བོད་ཡིག

e-texts based on the ACIP/ALL Input

dag pa'i sa la rab tu gnas pa dang / /'phags pa gos sngon dngos grub thob par shog /mchog rab snying po rtsa ba'i man ngag pad+ma 'byung gnas kyis mdzad pa'i 'grel pa rdzogs so//[ ]@##/ /rgya gar skad du/ tat+t+wa pra dI paM nA ma sA d+ha no pi ka a ti/ bod skad du/ de kho na nyid sgron ma zhes bya ba'i sgrub thabs rdzogs pa/ dpal rdo rje can la phyag 'tshal lo/ /gang zhig gis ni bde ba thob cing sdug bsngal spong 'dod pa/ /de yi sa bon nor bu bzhin du bsgrub phyir bde ba'i mchog nyid la ni rab btud de/ /sgrub pa'i thabs mchog de nyid sgron ma 'di ni gsang ba'i rgyud rnams la/ /brten cing gzhan yang gang las 'ongs pa de nyid bdag gis bshad par bya/ /gang zhig gis ni legs pa'i don gsung ba ni kun la gsal ma byas/ /de byas pa min mthong ba 'dir ni gsang ba 'di la dga' ba skyes/ / gang zhig sdug bsngal spang 'dod de la thabs rnams med 'gyur zhing / /bde ba thob pa'i thabs ni de 'dra de las zlog byed pa/ /thabs mchog dam pa 'di bstan 'di la gus par gyis/ /lta spyod dbang dang dam tshig ldan/ /yon tan gzhan gyis nyer brgyan pa'i/ / rnal 'byor snod can gang zhig gis/ /yang dag byang chub yid la gzhug /ri dang yul khams la sogs pa'i/ /yon tan thams cad ldan pa'i gnas/ /mngon sum grags pas ma smad pa/ /der ni nye bar 'dug nas ni/ /dang por bgegs rnams bskrad par bya/ / skad cig phyag na rdo rje gsal/ /'di yis gdug pa can rnams la/ /gzhan du 'gro ba'i bka' bsgo la/ /mi 'gro 'gyur ba'i bgegs rnams kun/ /rdo rje 'khor lo'i thog gis gsad/ /de nas rang 'od mdun byung las/ /sna tshogs rdo rje 'bar ba bsam/ /de yis khro bo'i khang pa 'bubs/ /yang na bdag las khams gsum rgyal/ /khro bo de spros 'byung bo bkug /phur bus mdun du btab byas nas/ /de ni 'byung po 'dul ba'i mchog /yang na rang gi gnas dag tu/ /bcing dang gtub pa'i las byas nas/ /de ni myur du bzlog pa yin/ /de 'og khro bo'i khang pa bsgom/ /phyi nas bgegs rnams gso bar bya/ /yang na khang pa med dang thog /tsha tsha 'khrug pa'i rnam pa la/ /'bar dang 'phro ba'i 'khor lo brtsam/ /mtshams bcad pa yi man ngag go/ /zhes pa 'di ni/ byang chub sems dpa' sems dpa' chen pos ji srid du mtshams bcad pa'i dam tshig go/ /gang tshe mtshams kyi cho ga rdzogs/ /de nas bla ma mchod pa brtsam/ /rang snying mdun gyi nyi ma la/ /bla ma bkug ste 'od du zhu/ /de las rdo rje 'chang chen sku/ /gnas rnams byin brlabs dbang bskur nas/ /phyag btsal ba dang mchod pa dang / /sdig bshags sdom pa bzung ba dang / /lus dbul dge rtsa bsngo byas na/ /bla med mchog gis 'grub par 'gyur/ /bla ma mchod pa'i rnal 'byor pas/ /bde gshegs mchod pa'i cho ga brtsams/ /sa man dza yi sngags byung ba'i/ /'od kyis dpal ldan gos sngon can/ /'khor bcas mdun du spyan drangs te/ /gdan la bzhugs par gsol ba gdab/ /de nas spos dang me tog dang / /mar me dri chab la sogs pa/ /dngos dang yid kyi mchod pa rnams/ /ci nus par ni dbul bar bya/ /de 'og sdig pa bshags pa dang / /sdom pa yang ni gzung bar bya/ /yi rang ba dang bskul ba dang / /gsol gdab rang gi lus dbul zhing / /dge rtsa byang chub chen por bsngo/ /bdag las sprul pa'i lha tshogs kyis/ / sems can kun gyi don byed bsam/ /phyi ma'i dus kyi smon lam gdab/ /sems can don bya'i bsam pa bskyed/ /tshad med bzhi yang bsgom par bya/ /de la nan tan cher bskyed nas/ /sdig pa sbyong par byed pa dang / /thun mong dngos grub kun 'grub cing / /de la sogs pa'i yon tan tshogs/ /dpag tu med pa 'byung bar 'gyur/ /zhes pa 'di ni byang chub sems dpa' sems dpa' chen po'i ji srid du bsod nams kyi tshogs bsags pa'i dam tshig chen po'o/ /gzhan yang yang dag bshad bya ba/ /ji srid bsod nams tshogs rdzogs nas/ /ye shes tshogs rnams bshad bya ste/ /dang po nyid nas rang bzhin med/ /de ltar mos par byed pa dang / /yang na snying ga'i yi ge las/ /'od byung bdag nyid zhu gyur te/ /slar 'dus rang bzhin med par 'gyur/ /de la dmigs nas bsgoms pa'i tshe/ /gzhan pa'i yul rnams rang bzhin gzhag de ltar/ yul ni gang la'ang mi gtad de/ /rten yang gang la'ang bcas pa med/ /ces pa 'di ni byang chub sems dpa' sems dpa' chen pos 'di ni ji srid du ye shes kyi tshogs bsags pa'i dam tshig chen po'o/ /de ltar tshogs gnyis bsags gyur na/ /gang zhig bskyed pa'i sbyor ba ni/ /yaM dang baM dang laM las dang / /suM dang b+hUM las byung ba yi/ /rlung dang chu yi dkyil 'khor dang / /sa gzhi ri rab sting dag tu/ /gzhal yas khang pa bsam byas te/ /gru bzhi pa la sgo bzhi pa/ /pad+ma brgyad kyis yang dag brgyan/ /gru chad bzhis brgyan bar khyams dang / /dra ba dra phyed pha gu dang / /dril bu dar dpyangs la sogs pa/ /phyi dang nang gi rgyan gyis mdzes/ /dbus su nyi zla pad+ma'i steng / /hUM las byung ba'i rdo rje 'bar/ /de las dpal ldan gos sngon sku/ /zhal gcig phyag gnyis mthing ga'i mdog / dbu la sbrul brgyad gdengs ka can/ /sangs rgyas lnga yis dbu brgyan cing / /gnas lngar sku lnga'i mtshan ma can/ /spyan gsum me yi mdog 'dra zhing / /shangs 'bar dbugs las rlung yang 'tshub/ /ljags ni glog bzhin myur 'dril zhing / /zhal nas sbrul nag gsol ba'i tshul/ /sbrul nag se ral kha la gzed/ /sbrul ser chun pos rkang lag brgyan/ /dmar po yis ni ska rags byas/ /gsus khyim che zhing gsus pa 'phyang / /sku smad gos sngon sham thabs can/ /rdo rje khros ma sku la'ang 'khril/ /gnyis su med par gyur pa dang / /phyogs bcu'i sangs rgyas spyan drangs te/ /mchod dang bstod pas mnyes byas nas/ /don chen 'di yis gsol ba btab/ /e ma ho dpal ldan gos sngon can/ /lus kyi rtog pa bsal ba'i phyir/ /thugs rje chen po'i byin rlabs kyis/ /bdag la byin gyis brlab tu gsol/ /gsang ba'i bdag po bcom ldan 'das/ /bdag ni sems can don kun rtsom/ /gsang 'dzin rigs kyi bdag po yis/ /bdag las bde gshegs sku byin rlobs/ /dag dang yid la de bzhin du/ /gsol ba btab pas byed pa yin// phyis ni gnas gsum byin brlabs te/ /bum pa la sogs dbang rnams blang / /bde ba chen por rtag tu dgyes/ /de nas phyogs bcu'i lha mo yis/ /bstod pa glu yis skul bar byed/ /a la la la la ho/ shu kra su ka ho/ /bde ba chen po gsang ba mchog ni nyams dga' nas/ /bcom ldan gsang mchog thugs rje'i bdag nyid can/ /ma rig rmongs pa yongs su bsal ba'i phyir/ /'bar ba'i sku bzhis rtag tu 'gro ba'i don la spyod/ /a la la la la ho/ /ma hA gu h+ya pU dzo pas+tha sa ma ya/ tsit+ta shu kra su ka a la la la la ho zhes bskul lo/ /'od las yongs su sad gyur te/ /rdo rje pad+ma byin brlabs nas/ /lha mos bskul dang dga' ba yis/ /spyod pa byas pas 'grub 'gyur te/ /snyoms par zhugs nas b+ha ga la/ / sum cu'am ni nyi shu lnga/ /bcu sogs yum gyi b+ha gar bskyed/ /de la so so'i sngags kyis gdon/ /oM sarba ta thA ga ta kro d+ha nI lAM ba ra d+ha ra hUM/ oM badzra kro d+ha nI lAM ba ra d+ha ra hUM/ oM rat+na kro d+ha nI lAM ba ra d+ha ra hUM/ oM pad+ma kro d+ha nI lAM ba ra d+ha ra hUM/ oM karma kro d+ha nI lAM ba ra d+ha ra hUM/ oM sarba ta thA ga ta kro d+hI shwa ri nI lAM ba ra d+h+wa ra hUM/ oM badzra kro d+ha trai lokya bi dzA ya hUM/ oM ma hA kA la b+ha ra san+ti na hUM/ oM bi rU D+ha kA ya hUM/ oM bi rU pak+Sha