བོད་ཡིག

e-texts based on the ACIP/ALL Input

/'di la gzhung tshad ni sh+lo ka nyis stong lnga brgya'o/ /[ ]@##/ /rgya gar skad du/ Ar+ya many+dzu shrI nA ma saM gI ti TI kA/ bod skad du/ 'phags pa 'jam dpal gyi mtshan yang dag par brjod pa'i rgya cher bshad pa/ gsung gi mnga' bdag 'jam dpal ye shes sems dpa' la phyag 'tshal lo/ /mchog tu dri med blo yi rnam pa kun mkhyen gzod nas zhi ba'i ngo bo nyid/ /sna tshogs sems can don rnams 'byor pas che ba gsal 'gyur mtshan rnams yang dag brjod/ /rang bzhin zhi brnyes rdzogs sangs rgyas dang byang chub sems dpa' yon tan mnyam med pa/ /gzod nas grangs 'das kyis gsungs de yi mtshan rnams dbye 'dir bdag gis bri par bya/ /ngag gi spyod yul kun las 'das/ /mtshan rnams kun gyi yon tan ldan/ /tshig rje dang bas rab btud de/ /de'i mtshan don ni rnam par dbye/ /bla ma'i man ngag las brgyud cing / /sna tshogs rgyud don mthong ba dang / /pha rol phyin pa kun ldan pa'i/ /mdo sde'i don rnams mthong ba las/ /nus pa kun dang rnam bral yang / /bdag nyid dran par bya ba'i phyir/ /rnam par 'byed la 'gal med de/ /gzhan gyi don du'ang dgag pa med/ rigs kyi bu'am rigs kyi bu mo gang la la zhig gis gang+gA'i klung gi bye ma snyed kyi de bzhin gshegs pa rnams kyi mtshan mchog tu dad pas bskal pa'am bskal pa las lhag par brjod na bsod nams kyi phung po ji tsam rab tu skye bar 'gyur zhe na/ de la ni grangs med cing tshad med pa rab tu skye bar 'gyur ro/ /yang rigs kyi bu'am rigs kyi bu mo gang la la zhig gis 'jam dpal gzhon nur gyur pa la phyag 'tshal lo zhes mtshan bzung na snga ma las 'di nyid bsod nams kyi phung po shin tu mang po rab tu skye bar 'gyur ro/ /de ci'i phyir zhe na/ de bzhin gshegs pa mtha' yas pa'i dge ba'i bshes gnyen du gyur pa'i phyir ro/ /de yang 'jam dpal gzhon nur gyur pas gang+gA'i klung gi bye ma snyed kyi sangs rgyas bcom ldan 'das dang por byang chub tu thugs bskyed pa la sogs pa nas/ sbyin pa la sogs pa pha rol tu phyin pa rnams kyi rim gyis sangs rgyas nyid la rab tu gzhag pas bcom ldan 'das shAkya thub pas yang dag par bsngags pa gsungs pa la/ la la dag ci 'di dag don ji lta ba nyid yin nam/ yang na gus pa bskyed par bya ba'i phyir bstod par mdzad pa yin zhes rnam par rtog pa skye ste/ rnam par rtog pa de bsal zhing bzlog pa'i phyir de nas zhes bya ba la sogs pa gsungs so/ /yang na dam tshig dang sngags dang phyag rgya dang ting nge 'dzin la 'jug pa'i le'u la sogs pa thams cad du bcom ldan 'das kyis 'jam dpal gzhon nur gyur pa'i bsngags pa gsungs te/ sangs rgyas thams cad kyi yon tan gyi bdag nyid kyi sngags dang phyag rgya dang dkyil 'khor gyi lha thams cad kyi ngo bo nyid chos dang longs spyod rdzogs pa dang sprul pa'i sku sangs rgyas thams cad kyi bdag nyid dang gnyis su med pa'i ngo bo nyid ni 'jam dpal gzhon nur gyur pa'o zhes gsungs kyi rang bzhin ni ma bstan to zhes som nyi dang bcas pa rnams kyi sems la sems kyis yongs su rtog pa phyag na rdo rjes mkhyen nas de bstan par bya ba'i phyir/ de nas zhes bya ba la sogs pa gsungs so/ /yang bcom ldan 'das bdag nyid kyis ma 'ongs pa'i sems can dpag tu med pa'i don gyi bya ba don yod par mkhyen nas gsol ba 'debs par bya ba'i phyir phyag na rdo rje la gzigs par gyur te/ de nas de'i 'og tu phyag na rdo rjes zhus pa'i phyir de nas zhes bya ba la sogs pa gsungs so/ /yang na ting nge 'dzin gyi dra ba'i le'ur dkyil 'khor ba'i lha rnams kyi ting nge 'dzin gyi khyad par gsungs nas/ de'i 'og tu skabs rnyed pa dang ting nge 'dzin thams cad kyi ngo bo nyid 'jam dpal gzhon nur gyur pa'i mtshan nye bar bstan par bshad par bya ba'i phyir/ de nas zhes bya ba la sogs pa gsungs so/ /de bas na de nas zhes bya ba'i sgra 'di ni de ma thag par rab tu sbyar gyi bkra shis pa la sogs par blta bar mi bya'o/ /de nas zhes bya ba la sogs pas ni nyan pa po'i skye bo rnams 'jug par bya ba'i phyir 'brel pa dang / brjod pa dang / brjod par bya ba dang / dgos pa dang dgos pa'i dgos pa yang brjod par bya ste/ de la sangs rgyas thams cad kyi yon tan gyi bdag nyid mtshan yang dag par brjod pa'i ngo bo nyid chos kyi dbyings rnam par dag pa'i rang bzhin rje btsun gsung gi dbang phyug ni brjod par bya ba yin la de ston pa'i gzhung gi tshogs ni mtshan yang dag par brjod pa ste/ de dag kyang brjod par bya ba dang brjod pa'i mtshan nyid dam bstan par bya ba dang ston par byed pa'i mtshan nyid dam thabs dang thabs las byung ba'i mtshan nyid dam rgyu dang 'bras bu'i mtshan nyid ni 'brel pa ste gdul bya'i khyad par gyi tshig go/ /dgos pa ni mtshan gyi don gang yang rung ba bsgoms pa rab kyi mthar thug pa rje btsun 'jam dpal gyi ngo bo nyid rdzogs par byas pa'o/ /dgos pa'i dgos pa ni mi gnas pa'i mya ngan las 'das pa thob nas 'gro ba ma lus pa'i don byed pa ste dgos pa'i mthar thug pa'o/ /de nas dpal ldan rdo rje 'chang / /spyan sngar 'dug ste 'di skad gsol/ /zhes bya bar sbyar te/ de la dpal ni bsod nams kyi tshogs dang ye shes kyi tshogs te/ bsod nams dang ye shes kyi tshogs de dag yongs su rdzogs pa dang ldan pas dpal ldan no/ /rdo rje ni me long lta bu dang / mnyam pa nyid dang / so sor rtog pa dang / bya ba grub pa dang / chos kyi dbyings shin tu rnam par dag pa'i ye shes kyi ngo bo nyid kyi rtse lnga pa gnyis su med pa'i de bzhin nyid kyi ngo bo nyid 'chang zhing lag mthil du gzhag pa bzhin du de'i bdag nyid kyi mngon sum du mdzad pa'i phyir 'dzin par mdzad pas na rdo rje 'chang ngo / /dka' ba 'dul ba'i phyir gdul dka' ba ste/ dbang phyug chen po la sogs pa'o/ /gdul dka' ba rnams 'dul bas na gdul dka' 'dul ba po'o/ /gzhan yang sred med kyi bu la sogs pas kyang lha ma yin gdug pa can rnams 'dul ba'i phyir gdul dka' 'dul ba po ma yin no zhes rtog pa la mchog / dpa' bo 'jig rten gsum las rgyal/ /zhes bya ba smos te/ mchog ni phul du byung ba'o/ /dpa' bo ni gnyis pa med pa dang / 'jigs pa thams cad dang bral ba'i phyir ro/ /'jig rten gsum las rgyal zhes bya ba la 'jig rten gsum gyi sgras ni de na gnas pa'i lha dang / lha ma yin dang / mi la sogs pa ste/ de rnams btul te byang chub tu sems bskyed pa dang dkyil 'khor du bcug pa la sogs pa sangs rgyas kyi byang chub la smon lam 'debs su bcug nas rang gi 'khor nyid du 'jog cing 'jig rten gsum gyi bdag por gyur pa nyid du gnas par mdzad pas na 'jig rten gsum las rgyal ba ste/ 'jig rten rnams las rgyal ba'i ngang tshul 'di la mnga' bas na 'jig rten gsum las rgyal ba'o/ /yang na thabs sna tshogs kyis 'jig rten gsum du rnam pa thams cad du rgyal ba 'di la mnga' bas na 'jig rten gsum las rgyal ba'o/ /rdo rjes nye bar mtshon pa'i rigs ni rdo rje'i rigs kyi sgrar brjod de/ de bas na rdo rje'i rigs kyi bdag po ni rdo rje'i dbang phyug go/ /gsang ba pa ni gnod sbyin rnams te/ de gdul bar bya ba'i phyir de'i rigs su skye ba yongs su 'dzin pa nye bar bstan nas de rnams kyi dbus na rgyal por gyur pas mdzes shing snang bar gyur pa'i phyir na gsang ba'i rgyal po'o/ /pad+ma dkar po rgyas pa dang 'dra bar yid 'phrog pa'i spyan gang la yod pa de ni pad+ma dkar po rgyas 'dra'i spyan zhes bya'o/ /pad+ma rgyas 'dra'i zhal mnga' ba/ /zhes bya ba ni zhal mtha' dag kyang mdzes par gsungs pa yin no/ /rang gi lag gis zhes pa ni rang gi lag pas so/ /rdo rje mchog ni ye shes lnga'i bdag nyid can no/ /yang dang yang du ni yang nas yang du'o/ /gsor byed pa ni shin tu gsor bar byed pa ste/ 'di dag gis ni khro bo sgeg pa'i gzugs nyid du gsungs pa yin no/ /de ltar rdo rje 'chang ba'i bye brag rnams bstan nas/ de'i 'khor gyi tshul gyis gnas pa rnams kyi yang khyad par thams cad dang ldan pa de bstan par bya ba'i phyir/ khro gnyer rim par ldan zhes bya ba la sogs pa gsungs te/ khro gnyer rim par ldan pa dang / 'dod pa'i rgyal po dang / dbyug sngon can dang / stobs po che dang / mi g.yo ba dang / gnod mdzes dang / sa 'og dang / rdo rje 'od 'phro dang / g+hu lu g+hu lu dang / rdo rje kum+b+hi dang / rdo rje rtse mo dang / rdo rje 'jigs byed dang / gzhan gyis mi thub pa la sogs pa zhes bya ste/ de rnams kyis yongs su bskor bas na mtha' yas pa nyid do/ /de bas na khro gnyer rim par ldan la sogs pa lag na rdo rje mtha' yas pa dang lhan cig tu phyag 'tshal nas zhes bya bar sbyar te/ ji skad du bshad pa'i lag na rdo rje gang yin pa de rnams la de skad ces bya ste/ de rnams kyis zhes thams cad la sbyar bar bya'o/ /'jigs pa med pas na dpa' bo'o/ /ji skad du bshad pa'i gdug pa rnams 'dul bas na gdul dka' 'dul ba po'o/ /'jigs su rung ba la sogs pa'i nyams dang ldan pas 'jigs su rung dang dpa' byad can no/ /rdo rje rtse mo rab 'phro ba/ /rang gi lag gis gsor byed pa/ /zhes bya bas ni lag pa'i mthil na gnas pa'i rdo rje dpag tu med pa 'phro bar ston pa'o/ /snying rje chen po dang zhes bya ba la sogs pas ni 'gro ba'i don byed pa'i thabs rnams ston pa yin te/ snying rje chen po dang thabs dang shes rab kyis 'gro ba'i don byed pa zhes bya bar sbyar ro/ /de yang snying rje chen po ni 'gro ba'i don la rab tu 'jug pa'o/ /shes rab ni chos thams cad dngos po med par rtogs pa'i tshul lo/ /thabs ni rnam pa dpag tu med pas sems can rnams kyi don byed pa'o/ /yang na shes rab dang thabs gnyis ni sems can rnams kyi don phyin ci ma log par rtogs pa'o/ /snying rje chen po ni 'khor ba ji srid par sems can ma lus pa'i don byed pa'i ngo bo ste/ sems can la dmigs pa dang / chos la dmigs pa'i bdag nyid can no/ /de bas na snying rje chen po dang shes rab dang thabs la sogs pa'am/ snying rje chen po dang shes rab dang thabs kyis 'gro ba rnams kyi kun nas don byed pa'o/ /de nyid kyis na mchog go/ /rgyu'i khyad par mthong bas na dga' ba'o/ / 'bras bu'i khyad par mthong bas na mgu ba'o/ /gnyi ga rdzogs par mthong bas na rangs pa'i bsam pa can no/ /khro bo'i lus kyi gzugs ldan pa/ /zhes bya ba ni khro bo'i gzugs can yin gyi khros pa ni ma yin te/ thugs rje chen po'i rang bzhin can yin pa'i phyir ro/ /de nyid kyis na sangs rgyas phrin las byed pa'i mgon te/ mgon med pa rnams kyi mgon du gyur pa ste/ de rnams dang lhan cig pa ni de dag dang bcas pa'o/ /khyad par ji lta bu zhe na/ lus btud rnams dang zhes bya ba'o/ /de bzhin gshegs pa bcom ldan 'das/ /rdzogs sangs rgyas la phyag 'tshal nas/ /zhes bya ba ni 'og nas rgya cher bshad par bya'o/ /thal mo sbyar ba byas nas ni/ /zhes bya ba 'di ni 'og nas bshad pa'i gsol ba 'debs pa'i tshul smos pa yin no/ /spyan sngar 'dug ste zhes bya ba ni rjes ma yin pa spang bar bya ba'i phyir rgyab dang logs su ni mi 'dug go zhes bya ba'i don to/ /khyab bdag bdag la sman pa dang / /zhes bya ba 'jig rten phyi ma'i 'bras bu rdzogs pa'i don du gsungs pa ni bdag la sman pa'o/ /tshe 'di'i 'bras bu yongs su rdzogs par bya ba'i phyir gsungs pa ni bdag gi don to/ /thugs brtse ba'i phyir ni gnyi ga rdzogs par bya ba'i phyir ro/ /sgyu 'phrul dra bas mngon rdzogs pa'i/ /byang chub ci nas bdag thob mdzod/ /ces bya ba la/ sna tshogs par sprul ba ni sgyu 'phrul lo/ /'ching ba'i bdag nyid can yin pas dra ba'o/ /de ltar na sbrul ba sna tshogs pas 'khor ba'i rgya mtshor nub pa'i sems can rnams dra ba nyid kyis bton nas mya ngan las 'das pa'i thang gi skam sar gzhag pa'i phyir/ rnam pa thams cad du chos thams cad las phyin ci ma log par mngon par byang chub pa ni sgyu 'phrul dra bas mngon par byang chub pa'o/ /de bas na de lta bu'i byang chub ji ltar bdag gis thob par 'gyur ba de ltar yang dag par rdzogs pa'i sangs rgyas kyi mtshan yang dag par bshad du gsol zhes bya bar sbyar ro/ /de ltar bdag la phan pa dang gzhan yang / nyon mongs pas ni sems dkrugs shing / /zhes bya ba ste/ nyon mongs pa rnams kyis sems dkrugs pa gang yin pa de la de skad ces bya ste/ de rnams la phan pa dang / mi shes pa nyid 'dam yin pas na mi shes 'dam du zhes bya ste/ mi shes pa'i 'dam du bying ba rnams la phan pa'i phyir ro/ /phan pa nyid bstan pa'i phyir/ sems can kun/ bla med 'bras bu thob bya'i phyir/ /zhes bya ba smos te/ bla na med pa'i 'bras bu sangs rgyas thob bar bya ba'i phyir/ rdzogs pa'i sangs rgyas bcom ldan 'das/ /'gro ba'i bla mas bshad du gsol/ /zhes bya bar sbyar ro/ /dam tshig chen po de nyid mkhyen/ /zhes bya ba la/ dam tshig ces bya ba'i sgra ni brda dang / grub pa'i mtha' dang / sdom pa dang / dkyil 'khor dang / sngags dang phyag rgya dang lha rnams la rab tu sbyar la/ brda la sogs pa'i yul thams cad kyi de kho na mkhyen pas na/ dam tshig chen po de nyid mkhyen/ /zhes bya'o/ /dbang po bsam pa mkhyen mchog gis/ /zhes bya ba la/ dad pa dang / brtson 'grus dang dran pa dang ting nge 'dzin dang / shes rab kyi dbang po ste lnga po ni dbang po'o/ /dbang po de rnams bsam pa sna tshogs pas chung ngu dang / 'bring dang chen po'i dbye bas dbang po rnam pa dgur dbye ba mkhyen pa'o/ /'dod chags dang / zhe sdang dang / gti mug dang / 'jig rten pa'i lha rnams dang / mtho ris dang thar pa sna tshogs dang / nyan thos dang / rang sangs rgyas dang / yang dag par rdzogs pa'i sangs rgyas kyi yul gyis dpag tu med par phye ba ni bsam pa ste/ dbang po rnams dang bsam pa rnams mkhyen pas na/ dbang po bsam pa mkhyen mchog gis/ / zhes pa ste/ phul du byung bas bcom ldan 'das kyi ye shes kyi sku mtshan yang dag par brjod pa bshad du gsol zhes sbyar ro/ /bcom ldan 'das kyi ye shes kyi sku yin pas na bcom ldan 'das kyi ye shes kyi sku zhes bya ste/ de bzhin gshegs pa thams cad kyi sku'i ye shes kyi ngo bo nyid yin pa'i phyir ro/ /de skad du dpal rdo rje snying po'i rgyan las/ bde gshegs dri med shes rab ni/ /rdo rje rnon por de bshad do/ /zhes gsungs so/ /de bas na de bzhin gshegs pa thams cad kyi dri ma med pa'i ye shes kyi bdag nyid kyi sku ni ye shes kyi sku ste de'i gtsug tor chen po'i ngo bo nyid kyi tshig gi bdag po ste gsung thams cad la rab tu 'jug par byed pa'o/ /ye shes sku ste rang byung ba/ /zhes bya ba ni ye shes nyid kyi sku yin te/ phyi'i don gyi gzugs kyi sku zla ba la sogs pa ni med de/ kun rdzob tu rnam par gzhag pa yin pa'i phyir ro/ /phyi rol gyi dmigs pa las ma skyes pa'i phyir dang / rang nyid rnam par dag pa'i gnyis su med pa'i ye shes kyi rgyun las 'khrungs pa yin pa'i phyir rang 'byung ba'o/ /'jam dpal ye shes sems dpa' yi/ /zhes bya ba la/ ye shes kyi sku dang ye shes sems dpa' la khyad par ci zhig yod ce na/ phyag rgya chen po ni ye shes kyi sku'o/ /dam tshig gi phyag rgya thugs ka'i zla ba'i dkyil 'khor dang rdo rje'i gzugs su gyur pas na ye shes sems dpa' ste khyad par ni de yin no/ /ming ni yang dag brjod pa'i mchog/ /ces bya ba la/ mtshan rnams kyi 'grel ba brjod pa ni mtshan yang dag par brjod pa'o/ /thams cad las phul du byung bas na mchog go/ /don zab don ni rgya che zhing / /don chen mtshungs med rab zhi ba/ /zhes bya ba la/ stong pa nyid ston pas na don zab pa'o/ /de las gzhan pa'i sangs rgyas rnams kyi yon tan yang ston pas na don rgya che ba'o/ /zab cing rgya che ba'i don gnyis kyis sangs rgyas nyid rab tu ston pas na don chen po'o/ /mnyam pa med pas na mtshungs pa med pa'o/ /mya ngan las 'das pa rab tu ston pas na zhi ba ste/ de bas na de bshad du gsol zhes sbyar ro/ /thog ma bar dang mthar dge ba/ /zhes bya ba ni nyan thos kyi theg pa ston pas na thog mar dge ba'o/ /rang sangs rgyas kyi theg pa thob par byed pas na bar du dge ba'o/ /yang dag par rdzogs pa'i byang chub la sbyor bas na tha mar dge ba'o/ /yang na bya ba dang / spyod pa dang / rnal 'byor gyi dbye bas de skad bya ba'am/ yang na thos pa dang bsam pa dang bsgom pa'i dbye bas so/ /dge ba zhes bya ba ni yang dag par rdzogs pa'i byang chub 'thob pas so/ /de bas na yon tan thams cad dang ldan pa de bshad du gsol zhes sbyar ro/ /'das pa'i sangs rgyas zhes bya ba la sogs bas ni de bzhin gshegs pa thams cad kyis kyang mtshungs par gsungs shing / bsngags pa yin par bstan pa'i phyir/ /'das pa'i sangs rgyas rnams kyis gsungs/ /ma 'ongs rnams kyang gsung 'gyur la/ da ltar byung ba'i rdzogs sangs rgyas/ /yang dang yang du gsungs pa gang / zhes bya ba gsungs so/ /rgyud chen sgyu 'phrul dra ba las/ /rdo rje 'chang chen gsang sngags 'chang / /dpag med rnams kyi bka' bzhin du/ /glur blangs gang lags bshad du gsol/ /zhes bya ba ni de bzhin gshegs pa 'ba' zhig gis gsungs pa yin gyi/ rdo rje 'chang chen po rnams kyis kyang sgyu 'phrul dra ba stong phrag bcu drug pa 'di nyid gzhan dag tu yang glur blangs shing gsungs te/ dpag tu med pa'i gsang sngags 'dzin pa rnams kyis gsang sngags dang don gzung ba'o/ /mgon po rdzogs sangs rgyas kun gyi/ /gsang 'dzin ci nas bdag 'gyur phyir/ zhes pa ni de bzhin gshegs pa thams cad kyi sku'i gsang ba dang / gsung gi gsang ba dang / thugs kyi gsang ba 'dzin par byed pas na gsang ba 'dzin par grags par bdag bgyid do zhes pa'o/ /nges par 'byung gi bar du 'di/ /zhes bya ba ni mya ngan las 'das kyi bar du'o/ /bdag gi bsam pa brtan pos gzung / /zhes bya ba ni mi g.yo ba'i bsam pas so/ /de ni mtshan yang dag par brjod pa bzung bas phyin ci ma log par gsang ba pa ji lta ba bzhin du gzung bar bgyi zhing de bzhin du bstan par bgyi'o zhes sbyar ro/ /da ni bdag gi don phun sum tshogs pa rdzogs na gzhan gyi don byed par nus so zhes bstan par bya ba'i phyir/ nyon mongs ma lus bsal ba dang / /mi shes ma lus spang ba'i phyir/ /bsam pa'i khyad par ji bzhin du/ /sems can rnams la bshad par 'tshal/ /zhes bya ba smos te/ ci'i phyir ston par byed ces rtog pa la/ /nyon mongs ma lus bsal ba dang / /mi shes ma lus spang ba'i phyir/ /zhes bya ba gsungs te/ nyon mongs pa ni nyon mongs pa'i kun nas nyon mongs pa dang / lus kyi kun nas nyon mongs pa dang / skye ba'i kun nas nyon mongs pa ste/ 'di dag thams cad ni byang chub la sgrib par gyur pa yin pas spang bar bya ba yin no/ /mi shes pa ni ma rig pa'o/ /de kun du 'gro bas 'dod chags la sogs pa'ang 'khor ba'i rgyur gyur cing phyin ci log la zhugs pa yin pas spang bar bya ba'o/ /de bas na bag chags dang bcas pa'i nyon mongs pa dang las dang mi shes pa bsal zhing spang bar bya ba'i phyir te/ de'i don du sems can thams cad la mtshan yang dag par brjod pa bstan par bgyi'o zhes pa'o/ /bsam pa'i khyad par ji bzhin du/ /sems can rnams la bshad par 'tshal/ /zhes bya ba ni gang gi bsam pa chung ngu dang / 'bring dang / chen po la sogs pa'i dbye bas bye brag tu phye ba gang yin pa de'i khyad par shes par bgyis la bstan par bgyi'o/ /thun mong gi tshul gyis ni ma yin no zhes bya ba'i don to/ /gsang dbang lag na rdo rje yis/ /de bzhin gshegs la de skad du/ /gsol nas thal mo sbyar byas te/ lus btud nas ni spyan sngar 'dug/ /de nas bcom ldan shAkya thub/ /gsang dbang la ni slar gsungs pa/ /zhes bya bar sbyar te/ de nas zhes bya ba ni phyag na rdo rjes zhus pa'i 'og tu'o/ /dbang phyug la sogs pa dang ldan pas na bcom ldan 'das so/ /phyin ci ma log pa'i don thugs su chud pas na rdzogs pa'i sangs rgyas so/ /lha dang mi rnams kyi dam par gyur pas na rkang gnyis mchog go/ /ci zhig mdzad nas slar gsungs she na/ nyid kyi zhal nas ljags bzang ba/ /ring zhing yangs pa brkyang mdzad de/ /zhes bya ba smos te/ de bzhin gshegs pa'i byin gyi rlabs kyis sems can gzhan gyi kha dang lce lta bus kyang chos ston par mdzad pa yang srid do zhes pa de dgag par bya ba'i phyir nyid kyi zhal zhes bya ba smos so/ /rang gi zhal yin yang gdul bya'i dbang gis rdzu 'phrul gyis gzhan dag tu ston pa yang srid do zhes rtog pa bzlog pa'i phyir nyid kyi zhal nas ljags zhes khyad par du gsungs so/ /bzang ba zhes bya ba ni bsod nams kyi tshogs las nges par byung ba dang / gzhan gyi rgyud la bsod nams dang ye shes kyi tshogs bskyed par mdzad pa zhes bya ba'i don to/ /ring ba ni chur ring ba'o/ /yangs pa ni dpral ba'i mthar thug gi bar du zhal gyi dkyil 'khor rab tu khebs pa ste/ srab cing che la zangs kyi mdog lta bu la sogs pa'i mtshan nyid dang ldan pa'o/ /brkyang bar mdzad pa ni phyung bar mdzad pa ste/ ci'i phyir yang de lta bu'i ljags bzang zhing yangs pa ston par mdzad ce na/ bskal pa du mar bden pa gsungs pa la goms par nye bar bstan pa'i phyir te/ de nyid kyang sems can thams cad la slu ba med pa'i chos ston par mdzad pa nyid du bstan par bya ba'i phyir ro/ /yang na ljags brkyang par mdzad cing 'dzum pa'ang yang dag par bstan par mdzad nas/ gsang dbang la ni slar gsungs pa/ /zhes bya bar sbyar ro/ /'dzum pa'i khyad par bstan pa'i phyir/ /'jig rten gsum po snang byed cing / /bdud bzhi dgra rnams gdul byed pa/ /sems can rnams kyi ngan song gsum/ /sbyong bar byed pa'i 'dzum bstan nas/ /zhes bya ba smos te/ 'jig rten gsum po snang bar byed pa ni khams gsum po snang zhing gsal bar mdzad pa'o/ /bdud bzhi ni phung po dang / nyon mongs pa dang / 'chi bdag dang / lha'i bu'i bdud ces grags pa rnams te/ de dag nyid ni dgra rnams so/ /de rnams 'dul bar byed pa ni rang gi yul las spos nas byang chub kyi lam la nges par sbyar ba'o/ /de 'ba' zhig tu ma zad kyi gzhan yang / sems can rnams kyi ngan song gsum/ /sbyong bar byed pa'i 'dzum bstan nas/ /zhes bya ba smos te/ ngan song gsum ni dmyal ba dang / yi dags dang / dud 'gro'i skye gnas te/ gang gi tshe sangs rgyas bcom ldan 'das 'dzum pa mdzad pa de'i tshe zhal las 'od zer kha dog sna tshogs byung nas sems can dmyal ba dang / yi dags dang / dud 'gro'i skye gnas su gtogs pa'i sems can rnams snang bar mdzad la/ de rnams 'od zer des yang dag par reg pa dang sems can dmyal ba la sogs pa'i lus dang ngag dang yid kyi sdug bsngal nye bar zhi zhing rgyun chad nas sangs rgyas mthong ngo / /de mthong bas dran pa rnyed par gyur te/ de nas sangs rgyas la phyag 'tshal lo/ /chos la phyag 'tshal lo/ /dge 'dun la phyag 'tshal lo/ /zhes dkon mchog gsum dran ma thag tu/ de nas shi 'phos te lha dang / mi rnams dang skal ba mnyam par skyes te/ dang po byang chub kyi sems yongs su bzung nas sbyin pa la sogs pa'i pha rol tu phyin pa la goms par byas pas rim gyis sangs rgyas bcom ldan 'das su gyur te/ de lta bas na ngan song gsum sbyong ba'o/ /yang na ngan song gsum gyi rgyu 'dod chags dang / zhe sdang dang / gti mug rnams rnam par sbyangs pas na sbyong ba'o/ /yang na ngan song gsum gyi rgyur gyur pa bdag dang / rdzas dang / yon tan dang / las dang / spyi dang / bye brag dang / 'du ba dang / dbang phyug la sogs pa yod pa nyid du ston par byed pa la snying stobs dang / rdul dang / mun pa'i gzugs can drag po dang / sred med kyi bu dang / tshangs pa ste de dag rnam par sbyangs pas na ngan song gsum sbyong bar byed pa zhes bya ste/ de lta bu'i 'dzum pa sems can rnams la yang dag par ston par mdzad pa'am/ sems can rnams dang 'brel pa'i ngan song gsum sbyong bar mdzad pa'o zhes bya bar sbyar ro/ /tshangs pa'i gsung ni snyan pa yis/ /'jig rten gsum po kun bkang nas/ lag na rdo rje stobs po che/ /gsang dbang la ni slar gsungs pa/ /zhes bya ba la/ tshangs pa'i gsung ni ji ltar yul nye bar gnas pa dag gis thos pa de bzhin du phyi rol gyi yul thag ring ba 'jig rten gyi khams rnams kyis kyang thos te/ gang na gnas pa rnams la sgrib pa med par thos pa gcig pur ma zad kyi/ thag ring ba na gnas pa'am/ dman zhing rna ba mi gsang ba rnams kyis kyang snyan zhing yid du 'ong la rnam par gsal ba'i don ston pa'i tshul te/ des/ snying rje che dang ldan gyur pa/ /zhes bya ba la sogs pa slar gsungs pa yin no/ /snying rje che dang ldan gyur pa/ /'gro la phan pa'i don du khyod/ /ye shes lus can 'jam dpal gyi/ /ming brjod pa ni don che ba/ /dag par byed cing sdig sel ba/ /nga las nyan par brtson pa ni/ /legs so dpal ldan rdo rje 'chang / /lag na rdo rje khyod legs so/ /zhes bya ba la/ 'gro la phan pa'i snying rje chen po dang ldan par gyur pas don chen po dang ldan pa'i mtshan yang dag par brjod pa nyan pa la khyod brtson par byed de/ de bas na legs so legs so zhes rab tu dgyes pas na lan gnyis su gsungs pa yin no/ /sangs rgyas nyid 'thob pa'i rgyur gyur pas na don che ba'o/ /nyes pa spyod pa'i gnyen por gyur pas na dag par byed pa'o/ /sdig pa thams cad rnam par 'gog par byed pas na sdig sel ba'o/ /de lta bu'i yon tan gyis phul du byung ba dang ldan pa'i mtshan yang dag par brjod pa gang gi yin zhe na/ ye shes lus can 'jam dpal gyi/ /zhes bya ba gsungs so/ /gsang ba'i bdag po de phyir ngas/ /khyod la legs par bstan par bya/ /khyod ni rtse gcig yid kyis nyon/ /bcom ldan de ni legs zhes gsol/ /zhes bya ba la gang gi phyir gang zhig khyod nyan pa la 'jug pa de'i phyir legs par bstan par bya'o zhes bshad par bya ba'i khyad par yin te/ ngas khyod la phyin ci ma log par mtshan yang dag par brjod pa bshad cing bstan par bya yis/ kye gsang ba'i bdag po khyod rtse gcig pa'i yid kyis nyon cig ces pa ste/ sems rnam par g.yengs pas ni ji skad du bshad pa'i don khong du chud par mi nus te/ de bas na bshad pa 'bras bu med par 'gyur zhes ma 'ongs pa'i 'gro ba rnams la bslab par bya ba'i phyir 'di skad du gsungs pa yin gyi gzhan du na rdo rje 'dzin pa chen po ni ma bstan pa nyid du rtag tu sems mi g.yengs pa kho na yin pa'i phyir ro/ /bcom ldan de ni legs zhes gsol/ /zhes bya ba ni gang bcom ldan 'das kyis bka' stsal pa rtse gcig pa'i yid kyis nyon cig ces gsungs pa de legs shing mdzes pas de bzhin du mnyan par bgyi'o zhes pa'o/ /de nas bcom ldan shAkya thub/ /tshig gi bdag pos tshigs su bcad pa 'di gsungs pa zhes bya bar sbyar te/ de bas zhes bya ba ni mnyan par nges ma thag tu'o/ /bdud la sogs pa bcom pas bcom ldan 'das so/ /shAkya'i rigs las byung bas shAkya'o/ /sku dang gsung dang thugs thub pa dang ldan pas na thub pa'o/ /gsang sngags rigs chen thams cad dang / /zhes bya ba ni bya ba dang / spyod pa dang / rnal 'byor gyi rgyud dang / rtog pa la sogs pa bskyed pa'i gnas skabs su gyur pa na gsang sngags kyi rigs so/ /yul dang dus la sogs pa khyab pas chen po'o/ /de la gzigs nas tshigs su bcad pa 'di gsungs pa zhes 'og nas bshad pa rnams la yang sbyar bar bya'o/ /gsang sngags rig sngags 'chang ba'i rigs ni de'i rgyud la gzigs pa'o/ / rigs gsum ni de bzhin gshegs pa dang / rdo rje dang pad+ma'i rigs kyi ngo bo ste/ rigs thams cad bsdus ba'o/ /rnam par gzigs pa ni nges par rtog par mdzad pa ste/ 'tsham pa dang mi 'tsham pa dang skal ba dang ldan nam mi ldan zhes rang gi ngo bo la nges par rtog par mdzad pa ni gzigs pa thams cad la dgos pa yin par blta'o/ /'jig rten 'jig rten 'das pa'i rigs/ /'jig rten snang byed rigs chen dang / /zhes bya ba la/ /'jig rten pa'i sngags kyi rigs ni 'jig rten pa'i rigs so/ /'jig rten las 'das pa'i gsang sngags kyi rigs ni 'jig rten las 'das pa'i rigs so/ /de gnyis ka ni 'jig rten snang bar byed pa'i rigs so/ /yang na 'jig rten gyi snang bar byed pa'i rigs ni 'jig rten snang bar byed pa'i rigs te/ 'jig rten las 'das pa ni khro bo chen po'i rigs so/ /phyag rgya chen po'i rigs mchog dang / /rigs chen gtsug tor cher gzigs nas/ /zhes bya ba la phyag rgya chen po ni spyan la sogs pa rig pa'i rgyal mo rnams so/ /de'i rigs ni de las byung ba'i gsang sngags dang phyag rgya las skyes pa'i rgyud dang 'brel pa'o/ /rigs chen gtsug tor yi ge gcig pa la sogs pa sngags kyi stobs las byung ba'i lha'i bye brag go/ /'di dag ni/ /gsang sngags rigs chen thams cad dang / /zhes bsdus pa'i rab tu dbye ba'i ngo bo nyid yin pa'i phyir thams cad du yang sngags sngon du byas nas rigs gzhag par bya'o/ /tshig gi bdag pos tshigs su bcad/ /gsang sngags rgyal po drug ldan zhing / /gnyis su med par 'byung ba dang / /mi skye chos can 'di gsungs pa/ /zhes smos pa la/ /tshig gi bdag po ni rje btsun gsung gi dbang phyug ste/ de dang 'brel pa'i tshigs su bcad pa gsungs pa'o/ /gsang sngags rgyal po drug ldan zhing / /zhes bya ba ni oM badzra tI k+ShA zhes bya ba la sogs pa'i gsang sngags drug dang ldan pa'o/ /'dir la la dag ni/ /gsang sngags rgyal po rjes drug ldan/ /zhes 'don par yang byed de/ tshig de ni glegs bam mang po las ma mthong bas mi rigs so/ /gzhan yang rgyal po'i sgra dang mnyam par rgyal po dang rjes su bya ba'i sgra yod do/ /des ni mtshams sbyar ba las mi snang ba yin no zhes la la zer ro/ /kha cig gzhan du yang 'chad mod kyi bcom ldan 'das kyis rton pa bzhi gsungs te/ gang zhe na/ 'di lta ste/ don la rton gyi tshig 'bru la mi rton pa dang / ye shes la rton gyi rnam par shes pa la mi rton pa dang / nges pa'i don gyi mdo sde la rton gyi drang ba'i don gyi mdo sde la mi rton pa dang / chos nyid la rton gyi gang zag la mi rton pa'o/ /de la don ni gang tshig 'bru ni gang zhe na/ tshig 'bru zhes bya ba ni gang 'jig rten pa'i chos dang / bya ba la 'jug pa bstan pa'o/ /don zhes bya ba ni gang 'jig rten las 'das pa'i chos rtogs pa'o/ /tshig 'bru zhes bya ba ni/ gang sbyin pa dang / dul ba dang legs par sdom pa dang / nges pa bstan pa'o/ /don zhes bya ba ni gang sbyin pa dang / dul ba dang legs par sdom pa dang / nges pa'i mnyam pa nyid shes pa'o/ /tshig 'bru zhes bya ba ni gang 'khor ba'i skyon sgrogs shing brjod pa'o/ /don zhes bya ba ni gang 'khor ba la mi dmigs par rtogs pa'o/ /tshig 'bru zhes bya ba ni gang mya ngan las 'das pa'i yon tan dang phan yon brjod pa'o/ /don zhes bya ba ni gang rang bzhin gyis mya ngan las 'das pa'i chos thams cad la rnam par mi rtog pa'o/ /tshig 'bru zhes bya ba ni gang theg pa ji ltar rnam par gzhag pa bzhin du ston pa'o/ /don zhes bya ba ni gang chos kyi dbyings dbyer med cing tshul gcig pa la 'jug pa shes pa'o/ /tshig 'bru zhes bya ba ni gang bdog pa thams cad yongs su gtong ba bstan pa'o/ /don zhes bya ba ni gang 'khor gsum yongs su dag par shes pa'o/ /tshig 'bru zhes bya ba ni lus dang ngag dang / yid kyi sdom pa dang / tshul khrims dang / bslab pa dang / sbyangs pa'i yon tan dang yo byad bsnyungs pa thams cad yang dag par blang pa bstan pa'o/ /don zhes bya ba ni gang lus dang / ngag dang / yid mi dmigs pa dang / sdom pa dang / tshul khrims dang / bslab pa dang / sbyangs pa'i yon tan dang / yo byad bsnyungs pa yang dag par blang ba bstan pa yongs su dag par shes pa'o/ /tshig 'bru zhes bya ba ni gnod sems dang / tha ba dang / skyon dang / khro ba dang / khon du 'dzin pa dang / nga rgyal dang / rgyags pa dang / dregs pa thams cad yang dag par 'joms shing bzod pa'i stobs dang nges pa bstan pa'o/ /don zhes bya ba ni gang mi skye ba'i chos la bzod pa thob pa'o/ /tshig 'bru zhes bya ba ni gang dge ba'i rtsa ba thams cad yang dag par bsgrub pa la brtson 'grus brtsams par bstan pa'o/ /don zhes bya ba ni gang blang ba dang dor ba la mi gnas pa'i brtson 'grus so/ /tshig 'bru zhes bya ba ni gang bsam gtan dang / rnam par thar pa dang / ting nge 'dzin dang / snyoms par 'jug pa bstan pa'o/ /don zhes bya ba ni gang 'gog pa'i snyoms par 'jug pa shes pa'o/ /tshig 'bru zhes pa ni gang thos pa thams cad 'dzin pa shes rab kyi rtsa ba'o/ /don zhes bya ba ni gang brjod du med pa'i don shes pa'o/ /tshig 'bru zhes bya ba ni gang byang chub kyi phyogs kyi chos sum cu rtsa bdun yang dag par bstan pa'o/ /don zhes bya ba ni gang byang chub kyi phyogs kyi chos sgrub pa'i 'bras bu mngon sum du byed pa'o/ /tshig 'bru zhes bya ba ni gang sdug bsngal ba dang / kun 'byung ba dang / lam gyi bden pa yang dag par bstan pa'o/ /don zhes bya ba ni gang 'gog pa mngon sum du byed pa'o/ /tshig 'bru zhes bya ba ni gang ma rig pa la sogs pa rga shi'i bar du yang dag par bstan pa'o/ /don zhes bya ba ni gang ma rig pa 'gog pa nas rga shi 'gog pa'i bar du'o/ /tshig 'bru zhes bya ba ni gang zhi gnas dang lhag mthong gi tshogs bstan pa'o/ /don zhes bya ba ni gang rig pa dang rnam par grol ba'i ye shes so/ / tshig 'bru zhes bya ba ni gang 'dod chags dang / zhe sdang dang / gti mug dang / cha mnyam par spyod pa'i sems can rnams la bstan pa'o/ /don zhes bya ba ni gang sems rnam par grol ba mi 'khrugs pa'i ye shes so/ /tshig 'bru zhes bya ba ni gang sgrib pa dang sgrib par 'gyur ba'i chos yang dag par bstan pa'o/ /don zhes bya ba ni gang sgrib pa med pa'i ye shes dang rnam par thar pa'o/ /tshig 'bru zhes bya ba ni gang dkon mchog gsum gyi yon tan dang bsngags pa mtha' yas pa bstan pa'o/ /don zhes bya ba ni gang sangs rgyas kyi chos kyi sku mthong ba dang / 'dod chags dang bral zhing 'gog pa'i chos nyid dang / 'dus ma byas kyi sangs rgyas dang chos dang dge 'dun gyi yon tan sgrub pa'i ye shes so/ /tshig 'bru zhes bya ba ni gang sems dang po bskyed pa nas bzung ste/ byang chub snying po la 'dug gi bar gyi byang chub sems dpa'i yon tan gyi tshogs bstan pa'o/ /don zhes bya ba ni gang sems kyi skad cig gcig dang ldan pa'i shes rab kyis thams cad mkhyen pa'i ye shes mngon par rdzogs par 'tshang rgya ba ste/ mdor na gang chos kyi phung po brgyad khri bzhi stong bstan pa 'di ni tshig 'bru zhes bya'o/ /gang sems can thams cad kyi skad dang / yi ge dang / tshig 'bru brjod du med pa'i don te/ 'di ni don la rton gyi tshig 'bru la mi rton pa zhes bya'o/ /de ltar khong du chud par byas la don gyi rjes su 'brang bar bya'o/ /yi ge'i rjes su 'brang ba ni mi bya bas/ gsang sngags rgyal po drug ldan zhing / /zhes bya ba'i sgra la ni bsam par mi bya'o/ /gnas skabs kyis na rton pa lhag ma gsum gyi rang bzhin yang rnam par gzhag par bya ba'i phyir dri bar bya ste/ de la rnam par shes pa ni gang / ye shes ni gang zhe na/ rnam par shes pa zhes bya ba ni rnam par shes pa gnas pa bzhi ste/ bzhi gang zhe na/ 'di lta ste/ rnam par shes pa gnas pa na gzugs la nye bar 'gro zhing gnas pa dang / rnam par shes pa gnas pa na tshor ba la nye bar 'gro ba dang / 'du shes la nye bar 'gro ba dang / 'du byed la nye bar 'gro zhing gnas pa ste/ 'di ni rnam par shes pa zhes bya'o/ /de la ye shes gang zhe na/ gang phung po bzhi la gnas pa'i rnam par shes pa'i phung po yongs su shes pa ste/ 'di ni ye shes zhes bya'o/ /gzhan yang rnam par shes pa ni sa'i khams rnam par shes pa dang / chu'i khams dang / me'i khams dang / rlung gi khams rnam par shes pa ste/ 'di ni rnam par shes pa zhes bya'o/ /gang khams rnam pa bzhi po 'di dag la gnas ba'i rnam par shes pa la chos kyi dbyings dbyer med pa shes pa 'di ye shes zhes bya'o/ /gzhan yang rnam par shes pa ni gang mig gi rnam par shes par bya ba'i gzugs rnams la rnam par rig pa dang / de bzhin du rna bas shes par bya ba'i sgra rnams dang / snas shes par bya ba'i dri rnams dang / lces shes par bya ba'i ro rnams dang / lus kyis shes par bya ba'i reg bya rnams dang / yid kyis shes par bya ba'i chos rnams la rnam par rig pa ste/ 'di ni rnam par shes pa zhes bya'o/ /gang yang nang nye bar zhi zhing phyi rol du rgyu ba med pa dang / ye shes la rton pas chos gang la yang mi rtog rnam par mi rtog pa 'di ni ye shes zhes bya'o/ /gzhan yang dmigs pa las rnam par shes pa skye ba dang / yid la byed pa las rnam par shes pa skye ba dang / yongs su rtogs pa las rnam par shes pa skye ba 'di ni rnam par shes pa zhes bya'o/ /gang yang 'dzin pa med pa dang / mchog tu 'dzin pa med pa dang / dmigs pa med pa dang / rnam par rig pa med pa dang / rtog pa med pa 'di ni ye shes zhes bya'o/ /gzhan yang 'dus byas rgyu ba'i chos rnams la rnam par shes pa skye ste/ 'dus ma byas la ni rnam par shes pa rgyu ba med do/ /gang 'dus ma byas su shes pa de ni ye shes so/ /gzhan yang skye ba dang / 'jig pa la gnas pa ni rnam par shes pa'o/ /mi skye ba dang mi 'gog pa la gnas pa ni ye shes te/ 'di ni ye shes la rton gyi rnam par shes pa la mi rton pa zhes bya'o/ /de la nges pa'i don gyi mdo sde ni gang / drang pa'i don gyi mdo sde ni gang zhe na/ mdo sde gang dag lam la 'jug par bstan pa de dag ni drang ba'i don zhes bya ba'o/ /mdo sde gang dag 'bras bu la 'jug pa'i phyir bstan pa de dag ni nges pa'i don zhes bya'o/ /mdo sde gang dag kun rdzob sgrub par bstan pa de dag ni drang ba'i don zhes bya'o/ /mdo sde gang dag don dam pa bstan pa de dag ni nges pa'i don zhes bya'o/ /mdo sde gang dag las dang bya ba la 'jug par bstan pa de dag ni drang ba'i don zhes bya'o/ /mdo sde gang dag las dang nyon mongs pa zad par bya ba'i phyir bstan pa de dag ni nges pa'i don zhes bya'o/ /mdo sde gang dag kun nas nyon mongs pa bshad par bya ba'i phyir bstan pa de dag ni drang ba'i don zhes bya'o/ /mdo sde gang dag rnam par byang ba yongs su dag par bya ba'i phyir bstan pa de dag ni nges pa'i don zhes bya'o/ /mdo sde gang dag 'khor ba la yid 'byung bar bya bar bstan pa de dag ni drang ba'i don zhes bya'o/ /mdo sde gang dag 'khor ba dang mya ngan las 'das pa gnyis su med pa la 'jug par bstan pa de dag ni nges pa'i don zhes bya'o/ /mdo sde gang dag tshig dang yi ge sna tshogs su bstan pa de dag ni drang ba'i don zhes bya'o/ /mdo sde gang dag zab mo mthong bar dka' ba khong du chud par dka' ba bstan pa de dag ni nges pa'i don zhes bya'o/ /mdo sde gang dag tshig dang yi ge mang zhing sems can gyi sems dga' bar bya ba bstan pa de dag ni drang ba'i don zhes bya'o/ /mdo sde gang dag tshig dang yi ge nyung la sems nges par sems par byad par bstan pa de dag ni nges pa'i don zhes bya'o/ /mdo sde gang dag bdag dang / sems can dang / srog dang / gso ba dang / skyes bu dang / gang zag dang / shed las skyes dang / shed bu dang / byed pa po dang / tshor ba po dang / sgra rnam pa sna tshogs su bshad pa dang / bdag po med pa la bdag po dang bcas par bstan pa de dag ni drang ba'i don zhes bya'o/ /mdo sde gang dag stong pa nyid dang / mtshan ma med pa dang / smon pa med pa dang / mngon par 'du mi byed pa dang / ma skyes pa dang / ma byung ba dang / dngos po med pa dang / bdag med pa dang / sems can med pa dang / srog med pa dang / gang zag med pa dang / bdag po med pa dang / rnam par thar pa'i sgo'i bar du bstan pa de dag ni nges pa'i don zhes bya ste/ 'di ni nges pa'i don gyi mdo sde la rton gyi drang ba'i don gyi mdo sde la mi rton pa zhes bya'o/ /de la chos nyid ni gang / gang zag ni gang zhe na/ gang gang zag tu lta ba la gnas te/ gang chos kha cig la rtsom pa 'di ni gang zag ces bya'o/ /gang zag tu lta ba de'i rtsom pa yongs su shes pa 'di ni chos nyid ces bya'o/ /gzhan yang so so'i skye bo'i gang zag dang / so so'i skye bo'i dge ba'i gang zag dang dad pas rjes su 'brang ba'i gang zag dang / chos kyi rjes su 'brang ba'i gang zag dang / brgyad pa'i gang zag dang / rgyun du zhugs pa'i gang zag dang / lan cig phyir 'ong ba'i gang zag dang / phyir mi 'ong ba'i gang zag dang / dgra bcom pa'i gang zag dang / rang sangs rgyas kyi gang zag dang / byang chub sems dpa'i gang zag dang / gang zag gcig 'jig rten du byung na skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang mi'i skye bo phal po che'i don gyi phyir/ phan pa'i phyir/ bde ba'i phyir lha dang mi rnams kyi ston pa sangs rgyas bcom ldan 'das gang zag gcig po 'jig rten du byung ste/ de ni gang zag ces bya'o/ /gang zag gi sgra de dag thams cad ni de bzhin gshegs pas kun rdzob kyi tshig gi gnas kyi sems can rnams drang ba'i phyir bstan pa ste/ de la gang zag mngon par zhen pa de dag ni rton pa ma yin pa zhes bya ste/ de dag rton pa la gzung ba'i phyir bcom ldan 'das kyis kyang chos nyid la rton cig gang zag la ni ma yin no zhes gsungs so/ /de la chos nyid gang zhe na/ 'di lta ste/ 'gyur ba med pa dang / sgro btags pa med pa dang / bya ba med pa dang / rnam par bya ba med pa dang / mi gnas pa dang / rab tu mi gnas pa dang / rtsa ba med pa dang / thams cad du mnyam pa med pa dang / mnyam pa dag la mnyam pa dang / mi mnyam pa dag la mnyam pa dang / mnyam pa dang mi mnyam pa dag la mnyam pa dang / rtog pa med pa dang / rtsom pa med pa dang / chos thams cad la skyon med pa rnyed pa dang / shin tu nam mkha'i rang bzhin gyi mtshan nyid 'di ni chos nyid ces bya'o/ /de la gang dag chos nyid la rton pa dag ni khams gang la yang mi rton no/ /de bas na chos kyi sgo'i tshul la 'jug pa 'dis chos thams cad la rton pa'i phyir chos thams cad chos nyid kho nar 'gyur ba 'di ni chos nyid la rton gyi gang zag la mi rton pa zhes bya'o/ /gnyis su med par 'byung ba dang / /zhes bya ba la/ sngags kyi tshul gyis ni shes rab dang thabs ni gnyis so/ /de gcig tu gyur pa ni gnyis su med pa ste/ shes rab dang thabs gnyis su med pa bde ba chen po'i ngo bo nyid ni gnyis su med pa yin par 'dod de de las byung ba'o/ /pha rol tu phyin pa'i tshul gyis ni gzung ba dang 'dzin pa'am/ bdag dang bdag gi'am/ shes pa dang shes bya ste ji srid du yid rnam par g.yo ba de srid du ni thams cad gnyis so/ /g.yo ba thams cad dang bral zhing spros pa med pa chos thams cad bdag med pa ni gnyis su med pa'i ngo bo nyid chos nyid kyi bdag nyid can gyi sku 'byung ste/ de bas na gnyis su med par 'byung ba'o/ /gnyis su med par 'byung ba yang mi skye ba'i rnam pas khyad par du dbye ba'i phyir/ mi skye chos can zhes bya ba smos te/ skye ba med pa'i chos gang la yod pa de ni 'dir mi skye ba'i chos can no/ /'dir yang kun brtags pa'i ngo bo nyid kyis skye ba med pa ste/ kun brtags pa yang gzung ba dang 'dzin pa'i rnam pa yin la/ gzhan gyi dbang gi tshul gyis ni don dam par skye ba yod do zhes bye brag tu smra ba rnams dang / mdo sde pa dang / sems tsam pa rnams 'dod de/ don 'di la gtan tshigs ni/ kun brtags pa yi ngo bo yis/ /chos rnams thams cad skye ba med/ /gzhan gyi dbang la gnas na ni/ /mi rnams rnam rtog skye bar 'gyur/ /zhes zer ro/ /de ni mi rigs te/ gzhan gyi dbang las skye ba med par bshad pa mdo sde dag las snang ba'i phyir ro/ /de yang 'phags pa dgongs pa nges par 'grel pa'i mdo las mtshan nyid ngo bo nyid med pa nyid dang / skye ba ngo bo nyid med pa nyid dang / don dam pa ngo bo nyid med pa nyid la dgongs nas ngas chos thams cad dngos po med pa/ skye ba med pa/ 'gag pa med pa/ gzod ma nas zhi ba/ chos thams cad rang bzhin gyis yongs sa su mya ngan las 'das pa'o zhes gsungs so/ /chos thams cad kyi mtshan nyid ngo bo nyid med pa gang zhe na/ kun brtags pa'i mtshan nyid gang yin pa'o/ /de ci'i phyir zhe na/ 'di ltar de ni ming dang brdar rnam par gzhag pa'i mtshan nyid yin gyi/ rang gi mtshan nyid kyis phung po dang khams la sogs pa 'dus byas dang 'dus ma byas rnams kyi rang gi mtshan nyid dang spyi'i mtshan nyid rnam par gnas pa ni ma yin te/ de'i phyir de ni mtshan nyid med pa nyid ces bya'o/ /chos rnams kyi skye ba ngo bo nyid med pa gang zhe na/ chos rnams kyi gzhan gyi dbang gi mtshan nyid gang yin pa'o/ /de ci'i phyir zhe na/ 'di ltar de ni rkyen gzhan gyi stobs kyis 'byung ba yin gyi/ bdag nyid kyis ni ma yin te/ gang yang rang nyid med pa de ni skye ba med de/ skye ba med pa la ni ngo bo nyid med pas de'i phyir de ni skye ba ngo bo nyid med pa zhes bya'o/ /chos rnams kyi don dam pa ngo bo nyid med pa gang zhe na/ chos rnams kyi yongs su grub pa'i mtshan nyid de/ de yang don dam pa ngo bo nyid med pa nyid ces bya'o/ /de ci'i phyir zhe na/ chos rnams kyi chos bdag med pa gang yin pa de ni de dag gi ngo bo nyid med pa nyid ces bya ste/ de'i don dam pa ni chos rnams kyi ngo bo nyid med pa nyid kyis rab tu phye ba yin pas de'i phyir don dam pa'i ngo bo nyid med pa nyid ces bya'o/ /'di lta ste dper na nam mkha'i me tog ji lta ba de lta bur ni mtshan nyid ngo bo nyid med pa nyid blta bar bya'o/ /'di lta ste dper na sgyu ma byas pa ji lta ba de lta bur ni skye ba ngo bo nyid med pa nyid kyang blta bar bya'o/ /'di lta ste dper na nam mkha'i gzugs kyi ngo bo nyid med pa nyid tsam gyis rab tu phye ba dang thams cad du song ba ji lta ba de lta bur ni don dam pa ngo bo nyid med pa de las chos bdag med pas rab tu phye ba dang / thams cad du song ba gcig par blta bar bya ba ste/ ngo bo nyid med pa yang ngo bo nyid med pa rnam pa gsum po de dag la dgongs nas chos thams cad ngo bo nyid med pa'o zhes ngas bstan to zhes gsungs pa yin no/ /lung 'ba' zhig tu yang ma zad kyi rigs pas kyang ji ltar skye ba med pa de ltar bstan par bya ste/ dngos po rnams skye bar gyur pa na rang gi ngo bo nyid du gyur pa'i rgyu las sam/ gzhan par gyur pa'i rgyu las sam/ tha dad pa'am tha dad pa ma yin pa las sam/ rgyu dang bya ba la ltos pa med pa las skye bar 'gyur/ rgyu yod pa'am rgyu med par brtags pa dang du ma zhig gis bya ba'i dngos po gcig bskyed par 'gyur ba'am/ yang na dngos po du ma bskyed par 'gyur ba'am/ yang na gcig pu nyid kyi rang bzhin gcig bskyed par 'gyur ba'am/ yang na rang bzhin du ma skyes par 'gyur ba'am/ rgyu zhig pa las 'bras bu skye bar 'gyur ba'am/ ma zhig pa las 'bras bu skye bar 'gyur zhes bya ba ste/ de lta bu'i rnam par rtog pa du ma 'byung bar 'gyur la/ phyogs de dag thams cad kyang rang gi phyogs la mngon par zhen pa la mchog tu brtson pas bsgrubs pa'i brtags pa tsam la snying po nyid du sems par zad do/ /de yang rgyu'i rang bzhin du gyur pa'i 'bras bu ni rgyu dang 'dra bar byung ba nyid do/ /de bas na de las skye bar mi 'gyur te/ rgyu'i rang bzhin dang 'dra bar 'byung ba'i phyir skye ba mi gtsang bar 'dod pa'i 'bras bu bdag tu gyur pa ni gtso bo'i ming can gyi rgyu zhes bya ba de skye ba med pa'i phyir ri bong gi rwa la sogs pa ltar rgyu nyid dang mi ldan no/ /de yang / rang 'dra de ni gzhan min phyir/ /rgyu ni rgyu ma yin par 'gyur/ /ma skyes phyir yang gang gang gi/ /rgyu min pa ni rgyu ru 'gyur/ /zhes bshad pa yin no/ /gzhan zhes bya ba yang dngos po gnyis la ltos nas bshad pa yin la/ dngos po gnyis pa ni 'di na 'bras bu ste/ de yang rgyu yod pa'i dus na ni yod pa ma yin te/ de yod pa'i dus su yang rgyu yod pa ma yin no/ /de gang la ltos nas de dag la gzhan nyid du don dam par khas len te/ ba long gi rwa la ltos pa'am/ mi'i rwa la ltos nas rta'i rwa'i gzhan pa nyid du yang dag par yod pa ma yin no/ /mngon par 'dod pa'i rgyus kyang mngon par 'dod pa'i 'bras bu mi bskyed de/ gzhan du gyur pas mngon par 'dod pa'i don bzhin no/ /'bras bu 'dod pa yang gzhan du gyur pas 'dod pa ma yin te/ de ni gzhan bzhin no/ /de yang / rang gi ngo bo ma byung bar/ /gang zhig gang las gzhan du 'dod/ /ba lang rwa 'am mi rwa las/ /rta yi rwa gzhan 'dod ma yin/ /zhes bshad pa yin no/ /rkyen gzhan gyis kyang don dam par mig la sogs pas mig gi rnam par shes pa bskyed pa ma yin te/ gzhan du gyur pas bi ba ran la sogs pa bzhin no/ /mig la sogs pa'i rgyur rnam par grags pa rnams kyang mig la sogs pa'i rgyur mi 'dod de/ /gzhan du gyur pa'i phyir ram/ snga nas med pa'i phyir bum pa dang snam bu bzhin no/ /gnyis ka las skye ba mi rigs te/ tha dad pa dang tha dad pa ma yin pa'i ngo bo dag ni phan tshun 'gal bar gnas pa'i mtshan nyid dag gcig pu 'dres nas gnas par gyur pa mi srid do/ /de bas na 'di ltar brjod du med pa'i phyogs kyang mi rigs te/ ma brtags pa'i ngo bo nyid dang / tha dad pa dang tha dad pa ma yin par rtog pa las 'das pa ste/ gang de nyid ni 'di ma yin no zhes bya ba ni de da'i gzugs dor ste/ de nyid ni tha dad pa'o/ /de dgag pa ni tha dad pa ma yin pa ste/ dngos po rnams rnam pa gzhan gang zhig las 'byung bar 'gyur/ rgyu med pa las kyang skye ba mi rigs te/ rtag tu yod pa dang med par thal bar 'gyur ba'i phyir ro/ /de bas na/ bdag las ma yin gzhan las min/ /gnyi ga las min rgyu med min/ dngos po gang dag gang na yang / /skye ba nam yang yod ma yin/ /zhes bshad pa yin no/ /de la bdag las zhes bya ba ni grangs can no/ /gzhan las zhes bya ba ni sangs rgyas pa kha cig dang bye brag pa sogs pa'o/ /gnyi ga las zhes bya ba ni dpyod pa pa dang gcer bu pa'o/ /rgyu med par smra ba ni 'jig rten rgyang pan pa dang rang bzhin rgyur smra ba'o/ /da ni rgyu'i rang bzhin brtag par bya ste/ yod pa las kyang mi skye ste/ ngo bo nyid yongs su grub zin pa ma 'ongs pa'i dus bzhin du skye ba'i don du mi rigs so/ /gzhan du gal te yod par skye bar gyur na ni skyes zin pa yang skye bar 'gyur ro/ /med pa las kyang mi skye ste/ shin tu gzugs med pa ri bong gi rwa la sogs pa dang 'dra zhing / skye bar 'jug pa dang mi ldan pa'i phyir ro/ /gzhan du 'di dag thams cad med par 'gyur zhing gang gi phyir dngos po'i phyogs gang yang rung ba 'ga' zhig las kyang dngos po thams cad rtag tu skye bar 'gyur bas rgyu dang 'bras bu nges pa med par 'gyur ro/ /gal te so so'i nus pa nges pa med par 'gyur yang dngos po 'di rnams kyi nus pa so sor nges par 'gyur ba ni/ dngos po de rnams las cung zad cig skye bar 'gyur bas khyad par med kyang thams cad med pa ma yin no zhe na/ de ni mi rigs te/ gal te 'bras bu rnams dang 'dres pa'i gzugs rnams rkyen du gyur na ni de'i tshe de rnams kyi so sor nges pa'i 'bras bu dang 'brel par 'gyur bas 'bras bu gang zhig las nus pa nges pa yin te/ de ltar na nus pa nges pa nyid du gnas par 'gyur ro/ /de bas na thams cad las thams cad du skye bar thal bar 'gyur ba bzlog dka' bar 'gyur ba dang / yod pa dang med pa'i phyogs su smra ba'i nyes pa dang 'dres par 'gyur ro/ /tshul gnyi ga las kyang skye ba 'byung bar mi 'gyur te/ gcig la ngo bo nyid gnyis su 'gyur ba med de/ gcig pa nyid dang gnyis nyid ni phan tshun 'gal ba'i phyir ro/ /de yang / yod dam med pa'i don la yang / /rkyen ni rung ba ma yin te/ /yod na rkyen gyis ci zhig bya/ /med na gang gi rkyen du 'gyur/ /gang tshe chos ni yod pa dang / /med dang yod med mi sgrub pa/ /ji ltar sgrub byed rgyu yin zhes/ /de lta yin na mi rigs so/ /rkyen rnams so sor 'dus pa las/ /'bras bu de ni med pa nyid/ /rkyen rnams la ni gang med pa/ /de ni rkyen gyis ji ltar bskyed/ /ci ste de ni med par yang / /rkyen de dag las skye 'gyur na/ /rkyen min las kyang 'bras bu ni/ /ci yi phyir na skye mi 'gyur/ /zhes bshad pa yin no/ /rgyu rnams kyang gal te mang pos 'bras bu'i rang bzhin gcig bskyed par 'gyur ram/ de lta ma yin gyi lhan cig byed ba'i grogs tha dad pa'i rang bzhin rnams las 'bras bu gcig bskyed pa'i rgyur 'gyur te/ bye brag rnams bye brag med par 'gyur ro/ /de la bye brag med pa rnams kyang bye brag med par mi 'gyur te/ rgyu'i dbye ba yang bye brag med pa'i phyir ro/ /gal te bye brag can las bye brag can nyid du 'gyur na ni/ bye brag med pa las kyang bye brag med pa nyid du rigs te/ rnam par brtags pa'i nges pa la sogs pa yang rgyu nyid ma yin te/ rgyu med pa can dang / sna tshogs pa'i bye brag can dang bye brag med par 'gyur te/ de las ma gtogs pa'i dngos po 'ga' yang mi srid de/ dngos po thams cad kyang gzhan gyi dbang las mi skye ba nyid du thal bar 'gyur ro/ /rgyu'i rang bzhin tha dad pa las 'bras bu'i rang bzhin tha dad pa kun du skye bar 'dod na ni rgyu dang bya bas rnam par bsgrubs pa rnams 'tshol bar 'gyur bas rgyu'i rang bzhin gyi khyad par rnams ji ltar yul dang dbang po dang yid la byed pa'i stobs las byung ba'i rnam par shes pa yang yul las de mi 'byung zhing / dbang po las kyang ma yin la/ yid la byed pa las kyang ma yin te/ / dbang po las yul la 'dzin pa so sor nges par 'gyur gyi gzhan las ni ma yin no/ /de bzhin du yid la byed pa de nyid las khong du chud par 'gyur gyi/ tshul gzhan las ni ma yin no/ /rgyu dang bya ba dang yul sna tshogs nyid kyang 'bras bu'i rang bzhin gyi dbye ba'i rnam par dbye ba med pa'i tshul nyid las dmigs par mi 'gyur ro/ /de ni 'dir thub rgyal gyi gzhung la brten pa dang 'dra bar khas lan pa ste/ ji ltar dngos po 'ga' zhig gi 'bras bu'i khyad par dag kyang de dang tha mi dad pa nyid sna tshogs par mi 'gyur te/ sna tshogs pa dang gcig pa nyid ni phan tshun 'gal ba nyid yin no/ /yul rnams su snang ba la sogs pa yang rnam par shes pa dang tha mi dad pa can du yul ji lta ba rnams kyis byed do/ /de bzhin du de dang tha mi dad pa'i khong du chud pa'i tshul la sogs pa dang / yid la byed pa la sogs pa rnams kyis kyang sna tshogs pa nyid las ldog bar 'gyur la/ de bas na nyes pa 'dir mi 'gyur bar khyad par gyi 'bras bu las tha dad pa nyid du 'dod do/ /de lta na yang rgyu dang bya ba las de rnams nyid dang nye bar ldan pas na 'bras bu de rgyu med par snang bar 'gyur ro/ /bya ba tha dad nyid min yang / /bye brag dag ni gnyis su 'dod/ /dbye ba gzhan yin de yi phyir/ /khyod kyi dbang phyug gis sprul gang / /shes pa'i tshul las gzhan min pas/ /de yi gzugs las byung ma yin/ /de dang 'dra ba gzhan min pas/ /gzugs kyang 'dir ni byung ba min/ /gang gis 'byung dang mi 'byung ba/ /de bzhin skye bo skyed po min/ /gcig tu gyur pa 'gal med pa/ /cig car du ni de nyid smos/ /gal te 'di dag gzhan ma yin/ /rnam par dbye ba gang gis byas/ /smras pa'i nyes par thal 'gyur bas/ /glang po'i khrus dang 'dra bar 'gyur/ /gal te rgyu'i dngos po gcig 'bras bu gcig bskyed par 'dod na/ /de lta na ni 'on pa dang long ba la sogs par thal bar 'gyur/ mig la sogs pa dang lhan cig 'byung ba'i skad cig phyi mas bskyed pa'i rnam par shes pa mi 'byung ngo / /rnam par shes pas bskyed pa nyid yin na ni rang gi cha skad cig ma phyi ma dang ma phrad pas skad cig ma gnyis pa la mig la sogs pa med pa'i phyir long ba la sogs pa de nyid du thal ba ni bzlog par dka'o/ /de bas na bya ba dang byed pa po dang dbang phyug la sogs pa du ma'am rgyu gcig pur smra ba'i tshad ma thams cad kyang bcom pa yin no/ /tshogs pa las ni 'bras bu rnams rim gyis 'byung bar ston pas 'bras bu yang gal te rgyu 'jig pa las byung na ni de ni 'dir rgyu med pa nyid du thal bar 'gyur te/ nam mkha'i pad+mar rtog pa rgyu nyid du 'gyur pa mi srid pa'i phyir ro/ /gzhan du ma zhig pa las skye bar 'gyur ro zhe na/ de lta na yang rgyu dang 'bras bu dus gcig pa nyid du 'gyur te/ de yang ba lang gi rwa g.yas g.yon rgyu dang 'bras bur 'dod pa ni mi rigs te/ snga na med pa'i nus pa dang nus pa med pa'i 'bras bu 'byung ba dang / rgyu dang 'bras bu lhan cig 'byung ba ni 'gal bar gsal ba yin pa'i phyir ro/ /yang na skyes pa'i 'og tu 'bras bu dang dus mnyam pa nyid du 'dod do zhe na/ lhan cig pa nyid 'gal bar brjod do/ /de lta na yang skye ba'i 'og tu tshogs par 'gyur ba dang 'gal bar 'gyur te/ shin tu 'bras bu bskyed par byung ba mi rigs so/ /yang na rgyu 'jig pa'i dus su 'bras bu 'byung ba 'di la nyes pa med do zhe na/ ting nge 'dzin du brtags pa tsam du gnas par zad do/ /de lta na yang brjod par bya ste/ 'di rgyu gang zhig 'jig par 'gyur/ ci rgyu'i rang bzhin nyid dam/ yang na dngos po rnams skad cig mar gnas pa'i chos can rnam par 'jig gam/ yang na rgyu 'gags nas sam/ gal te rgyu'i rang bzhin nyid yin na ni de nyid rgyu dang 'bras bu lhan cig par thal bar 'gyur ro/ /yang na rgyu zhig na de yang gang las 'bras bu dang dus mnyam par 'gyur/ dngos po med pa ni nam yang 'ga' zhig tu skye bar 'gyur ba med de/ nam yang 'ga' zhig tu 'byung na ni rgyu dang bcas pa nyid de/ rnam par shes pa dngos por 'gyur ba bzhin no/ /yang smras pa/ rgyu zhig pa las kyang 'bras bu 'byung bar mi rigs la/ ma zhig pa las kyang mi rigs te/ dngos po skye ba rnams ni rmi lam dang 'dra bar 'dod do/ /ma zhig pa las 'bras bu skye na ni de'i tshe 'bras bu ci yang med do/ /yang na zhig pas 'bras bu skye na ni de'i tshe 'bras bu gang zhig las 'byung / de bas na dngos po skyes pa rnams la ji lta ji ltar rnam par brtags pa de lta de ltar rigs pa brtag mi bzod do/ /de bas na tshad ma dang 'gal bar ma gyur par bya'o/ /de lta mod kyi de'i nges pa'i thabs gang zhig yod de/ gang gi phyir mngon sum dang rjes su dpag pas bsgrubs nas rgyu dang 'bras bu'i dngos por brjod par bya'o zhe na/ mngon sum dang rjes su dpag pa yang rnam pa dang bcas pa dang / rnam pa med pa dag bsdus pa nyid du 'dzin par byed pa ni mi rigs te/ yul du byas pa'i snang ba dang bral na don du 'dzin pa'i dngos po med pas 'dis 'di shes so zhes gzhag pa mi rigs so/ /rnam pa'i don ni med pa las yang rmi lam la sogs pa'i rkyen rnams la dngos por gyur pas khyab pa med de/ nam mkha' la bris pa'i ri mo dang gcig pa nyid du gyur pa ste/ rnam par shes pa med par mtshungs pa nyid pas mi rigs so/ /yang smras pa/ rnam pa med pa yang mi rigs te/ shes pa'i yul 'dzin pa ni rnam pa'i tshad med pas cig shos kyang rigs pa ma yin no/ /de ltar na shes pas mngon sum dang rjes su dpag pa nyid du rgyu dang 'bras bu nyid du grub par thabs gzhan rnam par dpyad pa yang de lta ma yin no/ /des na thams cad mkhyen pas rgyu dang 'bras bu gsal bar gsungs shing gzhan gyi dbang gis skad cig ma ma gtogs par cung zad kyang shes par mi nus so/ /de ltar shin tu mkhas pa'i tshad mar smra bas skye ba rnams skye ba med pa nyid du byas shing rnyog pa'i nyes pa thams cad dang bral ba nyid ni de bzhin gshegs pa yin no/ /de ci'i phyir 'di skad du/ de bzhin gshegs pa rtag tu skye med chos/ /chos rnams thams cad bde bar gshegs dang 'dra/ /byis pa'i blo can mtshan mar 'dzin pa rnams/ /'jig rten dag na med pa'i chos la spyod/ /ces gsungs pa yin no/ /de ltar mi skye ba'i chos can gyi tshigs su bcad pa thugs la nye bar gzhag pa 'di gsungs so zhes bya bar sbyar ro/ /shes rab kyi 'khor lo bsgom pa la goms pa las shes rab phul du byung bar 'gyur ba so so'i skye bo rnams la'ang skye bar 'gyur zhing / de bzhin du sangs rgyas kyi chos rnams mngon par rtogs shing dri ma med pa'i shes bya'i dkyil 'khor ma lus par khong du chud pa las thams cad mkhyen pa'i ye shes mngon sum du byed par skye bar 'gyur ba'i shes rab kyi 'khor lo bsgom pa'i rim pa nye bar bstan par bya ba'i phyir/ a A zhes bya ba la sogs pa'i tshigs su bcad pa gnyis gsungs pa yin no/ /dris pa tshigs su bcad pa dag gsungs so zhes bya bar rigs na/ tshigs su bcad pa zhes tshig gcig par ci'i phyir smos she na/ smras pa/ sngags nye bar mtshon pa ni gtso bor 'gyur ba yin la/ dbyangs kyi yi ge nye bar mtshon pa yang de nyid yan lag tu 'gyur ba yin te/ gtso bor gzung ba nyid kyis yon tan du gyur pa gzung ba bar du chod pa ma yin pas tshig gcig par gsungs pa la 'gal ba med do/ /gzhan yang ci'i phyir dbyangs kyi yi ge bcu gnyis kho na gsungs she na/ sa dang pha rol tu phyin pa'i nges ba bstan pa'i phyir te/ sngags kyi tshul chen po las bcu gnyis dang / pha rol tu phyin pa bcu gnyis su nges par gsungs te/ yi ge a ni skye ba med pa'i don dam pa byang chub kyi sems kyi ngo bo nyid de mos pa spyod pa'i sa rab tu ston par byed pa la byang chub kyi sems rnam par dag pa rab tu ston pas rin chen pad+ma'i pha rol tu phyin pa ston pa yang yin no/ /yi ge a ni rab tu dga' ba'i sa ston pa dang / sbyin pa'i pha rol tu phyin pa ston pa yin te/ byang chub spyod dang sangs rgyas nyid/ /mya ngan 'das dang 'das ma yin/ /zhes gsungs pas rang dgar brtags pa ni ma yin pas a ni byang chub kyi sems so/ /A ni sbyin pa la sogs pa pha rol tu phyin pa'i spyod pa rnams so/ /byang chub sems dpa'i sa dri ma med pa la ni tshul khrims kyi pha rol tu phyin pa la lhag par spyod pa yin pas na i ste/ rtog pa ngan pa dang bral ba'i phyir ro/ /'od byed pa'i sa la bzod pa'i pha rol tu phyin pa lhag par spyod pa yin te/ sdug bsngal gyi gnas dang gzhan gyis gnod pa byas pa las byung la chos la dmigs pa'i bzod pa dang ldan par 'gyur bas I ste/ 'di ni yan lag dang nying lag bcad par gyur kyang 'khrug pa med par bstan pa'i phyir ro/ /'od 'phro ba la ni brtson 'grus kyi pha rol tu phyin pa la lhag par spyod pa yin te/ lus dang ngag dang yid kyi brtson 'grus dang ldan pas u ste/ dge ba'i las rnams la kun du spro ba'i brtson 'grus dang ldan par bstan pa'i phyir ro/ /sbyang dka' ba la ni bsam gtan gyi pha rol tu phyin pa la lhag par spyod pa yin pas U ste/ ma tshang ba dang lhag chad med pas shin tu lhag par gyur par bstan pa'i phyir ro/ /mngon du gyur pa la ni shes rab kyi pha rol tu phyin pa la lhag par spyod pa yin pas e ste/ 'di lta bu'i ngo bo nyid de gzod ma nas zhi ba'o zhes rtogs par 'gyur bar bstan pa'i phyir ro/ /ring du song ba la ni thabs kyi pha rol tu phyin pa la spyod pa yin pas ai ste/ rtsol ba rnams las gcig tu rtsol ba med par rnam par mi rtog pa la 'jug par 'gyur bar bstan pa'i phyir ro/ /mi g.yo ba la ni smon lam gyi pha rol tu phyin pa la lhag par spyod pa yin pas oM ste/ rnam par rtog pa'i chu bo las brgal ba nyid du gyur par bstan pa'i phyir ro/ /legs pa'i blo gros la ni stobs kyi pha rol tu phyin pa la lhag par spyod pa yin pas au ste/ dpe las shin tu 'das pa'i chos chen po'i mdzod 'dzin par gyur pa nyid bstan pa'i phyir ro/ /chos kyi sprin la ni ye shes kyi pha rol tu phyin pa lhag par spyod pa yin pas aM ste/ byang chub sems dpa'i sa'i mthar gyur pa nyid kyis mngon par byang chub par 'gyur ba bstan pa'i phyir ro/ /sangs rgyas kyis kun du 'od la ni rnam pa thams cad mkhyen pa ye shes kyi snang ba mi g.yo zhing mi 'jigs pa rdo rje'i las kyi pha rol tu phyin pa dang / gnyis su med pa'i de bzhin nyid kyi bdag nyid can de bzhin gshegs pa'i ngo bo nyid du bstan pa'i phyir yi ge aH'o/ /de ltar sa bcu gnyis dang pha rol tu phyin pa bcu gnyis ston pa'i yi ge bcu gnyis ni 'khor lo'i phyi'i mu khyud la blta bar bya'o/ /badzra tIk+Sh+Na zhes bya ba la sogs pa'i sngags drug ni shar phyogs la sogs pa'i rtsibs drug la dgod par bya'o/ /mu khyud kyi nang gi lte ba la ni oM mu oM zhes bya'o/ /thams cad kyi phyi rol du ka la sogs pa nas k+Sha'i bar du bri bar bya ste/ thams cad kyang kha dog dkar po snying ga'i zla ba'i dkyil 'khor gyi steng du lus thams cad snang bar byed par bsam par bya ste/ de lta bu ni re zhig rtsibs drug pa'i 'khor lo gcig yin no/ /'khor lo rtsibs bcu gnyis pa'i dbus su ni yi ge oM/ mdun du yi ge hUM/ rgyab tu yi ge hrI/ g.yas su oM/ g.yon du AH/ shar gyi rtsibs la/ oM badzra tI k+Sh+NA ya nA ma/ bskor phyogs su bya ste/ oM duHkha ts+tshe dA ya nA ma/ gnyis ba la oM pra dz+nyA dz+nyAnA ya nA ma/ gsum pa la oM dz+nyA na kA yA ya nA ma/ bzhi pa la oM bA gI shwa rA ya nA ma/ lnga pa la oM a ra pa tsa nA ya nA ma/ drug pa la oM bar da badzra a grA ya nA ma/ bdun pa la oM shUn+ya tA gar+b+hA ya nA ma/ brgyad pa la oM ga ga not+tha bA ya nA ma/ dgu pa la oM dz+nyA na saM b+hU bA ya nA ma/ bcu pa la oM bud+d+ha saM b+ha bA ya nA ma/ bcu gcig pa la oM d+ha rma d+hA tu bA gI shwa ra ya nA ma/ phyi rol gyi mu khyud la ni dbyangs kyi yi ge bcu gnyis so/ /de las kyang phyi rol du ni ka nas k+Sha'i mthar thug pa ste/ de bzhin gshegs pa lnga'i snying po can sa bcu gnyis dang / pha rol du phyin pa bcu gnyis dang / rten cing 'brel par 'byung ba yan lag bcu gnyis te/ sangs rgyas thams cad kyi yon tan bsags pa rnam pa thams cad mkhyen pa'i ye shes kyi ngo bo nyid kyi dkyil 'khor snying ga'i zla ba'i dkyil 'khor gyi steng du rnam par bsams la/ de'i steng du dgod pa'i yi ge'i tshogs rnams las 'od zer sngon po dang dmar po la sogs pa 'byung bas rang gi lus snang bar byas te/ phyi rol du byung bas mtha' yas pa'i nam mkha'i khongs na gnas pa'i rgyu ba dang mi rgyu ba'i dngos po ma lus pa rnams rab tu snang bar byas la bltas la/ shes bya'i dkyil 'khor ma lus pa me long lta bur shin tu 'od gsal bar bdag nyid bsgoms na myur ba nyid du thams cad mkhyen pa nyid thob par 'gyur ro/ /de ltar snying gar gnas pa'i ye shes kyi gzugs ni bdag nyid sangs rgyas te/ dus gsum du bzhugs pa'i sangs rgyas rnams ye shes kyi snang ba'i ngo bo nyid kyi chos thams cad khong du chud pas rang gi snying gar gnas so zhes bya ba'i don to/ /'khor lo rtsibs brgyad pa'i dbus su yi ge oM/ shar la sogs pa'i phyogs rnams su ni badzra tI k+Sh+Na/ me la sogs pa'i mtshams rnams su ni bA gI shwar/ phyi'i mu khyud la yi ge dgod pa ni thams cad du 'dra ba yin no/ /'khor lo gnyis pa'i dbus su yi ge khaM/ shar la sogs pa'i phyogs rnams su ni duHkha ts+tshe da/ me la sogs pa'i mtshams rnams su mahA wA tsa/ 'khor lo gsum pa'i dbus su ni d+hIH/ shar la sogs pa'i phyogs rnams su pradz+nyA dz+nyA na/ me la sogs pa'i mtshams rnams su a nan+ta gI'o/ /bzhi pa'i dbus su oM/ /shar la sogs pa'i phyogs rnams su dz+nyA na kA ya/ mtshams rnams su ma hA bA d+hI/ lnga pa'i dbus su aH/ phyogs rnams su bA gI shwa ra'o/ /mtshams rnams su ma d+hI siM ha'o/ /drug pa'i dbus su ni yi ge a/ phyogs rnams su ra pa tsa na/ mtshams su badzra pA Ni ste/ 'khor lo drug po de dag tu yi ge'i khyad par gang dag yod pa de dag thams cad du ni kha dog dkar po ste/ shes rab lhag par bskyed par khong du chud par bya'o/ /gzhan yang man ngag las brgyud pa'i 'khor lo mang du yod mod kyi/ de dag ni gzhung mangs su dogs pas ma bris so/ /da ni mtshan gyi ngo bo bshad par bya ba'i phyir gling slong bar mdzad de gsungs pa ni 'di ltar zhes bya ba ste/ 'di ltar zhes bya ba'i sgra ni bsdus pa nyid kyis dpe rab tu bstan pa'i phyir te/ don 'di ni 'di yin no zhes pa'o/ /yang sngar smras pa'i gsol ba btab pas mtshon pa de ji ltar gnas pa bzhin du bshad do zhes pa'i khyad par ro/ /sangs rgyas zhes bya ba ni phul du byung ba'i thugs kyis sangs rgyas pa mnga' ba'i phyir sangs rgyas so/ /yang sangs rgyas ni nyan thos dang / rang sangs rgyas dang / byang chub sems dpa' dang / tshangs pa dang / khyab 'jug dang / dbang phyug chen po dang / lha dang / klu la sogs pa thams cad mkhyen pa nyes pa thams cad dang bral ba yon tan thams cad kyi 'byung gnas so zhes khong du chud cing shes pas na las kyi mthar thug pa ste/ de lta na yang nyes pa med do/ /sangs rgyas de yang rnam pa bcu ste/ gang zhe na/ rgyu mthun pa'i sangs rgyas dang / rnam par smin pa las byung ba'i sangs rgyas dang / ting nge 'dzin gyi sangs rgyas dang / smon lam gyi sangs rgyas dang / sems kyi sangs rgyas dang / ngo bo nyid kyi sangs rgyas dang / longs spyod rdzogs pa'i sangs rgyas dang / sprul pa'i sangs rgyas dang / btags pa'i sangs rgyas dang / mdun du gzhag pa'i sangs rgyas so/ /de la rgyu mthun pa'i sangs rgyas gang zhe na/ gang pha rol tu phyin pa rnams kyi rgyu mthun pa dang / pha rol tu phyin pa'i chos sgrub par byed pa yin te/ de gnyis gang grub pa de ni bsgrubs pa'i sangs rgyas te/ de'i phyir rgyu mthun pa'i sangs rgyas zhes bya'o/ /de la rnam par smin pa las byung ba'i sangs rgyas gang zhe na/ rgyu mthun pa gang pha rol tu phyin pa rnams kyi rnam par smin pa yin te/ rnam par smin pa de las gang rnam par smin pa'i sangs rgyas kyi gzugs su 'byung ba'o/ /de yang sangs rgyas kyi byin gyi rlabs dang / chos kyi byin gyi rlabs kyi phyir 'byung ste/ 'di ni rnam par smin pa las byung ba'i sangs rgyas zhes bya'o/ /de la ting nge 'dzin gyi sangs rgyas gang zhe na/ de bzhin gshegs pa'i ting nge 'dzin gang la snyoms par 'jug cing / ting nge 'dzin gang la snyoms par zhugs nas lhun gyis grub cing rtsol ba mi mnga' bar sangs rgyas brgya stong 'byung ste/ ting nge 'dzin gyi byin gyi rlabs des ting nge 'dzin las byung bas na ting nge 'dzin gyi sangs rgyas zhes bya ste/ 'di ni ting nge 'dzin gyi sangs rgyas zhes bya'o/ /de la smon lam gyi sangs rgyas gang zhe na/ byang chub sems dpa' sems can gang dang gang gzugs dang / kha dog dang spyod lam ji lta ji lta bur gang dang gang gis 'dul bar 'gyur pa de dang de la de lta bu'i gzugs dang kha dog dang spyod lam gyis 'dul bar gyur cig ces smon lam btab na de sangs rgyas kyis 'dul ba rnams ni sangs rgyas kyi gzugs kyis 'dul te/ smon lam de las byung bas smon lam gyis sangs rgyas zhes bya ste/ 'di ni smon lam gyi sangs rgyas zhes bya'o/ /de la sems kyi sangs rgyas gang zhe na/ gang byang chub sems dpa' sems la dbang rab tu thob nas da sems la dbang ba des gang dang gang bsams pa de bzhin du 'gyur te/ de sangs rgyas kyis 'dul ba'i sems can rnams mthong nas bdag sangs rgyas kyi gzugs su gyur cig ces mos par byed de/ sems las byung bas na sems kyi sangs rgyas yin te/ 'dul ba de dag kyang rang gi sems yongs su dag pas sangs rgyas mthong zhing shes te/ 'di ni sems kyi sangs rgyas zhes bya'o/ /de la ngo bo nyid kyi sangs rgyas gang zhe na/ ngo bo nyid kyi sangs rgyas ni gnas ngan len gyi gnas gyur pa bsam gyis mi khyab pa dri ma med pa gzugs sna tshogs can chos kyi dbyings rnam pa tha dad pa dang / gzugs dang / bya ba dang / dbyibs sna tshogs pa skyes bu chen po'i mtshan sum cu rtsa gnyis dang ldan pa'i sangs rgyas gzugs su snang ba 'di ni ngo bo nyid kyi sangs rgyas zhes bya'o/ /de la longs spyod rdzogs pa'i sangs rgyas gang zhe na/ gang byang chub sems dpa' rnams dang / longs spyod dang kun spyod pa mtshungs pa dang / rnam pa dang / zas dang / smra ba dang / cho ga dang / spyod pa mtshungs pa 'di ni longs spyod rdzogs pa'i sangs rgyas zhes bya'o/ /de la sprul pa'i sangs rgyas gang zhe na/ 'di la sangs rgyas dang byang chub sems dpa' gzugs thams cad ston pa'i ting nge 'dzin thob pa de dag ting nge 'dzin de la snyoms par zhugs te/ dbang thob cing snying rje chen po bskul nas sangs rgyas kyi gzugs su sprul nas sems can rnams 'dul ba 'di ni sprul pa'i sangs rgyas zhes bya'o/ /de la btags pa'i sangs rgyas gang zhe na/ 'di la la la zhig slob dpon nam mkhan po la sangs rgyas bzhin du blta sangs rgyas bzhin du bsnyen bkur byed de/ de la slob dpon dang mkhan po la sangs rgyas bzhin du blta zhing sangs rgyas bzhin du bsnyen bkur byas pas de sangs rgyas kyi chos rnams rab tu 'dzin la yongs su rdzogs par byed de/ yongs su sgrub pa 'di ni btags pa'i sangs rgyas zhes bya'o/ /de la mdun du gzhag pa'i sangs rgyas gang zhe na/ 'di la gang la la zhig sangs rgyas kyi gzugs byas sam byed du bcug ste/ mchod cing rim gro bya ba thams cad kyis bsti stang du byed/ bla mar byed/ ri mor byed cing de sangs rgyas kyi chos rnams rab tu 'dzin la yongs su rdzogs par byed de/ yongs su sgrub pa 'di ni mdun du gzhag pa'i sangs rgyas zhes bya ste/ de ltar na byang chub sems dpa' chos kyi tshul la 'jug pa bcu po de dag gis sangs rgyas khong du chud par bya'o zhes chos yang dag par sdud pa'i mdo las gsungs te/ de dag kyang blo dman pa rnams kyis legs par rtogs par bya ba'i phyir bris pa yin no/ /bcom ldan 'das ni/ dbang phyug dang ni gzugs bzang dang / /dpal dang grags dang ye shes dang / /brtson 'grus phun sum tshogs pa ste/ drug po de la ldan zhes bya/ /de dag ma lus la 'jug pa/ / ji ltar rgyal ba ston mdzad pa/ /de 'dra gzhan la yod min pas/ /des na bcom ldan 'das zhes bya/ /zhes bya ba'am/ yang na bdud bzhi bcom pas na nges pa'i tshig gi tshul gyis yi ge bAn gyis na bcom ldan 'das zhes zer ro/ /chos thams cad las phyin ci ma la logs par mngon par byang chub pas na rdzogs pa'i sangs rgyas so/ /a las byung ba ni a ni gzod ma nas ma skyes pa'i phyir chos thams cad skye ba med pa'i sgo ste/ de ltar na chos thams cad skye ba med par bsgoms pa las byung bas so/ /yang na byang chub kyi sems kyi ngo bo nyid a yongs su gyur pa las zla ba'i rnam par sems so sor rtog pa la sogs pa'i rim pa las grub pas na a las byung ba zhes bshad do/ /'o na yi ge dpag tu med pa yod pa las ci'i phyir a nyid las byung ba zhes pa'i rtog pa bzlog pa'i phyir/ a ni yig 'bru kun gyi mchog/ /don chen yi ge dam pa yin/ /zhes bya ba gsungs so/ /de yang mi 'gyur ba'i phyir yi ge ste chos kyi sku'o/ /de'i ngo bo nyid ni a ste yi ge'o/ /de nyid kyi phyir don chen te/ gang la don chen po yod pa de la de skad ces bya ste/ de bas na yi ge thams cad kyi mchog ni yi ge a yin no/ /yang na yi ge a ni yi ge thams cad kyi dang por gnas pas na kun gyi mchog go/ /rnam pa gzhan du na a ni mi bskyod pa dang / 'od dpag tu med pa'i ngo bo nyid du gyur pa'i phyir ro/ /don yod par grub pa'i ngo bo nyid du gyur pas na kun gyi mchog ste/ rigs thams cad kyi mchog tu gyur pas na sna tshogs pa'i gzugs can yin pa'i phyir ro/ /don 'byung ba'i ngo bo nyid rin chen 'byung ldan gyi ngo bo nyid yin pas na don chen no/ /rnam par snang mdzad kyi bdag nyid can yin pas na yi ge dam pa'o/ /de ltar yi ge rnams sbyar ba byas pa la don med pa yin nam 'on te dgos pa yod pa yin zhe na/ don med pa ma yin te/ ci'i phyir zhe na/ mtshan nyid don gyi re re nas bsgom par bya'o zhes gsungs pa'i phyir te/ mtshan rnams yang dag par bsdus pa ni mtshan yang dag par brjod pa yin la/ de yang mtshan rnams don dang bcas pas sangs rgyas nyid thob par 'gyur ba yin te/ sangs rgyas rnams kyi yon tan la dmigs pa'i phyir yi ge rnams nges par sbyar ba yang don dang ldan par byas pa yin no/ / khong nas 'byung ba skye ba med/ /tshig tu brjod pa spangs pa ste/ /brjod pa kun gyi rgyu yi mchog /tshig kun rab tu gsal bar byed/ /ces bya ba la 'bad pa chen pos brjod pa na khong nas byung ba ste yi ge a'o/ /chos thams cad gzod ma nas ma skyes pa'o zhes ston pas na skye ba med pa'o/ /rang nyid skye ba med pa'i ngo bo nyid du gyur pas na tshig tu brjod pa spangs pa'o/ /'o na ji ltar na de bsgoms pa'i stobs kyis gsung gi 'khor lo rdzogs par 'gyur zhes rtog pa la/ brjod pa kun gyi rgyu yi mchog /tshig kun rab tu gsal bar byed/ /ces gsungs te/ 'dis don rnams brjod par 'gyur bas na brjod pa ste sgra rnams so/ /brjod pa yang yin la kun yang yin pas na brjod pa kun te/ de rnams rgyur gyur pa gang yin pa de ni brjod pa kun gyi rgyu ste/ de rnams kyi mchog dang gtso bo 'jam dpal gyi ye shes skyed par byed de/ de bas na ngag thams cad la 'jug par byed pa yin no/ /ngag thams cad kyi don ma lus par ston pas na rab tu gsal bar byed pa'o/ /des ni 'di skad ston par 'gyur te/ yi ge a ni ma skyes pa'i rnam pas sangs rgyas thams cad kyi yon tan rnams kyi gnas byang chub kyi sems sngon du 'gro ba rnam par mi rtog pa'i ye shes kyi ngo bo nyid 'jam dpal gyi rang bzhin bskyed pas na chos kyi 'khor lo skor bar byed cing / tshig thams cad rab tu gsal bar byed pa'i gsung gi 'khor lo'i rgyur gyur pa'i phyir brjod pa thams cad kyi rgyu'i mchog yin no/ /rnam pa gzhan du na gnyis su med pa'i ngo bo nyid longs spyod rdzogs pa'i sku'i tshul gyis gnyis su rnam par rtog pa'i nye bar dmigs pa'i thog ma med pa'i stobs 'jig par mdzad pas na khong nas 'byung ba'o/ /chos kyi sku'i bdag nyid can gyi de bzhin gshegs pa rnams kyi ngo bo nyid yin pas na skye ba med pa'o/ /so sor rang gi rig pa'i mchog tu dga' ba gnyis su med pa'i bde ba chen po'i ngo bo nyid yin pas na tshig tu brjod pa spangs pa'o/ /de ltar rang gi don phun sum tshogs pa lhun gyis grub nas chos ston pa'i sgra sna tshogs pas gdul bya'i sems can rnams gdul bar bya ba'i phyir dam pa'i chos rnams ston par mdzad pas na brjod pa kun gyi rgyu'i mchog go/ /yid bzhin gyi nor bu ltar sems can ma lus pa'i mngon par 'dod pa'i tshig rnams bskyed pa'i rgyur gyur pas na tshig kun no/ /sprul pa'i 'od zer gyis sems can ma lus pa'i rgyud la yod pa'i ma rig pa'i mun nag sel bar mdzad pas na rab tu gsal bar byed ces bya'o/ /'dod chags la sogs pa'i tshul gyis phul du byung ba nyid du bsten par bya ba'i phyir/ mchod pa chen po 'dod chags che/ /sems can thams cad dga' bar byed/ /mchod pa chen po zhe sdang che/ /nyon mongs kun gyi dgra che ba/ /mchod pa chen po gti mug che/ /gti mug blo ste gti mug sel/ /mchod pa chen po khro ba che/ /khro bo chen po dgra che ba/ /mchod pa chen po chags pa che/ /chags pa thams cad sel bar byed/ /ces bya ba gsungs te/ de yang 'dod chags che ba ni lha chen po yin te/ des lha'i lo stong gi bar du 'khrig pa chen po spyad kyang cung zad tsam ngoms par ma byas te/ u ma gcig pu yang tshim par ma gyur to/ /de ci'i phyir zhe na/ rgyun mi 'chad cing phul du byung ba'i dga' ba skyed pa'i de kho na nyid ma shes pa'i phyir ro/ /rje btsun 'jam dpal gyis ni sems can thams cad skye ba med pa'i dga' bas tshim par mdzad de/ che bas kyang ches che ba'i phyir/ /mchod pa chen po 'dod chags che/ /sems can thams cad dga' bar byed/ /ces bya'o/ /yang na ma hA ni mchod pa ste mchod pa chen po gang la yod pa de la ni mchod pa chen po ste/ mchod pa chen po yang yin la 'dod chags chen po yang yin pas na/ mchod pa chen po 'dod chags che/ /zhes bya'o/ /'dis ni 'di skad ston par 'gyur te/ cig car ' jig rten gyi khams mtha' yas shing dpag tu med pa na gnas pa'i dkyil 'khor gyi 'khor lo'i nang du gtogs pa'i mchod pa chen po'i bkod pa rgyun gyi ngo bo nyid spyan la sogs pa'i pad+mar rdo rje rnam par zhugs pa'i yang dag par rig pa las byung ba rgyun mi 'chad cing phul du byung ba'i mchog tu dga' ba'i bde ba chen po'i rgyur gyur pas/ mchod pa chen po 'dod chags che/ /sems can thams cad dga' bar byed/ /ces gsungs te/ bcom ldan 'das rje btsun 'jam dpal de 'dir sems can thams cad dbang du byed pa zhes bya ba'i ting nge 'dzin ston te/ stong pa nyid bsgom pa sngon du 'gro bas zla ba'i dkyil 'khor gyi steng du yi ge hoHlas byung ba bdag nyid 'dod chags chen po'i gzugs dmar ser sgeg pa'i nyams dang ldan pa rol stabs kyis gnas pas gnas pa zhal bzhi pa/ phyag brgyad pa/ zhal dang po dmar ser/ g.yas pa gur gum ltar dmar ba/ rgyab pad+ma ltar dmar ba/ g.yon dmar ser/ phyag gnyis na mda' dang gzhu bsnams pa/ yang gnyis kyis zhags pa dang lcags kyu bsnams pa/ yang de las gzhan pa gnyis kyis shes rab kyi pha rol tu phyin pa'i glegs bam dang ral gri bsnams pa/ yang gnyis kyis rdo rje dang dril bu bsnams pa rnam par bsams la/ cod pan gyi rtse bran las 'od zer rnams byung bas steng du snang bar byas pas 'dod chags chen pos chags shing lus rab tu 'dud par lta zhing / de bzhin du shar dang / lho dang nub dang byang dang / 'og gi phyogs na gnas pa la zhal dang po dang / gnyis pa dang gsum pa dang / bzhi pa dang / zhabs kyi 'od zer rnams kyis kun du gang zhing rjes su dga' bar byas nas rang gi dbang du gyur pa la gzhag par yid kyis bsams la/ oM ma hA rA ga badzra rA ga ya sa rA satwa na hoHzhes bya ba'i gsang sngags par bar du bzlas brjod bya ste/ de nas nges par sems can thams cad dbang du 'gyur ro zhes nges pa'i blos de ltar rje btsun 'jam dpal gyi 'dod chags chen po'i sku bsgom par bya'o/ /de bzhin du/ mchod pa chen po zhe sdang che/ /zhes bya ba la sogs par sbyar bar bya ste/ khyad par dag kyang brjod par bya ste/ /zhe sdang che ni khyab 'jug ste/ zhe sdang gi dbang du gyur pas lha ma yin thams cad la sogs pa gsod kyang rang gi sems la gnas pa'i nyon mongs pa'i dgra ni bzlog par mi nus so/ /yang bcom ldan 'das ni bdag dang gzhan gyi rgyud du gtogs pa'i nyon mongs pa can gyi dgra bo'i stobs 'joms par mdzad pas/ nyon mongs kun gyi dgra che ba/ /zhes bya ba la/ de bas na/ mchod pa chen po zhe sdang che/ /zhes gsungs te/ zhe sdang rdo rje ni mi bskyod pa'o/ /de yang stong pa nyid sngon du 'gro ba'i nyi ma'i dkyil 'khor gyi steng du hUM las nges par 'byung ba'i rdo rje las byung ba ut+pal sngon po'i 'dab ma'i mdog can zhal bzhi pa phyag brgyad pa/ zhal dang po khro ba sgeg pa g.yas pa drag po ste/ zhal gdangs pa/ g.yon pa 'jigs su rung ba ste/ ma mchu'i sgros gnon pa/ rgyab kyi zhal dpa' bo ste/ gdug pa thams cad skrag par byed pa/ /phyag g.yas pa rnams na ral gri dang / mda' dang / rdo rje dang / lcags kyu bsnams pa/ g.yon pa rnams na sdigs mdzub bsgreng ba dang / dril bu dang / rnga yab dang / zhags pa bsnams pa/ g.yon brkyang ba'i gnas pas bzhugs pa/ ba spu'i bu ga thams cad nas byung ba'i rdo rje me ltar 'bar ba'i rtse mo rnams kun du 'bar bas khams gsum thal bar byas te/ rnam par sbyangs nas sangs rgyas kyi byang chub la nges par dgod par bsgom pa ni/ mchod pa chen po zhe sdang che/ /nyon mongs kun gyi dgra che ba/ /zhes bya ste/ rje btsun rdo rje rnon po'o/ /gti mug che ba ni tshangs pa ste/ gti mug las byung ba'i srog chags la 'tshe ba dang nye bar ldan pa'i mchod sbyin ston pas rang gi rgyud du gtogs pa'i gti mug gis kun du rmongs pa'i phyir ro/ /yang na 'jam pa'i dbyangs ni/ mchod pa chen po gti mug che/ gti mug blo ste gti mug sel/ /zhes bya ba ste/ mi shes shing log pa'i shes pa'i bdag nyid can rmongs pa'i gti mug gang yin pa de'i blo ni gti mug blo ste/ phyin ci log la mngon par zhen pa ste/ ji lta ba bzhin du gnas pa'i chos bdag med pa khong du ma chud pa la chos bdag med pa thugs su chud nas bdag dang gzhan rtogs par bya ba'i phyir bdag dang gzhan gyi rgyud du gtogs pa'i gti mug gi rtsa ba dang bcas pa drungs nas phyung bas/ gti mug blo ste gti mug sel/ /zhes bya'o/ /de nyid kyis na/ mchod pa chen po gti mug che/ /zhes bya ba ste/ ji ltar rims sel ba'i sngags la rims kyi sngags zhes bya ba dang / stong pa nyid ston pa'i sgra la stong pa nyid kyi sgra zhes bya ba dang mtshungs so/ /'dir yang rnam par snang mdzad chen po stong pa nyid sngon du 'gro ba zla ba'i dkyil 'khor gyi steng du oM gyi 'khor lo las byung ba gti mug chen po'i ngo bo nyid gser gyi mdog can zhal bzhi pa/ phyag brgyad pa/ zhal dang po ser po/ g.yas nag po/ g.yon dkar po/ rgyab dmar po/ phyag gnyis byang chub mchog gi phyag rgya can/ g.yas kyi phyag na rdo rje dang / / mda' dang / ral gri bsnams pa/ g.yon dril bu dang / gzhu dang zhags pa bsnams pa/ rdo rje'i skyil mo krung gis bzhugs pa/ ba spu'i bu ga thams cad nas de bzhin gshegs pa'i sprin byung bas sems can ma lus pa'i rgyud du gtogs pa'i ma rig pa'i mun pa bsal nas sangs rgyas nyid la rab tu 'jog par bsam par bya'o/ /khro bo chen po ni nyi ma la sogs pa gza' gdug pa rnams dang / klu la sogs pa ste/ sems can rnams la 'khu ba'i bsam pas gnas pa'i phyir khro ba chen po'o/ /khro bas khro ba thams cad drungs nas 'byin pas na mchod pa chen po khro bo che ste rdo rje blo'o/ /khro ba thams cad dgrar gyur pas khro ba chen po dgra che ba'o/ /'dir yang mchod pa chen po khro ba che ba ni don yod par grub pa ste/ sku mdog ljang gu zhal bzhi pa phyag brgyad pa/ zhal dang po mche ba gtsigs pa mdog ljang gu/ g.yas ser po/ g.yon dkar po/ rgyab dmar po/ phyag g.yas pa rnams na ral gri dang / rdo rje dang / mda' dang / lcags kyu bsnams pa/ g.yon gyis gdug pa rnams la sdigs mdzub mdzad pa/ dril bu dang / gzhu dang / zhags pa bsnams pa/ g.yon brkyang ba'i gnas pas bzhugs pa/ ba spu'i bu ga thams cad nas khro bo 'bar ba rnams byung bas sems can thams cad kyi rgyud du gtogs pa'i nyon mongs pa khro ba bag chags dang bcas pa thams cad bsregs nas nyon mongs pa rnam par bsal ba de rnams sangs rgyas kyi byang chub la rab tu gzhag par bsam mo/ /chags pa chen po ni/ ma rig pa dang / nga rgyal dang / bdag dang / bdag gir shin tu chags pa dang / nga dang nga yi zhes bya ba dang / bdag dang bdag gir mngon par zhen pa bsal bas na/ chags pa thams cad sel bar byed/ /ces bya ste/ de nyid kyis na/ mchod pa chen po chags pa che/ /zhes bya ba'o/ /'dir yang mchod pa chen po chags pa che ba ni bcom ldan 'das rin chen 'byung ldan te/ gser gyi mdog can zhal bzhi pa phyag brgyad pa/ zhal gyi rnam par dbye ba/ ser po dang / nag po dang / dkar po dang / dmar po'o/ /phyag g.yas dang g.yon rnams na rdo rje dang / ral gri dang / mda' dang / lcags kyu dang / yid bzhin gyi nor bu'i rgyal mtshan dang / dril bu dang / gzhu dang / zhags pa bsnams pa/ rgyal po'i skyil mo krung gis bzhugs pa/ ba spu'i bu ga thams cad las rin chen 'byung ldan gyi sprin byung bas sems can thams cad ji ltar mngon par 'dod pa bzhin du bsam pa thams cad yongs su rdzogs par mdzad cing rin po che la sogs pa'i char phab pas chags pa'i rdul zhi bar mdzad cing sems can rnams kyi sems chags pa dang bral bar mdzad de/ chags pa dang bral bar byas pa rnams sangs rgyas nyid la sbyar bar bsam par bya'o/ /ci'i phyir de ltar sbyor ba byas she na/ rgyud gzhan dag las/ sangs rgyas thams cad chags las 'khrungs/ /de bzhin rmongs dang sdang las 'khrung / /zhes bya ba la sogs pa gsungs te/ de yang 'di ltar bshad par rigs pa nyid du bstan par bya ba'i phyir ro/ /gzhan du 'dod chags dang / zhe sdang dang / gti mug dang / khro ba dang / chags pa rnams ni 'khor ba'i rgyu ma tshang ba med pa yin zhing rnam par rtog pa'i ngo bo nyid yin na/ ji ltar 'tshang rgya ba nyid kyi rgyur 'gyur/ gal te thabs dang bcas pa las 'gyur ro zhe na/ thabs kyis yongs su zin pa na/ snga ma'i rang bzhin las 'phos sam 'on te ma yin/ gal te rang bzhin snga ma las 'phos na de lta na ni de khyad par can nyid kyis rdzas gzhan skyes nas sangs rgyas nyid thob par byed pa ni nged kyang 'dod pa nyid yin no/ /'on te phyogs gnyis pa ltar na ni rgyu ma tshang ba med pa las phyin ci log gi 'bras bu 'byung ba ni 'gal ba nyid do/ /yang na dug gi nus pa med par byas pa bzhin du 'khor ba'i rgyur gyur pa'i nus pa nyid bsal nas 'dod chags la sogs pa yang rang gi ngo bo nyid kyis ston no zhe na/ rang gi ngo bo nyid las tha dad pa'i nus pas ni bde bar gshegs pa rnams kyi bstan pa la med de/ nus pa dang bral ba nyid rang gi ngo bo dang bral ba yin pas rdzas gzhan pa 'byung ba'i phyogs nyid yin la/ rang bzhin mi 'gyur ba'i dngos po ni 'ga' yang med de/ thams cad kyang skad cig ma nyid du bstan pa'i phyir ro/ /de bas na de bzhin gshegs pa lnga'i ngo bo nyid 'dod chags dang / zhe sdang dang / gti mug dang / khro ba dang / chags pa rnams ni chos kyi dbyings shin tu rnam par dag pa'i rang bzhin gyi ngo bo nyid du rtogs na 'tshang rgya ba nyid kyi rgyur 'gyur bas de bzhin gshegs pa la sogs pa'i nga rgyal gyis 'dod chags la sogs pa la brten pa ni sngags kyi tshul las 'gal ba med pa'am/ ngo bo nyid med cing sgyu ma lta bur lhag par mos pas ni thams cad legs par gnas pa yin no/ /'dod pa chen po bde ba che/ /dga' ba chen po mgu ba che/ /zhes bya ba ni yid kyi chos nyid kyi khyad par bstan pa ste/ sems can ma lus pa sangs rgyas nyid la rab tu 'god par 'dod par bzhed pa gang la yod pa'am/ chen po rnams kyi de 'dod par bya ba yin pas 'dod pa chen po ste/ de ni bcom ldan 'das ngag gi dbang phyug go/ /thar pa'i bde bskyed par byed par 'gyur bas na bde ba chen po'o/ /gong nas gong du rab tu dga' ba'i rgyur gyur pas dga' ba chen po'o/ /yang na bde ba chen po ni dkyil 'khor chen po'i tshul gyis lha mo thams cad la rol bar mdzad pas de rnams kyi 'dod par bya ba yin pas de ni 'dod pa chen po ste/ de nyid kyis 'di ltar bde ba chen po 'byung ba'i gnas skabs kyi kun du dga' ba'i byang chub kyi sems kyi bdag nyid du gyur pas bde ba chen po'o/ /de rnams dang bdag nyid rgyun mi 'chad pa yangs shing rgya che ba'i rab tu dga' ba 'phel bar gyur pas na dga' ba chen po'o/ /de nyid du tshad med cing rgyun mi 'chad pa'i dga' ba dang bde ba rab tu 'phel ba'i mthar thug pa ni mgu ba chen po'o/ /de dag thams cad kyang sgyu ma dang 'dra ba gnyis su med pa'i chos nyid so sor rig pas lhun gyis grub par sems can thams cad kyi don mdzad pa la mkhas pa'i blos bstan pa yin pas log par sgrub par ni mi bya'o/ /yang dag par sgrub pa'am rnal 'byor rgyud kyi rjes su 'brang ba las rang nyid kyis rtogs par bya yi/ rang dgas log par brtag par ni mi bya'o/ /da ni bcom ldan 'das kyi sku'i sgo nas khyad par du byas pa ni/ gzugs che lus kyang che ba ste/ /kho dog che zhing lus bong che/ /zhes bya ba gsungs pa yin te/ de la gzugs che ba ni skye bo rnams gdul bar bya ba'i phyir sna tshogs gzugs can gyis 'gro ba 'dul ba'i dbang gis gzugs sna tshogs pa'i tshul dang ldan par bdag nyid kyi dngos po sprul zhing 'gro ba thams cad khyab cing che ba'i gzugs mnga' bas na gzugs che ba'o/ /ji ltar tshad phra rab dang che ba la sogs pa'i gzugs can gyi gdul bya'i sems can rnams gdul bar bya ba'i phyir lha la sogs pa bas lhag par che ba'i sku ston pas na lus kyang che ba ste/ lus kyang yin la chen po yang yin pas lus che ba'o/ /ser po dang / nag po dang / dmar po dang / dkar po dang / ljang gu dang / 'dren ma'i kha dog gi shin tu 'bar bas na kha dog chen po ste/ 'di la kha dog chen po mnga' bas na kha dog che ba'o/ /de yang kha dog gang gis 'dul ba'i sems can rnams gdul bar bya ba'i phyir ro/ /lus kyi sku'i mdangs 'od 'bar ba ste/ rang gi 'od kyis lha la sogs pa'i mdangs zil gyis gnon pas na lus bong chen po mnga' ba ste/ de yang lus bong che ba'i gdul bya dag 'dul ba'i phyir ro/ /'od la sogs pa khyad par du 'gyur ba bstan pa'i phyir/ ming yang che zhing rgya che ba/ /dkyil 'khor chen po yangs pa yin/ /zhes bya ba gsungs te/ gang la ming chen po yod pa de la de skad ces bya ste/ 'jig rten thams cad kyi skad dang rjes su mthun pa'i ming dang brda dang tha snyad du btags pas rab tu grags pa'i phyir ming yang che ba'o/ /sbyin pa la sogs pa'i bsod nams kyi tshogs mang zhing rgya che ba mnga' bas na rgya che ba'o/ /'od zer gyi tshogs kyis zlum por bskor bas na dkyil 'khor chen po'o/ / 'jig rten gyi khams thams cad khyab pas yangs pa'i 'od kyi dkyil 'khor mnga' bas na/ dkyil 'khor chen po yangs pa yin/ /zhes bya'o/ /mtshon chas khyad par du 'gyur ba bstan pa'i phyir/ /shes rab mtshon chen 'chang ba ste/ /nyon mongs chen po lcags kyu mchog/ /ces bya ba gsungs te/ chos thams cad rnam pa thams cad du mngon par rtogs pa'i tshul gyis nges par 'byed pa'i shes rab chen po ni shes rab ste/ thos pa la sogs pa'i ngo bo nyid ni ma yin no/ /de nyid ni mtshon cha ste/ nye bar dmigs pa la sogs pa'i nyon mongs pa sel bar byed pas na mtshon chen no/ /de bsnams pa ni 'chang ba'o/ /yang na shes rab dang mtshon cha dag ni shes rab mtshon cha ste/ shes rab kyi pha rol tu phyin pa'i glegs bam dang ral gri phyag g.yon dang g.yas na bsnams pa'i rdo rje rnon po'i ting nge 'dzin nyid yin pas na shes rab mtshon chen 'chang ba'o/ /glang po che myos pa dang 'dra bar bzlog par dka' zhing che ba'i 'dod chags la sogs pa'i nyon mongs pa bzlog nas rang dbang du mdzad pas lcags kyu dang 'dra ba'i phyir lcags kyu'o/ /mchog ni gtso bo'o/ /'dir yang lcags kyu smos pa ni nye bar mtshon pa'i don tsam du zad de/ des na zhags pa yang gzung bar bya ste/ de ltar na shes rab kyi pha rol tu phyin pa'i glegs bam dang / ral gri dang / zhags pa dang / lcags kyu bsnams pa'i rje btsun rdo rje rnon po nyid 'dod pa chen po zhes bya ba la sogs pa'i khyad par gyis phul du byung bar blta bar bya'o/ /phyi dang nang gi grags pa dang ye shes kyi bye brag gis khyad par du gyur pa rab tu bstan pa'i phyir/ grags chen snyan grags chen po ste/ /snang ba chen po gsal ba che/ /zhes bya ba gsungs te/ gang la grags pa chen po yod pa de ni grags pa chen po'o/ /shes rab dang rtogs pa dang ye shes kyi shin tu phul du byung bas khyad par du 'phags pa'i phyir grags pa chen po mnga' bas na grags chen/ cho 'phrul shin tu rmad du byung ba sna tshogs pas phyi rol gyi grags pa'i gnas su nye bar mtshon par gyur pas snyan grags chen po'o/ /nang gi sems kyi snang ba dang ldan pa'i tshul can bas snang ba chen po'o/ /gsal ba chen po dang ldan pa ste/ phyi rol du 'od zer gyis kun nas bskor ba'i rang bzhin mnga' ba ste gsal che ba'o/ /sprul pa'i sgo'i khyad par du gyur par bstan pa'i phyir/ mkhas pa sgyu 'phrul chen po 'chang / /sgyu 'phrul chen po'i don grub pa/ /sgyu 'phrul chen po'i dga' bas dga'/ /sgyu 'phrul chen po'i mig 'phrul can/ /zhes bya ba gsungs te/ skye bo rnams la ji ltar sdug pa de lta bu'i rang bzhin can gyi sku ston par mdzad pas na mkhas pa'o/ /gdul bya'i sems can ji ltar 'dul ba dang / rjes su mthun pa'i gzugs su sprul pa ste/ de lta bu'i sgyu 'phrul mnga' bas na sgyu 'phrul chen po 'chang ngo / /sems can dang ngan song rnams ni dngos po med pa nyid de de lta na yang sgyu 'phrul chen po'i don sgrub pa ste/ gdul bya'i sems can sangs rgyas nyid la rab tu 'jog pa de sgrub par mdzad pas na sgyu 'phrul chen po'i don grub pa'o/ /rnam pa thams cad du sems can gyi don mdzad pa la mngon par dgyes pas sgyu 'phrul chen po'i dga' ba la dgyes pas sgyu 'phrul chen po dga' bas dga'o/ /de nyid kyi phyir/ sgyu 'phrul chen po'i mig 'phrul can/ /zhes bya'o/ /da ni sa bcu la bzhugs shing sbyin pa la sogs pa pha rol tu phyin pa bcu'i yon tan gyi rang gi ngo bos shin tu phul du byung ba'i bdag nyid chen pos khyad par du 'phags par bstan pa'i phyir/ sbyin bdag chen po gtso bo ste/ tshul khrims chen po 'chang ba'i mchog /bzod chen 'chang ba brtan pa po/ /brtson 'grus chen po brtul ba yin/ /bsam gtan chen po ting 'dzin gnas/ /shes rab chen po lus 'chang ba/ /stobs po che la thabs che ba/ /smon lam ye shes rgya mtsho ste/ /zhes bya ba gsungs te/ de la byang chub sems dpa'i sa rab tu dga' ba ni sbyin pa'i pha rol tu phyin pa la lhag par spyad pas na de la bzhugs te/ sbyin pa'i las tshad med pa mdzad pas na/ de yang blo gros mi zad pas bstan pa'i mdo las/ btsun pa sha ra dwa ti'i bu byang chub sems dpa' rnams kyi sbyin pa yongs su sbyang ba tshad med pa ste/ 'di ltar tshe dang / spobs pa dang / bde ba dang / stobs dang / kha dog nye bar bstan pa'i phyir zas 'dod pa rnams la ni zas sbyin pa'o/ /nyon mongs pa dang / sred pa thams cad bsal ba'i phyir btung ba 'dod pa rnams la btung ba sbyin pa'o/ /bde ba dang 'byor ba'i dngos po thams cad bsdu ba'i phyir bzhon pa 'dod pa rnams la bzhon pa sbyin pa'o/ /ngo tsha shes pa dang khrel yod pa dang gser gyi kha dog lta bu'i mdog yongs su sbyang ba'i phyir gos 'dod pa rnams la gos sbyin pa'o/ /de bzhin gshegs pa'i lha'i spyan yongs su gzigs par bya ba'i phyir mar me 'dod pa rnams la mar me sbyin pa'o/ /de bzhin gshegs pa'i lha'i snyan yongs su dag par bya ba'i phyir rol mos sgra 'dod pa rnams la rol mo'i sgra sbyin pa'o/ /tshul khrims dang thos pa dang ting nge 'dzin gyi spos kyis byug pa'i phyir spos dang byug pa sbyin pa'o/ /gzungs dang spobs pa dang byang chub kyi yan lag gi me tog thob par bya ba'i phyir me tog phreng ba 'dod pa rnams la me tog phreng ba sbyin pa'o/ /lus kyi dri yid du 'ong ba thob par bya ba'i phyir phye ma 'dod pa rnams la phye ma sbyin pa'o/ /skyes bu chen po'i mtshan ro bro ba'i mchog yongs su rdzogs par bya ba'i phyir ro thams cad 'dod pa rnams la ro thams cad sbyin pa'o/ /sems can thams cad kyi gnas dang skyabs dang mgon dang dpung gnyen bya ba'i phyir gnas 'dod pa rnams la gnas sbyin pa'o/ /sgrib pa thams cad rab tu spang ba dang / lha dang / tshangs pa'i gnas dang / de bzhin gshegs pa'i gzims cha thob par bya ba'i phyir mal cha 'dod pa rnams la mal cha sbyin pa'o/ /stong gsum gyi stong chen po'i sa thams cad kyi byang chub kyi snying po'i rdo rje'i gdan thob par bya ba'i phyir stan 'dod pa rnams la stan sbyin pa'o/ /byang chub kyi yo byad thams cad yongs su bskang ba'i phyir yo byad 'dod pa rnams la yo byad sbyin pa'o/ /mi rga mi 'chi ba'i bdud rtsi'i bde bas yongs su bskang ba'i phyir na ba dang sman 'dod pa thams cad la sman sbyin pa'o/ /rang dbang dang rang nyams dang / rang byung gi ye shes bskang ba'i phyir byang chub sems dpa' rnams kyi bran pho dang bran mo yongs su gtong ba'i sbyin pa'o/ /skyes bu chen po'i mtshan dam pa sum cu rtsa gnyis yongs su bskang ba'i phyir byang chub sems dpa' rnams kyi gser dang / dngul dang / nor bu dang / mu tig dang / bai DUr+ya dang / dung dang / man shel dang / bye ru dang / rin po che thams cad yongs su gtong ba'i sbyin pa'o/ /dpe byad bzang po brgyad cu yongs su rdzogs par bya ba'i phyir byang chub sems dpa' rnams kyi rgyan sna tshogs sbyin pa'o/ /gtsug tor bltar mi mthong ba thob par bya ba'i phyir byang chub sems dpa' rnams kyi gtsug gi nor bu dang cod pan sbyin pa'o/ /theg pa chen po yongs su rdzogs par bya ba'i phyir byang chub sems dpa' rnams kyi rta dang / ba lang dang / shing rta dang / dpung bu chung dang / bzhon pa sbyin pa'o/ /bsam gtan gyi yan lag dang yan lag gi tshogs yongs su rdzogs par bya ba'i phyir/ byang chub sems dpa' rnams kyi skyed mos tshal dang / gzhal med khang dang / dka' thub kyi nags tshal dang / gtsug lag khang yongs su gtong ba'i sbyin pa'o/ /bla na med pa yang dag par rdzogs par 'tshang rgya bar bya ba'i phyir/ byang chub sems dpa' rnams kyi bu pho dang / chung ma dang / sdug pa yongs su gtong ba'i sbyin pa'o/ /dam pa'i chos kyi mdzod dang / bang ba dag yongs su dgong ba'i phyir byang chub sems dpa' rnams kyi nor dang / 'bru dang / mdzod dang / bang ba yongs su gtong ba'i sbyin pa'o/ /rnam pa thams cad kyi mchog dang ldan pa dam pa'i chos kyi rgyal po byang chub kyi snying por 'gro bar bya ba'i phyir byang chub sems dpa' rnams kyi grong dang / grong khyer dang / yul 'khor dang / rgyal po'i pho brang 'khor dang / 'dzam bu'i gling dang / gling bzhi pa'i rgyal srid kyi dbang phyug thams cad yongs su gtong ba'i sbyin pa'o/ /chos la dga' zhing mos pa thob par bya ba'i phyir byang chub sems dpa' rnams kyi bde ba dang / dga' ba dang / rtsed mo thams cad gtong ba'i sbyin pa'o/ /dam pa'i chos kyi rkang pas byang chub kyi chos kyi snying por 'gro bar bya ba'i phyir byang chub sems dpa' rnams kyi rkang pa sbyin pa'o/ /sems can thams cad la dam pa'i chos kyi lag pa sbyin pa'i phyir byang chub sems dpa' rnams kyi lag mthil sbyin pa'o/ /dbang po ma nyams pa yongs su rdzogs par bya ba'i phyir byang chub sems dpa' rnams kyi rna ba dang sna sbyin pa'o/ /sems can thams cad kyis sgrib pa med pa'i sangs rgyas kyi spyan dang chos kyi spyan thob par bya ba'i phyir byang chub sems dpa' rnams kyi mig sbyin pa'o/ /khams gsum thams cad las khyad par du 'phags pa'i mtshan thams cad mkhyen pa'i ye shes thob par bya ba'i phyir byang chub sems dpa' rnams kyi yan lag gi dam pa mgo sbyin pa'o/ /snying po med pa'i lus las snying po blang zhing nye bar 'tsho bar bya ba'i phyir byang chub sems dpa' rnams kyi sha dang khrag yongs su gtong ba'i sbyin pa'o/ /'jam pa dang snum pa dang gser gyi kha dog lta bu'i mdog yongs su dag par bya ba'i phyir byang chub sems dpa' rnams kyi pags pa yongs su gtong ba'i sbyin pa'o/ /sangs rgyas kyi sku rdo rje ltar mi shigs shing sra ba sred med kyi bu ltar mkhregs pa thob par bya ba'i phyir byang chub sems dpa' rnams kyi rus pa dang / rkang sbyin pa'o/ /btsun pa sha ra dwa ti'i bu gzhan yang byang chub sems dpa' rnams la mi mthun pa'i longs spyod yongs su tshol ba'i sbyin pa med do/ /sems can thams cad la gnod pa'i sbyin pa med do/ / nga rgyal bskyed cing sbyin pa med do/ /'jigs pa dang sdug pa dang 'dzem pa'i sbyin pa med do/ /mgron du gnyer te yongs su mi gtong ba'i sbyin pa med do/ /ji skad smras pa las chung ba'i sbyin pa med do/ /bzang po yod