བོད་ཡིག

e-texts based on the ACIP/ALL Input

/ @##/ rgya gar skad du/ She ka tsa tu ra pra kA ra Na/ bod skad du/ dbang bzhi pa'i rab tu byed pa/ dpal rdo rje sems dpa' la phyag 'tshal lo/ /'phags pa spyan ras gzigs dbang phyug la phyag 'tshal lo/ /dngos kun rnam dag 'od gsal rang bzhin bde ba chen po'i sku/ /'gro ba 'di kun thugs rjes khyab mdzad cir yang snang ba'i sku/ /ma lus yul du gyur pas khams gsum ro mnyam gnyis su med/ /zung 'jug gzod nas dbyer med rdo rje 'chang ba de la 'dud/ /de yi dngos grub thob pa'i thabs ston pa/ /rdo rje 'chang dang tha dad med pa yi/ /lung dang man ngag brgyud pa ma nyams pa'i/ /bla ma rje btsun de la phyag 'tshal nas/ /dbang bzhi'i rab tu byed pa'i gdams ngag bri/ /rnyed dang bkur sti grags spangs byams dang ldan/ /'khor ba'i sdug bsngal sgrol ba'i thugs rje can/ /rgyud dag grol bar ston par dgyes pa po/ /mtho dman med par kun la mnyam por gzigs/ /dad ldan g.yo sgyu med cing gtang dka' gtong / /'khor bas yid byung mya ngan 'das pa sgrub/ /sman bcud mi 'bad dus kyi bdud rnams spong / /las kyi rkyen thub rtse gcig bsam gtan byed/ /rten dang brten med ngo bo nyid/ /bdag byin brlab pa'i man ngag go/ /dang por maN+Dal lnga byas te/ /gdugs sogs me tog rin po che/ /kha dang mngar sogs ro drug dang / /glang po rta dang rin chen khyim/ /brgyad khri bzhi stong chos phung po/ /lha mi klu sogs bu mo sdug / gnas lnga dag tu dbul bar bya/ /bdag byin rlobs shig gsol ba gdab/ /khong stong khyod kyi sku la med/ /bya ba la sogs tshigs bcad kyis/ /gsol ba gdab cing gnang ba sbyin/ /srung ba'i 'khor lo sngon 'gro bas/ /byang chub mchog tu sems kyang bskyed/ /gzugs brnyan lus dang byang chub sems/ /mtshan ma dbyibs dang sbas pa yum/ /zhal gyis bum pas dbang bskur te/ /phyi yi bzhi pa grangs kyi bzhi/ /sbas pa'i bzhi pa dga' bral bzhi/ /bde chen bzhi pa 'bras bu'i bzhi/ /de ltar de bzhin bzhi pa yang / /yang gi sgra don kyang ldan phyir/ / 'di ni bde chen bzhi pa ste/ /dang por nga rgyal sgom du gzhug /nga ni ye nas rdo rje 'chang / /gnas skabs glo bur gyis bsgribs shing / /rang gi mtshan nyid ngo ma shes/ /dam pa'i drin gyis de mthong nas/ /rang gi lus la de nyid gnas/ /chu khams gser dang nam mkha' 'dra/ /de ltar mos ldan blo bzang la/ /spro ba skyed pa'i bum pa zhal/ /dang po lus 'di grub pa ni/ /cho ga gsum dang byang chub lnga'o/ /pha ma'i sa bon bar do'i sems/ /las kyi rlung la zhon nas ni/ /ma rig pa yis len par byed/ /chags dang phrag dog dbang gis zhugs/ /mer mer ltar ltar yi ge lnga/ /gor gor mkhrang gyur mtshan ma lnga/ /yan lag rdzogs pa rigs lnga'i sku/ /sngon du shi ba chos sku ste/ /bar do longs spyod rdzogs pa'o/ /sa bon gsum 'dres zla ba yin/ /gnas skabs gnyis ni yi ge ste/ /gnas skabs gnyis ni mtshan ma yin/ /gcig ni sprul pa'i sku rdzogs pa'o/ /rab tu byung zhing tshul khrims