བོད་ཡིག

e-texts based on the ACIP/ALL Input

/ //lho phyogs ko sa lar sku 'khrungs pa'i rnal 'byor gyi dbang phyug shrI bai ro tsa na badzra'i zhal snga nas rang 'gyur du mdzad pa'o//[ ]@##/ /rgya gar skad du/ shrI kr-iSh+Na badzra pA da do ha ko Sha TI kA/ bod skad du/ dpal nag po rdo rje zhabs kyi do ha mdzod kyi rgya cher 'grel pa/ dpal rdo rje sems dpa' la phyag 'tshal lo/ /'khor ba'i rgya mtsho dri med chus gang ba'i/ /sngags kyi lugs kyi mtsho las pad skyes pa/ /spyod 'chang nag po 'gro don sbrang rtsi yi/ /bsung gi me tog rtag tu rgyal gyur cig /rang gi slob mas bskul ba'i dbang gis te/ /mkhas pa dpag med rdo rje yis/ /spyod zhabs do ha ko Sha yi/ /tshig don rab tu dbye bar bya/ /'dir log pa'i shes pa nyid kyis mchog gi don la mkhas pa'i bdag nyid yin no zhes nga rgyal bsam bzhin pas 'jig rten pa rnams nga'i de kho na nyid rig pa yin no zhes nga rgyal byed par grags pa de rnams la bltas nas/ snying rje'i khur bus brlan pa'i thugs kyis de'i nga rgyal thams cad 'joms par 'dod pas ji lta ba bzhin du 'gyur ba'i sngags kyi lugs kyi de kho na nyid bstan pa'i phyir/ skye 'gro thams cad kyi thun mong gi don du 'phral skad tshig gi slob dpon spyod pa'i rdo rje nga ni mchog gi don la mkhas pa zhes/ 'jig rten pa ni nga rgyal byed ces bya ba la sogs pa gsungs te/ 'jig rten pa ni nga rgyal byed pa de nyid gang yin zhe na/ nga ni mchog don la mkhas pa/ /zhes gsungs so/ /'di ni ji snyed yod tshad bstan pa yin gyi bye brag du bstan pa ni ma yin no/ /de bstan pa'i phyir bye ba'i nang na gcig tsam srid de zhes bya ba la sogs pa gsungs te/ gang de bye ba'i nang na srid na ste/ /rdul med pa 'dod chags la sogs pa nyon mongs pa dang 'dir bral bas rdul bral te/ lhan cig skyes pa'i sku'o/ /de la zhugs par gyur pa ni de la yid nges par zhugs pa ste/ rdul med pa la zhugs pa'o/ /rnal 'byor gyi dbang phyug de yang nga lta bu yin zhes dgongs so/ /log pa'i shes pa'i nga rgyal dang ldan pa rnams sun phyung nas 'jig rten pa'i bde ba'i shes rab dang ldan pas don dam par bdag gis shes so zhes mngon pa'i nga rgyal byed pa'i mkhas pa rnams kyi dbang du byas nas/ lung dang rigs pa rnying pa yis kyang ni/ /zhes bya ba la sogs pa gsungs te/ lung la sogs pa shes pa'i mkhas pa rnams nga rgyal byed pa ni don dam pa'i bden pa shes par mngon pa'i nga rgyal byed pa'o/ / de lta bur gyur pa gang la ji ltar ji byed snyam pa la/ dpal 'bras smin pa la ni bung ba bzhin/ /zhes bya ba la sogs pa la/ de rnams 'khor zhing rgyu ba bzhin/ /zhes gsungs te/ bung ba ni sbrang rtsi'o/ /gzhan ni ji lta ba bzhin du phyi rol nas 'khor zhing rgyu ba'o/ /de bzhin du phyi rol gyi sngags dang phyag rgya la sogs pas 'brel te/ de'i lta ba la mngon par zhen pa'i phyir ro/ /zab mo de kho na nyid kyi don ni/ bdud rtsi mi rigs zhes bya ba'i don to/ /de ltar yang lha mo bzhis zhus pa zhes bya ba rnal 'byor chen po'i rgyud las/ thub pa chen po'i chos phung ni/ /brgyad khri dang ni bzhi stong dag / gang gis de nyid mi shes na/ /de dag thams cad 'bras bu med/ /ces gsungs so/ /gal te de lta yin na spros pa'i rnam pa ji ltar dngos su byed ces brjod par bya ste/ spros pa'i rnam pa phung po dang khams dang skye mched la sogs pa yang spros pa med pa lhan cig skyes pa'i ye shes de nyid las skyes pa'o/ /de nyid las spros pa'i rnam pa byung ba ste/ de bstan par bya ba'i ched du de ltar yang / spros pas spros pa med par bya/ /zhes gsungs so/ /de'i phyir e waM las yi ge lhan cig skyes pa'i sku las/ ji ltar 'gro ba 'byung bar bstan pa'i phyir/ /byang chub sems dang zhes bya ba la sogs pa la/ byang chub sems dang rdul gyis ni/ /mi bskyod lus kyis 'khyud gyur pa/ /zhes gsungs te/ stong pa nyid dang / shin tu stong pa dang / stong pa chen po'o/ /snang ba dang / snang ba mched pa dang / snang ba thob pa'o/ /sems dang sems las byung ba dang ma rig pa'o/ /bud med dang skyes pa dang ma ning ngo / /nyin mo dang nub mo dang mtshams so/ /sprul pa'i sku dang / longs spyod pa dang / chos kyi sku'o/ /lus dang ngag dang yid do/ /rlangs pa dang / phyur ba dang / rnam par bcings pa'o/ /spyan drangs pa dang gshegs su gsol ba dang zhugs pa'o/ /oM AHhUM gi yi ge rnams dang / 'og dang steng dang thad ka'i sgo'o/ /bdag gi de nyid dang / sngags kyi de nyid dang / dkyil 'khor gyi de nyid do/ /snying stobs dang / rdul dang / mun pa'o/ /zla ba dang nyi ma dang sgra gcan no/ /skyes pa dang gnas pa dang 'jig pa'o zhes bya ba la sogs pa byang chub kyi sems dang / rdul dang mi bskyod pa'i sgras brjod pa'o/ /'di ltar gang du mthong zhes bya ba la/ pad+ma'i sa bon gyi ni rang bzhin gyi/ /dag pa lhan cig skyes pa lus la mthong / /zhes bya ba la sogs pa gsungs te/ pad+ma'i lus nyid pad+ma ste/ /de'i sa bon rang bzhin gyis so/ /dag pa ni dri ma med cing rang bzhin gyis 'od gsal ba'i phyir/ de nyid lhan cig skyes pa'i sku'o/ /'di gang du mthong zhing rtogs snyam pa la/ rang lus la mthong ba ste/ 'di'i don ni lus dang ngag dang yid las skyes pa'i bcom ldan 'das so/ /thams cad stong pa'i khams la zhugs pa 'gro ba e waM gyi yi ge'i ngo bo nyid do/ /de ltar dang po'i sangs rgyas kyi rgyud las/ lus kyi thig le zla ba byang chub sems/ /ngag dang tsheg drag rdul dang nyi ma'o/ /rA hu dus me dag gi sems 'di ni/ /e dang waM ni 'gro kun sa bon gcig /ces gsungs te/ 'di nyid kyi phyir yang mkha' 'gro ma'i 'khor lo skye ba dang / gnas pa dang thim pa dang / rab tu zhi ba zhes gsungs so/ /de'i phyir e dang waM gi yi gye dag las rnam pa sna tshogs pa'i 'gro ba 'byung ngo / /ji ltar 'jim bag gi gong bu las 'jim bag gcig las byas pa'i bum pa'i mtshan nyid kyi 'bras bu gcig 'byung ste/ de la ji ltar gcig las gzugs dang dbyibs dang phyogs sna tshogs nas gnas pa rgyun ma chad pa mtha' med pa ji ltar 'byung zhe na/ de la brjod par bya ste/ ji ltar mkhan po dag las rig /mar me las ni mar me bzhin/ /ji ltar rgya las rgya nyid dang / /me long las ni gdong dang gdong / /sgra las sgra brnyan 'byung ba bzhin/ /me shel las ni me 'byung bzhin/ /nyi gzugs nyi ma phyed na me/ /lce 'dzag skyur zos med na med/ /rang las ma yin gzhan las min/ /gnyis ka las min rgyu med min/ /dngos po gang dang gang las kyang / /skye ba nam yang yod ma yin/ /pha dang ma yi khu dang khrag / de bzhin srog dang thur sel dang / /sems kyi rdo rje yang dag ldan/ /lus kyi skyed par byed pa'i rgyu/ /'od dpag med dang rin chen srog /thur sel go rims ji lta bar/ /lus ngag yid dang chags pa ni/ /thugs kyi rdo rje zhal rnams so/ /khu ba las ni zla ba 'byung / /khrag las nyi ma srid pa ste/ /srog las rA hur skye ba'o/ /thur sel rtsol las dus me ste/ /khu ba las ni rtsa rnams skye/ /khu ba las ni rus pa 'byung / /rdul las khrag ni 'byung 'gyur zhing / /sha las pags pa skye ba ste/ /rus pa las ni rkang 'byung ngo / /zla ba las ni chu skye zhing / /khrag las me ni 'byung bar 'gyur/ /rA hu las ni srog skye ste/ /dus me las ni thur sel 'byung / /rtsol bas yid ni 'byung bar 'gyur/ /lus can kun gyi lce chung dang / /lce ni khu ba dag gis kyang / /g.yas dang g.yon pa dag gis ni/ /mig gnyis dag ni rdul las skyes/ /de bzhin sna yi bug pa gnyis/ /khrag dag las ni nges par skye/ /de bzhin rna ba'i bug pa gnyis/ /stong pa dag ni nyid las skyes/ /de bzhin 'og gi rgyun sgo gsum/ /thur sel nyid las yang dag skye/ /de bzhin nu ma'i bug pa gnyis/ /rA hu las ni yang dag skye/ /de bzhin 'bras bu gnyis po ni/ /thur sel dag las rab tu skye/ /de ltar 'dir rim pas lus po'i pad+ma skye bar 'gyur bas de'i phyir skye ba'i tshogs pa kun rdzob dang don dam pa'i rim par ston pa'i phyir/ nam mkha'i chu dang zhes bya ba la sogs pa gsungs te/ nam mkha' ni mi bskyod pa ste/ de nyid chu ru mtshon pa ste/ /de ltar 'di'i shin tu dag pa'i phyir ro/ /de yang / nam mkha' bdud rtsi thigs pa dang / /zhes gsungs so/ /'od dpag med kyi 'dam zhes pa ni/ 'od dpag med pa ni byang chub sems te/ rdul gyis brgyan pa zhes go bar bya'o/ /de nyid las/ 'dam gyi rtsa ba spang pa ni/ /de nyid bar pa mtshon pa'o/ /'di yi don ni gzhan na yang / sa bon dang chu dang 'dam bag tshogs pa na myu gu dang sdong bu la sogs pa skye ba bzhin du yang / chos kyi dbyings sa bon dang nam mkha'i chu dang / byang chub kyi sems kyi rgyu las 'byung bar bcom ldan 'das kyi gzugs gzhom du med pa de nyid ni/ pad+ma me tog gi ngo bo nyid sdong bu dang / yal ga dang lo ma'i rim pas rdzogs par 'gyur ro/ /de nyid sdig spangs rtsa ba dang ni sdong bur bcas/ /zhes bya ba la sogs pa gsungs te/ sdig pa'i nyes pa ste spangs pa ni bcom pa ste/ 'od gsal ba nyid kyi phyir ro/ /'dis bcom pas na sdig spangs zhes bya ste/ dbyangs yig dang po'i rang bzhin no/ /de ltar yang dang po'i sangs rgyas kyi rgyud las/ dang po dbyangs yig rang bzhin te/ /blo zhes sangs rgyas rnams kyis brtags/ /zhes so/ /sdig pa spangs shing gtso bo'i rtsa ba sdong bur byas pa'o/ /gang gis sdig pa spangs shing gtso bo'i rtsa ba dang sdong bu byas pa gang yin zhe na/ haM gi yi ge skyed par gyur pa'o zhes gsungs te/ gzhan gyis bstan pa las dang ba'i sa bon zhes brjod do/ /de nyid ni gzhom du med pa'i pha rol dang ni kha'i tshul te haM zhes bya ba'o/ /yan lag med pa'i rdo rje'i yi ge'o/ /thung ngu dang ring po'o/ / shin tu ring ba bsdus pa'i ngo bo nyid bde ba thams cad gcig tu bsdus pa'i ngo bo nyid zla ba'i dkyil 'khor yongs su rdzogs pa la gnas zhes bya'o/ /de ltar yang dpal kha sbyor thig le las/ dbyangs dang gsal byed yi ge las/ /byang chub sems ni sum cu gnyis/ /pad+ma'i dkyil 'khor rtogs pa'i sngags/ /rgyud dang dkyil 'khor zhes su brjod/ /'gro ba'i klad rgyas dbus su ni/ /gang zhig gnas par brjod pa ste/ /de yi dbus su haM yi ge /thig le'i rang bzhin gzhom du med/ /de ni sems can thams cad dang / /brtan dang g.yo ba bskyed pa'i rgyu/ /gsal dang mi gsal gzugs kyis ni/ /de yi sa bon ngo bor gnas/ /lus can ma lus kun gyi gzugs/ /de las dang po skye bar 'gyur/ /bdud rtsi 'dzag pa'i tshul gyis ni/ /nyin dang mtshan mo rnam par gnas/ /'og tu 'jug pa'i tshul gyis su/ /me ni 'bar bar gnas pa yin/ /de ni dkyil 'khor yongs rdzogs par/ /'gyur bar 'di la the tshom med/ /dngos rnams snying po mchog yin phyir/ /de nyid dkyil 'khor zhes su brjod/ /de nyid len cing 'dzin pa yis/ /lus ni dkyil 'khor nyid du 'dod/ /rnam par skyes par 'gyur ba'i tshig ni/ 'dir rnam pa ni tha mal pa'i tshig gi rgyan no/ /skyes pa ni ji skad du smos pa'i haM gi yi ge las byung ba'o/ /gal te sdig pa gtso bo'i bor ba dang / sdong bur byas pa de ltar ni/ /rtsa ba'i yan lag dang / yal ga dang lo ma'i rnam pa gang yin zhe na/ ro ma brkyang ma gnyis kyis ni/ /g.yas dang g.yon phyogs gnyis kyi sdong bur gnas/ /pad+ma 'dab bzhi rtsa ba bzhis/ /bde ba chen po tshang na gnas/ /zhes gsungs te/ de la brkyang ma'i sgra ni dbyangs yig dang shes rab zla ba zhes brjod de/ de yang g.yon phyogs kyi sna bug na rang bzhin des srog gi rlung rgyu zhing brkyang mar gnas so/ /ro ma'i sgra ni gsal byed kyi gzugs thabs dang nyi ma zhes brjod do/ /de yang g.yas phyogs sna bug gi rang bzhin te/ rang bzhin ni srog gi rlung rgyu zhing ro mar gnas so/ /de las byung ba tshogs pa'i rim pas rnam par shes pa dang / 'du byed dang / 'du shes dang / tshor ba dang / gzugs te/ dkyil 'khor rnams ni srid pa skye ba'i rim pas brkyang ma'o/ /sa dang chu dang me dang rlung dang nam mkha'i rang bzhin ni srid pa 'jig pa'i rim pas ro ma'o/ /de ltar 'pho ba bcu gnyis kyi rim pas mi mnyam pa dang mnyam par rgyu ba'i gzung ba dang 'dzin pa spangs pa'o/ /pad+ma 'dab ma bzhi zhes pa ni stong pa bzhi'i rang bzhin 'dab ma bzhi'o/ /rtsa ba bzhi zhes pa ni khams bzhi'i rang bzhin rtsa bzhi gyen la gnas pa'o/ /gang du gnas she na/ bde ba chen po dag ni tshang na gnas/ /zhes gsungs te/ dga' ba bzhi'i nga bzhin stong pa'i bdag nyid bde ba chen po'i tshang ste gnas pa ni 'dir bde ba chen po'i gnas te spyi bo'i pad+ma'o/ /de la thams cad stong pa bzhi ste mkha' 'gro dang mkha' 'gro ma rnams kyi dra ba'i tshogs te/ dzA lan+d+ha ra zhes bya ba'i ming du brjod la/ ri rab kyi rtse la zhes bya ba'i don to/ /e waM sa bon khyer nas zhes bya ba la sogs pa ni/ e waM ni gong du bstan pa'i mtshan nyid dang ldan pa'i e waM gyi yi ge'i sa bon blangs nas/ de'i sa bon snying por gyur nas/ me tog ni gzhom du med pa'i pad+ma rgyas pa zhes bya'o/ /don ni 'di yin te/ sa bon gyi sdong bu la sogs pa skyes pa de stong pa me tog kyang sa bon gyi snying po rgyu can nyid du 'gyur ro/ /'dir yang e waM gyi yi ge las skyes pa'i lus kyi pad+ma yang / e waM gyi snying po can gyi me tog go/ /bung ba'i gzugs kyis zhes bya ba la bung ba ni thugs kyi rdo rje'o/ /de'i gzugs ni rang bzhin no/ /bde chen dpa' bo zhes pa ni/ de dang de'i thabs dang shes rab gnyis kyis gnyis sprod pa'i sbyor ba ste/ de la rgyun mi 'chad par 'dod chags chen po'i ngo bo nyid kyis rnam par gnas par gsal ba'i phyir/ de nyid bcom ldan gzhom du med pa la dpa' bo zhes bya'o/ /sbrang rtsi