ye hUM/ oM badzra lA s+ye hUM/ oM badzra mA le trAM/ oM badzra gI ti hrIH/ oM badzra nr-i t+ya aH/ oM badzra d+hU ped+hU/ oM badzra puSh+pa pu/ oM badzra A lo ke hrIH/ oM badzra gan+d+he gaM/ badzra aM ku sha jaH/ badzra pA sha hUM/ badzra s+pho Ta baM/ badzra g+haN+De hoH/ zhes pa'o/ /shar du sangs rgyas gos sngon can/ /zhal dang sku ni dkar la 'tsher/ /'khor lo dang ni dril bu bsnams/ /sbrul dkar pos ni rnam par brgyan/ /lhor ni rin chen gos sngon can/ /zhal dang sku ni ser la 'tsher/ /rin po che dang dril bu bsnams/ /sbrul ser pos ni sku la brgyan/ /nub tu pad+ma gos sngon can/ /zhal dang sku ni dmar la 'tsher/ /pad+ma dang ni dril bu bsnams/ /sbrul dmar pos ni sku la brgyan/ / byang du las kyi gos sngon can/ /zhal dang sku ni ljang la 'tsher/ /rgya gram dang ni dril bu bsnams/ /sbrul ljang pos ni sku la brgyan/ /khro bo 'di dag thams cad kyang / /dbu la sangs rgyas bzhi yis brgyan/ /yum bzhi yis ni legs par 'khyud/ /kun kyang gtso bo'i cha lugs can/ /sngags kyi bdag po gzhan rnams kyang / /so so'i gnas su bskyed par bya/ /zhes pa 'di ni byang chub sems dpa' sems dpa' chen pos ji srid du gtso bo dang 'khor bskyed pa'i dam tshig chen po'o/ /ji srid bskyed pa rdzogs gyur nas/ / phyogs bcu'i sangs rgyas spyan drangs te/ /mdun du gnas la mchod pas mnyes/ /rdo rjes gsol ba gong bzhin gdab/ /de nas bdag la bstim pa'am/ /yang na lha mos dbang bskur phyir/ /gnas gsum byin brlab byas pa'am/ /yang na gsum 'dus sbyong ba bya/ /de ltar byas nas rang gi sku/ /dmigs dang gsal ba'i cho ga bya/ /'dis ni rang gi rnam rtog bzlog /ces pa 'di ni byang chub sems dpa' sems dpa' chen pos ji srid du bskyed pa'i sku byin gyis brlab pa'i dam tshig chen po'o/ /gang zhig rgyas la ma dad pa'i/ /gang zag la ni sbyor 'di bstan/ /sngon du bla ma sangs rgyas la/ /phyag 'tshal ba dang bshags byas nas/ /yang dag byang chub yid la bzhag /de nas 'byung ba gzhal yas bcas/ /nang du cho ga gsum las byung / /gtso bo'i sku dang sku bzhi ni/ /rang rang yum dang bcas pa bskyed/ /bcu las gzhan pa thams cad kun/ /bsdus pa'i skabs su spang bar bya/ /de nas ye shes 'khor lo'ang / /mchod dang dbang la sogs spangs te/ /bstim pa yi ni sbyor ba bya/ /zhes pa 'di ni byang chub sems dpa' sems dpa' chen pos ji srid du sbyor ba bsdus pa'i dam tshig chen po'o/ /gzhan yang shin tu bsdus pa ni/ /dang por gzhan gyi don bya dang / /rang nyid 'bras thob bsam pa bskyed/ /stong pa'i ngang las gcig par gyis/ /gzhal yas gtso bo dang bcas pa/ /rim pa'am ni cig car gyis/ /bskyed de 'khor ni 'dir ma gsungs/ /ye shes 'khor lo bkug nas ni/ /gnyis med gyur nas sems gzung ba/ /yang na sngags kyi sbyor ba byas/ /tshogs dang gtor ma la sogs pa/ /de la de yi sbyor ba bya/ /zhes pa 'di ni byang chub sems dpa' sems dpa' chen po'i ji srid du sbyor ba shin tu bsdus pa'i dam tshig chen po'o/ /de ltar sbyor ba'i don bstan nas/ /sems gzung rim pa bstan pa ni/ /dang po bla ma mchod la brten/ /gnyis pa bde gshegs brten pa ste/ /gsum pa rlung la sogs la brten/ /bzhi pa yi ge lnga pa la/ /rdo rje drug pa sku la brten/ /de nas 'khor lo brten pa ni/ /dbang po rab 'bring bye brag gis/ /dus gcig pa'am rim gyis byed/ /de nas dbang bskur byin brlab dang / /bstim pa'i sbyor la brten pa yin/ /yang na dus kyi bye brag ni/ /gang zhig bla ma la sogs pa/ /dang po'i dus kyi rnal 'byor pas/ /rjes su dran no skad cig dang / /skad cig bcu dang brgya dang ni/ /stong dang thun phyed thun gcig dang / /thun mtshams med pa'i bar du'o/ /zhes pa ni byang chub sems dpa' sems dpa' chen pos ji srid du sems gzung bar rim pa'i dam tshig chen po'o/ /sems gzung ched du byas pa yis/ /de yi thabs ni bshad bya ste/ /gzhan gyi rnam pas 'dir 'dod na/ /nyon mongs dgra ni spang bar bya/ /dag pa'i dbang du 'dod pa yis/ /dang por rtog pa spang bar bya/ /dul nas 'dzin par 'dod pa yis/ /sems ni phyi dang nang du byung / /'og tu bstim dang steng du 'phro/ /de bzhin nang du gzhug pa'ang / /sems gzung don du byed pa yin/ /gzhan yang rnal 'byor gang zhig gis/ /khams gsum la sogs shes pa dang / /ral gri yang ni sbyar bar bya/ /dpal ldan gsang ba mchog sgrub pas/ /gtso bo 'khor dang bcas gsal nas/ /mi 'gyur mchog gi cho ga bya/ /gang zhig la ni gang gsal ba/ /de la dmigs la bsgom par bya/ /ma gsal bar du bskyed cing bsgom/ /phyag tsam gsal na phyag la dmigs/ /gnyis dang gsum la sogs pa yang / /gsal 'gyur de la dmigs par bya/ /gtso bo gsal na gtso bo ste/ /'khor la yang ni de bzhin no/ /thams cad gsal na kun la dmigs/ /thams cad gsal bar ma gyur na/ /sdig pa zhi dang bsod nams spel/ /zhi dang rgyas pa'i sbyin sreg bya/ /res gsal res mi gsal gyur na/ /bgegs rnams bzlog pa'i las bya'i phyir/ /drag po yi ni sbyin sreg dang / /tshogs kyi 'khor lo la sogs bya/ /de bzhin bskrad dang mnan pa dang / /bsrung ba'i mchog kyang bya ba yin/ /phyag gnyis gsal bar ma gyur na/ /phyag mtshan gyis ni gsal bar bya/ /phyag mtshan gsal bar ma gyur na/ /phyag mtshan 'od kyis gsal bar bya/ /spyan rnams gsal bar ma gyur na/ /khrag gi zham chu 'bab pa dang / /bkrag dang ri mo ldan pas gsal/ /zhal mdog gsal bar ma gyur na/ /stong gsum 'od kyis gang bar gsal/ /yang na thams cad gsal byas na/ /phra mo mig gsal gyur kyang sla/ /gang che gang gis mi gsal na/ /zas dang skom dang gnas dag gis/ /'du ba gang la brten pas 'grub/ /dmigs pa mi gsal bco ba gang / /dang po skad cig rjes dran dang / /rgyun la ji srid 'tsho bar du/ /sbyor ba 'di ni byed pa yin/ /dpal ldan gsal bar gyur nas ni/ /ji srid las rnams byed pa yin/ /zhes pa 'di ni byang chub sems dpa' sems dpa' chen pos ji srid du dmigs pa la sems gzung ba'o/ /des na bsgom pa bogs dbyung ni/ /ji srid dus kyi bogs dbyung ni/ /skad cig rjes dran gong du shes/ /dmigs pa bogs dbyung bshad bya ste/ /dang por dkar po ljang gu'i bar/ /re re dang ni lnga 'dus pa/ /kha dog la ni bogs dbyung ba'o/ /de las ri rab til 'bru'i bar/ /dbyibs kyi bogs dbyung dag tu 'dod/ /stong gsum gang dang gcig 'dus pa/ /grangs kyi bogs dbyung dag tu bshad/ /sku la ji ltar bogs phyin pa/ /de ltar thugs la bslab bya ste/ /kha dog dbyibs dang grangs de bzhin/ /gsung la yang ni de ltar ro/ /de lta'i sbyor ba bstan pa yang / /gang zag rigs kyis rnam gnyis te/ /rkyen gyi dbang du 'gyur ba la/ /ji lta'i 'od kyis bdag rkyen byas/ /mi 'gyur rang bzhin 'gyur ba'o/ /zas dang skom la sogs pa yis/ /ji ltar bsam gtan 'phel byed pa/ /'di ni bras la sogs pa yis/ /bogs dbyung man ngag yin par 'dod/ /de ltar bogs dbyung sbyor ba yis/ /bsgom pa 'phel bar 'gyur ba yin/ /de las byung ba'i sku yis ni/ /las rnams thams cad 'grub par byed/ /ces pa 'di ni byang chub sems dpa' sems dpa' chen pos ji srid du bsgom pa'i bogs dbyung ba'o/ /gang tshe bsgom la mi gzhol zhing / /gsang sngags gtso bor byed pa la/ /sngags kyi nges pa bshad par bya/ /sngags bzlas pa ni rnam gnyis te/ /thun mong dang ni khyad par ro/ /thun mong sngags ni bshad bya ste/ /bdag dang gzhal yas 'khor bcas dmigs/ /gsal la dmigs pa'i bzlas pa'o/ /sdig pa