བོད་ཡིག

e-texts based on the ACIP/ALL Input

/[ ]@# /rgya gar skad du/ At+ma sA d+ha nA ba tA ra nA ma/ bod skad du/ bdag sgrub pa la 'jug pa zhes bya ba/ byang chub sems dpa' 'jam dpal gzhon nur gyur pa la phyag 'tshal lo/ /dpal ldan rtog pa'i dri ma ma lus pa dang bral zhing kun du rtog pa las/ /byung de'i bdag nyid 'gro ba thams cad nges par mi gnas sems ni gang yin 'dir/ /mdzes pa'i rnam pa'i yid rgyun cho gas lus can nges par legs pa'i gnas de la/ /phyag byas skye ba brgyud par nye bar 'tshe ba gcod byed yang dag bshad par bya/ / rnam par rtog pa tsam dang so sor 'brel pa de'i rang bzhin ma lus pa 'di ni gcig tu sdug bsngal dpag tu med pa'i mtshan nyid yin la/ /skad cig ma gcig nas gcig tu brgyud pa'i bdag nyid can gyi srid pa nyams su myong ba de rnam par ldog pa tsam ni mya ngan las 'das pa yin pas de bsgrub pa'i phyir rab tu 'bad par bya ste/ rnam rtog las gzhan 'khor ba zhes/ /bya ba 'ga' yang yod min te/ /de phyir rnam rtog bral gyur pas/ /rtag tu khyod ni mya ngan 'das/ /zhes gang gsungs pa yin no/ /gzugs la sogs pa'i ngo bo nyid du so sor snang bar gyur pa ma yin nam ji ltar na rnam par rtog pa tsam gyi bdag nyid 'khor bar 'gyur zhe na/ ma yin te/ gzugs la sogs pa rtogs pa'i yul nyid du ma grub pa ste/ gzugs la sogs pa so sor snang ba ma rtogs par gzhan gzung ba'am/ de 'dzin pa cung zad kyang dmigs su med pa'i phyir ro/ /yul rtogs par gyur pa ma yin par yang rang gi ngo bo yod pa'i tha snyad kyi yul mi 'grub ste/ shin tu thal bar 'gyur ba'i phyir ro/ /de dang 'brel pa'i dngos po gzhan rtogs pas de rtogs par 'gyur ba yang ma yin te/ 'ga' zhig mngon sum gyi bdag nyid las shin tu 'das pa la 'brel pa rab tu ma grub pa'i phyir ro/ /nang du so sor snang bar gyur pa rang gi bde ba la sogs pa'i snang ba ni 'dzin pa nyid yin la/ sngon po la sogs pa de las phyi rol gyi gzugs nyid du rtogs pa'i mtshan nyid ni gzung ba yin no zhe na ma yin te/ sngon po la sogs pa la bde ba la sogs pa'i byed pa ma grub pa'i phyir ro/ /rtog pa'i byed pa med par yang 'dzin pa zhes bya ba de lta na ni/ phyi rol gyi gzugs la sogs pa yang 'dzin pa nyid du thal bar 'gyur ba'i phyir ro/ /cig car rang dbang nyid du so sor snang bdag ni/ cung zhig ni gzung ba/ cung zhig ni 'dzin pa'o zhes so sor nges pa'i rnam pa ni ma mthong ngo / /bdag ni sngon po la sogs pa rig pa'o zhes bya ba yang rnam par rtog pa tsam nyid de/ phyi dang nang nyid du rang dgas so sor snang ba rnams khong du chud pa'i phyir ro/ /'dzin pa la sogs pa rnam par rtog pa'i rgyun 'di thams cad nyid ni rang dbang du nyams su myong ba rab tu ston pa la gzhol ba yin te/ so sor snang ba rnams gcig la gcig yongs su 'dzin pa'i byed pa dang bral ba'i dngos po nyid yin pa'i phyir ro/ /de lta bas na 'ga' zhig la 'ga' zhig gis 'dzin pa zhes bya ba ni ma yin no/ /de ltar yang rab 'byor chos kyis chos yongs su shes pa ni ma yin no zhes bya ba rgyas par gsungs pa yin no/ /gang yang gzung ba ni shes pa gnyis kyis shes par byed do zhes bya ba la sogs pa gsungs pa de dang de ni gzugs la sogs pa zhen pa tsam la ltos nas la lar gang zag la sogs pa bstan pa dang 'dra bas nyes pa med do/ /de lta yin du chug na yang 'gro ba rnams kyang rnam par rig pa tsam gyi rang bzhin gzung ba dang 'dzin pa med pa'i rang bzhin can yin la/ de yang ldog pa med pa'i phyir gang gis de rnam par ldog pa tsam mya ngan las 'das pa zhes bya zhe na/ ma yin te rnam par shes pa yang gcig dang du ma'i rang bzhin dang bral ba yin pa'i phyir ro/ /'di ltar de gcig ma yin te/ /sngon po la sogs pa tha dad pas dmigs pa sna tshogs pa'i phyir ro/ /dkar po la sogs pa kha dog gcig pa yang thog ma dang dbus dang tha ma'i cha tha dad par snang ba'i phyir dang / don byed pa'i nye bar sbyor ba tha dad pas du ma nyid ni de tsam gyi mtshan nyid yin pa'i phyir ro/ /du ma yang ma yin te/ rdul phra rab kyi rnam par rtog pas dkar po la sogs pa'i rnam par snang ba'i cha rnams rtogs pa med pa'i phyir ro/ /gcig dang du ma la ma gtogs pa rnam pa gzhan yang yod pa ma yin te/ 'di dag phan tshun med pa nyid pas 'gal ba'i phyir ro/ /thams cad du bdag med pa nyid ma yin nam gang dngos po rnams nyams su myong ba'i don byed pa'i rab tu dbye ba bya zhe na/ ma brtags gcig pu'i bdag nyid snga ma snga ma'i rnam par rtog pa tsam nyid yin pa'i phyir de rtogs pa las gzhan ma yin pa'i phyir ro zhes bya bas bstan to/ /de lta yin du chug na dngos po thams cad kyi ngo bo yod pa nyid du 'gyur te/ yod pa'i dngos po ni don byed nus pa'i mtshan nyid yin pa'i phyir ro zhe na/ de ni ma yin te/ so sor snang ba tsam du yod par khas blangs pas mi 'gal ba yin pa'i phyir dang / ji skad du bshad pa'i rim pa'i mtshan nyid dang bral ba nyid kyi phyir/ bdag med par rnam par gzhag pa tsam yin gyi so sor snang ba tsam la bsnyon pa'i phyir ni ma yin te/ rab 'byor gzugs kyang gzhan la stong pa nyid kyang gzhan ma yin te/ 'on kyang gzugs ni gzugs kyi rang bzhin gyis stong pa nyid do zhes rgyas par gang gsungs pa yin no/ /de nyid kyi phyir kun rdzob kyi dngos po ma lus pa snga ma dang phyi ma'i dbye bas snang ba yin pa'i