ni me tog gi bcud de/ bde ba chen po'i dpa' bo yin pas byang chub kyi sems ni 'byung ba chen po nyams su myong ngo zhes bya ba'i don to/ /de lta bu'i ngo bo nyid kyis bcom ldan 'das e waM gyi yi ge'i rang bzhin/ zag pa dang bcas pa'i 'byung ba lnga'i rang bzhin du ji ltar 'gyur snyam pa la/ 'byung ba chen po lnga'i sa bon no/ /blangs nas tshogs pa dag las skye/ /zhes gsungs te/ 'byung ba ni sa la sogs pa chen po lnga dang ste/ sa bon ni e waM gyi yi ge'o/ /blangs nas tshogs pa ni rdo rje pad+mar sbyor ba dag las skyes pa'i 'byung ba'o/ /de gsal bar bya ba'i phyir/ sra bar 'gyur ba dag ni sa yin zhes gsungs te/ sa'i khams ni sra ba nyid yin la sra ba ni sa'i khams so/ /zhu bar gyur pas na chu'o/ /tsha bas na me'o/ /g.yo bas na rlung ngo / /bde ba yin pas na nam mkha'i khams so/ /lnga ni yongs su rdzogs pas zhes bya bas ni/ de ltar gyur pa'i 'byung ba lnga po 'dis yongs su rdzogs pa ste/ bsdus pa ni byang chub kyi sems so/ /de ltar yang dpal dgyes pa'i rdo rje las 'byung ba las gyur pa'i gang zag dang bcas pa'i phung po ci'i phyir zhe na/ bcom ldan 'das kyis bka' stsal pa/ rdo rje pad+ma sbyor ba las/ /reg las sra ba sa ni skyes/ /gsher ba las ni chu 'byung ngo / /gtsubs pa las ni me 'byung ste/ /bskyod pa las ni rlung du grags/ /bde ba nam mkha'i khams yin te/ /rnam pa lnga yis yongs su bskor/ /dbyangs yig rnams ni bskyed pa'i rgyu/ /zhes gsungs so/ /de ni zhes pa de nyid de/ /de nyid 'di ste 'di yi don/ /sa sogs de nyid bzhi dang ni/ /stong pa nyid ni bzhi dang yang / /skye dang 'jig pa'i rgyu ru ni/ /de don brgyad ni shes par bya/ /'od gsal las ni stong chen te/ /de la thabs ni 'byung 'gyur zhing / /de las kyang ni shes pa 'byung / /rlung yang de las 'byung bar 'gyur/ /rlung las me ni 'byung bar 'gyur/ /chu las yang ni sa 'byung ngo / /de yi rim pas sems can skye/ /sa ni chu la zhugs gyur zhing / /chu ni me la zhugs par gyur/ /me ni phra ba'i don khams zhugs/ /rlung ni sems la zhugs gyur nas/ /sems ni sems las byung bar 'gyur/ /sems byung ma rig par zhugs nas/ /de yang 'od gsal bar gyur te/ /srid gsum po ni 'gag par 'gyur/ /de nyid bstan par bya ba'i phyir/ /rmongs gyur 'di ni stong pa nyid/ /ces gsungs so/ /de lta bur gyur pa'i theg pa las phyi rol du gyur pa'i phyir rmongs pa zhes bod pa ste/ /kye ma rmongs pa'i sngags kyi tshul gyis 'di nyid shes pa'o/ /'di ni zhes bya ba ni/ 'di nyid stong pa'i 'od gsal te/ /'di bor nas stong pa de kho na nyid gzhan na med ces bya ba'i don to/ /des 'di skad du ston te/ srid pa zhi ba gcig pa'i bde ba chen po rdo rje bcom ldan 'das de nyid/ 'dir rang nyid kyi lus kyi pad+mar mngon par sprul nas de ni gzhom du med pa'i me tog gi bcud sems bung ba'i gzugs kyis rtag tu 'phrogs shing gnas pa ste/ /de ltar yang dpal dgyes pa'i rdo rje las/ rang nyid byed cing rang nyid 'phrogs/ /rang nyid rgyal po rang gtso bo/ /zhes gsungs so/ /de ltar bsgrub par bya ba nges par byas nas/ da ni sgrub byed dpyad par bya ste/ de la re zhig yul ma lus pa la longs spyod pa spangs pa yang sgrub par byed pa ma yin la/ yul ma lus pa la zhen pa yang sgrub byed ma yin no/ /nyan thos dang pha rol phyin pa'i tshul nyid la sogs pa rnam par gnas pa'i phyir ro/ /skyon dag pa'i yul ma lus pa la longs spyod pa nyid kyis 'dod chags chen po'i mngon par byang chub pa bstan pa'i phyir yul gyi bden pa 'di nyid 'dis sgrub byed yin no/ /de ltar yang sa ra ha'i zhal snga nas/ kha cig yul rnams dag ni spong byed cing / /kha cig yul rnams dag ni 'ching bar byed/ /kha cig yul 'di nyid ni blangs nas su/ /mchog gi grol ba dag ni mngon par byed/ /ces gsungs so/ /bcom ldan 'das kyis bka' stsal pa/ gang dang gang gis 'jig rten 'ching 'gyur la/ /de dang de yis 'jig rten grol bar byed/ /'jig rten rmongs pa de nyid mi shes te/ /de nyid spangs pas dngos grub thob mi 'gyur/ /'dod chags kyis ni 'jig rten bcings/ /'dod chags nyid kyis grol bar byed/ /bzlog pa'i bsgom pa de nyid kyis/ /sangs rgyas mu stegs kyis mi shes/ /zhes gsungs so/ /gal te de ltar yin na srog chags thams cad dbul la dga' zhing chags pa de rnams 'dod chags chen po'i mngon par byang chub pa thal lo zhe na/ de ltar ma yin te/ yul la longs spyod pa 'ba' zhig gis rgyun ma chad pa'i bde ba chen po zhes kho bo cag mi smra ste/ 'on kyang de nyid thabs dang bcas pa la zer gyis/ /thabs dang bral ba'i yul la snang ba gsum mi shes pa'i phyir ro/ /'dod chags chen po'i bde ba dngos su mngon du byed pa med pa'o/ /de ltar ye shes chen po kun la snyoms par 'jug pa'i rgyud las/ b+ha gar ling+ga zhen cing gcig tu 'jol ba de ni 'dod chags chen po'i byang chub thob par mi 'gyur ro/ /gang gi tshe yang bde ba 'ba' zhig blangs nas lhag par mos pa tsam gyis las dang po pa'i sa la rnam par gnas pa de'i tshe slob par 'gyur ro/ /gang la rdo rje pad+ma'i sbyor ba'i bde bas rang bzhin snang ba'i yang dag pa'i yon tan mtshon par byed pa de ni 'dod chags chen po'i bde ba la zhugs pa yin no/ /de ltar yang dpal dgyes pa'i rdo rje las/ skye bo mi bzad pa yi las/ /gang dang gang gis 'ching 'gyur ba/ /thabs dang bcas na de nyid kyis/ /srid pa'i 'ching ba las grol 'gyur/ /zhes gsungs so/ /'on te chags pa dang bcas pa ma yin pas/ bde ba chen po mtshan ma med pa yin pa'i phyir ro/ /de dang 'dra bar ji ltar 'gyur zhe na/ de la brjod par bya ste/ mtshan ma dang bcas pa'i bde ba nyid/ bla ma dam pa'i gdams ngag gi mtshan ma med par 'gyur ro/ /de ltar sa ra ha'i zhal snga nas/ gang yang mtshan mar bcas pa'i bde ba 'di/ /de nyid bdag nyid chen po rnams kyis mtshan ma med pa yin/ /rang 'byung ye shes ngo bo nyid/ /kun rtog bde ba chen po nyid/ /de'i phyir thabs dang bcas pa'i yul la longs spyod cing / /'dod chags chen po mngon par byang chub pa'i sgrub byed yin no/ /de nyid sa dang chu dang me'i khams ni zhes bya ba la sogs pa gsungs te/ sa ni sa'i dkyil 'khor ro/ /chu ni chu'i dkyil 'khor ro/ /me ni me'i dkyil 'khor ro/ /rlung ni rlung gi dkyil 'khor ro/ /nam mkha' ni nam mkha'i dkyil 'khor ro/ /lnga po de nyid skye ba dang 'jig pa'i rim pas zla ba dang nyi ma'i rim par brjod do/ /de ltar yang dpal dang po'i sangs rgyas kyi rgyud las/ nam mkha' la sogs rtag tu g.yon nas rgyu/ /'jig pa po sogs rtag tu g.yas nas rgyu/ /zhes gsungs so/ /dpal gsang ba 'dus pa'i rgyud phyi ma las kyang / ye shes lnga yi rang bzhin dbugs/ /'byung ba lnga yi ngo bo nyid/ /gong bu'i gzugs kyis phyung nas ni/ /sna yi rtse mor rab tu brtag /rin chen kha dog sna lnga pa/ /srog dang rtsol ba zhes byar bshad/ /rang sngags snying gar bsams nas ni/ /sems ni thig ler rnam par dgod/ /'di'i yang bye brag bshad pa ni/ /rdo rje phreng ba zhes bya ba'i rgyud chen po las/ sna rtser yungs kar zhes bya ba/ /srog dang rtsol ba zhes su brtag/ /srog dang rtsol ba dag la 'od zer lnga/ /sangs rgyas lnga yi ngo bo ste/ /de skad du yang rdo rje snying po'i zhal snga nas/ /sna'i bu ga g.yon pa dang g.yas pa gnyis nas/ dang po'am tha mar gang yang rung ste/ gang gi tshe dbus nas rgyu ba'o/ /gang gi tshe nam mkha'i rlung rgyu ba de'i tshe dbus nas rgyu ba'o/ /gang gi tshe rlung gi dkyil 'khor rgyu ba de'i tshe sna bug steng la brten nas rgyu'o/ /gang gi tshe me'i dkyil 'khor rgyu ba de'i tshe sna bug g.yas pa la brten nas rgyu'o/ /gang gi tshe sa'i dkyil 'khor rgyu ba de'i tshe 'og la reg nas rgyu'o/ /gang gi tshe chu'i dkyil 'khor rgyu ba de'i tshe g.yon nas rgyu'o/ /dkyil 'khor 'di rnams yul du blos blangs zhes bya ba ni/ yul rdo rje dang pad+ma sbyor ba ste/ de las blo bde ba nyams su myong ba ye shes kyi phyag rgya de'i yul ni blo'o/ /de blangs nas dkyil 'khor gyi 'khor lo rtogs pa ste/ yongs su ni rnam pa thams cad kyi ye shes drug la sogs pa la 'jug par 'gyur ba de ltar nyams su myong bar gyis zhes pa'i don to/ /de ci'i phyir zhe na/ dba' rlabs med pa dag ni yongs su spyad/ /ces gsungs te/ dba' rlabs ni spyan 'dren pa dang gshegs su gsol ba med pas dba' rlabs med pa'o/ /ji ltar 'gyur ba'i e waM gyi yi ge'i ngo bo yin pa'i phyir na lhan cig skyes pa'i ngo bo rlung bum pa lta bu las shin tu 'das pa'i phyir na mnyam pa'o/ /skyon ni dri ma ma lus spangs pa ste/ /zhes bya ba ni ma lus pa'i sdig pa ni ma lus pa'i skyon te 'dod chags dang bral ba'i ngo bo nyid do/ /spangs pa ni grol ba'o/ /de ltar yang dang po'i sangs rgyas kyi rgyud las/ chags bral lta bu'i sdig pa med/ /bde ba lta bu'i dge mchog med/ /de phyir 'gyur med bde ba la/ / rgyal po rtag tu sems zhugs gyis/ /zhes gsungs so/ /de ltar gyur pa'i bde ba la yang mngon pa'i nga rgyal byed pa'i phyir/ de la dge dang sdig pa dag kyang med/ /ces bya ba la sogs pa gsungs te/ sdig pa ni 'dod chags dang bral ba'i sdug bsngal lo/ /dge ba ni byang chub kyi sems kyang phyir mi 'byung ba'i bde ba'o/ /de la gcig kyang med ces bya'o/ /de ltar dpal kha sbyor thig le'i rgyud las/ chags dang chags pa bral ba gnyis/ /zos na srid pa nyid du 'gyur/ /zhes gsungs so/ /gsal por nag po dag gis bstan/ /zhes pa ni/ 'di gsal bar nag po spyod pa'i rdo rjes bstan te/ gzhan gyis gsal por ma bstan zhes pa'i don to/ /'di lta bu'i rnal 'byor las kha phyir bltas pa rnams kyis bdag nyid kyi rnal 'byor byas nas kyang mi rtog par bstan pa'i phyir/ phyi rol 'byung ba lta bu spyad byas nas/ /zhes bya ba smos te/ rang gi blos nges par spyad pas stong pa nyid ni/ rnam pa'i 'khor lo stong pa nyid du rtogs pa'o/ /stong pa min ni rang gi lha rtog pa'i rnal 'byor pa la sogs pa'o/ /blo yis zhugs shing de la dmigs par 'gyur bas so/ /stong pa nyid dang stong min gnyis su zhes pa ni stong pa nyid dang stong pa ma yin pa dag gi dbus su/ kye ma rmongs ba de nyid gcig kyang ma mthong ste ma rtogs zhes bya ba'i don to/ /de lta bu yin na ji ltar na de nyid kho na yod snyom du dgongs pa la/ gcig tu lhan cig skyes pa de nyid yin/ /zhes gsungs te/ lhan cig skyes pa 'ba' zhig yod na ni/ nag po rdo rje kho na las shes pa'o/ /bstan bcos lung ni mang po bklags gyur kyang / /zhes pa ni/ bstan bcos ni tshad ma la sogs pa'o/ /lung ni bya ba dang spyod pa la sogs pa'o/ /de rnam pa sna tshogs kyi sgo nas klog pa dang nyan pa dang / sems pa dang goms par byas kyang cung zad kyang mi shes te/ de rnams la de'i ngo bo nyid med pa'i phyir ro/ /dba' rlabs med pa'i sngags tshul gdams ngag ni/ /gzhan nga lta bur shes so zhes pa'i don to/ /de lta bu'i gdams pa de nyid tshul de dang des rgyas par bstan pa'i phyir/ steng dang 'og dag tu ni mi rgyu zhing / /zhes bya ba la sogs pa gsungs so/ /steng du mi 'gro ba ni 'di'i tshul gyis srog gi rlung 'gegs pa'o/ /'og tu mi 'gro ba ni thur sel gyi rlung 'gegs pa ste/ lus dang ngag dang yid kyi bye brag gis zla ba dang nyi ma dang rA hu la dang / chu dang me dang / stong pa nyid rang gi rigs kyi lam gsum dgag pa'o/ /'og tu mi rgyu ba ni 'di'i tshul gyis 'og tu rgyu ba'i rlung ste/ lus dang ngag dang yid gsum gyi bye brag gis dri chen dang dri chu dang byang chub kyi sems rgyu zhing sa dang chu dang me ye shes kyi khams kyi rigs gsum 'gog pa'o/ /de ltar steng dang 'og gi srog dang thur sel gyi lam bkag pas/ sngon du bstan pa'i ye shes kyi gzugs brnyan mthong bas na de'i 'og tu rdo rje bzlas pa'i cho gas srog dang rtsol ba rtag tu 'byung bar byed do/ /de ltar yang dpal dus kyi 'khor lo las/ gzugs brnyan mthong nas byung ba ni/ /srog dang rtsol ba rtag tu ni/ /steng dang 'og dang rtsa gsum las/ /lus ngag yid gsum dgag pa'i phyir/ /zla ba nyi ma rA hu dang / /dri chen dri chu khu rgyu ba/ /zla ba nyi ma mun pa dang / /lus dang ngag dang yid kyi rtsa/ /dri chen dri chu dus rgyu ba/ /de dag srog rtsol rim pas so/ /zla ba lus kyi thabs dang ni/ /shes rab nyid ni nyi ma'o/ /shes rab kyi ni dri chen rtsa/ /gtso bo dag ni byang rgyu ba/ /chu me stong pa sa dang rlung / /ye shes khams ni rang rig la/ /thabs kyis sems ni mun lha mo/ /shes rab byang chub sems rgyu ba/ /steng dang 'og tu rigs drug ni/ /lus dang ngag yid byed pas so/ /shes rab thabs sbyor dbye ba yis/ /lus can kun la rnam par gnas/ /de ltar gyur pas srog dang rtsol bas ji ltar gnas she na/ /gnyis la mi rgyu ba ni rnam par gnas/ /zhes gsungs te/ gnyis ni steng dang 'og gi srog rtsol ba ste/ mi rgyu ba ni yongs su spangs pa ste/ de lta bu ngo bo nyid kyi mi g.yo bar gnas pa ni dbugs 'byin bar ma mchog ces bya ba/ de ltar yang rig ldan pas/ lhan cig skyes pa he ru ka / bar ma'i dbugs ni mchog yin te/ /dri chen dri chu khu ba nyid/ /rtsa gsum dag dang ldan pa'o/ /dngos po gsal po de kho na nyid rjes su 'gro ba las kyang / lhan cig skyes rung rang gi gzhi la gnas/ /rtog pa'i dra ba dag las rab tu grol/ /rang yang dga' ba skyed pa brjod du med/ /de ni stong pa nyid kyi rang bzhin du/ /zhes gsungs so/ /de ltar gyur pas byang chub sems bde ba chen po dgag pa bstan pa'i phyir/ yid ni gang du yang mi g.yo ba ni/ nag pos gsungs zhes bya ba smos te/ slob dpon nag po na re yid ni byang chub sems de mi g.yo ba ni gang