dbyung dang bsreg pa dang / /bkru ba'i don la rab dmigs nas/ / hUM dang raM dang haM bskul te/ /mgal me phreng ba nyi ma yis/ /gang zhig byed par 'gyur ba ni/ /rgyud rnams sbyor ba'i bzlas pa'o/ /gang tshe yum dang bzhi skor dang / /mdun gyi dkyil 'khor nyis skor dang / /'khor gyi dbang du sum skor dang / /gtso dang 'khor gyi bzlas pa dang / /snying na btson 'dra'i bzlas pa la/ /mgal me phreng ba nyi ma'i tshul/ /mtshan ma 'dod pa'i bzlas pa'o/ /khyad par bzlas pa bshad bya ste/ /sngags 'od dkyil 'khor rnams la phog /de las khro bo'i tshogs byung nas/ /len byed dgug pa'i bzlas pa'o/ / ral gri la sogs thog 'bebs dang / /gcod gtub gsad pa'i bzlas pa'o/ /bdag las byung ba'i khro tshogs kyis/ /gsad pa'i sha rus mdun du bton/ /ha ha ru lu'i sgra sgrogs pa/ /bsnyen pa'i dus kyi bzlas pa'o/ /khro tshogs 'khor lo thogs pa yis/ / klad par 'khor lo bskor ba yis/ /smyo byed dus kyi bzlas pa'o/ /rnga mo can gyi khro tshogs kyis/ /bzung zhing khrid par byed pa ni/ /bskrad pa'i dus kyi bzlas pa'o/ /'od zer dkar po'i tshogs byung nas/ /lha la sogs pa'i sdig pa sbyong / /de ni zhi ba'i bzlas pa'o/ / gang zhig gis ni bcud rnams bsdus/ /rang byung tshe yi yi ge gsos/ /bkrag dang gzi byin bsngos pas bskyed/ /rgyas pa'i dus kyi bzlas pa'o/ /sngags 'od rdo rje la sogs pas/ /gdul bya'i rkang dang spyi bor bsreg /'od zer gzhan gyis gsos 'debs pa/ / rengs pa'i dus kyi bzlas pa'o/ /'od zer kha dog sna lnga las/ /spos sogs lha mo rnams kyis gang / /gang la phul nas don grub pa/ /mchod pa'i dus kyi bzlas pa'o/ /gang zhig las ni 'od byung nas/ /bdag zhu der 'dus bde thob pa/ /gsang ba'i dus kyi bzlas pa ste/ /rnam dag don la rab dmigs pa/ /'di ni bla med bzlas pa'o/ /gsang sngags skyon rnams rab spangs nas/ /'bras bu thob pa'i las byed pa'ang / /'di yis 'gyur gyi gzhan du min/ /zhes pa 'di ni byang chub sems dpa' sems dpa' chen po'i ji srid du rdo rje sngags bzlas pa grub pa'i dam tshig go/ /gang zhig tshogs rnams rdzogs byed cing / /'di yis nor bu gzhan 'grub phyir/ /chogs kyi nges pa bshad par bya/ /'jig rten rdzas rnams ma lus pa/ /kun tshogs rnal 'byor lha grangs te/ /'tsham pa dang ni mchod pa sogs/ /sngon 'gro sa chog la sogs rdzogs/ /de nas lha yi ting 'dzin gyis/ /maN+Dal lnga dang bcu sogs la/ /me tog dang ni mchod pa bkram/ /de nas gsang ba'i dkyil 'khor bri/ /de tshe rgyal pos mtshams rnams bcad/ /tshogs bsags rgyal pos blang bar bya/ /med pa las byung phyag rgya yis/ /rgyal po bzhi ni thob bya ste/ /bde ba chen po nyid dag las/ /lha mos sad byas skur langs te/ /dkyil 'khor rgyas nas rgyal po len/ /de nas grub pa rdzogs gyur nas/ /rgyal po yis ni sems dpa' bskul/ / phyi rol 'khor lo bsdus byas nas/ /nang du so so'i maN+Dal bkod/ /bdag gis 'jug pa de bzhin du/ /'khor rnams dam pa'i don la 'jug /gang zhig gis ni rol mo dang / /ldan pas tshogs ni grangs byas te/ /skom dang mchod pa sngon song nas/ / tshogs kyang byin gyis brlab par bya/ /yaM raM a las rlung me thod/ /nang du sha lnga bdud rtsi lnga/ /yi ge gsum gyis legs sbyangs te/ /ye shes bdud rtsi bab gyur nas/ /bdag mchod dkyil 'khor mdun du mnyes/ /cho ga'i yan lag rdzogs par bya/ /'jig rten maN+Dal sngon po'i steng / /phyi rol du ni mchod par bya/ /de ni thun mong cho ga'o/ /khyad par cho ga bstan pa ni/ /zab par sprul par brten pa dang / /bzhi dang gsum du nges par sbyar/ /zhi ba la sogs sbyor ba ni/ /sngags kyi sbyor ba bzhin du sbyar/ /gang zhig 'di la rtag gnas nas/ /mchog 'grub gzhan gyis nus ma yin/ /zhes pa 'di ni byang chub sems dpa' sems dpa' chen pos ji srid du tshogs kyi 'khor lo'i sbyor ba'o/ /bdag po 'byor ba chung ba dang / /slob dpon bsam gtan ldan pa la/ /tshogs kyi mchod pa bstan par bya/ /rdzas ni lnga nas bcu yi bar/ /slob dpon gcig dang gnyis kyis 'grub/ /khyab 'jug bu mo'i sbyor ba'am/ /yang na rgyas pa tshogs 'khor bzhin/ /dkyil 'khor gcig dang gnyis pa dang / /bzhi yi bar yang mchod pa yin/ /slob dpon nus pa'i bye brag gis/ /las gzhan rtsom na gong ma bzhin/ /mi rtsom 'gyur na sdig pa sbyang / /zhes pa 'di ni byang chub sems dpa' sems dpa' chen po'i ji srid du tshogs kyi mchod pa'i dam tshig go/ /de nas dpal ldan rdo rje can/ /gang gis bsgrub par 'dod pa des/ /sbyin sreg cho ga bshad par bya/ /sngon bya gzhan ni gzhan du ste/ /sa yi rigs bzhir thab khung bzhi/ /zlum po gru bzhi zla gam e/ /thab khung dbyibs kyi mtshan nyid do/ /dkar ser dmar dang nag po ni/ /thab khung gi ni kha dog go/ /'khor lo rin chen pad+ma bri/ /thab khung mtshan ma zhes su bshad/ /de nyid raM las 'od 'phros pas/ /mi dmigs ngang las b+h+rUM du gyur/ /de las gzhal yas khang pa ni/ /gong ma'i kha dog dbyibs dang ldan/ /mchod rdzas mchod par shes bya ste/ /sreg rdzas byin gyis brlab pa yang / /mi dmigs snod na swa yig las/ /so so de nyid rgyas pa la/ /ha ho hrIHyis skyon rnams bsal/ /me lha bskyed pa'i rim pa ni/ /e las gru gsum de nyid gsum/ /raM bcas yi ge bzhi ru gsal/ /pad steng de las me lhar gyur/ /kha dog bzhi yi bdag nyid las/ /so so'i rigs kyi dbu rgyan byas/ /lte bar gong ma'i sbyor ba ste/ /snying gar phyogs skyong bcu dang ldan/ /de nas ye shes me lha dgug /byin brlabs dbang bskur gzi byin bskyed/ /so so'i mchod pa dbul byas te/ /gzar bu rdo rje la sogs pa/ /kha dog dbyibs ldan byin gyis brlabs/ /de nas dbul ba'i man ngag kyang / /shing gi 'od ni bskyed byas te/ /mar gyis 'od 'phro kun la sbyor/ /dkar gsum dang ni mngar gsum gyis/ /spyi dang so sor sdig pa 'byin/ /'bras dang 'bru yi chan dag gis/ /gong gis gnyis po so sor 'byin/ /nas thug 'o ma'i thug pa yis/ /re re'i gnas su sreg par byed/ /til gyis snying gi nang nas 'byin/ /tha ma'i bar gyis 'khru bar byed/ /yang na til gyis sgo dgur 'jug /rdzas de ser por byas pa la/ /dkar gsum gyis ni gzi byin bskyed/ /mngar gsum bsten bya gsal ba ste/ /'bras dang 'bru yi sbyor ba yis/ /ye shes bcud rnams spyi bor sdud/ /nas dang 'o ma'i sbyor ba yis/ /'gro bcud gnas rnams kun du sdud/ /tha ma dUr ba'i sbyor ba yis/ /mdzod spu'i snying ga'i hUM la sdud/ /tha ma mar gyi sbyor ba yis/ /bsrung ba'i mchog kyang 'grub par 'gyur/ /dbang gi sbyor ba byed pa la/ /ba lang sha yi gtor ma dang / /bcas pas sum skor la sogs kyis/ /myur du 'gugs shing dbang du sbyor/ /gsang ba'i las kyi cho ga ni/ /dang por sha yi khro ba ste/ /lag gi 'od ni 'phro bar byed/ /rus pas steng gi 'khor lo bri/ /bdud rtsis 'od 'phros sprul pa dgyes/ /'bru nag chan gyis sprul pa khros/ /dug gi gtor mas 'gugs pa dang / /de yi nang du gsod pa ni/ /phye ma gsum dang dug 'brus byed/ /de ltar me yi cho ga rdzogs/ /snying gar dgod pa'i lha rnams la/ /gong ma'i cho ga rdzogs byas te/ /bsdu dang gshegs su gsol byas nas/ /bzod gsol me yi sbyor ba byed/ /rdo rje me yi dam tshig yin/ / bsrung bzhi ba'i cha la gdab// tshe srid nam mkhar 'gro ba dang / /'od dang bu tsha bcud 'gugs pa/ /rgyas pa'i cha la gdags pa'o/ /dgug pa dbang gi cha yin te/ /drag po'i las gzhan tha ma'i cha/ /'di yis 'grub bya ma gtogs pa/ /gang zag gzhan gyis 'grub