phyir/ rtag pa yin zhes dogs par mi bya'o/ /gang yang 'di lta ste/ kye rgyal ba'i sras khams gsum pa 'di dag ni rnam par rig pa tsam mo zhes gsungs pa de yang shin tu dngos po la mngon par zhen pa dag phyi rol gyi don la zhen pa tsam bzlog pa'i phyir te/ de las ni bde ba la sogs pa sems tsam du zhen pa yang gsal ba srid pa'i phyir ro/ /de ltar yang / sems tsam la ni brten nas su/ /phyi rol don la mi brtag go/ /de bzhin nyid la dmigs nas ni/ /sems tsam las kyang 'da' bar bya/ /zhes gsungs pa yin no/ /de lta bas na 'di ltar nga dang nga'i zhes bya ba la sogs pa'i rnam par rtog pa'i rang bzhin can gyi 'gro ba'i skye ba de dang 'gal ba ni bshad ma thag pa'i rnam pas bdag med par mthong ba yin pa'i phyir ro/ /phyin ci log gi gzhan gyi dbang du gyur pa'i 'gro ba de dag mngon par gdon pa'i phyir snying rje mchog gi bsam pa bskyed nas chos thams cad stong pa nyid kho na la dang por mngon du phyogs par bya'o/ /snying rjes rab tu phye ba yin yang gtong ba la sogs pa dmigs pas rab tu phye ba'i sbyin pa la sogs pa'i dge ba'i rgyun ni bdag dang gzhan du rnam par rtog pa'i phyir/ rnam par mi rtog pa'i go 'phang bsgrub par bya ba la cung zhig kyang nus pa yod pa ma yin te/ phyin ci log gi zhen pa ni rang dang rjes su mthun pa'i rnam par rtog pa skye ba'i rgyu yin pa'i phyir ro/ / de skad du yang / shes rab med na mig med pha rol phyin lnga 'di/ /dmigs bu med par byang chub reg par nus ma yin/ /zhes gsungs pa yin no/ /dngos po ma lus pa'i bdag med pa nyid la mngon par zhen pa ni bdag nyid rnam par rtog pa nyid yin na yang phyin ci ma log pa'i rang gi yul la zhen pa'i rang bzhin nyid yin pas phyin ci log gi rtog pa ma lus pa dang lhan cig tu 'gal ba yin pa nyid du rtogs te/ gang zhig gang dang dus gcig gi tshe 'gal bar mthong ba de ni shin tu goms pa na yang rang dang 'gal ba shin tu ldog par byed pa ni me las grang ba nyid la sogs pa lta bu yin gyi rnam pa gzhan du na phyin ci log gi dogs pas tha snyad thams cad mi 'thad par 'gyur ba'i phyir ro/ /'dir yang / gal te chos la bdag med so sor rtog /so sor de rtogs gal te bsgom pa ni/ /de ni mya ngan 'das pa'i 'bras bu'i rgyu/ /rgyu gzhan gang yin gyis ni grol mi 'gyur/ /zhes gsungs so/ /bdag med pa la goms pa yang thabs kyi bye brag dang bral ba yin na gang gi phyir des rtog pa'i dri ma ma lus pa dang bral zhing 'gro ba ma lus pa la phan par mdzad pa'i thams cad mkhyen pa'i ye shes skyed par mi nus pa de'i phyir thabs shin tu mngon du gyur pa la rab tu 'bad par bya'o/ /skye bo ma lus pa la phan pa'i bdag nyid ni thams cad mkhyen pa'i ye shes yin la/ phan pa yang mthar thug pa'i rgya che ba las byung ba yin no/ /de'i rgyu yang thabs goms pa kho na yin te/ bdag med pa la goms pa ni rnam par rtog pa tsam spangs pa'i 'bras bu can nyid yin pa'i phyir ro/ /de yang / zab pa'i phyir dang rgya che'i phyir/ /rnam mi rtog dang yongs su smin/ /'di la de gnyis bstan pas na/ /de phyir bla na med pa'i thabs/ /zhes gsungs so/ /de bas na phyin ci ma log pa'i sbyin pa la sogs pa la sems dpa'i rab tu 'jug pa ni thabs yin te/ thams cad mkhyen pa nyid la yongs su bsngos par gyur na de dag rdzogs pa'i byang chub kyi rgyu nyid du 'gyur ba'i phyir ro/ /de skad du yang / sbyin dang tshul khrims bzod dang de bzhin brtson 'grus dang / /bsam gtan shes rab byang chub yongs su bsngo bar gyis/ /byang chub phung por zhen pas mchog 'dzin ma byed ces/ /dang po'i las can de la de skad bstan par bya/ /zhes gsungs pa yin no/ /de ni de lta ma yin te/ rgyu mi 'dra ba goms pa las rdzogs pa'i byang chub goms pa mngon sum du gyur pa dang rjes su mthun pa'i bsgom pa med pa'i phyir ro/ /bdag nyid kyi rang gi ngo bo nyid kyis zab pa dang rgya che ba'i bdag nyid can gyi 'bras bu ni rang gi rang bzhin las bsgrub pa'i bya ba yin la/ de'i bdag nyid can gyi rgyu yang 'di la yod pa ma yin te/ sbyin pa la sogs pa'i sems dpa' ni phal cher rang bzhin gyis rgya che ba ma yin pa'i yul can yin pa nyid kyi phyir ro/ /smon lam yang dus kyis shin tu bskal pa nyid kyis rdzogs pa'i sangs rgyas kyi che ba bdag nyid kyi yul can nyid yin pas rgya che ba ma yin pa'i bdag nyid kyi rnam par rtog pa'i gnyen po ma yin pa nyid do/ /gang gi phyir tha mal pa'i rang gi ngo bo skye bo dpag tu med pa la phan pa ma yin pa nyid kyis brtse ba dang ldan pas spang bar bya ba yin no/ /smon lam gyi grogs su gyur pa'i sbyin pa la sogs pa sems dpa'i bdag nyid kyi gnyen po la rab tu 'jug par gyur kyang de'i rgyun yang ldog par mi 'gyur na/ dus gzhan na ldog par 'gyur ro zhes gang las yang dag par yid ches par 'gyur/ zab mo la zhen pas rang gi mi mthun pa'i phyogs zad par gyur pa de lta bur gyur pa'i rnam pa ma dmigs pa'i phyir ro/ /rang las bzlog pa gzhan bdag med par bsgoms par gyur pas bdag gi dngos po rtog pa'i dri ma med par rab tu sgrub par byed pa ni ma yin te/ de rang gi ngo bo'i rnam par rtog pa dang 'gal bas 'jug pa med pa'i phyir ro/ /gang gi tshe rang gi sems dang tha mi dad pa'i sgo nas 'dzin pa la sogs pa'i rnam pa stong pa nyid du mngon du byed pa de'i tshe de ni bden pa ma yin pa'i rnam par