la bzang po ma yin pa'i sbyin pa med do/ /lhag pa'i bsam pa ma yin pas sbyin pa med do/ /g.yo dang sgyus sbyin pa med do/ /bcom pa'i sbyin pa med do/ /las kyi rnam par smin pa dang rgod pas sbyin pa med do/ /log pa'i bsam pas sbyin pa med do/ /gti mug gi bsam pas sbyin pa med do/ /'chol ba'i bsam pas sbyin pa med do/ /phyin ci log gi bsam pas sbyin pa med do/ /ma dad par sbyin pa med do/ /mi dga' bar sbyin pa med do/ /nye bar gnas pa'i sbyin pa med do/ /ngor bltas te sbyin pa med do/ /sems can tha dad pa'i sbyin pa med do/ /sbyin pa'i gnas 'dam zhing sbyin pa med do/ /sems can thams cad la sbyin pa'i gnas ma yin par brnyas shing sbyin pa med do/ /tshul khrims dang ldan pa dang tshul khrims 'chal ba la bstod pa dang smad pa'i sbyin pa med do/ /lan la re ba'i sbyin pa med do/ /grags pa dang sgra dang tshigs su bcad pa'i phyir sbyin pa med do/ /bdag la bstod pa dang / gzhan la smod pa'i sbyin pa med do/ /yongs su gdung bar byed pa'i sbyin pa med do/ /yid la gcags pa'i sbyin pa med do/ /'gyod pa'i sbyin pa med do/ /gnod par sbyin pa med do/ /gzhan gyi re ba la bab pa'i sbyin pa med do/ /smad par sbyin pa med do/ /las kyi rnam par smin pa la re ba'i sbyin pa med do/ /dpags te sbyin pa med do/ /khro ba dang / zhe sdang dang / gti mug dang / gnod sems bskyed pa'i sbyin pa med do/ /slong ba rnams la gnod pa'i sbyin pa med do/ /'phya ba dang co 'dri ba'i sbyin pa med do/ /phyin phyogs su sbyin pa med do/ /bskyur te sbyin pa med do/ /bsti stang du ma byas pa'i sbyin pa med do/ /bdag gi lag ma bdar ba'i sbyin pa med do/ /mi rtag pa'i sbyin pa med do/ /shin tu ma sbyangs pa'i sbyin pa med do/ /gzhan la rnyog pa'i sbyin pa med do/ /yongs su chad par byas te sbyin pa med do/ /ji ltar bstabs pa las chung ba'i sbyin pa med do/ /spro ba las mi spro bar 'gyur ba'i sbyin pa med do/ /sems can zhing ma yin zhes sbyin pa med do/ /chung ngu la brnyas shing sbyin pa med do/ /sbyin pa rgya chen po la snyems shing sbyin pa med do/ /log par sgrub pa'i sbyin pa med do/ /skye ba 'dod pa'i sbyin pa med do/ /gzugs dang longs spyod dang dbang phyug la mngon par dga' bas sbyin pa med do/ /brgya byin dang tshangs pa dang 'jig rten skyong ba dang lha thams cad du skye bar smon cing sbyin pa med do/ /nyan thos dang rang sangs rgyas kyi theg par bsngo zhing sbyin pa med do/ /gzhon nu dang rgyal srid kyi dbang phyug 'dod pas sbyin pa med do/ /tshe gcig tu zad pa'i sbyin pa med do/ /phyin chad chog cing mi dgos pa'i sbyin pa med do/ /thams cad mkhyen pa nyid kyi sems su ma bsngos pa'i sbyin pa med do/ /rung ba ma yin pa'i sbyin pa med do/ /dus la ma bab pa'i sbyin pa med do/ /dug dang mtshon sbyin pa med do/ /sems can la tho 'tshams shing sbyin pa med do/ /byang chub sems dpa' rnams kyi sbyin pa ni mkhas pas smad pa med do/ /sbyin pa de ni stong pa nyid kyi rnam pas bsgrubs pa ste/ de'i phyir de mi zad pa'o/ /sbyin pa de ni mtshan ma med pas yongs su bsgoms pa ste/ de'i phyir de mi zad pa'o/ /sbyin pa de ni smon pa med pa la rab tu gnas pa ste de'i phyir de mi zad pa'o/ /sbyin pa de ni mngon par 'dus ma byas par yongs su bsngos pa ste de'i phyir de mi zad pa'o/ /sbyin pa de ni yang dag par zin pa ste/ de'i phyir de mi zad pa'o/ / sbyin pa de ni khams gsum pa dang ma 'dres pa ste/ de'i phyir de mi zad pa'o/ /sbyin pa de ni 'bras bu rgyu mthun pa rnam par grol ba ste/ de'i phyir de mi zad pa'o/ /sbyin pa de ni bdud thams cad shin tu tshar gcod pa ste/ de'i phyir de mi zad pa'o/ /sbyin pa de ni nyon mongs pa thams cad dang ma 'dres pa ste/ de'i phyir de mi zad pa'o/ /sbyin pa de ni khyad par du 'gro ba ste/ de'i phyir de mi zad pa'o/ /sbyin pa de ni legs par byas pa nges pa ste/ de'i phyir de mi zad pa'o/ /sbyin pa de ni byang chub kyi lam gyi tshogs bsags pa ste/ de'i phyir de mi zad pa'o/ /sbyin pa de ni yang dag par bsngos pa ste/ de'i phyir de mi zad pa'o/ /sbyin pa de ni byang chub kyi snying por rgyan bkod pa rnam par grol ba rgyu mthun pa'i 'bras bu ste/ de'i phyir de mi zad pa'o/ /sbyin pa de ni sems can thams cad kyi gtso bo ste/ de'i phyir de mi zad pa'o/ /sbyin pa de ni mu med pa ste/ de'i phyir de mi zad pa'o/ /sbyin pa de ni yongs su mi bri ba ste/ de'i phyir de mi zad pa'o/ /sbyin pa de ni kun du mi gtogs pa ste/ de'i phyir de mi zad pa'o/ /sbyin pa de ni yongs su ma zad pa ste/ de'i phyir de mi zad pa'o/ /sbyin pa de ni yangs pa ste/ de'i phyir de mi zad pa'o/ /sbyin pa de ni mi gnas pa ste/ de'i phyir de mi zad pa'o/ /sbyin pa de ni thug pa med pa ste/ de'i phyir de mi zad pa'o/ /sbyin pa de ni kha na ma tho ba med pa ste/ de'i phyir de mi zad pa'o/ /sbyin pa de ni mi skur ba ste/ de'i phyir de mi zad pa'o/ /sbyin pa de ni mi thul ba ste/ de'i phyir de mi zad pa'o/ /sbyin pa de ni zil gyis ma non pa ste/ de'i phyir de mi zad pa'o/ /sbyin pa de ni thams cad mkhyen pa'i ye shes la btang ba ste/ de'i phyir de mi zad pa'o zhes ji skad gsungs pa lta bu'i sbyin pa de'i bdag por gyur pas na sbyin bdag chen po ste/ de nyid kyi phyir gtso bo'o/ /byang chub sems dpa'i sa dri ma med pa la ni tshul khrims kyi pha rol tu phyin pa la lhag par spyod pa yin te/ de bas na de khyad par du bya ba'i phyir/ tshul khrims chen po 'chang ba mchog / ces bya ste/ de le lo can dang blo dman pa rnams kyis khong du chud par bya ba'i phyir sbyin pa dang tshul khrims la sogs pa mdo sde dag gi nang nas gsungs pa 'dir bstan par bya ste/ de yang blo gros mi zad pas smras pa/ btsun pa sha ra dwa ti'i bu rnam pa drug cu rtsa lngas byang chub sems dpa' rnams kyi tshul khrims kyi phung po yongs su dag pa mi zad pa yin no/ /drug cu rtsa lnga gang zhe na/ 'di lta ste/ sems can thams cad la mi gnod pa dang / gzhan gyi longs spyod dag la mi rku ba dang / gzhan gyi chung ma dag la ma chags pa dang / sems can thams cad la mi slu ba dang / bdag gi 'khor gyis chog par 'dzin pas phra ma med pa dang / tshig drag po bzod pas mi brlang ba dang / tshig shin tu spong bas kyal ba mi smra ba dang / gzhan bde ba la dga' bas brnab sems med pa dang / ngan du brjod pa dang / ngan du smra ba'i tshig gi lam bzod pas gnod sems med pa dang / ston pa med pa gzhan gyis bstan pa med pas yang dag par lta ba dang / sems la rnyog pa med pas sangs rgyas la dad pa dang / chos nyid kyis chos dam pa'i phyir chos la dad pa dang / 'phags pa'i tshogs thams cad la dga' bas dge 'dun la dad pa dang / bla ma la gus pas sri zhu che ba dang / sangs rgyas dang chos dang dge 'dun la yan lag lngas phyag 'tshal bas rab tu 'dud pa dang / kha na ma tho ba chung rab la yang 'jigs par lta bas tshul khrims mi lhod pa dang / theg pa gzhan la mi brten pas tshul khrims ma ral pa dang / nyam nga bar skye ba spong bas tshul khrims ma nyams pa dang / skye bo mi srun pa dang / nyon mongs pa dang ma 'dres pas tshul khrims ma 'dres pa dang / dkar po'i chos phyogs gcig tu 'phel bas tshul khrims ma 'chol ba dang / ji ltar 'dod pa bzhin du 'gro bas 'byongs pa'i tshul khrims dang / mkhas pas rab tu bsngags pa'i tshul khrims dang / dran pa dang shes bzhin rab tu nye bar gnas pas rnam pa mchog gi tshul khrims dang / thams cad du kha na ma tho ba med pas ma smad pa'i tshul khrims dang / dbang po bsrungs pas shin tu sbas pa'i tshul khrims dang / sangs rgyas kyi chos thams cad la sems pas rnam par grags pa'i tshul khrims dang / rung ba la tshod shes pas 'dod pa chung ba'i tshul khrims dang / chags pa spong bas chog shes pa'i tshul khrims dang / lus dang sems dben pas rang bzhin gyis dben pa'i tshul khrims dang / 'du 'dzi rnam par spong bas dgon pa la gnas pa'i tshul khrims dang / gzhan gyi ngor mi lta bas 'phags pa'i rigs chog shes pa'i tshul khrims dang / dge ba'i rtsa ba bdag gi kha na las pas sbyangs pa'i yon tan dang yo byad bsnyungs pa'i tshul khrims dang / lha dang mi mgu bar byed pas ji ltar smras pa de ltar spyod pa'i tshul khrims dang / sems can thams cad kyi dpung gnyen du gyur pas byams pa'i tshul khrims dang / sdug bsngal thams cad bzod pas snying rje'i tshul khrims dang / sems ma zhum pas dga' ba'i tshul khrims dang / rjes su chags pa dang khong khro ba spangs pas btang snyoms kyi tshul khrims dang / bdag gi sems la nges par sems pas bdag gi 'khrul ba rtog pa'i tshul khrims dang / gzhan gyi sems srung bas gzhan gyi 'khrul pa la nyes par mi lta ba'i tshul khrims dang / sems can yongs su smin par byed pas sbyin pa'i tshul khrims dang / tshul khrims rab tu bsrungs pas shin tu gzung ba'i tshul khrims dang / sems can thams cad la zhe 'gras pa'i sems med pas bzod pa'i tshul khrims dang / phyir mi ldog pas brtson 'grus kyi tshul khrims dang / bsam gtan gyi yan lag gi tshogs 'phel bar byed pas bsam gtan gyi tshul khrims dang / thos pa'i dge ba'i rtsa bas mi ngoms pa'i phyir shes rab kyi tshul khrims dang / thos pa'i snying po len pa'i phyir thos pa tshol ba'i tshul khrims dang / byang chub kyi yan lag gi tshogs spel ba'i phyir dge ba'i bshes gnyen la brten pa'i tshul khrims dang / lam nyam nga ba 'dor ba'i phyir sdig pa'i grogs po yongs su spong pa'i tshul khrims dang / mi rtag pa'i 'du shes la rtog pas lus la lta ba'i tshul khrims dang / dge ba'i rtsa ba brtun te byed pas srog la yang mi rton pa'i tshul khrims dang / bsam pa dag pa'i phyir yid la gcags pa med pa'i tshul khrims dang / sbyor ba dag pa'i phyir bcos ma ma yin pa'i tshul khrims dang / lhag pa'i bsam pa dag pa'i phyir yongs su gdung ba med pa'i tshul khrims dang / las legs par byas pa'i phyir mi dga' ba med pa'i tshul khrims dang / khengs pa med pa'i phyir nga rgyal med pa'i tshul khrims dang / 'dod chags dang bral ba'i phyir mi rgod pa'i tshul khrims dang / drang ba'i phyir mi g.yeng ba'i tshul khrims dang / cang shes pa'i phyir mu cor mi smra ba'i tshul khrims dang / mi 'khrug pa'i phyir dul ba'i tshul khrims dang / nye bar zhi ba'i phyir zhi ba'i tshul khrims dang / ji skad smras pa bzhin byed pas bka' blo bde zhing mthun par 'dzin pa'i tshul khrims dang / bsdu ba'i dngos po mi 'dor bas sems can yongs su smin par byed pa'i tshul khrims dang / bdag gi nor chud mi gzon pa'i phyir dam pa'i chos yongs su srung ba'i tshul khrims dang / gzod ma nas shin tu dag pas bsam pa thams cad yongs su skong ba'i tshul khrims dang / de'i tshul khrims yongs su bsngos pa de bzhin gshegs pa'i tshul khrims la yang dag par gzhol ba'i tshul khrims dang / sems can thams cad la sems snyoms pas sangs rgyas kyi ting nge 'dzin dang snyoms par 'jug pa'i tshul khrims te/ btsun pa sha ra dwa ti'i bu rnam pa drug cu rtsa lnga po de dag gis byang chub sems dpa' rnams kyi tshul khrims kyi phung po yongs su mi zad pa yin no/ /btsun pa sha ra dwa ti'i bu gzhan yang gang la bdag tu sgro btags pa med pa dang / sems can du ma yin/ srog tu ma yin/ gso bar ma yin/ skyes bur ma yin/ gang zag tu ma yin/ shed las skyes su ma yin zhing shed bur sgro btags pa med pa de ni tshul khrims so/ /gang la gzugs su sgro btags pa med pa dang / tshor bar ma yin/ 'du shes su ma yin/ 'du byed du ma yin zhing rnam par shes par sgro btags pa med pa de ni tshul khrims so/ /gang la sa'i khams su sgro btags pa med pa dang / chu'i khams su ma yin/ me'i khams su ma yin zhing rlung gi khams su sgro btags pa med pa de ni tshul khrims so/ /gang la mig gi mtshan mar sgro btags pa med pa dang / gzugs kyi mtshan mar sgro btags pa med pa dang / de bzhin du rna bar ma yin/ sgrar ma yin/ snar ma yin/ drir ma yin/ lcer ma yin/ ror ma yin/ lus su ma yin/ reg byar ma yin zhing yid kyi mtshan mar sgro btags pa med pa de ni tshul khrims so/ /gang la lus dang ngag dang sems su sgro btags pa med pa de ni tshul khrims so/ /gang tshe gcig pa'i phyir zhi gnas kyi mtshan nyid de ni tshul khrims so/ /chos rab tu 'byed pa la mkhas pas lhag mthong gi mtshan nyid de ni tshul khrims so/ /gang stong pa nyid rig pa dang / mtshan ma'i mtha' dang / smon pa med cing khams gsum pa dang ma 'dres pa de ni tshul khrims so/ /gang mngon par 'du ma byas pa skyes pas rab tu phye ba'i skye ba la bzod pa de ni tshul khrims so/ /gang la ma byas shing bya ba med pa de ni tshul khrims so/ /gang sngon gyi mthar ma byung ba dang / phyi ma'i mthar ma 'phos pa dang / bar du mi gnas pa ni tshul khrims so/ /gang sems dri ma med pa dang / rnam par shes pa la mi gnas pa dang / yid la byed pa dang ma 'dres pa de ni tshul khrims so/ /gang 'dod pa'i khams la mi brten pa dang / gzugs kyi khams la mi gnas pa dang / gzugs med pa'i khams la mi 'dug pa de ni tshul khrims so/ /gang 'dod chags kyi rdul med pa dang / gnod sems dang tha ba dang skyon dang khong khro ba bsal ba dang / gti mug gi mun pa dang ma rig pa med pa de ni tshul khrims so/ /gang rtag pa med pa dang / chad pa med pa dang / brten nas byung ba dang 'gal ba med pa de ni tshul khrims so/ /gang ngar 'dzin pa med pa dang / nga yir 'dzin pa bor ba dang / 'jig tshogs la lta ba la mi gnas pa de ni tshul khrims so/ /gang ming dang brda la mngon par ma zhen pa dang / gzugs kyi mtshan nyid la mi gnas pa dang / ming dang gzugs dang ma 'dres pa de ni tshul khrims so/ /gang rgyu'i bag la nyal med pa dang / lta ba dang kun nas ldang ba kun nas ma langs pa dang / sgrib pa dang 'gyod pa la mi gnas pa de ni tshul khrims so/ /gang la chags pa mi dge ba'i rtsa ba'i gnas med pa dang / zhe sdang mi dge ba'i rtsa ba'i gnas med pa dang / gti mug mi dge ba'i rtsa ba'i gnas med pa de ni tshul khrims so/ /gang mi dge ba med pa dang yongs su gdung ba med pa dang shin tu sbyangs pa'i mtshan nyid de ni tshul khrims so/ /gang chos kyi sgus sangs rgyas kyi rigs mi gcod pa dang / chos kyi dbyings dbyer med pa'i phyir chos kyi rigs mi gcod pa dang 'dus ma byas kyi rab tu phye ba'i phyir dge 'dun gyi rigs mi gcod pa de ni tshul khrims so/ /btsun pa sha ra dwa ti'i bu tshul khrims mi zad pa ni rgyun mi zad pa'i phyir blta'o/ /de ci'i phyir zhe na/ so so'i skye bo rnams kyi tshul khrims ni skye ba'i gnas rnams kyis zad par 'gyur ro/ /phyi rol pa'i lnga mngon par shes pa rnams kyi tshul khrims ni mngon par shes pa nyams pas zad par 'gyur ro/ /mi rnams kyi tshul khrims ni dge ba bcu'i lam zad pas zad par 'gyur ro/ /'dod pa'i khams kyi lha'i bu rnams kyi tshul khrims ni bsod nams zad pas zad par 'gyur ro/ /gzugs kyi khams kyi lha'i bu rnams kyi tshul khrims ni tshad med pa dang / bsam gtan zad pas zad par 'gyur ro/ /gzugs med pa'i khams kyi lha'i bu rnams kyi tshul khrims ni ji lta bur snyoms par zhugs pa skyes pa zad pas zad par 'gyur ro/ /slob pa dang mi slob pa dang nyan thos thams cad kyi tshul khrims ni mya ngan las 'das pa'i mthar zad par 'gyur ro/ /rang sangs rgyas rnams kyi tshul khrims ni snying rje chen po dang bral bas zad par 'gyur ro/ /btsun pa sha ra dwa ti'i bu byang chub sems dpa' rnams kyi tshul khrims ni mi zad pa ste/ de ci'i phyir zhe na/ 'di ltar tshul khrims de las tshul khrims thams cad 'byung ba'i phyir te/ btsun pa sha ra dwa ti'i bu dper na sa bon mi zad pa thob pa mi zad pa'o/ /btsun pa sha ra dwa ti'i bu de bzhin du byang chub kyi sems kyi sa bon mi zad pas na de bzhin gshegs pa'i tshul khrims mi zad par rig par bya ste/ de'i phyir na skyes bu dam pa de dag ni tshul khrims mi zad pa zhes bya'o/ /de lta bu'i tshul khrims chen po 'chang ba'i phyir tshul khrims 'chang ba thams cad kyi gtso bor gyur pas na mchog go/ /byang chub sems dpa'i sa 'od byed pa la ni bzod pa'i pha rol tu phyin pa la lhag par spyod pa yin te/ de bas na/ bzod chen 'chang ba brtan pa po/ /zhes bya ste/ de yang rnam pa sum cu rtsa gnyis kyis byang chub sems dpa' rnams kyi bzod par blta'o/ /sum cu rtsa gnyis gang zhe na/ bag la nyal spangs pas bzod par blta'o/ /mi gnod pas bzod par blta'o/ /yongs su mi gdung bas bzod par blta'o/ /gnod sems med pas bzod par blta'o/ /khon du 'dzin pa med pas bzod par blta'o/ /mi khro bas bzod par blta'o/ /'thab mo med pas bzod par blta'o/ /rtsod pa med pas bzod par blta'o/ /yul gyi rma mi phyin pas bzod par blta'o/ /bdag dang gzhan srung bas bzod par blta'o/ /byang chub kyi sems dang mthun pas bzod par blta'o/ /tshul bzhin rab tu rtogs pas bzod par blta'o/ /yid byung zhing 'dod chags dang bral bas bzod par blta'o/ /las kyi rnam par smin pa la rton pas bzod par blta'o/ /lus kyi rgyun gyis bzod par blta'o/ /ngag dang sems yongs su dag pas bzod par blta'o/ /bsam pa brtan pas bzod par blta'o/ /yi ge ya ma brla yin pas bzod par blta'o/ /yongs su rtogs pa med pas bzod par blta'o/ /rang gi sems la nges par sems pas bzod par blta'o/ /gzhan gyi sems srung bas bzod par blta'o/ /tshangs pa'i 'jig rten gyi lam du 'gro bas bzod par blta'o/ /lha dang mi'i phun sum tshogs pa myong ba'i phyir bzod par blta'o/ /mtshan dang dpe byad bzang po yongs su rdzogs par byed pas bzod par blta'o/ /tshangs pa'i sgra skad 'byin pa'i dbyangs thob pas bzod par blta'o/ /nyes pa thams cad bcom pas bzod par blta'o/ /gnod sems dang skyon dang tha ba thams cad bcom pas bzod par blta'o/ / khong khro ba thams cad spangs pas bzod par blta'o/ /mi dge ba'i rtsa ba thams cad spangs pas bzod par blta'o/ /phyir rgol ba thams cad rab tu bcom pas bzod par blta'o/ /gzhan gyis gnod par bya ba thams cad las shin tu 'das pas bzod par blta'o/ /sangs rgyas kyi chos thams cad thob pas bzod par blta ste/ btsun pa sha ra dwa ti'i bu rnam pa sum cu rtsa gnyis po de dag gis byang chub sems dpa' rnams kyi bzod par blta'o/ /de la bzod pa gang zhe na/ ngag brag ca'i sgra dang mtshungs pa shin tu rtogs pa'i phyir spyo ba la slar mi spyo ba dang / lus gzugs brnyan dang mtshungs par rab tu rtogs pa'i phyir brdeg pa la slar mi brdeg pa dang / sems sgyu ma dang mtshungs par rab tu rtogs pa'i phyir gshe ba la phyir mi gshe ba dang / lhag pa'i bsam pa zhi ba'i phyir khros pa la phyir mi khro ba dang / rang gi yon tan yongs su rdzogs pa'i phyir bsngags pa ma yin pas khong khro bar mi 'gyur ba dang / ma thos par mi sems pa'i phyir bsngags pas rjes su chags par mi 'gyur ba dang / shin tu dul ba'i phyir rnyed pas dga' ba med pa dang / rab tu zhi ba'i phyir ma rnyed pas khong khro ba med pa dang / shes pas rab tu brtags pa'i phyir snyan pa la ngo mtshar du mi 'dzin pa dang / blo yangs pa'i phyir mi snyan pas zhum par mi 'gyur ba dang / legs par gnas pa'i phyir smad pas dmas par mi sems pa dang / mi g.yo ba'i phyir bstod pas mtho bar mi sems pa dang / sems can la blta ba'i phyir sdug bsngal gyis yongs su mi spyo ba dang / 'dus byas kyi bde ba mi rtag pa'i phyir bde bas dga' bar mi 'gyur ba dang / mi gnas pa'i phyir 'jig rten gyi chos rnams kyis mi gos pa dang / gzhan la mi gnod pa'i phyir bdag la gnod pa bzod pa dang / byang chub kyi yan lag gi tshogs yongs su rdzogs par bya ba'i phyir yan lag dang nying lag gcod pa'ang nyams su len pa dang / sangs rgyas kyi sku 'dod pa'i phyir bdag gi lus gcod pa'ang bzod pa dang / legs par byas pa'i las kyi stobs bskyed pa'i phyir ngan du byas pa thams cad bzod pa dang / mu stegs thams cad 'joms pas dpa'i ba'i phyir gdung ba dang yongs su gdung ba la mi mjed pa dang / brgya byin dang tshangs pa dang 'jig rten skyong ba rnams zil gyis gnon pa'i phyir brtul zhugs thams cad la rtsom pa'o/ /btsun pa sha ra dwa ti'i bu gzhan yang bzod pa zhes bya ba ni gang 'di shin tu rma mi phyin pa ste/ de ci'i phyir zhe na/ mi dmigs pa'i phyir ro/ /gshe'o zhes bzod pa de ni gnyi ga la dmigs pa'i bzod pa ste/ de ni shin tu bzod pa ma yin no/ /'di la su zhig gshe zhes bzod pa de ni chos la 'greng zhing rtog pa'i bzod pa ste/ de shin tu bzod pa ma yin no/ /ci bdag gi mig gshe'am zhes bzod pa'am/ de bzhin du ci bdag gi rna ba dang / sna dang / lce dang / lus dang / yid la yid gshe'am zhes bzod pa de ni skye mched la rtog pa'i bzod pa ste/ de ni shin tu bzod pa ma yin pa'o/ /'di la gang su yang gshe ba med do zhes bzod pa de ni bdag med pa la rtog pa'i bzod pa ste/ 'di ni shin tu bzod pa ma yin no/ /'di dag ni yi ge'i sgra 'byung ba'o zhes bzod pa de ni brag ca'i sgra la bzod pa ste/ de ni shin tu bzod pa ma yin no/ /'di'ang mi rtag pa'o/ /bdag kyang mi rtag pa'o zhes bzod pa de ni mi rtag pa la 'dug pa'i bzod pa ste/ de ni shin tu bzod pa ma yin no/ /'di ni phyin ci log yin gyi bdag ni phyin ci log ma yin no zhes bzod pa de ni mtho dman gyi bzod pa ste/ de ni shin tu bzod pa ma yin no/ /bdag ni rigs kyi 'di ni mi rigs pa'o zhes bzod pa de ni rigs pa dang mi rigs pa'i bzod pa ste/ de ni shin tu bzod pa ma yin no/ /bdag ni lam bzang po la gnas kyi 'di ni lam ngan pa la gnas so zhes bzod pa de ni lam dang lam ma yin pa'i bzod pa ste/ de ni shin tu bzod pa ma yin no/ /bdag ni mi rtag pa la bzod kyi rtag pa la bdag mi bzod do zhes bzod pa de ni gnyen pos spangs pa'i bzod pa ste/ de ni shin tu bzod pa ma yin no/ /bdag ni sdug bsngal bzod kyi bde ba la bdag mi bzod do/ /bdag ni bdag med pa la bzod kyi bdag la ni bdag mi bzod do/ /bdag ni mi sdug pa la bzod kyi sdug pa la bdag mi bzod do zhes bya ba ni gnyen pos spong ba'i bzod pa ste/ de ni shin tu bzod pa ma yin no/ /bdag ni stong pa nyid la bzod kyi lta ba'i rnam pa la bdag mi bzod do/ /bdag ni mtshan ma med pa la bzod kyi mtshan mar rnam par rtog pa la bdag mi bzod do/ /bdag ni smon pa med pa la bzod kyi smon pa la bdag mi bzod do/ /bdag ni ma ngon par 'du mi byed pa la bzod kyi mngon par 'du byed pa la bdag mi bzod do/ /bdag ni nyon mongs pa zad pa la bzod kyi nyon mongs pa la bdag mi bzod do/ /bdag ni dge ba la bzod kyi mi dge ba la bdag mi bzod do/ /bdag ni 'jig rten las 'das pa la bzod kyi 'jig rten la bdag mi bzod do/ / bdag ni kha na ma tho ba med pa la bzod kyi kha na ma tho ba dang bcas pa la bdag mi bzod do/ /bdag ni zag pa med pa la bzod kyi zag pa dang bcas pa la bdag mi bzod do/ /bdag ni rnam par byang ba la bzod kyi kun nas nyon mongs pa la bdag mi bzod do/ /bdag ni mya ngan las 'das pa la bzod kyi 'khor ba la bdag mi bzod do zhes bya ba de ni gnyen pos spong ba'i bzod pa ste/ de ni shin tu bzod pa ma yin no/ /de la shin tu bzod pa gang zhe na/ stong pa nyid rtogs pa de la lta bar gyur pa yang bsal ba med/ stong pa nyid du sgro 'dogs pa yang med de/ lta bar gyur pa nyid stong pa'o zhes gang 'di la bzod pa de ni shin tu bzod pa'o/ /gang mtshan ma med par rtogs pa de la mtshan ma'i rnam par rtog pa yang bsal ba med/ mtshan ma med par sgro 'dogs pa yang med de/ mtshan ma'i rnam par rtog pa nyid stong pa ste/ gang 'di la bzod pa de ni shin tu bzod pa'o/ /gang smon pa med par rtogs pa de la smon pa bsal ba yang med/ smon pa med par sgro 'dogs pa yang med do/ /smon pa nyid stong pa ste/ gang 'di la bzod pa de ni shin tu bzod pa'o/ /gang mngon par 'du mi byed par rtogs pa de la mngon par 'du byed pa bsal ba yang med/ mngon par 'du mi byed pas sgro 'dogs pa yang med de/ mngon par 'du byed pa nyid stong pa ste/ gang 'di la bzod pa de ni shin tu bzod pa'o/ /gang nyon mongs pa zad par rtogs pa de la nyon mongs pa bsal ba yang med/ nyon mongs pa zad par sgro 'dogs pa yang med de/ nyon mongs pa nyid stong pa ste/ gang 'di la bzod pa de ni shin tu bzod pa'o/ /gang dge bar rtogs pa de la mi dge ba bsal ba yang med/ dge bar sgro 'dogs pa yang med de/ mi dge ba nyid stong pa ste/ gang 'di la bzod pa de ni shin tu bzod pa'o/ /gang 'jig rten las 'das par rtogs pa de la 'jig rten pa bsal ba yang med/ 'jig rten las 'das par sgro 'dogs pa yang med de/ 'jig rten pa nyid stong pa ste/ gang 'di la bzod pa de ni shin tu bzod pa'o/ /gang kha na ma tho ba med par rtogs pa de la kha na ma tho ba dang bcas pa bsal ba yang med/ kha na ma tho ba med par sgro 'dogs pa yang med de/ kha na ma tho ba dang bcas pa nyid stong pa ste/ gang 'di la bzod pa de nyid shin tu bzod pa'o/ /gang zag pa med par rtogs pa de la zag pa bsal ba yang med/ zag pa med par sgro 'dogs pa yang med de/ zag pa nyid stong pa ste/ gang de la bzod pa de ni shin tu bzod pa'o/ /gang rnam par byang ba rtogs pa de la kun nas nyon mongs pa bsal ba yang med/ rnam par byang bar sgro 'dogs pa yang med de/ kun nas nyon mongs pa nyid stong pa ste/ gang de la bzod pa de ni shin tu bzod pa'o/ /gang mya ngan las 'das par rtogs pa de la 'khor ba bsal ba yang med/ mya ngan las 'das par sgro 'dogs pa yang med de/ 'khor ba nyid stong pa ste/ gang 'di la bzod pa de ni shin tu bzod pa'o/ /gang ma skyes pa ma bskyed pa ma byung ba ma phyung ba de la 'jig pa gang yang med de/ 'jig pa med pas na zad pa med de/ gang 'di la bzod pa de ni shin tu bzod pa'o/ /gang ma byas pa mngon par 'du ma byas pa/ sgro 'dogs pa med pa/ rnam par ma brtags pa/ ma bsgrubs pa/ ma bstan pa/ nye bar ma gtugs pa de la skye ba gang yang med de/ gang skye ba med pa de ni mi skye ba'o/ /gang mi skye ba de ni shin tu bzod pa'o/ /gang de ltar bzod pa de ni mi skye ba la bzod pa'o/ /gang mi skye ba la bzod pa de ni skye ba med par bzod pa'o/ /gang skye ba med par bzod pa de ni shin tu bzod pa'o/ / de lta bu'i bzod pa'i ngo bo nyid du gyur cing de'i bdag nyid 'chang bas bzod chen 'chang ba'o/ /rab tu mi g.yo bas brtan pa'o/ /byang chub sems dpa'i sa 'od 'phro ba la ni brtson 'grus kyi pha rol tu phyin pa la lhag par spyod pa yin te/ de bas na/ /brtson 'grus chen po brtul ba yin/ /zhes bya ba'o/ /de yang brtson 'grus yang dag par blang ba ni brgyad de/ brgyad po gang zhe na/ 'di lta ste/ cho ga mi zad pa dang / brtul ba mi zad pa dang / yang dag par 'grub pa mi zad pa dang / sems can yongs su smin par byed pa mi zad pa dang / bsod nams kyi tshogs mi zad pa dang / ye shes kyi tshogs mi zad pa dang / shes rab kyi tshogs mi zad pa dang / sangs rgyas kyi chos thams cad yang dag par sgrub pa'i tshogs mi zad pa'o/ /btsun pa sha ra dwa ti'i bu de la byang chub sems dpa'i go cha mi zad pa gang zhe na/ gang 'khor ba na yongs su mi skyo ba ste/ de bskal pa 'di snyed cig tu go cha bgo/ bskal pa 'di snyed cig tu go cha mi bgo'o zhes bskal pa bgrangs pas byang chub mi tshol gyi/ go cha bsam gyis mi khyab pa nyid gon par byed de/ gal te 'khor ba'i sngon gyi mtha' ji snyed pa de snyed kyis nyin zhag gcig gyur la/ de lta bu'i nyin zhag gis zhag bco lnga zhing zla ba phyed zhag sum cus zla ba ste/ zla ba bcu gnyis shing lor gyur la/ lo'i bgrang ba 'di lta bu'i lo stong phrag brgya la byang chub kyi sems gcig bskyed cing de bzhin gshegs pa dgra bcom pa yang dag par rdzogs pa'i sangs rgyas gcig mthong la/ 'jug pa de lta bu dang bgrang ba de 'dra bas gang gA'i klung gi bye ma snyed kyi byang chub kyi sems bskyed pa dang / de bzhin gshegs pa mthong bas sems can gcig gi sems kyi spyod pa shes te/ 'jug pa de lta bu dang bgrang ba de 'dra bas sems can thams cad la yang de snyed de snyed kyi byang chub tu sems bskyed pa dang / de bzhin gshegs pa mthong bas so so re rer sems can thams cad kyi sems kyi spyod pa shes kyang mi 'gong ba'i go cha'o/ /sbyin pa'i pha rol tu phyin pa yongs su rdzogs par bya ba'i phyir 'jug pa 'di nyid dang bgrang ba 'di nyid kyis de bzhin gshegs pa gang gA'i klung gi bye ma snyed la rim gro byed pa dang / tshul khrims kyi pha rol tu phyin pa yongs su rdzogs par bya ba'i phyir 'jug pa 'di nyid du bgrang ba nyid kyis de bzhin gshegs pa gang gA'i klung gi bye ma snyed la rim gro byed pa dang / de bzhin du bzod pa dang / brtson 'grus dang / bsam gtan dang / shes rab kyi pha rol tu phyin pa yongs su rdzogs par bya ba'i phyir de bzhin gshegs pa gang gA'i klung gi bye ma snyed la rim gro byed pa dang / de bzhin du byang chub kyi phyogs kyi chos thams cad yongs su rdzogs par bya ba dang / mtshan dang dpe byad bzang po thams cad yongs su rdzogs par bya ba dang / de bzhin gshegs pa'i stobs dang / mi 'jigs pa dang / sangs rgyas kyi chos ma 'dres pa thams cad yongs su rdzogs par bya ba'i phyir de bzhin gshegs pa gang gA'i klung gi bye ma snyed la rim gro byed pa dang / 'jug pa 'di nyid dang / bgrang ba 'di nyid kyis de bzhin gshegs pa gang gA'i klung gi bye ma snyed mthong ba dang / byang chub tu sems bskyed pa dag gis skyes bu chen po'i mtshan gcig mngon par sgrub cing rnam grangs 'dis mtshan dang dpe byad thams cad yongs su 'grub pa mngon par sgrub par byed kyang mi 'gong ba'i go cha gang yin pa de ni byang chub sems dpa'i go cha mi zad pa zhes bya'o/ /de la byang chub sems dpa'i brtul ba mi zad pa ni gang zhe na/ byang chub sems dpa'i brtul ba mi zad pa ni gang stong gsum gyi stong chen po'i 'jig rten gyi khams mes yongs su gang ba las kyang 'bogs te/ de bzhin gshegs pa blta bar spro ba'o/ /byang chub sems dpa'i brtul ba ni chos nyan pa'i phyir spro ba'o/ /byang chub sems dpa'i brtul ba ni sems can yongs su smin par bya ba'i phyir spro ba'o/ /byang chub sems dpa'i brtul ba ni dge ba'i chos thams cad kyi phyir spro ba'o/ /byang chub sems dpa'i brtul ba ni thams cad mkhyen pa'i ye shes kyi phyir spro ba'o/ /byang chub sems dpa'i brtul ba ni pha rol gyi don gyi phyir 'jug pas na de'i phyir brtul ba mi zad pa zhes bya'o/ /pha rol zhi ba'i phyir/ pha rol la gdul ba'i phyir/ pha rol yongs su mya ngan las bzla ba'i phyir/ 'jug pas na de'i phyir brtul ba zhes bya'o/ /mi lhod pa dang / ma zhum pa dang / brten pa dang / mi bzlog pa dang / dge ba'i bsam pa dang / snying rje chen po la gnas shing rtag tu sems can gyi don la brtson par 'jug pas na de'i phyir brtul ba zhes bya'o/ /gom pa 'dor ba dang / gom pa 'jog cing 'gro ba thams cad du byang chub kyi sems mngon du byed do/ /sems can lta bar yang lta zhing nyon mongs pa'i phyogs su yang mi ltung ste/ 'di ni byang chub sems dpa'i brtul ba mi zad pa zhes bya'o/ /de la byang chub sems dpa'i yang dag par 'grub pa mi zad pa gang zhe na/ gang ji ltar dge ba'i sems skyes shing byung ba byang chub kyi phyir yongs su sngo bar byed pa 'di ni byang chub sems dpa'i yang dag par 'grub pa mi zad pa'o/ /de ci'i phyir zhe na/ byang chub tu yongs su bsngos pa'i phyir te/ byang chub tu yongs su bsngos pa'i dge ba'i rtsa ba ni byang chub kyi snying po la ma 'dug gi bar du bar ma dor yongs su zad pa 'am gtugs par 'gyur ba gang yang med do/ /btsun pa sha ra dwa ti'i bu 'di lta ste/ dper na chu'i thigs pa rgya mtsho chen por lhung ba ni bskal pas ma bsregs kyi bar du bar ma dor yongs su zad pa'am gtugs par mi 'gyur ro/ /de bzhin du byang chub tu yongs su bsngos pa'i dge ba'i rtsa ba yang byang chub kyi snying po la ma 'dug gi bar du bar ma dor yongs su zad pa'am gtugs par 'gyur ba gang yang med do/ /yang dag par 'grub pa zhes bya ba ni gang 'di yang dag pa'i sgrub pa ste/ yang dag par zhugs pa de ni dge ba'i rtsa ba gang dag yang dag par sgrub pa sems can thams cad bskyab pa dang sems can thams cad yongs su smin par bya ba dang / sems can thams cad dge ba'i rtsa ba la gzud pa'i phyir dge ba'i rtsa ba de dag yongs su sngo bar byed de/ thams cad mkhyen pa'i ye shes mngon par bsgrub pa'i phyir dge ba'i rtsa ba de dag yongs su bsngo'o/ /sems can thams cad nye bar 'tsho ba'i phyir dge ba'i rtsa ba de dag yongs su bsngo'o/ /sems can thams cad yongs su mya ngan las 'da' ba dang / thams cad mkhyen pa'i ye shes la rab tu dgod pa'i phyir dge ba'i rtsa ba de dag yongs su bsngo ste/ de ni byang chub sems dpa'i yang dag par 'grub pa mi zad pa zhes bya'o/ /de la byang chub sems dpa'i sems can yongs su smin par byed pa mi zad pa gang zhe na/ sems can gyi khams ni tshad med de/ de la byang chub sems dpas bgrod pa 'di lta bus 'jug par bya'o/ / gal te bdag gis nyin gcig la stong gsum gyi stong chen po'i 'jig rten gyi khams su gtogs pa'i sems can thams cad yongs su smin par bya ste/ tshul 'dis bskal pa dpag tu med pa grangs med bsam gyis mi khyab par sems can gyi khams yongs su smin par bya zhing / sems can gyi khams de snyed du dpag tu med pa/ de snyed du grangs med pa de snyed du bsam gyis mi khyab pa yongs su smin par bya ste/ de lta bur byas kyang sems can rnams kyi brgya'i cha gcig kyang smin par ma byas/ brgya stong gi cha dang / bye ba'i cha dang / bye ba brgya'i cha dang / bye ba stong gi cha dang / bye ba brgya stong gi cha dang / grangs dang cha dang / bgrang ba dang / dpe dang rgyur yang yongs su smin par ma byas so zhes gal te rab tu brjod pa 'di thos nas byang chub sems dpa' mi skrag mi dngang zhing dngang bar mi 'gyur ba de ni brtson 'grus brtsams pa'i byang chub sems dpar rig par bya ste/ 'di ni byang chub sems dpa'i sems can yongs su smin par byed pa mi zad pa'o/ /de la byang chub sems dpa'i bsod nams kyi tshogs mi zad pa gang zhe na/ byang chub sems dpa'i bsod nams ni tshad med de/ /de la byang chub sems dpas bgrang pa 'di 'dra bas 'jug par bya'o/ /sems can thams cad dang / 'das pa dang / da ltar byung ba dang / ma 'ongs pa'i slob pa dang / mi slob pa thams cad dang / nyan thos dang / rang sangs rgyas thams cad kyi bsod nams ji snyed pa bsod nams de snyed brgyar 'gyur pas de bzhin gshegs pa'i sku la spu'i khung bu gcig 'grub bo/ /de bzhin du spu'i khung bu thams cad re re nas yongs su 'grub pa'i spu'i khung bu thams cad du gtogs pa'i bsod nams kyi phung po ji snyed pa brgyar bsgyur te gtan pa med pa'i bsod nams kyi phung po gcig yang dag par bsgrubs pa de bzhin gshegs pa'i sku la dpe byad bzang po gcig 'grub ste/ de bzhin du dpe byad bzang po thams cad re re nas yongs su 'grub po/ /dpe byad bzang po thams cad du gtogs pa'i bsod nams kyi phung po ji snyed pa stong du bsgyur te gtan pa med pa'i bsod nams kyi phung po gcig bsgrubs pa des/ de bzhin gshegs pa'i sku la skyes bu chen po'i mtshan gcig mngon par 'grub ste/ de bzhin du sku la skyes bu chen po'i mtshan sum cu re re nas mngon par 'grub bo/ /skyes bu chen po'i mtshan sum cur gtogs pa'i bsod nams kyi phung po ji snyed pa stong phrag bcur bsgyur te gtan pa med pa'i bsod nams kyi phung po gcig yang dag par bsgrubs pa des de bzhin gshegs pa'i sku la smin mtshams kyi mdzod spu skyes bu chen po'i mtshan mngon par 'grub bo/ /mdzod spur gtogs pa'i bsod nams kyi phung po ji snyed pa de las stong phrag brgyar bsgyur ba'i bsod nams kyi phung po yang dag par bsgrubs pas de bzhin gshegs pa'i sku la dbu'i gtsug tor spyi gtsug bltar mi mthong ba skyes bu chen po'i mtshan mngon par 'grub bo/ /gtsug tor du gtogs pa'i bsod nams kyi phung po de las bye ba phrag stong du bsgyur ba de bas kyang lhag pa'i bsod nams kyi phung po yang dag par bsgrubs pas de bzhin gshegs pa'i chos kyi dung yongs su 'grub par 'gyur te/ chos kyi dung des de bzhin gshegs pa bzhed na 'jig rten gyi khams mtha' yas mu med pa dag dbyangs kyis go bar mdzad cing chos kyis 'dul bar bsam pa dang / dad pa ji lta ba bzhin du sems can thams cad kyi dbang po rnams tshim par mdzad do/ /byang chub sems dpa' bsod nams kyi tshogs la 'jug pa 'di thos nas mi skrag mi dngas zhing dngas par mi 'gyur ba 'di ni byang chub sems dpa'i bsod nams kyi tshogs mi zad pa zhes bya'o/ /de la byang chub sems dpa'i ye shes kyi tshogs mi zad pa gang zhe na/ byang chub sems dpa'i ye shes kyi tshogs ni tshad med de/ de la byang chub sems dpa' bgrang ba 'di 'dra bas 'jug par bya'o/ /stong gsum gyi stong chen po'i 'jig rten gyi khams na sems can gang dag 'khod pa de dag thams cad dad pas rjes su 'brang ba'i ye shes dang ldan par gyur kyang / de dag gi chos kyi rjes su 'brang ba'i ye shes dang ldan pa'i brgya'i char yang nye bar mi 'gro/ stong gi cha dang / brgya stong gi cha dang / bye ba'i cha dang / bye ba brgya'i cha dang / bye ba stong gi cha dang / bye ba brgya stong gi cha dang / grangs dang cha dang / bgrang ba dang / dpe dang / rgyur yang nye bar mi 'gro'o/ /de bzhin du chos kyi rjes su 'brang ba'i ye shes dang ldan pa rnams ni brgyad pa'i ye shes dang ldan pa la'o/ /brgyad pa'i ye shes dang ldan pa rnams ni rgyun du zhugs pa'i ye shes dang ldan pa rnams la'o/ /rgyun du zhugs pa'i ye shes dang ldan pa rnams ni lan cig phyir 'ong ba'i ye shes dang ldan pa rnams la'o/ /lan cig phyir 'ong ba'i ye shes dang ldan pa rnams ni phyir mi 'ong ba'i ye shes dang ldan pa rnams la'o/ /phyir mi 'ong ba'i ye shes dang ldan pa rnams ni dgra bcom pa'i ye shes dang ldan pa la'o/ /dgra bcom pa'i ye shes dang ldan pa rnams ni rang sangs rgyas kyi ye shes dang ldan pa la'o/ /rang sangs rgyas kyi ye shes dang ldan pa rnams ni bskal pa brgyas nges par 'byung ba'i byang chub sems dpa'i ye shes dang ldan pa'i brgya'i char yang nye bar mi 'gro ba nas dpe dang rgyu'i bar du yang nye bar mi 'gro'o/ /bskal pa brgyas nges par 'byung ba'i byang chub sems dpa'i ye shes dang ldan pa rnams ni bzod pa thob pa'i byang chub sems dpa'i ye shes dang ldan pa la'o/ /bzod pa thob pa'i byang chub sems dpa'i ye shes dang ldan pa rnams ni phyir mi ldog pa'i ye shes dang ldan pa la'o/ /phyir mi ldog pa'i byang chub sems dpa'i ye shes dang ldan pa rnams ni skye ba gcig gis thogs pa'i byang chub sems dpa'i ye shes dang ldan pa'i brgya'i char yang nye bar mi 'gro ba nas dpe dang rgyu'i bar du yang nye bar mi 'gro'o/ stong gsum gyi stong chen po'i 'jig rten gyi khams na sems can gang dag 'khod pa de dag thams cad skye ba gcig gis thogs pa'i byang chub sems dpa'i ye shes dang ldan par gyur kyang byang chub kyi snying po la 'dug pa'i byang chub sems dpa'i ye shes dang ldan pa'i brgya'i char yang nye bar mi 'gro ba nas dpe dang rgyu'i bar du yang nye bar mi 'gro'o/ /'jig rten gyi khams mtha' yas mu med pa dag na sems can gang 'khod pa dag thams cad byang chub kyi snying po la 'dug pa'i byang chub sems dpa'i ye shes dang ldan par gyur kyang / de dag gi de bzhin gshegs pa'i gnas dang gnas ma yin pa mkhyen pa'i ye shes kyi stobs kyi brgya'i char yang nye bar mi 'gro ba nas rgyu dang dpe'i bar du yang nye bar mi 'gro'o/ /de bzhin gshegs pa'i stobs dang mi 'jigs pa dang sangs rgyas kyi chos ma 'dres pa bco brgyad thams cad yongs su grub pa'i rim pa yang de bzhin te/ byang chub sems dpa'i gang ye shes kyi tshogs la 'jug pa 'di thos nas mi skrag mi dngang zhing dngang bar mi 'gyur ba 'di ni byang chub sems dpa'i ye shes kyi tshogs mi zad pa zhes bya'o/ /de la byang chub sems dpa'i shes rab kyi tshogs mi zad pa gang zhe na/ gang sems can thams cad kyi sems kyi spyod pa la 'jug pa zhes pa de ni shes rab kyi tshogs mi zad pa'o/ /sems can thams cad kyi 'das pa dang ma 'ongs pa dang da ltar byung ba'i sems ji snyed pa de dag sems can gcig gis sems kyi 'jug pa gcig la yod par 'gyur la/ tshul 'dis sems can thams cad de snyed du tshad med pa'i sems kyis gang bar gyur te/ 'das pa dang ma 'ongs pa dang da ltar byung ba'i sems can de dag thams cad kyi 'dod chags dang / zhe sdang dang / gti mug gang dag yin pa de dag thams cad sems can gcig gi sems gcig la yod par gyur la/ rnam grangs 'dis sems can thams cad de snyed du tshad med pa'i nyon mongs pas gang ba'i sems su gyur na yang / de la byang chub sems dpa' gang shes rab kyi tshogs gcig bsgrubs pas sems can de dag gi sems su gtogs pa'i sems bskyed pa ji snyed pa'i sems bskyed pa de dag thams cad so so'i dmigs byung ste zhig cing zhu ba rnams shes par 'gyur ba de lta bu'i shes rab kyi tshogs bskyed par bya'o/ /shes rab des kyang sems can de dag gi sems su snang ba dang nyon mongs par snang ba dus gsum dang ldan pa gang yang mi shes pa med do/ /btsun pa sha ra dwa ti'i bu 'di lta ste dper na nam mkha' 'dis ma khyab pa gang yang med do/ /de bzhin du byang chub sems dpa'i shes rab 'dis kyang sems can de dag gi sems snang ba'am nyon mongs par snang ba dus gsum dang ldan pa de dag gsal bar ma gyur pa'am yongs su mi shes pa med de/ 'di ni byang chub sems dpa'i shes rab kyi tshogs mi zad pa zhes bya'o/ /de la byang chub sems dpa'i sangs rgyas kyi chos thams cad yang dag par bsgrub pa'i tshogs mi zad pa gang zhe na/ dge ba'i rtsa ba'i tshogs thams cad bsags pa dang / pha rol tu phyin pa thams cad kyi tshogs bsags pa dang / byang chub kyi phyogs kyi chos thams cad bsags pa gang yin pa de ni sangs rgyas kyi chos thams cad yang dag par bsgrub pa'i tshogs mi zad pa'o/ /dang po sems bskyed pa nas bzung ste byang chub kyi snying po la 'dug gi bar du byang chub tu sems bskyed pa'i dmigs pa dang / sbyor ba bsags pa gang dag yin pa dge ba'i sems bskyed pa'i tshogs gang dag gis sangs rgyas kyi chos thams cad yang dag par bsgrubs pa 'di ni byang chub sems dpa'i sangs rgyas kyi chos thams cad yang dag par bsgrub pa'i tshogs mi zad pa zhes bya ste/ btsun pa sha ra dwa ti'i bu brgyad po de dag ni byang chub sems dpa' rnams kyi brtson 'grus yang dag par blang ba'o/ / btsun pa sha ra dwa ti'i bu gzhan yang byang chub sems dpa' rnams kyi brtson 'grus mi zad pa ni gang lus kyi dge ba'i las kyi rten dang / ngag gi dge ba'i las kyi rten dang / yid kyi dge ba'i las kyi rten to/ /de ci'i phyir zhe na/ brtson 'grus gang ji snyed pa de dag thams cad lus dang ngag dang sems dang ldan pa'i phyir te/ lus dang ngag gi brtson 'grus pas sems kyi brtson 'grus nyid mchog ces bshad do/ /de la sems kyi brtson 'grus gang zhe na/ sems kyi 'jug pa dang sems gnas pa ste/ de la sems kyi 'jug pa gang zhe na/ gang byang chub kyi sems kyi rtsom pa'o/ /de la sems gnas pa gang zhe na/ byang chub kyi sems nye bar ma zhi ba'o/ /de la sems 'jug pa gang zhe na/ gang sems can rnams la snying rje ba'o/ /sems gnas pa gang zhe na/ gang bdag med pa la bzod pa'o/ /de la 'jug pa gang zhe na/ /gang sems can thams cad sdud pa'o/ /gnas pa gang zhe na/ gang chos thams cad mi 'dzin pa'o/ /de la 'jug pa gang zhe na/ gang 'khor ba na mi skyo ba'o/ /gnas pa gang zhe na/ khams gsum pa mi dmigs pa'o/ /de la 'jug pa gang zhe na/ bdog pa thams cad yongs su gtong ba'o/ /gnas pa gang zhe na/ gang sbyin pas rlom sems su mi byed pa'o/ /de la 'jug pa gang zhe na/ gang bslab pa yang dag par len pa'o/ /gnas pa gang zhe na/ gang bslab pas rlom sems su mi byed pa'o/ /de la 'jug pa gang zhe na/ gang bzod cing mi mjed pa'o/ /gnas pa gang zhe na/ gang sems la rma mi phyin pa'o/ /de la 'jug pa gang zhe na/ gang dge ba'i rtsa ba thams cad rtsom pa'o/ /gnas pa gang zhe na/ gang sems dben pa'o/ /de la 'jug pa gang zhe na/ gang bsam gtan yang dag par sgrub pa'o/ /gnas pa gang zhe na/ gang sems la nges par sems pa'o/ /de la 'jug pa gang zhe na/ gang thos pa la chog mi shes pa'o/ / gnas pa gang zhe na/ gang tshul bzhin sbyor ba'o/ /de la 'jug pa gang zhe na/ gang ji skad thos pa bzhin du chos ston pa'o/ /gnas pa gang zhe na/ gang brjod du med pa'i chos nyid do/ /de la 'jug pa gang zhe na/ gang shes rab kyi tshogs yongs su tshol ba'o/ /gnas pa gang zhe na/ gang spros pa shin tu chad pa'o/ /de la 'jug pa gang zhe na/ gang tshangs pa'i gnas pa rnams la sogs pa'o/ /gnas pa gang zhe na/ /gang yang dag pa'i shes pas btang snyoms pa'o/ /de la 'jug pa gang zhe na/ gang mngon par shes pa lnga yongs su rdzogs par byed pa'o/ /gnas pa gang zhe na/ gang zag pa med pa la 'dris par byed pa'o/ /de la 'jug pa gang zhe na/ gang dran pa nye bar gzhag pa bskyed pa'o/ /gnas pa gang zhe na/ gang dran pa yid la byed pa med pa'o/ /de la 'jug pa gang zhe na/ gang yang dag par spong ba la sbyor ba'o/ /gnas pa gang zhe na/ gang dge ba dang mi dge ba'i sems dang bral ba'o/ /de la 'jug pa gang zhe na/ gang rdzu 'phrul gyi rkang pa mngon par sgrub pa'o/ /gnas pa gang zhe na/ gang lhun gyis grub par bya ba la 'jug pa'o/ /de la 'jug pa gang zhe na/ gang dbang po la mkhas pa'o/ /gnas pa gang zhe na/ gang dbang po med pa'i chos la rtog pa'o/ /de la 'jug pa gang zhe na/ gang stobs yang dag par bsgrub pa'o/ /gnas pa gang zhe na/ gang mi brdzi ba'i ye shes so/ /de la 'jug pa gang zhe na/ gang byang chub kyi yan lag yang dag par 'byung ba'o/ /gnas pa gang zhe na/ gang chos rab tu rnam par 'byed pa la mkhas pa'i ye shes so/ /de la 'jug pa gang zhe na/ gang lam gyi tshogs tshol ba'o/ /gnas pa gang zhe na/ gang gar yang mi 'gro ba'o/ /de la 'jug pa gang zhe na/ gang zhig gnas tshol ba'o/ /gnas pa gang zhe na/ gang zhig gnas kyi sems zhi ba'o/ /de la 'jug pa gang zhe na/ gang lhag mthong spyod pa'o/ /gnas pa gang zhe na/ gang chos nyid shes pa'o/ /de la 'jug pa gang zhe na/ gang rgyu rtogs pa'o/ de la gnas pa gang zhe na/ gang rgyu kun shes pa'o/ /de la 'jug pa gang zhe na/ gang gzhan gyi sgra thos pa'o/ /gnas pa gang zhe na/ gang chos la nan tan byed pa'o/ /de la 'jug pa gang zhe na/ gang lus kyi rgyan no/ /gnas pa gang zhe na/ gang ngag gi chos nyid do/ /de la 'jug pa gang zhe na/ gang ngag gi rgyan to/ /gnas pa gang zhe na/ gang 'phags pa'i mi smra ba'o/ /de la 'jug pa gang zhe na/ gang rnam par thar pa gsum la mos pa'o/ /gnas pa gang zhe na/ gang byed pa med pa'o/ /de la 'jug pa gang zhe na/ gang bdud bzhi yongs su spong pa'o/ /gnas pa gang zhe na/ gang bag chags dang nyon mongs pa'i mtshams sbyor ba thams cad bstsal ba'o/ /de la 'jug pa gang zhe na/ gang thabs su lta ba'o/ /gnas pa gang zhe na/ gang shes rab tu lta ba'o/ /de la 'jug pa gang zhe na/ gang rtsom par lta ba'o/ /de la gnas pa gang zhe na/ gang nyams su len par byed par lta ba'o/ /de la 'jug pa gang zhe na/ gang brdar lta ba'o/ /gnas pa gang zhe na/ gang don dam par lta ba ste/ 'di ni sems kyi brtson 'grus mi zad pa de yongs su rdzogs par bya ba'i phyir gang 'jug pa thams cad dang gnas pa dang / mtshan ma thams cad dang bral ba dang / de mtshan ma'i las thams cad du yang 'jug la ye shes kyi las yang dag par gnas pa ste/ de las thams cad kyang ye shes kyi bya ba bya'o/ /de la byang chub sems dpa'i ye shes kyi las gang zhe na/ gang dge ba'i rtsa ba'i rgyu dang / sems can thams cad la snying rje chen po'i rgyur 'dus byas su yang mi gtong zhing / sangs rgyas kyi ye shes kyi rgyur 'dus ma byas su mi lta bas te/ 'di ni byang chub sems dpa' rnams kyi brtson 'grus kyi pha rol tu phyin pa mi zad pa zhes bya'o/ /de ltar ji skad gsungs pa'i brtson 'grus yongs su rdzogs pas na/ brtson 'grus chen po brtul ba yin/ /zhes bya'o/ /byang chub sems dpa'i sa sbyang dka' ba la ni bsam gtan gyi pha rol tu phyin pa la lhag par spyod pa yin te/ de bas na/ /bsam gtan chen po ting 'dzin gnas/ /zhes bya'o/ /de yang bsam gtan ni bzhi ste/ nyan thos dang rang sangs rgyas dang sangs rgyas dang byang chub sems dpa' thams cad kyi thun mong yin pa las byang chub sems dpa' rnams bsam pa'i rnam pa chen por gyur pa yin te/ de yang gang zhe na/ 'di la byang chub sems dpa'i ni 'dod pa dag las dben pa sdig pa mi dge ba'i chos las dben pa rtog pa dang bcas pa dpyod pa dang bcas pa dben pa las skyes pa'i dga' ba dang bde ba can bsam gtan dang po rdzogs par byas te gnas so/ /des 'dod pa rnams ni bsam gtan dang po'i mi mthun pa'i phyogs yin te/ gang sred pa de dag las dben pa'o/ /de la sdig pa mi dge ba'i chos rnams ni chags pa dang / zhe sdang dang / gti mug ste/ gzhi de las srog gcod pa dang / ma byin par len pa dang / 'dod pas log par g.yem pa dang / brdzun du smra ba dang / phra ma dang / ngag rtsub po dang / tshig kyal pa dang / brnab sems dang / gnod sems dang / log par lta ba'o/ /'di ni sdig pa mi dge ba'i chos rnams zhes bya ste/ de dag las dben pa ni bsam gtan dang po'o/ /rtog pa dang lhan cig pa ni rtog pa dang bcas pa ste/ rtog pa de dag gang zhe na/ gang dag bsam gtan dang po dang mthun pa'i rtog pa ste/ de cho ga bzhin du rtog cing de dag kun kyang 'dul bas na de dag ni rtog pa zhes bya ste/ shes pa dang khong du chud pa dang dpyod pa dang rab tu rtog pa dang ting nge 'dzin du byed pa ni rtog pa'o/ /de la dpyod pa gang zhe na/ bsam gtan dang po dang mthun pa'i rtog pa de dag nyid la dpyod pa dang rnam par dpyod pa dang nye bar longs spyod pa dang kun du longs spyod pa dang ting nge 'dzin du byed pa dang / sems rjes su 'gro ba ni dpyod pa zhes bya ste/ de dag dang lhan cig pa ni rtog pa dang bcas pa dang / dpyod pa dang bcas pa bsam gtan dang po'o/ /dga' ba dang bde ba dben pa las skyes pas de'i phyir dben pa las skyes pa'i dga' ba dang bde ba zhes bya'o/ /rdzogs par byas te gnas zhes bya ba la/ rdzogs par byas zhes bya ba ni sdom pa dang sdom par byed pa dang / sbed pa dang sbed par byed pa dang / ro myang ba dang / mngon par dga' ba ste/ bsam gtan dang po de la gnas pa'i byang chub sems dpa'i ni mi skye ba'i chos la bzod pa khong du chud par bya ba'i 'dun pa dang 'dod pa thob ste/ de mi skye ba'i chos la bzod pa'i 'dun pa dang 'dod pa des bsam gtan dang po snying por 'du shes pa ma yin no/ /de bsam gtan gnyis pa rtsom ste/ de bsam gtan dang po'i rtog pa dang dpyod pa de dag zhi bar byed nye bar zhi bar byed/ de dag las sems rab tu zhi bar byed cing bsam gtan gnyis pa'i yongs su 'grub pa'i rgyu tshol te/ de rtog pa dang dpyod pa dang bral bas nang yongs su dang ste/ sems kyi rgyud gcig tu gyur pas rtog pa med pa dang / dpyod pa med pa dga' ba dang ldan pa bsam gtan gnyis pa rdzogs par byas te gnas so/ /de la nang yongs su dang ba ni de'i bsam gtan gnyis pa'i mi mthun pa'i phyogs kyi chos gang yin pa de dag nye bar zhi ba dang / dang ba yin te/ de'i phyir nang yongs su dang ba zhes bya'o/ /rgyud gcig tu gyur zhes bya ba ni bsam gtan dang po'i rtog pa dang dpyod pa de dag thams cad rab tu zhi nas rgya mtsho'i chu ltar ro gcig tu gyur pa thob pa'o/ /'di lta ste dper na rgya mtsho chen por chu 'bab pa rnams lan tshwa'i ror ro gcig par 'gyur ba de bzhin du byang chub sems dpa' bsam gtan gnyis pa la snyoms par zhugs pa bsam gtan dang po'i rtog pa dang dpyod pa de dag thams cad zhi nas ro gcig tu 'gyur te/ de ting nge 'dzin zhes bya'o/ /ting nge 'dzin de las de sangs rgyas dang chos dang / dge 'dun la dga' ba skyes te/ dkon mchog gsum la dga' bas dge ba'i chos rnams rdzogs par 'gyur ro/ /de las mi skye ba'i chos la bzod pa thob pa'i 'dun pa shin tu 'bar ba dang / shin tu 'od gsal ba dang / shin tu yid du 'ong ba 'thob bo/ /de la chos la bzod pa la 'dun pa des bsam gtan gnyis pa de la ma chags te/ bsam gtan gsum pa kun du tshol lo/ /de 'di snyam du sems te/ dga' ba ni bsam gtan gsum pa'i sgrib pa yin no snyam nas de dga' ba de la 'dod chags dang bral nas btang snyoms can dran pa yongs su dag pa 'phags pa rnams kyis gang de dga' ba med pa bde ba la gnas pa zhes brjod pa bsam gtan gsum pa rdzogs par byas te gnas so/ /ting nge 'dzin las skyes ba'i dga' ba la 'dod chags dang bral ba 'thob pa de gang de dga' ba med pa'i bde ba de ni gtan du bde ba ma yin gyi zad pa'i chos can te/ de mi rtag cing mi brtan la ther zug ma yin zhing de yid brtan du mi rung ngo snyam pa'i sems de lta bu 'thob po/ /de de ltar shes nas mi skye ba'i chos la bzod pa rab tu thob pa'i sems 'dun pa drag po chen po 'thob po/ /de mi skye ba'i chos kyi 'dun pa drag po des bde ba dang sdug bsngal la mngon par chags pa mi skye'o/ /de bde ba yang spangs te snga nas sdug bsngal yang spangs shing yid bde ba dang yid mi bde ba nub pas bde ba yang ma yin sdug bsngal ba ma yin pa btang snyoms dang dran pa yongs su dag pa bsam gtan bzhi pa yongs su rdzogs par byas te gnas so/ /de bsam gtan bzhi pa la snyoms par zhugs pas sems mnyen pa dang / sems 'dod par bya ba dang / sems las su rung ba dang / sems 'od gsal ba dang / sems drang ba dang / sems bde ba de sems can thams cad kyi phyir mngon par dga' ba dang / de sems can thams cad la phan pa dang bde bar mngon par phyogs par 'gyur bas mi skye ba'i chos la bzod pa thob pa'i snang ba skye bar 'gyur te/ de'i gong du de la lhun gyis grub par lam la 'jug cing gnas par 'gyur ro/ /rnam pa gzhan yang btsun pa sha ra dwa ti'i bu byang chub sems dpa' rnams kyi bsam gtan gyi pha rol tu phyin pa mi zad pa ni rnam pa bcu drug ste/ de ni nyan thos dang rang sangs rgyas thams cad la med do/ /de la rnam pa bcu drug po dag gang zhe na/ 'di lta ste/ de bzhin gshegs pa'i bsam gtan yongs su rdzogs par bya ba'i phyir byang chub sems dpa' rnams kyi bsam gtan ni de la chags pa'o/ /bdag bde ba la ma chags pa'i byang chub sems dpa' rnams kyi bsam gtan ni ro myang ba med pa'o/ / sems can thams cad kyi nyon mongs pa spang ba'i phyir byang chub sems dpa' rnams kyi bsam gtan ni snying rje chen po la dmigs pa'o/ /'dod pa'i khams su dmigs pa'i phyir byang chub sems dpa' rnams kyi bsam gtan ni ting nge 'dzin ldog pa'o/ /sems can thams cad kyi sems kyi spyod pa kun shes pa'i phyir byang chub sems dpa' rnams kyi bsam gtan ni mngon par shes pa yongs su sbyang ba byas pa'o/ /sems kyi dbang phyug shes pa'i phyir byang chub sems dpa' rnams kyi bsam gtan ni sems las su rung ba'o/ /gzugs dang gzugs med pa'i khams zil gyis gnon pa'i phyir byang chub sems dpa' rnams kyi bsam gtan ni bsam gtan dang / rnam par thar pa dang / ting nge 'dzin dang snyoms par 'jug pa dang / ldang ba thams cad shes pa'o/ /nyan thos dang rang sangs rgyas thams cad kyi snyoms par 'jug pa zil gyis gnon pa'i phyir byang chub sems dpa' rnams kyi bsam gtan ni zhi ba dang rab tu zhi ba'o/ /shin tu mthar thug pa'i phyir byang chub sems dpa' rnams kyi bsam gtan ni mi 'khrugs pa'o/ /nyon mongs pa dang bag chags kyi mtshams sbyor ba thams cad legs par 'joms pa'i phyir byang chub sems dpa' rnams kyi bsam gtan ni log par bsgrub pa'i gnyen po'o/ /'jig rten thams cad las bsgral ba'i phyir byang chub sems dpa' rnams kyi bsam gtan ni shes rab la 'jug pa'o/ /sems can thams cad bsgral ba'i phyir byang chub sems dpa' rnams kyi bsam gtan ni sems can thams cad kyi bsam pa sngon du 'gro ba'o/ /de bzhin gshegs pa'i bsam gtan mi zad pa yongs su rdzogs par bya ba'i phyir byang chub sems dpa' rnams kyi bsam gtan ni dkon mchog gsum gyi rigs mi gcod pa'o/ /rtag tu mnyam par gzhag pa'i phyir byang chub sems dpa' rnams kyi bsam gtan ni ma nyams pa'o/ /sangs rgyas kyi chos thams cad yongs su rdzogs par bya ba'i phyir byang chub sems dpa' rnams kyi bsam gtan ni chos thams cad la dbang byed pa'i ye shes so/ /ye shes kyi bdag nyid che ba'i phyir byang chub sems dpa' rnams kyi bsam gtan ni nam mkha' ste/ btsun pa sha ra dwa ti'i bu 'di ni byang chub sems dpa' rnams kyi bsam gtan gyi pha rol tu phyin pa rnam pa bcu drug ste/ gang nyan thos dang rang sangs rgyas dag la med pa'o/ /de la bsam gtan yongs su sbyangs pa gang zhe na/ gang mngon par shes pa dang / ye shes yongs su rdzogs pa'o/ /de la mngon par shes pa ni gang / ye shes ni gang zhe na/ gang gi gzugs su snang ba thams cad mthong ba 'di ni mngon par shes pa zhes bya'o/ /gang gi gzugs thams cad kyi chos nyid mi zad par shes kyang mi zad pa'i chos mngon sum du mi byed pa 'di ni ye shes zhes bya'o/ /gang gi sgrar grag pa thams cad shes pa de ni mngon par shes pa zhes bya'o/ /gang sgra thams cad sngon gyi mtha' dang phyi ma'i mthar brjod du med par shes pa 'di ni ye shes zhes bya'o/ /gang gis sems can thams cad kyi sems kyi spyod pa rnams shes pa 'di ni mngon par shes pa zhes bya'o/ /gang sems 'gog par shes la sems 'gog pa mngon sum du mi byed pa 'di ni ye shes zhes bya'o/ /gang sngon gyi mtha' dang / phyi ma'i mtha' rjes su dran pa 'di ni mngon par shes pa zhes bya'o/ /gang dus gsum la ma chags par shes pa 'di ni ye shes zhes bya'o/ /gang sangs rgyas thams cad kyi zhing du 'gro ba 'di ni mngon par shes pa zhes bya'o/ /gang gis zhing nam mkha' dang mtshungs par shes pa 'di ni ye shes zhes bya'o/ / gang dbyer med pa'i chos 'dod pa 'di ni mngon par shes pa zhes bya'o/ /gang chos thams cad mnyam par mthong ba'i shes pa 'di ni ye shes zhes bya'o/ /gang 'jig rten thams cad dbyer med pa'i mtshan nyid 'di ni mngon par shes pa zhes bya'o/ /gang 'jig rten gyi chos thams cad dang ma 'dres par shes pa 'di ni ye shes zhes bya'o/ /gang brgya byin dang tshangs pa dang 'jig rten skyong ba rnams zil gyis gnon pa 'di ni mngon par shes pa zhes bya'o/ /gang nyan thos dang rang sangs rgyas thams cad kyi spyi bor shes pa 'di ni ye shes zhes bya ste/ btsun pa sha ra dwa ti'i bu de dag ni byang chub sems dpa' rnams kyi bsam gtan yongs su sbyang ba zhes bya'o/ /yang sems can thams cad kyi nyon mongs pa dang sems g.yeng ba ji snyed par byang chub sems dpa' rnams kyi bsam gtan gyi tshogs dang sems gzhag pa'ang de snyed de/ sems can thams cad kyi nyon mongs pa dang sems g.yeng ba ji snyed pa de snyed du byang chub sems dpas kyang bsam gtan gyi tshogs yang dag par bsgrub par bya'o/ /mnyam pa de nyid de la gnas pas na de'i phyir mnyam par gzhag pa zhes bya'o/ /sems can mnyam pa nyid dang / bsam pa mnyam pa nyid dang / lhag pa'i bsam pa mnyam pa nyid dang / sbyor ba mnyam pa nyid dang / sbyin pa dang / tshul khrims dang / bzod pa dang / brtson 'grus dang / bsam gtan dang / shes rab mnyam pa nyid dang / sangs rgyas kyi chos thams cad mnyam pa nyid la gnas pas na de'i phyir mnyam par gzhag pa zhes bya'o/ /ting nge 'dzin gang dang mnyam pa byang chub kyang de dang mnyam mo/ /byang chub gang dang mnyam pa sems can thams cad kyang de dang mnyam mo/ /sems can thams cad kyang de dang mnyam pa chos thams cad kyang de dang mnyam pa ste/ mnyam pa nyid de la snyoms par zhugs pas na de'i phyir snyoms par zhugs pa zhes bya'o/ /byang chub gang dang mnyam pa stong pa nyid kyang / de dang mnyam mo/ /stong pa nyid gang dang mnyam pa sems can thams cad kyang de dang mnyam mo/ /sems can thams cad gang dang mnyam pa chos thams cad kyang de dang mnyam ste/ mnyam pa nyid de la snyoms par zhugs pas na de'i phyir snyoms par zhugs pa zhes bya'o/ /stong pa nyid gang dang mnyam pa mtshan ma med pa yang de dang mnyam mo/ /mtshan ma med pa gang dang mnyam pa sems can thams cad kyang de dang mnyam mo/ /sems can thams cad gang dang mnyam pa chos thams cad kyang de dang mnyam ste/ mnyam pa nyid de la snyoms par zhugs pas na de'i phyir snyoms par zhugs pa zhes bya'o/ /mtshan ma med pa gang dang mnyam pa smon pa med pa'ang de dang mnyam mo/ /smon pa med pa gang dang mnyam pa sems can thams cad kyang de dang mnyam mo/ /sems can thams cad gang dang mnyam pa chos thams cad kyang de dang mnyam mo/ /mnyam pa nyid de la snyoms par zhugs pas na de'i phyir snyoms par zhugs pa zhes bya'o/ /smon pa med pa gang dang mnyam pa mngon par 'du mi byed pa'ang de dang mnyam mo/ /mngon par 'du mi byed pa gang dang mnyam pa sems can thams cad kyang de dang mnyam mo/ /sems can thams cad gang dang mnyam pa chos thams cad kyang de dang mnyam ste/ mnyam pa nyid de la snyoms par zhugs pas na de'i phyir snyoms par zhugs pa zhes bya'o/ /mngon par 'du mi byed pa gang dang mnyam pa mi skye ba yang de dang mnyam mo/ /mi skye ba gang dang mnyam pa sems can thams cad kyang de dang mnyam mo/ /sems can thams cad gang dang mnyam pa chos thams cad kyang de dang mnyam ste/ mnyam pa nyid de la snyoms par zhugs pas na de'i phyir snyoms par zhugs pa zhes bya'o/ /mi skye ba gang dang mnyam pa mi 'byung ba yang de dang mnyam mo/ /mi 'byung ba gang dang mnyam pa sems can thams cad kyang de dang mnyam mo/ /sems can thams cad gang dang mnyam pa chos thams cad kyang de dang mnyam ste/ mnyam pa nyid de la snyoms par zhugs pas na de'i phyir snyoms par zhugs pa zhes bya'o/ /mi 'byung ba gang dang mnyam pa dngos po med pa yang de dang mnyam mo/ /dngos po med pa gang dang mnyam pa sems can thams cad kyang de dang mnyam mo/ /sems can thams cad gang dang mnyam pa chos thams cad kyang de dang mnyam ste/ mnyam pa nyid de la snyoms par zhugs pas na de'i phyir snyoms par zhugs pa zhes bya'o/ /dngos po med pa gang dang mnyam pa rnam par dag pa yang de dang mnyam mo/ /rnam par dag pa gang dang mnyam pa sems can thams cad kyang de dang mnyam mo/ /sems can thams cad gang dang mnyam pa chos thams cad kyang de dang mnyam ste/ mnyam pa nyid de la snyoms par zhugs pas na de'i phyir snyoms par zhugs pa zhes bya'o/ /rang gi sems mnyam pas sems can thams cad kyi sems mnyam pa nyid de/ de la zhugs pas na de'i phyir snyoms par zhugs pa zhes bya'o/ /de lta bu la snyoms par zhugs pas na/ bsam gtan chen po'i ting 'dzin gnas/ /zhes bya'o/ /byang chub sems dpa'i sa mngon du gyur pa la ni shes rab kyi pha rol tu phyin pa la lhag par spyod pa yin la/ de'i bdag nyid can yin pas na/ shes rab chen po lus 'chang ba/ /zhes bya ste/ shes rab nyid lus yin la de'i bdag nyid kyis 'dzin par mdzad pas na shes rab chen po lus 'chang ba'o/ /de yang shes rab de'i rnam pa ni ji lta bu/ 'jug pa ni ci zhe na/ thos pa ni rnam pa'o/ /tshul bzhin yid la byed pa ni 'jug pa'o/ /thos pa yang rnam pa ni ji lta bu/ 'jug pa ni ci zhe na/ byang chub sems dpa' rnams kyi thos pa'i rnam pa ni brgyad cu rtsa bzhi ste/ 'di lta ste/ 'dun pa'i rnam pa dang / bsam pa'i rnam pa dang / lhag pa'i bsam pa'i rnam pa dang / sbyor ba'i rnam pa dang / dge ba'i bshes gnyen gyi rnam pa dang / nga rgyal med pa'i rnam pa dang / bag yod pa'i rnam pa dang / gus par byed pa'i rnam pa dang / mthun par 'dzin pa'i rnam pa dang / bka' blo bde ba'i rnam pa dang / bsnyen bkur byed pa'i rnam pa dang / rna ba blags te nyan pa'i rnam pa dang / yid la byed pa'i rnam pa dang / rnam par mi g.yeng ba'i rnam pa dang / gnas kyi rnam pa dang / chos la rin po cher 'du shes pa'i rnam pa dang / sman du 'du shes pa'i rnam pa dang / nyon mongs pa'i nad thams cad zhi bar byed pa'i rnam pa dang / dran pa'i snod kyi rnam pa dang / rtogs pa shes pa'i rnam pa dang / blo gros 'dod pa'i rnam pa dang / blo la 'jug pa'i rnam pa dang / sangs rgyas kyi chos la mi ngoms par nyan pa'i rnam pa dang / gtong ba spel ba'i rnam pa dang / dul zhing cang shes pa'i rnam pa dang / mang du thos pa la brten pa'i rnam pa dang / bsti stang du byas te dga' ba myong bar byed pa'i rnam pa dang / lus bde ba'i rnam pa dang / sems rab tu dga' ba'i rnam pa dang / mi skyo bar nyan pa'i rnam pa dang / don nyan pa'i rnam pa dang / chos nyan ba'i rnam pa dang / nan tan du nyan pa'i rnam pa dang / gzhan gyis bstan pa nyan pa'i rnam pa dang / chos thos pa nyan pa'i rnam pa dang / mngon par shes pa nyan pa'i rnam pa dang / theg pa gzhan la 'dod pa med pa'i rnam pa dang / pha rol tu phyin pa nyan pa'i rnam pa dang / byang chub sems dpa'i sde snod nyan pa'i rnam pa dang / bsdu ba'i dngos po nyan pa'i rnam pa dang / thabs mkhas pa nyan pa'i rnam pa dang / tshangs pa'i gnas pa nyan pa'i rnam pa dang / dran pa dang shes bzhin nyan pa'i rnam pa dang / skye ba la mkhas pa'i rnam pa dang / mi skye ba la mkhas pa'i rnam pa dang / mi sdug pa'i rnam pa dang / byams pa'i rnam pa dang / rten cing 'brel par 'byung ba'i rnam pa dang / mi rtag pa'i rnam pa dang / sdug bsngal ba'i rnam pa dang / bdag med pa'i rnam pa dang / zhi ba'i rnam pa dang / stong pa nyid kyi rnam pa dang / mtshan ma med pa'i rnam pa dang / smon pa med pa'i rnam pa dang / mngon par 'du mi byed pa'i rnam pa dang / dge ba mngon par 'du byed pa'i rnam pa dang / bden pas byin gyis brlabs pa'i rnam pa dang / chud mi gzon pa'i rnam pa dang / rang gi kha na las pa'i rnam pa dang / rang gi sems srung ba'i rnam pa dang / brtson 'grus mi gtong ba'i rnam pa dang / chos la nges par sems pa'i rnam pa dang / nyon mongs pa'i gnyen po'i rnam pa dang / rang gi phyogs srung ba'i rnam pa dang / pha rol gyi phyogs dang nyon mongs pa tshar gcod pa'i rnam pa dang / nor bdun yang dag par 'du ba'i rnam pa dang / dbul ba thams cad gcod pa'i rnam pa dang / mdzangs pas bsngags pa'i rnam pa dang / mkhas pa mngon par dga' ba'i rnam pa dang / 'phags pa kun shes pa'i rnam pa dang / 'phags pa ma yin pa dad par byed pa'i rnam pa dang / bden pa mthong ba'i rnam pa dang / phung po'i skyon rnam par spangs pa'i rnam pa dang / 'dus byas kyi skyon la yongs su 'jal ba'i rnam pa dang / don la rton pa'i rnam pa dang / chos la rton pa'i rnam pa dang / ye shes la rton pa'i rnam pa dang / nges pa'i don gyi mdo sde la rton pa'i rnam pa dang / sdig pa thams cad mi bya ba'i rnam pa dang / bdag dang gzhan la phan pa'i rnam pa dang / legs par byas pa'i las kyi rnam pa dang / mi 'gyod pa'i rnam pa dang / khyad par du 'gro ba'i rnam pa dang / sangs rgyas kyi chos thams cad 'thob pa'i rnam pa ste/ de dag ni byang chub sems dpa' rnams kyi thos pa rnam pa brgyad cu rtsa bzhi zhes bya'o/ /btsun pa sha ra dwa ti'i bu de la byang chub sems dpa' rnams tshul bzhin yid la byed pa la 'jug pa ni sum cu rtsa gnyis te/ sum cu rtsa gnyis gang zhe na/ 'di lta ste/ zhi gnas kyi gnas la 'jug pa dang / lhag mthong rnam par dpyod pa'i gnas la 'jug pa dang / sems las su rung ba la 'jug pa dang / lus dben pa la 'jug pa dang / sems dben pa la 'jug pa dang / rten cing 'brel par 'byung ba la 'jug pa dang / bden pa'i rjes su mthun pa la 'jug pa dang / chad pa med pa la 'jug pa dang / rtag pa med pa la 'jug pa dang / rgyu dang rkyen la 'jug pa dang / bdag med pa dang sems can med pa dang srog med pa dang gang zag med pa la 'jug pa dang / 'ong ba dang 'gro ba dang gnas pa med pa la 'jug pa dang / mi 'pho zhing rgyu dang 'bras bu chud mi za ba la 'jug pa dang / stong pa nyid dang mtshan ma med pa dang smon pa med pa 'dris par byed pa la 'jug pa dang / stong pa nyid dang mtshan ma med pa dang smon pa med pa mngon sum du mi byed pa la 'jug pa dang / bsam gtan dang ting nge 'dzin dang snyoms par 'jug pa bskyed pa'i tshul la 'jug pa dang / bsam gtan dang ting nge 'dzin dang snyoms par 'jug ba bskyed pa'i tshul la 'jug pa dang / mngon par shes pa'i ye shes bskyed pa la 'jug pa dang / zag pa zad par mngon sum du byed pa ma yin pa la 'jug pa dang / nang du rtog pa la 'jug pa dang / nges par 'gyur bar mi 'jug pa la 'jug pa dang / 'dus byas kyi skyon yongs su 'jal ba la 'jug pa dang / 'dus ma byas kyi chos mngon sum du mi byed par 'jug pa dang / sems can thams cad la bdag med par so sor rtog pa la 'jug pa dang / snying rje chen po mi gtong ba la 'jug pa dang / skye ba thams cad la 'jig par lta ba la 'jug pa dang / rtag tu bsams bzhin du shes pas srid pa thams cad yongs su 'dzin par 'jug pa dang / yid 'byung zhing 'dod chags dang bral ba'i chos kyis mngon sum du mi byed pa la 'jug pa dang / 'dod pa'i dga' ba'i yon tan yal bar 'dor ba la 'jug pa dang / chos kyi dga' ba mi gtong ba la 'jug pa dang / spros pa dang / rnam par rtog pa thams cad spong ba la 'jug pa dang / thabs mkhas pa'i spros pa dang / rnam par rtog pa mi spong bar 'jug ste/ btsun pa sha ra dwa ti'i bu de dag ni byang chub sems dpa' rnams kyi tshul bzhin yid la byed pa la 'jug pa sum cu rtsa gnyis zhes bya'o/ /btsun pa sha ra dwa ti'i bu gzhan yang tshul bzhin zhes bya ba ni rigs pa'i tshig go/ /de ni tshul gyi tshig go/ /de ni sgo'i tshig go/ /de ni kha'i tshig go/ /de ni rgyu'i tshig go/ /de ni rkyen gyi tshig go/ /de ni mi 'gog pa'i tshig go/ /de ni mi 'gal ba'i tshig go zhes bya ba nas de bzhin du ji srid du chos thams cad rigs pas ji ltar gnas pa bzhin mthong na de ltar mthong na ni tshul bzhin mthong ba'o/ /'khor ba'i khams kyi tshul bzhin gang yin pa mya ngan las 'das pa'i dbyings kyi tshul yang de yin no zhes gang gis de ltar mtshungs shing bye brag med par mthong ba de ni tshul bzhin rab tu sbyor ba zhes bya ba la sogs pa gsungs te/ gang de ltar chos kyi rnam pa dang / thos pa'i rnam pa dang / tshul bzhin la 'jug pa'i sbyor ba'i rgyu mthun pa de ni shes rab ces bya'o/ /de ltar de lta bu'i rnam pa'i shes rab gang yin pa de nges par 'byed pa'i shes rab ste/ de gnyi ga'i ngo bo nyid 'dzin par mdzad pas na/ shes rab chen po lus 'chang ba/ /zhes bya ste/ dpal ldan rdo rje snying po'i rgyan las kyang / bde gshegs dri med shes rab ni/ /rdo rje rnon por de bshad do/ /zhes gsungs pa'i phyir ro/ /byang chub sems dpa'i sa ring du song ba la ni thabs kyi pha rol tu phyin pa la lhag par spyod pas na thabs chen te/ thabs kyi sgra 'dis ni thabs kyi pha rol du phyin pa bstan te/ de yang byang chub sems dpa'i thabs sgrub pa gang zhe na/ gang byang chub sems dpa' ni bdag kyang mi dmigs la/ rtag tu bdag nyid kyis sbed pa yang spyod do/ /sems can yang mi dmigs la/ rtag tu sems can yongs su smin par byed pa'i brtson pa yang spyod do/ /nyon mongs pa yang mi dmigs la/ rtag tu dbang po rnams sbed pa la yang spyod do/ /de la gang sangs rgyas kyi gzugs ma yin pa'i gzugs cung zad kyang zad kyang snang bar mi 'gyur la/ rtag tu sangs rgyas mthong bar 'dod pa yang yin no/ /de gang chos kyi sgra ma yin pa'i sgra gang yang grag par mi 'gyur la/ rtag tu chos nyan pas ngoms mi myong ba yang yin no/ /'khor ba yang mi dmigs la rtag tu 'khor bas 'jigs pa'i yid dang ldan pa yang yin no/ /mya ngan las 'das pa yang dag par rjes su mi mthong la/ mya ngan las 'das pa khong du chud par bya ba'i phyir bdog pa thams cad yongs su gtong bar yang byed do/ /sangs rgyas dang byang chub kyang mi dmigs la/ sangs rgyas kyi byang chub khong du chud par bya ba'i phyir smon lam brgya stong mang po yang mngon par sgrub ste/ 'di ni byang chub sems dpa'i thabs sgrub pa zhes bya'o/ /gzhan gyi don la 'jug pa thams cad ni thabs kyi nang du 'dus pa'o/ /de lta bu'i thabs chen po dang ldan pa ni 'jam pa'i dbyangs so/ /byang chub sems dpa'i sa mi g.yo ba la ni smon lam gyi pha rol tu phyin pa la rnam par smin pa'i tshul du lhag par spyod cing smon lam chen po mnga' bas smon lam chen po ste/ chen po'i sgra ni thabs bzhin du 'di la yang sbyar bar bya'o/ /de la smon lam yang 'jam dpal gyi zhing bkod pa las sngon bcom ldan 'das 'jam pa'i dbyangs 'khor los sgyur ba'i rgyal po nam mkha' zhes bya bar gyur pa na bcom ldan 'das de bzhin gshegs pa 'brug sgra dbyangs kyi rgyal po'i spyan sngar smon lam tshad med pa btab pa lta bu ste/ de yang de nas rgyal po nam mkha' srog chags bye ba khrag khrig brgya stong phrag brgyad cus yongs su bskor cing mdun du bdar te/ bcom ldan 'das de bzhin gshegs pa 'brug sgra dbyangs kyi rgyal po ga la ba der dong ste lhags nas bcom ldan 'das kyi zhabs gnyis la spyi bos phyag 'tshal te/ bcom ldan 'das de la lan bdun bskor ba byas nas phyogs gcig tu 'khod de/ rigs kyi bu de nas rgyal po nam mkha' zhes bya ba des bcom ldan 'das de bzhin gshegs pa 'brug sgra dbyangs kyi rgyal po ga la ba de logs su thal mo sbyar ba btud nas bcom ldan 'das la tshigs su bcad de gsol pa/ khyod kyi zhal sngar chos dam zhu/ /skyes bu dam pa mchog skye bar/ /rnam pa gang gis 'gyur ba de/ /rnam par 'dren pas bdag la gsungs/ /rnam 'dren khyod la mngon sum du/ /mchod pa yangs pa bgyid bgyid kyang / /ma nges sems kyis bgyid 'gyur gyis/ /gang yang yongs su bsngo ma bgyis/ /bdag ni gcig pu dben gnas tshe/ /'di 'dra'i sems zhig skyes par gyur/ /bdag gis bsod nams che bas gsan/ /ji ltar yongs su de bsngo snyam/ /tshangs par bsngo'am brgya byin nam/ /gling bzhi'i dbang phyug thob pa'am/ /'on te nyan thos dngos por ram/ /rang rgyal thob pa'i phyir bsngo snyam/ /de ltar sems bskyed de ma thag / lha rnams sgra 'byin brjod pa ni/ /dam pa'i sems kyi bsod nams 'di/ /rnam par chud gson ma byed cig/ /sems can kun la phan pa'i phyir/ /smon lam rlabs chen gdab par gyis/ /byang chub sems rab bskyed byas shing / /'jig rten rnams kyi don yang gyis/ /de bas chos kyi dbang phyug gtso/ /rdzogs sangs rgyas la bdag zhu ste/ /thub pa ji ltar sems bskyed na/ /rdzogs pa'i byang chub skye bar 'gyur/ /ye shes de ni gang gis 'thob/ /de don bdag la bstan du gsol/ /byang chub sems ni bskyed bgyis shing / /thub pa khyod 'drar bdag kyang smon/ /de yi tshig de gsan gyur nas/ / de bzhin gshegs pas bka' stsal pa/ /rgyal po chen pos shes par gyis/ /rim gyis khyod la bstan par bya/ /chos rnams thams cad rkyen bzhin te/ /'dun pa'i rtsa ba rab tu gnas/ /gang gis smon lam ci btab pa/ /de yi 'bras bu thob par 'gyur/ /rgyal po ngas kyang sngon chad ni/ /rdzogs pa'i byang chub sems bskyed gyur/ /sems can kun la phan don du/ /ngas ni smon lam dam pa btab/ /smon lam ji ltar btab tshul du/ /ngas ni 'bras bu thob par gyur/ /byang chub dam pa ngas thob pas/ /nga yi bsam pa rdzogs par gyur/ /rgyal po chen po brtan gyis la/ /mi 'gyur sems ni bskyed par gyis/ /gal te spyod pa spyad byas na/ /khyod kyang yang dag sangs rgyas 'gyur/ /thub pa'i gsung ni thos gyur nas/ /rgyal po de ni dga' bar gyur/ /'jig rten kun gyis mngon sum du/ /seng ge'i nga ror tshig 'di brjod/ /'khor ba'i tha ma med pa yi/ /sngon gyi mtha' ni ji srid pa/ /de srid sems can phan don du/ /spyod pa dpag yas spyad par bya/ /'jig rten mgon po'i spyan snga 'dir/ /byang chub mchog tu sems bskyed do/ /'gro ba thams cad mgron gnyer te/ /dbul zhing phongs las dgrol bar bya/ /'di ring phan chad gal te yang / /bdag gis 'dod chags sems bskyed na/ / phyogs bcu dag na gang bzhugs pa'i/ /sangs rgyas thams cad bslus par gyur/ /byang chub nam zhig thob bar du/ /tha ba'i sems dang gnod sems dang / /phrag dog dang ni ser sna yang / /de ring phan chad mi bya'o/ /tshangs pa'i spyod pa bdag gis spyad/ /sdig pa'i spyod pa yongs su btang / /tshul khrims sdom dang nges pa la/ /sangs rgyas rjes su bslab par bya/ /bdag ni byang chub rings tshul du/ /'tshang rgyar mos shing spro ba med/ /phyi mthar thug gi bar du yang / /sems can gcig phyir spyad par bya/ /tshad med bsam gyis mi khyab pa'i/ /sangs rgyas zhing ni sbyang bar bya/ /phyogs rnams bcu po thams cad du/ /bdag gi ming ni thos par bya/ /bdag gis bdag la lung bstan te/ /sangs rgyas 'gyur bar dogs pa med/ /bdag gi lhag bsam rnam par dag /bdag dbang 'di na 'dren pa rnams/ /lus dang ngag gi las rnams kyang / /rnam pa kun du bdag gis sbyang / /yid kyi las kyang sbyang bar bya/ /mi dge'i las ni spyad mi bya/ /ma 'ongs dus na sangs rgyas te/ /'jig rten mgon du 'gyur zhe na/ /bden pa des ni sa 'di yang / /rnam pa drug tu g.yos gyur cig/ /bdag gis bden tshig gang brjod pa/ /ma nor yang dag smras she na/ / bden pa des ni mkha' dbyings las/ /sil snyan dag gi sgra grag shog /bdag la gal te g.yo med cing / /de bzhin tha ba med ce na/ /man+dA ra yi me tog bzang / /bden pa des ni char du phob/ /yang dag don du nges pa yi/ /tshig bden de skad brjod pa dang / /phyogs bcu mtha' yas thams cad kyi/ / bye ba'i zhing rnams rab tu g.yos/ /de yi mod la mkha' dbyings nas/ /sil snyan bye ba'i sgra yang byung / /me tog man+dA ra ba dag /mi 'greng bdun srid bab par gyur/ /rgyal po de yi rjes bslabs te/ /srog chags bye ba nyi shu yis/ /'dren par bdag cag gyur smon zhes/ /yid du 'ong ba'i sgra yang bsgrags/ /zhes bya ba dang / gzhan yang de nas bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das bskal pa bye ba khrag khrig brgya stong grangs ma mchis pa nas nye bar bzung ste/ bdag gis smon lam btab pa ni/ /nam bdag gis phyogs bcu mtha' yas mu med pa'i 'jig rten gyi khams su sangs rgyas kyi spyan sgrib pa med pas bltas/ sangs rgyas bcom ldan 'das gang ji snyed pa de dag thams cad bdag gis byang chub la yang dag par btsud pa dang / bdag gis byang chub kyi sems la bkod pa dang / bdag gis sbyin pa la yang dag par btsud pa dang / de bzhin du bdag gis tshul khrims dang / bzod pa dang / brtson 'grus dang / bsam gtan dang / shes rab la yang dag par btsud pa dang / bdag gis bskul ba dang / bdag gis rjes su bstan par gyur pa ma mthong ba de srid du bdag bla na med pa yang dag par rdzogs pa'i byang chub mngon par rdzogs par 'tshang rgya bar mi bya'o/ /nam bdag gis sangs rgyas kyi spyan sgrib pa med pas phyogs bcur rnam par bltas kyang bdag gis sangs rgyas nyid la ma bkod pa'i de bzhin gshegs pa de lta bu gang yang mthong bar gyur pa de'i tshe bdag kyang bla na med pa yang dag par rdzogs pa'i byang chub mngon par rdzogs par 'tshang rgya bar bya'o zhes bgyi bar smon lam btab bo/ /bcom ldan 'das gzhan yang bdag gis smon lam 'di skad ces btab ste/ bdag gis ni bdag gi sangs rgyas kyi zhing gcig la gang gA'i klung du ma'i bye ma snyed kyi sangs rgyas kyi zhing tsam gyi tha grur yangs par yongs su ma grub cing sangs rgyas kyi zhing de'i phyi rin po che 'bum phrag du ma las grub pa dang / rin po che brgya stong du mas spras pa srid pa'i rtse mo'i tshad du ma gyur gyi bar du bla na med pa yang dag par rdzogs pa'i byang chub tu mngon par rdzogs par 'tshang rgya bar mi bgyi bar smon lam btab bo/ /bcom ldan 'das gzhan yang bdag gi sangs rgyas kyi zhing der stong gsum gyi stong chen po'i 'jig rten gyi khams bcu'i tshad tsam gyi byang chub kyi shing skyes te/ byang chub kyi shing de'i 'od kyis sangs rgyas kyi zhing de thams cad rgyas shing khyab par gyur cig ces bgyi bar smon lam de skad btab po/ /bcom ldan 'das gzhan yang bdag gis byang chub kyi shing drung du 'dug pa'i tshe bla na med pa yang dag par rdzogs pa'i byang chub tu mngon par rdzogs par sangs rgyas pa nas yongs su mya ngan las 'das pa'i bar du byang chub kyi shing drung de nas ma langs kyang bdag gi sprul pa phyogs bcu'i phyogs re re zhing sangs rgyas kyi zhing bye ba khrag khrig brgya stong grangs med pa dag tu dong zhing sems can rnams la chos ston par gyur cig ces smon lam de skad btab po/ /bcom ldan 'das gzhan yang bdag gis bdag gi sangs rgyas kyi zhing der nyan thos dang rang sangs rgyas kyi ming tsam yang ye med par gyur te/ byang chub sems dpa'i zhe sdang dang tha ba dang 'chab pa med pa dang / tshangs par spyod pa yongs su dag par spyod pa sha stag gis sangs rgyas kyi zhing gang la/ sangs rgyas kyi zhing de na bud med kyi ming yang mi grag cing mngal du skye ba med pa dang / byang chub sems dpa' de dag thams cad kyang gos dur smrig gyon cing skyil mo krung bcas par rdzus te 'byung ba dang sangs rgyas kyi zhing de shin tu rnam par dag par gyur te/ de bzhin gshegs pa'i sprul pa phyogs bcu'i 'jig rten gyi khams bye ba khrag khrig brgya phrag grangs med par gshegs shing s ems can rnams la chos ston pa de dag theg pa gsum las brtsams te mos pa'i tshul bzhin du sems can rnams la chos ston pa ma gtogs par sangs rgyas kyi zhing de na nyan thos dang rang sangs rgyas med cing byang chub sems dpas yongs su gang bar gyur cig ces bgyi bar smon lam de skad btab po/ /de nas yang bcom ldan 'das la 'jam dpal gzhon nur gyur pas 'di skad ces gsol to/ /bcom ldan 'das bdag gi smon lam ni de bzhin gshegs pa 'od dpag med pas dga' ba'i zas dang ldan par 'gyur bar smon lam mdzad pa lta bu'ang ma lags te/ bcom ldan 'das bdag gis ni bdag gi sangs rgyas kyi zhing der byang chub sems dpa' gang dag skyes par gyur pa de dag kha zas kyi 'du shes cig skyes par gyur na de ma thag tu skad cig de la de dag gi lag pa g.yas par ro bro ba brgya phrag du ma dang ldan pa'i kha zas kyis gang ba'i snod mngon du byung bar gyur la/ snod de dag byung ma thag tu de dag 'di snyam du 'di ltar bdag cag gis phyogs bcu'i sangs rgyas bcom ldan 'das rnams la ma phul zhing / sems can dbul zhing phongs pas sdug bsngal ba dang / mgon med par gyur pa dag dang yi dags kyi 'jig rten du skyes pa gang dag lo stong phrag du mar yang mchil ma'i thal ba 'ga' yang mi rnyed pa de lta bu dag yongs su tshim par ma byas par bdag nyid kyis bza' ba ni tshul dang mi 'dra'o zhes bgyi bar dran pa thob par gyur cig de'i mod la de dag mngon par shes pa lnga yongs su grub par gyur te/ rdzu 'phrul dang ldan zhing nam mkha' las 'phyo ba dang / rlung ltar thogs pa ma mchis pa'i shugs kyis phyogs bcu'i 'jig rten gyi khams grangs dang tshad ma mchis pa dag tu phyin nas kha zas de bzhin gshegs pa nyan thos kyi dge 'dun dang bcas pa la yang phul/ sems can phongs shing ltogs pa dang / mgon ma mchis pa rnams dang / yi dgas kyi 'jig rten du skyes pa rnams kyang yongs su tshim par bgyis nas de dag la chos ston te/ skad cig gcig gis sangs rgyas kyi zhing der slar mchi bar gyur cig ces bgyi bar smon lam de skad btab po/ /bcom ldan 'das gzhan yang bdag gis ni bdag byang chub thob pa'i tshe bdag gi sangs rgyas kyi zhing der byang chub sems dpa' gang ji snyed cig skyes pa dag gos rin po che rnam pa sna tshogs kyi longs spyod dang ldan par gyur te/ bsams pa tsam gyis ci la dga' ba'i gos rin po che dge sbyong gi tshul dang mthun pa rung ba dag byung bar gyur la/ gos rin po che de dag byung ma thag tu 'di snyam du 'di ltar bdag cag gis gos 'di lta bu phyogs bcu'i sangs rgyas bcom ldan 'das rnams la ma phul bar bdag cag nyid kyis yongs su spyod pa ni tshul dang mi 'dra'o snyam pa'i dran pa thob par gyur nas/ de dag gis sems de ltar skyes ma thag tu 'jig rten gyi khams tshad ma mchis grangs ma mchis pa dag tu mchis shing gos de dag sangs rgyas bcom ldan 'das rnams la mngon par bkab ste/ slar sangs rgyas kyi zhing der mchis nas ci dga' ba'i gos rin po che la spyod par gyur cig ces bgyi bar smon lam de skad btab po/ /bcom ldan 'das de bzhin du sangs rgyas kyi zhing de na byang chub sems dpa' sems dpa' chen po de dag gi longs spyod dang / yongs su spyod pa gang ji snyed cig mchis pa de dag thams cad kyang sangs rgyas bcom ldan 'das nyan thos kyi dge 'dun dang bcas pa dag la phul nas slad kyis bdag cag yongs su spyod par 'gyur ba dang / sangs rgyas kyi zhing de na mi khom pa brgyad ma mchis pa dang / sangs rgyas kyi zhing de na mi dge ba'i sgra ma mchis pa dang / sangs rgyas kyi zhing de na sdug bsngal gyi sgra ma mchis pa dang / sangs rgyas kyi zhing de na skyon du 'gyur ba'i sgra ma mchis pa dang / sangs rgyas kyi zhing de na gzugs dang sgra dang dri dang ro dang reg pa yid du mi 'ong ba ma mchis par gyur cig ces bgyi bar smon lam btab po/ /bcom ldan 'das la 'jam dpal gzhon nur gyur pas gzhan yang 'di skad ces gsol to/ /bcom ldan 'das bdag gis smon lam 'di ltar btab ste/ bdag gi sangs rgyas kyi zhing de rin po che bye ba khrag khrig phrag 'bum du mas gang zhing nor bu rin po che du mas spras pas nor bu rin po che kun du bstan pa 'dra la/ rin po che de dag kyang phyogs bcu'i 'jig rten na dkon la sngon chad ma mthong zhing mi srid pa sha stag ste/ de dag gi ming brjod na yang lo bye ba brgya stong thogs par 'gyur ba de lta bu'i nor bu rin po che de dag gis sangs rgyas kyi zhing de yongs su gang bar gyur te/ sangs rgyas kyi zhing de la byang chub sems dpa' la la zhig sangs rgyas kyi zhing 'di gser las grub par mthong bar dga'o snyam na yang des gser las grub par mthong ba dang / dngul las grub par mthong bar dga'o snyam na yang dngul las grub par mthong la/ gzhan gyis gser las grub par mthong ba ma mchis par mi 'gyur ba dang / de bzhin du bai DUr+ya las grub pa dang / shel las grub pa dang / mu tig dmar po las grub pa dang / rdo'i snying po las grub pa dang / spug las grub pa dang / de bzhin du rin po che sna tshogs kyi rgyu las grub pa'am/ tsan+dan las grub pa'am/ a ka ru las grub pa'am/ ta ka ru las grub pa'am/ ta ma la'i lo ma las grub pa'am/ tsan+dan sbrul gyi snying po las grub pa'am/ tsan+dan dmar po las grub pa'am/ su rnam pa ji ltar grub par 'dod pa de dag gis de bzhin du mthong ste/ phan tshun nas sangs rgyas kyi zhing tha dad par mthong ba yang ma mchis par 'gyur ba dang / sangs rgyas kyi zhing de na byang chub kyi shing de las 'od byung ba dang / byang chub sems dpa' rang rang las 'od byung bas snang zhing gsal ba ma gtogs par nyi ma dang zla ba'i 'od kyang mi mngon/ skar ma dang / rin po che dang / zhugs dang / glog gam sems can gzhan dag gi 'od kyang mi mngon pa dang / gang dag ji tsam du 'od kyis khyab par dga' ba tha na sangs rgyas kyi zhing bye ba khrag khrig brgya stong de snyed du de dag gis 'od kyis gsal bar gyur te/ sangs rgyas kyi zhing de na byang chub sems dpa' rnams ni bsam pa'i khyad par gyis me tog kha phye ba dang / kha zum par 'gyur ba dang / gang dus dang chos rnam pa ji lta bur yongs su spyad par 'tshal ba de bzhin du de'i grub pa ma gtogs par nyin mtshan gyi ming ma mchis pa dang / sangs rgyas kyi zhing de na grang ba dang tsha ba ma mchis/ rga ba dang na ba dang 'chi ba yang ma mchis te/ byang chub sems dpa' gang byang chub mngon par rdzogs par 'tshang rgya bar 'tshal ba de 'jig rten gyi khams gzhan du mchis shing dga' ldan gyi gnas su tshe bas par bgyis nas byang chub mngon par rdzogs par 'tshang rgya bar 'gyur ba dang / sangs rgyas kyi zhing de'i steng gi bar snang las sil snyan bltar mi gda' ba bye ba khrag khrig brgya stong rtag tu rgyun mi 'chad par sgra 'byin pa dang / sil snyan de dag las kyang 'dod pa dang ldan pa'i sgra mi 'byung gi gzhan du na pha rol tu phyin pa'i sgra dang / sangs rgyas kyi sgra dang / chos kyi sgra dang / dge 'dun gyi sgra dang / byang chub sems dpa'i sde snod kyi chos kyi rnam grangs kyi sgra 'byin par 'gyur te/ byang chub sems dpa' de dag ji lta bur mos pa'i sgra de lta bu thos par 'gyur ba dang / byang chub sems dpa' de dag de bzhin gshegs pa de la blta 'tshal na 'chag gam 'gro'am/ sdod dam/ mchis kyang rung ste gang dag der sangs rgyas blta ba'i yid la bgyi ba skyes ma thag tu de dag gis de bzhin gshegs pa dgra bcom pa yang dag par rdzogs pa'i sangs rgyas kun du gzigs pa byang chub kyi shing drung na bzhugs pa de dag nyid na bzhugs par mthong par gyur cing / mthong nas kyang bcom ldan 'das de mthong ma thag tu de dag the tsom mam/ nem nur ram/ yid gnyis sam/ chos kyi som nyi gang mchis pa yongs su 'chad par 'gyur te/ bstan mi 'tshal bar chos kyi tshig de'i don yongs su 'tshal bar gyur cig ces bgyi bar smon lam btab po/ /bcom ldan 'das gzhan yang bdag gis ni 'di ltar phyogs bcu'i 'jig rten gyi khams bye ba khrag khrig brgya stong tshad med grangs med pa dag na bcom ldan 'das bzhugs pa rnams kyi sangs rgyas kyi zhing gi yon tan bkod pa'i rgyan dang / smon lam gyi rgyan dang / mtshan nyid dang / tshad ma dang / spyod pa dang / gnas kyi rnam pa'i rgyan gang ji snyed cig mthong ba las nyan thos kyi bkod pa dang / snyigs ma lnga'i sangs rgyas rnams ma gtogs par de dag thams cad bdag gis sangs rgyas kyi zhing gcig gi nang du 'dus pa dang khongs su chud par bya'o zhes bgyi bar smon lam btab ste/ bcom ldan 'das bdag 'tshal na bskal pa gang gA'i klung gi bye ma snyed du bdag gi sangs rgyas kyi zhing gi yon tan bkod pa las brtsams te rnam pa gzhan dang gzhan du thogs pa ma mchis pa'i tshul gyis sug las gzhan ma mchis par bshad dam/ de bas kyang ring du bshad kyang sangs rgyas kyi zhing gi yon tan bkod pa de dag mthar thug par mi 'gyur ro/ /de la sogs pa smon lam mtha' yas par btab pa de dag yongs su rdzogs shing lhun gyis grub par 'jug pa dang / phyin ci ma log par chen por gyur pa ni smon lam chen po'o/ /de dag kyang rje btsun 'jam dpal la dad pa rnams kyis smon lam ji skad gsungs pa de lta bu'i smon lam gdab par bya'o zhes bstan par bya ba'i phyir cung zad tsam zhig rnam par spros nas bshad pa yin no/ /byang chub sems dpa'i sa legs pa'i blo gros la ni stobs kyi pha rol tu phyin pa la lhag mar spyod pa yin no/ /stobs po che la zhes bya ste/ stobs chen po de gang la yod pa de ni stobs po che'o/ /de la byang chub sems dpa'i sa la ni byang chub sems dpa'i stobs bcu dang ldan la/ de bzhin gshegs pa'i sa la ni de bzhin gshegs pa'i stobs bcu'o/ /de yang byang chub sems dpa'i stobs bcu ni chos yang dag par sdud pa'i mdo las gsungs te/ de dag gang zhe na/ 'di lta ste/ mos pa'i stobs dang / so sor rtog pa'i stobs dang / bsgom pa'i stobs dang / bzod pa'i stobs dang / ye shes kyi stobs dang / spong ba'i stobs dang / thos pa'i stobs dang / spobs pa'i stobs dang / bsod nams kyi stobs dang / sgrub pa'i stobs so/ /de la mos pa'i stobs gang zhe na/ 'di la byang chub sems dpa' ni gang dang gang mos pa de de bzhin du 'gyur ro/ /de mos pa'i stobs de ni lha dang bcas pa'i 'jig rten gyis zil gyis gnon mi nus te/ 'di la byang chub sems dpa'i mos pa'i stobs zhes bya'o/ /de la byang chub sems dpa'i so sor rtog pa'i stobs gang zhe na/ 'di ltar byang chub sems dpa' ni 'dod chags skyes pa mi sdug pa bsgoms pas zhi bar byed do/ /zhe sdang skyes pa byams pa bsgoms pas zhi bar byed do/ /gti mug skyes pa rten cing 'brel par 'byung ba bsgoms pas zhi bar byed do/ /gshe ba dang mi snyan par zer ba rnams ni brag ca dang mtshungs par shes pas yongs su zhi bar byed do/ /gsod pa dang / 'ching ba dang / go rar 'jug pa rnams ni las bdag gir bya ba shes pas zhi bar byed do/ /lus la bsdigs pa dang / lus la gnod pa dang / lus nyam nga ba rnams ni gzugs brnyan dang mtshungs par shes pas zhi bar byed do/ /de ltar kun nas nyon mongs pa'i sgo ji snyed par byang chub sems dpa'i rnam par dag pa'i sgo yang de snyed du mthong ste/ 'di ni byang chub sems dpa'i so sor rtog pa'i stobs zhes bya'o/ /de la byang chub sems dpa'i bsgom pa'i stobs gang zhe na/ gang mos pas spyad pa'i sa dang / mthong ba'i sa la bar mchod par byed pa'i chos de dag gis byang chub sems dpa' de la bar chad byed mi nus so/ /des mthong ba de dang lam de las lhar bcas pa'i 'jig rten gyis dbral bar mi nus te/ 'di ni byang chub sems dpa'i bsgom pa'i stobs zhes bya'o/ /de la byang chub sems dpa'i bzod pa'i stobs gang zhe na/ gang gi phyir byang chub sems dpa'i ni spyod ba brag ca'i sgra dang mtshungs pa'i shes pa'i stobs kyis slar spyod bar mi bya'o/ /bsdigs shing brdegs kyang gzugs brnyan dang mtshungs par 'du shes pas slar mi bsdigs mi brdeg go/ /gshe yang sems sgyu ma dang mtshungs pa nyid du 'du shes pa'i stobs kyis slar mi gshe'o/ /khros kyang nang rnam par dag par shes pa'i stobs kyis slar mi khro'o/ /'jig rten gyi chos rnam par dag pa'i stobs kyis 'jig rten gyi chos rnams kyis mi 'phrogs so/ /rten cing 'brel par 'byung ba rnam par dag pa shes pa'i stobs kyis nyon mongs pa thams cad kyis mi brdzi'o/ /de ltar byang chub sems dpa' ni 'khrug pa'i sgo ji snyed mthong bar rab tu zhi ba'i sgo yang de snyed du mthong ste/ 'di ni bzod pa'i stobs zhes bya'o/ /de la byang chub sems dpa'i ye shes kyi stobs gang zhe na/ byang chub sems dpa' gang phung po dang / khams dang / skye mched shes pa de dag ni stong pa/ ma skyes pa ma 'gags pa'o/ /ye shes gang gis sangs rgyas kyi byang chub yang dag par bsgrub pa de las mu stegs can dang dmigs pa can thams cad dang / bdud thams cad sangs rgyas kyi gzugs su gnas pas kyang ye shes de la the tshom za bar byed mi nus pa 'di ni byang chub sems dpa'i ye shes kyi stobs zhes bya'o/ /de la byang chub sems dpa'i spong ba'i stobs gang zhe na/ gang de byang chub sems dpa' gnas gcig na gnas pa'i gan du sems can thams cad lhags te/ kha ngan zer/ mi snyan pa brjod/ tshig brlang ba dang / tshig rtsub po smra/ sangs rgyas dang / chos dang / dge 'dun gyi mi bsngags pa brjod kyang / de sems can de dag la mi 'khrug cing / yid mi bde bar mi 'gyur ro/ /'gyod par mi 'gyur ro/ /bag la nyal bar mi byed do/ / lus gshags gtubs kyang de bzhin du bag la nyal mi bskyed do/ /sems can de dag kyang dkon mchog gsum la rab tu 'god de/ 'di ni byang chub sems dpa'i spong ba'i stobs zhes bya'o/ /de la byang chub sems dpa'i thos pa'i stobs gang zhe na/ 'di la byang chub sems dpa' ni mang du thos pa 'dzin pa/ thos pa rgya mtsho thos pa bstsags pa yin te/ byang chub sems dpa' ni thos pa'i stobs de lta bu dang ldan no/ /gal te stong gsum gyi stong chen po'i 'jig rten gyi khams su gtogs pa'i sems can thams cad the tshom bzung ste/ byang chub sems dpa'i gan du lhags nas gang sems can gcig gi 'dri ba de bzhin mi 'dri bar thams cad kyis the tshom tha dad par lan cig tu dris kyang byang chub sems dpa' thags thogs med par lan 'debs so/ /bskal pa brgya stong du dris kyang de bzhin du lung ston te/ 'di ni byang chub sems dpa'i thos pa'i stobs zhes bya'o/ /de la byang chub sems dpa'i spobs pa'i stobs gang zhe na/ gal te byang chub sems dpa'i 'khor bye ba khrag khrig brgya stong du ma'i nang du chos ston na/ de mi sems mi rtog par sems can gang dang gang gi 'dod pa ji lta ba bzhin du chos ston cing thos par byed kyang byang chub sems dpa'i chos ston pa de don nyams par mi 'gyur/ tshig 'bru nyams bar mi 'gyur/ tshig zlos par mi 'gyur/ thogs par mi 'gyur/ gcod par mi 'gyur ba 'di ni byang chub sems dpa'i spobs pa'i stobs zhes bya'o/ /de la byang chub sems dpa'i bsod nams kyi stobs gang zhe na/ gal te byang chub sems dpa' shing drung na gnas pa dang / gtsug lag khang na gnas kyang rung / khyim stong pa na gnas kyang rung / bdud thams cad 'khor dang bcas te lhags nas bgegs bya ba dang gtse ba'i phyir nan tan byed na de la bdud de dag bdag nyid 'jigs skrag myos shing gyes te/ bdag mgon med par shes nas 'bros par 'gyur ro/ /gang bdud de dag gi ral gri dang / mtshon rtse gnyis pa dang / mdung rtse gsum pa dang / rdo ba dang / sta re 'bab pa de dag byang chub sems dpa'i bsod nams kyi byin gyis man+dA ra ba'i me tog dang / tsam pa ka dang / sna ma'i me tog dang / ut+pal dang / pad+mar gyur nas 'bab po/ / gang bdud de dag gi tshig rtsub po dang / tshig brlang po de dag ni byang chub sems dpa' la bstod par grag go/ /byang chub sems dpa'i la ni nam yang yid du mi 'ong ba'i yul drug snang bar mi 'gyur ro/ /bsams pa tsam gyis de'i phun sum tshogs pa thams cad nam mkha' las 'byung ngo / /de yang de'i rang gi bsod nams kyi dbang gis nam mkha'i mdzod dang / lag na rin po che las phun sum tshogs pa thams cad 'byung ste/ sems can thams cad 'tsho bar 'gyur ro/ /de'i rang gi bsod nams kyi dbang gis lag na rin po che ni tshe'i tshad bskal par gnas te/ brjod kyang byang chub sems dpa'i bsod nams kyi stobs kyis mtha' rtogs par sla ba ma yin te/ 'di ni byang chub sems dpa'i bsod nams kyi stobs zhes bya'o/ /de la byang chub sems dpa'i bsgrub pa'i stobs gang zhe na/ byang chub sems dpa'i bsgrub pa'i stobs ni rnam pa bcu ste/ bcu gang zhe na/ 'di lta ste/ sbyin pa bsgrub pa dang / tshul khrims bsgrub pa dang / bzod pa bsgrub pa dang / brtson 'grus bsgrub pa dang / bsam gtan bsgrub pa dang / shes rab bsgrub pa dang / thabs bsgrub pa dang / smon lam bsgrub pa dang / stobs bsgrub pa dang / ye shes bsgrub pa ste/ 'di ni byang chub sems dpa'i bsgrub pa rnam pa bcu zhes bya'o/ /byang chub sems dpa' rnams kyi pha rol tu phyin pa dang ldan pa'i bsgrub pa gang ji snyed pa de dag thams cad ni bsgrub pa bcu po 'di'i nang du 'dus par blta'o/ /de la byang chub sems dpa'i sbyin bsgrub pa gang zhe na/ byang chub sems dpa' ni sbyin pa'i chos gang gis sems can rnams la gnod par 'gyur ba ma gtogs par sems can rnams la mi sbyin pa gang yang med do/ /byang chub sems dpa'i sems gang gis sbyin pa byin pa'i sems de la ni de bzhin gshegs pa dang / byang chub sems dpa' bzod pa thob pa ma gtogs par sems can gzhan rnams kyis dad par sla ba ma yin na/ shes par 'gyur ba lta ci smos te/ 'di ni byang chub sems dpa'i sbyin pa bsgrub pa zhes bya'o/ /de la byang chub sems dpa'i tshul khrims bsgrub pa gang zhe na/ byang chub sems dpa' rnams kyi tshul khrims bsgrub pa ni rnam pa bcu'o/ /rnam pa bcu gang zhe na/ 'di lta ste/ nyan thos kyi sdom pa'i tshul khrims bsgrub pa dang / rang sangs rgyas kyi sdom pa'i tshul khrims bsgrub pa dang / byang chub sems dpa'i sdom pa'i tshul khrims bsgrub pa dang / dge ba'i chos thams cad sdud pa'i tshul khrims kyi sdom pa bsgrub pa dang / dge ba'i bshes gnyen kun du tshol ba mi gtong ba'i tshul khrims bsgrub pa dang / dam pa'i chos yongs su 'dzin pa'i sdom pa'i tshul khrims bsgrub pa dang / rtag tu gzhan gyi don bsgrub pa'i sdom pa'i tshul khrims bsgrub pa dang / byang chub tu yongs su bsngo ba'i sdom pa'i tshul khrims bsgrub pa dang / rtag tu mnyam par gzhag pa'i sdom pa'i tshul khrims bsgrub pa bag chags kyi mtshams sbyor ba yang dag par 'joms pa la bzod pa sdom pa'i tshul khrims bsgrub pa'o/ /byang chub sems dpa' rnams kyi rnam par mi rtog pa'i tshul khrims can yin te/ de dag gi tshul khrims bsgrub pa ni thams cad mkhyen pa ma yin pa rnams kyis shes par sla ba ma yin te/ 'di ni byang chub sems dpa'i tshul khrims bsgrub pa zhes bya'o/ /de la byang chub sems dpa'i bzod pa bsgrub pa gang zhe na/ byang chub sems dpa' rnams kyi bzod pa sgrub pa ni rnam pa gsum mo/ /rnam pa gsum gang zhe na/ 'di lta ste/ sdug bsngal dang du len pa'i bzod pa dang / gzhan gyis gnod pa byas pa la mi mjed pa'i bzod pa dang / chos la nges par sems pa'i bzod pa'o/ /sdug bsngal dang du len pa'i bzod pa ni las bdag gir bya ba la shes pa 'jug pa'o/ /gzhan gyis gnod pa byas pa la mi mjed pa'i bzod pa ni sems can thams cad la bu gcig pa bzhin du byams pa la 'jug pa'o/ /chos la nges par sems pa'i bzod pa ni chos thams cad skye ba med par shes pa la 'jug ste/ 'di ni byang chub sems dpa'i bzod pa rnam pa gsum zhes bya'o/ /gang bzod pa 'di dag sgrub pa 'di ni byang chub sems dpa'i bzod pa bsgrub pa zhes bya'o/ /de la byang chub sems dpa'i brtson 'grus bsgrub pa gang zhe na/ 'di la byang chub sems dpa' ni gang dang gang du ji lta ji ltar dge ba'i chos rnams yongs su 'grub par bya ba'i sbyor ba de dang de 'du shes 'di ltar sbyor te/ bdag gis sems can thams cad kyi dge ba'i chos 'di yongs su bsgrub par bya'o snyam pa 'di ni byang chub sems dpa'i brtson 'grus bsgrub pa zhes bya'o/ /de la byang chub sems dpa' bsam gtan bsgrub pa gang zhe na/ byang chub sems dpa' ni mnyam par ma bzhag pa'i chos gang yang yang dag par rjes su mi mthong ste/ de chos thams cad ni rang bzhin gyis snyoms par zhugs pa/ zhi ba sems dang / yid dang / yid kyi rnam par shes pa dang bral ba ma skyes ma 'gags shing mi g.yo ba thob par