mi 'gyur/ /zhes pa 'di ni byang chub sems dpa' sems dpa' chen po'i ji srid du me'i sbyor ba'i dam tshig go/ /de nas gzhan yang bshad bya ba/ /'phags mchog cho ga rdzogs byas te/ /gtor ma'i cho ga las byed pas/ /sha khrag rus pa 'bru la sogs/ /thams cad ma sbyang snod du blugs/ /bdag 'od sbyor bas rang bzhin med/ /de las yaM raM a ru gyur/ /nang du sha lnga bdud rtsi lnga/ /steng du rdo rje zla dkyil bcas/ /yi ge gsum gyis byin gyis brlab/ /dang por mdun gyi dkyil 'khor te/ /de nas dman dang bar ma dang / /shin tu dman pa rim bzhin sbyin/ /gnas kun byin gyis brlab byas nas/ /lce ni rdo rjer bsams te dbul/ /'di ni nyi shu rtsa gcig gam/ /brgya'am stong gi sbyor bas 'grub/ /khyad par gtor ma'i sbyor ba ni/ /sngags bzlas sbyor bar shes par bya/ /rang gi byang chub sems chu yis/ /ji ltar snying gi lha mchod pa/ /de ni 'bras min 'bras bu can/ /'di yi sbyor bas byed pa yin/ /rdzas ma tshogs dang bsam gtan bral/ /sngon bya med dang go rims bral/ /'di ni bar chad sbyor ba ste/ /mkhas pa rnams kyis spang bar bya/ /rdo rje'i lte ba 'khor lo can/ /bzhi po sbyor ba'i bdag nyid de/ /dran med mtha' yas dngos grub 'byung / /bla na med pa'i gtor ma'o/ /gang zhig gtor ma'i rim pa la/ /mi brten dngos grub sbyor ba spangs/ /zhes pa 'di ni byang chub sems dpa' sems dpa' chen po'i ji srid du gtor ma grub pa'i dam tshig chen po'o/ /de nas gzhan yang bshad bya ste/ /mkhas pas lta ba'i dus dag tu/ /sgyu ma mig yor lta bu ste/ /dngos po'i lta bar rab bzlog nas/ /'dod yon lnga la de ltar spyod/ / dmigs sogs sems dpa'i 'khor lo can/ /der ni lha mos rtag tu dgyes/ /ro ni mchog tu gyur pa ste/ /yid ni tshim par byed pa yin/ /nyan thos sdom pa'i 'khor lo dang / /reg pa'i bar du sbyor ba spang / /thabs mchog 'di yis byed pa ste/ /'bras bu khyad par sgrub par byed/ /ces pa 'di ni byang chub sems dpa' sems dpa' chen po'i ji srid du lta ba la sogs pa'i dam tshig go/ /gang zhig gis ni gang zhig la/ /gang zhig byed par 'gyur ba ni/ /rnal 'byor mchog gi byed pa ste/ /snying ga'i 'khor lo chen po la/ /snying ga'i 'khor lo bcug nas ni/ /gnyis su med par gyur pa dang / /lte ba'i rlung gis me 'bar bas/ /lha tshogs rnams ni smin byas te/ /lce yi 'khor lo chen po ni/ /byin za ru ni dmigs par bya/ /zas la sogs pa za dus su/ /zas ni sha lngar dmigs byas te/ /skom ni bdud rtsi lnga ru bsam/ /de las lag pa gzar bu gnyis/ /za ba'i dus su lha rnams la/ /zhal du gsol bas mnyes gyur nas/ /'od kyis zhi ba'i dus dag tu/ /lus ngag yid kyi sgrib pa sbyong / /rgyas pa'i dus su bcud rnams 'gugs/ dbang dus thams cad dbang sdud de/ /gsad pa'i dus su bkug gyur nas/ /bcad gyur sha khrag gsol bar bsams/ /zas sogs bdud rtsi thams cad kyang / /lag pa yis ni dbul ba dang / /yang na lha mos dbul ba dang / /rdo rje lce thung las byed pa'i/ /cho ga'i mchog ni 'di yis byed/ / ces pa 'di ni byang chub sems dpa' sems dpa' chen po'i ji srid du nang gi sbyin sreg gi dam tshig chen po'o/ /gzhan yang sems can mos pa yis/ /bsam gtan gtso cher mi byed cing / /mchod pa gtso cher byed pa la/ /mchod pa gtso bo'i sbyor ba bshad/ / spos dang me tog mar me dang / /dri chab la sogs sbyor ba la/ /thams cad las kyi sbyor ba yis/ /bsangs nas skyon rnams dag par bsam/ /yon chab zhu bas traM las ni/ /rin chen 'bar ba'i snod mchog tu/ /rang byung yi ge a las ni/ / yon chab dpag med gyur pa la/ /a yis rtog sbyang oM gyis 'bar/ /yang na de yi sbyor ba ni/ /ha yis dkar la 'tsher gyur te/ /ho yis mi 'dod dri rnams bsal/ /hrIHyis myos par 'gyur ba bsal/ /me tog zhu bas yi ge pu/ /de yi 'od kyis me tog bsdu/ / slar 'dus lha mo me tog ma/ /de yi 'od las me tog tshogs/ /bsnyen pa'i skabs su kha dog lnga/ /ha ho hrIHyis byin gyis brlab/ /mchod pa gzhan yang de bzhin du/ /byin gyis brlabs la mchod bya'i phyir/ /phyogs bcu'i sangs rgyas spyan drangs te/ /mdun du gsal bar bsam byas nas/ /me tog dmar po mdun du gtor/ /zhabs 'og pad+mar gyur par bsam/ /gdan gyi mchod pa'i rim pa'o/ /a ha ra yi sngags bzlas pas/ /yon chab thogs pa'i lha mo'i tshogs/ /dpag med mdun du sprul byas te/ /de yis rdo rje glu ldan par/ /yon chab kyis ni phyag zhabs bkru/ /me tog la sogs rim pa yang / /dang por lha mo sprul byas te/ /gnyis pas nam mkhar bzhugs par gsal/ /gsum pas nam mkhar rdo rje'i glu/ /bzhi pa so so'i gnas su dbul/ /gzhan yang 'dod yon lha mo ni/ /dwe Sha te yi sngags las byung / /dkar mo gzugs ni spyan la bstim/ /pad+ma ra tI'i sngags las byung / /dmar po sgra ni snyan la thim/ /karma ra tI'i sngags las byung / /ljang gu'i dri ni shangs la thim/ /rat+na ra tI'i sngags las byung / /ser mo ro ni ljags la thim/ /badzra ra tI'i sngags las byung / /mthing ga reg bya lus la thim/ /'dod pa lnga yi mchod pa'o/ /nang gi mchod pa'i rim pa ni/ /badzra kro d+hI shwa ri yi/ /sngags las mthing ga byang chub sems/ /bud+d+ha kro d+hI shwa ri yi/ /sngags las dkar mo dri chen te/ /rat+na krod+hI'i sngags las ni/ /ser mo sha chen zhes su bshad/ /pad+ma kro d+hI'i sngags las ni/ /dmar po khrag gi thod pa ste/ /karma kro d+hI shwa ri yi/ /sngags las ljang gu dri chu'o/ /lha mo 'di dag thams cad kyang / /thal ba'i mtshan mas lus byugs shing / /zhing chen gyon zhing dril bu thogs/ /g.yas pas thod pa'i snod nang du/ /bdud rtsi so sos bkang ba ni/ /bsam gyis mi khyab mdun du sprul/ /glu yis ljags la mchod pa dbul/ /nang gi mchod pa'i rim pa'o/ /gsang ba mchod pa'i rim pa'am/ /badzra kro d+hI gu h+ya yis/ /mthing ga byang chub sems yin te/ /dkar dmar ser dang ljang gu yis/ /byang chub sems kyang 'dis shes bya/ /gnas lnga nang du dbul ba dang / /gnas lnga phyi ru dbul ba dang / /gnas gcig tu ni dbul ba dang / /lus dang rjes su mthun par bya/ /'di ni rang byung bcom ldan 'das/ /'gro ba'i dpa' bo mnyes pa yin/ /brgyad dang khro ba la sogs pa/ /mchod pa nyi shu dbul ba dang / /gtor ma byin gyis brlab bya ste/ /bdag dang lha mo gang gis dbul/ /ci rigs sbyar te dbul bar bya/ /yi ge oM gyis mgor brgyan cing / /rdo rje glu yis mtha' brten pa/ /lha mo bskyed pa'i sbyor ba ste/ /rang gis gtso bo'am gang byed pa'i/ /ming gi sngags kyis mgo drangs te/ /rdo rje lha mo'i sngags rjes la/ /pU dza me g+ha sa mu dra/ /s+pha ra Na dang sa ma ye hUM/ /zhes pa 'di yis dbul ba yin/ /yang na badzra oM gnyis la/ /pU dza ya ni gnyis pa'i dam tshig yin/ /dkyil 'khor gnyis pa mnyes pa dang / /gtso bos 'khor rnams mnyes pa dang / /'khor gyis gtso bo mnyes pa dang / /yab dang yum la sogs pa la/ /gong ma mnyes gyur de bzhin no/ /rdzas la brten nas mchod pa dang / /bsam gtan kho nas mchod pa dang / /phyag rgya sngags kyis mchod pa yang / /gnyis 'dus gsum 'dus la sogs pa/ /sbyor ba 'dis ni byed pa yin/ /zhes pa 'di ni byang chub sems dpa' sems dpa' chen po'i ji srid mchod pa'i tshogs kyi dam tshig chen po'o/ /de nas gzhan yang bshad bya ste/ /sngags dang bsam gtan dus dag tu/ /bdud kyi sbyor ba brtag par bya/ /bdud ni rnam pa gnyis yin te/ /phyi dang nang na yod pa'o/ /phyi ni gzugs dang sgra dang dri/ /ro dang reg byar shes