བོད་ཡིག

e-texts based on the ACIP/ALL Input

/rgya gar skad du/ pra dI pa u d+yo ta na a no san+d+hi pra kA shi kA nA ma byA khyA TI kA/ bod skad du/ sgron ma gsal bar byed pa'i dgongs pa rab gsal zhes bya ba bshad pa'i TI kA/ rdo rje 'chang la phyag 'tshal lo/ /dpal ldan rtog pa'i dra ba du ma sna tshogs mun pa'i tshogs ni 'joms byed nyi ma ni/ /gang zhig yod dang med pa nyid kyang yongs su spong ba la brtson ngo bo nyid med sku/ /shin tu rjes chags yid can lha mo reg bya rdo rje ma la yang dag par 'khyud pa/ /dkyil 'khor pa rnams dag gis yongs bskor dpe med rdo rje sems dpa' de la bdag gis 'dud/ /'khor ba'i dgon par rtog pa'i dra ba du mas rnam par 'khor ba ni/ /rkun po dang 'dra gang gis shin tu dka' ba'i gnas su 'jig rten khyer/ /gang yod pas ni srid pa pa rnams skye yin khams tshogs de dag ni/ /yang dag sbyangs te gsal byed rigs bdag btsun mo spyan sogs bdag gis 'dud/ /dri ma dang bcas gzugs sogs nye bar len pa'i phung po lnga rnams dag byas nas/ /nam mkha'i dkyil mtshungs shel ltar dngas shing ye shes lnga po ro gcig rab bskyed pa/ /thabs dang shes rab bdag nyid sku yis skye dgu phan 'dogs brtson 'grus bdag nyid can/ /rang bzhin gyis grub rtag pa la sogs rgyal ba'i tshogs rnams mchog gyur de la bdag phyag 'tshal/ /gang gis dbang po rnams ni nges par nyams byas pa/ /chu skyes dri yi tshogs kyis bung ba'i tshogs rnams bzhin/ /de dag gang gis rab tu zhi bar byed pa ni/ /gzugs kyi rdo rje ma sogs de la bdag phyag 'tshal/ /gzugs sogs spyod yul tshogs ni rab nyams rgyu yi phyir/ /skad cig bde ba'i sred pas gzung bar byed pa gang / /dbang po de rnams gang gis rgyal ba nyid byed pa/ /sa snying la sogs de la spyi bos bdag rtag 'dud/ /'gro ba ma lus gzir byed 'jig rten skyong ba rnams/ /shin tu zil gyis mnan cing theg mchog 'jug byed pa/ /sbrul bdag tshogs kyis yan lag brgyan cing khro bcas pa/ /gshin rje gshed sogs khro rgyal rnams la phyag 'tshal lo/ /kong ka na yi grong khyer du/ /dpal gyi ri yi rtse mor ni/ /skye bos dben pa'i gnas nyid du/ /dang por de la gnas byas na / /mi dang lha yi bdag por mtshungs/ /mchog tu gyur pa'i chos gsungs pa / /sgra gcan 'dzin gyi zhal snga nas/ /sa steng 'di la rgyal gyur cig /mnyes pa de las de nyid ni/ /theg chen rnal 'byor pas thob pa/ /sa thob gzhan gyi don la brtson/ /dpal ldan klu sgrub rgyal gyur cig /de las de nyid rin chen ni/ /thob pa 'jig rten gsum du grags/ /'dus pa rgya mtsho'i pha rol phyin/ /zla grags gsal byed rgyal gyur cig /de yis byas pa'i 'grel pa ni/ / mtha' drug bshad pas zab pa nyid/ /de ni deng bdag ma lus par/ /skal ldan grags pas gsal bshad bya/ /sngags kyi theg pa chen po 'di la ni nai rany+dza na'i chu bo'i 'gram du rgyal bu don thams cad grub pa de bzhin gshegs pa thams cad kyis bskul bas thams cad mkhyen pa'i ye shes thob pa'i dga' ldan gyi gnas su gshegs pa bzhin du rgyud la sogs pa'i rigs pa bzhi la brten te/ snyigs ma rnam pa lngas rnyog par byas pa'i sems kyi rgyud dang ldan pa'i ma 'ongs pa'i sems can gyi khams rjes su gzung bar bya ba'i phyir rin po che sna tshogs pa'i rang bzhin chos kyi 'byung gnas kyi gzhi can gzhal yas khang pa la bzhugs te/ dkyil 'khor pa rnams spro zhing de bzhin gshegs pa lngas gsol ba gdab pa'i dpal rdo rje 'chang chen pos bsam pa dang bag la nyal dang khams dang bag chags kyi dbye ba las sngags kyi bstan bcos rnam pa lnga ru gsungs te/ bya ba dang / spyod pa dang / rnal 'byor dang / rnal 'byor gyi bla ma dang / rnal 'byor ma'i rgyud kyi dbye bas so/ /de la dkyil 'khor dang bskor ba dang sbyin sreg dang rab tu gnas pa dang dus gsum du khrus dang gos dus gsum du brje ba dang bsnyung bar gnas pa la sogs pa rjod par byed pa'i rgyud ni bya ba'i rgyud de sgrol ma byung ba la sogs pa'o/ /brtul zhugs dang dngos grub dang rdzu 'phrul gtsor gyur pa la sogs pa spyod pa'i rgyud de dpal mchog dang po dang rnam par snang mdzad mngon par byang chub pa'i rgyud rnams so/ /phyag rgya bzhi dang dkyil 'khor dang ting 'dzin gtsor gyur pa'i rnal 'byor gyi rgyud ni dpal de kho na nyid bsdus pa la sogs pa'o/ /bskyed pa dang rdzogs pa la sogs pa so sor bstan pa'i rgyud ni rnal 'byor gyi bla ma ste dpal gsang ba 'dus pa la sogs pa'o/ /rim pa gnyis po de yang spros pa med par gang du khyad par du bstan pa de dag ni dpal dgyes pa'i rdo rje la sogs pa rnal 'byor ma'i rgyud do/ /de la rab dang 'bring gi gti mug gi rigs can la dgongs te bya ba'i rgyud bstan to/ /gti mug dman pa'i rigs can rnams la spyod pa'i rgyud bstan to/ /dman pa dang bar pa'i 'dod chags dang zhe sdang dang gti mug gi rigs can rnams la rnal 'byor gyi rgyud bstan to/ /'dod chags dang zhe sdang dang gti mug rab kyi rigs can rnams la rnal 'byor gyi bla ma'i rgyud do/ /rab kyi rab kyi 'dod chags dang zhe sdang dang gti mug gi rigs can rnams la rnal 'byor ma'i rgyud bstan to zhes rgyud kyi dbye ba dang yul gyi bye brag bstan to/ /yul gyi dbye ba de la ni tsan+dan dang ut+pa la dang pad+ma dkar po dang / pad+ma dmar po dang / rin po che ste gang zag rnam pa lnga yod de/ de la tsan+dan ni blun po'i rigs can no/ /ut+pa la ni dbang po dman pa'o/ /pad+ma dkar po ni dbang po bar pa'o/ /pad+ma dmar po ni dbang po rno ba'o/ /rin po che ni dbang po rab kyi rab bo/ /bag chags kyi bye brag gis gang zag rnams la rigs kyi bye brag bstan to/ /de yang gdod ma nas chags pa yin te de dngul la sogs pa'i rigs bzhin no/ /de'i phyir gang zag gi dbye ba la dgongs te bcom ldan 'das kyis rgyud thams cad kyi ngo bo rnal 'byor gyi rgyud chen po 'di gang zag thams cad gdul bar bya ba'i phyir gsungs pa/ de'i 'grel pa slob dpon zla ba grags pas bskyed pa dang rdzogs pa'i rim pa gnyis la brten te sgrol ma gsal bar byed pa brtsams so/ /ji skad du rgyud phyi ma las/ bskyed pa yi ni rim pa dang / /rdzogs pa'i rim pa nyid dang ni/ /rim pa gnyis la brten byas nas/ /rdo rje can gyis chos gsungs so/ /de la bskyed pa'i rim pa rnam pa gsum ste/ dang po'i sbyor ba dang / dkyil 'khor rgyal ba mchog dang / las rgyal ba mchog go/ /rdzogs pa'i rim pa ni rnam pa lnga ste/ rdo rje bzlas pa'i rim pa dang / sems la dmigs pa thob pa'i rim pa dang / bdag la byin gyis brlab pa'i rim pa dang / mngon par byang chub pa'i rim pa dang / zung du 'jug pa'o/ /de la dang po'i sbyor ba la rnam pa bzhi ste/ rnal 'byor dang / rjes su rnal 'byor dang / shin tu rnal 'byor dang / rnal 'byor chen po'o/ /rnal 'byor la ni rnam pa bcu ste snying rje chen po mngon du bya ba sngon du 'gro ba khyad par gyi gnas la brten pa dang / bgegs bskrad pa'i bdag nyid can gnas bsrung ba dang / stong pa nyid kyi sgom pas bdag nyid bsrung ba dang / ye shes kyi sa gzhi bsgom pa dang / gzhal yas khang dang / de'i nang du pad+ma dang zla ba dang nyi ma'i gdan la gnas pa lhag par mos pa'i dkyil 'khor bsgom pa dang / don dam pa'i dkyil 'khor bsgom pa dang / gzhal yas khang gi nang du gdan dgod pa dang / chos kyi dbyings kyi de kho na nyid bsgom pa dang / yi ge gsum las skyes pa'i dbus kyi gtso bo bsgom pa'o/ /rjes su rnal 'byor ni ye shes sems dpa'i dang ting nge 'dzin sems dpa' bsgom pa'o/ /phung po khams dang skye mched byin gyis rlob pa ni shin tu rnal 'byor ro/ /sku dang gsung dang thugs byin gyis rlob pa'i bdag nyid can ni rnal 'byor chen po ste/ dang po'i sbyor ba'i ting nge 'dzin to/ /dkyil 'khor rgyal ba mchog ni rnam pa brgyad de/ phyag rgya'i dbye ba dang / rigs kyi dbye bas de dag la dmigs pa dang / rdo rje pad+ma snyoms par zhugs pa dang / de bzhin gshegs pa thams cad rjes su 'jug pa dang / pad+ma'i nang du dam tshig gi dkyil 'khor dbyung ba dang / sems can gyi khams sbyang ba sngon du 'gro ba'i phyir spro ba dang / phyir mi ldog pa'i dbang dang rgyas gtab pa ste dkyil 'khor rgyal ba mchog gi ting nge 'dzin to/ /las kyi rgyal ba mchog gi ting nge 'dzin la bcu gnyis te/ phra mo'i rnal 'byor dang / bzlas pa'i cho ga dang / bya ba byas pas zhu ba nyid dang / lha mos bskul ba nyid dang / slar yang bzhengs pa dang / bzhengs pa la de bzhin gshegs pa lngas bstod pa dang / dkyil 'khor gyi 'khor lo nye bar bsdu ba dang / tshim par byed pa'i cho ga dang / nang gi sbyin sreg gi cho ga dang / gshegs su gsol ba dang / gtor ma'i cho ga dang / gnyid log pa'i cho ga ste las kyi rgyal ba mchog gi ting nge 'dzin to/ /'di ni bskyed pa'i rim pa ste tha mal pa'i lus rnam par dag pas khyad par can gyi lha'i rnam pa rdzogs par byed pa'i phyir ro/ /rdo rje'i bzlas pa'i rim pa la rnam pa bcu gcig ste/ rdo rje 'chang chen po bzlas pa dang / sku'i bzlas pa dang / gsung gi bzlas pa dang / thugs kyi bzlas pa dang / rin po che'i bzlas pa dang / don yod pa'i bzlas pa dang / khro bo'i bzlas pa dang / 'dod chags kyi bzlas pa dang / zhe sdang gi bzlas pa dang / gti mug gi bzlas pa dang / ma ning gi bzlas pa'o/ /sems la dmigs pa thob pa yang rnam pa gsum ste/ snang ba rnam par dag pa dang / snang ba mched pa rnam par dag pa dang / snang ba nye bar thob pa rnam par dag pa'o/ /bdag la byin gyis rlob pa yang rnam pa gsum ste/ chos kyi skur bdag byin gyis brlab pa dang / longs spyod rdzogs pa'i skur byin gyis brlab pa dang / sprul pa'i skur byin gyis brlab pa'o/ /mngon par byang chub pa'i rim pa la yang rnam pa gsum ste/ 'dod chags rnam par dag pa dang / 'dod chags bar ma rnam par dag pa dang / 'dod chags dang bral ba rnam par dag pa'o/ /zung du 'jug pa'i rim pa yang gnyis te/ rgyu'i zung du 'jug pa dang / 'bras bu'i zung du 'jug pa'o/ /de ni rdzogs pa'i rim pa ste rang bzhin gyis grub pa'i phyir dang / dbang po rno ba'i gdul bya'i yul yin pa'i phyir zhes bya ba'i bar du'o/ /de la bskyed pa'i rim pa mdor bsdus pa 'di yin te/ dang po re zhig rnal 'byor pas snying rje chen po mngon du byas te/ sems can thams cad sdud par byed pa'i tshad med pa'i sems bskyed la/ de nas yid du 'ong ba'i sa phyogs su bdud rtsi lngas dkyil 'khor byugs te/ nang tshangs can la sogs pa'i stan 'jam po la sems dpa'i skyil mo krung du 'dug ste/ myur du tha mal pa'i lus rnam par dag par bya ba'i phyir zhe sdang rdo rje bdag nyid bsgom par bya'o/ /de nas gnas bsrung bar bya ba'i phyir zhe sdang rdo rje'i ting nge 'dzin mngon du byas te/ snyoms par zhugs pa'i reg bya rdo rje ma'i chos 'byung ba'i phyag rgya'i nang du sna tshogs pad+ma la nyi ma'i dkyil 'khor gyi steng du/ khro bo thams cad 'jug pa sngon du 'gro ba rdo rje'i lam nas hUM yongs su gyur pa las khro bo'i rdo rje las byung ba zhal gsum pa phyag drug pa/ spyan gsum pa rigs kyi klu brgyad kyis brgyan pa sku mdog sngon po dang dkar po dang dmar ba'i zhal/ spyan zlum zhing g.yo ba/ g.yon brkyang ba rdo rje dang dril bu rtsa ba'i phyag gnyis kyis bsnams pa/ zhags pa dang lcags kyu dang ral gri dang rdo rje tho ba 'dzin pa/ zhe sdang rdo rje'i cod pan can smin ma kham pa ha ha hi hi'i sgra sgrogs pa'i gnod mdzes kyi rgyal po bsgom par bya ste/ rdo rje dang pad+ma'i nang nas phyir byung ste nyi ma'i dkyil 'khor gyi steng du gnas shing bka' nod bzhin par rnam par bsams te/ de'i rjes su snga ma bzhin du reg bya rdo rje ma'i chos 'byung ba'i nang du yi ge hUM bcu yongs su gyur pa las gshin rje dgra la sogs pa khro bo bcu po 'og nas 'byung ba'i kha dog dang mtshon cha 'dzin pa spros te/ rim pa ji lta ba bzhin du shar la sogs pa'i phyogs su bsgom par bya'o/ /khro bo de rnams kyang stod khro bo'i rnam pa smad phur bu'i rnam par shes par bya'o/ /de'i rjes su dbus kyi gtso bo'i bdag nyid kyis sngags 'di dang gnod mdzes la bka' bsgo bar bya'o/ /oM sum+b+ha ni sum+b+ha hUM hUM phaT/ oM gr-ih+Na gr-ih+Na hUM hUM phaT/ oM gr-ih+NA pa ya gr-ih+NA pa ya hUM hUM phaT/ oM A na ya ho b+ha ga bAn badzra rA dza hUM hUM phaT/ zhes pa 'dis phyogs bcur gnas pa'i brgya byin la sogs pa'i phyogs skyong dgug par bya ba'i phyir bka' bsgo bar bya'o/ /bka' thos ma thag tu gnod mdzes kyi rgyal pos zhags pa dang / lcags kyu phyogs bcur spros te/ brgya byin la sogs pa phyogs skyong rnams kyi mgrin par zhags pas bcings te/ lcags kyus spyi bor btab pa la shar la sogs pa'i phyogs dang mtshams su dgod par bsam mo/ /phyogs skyong ba rnams kyi kha dog dang phyag mtshan la sogs pa'i rim pa ni 'di yin te/ shar gyi phyogs su brgya byin mdog ser po gdong gcig pa lag pa gnyis pa rab brtan la zhon pa lag pa na rdo rje thogs pa bsgom par bya'o/ /lho phyogs su gshin rje kha dog nag po gdong gcig pa lag pa gnyis pa ma he la zhon pa be con thogs pa'o/ /nub kyi phyogs su chu lha ste mdog dkar po gdong pa gcig pa lag pa gnyis pa klu'i zhags pa thogs pa chu srin la zhon pa'o/ /byang gi phyogs su nor lha ste mdog dmar ba gdong gcig pa lag pa gnyis pa seng ge'i rgyal mtshan dang ne'u le'i gter 'dzin pa seng ge'i stan la 'dug pa'o/ /me'i mtshams su me lha ste mdog dmar po gdong gcig pa lag pa gnyis pa dbyug pa dang bgrang phreng 'dzin cing ra skyes kham pa la zhon pa'o/ /bden bral gyi mtshams su srin po ste mdog nag po gdong gcig pa lag pa gnyis pa ral gri dang phub 'dzin cing yi dags la zhon pa'o/ /rlung gi mtshams su rlung lha ste mdog dud kha gdong gcig pa lag pa gnyis pa ba dan 'dzin cing sha ba la zhon pa'o/ /dbang ldan gyi mtshams su 'byung po'i bdag po ste kha dog dkar po gdong gcig pa lag pa gnyis pa rtse gsum dang sa bon rgyas pa'i 'bras bu 'dzin cing khyu mchog la zhon pa'o/ /steng du tshangs pa mdog dkar po gdong bzhi pa dbyug pa dang spyi blugs 'dzin pa ngang pa la zhon pa'o/ /steng du yang nyi ma ni mdog dmar po gdong gcig pa lag pa gnyis pa pad+ma thogs pa pad+ma'i gdan la 'dug pa'o/ /zla ba ni mdog dkar po gdong gcig pa lag pa gnyis pa me tog ku mu da thogs shing ku mu da'i stan la 'dug pa'o/ /'og tu srin po'i bdag po thags bzangs ris te kha dog nag po gdong gcig pa lag pa gnyis pa sdigs mdzub dang ral gri thogs pa glang po che la zhon pa'o/ /sa'i lha mo yang mdog ser po gdong gcig pa lag pa gnyis pa lus kyi stod mngon pa gser gyi bum pa thogs pa bsgom par bya'o/ /de'i rjes la gnod mdzes rgyal po la yang phyogs skyong rnams la phur bus gdab par bya ba'i phyir bka' bsgo bar bya'o/ /des kyang gshin rje'i gshed la sogs pa khro bo rnams phur bu'i rnam pa spyi bos blangs te phyogs skyong rnams kyi spyi bor 'debs par byed par bsams te/ de'i sngags ni 'di yin te/ oM g+ha g+ha g+hA ta ya g+hA ta ya sarba du Sh+TA na hUM hUM phaT/ kI la ya kI la ya sarba pA paM hUM phaT hUM hUM hUM badzra kI la ya badzra d+har A dz+nyA pa ya te sarba big+h+nAn kA ya bAka tsit+ta badzra kI la ya hUM phaT/ zhes sngags 'dis mgo bo nas rkang pa'i bar du phur bus gdab par bya'o/ /slar yang gnod mdzes kyi rgyal pos gshin rje gshed la sogs pa'i phur bu rnams la rdo rje tho bas brdung bar bya ste/ oM badzra mung+ga ra badzra kI la ya A ko Ta ya hUM phaT/ zhes 'dis brdungs pas sa 'og bdun gyi bar du de dag thams cad son par gyur par bsam mo/ /gshin rje gshed la sogs pa'i khro bo rnams kyis rang gi sku las nges par byung ba'i me stag 'phro ba lta bus brgya byin la sogs pa'i 'khor gnod sbyin dang srin po la sogs pa tshig cing thal bar byas par bsam par bya'o/ /de ltar bgegs bskrad pa byas la rang gi snying ga nas nges par 'byung ba'i 'od zer gyi tshogs kyis khro bo'i tshogs dgug par byas la de nyid du 'jug par bya'o/ / zhugs ma thag tu stong pa nyid kyi de kho na nyid mngon du bya'o/ /ci'i slad du zhe na/ gang gi phyir bsgom pa'i rim pa des kyang gal te bgegs zhi bar mi 'gyur na de'i tshe don dam pa'i bden pa la 'jug par bya'o/ /gang gi phyir 'od gsal ba'i sems la bgegs 'jug pa de ni gnas ma yin zhing glags skabs yod pa ma yin no/ /de la stong pa nyid kyi bsgom pa 'di yin te/ reg bya rdo rje ma dang snyoms par zhugs pa'i dbang gis bde ba chen po skye ba ni/ dngos po med pas bsgom pa med/ /bsgom par bya ba sgom pa min/ /de ltar dngos dang dngos med pas/ /bsgom pa dmigs su med pa'o/ /zhes byang chub kyi sems kyi tshigs su bcad pa rjes su dran par byas te/ snod dang bcud kyi 'jig rten gnyis po 'od gsal zhing stong pa nyid kyi rang bzhin du bsam par bya'o/ /de brten par bya ba'i phyir/ oM shU n+ya tA dz+nyA na badzra swa b+hA wa At+ma kou0f85haM/ zhes sngags brjod do/ /de'i rjes la kun gyi gzhi'i dkyil 'khor gru gsum pa nag po dang dkar po dang dmar po dbus dang g.yas pa dang g.yon pa'i cha bsam par bya'o/ /de'i dbus su yi ge hUM kha dog sngon por bsams te/ de'i phyi rol tu dbyangs kyi yi ge nyis 'gyur gyi phreng ba dang / de'i phyi skor tu gsal bya'i phreng ba rim pa ji lta ba bzhin du dkar po dang dmar po dang thabs dang shes rab kyi ngo bor bsam par bya'o/ /dbyangs yig gi phreng ba las grub pa'i lha mo rnams dang gsal bya'i yi ge las grub pa de bzhin gshegs pa de dag kyang snyoms par zhugs pa sems dpa' gsum g yi bdag nyid can snyoms par zhugs pa las skyes pa'i bde ba chen pos thim par gyur nas yi ge hUM dang lhan cig tu ro gcig par gyur nas chos 'byung ba'i phyag rgya'i nang byang chub sems kyis gang ba bsgom mo zhes de bzhin gshegs pa thams cad kyi ngo bo nyid chos 'byung ba'i phyag rgya zhes bya ba kun gyi gzhi'i dkyil 'khor du bsgom mo/ /de'i steng du mdog sngon po yi ge yaM las skyes pa hUM gnyis kyis spel ba chos mngon pa las bshad pa'i tshad dang ldan pa'i gzhu'i dbyibs can ba dan dag gis mtshan pa rlung gi dkyil 'khor hUM gnyis las skyes pa'i rdo rje sngon po gnyis kyis bcings pa rnam par bsams te/ de'i dbus su khaM sngon po rnam par dgod cing de'i 'od zer gyis me tog can zhes bya ba'i 'jig rten gyi khams na bzhugs pa bcom ldan 'das don yod grub pa 'khor dang bcas pa der 'jug par byas la/ de yongs su gyur pa las slar yang bcom ldan 'das don yod grub pa sku mdog sngo bsang zhal gsum pa phyag drug pa ral gri dang rdo rje dang 'khor lo dang rin po che dang pad+ma dang dril bu 'dzin pa/ dam tshig sgrol ma dang snyoms par zhugs par bsams te/ ye shes sems dpa'i thugs ka'i sa bon gyi thig le'i 'od zer gyi lcags kyus snga ma dang 'dra ba'i don yod grub pa dgug pa la sogs byas pas gnyis ka bde ba chen po'i dbang gis zhu ba'i gzugs thig ler gyur pa de nyid rlung gi dkyil 'khor dang lhan cig tu 'dres par gyur nas/ slar yang gzhu'i dbyibs can rlung gi dkyil 'khor du gyur par bsam mo/ /de'i rjes la rlung gi dkyil 'khor gyi steng du raM dmar po hUM gnyis kyis rnam par spel ba rnam par dgod de/ de yongs su gyur pa las rlung gi dkyil 'khor de nyid zur gsum pa me 'bar ba spro bar byed pa me'i dkyil 'khor hUM gnyis las skyes pa'i rdo rje dmar po gnyis kyis bcings pa rnam par bsams te/ de'i dbus su AH dmar po yongs su gyur pa las bcom ldan 'das 'od dpag tu med pa sku mdog dmar po zhal gsum pa phyag drug pa pad+ma dang rdo rje dang 'khor lo dang dril bu dang rin po che dang ral gri 'dzin pa gos dkar mo dang snyoms par zhugs pa rnam par bsams te/ ye shes sems dpa'i thugs ka'i sa bon gyi thig le'i 'od kyi tshogs kyis bde ba can gyi sangs rgyas kyi zhing na bzhugs pa'i 'od dpag tu med pa 'khor dang bcas pa bkug la de nyid du 'jug par bya ste/ gnyis ka bde ba chen po'i dbang gis zhu zhing thig le'i gzugs su yongs su gyur pa me'i dkyil 'khor de nyid dang lhan cig tu 'dres par gyur pa slar yang me'i dkyil 'khor bsam par bya'o/ /de'i rjes la de'i steng du yi ge baM dkar po hUM gnyis kyis spel ba rnam par dgod de/ de yongs su gyur pa las me'i dkyil 'khor de nyid kha dog dkar po chu'i dkyil 'khor zlum po 'o ma can gyi rgya mtsho bzhin du pha rol med par bltas te/ dba' rlabs kyi phreng ba dkar po 'phro ba bsams la/ de'i dbus su yi ge hUM kha dog gnag pa rnam par bkod nas de yongs su gyur pa las bcom ldan 'das mi bskyod pa sku mdog nag po zhal gsum pa phyag drug pa rdo rje dang 'khor lo dang pad+ma dang dril bu dang rin po che dang ral gri 'dzin pa/ mA ma kIs 'khyud par rnam par bsams te/ ye shes sems dpa'i thugs ka'i sa bon gyi thig le'i 'od zer gyi tshogs kyis mngon par dga' ba'i 'jig rten gyi khams na bzhugs pa'i mi bskyod pa 'khor dang bcas pa bkug la/ gnyis ka bde ba chen po 'bab pa'i dbang gis zhu zhing thig le'i gzugs su yongs su gyur pa chu'i dkyil 'khor de nyid dang lhan cig 'dres par gyur pas me'i dkyil 'khor de nyid slar yang chu'i dkyil 'khor du bsgom par bya'o/ /de'i rjes la de'i steng du yi ge laM las skye ba'i kha dog ser po yi ge hUM gnyis kyis spel ba yongs su gyur pa las sa'i dkyil 'khor gru bzhi rnam par bsams te/ de'i dbus su oM kha dog dkar po rnam par dgod la de yongs su gyur pa las bcom ldan 'das rnam par snang mdzad sku mdog dkar po zhal gsum pa phyag drug pa 'khor lo dang rdo rje dang / pad+ma dang dril bu dang rin po che dang ral gri 'dzin pa/ sangs rgyas spyan de dang 'dra bas 'khyud par bsams la/ ye shes sems dpa'i thugs ka'i sa bon gyi thig le'i 'od zer gyi tshogs kyis 'og min gyi gnas na bzhugs pa'i bcom ldan 'das rnam par snang mdzad bkug la de nyid du 'jug par bya ste/ gnyis ka bde ba chen po 'bab pa'i dbang gis zhu ba'i thig le'i gzugs yongs su gyur pa las sa'i dkyil 'khor de nyid dang lhan cig 'dres par gyur nas/ chu'i dkyil 'khor de nyid slar yang dbang chen gyi dkyil 'khor du bsgom par bya'o/ /de yang ji lta bu zhe na/ ji skad du gsang ba thams cad kyi rgyud las/ gru bzhi pa las shin tu rgyas/ /rin chen sna tshogs rang bzhin brtan/ /spros pa'i 'od zer tshogs kyis ni/ /nam mkha' ma lus ltos khyab pa/ /rdo rje chen po gnyis kyis ni/ /kha dog ser pos mdzes byas pa/ /rnam par snang mdzad rang bzhin te/ /sa yi dkyil 'khor bsgom par bya/ /zhes 'byung ngo / /de nas de'i steng du yi ge swA ser po yongs su gyur pa las rin chen 'byung ldan sku mdog ser po zhal gsum phyag drug pa/ rin po che dang / 'khor lo dang / rdo rje dang / dril bu dang / pad+ma dang / ral gri 'dzin pa/ mA ma kI nyid dang snyoms par zhugs par bsams te/ ye shes sems dpa'i thugs kha'i sa bon gyi thig le'i 'od zer gyi tshogs kyis rin po che'i 'byung gnas zhes bya ba'i 'jig rten gyi khams na bzhugs pa'i bcom ldan 'das rin chen 'byung ldan bkug la de nyid du 'jug par bya ste/ gnyis ka bde ba chen po 'bab pa'i dbang gis zhu ba'i gzugs su bsams te sa'i dkyil 'khor de nyid nam mkha' lta bu shin tu rgyas par bsam par bya'o / / ye shes lnga'i ngo bo nyid de bzhin gshegs pa rnam pa lnga rnam par dag pa rlung la sogs pa'i dkyil 'khor gyi rang bzhin ye shes kyi sa gzhi'o/ /de'i rjes la de'i steng du kha dog ser po yi ge swA yongs su gyur pa las rin po che sna bdun gyi ngo bo nyid gru bzhi pa rtse mo brgyad kyis nye bar mdzes pa/ rgyal po chen po bzhi la sogs pa'i lha'i gnas ris drug gis rnam par brgyan pa yongs su 'du zhes bya ba la sogs pa'i dpag bsam gyi shing la sogs pas nye bar brgyan pa'i ri'i rgyal po rnam par bsams te/ de'i steng du yi ge b+h+rUM dkar po yongs su gyur pa las 'khor lo rtsibs brgyad pa b+h+rUM gyis mtshan pa rnam par bsgoms te de'i 'od zer gyi tshogs kyis snga ma bzhin rnam par snang mdzad 'jug par bya ste/ de yongs su gyur pa las slar yang rnam par snang mdzad rig ma dang bcas par bsgoms te/ phyogs bcu'i 'jig rten gyi khams na bzhugs pa'i de bzhin gshegs pa 'jug pa de ma thag tu rnam par thim zhing thig le'i gzugs su bsgom par bya'o/ /de'i rjes su ye shes kyi sa gzhi dang ri rab dang thig le yongs su gyur pa las gzhal yas khang pa bsgom par bya ste/ ji skad du/ gru bzhi pa la sgo bzhi pa/ /rta babs bzhi pos rnam par brgyan/ / g.yer ka dar dpyang 'phan la sogs/ /rnga yab la sogs dag gis brgyan/ /mtshams kyi cha rnams thams cad dang / /sgo dang sgo khyud zur rnams la/ /rin chen rdo rjes mdzes par ni/ /phyi yi dkyil 'khor bsgom par bya/ /lha yi snam bu la sogs kyis/ /khyad par du ni rnam par brgyan/ /byang chub phyogs chos tshogs rnams kyi/ /rnam par dag nas dran par bya/ /zhes gzhal yas khang pa bsgom pa'i rim pa'o/ /de nas gzhal yas khang pa'i dbus su pad+ma 'dab ma sna tshogs pa dang / de'i shar la sogs pa'i phyogs su sna tshogs pad+ma bzhi dang / ji srid sgo ba'i bar du sna tshogs pad+ma sum cu rtsa gnyis bsgom par bya'o/ /dbus kyi gdan dang mA ma kI'i gdan dang / khro bo bcu'i nyi ma'i gdan du shes par bya'o/ /lhag ma rnams ni zla ba'i gdan no/ /dbus su sna tshogs pad+ma dang nyi ma'i steng du bcom ldan 'das kha dog gnag pa zhal gsum pa phyag drug pa/ cung zad mche ba gtsigs shing tsham ngam pa 'og nas 'chad pa'i phyag mtshan 'dzin pa rdo rje'i skyil mo krung gis bzhugs pa bcom ldan 'das ma reg bya rdo rje ma dang snyoms par zhugs pa/ zhi ba dang sgeg pa dang khro bo'i nyams dang ldan pa myur ba'i ting nge 'dzin gyis rdzogs pa mi bskyod rdo rje bsgom par bya'o/ /de bzhin du yang shar la sogs pa'i phyogs su rnam par snang mdzad la sogs pa zhal gsum pa phyag drug pa dkar ba la sogs pa'i mdog dang ldan pa la sogs pa dang snyoms par zhugs pa bsam par bya'o/ /mtshams rnams la yang spyan la sogs pa'i rigs kyi lha mo rigs dang rjes su mthun pa bsgom par bya'o/ /phyi'i mtshams bzhi la gzugs rdo rje ma la sogs pa de bzhin du bsam par bya'o/ /shar gyi snam bu la sa'i snying po dang byams pa dag go/ /lho'i snam bu la phyag na rdo rje dang nam mkha'i snying po'o/ /nub kyi snam bu la 'jam dpal dang spyan ras gzigs kyi dbang phyug go/ /byang gi snam bu la sgrib pa thams cad rnam par sel ba dang kun tu bzang po dag bsgom par bya'o/ /sgo rnams su gshin rje gshed la sogs pa dang sgo'i mtshams su mi g.yo mgon la sogs pa dang / steng dang 'og tu gtsug tor 'khor los sgyur ba dang gnod mdzes kyi rgyal po bsgom par bya'o/ /de dag gi kha dog dang phyag mtshan la sogs pa'i bye brag 'og nas 'chad par 'gyur ro zhes lhag par mos pa'i dkyil 'khor nye bar bstan to/ / de nas phung po dang khams dang skye mched 'di dag thams cad lha'i ngo bo nyid tha mal pa'i lus rnam par dag pas khyad par can gyi lha'i rnam pa'i bdag nyid yin yang spros pa yin pas/ de rnam par dag par bya ba'i phyir thams cad stong pa nyid ngo bo nyid don dam pa'i dkyil 'khor du thim par bya'o/ / de'i rim pa 'di yin te/ gzugs kyi phung po spyi bor rnam par snang mdzad dang spyan ma dang gzugs rdo rje ma dang sa'i snying po dang byams pa dang gshin rje mthar byed dang mi g.yo mgon rnams 'jug par bya'o/ /tshor ba'i phung po lte bar rin chen 'byung ldan dang mA ma kI dang sgra rdo rje ma dang phyag na rdo rje dang nam mkha'i snying po dag dang shes rab mthar byed dang 'dod pa'i rgyal po dag 'jug par bya'o/ /'du shes kyi phung po'i mgrin par 'od dpag tu med pa dang gos dkar mo dang rdo rje dri ma dang 'jam dpal dang spyan ras gzigs kyi dbang phyug dang pad+ma mthar byed dang dbyug sngon can 'jug par bya'o/ / 'du byed kyi phung po rkang pa dag la don yod grub pa dang dam tshig sgrol ma dang ro rdo rje ma dang sgrib pa thams cad rnam par sel ba dang kun tu bzang po dang bgegs mthar byed dang stobs po che rnams 'jug par bya'o/ /rnam par shes pa'i phung po snying gar sku'i dkyil 'khor de dag thams cad dang gtsug tor dang gnod mdzes kyang 'jug par bya'o/ /rnam par shes pa'i phung po yang nam mkha'i dbyings zhes bya ba 'od gsal ba la 'jug par bya'o/ /de'i rim pa ni reg bya rdo rje ma dang snyoms par zhugs pa'i dbang gis tshangs pa'i bu ga na gnas pa'i rtsa'i 'khor lo'i nang nas byang chub kyi sems 'pho ba'i tshe/ shes rab kyi ngo bo nyid mtshan mo'i cha ste snang ba'o/ /yan lag thams cad la khyab pa'i dus su nyin mo'i rang bzhin thabs kyi ngo bo nyid snang ba mched pa'o/ /rdo rje chang zungs su gnas pa'i byang chub kyi sems kyi thig le gsum 'pho ba'i gnas skabs su mtshams kyi ngo bo nyid shes rab dang thabs ro gcig pa'i tshul can snang ba thob pa'o/ /de'i rdzas la gsang ba'i rdo rje'i rtse mor nor bu'i char byang chub kyi sems kyi bde ba nyams su myong ba thob pas chags pa dang chags pa dang bral ba dang chags pa bar pa rnams spangs pa shes rab dang thabs dang nye bar thob pa dang bral ba/ thams cad stong pa'i bdag nyid skad cig ma gang shar ba de 'od gsal ba'i bdag nyid can skad cig ma yin par shes par bya'o/ /snang ba nye bar thob pa dang 'od gsal ba'i skad cig ma gnyis kyi bar du rtags rnam pa lnga de kho na nyid la mthong ba la mi slu bar byed pa de dag bshad par bya ste/ de la dang po smig rgyu'i rnam pa dang / gnyis pa du ba'i rnam pa dang / gsum pa mkha' snang gi rnam pa dang / bzhi pa mar me'i rnam pa dang / lnga pa sprin med pa'i nam mkha' dang mtshungs par shes par bya'o/ /de la sa chu la thim pas smig rgyu'i rnam pa dang / chu me la thim pas du ba'i rnam pa dang / me rlung la thim pas mkha' snang gi rnam pa dang / rlung nam mkha' la thim pas mar me'i rnam pa dang / nam mkha' 'od gsal ba la thim pas sprin med pa'i nam mkha' lta bu skye bar 'gyur zhes rtags kyi dbye ba'o/ /de nas bde ba chen po zhes bya ba'i rnam grangs can 'od gsal ba 'byung bar 'gyur ro/ /de nyid kyi yab yum gnyis ka zhu bar gyur nas zla ba nya ba bzhin du gnas pa stong pa nyid gcig pu'i bdag nyid can du gyur pa/ 'od gsal ba'i rang bzhin du bsgom par bya zhes pa 'di ni don dam pa'i bden pa la 'jug pa'o/ /de brtan par bya ba'i phyir sngags 'di brjod par bya ste/ oM shU n+ya tA dz+nyA na badzra swa b+hA ba At+ma kou0f85haM/ zhes don dam pa'i dkyil 'khor nye bar bstan pa'o/ /ji skad du rtsa ba'i rgyud las kyang / sku yi rdo rjer chud pa yi/ /sangs rgyas cho ga bzhin bsams te/ /don dam pa yi rdo rje yis/ /de bzhin nyid du 'jug par bya/ /de bzhin gshegs pa'i tshogs bsad na/ /dngos grub nges par thob par 'gyur/ /zhes 'byung ngo / /de'i rjes la sngon du bshad pa'i pad+ma'i steng du yi ge gsum las byung ba'i nyi ma dang pad+ma dang zla ba'i dkyil 'khor de bzhin gshegs pa'i rigs dang rjes su mthun pa'i kha dog rnam par bsgoms te/ de'i steng du yi ge gsum las byung ba'i zla ba'i dkyil 'khor bsams te/ 'og gi zla ba dang nyi ma dang pad+ma dang zla ba'i dkyil 'khor de nyid du bzhugs par bsam mo/ /rnam par byang ba'i zhen pa yongs su bzlog par bya ba'i phyir sngags 'di brjod par bya ste/ oM d+harma d+hA tu dz+nyA na badzra swa b+hA ba At+ma kou0f85haM/ de nas zla ba'i dkyil 'khor gyi steng du yi ge gsum po sngar bshad pa'i kha dog can rnam par dgod de/ yi ge gnyis thugs kyi rdo rje'i sa bon la nges par 'jug cing de yongs su gyur pa las / rdo rje dmar po yi ge hUM gis byin gyis brlabs pa/ de'i 'od zer rnams kyis nam mkha'i dbyings na gnas pa'i de bzhin gshegs pa'i tshogs de nyid du 'jug par byas la sems can thams cad kyi don bya ste/ bcom ldan 'das chu shel gyi nor bu'i 'od dang 'dra ba zhal gsum pa phyag drug pa/ zla ba'i dkyil 'khor la bzhugs pa/ dkar po dang / nag po dang / dmar po ste/ zhal gsum mdzes pa/ ral pa'i thor tshugs 'dzin cing rdo rje'i skyil mo krung can/ rdo rje dang / 'khor lo dang / pad+ma g.yas na bsnams pa/ dril bu dang / yid bzhin gyi nor bu dang / ral gri g.yon na bsnams pa/ rgyan thams cad kyis brgyan pa bdag nyid bsgom par bya zhes dbus kyi bdag po bskyed pa'i mtshan nyid yan lag bcu dang ldan pa'i rnal 'byor ro/ /de'i rjes su rang gi snying ga'i sa bon gyi 'od zer las bcom ldan 'das mi bskyod pa spros te sems can gyi khams ma lus pa'i nyon mongs pa zhe sdang rnam par dag par byas te/ slar yang gshegs shing bdag rdo rje 'dzin pa la zhugs te 'o ma dang chu bzhin du gcig gi dngos por gyur par bsam mo/ /de zhugs ma thag tu nyi ma'i dkyil 'khor la bzhugs pa nor bu in+d+ra nI la'i mdog can bcom ldan 'das zhe sdang rdo rje mi bskyod pa zhes bya ba bsgom par bya'o/ /de'i thugs kar baM las skyes pa'i pad+ma'i steng du a las skyes pa'i zla ba la sa bon hUM las skyes pa'i rdo rje las byung ba'i thugs rdo rje 'dzin pa de dang 'dra bar bsams te/ de'i thugs kar de bzhin du pad+ma dang zla ba la gnas pa/ rang gi chos kyi yi ge hUM ting nge 'dzin sems dpa' zhes bya ba rnam par dgod de/ chos dang longs spyod dang sprul pa'i sku'i bdag nyid bsgom par bya zhes rjes su rnal 'byor ro/ /de'i rjes su mig gnyis la th+liM las skyes pa'i sa'i snying po'o/ /rna ba gnyis la oM las skyes pa'i phyag na rdo rje'o/ /sna bug gnyis la oM las skyes pa'i nam mkha'i snying po'o/ /lce la oM las skyes pa'i spyan ras gzigs dbang phyug go/ /lus la oM las skyes pa'i sgrib pa rnam par sel ba'o/ /yid la oM hUM las skyes pa'i 'jam pa'i dbyangs so/ /rtsa rgyus thams cad la yi ge maiM las skyes pa'i byams pa'o/ /yi ge saM las kun tu bzang po tshig gis thams cad la dgod par bya'o/ /zhes mig la sogs pa'i skye mched byin gyis brlab pa'o/ /sra ba'i mtshan nyid ji srid sha dang rus pa la sogs pa'i tshogs de la yi ge laM las skyes pa'i sangs rgyas spyan ma'o/ /ji srid gsher ba'i mtshan nyid khrag la sogs pa de dag la yi ge e waM ma las skyes pa'i mA ma kI'o/ /ji srid drod kyi cha de dag tu yi ge baM las skyes pa'i gos dkar mo'o/ /ji srid g.yo 'gul la sogs pa de dag la yi ge taM las skyes pa'i dam tshig sgrol ma dgod ces khams byin gyis brlab pa'o/ /spyi bor zla ba'i dkyil 'khor gyi steng du yi ge oM las skyes pa'i rnam par snang mdzad do/ /mgrin par pad+ma'i steng du yi ge AHlas skyes pa'i 'od dpag tu med pa'o/ /thugs ka'i rdo rje dang nyi ma'i steng du yi ge hUM las skyes pa'i mi bskyod pa'o/ /lte bar yi ge swA las skyes pa'i rin chen 'byung ldan no/ /rkang pa dag la yi ge hA las skyes pa don yod grub pa dgod par bya zhes phung po byin gyis brlab pa'o/ /slar yang gshin rje gshed dpung pa g.yas la'o/ /shes rab mthar byed dpung pa g.yon la'o/ /kha la rta mgrin no/ /rdo rje la bdud rtsi 'khyil pa'o/ /lag pa g.yas pa la mi g.yo mgon no/ /g.yon pa la 'dod pa'i rgyal po'o/ /pus mo g.yas pa la dbyug sngon can no/ /g.yon pa la stobs po che'o/ /spyi bo la gtsug tor 'khor los sgyur ba'o/ /rkang pa'i 'og tu gnod mdzes kyi rgyal po dgod par bya zhes yan lag dang nying lag thams cad du dgod pa ni shin tu rnal 'byor ro/ /de'i spyi bor yi ge oM las byung ba'i zla ba'i dkyil 'khor gyi steng du yi ge oM kha dog dkar po dgod de/ de'i 'od zer gyi tshogs las phyi rol du sangs rgyas spyan ma'i tshogs spros te/ nam mkha'i khams na 'og min gyi gnas su bzhugs pa'i bcom ldan 'das sku rdo rje 'khor dang bcas pa sangs rgyas spyan ma'i tshogs des rjes su chags par byas la phyag gi zhags pas mgrin par bcings te bkug la gzhal yas khang pa'i mdun du pad+ma dang zla ba'i dkyil 'khor gyi steng du bzhugs par bsams te/ 'di ltar gsol ba gdab par bya ste/ dpal ldan sangs rgyas sku 'chang ba/ /rdo rje mi phyed gsum bsgoms pas/ /deng bdag byin brlabs go 'phang ni/ /sku yi rdo rjer mdzad du gsol/ /zhes bdag po'i tshigs su bcad pa'i gsol ba gdab pa'o/ /phyogs bcur bzhugs pa'i sangs rgyas rnams/ /mi phyed rdo rje gsum bsgoms pas/ /deng bdag byin brlabs go 'phang ni/ /sku yi rdo rjer mdzad du gsol/ /zhes de'i 'khor rnams la gsol ba gdab pa'i tshigs su bcad pa'o/ /de'i rjes la mchod pa rnam pa lngas de mchod nas spyan gyi tshogs dang bcas pa rnam par snang mdzad kyi tshogs yi ge oM la 'jug par bya'o/ /zhugs pa'i de ma thag tu mtshan dang dpe byad kyis brgyan pa'i bdag nyid kyi lus mthong nas nga rgyal bya'o/ /sangs rgyas kun gyi sku gang yin/ /phung po lnga yis rab rdzogs pa/ /sangs rgyas kun gyi rang bzhin ni/ /bdag la'ang de dang 'dra bar shog / oM sarba ta thA ga ta kA ya badzra swa b+hA ba At+ma kou0f85haM/ de'i 'og tu mgrin pa'i phyogs su AHlas skyes pa'i pad+ma'i steng du a rnam par dgod de/ de las byung ba'i 'od zer gyi 'khor los gos dkar mo'i tshogs spros pa des nam mkha'i dbyings na bde ba can gyi 'jig rten gyi khams na bzhugs pa'i 'od dpag tu med pa 'khor dang bcas pa bkug la/ shar gyi sgor mngon par phyogs pa pad+ma dang zla ba'i dkyil 'khor du bzhugs par lta ste/ tshigs su bcad pa 'dis gsol ba gdab par bya'o/ /dpal ldan chos kyi gsung lam nyid/ /rdo rje mi phyed gsum bsgoms pas/ /deng bdag byin brlabs go 'phang ni/ /gsung gi rdo rjer mdzad du gsol/ /phyogs bcur bzhugs pa'i sangs rgyas rnams/ /rdo rje mi phyed gsum bsgoms pas/ /deng bdag byin brlabs go 'phang ni/ /gsung gi rdo rjer mdzad du gsol/ /de'i rjes su mchod pa rnam pa lngas mchod la/ /'od zer gyi sgo nas yi ge AHla 'jug par bya'o/ /zhugs ma thag tu dung g.yas su 'khyil ba'i dbyibs can gyi mgrin pa'i gnas las byung ba'i pad+ma'i 'dab ma dang mtshungs pa'i yan lag drug cu dang gsung rab yan lag bcu gnyis dang ldan pa tshangs pa'i dbyangs can rang gi lce la bltas te/ tshigs su bcad pa 'dis 'di ltar nga rgyal 'dzin par bya ste/ gang zhig rdo rje chos kyis ni/ /gsung gi nges tshig phun sum tshogs/ /bdag la'ang de dang 'dra ba'i ngag /rdo rje 'dzin dang mtshungs par shog /brtan par bya ba'i phyir sngags 'di brjod par bya'o/ /oM sarba ta thA ga ta bAka badzra swa b+hA ba At+ma kou0f85haM/ de'i rjes su rang gi thugs kar pad+ma dang nyi ma dang rdo rje'i steng du sprin gyi mdog can yi ge hUM rnam par bkod nas/ de las byung ba'i 'od zer gyi tshogs las spros pa'i mA ma kI'i tshogs des nam mkha'i dbyings na mngon par dga' ba'i 'jig rten gyi khams na bzhugs pa/ dpal mi bskyod pa 'khor dang bcas pa rjes su chags par bya ste/ phyag gi zhags pa dag gis bkug la shar gyi sgor mngon par phyogs pa pad+ma dang nyi ma la bzhugs te/ tshigs su bcad pa 'dis gsol ba gdab par bya ste/ dpal ldan thugs kyi rdo rje ni/ / rdo rje mi phyed gsum bsgoms pas/ /deng bdag byin gyis rlob pa ni/ /thugs kyi rdo rjes mdzad du gsol/ /phyogs bcur bzhugs pa'i sangs rgyas rnams/ /rdo rje mi phyed gsum bsgoms pas/ /deng bdag byin gyis rlob pa ni/ /thugs kyi rdo rjes mdzad du gsol/ /snga ma bzhin du mchod pa rnam pa lngas mchod cing 'od zer gyi sgo nas mA ma kI'i tshogs dang bcas pa dpal mi bskyod pa 'khor dang bcas pa hUM de nyid du 'jug par bya'o/ /zhugs ma thag tu me long dri ma med pa ltar me long lta bu'i ye shes kyi ngo bo nyid zla ba'i bdud rtsi dang mtshungs shing dngas par rang gi sems blta ste/ tshigs su bcad pa 'dis nga rgyal 'chang ba ni/ /gang zhig kun tu bzang po'i thugs/ /blo ldan gsang ba'i dbang po ni/ /bdag la'ang de dang 'dra ba'i thugs/ /rdo rje 'dzin dang mtshungs par shog /brtan par bya ba'i phyir sngags 'di brjod par bya ste/ oM sarba ta thA ga ta tsit+ta badzra swa b+hA ba At+ma kou0f85haM/ de ltar sku la sogs pa tha dad par byin gyis brlabs nas/ sngags 'dis cig car du yang byin gyis brlab par bya ba yin te/ oM sarba ta thA ga ta kA ya bAka tsit+ta badzra swa b+hA ba At+ma kou0f85haM/ de ltar bdag nyid nyi ma'i dkyil 'khor gyi dbus su gnas pa zhal gsum pa phyag drug pa rdo rje skyil mo krung bcas pa in+d+ra nI la'i mdog can/ rdo rje dang / dril bu dang / 'khor lo dang / rin po che dang / pad+ma dang / ral gri 'dzin pa cung zad mche ba gtsigs pa spro ba dang bsdu ba'i rim pas rang dang 'dra ba'i lhag pa'i bdag po dang bcas pa'i gsal gyin gsal ba'i dkyil 'khor gyi 'khor lo skyed par byed pa bcom ldan 'das ye shes lnga'i ngo bo nyid rdo rje sems dpa' bsam par bya'o zhes rnal 'byor chen po'o/ /de ltar rnal 'byor bzhi'i bdag nyid can dang po'i sbyor ba zhes bya ba'i ting nge 'dzin te/ ngo bo nyid kyi sku'o/ /de'i rjes la dkyil 'khor rgyal ba mchog gi ting nge 'dzin brtsam pa'i dus su phyag rgya legs par sbyang ba'i cho ga ni 'di yin te/ de la phyag rgya mtha' yas pa yin pas rigs kyi dbye bas lnga ru gyur pa'o/ /de la yang mdor bsdu na sku dang gsung dang thugs kyi dbye bas gsum du 'gyur ro/ /de la thugs kyi rdo rje'i rnal 'byor pa la sme sha can gyi bu mo ut+pal sngon po'i mdog 'dra ba/ lo bcu gnyis lon pa bsngags so/ /gsung gi rdo rje'i rnal 'byor pa la lo bcu drug pa gar mkhan mo dmar mo bsngags so/ /sku'i rdo rje'i rnal 'byor pa la btso blag mkhan gyi bu mo lo nyi shu lon pa mdog dkar mo bsngags so/ /'dir yang sme sha can gyi bu mo ut+pal sngon po'i mdog dang 'dra ba brang skyes sra zhing mtho ba rgyas pa dang ldan pa lo bcu gnyis pa blangs te/ mdun du me'i dkyil 'khor zur gsum pa la gnas par bsams te / rang gi snying ga nas spros pa'i reg bya rdo rje ma dang snyoms par zhugs pa'i bdag nyid bsgoms te/ ye shes sems dpa'i thugs ka na gnas pa'i rdo rje rtse lnga pa dmar po de'i chang zungs na gnas pa'i hUM dmar po las byung ba'i 'od zer gyi 'khor lo me 'bar ba spro ba'i sna bug g.yas pa nas nges par 'byung ba des sme sha can gyi bu mo'i lus po bsregs te thal bar gyur pa las thal ba de yang rlung drag po'i shugs can gyis phyogs bcur khyer zhing de'i rnam par smin pa mar me dang 'dra ba dang / nor bu dang ba'i 'od zer dang 'dra ba mi g.yo bar bsgom ste / sngar byung ba'i 'od zer gyis sna bug g.yon pa nas nang du bsdus te/ lam dbus ma 'dod pa'i gdugs zhes bya ba'i rtsa nas zla ba zhu ba'i gzugs su spros te reg bya rdo rje ma'i chos 'byung ba'i phyag rgya'i nang du gnas pa'i 'dab ma sna tshogs pa'i pad+ma'i lte ba la gnas pa'i zla ba'i dkyil 'khor gyi steng du bde ba chen po 'bab pas dbang du gyur pas byang chub kyi sems thig le'i tshul du dgod par bya'o/ /dgod pa'i de ma thag tu lha mo reg bya rdo rje ma dang 'dra ba zhal gsum phyag drug pa mdog sngo bsangs ma rdo rje dang 'khor lo dang pad+ma dang dril bu dang yid bzhin nor bu dang ral gri 'dzin pa/ rdo rje'i skyil krung gis gnas pa/ sgeg pa dang bzhad pa dang rnam par rol pa can 'byung bar bsams te/ de'i snying khar rang gi chos kyi yi ge las 'byung ba'i pad+ma dang zla ba la gnas pa'i ye shes kyi lha mo de'i rnam par bkod la/ de yang snying khar snga ma bzhin du rang gi chos kyi yi ge las byung ba'i rdo rje'i steng du rang gi chos kyi yi ge la bltas te/ gsang ba'i rdo rje dang chu skyes kyi bya ba las byung ba'i 'od zer gyi 'khor los phyi rol tu spros te de dang lhan cig tu mar la mar thim pa bzhin du ro gcig par byas la/ spyi bo dang lkog ma dang snying ga dang lte ba dang rkang pa'i bol dag tu rim pa bzhin/ oM AHhUM swA hA sa bon 'di dag dgod de/ nu ma gnyis kyi steng du sa'i rang bzhin sa bon laM las skyes pa'i sangs rgyas spyan bsams te/ de yongs su gyur pa las slar yang nu ma gnyis su bsgom mo/ /ma mchu la yang chos kyi yi ge maM las 'byung ba'i mA ma kI yongs su gyur pa las slar yang ma mchur bsgom mo/ /gsang ba'i pad+ma la yang yi ge baM las skyes pa'i gos dkar mo me'i khams kyi rang bzhin can rnam par bsgoms te/ de'i nang gi khong stong la yang rlung gi khams kyi ngo bo nyid yi ge taM yongs su gyur pa las dam tshig sgrol ma yaM yongs su gyur pa las khong stong nam mkha' lta bu bskyed par bya'o/ /de'i gzugs la gzugs rdo rje ma dang / de'i pad+ma la sogs pa'i dri rnams la yang dri rdo rje ma dang / de'i skad snyan pa la sgra rdo rje ma dang / de'i kha mchan khung gnyis nu ma gnyis lte ba la sogs pa'i ro drug la rdo rje ma de dag dzaHhUM ba hoH / sa bon las skyes pa rnam par dgod do/ /de rnams dang lhan cig tu sa'i snying po la sogs pa dang snyoms par zhugs par bsams te/ g.yas pa dang g.yon pa'i phyag gnyis dang kha dang gsang ba dang / g.yas pa dang g.yon pa'i dpung pa gnyis dang de bzhin du g.yas dang g.yon pa'i pus mo dang / spyi bo dang rkang pa'i mthil du rim pa ji lta ba bzhin du rdo rje ro langs ma dang / gzhan gyis mi thub ma dang / khro gnyer ma dang / ral pa gcig ma dang / sna tshogs rdo rje ma dang / rin chen sna tshogs ma dang / pad+ma sna tshogs ma dang / las sna tshogs ma dang / nam mkha' rdo rje ma dang / sa 'dzin ma khro bo'i rgyal po rnams kyi btsun mo/ /gshin rje gshed la sogs pa khro bo bcu'i mdog dang mtshungs pa zhal gsum pa phyag drug pa dgod par bya'o/ /de'i rjes la bdag nyid kyi rdo rje sa bon hUM las yongs su rdzogs pa'i rdo rje rtse lnga pa'i rnam pa tshangs pas byin gyis brlabs pa'i nor bu'i cha dang ldan par bya ste/ lha mo la yang a las skyes pa'i pad+ma dmar po 'dab ma brgyad pa/ de'i lte bar char 'bab pa dgag par bya ba'i phyir yi ge phaT kyis byin gyis brlabs te de gnyis ka las kyang kha dog sna lnga pa'i 'od zer gyi 'khor lo byung bar bsams te/ bsnyen pa mchog la sogs pa'i rim gyis bsgrub pa la brtsam par bya'o/ /de la bsgrub bya dang sgrub byed kyi sbyor ba ni bsnyen pa'o/ /rdo rje dang pad+ma 'dus pa ni nye bar sgrub pa'o/ /sa bon gyi byin gyis brlabs pa de dag gis bskyod pa ni sgrub pa'o/ /de las bde ba chen po nyams su myong ba ni sgrub pa chen po'o/ /ji skad du rgyud phyi ma las/ gang phyir bsgrub bya sgrub byed kyi/ /sbyor ba bsnyen pa yin par 'dod/ /rdo rje pad+ma mnyam sbyor bas/ /nye bar sgrub par gsungs pa yin/ /sgrub pa bskyod pa rab bshad pa/ /hUM phaT yang dag ldan pa ste/ /rang ngo rang bde zhi ba ni/ /sgrub pa chen po yin par 'dod/ /ces 'byung ngo / /de'i 'og tu 'dod chags chen po'i dbyangs kyis de bzhin gshegs pa 'jug pa sngon du 'gro ba rdo rje dang pad+ma snyoms par 'jug pa'i dus su bcom ldan 'das rin chen 'byung ldan gyi sngags brjod par bya ste/ oM sarba ta thA ga ta a nu rA ga na badzra swa b+hA ba At+ma kou0f85haM/ yan lag dang nying lag thams cad la phyung zhing rdo rje'i chang zungs su gnas pa'i byang chub kyi sems/ hUM gi sgra brjod cing de'i 'og tu phaT kyi sgras de bzhin gshegs pa thams cad 'dus pa'i blos pad+ma'i nang zla ba'i dkyil 'khor gyi steng du dbyung bar bya'o/ /de'i sngags 'di yin te/ oM sarba ta thA ga ta pU dza badzra swa b+hA ba At+ma kou0f85haM/ bcom ldan 'das don yod grub pa'i sngags so/ /byang chub kyi sems de nyid oM badzra d+h+r-ika ces sngags kyi tshul du yongs su gyur pa las mi bskyod pa zhal gsum pa phyag drug pa sku mdog sngon po mche ba gtsigs pa tsham ngam pa sems dpa' gsum gyi bdag nyid can phyir spros pa des zhe sdang la sogs pa'i sems can gyi khams sbyangs la/ mngon par dga' ba'i 'jig rten gyi khams su rab tu dgod de/ slar yang gshegs nas phyogs bcu la gzigs te rdo rje sems dpa' de nyid dang lhan cig tu mar la mar thim pa bzhin du gcig tu gyur pa dpal mi bskyod rdo rje bsgom par bya'o/ /phyag la sogs pa'i bshad pa'i rgyud las gsungs pa ni ji skad du/ in+d+ra nI la'i mdog dang mtshungs/ /cung zad mche ba gtsigs pa ste/ /nyi ma'i dkyil 'khor la gnas pa/ /zhal gsum phyag drug gzi brjid che/ /rdo rje 'khor lo chu skyes ni/ /g.yas pa'i phyag du bsgom par bya/ /dril bu yid bzhin nor bu dang / /de bzhin ral gri phyag g.yon na'o/ /mgon po rdo rje skyil krung can/ /ral ba'i thor tshugs 'dzin pa mchog /zhi ba rjes chags sgeg pa dang / /zhal gsum po ni rnam par mdzes/ /spros pa'i 'od zer 'khor los ni/ /nam mkha'i gtos ni ma lus khyab/ /zhe sdang rdo rje'i go 'phang gnas/ /bdag nyid de ltar bsgom par bya/ /zhes 'byung ngo / /de'i rjes la byang chub sems kyi thig le gnyis pa dzi na dz-ika zhes sngags kyi tshul du spros te/ pad+ma'i nang du rnam par snang mdzad kyi gzugs yongs su gyur pa phyi rol du spros te gti mug la spyod pa'i sems can gyi khams sbyangs nas 'og min gyi gnas su dgod de/ slar yang gshegs nas phyogs bcur gzigs pa sngon du 'gro bas mdun du zla ba'i dkyil 'khor 'khor los mtshan pa la bzhugs par bsgom par bya'o/ /rdo rje phreng ba las kyang / de yi rtsa ba'i phyag la ni/ /'khor lo rtsibs ni brgyad pa mchog /kha dog dkar zhing kun+da 'dra/ /zhi ba yi ni gzugs 'chang ba/ /lhag ma thams cad sngon bzhin du/ /mdor bsdus par ni shes par bya/ /zhes 'byung ngo / /de'i rjes su slar yang byang chub kyi sems kyi thig le rad+na d+h+r-ika ces bya ba'i sngags kyi tshul du yongs su gyur pa'i rin chen 'byung ldan de nyid du spros te phyir gshegs shing nga rgyal la spyod pa'i sems can gyi khams sbyangs te/ rin chen 'byung ldan gyi 'jig rten gyi khams su rab tu bkod de/ slar yang gshegs nas phyogs bcur gzigs nas lho'i phyogs su zla ba'i dkyil 'khor la rtsibs drug pa'i rin po che'i steng du bzhugs par bsam mo/ /de'i rtsa ba'i phyag na yid bzhin gyi nor bu/ sku mdog ser po shes par bya'o/ /lhag ma ni snga ma bzhin no/ /de'i rjes su byang chub kyi sems kyi thig le A ro l-ika ces bya ba'i sngags kyi tshul du yongs su gyur pa 'od dpag tu med pa'i gzugs de nyid du spros te/ phyi rol tu gshegs nas 'dod chags la spyod pa'i sems can gyi khams sbyangs te/ bde ba can gyi 'jig rten gyi khams su bkod de/ slar yang gshegs nas phyogs bcu la gzigs te nub kyi phyogs su zla ba dang pad+ma'i steng du bzhugs par bsam mo/ /'di'i rtsa ba'i phyag gnyis kyis pad+ma bskum pa rgyas par byed pa sku mdog dmar po bsgom par bya'o/ /lhag ma ni snga ma bzhin no/ /de'i rjes su yang slar byang chub kyi sems kyi thig le pradz+nyA d+h+r-ika ces pa'i sngags kyi tshul du yongs su gyur pa de las don yod grub pa de nyid du spros te phyi rol du gshegs nas phrag dog la spyod pa'i sems can gyi khams sbyangs nas/ me tog can zhes bya ba'i sangs rgyas kyi zhing du rab tu gnas par mdzad nas slar yang gshegs te/ phyogs bcur gzigs nas byang gi phyogs su sna tshogs pad+ma dang sna tshogs rdo rjes mtshan pa'i nyi ma'i dkyil 'khor gyi steng du bzhugs par bsam mo/ /de'i rtsa ba'i phyag g.yas pa la ral gri dang sku mdog sngo bsangs su bsam par bya zhes lhag ma rnams snga ma bzhin no/ /de dag ni phung po lnga dang / 'byung ba chen po lnga dang / dbang po lnga dang / rnam par shes pa lnga dang / nam mkha' rnam par dag pa'i ye shes lnga'i ngo bo nyid de bzhin gshegs pa lnga po shes par bya'o/ /ji skad du/ zhe sdang gti mug 'dod chags dang / /dam tshig nor bu'i rigs de bzhin/ /de dag rigs ni lnga nyid de/ /'dod dang grol ba rab sgrub byed/ ces 'byung ngo / /de'i rjes la mo ha ra ti zhes sngags kyi tshul du yongs su gyur pa'i thig le las sangs rgyas spyan ma de nyid du bskyed pa'i phyir spros te/ bdag tu gti mug pa'i rnam par rtog pa sbyangs te sa'i khams la mngon par zhen pa rnams rnam par snang mdzad kyi zhing la bkod de/ /slar yang gshegs nas me'i mtshams su pad+ma dang zla ba'i dkyil 'khor gyi steng du bzhugs par bsam mo/ /de'i rjes su dwe Sha ra ti zhes bya ba'i sngags kyi tshul du yongs su gyur pa'i thig le las mA ma kI de nyid du bskyed la chu'i khams la mngon par zhen pa rnams kyi bdag tu nga rgyal ba'i rnam par rtog pa sbyangs te/ rin chen 'byung ldan gyi zhing khams su rnam par dgod de slar yang gshegs shing bden bral gyi mtshams su pad+ma dang nyi ma'i dkyil 'khor gyi steng du bzhugs par bsam par bya'o/ /de'i 'og tu rA ga ra ti zhes bya ba'i sngags kyi tshul du yongs su gyur pa las gos dkar mo de nyid du bskyed de phyir spros la me'i khams la mngon par zhen pa rnams kyi bdag tu chags pa'i rnam par rtog pa sbyangs te/ snang ba mtha' yas kyi zhing khams su bkod par byas la/ slar yang gshegs te rlung gi mtshams su pad+ma dang zla ba'i dkyil 'khor la bzhugs par bsam mo/ /de nas badzra ra ti zhes bya ba'i sngags kyi tshul du yongs su gyur pa thig le las lha mo sgrol ma de nyid du bskyed de de phyir spros la rlung gi khams la mngon par zhen pa rnams kyi bdag tu lta ba'i rnam par rtog pa 'joms shing don yod grub pa'i zhing du rnam par dgod de slar yang gshegs nas dbang ldan gyi mtshams su pad+ma dang zla ba'i dkyil 'khor du bzhugs par bsam mo/ /rigs kyi btsun mo bzhi po de dag zhal dang phyag dang mtshon cha dang sku mdog dang gnas stabs gtso bo bzhin du 'dzin pa/ lha'i gzugs can rgyan thams cad kyis brgyan pa 'dod kyang / khyad par du ni mA ma kI'i phyag mtshan ni rdo rjes mtshan pa'i ut+pa la'o/ /lha mo sgrol ma'i ut+pal ser po'o/ /de dag kyang stong pa nyid rnam par thar pa bzhi dang / tshad med pa bzhi dang / phrin las bzhi dang / pha rol tu phyin pa bzhi dang / bsdu ba'i dngos po bzhi'i ngo bo nyid du shes par bya'o zhes nang gi pho brang gcig go/ /de'i phyi rol tu gru bzhi pa de'i zur bzhi'i nang du/ dzaHhUM baM hoH / zhes bya ba'i sngags kyi tshul du thig le yongs su gyur pa las gzugs rdo rje ma la sogs pa'i mchod pa'i lha mo bzhi de nyid du bskyed la/ phyi rol du spros te gzugs la sogs pa'i mngon par zhen pa rnams la 'dod pa'i yon tan sbyangs te/ rang gi rigs kyi bdag po'i zhing khams su bkod par byas la/ slar yang gshegs te snga ma bzhin du zur bzhir zla ba rnams la bzhugs par bsam mo/ /de rnams kyi rtsa ba'i phyag g.yas pa'i dang po rnams la me long dang rgyud mangs dang dri'i dung chos dang bdud rtsi lngas gang ba'i snod bsgom par bya'o/ /lhag ma ni sangs rgyas spyan la sogs pa bzhin du shes par bya'o/ /de rnams th+liM mam sa bon las yongs su rdzogs pa sa'i snying po dang byams pa dag gis thig le'i gzugs las de nyid du spros te de'i phyi rol du gshegs nas sems can thams cad kyi mig la sogs pa'i dbang po lha'i mig tu byas pa dang / rtsa rgyus kyi dra ba yang sangs rgyas kyi sku dang 'dra bar bskyed de/ rang gi rigs kyi bdag po'i zhing khams su rab tu bkod cing slar yang gshegs nas shar gyi snam bu la zla ba'i dkyil 'khor bdag po la 'dud par byed cing gnas par bsgom mo/ /de dag rim pa bzhin du dkar po dang ser por sku mdog shes par bya'o/ /rtsa ba'i phyag dang po'i phyag mtshan ni rang rang gi rigs kyi bdag po'i bzhin no/ /'on kyang byams pa'i phyag du nA ga ge sar gyi shing gi yal ga'o/ /de'i rjes su oM gnyis thig le'i gzugs su yongs su gyur pa las phyag na rdo rje dang nam mkha'i snying po de nyid du spros te/ phyi rol du gshegs nas sems can thams cad kyi rna ba dang sna'i dbang po sbyangs te lha'i dbang por byas la/ rang gi rigs kyi bdag po'i zhing khams su gnas par mdzad cing slar yang gshegs te lha'i snam bu la zla ba'i dkyil 'khor du bdag po la 'dud pa sngon du 'gro bar bzhugs par bsam mo/ / 'di dag gi zhal la sogs pa ni lhag pa'i lha'i bdag po bzhin no/ /'on kyang phyag na rdo rje nag po dang / nam mkha'i snying po ser po'o/ /de'i rjes su hUM dang oM sa bon las thig le'i gzugs de dag las byung ba 'jam dpal dang spyan ras gzigs kyi dbang phyug de nyid du spros te phyi rol du gshegs nas sems can gyi lce dang yid kyi dbang po dag lha'i rang bzhin du byas nas rang gi rigs kyi bdag po'i zhing khams su rab tu bkod de/ slar yang gshegs nas nub kyi snam bu la zla ba'i dkyil 'khor gnyis kyi steng du rang gi bdag po la 'dud pa sngon du 'gro bar bzhugs so/ /sku mdog ni dmar po dang dkar po ste lhag ma ni bdag po bzhin no/ /de'i 'og tu saM dang oM sa bon dag las grub pa kun du bzang po dang sgrib pa thams cad rnam par sel ba de nyid spros te/ sems can thams cad kyi yan lag gi tshigs dang / lus kyi dbang po rnam par sbyangs te lha'i gzugs su bskyed la rang gi rigs kyi bdag po'i zhing khams su rab tu bkod de/ slar yang gshegs nas byang gi snam bur zla ba'i steng du bdag po la 'dud pa mdzad cing bzhugs so/ /sku mdog ni dmar po dang ljang gu dag go/ /lhag ma ni bdag po bzhin no/ /byang chub sems dpa' brgyad po de dag ni le'u bcu gnyis pa las phyag rgya chen po yongs su gyur pa'i gnas skabs su gsungs pa'i sa bon las shes par bya'o/ /'dir yang 'chad par 'gyur te/ de ltar las kyi lam rnam par dag pa so sor bstan zhes bya ba la sogs pas so/ /de'i rjes su ya mAn+ta kr-ita ces bya ba'i sngags las rdzogs pa gshin rje gshed po de nyid du spros te phyi rol du gshegs nas phung po'i bdud dang nyon mongs pa'i sgrib pa dang 'jig tshogs la lta ba dang ma dad pa rnam par bcom ste/ sems can thams cad dad pa'i dbang po la nges par bkod de/ slar yang gshegs nas shar gyi sgor pad+ma dang nyi ma'i dkyil 'khor gyi steng du bzhugs par bsam mo/ /'di'i rtsa ba'i phyag g.yas pa la tho ba'o/ /sku mdog nag po lhag ma rnams ni snga ma bzhin no/ /de'i 'og tu pradz+nyAn+ta kr-ita ces bya ba'i sngags las rdzogs pa'i shes rab mthar byed de nyid du spros te phyi rol du gshegs nas 'chi bdag gi bdud dang shes bya'i sgrib pa dang mthar 'dzin pa'i lta ba dang le lo rnam par 'joms shing / sems can thams cad brtson 'grus kyi dbang po la rnam par bkod de/ slar yang gshegs nas lho'i sgor pad+ma dang nyi ma'i dkyil 'khor gyi steng du bzhugs par bsam mo/ /rtsa ba'i phyag g.yas pas dbyug pa bsnams pa'o/ /sku mdog dkar po'o/ /lhag ma snga ma bzhin no/ /de'i 'og tu pad+ma mAn+ta kr-ita ces bya ba'i sngags las grub pa pad+ma mthar byed de nyid du spros te phyi rol du gshegs nas nyon mongs pa'i bdud dang las kyi sgrib pa dang lta ba log pa dang brjed ngas pa rnam par 'joms shing / sems can gyi khams dran pa'i dbang po la gnas par byas nas/ slar yang gshegs te nub kyi sgor pad+ma dang nyi ma'i dkyil 'khor gyi steng du bzhugs so/ /rtsa ba'i phyag g.yas pas pad+ma bsnams pa'o/ /sku mdog dmar po'o/ /lhag ma ni bdag po bzhin no/ / de nas big+h+nAn+ta kr-ita ces bya ba'i sngags las skyes pa bgegs mthar byed de nyid du spros nas phyir gshegs te/ lha'i bu'i bdud dang rnam par smin pa'i sgrib pa dang lta ba mchog tu 'dzin pa dang / g.yeng ba rnams rnam par 'joms shing ting nge 'dzin gyi dbang po la sems can thams cad rab tu dgod de/ slar yang gshegs nas byang phyogs kyi sgor pad+ma dang nyi ma'i dkyil 'khor la bzhugs so/ /rtsa ba'i phyag g.yas pas rdo rje 'dzin pa sku mdog margad lta bu ste/ lhag ma ni snga ma bzhin no/ /khro bo de rnams g.yas brkyang pa dang g.yon brkyang pa dang mnyam pa dang mi mnyam pa'i stang stabs kyis bzhugs par bsam mo/ /de'i 'og tu swA hA AHoM hUM b+h+rUM sa bon drug las rdzogs pa mi g.yo mgon dang / dbyug sngon can dang / 'dod pa'i rgyal po dang / stobs po che dang / gnod mdzes kyi rgyal po dang / gtsug tor 'khor los sgyur ba snga ma bzhin du spros nas phyir gshegs te mig la sogs pa'i rnam par shes pa drug gi rnam par rtog pa'i dri ma sbyangs te/ sems can gyi khams pha rol tu phyin pa drug dang ldan pa dang mngon par shes pa drug thob par byas te/ slar yang gshegs te shar la sogs pa'i sgo'i mtshams rnams dang / steng dang 'og dag tu bzhugs par bsam mo/ /de rnams kyi sku mdog ni rang rang gi rigs dang mthun pa zhes la la 'dod do/ /drug car sku mdog nag po yin zhes dpal klu sgrub kyi zhal snga nas bzhed do/ de dag g.yon brkyang pa'i stang stabs can no/ /khro bo bcu po mig g.yo zhing zlum pa'i smin ma kham pa/ shangs zlum pa/ dbu skra 'bar zhing gyen du brdzes pa/ zhal gsum pa/ spyan gsum pa/ phyag drug pa/ mi'u thung gi rnam pa can/ mche ba gtsigs shing tsham ngam pa/ ljags bsgul zhing me stag 'phro ba rigs kyi klu brgyad kyis rgyan byas pa/ 'jigs pa'i gzugs can rim pa ji lta ba bzhin du rdo rje ro langs ma dang / khro gnyer ma dang / gzhan gyis mi thub ma dang / ral pa gcig ma dang / rdo rje sna tshogs ma dang / rin chen sna tshogs ma dang / pad+ma sna tshogs ma dang / las sna tshogs ma dang / sa 'dzin ma dang / nam mkha' rdo rje ma khro bo'i rgyal po'i btsun mo rnams de dag gi chos nyid dag gis 'khyud par bsam mo/ /mi g.yo mgon la sogs pa'i khro bo drug gi rtsa ba'i phyag g.yas pa'i dang po rnams la lcags kyu dang / dbyug pa dang / rtse gsum dang / ral gri dang / rdo rje dang / 'khor lo dag shes par bya'o/ /lhag ma rnams ni snga ma bzhin no/ /rgyud phyi ma las kyang / lcags kyu dbyug pa rtse gsum dang / /ral gri rdo rje 'khor lo ste/ /'dod pa dbyug sngon mi g.yo stobs/ / steng 'og gnod mdzes gtsug tor gyi'o/ /zhes 'byung ngo / /srung ba'i 'khor lo 'di ni nang gi de bzhin gshegs pa dang lha mo dang byang chub sems dpa' snyoms par zhugs pa rnams kyi ting nge 'dzin bsrung ba'i don dang / bgegs rnam par 'jigs par bya ba'i phyir bcom ldan 'das kyi khro bo'i rgyal po'i dkyil 'khor gsungs so/ /le'u bcu gsum pa las kyang / /'gog pa'i rdo rje khro bo ni/ /sangs rgyas 'khor lo la brten pas/ /ting 'dzin ye shes rdo rje rnams/ /rdo rje khro bos las 'grub 'gyur/ /zhes 'byung ngo / /de ltar yongs su grub pa'i dkyil 'khor gyi 'khor lo lha sum cu rtsa gnyis kyi bdag nyid la bltas te/ gzhal yas khang pa'i phyi rol du yi ge swA las byung ba'i bai DUr+ya dang pad+ma rA ga dang in+d+ra nI la'i nor bu'i khyad par rnams kyis sprul pa'i skas kyi rim pa can chu dngas pa'i nang du skyes pa'i gser gyi pad+ma can gyi rdzing rnams dang / de bzhin du yang de las skyes pa'i bai DUr+ya'i sdong po can gser btso ma'i kha dog dang ldan pa'i pad+ma'i lte ba la bzhugs pa bsam gtan la 'jug pa'i de bzhin gshegs pa rnams so/ /de'i yang phyi rol tu me tog dang 'bras bu phun sum tshogs pa dang ldan pa'i yongs su 'du la sogs pa'i shing sna tshogs pa rnams kyi rtsa bar kr-iSh+Na sa le'i pags pa'i gdan la bzhugs pa'i rang sangs rgyas dang dgra bcom pa mtha' yas pas mdzes pa'o/ /de'i yang phyi rol tu gdugs dang rgyal mtshan dang ba dan dang g.yer ka dang rwa dung dang rdza rnga dang rnga zlum dang pi wang dang gling bu dang rgyud mangs dang chal cung bi ril dang / tam bu ra dang rked phran la sogs pa rol cha sna tshogs pa 'dzin pa'i lha mo rnams kyis brgyan pa'o/ /de'i yang phyi rol du rin po che sna bdun ni 'khor lo rtsibs brgyad la kha dog ser po dang glang po rin po che ni mche ba drug pa kha dog dkar po dang / rta rin po che ni kha dog ljang khu dang bud med rin po che ni lo bcu drug gi rnam pa sngo bsangs ma tshul khrims dang ldan pa dang / yid bzhin nor bu rin po che ni rtsibs drug pa kha dog ser po dang / khyim bdag rin po che ni mdog dmar po mdzod mi zad pa dang ldan pa dang / dmag dpon rin po che ni mdung dang ral gri 'dzin zhing kha dog nag po go cha dang bcas pa bsgom par bya'o/ /de'i phyi rol du lha'i gnas ris drug gi lha'i bu mo sna tshogs pa dang bcas pa mchod rdzas sna tshogs thogs par bsam mo/ /de'i yang phyi rol du gnod sbyin dang / srin po dang / 'byung po dang / yi dwags dang / sha za dang / grul bum dang / brjed byed dang / mkha' 'gro ma dang / dri za dang / lha ma yin dang / nam mkha' lding dang / mi'am ci dang / lto 'phye dang / mi dang / mi ma yin dang / rkang med dang / rkang gnyis pa dang / rkang bzhi pa dang / rkang mang ba rnams steng du lag pa tshol ba la brtson pa ki li ki li'i sgra rjod par byed pa rnams kyis bskor ba'o/ /gzhal yas khang pa'i 'og tu yang sa 'og bdun gyi bar du khyab par byed pa yi ge hA yongs su gyur pa las rdo rje rgya gram bsam mo/ /steng du yang ba dan dang g.yer kha rnams srid pa'i rtse mo'i bar du slebs par bsam mo/ /de lta bu'i dkyil 'khor gyi 'khor lo mthong nas dbus kyi bdag por gyur pa'i rnal 'byor pas snga ma bzhin du reg bya rdo rje ma'i chos 'byung ba'i phyag rgya'i nang du sna tshogs pad+ma dang zla ba'i dkyil 'khor gyi steng du bde ba chen po 'dod pa'i dbang gis gsang ba'i rdo rje rab tu 'jug pas ba spu'i khung bu nas nges par 'byung ba'i 'od zer lcags kyu'i rnam pas phyogs bcu na bzhugs pa'i de bzhin gshegs pa dbang bskur ba'i don du 'gugs shing gsol ba gdab par bya'o/ /kye bcom ldan 'das de bzhin gshegs pa rnams bla na med pa'i dbang bskur bas bdag la dbang bskur ba mdzod cig pa'o/ /gsol ba btab pa gsan ma thag tu/ bcom ldan 'das de bzhin gshegs pa dang lha mo dang byang chub sems dpa' khro bo 'khor dang bcas pa gser gyi me tog sna tshogs pa thogs pa dang / la la ni rol cha sna tshogs pa'i sgras phyogs kyi cha rnams khyab par byas la kha cig kyang mchod pa rnam pa lnga lag na thogs pa dang / la la yang bdud rtsi lngas bkang ba'i snod 'dzin pa/ de bzhin du yang kha cig dri bzang po'i chus bkang ba'i rin po che'i bum pa thogs pa gzhan dag kyang bstod pa'i tshig rnams brjod pa la brtson pa/ gzhan dag kyang bkra shis pa'i tshigs su bcad pa rjod par byed pa/ la la ni rdo rje'i glu len pa/ la la ni gar byed cing nam mkha'i dbyings nas gshegs shing sgrub pa po la mngon par phyogs pa/ dkyil 'khor gyi 'khor lo'i bdag po 'khor dang bcas pa la dbang bskur ba mdzad par bsam mo/ /de'i dus su yang sngags dang tshigs su bcad pa brjod par mdzad de/ ji ltar bltams pa tsam gyis ni/ de bzhin gshegs kun dbang bskur ba/ /lha yi chu ni dag pa yis/ / de bzhin khyod la dbang bskur ro/ /oM sarba ta thA ga ta a b+hi She ka sa ma ya shrI ye hUM/ dbang bskur ma thag tu dbus kyi bdag po'i cod pan du rdo rje 'chang ba'o/ /rnam par snang mdzad la sogs pa de bzhin gshegs pa bzhi la rdo rje 'chang ba nyid do/ /spyan la sogs pa bzhi ni rnam par snang mdzad dang / rin chen 'byung ldan dang / 'od dpag tu med pa dang / don yod grub pa'o/ /gzugs rdo rje ma la sogs pa yang de bzhin no/ /sa'i snying po dang byams pa dag la rnam par snang mdzad nyid do/ /phyag na rdo rje dang nam mkha'i snying po dag la rin chen 'byung ldan nam mi bskyod pa'o/ /'jam dpal dang spyan ras gzigs kyi dbang phyug la 'od dpag tu med pa'o/ /kun du bzang po dang sgrib pa rnam par sel ba la don yod grub pa'o/ /gshin rje gshed la sogs pa bzhi la rnam par snang mdzad la sogs pa'o/ / 'dod pa'i rgyal po la sogs pa bzhi la rnam par snang mdzad la sogs pa'am mi bskyod pa'o/ /ji skad du/ khro bo zhe sdang gnas las 'byung / /zhes gsungs so/ /rdo rje ro langs ma la sogs pa rnams la gshin rje gshed kho na'o/ /rgyas