mthong ngo / /de bdag ni mnyam par bzhag la gzhan ni rnam par g.yengs pa'o snyam du mi sems so/ /bdag dang gzhan las rnam par grol ba'i ting nge 'dzin gzhan yang dag par rjes su mi mthong la/ byang chub yang dag par sgrub pa'i brtson 'grus kyang mi nyams pa 'di ni byang chub sems dpa'i bsam gtan bsgrub pa'o/ /de la byang chub sems dpa'i shes rab bsgrub pa gang zhe na/ 'di la byang chub sems dpa' ni gang rten cing 'brel par 'byung ba las rnam par grol ba dang / gang stong pa nyid las rnam par grol ba dang / gang mtshan ma med pa las rnam par grol ba dang / gang smon pa med pa las rnam par grol ba dang / gang nam mkha' las rnam par grol ba'i chos de yang yang dag par rjes su mi mthong la/ byang chub kyi lam dang / sems can yongs su smin par bya ba'i brtson 'grus kyang mi nyams pa 'di ni byang chub sems dpa'i shes rab bsgrub pa'o/ /de la byang chub sems dpa'i thabs bsgrub pa gang zhe na/ gang byang chub sems dpa' ni bdag kyang mi dmigs la/ rtag tu bdag nyid kyis sbed pa yang spyod do/ /sems can yang mi dmigs la/ rtag tu sems can yongs su smin par byed pa'i brtson pa yang spyod do/ /nyon mongs pa yang mi dmigs la/ rtag tu dbang po rnams sped pa yang spyod do/ /de la gang sangs rgyas kyi gzugs ma yin pa'i gzugs cung zad kyang snang bar mi 'gyur la/ rtag tu sangs rgyas mthong bar 'dod pa yang yin no/ /de la gang chos kyi sgra ma yin pa'i sgra gang yang grag par mi 'gyur la/ rtag tu chos nyan pas ngoms mi myong ba yang yin no/ /'khor ba yang mi dmigs la/ rtag tu 'khor bas 'jigs pa'i yid dang ldan pa yang yin no/ /mya ngan las 'das pa yang yang dag par rjes su mi mthong la/ /mya ngan las 'das pa khong du chud par bya ba'i phyir bdog pa thams cad yongs su gtong bar yang byed do/ /sangs rgyas dang byang chub kyang mi dmigs la/ sangs rgyas kyi byang chub khong du chud par bya ba'i phyir smon lam brgya stong mang po yang mngon par bsgrub ste/ 'di ni byang chub sems dpa'i thabs bsgrub pa zhes bya'o/ /de la byang chub sems dpa'i smon lam bsgrub pa gang zhe na/ 'di la byang chub sems dpa' ni chos gang yang 'bri ba 'am 'phel bar yang dag par rjes su mi mthong la/ sems can thams cad kyi dge ba'i rtsa ba rnams la yang rjes su yi rang nas bla na med pa yang dag par rdzogs pa'i byang chub tu sngo bar byed do/ /rang gi dge ba'i rtsa ba rnams sems can thams cad dang thun mong du byas nas 'dis bdag bla na med pa yang dag par rdzogs pa'i byang chub mngon par rdzogs par 'tshang rgya bar gyur cig/ /bdag gi sangs rgyas kyi zhing 'di 'dra bar gyur cig / 'khor phun sum tshogs pa 'di 'dra bar gyur cig ces bla na med pa yang dag par rdzogs pa'i byang chub tu yongs su sngo bar byed do/ /de'i smon lam de yang yang dag par 'grub pa ste/ mi 'grub par mi 'gyur ro/ /de'i tshul khrims ma zhig pa/ ma nyams pa/ 'dren ma ma yin pa/ ma gyur pa/ mkhas pas bsngags pa bsrung ngo / /de tshul khrims de la rab tu gnas pas sems smon pa 'grub par 'gyur te/ 'di ni byang chub sems dpa'i smon lam bsgrub pa zhes bya'o/ /de la byang chub sems dpa'i stobs bsgrub pa gang zhe na/ gal te la la zhig sangs rgyas kyi gzugs su bsgyur nas byang chub sems dpa'i gan du 'ong ste/ sangs rgyas kyi byang chub las zlog par byed/ 'dun pa zlog par byed/ dbral bar byed kyang byang chub sems dpa' de 'dun pa zlog par mi 'gyur ro/ /byang chub nyid rjes su dran no/ /byang chub kyi snying po rjes su dran no/ /bdud 'dul ba dang / chos kyi 'khor lo rab tu bskor ba dang / snying rje chen po mngon du byed do/ /sems can gang byang chub sems dpa' de'i 'dun pa zlog par byed/ rnam par zlog par byed pa'i sems can de la yang byang chub sems dpa' khong khro bar mi 'gyur gyi/ sems can de la byams pa chen po dang snying rje chen po bskyed de/ dad pa dang / brtson 'grus dang / dran pa dang / ting nge 'dzin dang / shes rab kyi stobs las kyang mi nyams te/ de'i phyir mi ldog pa'i stobs des sems can dpag tu med pa grangs med pa dag sangs rgyas kyi byang chub la rab tu 'god/ rab tu 'dzud de/ 'di ni byang chub sems dpa'i stobs bsgrub pa zhes bya'o/ /de la byang chub sems dpa'i ye shes bsgrub pa gang zhe na/ 'di ni byang chub sems dpa' ni 'di la skye ba'am/ 'chi ba 'am rga ba yang med do/ /'di dag ni chos tsam du zad de bdag dang bdag gi dang bral ba'o zhes chos thams cad yang dag pa ji lta ba bzhin du rab tu shes te/ de ye shes kyi stobs de nyid kyis sems can dpag tu med grangs med pa dag ye shes kyi stobs de la rab tu 'god do/ /sems can thams cad kyi chos nyid de las rnam par bzlog nas 'jig rten gyi chos rnams la rab tu 'jog mi nus te/ 'di ni byang chub sems dpa'i ye shes bsgrub pa'o/ /'di ni bsgrub pa rnam pa bcu ste/ 'di dag ni byang chub sems dpa'i stobs bcu zhes bya ste/ stobs mtha' yas pa gzhan dang gzhan dag kyang rnam par smin pa'i tshul gyis byang chub sems dpa'i sa legs pa'i blo gros la mngon par 'gyur bas stobs po che la zhes bya'o/ /byang chub sems dpa'i sa chos kyi sprin la ni ye shes kyi pha rol tu phyin pa lhag par spyod pas na ye shes rgya mtsho'o/ /de yang rgya mtsho dang 'dra bas rgya mtsho ste/ rgya mtsho ni 'jug par dga' ba nyid dang / ro gcig pa nyid dang / rin po che thams cad kyi gnas su gyur pa dang / sems can dpag tu med pa'i gnas su gyur par chos mthun pa can no/ /de bzhin du ye shes rgya mtsho dang 'dra ste/ nyan thos dang / rang rgyal dang / tshangs pa dang / khyab 'jug dang / dbang phyug chen po la sogs pa thams cad kyis 'jug mi nus pa dang / stong pa nyid du ro gcig pa dang / sangs rgyas kyi chos thams cad kyi rin po che'i 'byung gnas su gyur pa dang / skye gnas dang 'gro ba dang / rigs kyi dbye bas phye ba'i sems can rnams nyon mongs pa las ldog cing bde ba 'thob ste/ mchog tu dbugs 'byin pa'i 'tshang rgya ba nyid kyi gnas su gyur pas sems can dpag tu med pa'i gnas su gyur pa'i ye shes kyi rgya mtsho de lta bu dang tha mi dad pa'i ye shes ni 'jam pa'i dbyangs yin pas ye shes rgya mtsho zhes bya ste/ de la byang chub sems dpa' rnams kyi ye shes kyi tshogs mi zad pa gang zhe na/ rgyu gang dang rkyen gang dag gis ye shes rtogs par 'gyur ba'i rgyu de dag dang rkyen de dag byang chub sems dpa' yang dag par bsgrub ste/ de dag la rgyu ni gang / rkyen ni gang zhe na/ gang 'di ye shes yongs su tshol ba la rab tu 'dun pa/ ye shes rtogs pa'i dge ba'i bshes gnyen rnams la rtag tu bstan pa dang / 'grogs pa dang / bsnyen bkur byed pa dang / gang yang sangs rgyas kyi ye shes la rton cing nyan thos dang rang sangs rgyas kyi ye shes la mi rton pa dang / dge ba'i bshes gnyen de dag la nga rgyal med cing bla ma bzhin du phangs par 'dzin pa dang / ston pa bzhin du phangs par 'dzin pa ste/ dge ba'i bshes gnyen de dag gis kyang 'di bsam pa phun sum tshogs par rig nas 'bel ba'i gtam dang ye shes kyi gtam sgrub par byed do/ /snod du rig nas rgyun mi 'chad par phyi rol ma yin pa'i chos ston to/ /des chos de dag thos nas chos kyi tshogs la sbyor bar byed de/ gang chos kyi tshogs la sbyor ba de ni de ye shes kyi tshogs yin no/ / de la chos kyi tshogs la sbyor ba gang zhe na/ gang 'di don nyung ba dang / bya ba nyung ba dang / smra ba nyung ba dang / yo byad nyung ba dang / nam gyi cha stod dang nam gyi cha smad la mi nyal zhing rnal 'byor la brtson pa dang / thos pa'i don la rtogs pa dang / yang dang yang tshol ba dang / sems la rnyog pa med pa dang / sgrib pa rnams rnam par sel ba dang / ltung ba rnams la byung ba shes pa dang / 'gyod pa med pa dang / kun nas ltung ba med pa dang / sgrub pa la snying por byed pa dang / chos la gzhol ba dang / chos la 'bab pa dang / rtul ba dang ldan pa dang / ye shes tshol ba la mgo dang gos la me 'bar ba lta bu dang / de la ma chags par gnas pa dang / tshul khrims la mi lhod pa dang / brtson pa mi gtong ba dang / khyad par du 'gro ba dang / 'du 'dzi la mi dga' ba dang / gcig pur dga' ba dang / dgon pa la mngon du phyogs shing yid la byed pa dang / 'phags pa'i rigs chog shes pa dang / sbyangs pa'i yon tan dag las mi g.yo ba dang / chos kyi kun dga' la dga' zhing mos pa dang / 'jig rten pa'i sngags dran par 'dzin pa dang / 'jig rten las 'das pa'i chos tshol ba dang / brjed pa med pa dang / don rtogs pa'i rjes su 'gro ba dang / blo gros kyi lam dang mthun pa dang / brtan pas sdom pa dang / rkyen rnams kyi ye shes kyi rjes su 'gro ba dang / ngo tsha shes pa dang / khrel yod pas brgyan pa dang / ye shes kyi rjes su 'gro ba lhur len pa dang / mi shes pa sel ba dang / ma rig pa dang / gti mug gi mun pa dang / rab rib kyi ling tog gis chod pa bsal ba dang / shes rab kyi mig rnam par dag pa dang / blo shin tu rnam par dag pa dang / blo rgya che ba dang / blo ma zhum pa dang / blo ma gyes pa dang / mngon sum du shes pa dang / yon tan gzhan la rag ma lus pa dang / bdag gi yon tan mi bsnyems pa dang / gzhan gyi yon tan yongs su brjod pa dang / legs par bya ba'i las byed pa dang las kyi rnam par smin pa dang 'gal bar mi byed pa dang / las yongs su dag pa'i ye shes te/ btsun pa sha ra dwa ti'i bu 'di ni byang chub sems dpa' rnams kyi ye shes kyi tshogs mi zad pa zhes bya'o/ /gzhan yang sbyin pa bzhi po 'di dag ni ye shes kyi tshogs rab tu bsags par 'gyur te/ bzhi po gang zhe na/ chos smra ba rnams la gro ga dang / smyu gu dang / snag tsha dang glegs bam sbyin pa dang / chos smra ba rnams la chos kyi stan sna tshogs sbyin pa dang / chos smra ba rnams la rnyed pa dang / bkur sti dang tshigs su bcad pa thams cad sbyin pa dang / chos smra ba rnams la chos bsdu ba'i phyir g.yo med par legs so zhes bya ba sbyin pa ste/ sbyin pa bzhi po de dag ni ye shes kyi tshogs sogs par 'gyur ro/ /bsrung ba bzhi po 'di dag ni byang chub sems dpa' rnams kyi ye shes kyi tshogs bsags par 'gyur te/ bzhi gang zhe na/ 'di lta ste/ chos smra ba rnams rje bo bzhin du bsrung ba dang / dge ba'i rtsa ba bsrung ba dang / yul dang ljongs kyi phyogs bsrung ba dang / phan pa'i dngos po bsrung ba ste/ bsrung ba bzhi po de dag ni byang chub sems dpa' rnams kyi ye shes kyi tshogs bsags par 'gyur ro/ /nye bar ston pa bzhi po 'di dag ni byang chub sems dpa' rnams kyi ye shes kyi tshogs sogs par 'gyur te/ bzhi gang zhe na/ 'di lta ste/ chos smra ba rnams la zang zing gis nye bar ston pa dang / chos kyis nye bar ston pa dang shes rab kyis nye bar ston pa dang / ye shes kyis nye bar ston pa ste/ nye bar ston pa bzhi po de dag ni byang chub sems dpa' rnams kyi ye shes kyi tshogs sogs par 'gyur ro/ /stobs lnga po 'di dag ni byang chub sems dpa' rnams kyi ye shes kyi tshogs sogs par 'gyur te/ lnga gang zhe na/ 'di lta ste/ mos pa'i phyir dad pa'i stobs dang / thos pa tshol ba'i phyir brtson 'grus kyi stobs dang / byang chub kyi sems mi brjed pa'i phyir dran pa'i stobs dang / mnyam pa nyid la sems nges par sems pa'i phyir ting nge 'dzin gyi stobs dang / thos pa'i stobs kyi phyir shes rab kyi stobs te/ stobs lnga po de dag ni byang chub sems dpa' rnams kyi ye shes kyi tshogs sogs par 'gyur ro/ /tshul khrims bzhi po 'di dag ni byang chub sems dpa' rnams kyi ye shes kyi tshogs sogs par 'gyur te/ bzhi gang zhe na/ 'di lta ste/ chos la rab tu dga' ba'i tshul khrims dang / chos yongs su tshol ba'i tshul khrims dang / chos la nges par sems pa'i tshul khrims dang / byang chub tu yongs su bsngo ba'i tshul khrims te/ tshul khrims bzhi po de dag ni byang chub sems dpa' rnams kyi ye shes kyi tshogs sogs par 'gyur ro/ /bzod pa bzhi po 'di dag ni byang chub sems dpa' rnams kyi ye shes tshogs sogs par 'gyur te/ bzhi gang zhe na/ 'di lta ste/ chos tshol ba la brtson pas ngan du brjod pa dang / ngan du smra ba'i tshig gi lam bzod pa dang / chos tshol ba la brtson pas rlung dang / nyi ma dang / grang ba dang / tsha ba dang / bkres pa dang / skom pa bzod pa dang / chos tshol ba la brtson pas mkhan po dang / slob dpon dang / mthun par 'jug pa'i bzod pa dang / chos tshol ba la brtson pas stong pa nyid dang / mtshan ma med pa dang / smon pa med pa'i chos la bzod pa ste/ bzod pa chen po de dag ni byang chub sems dpa' rnams kyi ye shes kyi tshogs sogs par 'gyur ro/ /brtson 'grus bzhi po 'di dag ni byang chub sems dpa' rnams kyi ye shes kyi tshogs sogs par 'gyur te/ bzhi gang zhe na/ 'di lta ste/ nyan pa'i brtson 'grus dang / 'dzin pa'i brtson 'grus dang / brtan pa'i brtson 'grus dang / nan tan gyi brtson 'grus te/ brtson 'grus bzhi po 'di dag ni byang chub sems dpa' rnams kyi ye shes kyi tshogs sogs par 'gyur ro/ /bsam gtan gyi yan lag bzhi po 'di dag ni byang chub sems dpa' rnams kyi ye shes kyi tshogs sogs par 'gyur ro/ bzhi gang zhe na/ 'di lta ste/ dben pa dang rtse gcig pa'i bsam gtan dang / mngon par shes pa tshol ba dang / sangs rgyas kyi ye shes la rton pa ste/ bsam gtan gyi yan lag bzhi po 'di dag ni byang chub sems dpa' rnams kyi ye shes kyi tshogs sogs par 'gyur te/ shes rab kyi snang ba bzhi po 'di dag ni byang chub sems dpa' rnams kyi ye shes kyi tshogs sogs par 'gyur te/ bzhi gang zhe na/ 'di lta ste/ chad pa la mi gnas pa dang / rtag pa la mi 'jug pa dang / rten cing 'brel par 'byung ba dang mi 'gal ba dang / bdag med pa la bzod pa ste/ shes rab kyi snang ba bzhi po 'di dag ni byang chub sems dpa' rnams kyi ye shes kyi tshogs sogs par 'gyur ro/ /thabs bzhi po 'di dag ni byang chub sems dpa' rnams kyi ye shes kyi tshogs sogs par 'gyur te/ bzhi gang zhe na/ 'di lta ste/ 'jig rten gyi rjes su 'jug pa dang / sems can gyi rjes su 'jug pa dang / chos kyi rjes su 'jug pa dang / ye shes kyi rjes su 'jug pa ste/ thabs bzhi po 'di dag ni byang chub sems dpa' rnams kyi ye shes kyis tshogs sogs par 'gyur ro/ /lam bzhi po 'di dag ni byang chub sems rnams kyi ye shes kyi tshogs par 'gyur te/ bzhi gang zhe na/ 'di lta ste/ pha rol tu phyin pa'i lam dang / sa'i lam dang / byang chub kyi phyogs kyi lam dang / thams cad mkhyen pa'i ye shes kyi lam ste/ lam bzhi po 'di dag ni byang chub sems dpa' rnams kyi ye shes kyi tshogs sogs par 'gyur ro/ /mi ngoms pa bzhi po 'di dag ni byang chub sems dpa' rnams kyi ye shes kyi tshogs sogs par 'gyur te/ bzhi gang zhe na/ 'di lta ste/ thos pas mi ngoms dang / bstan pas mi ngoms pa dang / dpyod pas mi ngoms pa dang / shes pas mi ngoms pa ste/ mi ngoms pa bzhi po 'di dag ni byang chub sems dpa' rnams kyi ye shes kyi tshogs sogs par 'gyur ro/ /gzhan yang ye shes kyi tshogs ni gang sems can thams cad kyi rjes su 'gro ba dang / chos thams cad kyi rjes su 'gro ba'o/ /sbyin pa las kyang ye shes kyi tshogs su blta'o/ /de bzhin du tshul khrims dang / bzod pa dang / brtson 'grus dang / bsam gtan dang / shes rab las kyang ye shes kyi tshogs su blta'o/ /byams pa dang / snying rje dang / dga' ba dang / btang snyoms las kyang ye shes kyi tshogs su blta ste/ de ci'i phyir zhe na/ byang chub sems dpa'i rtsom pa ji snyed pa de dag thams cad ye shes kyis grub pa/ ye shes sngon du 'gro ba/ ye shes la rton pa/ thams cad mkhyen pa'i ye shes la gnas pa'i phyir te/ ye shes dang ldan pa thams cad la rton pa yin no/ /bdud thams cad kyis kyang de la glags mi rnyed do/ /de la sangs rgyas kyi chos kyi snod thams cad kyang nye bar gnas pa yin te/ sangs rgyas kyi byin gyi rlabs kyang 'thob bo/ /thams cad mkhyen pa'i ye shes kyang 'thob par byed de/ 'di ni ye shes kyi tshogs mi zad pa zhes bya ste/ sbyor ba de dag gnas skabs la 'di ni sbyor na yang rnam par smin pa'i sa la rnam pa thams cad du yongs su rdzogs pa dang / mtshan ma med pa dang / lhun gyis grub pa dang / rnam par mi rtog pa dang / sgrib pa med pa'i thams cad mkhyen pa'i ye shes su gyur pas ye shes kyi tshogs su rdzogs pa dang / ye shes kyi tshogs nyid yin pas bcom ldan 'das ni ye shes kyi tshogs te/ tshigs su bcad pa dang mi mthun par tshig gzhan du bstan pa ni sa'i rim pas bshad pas na nyes pa med do/ /da ni tshangs pa'i gnas pa bzhi'i ngo bo nyid du bstan par bya ba'i phyir/ byams chen rang bzhin dpag tu med/ /snying rje chen po blo yi mchog//shes rab chen po blo chen ldan/ /mkhas pa chen po thabs che ba/ /zhes bya ba gsungs te/ byams pa dang / snying rje dang / dga' ba dang / btang snyoms bzhi ni tshangs pa'i gnas pa bzhi ste/ tshangs pa ni mya ngan las 'das pa'o/ /de'i don du gnas pas na tshangs pa'i gnas pa bzhi'o/ /de la byams pa ni gsum ste/ sems can la dmigs pa'i byams pa dang / chos la dmigs pa dang / dmigs pa med pa'o/ /de yang dmigs pa med pa'i byams pa'i bdag nyid du gyur pas na byams chen rang bzhin te/ de nyid kyis na dpag tu med pa'o/ /de yang blo gros mi zad pas bstan pa'i mdo las gsungs te/ btsun pa sha ra dwa ti'i bu byang chub sems dpa' rnams kyi byams pa yang mi zad pa ste/ de ci'i phyir zhe na/ thub pa med pa'i phyir ro/ /byang chub sems dpa' rnams kyi byams pa ni thug pa med par byas te/ de dag gi byams pa nye bar sgrub pa yongs su chad pa med do/ /'di ltar sems can gyi khams ji tsam pa de tsam du byang chub sems dpa' de'i byams pa'i sems bskyed pas khyab par byed do/ /btsun pa sha ra dwa ti'i bu 'di lta ste/ dper na nam mkha'i khams 'dis gar yang ma khyab pa med do/ /btsun pa sha ra dwa ti'i bu de bzhin du byang chub sems dpa'i byams pa 'dis gang ma khyab pa'i sems can de gang yang med do/ /'di lta ste dper na sems can gyi khams ni tshad med de/ de la zad pa med do/ /de bzhin du byang chub sems dpa'i byams pa bsgom pa yang tshad med de/ de la zad pa med de 'di ltar nam mkha' mi zad pas na sems can mi zad do/ / sems can mi zad pas na byams pa mi zad de/ de'i phyir skyes bu dam pa de dag byams pa mi zad pa zhes bya'o/ /de skad ces smras pa dang / gnas brtan sha ra dwa ti'i bus/ byang chub sems dpa' blo gros mi zad pa la 'di skad ces smras so/ /rigs kyi bu sems can gyi khams 'di ji tsam/ blo gros mi zad pas smras pa/ btsun pa sha ra dwa ti'i bu sa'i khams dang / chu'i khams dang / me'i khams dang / rlung gi khams ji snyed pa de bas kyang sems can gyi khams ches mang ngo / /smras pa/ rigs kyi bu dpe bya bar mi nus sam/ blo gros mi zad pas smras pa/ btsun pa sha ra dwa ti'i bu nus mod kyi/ rgyu chung ngus ni ma yin no/ /btsun pa sha ra dwa ti'i bu 'di lta ste dper na shar phyogs su 'jig rten gyi khams gang gA'i klung gi bye ma snyed dang / de bzhin du lho phyogs dang / de bzhin du nub phyogs dang / de bzhin du byang phyogs dang / de bzhin du phyogs bcu kun du phyogs re rer yang 'jig rten gyi khams gang gA'i klung gi bye ma snyed de dag thams cad rgya mtsho chen po'i chus yongs su gang ba gcig tu gyur la/ sems can gang gA'i klung gi bye ma snyed 'dus te/ skra'i rtse mo brgyar gshegs pa'i chas de la chu'i thigs pa gcig blangs la/ de bzhin du gzhan yang sems can gang gA'i klung gi bye ma snyed dag 'dus te bskal pa gang gA'i klung gi bye ma snyed na skra'i rtse mo brgyar gshegs pa'i chas chu'i thigs pa gnyis blangs la mtshan ma gzhag pa 'di dang / bgrang ba 'di lta bus bskal pa gang gA'i klung gi bye ma snyed cig sems can gang gA'i klung gi bye ma snyed dag gis skra'i rtse mo brgyar gshegs pa'i chas chu'i thigs pa re re blangs pas chu'i phung po de tsam zad par gyur kyang sems can khams de ni zad pa'am mtha' thug pa gang yang med do/ /btsun pa sha ra dwa ti'i bu de ltar sems can gyi khams tshad med de/ de dag la byang chub sems dpa'i byams pas khyab par byed do/ /btsun pa sha ra dwa ti'i bu 'di ji snyam du sems/ gang gi byams pa de lta bu bsgoms pa'i dge ba'i rtsa ba tshad med pa de zad par nus sam/ smras pa rigs kyi bu de ni ma yin te/ byams pa bsgoms pa'i dge ba'i rtsa ba de 'dra ba zad par su 'dod pa de ni nam mkha' zad par 'dod do/ /byang chub sems dpa' gang gis byams pa mi zad pa 'di thos nas skrag par mi 'gyur na de dag kyang byams pa mi zad par 'phags par 'gyur ro/ /blo gros mi zad pas smras pa/ btsun pa sha ra dwa ti'i bu byams pa ni bdag bsrung zhing gzhan la phan par gnas pa ste/ mchog tu rtsod pa med pa dang / gnod sems kyi tha ba'i skyon dang / khro ba dang khon du 'dzin pa thams cad rab tu 'joms pa'o/ /bag la nyal dang kun nas ldang ba dang bral ba ste/ dad pa bskyed cing sems can thams cad kyi 'khrul pa la nyes par mi lta ba'o/ /yongs su gdung ba med cing lus dang sems bde ba bskyed pa ste/ gzhan gyis gnod par bya ba las shin tu 'das pa'o/ /nyes pa thams cad kyi 'jigs pa dang bral ba ste/ 'phags pa'i lam dang mthun zhing gshe ba dang / sdang ba'i sems dang ldan pa'i sems can rnams dad par byed pa/ yul thams cad las sgrol ba ste/ dbyig dang / mtshon cha 'chang ba ma yin no/ /sems can thams cad rab tu thar par bya ba la dga' ba/ khong khro ba thams cad dang bral ba/ tshul 'chos pa dang / kha gsag dang / thob kyis 'jal ba thams cad dang bral ba rnyed pa dang / bkur sti dang / tshigs su bcad pa thams cad 'byung bar byed pa/ brgya byin dang / tshangs pa dang / 'jig rten skyong ba thams cad kyis phyag byas pa/ rang gi gzi brjid kyi rgyan gyis brgyan pa/ mkhas pas rab tu bsngags pa/ byis pa thams cad srung ba/ tshangs pa'i lam dang mthun pa/ 'dod pa'i khams dang ma 'dres pa/ sems can thams cad kyi thar pa'i lam gyi mchog theg pa thams cad yang dag par bsdus pa/ zang zing med pa'i bsod nams kyis bzung ba/ bsod nams kyi tshogs thams cad bsags pa/ rdzas las byung ba'i bsod nams bya ba'i dngos po thams cad kyis zil gyis mi non pa/ skyes bu chen po'i mtshan sum cu rtsa gnyis dang / dpe byad bzang po brgyad cus brgyan pa/ dbang po nyams pa dang ma tshang ba thams cad spangs pa/ bde 'gro thams cad dang mya ngan las 'das pa'i lam dang mthun pa/ ngan song thams cad dang mi khom pa brgyad las 'das pa/ chos kyi kun dga' la dga' zhing mos pa/ 'dod pa dang longs spyod kyi dbang phyug la mngon par dga' ba med pa/ sems can thams cad la sems snyoms pa dang / sbyin pa'i sbyor ba tha dad pa dang bral ba tshul khrims dang bslab pa thams cad kyi sgo dang / tshul khrims 'chal pa thams cad yongs su skyob pa/ bzod pa'i stobs ston pa/ nga rgyal dang / rgyags pa dang / dregs pa thams cad dang bral ba/ 'phags pa rnams 'jug pa'i bsam gtan dang ting nge 'dzin dang / snyoms par 'jug pa'i rtsa ba mi 'khrugs pa'i brtson 'grus brtsams shing yang dag par sbyor ba/ bya ba thams cad las yang dag par grol ba/ bsam gtan dang / rnam par thar pa dang / ting nge 'dzin dang / snyoms par 'jug pas nyon mongs pa thams cad las nges par 'byung ba/ gsang sngags dang thos pa 'dzin pas nges par sems pa'i shes rab kyi rgyu bskyed pa/ rang gi phyogs dang gzhan gyi phyogs la nges pa/ bdud kyi phyogs dang nyon mongs pa rnams bsal ba/ 'grogs na bde ba/ bsnyen bkur dang 'jug pa'i rgyu mthun pa la sems pa/ spyod lam srung bar byed pa/ rgod pa thams cad las 'das pa/ nga rgyal gyi las sel ba/ ngo tsha shes pa dang khrel yod pas phyugs shing bag chags dang mtshams sbyor ba dang nyon mongs pa'i dri nga ba sbyong ba'o/ /btsun pa sha ra dwa ti'i bu byams pa dri zhim pa dang / sems can thams cad yongs su skyob pa ste byams pa chen po ni bdag gi bde ba gtong zhing sems can rnams la bde ba sbyin pa'o/ /nyan thos kyi byams pa ni bdag skyob pa'o/ /byang chub sems dpa' rnams kyi byams pa chen po ni sems can thams cad yongs su skyob pa'o/ /btsun pa sha ra dwa ti'i bu byams pa ni chu bo las sgrol ba'o/ /btsun pa sha ra dwa ti'i bu byams pa ni gsum po 'di dag ste/ gsum gang zhe na 'di lta ste/ sems can la dmigs pa'i byams pa dang / chos la dmigs pa'i byams pa dang / dmigs pa med pa'i byams pa'o/ /sems can la dmigs pa'i byams pa ni sems dang po bskyed pa'i byang chub sems dpa' rnams kyi'o/ /chos la dmigs pa'i byams pa ni spyod pa la zhugs pa'i byang chub sems dpa'i rnams kyi'o/ /dmigs pa med pa'i byams pa ni mi skye ba'i chos la bzod pa'i byang chub sems dpa' rnams kyi ste/ btsun pa sha ra dwa ti'i bu 'di ni byang chub sems dpa' rnams kyi byams pa mi zad pa zhes bya ste/ de bas na byang chub sems dpa' byams pa mi zad pa ji skad gsungs pa de lta bu'i byams pa'i ngo bo nyid du 'gyur bas/ byams chen rang bzhin dpag tu med/ /ces bya'o/ /thugs rje chen po'i ngo bo nyid du bstan par bya ba'i phyir/ snying rje chen po blo yi mchog / ces bya ba gsungs te/ thugs rje chen pos brlan pa'i ngo bo nyid yin pas snying rje chen po'o/ /'jam pa'i dbyangs ni shes rab kyi mchog yin pas blo yi mchog go/ /'di yang byams pa bzhin du sems can dpag tu med pa la dmigs par brjod par bya'o/ /de bas na snying rje chen po sngon du 'gro ba'i byang chub sems dpa' thams cad kyi gzhan don gyi phyir tshogs thams cad nye bar stsogs par 'gyur ba ste/ de yang btsun pa sha ra dwa ti'i bu gzhan yang byang chub sems dpa' rnams kyi snying rje chen po yang mi zad pa ste/ de ci'i phyir zhe na/ sngon du 'gro ba'i phyir ro/ /btsun pa sha ra dwa ti'i bu 'di lta ste/ dper na dbugs 'byung ba dang rngub pa ni skyes bu'i srog gi dbang po'i sngon du 'gro ba'o/ /de bzhin du theg pa chen po yang dag par bsgrub pa'i phyir byang chub sems dpa'i snying rje chen po ni sngon du 'gro ba'o/ /'di lta ste/ dper na 'khor los sgyur pa'i rgyal po'i 'khor lo rin po che ni rin po che sna bdun gyi sngon du 'gro ba'o/ /de bzhin du byang chub sems dpa' rnams thams cad mkhyen pa'i ye shes yang dag par sgrub pa la snying rje chen po ni sngon du 'gro ba'o/ /'di lta ste/ dper na tshong dpon nam khyim bdag zhig bu gcig la snying thag pa nas sdug par 'dzin pa de bzhin du snying rje chen po la rab tu gnas pa'i byang chub sems dpa' yang sems can thams cad la snying thag pa nas sdug par 'dzin pa yin no/ /btsun pa sha ra dwa ti'i bu snying rje chen po zhes bya ba ni 'di bdag nyid kyis byas pas na de'i phyir snying rje chen po zhes bya'o/ /rang gis byas pas na snying rje chen po'o/ /gzhan gyi skabs mi rnyed pas na snying rje chen po'o zhes bya ba la sogs pa ste/ gang gi phyir de lta bu ni snying rje chen po'i ngo bo nyid yin la bcom ldan 'das kyang de'i rang bzhin yin te/ nges par 'byung ba thams cad kyi rgyu yin pas shes par bya ste/ de bas na blo'i mchog ces bya'o/ /shes rab chen po blo chen ldan/ /zhes bya ba ni dga' ba chen po'i ngo bo nyid bstan pa yin te/ de la dga' ba chen po gang zhe na/ gang sangs rgyas kyi chos rnams dran pa dang / rjes su dran pa dang dga' ba dang mos pa dang / mchog tu dga' ba de la ni dga' ba zhes bya ste/ chos thams cad khong du chud pas dga' bar 'gyur ba de ni shes rab med na mi 'byung bas shes rab nyid rgyu yin te de bas na shes rab chen po zhes bya ste/ gang la shes rab chen po yod pa de ni shes rab chen po'o/ /rab tu dga' ba'i shes rab brnyes nas kyang sems can thams cad kyi don mdzad pa la thugs gzhol bas na blo chen ldan zhes bya ste/ dri ma med pa'i blo gros ni blo'o/ /yul thams cad pa ni che ba ste/ de lta bu'i shes rab gang la mnga' ba de ni blo chen ldan zhes bya'o/ /de la dga' ba dang de'i ngo bo nyid brjod par bya ste/ de yang sems mi 'gong zhing mi brdzi ba dang / srid pa med pa dang / 'dod pa'i dga' ba thams cad gtong ba dang / chos kyi dga' ba thams cad kyi rten dang / sems mchog tu dga' ba dang / lus rab tu sim pa dang / sangs rgyas la dga' zhing yi rang ba dang / de bzhin gshegs pa'i sku la dga' zhing mos pas mtshan dang dpe byad bzang po'i rgyan tshol ba la mkhas pa dang / dge ba'i chos nyan pas mi skyo ba dang / de kho na'i chos la rton pa'i nan tan dang / dga' ba dang / dad pa dang / mchog tu dga' ba dang / rab tu dga' bas chos la mos pa dang / rtag tu rgyun mi 'chad par sems can rnams la khong khro ba med pa'i blo dang / sangs rgyas kyi chos tshol ba la shin tu 'dun pa dang / chos la 'dun pa yang mi 'dor ba dang / sangs rgyas kyi chos rgya chen po dag la mos shing rnam par grol ba dang / nyi tshe ba'i theg pa bsal te sems bskyed pa dang / ser sna med pas ma zhum par sems bskyed pa dang / slong ba la sbyin pa byin nas 'khor gsum yongs su dag par sbyangs pa dang / sbyin pa la mchog tu dga' ba dang / tshul khrims dang ldan pa rnams la dad pa dang / tshul khrims 'chal ba rnams la rjes su 'dzin cing byams pa dang / rang tshul khrims yongs su dag pas ngan 'gro'i 'jigs pa thams cad las shin tu 'da' bar dbugs 'byin pa dang / de bzhin gshegs pa'i tshul khrims la yongs su bsngo ba dang / brtan zhing mi phyed pa dang / pha rol ngan du brjod pa dang / ngan du smra ba'i tshig gi lam la khong khro ba med pa'i sems kyis bzod cing nges pa dang / nga rgyal med pa dang / bla ma la 'dud cing ri mor byed pa dang / rtag tu 'dzum pa'i bzhin dang / khro gnyer med pa dang / gsong por smra ba dang / tshul 'chos pa med pa dang / kha gsag med pa dang / thob kyis 'jal ba med pa dang / bsam pa dag pa dang / sems la brlang ba med pa dang / gyu med pa dang / thams cad la phan yon du lta ba dang / skyon med par lta ba dang / ltung ba mi gleng ba dang / yang dag par dga' bar 'gyur ba'i chos kyi rjes su 'jug pa dang / byang chub sems dpa' rnams la ston pa ltar phangs su 'dzin pa dang / chos rnams la bdag bzhin du phangs su 'dzin pa dang / de bzhin gshegs pa rnams la srog bzhin du phangs su 'dzin pa dang / bla ma rnams la pha ma bzhin du phangs su 'dzin pa dang / sems can rnams la bu bzhin du phangs su 'dzin pa dang / mkhan po dang slob dpon rnams la sangs rgyas bzhin du phangs su 'dzin pa dang / nan tan rnams la yan lag gi dam pa mgo bzhin du phangs su 'dzin pa dang / pha rol tu phyin pa rnams la rkang lag bzhin du phangs su 'dzin pa dang / chos smra ba rnams la rin po che thams cad bzhin du phangs su 'dzin pa dang / sangs rgyas kyi chos rnams thams cad la yid bzhin gyi nor bu bzhin du phangs su 'dzin pa dang / rjes su bstan pa rnams la dga' ba'i rtsed mo bzhin du phangs su 'dzin pa dang / chos shes pa rnams la nad med pa bzhin du phangs su 'dzin pa dang / chos 'tshal ba rnams la sman bzhin du phangs su 'dzin pa dang / bskul zhing dran par byed pa rnams la sman pa bzhin du sangs rgyas su 'dzin pa ste/ btsun pa sha ra dwa ti'i bu de ltar gang dbang po thams cad la dbang po 'gong ba 'di ni dga' ba chen po zhes bya'o/ /dga' ba chen po zhes bya ba ni rtog pa'i ye shes kyi phyir zhi ba'i rnam pa'o/ /mi rgod pa'i phyir rab tu zhi ba'i rnam pa'o/ /khengs pa ma yin pa'i phyir shin tu sbyangs pa'i rnam pa'o/ /rnam par mi g.yeng ba'i phyir dbang po dga' ba'i rnam pa'o/ /mi nyams pa'i phyir brtul zhugs kyi rnam pa'o/ /'dod pa'i phyir nges pa'i rnam pa'o/ /bka' blo bde ba'i phyir thos pa'i rnam pa'o/ /sems las su rung ba'i phyir nye bar zhi ba'i rnam pa'o/ /las legs par byas pa'i phyir dga' ba'i rnam pa'o/ /kha na ma tho ba med pa'i phyir mi 'gyod pa'i rnam pa'o/ /ma g.yos pa'i phyir shin tu gnas pa'i rnam pa'o/ /mi gnas pa'i phyir ma g.yos pa'i rnam pa'o/ /thul bar dka' ba'i phyir bsnyen dka' ba'i rnam pa'o/ /chud mi za ba'i phyir don gyi rnam pa'o/ /ma nor ba de bzhin nyid kyi phyir bden pa'i rnam pa'o/ /de byed pa'i phyir de kho na'i rnam pa'o/ /stobs kyi phyir spro ba'i rnam pa'o/ /mi brdzi ba'i phyir stobs kyi rnam pa'o/ /sangs rgyas kyi chos thams cad yang dag pa ji lta ba bzhin du tshol bas mi skyo ba'i phyir sangs rgyas kyi chos yongs su rdzogs par byed pa'i rnam pa ste/ de lta bu'i dga' ba'i ngo bo ni bcom ldan 'das yin zhes ston par 'gyur ro/ /mkhas pa chen po thabs che ba/ /zhes bya ba ni btang snyoms chen po'i ngo bo nyid du bstan par bya ba'i phyir gsungs pa yin te/ de yang thabs chen po gang la mnga' ba de ni thabs chen po zhes bya'o/ /gnas skabs 'dir btang snyoms chen po ni thabs chen po ste/ bsam pa sna tshogs pa dang ldan pa'i gdul bya'i sems can rnams 'dul ba'i phyir ro/ /de yang byang chub sems dpa' rnams kyi btang snyoms rnam pa gsum ste/ gsum gang zhe na/ 'di lta ste/ nyon mongs pa la btang snyoms pa dang / bdag dang gzhan srung ba'i btang snyoms dang / dus dang dus ma yin pa la btang snyoms pa'o/ /de la nyon mongs pa la btang snyoms pa ni bsti stang du byas pas mthos par mi sems pa dang / bsti stang du ma byas pas dmas par mi sems pa dang / rnyed pa dag la rlom sems med pa dang / ma rnyed pa dag la yi chad pa med pa dang / snyan pa dag la mngon par dga' ba med pa dang / mi snyan pa la zhum pa med pa dang / smad pas sro shi bar mi 'gyur ba dang / bsngags pa la chos nyid rab tu gnas pa dang / sdug bsngal dag la so sor rtog pa'i stobs dang / /bde ba dag la mi rtag pa dang sdug bsngal bar rtog pa'i stobs dang / rjes su chags pa 'dor ba dang / khong khro ba spong bas mdza' ba dang / mi mdza' ba dag la sems mnyam pa dang / tshul khrims dang ldan pa dang tshul khrims 'chal ba rnams la blo ma nyam pa dang / legs par byas pa dag dang nyes par byas pa rnams la yang gnyis su mi byed pa dang / sdug pa dang mi sdug par mi lta ba dang / legs par thos pa dang nyes par thos pa la mi 'byed pa dang / legs par smras pa dang nyes par smra ba la bag la nyal med pa dang / ro myong ba'i nyes dmigs rnams la mtshungs par yongs su 'jal ba dang / sems can thams cad la bsam pa mnyam po dang / lus dang srog la mi lta ba dang / rab dang 'bring dang tha ma rnams la 'du shes mnyam pa dang / bsngags pa dang bsngags pa ma yin pa rnams la sems mnyam pa dang / bde ba dang mi bde ba rnams la rang gi sems yongs su dag pa ste/ btsun pa sha ra dwa ti'i bu de ltar gang bsti stang du byed pa dang / gnod par byed pa la mthon dman du mi sems shing / de la byang chub sems dpa' btang snyoms pa yin te/ btsun pa sha ra dwa ti'i bu 'di ni byang chub sems dpa' rnams kyi nyon mongs pa la btang snyoms pa zhes bya'o/ /de la byang chub sems dpa' rnams kyi bdag dang gzhan bsrung ba'i btang snyoms gang zhe na/ 'di la byang chub sems dpa' lus dang yan lag dang nying lag rnams bcad kyang khong khro bar mi byed cing mi tshol te btang snyoms pa yin no/ /lus kyi rnam par 'gyur pa las sam/ ngag gi rnam par 'gyur ba las kyang rung ste/ gnyis ka las bzod pas na de'i phyir btang snyoms zhes bya'o/ /mig gi rnam pas kyang rma mi phyin/ gzugs kyi rnam pa las kyang rma mi phyin te/ gnyis kas kyang rma mi phyin to/ /de bzhin du rna bas ma yin/ sgras ma yin/ snas ma yin/ dris ma yin/ lces ma yin/ ros ma yin/ lus kyis ma yin/ reg byas ma yin/ yid kyi rnam pas kyang rma mi phyin/ chos kyi rnam pas kyang rma mi phyin te/ de'i phyir btang snyoms zhes bya'o/ rma mi phyin cing nyams pa med pas de'i phyir btang snyoms zhes bya'o/ /rma phyung ba la rma mi phyin pas de'i phyir btang snyoms zhes bya'o/ /bdag dang gzhan gnyi ga bsrung bas de'i phyir btang snyoms zhes bya'o/ /phan par byed pa dang gnod par byed pa la mnyam par sbyor bas de'i phyir btang snyoms zhes bya'o/ /btang snyoms ni mchog tu rtsod pa med pa'o/ /btang snyoms ni rang gi sems la nges par sems pa'o/ /btang snyoms ni gzhan gyi sems bsrung pa'o/ /btang snyoms ni bdag la rtog pa'o/ /btang snyoms ni sems can gzhan la gnod pa med pa'o/ /btang snyoms ni byang chub sems dpa'i mnyam par gzhag pa'i gnas skabs yin te/ 'di ni byang chub sems dpa'i bdag dang gzhan bsrung ba'i btang snyoms zhes bya'o/ /de la byang chub sems dpa'i dus dang dus ma yin pa la btang snyoms gang zhe na/ sangs rgyas bcom ldan 'das rnams ni byang chub sems dpa' thams cad du btang snyoms bya bar bka' mi stsol to/ /de ci'i phyir zhe na/ byang chub sems dpa'i rtag tu bdag dang gzhan gyi dge ba'i chos btsal ba la brtson zhing 'bad par bya ba'i phyir te/ des dus dang dus ma yin par btang snyoms par bya'o/ /de la dus dang dus ma yin pa'i btang snyoms gang zhe na/ snod du gyur pa ma yin pa dang / nyan par mi 'dod pa'i sems can rnams la btang snyoms pa dang / ma rnyed pa dang / smad pa dang mi snyan pa dang sdug bsngal ba la btang snyoms dang / sems can nyan thos kyi theg pa can skyon med pa la zhugs pa rnams la btang snyoms dang / sbyin pa'i dus na tshul khrims brtul ba'i btang snyoms dang / tshul khrims kyi dus na sbyin pa brtul ba'i btang snyoms dang / bzod pa'i dus na brtson 'grus brtul ba'i btang snyoms dang / brtson 'grus kyi dus na bsam gtan brtul ba'i btang snyoms dang / bsam gtan gyi dus na sbyin pa la chags pa brtul ba'i btang snyoms dang / shes rab kyi dus na pha rol tu phyin pa lnga la dmigs pa la brtul ba'i btang snyoms te/ 'di ni dus dang dus ma yin pa la btang snyoms pa zhes bya'o/ /de ltar btang snyoms rnam pa gsum ni thabs chen por yongs su gzung bar bya ste/ sems can sna tshogs pa'i don gyi bya ba'i thabs kyi rgyur gyur pa'i phyir thabs chen po zhes bya ba'i sgrar gsungs te/ de bas na bcom ldan 'das ni thabs che ba zhes bya'o/ /de nyid kyis na mkhas pa chen po ste/ thabs kyi bya ba la mkhas shing byas par mdzad pas so/ /de la 'dir rim pa ni 'di yin te/ byams pa chen pos ni sems can thams cad phan pa la nges par sbyor bar mdzad do/ /thugs rje chen pos ni de dag nyid bag yod pa la khong du chud pa'i bde ba la rab tu bkod par mdzad do/ /dga' ba chen pos ni dga' ba chen po la 'jog go/ /btang snyoms chen pos ni rjes su chags pa dang khong khro ba dang bral ba'i chos kyi sku'i mnyam pa nyid la 'jog par mdzad pa yin no/ /de ltar 'dir yi ge dang 'gal bar bshad do zhes bya ba'i som nyi mi bya'o/ /yang na gsang sngags kyi tshul gyi rim pas ni sbyin bdag chen po zhes bya ba la sogs pa gzhan du yang bshad do/ /de la sbyin bdag chen po zhes bya ba ni mchog tu bde ba 'byung ba'i byang chub kyi sems kyi chu'i rgyun 'bab pa'i ngo bor gyur pa gang la yod pa de ni sbyin bdag chen po yin la/ de'i bdag po pas sbyin bdag chen po gtso bo yin te/ de yang 'phags pa 'jam dpal gyi 'jam zhing yid du 'ong ba'i skus thams cad kyi mngon par 'dod pa yongs su rdzogs par mdzad pas 'jig rten gyi khams thams cad du gtogs pa'i dkyil 'khor thams cad kyi 'khor lo'i nang du chud pa'i lha mo sgeg mo'i gzugs can gyi bdag por gyur pa'i phyir te/ gang phyi rol pa'i bdag nyid pas/ /sgeg mo sbyin pa'i pha rol phyin/ /zhes gsungs pa'i phyir ro/ /de bzhin du/ /byang chub yan lag 'bras ster bas/ /phreng ba tshul khrims pha rol phyin/ /zhes gsungs pas/ byang chub kyi yan lag can gyi me tog gi phreng bas brgyan pas bsil bar gyur pa'i tshul khrims kyi pha rol tu phyin pa'i yan lag tu 'dus pa'i sku dang ldan pas na/ tshul khrims chen po 'chang ba'i mchog /ces bya ste/ thams cad du 'gro ba'i tshul khrims chen po gang la yod pa de ni tshul khrims chen po ste/ de 'chang bas na tshul khrims chen po 'chang ba'o/ /thams cad kyi gtso bo'i gzugs su gnas pas na mchog go/ /bzod pa chen po ni lha mo rdo rje dbyangs ma'i ngo bo ste/ zhi ba'i chos la rjes mos pas/ /glu ma bzod pa'i pha rol phyin/ /zhes gsungs pas so/ / de 'dzin par mdzad pas na bzod pa chen po 'chang ba'o/ /mi g.yo ba'i ngo bo nyid yin pas na brtan pa'o/ /brtson 'grus chen po gang yong ba de ni brtson 'grus chen po ste/ lha mo rdo rje gar gyi gzugs can no/ /de ni mchog tu brtul ba dang ldan pas na/ brtson 'grus chen po brtul ba yin/ /zhes bya ste/ sangs rgyas mchod la skyon med pas/ /gar ma brtson 'grus pha rol phyin/ /zhes gsungs pa'i phyir te/ ji ltar de bzhin gshegs pas gsungs pa de ltar sbyar ba yin gyi rang dgar byas pas brtags pa ni ma yin no/ /bsam gtan chen po gang la yod pa de ni bsam gtan chen po ste de rnams dang lhan cig bsam gtan chen po'i ting nge 'dzin de la snyoms par zhugs pas na/ bsam gtan chen po'i ting 'dzin gnas/ /zhes bya ste/ sangs rgyas nyid 'bras rgyu yin pas/ /me tog bsam gtan pha rol phyin/ /zhes gsungs pa'i phyir ro/ /rdo rje me tog ma'i bdag po nyid du bstan to/ /shes rab chen po gang la yod pa de ni shes rab chen po ste/ lha mo rdo rje bdug pa ma'i ngo bo'o/ /de'i lus ni chos 'byung ba'i tshul can te/ de'i dga' ba bsgrub par 'gyur ba'i tshul gyis 'dzin par mdzad pas na/ shes rab chen po lus 'chang ba ste/ thar par 'jug pa'i dga' bsgrub pas/ /bdug ma shes rab pha rol phyin/ /zhes gsungs pas so/ /mi shes mun nag 'jig byed pas/ /rdo rje mar me thabs chen po/ /zhes gsungs pa'i phyir ro/ /snang ba thams cad kyi bdag por gyur pas na rje btsun 'jam pa'i dbyangs ni thabs che ba zhes bya'o/ /nyon mongs dri nga 'jig pas na/ /smon lam rdo rje byug pa ma/ /zhes gsungs pa'i phyir nyon mongs pa'i dring ba thams cad sel bar byed pa smon lam gyi ngo bo rdo rje byug pa mo dang ldan pas na smon lam mo/ /gzungs kyi dkyil 'khor du grags pa'i/ /sgo rnams srung bar byed pa bzhi/ /so so yang dag rig ngo bo/ /de rnams stobs chen pha rol gnon/ /de dang yan lag kun sbyor ba/ /bde ba chen po'i stobs dang lnga/ /bdud dgra'i stobs ni rab 'joms pas/ /yid 'ong dpal ni stobs chen no/ /gzugs dang sgra dang dri chen po/ /ro dang reg bya'i khams rnams te/ / mchod pa'i lha mo rdzu 'phrul che/ /de rnams ye shes che'i rang bzhin/ /zhes gsungs pa'i phyir ro/ /de rnams dang gcig tu 'dres par gyur pa bsten par mdzad pas na ye shes chen po'i rgya mtsho'o/ /byams pa chen po'i rang bzhin ni spyan gyi sbyor bas sems can dpag tu med pa'i gnod pa zhi bar mdzad pa'i phyir te/ zhi ba'i las mchog sgrub byed pas/ /sangs rgyas spyan ni byams chen po/ /zhes gsungs so/ /snying rje chen po ni mA ma kI ste/ sdug bsngal rnams las sgrol bas na/ /mA ma kI ni snying rje che/ /zhes gsungs pa'i phyir ro/ /de dang lhan cig snyoms par zhugs pa'i sbyor ba ni blo yi mchog yin te/ de bas na/ snying rje chen po blo yi mchog /ces bya ste/ rje btsun 'jam pa'i dbyangs so/ /rdo rje pad+mar rab sbyor bas/ /gos dkar mo ni dga' bar grags/ /shes rab chen po rab sbyor bas/ /'jig rten na ni rab dga' skyes/ /shes rab chen po blo che ba/ de dang ldan pas 'jam pa'i dbyangs/ /btang snyoms che dang thabs che ba/ /lha mo sgrol mar rab tu brjod/ /mkhas pa chen po thabs che ba/ /de ldan 'jam dbyangs shes par bya/ /zhes 'byung ste/ 'di ni dkyil 'khor thams cad du mchod pa'i bdag por gyur pa nyid ma tshang ba med par ston par shes par bya ste/ rnal 'byor gyi rgyud shes pa rnams kyi chos kyi rjes su 'brangs pas nges par dpyad par bya'o/ /rnam grangs gzhan yang sbyin pa thams cad stsol ba'i byang chub kyi sems kyi bdag nyid chen po rdo rje rigs kyi bdag por gyur pas na/ sbyin bdag chen po gtso bo zhes bya'o/ /dbul zhing nyon mongs pa'i gdung ba thams cad sel zhing bsil ba'i ngang tshul can rin po che'i rigs kyi bdag po rin chen 'byung ldan gyi sku 'dzin pas na/ tshul khrims chen po 'chang ba'i mchog go/ /chos la nges par sems pa'i bzod pa'i ngo bo pad+ma'i rigs kyi bdag po 'od dpag med kyi sku 'dzin pas na/ bzod chen 'chang ba brtan pa po'o/ /brtson 'grus kyi pha rol tu phyin pa'i bdag nyid sna tshogs pa'i rigs kyi bdag po bya ba grub pa don yod grub pa'i sku'i ngo bor gyur pas na/ brtson 'grus chen po brtul ba yin/ /zhes bya'o/ /chos kyi dkyil 'khor gyi ting nge 'dzin la snyoms par zhugs pa'i lha'i bdag nyid du gyur pas na/ bsam gtan chen po'i ting 'dzin gnas so/ /gzungs kyi dkyil 'khor na gnas pa'i gzungs kyi lha mo thams cad kyi shes rab kyi sku 'dzin par mdzad pas na/ /shes rab chen po'i lus 'chang ba'o/ / stobs po che dang / rdo rje hUM mdzad dang / rdo rje me ltar 'bar ba dang / he ru ka dang / rta mchog la sogs pa'i sku'i tshul gyis bdud dang / gdug pa thams cad kyi stobs rab tu 'joms par mdzad pas na stobs po che'o/ /bsdu ba'i dngos po bzhi'i rang bzhin rdo rje lcags kyu dang / zhags pa dang / lcags sgrog dang / 'bebs pa la sogs pa'i gzugs kyis 'gro ba ma lus pa'i don mdzad pas na thabs che ba'o/ /sngon gyi smon lam gyi shugs kyis nus pa phul du byung ba'i stobs kyis 'jig rten pa dang / 'jig rten las 'das pa'i dkyil 'khor thams cad kyi lha rnams bsdus par gyur pas rgya mtsho chen po dang 'dra ba'i dkyil 'khor chen po bkod pa rnams kyi bdag por gyur pas na/ smon lam ye shes rgya mtsho ste/ /zhes gsungs so/ /de ltar dkyil 'khor thams cad kyi bdag por gyur kyang sems can thams cad la bu gcig pa ltar gces par 'dzin zhing thams cad du snyoms pa'i thugs kyis sems can rnams kyi don mdzad pas na/ byams chen rang bzhin dpag tu med/ /ces bya'o/ /ngan 'gro thams cad las gdon pa'i dkyil 'khor gyi lha rnams kyi bdag nyid du gyur pas na/ snying rje chen po blo yi mchog go/ / thams cad du shes rab phul du byung ba'i stobs kyis 'gro ba'i don ma tshang ba med par mdzad pas na/ shes rab chen po blo chen ldan no/ /sems can mos pa'i bye brag sna tshogs dang ldan pa'i gdul bya rnams shin tu gdul ba'i phyir bya ba dang spyod pa dang rnal 'byor gyi rgyud kyi thabs kyi dbye bas sems can rnams kyi don mdzad pas na/ mkhas pa chen po thabs che ba/ /zhes bya ste/ mkhas pa chen po ni rje btsun 'jam pa'i dbyangs so/ /da ni rdzu 'phrul dang cho 'phrul gyis 'dul ba'i sems can sdud pa'i rang gi ngo bo bstan pa'i phyir/ rdzu 'phrul chen po'i stobs dang ldan/ /shugs chen mgyogs pa chen po ste/ /rdzu 'phrul chen po cher grags pa/ /stobs chen pha rol gnon pa po/ /zhes bya ba gsungs te/ de la rdzu 'phrul chen po ni 'byor pa la bya'o/ /de yang rnam pa gsum ste/ lus kyi rdzu 'phrul ni 'jig rten gyi khams mtha' yas pa na gnas pa'i sems can rnams kyi lus dang rjes su mthun pa'i sku'i mchog cig car ston cing 'dul lo/ /ngag gi rdzu 'phrul ni sems can thams cad kyi skad dang brda chos ston par mdzad pa'o/ /yid kyi rdzu 'phrul ni sems can thams cad kyi spyod pa'i rjes su zhugs nas yang dag par bskul zhing snang bar byas te/ sangs rgyas kyi byang chub la rab tu 'jog par mdzad pa'o/ /rdzu 'phrul gyi stobs ni rdzu 'phrul stobs te/ bdud dang mu stegs la sogs pas bskyod par mi nus shing thogs pa med pa'i nus pa dang ldan pa ni stobs zhes bya ste/ de lta bu'i rdzu 'phrul chen po'i stobs dang nye bar ldan pa gang yin pa de ni rdzu 'phrul chen po'i stobs dang ldan zhes bya'o/ /g.yo ba med kyang thams cad du bdag nyid kyi dngos po ston pas na shugs chen no/ /de bzhin du yid ltar mgyogs pa'i 'gro ba rnam pas mgyogs pas na mgyogs pa chen po'o/ /gang gi phyir de ltar yin pas na/ rdzu 'phrul chen po cher grags pa/ /zhes bya ba ste/ thams cad kyi gtso bo zhes bya ba'i don to/ /rdzu 'phrul gyi stobs chen pos gzhan gyi don du 'jig rten gyi khams mtha' yas pa rnam par gnon pas/ stobs chen pha rol gnon pa po/ /zhes bya'o/ /da ni rdo rje 'chang chen po la sogs pa'i sgra'i don bstan par bya ba'i phyir/ srid pa'i ri bo chen po 'joms/ /mkhregs shing rdo rje chen po 'chang / /drag po chen po drag shul che/ /'jigs chen 'jigs par byed pa po/ /zhes bya ba gsungs te/ de la 'byung ba'i phyir srid pa ste/ yang nas yang du 'gro ba lngar skye bas na srid pa'o/ /de yang thog ma med pas na chen po ste/ srid pa yang yin la chen po yang yin pas na srid pa chen po'o/ /srid pa chen po de nyid ni ri bo ste/ de yang dag par 'joms pas na/ /srid pa'i ri bo chen po 'joms/ /zhes bya la/ de bas na/ mkhregs shing rdo rje chen po 'chang / /zhes bya ste/ stong pa nyid gnyis su med pa'i ye shes mi phyed pa la gnyis su gyur pa'i bu ga med pas na mkhregs shing zhes bya'o/ /rdo rje yang yin la chen po yang yin pas rdo rje chen po ste/ dngos po thams cad la nye bar dmigs pa 'jig par byed pa'i chos thams cad stong pa nyid kyi ye shes so/ /de yang de'i bdag nyid kyis 'dzin pas na rdo rje chen po 'chang ste/ rje btsun 'jam dpal lo/ /thog ma med pa'i bag chags kyi rnam par rtog pa dang nye bar dmigs pa'i nyon mongs pa'i dgra bo drag po'i bag chags rtsa ba nas 'byin pas na drag po chen po'o/ /shin tu gdug pa'i sems dang ldan pa'i sems can rnams 'dul bas na drag shul che ba'o/ /'jigs chen 'jigs par byed pa po/ /zhes bya ba la/ 'jigs pa chen po ni lnga ste/ 'tsho ba med pa'i 'jigs pa dang / tshigs su bcad pa med pa'i 'jigs pa dang / 'chi ba'i 'jigs pa dang / ngan 'gro'i 'jigs pa dang / 'khor gyis bag tsha ba'i 'jigs pa'o/ /bdag tu 'du shes pa dang bral bas bdag la chags par yang mi 'gyur la/ longs spyod thams cad la chags pa lta smos kyang ci dgos pa ste/ de bas na 'di la 'tsho ba med pas 'jigs par mi 'gyur ro/ /'dus byas ci yang rung ste gang la yang 'dod par mi byed cing / gzhan du na bdag nyid kyis 'di rnams la dgos pa'i yo byad thams cad mang du sbyin par bya'o zhes sems te/ de bas na tshigs su bcad pa med pas 'jigs par mi 'gyur ro/ /bdag tu lta ba dang bral bas bdag tu 'du shes par mi 'gyur te/ de bas na 'chi bas 'jigs par mi 'gyur ro/ /shi 'phos nas kyang nges par sangs rgyas dang byang chub sems dpa' rnams dang phrad par 'gyur bas na ngan 'gros 'jigs par mi 'gyur ro/ /'jig rten thams cad na bdag dang bsam pa mnyam pa 'ga' yang med na lhag pa lta smos kyang ci dgos/ de bas na/ 'khor gyis 'jigs par mi 'gyur la/ /'jigs pa ji snyed pa thams cad ni 'di nyid kyi nang du 'dus pa yin pas na 'jigs pa chen po ste/ de rnams 'jigs par mdzad pas na/ 'jigs chen 'jigs par byed pa po/ /zhes bya'o/ /yang na srid pa ni lha chen po ste/ de yang bdag nyid che ba nyid kyi dngos por sprul nas ri'i rgyal po ri rab bzhin du 'khor gyi tshogs dang bcas pas yongs su bskor la/ shin tu drag cing drag shul che ba'i 'jigs byed chen po'i gzugs 'jigs su rung ba bstan nas gzhan dag kun du skrag pa'i bsam pas gnas pa la/ de gdul bar bya ba'i phyir rje btsun 'jam dpal gzhon nu'i rol pas sems can gdug pa 'di gdul bar mi nus so snyam du dgongs nas rdo rje 'chang chen por gyur te/ /srid pa chen po'i ri bo 'joms par mdzad pas so/ /srid chen ri bo yang dag 'joms/ /zhes bya ste/ mtshams sbyar ba ni snga ma bzhin no/ /'khor gyi tshogs kyi stobs rnam par 'joms pas yang dag par 'joms zhes bya'o/ /bkug nas nges par 'gyel te/ rang gi rang bzhin las bsgyur ba'i bsad pa'i dgongs pas gnon par mdzad pas na drag po chen po'o/ /drag shul can gyi las rnam par bzlog pa'i phyir yi ge hUM gis gsod pas na drag shul chen po'o/ /'di la 'jigs pa mi mnga' bas na/ 'jigs med de mgon po 'jam dbyangs so/ /'jigs pa med pa yang yin la chen po yang yin pas na 'jigs med chen po'o/ /'jigs med chen po yang yin la 'jigs par byed pa yang yin pas na/ 'jigs med chen po 'jigs par byed/ /ces bya ste/ shes rab dang thugs rje'i rang bzhin can gyi ngo bo nyid yin pa'i phyir ro/ /de yang shes rab kyis ni dngos po med pa nyid thugs su chud la/ thugs rjes ni drag po chen po la sogs pa'i gzugs su ston par mdzad pa yin pas na thams cad 'gal ba med par legs par gnas pa yin no/ /bcom ldan 'das de nyid rig pa dang gsang sngags la sogs pa'i rab tu dbye ba'i gnas skabs kyis bzhugs par bstan pa'i phyir/ mgon po rig mchog chen po ste/ bla ma gsang sngags che ba'i mchog /ces bya ba gsungs te/ de la rig pa ni lha mor byin gyis brlabs pa'i sngags so/ /lha phor byin gyis rlob pa'i sngags la ni gsang sngags so/ /la la ni rig pa chen mo ni shes rab kyi pha rol tu phyin ma ste/ de yang kun rdzob dang don dam pa'i dbye bas rnam pa gnyis su gsungs na kun rdzob tu ni gzugs dang ldan pa ste/ de yang sngags kyi gzugs kyi ngo bo nyid dang ldan pa'i phyir mgon po mchog ste/ phun sum tshogs pa thams cad kyi rgyur gyur pa'o/ /don dam pa'i ngo bo nyid kyis kyang gcig tu 'dres par gyur pas gnyis su med pa'i ngo bo ni rig mchog chen po ste/ de nyid spros pa ma lus pa'i rgyur gyur pas na mgon po'o/ /man ni ye shes/ tra ni skyob pa ste/ thabs dang shes rab gnyis su med pa'i ye shes ni gsang sngags chen po'o/ /de las byung ba b+h+rUM la sogs pa'i yi ge'i bdag nyid can yang gsang sngags chen po ste/ gsang sngags chen po nyid kyis na bla ma'i mchog go /yang na gsang sngags chen po'i tshul gyis sngags thams cad la rab tu 'jug par byed pa'i ston pa po yin pas na/ bla ma gsang sngags che ba'i mchog go/ /theg pa chen po'i tshul ni gsang sngags kyi tshul dang pha rol tu phyin pa'i tshul lo/ /de la gnas pa ni gdul bya rnams la de ltar rab tu snang ba'i phyir ro/ /don dam par ni gang gi chos kyi dbyings la ma gtogs pa'i chos ni gang yang med pa de nyid kyi ngo bo nyid de tshul 'di ni/ /theg pa chen po'i tshul gyi mchog /ces bya ba gsungs pa yin no/ /sangs rgyas rnam par snang mdzad che/ /thub pa chen po thub chen ldan/ /zhes bya ba la/ de bzhin gshegs pa thams cad kyi bdag nyid du gyur pa ni sangs rgyas rnam par snang mdzad chen po ste/ de kho na nyid du dbyer med pa la gdul bya rnams la snang ba'i bdag nyid kyis 'di ni de bzhin gshegs pa'o/ /'di ni byang chub sems dpa'o zhes rnam par gzhag pa yin no/ /thub pa chen po ni sku dang gsung dang thugs dang 'brel ba'i mi dge ba'i las kyi lam bcu mi mdzad pa'i phyir te/ de nyid kyis ni thub chen ldan no/ /gsang sngags tshul chen zhes bya ba ni/ 'dir stong pa nyid bsgom pa'i sngon du 'gro ba'i zla ba'i dkyil 'khor gyi steng du rang gi sa bon gyi yi ge yongs su gyur pa las rang gi lha'i gzugs su byung ba ste/ de bas na/ gsang sngags tshul chen las byung ba/ /zhes bya ba gsungs so/ /gal te gsang sngags las skyes pa yin na ni de'i tshe gsang sngags kyi bdag nyid du mi 'gyur te/ rgyu dang 'bras bu tha dad pa'i phyir ro/ /yang na rgyu nyid 'bras bur gyur na ni de lta na yang yongs su gyur pa'i phyogs su 'gyur bas de dag gnyis ka yang rigs pa ma yin no zhe na/ gang gi phyir gnyis su med pa'i chos kyi dbyings kyi ngo bo nyid bcom ldan 'das de la lar ni gsang sngags las byung ba'i tshul du rab tu snang la/ la lar ni gsang sngags kyi tshul gyis so/ /gzhan dag tu ni gnyis su med pa'i tshul gyis bzhugs te/ de kho na nyid du rgyu dang 'bras bu dang yongs su gyur pa la sogs pas bzhugs pa ni ma yin no/ /de bas na/ gsang sngags tshul chen las byung ba/ /gsang sngags tshul chen bdag nyid can/ /zhes bya ba la 'gal ba med do/ /bcom ldan 'das 'jam pa'i dbyangs de nyid pha rol tu phyin pa bcu dag pa la sogs pa'i tshul gyis bzhugs so zhes bstan par bya ba'i phyir/ pha rol phyin bcu thob pa ste/ /pha rol phyin pa bcu la gnas/ /pha rol phyin bcu dag pa ste/ /pha rol phyin pa bcu yi tshul/ /mgon po sa bcu'i dbang phyug ste/ sa bcu la ni gnas pa po/ /zhes bya ba gsungs te/ de la pha rol tu phyin pa bcu gang zhe na/ 'di lta ste/ sbyin pa'i pha rol tu phyin pa dang / tshul khrims kyi pha rol tu phyin pa dang / bzod pa'i pha rol tu phyin pa dang / brtson 'grus kyi pha rol tu phyin pa dang / bsam gtan gyi pha rol tu phyin pa dang / shes rab kyi pha rol tu phyin pa dang / thabs kyi pha rol tu phyin pa dang / smon lam gyi pha rol tu phyin pa dang / stobs kyi pha rol tu phyin pa dang / ye shes kyi pha rol tu phyin pa ste/ pha rol tu phyin pa bcu ni 'di dag go/ /de la pha rol tu phyin pa 'di dag yang dag par brjod pa ni 'di lta ste/ sbyin pas rlom sems med pas sbyin pa'i pha rol tu phyin pa ste/ rgyun mi 'chad par bdog pa thams cad yongs su gtong bar mi byed pa yang ma yin no/ /tshul khrims kyis rlom sems med pas tshul khrims kyi pha rol tu phyin pa ste/ tshul khrims dang bslab pa dang sbyangs pa'i yon tan dang yo byad bsnyungs pa thams cad la mi 'jug pa yang ma yin no/ /bzod pas rlom sems med pas bzod pa'i pha rol tu phyin pa ste/ rtag tu bzod pa dag la yang mi 'jug pa yang ma yin no/ /brtson 'grus kyis rlom sems med pas brtson 'grus kyi pha rol tu phyin pa ste/ rgyun mi 'chad pa dge pa'i rtsa ba thams cad yang dag par mi bsgrub pa yang ma yin no/ /bsam gtan gyis rlom sems med pas bsam gtan gyi pha rol tu phyin pa ste/ rtag tu nges par sems pa lhur mi len pa yang ma yin no/ /shes rab kyis rlom sems med pas shes rab kyi pha rol tu phyin pa ste/ rtag tu thos pa tshol ba la mngon par mi brtson pa yang ma yin no/ /thabs kyis rlom sems med pas thabs kyi pha rol tu phyin pa ste/ mu stegs can gyi gnas thams cad dang sems can thams cad kyi dge ba'i rtsa ba bya ba'i rtsom pa rnams ni mi snang ba yang ma yin no/ /smon lam gyis rlom sems med pas smon lam gyi pha rol tu phyin pa ste/ sems can thams cad kyi dge ba'i rtsa ba dang bdag gi dge ba'i rtsa ba sna tshogs kyi sgo nas sems can thams cad dang thun mong du byas te/ bla na med pa yang dag pa rdzogs pa'i byang chub tu mi bsngo ba yang ma yin no/ /stobs kyis rlom sems med pas stobs kyi pha rol tu phyin pa ste/ sred med kyi bu dang / lag na rdo rje'i gzugs rnams kyis nga rgyal dang rgyags pa dang dregs pas khengs pa'i sems rnams mi gdul ba yang ma yin no/ /ye shes kyis rlom sems med pas ye shes kyi pha rol tu phyin pa ste/ bzo'i gnas dang / sbyor ba'i gnas dang / las kyi gnas thams cad la mi 'jug pa yang ma yin te/ rigs kyi bu 'di ni byang chub sems dpa' rnams kyi pha rol tu phyin pa dang rab tu ldan pa'i chos yang dag par brjod pa'o/ /gzhan yang rigs kyi bu byang chub sems dpa'i sbyin pa'i pha rol tu phyin pas ni lag na rin po che dang nam mkha'i mdzod 'thob bo/ /tshul khrims kyi pha rol tu phyin pas ni ngan song thams cad las shin tu 'da' ba dang / 'chi 'pho dang skye ba la dbang ba dang / cang shes pa'i sems 'thob bo/ /bzod pa'i pha rol tu phyin pas ni de bzhin gshegs pa'i sku mtshan dang dpe byad bzang pos legs par brgyan pa blta bas mi ngoms pa thob po/ /brtson 'grus kyi pha rol tu phyin pas ni mngon par shes pa myur ba dang / chos thams cad la dbang byed pa 'thob pa'o/ /bsam gtan gyi pha rol tu phyin pas ni lus dang sems yid du 'ong ba dang / gzungs dang spobs pa tha dad pa dang nyon mongs pa'i sgrib pa spong ba 'thob bo/ /shes rab kyi pha rol tu phyin pas ni mi 'jigs pa dang / so so yang dag par rig pa bzhi 'thob bo/ /thabs kyi pha rol tu phyin pas ni bya sla ba dang / lus dang ngag dang yid kyi las kyi mtha' kha na ma tho ba med pa 'thob bo/ /smon lam gyi pha rol tu phyin pas ni skye ba thams cad du skye ba dran pa dang ji ltar 'dod pa bzhin du dga' bar 'gyur ba 'thob bo/ /stobs kyi pha rol tu phyin pas ni nyon mongs pa thams cad dang bdud dang phas kyi rgol ba thams cad kyis mi brdzi ba dang / 'jig rten thams cad las mngon par 'phags pa 'thob bo/ /ye shes kyi pha rol tu phyin pas ni phung po dang / 'chi bdag dang / nyon mongs pa dang / lha'i bu'i bdud las yang dag par 'da' ba thob bo/ /gzhan yang rigs kyi bu byang chub sems dpa' ni sbyin pa'i bsngags pa smra ba yang yin la/ sbyin pas ngag go snyam du yang mi sems so/ /de bzhin du tshul khrims dang / bzod pa dang / brtson 'grus dang / bsam gtan dang / shes rab dang / thabs dang / smon lam dang / stobs dang / ye shes kyi bsngags pa yang smra la ye shes kyi ngag go snyam du yang mi sems so/ /de ci'i phyir zhe na/ chos de dag thams cad ni yang dag par bsgrubs nas spang bar bya'o/ /'di dag thams cad ni yongs su brtags pa las 'byung ba'o/ /de bas na gang yongs su rtogs pa dang / yongs su rtogs pa las byung ba'i chos de dag ni spang bar bya'o/ /de bas na byang chub sems dpa' ni yongs su rtogs pa dang / yongs su rtogs pa las byung ba'i chos rnams kyi ngag go snyam du mi sems te/ gzhan du rnam par mi rtog pa'i spros pa med pa'i yul gyi ye shes thob nas byang chub mngon par rdzogs par 'tshang rgya'o/ /de lta bu'i pha rol tu phyin pa dag pa ni chos yang dag par sdud pa'i mdo las rgya cher shes par bya'o/ /rang nyid pha rol tu phyin pa bcu thob cing gzhan dag pha rol tu phyin pa bcu la gnas par mdzad pas na/ pha rol phyin bcu thob pa ste/ khyad par du thob cing brnyes pa gang yin pa de ni pha rol tu phyin pa bcu thob pa ste/ thob pa pha rol tu phyin pa zhes tshig gi phrad sngon du mi 'byung ba ni mi rtag pa nyid kyi phyir ro/ /de la gnas nas gzhan dag pha rol tu phyin pa bcu rdzogs par mdzad pas na/ pha rol phyin pa bcu la gnas/ / zhes bya'o/ /pha rol phyin bcu'i dag pa ni ji skad du gsungs pa'i rnam par dag pa'i ngo bo nyid du gyur pas so/ /kun rdzob dang don dam pa'i tshul gnyi gas 'dren cing ston pa gang yin pa de ni pha rol tu phyin pa bcu'i tshul lo/ /yang na pha rol tu phyin pa bcu'i tshul gyi gzhung lugs gang la mnga' ba ni pha rol phyin pa bcu'i tshul lo/ /mgon po sa bcu'i dbang phyug ste/ /sa bcu la ni gnas pa po/ /zhes bya ba la/ de yang sa dang po ni don che ba 'dris pa ma yin pa 'jig rten las 'das pa'i sems thob pas dga' ba dang mchog tu dga' ba rgya che ba'i phyir rab tu dga' ba zhes bya'o/ /sa gnyis pa ni ltung ba phra mo dang 'chal ba'i tshul khrims kyi dri ma thams cad bral pa nyid kyi phyir dri ma med pa zhes bya'o/ /sa gsum pa ni ting nge 'dzin dang thos pa'i gzungs nges shes pa'i snang ba tshad med pa'i gnas nyid yin pa'i phyir 'od byed pa zhes bya'o/ /sa bzhi pa ni nyon mongs pa'i bud shing bsreg pa'i phyir byang chub kyi phyogs dang mthun pa'i chos bsgom pa de ye shes kyi me'i 'od 'phro bar gyur pa'i phyir 'od 'phro ba can zhes bya'o/ /sa lnga pa ni byang chub kyi phyogs dang mthun pa'i chos so/ /chos de dag nyid thabs kyi sgom pa de la dbang bya bar dka' ba nyid kyi phyir shin tu sbyang dka' ba zhes bya'o/ /sa drug pa ni 'du byed kyi 'jug pa mngon sum du gyur pa nyid dang / mtshan ma med pa la lan mang du yid la byed pa mngon sum du gyur pa'i phyir mngon du gyur pa zhes bya'o/ /sa bdun pa ni mtshan ma med pa yid la byed pa bar chad med cing rgyun mi 'chad par ring du rjes su zhugs pa dang / rnam par dag pa'i sa dang rjes su 'brel ba nyid kyi phyir ring du song ba zhes bya'o/ /sa brgyad pa ni mtshan ma med pa la lhun gyis grub pa nyid dang / mtshan ma'i nyon mongs pa kun du 'byung bas mi bskyod pa nyid kyi phyir mi g.yo ba zhes bya'o/ /sa dgu ba ni rnam pa thams cad du chos ston pa'i dbang la kha na ma tho ba med pa'i blo gros shin tu yangs pa thob pa nyid kyi phyir legs pa'i blo gros zhes bya'o/ /sa bcu pa ni gnas ngan len gyi lus nam mkha' lta bu la chos kyi sku sprin chen po lta bus khyab cing khebs pa'i phyir chos kyi sprin zhes bya'o/ /sa bcu gcig pa ni nyon mongs pa dang shes bya'i sgrib pa shin tu phra mo spangs pas chags pa med cing thogs pa med par shes bya'i rnam pa thams cad mngon par rdzogs par byang chub pa nyid kyi phyir sangs rgyas kyi sa zhes bya'o/ /bcom ldan 'das de dag la kun du rmongs pa ni du mchis/ gnas ngan len gyi mi mthun pa'i phyogs ni du mchis lags/ bcom ldan 'das kyis bka' stsal pa/ spyan ras gzigs dbang phyug kun du rmongs pa nyi shu rtsa gnyis dang / gnas ngan len gyi mi mthun pa'i phyogs bcu gcig ste/ sa dang po la ni gang zag dang chos la mngon par zhen pa kun du rmongs pa dang / ngan song ba'i nyon mongs pas kun du rmongs pa dang / de'i gnas ngan len gyi mi mthun pa'i phyogs so/ /gnyis pa la ni ltung ba phra mo'i 'khrul pa la kun du rmongs pa dang / las kyi rnam pa sna tshogs la kun du rmongs pa dang / de'i gnas ngan len gyi mi mthun pa'i phyogs so/ /gsum pa la ni 'dod pa'i 'dod chags kyi kun du rmongs pa dang / thos pa'i gzungs yongs su rdzogs pa la kun du rmongs pa dang / de'i gnas ngan len gyi mi mthun pa'i phyogs so/ /bzhi ba la ni snyoms par 'jug pa la sred pa kun du rmongs pa dang / chos la sred pa kun du rmongs pa dang / de'i gnas ngan len gyi mi mthun pa'i phyogs so/ /lnga pa la ni 'khor ba la gcig tu mi phyogs pa nyid dang / mngon du phyogs pa nyid yid la byed pa kun du rmongs pa dang / mya ngan las 'das pa la gcig tu mi phyogs pa nyid dang mngon du phyogs pa nyid yid la byed pa kun du rmongs pa dang / de'i gnas ngan len gyi mi mthun pa'i phyogs so/ /drug pa la ni 'du byed kyi 'jug pa mngon du bya ba nyid la kun du rmongs pa dang / mtshan ma mang po kun du 'byung ba kun du rmongs pa dang / de'i gnas ngan len gyi mi mthun pa'i phyogs so/ /bdun pa la ni mtshan ma phra mo kun du 'byung ba kun du rmongs pa dang / mtshan ma med pa gcig tu yid la byed pa thabs kun du rmongs pa dang / de'i gnas ngan len gyi mi mthun pa'i phyogs so/ /brgyad pa la ni mtshan ma med pa la stsol ba kun du rmongs pa dang / mtshan ma rnams la mi dbang ba kun du rmongs pa dang / de'i gnas ngan len gyi mi mthun pa'i phyogs so/ /dgu pa ni chos bstan pa dpag tu med pa dang chos kyi tshig dang yi ge dpag tu med pa dang / gong nas gong du shes rab dang / spobs pa dang gzungs kyi dbang la kun du rmongs pa dang / spobs pa'i dbang la kun du rmongs pa dang / de'i gnas ngan len gyi mi mthun pa'i phyogs so/ /bcu pa la mngon par shes pa chen po la kun du rmongs pa dang / gsang ba dang / phra ba'i rjes su 'jug pa la kun du rmongs pa dang / de'i gnas ngan len gyi mi mthun pa'i phyogs so/ /sangs rgyas kyi sa la ni shes bya thams cad la chags pa shin tu phra mo kun du rmongs pa dang / thogs pa med pa kun du rmongs pa dang / de'i gnas ngan len gyi mi mthun pa'i phyogs so/ /spyan ras gzigs dbang phyug de dag ni kun du rmongs pa nyi shu rtsa gnyis dang / gnas ngan len bcu gcig po de dag gis rnam par gzhag pa yin no zhes dgongs pa nges par 'grel pa las mdor gsungs te/ rgya cher ni sa bcu pa'i sa'i gnas skabs gzhag pa las shes par bya ste/ sa bcu po de dag la gtso bor gyur pa dang ldan pas/ mgon po sa bcu'i dbang phyug ste/ zhes bya ba la/ de dag nyid du byang chub sems dpa'i tshul gyis bzhugs pas/ sa bcu la ni gnas pa po/ /zhes bya'o/ /da ni shes pa bcu dang bden pa bcu dang stobs bcu dang / dbang bcu'i ngo bo nyid bstan par bya ba'i phyir/ shes bcu rnam dag bdag nyid can/ /shes bcu rnam dag 'chang ba po/ /rnam pa bcu po don bcu'i don/ /thub dbang stobs bcu khyab pa'i bdag /kun gyi don ni ma lus byed/ /rnam bcu dbang ldan che ba po/ /zhes bya ba'i tshigs su bcad pa phyed dang gnyis gsungs te/ de la shes pa bcu ni 'di lta ste/ sdug bsngal shes pa dang / kun 'byung shes pa dang / 'gog pa shes pa dang / lam shes pa dang / zad pa shes pa dang / mi skye ba shes pa dang / chos shes pa dang / rjes su rtogs pa shes pa dang / kun rdzob shes pa dang / 'dris pa shes pa dang / sgra ji bzhin pa shes pa'o/ /de la sdug bsngal shes pa gang zhe na/ sdug bsngal mi skye bar shes pa'o/ /de la kun 'byung shes pa gang zhe na/ kun 'byung spang bar shes pa'o/ /de la 'gog pa shes pa gang zhe na/ sdug bsngal 'gog par shes pa'o/ /de la lam shes pa gang zhe na/ 'phags pa'i lam yan lag brgyad shes pa'o/ /de la zad pa shes pa gang zhe na/ 'dod chags dang / zhe sdang dang / gti mug zad par shes pa'o/ /de la mi skye ba shes pa gang zhe na/ srid pa'i rgyud skye ba med par shes pa'o/ /de la chos shes pa gang zhe na/ phung po lnga sgyu mar yongs su rtogs shing shes pa'o/ /de la rjes su rtogs pa shes pa gang zhe na/ skye mched dang / khams dang rten cing 'brel par 'byung ba mi rtag ces bya bar shes pa'o/ /de la kun rdzob shes pa gang zhe na/ sems can gzhan dang gang zag gzhan gyi sems sems kyis shes pa'o/ /de la 'dris pa shes pa gang zhe na/ gang gis lam shes pa dang yongs su byang ba shes pa'o/ /de la sgra ji bzhin shes pa gang zhe na/ de bzhin gshegs pa'i rnam pa thams cad mkhyen pa nyid kyi ye shes te/ de yang dmigs pa med pa'i tshul gyis so/ / de ltar shes pa bcu po rnam par dag pa'i bdag nyid can gyi ngo bo nyid gang yin pa de ni/ shes bcu rnam dag bdag nyid can no/ /shes pa bcus rnam par dag pa'i sgra ji bzhin shes pa'i de bzhin gshegs pa 'dzin par byed pas na/ shes bcu rnam dag 'chang ba'o/ /bden pa rnam pa bcu gang yin pa de ni rnam pa bcu pa'o/ /de la bden pa rnam pa bcu gang zhe na/ 'di lta ste/ kun rdzob kyi bden pa dang / don dam pa'i bden pa dang / mtshan nyid kyi bden pa dang / rnam par dbye ba'i bden pa dang / phye ste rtog pa'i bden pa dang / dngos po'i bden pa dang / nus pa'i bden pa dang / zad pa dang mi skye ba shes pa'i bden pa dang / lam la 'jug pa shes pa'i bden pa dang / de bzhin gshegs pa'i ye shes kun 'byung ba'i bden pa ste/ 'di dag ni bden pa bcu'o/ /de la kun rdzob kyi bden pa ni tshad dang de dang 'brel bar yul yongs su chad pa kun du tha snyad gdags pa'i phyir gzhan gyi rkyen gyi dbang gis ston pa chung ba rgya chen po ma yin pa ste/ 'di ni kun rdzob kyi bden pa zhes bya'o/ /de la don dam pa'i bden pa ni zab pa/ stong pa nyid dang rab tu ldan pa/ yul yongs su ma chad pa/ gzhan gyi rkyen gyis ma yin pa/ mnyam pa dang mi mnyam pa med pa/ ma 'khrugs pa/ rtsod pa med pa'i mtshan nyid dang / chos thams cad de bzhin nyid kyi mtshan nyid de/ 'di ni don dam pa'i bden pa'o/ /de la mtshan nyid kyi bden pa ni gnod pa'i mtshan nyid ni sdug bsngal ba/ rab tu skye ba'i mtshan nyid ni kun 'byung ba/ zhi ba'i mtshan nyid ni 'gog pa nges par 'byin pa'i mtshan nyid ni lam ste/ 'di ni mtshan nyid kyi bden pa zhes bya'o/ /gzhan yang chos thams cad rang bzhin gyis bdag med pa'i mtshan nyid du shes nas nges par gyur pa la 'jug ste/ mtshan nyid las gyur pa'i nges par gyur pa ni mtshan nyid kyi bden pa zhes bya'o/ /de bzhin du chos thams cad rang bzhin gyis zhi ba'i mtshan nyid dang rang bzhin gyis dben pa'i mtshan nyid dang / rang bzhin gyis stong pa'i mtshan nyid dang / rang bzhin gyis mi skye mi 'gag pa'i mtshan nyid du shes nas nges par 'jug pa ste/ mtshan nyid las gyur pa'i nges par gyur pa ni mtshan nyid kyi bden pa zhes bya'o/ /de la rnam par dbye ba'i mtshan nyid ni chos thams cad mtshan nyid gcig pa las gzhan gyi dbang gis rnam par phye ste bstan pa'o/ /mtshan nyid gcig ces bya ba ni stong pa nyid kyi mtshan nyid ni chos thams cad mtshan ma med pa/ smon pa med pa/ mngon par 'du mi byed pa ma skyes pa ma byung ba/ ma 'gags pa 'di ni stong pa nyid de'i rnam par dbye ba ste/ rnam par dbye ba de dag thams cad kyang stong pa nyid kyi mtshan nyid do/ /de ltar stong pa nyid la slu bar mi byed pa de'i phyir rnam par dbye ba'i bden pa zhes bya ste/ 'di ni rnam par dbye ba'i bden pa zhes bya'o/ /de la phye ste rtog pa'i bden pa gang zhe na/ phral nas rtog pa ni phye ste rtog pas so/ /nges par sems pa/ rig pa mthong ba/ khong du chud pa/ mngon par rtogs pa shes pa zhes bya ba la mi slu ba ste/ de'i phyir phye ste rtog pa'i bden pa zhes bya'o/ /de la dngos po'i bden pa ni dngos po shes pa ste/ dngos po de dag ni phung po dang khams dang skye mched de dag rten cing 'brel par 'byung ba dang / stong pa dang dngos po med par shes te/ de ltar shes nas nges par 'gyur ba la 'jug pas de'i phyir dngos po'i bden pa zhes bya'o/ /de la nus pa'i bden pa ni ye shes de dang spong pa de dang / lam des nyon mongs pa spong bar byed pa dang / stobs dang / mi 'jigs pa dang sangs rgyas kyi chos ma 'dres pa khong du chud pa dang / de bzhin gshegs pa thams cad kyi dbang nyid khong du chud par nus pa ste/ de'i phyir nus pa'i bden pa zhes bya'o/ /de la zad pa dang mi skye ba shes pa'i bden pa ni 'dus byas thams cad zad pa can du ston te/ zad pa de yang mi zad la/ zad pa la zad pa med do/ /gal te zad pa la zad pa yod du zin na 'gog pa yang zad par 'gyur te/ de'i phyir zad pa zad par mi 'gyur ro/ /gang zad par mi 'gyur ba de mi skye ste/ 'di ni zad pa dang mi skye ba shes pa'i bden pa zhes bya'o/ /de la lam la 'jug pa shes pa'i bden pa gang zhe na/ ye shes kyi lam bsod nams dang ye shes kyi tshogs bsags pa gang gis chos thams cad ma skyes ma 'gags par shes pa des 'jug cing 'dzud pa ste/ de'i phyir lam la 'jug pa shes pa'i bden pa zhes bya'o/ /de la de bzhin gshegs pa'i ye shes kun 'byung ba'i bden pa gang zhe na/ chos kyi sprin gyi sa dang de bzhin gshegs pa'i sa'i char ni de bzhin gshegs pa'i ye shes kun 'byung ba'i bden pa ste/ de bstan pa'i lam gyis mngon par rtogs pa'o/ /'di dag ni byang chub sems dpa' rnams kyi bden pa bcu'o/ /bden pa bcu po 'di rnams kyi tshig rab tu ston pa'i tshig gi don ni don te/ dgongs pa gang yin pa de ni don bcu'i don no/ /thub pa ni nyan thos dang rang rgyal te/ de rnams kyi gtso bor gyur pas na thub dbang ngo / /stobs bcu khyab pa'i bdag ces bya ba ni de bzhin gshegs pa'i stobs bcu dang ldan pas na stobs bcu khyab pa'i bdag ste gtso bo zhes bya ba'i don to/ /de la de bzhin gshegs pa'i stobs bcu gang zhe na/ 'di lta ste/ gnas dang gnas ma yin pa ni dge ba'i las kyi lam bcu yongs su rdzogs nas mtho ris su skye ba ni gnas so/ / dmyal bar skye ba ni gnas ma yin no/ /de bzhin du mtshams med pa rnam pa lnga byed pa rnams mnar med par skye ba ni gnas so/ /mtho ris su skye ba ni gnas ma yin no zhes bya ba yang dag pa ji lta ba bzhin du rab tu shes so zhes rgya cher sbyar ro/ /de bzhin du 'das pa dang / ma 'ongs pa dang / da ltar byung ba'i las dang / las yongs su len pa'i rnam par smin pa gnas kyi rnam pa dang / rgyu'i rnam pa yang dag pa ji lta ba bzhin du rab tu shes so/ /'jig rten ni khams sna tshogs can te/ 'jig rten ni khams du ma pa'o zhes yang dag pa ji lta ba bzhin tu rab tu shes so/ /sems can gzhan dang gang zag gzhan gyi mos pa sna tshogs dang / mos pa du ma yang yang dag pa ji lta ba bzhin du rab tu shes so/ /sems can gzhan dang gang zag gzhan gyi dbang po rab dang tha ma shes par bya ba yang dag pa ji lta ba bzhin du rab tu shes so/ /kun du 'gro ba'i lam yang dag pa ji lta ba bzhin du rab tu shes so/ /dbang po dang / /stobs dang / byang chub kyi yan lag dang / bsam gtan dang / rnam par thar pa dang / ting nge 'dzin dang / snyoms par 'jug pa dang / kun nas nyon mongs pa dang / rnam par byang ba rnam par dgod pa yang dag pa ji lta ba bzhin du rab tu shes so/ /de rnam pa du mar sngon gyi gnas rjes su dran te/ tshe rabs gcig kyang rjes su dran pa nas rnam pa dang bcas/ sa mal dang bcas/ gtan tshigs dang bcas pa'i bar du rnam pa du mar sngon gyi gnas rjes su dran no/ /lha'i mig rnam par dag pa mi las 'das pas sems can 'chi 'pho dang / skye ba dag kyang yang dag pa ji lta ba bzhin du rab tu shes so/ /zag pa zad pa'i phyir sems rnam par grol ba dang / shes rab rnam par grol ba zag pa med pa rang gi mngon par shes pas mngon par byas te/ nye bar bsgrubs shing rnam par dpyod do/ /bdag gi skye ba ni zad do/ /bdag gis tshangs par spyod pa ni spyad do/ /bya ba ni byas so/ / rnam pa 'di lta bu gzhan ni med do zhes bya bar rab tu shes te/ 'di dag ni de bzhin gshegs pa'i stobs bcu'o/ /dgu pa la ni byang chub sems dpa'i stobs bcu'o zhes yang bzlas te ma smras pa yin no/ /de ltar stobs bcu dang ldan pa zil gyis mi non cing chags pa dang thogs pa med pa'i nus pas 'gro ba ma lus shing sna tshogs pa mos pa tha dad pa'i dbye bas dbye ba'i 'gro ba'i don thar pa thob pa'i mtshan nyid can skal ba ji lta ba bzhin du mdzad pas na/ kun gyi don ni ma lus byed/ ces bya ste/ 'jam pa'i dbyangs so/ /rnam bcu dbang ldan che ba po/ /zhes bya ba la/ dbang yod pas na dbang ldan pa ste/ de yang rnam pa bcu yod pas na rnam bcu dbang ldan no/ /dbang bcu gang zhe na/ tshe la dbang ba dang / sems la dbang ba dang / yo byad la dbang ba dang / las la dbang ba dang / skye ba la dbang ba dang / rdzu 'phrul la dbang ba dang / mos pa la dbang ba dang / smon lam la dbang ba dang / ye shes la dbang ba dang / chos la dbang ba ste/ de dag ni dbang bcu'o/ /bdud rtsi thob pa'i phyir tshe la dbang ba'o/ /sems tsam du yongs su shes pa'i phyir sems la dbang ba'o/ /lag na rin po che dang / nam mkha'i mdzod rab tu rnyed pa'i phyir yo byad la dbang ba'o/ /bag chags dang bcas pa'i las kyi lam kun chad pa'i phyir las la dbang ba'o/ /ting nge 'dzin rnam par bzlog pa'i bsam gtan rnyed pa'i phyir skye ba la dbang ba'o/ /lhun gyis grub par bya ba la 'jug pa thob pa'i phyir rdzu 'phrul la dbang ba'o/ /zad par gyi skye mched thob pa'i phyir mos pa la dbang ba'o/ /bsam pa tsam gyis don thob pa'i phyir smon lam la dbang ba'o/ /ye shes sngon du 'gro ba'i lus dang ngag dang yid kyi las thob pa'i phyir ye shes la dbang ba'o/ /de bzhin nyid dang / chos kyi dbyings dang / yang dag pa'i mtha' mnyam pa'i ye shes dri ma med pa'i phyir chos la dbang ba'o/ /gzhan yang rigs kyi bu 'jig rten ni 'chi bas 'jigs skrag ste/ de'i gnyen por tshe la dbang ba'o/ /'jig rten ni sems kun nas nyon mongs pas 'jigs skrag ste/ de'i gnyen por sems la dbang ba'o/ /'jig rten ni yo byad kyis 'jigs skrag ste/ de'i gnyen por yo byad la dbang ba'o/ /'jig rten ni nyes par spyod pas 'jigs skrag ste/ de'i gnyen por las la dbang ba'o/ /'jig rten ni ngan 'gros 'jigs skrag ste/ de'i gnyen por skye ba la dbang ba'o/ /'jig rten ni kun du rtsol ba'i phongs pas 'jigs skrag ste/ de'i gnyen por rdzu 'phrul la dbang ba'o/ /'jig rten ni dam pa'i chos kyis phongs par 'gyur ba'i las kyis 'jigs skrag ste/ de'i gnyen por mos pa la dbang ba'o/ /'jig rten ni 'dod pa'i 'ching bas 'jigs skrag ste/ de'i gnyen por smon lam la dbang ba'o/ /'jig rten ni the tshom gyi zug rngus 'jigs skrag ste/ de'i gnyen por ye shes la dbang ba'o/ / 'jig rten ni 'khor gyi nang na bag tsha bas 'jigs skrag ste/ de'i gnyen por chos la dbang ba'o/ /gzhan yang rigs kyi bu srog gcod pa spangs shing sems can thams cad la khong khro ba'i sems med pa ni tshe la dbang thob par bya ba'i rgyu'o/ /bden pa rnams la sgrib pa med pa'i byams pa chen po dang / sdug bsngal ba rnams la sgrib pa med pa'i snying rje chen po ni sems la dbang thob par bya ba'i rgyu'o/ /sems snyoms shing dngos po thams cad yongs su gtong ba byang chub tu bsngo ba ni yo byad la dbang ba thob par bya ba'i rgyu'o/ /las dang bya ba la zhugs nas lus dang ngag dang yid yongs su dag pa'i rgyu las kyi bya ba las bdag gir bya ba la 'jug pa ston pa ni las la dbang ba thob par bya ba'i rgyu'o/ /byang chub kyi sems kyis yang dag par bsdus pa'i dge ba bcu'i las kyi lam ni skye ba la dbang ba thob par bya ba'i rgyu'o/ /rnyed pa dang bkur sti dang tshigs su bcad pa thams cad sbyin pa dang / bzhon pa sbyin pa ni rdzu 'phrul la dbang ba thob par bya ba'i rgyu'o/ /sems can thams cad dkon mchog gsum la 'god cing 'dzud de/ mos par byed pa ni mos pa la dbang ba thob par bya ba'i rgyu'o/ /sems can thams cad kyi lus dang ngag dang yid yongs su dag pa sgrub pa ni smon lam la dbang ba thob par bya ba'i rgyu'o/ /zang zing med pa'i sems kyis chos sbyin pa ni ye shes la dbang ba thob bar bya ba'i rgyu'o/ /sems can thams cad la chos mnyam pa nyid khong du chud par byed pa dang / chos mtshungs par ston pa dang / de bzhin gshegs pa'i sku ni chos kyi sku ste/ zang zing gi sku ma yin no zhes yongs su 'byed pa ni chos thams cad la dbang thob par bya ba'i rgyu ste/ 'di dag ni byang chub sems dpa'i dbang bcu'o/ /dbang bcu po de dag mngon sum du mdzad pa dang / ji ltar bzhed pa bzhin du mdzad pa ste/ de dag rtag tu nye bar gyur pas sgrib pa med cing de nyid la byang chub sems dpa' dbang du gyur pas na/ rnam bcu dbang ldan che ba po/ /zhes gsungs so/ /chos nyid kyi rang gi ngo bo nyid bstan par bya ba'i phyir/ thog ma med pa spros med bdag /de bzhin nyid bdag dag pa'i bdag /ces bya ba gsungs te/ 'di la thog ma yod pa ma yin pas thog ma med pa'o/ /gal te thog ma'i sngon gyi rgyu yod pa gang yin pa de ni thog ma med pa zhes bya ba mi rigs te/ rgyu las gzhan pa las gang yang mi 'byung ba'i phyir ro/ /yang na sems pa yang dag par yod pa dgag pa'i phyir gsungs so zhe na/ thams cad kyang thog ma med par gyur pas su zhig phul du byung bar shes par 'gyur zhe na/ 'dir bcom ldan 'das kyi dgongs pa ni 'di yin te/ rgyu dgag par mdzad pa yang ma yin la/ sems pa yang dag par yod pa dgag pa ma yin no/ /de lta mod kyi dang po sbas par gyur pa phyis rnam par dag pa'i rnam par dag pa la thog ma zhes bshad pa las rang bzhin gyis rnam par dag pa yin pas de med de/ de yang de bzhin gshegs pa rnams byung yang rung / de bzhin gshegs pa rnams ma byung yang rung / chos rnams kyi chos nyid ni gnas pa nyid de/ chos gnas pa dang / de bzhin nyid dang / yang dag pa'i mtha' zhes bya ba'i tshul gyis na thog ma med pa zhes bshad do/ /de bas na 'di ltar spros med bdag ces bshad de/ spros pa ni rgyu dang / 'bras bu dang / gzung ba dang / 'dzin pa dang / bdag dang / bdag gi dang bcas pa nas ji srid 'jig rten gyi tha snyad du bya ba'i phyir dang / nang gi kun du rtog pa dang bral bar gyur pa de'i tshe ni nyes pa thams cad dang bral ba'i phyir dag pa'i bdag nyid do/ /gang gi tshe rang bzhin de las 'phos te/ de bzhin du gyur pas de bzhin nyid bdag go/ /yang na snga ma'i rgyus phyi ma phyi ma 'grub ste/ thog ma med pa nas spros pa med pa'o/ /spros pa med pas na de bzhin nyid do/ /de bzhin nyid pas na dag pa'i bdag nyid do/ / yang na bzlog ste/ dag pa'i dag pas na de bzhin nyid bdag go/ /de bzhin nyid dag pas na spros pa med pa'o/ /spros pa med pas na thog ma med pa ste/ gdul bya'i bsam pa las don gyi dbye bas phye ba yin gyi rnam grangs ni ma yin no/ /don ji ltar thugs su chud pa'i don gsungs pa nyid bstan par bya ba'i phyir/ bden par smra zhing tshig mi 'gyur/ /ji skad smras pa de bzhin byed/ /gnyis su med dang gnyis med ston/ /yang dag mtha' la rnam par gnas/ /zhes bya ba gsungs te/ yang dag pa dang bden pa dang phyin ci ma log pa'i chos nyid kyi ngo bo nyid de kho na ston pa'i ngang tshul gang la yod pa de ni bden par smra ba'o/ /gang gi phyir ji skad du gsungs pa de bzhin rjes su mthun par gnas par mdzad pas na tshig mi 'gyur ba ste/ gzhan slu bar 'gyur ba'i tshig mi mnga' bas na tshig mi 'gyur zhes bshad do/ /dam bcas pa'i don rdzogs par mdzad pas na/ /ji skad smras pa de bzhin byed/ /ces bya ste/ 'gro ba rnams la phan par bya ba'i phyir 'tshang rgya bar bya'o zhes dam bcas pa de bzhin du rdzogs par mdzad pa'i phyir ro/ /yang na sbyin pa dang tshul khrims la sogs pa dang ldan pa'i chos pha rol la ji snyed ston pa de bzhin du bdag nyid kyang sbyin pa la sogs pa la nan tan lhur len pa rab tu 'jug par mdzad pas na/ /ji skad smras pa de bzhin byed/ /ces bya'o/ /gnyis su med dang gnyis med ston/ /zhes bya ba la/ gnyis ni gzung ba dang / 'dzin pa dang / shes pa dang / shes par bya ba dang / nang gi mig la sogs pa dang phyi'i gzugs la sogs pa nas ji srid du yid dang / chos kyi bar du ste/ gnyis su rtag pa de dag mi mnga' bas na gnyis med do/ /ji ltar gnyis su med pa yin zhe na/ de yang mig gis gzung bar bya ba'i gzugs dang / mig gi rkyen gyi tshul las mig gi rnam par shes pa skye bar 'gyur la/ de bzhin du ji srid yid dang chos kyi rkyen gyis yid kyi rnam par shes pa skye bar 'gyur ro/ /de la gzugs la sogs pa mig la sogs pa'i yul nyid du brtags na de ci rdul phra rab kyi ngo bo nyid yin nam/ 'on te yan lag can gyi ngo bo nyid yin pa brtag par bya ste/ gal te rdul phra rab yin na 'dus pa'am/ thag ring ba'i phyogs na gnas pa'am/ bar mtshams med par gnas na rnam par shes pa'i rgyur 'gyur/ 'dus pa'i phyogs ltar na bdag nyid thams cad kyis 'dus sam/ /phyogs gcig gis 'dus/ bdag nyid thams cad kyis 'dus na ni cha shas med par 'gyur bas 'gro ba thams cad phra rab tsam du 'gyur ro/ /ci ste phyogs gcig gis 'dus na ni de lta na yang cha shas can nyid du 'gyur bas cha shas can nyid kyis na dam bcas pa las nyams par 'gyur zhing / phra rab nyid kyang mi 'grub ste/ cha shas can yin pa'i phyir bum pa dang 'dra'o/ /thag ring bar gnas pa rnams kyang dbang po'i yul las 'das par gyur pa nyid kyis yul ma yin no/ /bar mtshams med pa'i phyogs kyang 'dus pa'i phyogs las gud na med de/ de bas na rdul phra rab rnams ni mig la sogs pa'i yul du gyur par mi nus te/ gang gi phyir rdul phra rab rnams ni dbang po'i yul las 'das pas mthong mi srid do/ /yan lag can du brtags pa de yang mi rigs te/ phra rab gnyis la sogs pa'i rim gyis brtsams te/ yan lag can yin na grub pa'i mtha' las rdul phra rab bsags pa la sogs pa med pa de'i tshe 'dus pa'i yan lag can lta ga las 'byung / de yod pa'i tshad ma yang yod pa ma yin te/ mngon sum du ni dbang po'i yul las 'das pas rdul phra rab rnams kyang med pa nyid du gzung ba yin la/ rjes su dpag pa yang de sngon du 'gro ba yin pas rang dgar byed pas brtags pa ni ma yin no/ /de bzhin la yang 'jug par nus pa ma yin zhes dpe gcig las smos/ ji lta ba bzhin du bstan pa'i tshad ma gzhan dag kyang yod pa ma yin te/ tshad ma gnyis gzung ba nyid brtags pa yin gyi gzhan du ni ma yin no/ /gal te sbom po gang yin pa de ni phra ba bsags pa sngon du 'gro ba las snang ba yin te/ dper na mung+ga la sogs pa'i phung po dang / /phra rab gsum pa la sogs pa sbom por snang ba de phra mo bsags pa sngon du 'gro ba yin la/ gang rnam par phye ba'i gzugs can de ni phra rab yin no zhes bya ba yang mi rigs te/ sbom po'i don ma grub pas phyogs nyid dper mi rung ste/ phyogs dpe dang tha dad pa med par thal bar 'gyur ro/ /'on te de ltar rjes su dpag pa nyid du nus kyang gang sbom por tha dad par byas pas na rnam par bshig nas ston par 'gyur te/ dper na sran ma sha'i phung po re re nas spung ste/ ji srid thams cad bsal na stong pa nam mkha'i phyogs tsam zhig lus par 'gyur ro/ /de bzhin du ji srid phra rab kyi mthar thug par byas la phra rab rnams kyang cha shas kyi rnam par dbye ba byas na thams cad med par 'gyur ba nyid do/ /de bas na phra rab kyang gzung bar bya ba ma yin la/ cha shas can du yang gnas pa ma yin no/ /gal te rdul phra rab tu yang mi gzung la/ cha shas can du yang ma yin na 'o na ji ltar rags pa'i rnam pa mdun na gnas nas sngon po la sogs pa'i rnam par snang ba yin/ rgyu med par yang yul dang dus dang rnam par nges pa'i shes pa'i yul du ji ltar nye bar 'gyur/ gal te phyi'i rgyu yang de'i tshe rdul phra rab kyi tshul du 'am/ de las gzhan par phyi'i don grub par bzung ste/ rnam pa med pa'i rnam par shes pa dus mnyam par 'gyur bas shes par 'gyur ro zhes bye brag tu smra ba dang / spyod pa can la sogs pa smra ste/ de yang / snga ma yi ni tshogs pa nyid/ /shes byed yul gyi skad cig pa/ /snang dang bcas pa'i gzugs bzhin te/ /des na shes dang bcas par 'gyur/ /zhes bya ste/ de ltar yang phyi rol gyi yul yang dag par shes pa mngon sum du nye bar dmigs par 'gyur ro zhe na/ de ni mi rigs te/ 'dir tshad ma med pas rnam pa med pa'i rnam par shes pa don dang / lhan cig skye'o zhes bya ba'i tshad ma med de/ de la re zhig mngon sum du ni 'jug par mi nus so/ /shes pa tshad ma'i yin gyi dbang po'i shes pa ni ma yin no zhe na/ shes pa ni rang rig pa'am gzhan rig pa'am gnyi ga rig par 'gyur na/ gal te rang rig pa yin na don rig par ji ltar 'gyur/ shes pa'i rang bzhin nyid yin na ni don gyi rang bzhin ma yin la/ rang rig pa nyid gzhan rig pa ma yin te/ de lta na ni khams gsum pa thams cad shes par thal bar 'gyur ro/ /de bas na rang rig pa'i phyogs la don reg par 'gyur ba med do/ /yang na shes pa ni gzhan rig pa yin no zhe na/ de yang ngo bo nyid 'dzin pa'i tshad ma med pa'i phyir rang nyid ma grub na gzhan ji ltar shes pa smros shig / yang na don gyis go bas rang bzhin gyis 'jog na ni de lta na yang shes pa nyid la rjes su dpog pa 'byung gi mi shes pa'i don la su zhig blo 'jug par 'gyur te/ gal te rjes su dpag pa las don gyis go ba rtogs par 'gyur ro zhes bshad na/ de la rnam par dpyad par bya ste/ don gyis go ba 'dir gang zhig yin/ mngon sum mam/ rjes su dpag pa yin/ gal te don gyis go ba mngon sum yin na ni shes pa mngon sum du yod pa de yang ma grub pas des shes par 'gyur ro zhes bya ba shin tu legs par smras so/ /yang na don mthong ba'am thos pa ni gzhan du mi rigs so/ /ma mthong ba'i don la yongs su rtog pa ni don gyis go ba'o zhes bshad pas mngon sum du gang zhig la rtog snyam na dgongs pa'i rang bzhin ma shes pa las ni tshad ma yongs su chad par mi 'gyur te/ de yang mngon sum mam/ rjes su dpag pa yin par brtag par bya ste/ gal te mngon sum yin na ni de nyid sun phyung ba yin par dgongs so/ /ci'i phyir zhe na/ gal te mthong ba'i don du mi rigs na don gyis go ba ni shin tu yang mi rigs te/ don gyis go ba yang shes par byed par ji ltar 'gyur/ yang na mi mthong ba dag kyang gal te mthong ba'i shes pa skyed par 'gyur na ni gang zhig mthong nas don gyis go ba'i gnas skabs rig par 'gyur te/ rtsa ba med pas gnas skabs thams cad du med par 'gyur ro/ /yang na phyogs gnyis pa ltar na mi mthong ba sgrub na ni/ ri bong gi rwa las bong bu'i rwa sgrub par 'gyur ro/ /don gyis go ba rjes su dpag pa'i phyogs las sgrub par 'gyur na yang 'brel pa med pas don gyis go ba'i 'byung ba nyid med do/ /don gyis go ba las rnam par shes pa sgrub par yang mi 'gyur la/ gzhan gyi shes pa'i rigs pa las don gyis go ba yang mi 'grub bo/ /gnyi ga las shes pa'i phyogs kyang phyogs gnyi gar bshad pa'i nyes pa dang ldan par thal bar 'gyur bas gnyi ga'i bdag nyid can gyi rang gi ngo bo nyid dang 'gal ba'i phyir mi rigs so/ /rnam pa med pa'i shes pas don rig pa rigs pa ma yin la/ rnam pa dang bcas pa'i shes pas kyang don 'dzin par mi rigs te/ rnam pa'ang shes pa 'khrul pa las 'byung bar 'gyur ba yin no/ /yang na slu ba dang mi slu bar byed pa ni 'khrul pa dang gzhan pa'i rnam par dbye ba yin te/ rmi lam na yang 'khrul ba yod pas de bas na slu ba la ni bden pa nyid med la/ mi slu ba la yang log pa nyid med pas rmi lam gyi nang na yang don la rtog pa dang ldan pa ma yin te/ thams cad kyang rmi lam gyi nang dang 'dra bar thal bar 'gyur ro/ /'jig rten pa ma yin pa dang phyin ci log par bshad pa'i dran pa dang / brjed pa la sogs pa yang rig pa'i tshul 'di nyid kyis thams cad 'jig rten pa ma yin par thal bar 'gyur bas brtag par mi bya'o/ /rnam par shes pa la gnas pa'i rnam pa yang phyi'i don dang lhan cig rab tu 'brel pa'i tshad yod pa ma yin te/ tha dad pa'i rtog pa tsam 'dir rten yin no/ /so sor nges pa'i yul dang dus dang rnam pa dang ldan pa ni rgyu med pa las snang ba mi 'byung bas de yang me rigs te/ bag chags tsam las kyang srid pa'i phyir ro/ /de bas na nang gi bag chags tsam gyi rgyu las 'byung bas rmi lam dang / sgyu ma dang / dri za'i grong khyer gyi rnam pa dang 'dra bar snang ba tsam nyid do/ /rnam par shes pa tsam du smra ba rnams de las phyi'i don med pas rnam par shes pa tsam ni gnyis su med pa yin gyi/ gnyis med pa ni gnyis su med pa ma yin no zhes 'dod pa de 'dir tshad ma dang lung gi rjes su 'brangs nas brtag par bya ste/ de yang lung las rnam par shes pa ni gzugs med pa/ bstan du med pa/ thogs pa med pa/ gnas pa med pa zhes gsungs na ji ltar phyi'i yul du sngon po dang / stug po dang / sbom po la sogs pa'i rnam par snang bar 'gyur bar soms shig /rnam par shes pa sngon po la sogs par yod pa ma yin pa de ma yin pa ni bden mod kyi 'on kyang ma rig pa'i bag chags kyi stobs kyis phyi rol du sngon po nyid du snang ste/ sems 'di ni rang bzhin gyis 'od gsal te/ dri ma ni glo bur du 'ongs pa'o zhes gsungs pa dang / de bzhin du/ bag chags kyis ni dkrugs pa'i sems/ /sna tshogs lta bur snang ba yin/ /zhes bshad pa'i phyir ro zhe na/ 'dir brtag par bya ste/ ci rang gi bag chags gang zhig yin/ sems nyid bag chags yin nam/ /sems las tha dad pa gzhan 'ga' zhig yod/ ci gal te sems nyid bag chags yin na ni 'das pa ni 'gags la/ ma 'ongs pa ni ma phyin/ da ltar byung ba ni mi gnas pa yin pas lhan cig gnas pa ni ma yin te/ skad cig ma nyid du khas blangs pa'i phyir 'di'i zhig pa'am ma zhig pa'i gnas pa po thams cad 'jig par 'gyur te/ gnas pa po thams cad 'jig par 'gyur ba de bzhin du rgyun la nges pa med do/ /ci ste sngar gyi rgyur gyur pa'i rnam par shes pa rang dang rjes su mthun pa'i nus pa bskyed pa las 'bras bu gnas pa po de yang rang gi mtshan nyid du yod bzhin pa yin no zhe na/ rgyu'i rnam par shes pa'i skad cig la ni 'bras bu mi skyed de/ ji ltar na med bzhin du nus pa bskyed pa yin/ ci nus pa las shes pa yang tha dad pa yin nam tha mi dad pa yin/ gal te tha mi dad na ni de'i tshe shes pas shes pa bskyed de/ shes pa la rjes su 'jug pa ni med pa 'am 'jug par byed pa gnyis pa med do/ /gnas dang gnas pa po med pa'i phyir ro/ /ci ste tha dad pa yin na ni shes pa dang tha dad pas bems por 'gyur te/ rnam par shes pa tsam du smra ba las nyams so/ /de bzhin du bag chags dang tha dad pa'i phyogs la yang nyes pa 'di yod de/ so sor nges pa'i rgyu shes par mi nus la/ skad cig ma gcig tu gnas pa'i chos rnams la 'di ni rgyu'o/ /'di ni 'bras bu'o zhes shes par mi nus so/ /de'i phyir bag chags kyi stobs kyis sngon po la sogs pa'i gzugs su shes pa nyid du snang ba yin no zhes bya ba ni mi rigs so/ /de lta na yang bag chags ma lus pa dang bral ba de'i tshe sems de ji lta bu yin/ gal te rtog pa tsam la shin tu rnam par dag pa yin no zhe na/ de'i tshe ni de sngon po la sogs pa'i rnam pa gang las 'ongs/ phyi rol nas kyang ma yin te/ de rnam pa med pa'i phyir ro/ /sems las kyang ma yin te/ de yang rnam pa med pa'i ngo bo nyid yin pa'i phyir ro/ /'di dag thams cad ni ma rig pa'i rnam par 'phrul ba ste/ de bas na kun rdzob yin no zhe na/ de rnam par shes pa dang de las gzhan pa'i ngo bo nyid kyis nges par brtags pa na bag chags dang 'dra ba nyid du rnam par 'jig par 'gyur ro/ /de ltar phyi rol med pa'i phyir gzung bar bya ba med de/ de med pas de 'dzin par byed pa'i mig la sogs pa'i rnam par shes pa dang bral ba yin pas 'dzin pa po yang med pa nyid yin no/ /gnyis med pas gnyis su med pa zhes bya bar grub pa yin te/ de yang shes rab kyi pha rol tu phyin pa nyi khri lnga stong pa las rab 'byor rnam pa thams cad mkhyen pa nyid kyi dmigs pa ni ji lta bu/ dbang po ni ji lta bu/ rnam pa ni ji lta bu/ mtshan nyid ni ji lta bu zhe na/ rab 'byor rnam pa thams cad mkhyen pa nyid kyi dmigs pa ni dngos po med pa'o/ /dbang po ni dran ba'o/ /rnam pa ni zhi ba'o/ / mtshan nyid ni mtshan nyid med pa yin te/ de las dngos po ni ji lta bu lags/ dngos po med pa ni ji lta bu lags/ rab 'byor gnyis ni dngos po'o/ /gnyis su med pa ni dngos po med pa ste/ rab 'byor gnyis zhes bya ba ni mig dang / gzugs dang / rna ba dang / sgra nas/ de bzhin du yid dang chos dag ni gnyis te/ nang gi bdag nyid can ni nang gi bdag nyid can gyi ngo bo nyid kyis stong la/ phyi'i chos rnams ni phyi'i chos rnams kyi ngo bo nyid kyis stong ngo / /de ci'i phyir zhe na/ 'di ltar mig ni mig gi ngo bo nyid kyis stong pa dang / stong pa nyid ni gzhan ma yin te/ de'i rang bzhin ni de yin pa'i phyir ro/ /de bzhin du gzugs ni gzugs kyi ngo bo nyid kyis stong ngo zhes bya ba nas/ ji srid du yid dang chos rnams ni yid dang chos rnams kyi ngo bo nyid kyis stong ngo zhes rgya cher sbyar ro/ /ci thams cad du ma mchis lags sam/ thams cad med pa zhes su zhig gis smras/ ci thams cad yod do zhes bya ba 'di yang su zhig gis smras/ dngos po thams cad ces bya ba de gang gi tshig dang ldan pa yin/ dngos po thams cad ni gnyis kyang ma yin la dngos po thams cad kyang ma yin no zhes bya ba'i tshig 'di dag nyid rigs pas dngos po thams cad ni gnyis kyang ma yin la gcig pa yang ma yin no zhes bya/ ci thams cad du med pa'am/ med pa ma yin ci yod pa zhig gam/ ci thams cad du brjod du med pa yin nam/ ci don dam pa grub pas bsgrub par bya ba yin nam/ yang na kun rdzob tu tshig gis btags pas yin nam/ yang na kun rdzob kyi ngo bor bstan pa brjod par bya ste/ de la dngos po med pa ni kun rdzob ma yin te/ de bzhin nyid dang yang dag pa'i mtha' dang / stong pa nyid dang / gnyis su med pa dang / mya ngan las 'das pa dang / chos kyi sku dang / chos nyid do zhes kyang gsungs te/ de ltar nye bar gnas pas na dag cing gnyis su med pa'i ngo bo nyid ni bcom ldan 'das yin pas na gnyis su med pa zhes bya'o/ /de la ji ltar na gnyis su med pa ston pa yin zhe na/ rnam par rtog pa med pa dang gnyis su med pa'i ngo bo nyid yin pas rnam par rtog pa'i rigs mthun pa dang rjes su 'brel pa'i sgra'i rang bzhin ma yin no/ /'on kyang rgyu tsam dang rjes su 'brel pa ste/ rgyu yang rgyun tsam du bya ba byed kyi las kyi dbang gis ni ma yin te/ de yang bya ba dang bral du zin kyang yid bzhin gyi nor bu bzhin du gdul bya'i mngon par 'dod pa'i don mdzad par snang ste/ rkyen gyis byung ba la gnyis su med par ston pa zhes bya bar gzhag pa yin no/ /dang po zhes bya ba'i sgra ni sdud pa ste/ rang nyid gnyis su med pa'i ngo bo nyid yin pa 'ba' zhig tu ma zad kyi de ston pa'i sga yang gnyis su med pa'i ngo bo nyid yin no zhes bya ba'i don to/ /yang dag pa zhes bya ba ni bden pa'o/ /de'i mtha' ni mthar thug pa ste/ de las gzhan pa'i de kho na nyid med pas na yang dag pa'i mtha'o/ /de la de'i bdag nyid kyis rnam pa thams cad du chos kyi dbyings mi g.yo ba'i ngo bos bzhugs na/ yang dag mtha' la rnam par gnas/ /zhes bya'o/ /dpe kha cig las/ yang dag mtha' ni rnam par gnas/ /zhes zer te/ der ni gang gi phyir yang dag pa'i mtha' yin pas des na rnam par gnas pa'o zhes rgyu nyid du gyur pa bshad do/ /bdag la sogs pa mngon par zhen pa'i sems can rnams kyi dregs pa sel ba'i ngo bo nyid bstan par bya ba'i phyir/ bdag med seng ge'i sgra dang ldan/ /mu stegs ri dgas ngan 'jigs byed/ /ces bya ba gsungs te/ bdag dang bral ba'i phyir bdag med pa ste/ bdag med pa'i ngo bo nyid do/ /seng ge dang 'dra bar 'jigs pa med cing nges pa'i sgra gang la yod pa de la ni de skad ces bya la/ chos thams cad bdag med pa'o zhes bya ba 'di ni seng ge'i sgra ste de dang ldan pa'o/ /mu stegs ngan pa'i lam dang ldan pa gang yin pa de ni mu stegs ngan pa'o/ /mu stegs ngan pa de nyid ri dgas dang 'dra bas na ri dgas te/ de rnams 'jigs par mdzad pas na/ mu stegs ri dgas ngan 'jigs byed/ /ces bya'o/ /mu stegs ngan pa nyid kyang ji lta bu zhe na/ tshad ma dang 'gal ba bdag yod pa nyid du khas len pa ste/ rigs pa can dang / bye brag pa dang / dpyod pa pa dang / grangs can dang gcer bu pa la sogs pa bdag yod pa nyid du rtog pa'i gtan tshigs smra ba rnams so/ /de la rigs pa can dag smra ba ni gal te bdag med na las dang 'bras bu dag gi byed po po dang dpyod pa po gdags pa'i skabs med par 'gyur te/ byed pa po gcig med pas byas pa 'jig cing ma byas pa 'thob pa thal bar 'gyur ro/ /de'i yod pa nyid dang / rtag pa nyid dang / khyab pa nyid dang / byed pa po nyid dang / dpyod pa nyid du sgrub pa'i tshad ma dag brjod par bya ste/ de la re zhig yod pa nyid ni spobs pa dang bral ba bzhin du 'jal bar byed de/ yod pa la sogs pa bye brag pa'i yul dang yul ma yin pa'i shes bya'i yul bdag ces bya ba'i mngon sum dang / rjes su dpag pa dang / 'jal ba dang / sgra dang / dran pa dang / so sor shes pa dang / grub pa'i lta ba dang / drang srong gi lung dang / som nyi dang / phyin