o/ /skye gnas ni rgyal po'o/ /zhing ni chags pa'o/ /gzhi ni legs pa'o/ /'byung gnas ni rin chen no/ /mtha' ni nyi ma'o/ /brtag pa ni rgyal mtshan no/ /skye gnas ni bzhad pa'o/ /gdung ba'i 'chad pa ni chos so/ /rgyud rab tu 'phel ba ni rnon po'o/ /tshar gcod pa ni 'khor lo'o/ /'joms pa ni gsung ba'o/ /pham par byed pa ni las so/ /sdud pa ni gsung ba'o/ /yongs su smin pa ni gnod sbyin no/ /ting nge 'dzin ni khu tshur ro/ /bsam gtan ni sgeg mo'o/ /rnal 'byor ni phreng ba ma'o/ /bral ba ni glu ma'o/ /spang ba ni gar ma'o/ /nye bar zhi ba ni bdug pa ma'o/ /rnam par grol ba ni me tog ma'o/ /thar pa ni mar me ma'o/ /zhi ba ni dri chab ma'o/ /'byung gnas ni lcags kyu ma'o/ /sel ba ni zhags pa'o/ /gcod pa ni lcags sgrog go/ /lam bzang po ni dril bu'o/ /mi 'jigs pa ni rdo rje 'khor los sgyur ba'o/ /ba dan bsgreng ba ni pad+ma'i 'khor los sgyur ba'o/ /chos ston pa ni las kyi 'khor los sgyur ba'o/ /myur du sgrub pa ni phyag rgya chen po'i 'khor los sgyur ba'o/ /rtog pa ni dam tshig go/ /so sor rtog pa ni chos kyi 'khor los sgyur ba'o/ / rdzogs pa ni las kyi phyag rgya'i 'khor los sgyur ba'o/ /yongs su dag pa ni shar phyogs pa bzhi'i phan yon no/ /yongs su rdzogs pa ni lho phyogs pa rnams kyi phan yon no/ /so sor rtog pa ni nub phyogs pa rnams kyi phan yon no/ /gcig gis rtogs pa ni byang phyogs pa rnams kyi phan yon no/ /yongs su rdzogs par byed pa ni dran nas kha dog byed pa la byin gyis rlob pa'o/ /dkyil 'khor gsum pa'i phan yon gyi dbang du mdzad nas/ kye lag na rdo rje rdo rje 'chang / /zhes pa nas/ gzhan yang pad+ma gar gyi dbang phyug gi dkyil 'khor ji skad bshad pa'i don dran zhing ming yang dag par brjod pa 'di ni zhi bar byed do zhes bya ba pad+ma'i rnam par snang mdzad kyi phan yon no/ /rnam par sbyong ba ni pad+ma'i mi bskyod pa'i phan yon no/ /bzlog pa ni pad+ma'i gtsug phud kyi'o/ /yang dag par gcod pa ni pad+ma'i ting nge 'dzin gyi'o/ /mi skye bar byed pa ni pad+ma nges pa'i dbang phyug gi'o/ /zhi bar byed pa ni pad+ma'i sems ma'i'o/ /'jigs par byed pa ni pad+ma'i rin chen ma'o/ /sel bar byed pa ni pad+ma'i chos ma'i'o/ /zhi bar byed pa ni pad+ma'i las ma'o/ /spong bar byed pa ni pad+ma'i sems dpa'o/ / 'phel bar byed pa ni pad+ma'i rgyal po'o/ /skye bar byed pa ni pad+ma'i chags pa'o/ /'jigs par byed pa ni pad+ma'i legs pa'o/ /mi skye bar byed pa ni pad+ma'i khro gnyer gyi'o/ /snying por gyur pa ni pad+ma'i nyi ma'i'o/ /gsang bar gyur pa ni zla ba rgyal mtshan gyi'o/ /gsang chen du gyur pa ni zhal bcu gcig pa'o/ /thams cad du gyur pa ni pad+ma sgrol ma'i'o/ /shes bzhin yang dag par bskyed pa ni