gdab pa de rang gi rigs rnal 'byor pas rjes su dran par 'gyur ro/ /ji skad du/ rgyas gdab pas ni lhar 'grub dang / /rigs la'ang byin gyis rlob pa ste/ /rigs 'chol ba yi sbyor ba yis/ /dngos grub med cing sgrub pa'ang med/ /ces 'byung ngo / /'dir ni phyir mi ldog pa'i dbang bskur bas sa brgyad pa thob pa dang / kun gzhi rnam par shes pa gnas gyur pa zhes bya ba'i bar ro/ /de'i rjes su sngar bshad pa'i rim pas phyogs bcu na bzhugs pa'i de bzhin gshegs pa'i tshogs rnams bkug la zhal du 'jug par bya ste/ 'dod pa'i gdugs zhes bya ba'i rtsa'i dbus nas byang chub kyi gzugs su reg bya rdo rje ma'i chos 'byung ba'i nang du lha sum cu rtsa gnyis kyi bdag nyid kyi dkyil 'khor gyi 'khor lo rim gyis spros te snga ma bzhin du sems dpa' gsum gyis bdag nyid dang / dbang bskur ba rgyas gdab pa'i bar shin tu mngon par 'dus byas la/ phan tshun snyoms par zhugs pas zhu ba'i byang chub kyi sems de yongs su gyur pa las mchod pa'i lha mo rnams pad+ma'i nang nas phyung ste dkyil 'khor gyi sgo rnams kyi bar du yongs su bskor bar bsam mo/ /de dag gis kyang mchod pa rnam pa lnga dang nang gi mchod pa dang gsang ba'i mchod pa la brtson pa/ gdugs dang / rgyal mtshan dang / ba dan dang / rnga yab la sogs pa thogs shing phyag 'tshal ba sngon du 'gro bas pus mo g.yas pa sa la btsugs te/ dbus kyi bdag po nas brtsam zhing sgo ba rnams kyi bar du rang gi bdag nyid mchod par bya ste/ de la rim pa ni me tog mas me tog dbul ba'i dus su/ oM sarba ta thA ga ta puSh+pe pU dza me g+ha sa mu dra s+pha ra Na sa ma ya shri ye hUM/ de bzhin du yang / oM sarba ta thA ga ta d+hUp+pe pU dza me g+ha sa mu dra s+pha ra Na sa ma ya shri ye hUM/ zhes bya ba la sogs pa'i sngags kyi tshogs brjod par bya'o/ /mchod pa yongs su rdzogs pa na snga ma bzhin du 'od zer gyi lcags kyus bkug la mchod pa'i lha mo rnams snying gar 'jug par bya zhes mchod pa'i rim pa'o/ /de bzhin du yang spros te snyan pa'i skad rnams kyis lha mo'i tshogs kyis bdag nyid kyi 'khor lo la bstod par bsams te/ oM sarba ta thA ga ta stu ti pU dza me g+ha sa mu dra s+pha ra Na sa ma ya shri ye hUM/ zhes 'di ni dkyil 'khor rgyal ba mchog gi ting nge 'dzin dang longs spyod rdzogs pa'i sku'o// //da ni las kyi rgyal ba mchog gi ting nge 'dzin las thams cad dag par bya ba'i phyir brtsam par bya ste/ de'i rim pa ni re zhig dang po rnal 'byor pas phra mo'i rnal 'byor bsgom par bya ste/ de la reg bya rdo rje ma'i chos 'byung ba'i phyag rgya'i nang du rdo rje 'chang chen po'i rnal 'byor pas dkyil 'khor ma lus pa'i rnam par rtog pa spangs pas na ra'i sna dang 'dra ba'i pad+ma'i sna'i rtse mor yungs kar phra ba tsam gyi tshod thig ler bsgoms la/ de'i dbus su bdag nyid lha sum cu rtsa gnyis dang bcas pa'am gsang ba lnga'i dkyil 'khor chen po rnam par bsgoms te/ de srid gnas pa'i ji srid sems rtse gcig par gyur pa'i bar ro/ /sems rtse gcig pa'i rtags ni gam na gnas pa'i sgra la sogs pa'i mtshan nyid gzung bar mi nus pa dang de ltar gyur pa'i rnal 'byor pa la shin tu gsang ba'i rnga dang rwa dung dang / 'brug sgra'am yan lag mchog dang ldan pa'i rol mo byed pa'i reg pa'am shin tu sra ba'i brag dang / gnam lcags la sogs pa rnams kyis kyang sems rtse gcig pa las nyams par mi 'gyur te phra mo'i rnal 'byor dang ldan pa'i phyir ro/ /rdul phra rab bam shin tu che ba'i mtha' la gnas pa'i sems dbang du 'gyur zhes gzhan nas 'byung ngo / / de lta bur gyur pa'i brtan pa'i rtags mthong nas spro bar bya'o/ /dang po kha dog sna lnga pa 'od zer gyi tshogs de gsal bar gyur na rnam par snang mdzad la sogs pa'i sa bon rnams spro ba dang / de'i rjes su de yongs su gyur pa'i 'khor lo la sogs pa'i mtshan ma rnams so/ /de rnams las kyang de bzhin gshegs pa'i gzugs du ma spros te/ slar yang thig le de nyid du 'jug par bya'o zhes rdo rje 'chang chen po'i rnal 'byor pa'i phra mo'i rnal 'byor ro/ /zhe sdang rdo rje'i rnal 'byor pas tsa na ka'i 'bru'i tshod tsam in+d+ra nI la'i mdog can chos 'byung ba'i phyag rgya'i nang du phra ba'i rdo rje rnam par bsgoms te / de'i chang zungs kyi nang du snga ma bzhin du bdag nyid bsgoms te / brtan par byed pa'i mtshan ma mthong ba sngon du 'gro bas rdo rje'i rigs rnams spro ba dang bsdu bar bya'o zhes rigs kyi rnal 'byor pa'i phra mo'i rnal 'byor ro/ /sku'i rdo rje'i rnal 'byor pas ni yungs kar gyi 'bru'i tshod tsam 'khor lo'i mtshan ma de nyid du bsgoms te/ de'i lte ba la bdag nyid snga ma bzhin du bsams te brtan par byed pa'i mtshan ma mthong nas sku rdo rje rnams spro ba dang bsdu bar bya'o zhes sku rdo rje'i rnal 'byor pa'i phra mo'i rnal 'byor ro/ /de bzhin du gsung gi rdo rje'i rnal 'byor pas chos 'byung ba'i nang du tsa na ka'i 'bru'i tshod tsam pad+ma dmar po rnam par bsams te / de'i lte ba la snga ma bzhin du bdag nyid rnam par bkod de/ brtan par byed pa'i mtshan ma byung ba na gsung gi rdo rje'i lha rnams spro ba dang bsdu bar bya'o zhes gsung gi rdo rje'i rnal 'byor pa'i phra mo'i rnal 'byor ro/ /de'i rjes su rin chen 'byung ldan gyi rnal 'byor pas zur drug pa mdog ser po tsa na ka'i 'bru'i tshod dam nas 'bru'i tshod kyi rin po che rnams brtags la/ de'i dbus su bdag nyid snga ma bzhin du bsams te/ brtan par byed pa'i mtshan ma rnyed nas rin po che'i rigs kyi lha rnams spro ba dang bsdu bar bya'o zhes rin po che'i rigs kyi rnal 'byor pa'i phra mo'i rnal 'byor ro/ /de'i rjes su dam tshig gi rdo rje'i rnal 'byor pas chos 'byung ba'i nang du yungs kar gyi 'bru'i tshod tsam gyi ral gri la dmigs te/ de'i chang zungs kyi nang du snga ma bzhin bdag nyid bsams te/ brtan pa'i mtshan ma byung ba na dam tshig gi rdo rje'i rigs kyi lha rnams spro ba dang bsdu bar bya'o zhes dam tshig gi rdo rje'i rigs kyi rnal 'byor pa'i phra mo'i rnal 'byor ro/ /rdzogs pa'i rim pa'i rnal 'byor pa la yang phra mo'i rnal 'byor ni 'og nas 'chad par 'gyur ro zhes phra mo'i rnal 'byor gyi bsgom pa'i rim pa bstan to/ /de nas bzlas brjod bshad par bya ste/ re zhig dang por ye shes sems dpa'i snying ga'i pad+ma'i lte bar pad+ma dang zla ba'i dkyil 'khor gyi steng du rdo rje 'chang chen po la sogs pa'i snying po'am nye ba'i snying po la sogs pa gang yang rung ba kha gyen du lta ba/ shel gyi phreng ba lta bu 'od dang ba de'i nang na srog dang rtsol ba mdog dmar po skud pa lta bus brgyus pa ye shes sems dpa'i thugs ka nas byung zhing kha'i lam nas nges par spros te/ dam tshig sems dpa'i snying gar phyin nas de las kyang dam tshig sems dpa'i kha nas nges par byung ste/ dam tshig gi lha mo'i kha nas zhugs te de las kyang ye shes kyi lha mo'i kha nas ye shes kyi lha mo'i thugs kar thim nas de las kyang de nyid kyi chos 'byung ba'i phyag rgyar phyin te/ de las nges par byung nas dam tshig gi lha mo'i pad+mar phyin zhing de las kyang dam tshig sems dpa'i rdo rjer zhugs nas ye shes sems dpa'i rdo rje nas de'i thugs kar phyin cing thugs ka de nyid du gnas par bya'o/ /de ltar yang dang yang du mu tig phreng ba ltar sngags kyi phreng ba yongs su 'khor bar bsam par bya'o/ /kha cig ni ye shes sems dpa' rdo rje'i lam nas nges par byung zhing slar yang dam tshig sems dpa'i rdo rje'i lam nas byung ste/ dam tshig sems ma'i pad+mar zhugs shing ye shes sems ma'i pad+ma'i sgo nas de'i thugs ka dang kha la phyin te/ de las kyang dam tshig sems ma'i kha nas dam tshig sems dpa'i kha la phyin te/ de las kyang ye shes sems dpa'i khar zhugs shing de'i thugs kar phyin te de nyid du gnas par bya'o/ /steng dang 'og gi bye brag ni zhe sdang dang 'dod chags kyi rnal 'byor pa'i dbye bas rtogs par bya'o/ /zhes rdo rje 'chang chen po'i bzlas pa 'di ye shes kyi tshogs kyi ngo bo nyid rdo rje sems dpa'i rnal 'byor pas bzla bar bya'o/ /rnam par snang mdzad kyi rnal 'byor pas kyang ye shes sems dpa'i thugs kar zla ba dang 'khor lo'i steng du dzi na dzika ces bya ba'i sngags snga ma bzhin du bkod la/ de nyid mu tig gi phreng ba bzhin du spro ba dang bsdu ba'i rim pas bzla bar bya'o/ /de bzhin du yang rin po che dang 'od dpag tu med pa dang don yod grub pa'i rnal 'byor pa rnams kyis rang rang gi ye shes sems dpa'i thugs kar pad+ma dang zla ba la gnas pa'i rang rang gi rigs kyi mtshan ma rnams su rat+na d+h+r-ika ces bya ba'i sngags rnams rnam par bkod la/ spro ba dang bsdu ba'i rim pas so sor bzla bar bya'o zhes rigs drug gi dbye bas dam tshig gi bzlas pa bstan to/ /de ltar dbus kyi gtso bo'i bzlas brjod byas nas dkyil 'khor pa rnams la yang sngar bshad pa'i rim pas spro ba dang / bsdu ba sngon du 'gro ba'i sngags bzlas brjod bya'o/ /rtag tu bzlas pa'i dus su dbus kyi gtso bo la brgya rtsa brgyad dam de'i phyed dam phyed kyi phyed bzlas par bya'o/ /dkyil 'khor pa rnams la yang lan bdun nam gsum mam re re bzlas par bya'o/ / dkyil 'khor bri ba'i dus dang rab tu gnas pa dang / sbyin sreg gi cho ga'i dus su bzlas pa de nyid khyad par du bya ba yin te/ ji skad du/ 'khor lo can la 'bum bzla zhing / /rang 'dod lha yi 'bum de bzhin/ /gzhan dag la ni khri phrag gcig /sngon du bsnyen pa 'di bshad do/ /zhes 'byung ngo / /yang na rdo rje 'chang chen po'i bzlas pa ji ltar bshad pa bzhin du yin te/ 'on kyang rnam par snang mdzad la sogs pa'i sngags kyi bzlas pa ni ye shes sems dpa'i thugs ka nas pad+ma dang zla ba'i steng du 'khor lo la sogs pa'i mtshan ma rnams la rang gi chos kyi yi ge rnam par bkod de/ de las snga ma bzhin du 'od zer gyi 'khor lo spro ba dang bsdu bar bya zhing ji srid sems rtse gcig par gyur pa de srid du gnas kyi bar du gnas par bya'o zhes dam tshig gi bzlas pa'i rnam pa'o/ /ngag gi bzlas brjod gnyis pa'i rim pa ni lag pa g.yas pa dang g.yon pa dag la dbyangs dang gsal byed yongs su gyur pa las zla ba dang nyi ma'i dkyil 'khor du bsgoms te/ de dag gi steng du dbyangs dang gsal bya'i yi ge phreng ba gnyis po dgod de/ oM la sogs pa'i sa bon yongs su gyur pa'i phyag mtshan las skyes pa'i rnam par snang mdzad la sogs pa lag pa g.yas pa'i sor mor gyur pa dang / de bzhin du laM la sogs pa'i sa bon yongs su gyur pa'i rang rang gi mtshan ma las skyes pa'i spyan la sogs pa rigs kyi btsun mo rnams lag pa g.yon pa'i sor mo la dgod de/ sems rtse gcig pa nyid la dmigs te shel la sogs pa'i rang bzhin du bgrang phreng blangs la/ dal ba dang myur ba spangs pa'i srog dang rtsol ba'i rlung rgyu ba'i tshod du dbus ma zhi ba'i rang bzhin du bzlas brjod bya'o/ /ji skad du gdan bzhi las kyang / grangs la rab tu 'jug pa ni/ / bgrang phreng yang dag bsten par bya/ /shel dang dung dang mu tig dang / /de bzhin dkar po khams las byung / /zhi ba yi ni las rnams la/ /shes rab can gyi gzung bar bya/ /dngul dang gser dang zangs dag ni/ /rgyas pa la ni rgyal bas gsungs/ /dbang la gur kum gla rtsi dang / /bzhi mnyam rang bzhin shes par bya/ /dgug pa la ni ru drA k+Sha / /sdang ba la sogs glang po'i rus/ /rtsa ba'i sngags kyi bzlas brjod la/ /mi rus rang bzhin yin par 'dod/ /las rnams thams cad rab bsgrub phyir/ /bo d+he tse yi phreng bar 'dod/ /ces bya ba la sogs pa 'byung ngo zhes bya ba 'di ni bskyed pa'i rim pa'i bzlas brjod kyi cho ga'o/ /rdzogs pa'i rim pa'i rnal 'byor la yang phra mo'i rnal 'byor dang rdo rje bzlas pa dag /rdo rje bzlas pa'i rim pa gtan la dbab pa'i dus su 'chad par 'gyur ro/ /phra mo'i rnal 'byor dang dam tshig gi bzlas pa dag gis sems can thams cad kyi don byed pa na de bzhin gshegs pa rnal 'byor pa la lung ston pa yin no/ /dus de nas brtsams te dkyil 'khor 'bri ba dang rab tu gnas pa dang sbyin sreg dang mchod pa'i cho ga dang / slob ma lhag par gnas pa dang / dbang bskur ba la sogs pa la rnal 'byor pa snod du rung bar 'gyur ro/ /de'i rjes su rang dang gzhan gyi don phun sum tshogs pa yongs su rdzogs pa la bltas te/ bya ba byas pa byed pa rdzogs pa bdag yin zhes bdag rnam par dpyod cing spros pa 'di ci zhig bya zhes bsams te / dbus kyi gtso bo reg bya rdo rje ma dang lhan cig tu bde ba chen po'i dbang gis mar gyi bum pa thim pa dang 'dra bar byang chub kyi sems kyi thig le'i gzugs su yongs su gyur par bsam par bya / le'u bcu bdun pa las kyang / de nas bcom ldan 'das phyag na rdo rje de bzhin gshegs pa thams cad kyi bdag po de bzhin gshegs pa thams cad kyi rjes su chags pa'i rdo rje zhes bya ba'i ting nge 'dzin la snyoms par zhugs te/ snyoms par zhugs ma thag tu bcom ldan 'das kyi 'od kyis nam mkha'i dbyings kun tu zhugs pa'i de bzhin gshegs pa thams cad rdo rje'i dpal des reg pas kun tu bzang zhing kun tu bzang pos zhes yang dag par gyur to/ /de nas nam mkha'i dbyings thams cad 'di rdo rje'i chu'i bum pa bzhin du yongs su gang bar gyur to zhes bya ba la sogs pa 'byung ngo / /de nas bcom ldan 'das ma spyan la sogs pa'i rigs kyi btsun mo bzhi pos bcom ldan 'das rdo rje 'dzin pa thim par mthong nas gzhan gyi don med pas sngon gyi smon lam dang mi ldan pa'i phyir dang / chad pa'i lta ba bzhin du dbang phyug pa'i bstan par thal bar 'gyur bas tshad med pa'i ngo bo nyid kyi lha mos bcom ldan 'das bdag po ma mthong ba'i gdung ba'i yid can rnams kyis de bslang ba'i don du glu snyan pas 'di ltar sad par byed de/ sems can khams na gnas kyi dbang phyug khyod ni rdo rje'i thugs/ /dga' ba'i yid 'ong don chen 'dod pas bdag la skyab du gsol/ /mgon po gal te de ring bdag ni gson par mchis bzhed na/ /sems can yab chen gnyen mchog bdag la dgyes par mdzad du gsol/ /rdo rje'i sku khyod bka' yi 'khor los sems can kun la phan/ /sangs rgyas don du byang chub don dam rjes su phan ston pa/ /mgon po gal te de ring bdag ni gson par mchis bzhed na/ /'dod chags dam tshig chags pas bdag la dgyes par mdzad du gsol/ /khyod ni rdo rje'i gsung ste kun la phan zhing thugs brtse ba/ /'jig rten dag gi dgos pa'i don mdzad pa la rab tu brtson/ /mgon po gal te de ring bdag ni gson par mchis bzhed na/ /rab dga'i spyod pa kun tu bzang po bdag la dgyes par mdzad du gsol/ /khyod ni rdo rje 'dod pa dam tshig mchog gi phan don che/ /yang dag rdzogs sangs rgyas kyi gdung mchog mnyam pa nyid gzigs pa/ /mgon po gal te de ring bdag ni gson par mchis bzhed na/ /yon tan rin chen mang po gter gyur bdag la dgyes par mdzod/ /ces bskul ba'i glu rmi lam bzhin du gsan nas mi dmigs pa'i snying rjes bskul nas sngon gyi smon lam 'bras bu dang bcas par bya ba'i phyir dang / ma 'ongs pa'i sems can rjes su gzung bar bya ba'i slad du bcom ldan 'das don dam pa'i bden pa las bzhengs par gyur to/ /sgron gsal las kyang bshad pa/ tshad med pa bzhi'i lha mo rnams kyis bskul bar gyur pa dang / sngon gyi smon lam rgyun gyi shugs kyis stong pa nyid kyi rnal 'byor las bzhengs nas dpal rab tu dga' ba'i 'dod chags la spyod pa brtan par bya ba'i phyir/ 'khyud pa dang / 'o byed pa dang / 'jib pa dang / thal mos brdab pa dang / so dang sen mos 'deb pa dang / nyed pa dang / phyang thag dang / brkyang ba dang / grong gi 'dug stangs dang / brgyal ba dang / mu tig phreng ba g.yo ba dang / gdu bu dang / 'khor gdub dang / rkang gdub kyi sgra dang / yul dang / dbang po ste rdo rje dang / pad+ma mnyam par sbyor zhing shes rab dang thabs kyi snyoms par zhugs pas A li dang kA li dang / 'dod pa'i gdugs dang rus sbal dang / zla bas gang ba ste/ rtsa gsum sor mo gsum gyis bskyod cing rab tu bsgul ba'i dga' ba'i sgyu ma'i sgras mchog tu dga' ba'i bde ba nyams su myong bas phung po dang khams dang skye mched kyi ngo bo de bzhin gshegs pa thams cad spyi bo nas brtsams te/ dri ma med pa'i chu'i rgyun bzhin du bzhus la byang chub kyi sems kyi ngo bo nyid du 'dzag pas chos 'byung ba'i nang du yang dag par bzhag ste/ des zhe sdang la sogs pa la spyod pa'i sems can rnams rnam par sbyang ba'i phyir dkyil 'khor gyi 'khor lo phyung ste/ slar yang 'od gsal bar zhugs nas rnam par rtog pa med pa nyid du gyur pa de la ye shes kyi phyag rgya dang lhan cig tu zhal gsum la sogs pa'i rnam pa la dmigs te/ 'dod pa'i yon tan thams cad kyi dpal zhes bya ba'i ting nge 'dzin la snyoms par zhugs par bsam par bya'o/ /de'i dgongs pa ni bcom ldan 'das dang lha mo rnams ni thabs dang shes rab kyi ngo bo nyid stong pa nyid dang snying rje'i rang bzhin no/ /de dag phan tshun dbyer med pa yin te byas pa dang mi rtag pa bzhin no/ /de bas na bcom ldan 'das gang gi tshe don dam pa'i bden pa la rab tu zhugs pa de'i tshe snying rje'i cha lha mo rnams la gzugs brnyan gyi tshul du rab tu zhugs so/ /lha mo rnams kyi stong pa nyid kyi cha gang yin pa de bcom ldan 'das la gzugs brnyan du zhugs te/ me long gnyis kyi gzugs brnyan phan tshun snang ba bzhin no/ /de bas na bcom ldan 'das la gnas pa'i snying rje'i cha gzugs brnyan du zhugs pa'i stong pa nyid kyi ngo bo lha mo rnams kyis bcom ldan 'das rang gi chos nyid kyis kho na bskul bar byed pa yin te/ ye shes cha shas med pas gcig pa yin pa'i phyir ro/ /gzhan du na tha dad par smra bar 'gyur ro/ /gnyis su med pa'i ye shes ni tha mi dad pa yin te/ rang bzhin gyis grub pa'i phyir ro/ /de ltar na gal te ye shes la gnyis pa med na de'i tshe skyes pa dang bud med kyi dbye ba ji ltar 'gyur zhe na/ smras pa 'dod chags kyis 'dul ba'i sems can gyi khams sbyang bar bya ba yin gyi don dam par ni ma yin no/ /gang gi phyir don dam par ni gzugs med cing bag chags dang bcas pa'i nyon mongs pa dang shes bya'i sgrib pa dang bral zhing rang gi rig pa'o/ /'og nas kyang 'chad par 'gyur te/ 'dod pa'i khams na gnas pa'i yul la zhen pa'i sems can rnams la 'dod pa'i yon tan lnga longs spyod pa'i sgo nas thar pa bstan par bya ba'i phyir gsungs so zhes bya ba la sogs pa'o/ /le'u dang po las kyang / rang gi gzugs brnyan bud med kyi gzugs brnyan du sprul zhes gsungs so/ /de'i phyir thabs dang shes rab kyi ting nge 'dzin las dbyer med pa'i lha mo rnams kyis bstod de thal ches pas chog go/ /de'i rjes su snga ma bzhin du bcom ldan 'das zhal dang phyag mtshan ji lta ba bzhin du ye shes kyi phyag rgyas 'khyud pa bzhengs par mthong nas de bzhin gshegs pa lnga'i sgo nas rnam par snang mdzad la sogs pas bstod par 'gyur te/ mi bskyod rdo rje ye shes che/ /rdo rje dbyings ni mkha' chen po/ / rdo rje gsum mchog dkyil 'khor gsum/ /rdo rje gsum la phyag 'tshal lo/ /rnam par snang mdzad dga' chen po/ /rdo rje zhi ba dga' ba che/ /rang bzhin 'od gsal mchog gi mchog /ston pa rdo rje phyag 'tshal bstod/ /rin chen rgyal po shin tu zab/ /rdo rje nam mkha' dri ma med/ /rang bzhin gyis dag gos pa med/ /rdo rje sku la phyag 'tshal bstod/ /rdo rje 'chi med rgyal chen po/ /rtog med nam mkha' rdo rje 'dzin/ /'dod chags pha rol phyin thob pa/ /rdo rje gsung la phyag 'tshal bstod/ /don yod rdo rje rdzogs sangs rgyas/ / bsam pa thams cad yongs rdzogs pa/ /rnam dag ngo bo las byung ba/ /rdo rje sems la phyag 'tshal lo/ /de'i rjes la bstod pa'i tshig thos ma thag tu nga rgyal brtan par gyur pas kyang gal te skyo bar gyur na/ de'i tshe phung po khams dang skye mched kyi rang bzhin gyi lus tshim par bya ba'i phyir cho ga 'di brtsam par bya ste/ mtshogs ma'i bug pa nas mtho gang tsam gyi steng du kun+da dag pa'i 'od dang mtshungs pa'i yi ge oM rnam par dgod de/ de yongs su gyur pa'i dri ma med pa'i nam mkha'i zla ba'i dkyil 'khor dang mtshungs pa'i lha'i bdud rtsi'i rang bzhin gyi gzugs brnyan rnam par bsgoms te/ de'i dbus su thur du 'phyang ba 'bar ba'i phreng ba can oM rnam par dgod de/ de'i 'od zer gyis bzhu bar bya ste/ de'i bdud rtsi 'bab chu'i rgyun gyis rnam pas mtshogs ma'i bu ga'i lam nas 'ongs pa de rkan gyi phugs la gtad pa'i lces kun tu myang bar byas la/ rtsa kun tu spyod pa'i rim pas yan lag dang nying lag thams cad rgyas par bya'o/ /de ltar byas pas bsam gtan gyi zas can dbang po thams cad yongs su rdzogs pa/ kham gyi zas la ltos pa med cing gnas par 'gyur ro zhes tshim par byed pa'i cho ga gcig go/ /cho ga gnyis pa yang yod de/ mchu gnyis kyi rtse mor oM yongs su gyur pa'i kha dog ser po bum pa bzang po bkod de/ de'i nang du saM yongs su gyur pa las bdud rtsis kha'i bar du yongs su bkang ba la dmigs te/ lce'i rtse mor hUM phra mo yongs su gyur pa'i rdo rje phra mos de'i nang nas bdud rtsi bkug la snga ma bzhin du phung po la sogs pa tshim par bya'o zhes khyad par ro/ /de'i rjes su phyi'i dkyil 'khor lus kyi dkyil 'khor la rab tu 'jug cing bdud rtsi myang bar bya ste/ ye shes sems dpa'i thugs ka'i sa bon las byung ba'i 'od zer gyi tshogs lcags kyu'i rnam pas phung po la sogs pa'i ngo bo nyid de bzhin gshegs pa dang lha mo dang byang chub sems dpa' dang / khro bo'i 'khor lo snga ma bzhin du bkug la/ yan lag dang tshigs thams cad du nges par dgod de/ de las kyang sku'i rdo rje 'dzin pa'i ngo bo nyid lha'i 'khor lo spyi bor oM la bsdu ba dang / gsung gi rdo rje'i ngo bo nyid lha'i 'khor lo mgrin par yi ge AHla bsdu ba dang / thugs kyi rdo rje 'dzin pa'i ngo bo nyid kyi lha'i 'khor lo thugs ka na gnas pa'i yi ge hUM la bsdu bar bya'o/ /de'i rjes la yi ge oM AHla thim pa dang AHyi ge hUM la thim pa dang / hUM de nyid la yang ye shes kyi phyag rgya dang snyoms par zhugs pa'i rang gi lha'i gzugs brnyan bsdus te/ slar yang hUM de nyid la khams gsum ma lus pa bsdus te/ /de nyid yongs su gyur pa las/ slar yang bde ba chen po'i rang bzhin can/ rdo rje 'chang chen po'i gzugs brnyan bsgom par bya'o/ /zhes dpa' bo gcig tu bsgom pa'i bdag nyid can gyi 'khor lo nye bar bsdu ba'i bsgom pa'i cho ga'o/ /de'i rjes la kha dog sngon po yi ge yaM yongs su gyur pa las/ mdun du gzhu'i dbyibs can rlung gi dkyil 'khor rnam par bsams te/ de'i steng du yi ge raM yongs su gyur pa las me'i dkyil 'khor zur gsum pa me'i phreng bas dkrugs par bsams la / de'i steng du yi ge a dmar po yongs su gyur pa las dum bu gcig pa pad+ma'i snod bsams te / de'i dbus su ma ra bi shu mu'i sa bon dang go ku da ha na zhes bya ba'i sa bon lnga bkod de/ yi ge bcu 'dres par gyur pas lnga ru song bar rnam par bsams te/ de dag yongs su gyur pa las rtag pa la sogs pa'i rang bzhin can gyi rdzas rnam pa lnga po de'i steng du rim pa ji lta ba bzhin du de bzhin gshegs pa lnga'i sa bon oM la sogs pa rnam par dgod de/ spro ba dang bsdu ba'i rim pas de bzhin gshegs pa thams cad kyi rang bzhin du bsgrubs la/ sa bon dang rdzas yongs su gyur pa las de bzhin gshegs pa lnga zhal gsum pa la sogs pa'i rnam pa can/ sems dpa' gsum gyi bdag nyid rang rang gi phyag rgya dang snyoms par zhugs pa sna tshogs pad+ma dang zla ba'i dkyil 'khor la bzhugs pa 'od gsal ba'i rang bzhin can bsgom par bya'o/ /de nas r do rje dang pad+ma snyoms par 'jug pa'i dus su de rnams kyi rjes su chags pa'i sgra dam pas bkug pa de bzhin gshegs pa rnams nang du zhugs par bsam la zhugs pa'i de ma thag tu de dag zhu zhing byang chub kyi sems kyi gzugs 'o ma can gyi rgya mtsho lta bu bdud rtsi de nyid du gnas par blta bar bya'o/ /de la bltas te chos kyi dbyings kyi ye shes kyi rang bzhin yi ge hUM gis sbyangs pas tha mal pa'i rnam par rtog pa bzlog par bya'o/ /yi ge AHso sor rtog pa'i ye shes kyi rang bzhin gyis sad par bya ba g.yas dang g.yon du 'khor bar bsam par bya'o/ /yi ge oM me long lta bu'i ye shes kyi rang bzhin gyis sbar zhing 'od kyi tshogs spro bar gyur par bsam mo zhes bdud rtsi sbyang ba la sogs pa'i rim pa'o/ /oM swa b+hA ba shud+d+ha sarba d+ha rmA swa b+hA ba shud d+hou0f85haM/ zhes sngags sam yang na/ oM badzra d+h+r-ika ces bya ba'i sngags kyis byin gyis brlab par bya'o/ /de'i rjes la yang ye shes sems dpa'i thugs kar ting nge 'dzin sems dpa'i me lce bdun dang ldan pa lta bur bsams te / mgrin par yi ge AHyongs su gyur pa las pad+ma 'dab ma brgyad pa dmar po de'i 'dab ma gcig lce ru bsams la/ de la yang sa bon hUM yongs su gyur pa'i rdo rje dkar po phra mo de'i dbus kyi rtse la yi ge oM gyis byin gyis brlab par bya ste/ snga ma bzhin du de bzhin gshegs pa dang yum gyis byin gyis brlabs la dgang gzar dang blugs gzar du lag pa gnyis bsams te/ de dag gis bdud rtsi'i snod phyag 'tshal ba sngon du 'gro bar blangs te/ dbye ba rnam par spangs pa'i blos de bzhin gshegs pa thams cad 'dus pa'i ngo bo nyid oM badzra a mr-i te sa mA d+hi d+hA na pr-i Na ni swA hA/ zhes bya ba'i sngags 'dis kha'i thab khung gi lam nas ye shes kyi me la bsreg par bya'o/ /'di'i phan yon ni lha mo bzhis zhus pa'i rgyud las/ rga ba med cing nad med dang / /'chi ba med cing dug sogs med/ /de ni dus min 'chi ba med/ /gnod pa thams cad 'joms par byed/ /ces 'byung ngo / / zla gsang thig le las kyang / dus de brtsams nas de ni rtog med de/ /de yi kha dog dbyibs dang mtshan ma 'dzin/ /bsam mi khyab pa'i ngo bo rnam smin sku/ /sdom pa de las bya ba byas pas bsgom/ /zhes 'byung ngo / /bza' ba dang btung ba la sogs pa gang ci yang rung ba de dag thams cad zas kyi dus su rang 'dod pa'i lha'i rnal 'byor pa dang ldan pas bdud rtsi lnga bzhin du sbyangs te bza' bar bya'o/ /de la lkog ma dang snying ga dang lte ba dang gsang ba dag tu khams bzhi'i rang bzhin dkyil 'khor bzhi ste/ me dang chu dang rlung dang dbang chen no/ /de la me'i dkyil 'khor ni rlung gi dkyil 'khor gyis sbar ba yin te/ chu'i dkyil 'khor gyis yongs su smin par byed de/ dbang chen gyi dkyil 'khor snod kyi 'jig rten gyi ngo bor bsreg bya gnas par gyur te/ de nyid du 'jug go 'jug pa'i tha mar bshang lam las thal bar gyur pa nges par 'byung bar 'gyur zhes nang gi sbyin sreg gi cho ga'o/ /de'i rjes su mchod pa'i cho ga brtsam par bya ste/ ye shes sems dpa'i thugs ka na gnas pa'i dkyil 'khor gyi 'khor lo gang yin pa de nyid srog dang rtsol bas bskul ba na g.yas dang g.yon pa'i sna'i bug pa kha sbyar gyi nang nas phyi'i rdul tshon la sogs pa'i dkyil 'khor dag tu rnam par spro zhing dgod la/ snga ma bzhin du kha sbyar du byas te dkyil 'khor gyi 'khor lo yongs su gsal bar mthong nas yan lag lngas phyag 'tshal ba bzhi po bya'o/ /oM sarba ta thA ga ta sku'i rigs kyi dkyil 'khor pa rnams la kA ya bAka tsit+ta pra na me na pA dA ban+dA nAM ka ro mi/ zhes shar nas so/ /oM sarba ta thA ga ta rin po che'i rigs kyi dkyil 'khor pa rnams la kA ya bAka tsit+ta pra na me na pA dA ban+dA nAM ka ro mi / zhes lho nas bya'o/ /oM sarba ta thA ga ta pad+ma'i rigs kyi dkyil 'khor pa rnams la kA ya bAka tsit+ta pra na me na pA dA ban+dA nAM ka ro mi/ zhes nub nas bya'o/ /oM sarba ta thA ga ta las kyi rigs kyi dkyil 'khor pa rnams la kA ya bAka tsit+ta pra na me na pA dA ban+dA nAM ka ro mi/ zhes byang nas so/ /de ltar phyag bzhi byas la sdig pa bshags pa la sogs pa bla na med pa'i mchod pa rnam pa bdun byas la slar yang 'dud de sku khrus kyi cho ga sngon du 'gro bar rang rang gi mchod pa'i sngags dang bcas pa'i sngags dag gis mchod pa rnam pa lngas dkyil 'khor gyi 'khor lo mchod par bya ste/ oM badzra puSh+pe AHhUM phaT swA hA/ oM badzra d+hU p+pe AHhUM phaT swA hA/ oM badzra dI pe AHhUM phaT swA hA/ oM badzra gan+d+he AHhUM phaT swA hA/ oM badzra a mr-i te AHhUM phaT swA hA/ mchod pa rnam lnga'i sngags so/ /oM sarba ta thA ga ta pA t+yaM sa ma ya shri ye hUM/ oM sarba ta thA ga ta ar+g+haM sa ma ya shri ye hUM/ zhabs bsil dang yon chab dag gi sngags so/ /de'i rjes su rang rang gi sngags brjod par bya ste/ oM badzra d+h+r-ika AHhUM phaT swA hA/ oM dzi na dzika AHhUM phaT swA hA/ oM rat+na d+h+r-ika AHhUM phaT swA hA/ oM A ro l-ika AHhUM phaT swA hA/ oM pradz+nyA d+h+r-ika AHhUM phaT swA hA/ oM mo ha ra ti AHhUM phaT swA hA/ oM dwe Sha ra ti AHhUM phaT swA hA/ oM rA ga ra ti AHhUM phaT swA hA/ oM badzra ra ti AHhUM phaT swA hA/ oM dzaHru pa badzri ni AHhUM phaT swA hA/ oM hUM shab+ta badzri ni AHhUM phaT swA hA/ oM baM gan+d+ha badzri ni AHhUM phaT swA hA/ oM hoHra sa badzri ni AHhUM phaT swA hA/ oM hUM spaR+She badzri ni AHhUM phaT swA hA/ oM th+liM k+shi ti garba AHhUM swA hA/ oM maM mai tri AHhUM swA hA/ oM aM badzra pA Ni AHhUM swA hA/ oM oM a kA sha gar+b+ha AHhUM swA hA/ oM maM many+dzu shrI badzra AHhUM swA hA/ oM oM lo ke shwar AHhUM swA hA/ oM saM sa man+ta b+ha dra AHhUM swA hA/ oM oM sarba Ni wa ra Ni be ShaM bi ni AH hUM swA hA/ oM ya mAn+ta kr-ita AHhUM swA hA/ oM pradz+nyA n+ta kr-ita AHhUM swA hA/ oM pad+mAn+ta kr-ita AHhUM swA hA/ oM big+h+nAn+ta kr-ita AHhUM swA hA/ oM a tsa la AHhUM swA hA/ oM oM Tak+ki rA dza AHhUM swA hA/ oM AHni la daN+Da AHhUM swA hA/ oM hUM ma hA ba la AHhUM swA hA/ oM hUM sum+b+ha rA dza AHhUM swA hA/ oM b+h+rUM uSh+NI Sha tsakra brti ni AHhUM swA hA/ 'di dag mchod pa dang bzlas pa'i sngags so/ /mchod pa'i mtha' ru dkyil 'khor snga ma bzhin du bstod cing bskor bar bya ste/ 'dud de bsod nams yongs su bsngos la/ smon lam byas la slar yang dkyil 'khor sangs rgyas kyi zhing du gshegs su gsol nas dam tshig gi dkyil 'khor snga ma bzhin du sku'i dkyil 'khor du 'jug par bya'o/ /dkyil 'khor gyi 'khor lo dang / rgyal po chen po bzhi dang / 'byung po thams cad dang / khro bo rnams la gtor ma sbyin par bya'o zhes mchod pa'i cho ga'o/ /de la re zhig dang por mdun du 'dab ma sum cu rtsa gnyis pa'i pad+ma bsams te/ de'i dbus kyi lte ba nas brtsams te/ 'dab ma thams cad kyi bar du rang byin gyis rlob pa'i rim pas lha sum cu rtsa gnyis la dmigs shing / snga ma bzhin du btud la sngar bshad pa'i bsgom pa'i rim pas pad+ma'i snod kyi nang du ye shes kyi bdud rtsi bsgoms te zhabs bsil dang zhal bsil dang yon chab sngon du 'gro bar dril bu'i sgra sgrogs shing bdug spos bsregs te/ oM badzra d+h+r-ika swA hA/ zhes bya ba'i sngags kyis spyan drangs par bya'o/ /de nas dam tshig gi phyag rgya bcings te 'chad par 'gyur ba'i sngags kyis gtor ma sbyin par bya'o/ /phyag rgya ni rdo rje khu tshur gnyis bcings te/ mdzub mo dang mthe chung gnyis lcags kyu'i rnam par bcas te/ gung mo dang srin lag gnyis bkug pa dag gis rtsa ba'i tshigs gnyis su mthe bong gtad la lag pa g.yon pa'i mkhrig ma lag pa g.yas pa'i mkhrig mas 'khyud cing snying khar bcang la sngags 'di brjod la/ oM sarba ta thA ga ta tsa kraM kraM prI Na ye swA hA/ zhes 'di gtor ma'i snod phul nas/ de'i rjes su oM badzra satwa sa ma ya ma nu pA la ya/ zhes bya ba la sogs pa'i yi ge brgya pa dang / bdud rtsi 'khyil pa'i sngags dag gis shing gcig gam lam gyi sum mdo la sogs par spyi gtsug tu bcings te gtor ma sbyin par bya'o/ /khyed kyis sems can don kun mdzad/ /ces bya ba la sogs pa'i tshigs su bcad pas gshegs su gsol bar bya'o zhes dkyil 'khor gyi gtor ma'i cho ga'o/ /de'i rjes su gling bzhi'i bdag po rgyal po chen po bzhi la rim pa 'dis gtor ma sbyin par bya ba yin te/ mdun du D+h+ri dang bi dang bI dang bai zhes bya ba rnams las byung ba/ gdong gcig pa lag pa gnyis pa dkar po dang ser po dang nag po dang dmar po'i mdog can lus la go cha bgos pa spyi bor rmog gis brgyan pa/ mdung dang ral gri lag na thogs pa/ yul 'khor srung dang / 'phags skyes po dang / mig mi bzang dang / rnam thos sras te rgyal po chen po bzhi de rnams la snod bzhi po ni chang dang / sha dang 'o ma dang 'bras thug la sogs pa kha zas rnams kyis bkang bar byas te/ dkyil 'khor gyi phyogs bzhi'i mthar dgod par byas la sngags 'di dag gis sbyin par bya ste/ oM D+h+ri ta rASh+Ta ya gan d+ha rba se nA d+hI pA ta ye i maM ba liM pra tIts+tsha ya sa ma ya ma nu sma ra AHhUM phaT swA hA/ oM bi ru D+ha kA ya ma hA kuM b+hAn DA d+hi pa ta ye i maM ba li pra tIts+tsha sa ma ya ma nu sma ra AHhUM phaT swA hA/ oM bi rU pAk+Sha ya ma hA nA gA d+hi pa ta ye i maM ba liM pra tIts+tsha sa ma ya ma nu sma ra AHhUM phaT swA hA/ oM bai shra ba Na ya mahA ya k+Sha se nA d+hi pa ta ye i maM ba liM pra tIts+tsha sa ma ya ma nu sma ra AHhUM phaT swA hA/ sngags de dag gis byin gyis brlabs te shar la sogs pa'i phyogs su gtor bar bya'o zhes rgyal po bzhi po'i gtor ma'i cho ga'o/ /de'i rjes su 'byung po thams cad kyi gtor ma'i cho ga 'dis sbyin par bya ste/ re zhig dang por phyogs bzhi dag tu gling bzhi bris te/ zla ba phyed pa dang sog kha'i rnam pa dang zlum po dang gru bzhi rnams kyi dkyil du yi ge suM las ri rab bskyed de lha'i gnas rigs drug gis brgyan pa/ dbus kyi cha ru zla ba dang nyi ma dag gis 'khor bar bsams te/ de'i 'og tu 'jog po dang rigs ldan dang mtha' yas dang / pad+ma dang pad+ma chen po dang nor rgyas dang dung skyong dang stobs kyi rgyu zhes bya ba'i klu'i rgyal po rnams kyis bskor ba/ de rnams kyi yang 'og tu gser mig la sogs pa'i lha ma yin gyi rgyal po 'khor dang bcas pa'o/ /de rnams kyi yang 'og tu yi dags gcer bu skam zhing skra gyen du song ba'o/ /de rnams kyi yang 'og tu dmyal ba chen po brgyad/ 'bar ba'i mes bzod par dka' ba dang / grang ba'i dmyal ba yang shugs drag po can rlung gi reg pa dang bcas par bsams te/ gling bzhi la gnas pa'i skye bo sna tshogs pa'i mi rnams dang ngang pa dang phug ron la s ogs pa dang rkang med dang rkang gnyis pa dang rkang bzhi pa dang rkang mang la sogs pa byol song dang bcas par dmigs shing de rnams thams cad tshim par bya ba'i phyir shin tu rgyas pa'i snod chen po'i nang du 'bras chan dang sha chang dang myos byed dang bag phye'i 'bras bu dang nya skam po dang rlon pa dang 'bru lnga'i chan dang gla gor zho sha dang / zangs la sogs pa'i phye ma dang dar dang dngul gyi dong tse dang / 'gron bu la sogs pa rnams kyis yongs su bkang bar byas la/ sngar bshad pa'i bdud rtsi'i cho gas mi 'chi bar bya ste/ dril bu dkrol zhing spos bdugs la gong du bshad pa'i phyag rgya dang / gdan bzhi las gsungs pa'i sngags kyis de rnams dgug par bya ste/ snying rje chen po bskyed la sngags 'dis gtor ma sbyin par bya ste/ oM a kA ro mu khaM sarba d+harmA nAM Ad+yanu t+pa na twA ta oM AHhUM phaT swA hA/ zhes 'byung po la sogs pa'i gnas su gtor ma gtang ngo / /gtor mas tshim par byas ma thag tu de dag thams cad zhal gcig phyag gnyis pa sku mdog dkar po rdo rje dang dril bu 'dzin pa sems dpa'i skyil mo krung du bzhugs pa rdo rje sems dpa'i cha lugs can pad+ma'i gdan la bzhugs pa shin tu mnyam par gzhag pa/ mngon par dga' ba'i 'jig rten gyi khams su gshegs shing byang chub sems dpa'i tshogs kyis bskor ba chos ston par byed par bsgom par bya'o zhes 'byung po thams cad kyi gtor ma'i cho ga'o/ /nyal ba'i dus dang rab gnas mthar/ /de bzhin sbyin sreg tha mar ni/ /phyogs bcur tshim par bya ba'i phyir/ /khro rgyal rnams la gtor ma sbyin/ /re zhig dang por rnal 'byor pas/ /mdun du khro bo'i dkyil 'khor ni/ /rang gi sa bon las byung ba'i/ /ji ltar bshad pa'i mdog ldan pa/ /pad+ma'i steng du bsgom par bya/ /'khor los sgyur dang gnod mdzes dag / steng dang 'og tu bsgom par bya/ /drag po'i gzugs can bsgom byas nas/ /de nas gtor ma sbyin par bya/ /sha chang myos byed dag gis ni/ /snod bcu po ni dgang bar bya/ /mchod pa rnam lngas mchod byas nas/ /tshigs su bcad pa 'di rnams brjod/ /gtsang zhing gtsang ma'i gnas las byung / /lha yi me tog dge ba 'di/ /bdag gis dad pas 'bul lags na/ /bzhes te bka' drin bdag la gsol/ /de bzhin du spos dang / mar me dang / dri dang / lha bshos kyi tshig rnams brjod par bya'o/ /de nas yon chab dang / zhabs bsil dang / 'thor 'thung phul la/ dril bu'i dbyangs kyis spos bsreg cing spyan drang bar bya'o/ /oM A yan to A yan to kru d+ha rA dza e ha san ne hi swa b+hA ban to swA hA/ de nas rang rang gi sngags kyis snod rnams byin gyis brlab par bya ste/ na maHsa man+ta ta bud+d+he b+h+yo na mo badzra mung+ga ra hasta ya tsaN+Da maN+Da la a k+She ba kA rA ya hUM phaT/ gshin rje gshed kyi'o/ /na maHsa man+ta bud+d+he b+h+yo na mo ma hA daN+Da d+ha ra bi bi d+ha su ra a su ra ma rad+ha na b+hUM tan ni ra ma tha hUM phaT/ shes rab mthar byed kyi'o/ /na maHsa man+ta bud+d+he b+h+yo hu lu hu lu ma hA pad+ma a mr-i te ku ru ma hA bA ShA na a/ pad+ma mthar byed kyi'o/ /na maHsa man+ta bud+d+he b+h+yo na maH badzra krod+hA ya ma hA daM Sh+T+rod ka Ta b+hai ra wA ya badzra san+to ha daR+pA ya a mr-i ta kun+Da li hUM phaT/ bgegs mthar byed kyi'o/ /na maHsa man+ta bud+d+he b+h+yo oM ya ma da N+DA ya nI la daN+DA ya/ tu ru tu ru mu ru mu ru sarba duSh+Ta na mA ra ya mA ra ya hUM phaT/ dbyug sngon can gyi'o/ /na maH sa man+ta bud+d+he b+h+yo na mo ma hA ba lA ya u tsu sh+ma ko d+ha rA dza ya/ sarba na gA naM hr-i da yaM tA DA ya hUM phaT/ stobs po che'i'o/ /na maHsa man+ta bud+d+he b+h+yo na mo a tsa la kA Na tseT+Ta tseT+Ta moT+Ta moT+Ta/ g+ha g+ha/ g+hA ta ya g+hA ta ya hUM phaT/ mi g.yo mgon gyi'o/ /oM Tak+ki hUM dza/ 'dod pa'i rgyal po'i 'o/ /oM suM b+ha ni suM b+ha hUM hUM/ oM gr-ih+Na gr-ih+Na hUM hUM/ gr-ih+Na gr-ih+Na pa ya gr-ih+Na pa ya hUM hUM/ oM A na ya ho b+ha ga bAn bid+yA rA dza hUM phaT/ gnod mdzes kyi rgyal po yi'o/ /na maHsa man+ta bud d+hA nAM na ma sa man+ta d+harmA naM na ma sa man+ta saM g+hA nAM/ oM si tA ta pa tre oM bi ma le oM shaM ka re/ oM pra t+yaM gi ra badzra uSh+NI Sha tsakra warti sarba yan+t+ra man+t+ra mU la karma ban+d+hA nAM te Da naM ki la naM wAM/ ma ma kr-i te ye na ke na tsit+ta kr-i tan+ta sarba n+tu/ tshin+da tshin+da/ bin+d+ha bin+d+ha/ tsi ri tsi ri gi ri gi ri ma ra ma ra hUM hUM hUM hUM hUM hUM hUM hUM hUM hUM phaT phaT phaT/ gtsug tor 'khor los sgyur ba'i'o/ /sngags mchog dam pa de rnams kyis/ /gtor ma'i snod la sngags btab cing / shar la sogs par gtor byas nas/ /rang gi gnas su 'jug par bya/ /gtor ma'i sbyin pa 'di yis ni/ /phyogs bcur gnas pa'i 'byung po rnams/ /khro bo'i rgyal po tshim byas pas / /de dag ma lus tshim par 'gyur/ /gang phyir khams gsum thams cad ni/ /phyogs bcu pos ni yongs bskor ba/ /khro bo'i rgyal po rang nus pas/ /thams cad rtag tu skyong bar byed/ /rab gnas mthar ni 'di byas pas/ /gtor ma yis ni brtan par 'gyur/ /gzugs brnyan ras ris mchod rten sogs/ / bskal pa'i bar du gnas par 'gyur/ /sbyin sreg mthar ni lha mo rnams/ /de bzhin gshegs pa mnyes par 'gyur/ /nyal ba'i dus su cho ga bzhin/ /gtor ma sbyin pa 'di nyid kyis/ /rmi lam ngan pa sgrub pa pos/ /nam yang mthong bar mi 'gyur ro/ /rnal 'byor dbang po rmi lam ni/ /bzang po kho nar mthong bar 'gyur/ /zhes khro bo'i rgyal po'i gtor ma'i cho ga'o/ /de'i rjes su rang dad pa'i lha'i nga rgyal dang ldan pa'i rnal 'byor pas rang gi snying gar yi ge khaM yongs su gyur pa'i sna tshogs rdo rje'i chang zungs la gnas pa'i yi ge khaM gi thig le la ngal bso [(]te[,]ste[)]/ de'i rjes su sngar bshad pa'i khro bo'i rgyal po'i sngags bcu brjod cing se gol brdabs te phyogs bcing bar byas la nyal bar bya'o/ /de'i tshe rmi lam bzang po mthong ba slob dpon la bzla bar bya'o/ /de med na bcom ldan 'das de bzhin gshegs pa rnams kyi mdun du smra bar bya yi gzhan du ni ma yin no/ /tho rangs ldang ba'i dus su khyod ni rdo rje thugs te zhes bya ba la sogs pa'i tshigs su bcad pa brjod cing spyan la sogs pa rnams kyis bdag la sad par byed par bsam mo/ /slar yang tho rangs nas brtsams te snga ma bzhin du gnas gzung ba la sogs pa sngon du 'gro bar bsgom par bya'o zhes las kyi rgyal ba mchog gi ting nge 'dzin dang sprul pa'i sku bstan pas gzhan gyi don phun sum tshogs pa yang bstan to/ /de ltar phun sum tshogs pa gnyis ka gtsor gyur pa'i ting nge 'dzin gsum gyi bdag nyid bskyed pa'i rim pa bstan to/ / da ni rdzogs pa'i rim pa bshad par bya ste/ de yang bskyed pa'i rim pa'i pha rol tu phyin pas bsgom par bya ba 'di yin te/ dbang po rno bas dbang ba dang rang bzhin gyis grub pa'i phyir bskyed pa'i rim pa'i pha rol tu phyin pa'i rtags ni 'di dag yin te/ rang gi bdag nyid kyis ji bzhin bsgoms pa'i rang 'dod pa'i lha'i rnam pa gang yin pa de ma 'khrul zhing gsal bar snang ba dang / gzhan rnams kyang de bzhin du mngon par mthong ba dang ldang ba dang 'dug pa dang nyal ba dang 'chag pa'i mtshan nyid spyod lam bzhi po'i dus su lha'i rnam par dag pa mthong ba dang / zhi ba dang / rgyas pa dang / dbang dang / dgug pa dang / rnam par ldang ba dang / rengs pa dang / bskrad pa dang / mngon spyod ces bya ba dngos grub brgyad dang / de bzhin du sman mchog dang ro dang bcud kyis len pa dang / gser 'gyur gyi rtsi sbyor ba dang / nam mkha' lding gi sbyor ba dang / sa 'og gi dngos grub dang / ro langs dang ral gri dang ri lu dang mig sman dang rkang mgyogs dang / 'khor lo'i rig pa 'dzin pa la sogs pa dngos grub rnam pa du ma gang yin pa de rnams gzhan gyi don du mi slu bar 'grub pa dang / rang gi lus la ut+pa la sngon po'i dri bro ba dang / chos gos la sogs pa dang rdul dang lus la shig dang 'bu med pa dang / phyi'i kham gyi zas la ltos pa med pa dang / bza' bca' thob nas kyang sred pa med pa dang / shing tog la sogs pa gang ci yang rung bas chog shes pa dang / yul la 'dod pa chung ba dang / mi slong zhing sbyin pa gtong ba dang / bshang ba dang gci ba chung ba'o/ /nges pa can gyi rtags de dag gis bskyed pa'i rim pa'i rnal 'byor la mthar phyin par shes par bya'o/ /ji skad du/ lang kar gshegs pa las/ du ba las ni mer shes te/ chu skyar las ni chu yin no/ /byang chub sems dpa' blo ldan gyis/ /rigs ni mtshan ma rnams las shes/ /zhes 'byung ngo / /de ltar bskyed pa'i rim pa mthar phyin nas rdzogs pa'i rim pa la goms par bya ste/ rab tu byed pa'i mkhan pos kyang / /bskyed pa'i rim pa legs gnas shing / /rdzogs pa'i rim pa 'dod rnams la/ /thabs 'di rdzogs pa'i sangs rgyas kyis/ /skas kyi rim pa lta bur gsungs/ /zhes 'byung ngo / /de la bskyed pa'i rim pa la legs par gnas pa gang zhe na/ gang dang po'i sbyor ba la sogs pa'i bsgom pa'i rim pas/ rigs brgya'i dbye bas lus rnam par dben pa la zhugs pa'o/ /rigs brgya'i dbye ba ni gzugs kyi phung po'i tshogs ni rnam par snang mdzad do/ /tshor ba'i phung po'i tshogs ni rin chen 'byung ldan no/ /'du shes kyi phung po'i tshogs ni 'od dpag tu med pa'o/ /'du byed kyi phung po'i tshogs ni don yod grub pa'o/ /rnam par shes pa'i phung po'i tshogs ni mi bskyod pa'o/ /de rnams re re rigs lnga'i dbye bas nyi shu rtsa lngar 'gyur ro/ /sa ni sangs rgyas spyan yin te/ /chu khams mA ma kI ru bshad/ /gzi brjid gos dkar mo yin te/ /rlung ni dam tshig sgrol mar bshad/ /de rnams re re rigs lnga lnga'i dbye bas nyi shur 'gyur ro/ /rdo rje skye mched 'di dag kyang / /byang chub sems dpa'i dkyil 'khor mchog /ces bya bas mig la sogs pa'i dbang po rnams re re'ang rigs lnga lnga'i dbye bas nyi shu rtsa lngar shes par bya'o/ /yul gyi lha mo rnams re re rigs lnga lnga'i dbye bas nyi shu rtsa lnga'o/ /khyab par byed pa ye shes lnga ni rigs brgya'i bye brag go/ /ji skad du/ phung po khams dang skye mched rnams la ni/ /lnga po'i dbye bas lnga ru byas pa la/ /de bzhin gshegs pas so sor byin gyis brlabs / /'khor ba'i las rnams dag ni gang las 'byung / /de bzhin dbang po phyi rol yul bcas lnga/ /re re zhig kyang bde gshegs lnga rnams kyis/ /de la rang rang rtag tu byin rlob cing / /ye shes lnga dang gsum du yang dag gnas/ /zhes 'byung ngo / / de bzhin du yang / rigs ni rnam pa brgyar bshad pa/ /mdor bsdus pa ni rnam pa lnga/ /lus ngag yid kyi dbye ba yis/ /phyis ni rnam pa gsum du 'gyur/ /zhes 'byung bas so/ /rigs brgya'i dbye bas lha'i gzugs su lus rnam par dben par byas la/ thams cad stong pa'i rang bzhin de kho na nyid rnal 'byor pas mngon du byed de/ de ci'i phyir zhe na/ rigs brgya po gang bshad pa de mdor bsdus pas lnga ru 'gyur te phung po lnga dang nyon mongs pa lnga dang 'byung ba chen po lnga dang ye shes lngas rnam par dag pa'i phyir ro/ /rigs lnga po de yang slar yang gsum du 'gyur te/ sku dang gsung dang thugs kyis so/ /rin chen dang don yod pa'i rigs dag ni sku'i rigs dang gsung ngam thugs kyi rigs su bsdu bar bya'o/ /de la nga rgyal gyi ngo bo nyid rin chen 'byung ldan ni gti mug las 'byung ba'i phyir sku'i rigs su bsdu bar bya'o/ /don yod grub pa phrag dog gi ngo bo nyid ni 'dod chags sam zhe sdang las 'byung ba'i phyir 'dod chags kyi rigs sam zhe sdang gi rigs su bsdu'o/ /rigs gsum po de gcig pa nyid du shes par bya'o/ /gang gi phyir lus dang ngag ni thugs kyi rdo rje la bsdu ba yin te snang ba thams cad kyi rtsa ba yin pa'i phyir ro/ /sems de yang snang ba dang snang ba mched pa dang snang ba nye bar thob pa'i dbye bas dpyad pa na thams cad stong pa'i ngo bo nyid du 'gyur te/ ji skad du/ stong pa'i chos las stong pa'i chos rnams 'byung / /zhes slob dpon klu sgrub kyi zhal snga nas kyis gsungs so/ /rab tu byed pa las kyang / ji ltar chu klung dngas pa las/ /nya dag myur du ldang gyur te/ /de bzhin thams cad stong gsal la/ /sgyu 'phrul dra ba 'byung bar 'gyur/ /zhes 'byung ngo / /rigs brgya'i dbye ba bsgom pa'i rim pa 'dis/ /rnal 'byor pa phyir mi ldog pa'i sa brgyad pa la gnas par 'gyur ro/ /de ltar bskyed pa'i rim pa la mthar phyin nas rdzogs pa'i rim pa'i dang po rdo rje bzlas pa la goms par bya'o/ /de la dang po rlung gi de kho na nyid la dmigs nas sngags kyi de kho na nyid la dmigs par ro/ /rlung gi de kho na nyid ces bya ba ni gdong gi sna la sogs par gnas pa'i yungs kar phra mo tsam gyi thig le bsgom pa'o/ / gang gi phyir rlung ni lus thams cad la khyab pa dang / las thams cad byed cing srog chags thams cad kyi srog tu gyur pa rnam shes kyi bzhon pa gcig pu kho na'o/ /de yang phung po lnga'i dbye bas lnga ru 'gyur te/ srog dang / thur du sel ba dang / me dang mnyam pa dang / gyen du rgyu ba dang / khyab pa'o/ /de la srog ni lte ba la gnas shing rnam par shes pa'i phung po mngon par skyed par byed pa'i las can no/ /thur du sel ba ni bshang lam la gnas shing tshor ba'i phung po mngon par skyed pa'i las can no/ /gyen du rgyu ba ni mgrin pa la gnas shing 'du shes kyi phung po mngon par skyed pa'i las can no/ /me dang mnyam pa ni snying ga na gnas shing 'du byed kyi phung po mngon par skyed pa'i las can no/ /khyab par byed pa ni lus kyi tshigs thams cad la gnas shing gzugs kyi phung po mngon par skyed pa'i las can no/ /de dag sa la sogs pa 'byung ba chen po lnga dang / de bzhin gshegs pa lnga dang / kha dog lnga dang ldan zhing zhi ba la sogs pa'i las byed pa'i ye shes lnga'i ngo bo nyid du shes par bya'o/ /yan lag gi rlung ni rgyu ba dang rnam par rgyu ba dang kun tu rgyu ba dang / rab tu rgyu ba dang / nges par rgyu ba'o/ / de dag gi mig la sogs pa'i dbang po lnga la brten te gzugs la sogs pa gzung ba'i mtshan nyid can gyi las byed do/ /de rnams kyang de bzhin gshegs pa lnga'i ngo bo nyid do/ /bcu po de rnams kyi ming ni sgra ji bzhin ma yin pas dpal sangs rgyas thams cad dang mnyam par sbyor ba las bcom ldan 'das kyis gsungs te/ ku Ta khya dang ku Da dang / /ku Da b+ha dang ku Ti ra/ /ka ku lA tsha ku la wa/ /ku lA b+ha ko li ra ba/ /srog dang thur sel me mnyam dang / /gyen du de bzhin khyab byed dang / /glang po rus sbal rtsangs pa dang / /lha sbyin dang ni gzhu las rgyal/ /zhes 'byung ngo / /rlung bcu po de dag gnas dang nyon mongs pa dang las kyi bye brag la brten te nyin mtshan du zo chun bzhin du sems can gyi khams 'jug par byed pa na 'khor bar byed cing / yang dang yang du 'khor ba'i sgo nas nying mtshams sbyor ba la bcings pas nyon mongs par byed do/ /rlung de rnams kyi de kho na nyid yongs su shes pas grol bar 'gyur bas de bshad par bya ste/ de'i de kho na nyid ni thig le bsgom pa'o/ /gang gi phyir thabs dang shes rab snyoms par zhugs pa'i dus su rtsa stong phrag bdun cu rtsa gnyis kyi 'khor lo las byung ba'i byang chub kyi sems rdo rje nor bu'i rtse mor gong bur gyur pa na/ rlung dang nye ba'i rlung thams cad rab tu zhi bar gyur pas na/ gsal ba dang dga' ba'i rang bzhin can gyi 'od gsal ba'i de kho na nyid mngon du 'gyur ro/ /de'i phyir bde ba chen po'i dbang gis rlung gzugs med kyang byang chub kyi sems kyi thig le'i gzugs su 'gyur te/ shin tu grang ba'i dbang gis chu'i sra ba nyid bzhin no/ /thig le de yang rnam pa gsum ste/ gsang ba'i sna'i rtse mor byang chub kyi sems kyi thig le gsung gi rdo rje'i rnal 'byor pas bsgom par bya ba dang / snying ga'i pad+ma'i sna'i rtse mor sngags kyi thig le thugs kyi rdo rje'i rnal 'byor pas bsgom par bya ba dang / gdong gi sna'i rtse mor rlung gi thig le 'od zer can sku'i rdo rje'i rnal 'byor pas bsgom par bya ba'o/ /de la snyoms par zhugs pa las 'byung ba yan lag dang nying lag thams cad nas 'pho bas dam pa dga' ba'i gnas skabs su/ /rdo rje dang pad+ma'i sna ru 'dzin par gyur pa na ngag gi spros pa thams cad spangs pa/ brjod du med pa'i thig le 'dod chags can gyi rnal 'byor pas bsgom par bya'o zhes gsung gi rdo rje'i rnal 'byor pa'i phra mo'i rnal 'byor ro/ /spyi bo dang lkog ma dang / snying ga na gnas pa'i yi ge gsum po la dmigs te/ sku'i rdo rje'i sa bon gyi cha rnams steng nas brtsams te gcig nas gcig tu thim par byas te/ 'og gi cha gsung gi rdo rje'i cha rnams la 'jug par bya ste/ de'i cha rnams kyang snga ma bzhin du 'jug par byas la yi ge hUM du thim par bsam mo/ /yi ge hUM cha bzhi pa yang zhabs kyu ni 'a la thim pa dang / 'a ha la thim pa dang / ha mgo bo la thim pa dang / mgo bo zla tshes la thim pa dang / zla tshes thig le la thim pa dang / thig le sems rtse gcig par byas pas nam mkha' lta bu'i ngo bo nyid du gnas pa ni zhe sdang rdo rje'i rnal 'byor pa'i phra mo'i rnal 'byor ro/ /de bzhin du lus 'di la khams bzhi'i rang bzhin dkyil 'khor bzhi yod de/ de yang mgrin pa dang / snying ga dang / lte ba dang / gsang bar gnas pa ste/ gru gsum dang / zlum po dang / gzhu'i dbyibs can dang / gru bzhi'o/ /dmar po dang / dkar po dang / dud kha dang / ser po'i mdog can/ me dang / chu dang / rlung dang / sa'i ngo bo nyid do/ /yaM raM baM khaM zhes bya ba'i sa bon las byung ba dang / snang ba mtha' yas dang / mi bskyod pa dang / don yod grub pa dang / rin chen 'byung ldan gyis byin gyis brlabs pa ste thabs bstan no/ /de nas gos dkar mo dang / mA ma kI dang / sgrol ma dang / sangs rgyas spyan gyis byin gyis rlob pa ni shes rab kyi ngo bo nyid do/ /g.yas pa dang / g.yon pa dang / gnyis ka dang / dman par rgyu ba rnams kyi sna'i sgor bstan to/ /snga dro dang / nyi ma phyed dang / phyi dro dang / mtshams dag gi dus bstan pa de bzhin du yang mtshan mor ro/ /dbang dang zhi ba dang / dgug pa dang / rgyas pa ni phrin las so/ /dkyil 'khor de rnams las tho rangs nas brtsams te/ kha dog dmar po'i 'od zer sna'i bug pa g.yas pa nas 'byung bar 'gyur zhing sna'i rtse mor thun gyi phyed kyi phyed kyi bar du gnas par 'gyur ro/ /de bzhin du thun gnyis pa la kha dog ljang ser can/ 'od zer sna'i bug pa g.yon nas 'byung zhing de nyid du thun gyi phyed kyi phyed kyi bar du gnas pa'o/ / thun gsum pa la yang kha dog ser po 'od zer gnyis ka las 'byung zhing sna'i bug pa de nyid du thun gyi phyed kyi phyed kyi bar du gnas so/ /thun bzhi pa la yang gnyis ka kha nas 'byung zhing 'on kyang dal zhing dman par rgyu ba kha dog dkar po'i 'od zer 'byung zhing / de yang thun gyi phyed kyi phyed kyi bar du gnas pa ste/ mtshan mo yang de bzhin no/ /de ltar nyin mo dang mtshan mo thun brgyad la chu tshod drug cu'i bar du stong phrag nyi shu rtsa gcig dang drug brgya dkyil 'khor so so dag tu 'jug pa dang gnas pa dang ldang ba'i rim gyis rgyu ba'o/ /dkyil 'khor re re dag la bzhi bzhi'i bdag nyid yod de/ cha de rnams su 'jug pa la sogs pa'i sa ya bdun cu rtsa gnyis gsungs so/ /de dag thams cad kyi rtsa ba ni bcom ldan 'das ma phyi mo'i yi ge bzhi bcu rtsa dgu pa'o/ /de yi yang rtsa ba ni lte ba'i 'og 'od gsal ba'i gnas las byung ba srog ces bya ba'i rlung ngo / /ji skad du/ nam mkha'i rlung ni lus la 'byung ba ste/ /yang dag brjod pas dbyangs ni khar phyin pa/ /gnas gzhan dag tu rab tu phye bas na/ /yi ge nyid du gyur pa gang yin de sgra yin/ /de ni tshangs pa'i yi ge dag byed mchog /phugs na gnas par yang dag bram zes 'dod/ /de ni yang dag rab tu sbyor gyur na/ /nges legs mngon par mtho bas skyes bur sbyor/ /zhes so/ /de bas na srog de nyid snying la sogs pa'i gnas brgyad la rig pas dbyangs dang gsal bya'i sde tshan rnams skyed par byed do/ /ji skad du/ yi ge rnams kyi gnas brgyad de/ brang dang mgrin pa mgo de bzhin/ /lce yi rtsa ba so dang ni/ /sna dang mchu dang rkan dag go/ /zhes 'byung ngo / /gnas brgyad po de dag las sde tshan brgyad skye bar 'gyur te dbyangs kyi sde ka la sogs pa ma'i bar du sde tshan lnga dang bar na gnas pa dang drod kyi yi ge'i sde tshan gnyis te/ rnam par shes pa tshogs brgyad rnam par dag pa'i ngo bo yin zhes bar du'o/ /de las kyang tshigs rnams ni ba lang dang rta la sogs pa'i sgra 'byung ngo / /de rnams las kyang ngag skye ba yin te/ dper na kye lhas byin pa dkar mo dbyug pas rdungs shig /ces bya ba la sogs pa'o/ /de rnams kyang ngag chen por 'gyur te/ dper na 'di skad bdag gis thos pa'i dus gcig na zhes bya ba la sogs pa'o/ /ngag chen po las kyang bstan bcos rtsom pa dang / gar gyi bstan bcos dang / rab tu byed pa dang / rlung dang lung bstan pa dang / rtog ge dang / grangs can pa dang / mchod 'os dang / phyugs kyi bdag po pa dang / rigs pa pa dang / khyad par pa dang / dpyod pa pa dang / bde bar gshegs pa la sogs pa'i bstan bcos dang / 'jig rten gyi tha snyad kyi bye brag gis rnam pa drug tu byung ba de dag thams cad kyi rgyur gyur pa ni phyi mo'i yi ge kho na'o/ /de la sngags thams cad btu bas na sngags kyi btu ba ste phyi mo'o/ /de ni spro ba'i rim pas sngags btu ba'o/ /bsdu ba'i rim pas kyang 'di lta ste/ a la sogs pa nas ha'i bar du sde tshan brgyad pa dang po'i yi ge rnams kyis bsdus pa yin te/ a ka tsa Ta ta pa ya sha'o/ /de dag kyang 'byung ba'i yi ge bzhi la bsdus pas a ka ya sha'o/ /de dag kyang gsum du bsdus pa las a ka ya'o / /de rnams kyang yi ge gsum du 'gyur te/ de la shes rab kyi rang bzhin yi ge a/ 'dod chags kyi sa bon yi ge a ya'o/ /thabs kyi ngo bo nyid kyi yi ge ka yongs su gyur pa'i thugs kyi rdo rje'i sa bon yi ge hUM ngo / /gnyis ka snyoms par zhugs pa'i mtshan nyid yi ge ya yongs su gyur pa gti mug rdo rje'i sa bon yi ge A'o / /de rnams khams gsum dang / srid pa gsum dang / sku gsum dang / ye shes gsum dang / rtsa gsum dang / rdzas gsum dang / sems dpa' gsum dang / de bzhin gshegs pa gsum dang / lha mo gsum dang / dkyil 'khor gsum gyi ngo bo nyid bud med dang skyes pa dang ma ning dang / thabs dang shes rab dang gnyis ka snyoms par zhugs pa dang / zla ba dang / nyi ma dang / me dang / nyin mo dang / mtshan mo dang / mtshams kyi rang bzhin yi ge gsum skye bar 'gyur te/ de yang phan tshun yi ge oM AHla zhugs pa dang / AHhUM la zhugs pa dang / hUM thig le dang bcas pa la dmigs te/ thig le ni zla tshes la thim pa dang / zla tshes mgo bo la thim pa dang / mgo bo ha la thim pa dang / ha zhabs bskyed la thim pa dang / zhabs bskyed thung ngu a ru gyur pas ngag ma lus pa'i ngo bo nyid gnas par 'gyur ro zhes sngags kyi de kho na nyid kyis khyab pa'i sngags kyi btu ba'o/ /sgyu 'phrul dra ba las kyang / a ni yig 'bru kun gyi mchog / don chen yi ge dam pa ste/ /khong nas 'byung ba skye ba med/ /tshig tu brjod pa spangs pa ste/ /brjod pa kun gyi rgyu yi mchog /tshig kun rab tu gsal bar byed/ /ces 'byung ngo / /rdo rje dkyil 'khor gyi rgyan las kyang / snying gi dkyil na mi shigs pa'i/ /'bar ba'i mar me dag dang mtshungs/ /yi ge dam pa phra ba ni/ /a ni khyab bdag gtso bor gnas/ /zhes 'byung ngo / /gang las 'byung ba dang thim pa de ni yi ge a ste/ de'i rgyu can sngags thams cad yin pas btu ba yang de kho na nyid kyis khyab pa'o/ /gang gi tshe ma ning gi bzlas pa'i dus su lte bar thim par gyur pa de'i tshe 'gro ba dang 'ong ba dang bral ba dang / 'od gsal ba nyid sngags thams cad skyed par byed pa'i rgyu yin pas de nyid las btu bar bya'o/ /btu ba ni rnam pa gsum ste/ gang gi phyir phyi mo'i yi ge dang a dang 'od gsal ba nyid de/ spros pa dang spros pa med pa dang shin tu spros pa med pa'i phyir spyod pa bzhin zhes btu ba'o/ /sngags kyi don zhes bya ba ni yi ge oM gyi don ni rnam par snang mdzad do/ /AH'i don ni snang ba mtha' yas so/ /yi ge hUM gi don ni mi bskyod pa'o/ /swA dang hA dag gi don ni rin chen 'byung ldan dang don yod grub pa'o/ /de bzhin du gzhan rnams kyi brjod par bya ba'i don la brten te rang rang gi lha'i bdag nyid kyi don brtag par bya'o zhes bya ba'i don to/ /sngags kyi brda zhes bya ba ni sbrul dang mgo med dang mtha' med dang btu ba'o/ /de la oM dang swA hA ldan pa ni sbrul lo/ /oM med cing swA hA dang ldan pa ni mgo med do/ /swA hA med cing oM dang ldan pa ni mtha' med pa'o / /gnyis ka spangs pa ni btus pa'o/ /de rnams kyi dpe ni le'u bcu bzhi pa las 'chad par 'gyur ro/ /de yang las kyi dbye bas brda'i dbye ba ste/ zhi ba dang rgyas pa dang dbang dang dgug pa la sogs pa dag tu dgos pa'i phyir ro/ /gzhan yang brda bcu gcig po ni spel ba dang 'dres pa dang kha sbyar la sogs pa rdo rje gtsug tor gyi rgyud las rtogs par bya'o/ /de bzhin du yang snying po dang / nye ba'i snying po dang / snying po skul bar byed pa dang / rtsa ba'i sngags dang / phreng ba'i sngags dang / rig sngags dang / gzungs sngags dang / sa bon dang / ming gi yi ge dang po dang / phyung ba'i sngags rnams ni las dang rjes su mthun par bcom ldan 'das kyis gsungs so/ /de la snying po ni bcom ldan 'das mngon du rjod par byed pa'o/ /nye ba'i snying po ni yan lag gi sgo nas yin gyi dngos su ni ma yin no/ /de dag ni 'das pa'i dus dang las kyi rab 'byams sgrub la shes par bya'o/ /snying po bskul ba ni lha'i thugs kyi nus pa nan tan gyis bkug la bdag nyid la 'jug pa'o/ /rtsa ba'i sngags ni mngon par 'dod pa'i lha mngon du byed pa'o/ /phreng ba'i sngags ni mchod pa'i mthar chun 'phyang 'bul ba'o/ /rig pa'i sngags ni sa 'og la sogs pa'i dngos grub sgrub pa'o/ /gzungs sngags ni rgyal po la sogs pa'i 'jigs pa zlog pa'o/ /sa bon gyi sngags ni de bzhin gshegs pa dang lha mo rnams skyed pa'o/ /phyung ba'i sngags ni gsang ba'i gnas su dam tshig gi dkyil 'khor spro bar byed pa'o/ /ming gi dang po'i yi ge rnams ni sa bon gyi sngags kyi khyad par ro/ /de bas na brda'i sgo nas 'dod pa'i don thams cad 'grub pa yin zhes sngags kyi brda'o/ /sngags kyi de kho na nyid ni de bzhin nyid do/ /chos thams cad kyi don dam pa'i 'od gsal bas brtags shing chos nyid kyi mtshan nyid do/ /gang gi phyir de kho na nyid yongs su shes pa med par zhi ba la sogs sgrub pa la sngags thams cad don dang ldan par mi 'gyur ro/ / ji skad du/ yi ge'i gzugs can sngags rnams ni/ /de bas dam pa rnams mi 'dod/ /gang phyir rtswa mchog tsam nyid ni/ /'gugs par byed par mi nus so/ /zhes 'byung ngo / /mthar thug pa'i rim pa las kyang / /so mchu rkan dang lce sogs kyis/ /ngag ni bskyod pa dang ldan pa/ /de ni 'gyur ba nyid yin te/ /mi shigs pa nyid ga las 'gyur/ /zhes pa dang / rgyud phyi ma las kyang sngags kyi sgra man tra'i tshig gi sgo nas sngags kyi de kho na nyid bstan te/ ji skad du/ dbang po dang ni yul dag la/ /brten te yid ni gang skyes pa/ /de ni man zhes brjod pa ste/ /skyob pa'i don gyis tra zhes bya/ /zhes so/ /lung bstan pa las kyang / /man tra gsang bar brjod pa'i don to/ /de bas na sngags kyi de kho na nyid mi shes na gang las byed pa de'i las de rnams 'grub par mi 'gyur te/ ngo bo nyid yongs su mi shes pa'i phyir bye ma la mar bzhin no/ /sngags kyi de kho na nyid shes pa'i rnal 'byor pas zhi ba la sogs pa 'bad pa med par 'grub par 'gyur te/ de rnams zhar la 'byung ba'i phyir ro/ /de bas na rnam pa thams cad du bla ma'i drin la brten te sngags kyi de kho na nyid btsal bar bya'o/ /de ltar rnam pa bzhis sngags kyi de kho na nyid bstan to/ /rlung gi de kho na nyid dang / sngags kyi de kho na nyid bstan nas/ rdo rje bzlas pa la sogs pa brjod par bya ste/ de rdo rje 'chang chen po'i bzlas pa zhes bya ba ni dang po rnal 'byor pas myur du rdo rje 'chang chen po'i gzugs reg bya rdo rje ma dang snyoms par zhugs par bsams te/ lte bar rtsibs brgyad pa'i chos kyi dbyings kyi 'khor lo'i dkyil 'khor du mar me 'bar ba'i 'od dang mtshungs pa'i yi ge a la dmigs te/ de'i 'od zer gyis me stag dang 'dra ba'i yi ge gsum mdog ji lta ba bzhin du spros te/ snying la sogs pa'i gnas gsum du dgod de/ 'jug pa la sogs pa'i rim pas yan lag ma nyams par bzlas te/ ji srid sems rtse gcig par gyur gyi bar du tha mar mar me dang 'dra ba'i 'od gsal ba'i yi ge la gnas par bya'o/ /gdod ma nas ma skyes pa'i yi ge tsam la dmigs te rdo rje 'chang chen po'i ting nge 'dzin mngon du byas te/ srog la sogs pa'i 'khor lo dang / yid dang de nyid du zhugs pas brtan pa dang g.yo ba'i dngos po thams cad kyi rnam par rtog pa zhi bas/ ye shes lnga'i ngo bo nyid dpal rdo rje sems dpa'i rang bzhin 'od gsal ba la rnal 'byor pas gnas par bya'o zhes rdo rje 'chang chen po'i bzlas pa'o/ / de bzhin du yang myur ba'i ting nge 'dzin gyis sangs rgyas spyan dang snyoms par zhugs pa'i rnam par snang mdzad du bdag nyid bsgoms te/ spyi bo la sogs par yi ge gsum rnam par dgod de/ de'i 'od zer spro ba dang bsdu ba'i rim pas sems can gyi don byas la/ thugs dang gsung gi sa bon sku'i sa bon la 'jug par bya ste/ yi ge oM gcig pu la dmigs shing me long lta bu'i ye shes kyi ngo bo nyid nyon mongs pa dang shes bya'i sgrib pa rab tu zhi bar gyur par gnas par bya'o zhes sku'i bzlas pa'o/ / de bzhin du yang myur ba'i ting nge 'dzin gyi gos dkar mo dang snyoms par zhugs pa 'od dpag tu med par bdag nyid bsgoms te / yi ge gsum lkog ma la sogs par dgod de/ de'i 'od zer spro ba dang bsdu bas sems can gyi don byas pas/ thugs dang sku'i sa bon gsung gi sa bon la 'jug par byas te/ yi ge AH gcig pu la dmigs shing so sor rtog pa'i ye shes kyi ngo bo nyid du rtog pa thams cad nye bar zhi bar gnas par bya'o zhes gsung gi bzlas pa'o/ /de bzhin du yang myur ba'i ting nge 'dzin gyis mA ma kI dang snyoms par zhugs pa'i thugs kyi rdo rjer bdag nyid rnam par bsgoms te/ thugs la sogs pa'i yi ge gsum dgod de'i 'od zer spro ba dang bsdu bas sems can gyi don byas la lus dang ngag gi sa bon thugs kyi sa bon la 'jug par bya ste/ yi ge hUM gcig pu la dmigs shing chos kyi dbyings kyi ye shes kyi ngo bo nyid du rtog pa ma lus par rab tu zhi bar gnas par bya'o zhes thugs kyi bzlas pa'o/ / de bzhin du yang myur ba'i ting nge 'dzin gyis mA ma kI dang snyoms par zhugs pa rin chen 'byung ldan du bdag nyid rnam par bsgoms te/ spyi bo la sogs par yi ge gsum dgod de/ 'od zer spro ba dang bsdu ba'i rim pas sems can thams cad la dbul ba'i sdug bsngal phrogs te/ yi ge gsum po thig le la 'jug par bya ste/ nam mkha' dang mtshungs pa'i thig le la sems gtad de/ mnyam pa nyid kyi ye shes kyi ngo bo nyid du dmigs pa thams cad nye bar zhi bar bya'o zhes rin po che'i bzlas pa'o/ / de bzhin du yang myur ba'i ting nge 'dzin gyis dam tshig sgrol ma dang snyoms par zhugs pa don yod grub par bdag nyid bsgoms te/ spyi bo la sogs par yi ge gsum dgod de/ 'od zer spro ba dang bsdu ba'i rim pas gzhal yas khang pa dang bcas pa'i de bzhin gshegs pa spros te/ sems can thams cad kyi don byas la tho rangs kyi skar ma lta bu'i thig le la yi ge gsum bsdus te/ bya ba nan tan gyi ye shes kyi ngo bo nyid du bya ba byas pa nyid kyis gnas par bya'o zhes don yod bzlas pa'o/ / de bzhin du yang myur ba'i ting nge 'dzin gyis bdag nyid gti mug rdo rjer snyoms par zhugs par bsams te/ spyi bo la sogs par yi ge gsum dgod de/ sa bon gnyis yi ge oM la 'jug par bya ste/ de'i 'od zer gyis gti mug gi rigs can gyi sems can thams cad bkug la de nyid du 'jug par bya ste/ gti mug rnam par dag pa'i gnas su sems can 'jog par bya'o zhes lhag par mos pas gti mug ces bya ba gcig pa dang du ma ma yin zhes dpyod pas gang sems rtse gcig pa nyid de ni gti mug gi bzlas pa'o/ /de bzhin du yang myur ba'i ting nge 'dzin gyis 'dod chags rdo rjer bdag nyid snyoms par zhugs par bsgoms te/ spyi bo la sogs par yi ge gsum dgod cing sa bon gnyis gsung gi yi ge la bsdus te/ de'i 'od zer gyis 'dod chags kyi rigs can gyi sems can bkug cing de nyid du 'jug par byas la/ 'dod chags rnam par dag pa'i gnas su dgod par bya'o zhes lhag par mos pas 'dod chags zhes bya ba gcig pa dang du ma ma yin zhes spyod pas gang sems rtse gcig pa de ni 'dod chags kyi bzlas pa'o/ /de bzhin du myur ba'i ting nge 'dzin gyis bdag nyid zhe sdang rdo rjer snyoms par zhugs par bsgoms te/ spyi bo la sogs par yi ge gsum dgod de sa bon gnyis hUM la 'jug par byas la/ de'i 'od zer gyis zhe sdang gi rigs can gyi sems can bkug la de nyid du 'jug par bya ste/ zhe sdang rnam par dag pa'i gnas su dgod par bya zhes lhag par mos pas zhe sdang zhes bya ba ni gcig gam du mar med ces dpyod