du yang phyir mi 'byung ba ste steng dang 'og tu 'byung ba spangs pas/ dus kyi rtsa khams gsum du byas pa'i phyir ro/ /'di'i dgongs pa ni ri bong can gyi thig le ma lhung bar 'ba' zhig nga'i bsgrub par bya ba ma yin te/ 'on kyang steng 'og gnyis su 'gro ba'i ngo bo'o/ /'di lta bu'i 'byung ba med pa'i ngo bo gang du gnas she na/ mi g.yo rlung gi khyim bdag mo ni khyim na gnas/ /zhes gsungs so/ /mi g.yo ba'i rlung ni 'bar ba'i rlung ngo / /khyim bdag mo ni de nyid ye shes kyi phyag rgya'i ngo bo nyid yin pa'i phyir ro/ /khyim ni de'i bde ba'i nam mkha'i khams a haM gi rang bzhin gong du gsungs pa ste/ a wa d+hU tI'o/ /de la gnas pa ni khyim der gnas pa'o/ /'di'i dgongs pa ni rlung gi 'gro ba'i chos can te/ nam mkha'i khams la brten pa/ 'gro ba dang 'ong ba las grol ba'i nam mkha'i khams la khyer zhing / sems kyi bzhon pa snang ba dang bcas pa ye shes gsum dang ldan pa'i thim par 'gyur ro/ /de'i phyir de'i bdag nyid bcom ldan 'das bde ba chen po la zhugs pa zhes brjod do/ /de skad du yang / dgongs pa bla na med pa las/ /snang ba snang ba mched pa dang / /sna tshogs 'dus pa 'di dag ni/ /sems ni rnam pa gsum du brjod/ /rlung ni phra ba'i gzugs kyis ni/ /ye shes dang ni 'dres par 'gyur/ /dbang po lam nas phyung nas ni/ /yul rnams la ni 'jug par byed/ /snang ba dang ni mi ldan zhing / /rlung gi bzhon pa'i rgyur gyur pa/ /de la 'di ni rang bzhin kun/ /rim dang rim pa mun par 'jug/ / rlung ni gang dang gang gnas pa/ /de dang der ni de bzhin rgyu/ /ji srid rlung ni mi rgyu ba/ /snang ba brtan par mi 'gyur ro/ /de nyid sems can thams cad kyi thun mong du ji ltar 'gyur zhe na/ ri bo mchog rab dag gi phug zab mor/ /zhes gsungs te/ mchog ni phul du byung ba'i ngo bo'i ri bo ste/ rab ni sgal tshigs kyi bdag nyid do/ /de ltar yang dpal kha sbyor thig le las/ rkang pa'i mthil du rlung gnas pa/ /rlung ni gzhu yi dbyibs can no/ /mdoms kyi sum mdor gnas pa ni/ /de bzhin gru gsum dmar po'o/ /zlum po'i gzugs kyi ngo bo nyid/ /chu ni lto bar gnas pa'o/ / snying ga ru ni sa nyid kyang / /kun du gru bzhir gnas pa'o/ /sgal tshigs dbyug pa'i ngo bo ni/ /de bzhin ri rgyal lhun po'o/ /de yi phug ni ri phug go/ /de lus dang ngag dang yid kyi spyod yul ma yin pas zab pa'o/ /des cir 'gyur zhe na/ 'gro ba ma lus pa ni 'ching bar 'gyur te/ 'gro ba ma lus pa nyid 'ching bar 'gyur ba ni nyams pa ste/ de la steng du spyi bo'i bar du dbang po gnyis kyis sbyor ba'i bde ba'i mngon pa'i nga rgyal gyi byang chub sems med pa'i phyir ro/ /'on te 'gro ba thams cad 'di yis bcing bar cis shes she na/ dri ma med pa'i chu ni skams gyur te/ /zhes bya ba gsungs te/ dri ma med pa'i don dam pa'i rang bzhin no/ /zhu ba ni kun rdzob kun+da lta bu ste/ dri ma med pa'i chu bden pa gnyis zhes bya ba byang chub kyi sems gang yin pa skams par 'gyur te 'og tu ltung ba'o/ /gang gi phyir byang chub kyi sems 'gro ba'i ngo bo nyid du 'gyur ro/ /gang gi tshe 'og tu ltung ba de'i tshe nyams par 'gyur pa'o/ /de ltar yang dpal dang po'i sangs rgyas las/ lus can thams cad 'chi dus su/ /'og tu zla ba bdud rtsi 'dzag /rnam shes rang bzhin mtshan nyid dang / /nyi khrag rA hu steng du 'gro/ /des cis 'gyur zhe na/ dus kyi me ni rab tu zhu gyur na/ / zhes gsungs te/ dus kyi me ni byang chub kyi sems kyi phyir 'byung ba'i gnas skabs te/ nag po'i phyogs kyi mtshan nyid de/ /'chi ba'i dus kyis zhes bya'o/ /de ltar yang dpal dang po'i sangs rgyas las/ lhung na chags dang bral gyur te/ /chags bral las ni sdug bsngal bskyed/ /sdug bsngal gyis ni khams zad de/ /khams zad pas ni 'chi bar 'gyur/ /'chi ba las ni yang srid 'byung / /de ltar 'dod chags bral bas byung / /gzhan du sems can mi srid do/ /de phyir 'bad pa thams cad kyis/ /sems byung 'dod chags spang bar bya/ / rnal ma 'byung med bde ba yis/ /'khor ba'i 'ching ba las grol 'gyur/ /zhes gsungs so/ /ji ltar na byang chub kyi sems 'byung bar 'gyur zhe na/ sa 'dzin dag las 'di ni gzung dka' ste/ /zhes gsungs te/ gzung dka' ba ni sbyor ba'i yan lag drug gis rlung gzung zhing byang chub sems gzung dgos pa ste/ de la 'dir gzung dka' ba'o/ /sa 'dzin ri rab dang 'dra ste mi g.yo ba'o/ /de nyid kyi phyir mnyam pa dang mi mnyam pa ste zhes smos te/ sdud pa dang 'byung ba'o/ /de la mnyam pa'i 'pho ba'i rim pas rgyu ba ni nyi ma rgyu ba g.yas pa'i sna bug go/ /mi mnyam pa'i 'pho ba ni rim pa ma yin pas rgyu bas na/ mi mnyam pa ste zla ba rlung rgyu bas na sna bug g.yon pa'o/ /mnyam pa dang mi mnyam pa gnyis dang ldan pa'i yid kyis sems kyi khams la lta ba ni yongs su sgrol ba ste/ de lta bu'i shes pa'i don to/ /de ltar gyur pa'i yid kyis gal te mi shes na zla ba dang nyi ma mi mnyam pa dang mnyam par rgyu ba ni/ sems can gyi rnam par shes pa'i khams ni grol bar mi nus pa de spyi gtsug bar du 'gro bar mi nus pa zhes bya ba'i don to/ /de nyid kyi phyir/ nag po dag gis gsungs zhes smos te/ nag po rdo rjes 'dod chags dang bral ba'i gnas skabs spangs pa'i bde bas ye shes kyi mig gis mtshon par byas pas na mtshon par dka' ba ste/ thams cad stong pa nyid kyi phyir dang / rnam pa thams cad kyis mnyam pa nyid kyi phyir ro/ /bde ba nye bar rtogs shing nyams su myong ba de'i phyir rtogs par dka' ba'o/ /de la 'di lta bur gyur pa cis rtogs she na/ gang gis yid kyi rin chen rtogs/ /zhes gsungs so/ /gang rdo rje dang pad+ma mnyam par sbyor ba las yid kyi nye bar dmigs shing ji lta ba bzhin du 'gyur ba'i bdag nyid dga' ba ste/ bla na med pa'i bde ba 'phel bar byed pa'i phyir/ rin chen ni yid kyi rin po che ste/ sangs rgyas kyi gzugs brnyan no/ /de ltar yang dpal gsang ba 'dus pa las/ b+ha gar ling+gi bcug nas ni/ /byang chub sems ni gtang mi bya/ /khams gsum ma lus pa rnams ni/ /sangs rgyas gzugs brnyan dag tu bsgom/ /stong nyid gzugs brnyan rgyu yin pas/ /'bras bu mi 'gyur bde ba'o/ /de nyid kyi phyir lhan cig skyes pa spro zhes gsungs te/ nyi ma re re skyes pa ni thams cad stong pa'o/ /'pho ba ni nam mkha' dang 'pho zhing snang ba'o/ /de ltar yang mtshan yang dag par brjod pa las/ nam mkha' las byung rang byung ba/ /shes rab ye shes me bo che/ / zhes gsungs te/ de ltar dpal gsang ba 'dus pa'i rgyud phyi ma las/ bsnyen pa'i dus su gtsug tor che/ /'bad pas gzugs brnyan bsgom par bya/ /nye bar bsnyen pa'i dus su ni/ /gzugs brnyan bdud rtsi 'khyil pa yi/ /sgrub pa'i dus su lha yi gzugs/ /bsgom zhing mi dmigs par bya ste/ sgrub pa chen po'i dus su ni/ /gzugs brnyan sangs rgyas