rtog pa ma lus pa'i gnyen po nyid du de ltar rtogs par 'gyur ba'i bsgom pa goms par shin tu 'phel bar gyur pas kun du rtog pa ma lus pa bsal ba'i go 'phang bskyed par 'gyur zhes rtog pa yin pa'i phyir rtog pa sngon du gtong ba rnams kyi 'jug pa'i yul du 'gyur ro/ /de bas na rgya che ba ma yin pa'i bdag gi dngos por snang ba'i mngon sum gyi gnyen po'i phyogs su gyur pa ma yin pas/ 'gro la phan phyir sangs rgyas 'grub par shog /ces bya ba la sogs pa'i smon lam ni dngos su rdzogs pa'i sangs rgyas 'thob pa'i rgyu ma yin te/ ji skad du/ rigs kyi bu khyod de bzhin gshegs pa thams cad kyi de kho na nyid mngon par ma shes par dka' ba spyod pa la spro bas ji ltar bla na med pa yang dag par rdzogs pa'i byang chub tu mngon par 'tshang rgya bar bya snyam zhes gang gsungs pa yin no/ /de bas na bdag med pa dang 'dra bar rgya che ba'i rang gi ngo bo yang tha mi dad pa nyid du bsgom par bya'o/ /rgya che ba yang med pa nyid ma yin nam/ bsgom byar bya ba des ji ltar mngon par 'dod pa'i 'bras bu bsgrubs par 'gyur zhe na/ de ni ma yin te/ zad par sa la sogs pa dang 'dra bar yang dag pa ma yin pa bsgom pa goms pa yang gsal por snang ba'i rgyu nyid yin pa'i phyir ro/ /'di ji ltar na yang dag pa ma yin zhe na rdzogs pa'i sangs rgyas kyi sku'i rnam pa dang bral ba'i rang gi bdag nyid la de'i ngo bo sgro 'dogs pas 'jug pa ni rna ba mos pa yid la byed pa nyid yin pa'i phyir ro zhe na/ de lta na ni de kho na yid la byed pa yang yang dag pa nyid ma yin te/ de kho na nyid ji lta ba bzhin yul la 'jug pa ma yin pa'i phyir ro/ /gcig tu rnam par mi rtog pa'i mtshan nyid kyi de kho na nyid la de bzhin du yid la byed pa yang ma yin te/ de ni las dang po pa'i gnas skabs na rnam par rtog pa'i ngo bo nyid kyis 'jug pa yin pa'i phyir ro/ /rnam par rtog pa dang bcas pa yin pa de lta na yang dngos po ji lta ba bzhin du gnas pa nyid kyis de kho na nyid ni des nges par byas pa yin pa'i phyir de kho na nyid yid la byed pa nyid du de rnam par gzhag par bya'o/ /de las gzhan pa ni shin tu med pa'i rang gi ngo bo la sgro 'dogs par byed pa yin pa'i phyir mos pa yid la byed ces tha snyad gdags pa ste/ tha mal pa'i bdag nyid la thub pa mchog gi rnam pa med bzhin du de kho na nyid dang 'dra bar yid la byed pa'i phyir ro/ /de ni de lta ma yin te/ gang gi phyir bdag med pa yid la byed pas rang gi ngo bo ji lta ba bzhin du gnas pa yul du byed na rang gi yul nyid du so sor snang ba'am/ phyin ci log gi rnam par rtog pa'i yul du gyur pa yid la byed ce na/ de la phyogs dang pos ni mos pa yid la byed pa de yang gzhan dang mtshungs pa yin te/ rang gi yul du gyur pa'i rnam pa yongs su 'dzin pa nyid du 'jug pa'i phyir ro/ /rnam pa gzhan du mos pa yid la byed pa nyams par thal bar 'gyur ba'i phyir ro/ /rang gi yul ni rnam par shes pas rtogs par ma gyur pa ni lhag par mos pa'i tha snyad kyi yul ma yin te/ shes pa thams cad rang gi yul du 'dod pa'i rnam par rtog pa'i mtshan nyid can yin pa'i phyir ro/ /de la phyogs gnyis pa de yang rigs pa ma yin te/ bdag med pa'i shes pas 'dzin pa la sogs par zhen pas yul du mi byed pa'i phyir ro/ /shes pa las ma gtogs pa gzhan de'i yul can zhes bya ba med pa gang gis na cig shos de yul du byas pa yin no zhes bstan/ de bas na de kho na nyid yid la byed pa dang 'dra bar rang gi shes pa'i rnam pa tsam du yul nyid yin pa'i phyir rgya che ba la mos pa yang dag pa ma yin pa ga la yin/ tha mal pa'i bdag nyid 'di ni rgya che ba'i rnam pa la sgro 'dogs pas 'jug pa yang ma yin te/ tha mal pa'i rang gi ngo bo la mos pas rdzogs pa'i sangs rgyas kyi sku'i rnam pa yul du mi byed pa nyid kyi phyir yul ma yin pa la sgro 'dogs pa mi srid pa'i phyir ro/ /tha mal pa'i rang bzhin ni rnam par rtog pa tha mal par snang ba'i mtshan nyid yin la/ bde bar gshegs pa'i rnam pa'i spyod yul yid la byed pa shin tu stobs dang ldan pa ni de'i ngo bor snang ba ma yin no/ /gal te yang rgya che ba ma yin pa'i bdag nyid rang gi ngo bo la rnam pa gzhan du cung zhig kyang sgro 'dogs par mi byed na de ji ltar 'di'i gnyen por 'gyur zhe na/ bde bar gshegs pa'i rang gi ngo bor snang ba'i yid la byed pa'i rang gi ngo bo ni tha mal pa ma yin pa'i rang bzhin nyid du skye ba'i phyir dang / rgyun mi 'chad par bsgom pa goms pas rigs mthun pa'i shes pa skye ba ni shin tu gsal ba'i rgyu nyid yin pa'i phyir ro/ /rgya che ba'i shes pa skye ba'i dus de'i tshe cig shos tha mal pa'i rnam pa'i spyod yul shes pas nyams su myong bar 'gyur ba med do/ /tha mal pa'i rang gi ngo bo khong du chud par ma gyur pa de yang yod pa nyid du nges par byar mi nus te/ de ni rtog pa tsam nyid kyi rang bzhin nyid yin pa'i phyir ro zhes nges par byas pa yin no/ /de bas na kun du rtog pa spangs pa 'od zer ma lus pa spro ba can gyi kun du bzang po'i bdag nyid sgom par byed pa/ de kho na byang chub kyi snod yin te/ de skad du/ phyag rgya'i cho ga gang dag gis/ /bskal pa bye ba grangs med du/ /sangs rgyas nyid ni mi 'thob pa/ /tshe 'di nyid la thob par 'gyur/ /de la bdag tu brtag bya zhing / /zhes bya ba nas/ rang lha nyid kyi rnal 'byor gyis/ /de phyir bdag