pas gang sems rtse gcig pa de ni zhe sdang gi bzlas pa'o/ / de bzhin du yang myur ba'i ting nge 'dzin gyis rang 'dod pa'i lha gang yang rung ba snyoms par zhugs par bdag nyid rnam par bsgoms te/ spyi bo la sogs par yi ge gsum po bkod pa de la dmigs pas phyogs bcu na bzhugs pa'i sangs rgyas dang byang chub sems dpa' rnams bdag gis sngags brjod par gyur pa 'di nyon cig ces lhag par mos pas dngos grub 'dod pa'i sgrub pa pos rang ngam gzhan gyis thos par gyur pa khro bar brjod pas na khro bo'i bzlas pa'o/ / de bzhin du myur ba'i ting nge 'dzin gyis rdo rje 'chang chen po la sogs pa gang yang rung ba rang gi shes rab ma dang snyoms par zhugs par bdag nyid bsams te/ spyi bo la sogs par yi ge gsum po dgod cing / lte bar rtsibs brgyad pa kha dog dkar po chos kyi dbyings kyi 'khor lo de'i lte bar dbyangs yig dang po mar me dang 'dra ba la dmigs te/ de'i 'od zer spro ba dang bsdu ba'i rim pas sems can ma lus pa'i don byas la/ sems rtse gcig par gyur pas cha dang cha'i dbye bas yi ge gsum po skye ba med pa'i yi ge a la 'jug par bya ste/ de yang rtsibs brgyad pa'i 'khor lo la thim zhing de yang lte ba'i nam mkha' la dbyer med par bsams la/ rnam par rtog pa'i bag chags rab tu zhi ba sgo thams cad 'gags pa 'gro ba dang 'ong ba las nges par grol ba srog la sogs pa'i rlung gi 'khor lo thams cad ro gcig par gyur na/ dri ma med pa'i mtha' yas pa'i nam mkha' dang mtshungs pa 'od gsal ba'i de kho na nyid 'ba' zhig tu rnal 'byor pas gnas par bya'o/ /'di ni thabs dang shes rab ro gcig pa'i bdag nyid bud med dang skyes pa'i tha snyad dang bral ba'i ma ning gi bzlas par bshad do zhes rdo rje bzlas pa rnam pa bcu gcig pa'o/ / rdo rje 'chang chen po'i bzlas pa la yang dbye ba gzhan bshad par bya ste/ re zhig dang po rdo rje 'chang chen po'i phyag rgya chen po'i gzugs su bdag nyid bsams te/ lkog ma dang snying ga dang lte ba dang gsang ba dag tu 'byung ba chen po bzhi'i rang bzhin gyi dkyil 'khor myur du dgod de/ de rnams kyi steng du thugs kyi rdo rje'i sa bon gyi cha re re rnam par bkod la/ 'jug pa la sogs pa'i rim pas ji srid sems rtse gcig pa'i bar du bsam par bya'o/ /de la cha dgod pa'i rim pa 'di yin te/ snying ga'i pad+mar yi ge mgo med de dper na ha'o/ /lkog ma'i pad+mar mgo bo ste/ dper na a'o/ / gsang ba'i pad+mar dbyangs te dper na u'o/ /lte ba'i pad+mar dbyangs kyi mtha' ste dper na dbyangs kyi mtha'o/ /ji skad du/ lha mo bzhi yis zhus pa las kyang / mgo med snying ga'i pad+mar gnas/ /kha yi pad+mar mgo bo ste/ /gsang ba'i pad+mar dbyangs gnas pa/ /lte ba'i pad+mar dbyangs mtha'o/ /'di nyid 'gro dang 'ong ba yis/ /thig le rnal 'byor la 'jug pa'o/ /zhes 'byung ngo / /rab tu byed pa las kyang / /thabs kyi dam pa rab 'jug pa'o / /rnal 'byor dngos grub rab ster ba'i/ /gsang ba'i yi ge bshad par bya/ / gang zhig bsams pa tsam gyis ni/ /rnal 'byor can la mchog ster 'gyur/ /dang po'i yi ge'i sbyor ba yis/ /rtag tu dbugs ni rngub par byed/ /brgyad pa'i mtha' dang yang dag ldan/ /yi ge u dang thig ler bcas/ /rnal 'byor pa yis dbugs gtong byed/ /'di ni ci dga'i bzlas par bshad/ /rdo rje bzlas pa rnam pa bcu gcig po 'dis tha mal pa'i ngag gi brjod pa'i rnam par rtog pa bzlog pas 'jig rten las 'das pa'i ting nge 'dzin mngon du gyur pa na/ gsung gi rdo rje'i ting nge 'dzin la 'jug par 'gyur ro/ /tha mal pa'i ngag ni rnam pa bzhi ste/ mtshan nyid kyi ngag dang / rmi lam gyi ngag dang / gnas ngan len pa'i mngon par zhen pa'i ngag dang / thog ma med pa'i dus kyi rnam par rtog pa'i ngag go/ /ji skad du/ de la blo gros chen po mtshan nyid kyi ngag ni rang gi rnam par rtog pa'i gzugs kyi mtshan ma la mngon par zhen pa las 'byung ba'o/ /blo gros chen po rmi lam gyi ngag ni sngar myong ba'i yul rjes su dran pas rtog pa'i yul med bzhin du 'byung ba'o/ /blo gros chen po gnas ngan len pa'i mngon par zhen pas byung ba'i ngag ni sems can gyi sngon byas pa'i las kyi dbang las 'byung ngo / /blo gros chen po thog ma med pa'i dus nas rnam par rtog pa'i tshig ni thog ma med pa'i spros pa la mngon par zhen pa'i gnas ngan len gyi rang gi sa bon goms pa las byung ba ste/ blo gros chen po ngag gi rnam par rtog pa'i mtshan nyid bzhi po 'di dag go zhes mi'am ci'i rgyal pos zhus pa las byung ngo / /de bzlog pas 'jig rten las 'das pa'i ngag mngon du gyur pas rdo rje lta bu'i ngag rdzogs par gyur pa dang / bstod pa dang smad pa la sogs pa'i tshig gi tshogs thos nas/ yid bde ba dang yid mi bde bar mi 'gyur ro zhes rdo rje bzlas pa'i rim pa bstan to/ /ngag rnam par dag pa'i 'og tu sems rnam par dag pa la 'bad par bya ste/ de la thabs ni gnyis te/ sngags kyi rim pa dang / phyag rgya'i rim pa'o/ /de la sngags kyi rim pa ni 'di ltar rig par bya ste/ dang po sems ni rnam pa brgyad de kun gzhi rnam par shes pa dang / nyon mongs pa can dang / sgo lnga dang / yid kyi rnam par shes pa'o/ /rnam par shes pa brgyad po de dag mdor bsdus pas gsum du 'gyur te/ rnam par smin pa'i rnam shes dang / /nyon mongs pa can gyi yid dang / /'jug pa'i rnam par shes pa'o/ /rnam par shes pa gsum po des ni sems can gyi khams 'khor ba'i sa ru 'gro ba dang / 'ong ba dag gis 'khor bar byed do/ /ji skad du/ dmyal ba nas ni yi dags gnas su 'gro/ /slar yang lha yi gnas su skye bar 'gyur/ /zhes 'byung ngo / /de rnams gnas gyur pa las 'od gsal ba'i de kho na nyid sngon du byas pas thar bar 'gyur te/ ji skad du/ 'dod chags la sogs kyis gos pa'i/ /sems nyid 'khor bar bshad pa ste/ /de las rnam par dben pa ni/ /rgyal bas mdor bsdus thar pa gsungs/ /zhes 'byung ngo / /rnam par shes pa gsum po de'i brda 'di dag yin te/ sems dang yid dang rnam shes dang / snang ba dang snang ba mched pa dang snang ba 'thob pa dang / shes rab dang thabs dang nye bar thob pa'o/ /zla ba dang nyi ma dang mun pa'o/ /mtshan mo dang nyin mo dang mtshams dang stong pa dang shin tu stong pa dang stong pa chen po zhes bya'o/ /de la 'jug pa'i rnam par shes pa gnas gyur pa la gnyen po ni stong pa nyid dang snang ba'i ye shes so/ /nyon mongs pa can gyi yid gnas gyur pa la gnyen po ni snang ba mched pa dang shin tu stong pa'o/ /kun gzhi rnam par shes pa gnas gyur pa la gnyen po ni snang ba thob pa dang chen po stong pa'o/ /ye shes gsum po de ro gcig par byed pa 'od gsal ba'i ye shes thams cad stong pa'i ngo bo'o/ /rnam par shes pa gsum po'i rang bzhin ni brgyad cu'o/ /de la 'jug pa'i rnam par shes pa'i rang bzhin shes rab kyi ngo bo ste sum cu rtsa gsum mo/ /nyon mongs pa can gyi yid kyi rang bzhin ni bcu ste/ thabs kyi rang bzhin no/ /kun gzhi rnam par shes pa'i rang bzhin bdun po ni ma rig pa'i ngo bo nyid do/ /de rnams kho na nyin mo dang mtshan mo'i dbye bas brgya drug cur 'gyur ro/ /de rnams spang bar bya ba'i phyir sngags kyi rim pa bstan par bya ste/ dang por lte bar rtsibs brgyad pa'i chos kyi dbyings kyi 'khor lo'i lte bar pad+ma'i steng du zla ba'i dkyil 'khor la thig les brgyan pa'i dbyangs yig dang po dgod par byas la/ spyi bo la sogs par yi ge gsum la dmigs te a'i thig le las byung ba'i 'od zer dkar pos spyi bo nas yi ge oM 'jug pa'i rnam par shes pa'i ngo bo nyid bkug cing de nyid du 'jug par bya ste/ de la yid rtse gcig par gnas par bya'o/ /de'i tshe rang bzhin sum cu rtsa gsum dang ldan pa'i 'jug pa'i rnam par shes pa log pa las zla ba'i snang ba dang 'dra ba'i snang ba'i ye shes skye bar 'gyur ro/ /de'i 'og tu chos kyi dbyings kyi 'khor lo de nyid du nyi ma'i dkyil 'khor dang rdo rje'i chang zungs kyi nang na gnas pa'i thig le gnyis kyis brgyan pa'i dang po'i dbyangs yig kha dog dmar po rnam par bsams te/ de las byung ba'i 'od zer dmar po mgrin pa na gnas pa'i yi ge a nyon mongs pa can gyi yid kyi ngo bo nyid bkug la de nyid du 'jug par bya ste/ de nyid du yid rtse gcig par gnas par bya'o/ /de'i tshe rang bzhin bzhi bcu dang ldan pa'i nyon mongs pa can gyi yid log pas nyi ma'i snang ba dang 'dra ba'i snang ba mched pa'i ye shes skye bar 'gyur ro/ /de'i rjes la sa bon dang pad+ma dang zla ba dang nyi ma dang rdo rje'i dmigs pa spangs te/ 'khor lo la gnas pa'i thig le tsam la bltas te/ de las byung ba'i mtshams kyi snang ba dang mtshungs pa'i 'od zer gyi snying ga na gnas pa'i thugs kyi rdo rje'i sa bon bkug la de nyid du 'jug par bya ste de nyid du yid rtse gcig par gnas par bya'o/ /de'i tshe kun gzhi rnam par shes pa rang bzhin bdun dang ldan pa log pas mtshams kyi snang ba dang mtshungs pa'i snang ba thob pa'i ye shes skye bar 'gyur ro/ /de nas kyang rim gyis thig le dang 'khor lo lte ba'i mkha' la thim pas rtags lnga'i snang ba sngon du 'gro bar lus la sogs pa'i rnam par rtog pa'i bag chags ma lus pa zad pas sprin med pa'i nam mkha' dang 'dra ba'i chos kyi dbyings kyi ye shes 'od gsal ba'i de kho na nyid skye bar 'gyur ro/ /de dag rim pa ji lta ba bzhin du stong pa dang shin tu stong pa dang stong pa chen po dang thams cad stong pa ste/ snang ba la sogs pa'i ye shes rnams kyi rnam grangs su shes par bya ste/ kun nas nyon mongs pa dang rnam par byang ba dag rang bzhin gcig pa yin pa'i phyir zhes bya ba'i tha tshig go zhes sngags kyi rim pas sems rnam par dag pa'i rim pa bstan to/ /da ni phyag rgya'i rim pa bshad par bya ste/ re zhig dang po rnal 'byor pas myur ba'i ting nge 'dzin gyis rdo rje 'chang chen po la sogs pa'i phyag rgya bsgoms te/ sme sha can la sogs pa'i bu mo lo bcu gnyis pa la sogs pa na so dang ldan pa'i phyag rgya blangs te de ni mA ma kI la sogs par lhag par mos te mchog gi bsnyen pa la sogs pas bde ba chen po nye bar mtshon par bya ba'i phyir de dang lhan cig snyoms par zhugs par bya'o/ /de la rdo rje dang pad+ma bskyod pa la 'jug pa tshangs pa'i bu ga nas zhu ba'i byang chub kyi sems kyi gnas skabs su snang ba'i ye shes dang rnam pa sna tshogs pa'i skad cig dang / 'dod chags dang bral ba la sogs pa'i rang bzhin rnams dang / mtshan mo dang shes rab dang zla ba'i snang ba lta bu dang 'jug pa'i rnam par shes pa rang gi rang bzhin dang ldan pa rnams 'gog par 'gyur ro/ /yan lag gi tshigs thams cad khyab pa'i dus su snang ba mched pa'i ye shes dang / rnam par smin pa'i skad cig ma dang / 'dod chags dang 'dod chags kyi rang bzhin dang bcas pa dang / nyin mo dang thabs dang nyi ma'i 'od zer snang ba lta bu dang / nyon mongs pa can gyi yid rang gi rang bzhin dang bcas pa 'gog par 'gyur ro/ /de'i rjes su rdo rje'i chang zungs su gnas pa'i byang chub kyi sems kyi thig le gsum gyi bdag nyid kyi skabs su snang ba thob pa'i ye shes dang rnam par 'joms pa'i skad cig ma dang / chags pa bar ma rang bzhin dang bcas pa dang / mtshams kyi dus dang / thabs dang shes rab snyoms par zhugs pa dang / mun pa lta bu'i snang ba dang / kun gzhi rnam par shes pa rang gi rang bzhin bdun dang bcas pa 'gog par 'gyur ro/ /de'i rjes su rdo rje'i nor bu'i rtse mor byang chub kyi sems phyin pa'i gnas skabs su snga ma bzhin du rtags lnga sngon du 'gro ba'i thabs dang shes rab dang / nye bar thob pa dang bral ba/ zla ba dang nyi ma dang mtshams kyi mun pa'i snang ba la sogs pa chags pa dang chags bral dang / chags pa bar ma dang bral zhing / / sgo 'gags pa dang 'gro ba dang 'ong ba dang bral ba snang ba la sogs pa'i ye shes spangs pa sprin med pa'i nam mkha' dang 'dra ba'i 'od gsal ba'i ye shes rnal 'byor pas mthong bar 'gyur ro/ /ji skad du/ de nyid ye shes gnyis med de/ /chos dbyings shes rab pha rol phyin/ / zhes 'byung ngo / /rab tu byed pa las kyang / /sgyu ma dag ni thams cad las/ /bud med sgyu ma khyad par 'phags/ /ye shes gsum gyi dbye ba na / /'di nyid du ni gsal bar mtshon/ /zhes 'byung ngo / /sems rnam par dag pa'i rim pa 'dis rnal 'byor pa sa bcu pa la gnas par 'gyur ro/ /rab tu byed pa las kyang / dang po las kyi sbyor ba yis/ /sa brgyad pa ni thob par 'gyur/ snang ba gsum po mthong ba ni/ /sa bcu la ni gnas par 'gyur/ /zhes 'byung ngo / /sa bcu'i dbang phyug rnal 'byor pas ye shes la dbang thob pa'i dbang gis kun la dbang byed par 'gyur ro zhes phyag rgya'i rim pas sems la dmigs pa thob pa'o/ /da ni lus dang ngag dang yid rnam par dag pas don dam pa'i bden pa la 'jug pa nyid kyis gzhan gyi don dang bral ba dang / chad par thal bar 'gyur ba dang / sngon gyi smon lam gyi 'bras bu med pa dang / 'gro ba'i don mi byed pas nyan thos kyi byang chub bzhin du rang gi don tsam la lta ba de dag bzlog par bya ba'i phyir dang / kun rdzob kyi bden pa yang dag par mthong ba'i phyir sgyu ma lta bu'i ting nge 'dzin zhes bya ba bdag byin gyis rlob pa myur ba'i rnam pas yongs su rdzogs pa rdo rje 'chang chen po'i phyag rgya'i gzugs rim pa 'dis bsgom par bya'o/ /de la rnal 'byor gnyis te/ myur ba'i rnam pa'i rnal 'byor dang / snang ba thob pa la sogs pa'i rnal 'byor ro/ /de la dang po sems rnam par dag pa'i rim pas 'od gsal ba thob pa gang yin pa de las mi dmigs pa'i snying rje'i dbang gis 'bad pa med par rnam pa thams cad kyi mchog dang ldan pa/ zhal gsum pa la sogs pa dang ldan pa/ rin po che sna tshogs pa'i rang bzhin gzhal yas khang pa la pad+ma dang zla ba la sogs pa'i gdan la bzhugs pa/ de bzhin gshegs pa dang lha mo dang byang chub sems dpa' dang khro bo'i tshogs kyis yongs su bskor ba/ de'i ba spu'i khung bu nas byung ba'i 'od zer gyi 'khor los khams gsum pa rnams kyi re ba skong bar byed la/ yid bzhin gyi nor bu dang dpag bsam gyi shing bzhin du 'dod pa'i don stobs kyis ster bar byed pa sar zhing sar pa'i dkyil 'khor gyi 'khor lo spros pas nam mkha'i dbyings mtha' med pa ma lus pa khyab par byed pa/ rdo rje 'chang chen po la sogs pa'i phyag rgya chen po'i gzugs myur du spros te/ de nyid sgyu ma la sogs pa'i dpe bcu gnyis kyis yang dag par bltas te/ khams gsum thams cad kyang sgyu ma lta bur shes nas sngags dang phyag rgya la sogs pa'i sbyor ba dang / rab tu gnas pa dang / sbyin sreg dang / dkyil 'khor dang / bzlas pa dang / sku khrus dang / gtor ma dang / spyan drang ba dang / bzhugs su gsol ba dang / gshegs su gsol ba dang / rim pa gnyis bsgom pa la sogs pa dang / phrin las thams cad dang / de bzhin du yang gar dang glu dang rol mo dang / sgeg pa la sogs pa longs spyod pa dang / ji srid spyod lam bzhi'i bar du sgyu ma dang dri za'i grong khyer dang / brag ca dang smig rgyu dang / chu zla dang me long gi gzugs brnyan dang / chu shing dang seng ge zla ba'i grong khyer la sogs pa dang 'dra bar blta bar bya'o/ /ting nge 'dzin 'di spyod par gyur pa'i rnal 'byor pas rang dang gzhan gyi don thams cad 'bad pa med par 'grub par 'gyur ro/ / bskal pa dang bskal pa stong gi bar du gnas par 'gyur ro zhes 'di ni myur ba'i ting nge 'dzin gyis bdag byin gyis rlob pa'i rim pa gcig go/ / gnyis pa ni re zhig dang po sprin med pa'i nam mkha' 'dra ba'i 'od gsal ba la dmigs te/ de las mtshams kyi snang ba dang 'dra ba'i chos kyi dbyings kyi 'khor lo la gnas pa'i thig le la bltas te/ de'i rjes su nyi ma dang rdo rje'i steng du aHtsheg drag can dmar po bsams te/ de'i rjes la pad+ma dang zla ba'i dkyil 'khor gyi steng du thig le dang bcas pa dbyangs yig dang po dkar po la bltas te/ de dag thams cad yongs su gyur pa las snga ma bzhin du lha'i gzugs yongs su rdzogs pa zhes bya ba'i snang ba thob pa la sogs pa'i rim pas bdag byin gyis rlob pa'o/ /gal te yang sa bon dang mtshan ma yongs su gyur pa las byung ba'i rnam pa yin yang / 'on kyang sgyu ma la sogs pa'i dpe rnams kyis nye bar brgyan pas na bskyed pa'i rim pa las khyad par du gyur pa'o/ /gang gi phyir bskyed pa'i rim pa las sgyu ma nyid du mthong ba med do/ /lha'i nga rgyal kho na der bsgrub par bya ba yin pa'i phyir ro/ /lha'i nga rgyal dang sgyu ma lta bur mthong ba dag ni phan tshun 'gal ba yin no/ /de bas na lha'i rnal 'byor rnam pa gnyis te/ rtog pa dang yongs su rdzogs pa'o/ /de la rtog pa'i rnal 'byor ni zla ba dang rdo rje la sogs pa yongs su gyur pa las skyes pa/ bskyed pa'i rim pa'i rnal 'byor pa'i spyod yul sngags kyi sku'o/ /yongs su rdzogs pa'i rnal 'byor ni myur ba'i ting nge 'dzin gyis rdzogs pa'am/ snang ba thob pa la sogs pa'i rim pa las bskyed pa'i ye shes kyi sku yin pas khyad par yod pa kho na'o zhes bdag la byin gyis rlob pa'o/ /da ni sgyu ma lta bu'i ting nge 'dzin yang rnam par dag par bya ba yin te/ rtog pa dang bcas pa yin pa'i phyir ro/ /de'i phyir don dam pa'i bden pa'i ngo bo nyid mngon par byang chub pa'i rim pas de bzhin nyid kyis sbyang bar bya ba'i phyir mngon par byang chub pa'i rim pa bstan par bya ste/ de la yang rnam pa gnyis yin te/ phyag rgya dang / ting nge 'dzin gyi bye brag gis so/ /phyag rgya'i rim pa la rnam pa gnyis te/ phyi'i mngon par byang chub pa dang / nang gi mngon par byang chub pa'o/ /ting nge 'dzin gyi mngon par byang chub pa rnam pa gnyis te/ ril po 'dzin pa dang / rjes su gzhig pa'o/ /de la phyag rgya'i rim pa bstan par bya ste/ dang po re zhig sgrub pa pos slob dpon dang gsang ba'i dbang thob pas shes rab kyi dbang bskur ba thob par bya ba'i phyir phyi dang nang dang gsang ba'i mchod pa rnams kyis rdo rje slob dpon mchod par bya ste/ de la phyi'i mchod pa ni mchod pa rnam pa lnga'o/ /nang gi mchod pa ni go ku da ha na/ ma ra bi sha mu zhes bya ba'i mtshan nyid do/ /gsang ba'i mchod pa ni lo bcu gnyis pa gzugs bzang brgyan thams cad kyis brgyan pa/ dri dang me tog gis nye bar mdzes pa'i lus can rdol ba'i rigs kyi bu mo dam tshig dang sdom pa la gnas pa/ thos pa dang bsam pa dang sgom pa'i rim gyis shes rab kyi pha rol tu phyin pa'i rnal 'byor ma rdo rje slob dpon la dbul bar bya'o/ / de'i rjes su dkon mchog gsum tshim par bya ba'i phyir tshogs kyi 'khor lo'i nang du yang de mchod par bya'o/ /de la dang po re zhig nyan thos kyi rigs ma gtogs pa dge slong dang dge tshul dang rdo rje slob dpon dang dge bsnyen rnams spyan drangs te/ de rnams la go rims bzhin du brtul zhugs kyi rgan gzhon gyi rim pas gdan rnams dbul bar bya'o/ /de la rim pa gcig la dge slong gi tshogs dgod pa dang / gnyis pa la dge tshul gyi tshogs dang / gsum pa la rdo rje slob dpon gyi tshogs dang / dge bsnyen gyi tshogs so/ /gal te dge slong rnams rdo rje slob dpon du gyur na de rnams kyi mdun du brtul zhugs can dang brtul zhugs can ma yin pa rnams dgod par bya'o/ /gal te dge bsnyen rdo rje slob dpon du gyur na/ de'i mdun du dge slong slob ma dang slob ma ma yin pa rnams dgod par bya'o/ /rnal 'byor pa'i tshogs rnams ni rab tu byung ba'am/ rab tu ma byung ba rnams rnam pa thams cad du gong du dgod par bya'o/ /dge slong ngam dge tshul lam dge bsnyen yin yang rung la/ rnal 'byor pas rtags dang ldan pa yin na tshogs kyi bdag por bya'o/ /thams cad rim pa bzhin du bzhugs par mthong nas las kyi rdo rje mdun du phyin te phyag 'tshal ba sngon du 'gro bar rgan gzhon gyi rim pas re re la zhabs bsil dbul bar bya'o/ /de'i rjes su mchod pa rnam pa lngas mchod de lag pa g.yas pas bdud rtsi lngas bkang ba'i pad+ma'i snod blangs te/ lag pa g.yon pa'i srin lag dang mthe bong gis de rnams kyi mdun du gru gsum pa chos 'byung ba'i phyag rgya bri bar bya'o/ /de'i nang du thig le zlum po bris te/ de'i yang nang du dkyil 'khor gyi 'khor lo dag blta bar bya'o/ /dkyil 'khor gyi bdag po la sogs pa'i thugs kar sems dpa' gnyis po snod dang bcud kyi ngo bo nyid ma lus par blta bar bya'o/ /de'i shar gyi zur gyi steng du bdud rtsi lngas gang ba'i snod dang / thabs dang shes rab kyi ngo bo nyid hri hUM dag gis byin gyis brlabs pa myos byed dang sbyar ba'i chang gis bkang ba'i snod gnyis ni dbus kyi snod kyi logs gnyis su gzhag par byas la/ nag po dang dmar po dang dkar po'i ras kyis kha bkab la me tog snyim pas gtor bar byas te/ thugs rdo rje la sogs pa'i sngags kyis byin gyis brlab par bya'o/ /de nas phyag byas te dbus kyi snod las thigs pa gsum gsum blangs te/ g.yas g.yon gyi snod dag tu gtor bar bya zhing myos byed kyi snod dam chang gi snod blangs la rnal 'byor pa rnams la las kyi rdo rjes dang po bsnyod par bya'o/ /de'i rjes su dge slong dang / dge tshul dang dge bsnyen gyi tshogs la'o/ /gang las btung ba brtsam pa tha mar de nyid la bsnyod par bya'o/ /de nas re re'i mdun du tshod ma sna tshogs pa dang / sha sna tshogs pa dang ro drug dang ldan pa'i rgyal po'i sA lu la sogs pas bkang ba'i snod rnams 'bul bas tshim par bya'o/ /phyed zos pas bza' bca' thams cad snod gcig tu bsdus te thams cad kyis gcig tu bza' bar bya'o/ /de nas btung ba'i snod rnams gcig tu bsres te btung bar bya'o/ /las kyi rdo rjes kyang cang te'u la yi ge gsum gyis mchod par bya ste/ lag pa g.yas pas blangs la hUM phaT ces bya ba'i sgra sgrogs par bya'o/ /rdo rje rnal 'byor ma rnams kyis rdo rje'i gar sna tshogs bya'o/ /tshogs kyi bdag pos gar bya ba dang / gzhan ma rnams kyis glu dang rol mo bya'o zhes la la 'dod do/ /thams cad kyis kyang gar bya'o zhes la la 'dod do/ /dam par dga' ba skyes pa na gar bya ba yin gyi/ gzhan du na sems rtse gcig par gnas par bya'o/ /tshogs kyi 'khor lo'i byin gyis rlob pa'i rtags ni ngang pa dang bung ba dang khyu mchog dang 'ug pa la zhon pa'i mkha' 'gro ma rnams 'ong bar gyur pa na de rnams kyi lus kyi dri sgog skya dang ga bur dang pad+ma dang / sha'i dri bro ba dang / ngang pa la sogs pa'i sgra thos pas so/ /de'i tshe de rnams la lhag ma'i gtor ma rgyas par sbyin par bya'o/ /tshogs kyi nang du rtsod pa'am rgod pa'am rtog pa gang gis byed pa de de ma thag tu phyi rol du dbyung bar bya'o/ /bzod par gsol ba byed na mchod pa'i las byed du gzhug [(]so[,]go[)]/ /de nas lag pa la sogs pa bkrus la me tog gi gcal bkram par bya ste/ so rtsi phul la yon rnam pa bzhi pos mnyes par bya ste/ gshegs su gsol bas tshigs su bcad pas tshogs kyi 'khor lo gshegs su gsol lo/ /oM ku ru ku ru bat+ta le zhes bya ba la sogs pa'i sngags kyis lhag ma'i gtor ma dur khrod du bskyal bar bya'o zhes tshogs kyi 'khor lo'i cho ga'i rim pa'o/ / de lta bu'i mchod pa rdo rje slob dpon la byas pas mnyes par gyur pa'i slob dpon gyis kyang slob mas phul ba'i phyag rgya dang lhan cig snyoms par zhugs te phyag rgya de nyid dam/ phyag rgya gzhan gyis slob ma de la shes rab kyi dbang bskur bar bya'o/ /de la slob ma rdo rje slob dpon la 'dud cing tshigs su bcad pa 'dis bstod par bya ste/ khams gsum las ni nges sgrol zhing / /mkha' dang mnyam pa nyid gyur pa/ /khyod ni 'dod pas ma gos pas/ /mi dmigs khyod la phyag 'tshal bstod/ /phung po dang ni khams rnams dang / /skye mched rnams la mi brten pa/ /phyin ci log las nges grol ba/ /dmigs med khyod la phyag 'tshal bstod/ /ji ltar nam mkha' gzhi med cing / /spros pa med cing snang ba med/ /khyod kyi thugs ni mkha' dang mtshungs/ /mi dmigs khyod la phyag 'tshal bstod/ /de ltar bstod nas slar yang mngon par byang chub pa mthong bar 'dod pa'i phyir tshigs su bcad pa 'di dag gis gsol ba gdab par bya ste/ mngon par byang chub mthong ba ni/ /mgon po chen po bdag la stsol / /las dang skye ba las grol zhing / /snang ba gsum po rnam par spangs/ /rdo rje ye shes bla med pa/ /slob dpon chen po bdag la stsol / /sangs rgyas kun gyi ye shes che/ /de bzhin gshegs pa kun gyi gnas/ /lus ngag yid ni dag byed pa/ /rdo rje chen po bdag la stsol / /thog ma tha ma med zhi ba/ /nyon mongs thams cad sbyong byed pa/ /zhes tshigs su bcad pas mnyes pa'i slob dpon gyi rdo rje dbyings kyi dbang phyug ma'i ngo bo nyid kyi phyag rgya rdo rje 'chang gi rang bzhin slob ma de la sbyin par bya'o/ /de nas yang shes rab kyi pha rol tu phyin pa'i rang bzhin dam tshig gi phyag rgya rgyan thams cad kyis brgyan pa skra grol ba gcer bur gyur nas khri'i thog tu bzhugs te slob ma bkug la 'di ltar dri bar bya ste / bshang gci la sogs bza' ba ni/ /rdo rje can khyod ci nus sam/ khrag dang khu ba sha dag dang / /bud med rnams la dad pa dang / /b+ha ga'i 'o byed mi rtog gam/ /bu khyod smros shig rdo rje can/ /slob mas kyang 'di ltar brjod de/ /shu kra khrag sogs bza' ba ni/ /lha mo ci phyir bdag mi nus/ /rag+ta shu kra sha chen dang / /bud med rnams la dad de bzhin/ /b+ha ga'i pad+mar tsum pa na/ /thams cad bdag gi nus pa nyid/ /ces slob ma'i tshig thos nas lag pa gnyis kyis pad+ma phye bar byas te/ nang du gnas pa'i rtsa'i 'khor lo bstan par byed de/ skyes bu gsang ba'i pad+ma 'di la re zhig blta bar gyis shig / gang gi nang du rtsa rnam pa lnga po 'di dag nam mkha' lnga'i ngo bo nyid du gnas so/ /de la 'dod pa'i gdugs zhes bya ba'i rtsa dbu ma 'di ni chu rgyu ba thugs kyi rdo rje'i ngo bo nyid du shes par bya'o/ /'di ni g.yon pa'i rtsa ste ri bong 'dzin ma zhes bya ba shu kra rgyu ba ste bcom ldan 'das 'od dpag tu med pa'i bdag nyid du shes par bya'o/ /g.yas pa'i rtsa 'di yang khrag rgyu ba ste rus sbal mo zhes bya ba bcom ldan 'das rin 'byung gi ngo bo nyid du shes par bya'o/ /de bzhin du mdun na gnas pa'i rtsa 'di yang lha sbyin mo zhes bya ba dri chen rgyu ba ste/ bcom ldan 'das rnam par snang mdzad kyi ngo bo nyid du shes par bya'o/ /de bzhin du nub kyi cha la gnas pa nor rgyal mo zhes bya ba rtsa 'di ni sha rgyu ba ste bcom ldan 'das don yod grub pa'i rang bzhin du shes par bya'o/ /nam mkha' lnga'i bdag nyid de rtsa ba'i 'khor lo'i phyi rol du 'dab ma brgyad pa'i pad+ma 'di 'od gsal ba'i rdo rje 'chang chen po'i gzhal yas khang yin par shes par bya'o/ /ji skad du rdo rje bdud rtsi las/ b+ha ga'i dbus su nam mkha' gang / /nam mkha' lnga po rnam par brgyan / /lte ba ze 'bru rnams dang ldan/ /'dab ma brgyad pos nye bar mdzes/ /der gnas rtag tu zag pa ni/ / thig le bdud rtsi'i tshul can no/ /zhes 'byung ngo / /de bzhin du de nyid las kyang gsungs te/ bdud rtsi rgyu ba'i rtsa gang ni/ /b+ha ga'i gnas su rnam par gnas / /sum cu rtsa gnyis rtsa gzhan dag /de rnams kyi ni gtso bo yin/ /zhes 'byung ngo / /gzhan yang / kye ma'o nga'i pad+ma 'di/ /bde ba thams cad yang dag ldan/ /cho ga bzhin du gang bsten pa/ /de yi mdun na bdag gnas so/ /'di ni chos dbyings rnam par dag /sems can khams ni grol bar byed/ /bde chen rdo rje rgyal po nyid/ /dngos kun gyis ni 'di la gnas/ / zhes so/ /gzhan yang nu ma'i sna dang pags pas g.yogs pa sor bzhi pa'i lte ba 'jam pa de nyid bud med kyi dbang po'o/ /gang gi phyir de la ni rtsa stong phrag bdun cu rtsa gnyis de nyid du 'dus pa de'i phyir bde ba chen po'i mtshan nyid can gsang ba 'dus pa zhes bya'o/ /de ltar gtam dag smras te lha mo cang mi smra bar gyur to/ /slob mas kyang de'i pad+mar lag pa g.yon pa'i sor mo phyag rgyar bcings te 'jug par bya ste/ mig dang lcags kyu dang snam bu dang ba dan no/ /phyag rgya'i sbyor ba des de srid bskyod par bya ba ni ji srid mkhur tshos dmar ba dang ba spu ldang ba dang / dga' ba dam pa skyes pa'i dam tshig gi phyag rgya slob pa'i mgrin par rang nyid kyis 'khyud pa'i bar du bya'o/ /de'i rjes su rdo rje mkhregs mo'i steng du nye bar 'dug ste mchog gi bsnyen pa la sogs pa'i rim pa yang dag par bzla bar bya'o/ /de la bsgrub bya dang sgrub byed kyi sbyor ba ni bsnyen pa'o/ / rdo rje dang pad+ma mnyam par sbyor ba ni nye bar bsgrub pa'o/ /sa bon gyi byin gyis brlabs pa'i rdo rje dang pad+mas bskyod pa ni sgrub pa'o/ /bde ba chen po nyams su myong ba ni sgrub pa chen po'o zhes mchog gi bsnyen pa la sogs pa'o/ /rgyud phyi ma las kyang / bsgrub bya sgrub byed sbyor ba ni/ /gang phyir bsnyen par brjod pa ste/ /rdo rje pad+ma mnyam sbyor bas/ /nye bar sgrub pa zhes su bstan/ /yi ge hUM dang phaT ldan pa'i/ /bskyod pa sgrub par rab tu grags/ /rang zhi rang bde rang ngo bo/ /sgrub pa chen por rab tu bshad/ /dpal ldan sangs rgyas kun gyi bdag /rdo rje 'chang ba'i go 'phang che/ /cho ga'i sbyor ba 'di yis ni/ /myur du dngos grub thob par 'gyur/ /zhes 'byung ngo / /gnas skabs de la rdo rje dbyings kyi dbang phyug ma dang / snyoms par zhugs pa'i slob ma mthong nas rang gi snying ga nas gti mug dga' ma la sogs pa bzhi spros te slob ma'i kha la 'jug par byas la/ /gti mug dang zhe sdang dang 'dod chags dang phrag dog gi rgyun rnams kyis slob dpon gyis rim pa 'dis dbang bskur bar bya ste/ rang gi snying ga'i ye shes sems dpa'i phyag mtshan gyi sa bon gyi thig le las 'od zer gyi sgo nas sangs rgyas spyan ma dang snyoms par zhugs pa'i rnam par snang mdzad sems dpa' gsum gyi bdag nyid can rnam par spro zhing slob ma'i kha la 'jug pa ste/ de'i yang snying gar nam mkha'i dbyings nas rnam par snang mdzad kyi tshogs 'jug par byas la/ /bde ba chen po 'bab pa'i dbang gis zhu zhing byang chub kyi sems kyi thig le'i gzugs su gyur pa gti mug gi rgyun des dbang bskur bar bya'o zhes gti mug gi rgyun gyi dbang ngo / /de bzhin du snying ga'i 'od zer gyis gos dkar mo dang snyoms par zhugs pa'i snang ba mtha' yas sems dpa' gsum gyi bdag nyid can rnam par spros shing / slob ma'i kha la bcug ste/ de'i yang snying gar snang ba mtha' yas kyi tshogs nam mkha'i dbyings nas bkug cing bcug la bde ba chen po 'bab pa'i dbang gis zhu zhing byang chub kyi sems kyi thig le'i gzugs su gyur pa 'dod chags kyi rgyun des dbang bskur bar bya'o zhes 'dod chags kyi rgyun gyi dbang ngo / /de bzhin du snying ga'i 'od zer gyis mA ma kI dang snyoms par zhugs pa'i mi bskyod pa sems dpa' gsum gyi bdag nyid can rnam par spro zhing slob ma'i kha la bcug ste/ de'i yang snying gar mi bskyod pa'i tshogs nam mkha'i dbyings nas bkug cing bcug la bde ba chen po 'bab pa'i dbang gis zhu zhing byang chub kyi sems kyi thig le'i gzugs su gyur pa zhe sdang gi rgyun des dbang bskur bar bya'o zhes zhe sdang gi rgyun gyi dbang ngo / /de bzhin du yang snying ga'i 'od zer gyis dam tshig sgrol ma dang snyoms par zhugs pa'i don yod grub pa sems dpa' gsum gyi bdag nyid can rnam par spros zhing slob ma'i kha la bcug ste/ de'i snying gar don yod grub pa'i tshogs nam mkha'i dbyings nas bkug cing bcug la bde ba chen po 'bab pa'i dbang gis zhu zhing byang chub kyi sems kyi thig le'i gzugs su gyur pa phrag dog gi rgyun des dbang bskur bar bya'o zhes phrag dog gi rgyun gyi dbang ngo / /de ltar dbang bskur ba bzhis dbang bskur bas de bzhin gshegs pa thams cad kyi ngo bo nyid kyis phung po dang khams rgyas par byas pa zhes 'byung ba rgyas pa sngon du 'gro ba shes rab ye shes kyi dbang ngo / /de'i rjes su slob ma langs te thal mo sbyar zhing slob dpon gyi mdun du 'dug nas gsol ba 'debs pa'i slob ma la man ngag ga dbang bzhi pa 'di bstan par bya ste/ thabs dang shes rab snyoms par zhugs pa'i dus su tshang ba'i bu ga nas 'pho ba'i byang chub kyi sems las 'byung ba khyod kyis gang myong ba de ni snang ba'i ye shes dang 'dod chags dang bral ba dang / rnam pa sna tshogs pa'i skad cig ma'i bdag nyid dang / de nas bsnyen pa dang dga' ba'i rnam grangs can du shes par gyis shig /de'i rjes la byang chub kyi sems yan lag thams cad du khyab pa na khyod kyis bde ba gang myong ba de ni snang ba mched pa'i ye shes te rnam par smin pa'i skad cig ma'i bdag nyid can nye bar sgrub pa dang / mchog tu dga' ba'i ngo bo nyid du shes par gyis shig /de'i 'og tu rdo rje'i nang du son pa'i byang chub kyi sems las khyod kyis bde ba gang myong ba de ni snang ba thob pa'i ye shes te rnam par 'joms pa'i skad cig ma'i bdag nyid can sgrub pa dang / 'dod chags bar ba'i ngo bo nyid du shes par gyis shig /de nas yang rdo rje nor bu'i rtse mor phyin pa'i byang chub kyi sems kyi bde ba chen po nyams su myong bas sgo rnams 'gags pas sems kyi rnam par rtog pa'i tshogs thim zhing rab tu zhi ba'i gnas la sogs pa'i tshogs ro gcig par gyur pa ye shes mthong ba gang yin pa de ni snang ba la sogs pa gsum dang bral ba/ 'dod chags dang / 'dod chags dang bral ba dang / 'dod chags bar spangs pa thabs dang shes rab gnyi ga las 'das pa de ni 'od gsal ba gnyis su med pa'i ye shes sgrub pa chen po mtshan nyid dang bral ba'i skad cig ma bde ba chen por shes par gyis shig / de ltar dri ma thams cad dang bral ba'i ye shes shes rab kyi pha rol tu phyin pa dang chos kyi dbyings kyi ngo bo nyid du shes par gyis shig /skyes bu mtshan mo yang ma yin/ nyin mo yang ma yin/ mtshams kyang ma yin te/ snang ba yang ma yin/ snang ba mched pa yang ma yin/ snang ba thob pa yang ma yin pa/ gnyid log pa yang ma yin pa/ sad pa yang ma yin/ chags pa dang / chags pa dang bral ba dang / chags pa bar ma'i rang bzhin rnams dang bral ba'i 'od gsal ba'i ye shes la dus thams cad du gnas par gyis shig / de nas rdo rje slob dpon gyi bka' drin thob pa'i slob ma thal mo sbyar bar gyur pas de kho na nyid thob pa la rjes su yi rang zhing byang chub kyi sems kyi tshigs su bcad pa 'di rjod par byed de/ oM dngos po thams cad las 'das shing / /phung po khams dang skye mched bral/ /gzung dang 'dzin pa rnam spangs pa/ /chos rnams bdag med mnyam nyid kyis/ /rang sems gdod nas ma skyes pa/ /stong pa nyid kyi ngo bo yin/ /zhes bya ba byang chub kyi sems kyi sngags 'di brjod cing / bla ma'i zhabs kyi rtsa bar snyim pa'i me tog dbul bar bya'o zhes 'di ni nang gi mngon par byang chub pa'i rim pa'o/ /de'i dpe ni nyin mo snang ba mched pa'i ye shes so/ /mtshan mo ni snang ba'i ye shes so/ /nub kyi dus kyi mtshams ni snang ba thob pa'i ye shes so/ /skya rengs kyi dus su bzhi pa 'od gsal ba'i ye shes te phyi'i mngon par byang chub pa'i rim pa'o/ /rim pa 'dis kyang nang gi mngon par byang chub pa'i rim pa bstan pa yin te/ dper na/ smig rgyu dang / du ba dang / mkha' snang dang / mar me dang / sprin med pa'i nam mkha' dang 'dra ba'i rtags rnam pa lnga'o/ /ji skad du/ las kyi mtha' rnam par 'byed pa las/ dang po sa ni chur thim zhing / / chu ni me la thim par 'gyur/ /me ni rlung gi rjes 'gro zhing / /rlung ni nam mkhar yang dag 'jug /nam mkha' 'dzin pa de nyid de/ /ye shes gsum po rnam spangs pa'o/ /zhes 'byung ngo / /yang na dam tshig gi phyag rgya'i sgo nas phyi'i mngon par byang chub pa dang / ye shes kyi phyag rgya dang phyag rgya chen po'i sgo nas ni nang gi mngon par byang chub par shes par bya'o/ /rim pa de dag gis de kho na nyid rtogs pa'i rnal 'byor pas brtan par bya ba'i phyir ting nge 'dzin rnam pa gnyis kyis kyang de bzhin nyid la 'dun par bya'o/ /de la lte ba'i phyogs su rtsibs brgyad pa'i chos kyi 'khor lo'i dkyil 'khor du me'i 'od 'phro ba'i yi ge raM 'bar ba bsgoms te/ de'i snang bas spyi bo nas lus ma lus pa la khyab par bya ste/ stong pa nyid kyi rang bzhin 'od gsal bar gnas par bya'o zhes ril por 'dzin pa zhes bya ba'i ting nge 'dzin to/ /de bzhin du yang brtan pa dang g.yo ba'i rang bzhin khams gsum po dang po 'od gsal bar bya ste/ phyis de bzhin du bdag nyid la bya ba ni rjes su gzhig pa'i ting nge 'dzin to/ /ting nge 'dzin gnyis kyi dpe ni ji skad du/ /chu bo'am lteng ka'i chu ni dri med dag la zla ba gnas pa ltar/ /de bzhin de la rjes su 'jig par byed pa rnal 'byor pas ni rtag tu bsam/ /me long la ni dbugs rlung rim gyis zad 'gyur de bzhin yang dag blta/ /ril por 'dzin pa'i rim pa 'di yang rnal 'byor pa yis rtag tu brtag /ces 'byung ngo / /mngon par byang chub pa'i rim pas 'dis ye shes lnga'i ngo bo nyid rnam par rtog pa ma lus pa ring du spangs pa mchog tu dga' ba'i rang bzhin rnal 'byor pa gson bzhin grol bar gnas par bya'o zhes mngon par byang chub pa'i rim pa'o/ / da ni zung du 'jug pa'i rim pa bstan par bya ste/ de yang gnyis so/ /rgyu'i zung du 'jug pa dang / 'bras bu'i zung du 'jug pa'o/ /rgyu'i zung du 'jug pa la rnam pa bzhi ste/ nyan thos dang / rang sangs rgyas dang / dbu ma dang / sngags kyi lta ba'i bye brag gis so/ /de la rim pa bzhi po 'od gsal ba thob nas de'i rjes su kun rdzob dang don dam pa dbyer med pa dpal rdo rje 'chang chen po'i phyag rgya chen po rnam pa thams cad kyi mchog dang ldan pa/ sems can ma lus pa'i don byed pa myur du spros te gnyis pa thams cad kyi snang ba dang bral zhing / bla na med pa'i sku thob par 'gyur zhes zung du 'jug pa'i ting nge 'dzin mdor bsdus pa'o/ /de la ni lhag ma dang bcas pa dang lhag ma med pa'i mya ngan las 'das pa'i dbyings gnyis kyi rnam par rtog pa dang / gang zag la bdag med pa dang chos la bdag med pa nyid dang / 'du shes med pa'i snyoms par zhugs pa dang 'gog pa'i snyoms par zhugs pa dang / rnam pa dang bcas pa dang / rnam pa med pa dang / rtag pa dang chad pa dang / kun rdzob dang / don dam pa dang / rtag pa dang / mi rtag pa dang / gtsang ba dang mi gtsang ba dang / yod pa dang med pa dang / dngos po dang dngos po med pa dang / sngags kyi sku dang / ye shes kyi sku dang / bskyed pa dang / rdzogs pa dang / rtog pa'i rnal 'byor dang / yongs su rdzogs pa dang / stong pa nyid dang snying rje dang / thabs dang shes rab la sogs pa'i gnyis par 'dzin pa'i bag chags thams cad med pas bcu gnyis pa kun tu 'od ces bya ba la gnas pa'o/ /de bas na de las ldang ba'i dag pa 'jig rten pa'i ye shes la gnas pa sa bcu gsum pa thob pa yongs su rdzogs pa'i spyod pa zung du 'jug pa'i ngo bo nyid do/ /dper na bram ze dang gdol pa dang / smad 'tshong ma dang / bu mo dang chung ma dang / ga bur dang / bshang ba dang / drag po dang / rdo rje 'chang ba dang / mtho ris dang ngan song dang / bde ba dang sdug bsngal ba dang / grags pa dang grags pa ma yin pa dang / rnyed pa dang rnyed pa ma yin pa dang / bstod pa dang smad pa la sogs pa dang bral ba/ rjes su dran pa dang ma 'dres pa'i chos dang ldan pa/ sangs rgyas kyi sku 'dzin pa/ sangs rgyas kyi zhing gcig nas gcig tu sems can gyi don mdzad pa la brtson pa dpal bde ba chen po'i rnam grangs can rdo rje sems dpa' nyid du 'gyur ro/ /de lta na gal te 'bras bu de yin na rgyu nyid du ji ltar 'gyur te/ gang gi phyir rim pa bzhi po ni thabs te rgyu'o/ /lnga pa ni mi slob pa'i ngo bo nyid 'bras bu'o/ /de ci'i phyir gcig la rgyu nyid dang 'bras bu nyid 'thad ce na/ smras pa ro gcig pa'i zung du 'jug pa la blos brtags pa'i rgyu dang 'bras bu'i tha snyad yin gyi dam pa'i don du ni ma yin no/ /de ltar thams cad mkhyen pa'i ye shes thob pa'i rnal 'byor pa la rgyu dang 'bras bu'i bye brag tu gnas pa'i dngos po thams cad ngo bo gcig kho na yin gyi bye brag tu de la de rnams snang ba ma yin no/ /bdag cag lta bu gzhal bar byed pa rnams kyis de ltar 'dod pa la skyon med do/ /yang na srid pa dang mya ngan las 'das pa'i rnam par rtog pa phan tshun bye brag tu rab tu 'jug pa de rnams kho na ro gcig par shes pas ting nge 'dzin mngon du 'gyur zhes rgyu dang 'bras bu'i bye brag 'di ni brtags pa yin pas gnod pa gang yang med do/ /de lta na gal te ting nge 'dzin 'di yin na/ ji ltar ldang bar 'gyur te/ ldang ba med na de'i tshe sems can gyi don med ces phan tshun 'gal ba thob par 'gyur zhe na/ smras pa ldang ba zhes bya ba ni ting nge 'dzin nyams par byed pa ni ma yin te/ 'on kyang ting nge 'dzin la zhugs pa nyid kyis 'gro ba'i don mdzad pa'o/ /gang gi phyir sangs rgyas bcom ldan 'das rnams kyi spyod lam rnam pa bzhi ste/ spyod lam gyi bzhugs pa dang / bstan pa'i bzhugs pa dang / ting nge 'dzin gyi bzhugs pa dang / so sor yang dag pa'i 'jug pa'i bzhugs pa'o/ /de la sangs rgyas rnams kyi sku'i phrin las rtag tu mnyam par gzhag pa gang yin pa de ni spyod lam gyi bzhugs pa'o/ /gang gsung gi phrin las rtag tu mnyam par gzhag pa gang yin pa de ni bstan pa'i bzhugs pa'o/ / gang thugs kyi phrin las rtag tu mnyam par gzhag pa gang yin pa de ni ting nge 'dzin gyi bzhugs pa'o/ /gang sangs rgyas rnams kyis mthong ba'i chos kyi bde ba'i bzhugs pa dang / lha la sogs pa'i gnas su nye bar gshegs pa la thugs kyi phrin las rtag tu mnyam par gzhag pa gang yin pa de ni so sor yang dag par 'jug pa'i bzhugs pa'o/ /mnyam par gzhag pa'i spyod pa ni bzhugs pa ste gang gi phyir sangs rgyas bcom ldan 'das rtag tu mnyam par gzhag pas so/ /de ltar zung du 'jug pa'i rim pa la gnas pa'i rnal 'byor pa'i ting nge 'dzin las ldang yang rung mi ldang yang rung khyad par gang yang med de zhes ting nge 'dzin kho na yin te/ ting nge 'dzin ma yin pa las log pa'i phyir ro/ /gal te phyogs gnyis ka la mtshungs pa yin na de ci'i phyir rnam par mi rtog par gyur nas kyang sems can gyi don byed ce na/ smras pa sngon gyi smon lam dang thugs rje chen po'i shugs kyis sems can gyi don mdzad pa yin gyi rnam par rtog pas ni ma yin no/ /sems can rnams kyi yang de phrad pa tsam gyis re ba thams cad yongs su rdzogs par 'gyur te yid bzhin gyi nor bu dang bum pa bzang po bzhin no/ /ji skad du/ de ni phrad pa tsam gyis ni/ /skyes bu yid bzhin nor bu ltar/ / rtsig pa la sogs rnams las kyang / /ji 'dod bstan pa rnams ni 'byung / /zhes 'byung ngo / /de bas na sangs rgyas kyi sa la nyon mongs pa'i dra ba zad nas kyang sngon gyi smon lam gyi 'phen pa'i dbang gis skur byung ba dang sems can gyi don yang 'byung ste/ rdza mkhan gyi 'khor lo bzhin no/ / ji skad du/ skyon rnams skyed byed 'jig tshogs lta bu'i bud shing sreg byed gang / /rang gzhan bye brag yul rnams rtsa nas 'don byed de rnams skyon med de/ /skyon med pa yang thugs rjes sgyu ma'i skyes bu las la 'jug /blo bzang sngon gyi smon lam dbang gis 'khor lo 'khor bzhin gnas/ / zhes 'byung ngo / /kam pa la'i zhal snga nas kyis kyang gsungs te/ mi shigs khyod kyis mngon par byang chub thob nas ni/ /gang tshe mi shigs nyid kyang yi ger gsungs pa ni/ /de tshe ring du nyams pa rnams kyi ji ltar ni/ /lcags kyu med pa rnams kyis log pa'i rtsol ba byed/ /ces 'byung ngo / /zung du 'jug pa'i rim pa'i ting nge 'dzin te rdzogs pa'i rim pa'o/ / de ltar bskyed pa dang rdzogs pa'i rim pa dag yan lag dang dbye bar bcas pa ni rab tu bstan to/ /'grel pa ma lus pa'i don de nyid la brten te slob dpon zla ba grags pas 'grel pa las don bstan to/ /de brtsam pa la dang po rnam pa gsum yin te/ bya ba dang bya ba'i 'bras bu dang / bya ba'i 'bras bu'i 'bras bu'o/ /de la rdo rje phreng ba dang / lha mo bzhis yongs su zhus pa dang / dgongs pa lung bstan pa dang / ye shes rdo rje kun las btus pa rnal 'byor gyi rgyud chen po'i bshad pa'i rgyud bzhi po las yang dag par btus te/ dpal gsang ba 'dus pa'i 'grel pa byed pa gang yin pa de bya'o/ /bshad pa'i rgyud rgyas pa rnams las blo dman pa rnams kyis don gzung bar mi nus te/ de rnams kyis bde blag tu go ba ni bya ba'i 'bras bu'o/ /bde blag tu go bas phan tshun slob dpon dang slob ma dag gi 'chad pa po dang nyan pa po'i 'brel pa dang bsnyen bkur byed pa dang / bsnyen bkur bya ba dang / thos pa dang bsam pa dang bsgom pas rtogs pas zab cing rgya che ba bla na med pas sems can ma lus pa la rjes su gzung bar byed pa dpal rdo rje 'chang chen po'i go 'phang thob pa ni bya ba'i 'bras bu'i 'bras bu'o/ / de yod pas nyan pa po 'jug par 'gyur ro/ /de bzhin du gzhan yang brjod pa la sogs pa rnam pa lnga bo nyan pa po 'jug par bya ba'i phyir smra bar bya ste/ rjod pa dang brjod par bya ba dang / 'brel pa dang / dgos pa dang / dgos pa'i dgos pa'o/ /de la rjod par byed pa 'grel pa'i ming ni sgron ma rab tu gsal bar byed pa'o/ /dpal gsang ba 'dus pa'i rnal 'byor gyi rgyud chen po thos pa chung ba'i slob dpon gyis bshad pa'i mun pas khebs pa'i rdo rje'i tshig rnams sgron ma ltar gsal bar byed cing ji lta ba bzhin du mngon par gsal bar byed pas na sgron ma gsal ba'o/ /mtha' drug ces bya ba ni de nyid kyi don gyi sgo nas ming yin te/ brjod par bya ba drug du bstan pa'i phyir rjod par byed pa'o/ /brjod par bya ba ni sngon du bshad pa'i rim pa gnyis te/ de la yang dang po la rnam pa gsum ste/ lus rnam par dben pa'i bar du'o/ /gnyis pa ni rnam pa lnga ste ngag rnam par dben pa nas brtsams te mi gnas pa'i mya ngan las 'das pa'i bar du'o zhes brjod par bya'o/ /'brel pa zhes bya ba ni sgra dang don dag gis thabs dang thabs las byung ba'i mtshan nyid dam/ rgyu dang 'bras bu'i tshul lam/ rjod pa dang brjod par bya ba'i mtshan nyid nges par shes par bya'o/ /gal te sgra dang don dag gis 'brel pa gtso bo yod pa ma yin yang blos byas pa kho na'o/ /gang gi phyir sgra dang don dag la 'brel pa med de rang gi mtshan nyid ston mi nus pa'i phyir ro/ /'brel pa zhes bya ba ni rnam pa gnyis te/ de'i bdag nyid dang / de las byung ba'o/ /de las de'i bdag nyid ces bya ba ni dbyer med pa'i dngos po gcig po kho na la ldog pas byas pa'i bye brag la brten te bsgrub par bya ba dang sgrub par byed pa dang / rtogs par bya ba dang rtogs par byed pa'i bsgrub pa dag so sor bstan pa ni rmongs pa'i blo can rnams kyi rmongs pa sel bar byed pa'o/ /dper na shing dang / sha ba dag dang / byas pa dang mi rtag pa dag gi dbyer med pa ni shing dang sha ba dag dang byas pa dang mi rtag pa bzhin du sgra dang don dag la dbyer med pa nyid med do/ /dper na sgra rjod par gyur pa na skyes bu'i kha yongs su khengs par 'gyur ba'i don gyis ni ma yin no/ /sgra ni skad cig ma yin pa'i phyir brjod ma thag tu rnam par 'jig go/ /don ni bum pa la sogs pa'i mtshan nyid phyi rol du yod pa de yang skad cig ma can ma yin zhes de dag tha dad pa'o/ /tha dad pa dang tha mi dad pa dag gis phan tshun spangs pa'i mtshan nyid can gyi 'gal bas de'i bdag nyid med do/ /gal te skyon de bsal bar bya ba'i phyir tha dad pa'i don la yang don sgrar mtshan brda'i sgo nas rjod par byed ce na/ de yang mi rigs te/ gang gi phyir dngos po'i chos nyid du gnas pa'i rang gi mtshan nyid mi rtog pa'i ye shes pa'i spyod yul ni brdas bstan par mi nus te/ tha dad pa dang tha mi dad pa dang / ming dang rigs la sogs pa'i dbye bas kyang brjod par bya ba ma yin pa'i phyir ro/ /re zhig brjod bya ni skad cig ma yin pa'i phyir mi gnas te/ rjod par byed pa de yang de bzhin te/ dngos po thams cad skad cig mas khyab pa'i phyir ro/ /brda ni tha snyad la dgos pa ste/ /gang la brten pa'i tha snyad de/ / gal te gnas par mi 'gyur na/ /de'i tshe gang gi brda yin te/ /mo gsham gyi bu'i brda bzhin no/ /ji skad du tshad ma rnam 'grel las/ sgra rnams kyis ni brda can ston/ /de ni tha snyad phyir bshad pa/ /de tshe rang gi mtshan nyid med/ /des na de la brda med do/ /zhes 'byung ngo / / de bas na de'i bdag nyid kyi 'brel pa med pa kho na'o/ /de las byung ba'i 'brel pa yang med de/ ci'i phyir zhe na/ de las byung ba'i mtshan nyid kyi 'brel pa ni tha dad pa'i dngos po dag la yod de/ don gyi rjes su 'gro ba dang / ldog pa rjes su 'jug pa'i phyir te/ du ba dang me bzhin no/ /me yod pas du ba yod pa dang / me med pas bud shing la sogs pa rgyu rnams ma tshang ba med pa yod pas kyang du ba yod par mi 'gyur zhes rgyu yod pa dang med pa dag gis 'bras bu la yang yod pa dang med pa nyid de/ de ni rgyu'i rjes su 'gro ba'i phyir ro/ /de bas na yod pa dang med pa dag gis byas pa'i bdag nyid yod pa dang med pa can gyi du bas me rtogs par byed do/ /rtogs pa dang rtogs par bya ba'i dngos po'am/ bsgrub bya dang sgrub par byed pa dngos po dag gi rjes su 'gro ba dang ldog pa kho na rgyu yin no/ /de lta bu'i rigs pa sgra dang don dag la med de/ ci'i phyir zhe na/ bum pa la sogs pa'i don yod pas kyang dngos po gcig la yid 'brel pa can gyi skyes bus sgra brjod par mi nus pa dang / don med pas kyang rtog pa dang bcas pa'i rnam par shes pa rang dbang du sgra rjod par byed pa ste/ 'khor los sgyur ba dang rgya mtsho la sogs pa'i sgra bzhin no/ /de'i phyir don gyi rjes su 'gro ba dang ldog pa med pas sgra dang don dag gis de las byung ba'i 'brel pa med do/ /de la smras pa/ rang gi mtshan nyid kyi 'brel pa med de spyi'i mtshan nyid kyis byas pa'i 'brel pa yod pa nyid de dper na rtog bcas kyi shes pa la spyi'i tshul du don gyi rnam pa gang snang ba de nyid kyis pha rol po la rtogs par bya ba'i phyir 'bras bur gyur pa'i sgra skyed par byed do/ /spyi'i sgra'i rnam pa des kyang nyan pa po'i rgyud la rtog pa skyed par byed do/ /de'i phyir sgra'i yul gang yin pa de nyid rnam par rtog pa rnams kyi yul lo/ /de bas sgra dang don rnams kyi btags pa pa'i 'brel pa yod pa kho na'o/ /de nyid la brten te nye bar brtags pas rang gi mtshan nyid la yang sgra 'jug gi 'jug pa gtso bos ni ma yin no/ /'brel pa de yang rnam pa drug tu 'gyur te/ de bzhin gshegs pa dang lha mo dang byang chub sems dpa' dang / lha dang / mi'am ci dang / mi rnams kyi'o / /de la dang po 'gro ba 'di dag mun par gyur pa stong pa nyid kyi rang bzhin du yod de/ de nas bsam gtan bzhi pa'i gzugs khams su gnas pa dang / nam mkha' mtha' yas kyi skye mched du gnas pa dang / rnam par shes pa mtha' yas skye mched dang / ci yang med pa'i skye mched dang / 'du shes yod min med min skye mched du gnas pa rnams kyi yun ring ba'i dbang gis/ chang gis myos pa'i nus pa bzhin du 'dod chags kyi bag chags 'byung bar 'gyur ro/ /de'i de ma thag tu de rnams gzugs can du gyur to/ / de nas chags pa dang mngon par 'brel pa'i dbang gis rang gi lus las bcud kyi rang bzhin char gyi rgyun 'bab par 'gyur ro/ /bab pa de rnams kyis kyang kha dog ser po sa'i cha 'dam du chags so / /yang dus kyi dbang gis de dum bu bzhir gas nas gling bzhi dang dkyil du ri rab kyi rgyal po yang dag par byung bar gyur to/ /de nas de dag kyang de nyid du babs so/ /bag chags ldang ba'i shugs kyis bud med dang skyes pa'i rtags su gyur pas phan tshun 'brel pa'i dbang gis skye dgu dang rigs bzhi'i tha snyad kyang 'byung ngo / /ma rmos par smin pa'i 'bras la sogs pa'i 'bru rnams dang / de dag bsrung bar bya ba'i phyir mtha' yas grags pa la sogs pa rgyal po rnams byung ngo / /bdag dang gzhan gyi dbye ba'i dbang gis nga dang bdag tu 'dzin pa byung ngo / /de'i rtsa ba can ni 'dod chags la sogs pa'i nyon mongs pa dang de las byung ba'i dge ba dang mi dge ba'i las dang / de'i rgyu can bde 'gro dang ngan 'gro dag ces zo chun gyi 'khrul 'khor bzhin du yongs su 'khor ba'i dgon par 'khor bar gyur to/ /de nas bcom ldan 'das rdo rje 'chang chen pos snyigs ma lnga'i dus su nyon mongs pa lngas dkrugs pa'i sems can gyi khams la gzigs te/ nyan thos la sogs pa'i lam gzhan gyis 'di dag 'dul bar mi 'gyur te zhes mkhyen nas nyon mongs pa nyid kyis nyon mongs pa thams cad nye bar zhi bar 'gyur zhes dgongs nas sgeg pa la sogs pa'i cha lugs dang ldan pa'i de bzhin gshegs pa lnga ye shes lnga'i ngo bo nyid spro bar mdzad de/ de bzhin gshegs pa de dag gis dga' ldan gyi lha'i gnas su rin po che sna bdun gyi rang bzhin gyi gzhal yas khang pa la bzhugs pa'i rdo rje sems dpa' la gsol ba btab par gyur pas bcom ldan 'das kyis kyang rig ma'i chu skyes kyi nang du dkyil 'khor spros te/ de bzhin gshegs pa rnams la rig ma'i dbang bskur nas phyi rol du spros te/ de kho na nyid bstan to zhes pa de ni de bzhin gshegs pa'i 'brel pa'o/ /bcom ldan 'das de nyid kyis 'dod chags kyi rigs can rjes su gzung bar bya ba'i phyir/ lha mo bzhi spros te/ de rnams kyis yongs su zhus pas de kho na nyid gsungs pa de ni lha mo'i 'brel pa'o/ /dbang po rnams la mngon par zhen pa'i nyon mongs pa la gnas pa'i sems can rjes su gzung bar bya ba'i phyir byang chub sems dpa'i tshogs spros te de kho na nyid bstan pa ni byang chub sems dpa'i 'brel pa'o/ /brgya byin gyis yongs su zhus pa la sogs pa'i bshad pa'i rgyud la sogs pa gang gsungs pa de ni lha'i 'brel pa'o/ /mi'am ci dang klu dang drang srong la sogs pa rnams la sgrol ma 'byung ba la sogs pa'i rgyud bstan pa gang yin pa de ni mi 'am ci'i 'brel pa'o/ /rab gsal zla ba la sogs pa'i rgyal po rnams yul dbus su grong khyer bco brgyad la chos gsungs pa de ni mi'i 'brel pa'o/ /de ltar 'brel pa drug po rgyas pa de mdor bsdus pas rnam pa gnyis su 'gyur te/ sgra dang don gyi 'brel pa dang / ston pa dang 'khor gyi 'brel pa'o/ /ji skad du/ bstan bcos gang zag dbye ba yis/ /'brel pa rnam pa gnyis su 'dod/ /bstan bcos sgra dang don 'brel pa/ /'chad dang nyan pa'i cig shos yin/ /gnyis pa'i bye brag drug yin te/ /gcig nas gcig tu brgyud rim 'ongs/ /de bzhin gshegs sogs dbye ba yis/ /blo ldan grags pa rnams kyis gsungs/ /zhes 'byung ngo / /'dir ni de bzhin gshegs pa'i 'brel pa gcig pu yin te/ de bzhin gshegs pa lngas dbus kyi gtso bo la gsol ba btab pas so zhes 'brel pa bstan to/ /dgos pa zhes bya ba ni thos pa dang bsam pa dang bsgom pa'i rim pas bsgrub byar gyur pa'i rdo rje 'chang chen po'i gnas thob pa'o/ /de thob nas khams gsum pa thams cad kyang de'i gnas su dgod pa ni bya ba byas pa'i phyir dgos pa'i dgos pa'o/ /gzhan dag na re thos pa la sogs pa'i rim gyis rtogs pa ni dgos pa'o/ /de las kyang tha mal pa'i lus bzlog pas 'jig rten las 'das pa'i lha'i rnam pa bsgrub pa ni dgos pa'i dgos pa yin no zhes brjod pa de ni mi rigs te/ gang gi phyir byang chub sems dpa' rnams kyis rang gi don sgrub pa la 'bad pa ma yin te/ de rnams kyis ni gzhan gyi don gtso bo yin gyi rang gi don ni ma yin no/ /ji skad du/ 'gro ba ma lus rang gzhan don mdzad pa'i/ /de bzhin gshegs nyid de yi zhar la 'byung / /zhes 'byung ngo / / de'i phyir gzhan gyi don kho na dgos pa'i gtso bo yin gyi/ gzhan du na rang gi don ni dgos pa nyid du mi 'gyur ro/ /sgrub par snang ba dang / don gyi bya bar snang ba'i shes pa gnyis bzhin no/ /dper na dang po mig phye ba'i dus su sreg pa dang 'tshed pa la sogs pa'i don gyi bya ba byed nus pa yang me la sogs pa tsam du so sor snang ba yin te/ don gyi bya ba med pa'i phyir ro/ /me la sogs pa thob nas sreg pa dang 'tshed pa la sogs pa'i bya ba dngos su byed pa'i shes pa ni don gyi bya ba snang bar bshad do/ /de nyid du bya ba byas pa'i phyir ro/ /gang don gyi bya ba byed pa de nyid dam pa'i don du yod ces 'byung ngo / / 'dir yang dgos pa ni sgrub par snang ba'o/ /dgos pa'i dgos pa ni don gyi bya bar snang ba yin zhes rgyas pas chog go/ /dgos pa la sogs pa'i sgo nas gdul bya 'jug pa yin pas de dag bstan par bya ba'i phyir gang zag lnga brtag par bya ste/ de yang tsan+dan la sogs pa'i gong du bshad pa ste/ de la tsan+dan zhes bya ba ni gti mug 'ba' zhig gi rigs can thos pa chung zhing nga rgyal gyi dbang gis gzhan rnams skyo bar byed pa de las gzhan dang rang gi don sgrub par mi nus te/ blun po yin pa'i phyir ro/ /ut+pal zhes bya ba ni thos pa la sogs pa'i rim gyis 'jug pa yang brjed ngas pa'i ngang tshul can yin te/ dbang po dman pa yin pa'i phyir ro/ /de'i rang gi don skye ba 'di la med de skye ba gzhan la 'byung bar 'gyur ba'i phyir ro/ /pad+ma dkar po ni thos pa la sogs pa rang gi sems la 'dzin cing gzhan la ston par mi nus pas rang gi don tsam yod de/ dbang po bar ba yin pa'i phyir ro/ /pad+ma zhes bya ba ni gzhan rnams la ston par byed nus te/ dbang po rnon po yin pa'i phyir ro/ /rin po che zhes bya ba ni rang gi don dang gzhan gyi don phun sum tshogs pa dang ldan pa tshul khrims la sogs pa'i yon tan dang bcas pa byang chub sems dpa'i rigs can dbang po rab kyi rab yin pa'i phyir ro/ /bzhi po ni kun rdzob kyi phyogs kyi bshad pa la snod du rung ba dang / gcig ni don dam pa'i mchog gi bshad pa'i snod du rung ba'o/ /de yang shin tu rgyas par 'og nas 'chad par 'gyur ro/ /gzhan dag na re gang zag bzhi yod de/ mi shes pa dang / the tshom za ba dang / phyin ci log pa'i blo dang / nges pa can gyi blo can no/ /de la mi shes pa ni rnam pa gnyis te/ tshad ma'i rjes su 'brang ba dang / tshad ma ma yin pa'i rjes su 'brang ba'o/ /de la tshad ma'i rjes su 'brang ba ni gzhan gyi rigs pa len cing thos pa la sogs pa'i rim gyis lam la brten pa'o/ /tshad ma ma yin pa'i rjes su 'brang ba ni mkhas pa'i tshig la brten te lam la 'jug pa'o/ /de dag gnyis ka yang lam gyi snod du rung ba'o/ /the tshom za ba la yang rnam pa gnyis te snga ma bzhin te/ the tshom za ba tshad ma'i rjes su 'brang ba ni yang dag par tshad ma brjod pas the tshom las log cing yang dag pa'i lam la gzhag par bya ba zhes rjes su gzung bar bya'o/ /tshad ma'i rjes su mi 'brang ba'i the tshom za ba ni bcom ldan 'das de bzhin gshegs pas kyang rjes su gzung bar mi spyod do/ /ji skad du/ mi shes pa ni bde bar mgu gyur cing / /khyad par shes pa de bas myur bar mgu/ /dum gcig shes pas me yis phyed tshig pa/ /me de sangs rgyas kyis kyang mgu bya min/ /de bas na btang snyoms kyi gnas su bshad do/ /phyin ci log pa'i blo can ni rnam pa gsum ste/ the tshom za ba la phyin ci log pa dang / mi shes pa la phyin ci log pa dang / shes pa la phyin ci log pa'o/ /de la the tshom za ba la phyin ci log pa ni nyan thos lta bu sngags ni yang dag pa ma yin no zhes zer ba thabs gang gis kyang rjes su gzung bar bya ba ma yin pas btang snyoms kyi gnas kho na'o/ /mi shes pa la phyin ci log pa ni chos bstan pa tsam gyis phyin ci log pa las log cing lam du 'jug par bya'o/ /shes pa la phyin ci log pa la yang gnyis te/ tshad ma'i rjes su 'brang ba dang / tshad ma'i rjes su 'brang ba ma yin pa'o/ /de la shes pa la tshad ma'i rjes su 'brang ba ma yin pa'i phyin ci log pa'i blo can ni gang gis kyang lam du 'jug par byed mi nus te/ phyin ci log pa'i lta ba dang ldan pa yin pa'i phyir ro/ /shes pa la tshad ma'i rjes su 'brang ba phyin ci log pa'i blo can la rnam pa drug ste/ grangs can pa dang / rigs pa pa dang / 'jig rten rgyang pan pa dang / mchod 'os pa dang / zhi ba pa dang / dpyod pa pa'o/ /g.yo ba dang mi g.yo ba 'di dag thams cad de kho na nyid nyi shu rtsa lnga pa'o/ /blo'i dbang po lnga ni mig la sogs pa lnga'o/ /las kyi dbang po lnga ni / ngag dang / lag pa dang / rkang pa dang / bshang lam dang / gsang ba'i dbang po'o/ /gzugs la sogs pa yul lnga dang / sa la sogs pa 'byung ba chen po lnga dang / nang gi byed pa gsum ste/ yid dang / blo dang / nga rgyal lo/ /gtso bo'i rnam grangs can rang bzhin dang skyes bu'o/ /de la de kho na nyid nyi shu rtsa gsum ni 'bras bu yang yin la rgyu yang yin no/ /rang bzhin ni rgyu kho na'o/ /skyes bu ni rgyu yang ma yin 'bras bu yang ma yin no/ /ji skad du/ rtsa ba'i rang bzhin bya ba ma yin te/ /chen po la sogs bdun po rgyu 'bras yin/ /bcu drug po ni 'bras bu nyid yin te/ /rgyu min 'bras min skyes bu de yin no/ /de'i don ni 'di yin te/ yon tan gsum gyi bdag nyid can lus can thams cad kyi rgyur gyur pa'i rang bzhin ni gtso bo'o/ / snying stobs dang / rdul dang mun pa gsum ni yon tan no/ /de la snying stobs ni yang zhing gsal bar byed pa dge ba'i bag chags gtsor gyur pa ste mtho ris kyi rgyu'o/ /rdul ni g.yo ba ste g.yo zhing 'ching bar byed pa ste dmyal ba'i rgyu'o/ /mun pa ni lci zhing sgrib par byed pa mi dge ba'i bdag nyid dmyal ba nyid kyi rgyu'o/ /ji skad du/ snying stobs yang zhing gsal bar byed par 'dod/ /rdul ni 'ching byed g.yo ba nyid du bshad/ /mun pa lci zhing sgrib par byed pa ste/ /don la mar me bzhin du gnas par 'gyur/ /zhes 'byung ngo / /de ltar snying stobs la sogs pa'i yon tan gsum ro gcig par gyur pa/ dbang po la sogs pa rnams kyi rgyur gyur pa rtag pa'i rang bzhin ni bya ba'i sgo nas rjes su dpag par bya ba yin te me bzhin no/ /de ni rang gi gzugs su dmigs par mi 'gyur te/ phra ba'i phyir ro/ /mi dmigs pa de yang rnam pa bdun du 'gyur ro/ / 'di lta ste shin tu ring bas nam mkhar 'phur ba'i bya dang / shin tu nye bas mig gi dbang po'i rdzi ma dang / dbang po nyams pas long ba la sogs pas gzugs mi mthong ba dang / yid mi brtan pas smyo ba la sogs pa rnams kyis dngos po mi mthong ba dang phra bas phra ba la sogs pa mi mthong ba dang / zil gyis gnon pas rlung dang mtshon cha la sogs pas smas pa dang / mtshungs pa dang phrad pas 'o ma dang / chu dang til dang 'bras chang la sogs pa'o / /'dir ni rang bzhin phra ba'i phyir mi dmigs pas 'bras bus dpag par bya ba yin no/ /ji skad du/ shin tu ring ba dang ni shin tu nye ba yis/ /dbang po nyams dang yid ni mi gnas pas/ /phra ba nyid dang zil gyis non pas ni/ /de bzhin mtshungs pa phan tshun rnams tshogs pas/ /phra phyir de ni mi dmigs pa nyid de/ /de ni med min bya bas dmigs pa yin/ /bya ba de yang chen po la sogs te/ /rang bzhin dang ni 'dra dang mi 'dra yin/ /zhes bya ba la sogs pa'o/ /de la rgyu dang 'bras bu'i tshul ni rang bzhin las blo dang / de las kyang nga rgyal dang / de nyid las kyang blo'i dbang po lnga dang las kyi dbang po lnga dang de tsam lnga dang yid kyang skye bar 'gyur ro/ / de tsam rnam pa lnga las 'byung ba chen po yon tan gsum gyi bdag nyid skye bar 'gyur te/ yang dang yang du 'jig cing slar yang skye bar 'gyur zhes rgyu dang 'bras bu'i tshul du 'khor ba pa rnams yongs su 'khor bar gyur pa ste dbyer med par shes pa'i phyir ro/ /dbyer yod par shes pas rang bzhin dang skyes bu dag las 'di ni rang bzhin dang 'di ni skyes bu'o zhes pas grol ba'o/ /skyes bu ni dri ma med pa shel gyi rnam pa mthong ba po ste/ /btang snyoms pa nyid kyis rang bzhin gyi sgo nas thams cad mthong bar byed do/ /mthong nas kyang rang bzhin kha drag yin pas mthong bar mi 'gyur te/ dge ba dang mi dge ba'i rgyu gnyis las skye ba dang / tshe dang longs spyod kyi mtshan nyid kyi 'bras bu myong bar 'gyur ro/ /ji skad du/ dge ba yis ni steng du 'gro 'gyur te/ /mi dge ba yis 'og tu 'gro bar 'gyur/ /ye shes kyis ni grol ba nyid 'gyur zhing / / phyin ci log pas 'ching ba nyid du 'dod/ /ces 'byung ngo / /de bas na skyes bu du ma nyid de/ gang gi phyir gcig yin na skyes bu gcig grol bas thams cad grol bar thal ba dang / gcig skye ba'am 'chi bas thams cad de bzhin du thal bar 'gyur ro/ /rang bzhin ni bems pos kyang legs pa dang / mi legs pa'i las dag tu skyes bu rab tu 'jug par byed de 'o ma bzhin no/ /ji skad du/ be'u skyed par byed pa'i rgyu mtshan gyis/ /bems po 'o ma ji bzhin 'byung gyur pa/ /de bzhin skyes bu grol ba'i ched du ni/ /rang bzhin gtso bos rab tu 'jug par byed/ /ces 'byung ngo / /de ltar de kho na nyid nyi shu rtsa gsum rang bzhin dang lhan cig tu bems po yin te/ tha dad pa med pas 'byung po rnam pa bcu bzhi'i 'khor bar yongs su 'khor bar 'gyur ro/ /tha dad par yongs su shes pa tsam gyis grol bar 'gyur ro/ /rang bzhin bems po yin yang skyes bu dang 'brel pa'i dbang gis dngos po thams cad la 'jug pa dang ldog par byed de 'phye bo dang long ba bzhin no/ /'phye bo dang long ba'i 'brel ba bzhin/ /de yis byas pa 'di dag 'gro ba yin/ /zhes 'byung ngo / /bye brag de yang tshig gi don drug cu yongs su shes pas skye bar 'gyur te/ gtso bo yod dang gcig pa nyid/ /don ldan nyid dang de las gzhan/ /gzhan don nyid dang du ma dang / bral ba dang ni ma bral nyid/ /lhag ma'i skabs dang byed min nyid/ /don ni gtso bo bcu ru bshad/ /phyin ci log pa'i bye brag lnga yin te/ /byed pa ma tshang bas ni mi nus pa/ /dbye ba nyi shu rtsa brgyad can zhes bya/ /dga' ba dgu dang dngos grub rnam brgyad do/ /zhes mdor bstan pa'o/ /rgyas par bstan pa yang mun pa dang gti mug dang gti mug chen po dang / mun pa thibs po dang / shin tu mun nag thibs po zhes phyin ci log pa lnga'o/ /mig dang rna ba dang sna dang lce dang lus ma tshang ba dang / ngag dang lag pa dang rkang pa dang bshang sgo dang / gsang ba'i dbang po ma tshang ba dang / yid ma tshang ba ste bcu gcig go/ /dga' ba dang dngos grub ma tshang bas blo drug pa ni bcu bdun no/ /rtog pa sgra dang kha dog 'dzin pa dang / /sdug bsngal sel ba gsum ste bshes gnyen phrad/ /sbyin pa dad dang dngos grub rnam brgyad do/ /zhes 'byung bas so/ /lhag pa'i lha las 'byung ba dang / 'byung ba lhag pa las 'byung ba dang lhag pa'i nang gi bdag nyid las 'byung ba de sel bas dngos grub gsum ni dga' ba dag go/ /phra ba la sogs pa'i mtshan nyid dngos grub brgyad dang ni dga' ba dgu'o/ /tshig gi don drug cu gang gi tshe skyes bus bye brag tu mthong na de'i tshe grol ba'o/ /de yang tshad mas nges par bya ba yin te/ mngon sum dang / rjes su dpag pa dang / yid ches pa'i tshig ste tshad ma gsum mo/ /de la mngon sum gyis de kho na nyid nyi shu rtsa gsum nges par bya ba ste/ so so'i yul rnams la rtog pa ni mngon sum yin zhes bshad pa'i phyir ro/ /rang bzhin ni yon tan gsum gyi bdag nyid de rjes su dpag pas nges par bya ba ste/ lkog tu gyur pa'i phyir ro/ /skye ba dang tshe dang longs spyod ni spyir mthong ba'i rjes su dpag pas so/ /thar pa la sogs pa shin tu lkog tu gyur pa rnams la yid ches pa'i tshig gis so/ /de ltar tshad ma dang bcas pa 'ching ba dang grol ba'i tha snyad kyi rgyur gyur pa grangs can gyi gzhung la 'dod do/ /de la smras pa/ re zhig dang po de kho na nyid nyi shu rtsa lnga med de/ yid dang blo dang nga rgyal gcig pa yin pa'i phyir ro/ /'dir ni phyi'i don bdag gis rtogs so zhes nges par byas pa tsam gyis blo dang nga rgyal dag yid las tha dad pa ma yin no/ /yid kho na bdag gis rtogs so zhes nges pa dang bdag nyid du skye bar 'gyur ro/ /la la smra ba ni rtog par byed