pad+ma'i rnon po'o/ /yid gzhungs par byed pa ni pad+ma'i 'khor lo'i khyab 'jug gi gzugs can gyi'o/ /phun sum tshogs par byed pa ni pad+ma'i gsung ba tshangs pa'i gzugs can gyi'o/ /rab tu 'phel bar byed pa ni pad+ma'i las kyi'o/ /grags par byed pa ni pad+ma'i srung ba'i'o/ /zhi bar byed pa ni pad+ma'i gnod sbyin gyi'o/ /shin tu sad pa ni pad+ma'i khu tshur gyi'o/ /dag par byed pa ni pad+ma'i sgeg mo'o/ /'byor ldan ni phreng ba ma'i'o/ /bkra shis pa ni glu ma'i'o/ /skyabs ni gar ma'i'o/ /gnas ni pad+ma'i bdug pa ma'i'o/ /skyob pa ni pad+ma'i me tog ma'i'o/ /dpung gnyen ni pad+ma'i mar me ma'i'o/ /gling ni pad+ma'i dri chab ma'i'o/ /'khras ni pad+ma'i lcags kyu rta mgrin gyi'o/ / gru ni pad+ma'i zhags pa'i'o/ /rgyal po chen po ni pad+ma'i lcags sgrog gi'o/ /shes rab nyid ni pad+ma'i dril bu ma'i'o/ /phyi'i sgo ba bzhi bshad pas ye shes kyi snang ba ni lcags kyu'o/ /nor bu lta bu ni zhags pa'o/ /mkhyen pa'i ye shes ni lcags sgrog go/ /yongs su dag pa ni dril bu'o/ /shar phyogs kyi skal bzang rnams kyi ni yongs su rdzogs pa'i bar gyi'o/ /lho phyogs pa rnams kyi ni sa bcu thob pa'i bar ro/ /nub phyogs pa rnams kyi chos nyid do zhes bya ba'i bar ro/ /byang phyogs pa rnams kyi gzhan ma yin pa'i chos nyid kyi bar ro/ /thun mong gi phrin las de bzhin gshegs pa'i zlos pa po'i dbang du mdzad nas yang dag pa'i mtha'i rang bzhin no zhes bya ba'i bar du'o/ /sems pa'i zlos pa'i dbang du mdzad nas/ stong pa rang bzhin nyid do zhes bya ba'i bar ro/ /ming yang dag par brjod pa 'di ni zhes bya ba'i dran pa dang / kha ton 'don pa la ye shes sems dpa' zhugs nas byin gyis brlabs pa la gnyis su med pa'i chos nyid kyi don zhes gsungs pa yin no/ /rdo rje hUM mdzad kyi dkyil 'khor gyi dbang du mdzad nas/ kye lag na rdo rje 'chang zhes bos nas rten gyi gang zag la las dran pa dang 'don pa de'i 'jam dpal ye shes sems dpa' zhes pa ni gzhi'i sangs rgyas so/ /ye shes kyi sku ni dang po'i sangs rgyas so/ /gnyis su med pa ni don dam pa'i duHkhats+tshe da'o/ /gtsug gi nor bu 'di ni khams rnam par rgyal ba'i mtshan yang dag par brjod pa'o/ /de'i sku yang ston to zhes bya ba'i bar du de bzhin gshegs pa'i hUM mdzad kyi'o/ /byin gyis brlabs pa'i bar gyis rdo rje hUM mdzad kyi phan yon bstan to/ /phan 'dogs pa'i bar gyis rin chen hUM mdzad kyi'o/ /sgrub par mdzad do zhes bya ba'i bar gyis chos kyi hUM mdzad kyi'o/ /nye bar ston par mdzad pa ni las kyi hUM mdzad kyi'o/ /ma rungs pa 'dul ba nas sgrub par byed pa'i bar gyis ni shar phyogs kyi khro bo'i sems dpa' bzhi'i'o/ /sbed par byed pa'i bar gyis ni lho phyogs pa'i khro bo'i sems