par bya'o/ /gzugs ni dkar dmar la sogs pa/ /gsal ba de ni sangs rgyas te/ /mi gsal bdud kyi gzugs su 'gyur/ /snyan dang mi snyan de bzhin te/ /gzhan la yang ni de bzhin no/ /rang bzhin med dris dman pa dang / /spyod pa gtsor ston gang yin yang / /rigs dang sbyar la brtag par bya/ /gzhan yang brtag pa'i sbyor ba ni/ /mang ba'i rigs la nyung ba ston/ /che ba'i rigs la chung ba ston/ /de las bzlog par shes par bya/ /dkar po'i rigs la dmar po ston/ / dmar po'i rigs la gzhan pa ston/ /zab pa'i rigs la mi zab ston/ /mi zab rigs la zab ston dang / /spyod rigs lha ston bzlog pa dang / /mtshan ma med pa'i rigs can la/ /mtshan bcas man ngag ston pa dang / /mtshan bcas rigs la mtshan med ston/ / thabs kyi rigs la thabs mtha' dang / /shes rab rigs la'ang de bzhin no/ /'di dag phyi yi bdud du gsungs/ /nang gi bdud kyi sbyor ba ni/ /'du ba bskyed dang bsam pa bsgyur/ /rlung mkhris bad kan 'dus pa rnams/ /med bzhin bskyed pa'ang bdud yin no/ / dam pa dag la sun dbyung dang / /rtag tu bsam pa mi mos dang / /tha mal pa la chags pa dang / /khro dang 'khon du 'dzin pa dang / /'chab dang 'tshig pa la sogs pa/ /nyon mongs nye ba'i nyon mongs rnams/ /bsam gtan ngang las skyes 'gyur ba/ /'di yang bdud kyi rtags yin no/ /rtag tu mig rtsa rgod pa dang / /de bzhin 'phyar dang g.yeng ba dang / /zhum pa dang ni g.yeng ba dang / /de dag kun kyang bdud kyi rtags/ /bsam gtan 'phro mi gsal ba dang / /nyams mi dga' zhing log la dad/ /'di yang bdud kyis bslus pa'o/ /gzhan yang dam pa ston pa dang / /bdud 'gyur rgyun la brtag par bya/ /zas dang skom la lnga rol pas/ /shas cher 'dod par gyur pa dang / /kun rdzob spyod la dga' ba dang / /khyad par phyag rgya rang gi rigs/ /de la nyon mongs skye ba dang / /log pa'i bla ma bsten pa dang / /sdig pa'i grogs po bsten pa dang / /bsam gtan mi mos log chos mos/ /'di yang bdud kyi rtags yin no/ /chags dang khong khro la sogs pa/ /skye zhing nus pa 'phro ba yin/ /dri dang ro dang reg byar sbyar/ /dbugs rgod skyigs bu rngam pa 'byung / /de la sogs pa'i sbyor ba rnams/ /bsam mi khyab ste gzhan las shes/ /bdud kyi brtag pa mi shes na/ /yang dag 'bras med log 'bras bu/ /zhes pa 'di ni byang chub sems dpa' sems dpa' chen po'i ji srid du bdud kyi bslu ba brtag pa'i dam tshig go/ /thams cad bdud kyi rtags ma yin/ /yang dag rtags kyang bshad bya ste/ /yang dag don gyi bla ma la/ /sems bskyed dbang bskur la sogs rtsom/ /dam tshig rnams ni mi brjod cing / /rang gi rigs kyi bu mo bsten/ /dge ba'i grogs rnams rten byed dang / /me tog sngon po 'thub dang / /glegs bam dag la spyod pa dang / /chos kyi bgro ba byed pa dang / /gzhan gyis mchod dang gzhan la mchod/ /stong gsum thams cad mthong ba dang / /nyi zla'i steng na 'dug pa dang / /'khor lo klad la bskor ba dang / /mchod rten rtse la 'dzeg pa dang / /rak+sha'i phreng ba bgrang ba dang / /gos sngon lus la gyon pa dang / /gos sngon sku gzugs mthong ba dang / /bde gshegs khang par phyin pa dang / /mi gtsang me yis bsreg pa dang / /khrag sogs lus las 'thon pa dang / /sha mdog sngon por 'dug pa dang / /bdud rtsi lnga la spyod pa dang / /rtag tu gcer bur 'dug pa dang / /rang lus ral gris gtubs pa la/ /bde ba skye bar gyur pa dang / /gzhan gyis chos rnams ston pa dang / /lus la mi sdug gzugs byung nas/ /me nang sreg par gyur pa dang / / de la sogs pa'i sbyor ba rnams/ /rmi lam dag tu 'byung ba la/ /rang bzhin med pa la sogs kyis/ /brtan zhing mi g.yor gyur pa yin/ /zhes pa 'di ni byang chub sems dpa' sems dpa' chen po'i ji srid du yang dag pa'i rmi lam gyi mtshan ma brtag pa'i dam tshig go/ /gzhan yang sems nyams brtag pa ni/ /dbang blang mos dang bsrung la mos/ /sems can dman la tshad med 'byung / /yang dag don la spro ba skyes/ /sems can bdag dang 'dra bar sems/ /nga rgyal la sogs nyon mongs chung / /zab pa'i don la chog ma shes/ /dngos po'i rdzas la chags pa med/ /rtag tu sbyin pa gtong la dga'/ /rkang lag bcad kyang 'khrul pa med/ /ldang ba yang zhing zo mdog bde/ /rang gis lha dang mthun pa la/ /'jig rten rin chen tshogs bkang dbul/ /som nyi med cing yid ches ldan/ /de la sogs pa'i sbyor ba rnams/ /zhib tu bla ma'i zhal las shes/ /zhes pa 'di ni byang chub sems dpa' sems dpa' chen po'i ji srid du sems kyi rtags brtag pa'i dam tshig go/ /dngos po'i rdzas kyi khyad par la/ /mngon sum rtags ni brtag bya ste/ /dang po bris sku lugs ma la/ /sangs rgyas skur snang rab yin te/ /dam pa'i sgra 'byung 'bring du bshad/ /'od dang du ba la sogs pa/ /tha ma'i rtags su shes par bya/ /mchod pa'i rdzas la brten byas pa/ /byin brlabs 'bras bu rab yin te/ /sgra dang 'od ni gong ma bzhin/ /sbyin sreg sbyor la brten pa la/ /me dbus sangs rgyas rab yin te/ /de las sgra 'byung 'bring du bshad/ /me ni bdag gi dbang 'gyur zhing / /las dang mthun pa tha ma'o/ /gtor ma'i sbyor la brten pa yang / /'od dang sgra dang khol ba dang / /gang dmigs la byin de dbang 'gyur/ /rab 'bring tha ma go rims bzhin/ /dung dang dril bu la sogs la/ /ma dkrol sgra rnams 'byung ba dang / /'od dang g.yo ba de bzhin no/ /yang na rnal 'byor slob ma la/ /brten pa'i rtags ni bshad bya ste/ /dbab pa'i cho ga'i dus dag tu/ /slob mas thams cad shes pa dang / /smra ba dang ni 'gul ba dang / /rab 'bring tha ma go rims sbyor/ /gzhan yang 'od gzhan brtag bya ste/ /dkar dmar la sogs gang gi 'od/ /gsal ba sgyu mar bsgom pa dang / /mi gsal gshegs pa byas la sogs/ /brtan dang bogs dbyung bsam gsal ba/ /'di yang rab kyi rtags yin no/ /sku gsung thugs kyi mtshan ma rnams/ /gong gi stobs kyis gong 'gyur dang / /gang zhig sgra ni stong las byung / /rang dang 'phrod pa'i man ngag ston/ /sdig spong dge la 'jug pa yi/ /brtan pa dam pa ston 'gyur na/ /de yang yang dag rtags yin no/ /gzhan yang rtags kyi sbyor ba ni/ /mdzes pa'i lta mos bde ster dang / /nam mkha'i lha mos dbang bskur dang / /byang chub sems kyi chu 'bebs dang / /mchod pa'i tshogs rnams ster ba la/ /gang tshe sems snang sgyu ma dang / /rang bzhin med par bsgom pa yis/ /gsal brtan bogs dbyung rab tu gyur/ /'di yang yang dag rtags yin no/ /gzhan yang brtag pa'i sbyor ba ni/ /'ja' tshon dang ni sprin sngon dang / /nyi zlas stong khams gang ba dang / /sprul nag la sogs lus la gnas/ /der ni khang pa chen po dang / /tsan+dan tshal dang nor bu'i tshal/ /mchod rten sku gzugs sngon po dang / /puSh+pa sngon po rdo rje can/ /rtag tu thod rlon mdun byung ba/ /'di yang yang dag rtags yin no/ /dbu rgyan rdo rje dril bu dag /rtag tu mdun na byung ba 'am/ / bdag gi lag tu 'byung 'gyur ba/ /'di yang dam pa'i rtags yin no/ /khrag dang mchi ma dngos byung dang / /yi dags dbang du sdud nus dang / /yi dags zil gyis mnan pa'i tshe/ /gnad gyur smra ba byed pa dang / /skad ngan dang ni tse sgra 'don/ /'o dod khus 'debs byed pa yang / /yang dag pa yi rtags yin no/ /gzhan yang bsam gtan byed dus su/ /dam chos sngon du brda ma brtags/ /phyis ni rjes su dran pa dang / /ma thos de la ston pa dang / /gar dang phyag rgya la sogs pa/ /rdo rje dril bu'i sbyor