bsrung / /mgo zlum dpung zlum chos gos gyon/ /kham zas spangs shing bcud kyis 'tsho/ /thal sbyar gus pas mdo zlos byed/ /sa bcu'i bar du dka' thub bsrung / /de nas sngags kyi spyad pa spyod/ /dbang thob don du gsol 'debs pa/ /sgyur byed rlung gis zlog par byed/ /bcom ldan dkyil 'khor sgor bltas te/ /thal sbyar gdong g.yogs bkrol bar byed/ /a haM sgra sgrogs gsol ba 'debs/ /nga rgyal byed pa'i lha yis te/ /sbas pa'i yum ni bum pa'o/ / ku sha srung skud shis ba brjod/ /lhan cig skyes pa'i gnyid kyis nyal/ /bkra shis rdzas rnams lag thogs shing / /nam mkha' ca co'i sgras bkang nas/ /'jig rten 'das dang 'jig rten pa'i/ /bde legs phun sum tshogs pa brjod/ /chu dang cod pan rdo rje dang / /dril bu ming gi dbang rnams bskur/ /de nyid yang ni lan gnyis brjod/ /zas dang mal stan nu ma dang / /bshang gci la sogs brtul zhugs yin/ /pha dang ma yi longs spyod la/ /'di yis bdag po byed pa yin/ /pha dang ma dang gzhan pa la/ /rag ma lus bar rang stobs ldan/ /rin chen rta dang glang po khyim/ /rjes su gnas nas rang dbang thob/ /'di ni bum pa'i bzhi pa'o/ /sme sha can sogs bu mo rnams/ /rgyas shing smin par gyur pa la/ /gzhan gyis spro ba skyed byed cing / /gzhan dag snyoms par 'jug pa la/ /dga' dang mos pas 'jug byed cing / /skye'o cog ces mos skyed pa/ /'di ni gsang ba'i bzhi pa yin/ /phyag rgya dang ni lhan cig tu/ /'o dang 'khyud pa 'jib par byed/ /snyoms par zhugs nas srub par byed/ /snang ba rang bzhin bcas pa nub/ /stong pa zhes ni brjod pa yin/ /sems la dmigs pa dang po'o/ /rtsa rnams kun kyang dung khang nas/ /'dod chags chen po'i mes bzhu ste/ /a ba d+hU tI'i sgor zhugs shing / /k+Sha yi sgo ni ma phye bar/ /mched pa rang bzhin bcas pa nub/ /shin tu stong pa zhes brjod do/ /sems la dmigs pa gnyis pa yin/ /ye shes tsam la snyoms 'jug cing / /yi ge k+Sha yi sgo phye ba/ /bde chen bde ba chen po ni/ /skad cig tsam la nyams myong ba/ /dpal du yid ches byed pa yin/ /log rtog mtshan ma ma lus 'gog /nyer thob rang bzhin dang bcas nub/ /stong pa chen po zhes brjod do / /sems la dmigs pa gsum pa'o/ /gong ma de la rtog dpyod byed/ /glang po che yi lcags kyu 'dra/ /mchog dang dga' bral dbus dag tu/ /mtshan nyid dmigs la brtan par gyis/ /thun nam zla phyed zla ba lor/ /bskal par ye shes che la sbyor/ /stong pa gsum ni ro mnyam pa/ /thams cad stong pa 'od gsal ba/ /sems la dmigs pa bzhi pa'o/ /'di ni gsum pa'i bzhi pa yin/ /rang sems gdod nas ma skyes pa/ /stong pa nyid kyi rang bzhin no/ /dbugs gtong rngub pa ma yin te/ /spyan phye btsums pa ma yin no/ /dgye ba ma yin sbu ba min/ /gsung ba ma yin mi gsung min/ /phyir ni yul la mi dpyod cing / /nang du sems la mi rtog go/ /sems gang gis ni byis pa rnams/ /'khor ba'i bcing bas 'ching bar 'gyur/ /sems gang gis ni rnal 'byor pa/ /bde gshegs gnas su skye bar 'gyur/ /bya ba thams