nyid bsam par bya/ /zhes bya ba'i bar du gsungs pa yin no/ /de ltar yang dag pa yid la byed pa nyid la ltos nas/ bcom ldan 'das ye shes shin tu rdzogs pas de kho na'i rnal 'byor la rdzogs pa'i sgrub pa yang nye bar bsngags pa mdzad de/ rdzogs pa'i sangs rgyas la mos pa ni rdzogs pa'i rnal 'byor dang tha mi dad par mchog tu 'dzin pa'i phyir ro/ /mchog tu 'dzin pa med pa de ni bdag nyid bde bar gshegs pa yid la byed par mi 'gyur te/ bcom ldan 'das ni tha dad par zhen pa spangs pa nyid kyi phyir ro/ /gzhan bcom ldan 'das kyi rnam pa dag la de'i mtshan nyid med par rang gi ngo bo la chags pa'i rnam par rtog pa ni kha na ma tho ba med pa'i 'bras bur 'gyur ba yang ma yin te/ de'i phyir rgyal ba'i sku ni mtha' med la/ /yid kyis bdag gzhan mngon zhen dri med lus/ /sangs rgyas kun dang mtshungs par blo gros mchog /skye bo ma lus re ba'i dngos grub 'gyur/ /de la yang thub pa 'od zer dpag tu med pa spro ba dang ldan pa rang dang gzhan gyi phun sum tshogs pa mtha' yas pa'i rten du gyur pa nyid kyis yang dag pa'i thabs kyi mchog gi mtshan nyid can shes rab dang bral bas phongs par 'gyur pa la mngon sum du phyogs pas sgom par byed na yang phun sum tshogs pa kun ma lus pa thob par byed pa ma yin pa'i phyir de rang gi ngo bo la phyin ci ma log pa'i sems su bya'o/ /rnyog pa med pa'i phun sum tshogs pa ni shes rab dang thabs las rab tu byung ba nyid kyi phyir ro/ /de dag kyang phyin ci ma log pa'i rgya che ba'i sems dang mtshan nyid gcig pa nyid yin na yang tha dad pa'i tha snyad la zhen pas tha dad pa'i phyir ro/ /'di ltar de kho na nyid la sems phyin ci log pa las bzlog pa'i ngo bo nyid kyis shes rab tu shes par bya la/ rang gi 'bras bu la nus pa med pa las bzlog pa ni thabs su bstan pa yin no/ /shes rab yan lag kun du 'khyud pa las/ /mchog tu dga' ba nyams su bstar ba yi/ /phun tshogs rang bzhin yan lag thabs gyur te/ /rgyun chad med par blo ldan gyis bsgom bya/ /de'i 'og tu/ shes rab thabs las rab byung ba'i/ /dbyer med dmigs pa'i sprul 'phro bar/ /snang bas yul du rnam gzhag pa'i/ /yul gyi rang lus yang dag mchod/ /ji skad bshad pa'i rim pas shes rab dang thabs kyi bdag nyid can gyi rang gi ngo bo mngon du byas nas ji srid sprul pa rnams la des dbang thob par gyur pa de srid du bdag gi ngo bo dang tha mi dad pa'i ngo bo mngon sum du bya ba yin te/ phyin ci ma log pa dang rang gi 'bras bu skyed par rung ba nyid kyis na shes rab dang thabs kyi bdag nyid du mtshan nyid gcig pa nyid kyi phyir dang / rgyud kyang tha mi dad pa'i rang bzhin yin pa'i phyir te/ kun du rtog pa snga ma snga ma las byung ba'i rnam par rtog pa'i rgyun ni rgyud yin te/ sprul pa zhes bya ba yang gzhan pa nyid ma yin te/ de bzhin du kun du brtags pa tsam yin pa'i phyir ro/ /kha dog la sogs pa tha dad pas sna tshogs pa'i rang bzhin nyid yin pas ji ltar gcig nyid ces bya zhe na/ de ltar na ni 'ga' zhig kyang gcig nyid du mi 'gyur te/ lha'i sku gcig nyid la yang cha shas du ma'i rang bzhin nyid kyis sna tshogs pa'i bdag nyid yin pa'i phyir la/ cha shas med pa yang dmigs par ma gyur pa'i phyir ro/ /ji ltar kun rdzob tu rdzas gcig pa nyid kyis gcig tu rnam par gzhag pa de ltar tshul gzhan pa'i sna tshogs pa'i rang bzhin nyid la yang de'i ngo bor rtogs pa la ltos nas thams cad bdag nyid yin no zhes tha mi dad pa'i zhen pas yid la byed pa la 'jug pa'i phyir ro/ /de dag gis ni dngos po thams cad mnyam pa nyid du lhag par mos par bshad pa yin te 'dzin pa la sogs pa'i rnam pa dang bral bar thams cad du mtshungs pa nyid kyi phyir ro/ /gzhan du der snang ba la lhag par zhen pa'i yul rnams las gzhan pa thams cad ces bya ba'i tha snyad kyi gzhir gyur pa gzhan yod pa yang ma yin te/ de rnams kyang cig car rtogs pa'i rang bzhin yin pas tha dad par dbyer mi nus pa'i phyir gcig gi mtshan nyid gzhan yod pa yang ma yin no zhes bstan pa yin no/ /de bas na yang dag pa ji lta ba'i rang gi ngo bo so sor rtogs pa la gzhol ba ni kun rdzob 'ba' zhig po 'di la thams cad bdag mtshungs pa yin no zhes shes pa 'jug par 'gyur ba yin gyi dngos po 'ga' la yang gang gis kyang tha dad pa'am/ tha mi dad par yul du byed par ni mi nus te/ shes pa thams cad ni rang gi ngo bo tsam la gnas pa nyid kyis gzhan gyi ngo bo yongs su 'dzin pa med la/ yul du ma byas par ni tha dad pa la sogs pa'i tha snyad mi rung ba'i phyir ro/ /de ltar rnal 'byor pa'i rang gi sems rgyu ba re re yang mi mthun pa'i phyogs ma lus pa las ldog pa'i ngo bo nyid kyis dkyil 'khor pa'i lha ma lus pa nyid kyi rang bzhin du so sor brtag par bya ba yin te 'di ltar rang rang gi lha'i ting nge 'dzin rnams ni phyin ci log de dang de mi dmigs pas ston par byed pa nyid yin pa'i phyir ro/ /gang gi phyir sems kyi rang bzhin gang yin pa de nyid 'dzin pa la sogs pa'i rnam pa dang bral ba'i phyir chos kyi dbyings kyi rang bzhin yin la/ de nyid glo bur gyi dri ma dang bral bas 'od gsal ba nyid yin pa'i phyir dang / ye shes gzhan bskyed pa'i rgyu mtshan nyid yin pa'i phyir me long lta bu'i ye shes kyi bdag nyid yin no/ /mi dmigs pa'i snying rje la sogs pa'i bdag nyid kyis rgyud gzhan