pa yid yin no zhes mi rigs te/ khyad par gyi bdag nyid rnam par rtog pa ni spyi'i bdag nyid nges pa la 'dus pa'i phyir ro/ /dngos po'i bye brag ma nges pas rnam par rtog pa mi 'byung ngo / /bdag gis rtogs pa dang bdag rtogs pa po zhes khyad par ni nges pa las tha dad ma yin te/ yid ni thams cad nges par byed pa'i bdag nyid yin pa'i phyir ro/ /gang gi phyir shes pa ni ldog pa du ma dang ldan pa/ ldog pa gang gis brtags pa de'i bdag nyid de yin no/ /nga rgyal ma yin pa las log pa de nyid nga rgyal du bstan pa dang / rnam par mi rtog pa ldog pa las de nyid rnam par rtog pa yin zhes yid gcig pu kho na yin gyi blo dang nga rgyal med do/ /las kyi dbang po rnams kyang gud na med de/ de rnams lus kyi dbang po la 'dus pa'i phyir ro/ /gang 'di ltar smra ba'i tshig dang / len pa dang / 'gro ba dang / 'dor ba dang / dga' ba lnga po'i dbye bas ni mi rigs te/ ma khyab pa dang thal ches par 'gyur ro/ /gang gi phyir rkang pa med pa sbrul la sogs pa rnams kyi 'gro ba med par thal bar 'gyur ro/ /so dang mig gi rdzi ma dag ldang ba dang / btsum pa dang / phye ba las yod pas las kyi dbang por thal bar 'gyur ro/ /gzhan yang dur ba'i mchi mas dur mo mngal len pa'i phyir mchi ma yang las kyi dbang por thal bar 'gyur ro/ /de bas las kyi dbang po rnams ni med do/ /rang bzhin yang ni de kho na nyid gud pa ma yin te/ de tsam las kyang thams cad skye ba'i phyir ro/ /skyes bu yang tshad mas ma grub pas ngo bo nyid med de/ de'i mthong ba la sogs pa'i bya ba'i 'brel pa ji ltar 'thad do/ / de ltar grangs phyogs gcig pa ma grub pas nges pa med do/ /de'i phyir na phung po lnga las dngos po gang yang med do/ /rang bzhin bems po yin pas bya ba ji ltar byed/ be'u 'o mas skyed pa yin zhes mi rigs te/ de la gang gi phyir ba'i sems kyis 'o ma sbyin pa la 'jug pa yin gyi 'o ma ni ma yin no/ /dper na ba mi 'dod na rang gi be'u la yang mi ster ba'i phyir ro/ /de'i phyir sems dang ldan pa kho na la 'jug pa dang ldog pa'o/ /gang gi phyir skyes bus mi byed do zhes khyed cag 'dod pas bya ba thams cad gang las 'byung / de ltar skyes bu med de dmigs pa'i mtshan nyid dang ldan pa mi dmigs pa'i phyir ro/ /dper na bum pas dben pa'i sa phyogs bzhin no/ /med pa'i skyes bu gang yin pa de la 'ching ba 'am thar pa ga las srid ri bong rwa la spong ba dang len pa bzhin no/ /rang bzhin yod pas skyes bu dang lhan cig tu bye brag yongs su shes par rigs so/ /de yul med pas skyes bu du ma dang de thar pa'i phyir rang bzhin du 'jug pa dang thams cad ces bya ba ni mi rigs so/ /de ltar grangs can pa rnams bkag go/ /rigs pa pa dang khyad par pa rnams ni rtag pa dang bems po dag tu smra ba bdag gi yon tan dgu log pa na tshig gi don bcu drug yongs su shes pa ni / tshad ma bzhis grub pa'i bdag shes pas grol ba'o/ /de ltar yongs su mi shes pas 'ching ba'o/ /de rnams la lan 'di yin te/ bdag med de dmigs pa'i mtshan nyid dang ldan pa mi dmigs pa'i phyir te/ bum pas dben pa'i sa phyogs bzhin no/ /gang yongs su shes pas grol ba yon tan dgu po de gang yin/ gal te 'di ltar 'dod na khyed cag phung po lnga kho na bdag yin na/ de ni mi rigs te/ phung po mi rtag pas bdag kyang mi rtag par thal bar 'gyur ro/ /yang na mi rtag pa ma yin te de dang gzhi mthun pa med pas 'on kyang phung po la bdag yod do zhes gzhi dang gzhi can gyi tha snyad du gnas zhes 'dod do zhe na/ de yang mi rigs te/ rtag pa dang mi rtag pa dag gi gzhi dang gzhi can mi 'thad pa'i phyir ro/ /yang na gzhi dang gzhi can gyi 'brel pa yod mod kyi 'on kyang rgyu dang 'bras bu'i 'brel pa kho na gzhi dang gzhi can gyi 'brel pa yin gyi gzhan ma yin no/ /'di ltar rten gyis brten pa'i ltung ba 'gog par byed pa'i mtshan nyid kyi gnas skabs skyed par byed pa yin te/ ltung ba'i chos dang mi ltung ba'i chos can tha dad pa yin phyir ro/ / dngos po'i gnas skabs gzhan skyed par byed pa ni bya ba yin te/ skad cig ma'i rang bzhin yod pa'i phyir ro/ /dper na snod la 'bras bu bzhin no/ /gzhi gang yin pa de nyid rgyu yin zhes bya ba'i gzhi can yang mi rtag par 'gyur ro/ /de yang mi rigs te/ bdag rtag pa yin pa'i phyir ro/ /bdag la phung po yod ces phyogs ni mi rigs te/ snga ma bzhin du skyon du thal bar 'gyur ba'i phyir ro/ /bya ba'i rab tu skyed pas rgyu nyams par mthong ba'i shin tu yang bdag mi rtag par thal bar 'gyur ro/ /rgyu de rnams ni nges par 'bras bu dang ldan par mi 'gyur te zhes khyod kyi bdag gi phung po rnams mi skyed par yang yang srid pa'o/ /phung po kho na bdag yin zhes gzhi mthun pa'i phyogs su sngar bshad pa'i skyon kho nar thal bar 'gyur te tha mi dad pa'i phyir ro/ /phung po dang bdag ni me dang bud shing bzhin du tha mi dad ce na de yang med do/ /gal te de ltar yin na bud shing nyams pa las mi skye ba ni me yin gyi gzhan ma yin no/ /de bzhin du bdag nyams pa las phung po skye bar 'gyur bas bdag yod pa ma yin no/ /yang na bdag yongs su gyur zhing phung po skye ba ma yin gyi/ 'on kyang phung po yongs su gyur pa las bdag tu 'gyur ro zhe na smras pa/ phung po ma gtogs pa'i bdag mi dmigs pas med do zhes rtag pa nyid kyang med do/ /bems po nyid kyang mi rigs te brag dang 'dra ba'i bems po la 'ching ba dang grol ba'i tha snyad mi 'thad pa'i phyir ro/ /de'i phyir yon tan dgu po mtho ris dang dmyal ba sgrub par byed pa ji ltar rigs/ /chos dang chos min bde sdug bsngal/ /'dod dang zhe sdang de bzhin te/ /rtsol ba shes pa 'du byed rnams/ /bdag yod pa la rtags rnams so/ /zhes 'byung ba de ni mi rigs te/ gang gi phyir rtags ni rtags can mtshon par byed pas de las tha dad pa yin nam/ tha mi dad pa yin/ gal te tha dad pa yin na dngos po thams cad la chos la sogs pa rtags su 'gyur ro/ /yang na tha mi dad pa yin na de'i tshe/ rang rig pa yin nam/ gzhan yin/ de las gzhan yin na/ rang gis mi rig pa'i chos la sogs pas dmyal ba dang mtho ris la sogs pa'i 'bras bu dang 'brel pa med do/ /rang rig pa yin na bems po nyid du ji ltar 'gyur zhes phan tshun 'gal ba'o/ /me dang du ba bzhin du bdag dang rtags dag gi 'brel pa yin na de yang chos la sogs pa'i bya ba rtogs par byed pa 'byung bas rtogs par bya ba rgyur 'gyur ba bdag 'gog par thal bar 'gyur te/ 'bras bu 'byung bas rgyu rnams nyams par 'gyur ba'i phyir bdag med bdag ces rigs pa pa dang bye brag smra ba rnams la lan no/ /'jig rten rgyang pan pas ni mngon sum kho na tshad ma yin gyi rjes su dpag pa ni ma yin no/ /ci'i phyir zhe na/ lag pa reg pas long ba yis/ /dka' ba'i lam du rgyug pa na/ /rjes su dpag pa gtsor gyur la/ /ltung ba dag ni dkon pa min/ /'bad pas don ni rjes dpag pa/ /mkhas pa mjal bar spro rnams kyi/ / shin tu mkhas pa gzhan rnams kyis/ /rnam pa gzhan du sgrub par byed/ /de bas na rjes su dpag pa med do/ /gang mngon sum gyis nye bar dmigs pa de yod do/ ji skad du/ ji srid 'tsho bar bde tshol zhing / /shi nas 'byung ba khyod la med/ /thal bar 'gyur ba'i 'chi ba la/ / slar yang 'byung ba ga las 'gyur/ /zhes 'byung ngo / /de bzhin du 'byung ba chen po bzhi 'gyur ba las sna tshogs 'di dag so sor snang ba yin gyi sems pa zhes bya ba gzhan gang yang med de/ gang gi longs spyod dang thar pa bsgrub par bya ba'i phyir/ rjes su dpag pa tshad ma nyid yin no/ /gal te 'byung ba chen po yongs su gyur pa mtshungs pa yin na yang / g.yo ba nyid dang mi g.yo ba nyid mi rigs so zhe na/ de la yang smras pa nges pa can gyi 'bru yongs su gyur pa las skyes pa'i chang gis ji ltar myos pa'i nus pa de bzhin du pha dang ma las skyes pa'i lus kyi gong bu'i sems kyi nus pa skye bar 'gyur ro/ /shing la sogs pa'i dngos po rnams de ltar ma skyes pas sems pa med do/ /'byung ba chen po yongs su gyur pa ni mtshungs pa kho na'o/ /de yang mi rigs te/ 'byung ba chen po ni bems po dang sems pa ni bems po ma yin pas shes pa de dag ni phan tshun rgyu gcig pa ni mi rigs so/ /rgyu mtshungs pa yin pas thams cad sems pa nyid du 'gyur ba'am sems pa med pa nyid du 'gyur ro/ /rgyu med na rtag tu yod pa 'am med pa nyid du 'gyur ro/ /ji skad du/ rgyu med gzhan la ltos med phyir/ /rtag tu yod pa'am med par 'gyur/ / dngos po yi ni ltos pa las/ /brgya la nyid du 'byung bar 'gyur/ /don gzhan rgyu mtshan can nyid ni/ /chos de gzhan pa nyid du 'gyur/ /phyi nas 'byung ba rgyu med nyid/ /'bras bu nges pa can mi 'gyur/ /zhes gsungs pas so/ /sems pa dang 'byung ba chen po rnams ni tha dad med cing tha dad med pa'i rgyu can no/ /gal te 'byung ba chen po las tha dad pa bdag gis sems pa khas ma blangs te/ 'on kyang de'i rang bzhin de rnams yin zhes zer ba na/ 'di yang bden pa ma yin te/ sems dang 'byung ba chen po dag ni tha dad pa'i tshad ma'i yul can yin pa'i phyir ro/ /dper na dbang po'i mngon sum gyis 'di nyid du so sor snang ba ni 'byung ba chen po'o/ /rang rig pa'i mngon sum gyis bdag nyid du so sor snang ba ni sems pa nyid do/ /'di nyid dang bdag nyid dbang po dang rang rig pa'i mngon sum gyi tshad ma dag dang gzhal bya rnams phan tshun tha dad pa'i phyir ro/ /chos rnams kyi 'di nyid kho na dbye ba'am dbye ba'i rgyu ste/ gang 'gal ba'i chos dang ldan pa'am rgyu'i dbye ba'o/ /de ltar na bde bar gshegs pa khyed rnams la dngos po gcig la ni tshad ma tha dad pa 'jug par mthong ngo / /'di lta ste/ dngos po nyid dang skad cig ma dag bzhin no/ / dper na mngon sum yan lag thams cad dang ldan pa ma nyams pa'i dngos po nges par byas pa'am/ slar yang de nyid du rjes su dpag pas skad cig ma'i ngo bor dpag par bya ba de bzhin du 'byung ba dang sems pa'i bdag nyid can dbyer med pa'i dngos po can la yang dbang po'i mngon sum dang rang rig pa'i mngon sum 'jug par 'gyur zhe na/ smras pa dbyer med pa'i dngos po mngon sum gyis yongs su gcod pa yin te/ 'on kyang yul gang du gang la the tshom yod pa de dag tu 'jal ba po de'i 'khrul pa tsam yang spang bar bya ba'i phyir rjes su dpag pa 'jug par 'gyur te/ dper na dngos po rtag par smra ba'i skad cig ma yin pa nyid kyi'o/ /khyed cag la yang 'khrul pa gang yang mi dgos te/ gang bzlog par bya ba'i phyir tshad ma gzhan btsal bar bya ste/ sems pa nyid 'byung ba chen po'i rang bzhin yin pa'i phyir ro/ /de'i phyir dbyer med pa'i dngos po la tha dad pa'i tshad ma 'jug par mthong ba'i phyir sems pa tha dad pa yod pa kho na'o/ /chang gis myos pa bzhin zhes dpe ni don dang mi ldan pa ste/ lhan cig mi dmigs pa'i phyir ro/ /gang gi tshe chang gi rdzas myong bar mi byed pa na de'i tshe myos pa'i nus pa ga la yod de/ /chang gis myos par gyur pa na yang lus kyi nang du thim pas myong ba'i nus pa gcig tu snang gi chang ni ma yin zhes lhan cig dmigs pa med do/ /de bzhin du yang 'byung ba dang sems pa dag la med do/ /dper na lus med pas kyang phra ba'i lus dang ldan pa'i sems pa yod pa nyid do/ /sems dang ldan pa ni lus thams cad du mthong ngo / /gzugs med pa'i khams la yang ting nge 'dzin gyi lus med par mi 'byung ba'o/ /gzhi dang gzhi can gyi 'brel pa ni lus dang / sems dag la 'brel pa rigs pa nyid do/ /gzhi 'jig pas gzhi can 'jig par ma mthong ste/ shing bcad pas bya rog bcad pa ma mthong ngo / /gal te de lta yin na gson pa dang 'chi ba'i tha snyad ji ltar 'gyur zhe na/ smras pa/ thog ma med pa'i dus nas sred pa dang ma rig pa'i bag chags kun 'byung gi bden pa'i rnam grangs can gyi dbang gis srog dang dbang po'i tshogs g.yo bar gyur pas tshe gnas par byed pa'i las kyi dbang gis phung po za ma tog gi nang du ji srid rnam par shes pa gnas pa de srid gson po yin zhes tha snyad 'byung ngo / /tshe gnas par byed pa'i las 'gog pas srog la sogs pa'i 'khor lo 'dzad pas 'chi'o zhes 'jig rten du grags so/ /rnam par shes pa ni yang dang yang du skye zhing 'gog par 'gyur zhes 'byung ba chen po las sems tha dad pa kho na'o/ /de'i phyir rnam par shes pa'i tshogs drug ni yod de de rnams kyi yang bde ba la sogs pa sgrub par byed pa dge ba dang mi dge ba yod pas mtho ris dang dmyal ba la sogs pa yod ces de rtogs par bya ba'i phyir rjes su dpag pa yang yod pa kho na'o zhes 'jig rten rgyang pan pa la lan no/ /mchod 'os rnams kyis kyang yongs su 'gyur ba dang / gang zag rtag pa yin zhes smra ba'o/ /de rnams kyi gzhung 'di yin te/ dus gsum gyi dngos po rnams ni gang ma 'ongs pa'i dus su gnas pa de dag de ltar 'byung bar 'gyur te/ gang yang da ltar byung ba de dag 'das pa'i dus nyid du 'gyur te/ 'das pa rnams kyang ma 'ongs par 'gyur zhing / ma 'ongs pa yang da ltar byung bar 'gyur zhes gang yang skye ba dang 'jig par mi 'gyur te gser bzhin no/ /dper na rna cha 'gyur bas gser dang gser yang 'gyur bas rna cha lta bur 'gyur zhes gser gyi rang gzugs nyams par mi 'gyur ro/ /de ltar yin pas zho yang rnga mor 'gyur ba dang rnga mo yang zhor 'gyur ro/ / bdag rtag pa la ni 'gyur bas kyang skyon med do/ /ji skad du/ snga ma'i chos gzhan spangs pa ni/ /gang tshe chos gzhan len gyur na/ /chos can de nyid las ma 'phos/ /yongs su gyur pa de bshad do/ /zhes 'byung ngo / /de la smras pa/ gal te 'gro ba dang mi 'gro ba'i bdag nyid 'gro ba bdag rtag pa'i ngo bo yin na/ de'i tshe ci'i phyir yongs su 'gyur te yongs su 'gyur ba zhes bya ba ni rang gi gzugs 'jig pa'i bdag nyid mi rtag pa'i mtshan nyid can gyi chos kyi khyad par ro/ /gang mi rtag pa de ji ltar bdag yin gal te gser dang mdud pa dang khu tshur gyi rigs pas rang gi ngo bo mi 'jig ces zer na/ de yang mi rigs te/ gser la khyad par mthong ba'i phyir ro/ /dper na gser ltar snang ba 'jig pas kyang de ni brtag pa shes pa rnams kyis sra ba dang kha dog la sogs pas byas pa'i khyad par 'gas nges par 'byung ngo / / gang khyad par 'byung ba de nyid mi rtag pa nyid do/ /gal te bdag ces bya ba tha dad pa dang tha mi dad pa yang rung ste/ de'i rang gi ngo bo 'jig par mi 'gyur zhe na/ de yang bden pa ma yin te/ tha dad pa dang tha mi dad pa ni phan tshun 'gal ba'o/ /gal te tha dad na ci'i phyir tha mi dad/ tha mi dad pa la tha dad pa yang mi rigs te/ tha mi dad pa yang yin la tha dad pa yang yin zhes 'gal ba'i chos brtags pa'i dbang gis bdag ji ltar brtag par 'gyur ro/ / de'i phyir na gang zag gi tha snyad ni brtags pa yin no zhes mchod 'os pa la lan no/ /zhi ba pa na re rtag cing thams cad byed pa kun shes pa 'dod pa dang bya ba dang ye shes kyi nus pa gsum gyi mthus skye ba dang gnas pa dang / 'jig par byed pa 'jig rten gsum gyi dbang phyug kho na rgyu yin zhes de nyid las thams cad 'byung zhing thim par 'gyur ro/ /brtan pa dang g.yo ba'i dbye bas dbye bar 'gyur ba'i 'bras bu'i dngos po gang yin pa de dag thams cad 'jig pa'i chos can de las 'byung zhing / rang nyid ni mi 'jig go/ /ji skad du/ 'dir ni gnas skabs gnyis yin te/ /bya ba byed pa nyid du grags/ /bya ba nyid ni zad gyur pa/ /byed pa nyid ni zad med do/ /zhes 'byung ngo / /sbyor ba ni gang dang gang rgyu rtag pa las byung ba de dag ni 'jig pa'i chos can du mthong ste/ dug gi shing gi myu gu dang 'dab ma dang 'bras bu dang yal ga bzhin no/ /rtag pa'i dbang phyug las 'byung ba thams cad 'jig pa'i chos can yin gyi rtsa bar gyur pa'i dbang phyug la 'jig pa med de nam mkha' bzhin zhes rang bzhin gyi gtan tshigs so/ /smras pa/ gal te des khams gsum skyed par byed na de'i tshe ji ltar rtag pa yin te/ byed pa dang rtag pa nyid phan tshun 'gal ba'i phyir ro/ /byed pa po yin na ci'i phyir sngon du mi byed/ lhan cig byed pa la ltos pa ci dgos te/ ltos pa dang bcas pa ni nus pa med pa'i phyir ro/ /yang na ltos pa mi dgos na de'i tshe ci ste byed de nam mkha' bzhin no/ /de'i phyir bya ba'i dus dang bya ba med pa'i dus dag yod pas byed pa dang mi byed pas phan tshun 'gal ba yin pas mi rtag pa kho na'o/ /yang na gal te dbang phyug des rang dbang du byed pa yin na de'i tshe sngon du bshad pa'i nus pa gsum la ltos pa mi rigs so/ /yang na dbang phyug las nus pa tha mi dad pa zhe na/ de'i tshe nus pa kho na byed pa yin gyi dbang phyug ni ma yin no/ /yang na dbang phyug byed pa po yin na nus pas ci zhig bya/ /yang na dbang phyug gi nus pas zhes 'brel pa gang zhig yin / /de'i bdag nyid la sngon du bshad pa'i skyon du thal bar 'gyur ro/ /rgyu 'bras kyi 'brel pas kyang dbang phyug la nus pa skyes pas dbang phyug 'gog par 'gyur ro/ /de yang 'dod pa ma yin te/ de rtag pa'i phyir ro/ /rgyu rnams ni nges par 'bras bu dang ldan par mi 'gyur zhes nus pa kho na rgyu ru 'gal ba med do/ /de bas na dbang phyug byed pa por mi 'gyur ro/ /'du ba'i 'brel pas de'i bdag nyid du 'thad ce na/ 'du ba zhes bya ba ci yin na snam bu dang snal ma tha dad pa dag la yang 'dir snal ma la snam bu zhes tha snyad yin zhe na/ 'o na ni snal ma las ma gtogs pa'i snam bu gang zhig yod/ gang la ltos pas de dag gi 'du ba'i 'brel par 'gyur/ chu dang zheng gi bdag nyid khebs pa la sogs pa'i bya ba byed pa snam bu yin zhe na/ de ni ma yin te/ de'i tshe de dag snal ma ma yin gyi snam bu gcig pu kho na don gyi bya ba byed pas so/ /gang don gyi bya ba byed pa de nyid bden pa'i don no/ /gal te snam bu ma yin na de'i tshe snal ma ma yin pas 'brel pa med de/ gnyis la 'brel pa yod pa'i phyir ro/ /yang na rgyu spun dang snam bu rang gi bdag nyid du gnas pa yin na de'i tshe/ 'brel pa med de rang dbang yin pas so/ /ji skad du/ gang phyir 'brel pa gzhan dbang ni/ /grub pas gzhan dbang gang zhig yod/ /de bas dngos po thams cad kyi/ /de nyid kyis ni 'brel pa med/ /ces 'byung ngo / /gal te 'du ba'i mtshan nyid kyi 'brel pas snal ma dang snam bu'i 'brel pa yin na de'i tshe 'du ba la gzhan 'du ba dang de la yang gzhan dang gzhan thug pa med par thal bar 'gyur ro/ /gal te ltos pa med na de'i tshe 'brel pa med pa des gang gi 'brel pa byed/ de bas na snal ma rnams dang snam bu dag tha dad pa kho nar snang bar gyur na/ de ltar yang ma mthong ste/ 'dir snal ma la snam bu yod ces sgra dang rnam par rtog pa tsam yin gyi tshad ma ma yin no/ /de bas na dngos po rnam par dpyod pa na snam bu zhes bya ba med do/ /snal ma kho na ni thags mkhan gyi yongs su las kyi nus pas gnas skabs de lta bu thob pa gang gis khebs pa la sogs pa'i bya ba byed pa'o/ /blo dman pas snam bu zhes rtog ste/ bum pa chag pa bzhin no/ /dper na rdza mkhan gyi sprul pa'i dus su 'jig pa'i chos can kho na bum pa skyes pa de 'jig par byed pa rgyu gzhan med do/ /tho ba la sogs pa phrad pa'i dus su bum pa chag go zhes 'jig rten pas sems so/ /bum pa de 'jig rten pa ma yin te/ dang po kho na de 'jig pas so/ /gyo mo la sogs pa'i 'bras bu'i gnas skabs gzhan skyes pa nyid do/ /de bzhin du snal ma rnams ni khebs pa la sogs pa'i las can la snam bur btags pa'o/ / de'i phyir 'du ba'i 'brel pa med pas dbang phyug dang nus pa gcig pa ma yin no/ /gal te nus pa des nus pa gzhan la ltos pa'am mi ltos pa yin grang / gal te ltos par byed na de'i tshe des kyang gzhan la ltos pa dgos zhes thug pa med par thal bar 'gyur ro/ /yang na ltos pa med na nus pa med pa nus pa nyid du mi 'gyur ro/ /de bas na skyed par mi byed do/ /nus pa dang dbang phyug tha dad pas skyon snga ma bzhin no/ /de nyid kyis na kun shes pa nyid kyang mi rigs te de la thams cad shes pa nyid gang yin zhe na/ thams cad shes pa na thams cad shes pa zhe na/ 'das pa la sogs pa'i dus gsum na gnas pa'i sems can thams cad kyi sems kyi spyod pa shes pa'am/ sems kyi rang bzhin shes she na/ gal te 'das pa la sogs pa shes na de'i tshe khyu mchog dang 'phel ba la sogs pas byas pa'i skar ma'i bstan bcos yongs su shes pas pha rol po'i sems kyi spyod pa dang dus gsum gyi mtshan nyid bdag cag gis kyang shes pas thams cad shes par thal bar 'gyur ro/ /yang na sems kyi ngo bo nyid shes pa yin na bdag yod pa'am med par shes she na/ bdag med par ni mi shes te/ de ltar mi 'dod pa'i phyir ro/ /bdag yod par shes she na/ ngo mi shes te bdag sngon du bkag pa'i phyir ro/ /dngos po rnams kyi bdag med pa kho na don dam pa yin te/ de yang le'u gnyis pa las 'chad par 'gyur te de'i phyir de ni thams cad shes pa ma yin no/ /byed pa yin du 'jug na des ni cig car du thams cad ci'i phyir skye ba dang 'jig par mi byed par rim gyis pa'i phyir mi rtag pa'o/ /ltos pa med pa'i dngos pos cig car dang rim gyis don gyi bya ba ma mthong bas nam mkha' bzhin du dbang phyug med do zhes dbang phyug 'dod pa la lan no/ /spyod pa la yang rnam pa gnyis te/ bya ba'i phyogs la gnas pa dang / ye shes kyi phyogs la gnas pa'o/ /de la bya ba'i phyogs la gnas pa la tshad ma brgyad de/ ji skad du/ mngon sum dang ni rjes dpag dang / /sgra las byung ba dpe dang bcas/ /don gyi shugs dang med nyid dang / / srid dang yod snyam de bzhin te/ /zhes bshad pas so/ /tshad med rnams kyis dngos po rnams la spyi dang khyad par du 'jog par byed do/ /mchod sbyin la sogs pa srog gcod pa dang bcas pas kyang mtho ris dang thar pa dag 'dod do/ /de yang mi rigs te/ de rnams kyi rigs sam/ gsal ba'am spyi dang ldan pa'am de'i 'brel pa'i sgra don yin zhe na/ de la spyi zhes bya ba gang yang dngos po las gud na med de dmigs pa'i mtshan nyid dang ldan pa de mi dmigs pa'i phyir bum pas dben pa'i sa phyogs bzhin no/ /de lta na gcig gi rnam pa rtog pa dang sgra rtog par byed pa'i rgyu ni spyi yin pas khyed kyis ji ltar sbed par byed ce na/ de ni bden pa ma yin te khyad par kho na khyad par gzhan las log pas rnam par rtog pa dang sgra gcig tu skyed par byed ces par gcod par byed pa des ci zhig bya'o/ /khyad par rnams ni sgra dang rnam par rtog pas so sor bstan mi nus pas sgra dang shes pa gcig pa nyid bskyed pa'i nus pa ji ltar 'gyur zhe na/ smras pa/ khyad par gyis ni 'jug pa gtso bo sgra dang rnam par rtog pa skyed par mi nus te/ 'on kyang rtog bcas kyi rnam par shes pa la so sor snang ba'i spyi tsam gyis so/ /de bas ji skad du/ bye brag gzhan ni so sor bkag /ma bkag pa dang de dag gi/ /brda yi bye brag gnas yin te/ /shes pa po yi 'dod dor ro/ /zhes 'byung ngo / /de'i phyir med pa'i spyi ni khas blangs te ji ltar bdag nyid smod par byed/ de bas spyi med de / khyad par yang sgra'i don ma yin te/ khyad par ni don gyi bya ba byed pa 'on kyang de skad cig ma can yin pas mi gnas pa'i chos can no/ /gang la ngo bo nyid kyis gnas pa med pa de nyid de ji ltar rnam par rtog pa'i shes pa'am sgra skyed par nus so/ / ji skad du/ sgra yis mtshon cha bshad pa ste/ tha snyad phyir ni de bshad do/ /de tshe rang gi mtshan nyid med/ /des na de la brda yang med/ /ces 'byung ngo / /'di la 'di ltar dpyad par bya ste/ ci rtog pa dang bcas pa'i shes pa dang sgra dag las khyad par sngon du 'byung ba'am khyad par las kyang sngon du rnam par rtog pa'i shes pa dang sgra dag 'byung ngam/ ci lhan cig tu skyes pa rnam par rtog pa'i shes pa dang sgra dang khyad par rnams yin nam/ gal te khyad par dang po skyes na de'i tshe de gang gi yul yin/ yang na phyis skyes pa yin na rnam par rtog pa dang sgra dag gi khyad par dang lhan cig tu phan tshun 'brel pa med do/ / rgyu de dag gis rgyu dang 'bras bu 'brel pa ni tshad ma ma yin te/ 'khrul pa dang ma nges pa'i phyir ro/ /khyad par sgra dang rnam par rtog pa rnams lhan cig tu 'byung bas gang gi gang yul yin zhes nges pa med do/ /ma nges pa la brjod par bya ba dang rjod par byed pa'i 'brel pa med de gau'u sgra dag bzhin no/ /gzhan yang gal te khyad par sgra'i don du brtags na des me'i sgra brjod pa'i dus su kha tshig par 'gyur ba dang / bum pa brjod pa'i dus su yang bum pas kha khengs par 'gyur ro/ /de ltar ni ma mthong ste/ de'i phyir na khyad par ni sgra'i don ma yin no/ /spyi med pas spyi dang ldan pa'ang med de ldan pa'i sgra ni 'brel pa byed pa'i tshig las 'byung ba'i phyir ro/ /'brel pa ni spyi bkag pa'i sgo nas sel ba yin te/ gnyis las 'brel pa 'dod pa'i phyir ro/ /de'i phyir sngar bshad pa'i rim pas 'brel pa rtag par byed na dngos po rnams kyi phan tshun 'brel pa gang yang med de thams cad rang nyid las grub pa'i phyir ro/ /dngos po thams cad rang bzhin gyis/ /rang rang ngo bor gnas pa ste/ /rang dang gzhan gyi ngo bo las/ /gang phyir ldog pa la brten pas/ /de phyir dngos rnams gang gang las/ /ldog pa de yi rgyu mtshan ni/ /spyi yi dbye bar rab brtags pas/ /de yi khyad par gzung bar byed/ /de phyir gang zhig chos gzhan gyi / /khyad par yang dag rtogs 'gyur ba/ /de las gzhan gyis de mi rigs/ /des na tha dad tha snyad yin/ /gzhan dbang nyid dang 'brel pa yin/ /zhes bya ba la sogs pas 'brel pa med par bshad do/ /de ltar spyi la sogs pa bkag pas dpyod pa pa rnams la sgra'i don nyid med do zhes don gang la tshad ma brgyad don dang ldan par mi 'gyur te gzhal bya med pa'i phyir ro/ /gang gi phyir tshad ma las gzhal bya grub ces bshad do/ /de bas na yul med pa'i sgra rnams kyis don gang rjod par byed do/ /gzhan yang dpyod pa pa rnams kyi sgra'i don ma grub pas kyang khas blangs te lan smra bar bya ste/ re zhig bya ba'i phyogs su ni mchod sbyin dang khrus dang brtul zhugs dang smyung ba dang dka' thub la sogs pa'i mtshan nyid mtho ris dang thar pa'i 'bras bu thob pa'i phyir/ rnam par 'tshe ba'i bdag nyid kyi las ra gsod pa la sogs pa 'gal ba mi rigs te/ mtho ris ni bde ba la longs spyod pa'i mtshan nyid de/ bde ba sbyin pas thob par 'gyur gyi srog chags gsod pas ni ma yin no/ / yang na cho ga mkhan gyi sngags kyi mthus de sgrol ba yin na/ de ci'i phyir sgo thams cad bkag nas sgrol ba yin te/ ci sngags kyi mthu med dam yang na dbang po bkag pa gcig pu gtso bo yin na de'i tshe sngags don med do/ /sngags dang bcas pas rlung bkag par byed pa snying rjes gsod pa yin zhe na/ de lta na shin tu yid du 'ong ba rang gi nye ba rnams ci'i phyir mi gsod/ de ni des mi 'dod ce na/ phyugs kyis kyang 'dod pa ma yin zhes ci'i phyir rnam par 'tshe/ de bas rnam par 'tshe ba'i bdag nyid can me mchod pa'i las la sogs pa sdig pa yin pa'i phyir mtho ris kyi rgyu ma yin no/ /ji skad du/ srog chags gsod pa mi bzad pa/ /drag po khrag gis lag bsgos pa/ /rtag tu sdig pa'i las spyod pa/ /de dag ngu 'bod skye bar 'gyur/ /zhes 'byung ngo / /gzhan yang rtog pa dang ldan pa'i phyir thar par mi 'gyur te/ gang gi bya ba'i phyogs ni me mchod pa dang / kha don dang khrus la sogs pa dang ldan pa'i phyir te rtog pa dang bcas pa'o/ /thams cad 'dor ba'i rang bzhin ni mi rtog pa ste thar pa'o/ /de bas na rtog pa dang bcas pa'i lam gyis mi rtog pa'i thar pa thob par mi 'gyur te/ rgyu mi 'dra ba'i phyir ro/ / nas kyi sa bon las sA lu'i 'bras bu mi 'byung ba bzhin no/ /de bas na rtog pa thams cad yongs su spangs pa'i ting nge 'dzin gyis rtag tu dri ma med pa zag pa med cing rnam par mi rtog pa'i thar pa thob par 'gyur ro/ /de bas khyed cag gi bya ba'i phyogs su 'bras bu gang yang thob par mi 'gyur ro zhes dpyod pa pa rnams kyis gtsang sbra la sogs pa ngal ba don med du 'gyur ro/ /ji skad du/ khrus kyis dge 'dod rigs kyis brnyas pa dang / /rig byed tshad mar byed pa kha cig yod/ /sdig pa zad phyir dka' thub la brten pa/ /blo med rnams kyi blun po'i rtags lnga'o/ /zhes bya ba'i phyogs kyi dpyod pa pa rnams la lan no/ /ye shes kyi phyogs su yang chos gos la sogs pa 'dzin pa ni 'gal ba'o/ /rig byed kyi mtha' gsang bar smra ba bram ze rnams kyi thams cad 'dor ba'i ye shes can gyi phyogs su chos gos 'dzin pa dang / gtsug phud 'dzin pa dang / dbyug pa gsum pa dang / thig le gsum spras pa dang / kr-iSh+Na sa ra'i pags pa gyon pa dang / yul nas yul du 'khyam pa la sogs pa ni 'gal ba'o/ /dang po dam pa'i rnal 'byor la gnas pa'i brtul zhugs pa rnams kyis de dag thams cad spyod pa ni chos gos la sogs pas de kho nyid thob pa ma yin te spros pa dang bcas pa'i phyir ro/ /spros pa med pa'i rgyus spros pa med pa'i 'bras bu bskyed pa yin gyi spros pa dang bcas pa ni ma yin no/ /ji skad du/ gzhan rkyen med cing zhi ba ste/ /spros pa dag gis ma spros pa/ /tha dad don min rnam mi rtog /'di ni yang dag mtshan nyid do/ / zhes 'byung ngo / /de'i phyir rang gi phyogs khas blangs pa ma grub ste tshad ma med pa'i phyir ro/ /gzhan yang de rnams kyi phyogs ni sna tshogs kyi ngo bo dngos po thams cad gang snang ba de ni tshangs pa nyid kho na'o/ /dper na bum pa dang re lde la sogs pa phyi rol du snang ba gang yin pa de dag rnam par dpyod pa na rang gzugs su yod pa ma yin te snang ba gud na med pa'i phyir ro/ /snang ba yang bdag nyid kyis yod kyi 'di nyid kyis ni rig pa ma yin no/ /bdag nyid dang 'di nyid ces phan tshun 'gal ba'o/ /de'i phyir snang bar gyur pa'i bdag nyid kyis bsdus pa'i dngos po snang ba gang yin pa de nyid tshangs pa nyid do/ /rtag tu dga' ba'i bdag nyid bag chags sna tshogs dang bcas pa de nyid kyi dbye ba 'di dag go/ /ji skad du/ tshangs pa'i tshul ni dga' ba ste/ /zhes bya ba la sogs pa 'byung ngo zhes tshangs pas smra ba rnams kyi rang gi phyogs te de mi rigs pa ni tshad ma med pa'i phyir ro/ / tshangs pa nyid yod pa'i tshad ma mthong ba'o/ /re zhig mngon sum yang ma yin te mi rtog pa'i phyir ro/ /tshangs pa'i sna tshogs pa nyid ni rnam par rtog pas 'jog par bya bas so/ /de lta na gzhan yang rtog pa dang bcas pa'ang mngon sum ma yin nam/ ji skad du/ dang po mthong ba'i shes yod de/ / rtog pa thams cad rnam bral ba/ /byis pa lkugs pa dang 'dra ba'i / /shes pa dag pa'i dngos las byung / /de las gzhan pa'i dngos po ni/ /skyes sogs chos bcas gang gis ni/ /blo yis rtogs pa de nyid kyang / /mngon sum nyid du 'dod pa yin/ /zhes 'byung ngo / /de la smras pa/ dang po mi rtog pa kho na tshad ma yin te/ gang gi rang gi mtshan nyid kyi don gyi bya ba byed nus pa yul dang rgyu yin pa de nyid mi rtog pa tshad ma'o/ /de nyid kyis bya ba byas pa'i phyir gzhan ni brtags pa la brtag pa dang mtshungs pa don med pa ni tshad ma ma yin no/ /don dang phrad par byed pa ni ma yin te/ bstan pa'i don la skyes bu 'jug pa na de thob pas tshad ma'i bya ba de nyid du rdzogs so/ /de lta bu'i mtshan nyid dang po kho na la yod kyi/ gnyis pa la ma yin no/ / de'i phyir mi rtog pa'i bdag nyid mngon sum gyi ni de yul ma yin no/ /gang gi yul yin pa de ni tshad ma ma yin no zhes tshangs pa nyid la yod pa la mngon sum mi 'jug go/ /rjes su dpag pa yang de bzhin te gang gi phyir rjes su dpag pa ni rtags dang rtags can gyi 'brel pa sngon du 'gro bar 'jug par 'gyur te/ du ba dang me bzhin no/ /tshangs pa de'i 'bras bur gyur pa'i rtags gang yang ma mthong ste/ gang gis de mthong ba med par mi 'byung bas rtags can du gyur pa tshangs pa nyid dpag par bya'o/ /dngos po thams cad de las 'byung ba yin zhes 'bras bu mthong bas de dpag par bya zhe na/ de yang mi rigs te/ gang 'bras bu skyed par byed pa de ni rgyu nyid de/ 'bras bu byung bas de 'jig par 'gyur bas rtag pa ma yin no/ /tshangs pa nyid kyi tshul ni khyed cag gi phyogs su rtag par 'dod pa ma yin nam/ re zhig rgyu nyid du 'dod na yang / rang dang 'dra ba'i 'bras bu ci'i phyir mi skyed phyin ci log par skyed pa la rigs pa ma mthong ngo / /dper na lha la sogs pa kha cig bde bar gyur pa dang / yi dags la sogs pa kha cig sdug bsngal can du mthong ba'i phyir ro/ /de'i sna tshogs pa nyid de lta bu yod ce na/ smras pa sna tshogs pa nyid ni de dang tha dad pa yin nam/ tha mi dad pa yin/ tha dad pa yin na tshangs pa de nyid kyis der mi 'gyur ro/ /dbyer med pas de'i bdag nyid du gyur pa'i ngo bo gang yin pa de dang 'dra ba dga' ba'i gzugs can du 'gyur te/ tshangs pa'i gzugs ni dga' ba ste/ /zhes bshad pas so/ /de ltar yang ma mthong ste de'i phyir na 'bras bu'i rjes su dpag pa med do/ /yang na skyon de bsal bar bya ba'i phyir rgyu'i rjes su dpag pa rtog par byed na/ dper na/ bung ba ma he sbrul dag dang / /ta ma la yi 'od nag can/ /sprin rnams de dang 'dra ba ni/ /char 'bab nam yang slu mi byed/ /ces 'byung ba de bzhin du tshangs pa thams cad kyi bdag nyid gal te med na de'i tshe sna tshogs pa nyid kyang 'byung bar mi 'gyur ro/ /de la smras pa/ rgyu'i rjes su dpag pa ni slu ba yin pa'i phyir nges pa med pa nyid do/ /dper na/ phyogs bcur khyab pa'i shin tu nag po'i mdog can sprin rnams las kyang char res 'ga' mi 'byung ngo / /nyi ma dro ba'i dus su sprin chung ngu las kyang char pa 'byung bar mthong bas rgyu'i rjes su dpag pa ni slu ba kho na'o/ /des ni grog mo 'byung ba dang nya 'phar ba la sogs pa bkag go/ /spyi ru mthong ba'i rjes su dpag pa ni rtog par byed pa yin zhe na/ dper na khang bzangs la sogs pa brtsigs pa'i sngon du 'gro ba 'phel bar mthong bas nags kyi sman la sogs pa rnams kyi skye ba sngon du 'gro ba'i 'phel ba rjes su dpag par bya'o/ /de ltar tshangs pa'i sna tshogs pa nyid kyis dngos po sna tshogs pa nyid do/ /tshig gi don sna tshogs pa nyid kyang tshangs pa'i sna tshogs pa nyid rjes su dpag par bya'o/ /de yang mi rigs te/ gang gi phyir tshangs pa sna tshogs pa smra ba pos tshangs pa'i rang bzhin can dngos po rnams 'dod do/ /spyir mthong ba'i rjes su dpag pa'i phyogs su tha dad par thal bar 'gyur ro/ /ci'i phyir zhe na/ tshig gi don rnams gud du grub pa yin pas tshangs pa'i sna tshogs pa nyid nges pa dang tshangs pa yang gud na grub pas tshig gi don sna tshogs tha dad pa'o/ /de las slu ba nyid kyis kyang nges pa med de/ de yang dper na spyir mthong ba'i rjes su dpag pa ni slu bar mthong ste/ khang bzangs la sogs pa'i 'phel ba skye ba sngon du 'gro bas nags tshal la sogs pa'i 'phel ba rtogs par mi byed do/ /nags tshal la sogs pa kha cig ni chu 'bab pas kyang 'phel bar mi 'gyur ba dang / kha cig kyang mig 'phrul mkhan gyis sprul pa yang mthong ngo / /de bas na rjes su dpag pa des nges pa med do/ /sgra las byung ba yang tshad ma ma yin te/ tshangs pa'i sna tshogs pa nyid la sngon du bshad pa'i rigs pas sgra dang don dag gi 'brel pa med pa'i phyir ro/ /don tsam yang so sor bstan par sgras mi nus na de'i sna tshogs pa nyid ji ltar brjod/ spyi'i rnam pas nus kyang sgra'i rang gi mtshan nyid dang lhan cig tu don gyi rang gi mtshan nyid la brjod pa dang rjod par byed pa'i mtshan nyid med do/ /spyi'i yang gong du bkag pas ji ltar de kho bos tshad mar gzung / skad cig ma yin pas kyang nges pa med de/ gang gi phyir sgra ni gnas dang byed pa dang skyes bu'i rtsol ba las 'byung bas brjod ma thag tu 'jig par 'gyur ba de rang gzugs su yod par mi 'gyur bas ji ltar don rtogs par byed de / ga dang u dang tsheg drag rnams re re lhan cig tu mi dmigs pa'i phyir ro/ /rna ba'i dbang pos gzung bar bya ba dbyangs tsam ni rtogs par byed pa yin te/ dril bu'i sgra bzhin no zhe na/ smras pa yi ge dang tshig dang ngag rnams kyis rang gi ngo bo dor nas don gzhan gyi dbyangs tsam mi dmigs so/ /de rnams zhig nas dbyangs ni mi 'jig par ji ltar 'gyur/ de'i phyir na dbyangs tsam gyi tha snyad ni btags pa yin gyi nges pa'i rgyur ni ma yin no/ /dpe yang tshad ma ma yin te gang gi phyir de ni chos gsum dang ldan pa yin te/ dpe dang dpe las byung ba dang thun mong gi chos kyis so/ /dper na ba dang 'dra ba ni ba men no/ /de la ba men mthong ba'i skyes bus pa la gnas pa'i lkog shal la sogs pa'i chos mthun pa'i phyir ba men ma mthong ba'i skyes bu kha cig rtogs par byed de/ ba dang 'dra ba ni ba men no zhes pas so/ /des ni de'i ba men yin zhes khong du chud do/ /de bzhin du 'dir tshangs pa'i sna tshogs pa nyid dngos po sna tshogs pa nyid kyis dpe ma yin pa dang / de la sogs pas kyang ma yin te de dang mthun pa'i chos med pa'i phyir ro/ /tshangs pa ni gzugs med pa dang / dngos po rnams gzugs can yin pas gang gis dper bya'o/ / don gyi shugs kyis kyang nges pa med do/ /dper na lha sbyin chen po nyin par mi za zhes bya bas don gyi shugs kyis mtshan mo za zhes nges so/ /de ltar tshig gi don rnams la sna tshogs pa med do/ /don gyi shugs kyis tshangs pa la yod do zhes mi rigs te/ dngos po rnams la sna tshogs pa nyid dmigs pa'i phyir ro/ /gcig bkag pas chos gzhan nges par dmigs pas ni don gyi shugs so/ /de yang dngos po dang tshangs pa dag la med do/ /dngos po med pa yang tshad ma ma yin te/ gang gi phyir de la rnam pa bzhi yod de/ snga na med pa dang 'jig pas med pa dang phan tshun med pa dang shin tu med pa'o/ /de la snga na med pa ni 'o ma zhor gyur pa'o/ / 'jig pas med pa ni bum pa tho ba dang phrad pas 'jig pa'o/ /phan tshun med pa ni snam bu dang bum pa dag go/ /shin tu med pa ni ri bong gi rwa la sogs pa'o/ /dngos po med pa ni yul la dngos po med pa tshad ma yin gyi dngos po yod pa'i yul du ni ma yin no zhes ji ltar des ni dngos po'i chos ni tshangs pa'i sna tshogs pa nyid sgrub par byed de/ dgag pa gtso bo yin pa'i phyir ro/ /zho la mar srid pa dang / til 'bru la mar khu zhes srid pa ni tshad ma ma yin te/ sa mi gshin pa las skyes pa'i til 'bru rnams la mar khu mi 'byung bas so / /phal cher la dgongs pa ni nges par byed pa'i rgyu ma yin te slu ba'i phyir ro snyam pas yod pa yang tshad ma ma yin te/ shing 'di la gnod sbyin yod pa dang / khang pa 'di la sha za yod do zhes nges pa med do/ /res 'ga' de nas gzhan du 'gro ba'i phyir dang sngags shes pa'i skyes bu'i nus pa'i 'brel pas gnod sbyin la sogs pa bskrad pa rnams der mi gnas pa'i phyir ro/ /de bzhin du 'dir tshangs pa'i sna tshogs pa nyid dngos po rnams la ma nges so/ /ma mthong ba rang bzhin gyis bskal pa sha za la sogs pa la snyam pa zhes bya bas nges par byed par rigs so/ / sna tshogs pa ni mngon sum gyis snang na snyam pas ji ltar nges par byed do/ /de bas na tshad ma brgyad kyis ma grub pa'i tshangs pa nyid dang de'i sna tshogs pa nyid du gnas pa dad pa dam pa pa rnams ji ltar grol bar 'gyur/ /des ni tshangs pa zhi ba smra ba'i phyogs kyang bkag go /gal te tshangs pa nyid dngos po'i sna tshogs ma skyes pa zhi ba yin no/ /ji ltar dngos po 'di rnams rnam pa sna tshogs su snang ngo / /de rnams kyang zhi ba yin zhes 'dod pa rigs pa ma yin te/ tshad ma dang 'gal ba'i phyir ro/ /gang gi phyir mthong ba la mi rigs pa zhes bya ba med do/ / 'khrul pa kho na dngos po rnams kyi sna tshogs pa yin zhe na/ 'khrul pa ni ci de las tha dad pa'am tha mi dad ce na/ tha dad pa yin na 'khrul pa dang tshangs pa nyid gnyis ka yod ces tha dad pa'o/ /tshangs pa ni gnyis su med pas 'gal lo/ /tha mi dad pa ni tshangs pa nyid 'khrul pa'i rang bzhin du song bas de kho na nyid du mi 'gyur ro/ /de ni 'khrul pa med pa yin du 'jug na ci'i phyir 'khrul pa skyed par byed pa yin te/ 'gyur ba med pa la spros pa med de nam mkha' bzhin no/ /de bas na zhi ba'i tshangs pa nyid smra ba'i phyogs ni mi rigs so zhes tshad ma ba dpyod pa pa'i lan no/ /de rnams bstan pa drug la gnas pa phyin ci log pa'i blo can du bshad do/ /nges pa'i blo can ni rnam pa bzhi ste/ nyan thos dang rang sangs rgyas dang rnal 'byor spyod pa dang dbu ma'i dbye bas so/ /de la nyan thos pa'i gzhung ni bden pa bzhi ste/ sdug bsngal dang / kun 'byung ba dang / 'gog pa dang / lam mo/ /de la bden pa gnyis ni rgyu dang 'bras bu'i dbye bas gnas pa ni 'khor ba'o/ /bden pa yang gnyis ni rgyu dang 'bras bu'i bye brag gi mya ngan las 'das pa'o/ /de la 'dod pa dang gzugs dang gzugs med pa'i dbye bas nyon mongs pa dgu bcu rtsa brgyad mthong ba dang / bsgom pa'i lam gyis spangs te/ 'gog pa'i snyoms par zhugs pa gtsor gyur pa rang gi don tsam dang ldan pa nyan thos kyi byang chub thob par 'gyur ro/ /de rnams kyi re ba ni gzhan gyi don gyis ci zhig bya/ bdag gi don ni bsgrub bya yin/ /zhes bya ba la sogs pa 'byung ngo / /de rnams gang zag la bdag med par 'dod cing / phung po la sogs pa chos rnams la bdag yod par 'dod cing gzung ba dang / 'dzin pa la zhen pa'o/ /de'i phyir de rnams kyi grol ba rnam par dag pa ma yin pas sngags kyi theg pa chen por snod ma yin par bshad do/ /ji skad du/ dge slong nyid du gang gnas pa/ /gang yang rtog ge ba rnams mi/ /rgan por gyur pa gang rnams dang / /de la de nyid bstan mi bya/ /zhes gsungs so/ /mdo sde pa zhes bya bas rjes su dpag pas phyi'i don 'dod de/ phyi'i don ni gcig dang du mas ma grub pas med pas kyang rnam par shes pa'i skye ba gzhan du na mi 'gyur bas rjes su dpag pa yin te/ mig gi dbang po bzhin no zhes rjes su dpog pa'i mdo sde pa phyi'i don smra ba rnams kyis snga ma bzhin du thar pa ni rnam par ma dag pas de dag kyang sngags kyi snod du rung ba ma yin no/ /rnal 'byor spyod pa ba ni rnam pa gnyis te/ rnam pa dang bcas pa smra ba dang / rnam pa med pa smra ba'o/ /de la dngos po thams cad phyi rol du so sor snang ba rnams rang gi rnam pa yin te/ rang gi rnam par snang ba'i phyir ro/ /gang dang gang rang snang ba'i dngos po de dang de yod de blo bzhin no/ /gzhan gyi snang ba bum pa la sogs par rang nyid kyis yod pa ma yin te/ gzhan gang yin pa de rnam par shes pa yin no/ /don ni gcig dang du mar ma grub pas zhes grags so zhes smra ba de'i gzhung ni mi bden te/ gal te don med na gang la ltos nas rnam par shes pa 'byung / rnam par shes pas na rnam par shes pa'o/ /de bas na rnam par rig pa smra ba rang gi tshig dang 'gal ba 'di yin te/ rnam par shes pa 'dod pa dang don 'gog par byed pa'i phyir ro/ /gal te gzung ba dang 'dzin pa rnam par rtog pa 'khrul pa yin na de'i tshe rnam par rig pa yang 'khrul par 'gyur ro/ /des khas blangs na yang de'i thar pa ma dag par 'gyur ro/ /yang na ci'i phyir rnam par ma dag /bdag cag rnams kyi ni mtshan nyid gsum ste/ kun brtags dang / gzhan dbang dang / yongs su grub pa'o/ /de la kun brtags ni yang dag pa ma yin pa'i kun du rtog pa'i mtshan nyid de/ gzung ba dang 'dzin pa'i rnam par rtog pa'o/ /gzhan dbang zhes bya ba ni de'i rnam pa so sor snang ba'i 'khrul pa'i gzhi'o/ /yongs su grub pa zhes bya ba ni gnyis kyis stong pa'i mtshan nyid do/ /dngos po shes don de yi rnams / /de med pa nyid mkhas pa yis/ / kun brtags la sogs mtshan nyid ni/ /go rims bzhin du shes par bya/ /zhes 'byung ngo / /de la mtshan nyid gnyis med pas yongs su grub pa'i ngo bo nyid ni spros pa'i dri ma thams cad dang bral ba/ chos kyi dbyings kyi ye shes zhes bya ba rnam par dag pa'i thar pa yin zhe na/ de yang bden pa ma yin te/ rnam par dag pa zhes bya ba ni mdud pa thams cad dang bral ba'i stong pa nyid du bshad kyi/ /rnam par rig pa ni ma yin no/ /de'i dmigs pa ji srid blo la rgyu ba de'i bar du rnam par ma dag pa'o/ /ji skad du/ 'byung ba che sogs rnam shes la/ /bstan pa de dag 'gog par 'gyur/ /de ni ye shes la thim zhing / /nges par phyin ci log pa yin/ /zhes 'byung ngo / /kam pa la'i zhal snga nas kyis/ /re zhig thams cad brdzun yin te/ /ji srid ji srid rnam par rtog /gang zhig rtog par mi byed pa/ /de yi bden pa de nyid yin/ /zhes gsungs so/ /rnam rig tsam nyid 'di dag ces/ /de ltar nye bar dmigs gyur pa/ /mdun du cung zad 'jog byed na/ /de tsam la yang gnas mi 'gyur/ /zhes khyed cag rnams kyi rang gi tshig dang 'gal ba'o/ /'o na ji ltar 'gal ba yin zhes 'dod na/ smras pa/ gang tshe shes pa'i dmigs pa ni/ /dmigs pa nyid du mi 'gyur na/ /de tshe rnam rig la gnas shing / /gzung ba med pas de mi 'dzin/ /zhe na/ de yang bden pa ma yin te/ gang gi phyir de lta bus kyang stong pa nyid ni mngon par rtogs pa ma yin te/ rnam par rig par 'jig par byas pa'i phyir de yang sngon du bkag zin to/ /ji skad du/ gal te shes pa shes bya'i sngon/ /ci la dmigs te de byung ste/ /shes bya zhig pas shes 'byung na/ /ci la dmigs te de 'byung 'gyur/ /zhes 'byung bas shes pa dang shes bya dag la 'brel pa med pas rnam par shes pa'i snang ba med do/ /de'i phyir de lta bu'i lta ba can sngags kyi theg pa chen po la mi 'jug pas rjes su gzung bar bya'o zhes rnam par rig pa smra ba po rnams la lan no/ /dbu ma pa zhes bya bas gzung ba dang 'dzin pa'i rnam par rtog pa dang bral ba 'ba' zhig tu dri ma med pa'i mtha' yas pa nam mkha' dang mtshungs pa/ dngos po thams cad kyi de kho na nyid ces bya ba 'dod de rnam par thar pa gsum gyis rtogs par bya ba'i phyir ro/ /de bas na dngos po thams cad stong pa nyid de/ gcig dang du mas bral ba'i phyir ro/ /dbang phyug la sogs pa'i rgyu mtshan dang bral ba dngos po rnams yin te dbang phyug la sogs pa dpyod pa na mi dmigs pa'i phyir ro/ /dngos po thams cad smon pa med pa yin te/ smon par bya ba ma grub pas so/ /'di la sbyor ba ni dngos po thams cad stong pa yin te gcig dang du mas bral ba'i phyir gzugs brnyan bzhin no/ /de la gal te/ chos mthun pa'i dpes ngo bo med pa nyid dmigs na de bzhin du yang de tsam las gtan tshigs kyi 'brel pa nges so/ /rjes su 'gro ba nye bar len pa'i ldog pa don gyis rtogs pa'i phyir ro/ /mkhas pa rnams kyis gtan tshigs gcig pu tsam gyis nges pa yin gyi yan lag lnga'am yan lag gsum gyi tshig gi sbyor ba bstan mi dgos so/ /de dngos dang ni rgyu dngos dag /dpe yis de ni mi rigs la/ /smra ba yin gyi mkhas pa la/ /gtan tshigs gcig pu smra ba yin/ /de'i phyir phyogs dang dpe la sogs pa'i tshig rgyas pa spangs te rjes su 'gro ba tsam gyis kho bo cag gi stong pa nyid du 'grub po/ /gal te gcig dang du mas bral ba tsam gyis stong pa nyid nges par byed na/ de ci'i phyir bye brag bco brgyad pa'i stong pa nyid gsungs she na/ smras pa 'dir ni gdod ma nas ma rig pa'i bag chags kyi shugs kyi dbang gis ji srid rnam par rtog pa de dang de dag gi rgyu ba spang ba'i don du 'bad pa bya ba yin te/ nang stong pa nyid dang / phyi stong pa nyid dang / phyi nang stong pa nyid dang / stong pa nyid stong pa nyid dang / chen po stong pa nyid dang / don dam pa stong pa nyid dang / 'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang / dor ba med pa stong pa nyid dang / rang bzhin med pa stong pa nyid dang / chos thams cad stong pa nyid dang / rang gi mtshan nyid stong pa nyid dang / mi dmigs pa stong pa nyid dang / ngo bo nyid stong pa nyid dang / ngo bo med pa'i rang bzhin stong pa nyid do/ /nang gi chos ni mig la sogs pa nyid kyis stong pa yin no zhes stong pa nyid do/ /phyi'i chos ni gzugs la sogs pa ste/ de dag gzugs la sogs pa stong pa nyid kyis stong pa zhes phyi stong pa nyid do/ /nang dang phyi'i chos ni nang dang phyi'i chos nyid kyis stong pa ste phyi nang stong pa nyid do/ /chos thams cad kyis stong pa gang yin pa de nyid kyis stong pa yin no zhes stong pa nyid kyi stong pa nyid do/ /shar la sogs pa'i phyogs rnams la shar la sogs pa'i phyogs nyid kyis stong pa yin no zhes stong pa chen po'o/ /don dam pa ni mya ngan las 'das pa ste/ de yang mya ngan las 'das pa stong pa nyid kyis stong pa yin zhes don dam pa'i stong pa nyid do/ /'dus byas pa ni khams gsum ste/ 'dod pa dang gzugs dang gzugs med pa'i khams so/ /de de rnams kyis stong pa yin no zhes 'dus byas stong pa nyid do/ /skye ba dang gnas pa dang 'jig pa dang bral ba ni 'dus ma byas pa ste/ de de nyid kyis stong pa ni 'dus ma byas kyi stong pa nyid dang / rtag pa dang chad pa dag ni mtha'o/ /de dag nyid kyis stong pa ni mtha' las 'das pa stong pa nyid do/ /gang thog ma dang ma med pa de la bden pa'i dngos po med de/ 'gro ba dang 'ong ba med cing thog ma dang bar dang mthas stong pa'i phyir thog ma dang tha ma med pa'i stong pa nyid do/ /dor ba ni spang ba ste de las log pa ni dor ba med pa ste/ de nyid kyis stong pas na dor ba med pa'i stong pa nyid do/ /chos thams cad kyi rang bzhin gang yin pa de ni sus kyang ma byas pa dang 'dus ma byas pa yang ma yin te/ de rang bzhin gyis stong pas na/ rang bzhin gyis stong pa'o/ /chos thams cad ni 'dus byas pa dang 'dus ma byas pa de dag de nyid kyis stong pas na chos thams cad stong pa nyid do/ /chos thams cad ni rang rang gi gzugs la sogs pa'i mtshan nyid kyis stong pas na rang gi mtshan nyid stong pa nyid do/ /'das pa dang ma 'ongs pa dang da ltar byung ba nyid kyis stong pas na mi dmigs pa stong pa nyid do/ /sbyor ba las byung ba'i chos kyi mtshan nyid med de rten cing 'brel par 'byung ba las 'byung ba'i phyir ro/ / sbyor ba ni sbyor ba nyid kyis stong pas na ngo bo nyid do/ /rang bzhin gyis stong pas na rang gi ngo bo stong pa nyid do/ /dngos po med pa'i rang bzhin dngos po de de nyid kyis stong pas na ngo bo med pa'i rang bzhin stong pa nyid do/ /de'i phyir stong pa nyid bco brgyad bstan to/ /de bas na rnam par thar pa gsum thob pas rdo rje lta bu'i ting nge 'dzin gyi rjes thogs la sa bcu gnyis pa kun tu 'od kyi sa la byang chub sems dpas byang chub thob bo zhes de nyid yang dag par rdzogs pa'i sangs rgyas nyid do/ /phyogs der nyan thos la sogs pa'i 'dod pa'i dngos po'i mngon par zhen pa med de/ de rnams kyi stong pa nyid mngon du gyur pa la spangs pa'i phyir ro/ /ji skad du/ dngos po gos dang 'dra ba rnams/ /rnam pa du mas tha dad pa/ /stong pa nyid kyi mes tshig na/ /thal ba'i dbye ba gang yang med/ /snod dang sems can zhes bya ba'i/ /'jig rten gnyis po 'di bsregs nas/ /de yang rang nyid de nyid du/ /me sgron bzhin du zhi bar 'gyur/ /zhes 'byung ngo / /sngon gyi smon lam dang snying rje chen pos bskul bas sems can gyi don 'grub pa yin pas chad pa'i phyogs med do/ /spros pa thams cad dang bral ba'i ting nge 'dzin la rtag tu gzhol bas rtag pa yang med do zhes stong pa nyid smra ba theg pa chen po pa bdag cag rnams kyi zhi gnas dang lhag mthong gi bdag nyid zung du 'jug pa'i ting nge 'dzin gyi phyogs so/ /'o na mngon par 'dus ma byas pa'i rnam par thar pa yang yod de de ci'i phyir ma bstan zhe na/ de ni yod pa bden te/ 'on kyang gsum pa la goms pas 'bad pa med par lhun gyis grub pa yin te chu thigs bzhin no/ /de bas de ni byang chub kyi rgyu yin yang shin tu nye ba'i phyir 'bras bu yang yin pa la skyon gang yang med do/ /dbu ma pa de rnams gal te rang bzhin med par smra na yang sngags kyi theg pa chen po ni thabs du mas khyad par du 'gyur te/ ji skad du/ don gcig pa la ma rmongs phyir/ /thabs mang bas ni dka' thub med/ /dbang po rno ba'i dbang byas nas/ /sngags kyi theg pa khyad par 'phags/ /zhes 'byung ngo / /de la pha rol tu phyin pa'i rnal 'byor pas chos kyi dbyings kyi ye shes kyi ngo bo nyid de kho na ji ltar thob pa bzhin du sngags kyi theg pa chen po pa rnams kyis kyang thob par 'gyur ro zhes 'bras bu log par rtog pa gang yang med do/ /'on kyang de rnams la rmongs pa yod de/ dper na byang chub sems dpa' sems dpa' chen po thugs rje'i dbang gis sbyin pa'i pha rol tu phyin pa yongs su rdzogs par bya ba'i phyir don gnyer ba rnams la mgo bo la sogs pa sbyin par byed de/ de'i des ni sbyin pa'i pha rol tu phyin par mi 'gyur te/ sems can gcig la phan pa yin gyi kun la med pa'i phyir ro/ /gang gi phyir sbyin pa'i pha rol tu phyin pas na pha rol tu phyin pa zhes bya'o/ /de nyid kyi phyir de ni dge ba'i 'du byed de dag gis gzhan dang gzhan du skye zhing 'chi 'pho bar 'gyur ro/ /de bas na bskal pa grangs med pa gsum gyis thob pa'i byang chub can ni byang chub sems dpa' zhes bya'o/ /sngags kyi theg pa la gnas pa la rmongs pa med de/ 'gro ba gsum por des sbyin pa'i pha rol tu phyin pa spro ba la sogs pa'i rim gyis cig car du rdzogs pa'i phyir ro/ /sems can gyi bsod nams kyi bdag po'i rkyen dang de rnams kyi skal ba nyid kyis kyang bsam pa thams cad yongs su rdzogs par 'gyur ro/ /ji skad du/ lha yi dbang pos char phab kyang / /sa bon ngan pa skye mi 'gyur/ /sangs rgyas rnams ni byung na yang / /skal med pas ni 'bras mi thob/ /ces 'byung ngo / /de nyid kyi phyir des ni skad cig ma gcig gis byang chub pa yin no/ /de bzhin du nyan thos pa rnams kyis 'bras bu dang thabs yang dag pa ma yin te/ mi sdug pa la sogs pa bsgoms pas chos kyi dbyings thob par mi 'gyur te/ des keng rus la sogs pa tsam thob pa'i phyir ro/ /de yang de kho na nyid ma yin no/ /mar me lta bu mya ngan las 'das pa tshad ma gnyis dang bral ba rang dang gzhan gyi don phun sum tshogs pa med pa gang yin pa de yang de kho na nyid du bstan pa ma yin te/ mthong ba'i chos kyis de kho na nyid mi thob pa'i phyir ro/ / theg pa chen po rnams kyi de kho na nyid ngo bo gcig yin mod kyi 'on kyang thabs ni gcig kho na ste/ rnam par thar pa'i sgo nas stong pa nyid rtogs pa'i phyir ro/ /de yang brtags pa pa yin te/ gcig dang du ma la sogs pa'i gtan tshigs kyis de rtogs par bya ba yin pa'i phyir ro/ /mos pa dang rigs dang bag chags dang bag la nyal ba dang / bsam pa sna tshogs pa'i sems can gyi khams la lam gcig bstan pa ni mi 'dod pa'i phyir ro/ /de bzhin du theg pa chen po pa rnams kyis kyang dka' thub dang mgo la sogs pa sbyin pa dang / stong pa nyid bco brgyad bsgom pa dang / bskal pa grangs med pa gsum gyis byang chub thob pa'i phyir sangs rgyas nyid thob par 'gyur ro/ /de bzhin du sngags kyi theg pa'i spyod pa dang ldan pas dka' thub dang brtul zhugs la mi brten te/ de rnams kyis 'dod pa'i yon tan lngas spyod pa'i sgo nas de nyid thob pa'i phyir ro/ /le'u lnga pa las kyang / dka' thub nyes pa ma rungs la/ /rten par byed pas 'grub mi 'gyur/ /'dod pa'i yon tan longs spyod la/ /brten pas myur du 'grub par 'gyur/ /zhes 'byung ngo / /gzhan las kyang / dka' thub nyes pa ma rungs pas/ sdug bsngal dang ldan lus skam 'gyur/ /sdug bsngal gyis ni sems g.yengs te/ /g.yengs pas dngos grub thob mi 'gyur/ /zhes 'byung ngo / /de bzhin du theg pa chen po pa rnams ni dbang po rno ba ma yin te / de rnams kyi dad pa la sogs pa'i yon tan rnams dman pa yin pa'i phyir ro/ /de ltar ji srid tha mal pa'i lus ma sbyangs pa de srid du tha mal pa ma yin pa'i rdo rje'i sku'i mtshan nyid kyi sangs rgyas nyid thob par mi 'gyur ro/ /de yang theg pa chen po la med de/ /lha'i rnam pa bsgom pa med pa'i phyir ro/ /de mi bsgom pa ni dbang po rno ba ma yin pa'i phyir ro/ /lus gang gi tha mal pa 'ching ba de nyid kyi rnam par sbyang ba dang yongs su shes na grol bar 'gyur ro/ /de yang / rmongs pa gang gis 'ching ba ni/ /mkhas pa des ni rab tu grol/ /de ltar byang chub bsgom pa'i phyir/ /thabs 'di thams cad log pa yin/ /zhes 'byung ngo / / gang dang gang gis skye bo rnams/ /mi bzad las kyis 'ching 'gyur ba/ /thabs dang bcas pa de nyid kyis/ /srid pa'i 'ching ba las grol 'gyur/ /zhes 'byung ngo / /'od srungs 'di lta ste/ bu ram gyi shing dang 'bras kyi zhing rnams la lud kyi phung po phan par gyur pa de bzhin du byang chub sems dpa' sems dpa' chen po la yang nyon mongs pa kho na phan par 'gyur zhes gsungs pas so/ /de'i phyir sngags kyi theg pa la snod du gyur pa'i rnal 'byor pa rnams ni dbang po rno ba yin no/ /theg pa chen po pa de dag kyang 'dir rjes su gzung bar bya ba yin pa dang / sngags kyi theg pa chen po'i snod du rung ba yin te/ 'bras bu la dbyer med pa'i phyir ro/ /ji skad du/ dga' ba mi zad 'od gsal zhing / /sna tshogs gzugs can mi rtog pa/ /snying rje chen po'i ros khyab pa/ /chos dbyings bdag nyid 'bras bu yin/ /zhes gsungs so/ /re zhig theg pa chen po 'di bzhag na gsum po dag kyang sngags kyi theg pa chen po'i snod du rung bar 'gyur ro/ /gang gi tshe de rnams bcom ldan 'das yang dag par rdzogs pa'i sangs rgyas rnams kyi 'od zer gyi 'khor los bskul ba de'i tshe/ don dam pa'i blo yang dag par bskyed pas mi rtog pa'i ting nge 'dzin mngon du byas nas/ /de kho na nyid la 'jug cing yang dag par rdzogs pa'i sangs rgyas nyid du 'gyur ro/ /'khor los sgyur ba'i rgyal pos dbang bskur bas tha mal pa'i rgyal po rgyal po chen por 'gyur ba bzhin no/ /gzhan yang nyan thos la sogs pa de rnams sangs rgyas kyi snod yin zhes ngo mtshar med de/ de ni rang gi tshogs pa dang bcom ldan 'das kyi lam la gnas pa'i phyir sngags kyi theg pa chen po la brten te 'grub par 'gyur ro/ /rgyang pan pa la sogs pa gzhan gyi tshogs pa rnams de dag kyang bstan pa 'di la brten te dngos grub thob pa'o/ /ji skad du/ pha rol smra ba gang dag ni/ /rtags kyi dbye bas rnam par gnas/ /rdo rje sems dpa'i sprul pas so/ /zhes 'byung ngo / /tshad ma'i lam la gnas pa mkhas pa de dag re zhig tshad mas grub pa'i bstan bcos thos pa tsam gyis lam 'dir 'jug par 'dod pa de dag gzhan na/ 'on kyang shin tu gdug pa dang rku ba dang g.yem pa'i chos can dang mtshams med pa'i las byed pa de rnams kyang sngags kyi theg pa chen po la brten te/ dngos grub lhag par thob pa'o/ /ji skad du/ rigs ngan smyug ma mkhan la sogs/ gsod pas nor ni don gnyer ba/ /de yang theg pa mchog 'di la/ /bla med dngos grub thob par 'gyur/ /mtshams med la sogs las byed rnams/ /shin tu sdig can sems can rnams/ /de yang theg pa bla med 'di/ /'grub par 'gyur te the tshom med/ /ces 'byung ngo / /de ltar 'di skyon thams cad las nges par grol ba/ yon tan thams cad kyis brgyan pa/ zab pa dang rgya che ba rdo rje theg pa chen po 'di yin no/ /de la rnam pa lnga ste/ bya ba dang / spyod pa dang / rnal 'byor dang / rnal 'byor chen po dang / rnal 'byor chen po'i mthar thug pa'i bye brag gis de rnams kyi rang rang gi mtshan nyid dang / dbang po'i dngos po dang / yul gyi bye brag sngon du bshad zin to/ /de rnams kyi rim pa gnyis 'di ltar yin te/ de la bya ba'i rgyud kyi rnal 'byor pa rnams kyi bskyed pa'i rim pa ni dang po'i yi ge tsam yongs su gyur pas so/ /rdzogs pa'i rim pa yang mdzod spu las byung ba'i 'od zer gyi 'khor los spro ba dang / bsdu ba'i rim pas so/ /spyod pa dang rnal 'byor gyi rgyud kyi rnal 'byor pa rnams kyi bskyed pa'i rim pa ni mngon par byang chub pa'i rnam pa lnga'i rim pas so/ /rdzogs pa'i rim pa ni phra ba'i rdo rje la sogs pa'i bsgom pa'i rim pas so/ /rnal 'byor pa chen po pa rnams kyi bskyed pa'i rim pa ni rnal 'byor bzhi dang ldan pa'i dang po sbyor ba la sogs pa'i ting nge 'dzin gyi rim pa'am rdo rje bzhi pas so/ /rdzogs pa'i rim pa ni bsgom pa du ma ste/ dper na phra mo'i rnal 'byor ni so sor snang ba tsam gyi rang bzhin ni shel dag pa lta bu'i rnam pa 'od zer gyi sbyor bas so/ /thig le'i rnal 'byor ni sna gsum gyi rtse mor dgod pa'i khams gsum ma lus pa'i ngo bo phra zhing dang ba'i thig le tsam bsgom pa'i rim pas so/ /yang na rtsa'i kun tu rgyu bas byang chub kyi sems yongs su g.yo bas so/ /yang na pad+ma'i nang du dam tshig gi dkyil 'khor bsgom pa'i rim pas so/ /yang na rtsa thams cad kyi khung bu nas 'pho ba'i byang chub sems kyi steng du bzlog par 'gyur bas bde ba chen po'i nyams su myong ba'i ting nge 'dzin gyis so/ /rdo rje nor bu'i nang du chud pa'i thig le hUM phaT la sogs pa'i sa bon sngon du 'gro bas 'dzin pa'am snyoms par zhugs pa'i dus su de bzhin gshegs pa rnams 'jug pas ro gcig par byed pa'i rnal 'byor gyis sam/ de las ma lhung ba'i byang chub kyi sems de de bzhin gshegs pa thams cad 'dus pa'i blos lces yang dag par myong ba'i rim pas sam/ yul dang dbang po phrad pa dang de'i rnam par dag pa dang byang chub kyi sems de spro ba dang de 'dzin pa dang / nam mkha'i gtos de bzhin gshegs pa thams cad kyis yongs su gang ba dang / thams cad yongs su sdud pas rdo rje 'chang chen po'i phyag rgya chen po bsgom pa'i rim pa zhes bya ba yan lag drug gi rim pas so/ /yang na rim pa lnga ste rdo rje bzlas pa'i rim pa ni ngag rnam par dag pa'i phyir ro/ /sems rnam par dag pa ni sems la dmigs pa'i rim pas so/ /kun rdzob kyi bden pa rnam par dag pa ni rang byin gyis rlob pas so/ /don dam pa'i bden pa rnam par dag pa ni mngon par byang chub pas so/ /mi gnas pa'i mya ngan las 'das pa'i dbyings su 'jug pa ni zung du 'jug pa'i ting nge 'dzin gyi rim pas so/ /sems dpa' gnyis ni ye shes sems dpa'i sa bon gyi thig ler 'jug par bya ste/ de tsam gyi nga rgyal la gnas pa'i rim pas so/ /ril por 'dzin pa dang rjes su gzhig pa'i ting nge 'dzin gyis rang bzhin dang gzhan gyi rgyud la gnas pa'i lus la sogs pa'i rnam par rtog pa bkag pa'i sgo nas so/ /de dang 'dra ba gzhan yang rdzogs pa'i rim pa'i ting nge 'dzin 'og nas 'chad par 'gyur ba dang / rtsa yang dag par rgyu ba la sogs pa gang yin pa dang / de dag thams cad rim pa lnga por 'dus par rig par bya'o/ /rnal 'byor chen po'i phyogs 'di gang zag lnga 'dul ba'i yul can gang yin pa de'i dbye bas 'og nas kyang 'chad par 'gyur ro/ / da ni 'di ltar dpyad par bya ste/ bcom ldan 'das kyis gang gsungs pa de dag las bskyed pa'i rim pa sgom pa po'i gang zag gang zhe na/ smras pa/ dbang po dman pa dang bar ma dang / rab ni tsan+dan la sogs pa'o/ /de'i phyir de dag tshogs la bshad pa la snod yin no/ /bskyed pa'i rim pa zhes bya ba ni rtog pa'i rnal 'byor ro/ /phung po dang khams dang skye mched tha mal pa spangs te / de bzhin nyid dang phyag mtshan dang sa bon las spro ba dang bsdu ba'i rim pas phyag rgya bsgom pa yin no/ /de bas na spros pas bsgrub pa'i phyir rnal 'byor pa sa brgyad pa la gnas par gyur nas de'i 'og tu dad pa la sogs pa'i chos la mthar phyin pas de rnams kho na dbang po rno bar 'gro bas na rin po che lta bu'i gang zag tu 'gyur ro/ /la la na re gser khung lta bu'i tha dad pa'i rigs tsan+dan la sogs pa yin no/ /de'i phyir gang bskyed pa'i rim pa sgom pa po de dag de'i rigs can kho na'o/ /gang rin po che lta bu'i gang zag gang yin pa de rnams tha dad pa ste/ rdzogs pa'i rim pa'i sgom pa po kho na'o/ /de bas na de rnams kyis bskyed pa'i rim pa ma bsgoms pas kyang rdzogs pa'i rim pa gcig pu sgom pa la dbang ba ste/ bskyed pa'i rim pa tshe snga ma la goms pa'i phyir zhes skyon med do/ /ji skad du/ bskyed pa'i rim la legs gnas shing / /rdzogs pa'i rim pa 'dod rnams la/ /thabs 'di rdzogs pa'i sangs rgyas kyis/ / skas kyi rim pa lta bur gsungs/ /zhes gsungs pa'o/ /de la gal te bcom ldan 'das kyi gsung gi ngo bo mi bzod nas myur ba'i ting nge 'dzin gyis phyag rgya la dmigs te rim pa la bslab par bya'o/ /yang na med na de'i tshe snga ma bzhin du rdzogs pa'i rim pa nyid bsgom par bya'o/ / goms pa'i rim pas ci zhig bya zhes gang gsungs pa de ni rdzogs pa'i rim pa'i go rims la slob pa'i phyir yin gyi/ bskyed pa'i rim pa la ni ma yin no zhes skyon gang yang med de/ de la 'di ltar dpyad par bya ste/ rdzogs pa'i rim pa gtsor gyur pa rim pa lnga po yin na de'i tshe rim pa'i grangs kyis rnal 'byor pa'i rim pa lnga po yin nam gcig yin zhe na/ gal te gcig yin na de'i tshe rdo rje bzlas pa'i rim pa nyid kyis bya ba byas pa'i phyir rim pa gzhan gyis ci zhig bya/ de la yang ma ning gi bzlas pa la sogs pa'i skabs su 'od gsal ba nyid bstan pa'i phyir ro/ /lnga yin na ni de'i tshe re re dag la ngag rnam par dben pa la sogs pa yin gyi sems rnam par dag pa la sogs pa ma yin no/ /de bzhin du gzhan dag gi'o/ /smras pa/ rnal 'byor pa gcig pa yin gyi lnga ni ma yin no/ /gang gi phyir bskyed pa'i rim pas ting nge 'dzin gsum po de nyid la dmigs te/ rigs brgya'i dbye bas lus rnam par dben pa la 'jug go/ /de'i rjes su yi ge gsum 'jug pa la sogs pa'i rim gyis rdo rje'i bzlas pa la goms pas ngag rnam par dben pa la 'jug go/ /de'i 'og tu snang ba la sogs pa'i ye shes gsum rnam par dag pas de rdzogs pa na sems rnam par dben pa la 'jug go/ /rang byin gyis rlob pa'i rim pas kun rdzob kyi bden pa mthong ba la 'jug go/ /mngon par byang chub pa'i rim pas 'od gsal ba la 'jug go/ /zung du 'jug pa'i rim pas mi gnas pa'i mya ngan las 'das pa'i dbyings su 'jug go/ /de'i phyir sangs rgyas nyid rim gyis rnyed pa yin pas rnal 'byor pa gcig rdo rje'i bzlas pa gcig pu'am gang yang rung ste gcig gis mi 'grub po/ /de'i phyir tsan+dan la sogs pa lta bu'am rin po che lta bu'i rnal 'byor pas rim pa lnga char bsgom par bya'o/ /de lta na pad+ma lta bu la sogs pa'i bskyed pa'i rim pa gcig pu'i snod yin pas rdzogs pa'i rim pa lnga po'i phyir sgom par byed ce na/ smras pa/ drang ba'i don du yang rdzogs pa'i rim pa gsungs pas kun gyis bsgom par bya ba yin no/ /de bas na bcom ldan 'das kyis kyang gzhan du gsungs te/ de skad du spyod pa bsdus pa'i sgron ma las/ rdo rje slob mas gsol ba/ bdag cag lta bu'i so so'i skye bo thog ma med pa nas phyi rol gyi dngos po rnam pa sna tshogs pa la mngon par zhen pas yod pa dang med pa dang gcig pa dang du ma dang / gnyis dang gnyis ma yin pa dang / yod pa ma yin med pa'ang ma yin pa rtag pa dang mi rtag pa la sogs pa'i rang bzhin gyi bag chags kyi rgyus rnam par rtog pa la mngon par zhen pa la ma zhugs pa rnams kyis rdzogs pa'i rim pa'i go rims kyi ting nge 'dzin la slob pa na/ go rims ji lta ba bzhin du bslab par bgyi ba'am yang na bla ma'i man ngag tsam gyis de dag skad cig tsam ga yis so sor snang bar bgyi/ rdo rje slob dpon gyis smras pa/ rim gyis 'jug pa la slob par bya'i cig car ni ma yin no/ /bcom ldan 'das kyis kyang lang kar gshegs pa'i mdo las gsungs te/ de nas bcom ldan 'das la byang chub sems dpa' sems dpa' chen po blo gros chen pos rang gi sems snang ba'i rgyud rnam par dag par bya ba'i phyir yang gsol ba btab pa/ bcom ldan 'das rang gi sems snang ba'i rgyud cig car ram rim gyis 'jug pas sam/ ji ltar rnam par dag par gyur/ bcom ldan 'das kyis bka' stsal pa/ blo gros chen po rang gi sems