cad blos btang la/ /gang ltar gnas pa'i don la gzhag /ma bcos pa nyid ma nor ba/ /bde ba chen po rang so nyid/ /don du snang ba rang bzhin med/ /dngos por gsal ba rtog pa med/ /chu dang rnyog ma de bzhin no/ /bying zhing lci ba gzengs bstod cing / /'thor zhing 'phyar ba rang sor gzhag /cung zad cung zad goms byas pas/ /gong nas gong du khyad par 'gro / mthar ni mi rtog ting 'dzin dag /lhun gyis grub pa thob par 'gyur/ /sems kyi 'jur bu btang la gzhag /bla ma nyid kyang mnyam bzhag la/ /slob ma byin gyis brlab par bya/ /thun gyi nges pa yod min te/ /ji tsam gnas kyi bar du gzhag /'dod pa'i longs spyod kun bsten cing / /lus kyi 'byung ba ro yang mnyam/ /bzhi pa'i dbang bskur cho ga'o/ /de yi don ni bshad bya ste/ /e waM ma yA'i yi ge bzhin/ /don bzhi dang ni sbyar bar bya/ /rgyud rnams kun gyi don bsdus pa'o/ /e ni 'jug pa waM ni gnas/ /ma ni srung ba yA ni grogs/ /e ni las dang waM ni chos/ /ma ni mu dra yA dam tshig /e ni snang ba stong pa ste/ /waM ni mched pa shin tu stong / /ma ni nyer thob chen po stong / /yA ni ro mnyam thams cad stong / /e ni ma thob thob par byed/ /waM ni thob pa brtan par byed/ /ma ni gong nas gong du 'gro/ / yA ni tshe 'dir rdzogs sangs rgyas/ /e ni rgan po dar ma dang / /gzhon dang lang tsho bab pa'o/ /de bzhin bad kan mkhris pa dang / /rlung dang 'du ba cha mnyam pa'o/ /de bzhin gti mug zhe sdang dang / /'dod chags dug gsum cha mnyam pa'o/ /ti ba skyes bu las zin dang / /gzhon pa'i don dang dpyang thag chad/ /go rims bzhin du shes par bya/ /e ka ka la zhes pa ste/ /rang gi rgyud la cher te ltos / /skyes bu ma bcos ngang du gnas/ /bla ma dam pas mi rta sbyar/ /rang dbang med par rnam rtog phrogs/ /waM ni mar me rgya mtsho dang / /dig pa'i rmi lam khyung chen 'dra// brtan par zung la mnyam par zhog /rjes thob bzhi ni sgyu ma bzhin/ /ma ni nor bu so ga'i be'u/ /rgyal po'i btsun mo 'khor lo 'dra/ /legs par spyod la rtag tu bsrung / /ya ni seng ge glang chen dang / /smyon pa'am lceb pa lta bu yin/ /mgon po'i tsaR+ya dus dang sbyar/ /sngags kyi tsaR+ya gdod nas spyod/ /bzhi pa'i cho ga'i gdams pa ste/ /rigs dang dus dang gnas dang ni/ /bya ba spyod pa 'di ma nges/ /rin chen lta bu'i gang zag la/ /na so 'du ba nyon mongs sbyar/ /lo ni zla ba bcu gnyis pa'o/ /bco lnga na ni mngon sangs rgyas/ /rten can las la brten pa ste/ /las ni lus ngag yid kyi las/ /de la rgyas 'debs phyag rgya yin/ /dga' bral la ni bzhi pa brjod/ /sems la dmigs pa ji bzhin du/ /sgom pa sems la dmigs pa ste/ /rten can zhes ni brjod pa yin/ /rten med rang lus thabs ldan nam/ /'khor lo bzhi dang 'khor lo gnyis/ / rdo rje sems dpa'i dbab thabs sam/ /rnam par shes pa thod sbyor ram/ /yi ge hUM gi dbab thabs sam/ /gtum po'am mkha' 'gro'i byin rlabs sam/ /bla ma dus thabs bsten pas so/ /nyams su myong ba bzhi pa ste/ /rnam shes