ci log dang / yid ches par bya ba ma yin pa dang / rmi lam dang / rmi lam gyi rmi lam rnams ni shes pa ste/ bdag gi lus la sogs pa las tha dad pa'i shes pa pos rig pa ni rang gi rgyud la rag las pa nyid dang / skye ba dang ldan pa nyid dang / bye brag dang / khyab pa dang ldan pa nyid dang khong du chud pa'i bdag nyid can dang / shin tu myur bar 'dzin pa nyid dang / 'du byed skyed par byed pa nyid dang / rgyu rnams yod pa'i phyir skyes bu gzhan gyi shes pa yin no/ /chos mi mthun pas mi snang bar gyur pa ni bum pa la sogs pa dang 'dra'o/ /de la yod pa la sogs pa drug ni bye brag med pa ste/ yod pa dang mi rtag pa dang / rdzas can dang rgyu dang 'bras bu nyid dang / spyi dang bye brag dang ldan pa nyid de/ de dag ni rdzas dang yon tan dang las kyi bye brag med pa yin no/ /de rnams kyi yul ni rdzas dang yon tan dang las rnams yin no/ /yul ma yin pa ni spyi dang bye brag dang 'du'o/ /gang la yul gnyis po de dag dang yod pa'i mngon sum la sogs pa gang yin bde la de skad ces bya'o/ /grub pa'i lta ba skar rtsis kyi bstan pas 'dren pa ste/ de yang grub pa rnams kyis mthong ba'o/ /drang srong rnams kyi lung ni mngon par shes pa dang 'brel ba ste/ dper na nga'i spun zla nang par 'ong ngo zhes bya ba lta bu'o/ /de ni drang srong rnams la yod do zhes grags pas drang srong rnams kyi zhes bshad do/ /som nyi the tshom du gyur pa'o/ /phyin ci log ni log pa'i shes pa'o/ /yid ches par bya ba ma yin pa ni nges pa med pa'o/ /rmi lam dang po'i skabs su mthong ba ni rmi lam mo/ /rmi lam gyi nang du rmi lam rmi ba ni rmi lam gyi rmi lam mo zhes bud med dang rje'u rigs dag ngo mtshar skye ba'i phyir mu stegs kyi ston pa rna bug med kyis bshad do/ /'di ni tshig dka' ba tsam phye ba ste lhag ma rnams ni go sla'o/ /'jal bar byed pa zhes bya ba yang 'di ltar 'jal bar byed de/ lhas byin gyi gzugs dang / sgra dang / ro dang / dri dang / reg bya'i shes pa rnams kyi rgyu ni gcig dang du ma yin te/ ngas mthong ngo / /ngas thos so zhes bya ba la sogs pas byed pa po gcig par mtshams sbyor ba'i phyir ro/ /gcig mang po'i yang rgyur 'gyur te/ gar mkhan gyi smin ma bskyod pa gcig gis du ma'i shes pa cig car bskyed pa lta bu dang / yang dper na bya ba'i dus su byed pa po sna tshogs pa'i shes pa sna tshogs par gyur pa rgyu gcig las 'byung ba lta bu'o/ /de bzhin du 'dir yang yul sna tshogs pa'i shes pa rgyu gcig pa'i phyir gcig tu nye bar sbyor bar 'gyur la rgyu gcig pu gang yin pa de ni bdag ces bya'o/ / de bzhin du sbyor ba gzhan yang bdag ces bya ba'i tshig ni lus dang / dbang po dang / yid dang / blo dang / tshor ba bsdus pa las tha dad pa'i tshig yin la/ rab tu grags pa'i rnam grangs las tha dad pa nyid kyis na tshig gcig pa nyid de/ bum pa dang 'dra'o/ /de bzhin du srog dang ldan pa'i tshor ba 'di ni bdag med pa ma yin te/ srog dang mi ldan thal bar 'gyur bas bum pa dang 'dra'o/ /de ltar yod pa nyid kyi tshad ma smras nas/ rtag pa nyid dang / khyab pa nyid kyi tshad ma dag bstan par bya ba'i phyir rna bug med pas smras pa/ ma'i khong nas byung ba'i dus na bdag gi shes pa dang po tshor ba po dang / shes pa por yod pas dus gzhan dag tu yang bdag gi shes pa yod pas bdag gi shes pa yin pa'i phyir thog ma bdag gi shes pa dang 'dra'o/ /de bas na rtag pa yin no/ /khyab par byed pa la yang de nyid 'jal bar byed de/ sa dang chu dang me dang rlung dang / yid log par rtog pa'i yul du gyur pa shin tu thag ring du gnas kyang nga'i bdag dang 'brel pa yin te/ gzugs dang ldan pa nyid dang / shugs dang ldan pa nyid dang / gzhan nyid dang / gzhan ma yin pa nyid dang / phan tshun kun du 'dre ba dang / char gnas pa nyid yin pa'i phyir bdag gi lus la sogs pa dang 'dra ba'i phyir ro zhes de dag gi yod pa nyid dang / rtag pa nyid dang / khyab pa nyid du bsgrub bo/ /de ltar rtag pa nyid dang / khyab pa nyid yin du zin kyang byed pa po dang / longs spyod pa po dang / skye ba dang / 'chi ba dang / 'tsho ba dang / 'tshe ba la sogs pa dang ldan pa la 'gal ba med do/ / de la shes pa dang / byed 'dod pa dang / 'bad pa dang / bdag dang 'dus pa ni byed pa po nyid yin no/ /bde ba dang sdug bsngal gyi tshor ba dang / 'du ba ni longs spyod pa nyid yin te/ de yang bde ba dang sdug bsngal gnyis kyi shes pa ni longs spyod yin la/ de bdag dang 'dus pa ni longs spyod pa po nyid yin no/ /skye ba ni lus dang dbang po dang blo dang / tshor ba la sogs pa khyad par can sngon ma byung ba de dang 'brel pa'o/ /snga ma de dang bral ba ni 'chi ba'o/ /lus dang bcas pa'i bdag yid dang 'brel zhing chos ma yin pa la ltos par byed pa ni 'tshe ba'o/ /'bras bu'i rten gyi byed pa po gsod pas na 'tshe ba'o/ /'di'i don ni 'di yin te/ rgyun mi 'chad pa'i chos dang ldan pa'i sems can gyi bde ba la sogs pa yang dag par tshol bar byed pa'i 'bras bu'i rten lus dang yul la nye bar dmigs pa gnyis kyi byed pa po dbang po rnams gsod pas na 'tshe ba zhes bya bar rnam par gzhag pa yin no/ /'dir lan brjod par bya ste/ yod pa la sogs pa'i sbyor ba'i tshig drug po gang yin pa de mngon sum la sogs pa'i yul yin par mi 'grub ste/ rdzas dang / yon tan dang / las dang / spyi dang / khyad par dang / 'du ba rnams ni mngon sum pa la sogs pas mi 'dzin pa'i phyir ro/ /mi 'dzin pa de yang mig la sogs pa ni yul so sor nges pa yin pa'i phyir ro/ /de yang mig gi yul ni gzugs nyid yin gyi/ ro la sogs pa ni ma yin te/ dbang po lhag ma rnams 'bras bu med par thal bar 'gyur ro/ /de bzhin du rna bas ni sgra nyid 'dzin par byed kyi gzugs la sogs pa ma yin no/ /de bzhin du lhag ma rnams kyis kyang rang rang gi yul 'dzin par nges pa yin no/ /gzugs la sogs pa las tha dad pa'i rdzas la sogs pa de gang gis 'dzin par byed/ 'on te rjes su dpag pas sgrub par byed na de yang mngon sum sngon du 'gro ba can pas de med na 'jug par ji ltar nus/ bdag gi shes pa bdag gi lus las tha dad pa'i tshor ba pos rig go zhe na/ des na grub pa la sgrub pa nyid yin te/ khyed kyis lus las tha dad pa'i thams cad mkhyen pa dang / dgra bcom pa dang / rnal 'byor pa rnams kyi shes pa yin pa'i phyir ro/ /skyes bu gzhan gyi shes pa bzhin no zhes bya ba chos mthun pa'i dper smras pa gang yin pa de yang bsgrub par bya ba ma tshang ba yin te/ rnam par shes pa thams cad kyang rang rig pa'i bdag nyid can yin pa'i phyir ro/ /shes pa gzhan gyis rig par byed pa'i phyogs ltar na yang gnas pa'i mthar thug pa med pas shes pa ma yin no/ /yang gang gi gzhung la 'di dag ma lus pa ni/ rnam par shes pa tsam nyid yin zhing rang rig pa'i mthar thug pa yin pas/ de las logs shig na gzhan dag med do zhes lta ba de'i tshul ltar na yang grub pa la sgrub pa'i nyes pa 'di ni shin tu gsal ba yin no/ /de bzhin du skye ba dang ldan pa nyid la sogs pa gzhan dag la yang grub pa la sgrub pa'i skyon brjod par bya'o/ /gang gsal bar byed pa zhes bya bar lha sbyin gyi gzugs la sogs par mngon par sbyor ba'i shes pa ngas mthong ngo / /ngas thos so zhes bya ba la sogs pas byed pa po gcig pa nyid du shes la/ gang de ltar rab tu sbyor bar byed pa de ni bdag yin no zhes zer ba de yang mi rigs te/ rtag pa dang thams cad du song ba dang gcig tu gyur pa rab tu sbyor bar byed pa ni ma mthong ba'i phyir dang mi srid pa'i phyir ro/ /rtag pa dang / thams cad du song ba'i byed pa po dang / longs spyod pa po dang / rjes su bor bar byed pa po la sogs pa yin pa'i rjes su 'gro ba dang ldog pa med pas mo gsham gyi bu dang 'dra bar btags pa tsam du zad do/ /de ltar na su zhig gi mtshams sbyor bar byed pa yin/ sems skad cig ma nyid ni thog ma med pa'i ma rig pas gcig pa nyid du sgro btags pa la nying mtshams sbyor bar 'khrul pa yin gyi/ dngos por sbyor ba ma yin zhing dngos po'i yang dag pa nyid dang / 'brel pa ma yin no/ /de bas na bdag yod do zhes rtog pa ni shin tu sdig can yin no/ /tshig gcig yin pa'i phyir bya ba'i sgrub pa de yang bdag las go bzlog pa'i sgrub pa yin te/ tshig ces brjod pa ni spyi yin la/ spyi ni bdag ma yin te/ gzhan las ldog pa'i yul yin pa'i phyir tshig ni yul med pa ma yin no/ /de bas na yul med do zhes bya bar ston to/ /srog dang ldan pa'i 'tsho ba 'di ni bdag med pa ma yin te zhes bya ba la sogs pa yang 'brel pa yod pa ma yin te/ srog la sogs pa dang bdag tu 'brel pa grub pa ma yin no/ /de yang de'i bdag nyid du 'brel pa yang ma yin te/ dbye ba yod par khas blangs pa'i phyir ro/ /de las byung ba yang ma yin te/ rtag pa ni rim dang cig car dag gi don gyi bya ba byed par 'gal ba'i phyir ro/ /de la re zhig rim gyis bskyed par mi 'thad de/ skye ba po nyid dang skye ba po nyid ma yin pa nyid kyi rang bzhin gnyis gcig la dus gcig tu yod pa 'gal ba yin no/ /rnam par 'gyur ba med pa la lhan cig byed pa'i rgyu stong phrag gcig kyang phul du byung ba bskyed par nus pa mi srid pa'i phyir ro/ /rtag pa la ni lhan cig byed pa la ltos pa yang ga la yod de/ cig car byed pa yin pa'i phyir ro/ /skad cig ma gcig la thams cad byed pas skad cig ma gnyis pa la bya ba med pa'i phyir ro/ /dbugs rngub pa la sogs pa med pa'i mtshan nyid can 'chi ba'am/ thams cad med pa'i mtshan nyid can gyis thal bar 'gyur ro/ /de bas ni ldog par brtags pa yang rigs pa ma yin no/ /gang yang rtag pa nyid dang / khyab pa nyid las brtan par bya ba'i phyir sgrub pa gnyis smras pa de yang shin tu mi rigs te/ chos can med pas chos can gyi bdag mi 'grub bo/ /'on te lus la sogs pa phyogs su byas nas dang po'i rnam par shes pa skyed par byed pa las dus phyis 'byung ba'i rnam par shes pa yang skye'o zhes sgrub na de yang mi rigs te/ de nyid las 'di skye'o zhes bya ba'i tshad ma yod pa ma yin no/ /re zhig mngon sum yang ma yin te/ sngon yang phyi ma'i dus su gnas pa yang ma yin no/ /rjes su dpag pa yang mngon sum sngon du 'gro ba can yin pa'i phyir de med par 'jug pa dang ldan pa ma yin no/ /rjes su dpag pa la rjes su dpag pa sngon du 'gro ba can yang ma yin te/ gnas pa med pa'i phyir ro/ /sbyor ba gnyis pa la lus dang ldan pa'i phyir bdag gi lus dang 'dra'o zhes bya ba'i dpe nyid kyang bdag dang 'brel pa ma grub na thams cad du song ba'i khyab pa ga la yod de/ byis pa'i tshig ltar 'brel pa med pa yin no/ /de ltar na yang byis pa'i tshig sun dbyung ba'i phyir sgrub pa'i lan brjod par bya ste/ gang la skye ba med pa la ni 'jig pa yang med de/ de la yod pa med pa'i phyir/ dper na ri bong gi rwa dang 'dra'o/ /gzhan dag mngon par 'dod pa'i bdag ces bya ba la skye ba dang 'gag pa yang yod pa ma yin no zhes bya ba ni khyab par byed pa mi dmigs pa'o/ /de bzhin du gang rim gyis sam cig car don gyi bya ba byed pa gang yin pa de ni rtag pa ma yin zhing khyab pa yang ma yin la/ med pa yang ma yin no/ / dper na mar me dang sa bon dang myu gu dang lcug ma la sogs pa rim gyis sam cig car don gyi bya ba bskyed na rtag pa nyid dang / khyab pa nyid dang / med pa nyid las ldog par gyur pa ma yin no/ /med pa dang 'gal ba'i yod pa nye bar dmigs pa 'gal ba'i khyab pa nye bar dmigs pa yin no/ /yang na rim gyis sam cig car don gyi bya ba byed par mi 'gyur ba gang yin pa de ni yod pa ma yin te/ ri bong gi rwa dang / rus sbal gyi spu la sogs pa dang 'dra'o/ /chos mi mthun pa ni myu gu la sogs pa dang 'dra'o/ /bdag rtag pa las ni rim gyis sam cig car don gyi bya ba byed pa mi 'byung ngo / / de bas na rim gyis sam cig car gyi mtshan nyid kyis don gyi bya ba byed pas rtag pa las ldog na rang gi khyab par bya ba yod pa las ldog pa yin pa khyab par byed pa mi dmigs pa yin no/ /yang na dngos po nyid dang / yod pa nyid dang / byas pa nyid dang / skye ba dang ldan pa nyid la sogs pa'i chos dang ldan pa gang yin pa de thams cad ni bdag med pa yin te/ dper na phyi'i bum pa la sogs pa dang 'dra'o/ /nang gi srog dang / lus dang / yid dang / blo dang / bde ba dang / sdug bsngal la sogs pa'i dngos po nyid la sogs pa'i chos dang ldan pa ni rang bzhin gyi gtan tshigs yin no/ /dpyod pa can la sogs pa mngon sum la sogs pa'i tshad ma dang 'gal bar bdag yod par smra ba rnams kyang rim pa 'di nyid kyis tshar gcod par 'gyur ro/ /de lta mod kyi cung zad tsam zhig bstan par bya'o/ /de la dpyod pa pa rnams bzlog pa dang rjes su mthun pa'i rang bzhin gyi sems kyi bdag nyid can bde ba dang / sdug bsngal la sogs pa'i tshul gyis ni tha dad pa bzlog pa yin la/ sems dang ldan pa'i tshul gyis ni rjes su mthun pa yin par bdag ces bya ba'i rang bzhin khas len to/ /de yang gcig tu 'jig na ni byas na chud za ba dang / ma byas pa dang phrad par 'gyur ro/ /skyes bu gcig tu rtag pa nyid yin na yang byed pa po'i rang bzhin mi 'dor bas longs spyod pa nyid du mi 'gyur ro/ /de yang ku ma ra ri las/ /de bas gnyi ga spangs nas ni/ /bzlog dang rjes mthun bdag can du/ /skyes bus khas ni blang bya ste/ /lus bskyil sogs pa sbrul dang 'dra/ /zhes bshad pa yin no/ /byed pa po nyid dang / longs spyod nyid ni bdag la brten pa yin te/ gnas skabs la brten pa ni ma yin no/ /de nyid ni byed pa po dang longs spyod pa yin par so sor mngon par shes pa'i stobs kyis rnam par 'jog go/ /bdag de yang shes pas rtogs par bya ba dang / 'das pa dang / ma 'ongs pa dang / da ltar gyi yul gcig tu byed pas rtag pa yin pa ste/ ngas shes par gyur to/ /shes par 'gyur ro/ /shes so zhes yul gcig pa nyid du rtogs pa'i phyir ro/ /de skad zer ba 'di ni tshad ma la shin tu bzo bas khyed bram ze kho na la srid par zad do/ /de yang 'das pa dang / ma 'ongs pa la sogs pa'i dus la khyab pa'i dngos po gnyi ga'i bdag nyid can shes so zhes zer bas 'das pa dang ma 'ongs pa skye ba gcig nas gcig tu brgyud pa shes so zhes smras par 'gyur bas zhig zin pa'i 'das pa dang / ma skyes pa'i ma 'ongs pa dag mngon sum du shes so zhes smras pas yod pa'i bar du sbyor ba'i mdor byas pa dang 'gal bar 'gyur ro/ /mngon sum nus pas ma 'ongs pa'am/ cung zad kyang ni mthong mi 'gyur/ /zhes smos pa dang yang 'gal bar 'gyur ro/ /'das pa dang / ma 'ongs pa'i yul gnyis rnal 'byor mngon sum yin pa la 'jug na ni/ /rig byed las skyes bus byas pa ma yin pa nyid la sogs par sgrub pa'i ngal ba don med par 'gyur ro/ /de bas na mngon sum gyis ni da ltar tsam 'dzin pa yin par khas blang bar bya'o/ /de'i phyir yang sngon dang / phyi ma dang bral ba'i da ltar byung ba tsam gyi bdag gi rang bzhin rang rig pa tsam gyis shes par 'gyur pas rnam par shes pa nyid sngon dang / phyi ma'i rjes su 'gro ba ma yin pa'i skad cig mar rig pa'i bdag nyid can de khas blangs pa la bdag ces bya bar ming btags par gyur pa tsam du zad do/ /yang na rjes su dpag pas bdag rtag pa nyid sgrub na de yang mngon sum sngon du 'gro ba can yin na/ rjes su dpag pa sngon du 'gro ba can nyid las ni thug pa med par 'gyur ro/ /mngon sum 'jug pa med na de sngon du 'gro ba'i rjes su dpag pa 'jug par ji ltar 'gyur/ 'on te nga rgyal gyi stobs kyis bdag sgrub na bdag tu shes pa ni lus la dmigs pa yin te/ nga'i yan lag phra'o/ /sbom mo/ /dkar ro zhes bya ba'i gzhi mnyam pa yin pa'i phyir ro/ /bdag gi bdag ces bya ba ni gzhi mnyam pa med na de 'di ltar 'gyur te/ mig la sogs pa spyir bdag gi lus tsam du dmigs pa'i nga rgyal gyi stobs kyis bdag yod par smra na mig la sogs pa'i spyi'i bdag nyid can gyi lus kyi rang bzhin la bdag ces bya'o zhes ston par 'gyur bas de la yang ming tsam du zad pas log par bsgrub pa med do/ /byed pa po dang longs spyod la sogs pa yang skad cig pa'i rnam par shes pa yin gyi/ rgyu dang 'bras bur gyur pa'i khyad par can gzhan yod pa ma yin pas byas pa chud za ba dang ma byas pa dang phrad par rgol ba yang rgol ba ma yin pa nyid yin no/ /de bas na dpyod pa can gyis btags pa ni btags pa kho na tsam du zad do/ /gcer bu pa rnams kyang rma bya'i spu yang sbrug cing gar byed bzhin du lus phyi'i dri mas bsgos pa dang / bdag yod par bsgrub par bya ba'i phyir langs te smras pa bdag ni mngon sum nyid du rjes su 'jug pa dang bzlog pa'i rang bzhin gnyis kyis bdag nyid can du nye bar dmigs so/ /de yang bde ba dang sdug bsngal la sogs pa'i gnas skabs tha dad du zin kyang gnas pa po gang yin/ /de ni gnas skabs thams cad du sems dang ldan par nye bar dmigs su rung ste/ bdag de ni rdzas yin no/ /rnam grangs su ni bde ba la sogs pa'i gnas skabs kyi dbye bas rim gyis 'byung ba yin la/ de ni mngon sum du grub pa yin no/ /de yang chos dang chos can gnyis ni yul dang dus kyi rang bzhin dbye bas dbye ba med la/ grangs dang / ming dang / mtshan nyid dang / bya ba'i dbye bas dbye ba yod pa yin te/ dper na bum pa dang / de'i gzugs la sogs pa bzhin te/ bum pa dang gzugs la sogs pa ni yul la sogs pas dbye ba med pa yin te/ bum pa'i phyogs dang dus rang bzhin gang kho na yin pa de nyid ni de'i gzugs la sogs pa'i yang yin no/ /grangs la sogs pa ni bum pa las gzugs la sogs pa dbye ba yod pa yin te/ de yang grangs kyi dbye ba ni gcig dang gnyis la sogs pa'o/ / ming gi dbye ba ni bum pa dang / rna rgyan dang / dpung rgyan dang / nor bu zhes bya ba la sogs pa'o/ /mtshan nyid kyi dbye ba las rjes su 'jug pa'i mtshan nyid ni gser ro/ /bzlog pa'i mtshan nyid ni gdu bu la sogs pa'o/ /bya ba'i byed pa ni bum pas chu 'dzin pa la sogs pa dang / rang dang rjes su mthun pa'i rgyan la sogs pa'i bya ba byed pa'o/ /'dir brjod par bya ste/ sems pa'i bdag nyid can gyi rdzas gang yin pa de rnam grangs dang 'brel ba ni ci snga ma'i rang bzhin ma spangs pa'am spangs nas 'brel zhes gnyis su brtag par bya'o/ /de la brtag pa dang po ltar na sngon dang phyi ma'i gnas skabs khyad par byed na sems pa ji ltar yongs su 'gyur ba zhes bya ba yin/ 'gyur ba zhes pa brtags pa ni snga ma'i gnas skabs yongs su spangs nas gnas skabs gzhan dag yongs su gzung ba la bya na/ mi 'gyur ba'i rang bzhin la ni de yang yod pa ma yin pas 'gyur ba zhes tha snyad tsam du brtag tu mi rung ngo / /sbyor ba la yang sngon dang phyi ma'i gnas skabs khyab par med pa gang yin pa de ni 'gyur ba can yang ma yin te/ dper na nam mkha' dang 'dra'o/ /sems pa sngon dang phyi ma'i gnas skabs su khyab par med kyang ni khyab par byed pa mi dmigs pa yin no/ /'on te brtag pa gnyis pa ltar na snga ma'i rang bzhin yongs su spangs na de'i rang bzhin gzhan pa nyid du 'byung ste/ dper na snal ma las snam bur gyur pa de'i tshe 'gyur ba ji ltar yin/ sbyor ba ni gang du rang bzhin mi 'gyur ba gnas su zin kyang gzhan du gyur pa gang yin pa de nyid de'i yongs su 'gyur ba ma yin te/ dper na bum pa'i rang bzhin ma gyur par gnas pa las snam bur gyur pa dang 'dra'o/ /snga ma'i rang bzhin spangs nas rang bzhin gzhan du skye ba ni khyab par byed pa'i 'gal ba nye bar dmigs pa yin no/ /'on te gnyi ga'i bdag nyid can yin pas rdzas dang rnam grangs gcig tu bya ba yod pa'ang ma yin la/ dbye ba med pa'ang ma yin mod kyi/ /'on kyang de gnyi ga yang dbye ba yod pa dang / dbye ba med pa yin pa de'i phyir ji skad du bshad pa'i nyes pa med do zhe na/ de ni bzang po ma yin te/ gal te rdzas dang rnam grangs bye brag med par yang khas len na de'i tshe rnam pa thams cad du dbye ba med pa yin gyi/ de bas go bzlog pa'i dbye ba can du ji ltar 'gyur te/ gcig la gcig phan tshun 'gal ba'i sgrub pa dang / dgag pa yod par rigs pa ma yin no/ /sbyor ba ni gang du dbye ba med pa de ni de dang 'gal ba'i dbye ba'i go skabs yod pa ma yin te/ de rnams nyid kyi rnam grangs dang rdzas kyi so sor nges pa thun mong ma yin pa bdag gi rang bzhin de'i ngo bo nyid de las gzhan du bya ba'i go skabs med do/ /rdzas dang rnam grangs dbye ba yod pa dang dbye ba med pas gnas pa ni 'gal ba nye bar dmigs pa yin no/ /gang na bzlog pa dang ldan pa'i rang bzhin las ngo bo nyid tha mi dad pa de ni bzlog pa dang ldan pa'i ste/ dper na rnam grangs kyi rang bzhin dang 'dra'o/ /bzlog pa dang ldan pa'i rang bzhin las tha mi dad pa'i rdzas yin no zhes bya ba ni rang bzhin gtan tshigs so/ /yang na rjes su mthun pa'i bdag nyid can gyi rang bzhin las tha mi dad pa de ni rjes su 'gro ba'i bdag nyid can yin te/ dper na rdzas kyi rang bzhin dang 'dra'o/ /rjes su mthun pa'i bdag nyid can gyi rang bzhin las bde ba la sogs pa'i rnam grangs tha mi dad pa'i ngo bo nyid yin no zhes bya ba yang rang bzhin gyi gtan tshigs yin no/ /gal te 'gal ba'i chos la lhag par chags su zin kyang dbye ba med na dbye ba ma grub pas dbye ba med pa yang med do/ /dbye ba dang dbye ba med pa'i tha snyad rgyun chad na ni 'gro ba rnams kyi 'jug pa dang ldog pa med par 'gyur te/ 'di ni go bzlog pas gnod pa'i tshad ma yin no/ /de bas na mngon sum ni rjes su 'gro ba dang bzlog pa'i rang bzhin dang bral ba sngon dang phyi ma'i tshul las dben pa da ltar byung ba tsam gyi rang bzhin 'dzin par byed pa rang rig pa'i bdag nyid can yin pas bdag med pa ni mngon sum du grub pa yin no/ /bdag med pa mngon sum du grub tu zin kyang gzhan gyi gzhung tshul snying po med par bstan par bya ba'i rjes su dpag pa yod pas 'dir mngon par zhen par mi bya'o/ /tshad ma dang bral bar rmongs pas bdag yod par khas 'che ba'i mu stegs ngan pa gzhan dag la yang tshul 'di bzhin du tshar gcad par bya'o/ /da ni dkyus ma nyid la 'jug par bya ste/ rje btsun 'jam dpal gyis 'gro ba thams cad kyi don yod par mdzad pa la sogs pa'i khyad par gyis phul du byung ba'i ngo bo nyid du bstan par bya ba'i phyir ro/ /kun du 'gro ba'i don yod stobs/ /de bzhin gshegs pa'i yid ltar mgyogs/ /rgyal ba dgra rgyal rnam par rgyal/ /'khor los sgyur ba stobs po che/ /zhes bya ba gsungs te/ thams cad du cig car gdul bya rnams la snang zhing gshegs pas na kun du 'gro ba'o/ / yang na gang gi phyir chos kyi dbyings la ma gtogs pa'i chos ni 'ga' yang med do zhes bya ba'i rigs pas chos kyi dbyings kyi ngo bo nyid yin pas na kun du 'gro ba'o/ /don yod pa ni 'bras bu yod pa ste/ gdul bya rnams kyi bsam pa ji lta ba bzhin du rdzogs pa'i 'gro ba gang la yod pa de ni don yod stobs so/ /bshad pa gnyis pa yang chos kyi sku mnga' brnyes pas don yod la/ thogs pa med par gshegs pa ni thugs su chud pa ste/ de bzhin nyid thugs su chud pas skal ba dang ldan pa rnams la yid bzhin gyi nor bu rin po che dang 'dra bar gyur pas na/ kun du 'gro ba don yod stobs/ /zhes bya ste/ chos kyi sku'o/ /de bzhin gshegs pa'i yid ltar mgyogs pa'i ting nge 'dzin gyi ngo bo nyid du 'gyur bas/ de bzhin gshegs pa'i yid ltar mgyogs/ /zhes bya'o/ /yang na de bzhin gshegs pa'i yid ltar mgyogs pas don yod pa'i stobs so/ /don yod stobs pas kun du 'gro ba'o zhes rgyu dang 'bras bu'i ngo bor gyur par bshad do/ /nang gi nyon mongs pa las nges par rgyal bas na rgyal ba ste/ sdig pa'i chos las nga rgyal te/ de'i phyir nyer 'gro nga rgyal yin/ /zhes gsungs pa'i phyir ro/ /phyi rol gyi bdud kyi dgra las rnam par rgyal bas na dgra las rgyal ba ste/ bdud dang mu stegs la sogs pa'i dgra las gang zhig rgyal ba de ni dgra las rgyal ba'o/ /nang dang phyi'i nyon mongs pa dang / bdud kyi dgra las rgyal ba rnam pa sna tshogs pa 'di la mnga' bas na rnam par rgyal pa'o/ /de bas na zil gyis mi non pa'i chos kyi 'khor lo bskor bar mdzad pas na 'khor los sgyur ba ste/ gang la 'khor los sgyur pa'i ngang tshul yod pa de la ni de skad ces bya'o/ / bsod nams dang ye shes kyi tshogs las nges par 'byung ba stobs che ba'i byang chub sems dpa' dang / khro bo la sogs pa'i 'khor gyi tshul gang la yod pa de ni stobs po che'o/ /yang na bsod nams dang ye shes kyi tshogs kyi bdag nyid can zil gyis gnon par mi nus pa'i gzugs dang nus pa la stobs zhes bya'o zhes bshad do/ /bcom ldan 'das ni 'jig rten dang 'jig rten las 'das pa thams cad kyi bdag po nyid du gyur par bstan par bya ba'i phyir/ tshogs kyi slob dpon tshogs kyi mchog /tshogs rje tshogs bdag dbang dang ldan/ /mthu chen gces par 'dzin pa ste/ /tshul chen gzhan gyi dring mi 'jog /ces bya ba gsungs te/ de la nyan thos la sogs pa'i dge 'dun bslab pa'i kun du spyod pa 'dzin du 'dzud par mdzad pas na/ tshogs kyi slob dpon no/ /tshogs rnams kyi gtso bo yin pas na tshogs kyi mchog ste/ byang chub sems dpa'i dge 'dun gyi gtso bor gyur pas na tshogs kyi mchog go/ /rdzu 'phrul chen po dang ldan pa'i lha rnams kyi tshogs kyi gtso bor gyur pas na tshogs rje'o/ /de las gzhan pa'i gnod sbyin dang lha ma yin la sogs pa tshogs rnams kyi gtso bor gyur cing skyong bar mdzad pas na tshogs bdag go/ /ji ltar na thams cad du 'di ltar gyur pa yin zhe na/ de'i phyir dbang dang ldan zhes bya ba gsungs te/ dbang du gyur pa nyid thob pa'i phyir ro zhes bya bar dgongs so/ /yang na de bzhin gshegs pa'i dkyil 'khor chen po de bzhin gshegs pa ni byang chub sems dpa' la sogs pa'i tshogs rnams kyi gtso bor gyur pas na tshogs kyi mchog go/ /khro bo'i dkyil 'khor du drag pos mnan nas stobs kyis byang chub sems dpa'i spyod pa 'dzin du 'dzud par mdzad pas na tshogs kyi slob dpon no/ /'jig rten pa'i phyi rol gyi rdo rje'i rigs kyi dkyil 'khor gyi dbus su bzhag nas 'di ni bdag cag gi ston pa dang gtso bo dang dbang po'o zhes mchod par byed pas na tshogs kyi mchog go/ /gzungs kyi dkyil 'khor du gzungs kyi lha mo thams cad kyi tshogs rnams dga' ba bskyed pa'i bdag por gyur nas bzhugs pas na tshogs rje'o/ /thams cad du cig car bdag por gyur pas na tshogs bdag go/ /'di yang dbang du gyur pas na dbang dang ldan pa zhes bya'o/ /thams cad du legs par gnas pa'i phyir mthu chen po 'di la mnga' bas na mthu chen no/ /sems can ma lus pa'i don mdzad pa'i phyir de bzhin gshegs pa'i gces pa la nges par sbyor bas na gces par 'dzin pa ste zhes bya'o/ /de lta na ni gzhan la rag las pa nyid du 'gyur ro snyam pa'i rtog pa bsal bar bya ba'i phyir/ /tshul chen gzhan gyi dring mi 'jog /ces bya ba gsungs te/ 'dis sems can rnams sangs rgyas nyid du 'khrid par mdzad pas na tshul zhes bya ste lam mo/ /theg pa chen po'i bdag nyid can gyi che ba'i tshul gang la yod pa de ni tshul chen no/ / gzhan gyis bkrir med pas na gzhan gyi dring la mi 'jog pa ste/ gzhan gyis kha drang du med pa'o/ /de lta mod kyi rang nyid bdag nyid kyis bdag nyid sems can gyi don byed pa la nges par sbyor ba dang ldan pas na gces par 'dzin pa dang / gzhan gyi dring la mi 'jog pa zhes bya ba la 'gal ba med do/ /da ni ngag gis rab tu dbye bas bdag por gyur pa nyid du bstan par bya ba'i phyir/ tshig rje tshig bdag smra mkhas pa/ /tshig la dbang ba tshig mtha' yas/ /tshig bden pa dang bden par smra/ /bden pa bzhi ni ston pa po/ / zhes bya ba gsungs te/ 'dir so so yang dag par rig pa bzhi dang sbyar bar blta ste/ de yang blo gros mi zad pas bstan pa'i mdo las rgyas par bstan te/ 'di ni mdo tsam du sbyar bar bya'o/ /de la don so so yang dag par rig pa ni gang chos thams cad la don dam par shes pa ste/ chos shes pa dang / so sor rtog pa shes pa dang / rjes su 'gro ba shes pa dang / rgyu shes pa dang / rkyen shes pa dang / gnyis su med par shes pa dang / tshogs par shes pa dang / tha mar mi 'gro ba shes pa dang / bar na mi 'dug pa shes pa dang / rkyen la 'jug pa shes pa dang / chos kyi dbyings dbyer med pa shes pa dang / de bzhin nyid kyi rjes su 'jug pa shes pa dang / yang dag pa'i mtha' la gnas pa shes pa dang / stong pa nyid rtogs pa'i shes pa dang / de bzhin du mtshan ma med pa dang / smon pa med pa dang / mngon par 'du mi byed pa dang / tshul gcig pa dang / bdag med pa dang / sems can med pa dang / srog med pa dang / gang zag med pa don dam par shes pa nas theg pa chen po la dge ba'i rtsa ba dang tshogs thams cad spel bar shes pa 'di ni don so so yang dag par rig pa zhes bya'o/ /don so so yang dag par rig pa ni don so so yang dag par rig pa gang gis chos thams cad don la rton pas rton pa'o/ /de ci'i phyir zhe na/ chos thams cad ni ma lus par stong ste/ gang stong pa de ni don no/ /de bzhin du mtshan ma med pa dang / smon pa med pa dang / mngon par 'du mi byed pa dang / mi skye ba dang / ma byung ba dang / dngos po med pa dang / dben pa dang / bdag med pa dang / sems can med pa dang / srog dang gang zag med pa'i don de ni don te/ zhes bya ba nas/ don so so yang dag par rig pa de ni don thams cad bstan pa la mi zad pa yin te/ de lta bu'i mi zad par bstan pa'i tshig rnams la dbang phyug tu gyur pas na tshig rje'o/ /de la chos so so yang dag par rig pa ni gang chos thams cad la rjes su 'jug pa shes pa nas ji srid du sems can gyi spyod pa brgyad khri bzhi stong po de dag gi sems kyi 'jug pa dang / 'bab pa shes pa dang / so so ci rigs par chos ston par shes pa dang 'dus pa las mi 'da' bar shes pa dang / snod kyi bye brag ji lta ba bzhin du shes pa dang / 'bras bu yod par chos bstan pa shes pa dang / ma chad ma lhag par chos ston pa shes pa ste/ de ltar tshig rnams kyi bdag por gyur pas na tshig bdag go/ /de la nges pa'i tshig so so yang dag par rig pa ni gang sems can thams cad kyi skad la 'jug pa shes pa ste/ lha'i skad dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / mi dang / mi ma yin pa'i skad la 'jug pa shes pa ste/ mdor na ji snyed du 'gro ba ltar skyes pa'i sems can rnams kyi skad dang / sgra dang / dbyangs dang / tshig gi lam dang / nges pa'i tshig dang / brda dang / spyod pa ji snyed pa de dag thams cad rab tu shes te/ shes nas kyang sgra de dang de dag dang / nges pa'i tshig de dang de dag gis sems can de dang de dag la sgra ji lta ba bzhin du 'jug pas chos ston pas na mkhas pa'o/ /de bzhin du nges pa'i tshig so so yang dag par rig pa'i spyod pa 'di dag 'di lta bur brtag par bya/ chos 'di dag 'di lta bur brtul bar bya/ chos 'di dag 'di lta bur mtshams sbyar bar bya/ chos 'di dag 'di lta bur khong du chud par bya/ chos 'di dag 'di lta bur yi ge rnams kyis brtag par bya'o zhes de dag gcig gi tshig kyang shes pa nas ji srid gnyis kyi tshig nas/ yi ge du mar sgro btags pa yang shes/ sgro btags pa med pa yang shes te/ de'i phyir tshig rnams kyi bdag por gyur pas na tshig la dbang ba'o/ /nges pa'i tshig de yang thogs pa med pa 'khrul pa med pa zhes bya ba nas sems can thams cad mgu par byed pa'i bar te/ des na smra mkhas pa'o/ /de la spobs pa so so yang dag par rig pa ni chags pa med par lung bsgo ba bstan pa shes pa dang / dpyad par lung bsgo ba bstan pa shes pa dang / thogs pa med par lung bsgo ba bstan pa shes pa dang / myur ba'i spobs pa dang / la gor du spobs pa dang / mgyogs pa'i spobs pa dang / 'bras bu yod pa'i spobs pa dang / ji ltar dris pa bzhin du spobs pa dang / mi 'phrogs pa'i spobs pa dang / yongs su mi nyams pa'i spobs pa nas ji srid du yang dag pa ji lta ba bzhin du bstan pas sems can thams cad kyi sems kyi spyod pa tshim par bya ba'i spobs pa ste/ mi dor mi lkugs pa'i tshig dang / tshig mi brlang ba dang / brtan pa dang / mi rtsub pa dang / 'jam pa dang / dag pa dang / rab tu grol ba dang / thogs pa med pa dang / zur phyin pa dang / nges pa dang / mi g.yo ba dang / mi rgod pa dang / zhi ba dang / gzung ba'i tshig dang / btsun pa'i tshig nas de bzhin du sdug bsngal zad par bya ba'i phyir nges par 'byung bar 'gyur te/ gdul bar bya ba'i thabs dpag tu med pa'i gsung gang mnga' ba de ni tshig mtha' yas pa'o/ /de ltar so so yang dag par rig pa bzhi dbye bas tshig rnams ston pa'i dbye ba yod pas rnam grangs su byas nas bshad pa yang ma yin no/ /yang na tshig thams cad bskyed pa'i sngags kyi bdag nyid kyis bzhugs pas na tshig rje ste/ gtso bo ni dbang por gyur pa yin pas rgyur gyur pa las 'bras bu'i tshul du grub pa'o/ /tshig 'byung ba rgyun mi 'chad par sbyor bas na tshig bdag go/ /de ltar grub pa'i tshig gi rgyun 'byung bas pha rol smra ba po ma lus par tshar gcod pas tshig gi nus pa dang ldan pa smra mkhas pa'o/ / saM skr-i ta dang / skad tha mal pa dang / zur bcag pa dang / sha za'i skad dang / ma ga d+hA pa'i skad dang / zung du 'jug pa'i skad dang / tha dad pa la sogs pa'i skad thams cad la mkhas shing thams cad du tshig gis ston pas na tshig la dbang ba'o/ /de bzhin du 'khor thams cad kyis zil gyis non par mi nus kyang tshig gi rgyun la yul dang dus kyi gnas skabs kyi khyad par gyis len 'ga' rgyun chad par dogs pa de lta bu 'di la mi mnga' ste/ de ltar gyur pa'i rgyu'i khyad par byang chub sems kyi ngo bo nyid la zad pa med pa'i phyir ro/ / de yang / bstan gang tshig gcig ston par mdzad pa na/ /bskal pa bsam mi khyab par 'das gyur kyang / /zad pa med pa'i tshig gi dbye ba yis/ /don rtogs mdzad par thugs ni rnam par sbyangs/ /zhes bshad pa lta bu'o/ /de bas na yul dang dus kyi gnas skabs kyi bye brag gis rgyun chad pa med par rnam pa thams cad du rgyun mi 'chad pa'i tshig rgyun 'byung bas na tshig mtha' yas zhes bya ste/ rgyu nyid dang 'bras bu nyid du gzhag pa'i bye brag gi gnas skabs yongs su bzung nas/ bcom ldan 'das de nyid thams cad du bzhugs pa'o zhes ston pa yin pa'i phyir rnam grangs ni ma yin no/ /yang na rnam grangs nyid du bya na yang tshig 'ga' zhig la de las gzhan pa'i tshig 'gas gsang sngags kyi tshul du gyur pas/ ji ltar mngon par 'dod pa'i don thob par 'gyur bas na rnam grangs kyis ston par mdzad pa yang srid pa'am yang na tshig snga ma snga ma'i bshad par gyur pa ni tshig phyi ma phyi ma yin par bcom ldan 'das kyi bka' nyid las shes te/ ngas bshad cing bstan te bkrol zhing rnam par phye la gsal bar bya'o zhes gsungs te/ gzhan du rnam par phye ba la sogs pa ni med pas gzhan dag tu yang rnam grangs kyi tshig 'di ltar sbyar ba la nyes pa med do/ /tshig bden zhes bya ba la/ de la byang chub sems dpa'i bden pa gang zhe na/ gang byang chub sems dpa' bla na med pa yang dag par rdzogs pa'i byang chub tu sems bskyed nas sems de srog gi phyir yang yongs su mi 'dor zhing sems can rnams la log par yang mi sgrub pa ste/ 'di ni byang chub sems dpa'i bden pa'o/ /gang byang chub sems dpa' bla na med pa yang dag par rdzogs pa'i byang chub tu sems bskyed nas phyis sems 'dor zhing sems can thams cad la log par sgrub pa 'di ni byang chub sems dpa'i rab tu smad pa'i brdzun du smra ba'o zhes chos yang dag par sdud pa las 'byung ste/ slu bar byed pa ni skyes bu gtso bo'i don thos pa ma yin pas tha dad par mi gsung ste/ de bas na gtso bor gyur pas sangs rgyas nyid thob pa las gzhan du mi 'gyur ba'i gsung mnga' bas ni tshig bden no/ /mya ngan las 'das pa dang / stong pa nyid dang / de bzhin nyid dang / yang dag pa'i mtha' ni bden pa'o/ /de las gzhan pa thams cad ni brdzun zhing slu ba'i chos te/ rnam pa thams cad du bden pa de gsung pa'i ngang tshul gang la mnga' ba de ni bden par smra ba'o/ /dang zhes bya ba'i sgra ni nges par gsung pa ste/ bden pa ni 'di nyid do zhes rnam par phye ba'i rim pa yin par blta bar bya'o/ /bden pa bzhi ni ston pa po/ /zhes bya ba la/ bden pa bzhi ni 'di lta ste/ sdug bsngal gyi bden pa dang / kun 'byung gi bden pa dang / 'gog pa'i bden pa dang / lam gyi bden pa'o/ /de la sdug bsngal gyi bden pa gang zhe na/ 'khor bar gyur pa'i phung po lnga ni sdug bsngal yin te/ de yang sdug bsngal gyi sdug bsngal dang / 'gyur ba'i sdug bsngal dang / 'du byed kyi sdug bsngal te/ sdug bsngal de gsum dang ldan pa'i phyir nye bar len pa'i phung po lnga ni sdug bsngal lo/ /nye bar len pa'i phung po lnga po sdug bsngal gyi mtshan nyid can 'di ni/ sdug bsngal zhes bya ste/ sdug bsngal gyis sdug bsngal ba'i mtshan nyid can gyis gang stong pa nyid du so sor rtog pa 'di ni sdug bsngal ba la sdug bsngal shes pa'i 'phags pa'i bden pa'o/ /gang phung po lnga'i bag la nyal ba dang / srid pa'i rgyu dang / lta ba'i rgyu 'di ni kun 'byung ba ste/ gang sred pa'i rgyu dang lta ba'i rgyu yang dag par len pa dang rjes su 'dzin pa dang / yongs su tshol ba 'di ni kun 'byung shes pa'i 'phags pa'i bden pa'o/ /gang phung po lnga po rnams kyi zad pa dang / mthar thug pa dang / 'gog pa dang / sngon gyi mthar mi 'byung phyi ma'i mthar mi 'pho ba dang / da ltar gyi dus su thob pa med pa 'di ni 'gog pa'i bden pa zhes bya ste/ de ni gang 'di ltar shes pa 'di ni 'gog pa la 'gog par shes pa'i 'phags pa'i bden pa'o/ / lam gang zhig rtogs pas sdug bsngal shes pa dang / kun 'byung shes pa dang / 'gog pa shes pa la reg par gyur cing rjes su shes pa 'jug pa 'di ni 'gog par 'gro ba'i lam sgrub pa'i 'phags pa'i bden pa'o/ /'di gang stong pa nyid shes pa 'di ni lam la lam gyi 'phags pa'i bden pa shes pa ste/ nyan thos rnams kyi sdug bsngal yongs su shes pa dang / kun 'byung spang bar bya ba dang / 'gog pa mngon du bya ba dang / lam bsgom par bya'o zhes bya ba dang / sdug bsngal la sogs pa la mi rtag pa dang / sdug bsngal ba dang / stong pa dang / bdag med pa'o zhes bya ba dang / kun 'byung ba dang / rgyu dang / rkyen dang / rab tu 'byung ba zhes bya ba dang / 'gog pa dang / zhi ba dang / gya nom pa dang / nges par 'byung ba zhes bya ba dang / lam dang / rigs pa dang / sgrub pa dang / nges par 'byin pa zhes bya ba ste/ rnam pa bcu drug tu bya'o/ /mdor bsdu na nye bar len pa'i phung po lnga ni sdug bsngal ba'o zhes bya ba la/ mi rtag pa la sogs pa'i rnam pas shes par bya'o/ /kun 'byung gi bden pa ni gang sred pa dang / yang 'byung bar byed pa dang / kun du dga' ba'i 'dod chags dang ldan pa de dang der mngon par dga' ba dang / 'di lta ste/ 'dod pa'i srid pa dang / gzugs dang gzugs med pa'i srid pa'o/ /'gog pa'i bden pa ni sred pa nyid gang ma lus pa dang / bral ba dang / 'gog pa dang / spangs pa dang / so sor 'byung ba dang / grol ba dang / mi gnas pa'o/ /lam gyi bden pa ni 'phags pa'i lam yan lag brgyad pa ste/ mdor bsdus nas cung zad cig bshad pa yin te/ gzhung mangs kyis 'jigs pas rgya cher spros pa ni ma byas so/ /de ltar thun mong ma yin pa'i tshul gyis bsam pa dang rjes su mthun par nye bar ston par mdzad pas na/ bden pa bzhi ni ston pa po/ /zhes bya'o/ /kun rdzob dang don dam pa'i bden pa gnyis kyi tshul gyi gnas skabs kyi nyan thos la sogs pa'i ming du ston pa'i phyir tshigs su bcad pa gsum gyis rang gi ngo bo nyid bstan pa ni/ phyir mi ldog pa phyir mi 'ong / /'dren pa rang rgyal bse ru'i tshul/ /nges 'byung sna tshogs las byung ba/ /'byung ba chen po'i rgyu gcig po/ /dge slong dgra bcom zag pa zad/ /'dod chags bral ba dbang po thul/ /bde ba rnyed pas 'jigs med thob/ /bsil bar gyur pa rnyog pa med/ /rig pa dang ni rkang par ldan/ /bde gshegs 'jig rten rig pa'i mchog /bdag gir mi 'dzin ngar mi 'dzin/ /bden pa gnyis kyi tshul la gnas/ /zhes bya ba gsungs te/ bla na med pa yang dag par rdzogs pa'i byang chub las ldog pa med pas na phyir mi ldog pa ste/ phyir mi ldog pa nyid yin pa'i phyir phyir mi ldog pa zhes bya bas sa brgyad pa la gnas pa'i byang chub sems dpa' yin par shes par bya'o/ /phyir mi 'ong zhes bya ba ni nyan thos kyi theg pa'i 'bras bu la gnas pa'i slob pa yin par bshad de/ 'jig rten 'dir mi 'ong bar de nyid du nyon mongs pa zad par byas nas yongs su mya ngan las 'da' bar byed pa ste/ nyan thos kyi theg pas 'dul ba rnams rjes su gzung ba'i phyir phyir mi 'ong ba zhes bshad pa ni kun rdzob bo/ /don dam par yang ldog par mi 'gyur bas phyir mi 'ong ba zhes bshad do/ /'dren pa rang rgyal zhes bya ba ni tshogs na spyod pa'i rang sangs rgyas rnams kyi tshogs yin par bshad de/ so sor re re gtso bo mdzad cing rang sangs rgyas dpag tu med pas 'dul ba'i sems can rnams 'dul ba'i phyir rang sangs rgyas kyi gzugs su bdag nyid ston pas na 'dren pa rang rgyal te kun rdzob po/ /don dam par brda ni 'dren par mdzad pas na mdzad pa'o/ /'dren pa yang yin la so sor gtso bor mdzad pas na 'dren pa rang rgyal lo/ /'jig rten gyi khams so so dag tu sangs rgyas la sbyor bar mdzad pa'i gtso bo gcig pu yin pa'i phyir 'dren pa rang rgyal lo/ /yang na 'khor gyi dkyil 'khor thams cad du re res gtso bo dang 'dren par mdzad pas na 'dren pa rang rgyal zhes bshad do/ /bse ru ltar gcig pu spyod pa'i rang sangs rgyas la ni bse ru zhes bshad de/ rang sangs rgyas kyis 'dul ba'i sems can rnams smin par bya ba'i phyir de'i gzugs su ston par mdzad pas na 'jam dbyangs la yang bse ru zhes bya ste kun rdzob bo/ /don dam par ni gnyis pa med pas na bse ru'i tshul zhes bya'o/ /de ltar so sor 'gro ba'i don mdzad pa'i phyir/ nges 'byung sna tshogs las byung ba/ /zhes bya ste/ de yang 'dis 'gro ba rnams nges par 'byung ba ste lam mo/ /mya ngan las 'das pa'i dngos so grub pas na mya ngan las 'das pa de las byung ba zhes bshad do/ /de bas nyan thos dang / rang sangs rgyas kyi lam dang 'bras bu'i tshul gyis der bdag nyid kyi dngos po ston par mdzad pas na/ nges 'byung sna tshogs las byung ba/ /zhes bya ste kun rdzob bo/ /don dam par ni 'byung ba chen po ste/ rdzu 'phrul chen po dang ldan pa'i sems can gzhan rnams sangs rgyas nyid thob pa'i rgyu gcig pu yin pas thams cad kyi bdag nyid de kho na nyid kyi gzugs can ni bcom ldan 'das yin te/ 'byung ba chen po'i rgyu gcig po/ /zhes bya'o/ /tshur shog ces bya bas bsnyen par rdzogs pa'i dge slong dang / gsol ba dang bzhi'i las kyis bsnyen par rdzogs pa'i dge slong ni dge slong ngo / /dgra rnams bcom pas na dgra bcom pa ste/ nges pa'i tshig gi tshul gyis phyi rol gyi nye bar 'tshe ba'i dgra las nges par rgyal bas na dgra bcom pa'o/ /nang gi nyon mongs pa'i zag pa zad par gyur pa gang yin pa ni zag pa zad pa'o/ /gang gis 'dod pa'i 'dod chags dang / gzugs med pa'i 'dod chags rnams dang bral zhing bsal ba de ni 'dod chags dang bral ba'o/ /gang gis dbang po rnams yul la 'jug pa bkag bas rgyal ba de ni dbang po thul ba'o/ /de ltar de'i gzugs dang ming gis sems can rnams 'dul ba'i phyir de dang der ston par mdzad pa ni kun rdzob bo/ /don dam par ni gnyis su med pa'i ye shes kyis nyon mongs pa bcom pas na dge slong ngo / /thams cad du mchod par 'os pas na dgra bcom pa'o/ /zag pa zad pa ni nyan thos kyi byang chub dang rang sangs rgyas kyi byang chub ste/ des na zag pa zad pa zhes bya mod kyi/ bdag nyid ni bdun brgya pa las gsungs pa lta bu'i zag pa med pa yin gyi dgra bcom pa ltar nyon mongs pa thams cad zad pa las ni ma yin no/ /de ltar ga las shes she na/ nyon mongs pa dang nye bar dmigs pa med pas chos thams cad gzod ma nas zad pa nyid do zhes 'byung ba'i phyir ro/ /gang gis 'khor ba dang mya ngan las 'das pa mnyam pa nyid du dmigs pas zhen pa'i mtshan nyid can gyi 'dod chags dang bral zhing bor ba de ni 'dod chags dang bral ba'o/ /ji ltar na dbang po thul ba yin zhe na/ nyan thos la sogs pa ltar dbang po bsdams pas dbang po thul ba ni ma yin gyi/ 'on kyang dad pa la sogs pa'i dbang po lnga mngon sum du mdzad pas na dbang po thul ba ste/ de la dbang po lnga ni dad pa'i dbang po dang / brtson 'grus kyi dbang po dang / dran pa'i dbang po dang / ting nge 'dzin gyi dbang po dang / shes rab kyi dbang po'o/ /de la dad pa'i dbang po gang zhe na/ dad pa gang gis chos bzhi la dad pa ste/ bzhi gang zhe na/ 'di lta ste/ 'khor ba na spyod pa'i 'jig rten pa'i yang dag pa'i lta ba la dad pa ste/ de las kyi rnam par smin pa la rton pa yin/ dge ba'am sdig pa 'am las gang dang gang byas pa las de dang de'i rnam par smin pa myong bar 'gyur ro snyam ste srog gi phyir yang sdig pa'i las mi byed pa dang / byang chub sems dpa'i spyod pa la dad pa ste/ spyod pa de la zhugs nas kyang theg pa gzhan la 'dod pa mi bskyed pa dang / chos thams cad la don dam pa nges pa'i don zab mo rten cing 'brel par 'byung ba bdag med pa/ sems can med pa/ srog med pa/ gso ba med pa/ gang zag med pa/ rnam par dpyod pa dang / stong pa nyid dang / mtshan ma med pa dang / smon pa med pa'i mtshan nyid du dad pa ste/ lta bar gyur pa thams cad bag la nyal bar mi byed pa dang / stobs dang mi 'jigs pa la sogs pa sangs rgyas kyi chos thams cad la dad pa ste/ dad pa'i phyir the tshom dang bral/ nem nur dang bral bas sangs rgyas kyi chos de yang dag par sgrub pa ste/ 'di ni dad pa'i dbang po zhes bya'o/ /de la brtson 'grus kyi dbang po gang zhe na/ chos gang dag dad pa'i dbang pos dad par gyur pa'i chos de dag brtson 'grus kyi dbang pos yang dag par sgrub ste/ 'di ni brtson 'grus kyi dbang po zhes bya'o/ /de la dran pa'i dbang po gang zhe na/ chos gang dag brtson 'grus kyi dbang pos yang dag par bsgrub pa'i chos de dag dran pa'i dbang po chud mi gson te/ 'di ni dran pa'i dbang po zhes bya'o/ /de la ting nge 'dzin gyi dbang po gang zhe na/ dran pa'i dbang pos chos gang dag chud mi gson pa'i chos de dag ting nge 'dzin gyi dbang pos rtse gcig tu byed de/ 'di ni ting nge 'dzin gyi dbang po zhes bya'o/ /de la shes rab kyi dbang po gang zhe na/ chos gang dag ting nge 'dzin gyi dbang pos rtse gcig tu byas pa'i chos de dag shes rab kyi dbang pos rab tu rtog cing shin tu rtog par byed de/ gang chos de dang de dag las gzhan gyi dring la mi 'jog par shes shing so sor shes pa 'di ni shes rab kyi dbang po zhes bya'o/ /de ltar na dbang po lnga po 'di dag ni lhan cig 'grogs shing rjes su 'brel ba ste/ sangs rgyas kyi chos thams cad yongs su rdzogs par byed do/ /lung bstan pa'i sa yang 'jog go/ /btsun pa sha ra dwa ti'i bu 'di lta ste/ dper na phyi rol pa'i lnga mngon par shes pa rnams sems can mngal du song ba rnams ni ji srid du de'i dbang po dang mo'i dbang po mngon par grub par ma gyur pa de srid du lung mi ston to/ /de bzhin du sangs rgyas bcom ldan 'das rnams kyang byang chub sems dpa' dag la ji srid du 'jig rten las 'das pa'i dbang po 'di dag dang ldan par ma gyur pa de srid du bla na med pa yang dag par rdzogs pa'i byang chub tu lung mi ston te/ 'di dag ni byang chub sems dpa'i dbang po lnga'o/ /de ltar dbang po lnga thul zhing dbang du byed de rang dgar mdzad pas na dbang po thul ba'o/ /bde ba rnyed pas 'jigs med thob/ /ces bya ba la/ bde ba'i sgra dang 'jigs pa med pa'i sgras kyang mya ngan las 'das pa yin par bshad do/ /de bas mya ngan las 'das pa thob pa'i dgra bcom pa yin par bshad pa ni kun rdzob po/ /don dam par ni nye bar dmigs pa'i nyon mongs pa dang / gnas ngan len thams cad dang bral bas bde ba rnyed pa'o/ /'jigs pa med pa thob pa yang chos thams cad mnyam pa nyid la gnas pa la bya bar bshad do/ /nyam nga zhing mi bde ba dang 'jigs pa dang bcas pa nyid ni mnyam pa nyid thob pa la gnyis po 'di dag med pas na bsil bar gyur pa zhes bya ste/ mar me lta bur mya ngan las 'das pa phung po lhag ma med pa'i mya ngan las 'das pa la yang bya mod kyi/ byang chub sems dpa' yang sems can thams cad kyi nyon mongs pa'i gdung ba thams cad sel bas mtsho chen dang 'dra bar bsil zhing yid 'phrog pa'i gzugs su snang bas bsil ba'i rgyur gyur pas na bsil bar gyur pa zhes bshad de/ rgyu dang 'bras bu'i tshul gyis so/ /rnyog pa ni dri ma dang bcas pa ste de dang bral bas na rnyog pa med pa yin te/ nyon mongs pa dang bral ba la rnyog pa med pa zhes bya'o/ /'dir yang rnyog pa ni gcig dang du ma la sogs pa'i rnam par rtog pa dang ldan pa yin la/ de med pas na rnyog pa med pa zhes bya ste/ gang gi phyir rtog pa'i rnyog pa thams cad dang bral ba de ni rnyog pa med pa'o/ /rig pa dang ni rkang par ldan/ /zhes bya ba la rig pa ni yang dag pa'i lta ba'o/ /yan lag lhag ma ni rkang pa ste/ 'phags pa'i lam yan lag brgyad do/ /de dag gi tshul dang ldan pas na 'di skad ces bya ste/ 'phags pa'i lam yan lag brgyad po ni 'di'i 'og nas rgya cher bshad par bya'o/ /bde bar gshegs pa zhes bya ba'i don ni rnam pa gsum du nye bar gzung ste/ mdzes par gshegs pas na bde bar gshegs pa yin te/ gzugs bzang ba bzhin no/ /ma lus par gshegs pas na bde bar gshegs pa ste/ bum pa legs par gang ba bzhin no/ /phyir mi ldog par gshegs pas na bde bar gshegs pa ste/ rims nad legs par byang ba bzhin no/ /gshegs pa'i don thams cad ni mkhyen pa'i don te/ phyin ci ma log pa'i lam gyis shes bya ma lus par rtogs pas chos nyid thugs su chud cing yongs su ma nyams pa nyid du bshad do/ /'jig rten rig pa zhes bya ba ni 'gro ba dang / skye gnas dang / rigs kyi dbye bas tha dad pa'i sems can gyi 'jig rten dang / snod kyi 'jig rten rnams ji lta ba bzhin du mkhyen pas na 'jig rten rig pa'o/ /mchog ces bya ba ni nyan thos dang rang sangs rgyas rnams las kyang shin tu phul du byung ba'o zhes bya ba'i don to/ /bdag gir mi 'dzin ngar mi 'dzin/ /zhes bya ba la 'di ni bdag gi'o bdag gir bya ba med pas na bdag gir mi 'dzin pa'o/ /bdag rkyen du gzung ba'i bdag nyid med pas na ngar mi 'dzin pa'o/ /de dag thams cad kyang kun rdzob dang don dam pa'i ngo bo nyid gnyis su gzhag pa la 'gal ba med par bstan par bya ba'i phyir/ bden pa gnyis kyi tshul la gnas/ /zhes bya ba gsungs te/ bden pa gnyis po nyid tshul te gzhung lugs so/ /de la gnas pa ni kun rdzob kyi bden pa'i tshul gyis nyan thos dang rang sangs rgyas kyi lam thugs su chud cing kun nas nyon mongs pa dang / rnam par byang ba la sogs pa'i tshul gyis bzhugs pa'o/ / don dam pa'i bden pa'i tshul gyis kyang chos kyi dbyings spros pa med pa'i ngo bo nyid la mnga' brnyes pa mgon po 'jam pa'i dbyangs nyid gdul bya rnams de ltar snang bas na/ bden pa gnyis kyi tshul la gnas/ /zhes bya ste/ gnas pa med pa'i tshul gyis gnas te/ bye brag ni de yod do/ /bden pa gnyis kyi tshul du gnas pa 'di ni bar gyi gling dang 'dra bas 'og nas bshad pa la yang sbyar bar bya'o/ /bsod nams kyi tshogs dang ye shes kyi bdag nyid can du bstan par bya ba'i phyir/ 'khor ba'i pha rol mthar son pa/ /bya ba byas pas skam sar gnas/ /shes pa 'ba' zhig nges bsal ba/ / shes rab mtshon chas rnam 'joms pa/ /dam chos chos rgyal gsal bar ldan/ /'jig rten snang bar byed pa'i mchog /chos kyi dbang phyug chos kyi rgyal/ /legs pa'i lam ni ston pa po/ /don grub bsam pa grub pa ste/ /kun tu rtog pa thams cad spangs/ /rnam par mi rtog dbyings mi zad/ / chos dbyings dam pa zad mi shes/ /bsod nams ldan pa bsod nams tshogs/ /ye shes ye shes 'byung gnas che/ /ye shes ldan pa yod med shes/ /tshogs gnyis tshogs ni bsags pa po/ /zhes bya ba'i tshigs su bcad pa bzhi gsungs pa yin te/ de la 'khor ba ni dmyal ba dang / yi dags dang / dud 'gro dang / mi dang / lha la sogs pa'i srid par yang dang yang du 'khor bar byed pas 'khor ba'o/ /'khor ba de'i pha rol gyi mtha' ni 'khor ba'i pha rol te/ der son pa ni de la gnas pa'o/ /de yang ji ltar 'khor zhe na/ las dang nyon mongs pa skye ba'i bdag nyid kyi rang gi ngo bo yongs su ma shes pas 'khor bar 'jug la/ rang gi ngo bo yongs su shes pa ni pha rol te mtha'o/ /'khor ba dang mya ngan las 'das pa'i bye brag mi dmigs par de la gnas pa ni chos nyid kyi gzugs kyis bzhugs pa yin gyi/ rten dang brten pa'i dngos por yod pa ni ma yin te/ gang gi phyir/ mya ngan 'das pa'i mtha' gang yin/ /de ni 'khor ba'i mtha' yin te/ /'di gnyis bye brag cung zad tsam/ /shin tu phra ba'ang yod ma yin/ /zhes bshad pa'i tshul gyis so/ /bya ba byas pa zhes pa ni gang gis bya ba ste/ las su bya ba byas pa de ni bya ba byas pa'o/ /ji ltar na byang chub sems dpa' rnams kyi bya ba byas pa yin/ bya ba med na ni lhag me med pa'i mya ngan las 'das par thal bar 'gyur ro zhe na/ 'di ni dgongs pa yongs su ma shes pa yin te/ byang chub sems dpa' rnams kyi bya ba byas pa ni sems can ma lus pa'i don mdzad par spyod pa'i bdag nyid kyi dngos po bskyed pa ste/ bsod nams dang ye shes kyi tshogs dang sa dang pha rol tu phyin pa yongs su rdzogs par mdzad pa ni bya ba byas pa'o zhes bcom ldan 'das kyis gsungs pas na 'gal ba med do/ /skam sar gnas zhes bya ba ni/ 'khor ba'i skye bo las 'phags shing mtho ba'i bsod nams dang ye shes kyi tshogs dang sa dang pha rol tu phyin pa'i thang thams cad las mthon po la gnas pas na skam sar gnas zhes bya'o/ /nyan thos kyi theg pa la ni/ 'khor ba'i pha rol mthar son pa/ /bya ba byas pas skam sar gnas/ /zhes bya ba 'di gnyis ka mya ngan las 'das pa thob pa la bya'o zhes zer te/ de lta na ni mya ngan las 'das pa la sogs pas 'dul ba'i sems can de dag la de dang de lta bur ston pa ni kun rdzob yin te/ de ltar na sngar bshad pa bzhin du sbyar ro/ /shes pa 'ba' zhig nges bsal ba/ /zhes bya ba la/ ye shes 'ba' zhig phyung zhing bsal ba ste/ gtso bo'i bdag dang bdag gi la sogs pa'i rgyu gang gis bsal ba de ni ye shes 'ba' zhig nges phyung ba zhes bya ste/ nges phyung shes pa 'ga' zhig go zhes tshig gi phrad gong du mi 'byung gi / tshig gi phrad sngar byung ba ni rtag pa ma yin pa'i phyir ro/ /yang na shes ba 'ba' zhig ni grangs can dang gcer bu pa'i gzhung gis thar pa'i rgyur yongs su brtags pa'i shes pa 'ba' zhig pa'o/ /de phyung ba ni bsal ba ste/ snying po med pas gang gis yongs su dor ba de la de skad ces bya ste/ snga ma bzhin du tshig gi phrad ni gong du mi 'byung ngo / /Sh+Thi ba ni ras na zhes skad kyi byings las 'byung bas tha dad skad kyi byings kyi tshig ni de ltar bshad de/ gang gi tshe tha dad pa'i tshig ni glegs bam gang la yang med pas na skad kyi byings Sh+Tha bu ni ra sa na ni sha ma na yo zhes bya ba'i skad kyi byings la brten pas na/ shes pa 'ba' zhig nges bsal pa/ /zhes bshad pa yin no/ /shes rab nyid mtshon cha yin pas na shes rab kyi mtshon cha rnon po gang yin pa de la de skad ces bya'o/ /gang de lta bu'i shes rab kyi mtshon cha dang ldan pa ni nges par sems can thams cad kyi rgyud la yod pa'i ma rig pa rnam pa sna tshogs kyi tshul gyis 'joms pa'o/ /gang gi tshe tshig rnam par phye ba de'i tshe ni shes rab kyi mtshon cha gang la mnga' ba de ni shes rab mtshon cha'o/ /log pa'i blo gros 'joms pas na rnam 'joms pa'o/ /yang na/ shes rab mtshon chas rnam 'joms pa/ /zhes bya ba ni ma rig pa 'joms pas na rnam 'joms pa zhes bar gyi tshig mi mngon par byas nas mtshams sbyar ba ste/ rgyal po sha ka la sogs pa bzhin no/ /dam chos chos rgyal zhes bya ba la/ dam pa rnams kyi chos yin pas na dam pa'i chos te/ dam pa'i chos ni mtho ris dang thar pa sgrub pa'i thabs snying brtse ba dang / sbyin pa la sogs pa'i mtshan nyid can yin la/ bcom ldan 'das kyang thugs rje dang / sbyin pa la sogs pa'i ngo bo nyid yin pas na dam pa'i chos so/ /yang na lung las ni dam pa'i chos kyi sgras bshad pa'i bdag nyid can dang / rtogs pa'i bdag nyid can la zer te/ de la rtogs pa'i bdag nyid can ni dam pa'i chos kyi ngo bo nyid du gyur pas dam pa'i chos so/ /lung gi bdag nyid can gyi chos kyang sngags la sogs pa'i gzugs kyi yi ge thams cad la khyab pas na dam pa'i chos zhes bya'o/ /de yang dam pa yang yin la chos kyang yin pas na dam pa'i chos te/ de bzhin nyid kyi tshul gyis rnam pa thams cad du dam par gyur pas na dam pa'o/ /rang gi mtshan nyid 'dzin pas na chos so/ /de bas na nyes pa thams cad dang bral ba'i chos kyi snang ba'i ngo bo nyid kyis mdzes shing snang bar gyur pas na chos rgyal lo/ /gsal bar ldan/ 'jig rten snang bar byed pa'i mchog /ces bya ba la gsal bar ldan pa'i mchog ni 'jig rten gyi khams thams cad na gnas pa'i sems can thams cad kyi rgyud du gtogs pa'i mi shes pa'i mun nag dang bral bar byed pa la mkhas pa'i chos kyi 'od zer shin tu rgyas pas khyab pa'i snang bar gyur pa ste/ gling bzhi pa tsam gyi phyi rol snang bar byed pa ni mchog ma yin no/ /gzhan yang gsal bar ldan zhes bya ba tha dad par bsten pa'i phyir mchog ces bya bas khyad par du byas pa yin no/ /chos kyi dbang phyug ces bya ba ni chos kyis bdag dang gzhan la kha na ma tho ba med pa'i dga' ba dang bde ba'i skal ba bzang po can gyi nor zad pa med pa'i mdzod kyi ngo bo nyid du gyur cing dbang byed pas na chos kyi dbang phyug go/ /yang chos rnams pa dbang bas na chos kyi dbang phyug ste/ chos thams cad la dbang sgyur ba'i phyir chos thams cad de la rag las pas 'jug pas na chos kyi dbang phyug go/ / chos kyis sems can thams cad rjes su 'dul ba dang / yongs su skyong bas rnam pa thams cad du mdzes pa 'am/ snang zhing gsal bas chos kyi rgyal po'o/ /de yang gang gi phyir/ legs pa'i lam ni ston pa po/ /zhes bya ste/ nyan thos rnams la ni mya ngan 'das pa dang rjes su mthun pa'i lam rab tu ston par mdzad pa'o/ /byang chub sems dpa' rnams kyi yang byang chub tu sems bskyed pa sngon du 'gro bas bdag med pa gnyis dang / sbyin pa la sogs pa'i pha rol tu phyin pa rab tu ston pa ste/ de bas na chos kyi rgyal po'o/ /don grub ces bya ba las sa bcu dang pha rol tu phyin pa'i mtshan nyid can gyi don gyi dgongs pa gang yin pa de la ni de skad ces bya ste/ de grub na yongs su rdzogs pa'o/ /bsam pa grub pa ste zhes bya ba la sems pas na rtog pa ste/ yang dag pa'i rtog pa ni phyin ci ma log pa'i rtog pa'o/ /grub pa ni mthar phyin pa yin pas de skad ces bya'o/ /de ni 'di skad ston par 'gyur te/ sngon las dang po pa'i gnas skabs su byang chub tu sems bskyed pas smon lam dpag tu med pa btab pa ni yang dag pa'i rtog pa tsam du byung zhing rnam par grol ba'i yid la byed pas byas pa de rnams grub pa ni rnam par smin pa'i tshul du rdzogs par gyur pas bsam pa grub pa ste/ bcom ldan 'das 'jam pa'i dbyangs so/ /'dir dgongs pa ma rtogs pa la las dris pa/ gal te bcom ldan 'das kun tu rtog pa grub na ni byis pa so so'i skye bo dang 'dra bar phyin ci log gi nyon mongs pa dang ldan pa yin pas ji ltar na yon tan ma lus pa'i gzhir 'gyur zhe na/ de ni sngar bstan pa yin te/ bcom ldan 'das la 'gal ba med do/ /'gal ba med pa nyid du bstan pa'i phyir/ kun tu rtog pa thams cad spangs/ /zhes bya ba gsungs te/ kun tu rtog pa thams cad spangs shing dor bas skabs mi phyed pa ste/ chos kyi dbyings shin tu rnam par dag pa'i ngo bo nyid de la ma rig pa'i bdag nyid can gyi rnam par rtog pa'i skabs med na ji ltar de 'byung bar 'gyur/ / dper na nyi ma'i dkyil 'khor shin tu 'od gsal ba'i mdun du mun pa mun nag gi tshogs kyi rab rib 'dug pa'i skabs med pa dang 'dra par yang dag pa'i ye shes dang / log pa'i shes pa dag ni snang ba dang mun pa lhan cig gnas pa lta bur mtshan nyid dang 'gal ba yin pa'i phyir te/ gang gi phyir rnam par rtog pa ni mi rigs te/ de ni rang nyid phyin ci log yin pa'i rigs pa 'dis na mi srid do/ /de ltar na ji ltar bcom ldan 'das chos ston par mdzad pa na rnam par rtog pa sna tshogs pa la lhag par spyod pa'i tshig ston par mdzad pa dang / de bzhin du 'jig rten las 'das pa'i rjes las thob pa'i dag pa ni 'jig rten pa'i ye shes mngon sum du mdzad nas bcom ldan 'das chos ston par mdzad do zhes ji ltar lung dang yang 'gal ba med pa yin zhes rtog na/ theg pa 'di ni gzhan nyid yin te/ des na dgongs pa can yin pa'i phyir 'di la 'gal ba med do/ /theg pa dman pa la mos pa rnams la bya'i don bstan pa de ni gang zag la sogs pa yod par bstan pa dang 'dra bar de dag nyid kyis de ltar brtags pa ni rang gi mos pa'i dbang yin gyi de kho na nyid du ni ma yin no/ /de kho na nyid du ni rnam par rtog pa thams cad dang bral ba'i chos kyi dbyings kyi ngo bo nyid la bcom ldan 'das mnga' brnyes pas bsam pa ji lta ba dang rjes su mthun pa'i chos ston pa lta bur snang ba gdul bya rnams kyi rkyen las byung ba yin la/ de rnams kyis kyang bcom ldan 'das kyi zhal gyi sgo nas sgra'i tshogs rnams byung bar gyur pa shes shing / bcom ldan 'das ni chos rnams ston par mdzad do zhes bya bar rnam par 'jog pas na bcom ldan 'das ni chos ston par mdzad do zhes zer ro/ /de skad du/ de yi byin gyis brlabs tsam gyis/ /skyes bu yid bzhin nor bu ltar/ /rtsig pa la sogs rnams las kyang / /ji ltar 'dod bzhin ston pa 'byung / /de yi don rnams dpyad nas ni/ /mi rnams kyis ni kun shes te/ /phan pa rnams la ci rigs par/ /myur ba nyid du sbyor bar 'gyur/ /zhes bshad pa dang / de bzhin du/ gtso bo khyod kyis yi ge ni/ /gcig tsam zhig kyang ma gsungs kyang / /gdul bya'i skye bo ma lus rnams/ /chos kyi char gyis tshim par mdzad/ /ces bya ba dang / de bzhin du gzhan dag las kyang / /skyob pa mdzad pa mi mnga' yang / /'khor lo 'khor ba'i tshul gyis ni/ /tshogs rnams nyid kyi mthu yis na/ /ston pa la yang 'jug par mdzad/ /rtsol ba thams cad spangs par ni/ /nges pa nyid du shes bya ste/ /gzhan du 'di ltar mi 'gyur bar/ /de ni rtag tu shes par bya/ /rnam rtog 'di ni rang nyid dag / ma rig ngo bor gyur pa yi/ /nang gi rnam pa phyi gzigs kyi/ /gang phyir brtags nas 'jug pa yin/ /mgon po shes bya'i sgrib zad pas/ /de'i phyir 'di ni yod ma yin/ /'dren bya 'jig rten rnam shes dag /mngon sum mdzad nas ston mi mdzad/ /sangs rgyas rin chen dbang sgyur bas/ /sna tshogs rin chen bzhin bsam 'das/ /skal ldan rnams la dregs pa ni/ /'byung bar thub pa rnam par bsam/ /nga rgyal de yi rjes 'jug rnams/ /sdud par byed pa'i mkhas rnams kyi/ /mdo dang chos mngon 'dul ba la/ /tshig ni de ltar byas pa yin/ /sangs rgyas rin chen mthu yis na/ /don rnams sna tshogs ston pa ltar/ /rkyen gyis ma 'dres par ston pa/ /rtog pa'i dra ba rnam par bshig /gdul bya ji ltar mos pa bzhin/ /de la 'di ni ston par 'dod/ /khyod kyis gdul byar bya ba rnams/ /de nyid la ni brten pa yin/ /gzhan 'di ji ltar phyi rol bzhin/ /de 'di yin zhes smra bar byed/ /gzhan dang gzhan gyi 'di ni de bzhin shes par bya/ /'di ltar khong du chud bya ste/ /gzhan du phyi rol ba yi sgra/ /ji ltar lta ba po'i dbye bas/ /dris pa mgu bya ji lta bur/ /bshad pa dag ni gcig gis kyang / /gcig gis 'dzin pa'ang bzlog min na/ /rgyu rnams kyis ni dbye ba yis/ /sgra ni mang por gyur pa yin/ /'on kyang thub pa chen po yi/ /gsung gcig du ma'i snang bar ni/ /de ni du ma'i bdag nyid du/ /gdul bya rnams kyis go bar gyur/ /gdul bya rnams la ye shes de/ /de ltar snang zhing gyur pa yang / /gal te phyi don yul rnams ni/ /thams cad rnam pa gcig tu 'gyur/ /snang ba du mar gyur pas na/ /ye shes tsam du rnam par mdzes/ /sgra ni du ma'i bdag nyid min/ /gcig dang du mar 'gal ba nyid/ /gang zhig du mar gyur pa yang / /rtog pa nyid du 'gyur ba yin/ /yul gyi shes pa de nyams pas/ /shes par bya ba'ang 'dres par gyur/ /rgyal bas yi ge gcig tsam yang / /cung zad tsam yang ma gsungs te/ /rnam par mi rtog tshul 'di ni/ /shin tu mdzes par gyur pa yin/ /de bas rtog pa kun spangs par/ /'di ni gnas par gyur pa yin/ /zhes bshad pa yin no/ /gang gi phyir rnam par rtog pa thams cad spangs pa des na/ rnam par mi rtog dbyings mi zad/ /ces bya ste/ de yang gang yin zhe na/ chos kyi dbyings zhes bya ba ste/ chos rnams kyi rigs so/ /mchog tu phul du byung bas na dam pa'o/ /nam yang gzhan du mi 'gyur bas na zad mi shes pa ste/ chos kyi dbyings ni zad par yang mi 'gyur la/ 'phel bar yang mi 'gyur ro zhes gsungs pa'i phyir 'phel ba dang 'bri ba dang bral bas na chos kyi dbyings zhes bya'o/ /bsod nams ldan pa bsod nams tshogs/ /zhes bya ba la/ sbyin pa dang / tshul khrims dang / bzod pa ste pha rol tu phyin pa gsum ni bsod nams kyi tshogs so/ /shes rab kyi pha rol tu phyin pa dang / thabs kyi pha rol tu phyin pa dang / smon lam gyi pha rol tu phyin pa dang / stobs kyi pha rol tu phyin pa dang / ye shes kyi pha rol tu phyin pa ste/ pha rol tu phyin pa lnga ni ye shes kyi tshogs so/ /brtson 'grus dang bsam gtan ni gnyi gar gtogs so/ /de la bsod nams dang ldan pa ni rgyu'i gnas skabs su'o/ /bsod nams kyi tshogs ni 'bras bu'i gnas skabs te/ de'i rang bzhin du gyur pas so/ /ye shes ni ye shes kyi tshogs te rgyu'i gnas skabs so/ /ye shes kyi gnas ni 'bras bu'i gnas skabs te/ ye shes gzhan gyi rgyur gyur pa'i phyir te/ ye shes kyi 'byung gnas kyi ye shes kyi che ba nyid ni thams cad du yongs su smin pa'i dbang gis ye shes kyi rgyur gyur pas na ye shes kyi 'byung gnas so/ /'bras bur gyur pa'i ye shes kyis na ye shes dang ldan pa zhes bya'o/ /yod pa dang med pa dag ni yod med ces bya ste/ gnyis po de dag shes pa'i ngang tshul gang la yod pa de ni/ ye shes ldan pa yod med shes/ /zhes bya'o/ /de ma rtogs pa'i gzung ba dang 'dzin pa thams cad ni med pa ste/ rang gi ngo bo nyid shes pa las gzhan mi shes pa'o zhes bya ba'i tshul gyis na de skad ces bya bas de dag ni kun rdzob yin par bshad do/ /don dam par ni yod pa dang med pa'i ngo bo nyid gnyi ga dang bral ba gnyis su med pa'i mnyam pa nyid kyi she shes ni yod med shes pa'o/ /de lta bu'i yod med shes pa'i ye shes de rje btsun 'jam dpal la mnga' bas na yod med shes zhes bshad de/ gnyis su med pa'i ye shes las tha dad pa'i rje btsun 'jam dpal gzhan yod pa ma yin no/ /ji ltar shes she na/ bden pa las gzhan na med pa'i phyir ro/ /de mnga' bas na kun rdzob kyi bden par bshad pa la yang nyes pa med do/ /de bas na kun rdzob dang don dam pa'i sgo nas tshogs rnam pa gnyis yang dag par bsags pas na/ bsod nams dang ye shes kyi tshogs yang dag par rdzogs so zhes bya ba'i don to/ / da ni tshigs su bcad pa bcu dgus gsang sngags kyi tshul gyi lha rnams kyi ngo bo nyid dang / ting nge 'dzin dang / gsang sngags dang / khro bo la sogs pa'i gzugs kyis 'dul ba'i 'gro ba rnams gdul bar bya ba'i phyir bcom ldan 'das de dang de'i gzugs kyis bzhugs so zhes bstan par bya ba'i phyir/ rtag pa zhes bya ba la sogs pa gsungs pa ni/ rtag pa kun rgyal rnal 'byor can/ bsam gtan bsam bya blo ldan bdag /so so rang rig mi g.yo ba/ /mchog gi dang po sku gsum 'chang / /sangs rgyas sku lnga'i bdag nyid can/ /khyab bdag ye shes lnga yi bdag /sangs rgyas mnga' bdag cod pan can/ /spyan lnga chags pa med pa 'chang / /sangs rgyas thams cad skyed pa po/ /sangs rgyas sras po dam pa'i mchog /shes pa srid 'byung skye gnas med/ /chos las byung ba srid pa sel/ /gcig pu sra mkhregs rdo rje'i bdag /skyes ma thag tu 'gro ba'i bdag /nam mkha' las byung rang byung ba/ /shes rab ye shes me bo che/ /'od chen rnam par snang bar byed/ /ye shes snang ba lam me ba/ /'gro ba'i mar me ye shes sgron/ /gzi brjid chen po 'od gsal ba/ /sngags drag sngags bdag rig sngags rgyal/ /gsang sngags rgyal po don chen byed/ /gtsug tor chen po rmad 'byung gtsug / nam mkha'i bdag po sna tshogs ston/ /sangs rgyas kun bdag dngos po mchog /'gro kun dga' ba'i mig dang ldan/ /sna tshogs gzugs can skyed pa po/ /mchod cing brjod pa drang srong che/ /rigs gsum 'chang ba gsang sngags 'chang / /tshig chen po ni gsang sngags 'dzin/ /gtso bo dkon mchog gsum 'dzin pa/ /theg pa mchog gsum ston pa po/ /don yod zhags pa rnam par rgyal/ /'dzin pa chen po rdo rje zhags/ /rdo rje lcags kyu zhags pa che/ /rdo rje 'jigs byed 'jigs par byed/ /khro bo'i rgyal po gdong drug 'jigs/ /mig drug lag drug stobs dang ldan/ /keng rus mche ba gtsigs pa po/ /ha la ha la gdong brgya pa/ /gshin rje gshed po bgegs kyi rgyal/ /rdo rje shugs can 'jigs byed pa/ /rdo rje grags pa rdo rje'i snying / /sgyu 'phrul rdo rje gsus po che/ /rdo rje las skyes rdo rje'i bdag /rdo rje'i snying po mkha' 'dra ba/ /mi g.yo ral pa gcig gis bsgyings/ /glang chen ko rlon gos su gyon/ /drag chen hA hA zhes sgrogs pa/ /hI hI zhes sgrogs 'jigs par byed/ /gad mo chen po gad rgyangs can/ /rdo rje gad mo cher sgrogs pa/ /rdo rje sems dpa' sems dpa' che/ /rdo rje rgyal po bde ba che/ /rdo rje drag po dga' ba che/ /rdo rje hUM ste hUM zhes sgrogs/ /mtshon du rdo rje'i mda' thogs pa/ /rdo rje'i ral gris ma lus gcod/ /rdo rje kun 'chang rdo rje can/ /rdo rje gcig pu g.yul sel ba/ /rdo rje 'bar ba mig mi bzad/ /skra yang rdo rje 'bar ba ste/ /rdo rje 'bebs pa 'bebs pa che/ /mig brgya pa ste rdo rje mig /lus ni rdo rje'i ba spu can/ / rdo rje'i spu ni gcig pu'i lus/ /sen mo skyes pa rdo rje'i rtse/ /rdo rje snying po pags pa mkhregs/ /rdo rje'i phreng thogs dpal dang ldan/ /rdo rje'i rgyan gyis brgyan pa ste/ /gad rgyangs hA hA zhes par sgrogs/ /yi ge drug pa rdo rje'i sgra/ /'jam dbyangs chen po'i sgra che ba/ /'jig rten gsum na sgra gcig pa/ / nam mkha'i mtha' klas sgra sgrogs pa/ /sgra dang ldan pa rnams kyi mchog /ces bya ba yin no/ /de la rnam par snang mdzad kyi ngo bo nyid kyi thams cad du rgyun mi 'chad pa'i gzugs kyis bzhugs pa'i phyir rtag pa'o/ /sna tshogs pa ni 'gro ba rnam pa tha dad pa ste/ de na mdzes par gnas pas na kun rgyal te/ don yod par grub pa'i ngo bo nyid du gyur pas kun rgyal lo/ /shes rab dang thabs kyi bdag nyid can gyi rnal 'byor 'di la mnga' bas na rnal 'byor can te/ 'od dpag tu med pa'i ngo bo nyid du gyur pa'i phyir ro/ /yang na zhi gnas dang lhag mthong zung du 'brel bar 'jug pa'i lam ni rnal 'byor ro/ /de yang bcom ldan 'das 'jam dpal gyis rnam pa thams cad du yongs su rdzogs pa ste/ de bas na de nyid ni don dam par rnal 'byor can zhes bya bas las kyi sa la slob par gyur pa na yang nye bar gdags pas rnal 'byor can du gyur pa nyid yin no zhes bya bar dgongs so/ / bsam gtan dang / bsam pa po dang / bsam par bya ba dang / bral ba'i rnam par mi rtog pa can gyi thugs kyi bdag nyid mi bskyod pa'i ngo bo nyid du gyur pa'i phyir bsam gtan no/ /sangs rgyas nyid 'dod pa rnams kyis bslab par bya ba yin pa'i phyir rin chen 'byung ldan gyi ngo bo nyid kyis bzhugs pas na bsam bya'o/ /de bzhin gshegs pa lnga'i ngo bo nyid kyis bzhugs pa 'di su zhig yin pa bstan par bya ba'i phyir/ blo ldan bdag ces pa gsungs te/ blo ldan zhes bya ba de bzhin gshegs pa lnga'i shes rab rnams kyi bdag po ste/ gtso bor gyur pa'o/ /de yang dpal rdo rje snying po'i rgyan las/ bde gshegs dri med shes rab ni/ /'jam pa'i dbyangs su de bshad do/ /zhes gsungs pa'i phyir dang / dngos dang dngos med rnam dpyad na/ /sangs rgyas kun la bdag med kyang / /bdag gi dbang du 'jug 'gyur ba/ /e ma'o chos kyi chos nyid yin/ /zhes gsungs pas bdag po nyid bstan pas na log par brtag par mi bya'o/ /gang gi phyir blo dang ldan pa thams cad kyi bdag po yin pa des na mchog gi dang po zhes bya ste/ dang por gyur pa'o/ /mchog kyang yin la dang po yang yin pas na mchog gi dang po'o/ /de ni 'di skad ston par 'gyur te/ de nyid ni thams cad kyi dang po ste/ de thob nas de bzhin gshegs pa rnams dang / byang chub sems dpa' rnams dang / nyan thos rnams dang / /rang sangs rgyas rnams 'byung bar 'gyur ba yin pas mchog gi dang po zhes bshad do/ /mchog gi dang po'i ngo bo nyid du gyur kyang gal te rang gi ngo bo nyid las nyams par 'gyur ro zhes rtog pa la mi g.yo ba zhes gsungs te/ rang gi ngo bo nyid du 'gyur ba'i mtshan nyid can gyi g.yo ba med pas na mi g.yo ba zhes bya ba'i ri brags ltar gnas nas rtog pa nyid du mi g.yo ba ni ma yin no/ /de yang de lta bu'i ngo bo nyid du gyur pa gang gis ji ltar rtogs par bya zhe na/ so so rang rig ces bya ba gsungs te/ so so rang rig pa'i ngo bo nyid la ma gtogs par gang gis ji ltar yang rtogs par mi nus/ so zhes bya ba'i don to/ /gal te thog ma dang tha ma med pa dang / rnam par mi g.yo ba'i ngo bo nyid dang / so so rang rig pa'i ngo bo nyid yin na ji ltar chos dang longs spyod rdzogs pa dang / sprul pa'i sku la sogs pa'i gzugs kyis gzhan yang dag par rtogs par gzhag ces rtog pa bsal bar bya ba'i phyir/ sku gsum 'chang zhes bya ba gsungs te/ de la de'i dgongs pa ni 'di yin te/ so so rang rig pa'i chos nyid kyi bdag nyid can gyi sku la dbang sgyur bas sku gsum du snang ste/ gdul bya'i rgyud la yod pa'i rang rig pa'i tshul yang rtogs par mdzad nas/ des de rnam par gzhag pa'i phyir sku gsum 'chang zhes bya ba ste/ /kun rdzob dang don dam pa'i bden pa la brten pa yin pas na 'gal ba med do/ /sku gsum po de dag kyang yang rnam pa lngar dbye bar bya'o zhes bstan par bya ba'i phyir/ sangs rgyas sku lnga'i bdag nyid can/ /zhes bya ba gsungs te/ de yang ngo bo nyid kyi sku dang / chos kyi sku dang / ye shes kyi sku dang / longs spyod rdzogs pa'i sku dang / sprul pa'i sku'o/ /de la/ chos gang rnam pa thams cad du/ /rnam dag zag pa med brnyes pa/ /thub pa'i ngo bo nyid sku ste/ de yi rang gi mtshan nyid do/ /zhes bya ste/ chos thams cad ni rang bzhin gyis dri ma med pa'i ngo bo nyid yin pas chos nyid kyi de kho na nyid kyi bdag nyid can gyi sku yin pa'i phyir chos kyi sku'o/ /chos sku gnyis pa ni chos rnams kyi bdag nyid can te/ byang chub kyi phyogs kyi chos la sogs pa nas ji srid du rnam pa thams cad mkhyen pa'i ye shes kyi mthar thug pa'i bar du snang ba'i chos kyi tshul yin pa'i phyir ro/ /sems can thams cad kyi don dang bya ba rnams thugs su chud pa'i bdag nyid ni thub pa'i ye shes kyi sku'o/ /thub mtshan sum cu rtsa gnyis dang / /dpe byad bzang po brgyad cu 'di/ /theg chen nye bar longs spyod 'dir/ /longs spyod rdzogs pa'i skur 'dod do/ /zhes bya ba ni longs spyod rdzogs pa'i sku'o/ /rang gis phan pa sna tshogs pa/ /'gro la snyoms par mdzad pa ste/ /'khor ba srid du rgyun mi gcod/ /thub pa'i sprul pa'i sku yin no/ /zhes bya ba ni sprul pa'i sku'o/ /de la chos kyi sku la ni chos nyid kyi bdag nyid can dang chos rnams kyi bdag nyid can dang / ye shes kyi bdag nyid can gyi dbye ba gsum dang / longs spyod rdzogs pa'i sku dang / sprul pa'i sku dang gnyis te/ lnga po de dag ni/ sangs rgyas sku lnga'i bdag nyid can/ /zhes bya'o/ /de la sku gsum ni so so rang gis rig pa ste/ thun mong ma yin pa'o/ /longs spyod rdzogs pa'i sku ni sa bcu la gnas pa'i byang chub sems dpa' dang thun mong ngo / /sprul pa'i sku ni nyan thos dang rang sangs rgyas la sogs pa thams cad dang thun mong yin pas 'di ni dbye ba ste/ bcom ldan 'das kyi chos kyi sku dang / longs spyod rdzogs pa'i sku dang / sprul pa'i sku'i ngo bo rnams phye ste spros pa dang / 'og nas rang gi gnas skabs nyid du bstan pas na 'dir ma spros so/ /khyab bdag ye shes lnga yi bdag /ces bya ba la bcom ldan 'das de nyid ldog pa'i dbye ba dang / mdzad pa'i dbye bas 'di ltar rnam par bzhugs te/ me long lta bu dang / mnyam pa nyid dang / so sor rtog pa dang / bya ba sgrub pa dang / chos kyi dbyings rnam par dag pa zhes bya ba ni ye shes lnga rnams so/ /de la me long gi dkyil 'khor shin tu dri ma med pa la sogs pa'i kha dog dang nye ba'i phyogs na gnas pa'am nam mkha'i ngos na gnas pa'i skar ma'i tshogs la sogs pa'i gzugs brnyan snang yang me long ni 'di snyam du 'di ni sngon po'o/ /'di ni ser po'o/ /'di ni thag ring ba'o/ /'di ni thag nye ba'o snyam du mi sems kyang de'i gnas pa rnams sngon po dang / ser po dang / ring ba la sogs pa rnam par rtog cing 'jog par byed do/ /de bzhin du nyon mongs pa dang shes bya'i sgrib pa rnams dang bral bas dri ma med cing rnam par mi rtog la/ shes bya thams cad la khyab pa'i ye shes kyi me long la ni 'di dag thams cad nye bar gyur cing thams cad so sor snang la/ gdul bya'i tshogs rnams kyi bsod nams dang rjes su mthun pa'i gzugs brnyan 'char zhing snang ba'i rgyur 'gyur bas na me long lta bu'i ye shes zhes bya'o/ /de yang chos kyi mnyam pa nyid kyis thams cad mnyam pas na mnyam pa nyid kyi ye shes zhes bya'o/ /de nyid ni rten cing 'brel par 'byung ba'i ngo bo nyid rtog pa'i so so rang gi rig pas so sor rtogs pas na so sor rtog pa'i ye shes zhes bya'o/ /de lta yin du zin kyang 'gro ba ma lus pa'i mngon par 'dod pa'i don byed pa'i khyad par can gyi bya ba sgrub par mdzad de/ so sor snang bar bskyed pas na bya ba sgrub pa'i ye shes zhes bya'o/ /de ltar gdul bya rnams nye bar 'jog par mdzad du zin kyang / de shin tu yang rang bzhin gyis dri ma med pa'i phyir/ chos kyi dbyings rnam par dag pa'i ye shes zhes bya ste/ de ltar gcig pa yin yang rnam par rtog pa'i dbye ba byas pa yin gyi/ gzhan du na ye shes lnga'i bdag nyid gcig pu nyid du mi rigs so/ /gzhan dag ni gzhan du yang ston to/ /mi bskyod pa'i ngo bo nyid du gyur pas na me long lta bu'i ye shes te/ rnam par rtog pa dang bcas kyang thams cad mngon sum du gyur te/ ji ltar la las me long la gzugs brnyan du gyur pa'i ye shes bya rnams mthong ba de bzhin du rang gi ye shes kyi me long la shes bya snang ba rnams shes shing / gzhan rnams la yang ston pa yin te/ de bas na me long dang chos mthun pas na me long lta bu'i ye shes zhes bya'o/ /rin chen 'byung ldan gyi bdag nyid yin pa'i phyir mnyam pa nyid kyi ye shes te/ ro gcig pa'i bde ba thams cad nyams su myong ba'i mnyam pa nyid kyi ye shes zhes bya'o/ /'od dpag tu med pa'i ngo bo nyid du gyur pas so sor rtog pa'i ye shes te/ 'dod chags la sogs pas ma gos pa'i ngo bo nyid la rnam par dpyod pa'i bdag nyid can no/ /don yod par grub pa'i ngo bo nyid du gyur pas bya ba sgrub pa'i ye shes te/ de bzhin gshegs pa thams cad kyi phyi nang gi mchod pa'i bya ba la 'jug par byed do/ /rnam par snang mdzad kyi bdag nyid can du gyur pa'i phyir chos kyi dbyings rnam par dag pa'i ye shes te thabs dang shes rab gnyis su med pa'i bde ba chen po nyams su myong ba 'byung ba rgyun mi 'chad de/ shin tu rnam par dag pa'i chos 'byung ba las skyes pa'i phyir chos kyi dbyings kyi ye shes so/ /thams cad kyang rnam par rtog pa dang bcas pa ste/ gzhan du gsang sngags kyi tshul 'byung ba mi srid pa'i phyir ro zhes bya ba 'di la cung zad cig dpyad par bya ba yod de/ gal te ye shes de dag rgyun tha dad par gnas na ji ltar ye shes kyi bdag nyid can gcig pur 'gyur/ yang na gcig pu la phan tshun rjes su zhugs pa yin na rgyun tha dad par ma gyur par gnas pa ni shin tu yang 'jug pa mi srid do/ /de lta mod kyi sngags kyi tshul la yang rnam par mi rtog pa'i phyogs nyid dang sbyar bar bya ba yin te/ rnam rtog gti mug chen po ni/ /'khor ba'i rgya mtshor bying ba nyid/ /mi rtog ting 'dzin la gnas na/ /mkha' bzhin dri ma med par snang / /zhes gsungs pas rnam par mi rtog pa la ni thams cad mkhyen pa'i ye shes kyi ngo bo nyid mthar thug pa yod pa ma yin no/ /zhar la 'ongs pas chog gi dkyus ma nyid la 'jug par bya'o/ /sangs rgyas lnga bdag cod pan can/ /zhes bya ba la/ bcom ldan 'das rnam par snang mdzad dang / mi bskyod pa dang / rin chen 'byung ldan dang / snang ba mtha' yas dang / don yod par grub pa ste/ yang dag par rdzogs pa'i sangs rgyas lnga las bsgrubs pa'i cod pan ni sangs rgyas kyi rin po che dang ldan pa yin pas na sangs rgyas lnga bdag go/ /cod pan des dam pa'i dbang phyug gi bdag po nyid du dbang bskur bar gyur pa gang yin pa de ni sangs rgyas mnga' bdag cod pan no/ /yang na ye shes lnga'i bdag nyid can gyi sangs rgyas lnga'i ngo bo nyid du 'gyur bas rang nyid yang dag par rdzogs pa'i sangs rgyas lnga'i cod pan gyi gzugs kyis thams cad la dbang bskur ba'i ngo bo nyid du zhugs pas na sangs rgyas mnga' bdag cod pan zhes bshad do/ /spyan lnga chags pa med pa 'chang / zhes bya ba la sha'i spyan dang / lha'i spyan dang / shes rab kyi spyan dang / chos kyi spyan dang / sangs rgyas kyi spyan zhes pa'i spyan lnga po chags pa med pa dang / thogs pa med pa'i nus pa dang ldan pa 'chang bar mdzad pas na/ spyan lnga chags pa med pa 'chang / /zhes bya'o/ /yang na ji skad du spyan lnga gang la yod pa de ni spyan lnga zhes bya ba la chags pa ni thogs pa ste 'khor ba dang mya ngan las 'das pa la mngon par zhen pa'o/ /de lta bu'i mngon par zhen pa med pas na chags pa med pa'o/ /chags pa med pa de gnyis su med par 'dzin par mdzad pas na chags pa med pa 'chang zhes bya'o/ /sangs rgyas thams cad skyed pa po/ /sangs rgyas sras po dam pa'i mchog /ces bya ba la 'di ni rgyan dang 'gal bar bshad pas ngo bo nyid bshad pa yin te/ ji ltar sangs rgyas thams cad skyed pa po yin zhe na gsang sngags kyi tshul la ni byang chub kyi sems/ rdo rje ni de bzhin gshegs pa drug ste rnam par snang mdzad la sogs pa skyed pa yin par 'dod la/ de yang mgon po 'jam pa'i dbyangs yin te de bas na sangs rgyas thams cad skyed pa'i yum yin no/ /shes rab kyi pha rol tu phyin pa'i tshul ltar na ni shes rab kyi pha rol tu phyin pa las sangs rgyas thams cad 'byung bar 'dod la shes rab kyi pha rol tu phyin pa ni rdo rje blo'o zhes gsungs pas na/ sangs rgyas thams cad skyed pa'i yum yin no/ /de bzhin du byang chub sems dpa' 'jam dpal gzhon nur gyur pas gang gA'i klung gi bye ma snyed kyi sangs rgyas bcom ldan 'das rnams byang chub tu sems bskyed pa la sogs pa dang / pha rol tu phyin pa la sogs pa yang dag par 'dzin du bcug nas sangs rgyas kyi byang chub la rab tu gzhag pa yin pas na rnam pa gsum car gyis kyang sangs rgyas thams cad skyed pa yin par ston to/ /gal te skyed pa po yin na ji ltar na sangs rgyas kyi sras su 'gyur ba yin zhe na/ sangs rgyas sras po dam pa'i mchog /ces bya ba gsungs te/ sangs rgyas kyi sras po mchog ni sangs rgyas rnams ni mthar phyin pa ste/ byang chub sems dpa' gzugs kyi gnas skabs kyis bzhugs pa la dgyes so zhes bya ba'i don te/ chos kyi mchog ni chos kyi mthar thug pa'o zhes bya ba bzhin no/ /glegs bam la la las ni/ sangs rgyas sras po dam pa mchog /ces zer te de la rang gi don la rab kyi mthar thug par byon pas na dam pa'o/ /gzhan gyi don la rab kyi mthar thug par byon pas na mchog go zhes bya bar blta bar bya'o/ /shes pa srid 'byung skye gnas med/ /chos las 'byung ba srid pa sel/ /zhes bya ba la shes rab nyid srid pa yin pas na srid pa ste/ 'di las sangs rgyas dang byang chub sems dpa' rnams dang nyan thos dang rang sangs rgyas rnams 'byung bas na srid pa yim pa'am/ de rnams las byung ba'i nang nas mtho ba nyid du skyes pa gang la yod pa de ni shes pa srid 'byung zhes bya'o/ /skye gnas med ces bya ba ni skye gnas kyi rgyu dang skye gnas kyi lam la bya la/ de dag med pa ste 'khor bar skye ba'i rgyu med pa gang yin pa de la ni skye gnas med ces bya'o/ /skye ba'i rgyu med na ji ltar byang chub sems dpar 'gyur/ rgyu med pa las ni ci yang 'byung bar mi 'gyur ba rigs pas brtags na sems can nam sems can ma yin pa rnams ni rgyu las gzhan du ltos pa med par skye bar mi rigs so zhes rtogs pa la chos las 'byung ba zhes bya ba gsungs te/ chos rnams kyi skye gnas yin pas na chos las 'byung ba yin pa'am/ 'di la chos kyi skye gnas mnga' bas na chos las 'byung ba ste/ gang gi tshe chos rnams kyi skye gnas zhes drug pas mtshams sbyar ba de'i tshe ni chos kyi dbyings kyi ngo bo nyid du gyur pas chos rnams kyi rgyu ste/ de'i rgyu gzhan med pas skye gnas med pa dang / chos las 'byung ba zhes 'gal ba med la/ 'bru mang po pa'i phyogs ltar na yang 'khor ba'i rgyur gyur pa med pas skye gnas med pa yin gyi/ shes rab dang thabs gnyis su med pa'i sbyin pa la sogs pa'i chos rnams las byung bas na chos las byung zhes bya ba la 'gal ba med de/ de bzhin du shes pa srid 'byung zhes bya ba dang srid pa sel zhes bya ba yang de dang 'dra ste/ ji skad du bstan pa'i don ma rtogs pas 'gal bar khong du chud par 'gyur gyi/ bdag gis ji ltar bshad pa de ltar ni 'gal ba 'ga' yang med do/ /de bas na 'di ltar rgyan dang 'gal ba'i bshad pa gsungs pa yin no/ /ji ltar na srid pa sel ba nyid yin zhe na/ gcig pu sra mkhregs rdo rje'i bdag /ces gsungs te sra ba ni 'thas shing cha shas med pa'o/ /rtse mo dang bcas par gnas pas na rtser bcas te rtse mo dang bcas pa'o/ /de lta bu'i bye brag gis khyad par du byas pa gang yin zhe na/ rdo rje'i bdag ces bya ba gsungs te/ bdag ces bya ba'i sgra ni rang bzhin gyi rnam grangs so/ /de ni 'di skad du ston par 'gyur te/ rdo rje'i bdag nyid can de ni ye shes lnga'i rang bzhin gyi rtse lnga yod pas na rtse bcas so/ /thogs pa med pa'i nus pa dang ldan pas na gcig bu'o/ /gzhan gyis skabs mi phyed pas na sra ba'o/ /rdo rje'i gzugs kyis mi shes pa'i srid pa 'jig par byed pas srid pa sel zhes bshad do/ /yang na gcig pu gnyis su med pa sra ba'i mkhregs pa gang yin pa de ni gcig pu sra mkhregs so/ /'di'i don ni 'di yin te/ gnyis su med cing mkhregs la khong stong lta bu'i gnyis su med pas na gcig pu ste gnyis su med pa de ni rang rig pa la ma gtogs pa rig par bya ba med pas na de nyid ni mkhregs pa ste gnyis pa ni tshad ma dang 'gal bas snying po med pa'o/ /de bas na rdo rje dang 'dra bar mi shigs pa'i gzugs can du gyur pas rdo rje'i bdag ces bya ste/ gnyis su med pa'i ngo bo nyid bcom ldan 'das rje btsun 'jam dpal lo/ /skyes ma thag pa 'gro ba'i bdag /ces bya ba la skyes ma thag pa ni hUM mdzad de/ de'i skad cig nyid la rdo rje'i bdag nyid du skyes shing byung ba'o/ /'gro ba'i bdag ces bya ba ni bka' bsgo ba nyan cing rang dbang du mdzad pas na 'gro ba'i bdag go/ /yang na dam pa yin zhing mdzes pa'i bdag por 'khrungs pa gang yin pa de ni 'jam pa'i dbyangs so zhes rjes su dpag par bya'o/ /yang skyes ma thag pa ste de bzhin gshegs pa'i rigs su byung ba'i skad cig ma nyid la 'gro ba'i bdag por gyur pa ni byang chub kyi sems yin pas na rigs kyi khyad par gyis 'khor los sgyur ba'i sras dam pa dang mtshungs so/ /de ni nam mkha' dang mnyam par chos thams cad thugs su chud pa las yang dag par 'khrungs pa yin pas na nam mkha' las byung ba'o/ /gdul bya'i dbang gis de dang de'i gzugs su rang nyid du gyur pas na rang byung ba'o/ /de lta na ni gdul bya'i dbang gis 'gro ba thams cad du song ba der gtogs pa'i nyes pa'i skyon dang ldan par 'gyur ro zhes rtog pa bsal ba'i phyir/ shes rab ye shes me bo che/ /zhes bya ba gsungs pa yin no/ /'di skad ston par 'gyur te/ nyon mongs pa'i bud shing ma lus par sreg pa'i nus pa dang ldan pa'i shes rab ye shes kyi me'i gzugs can bcom ldan 'das la ni 'gro ba thams cad du gtogs pa'i nyes pa rnams kyi skabs med pa'i phyir shes rab ye shes te/ chos thams cad dngos po med pa nyid du thugs su chud pa'o/ /de nyid kyis ni nye bar dmigs pa'i nyon mongs pa'i shing rnams thal bar byed pas na me bo che ste/ 'jig rten las 'das pa'i ye shes kyi bdag nyid do/ /de bas na de nyid gdul bya sna tshogs pa'i rgyud la rnam pa tha dad pa'i tshul gyis snang zhing gsal bar byed pas na rnam par snang bar byed pa'o/ /zhing mtha' yas pa snang bar byed cing thams cad du chos nyid gsal bar byed pas na 'od chen no/ /nyi ma la sogs pa'i 'od ltar bems po ma yin par khyad par du bya ba bstan par bya ba'i phyir ye shes snang ba zhes bya ba gsungs te/ ye shes kyi rang bzhin gyi snang ba des rnam pa sna tshogs pa'i tshul gyis snang bar mdzad pas na lam me ba'o/ /de ltar rnam par snang bar mdzad pa ni nyi ma'i dkyil 'khor ltar so sor nges par 'jig rten gyi khams su snang bar mdzad dam/ 'on te de nyid gcig pu 'jig rten gyi khams thams cad du snang bar mdzad ce na/ de ni gcig pu nyid kyis snang bar mdzad pa bstan pa'i phyir 'gro ba'i mar me zhes bya ba gsungs te/ mar me ni sgrib pa dang bcas pa dang / thogs pa dang bcas pa'i phyogs nges pa na gnas pa nyid du 'byung bar gyur pa yin la/ ye shes kyi mar me bcom ldan 'das ni nyon mongs pa dang shes bya'i sgrib pa thams cad dang thogs pa dang bcas pa'i phyi'i don mi mnga' bas 'jig rten gyi khams thams cad du gdul bya'i rgyud thams cad kyi mi shes pa'i mun pa cig car sel bar mdzad pa'i ye shes kyi snang ba shar nas 'gro ba'i mar mer gyur pa la nyams pa mi mnga' ba'o/ /sgron ma dang 'dra ba'i ye shes kyis snang bas 'jig rten thams cad snang bar mdzad cing nam mkha' la bzhud par ston pa ni ye shes sgron ma ste/ ye shes kyi sgron ma gang yin pa de ni ye shes sgron ma'o/ /thams cad du 'gro ba'i nus pas phul du byung ba'i mtshan nyid kyis che ba'i gzi brjid gang yin pa de ni gzi brjid chen po'o/ /shin tu gsal bar snang bar gyur pa'i ngang tshul can yin pas na 'od gsal ba'o/ /gtsug tor 'khor los sgyur ba la sogs pa'i gsang sngags kyi lha rnams kyi bdag nyid can du gyur pa'i bye brag bstan par bya ba'i phyir/ sngags drag sngags bdag rig sngags rgyal/ /zhes bya ba la sogs pa gsungs te/ khro bo'i gsang sngags kyi bdag por gyur pas na sngags drag sngags bdag go/ /rig sngags kyi rgyal po gnod mdzes te/ hUM bzhi'i ngo bo nyid du gyur pa'i phyir ro/ /gsang sngags rgyal po ni yi ge b+h+rUM ste/ gsang sngags thams cad kyi bdag por gyur pa'i phyir te/ de'i ngo bo nyid du gyur pas na gsang sngags rgyal po'o/ /gtsug tor kun nas snang ba'i ngo bo nyid du gyur pas na don chen byed do/ /gtsug tor 'khor los sgyur ba'i yi ge gcig pa'i ngo bo nyid du gyur pas gtsug tor chen po'o/ /'khor los sgyur ba'i nyon mongs pa sel ba'i ngo bo nyid du gyur pas na rmad byung gtsug go/ /gtsug tor gyen du 'phags kyi ngo bo nyid du gyur pas na nam mkha'i bdag po'o/ /gzi brjid phung po'i ngo bo nyid du gnas pas na sna tshogs ston to/ /gsang sngags kyi mdzod kyi gtsug tor thams cad kyi bdag nyid du gyur pas na sangs rgyas kun bdag dngos po mchog go/ /yang na khro bo'i dkyil 'khor gyi gsang sngags kyi bdag por gyur pas na sngags drag sngags bdag go/ /rig pa ni spyan la sogs pa yin te/ de rnams kyi dbus su rgyal por gyur pas na rig sngags rgyal te gzungs kyi dkyil 'khor gyi bdag po mdzad ces bya ba'i don to/ /gsang sngags kyi bdag po nyid du gyur pa'i chos kyi dkyil 'khor du gsang sngags thams cad kyi bdag por gyur pas na gsang sngags rgyal po'o/ /de ltar rnam pa thams cad kyis sems can thams cad kyi don ma lus par mdzad pas na don chen byed ces bya'o/ /gtsug tor 'khor los sgyur ba bcu gnyis kyi dkyil 'khor gyi gsang sngags kyi lha rnams dang / ting nge 'dzin gyi khyad par rmad du byung ba la sogs pa'i tshul gyis zhugs pas na gtsug tor chen po rmad byung gtsug go/ /nam mkha'i snying po'i dkyil 'khor gyi bdag por gyur bas na nam mkha'i bdag po'o/ /sna tshogs pa la lta ba'i ngang tshul gang la yod pa de la de skad ces bya ste 'gro ba 'dul ba'i dkyil 'khor gyi lha rnams kyi gzugs kyis 'gro ba rnams 'dul bar mdzad pas na sna tshogs ston zhes bya'o/ /rnam par snang mdzad chen po la sogs pa de bzhin gshegs pa lnga'i dkyil 'khor chen po'i phyag rgya chen po la sogs pa'i ngo bo nyid du gyur pas na/ sangs rgyas kun bdag dngos po mchog / ces bya'o/ /de la mnyam par lta bas 'gro ba rnams la gzigs pas kun du dga' bar byed pa'i spyan gang yin pa de ni/ /'gro kun dga' ba'i mig dang ldan/ /zhes bya'o/ /sems can thams cad gdul bar bya ba'i phyir gzugs thams cad du sprul pa sna tshogs shing tha dad pa'i sku mnga' bas na sna tshogs gzugs can no/ /mtho ris dang thar pa nye bar ston pa'i 'byin pa po yin pas na skyed pa po'o/ /dang zhes bya ba ni sdud pa ste sna tshogs pa'i gzugs kyis 'dul ba dang dge ba'i las kyi lam ston par mdzad pa'o/ /bcom ldan 'das de nyid tshangs pa dang / khyab 'jug dang / dbang phyug chen po la sogs pa rnams kyis me tog la sogs pa'i mchod pa'i rnam pa thams cad kyis mchod par 'os pa yin pas na mchod pa'o/ /mchod yon dang zhabs bsil dang gdan la sogs pa phul bas rjed par 'os pa yin pas na rjed pa'o/ /chos rnams mngon du byed pas na drang srong ngo zhes bshad pa'i phyir te de kho na nyid gzigs pas drang srong ngo / /'jig rten pa'i lam la yang cung zad tsam gyi snang ba thob par gyur pa'i 'jig rten pa'i drang srong rnams dang 'jig rten las 'das pa yang nyan thos dgra bcom pa la sogs pa ste/ 'jig rten dang 'jig rten las 'das pa'i drang srong de rnams kyi nang na ches mchog yin zhing / de kho na nyid ma lus pa rnam pa thams cad du mngon sum du mdzad pas na drang srong chen po'o/ /de bzhin gshegs pa dang / rdo rje dang / pad+ma ste rigs gsum gyi ngo bo nyid du gyur pa'i bdag nyid 'dzin par mdzad pas na rigs gsum 'chad pa'o/ /rigs gsum gyi nang du gtogs pa'i rigs thams cad kyi gsang sngags rnams 'dzin pas na gsang sngags can te/ 'di la gsang sngags mnga' bas na gsang sngags can zhes bya'o/ /grub pa'i mtha' thams cad kyi gsang sngags rab tu ston pa'i gtso bor gyur pa nyid kyis 'chang bar mdzad pas na/ dam tshig chen po gsang sngags 'dzin/ /zhes bya'o/ /mchog tu gyur pas na gtso bo'o/ /sangs rgyas dang chos dang dge 'dun gsum skyong bar mdzad cing rgyun mi 'chad par 'jug par mdzad pas na dkon mchog gsum 'dzin pa'o/ /theg pa mchog gsum ston pa po/ /zhes bya ba la nges par 'byin par byed pa'i theg pa ni rnam pa gsum ste gsum gang zhe na/ nyan thos kyi theg pa dang / rang sangs rgyas kyi theg pa dang theg pa chen po'o/ /de la nyan thos kyi theg pa gang zhe na sangs rgyas 'byung ba med par nyan thos kyi theg pa yang med do/ /de ci'i phyir zhe na/ nyan thos rnams kyi yang dag par lta ba ni pha rol gyi sgra'i rjes su 'gro ba'o/ /de la nyan thos na gang 'di tshul khrims sdom pa ste bslab pa ji ltar bcas pa bzhin du rjes su 'jug pas na tshul khrims kyi phung po yongs su rdzogs par 'gyur la/ tshul khrims kyi phung po yongs su rdzogs nas ting nge 'dzin gyi phung po yongs su rdzogs par byed la/ ting nge 'dzin gyi phung po yongs su rdzogs nas shes rab kyi phung po yongs su rdzogs par byed la/ shes rab kyi phung po yongs su rdzogs nas rnam par grol ba'i phung po yongs su rdzogs par byed la/ rnam par grol ba'i phung po yongs su rdzogs nas rnam par grol ba'i ye shes mthong ba'i phung po yongs su rdzogs par byed pa ste/ gang 'di la mkhas pa 'di ni nyan thos kyi theg pa la mkhas pa zhes bya'o/ /gzhan yang nyan thos kyi theg pa ni gang bsod nams dang / bsod nams ma yin pa dang / mi g.yo ba'i 'du byed rnams la rnam par smod pa dang / khams gsum pa thams cad la yid byung zhing 'dod chags dang bral ba dang / 'du byed thams cad la mi rtag pa dang sdug bsngal bar rtog pa dang / chos thams cad la bdag med par rtog pa dang / mya ngan las 'das pa zhi ba la mngon par dga' ba dang / skad cig kyang srid par skye bar mi 'dod pa dang / rtag tu 'jigs par lta ba dang / rtag tu yid mi ston pa dang / phung po rnams la gsod par 'du shes pa dang / khams rnams la sbrul gdug pa lta bur rtog pa'i 'du shes dang / skye mched rnams la grong stong pa lta bur 'du shes pa dang / skye ba'i gnas thams cad la smon pa med pa'i 'du shes dang / mya ngan las 'das pa la gnas dang skyabs su 'du shes pa dang / gang 'di ltar ston pa dang / rab tu ston pa 'di ni nyan thos kyi theg pa zhes bya'o/ /de la rang sangs rgyas kyi theg pa gang zhe na/ rnam pa gang dag dang / rkyen gang dag gis rang sangs rgyas rnams nges par 'byung bar 'gyur ba'i rnam pa de dag dang / rkyen de dag byang chub sems dpas yang dag pa ji lta ba bzhin du rab tu shes pa de dag gang zhe na 'dun pa dang / brtson 'grus dang / bag yod pa chen pos nyan thos kyi lta bu ma yin pa'i sbyin pa'i bsod nams kyi tshogs sog pa dang / tshul khrims kyi bsod nams kyi tshogs sog pa dang / thos pa nyung ba la chos kyi nan tan byed pa dang / sangs rgyas bcom ldan 'das rnams la rim gro dang bsnyen bkur byed pa la yang zhum pa med pa dang / dbang po bar ma dang / rtag tu rab tu 'byung ba la gzhol ba dang / don nyung ba dang / byed pa nyung ba dang / 'du 'dzi la mi dga' zhing dben pa la dga' ba dang / rab tu dben par gnas mal 'cha' ba dang / /bsnyen par dka' ba dang / mthu che ba dang / sbyin pa'i gnas kyi sa la mngon par dga' ba dang / rgyun mi 'chad par rten cing 'brel bar 'byung ba la lta ba dang / nges par 'byung ba'i dbyings gcig la rtog pa dang / rang byung gi ye shes kyi rab tu brgal bar bya ba dang / dmigs pa la 'jug pa thob pa dang / bsam gtan dang / rnam par thar pa dang / ting nge 'dzin dang / snyoms par 'jug pa rgyun mi 'chad pa dang / gzhan gyi dring la mi 'jog pa'i ye shes bskyed pa dang / dmigs pa gang yang rung ba la rkyen gyis ye shes rtogs pa ste/ gang de ltar 'chad pa dang / ston pa dang / rab tu ston pa 'di ni byang chub sems dpa'i rang sangs rgyas kyi theg pa'o/ /de la byang chub sems dpa'i theg pa chen po gang zhe na/ byang chub sems dpa'i theg pa chen po ni dpag tu med de/ de las phyogs tsam zhig bstan to/ /theg pa chen po de sems can thams cad kyi go skabs 'byed pas na dpag tu med pa'o/ /theg pa de ni chags pa med pa'i ye shes la btang ba ste sgrib pa med pa'o/ /theg pa de ni sems can thams cad nye bar 'tsho ba ste/ bsod nams kyi tshogs dang dge ba'i rtsa ba thams cad bsags pa'o/ /theg pa de ni sems can thams cad kyi sems kyi spyod pa la las su rung ba'i phyir pha rol tu phyin pa thams cad yongs su sbyong ba byas pa'o/ /theg pa de ni thogs pa med par byang chub kyi snying por 'gro bas na thams cad mkhyen pa'i ye shes kyi tshogs nyams su len par byed pa'o/ /theg pa de ni sems can thams cad la sbyin pa'i gnas kyi phyir sems can thams cad la thogs pa med pa'i 'od zer mnyam par gtong ba'o/ / theg pa de ni sangs rgyas kyi chos thams cad mngon sum du gyur pa'i phyir las ngan pa'i 'jigs pa thams cad las 'das pa'o/ /theg pa de ni byang chub kyi phyogs kyi chos thams cad dang rten cing 'brel bar 'byung ba'i rgyal mtshan dang / ba dan bsgreng ba ste/ bdud dang phas kyi rgol ba dang ngan pa'i tshogs thams cad rab tu 'joms pa'o/ /theg pa de ni sangs rgyas kyi theg pa sgrib pa med par gyur pa ste mtha' dang mtha' med pa ste rtag pa dang / chad pa dang / 'byung ba dang / 'jig pa dang / lta bar 'gyur ba thams cad dang / kun nas ldang ba dang / sgrib pa dang / chod pa dang / the tsom dang / 'gyod pa sel ba'o/ /theg pa de ni lhag pa'i bsam pa dang snying rje chen pos phye bas na chos thams cad phun sum tshogs pa'i rin po che thams cad dang ldan pa dang phun sum tshogs pa thams cad rnyed pa mi slu ba'i lam du 'gro ba sems can thams cad nye bar 'tsho ba'o/ /theg pa de ni thams cad du kha na ma tho ba med pa ste stobs bcu dang / mi 'jigs pa dang / sangs rgyas kyi chos ma 'dres pa dang / mtshan dang / dpe byad bzang po dang / lus dang ngag dang / sems kyi rgyan gyis brgyan pa ste/ 'di ni byang chub sems dpa'i theg pa chen po la mkhas pa zhes bya ste nges par 'byin par byed pa 'di dag de'i rnam par dbye bas de dang de lhag par mos pa rnams la de bzhin du ston par mdzad pas na/ theg pa mchog gsum ston pa po/ /zhes bya'o/ /don yod zhags pa zhes bya ba ni gdug pa thams cad bcings nas theg pa chen po las mi 'gyur bar mdzad pas don yod cing 'bras bu dang bcas pa'i thugs rje chen po mi g.yo ba 'jig rten dbang phyug gi ngo bo nyid kyi zhags pa gang la yod pa de ni don yod zhags pa'o/ /rnam par rgyal ni bdud dang mu stegs pa las rnam par rgyal bar gyur pas na rnam par rgyal lo/ /bsdu ba'i dngos po bzhi'i ngo bo nyid mi byed pas sems can thams cad yang dag par sdud par mdzad pas na/ 'dzin pa chen po rdo rje zhags/ /zhes bya'o/ / de bzhin gshegs pa thams cad spyan 'dren pa don yod cing dri ma med pa'i thugs rje chen po'i ye shes kyi lcags kyu'i ngo bo nyid du gyur pas na rdo rje lcags kyu'o/ /rdo rje lcags kyus drangs pa rnams chos thams cad bdag med par nges par btul bas na zhags pa chen po'o/ /'jigs byed chen po'i gzugs kyis 'jig rten gsum la 'jigs pa yang dag par bstan pa'i