snang ba'i rgyud ni rim gyis 'jug pas rnam par dag ste cig car ni ma yin no/ /'di lta ste blo gros chen po shing a mra'i 'bras bu ni rim gyis smin par 'gyur gyi cig car ni ma yin no/ /blo gros chen po de bzhin du sems can rnams kyi rang gi sems snang ba'i rgyud kyang rim gyis rnam par dag pa ste/ cig car ni ma yin no/ /blo gros chen po 'di lta ste/ rdza mkhan gyi snod rnams ni rim gyis byed kyi/ cig car ni ma yin no/ /blo gros chen po de bzhin du de bzhin gshegs pa yang sems can rnams kyi rang gi sems snang ba'i rgyud rim gyis rnam par sbyong ste / cig car ni ma yin no/ /blo gros chen po 'di lta ste/ sa chen po las rtswa dang shing gel ba dang / sman dang nags tshal rnams rim gyis 'jug pas skye'i cig car ni ma yin no/ /blo gros chen po de bzhin du de bzhin gshegs pa yang sems can thams cad kyi rang gi sems snang ba'i rgyud rim gyis sbyong ste cig car ni ma yin no/ /blo gros chen po 'di lta ste/ bzhad gad dang / rol mo dang / glu dang / pi wang dang / sil snyan dang / rol mo dag la mkhas pa ni rim gyis 'byung gi cig car ni ma yin no/ /blo gros chen po de bzhin du/ de bzhin gshegs pa yang sems can thams cad kyi sems snang ba'i rgyud rnams rim gyis sbyong ste cig car ni ma yin no/ /rim pa 'di nyid ni dpa' bar 'gro ba'i ting nge 'dzin gyi mdo las kyang gsal bar gsungs te/ de nas byang chub sems dpa' sems dpa' chen po blo gros brtan pas 'di skad ces gsol to/ /bcom ldan 'das ji ltar slob na byang chub sems dpa' bslab pa thams cad la dmigs pa ma mchis par dpa' bar 'gro ba'i ting nge 'dzin la slob pa lags / de skad ces gsol pa dang / bcom ldan 'das kyis byang chub sems dpa' sems dpa' chen po blo gros brtan pa la 'di skad ces bka' stsal to/ /blo gros brtan pa 'di lta ste/ dper na 'phong gi slob dpon nam 'phong gi slob ma ni thog mar ba lang gi ko ba la slob par byed do/ /gang gi tshe ba lang gi ko ba la lobs pa de'i tshe shing leb la 'phog par byed do/ /gang gi tshe shing leb la lobs pa de'i tshe/ 'ben la 'phog par byed do/ /gang gi tshe 'ben la lobs pa de'i tshe dbyug gu la 'phog par byed do/ / gang gi tshe dbyug gu la lobs pa de'i tshe skra brgya la 'phog par byed do/ /gang gi tshe skra brgya la lobs pa de'i tshe skra bcu la 'phog par byed do/ /gang gi tshe skra bcu la lobs pa de'i tshe/ skra gcig la 'phog par byed do/ /gang gi tshe skra gcig la lobs pa de'i tshe/ sgras mtshon pa la 'phog par byed do/ /gang gi tshe sgras mtshon pa la 'phog pa de'i tshe/ mi 'chor bar 'phog par byed do/ /gang gi tshe mi mchor bar 'phog par byed pa de'i tshe 'phong bslabs pa mthar phyin pa yin te/ de 'dod na nub mo mun pa mun nag gi nang na mi dang mi ma yin pa gang dang gang dag gi sgra grag pa de dang der lhun gyis grub cing mi 'chor ba nyid du mda' 'gro'o/ /sgras mtshon pa 'phog par byed par gnas pas phyis gang du yang mi slob ste/ de ci'i phyir zhe na/ sngon legs par bslabs pa'i phyir phog par bya ba thams cad de la mngon sum du 'gyur ro/ /blo gros brtan pa de bzhin du dpa' bar 'gro ba'i ting nge 'dzin 'di la gnas pa'i byang chub sems dpas phyis chos gang la yang bslab par mi bya'o/ /de ci'i phyir zhe na/ ting nge 'dzin de nyid la legs par bslabs pa'i phyir byang chub sems dpa'i yon tan gyi chos thams cad mngon sum du 'gyur ro/ /yang tshul 'di nyid kyis rdo rje'i theg pa la gnas pa'i dpa' bar 'gro ba'i ting nge 'dzin la slob par 'dod pas kyang rim pa 'di nyid kyis bslab par bya'o/ /de'i rim pa 'di yin te/ thog ma nyid du sangs rgyas kyi theg pa'i bsam pa la slob bo/ /gang gi tshe sangs rgyas kyi theg pa'i bsam pa la lobs par gyur pa de'i tshe theg pa sar pa la dran pa gcig pa'i ting nge 'dzin la slob bo/ /gang gi tshe theg pa sar pa la dran pa gcig pa'i ting nge 'dzin la lobs pa de'i tshe rtog pa'i rnal 'byor la slob bo/ /gang gi tshe rtog pa'i rnal 'byor la lobs pa de'i tshe las dang po pa'i ting nge 'dzin la rab tu gnas par 'gyur ro/ /gang gi tshe las dang po pa'i ting nge 'dzin la gnas pa de'i tshe rigs brgya'i dbye ba la 'jug go/ /gang gi tshe rigs brgya'i dbye bas lus rnam par dben pa shes pa de'i tshe sku rdo rje'i ting nge 'dzin la gnas par 'gyur ro/ /lus rnam par dben pa la gnas nas A li kA li'i sgo nas ngag rnam par dben pa la 'jug go/ /gang gi tshe rdo rje bzlas pa'i rim gyis srog dang rtsol ba shes par 'gyur ba de'i tshe gsung gi rdo rje'i ting nge 'dzin gsal bar 'gyur ro/ /ngag rnam par dben pa la gnas nas rang bzhin gyis snang ba'i rim gyis sems kyi ting nge 'dzin la 'jug par 'gyur ro/ /sems yang dag pa ji lta ba bzhin du yongs su shes pa la gnas nas sgyu ma'i dpe bcu gnyis kyi kun rdzob kyi bden pa la 'jug par 'gyur ro/ /gang gi tshe sgyu ma lta bu'i ting nge 'dzin la 'jug pa de'i tshe sangs rgyas kyi dbang bskur ba thob bo/ /gang gi tshe dbang bskur ba thob pa de'i tshe sgyu ma lta bu'i ting nge 'dzin la gnas nas stong pa chen po bco brgyad kyi rim pas don dam pa'i bden pa la 'jug go/ /gang gi tshe ril por 'dzin pa dang rjes su 'dzin pa'i ting nge 'dzin gyis yang dag pa'i mtha' la 'jug pa de'i tshe nyon mongs pa thams cad rnam par dag par 'gyur ro/ /gang gi tshe ye shes kyi rim gyis ldang ba'i phyir rang bzhin gyis 'od gsal ba'i bden pa gnyis la gnyis su med pa'i rnal 'byor pas bdag nyid mngon par rdzogs par sangs rgyas pa de'i tshe rdzogs pa'i ting nge 'dzin la slob par 'gyur ro/ /gang gi tshe rdzogs pa'i ting nge 'dzin la snyoms par 'jug pa'i rnal 'byor pas ni yang chos gang la yang mi slob bo/ /de ci'i phyir zhe na/ sngon legs par bslabs pa'i phyir de'i sngon gyi 'phen shugs kyi stobs kyis mngon sum du 'gyur ro zhe'o/ /de'i phyir na rim gyis thob par bya ba rdo rje 'chang chen po nyid/ rim pa lnga bsgom pas thob pa yin zhes rnal 'byor pa gcig gis thams cad bsgom mo/ /gang yang rim pa re re la 'od gsal ba bshad pa de ni de kho na nyid kyis kun khyab bo zhes bstan par bya ba'i phyir yin gyi/ de nyid du yongs su rdzogs pa ma yin no/ /bya ba byas pa nyid ni zung du 'jug pa'i ting nge 'dzin la'o/ /ji skad du/ 'di ni rdzogs pa'i rnal 'byor zhes/ /rdo rje 'chang ba chen po nyid/ /rnam pa thams cad mchog ldan pa/ /thams cad mkhyen pa'ang de nas 'gyur/ /zhes dang / de bzhin du yang gsungs te/ zung 'jug gi ting nge 'dzin la gnas pas slar yang gang la mi bslab po zhes 'byung ngo / /de'i phyir rim pa lnga la brten nas rnal 'byor pa gcig gis 'bras bu'i gnas skabs su dngos grub thob pa yin no/ /le'u bco brgyad pa'i brjod par bya ba'i rim pa gnyis sgom pa po rnal 'byor pa gcig gis thob par bya ba rdo rje 'chang gi go 'phang bzhin no/ /rtsa ba'i rgyud kyi le'u bco brgyad la rnal 'byor pas bco brgyad so sor sgom pa po ma bstan to/ /'on kyang gcig pu nyid do/ /rim pa gnyis ma gtogs par gzhan ma gsungs so/ /de dag gi sgom pa po ni gcig yin zhes sngon du bshad do/ /gang zag gi dbye ba ni bshad pa'i dbye bas bshad du rung ba'o/ /thabs la mkhas pa dang ldan pa'i bcom ldan 'das sangs rgyas rnams kyis sems can gyi bsam pa'i dbye bas sems can gyi rgyud kyi khyad par shes nas de dang rjes su mthun par bstan par mdzad do/ /'bras bu la dgongs te dbye ba ma bstan te/ de gcig gi rang bzhin yin pa'i phyir ro/ /lam ni tha dad pa kho na ste/ lam gyi 'bras bur gyur pa'i de kho na nyid kyi dbye ba sgrub par byed pa ma yin te/ lam du mas thob par bya ba grong khyer chen po bzhin no/ /mos pa'i bye brag gi de kho na nyid gcig pu yang nyan pa pos bye brag tu gzung ngo / /dper na nyan thos rnams kyis 'gog pa'i snyoms par zhugs pa'i sgo nas gzung bar byed de/ mdo sde pa rnams kyis de nyid rjes su dpag pa'i phyi'i don yod par so sor snang ba'i sgo nas so/ /rnam pa dang bcas pa'i rnam rig smra ba rnams kyis shes pa'i rnam pa phyi'i don yod pa'i sgo nas so/ /rnam pa med pa'i rnam rig smra ba pos phyi'i dngos po las nges par grol ba dri ma med pa mtha' las 'das pa'i nam mkha' gcig pu dang mtshungs pa'i rnam par rig pa gcig pu yod pa'i sgo na gzung ngo / /la la yang dbu ma pa rnams kyis gzung ba dang 'dzin pa las grol ba rab tu zhi zhing spros pa med pa 'ba' zhig tu stong pa nyid kyis ngo bo nyid dngos po so sor snang ba tsam gyi sgo nas gzung ba dang / bya ba'i rgyud kyi rnal 'byor pas lha'i rnam pa sgom pa tsam gyi sgo nas gzung ba dang / spyod pa'i rgyud kyi rnal 'byor pas dngos grub dang ting nge 'dzin dang cho 'phrul dang ldan pa/ sngags kyi sku bsgom pa'i sgo nas so/ /rnal 'byor gyi rgyud gtsor gyur pa'i rnal 'byor pas sngags dang phyag rgya la sogs pa gtsor gyur pa'i rnal 'byor pas rdo rje dbyings kyi dkyil 'khor chen po la sogs pa'i bsgom pa'i rim pas so/ / rnal 'byor chen po'i rgyud kyi rnal 'byor pas rim pa gnyis kyis so/ /de la bskyed pa'i rim pa'i rnal 'byor pas ting nge 'dzin gsum gyi sgo nas de kho na nyid gzung ba'o/ /rdzogs pa'i rim pa'i rnal 'byor pas phra mo'i rnal 'byor gzung ba'i sgo nas de kho na nyid gzung ba'o/ /la las kyang thig le'i rnal 'byor bsgom pa'i rim pas 'dod do/ /la las kyang rtsa kun tu rgyu ba'i rtsa'i bsgom pas so/ /la las kyang dam tshig gi dkyil 'khor gyi sgo nas gzung ngo / /la las kyang de'i nang du gsang ba'i dkyil 'khor la gsang ba'i dbang gis so/ /gzhan dag gis kyang byang chub kyi sems gzung ba gcig pus so/ /gzhan yang de nyid steng du bzlog pa'i sgo nas so/ /la las kyang yul dang dbang po'i longs spyod cing so sor sdud pa'i bsgom pa'i rim pas so/ /gzhan dag gis kyang de'i rnam par dag pa'i ngo bo nyid de bzhin gshegs pa lnga'i rang bzhin rtog pa dang dpyod pa la sogs pa rnam pa lnga'i bsam gtan gyi rim pas so/ /kha cig gis kyang steng dang 'og tu rgyu ba'i rlung gsum gyi bdag nyid srog dang rtsol ba'i rlung gi sgo nas de kho na nyid nges par gzung ngo / /de bzhin du gzhan rnams kyis kyang sna gsum gyi rtse mor 'dzin par gyur pa rlung dang sngags dang byang chub kyi sems kyi thig le 'dzin pas so/ /kha cig gis kyang sprul pa mtha' yas pa spro bas nam mkha'i dbyings yongs su bkang zhing rjes su dran pa'i yan lag bsgom pas so/ /la las kyang dngos po thams cad nye bar sdud cing gcig dang du ma la sogs pa spangs pa'i gnyis su med pa'i ting nge 'dzin gyi rim pas so/ /la la sngags kyi de kho na nyid dam rlung gi de kho na nyid bsgom pas so/ /la las kyang sngags dang phyag rgya la sogs pa'i rim pas so/ /kha cig gis kyang de las skyes pa'i sngags kyi sku dang sgyu ma lta bu'i ting nge 'dzin gyis so/ /gzhan dag gis kyang snang ba thob pa la sogs pa'i rnal 'byor gyis lha'i skur bsgoms pas so/ /la las kyang phyag rgya dang ting nge 'dzin bsgom pa'i rim pas 'od gsal ba la 'jug pas so/ /gzhan yang srid pa dang mya ngan las 'das pa ro gcig pa gnyis su med pa zung du 'jug pa'i ting nge 'dzin gyi sgo nas de kho na nyid sgom par byed do/ /de kho na nyid gcig yin pa'i phyir lam gyi bye brag du ma la skyon med do/ /gzhi'i bye brag gi dbang gis bye brag ltar snang ba ste char bzhin no/ /dper na char pa'i dus su chu 'dzin gyi tshogs kyi nang nas 'byung ba'i char pa rma byas 'thung ba na bdud rtsi nyid du 'gyur ro/ /de nyid sbrul gyis 'thung ba na dug tu 'gyur ro/ /bu ram gyi shing la sogs pa de nyid mngar ba'i ro ru 'gyur ro/ /nim pa'i shing la de nyid kha ba'i ro ru 'gyur ro zhes de kho na nyid la de bzhin du bye brag tu med do/ /'di ltar dpyad par bya ste/ gal te dpal gsang ba 'dus pa'i phyogs su rim pa lnga ma gtogs par gzhan rdzogs pa'i rim pa med pa yin na de ci'i phyir phra mo'i rnal 'byor la sogs pa yan lag drug pa'i rnal 'byor bcom ldan 'das kyis de dang de ru gsungs she na/ smras pa/ de dag gi nang du song bas rdzogs pa'i rim pa de las gzhan med do/ /de la phra mo'i rnal 'byor dang thig le'i rnal 'byor dag ni rdo rje bzlas pa'i rim pa la bsdus so/ /rtsa'i kun tu spyod pa dang dam tshig gi dkyil 'khor dang de'i nang du gsang ba'i dbang sems la dmigs pa thob pa'i bdag nyid do/ /byang chub sems 'dzin pa ni mngon par byang chub pa'i rim pa la'o/ /de steng du bzlog pa ni de nyid du 'dus so/ /so sor sdud pa dang bsam gtan dag ni sems rnam par dag pa la'o/ /srog dang rtsol ba dag gis rdo rje bzlas pa mtshon pa dang / 'dzin pa ni mngon par byang chub pa'i rim pas mtshon no/ /rjes su dran pas ni bdag byin gyis rlob pa'i rim pa mtshon pa dang / ting nge 'dzin gyi yan lag ni zung du 'jug pa'i rim pa la bsdus so zhes rim pa lnga'i bdag nyid kho na rdzogs pa'i rim pa'o/ /de la 'di ltar dpyad pa yin te/ ci rim pa 'di dag bzhi'am drug la sogs par mi 'gyur zhing lnga kho nar bshad ce na zhes grangs la log par rtog pa bsal bar bya ba'i phyir smras pa/ 'dir ni rnal 'byor pas tha mal pa'i lus dang ngag dang yid rnam par bya ba yin te/ de'i don du bskyed pa'i rim pas lus rnam par dag pa dang / rdzogs pa'i rim pa'i dang po rdo rje bzlas pa'i rim pas ngag rnam par dag pa dang / thams cad rnam par dag pas sems rnam par dag pa'o/ /lus dang ngag dang yid rnam par dag pa na sems can gyi don bya ba'i phyir sgyu ma lta bu'i ting nge 'dzin gyis rang byin gyis rlob pa'o/ /de la mngon par zhen pa yongs su spong ba'i phyir don dam pa'i bden pa'i ngo bo mngon par byang chub pa'o/ /de ltar na chad par thal bar 'gyur bas de yongs su spong ba'i phyir bden pa gnyis gnyis su byar med pa'i mtshan nyid rnam pa thams cad kyi mchog dang ldan pa rdo rje'i sku zhes bya ba'i rnam grangs can rin po che sna tshogs kyi rang bzhin gzhal yas khang pa'i nang du gnas pa'i dkyil 'khor gyi bdag po nyid du bzhugs pa/ sar zhing sar pa'i dkyil 'khor gyi 'khor lo spros pas nam mkha'i gtos ma lus par khyab pa dus thams cad du sems can ma lus pa sgrol ba la brtson pa/ khyab 'jug dang lha chen po dang tshangs pa dang brgya byin la sogs pa lha'i mchog rnams kyis zhabs kyi pad+ma la phyag byas pa/ yid bzhin nor bu dang dpag bsam shing dang / bum pa bzang po ltar re ba thams cad skong bar byed pa zung du 'jug pa'i ting nge 'dzin la dmigs nas rnal 'byor pas gnas par bya'o/ /de bas na kun tu 'od kyi sa bcu gnyis pa la gnas par 'gyur ro/ /de'i 'og tu bslab par bya ba med pas de nyid sa bcu gsum par bshad do/ /ji skad du/ zung 'jug ting 'dzin la gnas nas/ /slar zhing gang la'ang mi slob bo/ /zhes 'byung ngo / /de ltar rim pa de dag gi rnal 'byor pas gal te gang la yang mi slob pa'i dbang gis bya ba byas pa byed pa rdzogs pas rim pa drug pa gang yang med do/ / zhes grangs lhag pa bsal to/ /nyung ba yang ma yin te/ lnga med pas gzhan dang rang gi don med pa'i phyir zhes grangs la log par rtog pa can gyi lan no/ / 'dir yang 'di ltar dpyad par bya ste/ ting nge 'dzin de rnams kyi tshad ma mngon sum mam rjes su dpag pa yod ce na/ de la re zhig mngon sum ni mi 'thad de/ rtog pa med pa'i phyir ro/ /mngon sum rtog pa dang bral zhing ma 'khrul pa yin zhes bshad pas so/ /rdo rje bzlas pa la sogs pa'i bsgom pa'i rim pas de kho na nyid kyi rnam par rtog pa 'byung ba'i phyir ro/ / rdo rje bzlas pa'i rim pa la ni sngags dang / rlung gi de kho na nyid yid la byed pa ji srid ma byas pa de srid rnam pa bcu gcig gis rdo rje bzlas pa ji ltar bsgom/ sems la dmigs pa thob pa la ni yi ge gsum gyi bdag nyid sngags chos 'byung ba'i 'khor lo'i nang du thig le dang tsheg drag gi nang du 'jug pa dang / phyag rgya dang lhan cig tu snang ba la sogs pa'i ye shes rtogs par byed do/ /sgyu ma lta bu'i ting nge 'dzin la yang sgyu ma'i dpe bcu gnyis kyi rnam par rtog pa skye'o/ /mngon par byang chub pa'i rim pa la phyag rgya dang rdo rje dang pad+ma snyoms par zhugs pa'i yid la byed pa dang / chags pa dang chags pa dang bral ba dang / chags pa bar ma'i rnam par rtog pa yid la byed pa 'byung ngo / /zung du 'jug pa'i ting nge 'dzin la yang bden pa gnyis gnyis su med pa'i rtog pa skye bar 'gyur ro/ /de ltar rim pa gnyis bsgom pa ni rtog pa dang bcas pa'i phyir mngon sum du mi srid do/ /nges pa'i shes pas 'grub po zhe na ma yin te/ nges pa'i shes pa ni rtog pa med pa'i mngon sum las phyis 'byung ba yin gyi dang po ni ma yin no/ /rdo rje bzlas pa la sogs pa ni rnam par rtog pa la rtog pa med pa'i mngon sum 'jug par mi 'gyur zhes ci la brten te/ nges pa'i shes pa 'byung bar 'gyur/ /rgyun du gnas pa'i shes pa rnams kyis tshad ma nyid med de/ don gyi yul can ma yin pa'i phyir ro/ /rang dbang gi rtog pa yang nges pa med de/ de tshad ma ma yin pa'i phyir ro/ /tshad ma med pa ni bden pa'i dngos po la brten te mi 'byung ba'i phyir ro/ /slob dpon gyis bstan pa'i rdo rje bzlas pa la sogs pa'i rim pa rnams rna ba'i dbang gis gzung bar bya ba yin pas dbang po'i mngon sum nges pa'i shes pa dang bcas pas nges par 'gyur zhe na/ bden mod kyi 'on kyang nye bar ston pa'i dus su de tshad ma nyid du nges na de phyis kyi dus su ji ltar nges/ rnam par rtog pas she na/ bden te don la brten pa ma yin pas rtog pa ni tshad ma ma yin no/ /yang na skyon de bsal bar bya ba'i phyir slob dpon gyis bstan pa'i phyis kyi dus su de nyid 'di yin no zhes ngo shes pas shes par byed de dper na ma ga d+hA'i 'bru gang yin pa de nyid yul 'di'i yin no zhes pa dang / gang ma ga d+hA ru mthong ba de 'di nyid yin zhe na/ de la smras pa/ ngo shes pas ni tshad ma ma yin te sgra dang don 'gal ba'i phyir ro/ /de zhes bya ba ni thams cad kyi ming gi sgras 'das pa'i dus su so sor rtogs pa'o/ /'di zhes bya ba ni mngon sum gyi dngos po rtogs par byed pa thams cad kyi ming gi sgra'o/ /'das pa dang da ltar byung ba dus so sor bstan pa'i sgra gnyis kyi gzhi mthun pa med pa'i phyir khyad par can gyi mtshan nyid mi rigs so/ /ji ltar mi rigs te/ rdzas tha dad pa ston par byed pa'i sgra dag gi don gcig la 'jug pa ni gzhi mthun pa'o/ /de zhes bya ba'i sgra ni 'das pa'i dus kyi yul gyi rdzas ston par byed pa dang / 'di zhes bya ba'i sgras kyang da ltar byung ba'i yul gyi rdzas so sor ston zhes pa 'dir ni 'di dang de gnyis kyi de nyid 'di yin zhes gzhi mthun par rigs pa yin no zhe na/ de la smras pa/ gzhi mthun pa'i tha snyad 'di brtags pa pa yin gyi/ dngos po'i yul can ma yin no/ /ci'i phyir zhe na/ dngos po gang 'das pa de'i 'jig pas de'i rdzas ji ltar rtogs/ gang de ltar byung ba de yang skad cig mas mi gnas pa'am chos can zhes 'di'i sgras ji ltar brjod nus/ brjod ma thag tu 'jig pa'i sgra rnams rang gi bdag nyid kyi nus pa zad pa'i phyir ro/ /ji ltar don gcig la 'di yin zhes ji ltar 'jug ces sgra 'gal ba'o/ /sgra dang don dag gi 'gal ba ni 'brel pa med pa'i sgo nas so sor bstan to/ /bum pa la sogs pa'i sgra gcig gis kyang gtsor 'jug pa'i sgo nas dngos po so sor bstan pa ma mthong ngo / /'das pa dang mngon sum gyi dus kyi yul can dag gi sgra gnyis kyis so sor bstan pa ci mthong ngam gzhan yang de nyid la 'di yin zhes 'khrul pa kho na yin gyi gzhan ni ma yin no/ /gang gi phyir gang ma ga d+hA la sogs pa'i yul du ba lang dang / 'bru la sogs pa mthong ba dang myong ba gang yin pa de dag gi gzugs kyi bye brag dang ro mchog la sogs pa gzhan yin la 'di dag gi yang gzhan yin pa'i phyir ro/ /ji skad du/ yul la sogs pa'i bye brag gis/ /rdzas kyi nus pa tha dad yin/ /de la gcig ni mthong ba yis/ /gzhan du de dngos mthong nges med/ /ces 'byung ngo / /dper na lho'i phyogs kyi a ru ra bdam par byed pa yin te/ gzhan du khrus sman du 'gyur ro/ /yul gyi bye brag re zhig 'jog na dngos po thams cad rang rang gi gzugs su yod pa ma yin te zhes gang gang gis brjod cing 'brel lo/ / ji skad du/ 'du byed thams cad skad cig ma/ /mi gnas bya ba ga la yod/ /gang yod de nyid bya ba ste/ /byed pa po yang de nyid bshad/ /ces 'byung ngo / /de'i phyir dran pa'i shes pa ltar ngo shes pa yang don gyi yul can ma yin pas tshad ma ma yin no/ /rjes su dpag pas kyang rdo rje bzlas pa la sogs pa rnams kyi nges pa med de/ de ni rtags dang rtags can gyi dngos po'i 'brel pa'i sgo nas rtogs pa ste/ me dang du ba bzhin no/ /de lta bu'i rtags rdo rje bzlas pa la sogs pa rnams la med do/ /rlung gi de kho na nyid dang sngags kyi de kho na nyid med par mi 'byung ba'i rdo rje bzlas pa'i shes pa ni rang bzhin gyi gtan tshigs kyis nges par 'dzin ce na/ de ni ma yin te/ bye brag tu dmigs pa'i phyir ro/ /rlung gi de kho na nyid ni thig le phra mo'i rnal 'byor ro/ /sngags kyi de kho na nyid kyi yi ge gsum mam yi ge a'o/ /rdo rje bzlas pa'i rim pa yang 'jug pa la sogs pa'i bya ba'i gzhi srog dang rtsol ba dang me dang mnyam pa'i ngo bo yin zhes bye brag go/ /de'i bdag nyid kyi 'brel pas ni byas pa dang / mi rtag pa dang shing dang sha ba bzhin dbyer med par nges par byed pa'o/ /mi dmigs pa'i gtan tshigs kyis kyang rdo rje bzlas pa la sogs pa yang nges par mi nus te/ dngos po med pa'i tha snyad de'i yul yin pa'i phyir ro/ /'dir chos can thams cad kyi chos nyid kyi ngo bo de kho na nyid dngos po dang dngos po med pa dag gis brjod du med par grags so/ /de'i phyir mngon sum dang rjes su dpag pa dag gis gang ma grub pa'i rdo rje bzlas pa la sogs pa'i de rnams tshad ma med pa kho na'o/ /de la smras pa/ mngon sum kho nas 'grub pa yin te/ yang rnam pa bzhi yin pas rang rig pa'i mngon sum gyis rdo rje bzlas pa la sogs pa mngon par byang chub pa'i bar du nges par byed do/ /rlung dang sngags kyi de kho na nyid ces bya ba'i thig le tsam bsgom pa ni rang gi mngon sum gyi yul kho na'o/ /thig le bsgom pa zhes bya ba ni ting nge 'dzin gyi chos te sems las byung ba'o/ / sems las byung ba'i chos rnams kyang rang rig pa'i yul yin no/ /rang rig pa'i mngon sum gyi mtshan nyid ni sems dang sems las byung ba thams cad rang gis rig pa'o/ /sems la rnam par dag pa yang rnam par shes pa gsum gnas gyur pa'i mtshan nyid 'od gsal ba de nyid kyi rjes su myong ngo / /bdag byin gyis brlab pa'i rim pa la yang sgyu ma'i dpe bcu gnyis kyis nye bar mtshon pa'i ye shes kyi sku thob pa ste/ sems las byung ba'o/ /thob pa dang ma thob pa dang rigs gcig ces bya ba la sogs pa sems dang mi ldan pa'i 'du byed kyang sems las byung ba nyid do/ /mngon par byang chub pa'i rim pa la yang bde ba chen po 'od gsal ba 'dod chags la sogs pa dang bral ba ni rang rig pa nyid do/ /bzhi po de dag rang rig pa ste/ ma 'khrul zhing gsal bar snang ba'i phyir ro/ /rang bzhin gyis grub pa'i dngos po las skyes pa'i phyir rtog pa med pa'o zhes mngon sum gyi mtshan nyid las ma 'das pa'o/ /ji skad du/ mngon sum mi rtog mi slu ba/ /zhes 'byung ngo / /rim pa tha ma ni rnal 'byor gyis thob pa yin te/ gang gi phyir de ni lhun gyis grub pa'i yang dag pa'i don la bsgom pa mthar thug pa'i dbang gis rdo rje'i sku lag mthil gyi skyu ru ra bzhin du dngos po thams cad mthong ba la brtson pa thams cad mkhyen pa yin pas rtog pa med cing ma 'khrul pa yin no/ /ji skad du/ bsgoms pa'i stobs kyis gsal ba ni/ /'jigs pa la sogs gsal ba bzhin/ /mi slu ba yis shes pa gang / /de ni rtog med mngon sum mo/ /zhes 'byung ngo / /rdzogs pa'i rim pa tshad ma nyid du brtags pa'o/ / da ni 'di ltar dpyad par bya ste/ gsang ba 'dus pa'i rnal 'byor gyi rgyud chen po 'di gsung rab yan lag bcu gnyis kyi nang nas gang yin zhe na/ smras pa/ mdo sde zhes bya ba 'di yin te/ de yang zab pa dang rgya che ba'i tshig gi don mtshon par byed pas mdo zhes bya'o/ /'o na dpal gsang ba 'dus pa zhes bya ba rnal 'byor chen po'i rgyud yin na/ ji ltar mdo zhes bshad ce na/ smras pa/ yan lag yin pa'i phyir de'i tha snyad yin te/ rgyud kyi mdo zhes bya ba yan lag gtso bo yin te/ de'i phyir de nyid kyis bstan pa yin te/ gdengs ka can dang sna can bzhin no/ /'o na rgyud kyi yan lag gtso bo mdo sde zhes smras pas yan lag gzhan rnams kyang smra bar bya ba'i rigs so zhes yan lag de ji lta bu yin zhe na/ smras pa/ mdo dang tshad ma yan lag grub pa dang / /ma tshang med dang 'dri la lan 'debs dang / /mdor bstan pa dang rgyas bshad go rims dang / /ming dang nye bar bstan pa rgyud kun yin/ /mdo dang tshad ma yan lag rnams ni mdo dang tshad ma dang yan lag rnams so/ /de rnams grub pa ni mdo dang tshad ma yan lag grub pa'o/ /'grub pa ni yod pa zhes don gzhan ma yin no/ /'grub pa'i sgra ni re re dang sbyar te mdo grub pa zhes bya ba la sogs pa'o/ /mtshan nyid dang ldan pa'i mdo grub pa zhes bshad par bya ste/ gzhan du na mtshan nyid dang mi ldan pa'i mdo rgyud kyi yan lag tu 'gyur zhe na/ smras pa/ brjod par mi bya ste/ med par mi 'byung ba'i phyir ro/ /mtshan nyid grub pa ma gtogs par mdo nyid mi 'gyur ro/ /de'i phyir mtshan nyid brjod par mi bya ste/ yang na mdo zhes bya ba ci'i phyir zhe na/ smras pa/ don mdor bstan pas na mdo'o/ /khyad par gyi don de dag ston par byed pas na mdo'o/ /de nas bcom ldan 'das ye shes sgron ma rdo rje zhes bya ba'i ting nge 'dzin la snyoms par zhugs te zhes bya ba de'i bshad pa rnam pa bzhi'i rigs pas bskyed pa'i rim pa dang / rdo rje bzlas pa dang / sems rnam par dag pa dang / bdag la byin gyis brlab pa dang / 'od gsal ba dang / zung du 'jug pa'i rim pa rnams mtshon to/ /de bzhin du/ dngos po thams cad dang bral ba/ /phung po khams dang skye mched dang / /gzung dang 'dzin pa rnam spangs pa/ /chos bdag med pa mnyam nyid pas/ /rang sems gzod nas ma skyes pa/ /stong pa nyid kyi rang bzhin no/ /zhes bya bas rang gi sems la dam bca' ba dang / gtan tshigs dag nyid kyis gsungs so/ /de dag gzung bas bsgrub bya bsgrub par bya ba'i phyir ro/ /dpe med pa'i sgrub par byed pas sgrub mi nus pa'i phyir ro zhes bya ba nas/ ji ltar sgyu ma'i rmi lam bzhin/ /ji ltar srid pa bar ma do/ /zhes bya ba la sogs pa rgyud gzhan nas gsungs pa'i dpe rnams ston pas na mdor shes par bya'o/ /yang na g.yeng ba gzhan nye bar sdud pa'i dge slong rtse gcig pa'i blo ni tshig de dang de dag tu spel bar byed pas na mdo'o/ / 'di lta ste/ thugs kyi dkyil 'khor gyi le'u bzhi pa las/ de nas las kyi cho ga ni/ /mthong bas phyag rgya dgod par bya/ /zhes smos pa las las kyi cho ga mthong ba'i rdo rje slob dpon gyis lha dang dkyil 'khor dang thig gdab pa la sogs pa'i rnam pa dkyil 'khor gyi cho ga'i spros pa gang yin pa de dag thams cad rgyud gzhan las 'dir mtshon pa'o/ /gzhan yang mdo'i mtshan nyid dang ldan pas na mdo sde/ mdo'i mtshan nyid slob dpon rnams kyis nye bar bstan pa gang yin pa dang / de dang ldan pas na mdo ni 'di lta ste/ tshig nyung the tshom med pa dang / /sna tshogs sgo dang snying po can/ /zlos med kha na ma tho med/ /mdo shes pas ni mdo sder bshad/ /zlos med ces bya ba ni snga phyi dag la khyad par yod pa'o/ /de bzhin du yang / spang ba de ni don mtshon pa/ /yi ge dang ni tshig nyung ba/ /kun tu snying por gyur pa ste/ /blo dang ldan pas mdo ru bshad/ /de nas mdo zhes bya ba yan lag dang po gtso bo ste/ mdo gang gi ming gis rgyud yin yang mdo sde zhes bya bar bstan to/ /tshad ma ni mngon sum dang rjes su dpag pa gnyis te/ de dag kyang 'og nas 'chad par 'gyur ro/ /de bzhin du yang le'u bcu bdun pa las/ de nas de bzhin gshegs pa phyag na rdo rjes de bzhin gshegs pa de dag thams cad la 'di skad ces bka' stsal to/ /bcom ldan 'das de bzhin gshegs pa thams cad sangs rgyas thams cad kyi chos kyi mnyam pa nyid mthong ngam/ de nas de bzhin gshegs pa thams cad kyis phyag na rdo rje de bzhin gshegs pa thams cad kyi bdag po la 'di skad ces gsol to/ /bcom ldan 'das de bzhin gshegs pa thams cad kyi rdo rje ye shes kyi spyod pa mthong lags so/ / bde bar gshegs pa mthong lags so zhes pa dang / le'u dang po'i gleng bzhi'i tshig la ni 'di skad bdag gis thos pa'i dus gcig na/ bcom ldan 'das de bzhin gshegs pa thams cad kyi sku dang gsung dang thugs kyi snying po rdo rje btsun mo'i b+ha ga la bzhugs so zhes bya ba 'dir mthong ba dang thos pa'i sgra dag gis mngon sum gyi tshad mar so sor rtogs so/ /de bzhin du le'u dgu pa las kyang / rigs kyi bu 'di lta ste dper na gtsub shing dang gtsub stan dang / mi'i lag pa bskyod pa'i rkyen gyis du ba rab tu 'byung zhing me 'byung bar 'gyur mod kyi zhes bya ba tshogs pa'i rgyu la brten nas/ me dang du ba dag gi rgyu dang 'bras bu'i ngo bo'i mtshan nyid can rjes su dpag par bstan to/ /de ltar tshad ma zhes bya ba'i yan lag gnyis pa'o/ /yan lag ni bshad pa'i rgyud dang / yan lag gi rgyud rnams te lha mo bzhis yongs su zhus pa dang / dgongs pa lung bstan pa dang / rdo rje phreng ba dang / ye shes rdo rje kun las btus pa'i rnal 'byor chen po'i rgyud la sogs pa de rnams kyis rgyud kyi don yongs su rdzogs par 'gyur te/ lag pa dang rkang pa la sogs pas lus bzhin no/ /de yang de nas las kyi cho ga ni mthong bas zhes bya ba la sogs pa'i tshig gis rgyud gzhan las mthong ba'i yan lag rdzogs par bstan to/ /de ltar na yan lag ces bya ba yan lag gsum pa'o/ /ma tshang ba med pa ni tshig gi don ma lus par grub pa'o/ /de la tshig gi don ni gnyis te/ bskyed pa'i rim pa dang rdzogs pa'i rim pa'o/ /de dag gi ma lus pa de ni dang po'i dbye ba gsum dang gnyis pa'i lnga'o/ /de rnams grub pa ni bshad pa'i rgyud kyi tshig gis bstan pa'o/ /de bzhin du yang le'u bco brgyad pa las/ bskyed pa yi ni rim pa dang / /rdzogs pa yi ni rim pa ste/ /rim pa gnyis la brten nas ni/ /rdo rje can rnams chos bstan pa'o/ /zhes rtsa ba'i rgyud kyi tshig go/ /yi ge'i don dang spyi don dang / /sbas pa dang ni mthar thug pa/ /zhes bya ba'i rdo rje phreng ba'i bshad pa'i rgyud las gsungs pa'i tshig gis bskyed pa'i rim pa'i dang po sbyor ba la sogs pa gsum dang / rdzogs pa'i rim pa'i rdo rje bzlas pa la sogs pa'i tshig gi don lnga bstan to/ /de rnams tshang bar bstan pa ni ma tshang ba med pa zhes bya ba'i yan lag bzhi pa'o/ /'dri ba dang lan 'debs pa ni 'dri ba dang lan 'debs pa'o/ /de dag bstan pa ni 'dri ba dang lan 'debs pa bstan pa'o/ /ji skad du le'u bco brgyad pa las/ gsang ba zhes bya ba ji ltar bshad bya ba nas brtsams te phrin las kyi tshogs mchog ces bya ba'i bar du 'dri ba'i tshig bdun cu rtsa gnyis so/ /sku gsung thugs ni rnam pa gsum/ /gsang ba zhes byar bshad pa yin/ /zhes bya ba nas brtsams te/ khros pas drag po kun tu spyod/ /ces bya ba'i bar du lan 'debs pa'i tshig kyang bdun cu rtsa gnyis bstan to/ /gang gi phyir spyir ston pa ni 'dri ba dang khyad par ston pa ni lan 'debs pa'o/ /de yang rnam pa gnyis te/ sgra dang don gyis so/ /de la sgra ni/ sku gsung thugs ni rnam pa gsum/ / zhes bya ba la sogs pa'o/ /don gyis ni/ yul dang dbang po rnam dag la/ /brten te gang zhig yid skyes pa/ /de ni man zhes bshad pa ste/ /tra ni skyob pa'i don yin no/ /zhes bya'o/ /de ni 'dri ba dang lan btab pa'i mtshan nyid can yan lag lnga pa'o/ /mdor bstan pa dang rgyas par bstan pa ni mdor bstan pa dang rgyas par bstan pa'o/ /zlas dbye ba thams cad ni phyogs gcig tu 'gyur ro zhes gcig gi tshig gi mtha' can no/ /mdor bsdus pa'i tshig ni mdor bstan pa'o/ /'di lta ste/ tha mal mchog gi dbye ba yis/ /bsnyen pa rnam pa gnyis yin te/ /tha mal pa ni rdo rje'i gzhi/ /yan lag drug ni mchog yin no/ /rgya che ba'i tshig ni rgyas par bshad pa 'di lta ste/ dang por stong nyid byang chub ste/ /gnyis pa sa bon bsdus pa dang / /gsum pa gzugs brnyan rdzogs pa ste/ /bzhi pa yig 'bru rnams dgod pa'o/ /so sor sdud dang bsam gtan dang / /srog rtsol de bzhin 'dzin pa dang / /rjes su dran dang ting 'dzin ni/ /rnal 'byor yan lag drug tu bshad/ /de ni mdor bsdus bstan pa dang / /rgyas par bstan pa'i mtshan nyid can yan lag drug pa'o/ /tshig gi don rim pas ston pa ni go rims so/ /'di lta ste / le'u dang po las/ badzra d+h+r-ika//dzi na dzika /rat+na d+h+r-i ka /A ro lika /pradz+nyA d+h+r-ika ces bya bas dang po de bzhin gshegs pa lnga phyung ba'o/ /de'i rjes la mo ha ra ti/ dwe Sha ra ti/ rA ga ra ti/ badzra ra ti zhes bya bas dga' ma rnams phyung ba'o/ /de nas yang ya mAn+ta kr-ita / pradz+nyAn+ta kr-i ta/ pad mAn+ta kr-ita/ big+h+nAn+ta ta kr-ita/ ces bya bas khro bo phyung ba zhes go rims bya ba'i yan lag bdun pa'o/ /ming dang nye bar bstan pa ni ming dang nye bar bstan pa dag go/ /ming can rtogs par byed pa'i sgra ni ming ngo / /de yang rnam pa gnyis te/ don gyi rgyu mtshan can dang / rang gzugs kyi rgyu mtshan can no/ /de la don gyi rgyu mtshan ni/ don gyi dbang gis don gyi bya ba la ltos pas so/ /rigs la sogs pa'i don rang gzugs su bsdus par bya ste/ ji ltar don yin pa de lta bur gyur pa'i ming can rtogs par byed do/ /dper na 'tshed pa dang / byed pa dang dra bar byed pa'o/ /rang gzugs kyi rgyu mtshan can ni ming dang rtogs par byed pa'i thabs tsam yin te/ rang gzugs tsam la phan par byed pa yan lag gi don ma gtogs par rang gi brda'i dbang gis de lta bur gyur pa'i ming can yang rtogs par byed do/ /dper na glang po'i rna ba can dang / rta'i rna ba can no/ /de la bcom ldan 'das khams gsum ma lus pa'i bden pa mkhyen pas thams cad mkhyen pa'i ye shes kyi dngos po thams cad kyi bden pa gzigs nas ming btags pa la rang gzugs kyi rgyu mtshan can gyi sgra med de / dper na mi bskyod pa zhes bya ba ni nyon mongs pa dang shes bya'i sgrib pa'i bag chags kyi rlung gis ma bskyod pas mi bskyod pa ste/ chos kyi dbyings kyi ye shes kyi ngo bo nyid yin pa'i phyir ro/ /rnam par snang mdzad pas na rnam par snang mdzad de me long lta bu'i ye shes gsal ba yin pa'i phyir ro/ /de ltar na ming gi brda don dang ldan pa gzhan dag tu yang shes par bya'o zhes ming bstan pa zhes bya ba yan lag brgyad pa'o/ /'di ltar bya ba'i 'bras bu yang dag par bstan pa ni nye bar bstan pa'o/ /'di lta ste/ de ltar byas na sangs rgyas dang / /byang chub sems dpa' grags chen mnyes/ /zhes 'byung ngo / /de bzhin du yang rnal 'byor 'di dag nyid kyis ni/ myur du sangs rgyas nyid thob 'gyur/ /zhes nye bar bstan pa zhes bya ba'i yan lag dgu pa'o/ /lnga pa dang drug pa gnyis gnyis su byas te/ mdo sde la sogs pa rgyud kyi yan lag bcu gcig yin no zhes bya ba'i sgra ni rnam pa'i don to/ /des na de lta bu'i rnam pa can gzhan rnams kyang shes par bya'o/ /'di lta ste/ spyir btang ba dang / dmigs kyis bsal ba dang / gzhan gyi chos yongs su thob pa'o/ /ji skad du/ le'u lnga pa las/ rigs ngan smyig ma mkhan la sogs/ /gsod don don gnyer sems pa rnams/ /theg chen bla na med pa yi/ /theg mchog 'di la 'grub par 'gyur/ /zhes spyir btang ba'o/ / gzhan yang / slob dpon la ni smod pa dag /bsgrubs kyang 'grub par yang mi 'gyur/ /zhes dmigs kyis bsal ba'o/ /le'u bco brgyad pa las kyang / /ji ltar sngon byung de bzhin kun/ /'di ni gsang ba yang dag ster/ /zhes gzhan gyi chos thob po/ /yang na 'dam kha yang rgyud kyi yan lag yin te/ /sku gsung thugs kyi rdo rje'am/ /rang sngags don gyi yon tan nam/ /yang na gtsug tor dam tshig gis/ /bka' yi 'khor lo sbyar bar bya/ /zhes 'dam kha'o/ /bsdu ba yang rgyud kyi yan lag yin te/ rdo rje can gyi gzugs sogs kyis/ gtsug tor mnyes par byed par bshad/ /khro bo rnams la'ang de mchog ste/ /sangs rgyas rdo rje rab bsgom pa'o/ /zhes le'u bco lnga pa las 'byung ngo / /nges pa yang rgyud kyi yan lag yin te/ /le'u de nyid las kyang / /gnod sbyin ma yi sngags rgyud la/ /gshin rje gshed ni nyid du bsgom/ /zhes 'byung ngo / /rdo rje phreng ba las kyang / ming dang yongs su smra ba dang / /cho ga dang ni nges pa nyid/ /so sor bkag pa dbang ba dang / /'dam kha dang ni gzhan dag sdud / /rjes su smra ba gzhan chos thob/ /mdo yi mtshan nyid rnam pa bcu/ /zhes bya ba'i tshig 'dus so/ /de ltar gzhan yang rgyud kyi yan lag 'di nyid du bstan par byed nus te/ 'on kyang shin tu rgyas pas don rnal ma sgrib par byed pas ma bstan to/ /rgyud kyi yan lag grub pas rgyud grub po/ /gtso bo yin pa'i phyir mdor yang bstan to/ /gal te de ltar yin na yan lag du ma yod pas tshad ma la sogs pa ci'i phyir ma bstan zhe na/ smras pa/ gang gnyi ga las skyes pa de ni gcig gis nye bar bstan du yod de/ dper na/ u ma'i bu ni gzhon nu dang ma hA de ba'i bu bzhin no/ /bshad pa'i rgyud rnams kyang de ltar gyur pa'i yan lag lnga dang ldan pa'i phyir mdo sde'i yan lag gi nang du 'dus so/ /gal te 'di mdo sder bshad pa yin na de'i tshe/ dgos pa bsdus pa'i don dang bcas/ /tshig don dgongs pa yang dag ldan/ /rgal lan bcas pa nyid dang ni/ /mdo don smra ba pos bshad bya/ /zhes 'byung bas dgongs pa la sogs pa drug po nges par bshad par bya ba yin zhe na/ smras pa/ brjod pa la sogs pa rnam pa lnga po 'dus pa'i phyir logs su ma bstan te/ brjod pa la sogs pa bshad pa'i dus nyid du dgongs pa la sogs pa'i don rtogs pas logs su mi bshad de/ mdo'i dgos pa ni dgos pa'i nang du 'dus pa dang / /rgal lan dag ni 'brel pa bsdus pa'o/ /gang gi phyir de bzhin gshegs pa la sogs pa'i 'brel pa rnam pa drug bstan pa'i dus su nyan pa po dang 'chad pa po dag gi dus su phan tshun 'dri ba dang lan gyi bye brag nges par 'byung ba yin te/ 'dri ba dang lan kho na rgal lan dag go/ /brjod par bya ba la tshig gi don dang 'dus pa'i don dang dgongs pa rnams 'dus pa'o/ /de yang ma bsdus pa'i don dang dgos pa med pa/ brjod par bya bar dang bral ba brjod pa nyid du mi 'gyur ro/ /bya rog gi skad brtag pa dang se'u bcu la sogs pa'i tshig bzhin no/ /de'i phyir 'di ni mdo sde'i yan lag kho na yin pas skyon med do/ /de lta na brjod pa la sogs pa lnga po de dag ni tshad ma med pa'i tshig las ji ltar gzung zhe na/ rtag pa sngon du 'gro ba rnams kyis kyang tshad ma sngon du 'gro bas 'jug par byed de tshig la ni tshad ma nyid med do/ /ji skad du/ dngos pos dngos po ston min te/ /dngos po'i dus su dngos med yin/ /de nyid kyis ni 'das pa de/ /de ni 'das pa zhes brjod do/ /brag gi za ma tog dpe yis/ /sgra yis bdag dang 'jig rten dang / /sgra ni sbal pa'i phung po yis/ /rang nyid kyis ni dman par byas/ /yi ge tshig dang ngag rnams dang / /rtags dang tshig gi tshogs dag nyid/ /bya ba byed pa 'brel pa rnams/ /brdzun yin pas na rjod byed min/ /tshig bshad tshig rkang lnga 'am ni/ /gsum gyis kyang ni cis mi 'dod/ /ngag ni brjod bya rag las phyir/ /mkha' 'gro ma yi brda ltar 'gyur/ /gzung bar bya ba'i chos rnams la/ /sngon gyi mkhas par 'dod rnams kyis/ /sgra yi legs sbyar g.yang sa ru/ /e ma'o 'jig rten lhung bar byas/ /'di ni snang zhes brjod pa la/ /dris pa mkhas pa gang gis ni/ /mgo nas bskor nas lag g.yas kyi/ /de ltar gang gis ston par byed/ /gzhan gyis gzhan ni mi rig ste/ /'brel pa med pas skye mi 'gyur/ /gzhan du ral gri phog pa la/ /gzhan la 'gyur bar byed dam ci/ /bya ba med pa'i rang bzhin gyis/ /gang gis gang gi 'dir ston byed/ /dngos med las byung dngos po yis/ /dngos po gang las bskyed pa med/ /de bas skyob pa rnams kyis ni/ /'byung ba chen po zhes bshad do/ /'byung ba kun gyi sngon gyur pas/ /nges tshig mkhas pa rnams kyis gsungs/ /zhes bya ba la sogs pa sngon gyi slob dpon gyi tshad ma'i tshig rnams kyis gsal ba'i sgra dang don gyi 'brel pa la ngag gi tshad ma nyid med pa'i phyir brjod pa la sogs pa'i tshig tsam gyis ji ltar nges par byed ce na/ de la smras pa/ ngag las the tshom skye ba ni/ de yang rnam pa gsum ste/ don dang ldan pa'i the tshom dang / don med pa'i the tshom dang / don yod pa dang don med pa'i the tshom mo/ /de la don dang ldan pa'i the tshom ni dper na/ sa 'og na gnas pa'i gter 'don pa bzhin no/ /don med pa ni dper na shugs che ba'i gtsang po la gcod pa bzhin no/ /don yod pa dang med pa'i the tshom ni dper na ro langs bslang ba bzhin no/ /de la don dang ldan pa ni 'jug pa'i yan lag go/ /don dang mi ldan pa dang don med pa dang / yod pa'i the tshom dag ni ldog pa'i yan lag go/ /'dir ni dang po'i tshig tshad ma med pa las ci 'dir brjod pa la sogs pa yod dam med ces the tshom la 'jug par 'gyur te/ de'i rjes su rim pa gnyis kyis mtshon pa'i brjod par bya ba dang / de rjod par byed pa'i tshig gi tshogs dang de dag gi 'brel pa yang thos nas bsam pa dang bsgom pa'i rim pas tha mal pa'i lus bzlog pa dang 'jig rten las 'das pa'i rdo rje'i sku'i mtshan nyid rdo rje 'chang chen po'i phrin las thams cad pa thob nas/ de'i rjes thogs su 'gro ba thams cad kyang rdo rje 'dzin par byed pa ni dgos pa'i dgos pa yang la la yod par 'dod pas bstan bcos 'di legs zhes mgu zhing bya ba byas par 'gyur ro/ /de'i phyir don gyi the tshom las 'jug pa ni rigs pa kho na'o/ /gzhan dag gis kyang khyab par byed pa mi dmigs pas rgol bar byed pa gang yin pa de'i gtan tshigs ma grub pa yin zhes smra bar bya ba'i phyir/ brjod pa la sogs pa'i mtshan nyid 'chad par 'gyur ro/ / 'dir 'brel pa rtsom pa'i dus su slob dpon zla grags rang 'dod pa'i lha la phyag 'tshal ba rtsom pa byed de/ de la rnam pa gsum ste/ mthun pa dang rjes su mthun pa dang gnyi ga'i rjes su 'gro ba'o/ /de la mthun pa zhes bya ba ni gang bstan bcos dang mi 'gal ba yin gyi bstan bcos mkhan gyi ni ma yin no/ /'di lta ste/ dpal gyi phun sum tshogs pa'i sa las 'das zhes bya ba la sogs pa so sor thar pa'i rab tu byed pa'i dang po bcom ldan 'das 'dod chags dang bral ba la phyag 'tshal lo/ / rjes su mthun pa zhes bya ba ni bstan bcos dang mi 'gal ba yin te/ bstan bcos mkhan gyi mngon par 'dod pa kho na'o/ /'di lta ste/ ngag ni rtogs par byed pa mchog /'jig rten mgon po la btud nas/ /zhes snang ba'i phreng ba'i 'brel pa dang po la phyag 'tshal ba bzhin no/ /de la ni bstan bcos kyi brjod par bya ba dang mthun pa ma yin te/ 'on kyang 'grel pa mkhan gyi yi dam yin pas rjes su mthun pa'o/ /gnyi ga'i rjes su 'gro ba ni gang bstan bcos dang bstan bcos mkhan po dag gis brjod par bya ba dang mngon par 'dod pas gnyi ga'i rjes su 'gro ba'o/ / gzhan yang 'di lta ste/ khams gsum spyod pa las grol zhes bya ba la sogs pa'i phyag 'tshal ba'i tshig la brjod par bya ba dang / rang 'dod pa'i lha gnyi ga'i rjes su 'gro'o / /de ltar 'dir yang dpal rdo rje sems dpa' la phyag 'tshal ba ni slob dpon zla ba grags pa'i de nyid rang 'dod pa'i lha yin te/ dpal klu sgrub kyi zhal snga nas kyis 'dod pa dang rjes su mthun pa'i phyir ro/ /sgron ma gsal bar byed pa las kyang / de nyid brjod par bya ba yin te/ /ting nge 'dzin thams cad kyi sgo nas de nyid thob par bya ba'i phyir ro/ /rjod pa dang brjod par bya ba'i bdag nyid rdo rje 'chang chen po'i yin zhes 'chad par 'gyur ro/ /de'i phyir phyag 'tshal ba gnyi ga'i rjes su 'gro ba 'di yin no/ /de ltar na phyag 'tshal ba byas pas cir 'gyur/ bgegs nye bar zhi bar 'gyur zhes rigs pa gang zhig yod ce na/ phyag 'tshal ba byas pas bcom ldan 'das rdo rje 'chang chen po'i yon tan brjod pa las skyes pa'i bsod nams kyi tshogs kyis bsod nams ma yin pa log par 'gyur ro/ /bsod nams ma yin pa las skyes pa'i bgegs bsod nams nye bar dmigs pas de dag med do zhes dgag par bya ba'i rgyu 'gal ba dmigs pa'i phyir ro/ /phyag 'tshal ba de yang la las rnam pa bzhi ru 'dod de lus dang ngag dang yid dang bla na med pa'i mchod pas phyag 'tshal ba'o/ /de la lus kyis ni yan lag lnga pa'i phyag go/ /ngag gis ni de'i yon tan gyi tshogs brjod pa'i mtshan nyid do/ /yid kyis ni de nyid rjes su dran pa'o/ / bla na med pa'i mchod pa'i phyag 'tshal ba ni de'i bdag nyid rjes su 'jug pa'o/ /rab tu byed pa las/ ji ltar chu la chu bzhag dang / /ji ltar mar la mar bzhin du/ /rang gis rang gi ye shes ni/ /legs mthong gang yin 'dir phyag yin/ /zhes de lta bu'i phyag 'tshal ba yang 'dir 'dus pa kho na'o/ / da ni phyag 'tshal ba bshad par bya ste/ dpal ldan rgyud rgyal zhes bya ba la sogs pa la bcom ldan 'das rdo rje sems dpa' la phyag 'tshal nas/ slob dpon zla ba grags pas 'dus pa ni gsang ba 'dus pa zhes bya ba'i rgyud do/ /rab gsal zhes bya ba ni gsal bar byed pa'o/ /'dus pa ji lta bu zhe na/ dpal ldan rgyud rgyal dam pa zhes bya ba 'di nyid kyi khyad par ro/ /dpal ni bsod nams dang ye shes kyi tshogs so/ /de dang ldan pas na dpal ldan no/ /de bzhin du ni dang po snying rje chen po'i sems bskyed la dang po'i sbyor ba la sogs pa'i ting nge 'dzin gyi rim gyis sems can ma lus pa'i don byas te de'i rjes la ngag la sogs pa rnam par dag par byed pa rim pa lnga'i mtshan nyid ye shes kyi tshogs mngon du bya'o/ /yang na dpal ni las kyi phyag rgya la sogs pa bzhi'o/ / de nye bar bstan pa yod pas dpal ldan no/ /de ltar dkyil 'khor rgyal ba mchog gi ting nge 'dzin gyi dus su rigs ngan gyi bu mo la sogs pa las dang dam tshig gi phyag rgya med pas ye shes kyi phyag rgya bsams te/ bde ba chen po'i mtshan nyid can phyag rgya chen po thob par 'gyur zhes bstan to/ /rgyud ni spyod pa la sogs pa'i rgyud do/ /de rnams kyi dam pa'i rgyal po ni rgyal po dam pa ste rnal 'byor chen po'i rgyud do/ /rgyud ces bya ba gang zhe na/ bcom ldan 'das kyis rgyud phyi ma las gsungs te/ rgyud ni rgyun zhes bya ba ste/ rgyun de rnam pa gsum du 'gyur/ /gzhi dang rang bzhin nyid dang ni/ /'gyur ba med pa rab dbye ba'o/ /rang bzhin rnam pa rgyu yin te/ /de bzhin 'gyur med 'bras bu yin/ /gzhi ni thabs zhes bshad pa ste/ /gsum gyis rgyud kyi don 'dus so/ /zhes 'byung ngo / /de'i dgongs pa ni rgyu'i rgyud dang 'bras bu'i rgyud dang thabs kyi rgyud do/ /de la rgyu'i rgyud ni gang du tshangs pa'i gnas dang rnam par thar pa'i sgo la sogs pa'i sgom pa bstan pa'o/ /'bras bu'i rgyud ni gang du rdo rje 'chang chen po'i phyag rgya chen po nges par bstan pa'o/ /thabs kyi rgyud ni gang du zhi ba la sogs pa'i las kyi tshogs nges par bstan pa'o/ / don so sor ston par byed pa'i rgyud rnams kyi rgyal po dam pa'o/ /de nas las 'dzin pa'i bsdu ba bya'o/ /des ni rgyud thams cad kyi dam pa nyid nye bar bstan pa yin no/ /gal te rgyud thams cad kyi dam pa yin na/ de'i tshe don zab mo dang ldan pa'i phyir khyod kyis ji ltar bshad par nus pa zhe na/ rnal 'byor rgyud rnams kyi legs par bshad pa ni rnal 'byor gyi rgyud yan lag dang bshad pa'i rgyud sngar bshad pa'o/ /de rnams kyi legs par bshad pa ni gsal bar bshad nus pa'o/ /shin du gsal bar rnam par phye zhes pa ni de rnams ni khyad par ro/ /bshad pa ni don gsal bar rtogs pa'i rgyus so/ /rtsa ba'i rgyud ni bshad pa'i rgyud kho nas rtogs par bya zhes bya ba'i don to/ /rnal 'byor gyi don gang zhe na/ rgyud phyi ma las kyang / thabs dang shes rab mnyam sbyor bas/ /rnal 'byor zhes ni mngon par brjod/ /rang bzhin med pa shes rab ste/ /thabs ni dngos po'i mtshan nyid do / /zhes 'byung ngo / /de'i dgongs pa ni bskyed pa'i rim pas snying rje chen po sngon du 'gro bar bsgom pa ni thabs so/ /rdzogs pa'i rim pa gnyis pa dang bzhi pa dag gis chos thams cad rang bzhin med pa'i mtshan nyid can stong pa nyid sgom pa ni shes rab bo/ /de dag snyoms par zhugs pa ni rnal 'byor ro/ /yang na snga ma bzhin du dkyil 'khor rgyal ba mchog gi ting nge 'dzin nam/ /yang na gang du phyag rgya'i mnyam par sbyor ba dgongs pa de la dbang po gnyis kyis mnyam par sbyor ba/ thabs dang shes rab snyoms par 'jug pa'i mtshan nyid rnal 'byor zhes bshad do/ /sems rnam par dag pa la sogs pa'i rim pa dag tu bde ba chen po bskyed pa'i slad du bsgrub bya dang sgrub byed kyi dbye ba la dmigs te/ thabs dang shes rab nyid du 'jog par byas pa gnyi ga snyoms par zhugs pa'i mtshan nyid ni rnal 'byor zhes bya'o/ /de bzhin du yang bshad pa'i bye brag gzhan rnams kyang 'og nas skabs skabs su 'chad par 'gyur ro/ /gal te rnal 'byor gyi rgyud kho nas rtsa ba'i rgyud bshad pa yin na/ de'i tshe 'grel pa brtsams pas ci zhig bya zhe na/ mtha' drug 'ching ba rnams kyis bcings pa zhes bya ba smos te/ mtha' drug ces bya ba'i bshad pa ni/ 'og nas 'chad par gyur pa de nyid 'ching ba ni 'brel pa'o/ /des bcings pa ni bcings pa ste de'i phyir rtogs par dka' zhes bya ba'i tha tshig go/ /gang gi phyir bshad pa'i rgyud kyis ni rtsa ba'i rgyud kyi tshig dang ngag gi don tsam so sor bstan par nus kyi mtha' drug gi bye brag dang rab tu dbye ba bshad par mi nus so zhes 'grel pa bya bar don dang ldan no/ /de lta na 'dus pa'i rgyan la sogs pa gzhan yod pas 'grel pa 'dis ci zhig bya zhe na/ rgyal sras yul gyur zhes smos pa la rgyal ba'i sras ni nyon mongs pa dang shes bya'i sgrib pa bral bar sa bcu'i dbang phyug byang chub sems dpa'o/ /de rnams kyi yul du gyur pa ni bshad pa'i spyod yul 'dus pa 'di yin zhes 'dis bdag nyid mngon par shes pa thob pa nyid kyis snod du rung ba nyid du bstan pas 'grel pa byas pa ste/ skye bo gzhan gyis 'grel pa byed mi nus so/ /rgyud kyi ming bstan par bya ba'i phyir/ rgyal ba rnams kyi 'dus pa gang yin pa/ /zhes smos te/ rgyal ba rnams ni de bzhin gshegs pa lnga'o/ /de rnams kyi 'dus pa ni gcig tu gyur pa'o/ /dgongs pa ni 'di lta ste/ bskyed pa'i rim pa'i rigs brgya'i dbye ba nye bar bsdus te/ phung po lnga dang nyon mongs pa dang dbang po dang yul dang / rnam par shes pa dang 'byung ba dang rlung rnam pa lnga la sogs pa'i rnam par dag pa'i bcom ldan 'das rdo rje 'chang chen pos ye shes lnga'i ngo bo nyid de bzhin gshegs pa rnam par snang mdzad la sogs pa spros te/ de dag gcig tu gyur pa dag gis mgrin pa gcig gis dang po zhu ba sngon du 'gro bar gsol ba gdab bo/ /bcom ldan 'das kyis kyang de rnams la so sor bstan zhes rgyal ba rnams kyi 'dus pa'o/ /yang na dam tshig gi dkyil 'khor du thams cad phyung ba ni 'dus pa'o/ /yang na sku dang gsung dang thugs kyi ngo bo nyid yi ge gsum po 'jug pa la sogs pa'i rim gyis goms par gyur pa na de bzhin gshegs pa thams cad kyi 'khor lo ro gcig par gyur pa ni 'dus pa'o/ /gzhan yang phyir mi ldog pa'i dbang gis dus su slob ma'i tshangs pa'i sgo nas de bzhin gshegs pa 'jug pas gcig tu gyur pa ni 'dus pa'o/ /rdzogs pa'i rim pa la yang rtsa stong phrag bdun cu rtsa gnyis kyi bug pa nas 'pho ba'i byang chub kyi sems de bzhin gshegs pa thams cad kyi ngo bo nyid rdo rje'i rtse mor 'dzin pa'i yan lag gis gzung ba ni 'dus pa'o/ /yang na dngos po thams cad nye bar bsdus shing sangs rgyas dang byang chub sems dpa' thams cad kyi ngo bo nyid phyag rgya chen po'i gzugs sgom pa ni 'dus pa'o/ /de lta bu'i rnam pa du ma gzhung rgyas pa'i 'jigs pas 'dir ma bshad do/ /gsang ba zhes bya ba brjod par bya ba yin te/ gsang ba 'dus pa zhes bya'o/ /tha mal pa'i lus ngag yid 'jig rten las 'das par byed pa ni gsang ba'o/ /sku la sogs pa'i ngo bo nyid yi ge gsum gyi 'jug pa la sogs pa'i sgom pa ni gsang ba'o/ /yang na 'dod pa'i gdugs la sogs pa rtsa gsum du bde ba chen po myong ba ni gsang ba'o/ /de bzhin du gzhan yang 'og nas 'chad par 'gyur ro/ /ji skad du/ sku gsung thugs ni rnam pa gsum/ /gsang ba zhes ni mngon par brjod/ /'dus pa bsdus par brjod pa ste/ /sangs rgyas thams cad ming zhes bya'o/ /zhes 'byung ngo / /rang gi glegs bam la blta ba bkag pa dang slob dpon gyis man ngag bstan par bya ba'i phyir/ de ni dpal ldan klu sgrub las rnyed pa/ /zhes bya ba smos te/ de ni dpal klu sgrub kyi zhal snga nas kyi dngos su slob ma nyid so sor bstan gyi brgyud pas ni ma yin no/ /des 'dus pa'i tshig gi khyad par dang bcas par smra ba na rgyud kyi ming bstan to/ /brjod par bya ba bstan par bya ba'i phyir/ rim pa gnyis kyi gnas zhes bya ba smos pa la/ bskyed pa'i rim pa dang rdzogs pa'i rim pa ni rim pa gnyis so/ / de dag gi gnas ni 'dus pa'o/ /des de dag kho na bstan par bya ba ni brjod par bya ba yin gyi gzhan ma yin no/ /rim pa gnyis po ni dbye ba dang mtshan nyid dang bcas par bshad zin to/ /mtha' drug kyang bshad pa'i rgyud las shes par byas la rgyud go bar gyur pas 'grel pas ci zhig bya zhes de la bstan par bya ba'i phyir/ sangs rgyas kun gyis rgyas btab pa/ /zhes smos te/ dper na rgyal po rnams kyis rang gi mdzod la rgyas btab pa bzhin du sangs rgyas kun gyi man ngag gi gnas dag tu rdo rje'i tshig gis rgyud 'di la rgyas btab pa'o/ /de bas na 'grel pa'i lde mig gis phye bar byas so/ /rdo rje sems dpa' de ji lta bu zhe na/ khyab bdag ces smos te de bzhin gshegs pa thams cad kyi bdag po yin pa'i phyir ro/ /gang gi phyir ye shes lnga ni tha dad pa ltar snang ba yin zhes kun rdzob kyi phyogs so/ /de dag nus pa thams cad nye bar bsdus pa na gnyis su med pa'i ye shes kyi gnas skabs su gyur pa thams cad stong pa'i mtshan nyid kyi de kho na nyid gang yin pa bcom ldan 'das te ye shes dang shes bya ro gcig pa rdo rje 'chang chen po khyab bdag ces bshad do/ /dpal gyi sgra ni sngar bshad do/ /rdo rje sems dpa' bshad par bya ste/ spong ba lnga dang ye shes lnga/ /rdo rje zhes ni mngon par brjod/ /don ni 'di yin te/ rnam par shes pa lnga po spong bar byed pa ye shes lnga'i ngo bo nyid stong pa 'od gsal ba ni rdo rjer bshad do/ /de nyid sems dpa' ste ngo bo nyid gang la yod pa de ni rdo rje sems dpa'o/ /yang na rdo rje ni thabs kyi ye shes so/ /sems dpa' ni shes rab kyi ye shes so/ /de dag ro gcig pa ni bcom ldan 'das rdo rje sems dpa'o/ /yang na dpal ni thabs te rdo rje shes rab bo/ /des na snying rje dang stong pa nyid dbyer med pa nyid dpal rdo rje sems dpa'o/ /rdo rje rtse mo las kyang / brtan zhing snying po khong stong med/ /dbyer med bcad med mtshan nyid can/ /bsreg tu med dang mi 'jig ni/ /stong nyid rdo rje zhes su bshad/ /ces 'byung ngo / /btud de zhes pa ni lus ngag yid kyis 'dud pa'am de'i bdag nyid du rjes su 'jug pa'o/ /rim pa bzhin ni go rims kyis so/ /zla ba grags pas rab gsal bshad pa ni/ gsal bar ston par byed ces bya ba'i don to/ /rim pa gnyis po'i gnas zhes gang bshad pa de nyid bstan par bya ba'i phyir/ bskyed pa'i rim pa dang po yin/ /zhes smos te/ bskyed pa'i gtsor gyur pa'i rim pa ni bskyed pa'i rim pa ste de bzhin du bzla ba dang rdo rje dang sa bon dang spro ba dang bsdu bas lha'i gzugs kyis tha mal pa'i lus bzlog pas 'jig rten las 'das pa'i rdo rje lta bu'i sku 'byung ba'i phyir ro/ /de la dang po'i sbyor ba la sogs pa dbye ba gsum sngar bshad zin to/ /rigs brgya'i bye brag gi mtha' can zhes smra bar bya ba yin te/ bskyed pa'i rim pa gcig pus tha mal pa'i lus rnam par dag par byed mi nus te/ 'on kyang ting nge 'dzin gsum gyi 'og tu gang gi tshe phung po khams dang skye mched kyi bdag nyid kyi lus cha shas kyi dbye bas ye shes lnga'i ngo bo de bzhin gshegs pa lngas rnam par dben par byed pa de'i tshe tha mal pa'i lus kyi nye bar dmigs pa spangs nas/ tha mal pa ma yin pa'i sku byung ba de nyid bskyed pa'i rim pa'i mthar phyin pa'o/ /gcig pus mi nus zhes smra bar mi bya ste/ ting nge 'dzin gsum bzhin du de grub pa'i phyir ro/ /rigs brgya'i dbye ba'i mtha' can bskyed pa'i rim pa yin zhes smra bar mi bya ste/ ci'i phyir zhe na/ ting nge 'dzin gsum rtsa ba'i rgyud las ji ltar brtag pa bzhin du rigs brgya'i dbye ba yang shes par bya'o/ /de ltar ma yin te gud par bstan pa'i phyir ro/ /ting nge 'dzin gsum bzhin du de yang grub po zhes gang smras pa de ni ma yin no/ /gnyi ga gsungs pa'i phyir ro/ /'di lta ste/ de nas bcom ldan 'das de bzhin gshegs pa rdo rje rnam par snang mdzad chen pos de bzhin gshegs pa thams cad kyi 'dod chags chen po'i tshul zhes bya ba'i ting nge 'dzin la snyoms par zhugs so zhes bya ba nas brtsams te de bzhin gshegs pa thams cad kyi sku dang gsung dang thugs kyi rdo rje la bzhugs par gyur to zhes bya ba'i bar du dang po'i sbyor ba zhes bya ba nye bar bstan to/ /de nas bcom ldan 'das de bzhin gshegs pa thams cad kyi dam tshig 'byung ba chen po rdo rje zhes bya ba'i ting nge 'dzin la snyoms par zhugs te zhes pa nas brtsams te/ de bzhin gshegs pa thams cad kyi sku dang gsung dang thugs mnyes par byed pa dkyil 'khor gyi dam tshig sems dpa' rnams so so zhes bya ba'i bar gyis dkyil 'khor rgyal ba mchog gi ting nge 'dzin bstan to/ /de'i rjes su le'u drug pa la sogs pa dag tu/ sna yi rtse mor yungs kar bsam/ /zhes bya ba la sogs pas las kyi rgyal ba mchog gi ting nge 'dzin bstan to zhes de'i phyir ting nge 'dzin gsum po gsal bar bstan to/ /rigs brgya'i bye brag gi mtha' can du smra ba kho na'o/ /de yang dang po yin zhes pa ni dang po lus kyi rnam par rtog pa rags pa spang bar bya ba yin zhes pa'i tha tshig go/ /de las lus rnam par dag nas ngag rnam par dag par bya ba'i phyir/ rim pa lnga po'i dang po rdo rje bzlas pa zhes bya ba bsgom par bya ste/ de'i phyir gsang sngags kyi sku ni rab sgrub byed ces bya ba smos te/ de la bcom ldan 'das kyis bsam pa dang bag la nyal ba dang khams dang bag chags kyi dbye bas sngags kyi sa ya bdun cu rtsa gnyis bshad do/ /de dag thams cad kyi rtsa ba ni yi ge bzhi bcu rtsa dgu pa phyi ma'o/ /de yang sde tshan brgyad kyi bdag nyid dang po'i yi ge rnams la yongs su thim par gyur pa'o/ /de dag kyang bzhi po la thim/ bzhi po yang yi ge gsum gyi bdag nyid du gyur pas zhes yi ge dang tshig dang ngag dang rab tu byed pa dang sngags thams cad kyi yi ge gsum po kho na rgyu'i gtso bo yin te/ rigs gsum rnam par dag pas sku gsung thugs kyi ngo bor gyur pa gsang sngags kyi sku'o/ / de yang gnyis te/ rlung gi bdag nyid dang / yi ge'i bdag nyid do/ /de la 'jug pa dang / gnas pa dang / ldang ba'i rim pas nyin mtshan du nyi khri chig stong drug brgya'i dkyil 'khor bzhi'i sbyor bas goms pas sems rtse gcig pa de nyid gang yin pa de ni rlung gi bdag nyid kyi sngags kyi sku'o/ /rdo rje 'chang chen po la sogs pa'i sngags kyi bzlas pa la yi ge gsum po kho na spyi bo la sogs par gnas pa yan lag ma nyams par bzlas pa'i rim pa goms par byed pa na sems rtse gcig pa nyid gang yin pa de ni yi ge'i bdag nyid gsang sngags kyi sku'o/ /de gnyis ka rab tu sgrub par byed pa ni rdzogs par byed pa rdo rje bzlas pa'i rim pa ste gcig go/ /des ni ngag gi ngo bo shes nas bstod pa dang smad pa la sogs pa'i tshig gis rnal 'byor pa mgu ba dang mi mgu bar mi 'gyur ro zhes gsung gi rdo rje'i ting nge 'dzin la gnas pa'o/ /gcig ces smra bar bya ba yin te/ rdo rje bzlas pa'i rim pa gsang sngags kyi sku rab tu sgrub par byed pa gcig ni dang po ste rdzogs pa'i rim pa'i dang po'o/ /la la na re bskyed pa'i rim pa khyad par du gyur pa kho na gsang sngags kyi sku rab tu sgrub par byed pa zhes 'chad pa de ni mi bden te/ de lta yin na rdo rje bzlas pa ma 'dus par thal bar 'gyur ro/ /de ma gtogs par ngag rnam par dag pa med pas dgos pa kho na'o/ /gang gi tshe/ bskyed pa'i rim pa dang po yin/ /zhes dang po bskyed pa'i rim pa bsgom pa yin na de'i tshe gcig ces smras pas / rdo rje bzlas pa'i rim pa'i 'og tu sems la dmigs pa tsam zhig ni rim pa gnyis pa zhes brjod do zhes smras par mi rigs te/ rdo rje bzlas pa'i 'og tu de nye bar bstan pa yin gyi bskyed pa'i rim pa'i 'og tu ni ma yin no/ /de'i phyir gsang sngags kyi sku rab tu sgrub par byed pa'i sgra ni bskyed pa'i rim pa'i khyad par ma yin te 'on kyang rdo rje bzlas pa'i rim pa kho na ston par byed pa'o/ /de'i khyad par byed pa'i phyir gcig ces smra bar bya ba kho na'o/ /ji ltar rim pa kho na mchog go/ /sems la dmigs pa zhes bya ba la sogs pa la ngag rnam par dag par gyur pas rnam par shes pa gsum gyi bdag nyid kyi sems la dmigs pa ni mthong ba ste/ sngar bshad pa'i sngags dang phyag rgya'i rim pas 'od gsal bar bya'o/ /de nyid ni de tsam zhig yin gyi sngags kyi sku'i bdag nyid gzhan ni ma yin no/ /sems rnam par dag pa tsam gcig pu rim pa gnyis pa yin zhes tshig gi don to/ /rnam par dag pa'i sems kyi rgyud dang ldan pa'i rnal 'byor pas gzhan gyi don bya ba'i phyir/ lha'i sku yid kyi rang bzhin gyis chos thams cad sgyu ma lta bur blta bar bya zhes de'i slad du/ kun rdzob bden pa bstan pa ni/ /zhes bya ba smos te/ 'od gsal ba las myur bar rnam pa thams cad kyi mchog dang ldan pa yid du 'ong ba ni dkyil 'khor pa'i lha tshogs kyis yongs su bskor ba/ mi ngoms pa'i gzugs ye shes kyi sku spras te gnas pa bstan pa ni sgyu ma dang mtshungs par bdag dang dngos po thams cad la blta'o/ /yang na yid 'ong ni bstan pa dang dge ba'i rtsa ba smin pa dang rnam par grol ba dang / spro ba'i rim pas 'gro ba'i don byed pas so/ /de bas na bdag byin gyis rlob pa zhes bya ba rim pa gsum pa bstan to/ /sgyu ma lta bu'i ting nge 'dzin mngon du byas nas de nyid du mngon par zhen par brgya lam du 'gyur bas de dag par bya ba'i phyir/ kun rdzob bden pa'i dag pa ni/ /zhes smos te kun rdzob kyi bden pa ni sgyu ma lta bur mthong ba de'i dag pa gang yin pa thams cad stong pa la 'jug pa ste 'od gsal ba rtogs pa'o/ /de ni mngon par byang chub pa/ /zhes bya ba rim pa bzhi par bshad do/ /'od gsal ba'i de kho na nyid thob pas chad pa'i phyogs su lhung bas skyon de bsal ba'i phyir/ bden gnyis sbyor ba gang yin pa/ zhes smos te/ bden pa gnyis ni kun rdzob dang don dam pa'i bdag nyid ye shes kyi sku dang 'od gsal ba'i rnam grangs can bdag la byin gyis rlob pa dang / mngon par byang chub pa'i rim pa gnyis dang / de bzhin du phan tshun 'gal ba'i dngos po dang dngos po med pa la sogs pa'i chos rnams la sbyor ba ni gcig tu byed pa ste gnyis su med par yongs su shes pa gang yin pa de zung du 'jug pa'o/ /zung ni dngos po dang dngos po med pa la sogs pa'i bdag nyid du 'jug pa ni dbyer med pa'o zhes rim pa lnga par shes par bya'o/ /de las gzhan pa'i rim pa med de bya ba med pa'i phyir dang mi slob pa'i phyir ro/ /grangs la log par rtogs pa la sogs pa sngon du bshad zin to/ /bsdus pa bstan par bya ba'i phyir/ 'di ni sgrub pa'i yan lag ces bya ba la sogs pa smos te/ sgrub pa ni lha'i rnal 'byor gnyis te/ brtags pa dang yongs su rdzogs pa'o/ /de la brtags pa ni ting nge 'dzin gsum gyi bdag nyid do/ /yongs su rdzogs pa ni rim pa lnga'i bdag nyid do/ /de dag gi yan lag ni bye brag ste/ ting nge 'dzin gsum dang rim pa lnga'o/ /de nyid kyi phyir mchog ces smos te/ gzhan la ltos pa med pa ste/ bdag dang gzhan gyi don byed nus pa'i phyir ro/ /de bzhin du yang rgyud kun gyi don zhes bya ba ni dpal gsang ba 'dus pa ma lus pa'i brjod par bya ba gang yin pa de bsdu bar byed pa ni rim pa gnyis po zhes pa'i tha tshig go/ /la la na re bsnyen pa la sogs pa yan lag bzhi dang ldan pa rgyud kyi don du 'chad pa de rnams kyis rdzogs pa'i rim pa ma bzung ste/ dpal sangs rgyas ye shes zhabs kyi gzhung bzhin no/ /gang yang rdo rje bzhi pos rgyud kyi don bshad par byed pa de rnams kyi bskyed pa'i rim pa'i rim pa tsam yang yongs su ma rdzogs pa'o/ /ji skad du/ dang po stong nyid byang chub sems/ /gnyis pa sa bon bsdu ba ste/ /gsum pa gzugs brnyan rdzogs pa ni/ /yi ge dgod pa bzhi pa'o/ /zhes bya bas sbyor ba dang po ting nge 'dzin kho na gzung ba yin no/ /kho bos ni ji ltar gyur pa de bzhin du 'og nas bshad par bya'o/ /da ni rim pa gnyis kyi nang nas rdzogs pa'i rim pa rgyas pa dang mdor bsdus par rtogs par byed pas rgyud shes pa yin gyi gzhan gyis ma yin zhes dgongs nas/ rim pa 'di'i zhes bya ba la sogs pa smos te/ de'i sngon du bshad pa'i rim pa rnams kyi'o/ /spros pa'i rim pa ni rgya che ba'i rim pas so/ /rnam pa mang ba ni bshad par bya ste/ 'di lta ste/ rdo rje bzlas pa ni rnam pa bcu gcig ste/ rdo rje 'chang chen po'i bzlas pa dang / sku'i bzlas pa dang / gsung gi bzlas pa dang / thugs kyi bzlas pa dang / rin po che'i bzlas pa dang / don yod pa'i bzlas pa dang / khro bo'i bzlas pa dang / zhe sdang gi bzlas pa dang / 'dod chags kyi bzlas pa dang / gti mug gi bzlas pa dang / ma ning gi bzlas pa'o/ /sems rnam par dag pa la gsum ste/ snang ba rnam par dag pa dang / snang ba mched pa rnam par dag pa dang / snang ba nye bar thob pa rnam par dag pa'o/ /bdag la byin gyis rlob pa la gsum ste/ chos kyi skur byin gyis rlob pa dang / longs spyod rdzogs pa'i skur byin gyis rlob pa dang / sprul pa'i skur byin gyis rlob pa'o/ /mngon par byang chub pa la rnam pa gsum ste/ chags pa rnam par dag pa dang / chags bral rnam par dag pa dang / chags pa bar ma rnam par dag pa'o/ /zung du 'jug pa la gnyis te/ rgyu'i zung du 'jug pa dang / 'bras bu'i zung du 'jug go/ /rgyu'i zung du 'jug pa la bzhi ste/ nyan thos dang / rnal 'byor spyod pa dang / dbu ma dang / sngags kyi dbye bas so/ /'bras bu la yang bzhi ste/ rigs dang / yon tan dang / bya ba dang / rdzas kyi bye brag gis so/ /kun tu bsdus pas dbye ba nyi shu rtsa brgyad kyi ting nge 'dzin to/ /de rnams kyi don ni sngon du bshad zin to/ /de bzhin du yang phung po lnga dang 'byung ba chen po dang rnam par shes pa dang / dbang bskur ba dang / lam dang de bzhin gshegs pa dang / ye shes lnga'i ngo bo nyid rim pa lnga'o/ /de la gzugs kyi phung po'i sku rnam par dag pa ni rdo rje bzlas pa'i rim pa ste/ des khrag dang khu ba las byung ba'i gzugs kyi phung po phra mo'i rnal 'byor gyis spong ba'i phyir ro/ /tshor ba'i phung po rnam par dag pas sems rnam par dag pa ste bde ba la sogs pa'i rnam pa can gyi sems des spong ba'i phyir ro/ /'du shes kyi phung po rnam par dag pas bdag byin gyis rlob pa ste/ gzugs la sogs pa'i yul rnams kyi mtshan ma thams cad sgyu ma tsam du mthong bas so/ /'du byed kyi phung po rnam par dag pas mngon par byang chub pa'i rim pa ste/ 'dod chags dang 'dod chags dang bral ba dang 'dod chags