gtso bo'i sems/ /zhes gsungs so/ /de nyid bstan pa'i phyir rigs ldan las kyang / dgongs pa bstan pa 'di skad gzhan gyi gtsug tor gzugs brnyan ni khams gsum ma lus pa'i sangs rgyas kyi gzugs brnyan nam mkha'i chos kyi 'byung gnas la sems kyi rdo rje rab tu gzhag pa ste/ bsnyen pa'i dus su so sor sdud pa bsgom par bya ste/ bsam gtan gyis ni brtan par bya'o/ /de la bcom ldan 'das kyi dam bca' ba ni/ bsam pa thams cad yongs spangs te/ /nyi ma gcig tu yongs su brtag / gal te yid ches ma gyur na/ /de'i tshe nga yis brdzun smras so/ /zhes gsungs te/ /de yang yid ches pa'i du ba la sogs pa'i rtags so/ /de ltar yid du 'ong ba'i rin po che sangs rgyas kyi gzugs brnyan rtogs pa 'byung ba de ni/ chos kyi rang bzhin dag ni de yis zhes gsungs te/ rang bzhin dag ni de yis shes pa ni/ /de gcig pu chos kyi rang bzhin mngon par rtogs pa'o/ /gzhan la bzlas su zin kyang ci la go/ /zhes pa ni/ gzhan ni dbang po'i bde ba la mngon par zhen pa'o/ /ci la go ni smras kyang mi go zhes pa'i don to/ / de nyid rnam pa gzhan gyis bstan pa ni/ rlung ni bzhon pa'i rgyur gyur pas snang ba gsum gyi ngo bo nyid kyi rang bzhin brgya drug cu'i ngo bo nyid dbang po'i sgo nas 'byung ba ste/ yul rnams la nye bar dmigs par 'gyur ro/ /lam 'gro rang nyid bcings par byas pa gang / /zhes gsungs te/ rnam par shes pa'i khams 'khor ba'i lam du 'gro ba'o/ /yid ni lhan cig skyes pa'i gzugs so/ /bcing bar bya ba ni gang gis yan lag drug gi srog brtan par byed pa ni bcings pa'o/ /de rnal 'byor gyi dbang phyug gis byed pa de ni/ khams gsum ma lus spro zhing yang der bsdu/ /zhes gsungs te/ khams gsum ni sku dang / gsung dang / thugs kyi 'khor lo'o/ /ma lus pa ni so so'i ba spu'i bu ga'i bar du gnyid sad pa'i gnas skabs su dga' ba la sogs pa'i khyad par gyi byang chub kyi sems rnam par spros nas yang der sdud pa ste/ steng du song nas bzhi pa zad cing rgyu mthun pa la sogs pa'i bye brag gis/ a wa d+hU tIr sdud pa ste/ cha dang thig le phra mo las 'das shing thams cad stong pa nyid kyi khams la zhugs te/ des rdo rje 'dzin pa chen po mngon du byed ces bya ba'i don to/ /de nyid kyi phyir/ bde gshegs lha mo khro bo'i tshogs/ /srid pa ci phyir byed ces gsungs te/ de bzhin gshegs pa dang / lha mo dang / khro bo'i tshogs la sred pa ci'i phyir byed ces bya ste/ dkyil 'khor gyi 'khor lo dag spangs la/ lhan cig skyes pa'i dus su gnas so zhes dgongs so zhes bya ba la dgongs pa 'di yin te/ phung po dang skye mched la sogs pa dang / lus dang ngag dang yid dang / dkyil 'khor gyi lha rnams gdams ngag gis bde ba chen po ro gcig par gyur pa de ltar na'o/ /de nyid dkyil 'khor chen por gyur pa las/ /de la gzhan du gyur pa'i dkyil 'khor med do zhes bya'o/ /de ltar yang gsang ba'i rgyud las/ yan lag kun bsgoms las 'das shing / /rtogs dang rtog byed rnam par spangs/ /cha dang thig le yang dag 'das/ /'di ni dkyil 'khor mchog yin no/ /zhes gsungs so/ /de nyid gzhan gyi sgo nas dkyil 'khor du bstan pa ni/ gang gis lhan cig skyes pa brtan byas te/ /zhes pa lhan cig skyes pa ni lhan cig 'byung ba'i shes rab ste/ brtan pa ni phyir 'byung ba med par bya'o/ /mnyam par ro gcig pa ni dga' ba bzhi po gcig pas rang gi yid kyi rgyal po ni yan lag med pa'i rdo rje'o/ /de'i dus nyid du ni 'grub par 'gyur zhes gsungs so/ /grub pa ni phyag rgya chen po grub pa ste/ rdo rje 'chang chen po thob bo/ /de'i dus nyid du dus ma yin pa rgyud la gcig ces bya'o/ /de skad du yang dpal bde mchog las/ mtho ris mi yul sa 'og gi/ /skad cig gis ni sku gcig 'gyur/ /rang dang gzhan du rtog pa yis/ /skad cig tu ni gnod mi 'gyur/ /zhes gsungs so/ /de nyid kyi phyir/ rga dang 'chi ba'i 'jigs pa dag ni med/ /ces gsungs so/ /phyag rgya chen po'i ngo bo nyid bstan pa ni/ mi g.yo zhes bya ba la sogs pa gsungs te/ mi g.yo ba ni byang chub kyi sems phyir mi 'byung ba'o/ /mi rtog pa ni nyams su myong ba ro gcig pas/ de dang 'di ni rnam par rtog pa spangs pa'i phyir ro/ /'gyur ba med pa ni 'dod chags dang 'dod chags dang bral ba dag gis ci bya zhe na/ de dag las grol ba'i phyir ro/ /skye 'jig spangs pa ni/ zla ba dang nyi ma bkag pa'i phyir ro/ /mdzes pa ni shin tu mdzes pa ste/ bde ba chen po yin pa'i phyir ro/ /snying po ni 'od gsal ba nyid kyi phyir ro/ /deng 'dir zhes bya ba la sogs pa ni 'di nyid kyi phyir mya ngan las 'das par brjod de/ mya ngan las 'das pa'o zhes sgras smras pa la/ yang dag pa'i mya ngan las 'das pa yin te/ mi gnas pa'i mya ngan las 'das pa nyid kyi phyir ro/ /de ji lta bu'i khyad par dang ldan zhe na/ gang la sems dang sems las byung ba med/ /ces gsungs te/ gang la ji srid sems ni rnam pa gsum ste/ sems las byung ba ni sems kyi rang bzhin brgya drug cu dang / thig les kyang ci'ang mi byed de lta bu'i rnam par rtog pa cung zad kyang mi 'byung ngo zhes pa'i don to/ /de nyid bstan pa'i phyir/ gang gis e waM rnam par shes gyur pa/ /zhes gsungs te/ de'i don ni 'di yin te/ de yang ji skad du/ lha'i dbang pos yongs su zhus pa las/ e ni stong pa'i rang bzhin te/ /waM ni thugs rje chen por brjod/ /thig le gnyis med sbyor ba'o/ /'di yi zung 'jug dran par bya/ /e ni ma ru brjod pa ste/ /waM ni pha ru shes par bya/ /thig le gnyis med sbyor bar 'gyur/ /de yi sbyor ba ngo mtshar te/ /e ni pad+ma nyid du gsungs/ /waM ni rdo rje'i rang bzhin no/ /de las thig le'i sa bon 'gyur/ /de las srid gsum yang dag 'byung / /e ni shes rab nyid du 'gyur/ /waM ni thabs su yang dag brjod/ /thig le de nyid mi shigs pa'o/ /de las yi ge ma lus byung / /gang gis chos kyi phyag rgya ni/ /yi ge gnyis ni de nyid shes/ /de yis sems can thams cad la/ /chos kyi 'khor lo bskor 'gyur ro/ /'gro ba gang gis yi ge gnyis/ / de nyid mi shes rtag tu 'don/ /sangs rgyas chos la phyir 'byung ste/ /phyug po longs spyod spangs bzhin no/ /zhes gsungs so/ /'dir de lta bu'i e waM yi ge shes pa ni rtogs pa ste/ gang gis shes pa de ni sangs rgyas rtogs pa'o/ /ma lus ni e waM gyi yi ge sna tshogs lus pa med pa ste/ de nyid sna tshogs gcig gi ngo bo nyid kyi phyir ro/ /de ji lta bur gyur pa zhe na/ de nyid chos kyi za ma tog yin te/ /zhes gsungs te/ chos rnams kyi phung po dang khams dang skye mched rnams te dga' ba la sogs pa'o/ /de rnams kyi za ma tog ni gnas so/ /de nyid bod pa'i tshig go/ /de ni rang gi bdag po'i cha lugs so/ /zhes gsungs te/ rang gi bdag po ni thugs kyi rdo rje'o/ /cha lugs ni rgyan no/ /de nyid kyis 'khyud par skyes pa'i phyir ro/ /yang de nyid kyis sgrub