tha dad par 'dzin pa med pa'i phyir mnyam pa nyid kyi ye shes so/ /shes bya thams cad la phyin ci ma log pa'i phyir so sor rtog pa'i ye shes so/ /'gro ba ma lus pa la phan pa'i rgyu yin pa nyid kyis bya ba nan tan gyi ye shes kyi bdag nyid yin no/ / de bas na de dag ni go rims bzhin du rtag pa la sogs pa'i bdag po rnams kyi rang bzhin no/ /dmigs pa'i gnyen po nyid kyis rnam par thar pa'i sgo stong pa nyid kyi mtshan nyid dang / de bzhin du mtshan ma dang log pa'i smon lam dang phyin ci log tu mngon par 'du byed pa'i gnyen po nyid kyis rim pa bzhin du/ /mtshan ma med pa dang / smon pa med pa dang / mngon par 'du mi byed pa'i rnam par thar pa'i bdag nyid dag yin no/ /de lta bas na go rims bzhin du rdo rje sems ma la sogs pa'i rigs kyi yum gyi rang bzhin te/ stong pa nyid la sogs pa rnam par thar pa'i sgo bzhi po dag gis chos kyi dbyings la dmigs par byed pas ting nge 'dzin thams cad skye ba'i rgyu nyid yin pa'i phyir ro/ /de nyid nang la phyin ci log pa'i gnyen po nyid kyis na nang stong pa nyid kyi rnam pa dang / phyi dmigs pa med pa'i phyir phyi stong pa nyid kyi rang bzhin dang / de'i rten las mi dmigs pa'i rang bzhin nyid kyis phyi nang stong pa nyid kyi bdag nyid can dang / snod kyi 'jig rten la zhen pa dang bral ba nyid kyis na chen po stong pa nyid kyi mtshan nyid yin no/ /de'i phyir me long lta bu'i ye shes la brten pa'i rdo rje sems dpa' la sogs pa'i ting nge 'dzin gyi rang bzhin yin te/ ming dang gzugs la sogs pa'i bag chags yongs su gyur pa me long lta bu'i ye shes ni nang mi dmigs pa la sogs pa'i rten nyid yin pa'i phyir/ ji ltar rang rang gi phyin ci log gi gnyen po nyid kyis/ byang chub kyi sems skye ba dang / 'dren par byed pa dang / rjes su chags pa dang / legs so zhes bya ba'i rgyu nyid yin pa'i phyir ro/ /de bzhin du stong pa nyid kyi ye shes kyang mtshan ma med pa'i phyir stong pa nyid stong pa nyid dang / don dam pa la mchog tu mtshan mar 'dzin par byed pa med pa'i phyir don dam pa stong pa nyid dang / 'dus byas kyis bsod nams nyid kyi tshogs la mtshan mar yongs su 'dzin pa med pa'i phyir/ 'dus byas stong pa nyid dang / 'dus ma byas byang chub kyi phyogs la yang mtshan mar rjes su 'dzin pa med pa'i phyir 'dus ma byas stong pa nyid yin no/ /de bas na mnyam pa nyid kyi ye shes kyi 'khor lo rdo rje rin chen la sogs pa bzhi'i bdag nyid yin te/ nyon mongs pa can gyi yid gnas gyur pa'i bdag nyid can mnyam pa nyid kyi ye shes 'dzin pa la sogs pa'i sgo nas ji skad du bshad pa'i mtshan mar 'dzin pa med pa'i phyir dang / rang rang gi mi mthun pa'i phyogs spangs pa'i sgo nas dbang bskur ba dang / gzi brjid 'phel ba dang / sbyin pa'i pha rol tu phyin pa la nges par sbyor bar byed pa dang / rab tu spro bar byed pa'i rgyu yin pa'i phyir ro/ /de nyid sems can gyi don la shin tu smon pa'i mngon par zhen pa med pa'i phyir mtha' las 'das pa stong pa nyid dang / bdag gis 'khor ba'i thog ma dang tha ma med pa yongs su dor bar bya'o zhes smon pa len pa med pa'i phyir thog ma dang tha ma med pa stong pa nyid dang / bdag gi phung po lhag ma med pa'i mya ngan las 'das pa'i dbyings la yang dge ba yongs su dor bar mi bya'o zhes mngon par zhen pa med pa'i phyir dor ba med pa stong pa nyid dang / bdag gis rang gi mtshan nyid kyi rigs ni yongs su sbyong bar bya'o zhes don du gnyer ba dang bral ba'i phyir rang bzhin stong pa nyid yin no/ /de'i phyir rnam par rtog pa'i yid gnas gyur pa'i mtshan nyid can so sor rtog pa'i ye shes la brten pa rdo rje chos la sogs pa bzhi po'i bdag nyid yin te/ rnam par rtog pa'i yid gnas gyur pa'i mtshan nyid can gyi so sor rtog pa'i ye shes ni ji skad du bshad pa'i phyin ci log gis dben pas chos kyi de kho na nyid so sor rtog pa nyid yin pa'i phyir dang / de'i sgo nas kyang rang bzhin gyis dag pa'i chos nyid dang shes rab dang / ye shes las phyir mi ldog pa nyid dang / dgongs pa'i don ma lus pa yongs su shes pa'i rgyu nyid yin pa'i phyir ro/ /de nyid mtshan dang dpe byad kyi bdag nyid can gyi gzugs kyi sku la mngon par zhen pa med pa'i phyir rang gi mtshan nyid stong pa nyid dang / stobs dang / mi 'jigs pa la sogs pa'i rang bzhin gyi chos kyi sku la mngon par zhen pa med pa'i phyir/ /chos thams cad stong pa nyid dang / gang zag dang chos su kun nas sgro 'dogs pa med pa'i phyir dngos po med pa stong pa nyid dang / ji skad du bshad pa'i stong pa nyid kyi mtshan nyid la skur pa mi 'debs pa dang / mngon par zhen pa med pa'i phyir dngos po med pa'i rang bzhin stong pa nyid yin no/ /de bas na bya ba nan tan gyi ye shes la brten pa rdo rje chos la sogs pa bzhi po'i bdag nyid yin te/ mig la sogs pa'i shes pa gnas gyur pa'i bdag nyid bya ba nan tan gyi ye shes ni ji skad du bshad pa'i phyin ci log spangs pa'i sgo nas bde bar gshegs pa ma lus pa mchod pa dang / kun nas bsrung ba dang / bgegs bsal ba dang / lus la sogs pa stong pa nyid kyi ye shes kyi rgyu nyid yin pa'i phyir ro/ /de bzhin du ser sna dang / 'chal ba'i tshul khrims dang mi bzod pa dang / le lo dag gi gnyen po nyid kyis de nyid sbyin pa dang / tshul khrims dang / bzod pa dang / brtson 'grus kyi pha rol tu phyin pa'i bdag nyid yin no/ /de'i phyir gsang ba'i mchod pa bzhi po'i rang bzhin yin te/ go rims bzhin du me long lta bu'i ye shes la sogs pa bsgrub pa ni rang gi rnam par thar pa'i sgo rnam par dag pa'i stobs kyi lhun gyis grub par mngon par 'dod pa'i khyad par skyed par byed pa nyid yin pa'i phyir ro/ /de nyid rnam par g.yeng ba dang / shes rab 'chal pa dang / yang dag pa ma yin pa'i smon lam dang / thabs ma yin pa spangs pa'i sgo nas bsam gtan dang / shes rab dang / smon lam dang / thabs kyi pha rol tu phyin pa'i mtshan nyid kyis phyi'i mchod pa bzhi po'i bdag nyid yin te/ 'bad pa dang bcas pa'i lam gyis chos kyi dbyings la dga' bas 'jug pa'i rang bzhin nyid yin pa'i phyir ro/ /dad pa dang / brtson 'grus dang / dran pa dang / ting nge 'dzin gyi ngo bo nyid kyis sgo bzhi bsrung ba bzhi po'i bdag nyid yin te/ theg pa chen po'i chen po la mngon par yid ches dang / 'jug pa dang / kun nas dga' ba dang / rgyun mi 'chad pa'i rgyu nyid yin pa'i phyir ro/ /de nyid shes rab yongs su dag pa tsam la ltos nas ji skad du bshad pa'i stong pa nyid kyi rab tu dbye ba'i sgo nas byams pa la sogs pa'i ting nge 'dzin bcu drug gi bdag nyid yin no/ /thabs 'ba' zhig tsam la ltos pa ni 'jig rten pa'i ting nge 'dzin ma lus pa'i rang bzhin no/ /de nyid kun nas nyon mongs pa'i phung po dang / khams dang / skye mched du sgro 'dogs pa dang bral ba'i phyir rnam par byang ba'i phung po la sogs pa'i mtshan nyid du rig par bya'o/ /de nyid kun du rtog pa ma lus pa'i sems pas sgro btags pa spangs te de'i phyir ji srid de kho na nyid du kun du rtog pa de srid du de la yang dag par brten par bya ste/ de'i ngo bo nyid du zhen pa nyid kyis de skye ba'i yang dag pa'i rten yin pa'i phyir te/ rnal 'byor pa'i ye shes skyed par byed pa yin par 'dod pa'i phyir ro/ /de nyid dngos po ma lus pa bdag dang tha mi dad pa la bltas nas snang ba'i yul du gyur pa gzugs la sogs pa yul thams cad kyis yang dag par mchod par bya'o/ /ji ltar bdag nyid la mchod pa legs pa yin/ gzugs la sogs pa cung zad nyams su myong ba thams cad kyang bkag pa yin no zhe na de ni ma yin te/ thams cad du bdag nyid kho na mchod par bya ba nyid yin pa'i phyir ro/ /gang gi phyir 'dir sems las ma gtogs pa gzhan bdag tu mngon par 'dod pa ma yin la/ sems las gzhan mchod par bya ba nyid kyang med do/ /lugs sku la sogs pa'i rang gi ngo bo yang mngon par 'dod pa'i lha nyid du sems kyis sgro btags pa yin pa'i phyir ro/ /so sor snang ba tsam las lhag pa gzhan yod pa yang ma yin te/ rang la lha nyid du sgro btags pa'i bdag nyid kyang bla na med pa'i 'bras bu yin no zhes bstan pa dang 'dra'o/ /gang yang cung zad nyams su myong ba bkag pa'i phyir ro zhes smras pa de yang rigs pa ma yin te/ dgag pa'i ngag 'jug pa'i spyis khyad par gyi sgrub pas dgag par gyur pa'i phyir ro/ /yul gcig nyid la sgrub pa dang / dgag pa dag 'gal bar gyur pa yang yul du ma nyid la ni ma yin no/ /bya ba'i rang gi ngo bo la khyad par med pa'i yul du ma nyid du mi 'thad do zhe na ma yin te tshogs pa'i khyad par gyis 'dod pa dang / 'dod pa ma yin pa'i 'bras bu skyed par rjes su mthun pa nyid kyi phyir 'dod pa ma yin pa'i 'bras bu ni dgag par bya ba'i yul yin no/ /de yi ngo bo la zhen pa tsam gyis thams cad de bzhin du 'gyur ba yang ma yin te/ sngags la sogs pas mngon par sbyangs pa longs spyod pa'i dug las 'chi ba la sogs pa 'byung ba'i nus pa ma mthong ba'i phyir ro/ /de bzhin du 'dir lus la sogs pa'i las phyir phyogs pa thun mong du gzhan nas bkag pa yin yang 'dir khyad par can gyi snying rje la sogs pas kun nas bslang bas 'dod pa ma yin pa'i 'bras bur mi 'gyur te/ de ltar gyur pa'i gang zag rnams la brtse bas spang ba la sogs pa'i las kyis gnod pa skyed pa lta bu dang / bud med chu la sogs pas khyer ba la sogs pa la pha'i 'du shes kyis bton pa dang 'dra ba yin no/ /byang chub sems dpa' dag la ji srid du dge ba la sogs pa'i yid la byed pas rab tu zhugs pa'i las de ni mngon par snang ba'i yul yin te/ byang chub sems dpa'i lam gyi mtshan nyid kho na nyid yin pa'i phyir te/ snying brtser ldan dang byams phyir dang / /sems dge ba la nyes pa med/ /ces bya ba dang / brtser ldan gzhan gyi don mthong na/ /bkag pa rnams kyang de la gnang / /zhes gang gsungs la/ gzhan yang / byang chub sems dpa'i kun rtog las/ /dge ba'am gal te mi dge ba'ang rung / /gang phyir de yi yid dbang 'gyur/ /thams cad dge ba nyid yin no/ /zhes gsungs pa yin no/ /thabs la mkhas pa ma gtogs par srog gcod pa la sogs pa las nges par ldog par rnam par gzhag pa yin pa'i phyir la/ thabs la mkhas pa ni de gnang ba yin pa'i phyir te/ sum cu rtsa gsum pa'i mdo dang / mngon par rdzogs par byang chub pa las kyang / 'dir byang chub sems dpa' thams cad kyis thams cad du srog gcod pa las slar ldog par bya ste/ gzhan du dkon mchog gsum la gnod pa byed pa'i sems can mthong na zhes bya ba'i bar dang / de bzhin du ma byin par len pa las slar ldog par bya ste/ sems can ser sna can mthong na zhes bya ba'i bar dang / de bzhin du gzhan gyi chung ma gzhan gyis yongs su bzung ba la brnab sems kyi