bar pa'i 'du byed rnams des spong ba'i phyir ro/ /rnam par shes pa'i phung po rnam par dag pa ni zung du 'jug pa'i rim pa ste/ bag chags dang bcas pa'i rnam par shes pa'i phung po gnas gyur pas/ 'jig rten las 'das pa'i rdo rje lta bu'i skur 'gyur ba'i phyir ro/ /sa'i khams rnam par dag pas rdo rje bzlas pa ste sra ba'i gnas brgyad la brgyab pa las sngags skyes pa'i phyir ro/ /chu'i khams kyi rang bzhin ni sems rnam par dag pa ste des rnam shes dang ye shes kyi dri ma bkrus pa'i phyir ro/ /me'i khams kyi ngo bo nyid ni bdag la byin gyis rlob pa ste/ des dngos po'i mtshan ma'i bud shing sgyu ma lta bu'i ting nge 'dzin gyi mes bsregs pa'i phyir ro/ /rlung gi khams kyi ngo bo nyid mngon par byang chub pa'i rim pa ste/ 'du byed thams cad 'od gsal ba des sbyangs pa'i phyir ro/ /nam mkha'i khams kyi ngo bo nyid zung du 'jug pa ste/ nam mkha' dang mtshungs pa mtha' yas shing dri ma med pa gnyis su med pa'i ye shes gcig pu yin pa'i phyir ro/ /de la rnam par shes pa lnga ni gzugs la sogs pa so sor snang ba'i rnam par shes pa dang / 'jug pa'i rnam par shes pa dang / yid kyi rnam par shes pa dang / nyon mongs pa can gyi yid rnam par shes pa dang / kun gzhi rnam par shes pa'o/ /de la gzugs la sogs pa'i so sor snang ba'i rnam par shes pa'i ngo bo ni rdo rje bzlas pa'i rim pa ste de ni bzlas pa la sogs pa'i sangs rgyas thams cad kyi ngo bor gzugs la sogs pa mthong ba'i phyir ro/ /sgo lnga rnam par dag pa ni sems la dmigs pa thob pa'i rim pa ste/ snang ba thob pa la de thim pa'i phyir ro/ /yid kyi rnam par shes pa rnam par dag pa ni bdag byin gyis rlob pa ste/ sgyu ma lta bu'i ting nge 'dzin mngon du gyur pas yid kyi rnam par rtog pa nub pa'i phyir ro/ /nyon mongs pa can gyi yid rnam par dag pa ni mngon par byang chub pa ste bdag tu lta ba la sogs pa'i nyon mongs pa des sbyangs pa'i phyir ro/ /kun gzhi rnam par shes pa rnam par dag pa ni zung du 'jug pa ste bag chags dang bcas pa'i sgrib pa thams cad rnam par shes pa thams cad kyi gzhir gyur pa nub pa'i phyir ro/ /dbang bskur ba lnga ni de la rig pa'i dbang gi ngo bo ni rdo rje bzlas pa'i rim pa ste rigs lnga'i rnam par shes pa rnam par dag pa'i phyir ro/ /phyir mi ldog pa'i dbang gi ngo bo ni sems rnam par dag pa'i rim pa ste sa bcu pa las slar mi ldog pa'i phyir ro/ /gsang ba'i dbang gi ngo bo ni bdag la byin gyis rlob pa'i rim pa ste des ni kha dog dang dbyibs can ye shes kyi sku thob pa'i phyir ro/ /ji skad du/ des dus brtsams nas de ni mi ldog pa/ /de yi kha dog dbyibs dang phyag mtshan can/ /bsam gyis mi khyab rnam par smin pa'i sku/ / sdom pa de las bya ba byas pas thob/ /ces byung ngo / /shes rab ye shes kyi dbang gi ngo bo nyid ni mngon par byang chub pa'i rim pa ste des de thob pa'i phyir ro/ /ngag gi dbang bskur ba'i ngo bo ni zung du 'jug pa'i rim pa ste srid pa dang mya ngan las 'das pa ro gcig pa ste de kho na nyid thob pa'i phyir ro/ /tshogs kyi lam gyi ngo bo nyid ni rdo rje bzlas pa ste/ bzlas pa'i yan lag bcu gnyis mngon du byas pa'i phyir ro/ /sbyor ba'i lam gyi ngo bo ni sems la dmigs pa ste snang ba la sogs pa'i ye shes kyi sa bcu la sbyor ba'i phyir ro/ /mthong ba'i lam gyi ngo bo ni rang byin gyis rlob pa ste/ yan lag bdun dang ldan pa'i yid kyi rang bzhin gyi sku sgyu ma'i de kho na nyid du mthong ba'i phyir ro/ /bsgom pa'i lam gyi ngo bo ni mngon par byang chub pa'i rim pa ste phyi dang nang gi mngon par byang chub pa'i rim pa'i lam gyi yan lag brgyad dang ldan pa'i phyir ro/ /mi slob pa'i lam gyi ngo bo ni zung du 'jug pa'i rim pa ste/ de las slob pa'i rgyu med pa'i phyir ro/ /rnam par snang mdzad kyi ngo bo ni rdo rje bzlas pa'i ngo bo ste/ rlung rnam par dag pas me long lta bu'i ha hu med par snang ba'i phyir ro/ /rin chen 'byung ldan gyi ngo bo ni sems rnam par dag pa ste rang bzhin gyis tshogs 'gog pas thams cad mnyam pa nyid du 'gyur ba'i phyir ro/ /snang ba mtha' yas kyi ngo bo ni bdag la byin gyis rlob pa ste chos thams cad sgyu ma nyid du so sor rtog pa'i phyir ro/ /mi bskyod pa'i ngo bo ni mngon par byang chub pa ste 'od gsal ba ni shin tu rnam par dag pa chos kyi dbyings kyi ye shes yin pa'i phyir ro/ /don yod grub pa'i ngo bo nyid ni zung du 'jug pa'i rim pa ste bya ba byas pa'i phyir ro/ /ye shes lnga ni 'dir de bzhin gshegs pa dang dbyer med pa'i phyir ma bstan to/ /gti mug rnam par dag pa'i ngo bo ni rdo rje bzlas pa ste/ sngags thams cad la ma rmongs pa'i phyir ro/ /zhe sdang rnam par dag pa ni sems rnam par dag pa ste/ phyin ci ma log pa'i rang bzhin dang snang ba thams cad la rnam par snang ba'i phyir ro/ /nga rgyal rnam par dag pa ni bdag byin gyis rlob pa ste tha mal pa'i nga rgyal log pas so/ /'dod chags rnam par dag pa ni mngon par byang chub pa ste 'dod chags thams cad spangs pa'i phyir ro/ /lta ba rnam par dag pa ni zung du 'jug pa ste lta ba thams cad kyi dri ma med pa'i phyir ro/ /ngag rnam par dag pa ni rdo rje bzlas pa ste ngag gi brjod pa thams cad spangs pa'i phyir ro/ /sems rnam par dag pa ni/ thams cad rnam par dag pa'i rim pa ste/ sems dang sems las byung ba thams cad 'gog pa'i phyir ro/ /lus rnam par dag pa ni bdag la byin gyis rlob pa ste yid kyi rang bzhin gyi sku thob pa'i phyir ro/ /des ni kun rdzob kyi bden pa rnam par dag pa ste thams cad sgyu ma tsam du mthong ba'i phyir ro/ /don dam pa'i bden pa rnam par dag pa ni mngon par byang chub pa ste 'od gsal ba'i de kho na nyid mngon du byas pa'i phyir ro/ /bden pa gnyis ro gcig pa ni zung du 'jug pa ste mi gnas pa'i mya ngan las 'das pa'i dbyings kyi ngo bo yin pas so/ /de bzhin du nye ba'i nyon mongs pa rnams kyang gti mug la sogs par 'dus par shes par bya'o / /de rnams yang dag bsdus pa ni zhes bya ba la/ dbye ba thams cad gcig tu 'dus pa de yang rnam pa gnyis so/ / rang rang gi rigs la ltos pa dang / tha dad pa'i rigs la ltos pa'o/ /de la yang rang gi rigs la ltos pa ni ji ltar rdo rje bzlas pa rnam pa bcu ma ning gi bzlas pa gcig pu la 'dus so/ /de bas na de ni le'u bcu gsum pa las tha mar bstan to/ /snang ba la sogs pa'i ye shes gsum po ni 'od gsal ba la'o/ /chos kyi sku la sogs pa ye shes kyi sku la'o/ /'dod chags dang 'dod chags bral ba dang 'dod chags bar ma 'od gsal ba'i de kho na nyid la'o/ /rgyu dang 'bras bu dag ni zung du 'jug pa'i ting nge 'dzin la 'dus par 'gyur ro/ / rigs tha dad pa la ltos pa ni ji ltar rim pa thams cad rgyu dang 'bras bu'i ngo bor gnas te/ de la rdo rje bzlas pa la sogs pa rim pa bzhi po ni rgyu'o/ /zung du 'jug pa rim pa 'bras bu yin pas rim pa bzhi po ni zung du 'jug pa'i rim pa lnga pa la 'dus te/ bya ba byas pa dang / de las gzhan pa mi slob pa'i phyir ro/ /de ltar rim pa lnga po de dag gi dbye ba dang bsdu ba gang gis shes pa des rgyud ni rnal 'byor chen po'i rgyud rnams rig cing shes so zhes tshig gi don to/ /tshig gi don gcig pu tsam bshad pa la mkhas pas shes pa ma yin no/ /da ni rim pa lnga'i bsdus pa'i don shes pas mtha' drug gi 'grel pa 'di la snod du rung bar 'gyur zhes bstan par bya ba'i phyir/ sngags dang zhes bya ba la sogs pa smos pa la/ de la sngags dang sngags ni sngags so/ /gcig ni lhag ma'i bsdu ba byas nas sngags kyi sgra gnyis gzung ngo / /de la sngags kyi sgra dang pos ni dang po'i sbyor ba la sogs pa ting nge 'dzin gsum gyis rdzogs pa'i sngags kyi sku brjod pa'o/ /gnyis pas kyang sngags thams cad kyi snying por gyur pa yi ge gsum po 'jug pa la sogs pa gtsor gyur pa rjod par byed do/ /de'i rjes su ye shes dang rnam shes dang rang bzhin thams cad 'gog pas sngags dang phyag rgya'i rim pas rdzogs pa sems rnam par dag pa'i mtshan nyid so sor bstan pa'i rim pa ni sems so/ /de la rnam par dag pa'i tshig mi mngon par shes par bya'o/ /de'i rjes su grib ma dang / sgyu ma dang 'ja' tshon la sogs pa sgyu ma'i dpe rnams kyis mtshon pa ye shes kyi sku ston par byed pa ni lus so/ /sgyu ma'i lus po de la yang phyag rgya dang ting nge 'dzin gyi rim pa bsgom pa'i dbang gis nye bar zhi bas 'od gsal ba la 'jug pa'i mtshan nyid kyi rim pa ston par byed pa ni rnam dag go/ / sngar bshad pa'i kun rdzob dang don dam pa la sogs pa gnyis su 'dzin pa'i rnam par rtog pa gsal ba'i mtshan nyid kyi rim pa so sor bstan pa ni zung du 'jug go/ /de dag la brten te rkyen dang ldan pa'i sgra phye bas las kyi don du 'am rgyu lnga pa la bya'o/ /rim pa lnga'i bsdus pa'i don ni de dag skabs kyi rim pa'i rigs pas bsdus pa'i don rnams shes nas ni rtogs nas so/ /ci bya zhe na/ mtha' drug la 'jug go zhes smos te don drug so sor bstan pa'i 'grel pa 'di la 'jug par bya ste/ de mnyan pa'am bshad pa la snod du rung bar 'gyur zhes pa'i don to/ /ji ltar mtha' drug gi 'grel pa'i rim pa lnga brjod par bya ba de bzhin du sngon du bshad zin pa dang 'chad par yang 'gyur ro/ /da ni gang la brten te 'grel pa byas pa de nyid yi ge gsum po ston par byed pa dpal gsang ba 'dus pa nyid bsngags par bya ba'i phyir/ ji srid ces bya ba la sogs pa smos pa la yang / ra la wa la sogs pa gsal bar bya ba rnams dang / gang med par mi 'byung ba dbyangs kyi sde ji srid yod pa de rnams/ de de'i rtsa ba yi ge gsum las de rnams 'byung zhes bya ba'i don to/ /dgongs pa ni 'di yin te lte ba'i phyogs nas langs pa'i srog gi rlung gis gnas brgyad dang phrad pa las dbyangs dang gsal ba'i bye brag gis sde tshan brgyad skye bar 'gyur te/ de dag kyang sde tshan gyi yi ge dang po rnams la thim par gyur nas slar yang bzhi ru gyur nas de nyid skyes pa dang bud med dang ma ning gi dbye bas yi ge gsum du 'gyur ro/ /de'i phyir 'di la grub pa'i mtha' 'di yin te/ yi ge hUM las ka la sogs pa nas ma'i bar du skyes pa dang / yi ge oM las bar na gnas pa ya la sogs pa dang / yi ge a la sogs pa dbyangs yi ge bcu drug skye bar 'gyur ro/ /dbyangs yig med pas gsal bya rnams brjod par mi nus te/ ke khe g+he de zhes bya ba la sogs pa bzhin no/ /de'i phyir ya la sogs pa gzung bas dbyangs yig rnams kyang 'dus so/ /de ltar na ka la sogs pa dang po brjod par rigs pa yin na ji ltar ya la sogs pa brjod de/ go rims 'dor ba'i rgyu med pa'i phyir ro/ /smras pa ya la sogs pa'i rgyud yod de las kyi rab 'byams gtso bo yin pas na gong du gsungs so/ /rab tu byed pa las kyang / ya yi don gyis ci yang rung / /dngos grub 'dod pas bya ba ni/ /ra la sogs pa gsum gyis ni/ /'gro ba'i bya ba rab tu 'jug /zhe'o/ gzhan dag na re dpal gsang ba 'dus pa rnal 'byor gyi rgyud chen po'i yan lag gi yi ge sum cu rtsa gnyis kyi grangs kyis rnal 'byor chen po'i rgyud sum cu rtsa gnyis yod de/ de rnams kyang ka la sogs pa'i gsal bya'i mtha' can no/ /'di lta ste/ dz+nyA na badzra sa muny+dza ya ni ya'i mtha' can no/ /badzra d+ha ra rgyud ni ra'i mtha' can no/ /badzra ma la rgyud ni la'i mtha' can no/ /badzra gra ha rgyud ni ha'i mtha' can no/ /de ltar gsal bya'i mtha' can rgyud gzhan rnams kyang shes par bya'o/ /de rnams kyi yi ge gsum po rjod par byed pa dpal gsang ba 'dus pa kho na rtsa ba'o/ /de yang rnal 'byor gyi rgyud rnams kyi rtsa ba gcig pur ma zad kyi gsung rab yan lag bcu gnyis kyi yang rtsa bar 'gyur zhes bstan par bya ba'i phyir/ thub pa chen po'i chos kyi pha phung po zhes bya ba la sogs pa smos pa la/ thub pa chen po ni shAkya seng ge'i 'o/ /chos kyi phung po brgyad khri bzhi stong yod de de dag thams cad kyi dpal gsang ba 'dus pa snod yin te/ de kho na nyid kyi rin po che'i za ma tog go/ /de la gnas pa'am de nyid las 'byung ngo zhes tshig gi lhag ma'o/ /de bas 'di ni rgyud kyi rtse/ /zhes bya ba ni de nyid rnal 'byor chen po'i rgyud rnams kyi gtsug phud yin no/ /dgongs pa 'di yin te lus dang ngag dang yid dag par bya ba'i phyir bcom ldan 'das kyi gsung rab gsungs pa de nyid rgyud 'di ru mdor bsdus shing thabs bde bas bstan to/ /yang na yi ge gsum po kho na las sngags kyi sde thams cad dang lus la sogs pa'i bya ba yang 'byung ngo zhes de la ltos pas dpal gsang ba 'dus pa kho na rgyud kyi rtse mo yin te / chos kyi phung po'i tshad ni gro ga rim pa gcig pa dang shing ta la'i 'dab ma rnams su phag ze'i rtse mos bris pa'i tshod kyi yi ge rnams kyis gang bar byas te gang bar byas pa'i gro ga'i khur ji srid glang rgod kyis theg pa de ni chos kyi phung po gcig go/ /de'i grangs kyis brgyad khri bzhi stong ngo / /de ni nye bar mtshon pa yin te/ nyan thos kyi sde snod ni chos kyi phung po brgyad khri bzhi stong yin no/ /theg pa chen po la dgu khri'o/ /sngags kyi theg pa la stong phrag brgya yin no/ /da ni don zab pa yin pa'i phyir nyan pa pos rgyud 'di rtogs par dka' ba nyid du bstan par bya ba'i phyir/ gzhung nyung ba la don mang ba zhes bya ba smos te/ rim pa gnyis yongs su rdzogs par ston par byed pa'o/ / rgyud 'di gzhung nyung ba yin pas mdor bsdus pa'i blo can gyi nyan pa po la phan pa'o/ /de lta yin na rjod par byed pa'i nyung bas brjod par bya ba yang nyung bas blang bar bya bar mi 'gyur zhe na/ don mang ba zhes bya ba smos te/ rim pa gnyis yongs su rdzogs par ston par byed pa'o/ /dgongs pa 'di yin te bya ba'i rgyud la sogs pa ma lus pa dang / chos kyi phung po ma lus pa'i don gang yin pa de dag thams cad 'dir me long la zhugs pa'i gzugs brnyan gyi rigs pas nang du 'dus pa zhes dgongs pa'o/ /'dus pa'i rgyud ni rnyed dka' zhing / /zhes bya ba las/ sngon du bshad pa'i rgyud rnams kyi nang nas rnyed par dka' ba ste/ rtogs par dka' ba'o/ /thams cad du ni dus thams cad du'o/ /rnam par 'khor ba ni nyan pa po rmongs shing go bar mi 'gyur ro zhes pa'i tha tshig go/ /ci'i phyir zhe na/ rgyan bdun rtogs par dka' bas na/ /zhes smos te/ rgyan rnams dka' bas yongs su mi shes pa'i phyir ro/ /sbyor ba ni 'dus pa zhes chos can no/ /rnam par 'khor ba zhes bsgrub bya'i chos so/ /rgyan bdun rtogs par dka' bas na zhes gtan tshigs so/ /rgyud kyis brjod par bya ba rgyan rnams dgongs pa dang bcas par bstan par bya ba'i phyir/ de bas zhes bya ba la sogs pa smos pa la/ rgyan rtogs par dka' ba can yin pas gang gi phyir 'dus pa la mkho ba de'i phyir mkho bas so/ / de yi rnam par dbye bar bya/ /zhes smos te/ rgyan de rnams phye nas bshad par bya'o/ /thos pa mang ba nyid bstan par bya ba'i phyir/ 'bad de rnam par shes nas ni/ /zhes bya ba smos te/ chos mang du thos pa la brtson pas dngos su phyin ci ma log par shes nas so/ /rang bzo dgag par bya ba'i phyir/ /de bas bla ma'i bka' drin gyis/ /zhes smos te/ 'phags pa klu sgrub kyi zhabs kyi pad+ma'i bka' drin las so/ /ci'i don du zhe na/ sems can rjes bzung 'dod pa yis/ /zhes smos te sgra ji bzhin pa'i don tsam bzung bas blo rnam par 'khor ba rnams la yang dag par gyur pa'i de kho na nyid kyi don rab tu bstan par 'dod pas so/ / rgyan de ji lta bu zhe na/ brgyan pa ni rgyan te dngos po sgrub par byed par gyur pa'am/ yang na 'dis brgyan par byed pas na rgyan zhes byed pa sgrub par byed pa yin nam zhe na/ gal te dngos po sgrub par byed pa yin na de'i tshe dngos po ni bya ba tsam du gtso bo yin pas brjod par bya ba dang rjod par byed pa las de tha mi dad pa yin pas sgra dang don rgyan nyid du thal bar 'gyur ro/ /rgyan ni tha dad pa yin te ldum bu la sogs pa bzhin no/ /gal te byed pa sgrub par byed pa yin na de'i tshe sgra dang don ma gtogs par rgyan nyid du 'gyur ro/ /rjod pa dang brjod par bya ba las gzhan pa rgyan ni ma mthong ngo zhe na/ smras pa 'dis brgyan pas na rgyan zhes bya ba ni byed pa sgrub par byed pa'o/ /gal te tha dad pa ni mi dmigs zhes bshad ce na/ smras pa/ 'dir sgra ni nus pa du mas khyab pa'i rang bzhin can gyis don du ma la ston par byed pa'i nus pa yod de/ don yang de dang de dag sel ba ston pa'i sgo nas nus pa du ma can no/ /'di lta ste/ sgra'i don gnyis yod de/ brjod par bya ba dang / gsal bar bya ba dag go/ /de la brjod par bya ba ni bum pa'i 'og rgyas pa dang lto ba'i rnam pa can tshig gi don to/ /gsal bar bya ba ni brjod par bya ba las tha mi dad kyang de lta bu'i sna tshogs kyi sgra'i sbyor bas mtshon par bya ste/ dper na go dang wa ri'i yul du chu bo'i 'gram na gnas pa'i seng ges khyi de bsad do zhes/ kye dge slong bde bar song shig ces pa bzhin no/ /de la song shig ces sgra'i don 'gro ba gtso bo ste/ 'gro ba bkag pa ni gsal bar bya ba yin no/ /de bzhin du yang byed pa sgrub pa'i phyogs su tha mi dad pa yang brjod par bya ba ni gsal bar bya ba yin te/ rab tu grags pa'i yan lag la gnas pa'i mdzes pa nyid bud med dam skyes bu'i tha mi dad pa ltar ro/ /de'i dbye ba sgra dang don la sogs pa'i bye brag gis 'og nas 'chad par 'gyur ro/ /mdor bstan pa dang rgyas par bstan pa dang yongs su brtag pa zhes 'grel pa byed pa po rnams kyi lugs so/ /dang po mdor bstan pa yin te de yang grangs sngon du 'gro bar bstan par bya'o/ /grangs ma bstan pas kyang mdor bstan pa ma nges par 'gyur ro/ /rgyas par bstan pa de lta bus brjod pas ni bstan bcos mkhan du mi 'gyur ro/ /gleng bslang ba'i grangs ni lnga zhes bya ba la/ /rnal mos bsgrub par bya ba'i phyir/ /sems dpa' gleng bslang ba ru bshad/ /ces 'byung ba las bstan bcos rtsom pa'i dus su rjod par byed pa la sogs pa ji lta bu yin zhes dpyod pa'o/ /de la rnam pa lnga'o/ /de'i rjes la de nyid bstan par bya ba'i phyir phyin ci ma log pa'i phyir dang nang gi bye brag gis tshad ma nye bar ston pa'i mtshan nyid can rigs pa ste rnam pa bzhi'o/ /de'i rjes la sgra don rgyan gyi dbye bas rgyas bshad mtha' ni rnam pa drug go/ /de nas de'i yan lag kho na rim pa gnyis gtsor gyur pa'i bshad pa ni rnam pa bzhi'o/ /'chad pa'i rgyan lnga pa ste rnam pa gnyis so/ /nyan pa po'i rgyan drug pa ste rnam pa lnga'o/ /bdun pa'i dbye ba rnam pa gnyis te zhes bya ba la brjod par bya ba'i don ma lus pa bsdus pa'i rgyan yin te rim pa gnyis gtsor gyur pa'i phyir ro/ /de las gzhan pa rgyan med de mi dgos pa'i phyir ro/ /mdor bsdus pa ni mdor bstan pas so/ /de'i dgongs pa ni 'di yin te/ bcom ldan 'das rdo rje 'dzin pas ngag ji srid gsum pa de dag zab pa dang rgya che ba dang / sna tshogs kyi don ston par byed pa'i phyir/ rgyan du ma dang ldan pa yin pas mdor bsdus pa ni 'dir bdun gzung bar byas so/ /rgyas par bstan par bya ba'i phyir/ bshad pa'i rgyud kyi rjes su 'brangs nas zhes bya ba la sogs pa la/ dgongs pa lung bstan pa la sogs pa'i bshad pa'i rgyud kyi rjes su 'brangs nas zhes bya ba 'dis rang bzor bkag pa bstan to/ /rgyan ni bdun po rnams kyis ni/ /zhes bya ba nges par bzung ba'i drug pa'o/ /rim pa bzhin du ni mdor bstan pa'i tshig gi rjes su 'brang bas so/ /re re yi ni gleng bslangs pa la sogs pa rnams kyi'o/ /bstan pa dag ces pa ni kho bos 'chad do/ /de nyid bstan par bya ba'i phyir/ /rgyud 'di'i ming ni ci zhig yin/ /zhes bya ba la sogs pa smos pas dri tshig lnga bstan to/ /lan smras pa/ rgyud kyi mtshan ni ming yin la/ zhes pa ni mtshan ni ming ste/ de yang rgyud rjod par byed pa dpal gsang ba 'dus pa zhes bya'o/ /ji skad du/ bstan bcos dag ni thams cad kyi/ /las rnams gang ci'ang rung ba yi/ /ming med pas ni 'jig rten 'di/ /long ba'am lkugs pa 'dra bar 'gyur/ /zhes 'byung ngo / /skye bo 'dod chags can don du/ /zhes pa ni don du rgyu mtshan te rgyu'o/ /gang la brten te bcom ldan 'das kyis rgyud gsungs so/ /'dod chags can zhes nye bar mtshon pa ste 'dod chags la sogs pa nyon mongs pa lngas dkrugs pa'i skye bo rnams la gzigs nas de rnams sbyang bar bya ba'i phyir rim pa gnyis ston par byed pa'i rgyud gsungs te/ ji skad du/ zhe sdang gti mug 'dod chags dang / /yid bzhin nor bu dam tshig ste/ /rigs lngar gtogs pa 'di rnams kyis/ /'dod dang thar pa rab bsgrub pa'o/ /zhes 'byung ba'i phyir ro/ / de ltar 'dod chags la sogs pa'i rigs can gyi skye bo rjes su gzung bar byed pa rim pa gnyis po ni brjod par bya'o/ /ji skad du/ brjod bya med pa'i ngag rnams ni/ /gang phyir bya rog skad bzhin no/ /de'i phyir bstan bcos brtsams dus su/ /brjod bya sngon du mngon par brjod/ / ces 'byung ngo / /brjod bya dang rjod par byed pa 'di dag gi thabs dang thabs las byung ba'i mtshan nyid kyi 'grel pa ma bshad kyang shes par bya ste/ de dag gnas pa'i phyir ro/ /'di yi byed po rdo rje sems/ /zhes pa ni rdo rje sems dpa' byed pa po yin pas nyan pa po rnams bkur sti dang bcas par 'jug par 'gyur ba de nyid kyi phyir zur gyis 'brel pa yang bstan to/ /dper na dga' ldan gyi gnas su bcom ldan 'das rdo rje sems dpa' dpal gsang ba 'dus pa'i rgyud gsungs pa na de la de bzhin gshegs pa rnams kyis zhus par gyur to zhes don gyi shugs kyis nyan pa po dang 'chad pa po'i 'brel pa yin no/ /gang la brten te 'chad pa pos bshad pa dang / nyan pa pos nyan pa de ni sgra dang don gyi 'brel pa rtogs par bya'o/ /ji skad du/ gang phyir 'brel pa yod pas na/ /nyan pa po yi 'jug 'grub pa/ /de phyir bstan bcos thams cad kyi/ /sngon du 'brel pa rtogs par bya/ /zhes 'byung ngo / /tshad dag kyang ni bshad bya ste/ /zhes bya ba ni brjod par bya ba dang rjod par byed pa'i bstan bcos kyi khyad par ro/ /de yang brjod bya dang rjod byed gnyis ka'i yan lag las gzhan ma yin no/ /le'u de bzhin cho ga dang / /zhes pa ni le'u la sogs pa bzhi po ni gzhung rdzogs pa'i gnas yin te/ gang gi phyir yongs su gcod cing gzhal bya gang du rdzogs par byed pa de ni le'u 'o/ /gzhan du ni le'u bco brgyad kyi bdag nyid kyi rgyud nges par mi 'gyur te/ mang nyung gi skyon du thal bar 'gyur ba'i phyir ro/ /de bzhin du cho ga la sogs pa yang shes par bya'o/ /ji skad du/ yongs su gcod pas le'u ste/ stong pa nyid kyi cho gar 'gyur/ /spros pa mang bas dum bu ste/ /sgrib pa med pas rim pa phye/ /zhes 'byung ngo / /gzhung nyid kyis ni grangs kyang ngo / /zhes pa la kyang gi sgra ni don gyis yin te/ gang du don yang yongs su rdzogs pa de yang le'u la sogs pa yin no/ /dgos pa bstan par bya ba'i phyir/ dgos pa yang ni zhes bya ba smos te de yang rnam pa gnyis te/ dgos pa dang / dgos pa'i dgos pa'o/ / de dag rang dang gzhan gyi don sgrub par byed pa'i mtshan nyid do/ /sgrub pa brgyad ni rang gi don phun sum tshogs pa gtsor gyur pa'o/ /sangs rgyas nyid ni gzhan gyi don phun sum tshogs pa'o/ /grub pa ni rnam pa gnyis te/ 'jig rten pa dang 'jig rten las 'das pa'o/ /'jig rten pa ni zhi ba la sogs pa'i cho ga'o/ /'jig rten las 'das pa ni phra ba la sogs pa'o/ /de la zhi ba dang rgyas pa dang dbang dang dgug pa dang rnam par sdang ba dang gsod pa dang / skrod pa dang rengs pa'o/ /yang na 'khor lo dang rin po che dang pad+ma dang ral gri dang rdo rje dang ri lu dang mig sman dang rkang mgyogs te brgyad do/ /phra ba la sogs pa ni gzugs phra ba dang reg pa yang ba dang khyab pa dang yang dag par thob pa nyid dang rab tu snang ba nyid dang brtan pa dang dbang du gyur pa dang 'dod dgur gyur pa'o/ / yang na/ sku yi dbang phyug gsung dbang phyug / de bzhin thugs kyi dbang phyug ste/ /rdzu 'phrul yon tan kun dbang phyug /bza' ba byed pa yon tan brgyad/ /de ltar rang gi don phun sum tshogs pa gtsor gyur pa ni dgos pa'o/ /gzhan gyi don phun sum tshogs pa gtsor gyur pa ni dgos pa'i dgos pa'o/ /dgos pa'i tshig gcig gis gnyis ka gzung ba ste/ rgyud kyi rigs pa las/ shin tu dang ba de ni khyi dang dkar po 'gro ba la yang 'jug pa bzhin no/ /des na dgos pa dang de'i yang dgos pa yang dag par bsdus so/ /gleng bslang ba ni 'das zin te/ zhes bya ba 'dis nye bar sdud pa bstan to/ /gnyis pa zhes pa la sogs pa 'dis gnyis pa mdor bstan pa'o/ /rgyud ces bya ba la sogs pa 'dis rgyas par bstan pa'o/ /mi yi skye bar 'khrungs pa ni/ zhes bya ba la sogs pas so sor bstan pa'o/ /de la mdo sde dang 'dul ba dang mngon pa rnams kyi rigs pa nges par bstan nas slar yang sngags kyi theg pa chen po'i sgo nas ston pa yin te/ de la re zhig dang po ni bcom ldan 'das kyis mi'i skye bar 'khrungs par bstan te/ gang gi phyir bcom ldan 'das shAkya seng ges 'gro ba gdon par bya ba'i phyir rjes su mthun pa'i mi'i skye bar 'khrungs so/ /rigs pa de nyid 'thad pa yin te mi 'gal ba'i phyir ro/ /gang gi phyir rigs mi mthun pa rnams la de'i lus la sogs pa dang mtshungs pa ma yin te/ ba lang la sogs pa dang bya rnams la sogs pa bzhin no/ /de bas na mtshungs pa ni rgyud yin te/ rgyal rigs kyi skyes bu chen po'am bram ze'i skyes bu chen por 'khrungs pa'o/ /de tsam gyis don mi 'grub pas chags pa dang bral zhing dben pa la ma bsten pa'i bar du mi 'grub pas btsun mo'i 'khor gyi nang nas zhes smos te/ bcom ldan 'das de nyid k yis btsun mo'i 'khor gyi nang du bzhugs pas mtshan phyed kyi dus btsun mo thams cad gnyid log pas dur khrod 'di nyid yin zhes mi sdug pa'i bsgom pa mngon du byas te de'i tshe mkha' la byon pa'i sangs rgyas kyi tshogs 'dod chags dang bral ba dag rgyal po'i pho brang gi nang du zhugs pa la bltas te/ de rnams kyis sku bstan pa mthong nas skyo ba skyes par gyur pas de rnams kyi chos gos kyi mtha' bzung zhing / bcom ldan 'das rang sangs rgyas gang gis bzhud pa'i lam de nyid nas nges par 'byung bar gyur to/ /byung nas dgon pa dben pa la drang srong dam pa las chags bral gyi lam blangs te/ ral gris dbu skra bregs te chos gos 'dzin par gyur to zhes btsun mo'i 'khor gyi nang nas ni nges par byung ba ni gleng gzhi yin te/ 'dod chags dang bral ba'i sngon byung ba'i bcas gzhi'o/ /dgon par gnas pas kyang gal te 'dod chags la sogs pa skye bar gyur na/ de'i tshe khyim nas 'byung ba don med par 'gyur bas de'i phyir gsum pa yin te/ 'dul las zhes bya ba la sogs pa 'dul ba las bstan pa ni so sor thar pa'i sdom pa la sogs pa nas gsungs pa'i bslab pa'i tshig gi tshogs gang yin pa de bcom ldan 'das kyis blangs so/ /des ni don mthun pa bsdu ba'i dngos po bstan to/ /gzhan du na sdom pa ma blangs pas pha rol po rnams la de bstan pa don med par 'gyur ro/ /de bas na de rigs pa yin te/ /sems can gyi don gyi yan lag gtso bo yin pa'i phyir ro/ /de ni nges pa'i tshig ces bya ba la sogs par gsungs pa'i sdom pa'i tshig nges par bsrung ba'i phyir ro/ /'bras bu ni sangs rgyas nyid do/ /de 'dod pas ni de thob par bya ba'i 'dun pas so/ /chos spyod pa ni dka' thub kyi spyod pa la sogs pa bcom ldan 'das kyis gang mdzad pa de ni rgyu zhes brjod bya ste/ 'bras bu thob pa la thabs yin pa'i phyir ro/ /de nyid ni rigs pa yin te/ gang gi phyir lus dang ngag dang yid sdom par byed pa brtul zhugs kyi khyad par 'di byang chub 'dod par bya ba yin no/ /'di ni zhes bya ba la sogs pas nye bar sdud pa bstan to/ /'dod chags chos kyi zhes bya ba la sogs pa la/ 'dod chags rnam par dag par byed pa'i sngags kyi bstan pa la'o/ /don gsal rtogs phyir bshad par bya/ /zhes pa ni mi slu ba'i don yongs su shes pa'i rgyu bshad par bya'o/ /rigs lnga'i sangs rgyas zhes bya ba la sogs pa la/ nyon mongs pa lnga dang khams dang dbang po dang yul dang rnam par shes pa dang phung po lnga rnam par dag pa'i slad du bcom ldan 'das rdo rje 'chang chen pos gzugs gcig pu yang ye shes lnga'i ngo bo nyid de bzhin gshegs pa lnga'i rigs su sprul par mdzad de/ de nyid kyis sngon du bshad pa'i nyon mongs pa la sogs pa 'gog pa'i phyir ro/ /de nyid rigs pa yin te/ gang gi phyir lha'i sku ni tha mal pa'i lus dang 'gal ba yin pa'i phyir ro/ /kun rdzob kyi phyogs 'di yin gyi don dam pa ma yin par bstan par bya ba'i phyir/ rgyud ces bya ba yin par brjod ces smos so/ /slar yang zhes bya ba la sogs pa la/ rigs lnga po rdo rje 'chang chen po'i rigs su gcig tu gyur te/ de yang bskyed pa'i rim pa las kyi rgyal ba mchog gi ting nge 'dzin gyi bar du phyi'i dkyil 'khor lus kyi dkyil 'khor la bsdus te bde ba chen po'i rang bzhin dpa' bo gcig pu gnas pa bzhin no/ /rdzogs pa'i rim pa la yang gnyis pa dang / bzhi pa'i rim pa las gsungs pa'i 'od gsal ba la 'jug pa'am/ zung du 'jug pa'i ting nge 'dzin ni rigs gcig tu gyur pa'o/ /de nyid gleng gzhi yin par bstan pa ni rdo rje 'chang chen po nyid bskal pa'i bar du gnas pa dang / rang bzhin gyis rtag pa yin gyi gzhan ni ma yin pa'i phyir ro/ /rigs pa 'di yang yin te/ dbye ba thams cad stong par nub pa'i phyir ro/ /rdo rje la sogs pa zhes bya ba la/ mos pa sna tshogs pa'i sems can gyi khams rjes su gzung ba'i phyir/ de bzhin gshegs pa rigs lnga po rdo rje la sogs pa'i phyag mtshan gzung bar bya bar gsungs so/ /de rnams kyang rnam par dag pa dang bcas par bstan te/ spong ba lnga dang rig pa lnga/ /rdo rje zhes ni mngon par brjod/ /ji ltar pad+ma dmar po 'di/ /gnas kyi skyon gyis ma gos pa/ / dngos po sna tshogs skyon rnams kyis/ /ma gos de ltar khams gsum yin/ /zhes 'byung ba dang / de bzhin du yang rig pa'i dbang bskur ba'i dus su slob ma'i lag pa dag tu rdo rje dang dril bu byin nas/ byang chub sems gang de rdo rje/ /shes rab dril bu zhes brjod do/ /zhes 'byung ngo / /'dir yang rigs pa ste/ don dang rjes su ldan pa'i ming dang ldan pa 'dzin pa'i phyir ro/ /gzhan du na lcags la sogs pas 'dzin pa med do/ /de nyid kyi phyir/ nges pa'i tshig ni yin par bshad/ /ces smos te/ sgeg pa la sogs pa zhes bya ba la sogs pa ni/ bde bas byang chub thob par 'gyur/ /zhes tshig las sgeg pa la sogs pa'i gar gyi nyams dgu dang ldan pa'i spyod pas rdo rje 'chang chen po'i go 'phang thob par 'gyur zhes 'bras bu thob pa'i phyir spyod pa lnga ni snga ma bzhin kho na'o/ /de la/ sgeg pa dpa' ba 'jigs rung dang / /dgod dang gshe dang 'jigs byed dang / /snying rje rngam dang zhi ba ni/ /gar gyi nyams ni dgu ru bshad/ /de la sgeg pa'i spyod pa ni/ dam tshig gi phyag rgya la sogs pa bsten pa'o/ /dpa' ba'i spyod pa ni thams cad du mi 'jigs pa'o/ /'jigs su rung ba'i spyod pa ni go ku da ha na bza' ba'i mtshan nyid do/ /smad pa dang 'jigs par byed pa ni 'jigs su rung ba zhes bshad do/ /dgod pa'i spyod pa ni ro langs bslang ba la sogs pa'i mtshan nyid dam sgeg pa'i nyams kyi bye brag go/ /gshe ba'i spyod pa ni mngon spyod la sogs pa'i las drag po'i rab 'byams byed pa'i mtshan nyid do/ /'jigs par byed pa'i spyod pa ni zhe sdang rdo rje'i ting nge 'dzin gyis khro bo'i 'khor lo spros te bgegs rnam par gnon pa dang phur bus gdab pa dang brdung ba'i mtshan nyid do/ /snying rje'i spyod pa ni sems can rjes su bzung ba'i mtshan nyid do/ /rngam pa'i spyod pa ni bstan pa la sogs pa'i rdzu 'phrul lam/ chos 'di ru bstan pa'i dus su gzhan du yang bstan pa ltar snang ba'o/ / 'gal ba'i sgo nas sems can gyi don byed pa'i mtshan nyid do/ /zhi ba'i spyod pa ni rang bzhin gyis grub pa'i 'od gsal ba la 'jug pa'i ting nge 'dzin to/ / 'di yang rigs pa yin te/ thabs bde bas 'dod chags can la sogs pa 'dul ba'i phyir ro/ /rigs pa bstan nas gsum pa rgyan bshad pa'i rgyud las bya ba'i phyir/ rgyan ni gsum pa zhes bya ba la sogs pa smos te/ mtha' drug ni mtha'i sgras bye brag bshad de/ des bye brag drug gi bshad pa'i rim pa yin zhes bshad do/ /rnal 'byor rgyud tshul las bshad pa'i/ /zhes pa ni rdo rje phreng ba la sogs pa'i bshad pa'i rgyud las bcom ldan 'das nyid kyis gsungs so/ /rgyas btab don ni rab rtogs pa/ /zhes bya ba ni phyed par dka' ba'i don ji lta ba bzhin du phyin ci ma log pa'i de kho na nyid rab tu rtogs shing bar tu gsal ba zhes tha tshig go/ /ji lta bu zhe na/ mtha' drug gi ni tshig nges shing / /zhes smos pa ni mtha' drug gis tshig rnams nges par byed pa'o/ /tshig rnams kyi don yang nges par bya zhes smra ba yang yin te/ mtha' drug ni don dang sgra'i rgyan yin pa'i phyir ro/ /drang ba dang zhes bya ba la sogs pas rgyas par bshad do/ /skal ngan rnams la zhes bya ba la sogs pas so sor bstan par bshad do/ /skal ngan ni sems la g.yo sgyu yod pa dang / the tshom rgol ba la dga' ba'i phyir ro/ /de lta bu nyan pa po gang yin pa de rnams la rgyal ba ste rdo rje 'chang chen pos drang ba'i don du gsungs te/ de kho na nyid kyi don las bskyed pa'i rim pa tsam gzhan du drangs pas na drang ba'i don to/ /de kho na nyid ston par byed pa ma yin no/ /sbas te zhes pa ni don dam pa ma yin zhes bya ba'i don to/ /yang dag don ni rab ston phyir/ /zhes pa ni rtsa kun tu spyod pa la sogs pa'i mtshan nyid can gyi don ji lta ba bzhin du bstan par bya ba'i phyir ro/ /nges pa'i don ni nges par bshad pa'i don no/ /gnas pa ni bshad pa'o/ /rjod par byed pa gcig gis don gnyis brjod pa la nus pa ji ltar yod ce na/ smras pa/ sna tshogs sel ba dang ldan pa'i sgra yin pa'i phyir ro/ /dper na go'i sgra gcig pus don bcu brjod de/ ji skad du/ ngag phyogs sa 'od rdo rje mda'/ /phyugs mig mtho ris chu dag tu/ /don bcu la ni blo can gyis/ /go yi sgra ni brtag par bya/ /zhes 'byung ngo / /don gyi rgyan de dag yin te/ sgra'i bye brag med pa'i phyir ro/ /mchog 'dod ces bya ba la sogs pa ni de kho na nyid 'dod pa'i slob ma rnams la'o/ /de rnams la chos kyi de nyid rab ston pa zhes pa ni 'od gsal ba'i de kho na nyid bshad pa'o/ /'gal ba'i tshig gi sbyor ba yis/ /zhes pa la 'jig rten dang 'gal ba'i sgra'i sgo nas so/ /gsungs pa gang yin dgongs bshad de/ /zhes pa ni dgongs pa dang bcas pa'i sgra'i sbyor ba bstan te zhes tha tshig go/ /'di ni sgra yi rgyan yin te/ de lta bur gyur pa'i sgra gtso bo yin pa'i phyir ro/ /dbang po dman pa'i sems can rnams/ /zhes bya ba la sogs pa ni shes rab kyi mthar thug pa med pa de bas dad pa che ba'i phyir de kho na nyid ston pa la snod du gyur pa dbang po dman pa'o/ /rtogs phyir zhes pa ni de rnams de kho na nyid du rtogs su 'jug pa'o/ /mchog tu gsal ba yis zhes pa ni gsal zhing 'jam pa'i tshig gis ston pa'o/ /de nyid gsal bar ston pa ni zhes pa la rab tu grags pa'i de kho na nyid bshad pa'o/ /dgongs pa min pas bshad pa'o/ /zhes pa ni 'gal ba'i sgra med par gsungs zhes tha tshig go/ /'di ni don gyi rgyan yin te/ don kho na brgyan par bya ba yin pas so/ /dkyil 'khor la sogs dang zhes pa ni dkyil 'khor sna tshogs 'dri ba dang / tshad la sogs pa'i tshig rnams la'o/ /de bzhin du rtog pa ni gshin rje gshed la sogs pa'i sgom pas rnam par sdang ba la sogs pa las kyi rab 'byams ston par byed pa la'o/ /spyod pa ni spros bcas la sogs pa'o/ /ji lta ji ltar gsungs zhes pa ni de dang de ston par byed pa'i tshig dag la'o/ /don zab min bshad gang yin pa/ zhes pa ni de kho na nyid kyi don dang bral zhing phyi'i spros pa tsam ston par byed pa'o/ /de ni ji bzhin sgrar gsungs pa'o/ /zhes pa la sgra ji ltar yod pa de dang 'dra ba'i don ston pa'o/ /'di yang sgra yi rgyan yin te/ /ji skad du/ thugs kyi dkyil 'khor dam pa ste/ /khru ni bcu gnyis tshad du bya/ /zhes gsungs pas de las mang ba'am nyung bar mi bya'o/ /de bzhin du rtog pa dang dpyod pa dag las shes par bya'o/ /ko Ta k+Sha la sogs pa ni 'dir sgra gnyis te/ 'jig rten pa dang / bstan bcos pa'o/ /de la 'jig rten pa ni/ dper na ba lang dang rta dang skyes pa dang bya dang ri dgas dang glang po che dang bram ze zhes bya ba dang / bstan bcos pa ni dper na bden pa dang dkon mchog gsum dang / de bzhin nyid dang yang dag pa'i mtha' dang stong pa nyid do zhe'o / /ko Ta k+Sha la sogs pa ni 'jig rten pa yang ma yin la/ bstan bcos pa yang ma yin no/ /de lta yin na ci'i phyir brjod ce na/ de bzhin gshegs pa zhes pa ni rang gis glegs bam lta ba rnams la 'khrul pa bskyed par bya ba'i phyir bcom ldan 'das de bzhin gshegs pa rtsa ba dang yan lag gi rlung rnams kyi de dag brdar gsungs so/ /dper na b+hu su ko bzhin no/ /za ba dang nyal ba dang 'chag tu 'gro ba zhes bya ba'i don to/ /de ni ji bzhin min sgrar grags/ /zhes pa ni don brjod pa la sgra mi 'dra ba'i phyir ro/ /'di yang sgra yi rgyan yin te/ brda yang sgra yin pa'i phyir ro/ /de lta na sgra ji bzhin pa dang drang ba'i don la bye brag gang zhe na/ smras pa/ sgra dang don gyi rgyan gyi dbye bas so/ /drang ba'i don dang dgos pa ma yin pa dag gi khyad par gang zhe na/ mi gsal ba dang gsal ba'i bye brag gis so/ /sgra ji bzhin pa dang / dgongs pas bshad pa dag gi ni/ mi 'gal ba dang 'gal ba'i sgra'i da bye bas so/ /nges pa'i don dang / dgongs pa ma yin pa dag gi ni/ dbang po rno ba dang dbang po dman pa'i gang zag gi dbye bas so/ /dgongs pa dang sgra ji bzhin ma yin pa dag gi ni 'gal ba dang ma grags pa dag gi sgra'i dbye bas so/ /de ltar drang ba dang nges pa'i don dang dgongs pa ma yin pa ni don gyi rgyan no/ /dgongs pas bshad pa dang sgra ji bzhin ma yin pa ni sgra'i rgyan zhes mtha' drug gi dbye ba zhes bya ba bshad pa'i bye brag bstan to/ /rim pa gnyis po gcig pu ston par byed pa bshad pa'i rnam pa bstan par bya ba'i phyir/ bshad pa'i dbye ba zhes bya ba la sogs pa smos so/ /yi ge don zhes bya ba la sogs pas mdor bstan pa'o/ /dang po gcig pu kho na nyid/ /ces bya ba la sogs pas grangs sngon du 'gro bas rgyas par bshad pa'o/ /kun du bsdus te rnam pa brgyad du 'gyur ro/ /so sor bstan par bya ba'i phyir/ sgra tsam la ni rab gzhol ba/ /zhes pa ni sgra tsam la mngon par zhen pa'o/ /phyi rol bstan bcos mkhas pa yis/ /zhes pa ni rtog ge dang sgra'i bstan bcos la sogs par byed pa'i tshig dang byed pa po dang rtags dang bsdu ba la sogs la mkhas pa'o/ / de yi sgrub pa rab ston pa/ /zhes pa ni de dang rjes su mthun pa'i bstan pa bcom ldan 'das kyis gang bstan pa de ni yi ge'i don te/ yi ge tsam gyi don brjod cing brjod par bya ba gang yang rung ba ste/ rdzogs pa'i rim pa spangs pa'i bskyed pa'i rim pa'i phyogs gcig gi mtshan nyid do/ /de bas 'di sgra'i rgyan yin te/ sgra sna tshogs pa tsam yin pa'i phyir ro/ /spyi'i don bstan par bya ba'i phyir/ mdo sogs zhes bya ba la sogs pa smos te/ mdo sde la sogs pa ni nyan thos dang mdo sde pa dang rnal 'byor spyod pa dang / dbu ma pa rnams so/ / gang gi tshe sngon gyi bag chags kyi 'brel pa'am/ dge ba'i bshes gnyen dang phrad pas sngags kyi theg pa chen po bstan par gyur pa de'i tshe rang gi sdom pa dang 'gal ba'i dam tshig dang sdom pa thos nas 'gyod par gyur pas gsang sngags kyi gsung la skur ba btab pa'i sdig pa me la phye ma leb bzhin du ltung bar 'gyur ro/ /de rnams kyi 'gyod pa bzlog par bya ba'i phyir de dang mthun par bcom ldan 'das kyi bstan pa gsungs so/ /gang gis 'di ni rigs pa yin/ /zhes lam de nyid du zhugs shing skur ba mi 'debs so/ / mdo sde la sogs pa la zhugs pa'i 'gyod pa zlog par byed pa'i mtshan nyid ni spyi'i don gyi yan lag dang po'o/ /de bzhin du yang bskyed pa'i rim pa dang ldan pas na zhes pa ni yan lag gnyis pa'o / /de yang rnam pa gnyis te/ yongs su grags pa dang bstan bcos pa'o/ /de la dang po sbyor ba dang dkyil 'khor rgyal ba dang las kyi rgyal ba'i ting nge 'dzin gsum ston par byed pa ni yongs su grags pa'o/ /byang chub kyi sems kho na las khams gsum thams cad skye ba ste/ byang chub kyi sems de yang dbang po gnyis snyoms par zhugs pa las 'byung ngo zhes pa ni bstan bcos pa'o/ /gnyi ga de dag kyang spyi'i don zhes bshad pa'i bye brag ste bskyed pa'i rim pa'o/ /rdzogs pa'i rim pa so sor bstan par bya ba'i phyir/ /'dod chags chos zhes bya ba la sogs pa 'dod chags kyi chos ni 'dod chags kyi chos te de'i chos nyid do/ /bzlas pa'i gnas skabs su ni 'dod chags la sogs pa'i bzlas pas 'dod chags la sogs gang gis 'dod chags rnam par dag par gyur pa'o/ /'di ni nye bar mtshon pa ste/ zhe sdang la sogs pa'i rnam par dag pa yang shes par bya'o/ /de rab tu ston pa ni sbas pa'i don gcig pa'o/ /de yis rdo rje bzlas pa'i rim pa bshad do/ /bzlas pa'i gnas skabs su ni 'dod chags la sogs pa'i bzlas pas 'dod chags la sogs pa rnal 'byor pas dag par byed do/ /kun rdzob bden pa rtogs pa dang / /zhes pa ni myur ba'i ting nge 'dzin nam snang ba la sogs pa'i rnal 'byor gyis skyed pa'i lha'i sku sgyu ma la sogs pa'i dpe bcu gnyis kyi sgo nas mthong ba zhes bya ba 'dis bdag la byin gyis rlob pa'i rim pa sbas pa'i don gnyis pa'o/ /ye shes gsum po rnam dpyad pa'i/ /zhes pa ni 'dis sems rnam par dag pa'i rim pa bstan to/ /de ltar rdo rje bzlas pa dang sems rnam par dag pa dang rang byin gyis brlab pa ste rim pa gsum ni sbas pa'o/ /sbas pa ni sbas pa'i mtshan nyid can rim pa gsum po gang la yod pa de ni sbas pa'o/ /rim pa tha ma gnyis po so sor ston par byed pa na mthar thug pa bstan par bya ba'i phyir/ 'od gsal ba la rab 'jug dang / /zhes smos te/ phyag rgya dang / ting nge 'dzin gyi rim pa dag gis yang dag par thob par bya ba'i de kho na nyid bzhi pa mngon du byed pa'o/ /des ni mngon par byang chub pa'i rim pa bstan to/ /de bzhin du/ zung du 'jug pa rtogs pa ste/ /zhes bya ba 'dis zung du 'jug pa'i rim pa bstan to/ /mtha' ni mur thug pa yi tshig /ces pa ni de las gzhan pa'i rim pa med pa'i phyir ro/ /de ltar bshad pa rnam pa bzhis rim pa gnyis po yongs su rdzogs par bstan to/ /de ltar yi ge'i don ni sgra'i rgyan no/ /spyi'i don dang sbas pa dang mthar thug pa'i don ni don gyi rgyan no/ /de rnams kyis rim pa gnyis po brgyan par byed ces pa'i tha tshig go/ / gal te bshad pa rnam pa bzhi pos rim pa gnyis po bstan pa yin na/ de'i tshe sgra dang don gyi dbye bas ci zhig bya zhe na/ smras pa/ nges pa med pa'i phyir mtha' drug tu gsungs te/ bshad pa rnam pa bzhi po bzhin du mtha' drug gis nges par rim pa gnyis pa bshad pa ma yin te / drang ba'i don gyis rdzogs pa'i rim pa bkag nas bskyed pa'i rim pa'i yan lag tsam ston par byed de/ de bas na spyi'i don las khyad par yod pa'o/ /nges pa'i don ni rdzogs pa'i rim pa ston par byed pa yang rdo rje bzlas pa la sogs pa'i rim pa ston pa la nges pa med de/ stong pa nyid tsam mam gzhan gang ci yang rung ba des ston par byed pa'i phyir ro/ /res 'ga' zhig bstan pas kyang de'i tha snyad mi rigs so/ /dgongs pa bshad pas kyang de kho na nyid kyi don so sor ston par byed pa snga ma bzhin no/ /khyad par ni 'gal ba'i sgra rab tu sbyor bas so/ / dgongs pa ma yin pa de bzhin yin no/ /sgra ji bzhin pas ni phyi'i spros pa tsam ston par byed pa'i nus pa yod kyi gzhan ni ma yin no/ /shin tu spros pa med pa'i spyod pa ni rdzogs pa'i rim pa'i yan lag yin yang sgra ji bzhin pas de bsgrub par bya ba ma yin gyi 'on kyang de'i mtshan nyid tsam rjod par byed pas skyon med do/ /sgra ji bzhin ma yin pa ni 'jig rten dang bstan bcos las phyir gyur pas bskyed pa'i rim pa tsam la yang ston par byed pa'i nus pa med na yang / yan lag lnga dang ldan pa'i rdzogs pa'i rim pa la ga las 'gyur te/ brda tsam ston par byed pa yin pa'i phyir ro/ /de'i phyir na mtha' drug las bshad pa rnam pa bzhi po tha dad pa kho na'o/ /'chad pas zhes bya ba la sogs pa 'dis 'chad pa po'i rgyun bshad pa yin te/ gal te 'chad pa pos gzhal bya ma shes nas slob ma rnams kyi bsam pa ma longs shing bshad par byed na/ de'i tshe thams cad dkrugs par 'gyur ro/ /slob ma'i dbye ba yongs su shes pas bshad pa sna tshogs pa byed pa la brtson pa'i 'chad pa po yod na/ thams cad mdzes par byed pas 'chad pa po'i rgyan yin no/ /'dod pa ni smon pa ste srid pa'i don du lung sbyar ro/ /gal te 'chad pa pos bshad par 'dod pa de'i tshe dbye ba gnyis kyis nyan du gzhug pa'i phyir bshad par bya'o/ /de la dbye ba gnyis ni tshogs pa la bshad pa dang / slob ma la bshad par bstan pa'o/ /de la tshogs kyi nang du gsang ba'i don gab par byas la bshad pa gang yin pa de ni tshogs la bshad pa'o/ /dbang po rno ba'i gang zag rnams la shin tu gsal ba'i de kho na nyid rab tu bstan pa ni slob ma la bshad pa'o/ /de la dang po rnam pa lnga ste/ ji bzhin sgra ni sgra'i rgyan no / /dgongs min ni don gyi rgyan no/ /drang ba'i don ni don gyi rgyan no/ /yi ge'i don ni sgra'i rgyan no/ / de ltar yi ge'i don dang sgra ji bzhin pa sgra'i rgyan dag dang / drang ba'i don dang dgongs pa ma yin pa dang / spyi'i don rnams ni don gyi rgyan te tshogs pa la bshad pa yin te bskyed pa'i rim pa tsam ston par byed pa'i phyir ro/ /gal te dbang po dman pas rtogs par byed pa'i de kho na nyid gsal bar bshad pa dgongs pa ma yin no/ ji ltar tshogs pa la bshad par 'gyur/ smras pa/ rnam par dag pa tsam ston par byed pas sam/ rigs brgya'i dbye bas lus rnam par dben pa ston pas na skyon med do/ /gal te res 'ga' zhig dgongs pa ma yin pas rim pa lnga'i nang nas gang yang rung ba ston par byed na de'i tshe tshogs pa la bshad pa nyid du 'gyur ro/ /gang gi tshe bya mjug rings 'phur bas sbrul du mi 'gyur ro/ /ji bzhin min sgra ni sgra'i rgyan no/ /nges don ni don gyi rgyan no/ / dgongs te bshad pa ni sgra'i rgyan no/ /sbas pa dang mthar thug pa dag ni don gyi rgyan yin zhes slob ma la bshad pa dbye ba lnga ste/ rdzogs pa'i rim pa bstan par byed pa'i phyir ro/ /bshad pa'i rgyud kyi rjes 'brangs nas/ zhes pa 'dis lung gi tshad ma bstan to/ / de ltar mdor bsdus te 'dul bya rnams la ni gang zag rnams la rim pa gnyis la brten te sngon du bshad pa'i dbye ba bde bar gshegs pa rnams kyis gsungs so/ /nyan pa po'i rgyan bstan par bya ba'i phyir/ rnam pa kun du zhes bya ba la sogs pa smos te/ /'jig rten na ni nges gyur pas/ /zhes pa la/ rigs so sor nges pa can no/ /de bas na lnga yin te/ byang chub sems dpa'i rigs can gcig pur ci'i phyir ma gsungs she na/ rnam pa kun tu nyan 'dod pa'i/ zhes pas ni thos pa la 'jug pa btang snyoms bya bar mi rigs pa'i phyir ro/ /blo yi rnam pa dpag med phyir/ /zhes pa ni rigs so sor nges pa'i rgyu yin pas so/ /ut+pa la dang zhes bya ba la sogs pas mdor bstan pa'o/ /rang bzhin tha dad ming can de/ /zhes pa don dang ldan pa'i ming 'dzin pa'o/ /thams cad mkhyen pas gsungs pa yin/ /zhes pa 'dis rang bzo bkag pa'o/ /de ni ma lus don thos nas/ /zhes pa ni rgyas par bstan pa'o/ /don ma lus pa ni gzhal bar bya ba'i dngos po slob dpon gyi zhal nas thos te/ 'dzin pa la ni rnam par mkhas/ /zhes pa ni phyin ci ma log par 'dzin par byed do/ /skad cig gis ni brjed gyur pa/ /zhes pa ni/ de nas langs te cang mi dran pa'o/ /de bas na ut+pal ltar ut+pal te/ gang gi phyir mtshon gnas pa'i ut+pala'i dri dang kha dog yod de/ de nas bcad ma thag tu dri med pa dang mdog yal lo/ / gzung bya lhag par mang thos kyang / /zhes bya ba la sogs pa 'dis pad+ma dkar po bstan to/ /gzung bya ni chos kyi don no/ /lhag pa ni chos grogs po las khyad par du gyur pa'o/ /de nyid mang du thos nas 'dzin cing dran pas kyang byed do/ /ston pa yis ni nus med pa/ /zhes pa ni thos nas kyang bshad pa'i dus su phyogs dang gtan tshigs dang dpe dang bshad pa'i rgyud dang yan lag gi rgyud kyi rim pas so sor ston par mi nus pa ste/ skye bas thob pa'i shes rab med pa'i phyir dang / chos la dmigs pa las byung ba'i shes rab dman pa'i phyir zhes dgongs so/ /bum pa'i ras bal zhes bya ba'i dpe yin te/ des na bum pa gnas pa'i ras bal gyi sa bon las/ myu gu la sogs pa mi 'byung ngo zhes tha tshig go/ /'dra ba ni pad+ma dkar po'i gang zag kyang de dang 'dra ba yin te pad+ma dkar po'i dri rang gi lte bar 'khor zhing phyir spro ba med do/ /pad+ma bstan par bya ba'i phyir/ dad dang ldan zhing snying rje shes/ /zhes pa ni yon tan thams cad kyi gzhir gyur pa ni dad pa'o/ /des ni dge ba can yin bzhin du rnal 'byor pa la srung bar byed pa ste/ bden pa dang dkon mchog gsum la sogs pa rnams la mngon par dad pa'o / /shes pa ni yang dag par rtogs pa'o/ /snying rje ni thos pa la sogs pa'i 'bras bu de dang ldan pa'o/ /thos pa blo la rgyas par gyur pa zhes pa ni slob dpon gyi zhal nas gang thos pa de nyid sems kyi rgyud du rigs pa rnam pa bzhis 'phel bar gyur pa'i ngang tshul can no/ /de bzhin du 'chad pa'i dus su/ /tshigs med 'od ma bzhin du 'dzag /ces pa ni chos thams cad gtong bar byed pa'o/ /de ni pad+mar bshad pa yin te/ pad+ma'i lte bar yod pa'i zil ba rnams nyi mas kha phye ma thag tu 'thor bar byed do/ /tsan+dan bstan par bya ba'i phyir/ thos pa nyung zhing zhes smos te/ slob dpon gyi zhal nas thos pa mang du ma thos pa'o/ /gal te mkhas pa gzhan gang zhig gis skul bar byed na kye gdong bzang 'bad par gyis shig /ji srid 'dod par bdag gis khyod la thams cad bshad par bya zhes thos nas smra na bdag gis thams cad shes pas chos gzhan thos pas bdag la dgos pa med do zhes khros nas langs te 'gro ba ni nga rgyal ldan pa'o/ /ji skad du/ thos pa'i rjes su 'brang ba gang zhig blo ldan nyid/ /thob nas thos pa nyid la btang snyoms gang byed pa/ /thos pa sna tshogs rnam pa dpag med lus pa na/ /rmongs pa de ni nges pa skye bar ga la 'gyur/ /zhes 'byung ngo / /gal te nga rgyal ldan pa yin na de skyon med du chug na gal te bshad pa'i dus su mang du smra ste skyo ba skyed par byed do/ /gal te rigs pa smra na de'i tshe skyon med do/ /'on kyang rtsa ba med par ni mdo las 'das shing bstan pa gzhan dang bsres te rang gi grub pa'i mtha' dang bral bar smra zhes bya ba'i tha tshig go/ /skyon de bsal bar bya ba'i phyir thos pa'i snod du rung bar gal te byas na de yang mi nus te/ nga rgyal dang ldan pa'i phyir ro/ /ji skad du/ mi shes pa ni bde bar mgu bya ste/ /khyad par shes pa shin tu mgu bar sla / /dum cig shes pas khengs pa gang yin pa/ /sangs rgyas kyis kyang mgu bar byed mi nus/ /zhes 'byung ngo / /de ni tsan+dan zhes bya ba ste tsan+dan ni rang bzhin gyis 'bras bu med pa dang mche ba'i dug can gyi sbrul rnams kyis bskor ba'i phyir de'i gam du gang gis kyang mi nye bas rjes su gzung bar mi nus so/ /de ltar bsod nams dang ye shes kyi tshogs dang bral ba'i phyir ro/ / bdag gi don dang gzhan gyi don sgrub par byed pa ma yin no/ /rin po che bstan par bya ba'i phyir/ /tshul khrims zhes bya ba la sogs pa smos te/ rgyu dang mi rgyu rnams kyi rten sa gzhi bzhin du yon tan thams cad kyi gzhi ni tshul khrims de dang ldan pa'o/ /dag pa ni g.yo sgyu med pa'o/ /mkhas pa sgrin zhes bya ba ni dge ba'i las rnams la brtson zhing yongs su shes pa'o/ /shes rab ldan zhing zhes pa ni lhan cig skyes pa'i shes rab yod pa'o/ /rgyud gcig pa ni lan gcig gzhan gyis brjod pa'i gzhal bya thos nas ji srid 'tsho ba'i bar du 'dzin cing dran pa'o/ /thos nas legs par ston pa ni/ /zhes pa la/ ji ltar slob dpon gyi zhal nas thos pa de bzhin du/ bshad pa'i rgyud la sogs pa dang bcas pa ma nor bar ston pa de ni rin po che lta bu'i gang zag ste re ba thams cad rdzogs par byed pa dang rin thang med pa'i phyir ro/ /yang na sngon du bshad pa'i yon tan gyi tshogs rin che ba'o / /de dang ldan pa'i phyir rin po che'o/ /gang zag de rnams rnam pa gnyis su bstan par bya ba'i phyir ut+pal zhes bya ba la sogs pa smos so/ /gang zag bzhi pa 'di dag ni/ /zhes bya ba la sogs pa smos te/ /bskyed pa'i rim pa gtsor gyur pa'i tshogs kyi bshad pa'i snod du rung ba yin gyis gzhan gyi ni ma yin zhes tshig gi lhag ma'o/ /de lta na tsan+dan zhes bya ba bems pa'i rigs can de ci'i phyir bshad pa'i snod du rung bar 'gyur zhe na/ smras pa/ rnam pa kun tu nyan 'dod pa/ /zhes sngon du bshad de nyan pa la 'jug pa ni btang snyoms kyi gnas ma yin pa dang / rjes su gzung bar bya ba yin pas so/ /gang gi phyir gsang ba 'dus pa 'di la ni/ rigs ngan dang / smyug ma mkhan la sogs pa yang snod du rung bar 'gyur na/ chos thos pa la sogs pa'i rim gyis 'jug pa ni lta smos kyang ci dgos/ de'i lta ba log pa tsam rim gyis bsal bar nus kyi de nyid kyi phyir rdzogs pa'i rim pa'i snod ma yin no/ /gang gi tshe skas kyi rim pa'i rigs pas bskyed pa'i rim pa mthar phyin na de'i tshe tsan+dan lta bu yang rdzogs pa'i rim pa'i snod du 'gyur ro/ /des na rnam pa thams cad du de la btang snyoms bya ba ma yin no/ /rdzogs pa'i rim pa'i zhes bya ba la sogs pa ni 'di slob ma la bshad pa'i snod du rung ba gcig pu kho na zhes dam bca' ba'o / /rtag tu spyod pas rnam brgyan pa ni tshul khrims la sogs pa'i yon tan rnams kyis brgyan pa zhes khyad par gyi sgo nas gtan tshigs so/ /da ni slob ma brtags pas bshad pa'i dbye ba bstan par bya ba'i phyir/ gang zag ces bya ba la sogs pa smos te/ gang zag gang yin pa dang ji lta bu'i shes pa dang ldan pa zhes yongs su brtags te snod dang snod min zhes pa la yon tan can dang yon tan can ma yin pa shes nas/ rdo rje slob dpon mkhas pa ni/ /zhes pa la/ de rnams kyi bsam pa dang bag chags la sogs pa'i dbye ba shes pas so/ /bshad pa rnam pa gnyis bya'o/ /zhes pa ni sngar bshad pa'i bshad pa bya ba yin te/ gzhan du na thams cad dkrugs par 'gyur ro/ /bstan bcos thams cad khyab par byed pa bsdu ba'i rgyan bstan par bya ba'i phyir/ rgyan ni drug po zhes bya ba la sogs pa smos te/ gleng gzhi la sogs pa drug gis rgyud kyi lus nges par byas pas so/ /bden gnyis rnam par nges byas pa/ /zhes pa ni kun rdzob dang don dam pa dbyer med pa'i ting nge 'dzin so sor bstan pa'o/ /de ni rgyan 'gyur bdun pa ste/ /zhes pa la/ de las gzhan pa'i rgyan mi dgos te bslab par bya ba med pas so/ /rdzogs pa'i rim pa sgrub pa'o/ /zhes pa ni rdo rje'i sku rnam grangs can chos kyi dbyings dang shes rab kyi pha rol tu phyin pa dang / ji ltar gyur pa'i tshul zhes bya ba la sogs pa'i sgras brjod pa ste 'bras bur gyur pa'i phyir ro/ /de lta na zung du 'jug pa rab tu bstan pa ni mthar thug pa'i rnam pa gnyis pa 'di yin na/ de ci'i phyir rdzogs pa'i rim pa sgrub par byed pa'i rgyan gzhan bshad ce na/ de ni bden gyi rgyas par bshad pa dang mngon du byed pa dag gis bye brag yod do/ /dgongs pa ni mthar thug pas ni zung du 'jug pa'i rgyas par bshad pa dang mtshan nyid ston to/ /de bas na zung du 'jug pa la rtogs pa zhes bshad kyi thob pa ni ma yin no/ /'dir ni bstan bcos kyi don ma lus pa yongs su brtags pas gnyis su med pa'i ting nge 'dzin du gyur te/ thos pa dang bsam pa'i shes rab dag las bsgom pa'i rang bzhin khyad par du 'phags pa yin pas mngon du byed pa'i dbang gis rgyan 'di tha dad pa kho na'o/ /da ni gzhung gi tshad ma nyid bstan par bya ba'i phyir bshad pa'i rgyud kyi rjes su 'brangs nas zhes smos te/ rdo rje phreng ba la sogs pa'i rgyud kyi rjes su 'brangs pas so/ /smras bshad shin tu rnyed par dka'/ /zhes pa ni smras pa de nyid bshad pa ni bstan bcos kyi don ma lus pa yongs su ma brtags na rnyed par dka' ba'o/ /des ni sgra ji bzhin pa la brten te bshad pa po gzhan rnams la sun 'byin pa'o/ /de'i phyir/ rnal 'byor rgyud rnams 'di nyid kyis/ /drangs te bshad pa gzhan gyis min/ /zhes pa ni rnal 'byor gyi rgyud chen po ni bshad pa 'di nyid kyis bshad par rigs so/ /gzhan du min sgra ji bzhin pa tsam gyis ni ma yin no/ /nye bar sdud pa'i phyir/ de bas zhes bya ba la sogs pa smos te/ rdo rje slob dpon ni yang dag pa'i dbang bskur ba la sogs pa yon tan gyi tshogs dang ldan pa las so/ /bshad pa'i rgyud la mkhas pa las ni rdo rje slob dpon gyi khyad par ro/ /gleng gzhi ni bskyed pa'i rim pa'o/ /rim pa ni rdzogs pa'i rim pa ste/ de dag gi sbyor ba ni bshad pa'i 'brel pa'o/ /yis ni byed pa'i gsum pa'o/ /de'i sgo nas bshad pa'i rgyud la mkhas pa'i rdo rje slob dpon gang yin pa de las so/ /'bad de ni thos pa la sogs pa'i rtsol bas so/ /rnal 'byor rgyud rnams gzung zhes pa'i rnal 'byor chen po'i rgyud rnams mnyan par bya ba'o/ /de lta na rim pa'i sgras ni bskyed pa dang rdzogs pa gnyis ka brjod na/ 'dir rdzogs pa gcig pu ji ltar brjod ce na/ smras pa gleng gzhi'i sgra gang du yod pas de'i phyir gleng gzhi'i sgras ni bskyed pa'i rim pa brjod do zhes don gyi shugs kyis rim pa'i sgras rdzogs pa'i rim pa rjod par byed pa'i phyir ro/ /gang gi phyir spyi'i sgra rnams ni rgyud rnam pa bzhis khyad par can du 'gyur te/ don dang rtags dang rab tu byed pa dang sgra gzhan dang 'grogs pas so/ /de la don gyis ni dper na bza' ba po 'di yin no zhes 'dis thams cad bza' ba po yin pas bza' ba po'i sgras don gyi shugs las khyad par ston te/ des na mang po za zhes rtogs par bya'o/ /rab tu byed pas ni dper na sen da ba khyer la shog ces pas tshang bang na gnas pa'i mis tshwa 'ong ngo / /g.yul ngor gnas pa'i mis smras na rta 'dod pa yin no/ /rtags kyis ni go zhes 'dis rtags gnyis ka can yin yang bud med kyi rtags kyi rkyen dang gzhi mthun pas bud med kyi don la 'jug go/ /dper na go i yaM zhes pas mo bstan to/ /go a yi zhes pas pho bstan to/ /sgra gzhan dang 'grogs pa ni ba yang 'ongs pa dang glang rnams kyang 'ongs so zhes bya ba la sogs pa bzhin no/ /de bzhin du 'dir yang shes par bya'o/ /rgyan rnam pa bdun bshad pa'i rigs pa'o zhes pa 'dis rgyan gyi bshad pa rdzogs zhes bstan pa'o/ / da ni le'u bcu bdun gyis bsdus pa'i don bshad par bya zhes bya ba la/ de'i dgongs pa ni rgyud kyi don ni rnam pa gsum ste/ tshig gi don dang / ngag gi don dang / bsdus pa'i don no/ /de la tshig gi don ni 'di skad bdag gis thos pa zhes bya ba la sogs pa'i bshad pa'o/ /ngag gi don ni le'u so so ngag tu yod pa'i ngag rnams kyis brjod par bya ba so sor bstan pa'o/ /bsdus pa'i don ni le'u de rnams kyis brjod par bya ba ni 'di yin te zhes brtag pa na bsdus te don so sor bstan pa'o/ /de la bsdus pa'i don nges pa las tshig gi don dang ngag gi don dag ni bde bar rtogs pas dang po bsdus pa'i don smra bar bya ba'i phyir/ de la zhes bya ba la sogs pa smos so/ /rjod pa dang brjod par bya ba'i bdag nyid rdo rje 'chang chen po'i zhes pa'i don ni 'di yin te/ rjod pa ni rgyud kyi tshig rnams so/ /brjod par bya ba ni rim pa gnyis so/ /de dag gi bdag nyid ni ngo bo gang la yod pa rjod pa dang / brjod par bya ba'i bdag nyid bcom ldan 'das rdo rje 'chang chen po ste/ dpal rdo rje sems dpa' zhes bstan to/ /gang gi phyir rgyud kyi tshig rnams dang de las nye bar dmigs pa'i don gyi khyad par bsgoms pa rnams kyis rdo rje 'chang chen po'i sku nyid thob par 'gyur ro/ /sgra dang don gyi ngo bo rdo rje sems dpa' kho na'o/ /gang gi phyir lte ba na gnas pa'i chos kyi dbyings kyi 'khor lo 'od gsal ba las/ srog gi rlung langs te gnas brgyad dang phrad pas yi ge rnams 'byung bar 'gyur te de dag gi tshig rnams so/ /de dag gis kyang ngag bskyed cing de las kyang rgyud dang rab tu byed pa la sogs pa sgra'i tshogs thams cad rgyu dang rjes su mthun pa nyid yin no/ rgyu de yang 'od gsal ba'i bdag nyid rdo rje 'chang chen po nyid do/ /yang na brjod pa ni rgyud kyi ming ste gsang ba 'dus pa zhes bya'o/ /des ni sku gsung thugs kyi ngo bo nyid sangs rgyas thams cad 'dus pa'i bdag nyid de rdo rje sems dpa' zhes bstan par 'gyur ro/ /brjod par bya ba ni rim pa gnyis te/ de las bskyed pa'i rim pa zhes bya ba dang po'i sbyor ba la sogs pa'i ting nge 'dzin gsum gyi ngo bo rdo rje 'dzin pa'o/ /rdzogs pa'i rim pa yang rdo rje bzlas pa la sogs pa'i rim pa'i mtshan nyid do/ /de la rgyu dang 'bras bu'i ngo bo zung du 'jug pa lnga pa'i ting nge 'dzin las rdo rje 'chang chen po'i go 'phang thob par 'gyur ba de yang rdo rje 'chang nyid do/ /bcom ldan 'das des le'u dang po las lha'i rnal 'byor rnam pa gnyis bstan to zhes 'brel ba'o/ /sprul pa'i dkyil 'khor du zhes pa ni reg bya rdo rje ma'i chos 'byung bar ro/ /nyan pa'i bskal pa zhes bya ba la sogs pa ni badzra d+h+r-ika ces bya ba la sogs pa'i phyung ba'i sngags kyis dam tshig gi dkyil 'khor spros te/ de nyid la rig ma'i dbang bskur ba byin nas zhes pa ni rig ma'i chos 'byung bar dbang bskur ba ni rig ma'i dbang ngo / /byang chub kyi sems kyis zhes bya ba'i don to/ /byin nas ni byin gyis brlab par byas nas so/ /drang ba dang nges pa'i don zhes bya ba la sogs pa la/ de la brtags pa'i rim pa ni drang ba'i don gyis so/ /rdzogs pa'i rim pa ni nges pa'i don gyis so/ /le'u bcu drug pa las don gzhan dag rnyed pas zhes pa ni de la yang don de nyid bstan to/ /de lta na bcu drug pa dang le'u dang po dag gi bye brag gang yin zhe na/ don gzhan dag rnyed nas zhes smos te/ de dang 'dra ba'i don blangs pa yin gyi de nyid ni ma yin no zhes dgongs pa'o/ /lha'i rnal 'byor rnam pa gnyis ni bskyed pa dang rdzogs pa'i rim pa dag de nyid rtogs pa dang rdzogs pa'i rim par byed pa'i thabs so sor bstan zhing gsungs pa'o/ /de'i dgongs pa ni rgyal bu don thams cad grub pas byang chub sems dpa'i gnas skabs las 'das te rdo rje 'chang ba'i sku thob nas ma 'ongs pa'i sems can gyi khams rjes su gzung bar bya ba'i phyir/ 'dod chags chen po'i tshul zhes bya ba'i ting nge 'dzin pa snyoms par zhugs te/ spyan la sogs pa rigs kyi lha mo bzhi dang gzugs rdo rje la sogs pa'i yul gyi lha mo lnga spros te/ de dang lhan cig tu bde ba chen po dam pa rjes su myong nas de dag kho na rang gi sku la 'jug par mdzad cing slar yang de bzhin gshegs pa lnga'i gzugs su phyir spros te/ rin po che sna bdun gzhal yas khang pa'i nang du bzhugs pa de la de rnams kyis gsol ba gdab pa gsan nas bcom ldan 'das kyis gsang ba 'dus pa'i dkon pa nyid bstan par bya ba'i phyir cang mi gsung bar gyur pas slar yang zhus par gyur te/ de nas de dag nang du 'jug cing badzra d+h+r-ika ces bya ba la sogs pas mi bskyod pa reg bya rdo rje ma'i chos 'byung ba'i nang du pad+ma dang zla ba'i dkyil 'khor gyi steng du spros nas de rnams la byang chub kyi sems kyis dbang bskur te de las kyang phyir spros te/ sems can gyi don byed du bcug nas shar phyogs su 'khor gyi rnam par dgod cing / dbus kyi gtso bo'i bdag nyid rdo rje 'chang chen po'i gzugs su bzhugs par gyur to/ /le'u bcu drug pa las gsang ba lnga'i lha'i 'khor lo'i rim pa gnyis kyis 'chad par 'gyur ro/ /de'i phyir ngag gi don ni 'di yin te/ bcom ldan 'das rdo rje 'chang chen pos dang po'i sbyor ba dang dkyil 'khor rgyal ba mchog gi ting nge 'dzin bstan nas thugs kyi rdo rje 'dzin pa'i sku la dmigs te/ dpal gsang ba 'dus pa'i rnal 'byor gyi rgyud chen po'i rim pa gnyis rjod par byed pa bstan par bya ba'i phyir dang po'i le'u gsungs te/ de la gnyis pa las ni zhes pa nas brtsams te dam tshig dang sdom pa rab tu bstan pa yin no zhes bya ba'i bar du don ni 'di yin te/ lha'i rnal 'byor gnyis kyis rgod pa skyes par gyur na de nye bar zhi bar bya ba'i phyir rdzogs pa'i rim pa 'ba' zhig gtsor gyur pa byang chub kyi sems kyi le'u gnyis pa bstan to/ /bskyed pa'i rim pa las dang po'i sbyor ba'i ting nge 'dzin gyi yan lag go/ /rdzogs pa'i rim pa las sems rnam par dag pa la sogs pa'i mtshan nyid kyi yan lag go/ /don dam pa'i bden pa 'ba' zhig la zhugs pas gzhan gyi don mi 'grub pas de bsgrub par bya ba'i phyir/ yongs su dag pa'i lha'i rnal 'byor rjod par byed pa ni le'u gsum pa bstan to/ /yongs su dag pa'i sgra ni rnam pa gnyis te/ gcig gis ni sngags kyi sku bstan pa dang / gnyis pas ye shes kyi sku bstan to/ /'dir ni gnyis ka gzung ba yin te/ des ni sbyor ba dang po'i ting nge 'dzin gyi dbus kyi gtso bo bskyed pa ni/ /yan lag dang po ste rnal 'byor du bshad do/ /yongs su dag pa'i sgra'i yang don gnyis pa nye bar blangs pa'i phyir phra mo'i rnal 'byor yang rnam pa gsum du bshad do/ /de yang rdzogs pa'i rim pa las rdo rje bzlas pa la 'dus so/ /sku rdzogs pa ni de bzhin gshegs pa'i dbang bskur ba thob par bya ba'i phyir le'u bzhi pa gsungs te/ phyir mi ldog pa dang slob ma rnams la dbang bskur ba'i ched du thugs kyi dkyil 'khor so sor bstan pa'i phyir ro/ /de ni dkyil 'khor rgyal ba mchog gi ting nge 'dzin gyi yan lag go/ /dbang bskur ba thob pas rnal 'byor gyi spyod pa gsum gyis dngos grub thob pa yang yin zhes de'i phyir le'u lnga pa bstan to/ /las kyi rgyal ba mchog gi ting nge 'dzin gyi yan lag go/ /le'u gsum pa las bsgrubs pa lha'i rnam pa'i sku la sogs pa byin gyis rlob pa'i phyir le'u drug pa bstan to/ /dad pa'i sbyor ba'i yan lag bzhi pa rnal 'byor chen po zhes bya ba yin no/ /de yang nye bar mtshon pa yin te/ de la yang phra mo'i rnal 'byor zhes bya ba rdzogs pa'i rim pa yang bshad do/ /le'u bdun pa la ni khyad par gang yang med do/ /'on kyang le'u lnga pa las bshad pa'i rnal 'byor spyod pa'i spros pa nyid bstan te/ las kyi rgyal ba mchog gi ting nge 'dzin gyi yan lag go/ /gtsong ba dang mi gtsong ba'i rnam par rtog pa zlog pa med pas spyod pa'am sngags kyi sku mi 'grub pas de'i phyir gsang ba'i dbang bskur ba so sor bstan par byed pa le'u brgyad pa gsungs so/ /dkyil 'khor gyi rgyal ba mchog dang las kyi rgyal ba mchog gi yan lag go/ /nan gyis sbyor ba'i ting nge 'dzin gyis sems can gyi don 'grub ces shin tu rmad du 'byung ba'i lung bstan rjod par byed pa le'u dgu pa bstan te / las kyi rgyal ba mchog gi yan lag go/ /de bzhin gshegs pa'i thugs kyi snying pos bskul bas sems can gyi don dang dngos grub mngon du 'gyur bas de'i ched du bsdums dang / sbyin pa dang / dbyes dang / 'chad pa zhes bya ba thabs bzhi gtsor gyur pa le'u bcu pa gsungs so/ /dang po'i sbyor ba'i ting nge 'dzin gyi shin tu rnal 'byor ces bya ba yan lag gsum pa'o/ /las kyi rgyal ba mchog ces la la 'dod do/ /de bzhin gshegs pa'i byin gyis rlob pa thob pas sngags kyi sku rnam pa gnyis te/ sngags dang ye shes kyi sku'o/ /de dag gi slad du le'u bcu gcig pa bstan to/ /sngags kyi sku ni dang po'i sbyor ba dang dkyil 'khor rgyal ba mchog gi ting nge 'dzin gyi yan lag go/ /ye shes kyi sku ni bdag la byin gyis rlob pa'i yan lag ces bya'o/ /spros pa spang bar bya ba'i phyir sku rnam pa gnyis po yang phyag rgya chen por yongs su 'gyur bar bya ba'i ched du le'u bcu gnyis pa bstan to/ /snga ma bzhin du dkyil 'khor rgyal ba mchog gam/ las kyi rgyal ba mchog gam bdag la byin gyis rlob pa'i rim pa'i yan lag bstan to/ /rim pa gnyis pa yongs su rdzogs pa'i rnal 'byor pas 'gro ba'i don bya ba'i phyir zhi ba la sogs pa'i las kyi tshogs rab 'byams rjod par byed pa le'u bcu gsum pa dang bcu bzhi pa dag bstan to/ /rim pa gnyis kyi yan lag tu shes par bya'o/ /de dag thams cad nye bar mi dmigs pas sgyu ma lta bu'i ting nge 'dzin gyis 'grub par 'gyur zhes de'i slad du le'u bco lnga pa gsungs so/ /rdzogs pa'i rim pa'i nang nas bdag la byin gyis rlob pa'i rim pa'i yan lag tu shes par bya'o/ /le'u bcu drug pa ni le'u bzhi pa'i yan lag yin te/ gang gi phyir bzhi pa las thugs kyi dkyil 'khor gcig pu gsungs pas sku gsung thugs kyi dkyil 'khor gyis yongs su bkang bar bya ba'i phyir le'u bcu drug pa yin te/ yi ge gsum gyi rgyud ni sku gsung thugs kyi ngo bo yin pa'i phyir ro/ /de ltar le'u bcu drug gis bdag gi don dang gzhan gyi don phun sum tshogs pa shes par bya'o/ /de yang dam tshig dang sdom pa ma gtogs par 'grub par mi 'gyur bas thabs phun sum tshogs pa gtsor gyur pa le'u bcu bdun pa gsungs so/ /dang po'i sbyor ba'i yan lag ni rnal 'byor zhes bya ba dang po ste/ dam tshig dang sdom pa blangs nas rim pa gnyis sgom pa la dbang ba'i phyir ro/ /de las le'u gzhan med do/ /de ltar na le'u bco brgyad pa yang yod pas ci'i phyir bcu bdun po kho nar bstan to zhe na/ bden te 'on kyang bco brgyad pa ni le'u bcu bdun po rnams kyi bshad pa dang 'dra ba yin pas de'i bsdus pa'i don tha dad par ma bstan te/ rgyud phyi ma yin pa'i phyir ro/ /de bas na de ni 'dus pa'i phyi ma zhes grags pas 'gal ba med do/ / da ni zhes bya ba la sogs pas rgyud ma lus pa'i sgra dang don gyi rgyan gyi dbye bas gang don rnam pa bcu bshad pa de rnams tshig re re la ji ltar gnas zhes so sor bstan par bya ba'i phyir/ da ni zhes bya ba la sogs pa bstan to/ /'di skad bdag gis zhes bya ba nas bzhugs so zhes bya ba'i bar du ni bshad pa'i tshul rnam pa bzhi zhes bya ba la yi ge'i don la sogs pa ste/ rim pa gnyis bstan par bya ba'i phyir 'dod pas so/ / brjod kyis mi lang ba'i zhes bya ba nas brtsams te drang ba dang nges pa'i don zhes bya ba'i bar du ni snga ma bzhin du kun rdzob dang don dam pa'i mtshan nyid can gyi don yod pa'i phyir ro/ /de bzhin gshegs pa thams cad ces pa nas/ rnam pa bzhir bshad ces bya ba'i bar du ni dpal gsang ba 'dus pa'i rgyud rim pa gnyis kyi gtso bo yin pa'i phyir ro/ /'dod chags chen po zhes bya ba nas/ /drang ba dang nges pa'i don zhes bya ba'i bar du ni snga ma bzhin du kun rdzob dang don dam pa'i mtshan nyid can gyi don yod pa'i phyir ro/ /sku gsung thugs zhes bya ba nas/ rnam pa bzhir bshad ces bya ba'i bar du rim pa gnyis bshad par 'dod pa'i phyir ro/ /rig pa chen po'i skyes bu zhes pa nas/ drang ba dang nges pa'i don zhes bya ba'i bar du ni phyi dang nang gi mchod pa gnyis 'thad pa'i phyir ro/ /phyi'i ni mchod pa rnam pa lnga'i mtshan nyid do/ /nang gi ni gzugs rdo rje ma la sogs pa'i yan lag mchog gi mchod pa'o/ /e ma'o zhes bya ba nas gnas med pa zhes bya ba'i bar du ni dgongs pa ma yin zhes bya ba'i de kho na nyid gsal bar gsungs pa'i phyir ro/ /bcom ldan 'das zhes bya ba nas dgongs pas bshad pa'i zhes bya ba'i bar du ni 'gal ba'i sgra'i sgo nas de'i kho na nyid gsungs pa'i phyir ro/ /'gal ba la gnyis te/ 'jig rten pa dang 'gal ba dang / /sgra dang 'gal ba'o/ /'jig rten dang 'gal ba ni/ dper na/ /pha dang ma ni bsad bya zhing / /rgyal po gtsang ma gnyis dang ni/ /yul 'khor 'khor bcas bsad byas na / /mi de dag par 'gyur zhes bshad/ /ce'o/ /sgra dang 'gal ba ni dper na bum pa'i don rjod par byed pa'i sgra smra ba na snam bu'i sgra bzhin no/ /'di ni sgra dang 'gal ba yin te/ de bzhin gshegs pa thams cad kyi sgras rnam par snang mdzad la sogs pa rjod par mi rigs te/ 'on kyang rin po che lta bu'i gang zag rnams brjod do/ /zhe sdang gi rigs zhes bya ba nas/ sgra ji bzhin pa zhes bya ba'i bar du ni/ dkyil 'khor rgyal ba mchog gi ting nge 'dzin bshad par 'os pa'i phyir ro/ /badzra d+h+r-Ika ces bya ba nas/ drang ba dang nges pa'i don gyi bar ni brtag pa'i rnal 'byor dang yongs su dag pa'i rnal 'byor gyi mtshan nyid dkyil 'khor gyi 'khor lo spros pa'i phyir ro/ /de bas ni bskyed pa'i rim pa'i phyogs su dkyil 'khor rgyal ba mchog gi ting nge 'dzin to/ /rdzogs pa'i rim pa'i phyogs su bdag la byin gyis rlob pa'i rim pa bstan to/ /le'u dang po zhes bya ba la sogs pas dang po'i le'u bshad pa'i dbye ba nye bar bsdus pa bstan to/ / de nas zhes bya ba nas/ sgra ji bzhin pa'i bar du ni bde bar gshegs pa'i gsung tsam bstan pa'i phyir ro/ /khyed kyi sems zhes bya ba nas drang ba dang nges pa'i don zhes bya ba'i bar du rim pa gnyis bshad par 'os pa'i phyir ro/ /e ma'o zhes bya ba nas dgongs pa ma yin pa zhes bya ba'i bar du de kho na nyid shin tu gsal bar bstan pa'i phyir ro/ /de yang myur ba'i ting nge 'dzin gyis rdzogs pa'i ye shes kyi sku 'chad par 'dod pa'i phyir ro/ /dngos po med pa zhes pa nas rnam pa bzhi yis bshad ces bya ba'i bar du ni yi ge'i don gyis stong pa nyid bstan te/ rnam par thar pa bzhi so sor bstan pa'i sgo nas stong pa nyid kyi de kho na nyid rtogs par bya bas so/ /spyi'i don gyis ni mdo sde la sogs pa rnams kyi 'gyod pa bzlog par bstan to/ / sbas pa'i phyogs su ni bdag byin gyis rlob pa'i rim pa bstan pas so/ /mthar thug pa'i phyogs su ni zung du 'jug pa'i rim pa bstan zhes pa'i tha tshig go/ /dngos po thams cad ces bya ba nas dgongs pa ma yin pa zhes pa'i bar du ni de kho na nyid gsal bar bshad pa'i phyir ro/ / de kho na nyid ni rdzogs pa'i rim pa'o/ /byang chub kyi sems kyi tshigs su bcad pa lnga pos rdo rje bzlas pa la sogs pa'i rim pa lnga po ma nges par bstan pa'i phyir ro/ /de nas zhes bya ba nas sgra ji bzhin zhes bya ba'i bar du ni phyag 'tshal ba tsam bshad pa'i phyir ro/ /le'u gnyis pa'o zhes pas nye bar sdud pa bstan to/ /de nas bcom ldan 'das zhes bya ba nas drang ba'i don dang zhes bya ba'i bar du ni sku rdo rje la sogs pa'i ngo bo dang de rnams kyi de kho na nyid bstan pa'i phyir ro/ /rin chen zhes bstan pa nas rnam pa bzhi yis bshad ces pa'i bar du ni de la spyi'i don gyi phyogs su gdong gi sna la thig le bsgom pa'o/ /sbas pa'i phyogs su gsang ba'i chu skyes dang rdo rje'i rtse mor bsgom pa'o/ /mthar thug pa'i phyogs su snying gi pad+ma'i sna la bsgom pa ste/ gti mug dang 'dod chags dang zhe sdang gi rigs can rnal 'byor pa'i dbye bas so/ /tshig re re'i bsdu ba dang chos mthun pa bshad pa ni yi ge'i don te thams cad du sbyor ro/ /nam mkha'i zhes pa drang ba dang nges pa'i don zhes pa'i bar du ni rim pa gnyis 'chad par 'dod pa'i phyir ro/ /de la bskyed pa'i rim pa ni rnam par snang mdzad la sogs pa lha'i tshogs bsgom pa'i gtsor gyur pa'o/ /rdzogs pa'i rim pa ni dkyil 'khor bzhi 'char ba na rdo rje bzlas pa 'chad par 'dod pa'i phyir ro/ /le'u gsum pa'i zhes pa 'dis nye bar sdud pa bstan to/ / de nas zhes pa nas sgra ji bzhin pa zhes pa'i bar du ni bstod pa tsam gtso bo yin pa'i phyir ro/ /dkyil 'khor la sogs pa zhes pa'i sgras shes par bya'o zhes dgongs so/ /de bzhin zhes pa nas dgongs pa ma yin zhes pa'i bar du ni dkyil 'khor gyi de kho na nyid bstan pas so/ /de ltar na dkyil 'khor la sogs zhes bya ba 'dis sgra ji bzhin par ji ltar mi 'gyur zhe na/ smras pa / dkyil 'khor gyi tshad tsam dang dgod pa de dag tu sgra ji bzhin pa'o/ /'dir ni dkyil 'khor gyi de kho na nyid kyi skabs yin pas dgongs pa ma yin pa'o/ /de nas ston pa zhes pa nas/ sgra ji bzhin pa zhes bya ba'i bar du ni thugs kyi dkyil 'khor tsam brjod bya yin pas so/ /de nas thugs zhes pa nas drang ba dang nges pa'i don zhes bya ba'i bar du ni mtshan ma'i phyag rgya dang bcas pa'i dkyil 'khor dang de kho na nyid kyang bstan pa'i phyir ro/ /le'u bzhi pa'i zhes pa 'dis nye bar sdud pa'o/ /de nas zhes bya ba nas sgra ji bzhin zhes bya ba'i bar du ni spyod pa'i mtshan nyid bstan to/ /spyod pa ji lta ji ltar gsungs/ /zhes bshad pa'i phyir ro/ /rnam par mi rtog pa zhes bya ba nas dgongs pa ma yin pa zhes bya ba'i bar du de kho na nyid gsal bar bstan pa'i phyir ro/ /rigs ngan zhes pa nas sgra ji bzhin pa'i zhes pa'i bar du ni dngos grub kyi cho ga dgag pa sgra ji bzhin pa nyid de/ sogs pa'i sgra sbyor bas so/ /srog gcod pa nas dgongs pas bshad ces bya ba'i bar du ni 'jig rten dang 'gal ba'i sgra'i sgo nas de kho na nyid bstan pa'i phyir ro/ /ma dang zhes pa nas drang ba'i don dang nges pa'i don gyi zhes bya ba'i bar du ni legs par bslabs pa'i dam tshig gi phyag rgya dang chos dang longs spyod dang sprul pa'i sku brjod bya yin pa'i phyir ro/ /de nas zhes pa nas sgra bzhin zhes bya ba'i bar du ni/ spyod pa ji lta ji ltar gsungs/ /zhes bya bas de mtshon pa'i phyir ro/ /de nas zhes pa nas drang ba dang nges pa'i don zhes bya ba'i bar du ni rgyal ba dang 'od gsal ba la 'jug pas bstan pa'i phyir ro/ /de nas zhes pa nas sgra ji bzhin pa zhes bya ba'i bar du ni lan btab pa dang 'od zer spro ba bstan pa'i phyir ro/ /de yang sogs pa'i sgras shes par bya'o/ /de nas zhes pa nas drang ba dang nges pa'i don gyi bar du ni rang gi gdan la gnas pa dang 'od gsal ba dang bdag la byin gyi rlob pa bstan pa'i phyir ro/ /de nas zhes pa nas dgongs pa ma yin pa'i zhes bya ba'i bar du ni spyod pa'i de kho na nyid bstan pa'i phyir ro/ /le'u lnga pa zhes bya ba 'dis nye bar bsdus pa bstan to/ / de nas zhes pa nas/ drang ba'i don dang nges pa'i don zhes bya ba'i bar du ni bskyed pa'i rim pa'i phyogs su spyi bo la sogs par yi ge gsum bkod pa la rnam par snang mdzad la sogs pa 'jug pas sku rdo rje la sogs pa'i byin gyis rlab pa bstan pa'i phyir ro/ /rdzogs pa'i rim pa la de bzhin gshegs pa lnga'i bdag nyid sku la sogs pa'i ngo bo nyid kyis sgyu ma'i lus so sor bstan pa'i phyir ro/ /de nas bcom ldan 'das zhes pa nas/ dgongs pas bshad pa zhes bya ba'i bar du ni 'gal ba'i sgra brjod pa'i sgo nas rim pa lnga po bstan pa'i phyir ro/ /de nas dpal zhes pa nas nges pa'i don dang drang ba'i don zhes bya ba'i bar du ni lo bcu drug pa'i rol byed ma dang snyoms par zhugs pa dang phyi dang nang gi mchod pa dang chos kyi dbyings kyi ngo bo nyid shes rab dang rjes su mthun pa'i mchod pa bstan pa'i phyir ro/ /le'u drug pa zhes bya ba 'dis nye bar bsdus pa bstan to/ / de nas zhes pa nas sgra ji bzhin pa zhes pa'i bar du ni spyod pa'i gnas skabs yin pa'i phyir ro/ /slong mo za zhes pa nas/ drang ba dang nges pa'i don zhes bya ba'i bar du ni dman pa nyid yongs su dgag pa dang rdo rje bzlas pa'i rim pa bstan pa'i phyir ro/ /sangs rgyas zhes bya ba nas/ rnam pa bzhi yi tshul gyis bshad/ /ces bya ba'i bar du ni de la spyi'i don gyi phyogs su gzugs la sogs pa rnams ni rnam par snang mdzad la sogs pa'i ngo bo nyid yongs su shes pa la longs spyod pa ste/ de rnams de'i ngo bo yin pa'i phyir ro/ /sbas pa'i phyogs su ni ye shes gsum gyi rang bzhin gyi gzugs la sogs pa rnams la longs spyod pa'o/ /mthar thug pa la yang 'od gsal ba'i ngo bo nyid du gzugs la sogs pa spyad pa'o/ /sangs rgyas rjes dran zhes bya ba nas dgongs pas bshad pa zhes bya ba'i bar du ni 'gal ba brjod pa'i sgo nas rdzogs pa'i rim pa'i rnam grangs can rim pa lnga po bstan pa'i phyir ro/ /bud med ces pa nas dgongs pa ma yin pas bshad pa zhes bya ba'i bar du ni rdo rje 'chang chen po la sogs pa'i rnal 'byor pa rnams kyis phyag rgya'i 'brel pa de kho na nyid nye bar mtshon pa bstan pa'i phyir ro/ /sangs rgyas zhes pa nas dgongs pas bshad pa zhes bya ba'i bar du 'gal ba'i sgra'i sgo nas bdag byin gyis rlob pa'i rim pas de bzhin gshegs pa lnga'i sku sgom pa dang / tshim par byed pa'i cho ga dang dam tshig dang ye shes kyi phyag rgya dag las gang yang rung ba dang snyoms par zhugs pa'i don rab tu bstan par bya ba'i phyir ro/ /de la sku zhes pa nas sgra ji bzhin par bshad pa zhes bya ba'i bar du ni sku la sogs par byin gyis rlob par byas nas de'i nga rgyal tsam de'i brjod par bya ba yin pas so/ /de yang sogs pa'i sgra snga ma bzhin du shes par bya'o/ /de la zhes bya ba nas dgongs pas bshad pa zhes bya ba'i bar du ni 'gal ba'i sgra'i sbyor bas sgo nga las skyes pa la sogs pa'i sems can gyi khams rnam pa bzhi'i ngo bo yongs su shes pa dang / dam tshig gi dkyil 'khor phyung ba dang rdo rje phreng ba las gsungs pa'i don dam pa'i dkyil 'khor bstan pa'i phyir ro/ /de la shes rab ces pa nas dgongs pa ma yin pas bshad pa zhes bya ba'i bar du ni shes rab kyi pha rol tu phyin pa'i ngo bo nyid kyi 'od gsal ba bstan pa'i phyir ro/ /de la ma skyes pa zhes pa nas sgra ji bzhin par bshad par bya ba'i bar du ni spyod pa nyid kyi phan yon tsam rab tu bstan pa'i phyir ro/ /le'u bdun pa'i zhes pa ni nye bar bsdu ba'o/ / de nas zhes pa nas sgra ji bzhin pas bshad pa zhes bya ba'i bar du ni sogs pa'i sgras gsol ba gdab pa tsam bshad pas so/ /'dod chags zhes pa nas drang ba dang nges pa'i don gyi bshad pa zhes pa'i bar du ni drang ba'i don gyi phyogs su de bzhin gshegs pa lnga'i ngo bo rdo rje 'chang chen po la bstod pas so/ /nges pa'i don gyi phyogs su ye shes gsum gyi ngo bor gyur pa rang bzhin gyis 'od gsal ba'i rnam pa la bstod pa'i phyir ro/ /de nas zhes pa nas dgongs pa ma yin pas bshad pa zhes bya ba'i bar du ni kun rdzob kyi bden pa rnam par dag pa'i ngo bo nyid de kho na nyid bstan pas so/ /de bzhin zhes pa nas dgongs pas bshad pa zhes bya ba'i bar du ni 'gal ba'i sgras myur ba'i ting nge 'dzin gyis grub pa'i rdo rje 'chang chen po'i gzugs brnyan bstan pa dang / bdag la byin gyis rlob pa'i rim pas de kho na nyid bstan pa'i phyir ro/ /sa phyogs zhes pa nas sgra ji bzhin pa bshad pa zhes bya ba'i bar du ni gnas kyi dbye ba dang de legs par sbyangs pa dang / lha'i sku bsgom pa sngon du 'gro bas mchod pa'i sprin spro bar bstan pa'i phyir ro/ /mkhas pa zhes pa nas drang ba dang nges pa'i don du bshad pa zhes bya ba'i bar du ni phyi'i me tog dang / srog la sogs pa'i rlung rnams bstan pa'o / /dpag tshad ces pa nas sgra ji bzhin par bshad pa zhes bya ba'i bar du ni dbang bskur ba'i dkyil 'khor dang de'i tshad dang de nyid du slob ma 'jug pa dang / de'i phan yon gsungs pas so/ /le'u brgyad pa'i zhes pa 'dis nye bar sdud pa'o/ /de nas rgyal po zhes pa nas sgra ji bzhin par bshad pa zhes pa'i bar du dam tshig lnga tsam bstan pas so/ /de yang sogs pa'i sgras shes par bya'o/ /nam mkha' zhes pa nas drang ba dang nges pa'i don du bshad pa zhes pa'i bar du ni de la drang ba'i don gyi phyogs su rnam par snang mdzad la sogs pa de bzhin gshegs pa lnga'i sku la dmigs te ser sna dang 'dod chags dang dkon mchog gsum la gnod pa dang nga rgyal dang phrag dog can rnams kyi rdzas 'phrog pa la sogs pa mi dge ba'i las kyi lam lnga spyod pas bsod nams chen po thob par 'gyur zhes rab tu bstan pas so/ /nges pa'i don gyi phyogs su phung po la sogs pa rnam par rtog pa rnams chos kyi dbyings kyi ye shes kyis ro gcig pa nyid du bstan pa'i phyir ro/ /de nas zhes pa nas dgongs pas bshad pa zhes bya ba'i bar du ni lag na rdo rje la sogs pa byang chub sems dpa' rnams kyis smod pa'i sems bzlog par bya ba'i phyir de bzhin gshegs pa rnams kyis 'gal ba'i sgra'i sgo nas srub shing dang srub gtan la sogs pa'i rang bzhin med pa'i dpes 'od gsal ba'i de kho na nyid rab tu bstan pa'i phyir ro/ /le'u dgu pa'i zhes pa 'dis nye bar sdud pa bstan to/ / de nas zhes pa nas dgongs pa ma yin pas bshad pa zhes bya ba'i bar du ni lus la sogs pa rnams mnyam pa nyid kyi ngo bo nyid pas stong pa nyid yin par rab tu bstan pas so/ /de nas bcom ldan 'das zhes pa nas sgra ji bzhin par bshad ces bya ba'i bar du ni rim pa spong ba dang de bzhin gshegs pa'i thugs bskul ba med pas dngos grub med ces dngos grub yongs su bkag pa tsam rab tu bstan pas so/ /de yang sogs pa'i sgras shes par bya'o/ /de nas rgyal po zhes pa nas dgongs pas bshad pa zhes bya ba'i bar du ni 'gal ba'i sgra'i sbyor bas phyag rgya chen po'i mtshan nyid de kho na nyid thob pa rab tu bstan pas so/ /le'u bcu pa'i zhes pas nye bar bsdus pa bstan to/ / de nas bcom ldan 'das zhes pa nas/ sgra ji bzhin pas bshad ces pa'i bar du ni rdo rje 'chang chen po dang de bzhin gshegs pa lnga'i bskyed pa'i rim pa brjod bya yin pa'i phyir ro/ /ye shes zhes pa nas dgongs pas bshad pa zhes bya ba'i bar du ni 'jam pa'i rdo rje la sogs pa zhes 'gal ba'i sgras brjod pas 'od gsal bstan pa'i phyir ro/ /'od zer zhes pa nas dgongs pa ma yin pas bshad ces pa'i bar du ni shin tu rnal 'byor gyi lha'i dmigs pa la sogs pa de kho na nyid bstan pas so/ /rnam par dben pa zhes pa nas drang ba'i don dang nges pa'i don du bshad pa zhes bya ba'i bar du ni de la drang ba'i don gyi phyogs su rnam par dben pa dang ri'i mchog la sogs pa'i gnas bstan pa'i phyir ro/ /nges pa'i don gyi phyogs su nu ma rgyas pa dang / yan lag mchog la sogs pa dang ldan pa'i dam tshig gi phyag rgya dang lhan cig tu spyod pa bstan pas so/ /mi bskyod pa zhes pa nas sgra ji bzhin pas bshad ces bya ba'i bar du ni byang chub sems dpa' rnams kyi mig la sogs pa byin gyis rlob pa bzhin du de bzhin gshegs pa rnams kyis kyang bya'o zhes bstan pas so/ /rdo rje 'chang chen po zhes bya ba nas dgongs pas bshad pa zhes bya ba'i bar du ni 'gal ba'i sgras rdo rje bzlas pa la sogs pa rdzogs pa'i rim pa bstan pa'i le'u bcu gcig pa'i zhes pas nye bar bsdus pa'o/ / de nas ston pa zhes pa nas dgongs pa ma yin pas bshad pa zhes bya ba'i bar du ni spros pa 'di dag thams cad rang bzhin med par bstan pas so/ /dgon pa zhes pa nas drang ba'i don nges pa'i don du bshad pa zhes bya ba'i bar du drang ba'i don gyi phyogs su rnam par dben pa'i gnas kyi khyad par rab tu bstan pas so/ /nges pa'i don la yang chos kyi sku la sogs pa'i nye bar dmigs pa bstan pa'i phyir ro/ /lus dang zhes pa nas dgongs pas bshad pa zhes bya ba'i bar du ni lcags gsum la sogs pa'i sgra'i sgo nas ye shes gsum rnam par dag pa'i mtshan nyid 'od gsal ba'i de [(]kho [,]kho na [)]nyid bstan pas so/ /'khor lo zhes pa nas sgra ji bzhin pas bshad ces bya ba'i bar du ni 'khor lo dang / rdo rje dang / pad+ma dang / rin po che dang / ral gri'i rig pa 'dzin pa'i dngos grub dang / ri lu dang mig sman gyi dngos grub dang / rnam par snang mdzad la sogs pa de bzhin gshegs pa'i sku bskyed pa dang / bskyed pa'i rim pa'i yan lag tu gyur pa'i bsnyen pa la sogs pa bzhi po bstan pa'i phyir ro/ /rtog pa'i sgras shes par bya zhes dgongs so/ /bsnyen pa'i ye shes zhes pa nas dgongs pas bshad ces pa'i bar du ni 'gal ba'i sgras brjod pa'i rdzogs pa'i rim pa'i mtshan nyid can rnal 'byor gyi yan lag drug bstan pa'i phyir ro/ /dgon pa chen po zhes pa nas drang ba dang nges pa'i don du bshad ces bya ba'i bar du ni drang ba'i don gyi phyogs su ni phyi'i gnas tsam so sor bstan pas so/ /nges pa'i don gyi phyogs su ni ye shes lnga'i nye bar dmigs pa'i gzhi bstan pa'i phyir ro/ /dus bzhi zhes pa nas sgra ji bzhin pas bshad ces bya ba'i bar du ni dman pa la sogs pa dbye bas dus kyi dbye ba gang gis dngos grub bstan pa'i phyir de yang sogs pa'i sgras shes par bya'o/ /gsang ba zhes pa nas dgongs pas bshad pa zhes bya ba'i bar du ni zla ba phyed la sogs pa'i 'gal ba'i sgras de kho na nyid thob par rab tu bstan pas so/ /de la zhes pa nas sgra ji bzhin pas bshad pa zhes bya ba'i bar du ni rnal 'byor chen po'i yan lag tu gyur pa sku rdo rje la sogs pa gsum la gsol ba gdab pa tsam bstan pa'i phyir ro/ /sogs pa'i sgras yin zhes dgongs so/ /le'u bcu gnyis pa'i zhes pas ni nye bar sdud pa bstan to/ / de nas bcom ldan 'das zhes pa nas/ sgra ji bzhin pas bshad pa zhes bya ba'i bar du ni de bzhin gshegs pa thams cad dang lha mo dang byang chub sems dpa' dang khro bo rnams rdo rje 'chang chen po la gsol pa gdab par gyur pas so/ /e ma'o zhes pa nas dgongs pas bshad pa zhes bya ba'i bar du ni sangs rgyas la sogs pa zhes 'gal ba'i sgras rnal 'byor yan lag drug la sogs pa'i de kho na nyid bstan pas so/ /ma skyes zhes pa nas dgongs pa ma yin pas bshad pa zhes bya ba'i bar du ni rang bzhin gyis rnam par dag pa'i ngo bo nyid med pa'i phyogs su yang bstan pa dang bstan bya'i sgo nas ye shes skye ba bstan pa'i phyir ro/ /yid 'ong zhes pa nas dgongs pas bshad pa zhes bya ba'i bar du ni 'gal ba'i sgras rdo rje bzlas pa bcu gcig so sor bstan pas so/ /'dod chags zhes pa nas/ sgra ji bzhin pas bshad pa zhes bya ba'i bar du ni 'dod chags la sogs pa'i sgras rigs can rnal 'byor pa rnams la rdo rje bzlas pa'i phan yon bstan pas so/ /gti mug ces pa nas drang ba'i don dang nges pa'i don du bshad pa zhes bya ba'i bar du ni drang ba'i don gyi phyogs su rnam par snang mdzad la sogs pa'i lha rnams kyi rang rang gi sa bon las bskyed pa bstan pas so/ /nges pa'i don gyi phyogs su ni rang bzhin dang snang ba'i rim pas 'od gsal ba la 'jug pa bstan pa'i phyir ro/ /ye shes zhes pa nas sgra ji bzhin pas bshad pa zhes bya ba'i bar du ni rnam par snang mdzad la sogs pa de bzhin gshegs pa lnga'i sku'i sgo nas zhi ba la sogs pa'i las kyi rab 'byams lnga bstan pas so/ /rtog pa'i sgras shes par bya'o/ /nam mkha' rdo rje zhes pa nas/ dgongs pas bshad ces bya ba'i bar du ni 'gal ba'i sgra'i sbyor bas lus dang ngag dang yid nye bar sdud pas 'od gsal bar bstan pa'i phyir ro/ /rnam pa zhes pa nas/ sgra ji bzhin bshad ces pa'i bar du ni chu rengs pa bstan pas so/ /rtog pa'i sgras shes par bya zhes dgongs so/ /rkang pa zhes pa nas/ dgongs pas bshad pa zhes bya ba'i bar du ni 'gal ba'i sgra'i sgo nas mi gnas pa'i mya ngan las 'das pa'i ngo bo rdo rje'i sku bstan pas so/ /dbang chen zhes pa nas sgra ji bzhin pas bshad pa zhes bya ba'i bar du ni ngag rengs pa dang dpung rengs pa dang gdug pa can phur bus gdab pa dang grong dang grong khyer la sogs pa dag tu zhi ba la sogs pa sgrub pa dang / gshin rje gshed la sogs pa'i khro bo'i 'khor lo bskyed pa'i rim pa bstan pas so/ /rtog pa'i sgra dang sogs pa'i sgras shes par bya'o/ /'gog pa zhes pa nas drang ba'i don dang nges pa'i don du bshad pa zhes bya ba'i bar du ni drang ba'i don gyi phyogs su ni srung ba'i 'khor lo'i dbus kyi bdag po'i ting nge 'dzin bsrung bas so/ /nges pa'i don gyi phyogs su ni 'od gsal ba'i de kho na nyid so sor bstan pas so/ /le'u bcu gsum pa'i zhes pas nye bar sdud pa'o/ / le'u bcu bzhi pa la sogs pa zhes bya ba la/ phreng ba'i sngags rnams ni las kyi rab 'byams sgrub par byed pa zhes bya ba'i don to/ /las kyi rab 'byams ni zhi ba la sogs pa'o/ /sgra ji bzhin pa ni sogs pa'i sgra dang rtog pa'i sgra brjod pas so/ /bar bar na zhes pa ni skabs skabs su'o/ /la la ni zhes pa la rim pa med par gnas pa'o/ /dgongs pas bshad pa yang yod do zhes pa ni gang du 'gal ba'i sgras de kho na nyid bstan pa'o/ /de bzhin du le'u bco lnga pa dang zhes bya ba la sogs pas mtha' drug gi don kho na bstan to/ /lus tshad ma nyid du bstan par bya ba'i phyir/ de ltar mdo'i tshig ces bya ba la sogs pa smos so/ /bshad pa'i rgyud las zhes pa ni rdo rje phreng ba las so/ /dgongs pas bshad pa zhes bya ba la sogs pas ni sngar bshad zin to/ /rnal 'byor gyi rgyud ces pa ni rnal 'byor chen po'i rgyud ces bya ba'i don to/ /de lta na yang rnal 'byor ma'i rgyud rnams las kyang mtha' drug mthong na rnal 'byor gyi rgyud kho na las ci'i phyir bshad ce na/ de la bden te rnal 'byor gyi rgyud ni thun mong yin la rnal 'byor ma'i rgyud thun mong ma yin zhes khyad par thams cad spyi'i dbang du song ba yin pas khyad par rnams bsdu bar bya'o/ /de ltar na rnal 'byor rgyud ni mtha' drug can yin zhes pa'i tshig las 'grel pa 'di mtha' drug pa zhes mi 'thad do/ /rgyan bdun pa zhes rigs pa yin te/ de dag tshang ba'i phyir ro zhe na/ smras pa gleng gzhi zhes bya ba ni tshig thams cad du bshad par bya ba yin te/ gang gi phyir nges brjod pa la sogs pa lnga ston gyi tshig re re la ni mi 'jug go/ /rigs pa yang tshig re re la smra bar bya ba ma yin te/ gleng bslang ba bzhin du de yang de'i ngo bo nyid yin pa'i phyir ro/ /'chad pa po'i rgyan yang logs pa ma yin te ma gtogs par bshad pa dbye ba ma 'grub pas so/ /nyan pa po'i rgyan yang rten med pa ma yin te de'i rten mtha' drug yin pa'i phyir ro/ /mtha' drug gi don so sor bstan pa nyid kyi rim pa gnyis sdud par byed pa'i brjod par bya ba'i don ma lus pa bsdu ba'i rgyan zhes bya ba 'grub po zhes don gyi shugs kyis tshig re re la mtha' drug gis bshad pas de'i ming gis 'grel par grags so/ /de ltar na bshad pa rnam pa bzhi yang tshig re re la lnga lngar yod pas zhes mtha' drug gis bshad pa mi rigs she na/ smras pa dang / gzhan gyi brjod pas nyes pa med do/ /dper na ma'i bu dang pha'i bu zhes bya ba bzhin no/ /gang gi phyir gnyi ga la 'byung ba de cig shos kyi ming gis kyang grags pa yin no/ /de bas na rim pa 'di nyid kyis zhes bya ba la sogs pa smos so/ /mtha' drug tu bshad pa dang rnam pa bzhir bshad pa zhes pa ni mtha' drug dang bshad pa rnam pa bzhis bzung bas rgyan gzhan rnams de dag tu 'dus pas so/ /dpal gsang ba 'dus pa'i don rgyas btab pa yin la zhes pa ni de bzhin gshegs pa'i bdag po rdo rje 'chang chen pos de dag gis rgyas btab pa ni bcings pa'o/ /des na rtogs par dka' ba'i rgyud 'di yin zhes bstan to/ /de ma gtogs pa zhes bya ba 'dis da ltar byung ba rnams kyis mi rtogs zhes bstan to/ /sgra ji bzhin par bshad pa'i sgra'i don tsam la brten te zhes pa ni mtha' drug gi don mi shes nas so/ /'gal ba dang shin tu rmad du gyur pa'i bya ba byed pas ni lta ba la sogs pa'i dbang gis ma dang sring mo zhes bya ba la sogs pa sgra ji bzhin du gzung bas 'gal ba spyod pas so/ /las kyi dbang du 'gyur ro zhes pa ni/ sdig pa'i las kun tu spyod pas mnar med pa la sogs par skye bar 'gyur te zhes bya ba'i don to/ /de yang bcom ldan 'das kyis zhes bya ba la sogs pas lung tshad ma nyid du bstan to/ /gsang ba'i bdag po zhes pa ni bod pa'i tshig go/ /tshul chen 'di ni rnyed gyur nas/ /zhes pa ni rnal 'byor gyi rgyud chen po zhes bya ba'i don to/ /zad min don ni sgra ji bzhin pa yin zhes tha tshig go/ /lam ngan pa zhes pa ni so so'i skye bo'i lam du'o/ /mngon pa'i nga rgyal zhes bya ba la sogs pa ni rig pa'i dbang tsam thob nas sgrub pa'i thabs tsam yongs su shes pas nga rgyal dang ldan par 'gyur ro zhes tha tshig go/ /chos ni g.yo yis byed par 'gyur/ /zhes pa ni g.yo sgyu'i dbang gis chos byed pa ste so bya bzhin no/ /sems can slu bar byed pa zhes bya ba'i don to/ /des ni 'dus pa zhes bya ba la sogs pas dam tshig nyams pa dang yongs su mi shes pa dag bstan to/ /mngon sum zhes bya ba la sogs pas rdo rje slob dpon la smod par byed pa bstan to/ /skad cig ces pa nas byams pa'i sems med pa dang / bgrod min la 'gro ba dang / mtshams med pa byed pa dang / mi dge ba'i las kyi lam la spyod par byed pa ston par byed do/ /de nyid ye shes pa ni rnam pa gnyis te/ bskyed pa'i rim pa lhag par mos pa'i sbyor bas stong pa nyid mngon du byed pa dang / rdzogs pa'i rim pa la rdo rje bzlas pa la sogs pa'i mtshan nyid do/ /ting nge 'dzin ni rim pa gnyis kyi mtshan nyid do/ /rtogs pa med pa'i 'bras bu bstan par bya ba'i phyir ro / /nyes pa cung zad ces bya ba la sogs pa smos te slong mo'i khyim nas gal te bza' ba tsam ma rnyed na de'i tshe/ le'u gsum pa la sogs pa nas gsungs pa'i mngon spyod kyi las byed par 'gyur ro/ /gal te des grub par gyur na de'i tshe skyon med do/ /'on kyang rnal 'byor ni bskyed pa'i rim pa'i ting nge 'dzin to/ /sbyor ba ni rdzas la sogs pa ji lta ba bzhin du sbyor ba'o/ /de dag gi dman pa ni bral ba'i phyir 'grub par mi 'gyur ro/ /sngags pa ni bshad pa'i tshig ste blun po zhes bya ba'i don to/ /de yi sbyor ba la mkhas pa zhes bya ba la sogs pa 'dis sgom pa med pas rang gi bstan pa la skur ba 'debs shing / phyi'i bstan bcos la brten te de'i sbyor ba slob pas rang gi dam tshig dang bral zhing rang dbang du song bas sngags la sogs pa'i sbyor bas 'tsho ba tshol zhing / gang du rnyed pa yod pa de nyid du 'jug par 'gyur te bzo bo bzhin no/ /de rnams rjes su gzung bar bya ba'i phyir/ gsang ba dgongs pas bshad pa yin/ /zhes pa ni sems can de rnams rjes su gzung bar bya ba'i phyir dgongs pas lung bstan te/ rtsa ba'i rgyud kyi dka' ba'i tshig phye nas ji lta ba bzhin du don nges par gzung bas so/ / de ltar zhes bya ba la sogs pas yan lag gi don dbye bar bya ba'i phyir bshad par byed de/ 'dir zhes bya ba la sogs pas gleng gzhi'i tshig gi gnas skabs so/ /sdud pa po 'phags pa phyag na rdo rje zhes pa ni le'u bcu bdun pa las kye'i rdo rje chos kyi rnam grangs 'di [(]long [,]longs [)]shig ces 'chad par 'gyur ro/ /de bas ni sdud pa por gyur pa ni chos kyi mdzod de nyid la gtad pa'i phyir ro/ /'di skad bya ba tshig gi phrad kyis rgyud kyi don ma lus pa mtshon par byed pa ni rgyud kyi don ma lus pa sems la bzhag nas 'di skad ces gsungs te/ tshig phrad rnams la don du ma yod pa'i phyir ro/ /bdag nyid kyis ni dngos su thos kyi brgyud pas ni ma yin zhes bya ba la dngos su thos pas 'khrul pa med pa nyid ston te/ brgyud pa'i sgo nas thos pa la ni de las gzhan par 'gyur zhes bya ba'i don to/ /rtogs pa ma yin pa zhes pa ni thos pa tsam gtso bo yin pas so/ /rtogs pa yod na bsgom pa'i rang bzhin gyi shes rab kyi nges pa rnyed nas de'i ngo bor gnas pa'i phyir ro/ /sdud pas ci zhig bya zhes pa'i tha tshig go/ /dus gcig na zhes pa la sogs pa 'dis thos pa mang ba la sogs pa yon tan gsum bstan pa'o/ /rgyud kyi dkon pa nyid ni rgyud kyi yon tan no/ / thos pa mang ba dang shes rab phul du byung ba dag ni sdud pa po'i yon tan no/ /gang las zhes bya ba la sogs pas gleng gzhi gsungs so/ /gang gi phyir ston pa dang gnas dang nyan pa phun sum tshogs pa gtso bo yin pa'i phyir gleng gzhi yin no/ /de la ston pa phun sum tshogs pas rgyud kyi che ba nyid bstan to/ /gnas phun sum tshogs pa yongs su dag pas sangs rgyas kyi zhing rnams su tshad bstan pas tshad ma nyid du 'gyur ro/ /'khor phun sum tshogs pas 'di dang lhan cig thos zhes pas dbang po nyid bstan pa yin no/ /bcom ldan 'das zhes bya ba la sogs pas de nyid bstan to/ /skal ba dang ldan pa'i phyir zhes pa ni/ ji skad du/ dbang phyug ma lus pa nyid dang / /ye shes dang ni grags pa dpal/ /chags bral rtsol ba nyid dang ni/ /bcom pa rnam pa drug tu grags/ /zhes 'byung bas so/ /de rnams dang ldan pa'i phyir na bcom ldan 'das so/ /mi mthun pa la rnam pa gnyis te/ phyi dang nang gi dag go/ /de la phyi'i ni lha'i bu la sogs pa'i bdud rnams kyi'o/ /de rnams rdo rje lta bu'i ting nge 'dzin gyis bcom pa'i phyir na bcom ldan 'das so/ /nang gi ni nyon mongs pa dang shes bya dang las dang rnam par smin pa'i sgrib pa zhes bya ba de rnams mthong ba dang / bsgom pa la sogs pa'i rim gyis bcom pas na bcom ldan 'das so/ /rab tu byed pa las kyang / skya rengs 'char ba'i dus su ni/ /rdo rje lta bu'i ting 'dzin gyis / /byang chub shing drung bzhugs nas ni/ /des ni bdud rnams 'joms par mdzad/ /ces 'byung ngo / /ji srid yid ni g.yo 'gyur bas / /de srid bdud kyi spyod yul yin/ /de ltar yod pas skyon med ni/ /'di ni ci phyir rigs pa min/ /zhes 'byung ngo / /kyang gi sgras ni ma bshad pa bsdu ba'i don yin te/ de nas bcom ni chos 'byung ba'i nang du bde ba chen po'i tshul lam thig le'i gzugs su gnas pa'i phyir ro/ /bcom ldan 'das zhes spyi'i don gyi phyogs su 'chad par 'gyur ro/ /de bzhin gshegs pa thams cad ces bya ba la sogs pas ni gnas phun sum tshogs pa bstan pa yin te zhes pa ni bcom ldan 'das gang du bzhugs zhes 'dri ba la/ rgyud gang du bshad par der bzhugs zhes lan no/ /de bzhin nyid du gshegs pas na de bzhin gshegs pa'o zhes pa ni 'od gsal ba la 'jug pa'am mkhyen pa'o/ /de bzhin gshegs pa yang yin la zhes bya ba la sogs pa ni rdo rje 'chang chen po snod dang bcud kyi 'jig rten gnyis kyi ngo bo yin pa'i phyir ro/ /mgon po sems can kun bdag nyid/ /ces rab tu byed pa las 'byung ba'i phyir ro/ /de bzhin gshegs pa thams cad kyi sku dang gsung dang thugs kyi snying po ste/ rdo rje 'chang chen po zhes pa ni de bzhin gshegs pa thams cad kyis yongs su rdzogs pa'i phyir ro/ /gang gi phyir rigs lnga phung po lnga rnam par dag par gsungs te/ de dag kho na sku dang gsung dang thugs kyi dbye bas gsum du 'gyur ro/ /de rnams kyang 'od gsal ba la nye bar bsdus pas rdo rje sems dpa'i rigs gcig po kho nar 'gyur ro/ / de bas rdo rje 'chang chen po zhes gsungs te/ shes pa dang shes bya'i rnam par dag pa'i spros pa las nges par grol ba thams cad stong pa'i ngo bo nyid dpal rdo rje sems dpa' zhes bya ba'i don to/ /de'i rdo rje btsun mo ni shes rab ste zhes pa la 'od gsal ba'i de kho nyid mngon du byed pa rnal 'byor gyi mngon sum gyi tshad mas yang dag par rtogs par bya ba bsgom pa'i rang bzhin gyi shes rab ste stong pa nyid ces bya ba'i don to/ /de nyid nyon mongs pa rnams 'joms pas na b+ha ga'o zhes pa ni ye shes gsum dang de dang 'brel pa'i chags bral la sogs pa'i rang bzhin brgya drug cu ni nyon mongs pa rnams so/ /de rnams sngags dang phyag rgya'i rim pas bcom zhing rnam par dag pas na b+ha ga zhes bshad do/ /'di skad ston pa yin te zhes pa 'dis nye bar sdud pa bstan to/ /de bzhin nyid ces bya ba la sogs pa 'dis bgegs bskrad par byas nas chos kyi dbyings kyi ye shes kyi ngo bo nyid stong pa nyid bsgoms te/ slar yang de bzhin gshegs pa lnga'i rang bzhin ye shes kyis sa gzhi byin gyis brlabs la/ de'i steng du ri rab yongs su gyur pa'i gzhal yas khang pa'i nang du myur du lhag par mos pa'i dkyil 'khor rnam par bsams la/ rdo rje phreng ba las gsungs pa'i rim pas don dam pa'i dkyil 'khor la dmigs shing stong pa nyid kyi sngags mngon du byas te/ yi ge gsum spro ba dang bsdu ba'i rim pas pad+ma dang zla ba dang nyi ma bsams la slar yang de'i steng du yi ge gsum bkod la/ de yongs su gyur pa'i zla ba'i dkyil 'khor du sngar bshad pa'i nyi ma la sogs pa de nyid du 'jug par byas la/ chos kyi dbyings zhes bya ba'i sngags brjod pa sngon du 'gro bas rang gi sems brtan par byas la/ slar yang zla ba de la yi ge gsum bkod cing de nyid las spro ba dang bsdu ba'i rim pas rdo rje dkar po rtse lnga pa sa bon dang bcas par bsams la/ de yongs su gyur pa las bcom ldan 'das rdo rje sems dpa' bskyed la de'i thugs kar ye shes sems dpa' de'i thugs kar ting nge 'dzin sems dpa' rnam par bsgoms te/ mig la sogs pa'i dbang po rnams la byang chub sems dpa'i sa bon rnam par dgod pa'i mtshan nyid can shin tu rnal 'byor rdzogs par byas la/ sku gsung thugs kyi byin gyis rlob pa'i mtshan nyid can rnal 'byor chen po yongs su rdzogs par byas pa dang / pad+ma dang zla ba'i dkyil 'khor gyi steng du zhal gsum la sogs pa'i rnam pa can rdo rje 'chang chen pos rgyud gsungs so zhes dgongs so/ /yi ge'i don te zhes pa ni bskyed pa'i rim pa ston pa la dang po'i sbyor ba tsam tshig gi sbyor bas ston pa dang sgra la rnam par zhen pa rnams la 'di skad ces bya ba la sogs pa rnams su bya ba dang byed pa dang bsdu ba la sogs pa bshad pa'i phyir ro/ /tshogs pa la bshad pa'i zhes pa ni yan lag lnga dang ldan pa de'i yang gcig gis kyang tha snyad du rigs te/ tshig rnams la tshig gi phyogs gcig yod do zhes 'byung ba'i phyir ro/ /dper na yul tshig pa dang snam bu tshig pa bzhin no/ /da ni spyi'i don gyi skabs la dang po rgol ba dang lan gyi sgo nas so sor bstan par bya ba'i phyir/ 'dir smras pa zhes bya ba la sogs pa smras so/ /dgongs pa gang gis na zhes bya ba la sogs pas ni dgongs pa ni 'di yin te/ 'das pa dang da ltar byung ba dag rjod par byed pa de dang 'dir zhes sgra gnyis po yod na 'di skad ces bya ba'i tshig gi phrad ci'i phyir gzung zhe na/ smras pa zhes bya ba 'dis lan yin no/ /de bzhin gshegs pa thams cad ni spyan la sogs pa lha mo dang bcas pa rnams kyi'o/ /brdar gyur pa ni brda tsam nyid du bzung ba'o/ /de bas na thabs dang shes rab ston pa nyid kyis na zhes pa ni stong pa nyid dang snying rje'i de kho na nyid thob par byed pa bsgrub bya dang sgrub byed dang / rdo rje dang pad+ma dang de dag gi snyoms par zhugs pa las skyes pa'i bde ba chen po'i rjod par byed pa zhes bar du'o/ /smras pa gal te de lta na ni zhes bya ba la sogs pa ni sdud pa po yod par mi 'gyur te zhes bstan to/ /sdud pa po med ces dam bca' ba'o/ /'brel pa med pa'i phyir zhes gtan tshigs so/ /dgongs pa ni 'di skad bdag gis thos pa 'dis thabs dang shes rab mtshon par byed pas bdag gis thos pa zhes bya ba la sogs pa'i byed pa po dang bya ba la sogs pa'i rnam grangs can gyi las med pas 'brel pa med do/ /de bas na bdag gis thos zhes sdud par byed pa po med par thal bar 'gyur ro/ /rgyud kyi don yang mchog tu 'dzin par mi 'gyur ro zhes dri'o/ /de ni bden te smras pa zhes pa ni bden te zhes pa 'dis lan no/ /'dir sdud par byed pa po ni med do zhes pa ni rdo rje 'chang chen po nyid longs spyod dang sprul pa'i sku nyid kyis 'chad pa po yang yin la nyan pa po yang yin no/ /gang gi phyir thams cad stong pa'i ngo bo nyid rdo rje 'chang chen po zung du 'jug pa'i ting nge 'dzin las mi g.yo ba de dang tha mi dad pa'i sprul pa phyag na rdo rje la sogs pa sdud pa po rnams la the tshom med na/ gang bzlog par bya ba'i phyir de rnams la rdo rje 'chang chen pos chos bstan pa dang de rnams kyis kyang de las thos nas gzhan rnams la so sor bstan par 'gyur ro/ /de bas na ma 'ongs pa'i sems can gyi khams gdon par byed pa'i bsam pas sna tshogs pa sangs rgyas kyi rol ston 'di bstan to zhes 'chad pa po dang nyan pa po tha dad pa gang zhig yod/ de'i phyir spros pa med pa rdo rje 'chang chen po gcig pu nyid rdo rje 'chang chen pos dbang du byas pa'i thugs kyi rgyud kyi 'chad pa po dang / nyan pa po dang sdud pa po'i dbye bas bdag nyid kho na rab tu ston par mdzad do/ /de lta na smras pa ni 'o na btsun pa kun dga' bo zhes bya ba la sogs pas slar yang 'dri ba'o/ /de'i bsam pa ni 'phags pa shes rab kyi pha rol tu phyin pa las btsun pa kun dga' bo ni sdud pa po ste/ de bzhin du yang mdo sde dang rgyud kyi rgyal po gzhan rnams la yang 'od srungs dang mod gal gyi bu la sogs pa sdud pa po yod ces ci'i phyir 'dir sdud pa po med ces smras she na/ smras pa zhes bya ba la sogs pas lan yin te/ kun dga' bo ni 'dir byang chub sems dpa' sems dpa' chen po kun tu bzang po ste zhes pa ni nyan thos kyi sde snod rnams la gang btsun pa kun dga' bo sdud pa po yin pa de nyid sngags kyi bstan pa 'di la kun tu bzang po zhes bya'o/ /sngags kyi theg pa la sdud pa po phyag na rdo rje gang yin pa de nyid rdo rje 'chang chen po nyid de/ longs spyod dang sprul pa'i sku dag ni dbyer med pa'i phyir ro/ /gzhan du na zhes bya ba la sogs pas de dag dbyer med pa la tshad ma nyid gsungs so/ /chos kyi phung po brgyad khri bzhi stong zhes pa ni nyan thos kyi sde snod kyi tshad do/ /nye bar mtshon pa yin pas theg pa chen po ni stong phrag dgu bcu rdo rje theg pa yang zhes pa ni yang gi sgras ni khri phrag bcu'i tshad can no/ /lhag chad med par lan cig gis 'dzin par ga la nus zhes pa ni mi nus zhes bya ba'i don to/ /de bas na rdo rje 'chang chen po kho na'o/ /bcom ldan 'das kyis kyang zhes pa la sogs pas lung tshad ma nyid du bstan pa yin te/ 'di lta ste/ 'jam dpal ni rgyal po chen po zas gtsang mar gyur to zhes pa ni/ zas gtsang ma ni bcom ldan 'das kyi yab ste rgyu'i rdo rje 'chang ba'o/ /'jam dpal ni rgyal ba'i sras te sprul pa'i sku'o/ /de dag tha mi dad pa yin te/ mdzad pa gcig pa yin pa'i phyir ro/ /'jig rten dbang phyug ni lha mo chen mo sgyu 'phrul du gyur to zhes pa ni 'dis kyang bud med dang skyes pa dbyer med par sgyu ma lta bur mthong bas dngos po thams cad la gnyis su med pa'i mtshan nyid bstan to/ /dpal lha mo ni grags 'dzin no zhes pa ni bcom ldan 'das kyi btsun mo dam pa'o/ /de nyid dpal gyi lha mo ni reg bya rdo rje ma'o/ /rdo rje sems dpa' ni sgra gcan 'dzin no zhes pa ni shAkya seng ge'i sras te sprul pa'i sku'o/ /rdo rje sems dpa' ni longs spyod rdzogs pa'i sku'o zhes de dag dbyer med pa nyid du bstan to/ /de bzhin du thams cad du shes par bya'o/ /rigs pa 'dis ni zhes bya ba la brtson pas nye bar sdud pa bstan to/ /'dir / sangs rgyas mya ngan mi 'da' zhing / /zhes pa ni rdo rje'i sku nyid kyis mi zad pa'i phyir ro/ /chos kyang nub par mi 'gyur te/ /zhes pa ni sangs rgyas kyis byin gyis rlob pa de yin pa'i phyir ro/ /sems can rnams ni gdul bya'i phyir/ /zhes pa ni ma 'ongs pa'i sems can sbyor ba'i phyir ro/ /mya ngan las 'das pa ni yongs su mya ngan 'das pa dang nub pa yang nye bar bstan to/ /de ltar sdud pa po rnams dang dbyer med pa nyid du bstan nas/ gleng gzhi'i tshig rab tu bstan par bya ba'i phyir/ 'di skad ces bya ba la sogs pa gsungs so/ /bcom ldan 'das zhes bya ba la sogs pas lung tshad ma nyid du bstan to/ /brgya byin gyis gsol pa ni dri ba'o/ /dri ba de nyid ci'i phyir zhes bya ba la sogs pas bstan te/ 'dir ni skad kyi yi ge'i don gang yin pa dang ci'i slad du dang po sbyor ba dang sangs rgyas kyis gsungs pa'am nyan thos kyis gsungs sam zhes 'dri ba'o/ /dam chos yon tan smra ba yi/ /zhes bya ba la sogs pas lan gsungs so/ /dri ba mchog yin pa'i phyir legs so zhes bya ba byin pa'o/ /gang phyir thams cad gzigs pa zhes bya ba la sogs pas dang por sbyor ba'i dri ba'i lan no/ /gang gi phyir gyis ni don gang yin zhes dri ba'i lan no/ /thams cad gzigs pa yis zhes pa 'dis nyan thos kyis gsungs pa bkag pa'o/ /don de nyid las bde bar gshegs pa'i gsung yin zhes bstan par 'gyur ro/ /ji bzhin du zhes pa ni spyi'i don gyis bshad pa'i rim pas so/ /de ni go rims zhes pa ni dkyil 'khor rgyal ba mchog dang las kyi rgyal ba mchog gi ting nge 'dzin gyi phyogs so/ /chos kyi phung po zhes bya ba la sogs pas mdo sde la sogs pa chos kyi phung po thams cad du'o/ /pha dang ma'i ngo bo nyid yi ge gnyis yin zhes dam bca'o/ /de nyid bstan par bya ba'i phyir/ /yi ge e ni mar gyur la/ /zhes smos te/ ma ni shes rab ste e'i rnam pa can chos 'byung ba'i phyag rgyas nye bar mtshon pa'i phyir ro/ /wa ni pha zhes bya bar grags/ /zhes pa ni thabs kyi ngo bo nyid rnal 'byor pa yin te/ yi ge was nye bar mtshon pa'i rtags dang ldan pa'i phyir ro/ /thig le de ni sbyor ba ste/ /zhes pa ni de dag 'dus pa'i ngo bo yin pa'i phyir ro/ /des ni bsgrub bya dang sgrub byed kyi 'brel pa'i ngo bo nyid ni bsnyen par bstan to/ /sbyor te shin tu rmad byung ba/ /zhes pa ni 'khyud pa dang tsum pa na la sogs pa'i sna tshogs pa'i skad cig ma rdzogs par byed pa'i phyir ro zhes yan lag dang po'o/ /e ni pad+ma zhes pa ni/ gru gsum yin pa'i phyir ro/ / waM ni rdo rje nyid yin no/ /zhes pa ni yi ge was gsang ba'i rdo rje mtshon pa'i phyir ro/ /thig le der ni sa bon te/ /zhes pa ni de gnyis kyi dbus su gnas pa'i byang chub kyi sems so/ /de las 'gro ba gsum po skyes/ /zhes pa ni dkyil 'khor gyi 'khor lo dang khams gsum yang skyes so/ /des ni rdo rje dang pad+ma snyoms par zhugs pa'i mtshan nyid nye bar sgrub pa zhes bya ba yan lag gnyis pa bstan to/ /e ni shes rab nyid gyur pa/ /zhes pa ni shes rab kyi pad+ma'i lte bar char bkag par bya ba'i phyir yi ge phaT rnam par bkod nas bskyod pa gang yin pa de ni shes rab po/ /wa ni rab dga'i bdag po zhes pa ni rab tu dga' ba'i bdag po rdo rje la yi ge hUM bkod nas bskyed pa gang yin pa de ni bsgrub pa zhes bya ba yan lag gsum pa'o/ /thig le ni myong ba'i ngang tshul can no/ /de yang rnam pa gnyis te/ rdzas kyi bdag nyid dang bde ba chen po'o/ /de la bde ba chen po ni mi shigs te de nyid ces smos te/ rang rig pa'i de kho na nyid ces bya ba'i don to/ /rdzas kyi bdag nyid ni gang rdo rje rtse mo nas phyir spros pa'i byang chub kyi sems so/ /de las yi ge de nyid kyang skyes zhes pa ni thig le de las badzra d+h+r-ika ces bya ba la sogs pa'i sa bon gyi sngags las skyes pa'i thugs rdo rje 'dzin pa la sogs pa zhes sgrub pa chen po zhes bya ba yan lag bzhi pa'o/ /chos kyi phyag rgya yi ge gnyis/ /zhes bya ba la sogs pa la chos ni brgya khri bzhi stong gi tshad kyi phung po de la gang gis rgyas btab cing bsdus pa de ni chos kyi phyag rgya ste e waM mo / /de bas na chos yang dag par brjod pa'i mdo las dge slong rnams de'i chos 'di skad bdag gis thos pa zhes bya ba la sogs pas sdud par bya'o zhes gsungs so/ /de bas na gsung rab thams cad kyi snying por gyur pa'i yi ge gnyis po yongs su shes pas sems can thams cad la chos kyi 'khor lo bskor bar 'gyur ro/ /'gro ba gang gis yi ge gnyis zhes bya ba la sogs pa la/ skye bo gang gis sngon du bshad pa'i yi ge gnyis po mi shes nas chos klog pa'am nyan pa'am sgom par byed pa de ni sangs rgyas kyi chos las phyi rol du gyur pa sbyor spangs ni rnal 'byor med pa'i thub pa bzhin/ /zhes pa ni mu stegs kyi bram ze bzhin du 'gyur ro/ /yang na dgag par byed pa'i sgra spangs te/ shes nas rtag tu 'don pa dag /ces pa ni 'dis yi ge gnyis po tsam yongs su shes pas sangs rgyas kyi chos rnams kyi phyi rol tu 'gyur zhing sbyor ba spangs pa ni ting nge 'dzin spang ba yang thub pa bzhin zhes pa ni shAkya seng ge dang 'dra bar 'gyur ro/ /e waM yi ge gnyis sgyu ma la zhes pa ni rig ma dang skyes bu'i bdag nyid yin pa'i phyir ro/ /thams cad mkhyen pa 'dir bzhugs pas/ zhes pa ni dkyil 'khor gyi bdag po nyid du rdo rje 'chang chen po bzhugs pas so/ /dam chos bstan pa'i thog mar ni/ /zhes bya ba la sogs pas rtag pa'i gnas thob par 'dod pas dang po bstan bcos kyi thog mar e waM zhes bya ba sbyar bar bya ba dang / bstan bcos kyi bkur sti bya ba dang / yi ge gnyis po dran par bya'o zhes brgya byin la 'bod cing gdams pa'o/ /bdag gis zhes bya ba la sogs pas lung tshad ma nyid bstan to/ /bshad pa'i rgyud las zhes pa ni rdo rje phreng ba las so/ /'khor los sgyur ba'i ngo bo'o/ / zhes pa ni dbus kyi bdag po'i tshul gyis so/ /bdag gis thos pa zhes gsungs pa'i thos zhes bya ba'i don bshad par bya ste/ sa bon ngo bos gang sprul pa/ /zhes pa ni rdo rje rtse mo las 'phros pa'i byang chub kyi sems las skye ba'o/ /lha rnams kyi ni 'khor lo mchog /ces pa ni mi bskyod pa la sogs pa lha sum cu rtsa gnyis kyi bdag nyid dkyil 'khor gyi 'khor lo'o/ /dus bshad par bya ste mchog tu dga' ba'i dus gang yin/ /dus gcig na zhes bshad pa yin/ /zhes pa ni snyoms par zhugs pa'i dus su bde ba chen po myong nas phyis dkyil 'khor gyi 'khor lo spro ba yin no/ /dbus kyi bdag po'i khyad par bstan par bya ba'i phyir/ dbang phyug brgyad kyis bcom ldan 'das/ /zhes bya ba smos te/ dbang phyug brgyad ni sku'i dbang phyug la sogs pa'am phra ba la sogs pa sngon du bshad zin to/ /bde ba chen po ni bde ba chen po rgyu mthun par gyur pa byang chub kyi sems las skyes pa'i dkyil 'khor gyi 'khor lo de nyid gnas zhes pa ni bzhugs gnas te gzhi'i dkyil 'khor ro/ /der bzhugs pa ni der bdag po nyid du bzhugs so/ /'di ni phung po lnga rgyal ba/ /zhes bya ba la sogs pa phung po lnga dang sku gsung thugs kyi bdag nyid rdo rje 'chang chen po kho na bzhugs so/ /de tsam gyis ni dkyil 'khor rgyal ba mchog gi ting nge 'dzin bshad do/ /btsun mo zhes bya ba la sogs pa rnams ni reg bya rdo rje ma'o/ /b+ha ga legs sbyangs zhes pa ni de'i pad+ma'o/ /bzhugs pa zhes bya ba la sogs pas ni phra mo'i rnal 'byor la sogs pa byas nas/ dkyil 'khor gyi 'khor lo nye bar bsdus la/ sku dang gsung dang thugs kyi mtshan nyid yi ge gsum po tsam la dmigs te/ de yang cha shas kyi dbye bas bsdus te thig le tsam la dmigs shing gnas par bya'o/ /de bas na 'dir bshad pa zhes bya ba la sogs pa ni cha gnyis pa ni yi ge a'o/ /dgu pa ni ma ning gi yi ge spangs te o'o/ / sum cu pa lnga pa'i sa bon ni ha'o / /cha gnyis ni tsheg drag go/ /lnga pa ni ma'o/ /de nyid rjes dbyangs so/ /drug pa ni u'o/ /thig le ni rjes dbyangs so/ /de ltar oM AHhUM 'byung ngo / /sku gsung thugs kyi dkyil 'khor nye bar bsdus te gnas par bya'o/ /yang na yi ge a dgag par byed pa sbrel te/ thig le tsam du dmigs te gnas par bya'o/ /de'i bsdus pa'i don ni 'di yin te/ yi ge'i don gyi phyogs su dang po sbyor ba'i ting nge 'dzin gyis dbus kyi bdag por gyur nas sme sha can la sogs pa'i rigs su skyes pa'i dam tshig gi phyag rgya blangs te/ ye shes sems dpa'i sa bon gyi thig le las byung ba'i 'od zer gyi 'khor lo sna'i bug pa g.yas pa nas 'byung bas de'i lus po bsreg par bya ste/ de'i rnam par shes pa dri ma med pa rlung gis ma bskyod pa'i mar me lta bu de nyid lcags kyu'i rnam pas rnam par bcings te bkug la sna'i bug pa g.yon pa nas bcug la 'dod pa'i gdugs zhes bya ba'i lam nas byang chub kyi sems kyi gzugs su rnam par spros te/ reg bya rdo rje ma'i chos 'byung pad+ma dang zla ba'i gdan gyi steng du de dang 'dra ba'i sems ma gsum gyi bdag nyid bskyed par byas la/ shin tu rnal 'byor dang rnal 'byor chen po'i rim pas lha mo thams cad kyi ngo bor byas la phyir spros te/ 'khyud pa'i reg bya rdo rje ma dang gnyis su med par byas la rdo rje dang pad+ma sbyar ba sngon du 'gro ba'i rin chen 'byung ldan dang don yod grub pa'i sngags dag gis snyoms par zhugs te bskyed par byas la/ rjes su chags pa dam pa'i sgras nam mkha'i dbyings kun du gnas pa'i de bzhin gshegs pa'i tshogs bkug cing 'jug par byas la/ snga ma bzhin du dbus ma'i lam nas thig le'i gzugs su dmigs te/ badzra d+h+r-ika ces bya ba la sogs pa phyung ba'i sngags kyis mi bskyod pa nas brtsams te/ sgo skyong gi bar du dkyil 'khor gyi 'khor lo de nyid du spros te/ sems dpa' gsum gyi bdag nyid du byas nas slar yang rnam par spros te/ sems can gyi don byas nas slar yang gshegs te shar la sogs pa'i phyogs rnams su rnam par dgod cing dbang bskur ba dang phyag rgya gdab par bsams te/ phra mo'i rnal 'byor dang bzlas pa byas nas bya ba byas pa'i phyir rnam par zhu ba lha mo'i glus bskul bas bzhengs te/ de bzhin gshegs pa rnams kyis bstod pa gsan nas tshim par byed pa'i cho ga la sogs pa rdzogs nas phyi'i dkyil 'khor lus kyi dkyil 'khor du bcug la/ yi ge gsum gyi bdag nyid du gyur nas de yang yongs su gyur cing bde ba chen po'i rang bzhin thig le tsam du mthar thug la rdo rje 'dzin par 'gyur ro zhes bya'o/ /spyi'i don zhes bya ba ni bskyed pa'i rim pas so zhes tshig gi lhag ma'o/ /yang lung gis bshad pa zhes bya ba 'dis lung tshad ma las sbas pa'i don bshad par bya ba'i phyir/ e/ e ni shes rab dam pa ste/ /'dod chags bral sogs skad cig bdag /srid pa gsum na yongs shes pa/ /'di ni rtsa bar rnam par bstan/ /zhes smos te / 'dir dang po ye shes gsum po rnam par dpyad pa'i mtshan nyid can sbas pa'i don bshad par bya ste/ sems rnam par dag par byed par 'dod pa'i rnal 'byor pas dang po sngags sam phyag rgya'i rim pa la dmigs par bya'o/ /de la sems ni rnam gsum ste/ sems dang / yid dang / rnam par shes pa ste/ de nyid 'jug pa'i rnam par shes pa dang / nyon mongs pa can gyi yid dang / kun gzhi rnam par shes pa'o/ /de la 'jug pa'i rnam par shes pa gnas gyur pa zla ba'i snang ba dang 'dra ba'i snang ba'i ye shes skye bar gyur pa dang / 'dod chags bral ba la sogs pa'i rang bzhin sum cu rtsa gsum 'gog par 'gyur ro/ /nyon mongs pa can gyi yid gnas gyur pas nyi ma'i 'od zer dang 'dra ba'i snang ba mched pa'i ye shes skye ba dang / 'dod chags la sogs pa rang bzhi bcu 'gog par 'gyur ro/ /kun gzhi rnam par shes pa gnas gyur pas mtshams kyi snang ba dang 'dra ba'i snang ba nye bar thob pa'i ye shes skye bar 'gyur ba dang / chags pa bar ma zhes bya ba la sogs pas rang bzhin bdun 'gog par 'gyur ro/ /de yang gang gi tshe thams cad stong pa la 'jug pa de'i tshe/ sprin med pa'i nam mkha' dang 'dra ba'i 'od gsal ba'i de kho na nyid 'chad par 'gyur ro/ /de'i phyir rnam par shes pa gsum po'i rnam grangs ni shes rab dang thabs dang ma rig pa'o/ /snang ba gsum ni gnyen po'i phyogs so/ /stong pa la sogs pa gsum ni de rnam par dag pa'i thabs so/ / 'bras bur gyur pa ni sems kyi 'od gsal ba'o/ /la la'i skabs su mi mthun pa'i phyogs kyi ming gis gnyen po bstan pa dang / gnyen po'i ming gis mi mthun pa'i phyogs bstan pa dang / de'i thabs kyi ming gis kyang de dag bstan pa dang / de dag gi ming gis kyang de nyid bstan pa'o/ /dper na char gyis byas pa'i mu ge ni char med pas mu ge byung zhes bya ba'i don to/ /de la dang po shes rab kyi ye shes bstan par bya ba'i phyir/ e ni shes rab dam pa zhes smos te/ shes rab ni 'jug pa'i rnam par shes pa'o/ /dbang po dang yul dang snang ba dang yid la byed pa'i rten cing 'brel pa tshogs pa las rab tu shes pa ste rnam par shes pa'i tshogs drug go/ /'dod chags bral sogs skad cig bdag /ces pa ni 'dod chags bral ba la sogs pa rang bzhin sum cu rtsa gsum gyi ngo bo'o/ /srid pa gsum na zhes bya ba la sogs pa ni khams gsum na gnas pa'i gzugs rnam pa gsum la sogs pa yul dag tu'o/ /yongs su shes pa ni yul gzung ba'i ngo bo nyid do/ /'di ni rtsa bar zhes pa la mig la sogs pa'i rnam par shes pa'o/ /gnyis pa bstan par bya ba'i phyir khams ni 'od ma 'greng ba zhes bya ba la sogs pa smos pa la/ rnam par shes pa ni nyon mongs pa can gyi yid gnyis pa ste bdag tu lta ba la sogs pa bzhi dang ldan pa'i phyir ro/ /waM/ 'od ma 'greng ba ltar zhes pa ni dper na khong stong 'od ma yin yang tshigs mdud kyi dbang gis bstan pa nyid du 'gyur ro/ / de bzhin du rang bzhin gyis stong pa yin yang shes pa de nyid nyon mongs pa'i mdud pa bzhi'i dbang gis bstan par snang bar 'gyur ro/ /sems las byung ba bstan par bya ba'i phyir/ 'dod chags la sogs rab skye ldan/ /zhes pa ni thabs kyi ngo bo nyid rang bzhin bzhi bcu'i skad cig ma la sogs pa'i dbye bas skye ba gang yin pa de dang ldan pa'o/ /de bzhin du gnyen po'i ming gis snang ba mched pa zhes brjod do/ / de 'gog pas de dmigs pa'i phyir ro/ /de nyid thabs zhes pa ni 'khor ba'i grong khyer sna tshogs pa sprul pa'i rgyu yin pa'i phyir ro/ /ming zhes pa ni de nyid kyi brda ru shes par bya'o/ /gsum pa bstan par bya ba'i phyir/ ma/ rig chen zhes bya ba la sogs pa smos te/ rig chen ni chos kyi dbyings kyi ngo bo ste 'od gsal ba'o/ /gang gi phyir zhe na/ ma rig pa ni zla ba yi/ / zhes smos te/ kun gzhi rnam par shes pa rang bzhin bdun dang bcas par 'gog par byed pas so/ /ma rig pa ni kun gzhi rnam par shes pa'o/ /'di 'byung ba zhes pa ni de spangs pas de bas snang ba 'byung ba ni mtshams kyi snang ba dang 'dra ba'i snang ba thob pa skye bar 'gyur ro/ /rnam par shes pa gsum gyi mtshan nyid bstan nas gnyen po'i sgo nas 'od gsal ba la 'jug pa bstan par bya ba'i phyir/ /yA / gang yang rnam shes dang po ste/ /zhes smos te/ dang po'i rnam par shes pa ni sngags sam phyag rgya'i rim pas sbyangs pa na/ snang ba mched pa'i ming ni ye shes gnyis pa nyid du 'gyur ro/ /de ni snang ba mched pa dag pa'o/ /de ni stong pa cher 'gyur la/ /zhes pa ni mtshams kyi snang ba dang 'dra ba'i snang ba thob pa'i ye shes kyi ngo bo nyid du 'gyur ro/ /de ni stong pa chen po'i ngo bo nyid snang ba mched pa'i ye shes dag par 'gyur bas 'od gsal ba ni thams cad stong pa 'od gsal bar 'gro ba ni 'gyur ba'o/ /dgongs pa 'dis rab tu byed mkhan gyis kyang gsungs te/ stong nyid shin tu stong pa dang / /gsum pa stong pa chen po dang / /bzhi pa thams cad stong pa ni/ /rgyu dang 'bras bu'i bye brag go/ /snang ba snang ba mched pa dang / /de bzhin snang ba nyer thob pa/ /sems ni rnam pa gsum bstan pa/ /de yi bsgrub pa bshad par bya/ /zhes 'byung ngo / /bsdu ba bstan nas bskyed par bya ba'i phyir ro/ /shru/ snang ba gsum gyis zhes bya ba la sogs pa smos te/ sngon du bshad pa'i rnam par shes pa gsum po gang yin pa de snang ba gsum gyi mtshan nyid can de 'gog pas snang ba la sogs pa'i sgras brjod par bya bar 'gyur ro/ /sems can khams ni ma lus pa'i/ /zhes pa ni khams gsum na spyod pa'i sems can gyi khams kyi'o/ / rang bzhin rtsa ba 'di yin no/ /zhes pa ni shes rab dang thabs dang ma rig pa'i ngo bo nyid 'dod chags dang bral ba la sogs pa brgya drug cu rnams kyi rtsa ba ste rgyu'o/ /de rnams rnam par shes pa gsum las byung ba'i phyir ro/ /ji skad du/ len pa'i rnam par shes pa zab cing phra/ /sa bon thams cad chu bo'i rgyun bzhin 'bab/ /bdag tu rtog par gyur na mi rung zhes/ /nyan thos byis pa rnams la ngas ma bstan / /zhes 'byung ba dang / de bzhin du yang / yang dag ma yin kun brtags ni/ /sems dang sems byung khams gsum pa/ / zhes 'byung ngo / /de ni rlung dang rnam par shes pa yang dag par sbyor bas 'gro ba rnams kyi skye ba bstan par bya ba'i phyir/ taM/ da ni re re zhes bya ba la sogs pa smos te/ mig la sogs pa'i dbang po'i sgo nas/ sngon po la sogs pa'am bde ba la sogs pa'i don gang dang gang snang ba de dang de dag rlung gis kho na yang dag par blangs nas 'dzin par byed de/ g.yo 'gul la sogs pa'i ngo bo de yin pa'i phyir ro/ /rnam par shes pas ni ma yin te/ g.yo 'gul la sogs pa med pa'i phyir ro/ /de bas na 'phye bo dang long ba bzhin du/ /rlung dang ldan pa'i rnam shes ni/ rtag tu 'gro la gnas par 'gyur/ /zhes bya ba 'di srid pa gsum gyi bar du yang 'gro ba dang 'ong zhing 'jug par 'gyur ro/ /las kyi lus kyis skye ba bstan par bya ba'i phyir/ /e/ 'di ni zhes bya ba la sogs pa smos te/ 'chi ba'i srid pa 'das nas zhag nyi shu rtsa gcig gi bar du bar ma do'i srid pa nam mkha' la gnas par 'gyur te/ rang gi gnyen dang gnas la sogs pa dang bdag gi lus 'di yin zhes yongs su ngo shes shing gnas so/ /de bas na las kyi rlung gis bskul bas pha ma'i g.yem pa'i dus su zhe sdang dang bcas pa'am 'dod chags dang bcas par skye gnas su 'jug cing lus len par byed do/ /de bas na rnam par shes pa gsum gyi ni bzhi pa ste skul bar byed pa'o/ /de yis rang bzhin rtag tu ni/ /ji lta ji ltar nges par 'byung / /zhes pa ni rnam par shes pa rnams las/ sems las byung ba'i ngo bo nyid kyi 'dod chags bral ba la sogs pa rang bzhin rnams skad cig la sogs pa'i dus kyi dbye ba dang / yul gyi snang ba yod pa las skye bar 'gyur ro/ /mngal nas 'byung ba'i ngo bo bstan par bya ba'i phyir/ ka /sra ba'i khams zhes bya ba la sogs pa smos te/ rlung nyid kyis 'byung ba chen po bzhi blangs te/ lus can rnams khams gsum du 'khor bar byed do/ /phung po 'byung ba bstan par byed pa'i phyir/ smin/ 'di na zhes bya ba la sogs pa smos pa 'dis de lta bu'i lus po gzugs la sogs pa'i phung po lnga'i bdag nyid du skye bar 'gyur ro/ /'dus byas mtshan nyid ni de dag rten cing 'brel pa las 'byung gi rang dbang du ni ma yin no/ /ji skad du/ dngos po las ni dngos mi skye/ /dngos med las kyang 'byung ba yin / /dngos po rtag tu skye ba ni/ /'khrul pas mkha' yi me tog bzhin/ /bdag las ma yin gzhan las min/ /gnyi ga las min rgyu med min/ /dngos po gang dang gang na yang / /skyes pa nam yang yod ma yin/ /zhes 'byung bas so/ /de bas na 'khrul pa tsam gyi ngo bo gzugs la sogs pa phung po lnga zhes tha tshig go/ /byang chub kyi sems kyi rnam 'grel las kyang / gzugs ni lbu ba lta bu ste/ /tshor ba chu bur lta bu yin/ /'du shes smig rgyu lta bu ste/ /'du byed chu shing dang 'dra zhing / /rnam shes sgyu ma lta bu ste/ /phung po'i bstan pa 'di yin no/ /zhes 'byung ngo / /kun nas nyon mongs pa'i phyogs bstan nas rnam par byang ba'i phyogs bstan par bya ba'i phyir/ sa/ mnyam nyid ces bya ba la sogs pa smos te/ phung po lnga gnas gyur pas ye shes lnga thob pa'i rnam par shes pa gsum kho na rgyu yin no/ /de med pas phung po yang med do/ /ci'i rnam par dag par bya ba'i phyir ye shes skye'o/ /skye mched kyi bskyed pa bstan par bya ba'i phyir/ ma / yid kyi skye mched ces bya ba la sogs pa smos te/ yid la sogs pa nang gi skye mched drug ste/ gang gis las kyi lus po 'di dang yul rnams dang len par byed de/ 'dir ni tshigs su bcad pa gcig 'dor te bshad par bya ba yin no/ /lus skyes pas las kyi dbang gis skye ba len pa bstan par bya ba'i phyir/ b+ha/ 'byung ba 'di las rang bzhin zhes bya ba la sogs pa smos te/ 'dod chags la sogs pa'i rang bzhin brgya drug cu'i dbang gis dge ba dang mi dge ba'i las byas nas de nas shi 'phos te ngan song dang bde 'gro la sogs pa'i mtshan nyid can skye ba thob pa gang yin pa de'i rgyu ni rnam par shes pa gsum po kho na las gzhan ma yin no/ /bskyed pa'i rim pa phung po rnam par dag pa bstan par bya ba'i phyir/ ga/ 'gro bar byed ces bya ba la sogs pa smos te/ 'gro ba ni mi la sogs pa'i 'gro ba'o/ /des na bde 'gro dang ngan 'gro dag tu nye bar len pa'i phung po lnga gzugs la sogs pa gang yin pa de dag 'byung ba ni skye bar 'gyur te nyon mongs pa dang las dang rnam par smin pa'i ngo bo nyid kyi rten cing 'brel pa yan lag bcu gnyis kyi mtshan nyid can srid pa'i 'khor los yongs su 'khor ro/ /de dag dag par bya ba'i phyir bskyed pa'i rim pa mngon par byang chub pa rnam pa lnga'i bsgom pas sangs rgyas lnga'i ngo bo nyid thob pa gang yin pa de'i yang rgyu ni rnam par shes pa gsum yin no/ /sa la sogs pa rnam par dag pa'i rgyu bstan par bya ba'i phyir/ wAn/ rlung dang zhes bya ba la sogs pa smos te/ sa la sogs pa khams bzhi po rnam par dag pa'i ngo bo spyan ma la sogs kyi btsun mo yang rnam par shes pa gsum po las 'byung ba ste/ de la dmigs pa las de dag rnam par dag pa'i phyir ro/ / de bas na sangs rgyas byang chub ni zhes smos te sa brgyad pa la gnas pa'i byang chub sems dpa' las sangs rgyas nyid ster bar byed pa de nyid ces tshig lhag ma'o/ /mig la sogs pa rnam par dag pa'i rgyu nyid bstan par bya ba'i phyir/ sa/ thams cad ces bya ba la sogs pa smos te/ bskyed pa'i rim pas de bzhin gshegs pa thams cad kyis gang slar bshad pa de nyid rnam par shes pa gsum gyi rgyun can yin no/ /phyag rgya bzhis ni rgyas btab cing / /zhes pa ni de las dgug pa dang / gzhug pa dang / bcing ba dang / dbang du bsdu ba'i mtshan nyid can phyag rgya bzhi po'o/ /gang gis ye shes sems dpa' dgug pa la sogs pa bya'o / /yang na spyan la sogs pa bzhi po ni phyag rgya bzhi ste/ de rnams kyis rgyas btab pa ni yongs su bskor te des ni gsang ba lnga'i dkyil 'khor chen po bstan to/ /yang na las dang / chos dang / dam tshig dang / phyag rgya chen po'i dam tshig can bzhi'o/ /phyag rgya chen po'i gzugs de dag gis 'grub par bya'o / /ji skad du/ thams cad mkhyen pa 'jigs byed ces bya ba rnal 'byor chen po'i rgyud las/ de nas de dag rnams kyis ni/ /rnal 'byor gsang ba mchog bshad bya/ /dang po ye shes sems bsgoms nas/ /phyag rgya chen po 'chang bar bya/ /zla ba'i dkyil 'khor dang mtshungs pa'i/ /snying gar gnas pa'i byang chub sems/ /phyi mo'i yi ge dang mtshungs pa/ /cung zad snang ba tsam du bsgom/ /rnal 'byor chen po'i mthong ba bzhin/ /dam tshig ces bya bcad par bya/ /rtag tu las kyi rgya bcings te/ /sna tshogs rdo rje snying gar gnas/ /nges pa nyid du shes byas na/ /de tshe the tshom med par 'grub/ /dang po rdo rje lcer bsgoms te/ /chos kyi phyag rgya yang dag 'chang / /ci 'dod pa yi las rnams ni/ /myur du the tshom med par 'grub/ /de ltar phyag rgya rnam pa bzhi/ /blo ldan gang gis mi shes na/ /sdom pa'i rnal 'byor mchog nyid ni/ /de yis nges par thob mi 'gyur/ /dkon zhing bde ba'i thabs 'di ni/ sangs rgyas rol ston gsang ba yin/ /de ni byang chub sems yin te/ / rtag tu shes rab rgya mtshor gnas/ /zhes 'byung ngo / /mig la sogs pa'i bdag nyid der/ /zhes pa ni lus de nyid du mig la sogs pa gang yod pa de dag tu shin tu rnal 'byor gyi rim pas sa'i snying po la sogs pa byang chub sems dpa' brgyad kyi sa bon bkod pas rnam par dag par byed pa gang yin pa de ni shes pa gsum gyi rgyu can kho na'o/ /rtog pa'i rnal 'byor pa'i yan lag la 'god pa ni shes pa gsum gyi yang rgyu can yin par bstan par bya ba'i phyir/ rba/ rol pas shes pa la sogs pa smos te/ phyogs bcu na gnas pa'i khro bo'i rgyal po'i phyi'i dkyil 'khor du brgya byin la sogs pa phyogs skyong rnams zil gyis mnan nas bzhugs pa/ stobs dang mthu che ba gang yin pa de rnams zhal la sogs pa'i yan lag dang nying lag rnams su rnam par bkod pa/ sku'i dkyil 'khor gyi tshul du bzhugs pa gang yin pa de yang shes pa gsum gyi rgyu can yin no/ /de'i rjes su dkyil 'khor nye bar sdud pa la rang bzhin med pa nyid kyi sgom pa'i yang rgyu shes pa gsum yin pa zhes bstan par bya ba'i phyir/ ta/ de dang de yi zhes bya ba la sogs pa smos te/ thugs kyi rdo rje 'dzin pa la sogs pa'i rigs las 'byung ba ste/ de bzhin gshegs pa dang lha mo dang byang chub sems dpa' dang khro bo rnams so/ /de dag kho na yod min zhes pa ni las kyi rgyal ba mchog gi ting nge 'dzin gyi mthar