phyir bzhengs nas lha chen po la sogs pa dregs pa bcom pas gdul ba'i phyir 'phags pa gshin rje gshed la sogs pa'i gzugs kyis rje btsun 'jam dpal gzhon nur gyur pa bzhugs pa ste de yang / gang dang gang gi gzugs kyis ni/ /lus can rnams ni 'dul 'gyur ba/ /de dang der ni rnam ston te/ /sna tshogs nor bu ji bzhin no/ /zhes gsungs pa'o/ /de'i phyir rdo rje 'jigs byed kyang yin la 'jigs par byed pa yang yin pas na/ rdo rje 'jigs byed 'jigs par byed/ /ces khyad par gyi mtshams sbyar ba yin gyi drug pa'i mtshams sbyar ba ni ma yin te/ 'dir rdo rje 'jigs byed ces bya ba'i sgras ni gshin rje gshed la bya bar dgongs pas de 'jigs pa skyed par byed pa'i nus pa ni 'ga' yang yod pa ma yin pa'i phyir ro/ /khro bo rnams kyi gtso bo yin pas na khro bo'i rgyal po'o/ /pha rol tu phyin pa drug gi ngo bo nyid zhal drug gang la yod pa de ni gdong drug ces bya ste/ zhal gyi dbyibs ni du ma ste/ /sgra ni rgya mtsho 'khrugs pa 'dra/ /kha cig bzhad cing kha cig zhi/ /kha cig 'jigs par bgrad pa'i zhal/ /kha cig zhal ni gdangs pa ste/ /ljags kyang bskyod par mdzad pa dang / /kha cig kyang ni mche ba gtsigs/ /zhes gsungs pa'o/ /'jigs pa ni 'jigs su rung ba'o/ /mngon par shes pa drug gi rang bzhin dngos po ma lus par mthong ba'i ngo bo nyid kyi spyan dpral ba'i phyogs na yod pa gang yin pa de ni mig drug go/ /bshad pa 'di ni sngon ma byung ba zhig yin te gzhan du na ni spyan bco brgyad par 'gyur ro/ /rjes su dran pa drug gi ngo bo nyid kyis phyag drug gang yin pa de ni lag drug ces bya'o/ /'di la dad pa la sogs pa'i stobs lnga mnga' bas na stobs dang ldan pa'o/ /mi mgo rlon dang skam po dang / /yi dags phreng bas brgyan par bsgom/ /zhes gsungs pas na keng rus kyi rgyan dang ldan pa'i phyir keng rus so/ /nges par 'byed pa'i shes rab rnon po'i mche ba gtsigs pa'i tshems mthon po mnga' bas na mche ba gtsigs pa'o/ /keng rus can yang yin la mche ba gtsigs pa yang yin pas na/ keng rus mche ba gtsigs pa po/ /zhes bya bar sbyar ro/ /lta ba dang / mche ba dang / kha chu dang / reg pa'i dug dang ldan pa'i klu chen po rnams ni ha la ha la zhes pa ste/ me 'bar ba ltar dug 'bar zhing rnam par 'phyo bas gzengs pa/ mig shin tu gdug pa/ lce shin tu bskyod cing glog ltar 'gyu ba/ shin tu 'jigs su rung ba nor bu gzugs sna tshogs dang kha dog sna tshogs pa'i gdengs ka can gyi sbrul gyis skra bcings pa dang / dpral bar dar dpyangs su bcings pa dang / rna rgyan dang / mgul rgyan dang / do shal dang / mchod phyir thogs dang / lus la ska rags dang / gdu bu dang / dpung rgyan dang / zhabs gdub dang / rgyan rnams su byas pa'i sbrul chen po'i gdengs ka'i gdong brgya snyed 'dus par ston pa'i sku dang ldan pas na/ ha la ha la gdong brgya pa/ /zhes bya'o/ /gshin rje mthar gtugs par mdzad pas na gshin rje gshed de sngon gyi rang bzhin las spros nas byang chub kyi lam la nges par bkod pa yin gyi gsang ba ni ma yin no/ /yang na yA ma zhes bya ba'i sgra ni gnyis la zer bas gzung ba dang 'dzin pa dang / rtag pa dang chad pa gang mthar phyin par mdzad cing ma lus par bsal bas na gshin rje gshed de/ mtshe ma zhes bya ba dang 'dra'o/ /bgegs thams cad kyi gtso bor gyur pas na bgegs kyi rgyal lo/ /thogs pa med par bzhud pas na rdo rje shugs can no/ /'jigs byed pa zhes bya ba la gdug pa rnams zhes bya ba ni lhag ma'o/ /rdo rje 'jigs byed ces bya ba nas brtsams te/ sgra dang ldan pa rnams kyi mchog /ces bya ba'i bar gyis 'phags pa gshin rje'i gshed nyid kyi bye brag bstan pa yin la/ de'i gzugs dang rje btsun 'phags pa 'jam dpal khyad par med de/ nye bar gdags pas khyad par du byas pa yin pas de'i mtshan rnams yin pa'am/ yang na don gyi shugs la sogs pa'i dbye bas khro bo la sogs pa'i gzugs kyi khyad par gyis bye brag tu phye ba yin par blta bar bya'o/ /rdo rje grags pa zhes bya ba la/ shin tu 'jigs pa nyid dang / mi phyed pa nyid kyis na rdo rje'o/ /grags pa ni 'jig rten gsum du sgrogs pas na grags pa ste/ rdo rje grags pa ni gshin rje'i gshed do/ /khro bo rdo rje grags pa'am/ rdo rje gu lu gu lur thugs kar rab tu gzhag pa'i rdo rje yin pas rdo rje snying po'o/ /yang na 'dod pa'i rgyal po la bya'o/ /sna tshogs par sprul pa mdzad pas na sgyu 'phrul rdo rje'o/ /sku che bas gsus khyim che pa'i phyir gsus po che'o/ /skye ba'i rgyu'i rdo rje yin zhing byang chub kyi sems kyi ngo bo nyid du gyur pas na rdo rje las skyes so/ /rdo rje rigs kyi gtso bor gyur pas na rdo rje bdag po'o/ /rdo rje dkyil 'khor gyi snying po rdo rje'i rgyu'i ngo bo nyid pas na rdo rje snying po'o/ /sems can thams cad la go skabs 'byed pa dang nyes pa thams cad kyis ma gos pas na mkha' 'dra ba'o/ /gang gis kyang bskyod par mi nus pa'am rang gis dam bcas pa las mi 'gyur ba'am/ 'phags pa khro bo mi g.yo ba'i gzugs 'dzin pas na mi g.yo ba'o/ /ral pa gcig gis bsgyings shing ral pa'i mchog gcig lhag par 'phyang ba'i ral pa'i thor tshugs dang ldan pa'am/ khro bo ral pa gcig pa'i gzugs can yin pas na ral pa gcig gis bsgyings pa'o/ /glang chen ko rlon gos su gyon/ /zhes bya ba la tshogs kyi bdag po'i ngo bo glang po che'i pags pa rlon pa gos su gyon zhing 'chang bas na/ glang chen ko rlon gos su gyon/ /zhes bya'o/ /'byung po'i dkyil 'khor du phra men mar gtogs pa'i ha ha'i sgra'i ngo bo nyid drag po chen po sems can dman pa brgyal bar bya ba'i phyir drag chen hA hA zhes pa'am yang na yi ge hA hA zhes bya ba'i gsang sngags kyi bdag nyid can du gyur pa'i phyir drag po chen po'o/ /hi hi zhes sgrogs 'jigs par byed/ /ces bya ba la rta mchog gi gzugs kyis hi hi zhes bya ba'i sgras tshangs pa la sogs pa ltung bar byed cing gzhan rnams kyang 'jigs pa skyed par mdzad pa'am/ yang na yi ge hi hi zhes bya ba'i gsang sngags kyi gzugs kyis 'jigs par byed pas na/ hi hi zhes sgrogs 'jigs par byed/ /ces bya'o/ /'jig rten gyi khams ma lus par khyab par mdzad pas na gad mo chen mo'o/ /rdo rje bzhad pa'i gzugs kyis shin tu rmad du byung ba'i don ston par mdzad pas na gad rgyangs can zhes bya'o/ / gzhan gyis dbye bas mi phyed pa'i ye shes kyi bdag nyid can yin pas na rdo rje'i gad mo'o/ /sgra chen po nyid dang ldan pas na cher sgrogs pa'o/ /rdo rje dang 'dra bar mi phyed pa'i thugs mnga' ba'am rdo rje sems dpa'i gzugs 'dzin par mdzad pas na rdo rje sems dpa'o/ /shin tu'am gcig tu gzhan gyi don mdzad pa'am rdo rje sems dpa'i ngo bo nyid yin pas na sems dpa'o chen po'o/ /rdo rje dang 'dra bar mi phyed pa'i gzugs kyis mdzes pa'am/ rdo rje lcags kyu'i gzugs 'dzin par mdzad pas na rdo rje rgyal po'o/ /mchog tu phul du byung zhing lhun gyis grub par 'byung ba'i bde ba chen po'i ngo bo nyid du gyur pa'am rdo rje chags pa'i gzugs can yin pas na bde ba chen po'o/ /sems can shin tu gtum po rnams gdul bar bya ba'i phyir drag po'i gzugs 'dzin par mdzad pas na rdo rje drag po'o/ /gdul ba'i sems can dga' ba bskyed par bya ba'i phyir dang / bdag nyid kyang dga' ba'i bdag nyid can du gyur pas na dga' ba che'o/ /khams gsum rnam par rgyal ba rdo rje hUM mdzad kyi gzugs kyis srid gsum ma lus pa rnams su yang yi ge hUM spro bar mdzad pas na/ rdo rje hUM ste hUM zhes sgrogs/ /zhes bya'o/ /rdo rjes mtshan pa'i mda' dang gzhu bsnams pas na/ mtshon du rdo rje'i mda' thogs pa/ / zhes bya'o/ /nye bar dmigs pa'i mi shes pa ma lus pa gcod par byed pa'i ngo bo nyid du gyur pas na/ rdo rje ral gris ma lus gcod/ /ces bya'o/ /rdo rje las kyi ngo bo nyid kyis rdo rje rtse bcu gnyis pa 'dzin par mdzad pas na/ rdo rje kun 'chang rdo rje can/ /zhes bya'o/ /rdo rje gcig pus bdud dang mu stegs dang nyon mongs pa'i dgra rnams 'joms par mdzad pas na/ rdo rje gcig pu g.yul sel ba/ /zhes bya'o/ /rdo rje 'bar ba'i kha rnam par gyes pa shin tu drag cing dmar la ser skya dang / dmar ser gyi spyan gang mnga' ba de ni/ rdo rje 'bar ba mig mi bzad/ /ces bya'o/ /khro bo rdo rje me ltar rab tu 'bar ba'i gzugs kyis tshangs pa'i 'jig rten mthar thug pa 'bar zhing sreg pa'i ngo bo nyid kyi skra gang la yod pa de ni/ skra yang rdo rje 'bar ba ste/ /zhes bya'o/ /rdo rje hUM dang bcas pas sku dang gsung dang thugs so sor rtogs pas na rdo rje 'bebs pa'o/ /gzhan gyis mi 'phrog par gyur cing thams cad du song ba'i yul che ba nyid du gyur pas 'bebs pa chen po'o/ /nam mkha'i sgron ma zhes bya ba la sogs pa grangs brgyar chad pa'i ting nge 'dzin gyi ngo bo nyid kyis dngos po'i don ji ltar gnas pa bzhin du gzigs pa'i ngo bo nyid du gyur pa'i mig gang la yod pa de ni mig brgya pa ste de yang rdo rje chen po 'bar ba dang ldan pas na rdo rje'i mig go/ / rdo rje'i gzugs can gyi ba spu ni rdo rje'i spu ste/ de yang shin tu rno ba'i myu gu lta bu dang ldan pa'i lus gang yin pa dang ldan pa de ni/ lus ni rdo rje'i ba spu can/ /zhes bya'o/ /mi mthun pa'i spu med pas na rdo rje'i spu zhes bya'o/ /de lta bu'i gcig pu gnyis su med pa'i lus gang yin pa de la ni/ rdo rje'i spu ni gcig pu'i lus/ /zhes bya'o/ /rdo rje'i rtse mo rnams kyis shin tu brtan zhing sra bar bya ba'i sen mo skye zhing rtsom pa gang yin pa de ni/ sen mo skyes pa rdo rje'i rtse/ /zhes bya'o/ /rdo rje dang 'dra bar sra la mkhregs shing shin tu 'thas pa'i pags pa gang yin pa de ni/ rdo rje snying po pags pa mkhregs/ /zhes bya'o/ /rdo rje'i phreng thogs dpal dang ldan/ /rdo rje'i rgyan gyis brgyan pa ste/ /zhes pa ni rdo rje'i rang bzhin gyi rgyan thams cad kyis brgyan zhes bya ba'i don to/ /gad rgyangs hA hA nges par sgrogs/ /zhes bya ba ni chos nyid nges pa nyid du sgrogs pa'i phyir ro/ /yi ge drug pa ni/ oM bA kye daM na maH/ oM wA gI shwa ri muM/ oM badzra tIk+Sh+NA d+hAM/ oM many+dzu g+ho Sha muHzhes bya ba'i yi ge drug pa'i gsang sngags thams cad kyi ngo bo nyid du gyur pas na yi ge drug pa'o/ /rdo rje'i theg pa ston pas na rdo rje'i sgra'o/ /snyan la yid du 'ong ba'i gsung dang ldan pas na 'jam pa'i dbyangs so/ /chos thams cad bdag med pa'i sgra chen po sgrogs pas na sgra che ba'o/ /'jig rten gsum na gcig pur gyur pas na/ 'jig rten gsum na sgra gcig pa'o/ /gnyis su med pa'i sgra yin pas na de nyid chen po ste don chen po ston pa'i phyir ro/ /nam mkha'i khams kyi mthar thug par khyab pa'i sgra dang ldan pas na/ nam mkha'i mtha' klas sgra sgrogs pa'o/ /sgra dang ldan pa rnams kyi nang na dam pa yin pas na/ sgra dang ldan pa rnams kyi mchog /ces bya'o/ /de ni chos nyid kyi de bzhin nyid la sogs pa'i tshul gyis bcom ldan 'das 'jam pa'i dbyangs kyi mtshan nyid du gyur pa tshigs su bcad pa bcu drug gis bstan pa ni/ yang dag bdag med de bzhin nyid/ /ces bya ba nas brtsams te/ 'jigs pa ma lus sel bar byed/ /ces bya ba'i bar du yin no/ /de la/ yang dag bdag med de bzhin nyid/ yang dag mtha' ste zhes bya ba'i sgra'i rnam grangs kyi de kho na nyid ston pa yin te/ tshig la la ni tshig gzhan 'ga' zhig gis don de rtogs par 'gyur bas rnam grangs kyis ston par mdzad pa yin te/ rnam grangs de ni gzhan dag tu yang shes par bya'o/ /yi ge thams cad kyis brjod du med pas na yi ge med pa'o/ /rnam pa thams cad kyi mchog dang ldan pa'i stong pa nyid smra ba'i ngang tshul gang yin pa de ni stong pa nyid smra ba ste/ stong pa nyid smra ba'i mtshan nyid ni chos yang dag par sdud pa las rgya cher bstan te/ de yang rigs kyi bu byang chub sems dpa' chos kyi tshul la 'jug pa bcus stong pa nyid smra ba khong du chud par bya ste bcu gang zhe na 'di lta ste/ mi 'phrogs pa dang / rnam par mi 'gro ba dang / chags pa med cing chags pa dang bral ba yang ma yin pa dang / 'jug pa med cing ldog pa med pa dang / 'thab pa med cing rtsod pa med pa dang / bri ba med cing gang ba med pa dang / 'du byed thams cad rang bzhin gyis 'gag par bzod pa dang / chos gang yang so so'i skye bo rnams kyis ma bskyed sangs rgyas rnams kyis ma bkag go zhes thos na mi skrag pa dang / 'khor ba'i rang bzhin dang mya ngan las 'das pa'i rang bzhin de dag mtshungs so zhes thos na the tshom mi za ba dang / de bzhin gshegs pa'i sku ni rtag pa chos rnams ni mi zad pa'o zhes thos na 'jug pa'o/ /de la ji ltar na mi 'phrogs pas stong pa nyid smra ba khong du chud par bya zhe na/ stong pa nyid smra ba ni mi gnas pa'i phyir 'jig rten gyi chos rnams kyis mi 'phrogs pa ste rnyed pas dga' ba yang med/ ma rnyed pas mi dga' ba yang med/ /grags pas yid sos pa yang med/ /ma grags pas sro shi ba yang med/ smad pas zhum pa yang med/ bstod pas dga' bar sems pa yang med/ bde bas chags par 'gyur ba yang med/ sdug bsngal bas yid 'byung bar 'gyur ba yang med do/ /gang de ltar 'jig rten gyi chos rnams kyis mi 'phrogs pa de ni stong pa nyid shes pa/ de ltar mi 'phrogs pas stong pa nyid smra ba khong du chud par bya'o/ /ji ltar na rnam par mi 'gro bas stong pa nyid smra ba khong du chud par bya zhe na stong pa nyid smra ba ni gang nas kyang rnam par mi 'gro/ /gang du yang mi 'gro/ /de gang nas rnam par 'gro ba dang / gang du rnam par 'gro ba de stong pa nyid du mthong stong pa nyid du shes so/ /gang mi 'gro rnam par mi 'gro ba de yang stong pa nyid du shes te/ de ltar rnam par mi 'gro bas stong pa nyid du smra ba khong du chud par bya'o/ /ji ltar na chags pa med cing chags pa dang bral ba yang ma yin pas stong pa nyid smra ba khong du chud par bya zhe na/ stong pa nyid smra ba ni gang du yang chags pa 'am mi chags pa med de/ de gang la chags pa dang gang la mi chags pa de stong pa nyid du shes stong pa nyid du mthong zhing / gang chos gang la chags pa dang chags pa med pa de yang stong pa nyid du shes te de ltar chags pa med cing chags pa dang bral ba yang ma yin pas stong pa nyid smra ba khong du chud par bya'o/ /de la ji ltar na 'jug pa med cing ldog pa med pas stong pa nyid smra ba khong du chud par bya zhe na/ stong pa nyid smra ba ni gang du yang mi 'jug gang nas kyang mi ldog ste de gang la 'jug pa dang gang nas ldog pa de stong pa nyid du shes stong pa nyid du mthong yang byang chub kyi tshogs rnams la mi 'jug pa yang ma yin te gang de ltar 'jug pa de ni stong pa nyid shes pa yin te/ de ltar 'jug pa med cing ldog pa med pas stong pa nyid smra ba khong du chud par bya'o/ /ji ltar na 'thab pa med cing rtsod pa med pas stong pa nyid smra ba khong du chud par bya zhe na/ gang la la 'thab cing rtsod par byed pa de ni stong pa nyid mi shes te/ de gang dang 'thab cing rtsod par byed pa de ni stong pa nyid du shes stong pa nyid du mthong ste/ de ltar 'thab pa med cing rtsod pa med pas stong pa nyid smra ba khong du chud par bya'o/ /ji ltar na bri ba med cing gang ba med pas stong pa nyid smra ba khong du chud par bya zhe na/ stong pa nyid smra ba ni chos gang yang bri ba'am gang bar mi mthong ste/ des chos gang stong pa de ni bri ba'am 'phel bar yang dag par rjes su mi mthong ngo / /su chos gang bri ba'am 'phel bar yang dag par rjes su mthong ba de ni stong pa nyid shes pa ma yin te de ltar bri ba med cing gang ba med pas stong pa nyid smra ba khong du chud par bya'o/ /ji ltar na 'du byed thams cad rang bzhin gyis 'gags par bzod pas stong pa nyid smra ba khong du chud par bya zhe na/ stong pa nyid smra ba ni chos yang dag pa'am/ yang dag pa ma yin par yang dag par rjes su mi mthong ngo / /gang yang dag pa ma yin/ yang dag pa ma yin pa yang ma yin pa de ni ngo bo nyid kyis 'gags pa'o/ /gang ngo bo nyid kyis 'gags pa de ni rang bzhin gyis 'gags pa zhes bya'o/ /stong pa nyid smra ba ni chos gang yang skyes pa'am 'gag par yang dag par rjes su mi mthong ste/ de ltar 'du byed thams cad rang bzhin gyis 'gag par bzod pas stong pa nyid smra ba khong du chud par bya'o/ /de la ji ltar na chos gang yang so so'i skye bo rnams kyis ma bskyed/ sangs rgyas rnams kyis ma bkag ces thos na mi skrag pas stong pa nyid smra ba khong du chud par bya zhe na/ stong pa nyid smra ba ni 'di ltar 'di dag ni so so'i skye bo'o/ /'di dag ni sangs rgyas so snyam du mi sems mod kyi sangs rgyas kyi chos mnyam pa nyid kyis so so'i skye bo'i chos mnyam pa nyid du shes so/ /gang so so'i skye bo'i chos rnam pas sangs rgyas kyi chos rnams ni rgya cher mthong ba de ni stong pa nyid shes pa ma yin te/ de ltar chos gang yang so so'i skye bo rnams kyis ma bskyed/ sangs rgyas rnams kyis ma bkag ces thos na mi skrag pas stong pa nyid smra ba khong du chud par bya'o/ /ji ltar na 'khor ba'i rang bzhin dang mya ngan las 'das pa'i rang bzhin de dag mtshungs so zhes thos na the tshom mi za bas stong pa nyid smra ba khong du chud par bya zhe na/ gang 'khor ba'i rang bzhin dang mya ngan las 'das pa'i rang bzhin tha dad par mthong ba de ni stong pa nyid shes pa ma yin no/ /de ci'i phyir zhe na 'di lta ste 'khor ba'i de bzhin nyid dang / mya ngan las 'das pa'i de bzhin nyid de gnyi ga yang 'dus ma byas kyi mtshan nyid du mtshan nyid gcig ste/ gang 'di ltar 'khor ba'i de bzhin nyid dang / mya ngan las 'das pa'i de bzhin nyid dag mtshungs shing bye brag med par mthong ba ni the tshom mi za ste/ de ltar 'khor ba'i rang bzhin dang mya ngan las 'das pa'i rang bzhin de dag mtshungs so zhes thos na the tshom mi za bas stong pa nyid smra ba khong du chud par bya'o/ /ji ltar na de bzhin gshegs pa'i sku ni rtag pa chos rnams ni mi zad pa zhes thos na 'jug pas stong pa nyid smra ba khong du chud par bya zhe na/ gang de bzhin gshegs pa'i sku ni rtag pa chos rnams ni mi zad pa zhes thos na mi 'jug pa de ni stong pa nyid shes pa ma yin no/ /de ci'i phyir zhe na de bzhin gshegs pa'i sku ni de bzhin nyid dang stong pa nyid de glo bur gyi nyon mongs pa dang nye ba'i nyon mongs pa'i sku ni ma yin no/ /gang de ltar shes pa de ni stong pa nyid shes pa ste de ltar de bzhin gshegs pa'i sku ni rtag pa chos rnams ni mi zad pa zhes thos na 'jug pas stong pa nyid smra ba khong du chud par bya ste/ rigs kyi bu byang chub sems dpas chos kyi tshul la 'jug pa bcu po de dag gis stong pa nyid smra bar khong du chud par bya'o zhes bya ba gsungs te/ pha rol tu phyin pa dang ldan pa'i mdo sde du ma dang gsang sngags kyi tshul rnams la blta ba dang / le lo dang ldan pa rnams la lhan cig tu bsdus pa'i don bstan pas rang gi don du yang 'gyur ro zhes rgyu sngar smras pa yin no/ /gang gi phyir stong pa nyid du smra ba ni smra ba po thams cad kyi gtso bor gyur pa yin pas na khyu mchog ces bya'o/ /ji skad du gsungs pa'i stong pa nyid dang sangs rgyas kyi chos rgya che ba rnams dang phul du byung ba rnams ston par mdzad pas na zab cing rgya che sgra sgrogs pa ste zab pa dang rgya che ba'i sgra sgrogs pa gang yin pa de la ni de skad ces bya'o/ /glegs bam la las ni/ stong nyid smra ba'i khyu mchog ste/ /zab cing rgya che sgra sgrogs pa/ /zhes zer te der ni stong pa nyid smra ba rnams ni khyu mchog ste gtso bo zhes bshad par bya'o/ /lhag ma rnams ni snga ma bzhin no/ /chos kyi dung ste sgra chen ldan/ /chos kyi gaN+DI sgra bo che/ /zhes bya ba la chos thams cad ston pa'i sgra rnams rdzogs pa'i rgyur gyur pa'i chos kyi dung gi ting nge 'dzin gyi ngo bo nyid gyur pas na/ chos kyi dung ste sgra chen ldan/ /zhes bya'o/ /de la chos kyi dung gi ting nge 'dzin ni 'di yin te/ chu'i dkyil 'khor zlum po bdud rtsi'i rang bzhin can kha dog dkar po de'i steng du pad+ma chen po 'dab ma brgyad pa ge sar dang bcas pa/ de'i dbus su chos thams cad yid la byed pa dang bral ba'o zhes ston pa'i sgra muM gi sa bon las byung ba'i rje btsun 'jam dpal phyag gnyis pa sku mdog dkar po rdo rje'i skyil mo krung gi steng du phyag gnyis ting nge 'dzin gyi tshul du gnas pa/ gzhon nu'i rgyan ma lus pa dang ldan pa zur phud lnga pa/ gzhon nu'i gzugs can dngas shing dri ma med pa'i ye shes kyi ngo bo nyid kyi skur bdag nyid bsgoms la/ rang gi snying ga'i zla ba la gnas pa'i pad+ma'i steng du yi ge khaM las dung gi dbus su yi ge oM badzra dzihwa raM rdo rje'i lce/ lce'i steng du rin po che'i pad+ma/ /rin po che'i pad+ma'i steng du sangs rgyas bcom ldan 'das 'od dpag med pa ting nge 'dzin la snyoms par zhugs pa bcom ldan 'das kyi steng gi rkan gyi yi ge baM las bdud rtsi'i thigs pa thur du khar 'dzag par gyur pa ste de ltar zla ba phyed dam/ zla ba gcig gam/ zla ba drug gi bar du bsam par bya'o/ /de nas mtshan ma thob pa dang de'i 'og tu dkyil 'khor bri bar bya ste phyi rol du/ zur bzhi la sgo bzhi pa sgro srung rnams dang yang dag par ldan pa dang / phyi'i dkyil 'khor du lha mo sgeg mo dang / phreng ba ma dang / glu ma dang / gar mkhan ma dang / bdug pa ma dang / me tog ma dang / mar me ma dang / byug pa ma rnams de ltar dgod par bya'o/ /de'i nang du ri mo dkar po gcig gis bskor ba sgo med pa/ de'i dbus su pad+ma dkar po bzang po bri bar bya'o/ /de ltar bris nas ston zla ra ba'am/ dpyid zla tha chungs la sogs pa'i zla ba nyal 'byor pa ci yod pas mchod pa dang lha bshos dang / gtor ma la sogs pa thams cad phul la mnyam par gzhag nas dkyil 'khor gyi dbus su rdo rje'i skyil mo krung gis 'dug la/ 'phags pa 'jam dpal gyi gzugs yongs su gyur pa las sangs rgyas kyi sku chos kyi dbyings dang mnyam pa 'od gsal bar bdag nyid bsgom par bya'o/ /de nas de bzhin gshegs pa thams cad kyi sku dang gsung dang thugs kyi mtshan ma'i phyag rgya thams cad phyogs thams cad nas byon te rang gi lus dang ngag dang yid la zhugs shing brtan par gyur to zhes legs par brtan por bsams la/ rang gi zla ba dang pad+ma la gnas pa'i dung la gsal bar blta zhing de yongs su bskor bar gnas pa'i yi ge thams cad kyi ngo bo ge sar gyi thig le rnams las ngag gi cha shas su gyur te lkog ma'i phyogs su phyin pa dang / dbyangs kyi ngo bo nyid du gyur la dbyangs las ni sgra/ sgra las ni yi ge'i gzugs su gyur nas lcer phyin pa dang / rdo rje lta bu'i dbyibs su gcig la gcig nam mkha'i khams kyi mthar thug pa gsal bar byed pa sgrib pa med par nam mkha' thams cad du spros la/ sgra'i rnam pa de la bsams shing sgra rnams kyis nam mkha' khengs par bsams la/ oM bA kye daM na maHzhes bya ba'i sngags skyil mo krung ma bshig par mtshan rangs par bzlas brjod bya'o/ /mkhas pas kyang lce las 'od zer rnams nges par 'byung ba 'am grub po zhes bya ba'i sgra thos pa dang / mchu 'am so rnams las 'od zer sna tshogs 'byung ba la sogs pa grub pa'i mtshan ma rnams 'byung bar 'gyur ro/ /de nas brtsams te ji ltar bsams pa'i tshig dang / ngag dang sdeb sbyor sna tshogs dang / tshigs su bcad pa dang / gsang sngags dang / rig sngags dang / snying po la sogs pa dang las 'bad pa med pa nyid du 'byung bar 'gyur ro/ /'jig rten dang 'jig rten las 'das pa'i bstan bcos thams cad kyang shes pa dang byed par 'gyur ro/ /sems can thams cad kyi sgra'i don thams cad yongs su shes par 'gyur zhing / thams cad mkhyen pa nyid du yang ring por mi thogs par 'gyur bas na/ chos kyi dung ste sgra chen ldan/ /zhes bya ste thams cad du sgrib pa med par chos rnams 'chad cing rab tu 'chad pa'i sgra'i rgyur gyur pa'i phyir ro/ /'jig rten gyi khams thams cad du dam pa'i chos ston pa'i ltas kyi sgra'i snang ba skyes pas na/ chos kyi gaN+DI sgra bo che/ /zhes bya'o/ /mi gnas mya ngan 'das pa po/ /phyogs bcu'i chos kyi rnga bo che/ / zhes bya ba la mi gnas pa'i mya ngan las 'das pa nyid yang dag par rdzogs pa'i byang chub yin pa ni dpyad par bya ste/ de yang sangs rgyas bcom ldan 'das thams cad ni mi gnas pa'i mya ngan las 'das pa'o zhes bya ba rigs pa dang lung rnams kyis rgya cher bstan par bya'o/ /de la re zhig rigs pa ni gang ma lus par gnas pa'i rgyu can de rnams kyi gnas pa la ni mtha' yod pa ma yin te/ dper na shing kun du spungs pa tshig pa la ni du ba la sogs pa gnas pa'i rgyu byed par nus pa yin no/ /de bzhin du 'khor ba ji srid par gnas pa'i rgyu ma tshang ba med pa de ni sangs rgyas bcom ldan 'das yin no zhes bya ba la gnas pa rgyun 'chad pa'i khyab pa can dang / ma lus par gnas pa'i rgyu can nyid ni 'gal bas ma lus par gnas pa'i rgyur 'di na bshad pa nyid kyi khyab pa can yin pas 'gal bar shes pa ste du ba la sogs pa rgyun chad pa dang / breng ma chad pa chos mi mthun pa yin te/ rgyu ma tshang bar gyur pa las 'bras bu mi 'byung bas sbyor ba 'gal ba yin na rgyu ji ltar grub pa yin zhes zer na de brjod par bya ste/ gnas pa'i rgyu ma tshang ba ni sems can gyi don mdzad pa'i nus pa yongs su zad pa'am thugs rje chen po dang bral ba'am/ tshe'i 'du byed gnas pa la mnga' brnyes pa las nyams pa'am/ srog gi dbang po gnas pa'i las kyi rnam par smin pa'i mthar gtugs pa'am/ sangs rgyas kyis 'dul ba rnams med pa las gyur pa yin gyi/ de dag las bzlog pa ni gnas pa'i rgyu nyid du bshad do/ /de la ston pa ni ye shes thogs pa mi mnga' ba'i nus pa dang ldan pas so sor mkhyen pa mnga' bas dang po'i som nyi med de/ gzhan du na gcig pur spyod pa'i rang sangs rgyas dang khyad par ci zhig yod/ yun ring por mya ngan la bzla bas nyan thos srin bu me khyer ltar brtse ba med pa yang ma yin te thugs rje chen po mngon sum du mdzad pas 'bad pa dang bral na de nyams shing / 'bad na ni 'bad rtsol la mngon par chags pa dang ldan pa'i nyes pa mnga' bas 'gro ba'i don gzigs shing de la mngon par chags pa mi mnga' bas sangs rgyas de nyid ni phyogs su ltung ba med pa'i phyir som nyi gnyis pa yang med do/ /rdzu 'phrul rkang pa la goms pa'i mthar byon pas som nyi gsum pa yang ma yin no/ /rigs pa'i gnas skabs kyi de 'dir brjod par bya ste/ de yang 'di ltar kun dga' bo gang la la zhig gis rdzu 'phrul gyi rkang pa bzhi ma lus par bsten cing bsgoms la mang du byas pas de 'dod na bskal pa'am bskal pa las lhag par gnas par 'gyur ro/ /kun dga' bo de bzhin gshegs pas ni rdzu 'phrul gyi rkang pa bzhi ma lus par ston cing bsgoms la mang du mdzad pas gal te/ de bzhin gshegs pa bzhed na bskal pa'am bskal pa las lhag par bzhugs so zhes gsungs pa'i phyir ro/ /srog gi dbang po gnas pa'i las kyi 'bras bu zad pa yang mi mnga' ste/ bskal pa du mar srog gcod pa las ldog pa goms par mdzad pa dang / thabs dpag tu med pas sbyin pa'i pha rol tu phyin pa la bla mar mdzad cing bstan pa dang bsags pa las yang dag par 'byung ste/ 'di la rgyu dang 'bras bu'i tshogs dag ni gang mchog tu gyur pa'i rgyu las mchog tu gyur pa'i 'bras bu 'byung la/ mchog ma yin pa las ni mchog ma yin pa 'byung gi gzhan du mchog dang mchog ma yin pa dag las 'bras bu de dang mi mthun par 'byung ba ni mi srid pas phan pa gnod par 'gyur ba ni mi srid de/ der gtogs pa'i dbye ba la ltos pa med pa'i phyir ro/ /ston pa la yang 'tsho ba'i rgyu'ang kha na ma tho ba med cing gzhan gsod pa spang pa la sogs pa sngar du spyad zin kyang / ci'i phyir lo brgyar yang mi bzhugs she na/ 'di dag thams cad kyi 'bras bu ni thams cad mkhyen pa nyid yin no zhes yun ring du 'tsho ba'i 'bras bu mngon sum du 'byin par bshad pa srog gcod pa spangs pa la sogs pa'i pha rol tu phyin pa ni rigs mthun par ma 'dres pa nyid du 'bras bu tshe ring bar gsungs pa yin gyi/ gang 'di gang gi rgyur mngon par bstan pa de ni rkyen yongs su tshogs pa dang 'dus par gyur na de bskyed par 'gyur ba nyid dang / gzhan dag gi rgyur 'gyur ba ni nyes pa med kyi/ de ma yin na ni de bskyed par mi 'gyur bar thal bar 'gyur ro/ /'on kyang chos rnams kyi de kho na nyid la goms par mdzad pa nyid las ni thams cad mkhyen par gyur pa yin la/ bsod nams ni tshogs kyi de'i khyad par gzhi bskyed pa la rjes su mthun par gyur pa yin no/ /de bas na bsod nams yongs su zad pas bcom ldan 'das mya ngan las 'das par 'gyur zhes bya ba ni log par btags pa tsam yin no/ /gal te de bzhin gshegs pa gdul bar bya ba'i sems can rnams med pas mya ngan las 'das par 'dod pa tshad ma yin no zhe na de 'dir dpyad par bya ste/ ci sangs rgyas kyi skus gdul ba'i sems can nyid med dam/ ci gzugs gzhan dag gis gdul ba rnams kyang med gal te phyogs snga ma ltar byas na de'i tshe brgya byin la sogs pa'i gzugs su bstan pas kyang gdul ba'i skye bo rnams srid pas de'i gzugs su ci ste mi bzhugs thugs brtse ba'i dbang du gyur pa'i thugs dang ldan pa rnams la phan par bya ba'i phyir cha lugs gzhan dag gis kyang gnas par mdzad de/ dper na bcom ldan 'das nyid 'khor los sgyur ba'i gzugs su bzhugs pa dang 'dra zhing / brgya byin la sogs pa'i gzugs kyis 'dul bar 'gyur ba med pa'i gtan tshigs kyang med pa dang / brgya byin la sogs pa gzhan gyi don byed pa mi srid par yang thal bar 'gyur ro/ /yang na 'jig rten gyi khams gcig tu sangs rgyas kyi skus 'dul ba'i skye bo rnams med kyang 'jig rten gyi khams dpag tu med pa gzhan rnams na des 'dul ba'i srid pa ci'i phyir 'di yongs su mya ngan las 'das par mdzad/ 'jig rten gyi khams gzhan yang de med do zhes zer na ni de'i gtan tshigs kyang 'di na yod pa ma yin te/ 'jig rten gyi khams thams cad na sangs rgyas kyi sku bstan pas 'dul ba'i sems can rnams med do zhes bya ba 'di ni gang nas kyang ma gsungs so/ /yang na nges pa'i sems can rnams med pas gzhan gyi don la 'jug pa rnams ci'i phyir yongs su mya ngan las 'da' bar mi mdzad de yongs su mya ngan las 'da'o zhes 'dod na 'di nyid kyi 'grub pa ma yin te/ gang gi phyir 'jig rten gyi khams gcig tu sangs rgyas kyi sku bstan pas 'dul ba'i sems can rnams la mya ngan las 'das pa nye bar bstan pas 'dul ba'i skye bo rnams rjes su gzung bar mdzad pa'i phyir yongs su mya ngan las 'da' bar ston par mdzad kyang gzhan dag tu bltams pa dang / mngon par byang chub pa dang / chos kyi 'khor lo bskor ba ma tshang ba med pa nye bar ston par mdzad pa yin te/ dus 'di ni ji skad du bstan pa/ sangs rgyas mya ngan yong mi 'da'/ /chos kyang nub par mi 'gyur te/ /sems can rnams ni smin mdzad phyir/ /mya ngan 'da' bar ston par mdzad/ /ces gsungs so/ /yang na gal te thub pa chen po ni 'khor ba ji srid par bzhugs na 'jig rten gyi khams su ci rim gyis sam cig car 'byung bar 'gyur de bcom ldan 'das de bzhin gshegs pa gzhan rnams gang thogs pa med pa'i ye shes dang ldan pa rnams ni gang du de bzhin gshegs pa gcig pu nyid sangs rgyas kyi bya ba mdzad pa des/ der gang du 'khrungs pa'i 'jig rten gyi khams de dang 'dra ba thogs pa med pa'i ye shes dang ldan pa'i de bzhin gshegs pa gcig gis 'khor ba thams cad du gtogs pa'i sangs rgyas kyis gdul ba rnams 'dul bar spyod pa de bzhin gshegs pa gnyis pa la don med par 'gyur te/ gzhan du sangs rgyas 'byung ba med pa'am/ ye shes thogs pa med pa nyid mi rigs par 'gyur ro/ /de bzhin du gal te gcig pu de nyid kyis sangs rgyas kyi bya ba mdzad par spyod na gzhan dag ci'i phyir 'byung bar 'gyur te/ 'di la gdul bar bya ba med do zhes bya bar brtags pa yang mi rigs te/ sangs rgyas thams cad la yang gdul bya med par thal bar mi 'gyur ro/ /de bas na tshogs mtshungs par gyur pa'i de bzhin gshegs pa rnams ni gcig gis mi spyod pa der de bzhin gshegs pa gzhan dag gis kyang mi spyod do/ /rang gis yongs su smin par byas pa'i sems can rnams gdul bar 'gyur ba nyid ni nyan thos dang mtshungs te/ de ltar na de bzhin gshegs pa rnams la thogs pa med pa'i ye shes mnga' ba shin tu yang mi rigs te/ ji ltar rang gis yongs su smin par byas pa sems can rnams 'dul ba ni nyan thos dang mtshungs pa'i phyir ro/ /byang chub sems dpa' gzhan rnams la skabs dbye bar bya ba'i phyir 'jig rten gyi khams gzhan rnams su sems can gyi don mi mdzad do zhe na/ gling bzhi pa so sor yang sangs rgyas 'byung ba med pa kho nar thal bar 'gyur ro/ /gal te byang chub sems dpa' gzhan rnams skabs 'byed par 'gyur te/ de dag la ltos nas de bzhin gshegs pa rnams 'jig rten gyi khams gzhan rnams su sems can gyi don mdzad pa yin gyi/ mi spyod pa'i phyir ni ma yin no/ /de bas na gling bzhi par sangs rgyas 'byung ba nyid du 'dod do zhe na/ gcig pu stong gsum pa'i 'jig rten gyi khams su byung nas gling bzhi par sprul pa'i skus sems can rnams kyi don mdzad pa gang zhig yin/ de ltar na yang 'khor ba thams cad du de bzhin gshegs pa gcig pu nyid byung nas 'khor ba ma lus par gtogs pa'i gling bzhi pa rnams su sprul pa'i skus sems can gyi don mdzad do zhes khas blang dgos so/ /de bzhin gshegs pas 'khor ba thams cad du gtogs pa'i gling bzhi pa rnams su sprul pa'i sku'i spyod pa ston par ni spyod de/ gal te thams cad du sprul pa'i sku'i spyod pa ston par mi spyod na ni de bzhin gshegs pa thogs pa med pa'i ye shes dang ldan pa ma yin no/ /'on kyang 'jig rten na long ba mgon med pa rnams su mgon bya ba'i phyir sangs rgyas par bya'o zhes smon lam 'debs par mdzad par 'jig rten gyi khams gzhan dag tu de bzhin gshegs pa mi 'byung ba yang ma yin te/ sangs rgyas bcom ldan 'das bzhugs pa dag tu ni 'gro ba rnams long bar gyur par mi rigs so/ /'jig rten gyi khams khyad med par bshad na ni stong gsum gyi 'jig rten gyi khams 'byung bar mi rigs par thal bar 'gyur ro zhe na/ de ltar yongs su rtog par gyur na stong gnyis pa dang stong gsum pa rnams kyi gling bzhi pa rnams su yang ci de bzhin gshegs pa rnams 'byung bar mi rigs par 'gyur ro/ /de lta na ni byang chub sems dpa' shin tu mnga' ba'i tshogs mnyam par gyur pa'i tshogs 'bras bu dang bcas par 'gyur zhing sems can shin tu mang po'i don bya ba la de bzhin gshegs pa rnams shin tu yang nyon mongs pa med par 'gyur te/ yul shin tu chung ngu la khyab par mdzad pa'i phyir gal te bcom ldan 'das yongs su mya ngan las 'da' ba mi mnga' na sku gdung rnams ji ltar snang bar 'gyur/ smras pa/ rdzogs sangs mya ngan mi 'da' na/ /nyes pa drug gcig 'byung 'gyur te/ /don med nus pa ma tshang dang / /thams cad gdul bar mi 'gyur dang / /nyan thos rnams dang mtshungs 'gyur dang / /sku gdung rnams ni mi 'byung dang / /gling bzhi pa tsam nyid du ni/ /'khrungs par de dag snang bar 'gyur/ /skal ba mnyam pa chad pa dang / /bde gshegs kyang ni mya ngan 'das/ /ji ltar nyan thos la sogs pa/ /'chi ba'i lus ni snang ba dang / /mi mthun chos su ston pa ste/ /mo gsham bu bzhin shes par bya/ /gzhan du sku gdung med pa yi/ /tshad ma dang ni 'gal bar 'dod/ /ces bya ba de 'dir shin tu btags pa tsam ste/ /gang lung gzhan dag las kyang de bzhin gshegs pa rnams nges par skye ba gzhan du bzhes pa la don 'di la the tshom dang bcas pa yin yang bcom ldan 'das ni gzhan gyi don mdzad pa'i bya ba la gzhol bar 'dod pas dad pa la gzhol ba'i sems dang ldan pa rnams 'dor zhing spong bar mdzad pa ni mi rigs so/ /lung gzhan gyi stobs la nges par ston pa lta smos kyang ci dgos/ de bzhin du theg pa mchog gi tshul yang zhogs shig/ /dge 'dun phal chen sde'i lung las/ 'dus pa la sogs pa rnams ni de bzhin gshegs pa khams gzhan dag tu 'byung bar 'chad do/ /gzhan don 'di la rigs pa yang yod de/ gang lhan cig tu rgyu rnams nye bar 'dus pa'i nus pa dang ldan pa de rnams lhan cig skye bar 'os te/ dper na lhan cig btab pa'i sa bon tshogs pa rnams kyi bar ma bcad na tshogs pa las lhan cig myu gu 'byung ngo / /byang chub kyi sa bon btab pa'i rim pa la ni lhan cig gis tshogs bsags par mi nus te/ rgyu yang sna tshogs pa las mngon par mtho ba dang nges par legs pa'i 'bras bu dang bcas par ster ba'i de bzhin gshegs pa'i myu gu rnams 'byung ba yin no/ /rang bzhin gyis rgyu yod pa'am/ nus pa'i rgyu 'bras bu mi bskyed pa ni rigs pa dang 'gal ba yin te/ gang gi phyir 'gro ba mtha' yas pa ma lus pa cig car ston pa'i phan pa'i blo dang ldan pa'i bdag nyid chen po skyes bu gces par 'dzin pa ni bsod nams dang ye shes kyi tshogs yongs su rdzogs nas rjes su gnas par snang ngo / /de rnams kyi bsod nams dang ye shes kyi tshogs cig car yongs su rdzogs pa ni nges par 'dod pa la rag las te/ bstan bcos legs par rtogs pa'i 'chad pa byed pa dang mtshungs so/ /des na sangs rgyas nyid du 'gyur ba'i rgyu gang gis dgag ste/ sems can sna tshogs pa rnams la don mdzad bzhed pa yang tshogs bsags nas ni mi bzhed pa nyid du gegs su gyur pa yin no/ /ji skad du snying rje pad+ma dkar po'i mdo las kyang / byams pa khyod myur du bla na med pa'i ye shes kyis lhag ma med pa'i mya ngan las 'das par bzhugs par nus kyang gang gi phyir/ byams pa khyod yun ring por 'di snyed du 'khor par mngon par dga' ba de thams cad ni smon lam gyi dbang gis dus la sdod pa yin te/ de bas na byams pa khyod da ltar nga'i rgyal tshab yongs su blangs pa yin no zhes gsungs te/ de lta mod kyi bcom ldan 'das 'gro ba'i don du'am/ yang na skyes bus sam/ gzhan gyis der 'jug pa ni ma yin te/ gang gi phyir gcig gis kyang nus pas 'dod de bdag gis ci zhig bya snyam du dgongs nas gzhan ldog par mdzad pa de rnams kyang thugs rje chen po bskyed pa mngon du mdzad pas na/ ji ltar thugs rje chen po gzhan gyi dbang gis 'jug pa de bzhin du lhag ma rnams kyang de dang 'dra ste/ rgyu ma tshang ba med pa'i dgongs pa dam pa de 'di ltar grangs su bgrang ba ji ltar mdzad/ de rnams longs spyod rdzogs pa'i skus sam/ sprul pa'i skus rang gi 'jig rten gyi khams sam khams gzhan gyi gling bzhi rnams su skal ba ji lta ba bzhin du 'gro ba'i don lhun gyis grub par rdzogs par mdzad kyi thugs rje'i rang bzhin gyi sku can rnams ni dmigs pa can du 'os pa ma yin te/ sangs rgyas kyi rol pa 'di ni bsam gyis mi khyab pa yin no/ /ji ltar smon lam dang 'gal ba med de/ gang gi phyir mgon med pa nyid dang / long bar gyur pa'i 'gro ba rnams la de bzhin gshegs pa rnams ma gtogs par dgra bcom pa la sogs pa mgon du gyur pa dang / mig tu gyur pa ni mi rigs so/ /sku gdung med pa yang ma yin te/ bcom ldan 'das kyi byin rlabs nyid kyis skye mched dang ba'i rgyud la snang gis sku gdung nyid de yod pa ni ma yin te/ bcom ldan 'das ni ye shes kyi rang bzhin gyi sku dang ldan pa'i phyir dang / thub pa rnams ni rnyog pa med pa'i shes rab kyis 'khor ba ji srid par bzhugs pa'i phyir te/ ji skad du gser 'od dam pa'i mdo las/ mtho ris su ni 'dzeg pa'i phyir/ /nam zhig ri bong rwa rnams las/ /skas ni legs par byas gyur pa/ /de tshe ring bsrel yod par 'gyur/ /sku la rus pa khrag med na/ /ring bsrel yod par ga la 'gyur/ /zhes gsungs te/ gang la yang dpe 'dis na gang du 'byung ba'i 'jig rten gyi khams bzhin du de grub pa ma yin te/ der de bzhin gshegs pa de nyid gcig pu bya ba mdzad pa ma yin no/ /ma grub pa ni/ gang gi phyir de bzhin gshegs pa rnams kyi 'gro ba'i don rdzogs par bya ba yin la/ de mdzad pa yang bcom ldan 'das gcig pu 'dus par mdzad pa'i tshul des 'dul bar 'gyur ba'i skye bo rnams ni srid de/ ji skad du/ 'phags pa rin po che tog gi mdo las/ bcom ldan 'das 'od dpag med dang / shAkya thub pa la sogs pa gcig tu 'dus par mdzad nas sems can dpag tu med pa'i bya ba mdzad do zhes 'byung ba ste/ phrag dog ma lus spangs pa rnams/ /phyogs gcig bzhugs pa nyid na yang / /bcom ldan 'das rnams rnam mdzes te/ /'khor los sgyur las khyad par 'phags/ /zhes bshad pa ste/ phrag dog ni nag nog gi spyod pa can gyi 'khor los sgyur ba rnams ni gcig la gcig gis 'byor ba la khong khro bar byed pa rnams g cig tu mdzes pa ma yin no zhes bya ba 'di ni rigs kyi bcom ldan 'das ni yang thugs rje'i rang bzhin las rjes su sprul pa'i sku dang ldan pa phrag dog dang ser sna la sogs pas rjes su gos pa med pa'i bdag nyid can 'gro ba'i don mnyam pa med pa lhun gyis grub par mnyam par gyur pa rnams gcig tu 'dus kyang ni mdzes pa ci zhig yod/ /'dus par gyur pa'i tshul des gdul ba'i skye bo rnams med par gyur na ni gcig tu 'dus par ni mdzad do/ /de bas na 'di ltar 'jig rten gyi khams gcig tu de bzhin gshegs pa mang po dus gcig 'byung bar srid pa la 'gal ba yod pa ma yin no/ /de yang de rnams kyis 'di ltar smon lam btab ste/ ji lta ji ltar gdul bya rnams kyi don rdzogs par 'gyur ba 'byung ba de lta de ltar bdag cag la brtan pa rnams la snang bar gyur cig ces gsungs te/ de'i gzugs tsam du snang ba las ma gtogs par 'jig rten gyi khams kyang med la/ rgyal ba'i gzugs kyi sku yang yod pa ma yin te/ dngos po thams cad ni ye shes kyi lus nyid yin pa'i phyir ro/ /de skad du yang lang kar gshegs pa'i mdo las/ sems can las rnams mtha' yas kun du 'byung / /sna tshogs la las 'jig rten thams cad de/ /'gro ba sems kyi ngo bor shes na ni/ /rang gi lus ni bsam gyis mi khyab ston/ /zhes gsungs so/ /yang na ji ltar de bzhin gshegs pa gcig nyid kyi gdul bya yin par gsungs so zhe na/ de lta na yang de bzhin gshegs pa gcig nyid kyi gdul bya ni sangs rgyas thams cad kyi gdul bya yang yin pas de rnams kyang snga ma bzhin du de bzhin gshegs pa gzhan rnams kyi yang mdzad pa yin par 'dod de/ de nyid bsgrub par bya ba ma tshang ba'i dper 'gyur ro/ /gzhan yang gzhan dag kyang ji srid du srid pa sgom pa'i dam pa rnams ni snying brtse bas dbul bar gyur kyang ngo tsha shes pa dang khrel yod pa'i nor yongs su bskyang bar bya ba'i phyir dang / dam bcas pa'i don mthar phyin par bya ba'i phyir nus pa thams cad kyang zad/ des nges par rdzogs par byed pa dag snang na de bzhin gshegs pa rnams ni skye bo dam pa ma lus pa'i gtsug gi nor bur gyur cing / srid pa'i 'jigs pa rnams las yang dag par brgal ba/ ngo tsha shes pa dang bden pa dang snying brtse ba'i nor rnams mngon du bdag gir mdzad pa ye shes kyi nus pa thogs pa med pa rnams kyis rdzogs par mi mdzad ces bya ba la sems dang ldan pa gang zhig dad par 'gyur/ dam bcas pa yang sems can thams cad kyi sdug bsngal thams cad las shin tu nges par grol ba'i phyir mdzad de/ de yang bcom ldan 'das kyis sngon gyi smon lam btab pa/ /bsod nams 'di yis thams cad gzigs pa nyid/ /thob nas nyes pa'i dgra rnams pham byas te/ /rga nad 'chi ba'i dba' klong 'khrugs pa yi/ /srid pa'i mtsho las 'gro ba gdon par bgyi/ /zhes bya ba'i sgra ni sems can nyung zad cig gzung bar rigs pa ma yin te/ sems can thams cad la dmigs pa'i thugs rje chen po med par ni ma gyur cig/ /de bas na ji snyed du sems can gcig yod pa de srid du ni thugs rje'i rang bzhin can rnams mya ngan las 'da' bar mdzad pa'i rigs pa ma yin no/ /de yang mtha' yas pa yin pas na sems can thams cad 'khor ba las nges par gdon mi srid do zhe na/ de nyid kyis na thugs rje'i rang bzhin can de'i dgos pa dang ldan pa rnams ni gnas skabs ni mtha' yas pa yin te/ gzhan du na dam bcas pa dang rjes su mthun par sgrub par mdzad par mi 'gyur la/ thugs rje chen po dang rjes su mthun par yang ma yin no/ /de yang thugs rje chen po 'di ni sems can thams cad kyi sdug bsngal las yongs su skyob par bzhed pa'i rnam pa can no/ /de ltar na 'di la legs par bsgoms pas ci'i phyir dus ma yin par 'chad par 'gyur bar 'dod de/ rgyun mi 'chad do/ /'on kyang dus de'i tshe 'byung ba'i sangs rgyas kyis 'dul ba rnams te/ rab bzang gi mthar thug pa de thams cad btul nas/ gang gzhan dag ni dus gzhan dag tu rgyud yongs su smin par 'gyur bar 'byung ba rnams la de'i don mdzad pa'i phyir de bzhin gshegs pa gzhan rnams rim gyis 'byung bar 'gyur la/ de nas de rnams la phan par rdzogs par bya ba'i byang chub sems dpa' gzhan dag dbang bskur nas yongs su mya ngan las 'da' ba yin gyi/ gzhan du na bar du gzhan gyi don la 'jug pa rnams don med pa'i gnas skabs su 'gyur ro zhes bya ba de ni mi rigs te/ sangs rgyas kyis 'dul ba'i sems can rnams med par ni grub pa'i phyir dang / 'jig rten gyi khams thams cad na cha lugs gzhan dag gis 'dul ba dag kyang srid de/ sngar ji skad bshad pa bzhin no/ /don med par bzhugs pa'ang ma yin te/ de'i don mdzad pa'i ched du bzhugs pa'i phyir ro zhes bshad do/ /de yang ji ltar shAkya'i rgyal pos kyang rab bzang la bzhes par mdzad pa'i phyir skad cig ji snyed du bzhugs te/ dus de ni shin tu chung ba yin no zhes kyang yang dag par mi brtag ste/ gang rang nyid kyi thugs la mngon par 'dod pa'i don brnyes pa de dag ni dus ring ba dang / thung bar brtsi bar mi mdzad do/ /der gzhan dag bla na med pa'i nus pa dang ldan pa 'byung bar 'gyur ro snyam du yang mi dgongs te/ de lta na ni byang chub tu sems bskyed pa la 'bad pa med pa kho nar 'gyur te/ 'jig rten mang po gdon pa'i bsam pa can bya ba gzigs pa de dag gis byas zin na 'dir bdag gis ci zhig bya snyam du dgongs par 'gyur ro/ /thugs rje chen po dang ldan pas de ltar brtsi bar mi mdzad par 'jug go zhe na/ lhag par gnas par mdzad pa la/ ci phyir brtsi ba la brtson par mi mdzad/ gnas skabs der brtsi bar mi mdzad par rigs pa yin no/ /'jug pa'i rgyur thugs rje chen po mngon du mdzad pas de'i phyir ye shes thogs pa med pa dang ldan yang lhan cig tu yang 'byung bar 'gyur ro/ /bcom ldan 'das rnams ni sems can rnams kyi don la 'jug pa'i rgyu mnyam pas so so'i skye bo sa la gnas pa na yang rgyal po gdon pa'i phyir rdo 'degs pa dang mtshungs so zhe na/ de lta na yang thogs pa med pa'i ye shes dang ldan pa gcig gi ngo bo gyur pas rgyu dang 'bras bu rjes su mtshungs par 'gyur na/ gzhan dag kyang de dang mnyam par mi 'gyur bas de bzhin du khong du chud par bya ba ni rigs pa ma yin no/ /gcig med par gyur nas de las gzhan pa de dang mnyam pa'i rgyu las kyang mi 'byung ba ma yin no/ /'dir smras pa/ bskal ba mang po'i grangs snyed du/ /bsgom pa yongs su rdzogs pa yi/ /thugs rje chen por ldan pa gang / /gzhan gyi kha na las pas bzhugs/ /zhes bshad do/ /bcom ldan 'das yon tan gyi rang bzhin gyi sku dang ldan pa rnams shin tu rgyun mi 'chad pa'i mtshan nyid yongs su mya ngan las 'das par ma gyur pa de la skyabs su 'gro ba don du gnyer ba rnams kyang de ltar dang tha dad par mi rigs so/ /de yang bcom ldan 'das ni skyabs kyi don dang skyob pa'i don du bshad de/ gang sangs rgyas bcom ldan 'das la skyabs su 'gro ba de ni sangs rgyas su byed pa'i chos mi slob pa la skyabs su 'gro ste/ mar me'i rgyun lta bu'i sangs rgyas su byed pa'i mi slob pa'i chos kyi bdag nyid can gyi rgyal ba rnams shin tu yang so sor nub par gyur na de rnams kyi skyob par spyod pa'i nus pa ga las 'ongs/ nus pa mnga' ba las na mya ngan las mi 'da' bar thal bar 'gyur la/ nus pa'i mtshan nyid dang ldan pa'i dngos po rnams ni 'das pa'i dus na gnas kyang nus pa nyams pa med do zhe na/ 'das pa de'i gzugs yod pa de ltar yang yod par bshad pa mi rigs so/ /de bzhin du yang de nyid mi gnas pa'i mya ngan las 'das par grub cing nus pa'i gzugs nub par gyur na ni lhag ma lus pa ci zhig yod/ yang des bstan pa'i gsung rab rin po ches kyang skyob pa'i nus pa da dung yang yod par 'dod na ni de'i nus pa yang brjod par bya ste/ gal te de lta na ni de la skyabs su 'gro ba'i gtso bor mi 'gyur la/ de'i 'bras bu'i nus pa yang de'i ma yin te/ rang bzhin gyi dbye bas de dang da ltar gyi nus pa gcig tu 'pho ba ma yin te/ de ma bstan par de'i skyob pa'i don med do/ /lung 'dzin par byed pa gnas pa med pa yin te/ gang 'di rgyu med pa zhe 'gras pa bzhin du lung dang rigs pa gzhan dag dang ldan du zin kyang mngon par 'dod pa'i lung gi don las 'das shing brgal la/ de dag bcom ldan 'das 'pho bar ston pa'i phyir spros pa dang bcas shing gnas par 'gyur te/ de yang mngon par 'dod pa can gyi mya ngan las 'das pa ni chos yang dag par sdud pa las gsungs te/ rigs kyi bu byang chub sems dpa' chos kyi tshul la 'jug pa bcus de bzhin gshegs pa dgra bcom pa yang dag par rdzogs pa'i sangs rgyas kyi yongs su mya ngan las 'das pa chen po khong du chud par bya ste/ bcu gang zhe na 'di lta ste/ nyon mongs pa dang / shes bya'i sgrib pa thams cad spong ba'i mthar 'gro ba dang / gang zag dang chos kyi yul la bdag med par khong du chud pa dang / skye ba dang chos kyi gnas gyur pa rnyed pa dang / sems can thams cad la sangs rgyas kyi mdzad pa byed pa lhun gyis grub pa rgyun ma bcad pa'i ye shes thob pa dang / de bzhin gshegs pa thams cad kyi chos kyi sku dbyer med pa thob pa dang / 'khor ba dang mya ngan las 'das pa rnam pa gnyis su bsam pa dang bral ba dang / chos thams cad kyi rtsa ba yongs su dag pa dang / chos thams cad skye ba med cing 'gag pa med pa de'i dngos po bsgom pa dang / de bzhin nyid dang chos kyi dbyings dang yang dag pa'i mtha' mnyam pa'i ye shes thob pa dang / chos thams cad kyi rang bzhin dang mya ngan las 'das pa'i rang bzhin dang mnyam pa'i ye shes thob pa ste/ rigs kyi bu byang chub sems dpa' chos kyi tshul la 'jug pa bcu po de dag gis de bzhin gshegs pa rnams kyi yongs su mya ngan las 'das pa chen po khong du chud par bya'o/ /rigs kyi bu gzhan yang byang chub sems dpa' chos kyi tshul la 'jug pa bcus de bzhin gshegs pa rnams kyi yongs su mya ngan las 'das pa chen po khong du chud par bya ste/ bcu gang zhe na/ 'di lta ste/ nyon mongs pa thams cad kyi rtsa ba ni smon pa yin te/ smon pa las byung ba'o/ /de bzhin gshegs pa la ni smon pa med do/ de smon pa dang bral bas de bzhin gshegs pa yongs su mya ngan las 'das pa zhes bya'o/ /smon pa med pas de bzhin gshegs pas ni chos gang yang mi len to/ /mi len pas mi 'jug mi ldog ste/ len pa med pas de bzhin gshegs pa yongs su mya ngan las 'das pa zhes bya'o/ /gang 'jug pa dang ldog pa yang dag par chad pa de ni chos kyi sku ste/ mi skye mi 'gag go/ /skye ba dang 'gag pa dang bral bas de bzhin gshegs pa yongs su mya ngan las 'das pa zhes bya'o/ /gang skye ba med pa dang 'gag pa med pa de ni cir yang brjod par bya ba ma yin te/ brjod par bya ba med pas de bzhin gshegs pa yongs su mya ngan las 'das pa zhes bya'o/ /bdag dang sems can med de/ chos tsam 'di skye zhing 'gag pas chos kyi gnas gyur pa'i phyir de bzhin gshegs pa yongs su mya ngan las 'das pa zhes bya'o/ /nyon mongs pa dang nye ba'i nyon mongs pa thams cad ni glo bur ba yin te/ chos kyi dbyings ni 'ong ba med cing 'gro ba med pas de glo bur ba yang ma yin/ gnas pa yang ma yin te/ chos kyi dbyings mnyam pa'i phyir de bzhin gshegs pa yongs su mya ngan las 'das pa zhes bya'o/ /de bzhin nyid ni bden pa ste/ de bzhin nyid ma gtogs pa'i chos gzhan rnams ni brdzun pa'o/ /bden pa'i ngo bo nyid ni de bzhin nyid de de bzhin nyid kyi ngo bo nyid ni de bzhin gshegs pa yongs su mya ngan las 'das pa zhes bya'o/ /yang dag pa'i mtha' ni spros pa med pa/ chos gzhan ni spros pa'i ngo bo nyid de/ yang dag pa'i mtha' mnyam pa'i phyir te/ de bzhin gshegs pa yongs su mya ngan las 'das pa zhes bya'o/ /skye ba med pa ni bden te/ skye ba la sogs pa'i chos gzhan rnams ni mi bden pa log pa/ brdzun pa bslu ba'i chos can no/ de bzhin gshegs pa ni brdzun pa bslu ba'i chos can ma yin te/ bden pa'i ngo bo nyid ni de bzhin gshegs pa yongs su mya ngan las 'das pa zhes bya'o/ /yang dag pa ma yin pa ni mngon par 'du byed de/ yang dag pa la ni mngon par 'du bya ba med do/ /yang dag pa ni de bzhin gshegs pa'i chos kyi sku ste/ 'dus ma byas pa ni yongs su mya ngan las 'das pa zhes bya ste/ rigs kyi bu byang chub sems dpa' chos kyi tshul la 'jug pa bcu po de dag gis de bzhin gshegs pa rnams kyi yongs su mya ngan las 'da' ba chen po khong du chud par bya'o/ /rigs kyi bu gzhan yang byang chub sems dpas chos kyi tshul la 'jug pa bcus de bzhin gshegs pa rnams kyi yongs su mya ngan las 'das pa chen po khong du chud par bya ste/ bcu gang zhe na/ 'di lta ste/ sbyin pa dang sbyin pa'i 'bras bu bdag med cing bdag gi ba med pa dang / sbyin pa dang sbyin pa'i 'bras bu yongs su shes pas rnam par rtog pa gnas gyur pa phyin ci ma log pa ni de bzhin gshegs pa yongs su mya ngan las 'das pa zhes bya'o/ /tshul khrims dang tshul khrims kyi 'bras bu bdag med cing bdag gi ba med pa dang / tshul khrims dang tshul khrims kyi 'bras bu yongs su shes pas rnam par rtog pa gnas gyur pa phyin ci ma log pa ni de bzhin gshegs pa yongs su mya ngan las 'das pa zhes bya'o/ /bzod pa dang bzod pa'i 'bras bu bdag med cing bdag gi ba med pa dang / bzod pa dang bzod pa'i 'bras bu yongs su shes pas rnam par rtog pa gnas gyur pa phyin ci ma log pa ni de bzhin gshegs pa yongs su mya ngan las 'das pa zhes bya'o/ /brtson 'grus dang brtson 'grus kyi 'bras bu bdag med cing bdag gi ba med pa dang / brtson 'grus dang brtson 'grus kyi 'bras bu yongs su shes pas rnam par rtog pa gnas gyur pa phyin ci ma log pa ni de bzhin gshegs pa yongs su mya ngan las 'das pa zhes bya'o/ /bsam gtan dang bsam gtan gyi 'bras bu bdag med cing bdag gi ba med pa dang / bsam gtan dang bsam gtan gyi 'bras bu yongs su shes pa rnam par rtog pa gnas gyur pa phyin ci ma log pa ni de bzhin gshegs pa yongs su mya ngan las 'das pa zhes bya'o/ /shes rab dang shes rab kyi 'bras bu bdag med cing bdag gi ba med pa dang / shes rab dang shes rab kyi 'bras bu yongs su shes pas rnam par rtog pa gnas gyur pa phyin ci ma log pa ni de bzhin gshegs pa yongs su mya ngan las 'das pa zhes bya'o/ /sems can thams cad sems can ma yin pa dang / chos thams cad bdag med pa dang / sems can du 'du shes pa'i phyin ci log ni bral zhing chos yongs su 'du shes pa'i phyin ci log pa dang bral ba de bzhin gshegs pa yongs su mya ngan las 'das pa zhes bya'o/ /gang bdag la sdug par 'gyur ba de ni tshor bar 'gyur ro/ /tshor ba la brtson pa de ni nyon mongs so/ /bdag la sdug pa dang bral zhing tshor ba thams cad dang bral ba ni nyon mongs te/ nyon mongs pa med pa ni de bzhin gshegs pa yongs su mya ngan las 'das pa zhes bya'o/ /'dus byas ni tshad dang ldan pa yin te/ 'dus ma byas pa na tshad med pa'o/ /'dus byas dang 'dus ma byas kyi chos las rnam par grol zhing 'dus ma byas kyi chos nyid thob pa tshad med pa'i chos ni de bzhin gshegs pa yongs su mya ngan las 'das pa zhes bya'o/ /de bzhin gshegs pa ni gang stong pa nyid las rnam par grol ba'i chos sam/ sems can gang yang ma gzigs te/ stong pa nyid ni chos so/ /chos kyi sku ni de bzhin gshegs pa yongs su mya ngan las 'das pa zhes bya ste/ /rigs kyi bu byang chub sems dpa' chos kyi tshul la 'jug pa bcu po de dag gis de bzhin gshegs pa dgra bcom pa yang dag par rdzogs pa'i sangs rgyas rnams kyi yongs su mya ngan las 'das pa chen po khong du chud par bya'o zhes mngon par 'dod pa can gyi mya ngan las 'das pa bstan pa yin no/ /de bzhin du thogs med kyi zhal snga nas kyang / sgrib pa kun las nges grol phyir/ /mdzad pa rnams kyang ma rdzogs phyir/ /sangs rgyas gtan du mya ngan 'das/ /mya ngan 'das pa'ang min par 'dod/ /kun kyang 'dres pa'i phrin las can/ /rgya mtsho'i chu 'dra rgyal ba rnams/ /byas so byed do bya'o zhes/ /gzhan gyi don la dgongs pa med/ /sems can nyes pas mi snang ste/ /snod chags pa yi zla ba bzhin/ /'jig rten kun la nyi bzhin du/ /de dag chos 'od khyab par mdzad/ / la lar rdzogs pa'i byang chub ston/ /la lar me bzhin mya ngan 'da'/ /nam yang med pa ma yin te/ /de bzhin gshegs pa rtag pa'i sku/ /sangs rgyas 'phags min chos rnams dang / /mi dang ngan song ba rnams dang / /tshangs spyod ma yin chos rnams la/ /bdag nyid dang ni bzhugs pa mchog / de dag kun tu rnam par dpyod/ /gang du'ang rnam par dpyod mi mnga'/ /gnas rnams kun nas mthong mod kyi/ /dbang po drug gi spyod yul min/ /nyon mongs thul la spangs pa med/ /sngags kyis bsad pa'i dug dang 'dra/ /sangs rgyas spyod ni nyon mongs las/ /nyon mongs zad pa kun mkhyen brnyes/ /thab chen rnams dang ldan pa la/ /nyon mongs byang chub yan lag 'gyur/ /'khor ba zhi ba'i bdag nyid de/ /de phyir de bzhin gshegs bsam yas/ /khams gcig na ni gnyis med phyir/ /bdag med lhan cig tshogs bsags phyir/ /rim gyis 'byung bar mi rigs phyir/ /sangs rgyas mang po rab tu grags/ /zhes bshad pa'i phyir de ltar shin tu spros pas chog gis/ da ni dkyus ma nyid la 'jug par bya ste/ /mi gnas pa'i mya ngan las 'das par gyur pas phyogs bcu'i 'jig rten gyi khams rnams su/ skal ba dang ldan pa'i sems can rnams rjes su mthun pa'i chos ston pa'i sgras mngon par dga' bar mdzad pas na/ phyogs bcu'i chos kyi rnga bo che/ /zhes bya'o/ /gzugs med gzugs bzang dam pa ste/ /sna tshogs gzugs can yid las skyes/ /zhes bya ba la sogs pa la/ chos kyi sku'i ngo bo nyid du gyur pas na gzugs med do/ /mtshan thams cad yongs su rdzogs pa'i longs spyod rdzogs pa'i sku'i ngo bo nyid du gyur pas na gzugs bzang dam pa ste'o/ /sprul pa'i sku gdul bya rnams dang rjes su mthun par sna tshogs pa'i gzugs kyi sku yang dag par ston par mdzad pas na sna tshogs gzugs can no/ /yid la skyes pa ni phyi rol gyi don gyis stong zhing yid tsam las nges par 'byung ngo / /gzugs thams cad snang ba la dbang bsgyur bas na/ gzugs rnams thams cad snang ba'i dpal lo/ /'jig rten gyi khams ma lus pa rnams su cig car 'dul ba'i skye bo dri ma med pa'i chu lta bu'i rgyud la gzugs brnyan 'char ba so sor snang bar mdzad pas na/ gzugs brnyan ma lus 'chang ba bo'o/ /thams cad du thogs pa med pa'i nus pas mi g.yo ba ni tshugs pa med pa'o/ /khams gsum ma lus pa'i bdag po nyid du byed pa'i dbang phyug chen po la sogs pa rnams kyi yang de nyid gcig pu dbang phyug chen po yin zhing / zil gyis mi gnon pa'i sku mnga' bas na/ che bar grags/ khams gsum dbang phyug chen po ste/ /zhes bya'o/ /'dir 'phags pa'i lam yan lag brgyad pa ni 'phags pa'i lam mo/ /'phags pa'i lam yan lag brgyad pa la bzhugs pas na 'phags pa'i lam la gnas pa'o/ /shin tu mtho ba yang yin la 'phags pa'i lam la gnas pa yang yin pas na/ 'phags lam shin tu mtho la gnas/ /zhes bya'o/ /de gang zhe na/ dar pa chen po chos kyi tog /ces bya ste/ chos kyi mtshan ma chen po 'byung bar ston pa'o/ /'di skad ston par 'gyur te/ chos thams cad kyi mtshan mar gyur pa yang dag pa'i ye shes bsgreng zhing bslar ba de bzhin nyid kyi lam la bzhugs pa dang / 'byung ba chen po'i chos rgyur gyur pa rje btsun 'jam dpal nyid la de skad ces bshad de de la ma gtogs pa'i chos rnams kyi rgyu med pa'i phyir ro/ /khams gsum ni 'jig rten gsum mo/ /der gzhon nu'i lus can gcig bu'i sku dang ldan pa gang yin pa de ni/ 'jig rten gsum na gzhon lus gcig go/ /dge 'dun gyi gnas brtan nyid kyi thams cad mchog tu gyur cing mchod par 'os pas na gnas brtan no/ /thams cad mkhyen pa'i ye shes kyis bgres pas na rgan po'o/ /tshangs pa la sogs pa'i gzugs so sor snang ba bskyed par mdzad pa na skye dgu ma lus par skyed bas na skye dgu'i bdag go/ /sum cu rtsa gnyis mtshan 'chang ba/ /zhes bya ba la skyes bu chen po'i mtshan sum cu rtsa gnyis gang zhe na/ phyag dang zhabs 'khor lo'i mtshan dang ldan pa dang / zhabs shin tu gnas pa dang / phyag dang zhabs dra bas 'brel pa dang / phyag dang zhabs gzhon zhing 'jam pa dang / bdun shin tu mtho ba dang / sor mo ring ba dang / rting pa yangs pa dang / sku che zhing drang ba dang / zhabs legs par mtho ba dang / yan lag gi spu gyen du 'khyil ba dang / ri dgas en ya'i byin pa lta bu dang / phyag brla drang por slebs pa dang / gsang ba'i gnas sbubs su nub pa dang / gser gyi kha dog dang / mdog shin tu 'jam pa dang / spu re re nas g.yas phyogs su 'khyil ba dang / zhal mdzod sbus brgyan pa dang / ro stod seng ge lta bu dang / phrag pa'i lhun mdzes par grub pa dang / phrag so shin tu rgyas pa dang / ro bro ba'i mchog dang / shing n+ya gro d+ha ltar chu zhing gab pa dang / dbu spyi gtsug dang ldan pa dang / ljags shin tu yangs pa dang / tshangs pa'i dbyangs dang / seng ge'i 'gram pa lta bu dang / tshems shin tu dkar ba dang / tshems shin tu mnyam pa dang / tshems thags bzang ba dang / tshems mnyam shing bzhi bcu tshang ba dang / spyan dkar nag 'byes pa dang pa'i rdzi ma lta bu'o/ /de la bcom ldan 'das kyi phyag dang zhabs kyi mthil la 'khor lo rtsibs stong dang ldan pa mu khyud can lte ba dang bcas pa rnam pa thams cad yongs su rdzogs pa 'di lta ste/ rus pa'am ba so las gzugs su brkos pa dang 'dra ba mnga' bas phyag dang zhabs 'khor lo'i mtshan dang ldan pa'o/ /zhabs kyi mthil gnyis mnyam par sa la 'jog cing de yang mthon dman med pas zhabs shin tu gnas pa'o/ /ngang pa'i rgyal po ltar phyag dang zhabs kyi sor mo dra bar 'brel bas phyag dang zhabs dra bar 'brel ba'o/ /shing bal gyi sgo nga ltar shin tu 'jam zhing gzhon la mnyen pas phyag dang zhabs gzhon zhing 'jam pa'o/ /phyag gnyis dang / zhabs gnyis dang / dpung mgo gnyis dang / mgur gyi lhun shin tu mtho bas bdun shin tu mtho ba'o/ /phyag dang zhabs gnyis sor mo ring bas sor mo ring ba'o/ /rting pa ring bas rting pa yangs pa'o/ /sku lag pa mdun du 'phags pa la drang bas sku che zhing drang ba'o/ /pus mo'i lha nga dang long bu mdzes par nub pas zhabs legs par mtho ba'o/ /spu gyen du g.yas phyogs su 'khyil bas yan lag gi spu gyen du 'khyil ba'o/ /ri dgas en ya'i byin pa dang / smin ma dang / ldum bu dar pa ltar drang zhing ma nyams la rim gyis gzhol bar grub cing byin pa zlum pas ri dgas en ya'i byin pa lta bu'o/ /drang por bzhag ste ma btud kyang phyag gi mthil 'khyil gnyis kyi pus mo'i lha nga la reg pas phyag gis ma btud par pus mor slebs pa'o/ /glang po che dang / rta cang shes ltar gsang gnas shin tu mdzes par sbubs su nub pas gsang ba'i gnas sbubs su nub pa'o/ /shin tu sbyangs pa'i gser gyi kha dog lta bu dang ldan pas gser gyi kha dog go/ /gser dang dngul shin tu sbyangs pa ltar 'jam zhing snyoms pa'i mdog tu 'dug la skra la rdul gyis mi gos pas mdog shin tu 'jam pa'o/ /shin tu rnam par phye ba'i spu re rer skyes shing gnyis su med pas spu re re nas g.yas phyogs su 'khyil ba'o/ /me tog kun+da dang zla ba dang 'o ma dang ba mo'i mdog ltar 'dug la/ nyi ma dang zla ba brgya las kyang 'phags shing 'od gsal ba'i mdzod spus smin mtshams shin tu brgyan pas zhal mdzod spus brgyan pa'o/ /ro stod che bas seng ge'i ro stod do/ /mgur dang rgyud legs par 'brel bar lhun zlum pas phrag pa'i lhun mdzes par grub pas so/ /gser gyi gtan pa shin tu phyis pa ltar phrag so legs par grub pas phrag so rgyas pa'o/ /rlung dang mkhris pa dang bad kan gyis ma nyams shing rnam par shes pa 'dra ba med pas ro bro ba'i mchog mnga' ba'o/ /sku che zhing mdun du mnyam pas shing n+ya gro d+ha ltar chu zheng gab pa'o/ /spyi gtsug zlum zhing legs la g.yas phyogs su 'khyil ba dang mnyam zhing legs par grub la mdzes pa mnga' bas dbu spyi gtsug dang ldan pa'o/ / me tog ut+pal dmar po'i 'dab ma dang kha dog ltar 'dug cing shin tu yangs pas ljags shin tu yangs shing srab pa'o/ /tshangs pa dang bya ka la bing+ka lta bu'i gsung mnga' bas tshangs pa'i dbyings so/ /'gram pa me long gi dkyil 'khor ltar legs par grub cing mdzes par skyes te yid du 'ong bas seng ge'i 'gram pa lta bu'o/ /me tog kun+da dang dung gi bcag 'phro ltar shin tu dkar ba'i tshems mnga' bas tshems dkar ba'o/ /tshems la mthon dman med pas tshems mnyam pa'o/ /tshems la mtshams ma dod pas tshems thags bzang ba'o/ /bla 'og dgye dgu med pas tshems mnyam zhing bzhi bcu tshang ba'o/ /dkar nag gi cha ma 'dres la shin tu rnam par dag cing mdog dmar pos ma g.yogs pas spyan dkar nag 'byes pas so/ /bcom ldan 'das ni rdzi ma bla 'og tu shin tu legs par gnas la ma 'dzings pas/ ba'i rdzi ma lta bu ste/ de lta bu'i skyes bu chen po'i mtshan sum cu rtsa gnyis dang ldan pa'o/ /de la bla ma la bsu skyel dang chos mnyan pa la sdod pa dang / gtsug lag khang dang mchod rten la sogs pa la bsti stang byas pas phyag dang zhabs 'khor lo'i mtshan dang ldan pa ste/ de ni 'khor shin tu mang ba'i snga ltas so/ /yi dam la brtan pas shin tu gnas pa ste/ de ni mi g.yo zhing shin tu brtan pa'i snga ltas so/ /sbyin pa dang / ngag snyan pa dang / don spyod pa dang / don mthun pa'i bsdu ba'i dngos po rnam pa bzhi goms par byas pas phyag dang zhabs dra bas 'brel pa ste/ de ni myur du 'du ba'i snga ltas so/ /bza' ba dang / bca' ba dang btung ba zhim zhing nyams su bde ba byin pas phyag dang zhabs gzhon zhing 'jam pa dang / bdun shin tu mtho ba ste/ de gnyis bza' ba dang bca' ba dang btung ba zhim zhing nyams su bde ba thob pa'i snga ltas so/ /bcings pa dgrol ba dang srog gi rim gro byas pa dang / srog gcod pa spangs pas sor mo ring ba dang / rting pa yangs pa dang / sku tshe zhing drang ba ste/ de ni sku tshe ring ba'i snga ltas so/ /dge ba'i chos yang dag par blangs pa dang bzung ba mngon par spel zhing 'grim par ma byas pas zhabs kyi gong mtho ba dang / yan lag gi spu gyen du 'khyil ba ste/ de ni mi nyams pa'i chos dang ldan pa'i snga ltas so/ / rig pa dang bzo'i las la rim gror byas shing gzhan la byin pa dang bdag gis blangs pas ri dgas en ya'i byin pa lta bu ste/ de ni myur du 'dzin pa'i snga ltas so/ /bdog cing yod pa'i nor ya bslangs na mi 'gong par gtong zhing med ces ma byas pas phyag gis ma btud par pus mo slebs pa ste/ de ni yo byad la mnga' ba dang dul ba'i snga ltas so/ /'grogs pa dang mdza' bshes dang gnyen ma phye ba dang / bye bar gyur pa'i sems can rnams tshangs pa'i spyod pa la yang dag par bskul ba dang / gsang ba'i tshig yongs su bsrung bas gsang ba'i gnas sbubs su nub pa ste/ de ni bu mang ba'i snga ltas so/ /stan dang gos dang khang pa dang gzhan gzhal med khang dang gnas bzang po byin pas gser gyi kha dog dang mdog shin tu 'jam pa ste/ de gnyis ni gdan dang na bza' dang khang pa dang gzhal med khang dang gnas bzang po thob pa'i snga ltas so/ /'du 'dzi spangs pa dang / mkhan po dang / slob dpon dang / pha ma dang phu nu la sogs pa bla ma rnams la tshul dang 'dra bar rim gro byas pa dang / btsun par byas pa dang / bcol ba rna la ma gzon pas spu re re nas g.yas phyogs su 'khyil ba dang / zhal mdzod spus brgyan pa ste de ni mnyam pa med pa'i snga ltas so/ /mi snyan pa mi zer zhing mi smod la/ snyan par smra zhing legs par bshad pa mthun par 'dzin pas ro stod seng ge lta bu dang / phrag pa'i lhun mdzes par grub pa ste/ de ni thub pa med pa'i snga ltas so/ /na ba rnams la rtsi sman dang nyams su phan pa'i zas byin pa dang / rim gro byas pas phrag so shin tu rgyas pa dang / ro bro ba'i mchog ste/ de ni nad nyung ba'i snga ltas so/ /skyed mos tshal dang 'khor dang btung ba dang / rdzing bu dang brgal dka' ba'i zam pa dang kha zas dang phreng ba'i gnas dang stegs dang gtsug lag khang bya ba la sogs pa gzhan mos par bya ba sngon du gtong zhing bdag gis gzhan la byin pas shing n+ya gro d+ha ltar chu zheng gab pa dang / dbu spyi gtsug dang ldan pa ste/ de ni mnga' ba chen po mnga' ba'i snga ltas so/ /yun ring por tshig snyan cing 'jam pa dang nyams su bde ba smras pas ljags shin tu yangs shing srab pa dang / tshangs pa'i dbyangs te/ de gnyis ni yan lag lnga dang ldan pa'i gsung mnga' ba'i snga ltas so/ /gsung yan lag lnga dang ldan pa zhes bya ba ni yongs su shes shing rnam par shes par 'gyur ba dang / mnyan na dga' zhing mi mthun pa med pa dang / zab cing dbyangs rjes su 'byung ba dang / gtang mi bra zhing rnar snyan pa dang / ma dkrugs shing gsal ba'o/ /yun ring po nas tshig kyal pa spangs shing dus su smra bas seng ge'i 'gram pa lta bu ste/ de ni tshig kun gyis mnyan pa'i snga ltas so/ /rim gro bya ba dang / brnyes pa med pa gnyis kyis 'tsho ba yongs su dag pas tshems shin tu dkar ba dang / mnyam pa ste/ de ni 'khor snga nas bsags pa'i snga ltas so/ /yun ring po nas blta zhing phra ma med pa'i tshig smra bas tshems thags bzang ba dang / tshems mnyam zhing bzhi bcu tshang pa ste/ de ni 'khor dbyer mi byed pa'i snga ltas so/ /pang gis 'khyud pa bzhin du nyes pas bsam pa med la/ ma chags mi sdang ba dang / rmongs pa med pa'i mig gis blta bas spyan dkar nag 'byes pa dang / ba'i rdzi ma lta bu'o/ /de ni kun nas mdzes pa'i snga ltas so/ /rab 'byor de dag ni bcom ldan 'das kyi mtshan sum cu rtsa gnyis te/ stong gsum gyi stong chen po'i 'jig rten gyi khams su rang bzhin gyi 'od kyis snang bar mdzad la/ gal te bzhed na/ 'jig rten gyi khams dpag tu med pa'i 'og dang / steng dag tu snang bar mdzad kyang sems can rnams la rjes su thugs brtse ba'i phyir 'od 'dom gang bar byin gyis brlabs shing bzhugs te/ gal te bcom ldan 'das kyis 'od 'dom gang bar byin gyis brlabs su zin na rang bzhin gyi 'od kyi zil gyis mnan pas nyi ma dang zla ba'i 'od kyang shes par mi 'gyur zhing / zla ba dang zla ba phyed dang lo rnams kyang shes par mi 'gyur ro/ /rang bzhin gyis 'od 'phro ba'am/ dbyangs kyis stong gsum gyi stong chen po'i 'jig rten gyi khams khyab par mdzad cing de bzhin du gnyis dang gsum dang bzhi nas ji srid bzhed pa de srid kyi bar du 'od kyis snang bar mdzad cing gsung gis khyab par mdzad de/ de lta bu'i mtshan sum cu rtsa gnyis mnga' bas na/ sum cu rtsa gnyis mtshan 'chang ba/ /zhes bya'o/ /sdu gu 'jig rten gsum na mdzes/ /zhes bya ba ni dpe byad bzang po brgyad cus sku'i yan lag dang nying lag thams cad brgyan pas mdzes pa'i phyir 'jig rten gsum na sdug pa yin te/ de la dpe byad bzang po brgyad cu gang zhe na/ /'di lta ste/ bcom ldan 'das ni mngon par 'du bya ba thams cad las dben pa ste/ sen mo zangs kyi mdog ltar 'dug pa yin/ bshes gnyen byams pa dang 'dra bar sems can la phan pa dang / bde ba'i thugs mnga' ba ste/ sen mo'i mdog snum pa yin/ rigs dang rgyud mthon por byung ba ste/ sen mo mtho ba yin/ tshul kha na ma tho ba mi mnga' ba ste/ sor mo zlum pa yin/ dge ba'i rtsa ba shin tu stsogs pa ste/ sor mo rgyas pa yin/ dge ba'i rtsa ba rim gyis grub pa ste/ sor mo rim gyis gzhol ba yin/ thugs dang gsung dang sku'i phrin las dang 'tsho ba shin tu dben pa ste/ rtsa mi mngon pa yin/ nyon mongs pa'i mdud pa 'grol ba ste/ rtsa la mdud pa med pa yin/ shin tu dben pa'i chos mnga' ba ste/ long bu mi mngon pa yin/ mi mnyam pa thams cad las sgrol ba ste zhabs mnyam pa yin/ mi'i seng ge ste/ seng ge'i 'gros su bzhud pa yin/ mi'i glang po ste glang po'i 'gros su bzhud pa yin/ ngang pa'i rgyal po ltar nam mkha' la bzhud pa ste/ ngang pa'i stabs su bzhud pa yin/ mi'i khyu mchog ste khyu mchog gi stabs su bzhud pa yin/ mthun pa'i lam mnga' ba ste/ g.yas phyogs su bzhud pa yin/ blta na mdzes pa ste/ mdzes par bzhud pa yin/ rtag tu thugs yon po mi mnga' ba ste/ ma yo bar bzhud pa yin/ tshul rnam par dag pa'i yon tan ston pa ste/ sku shin tu legs pa yin/ sdig pa'i chos rnams shin tu sbyangs pa ste/ sku shin tu sbyangs pa yin/ sku chos rim gyis ston pa ste/ sku rim gyis gzhol ba yin/ sku dang gsung dang thugs gtsang ma dang ldan pa ste/ sku shin tu gtsang ba yin/ rang bzhin gyis thugs 'jam pa dang ldan pa ste/ sku shin tu 'jam pa yin/ rang bzhin gyis rnam par dag pa'i thugs mnga' ba ste/ sku shin tu rnam par dag pa yin/ chos 'dul ba shin tu rdzogs pa ste/ dpe byad shin tu rdzogs pa ste/ dpe byad shin tu rdzogs pa yin/ yon tan yangs shing bzang ba ston pa ste/ sku che zhing mdzes pa yin/ sems can thams cad la mnyam pa'i thugs mnga' ba ste/ sku legs par mnyam pa yin/ shin tu 'jam pa'i chos ston pa ste/ sku shin tu gzhon pa yin/ rtag tu zhum pa med pa'i thugs mnga' ba ste/ sku zhum pa med pa yin/ mi dge ba'i rtsa ba thams cad byang ba ste/ sku shin tu rgyas pa yin/ yang 'byung ba shin tu bcom zhing zad pa ste/ sku shin tu mkhregs pa yin/ rten cing 'brel par 'byung ba'i yan lag dang nying lag legs par ston pa ste/ yan lag dang nying lag spa bar mdzes pa yin/ gzigs pa shin tu dag pa ste/ snang ba rab rib med cing rnam par dag pa yin/ tshul dang ldan pa'i slob ma mnga' ba ste/ phyal zlum pa yin/ 'khor ba'i nyes pa thams cad shin tu sbyangs pa ste/ phyal shin tu byang ba dang ldan pa yin/ nga rgyal gyi mde'u bcom pa ste/ phyal ma zhom pa yin/ chos zad pa rnam par bzlog pa ste/ phyal phyam mer 'dug pa yin/ chos zab mo shin tu thugs su chud pa ste/ lte ba zab pa yin/ mthun par 'dzin pa'i slob ma mnga' ba ste/ lte ba g.yas phyogs su 'khyil ba yin/ slob ma kun nas mdzes pa'i dge 'dun mnga' ba ste/ kun nas mdzes pa yin/ thugs shin tu gtsang ba dang ldan pa ste/ kun du spyod pa shin tu gtsang ba yin/ chos nag po bstan pa dang bral ba'i chos 'dul ba mnga' ba ste/ sku la sme ba med pa yin/ shing bal ltar rab tu yang pa rab tu thob pa'i chos ston pa ste/ phyag shing bal ltar shin tu 'jam pa yin/ rang gi skye bo dang skye bo phal la byams pas dge sbyong chen po mnyes pa ste/ phyag gi ri mo snum pa yin/ shin tu zab cing brtan par bzhugs pa ste/ phyag gi ri mo zab pa yin/ bzod pa'i chos yang dag par ston pa ste/ phyag gi ri mo ring ba yin/ bslab pa'i gnas ha cang yang mi ring bar 'cha' ba ste/ zhal ha cang yang mi ring ba yin/ gzugs brnyan 'jig rten du bkye ba ste/ zhal la gzugs kyi gzugs brnyan snang ba yin/ 'jam pa sngon du btang zhing 'dul ba ste/ ljags mnyen pa yin/ yon tan 'thad pa mang ba ste/ ljags shin tu srab pa yin/ byis pa'i skye bo 'dod chags pa rnams kyis chos 'dul ba gting dpag dka' ba ste/ ljags shin tu dmar ba yin/ glang po'i sgra dang 'brug gi sgra lta bus bsnyems pa mi mnga' ba ste/ glang po'i nga ro dang 'brug gi dbyangs dang ldan pa yin/ snyan cing 'jam pa dang nyams su bde bar smra ba'i slob ma mnga' ba ste/ snyan cing 'jam pa dang nyams su bde ba'i gsung dang ldan pa yin/ srid par kun du sbyor ba las 'das pa ste/ tshems mche ba shin tu zlum pa yin/ skye bo rno ba rnams 'dul ba ste/ tshems mche ba rno ba dang ldan pa yin/ chos 'dul ba shin tu dkar ba ste/ tshems mche ba shin tu dkar ba yin/ sa'i phyogs mnyam pa la bzhugs pa ste/ mche ba mnyam pa dang ldan pa yin/ rim gyis mngon par rtogs pa'i chos ston pa ste/ tshems mche ba rim gyis gzhol ba yin/ shes rab kyi ri bo mthon po la bzhugs pa ste/ shangs legs par mtho ba dang ldan pa yin/ gdul ba'i skye bo gtsang ba mnga' ba ste/ shangs shin tu gtsang ba yin/ sangs rgyas kyi chos phul du yangs pa mnga' ba ste/ spyan ring ba dang ldan pa yin/ gzigs pa shin tu rnam par dag pa ste/ spyan rnam par dag pa yin/ sems can gyi tshogs shin tu drangs pa ste/ rdzi ma stug pa yin/ lha dang lha ma yin dang skyes bu dang na chung mchog mig dkar gnag 'byes shing pad+ma'i 'dab ma ltar 'dug pa rnams kyis mngon par dga' bar bya ba ste/ spyan dkar gnag 'byes shing pad+ma'i 'dab ma ltar 'dug pa yin/ rtag tu yangs pa gzigs pa ste/ smin ma ring ba dang ldan pa yin/ 'jam par 'dul ba la mkhas pa ste/ smin ma 'jam pa dang ldan pa yin/ skyon thams cad mkhyen pa ste/ smin ma'i spu mnyam pa dang ldan pa yin/ dge ba'i rtsa ba'i snum gyis sems can snum par gyur pa'i skye bo 'dul ba ste/ smin ma snum pa dang ldan pa yin/ chos mchog tu yangs shing don dang ldan pa mnga' ba ste/ snyan legs shing snyan shal ring ba yin/ nyon mongs pa'i rgyud las rnam par rgyal ba ste/ snyan mnyam pa yin/ sems can bsam pa ma nyams pa 'dul ba ste/ snyan gyi dbang po ma nyams pa dang ldan pa yin/ lta ba'i rnam pa thams cad yongs su byang ba ste/ zhal dpral ba legs par grub pa dang ldan pa yin/ phas kyi rgol ba shin tu 'dul ba ste/ zhal dang dpral ba yangs pa dang ldan pa yin/ smon lam dam pa shin tu rdzogs pa ste/ dbu shin tu rgyas pa dang ldan pa yin/ yul gyi bung ba rnam par zlog pa ste/ dbu bung ba ltar gnag pa dang ldan pa yin/ mthong ba dang bsgoms pas spang ba'i bag la nyal ba zad par byas pa ste/ dbu stug pa yin/ thugs 'jam pas bstan pa'i snying po thugs su chud pa ste/ dbu 'jam pa yin/ rtag tu ma 'khrugs pa'i thugs dang ldan pa ste/ dbu mi 'dzing pa yin/ brlang ba'i gsung dang yongs su bral ba ste/ dbu mi rtsub pa yin/ byang chub kyi yan lag spos kyi me tog gis skye bo mthun par bsgrubs pa ste/ dbu'i dri zhim pa yin/ bcom ldan 'das rnams ni phyag dang zhabs dpal be'u dang bkra shis dang dga' ba 'khyil pas brgyan pa yin te/ de ltar sku'i yan lag dang nying lag thams cad rdzogs par mdzes par gyur pas na/ sdu gu 'jig rten gsum na mdzes/ /zhes bya'o/ /'jig rten pa'i ye shes dang yon tan rnams kyi pha rol tu phyin pas/ 'jig rten shes legs slob dpon te/ /zhes bya'o/ /chos dang rjes su mthun pa'i 'jig rten pa'i tha snyad rnams la thams cad du log pa'i lam las bzlog cing / dam pa'i spyod pa rnams 'dzin du 'dzud par mdzad pas na/ 'jig rten slob dpon no/ /de lta na yang tha snyad kyi nyes pa'i dogs pa thams cad dang bral bas na/ 'jigs pa med pa ste bsnyengs pa dang bral ba'o/ /de ci'i phyir zhe na/ /de nyid gcig pu ni 'gro ba rnams kyi mgon po yin pa'i phyir ro/ /ngan 'gro ngan song gi 'jigs pa rnams las skyob pas na skyob pa'o/ /'jig rten yid gcugs pa zhes bya ba ni/ slu bar mi mdzad pa dang / nyes pa thams cad dang bral ba ni yid gcugs pa'o/ /de yang / lung ni yid ches tshig yin te/ nyes zad lung du shes par bya/ nyes pa zad par brdzun gyi tshig /smra bar mi 'gyur rgyu med phyir/ /zhes bshad pas so/ /'jig rten gsum po thams cad na de nyid yid gcugs pa yin gyi tshangs pa la sogs pa ni ma yin te/ log pa'i bdag nyid can la mngon par zhen pa yin pa'i phyir ro/ /don gyi gtso bo sangs rgyas nyid du 'gyur ba'i mi slu ba'i lam nye bar ston pas bden pa yin gyi/ cung zad tsam gyi bden pa ni so so'i skye bo rnams la yang yod mod kyi/ de tsam gyis ni yid gcugs pa ma yin/ sangs rgyas nyid du 'gyur ba las gzhan la ni don gyi gtso bo med do zhes rgya cher bshad zin pas yang ma smras so/ /de nyid kyis ni/ skyabs dang skyob pa bla na med/ /ces bya ste nyon mongs pa'i dgra bo thams cad kyis 'jigs shing skrag pa rnams kyi nyon mongs pa'i dgra bo zhi bar mdzad pa'i phyir dang / dge ba'i rtsa ba'i stobs gong nas gong du nye bar brtan par byed pa ni tshangs pa dang / brgya byin dang / dbang phyug la sogs pa dang / 'jig rten pa'i 'dod chags dang bral ba gzhan rnams la yod pa ma yin pas na/ bla na med pa'o/ /nam mkha'i khams khyab pa'i longs spyod yang dag par rdzogs pa'i byang chub kyi chos dang / zang zing dang mi 'jigs pa la sogs pa'i mtshan nyid can te/ de lta bu'i longs spyod gang zhig spyod pa de ni/ nam mkha'i mtha' las longs spyod pa/ /zhes bya'o/ /thams cad mkhyen pa ste/ sangs rgyas rnams kyi ye shes rnams ni thams cad mkhyen pa'i ye shes so/ /de ni 'jug par dka' ba nyid dang / sangs rgyas thams cad kyi yon tan rin po che thams cad kyi 'byung gnas su gyur pa dang / sems can thams cad kyi gnas su gyur pas na/ thams cad mkhyen pa'i ye shes mtsho/ /zhes bya'o/ /ji ltar sgo nga'i sbubs kyi nang na gnas pa rnams ni phyi rol na snang ba shin tu gsal bar gnas kyang gzugs rnams mi mthong ngo / /de bzhin du ma rig pa'i yan lag gi sbubs kyi rab rib kyi nang na gnas pa rnams la yang dag pa'i ye shes kyi snang ba bstan du zin kyang chos thams cad bdag med pa'i de kho na nyid mthong bar mi nus kyi/ ma rig pa'i sgo nga'i sbubs bcom pa rnams kyis ni mthong bar nus te/ de kho na nyid mthong ba'i rkyen gyis chos thams cad bdag med par thugs su chud pa'i rdo rjes bdag tu gti mug pa la sogs pa ma rig pa'i sgo nga'i sbubs kyi rab rib thams cad yang dag par bsal bas na/ ma rig sgo nga'i sbubs 'byed pa/ /zhes bya'o/ /'gro ba lnga'i 'khor ba ni srid pa ste/ sems can rnams 'dir yang dang yang du 'byung ba yin pas na srid pa'o/ /srid pa nyid 'ching ba'i gnas su gyur pas na dra ba'o/ /shes rab kyi ral gris phyin ci log ma lus pa'i 'ching ba rnam par 'joms pas na/ srid pa'i dra ba 'joms pa po/ /zhes bya'o/ /nyon mongs ma lus zhes bya ba ni las kyi kun nas nyon mongs pa dang skye ba'i kun nas nyon mongs pa dang / nyon mongs pa'i kun nas nyon mongs pa ste/ kun nas nyon mongs pa nye bar mtshon pa'i don gyis gzhan dag kyang gzung bar bya'o/ /yang na ma lus pa zhes smos pas nyon mongs pa dgu bcu rtsa brgyad yin par shes par bya ste/ nyon mongs ma lus zhi byed pa/ /zhes smos pa'i phyir te/ zhi bar byed pa ni bral ba'o/ /gang gi phyir nyon mongs pa'i nyes pa thams cad dang bral ba'o/ /rgyu de nyid kyis na/ /'khor ba'i rgya mtsho'i pha rol phyin/ /zhes bya ste/ nyes pa dang bral ba rnams ni 'khor bar 'khor ba mi srid pa'i phyir ro/ /'khor ba de nyid ni rgya mtsho ste/ blo byang bar ma byas pa rnams kyis rgya mtsho chen po ltar shin tu zab pa dang / rgal bar dka' ba'i phyir ro/ /de'i pha rol ni mya ngan las 'das pa ste/ rnam par rtog pa bsags pa dang bral ba tsam gyis rtogs pa'i tshul gyi 'gro bas na/ 'khor ba'i rgya mtsho'i pha rol phyin/ /zhes bya'o/ /rnam pa thams cad mkhyen pa'i ye shes ni ye shes so/ /ye shes kyi dbang bskur ba'i cod pan ni yang dag par rdzogs pa'i sangs rgyas lnga las bsgrubs pa'o/ /de nyid kyi phyir/ rdzogs pa'i sangs rgyas rgyan du thogs/ /zhes bya ste/ des dbang bskur bas na/ ye shes dbang bskur cod pan can/ /rdzogs pa'i sangs rgyas rgyan du thogs/ /zhes bshad do/ /yang na thams cad mkhyen pa'i ye shes ni cod pan gyi ngo bo nyid de/ gnyis su med pa'i ye shes las gzhan pa gser la sogs pa las brdungs pa'i cod pan ni ma yin no/ /de nyid kyis na/ rdzogs pa'i sangs rgyas rgyan du thogs/ /zhes bya ste/ yang dag par rdzogs pa'i sangs rgyas kyi rgyan mnga' bas na rdzogs pa'i sangs rgyas kyi rgyan dang ldan pa ste/ sangs rgyas rnams kyi rgyan ni rnam pa thams cad mkhyen pa'i ye shes so zhes bshad pa'i phyir ro/ /sdug bsngal gsum ni sdug bsngal gyi sdug bsngal te/ rims dang / phol mig dang / klad pa gzer ba la sogs pa ni/ sdug bsngal gyi rang gi ngo bo nyid yin pa'i phyir sdug bsngal gyi sdug bsngal lo/ /yongs su 'gyur pa'i sdug bsngal te/ dug gis sbags pa'i kha zas ngan pa cung zad mngar ba tsam la rjes su bsten pas yongs su gyur pa dang 'dra bar 'dod chags la sogs pa ni sdug bsngal gyi rgyur gyur pa'o/ /'du byed kyi sdug bsngal bsal te skye ba dang gnas pa mi rtag pa'i bdag nyid can du gyur pa yin la/ gang mi rtag pa de nyid ni sdug bsngal zhes bya ste/ de yang sdug bsngal gyi rgyur gyur pas sdug bsngal zhes bya'o/ /yang na nang gi bdag nyid can la sogs pa dang lha sdang ba la sogs pa las byung ba dang / 'byung ba las gyur pa dang / las la sogs pa'i dbye bas phye ba'i sdug bsngal rnam pa gsum ni sdug bsngal gsum mo/ /lus dang ngag dang yid kyi sdug bsngal ba'i dbye bas rgyu dang 'bras bur gyur pa'i sdug bsngal rnams zhi bar mdzad pas na/ sdug bsngal gsum gyi sdug bsngal zhi/ /zhes bya'o/ /sdug bsngal gsum gyi bdag nyid can gyi sdug bsngal de zhi bar byas kyang phyi'i don dang / nang la bdag tu mngon par zhen pa rnams la ni slar yang 'byung bar 'gyur bas de bsal bar bya ba'i phyir/ gsum sel zhes bya ba smos te/ sdug bsngal rnam pa gsum po de rnams sel ba ni mthar 'byung zhing slar mi skye ba'i chos can du gyur pas na gsum sel lo/ /bdag nyid kyang mi gnas pa'i mya ngan las 'das par gyur cing sems can mtha' yas pa'i don mdzad pas na mtha' yas so/ /nyan thos dang / rang sangs rgyas dang / yang dag par rdzogs pa'i sangs rgyas kyi rnam par grol ba'i dbye bas phye ba'i rnam par grol ba gsum po de dag la thams cad dug dul bya'i skye bo rnams kyi dbang du mdzad de bdag nyid de dang de'i gzugs su ston pas na grol gsum thob ces bshad do/ /don dam par ni gang nas kyang ma byon la gang du yang mi bzhud de/ chos kyi dbyings kyi ngo bo nyid yin pa'i phyir ro/ /nyon mongs pa'i sgrib pa dang / shes bya'i sgrib pa dang / las kyi sgrib pa dang bral bas na/ sgrib pa kun las nges par grol/ /zhes bya'o/ /sgrib pa thams cad dang bral ba nyid dang / sems can thams cad la go skabs 'byed par mdzad pas na/ mkha' ltar mnyam pa nyid la gnas/ /zhes bya'o/ /nyon mongs dri ma kun las 'das/ /zhes bya ba la nyon mongs pa'i dri ma thams cad spangs bar gyur pa'am/ gang nyon mongs pa'i dri ma thams cad las 'das par gyur pas na/ nyon mongs dri ma kun las 'das/ /zhes bya'o/ /'das pa dang / ma 'ongs pa dang / da ltar byung ba'i dus gsum du brtags pa'i nyon mongs pa'i dri ma rnams las 'das pa'i nam mkha' dang mnyam pa'i chos nyid kyi bdag nyid can yin pas na/ dus gsum dus med rtogs pa po/ /zhes bya'o/ /gdul dka' ba rnams gdul bar bya ba'i phyir yang dag par bsdams shing legs par 'dul ba dang / nyon mongs pa'i g.yul las rnam par rgyal ba la dpa' bas klu chen po ste/ spyod pa kun du bsdams pas klu zhes bya ba la sogs pa lung las gsung pa'i phyir ro/ /yang na klu chen po dang 'dra bas na klu chen po ste/ nyon mongs pa'i gdung ba thams cad zhi bar mdzad cing legs par gsungs pa'i chos kyi char 'bebs pa'i rgyur gyur pas na/ sems can kun gyi klu chen po/ /zhes bya/ /yon tan ni mchog tu gyur pas thod de/ she kha ra'i sgra mthon po'i tshig yin pa'i phyir ro/ /de rnams kyi rtse mo yin pas na/ thod can rnams kyi thod do/ /yang na yon tan nyid rtse mo yin te/ rab kyi mthar phyin pa'o/ /de rnams kyi rtse mo ni shin tu dri ma med pa'i yon tan gyi nor bu'i rtse mo yin pa'i phyir yang de skad ces bya'o/ /nyon mongs kun las rnam grol ba/ /zhes bya ba ni nyon mongs pa thams cad las nges par grol ba'o/ /des na nam mkha' ltar sgrib pa thams cad dang bral zhing rnam par mi rtog pa'i chos kyi dbyings sangs rgyas thams cad kyi chos nyid la legs par bzhugs shing mi g.yo pa'i ngo bo nyid kyis de'i ngo bo nyid du yang gyur pas na/ nam mkha'i lam la rab gnas pa/ /zhes bya ste/ dbye ba med pa la mngon par dga' ba'i sems can rnams kyi dbang du mdzad nas bstan pa yin no/ /gal te rnam par mi rtog pa'i chos kyi dbyings sgrib pa thams cad las nges par grol ba la de'i bdag nyid las mi g.yo ba'i ngo bo nyid du legs par bzhugs na ji ltar na sems can thams cad kyi bsam pa rnams yongs su rdzogs par spyod/ nyon mongs pa mi mnga' na ni skye ba la sogs pas 'dul bar yang srid la/ rnam par rtog pa mi mnga' na ni chos ston pa yang mi srid de/ de bas na mo gsham gyi bu dang 'dra par mtho ris dang / byang grol don du gnyer ba rnams la thabs med par 'gyur ro zhes blo gros ngan pa rnams kyi mi mthun pa'i rnam par rtog pa g.yo ba bsal bar bya ba'i phyir dpe'i tshul gyis nyon mongs pa thams cad dang bral zhing rnam par rtog pa mi mnga' ba rnams kyang sems can thams cad kyi don mdzad par spyod do zhes bstan pa'i phyir/ yid bzhin nor bu chen po 'chang / /khyab bdag rin chen kun gyi mchog /ces gsungs te thams cad du khyab bas che zhing chos kyi dbyings kyi ngo bo nyid dang / gnyis su med pa'i sems nyid ni yid bzhin gyi nor bu chen po'o/ /de nyid kyis ni sems can ma lus pa'i mngon par 'dod pa'i don rdzogs par byed pa'i phyir te/ phyi rol gyi yid bzhin gyi nor bu snang ba las mchog tu gyur pa mi srid de/ srid kyang thams cad mkhyen pa nyid la sogs pa ster bar mi nus mod kyi/ rnam par rtog pa med kyang yid la re ba'i gsol ba po rnams kyi dgos pa don ster bar nus te/ de tsam gyi phyi rol gyi nor bu rin po che yang dper byar rung ste/ de bas na 'di ltar/ khyab bdag rin chen kun gyi mchog /ces bya bas bye brag tu byas pa yin no/ /dpag bsam shing chen rgyas pa ste/ /bum pa bzang po che ba'i mchog / ces bya ba yang de bzhin no/ /dpe gcig gis kyang don rtogs par 'gyur na dpe gzhan gnyis pa la don ci zhig yod ce na/ don rtogs pa ni bdag bden mod kyi 'on kyang 'ga' zhig las la la zhig rab tu grags pa yod pas dpe gzhan dag bstan to/ /yang na nus pa mchog dang 'bring dang tha ma bstan par bya ba'i phyir dpe so sor bstan te/ de yang yid bzhin gyi nor bus ni rang gi phyogs nas brtsams te dpag tshad stong gi bar du gnas pa rnams kyi mngon par 'dod pa'i don rdzogs par bya ba la/ dpag bsam gyi shing yang rang gi grib ma'i nang du chud pa rnams kyi'o/ /bum pa bzang po yang der lag pa chud pa rnams 'dod pa rdzogs par byed la/ yang nyes pa thams cad dang bral ba'i rnam par mi rtog pa'i chos kyi dbyings kyi yid bzhin gyi nor bu 'di ni sems can thams cad kyi re ba rnams yongs su rdzogs par mdzad pa la tshad med pas dpag bsam shing chen no/ /thams cad du khyab pa'i grib ma dang ldan pas na rgyas pa ste/ gang gi phyir chos kyi dbyings la ma gtogs pa'i chos ni 'ga' yang med do zhes bya ba'i rigs pas so/ /nam mkha' dang mtshungs la dgab pa med cing thams cad pa'i kha dang ldan pas na/ bum pa bzang po che ba'i mchog /ces bya'o/ /de ltar rnam par rtog pa med kyang phyir sgrib pa med pa'i ngo bo nyid du gyur kyang sems can thams cad kyi don mdzad de/ de bas na/ byed pa sems can kun don byed/ /ces bya'o/ /rnam pa thams cad du gzhan gyi don rdzogs par mdzad par dgyes pas na phan 'dod ces bya'o/ /sems can thams cad la bu gcig pa ltar sdug cing gces pa'i thugs rje chen po'i rang bzhin dang ldan pas na sems can mnyes gshin pa'o/ /dge ba dang mi dge ba la sogs pa de dag nyid la dbang bsgyur bas so sor snang bas na bzang ngan shes zhes bshad do/ /gang rnam par rtog pa dang dpyod pa sngon du 'gro ba'i yid kyi rnam par shes pas dge ba dang mi dge ba'i shes pa nyid du rtog pa de rnams yongs su dga' bar bya ba'i phyir de bzhin du bshad de/ gzhan du na las dang po'i sems can rnams 'jug pa nyid du mi 'gyur te/ des na sems can thams cad sdud par byed pa'i chos ston pa por mi 'gyur ro/ /de yang mtho ris dang thar pa'i 'bras bu bzang po ster bar byed pa ni bzang po'o/ /chags shing zhe sdang la sogs pa las sems can dmyal ba dang / yi dags dang / dud 'gror 'gro bar 'gyur ba gang yin pa de ni ngan pa'o/ /de dag gi dbye ba yang dag par mkhyen pas na bzang ngan shes pa'o/ /bstan pa dang btang snyoms dang yongs su rgyal ba mngon sum du bya ba'i dus kyi rnam par dbye ba mkhyen pas na dus shes pa'o/ /grub pa'i mtha' thams cad dang bstan bcos thams cad mdzad cing rgyu dang 'bras bu thams cad du rtogs pas na khyab bdag go/ /dam tshig ni brda ste/ sems can thams cad kyi skad thams cad yongs su mkhyen pas na dam tshig shes so/ /grub pa'i mtha' thams cad grub pa'i dam tshig yongs su mkhyen pa 'di la mnga' bas na/ dam tshig ldan no/ /sems can yongs su smin pa'i dus las 'da' bar mi mdzad pas na dus shes pa'o/ /sems can thams cad kyi dad pa la sogs pa'i dbang po rab dang 'bring dang chung ngu'i dbye bas rnam pa dgur phye ba mkhyen pas na sems can dbang po shes zhes bya'o/ /nyan thos dang rang sangs rgyas dang / yang dag par rdzogs pa'i sangs rgyas rnams kyi rnam par grol ba rnams la nyon mongs pa dang bral ba rnams thams cad du yongs su mkhyen pas na/ rnam grol gsum la mkhas pa po/ /zhes bya'o/ /stobs bcu dang / mi 'jigs pa bzhi dang / sangs rgyas kyi chos ma 'dres pa rnams ni yon tan no/ /dri ma med par rnam pa thams cad yongs su rdzogs pa 'di la mnga' bas na yon tan ldan zhes bya ste/ yon tan rnams nges par 'byor ba'o/ /gzhan gyi rgyud kyis rtogs pa'i yon tan rnams kyang khyad du mkhyen pas na yon tan shes zhes bya'o/ /dge ba dang / mi dge ba dang / lung du ston pa dang / lung du mi ston pa dang / zag pa dang bcas pa dang / zag pa med pa dang / 'jig rten pa dang / 'jig rten las 'das pa dang / thun mong dang / thun mong ma yin pa la sogs pa'i chos thams cad sgyu ma dang 'dra ba la sogs pa'i tshul gyis ji lta ba bzhin du mkhyen pas na chos shes pa'o/ /rnam pa thams cad du yongs su dag pa'i bsod nams kyi rang bzhin yin pas na bkra shis so/ /bkra shis thams cad kyang 'di las 'byung bar 'gyur bas bkra shis 'byung ngo / /bkra shis thams cad kyi rgyur gyur pa dang 'bras bur gyur pa de nyid yin pas na bkra shis so/ /bkra shis thams cad kyi bdag nyid can yin pas na kun gyi bkra shis pa'o/ /grags pa rnams kyi rgyur gyur pa dang grags pa ngo bo nyid yin pas na grags pa'o/ /yang na bsod nams kyi mtho ba'i tshul gyis thams cad kyis bsgrags shing grags pas na grags pa'o/ /dpal gyi gnas su thams cad kyi shes pa dang / dpal gyi rgyur gyur pas na bkra shis so/ / dri ma thams cad dang bral ba'i dri ma med pa'i yon tan gyi rang bzhin gyi grags pa'i gzugs can nyid yin pa'i phyir dang gzhan rnams kyi yang grags pa'i rgyur gyur pas na snyan grags so/ /bsod nams dang ye shes kyi dge ba'i gzugs can yin pa'i phyir dang / sems can thams cad kyi dge ba'i rgyur gyur pas dge ba'o/ /'jigs shing skrag pa thams cad dang bral ba la ni dbugs 'byin pa thob pa zhes bshad la/ bcom ldan 'das kyang thams cad kyi dbugs 'byin pa'i gnas su gyur pa'i phyir dang / dbugs 'byin pa'i ngo bo nyid yin pa'i phyir dbugs 'byin chen po'o/ /dga' ston ni bu la sogs pa skyes pa'i don sbyin pa la sogs pa byed cing mchod sbyin dang sbyin gtong byed pa la dga' ba 'dus pa ni dga' ston zhes bya'o/ /bcom ldan 'das kyang srid gsum thams cad kyi dga' ston gyi ngo bo nyid du gyur pa'i phyir dang / dga' ston chen po'i rgyur gyur pa'i phyir dga' ston chen po'o/ /thams cad du rgyun mi 'chad pa'i bde ba chen po'i ngo bo nyid du gyur pa'i phyir sher dang / sems can thams cad kyi mchog tu dga' ba'i rgyur gyur pas na dga' chen no/ /sangs rgyas nyid du gyur pa la dga' zhing chags pa'am/ sems can thams cad kyi don mdzad pa'i chags pa chen po gang yin pa'am/ dga' ba thams cad kyi rgyur gyur pa rgyun du 'gro ba'i chos nyid la dga' ba'i ngo bo nyid yin pas na rol mo chen po ste zhes bya'o/ /bsnyen bkur sngon du 'gro ba'i mchod pa la sogs pa'i bye brag la ni bkur sti'i sgrar brjod do/ /'jig rten du bzang zhing mdzes par byas pas na rim gro ste/ dam pa yin zhing mdzes pa chos kyi sku dang longs spyod rdzogs pa'i sku rdzogs par byed pa gang yin pa de ni rim gro yin pa'am/ bkur sti thams cad kyi rgyur gyur pa'i phyir dang / mdzes shing dam pa'i bya ba mdzad pa ste/ sems can thams cad thams cad mkhyen pa'i ye shes la rab tu gzhan pa'i phyir smon lam btab pa dang / rjes su mthun par bdag dang gzhan gyi don rdzogs par mdzad pa gang yin pa de ni rim gro ste/ dam par mdzad pa'o/ /phun sum tshogs pa ni 'byor pa'i rgyur gyur pa bsod nams kyi tshogs kyi bdag nyid can du gyur pa'i phyir ram/ phun sum tshogs pa'i rgyur gyur pa'i phyir ro/ /ngan 'gro dang skye ba dang nyon mongs pa'i sdug bsngal bsal bas rab tu dga' ba la sogs pa'i sa rnams su 'jug pa'i dga' ba skyed pa dang / rang nyid kyang bde ba dang yid bde ba thams cad kyi bdag nyid can du gyur pas na mchog tu dga' ba'o/ /rnam pa thams cad du yongs su dag pa'i rang bzhin can gyi sku mnga' bas na grags bdag go/ /bsod nams dang ye shes kyi tshogs kyi bdag nyid can yin pa'i phyir dang / de'i rgyur gyur pa yin pa'i phyir dpal lo/ /mchog ni dam pa ste/ mchog tu 'os shing gang la ji ltar rigs pa'i mchog sangs rgyas nyid du 'os pa dang ldan pas na mchog ldan no/ /skal ba dang ldan pa'i sems can rnams la mchog tu gyur pa'i sangs rgyas nyid stsol bar mdzad par 'os pa yin pas na mchog sbyin no/ /'di nyid kyi 'brel pa ni mchog sbyin gtso ste zhes bya ba yin no/ /mngon par 'dod cing kha na ma tho ba med pa'i mchog rgya chen po rab tu stsol bas na mchog sbyin gtso bo'o/ /skyabs 'dod pa rnams dang / dpung gnyen 'dod pa rnams la thams cad kyi skyabs su gyur pa'i don gyis na skyabs kyi dam pa'o/ /gzhan yang skyabs kyi 'os su 'dod pa dbang phyug chen po la sogs pa'ang rje btsun 'jam dpal la skyabs su 'gro ba yin te/ de bas na de nyid ni skyabs kyi dam pa dang skyabs su 'os pa yin no/ /'khor ba'i 'jigs pa thams cad kyis skrag pa rnams kyi skyabs su 'os pa yin pa'i phyir dang / 'jigs pa dang bcas pa las 'das pa'i mya ngan las 'das pa la rab tu 'jog pas na skyabs su 'os pa'o/ /'khor ba'i rgyur gyur pa'i ma rig pa la sogs pa ni 'jigs pa'i rgyu yin pas 'jigs pa chen po'o/ /de rnams kyi sgra ni nyan thos dang rang sangs rgyas la sogs pa dag kyang yin mod kyi de rnams ni mchog ma yin te/ gang zag la bdag med par rtogs pas nyon mongs pa'i sgrib pa tsam spangs pa yin pa'i phyir ro/ /bdag dang bdag gir mngon par zhen pa'i rtsa ba nyon mongs pa dang / shes bya'i sgrib pa mi mnga' zhing bdag dang gzhan gyi rgyud la gnas pa'i 'jigs pa chen po rnams kyi dgra'i rab mchog tu gyur cing 'jigs par mdzad pas nye bar dmigs pa'i rtsa bar gyur pa'i 'jigs pa thams cad la nye bar dmigs pa thams cad drungs nas 'byin pas stong pa nyid kyi ting nge 'dzin gyi ngo bo nyid la ni/ 'jigs chen dgra ste rab kyi mchog /'jigs pa ma lus sel ba po/ /zhes bya'o// //de ni mu stegs rnams kyis yongs su brtags pa'i brtul zhugs kyis 'dul ba'i sems can rnams 'dul ba'i phyir dang brtul zhugs ston pa po'i mtshan la sogs pa'i don bstan par bya ba'i phyir/ gtsug phud phud pu zhes bya ba la sogs pa nas/ phra zhing zag med sa bon bral/ /zhes bya ba'i bar gyis tshigs su bcad pa lnga gsungs pa yin te/ de la skra dang kha spu bregs nas gtsug phud tsam 'jog cing 'di la gtsug phud tsam gyi mtshan ma yod pa'i phyir ro/ /gtsug phud can te/ dbyig pa gsum pa can gyi kun tu rgyu ba'i gzugs 'dzin pa'o zhes bya ba'i bar du'o/ /phud pu yod pa'i phyir phud pu can yin te/ mgo bo'i dbus kyi skra bregs nas dpral ba'i mtha' skra 'jog bas na/ phud bu can zhes bya'o zhes la la dag 'dod do/ /gzhan dag ni mngal nas skyes pa dang / skra dpral ba'i mtshams dang / mgo'i dbus dang / rgyab kyi phyogs cha ste gsum du phud bu gsum 'jog pas na phud bu can zhes bya'o zhes zer kha cig na re gtsug phud can zhes bya ba rma bya la zhon pas tsug phud can te/ gzhon nu gdong drug pa la bya'o zhes zer bas de'i gzugs dang cha lugs 'dzin par mdzad pas na gtsug phud can no/ /shing shun dang ral pa 'chang zhing lha chen po la dad pa'i drang srong gi gzugs 'dzin par mdzad pas na lcang lo can no/ /skra'i rtsa ba la sogs pa thams cad sboms pa'i ral pa bsdus pa yod pas na ral pa ste/ thams cad du yang gang dang gang gis 'dul ba'i sems can rnams 'dul bar bya ba'i phyir de dang de'i gzugs 'dzin par mdzad pa yin no zhes khong du chud par bya'o/ /ska rags 'ching ba yongs su ma btang bar tshangs par spyod pa bsrungs pas na mun dza'o/ /rgyan thams cad kyis brgyan pa'i cod pan dang rtse bran 'chang ba'i lha'i bu'i brtul zhugs 'dzin pa'i gzugs mdzad pas na cod pan thogs pa'o/ /gdong lnga zhes bya ba ni seng ge la bya bar bshad la/ de'i brtul zhugs 'dzin pa'i gzugs 'chang bar mdzad pas na gdong lnga pa'o/ /yang na lha chen po'i mtshon cha 'chang ba ni gdong lnga pa zhes bya ste/ de'i gzugs kyis 'dul ba'i sems can rnams 'dul bar bya ba'i phyir de'i gzugs 'dzin par mdzad pas na gdong lnga pa'o/ /don dam par gdong lnga ni sgo lnga ste/ stong pa nyid dang / mtshan ma med pa dang / smon pa med pa dang / mngon par 'dus ma byas pa dang / rang bzhin gyi 'od gsal ba'i ngo bo nyid gang yin pa de ni gdong lnga'o/ /phyogs bzhir gtsug phud bzhi dang / spyi bor gcig ste/ gtsug phud lnga pa'i gzhon nu'i brtul zhugs 'dzin cing byis pa'i rgyan gyis brgyan pa de'i gzugs 'dzin par mdzad pas na gtsug phud lnga'o/ /yang na dri za'i rgyal po gtsug phud lnga pas 'dul ba rnams de'i gzugs 'dzin par mdzad pas na gtsug phud lnga'o/ /don dam par gtsug phud lnga ni me long lta bu dang / mnyam pa nyid dang / so sor rtog pa dang / bya ba grub pa dang / chos kyi dbyings shin tu rnam par dag pa'i ye shes kyi ngo