rlung dang ro gcig pa'o/ /ngo bo nyid ni rdo rje 'chang / / yan lag bdun dang ldan pa ste/ /longs spyod rdzogs pa kha sbyor bde chen rang bzhin med/ /snying rjes nges gang rgyun mi 'chad cing 'gog pa med/ /lha la dmigs shing 'dod la spyod/ /longs spyod rdzogs pa'i rgyu ru bshad/ /las kyi phyag rgya rang 'od yum/ /ye shes phyag rgyas rgyas btab cing / /dkyil 'khor sgrub dang dbang gnyis dus/ /tshogs dang spyod pa ro mnyam dus/ /yum dang bcas pa'i rgyu ru bshad/ /bde la stong pas rgyas btab cing / /ye shes tsam la snyoms 'jug pa/ /lha dang mi yi bde ba las/ /bsdus byas rdo rje 'dzin pa yi/ / bcu drug char yang mi phod do/ /dngos don rang gi mtshan nyid las/ /gud na yod pa ma yin na/ /lha sogs ye shes snang ba las/ /gzhan du dmigs pa smos ci dgos/ /chu yi nang gi zla ba ni/ /bden pa ma yin brdzun pa min/ /de bzhin dkyil 'khor 'khor lo yang / /rang bzhin med lugs de ltar snang / /rnam dag tshangs pa'i gnas bzhi dang / /smon lam snying rje gang ba'i rgyu/ /thog mtha' med pa'i rdo rje sems/ /dus dang phyogs ris rnam par spangs/ /chu bo'i gzhung ltar rgyun mi 'chad/ /'di dang 'di la bya min bral/ /nyon mongs la sogs 'dod lnga rnams/ /ma bkag bde chen rgyan du shes/ /gser 'gyur rtsi bzhin shes pas 'grub/ /bde chen bde ba chen po'i sku/ /rang snang rig mas nyer brgyan pa/ /'og min gnas su dus rtag tu/ /mtshan dang dpe byad 'bar bas bzhugs/ /gang dang gang gis 'dul 'gyur ba/ /de de bzhin du so sor snang / /mos pa'i dbang gis tha dad pa/ /sems can rnams ni 'dul bar mdzad/ /rgyud gzhan dag las bshad pa ni/ /spang bya gsum dang ma rig pa/ /sbyong byed smin byed dbang bzhi'o / /grol byed rgyud dang sngags dang chos/ /gsang ba'i rim pas bzhi par 'dod/ /'di nyid yi ge spyi dang sbas/ /mthar thug yin pas bzhi par 'dod/ /mkha' 'dra chos sku stong pa las/ /rtog med ye shes 'ja' 'dra ba/ /rlung dang ye shes ting 'dzin gyis/ /'bad dang bral bas lhun gyis grub/ /dka' thub dka' spyad 'dir mi dgos/ /dka' thub sdom pa mi bzad pa/ /lus skams nas ni sems gdungs nas/ /sdug bsngal 'ba' zhig byed par zad/ /khrus dang gtsang sbras gdung ba skyed/ /'dod pa lnga ni ma spangs par/ /dka' thub kyis ni ma gdungs par/ /bde bas byang chub tshe 'dir 'thob/ /bskal pa grangs med gsum du ni/ /lus dang srog la ma bltas kyang / /bde ba chen po rnyed par dka'/ /phyag rgya chen po rdo rje ye shes kyi / /dbang bskur bzhi pa'i gdams pa byas pa yin/ /'gro kun byang chub sems kyi dkyil 'khor mthong nas ni/ /zung 'jug rdo rje 'chang gi go 'phang thob bar shog /dbang bzhi pa'i rab tu byed pa slob dpon nA gA rdzu nas mdzad pa rdzogs so/ / //rgya gar gyi mkhan po shAn+ti gar+b+ha dang bod kyi lo tsA ba 'gos lhas btsas kyis bsgyur ba'o// @##/ /rgya gar skad du/ bo d+hi tsit+ta bi ba ra Na nA ma/ bod skad du/ byang chub sems kyi 'grel pa zhes bya ba/

CLOSE WINDOW