pa'i thabs mdor bstan pa ni/ rlung ni 'gro ba'i sgo rnams la'ang / /zhes gsungs te/ rlung 'gro ba'i sgo ni steng dang 'og go/ /dmar por ni de la brtan zhing mi phyed pa'o/ /lcags ni sgo drug gi rlung kha sbyor du bya ba ste/ zla ba dang nyi ma'i lam bkag pas dus kyi me yongs su rdzogs par byed pa 'di'i lus kyi 'ching ba'o/ /gal te nang gi mun pa nag po la/ /zhes gsungs te/ gal te de la mi zad pa ni mun pa ste mi g.yo ba'i ting nge 'dzin rlung bum pa lta bu'i ngo bo nyid gzhom du med pa'i sgra/ chos kyi dbang phyug yid kyi byang chub kyi sems kyis de'i tshe nyid bde ba chen po gsal bar byed pa'i phyir mar me'o/ /byed gyur na ni du ba la sogs pa'i rtags kyis gsal bar byed pa'o/ / de skad du yang / dpal gsang ba 'dus pa las/ sems kyi rdo rje 'gog pa las/ /mtshan ma la sogs mthong bar 'gyur/ /zhes gsungs te/ 'dis ni ngag bcing ba'o/ /rgyal ba'i rin chen steng gi nam mkhar bzhugs/ /zhes gsungs pa ni/ rgyal ba'i rin chen ni gzhom du med pa'i sgra de nyid do/ /steng gi nam mkhar bzhugs pa ni gang gi tshe rten du gyur pa drug pa ye shes kyi dkyil 'khor gyi thig le la reg pa ste/ de la 'khyud pa zhes bya'o/ /de ltar yang / /mkha' 'gro rdo rje nor bu ste/ sangs rgyas rnams ni spyi bor gnas/ /zhes gsungs te/ 'dis ni sems kyi bcing ba'o/ /de ltar yang dpal kha sbyor thig le las/ rlung dang me yi dkyil 'khor las/ /rdo rje pad+ma'i sa bon bskul/ /thig le sgra yis yang dag mnan/ /char rgyun 'bab pa dag tu dran/ /zhes gsungs te/ de ltar yang / thig le'i sgra dang yang dag ldan/ /gang tshe rnam kun 'gyur ba na/ /de tshe 'bras bu zhes brjod par/ /mchog gi rnal 'byor pa yis bshad/ /ces gsungs so/ /des cir 'gyur zhe na/ ji srid longs spyod pas thar sgrub nag pos gsungs te nag po rdo rje srid pa la spyod pa ste/ shes rab ni bde ba nyams su myong zhing 'dod chags bral ba thams cad las log pa'i phyir/ thar pa ni phyag rgya chen po'i go 'phang thob pa ste mngon du byed pa'o/ /de ltar dpal dang po'i sangs rgyas las/ srog ni dbus su bcug ste zla ba nyi ma 'gro ba g.yas dang g.yon bcing ba/ /byang sems phyag rgya 'grogs pas mchog tu dga' bar 'grogs shing rdo rje bslang bar bya/ /chu skyes rdo rje sgra yi rang lag pad+ma'i rol pas bde ba phyir gsor ba'am/ /sa bon 'chor ba bde bcas 'jig pa spong byed de ni dpal ldan bla ma'i zhal/ /zhes gsungs so/ /sems kyi bcing pa nyid kyis thams cad 'grub par bsams nas sems brtan pa nyid gsal bar ston te/ brtan pa'i yid kyis sbyor bas na/ /zhes gsungs te/ rdo rje pad+ma sbyor ba'i sgo nas byang chub sems brtan pa'i sbyor ba byed pa'o/ /de gang du zhe na/ chos kyi yi ge'i nang du ni/ /zhes gsungs te/ chos kyi yi ge ni gzhom du med pa ste/ bdag med pa'i sa bon te/ de'i nang du ni de la zhes pa'i don to/ /des cir 'gyur zhe na/ skad cig de las rlung ni 'gags 'gyur te/ /zhes gsungs te/ rlung ni srog gi rlung ste skad cig de la 'gag pa'o/ /gzhan yang ci zhe na/ yul rnams la yang chags pa med par 'gro/ /zhes gsungs te/ yul rnams ni gzugs la sogs pa'i yul rnams so/ /nye bar longs spyod pa ni mngon par zhen pa med par 'khor ba'i 'ching ba las grol zhes bya ba'i don to/ /'on te chos kyi yi ge gang du shes par bya zhe na/ gang la mchog dang dga' bral dag thob na/ /zhes gsungs te/ mchog dang dga' bral ni zla ba dang nyi ma'o/ /de gnyis kyi dbus su mthong ba ni de la chos kyi yi ge ste/ sngon bstan pa'i mtshan nyid dang ldan pa dbus su mtshon par bya'o/ /gang la 'di lta bu yi gdams ngag gsal grub na/ /zhes bya ba smos te/ 'di lta bu'i gsang sngags ni tshul gyis gdams ngag gis gsal bar grub ste/ yongs su rdzogs pa grub pa de'i tshe khyim bdag mo rlung mi g.yo bar bcings zhes gsungs te/ khyim bdag mo rlung gi sngon du bstan pa'i mtshan nyid dang ldan pa'i mi g.yo zhes bya ba'i don to/ /gal te 'di de la rtsol rlung bcings pas chos kyi yi ge bde ba chen po'i ngo bo rdo rje lta bu'i ngo bo nyid du gyur pa gang la gnas par 'gyur zhe na/ ri bo mchog gi rtse thang spangs pa la/ /zhes gsungs te/ ri bo mchog ni rin po che'i ri bo ste/ de nyid sngon du bstan pa'i ri bo'o/ /de'i rtse mo ste/ ma lus pa'i rgyu ba dang / mi rgyu ba'i bde ba chen po nyid gnas yin pa'i phyir ro/ /thang spangs pa ni yan lag mchog gi thang ste spyi gtsug ste/ ri khrod ma yi sa der gnas bcas la/ /zhes pa ni ri khrod ma de lta bu'i bdag nyid grub pa'i chos kyi yi ge/ /bcom ldan 'das kyis gang gnas byas pa de de ni gnas byas pa'o/ /khyad par ji lta bu zhe na/ seng ge yis kyang mchong bar mi nus na/ /zhes gsungs te/ mchong mi nus pa ni gzhom par mi nus pa'o/ /gang gis she na/ seng ge ni gdong pa lnga pa ste/ de nyid dkyil 'khor lnga'i bdag nyid kyi srog gi rlung seng ges gnon par mi nus te/ drug pa ye shes kyi dkyil 'khor gyi ngo bo nyid yin pa'i phyir ro/ /glang po che yis smos ci dgos/ /zhes gsungs te/ glang po che ni phyugs te/ nyi ma dang zla ba ste/ de dag gis thag ring por 'gom pa dang gsal bar ga la nus zhes bya ba'i don to/ /de ltar zla ba nyi ma phyugs chen po/ /zhes gsungs te/ 'dir dgos pa ni zla ba dang nyi ma'i dkyil 'khor du rgyu ba'i rlung la zhon pa'i rnam par shes pa'i khams nyid kyis thams cad las thams cad du thams cad kyi ngo bo nyid kyis gnas pa dang bcom ldan 'das bde ba chen po rdo rje gnas kyang mi rtogs pa'o/ /de ltar yang lus skyes pa'i lus la nges par gang du gnas she na/ 'di yi rigs mchog dag tu 'di yi sa bon bstan/ /zhes bya ba la sogs pa tshigs bcad phyed dang gnyis ni rtogs par sla bas 'dir ma smos so/ /gong du ji skad bstan pa'i las kyi phyag rgya gang du mthong ba'i ye shes kyi phyag rgya mi 'gyur ba'i bde ba chen po rdzogs pas/ de bstan pa'i phyir/ sngags dang rgyud ni gcig kyang mi bya ste/ /zhes gsungs te/ gcig kyang bya mi bya ste/ gang mi bya zhe na/ sngags kyi bzlas pa ni gsang sngags kyi bzlas pa'o/ /rgyud ni rgyud klog pa'o/ /ci'i phyir de ltar yin zhe na/ rang khyim bdag mo zhes gsungs te/ rang khyim bdag mo ni lhan cig rang snang ba'i ye shes kyang phyag rgya ste/ bzung ba ni bla ma dam pa'i gdams ngag gis so/ /grol 'gyur ni yid dang rjes su mthun pa'i phyag rgya dang lhan cig skyes pa rnams kyis byed do zhes bya ba'o/ /de ltar yang dpal dus kyi 'khor lo las/ sems kyi snang ba tsam du yid las skyes pa'i me long gzugs brnyan lta bu ste/ /rnal 'byor dbang phyug bsten bya ma lus sangs rgyas lnga dang sras bcas rnams kyis sten de'i ye shes 'od zer bskyed/ /rang gi lus dang bcas pa'i bdud rnams sgrib pa ma lus bsreg /'dod chags