bo nyid de/ spyi gtsug bzhin du gnas pa gang yin pa de ni gtsug phud lnga dang ldan pa'o/ /zur phud lnga pa'i me tog gi thod kyi cod pan gang la yod pa de ni zur phud lnga pa'i me tog thod do/ /gtsug phud la sogs pa bor zhing nges par spangs te ngang pa mchog gi mya ngan las 'das pa'i dbang bskur ba ni mgo zlum yin pa'am/ 'di la mgo be+egs pa tsam gyis kun du rgyu ba'i rtags yod pas na mgo zlum mo/ /yul dang dus dang rigs nges pa'i brtul zhugs kyi nges pa dang ldan pa ste/ yul ni 'jug ngogs dag tu srog chags gsad par mi bya'o/ /zhes bya ba dang dus ni tshes brgyad dam bcu bzhi 'am bco lnga dag go/ /rigs ni ri dgas sam bram ze rnams mi bsad do zhes bya ba ste/ de lta bu la sogs pa'i mi dge ba bcu'i las kyi lam las bzlog pa phyogs chad pa med par yul thams cad dang / dus thams cad du srog chags thams cad gsod pa la sogs pa las ldog pa ni brtul zhugs chen po ste/ de 'dzin par mdzad pas na/ brtul zhugs chen po 'chang zhes bya'o/ /zhi ba'i grub pa'i mtha' las bshad pa'i brtul zhugs chen pos 'dul ba rnams dga' bar bya ba'i phyir de'i brtul zhugs 'dzin par mdzad pas na btul zhugs chen po 'chang ba'o/ /yang na sems can ma lus pa 'don par byed pa la thun mong ma yin pa'i thugs rje chen po'i brtul zhugs 'dzin par mdzad pas na brtul zhugs chen po 'chang ba'o/ /yang na rig byed re re zhing lo bcu gnyis tshangs par spyod pa spyad nas khyim la gnas par mi byed pa nyid du slong mo spyod pa dang / nags na gnas pas gang tshe zad par byed pa de ni brtul zhugs chen po'o/ /bud med bsten pa las ldog pas na tshangs par spyod pa'o/ /yang na tshangs pa ni mya ngan las 'das pa'o/ /de'i don du spyod pa ni tshangs par spyod pa ste/ de dang ldan pa gang yin pa de ni tshangs par spyod pa can no/ /brtul zhugs thams cad kyi mchog gi phul du byung ba ni brtul zhugs mchog go/ /glegs bam la la las ni/ tshangs par spyod pa brtul zhugs mchog /ces zer ba la de'i don ni 'di yin te/ brtul zhugs thams cad kyi rtsa ba ni tshangs par spyod pa yin la/ de bas na thams cad du gzhon nu'i tshangs par spyod pa'i brtul zhugs ma nyams pa dang ldan pas na/ tshangs par spyod pa'i brtul zhugs mchog/ ces bya ste/ /bcom ldan 'das rje btsun 'jam dpal lo/ /dka' thub thams cad las rnam pa thams cad du yongs su mthar phyin cing rdzogs par 'gyur la/ dka' thub de rnams kyi mthar phyin pa'i mtha' la dgyes pas na dka' thub mthar phyin no/ /rlung dang chu dang lo ma za ba dang / me lnga bsten pa la sogs pa'i dka' thub shin tu drag po'i khyad par ston par mdzad pas na dka' thub chen po'o/ /rig byed rtogs pa'i brtul zhugs de ni gtsang gnas zhes bya ba la/ brtul zhugs thams cad dang / rig byed thams cad kyi pha rol tu rab kyi mthar phyin pas mgon po 'jam dpal la yang gtsang gnas zhes bya ba'am/ des 'dul ba'i sems can rnams la dga' bar bya ba'i phyir de'i gzugs 'dzin par mdzad pas na gtsang gnas so/ /go ta ma'i rigs kyi rab mchog tu gyur pas na dam pa go ta ma ste/ thams cad kyi gtso bor gyur pa'o/ /yang na go ta ma zhes bya ba'i sgra ni stong pa nyid kyi ye shes la bya ste/ thams cad du song bas na thams cad khyab pa'i phyir ro/ /de'i rigs su gyur pas na go ta ma'o/ /de nyid kyis na dam pa ste/ thams cad kyi gtso bo yin pa'i phyir ro/ /dka' thub thos pa skye gnas te/ /de dag bram ze'i rgyu yin no/ /zhes bya bas yon tan gsum dang ldan pa ni bram ze yin par bshad la/ mgon po 'jam pa'i dbyangs kyang dus dpag tu med par dka' thub spyod par mdzad pa dang / mtha' yas pa'i thos pa dang ldan pa dang / zag pa med pa'i stong pa nyid kyi dgongs pa las nges par 'khrungs pa yin te/ yon tan de gsum dang ldan pas na bram ze chen po'i mchog yin no/ /yang na bram ze gang zhe na/ sdig pa'i chos rnams las phyi rol tu gyur pa'o zhes gsungs pas sdig pa'i chos thams cad dang bral ba'i phyir bram ze'o/ /tshangs pas 'dul ba'i sems can rnams gdul bar bya ba'i phyir tshangs pa'i gzugs kyis chos ston par mdzad pa'i phyir dang / mi gnas pa'i mya ngan las 'das pa'i ngo bo nyid du gyur pas na tshangs pa'o/ /tshangs pa shes zhes bya ba la/ de la yi ge a ni snyan tshig gi rig byed do/ /yi ge u ni mchod sbyin gyi rig byed do/ /yi ge ma ni srid srung gi rig byed do/ /de bzhin du yi ge a ni khyab 'jug ste/ yi ge rnams las yi ge a ni nga yin no zhes bshad pas so/ /srung bas na yi ge u ste/ lha chen po'o/ /mi rnams skyong bas na ma ste/ tshangs pa'o/ / de bzhin du yi ge a ni snying stobs so/ /yi ge u ni rdul lo/ /yi ge ma ni mun pa ste/ de dag ston par byed pa'i yi ge oM gyi sgra ni bram ze'o/ /de ji lta ba bzhin du rig pas na tshangs pa shes pa ste/ oM zhes bya ba tshangs pa mchog /'byung po kun gyi snying la gnas/ /yid kyi sgrol mar gyur pa yi/ /mi g.yo bar ni snang bar byed/ /glog dang shel ltar snang ba dang / /nyi ma 'char ka lta bur ni/ /gang gi snying la gnas mthong ba/ /tshangs pa mchog ni des mthong ngo / /gnas gsum dang ni tsam gsum dang / /yon tan gsum dang lha gsum du/ /gug skyed dang bral gug skyed bcas/ /gang gis de rigs tshangs pa shes/ /zhes bya ba ni nges brjod kyi rig byed bsdus pa'i rab tu byed pa'o/ /bdag tshangs pa yin par bstan pa'i phyir smras pa/ /dbang phyug gis ni lung bstan srog /'byung ba dbang po blo med par/ /gang gis rang bzhin nyid bzhin gsal/ /sgyu ma'i tshangs par 'gro 'di yin/ /rlabs drug mthar 'gro tshangs pa ste/ /ma yin ma yin gang smra ba/ /dga' ba rtag pa tsam zhig ste/ /gang zhig smra ba rgyu mchog yin/ /de las skye ba 'gro ba'i mdo/ /sngon gyi skye ba skye dgu'i bdag /tshangs pa dag tu gang bshad pa/ /ma lus 'byin par byed pa'i rgyu/ /sa ni rkang pa lha yul mgo/ /nyi ma zla ba mig yin zhing / /lto ba nam mkha'i khongs gang yin/ /de ni yongs su rgyu mchog skyes/ /mchod sbyin gyi rig byed bsdus pa'i rab tu byed pa'o/ /gang tshe na ni shes gyur pa/ /thub chen sangs rgyas grub par 'gyur/ /de tshe bzhi pa rnam shes pa/ /dbang phyug ces ni bya bar grags/ /bzhi pa las 'das dam pa'i bdag /skye dang 'jig pa spangs pa ste/ /bcings dang grol las nges 'das shing / /rtag par kun tu 'gro ba'i gtso/ /gnyid med rmi lam gnyid stug pa/ /bzhi pa mnyam par gnas par 'gyur/ /gang du bzhi pa thim 'gyur dang / /de ni rtag pa'i tshangs pa yin/ /snyan tshig gi rig byed bsdus pa'i rab tu byed pa'o/ /nam mkha' 'di ni mtha' yas te/ /de ni mi zad mi 'gyur bstan/ /sna tshogs skye gnas tshangs pa mchog /rtag tu 'byung po'i skyabs mchog yin/ /mi zad pa yi bdag mchog ni/ /gang gis bdag la gnas mthong ba/ /yon tan med kyang yon tan spyod/ /de dag 'jug ngogs rjes su 'brang / /de ni gzhan la bdag gzhan zhes/ /de ltar blo ngan rnams kyis mthong / /de ni gang yin bdag yin par/ /shes pa nges par grol bar 'gyur/ /bdag ni tshangs pa bdag tshangs par/ /gang zhig de nyid shes gyur pa/ /srin po'am byin za dag dang ni/ /las rnams kyi ni reg pa med/ /srid srung gi rig byed bsdus pa'i rab tu byed pa'o/ /ma lus rig byed mtha' yi cho gar ldan/ /gnyis med de nyid la la gang gis shes/ /nyon mongs rnam rtog ldan yang rab grol zhing / /grol ba'i thub par de nyid shes par bshad/ /rig byed du ma'i mtha' dpyad snying po ni/ /gcig dang du ma nyid du rnam rtog spang / /de nyid bdud rtsi bla ma'i lung gis thob/ /rtse gcig bsam pas rnam par bsgom par bya/ /bstan pa'i gzhung gzhan nges par brtag pa gzhan/ /rgyun mi 'chad par shes shing rnam dag gzhan/ /rnam rtog spyod yul thams cad spangs na ni/ /rgyun mi 'chad par sems gzhan bsgom par bya/ /zhes bya ba'i man ngag ston pa stsol bar mdzad pas na tshangs par shes pa'o/ /mya ngan las 'das pa'i tshangs pa ni spros pa thams cad dang so sor bral ba'i dam pa'i bdag nyid kyi gnas gang yin pa de thob par gyur pa ste/ mya ngan las 'das pa des 'dul ba rnams la de bstan par bya ba'i phyir te/ dam pa'i bdag nyid ni chos thams cad stong pa nyid der thim zhing de'i bdag nyid du gnas pa ni de thob pa yin pas thob par byed pa dang / thob par bya ba rjes su mi dmigs pa'i tshul gyis na/ /mya ngan 'das pa tshangs pa thob/ /ces bya'o/ /las dang skye ba dang sdug bsngal rnams las ldog pa ni grol ba'o/ /gti mug gi bdag nyid can gyi 'khor ba'i 'ching ba dang bral bas na thar pa'o/ /yang dag pa'i lta ba'i rig pa'i lam gyi ngo bo nyid du gyur pas na rnam grol lus so/ /nyon mongs pa rnam pa sna tshogs kyi rab tu byed pa ma skyes pas na rnam grol lo/ /chos thams cad mnyam pa nyid ni zhi ba'o/ /nyon mongs pa'i gdung ba'i nye bar 'tshe ba dang bral bas na zhi ba nyid dam rnam par rtog pa'i dba' rlabs thams cad zhi ba'i don gyis ni zhi bo nyid do/ /dge ba nyid kyis mya ngan las 'das pa bye brag pa rnams kyis brtags pa'i tshul ni mya ngan las 'das pa ste de thob pa'o/ /mar me shi ba dang mtshungs par nye bar 'tshe ba thams cad dang bral bas na zhi ba'o/ /de'i legs pa ni mya ngan las 'das pa yin la/ de thos par byed pa'i lam ni nges par 'byung ba ste/ mya ngan las 'das pa dang nye ba'o/ /de yang 'dis nges par 'byung bas na nges par 'byung ba ste/ de ltar nges par 'byung bar rnam par gzhag go/ /bde ba dang sdug bsngal dag zad pa ni thar pa yin no zhes gcer bu pa rnams 'dod la/ de skyed pa'i las zad pas na zad pa la ni mthar gyur pa zhes bya ste/ gang gi phyir bde ba dang sdug bsngal rnams mthar phyin par mdzad pa'i mthar byon pas so/ /yul thams cad la ji srid du rang bzhin gyis chags pa dang bral bas na chags bral lo/ /rdzas thams cad kyi rang bzhin yongs su gyur pa la mi dben pa'i 'ching pa rnams zad pa'i skyes bu 'ba' zhig yin pas na lus las 'das pa po ste/ /yongs su dag pa'i byang chub sems dpa'i ngo bo nyid kyi skyes bu zhes bya ba'i don to/ /gzhan rnams kyis brgal bar mi nus pas na thub pa med pa'o/ /gnyis pa med pas na dpe med pa'o/ /mngon par gsal ba'i gzugs la sogs pa mnga' bas na mi mngon pa'o/ /rnam pa thams cad bral ba ste mi snang ba'o/ /rnam pa gang gis kyang rtsir mi nus pas na gsal byed min no/ /cha thams cad las yang dag par 'das pas na mi 'gyur ro/ /lus med bzhin du brten pas nu kun 'gro'o/ /nus pa'i tshul gyis thams cad rdzogs par mdzad pas na khyab pa po'o/ /rnal 'byor pa ma yin pa rnams kyis shes par mi nus pas na phra ba'o/ /shin tu rnam par dag par gyur pas na zag med do/ /dngos po thams cad kyi rgya ma yin pas na sa bon bral lo/ /ci'i phyir de ltar gzhan gyi grub pa'i mtha'i grol ba la sogs pa'i gzugs su bcom ldan 'das rje btsun 'jam dpal gzhon nur gyur pa bshad ce na/ bcom ldan 'das nyid ni grol ba 'dod pa thams cad kyis bstan par bya ba yin gyi de las gzhan med do zhes bya ba bstan par bya ba'i phyir de ltar bshad do/ /yang na gdul bya de dang de la de dang de'i gzugs kyis 'dul ba la gzhol bar mdzad pas na de'i ming btags pa yin pa thams cad la yang nyes pa med do/ /chos kyi sku dang longs spyod rdzogs pa'i sku dang sprul pa'i sku'i yon tan bstan par bya ba'i phyir rdul med ces bya ba la sogs pa gsungs te/ phyi rol gyi yul rnams la zhen pa'i 'dod chags kyi rdul dang bral bas na rdul med pa'o/ /sems kyi rnam par rtog pa'i rdul sna tshogs pa dang bral bas na rdul bral lo/ /bag la nyal dang kun nas dkris pa sna tshogs pa dang bral bas na dri ma med pa'o/ /phyi dang nang gi rnam par rtog pa'i gnas ngan len gyi bag chags kyi nyes pa spangs pas na nyes pa spangs pa'o/ /nang du gyur pa'i bdag dang bdag gir 'dzin par zhen pa'i bag chags kyi mtshams sbyor ba dang bral bas na skyon med pa'o/ /yang na snga ma snga ma'i bshad par gyur pa ni phyi ma phyi ma'i rnam grangs nyid yin pa'am/ sgra 'di dag ni chos kyi sku ston par byed pa yin te/ tshig la la la tshig gzhan la la dag gis don rtogs par 'gyur bas rnam grangs su bstan pa nyid dgos pa yin no/ /yang na tshig lngas mngon par byang chub pa rnam pa lnga ston pa yin te/ oM tsit+ta pra ti bo d+h+yaM ka ro mi zhes bya ba ni gzung ba dang 'dzin par byed pa'i sems tsam so sor rtogs pas na rdul med do/ /oM bo d+hi tsit+taM ut+pA da yA mi zhes bya ba ni dri ma med pa'i 'od zer zla ba'i dkyil 'khor gyi gzugs rnam par snang ba bzhin du 'byung bas mdzes pa na rdul bral lo/ /oM tiSh+Tha badzra badzra At+ma kou0f85haM zhes zla ba'i dkyil 'khor gyi steng du rdo rje rtse lnga pa'i gzugs kyis mu stegs pa'i rnam pa sna tshogs pa'i dregs pa 'joms pas dri ma med pa'o/ /oM sa man+ta b+ha drou0f85haM zhes bya ba thams cad kyi mchog dang ldan pa'i kun du bzang po'i gzugs kyis mun nag thams cad rnam par bsal bas na nyes pa spangs pa'o/ /oM ya thA sarba ta thA ga ta ta thA a haM zhes bya ba de bzhin gshegs pa thams cad kyi bdag nyid dngos po dang mnyam pas 'khor ba thams cad pa'i nyes pa'i nad dang bral bas na skyon med pa'o/ / dang po bshad pa'i phyogs chos kyi sku ltar ma lus pa'i rab kyi mthar thug pa'i chos thams cad thugs su chud pa'i bdag nyid can yin pas na shin tu sad pa'o/ /gdul bya'i sems can sna tshogs pa'i sems kyi rgyud thugs su chud pas na sad pa'i bdag go/ /dge slong dag chos thams cad ces bya ba ni nye bar len pa'i phung po lnga'o zhes gsungs pa de mkhyen pa'i phyir kun shes pa'am nyan thos dang rang sangs rgyas rnams la de lta bu'i nan tan nyams su len pa bskyed par mdzad pas na kun shes pa ste/ de bzhin gshegs pa rnam pa thams cad mkhyen pa'i ye shes dang ldan pa'o/ /nyan thos dang rang sangs rgyas thams cad las mchog tu gyur cing de bzhin gshegs pa dang byang chub sems dpa' la sogs pa'i so sor snang ba'i spyod yul mnga' bas kun rig dam pa'o/ /gal te thams cad mkhyen na rig par bya ba dang / rig pa po yod na ji ltar rnam pa thams cad yongs su dag pa'i chos kyi sku yin zhe na/ rnam par shes pa'i chos nyid 'das/ /zhes bya ba gsungs te byed pa po dang / las dang bya ba la sogs par brtags pa'i chos dang chos can gyi dngos por gyur pa'i rnam par shes pa ni don dam par med pas rnam par shes pa'i chos nyid las 'das pa ste chos kyi sku'o/ /rnam par shes pa'i chos dang bral na ni rnam pa thams cad du bems por 'gyur ro zhes rtog pa bzlog par bya ba'i phyir/ ye shes gnyis med tshul 'chang ba/ /zhes bya ba gsungs te gnyis su med pa'i tshul de'i bdag nyid kyis yongs su 'chang ba'i ye shes yin gyi/ shes pa dang shes par byed pa po'i tshul can ni ma yin te/ de la rnam pa thams cad du mo gsham gyi bu bzhin du med do/ /shes pa dang shes par byed pa dang / khong du chud pa dang / khong du chud par byed pa'i rnam par rtog pa'i tshogs la spyod pa las gzhan pa gnyis su med pa'i ye shes kyi skus sems can thams cad kyi don gyi bya ba byed par ji ltar nus she na/ 'dir bshad par bya ste/ rnam par mi rtog pa'i chos kyi dbyings kyi ngo bo nyid gnyis su med pa'i ye shes kyi rang bzhin la sangs rgyas rnams dbang bskyur bas yid bzhin gyi nor bu 'dra bar sems can thams cad kyi mngon par 'dod pa'i don rdzogs par mdzad kyi rnam par rtog pa'i tshogs la spyod pa ni ma yin te/ de bas na/ rnam par rtog med lhun gyis grub/ /ces bya'o/ /dus gsum sangs rgyas las byed pa/ /zhes bya ba la ji ltar gcig pus dus gsum gyi sangs rgyas kyi bya ba mdzad par 'gyur zhe na/ de brjod par bya ste/ de bzhin gshegs pa rnams byung yang rung / de bzhin gshegs pa ma byung yang rung ste/ chos rnams kyi chos nyid 'di na gnas pa ste/ chos gnas pa nyid dang / chos mi 'gyur ba nyid dang / yang dag pa'i mtha' dang / stong pa nyid do zhes gsungs pas gcig pu nyid kyis kyang dus gsum gyi sangs rgyas kyi bya ba mdzad pa yin no/ / yang na/ tshogs dang chos kyi sku dag dang / /'gro ba'i don ni spyod pa yis/ /sangs rgyas thams cad mnyam pa ste/ /sku tshe rigs dang tshad kyis min/ /zhes 'byung ba'i phyir chos kyi sku la khyad par med pas gcig pu nyid kyis dus gsum gyi sangs rgyas kyi phrin las mdzad pa yin no/ /de dag nyid bstan pa ni/ sangs rgyas thog ma tha ma med/ /ces bya ste/ thog ma dang tha ma ni thog ma dang tha ma'o/ /gang la thog ma dang tha ma med pa de ni thog ma dang tha ma med pa ste/ chos kyi sku'o/ /de nyid ni don dam pa'i sangs rgyas ste/ gang dag nga la gzugs su mthong / /gang dag nga la sgrar shes pa/ /log pas spong bar zhugs pa ste/ /skye bo de dag nga mi mthong / /sangs rgyas rnams ni chos nyid ltar/ /'dren pa rnams ni chos kyi sku/ /zhes ji skad du gsungs pa lta bu'o/ /thog ma nyid chos kyi sku'i bdag nyid can yin pas na dang po'i sangs rgyas so/ /gang las kyang skye ba med pas na rgyu med pa ste/ rgyu ni rjes su 'gro ba'i rgyu dang / so sor 'brel pa dang / gcig nas gcig tu brgyud pa'o zhes bya ba'i bar du'o/ /ye shes nyid gcig pu gnyis su med pa ni mig dang 'dra bas na mig ste/ chos kyi sku gang yin pa de la/ /ye shes mig gcig dri ma med/ /ces bya'o/ /'dir chos thams cad rgyal zhing de'i bdag nyid du thim par 'gyur bas na ye shes lus can no/ /de bzhin nyid du gshegs pas na de bzhin gshegs pa'o/ /bcom ldan 'das chos kyi sku'i bdag nyid can du bshad zin to/ /mngon par byang chub pa rnam pa lngar bshad pa'i phyogs ltar na rab tu sad pa'i rnam par snang mdzad kyi tshul gyis na shin tu sad pa'o/ /mi bskyod pa'i ngo bo nyid kyis na sad pa'i bdag go/ /rin chen 'byung ldan gyi bdag nyid can yin pas na kun shes pa'o/ /snang ba mtha' yas kyi ngo bo nyid yin pas na kun rig go/ /don yod par grub pa'i ngo bo nyid kyis na dam pa'o/ /de ltar mngon par byang chub pa rnam pa lnga yongs su rdzogs pa'i de bzhin gshegs pa lnga'i bdag nyid can rnam par shes pa'i chos nyid las 'das pa'o/ /ye shes kyi rang bzhin can thabs dang shes rab gnyis su med par snyoms par zhugs pa'i tshul dang ldan pas na/ ye shes gnyis med tshul 'chang ba/ /rnam par rtog pa med cing lhun gyis grub par dus gsum gyi yang dag par rdzogs pa'i sangs rgyas 'phro ba'i bdag nyid can gyi phrin las mdzad pas na/ rnam par rtog med lhun gyis grub/ /dus gsum sangs rgyas las byed pa/ /zhes bya'o/ /thog mtha' med pa'i sems dpa' ni/ /rdo rje sems dpa' dga' ba che/ /zhes bshad pas na sangs rgyas ni rdo rje 'dzin pa byang chub kyi sems kyi ngo bo nyid du gyur pas na dang po'i sangs rgyas so/ /de nyid ni thams cad kyi rgyur gyur pas na rgyu'o/ /de'i rgyu ni gzhan med pas na rgyu med pa'o/ /ye shes kyi mig gcig ni spyan lnga'i bya ba rdzogs par byed pas na/ ye shes mig gcig dri ma med/ /ces bya'o/ /ye shes lus can de bzhin gshegs/ /zhes bya ba ni gdul bya'i dbang du gshegs pas na de bzhin gshegs pa zhes bya bar sbyar ro/ /longs spyod rdzogs pa'i sku'i ngo bo yin par bstan pa'i phyir/ tshig gi dbang phyug smra ba che/ /zhes bya ba la sogs pa gsungs te/ sa bcu'i dbang phyug gi byang chub sems dpa' rnams dang thun mong du gyur pa'i zab cing rgya che ba'i chos ston pa la mnga' brnyes pas na gsung la dbang sgyur ba'i phyir tshig gi dbang phyug go/ /rnam pa thams cad mkhyen pa'i ye shes ni chen po ste/ chos thams cad rnam pa thams cad thugs su chud pa'i ngo bo nyid yin pa'i phyir te/ /de gsungs pa'i ngang tshul can gang yin pa de ni smra ba che zhes bya ba'am smra ba'i yul chen po mnga' bas na smra ba chen po ste/ nyan thos dang rang sangs rgyas la sogs pa rnams las chen por gyur pa yin zhing lhag par gyur pas thams cad zil gyis gnon pa'i gsung dang ldan pas na smra ba chen po'o/ /nyan thos la sogs pa las gzhan pa'i mu stegs byed skyes bur smra bar 'dod pa rnams kyi gtso bor gyur pas na smra ba'i skyes mchog go/ /nyan thos dang rang sangs rgyas dang / byang chub sems dpa' dang / phur bu dang / drag po dang / dbang po dang / khyab 'jug dang / tshangs pa la sogs pa'i smra ba'i tshogs rnams zil gyis gnon pa'i gsung gis shin tu mdzes pas na smra ba'i rgyal lo/ /nyan thos dang rang sangs rgyas dang / rgyal ba'i sras dang / tshangs pa la sogs pa rnams kyi smra ba'i mchog yin zhing phyin ci ma log pa dang / mi slu ba'i rnam pa thams cad du tshad ma dang ldan pa'i don ston pas na smra ba'i dam pa'o/ /de nyid kyis na/ mchog gi gnas te/ khyad par du smra ba po thams cad kyi mchog tu gyur pa'o/ /bdud dang mu stegs la sogs pa thams cad kyis thub par mi nus pas na/ smra ba'i seng ge tshugs pa med/ /ces bya'o/ /gsung gi 'byor pas thams cad zil gyis gnon par spyod pa'i thun mong ma yin pa bstan nas/ sku'i bdag nyid che ba'i thun mong ma yin pa'i tshul bstan par bya ba'i phyir/ kun du blta ba mchog tu dga'/ / zhes bya ba la sogs pa gsungs te/ sgrib pa med pa'i ye shes kyis nam mkha'i mthas gtugs pa na spyod pa'i dngos po ma lus pa rnam pa thams cad du ma lus par gzigs pa'i ngang tshul mnga' bas na kun du blta ba'o/ /chos rnams kyi de kho na nyid thugs su chud pa'i rab tu dga' ba'i sku'i bde ba chen pos 'phags pa mchog tu dga' ba'o/ /'od zer 'phro ba'i phreng bas brgyan pa'i sku mnga' bas na gzi brjid phreng ba'o/ /gzi brjid kyi phreng bas bskor na yang zhi ba'i ngo bo nyid kyi sku dang ldan pas legs par snang ba'i phyir blta na sdug pa'o/ /mi shes pa'i mun nag sel bar byed pa'i ye shes dam pa'i 'od mchog mnga' bas na 'od bzang ngo / /ye shes kyi gzugs kyis shes bya rnams la khyab cing gsal bar mdzad pas na 'bar ba'o/ /dpal be'u'i dpe byad kyis brgyan pa'i dpal gyi tshogs dang ldan pas na dpal gyi be'u'o/ /rnam pa thams cad du mdangs dang ldan pas mdzes par gyur cing gsal bar snang ba rang gis rtogs pas nang gi de kho na nyid gsal bar byed pa'i snang ba gang la yod pa de ni/ /lag na 'od 'bar snang ba po/ /zhes bya ste/ 'khor thams cad zil gyis gnon pa'i gzi brjid can zhes bya ba'i don to/ /yang na 'od zer rnams kyis snang bar byas pa'i ngang tshul ni snang ba bo'o/ /ka ni bde ba/ ra ni ster ba ste/ de bas bde ba ster ba'i phyir lag na ka ra zhes bya'o/ /de ltar na bde ba ster ba yang yin la/ 'od 'bar snang ba bo yang yin pas na de skad ces bya'o/ /de lta bu'i ma rig pa sel bar byed pa'i bde ba ster bar byed pa'i snang ba'i ngo bo nyid ni rang nyid yin pas rje btsun 'jam dpal la/ bde sbyin 'od 'bar snang ba po/ /zhes bya'o/ /de rnams rnam pa thams cad kyi mchog dang ldan pa'i mtshan rnams dang ldan zhing / dpe byad rnams kyis brgyan pa'i longs spyod rdzogs pa'i sku'i ngo bo nyid kyis ni nyid kyi don yongs su rdzogs par bstan nas/ bcom ldan 'das rje btsun 'jam dpal gyis gzhan gyi don mdzad pa'i thabs kyi tshul nyid bstan par bya ba'i phyir/ /sman pa che mchog gtso bo ste/ /zhes bya ba la sogs pa gsungs te/ nad thams cad rnam par zlog par byed pa bdag med pa rnam pa gnyis ston par mdzad pa'i dam pa'i chos kyi sman stsol zhing nyon mongs pa'i nad rnams gso bar mdzad pas na sman pa che mchog go/ /bdag dang bdag gir mngon par zhen pa'i rtsa ba can gyi nyon mongs pa'i nad kyi gzhi'i khyad par ston par mdzad pas na gtso bo'o/ /thog ma med pa'i skye ba gcig nas gcig tu brgyud de/ zug pa'i zug rngu'i gzugs can 'dod chags la sogs pa'i zug rngu rtsa ba nas 'byin pas na/ zug rngu 'byin pa bla na med pa'o/ /sman rnams ma lus pa'i ngo bo nyid sangs rgyas kyi chos rnams sbyar zhing bsgrub pas nyon mongs pa'i nad ma lus pa zhi bar mdzad pas na/ sman rnams ma lus ljon pa'i shing / /zhes bya'o/ /nyon mongs pa rnams nyid gsod pa'i bdag nyid can yin pas na nad do cog go/ /de rnams kyi dgra ni dgra bo ltar rigs rgyud du bcas pa zad par mdzad pas na/ nad do cog gi dgra che ba'o/ /nyon mongs pa thams cad kyi dgrar gyur du zin kyang mi mthun pa'i gzugs ni nam yang mi mnga'o zhes bstan par bya ba'i phyir/ sdu gu 'jig rten gsum gyi mchog /dpal ldan rgyu skar dkyil 'khor can/ /zhes bya ba gsungs te/ thams cad kyis 'dod par bya ba yin pas na sdu gu'o/ /khams gsum gyi mchog tu gyur pas na/ 'jig rten gsum gyi mchog go/ /skar ma rnams kyi nang na/ zla ba'i dkyil 'khor dang 'dra bar lha la sogs pa rnams kyi nang na zla ba'i dkyil 'khor bzhin du yid 'phrog pa'i sku mnga' bas na/ dpal ldan rgyu skar dkyil 'khor can no/ /phyogs bcu'i nam mkha'i khams mthas gtugs pa rnams su chos kyi sbyin pa'i ba dan bsgrengs pas nye bar mtshon pa'i don chen po 'dzugs par mdzad pas na/ phyogs bcu'i nam mkha'i mthar thug par/ /chos kyi rgyal mtshan legs par 'dzugs/ /zhes bya'o/ /char bab pa dang tsha ba'i nye bar 'tshe ba zlog par byed pa'i phyir dang / yongs su dub pa'i nyon mongs pa zhi bar byed pa'i grib ma byed pa'i phyir/ gdugs dang 'dra bas na gdugs te/ 'gro ba thams cad khyab par byed pa'i grib ma byed cing sdug bsngal gyi char dang / nyon mongs pa'i gdung ba sel bas na 'gro na gdugs gcig go/ /'gro ba rnams khyab par byed pa'i gdugs gcig gi bdag nyid can yin zhing / byams pa dang snying rje dag gis kun nas 'khor ba'i tshul gyis 'gebs pas na/ 'gro na gdugs gcig yangs pa ste/ byams dang snying rje'i dkyil 'khor can/ /zhes bya'o/ /'dam na gnas kyang dri mas ma gos pa'i phyir pad+ma dang 'dra ste/ 'khor ba'i 'dam du gnas pa'i nyes pas ma gos par gdul bya ji ltar 'dul ba dang / rjes su mthun pa'i cha lugs dang / rgyan dang / sgeg pa la sogs pa'i gar stabs la dgyes shing / zhal dang / tshems dang / spyan dang / smin ma gnyer ba sna tshogs pa dang / phyag gi rtse mo dang zhabs rnam par rol pas sgeg pa'i thabs kyis gar mdzad par ston cing / /sems can ma lus pa 'dul bar mdzad pas na/ dpal ldan pad+ma gar gyi bdag /ces bya'o/ /'byor pa dang / 'od kyis snang bar bya ba'i phyir/ dga' ba rgyas par byed pas na rin po che ste/ dkon mchog gsum gyi rang bzhin can gyi gdugs gang yin pa de ni/ khyab bdag chen po rin chen gdugs/ /zhes bya ste/ thams cad kyi bdag po rin chen 'byung ldan gyi ngo bo nyid du gyur pa'i phyir ro/ /sangs rgyas kyang yin la kun kyang yin pas na/ sangs rgyas kun te mi bskyod pa la sogs pa'o/ /de rnams kyi dbus su rnam par snang mdzad chen po'i tshul gyis mdzes pas na/ sangs rgyas kun gyi rgyal po che/ /zhes bya'o/ /don yod par grub pa'i ngo bo nyid kyis sangs rgyas thams cad kyi bya ba rdzogs par mdzad pas na/ sangs rgyas kun gyi sku 'chang ba/ /zhes bya'o/ /rnal 'byor chen po skye gnas che/ /sangs rgyas kun gnas mi zad pa'o/ /zhes gsungs pa ste/ mi bskyod pa'i ngo bo nyid kyis bzhugs pa'i phyir/ sangs rgyas kun gyi rnal 'byor che/ /zhes bya'o/ /yang na dkyil 'khor pa'i lha thams cad kyi snyoms par 'jug pa'i sbyor ba ni/ /sangs rgyas kun gyi rnal 'byor che/ /zhes bya'o/ /rdo rje hUM mdzad la sogs pa khro bo'i gzugs kyi dbang phyug chen po la sogs pa ma rungs pa thams cad 'dul bar mdzad pas na bstan pa ste/ sangs rgyas thams cad kyi bstan pa gcig gi tshul gang yin pa de ni/ sangs rgyas kun gyi bstan pa gcig /ces bya'o/ /rdo rjes mtshan pa'i rin po che ni rdo rje rin chen no/ /des dbang bskur bas khams gsum gyi bdag por dbang bskur ba'i mtshan nyid can gyi dpal gang yin pa de ni/ rdo rje rin chen dbang bskur dpal/ /zhes bya'o/ /rin po che thams cad la dbang bskur bas/ rin po che'i rigs kyi dkyil 'khor de la de rnams kyi dbang phyug rin chen 'byung ldan gyi ngo bo nyid kyis bzhugs pas na/ rin chen kun bdag dbang phyug ste/ /zhes bya'o/ /'gro ba 'dul ba'i dkyil 'khor ba rnams ni/ 'jig rten dbang phyug kun te/ de rnams kyi bdag po 'od dpag tu med pa'i ngo bo nyid yin pas na bdag po'o/ /khams gsum rnam par rgyal ba'i dkyil 'khor pa rnams ni rdo rje 'chang ba kun no/ /de rnams kyi bdag po ni rdo rje 'chang chen po ste/ sangs rgyas hUM mdzad kyi ngo bo nyid du gyur pas na/ rdo rje 'chang ba kun gyi rje/ /zhes bya'o/ /sangs rgyas thams cad kyi gnyis su med pa'i ye shes dang / thugs rje chen po'i rang bzhin can rnam pa thams cad mkhyen pa'i thugs ni sangs rgyas kun gyi thugs chen po ste/ de'i ngo bo nyid yin pas na/ sangs rgyas kun gyi thugs che ba/ /zhes bya'o/ /de bzhin gshegs pa thams cad dang mnyam pa nyid kyi thugs la khyab pas na/ sangs rgyas kun gyi thugs la gnas/ /zhes bya'o/ /mtshan dang dpe byad thams cad kyis rjes su brgyan pa'i sangs rgyas thams cad sku'i gzugs su bdag nyid ston pas na/ sangs rgyas kun gyi sku che ba/ /zhes bya'o/ /de bzhin gshegs pa thams cad kyi gsung thams cad la 'jug pa'i rgyur gyur pas na/ sangs rgyas kun gyi gsung yang yin/ /zhes bya'o/ /rdo rje ye shes kyi nyi ma'i tshul gyis phyi dang nang gi mun pa dang / ma rig pa sel bar mdzad cing snang bar gyur pas na/ rdo rje nyi ma snang ba che/ /zhes bya'o/ /mi phyed pa'i ye shes kyi zla ba'i gzugs kyis nyon mongs pa'i gdung ba sel bar mdzad cing / dri ma med de/ bsil zhing yid sim par byed pa'i 'od zer rab tu gtong bar mdzad pas na/ rdo rje zla ba dri med 'od/ /ces bya'o/ /chags pa dang bral ba la sogs pa gdul bya'i sems can rnams 'dul bar bya ba'i phyir/ shin tu mngon par zhen par mdzad pas na/ /chags bral la sogs chags pa che/ /zhes bya'o/ /phyi rol gyi 'od de nyid kha dog sna tshogs par 'bar zhing / yid kyi las rnams mchog tu ston pa gang yin pa de ni/ kha dog sna tshogs 'bar ba'i 'od/ /ces bya'o/ /yang na stong pa nyid dang thugs rje chen po can gyi snying po dang ldan pa'i byang chub kyi sems de la de skad ces bya ste/ de nyid sangs rgyas kyi 'bras bu shin tu che ba nyid kyi rgyur gyur pas na sangs rgyas thams cad kyi thugs te/ de ltar byang chub kyi sems kyi ngo bo nyid yin pa'i phyir/ sangs rgyas kun gyi thugs che ba/ /zhes bya'o/ /de nyid dpag tu med pa'i yid kyi rang bzhin gyi rdo rje'i gzugs su gyur nas/ sangs rgyas thams cad kyi thugs kyi rdo rje'i ngo bo nyid du gyur pas na/ sangs rgyas kun gyi thugs la gnas/ /zhes bya'o/ /rdo rje yongs su gyur nas de bzhin gshegs pa thams cad kyi sku'i ngo bor gyur pas na/ sangs rgyas kun gyi sku che ba'o/ /ljags kyi pad+ma'i zla ba dang / rdo rje'i steng du dkar po dang / dkar po ma yin pa'i chos kyi phyag rgya'i gzugs kyi gsung gi 'khor lo rab tu bskor bas na/ sangs rgyas kun gyi gsung yang yin/ /zhes bya'o/ /shin tu yongs su rdzogs nas sangs rgyas thams cad kyi bdag nyid du rgyab tu 'od kyi dkyil 'khor gyi gzugs kyi dbyer med par/ thams cad la snang ba chen por mdzad pas na/ rdo rje nyi ma snang ba che ba'o/ /thugs kyi zla ba'i rdo rje'i lte ba'i dbus su gnyis su med par snyoms par 'jug pa la snyoms par zhugs pa'i bde ba chen po'i 'od zer dri ma med pa rab tu dgyes pa'i gzugs kyis gnas pas na/ rdo rje zla ba dri med 'od do/ /sangs rgyas thams cad kyi dbang phyug gi rang gi ngo bo 'ba' zhig gis bzhugs par ma zad kyi/ gzhan yang dkyil 'khor gyi lha thams cad kyis gzugs rnams kyis kyang / de nyid thabs sna tshogs la dgyes shing sna tshogs pa'i gzugs kyis bzhugs pas na/ chags bral la sogs chags pa che/ /zhes bya'o/ /kha dog sna tshogs pa'i lha rnams kyi sku mdog dang 'od kyi kha dog gi dbye bas gcig pu yang thams cad kyi bdag nyid can yin pa'i phyir/ kha dog sna tshogs 'bar ba'i 'od/ /ces bya'o/ /brla g.yas pa la rkang pa g.yon pa gzhag pa/ brla g.yon pa la rkang pa g.yas pa gzhag pa ni/ /rdo rje skyil mo krung yin te/ g.yon pa ni shes rab bo/ /g.yas pa ni thabs te/ de ltar thabs dang shes rab mi phyed pas/ / bdud thams cad 'jigs par byed pa'i bdag nyid can gyi/ skyil mo krung ni sangs rgyas thams cad kyi yin pas na/ rdo rje'i skyil krung rdzogs sangs rgyas/ /zhes bya ste/ de yang / rdo rje skyil krung bcas nas ni/ /bdud rnams thams cad rab tu 'joms/ /zhes gsungs pas so/ /sangs rgyas rnams ni 'gro ba ni/ 'dus nas chos kyi 'brel ba'i gtam mdzad pa'o/ /de yang thun mong ma yin pas sangs rgyas kho na la srid kyi gzhan la ma yin pas na/ sangs rgyas 'gro ba'i chos 'dzin pa'o/ /gang gi phyir/ bsod nams dang ye shes kyi tshogs rdzogs pas na/ dpal ldan no/ / gos pa med pa'i chos nyid du chos mthun pas na/ sangs rgyas nyid pad+ma ste/ de rnams las byung ba'i skye ba'i chos kyi skye gnas su gyur pa ste/ de bas na/ sangs rgyas pad+ma skyes zhes bya'o/ /kun mkhyen pa ste/ sangs rgyas thams cad kyi ye shes kyi mdzod 'dzin par mdzad cing / tshogs gnyis ma tshang ba med pas te/ 'dzin pa'i nus pa mnga' bas na/ dpal dang ldan zhing / kun mkhyen ye shes mdzod 'dzin pa/ /zhes bya'o/ /'gro ba rnam pa sna tshogs shing / tha dad pa'i 'gro ba rnams la sbrul ba'i sgyu 'phrul spro ba la bdag por gyur cing thams cad du sprul ba'i byed pa por gyur pas na/ rgyal po sgyu 'phrul sna tshogs 'chang / /zhes bya'o/ /sangs rgyas rnams ni rig pa ni/ shes rab kyi pha rol tu phyin pa'o/ /shes rab kyi pha rol tu phyin pa'i rig pa'i stobs kyis 'jig rten dang / 'jig rten las 'das pa'i sprul pa mdzad pa'i bdag nyid chen po dang / shin tu ldan pas na/ rgyal po sgyu 'phrul sna tshogs 'chang / /che ba sangs rgyas rig sngags rgyal/ /zhes bya'o/ /de ni bcom ldan 'das kyis sngar bshad pa'i sngags kyi don ngo bo nyid du bstan par bya ba'i phyir/ rdo rje rnon po ral gri che/ /zhes bya ba la sogs pa gsungs te/ chos thams cad bdag med par shin tu yang so sor rtogs pas na rdo rje rnon po'o/ /bdag tu gti mug pa la dmigs pa'i rtsa ba can 'jig tshogs la lta ba'i yal ga dang / lo ma dang / 'dab ma dang ldan pa'i nyon mongs pa'i shing chen po gcod par mdzad pas na ral gri chen po'o/ /don dam par shes rab kyi pha rol tu phyin pa ni mi 'gyur zhing mi zad pa la rang gi ngo bo nyid gzhan du mi 'gyur bas yi ge mchog ste/ chos kyi sku'o/ /sna tshogs pa'i mi bden pa'i rnam par rtog pa'i dri ma mnga' bas na rnam par dag pa'o/ /de yang 'di skad ston par 'gyur te/ nges par 'byed pa'i shes rab kyis nyon mongs pa dang / sdug bsngal ma lus par bcad pas shin tu rnam par dag pa'i chos kyi sku thugs su chud pas rnam par mi rtog pa nyid du gyur pa ni badzra tIk+Sh+Na zhes bya ba'i sngags kyi don yin no/ /sngags gnyis pa'i don bstan pa'i phyir/ /theg pa chen po sdug bsngal gcod/ /mtshon cha chen po rdo rje chos/ /zhes bya ba gsungs te/ sdug bsngal ma lus par gcod pa ni theg pa chen po nyid kyis nus so/ /de bas na sdug bsngal ma lus pa gcod pa'i bdag nyid can theg pa chen po dang / de'i rdo rje'i chos nyid mi phyed pa yin te/ gnyis su med pa'i ye shes de nyid ni sems can ma lus pa'i the tshom thams cad gcod pa'i phyir mtshon cha chen po'o/ /de yang 'di skad ston par 'gyur te/ theg pa chen po thams cad ni rdo rje'i chos nyid kyi don ston pa yin te/ duH khats+tshe da zhes bya ba'i sngags kyi don yin no/ /sngags gsum pa'i don bstan pa'i phyir/ rdo rje zab mo dzi na dzika/ /ces bya ba gsungs te/ sangs rgyas shes rab ye shes kyi/ /snying po dzin dzig tu bshad/ /ces gsungs pas/ so so yang dag par rig pa bzhi bsgoms pas yongs su rdzogs pas phyed cing rtogs par dka' la/ mnyam pa med pa'i sangs rgyas kyi blo dang ldan pas na rdo rje ltar zab pa ni rdo rje blo gros so/ /de nyid kyis na don bzhin rig /ces bya ba ste/ rdo rje ltar chos thams cad so sor 'bigs pa'i shes rab kyis zab cing rgya che ba'i sangs rgyas kyi chos rnams thugs su chud pa dang / shes bya ma lus par thugs su chud pa yang myur du 'byung bar 'gyur ba ste/ pradz+nyA dz+nyA na zhes bya ba sngags kyi don to/ /yi ge bcu gnyis pa'i sngags kyi don bstan par bya ba'i phyir/ pha rol phyin pa kun rdzogs pa/ /sa rnams kun gyi rgyan dang ldan/ /zhes bya ba gsungs te/ sa bcu gnyis dang pha rol tu phyin pa bcu gnyis ji lta ba nyid ni de nyid du yi ge bshad pa'i skabs su rgya cher sbyar zin pas 'dir ma spros so/ /pha rol phyin pa thams cad rdzogs par mnga' bas na/ pha rol tu phyin pa kun rdzogs pa'o/ /sa thams cad kyis rnam pa sna tshogs par brgyan pa des nas thams cad ni rgyan du gyur pa yin te/ des brgyan pa gang yin pa de ni/ sa rnams kun gyi rgyan dang ldan/ /zhes bya'o/ /sngags bzhi pa'i don bstan par bya ba'i phyir/ rnam par dag pa zhes bya ba la sogs pa gsungs te/ rnam par dag pa'i chos la bdag med pa'i ye shes nyid ni phyin ci ma log pa'i don ston pa'i phyir dang / sangs rgyas nyid kyi 'bras bu la slu ba med pa'i phyir yang dag pa'i ye shes so/ /de yang snying la gnas pa'i ma rig pa'i mun nag sel ba'i 'od gsal ba bskyed pas na/ rnam par dag pa bdag med chos/ /yang dag ye shes zla 'od bzang / /zhes bya'o/ /de yang 'di skad ston par 'gyur te/ phyi dang nang gi bdag dang bdag gi dang bral ba'i rnam par dag pa'i chos la bdag med par thugs su chud pas 'jig rten dang 'jig rten las 'das pa'i shes rab dang ye shes kyi bdag nyid can gyi ye shes kyi sku brnyes pas na bde ba dang ldan par 'gyur te/ dz+nyA na kA ya zhes bya ba'i sngags kyi don yin no/ /sngags lnga pa'i don bstan par bya ba'i phyir/ brtson chen zhes bya ba la sogs pa gsungs te/ sgyu 'phrul ni sprul pa'o/ /sgyu 'phrul nyid 'ching ba'i bdag nyid can yin pas na dra ba'o/ /sgyu 'phrul chen po brtul ba gang la yod pa de la ni de skad ces bya'o/ /sngags dang / phyag rgya dang / dkyil 'khor dang / lha rnams kyi rnal 'byor dang / las kyi tshogs la sogs pa rgyud cing nges par bya ba byed pas na rgyud do/ /rgyud thams cad kyi bdag po'i mchog ni rje btsun 'jam pa'i dbyangs ji lta ba nyid de/ 'di skad ston par 'gyur te/ sngags dang / phyag rgya dang / dkyil 'khor la sogs pa sprul pa sna tshogs pa'i gzugs kyis bya ba dang / spyod pa dang / rnal 'byor gyi rgyud kyi bdag por gyur pas gsung gi 'khor lo thams cad bskor bas na bA gI shwa ra zhes bya ba'i sngags kyi don yin no/ /sngags grub pa'i don bstan par bya ba'i phyir/ rdo rje'i gdan ni zhes bya ba la sogs pa gsungs te/ rdo rje ma lus pa zhes bya ba ni de bzhin gshegs pa rnams kyis yongs su rdzogs pa'i mtshan ma dang / mtshon par gyur pa ni chos thams cad yi ge lngas mtshan pa yin te/ de yang a ni chos thams cad kyi sgo'o/ /ra ni chos thams cad rdul dang bral ba dang / sangs rgyas thams cad ni thugs rje chen pos chags par mdzad pa'o/ /pa ni skye ba med pa dang / thugs rje chen po'i chags pa'i thugs rje dang thabs kyi bdag nyid du gyur pas na don dam pa'o/ /tsa ni sa dang pha rol tu phyin pa la sogs pa'i spyod pa de dag gi rgyu dang bral ba'i phyir ro/ /na ni nam mkha' dang 'dra bar nye bar dmigs pa'i sgrib pa thams cad dang bral ba'i chos kyi sku'i mthar thug pa'o zhes ston pa'i phyir te/ de bas na yi ge lnga'i sngags kyi de kho na nyid kyi ngo bo nyid yin pas na/ ye shes sku rnams ma lus 'chang / /zhes bya'o/ /rnam pa thams cad du kun nas sems can thams cad kyi mngon par 'dod pa'i don bzang po mdzad pa dang / rnam pa thams cad du bzang zhing sdug pas na kun du bzang po'o/ /bdag dang gzhan gyi phan pa rdzogs pa bskyed pa'i blo gros bzang po mnga' bas na blo gros bzang po'o/ /sa bzhin du mi 'gyur bar sems can thams cad kyi gnas dang / skyed pa'i rgyur gyur pas na sa'i snying po'o/ /sems can gyi snod kyi ngo bo nyid 'gro ba rnams rnam par 'dzin pa'i rgyu bsod nams dang / ye shes kyi tshogs kyi bdag nyid can yin pas na 'gro ba 'dzin pa'o/ /sangs rgyas thams cad kyi skye gnas chen po ni/ sangs rgyas kun gyi snying po che/ /zhes bya ste/ gar+b+ha zhes bya ba'i sgra 'di ni snying po la yang yod de/ shing gi snying po bzhin no/ /bskyed pa la yang yod de/ mnga' ba bzhin no/ /de bas na bskyed pa'i don ltar na yang de bzhin gshegs pa thams cad la sogs pa'i dkyil 'khor spros pas na/ sangs rgyas kun gyi snying po che/ /zhes bya ste/ de bzhin gshegs pa dpag tu med pa'i dkyil 'khor 'dzin par mdzad pas na/ sprul pa'i 'khor lo sna tshogs 'chang / /zhes bya'o/ /de las phyogs tsam nye bar bstan pa'i ming du zad de/ 'dir shes rab can gyis gzhan dag kyang dpag par bya ba sbyar bar bya ste/ sangs rgyas kun gyi snying po che/ /sprul pa'i 'khor lo sna tshogs 'chang / /zhes bya ba la/ /dkyil 'khor thams cad bsdus par gyur la/ bcom ldan 'das rje btsun 'jam dpal gyi don thams cad grub pa nam mkha' ltar dri ma med cing shin tu rnam par dag pa chos kyi dbyings kyi ye shes kyi snying po zhes bya ba'i dkyil 'khor chen po'i don gyi dgos pa sbas te/ 'dug pas na phyin ci ma log pa'i man ngag las brgyud de 'ongs pa bshad par bya'o/ /de ni dkyus ma nyid la 'jug par bya ste/ dngos po kun gyi rang bzhin 'dzin/ /zhes bya ba la sogs pa ni dka' 'grel gyi tshul du byas te/ shin tu rgya che bar ni ma spros so/ /de la dngos po thams cad kyi rang bzhin ni skye ba med pa'i stong pa ste/ de lta bu'i ngo bo nyid kyis na mchog ste/ gtso bo yin pas na/ dngos po kun gyi rang bzhin mchog /ces bya ba la/ de nyid kyis na/ dngos po kun gyi rang bzhin 'dzin/ /zhes bya'o/ /chos can gyi ngo bo nyid du bshad nas/ chos rnams kyi ngo bo nyid du bstan par bya ba'i phyir/ skye med chos te sna tshogs don/ /zhes bya ba la sogs pa gsungs te/ gang la skye ba med pa'i chos te/ chos can la brten pa nyid kyis brtags na skye ba med pas na/ de la brten pa'i chos rnams ni shin tu yang skye ba med pa nyid do zhes pa'i skye ba med pa'i don ni chos thams cad kyi don yin no/ /de bas na/ chos kun ngo bo nyid 'chang ba/ /zhes bya'o/ /rtog par bya ba'i chos kyi rim pa med pas rtog pa'i rim pa yang med do zhes bya ba bstan par bya ba'i phyir/ shes rab chen pos skad cig la/ /chos kun khong du chud pa 'chang / /zhes bya ba la sogs pa gsungs te/ 'di ltar phrin las yongs su shas cher sbyangs pa shes bya thams cad thugs su chud pa'i ngo bo nyid kyi shes rab gang yin pa de ni shes rab chen po yin te/ gang gi phyir skad cig ma gcig gis chos thams cad thugs su chud pa ni rnam pa thams cad mkhyen pa'i ye shes yin la/ de de'i bdag nyid kyis 'dzin par mdzad pas na/ shes rab chen pos skad cig la/ /chos kun khong du chud pa 'chang / /zhes bshad do/ /'dus byas dang / 'dus ma byas dang / zag pa dang bcas pa dang / zag pa med pa dang / 'jig rten dang / 'jig rten las 'das pa'i dbye bas phye ba'i chos thams cad do/ /de rnams mngon par rtogs pa ni thugs su chud pa ste/ rnam pa thams cad du thugs su chud pa gang yin pa de ni/ chos kun mngon par rtogs pa ste/ /zhes bya'o/ /thub pa zhes bya ba ni sku dang / gsung dang / thugs thub pa dang ldan pas mi dge ba bcu'i las kyi lam las ldog cing dge ba'i chos thams cad yang dag par ldan pas na thub pa'o/ /blo mchog ni chos thams cad thugs su chud pa dang ldan pa'i blo gang yin pa de ni blo mchog go/ /'byung ba ni bden pa ste/ de kho na nyid do/ /de'i mthar ni mthar thug pa ste/ de kho na nyid kyi mtha' thugs su chud pa ni 'byung po'i mtha' zhes bya'o/ /yang na 'byung po ni srog chags rnams so/ /de'i mtha' ni mya ngan las 'das pa ste/ skye ba'i mthar thug pa ni mya ngan las 'das pa yin pa'i phyir mi gnas pa'i mya ngan las 'das pa'i ngo bo nyid kyis thub pa ni thub pa yang dag mtha' zhes bya'o/ /mi g.yo rab tu dang ba'i bdag /ces bya ba la sogs pa la gnas ngan len dang rnam par rtog pa thams cad spangs pas na brtan zhing mi 'gyur bar gnas pa ni mi g.yo ba'o/ /ma rig pa dang 'dod chags la sogs pa'i rnyog pa dang bral bas shin tu yang rab kyi mthar thug pas dri ma med pa'i ngo bo nyid kyi rang bzhin gyi sku'i rang bzhin can yin pas na rab tu snang ba'i bdag go/ /yang dag par rdzogs pa'i byang chub ni zad pa dang mi skye ba'i ye shes te/ nyon mongs pa ma lus par zad pa dang / slar yang mi skye bdag ni dus gcig pa ste/ rkun ma phyung ba dang sgo gtan bcug pa lta bu dang / tshul mthun no zhes bye brag tu smra ba dag 'dod do/ /zad pa dang mi skye ba'i ye shes dri ma med pa'i byang chub bshad par bya ste/ zad pa med pa ni mi skye ba'i mtha' yin par rim pa ji lta ba bzhin du shes par bya'o/ /de yang 'dus byas thams cad zad pa'i tshul nyid ni stong pa'o/ /stong pa nyid kyi ngo bo nyid yin pas na 'dus byas nyid 'dus ma byas so/ /de bas na 'dus byas dang 'dus ma byas kyi chos thams cad mnyam pa nyid zad pa'o/ / zad pa de yang 'grib pa med de/ /gang gi phyir zad pa de la ni zad pa med do/ /gal te zad pa zad par gyur na ni 'gog pa yang zad par 'gyur te/ 'gog pa med par thal bar 'gyur bas mi 'dod do/ /de bas na zad pa ni zad par mi 'gyur ro/ /gang zad par mi 'gyur ba de ni mi skye ba'o/ /gang mi skye ba de ni 'gag par mi 'gyur ro/ /de ltar chos thams cad mnyam pa nyid dang / chos thams cad de bzhin nyid du rtogs pa ni byang chub ste/ zad pa dang mi skye ba'i ye shes ni byang chub ces bya la/ de de'i bdag nyid kyis 'dzin par mdzad pas na/ rdzogs pa'i sangs rgyas byang chub 'chang / /zhes bya'o/ /sgrib pa thams cad las rnam par grol pa'i ye shes ni shes bya thams cad snang ba'i bdag nyid can yin pas me lce dang 'dra bas na ye shes me lce ste/ de ni rnam pa thams cad du 'od rab tu gsal ba'o/ /de bas na rnam pa thams cad du sangs rgyas kun gyi mngon sum pa yin te/ sangs rgyas rnams kyi byang chub ni nam yang mngon sum du ma gyur pa ma yin no/ /sangs rgyas thams cad kyi byang chub kyi ngo bo nyid du gyur pas mngon sum du gyur pa ni sangs rgyas thams cad kyi ye shes me lce 'od rab tu gsal ba'o/ /'dod pa'i don zhes bya ba la/ 'dod pa ni dgos pa'i gtso bo ste/ sangs rgyas nyid do/ /mtho ris dang / longs spyod dang / dbang phyug dang / rig 'dzin grub pa la sogs pa ni zhar la 'grub ste/ de bas na dgos pa rnam pa gnyi ga yang 'dod pa'i don grub pa ni rdzogs par byed pa'o/ /mchog ni 'jig rten dang 'jig rten las 'das pa'i 'bras bu rtsol ba'i phul du byung ba yin pas na/ 'dod pa'i don dam sgrub pa ste/ /zhes bya'o/ /sems can dmyal ba dang / yi dags dang / dud 'gror 'gro ba 'jug par byed pa'i las kyi gnyen por gyur pa thar pa dang rjes su mthun pa'i chos rnams ston par mdzad pas na/ ngan song thams cad rnam sbyong ba'i/ /mgon po sems can kun gyi mchog / ces bya'o/ /gang gi phyir nyon mongs pa'i 'ching ba thams cad la mkhas pa'i stobs kyis sems can thams cad yongs su grol bar mdzad pas/ sems can thams cad rab grol byed/ /ces bya'o/ /sems can rnams kun nas nyon mongs pas na nyon mongs pa ste/ bdag dang bdag gir mngon par zhen pa'i rtsa ba 'dod chags la sogs pa'o/ /de dang lhan cig tu g.yul sprod pas na nyon mongs pa'i g.yul der dpa' bo gcig pa'o/ /dgra gang yin zhe na/ mi shes pa'i dgra bo de'i dregs pa ni bdag nyid gcig pu nyid kyis sems can ma lus pa mi shes pa'i zhags pas bcings la ngan song gsum du lhung bar bya'o zhes brnyas pa dang bcas pa'o/ /de bcom pas na/ mi shes dgra'i dregs pa 'joms pa'o/ /yang na nyon mongs pa'i g.yul du dpa' ba nyid gang yin zhe na/ gang mi shes pa'i dgra'i dregs pa bsal te/ de yang nyon mongs pa rnams shes rab kyi ral gyis mi shes pa'i rgyal po nges par bcom nas/ de'i stobs kyis rnam par rol cing rtsa ba bcad pas gzhan dag kyang bcom par gyur pa ni/ nyon mongs g.yul du gcig dpa' ba/ /mi shes dgra yi dregs pa 'joms/ /zhes bya'o/ /shes rab kyi rang bzhin gyi sku dang ldan pa rje btsun 'jam dpal gcig pu n yid sangs rgyas dang byang chub sems dpa' thams cad kyi bdag nyid du gyur pas de las lhag pa gzhan med par bstan nas nyon mongs pa dang bdud dang mu stegs la sogs pa ma lus pa las rnam par rgyal pa'i dga' ston gyi gar gyis 'dul ba'i 'gro ba rnams gdul par bya ba'i phyir sgeg pa la sogs pa gar stabs kyi nyams dgu'i khyad par gyis phul du byung bar bstan par bya ba'i phyir/ /dpal ldan blo dang sgeg pa 'chang / /zhes bya ba la sogs pa gsungs te/ sems can rnams dad cing rjes su chags par byed pa'i ngo bo nyid kyi dngos po ni sgeg pa'i gar stabs yin la/ shes rab kyang dri ma med cing sems can thams cad kyi sems kyi spyod pa rjes su mkhyen nas rjes su dga' bar mdzad pa'i tshul gyis ni sgeg pa'o/ /de 'dzin par mdzad pas na sgeg 'chang ngo / /glegs bam la la las ni/ blo ldan sgeg 'chang dpal ldan zhes zer te/ der ni bde gshegs dri med pa'i/ /shes rab rdo rje rnam par bshad/ /ces gsungs pas dri ma med pa'i shes rab kyi bdag nyid can yin pa'i phyir blo'o/ /gal te blo yin na de ni so so rang rig pa'i bdag nyid can gzugs can ma yin pas ji ltar na des sna tshogs pa'i gzugs kyis gdul bya'i don rdzogs par mdzad ce na/ 'dir bshad par bya ste/ sems shin tu rnam par dag pa nyid de dang der so sor snang ba yin la/ rje btsun 'jam dpal gyis kyang dpal rdo rje snying po'i rgyan gyi rgyud las/ de bas sangs rgyas skyob kun gyi/ /zag pa med pa'i shes rab ste/ /shes rab dri med bsam mi khyab/ /sems dpa'i lus su gyur pa yin/ /dngos dang dngos med rnam dpyad pas/ /da med sangs rgyas thams cad kyang / /bdag gi dbang du 'jug gyur pa/ /e ma'o chos nyid bsam mi khyab/ /ces gsungs pa'i phyir ro/ /de bas na sgeg pa la sogs pa'i nyams dang shin tu ldan pa'i gzugs sna tshogs pas gdul bya'i skye bo rnams kyi don rdzogs par mdzad pas na dus thams cad du ma tshang ba med pas sems can gyi don rgyas par mdzad pa yin no/ /des na/ blo ldan sgeg 'chang dpal dang ldan/ /zhes zer ba'i tshig shin tu rigs pa yin no/ /bdud la sogs pa'i dgra nges par bzlog cing 'jigs pa mi mnga' ba'i gzugs mod la 'dzin par mdzad pas na brtan pa'i gzugs 'chang ba'o/ /shin tu drag cing mi bzad pa 'jigs su rung ba'i gzugs 'dzin par mdzad pas na mi sdug gzugs can 'chang ba'o/ /de yang sgeg pa dang / dpa' ba dang / mi sdug pa dang / dgod pa dang / rngam pa dang / snying rje dang / 'jigs su rung ba dang / zhi ba dang / rmad du byung ba'i gar gyi bye brag gis kun du spyod cing smin ma'i khro gnyer dang / spyan 'bar bar snang zhing zhal gyi dbyibs du ma rnams dang / mtshon cha sna tshogs pa bsnams pas gtum pa'i lag pa brgya po gar gyi rnam pa'i bya ba sna tshogs par gzhag pa'i zhabs brgya rnams kyis nam mkha'i khams thams cad khyab cing sku dang / phyag dang zhabs kyis khyab pa'i rnam par rol pa rnams kyis gar mdzad cing sgyu 'phrul chen po'i gar gyi dbang phyug tu gyur pa ni bcom ldan 'das nyid yin no zhes bya ba ni/ lag pa brgya po kun bskyod cing / /gom pa'i stabs kyis gar byed pa/ /dpal ldan lag pa brgyas gang la/ /nam mkha' khyab par gar byed pa/ /zhes bya ba bsdus pa'i don yin no/ /yan lag gi don yang bstan par bya ste/ sems can gdug pa rnams brdeg pa dang / gdul ba dang / chad pas bcad pa'i phyir lag pa rnams kyi lag ngar brgya ste/ des kun nas sems can gyi sdug bsngal g.yo bar byed cing bskyod pa gang yin pa de ni/ lag pa brgya po kun bskyod cing / /zhes bya'o/ /zhabs 'jog pa ni sems can gdul bar byed pa'i rgyu/ rdzu 'phrul gyi rkang pa rnam pa bzhi ste/ rdzu 'phrul gyi rkang pa rnam pa bzhi ni zhabs so zhes gsungs pa'i phyir ro/ /de bas na rdzu 'phrul dang / cho 'phrul rnams kyis mgu bar mdzad nas mi gnas pa'i mya ngan las 'das pa la nges par 'jog par byed pa'i stabs ni gom pa'i stabs so/ /de nyid kyi gar gang la yod pa de ni gom pa'i stabs kyis gar byed pa'o/ /'di skad ston par 'gyur te/ thabs sna tshogs pa rnams kyis sems can rnams theg pa chen po la btsud de/ /mi gnas pa'i mya ngan las 'das pa'i sangs rgyas nyid dam/ rdo rje 'chang chen po nyid la rab tu 'jog pa ni sangs rgyas dang byang chub sems dpa' rnams kyi gar yin gyi/ lag pa dang / rkang pa rnam par bskyod pa tsam ni ma yin te/ de bas na/ lag pa brgya po kun bskyod cing / /gom pa'i stabs kyis gar byed pa/ /zhes bshad do/ /de nyid kyis na/ dpal ldan lag pa brgyas gang la/ /nam mkha' khyab par gar byed pa/ /zhes bya ba ste/ bsod nams dang ye shes kyi tshogs tshad med pa nye bar bsags pas khyab pa dang / nam mkha'i khongs na gnas pa'i sems can gyi don mdzad par bya ba'i gar gyis gar mdzad pa'i dbang phyug dam pa gar gyi sgyu 'phrul chen po'i dbang phyug ni rje btsun 'jam dpal yin no/ /'jig rten las 'das pa'i gar gyi bya ba rnam par gzhag pa'i khyad par bstan par bya ba'i phyir/ sa yi dkyil 'khor gzhi yi khyon/ /rkang pa ya gcig mthil gyis gnon/ /rkang mtheb sen mo'i khyon gyis kyang / /tshangs pa'i yul sa rtse nas gnon/ /zhes bya ba gsungs te/ sa'i dkyil 'khor ni sa chen po'i dkyil 'khor ro/ /de'i gzhi ni steng gi cha ste/ de zhabs gcig gi mthil gyis gnon cing ljid kyis phab pas bzung nas bzhugs pas na/ sa yi dkyil 'khor gzhi yi khyon/ /rkang pa ya gcig mthil gyis gnon/ /zhes bya'o/ /tshangs pa'i yul sa'i sgras ni srid pa'i rtse mo'i steng nas nam mkha'i mthar thug pa'i thod pa'i gzugs su mu stegs pa rnams kyis yongs su btags pa'o/ /de'i rtse mo ni steng gi cha ste/ de ni tshangs pa'i yul sa'i rtse mo'o/ / gnon pa ni mnan pa'o/ /zhabs gang gi tshangs pa'i yul sa'i rtse nas gnon pa'i zhabs de'i mthe bo'i sen mo der 'jog pa gang yin pa de ni/ rkang mtheb sen mo'i khyon gyis kyang / tshangs pa'i yul sa rtse nas gnon/ /zhes bya'o/ /'di skad ston par 'gyur te/ zhabs gcig gi mthil gyis sa gzhi 'og nas mnan nas/ zhabs gnyis pa'i mthe bo'i rtse mos tshangs pa'i yul sa rtse mo nas mnan te gar gyi byed pa sna tshogs pa'i thabs kyis rnam par gnon zhing zab cing brtan pas nam mkha'i khongs thams cad khyab pa'i gar gyis 'gengs la/ dri ma med cing mtha' yas pa'i sgyu rtsal dang ldan pas 'jam pa'i dbyangs rab tu gar mdzad cing bzhugs pa'o/ /la la las ni/ rkang mtheb sen mo gnas pa ni/ tshangs pa'i yul sa rtse nas gnon/ /zhes zer te/ der sa'i dkyil 'khor du rkang pa gcig gis mnan nas gnas pa'o/ /de gang yin zhes dris pa la/ rkang mtheb sen mo zhes bya ba ni lan no/ /des ji tsam khyab nas gnas so zhes rtog pa la/ tshangs pa'i yul sa rtse nas gnon/ /zhes bya ba ni lan no/ /der de lta bu'i khyad par can gyi zhabs kyi mthe bo'i sen mos bcom ldan 'das bzhugs so zhes bya ba ni tshig gi lhag ma'o/ /yang na sa'i dkyil 'khor gzhi'i khyon la gnas pa gang yin pa de nyid tshangs pa'i yul sa rtse nas gnon pa ste/ zhabs kyi rkang pa'i mthe bo'i sen mo gcig gis der yang gnas so zhes bshad do/ /'jog pa ni gnyi ga dang sbyar bar yang rigs pa las 'dir tshigs su bcad pa'i thugs kyis de dang 'byor pa'i don dang sbyar bar bya ste/ rang dgar ni ma yin no/ /rang dgar ni phyi rol gyi bstan bcos la mtshams sbyor te/ brtags pas gzhan du tshigs bcad byas pa ni mi rigs te/ lung ma yin par thal bar 'gyur ro/ /'dul pa'i thabs rnam pa sna tshogs pas sems can sna tshogs pa'i rgyud la sems can rnams 'dul bar bya ba'i phyir spros pa'i gzugs de dag tu gsungs pa yin gyi/ don dam par ni/ don gcig gnyis med chos kyi don/ /dam pa'i don de 'jigs pa med/ /ces bya ba ste/ don gcig pu nyid gang zhe na/ gnyis su med pa'i chos kyi don te/ spros pa thams cad dang bral ba'i de bzhin nyid kyi bdag nyid can gnyis su med pa'i ye shes so/ /don dam par de la ni gzhan du 'gyur ba yod pa min te/ rgyun gyis rtag pas rnam pa thams cad du gnas pas na/ dam pa'i don de 'jigs pa med/ /ces bya'o/ /de ltar gnyis su med cing shin tu rnam par dag pa'i ye shes kyi rang bzhin yin yang sngon goms pa'i thugs rje chen po dang / smon lam gyi shugs kyis sna tshogs par snang ba'i gdul bya'i skye bo rnams dang rjes su mthun pa'i rnam par shes pa bskyed par mdzad pas na/ rnam rig sna tshogs gzugs don can/ /zhes bya'o/ /sems ni rnam par mi rtog pa'i ye shes so/ /rnam shes ni rnam par shes pa'i mtshan nyid can te/ rnam par rtog pa dang bcas pa'i yid do/ /de gnyis ni rgyud kyi 'jug pas rab tu 'jug pa ste/ rnam par rtog pa dang bcas pa dang / rnam par rtog pa med pa'i sems kyi rgyun rab tu dang ba'i me long gi ngos dang 'dra ba la gdul bya'i skal ba dang rjes su mthun par snang ba bskyed par mdzad pas na/ sems dang rnam shes rgyud dang ldan/ /zhes bya'o/ /dngos don ma lus ni rang dang spyi'i tshul gyis brtags pa'o/ /der dga' ba ni kun du zhen pa ste/ de nges par brtags pa'i phyir ro/ /de yang dngos po thams cad kyi rang gi ngo bo nyid thugs su chud pa las sangs rgyas su 'gyur gyi dngos po la mngon par zhen pa las gzhan pas dngos po rnams kyi ngo bo nyid rnam par dpyod par mi 'byung ngo / /de bas na dngos po la mngon par zhen pa'i skye bo rnams dga' bar bya ba'i phyir/ dngos don ma lus rnams la dga'/ /zhes bya'o/ / don dam par ni stong pa nyid la dga' zhing mngon par zhen pa med pa'i tshul gyis mngon par zhen pa'i dga' ba dang bral ba nyid stong ba nyid la dga' ba'o/ /gzugs dang gzugs med pa'i khams gnyis la mngon par zhen cing shin tu chags pa ni sring ba'i 'dod chags te/ kha nang du bltas par 'jug cing bsam gtan dang gzugs med pa rnams la thar par 'du shes pa rnams las bzlog pa'i phyir khams gnyis las byung ba'i 'dod chags ni srid pa'i 'dod chags yin no zhes bcom ldan 'das kyis gsungs so/ /srid pa'i 'dod chags la sogs pa las 'das par gyur pas na/ /srid pa'i 'dod chags sogs spangs pa'o/ /sogs pa'i sgras ni 'dod pa'i 'dod chags bzung ste/ 'dod pa rnams la chags pas na 'dod pa'i 'dod chags so/ /de ltar na/ srid pa'i 'dod chags sogs spangs pa/ /zhes bya'o/ /chos thams cad stong pa nyid du thugs su chud pas 'dod pa dang gzugs dang gzugs med par nye bar dmigs pa'i 'dod chags de dag dang bral du zin kyang / thugs rje chen pos srid pa gsum du skyes pa'i sems can rnams/ gdon par bya ba la mngon par dgyes pas na/ srid gsum dga' ba chen po ba/ /zhes bya ste/ srid pa gsum la dga' ba chen po gang la yod pa de la de skad ces bya'o/ /sems can gye don mdzad pa'i gar stabs kyi tshul bshad nas/ /bcom ldan 'das shin tu yang mdangs dang gzi brjid nyid dang ldan par bya ba'i phyir/ sprin dkar dag pa bzhin du dkar/ /zhes bya ba la sogs pa gsungs te/ sprin ni chu 'dzin no/ /dkar ba ni shin tu yang dkar ba'o/ /dag pa ni kha dog gzhan dag dang ma 'dres pa'o/ /de ltar na sprin dkar po dag pa bzhin du dkar ba la ni/ sprin dkar dag pa bzhin du dkar/ /zhes bya'o/ /dang zhing bsil la 'gro ba rnams tshim par byed pa'i 'od zer dkar po dpag tu med pa mnga' bas na/ 'od bzang ston ka'i zla ba'i 'od/ /ces bya'o/ /thugs rje chen po'i chags pas dmar ba'i sen mo mnga' bas na/ sen mo'i 'od ni shas cher dmar/ /zhes bya'o/ /de nyid kyis na/ nyi ma 'char ka'i dkyil ltar mdzes/ /zhes bya ba ste/ dang po 'char ba'i nyi ma'i dkyil 'khor gyi mdangs ltar dmar ba'i 'od gang la yod pa de la de skad ces bya'o/ /'di skad ston par 'gyur te/ shin tu rnam par dag pa'i shes rab kyi rang bzhin gyi sku dang ldan pas/ /sprin dkar dag pa bzhin du dkar/ /zhes bya'o/ /shes rab kyi 'od zer 'phro bas rnam par mdzes pa'i 'od mnga' bas na 'od bzang ston ka'i zla ba'i 'od do/ /thugs rje chen po'i chags pa'i mdangs kyis phyi rol du snang ba'i 'od dang ldan pa'i sku mnga' bas na/ nyi ma 'char ka'i dkyil ltar mdzes/ /sen mo'i 'od ni shas cher dmar/ /zhes bya'o/ /rin po che mthon ka'i rtse mo'i 'od kyi tshogs kha dog sngo ba ste/ mthon ka'i rtse ltar bzang zhing mdzes pa'i zur phud lnga gang la mnga' ba de ni/ cod pan bzang po mthon ka'i rtse/ /zhes bya'o/ /skra rnams kyi mchog ni mchog ste/ skra gzhan las thams cad kyi mchog ces bya ba'i don to/ /mthon ka chen po ltar shin tu sngo ba'i skra'i mchog 'chang bar mdzad pas na/ skra mchog mthon ka chen po can/ /zhes bya'o/ /mthon ka dang mthon ka chen po'i dbye ba ni 'di yin te/ mthon ka ni cung zad sngo ba ste/ cung zad dmar ba dang 'dra'o/ /de nyid shin tu shas cher sngo ba ni mthon ka chen po ste/ rigs kyi bye brag yod pa ni ma yin no/ /nor bu chen po ni 'gro ba ma lus pa'i mngon par 'dod pa'i don yang dag par rdzogs par mdzad pa la gzhol pas na sangs rgyas bcom ldan 'das la bya'o/ /de rnams kyi 'od chags pa ni kha dog sna tshogs pa'i sprul pa'i 'od zer rnams te/ 'od zer de rnams kyis mdzes pa'i dpal gang la yod pa de ni/ nor bu chen po'i 'od chags dpal/ /zhes bya ste/ gang gi phyir mdog sna tshogs pa'i nges par 'byung ba'i rgyan thams cad zil gyis gnon par byed pa ni/ sangs rgyas sprul pa'i rgyan dang ldan/ /zhes bya ste/ shin tu yang legs par brgyan par byas pa'o zhes bya ba'i don to/ /'jig rten khams brgya kun bskyod pa/ /rdzu 'phrul rkang pa'i stobs chen ldan/ /zhes bya ba la/ de la rdzu 'phrul gyi rkang pa ni bzhi ste/ bzhi gang zhe na/ 'di lta ste/ 'dun pa dang / brtson 'grus dang / sems dang / dpyod pa'o/ /de rnams kyi rtsa ba dang gzhi dang gnas ni byams pa dang snying rje dang dga' ba dang btang snyoms so/ /de tshad med pa bzhi po 'di bsten cing bsgoms la mang du byas pas sems las su rung ba thob par 'gyur ro/ /de sems las su rung ba thob pas bsam gtan dang po la mnyam par 'jog go/ /de bzhin du gnyis pa dang / de bzhin du gsum pa dang / de bzhin du bzhi pa la yang mnyam par 'jog ste/ de bsam gtan thob pas lus dang sems yang ba thob par 'gyur ro/ /de lus dang sems yang ba dang ldan pas mngon par shes pa la 'jug pa mngon par sgrub bo/ /de mngon par shes pa la 'jug pa mngon par sgrub pa dang ldan pas 'dun pa las sam/ sems las sam/ dpyod pa las rdzu 'phrul gyi rkang pa bskyed do/ /de la 'dun pa ni gang chos de dag la mngon du phyogs pa'o/ /de la brtson 'grus ni gang chos de dag sgrub pa'o/ /sems kyis ni gang chos de dag rtog pa'o/ /dpyod pa ni gang chos de dag la mkhas pa ste/ de rdzu 'phrul gyi rkang pa mngon par 'grub pa rnams kyis yang dag par 'grub pa ste/ de'i phyir na rdzu 'phrul gyi rkang pa zhes bya'o/ /de la 'dun pas ni rnam par sgrub pa'o/ /brtson 'grus kyis ni rdzogs par byed pa'o/ /sems kyis ni rnam par 'jog go/ /dpyod pas ni rnam par 'byed do/ /de la byang chub sems dpa' rnams kyi rdzu 'phrul gyi rkang pa ni mos pa las byung ba/ mngon par 'du byed pa med pa/ rang gi sems bskyed pas dbang byed pa/ ji ltar 'dod pa bzhin du 'gro ba/ yongs su sbyang ba legs par byas pa/ rtsa ba la shin tu gnas pa/ thams cad du rgyu zhing rlung dmar bzhin du thogs pa med pa nam mkha'i mthar thug pa ste/ btsun pa sha ra dwa ti'i bu de dag ni byang chub sems dpa' rnams kyi rdzu 'phrul gyi rkang pa bzhi mi zad pa'o zhes bya ba'i rdzu 'phrul gyi rkang pas 'jig rten gyi khams mtha' yas pa gnon par mdzad pas na/ 'jig rten khams brgya kun bskyod pa/ /rdzu 'phrul rkang pa'i stobs chen ldan/ /zhes bya ste/ 'jig rten khams brgya zhes pa ni nye bar mtshon pa'i don tsam yin gyi/ gzhan du na sa dang po nyid la 'jig rten gyi khams brgya g.yo bar byed pa yin pas phul du byung ba ci zhig yod par bshad pa yin/ de yang sa bcu pa'i mdo las/ sa'i rgya cher gsungs nas nye bar bsdu ba'i tshul gyis gsungs pa ji ltar 'dod pa de lta bu'i gzugs dang / brtson 'grus ji lta bu dag rtsom zhe na/ de 'dod na skad cig yud tsam thang cig la khyim dang chung ma dang rgyal sring thams cad yongs su spangs te/ de bzhin gshegs pa'i bstan pa la rab tu byung ba dang rab tu byung nas kyang skad cig yud tsam thang cig la ting nge 'dzin brgya rab tu 'thob cing snyoms par 'jug pa dang / sangs rgyas brgya mthong ba dang / de dag gi byin gyi rlabs kyang yang dag par shes pa dang / 'jig rten gyi khams brgya bskyod pa dang / sangs rgyas kyi zhing brgyar 'gro ba dang / 'jig rten gyi khams brgya snang bar bya ba dang / sems can brgya yongs su smin par bya ba dang / bskal pa brgyar gnas par bya ba dang / sngon gyi mtha' dang / phyi ma'i mtha' bskal pa brgya la rab tu 'jug pa dang / chos kyi sgo brgya rnam par 'byed pa dang / lus brgya yongs su bstan pa dang / lus re re la yang byang chub sems dpa'i 'khor brgya yang dag par bstan par bya ba'i brtson 'grus kyi rnam pa de lta bu rtsom mo/ /de yan chad byang chub sems dpa'i smon lam gyi mthu can rnams smon lam gyi khyad par gyis rnam par 'phrul te/ de dag gi lus sam/ 'od dam rdzu 'phrul lam/ mig gam/ spyod yul lam/ dbyangs sam/ spyod pa'am/ rgyan nam/ byin gyi rlabs sam/ mngon par 'du byed pa dag kyang bskal pa du ma dang / bskal pa brgya phrag du ma dang / bskal pa stong phrag du ma dang / bskal pa brgya stong phrag du ma dang / bskal pa bye ba khrag khrig brgya stong du mas kyang bgrang bar dka'o/ /de lta yin na yang nye bar mtshon pa'i don tsam du smos pa la yang nyes pa med do/ /sangs rgyas thams cad kyi yon tan gyi bdag nyid du gyur pa'i phyir dran pa nye bar gzhag pa dang rjes su mthun pa'i tshul gyis khyad par du 'phags pa bstan par bya ba'i phyir/ de nyid dran pa chen po 'chang / /dran pa bzhi po ting 'dzin rgyal/ /zhes bya ba gsungs te/ dran pa chen po ni dran pa nye bar gzhag pa'i yul bcu ste/ dran pa nye bar gzhag pa bcu ni chos yang dag par sdud pa'i mdo las kyang rgya cher ston te de la de nas byang chub sems dpa' sems dpa' chen po blo gros rnam par gnon gyis byang chub sems dpa' sems dpa' chen po rtsom pa med la 'di skad ces smras so/ /rigs kyi bu byang chub sems dpa'i dran pa nye bar gzhag pa ni gang / dran pa ni gang / dran pa'i gnas ni gang / de skad ces smras pa dang / byang chub sems dpa' sems dpa' chen po rtsom pa med kyis byang chub sems dpa' sems dpa' chen po blo gros rnam par gnon pa la 'di skad ces smras so/ /rigs kyi bu byang chub sems dpa' rnams ni chos thams cad la mi skye ba shes pa dran pa yin no/ /byang chub sems dpa' chen po rnams ni mi skye ba'i shes pa'i smon lam can yin te/ de dag gi dran pa de yang mi skye ba shes pas yongs su sbyang ba byas pa/ thams cad du mi bskyod pa/ dran pa mi g.yo ba/ gting dang 'gram mi rtog pa dang / 'jig rten pa dang / nyan thos dang rang sangs rgyas thams cad kyis shes par dka' ba ste/ byang chub sems dpa'i dran pa gang gis sangs rgyas thams cad kyis gsungs te kun 'dzin pa'i dran pa de ni de bzhin gshegs pa dgra bcom pa yang dag par rdzogs pa'i sangs rgyas kyis mngon sum mo/ /byang chub sems dpa'i dran pa de ni 'di 'dra'o/ /byang chub sems dpa' de'i gnas ni rnam pa bcu ste/ lus dran pa nye bar gzhag pa dang / tshor ba dran pa nye bar gzhag pa dang / sems dran pa nye bar gzhag pa dang / chos dran pa nye bar gzhag pa dang / sangs rgyas rjes su dran pa'i dran pa nye bar gzhag pa dang / chos rjes su dran pa'i dran pa nye bar gzhag pa dang / dge 'dun rjes su dran pa'i dran pa nye bar gzhag pa dang / tshul khrims rjes su dran pa'i dran pa nye bar gzhag pa dang / gtong ba rjes su dran pa'i dran pa nye bar gzhag pa dang / lha rjes su dran pa'i dran pa nye bar gzhag pa ste/ 'di dag ni dran pa nye bar gzhag pa bcu'o/ /de la byang chub sems dpa' rnams kyi lus dran pa nye bar gzhag pa gang zhe na/ 'di la byang chub sems dpa' lus 'di ni sngon gyi mtha' nas ma 'ongs/ phyi ma'i mthar mi 'pho/ sngon gyi mtha' dang / phyi ma'i mtha' la mi gnas te/ gzhan du na yang dag pa ma yin pa/ phyin ci log las byung ba/ byed pa po dang / tshor ba po med pa/ thog ma dang / tha ma dang / dbus med pa/ rtsa ba gnas pa med pa/ bdag po med pa/ nga yi ba med pa/ yongs su 'dzin pa med pa ste/ tshogs zhes bya ba dang / lus zhes bya ba dang / longs spyod ces bya ba dang / gnas zhes bya ba dang / ro zhes bya ba dang / skye mched ces bya ba ni glo bur gyi tha snyad du btags pa'o/ /lus 'di ni snying po med pa ste/ pha ma'i khu ba dang khrag las byung ba/ rul pa/ rang bzhin gyis dri mi zhim pa/ 'dod chags dang / zhe sdang dang / gti mug dang / 'jigs pa dang / sgyid lug pa'i rkun pos dkrugs pa/ rtag tu 'jig pa dang / 'drul ba/ 'dral ba/ rnam par 'thor ba/ rnam par 'joms pa'i chos can/ nad tha dad pa brgya stong gi tshang ngo snyam du lus la dran pa nye bar 'jog go/ / gzhan yang rigs kyi bu byang chub sems dpa' ni 'di ltar lus 'di ni rkang pa dang / rkang sor dang / byin pa dang / brla dang / dku do dang / lto ba dang / lte ba dang / sgal tshigs dang / snying dang / rtsib logs dang / rtsib ma dang / lag pa'i thal mo dang / dpung pa dang / thal gong dang / mgrin pa dang / 'gram pa dang / dpral ba dang / mgo'i thod pa 'dus pa tsam ste/ lus 'byung ba'i byed pas bsags pa nyon mongs pa dang / nye ba'i nyon mongs pa dang / kun du rtog pa dang / rnam par rtog pa tha dad pa brgya stong gi gnas so/ /'di ni rdzas mang po 'dus pa 'di lta ste/ skra dang / spu dang / sen mo dang / so dang / rus pa dang / pags pa dang / sha dang / lus dang / rgyus pa dang / tshil dang / zhag dang / chu ser dang / mcher pa dang / gcin dang / phyi sa dang / pho ba dang / long ka dang / khrag dang / ngar snabs dang / mkhris pa dang / rnag dang / mchil ma dang / klad pa dang / klad rgyas rnams te/ de ltar rdzas mang po 'dus pa yin na de la lus zhes ji skad du bya snyam du lus la dran pa nye bar 'jog go/ /de so sor rtog pa na 'di snyam du sems te/ lus 'di ni nam mkha' dang mtshungs so snyam nas de lus la nam mkha' ltar dran pa nye bar 'jog go/ /de thams cad nam mkha' ltar mthong ngo / /de lus yongs su shes par bya ba lus gang du yang dran pa mi 'jug go/ /mi ldog go/ /mi 'jug mi ldog pas dran pa la gnas pa zhes bya'o/ /de ltar dran pa la gnas pas ni lus ji lta ba de ltar byang chub kyang de bzhin du shes te 'di la thogs par bya ba med do/ /de ci'i phyir zhe na/ gang du thogs pa de thams cad ni tshul bzhin ma yin pa ste/ 'di ni byang chub sems dpa'i lus dran pa nye bar gzhag pa zhes bya'o/ /de la byang chub sems dpa'i tshor ba dran pa nye bar gzhag pa gang zhe na/ 'di la byang chub sems dpa' 'di snyam du sems te/ tshor ba zhes bya ba ni khong du chud pa ste/ rig pa de yang phyin ci log dang / phyin ci ma log pa dang / de gnyi ga las rnam par grol ba'o snyam mo/ /de la byis pa so so'i skye bo sems g.yengs pa phyin ci log tu gyur pa rnams kyi tshor ba ni phyin ci log ste/ de dag ni mi rtag pa la rtag par tshor ro/ /sdug bsngal ba la bde bar tshor ro/ /bdag med pa la bdag tu tshor ro/ /mi gtsang ba la gtsang bar tshor ro/ /'di ni phyin ci log gi tshor ba'o/ /gang mi rtag pa la mi rtag par tshor ba dang / sdug bsngal ba la sdug bsngal bar tshor ba dang / bdag med pa la bdag med par tshor ba dang / mi gtsang ba la mi gtsang bar tshor ba 'di ni nyan thos rnams kyi tshor ba'o/ /gang mi rtag pa la mi rtag pa dang / mi rtag pa yang ma yin par tshor ba dang / sdug bsngal ba la sdug bsngal ba yang ma yin bde ba yang ma yin par tshor ba dang / bdag med pa la bdag med pa dang bdag med pa yang ma yin par tshor ba dang / mi gtsang ba la mi gtsang ba dang mi gtsang ba yang ma yin par tshor ba 'di ni byang chub sems dpa' rnams kyi tshor ba'o/ /byang chub sems dpa' de ltar tshor ba ni tshor ba po yang dag par rjes su mi mthong ngo / /de mi mthong bas tshor ba yang dag par rjes su mi mthong ngo / /de 'di snyam du sems te/ bcom ldan 'das kyis kyang 'dus byas thams cad ni tshor ba po zhes gsungs so/ /gal te 'dus byas thams cad tshor ba yin na ni 'di la tshor ba po zhes bya ba ci zhig yod/ tshor ba ni tshor bar byed pa ma yin tshor ba dang tshor bar byed pa ma yin/ 'dus ma byas kyang 'dus byas tshor bar byed pa ma yin/ 'dus byas dang 'dus ma byas las rnam par grol ba'i tshor bar byed pa gang yang med de/ de ltar tshor ba de dag tshor ba med par yang dag par rjes su mthong ngo / /'di la tshor ba la rtsol ba gang yang dag par rjes su mi mthong ste/ byang chub ji ltar tshor ba yang de bzhin du yang dag par rjes su mthong ba 'di ni byang chub sems dpa'i tshor ba dran pa nye bar gzhag pa zhes bya'o/ /de la byang chub sems dpa' sems dran pa nye bar gzhag pa gang zhe na/ 'di la byang chub sems dpa' 'di snyam du sems te/ gang tshor ba de ni sems tsam mo/ /sems de yang gnas pa med pa/ gzung du med pa/ lus med pa'o/ /gang gnas med pa/ lus med pa de'i gnas ji lta bu zhig yod snyam mo/ /sems kyis sems mi shes so/ /sems kyis sems mi mthong ngo / /gang la brten nas 'byung ba'i sems de yang gzhan rag las pa rang dbang med par mthong ngo / /sems ma rtog bar byang chub kyang mi shes so/ /de byang chub sems tsam du shes pas sems la dbang thob bo/ /de sems la dbang bas theg pa chen po la dbang byed pa dang / sems can thams cad la yang sems snyoms pa dang / theg pa chen po la gzhan gyi dring mi 'jog pa yin te/ 'di ni byang chub sems dpa'i sems dran pa nya bar gzhag pa zhes bya'o/ /de la byang chub sems dpa'i chos dran pa nye bar gzhag pa gang zhe na/ 'di la byang chub sems dpa' dge ba'am/ mi dge ba'am/ kha na ma tho ba dang bcas pa'am/ kha na ma tho ba med pa'am/ zag pa dang bcas pa'am/ zag pa med pa'am/ 'jig rten pa'am/ 'jig rten las 'das pa'am/ nyan thos kyi chos sam/ rang sangs rgyas kyi chos sam/ so so skye bo'i chos sam/ chos gang dang gang la dran pa nye bar gzhag pa'i chos te/ shin tu gzung ba/ shin tu yongs su sbyang ba byas pa/ shin tu bsags pa/ shin tu byang chub pa rang gi kha na las pa/ shin tu dbang med pa'i dran pa des/ skye ba med pa dang 'gag pa med pa mnyam par byed de/ gang skye ba med pa dang / 'gag pa med pa las rnam par grol ba dang / gang rten cing 'brel par 'byung ba las rnam par grol ba dang / gang stong pa nyid dang mtshan ma med pa dang / smon pa med pa las rnam par grol ba'i chos de yang dag par rjes su mi mthong ngo / /de 'di snyam du sems te/ chos thams cad bdag po med pa ste/ dben pa'i rang bzhin can/ chos thams cad ni bdag gi ba med pa ste/ gnyis su med pa'i rang bzhin can/ chos thams cad ni sgrib pa med pa ste/ nam mkha'i rang bzhin can/ chos thams cad ni rnam par mi rtog pa ste/ sems dang yid dang yid kyi rnam par shes pa dang bral ba/ chos thams cad ni rnam par grol ba'i ngo bo nyid de/ nyon mongs pa med pa'i rang bzhin can/ chos thams cad ni smra ba med pa ste/ brjod du med pa'i rang bzhin can/ chos thams cad ni yi ge med pa ste/ 'dus ma byas pa'i rang bzhin can/ chos thams cad ni grangs med pa ste/ grangs thams cad las shin tu 'das pa/ chos thams cad ni drang ba med pa ste/ spros pa thams cad las shin tu 'das pa/ chos thams cad ni sa bon med pa'i phyir rtsa ba med pa/ chos thams cad ni rtsa ba rnam par byang ba'i phyir skyon med pa/ chos thams cad ni lus med pa'i phyir 'ong ba med pa/ chos thams cad ni gnas pa med pa'i phyir song ba med pa/ chos thams cad ni rang bzhin gyi stong ba'i phyir chags pa med pa'o/ /chos thams cad ni rten cing 'brel par 'byung ba'i phyir stong pa/ chos thams cad ni rnam par mi rtog pa'i phyir nges par byung ba/ chos thams cad ni ji ltar 'dod pa bzhin khong du chud pa'i phyir rang gi kha na las pa/ chos thams cad ni shes bya'i ngo bo nyid kyi phyir byang chub pa/ chos thams cad ni rdzas med pa'i phyir ming tsam pa/ chos thams cad ni bstan du med pa'i ngo bo nyid kyi phyir lta ba dang bral ba/ chos thams cad ni lus pa med pa'i phyir bcings pa med pa/ chos thams cad ni ngo bo nyid med pa'i phyir grol ba med pa/ chos thams cad ni de bzhin nyid kyi ngo bo nyid kyi phyir thibs po med pa/ chos thams cad ni chos kyi dbyings dbyer med pa'i phyir dbyings gcig pa/ chos thams cad ni yang dag pa'i mtha' dang mnyam pa'i phyir tha mi dad do snyam du de nyid chos la chos kyi dbyings su lta zhing gnas so/ /de ltar chos la chos kyi rjes su lta zhing gnas pa'i byang chub sems dpa' ni sems can du mi byed/ theg pa tha dad du mi byed/ sangs rgyas kyi zhing tha dad du mi byed/ tha ma dang / mchog dang / bcings pa dang / thar pa dang / 'khor ba dang / mya ngan las 'das pa yang dag par rjes su mi mthong / spong ba med 'dzin pa med/ 'jug pa med/ ldog pa med/ len pa med/ dor ba med/ mi g.yo ba mthong zhing gnas pa yin te/ byang chub sems dpa' sems dpa' chen po zhi ba la gnas pa de sangs rgyas kyi zhing tha dad pa na gnas pa'i sangs rgyas bcom ldan 'das rnams kyis gzigs nas bla na med pa yang dag par rdzogs pa'i byang chub tu lung ston te/ de ni byang chub sems dpa'i chos dran pa nye bar gzhag pa zhes bya'o/ /de la byang chub sems dpa'i sangs rgyas rjes su dran pa'i dran pa nye bar gzhag pa gang zhe na/ 'di la byang chub sems dpa' sangs rgyas rjes su dran pa'i dran pa nye bar gzhag pa bsgom ste/ sems can thams cad mngon du byas nas bdag kyang sems can thams cad kyi ched du bla na med pa yang dag par rdzogs pa'i byang chub yang dag par sgrub po/ /'di ltar gang de bzhin gshegs pa dgra bcom pa yang dag par rdzogs pa'i sangs rgyas rnams kyi de bzhin gshegs pa'i stobs bcu dang mi 'jigs pa bzhi dang / sangs rgyas kyi chos ma 'dres pa bco brgyad po de bdag gis bsgrub par bya'o snyam du dran pa nye bar 'jog go/ /dran pa des sangs rgyas bcom ldan 'das rnams kyi dran pa bsam gyis mi khyab pa/ dri ma med pa/ rnam par dag pa/ 'od gsal ba/ bag la nyal med pa/ bag chags kyi mtshams sbyor ba thams cad yang dag par chad pa/ ye shes sngon du 'gro ba/ ye shes kyi dbang du gyur pa/ sangs rgyas thams cad kyi dbang du gyur pa/ chos kyi dbang du gyur pa/ lha'i dbang du gyur pa/ nges par gyur pa thams cad thob pa/ shes bya'i sgrib pa'i dri ma med pa/ nyan thos dang rang sangs rgyas thams cad kyis mi rtogs pa/ rang bzhin gyis rnam par mi rtog pa/ lhun gyis grub pa/ mthu sgrib pa med pa/ thogs pa med par gnas pa/ sems can thams cad kyi bsam pa rgyas par byed pa/ nam mkha' ltar 'gyur ba med pa'i sangs rgyas kyi rjes su dran pa de dag rjes su dran no/ /dran pa rin po che sangs rgyas rnams kyi nor/ sangs rgyas rnams kyi mdzod de dag rjes su dran te/ de'i phyir sangs rgyas rjes su dran pa zhes bya'o/ /sangs rgyas ni dran pa yang ma yin/ mi dran pa yang ma yin par thams cad du lhun gyis grub cing rnam par mi rtog pa'i dran pa de dag rjes su dran te/ /de'i phyir sangs rgyas rjes su dran pa zhes bya'o/ /sangs rgyas ni sems can dang chos la dad pa'i 'du shes mi mnga' ba ste/ de dag gi dran pa rjes su dran pas de'i phyir sangs rgyas rjes su dran pa zhes bya'o/ /sangs rgyas ni mi rtog rnam par mi rtog /mi len mi 'dor/ mi 'khor yongs su mya ngan las mi 'da'/ mi skye mi 'gag pa ste/ de dag rjes su dran pas de'i phyir sangs rgyas rjes su dran pa zhes bya'o/ /gzhan yang sangs rgyas bcom ldan 'das rnams ni/ bsod nams dang ye shes kyi tshogs chen po mnga' ba/ byams pa chen po dang snying rje chen po'i spyod yul can/ sems can gyi phung po chen po'i skyabs su gyur pa/ mgon du gyur pa/ sman pa chen po zug rngu 'byin pa/ sems can thams cad la sems snyoms pa/ rtag tu ting nge 'dzin gyi spyod yul ba/ 'khor ba dang mya ngan las 'das pa las rnam par grol ba/ nyon mongs pa dang shes bya'i sgrib pa thams cad kyi pha rol tu phyin pa/ sems can chen po'i gnas sems can chen po'i rten/ rnam par 'dren pa/ chos kyi sku'i spyod yul ba/ thams cad du khong khro ba med pa'i sems dang ldan pa/ rtag tu sems can gyi don la dgyes pa/ sku dang gsung dang thugs rgya che ba/ khyad par lung ston pa/ sku dang gsung dang thugs kyi phrin las kyi mtha' kha na ma tho ba med pa/ bag chags dang bcas pa'i 'dod chags dang zhe sdang dang gti mug bkrus pa/ bdud dang phyir rgol ba thams cad bcom pa/ rtsod pa med pa/ chos kyi mchog dang ldan pa/ rgya mtsho thams cad pas ches zab pa/ ri rab thams cad pas ches mtho ba/ sa bas ches brtan pa/ chu bas ches mnyan pa/ /me bas ches 'bar ba/ rlung bas ches chags pa med pa/ nam mkha' bas ches dri ma med pa/ yid kyi 'gro bas ches mgyogs pa yid bzhin gyi nor bu bas ches khyad par du 'phags pa/ thams cad mkhyen pa/ sems can thams cad la mtshungs par sbyor ba/ chags pa thams cad dang bral ba/ sems can thams cad la phan par brtson pa'i rgyun ma chad pa/ gzugs tshad med pa/ sgra tshad med pa/ yon tan tshad med pa/ yul tshad med pa/ bsam gyis mi khyab pa/ sangs rgyas kyi chos bsam gyis mi khyab pa dang ldan pa/ sems dang / yid dang / yid kyi rnam par shes pa'i yul las yang dag par 'das pa/ rig pa dang / zhabs kyi sems dang ldan pa/ lam gyi sdig pa rnams yang dag par chad pa/ snying rje chen po'i lhag pa'i bsam pa can/ sems can thams cad dang thun mong pa'i yon tan can/ sems can thams cad kyang pha ma lta bur gyur pa/ dgra zun la sems snyoms pa ste/ ste'u dang / tsan+dan du mtshungs pa/ sems can tha ma dang / 'bring dang / mchog thams cad la thams cad du rtag tu gsal bar byed pa'i chos can/ /pha rol gyis dpag par dka' ba/ sems can chen po'i longs spyod chen po/ rig pa dang zhabs su ldan pa chen po/ chos gsung ba chen po/ 'dul ba gsung ba chen po/ skyes bu chen po'i mtshan dang ldan pa/ 'jig rten thams cad kyi snang bar gyur pa/ rnal 'byor chen po la rnal 'byor pa bsam gtan chen po'i spyod yul ba/ rnam par grol ba chen po phun sum tshogs pa/ bdag nyid che ba/ skye bo chen po'i zhabs 'bring ba dang ldan pa/ skye bo khyad par can gyi zhabs 'bring ba dang ldan pa/ lta ba dang / nyan pa dang ston pa dang / bsnyen bkur byed pa ni mi bzlog pa dang / bdag gi bde ba la mi lta ba/ gzhan gyi sdug bsngal zhi bar byed pa la dgyes pa/ chos la gzhol ba/ chos kyi nor can/ chos kyi zas can/ chos kyi sman can/ chos kyi gter can/ chos kyi dbang phyug /chos kyi bdag po/ chos kyi sbyin bdag /rtag tu gtong ba la mngon par dgyes pa/ rtag tu bag yod pa/ rtag tu dben pa la mngon par dgyes pa/ thams cad du stegs dang zam par gyur pa/ rgyal po'i lam chen po dang 'dra ba/ nyi ma chen po dang 'dra ba/ tshangs pa chen po dang 'dra ba/ ye shes chen po'i rdo rje 'chang ba/ chos chen po'i dbugs 'byin pa/ gzugs blta bas mi ngoms pa/ mthong bas mi ngoms pa ste/ sangs rgyas bcom ldan 'das de dag de ltar rjes su dran no/ /de ltar de dag rjes su dran pas de dag gi yon tan yongs su bsgrub pa'i phyir sbyor ro/ /dran pa nye bar 'jog go/ /brtson 'grus rtsom mo/ /de'i phyir sangs rgyas rjes su dran pa zhes bya ste/ 'di ni byang chub sems dpa'i sangs rgyas rjes su dran pa'i dran pa nye bar gzhag pa zhes bya'o/ /de la byang chub sems dpa'i chos rjes su dran pa'i dran pa nye bar gzhag pa gang zhe na/ 'di la byang chub sems dpa' 'di snyam du sems te/ gang sangs rgyas bcom ldan 'das de dag ni yon tan mtha' yas mu med pa ste/ de dag ni chos las skyes pa/ chos kyi bgo skal la spyod pa/ chos kyis sprul pa/ chos kyi bdag por gyur pa/ chos las byung ba/ chos kyi spyod yul/ chos la rton pa/ chos kyis grub pa ste/ gang sangs rgyas bcom ldan 'das rnams kyi mtshan dang dpe byad bzang po de dag kyang chos las skyes pa/ chos kyis rnyed pa/ chos kyis grub pa'o/ /gang de bzhin gshegs pa rnams kyi de bzhin gshegs pa'i stobs bcu dang mi 'jigs pa bzhi po de dag kyang chos las skyes pa/ chos kyis rnyed pa/ chos kyis grub pa'o/ /gang de bzhin gshegs pa rnams kyi sangs rgyas kyi chos ma 'dres pa bco brgyad po de dag kyang chos las skyes pa/ chos kyis rnyed pa/ chos kyis grub pa'o/ /gang 'jig rten pa dang / 'jig rten las 'das pa'i bde ba yod pa de dag kyang chos las skyes pa/ chos kyis rnyed pa/ chos kyis grub pa'o/ /de lta bas na bdag sangs rgyas kyi byang chub tshol bas chos gtso bor bya'o/ /chos spyod yul ba dang / chos la brten pa dang / chos la gzhol ba dang / chos snying por byed pa dang / chos kyi rjes su mthun pa'i chos bsgrub par bya'o snyams pa 'di ni byang chub sems dpa'i chos rjes su dran pa'i dran pa nye bar gzhag pa zhes bya'o/ /gzhan yang byang chub sems dpa' 'di snyam du sems te/ chos ni sems can thams cad la mnyam par 'jug pas chos ni tha ma dang 'bring dang rab mthong nas 'jug pa ma yin te/ de ltar bdag gis kyang chos dang 'dra ba'i sems su bya'o/ /chos ni phyogs su ma lhung ba/ chos ni ngor lta zhing 'jug pa ma yin te/ de ltar bdag gis kyang chos dang 'dra ba'i sems su bya'o/ /chos ni dus chad pa med pa 'di mthong la don yod pa rang gis rig pas chos ni dus la lta zhing 'jug pa ma yin te/ de ltar bdag gis kyang chos dang 'dra ba'i sems su bya'o/ /chos ni mthon dman med pas chos ni rgya che ba la 'jug pa ma yin/ dman pa la 'jug pa ma yin te/ de ltar bdag gis kyang chos dang mthun pa'i sems su bya'o/ /chos ni mchog dang tha ma dang bral bas chos ni rnam par dag pa la 'jug pa yang ma yin/ nyams pa la 'jug pa yang ma yin te/ de ltar bdag gis kyang chos dang 'dra ba'i sems su bya'o/ /chos ni zhing dang zhing ma yin pa'i lta ba dang bral bas chos ni 'phags pa la 'jug pa yang ma yin/ so so'i skye bo la 'jug pa yang ma yin te/ de ltar bdag gis kyang chos dang 'dra ba'i sems su bya'o/ /chos ni rtag pa rgyun mi 'chad par 'jug pas chos ni nyin mo 'jug pa ma yin/ mtshan mo 'jug pa ma yin/ mtshan mo 'jug la nyin mo mi 'jug pa ma yin te/ de ltar na bdag gis kyang chos dang 'dra ba'i sems su bya'o/ /chos ni gang la yang nam yang sdod pa ma yin pas chos ni 'dul ba'i chos las kyang mi 'da' ste/ de ltar bdag gis kyang chos dang 'dra ba'i sems su bya'o/ /chos ni thams cad du 'dod pa med pas chos ni snang ba thams cad la zhe 'gras pa yang med/ dad pa rnams la rjes su chags pa yang med de/ de ltar bdag gis kyang chos dang 'dra ba'i sems su bya'o/ /chos ni bri ba yang ma yin gang ba yang ma yin te/ dpag tu med pa grangs med pas nam mkha' ltar bri ba yang ma yin 'phel ba yang ma yin te/ de ltar na bdag gis kyang chos dang 'dra ba'i sems su bya'o/ /chos ni sems can rnams kyis bsrung ba ma yin gyi/ chos kyis sems can rnams bsrung ste/ de ltar bdag gis kyang chos dang 'dra pa'i sems su bya'o/ /chos ni skyabs yongs su tshol ba ma yin pas/ chos ni 'jig rten thams cad kyi skyabs yin te/ de ltar bdag gis kyang chos dang 'dra ba'i sems su bya'o/ /chos ni thogs pa med pa'i mtshan nyid pas chos ni gang la yang thogs pa med de/ de ltar bdag gis kyang chos dang 'dra ba'i sems su bya'o/ /chos ni bag la nyal la mi 'jug ste/ de ltar bdag gis kyang chos dang 'dra ba'i sems su bya'o/ /chos ni rtag tu rnam par mi rtog pas chos ni 'khor pas 'jigs skrag pa yang ma yin/ mya ngan las 'das pa la rjes su chags pa yang ma yin te/ de ltar bdag gis kyang chos dang 'dra ba'i sems su bya'o snyam mo/ /de ltar na byang chub sems dpa' chos la chos ltar dran pa nye bar 'jog pas de'i phyir chos rjes su dran pa zhes bya ba ste/ rigs kyi bu 'di ni byang chub sems dpa'i chos rjes su dran pa'i dran pa nye bar gzhag pa zhes bya'o/ / de la byang chub sems dpa'i dge 'dun rjes su dran pa'i dran pa nye bar gzhag pa gang zhe na/ 'di la byang chub sems dpa' 'di snyam du sems te/ dge 'dun ni chos smra ba/ chos spyod pa/ chos sems pa/ chos kyi zhing / chos 'dzin pa chos la rton pa/ chos la mchod pa/ chos kyi bya ba byed pa/ chos spyod yul ba/ chos spyod pa/ phun sum tshogs pa/ rang bzhin gyis drang pa/ rang bzhin gyis dag pa/ snying rje'i chos can/ snying rje dang ldan pa/ rtag tu dben pa la spyod pa/ rtag tu chos la gzhol pa/ rtag tu dkar po spyod pa'o snyam mo/ /gzhan yang byang chub sems dpa' ni 'di snyam du sems te/ bcom ldan 'das kyis dge 'dun rnam pa du mar gsungs pa ni/ 'di lta ste/ kun rdzob kyi dge 'dun dang / don dam pa'i dge 'dun dang / ngo tsha shes pa'i dge 'dun dang / ngo tsha med pa'i dge 'dun dang / 'phags pa'i dge 'dun dang / cang shes kyi dge 'dun dang / phyir mi ldog pa'i dge 'dun no snyam mo/ /de la byang chub sems dpa' ni kun rdzob kyi dge 'dun bsdu ba'i phyir nan tan byed do/ /don dam pa'i dge 'dun la brten pa'i phyir nan tan byed do/ /ngo tsha med pa'i dge 'dun yongs su gdul bar bya ba'i phyir nan tan byed de/ 'phags pa'i dge 'dun la mchod cing bsti stang du bya ba'i phyir rim gro byed do/ /cang shes kyi dge 'dun la sangs rgyas bzhin du nan tan byed do/ /phyir mi ldog pa'i dge 'dun la chos kyi gtam gyi phyir nan tan byed do/ /gzhan yang byang chub sems dpa' 'di snyam du sems te/ rigs 'dzin pa'i phyir sangs rgyas kyi sras rnams kyi dge 'dun yin no/ /yid du 'ong ba'i 'bras bu rab tu sbyin pa'i phyir zhing bzang po rnams kyi dge 'dun no/ /gnas ngan len dang bral ba'i phyir 'jigs pa med pa rnams kyi dge 'dun no/ /yongs su 'dzin pa gtong zhing 'dor ba'i phyir sems rnam par grol pa rnams kyi dge 'dun no/ /shin tu dul ba'i phyir cang shes rnams kyi dge 'dun no/ /ma 'dres pa'i phyir nyon mongs pa med pa rnams kyi dge 'dun no/ /sdig pa dang bral ba'i phyir ngo tsha shes pa rnams kyi dge 'dun no/ /bka' bla bde pa'i phyir slob ma rnams kyi dge 'dun no/ /bdag yongs su shes pa dang ldan pa'i phyir bdag gi ba med pa rnams kyi dge 'dun no/ / zha ba'i phyir rgyags pa med pa rnams kyi dge 'dun no/ /'dod pa nyung ba'i phyir phyin ci log pa rnams kyi dge 'dun no/ /rnam par rtog pa yang dag par chad pa'i phyir nad med pa rnams kyi dge 'dun no/ /pha rol du son pa'i phyir thang la gnas pa rnams kyi dge 'dun no/ /thang la gnas pa'i phyir bde ba thob pa rnams kyi dge 'dun no/ /de kho na nyid mthong ba'i phyir bag yod pa rnams kyi dge 'dun no/ /skyon ma chags pa'i phyir dgon pa rnams kyi dge 'dun no/ /rgya che ba'i phyir byang chub la gzhol ba rnams kyi dge 'dun no/ /bslab pa gsum gyi bya ba shes pa'i phyir bslab pa 'dod pa rnams kyi dge 'dun no/ /dran pa nye bar gzhag pa spyod yul ba'i phyir dran pa dang ldan pa rnams kyi dge 'dun no/ /yang dag par spong ba spyod yul pa'i phyir brtson 'grus brtsams pa rnams kyi dge 'dun no/ /rdzu 'phrul gyi rkang pa spyod yul de'i phyir ngal ba med pa rnams kyi dge 'dun no/ /dbang po spyod yul pa'i phyir mi phyed pa rnams kyi dge 'dun no/ /stobs spyod yul ba'i phyir tsher ma dkrugs pa rnams kyi dge 'dun no/ /byang chub kyi yan lag spyod yul pa'i phyir sgrib pa med pa rnams kyi dge 'dun no/ /lam spyod yul pa'i phyir yang dag par lta ba rnams kyi dge 'dun no/ /bden pa spyod yul pa'i phyir 'phags pa rnams kyi dge 'dun no/ /bsam gtan spyod yul pa'i phyir mnyam par gzhag pa rnams kyi dge 'dun no/ /rten cing 'brel par 'byung ba spyod yul ba'i phyir chos kyi 'khor lo rab tu bskor ba rnams kyi dge 'dun no/ /snying rje chen po dang ldan pa'i phyir phyir mi ldog pa rnams kyi dge 'dun no/ /bsod nams thams cad kyi tshogs bsags pa'i phyir skye ba gcig gis thogs pa rnams kyi dge 'dun no snyam mo/ /de la byang chub sems dpa' 'di ltar dge 'dun rjes su dran pas 'di snyam du sems te/ gang dge 'dun gyi yang dag pa'i yon tan de dag ni bdag dang sems can thams cad kyis kyang bsgrub par bya'o snyam pa 'di ni byang chub sems dpa'i dge 'dun rjes su dran pa'i dran pa nye bar gzhag pa zhes bya'o/ /de la byang chub sems dpa'i tshul khrims rjes su dran pa'i dran pa nye bar gzhag pa gang zhe na/ 'di la byang chub sems dpa' 'di snyam du sems te/ gang 'jig rten pa dang / 'jig rten las 'das pa'i phun sum tshogs pa gang ci yang rung ba de dag thams cad tshul khrims las byung bar blta'o/ /de ci'i phyir zhe na/ tshul khrims ni phun sum tshogs pa de dag thams cad kyi gnas yin no/ /'di lta ste dper na sa ni sman dang rtswa dang nags tshal thams cad kyi gnas yin no/ /de bzhin du tshul khrims kyang phun sun tshogs pa thams cad kyi gnas yin no/ /byang chub sems dpa' tshul khrims kyi gnas la rab tu gnas pa'i lha dang bcas pa'i 'jig rten gyi sbyin gnas yin no/ /sbyin pa'i chos yongs su rdzogs par byed do/ /tshul khrims kyi gnas la rab tu gnas pa'i byang chub sems dpa' ni dga' ba skye ba'o/ /yid dga' bas 'gyod pa med do/ /'gyod pa med pas mchog tu dga' ba thob po/ /mchog tu dga' bas lus dang sems shin tu sbyangs par 'gyur ro/ /lus dang sems shin tu sbyangs pas ting nge 'dzin thob bo/ /yid mnyam par gzhag pas yang dag pa ji lta ba bzhin du mthong ba ma yin no/ /yang dag pa ji lta ba bzhin du mthong pa'i byang chub sems dpa' ni sems can rnams la snying rje chen po 'jug go snyam mo/ /de yang 'di snyam du sems te/ bdag gis sems can thams cad la ting nge 'dzin gyi sgo 'di dang chos rnams yang dag pa ji lta ba bzhin du mthong ba bsgrub par bya'o snyam mo/ /de snying rje chen po des bskul bas lhag pa'i tshul khrims dang / lhag pa'i sems dang / lhag pa'i shes rab kyi bslab pa yongs su rdzogs nas bla na med pa yang dag par rdzogs pa'i byang chub tu mngon par rdzogs par 'tshang rgya'o/ /de bas na bdag gis kyang tshul khrims la gnas pa mi bskyod pa mi lhod par bya'o/ /sems can thams cad mngon du byas nas tshul khrims bsrung bar bya'o snyam mo/ /de ci'i phyir zhe na/ byang chub sems dpa'i tshul khrims de ni sems can thams cad la phan pa dang bde ba'i phyir gnas la mi gnas pa ma yin no/ /gzhan yang byang chub sems dpa' 'di snyam du sems te/ byang chub sems dpa'i mngon par 'byung ba'i tshul khrims ni gnod sems med pa yongs su rdzogs par byed do/ /byang chub sems dpa' rab tu byung ba'i tshul khrims ni bdog pa thams cad yongs su gtong ba rdzogs par byed do/ /byang chub sems dpa'i bslab pa dang sdom pa yang dag par 'dzin pa'i tshul khrims ni lus dang ngag dang sems yongs su dag pa yongs su rdzogs par byed do/ /byang chub sems dpa'i nges par sems pa'i tshul khrims ni mngon par shes pa drug yongs su rdzogs par byed do/ /byang chub sems dpa'i nang du yang dag 'jog pa'i tshul khrims ni byang chub kyi phyogs kyi chos rnams yongs su rdzogs par byed do/ /byang chub sems dpa'i chos nyan pa'i tshul khrims ni so so yang dag par rig pa bzhi yongs su rdzogs par byed do/ /byang chub sems dpa'i thos pa yongs su tshol ba'i tshul khrims ni nga rgyal med pa yongs su rdzogs par byed do/ /byang chub sems dpa'i dge ba'i bshes gnyen la bsnyen bkur byed pa'i tshul khrims ni yon tan gyi chos thams cad chud mi za ba yongs su rdzogs par byed do/ /byang chub sems dpa'i pha rol tu phyin pa'i tshul khrims ni thams cad mkhyen pa'i ye shes yongs su rdzogs par byed do/ /byang chub sems dpa' ji ltar thos pa'i chos rnams ston pa'i tshul khrims ni chos smra ba nyid yongs su rdzogs par byed do/ /byang chub sems dpa' ji ltar thos pa'i chos rnams sems pa'i phyir tshul khrims ni gzungs dang spobs pa thob pa yongs su rdzogs par byed do/ /byang chub sems dpa'i byang chub kyi sems kyi tshul khrims ni skye ba thams cad la yang dag par 'da' bar yongs su rdzogs par byed do/ /byang chub sems dpa'i sems can thams cad la khong khro ba med pa'i tshul khrims ni byang chub kyi sems chud mi za ba yongs su rdzogs par byed do/ /byang chub sems dpa'i byang chub kyi sems chud mi za ba'i tshul khrims ni dkon mchog gsum chud mi za ba yongs su rdzogs par byed do snyam mo/ /de yang 'di snyam du sems te/ tshul khrims bsrung bas srung ba thams cad bsrungs pa yin no snyam pa 'di ni rigs kyi bu byang chub sems dpa'i tshul khrims rjes su dran pa'i dran pa nye bar gzhag pa zhes bya'o/ /de la byang chub sems dpa'i gtong ba rjes su dran pa'i dran pa nye bar gzhag pa gang zhe na/ 'di la byang chub sems dpa' 'di snyam du sems te/ gang ci stong pa de thams cad ni 'di lta ste/ zang zing gi gtong ba dang / chos kyi gtong ba dang gtong ba rnam pa gnyis kyi nang du 'dus so snyam mo/ /de la zang zing gi gtong bas ni byang chub sems dpa'i mtshan dang dpe byad bzang po yongs su mi spong ba dang / sangs rgyas kyi zhing yongs su dag pa dang / sems can yongs su smin par byed pa rnam par dag pa yongs su rdzogs par byed do/ /chos kyi gtong bas ni stobs bcu dang / mi 'jigs pa bzhi dang / sangs rgyas kyi chos ma 'dres pa bco brgyad yongs su rdzogs par byed do/ /bag chags kyang yang dag par 'jog par byed do/ /gzhan yang zang zing gi gtong bas ni phung po thams cad nges par 'dor bar byed do/ /chos kyi gtong bas ni nyan thos dang rang sangs rgyas thams cad kyis las yang dag par 'da'o/ /gzhan yang zang zing gi gtong bas ni skye ba'i lus yongs su sbyor bar byed do/ /chos kyi gtong bas ni chos kyi sku yongs su sbyor bar byed do/ /gzhan yang rigs kyi bu byang chub sems dpa' sems dpa' chen po zang zing gi gtong bas ni pham las byung ba'i stobs sgrub par byed/ /stobs de ni de bzhin gshegs pa dang sa bcu la gnas pa'i byang chub sems dpa' rnams ma gtogs par su la yang med do/ /chos kyi gtong bas ni rdzu 'phrul gyi stobs sgrub par byed do/ /stobs de ni de bzhin gshegs pa dang sa bcu pa la gnas pa'i byang chub sems dpa' ma gtogs par su la yang med do/ /gzhan yang zang zing gi gtong bas ni yongs su smin par byed do/ /chos kyi gtong bas ni rnam pa tha dad par byed do/ /gzhan yang zang zing gi gtong bas ni tshogs stsogs so/ /chos kyi gtong bas ni sgrol lo/ /gzhan yang zang zing gi gtong bas ni nor yongs su gtong ngo / /chos kyi gtong bas ni thams cad gtong ngo / /gzhan yang zang zing gi gtong bas ni nyon mongs pa'i sgrib pa las rnam par grol ba sgrub par byed do/ /chos kyi gtong bas ni shes bya'i sgrib pa las rnam par grol ba sgrub par byed do/ /gzhan yang gtong ba zhes bya ba 'di ni yongs su rtog pa gtong ba'i tshig bla dgas so/ /'di lta ste/ yongs su rtog pa gtong ba de ni gtong ba rnams kyi dam pa'o/ /de ci'i phyir zhe na/ yongs su rtog pa btang bas byang chub sems dpa' dag pa zhes bya'o/ /smras pa/ rigs kyi bu yongs su rtog pa zhes bya ba 'di de gang gi tshig bla dgas/ smras pa rigs kyi bu yongs su rtog pa zhes bya ba 'di ni yang dag pa ma yin zhing / med pa las sgro btags pa'i tshig bla dgas so/ /smras pa/ ji ltar na yang dag pa ma yin zhing med pa las sgro btags pa yin/ smras pa/ nam 'di ltar bdag ni chags pa/ bdag ni zhe sdang ba/ bdag ni gti mug pa/ bdag ni nyon mongs pa/ bdag ni rnam par dag pa/ bdag ni bcings pa/ bdag ni grol ba/ bdag ni 'khor ba/ bdag ni yongs su mya ngan 'das pa'o snyam pa la sogs par sgro btags pa thams cad ni yang dag pa ma yin zhing med pa las yongs su btags pa'o/ /de ci'i phyir zhe na/ 'di dag thams cad ni rgyu dang rkyen tsam ste/ 'di la bdag dang bdag gi ba med pa/ sems can med/ srog med/ gang zag med/ shed las skyes med do/ /shed bu med do/ /rgyu dang rkyen de dag kyang rang bzhin gyis stong pa/ rang bzhin gyis dben pa/ sems dang yid dang yid kyi rnam par shes pa dang bral ba/ mi sems pa/ yongs su mi rtog pa/ kun nas nyon mongs pa ma yin pa/ rnam par byang ba ma yin pa/ 'khor ba ma yin pa/ yongs su mya ngan las 'das pa ma yin pa'o/ /de la byang chub sems dpa' yod pa ma yin pa la sgro mi 'dogs shing de sgro 'dogs pa btang bas gtong ba phun sum tshogs pa zhes bya'o/ /nam chos de dag rjes su dran pa de ni de'i gtong ba rjes su dran pa zhes bya'o/ /gzhan yang rigs kyi bu byang chub sems dpa' rnams kyi gtong ba rnam pa gsum ste/ gtong ba dang /gtang ba chen po dang / shin tu gtong ba'o/ /de la byang chub sems dpa' rnams kyi gtong ba gang zhe na/ 'di lta ste/ bza' ba dang / 'dod pa rnams la bza' ba'i sbyin pa dang / btung ba dang / bzhon pa dang / gos dang / mar me dang / bdug spos dang / phreng ba dang / byug pa dang / phye ma dang / gos dang / gdugs dang / rgyal mtshan dang / ba dan dang / shing rta dang / rgyan la sogs pa sbyin pa ste/ sbyin pa gang sems can rnams la gnod pa dang / phangs par 'gyur ba de ma gtogs par byang chub sems dpa' sems can rnams la mi sbyin pa gang yang med de/ 'di ni byang chub sems dpa' rnams kyi gtong ba zhes bya'o/ /de la byang chub sems dpa' rnams kyi gtong ba chen po gang zhe na/ 'di la byang chub sems dpa' rnams kyi gtong ba phun sum tshogs nas gtong ba chen po byed de/ 'di lta ste/ chung ma dang / bu dang / bu mo dang / yid du 'ong ba'i bran pho dang / bran mo dang / las byed pa dang / zho shas 'tsho ba dang / khyim dang / rgyal srid rnams yongs su gtong ba 'di ni byang chub sems dpa'i gtong ba chen po zhes bya'o/ /de la byang chub