ba rnams/ /ma grags mngon du shes gyur pa/ /'di dag kun kyang rgyal ba yis/ /rab dang dam pa'i rtags su gsungs/ /yang dag rtags rnams thob bya dang / /log pa'i rtags ni spang bya'i phyir/ /rtags rnams bzlog pa'i cho ga yi/ /dam pa bdag gis bshad par bya/ /dang por byang chub sems bskyed de/ /gang du rtags kyi sbyor 'byung la/ /dga' ba dang ni mi dga'i sems/ /gnyis dang bral ba'i bsam pa bzlog /sems kyi 'khrul par lta ba dang / /sgyu ma rang bzhin med pa yi/ /lta ba bzlog pa'i cho ga'o/ /gong du dri chen sha chen dang / /byang chub sems la spyod byed pa/ /spyod pas bzlog pa'i cho ga'o/ /gang gis dam tshig rtag tu bsrung / /de la shugs kyis sbyor ba med/ /dam tshig gis ni bzlog pa'o/ /yi dam lha la lus 'bul zhing / /dam tshig nyams pa bshags pa dang / /phyis ni sdom pa 'dzin byed pa/ /bshags pas dbang du sdud pa'o/ /de la drag po'i sbyor sngags dang / /mi 'da' gsang ba'i sngags zlos pa/ /sngags kyis bzlog pa'i cho ga'o/ /bdag las byung ba'i khro tshogs kyis/ /lus la mtshon cha'i char 'bebs dang / /bdag 'od dbyings las byung ba yis/ /thogs 'bebs sbyor ba rtsom pa dang / /me dang chu yi 'khor lo yis/ /sbyor ba'i cho ga 'di byed pa/ /bsam gtan stobs kyis bzlog pa'o/ /yungs kar dang ni yungs nag dang / /ske tshe shang tshe gu gul dang / /dug 'bru la sogs sbyor ba yis/ /zlog par byed pa 'di dag ni/ /rdzas kyis bzlog pa'i cho ga'o/ /yang na bdag nyid khro bo yi/ /mdun gyi snying du sems dpa' bskyed/ /las bcol rdo rje me 'bar ba/ /'dir yang bsam gtan sbyor ba'o/ /gang zhig de yi mgrin pa ru/ /yi ge AH ni bsam bya ste/ /spyi bo 'khor lo bskor ba yis/ /smros shig byas pas smra bar 'gyur/ /'di yang bsam gtan sbyor ba'o/ /thod pa gsum gyi phyag rgya dang / /dam tshig rdo rje sdigs mdzub dang / /rgya gram 'khor lo'i sbyor ba yang / /phyag rgya'i sbyor bas gsungs pa yis/ /bkra shis 'khor lo'i sbyor ba yis/ /chags par 'gyur na rul myags dang / /dum bu lang ling rnam par bsam/ /khro bor gyur na byams la sogs/ /gti mug la ni chos rnams byed/ /de bzhin mi dge'i gnyen po bsam/ /gzhan yang log pa'i don ston na/ /bdag dang chos dang chos can rnams/ /rang bzhin med pa sgyu mar bsam/ /des ni zhi dang gsal ba yin/ /gal te brda dang phyag rgya las/ /sogs pa'i sbyor ba ston gyur na/ /snying nang sems dpa' bcug nas ni/ /mi yi sbyor bas gsal 'gyur na/ /de la lan dang bcas par bya/ /thabs kyis ston pa shes rab ste/ /shes rab ston pa thabs dang sbyar/ /gleng bslang ba la lan sbyin te/ /des ni zhing dang gsal bar yin// gsang ba'i rol pa'ang de bzhin no/ /de bas mkhas pas dus kun du/ /sbyor ba 'di ni bsam par bya/ /bdud rnams sbyor ba kha cig la/ /shes rab ma yin spyod pas rdzogs/ /'di yis 'grub par 'gyur ba yin/ /sbyor ba 'di la bzlog pa yang / /gnyis 'dus dang ni bcu 'dus dang / /thams cad 'dus pas 'grub pa'ang yod/ /ces pa 'di ni byang chub sems dpa' sems dpa' chen po'i ji srid du bdud bzlog pa'i dam tshig chen po'o/ /gang zhig bdag dang gzhan rnams la/ /gdug pa brtson pa tshar bcad phyir/ /sbyor ba 'di ni bsam par bya/ /sa gzhi yid 'ong mdzes pa ru/ /sngon 'gro'i bya ba rdzogs pa dang / /gang ltar 'dod pa'i sku bskyed de/ / zhi ba la sogs so so yi/ /bzlas dang bsdu ba rdzogs gyur nas/ /tshogs dang gtor mas bzlog par bya/ /de yis dul bar ma gyur na/ /rkang par ral gri g.yas pa la/ /g.yon pa lcags kyu'i sbyor ba yis/ /mi g.yo g.yas g.yon stang stabs bya/ /bsam gtan de dang 'brel pa ste/ /ral gri'i gsang sngags bzlas pas 'grub/ /gdab pa yang ni de bzhin no/ /yang na gzir ba'i cho ga ni/ /nad pa'am ni gzugs dag la/ /dmigs pa legs par dbab bya ste/ /rkang pa g.yas la ri rab ste/ /rgya gram 'bar bas mtshan pa'o/ /rgyal chen phyogs skyong gong ma ste/ /khro bo bzhi ni 'og ma'o/ /pus mor chu srin rgyal mtshan te/ /gnas lngar khro bo lnga po bskyed/ /g.yon par lcags kyu'am rdo rje'o/ /dgug pa la sogs sbyor byas nas/ /snying gar mnan par gyur pa yis/ /'byung po khrag tu 'thon gyur te/ /mi bzod smre sngags 'don pa dang / /lha chen po yang 'dar bar 'gyur/ /yang na snying nang me dpung bskyed/ /'bar ba dang ni bsreg par 'gyur/ /phyogs skyong gang dang gang 'dul yang / /gong ma'am ni khro bcus 'grub/ /khyad par klu yi sbyor ba yang / /gzir ba mkha' lding lnga po ste/ /yang na snying pad 'bar ba brtsam/ /lnga la lnga ni legs gnas te/ /lnga po yi ni sbyor bas 'dzin/ /pus mo dpung pa rnam bzhi la/ /thogs med 'khor lo bzhi bsams te/ / rdo rjes bsreg cing lcags kyus 'dzin/ /sbyor ba 'di ni dam pa'o/ /gzhan yang sbyor ba dam pa ni/ /gang zhig bde gshegs skur gnas te/ /g.yas par rtse lnga thogs med lnga/ /g.yon par rtsa las byung ba'i steng / /su las rin chen rdo stengs su/ /khom sha las byung rnam lnga bsam/ /'od zer gyis ni legs bkug ste/ /nus dang ldan par byas nas ni/ /bdag 'od bu ga dgu sogs zhugs/ /lte ba'i 'khor lo bskul byas te/ /g.yas kyi rdo rjes spar byas nas/ /g.yon pas len par byed pa yin/ /g.yon sbyor shin tu rmad du byung / /yang na nang du bsreg par bya/ /des ni 'grub par 'gyur ba yin/ /zangs sogs dmar po'i snod du bkod/ /de ni bdud rtsis gso bar bya/ /phyi nas rang gi gnas su bskyal/ /'khor lo'i rtsibs brgyad 'bar ba ni/ /gnas brgyad du ni bsams byas te/ /bsregs pas rlung gis gtor gyur nas/ /bkrus pa byang chub thig le byas/ /dpal ldan skur gyur byin brlab cing / /dbang thob sku yi gsang sngags bzlas/ /'di yis gdug pa sel ba yin/ /khyad par can gyis bdag dang gzhan/ /myur du phan gnod las rnams byed/ /de bas 'di ni thabs kyi mchog /sbyor ba gzhan las rnyed ma yin/ /zhes pa 'di ni byang chub sems dpa' sems dpa' chen po'i ji srid du bgegs bzlog pa'i dam tshig chen po'o/ /gang zhig gdug pa 'dul 'dod pas/ /gsad pa'i cho ga dam pa ni/ /dur khrod la sogs 'jigs gnas su/ /drag po'i dkyil 'khor dug gis bris/ /rkang rjes gos la sogs pa la/ /gdug pa'i gzugs brnyan byas nas ni/ /de nyid snying gar ming rus gzhug /tsha ba bskyed pa'i sbyor ba bya/ /de nas tshon skud sna lngas bcing / /rabs chad thod pa rlon pa ru/ /de ni gzhug par bya ba yin/ /de 'od las ni nr-ir gyur te/ /de las gang yin gzugs su gyur/ /bdag las sprul pa'i khro bo'i tshogs/ /dpag tu med pa'i 'jig rten bkang / /rdo rje dgug pa'i sngags bzlas pas/ /lcags kyu la sogs bzhi po 'phros/ /gang yin de ru dgug byas te/ /las kyi rgya'am ri rab kyis/ /de yi steng nas mnan par bya/ /byin gyis brlab pa'i lha rnams kun/ /las kyi khro bos dbye ba dang / /me 'bar lcags kyu phur pas 'debs/ / srog rtsa'i bdag po bram ze'i gzugs/ /gdug pa'i khro bo'i sbyar mas bdug /khros pa'i stobs kyis khrag 'byin cing / /ro la za bar byed pa yin/ /bdag dang ye shes khro bo las/ /sprul pa thogs lnga sngags las byung / /des lus gcod par byed pa dang / /phye mar yang ni 'gyur ba yin/ /de dag kun gyi sbyor ba yis/ /'grub par ma gyur pa rnams la/ /phye ma gsum gyis gsad pa yin/ /lcags phye zangs phye rdo lcags la/ /thog chen sbyor ba'i las byas na/ /dkyil 'khor kun gyi sbyor ba yis/ /gsad par gyur pa gdon mi za/ /de yis gsad par ma gyur na/ /phur pa kho nas gsad par bya/ /lcags