dpa' bzhi'i'o/ /tshangs pa la ni byang phyogs pa phyogs skyong nyi shu rtsa bzhis srung ba dang / skyob pa dang sbed par 'gyur ba ni nub phyogs pa'i khro bo'i sems dpa' bzhi'o/ /gnas nyi shu rtsa lngar srung ba dang skyob pa dang sbed par byed pa ni byang phyogs pa'i lus kyi khro bo'i sems dpa' bzhi'o/ /bde legs su 'gyur ro zhes bya ba'i rkang pa gcig gis ni rdo rje sems ma dang sgeg mo dang bdug pa dang shar phyogs kyi lcags kyu'i yon tan bstan to/ /lha la sogs pa bco brgyad kyis srung ba dang skyab pa dang sbed par byed pa ni rin chen sems ma dang phreng ba ma dang me tog ma dang zhags pa bzhi'i yon tan bstan to/ /lus la 'jug par byed do zhes bya ba'i bar gyis ni chos kyi sems ma dang glu ma dang mar me ma dang lcags sgrog gi yon tan bstan to/ /sgrub par byed do zhes bya ba'i bar gyis ni las kyi sems ma dang gar ma dang dri ma dang dril bu ma'i yon tan bstan to/ /don thams cad grub pa'i dkyil 'khor gyi dbang du mdzad nas/ kye lag na rdo rje 'chang zhes bya ba ni bod pa'o/ /gzhan yang gtsug gi nor bu 'di zhes bya ba nas/ dran pa dang kha ton byed pa ni zhes bya ba nor bu rigs kyi yon tan no/ /bcom ldan 'das 'jam dpal ye shes sems dpa'i gzugs yid la dmigs shing zhes bya ba ni gzhi'i lus dang dang po'i sangs rgyas dang wA gI shwa ra gsum gyi gzugs mthong bar 'gyur ro/ /nam mkha'i dkyil na bzhugs pa dag kyang mthong bar 'gyur ro zhes bya ba ni grub kyi mi bskyod pa'i bsgom pa dang kha ton byas pas so/ /ltung bar mi 'gyur ba ni rin chen gtsug phud kyis so/ /rigs ngan du skye bar mi 'gyur ba ni pad+ma'i ting nge 'dzin gyis so/ /yul mtha' khob tu skye bar mi 'gyur ba ni pad+ma nges pa'i dbang phyug gis so/ /dbang po ma tshang bar skye bar mi 'gyur zhes pa ni rin chen sems ma'i'o/ /lta ba ngan pa'i rigs su skye bar mi 'gyur ba ni rin chen rgyal po'i'o/ /sangs rgyas mi bzhugs pa'i yul du skye bar mi 'gyur ba ni pad+ma chags pa'i'o/ /dmyal bar skye bar mi 'gyur ba ni rin chen legs pa'i'o/ /lha tshe ring por mi 'gyur ba ni rin chen khro gnyer gyi'o/ /mu ge la sogs pa'i bskal pa'i nang du skye bar mi 'gyur ba ni rin chen nyi ma'i'o/ /snyigs ma lnga'i dus su skye bar mi 'gyur ba ni rin chen rgyal mtshan gyi'o/ /chom rkun gyi 'jigs pa 'byung bar mi 'gyur ba ni rin chen bzhad pa'i'o/ /dbul ba'i 'jigs pa mi 'byung ba ni chos kyi'o/ /'jigs pa 'byung bar mi 'gyur ba zhes pa ni rnon po'i'o/ /ldan par 'gyur ro zhes bya ba ni 'khor lo'i'o/ /kha dog dang ldan par 'gyur ro'i bar gyis ni gsung ba'i'o/ / dag par 'gyur ba ni las kyi'o/ /tshig btsan pa ni srung ba'i'o/ /tshe rabs dran pa ni gnod sbyin gyi'o/ /'khor mi zad pa