sems dpa' rnams kyi shin tu gtong ba gang zhe na/ 'di la byang chub sems dpa' gtong ba dang / gtong ba chen po phun sum tshogs nas shin tu gtong ba byed de/ 'di lta ste/ lag pa dang / rkang pa dang / rna ba dang / sna dang / sha dang / rus pa dang / pags pa dang / mig dang / lce dang / mgo rus dang / rkang la sogs pa yongs su gtong ba ste/ 'di ni byang chub sems dpa'i shin tu gtong ba zhes bya'o/ /de la byang chub sems dpa' des gtong ba dang / gtong ba chen po dang / shin tu gtong ba de dag rjes su dran nas bdag gis kyang dran pa de dag yongs su rdzogs par bya'o snyam pa de ni de'i gtong ba rjes su dran pa zhes bya ste/ 'di ni byang chub sems dpa'i gtong ba rjes su dran pa'i dran pa nye bar gzhag pa zhes bya'o/ /de la byang chub sems dpa'i lha rjes su dran pa'i dran pa nye bar gzhag pa gang zhe na/ 'di la byang chub sems dpa' ni gang rnam par dag pa'i lha nyan thos dang / rang sangs rgyas dang / byang chub sems dpa' dang / yang dag par rdzogs pa'i sangs rgyas de dag rjes su dran no/ /'di ltar de dag rjes su dran te sgrub pa dang / yon tan dang / skye ba dang / longs spyod dang / kun spyod pa dang / rtsom pa dang / rab tu thob pa dang / yongs su grub pas kyang rjes su dran pa'i dran pa nye bar gzhag pa zhes bya'o/ /gang lha gzhan de dag kyang rjes su dran no/ /'di ltar de dag rjes su dran te/ lha 'di dag ni las dge ba'i 'bras bu las byung ba'o/ /dge ba'i las de dag ni 'di lta ste/ mi dge ba bcu'i las kyi lam las bzlog pa rnams so/ /de la lha gang rnams kha dog dang ldan pa/ bde ba mnga' ba/ dbang po tshim pa/ de thams cad ni dge ba bcu'i las kyi lam gyi rnam par smin pa'o snyam ste/ de la byang chub sems dpa' lha'i bde ba de la rjes su yi rang nas sems can thams cad la phan pa'i phyir bla na med pa yang dag par rdzogs pa'i byang chub tu yongs su bsngo'o/ /lha'i bde ba de yang sems can thams cad kyir 'dod do/ /bde ba de sems can thams cad kyir 'dod pas/ dge ba'i rtsa ba yongs su grub par bya ba'i phyir brtson 'grus chen po rtsom mo/ /ngan song rnams su skyes pa'i sems can dag la snying rje chen po bskyed de/ de 'di snyam du bdag gis 'di ltar sems can thams cad lha'i 'jig rten du skye bar 'gyur ba'i las byed du gzung ngo / /sems can thams cad gang dag lhar gyur pa de dag ni bla na med pa yang dag par rdzogs pa'i byang chub mngon par rdzogs par 'tshang rgya bar bya'o/ /gang gis sems can rnams la lha'i bde ba thob nas phyis nyams par mi 'gyur ba dang / bde bar gyur nas 'di lta ste/ de bzhin gshegs pa'i nye bar zhi ba'i bde ba thob par 'gyur ba'i las de dag sems can rnams byed du gzhug go snyam du sems pa 'di ni byang chub sems dpa'i lha rjes su dran pa'i dran pa nye bar gzhag pa zhes bya ste/ rigs kyi bu de dag ni byang chub sems dpa' rnams kyi dran pa nye bar gzhag pa bcu'o zhes bya ste/ de dag dang ldan pas na/ de nyid dran pa chen po 'chang / /zhes bya'o/ /dran pa'i ngo bo nyid stong pa nyid dang / mtshan ma med pa dang / smon pa med pa dang / rang bzhin gyis 'od gsal ba'i dran pa'i tshul can dpa' bar 'gro ba la sogs pa'i ting nge 'dzin brgya stong gi bdag por gyur bas na/ dran pa bzhi po ting 'dzin rgyal/ /zhes bya'o/ /byang chub yan lag me tog spos/ /de bzhin gshegs pa'i yon tan mtsho/ /zhes bya ba la/ byang chub kyi yan lag rnams nyid ni me tog ste/ de rnams kyi dri ni 'jig rten gyi khams ma lus pa'i rab 'byam khyab pa'i yon tan dang ye shes kyi rang bzhin gyi dri ni khyad par gang la yod pa de ni/ byang chub yan lag me tog spos/ /zhes bya'o/ /de la byang chub kyi yan lag bdun gang zhe na/ 'di lta ste/ dran pa yang dag byang chub kyi yan lag dang / chos rnam par 'byed pa yang dag byang chub kyi yan lag dang / brtson 'grus yang dag byang chub kyi yan lag dang / dga' ba yang dag byang chub kyi yan lag dang / shin tu sbyangs pa yang dag byang chub kyi yan lag dang / ting nge 'dzin yang dag byang chub kyi yan lag dang / btang snyoms yang dag byang chub kyi yan lag go/ /de la dran pa yang dag byang chub kyi yan lag gang zhe na/ dran pa gang gis chos rnams rtogs par 'gyur ba dang / chos rnams so sor rtog pa dang / chos rnams la dpyod pa dang / chos rnams la kun du 'gro ba dang / chos rnams la bsam pa dang / chos rnams la rjes su rtog pa ste/ de dran pa des chos rnams kyi rang gi mtshan nyid rtogs par 'gyur ro/ /chos rnams kyi rang gi mtshan nyid gang zhe na/ chos thams cad ni rang gi mtshan nyid kyis stong ste/ gang gis de ltar dran zhing rtogs pa 'di ni dran pa yang dag byang chub kyi yan lag ces bya'o/ /de la chos rnam par 'byed pa yang dag byang chub kyi yan lag gang zhe na/ gang chos kyi phung po brgyad khri bzhi stong rab tu rnam par 'byed pa shes pa ste/ chos gang dang / gang ji lta ji lta bur rnam par dbye bar bya ba nges pa'i don kyang nges pa'i don du/ drang ba'i don kyang drang ba'i don du/ kun rdzob kyi don kyang kun rdzob kyi don du/ don dam pa yang don dam par/ brda yang brdar/ rnam par nges pa yang rnam par nges par/ chos de dang de dag de lta de lta bur rnam par 'byed pa'i 'di ni chos rnam par 'byed pa yang dag byang chub kyi yan lag ces bya'o/ /de la brtson 'grus yang dag byang chub kyi yan lag gang zhe na/ gang dran pa 'di dang / chos rnam par 'byed pa dang / dga' ba dang / shin tu sbyangs pa dang / ting nge 'dzin dang / btang snyoms shes pa 'di rab tu 'dzin pa dang / spro ba dang / stobs dang / brtul ba dang / phyir mi ldog pa dang / 'dun pa dang / mthu dang / brtson pa mi gtong ba dang / lam mngon par rtogs par bya ba'i phyir brtson pa 'di ni brtson 'grus yang dag byang chub kyi yan lag ces bya'o/ /de la dga' ba yang dag byang chub kyi yan lag gang zhe na/ chos la dga' ba dang / chos la mos pa dang / chos la mchog tu dga' ba gang gis sems ma gong ba dang / dad cing 'dod pa ste/ chos la dga' ba gang gis lus dang sems shin tu sbyangs bar 'gyur ba dang / nyon mongs pa rnams sel ba 'di ni dga' ba yang dag byang chub kyi yan lag ces bya'o/ /de la shin tu sbyangs pa yang dag byang chub kyi yan lag gang zhe na/ gang lus shin tu sbyangs pa dang / sems shin tu sbyangs pas nyon mongs pa bsal ba dang / sgrib pa dang bral ba dang / zhi gnas la 'jug pa'i dmigs pa la sems gzhol ba 'di ni shin tu sbyangs pa yang dag byang chub kyi yan lag ces bya'o/ /de la ting nge 'dzin yang dag byang chub kyi yan lag gang zhe na/ gang sems mnyam par gzhag pas chos kyi ye shes mngon par rdzogs par 'tshang rgya'o/ sems mnyam par ma bzhag pas ni ma yin no/ /gang sems mnyam par gzhag pas chos de dag mngon par 'tshang rgya'o/ /sems mnyam par ma bzhag pas ni ma yin te/ lta ba dang bag la nyal dang kun nas ldang ba de dag bor bas kyang mngon par rdzogs par 'tshang mi rgya ste/ gzhan du na chos thams cad mnyam pa nyid dang / chos thams cad tha dad du dbye ba med pas chos thams cad mnyam pa nyid du mngon par rdzogs par 'tshang rgya ste/ 'di ni ting nge 'dzin yang dag byang chub kyi yan lag ces bya'o/ / de la btang snyoms yang dag byang chub kyi yan lag gang zhe na/ gang 'di yid bde ba dang yid mi bde ba cha dang mthun pa'i chos rnams kyis sems yongs su mi gtugs pa dang / 'jig rten gyi chos rnams kyis mi 'phrogs pa dang mtho dman du mi gnas pa'i phyir mi sgul ba yin/ gnod pa med pa dang / 'phrogs pa med pa dang / rjes su chags pa med pa dang / zhe 'gras pa med pa dang / 'phags pa'i bde ba'i lam dang mthun pa 'di ni/ btang snyoms yang dag byang chub kyi yan lag ces bya ste/ de ltar na/ byang chub yan lag me tog spos/ /zhes bya'o/ /de bzhin gshegs pa'i yon tan mtsho/ /zhes bya ba la/ de bzhin gshegs pa'i yon tan 'di la sems shing rtog pas de bzhin gshegs pa'i yon tan mtsho ste/ de bzhin gshegs pa thams cad kyi gzhir gyur pa'i phyir ram thun mong ma yin pa'i yon tan ni ma 'dres pa'i chos la sogs pa ste/ de'i gzhir gyur pa'i phyir ro/ /de yang shes rab kyi pha rol tu phyin pa nyi khri lnga stong pa zhes bya ba theg pa chen po ston pa las/ thun mong ma yin pa'i yon tan rnams gsungs te/ rab 'byor gzhan yang byang chub sems dpa' sems dpa' chen po rnams kyi theg pa chen po ni 'di lta ste/ sangs rgyas kyi chos ma 'dres pa bco brgyad gang zhe na/ de bzhin gshegs pa la 'khrul pa mi mnga'o/ /ca co mi mnga'o/ / dgongs pa nyams pa mi mnga'o/ /'du shes sna tshogs mi mnga'o/ /thugs mnyam par ma bzhag pa mi mnga'o/ /ma brtags pa'i btang snyoms mi mnga'o/ /mos pa yongs su nyams pa mi mnga'o/ /brtson 'grus yongs su nyams pa mi mnga'o/ /dgongs pa yongs su nyams pa mi mnga'o/ /ting nge 'dzin yongs su nyams pa mi mnga'o/ /shes rab yongs su nyams pa mi mnga'o/ /rnam par grol ba yongs su nyams pa mi mnga'o/ /rnam par grol ba'i ye shes gzigs pa yongs su nyams pa mi mnga'o/ /sku'i phrin las thams cad ye shes sngon du 'gro ba ste/ ye shes kyi rjes su 'brang ngo / /gsung gi phrin las thams cad ye shes sngon du 'gro ba ste/ ye shes kyi rjes su 'brang ngo / /thugs kyi phrin las thams cad ye shes sngon du 'gro ba ste/ ye shes kyi rjes su 'brang ngo / /'das pa'i dus la ma chags ma thogs pa'i ye shes gzigs pa 'jug go/ /ma 'ongs pa'i dus la ma chags ma thogs pa'i ye shes gzigs pa 'jug go/ /da ltar byung ba'i dus la ma chags ma thogs pa'i ye shes gzigs pa 'jug ste/ de dag ni sangs rgyas kyi chos ma 'dres pa rnams so zhes rgya cher gsungs pa yin no/ /lam gyi yan lag brgyad tshul rig /yang dag sangs rgyas lam rig pa/ /zhes bya ba la 'phags pa'i lam yan lag brgyad pa'i rig pa ni nyan thos dang rang sangs rgyas rnams dang thun mong du ma gyur pa yongs su mkhyen pa'o/ /de nyid kyis ni sangs rgyas lam rig pa'o/ /'di ni blo gros mi zad pas bstan pa'i mdo las gsungs te/ btsun pa sha ra dwa ti'i bu gzhan yang byang chub sems dpa' rnams kyi lam mi zad pa ste/ de la byang chub sems dpa' rnams kyi lam gang zhe na/ lam zhes bya ba ni 'phags pa'i lam yan lag brgyad pa ste/ 'di lta ste/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin to/ /de la yang dag pa'i lta ba gang zhe na/ gang 'di 'phags pa'i 'jig rten las 'das pa ste/ bdag tu lta ba las kun nas langs pa ma yin te/ sems can du ma yin/ srog tu ma yin/ gso bar ma yin/ skyes bur ma yin/ gang zag tu ma yin/ shed las skyes su ma yin/ shed bur ma yin/ byed pa por ma yin/ tshor ba por lta ba las kun nas langs pa ma yin/ rtag pa dang / chad par lta ba las kun nas langs pa ma yin/ 'byung ba dang / 'jig par lta ba las kun nas langs pa ma yin/ dge ba dang / mi dge ba dang / lung du mi ston par lta ba las kun nas langs pa yang ma yin pa nas 'khor ba dang mya ngan las 'das par lta ba'i bar las kun nas langs pa yang ma yin ste 'di ni yang dag pa'i lta ba zhes bya'o/ /de la yang dag pa'i rtog pa gang zhe na/ rtog pa gang dag gis 'dod chags dang / zhe sdang dang / gti mug gi nyon mongs pa dag kun du 'byung ba'i kun du rtog pa de dag la mi rtog pa dang / rtog pa gang gis tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes mthong ba'i phung po rnams kun du 'byung ba'i rnam par rtog pa de dag rtog pa 'di ni yang dag pa'i rtog pa zhes bya'o/ /de la yang dag pa'i ngag gang zhe na/ ngag gang gis bdag la yang yongs su mi gdung zhing gzhan la yang ma yin pa dang / bdag la yang kun nas nyon mongs pa med par byed cing / gzhan la yang ma yin pa dang / bdag la yang mi gnod cing gzhan la ma yin pa ste/ ngag gang gis 'phags pa'i lam la legs par 'jug pa mnyam par gzhag pa la brtson pa'i ngag de la ldan pa yin te/ 'di ni yang dag pa'i ngag ces bya'o/ /de la yang dag pa'i las kyi mtha' gang zhe na/ gang las kyang gnag la rnam par smin pa yang gnag pa'i las de mngon par 'du mi byed pa dang / gang las kyang dkar la rnam par smin pa yang dkar ba'i las de mngon par 'du byed pa dang / gang las kyang dkar gnag la rnam par smin pa yang dkar gnag du 'gyur ba'i las de mngon par 'du mi byed pa dang / las gang mi gnag mi dkar zhing rnam par smin pa yang med la/ las kyis las zad par 'gyur ba'i las de mngon par 'du byed pa'o/ /de las la rton pas yang dag pa'i las kyi mtha' la brtson pa zhes bya ste/ 'di ni yang dag pa'i las kyi mtha' zhes bya'o/ /de la yang dag pa'i 'tsho ba gang zhe na/ gang 'phags pa'i rigs dang / sbyangs pa'i yon tan dang / yo byad bsnyungs par mi gtong ba dang / tshul 'chos med pa dang / kha gsag med pa dang / thob kyis 'jal ba med pa dang / dgang sla ba dang / gso sla ba dang / cho ga bzang po'i ngang tshul can dang / gzhan gyi rnyed pa la phrag dog med pa dang / bdag gi rnyed pas chog shes pa dang / kha na ma tho ba med pa dang / 'phags pas gnang ba'i 'tsho ba 'di ni yang dag pa'i 'tsho ba zhes bya'o/ /de la yang dag pa'i rtsol ba gang zhe na/ rtsol ba gang log pa 'phags pa rnams kyis ma gnang ba 'dod chags dang / zhe sdang dang / gti mug gis nyon mongs pa bag la nyal bar byed pa'i rtsol ba de mi 'dod cing rtsol ba gang yang dag pa 'phags pa'i lam dang / bden pa la 'jug pa mya ngan las 'das par 'gro ba'i lam du gtong pa'i brtson pa de'i rjes su 'gro ba 'di ni yang dag pa'i rtsol ba zhes bya'o/ /de la yang dag pa'i dran pa gang zhe na/ dran pa gang shin tu nye bar gzhag pa dang / mi sgal ba dang / drang ba dang / gya gyu med pa dang / 'khor ba'i skyon gyi nyes dmigs la lta ba dang / mya ngan las 'das par 'gro ba'i lam du 'dren pa ste/ dran pa dang / gzhungs pa dang / 'phags pa'i lam mi brjed pa 'di ni yang dag pa'i dran pa zhes bya'o/ /de la yang dag pa'i ting nge 'dzin gang zhe na/ yang dag pa nyid du mnyam pa dang / gang chos thams cad kyis mnyam pa ste/ ting nge 'dzin gang la gnas pas sems can thams cad rab tu thar par bya ba'i phyir yang dag pa nges par gyur pa la 'jug pa 'di ni yang dag pa'i ting nge 'dzin zhes bya'o/ /gang yang byang chub sems dpa'i ting nge 'dzin 'di la gnas nas sems can thams cad rab tu thar par bya ba'i phyir yang dag pa nges par gyur pa la mi 'jug pa 'di ni byang chub sems dpa' yang dag pa'i ting nge 'dzin mi zad pa zhes bya'o/ /'di ni 'das pa dang / ma 'ongs pa dang / da ltar byung ba'i sangs rgyas bcom ldan 'das rnams kyi lam ste/ de byang chub sems dpa' mngon par rdzogs par sangs rgyas nas 'chad pa dang / ston pa dang / rab tu ston pa dang / 'dzin du 'jug pa dang / mos par byed pa dang / klog tu 'jug pa dang / shes par byed pa dang / rnam par shes par byed pa dang / rab tu shes par byed pa dang / rab tu 'dzud pa dang / rnam par 'grel pa dang / rnam par 'byed pa dang / gsal bar byed pa dang / yang dag par ston pa 'di ni btsun pa sha ra dwa ti'i bu byang chub sems dpa' rnams kyi lam mi zad pa zhes bya'o/ /sems can thams cad mi gnas pa'i mya ngan las 'das pa la 'jug pa'i thugs rje chen po'i ngo bo nyid du gyur bas na/ sems can kun la shas cher chags/ /zhes bya'o/ /chos thams cad dngos po med par thugs su chud pa'i dri ma med pa'i shes rab kyi pha rol tu phyin pa'i bdag nyid can yin pas na/ nam mkha' lta bur chags pa med/ / ces bya'o/ /dpag tu med pa'i thabs dang shes rab dang thugs rje'i rang bzhin can gyi rgyal ba'i sras kyi bdag por 'khrungs par gdul bya rnams la so sor snang bas na phan tshun gcig la gcig mi mthun pa'i sems med par sems can thams cad kyi sems kyi chos nyid mnyam pa nyid thugs su chud pas na/ sems can kun gyi yid la 'jug /ces bya ba yin gyi/ sems sems gzhan dag gi nang du zhugs pa ni ma yin te/ gzhan rigs par thal bar 'gyur ba'i phyir ro/ /de bas na der gshegs shing thugs su chud pa nyid 'dul ba'i dus las mi 'da' bar myur ba nyid du gdul bya thams cad la cig car sems kyi rjes su 'gro bas chos kyi de nyid snang bar mdzad pas na/ sems can kun gyi yid ltar mgyogs/ /zhes bya'o/ /dad pa la sogs pa'i dbang po rab dang 'bring dang chung ngu mkhyen nas de dang rjes su mthun pa'i chos ston par mdzad pas na/ sems can kun gyi dbang don shes/ /zhes bya'o/ / sems can thams cad rjes su mthun pa'i sku yid 'phrog pa'i bdag nyid kyi dngos po ston par mdzad pas na/ sems can kun gyi yid 'phrog pa/ /zhes bya'o/ /gzugs ni dbu ba lta bu ste/ /tshor ba chu yi chu bur 'dra/ /'du shes smig rgyu lta bu ste/ /'du byed chu shing snying po 'dra/ /rnam par shes pa sgyu 'drar shes/ /nyi ma'i gnyen gyis rab tu gsungs/ /zhes bya ba'i gzugs la sogs pa'i phung po kun rdzob kyi de kho na nyid dang / don dam par gzod nas ma skyes pa'i ngo bo nyid du phung po lnga'i de kho na nyid mkhyen pas na/ phung po lnga don de nyid shes/ /zhes bya'o/ /tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes mthong ba'i phung po rnams kyi rnam par dag pa'i ngo bo 'dzin par mdzad pas na/ rnam dag phung po lnga 'chang ba/ /zhes bya'o/ /nyan thos dang / rang sangs rgyas dang / yang dag par rdzogs pa'i sangs rgyas kyi nges par 'byung ba'i mtha' ste/ mtha' thug pa la rab tu 'jog pa'i tshul gyis rab tu bzhugs pas na/ nges 'byung kun gyi mtha' la gnas/ /zhes pa'o/ /nges par 'byung ba thams cad kyi rang gi ngo bo nyid kyi khyad par thugs su chud pas na/ nges par 'byung ba kun la mkhas/ /zhes bya'o/ /nges par 'byung ba'i lam thams cad la zhugs pa'i tshul gyis lam de la 'jug par mdzad pas na/ nges 'byung kun gyi lam la gnas/ /zhes bya'o/ /theg pa gcig gis lam ston par mdzad kyang rim gyis 'dul ba'i sems can gyi ngo bor theg pa thams cad ston par mdzad pas na/ nges par 'byung ba kun ston pa/ /zhes bya'o/ /rten cing 'brel bar 'byung pa yan lag bcu gnyis kyi mtshan nyid can gyi srid pa ming gzhan du na 'khor ba zhes kyang bya ba dngos po med pa nyid du rab tu bstan pas mi snang bar mdzad pas na/ yan lag bcu gnyis srid rtsa bton/ /zhes bya ste/ skye ba med pa la ni rtsa nas bton pa mi srid do/ /de yang 'phags pa sa bcu pa'i mdo las/ rten cing 'brel par 'byung ba yan lag bcu gnyis kyi 'jug pa dang / ldog pa'i rgyu nyid rgya cher gsungs pa de brjod par bya ste/ byang chub sems dpa' rdo rje snying pos smras pa/ kye rgyal ba'i sras dag de ltar byang chub sems dpa'i sa lnga pa la sa'i lam yongs su rdzogs pa'i byang chub sems dpa' de ni byang chub sems dpa' sa drug pa la 'jug go/ /de chos mnyam pa nyid bcus 'jug ste/ bcu gang zhe na/ 'di lta ste/ chos thams cad mtshan ma med pa mnyam pa nyid dang / chos thams cad kyi mtshan nyid med pa mnyam pa nyid dang / chos thams cad mi skye ba mnyam pa nyid dang / chos thams cad ma byung ba mnyam pa nyid dang / chos thams cad dben pa mnyam pa nyid dang / chos thams cad snga nas rnam par dag pa mnyam pa nyid dang / chos thams cad spros pa med pa mnyam pa nyid dang / chos thams cad blang ba dang / dor ba med pa mnyam pa nyid dang / chos thams cad sgyu ma dang rmi lam dang mig yor dang / sgra brnyan dang / chu'i zla ba dang gzugs brnyan dang sprul pa dang mtshungs pa mnyam pa nyid dang / chos thams cad dngos po yod pa dang / dngos po med pa dang gnyi ga ma yin pa mnyam pa nyid de/ kye rgyal ba'i sras dag chos mnyam pa nyid bcu po 'di dag gis byang chub sems dpa' sa drug pa la 'jug go/ /de chos thams cad la rang bzhin de 'dra bar rab tu rtog cing dpyod pa dang mthun par sems shing mi phyed pas byang chub sems dpa'i sa drug pa la mthun pa'i bzod pa rnon pos 'thob ste/ 'on kyang da dung mi skye ba'i chos la bzod pa mngon du gyur pa ni thob pa ma yin no/ /de chos thams cad la rang bzhin de ltar rtog pa'i tshe de bas kyang snying rje chen po sngon du btang ba dang / snying rje chen po la dbang bskur ba dang / snying rje chen po yongs su rdzogs par bya ba'i phyir 'jig rten 'byung ba dang 'jig rten pa la rnam par lta'o/ /de 'jig rten 'byung ba dang 'jig pa la lta ba'i tshe 'di snyam ste/ 'jig rten kun tu rgyu ba'i skye bo ji snyed yod pa de dag thams cad bdag tu mngon par zhen pa las 'byung ste/ bdag tu mngon par zhen pa dang bral na/ 'byung ba yang med par 'gyur ro/ /byis pa'i blo can bdag tu mngon par zhen pa mi shes pa'i rab rib kyis sgrib pa yod pa dang med pa dang mngon par mos pa tshul bzhin ma yin pa'i yid la byed pa la gzhol bas yang dag pa ma yin par rab tu zhugs pa log pa'i rjes su 'brang ba de dag ni bsod nams dang / bsod nams ma yin pa'i 'du byed nye bar stsogs te/ 'du byed de dag gis yongs su bsgos pa'i sems kyi sa bon zag pa dang bcas pa nye bar len pa dang bcas pa ni ma 'ongs pa'i skye ba dang rgya shi dang yang srid pa mngon par 'grub pa 'byung bar nye bar song ba yin te/ las kyi zhing gi gzhi dang / ma rig pa'i mun pa dang / srid pa'i snum dang / nga'i nga rgyal gyis brlan pa'i lta ba'i rnam pa dang / dran pa rab tu 'phel bas ming dang gzugs kyi myu gu 'byung ste/ byung nas rnam par 'phel lo/ /ming dang gzugs kyi myu gu rnam par 'phel nas dbang po lnga 'byung bar 'gyur ro/ /dbang po lnga byung nas phan tshun 'dus shing phrad pas reg par 'gyur ro/ /reg pa 'dus pas tshor bar 'byung ngo / /tshor nas de'i rjes su mngon par smon pas sred par 'byung ngo / /sred pas ni nye bar len pa rnam par 'phel bar byed do/ /nye bar len pa rnam par 'phel ba las srid pa 'byung bar 'gyur ro/ /srid pa byung nas phung po lnga 'byung bar 'gyur te phung po lnga byung nas lam gyi rgyud lngar rim gyis dengs par 'gyur ro/ /de dengs nas 'bral par 'gyur te/ dengs shing bral ba mi dga' zhing yongs su gdung bar 'gyur ro/ /mi dga' ba dang yongs su gdung ba'i rgyus mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa 'byung bar 'gyur yang de dag la su yang 'byung bar byed pa med do/ /rang bzhin dang lhun gyis grub par 'jig par 'gyur yang de dag la 'jig par byed pa su yang med do zhes de ltar byang chub sems dpa' sems dpa' chen po lugs su mthun par rten cing 'brel bar 'byung ba la rab tu rtog go/ /'di snyam du sems te/ bden pa mngon par mi shes pa ni yang dag pa ma rig pa ste/ ma rig pas byas pa'i las kyi rnam par smin pa ni 'du byed rnams so/ /'du byed la gnas pa'i sems dang po ni rnam par shes pa'o/ /rnam par shes pa dang lhan cig tu skyes pa'i nye bar len pa'i phung po bzhi ni ming dang gzugs so/ /ming dang gzugs rnam par 'phel ba ni drug gi skye mched do/ /dbang po dang yul dang rnam par shes pa gsum phrad pa zag pa dang bcas pa ni rig pa'o/ /reg pa'i rjes las skyes pa ni tshor ba'o/ /tshor ba la chags pa ni srid pa'o/ /sred par rnam par 'phel ba ni nye bar len pa'o/ /nye bar len pa las byung ba'i las zag pa dang bcas pa ni srid pa'o/ /las dang rgyu mthun pa'i 'bras bu ni skye ba'o/ /skye ba ni phung po 'byung ba'o/ /phung po yongs su smin pa ni rga ba'o/ /rgas nas phung po 'jig pa ni 'chi ba'o/ /'chi zhing 'bral ba'i tshe myos shing chags par 'gyur ba'i sems la yongs su gdung ba ni mya ngan no/ / mya ngan las byung ba'i tshig tu brjod pa ni smre sngags 'don pa'o/ /dbang po lnga'i nyams su bab pa ni sdug bsngal ba'o/ /yid kyis lta ba'i nyams su bab pa ni yid mi bde ba'o/ /sdug bsngal dang yid mi bde ba mang po 'byung ba ni 'khrug pa ste/ de ltar na sdug bsngal gyi phung po chen po dang / sdug bsngal gyi sdong po 'ba' zhig byed pa po dang tshor ba po med par mngon par 'grub par 'gyur ro/ /de 'di snyam du ste/ byed pa po la mngon par chags pas las rnams yod par gyur to/ /gang na byed pa po med pa de ni don dam par na las kyang mi dmigs so/ /de 'di snyam du sems te/ 'di ltar khams gsum pa 'di dag sems tsam ste/ gang 'di srid pa'i yan lag bcu gnyis de bzhin gshegs pas rab tu phye ste bka' stsal pa de dag thams cad kyang sems gcig la gnas pa dag go/ /de ci'i phyir zhe na/ dngos po gang la 'dod chags dang ldan pa'i sems bskyed pa de ni rnam par shes pa'o/ /dngos po ni 'du byed do/ /'du byed la mgo rmongs pa ni ma rig pa'o/ /ma rig pa'i sems dang lhan cig skyes pa ni ming dang gzugs so/ /ming dang gzugs dang rnam par 'phel ba ni drug gi skye mched do/ /drug gi skye mched dang 'brel pa ni reg pa'o/ /reg pa dang lhan cig skyes pa ni tshor ba'o/ /tshor bas mi ngoms pa de sred pa'o/ /sred pas mnar te sdug cing mi gtong ba ni nye bar len pa'o/ /sred pa'i yan lag 'byung ba 'di dag ni srid pa'o/ /srid pa 'byung ba ni skye ba'o/ /skye ba yongs su smin pa ni rgya ba'o/ /rgya ba dang bral ba ni 'chi ba'o/ /de la ma rig pa ni bya ba gnyis su nye bar gnas pa yin te/ sems can rnams kyang dmigs pa la rmongs par byed do/ /'du byed mngon par 'grub pa'i rgyu yang 'byin to/ /'du byed rnams kyang bya ba gnyis su nye bar gnas pa yin te/ ma 'ongs pa'i rnam par smin pa yang mngon par grub par byed do/ /rnam par shes pa mngon par grub pa'i rgyu yang 'byin to/ rnam par shes pa'ang bya ba gnyis su nye bar gnas pa yin te/ srid pa'i nying gi mtshams kyang sbyor ro/ /ming dang gzugs mngon par 'grub pa'i rgyu yang 'byin to/ /ming dang gzugs kyang bya ba gnyis su nye bar gnas pa yin te/ phan tshun nye bar ston pa yang byed do/ /skye mched drug mngon par 'grub pa'i rgyu yang 'byin to/ /drug gi skye mched kyang bya ba gnyis su nye bar gnas pa yin te/ rang gi yul rnam par phye ba ston to/ /reg pa mngon par 'grub pa'i rgyu yang 'byin to/ /reg pa yang bya ba gnyis su nye bar gnas pa yin te/ dmigs pa la reg par yang byed do/ /tshor ba mngon par 'grub pa'i rgyu yang 'byin te/ /tshor ba yang bya ba gnyis su nye bar gnas pa yin te/ yid du 'ong ba dang / yid du mi 'ong ba dang / gnyis ka ma yin par tshor ba skyed do/ /sred pa mngon par 'grub pa'i rgyu yang 'byin to/ /sred pa yang bya ba gnyis su nye bar gnas pa yin te/ chags par 'gyur ba'i dngos po la mngon par chags par yang byed do/ / nye bar len pa'i mngon par 'grub pa'i rgyu yang 'byin to/ /nye bar len pa yang bya ba gnyis su nye bar gnas pa yin te/ kun nas nyon mongs pas 'ching bar yang byed do/ /srid pa mngon par 'byung ba'i rgyu yang 'byin to/ /srid pa yang bya ba gnyis su nye bar gnas pa yin te/ /srid pa'i rgyu gzhan du yang gnas par byed do/ /skye ba mngon par 'grub pa'i rgyu yang 'byin to/ /skye ba yang bya ba gnyis su nye bar gnas pa yin te/ phung po 'byung bar yang byed do/ /rga ba mngon par 'grub pa'i rgyu yang 'byin to/ /rga ba yang bya ba gnyis su nye bar gnas pa yin te/ dngos po yongs su 'gyur bar yang byed do/ /'chi bar 'gyur ba'i rgyu yang 'byin to/ /'chi ba yang bya ba gnyis su nye bar gnas pa yin te/ 'du byed 'jig par yang byed do/ /yongs su ma shes pa rgyun mi 'chad pa'i rgyu yang 'byin to/ /de la ma rig pa'i rkyen gyis 'du byed rnams so zhes bya ba ni ma rig pa'i rkyen gyis 'du byed rnams rgyun mi 'chad cing rton pa'o/ /'du byed kyi rkyen gyis rnam par shes pa'o zhes bya ba ni 'du byed kyi rkyen gyis rnam par shes pa rgyun mi 'chad cing rton pa'o/ /rnam par shes pa'i rkyen gyis ming dang gzugs zhes bya ba ni rnam par shes pa'i rkyen gyis ming dang gzugs rgyun mi 'chad cing rton pa'o/ /ming dang gzugs kyi rkyen gyis drug gi skye mched ces bya ba ni ming dang gzugs kyi rkyen gyis drug gi skye mched rgyun mi 'chad cing rton pa'o/ /drug gi skye mched kyi rkyen gyis reg pa'o zhes bya ba ni drug gi skye mched kyi rkyen gyis reg pa rgyun mi 'chad cing rton pa'o/ /reg pa'i rkyen gyis tshor ba'o zhes bya ba ni reg pa'i rkyen gyis tshor ba rgyun mi 'chad cing rton pa'o/ /tshor ba'i rkyen gyis sred pa'o zhes bya ba ni tshor ba'i rkyen gyis sred pa rgyun mi 'chad cing rton pa'o/ /sred pa'i rkyen gyis nye bar len pa'o zhes bya ba ni sred pa'i rkyen gyis nye bar len pa rgyun mi 'chad cing rton pa'o/ /nye bar len pa'i rkyen gyis srid pa'o zhes bya ba ni nye bar len pa'i rkyen gyis srid pa rgyun mi 'chad cing rton pa'o/ /srid pa'i rkyen gyis skye ba'o zhes bya ba ni srid pa'i rkyen gyis skye ba rgyun mi 'chad cing rton pa'o/ /skye ba'i rkyen gyis rga shi'o zhes bya ba ni skye ba'i rkyen gyis rga shi rgyun mi 'chad cing rton pa'o/ /ma rig pa 'gags pas 'du byed rnams 'gag go zhes bya ba ni ma rig pa'i rkyen med pas 'du byed rnams nye bar zhi zhing rton pa med pa'o/ /de bzhin du ji srid skye ba'i rkyen gyis rga shi 'gag go zhes bya ba ni skye ba'i rkyen med pas skye ba nye bar zhi zhing rton pa med pa'o/ /de ltar thabs dang bcas pa'i shes rab kyi stobs kyis yan lag bcu gnyis can gyi srid pa'i dngos po rnam par bsgom pa'i blo gros mnga' bas shin tu rnam par dag pa'i de bzhin nyid kyis srid pa'i yan lag 'dzin par mdzad pas na/ dag pa rnam pa bcu gnyis 'chang / /zhes bya ste/ de'i bdag nyid kyis gnas pa nyid 'chang ba yin gyi/ gzung ba dang 'dzin pa'i dngos po ni ma yin no/ / sdug bsngal ba dang / kun 'byung ba dang / 'gog pa dang lam gyi mtshan nyid can gyi bden pa ni rnam pa bzhis chos thams cad khrid par mdzad pas na bden pa bzhi'i tshul te gzhung lugs kyi lam mo/ /de ston cing rnam pa sna tshogs pas 'chad par mdzad pa'am 'dis 'joms par mdzad pas na/ bden bzhi'i tshul gyis rnam pa can/ /zhes bya'o/ /sdug bsngal la chos shes pa dang / sdug bsngal la rjes su rtogs pa shes pa dang / kun 'byung la chos shes pa dang / kun 'byung la rjes su rtogs pa shes pa dang / 'gog pa la chos shes pa dang / 'gog pa la rjes su rtogs pa shes pa dang / lam la chos shes pa dang / lam la rjes su rtogs pa shes pa zhes bya ba'i shes pa brgyad po nyan thos dang / rang sangs rgyas dang / yang dag par rdzogs pa'i sangs rgyas kyi lam gdul bya dang rjes su mthun par thugs su chud cing mi mthun pa med pa'i don khong du chud par 'dzin par mdzad pas na/ shes pa brgyad po rtogs pa 'chang / /zhes bya'o/ /glegs bam la la las ni/ bden bzhi'i tshul dang 'dra ba yi/ /shes pa brgyad po rtogs pa 'chang / /zhes zer te/ de la bden pa bzhi'i tshul nyan thos la sogs pa dang rjes su mthun pas rnam pa bcu drug tu bya ba ni bden pa bzhi'i tshul gyis rnam pa ste/ mi bden pa'i rnam pa bcu drug gzhag pa las yongs su drang ba'i tshul gyis mi rtag pa la sogs pa'i rnam pa ji lta ba bzhin du bsgoms pas bzod pa brgyad dang shes pa brgyad 'byung bar 'gyur te/ sdug bsngal la chos shes pa'i bzod pa dang / sdug bsngal la chos shes pa dang / sdug bsngal la rjes su chos shes pa'i bzod pa dang / sdug bsngal la rjes su chos shes pa dang / kun 'byung ba la chos shes pa'i bzod pa dang / kun 'byung la chos shes pa dang / kun 'byung la rjes su chos shes pa'i bzod pa dang / kun 'byung la rjes su chos shes pa dang / 'gog pa la chos shes pa'i bzod pa dang / 'gog pa la chos shes pa dang / 'gog pa la rjes su chos shes pa'i bzod pa dang / 'gog pa la rjes su chos shes pa dang / lam la chos shes pa'i bzod pa dang / lam la chos shes pa dang / lam la rjes su chos shes pa'i bzod pa dang / lam la rjes su chos shes pa zhes bya ba'i rim pa thugs su chud cing ston pas dri ma med pa'i rtogs pa 'chad par mdzad pas na/ bden bzhi'i tshul dang 'dra ba yi/ /shes pa brgyad po rtogs pa 'chad/ /zhes bya'o/ /rten cing 'brel par 'byung ba'i yan lag bcu gnyis kyi rnam pas bden pa la 'jug pa'i ye shes kyis skye mched bcu gnyis rnam par dag nas sa bcu gnyis kyi mthar thug pa'i bde ba'i dgongs pa dang ldan pas/ bden don rnam pa bcu gnyis ldan/ /zhes bya'o/ /de nyid rnam pa bcu drug ni stong pa nyid bcu drug ste/ shes rab kyi pha rol tu phyin pa nyi khri lnga stong pa zhes bya ba theg pa chen po ston pa las gsungs te/ rab 'byor gzhan yang byang chub sems dpa' sems dpa' chen po'i theg pa chen po 'di lta ste/ nang stong pa nyid dang / phyi stong pa nyid dang / phyi nang stong pa nyid dang / stong pa nyid stong pa nyid dang / chen po stong pa nyid dang / don dam pa stong pa nyid dang / 'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang / dor ba med pa stong pa nyid dang / rang bzhin stong pa nyid dang / chos thams cad stong pa nyid dang / rang gi mtshan nyid stong pa nyid dang / mi dmigs pa stong pa nyid dang / dngos po med pa'i ngo bo nyid stong pa nyid de/ de la nang stong pa nyid gang zhe na/ nang gi chos zhes bya ba ni mig dang / rna ba dang / sna dang / lce dang / lus dang yid de/ de la mi rtag mi 'jig pa'i phyir mig ni mig gis stong ngo / /de ci'i phyir zhe na/ de'i rang bzhin de yin pa'i phyir ro/ /mi rtag mi 'jig pa'i phyir rna ba dang / sna dang / lce dang / lus dang / yid ni yid kyis stong ngo / /de ci'i phyir zhe na/ de'i rang bzhin de yin pa'i phyir te/ 'di ni nang stong pa nyid do/ /de la phyi stong pa nyid gang zhe na/ phyi'i chos zhes bya ba ni gzugs dang / sgra dang / dri dang / ro dang / reg dang / chos rnams te/ de la mi rtag mi 'jig pa'i phyir gzugs gzugs kyis stong ngo / de ci'i phyir zhe na/ de'i rang bzhin de yin pa'i phyir ro/ /de bzhin du mi rtag mi 'jig pa'i phyir sgra dang / dri dang / ro dang / reg dang / chos chos kyis stong ngo / /de ci'i phyir zhe na/ de'i rang bzhin de yin pa'i phyir te/ 'di ni phyi stong pa nyid ces bya'o/ /de la phyi nang stong pa nyid gang zhe na/ nang gi skye mched drug dang / phyi'i skye mched drug po 'di dag ni phyi nang gi chos zhes bya ste/ de la mi rtag mi 'jig pa'i phyir nang gi chos rnams phyi'i chos kyis stong ngo / /de ci'i phyir zhe na/ de'i rang bzhin de yin pa'i phyir ro/ /phyi'i chos rnams nang gi chos rnams kyis stong ngo / /de ci'i phyir zhe na/ de'i rang bzhin de yin pa'i phyir te/ 'di ni phyi nang stong pa nyid ces bya'o/ /de la stong pa nyid stong pa nyid gang zhe na/ mi rtag mi 'jig pa'i phyir chos thams cad kyi stong pa nyid gang yin pa'i stong pa nyid des stong pa nyid stong ngo / /de ci'i phyir zhe na/ de'i rang bzhin de yin pa'i phyir te/ 'di ni stong pa nyid stong pa nyid ces bya'o/ /de chen po stong pa nyid gang zhe na/ mi rtag mi 'jig pa'i phyir shar phyogs shar phyogs kyis stong ngo / /lho phyogs lho phyogs kyis stong ngo / /nub phyogs nub phyogs kyis stong ngo / /byang phyogs byang phyogs kyis stong ngo / /'og gi phyogs 'og gi phyogs kyis stong ngo / /steng gi phyogs steng gi phyogs kyis stong ngo / /phyogs mtshams rnams phyogs mtshams rnams kyis stong ngo / /de ci'i phyir zhe na/ de'i rang bzhin de yin pa'i phyir te/ 'di ni chen po stong pa nyid ces bya'o/ /de la don dam pa stong pa nyid gang zhe na/ /don dam pa ni mya ngan las 'das pa ste/ mi rtag mi 'jig pa'i phyir mya ngan las 'das pa de yang mya ngan las 'das pas stong ngo / /de ci'i phyir zhe na/ de'i rang bzhin de yin pa'i phyir te/ 'di ni don dam pa stong pa nyid ces bya'o/ /de la 'dus byas stong pa nyid gang zhe na/ 'dus byas zhes bya ba ni 'dod pa'i khams dang / /gzugs kyi khams dang / gzugs med pa'i khams te/ de la mi rtag mi 'jig pa'i phyir 'dod pa'i khams 'dod pa'i khams kyis stong ngo / /gzugs kyi khams gzugs kyi khams kyis stong ngo / /gzugs med pa'i khams gzugs med pa'i khams kyis stong ngo / /de ci'i phyir zhe na/ de'i rang bzhin de yin pa'i phyir te/ 'di ni 'dus byas stong pa nyid ces bya'o/ /de la 'dus ma byas stong pa nyid gang zhe na/ 'dus ma byas zhes bya ba ni gang la skye ba med pa dang / 'gag pa med pa dang / gnas pa las gzhan du 'gyur ba med pa 'di ni 'dus ma byas zhes bya ste/ mi rtag mi 'jig pa'i phyir 'dus ma byas 'dus ma byas kyis stong ngo / /de ci'i phyir zhe na/ de'i rang bzhin de yin pa'i phyir te/ 'di ni 'dus ma byas stong pa nyid ces bya'o/ /de la mtha' las 'das pa stong pa nyid gang zhe na/ gang la mtha' mi dmigs pa de ni mtha' las 'das pa ste/ mi rtag mi 'jig pa'i phyir mtha' las 'das pa mtha' las 'das pas stong ngo / /de ci'i phyir zhe na/ de'i rang bzhin de yin pa'i phyir te/ 'di ni mtha' las 'das pa stong pa nyid ces bya'o/ /de la thog ma dang tha ma med pa stong pa nyid gang zhe na/ gang la thog ma mi dmigs shing tha ma yang mi dmigs pa de la 'gro ba mi dmigs 'ong ba yang mi dmigs te/ mi rtag mi 'jig pa'i phyir thog ma dang / tha ma med pa thog ma dang tha ma med pas stong ngo / /de ci'i phyir zhe na/ de'i rang bzhin de yin pa'i phyir te/ 'di ni thog ma dang tha ma med pa stong pa nyid ces bya'o/ /de la dor ba med pa stong pa nyid gang zhe na/ gang la gang yang dor ba med pa ste/ mi rtag mi 'jig pa'i phyir dor ba med pas stong ngo / /de ci'i phyir zhe na/ de'i rang bzhin de yin pa'i phyir te/ 'di ni dor ba med pa stong pa nyid ces bya'o/ /de la rang bzhin stong pa nyid gang zhe na/ 'dus byas sam 'dus ma byas kyang rung ste/ chos thams cad kyi rang bzhin gang yin pa de ni nyan thos rnams kyis ma byas/ rang sangs rgyas rnams kyis ma byas/ byang chub sems dpa' sems dpa' chen po rnams kyis ma byas/ de bzhin gshegs pa dgra bcom pa yang dag par rdzogs pa'i sangs rgyas kyis ma byas te/ mi rtag mi 'jig pa'i phyir rang bzhin rang bzhin gyis stong ngo / /de ci'i phyir zhe na/ de'i rang bzhin de yin pa'i phyir te/ 'di ni rang bzhin stong pa nyid ces bya'o/ /de la chos thams cad stong pa nyid gang zhe na/ de la chos thams cad ces pa ni gzugs dang / tshor ba dang / 'du shes dang / 'du byed dang / rnam par shes pa dang / mig dang / rna ba dang / sna dang / lce dang / lus dang / yid dang / gzugs dang / sgra dang / dri dang / ro dang / reg dang / chos dang / mig gi rnam par shes pa dang / rna ba'i rnam par shes pa dang / sna'i rnam par shes pa dang / lce'i rnam par shes pa dang / lus kyi rnam par shes pa dang / yid kyi rnam par shes pa dang / mig gi 'dus te reg pa dang / rna ba'i 'dus te reg pa dang / sna'i 'dus te reg pa dang / lce'i 'dus te reg pa dang / lus kyi 'dus te reg pa dang / yid kyi 'dus te reg pa dang / mig gi 'dus te reg pa'i rkyen gyis tshor ba dang / rna ba'i 'dus te reg pa'i rkyen gyis tshor ba dang / sna'i 'dus te reg pa'i rkyen kyis tshor ba dang / lce'i 'dus te reg pa'i rkyen gyis tshor ba dang / lus kyi 'dus te reg pa'i rkyen gyis tshor ba dang / yid kyi 'dus te reg pa'i rkyen gyis tshor ba dang / gzugs yod pa'i chos dang / gzugs med pa'i chos dang / 'dus byas kyi chos dang / 'dus ma byas kyi chos te/ 'di dag ni chos thams cad stong pa nyid ces bya'o/ /de la mi rtag mi 'jig pa'i phyir chos thams cad chos thams cad kyis stong ngo / /de ci'i phyir zhe na/ de'i rang bzhin de yin pa'i phyir te/ 'di ni chos thams cad stong pa nyid ces bya'o/ /de la rang gi mtshan nyid stong pa nyid gang zhe na/ gzugs ni 'jig pa'i mtshan nyid/ tshor ba ni myong ba'i mtshan nyid/ 'du shes ni 'dzin pa'i mtshan nyid/ 'du byed ni mngon par 'du byed pa'i mtshan nyid/ rnam par shes pa ni rnam par rig pa'i mtshan nyid dang / mi rtag mi 'jig pa'i phyir 'dus byas kyi chos rnams kyi mtshan nyid gang yin pa dang / 'dus ma byas kyi chos rnams kyi mtshan nyid gang yin pa'i rang rang gi mtshan nyid de dag gis chos de dag thams cad stong ngo / /de ci'i phyir zhe na/ de dag gi rang bzhin de yin pa'i phyir te/ 'di ni rang gi mtshan nyid stong pa nyid ces bya'o/ /de la mi dmigs pa stong pa nyid gang zhe na/ gang la 'das pa mi dmigs pa dang / ma 'ongs pa mi dmigs pa dang / da ltar byung ba'i gnas mi dmigs pa ste/ mi rtag mi 'jig pa'i phyir mi dmigs pa mi dmigs pas stong ngo / /de ci'i phyir zhe na/ de'i rang bzhin de yin pa'i phyir te/ 'di ni mi dmigs pa stong pa nyid ces bya'o/ /de la dngos po med pa'i ngo bo nyid stong pa nyid gang zhe na/ chos thams cad rten cing 'brel par 'byung ba'i phyir 'dus pa'i ngo bo nyid med de/ mi rtag mi 'jig pa'i phyir 'dus pa 'dus pas stong ngo / /de ci'i phyir zhe na/ de'i rang bzhin de yin pa'i phyir te/ de ni dngos po med pa'i ngo bo nyid stong pa nyid ces bya'o zhes bya ba'i stong pa nyid rnam pa bcu drug gi de kho na nyid mkhyen pas na/ de nyid rnam pa bcu drug rig / ces bya'o/ /de la gzhan yang stong pa nyid bzhi dang bcas pa'i stong pa nyid nyi shu'i rnam pa thugs su chud pas na/ rnam pa nyi shu byang chub pa/ /rnam par sangs rgyas kun rig mchog /ces bya ste/ de yang rab 'byor gzhan yang dngos po ni dngos pos stong ngo / /dngos po med pa ni dngos po med pas stong ngo / /rang bzhin ni rang bzhin gyis stong ngo / /gzhan gyi dngos po ni gzhan gyi dngos pos stong ngo / /de la dngos po dngos pos stong zhes bya ba gang zhe na/ phung po lnga po ste/ phung po lnga po de dag kyang phung po rnams kyis stong pas de ltar na/ dngos po dngos pos stong ngo / /ji ltar na dngos po med pa dngos po med pas stong zhe na/ dngos po med pa zhes bya ba ni 'dus ma byas pa ste/ 'dus ma byas de yang 'dus ma byas kyis stong pas de ltar na dngos po med pa dngos po med pas stong ngo / /ji ltar na rang bzhin rang bzhin gyis stong zhe na/ rang bzhin zhes bya ba ni ngo bo nyid ma nor ba ste/ de la stong pa nyid gang yin pa de ni shes pas ma byas mthong bas ma byas te/ 'di ni rang bzhin stong pa nyid do/ /de la gzhan gyi dngos po stong pa nyid gang zhe na/ de bzhin gshegs pa rnams byung yang rung / de bzhin gshegs pa rnams ma byung yang rung ste/ chos kyi gnas nyid dang / chos nyid dang / chos kyi dbyings dang / chos skyon med pa nyid dang / de bzhin nyid dang / ma nor ba de bzhin nyid dang / gzhan ma yin pa de bzhin nyid dang / yang dag pa'i mtha' ni de bzhin nyid du gnas pa ste/ de ltar chos de dag gi gzhan gyi stong pa gang yin pa de ni gzhan gyi dngos po stong pa nyid ces bya ste/ rab 'byor 'di ni byang chub sems dpa' sems dpa' chen po'i theg pa chen po'o/ /de lta bu'i rnam pa nyi shu'i rdzogs pa'i byang chub gang yin pa de la de skad ces bya'o/ /yang na byang chub sems dpa'i tshe bcu drug gis sangs rgyas nyid thob bo zhes gsungs pas na/ byang chub sems dpa' bcu drug gi rnam par shes pa yongs su mkhyen pa'i phyir/ de nyid rnam pa bcu drug rig /ces bya ste/ de yang dpal rdo rje snying po'i rgyan zhes bya ba'i rgyud las/ 'gro la yang dag spro ba'i sems/ /bstan la snying po legs bsgoms shing / /stong nyid de nyid las byung ba/ /rdo rje sems dpa' de bshad do/ /'gro ba thams cad bkug nas ni/ /sangs rgyas byang chub la sbyor ba/ /don yod ye shes dag pa ste/ /rdo rje rgyal po mchog tu bshad/ /rdo rje chags pas chags pa yang / /'gro ba ma lus lhag ma med/ /ngo bo nyid kyis brtan gyur pa'i/ /sems de chags pa yin par bshad/ /chos rnams ngo bo nyid kyis ni/ /dben zhing de bzhin gnyis med par/ /gang tshe dag pa'i bdag nyid mthong / /de tshe 'di ni legs par bshad/ /rdo rje sems dpa' bzhi po yi/ /ming gi brdar btags sbyar ba ni/ /sangs rgyas kun dang mnyam sbyar ba'i/ /bde mchog mchog gi dam pa yin/ khams gsum pa yi rgyal po che/ /tshogs gnyis yongs su rdzogs pa dang / /sa dang pha rol phyin mchog mchog /rdo rje dbang bskur legs 'byung ba'i/ /bde gshegs kun gyi ye shes ni/ /rnyog pa med cing 'gyur ba med/ /'od kyi dkyil 'khor gzi brjid mchog / brtan zhing rtag par gyur pa yin/ /nam mkha'i mdzod ni mdzod chen po/ /chos rnams kun la dbang bskur ba/ /yid bzhin nor bu rdo rje 'chang / /rdo rje tog ni bla med pa'o/ /ye shes snang ba rin chen che/ /ngo mtshar la sogs nges par ston/ /de bzhin gshegs pa kun gyi gsang / /rdo rje bshad pa zhes bsgrags so/ /bdag med chos la legs par byung / /gnyis med ye shes dam pa ste/ /chos nyid mchog tu bsam mi khyab/ /rdo rje chos su de bshad do/ /rdo rje blo ni snang ba che/ /shes rab ye shes dri ma med/ /zag pa med pa'i shes rab che/ /rdo rje rnon por de bshad do/ / sangs rgyas rnams kyi chos 'khor lo/ /gnyis med thob pa'i mtshan nyid can/ /rten 'brel yan lag bcu gnyis grags/ /rdo rje rgyu zhes grags pa yin/ /sems can skad kyis spros pa'i mchog /yul rnams dag ni nges gsungs pa/ /sangs rgyas kun gyis bzlas pa che/ /rdo rje gsung du de bshad do/ /sems can kun don yang dag 'byor/ /sangs rgyas kun gyi mchog chen po/ /dang po'i sbyor ba dag pa che/ /rdo rje las zhes bya bar bshad/ /bla na med pa'i byams pa che/ /bsrung ba las ni bla med par/ /dag pa'i chos ni brtson 'grus che/ /rdo rje bsrung ba zhes bshad do/ /sangs rgyas skyob pa thams cad kyi/ /shes rab thabs kyi khro bo che/ /nyon mongs thams cad za ba che/ /rdo rje gnod sbyin du de bshad/ /sku gsung thugs kyi sbyor ba ni/ /sgrib pa med cing bla med pa/ /de bzhin gshegs pa kun gyis gsang / /rdo rje bsdus par rtag tu bshad/ /rdo rje ye shes rnal 'byor che/ /sangs rgyas kun gyi stobs chen po/ /thog ma tha ma med zhi ba/ /rig pa'i mchog tu gnas pa yin/ /zhes bya ba ste thugs kyi rab tu 'jug pa'i rim pa'i dbye bas rnam par phye ba yin gyi/ rgyud gzhan la so sor snang bas ni phye ba ma yin te/ mtha' yas pa'i rnam par thal bar 'gyur ba'i phyir ro/ /de yang byang chub tu thugs bskyed pa nas brtsams te/ ji srid du sangs rgyas kyi bar du sems kyi rgyun gcig gi dbang du byas nas rnam pa'i dbye ba rab tu gzhag pa yin te/ de la dang po bdud dang mu stegs la sogs pas mi phyed cing / brtan pa'i byang chub kyi sems bskyed par bya'o/ /byang chub tu sems yang dag par bskyed nas theg pa chen por sems can rnams 'dzud par byed do/ /btsud pa rnams 'di nyid la rjes su chags pa nyid du bya'o/ /shin tu rjes su chags pa rnams ni 'di nyid legs so zhes chos nyid kyi de kho na nyid rtogs pa la nges par 'gyur ro/ /de ltar na bsod nams dang ye shes kyi tshogs rdzogs par bya ba'i sangs rgyas nyid las mi 'gyur ba rnams ni srid pa gsum gyi chos kyi rgyal por dbang bskur ba 'thob bo/ /dbang bskur ba rnams ni mi mthun pa'i phyogs las rnam par rgyal bar bya ba'i phyir gzi brjid chen por 'gyur ro/ /rnam par rgyal ba dang rab tu 'bar ba'i gzi brjid thob pa rnams ni sems can thams cad la mi 'jigs pa sbyin pa'i rgyal mtshan sgreng bar byed do/ /sbyin pa chen po'i rgyal mtshan bsgreng ba rnams ni shin tu rmad du byung ba'i chos rab tu ston pa'i snga ltas bzhad par ston la/ /shin tu rmad du byung ba'i bshad pa chen po yang dag par ston pa rnams ni rdo rje chos kyi mnyam pa nyid rtogs par 'gyur ro/ /rdo rje chos kyi mnyam pa nyid khong du chud nas chos thams cad rnam pa thams cad du rtogs par 'gyur ro/ /chos thams cad rnam pa thams cad du rtogs pa rnams ni chos kyi 'khor lo skor bar byed do/ / chos kyi 'khor lo bskor ba rnams dgongs pa'i don rnam pa sna tshogs pas sems can rnams kyi don byed pa'i skad thams cad kyis de kho na nyid ston to/ /de kho na nyid ston pa rnams ni de bzhin gshegs pa thams cad la mchod cing bsnyen bkur la 'jug par byed do/ /de bzhin gshegs pa thams cad la mchod cing bsnyen bkur la 'jug pa rnams ni byams pa chen po'i go chas sems can thams cad yang dag par srung bar byed do/ /sems can thams cad yang dag par bsrung ba rnams ni sems can gdug pa rnams dang nyon mongs pa'i phyogs zad par byed do/ /nyon mongs pa ma lus par zad pa rnams ni/ de bzhin gshegs pa thams cad kyi tshogs yang dag par bsdus pa'i khu tshur 'chang ste/ de ltar na sems can gyi rgyud rnam pa bcu drug nyid rtogs pa dang / de bzhin du gzhan yang rnam pa bzhi ste/ yongs su rdzogs pa'i sems de nyid me long lta bu'i ye shes kyi ngo bo nyid du gyur pa mi bskyod pa'i ngo bo nyid dang / mnyam pa nyid kyi ye shes kyi bdag nyid can rin chen 'byung ldan gyi ngo bo nyid dang / so sor rtog pa'i ye shes kyi rnam pa 'od dpag tu med pa'i ngo bo nyid dang / bya ba grub pa'i ye shes kyi bdag nyid can don yod par grub pa'i ngo bo nyid de/ de dag ni rnam pa nyi shu ste/ dbus su chos kyi dbyings shin tu rnam par dag pa'i ngo bo nyid du rnam par snang mdzad bzhugs pa las rnam par snang mdzad chen po'i ngo bo nyid bcom ldan 'das rje btsun 'jam dpal mngon par byang chub pas na/ rnam pa nyi shus byang chub pa/ /zhes bya'o/ /'di nyid kyis na rnam pa sna tshogs pas sangs rgyas pa'i phyir na rnam par sangs rgyas so/ /rnam pa thams cad mkhyen pa'i ye shes mnga' bas na kun rig go/ /thams cad kyi dam par gyur pas na mchog go/ /sangs rgyas kyi sprul pa dpag tu med pa'i sprin rnams kyis 'jig rten gyi khams dpag tu med cing mtha' yas pa rnams su gtogs pa'i sems can rnams kyi don cig car mdzad pas na/ sangs rgyas kun gyi sprul pa'i sku/ /bye ba dpag med 'gyed pa po/ /zhes bya'o/ /sems kyi skad cig ma bcu drug gi rang bzhin thugs su chud pa'i ngo bo nyid du gyur pas na/ skad cig thams cad mngon par rtogs/ /zhes bya'o/ / sems kyi skad cig don kun rig /ces bya ba la/ sems kyi skad cig gi don ni skye ba med pa dang dngos po med pa'o/ /de ji lta ba bzhin du thugs su chud pas na/ sems kyi skad cig don kun rig /ces bya'o/ /theg pa sna tshogs zhes bya ba ni 'jig rten pa dang / nyan thos dang / rang sangs rgyas dang / yang dag par rdzogs pa'i sangs rgyas kyi theg pa rnams so/ /de rnams kyi tshul ni rig pa'i bye brag go/ /de nyid 'gro ba'i don byed pa'i thabs te/ mtho ris dang thar pa la sogs pa thob par byed pas te/ de bas na/ theg pa sna tshogs thabs tshul gyis/ /'gro ba'i don la rtog pa po/ /zhes bya ste/ sangs rgyas nyid la sogs pa rdzogs par byed pas na de skad ces bya'o/ /de bas na/ theg pa gsum gyi nges 'byung la/ /zhes bya ba smos te/ shin tu yang theg pa de'i mthar thug pa nyid du bdag nyid bstan pa'i phyir/ theg pa gsum gyi nges 'byung la/ /zhes bya ba bshad do/ /de ni gdul bya'i bsam pa'i bye brag gi dbang du mdzad pa yin gyi/ don dam par ni theg pa la dbye ba yod pa ma yin/ theg pa ni gcig pu nyid du zad la/ 'bras bu yang sangs rgyas la sogs par gcig pas na/ theg pa gcig gi 'bras bur gnas/ /zhes bya ste/ theg pa thams cad bsdus pa'i tshul ni theg pa chen po yin no/ / ji skad du dam pa'i chos pad+ma dkar po'i mdo las/ don dam par nges par yang dag par gsungs pa ni 'di yin te/ mi mkhas gang dag dman la mngon dga' zhing / /sangs rgyas bye ba mang la spyod ma spyad/ /'khor bar chags shing shin tu sdug bsngal ba/ /de la mya ngan las 'da' nye bar bstan/ / sangs rgyas ye shes rab tu rtogs bya'i phyir/ /de ltar rab 'byung ba ni thabs mdzad de/ /khyed cag sangs rgyas su yang 'grub po zhes/ de rnams la ni re zhig mi gsung ngo / /zhes gsungs pa dang / yang mdo de nyid las/ rang byung bdag nyid ci la gnas ba dang / /sangs rgyas ji lta bu dang ci 'dra ba/ /stobs dang bsam gtan rnam thar dbang po rnams/ /de dag nyid la sems can rab tu 'jog /byang chub rdul med dam pa thob nas su/ /theg pa dman la sems can gcig bkod na/ /'di ni nga yi legs pa ma yin te/ /ser sna'i nyes pa nga la yod par 'gyur/ /zhes gsungs pa yin no/ / bshad pa 'di la lang kar gshegs pa'i mdo las blo gros chen po gzhan yang mngon par rtogs par 'gyur ba'i rigs lnga yod de/ lnga gang zhe na/ 'di ltar nyan thos kyi theg pa mngon par rtogs par 'gyur ba'i rigs dang / rang sangs rgyas kyi theg pa mngon par rtogs par 'gyur ba'i rigs dang / de bzhin gshegs pa'i theg pa mngon par rtogs par 'gyur ba'i rigs dang / gang du'ang ma nges pa'i rigs dang / rigs med pa dang lnga'o/ /blo gros chen po nyan thos kyi theg pa mngon par rtogs par 'gyur ba'i rigs ji ltar khong du chud par bya zhe na/ gang phung po dang / khams dang / skye mched dang / rang dang spyi'i mtshan nyid yongs su shes pa khong du chud par 'gyur ba bstan na lus kyi spu ldang zhing de'i blo mtshan nyid yongs su 'dris par bya ba'i shes pa la 'jug la/ rten cing 'brel par 'byung ba dang tha mi dad pa'i mtshan nyid yongs su 'dris par bya ba la ma yin pa ste/ blo gros chen po 'di ni nyan thos kyi theg pa mngon par rtogs par 'gyur ba'i rigs te/ nyan thos kyi theg pa mngon par rtogs pa'i lta bas sa drug dang lnga dag tu kun nas lta ba'i nyon mongs pa rab tu spangs nas bag chags kyi nyon mongs pa rab tu ma spangs pa bsam gyis mi khyab pa'i 'chi 'pho dang ldan pa de ni bdag gi skye ba zad do/ /tshangs par spyod pa la gnas so/ /bya ba byas so zhes yang dag par seng ge'i sgra sgrogs shing de la sogs pa smras nas gang zag la bdag med par yongs su 'dris pa nas mya ngan las 'das pa'i bar gyi blor 'gyur ro/ /blo gros chen po gzhan dag ni bdag dang / sems can dang / srog dang / gso ba dang / skyes bu dang / gang zag yod par khong du chud par mya ngan las 'das pa tshol lo/ /blo gros chen po yang gzhan dag ni dngos po thams cad rgyu la rag las par mthong nas mya ngan las 'das pa 'dod pa'i blo 'gyur te/ blo gros chen po chos la bdag med par mthong ba med pa'i phyir thar pa ni med do/ /blo gros chen po 'di ni nyan thos kyi theg pa mngon par rtogs par 'gyur ba dang / mu stegs can gyi rigs 'byung ba ma yin pa las 'byung ba'i blo can te/ blo gros chen po 'di la khyod kyis lta ba ngan pa rnam par bzlog pa'i phyir brtson par bya'o/ /blo gros chen po da la rang sangs rgyas kyi theg pa mngon par rtogs par 'gyur ba'i rigs ni gang gcig pu'i phyir mngon par rtogs par bstan na mchi ma dang snying yer zhes lus kyi spu ldang bar 'gyur zhing 'du 'dzi med pa'i rkyen gyis dngos po la mngon par zhen pa dang / rang gi lus kyis rdzu 'phrul sna tshogs pa rnam pa mang po bsnor ba dang / zung gi cho 'phrul bstan pa rab tu bshad na dga' bar 'gyur ba yin te/ de ni rang sangs rgyas kyi theg pa mngon par rtogs par 'gyur ba'i rigs can du shes nas rang sangs rgyas kyi theg pa mngon du rtogs par 'gyur ba dang rjes su mthun pa'i gtam bya'o/ /blo gros chen po 'di ni rang sangs rgyas kyi theg pa mngon par rtogs par 'gyur ba'i rigs can gyi mtshan nyid do/ /blo gros chen po de la de bzhin gshegs pa'i theg pa mngon par rtogs par 'gyur ba'i rigs ni rnam pa gsum ste/ 'di ltar rang bzhin gyi rang bzhin med pa'i chos mngon par rtogs par 'gyur ba'i rigs dang / khong du chud pa dag gi so so rang gi mngon par rtogs par 'gyur ba'i rigs dang / sangs rgyas kyi zhing phyi rol yangs pa mngon par rtogs pa'i rigs so/ /blo gros chen po rnam pa gsum po 'di dag las gang yang rung ba zhig bstan pa dang / rang gi sems snang ba'i lus dang / kun gzhi dang / longs spyod dang / gnas bsam gyis mi khyab pa'i yul bstan pa na mi 'jigs mi skrag skrag par mi 'gyur na de ni de bzhin gshegs pa'i theg pa mngon par rtogs par 'gyur ba'i rigs can du shes par bya ste/ blo gros chen po 'di ni de bzhin gshegs pa'i theg pa mngon par rtogs par 'gyur ba'i rigs can gyi mtshan nyid do/ /blo gros chen po ma nges pa'i rigs can gsum po 'di dag bstan pa'i tshe gang la dga' ba de la rjes su sbyor bar bya'o/ /blo gros chen po 'di ltar rigs rnam par dgod pa 'di ni yongs su sbyang ba'i sa ste/ snang ba med pa'i sa la 'jug pa'i phyir rnam par dgod par bya'o/ /so so rang gi kun gzhi la rang gi nyon mongs pa'i bag chags dag nas chos la bdag med pa mthong ba'i phyir ting nge 'dzin gyi bde ba la gnas pa thob nas nyan thos rnams kyang rgyal ba'i sku nyid rab tu thob par 'gyur ro zhes gsungs pa dang / yang mdo de nyid las de la theg pa gcig po rtogs pa'i mtshan nyid gang zhe na/ 'di lta ste/ theg pa gcig gi lam rig cing khong du chud pas theg pa gcig ces bya'o/ /theg pa gcig gi lam rig cing khong du chud pa gang zhe na/ 'di lta ste/ gzung ba dang 'dzin pa'i rnam par rtog pa yang dag pa ji lta ba bzhin du gnas pas rnam par rtog pa mi 'byung ba'i phyir theg pa gcig gi khong du chud par byas pa yin no/ /blo gros chen po theg pa gcig po khong du chud pa 'di ni nga ma gtogs par mu stegs can gzhan dang / nyan thos dang / rang sangs rgyas dang / tshangs pa la sogs pas sngon ma thob bo/ /des na de'i phyir blo gros chen po theg pa gcig ces bya'o/ /blo gros chen pos gsol ba/ bcom ldan 'das kyis ci'i slad du theg pa gsum du bshad de/ theg pa gcig tu ma bshad/ bcom ldan 'das kyis bka' stsal pa/ blo gros chen po 'di ltar nyan thos dang / rang sangs rgyas thams cad ni de bzhin gshegs pa'i gdul bya dang / rab tu dben pa'i rnal 'byor gyi lung gis 'grol gyis rang gis ma yin te/ blo gros chen po bdag nyid yongs su mya ngan las mi 'da' ba'i chos can bas na nyan thos dang / rang sangs rgyas thams cad la theg pa gcig tu ma bshad do/ /gzhan yang blo gros chen po nyan thos dang / rang sangs rgyas thams cad ni shes bya'i sgrib pa dang / /las kyi bag chags ma spangs pa'i phyir chos la bdag med pa ma rtogs shing bsam gyis mi khyab par 'gyur ba'i shi 'pho ba ma thob pas nyan thos rnams la theg pa gsum du bstan te/ theg pa gcig tu ma yin no/ /blo gros chen po de dag nam nyes pa'i bag chags thams cad spangs shing chos la bdag med par rtogs pa de dag bag chags kyi nyes pa dang / ting nge 'dzin gyis myos par gyur nas zag pa med pa'i dbyings nas slar sad de/ de yang 'jig rten dang 'jig rten las 'das pa zag pa med pa'i dbyings su gtogs pa'i tshogs rnams yongs su bkang nas chos kyi sku bsam gyis mi khyab pa la dbang byed pa rab tu thob par 'gyur ro/ /de la 'di skad ces bya ste/ lha yi theg dang tshangs pa'i theg /nyan thos kyi yang de bzhin te/ /de bzhin gshegs dang rang rgyal gyi/ /theg pa de dag ngas bshad do/ /ji srid sems ni 'jug pa'i bar/ /theg pa dag la thug pa med/ /sems ni shin tu gyur pas na/ /theg pa med cing 'gro ba'ang med/ /theg pa'i rnam pa gzhan med kyang / /sems can rnams ni drang ba'i phyir/ /theg pa tha dad ngas bshad de/ /theg pa gcig tu ngas bstan to/ /de bzhin rnam grol gsum po dang / /chos la bdag med de nyid dang / /mnyam med ye shes nyon mongs pa/ /rnam par grol bas de dag spangs/ /ji ltar shing dag rgya mtsho la/ /rlabs rnams kyis ni rnam par g.yengs/ /de bzhin nyan thos rmongs pa yang / / mtshan nyid rnams kyis rab tu g.yengs/ /kun nas ldang dang bral mod kyi/ /nyon mongs bag chags rnams dang 'brel/ /ting 'dzin myong bas de myos te/ /zag pa med pa'i dbyings na 'khod/ /tha mar phyin pa de las med/ /phyir yang de las mi ldog ste/ /ting nge 'dzin gyi lus thob nas/ /bskal pa'i bar du de mi sad/ /ji ltar skyes bu ra ro ba/ /chang dang bral nas sad gyur bzhin/ /de nas de dag gang nga'i yang / /chos kyi sku ni thob par 'gyur/ /zhes gsungs pa dang / /phyir mi ldog pa'i 'khor lo'i mdo las kyang theg pa chen po gcig tu bstan pa'i dbang du mdzad nas gsungs pa/ /de nas bcom ldan 'das de'i bsnyen bkur ba byang chub sems dpa' sems dpa' chen po sgra dbyangs snyan pa zhes bya ba de pad+ma'i stan de las langs te/ bla gos phrag pa gcig tu bgos nas bcom ldan 'das de'i zhabs la mgo bos phyag 'tshal te/ pus mo g.yas pa'i lha da pad+ma'i snying po la btsugs nas bcom ldan 'das ga la ba de logs su thal mo sbyar ba btud de bcom ldan 'das la 'di skad ces gsol to/ /bcom ldan 'das 'jig rten gyi khams mi mjed de ji srid cig na mchis/ de skad ces gsol pa dang / de bzhin gshegs pa 'od zer gyis khebs pa'i pad+ma rab tu rgyas pa'i skus byang chub sems dpa' sems dpa' chen po sgra dbyangs snyan pa la 'di skad ces bka' stsal to/ /rigs kyi bu 'jig rten gyi khams 'di nas nub phyogs logs su 'jig rten gyi khams gang+gA'i klung gi bye ma snyed 'das pa na'o/ /gsol pa/ bcom ldan 'das 'jig rten gyi khams de na bcom ldan 'das gang chos ston/ bcom ldan 'das des bka' stsal pa/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa zhes bya'o/ /gsol pa/ bcom ldan 'das de ni chos ston pa ci 'dra ba zhig lags/ bka' stsal pa/ theg pa gsum las brtsams te'o/ / gsol pa/ bcom ldan 'das theg pa gsum po de dag gang lags/ bka' stsal pa/ nyan thos kyi theg pa dang / rang sangs rgyas kyi theg pa dang / theg pa chen po ste/ theg pa gsum po de dag las brtsams nas bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa de chos ston to/ /gsol pa/ bcom ldan 'das/ sangs rgyas bcom ldan 'das kyi chos bstan pa mthun pa ma lags sam/ bka' stsal pa/ rigs kyi bu sangs rgyas bcom ldan 'das rnams kyi chos bstan pa ni mthun no/ /gsol pa/ sangs rgyas bcom ldan 'das rnams kyi chos bstan pa ci tsam zhig mthun/ bka' stsal pa/ sangs rgyas bcom ldan 'das rnams kyi chos bstan pa ni phyir mi ldog pa'i chos kyi 'khor lor mthun no/ /gsol pa/ bcom ldan 'das/ ji ltar bcom ldan 'das de theg pa gsum las brtsams te/ de ltar bcom ldan 'das chos ston to/ /bka' stsal pa/ rigs kyi bu sems can de dag snyigs ma lnga'i dus na byung bas dman pa la mos pa dag ste/ de dag theg pa gcig la mi 'jug pas na thabs mkhas pas de dag de ltar nye bar khrid de/ rigs kyi bu sangs rgyas bcom ldan 'das rnams ni thabs mkhas pa chen po dang ldan pa'o/ /bcom ldan 'das de ni snyigs ma lnga'i dus na byung ste/ de dag ni theg pa gcig la ma mos pa dag go zhes gsungs pa dang / yang de nyid las de nas bcom ldan 'das la tshe dang ldan pa kun dga' bos 'di skad ces gsol to/ /bcom ldan 'das ci lags/ 'jam dpal gzhon nur gyur pa phyir mi ldog pa'i 'khor lo'i slad du yongs su zhu lags sam/ /bka' stsal pa/ kun dga' bo de de bzhin te/ kun dga' bo sangs rgyas bcom ldan 'das rnams ni phyir mi ldog pa'i 'khor lo bskor ba dag go/ /gsol pa/ bcom ldan 'das de bzhin gshegs pa ci la dgongs te dad pas rjes su 'brang ba bstan/ chos kyi rjes su 'brang ba bstan/ de bzhin du bcom ldan 'das de bzhin gshegs pa dgra bcom pa yang dag par rdzogs pa'i sangs rgyas kyis ci la dgongs te brgyad pa dang / rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa dang / nyan thos dang / rang sangs rgyas dang / bcom ldan 'das de bzhin gshegs pas gang la dgongs te dad pas rjes su 'brang ba yongs su bstan pa dang / de bzhin du/ de bzhin gshegs pas gang la dgongs te chos kyi rjes su 'brang ba dang / brgyad pa dang / rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa dang / nyan thos dang / rang sangs rgyas yongs su bstan pa de bcom ldan 'das de bzhin gshegs pas byang chub sems dpa'i chos kyang de nyid lags par de ltar yongs su bstan tam/ ci lags/ bcom ldan 'das kyis bstan du gsol/ bka' stsal pa/ kun dga' bo de de bzhin te/ de bzhin gshegs pas de dag nyid byang chub sems dpa'i chos zhes de skad yongs su bstan to/ /de ci'i phyir zhe na/ kun dga' bo snyigs ma lnga'i tshe skyes pa'i sems can de dag ni dman pa la mos pa dag ste/ de dag sangs rgyas kyi ye shes la mngon par mos pas kun dga' bo sangs rgyas bcom ldan 'das thabs la mkhas pas de ltar de dag la chos ston to/ /kun dga' bo sems can gang dag rgya chen po la mos pa de dag ni nyung ste/ kun dga' bo sems can gang dag dman pa la mos pa de dag gi ched du de bzhin gshegs pa thabs mkhas pa de lta bus chos ston to/ / thabs 'dis sangs rgyas kyi chos ston to zhes gsungs so/ /yang de nyid las/ 'di la dngos po grub pa med/ /'di la sems can yod ma yin/ /ci nas sus kyang mi mthong ba/ /khams de rnam par lta bar gyis/ /nyin dang mtshan du g.yel med par/ /sems can rnams la de skad sgrogs/ /bdag ni 'ga' zhig sgrogs so zhes/ /rlom sems de la ci yang med/ /ces gsungs pa dang / yang de nyid las/ spros pa med cing rnyog pa med/ /chags pa med pa'i dbyings kyang ston/ /sangs rgyas chos rnams ma lus par/ /rnam par mthong nas ston par byed/ /sangs rgyas kyis ni gang gsungs pa/ / chos dang ring bar mi rtog cing / /chos dang nye bar mi rtog ste/ /de phyir de dag 'dre ba med/ /sgrogs kyang 'dre ba yod min zhing / /sems can dpag tu med la brjod/ /sems can de dag mthong ba med/ /des de nyan thos zhes brjod do/ /kun dga' 'di la dgongs nas ni/ /nga yis nyan thos yongs su bstan/ / byang chub sems dpa' mi gnas pa/ /nyan thos de ltar shes par gyis/ /zhes gsungs pa dang / yang de nyid las/ /nyon mongs med cing bral ba med/ /chos med rnam par smin pa med/ /sangs rgyas chos dang dge 'dun med/ /mya ngan 'das med rab byung med/ /de la zhi gnas gang yang med/ lhag mthong yang ni yod ma yin/ /yo byad bsnyungs med 'dod chung med/ /le lo med cing brtson 'grus med/ /rgod pa med cing 'gyod pa med/ /sdom pa'ang yod pa ma yin te/ /gang phyir sdom par gyur pa yi/ /'di la dngos po grub pa med/ /'di la rtog pa'ang rnam rtog med/ /rnam mi rtog pa'ang yod ma yin/ /'jigs pa med cing dgon pa med/ /bcings pa med cing thar pa med/ /'di ni sgra yis 'jug pa ste/ /'jug pa med par nges par bstan/ /chos rnams thams cad sgra med de/ /sgra nyid kyis ni brjod pa yin/ /'di ni mngon sum gyur pas na/ /zad mi shes pa'i tshul bstan to/ /ting 'dzin 'di la brten nas ni/ /de ni sgra la mi chags so/ /ci 'dra gang gi gang yin pa/ /sgra de des ni mngon sum shes/ /chos kun 'di ltar mnyam pa ste/ /brjod pa med cing gnas pa med/ /'di ni mngon sum gyur pas na/ /tshu rol nas ni pha rol song / /de ni smod pa med pa ste/ /rang rdzogs sangs rgyas zhes brjod do/ /zhes gsungs pa dang / yang de nyid las/ len pa len pas ma yin te/ /stong par de yin rnam par bshig /de ni dngos por grub med de/ /smig rgyu la ni chu bzhin no/ /de yi srid par 'du shes gang / /de yi gnyen 'du shes sdig can/ /de ni de yi rang bzhin gyis/ /rtag par shin tu dngos med ces/ /de la skye ba thams cad med/ /de la 'chi ba yod ma yin/ /de ni nam yang gang zhig tu/ /skye bar 'gyur ba gang yang med/ /rkyen rnams 'di dag shes nas ni/ /de ni gang la'ang mi gnas te/ /rang sangs rgyas zhes bya ba'i sgrar/ /byang chub sems dpa' rab tu bstan/ /zhes rgya cher gsungs pa yin no/ /de bas na theg pa thams cad ni theg pa gcig la zhugs pa yin pas na/ theg pa gcig gi 'bras bur gnas/ /zhes bya'o/ /nyon mongs khams rnams dag pa'i bdag /ces bya ba la/ nyon mongs pa rnams kyi rgyur gyur pa ni/ nyon mongs pa'i khams te/ nyon mongs pa'i rigs so/ /de yang / spungs dang skye sgo rigs kyi don/ / phung po skye mched khams rnams so/ /zhes bshad pa'i phyir ro/ /de yang 'dod chags dang / zhe sdang dang / gti mug ni mi dge ba'i rtsa ba gsum ste/ 'di dag ni rang nyid kyang mi dge ba'i ngo bo nyid yin la/ mi dge ba gzhan rnams kyi yang rtsa bar 'gyur ba yin pas mi dge ba'i rtsa ba zhes bya'o/ / de rnams rnam par dag pas chos thams cad bdag med par mthong ba ste/ des rtsa ba ma lus par drungs nas phyung bas nyon mongs pa'i khams rnam par dag pa'i bdag nyid 'ba' zhig gang yin pa de ni/ nyon mongs khams rnams dag pa'i bdag /ces bya ba la/ yang na nyon mongs pa rnams kyi khams ni rang bzhin dang ngo bo nyid ces bya ba'i don to/ /rang bzhin gang yin zhe na/ chos thams cad dang nyon mongs pa rnams kyi rang bzhin ni gdod ma nas ma skyes pa yin pas na rang bzhin rnam par dag pa'i bdag nyid kyi ngo bo nyid gang yin pa de la de skad ces bya'o/ /las kyi khams rnams zad byed pa/ zhes bya ba la/ las dge ba dang / mi dge ba dang / lung du ma bstan pa kun nas slong bar byed pa'i sems ni las kyi khams so/ /bdag dang bdag gis gzung ba dang 'dzin pa bskyed pa la mngon par zhen pa las de 'byung bar 'gyur la/ phyin ci log de skyed par byed pa'i las kyi khams kun du bskyed pa yang skye ba med pa'i chos can du bstan pas na/ las kyi khams rnams zad byed pa/ /zhes bya'o/ /chu bo rgya mtsho kun las brgal/ /zhes bya ba la/ chu bo ni bzhi ste/ 'dod pa'i chu bo dang / srid pa'i chu bo dang / lta ba'i chu bo dang / ma rig pa'i chu bo'o/ /de yang sems can rnams kyi legs par phrogs pas na chu bo ste/ chu bo'i chu bo dang 'dra'o/ /chu bo de ni rgal dka' ba'i phyir rgya mtsho dang 'dra bas na rgya mtsho'i/ /de las yang dag par kun du brgal ba ni rnam pa thams cad du pha rol tu byon pas slar mi ldog pa'o/ /sbyor ba'i dgon pa las byung ba/ /zhes bya ba la/ sbyor ba ni bzhi ste/ 'dod pa'i sbyor ba dang / srid pa'i sbyor ba dang / lta ba'i sbyor ba dang / ma rig pa'i sbyor ba'o/ /sbyor ba de rnams ni shin tu 'jigs su rung bas na dgon pa'o/ /de rnams las byung ba ni nges par mthong ba ste/ des na/ sbyar ba'i dgon pa las byung ba/ /zhes bya ste/ nges pa'i tshig ni yang khams dang / 'gro ba dang / skye gnas dang / sa rnams su sbyor zhing sems can rnams chu bor lhung bar 'gyur bas na sbyor ba zhes bya'o/ /nyon mongs nye ba'i kun nyon mongs/ /bag chags bcas par gtan spangs pa/ /zhes bya ba la/ de la nyon mongs pa ni dgu bcu rtsa brgyad do/ /nye ba'i nyon mongs pa yang de nyid de/ de rnams mdor bsdus pa dang rgyas par phye nas gsungs pa yin no/ /de la kun du sbyor ba dgu ste/ rjes su chags pa dang / khong khro ba dang / nga rgyal dang / ma rig pa dang / lta ba dang mchog tu 'dzin pa dang / the tshom dang / ser sna dang / phrag dog go/ /de la khams gsum gyi 'dod chags zhen pa'i mtshan nyid rgya skyegs zhu bar sbyar ba lta bu'i chos ni rjes su chags pa ste/ rjes su chags pa nyid kun du sbyor ba'o/ /sems can rnams la gnod cing gsod pa'i mtshan nyid can sa bon kha ba lta bu'i chos ni khong khro ba ste/ khong khro ba nyid kun du sbyor ba'o/ /bdag dang gzhan du nye bar btags nas sems mtho ba'i mtshan nyid can du skyes bu rengs pa lta bu ni nga rgyal lo/ /de yang rnam pa bdun te/ nga rgyal dang / che ba'i nga rgyal dang / nga rgyal las kyang nga rgyal dang / nga'o snyam pa'i nga rgyal dang / mngon pa'i nga rgyal dang / cung zad snyam pa'i nga rgyal dang / log pa'i nga rgyal lo/ /de la nga rgyal ni chung ngu bas bdag rus dang / rigs dang / gzugs dang / nor dang / thos pa dang / tshul khrims dang / bzo la sogs pa dag gis bye brag tu 'phags pa'am/ rus la sogs pa 'dra ba dang mtshungs so snyam pa de'i rgyu las byung ba'i sems kyi rlom sems de ni nga rgyal zhes bya'o/ /che ba'i nga rgyal ni mtshungs pa bas bdag rus la sogs pa dag gis bye brag tu 'phags pa'am/ che ba dang mtshungs so snyam pa des drangs pa'i sems khengs pa ni che ba'i nga rgyal lo/ /nga rgyal las kyang nga rgyal ni che ba bas kyang bdag ches che'o snyam pa des drangs pa'i sems khengs pa'o/ /nga'o snyam pa'i nga rgyal ni bdag tu lta ba'i rjes las byung ba'i sems khengs pa'o/ /mngon pa'i nga rgyal ni rgyun du zhugs pa'i 'bras bu la sogs pa gong ma'i khyad par thob par bya ba ma thob par bdag gis thob po snyam pa de'i rgyu las byung ba'i sems kyi rlom sems so/ /cung zad snyam pa'i nga rgyal ni rigs la sogs pa khyad par ches 'phags pa bdag cung zad cig gis chung bar blta zhing des rlom sems pa'o/ /log pa'i nga rgyal ni yon tan ma yin pa dang ldan par blta zhing des rlom sems pa'o/ /nga rgyal bdun po 'di dag ni nga rgyal gyis kun du sbyor ba zhes bya'o/ /ma rig pa zhes bya ba ni khams gsum po'i mi shes pa mi rtog pa'i mtshan nyid long ba lta bu ste/ rig pa'i gnyen po ni ma rig pa zhes bya'o/ /dag pa ni gnyen po la gzhag pa'i phyir mi mdzad pa dang / mi bden pa la sogs pa bzhin no/ /ma rig pa nyid kun du sbyor ba ni ma rig pa'i kun du sbyor ba'o/ /'jig tshogs dang mthar 'dzin pa dang log par lta ba gsum ni lta ba'i kun du sbyor ba'o/ /de la nye bar len pa'i phung po lnga po bdag med pa bdag gi med pa rnams la bdag dang bdag gi tshul gyis zhugs pa nyon mongs pa can gyi blo ni 'jig tshogs la lta ba'o/ /de ni 'jig pa yang yin la tshogs kyang yin pas 'jig tshogs so/ /de la lta bas 'jig tshogs la lta ba'o/ /chad pa ma yin pa rtag pa ma yin pa de dag nyid la chad pa dang / rtag pa'i tshul gyis zhugs pa nyon mongs pa can gyi blo ni mthar 'dzin par lta ba ste/ mtha' gnyis su zhugs pa'i phyir ro/ /las med do/ /las kyi 'bras bu med do/ /thar pa med do/ /de thob par byed pa'i lam yang med do snyam du de ltar dngos po yod pa yang dag par 'jig par zhugs pa nyon mongs pa can gyi blo gang yin pa de ni log par lta ba'o/ /lta ba gsum po de dag ni lta ba'i kun du sbyor ba'o/ /mchog tu 'dzin pa gnyis po lta ba mchog tu 'dzin pa dang / tshul khrims dang brtul zhugs mchog tu 'dzin pa ni mchog tu 'dzin pa'i kun du sbyor ba'o/ /de la lta ba mchog tu ma yin pa de dag dang nye bar len pa'i phung po lnga po mchog ma yin pa rnams la mchog go snyam du mchog tu 'dzin pa'i blo'i bye brag gang yin pa de ni lta ba mchog tu 'dzin pa ste/ rtog pa zhes bya ba'i don gang yin pa'o/ /tshul khrims ni 'chal ba'i tshul khrims spangs pa'o/ /brtul zhugs ni khyi dang / ri dgas dang / ba lang gi brtul zhugs dang / gcer bu dang / thab dang thal ba'i nang na nyal ba dang / skra 'bal ba dang 'bab stegs su 'khru ba dang / 'bras bu dang rtsa ba za ba dang / ral pa thogs pa la sogs pa ste/ dag pa'i bdag nyid ma yin pa de gnyi ga la dag par yid ches pa'i blo'i bye brag bram ze'i cho ga can gtsang sbra 'dod pa lta bu'i chos gang yin pa de ni tshul khrims dang / brtul zhugs mchog tu 'dzin pa'o/ /mchog tu 'dzin pa'i gnyis po de dag ni mchog tu 'dzin pa'i kun du sbyor ba'o/ /the tshom ni sdug bsngal ba dang / kun 'byung ba dang / 'gog pa dang / lam zhes bya ba bden pa rnams la yid gnyis za ba las lam kha brag dang / rtsa mi 'dra ba'i chos nyid de/ 'di sdug bsngal yin nam/ 'di sdug bsngal ma yin snyam pa la sogs pa'o/ /the tshom nyid kun du sbyor bas the tshom gyi kun du sbyor ba'o/ /phrag dog ni pha rol gyi 'byor pa la mi bzod pa ste/ pha rol po nor dang ldan nam/ mkhas nas bkur ba rnams la sems khong nas 'khrugs pa zhes bya ba'i don gang yin pa'o/ /phrag dog nyid kun du sbyor bas phrag dog gi kun du sbyor ba'o/ /dngos po 'di dag las gzhan la mi gtong ngo snyam du sems kyi kun du 'dzin pa gang yin pa de ni ser sna ste/ de nyid kun du sbyor bas ser sna'i kun du sbyor ba'o/ /kun du sbyor ba'i don ni 'ching ba'i don te/ ji skad du 'jig rten gyi mgon pos kyang / mig gzugs rnams la kun du mi sbyor la/ gzugs rnams kyang mig la ma yin mod kyi/ de la 'dod pa la 'dod chags gang yin pa de ni 'dir kun du sbyor ba ste/ dper na ba lang nag po yang ba lang dkar po la kun du mi sbyor la/ ba lang dkar po yang ba lang nag po la ma yin no/ /zhes rgya cher gsungs pa lta bu'o/ /kun du sbyor ba rnams ni 'ching ba'i don yin pas kun du sbyor ba gang yin pa de ni 'ching ba yang yin mod kyi/ 'on kyang gtso bor gyur pa'i phyir de bzhin gshegs pa'i mdo las 'dod chags ni 'ching ba/ zhe sdang ni 'ching ba/ gti mug ni 'ching ba zhes 'ching ba gsum gsungs te/ de dag gi mtshan nyid ni bshad zin to/ /phra rgyas ni bdun te/ 'dod pa la 'dod chags dang / khong khro dang / srid pa'i 'dod chags dang / nga rgyal dang / ma rig pa dang / lta ba dang / the tshom gyi phra rgyas so/ /de rnams kyi mtshan nyid ni kun du sbyor ba bsam pa'i skabs su bshad zin te/ khams dang / tshul dang / rnam pa'i bye brag de dbye bar bya'o/ /de la 'dod pa rnams la 'dod chags pa ni 'dod pa'i 'dod chags so/ /de nyid phra rgyas yin pas 'dod pa la 'dod chags kyi phra rgyas so/ /de la 'dod par gtogs pa'i 'dod chags sdug bsngal dang / kun 'byung dang / 'gog pa dang / lam mthong ba dang / bsgom pas spang bar bya ba ni 'dod pa la 'dod chags kyi phra rgyas so/ /sdug bsngal la sogs pa mthong ba dang bsgom pas spang bar bya ba'i khong khro ba lnga ni khong khro ba'i phra rgyas so/ /gzugs dang gzugs med pa'i 'dod chags bcu po sdug bsngal la sogs pa mthong ba dang bsgom pas spang bar bya ba ni srid pa'i 'dod chags kyi phra rgyas so/ /nang du bltas par gyur pa dang / bsam gtan dang / gzugs med pa rnams la thar par 'du shes pa bzlog pa'i phyir khams gnyis nas skyes pa'i 'dod chags ni srid pa'i 'dod chags so zhes bde bar gshegs pas gsungs so/ /de bzhin du khams gsum pa'i nga rgyal bco lnga sdug bsngal la sogs pa mthong ba dang / bsgom pas spang bar bya ba ni nga rgyal gyi phra rgyas so/ /ma rig pa'i phra rgyas kyang de bzhin du khong du chud par bya'o/ /khams gsum pa'i lta ba sum cu rtsa drug po dag ni lta ba'i phra rgyas te/ de la 'dod par gtogs pa'i 'jig tshogs la lta ba dang / mthar 'dzin par lta ba dang / sdug bsngal mthong bas spang bar bya ba'i log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / kun 'byung mthong bas spang bar bya ba'i log par lta ba dang / lta ba mchog tu 'dzin pa dang / 'gog pa mthong bas spang bar bya ba'i log par lta ba dang / lta ba mchog tu 'dzin pa dang / lam mthong bas spang bar bya ba'i log par lta ba dang / lta ba mchog tu 'dzin pa dang / tshul khrims dang / brtul zhugs mchog tu 'dzin pa de dag ni lta ba bcu gnyis so/ /gzugs dang gzugs med pa'i yang de bzhin te/ lta ba sum cu rtsa drug po de dag ni lta ba'i phra rgyas so/ /khams gsum pa'i the tshom bcu gnyis ni the tshom gyi phra rgyas te/ de la 'dod par gtogs pa sdug bsngal la sogs pa mthong bas spang bar bya ba bzhi dang / de bzhin du gzugs dang gzugs med pa dag go/ /'dod pa la 'dod chags dang / khong khro ba'i phra rgyas dag ni rnam pa tha dad pa nyid do/ /khams kyis ma yin/ tshul gyis ma yin no/ /srid pa'i 'dod chags kyi phra rgyas ni khams dang rnam pa ste/ tshul gyis ma yin no/ /nga rgyal dang / ma rig dang / the tshom gyi phra rgyas kyang khams dang rnam pa ste tshul gyis ma yin no/ /lta ba'i phra rgyas ni khams dang / rnam pa dang / tshul gyi bye brag gis tha dad do/ /de la lta ba rnams kyi khams dang / lta ba'i bye brag ni bshad zin to/ /tshul gyi bye brag ni ma bshad de brjod par bya'o/ /de la bdag dang bdag gi tshul gyis zhugs pa ni 'jig tshogs la lta ba'o/ /chad pa dang rtag pa'i tshul gyis zhugs pa ni mthar 'dzin par lta ba'o/ /med pa'i tshul gyis zhugs pa ni log par lta ba'o/ /mchog gi tshul gyis zhugs pa ni lta ba mchog tu 'dzin pa'o/ /dag pa'i tshul gyis zhugs pa ni tshul khrims dang brtul zhugs mchog tu 'dzin pa'o/ /phra rgyas kyi don ni phra rgyas kyi don to/ /yang na lus dang sems kyi rgyun gyi rjes su bsnyegs pa ste/ chu la rgyu bas nam mkha' la rgyu ba'i grib ma la bsnyegs pa lta bu'i phyir phra rgyas so/ /yang na rjes su zhugs pa ste/ til rnams ni til mar lta bu'i phyir phra rgyas so/ /yang nye bar len pa'i phung po lnga rnams la dmigs pa dang ldan pa rnams kyis rgyas par 'gyur bas phra rgyas so/ /ci'i phyir rgyas par 'gyur ba zhe na/ dmigs pa dang ldan pa gnyis kyis rtag par 'gyur zhes bya ba'i tha tshig go/ /de ltar phra rgyas bdun po khams dang tshul dang rnam pa'i bye brag gis tha dad pa de dag ni dgu bcu rtsa brgyad du 'gyur te/ 'dod pa na sdug bsngal mthong bas spang bar bya ba bcu ste/ 'jig tshogs la lta ba dang / mthar 'dzin par lta ba dang / log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / the tshom dang / 'dod chags dang / khong khro ba dang / nga rgyal dang / ma rig pa'o/ /kun 'byung ba mthong bas spang par bya ba bdun te/ de dag gi nang nas 'jig tshogs la lta ba dang / mthar 'dzin par lta ba dang / tshul khrims dang brtul zhugs mchog tu 'dzin pa ma gtogs pa rnams so/ /'gog pa mthong bas spang par bya ba bdun te/ de dag nyid do/ /lam mthong bas spang par bya ba brgyad do/ /bdun po de dag nyid dang / tshul khrims dang brtul zhugs mchog tu 'dzin pa'o/ /bsgom pas spang bar bya ba bzhi ste/ lta ba rnams dang the tshom ma gtogs te/ de ltar de dag ni 'dod par gtogs pa'i phra rgyas sum cu rtsa drug go/ /gzugs kyi khams rnams ni de dag nyid las khong khro ba lnga ma gtogs so/ /gzugs med pa rnams na yang de bzhin te/ de dag ni dgu bcu rtsa brgyad yin no/ /de la de dag gcig tu bsdus nas brgyad cu rtsa brgyad ni mthong bas spang bar bya ba'o/ /bcu ni bsgom pas spang bar bya ba'o/ /khams rnams kyi sdug bsngal dang / rgyu mthong bas spang bar bya ba'i lta ba dang / the tshom dang / dgu dang / de dang ldan pa'i ma rig pa dang / ma 'dres pa'i ma rig pa dang / de dag ni kun du 'gro ba zhes bya'o/ /lhag ma rnams ni kun du 'gro ba ma yin pa zhes bya'o/ /de bzhin du 'gog pa dang / lam mthong bas spang bar bya ba'i log par lta ba dang the tshom dang / de dang ldan pa'i ma rig pa dang / ma 'dres pa'i ma rig pa dang / de dag ni zag pa med pa la dmigs pa ste/ 'gog pa dang / lam la dmigs pa dang / de gnyis kyang zag pa med pa'i phyir ro/ /lhag ma rnams ni zag pa dang bcas pa la dmigs pa'o/ /de la gang dag zag pa dang bcas pa la dmigs pa de dag ni/ dmigs pa dang ldan pa gnyis kyis rgyas par 'gyur ro/ /gang dag zag pa med pa la dmigs pa de dag ni ldan pas te rang gi tshogs rnams so/ /de bzhin du khams rnams kyi 'gog pa mthong bas spang bar bya ba'i log par lta ba dang / the tshom dang / de dang ldan pa'i ma rig pa dang / ma rig pa 'ba' zhig pa dang / de dag ni 'dus ma byas la dmigs pa'o/ /lhag ma rnams ni 'dus byas la dmigs pa'o/ /de dag 'byung ba'i go rims ni dang po kho nar ma rig pa dang ldan pas sems can bden pa rnams la rmongs te/ de rnams sdug bsngal nas lam gyi bar de dag mi 'dod do/ /de nas glen pa rnams yang dag pa dang / log pa'i phyogs gnyis thos nas 'di sdug bsngal yin nam/ 'di sdug bsngal ma yin pa la sogs pa'i the tshom skye'o/ /de nas dogs pa'i blos dman pa ma yin pa dang / bsten nas log par thos pa dang / log par sems pas nges par 'byung ste sbyin pa med do snyam pa la sogs pa'o/ / de nas log par lta ba las 'jig tshogs la lta ba 'byung ste/ des nye bar len pa'i phung po lnga po rnams la sdug bsngal nyid bsal nas bdag tu mngon par zhen to/ /de las mthar 'dzin par lta ba 'byung ste/ des bdag chad pa dang / rtag pa mtha' gnyis bzung ba'i phyir ro/ /mthar 'dzin pa las tshul khrims dang brtul zhugs mchog tu 'dzin pa 'byung ngo / /mthar 'dzin pa gang yin pa de nyid kyis dag par yid ches so/ /de las kyang lta ba mchog tu 'dzin pa 'byung ngo / /gang gis dag par yid ches pa de la mchog tu 'dzin to/ /de'i 'og tu rang gi lta ba la 'dod chags skye'o/ /lta ba de nyid kyis kyang rlom sems su byed cing pha rol gyi lta ba'am/ rang gi rgyud kyis sngon bzung ba las gtong ba dag la zhe sdang skye ste/ de dag gi go rims ni de lta'o/ /nyon mongs pa re re yang rgyu gsum gsum las skye ste/ gal te phra rgyas ma spangs pa dang / tshul bzhin ma yin pa'i yid la byed pa dang / yul nye bar gnas par gyur nas rgyu dang yul dang sbyor ba'i stobs de dag las nyon mongs pa skye'o/ /de dag ni lus dang sems kyi rgyu nyon mongs par byed pas nyon mongs pa rnams zhes bya ste/ nyon mongs pa rnams gang yin pa de dag ni nye ba'i nyon mongs pa yang yin mod kyis gang dag de rnams las gzhan pa sems las byung ba'i chos nyon mongs pa can 'du byed kyi phung por bsdus pa de dag ni nye ba'i nyon mongs pa nyid do/ /de dag kyang gang zhe na/ sgyu dang / rgyags pa dang / rnam par 'tshe ba dang / dus che ba dang / khon du 'dzin pa dang / g.yo la sogs pa rnam pa du ma rgyud las byung ba rnams so/ /de la sgyu ni pha rol la slu ba'o/ /rgyags pa ni gzugs dang / lang tsho dang / rigs dang / tshul khrims dang / mang du thos pa la sogs pa rang gi chos rnams la chags te gzhan la mi ltos par sems yongs su gtugs pa'o/ /rnam par 'tshe ba ni lag pa dang / bong ba dang / dbyig pas brdeg pa dang / pha rol la tshig rtsub pos rnam par tho 'tshams pa'o/ /dus che ba ni kha na ma tho ba dang bcas pa'i dngos po dam du 'dzin pa ste/ de'i dbang gis rigs par bsgo ba mi 'dzin pa'o/ /khon du 'dzin pa ni kun nas mnar sems kyi dngos po mang du byed pa'o/ /g.yo ni sems gya gyu ba ste/ de'i dbang gis gzhan nas gzhan du brgyud cing gung du 'dren te/ gsal bar mi rtog par byed pa'o/ /de la de dag ni nang nas sgyu dang rgyags pa gnyis ni 'dod chags kyi rgyu mthun pa 'dod chags kyi rjes su 'gro ba ste/ 'dod chags kyi rigs la brten zhes bya ba'i tha tshig go/ /khon du 'dzin pa dang / rnam par 'tshe ba ni khong khro ba'i rjes su 'gro ba'o/ /dus che ba ni lta ba snyems pa'i rgyu mthun pa'o/ /g.yo ba ni log par lta ba'i rgyu mthun pa'o/ /gya gyu ba ji lta bu zhe na/ sdig pa can gyi lta ba'o zhes tshigs su bcad pa las 'byung ngo / /kun nas dkris te 'dug pa ni bcu ste/ rmugs pa dang / gnyid dang / rgod pa dang / 'gyod pa dang / phrag dog dang / ser sna dang / ngo tsha med pa dang / khrel med pa dang / khro ba dang / 'chab pa'o/ /de la rmugs pa ni lus dang sems las su mi rung ba ste/ slong zhes bya ba'i tha tshig go/ /gnyid ni lus dang sems 'dzin par mi nus pa dang / sems sdud pa ste/ de yang nyon mongs pa can nyid yin pas kun nas dkris te 'dug pa'o/ /rgod pa ni sems ma zhi ba'o/ /ngan par byas pa'i dngos po ni 'gyod pa'o/ /'dir de la dmigs pa sems las byung ba'i chos la 'gyod pa zhes bya ste/ yid la gcags zhes bya ba'i tha tshig go/ /rgyu la 'bras bus btags te/ dper na mi sdug pa la dmigs pa'i chos la mi sdug ces bya ba lta bu'o/ /'jig rten na yang gnas kyis gnas pa ston te/ dper na grong thams cad lhags so zhes bya ba lta bu'o/ /de yang nyon mongs pa can nyid yin pas kun nas dkris te 'dug pa'o/ / phrag dog dang ser sna'i mtshan nyid ni bshad zin to/ /ngo tsha med pa ni yon tan rnams dang / yon tan can rnams la mi gus pa ste/ gus pa'i gnyen po'i chos so/ /khrel med pa ni kha na ma tho ba la 'jigs par mi lta ba'o/ /kha na ma tho ba ni gang dam pa rnams kyis smad pa ngan song du 'gro ba'o/ /khro ba ni zhe sdang dang / rnam par 'tshe ba ma gtogs te/ sems can dang sems can ma yin pa dag la kun nas mnar sems pa'o/ /'chab pa ni kha na ma tho ba mkhyud pa'o/ /sems la kun nas dam du dkris te gnas pas kun nas dkris te 'dug pa rnams so/ /de dag las rmugs pa dang / gnyid dang / khrel med pa ni ma rig pa'i rgyu mthun pa'o/ /'gyod pa ni the tshom gyi rgyu las byung ba'o/ /ngo tsha med pa dang / rgod pa dang / ser sna ni 'dod chags kyi rgyu mthun pa'o/ /khong khro ba dang phrag dog ni khong khro ba las byung ba'o/ /'chab ba ni sred pa dang ma rig pa'i rgyu mthun pa'o/ /dri ma rnam pa bcu po de rnams kyang nye ba'i nyon mongs pa zhes bya'o/ /sems las byung ba rnams kyi rgyu phra ba ste/ de rgyun du 'bab pa yang bye brag phyed par mi nus na skad cig rnams la lta smos kyang ci dgos/ bcom ldan 'das kyis gsungs pa'i chos kyi mtshan nyid la mkhas pa'i blo can dag gis ni/ de'i 'bras bu'i khyad par mthong bas de dag gi rigs bzhin skyon med par rtogs kyi/ bde bar gshegs pa'i gsung rab 'chad pa'i slob dpon la bsnyen bkur ma byas pa 'khrul pa'i blo gros can dag gis ni ma yin no/ /de bzhin du/ sgyu dang / dregs pa dang / rnam par 'tshe ba dang / khengs pa dang / g.yo la sogs pa dpag tu med pa dag bshad mod kyis gzhung mangs su dogs pas 'dir ma spros so/ /nyon mongs pa dang / nye ba'i nyon mongs pa de dag gis kun du spags shing kun nas nyon mongs pas na kun nas nyon mongs pa ste/ nyon mongs pa dang nye ba'i nyon mongs pa de rnams shin tu mdzes pa'i rnam pa dang / phul du byung ba'i rnam pas bag chags dang bcas par spangs pa gang yin pa de ni/ nyon mongs nye ba kun nyon mongs/ bag chags bcas par gtan spangs pa/ /zhes bya'o/ /thugs rje chen po dang shes rab dang thabs ni/ snying rje che dang shes rab thabs/ /zhes bya ste/ de rnams kyis kun nas ma lus gsungs par 'gro ba'i don mtho ris dang / byang grol gyi mtshan nyid can don yod cing 'bras bu dang bcas pa rten byed cing rdzogs par mdzad pas na/ don yod 'gro ba'i don byed pa/ /zhes bya'o/ / mtshan mar 'dzin pa ni 'du shes te/ khams dang / 'gro ba dang / skye gnas thams cad du gtogs pa'i 'du shes thams cad ni 'du shes kun no/ /'du shes de rnams ni don spangs pa'i chos thams cad la bdag med pa'i ye shes 'dis spong bar mdzad pa'o/ / de nyid ni don te/ dgos pa gang yin pa de la/ 'du shes kun gyi don spangs pa/ /zhes bya'o/ /rnam par shes pa'i mtshan nyid can ni rnam shes so/ /de'i don ni gzung bar bya ba ste/ yul rnams so/ /de'i 'gog pa ni ngo bo nyid kyis skye ba med pa'o/ /de byed cing rtogs par mdzad pas ni/ rnam shes don ni 'gag par byed/ /ces bya'o/ /'du shes thams cad dang bral zhing gzung ba dang / 'dzin pa'i nye bar dmigs pa rnam par spangs su zin kyang don yod par 'gro ba rnams kyi don mdzad pas na/ sems can kun yid yul dang ldan/ /sems can kun gyi yid rig pa/ /zhes smos te/ sems can thams cad kyi yid kyi yul 'di la dmigs pa nyid kyis skal ba dang ldan pa dang / skal ba dang mi ldan pa nyid thugs su chud pa'i don gyis na/ sems can kun yid yul dang ldan/ /zhes bya'o/ /chung ngu dang / 'bring dang / chen po la sogs pa'i dbye bas tha dad pa'i sems can rnams kyi sems kyi ngo bo nyid thugs su chud pas na/ sems can kun gyi yid rig pa/ /zhes bya ste/ rig pa dang / rtogs pa dang / khong du chud pa zhes bya ba ni/ rnam grangs yin par shes par bya'o/ /gang 'di sems can thams cad kyi sems kyi ngo bo nyid bcom ldan 'das kyis thugs su chud de/ de lta mod kyi gzhan dag gi sems ni bcom ldan 'das kyi thugs las tha dad pa yin na/ don ji ltar rdzogs par 'gyur zhes kun du rtog pa la/ sems can kun gyi yid la gnas/ de dag sems dang mthun par 'jug /ces bya ba gsungs te/ de rnams kyi sems ni de dag sems so/ /de rnams kyi sems dang mthun pa ni mnyam pa'o/ /'jug pa ni thob pa'o/ /des na/ sems can kun gyi yid la gnas/ /zhes bya ste/ nang du song zhing gnyis su med par khong du chud pa'i rnam pas so sor snang ba skyes pas na/ de rnams kyi rang gi don ma tshang ba med par rdzogs par 'gyur ro/ /thag ring bar rtog pa ring du spangs pa nyid kyis ji ltar mngon par 'dod pa'i don rdzogs par mdzad pas na/ sems can thams cad kyi yid tshim par mdzad pa'i ngang tshul can yin pas na/ sems can kun yid tshim par byed/ /ces bya'o/ /mchog tu dga' ba'i bde ba chen po'i dga' ba skyed par mdzad pas na/ sems can kun gyi yid dga' ba/ /zhes bya'o/ grub pa mthar phyin 'khrul pa med/ /nor ba thams cad rnam par spangs/ /don gsum the tshom med pa'i blos/ /zhes bya ba la/ grub pa rnams kyi mtha' ni grub pa'i mtha' ste/ mthar thug pa de las gzhan pa'i lhag pa med pa'o/ /de ci'i phyir zhe na/ gang gi phyir 'khrul pa rnams dang bral ba'i rgyu gang gis na nor ba thams cad rnam par spangs pa'i phyir ro/ /'di ltar thams cad ji ltar shes she na/ gang gi phyir the tshom med pa'i blo zhes bya bas nor pa thams cad rnam par spangs pa yin la/ nor pa thams cad rnam par spangs pas na 'khrul pa med pa'o/ /de nyid kyis na grub pa'i mthar phyin zhes bya ste/ gzhan rnams kyis grub pa'i mtha' ni nyon mongs pa'i bag chags la sogs pa yod pas mthar thug par 'gro ba med pas na mthar phyin pa ma yin no/ /yang na grub pa'i mtha' ni 'dir phyogs 'jog pa ste/ chos thams cad bdag med pa nyid thugs su chud pa'i gnyis su med pa'i rnam par mi rtog pa'i ye shes kyi ngo bo nyid ni bcom ldan 'das kyi don dam pa'i rang bzhin yin pa'i phyir ro/ /de la 'khrul pa ni gzhung gzhan sna tshogs pa dag gis kun du bslang ba'i bdag dang bdag gir mngon par zhen pa rnams ni rnam pa sna tshogs par rig pas rnam par 'khor ba'i phyir 'khrul pa ste de dang bral ba'o/ /gang gi phyir zhe na/ 'khrul pa rnams las 'das par gyur pas na 'khrul pa med pa'o/ /de la rdzas dang / yon tan dang / las dang / spyi dang / khyad par dang / tshogs pa las bdag dang bdag gi dang / gzung ba dang / 'dzin pa po la sogs pa dang / phung po dang / khams dang / skye mched dang / gang zag la sogs pa ni nor ba'i bye brag gi phyogs snga ma nges par spangs pa ste/ tshad mas bcom pa'i phyir rnam par spangs pa gang yin pa de ni nor ba thams cad rnam par spangs pa'o/ /the tshom med pa'i blo ni shes bya thams cad rnam pa thams cad du thugs su chud pa'i ngo bo nyid kyis dri ma med pa'i blo gang yin pa de ni the tshom med pa'i blo zhes bya ste/ mi slu ba zhes bya ba'i don to/ /gsum ni bud med de/ shes rab kyi pha rol tu phyin pa'o/ /don ni dgongs pa ste/ des kha na ma tho ba med par gzhan gyi don mdzad pa gang yin pa de ni don gsum mo/ /yang na don rnam pa gsum ste/ spang bar bya ba dang / blang bar bya ba dang btang snyoms su bya ba'o/ /de la spang bar bya ba ni phyi rol gyi mi dge ba bcu la sogs pa'o/ /blang bar bya ba ni chos bdag med pa'i ye shes kyi tshogs dang bsod nams kyi tshogs so/ /btang snyoms su bya ba ni lung du ma bstan pa'i chos rnams te/ 'di dag thams cad ni gdul bya dang rjes su 'tsham pas na don de dgongs pa'o/ /de gang la mnga' ba de ni don gsum mo/ /rnam pa thams cad du mkhyen pa nyid ni thams cad ces bya ba'i sgras bshad do/ /de las don thams cad pa gang yin pa de kun don te/ gang gi phyir thams cad kyi don du 'gyur zhing skal ba ji lta ba bzhin du thams cad cir 'gyur bas na kun don to/ /yang na don med pa ni sdug bsngal dang / sdug bsngal gyi rgyu'o/ /don ni bde ba dang / bde ba'i rgyu ste/ thams cad du bde ba'i ngo bo nyid du gyur pa dang / bde ba thams cad ni rgyur gyur pas na kun don no/ /snying stobs dang / rdul dang / mun pa ni yon tan gsum ste/ 'dod chags dang / zhe sdang dang / gti mug gi bdag nyid can no/ /de bzhin yang ye shes kyi ngo bo nyid de/ 'dod chags dang / zhe sdang dang / gti mug gis 'dul ba'i sems can rnams gdul bar bya ba'i phyir/ de'i bdag nyid can gyi de bzhin gshegs pa'i ngo bo nyid du gyur pas na/ yon tan gsum gyi bdag ces bya ba'i grangs can gyis yongs su btags pa'i bems po'i rang bzhin can yongs su gyur pa'i ngo bo nyid kyi yon tan ni ma yin te/ tshad mas stobs kyis bcom zhing brtags pa tsam yin pa'i phyir ro/ /phung po lnga po nyid dus gsum yin gyi/ dus gzhan dag med do zhes bstan par bya ba'i phyir/ phung po lnga don dus gsum du/ /zhes bya ba gsungs te/ de dang der so sor snang ba bskyed par bya ba'i phyir de dang der bstan pas ston pa'o/ /de bzhin du skad cig ma bcu drug gi mtshan nyid dang ldan pa'i lam la sogs pa nye bar ston pa 'chad par mdzad pas na/ skad cig thams cad bye brag phyed/ /ces bya'o/ /yang bdag nyid ni/ skad cig gcig gis rdzogs sangs rgyas/ /sangs rgyas kun gyi rang bzhin 'chang / /zhes bya ba ste/ cha shas med cing dum bu med par de kho na nyid thugs su chud pa la ni rim pa yod pa ma yin te/ thugs su chud par bya ba'i rim pa'i mthar byon pas thugs su chud pa'i rim pa thams cad kyi bdag nyid blangs su zin kyang de bzhin du mthar thug pa med pas blo dman pa rnams ni rnam par dbye bas khong du chud par 'gyur ro/ /de bas na de rnams la nye bar ston cing bsgom pa'i lam la 'jug par bya ba'i phyir yin gyi/ dri ma med pa'i blo la ni rnam pa thams cad du de lta ma yin no/ /chos kyi sku'i ngo bo nyid kyis bye brag med pa na/ sangs rgyas kun gyi rang bzhin 'chang / /zhes bya'o/ /'chang ba de yang de'i bdag nyid kyis zhugs pa yin gyi/ gzung ba dang / 'dzin pa'i dngos po ni de la yod pa ni ma yin no/ /sangs rgyas thams cad ni y on tan gyi bdag nyid kyi skus thams cad du sems can thams cad kyi don thams cad rnam pa thams cad du mdzad pa la rang dbang du gyur cing gzugs thams cad las lhag pa'i skur sprul pas gzugs kyis mngon par rlom pa'i sems can rnams kyi dregs pa bsal bas sems can thams cad kyi don mdzad pa la mkhas shing byang ba nyid du bstan par bya ba'i phyir/ lus med lus te lus kyi mchog /lus kyi mtha' ni rtogs pa po/ /zhes bya ba gsungs te/ 'dod pa'i lha dpag tu med pa'i lus las lhag par gyur pa'i gzugs dang / kha dog dang / gzi mdangs dang blta na sdug pa la dbang sgyur ba la sogs pas zil gyis gnon pa'i sku dang ldan pas na/ lus med lus te lus kyi mchog /ces bya'o/ /gzugs de mtha' yas pa'i sku sprul par mdzad pas na/ lus kyi mtha' ni rtogs pa po/ /zhes bya'o/ /lha dang / lha ma yin dang / lto 'phye chen po dang / gnod sbyin dang / mi la sogs pa 'gro ba drug gi bye brag gis phye ba'i sems can thams cad kyi gzugs kyis 'dul ba rnams kyi dbang du mdzad nas de dang de'i gzugs su bdag nyid kyi dngos po yang dag par ston pa'i tshul can gang yin pa de ni/ gzugs rnams thams cad kun du ston/ /zhes pa'o/ /nyes pa thams cad dang bral zhing yon tan thams cad kyi 'od zer gyi snang ba dang ldan pa'i nor bu chen po'i ngo bo nyid du gyur pas na nor bu chen po'o/ /sems can thams cad kyi bsam pa thams cad yongs su rdzogs par byed pa'i yid bzhin gyi nor bu rin po ches mtshan pas na rin chen tog go/ /don dam pa'i ngo bo nyid chos kyi sku'i bdag nyid can du gyur pas na yang dag par rdzogs pa'i sangs rgyas thams cad kyis rtogs par bya zhing thugs su chud par bya ba yin pas na/ sangs rgyas kun gyis rtogs bya ba'o/ /sangs rgyas byang chub ni chos kyi sku las logs shig na yod pa ma yin pas na de nyid sangs rgyas byang chub po/ /'di skad ston par 'gyur te/ rtogs pa dang / rtogs par byed pa dang / rtogs pa po'i tshul gyis rnam pa thams cad du ston pa'i mdzad pa thams cad rdzogs par mdzad pas na thams cad kyis de bzhin du mthar thug pa nyid du bstan pa yin te/ rnam pa thams cad du ting nge 'dzin gyi ngo bo nyid du gyur pa'i bla na med pa'i chos kyi sku'i bdag nyid can ni bcom ldan 'das rje btsun 'jam dpal yin no/ /gsang sngags rgyu yin pas na gsang sngags las byung ba ste/ stong pa nyid kyi ye shes las byung ba'i gsang sngags ni rnam par dag pa'i rgyu las yang dag par byung ba yin pas khyad par can gyi 'bras bu skyed cing ster bar 'gyur ro/ /stong pa nyid kyi ye shes kyi ngo bo nyid yin pas na yi ge med pa'o/ /rgyu de gcig pu yin yang rigs kyi dbye bas gsum du 'gyur bar bstan par bya ba'i phyir/ gsang sngags chen po'i rigs gsum pa/ zhes bya ba gsungs te/ rgyu che ba nyid dang / 'bras bu che ba nyid kyis gsang sngags chen po'o/ /de la rgyu che ba nyid ni thams cad du khyab pa'i thugs rje chen po dang stong pa nyid rgyu yin pa'i phyir ro/ /'bras bu che ba nyid ni sems can ma lus pa'i bsam pa yongs su rdzogs par mdzad nas spyod pa'i sangs rgyas nyid 'bras bu yin pa'i phyir ro/ /gsang sngags chen po de rnams kyi rigs ni sku dang gsung dang thugs kyi ngo bo nyid du gyur pa'i phyir gsum ste/ rnam par snang mdzad dang / 'od dpag tu med pa dang / mi bskyod pa'i ngo bo nyid dang de bzhin gshegs pa dang / pad+ma dang / rdo rje'i rigs te/ rigs gsum po gang yin pa de ni/ gsang sngags chen po'i rigs gsum pa/ /zhes bya'o/ /yi ge med kyang gsang sngags kyi rigs rnams skyed par mdzad pa dang / gsang sngags kyi don skyed par mdzad pas bcom ldan 'das nyid rnam pa thams cad du thams cad kyi rgyu nyid du bstan par bya ba'i phyir/ gsang sngags don kun skyed pa po/ /thig le chen po yi ge med/ /ces bya ba gsungs te/ gsang sngags thams cad kyi don ni gsang sngags don to/ /de yang / man ni ye shes/ tra ni skyong bas na gsang sngags te/ mi gnas pa'i mya ngan las 'das pa sangs rgyas pa nyid ni don to/ /de bdag dang gzhan gyi rgyud la rdzogs par mdzad pas na/ gsang sngags don kun skyed pa po/ /zhes bya'o/ /thig le chen po ni stong pa nyid chen po ste/ spros pa thams cad kyis stong pa'i phyir chos kyi sku nyid ni thig le chen po'o/ /yi ge dang sgra dang brda thams cad dang bral bas na yi ge med pa'o/ /a ra pa tsa na'i sngags kyi bdag nyid can du gyur pas na yi ge lnga'o/ /gang 'di la yi ge med na/ yi ge med pa dang / yi ge lnga'i bdag nyid can du gyur pa ji ltar mi 'gal zhe na/ yi ge lnga'i gsang sngags nyid stong pa chen po'i don yin pas 'gal ba med do zhes bshad pa'i phyir stong pa zhes bya ba gsungs te/ de yang yi ge a ni chos thams cad skye ba med pa'o zhes skye ba med pa'i don ston par byed do/ /yi ge ra ni skye ba med pas 'dod chags la sogs pa'i rdul dang bral zhing 'dod chags la sogs pa'i nyon mongs pa thams cad med pa'o/ /yi ge pa ni don dam pa nyid yin pa'i phyir ro/ /yi ge tsa ni 'phel ba dang 'bri ba dang bral ba'o/ /des na yi ge na ni chos thams cad dngos po med pa zhes bya ste/ yi ge med pa nyid du byed par nus pas na