la sogs bsreg cing lo gcig sbyor bas lus la ro mnyam bde ba ster/ /zhes gsungs te/ bcom ldan 'das ma de nyid la mngon du zhen pa'i rnal 'byor pa des/ sngags dang rgyud la 'dzin cing zhen par mi bya'o/ /'di'i don ni 'di yin te de nyid gang ste/ byang chub kyi sems kyi yid yin par bsngags so/ /de nyid du 'tshogs pa'i rgyu yin pas na skad kyi dbyings kyi rgyal po nye bar 'khor 'dzin pa'i phyir rgyud do/ /de la mngon par dga' bas thams cad byas pa yin no zhes pa'o/ /de ltar yang dgyes pa'i rdo rje las/ sngags bzlas dka' thub med cing dkyil 'khor sbyin sreg med/ /de nyid sngags bzlas dka' thub sbyin sreg de nyid yin/ /de nyid dkyil 'khor ba dang dkyil 'khor nyid/ /ces gsungs so/ /de nyid kyi don gsal bar bstan pa'i phyir/ de srid khyim bdag mo ni rang khyim gnas ma 'gyur/ /zhes gsungs so/ /rang gi khyim ni thams cad stong pa nyid/ sdig spangs kyi gnas ni rang gi khyim mo/ / phyag rgya chen po ni khyim bdag mo ste/ ji srid du gnas par ma gyur pa ni thim par ma gyur pa'o/ /de srid 'dod yon lnga ste/ re zhig mngon par byang chub pa lngas sems can mang pos bsam pa'i bye brag gis zhal dang / /phyag rgya dang kha dog dbyibs la sogs pa sna tshogs kyis de ltar ji ltar gnas te mi gnas so zhes bya'o/ /de yang dpal dang po'i sangs rgyas kyi rgyud las/ las kyi phyag rgya mnyam sbyor zhing / /ye shes phyag rgya sogs dmigs nas/ /phyag rgya chen po gcig sbyor bas/ /'byung med bde ba bde 'phel 'gyur/ /kun du zhal dang phyag la sogs/ /kun du dbu dang spyan dang gdong / /kun du 'jig rten thos par ldan/ /thams cad khyab nas gnas pa'o/ /zhes gsungs so/ /de nyid lha rdzas kyi phyag rgya de nyid kyi 'bras bu'i phyag rgya chen po bsgrub pa'i gdams ngag nges par bstan cing yang de nyid bstan pa ni/ bzlas dang sbyin sreg dkyil 'khor las 'di yin/ / zhes gsungs te/ phyi rol du gyur pa'i bzlas pa dang / dkyil 'khor dang sbyin sreg gi las 'dis ni nyi ma re re zhing ci'i phyir gnas zhes bya ba ste/ steng du kha bltas shing ci'i phyir ku re'i ngo bo nyid 'bras bu med ces bya ba'i don to/ /'di rnams ci'i phyir don med pa yin zhe na/ de lta bu'i gzhon nu ma dang rtag tu ma mjal na zhes gsungs te/ de nyid rtag tu gzhon nu ma la 'dod chags kyi rang bzhin yin pas/ de nyid lha rdzas kyi phyag rgya ste/ de la dba' rlabs med pa'i rtag tu dga' ba la sogs pa'i rim pa gang gis rjes su chags pa skye ba de dba' rlabs med pa'i mdza' bas so/ / lus 'di yin te byang chub ji ltar 'grub/ /ces bya ba ni/ byang chub kyi phyag rgya chen po ste/ de ji ltar 'grub ce na/ sngon du bstan pa'i e waM gyi yi ge'i lus med na mi 'grub ces pa'i don to/ /gang gis rtag tu lhan skyes bde rtogs na/ /zhes gsungs pa ni go sla'o/ /gang gis rin chen sems ni brtan byas pa/ /zhes gsungs te/ rab tu gtum pa'i gtum mo mes zhu bar byas nas/ bskyod par mi nus pa'i phyir gang gis brtan par byas pa'i sems rin po che byang chub kyi sems so/ /ci byas nas zhes pa la/ rang gi khyim bdag mo blangs nas 'di zhes bya ba gsungs te/ rang gi khyim bdag mo ni lha rdzas kyi phyag rgya de nyid de/ de la e waM gyi yi ge de la bde ba chen po'i gzugs bzung nas de nyid rdo rje sems dpa' mgon po ste/ sku dang gsung dang thugs kyi gtso bo ste/ de nyid bod pa'i tshig go/ /mchog gi don ni bdag gis rab brjod na/ /bdag nag po rdo rjes mchog gi don ma bcos pa 'di brjod do zhes pa ste/ don 'di las gzhan med do zhes bya ba'i don to/ /de nyid dpes bstan pa'i phyir/ tshwa ni chu la zhugs pa bzhin du ni/ /zhes gsungs te/ tshwa chu la zhugs pa de bzhin du khyim gyi bdag mo ye shes kyi phyag rgya'i rang bzhin blangs pa'o/ /sems ni byang chub kyi sems te ro gcig par 'gyur ro/ /de ltar dpal dgyes pa'i rdo rje las/ khu ba'i rnam pa bcom ldan 'das/ /de yis bde ba 'dod mar brjod/ /ces gsungs te/ khu ba dang bde ba de nyid kyang rten dang brten pa ngo bo nyid de dag thams cad stong pa nyid kyi rang bzhin du brjod pa bde ba mnyam zhing ro gcig pa de'i skad cig las 'gyur ro/ /de ltar yang dpal dang po'i sangs rgyas las/ ji srid rten dang brten pa'i sbyor ba yis/ /de srid 'byung med bar du'o/ /sems ni 'gog pa nyid gyur nas/ /rten dang brten pa'i mtshan nyid med/ /ces gsungs te/ de ltar yang kha sbyor thig le las/ sna yi bu ga gnyis nas ni/ /'jug pa bde ba dus zhes brjod/ /'byung ba bde ba dus yin te/ /de gnyis nyid ni gcig par grags/ /grogs med dag ni gcig pu ni/ /bsam gyis mi khyab dus nyid 'gro/ /srog dang thur sel mnyam gnas dang / /'byung dang 'jug pa rnam par spangs/ /'gro dang 'ong ba rnam grol ba/ /dus gcig tu ni de brjod do/ /'dod chags ma yin chags bral min/ /dbu mar dmigs par mi 'gyur ro/ /'dod chags ma yin chags bral lam/ /gnyis po 'dres pa gzhom du med/ /mar ni mar du zhu gyur pa/ /'dres par gyur pa rnyog med ltar/ /de bzhin 'dod chags bral ba ltar/ /skad cig la ni ro gcig 'gyur/ /zhes gsungs so/ /gang gi de dang rtag tu gnas na ni/ /zhes gsungs te/ gal te de gnyis phan tshun du'o/ /rtag tu gnas pa ni rgyun mi 'chad par de'i tshe yang 'di ltar 'gyur zhes pa'o/ /'di'i don ni de ltar bstan pa'i khams kyi khu ba dang ngo bo dag phan tshun rgyun mi 'chad par bya'o/ /gal te gzhan du 'gyur na/ khu ba'i ngo bo nyid zla ba'i rang bzhin no/ /longs spyod rdzogs pa'i sku'o/ /khrag gi rang bzhin nyi mar snang bas sbrul ba'i sku nus par gnas pa'o/ /bde ba'i ngo bo nyid du gnas pa'i khyim bdag mo dang lhan cig tu byang chub kyi sems 'di gnyis ka'i sbyor bas gong bur gyur nas skye ba dang 'jig pa'i 'khor ba'i lam nas 'das nas/ ro gcig pa rgyun 'byung ba'i dpal he ru kar 'gyur ro/ /de ltar yang dpal kha sbyor thig le las/ gang tshe mgron gnas chags chen po/ /zla ba'i gzugs kyis gnas gyur pas/ /sangs rgyas rnams kyi sku mchog yin/ /gang tshe rdo rje rtse gnas pa'i/ /de tshe longs spyod rdzogs pa yi/ /sku yang nus par 'gyur ba yin/ /pad+ma'i nang du gnas gyur 'dod/ /nyungs kar du ni rnam par grags/ / nyi ma'i gzugs su yang dag grags/ /sprul pa'i sku ru brjod par bya/ /sangs rgyas byang chub sems dpa' rnams/ /de la spro zhing skye ba yi/ /pad+ma gar dbang rgyal po ni/ /pad+ma'i gtso bo ru ni 'gyur/ /zhes gsungs so/ /dpal nag po rdo rje'i do ha mdzod kyi 'grel pa paN+Di ta 'od dpag med kyis mdzad pa rdzogs so/ /[ ]@##/ /rgya gar skad du/ ma hA mu dra u pa de shaM/ bod skad du/ phyag rgya chen po'i man ngag /dpal lhan cig skyes pa la phyag 'tshal lo/ /phyag rgya chen po bstan du med gyur kyang / /dka' ba spyod cing bla ma la gus pa'i/ /

CLOSE WINDOW