ni khu tshur gyi'o/ /yon tan mchog dang ldan pa ni rdo rje sems ma'i'o/ /pha rol tu phyin pa drug dang ldan pa ni rin chen ma'o/ / tshangs pa'i gnas bzhi ni chos ma'o/ /dran pa la sogs pa drug dang ldan pa ni las ma'i'o/ /smra ba mkhas pa ni sgeg mo dang bdug pa ma'i'o/ /sgrin por gyur pa ni phreng ba dang me tog gi'o/ /sred pa med par 'gyur ba ni glu ma dang mar me ma'i'o/ /bkur bar yang 'gyur ba ni gar ma dang dri ma'i'o/ /shes par 'gyur ba ni rin chen lcags kyu'i'o/ /rdzogs par 'gyur ba ni rin chen zhags pa'i'o/ /mi brjed pa ni rin chen lcags sgrog gi'o/ /'jug par mi 'gyur ba ni rin chen dril bu'i'o/ /rta mchog gi dkyil 'khor gyi dbang du mdzad nas/ kye lag na rdo rje 'chang zhes bos nas/ de ltar yon tan dpag tu med pa dang ldan par 'gyur ro zhes bya ba ni gzhi'i don yod par grub pa dang / dang po sangs rgyas dz+nyA na kA ya dang gsum gyi yon tan bstan to/ /gzhan dag dang ldan par 'gyur ro zhes bya ba dpa' bo gcig pu'i rta mchog gi yon tan bstan to/ /mngon par rdzogs par sangs rgyas par 'gyur ro zhes bya bas ni rigs lnga'i rang bzhin gyi rta mchog gi yon tan bstan to/ /chos kyi rgyal po chen por 'gyur ro zhes bya ba'i bar gyis rigs gsum gyi rta mchog gi yon tan bstan to/ /nye ba'i snying po'i sngags kyi dbang du mdzad nas/ oM sarba d+har+m+ma zhes bya ba nas a A aM aHzhes bya ba'i bar gyis badzra tIk+Sh+Na'i nye ba'i snying po bstan to/ /pra kr-i ti pa ri shud+d+ha zhes bya ba nas mu pA dA ye ti a zhes bya ba'i bar gyis duHkhats+tshe da'i nye ba'i snying po bstan to/ /sarba ta thA ga ta zhes bya ba nas oM hUM hrIHzhes bya ba'i bar gyis pradz+nyA dz+nyA na'i nye ba'i snying po bstan to/ /b+ha ga bAn dz+nyA na mUrti zhes bya bas dz+nyA na kA ya'i nye ba'i snying po bstan to/ /wA gI shwa ra ma hA pa tsa zhes bya bas wA gI shwa ra'i nye ba'i snying po bstan to/ /sar+b+ba d+har+m+mA ga ga na zhes bya ba nas dz+nyA na gar+b+ha AHzhes bya ba'i bar gyis a ra pa tsa na'i nye ba'i snying po bstan to/ /sngags 'dis ni dkyil 'khor drug gi thun mong gi nye ba'i snying po bzlas pa bstan to/ /da ni gnyis kas gsal gdab pa dang mjug bsdu ba'i dbang du mdzad nas/ de nas zhes bya ba la sogs pa gsungs te/ dpal ldan rdo rje 'chang ni khams gsum rnam par rgyal ba'o/ /dga' zhing mgu nas thal mo sbyar ni gus pas so/ /mgon po bcom ldan de bzhin gshegs/ /rdzogs sangs rgyas la zhes bya bas ni rnam par snang mdzad la'o/ /phyag 'tshal nas zhes bya bas ni lus ngag yid gsum gyis so/ /de ni mgon po gsang ba'i bdag /lag na rdo rje'i khro bo rgyal/ /zhes bya ba ni sdud pa po lag na rdo rje'o/ /sna tshogs gzhan dang zhes bya ba