sems 'gal ba med do/ /yang na gdul bya rnams la so sor snang ba dang rjes su mthun par gnas pa yin pas 'gal ba'i so so nyid med de/ dngos po'i chos nyid rigs 'di yin/ /bag chags stobs kyis bsgos pas na/ /bag chags so sor snang 'gyur gyi/ /nges pa can ni ma yin no/ /zhes bya bar thams cad du blta bar bya'o/ /thig le stong pa yi ge brgya/ /zhes bya ba la thig le stong pas na thig le stong pa ste/ thig le ni stong pa'i gnas cung zhig tsam mo/ /stong pa nyid kyi gnas de dang cung zhig tsam gyi stong pa nyid kyi yi ge brgya ni theg pa chen po mngon par rtogs pa bsdus pa'i yi ge brgya pa'i gsang sngags kyi tshul gyis/ phyag rgya thams cad ston par byed cing dam tshig nyams pa las bslang ba dang / bdag bsrung ba la sogs pa'i bya ba thams cad rdzogs par byed pa dang / dam tshig nyams pa la sogs pa'i bu ga sel bas na thig le stong pa'i yi ge brgya po ni bcom ldan 'das so/ /de la yi ge brgya pa'i gsang sngags ni 'di yin te/ oM badzra tIk+Sh+Na sa ma ya/ ma nu pA la ya/ badzra tIk+Sh+Na twe no pa tiSh+Tha dr-i D+ho me b+ha ba/ su to Sh+yo me b+ha ba/ shA shwa to me b+ha ba/ a nu rak+to me b+ha ba/ su poSh+yo me b+ha ba/ hr-i da yaM me b+ha/ a d+hi tiSh+Tha/ sarba sid+d+hi m+me pra ya ts+tsha sarba karma su tsa me tsit+taM shre yaHku ru hUM/ ha ha ha ha hoHb+ha ga bA na ma me muny+tsa badzrI b+ha ba/ ma hA sa ma ya satwa AH/ de ltar rnam pa thams cad du thams cad shes pa bskyed pas na rnam pa kun ldan te/ rnam pa'i bag chags kun nas bsags pas bsgos pa rnams la'o/ /rnam pa med pa ni rnam par mi rtog pa so so rang rig pa/ chos kyi sku ni ngo bo nyid med pa yin pas rnam pa med pa'o/ /rnam pa kun ldan yang yin la rnam pa med pa yang yin pas na/ rnam pa kun ldan rnam pa med/ /ces bya'o/ /ji ltar na phan tshun 'gal ba dag rnam pa thams cad dang ldan pa dang mi ldan pa rung zhe na/ rang dang gzhan gyi rig pa la ltos nas thams cad 'gal ba med ces sngar rgyas par smras zin pas 'dir ma spros so/ /yang na rnam pa yang yin la kun kyang yin pas na rnam pa kun ldan no/ /rnam pa thams cad dang bral bas na rnam pa med pa ste/ gang gi phyir skye ba med pa'i mtshan nyid can gyi sku ni/ rnam pa kun ldan rnam pa med/ /ces bya ste/ chos kyi bdag nyid bcom ldan 'das rje btsun 'jam dpal lo/ /de nyid ni gsang sngags kyi sku'i sbyor bas kyang bzhugs so zhes bstan par bya ba'i phyir/ bcu drug phyed phyed thig le can/ /zhes bya ba gsungs te/ bcu drug phyed pa ni cha bcu drug pa'i phyed phyed kyi zla ba la thig le phyed phyed pa'i thig le rnam par 'chang ba mdzad pas na/ bcu drug phyed phyed thig le can/ /zhes bya'o/ /'di skad ston par 'gyur te/ zla ba phyed pa'i steng du thig le phyed pa'i sgra'i tshul gyis sngags thams cad la dbang bsgyur ba 'dzin par mdzad do zhes bya ba'i don te/ /yan lag med pa'i rtsis las 'das/ /zhes bya ba la yan lag ni bgrangs te/ dpag tu yod par yongs su chad pas yongs su shes shing bsgres la rnam par shes pa'o zhes 'jig rten na tha snyad dag snang ngo / /gang gis kyang bgrang bar mi nus pas na bgrang ba las 'das pa la ni yan lag med pa zhes bya ste/ yongs su shes par bya ba'i phyir cha shas med pas na yan lag med pa'o/ /yang na sgra'i mthar bgrang ba'i cha med pas na yan lag med pa ste/ de nyid kyis na rtsis las 'das/ /zhes bya ste/ brtsi ba ni nges par brtag pa ste/ 'di ni 'di dag tsam mo zhes bzhag cing bris pa'o/ /de med pas na rtsis las 'das pa'o/ /ci'i phyir zhe na/ bsam gtan bzhi po'i rtse mo can/ /zhes bya ste/ bsam gtan bzhi po'i rtse mo ni mtha' ste/ rnam par rtog pas gzhag pa thams cad dang bral bas gnas pa'o/ /de nyid kyi ngo bo nyid de'i bdag nyid kyis 'dzin par mdzad pas na/ yan lag med pa'i rtsis las 'das/ /zhes bya'o/ /gal te rnam par rtog pa thams cad las 'das shing bsam gtan bzhi pa'i rtse mo la zhugs pa ji ltar na bsam gtan gyi yan lag gi rnam par dbye bas ston par mdzad ces rtog pa bzlog par bya ba'i phyir/ bsam gtan yan lag kun shes shing / /zhes bya ba gsungs te/ de la mnga' brnyes pas gdul bya rnams la de bzhin du rab tu snang ba bskyed par mdzad pas na/ bsam gtan yan lag kun shes shing / /zhes des rnam par gnas te/ rnam par mi rtog pa'i ting nge 'dzin las langs pa'am/ rang nyid bsam gtan gyi yan lag gi rnam par dbye ba sems can thams cad la rnam pa thams cad du rab tu ston par mdzad pas na de skad ces bshad do/ /bsam gtan gyi yan lag kun shes pa 'ba' zhig tu yang ma zad kyi ting nge 'dzin thams cad kyi rab tu dbye ba'i bye brag la yang shin tu mkhas pa nyid du bstan par bya ba'i phyir/ ting 'dzin rigs dang rgyud rig pa/ /zhes bya ba gsungs te/ ting nge 'dzin ni dpa' bar 'gro ba dang / rin chen phyag rgya dang / seng ge rnam par rtse ba dang / zla ba bzang po dang / zla ba'i rgyal mtshan dpal gyi tog /ces bya ba la sogs pa'o/ /de rnams kyi rigs ni ting nge 'dzin gyi rtsa ba'i rgyud de/ ting nge 'dzin gyi rigs mchog tu 'brel ba'i ngo bo nyid ni/ ting nge 'dzin gyi rigs so/ /rgyud ji lta ba bzhin du mkhyen pas na/ ting 'dzin rigs dang rgyud rig pa/ /zhes bya'o/ /ting nge 'dzin gyi ngo bo nyid mkhyen pa'i phyir de la rag las pa nyid kyis phul du byung bar bstan par bya ba'i phyir/ ting 'dzin lus can lus kyi mchog /ces bya ba gsungs te/ ting nge 'dzin gyi ngo bo nyid kyi sku ni ting 'dzin lus can te yid kyi rang bzhin no/ /thams cad du thogs pa med par 'jug pa'i nus pa dang ldan pa'i ngo bo nyid du gyur pas lus kyi mchog ste de lus kyi gtso bo zhes bya ba'i don to/ /thub pa'i mtshan sum cu rtsa gnyis dang / dpe byad bzang po brgyad cus brgyan pa'i bdag nyid can gyi sku 'di ni longs spyod rdzogs pa'i sku yin par 'dod de/ theg pa chen po la longs spyod par mdzad pa'i phyir ro/ /de bzhin gshegs pa thams cad kyi longs spyod rdzogs pa'i skus mdzes par gyur pas na/ longs spyod rdzogs sku kun gyi rgyal/ /zhes bya'o/ /sprul pa'i skus kyang thams cad phul du byung ba nyid yin par bstan par bya ba'i phyir/ sprul ba'i sku ste sku yi mchog /sangs rgyas sprul pa'i rgyud 'chang ba/ /zhes bya ba gsungs te/ gang gi phyir sangs rgyas rnams kyi sprul pa'i rgyud 'chang ba des na/ sprul pa'i sku ste sku yi mchog /ces bya'o/ /sku'i sku phul du byung ba'i khyad par dang ldan pa nyid bstan par bya ba'i phyir/ phyogs bcur sprul pa sna tshogs 'gyed/ /ji bzhin 'gro ba'i don byed pa/ /lha dang lha dbang lha yi lha/ /lha yi bdag po lha min bdag / 'chi med dbang po lha yi bla/ /'joms byed 'joms byed dbang phyug po/ /zhes bya ba gsungs te/ sna tshogs shing rnam pa tha dad pa'i sprul pa gang yin pa de la de skad ces bya'o/ /de nyid kyis na ji lta ba bzhin du 'gro ba'i don mdzad pa'o/ /de dag nyid bstan pa ni lha zhes bya ba la sogs pa gsungs te/ la lar ni lha rnams su'o/ /la lar ni lha'i dbang po ste brgya byin no/ /la lar ni lha'i lha'o/ /gzhan dag tu ni lha'i bdag po ste/ dga' ldan gyi lha'i bdag po'o/ /lha min bdag ni thags bzangs ris la sogs pa'o/ /la lar ni 'chi med dbang po ste/ 'thab bral la sogs pa'i lha rnams kyi rgyal po'o/ /lha'i bla ma ni phur bu'o/ /'joms byed ni drag po'i 'khor lo rnams so/ /'joms byed dbang phyug po zhes bya ba ni drag po ste/ de dag la sogs pa sprul pa sna tshogs pas 'gro ba'i don mdzad pa'o/ /de yang chos yang dag par sdud pa'i mdo las rgya cher gsungs par shes par bya ste/ rigs kyi bu byang chub sems dpa' rnams kyi sprul pa ni rnam pa bcur shes par bya ste/ rnam pa bcu gang zhe na/ 'di lta ste/ 'khor los sgyur bar 'phrul ba dang / brgya byin du 'phrul pa dang / tshangs par 'phrul pa dang / nyan thos su 'phrul pa dang / rang sangs rgyas su 'phrul pa dang / byang chub sems dpar 'phrul pa dang / sangs rgyas su 'phrul pa dang / sangs rgyas kyi zhing du 'phrul pa dang / byang chub kyi snying por 'phrul ba dang / 'khor chen por 'phrul pa ste/ bcu po de dag ni byang chub sems dpa' rnams kyi 'phrul pa chen por khong du chud par bya'o/ /byang chub sems dpa' rnams kyi 'phrul pa chen po 'di dag thams cad ni gzhan gyi bsam pa las gyur par lta'o/ /de la nam 'jig rten na 'khor los sgyur ba'i rgyal po gtsor byed cing tshul khrims yang dag par 'dzin pa dang / spyod pa gtso bor byed pa de na byang chub sems dpa' sems dpa' chen po 'khor los sgyur ba'i bkod pa rnams sprul nas sems can gyi don byed do/ /de la 'khor lo rin po che ni rtsibs stong yod pa/ lha dang mi las shin tu 'das pa/ 'dzam bu chu bo'i gser las grub pa/ mgar bas ma brdungs pa/ rang gi smon lam dang bsod nams kyi rdzu 'phrul gyi mthu las byung ba/ blta bas mi ngoms pa'i gzugs can nam mkha' la 'gro ba ste/ 'khor los sgyur ba phal pa gzhan rnams kyi lta bu ma yin no/ /glang po rin po che ni chu zhing phun sum tshogs pa thal kar mche ba drug yod pa/ blta bas mi ngoms pa'i gzugs can nam mkha' la 'gro ba/ mgyogs pa'i shugs phun sum tshogs pa/ sa srung gi bu dang nam mkha' lding ltar mgyogs pa/ legs par spyod pa/ las kyi mthu las byung ba ste/ 'khor los sgyur ba phal gzhan rnams kyi lta bu ma yin no/ /rta rin po che thams cad sngo ba/ cang shes pa/ rta'i rgyal po sprin gyi shugs can dang mtshungs pa/ rlung ltar mgyogs pa/ yid bzhin gyi nor bu ltar bsam pa tsam gyis phyin par byed pa/ nam mkha' la 'gro ba ste/ 'khor los sgyur ba phal gzhan rnams kyi lta bu ma yin no/ /nor bu rin po che ni zur brgyad pa mkhan bzos ma byas pa/ 'od phun sum tshogs pa/ me dang nyi ma'i 'od zil gyis gnon pa/ gar dga' mgur 'gro ba phun sum tshogs pa/ 'dod dgu phun sum tshogs par sbyin pa/ bsam pa thams cad yongs su rdzogs par byed pa ste/ 'khor los sgyur ba phal gzhan rnams kyi lta bu ma yin no/ /bud med rin po che ni ha cang yang mi dkar/ ha cang yang mi sdo/ /ha cang yang mi ring / ha cang yang mi thung / ha cang yang mi skems/ ha cang yang mi sbom pa/ dul ba'i mchog phun sum tshogs pa bstan bcos dang bzo dang / snyan ngag dang / sgyu rtsal sna tshogs mngon par shes pa/ mnyen zhing zab pa/ snyan pa'i smra ba phun sum tshogs pa yid bzhin gyi nor bu dang mtshungs pa 'dzum pa dang tshul phun sum tshogs pa/ chos spyod pa la dga' ba/ mtshungs pa med pa'i gzugs can te/ 'khor los sgyur ba phal gzhan rnams kyi lta bu ma yin no/ /khyim bdag rin po che ni lag na rdo rje dang 'dra ba chu zhing rnam thos kyi bu dang sred med kyi bu dang 'dra ba rtag tu mnyen zhing snyan la 'jam zhing yid du 'ong ba'i tshig 'byin pa/ sha'i mig sgrib pa med pa dang ldan pa/ byams pa dang / snying rje mnga' ba/ yid bzhin gyi nor bu ltar 'dod dgur 'jud pa/ mi rin po che dge ba'i rtsa ba skal ba mnyam pas grub pa ste/ 'khor los sgyur ba phal gzhan rnams kyi lta bu ma yin no/ /blon po rin po che ni rin po che'i rigs ma lta bu/ dge ba'i rtsa ba rnams kyi gzugs brnyan du gyur pa/ sngar ldang zhing bsam pa dge ba/ bltas pa dang / mig rig rig byas pas don go ba/ las bzang po dang / rgyas pa dang / rdzogs pa dang / ma smad par byed pa/ nam mkha' la 'gro ba/ 'dod dgur 'gro ba 'byor pa ste/ 'khor los sgyur ba phal gzhan rnams kyi lta bu ma yin no/ /de la sogs pa 'khor los sgyur ba rin po che bkod pa thams cad sprul nas byang chub sems dpa' sems la dbang ba sems can thams cad la phan pa dang bde ba'i lhag pa'i bsam pa can mi rin po che kha na ma tho ba med pa'i las zab pa/ snum pa/ phan pa/ lhag pa'i bsam pa dam pa'i chos chen po la gzhol ba/ 'khor los sgyur ba chen po dge ba bcu'i las kyi lam la brten pa/ skyes bu chen po'i mtshan sum cu rtsa gnyis dang ldan pas sems can rnams yongs su smin par byed de/ 'di ni byang chub sems dpa'i 'khor los sgyur ba 'phrul pa chen po zhes bya'o/ /nam 'jig rten na brgya byin gtso bor byed pa de na/ brgya byin gyi gzugs su sprul nas sum cu rtsa gsum gyi khang par zhugs te/ bag yod pa'i gtam rnams kyis lha rnams yongs su smin par byed do/ /nam 'jig rten na tshangs pa gtso bor byed pa de na tshangs pa'i gzugs su sprul nas rab tu zhi ba'i bsam gtan dang / tshad med pa'i gtam rnams kyis tshangs pa'i ris kyi lha rnams yongs su smin par byed do/ /nam sems can rnams nyan thos kyis 'dul ba yin gyi/ rang sangs rgyas kyis 'dul ba ma yin sangs rgyas kyis 'dul ba ma yin pa de na nyan thos kyi gzugs su sprul nas sdug bsngal zad par bya ba dang / mya ngan las 'das pa thob pa'i phyir chos ston to/ /nam sems can rnams rang sangs rgyas kyis 'dul ba yin gyi/ nyan thos kyis 'dul ba ma yin/ sangs rgyas kyis 'dul ba ma yin pa de na rang sangs rgyas kyi gzugs su sprul nas rang sangs rgyas kyi byang chub kyi lam yang dag par rab tu ston to/ /dben pa'i gtam dang / 'dod chags dang bral ba'i gtam dang / bsam gtan dang / ting nge 'dzin dang snyoms par 'jug pa dang / rnam par thar pa dang / rdzu 'phrul gyi rkang pa'i gtam dang / sbyin gnas chen por dbang bskur ba'i gtam dang / brten pa'i gtam dang / rnam par thar pa'i tshul gyis sems can rnams yongs su smin par byed do/ /nam sems can rnams byang chub sems dpas 'dul bar gyur pa de na rang gi gzugs su gnas nas pha rol tu phyin pa drug dang / byin gyi rlabs bzhi dang / byams pa chen po dang / snying rje chen po dang / gzungs dang / dbang dang / bzod pa dang / sa'i gtam gyis sems can de dag yongs su smin par byed do/ /nam sangs rgyas kyis 'dul ba'i sems can dbang po dang / khams rgya che zhing rgyas par 'gyur ba de na sangs rgyas kyi gzugs su gyur nas stobs dang / mi 'jigs pa dang / sangs rgyas kyi chos ma 'dres pa'i gtam rnams dang / sangs rgyas kyi rdzu 'phrul gyi cho 'phrul chen po rnams kyis sems can de dag yongs su smin par byed do/ /nam sems can rnams sangs rgyas kyi zhing rgya chen pos 'dul bar 'gyur ba de na stong gsum gyi stong chen po'i 'jig rten gyi khams lag mthil ltar mnyam zhing 'jam pa/ ka tsa lin+di ka ltar reg na bde ba/ bai DUr+ya sngon por gyur pa/ shel du gyur pa/ tsan+dan sprul gyi snying por gyur pa/ 'dzam bu chu bo'i gser du gyur pa/ rdo dang / gseg ma dang / gyo mo med pa/ mtho dman med pa/ ngan song log par lhung ba med pa/ bud med rgyu ba med pa/ ri nag po med pa/ rin po che sna tshogs kyi ri rnams kyis mdzes par byas pa/ tsher ma dang / ngam grog dang / g.yang sa med pa/ rin po che'i shing ljon pa dang / spos kyi shing ljon pa sna tshogs kyis mdzes par byas pa sprul nas sems can de dag yongs su smin par byed do/ /nam sems can rnams byang chub kyi snying po rgya chen pos 'dul bar gyur pa de na byang chub kyi shing dpag tshad bcu gnyis kyi tshad du mngon par sprul nas rtsa ba shin tu zug pa/ sdong po ni 'dzam bu chu bo'i gser/ yal ga ni gser dang / dngul dang / byi ru dang / shel dang / rin po che tha dad pa rin po che sna tshogs kyis mdzes par byas pa/ lha'i bu mo brgya stong du ma gnas pa sprul nas sems can de dag yongs su smin par byed do/ /nam sems can rnams 'khor rgya chen pos 'dul bar 'gyur ba de na lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dang / brgya byin dang / tshangs pa dang / 'jig rten skyong ba dang / gzi brjid che ba sprul pa dang / nyan thos so so yang dag par rig pa thob pa gnyi ga'i cha las rnam par grol ba dang / byang chub sems dpa' sa bcu la gnas pa dpa' bar 'gro ba'i ting nge 'dzin thob pa rnams sprul nas sems can de dag yongs su smin par byed de/ rigs kyi bu chos kyi tshul la 'jug pa bcu po de dag gis byang chub sems dpa' rnams kyi 'phrul pa chen po khong du chud par bya'o zhes gsungs pa yin no/ /de ltar gzugs thams cad kyis sems can thams cad kyi don mdzad pa la mkhas shing byang bar gyur kyang 'khor ba'i bag chags kyi nyes pa mi mnga' ba'i phyir/ srid pa'i dgon pa las brgal ba/ /ston pa gcig pu 'gro ba'i bla/ /zhes bya ba gsungs te/ srid pa ni 'khor ba'o/ /nyes pa thams cad kyi 'byung gnas yin pas na dgon pa ste/ de lta bu'i dgon pa las brgal ba gang yin pa de la de skad ces bya'o/ /rdzu 'phrul dang / cho 'phrul la sogs pas 'dun par mdzad nas theg pa chen po rjes su ston par mdzad pas na ston pa'o/ /gnyis pa med pas na gcig pu'o/ /ston par gyur pa nyid kyis na 'gro ba'i bla ma'i bla ma'o/ /chos dang / zang zing dang / mi 'jigs pa dang / byams pa sbyin pa las chos kyi sbyin pa shin tu mchog tu 'phags pa yin pas de nyid kyis phul du byung bar bstan pa'i phyir/ 'jig rten phyogs bcur rab grags pa/ /chos kyi sbyin bdag che ba po/ /zhes bya ba gsungs te/ grags pa ni rab tu grags par gyur pa ste/ chos kyi sbyin bdag chen po nyid du grags pa'o/ /gang du grags she na/ 'jig rten phyogs bcur zhes bya ba smos te/ phyogs bcu'i phyogs rnams na sems can dang / snod kyi 'jig rten gang dag yod pa de dag thams cad du sbyin bdag chen po nyid kyis mchog tu ye shes dang ldan pa rnams kyis mkhyen to zhes bya ba'i don to/ /nyon mongs pa dang mi shes pa dang bdud kyi dgra rnams las rnam par rgyal ba'i phyir ji ltar mngon par chags pa de ltar bstan par bya ba'i phyir/ /byams pa'i go chas chas pa ste/ /snying rje yi ni ya lad bgos/ /zhes bya ba gsungs te/ blo gros kyi tshogs bcings shing go bgos pa ni byams pa'i go chas chas par gyur pa dang / thugs rje chen po nyid du dbug par dga' ba'i chos can yin pas na ya lad de/ de lta bu'i snying rje chen po'i ya lad bgos pa'o/ /phyi rol gyi mtshon cha'i bye brag gis nyon mongs pa dang / mi shes pa las rgyal bar 'gyur mi srid pas phul du byung ba'i mtshon cha dang ldan pa nyid du bstan par bya ba'i phyir/ shes rab ral gyi mda' gzhu thogs/ /zhes bya ba gsungs te/ shes rab kyi ral gyi dang mda' gzhu thogs pa la de la de skad ces pa'o/ /de ltar go cha dang chas shing ya lad bgos te mtshon cha thogs nas ci zhig mdzad ces rtog pa la mdzad pa bstan par bya ba'i phyir/ nyon mongs mi shes g.yul ngo sel/ /zhes bya ba gsungs te/ nyon mongs pa rnams dang / mi shes pa ni sngar bshad zin pas 'dir ma smos so/ /de yang nyon mongs pa'i dpung gi tshogs pha rol gnod pa du ma dag gis yongs su bskor ba'i mi shes pa'i rgyal pos sems can rnams 'joms shing gzir bar byed pas na g.yul lo/ /de bcom zhing rnam pa thams cad du mi snang bar mdzad pas na/ nyon mongs mi shes g.yul ngo sel/ /zhes bya'o/ /de ltar re zhig nang gi nyon mongs pa rnams las nges par rgyal nas phyi rol gyi lha'i bu'i bdud la sogs pa rnam par bzlog cing 'joms par bstan pa'i phyir/ dpa' bo zhes bya ba la sogs pa gsungs te/ bdud rnams dgrar gyur pa gang yin pa'am/ bdud rnams kyi dgra yin pas na bdud kyi dgra'o/ /bdud las rgyal bar mdzad pas na bdud thul ba'o/ /de nyid kyis na phyi dang nang gi bdag nyid can gyi dgra bo nges par zlog par mdzad pa'i brtson 'grus dang ldan pas na dpa' po'o/ /tshangs pa dang / dbang phyug chen po dang / khyab 'jug gi mthus zil gyis mnan par mdzad pas na/ tshangs pa ma dang / dbang phyug ma dang / khyab 'jug ma dang / 'dod pa'i lha'i dga' ba mo mthu stobs kyis de rnams blangs pa ste/ drag po'i stobs kyis len par mdzad pas na dpa' bo ste/ 'jig rten pa'i dbang po rnams kyang 'jigs pa med pa dang / snying stobs dang ldan pas gzhan dag zil gyis gnon pa'i rang bzhin can la dpa' bo zhes bya'o/ /bdud bzhi ni phung po'i bdud dang / nyon mongs pa'i bdud dang / 'chi bdag gi bdud dang / lha'i bu'i bdud ces grags pa ste/ de rnams las 'jigs pa gang dag yod pa de mthar 'byin zhing sel bar mdzad pas na/ bdud bzhi'i 'jigs pa sel bar byed/ /ces bya'o/ /gang gi phyir bdud thams cad kyi dpung ste/ bdud thams cad kyi sde las rgyal par mdzad cing pham par byed pa nyid kyis na/ rdzogs pa'i sangs rgyas 'jig rten 'dren/ /zhes bya'o/ / 'di skad ston par 'gyur te/ byams pa dang / snying rje dang / shes rab rnams kyis nyon mongs pa dang / mi shes pa dang / bdud kyi dgra rnams las mngon par rgyal nas mngon par rdzogs par sangs rgyas te/ 'jig rten gyi 'dren par gyur pa ni bcom ldan 'das rje btsun 'jam dpal lo/ /des na de nyid mchod par 'os pa dang / bstod par 'os pa dang / phyag bya ba'i gnas su gyur pa dang / rtag tu ri mor bya bar 'os pa dang / bkur bar 'os pa dang / brjed par bya ba'i mchog yin pa dang / phyag bya bar 'os pa'i bla ma'i rab yin te/ shin tu bla na med pa nyid du bstan par gyur pa yin no/ /rdzogs pa'i sangs rgyas 'gro ba rnams kyi bla ma de thams cad du sems can thams cad kyi don gyi phyir thogs pa med par bzhud pa nyid du bstan par bya ba'i phyir/ 'jig rten gsum po gom gcig bgrod/ mkha' ltar mtha' med rnam par gnon/ / zhes bya ba gsungs te/ 'jig rten gsum po thams cad du cig car gom pa gcig pa'i gom pas 'gro ba gang yin pa de la de skad ces bya'o/ /de bzhin du nam mkha' la ni mtha' med pas de'i mthar thug pa'i rnam par gnon pa dang ldan pas na/ mkha' ltar mtha' med rnam par gnon/ / zhes bya'o/ /gsum rig ni rig pa gsum ste/ de dang ldan pas na gsum rig go/ /de la byang chub sems dpa' rnams kyi rig pa gsum gang zhe na/ 'di lta ste/ lha'i mig gi rig pa dang / sngon gyi gnas rjes su dran pa'i rig pa dang / zag pa zad pa'i rig pa ste/ rig pa ni shes pa zhes bya'o/ /de la lha'i mig gi shes pa ni lha'i mig gi rig pa yin no/ /lha'i mig gi rig pa gang yin pa de ni rnam par dag pa'i lha'i mchog rnams kyi yin te/ byang chub sems dpa' ni lha'i mig gi rig pa de dang ldan pa yin no/ /rnam par dag pa ni shes pa zhes bya'o/ /rnam par dag pa'i lha ni nyan thos dang / rang sangs rgyas dang / byang chub sems dpa' rnams te/ de dag ni rnam par dag pa'i lha'o/ /rnam par dag pa'i lha de dag gi mchog ni de bzhin gshegs pa dgra bcom pa yang dag par rdzogs pa'i sangs rgyas rnams te/ rnam par dag pa'i lha'i mchog rnams zhes bya'o/ /byang chub sems dpas ni rnam par dag pa lha'i mchog rnams kyi lha'i mig gi rig pa gang yin pa de 'thob ste/ nyan thos dang rang sangs rgyas rnams kyi ltar ma yin pa 'di ni rig pa dang po'o/ /de la sngon gyi gnas rjes su dran pa'i rig pa ni de bzhin gshegs pas sngon gyi mtha' mi mkhyen pa'am/ mi rig pa'am/ mi rtog pa gang yang mi mnga' ba'o/ /byang chub sems dpa' ni rig pa de 'thob ste/ nyan thos dang / rang sangs rgyas kyi ltar ma yin pa de ni rig pa gnyis pa'o/ /de la zag pa zad pa'i rig pa gang zhe na/ zag pa bzhi ste/ bzhi gang zhe na/ 'dod pa'i zag pa dang / srid pa'i zag pa dang / ma rig pa'i zag pa dang / lta ba'i zag pa ste/ zag pa de dag kyang byang chub sems dpa' bag chags dang bcas par spong ba lam gyis mngon par rtogs pa ste/ nyan thos dang / rang sangs rgyas rnams ltar nyon mongs pa'i sgrib pa spong ba'i lam gyis ni ma yin no/ /de zag pa zad nas sems can yongs su smin par bya ba'i phyir skye ba'i gnas thams cad du skye ba yongs su 'dzin pa thogs pa med pa yin te/ 'di ni byang chub sems dpa' zag pa zad pa'i rig pa zhes bya ste/ byang chub sems dpa'i rig pa gsum dang ldan pas na gsum rig ces bya'o/ /'jig rten pa rnams ni nges brjod kyi rig byed dang / mchod sbyin gyi rig byed/ snyan tshig gi rig byed de/ gsum la rig pa gsum du 'dod do/ /'jig rten pa'i thos pa las bshad pa'i gtsang sbra spyod pa dang ldan pas na gtsang ma zhes bshad do/ /'jig rten las 'das pa'i tshul ltar na yang bdag dang bdag gir mngon par zhen pa'i nyon mongs pa'i bag chags kyi mi gtsang ba thams cad dang 'dres pa dang / bral ba'i chos thams cad bdag med pa'i chu'i tshogs kyis bkrus pas na gtsang ma'o/ /de nyid ni nyes pa thams cad dang bral bas na dag pa ste zhes bya'o/ /phyi rol gyi chu'i tshogs kyis bkrus pa ni mu stegs rnams kyi lta ba la ltos nas bshad pa yin te/ khyad par de yin no/ /mngon shes drug ldan zhes bya ba la gang la mngon par shes pa drug yod pa de ni mngon shes drug ldan zhes bya ste/ de la byang chub sems dpa'i mngon par shes pa drug gang zhe na/ lha'i mig dang / lha'i rna ba dang / pha rol gyi sems shes pa dang / sngon gyi gnas rjes su dran pa'i shes pa dang / rdzu 'phrul bya ba shes pa dang / zag pa zad pa shes pa ste/ 'di dag ni byang chub sems dpa' rnams kyi mngon par shes pa drug go/ /de la byang chub sems dpa' rnams kyi lha'i mig gang zhe na/ dge ba'i tshogs thams cad bsags pa ma nyams pa/ chags pa med pa/ tshad med pa/ sgrib pa med pa/ gnas pa med pa/ rma med pa/ 'khrul pa med pa/ bstan du med pa/ kha na ma tho ba med pa/ 'jig rten pa thams cad dang / nyan thos dang / rang sangs rgyas rnams dang / thun mong ma yin pa/ bag chags kyi mtshams sbyor ba thams cad yang dag par bcom pa/ phyad par mthong ba/ phyad par lung ston pa ste/ lha'i mig des sems can rnams mthong ste/ 'chi 'pho dang / skye ba dang / kha dog bzang po dang / kha dog ngan pa dang / tha ma dang / mchog dang / las nye bar 'gro ba ji lta ba dang / rgyu dang bcas pa dang / rnam par smin pa dang bcas pa yang dag pa ji lta ba bzhin du mthong ngo / /de'i lha'i mig de ni sangs rgyas kyi ye shes thob par byed pa ste/ der nges pa yin no/ /de la byang chub sems dpa'i lha'i rna ba ni lha'i rna ba sgrib pa med pa/ dge ba'i tshogs thams cad bsags pa/ byis pa so so'i skye bo dang / brgya byin dang / tshangs pa dang / 'jig rten skyong ba dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po thams cad dang / nyan thos dang / rang sangs rgyas thams cad las khyad par du 'phags pa/ chod pa med pa/ 'od gsal ba/ sgra thams cad thos pa ste/ lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po'i sgra dang / tha na sbrang bu dang / grog mo dang / sha sbrang dang / 'phags pa dang / 'phags pa ma yin pa'i sgra rnams kyang thos te/ thos nas kyang 'phags pa ma yin pa'i sgra rnams la khong khro bar yang mi byed/ 'phags pa'i sgra rnams la rjes su chags par yang mi byed/ so so'i skye bo'i sgra rnams la tha mar 'du shes pa yang ma yin te/ nyan thos dang / rang sangs rgyas kyi sgra rnams la dam par 'du shes pa yang ma yin no/ /'phags pa ma yin pa'i tshul la khong khro ba yang mi byed/ 'phags pa'i tshul la rjes su chags par yang mi byed/ sgra gang la yang yon tan du 'du shes pa'am/ nyes par 'du shes pa ma yin te/ gzhan du na sgra thams cad brag ca lta bu dang / stong pa dang / g.yo ba med pa dang / bdag dang bdag gi med cing dben par rab tu shes kyang rna ba'i skye mched 'bad pa yang ma yin/ sgra'i skye mched 'bad pa yang ma yin te/ byang chub sems dpa'i lha'i rna ba ni 'di lta bu yin no/ /de la byang chub sems dpa'i pha rol gyi sems shes pa ni rang gi sems yongs su shes pa dang ldan pas sems can thams cad kyi sems kyi spyod pa rab tu shes te/ sems can gzhan rnams dang / gang zag gzhan dag gis 'dod chags dang bcas pa'i sems kyang 'dod chags dang bcas pa'i sems su yang dag pa ji lta ba bzhin du rab tu shes/ 'dod chags dang bral ba'i sems kyang 'dod chags dang bral ba'i sems su yang dag pa ji lta ba bzhin du rab tu shes te/ shes nas kyang gang 'dod chags dang bcas pa'i sems de la khong khro bar yang mi byed/ gang 'dod chags dang bral ba'i sems de la rjes su chags par yang mi byed/ gzhan du na 'dod chags dang bcas pa rnams la snying rje chen po bskyed do/ /'dod chags dang bral ba rnams la byams pa chen po bskyed do/ /de bzhin du zhe sdang dang bcas pa dang / zhe sdang med pa dang / gti mug dang bcas pa dang gti mug med pa dang / sred pa dang bcas pa dang sred pa med pa dang / len pa dang bcas pa dang len pa med pa dang / nyon mongs pa dang bcas pa dang nyon mongs pa med pa dang / tshad dang ldan pa dang tshad dang mi ldan pa dang / mnyam par gzhag pa dang mnyam par ma gzhag pa dang / rnam par ma grol ba'i sems dang rnam par grol ba'i sems kyang yang dag pa ji lta ba bzhin du rab tu shes te/ shes nas kyang sems can sems rnam par ma grol ba rnams la khong khro bar yang mi byed/ sems rnam par grol ba rnams la rjes su chags par yang mi byed/ gzhan du na sems rnam par grol ba rnams la byams pa chen po bskyed do/ /sems rnam par ma grol ba rnams la snying rje chen po bskyed do/ /sems can thams cad shes kyang sems de la sems des bsnyems pa yang med rlom sems kyang med do/ /de la pha rol gyi sems shes pa des sems can thams cad kyi sems kyi spyod pa rab tu shes so/ /sems can de dag gis ni byang chub sems dpa' des skabs ma phye ba'i bar du mi shes te/ nyan thos dang rang sangs rgyas kyi lha'i ye shes kyis kyang mi shes na/ phal ba gzhan rnams kyis shes par mi 'gyur bar lta ci smos te/ 'di ni byang chub sems dpa'i pha rol gyi sems shes pa'o/ /de la byang chub sems dpa' ni bdag dang sems can gzhan rnams kyi sngon gyi gnas rnam pa du ma rjes su dran te/ skye ba gcig kyang rjes su dran no/ /skye ba gnyis dang / skye ba brgya dang / skye ba stong dang / skye ba brgya phrag stong nas skye ba bye ba khrag khrig brgya stong dpag tu med grangs med pa yang rjes su dran no/ /'jig pa'i bskal pa yang rjes su dran no/ /chags pa'i bskal pa yang rjes su dran no/ /'jig pa dang chags pa'i bskal pa yang rjes su dran pa nas bskal pa chen po bye ba khrag khrig brgya stong dpag tu med pa'i bar rjes su dran te/ dran pa de la de bzhin gshegs pa dang / byang chub sems dpa' sa bcu la rab tu gnas pa rnams ma gtogs par lha dang bcas pa'i 'jig rten myos par 'gyur te/ 'di ltar bdag che ge mo zhig 'di 'dra bar gyur te/ rigs ni 'di zhes bya/ rus ni 'di zhes bya/ mdog ni 'di lta bu/ ming ni 'di zhes bya/ kha zas ni 'di lta bu za za/ tshe'i gnas pa ni 'di srid cig thub/ chu zheng ni 'di lta bu/ bde ba dang sdug bsngal ni 'di lta bu zhig myong ste/ bdag de nas shi 'phos nas ga ge mo zhig tu skyes/ de nas kyang shi 'phos nas 'dir skyes te/ rigs ni 'di zhes bya/ rus ni 'di zhes bya/ mdog ni 'di lta bu/ ming ni 'di zhes bya/ kha zas ni 'di lta bu zhig za za/ tshe ni 'di tsam zhig thub/ chu zheng ni 'di lta bu/ bde ba dang sdug bsngal ni 'di lta bu zhig myong ngo zhes rjes su dran te/ bdag ji lta bar sems can thams cad kyi yang de bzhin te/ tha na sbrang bu dang grog mo rnams kyis kyang rjes su dran no/ /de'i dran pa de chags pa med pa rgyun mi 'chad pa/ sgrib pa med pa/ thogs pa med pa dang / dus su bskul ba med pa dang / byams pa chen po dang / snying rje chen po dang rab tu ldan pa/ zab pa/ gting dpag dka' ba/ bag la nyal med pa/ bag chags kyi mtshams sbyor ba rnam par dag pa/ bsod nams dang ye shes kyi tshogs thams cad kyis brgyan pa ste/ 'di ni byang chub sems dpa'i sngon gyi gnas rjes su dran pa'i shes pa zhes bya'o/ /de la byang chub sems dpa' rnams kyi rdzu 'phrul bya ba shes pa ni bsod nams dang / ye shes kyi tshogs kyis bstan pa/ sgrib pa med pa/ lhun gyis grub pa/ rnam par ma brtags pa/ bskal pa bye ba khrag khrig brgya stong grangs med par sbyin pa dang / dul ba dang / mi 'gyur ba dang / yang dag par sdom pa dang / nges pa dang / bsam gtan dang / ting nge 'dzin dang / snyoms par 'jug pa yongs su sbyang bar byas pa/ bdag dang / sangs rgyas dang / lha'i dbang dang ldan pa ste/ de rdzu 'phrul mngon du gyur pa/ mngon par 'du bya ba med pa/ sgrib pa med pa/ 'jig rten thams cad las khyad par 'phags pa des sems can rnams kyi don byed de/ ji ltar 'dod pa de ltar byin gyis brlab bo/ /ji ltar 'dod pa de bzhin du yul rnams ston to/ /byang chub sems dpa' de'i rdzu 'phrul gyi dbang ni thams cad du thogs pa med par 'jug ste/ de gal te sems can gcig cig sems can thams cad kyi gzugs kyis 'dul bar gyur na sems can gcig po de'i mdun du sems can thams cad kyi gzugs snod ji lta ba bzhin du ston to/ /sprul pa de dag thams cad kyang byed pa dang / kha zas dang / smra ba dang / spyod pa tha dad du 'jug go/ /de 'dod na sems can thams cad kyi gzugs sangs rgyas kyi gzugs su mos na yang sems can thams cad kyi gzugs sangs rgyas kyi gzugs su 'gyur ro/ /sangs rgyas kyi gzugs sems can thams cad kyi gzugs su mos na yang sangs rgyas kyi gzugs sems can thams cad kyi gzugs su 'gyur ro/ /'jig pa'i bskal pa 'chags pa'i bskal par mos na yang 'jig pa'i bskal pa 'chags pa'i bskal par 'gyur te/ sems can de dag gis kyang 'chags pa'i bskal par shes so/ /'chags pa'i bskal pa 'jig pa'i bskal par mos na yang 'chags pa'i bskal pa 'jig pa'i bskal par 'gyur te/ sems can de dag gis kyang 'jig pa'i bskal par shes so/ /'jig pa dang chags pa yang gzhan du gyur pa ma yin te/ mos pa de ltar yang 'gyur ro/ /de bzhin du bskal pa gcig snga dro tsam du mos na yang de nas sems can de dag gi bskal pa snga dro tsam du shes so/ /snga dro bskal pa tsam du mos na yang de bzhin du 'gyur te/ de nas sems can de dag gi de bzhin du shes te/ 'di ni byang chub sems dpa'i mos pa las byung ba'i rdzu 'phrul zhes bya'o/ /de la mngon du gyur pa'i rdzu 'phrul ni gang byang chub sems dpa'i bsam gyis mi khyab pa'i bsod nams dang ye shes kyi dbang lhun gyis grub pas sgrib pa med par phun sum tshogs pa thams cad mngon du 'gyur zhing 'grub pa ste/ 'di ni byang chub sems dpa'i mngon du gyur pa'i rdzu 'phrul zhes bya'o/ /de la byang chub sems dpa'i mngon par 'du byed pa las byung ba'i rdzu 'phrul ni gang byang chub sems dpa'i sems mi 'jug cing lhun gyis grub pas sems can de dag gi mos pa ji lta ba bzhin du byang chub sems dpa' de gzugs dang spyod lam tha dad pas mthong zhing shes te/ 'di ni byang chub sems dpa'i mngon par 'du byed pa med pa las byung ba'i rdzu 'phrul zhes bya'o/ /de 'jig rten gyi khams ji snyed na/ sems can rnams sangs rgyas 'byung bas 'dul ba'i 'jig rten gyi khams de snyed du sangs rgyas 'byung ba ston te/ dga' ldan gyi gnas nas 'chi 'pho ba dang / mngal du 'jug pa dang / btsas pa dang / bzo'i gnas la mkhas pa dang / btsun mo'i 'khor gyi rol pa dang / mngon par 'byung ba dang / dka' ba spyod pa dang / byang chub kyi snying por 'gro ba dang / bdud 'dul ba dang / byang chub tu rnam par 'tshang rgya ba dang / chos kyi 'khor lo rab tu bskor ba dang / yongs su mya ngan las 'das pa chen po ston pa rnams kyis sems can de dag yongs su smin par byed do/ /de ltar na byang chub sems dpa' rdzu 'phrul gyi yul tshad med pa yin te/ 'di ni byang chub sems dpa'i rdzu 'phrul bya ba shes pa zhes bya'o/ /de la byang chub sems dpa'i zag pa zad pa'i shes pa gang zhe na/ 'di dag ni zag pa bzhi ste/ bzhi gang zhe na/ 'dod pa'i zag pa dang / srid pa'i zag pa dang / ma rig pa'i zag pa dang / lta ba'i zag pa ste/ byang chub sems dpa'i zag pa zad pa de dag yongs su spangs pa yin/ ma 'ongs pa ni mi skye ba'i chos can du 'gyur zhing phyir mi skye mi 'gag ste/ gdul ba ji lta ba bzhin du sems can rnams la thams cad du skye ba yang ston pa 'di ni byang chub sems dpa'i lam lhun gyis grub pas rgyun mi 'chad par 'jug pa zhes bya ste/ 'di dag ni byang chub sems dpa'i mngon par shes pa drug go/ /byang chub sems dpa'i mngon par shes pa drug po de dag dang mngon par ldan zhing rtag tu mi 'bral te/ de bas na mngon shes drug ldan no/ /rjes dran drug ni sangs rgyas rjes su dran pa dang / chos rjes su dran pa dang / dge 'dun rjes su dran pa dang / tshul khrims rjes su dran pa dang / gtong ba rjes su dran pa dang / lha rjes su dran pa ste/ de rnams kyi rang gi mtshan nyid ni sngar bshad pas 'dir yang ma bshad do/ /rtag tu phyin ci ma log pa'i rjes su dran pa drug dang ldan pas na rjes su dran pa drug ces bya'o/ /byang chub sems dpa' sems dpa' che/ /zhes bya ba la/ byang chub sems dpa'i sems gang la yod pa de ni byang chub sems dpa'o/ /de nyid gcig tu gzhan gyi don la 'jug pa ni sems dpa' chen po'o/ /yang byang chub sems dpa'i bdag nyid can gyi sems ni byang chub sems dpa'o/ /kun tu 'gro ba'i chos kyi dbyings thugs su chud nas mngon par sangs rgyas pa'i phyir sems dpa' chen po'o/ /rnam pa thams cad du yul che pa'i rdzu 'phrul brnyes pas na rdzu 'phrul chen po'o/ /de bzhin du 'jig rten las 'das pa'i ye shes thugs su chud pas na 'jig rten las 'das pa'o/ /shes rab pha rol phyin pa'i mtha'/ /zhes bya ba ni shes rab kyi pha rol tu phyin pa dang mngon par ldan pa'i chos kyi sku thugs su chud pa'o/ /rnam pa thams cad du de'i ngo bo nyid du gyur pas na/ shes rab kyi ni de nyid thob/ /ces bya ba ste/ shes rab kyi pha rol tu phyin pa'i de kho na nyid ni dri ma med pa'i de bzhin nyid do/ /de kho na nyid kyi rang bzhin ni chos kyi sku'i bdag nyid can yin pas na/ sems la sems shes pa med do zhes brtag par mi bya ste/ sbyor ba bstan pas na spyi las spyi khas blang par bya ba yin no/ /yang na 'di ni nye bar gzhag pa tsam du zad kyi/ de la mngon par zhen par mi bya'o zhes bstan par bya ba'i phyir/ shes rab kyi pha rol tu phyin pa'i ngo bo nyid yin yang bdag dang gzhan gyi dbye bas tha snyad du bya ba bden pa gnyis kyi dbang du ston par mdzad pa ni/ bdag rig gzhan rig thams cad pa/ kun la phan pa'i gang zag mchog / ces bya ba gsungs pa yin te/ de la so sor rang gi rig pa'i chos nyid kyi tshul gyis na bdag rig pa'o/ /sgyu ma lta bu'i sems kyi ngo bo nyid kyis na gdul bya rnams la khong du chud par mdzad pa'i phyir gzhan rig go/ /rgyu ba dang mi rgyu ba'i dngos po thams cad kyi ngo bo nyid chos kyi dbyings su bye brag med pas na thams cad pa'o/ /sems can thams cad la phan pa dang / bde ba rdzogs par mdzad pas na kun la phan pa'o/ /sems can thams cad kyi gtso bo'i skyes bu yin pas na gang zag mchog ste/ rigs pa can gyis brtags pa'i gang zag ni ma yin te/ de ni rnam pa thams cad du med pa'i phyir ro/ /dper bya kun las 'das pa ste/ /shes dang shes bya'i bdag po mchog /ces bya ba la/ cung zad tsam gyi mnyam pa yang med pa rnam pa thams cad du dper bya ba thams cad las 'das pa yin no/ /de bzhin gshegs pa thams cad kyi bdag nyid du gyur pas shes pa zhes kyang bshad do/ /legs pa 'dod pa rnams kyi mtho ris dang / thar pa'i rgyur gyur pas na de nyid ni mi shes par bya ba dang bsam par bya ba yin gyi/ de las gzhan med do zhes bya ba'i don to/ /de kho na nyid kyi ye shes ma lus par byung ba'i rgyu yin pa'i phyir thams cad mkhyen pa'i ye shes kyi bdag po'o/ /thams cad las phul du byung bas na mchog go/ /chos kyi sbyin pa ni sbyin pa thams cad kyi gtso bo yin la/ de stsol bar mdzad pa'i phyir/ gtso bo chos kyi sbyin bdag ste/ /zhes bya ste/ sbyin bdag rnams kyi mchog tu gyur pa zhes bya ba'i don to/ /phyag rgya bzhi po'i don ston pa/ /zhes bya ba la phyag rgya chen po dang / dam tshig gi phyag rgya dang / chos kyi phyag rgya dang / las kyi phyag rgya ni phyag rgya bzhi ste/ de rnams kyi don ni phyag rgya bzhi po'i don ston pa'o/ /de la phyag rgya chen po ni lha dang rjes su mthun par byed pa yin pas longs spyod rdzogs pa'i sku'o/ /dam tshig gi phyag rgya ni thugs kyi ngo bo nyid yin pas so so rang gi rig pa'i chos sku'o/ /chos kyi phyag rgya ni chos kyi longs spyod kyi byin gyis brlabs las chos kyi de kho na nyid ston pa'i gsang sngags kyi yi ge'i bdag nyid can sna tshogs pa'o/ /las kyi phyag rgya ni bya ba sgrub pa'i ngo bo nyid du gyur pas sprul pa'i mdzad pa sna tshogs rdzogs par byed pa sprul pa'i sku ste/ phyag rgya bzhi po de dag gis don ston par mdzad pa'o/ /gang gi phyir nyes pa thams cad las 'das shing yon tan thams cad kyi rang bzhin can yin la/ thar pa thams cad dang phun sum tshogs pa thams cad skyed par mdzad pa yin te/ de bas na/ 'gro ba'i bsnyen bkur gnas kyi mchog /ces bya'o/ /nges 'byung gsum po bgrod rnams kyi/ /zhes bya ba ni/ khyad par du 'gro ba rnams nyan thos dang rang sangs rgyas dang / yang dag par rdzogs pa'i sangs rgyas kyi nges par 'byung ba la ma gtogs pa la gzhan ma dag gis nges par 'byung ba 'thob mi srid par bstan pa'i phyir/ nges 'byung gsum po bgrod rnams kyi/ /zhes bya ba la de'i dngos po gang yin zhe na/ 'gro ba'i bsnyen bkur gnas kyi mchog tu gyur pa rje btsun 'jam dpal lo/ /de nyid ni dpal dang ldan pa'i mchog yin no/ /ji ltar shes she na/ don gyi dam pa rnam dag dpal/ /zhes gsungs pa las shes so/ /de dag kyang 'jig rten gsum gyi skal ba bzang po nyid du gyur pas thams cad kyi mngon par 'dod pa'i phun sum tshogs pa thams cad yang dag par rdzogs par mdzad pas na dpal ldan 'byor pa kun byed pa'o/ /de bas na 'gro ba rnams kyis nges par 'byung ba gsum bgrod par byed pa yin te/ de nyid gcig pu ni 'gro ba rnams kyis bsnyen bkur byed pa'i gnas kyi mchog yin gyi/ de las gzhan med do zhes nges par byas pa yin te/ sangs rgyas dang byang chub sems dpa' thams cad kyi ngo bo nyid du gyur pa yang de nyid yin no zhes nges par gzung ba la yang nyes pa med do/ /da ni mtshan nyid kyi don thams cad nye bar bsdu ba'i sgo nas bcom ldan 'das de rnam pa thams cad du mchod par 'os pa yin no zhes ston cing mtshan thams cad don ji lta ba nyid du bden pa'i mtshan nyid yin par khong du chud par bya ba'i phyir tshigs su bcad pa lngas phyag 'tshal ba'i khyad par gyis de bzhin gshegs pa'i 'khor gyi dkyil 'khor dang bcas pa'i tshogs rnams mchod par byas pa'i phyir/ mchog sbyin rdo rje mchog khyod 'dud/ /ces bya ba la sogs pa gsungs te/ de la mchog sbyin rdo rje ni rje btsun 'jam dpal te/ mchog tu gyur pa sangs rgyas nyid stsol bar mdzad pas na mchog sbyin no/ /mchog sbyin pa la rdo rje ltar mi phyed pas na rdo rje ste/ de nyid kyis na mchog ste/ thams cad kyi gtso bor gyur pa zhes bya ba'i don yin pas de la yang dag pa'i bod pa ni/ mchog sbyin rdo rje mchog khyod 'dud/ /ces smos so/ /yang dag pa'i mtha' ni de bzhin nyid de/ de la kye yang dag pa'i mthar gyur pa khyod la 'dud cing phyag 'tshal lo zhes pa'o/ /stong nyid las byung khyod la 'dud/ /ces bya ba la/ stong pa nyid las byung ba ni stong pa nyid las rab tu skyes pa'i phyir stong pa nyid las byung ba'o/ /yang na stong pa nyid kyi snying po gang la yod pa de la de skad ces bya ste/ stong pa nyid kyi snying po dang ldan pa'i phyir ro/ /sangs rgyas byang chub khyod la 'dud/ /ces bya ba la 'dir yang bod pa ni snga ma bzhin no/ /sangs rgyas kyi byang chub ni sangs rgyas kyi byang chub bo zhes sbyar ba'am gang gis na sangs rgyas kyi byang chub yin pa de la de skad ces bya ste/ khyad par med kyang bye brag tu nye bar btags pa'o/ /sangs rgyas chags pa khyod la 'dud/ /ces bya ba la/ sangs rgyas rnams la chags shing shin tu zhen pa gang yin pa de la de skad ces bya ba'am/ sangs rgyas rnams kyi chags pa la mngon par zhen pa gang yin pa'o zhes rnam par sbyar ro/ /yang na sangs rgyas kyang yin la chags pa yang yin pas na sangs rgyas chags pa ste/ de kho na nyid thugs su chud cing sangs rgyas pa'i chags pa ni sems can thams cad rjes su dga' bar gyur pa yin pa'i phyir ro/ /sangs rgyas 'dod la phyag 'tshal 'dud/ ces bya ba la/ sangs rgyas rnams kyi 'dod pa ni mngon par chags pa ste/ 'gro ba rnams la mngon par bzhed pa'o/ /de'i ngo bo nyid du gyur pas na sangs rgyas 'dod pa'o/ /yang na sangs rgyas rnams kyi 'dod par bya ba yin pas na sangs rgyas 'dod pa yin pa'am/ sangs rgyas par 'dod pa ste/ sangs rgyas kyi ngo bo nyid kun du bzang po la sogs pa 'dod par rab tu ston pa'i phyir ro/ /sangs rgyas dgyes pa khyod la 'dud/ /sangs rgyas rol la phyag 'tshal 'dud/ /ces bya ba la/ sangs rgyas rnams kyi dgyes pa dang / sangs rgyas rnams kyi rol pa yin pas na sangs rgyas rnams la dgyes shing rol pa'o/ /yang na dgyes pa ni lA s+ye'o/ /rol pa ni mA le'o/ /sangs rgyas 'dzum pa khyod la 'dud/ /sangs rgyas bzhad pa khyod la 'dud/ / ces bya ba la/ sangs rgyas rnams kyi 'dzum pa ni de kho na nyid thugs su chud pas zhal gyi pad+ma kha dbye ba'o/ /sangs rgyas kyi bshad pa ni shin tu rmad du byung ba'i don ston cing byang chub sems dpa' chen po lung bstan pa'i ltas ston par byed pa'i ye shes kyi 'od zer gyi bye brag go/ / sangs rgyas gsung nyid khyod la 'dud/ sangs rgyas thugs la phyag 'tshal 'dud/ ces bya ba la/ sangs rgyas kyi gsung ni dam pa'i chos ston pa lta bu'i rkyen gyis sems can rnams gdul bya'i phyir rab tu 'jug pa'am/ yang na sangs rgyas kyi gsung ni rnam pa bzhi ste/ khro ba dang / gsal ba dang / rdo rje dang / phra ba'i gsung gi bye brag go/ /sangs rgyas kyi thugs ni sangs rgyas nyid de/ thams cad du yang de'i rang bzhin du gyur pa'i phyir de dang / der bshad pas phyag 'tshal ba yin par blta bar bya'o/ /med pa las byung khyod la 'dud/ /sangs rgyas 'byung ba khyod la 'dud/ /ces bya ba la/ 'di la dngos po yod pa ma yin pas na/ dngos po med pa'o/ /de las byung ba'i skyes pa ste/ de las skyes pa de la de skad ces bya'o/ /'di las sangs rgyas rnams byung bas na sangs rgyas 'byung ba'o/ /'di ni sangs rgyas rnams las 'byung bas na/ sangs rgyas 'byung ba'o/ /nam mkha' las byung khyod la 'dud/ /ye shes las byung khyod la 'dud/ /ces bya ba la/ nam mkha' dang mnyam pa'i chos nyid kyi de kho na nyid las nges par 'byung bas na nam mkha' las byung ba'o/ /gnyis su med pa'i de kho na nyid kyi ye shes las yang dag par byung ba'am/ ye shes rnams 'di las byung bas na ye shes las byung ba'o/ /sgyu 'phrul dra ba khyod la 'dud/ /sangs rgyas rol ston khyod la 'dud/ /ces bya ba la/ sgyu 'phrul dra ba'i spros pa ma lus pa'i dngos po'i bdag nyid thams cad yang dag par ston par mdzad pas na sgyu 'phrul dra ba'o/ /cha lugs dang rgyan dang gos dang nyams kyi rnam par bkod pa sna tshogs pa'i khyad par gyis bzhugs pas na/ sangs rgyas rol ston zhes bya'o/ /sngar bshad pa'i rnam pa thams cad dang ldan pa'i yon tan gyi rang bzhin thams cad la phyag 'tshal ba dang / de dag thams cad ye shes kyi sku las tha mi dad cing ye shes sku nus mthu la de ltar so sor snang ba yin te de bas na/ thams cad thams cad khyod la 'dud/ /ye shes sku nyid khyod la 'dud/ /ces gsungs so/ /i ti zhes bya ba'i sgra ni de dag go zhes bya ba ste/ yang dag pa'i yon tan gyi mtshan ni de dag yin no zhes bya ba'i don to/ /sa rnams ma lus 'byor ba ye shes phun tshogs ldan/ /sna tshogs tshul rnams dpyad pas rnam kun dag pa grub/ /'jam dbyangs mtshan ni yang dag dus rnams thams cad du/ /dran pas 'gro ba kun gyi phan pa'i don 'byung 'gyur/ /byang chub yan lag kun 'dus bde gshegs sras 'byor pa/ /nam mkha'i ngos ltar yangs shing dus tshod rnams las 'das/ /rgyal ba'i rdo rje rin chen pad+ma sna tshogs ldan/ /rgyal bas mchod pa 'jam dbyangs mtshan don rtogs las byung / /de ltar don yang brtsis nas dad pa'i rjes 'brangs te/ /gus pa nyung zad tshig la tshig der sems dgas drangs/ /sna tshogs tshul gyi rtog pas brtags pa'i dra bar ldan/ /'jam dbyangs 'jig rten thams cad nyid ni rang dag min/ /'jam dbyangs zhabs kyi rgya mtshor cung zad tsam dang pas/ /'jug dga' 'di ni rnam bkrol sangs rgyas mthu stobs kyis/ /bde gshegs sras mchog rnams kyis rtogs bya phra ba 'dir/ /bdag 'dra'i blo dman skye bo gzhan dag ji ltar 'jug /mdo dang tshad ma'i tshul dang pha rol phyin mi 'gal/ /lus kun las gsungs dpal gyi cho ga 'gal med dngos/ / rgyal ba'i gsang sngags don rnams kun gyi rnam dag ldan/ /phra zhing ma lus tshul rnams bsdus pa'i rgyur gyur yin/ /bshad pa'i tshul kun nyes pa rnam par spangs gyur pas/ /ma brtags mi smad mkhas pas nges par brtags te gzung / /chos don de nyid mi 'gal shin tu dag gyur pa'i/ / bshad pa 'di la 'gal ba'i tshul gyis spang mi bya/ /sngar khyod kyis nga la gsol ba btab pa'i mtshan yang dag par brjod pa 'di ci'i phyir gsungs zhes rtogs par byed pa dag gi phyir/ lag na rdo rje rdo rje 'chang / /'di ni zhes bya ba la sogs pa gsungs te/ su zhig gi mtshan yang dag par brjod pa yin zhe na/ bcom ldan 'das ye shes kyi sku/ de bzhin gshegs pa thams cad kyi ye shes kyi sku/ 'jam dpal ye shes sems dpa'i zhes bya ba gsungs te/ rnam par dag pa'i ye shes kyi rang bzhin yin pa'i phyir ye shes kyi sku'o/ /chos kyi sku'i ngo bo nyid yin pas na de bzhin gshegs pa thams cad kyi ye shes kyi sku'o/ /dkyil 'khor gyi bdag po nyid kyis ye shes kyi sems dpa' ma lus pa'i ngo bo nyid yin pas na 'jam dpal ye shes sems dpa'o/ /de'i mtshan yang dag par brjod pa de yang don dang yi ge yongs su dag pas na yongs su dag pa'o/ /ma 'dres pas na/ thun mong ma yin pa'o/ /ci'i phyir 'di ston par mdzad ces rtogs par byed pa la/ khyod kyis dga' ba dang dang ba dang / mgu ba chen po bla na med pa bskyed pa dang zhes bya ba gsungs te/ de la tha mal can gyi tshul gyis yid dga' ba ni yid dga' ba'o/ /sems kyi rab tu dang ba'i mos pa'i khyad par gyis na dang ba'o/ /de nyid rab kyi mthar thug par song ba ni mgu ba chen po'o/ /lag na rdo rje rdo rje 'chang khyod kyis lus dang ngag dang yid kyi gsang ba yongs su dag par bya ba'i phyir bshad par bya'o zhes thams cad la sbyar bar bya'o/ /de la lus kyi gsang ba ni nyan thos dang / rang sangs rgyas dang / bdud dang / mu stegs la sogs pa dang / thun mong ma yin pa'i lus kyis de bzhin gshegs pa'i 'khor gyi dkyil 'khor du nye bar song ba'i lus ni lus kyi gsang ba'o/ /de bzhin du ngag gi gsang ba yang de bzhin gshegs pa dang sa bcu'i dbang phyug gi byang chub sems dpa' rnams dang thun mong du gyur pa dang / gzhan dag dang thun mong ma yin pa'i chos ston pa la mkhas pa ni ngag gi gsang ba'o/ /de bzhin du yid kyi rang bzhin gyi lus kyis de bzhin gshegs pa thams cad kyi thugs kyi spyod pa'i rjes su zhugs pas chos kyi longs spyod nyams su myong ba ni yid kyi gsang ba ste/ de ltar na lus dang ngag dang yid kyi gsang ba'i khyad par ni mtshan yang dag par brjod pa'i don rtogs pa las yongs su dag cing khyad par can du 'gyur bas de nyid la mngon par brtson par bya'o/ /yongs su ma rdzogs pa dang yongs su ma dag pa'i sa dang pha rol tu phyin pa dang / bsod nams dang ye shes kyi tshogs rnams yongs su rdzogs shing yongs su dag par bya ba dang zhes bya ba'i sa bcu dang pha rol tu phyin pa bcu yongs su ma rdzogs pa rdzogs par bya ba'i phyir dang / bsod nams dang ye shes kyi tshogs yongs su ma dag pa dag par bya ba'i phyir bshad do zhes bya bar sbyar ro/ /bla na med pa'i don ma rtogs pa rnams rtogs par bya ba dang zhes bya ba ni sangs rgyas nyid kyi don rtogs par bya ba'i phyir dang / stobs dang mi 'jigs pa la sogs pa mthong ba thob par bya ba'i phyir dang / de bzhin du ji srid de bzhin gshegs pa thams cad kyi dam pa'i chos kyi tshul yang dag par bzung ba'i bar gyi phyir zhes bya ba shes rab kyi pha rol tu phyin pa la sogs pa yang dag par rtogs shing gzung bar bya ba'i phyir te/ bshad pa ni gzhung tsam zhig bstan pa'o/ /yang dag par bstan pa ni gzhung gi don bshad pa'o/ /bkrol ba ni rnam grangs gzhan dag gis brda sprad pa'o/ /rnam par phye ba ni rnam grangs kyi don gyi yul gyi rnam par dbye ba nye bar bstan pa'o/ /gsal bar byas pa ni shin tu yang gsal bar byas pa'i phyir ro/ /lag na rdo rje rdo rje 'chang 'di ni ngas khyod kyi rgyud la yang gsang sngags thams cad kyi chos nyid kyi byin gyi rlabs kyis byin gyis brlabs so zhes bya ba ni/ gsang sngags thams cad kyi chos nyid thogs pa med pa'i nus pas bzung ba dang / bcing ba dang / ston pa'i nus pa phul du byung bar bskyed pas bdud dang mu stegs la sogs pas zil gyis mi non pa ni byin gyis brlabs pa ste/ bstan par byas zhes bya ba'i don to/ /phan yon rnam pa mang po rnam grangs dpag tu med pa'i dbye bas bstan par bya ba'i phyir/ /lag na rdo rje rdo rje 'chang gzhan yang zhes bya ba la sogs pa gsungs te/ gzhan yang zhes bya ba ni gzhan du na zhes bya ba'i don to/ /ming yang dag par brjod pa 'di ni thams cad mkhyen pa'i ye shes dang sku dang gsung dang thugs kyi gsang ba shin tu yongs su dag cing yongs su byang ba'o zhes bya ba la/ thams cad mkhyen pa'i ye shes ni sangs rgyas thams cad kyi ye shes te/ de nyid ni sku dang gsung dang thugs kyi gsang ba'o/ /shin tu kun nas yongs su dag cing byang ba ni bag chags dang bcas pa'i nyon mongs pa med pa'i phyir te/ de dag thams cad kyang mtshan yang dag par brjod pa'i ngo bo nyid rtogs pa las byung bas na de skad ces bshad do/ /de bzhin gshegs pa thams cad kyis sangs rgyas kyi byang chub kyi rgyu'i ngo bo nyid du gyur pa dang / 'bras bu'i ngo bo nyid du gyur pas na sangs rgyas kyi byang chub bo/ /rtogs pa dang lam phyin ci ma yin pa'i rang bzhin du gyur pas na yang dag par rdzogs pa'i sangs rgyas rnams kyi mngon par rtogs pa'o/ /bde bar gshegs pa zhes bya ba ni slar mi ldog par gshegs pa rnams kyi'o/ /de bzhin gshegs pa thams cad kyi zhes pa ni de bzhin nyid la zhugs pa rnams kyi'o/ / chos kyi dbyings bla na med pa thugs su chud pa ni chos kyi dbyings la nan tan gyis sgrub pa po'o/ /rgyal ba rnams kyis bdud kyi stobs thams cad pham par mdzad pa'o zhes bya ba ni phung po dang / nyon mongs pa dang / 'chi bdag dang / lha'i bu'i bdud kyi stobs te/ nus pa zil gyis gnon pa'i phyir ro/ /stobs bcu dang ldan pa thams cad kyi stobs bcu'i stobs nyid do zhes bya ba ni bdud dang mu stegs la sogs pa pha rol smra ba rnams kyi zil gyis mi non cing brdzi bar mi 'gyur ba'i stobs bcu po thams cad dang ldan pa'i phyir ro/ /thams cad mkhyen pa rnams kyi zhes pa ni shes bya ma lus pa thams cad thugs su chud pa'i ye shes dang ldan pa rnams kyi'o/ /thams cad mkhyen pa nyid do zhes bya ba ni chos thams cad rnam pa thams cad du rtogs par gyur pas so/ /chos thams cad kyi lung ngo zhes bya ba ni lung dang rtogs pa'i chos shis shing khong du chud pa 'byung bar 'gyur ba'i phyir ro/ /sangs rgyas thams cad kyi yang dag par sgrub pa'o zhes bya ba ni yang dag par bskyed pa'o/ /byang chub sems dpa' sems dpa' chen po thams cad kyi bsod nams dang ye shes kyi tshogs yongs su rdzogs pa dri ma med cing shin tu rnam par dag pa'i skye gnas so zhes bya ba ni nye bar dmigs pa'i dri ma dang bral bas na dri ma med pa'o/ /rnam par rtog pa'i bag chags med pas na shin tu rnam par dag pa'o/ /byang chub sems dpa' rnams kyi tshogs gnyis yin pas bsod nams dang ye shes kyi tshogs yongs su rdzogs pa'o/ /thams cad du yang mtshan yang dag par brjod pa nyid rgyu dang 'bras bur gyur pa yin no zhes bya ba brjed par mi bya ste/ 'di nyid kho na las skyes pa yin pas so/ /nyan thos dang rang sangs rgyas thams cad kyi zhing ngo zhes bya ba ni gzhir gyur pa dang bskyed pa'i gnas so/ /lha dang mi thams cad kyi phun sum tshogs pa'o zhes bya ba ni 'byor ba'i gnas so/ /theg pa chen po'i gzhi'o zhes bya ba ni theg pa chen po thams cad 'di nyid du rab tu gnas pas na theg pa chen po'i gzhi'o zhes bya'o/ /byang chub sems dpa'i spyod pa thams cad kyi 'byung gnas so zhes bya ba ni sngags kyi spyod pa ma lus pa dang / sbyin pa la sogs pa'i pha rol tu phyin pa'i spyod pa rnams 'byung ba'i rgyu phyin ci ma log par gyur pa'i phyir ro/ /'phags pa'i lam thams cad kyi mtha'o zhes bya ba ni yang dag pa'i lam gyi mthar thug pa'o/ /rnam par grol ba rnams brtag pa'o zhes bya ba ni yongs su brtag pa'i gnas yin pas so/ /nges par 'byung ba'i lam skye ba'i gnas so zhes bya ba ni theg pa thams cad bsdus par gyur pa yin pa'i phyir ro/ /de bzhin gshegs pa'i gdung rgyun mi 'chad pa'o zhes bya ba ni byang chub sems dpa' thams cad bskyed pa rgyun mi gcod pa'i phyir ro/ /byang chub sems dpa' chen po'i rigs dang rgyud rab tu 'phel ba'o zhes bya ba ni byang chub sems dpa'i rgyun gcig nas gcig tu brgyud pa'i rgyun rab tu 'phel bar byed pas so/ /pha rol rgol ba thams cad tshar gcod pa'o zhes bya ba ni gzhan du khas 'che ba'i phyogs tshar gcod cing sun 'byin pa'i gnas thob pa bskyed pas so/ /mu stegs can thams cad rnam par 'joms pa'o zhes bya ba ni chos thams cad bdag med par bstan pas bdag tu mngon par zhen pa la sogs pa rnam par 'jig pas so/ /bdud bzhi'i stobs kyi dpung dang sde pham par byed pa'o zhes bya ba la/ stobs ni nus pa'o/ /dpung ni blon po chen po rnams so/ /sde ni thams cad bsdus pa'i sde chen po ste/ sde zhes bya ba ni rnam par phye ba'o/ /de yang byang chub mngon par rdzogs par 'tshang rgya bas phung po dang / nyon mongs pa dang / 'chi bdag dang / lha'i bu'i bdud bzhi po las rnam par rgyal ba'i rgyur gyur pa'i phyir ro/ /sems can thams cad yang dag par sdud pa'o zhes bya ba ni sbyin pa dang / snyan par smra ba dang / don mthun pa dang / don spyod pa thams cad ngo bo nyid du gyur pa'i phyir ro/ /nges par 'byung ba bgrod pa thams cad kyi 'phags pa'i lam yongs su smin pa'o zhes bya ba ni 'phags pa'i lam yan lag brgyad pa yang dag pas nyan thos dang rang sangs rgyas dang yang dag par rdzogs pa'i sangs rgyas kyi mya ngan las 'das pa thob par byed pas so/ /tshangs pa'i gnas bzhi la gnas pa rnams kyi ting nge 'dzin to zhes bya ba ni byams pa dang snying rje dang dga' ba dang / btang snyoms la gnas pa rnams kyi dpa' bar 'gro ba la sogs pa'i ting nge 'dzin rdzogs par byed pas na ting nge 'dzin to/ /sems rtse gcig pa rnams kyi bsam gtan no zhes bya ba ni sngar bshad pa'i bsam gtan bzhi po rnams te/ de rnams bskyed pa ni de la gzhol ba'i sems su 'gyur bas so/ /lus dang ngag dang yid 'dul ba la brtson pa rnams kyi rnal 'byor ro zhes bya ba ni zhi gnas dang lhag mthong zung du 'brel pa'i lam ni rnal 'byor te/ lus dang ngag dang yid yang dag pa la zhugs pa rnams kyi rnal 'byor thams cad rdzogs par byed pa'o/ /kun du sbyor ba thams cad dang bral ba'o zhes bya ba ni kun du sbyor ba dgu ste/ rjes su chags pa dang / khong khro ba dang / nga rgyal dang / ma rig pa dang / lta ba dang / mchog tu 'dzin pa dang / the tshom dang / phrag dog dang / ser sna zhes bya ba sngar bshad pa'i kun du sbyor ba thams cad kyi gnyen por gyur pas na bral ba'o zhes nyon mongs pa dang nye ba'i nyon mongs pa thams cad spong ba'o zhes bya ba ni nyon mongs pa dgu bcu rtsa brgyad dang nye ba'i nyon mongs pa sngar bshad pa ste/ de thams cad spong ba ni bag chags dang bcas pa rtsa nas 'byin pa'o/ /sgrib pa thams cad nye bar zhi ba'o zhes bya ba ni nyon mongs pa'i sgrib pa dang / las kyi sgrib pa dang / shes bya'i sgrib pa rnams rnam pa sna tshogs pas nye bar zhi bar byed pa'o/ / 'ching ba thams cad las rnam par grol ba'o zhes bya ba ni 'dod chags kyi 'ching ba dang / zhe sdang gi 'ching ba dang / gti mug gi 'ching ba ste/ 'ching ba thams cad dang bral bas na rnam par grol ba'o/ /rdzas thams cad las thar ba'o zhes bya ba ni ma rig pa dang / nyon mongs pas sbags pa dang bcas pa'i nye bar len pa'i phung po rnam pa lnga ni rdzas te/ rnam pa thams cad tu de dang bral bas thar ba'o/ /sems kyi g.yeng ba thams cad zhi ba'o zhes bya ba ni nyon mongs pa'i rgyur gyur pa 'dod chags la sogs pa rnams dang / rnam par rtog pa ste/ de rnams rnam pa thams cad tu zhi ba ni zhi ba'o/ /'byor pa thams cad kyi 'byung gnas so zhes bya ba ni 'jig rten dang 'jig rten las 'das pa'i phun sum tshogs pa thams cad kyi skye ba'i gnas yin pas so/ /rgud pa thams cad sel ba'o/ /zhes bya ba ni ji skad du bshad pa'i phun sum tshogs pa las bzlog pa'i mtshan nyid can ni rgud pa ste/ de'i phyir de sel ba ni spong ba'o/ /ngan song gi sgo thams cad gcod pa'o zhes bya ba ni ngan song du 'jug par 'gyur ba'i las ni ngan song gi sgo ste/ de mi 'byed pas gcod par 'gyur ba'o/ /rnam par grol ba'i grong khyer gyi lam bzang po'o zhes bya ba ni mya ngan las 'das pa'i grong khyer 'thob pa'i thabs te/ de bas na de las lhag pa'i lam gzhan med pas na bzang po'o/ /'khor ba'i 'khor lo la mi 'jug pa'o zhes bya ba ni 'khor ba'i 'khor lo'i rgyu ni ma rig pa dang sred pa ste/ de dag chos bdag med par mthong bas rtsa ba nas bton pa'i phyir ro/ /chos kyi 'khor lo bskor ba'o zhes bya ba ni/ /chos thams cad rnam pa thams cad du rtogs nas sems can dpag tu med pa'i don byed pa'i phyir chos kyi 'khor lo rab tu bskor ba'o/ /de bzhin gshegs pa'i bstan pa'i gdugs dang rgyal mtshan dang ba dan bsgreng ba'o zhes bya ba ni chos thams cad rtogs pa'i rnam par rgyal ba dang ba dan bsgreng ba ni ba dan te/ de bzhin gshegs pa thams cad kyi bstan pa'i mtshan ma'i ngo bo nyid yin pa'i phyir ro/ /dam pa'i chos ston pa'i gnas so zhes bya ba ni gnas ni byin gyi rlabs te/ chos thams cad ston pa la gegs byed pa bdud kyi dgra bo rnams tshar gcod par byed pa'i phyir ro/ /byang chub sems dpa' gsang sngags kyi sgo'i spyad pa spyod pa rnams kyi myur du 'grub pa'o zhes bya ba ni gsang sngags sgrub pa la zhugs pa rnams kyi bgegs thams cad nye bar zhi ba dang bsod nams dang ye shes kyi tshogs nye bar sogs par sangs rgyas nyid kyi mthar thug pa'i bar gyi dngos grub myur du 'grub pa'o/ /byang chub sems dpa' bsgom pa la mngon par brtson pa rnams kyi rtogs pa'o zhes bya ba ni de kho na nyid mngon sum du byed pa'i mtshan nyid can no/ /byang chub sems dpa' sems dpa' chen po shes rab kyi pha rol tu byin pa la mngon par brtson pa rnams kyi stong pa nyid so sor rtogs pa'o zhes bya ba ni chos thams cad bdag med pa nyams su myong ba mngon sum du byed pa'o/ /gnyis su med pa'i so sor rtogs par mngon par brtson pa rnams kyi rdzogs pa'o zhes bya ba ni rnam pa thams cad mkhyen pa'i ye shes so zhes bya ba ni lhag pa'o/ /pha rol tu phyin pa dang tshogs thams cad yongs su rdzogs pa'o zhes bya ba ni rnam pa thams cad du rdzogs pa ni yongs su dag par byed pa'o/ /sa thams cad yongs su rdzogs pa'o zhes bya ba ni pha rol tu phyin pa rnams yongs su rdzogs pa'o/ /'phags pa'i bden pa bzhi po rnams kyi so sor rtogs pa'o zhes bya ba ni byang chub sems dpa' rnams kyi dbang du byas pa ste/ dgra bcom pa nyid kyi phyir ni ma yin no/ /chos thams cad kyi dran pa nye bar gzhag pa rnams sems rtse gcig gis rtogs pa'o zhes bya ba ni chos thams cad ro gcig pa nyid kyis sems kyi skad cig ma gcig nyid la chos thams cad khong du chud pas na dran pa nye bar gzhag pa bzhi'i rim pas rtogs pa ste/ bslab pa'i gnas skabs kyi rim pas ni ma yin no zhes bya ba'i don to/ /phan yon re re nas mang du bstan pas ci zhig bya ste/ re re nas smras na bskal pa bye ba'i bar du yang mthar thug par bya bar mi nus so zhes bstan par bya ba'i phyir/ ming yang dag par brjod pa 'di ni sangs rgyas kyi yon tan thams cad kyi bar du yang yongs su rdzogs par byed pa'o zhes bya ba gsungs te/ sangs rgyas thams cad kyi yon tan gyi rang bzhin gyi gzugs can no zhes bya ba'i don to// //da ni mthong ba'i chos can gyi dge ba 'phel bar 'gyur ba dang / yid du 'ong ba'i 'bras bu 'thob par 'gyur ba'i phan yon la sogs pa bstan par bya ba'i phyir/ lag na rdo rje rdo rje 'chang gzhan yang zhes bya ba la sogs pa gsungs te/ ji skad du bshad pa'i ming yang dag par brjod pa 'di klog pa dang 'don pa la sogs pas yid la byas na sems can thams cad kyi lus dang ngag dang yid la kun du spyod pa'i sdig pa ma lus pa rab tu zhi bar byed pa'o zhes bya ba ste/ kun du spyod pa'i ngo bo nyid kyi sdig pa rnams sel zhing ril gyis rtsa ba nas 'byin par 'gyur ro zhes don gyi dbang gis shes par bya'o/ /sems can thams cad kyi ngan song thams cad rnam par sbyong ba'o zhes bya ba ni sems can dmyal ba dang yi dags dang / dud 'gro'i skye gnas su 'jug par 'gyur ba'i las rnam par sbyong bar byed pa yin pas na ngan song sbyong ba ste/ rnam par sbyong ba ni dngos po med pa nyid du bstan pa'o/ /ngan 'gro thams cad bzlog pa'o zhes bya ba ni/ ngan 'gror 'gro ba'i las bzlog pa yin pa'i phyir ro/ /las kyi sgrib pa thams cad yang dag pa gcod pa'o zhes bya ba ni bdag dang bdag tu 'ching ba'i nyon mongs pa 'dod chags dang zhe sdang dang gti mug la sogs pa dang / las kyi sgrib pa rnams mi dmigs par ston pa'i phyir ro/ /mi khom pa brgyad po thams cad kyi skye ba'i rgyun mi skye bar byed pa'o zhes bya ba ni mi dge ba bcu'i las kyi lam rnam par spong bar ston pa dmyal ba dang / yi dags dang / dud 'gro dang / mtha' 'khob kyi skye bo dang / lha tshe ring po rnams su skye ba dang / dbang po ma tshang ba dang / med par lta ba la sogs pa sangs rgyas mi 'byung ba'i sangs rgyas kyi zhing du skye ba ste/ de dag med pa'i phyir ro/ /'jigs pa chen po brgyad rnam par zhi bar byed pa'o zhes bya ba ni seng ge dang / glang po che myos pa dang / me drag po 'bar ba'i tshogs can rnam par 'phro ba dang / dug rnam par 'phro bas bsgyings pa'i sbrul dang / skra dang kha spu kham pa gyen du brdzes pa mig gtum pa'i srin po dang mtshon cha'i tshogs sra zhing rno ba'i rkun po dang / brtson srung dang lcags sgrog gis kun du dkrugs pa'i rgyal po'i 'jigs pa dang / dba' rlabs kun du 'khrug pa'i chu dang / sha za'i 'jigs pa rnams la dran pa tsam gyis rnam par thar par byed pa'i phyir ro/ /rmi lam ngan pa thams cad nges par 'jig par byed pa'o zhes bya ba ni/ rmi lam gang gis yid du mi 'ong ba ston pa ni rmi lam ngan pa ste/ de 'jig par byed pa ni gzhig ba'i bsam pas lan cig bklags pa tsam mam/ dran pa tsam gyis 'jig par byed pa'o/ /ltas ngan pa thams cad nges par sel bar byed pa'o zhes bya ba ni ce spyang sgra sgrogs pa la sogs pa yid du mi 'ong ba skyed par byed pa ni ltas ngan pa ste/ de yang bklags pa tsam mam dran pa tsam gyis sel bar byed pa yin no/ /brdangs dang bgegs thams cad rnam par zhi bar byed pa'o zhes bya ba ni brdangs ston pa dang bgegs rnams gus pa dang bcas te bklags pas zhi bar byed pa'o/ /bdud kyi dgra'i las thams cad ring du spong bar byed pa'o zhes bya ba ni chos thams cad stong pa nyid mngon du byas nas bklags pas so/ /de dge ba'i rtsa ba dang / bsod nams thams cad 'phel bar byed pa'o zhes bya ba ni 'dod chags med pa dang / zhe sdang med pa dang / gti mug med pa'i bdag nyid can gyi dge ba'i rtsa ba la 'jug pa rnams la bklags pa dang / bton pa la sogs pa byas pas gong nas gong du 'phel bar byed pa'i phyir ro/ /tshul bzhin ma yin pa'i yid la byed pa thams cad mi skye bar byed pa'o zhes bya ba ni bdag dang bdag gir mngon par zhen pa sngon du 'gro ba ni tshul bzhin ma yin pa'i yid la byed pa ste/ lam la dmigs pa'i sems skye bar mi 'gyur ba'i phyir ro/ /de chos la bdag med par ston pa'i de kho na nyid yid la byed cing rgyun du bklags pas zhi bar byed pa'o/ /rgyags pa dang nga rgyal dang dregs pa dang ngar 'dzin pa thams cad ma lus par 'joms par byed pa'o zhes bya ba ni rigs dang nor dang shes rab la sogs pas sems mtho bar 'gyur ba ni rgyags pa'o/ /nga rgyal ni rnam pa bdun te sngar bshad pa'o/ /dregs pa ni nga dang mnyam pa med do zhes khengs pa ste/ de dag thams cad kyi rtsa ba ni ngar 'dzin pa la mngon par zhen pa'o/ /de yang sgyu ma lta bu dang dngos po med pa nyid du khong du chud par ston pas so/ /sdug bsngal dang yid mi bde ba thams cad mi skye bar byed pa'o zhes bya ba ni chos kyi de kho na nyid khong du chud pa'i dga' ba dang ldan pa'i dga' ston gyi zil gyis gnon pa'i phyir ro/ /de bzhin gshegs pa thams cad kyi snying por gyur pa'o zhes bya ba ni stong pa nyid kyi ye shes kyi ngo bo nyid yin pa'i phyir te/ stong pa nyid kyi ye shes ni de bzhin gshegs pa thams cad kyi snying po yin la/ de ston pa'i yi ge'i bye brag kyang snying po yin te/ de gnyi ga'i ngo bo nyid med pa'i phyir ro/ /byang chub sems dpa' thams cad kyi gsang bar gyur pa'o zhes bya ba ni skal pa dang mi ldan pa'i sems can rnams la sla bar bya ba yin pa'i phyir ro/ /nyan thos dang rang sangs rgyas thams cad kyi gsang chen du gyur pa'o zhes bya ba ni mchog tu yid rton pa'i gnas su gyur pa'i phyir ro/ /phyag rgya dang gsang sngags thams cad du gyur pa'o zhes bya ba la/ phyag rgya chen po dang / dam tshig gi phyag rgya dang / chos kyi phyag rgya dang / las kyi phyag rgyas kyang lha'i 'khor lo thams cad kyang rgyas 'debs pas na phyag rgya thams cad du gyur pa'o/ /snying po dang / nye ba'i snying po dang rtsa ba'i gsang sngags dang / phreng ba'i gsang sngags la sogs pa'i dbye ba'i bdag nyid can yin pas na gsang sngags thams cad du gyur pa'o/ /chos thams cad brjod du med par smra ba rnams kyi dran pa dang shes bzhin yang dag par bskyed pa'o zhes bya ba la/ dran pa ni chos la dmigs pa'i shes rab kyi cha dang bcas pa'o/ /shes bzhin ni dran pas 'jog pa'i dngos po rnams la brtan par bya ba'i phyir bsgom pa'o/ /bla na med pa'i shes rab bskyed pa dang / yid gzhungs par byed pa'o zhes bya ba ni gzhung dang don la dpyod cing rnam par 'jig pa'i bdag nyid can dang / nges par 'byed pa'i bdag nyid can ni shes rab bo/ /gzhung 'dzin pa'i bdag nyid can ni yid gzhungs pa ste/ shes rab dang yid gzhungs pa de las lhan cig gong mar gyur pa med pas na bla na med pa'i shes rab dang yid gzhungs par byed pa'o/ /nad med pa dang / stobs dang / dbang phyug phun sum tshogs par byed pa'o zhes bya ba ni lus dang sems las gnod pa sel bar byed pa'i nus pa phul du byung ba bskyed pa'i ngo bo nyid yin pa'i phyir nad med pa'o/ /yang ba dang / phra ba dang / mchod par bya ba dang / bdag por gyur pa dang / dbang phyug tu gyur pa dang / gar yang phyin pa dang / 'dod dgur ldan pa dang / dga' dgur gnas pa ste/ yon tan gyi dbang phyug brgyad phun sum tshogs par byed pa'am/ yang na phyi dang nang gi bdag por gyur pa la phul du byung bar byed pas dbang phyug phun sum tshogs par byed pa'o/ /dpal dang dge ba dang zhi ba dang legs pa rab tu 'phel bar byed pa'o zhes bya ba la/ bsod nams kyi tshogs ni dpal lo/ /ye shes kyi tshogs ni dge ba'o/ /nyon mongs pa dang nye ba'i nyon mongs pa thams cad ldog pa ni zhi ba'o/ /'tshang rgya ba nyid kyis mya ngan las 'das pa ni legs pa ste/ de dag ma lus pa'i rab kyi mthar thug par 'dren par byed pas dpal dang dge ba dang zhi ba dang legs par 'phel bar byed pa'o/ /grags pa dang snyan pa dang tshigs su bcad pa dang bstod pa grags par byed pa'o zhes bya ba ni sbyin pa phul du byung ba las byung ba ni grags pa'o/ /ye shes phul du byung ba las byung ba ni snyan pa'o/ /yon tan thams cad phul du phyin pa'i ngo bo nyid kyis ni tshigs su bcad pa rgyas par 'gyur ro/ /rnam pa thams cad du mchod par 'os pas ni bstod pa rgya cher 'phel bar 'gyur ro zhes rnam par dbye'o/ /nad dang 'jigs pa chen po thams cad rab tu zhi bar byed pa'o zhes bya ba ni nad thams cad dang 'ching ba la sogs pa sel bar byed pa yin pa'i phyir ro/ /shin tu rnam par dag pa rnams kyi nang na shin tu rnam par dag pa yin te/ nyon mongs pa bag chags dang bcas pa sel bar byed pa yin pa'i phyir ro/ /shin tu dag byed rnams kyi yang shin tu dag byed kyang yin te/ de bzhin gshegs pa'i ye shes dri ma med pas sems can thams cad dag par byed pa yin pa'i phyir ro/ /shin tu 'byor ldan rnams kyi yang shin tu 'byor ldan no zhes bya ba ni bsod nams dang ye shes kyi skal ba phul du byung bar bskyed pa'i phyir ro/ /shin tu bkra shis pa rnams kyi yang shin tu bkra shis pa'o zhes bya ba ni dga' ston phul du byung ba'i khyad par skye ba'i phyir ro/ /skyabs 'dod pa rnams kyi skyabs so zhes bya ba ni 'jigs pa thams cad sel bas skyong ba'i phyir ro/ /gnas med pa rnams kyi gnas so zhes bya ba ni rnam par 'tshe ba thams cad dang bral ba'i mya ngan las 'das pa'i gnas kyi ngo bo nyid yin pa'i phyir ro/ /skyob pa 'dod pa rnams kyi skyob pa'o zhes bya ba ni 'jigs pa thams cad las skyob par byed pa'i don gyis so/ /dpung gnyen 'dod pa rnams kyi dpung gnyen no zhes bya ba ni ngan 'gro thams cad las bzlog nas bde 'gro'i gnas ster ba'i phyir ro/ /gling 'dod pa rnams kyi gling ngo zhes bya ba ni 'khor ba'i rgya mtshor lhung ba rnams kyi ngal bso ba'i gnas su gyur pa'i phyir ro/ /'khra sa med pa rnams kyi 'khra sa bla na med pa'o zhes bya ba ni lam dang lam ma yin pa shes pa la rmongs pa rnams ni yang dag pa'i lam sgrub pa'i rgyur gyur pa'i phyir ro/ /srid pa'i rgya mtsho'i pha rol tu 'gro ba rnams kyi gru'o zhes bya ba ni theg pa chen po'i ngo bo nyid yin pa'i phyir ro/ /nad thams cad sel ba'i sman gyi rgyal po chen po'o zhes bya ba ni chos thams cad bdag med pa'i sman gyi rgyal po chen po yin pa'i phyir ro/ /blang ba dang dor ba'i dngos po'i bye brag phyed pa'i shes rab nyid ces bya ba ni sdug bsngal dang kun 'byung dag ni dor ba'o/ /'gog pa dang lam gyi khyad par ni blang bar bya'o/ / shes rab kyi rnam par dbye ba'i khyad par gyi sangs rgyas nyid thob pa la 'jog pa'i phyir bye brag phyed pa'i shes rab bo/ /lta ba dang ngan pa'i mun pa mun nag thams cad yang dag par sel ba'i ye shes kyi snang ba'o zhes bya ba ni bdag dang / rtag pa dang dbang phyug dang / skyes bu dang / tshor ba po la sogs par lta ba ngan pa'o/ /de nyid ni mun pa mun nag ltar de kho na nyid 'gegs pa'i phyir mun pa'o/ /de sel ba de dang de ni mi mthun pa'i chos thams cad bdag med pa'i ye shes kyi snang ba ston pa'i phyir ro/ /sems can thams cad kyi bsam pa ji lta ba bzhin du yongs su rdzogs par byed pa'i yid bzhin gyi nor bu lta bu'o zhes bya ba ni ji ltar mngon par 'dod pa'i don ma tshang ba med pa dang 'gal ba med par rdzogs par byed pas sems can thams cad kyi bsam pa thams cad yongs su rdzogs par byed pa'i phyir yid bzhin gyi nor bur gyur pa'o/ /'jam dpal ye shes kyi sku yongs su thob par bya ba'i phyir thams cad mkhyen pa'i ye shes so zhes bya ba ni gnyis su med pa'i de bzhin nyid kyi ngo bo nyid du chos thams cad khong du chud pa'i ye shes ni thams cad mkhyen pa'i ye shes te/ 'jam dpal gyi ye shes kyi sku'i bdag nyid can gyi ngo bo nyid do/ /de thob pas na thams cad mkhyen pa'i ye shes so/ /spyan lnga thob par bya ba'i phyir ye shes mthong ba yongs su dag pa'o zhes bya ba ni sha dang / lha dang / shes rab dang / chos dang / sangs rgyas kyi spyan rdzogs par byed pas spyan lnga thob par byed cing shin tu yongs su dag pa'i ye shes mthong bar byed pa'o/ /zang zing dang mi 'jigs pa dang chos kyi sbyin pa gtong ba'i phyir pha rol tu phyin pa drug yongs su rdzogs pa'o zhes bya ba ni zang zing byin pas ni sbyin pa'i pha rol tu phyin pa yongs su rdzogs so/ /mi 'jigs pa byin pas ni tshul khrims dang bzod pa'i pha rol tu phyin pa'o/ /chos byin pas ni bsam gtan dang shes rab kyi pha rol tu phyin pa'o/ /brtson 'grus kyi pha rol tu phyin pa ni thams cad du 'gro ba ste/ de ltar sbyin pa dang / tshul khrims dang / bzod pa dang / brtson 'grus dang / bsam gtan dang / shes rab kyi pha rol tu phyin pa'i ngo bo nyid zang zing dang mi 'jigs pa dang chos kyi sbyin pa yongs su rdzogs pas pha rol tu phyin pa drug yongs su rdzogs pa'o/ /bsod nams dang ye shes kyi tshogs dang / ting nge 'dzin yongs su rdzogs pa'i phyir sa bcu thob pa'o zhes bya ba ni sbyin pa dang tshul khrims dang bzod pa ni bsod nams kyi tshogs so/ /bsam gtan gyi pha rol tu phyin pa ni dpa' bar 'gro ba la sogs pa'i ting nge 'dzin thams cad yang dag par bskyed pas na ting nge 'dzin dang / shes rab kyi pha rol tu phyin pa la sogs pa pha rol tu phyin pa lnga ni ye shes kyi tshogs so/ /gang gi phyir pha rol tu phyin pa bcu pos de rnams la yongs su rdzogs pas sa rnams rdzogs par byed pa'i bsod nams dang ye shes kyi tshogs yongs su rdzogs pa'i phyir sa bcu thob pa ste/ de'i ngo bo nyid yin pa'i phyir ro/ /chos gnyis dang bral ba'i phyir gnyis su med pa'i chos nyid do zhes bya ba ni sngar bshad pa'i gnyis su med pa'i chos nyid kyi ngo bo nyid du gyur pas don dam pa'i ngo bo nyid do/ /sgro btags pa med pa'i phyir de bzhin nyid kyi rang bzhin dang gzhan ma yin pa'i chos nyid do zhes bya ba ni tha dad pa dang tha dad pa ma yin pa dang chos dang chos can gyi sgro btags pa dang bral zhing med pa'i phyir de bzhin nyid kyi rang bzhin te/ de bzhin nyid kyi ngo bo nyid do/ /de bzhin du de bzhin gshegs pa'i ye shes yongs su dag pa'i ngo bo nyid yin pa'i phyir yang dag pa'i mtha'i rang bzhin nyid do zhes bya ba la don dam par ro zhes bya ba ni lhag ma'o/ /lta ba ngan pa'i tshang tshing brgya stong ma lus par sel ba'i phyir rnam pa thams cad rnam pa med pa stong pa nyid kyi rang bzhin nyid do zhes bya ba ni lta ba ngan pa'i tshang tshing gnyen po'i phyogs su gyur pa chos thams cad rnam pa thams cad du stong pa nyid du ston pa yin pa'i phyir ro/ /ming yang dag par brjod pa ni 'di lta ste/ gnyis su med pa'i chos nyid kyi don gyi ming yang dag par 'dzin pa ston pa'i phyir chos thams cad brjod du med pa'i rang bzhin nyid do zhes bya ba ni brjod pa thams cad dang bral ba chos nyid kyi de kho na nyid kyi don ston pa'i ming 'chad pa'i phyir rgyu las 'bras bu nye bar btags nas bshad do zhes bya ba ni lhag ma'o/ / //tha mal par bklags pa'i phan yon rgya cher bstan par bya ba'i phyir/ lag na rdo rje rdo rje 'chang gzhan yang zhes bya ba la sogs pa gsungs te/ lag na rdo rje rdo rje 'chang gzhan yang rigs kyi bu'am/ rigs kyi bu mo gsang sngags kyi sgo'i spyad pa spyod pa gang la las bcom ldan 'das 'jam dpal ye shes sems dpa' de bzhin gshegs pa thams cad kyi ye shes kyi sku gnyis su med pa'i don dam pa'i ming yang dag par brjod pa ming gi gtsug gi nor bu 'di thams cad yongs su rdzogs pa dang / ma nyams shing lhag chad med par rigs su bcad pa'i tshig dang / yi ge'i 'bru 'di dag gis nyin gcig bzhin du dus gsum du 'chang ba dang / klog pa dang / kun chub par byed pa dang / tshul bzhin du yid la byed pa dang / gzhan dag la yang dam tshig ji lta ba bzhin du ston pa dang / ming gi don gang yang rung ba re re nas kyang 'jam dpal ye shes kyi sku la dmigs te/ kun nas sgo'i gnas pas gnas pa dang / chos thams cad rtogs pa'i mchog rnyog pa med pa'i dad pa dang ldan bzhin pa dang mos pa dang / de kho na nyid la byed pas sems rtse gcig tu bsgom pa de la ni dus gsum gyi dus med pa dang ldan pa'i sangs rgyas dang byang chub sems dpa' thams cad 'dus te gshegs nas chos kyi sgo thams cad ston par mdzad de sku yang ston to/ /sangs rgyas dang byang chub sems dpa' thams cad kyis kyang byin gyis rlob par mdzad de/ sku dang gsung dang thugs thams cad kyis de'i rgyud la yang dag par byin gyis rlob bo/ /sangs rgyas dang byang chub sems dpa' thams cad kyis phan gdags pas kyang phan 'dogs par mdzad do/ /chos thams cad la mi 'jigs pa'i spobs pa yang sgrub par mdzad do/ /dgra bcom pa dang nyan thos dang rang sangs rgyas thams cad kyang 'phags pa'i chos la sdug par 'dzin pa'i bsam pas bdag nyid kyi dngos po yang nye bar ston par byed do/ /ma rungs pa 'dul ba'i khro bo'i rgyal po chen po rnams dang / rdo rje 'chang chen po la sogs pa 'gro ba yongs su skyob pa rnams kyang sprul pa'i gzugs kyi lus sna tshogs kyis mdangs dang stobs dang gzi brjid zil gyis mi non pa dang / gsang sngags dang / phyag rgya dang / mngon par rtogs pa dang / dkyil 'khor thams cad sgrub par byed do/ /gsang sngags dang / rig sngags kyi rgyal mo ma lus pa dang / bgegs dang / log 'dren dang / bdud kyi dgra dang / phyir bzlog pa dang / gzhan gyis mi thub pa chen po thams cad kyang nyin mtshan phyed par skad cig re re la spyod lam thams cad du srung ba dang skyob pa dang sped par byed do/ /tshangs pa dang / dbang po dang / nye dbang dang / drag po dang / tshan po che dang / kun 'gyed gzhon nu dang / dbang phyug chen po dang / smin drug gi bu dang / nag po chen po dang / dga' byed dbang phyug dang / gshin rje dang / chu lha dang / ku be ra dang / 'phrog ma dang / phyogs bcu'i 'jig rten skyong ba gang yin pa de dag kyang rtag tu rgyun mi 'chad par nyin mtshan phyed par 'gro yang rung / 'greng yang rung / 'dug kyang rung / nyal yang rung / gnyid log kyang rung ma log kyang rung ba na srung ba dang / skyob pa dang sbed par byed do/ /mnyam par bzhag kyang rung mnyam par ma bzhag kyang rung / gcig pu 'dug kyang rung / skye bo mang po'i nang na 'dug kyang rung / grong dang / grong khyer dang / grong rdal dang / ljongs dang / yul 'khor dang / rgyal po'i pho brang na 'dug kyang rung / sgo khang dang / khyim dang / srang dang / bzhi mdo dang / sum mdo dang / grong bar dang / tshong khang na 'dug kyang rung / khong stong dang / ri dang / chu klung dang / tshal dang / nags tshang tshing na 'dug kyang rung / gtsang sbra ma byas pa dang / ra ro ba dang / bag med par 'dug kyang rung ste/ rtag tu rnam pa thams cad du ci'i sgo nas kyang mchog tu srung ba dang skyob pa dang sped par byed do/ /nyin mtshan du yang mchog tu bde legs su 'gyur bar byed do/ /gang yang lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dang / mi dang / mi ma yin pa gzhan dag kyang / gza' dang / rgyu skar dang / ma mo rnams dang / tshogs kyi bdag po gzhan dag dang / ma mo bdun po gang yin pa rnams dang / gnod sbyin mo dang / srin mo dang / sha za mo gang yin pa de dag thams cad kyang 'du zhing gcig tu mthun par dpung dang bcas/ 'khor dang bcas pas bsrung ba dang / skyob pa dang sbed pa thams cad byed par 'gyur ro/ /mdangs dang stobs dang gzi brjid mchog kyang de'i lus la 'jug par byed do/ /nad med pa dang stobs dang tshe 'phel ba yang sgrub par byed do zhes gsungs pa yin te/ de la de dag las tshig don nyung zad cig dbye bar bya ste/ gsang sngags kyi sgo la spyad pa spyod pa zhes smos pa ni gsang sngags smra ba las gzhan du dngos grub med par bstan par bya ba'i phyir smos so/ /nyin gcig bzhin du dus gsum du/ /zhes smos pa ni dus mtshams kyi dus las ma 'das par bklags pa la sogs pa bya ba ni nges par 'grub par bya ba'i phyir smos so/ /'chang ba dang zhes bya ba ni gzhung gi tshig 'dzin pa'i phyir ro/ /klog pa dang zhes bya ba ni dkyil 'khor byas la mchod pa rnam pa lnga sngon du 'gro bas mtshan yang dag par brjod pa'i glegs bam klog pa ste/ dus gsum du yang dag par blangs pa zhes bya ba ni thams cad la sbyar bar bya'o/ /kun chub par byed pa dang zhes bya ba ni gzhung dang don 'dzin pa'i phyir ro/ /tshul bzhin yid la byed pa dang / /zhes bya ba ni ji ltar gzung ba'i don gyi de kho na nyid bsgom pa'o/ /gzhan dag la yang dam tshig ji lta ba bzhin du ston pa dang zhes bya ba ni gsum la skyabs su 'gro ba dang / byang chub tu sems bskyed pa dang / dkyil 'khor du zhugs shing dam tshig dang ldan pa gzhan la yang dag par ston pa dang / bcom ldan 'das 'jam dpal ye shes kyi sku'i de bzhin nyid dang gnyis su med pa'i ngo bo nyid la dmigs par byas nas bsgom pa dang / mos pa dang de kho na nyid yid la byed pa dang ldan pa ni las dang po pa rnams so/ /de kho na nyid mthong zhing de kho na nyid yid la byed pa dang ldan pas dge ba dang mi dge ba'i mtshan ma'i rnam par rtog pa dang bral ba ni kun nas sgo'i gnas pas gnas pa'o/ /chos thams cad nges par rtogs pas nye bar dmigs pa'i dri ma rnyog pa dang bral ba'i shes rab dang ldan pa'i dad pa dang yang dag par ldan pas yang dag par 'dzin pa la sogs pa byed pa de la ni sangs rgyas dang / byang chub sems dpa' thams cad 'dus te zhes yang dag par 'du ba mdzad pa dang / gshegs nas zhes pa la/ legs par byon nas chos kyi sgo thams cad yang dag par ston par mdzad pa ste/ thabs kyi bye brag rjes su ston par mdzad cing thabs sna tshogs pas chos kyi de kho na nyid rtogs par bya ba'i phyir bdag nyid kyi sku yang dag par ston par mdzad do/ /bsod nams kyi tshogs yongs su rdzogs par bya ba'i phyir sangs rgyas dang byang chub sems dpa' thams cad kyis byin gyis rlob par mdzad cing bdag gir mdzad pa dang / nyon mongs pa dang bdud kyi phyogs la sogs pa rnams kyis glags mi rnyed par bya ba'i phyir sku dang gsung dang thugs kyis lus dang ngag dang yid brtan par mdzad par 'gyur ro/ /sa dang pha rol tu phyin pa thams cad bstan par bya ba'i phyir sangs rgyas dang byang chub sems dpa' thams cad kyis phan 'dogs pas kyang phan 'dogs par mdzad do/ /chos thams cad stong pa nyid du bstan pa la skrag pa spang ba'i phyir dang / gzhan rnams la dogs pa med par chos thams cad stong pa nyid kyi don bstan par bya ba'i phyir chos thams cad la mi 'jigs pa'i spobs pa yang sgrub par mdzad do/ /dgra bcom pa dang / nyan thos dang / rang sangs rgyas thams cad kyang 'phags pa'i chos la sdug par 'dzin pa'i bsam pas bdag nyid kyi dngos po yang nye bar ston par byed do zhes bya ba ni ji ltar bcom ldan 'das shAkya thub pas nyan thos dang rang sangs rgyas thams cad kyi ston par 'gyur ba de bzhin du 'di yang ston par 'gyur ro zhes te'o/ /ma rungs pa 'dul ba'i khro bo'i rgyal po chen po la sogs pa 'gro ba rnams kyi yongs su skyob par gyur pa rnams kyis kyang sprul pa'i gzugs kyis lus sna tshogs pa bstan nas lus la mdangs 'jug par 'gyur te/ mdangs dang ldan par byed pa'o/ /mdangs dang ldan pa nyid kyis ni stobs te/ bdud la sogs pa rnams kyis zil gyis mi gnon pa'i phyir ro/ /gzi brjid ni mthu shin tu phul du byung ba'i don gyis thams cad zil gyis gnon pa'i phyir ro/ /lus dang ngag dang yid la 'jug par mdzad do zhes bya ba ni thams cad la blta bar bya'o/ /gsang sngags dang / phyag rgya dang / mngon par rtogs pa dang / dkyil 'khor thams cad sgrub par byed do zhes bya ba ni gsang sngags dang / phyag rgya dang / dam tshig thams cad dang ldan pa'i dkyil 'khor thams cad dang / sems can thams cad kyi don bya ba'i phyir khyod kyis som nyi med pa dang dkyil 'khor la 'jug pa la sogs pa gsang sngags kyi 'khor lo bskor cig ces yang dag par ston pa'i phyir ro/ /gsang sngags dang rig sngags kyi rgyal mo ma lus pa dang zhes bya ba ni 'jig rten las 'das pa ste/ sangs rgyas spyan ma la sogs pa thams cad spyod lam thams cad du srung ba dang skyob pa dang sbed pa byed do/ /bgegs thams cad ni rnam pa sna tshogs pas bgegs byed pa'o/ /log 'dren ni gtsug 'phyang la sogs pa'o/ /bdud kyi dgra dang phyir bzlog pa dang zhes bya ba ni gtsug tor gdugs dkar mo la sogs pa'o/ /gzhan gyis mi thub pa chen po zhes bya ba ni khro bo gzhan gyis mi thub pa la sogs pa dang 'jig rten las 'das pa rnams te/ de dag thams cad kyang nyin mtshan phyed par skad cig re re la spyod lam thams cad du srung ba dang skyob pa dang sbed par byed do/ /mthu chen po dang ldan pa'i 'jig rten pa tshangs pa la sogs pa dang 'jig rten skyong ba rnams dang lha la sogs pa gzhan rnams kyang rnam pa thams cad nas spyod lam thams cad du mchog tu srung ba dang skyob pa dang sbed pa byed de/ /thams cad kyi gtso bor gyur pas bsrung bar bya ba yin pa'i phyir ro/ /ma nyams pa yi dam du blangs pa'i phan yon gyi khyad par bstan par bya ba'i phyir/ lag na rdo rje rdo rje 'chang gzhan yang zhes bya ba la sogs pa gsungs te/ lag na rdo rje rdo rje 'chang gzhan yang ming gi gtsug gi nor bu 'di gang nyin gcig bzhin du dus gsum du ma nyams par yi dam du zhes bya ba ni ma nyams par yi dam du blangs pas so/ /lan gsum ni thun mtshams gsum du lan gsum du kha ton du byas te 'don tam glegs bam du byas pa lan gsum klog cing brjod la/ /bcom ldan 'das 'jam dpal ye shes sems dpa'i gzugs yid la ma dmigs shing zhes pa chos kyi sku'i tshul lo/ /gzugs dang mthun par sems te zhes pa ni longs spyod rdzogs pa'i sku'i tshul lo/ /de'i gzugs dang mthun par bsam gtan du byed pa ni sprul pa'i sku'i tshul la ste/ de ni las dang po pa yin pa'i phyir sprul pa'i sku mthong bar 'gyur ro/ /dge ba'i rtsa ba yongs su smin pa ni gzugs kyi lus te/ longs spyod rdzogs pa'i sku mthong bar 'gyur ro/ /'dul ba'i dbang gi phyir zhes bya ba ni skal ba dang rjes su mthun pa'i dbang du'o/ /sangs rgyas dang byang chub sems dpa' thams cad kyi gzugs kyi sku rnam pa sna tshogs dang ldan pa nam mkha'i dkyil na bzhugs pa dag kyang mthong bar 'gyur zhes bya ba ni dad pa phul du 'byung ba'i mig gis so/ /sems can chen po de ni nams kyang ji ltar gyur kyang ngan 'gro ngan song du ltung bar mi 'gyur ro/ /rigs ngan du skye bar mi 'gyur ro/ /yul mtha' 'khob tu skye bar mi 'gyur ro/ /dbang po ma tshang bar mi 'gyur ro/ /dbang po nyams par mi 'gyur ro/ /log par lta ba dang lta ba ngan pa'i rigs su skye bar mi 'gyur ro/ /sangs rgyas mi bzhugs pa'i sangs rgyas kyi zhing du skye bar mi 'gyur ro/ /sangs rgyas bzhugs na yang des bstan pa'i chos spong ba dang bskol bar mi 'gyur ro/ /lha tshe ring po'i nang du yang skye bar mi 'gyur ro/ /mu ge dang nad dang mtshon gyi bar gyi bskal pa'i nang du yang skye bar mi 'gyur ro zhes bya ba ni mi khom pa brgyad du skye bar 'gyur ba'i las rnams zad pa'i thabs la zhugs pa'i phyir ro/ /snyigs ma lnga'i dus su yang skye bar mi 'gyur ro zhes bya ba ni lta ba dang / nyon mongs pa dang / sems can dang / skal pa dang / tshe'i snyigs ma zhes bya ba ni snyigs ma lnga ste/ log par lta ba la sogs pa lta ba drug cu rtsa gnyis ni lta ba'i snyigs ma'o/ /'dod chags chen po la sogs pa'i nyon mongs pa rnams ni nyon mongs pa'i snyigs ma'o/ /bsod nams dang bag yod pa la sogs pa dang bral ba'i sems can ni sems can gyi snyigs ma'o/ /dus ring por sdug bsngal bar byed pa nyid ni bskal pa'i snyigs ma'o/ /tshe thung bar 'gyur ba nyid ni tshe'i snyigs ma ste/ gzhan du tshe tshad dpag med de/ /'di ni sems can tshe thung 'gyur/ /zhes bshad pa'i phyir ro/ /de yang gos dmar po dang 'dra bar bsgyur bar dka' ba'i phyir snyigs ma ste/ snyigs ma lnga po de rnams su phyin ci log gi lta ba dang bral ba'i phyir skye bar mi 'gyur ro/ /lhag ma rnams ni gzhung nyid gsal bas rnam par mi phye ste/ tshig dag par bya ba'i phyir bris pa yin no/ /rgyal po dang / dgra dang / chom rkun gyi 'jigs pa yang 'byung bar mi 'gyur ro/ / ci nas kyang dman pa dang dbul ba'i 'jigs pa yang 'byung bar mi 'gyur ro zhes bya ba ni bsod nams kyi tshogs nye bar bstan par bya ba'i phyir ro/ /dri ngas dang / skur pa dang / smad pa dang / mi snyan pa dang / gtam ngan gyi 'jigs pa yang 'byung bar mi 'gyur ro zhes bya ba ni chos thams cad sgyu ma dang 'dra bar khong du chud pa'i phyir ro/ /rgyud dang rus dang rigs bzang po dang yang ldan par 'gyur ro zhes bya ba ni nyes par spyod pa'i las thams cad dang bral bar 'gyur ba'i phyir ro/ /kun nas mdzes pa dang gzugs dang kha dog dang ldan par yang 'gyur ro zhes bya ba ni bzod pa phun sum tshogs pa'i phyir ro/ /'jig rten pa rnams la sdug pa dang yid du 'ong ba dang 'grogs na bde ba dang mthong na dga' bar yang 'gyur ro zhes bya ba ni byams pa dang snying rje'i mig gnyis kyis sems can thams cad la lta ba'i phyir ro/ /'jig rten rnams la mdzes pa dang skal ba dang ldan pa dang tshig btsan par yang 'gyur ro zhes bya ba ni bsdu ba'i dngos po bzhi la nges par ston pa'i phyir ro/ /gang dang gang du skyes pa de dang der yang tshe rabs dran par 'gyur ro zhes bya ba chos kyi sbyin pa la bslabs pa'i phyir ro/ /longs spyod kyi gzhi che ba dang / 'khor mang ba dang / longs spyod kyi gzhi mi zad pa dang 'khor mi zad par yang 'gyur ro zhes bya ba ni bdag gis thams cad yongs su gtong ba la bslabs pa'i phyir ro/ /sems can thams cad kyi mchog dang yon tan mchog dang yang ldan par 'gyur ro zhes bya ba ni dri ma med pa'i shes rab la sogs pa'i yon tan dang ldan pa'i phyir ro/ /rang bzhin gyis kyang pha rol tu phyin pa drug gi yon tan dang ldan par 'gyur ro zhes bya ba ni pha rol tu phyin pa drug gi ngo bo nyid byang chub kyi sems mi brjed pa'i phyir ro/ /tshangs pa'i gnas bzhi la yang gnas par 'gyur ro zhes bya ba ni byams pa dang / snying rje dang / dga' ba dang / btang snyoms la gus par byed pa'i phyir ro/ /dran pa dang / shes bzhin dang / thabs dang / stobs dang / smon lam dang / ye shes dang ldan par 'gyur ro zhes bya ba ni lhun gyis grub par 'jug pa'i lam 'thob pa las so/ /bstan bcos thams cad la 'jigs pa med pa dang smra mkhas par yang 'gyur ro/ / mi blun pa dang tshig gsal ba dang sgrin por yang 'gyur ro zhes bya ba ni dri ma med pa'i shes rab 'thob pa'i phyir ro/ /shes nyen can dang / le lo med pa dang / chog shes pa dang / nor mang ba dang / sred pa med par yang 'gyur ro zhes bya ba ni chos thams cad sgyu ma lta bur rtogs pas brtson 'grus rnam pa gsum 'thob pa'i phyir ro/ /sems can thams cad kyis mchog tu yid brten par bya ba dang / slob dpon dang bla mar bkur bar yang 'gyur ro zhes bya ba ni mchog tu yid brten pa'i gnas kyi don dang / las so sor rtog pa'i chos nyid thob pa'i phyir ro/ /des sngon ma thos pa'i bzo dang / sgyu rtsal dang / mngon par shes pa'i shes pa dang bstan bcos thams cad kyang don dang yi ge'i sgo nas shes par 'gyur ro zhes bya ba ni stong pa nyid dang / mtshan ma med pa dang / smon pa med pa dang / mngon par 'dus ma byas pa'i sgo mngon sum du byas pa'i phyir ro/ /tshul khrims dang / 'tsho ba dang kun du spyod pa shin tu yongs su dag par spyod pa dang legs par rab tu byung ba dang / legs par bsnyen par rdzogs par yang 'gyur ro zhes bya ba ni lus dang ngag dang yid kyi nyes par spyod pa las ldog pa'i ngo bo nyid kyis chos rtogs pa'i phyir ro/ /thams cad mkhyen pa nyid kyi byang chub kyi sems kyang mi brjed par 'gyur ro zhes bya ba ni byang chub kyi sems mi brjed pa'i ting nge 'dzin rdzogs par byed pa'i phyir ro/ /nyan thos dang / dgra bcom pa dang / rang sangs rgyas kyi nges pa la nams kyang 'jug par mi 'gyur ro zhes bya ba ni theg pa de la mngon par 'dod pa med pa nyid dang / theg pa gcig gi tshul la mkhas pa'i phyir ro/ /lag na rdo rje rdo rje 'chang de ltar na yon tan dpag tu med pa dag dang ldan par 'gyur te/ rnam pa de lta bu'i yon tan gyi tshogs dpag tu med pa gzhan dag dang yang ldan par 'gyur ro/ /lag na rdo rje rdo rje 'chang don dam pa'i ming yang dag par brjod pa 'di yang dag par 'dzin pa'i skyes bu gang zag de ni bsod nams dang / ye shes kyi tshogs legs par bsags shing / sangs rgyas kyi yon tan rnams shin tu myur du bsgrubs nas ring por mi thogs pa bla na med pa yang dag par rdzogs pa'i byang chub mngon par rdzogs par 'tshang rgya bar 'gyur te/ bskal pa mang por yongs su mya ngan las 'das pa'i chos su mi 'gyur bar sems can thams cad la bla na med pa'i chos ston pa dang / phyogs bcur dam pa'i chos kyi rnga sgra chen po rgyun mi 'chad par sgrogs pa'i chos kyi rgyal po chen por 'gyur ro zhes bya ba ste/ myur du mngon par shes pas so zhes bya ba ni tshig gi lhag ma'o/ /oM sarba d+harmA b+hA ba swa b+hA ba bi shud+d+ha badzra a A aM aHpra kr-i ti pa ri shud+d+haHsarba d+harmA ya du ta/ sarba ta thA ga tA dz+nyA na kA ya many+dzu shrI pa ri shud+d+hi tA mu pA dA ye ta a A oM sarba ta thA ga tA hr-i da ya ha ra ha ra oM hUM hrIH b+ha ga bAn dz+nyA na mUrti bA gI shwa ra ma hA pA tsa sarba d+ha rma ga ga nA ma la su pa ri shud+d+ha d+ha rma d+hA tu dz+nyA na gar+b+ha AH/ /zhes bya ba'i sngags 'di thog ma dang tha ma dang bar du byin gyis brlab pa'i phyir gsungs te/ de yang yi ge a ni/ byang chub sems kyi bdag nyid can no/ /A ni sa dang pha rol tu phyin pa la sogs pa'i spyod pa'i ngo bo nyid do/ /oM ni sangs rgyas nyid ston pa'o/ /aM ni mya ngan las 'das pa chen po ston par byed pa'o/ /aH ni ye shes kyi sku byin gyis rlob par byed pa'o/ /oM hUM hrIHni sku dang gsung dang thugs byin gyis rlob par byed pa'o/ /a ni rgyu dang mi rgyu ba'i ngo bo nyid kyi dngos po thams cad ni/ chos kyi dbyings gsung gi dbang phyug gi bdag nyid can yin pas chos kyi skur rgyas btab pa'i don du 'dir gsungs pa yin par shes par bya'o/ /de nas zhes bya ba ni de ma thag tu ste/ gsang sngags kyis byin gyis brlabs pa'i rjes thogs nyid la/ bdud la sogs pa rnams kyis mi tshugs par byin gyis brlabs shing rgyas btab pas bdag gi don yongs su rdzogs pas na dga' ba'o/ /gzhan gyi don yongs su rdzogs pas na mgu ba'o/ /de ltar rdo rje 'dzin pa chen po gsang ba'i bdag po lag na rdo rje rnams dang bcas pas bcom ldan 'das la phyag 'tshal nas tshig 'di skad ces gsol pa ste/ mgon po bdag cag yi rang ngo / /legs so legs so legs par gsungs/ /rnam grol 'bras bu 'tshal ba yi/ /'gro ba mgon med rnams dang ni/ /bdag cag yang dag rdzogs pa yi/ /byang chub thob pa'i don chen mdzad/ /ces bya ba ste/ bla na med pa'i byang chub thob par mdzad pa'o/ /gang gi phyir zhe na/ sgyu 'phrul dra ba'i tshul bstan pa/ /'di ni rnam dag legs pa'i lam/ /zab cing yangs la rgya che ste/ /don chen 'gro ba'i don byed pa/ /zhes bya ste/ de bas na nges pa kho nar bla na med pa yang dag par rdzogs pa'i byang chub thob par byed pa'o/ /don 'di la ni sangs rgyas nyid tshad mar gyur pa yin pa'i phyir/ sangs rgyas rnams kyi yul 'di ni/ /rdzogs pa'i sangs rgyas rnams kyis bshad/ /ces smos pa yin no/ /mtshan mchog shin tu legs par brgyan pa'i skur ldan zhing / /nam mkha'i ngos ltar yangs pa'i grags phreng kun du khyab/ /dge ba'i dri tshogs rgyas pas ma lus sad mdzad cing / /ngan pa'i rab rib tshogs dang las kyi dra ba 'joms/ /bdag sogs rmongs pa'i sgrib pa'i rab rib spong byed pa'i/ /bdag med seng ge'i sgra sgrogs bdag bral de bzhin nyid/ /de nyid de las mi 'gyur ming las mtshan rnams su/ /yang dag brjod sgrar mkhyen nas smra mchog rnams kyis gsungs/ /mtshan rnams yang dag brjod de yon tan tshogs kyis phyug /mnyam nyid mtshan 'dir 'bad de tshul bzhin rnam bkrol nas/ /'gro kun rjes su brtse phyir bdag gis byas pa yi/ /'grel 'dis rmongs pa'i tshogs rnams ma lus 'joms byed yin/ /sngags don rig pas rab gsal dgrol bar bya min gyi/ /mkhas pas lung gi snying po skyon don brtags la yang / /yang dag tshul sgo du mas mi 'gal rtogs byas na/ /ma lus don gyis brgyan zhing legs par rtogs pas dgrol/ / 'dis byas bdag gi bsod nams zla ba ltar dga' ba/ /mkha' ltar mtha' med mthar thug yang dag gang thob pa'i/ /bsod nams tshogs des 'jig rten 'di dag ma lus pa/ /thams cad mkhyen nyid thob pa'i bde la reg gyur cig /de bzhin 'jam dpal grags bcas 'jig rten 'di kun yon tan gyis brgyan zhing / /mkhas pa rnams kyi mchog gyur shes rab ye shes mchog gi lus dang ldan/ /las kyi 'ching ba rnams las rab grol snying rje chen po rnams 'phro zhing / /'khor bar skyo med sems kyis gzhan don byed la rtag tu 'jug /bdud dang mu stegs las rgyal bde gshegs sras mchog 'jam dbyangs nyid gyur cig / 'phags pa 'jam dpal gyi mtshan yang dag par brjod pa'i rgya cher 'grel ba slob dpon chen po 'jam dpal grags pa'i zhal snga nas kyis mdzad pa rdzogs so// //rgyal sras dam pa mgon po 'jam dbyangs kyi/ /yon tan phul byung mtshan gyi khyad par 'di/ /kun la grags kyang ji bzhin don la khrel/ /yang dag don la nor pa'i dri mas bslad/ /don 'di gzigs pas rje rgyal bla ma yis/ /gzhan la phan bzhed bka' yis bskul bas na/ /rgya chen sgra don bdag blos ma rtogs kyang / /bka' mnyan mos blo gtso bor byas pas bsgyur/ /legs bkrol rgya chen don la rmongs gyur bas/ /log par bsgyur sogs tshul min bgyis pa 'chags/ /sgra dang don mkhas nus ldan byung gyur na/ /tshig don brtags la nor ba bcos par gsol/ /chos don gnyer zhing mtshan mchog rgyas byas pas/ /dam pa'i zhing 'dir dge ba gang bskrun des/ /'gro kun mtshan rtogs blo yi skyon bral zhing / /bdag kyang blo mchog 'jam dbyangs mtshungs par shog /rgya gar gyi mkhan po A tsAr+ya shrad+d+hA ka ra barma dang / ka ma la gup+ta dang / zhu chen gyi lo tsA ba dge slong rin chen bzang pos bsgyur cing zhus te gtan la phab pa'o// //

CLOSE WINDOW