sems skyed par yang mi byed na 'on kyang yan lag ma yin pas bshad pa'am/ gnyis kyis gnyis sprod pa lta ci smos/ gzhan du de lta bus 'dul ba rnams la ni zhes bya ba brgyas par gang gsungs pa yin pas bslab pa thams cad kyi cha blta bar bya'o/ /'dod chags kyi bsam pas kun nas slob pa'i lus dang ngag gi las ni kun nas nyon mongs pa'i 'bras bu can yin pa'i phyir mi dge ba yin gyi rang gi ngo bos ni ma yin te/ de lung du ma bstan pa nyid yin pa'i phyir ro/ /gang yang gzhan la phan pa'i bsam pas rab tu zhugs pa de ni bla na med pa'i 'bras bu skyed par byed pa nyid kyis byang chub sems dpa'i bslab pa'i rang bzhin no/ /bdag nyid kyi tshul khrims srung bar byed pa ni byang chub sems dpa'i kha na ma tho ba dang bcas par 'gyur pa ma yin te/ bcom ldan 'das kyis/ chos gang nges pa rnams kyi byang chub yon tan 'byung 'gyur ba/ /'di ni yon tan chos ldan rnams kyi tshul khrims don/ / chos gang phan byed rnams kyi byang chub yon tan nyams byed pa/ /'di ni tshul khrims 'chal zhes 'dren pa rnams kyis gsungs/ /zhes gang gsungs pa dang / 'phags pa blo gros mi zad pas bstan pa las kyang / thabs la mkhas pas thams cad la/ /rnam par smad par mi bya'o/ /zhes gsungs pa yin no/ /gzugs la sogs pa'i yul la longs spyod par mtshungs su zin kyang zhen pa'i dbang gis kha ma tho ba dang bcas pa dang / kha na ma tho ba med par rnam par gzhag pa yin pa'i phyir ro/ /nyon mongs pa'i bdag nyid can gyi longs spyod pa zhen par gyur pas yum lnga la longs spyod pa ni nyon mongs pa'i yul la longs spyad pa yin la/ nyon mongs pa'i bsam pa med pas ni kun nas nyon mongs pa can ma yin no/ /de yang rnam pa gsum ste/ 'jig rten pa'i 'bras bu dang rjes su mthun pa dang / rang gi mya ngan las 'das pa dang rjes su mthun pa dang / bla na med pa'i 'bras bu dang mthun pa'o/ /de la dang po ni mtho ris la sogs pa thob pa'i phyir lha la sogs pa la ji lta ba bzhin du thob pa'i yul stobs pa'i yid la byed pa'o/ /gnyis pa nyan thos la sogs pa'i byang chub don du gnyer ba yin te/ de kho na nyid du gzugs la sogs pa rnams la mi rtag pa la sogs pa'i rnam par so sor rtog pa yin te/ ji skad du yang dag par ldan pa'i lung las/ dge slong dag dge slong gi mig gis gzugs mthong ba na gzugs rnams zil gyis gnod par byed kyi gzugs kyis de dag zil gyis gnon par mi 'gyur ro zhes bya ba nas/ mi rtag par dmigs nas gnas par byed pa de'i phyir gzugs kyis zil gyis gnon par mi 'gyur ro zhes bya ba'i bar du rgyas par gsungs pa yin no/ /gsum pa la yang rnam pa bzhi ste/ smon lam la mos pas rab tu 'jug pa dang / de kho na nyid 'ba' zhig so sor rtog pas rab tu 'jug pa dang / rgya che ba tsam gyi dmigs pas rab tu 'jug pa dang / zab pa dang rgya che bas rab tu 'jug pa'o/ /de la gzugs la sogs pas snang ba thob pa rnams kyi de'i rang bzhin ngo bo nyams su myong ba'i rjes su 'brangs nas 'gro ba ma lus pa la phan pa skye ba'i sems pa la sngon du phyogs pa nyid yin te/ spyod yul yongs su dag pa las 'dir byang chub sems dpa'i mig gis gzugs yid bde ba'i gnas su gyur pa mthong ba na sems can thams cad kyis de bzhin gshegs pa'i sku'i mchog thob par gyur cig ces de ltar yang sems bskyed par bya'o/ /yid mi bde ba'i gnas su gyur pa mthong ba na sems can thams cad 'khor ba'i sdug bsngal las skyo bar gyur cig ces de ltar yang sems bskyed par bya'o/ /btang snyoms kyi gnas su gyur pa mthong na sems can thams cad chos thams cad la sems mnyam par gyur cig ces de ltar yang sems bskyed par bya'o zhes rgya cher gang gsungs pa dang / de ltar mdo sde'i rgyan las kyang / /ji lta ji ltar dbang po'i spyod yul la/ /brtse ldan bdag nyid spyod pas 'jug gyur pa/ /de lta de ltar ci rigs mthun gnas te/ /brtse bas sems can dag la mngon du byed/ /ces gsungs pa yin no/ /gnyis pa ni brtse ba dang bcas pas sems can gyi khams la ltos pa dang bcas pas yul la longs spyod pa ma lus pa rnams la bdag med pa'i so sor rtog pa'i yid la byed pa yin te/ bcom ldan 'das kyis rigs kyi bu dge slong chos smra ba de la bdud sdig can gyis bar chad bya ba'i phyir sems bsgyur ba'i gzugs dang / sgra dang / dri dang / ro dang / reg bya dag nye bar bstan pa de dag 'dir thabs la mkhas pa dang / shes rab kyis zil gyis mnan nas yongs su spyad par bya'o zhes rgyas par gang gsungs pa yin te/ de kho na nyid yid la byed pa ni nyes pa ma lus pa skye ba'i gnyen po nyid yin pa'i phyir ro/ /gang gi phyir 'dod pa ma yin pa'i las mngon par bsgrub pa yang de kho na nyid la so sor rtog pas nyams shing zad par 'gyur te/ de'i dbang gis ni 'dod pa'i 'bras bu skyed pa'i nus pa nye bar bcom par 'gyur na gang du yang dag par so sor rtog pa'i bdag nyid can gyi gzugs la sogs pa khong du chud pa de la nyon mongs pa can gyi las kyi skabs lta ga la yod/ phyin ci log gi sems kyi khyad par nyon mongs pa can gyi las ni bdag med pa so sor rtog pa de dang 'gal ba'i phyir cig car skye bar mi 'gyur ro/ /de skad du yang / 'jig rten sna tshogs gang de 'dod pa min/ /skyes bu'i kun rtog 'dod chags 'dod pa yin/ /'jig rten sna tshogs de bzhin gnas kyang ni/ /'on kyang brtan rnams 'di la 'dod pa spang / / zhes gsungs so/ /gsum pa yang rgya che