dang rigs mthun gyur pa la/ /khro bo de dang mthun byas nas/ /dkyil 'khor kun gyi sbyor bas 'grub/ /gang zhig ral gri'i sbyor ba dang / /rdo rje tho ba'i sbyor ba yang / /myur du 'grub par 'gyur ba yin/ /yang na gsad pa'i dam pa yin/ /yungs kar dang ni yungs nag dang / /de bzhin gdug pa'i 'bru rnams kun/ /khro chung sbyor bas 'grub pa yin/ /dug dang myos pa'i chur sbyar te/ /gdug pa sbrul nag sbyor ba yis/ /bkug cing kha ru blugs gyur nas/ /lus nang sbrul nag sbyor byas na/ /'grub par 'gyur ba gdon mi za/ /yang na ma mo'i sbyor ba yis/ /bud med thod pa lcang lo'i nang / /rims khrag dug dang bcas blugs na/ /snying nag ma mo'i sbyor ba yis/ /khar blugs gyur na myos nas 'chi/ /thod par klad pa'i 'khor lo bskor/ /yang na mdze can thod pa ru/ /de la dgug pa sngon 'gro bas/ /mdze can khrag gi sbyor ba yis/ /lus nang gang nas lcags sbrang ngam/ /lcags sdig srin bu la sogs pa/ /ba spu'i bu gar sbyor byas na/ /de ni mdze yis 'chi bar 'gyur/ /dug dang myos pa'i rims khrag la/ /lug dang glang gi khrag dag gis/ /smyo byed sbyor ba rab byas nas/ /gang du sha ba'i 'khor lor ldan/ /des ni lkugs par 'gyur ba yin/ /lce la ri rab sbyor ba bya/ /yang na mnan pa'i sbyor ba ni/ /byang du bltas pa'i chu mig tu/ /thod pa dum bu drug yod par/ /gang yin ming rus bcug byas te/ /dgug pa la sogs byas na ni/ /zhag bdun gyis ni 'chi bar 'gyur/ /yang na bsam gtan kho na yis/ /gsang ba'i thabs ni bshad bya ste/ /dgug pa sngon du 'gro ba yis/ /mdun du za byed kha gdangs la/ /phur bu spyi bor btab byas nas/ /rkang par khrag byung za byed 'jig /de ltar byas na skya lam 'gyur/ /gsad pa'i cho ga dam pa yin/ /yang na spyi'u gtsug gyur pa la/ /mdun du spyi bsdus rdo rje ni/ /kha dog nag po 'bar ba la/ /me yi phreng bas bskor gyur te/ /sum skor 'od kyi sbyor ba yis/ /rdo rje spyi bor zhugs gyur nas/ /'od zer snying nas sreg par byed/ /thig le dag kyang 'joms pa yin/ /yang na 'od zer nag pos yang / /lte ba'i 'khor lo bskul byas te/ /me 'bar stobs kyis bsreg pa dang / /spyi bo'i khu ba bkug nas ni/ /rkang pa'i me nang sreg pa'am/ /yang na za byed kha ru sreg /yang na rdo rje'i yi ge gsal/ /spyi nas bshang bar rdo rjes brdeg /bshang ba'i yi ge bshig pa yin/ /yang na snying nang raM las mes/ /me nang me yis sreg pa dang / /thal bar byed pa rdo rje yin/ /'dis ni ma rungs 'joms par byed/ /yang na 'khor lo nag po'i steng / /gang yin dngos su gsal byas nas/ /snying gi nang du sbrul nag po/ /bsam gyis mi khyab phu las byung / / stong gsum sbrul nag bkug nas bstim/ /sbrul las lcags sbrang gze ma yis/ /ba spu'i bu ga nas phyung zhing / /me yis bsreg par 'gyur ba yin/ /'di ni thabs kyi dam pa'o/ /gzhan yang gsad pa'i bsam pa ni/ /lte ba'i yi ge bsams nas kyang / /raM las byung ba'i 'og nas 'bar/ /rdo rje phur bus steng nas rdeg /'od zer lcags gze'i tshul can gyis/ /yi ge dkrug cing sreg pa dang / /gshegs pa'i sbyor ba byas pas 'grub/ /de phyir zab par bstan pa yin/ /yang ni snying gar nr-i bsam mam/ /ming yig dang por gnas pa las/ /'od zer lnga yi sbyor ba yis/ /yi ge ma rungs byed pa yin/ /spyi bo nas ni rkang pa'i bar/ /mkhas pas 'od zer nag pos dgang / /'od zer 'tshub mas dgra nyid kyang / /steng du g.yo zhing yi ge bsregs/ /nag po'i rdzas kyi sbyor ba byas/ / raM las byung ba'i gru gsum du/ /sbrul nag tshogs kyis bkang ba la/ /nang du gdul bya bkug gyur nas/ /lcags gze nyi ma'i sbyor ba bya/ /drag po chen po bdud chen dang / /dbang phyug lha chen la sogs pa/ /sbyor ba 'di ni byas tsam gyis/ /rdo rje bzhin du 'grub par 'gyur/ /yang na dbang phyug mthun chen gyis/ /rigs pa 'di yi sbyor ba la/ /zla ba zer la de dag gis/ /dmigs pa chu yi nang du 'bab/ /sbyor ba mchog la gnas byas nas/ /dug dang me yi sbyor ba yis/ /rtag tu 'chi bar 'gyur ba yin/ /zhes pa 'di ni byang chub sems dpa' sems dpa' chen po'i ji srid du gsang ba'i dam tshig chen po'o/ /gzhan yang dngos grub sbyor ba rnams/ /gang du mthar phyin byed pa yi/ /rdo rje'i sbyor la brten par bya/ /las bzhi'i rgyu las byung ba las/ /shin tu mdzes pa'i rdo rje byas/ /gang ltar 'dod pa'i dbyibs su bsgyur/ /'od zhu hUM las byung ba yi/ /rdo rje 'bar ba 'od dang ldan/ /de las rdo rje thugs mchog sku/ /gnyis med thim nas byin brlabs dang / /dbang bskur mchod dang bstod pa dang / /las bcol sngags bzlas 'od du zhu/ /de las rdo rje kha dog lnga/ /gang gis las dang mthun par bskyed/ /badzra satwa zhes pa'am/ /rang gi rtsa ba'i sngags bzlas pas/ /ye shes rtags rnams bkug bya ste/ /'od 'gyur sbyar ba brtsam par bya/ /gang zhig 'di yi sbyor ba yis/ /las rnams ma lus 'grub par 'gyur/ /dril bu phreng ba la sogs pa'ang / /lhag par gnas pa las byung las/ /'di yis dngos grub thams cad kun/ /'grub par 'gyur gyi gzhan du min/ /zhes pa 'di ni byang chub sems dpa' sems dpa' chen po'i ji srid du rdzas bsgrub pa'i dam tshig chen po'o/ /ji srid khrus kyi sbyor ba ni/ /gang gi bum pa sbyangs byas nas/ /pad+ma bzhi nang gos sngon bskyed/ /bsgrub pa'i cho ga rdzogs gyur nas/ /dag pa'i sngags kyi sbyor ba yis/ /ye shes chu bo byin brlabs te/ /gang la bkrus pa tsam gyis ni/ /dngos grub thams cad 'byung ba yin/ /gang zhig dam pa'i don la gnas/ /lha mo rgyun 'bab chu bo yis/ /gang du bkrus pa tsam gyis ni/ /'dod pa thams cad sgrub par byed/ /ces bya ba 'di ni byang chub sems dpa' sems dpa' chen po'i ji srid du rdo rje khrus kyi dam tshig go/ /bsam gtan dag la mi gnas shing / /rtag tu drag po'i sngags rtsom pa/ /de yis nor bu bzhin sgrub phyir/ /sngags kyi nges pa bshad par bya/ /oM na mo badzra pA Ni ma hA yak+Sha se nA pa ta ye badzra kro d+ha nI lAM ba ra d+ha ra hUM hUM phaT/ oM na mo sarba d+harma ku ru ban+d+ha ye hUM phaT/ oM na mo badzra kro d+hI shwa ri mu hUM hUM phaT/ oM shAn+tiM ku ru swA hA/ puSh+TiM ku ru swA hA/ ba shaM ku ru na ma hrIHhUM mA ra ya mA ra ya sha trUM phaT/ oM staM b+ha ya staM b+ha ya hUM ba liM ba liM/ gr-ih+Na gr-ih+Na/ khA ti khA hi a kA ro mu khaM sarba d+harmA NAM A d+ya nut+pan+na ba na ye hUM phaT/ oM rat+tI sha ye d+ha ba ra tsa mu khaM ku ru hUM phaT/ oM sarba de ba mA ra ya tshin+da tshin+da hUM phaT/ bin+da bin+da hUM phaT/ gr-ih+Na gr-ih+Na hUM phaT/ ha na ha na hUM phaT/ ta thA ya ta thA ya hUM phaT/ dzA la dzA la hUM phaT/ su ru su ru hUM phaT/ mu ru mu ru hUM phaT/ nA sha ya nA sha ya hUM phaT/ gr-ih+NA pa ya gr-ih+NA pa ya hUM phaT/ ha sa ya na ha sa ya na hUM phaT/ ki li ki li mA ra ya hUM phaT/ s+pho Ta ya s+pho Ta ya hUM phaT/ nA ga rA dza nA ga rak+Sha/ yak+Sha ku ru sarba ra sha rak+Sha rak+Sha/ bi d+h+wan+sa ya he b+ha ga bAn ku ru ku ru/ ba shaM ku ru hUM phaT/ oM a pasma ra bi na shi ka ra hUM hUM swA hA/ pre ti ba ne sho ka hUM phaT/ oM shud+d+he shud+d+he bi shod+ha bi shod+ha ni/ sarba pA paM bi shod+ha ni hUM phaT/ oM dz+wa la dz+wa la sarba pA paM da ha ni badzra dz+wa la hUM phaT/ oM gu la pA ya gu la pA ya/ sarba pA paM d+harmA shud+d+he shud+d+he hUM/ oM gr-ih+Na sarba sha trUM mA ra ya mA ra ya nA sha ya sarba da ha badzra hUM phaT/ pa ra bit+t+wa na/ rak+Sha bit+t+wa na/ yak+Sha bit+t+wa na karma g+ho ru bit+t+wen mA ra ya hUM phaT/ ces pa 'di ni byang chub sems dpa' sems dpa' chen po'i ji srid du rdo rje sngags bsgrub pa'i dam tshig chen po'o/ /de nas gzhan yang bshad bya ba/ /gang zhig mchog gi don bsgrub pa/ /de yis nor bu bzhin sgrub phyir/ /de nyid rgyan ni bshad par bya/ /gang zhig nor bu 'phel byed pa/ /de yis rtag tu don 'di bsam/ /snying gar bcu drug brgyad dam bzhi/ /dbu nas thabs dang shes rab 'bar/ /dkar zhing zlum pa'i thig le bsam/ /'byung bzhi dang po yi ge brgyad/ /g.yas dang g.yon du bsgom par bya/ /de las byung ba lnga'am bcus/ /thig le dag la brten nas ni/ /dbang po'i rgyu ba dgag par bya/ /'byung ba dang ni 'jug pa dang / /gnas pa gnyis kyi bdag nyid can/ /gang dag 'di la rtag gnas nas/ /rnal 'byor bde ba myong bar byed/ /yang na snying ga nas byung ba/ /lnga'am khrag dang chu dang byang chub sems/ /mdung dang ral gri'i sbyor ba can/ /mgrin pa'i pad+ma kha bye bsam/ /phyogs su gzhol ba slob pa ni/ / kha bye thig le 'gro 'od bdag /'byung dang 'jug pa 'dir bslabs nas/ /rnal 'byor bde ba myong bar byed/ /re re 'am ni lnga yi bar/ /slob ma rnal 'byor bde ba'i lam/ /snang mtha' yas kyi gnas dag na/ /bzhi bcu'am ni sum cu gnyis/ /bcu drug brgyad kyi rnam pa la/ /'byung bzhi A li bcu drug ni/ /g.yas dang g.yon du 'khor bar byed/ /gang zhig dbus nas dpa' bo ste/ /dbang po'i rgyu ba 'gog pa dang / /bde chen kha bye de bzhin du/ /'byung 'jug 'di la gnas pa ni/ /rtag tu bde ba chen po bsgrub/ / gang zhig spyi bo'i khang pa ru/ /bdun cu gnyis sam drug cu bzhi/ /sum cu rtsa gnyis brgyad dang bzhi/ /A li gnyis dang kA li gcig /'byung ba bzhi dang yang dag ldan/ /steng dang 'og tu rgyu ba'i tshul/ /dbang po 'gengs par byed pa'am/ /yang na tshangs dang smin mtshams bar/ /rtsa lnga kha 'byed sbyor bar byed/ /lte ba dpa' bo gsang ba'i bdag /brgyad dang nyi shu'i sbyor ba'am/ /phyed bcas A li kA li 'bar/ /gang zhig dpa' bo rlung stobs kyis/ /rtsa lnga snying gar slob pa dang / /dbang po 'gegs par byed pa yin/ kha cig slob pa'i dus dag tu/ /nyi ma rdo rje sbyor ba ste/ /la la yi ge thig ler 'dod/ /bzhi ni so sor slob pa ste/ /gcig ni mdud par slob pa'o/ /gang zhig 'di la rtag gnas nas/ /bde ba chen po sgrub par byed/ /gzhan gyi sbyor bas ma gsungs so/ /yang na dbang po 'gegs pa dang / /rtsa lnga'i sbyor ba ma gsungs te/ /gang zhig 'di yi sbyor la gnas/ /dbab dang bzlog pas 'grub pa yin/ /ji srid 'khor lo gong ma la/ /de yi sbyor ba ma gsungs te/ /gang zhig rdo rje'i sbyor ba yi/ /bzhi po 'di ni brtsam par bya/ /sum cu gnyis sam bcu drug dang / /brgyad dang bzhi yi rnam pa la/ /bzhi po kho na'i sbyor ba yis/ /dbab dang bzlog par bya ba'am/ /brgyad dang gnyis la brten pa dag /dbab pa gong 'og gzhan du sbyor/ /dbab pas dga' ba bskyed pa dang / /bzlog pas dga' ba bskyed pa dang / /bar du skye dbar gyur pa dang / /gang zhig rgyun la skye ba dang / /'di dag rigs kyi dbang du gsungs/ /gang zhig rigs gzhan sbyor ba la/ /rigs gzhan pho nya'i sbyor ba bya/ /gang tshe rang gi rigs mthun pa/ /byin gyis brlabs nas gnyis med sbyor/ /rtag tu dam pa bde ba 'bab/ /'di yi sbyor bas dga' ba rnams/ /rim skye phyag rgya'i dngos grub 'grub/ /gang zhig 'di yi sbyor ba yang / /las las bskyed pa'i bu mo dang / /ye shes bu mo sprul pa dang / /g.yon gyi yum dang snying ga las/ / byung ba'i bu mo sbyor byed pa/ /'di la brten nas rnal 'byor pa'i/ /ye shes skyed par byed pa yin/ /tha ma'i las kyi dus dag tu/ /rked pa thig gus bcing ba dang / /dbugs kyi lcags kyus bzlog pa yang / /'di yis 'byung gi gzhan du min/ /gang zhig sbyor ba gzhan dag kyang / /nyi ma me ni lte bar 'bar/ /spyi bo'i byang chub sems bkug nas/ /dga' ba bde ba 'grub pa dang / /rtag tu gzhan nas 'bar ba yis/ /rtse mo las ni 'bar ba dang / /gang 'dir byang chub sems dag gi /bzlog pa rlung sngon bskyed pa dang / /'bar ba rang gi gnas dag tu/ /gang zhig 'di yis byed pa dag /rnal 'byor bas ni spyad par bya/ /yang na 'byed 'dzums sbyor ba yis/ /las kyi rlung bskul sangs rgyas rnams/ /'og min gnas nas rab bkug ste/ /zhing khams brgyad la sogs pa bkug / rnal 'byor ye shes dngos grub 'gyur/ /rnal 'byor ma ni thams cad kyi/ /thod pa byang chub sems bkang la/ /gang gis dmigs pa de dag gis/ /rtag tu bde ba chen po 'grub/ /thabs ni kun rnams ma lus pas/ /ri lu'i phreng ba mgul na thogs/ /sbrul gyi zhags pa'i sbyor ba yis/ /kun du 'khyud pas dngos grub 'byung / /gang du rnal 'byor ma rnams la/ /rtag tu bde ba ster byed pa/ /sna tshogs dpal ldan rdo rje can/ /'di la dmigs pas rnal 'byor ba'i/ /'dod pa rdo rje bzhin du 'grub/ /gang zhig gtso bo'i sbyor ba la/ /dmigs nas gsal bar 'gyur ba'i tshe/ /zhing khams gang dang gang rung bar/ /sprul pa'i byin rlabs phyogs bcur 'gyed/ /gang tshe de yi sbyor ba yis/ /zhing khams yongs su gyur nas ni/ /thams cad bde ba chen por 'grub/ /yang na rnal 'byor bde chen por/ /gsal nas khyab pas spu ldang zhing / /snang ba gsum ni 'byung bar 'gyur/ /rnal 'byor pa ni thams cad kyis/ /bde ba chen po skyed par byed/ /yang na 'khor lo'i sbyor spangs pas/ /gnas ni bzhi'am brgyad dag dang / /bcu drug gnas su thig le bsgom/ /thams cad 'pho dang 'jug pa la/ /rnal 'byor bde ba skyed par byed/ /gang zhig 'di la rtag gnas na/ /zla ba drug gam bcu gnyis sam/ /de las gyur pa'i sbyor ba yis/ /rnal 'byor dngos grub 'grub par byed/ / sangs rgyas byang chub sems dpa' dang / /rnal 'byor pho dang rnal 'byor mo/ /pho nya 'khor tshogs thams cad kyis/ /rtag tu bde ba ster bar byed/ /bdud dang gnod sbyin la sogs pa/ /gang gis gnod pa'i tshogs rnams kun/ /ma lus kun du zhi bar 'gyur/ /gang zhig don 'di log rtog can/ /dbyar gyi tsan+dan lta bu la/ /gang zhig ster bar 'gyur ba ste/ /rtag tu brlag par 'gyur ba yin/ /gsang ba'i don rnams thams cad kun/ /dri mchog ga bur bzhin du btsa'/ /gang zhig 'di las log pa la/ /'bras bu med cing ngan song ltung / /mkha' 'gro byad ma srin po dang / /ro langs la sogs kun gyis gsod/ /seng ge'i 'o ma snod nang du/ /blugs pa ji bzhin dngos grub med/ /tsan+dan sbrul gyi snying po bzhin/ /mkhas pas bstan pa mi ster bar/ /glegs bam mthong nas khengs 'gyur ba/ /da la gsang ba bstan mi bya/ /gang zhig snod ldan ngang tshul can/ /lus dang longs spyod gtong ba dang / /som nyi med cing gsang la dang / /sgang bu dma' zhing sems can gsod/ /rtag tu mkhas pas de la sbyin/ /bdag 'dra rmongs pas sgrub pa'i thabs 'di brtsams par mi rigs na/ /sems can don du 'gyur la phan phyir bdag gis brtsams/ /'di la nyes par gyur pa ci mchis pa/ /mkhas dang dam pa rnams la bzod par gsol/ /bdag gis sgrub pa'i thabs ni brtsams pa'i dge ba yis/ /gang gis legs gsungs rgyal ba'i bstan pa kun rgyas te/ /rtag tu bde ba mchog bsgrub dam pa de yi zhal mthong nas/ /'gro rnams dngos grub kun thob rtag tu sdug bsngal bral bar shog/[ ]@##/ /rgya gar skad du/ /tat+t+wa pra dI paM nA ma br-it+ti/ bod skad du/ de kho na nyid kyi sgron ma zhes bya ba'i 'grel pa/

CLOSE WINDOW