ni khro gnyer rim par ldan la sogs kyi rdo rje gtsug tor la sogs pa nyi shu rtsa gcig dang ngo / /lhan cig tu ni khro bo'i rgyal po dang lhan cig pa'o/ /gsang bstod nas ni yan lag brgyad dang ldan pa'i tshangs pa'i dbyangs kyis so/ /tshig 'di gsol ba ni 'chad par 'gyur ba'i mgon po bdag cag yi rang ba'o/ /legs so legs so legs par gsungs/ /zhes bya ba ni rjes su yi rang ba'o/ / 'bras bu bshad pa/ rnam grol 'bras bu 'tshal ba yi/ /zhes bya bas ni rnam par grol ba'i 'bras bu don du gnyer ba'i gang zag dang / 'gro ba'i mgon po 'khor ba rnams dang bdag cag lag na rdo rje la sogs pa 'bras bu yang dag par rdzogs pa'i byang chub thob pa'i don chen mdzad pa ni rjes su yi rangs pa'o/ /de'i don ci 'dra zhe na/ sgyu 'phrul dra ba'i tshul bstan pa ste/ sgyu 'phrul dra ba'i rgyud las so/ /'di zhes bya ba ni mtshan yang dag par brjod pa'o/ /rnam dag ni dang por dge ba'o/ /legs pa'i lam ni bar du dge ba'o/ /zab pa ni tha mar dge ba'o/ /yangs la rgya che ba ni shes rab dang snying rje ste thabs so/ /don chen po dang 'gro ba'i don bgyid pa ni mngon par mtho ba dang nges par legs pa'i 'bras bu'o/ /sangs rgyas rnams kyi yul 'di ni/ /rdzogs pa'i sangs rgyas rnams kyis bshad/ /ces bya ba ni sgyu 'phrul dra ba'i glu gsungs pa'o/ /da ni mtshan bstan pa'i dbang du mdzad nas/ 'jam dpal ni rigs drug gi gzhi'i sku'o/ /ye shes sems dpa' ni dang po'i sangs rgyas drug go/ /don dam pa ni ye shes kyi sku drug go/ /mtshan yang dag par brjod pa ni de'i dkyil 'khor drug gi mtshan bsgom pa'i don brjod pa'o/ /bcom ldan 'das shAkya thub pa ni rnam par snang mdzad de ma 'ongs pa'i dus na shAkya thub par sprul pas na shAkya thub pa'o/ /gsungs pa ni bshad pa'o/ /rdzogs pa ni ting nge 'dzin dra ba'i le'u mthar thug pa'o/ /'jam dpal sangs rgyas ye shes dang / /pad+ma yan lag med pa dang / /sgeg pa bzhad pa'i rdo rje dang / /gsung gi myu gu mgrin gsum dang / /in+d+ra po d+hi legs gsungs dang / /chos skyong dang ni dpal sbas dang / /ye shes bshes gnyen ye shes grags/ /tri bi dra ma chos dbang po/ /skal ldan dbang phyug zla bzang dpal/ /'di skad brgyud pa'i rim pa las/ /bdag gis 'grel pa 'di brtsams pas/ /'jam dpal go 'phang thob par shog /slob dpon chen po zla ba bzang po grags pa'i dpal gyis mdzad pa rdzogs so// // rgya gar gyi mkhan po paN+Di ta chen po shrI ma hA dza na dang / sgra bsgyur gyi lo tsA ba chen po dge slong 'phags pa shes rab kyis bsgyur cing gtan la phab pa'o//[ ]@##/ /rgya gar skad du/ Ar+ya many+dzu shrI nA ma sad+hI ti dr-it+t+waM/ bod skad du/ 'phags pa 'jam dpal kyi mtshan yang dag par brjod pa'i 'grel pa/

CLOSE WINDOW