ba la dmigs pa nyid kyi phyir rang gi bdag nyid kyi gzugs la sogs pa yang tha mal pa'i gzugs la zhen pa'i gnyen po nyid yin pas brgyud pas rdzogs pa'i sangs rgyas kyi go 'phang la 'jog pa'i rgyu yin te/ rdzogs pa'i sangs rgyas kyi ngo bo'i nga rgyal gyi rjes su mthun pa'i gzugs la sogs pa longs spyod pa'i phyir ro/ /gal te de lta yin du chug na de lta na yang bcom ldan 'das rang gi ngo bor yongs su bsgom pa de ni don dam pa nyid du rdzogs pa'i sangs rgyas kyi rang bzhin ma yin pa nyid kyi phyir ro zhe na/ de lta na ni tha mal pa'i bdag nyid longs sbyong pa yang yod par mi 'gyur te/ de kho na nyid du gang gzugs la sogs pa med pa nyid kyi phyir ro/ /ji ltar bdag gis gzugs la sogs pa mthong ngo zhes zhen pas yul du byas pa'i gzugs la sogs pa de dag ni de kho na nyid du de ltar yod pa ma yin no zhes bstan pa dang 'dra'o/ /de bas na de kho na nyid du gnas pa la ltos pa med pa'i zhen pa 'ga' zhig ni mi 'dod pa skyed pa nyid kyi phyir mi dge ba yin la/ cig shos ni mchog gi skyes bu'i don la mkho ba nyid kyi phyir dge ba yin no zhes bya ba bcom ldan 'das kyi gzhung las mthong ngo / /de nyid kyi phyir ming tsam gyi sgo nas kyang rdzogs pa'i sangs rgyas kyi nga rgyal ni phun sum tshogs pa mchog rdzogs par byed pa'i rgyu yin no zhes rnam par gzhag pa yin gyi bdag nyid kyis nye bar longs spyod pa kho nas thams cad dge ba'i bdag nyid du mi 'gyur ro zhes rnam par gzhag par ni mi nus te/ bsam pa'i dbang gis de yang dge ba'i bdag nyid yin pa'i phyir ro/ /byang chub sems dpa' 'ga' zhig lo stong phrag brgyad cur de bzhin gshegs pa 'khor dge slong stong phrag brgyad cu dang bcas pa re re la bskal pa du mar bde ba'i yo byad t hams cad kyis stobs par byed la byang chub sems dpa' gzhan 'ga' zhig kyang dam pa'i chos yongs su gzung ba'i rgyus bdag nyid bsod snyoms kyis longs spyod par byed na snga ma de bas byang chub sems dpa' 'di la bsod nams mang du 'byung bar 'gyur ro zhes gsungs pa yin no/ /rnam par rtog pa bzhi pa ni nyid kyi rang bzhin ngo bo nyid rtog pa'i dri ma ma lus pa spangs pas bde bar gshegs pa'i sku'i bdag nyid can 'od zer can gyi tshogs rnam pa du ma'i sgo las yang dag par byung ba'i sprul pa sna tshogs rnam par 'phro bas 'gro ba ma lus pa'i don mdzad pa la gzhol ba de dang rjes su mthun pa'i gzugs la sogs pa gong du smos pa'i khyad par gyis dngos po ma lus pa mnyam pa nyid kyis blta ba ni gcig tu phun sum tshogs pa mchog gi rgyu yin te/ mngon sum du bsgrub par bya ba'i ngo bo la dmigs pa nyid kyi phyir ro/ /de lta bu'i rnam pa'i gzugs la sogs pa la ma nges par dpyod pa'i bdag nyid kyi rdzogs pa'i sangs rgyas kyi mchod pa la kha na ma tho ba dang bcas par dogs pa nyid ni kha na ma tho ba chen po'i rgyu ma yin te/ tha mal pa'i phyin ci log gi yid la byed pa'i gnyen po nyid kyis 'di ni lhag pa'i tshul khrims kyi bslab pa'i bdag nyid yin pa'i phyir ro/ /mig la sogs pa'i yul yang dag pa ma yin pa rnams la yid la byed pa thams cad 'gog pas mya ngan las 'das pa mchog gi gzhi nyid yin pa'i phyir sdom pa mchog gi don yin no/ /de ltar yang / mig gi sdom pa legs pa ste/ / rna ba'i sdom pa legs pa yin/ /sna yi sdom pa legs pa ste/ /lce yi sdom pa legs pa yin/ /lus kyi sdom pa legs pa ste/ /yid kyi sdom pa legs pa yin/ /dge slong kun du bsdams pa yis/ /sdug bsngal kun las rab tu grol/ /zhes gsungs so/ / rang dang gzhan rdzogs pa'i sangs rgyas kyi ngo bor dmigs pa nyid kyis lhag pa'i sems kyi bslab pa'i rang bzhin la/ rang gi ngo bo la phyin ci ma log pas lhag pa'i shes rab kyi bslab pa la dmigs pa yang ma yin no/ /de bzhin du ser sna la sogs pa'i nyes pa las ldog pa nyid kyis pha rol tu phyin pa la sogs pa ma lus pa nang du 'dus pa ni snga ma'i rjes su 'brangs nas blta bar bya'o/ /de'i phyir rnam pa de lta bu'i byang chub kyi sems bskyed pa dang rjes su mthun pa'i rang bzhin las rnam par log pa rnams ni rgyu'i mchog spangs pa rdzogs pa'i byang chub kyi snod du mi 'gyur zhing / gnas ma yin pa la skrag pa ni don med pa brgyud pa skyed par byed pa'i rgyu nyid yin te/ 'gro ba gang zhig rmongs pa'i rgyu yis gnas ma yin la skrag 'gyur ba/ /yun rings dus su bsod nams phung po chen po min pa 'byung 'gyur rgyus/ /rigs med bshes med blo ma sbyangs shing snga mar dge ba ma bskyed pas/ /chos 'di dag la skrag par gyur pa don chen 'di las nyams par 'gyur/ /rdzogs pa'i byang chub gzhan don mchog gi rgyur gyur sna tshogs mthu yi gnas/ /de las de dang mnyam nyid sems 'di 'ba' zhig rgyu yi mchog yin zhes/ /bdag gis bshad par gyur pa las kyang cung zad dri med bsod nams des/ /sangs rgyas ye shes 'khrul spangs blo can skye bo byang chub thob gyur cig /slob dpon sangs rgyas ye shes kyi zhal snga nas kyis mdzad pa bdag sgrub pa la 'jug pa zhes bya ba rdzogs so// //paN+Di ta shAn+ti b+ha dra dang / lo tsA ba 'gos lhas btsas kyis bsgyur cing zhus te gtan la phab pa'o/ /[ ]@##/ /rgya gar skad du/ b+haT+TA ra ka AR+Ya dzaM b+ha la dza len+d+ra sA d+ha naM/ bod skad du/ rje btsun 'phags pa gnod 'dzin chu dbang gi sgrub pa'i thabs/ sangs rgyas rin chen 'byung ldan la phyag 'tshal lo/

CLOSE WINDOW