nye bar bsdus pas dmigs par mi 'gyur ro/ /'on kyang 'gro ba'i don du bstan pa yin zhes pa ni 'dod chags la sogs pa'i nyon mongs pas dkrugs pa'i sems can gyi khams rjes su gzung bar bya ba'i phyir/ de dang de'i mos pas dbye bas bcom ldan 'das kyi sprul pa yin gyi/ don dam par de dag thams cad 'od gsal ba nyid do/ /rdzogs pa'i rim pa'i rnal 'byor pas so sor sdud pa'i yan lag gis 'jug pa ni shes pa gsum gyi rgyu can yin no zhes bstan pa'i phyir/ thA/ 'di las zhes bya ba la sogs pa smos te/ 'dod pa'i yon tan lnga nye bar spyod pa'i dus su dman pa dang bar ma dang dam pa'i dbye bas so so tha dad pa'i gzugs la sogs pa yul lnga mchog tu gyur par rnam par 'jog cing shes pa gsum gyi ngo bo nyid yin zhes rnam par spyod cing / yul dang dbang po bcu po gnyis su med par mthong nas/ rnam par snang mdzad la sogs pa de bzhin gshegs pa'i ngo bor lhag par mos te/ rnal 'byor pas gnas par bya'o/ /so sor sdud pa dag par bya ba'i phyir bsam gtan gyi yan lag gis 'jug pa gang yin pa de ni ye shes gsum gyi rgyu can no zhes bstan par bya ba'i phyir/ ga/ dbang po rang nyid ces bya ba la sogs pa smos te/ dbang po lnga po ni rang rang gi yul 'dzin pa la sred pa can yin pas gang gi tshe de rnams gzung bar byed na de'i tshe de bzhin gshegs pa'i ngo bo nyid ye shes lnga'i rang bzhin gyis snang bas spyod par bya'o/ /don de nyid rgyas par bstan par bya ba'i phyir/ ta/ dbang po de de'i zhes bya ba la sogs pa smos te/ mig la sogs pa'i dbang po'i sgo nas rang rang gi yul thob cing / de dang de las 'byung ba'i dga' bas de bzhin gshegs pa thams cad tshim par bgyid do zhes lhag par mos pas shes pa gsum kho na'i rnam 'phrul yin te/ bde ba'i rang bzhin rnam par shes pa gsum las 'byung ba'i phyir ro/ /shes pa gsum brtag pa nye bar sdud pa bstan par bya ba'i phyir/ kA/ sku gsum zhes bya ba la sogs pa smos te/ dang po'i sbyor ba la sogs pa'i ting nge 'dzin gsum gyi rim pa'am bdag la byin gyis rlob pa'i rim pas/ chos dang longs spyod dang sprul pa'i bdag nyid sku gsum po bcom ldan 'das kyis gang gsungs pa/ tha dad par skyob pas gsungs pa ni so sor nges pa can gyis nges par bstan pa gang yin pa de yang shes pa gsum gyi rnam 'phrul yin no/ /rdzogs pa'i rim pa'i sbyor ba yis/ /gcig tu yang ni 'gyur ba yin/ zhes pa la/ ye shes gsum gyi rnam par rtog pa spangs pas/ 'od gsal ba shar bar gyur pas ro gcig tu 'gyur ro zhes bya ba'i don to/ /de yan chad ye shes gsum po rnam par dpyod pa'i mtshan nyid can sbas pa'i don rnam pa gcig tu bstan to/ /ye/ gang yang khams gsum sems can rnams/ /zhes bya ba la sogs pa sngon du bshad pa'i tshigs su bcad pa bshad par bya ste/ sgo nga las skyes pa dang mngal nas skyes pa dang drod gsher las skyes pa dang rdzus te skyes pa'i dbye bas khams gsum gyi sems can ji srid yod pa de srid thams cad bsam gtan dang klog pa'i ting nge 'dzin dang kha na ma tho ba med cing mi shes pas kyang rdo rje'i bzlas pas gsang sngags kyi rgyal po rang bzhin gyis bzlas par byed de/ srog dang rtsol ba de'i ngo bor zlos pa'i phyir ro/ /gang gi phyir pha ma mnyam par sbyor ba'i dus su 'jug pas sogs pa'i rlung gsum gyi bdag nyid nye bar sdud pas sems can de rnams skyes pa'i phyir ro/ /nyin dang mtshan du stong phrag nyi shu rtsa gcig dang drug brgya'i rlung rnams rgyu ba ste zo chun bzhin no/ /'dis ni 'dod chags kyi chos rab tu bstan pas sbas pa'i don gnyis pa bshad do/ /da ni kun rdzob kyi bden pa rtags par byed pa'i mtshan nyid bdag la byin gyis rlob pa'i rim pa bstan par bya ba'i phyir/ ya/ gang zhig ces bya ba la sogs pa smos te/ sangs rgyas rnams kyis ni de bzhin gshegs pa thams cad kyi sku ste rnam pa'o/ /de 'ja' tshon bzhin du gang gis mthong ba de mtshan nyid do/ /kun rdzob ces pa ni myur ba'i ting nge 'dzin gyis bzhengs pa'i ye shes kyi sku'o/ /de'i bden pa ni sgyu ma bcu gnyis kyi dpe dang 'dra bar mthong ba'o/ /de nyid rdzogs pa'i rim pa zhes bshad pa yin te/ 'od gsal ba rnam par dag pas so zhes pa ni sems rnam par dag pa'i rim pas thob pa'i 'od gsal ba'i de kho na nyid las myur du yang dag par byung ba'i phyir ro/ /bdag la byin gyis rlob pa'i sgyu ma dang mtshungs shing 'gro ba'i don byed pa yang bstan par bya ba'i phyir/ wAka / tshig gi lam zhes bya ba la sogs pa smos te/ 'di ni rang bzhin ye shes sku/ /ngag gi lam gyi spyod yul yin/ /zhes pa ni sprul pa bzhin du chos bstan pa la brtson pa'o/ /sems can kun la phan pa'i phyir/ /zhes pa ni grol ba'i gnas thob par bya ba'i phyir 'ja' tshon bzhin du ni dbang po'i gzhu dang 'dra bar snang ba ste gdul bya rnams kyis mthong ngo / /myur ba'i rnal 'byor bstan nas snang ba thob pa la sogs pa bstan pa'i phyir/ tsita/ sems zhes bya ba la sogs pa smos te/ sems ni 'jug pa'i rnam par shes pa'o/ /sems las byung ba ni nyon mongs pa can gyi yid do/ /ma rig pa ni kun gzhi rnam par shes pa'o/ /de rnams kyi go rims bzhin du shes rab dang thabs nye bar thob pa ste/ ming gi rnam grangs so/ /sngags dang phyag rgya'i rim pas rnam par shes pa rnams log pa na de nyid snang ba dang snang ba mched pa dang snang ba thob pa dang stong pa dang shin tu stong pa dang stong pa chen por 'gyur ro/ /de ltar gnas pas dbang po dman pa'i rnal 'byor pas dang po 'od gsal ba nyams su myong nas de'i rjes su mtshams kyi snang ba dang 'dra ba'i snang ba thob pa'i ye shes mthong nas/ de'i rjes su nyi ma'i snang ba dang 'dra ba'i snang ba mched pa'i ye shes rnam par rtogs shing / de las kyang zla ba'i snang ba dang 'dra ba'i snang ba'i ye shes nges par byas la/ thams cad yongs su gyur pa las ye shes kyi sku rdzogs par 'gyur zhes snang ba thob pa la sogs pa'i rim pas bdag byin gyis rlob pa gnyis pa'o/ /rim pa gsum pa la gnas pa'i spyod pa bstan par bya ba'i phyir/ ta/ rang bzhin zhes bya ba la sogs pa smos te/ rang bzhin ni 'dod chags dang bral ba la sogs pa dang / snang ba ni snang ba'i ye shes la sogs pa rnams kyi dbye ba shes pa ste/ rim pa gnyis pas de rnams la goms pa'i phyir ro/ / de nas spyod pa rab tu bya/ /zhes pa ni sku'i rnam pa thob nas dkyil 'khor dang mchod pa dang sbyin sreg dang bstod pa la sogs pa'i mtshan nyid spyod lam rnam pa bzhi dag tu gang byed pa de dag thams cad sgyu ma bzhin du bya'o/ /de bas na/ sgyu ma lta bu yongs shes pas/ /las kyi lus ni yongs spangs nas/ /zhes pa ni dge ba dang mi dge ba'i las dang 'brel pa'i lus po yongs su spangs pas rdo rje'i sku ste/ ye shes kyi rang bzhin gyi sku nyid thob par 'gyur ro/ /longs spyod rdzogs pa'i sku'i rang byin gyis brlab pa bstan nas/ sprul pa'i sku'i bdag byin gyis rlob pa bstan pa'i phyir/ hri/ thugs la zhes bya ba la sogs pa smos te/ don spyod pa ni sems can gyi don la spyod pa ni sngon gyi smon lam gyi bag chags las 'byung ba'i 'jig rten pa rnams ni 'jig rten pa dang 'dra ba'i spyod pa thugs la bzhag nas so/ /kun rdzob pa yi skur sprul nas/ /zhes pa ni de bzhin gshegs pa dang lha mo dang byang chub sems dpa' dang / khro bo'i bdag nyid can gyi dkyil 'khor gyi 'khor lo spros te/ 'dod pa la zhes pa ni 'dod pa'i yon tan lnga la longs spyod cing sems can gyi don mdzad nas bya ba byas par 'gyur ro/ /de nyid bstan par bya ba'i phyir / da/ yid bzhin zhes bya ba la sogs pa smos te/ bdag la byin gyis rlob pa la gnas pa'i rnal 'byor pa de nyid kyis sems can thams cad la mngon par 'dod pa'i don yid bzhin nor bu ltar ster bar 'gyur ro/ /sangs rgyas rnams kyi phun tshogs kyang / /zhes pa ni de bzhin gshegs pa rnams kyi sbyor ba ste/ phra ba la sogs pa dang bstan pa'i cho 'phrul la sogs pa rnams kyang stobs kyis blangs nas spyod par 'gyur ba ni nan gyis bdag nyid du 'jog par byed do/ /de nyid kyis thams cad kyi dbang phyug nyid bstan par bya ba'i phyir/ ya/ rnal 'byor zhes bya ba la sogs pa smos te/ rnal 'byor pa'i dbang phyug des/ gang dang gang 'dod pa ni bde ba nye bar spyod pa la sogs pa 'gal ba'am mi 'gal ba gang 'dod pa de dang de dag sgrib pa med cing ma gos pa'i ngo bo nyid kyis byed pa ni thams cad spyod pa'o/ /de bas na/ mnyam par ma bzhag rnal 'byor gyis/ /zhes bya ba smos te/ bzhengs pa dang 'dug pa dang / nyal ba dang 'chag pa'i sbyor bas gnas na yang / rtag tu mnyam par gzhag par gyur pa ni dus thams cad du rtse gcig pa ste/ sgyu ma lta bu'i ting nge 'dzin las mi g.yo ba'i phyir ro/ /ji skad du 'phags pa byams pas kyang / / ji lta ji ltar mngon gsum sna tshogs spyod yul la/ /spyod pa la gnas snying rje'i bdag nyid kyis 'jug pa/ /de dang de ltar rigs pa dang mtshungs tshig rnams kyis/ /sems can rnams la phan phyir mngon par 'du byed pa'o/ /zhes 'byung ngo / /sgyu ma lta bu'i ting nge 'dzin nyid kyis snyoms par 'jug pa bstan par bya ba'i phyir/ wa/ rdo rje pad+ma zhes bya ba la sogs pa smos te/ mchog gi bsnyen pa la sogs pa'i rim pas rdo rje dang pad+ma mnyam par sbyor zhing sngon du bshad pa'i ye shes gsum gyi dbye ba shes par 'gyur ro/ /de shes nas bde bas ni bde ba chen po'i ting nge 'dzin gyis rtag tu gnas par bya'o/ /blo la gos dang ma gos pas bya ba ni/ blo la ma gos pas ni nyon mongs pas so/ /blo la gos pas ni 'od gsal bas so/ /de ltar 'od gsal ba'i de kho na nyid kyis khyab pa'i sgyu ma lta bu'i ting nge 'dzin bstan to/ /'od gsal ba la gnas pa'i rnal 'byor pas sems can gyi don gyi bya ba bstan pa'i phyir/ dzre/ sgyu ma lta bu zhes bya ba la sogs pa smos te/ rnal 'byor pa des sgyu ma lta bu'i ting nge 'dzin gyi sgo nas dngos po thams cad dang sangs rgyas kyi bya ba ni bstan pa dang / yongs su smin pa dang / rnam par grol ba la sogs pa byed pa ni mdzad pa'o/ /gtan la dbab pa'i gzhi ni grub pa'i mtha' ste/ de nyid mi 'pho ba'i phyir gnas pa'o/ /de la gnas pa ni ngal so ba'o/ /rim pa gnyis pa goms pas gsum pa thob nas de nyid 'dor ba byed do zhes bya ba'i don to/ / bskyed pa'i rim pa'i rnal 'byor bzhi las khyad par bstan par bya ba'i phyir/ yo/ rnal 'byor zhes bya ba la sogs pa smos te/ bskyed pa'i rim pa rnal 'byor bzhi ste/ gang gis dang po'i sbyor ba zhes bya ba la sogs pa'i ting nge 'dzin 'grub par 'gyur ro/ /'dir rnal 'byor ni thabs so/ /rjes su rnal 'byor ni shes rab bo/ /shin tu rnal 'byor ni de dag gi snyoms par zhugs pa'o/ /rnal 'byor chen po ni snyoms par zhugs pa las bde ba chen po thob pa'o/ /de nyid bstan par bya ba'i phyir dang / rdo rje can ni skyes bu'o/ /mkha' 'gro ni shes rab bo/ /de rang nyid ni rdo rje dang pad+ma snyoms par zhugs pa'o/ /yang gi sgras ni bde ba chen po'o/ /rnal 'byor gyi sgras ni rjes su rnal 'byor du shes par bya'o/ /de ltar gyur pa'i rnal 'byor pa rang dbang du spyod pa ni yang ma gos pa nyid bstan par bya ba'i phyir/ ShiDa/ bkag pa zhes bya ba la sogs pa smos te/ bkag pa ni 'jig rten dang 'gal ba'i las so/ /dper na dkon mchog gsum la gnod pa can rnams la rnam par 'tshe ba dang / ser sna can la rdzas 'phrog pa dang / 'dod chags can la bu smad 'phrog pa dang / nga rgyal can la nga rgyal gcog pa dang / phrag dog can la rtsub mo smra ba dang / de la sogs pa 'jig rten dang 'gal ba'i las rnams thams cad thabs la mkhas pa'i dbang gis byas te gos par mi 'gyur te/ snying rje chen po'i dbang gis byas par gyur na sgrib par mi 'gyur ro/ /bya dang bya min rnam spangs la/ /zhes pa la/ bgrod pa dang bgrod par bya ba ma yin pa la sogs pa'i rnam par rtog pa spangs pa yin te/ ngo bo nyid shes pa'i phyir ro/ /pad+ma la ni 'dam gyis bzhin/ /zhes bstan to/ /de'i phan yon bstan par bya ba'i phyir/ b+ha/ yon tan zhes bya ba la sogs pa smos te/ phra ba la sogs pa yon tan brgyad kyi dbang phyug gam sku'i dbang phyug la sogs pa de dang ldan pa'o/ /sems can thams cad rig 'gyur zhes pa ni 'das pa la sogs pa'i dus gsum gyi nang na gnas pa'i sems can thams cad kyi sems kyi spyod pa dang 'chi 'pho ba dang skye ba la sogs pa shes par 'gyur ro/ /de bzhin du yang sems can gyi don bya ba'i phyir/ bdag nyid ye shes lus kyi spyod/ /ces pa ni sgyu ma lta bu'i rnam pas 'jig rten gyi khams ma lus pa ste/ sangs rgyas kyi zhing rnams su yongs su spyod do/ /phyi dang nang gi rim pas de'i gzhi bstan par bya ba'i phyir/ ge/ gtso bo zhes bya ba la sogs pa smos te/ nam mkha' ni nam mkha'i dbyings so/ /de yi khyim ni bzhugs gnas so/ /gtso bo gang du spyod pa yi/ / zhes pa la/ mi bskyod pa la sogs pa lnga'i gtso bo dpal rdo rje sems dpa'/ 'gro ba'i don mdzad pa'i phyir gang du spyod pa zhes pa ni bzhugs shing gnas pa 'tsho zhes bya ba'i bar du'o/ /bde ba chen po'i ting 'dzin gyis/ /de nyid du ni rtag tu rol/ /zhes pa la/ 'od gsal ba'i de kho na nyid mngon du byas pas/ spro ba dang bsdu ba'i rim pas rol par 'gyur ro zhes phyi'i don to/ /de bzhin du rnal 'byor pa de'i nam mkha' dang 'dra ba'i khong stong pad+ma ni khyim ste/ bzhugs pas so/ /gtso bo gang du spyod pa yi/ / zhes pa la/ phyag rgya'i pad+ma gang du dpal rdo rje 'dzin pa steng dang 'og tu byang chub kyi sems kyi gzugs kyis yongs su spyod pa'o/ /ji skad du/ b+ha ga'i dbus su nam mkha' gang / /nam mkha' lnga yis rnam par brgyan/ /zhes 'byung bas so/ /de bzhin du yang / chos dbyings 'di ni rnam par dag /sems can khams ni grol byed pa/ /rang nyid rdo rje 'dzin rgyal po/ /dngos kun gyis ni 'di la bzhugs/ /zhes 'byung ngo / / de la phyag rgya'i pad+mar bde ba chen po'i ting nge 'dzin gyis ni snang ba la sogs pa'i ye shes gsum rnam par dag par byed pa bde ba chen po'i rnam grangs can 'od gsal ba nyams su myong bas rol te/ rang rig pa'i ngo bo nyid kyis gnas so zhes nang gi don to/ /bdag byin gyis rlob pa'i rim pa'i rnal 'byor pas bar bar du sems rnam par dag pa yang mngon du bya ba'i phyir/ Sh+ya/ 'di la snang ba zhes bya ba la sogs pa smos te/ snang ba la sogs pa'i ye shes gsum po mtshams la sogs pa'i sgras tha snyad du bya'o/ /'jig rten na mtshams la sogs pa gzhan med de ye shes gsum du mthong ba'i phyir ro zhes pa la/ 'jug pa'i rnam par shes pa la sogs pa'i bzlog pas spangs pa'i phyir ro/ /de dang de'i rjes su mthun pa snang ba gsum bzhin du phyi'i mtshams la sogs pa'i rnam par rtog pa brdzun pa nyid do/ /'das pa la sogs pa yang ye shes gsum gyi rnam par dag pa bstan par bya ba'i phyir/ wi/ sna tshogs zhes bya ba la sogs pa smos te/ sna tshogs pa yi tha snyad ni/ /lus dang ngag dang yid kyi bya ba ste/ spyod lam bzhi'i mtshan nyid can de dag chags pa dang bral ba la sogs pa'i rang bzhin gyi dbye bas sna tshogs can te/ dge ba dang mi dge ba dang lung du ma bstan pa zhes bya ba'i bar ro/ /'jig rten pas ni yongs brtags pa/ /zhes pas ni so so'i skye bos brtags pa gang yin pa de dag dus gsum gyi dbye bas ni/ ye shes rnam pa gsum las 'byung / / zhes rig par bya'o/ /de ltar yin na/ ye shes gsum ltar spang bar bya/ /zhes tha tshig go/ /skye ba la sogs pa yang de'i ngo bo yin zhes bstan par bya ba'i phyir/ dza/ skye dang zhes bya ba la sogs pa smos te/ 'dus byas pa'i mtshan nyid gsum ste/ skye ba dang gnas pa dang 'jig pa'o / /de bzhin du yang srid pa bar ma na gang du bstan to/ /ji snyed 'jig rten gyis brtags pa/ /zhes pa ni rten cing 'brel par 'byung ba yang yan lag bcu gnyis la sogs pa'i rnam par rtog pa'o/ /sems kyi rlung gi rnam 'phrul lo / /zhes pa ni de dag thams cad rnam par shes pa'i rlung gi rgyu las kun du skye bar 'gyur ro/ /de ltar shes nas de dag rnam par dag par bya ba'i phyir 'bad par bya'o/ /slar yang bdag byin gyis rlob par bya ba'i phyir/ ha/ dgod dang zhes bya ba la sogs pa smos te/ dgod pa ni sgeg pa'i ro'i bye brag go/ /rtsed mo ni gar dang glu dang rol mo la sogs pa'o/ /de bzhin du yang gar gyi ro dgu zhes pa ni sngon du bshad pa'o/ /ldan pa ni de'i yan lag tu gyur pa'i tha snyad do/ /de bzhin du phyag rgya ni lag pa dang rkang pa dang rked pa dang mgrin pa la sogs pa'i yan lag gi khyad par gyi bya ba'i mtshan nyid do/ /sngags ni zhi ba dang khro ba dang gnyi ga ma yin pa'i ngag gis brjod par gyur pa'o/ /rnam par rtog pa ni sems las byung ba rtse gcig pa la sogs pa'o/ /rdo rje sems dpa'i rnam 'phrul zhes pa ni de dag thams cad sgyu ma lta bu'i ting nge 'dzin las rnam par 'phrul pa ste/ 'byung ngo zhes rnal 'byor pas shes par bya'o/ /de ltar shes pas ting nge 'dzin de la legs par gnas par 'gyur ro/ /nye bar sdud pa bstan par bya ba'i phyir/ ra / bdag byin zhes bya ba la sogs pa smos te/ bdag byin gyis rlob pa'i rim pa spangs te/ rin po che gzhan ni 'gro ba thams cad kyi re ba rdzogs par byed pa yod pa ma yin te/ gang gi phyir bskyed pa'i rim pa'i sngags kyi skus re ba rdzogs par byed mi nus te/ brtags pa ba yin pa'i phyir ro/ /rdzogs pa'i rim pa'i sems rnam par dag pa dang mngon par byang chub pa'i rim pa dag gis 'gro ba'i don yang mi 'grub ste/ 'od gsal ba tsam gtso bo yin pa'i phyir ro/ /rdo rje bzlas pa'i rim pas kyang sems can gyi don med de/ rlung la dbang ba tsam thob pas so/ /de'i phyir 'gro ba'i don la bdag byin gyis rlob pa kho na mchog yin no/ /sgyu ma lta bu'i ting nge 'dzin la mngon par zhen pa brgya la srid pas de dgag par bya ba'i phyir/ rim pa bzhi bsgom par bya ba yin zhes zur gyis mthar thug pa'i phyogs gcig pa 'od gsal ba la 'jug par bya ba'i phyir/ /mes zhes bya ba la sogs pa smos te/ rim pa bzhi pas thob pa'i 'od gsal bas gal te bdag byin gyis rlob pa'i sku dag par 'gyur na/ de'i tshe mes sbyangs pa'i gser bzhin du rnam par dag pa dri ma med cing spros pa med par 'gyur ro/ /de'i phyir rim pa bzhi pa yang / sgom par byed par rig pa kho na'o/ /yang tshad ma nyid du bstan par bya ba'i phyir/ dpal ldan 'dus pa zhes bya ba la sogs pa smos te/ /rdo rje phreng ba zhes bya ba'i bshad pa'i rgyud las bcom ldan 'das 'jam pa'i dbyangs kyis khro bo'i rgyal po gshin rje gshed la bzhugs pa'i tshig don ni gleng gzhi'i tshig don bshad pa yin zhes pa ni de ltar gtan la dbab par bstan pa'o/ /sbas pa zhes pa ni bshad pa'i khyad par ro/ /de nas/ don 'di yin te/ 'dod chags kyi chos bstan pa'i sgo nas rdo rje bzlas pa'i rim pa dang ye shes gsum brtags pa'i sgo nas sems la rnam par rtog pa'i rim pa dang / kun rdzob kyi bden pa rtog pa'i sgo nas bdag byin gyis rlob pa'i rim pa bsten zhes sbas pas rim pa gsum so sor bstan to/ /yang lung gis bshad pa gsungs pa zhes bya ba 'dis rim pa tha ma gnyis po ston par byed pa mthar thug pa nyid bstan par bya ba'i phyir/ rgyud 'di zhes bya ba la sogs pa smos te/ 'di skad bdag gis thos zhes sdud pa po'i tshig gsal ba kho na'o/ /gsal ba 'ga' zhig dus yin te/ zhes pa ni snyoms par zhugs pa'i dus su bcom ldan 'das kyi khyad par ro/ /rdo rje gsang ba bcom ldan 'das zhes pa ni gsang ba'i rdo rje ni rtags bstan pa'o/ /de'i dbang phyug ni snyoms par zhugs pa'i dbang gis bde ba thob pa'o/ /rdo rje gsum po dam tshig mchog /ces pa ni de bzhin gshegs pa thams cad kyi sku gsung thugs zhes 'di bshad pa'o/ /des na don 'di yin te/ rdo rje gsum ni sku la sogs pa'o/ /de rnams kyi dam tshig ni dbyer med par yongs su shes pa'o/ /des mchog ces pa ni zung du 'jug pa'i rim pa'i yan lag tu gyur pa bcom ldan 'das kyi khyad par ro/ /ye shes de bzhin gshegs pa kun/ /zhes pa ni rdo rje gsum ni btsun mo'i b+ha ga'i khyad par ro/ /de bzhin gshegs pa kun ni phung po lnga'i ye shes te/ ro gcig pa nyid du rtogs pa ni 'od gsal ba'o/ /yon tan phun tshogs bsam mi khyab/ /ces pa ni byang chub kyi phyogs la sogs pa sangs rgyas kyi yon tan gyi tshogs bsam gyis mi khyab pa gang la yod pa de la 'di skad ces bya'o/ /des ni chos kyi sku'i ngo bo rtag tu dga' ba'i rang bzhin can rim pa bzhi pa nges par bstan to/ /chad par lta ba spang bar bya ba'i phyir mi gnas pa'i mya ngan las 'das pa'i dbyings la mngon du byed pa'i mtshan nyid bsgom par bya ba yin pas de bstan par bya ba'i phyir/ yod med ces bya ba la sogs pa smos pa la/ yod pa dang med pa dang gnyi ga spangs pa dang / gnas dang gnas ma yin pa gnyi ga bral ba ste zung du 'jug pa'i ting nge 'dzin to/ /nam mkha' gcig pu'i ngo bo 'dir/ /zhes pa ni sgrib pa med pa'i ye shes kyi dbyings kyi ngo bor ro/ /thams cad mkhyen pa'i ye shes bsgom / /zhes pa ni rtag tu 'char zhing dri ma med pa'i 'gro ba gsum po skad cig ma gcig gis yongs su shes pa'o/ /'gro snying zhes pa ni g.yo ba dang mi g.yo ba'i ngo bo nyid khams gsum gyi rgyu rdo rje 'chang chen po'i de kho na nyid ces 'od gsal ba'i khyad par ro/ /rnam dag ces pa ni bden pa gnyis kyi rnam par rtog pa'i dri ma dag par byed pa zhes zung du 'jug pa'i rim pa'i khyad par ro/ /thub pa chen po ni bcom ldan 'das rdo rje 'chang chen po bzhugs so zhes pa ni mi gnas pa'i mya ngan las 'das pa'i dbyings kyi ting nge 'dzin la bzhugs so/ /mthar thug pa zhes pa ni rim pa tha ma so sor ston par byed pa yin te/ de las gzhan la mi slob pa'i phyir ro/ / slob ma la bshad pa'o zhes pa ni rin po che lta bu'i gang zag snod yin pa'i phyir ro/ /de yang sngar bshad zin to/ /bsdus pa'i don 'di yin te/ yi ge'i don dang spyi'i don dag gis bskyed pa'i rim pa dang sbas pa dang mthar thug pa'i rim pa dag gis rim pa lnga zhes bya ba rdzogs pa'i rim pa bstan to/ /de bas na bzhugs pa'i tshig nyid kyis zhes bya ba la sogs pa smos te/ bzhugs pa'i phyogs gcig dang ldan pa'i tshig ni bzhugs pa'i tshig go/ /bar gyi sgra'i dbye bar byas pa'i las 'dzin pa'o/ /rgyud ma las pa'i dgongs pa/ zhes pa ni le'u bco brgyad kyi bdag nyid kyi rgyud kyi don rim pa gnyis ma gtogs par gzhan mi dmigs pa'i phyir ro/ /yod na yang de nyid du 'dus pa'o/ /'khor phun sum tshogs pa bstan par bya ba'i phyir/ brjod kyis mi lang ba'i zhes bya ba la sogs pa smos te/ 'khor phun sum tshogs pa ni nyan pa po phun sum tshogs pa'o/ /ston te zhes pa ni sdud pa pos zhes tshig lhag ma ste 'chad pa po dang gnas phun sum tshogs pa dag ni gleng gzhi'i tshig nyid du bstan pa'i phyir ro/ /brjod kyis mi lang ba zhes bya ba la sogs pa ni mang ba tsam du dgongs pa'i phyir ro/ /yang brjod kyis mi lang ba zhes bya ba la sogs pa ni de la gzugs ni mi ngoms pa'o/ /yon tan ni sbyin pa la sogs pa'i pha rol tu phyin pa'i mtshan nyid do/ /de yang ngag gi spyod yul las 'das pa'o/ /de dag ces pa ni grangs dang gzugs la sogs pa'i yon tan dpag tu med pa'i phyir ro/ /sangs rgyas kyi zhing gi zhes bya ba la sogs pas dpe bstan to/ /gang gis zhes bya ba la sogs pas dkyil 'khor pa smos te/ de tsam rgyud 'di ru bsgom par bya ba yin pa'i phyir ro/ /'di lta ste zhes bya ba la sogs pas de dag kho na gsungs so/ /dam tshig rdo rje ni don yod par grub pa zhes pa la/ dam tshig gi rigs yin pa'i phyir ro/ / ji skad du/ zhe sdang gti mug 'dod chags dang / /yid bzhin nor bu dam tshig ni/ /'di dag rigs ni lnga po ste/ /'dod dang thar pa rab bsgrub pa'o / /zhes 'byung ngo / /'dir yang zhes bya ba la sogs pa ni rigs dang rigs can rnams la bye brag med pa'i phyir ro/ /byang chub sems dpa'i sgra ni longs spyod rdzogs pa'i sku dang sprul pa'i sku dbyer med pa'i phyir ro/ /dbyer med pa yang bya ba gcig yin pa'i phyir ro/ /de ltar sku rdo rje la sogs pa snga ma bzhin no/ /ting nge 'dzin rdo rje ni nam mkha'i snying po zhes pa la/ rin chen 'byung ldan gyi rigs nam mkha' mdzod kyi ting nge 'dzin gtso bor gyur pa'i phyir ro/ /rgyal ba rdo rje ni byams pa zhes pa la/ /ma 'ongs pa'i dus su chos kyi rgyal srid la mnga' mdzad pa'i phyir ro/ /sa rdo rje zhes bya ba la sogs pa khams bzhi'i rnam par dag pa'i ngo bo spyan la sogs pa bstan to/ /dam tshig sgrol ma zhes pa ni don yod grub pa'i rigs yin pa'i phyir ro/ /gang gi phyir sgrol ma ni gnyis te/ dam tshig gi sgrol ma dang / dbang gi sgrol ma'o/ /dbang gi sgrol ma ni 'od dpag tu med pa'i rigs can no/ /dam tshig sgrol ma ni de nyid kyi sku'i bye brag go/ /nam mkha' rdo rje ni 'jam dpal zhes pa la rtag tu dri ma med cing zag pa med pa'i shes rab dang ldan pa'i phyir ro/ /gzugs rdo rje zhes bya ba la sogs pas gzugs la sogs pa rnam par dag pa'i mtshan nyid can mchod pa'i lha mo dang dbus kyi gtso mo yang bstan to/ /chos kyi dbyings kyi rdo rje ni kun tu bzang po zhes pa ni chos ni bya ba grub pa'i ye shes kyi rang bzhin can 'dzin pa dang / mi phyed pa'i phyir rdo rje ste/ chos kyi dbyings kyi rdo rje dam tshig gi rigs can no/ /byang chub sems dpa'i tshogs zhes bya ba la sogs pas nam mkha'i dbyings dang mtshungs pa/ longs spyod rdzogs pa'i sku'i ngo bo nyid de bzhin gshegs pa rnams kyis gsungs so/ /de dag ces bya ba la sogs pas rnam par snang mdzad la sogs pa lnga bzung ste/ de dang 'dra ba'i de bzhin gshegs pa gzhan rnams kyang bstan to/ /rigs lngas bsdus pa zhes bya ba la sogs pas de rnams kho na bstan to/ /de ltar na gang gis lha'i 'khor lo yongs su rdzogs pa de tsam nyid kyi dpe bsten pa'i phyir de bas na sum cu rtsa gnyis dgod par rigs na ci'i phyir khro bo rnams ma bstan zhe na/ de ni bden te/ 'on kyang 'grel pa mkhan gyis 'chad par 'gyur te/ dper na sku'i dkyil 'khor nyid du lha dgod pa ji ltar zhes bya ba la sogs pas bshad pa'i rgyud kyi khungs las/ sku'i dkyil 'khor bzhin du 'byin pa'i dkyil 'khor la yang yod par rigs so/ /'dir ma gsungs pa ni rang gis glegs bam lta ba rnams la 'khrul pa bskyed par bya ba'i phyir ro/ /'byin pa'i dkyil 'khor gyi skabs su le'u dang po las bzhi po gsungs te lhag ma rnams le'u bcu gsum po las gsungs pa rnams mdo bsres te shes par bya'o/ /klog pa'i rim pa las don gyi rim pa stobs dang ldan pa yin no zhes gsungs so/ /de'i phyir gang gis lha'i 'khor lo yongs su rdzogs par 'gyur ba gang gsungs pa de ni rigs pa kho na'o/ /nam mkha'i dbyings thams cad dang mnyam pa zhes bya ba la sogs pas gzhal yas khang pa'i phyi rol tu bar snang la bzhugs so zhes pa'i bar du'o/ /'di lta ste zhes bya ba la sogs pas til gyi gang bu'i dpes de bzhin gshegs pa mtha' yas pa rnams kyi gnas pa mi 'gal ba bstan pa'o/ /drang ba'i don zhes pa ni yod pa tsam nyid bstan pa'i phyir ro/ /brjod kyis mi lang ba zhes bya ba la sogs pas dkyil 'khor gyi 'khor lo ma lus pa nye bar bsdus nas kyang lha thams cad kyi ngo bo rdo rje 'chang chen pos sems can rjes su gzung bar bya ba'i phyir gzhal yas khang pa dang dkyil 'khor pa rnams sprul te rgyud gsung zhes bya ba 'dis dkyil 'khor rgyal ba mchog gi ting nge 'dzin bstan to/ /nges pa'i don zhes pa ni rdo rje 'chang chen po nyid gzhi dang gzhi can gyi dkyil 'khor gyi de kho na nyid kyi rang bzhin yin pa'i phyir ro/ /de ltar zhes bya ba la sogs pas gleng gzhi sdud par byed do/ /de ni 'dod pa'i khams na gnas pa'i yul la chags pa'i sems can rnams zhes bya ba la sogs pa la dpal gsang ba 'dus pa la bstan pa'i dus su dang po rang gi sku la grub pa'i lha'i 'khor lo phyi rol du spros te/ slar yang sku'i dkyil 'khor gyi tshul du bsdus la/ slar yang lha mo dgur spros te/ de dag gcig tu song ba dang lhan cig tu bde ba chen po myong nas slar yang de bzhin gshegs pa thams cad nye bar bsdus te gzhal yas khang pa sprul zhing de'i nang du lhag par mos pa'i dkyil 'khor byin gyis brlabs la/ de yang don dam pa'i dkyil 'khor gyi rim pas nye bar bsdus te dbus kyi gtso bor gyur nas dang po'i sbyor ba'i ting nge 'dzin gyi mthar dkyil 'khor 'byin pa'i mtshan nyid can gyi dkyil 'khor rgyal ba mchog gi ting nge 'dzin rab tu bstan par gyur to/ /de nyid spros te bstan par bya ba'i phyir/ 'dod pa'i yon tan zhes bya ba la sogs pa smos pa la/ gzugs la sogs pa la phyag rgya gcig la gnas pas grol bar rab tu bstan par bya ba'i phyir ro/ /de nas zhes bya ba ni de ma thag pa'o zhes pa ni 'khor gyi nang du gnas pa'i 'og tu'o/ /yon tan brgyad kyi dbang phyug dang ldan pa ni sngar bshad zin to/ /chen po yang yin la rnam par snang mdzad kyang yin pas na zhes pa ni rdo rje 'chang chen po zhes bya ba'i don to/ /'dod chags kyis 'dod chags rab tu spang bar bya ba'i phyir zhes pa ni phyag rgya bstan pa'i chags pas 'dod chags kyi nyon mongs pa bzlog par bya ba'i phyir ro/ /'dod chags dang bral ba'i sku spangs nas zhes pa ni snyigs ma lnga'i dus su sgeg pa'i nyams gtsor gyur pas sgeg cing gzugs bstan to/ /de nyid bstan par bya ba'i phyir/ rdo rje 'chang chen po zhes bya ba smos so/ / sems can rnams smin pa zhes bya ba la sogs pas de bzhin gshegs pa rnams kyi ngo bo ni snying rje chen po'i bdag nyid kyi rgyu can yin zhes bstan to/ /de bas na dkyil 'khor gyi 'khor lo bsgom pas gang gi tshe 'gro ba'i don byed na de'i tshe de rdzogs par bya ba'i phyir de dang rjes su mthun pa'i ting nge 'dzin la dpal rdo rje 'chang chen pos dmigs par mdzad ces rgyud thams cad kyi gzhung lugs so/ /dkyil 'khor pa rnams zhes pa ni 'khor rnams so/ /rang gi sa bon zhes bya ba la sogs pas ye shes sems dpa'i thugs ka na gnas pa pad+ma dang zla ba dang rdo rje la gnas pa rdo rje 'chang chen po'i sa bon gyi 'od zer gyi lcags kyus nam mkha'i dbyings na bzhugs pa'i de bzhin gshegs pa la sogs pa'i tshogs bkug la 'jug par mdzad do/ /de nas de bzhin gshegs pa thams cad ces bya ba la sogs pas sngar nye bar bsdus pa gang yin pa de rnams kyis dga' ba bskyed par bya ba'i phyir bud med mchog gi gzugs su bcom ldan 'das kyi spros pa mdzad do/ /de ni don dam par bud med dang skyes pa'i bye brag gang yang med do zhes bstan to/ /gdul bya rnams 'jug par bya ba'i phyir sangs rgyas kyi rol ston gyi spros pa rmad du byung bar bstan to/ / de la bcom ldan 'das mchog tu dga' ba'i bde bas/ zhes pa ni mchog tu dga' ba las phyi ma'i dga' ba ni mchog tu dga' ba ste/ 'od gsal ba bzhi pa la 'jug go/ /yang na mchog ni thams cad kyi phul du byung ba ste dga' ba bzhi pa kho na'o/ /rnal 'byor pa la grags pa'i rigs pas mchog tu dga' ba'i sgras kyang bzhi pa brjod do/ /de lta na rang gzugs su de nyid ci'i phyir ma gzung zhe na/ skad cig ma yin pa'i phyir ro/ /bzhi pa ni blang bar bya ba yin te/ rtog pa med pa nyid kyis rtag pa yin pa'i phyir ro/ /de bas na tshim par bya ba'i phyir zhes smos pa la/ de nyid kyis tshim par bya bar rigs te/ 'khrul pa med pa'i phyir ro/ /snang ba la sogs pa'i ye shes gsum gyi bde ba ni 'khrul pa dang bcas pa yin te/ de ma yin pa la de nyid du gzung ba'i phyir ro/ /rang bzhin gyis dag pa la ni 'khrul pa med de/ chos nyid ni 'khrul pa med pa'i phyir ro/ /gnas skabs zhes bya ba la sogs pas ni 'og nas 'chad par 'gyur ba'i lha mo dgu ni de bzhin gshegs pa thams cad dang lha mo dang byang chub sems dpa' dang khro bo rnams kyi ngo bo nyid yin no zhes rab tu bstan to/ /gzhi dang gzhi can thams cad kyi dkyil 'khor nye bar bsdus pa'i byang chub kyi sems las 'byung ba yin pas de'i rgyu mthun par gyur pa bde ba chen po'i ngo bo nyid gsal bar byas pa yin no/ /sa'i khams ni zhes bya ba la sogs pas rigs kyi btsun mo bzhi bstan to/ /yang rnam par snang mdzad ni zhes bya ba la sogs pas rnam par snang mdzad la sogs pa'i rigs las 'byung ba'i lha mo lnga bstan to/ /drang ba'i don zhes pa ni spro ba dang bsdu ba tsam brjod pa'i phyir ro/ /des ni bcom ldan 'das nam mkha'i dbyings thams cad du bzhugs pa'i de bzhin gshegs pa rnams nye bar bsdus pas lha mo dgur spros te/ de'i dbus su 'dod pa sna tshogs kyi dbang phyug nyid du bzhugs so/ /de'i 'og tu 'di ltar bya ba nyid bstan par bya ste/ 'dod chags kyang yin la chen po yang yin pas zhes bya ba la sogs pa ni 'dod chags chen po'i chos zhes nang du song ba'i dngos po'i rkyen nyid kyis 'dod chags chen po'i chos nyid kyis brjod par bya ba ni 'od gsal ba nyid bstan to/ /de nyid bstan par bya ba'i phyir/ 'dod chags dang 'dod chags bral ba zhes bya ba la sogs pa ni snang ba mched pa la sogs pa'i ye shes gsum gyi rnam grangs yin zhes bya ba'i tha tshig go/ /rnam par dag pa ni mngon du bya ba ste/ 'od gsal ba thob pa'o/ /thabs ni sngags dang phyag rgya'i rim pa'i mtshan nyid kyis ni sems rnam par dag pa'o/ /phyag rgya dang ting nge 'dzin gyi rim pa'i mtshan nyid can gyi rim pa ni mngon par byang chub pa'o/ /phyi rol gyi de bzhin gshegs pa'i 'khor de dag tu dmigs pa'i mngon par zhen pa spangs nas zhes pa ni bdag ni 'di yin pa dang 'di rnams de bzhin gshegs pa yin zhes de dag gis ni sems rnam par dag pa dang mngon par byang chub pa'i rim pa dag la med pa'i phyir ro/ /de bzhin gshegs pa thams cad kyis yongs su bsgrubs pa'i sku ni bdag yin no zhes bya ba 'dis gnyis pa'i rim pa las myur du lha'i gzugs bdag byin gyis rlob pa'i rim pas spro ba'am/ yang na bzhi pa las zung du 'jug pa'i rim pas rdo rje lta bu'i sku byin gyis brlab par mdzad do/ /bdag nyid ces bya ba la sogs pas lung gi tshad ma nyid bshad do/ /snga ma bzhin zhes bya ba ni spro ba tsam gyi dpe yin gyi thams cad kyi ni ma yin no/ /gang gi phyir sngon du ni rtog pa'i rnal 'byor gyis spros pa'i phyir ro/ /'dir ni sgyu ma lta bu nyid kyis so/ /nges pa'i don zhes pa ni sems rnam par dag pa dang bdag byin gyis rlob pa dang / mngon par byang chub pa dang zung du 'jug pa rnams 'chad par 'dod pa'i phyir ro/ /de ltar zhes bya ba la sogs pas ni 'dod pa'i dbang phyug nyid bstan par bya ba'i phyir lha mo dgu'i bdag nyid gzungs kyi dkyil 'khor bstan to/ /sems gtso bo ni ngag dang lus kyi nang nas sems kho na gtso bo yin pa'i phyir ro/ /mi bskyod pa'i bsdus pa'i dkyil 'khor sprul pa'i bya ba zhes pa ni rdo rje 'chang chen po la rjes su zhugs pas bskyed pa'i thugs kyi rdo rje'i gzhi dang / gzhi can gyi mtshan nyid kyi dkyil 'khor gyi sprul pa mdzad ces tha tshig go/ /snga ma bzhin te shes rab kyi gnas/ /zhes pa ni bgegs bskrad pa dang stong pa nyid bsgom pa'i rjes su hUM las byung ba'i chos 'byung ba'i phyag rgya la'o/ /der chud pa zhes bya ba la sogs pas ye shes kyi sa gzhi dang ri rab la sogs pa yongs su gyur pa las skyes pa'i gru bzhi pa la sogs pa'i yon tan dang ldan pa'i gzhi'i dkyil 'khor zhes bya ba'i bar ro/ /dam tshig chen po zhes pa ni de bzhin gshegs pa lnga'o/ /de gang du 'dus pa de dam tshig chen po ste rdo rje 'chang chen po kho na'o/ /dri ma thams cad dang bral ba las zhes pa ni 'dod chags kyi nyon mongs pa'i dri mas ma gos pa'o/ /sprul par mdzod ces pa ni bskyed pa'i rim pas sprul to zhes tha tshig go/ /gzhal yas khang pa'i phyi rol na/ /zhes bya ba la sogs pas shin tu dang ba nyid bstan to/ /in+d+ra nI la zhes bya ba la sogs pas rin po che'i kha dog lnga bstan to/ /phyung ba'i dkyil 'khor zhes bya ba la sogs pas de'i nang du sna tshogs pad+ma dang zla ba dang nyi ma'i dkyil 'khor dag tu myur du bsgoms pa'i lha sum cu rtsa gnyis kyi bdag nyid kyi dkyil 'khor gyi 'khor los nye bar mdzes pa'o/ /'dis ni gzhal yas khang pa bsgom pa'i 'og tu lhag par mos pa'i dkyil 'khor bstan to/ /phyogs bcu zhes bya ba la sogs pa nas brtsams te/ dkyil 'khor zhes bya ba'i don to zhes bya ba'i bar du ni lhag par mos pa'i dkyil 'khor nyid kyi khyad par ro/ /rdo rje 'chang chen po zhes bya ba la sogs pa lhag par mos pa'i dkyil 'khor gyi bdag po dbus kyi gtso bo rdo rje 'chang chen pos byin gyis brlab pa bstan to/ /rigs lngas bsdus pa'i zhes bya ba la sogs pa lhag par mos pa'i dkyil 'khor de nyid rdo rje phreng ba'i rgyud las gsungs pa'i rim pas sku'i dkyil 'khor la 'jug pa'i mtshan nyid can gyi don dam pa'i dkyil 'khor bstan to/ /drang ba'i don zhes bya ba ni dang po sbyor ba'i ting 'dzin gyi phyogs gcig bstan pa'i phyir ro/ /tshig gi don yang 'di yin te/ le'u bco brgyad pa las gsungs pa'i gzungs kyi dkyil 'khor sprul te/ 'dod pa'i dbang phyug nyid du gyur pa bstan nas gnod mdzes kyi rgyal po spro ba sngon du 'gro bas khro bo'i 'khor los bgegs bskrad la le'u gnyis pa las gsungs pa'i dngos po med pa zhes bya ba la sogs pa'i tshigs su bcad pa stong pa nyid mngon du byas la/ rlung la sogs pa'i dkyil 'khor bzhi yongs su gyur pa'i ye shes kyi sa gzhir byin gyis brlabs te/ ri rab yongs su gyur pa las skyes pa'i gzhal yas khang pa bsams la/ de'i nang du sna tshogs pad+ma dang zla ba dang nyi ma'i steng du myur du dkyil 'khor pa'i tshogs bskyed de/ de nyid slar yang rang gi lus la 'jug pa'i mtshan nyid can don dam pa'i dkyil 'khor du rnam par bsams te/ bdag po de yang dbang po gnyis kyis snyoms par zhugs pa las 'byung ba'i 'dod chags kyi sems zhu bar gyur par bsams te/ stong pa nyid kyi sngags kyis brtan par bya zhing gnas par bya'o/ /rnam par shes pa'i bdag nyid ces pa nas brtsams te skye gnas yin te zhes bya ba'i bar du ni rdzogs pa'i rim pa bstan to/ /de la shes rab kyi pha rol tu phyin pa zhes pa ni sems rnam par dag pa'i rim pa gnyis pas 'od gsal ba thob pa bstan to/ /dgongs pa lung bstan zhes bya bas lung gi tshig tshad ma nyid du bstan to/ /sangs rgyas kun gyi gang bstan pa'i/ /zhes pa ni de nyid la brten te/ /de bzhin gshegs pa thams cad kyis byang chub thob pa'i phyir ro/ /sar gyur de ni bcu gsum pa/ zhes pa ni lhag par mos pa'i spyod pa'i sa ni tshogs kyi lam mo/ / rab tu dga' ba ni mthong ba'i lam mo/ /dri ma med pa dang / 'od byed pa dang / 'od 'phro ba dang / sbyang dka' ba dang / mngon du gyur pa dang / ring du song ba dang / mi g.yo ba dang / legs pa'i blo gros dang / chos kyi sprin rnams ni bsgom pa'i lam mo/ /kun tu 'od kyis ni mi slob pa'i lam mo/ /de la rnam pa gnyis te/ 'jig rten las 'das pa dang / de'i rjes la skyes pa ste dag pa 'jig rten pa'o/ /ji skad du/ rnam par mi rtog pa la 'jug pa'i gzugs las shes bya ma lus pa'i ye shes kyis nam mkha'i dkyil dang mtshungs par chos thams cad mthong ngo / /de'i rjes las skyes pas ni sgyu ma dang / smig rgyu dang / dri za'i grong khyer dang / brag ca dang / gzugs brnyan dang / mtshungs par rnal 'byor pas mthong ngo / /de'i phyir na sa bcu gsum pa ste rdo rje 'chang chen po'i 'o/ /btsun mo ni shes rab po/ / dam chos b+ha ga ni nang du song ba'i dngos po'i rkyen du shes par bya ste/ des na chos nyid ni sa bcu gsum pa'o/ /'jog par gyur pa ni 'od gsal ba la ye shes kyi sku 'jug par mdzad de/ mngon par byang chub pa'i rim pas so zhes tshig gi lhag ma'o/ /gsal ba zhes bya ba la sogs pas rdo rje 'chang chen po'i sku phyag rgya dang ting nge 'dzin gyi rim pas 'od gsal ba rab tu bzhugs par gyur to zhes pa ni de'i bdag nyid du mdzad pa'o/ /de nas zhes bya ba la sogs pas rim pa bzhi pa'i bsgom pas de kho na nyid thob pas na 'gro ba'i don bya ba'i phyir/ zung du 'jug pa'i ting nge 'dzin gyis rdo rje'i sku blangs so zhes bstan to/ /ji skad du/ nam mkha'i kun gyi skabs na dpal/ /zhes pa ni nam mkha'i dbyings ma lus pa las khyab pa'i bsod nams dang ye shes kyi tshogs dang ldan pa'o/ /rdo rje sems dpa' rab tu bzhugs/ / zhes pa ni mi gnas pa'i mya ngan las 'das pa'i ngo bo rdo rje 'chang chen po'o/ /de nas zhes bya ba la sogs pas don dam pa'i dkyil 'khor yang snga ma bzhin du bshad par bya'o/ /nges pa'i don zhes pa ni sems rnam par dag pa dang bdag la byin gyis brlab pa dang / mngon par byang chub pa dang / zung du 'jug pa'i rim pas brjod par 'dod pa'i phyir ro/ /don dam pa'i dkyil 'khor gyi bar du bsgom pa rdzogs pa na de nyid yang spros te/ bstan par bya ba'i phyir/ don 'di nyid ces bya ba la sogs pa smos te/ 'das pa dang / ma 'ongs pa zhes pa ni dus gsum gyi de bzhin gshegs pa rnams so/ /zla ba dang rdo rje la sogs pa'i rim gyis gcig tu mdzad pa ni zhes pa la/ lhag par mos pa'i dkyil 'khor du zla ba dang rdo rje la sogs pa'i steng du rnam par dgod cing bsgom pa gang yin pa de ni zil gyis gnon pa zhes bya ba'i don to/ /de'i don du rdo rje ni zhes bya ba la sogs pas ting nge 'dzin gyi ming ngo / /de la snyoms par zhugs zhes pa ni lhag par mos pa'i dkyil 'khor du bdag po nyid du gnas so/ /de bzhin gshegs pa thams cad ces bya ba la sogs pas dbus kyi bdag po de nyid kyis rdo rje 'chang chen po'i dkyil 'khor pa rnams myur du bsgom par bstan to/ /des zhes bya ba nas brtsams te/ rdo rje sems dpa' nyid thob bo zhes bya ba'i bar du ni rdo rje 'chang chen po'i dkyil 'khor pa rnams kyis sems can gyi don gyi bya ba bstan to/ /'di ltar bshad pa yin te/ lhag par mos pa'i dkyil 'khor myur du bsgom zhing de ma thag tu 'gro ba thams cad de'i rang bzhin du bya'o zhes pa'i don to/ /spyi'i don zhes pa ni lhag par mos pa'i dkyil 'khor dang po sbyor ba'i phyogs gcig bstan pas so/ /don dam pa'i dkyil 'khor bstan par bya ba'i phyir ting nge 'dzin gang gis zhes bya ba la sogs pas ni phung po la sogs pa'i rnam par rtog pa yongs su 'gog par byed pa kun rdzob kyi byang chub kyi sems la brten pa'i bde ba chen po'i ting nge 'dzin la snyoms par zhugs pa zhes bstan to/ /'dir rtsa phran stong phrag bdun cu rtsa gnyis kyi khong stong zhes pa ni phung po lnga'i bdag nyid can lus 'di la ji snyed kyi ba spu yod pa de srid kyi rtsa rnams kyi dbus kyi khong stong ni nam mkha'i cha'o/ /thabs kyi ye shes ni snang ba mched pa'i ye shes so/ / phung po la sogs pa zhes pa ni de'i rgyur gyur pa'i 'dod chags la sogs pa'i rang bzhin rnams so/ /thabs kyi ye shes shar bas zhes pa ni bshad ma thag pa de nyid kyis so/ /dbang po gnyis zhes bya ba la sogs pas dam pa dga' ba'i bde ba nyams su myong ba thob par gyur to zhes bstan to/ /des ni 'dod chags la sogs pa rnam par dag pa'i sgo nas don dam pa'i dkyil 'khor bstan to/ /sbas pa zhes pa ni 'dod chags kyi chos kyi mtshan nyid bstan pa'i phyir ro/ /phung po lnga rnams so zhes pa nas de'i ngo bor gnas par gyur pa'o zhes bya ba'i bar du ni stong pa gsum gyi rim pas thams cad stong pa la 'jug pa bstan to/ /mthar thug pa ni 'od gsal ba la 'jug pas so/ /de ltar lhag par mos pas zhes bya ba la sogs pas lhag par mos pa'i sbyor bas rdo rje 'chang chen po yongs su rdzogs par bstan to/ /de ni nye bar mtshon pa yin te/ don dam pa'i dkyil 'khor yang rdzogs par mdzad do/ /yongs su dag pa dang ma dag pa zhes bya ba la sogs pas bskyed pa'i rim pa dang / bdag byin gyis rlob pa'i rim pa las skyes pa dkyil 'khor gyi 'khor lo'i bdag po so sor bstan par byed do zhes dgongs pa'o/ /rtog pa'i rnal 'byor gyi rim pa rdzogs par bya ba'i phyir/ /ting nge 'dzin la snyoms par zhugs pa bstan par byed de/ sku la sogs pa'i ngo bo nyid yin pas yi ge gsum po kho na sku la sogs pa ste dbyer med par brtags pas so/ /'da' bar mi bya bas ni bskyed pa'i rim pa'i rnal 'byor pa rnams kyis dor bar bya ba ma yin pa'i phyir ro/ / sngags kyi yi ge rnams zhes bya ba la sogs pas don dam pa'i dkyil 'khor gyi 'og tu yi ge gsum yongs su gyur pa las skyes pa'i zla ba dang nyi ma dang pad+ma gsum po rnam par bsgoms te/ de'i steng du yi ge gsum las skyes pa'i zla ba'i dkyil 'khor la zla ba la sogs pa 'jug par byas la/ chos kyi dbyings brjod pa'i sngags kyis zla ba'i dkyil 'khor gyi rnam par sems brtan par byas la/ de'i steng du yi ge gsum yongs su gyur pa las skyes pa'i rdo rje rtse lnga pa rnam par bsgoms pas spro ba dang bsdu ba yang byas te/ de yongs su gyur pa las byung ba'i rdo rje sems dpa'/ de'i thugs kar ye shes sems dpa' dang / ting nge 'dzin sems dpa' byin gyis brlabs te/ mig la sogs pa dang sku gsung thugs byin gyis brlabs la/ sna tshogs pad+ma dang zla ba'i dkyil 'khor gyi steng du zhal gsum pa dang / phyag drug pa'i gzugs 'chang bar gyur to/ /des ni rnal 'byor bzhi'i bdag nyid can dang po'i sbyor ba zhes bya ba'i ting nge 'dzin bstan to/ /sgrub thabs las bshad pa'i rim pas zhes pa ni mdor bsdus pa'i sgrub thabs nas bshad pa'i rim pas so/ /rnal 'byor bzhi'i rim gyis/ zhes pa ni rnal 'byor dang / rjes su rnal 'byor dang / shin tu rnal 'byor dang / rnal 'byor chen po'i rim pas so / /sems dpa' gsum gyi mthar thug pa'i bar gyis/ zhes pa ni sems dpa' gsum gyi bdag nyid kyi rdo rje 'chang chen po'i sku rdzogs pa'i mthar thug pa'i bar ro/ /byin gyis brlabs pa zhes bya ba la sogs pas dbus kyi bdag po'i zhal dang phyag mtshan gyi khyad par bstan to/ /zhal gsum lta bur zhes pa ni phyag drug la sogs pas kyang nye bar mtshon par bya'o/ /'jig rten gyi khams na gnas pa rnams kyis/ /zhes pa ni sangs rgyas kyi zhing mtha' yas pa la gnas pa'i 'khor thams cad kyis mthong ngo zhes bya ba'i bar ro/ /drang ba'i don zhes pa ni rnal 'byor bzhi'i bdag nyid can dang po'i sbyor ba'i ting nge 'dzin du bshad pas so/ /'od gsal ba zhes bya ba la sogs pa ril por 'dzin pa dang / rjes su gzhig pa'i ting nge 'dzin gyi thob par bya ba'i 'od gsal ba'i de kho na nyid mngon du byas te/ kun rdzob dang don dam pa dbyer med pa'i lha'i sku zung du 'jug pa'i ting nge 'dzin gyi mtshan nyid can blangs par gyur to zhes bstan to/ /chen po'i sgra'i don rnam pa drug ste/ mchog ni dper na skyes bu chen po bzhin te skye dgu thams cad kyi mchog ces bya ba'i don to/ /tshad med pa ni dper na rgya mtsho chen po bzhin tshad med ces bya ba'i don to/ /mkhas pa ni dper na blo gros chen po de mkhas pa chen po zhes bya ba'i don to/ /brtson pa ni dper na chen por 'gro ba ste brtson 'grus kyis kun du 'gro ba'o/ /spro ba ni dper na chen po dge ba ste dge ba'i las rnams la brtson pa'o/ /rmad byung byed pa ni dper na bstan bcos chen po brtsam pa bzhin sngar med pa sprul pa la mkhas pa'o/ /'dir ni mchog gi don gtso bo yin te/ thams cad kyi mchog tu gyur pa'i rnam pa yin zhes bya ba'i don to/ /don dam pa'i bden pa zhes pa nas snga ma bzhin zhes bya ba'i bar du rdo rje 'chang chen po'i sku bstan to/ /nges pa'i don zhes pa ni rim pa bzhi pa dang zung du 'jug pa rjod par 'dod pas so/ /gzhung de tsam gyis ni dpal gsang ba 'dus pa'i rgyud ston par bzhed pa dpal rdo rje 'chang chen pos ma 'ongs pa'i sems can gyi khams gdul bar bya ba'i don du gnas dang bgegs bskrad pa dang stong pa nyid bsgom pa dang / ye shes kyi sa gzhi dang gzhal yas khang bsgom pa dang lhag par mos pa'i dkyil 'khor dang don dam pa'i dkyil 'khor dang gdan gyi dbye ba dang chos kyi dbyings kyi de kho na nyid mngon du bya ba dang / sa bon las phyag mtshan bsgom pa dang / de yongs su gyur pa las rdo rje 'dzin pa sems dpa' gsum gyi bdag nyid bskyed pa dang / mig la sogs pa'i byin gyis rlob pa dang sku gsung thugs byin gyis rlob pa'i mtshan nyid dang po'i rnal 'byor gyi ting nge 'dzin las bsgrub pa rdo rje 'chang chen po'i sna tshogs pad+ma dang zla ba'i dkyil 'khor gyi steng du bzhugs so zhes bstan to/ /dpal gsang ba 'dus pa'i rgyud gsungs pa dang de bzhin gshegs pa spro ba sngon du 'gro bar slob dpon dang slob ma'i 'brel pa bstan par bya ba'i phyir/ de nas zhes bya ba la sogs pa smos te/ de'i dgongs pa ni bcom ldan 'das rdo rje 'chang chen po des mi bskyod pa la sogs pa de bzhin gshegs pa rnams spros te/ de rnams kyi ched du brjod pa nyid bstan to/ /lha'i sku rnam pa gnyis zhes bya ba la sogs pas ni dpal rdo rje 'chang chen po'i lha'i rnal 'byor gnyis bsgrub par bya ba'i phyir de dang rjes su mthun pa'i ting nge 'dzin rnam pa gnyis bstan pa gang yin pa de ni rmad du byung ba zhes bstan to/ /de bzhin gshegs pa kun gyi zhes bya ba la sogs pas dpal gsang ba 'dus pa'i rgyud de dang rjes su mthun par bstan to/ /dgongs pa ma yin pa ni rim pa gnyis gtsor gyur pa'i rgyud kyi de kho na nyid bstan pa'i phyir ro/ /da ni zhes bya ba la sogs pas mchod pa sngon du 'gro bar gsol ba gdab par rigs te/ de bas na dang po phyi dang nang gi mchod pa'i bye brag yongs su bstan to/ /'dus pa mdzad nas zhes pa ni mdun du thams cad gcig tu bsdus pa mdzad nas so/ /de bzhin gshegs pa thams cad kyi mchod pa rgyas pa de kho na nyid dam tshig rin po che'i rgya mtsho'i tshogs ni zhes pa la nye bar spyod pa lnga la sogs pa dang bdud rtsi lnga dag ni sprin dang 'dra ba'o/ /de dag gis yang dag par mchod nas so/ /drang ba'i don ni phyi'i me tog la sogs pa dang bdud rtsi'i mchod pa brjod par 'dod pas so/ /gzugs la sogs pa ste zhes pa ni gzugs rdo rje ma la sogs pas so / /bud med rin po che zhes pa ni mchog tu bde ba ster bar byed pas na rin po che'o/ /de rnams kyis mchod de phyag btsal nas 'di skad ces gsol to zhes pa ni de'i don 'di yin te/ rdo rje 'chang chen po'i thugs ka nas de bzhin gshegs pa lnga phyung ste/ nye bar spyod pa lnga la sogs pa'i phyi'i mchod pa dang / bdud rtsi lnga'i mtshan nyid nang gi gsang ba'i mchod pa dang / gzugs rdo rje ma la sogs pa'i snyoms par zhugs pa'i gsang ba'i mchod pas/ de nyid la mchod cing 'di skad ces gsol to/ /nges pa'i don ni snyoms par zhugs pa'i mchod par brjod par 'dod pa'i phyir ro/ /de bzhin gshegs pa rnams kyis gsol ba gdab pa'o/ /gnyis gcig tu gyur pa ni stong pa nyid dang snying rje'i bdag nyid ces pa'i tha tshig go/ /yi ge'i don ni de nyid tsam so sor bstan pa'i phyir ro/ /rdo rje dang pad+ma yang dag par sbyor ba ni zhes pa la gsang ba'i rdo rje dang chu skyes sbyangs pa las khams gsum gyi bdag nyid dkyil 'khor gyi 'khor lo skye bar 'gyur ro/ /spyi'i don ni bskyed pa'i rim pa brjod par 'dod pa'i phyir ro/ /shes rab dang / thabs yang dag par sbyor ba ni zhes pa la/ shes rab ni 'jug pa'i rnam par shes pa 'gog par byed pa'i mtshan nyid de snang ba'i ye shes so/ /thabs ni nyon mongs pa can gyi yid 'gog par byed pa'i mtshan nyid can snang ba mchod pa'i ye shes so/ /yang dag par sbyor ba ni kun gzhi rnam par shes pa 'gog pa'i mtshan nyid can snang ba thob pa'i ye shes so/ /don de lta bu ston par byed pa'i phyir na 'dus pa'o/ /sbas pa ni ye shes gsum rnam par dag pa'i mtshan nyid gtsor gyur pa'i phyir ro/ /yang na shes rab ni yi ge AH'o/ /thabs ni hUM ngo / /yang dag par sbyor ba ni ma ning gi ngo bo nyid yi ge oM mo/ /de rnams kyi 'jug pa la sogs pa'i rim pa la brten te/ dam tshig gam ye shes kyi phyag rgya dang / 'brel pas yan lag ma nyams pa'i mtshan nyid can bzlas pa ni 'dus pa'o zhes 'dod chags kyis chos bshad pa'i sgo nas rdo rje bzlas pa bshad pa'o/ /yang na shes rab ni zla ba dang 'dra ba'i snang ba'o/ /thabs ni nyi ma dang 'dra ba'i snang ba mched pa'o/ / yang dag par sbyor ba ni mtshams kyi snang ba dang 'dra ba thob pa'o / /de yongs su gyur pa las yang dag par skyes pa'i sgyu ma lta bu'i ye shes kyi sku ste/ 'dus pa'o zhes kun rdzob kyi bden pa rtogs pa'i mtshan nyid can bdag byin gyis rlob pa'i rim pa bstan to/ /kun rdzob dang don dam pa'i bden pa dag tu 'dus pa ni zhes pa la nye bar mtshon pa 'di yin pas yod pa dang med pa dang / dngos po dang dngos po med pa dang / rnam pa dang / rnam pa med pa dang / rtag pa dang / chad pa dang / gcig pu dang / du ma dang / thabs dang shes rab la sogs pa gnyis po gcig tu 'dus pa'i rang bzhin no/ /gsal ba zhes pa ni 'od gsal ba ste rim pa bzhi pas thob par bya ba de kho nyid do/ /de las byung ba ni zhes pa la myur ba'i rnam pas so zhes tshig gi lhag ma'o/ /gnyis su med pa'i ye shes kyi bdag nyid can rdo rje 'chang chen po zhes bya ba'i bar du ste zhes pa la/ zung du 'jug pa'i rim par thob par bya ba phyag rgya chen po'i gzugs kyi mtshan nyid ye shes so/ /mthar thug pa ni rim pa bzhi pa dang lnga pa'i rim pas so sor bstan pa'i phyir ro/ /de ltar gsang ba 'dus pa'i don bshad pas rim pa gnyis gsal bar bstan to/ /gcig nas gcig tu brgyud pa'i zhes pa la/ rdo rje 'chang chen po nas brtsams te de bzhin gshegs pa la sogs pa 'brel pa drug gtsor gyur pa'o/ /sba bar bya'o zhes pa la bya ba dang spyod pa'i tshul la gnas pa rnams la bstan par bya ba ma yin pa'o/ /de rnams kyi gcig tu gyur pa'i mtshan nyid can ni zhes pa la/ rigs brgya'i dbye ba la brten te bsdus pas sku dang gsung dang thugs kyi ngo bor bsdus pa'i phyir ro/ /ji lta ba bzhin du 'byung ba zhes pa ni rim pa gnyis brjod par bya ba yin pa'i phyir ro/ /des ni de bzhin gshegs pa rnams kyis zhus pa'o/ /de nas zhes bya ba la sogs pa nas brda sprod pa yin no zhes bya ba'i bar du ni rdo rje 'chang chen pos legs so legs so sbyin pa sngon du 'gro ba rin po che lta bu dbang po rno ba rnams kyang spyod yul ma yin na/ tsan+dan la sogs pa dbang po dman pa rnams kyi ga las 'gyur ro zhes pas dri ba la lan mi rtsol zhes bstan to/ /de [(]lhar [,]ltar [)]bya ba nas b rtsams te ston pa yin te zhes pa'i bar du ni dbang po rno ba dang dman pa dag gis yul ma yin pa nyid kyis dpal gsang ba 'dus pa'i rgyud mi gsung ba'i phyir ngo mtshar dang rmad du byung ba'i de bzhin gshegs pa rnams kyis rin po che lta bu'i gang zag gi ngo bo bdag cag rnams 'khor 'di yin pas/ bcom ldan 'das kyis bka' stsol cig ces gsol ba btab par gyur to zhes bstan to/ /dgongs pas bshad pa ni de bzhin gshegs pa'i sgra ni rin po che lta bu gang zag gi rnam grangs dang byang chub sems dpa'i sgra yang tsan+dan la sogs pa rjod par byed pa yin pas 'gal ba'i tshig gi sbyor ba dang / gsang ba 'dus pa'i de kho na nyid bstan pa'i phyir ro/ /da ni snod du rung bar bya ba sngon du 'gro bas dpal gsang ba 'dus pa rab tu ston cig ces slar yang gsol ba gdab par bya ba'i phyir dam tshig dang sdom pa la sogs pa gsungs te/ de la dam tshig ni bsrung bar bya ba dang bza' bar bya ba'o/ /de la bsrung bar bya ba ni de bzhin gshegs pa rigs lnga'i dam tshig ste dkon mchog gsum la skyabs su 'gro ba la sogs pa dang srog gcod pa la sogs pa las log pa'o/ /rdzogs pa'i rim pa'i phyogs su srog gcod pa la sogs pa kho na'o/ / bza' bar bya ba ni bdud rtsi dang lcags kyu la sogs pa myang bar bya ba kho na'o/ /sogs pa'i sgras ni tshad med pa bzhi bsgom pa la sogs pa'o/ /rigs gsum yongs su gyur pa ste zhes pa ni dam tshig la sogs pa blangs nas bskyed pa'i rim pa las lus dang ngag dang yid sbyang bar bya ba'i phyir rnam par snang mdzad la sogs pa'i rigs gsum gyi gzugs su bdag nyid yongs su gyur nas lha'i nga rgyal gyis gnas pa'o/ /yi ge'i don ni dam tshig la sogs pa tsam so sor bstan pas so/ /yi ge gsum ste zhes pa ni yi ge gsum yongs su gyur pa las skyes bu'i lha'i sku'o/ /spyi'i don ni bskyed pa'i rim pa brjod par 'dod pa'i phyir ro/ /ye shes gsum ni rnam par shes pa gsum gyi gnyen por gyur pa'o/ /rang bzhin gyis snang ba rlung gi bzhon pa dang ldan pa ste/ zhes pa ste 'dod chags dang bral ba la sogs pa rang bzhin gyi tshogs dang bcas pa 'jug pa'i rnam par shes pa la sogs pa gsum po ni mi mthun pa'i phyogs so/ /de ltar mi mthun pa dang gnyen po'i sgo nas sems rnam par dag par 'gyur ro/ /sbas pa ni ye shes gsum po brtags pa'i mtshan nyid can gyi sems rnam par dag pa'i rim pa so sor bstan pa'i phyir ro/ /ye shes kyi rang bzhin gyi sku ste zhes pa ni ye shes ni bzhi pa'o/ /de las byung ba'i sku ni ye shes kyi sku'o/ /mthar thug pa ni 'od gsal ba dang zung du 'jug pa bstan pas so/ /sku la sogs pa bzhugs pa ste de mdzad pa zhes bya ba ni lus la sogs pa snod du rung bar bya ba'i phyir pad+ma'i nang du dam tshig gi dkyil 'khor spro bar mdzad nas so/ /des bskyed pa'i sa bon gyi yi ge ste/ /zhes pa ni badzra d+h+r-ika ces bya ba la sogs pa phyung ba'i sngags kyi yi ge rnams so/ /de rnams kyis byin gyis brlabs par mdzad nas zhes bya ba'i bar ro/ /spyi'i don ni bskyed pa'i rim pa'i yan lag tu gyur pa'i dkyil 'khor rgyal ba mchog brjod par 'dod pa'i phyir ro/ /dbang po gnyis kyis snyoms par 'jug pa zhes pa ni gsang ba'i rdo rje dang chu skyes phrad pa'o/ /rdo rje'i dam tshig ces pa ni rdo rje dang dam tshig go/ /rdo rje dang dam tshig ste zlas dbye ba'i bsdu ba'i don gcig pa'o/ /yang na rdo rje ni de bzhin gshegs pa'am rnal 'byor pa rnams kyi'o/ /dam tshig ni dbang po gnyis snyoms par zhugs pa kho na'o/ /byang chub sems kyi thig le zhes pa ni snyoms par zhugs pa'i sgras nam mkha'i dbyings ma lus pa na gnas pa'i de bzhin gshegs pa 'jug pas yongs su gyur pa'i shu kra'i thig le rnams so/ /dbang bskur bar bya ba ste zhes pa ni chos 'byung nang du thig le rnams kyis gsang ba'i dbang byin nas so/ /sbas pa ni 'dod chags kyi chos bstan pas so/ /'od gsal ba ni phyag rgya dang ting nge 'dzin gyi rim pas thob par bya ba'i de kho na nyid bzhi pa'o/ /chen po stong pa zhes bya ba la sogs pas ni chags pa bar ma dang chags pa dang / chags pa dang bral ba'o/ /des byin gyis rlob pa ni chags pa bar pa la sogs pa bkag nas so/ /gdul bya'i skye bo'i rgyud la ni 'khor gyi sems kyi rgyud rnams su'o/ /lha'i sku rnam pa gnyis gsal bar mdzad nas zhes pa ni sngags kyi sku dang ye shes kyi sku dbyer med par byas nas so/ /mthar thug pa ni 'od gsal ba la 'jug pa dang zung du 'jug pa bstan pa'i phyir ro/ /de ltar gsol ba btab pa dang / zhes bya ba la sogs pas rang gi snying ga nas spros pa'i de bzhin gshegs pa rnams gsol ba btab pa thos ma thag tu de rnams la dbang bskur bas chos bstan pa la dbang ba yin pas de dang 'brel pa'i ye shes kyi dkyil 'khor sprul par mdzad do zhes bstan to/ /ye shes kyi dkyil 'khor ni legs par sbyangs pa'i yan lag dang nying lag dang ldan pa'i dam tshig gi phyag rgya pad+ma'i nang du byang chub kyi sems kyi thig le las sprul pa'i dam tshig gi dkyil 'khor ro/ /de'i sprul pa dang rjes su mthun pa'i ting nge 'dzin la snyoms par zhugs pa nyid bstan par bya ba'i phyir/ ye shes nyid sgron ma yin pas na zhes smos to/ /ye shes ni dkyil 'khor sprul pa'i phyir sems rtse gcig pa nyid do/ /sgron ma ni sprul pa'i dkyil 'khor rab tu bstan pas so/ /yi ge'i don ni de tsam bar du bstan pas so/ /sems can rnams kyi rgyud la zhes bya ba la sogs pa ni gdul bya'i rgyud la'o/ /ye shes ni shin tu rnam par dag pa'i chos kyi dbyings kyi ye shes so/ /de nyid kyis rab tu snang ba mdzad pas na ye shes kyi sgron ma ste mi bskyod pa'o/ /spyi'i don ni mdo sde la sogs pa rnams kyi 'gyod pa bzlog pas so/ /rnam par shes pa gsum gyi snang bas zhes pa ni/ rnam par shes pa gsum rnam par dag pa'i ngo bo ye shes gsum rnam par dag pa sems la dmigs pa thob pa'o/ /phyogs bcur snang bar mdzad pas zhes pa ni gtan tshigs so/ /sbas pa ni ye shes gsum brtag pa'i mtshan nyid can gyi don yin pa'i phyir ro/ /dz+nyA na rtog pa'i don to/ /zhes bya ba ni 'dod chags dang bral ba la sogs pa yongs su shes pa'i mtshan nyid ni ye shes te dz+nyA'o/ /na ni dgag pa la 'jug pa ste zhes bya ba ni a ma no na dgag pa'i don zhes 'byung bas so/ /de gang yin zhes pa ni 'dod chags la sogs pa 'gog pa'i mtshan nyid can 'od gsal ba'i rnam grangs de kho na nyid bzhi pa gzi brjid ma lus pa'i zil gyis gnon pa mi phyed pa'i ting nge 'dzin zhes bstan to/ /mthar thug pa ni man ngag bzhi pa brjod par 'dod pas so/ /rang bzhin gyis 'od gsal ba'i ting nge 'dzin las bzhengs nas zhes bya ba la sogs pa'i don ni 'di yin te/ dang po'i sbyor ba'i ting nge 'dzin gyi rjes su ut+pa la sngon po'i 'dab ma dang 'dra ba'i lo bcu gnyis pa sme sha can gyi bu mo phyag rgya rnyed nas sngon du bshad pa'i rim pas de'i tha mal pa'i lus bsregs te/ de'i rnam par shes pa ni 'khyud pa'i ye shes kyi phyag rgya'i chos 'byung ba'i nang du pad+ma dang zla ba'i dkyil 'khor la zhal gsum pa phyag drug pa sku mdog nag po dang mthing ga dang dkar ba dang dmar po ste zhal gsum pa/ rdo rje dang 'khor lo dang pad+ma dang dril bu dang rin po che dang ral gri g.yas pa dang g.yon pa'i phyag na bsnams pa/ rdo rje skyil mo krung gis bzhugs pa sems dpa' gsum gyi bdag nyid can reg bya rdo rje ma rnam par spros te rnal 'byor dang rjes su rnal 'byor byas nas/ de nas kyang phyi rol du spros te de dang lhan cig tu ro gcig par byas te spyi bo la sogs pa'i gnas lnga la rigs lngas khyab par byas te mig la sogs pa rnams su sa'i snying po la sogs pa dang / snyoms par zhugs pa'i gzugs rdo rje ma la sogs pa'i lha mo'i tshogs rnams rnam par bkod la/ sa'i khams kyi ngo bo yi ge laM yongs su gyur pa'i sangs rgyas spyan las skyes pa'i de'i nu ma dang / yi ge maM chu'i khams kyi ngo bo yongs su gyur pa las mA ma kI de'i rang bzhin chu dang / baM gyi sa bon las me'i khams kyi ngo bo yongs su gyur pa las gos dkar mo'i rang bzhin de'i pad+ma dang / yi ge taM las rlung gi khams kyi rang bzhin sgrol ma yongs su gyur pa'i pad+ma'i nang du khong stong bsams la/ gsang ba la sogs pa'i gnas bcu la rdo rje ro langs ma la sogs pa khro bo'i rgyal po rnams kyi btsun mo bcu rnam par bkod la sku gsung thugs kyang byin gyis brlab par bya ste/ de'i pad+ma yang stong pa nyid bsgom pa sngon du song ba yi ge a yongs su gyur pa'i pad+ma 'dab ma brgyad pa'i rnam par byas la/ de'i lte ba la oM gyi byin gyis brlab par byas la/ bdag nyid kyi gsang ba'i rdo rje yang snga ma bzhin hUM yongs su gyur pa las rdo rje rtse lnga pa bsgom par bya ste/ de'i chang zungs yang yi ge oM gyi byin gyis brlab par byas la/ dang po rjes su chags par bya ba'i phyir/ de'i pad+ma la hUM gis byin gyis rlob pa'i mig dang lcags kyu dang ba dan dang sdigs mdzub kyi phyag rgya rnams las gang yang rung ba bcug la/ grang ba ma yin pa'i reg pa'i bar du bskyed par byas la/ byang chub kyi sems kyi rgyun 'byung bar 'gyur ba'i tshe 'dod chags chen po'i dbang gis rang gi mgrin pa nas bzung ste rnam par bsams la/ de dang 'khyud pa dang 'o la sogs pa rnam pa brgyad de'i skad 'jam po dga' ba'i rang bzhin thos nas/ oM sarba ta thA ga ta a nu rA ga na badzra swa b+hA wa At+ma kou0f85haM/ zhes 'dis ni rdo rje dang pad+ma yang dag par btsir la/ oM sarba ta thA ga ta pU dza badzra swa b+hA wa At+ma kou0f85 haM/ zhes bya ba'i sngags kyis bskyod cing / dam pa dga' ba'i sgras phyogs bcu na gnas pa'i de bzhin gshegs pa bkug la ngag gi lam du 'jug par byas la/ rtsa dbu ma nas rdo rje nor bu'i rtse mor byang chub kyi sems thig ler bsams te/ 'dod chags dang 'dod chags bral ba dang 'dod chags bar ma'i rim gyis 'od gsal ba'i de kho na nyid myong nas 'chad par 'gyur ba'i badzra d+h-ika ces bya ba la sogs pa'i phyung ba'i sngags kyis de bzhin gshegs pa la sogs pa spro bar mdzad do zhes dgongs so/ /'od gsal ba'i ting nge 'dzin las bzhengs nas zhes bya ba ni bde ba chen po'i ting nge 'dzin las so/ /nyon mongs pa lngas khyab pa'i sems can gyi khams la gzigs nas zhes bya ba ni 'dod chags la sogs pa'i skyon gyis yongs su khyab par rnam par gzigs nas so/ /nyon mongs pa'i rang bzhin yongs su shes pa zhes pa ni gzod ma nas ma skyes pa'i rang bzhin de kho na nyid shes pa'o/ /byang chub yin la ni rdo rje 'chang nyid do/ /de'i ngo bo nyid bdag yin no zhes bya ba ni 'dod chags la sogs pa nyon mongs pa yongs su shes pa'i rang bzhin rdo rje 'chang chen po'i bdag yin no zhes bya ba'i don to/ /gdul bya rnams kyis nyon mongs pa zhe sdang rnam par sbyang ba'i zhes pa ni nye bar mtshon pa tsam yin te/ de'i 'brel pa dang ldan pa'i khro ba la sogs pa nye ba'i nyon mongs pa rnams kyang rnam par sbyang bar bya ba'i phyir zhes pa'i tha tshig go/ /thugs rje chen po'i thabs ni thugs rje chen po'i thabs gang la yod pa de ni thabs can te khro ba'o/ /gang gi phyir bcom ldan 'das ni thugs rje chen pos drag po'i gzugs mdzad kyis zhe sdang gis ni ma yin no/ /ji skad du/ shin tu ma rungs gdug pa la/ /zhi ba nyid du mi rigs so/ /zhes dpal bde mchog las 'byung bas so/ /de bas na bcom ldan 'das snying rje chen pos khyab pa yang gdug pa 'dul bar bya ba'i phyir phyi'i khro bo'i gzugs 'chang bar 'gyur ro/ /nyi ma'i 'od kyis bsros pa'i mtsho chen dang mtshungs pa/ /snying rje chen po can rnams khro bo'i sku dang ldan/ /nang ni gangs dang 'dra ste bsil ba ste/ /'gro ba 'dul zhing phyi yi khro bor snang / /zhes 'byung ngo / /'dod pa'i 'bras bu bskyed pas na/ /zhes pa ni 'dod pa'i 'bras bu ni chos kyi dbyings kyi ye shes kyi mtshan nyid do/ /de bskyed pa ni thob par byed pas so/ /sngags ni dngos su mi bskyed pa brjod par bya ba yin zhes ston pa'o/ /blo la gzhag pa ni sdud pa po'i blo la gnas pa'o/ /snyoms par zhugs pa las zhes pa ni sngar bshad pa'i reg bya rdo rje ma'i pad+ma dang rdo rje mnyam par sbyor ba las yang dag par 'byin par mdzad do zhes bya ba'i don to/ /sgra ji bzhin pa ni mi bskyod pa spro ba brjod par 'dod pa'i phyir ro/ /dkyil 'khor la sogs zhes sogs pa'i sgras shes par bya'o/ /mngon par byang chub pa rnam pa lnga yang dag par ston pa'i zhes pa la/ 'og gi rtse lnga rnam par shes pa lnga'i ngo bo nyid steng gi rtse lnga po ye shes lnga'i ngo bo dag gis sbyangs pa'i phyir rdo rje rnam par dag pa'o/ /rgyud phyi ma las kyang / spang bya lnga dang rig pa lnga/ /rdo rje zhes par brjod pa'o/ /zhes 'byung bas so/ /drang ba'i don ni rnam par dag pa dang bcas pa'i phyag mtshan tsam bstan pas so/ /bde ba gnyis kyi bdag nyid can/ /zhes pa ni zung du 'jug pa'i ting nge 'dzin gyi ngo bo nyid do/ /nges pa'i don ni 'bras bur gyur pa'i de kho na nyid bstan pa'i phyir ro/ /des na ni yongs su dag pa dang yongs su ma dag pa'i mtshan nyid lha'i rnal 'byor gnyis bstan to/ /de ltar dkyil 'khor pa gzhan rnams la yang shes par bya'o/ /sngar bshad pa'i rdo rje 'chang chen po zhes bya ba la sogs pas reg bya rdo rje ma'i pad+ma nas byung ste/ zhe sdang la spyod pa'i sems can gyi khams rnam par sbyangs te/ mngon par dga' ba'i 'jig rten gyi khams su bzhag nas slar yang gshegs te/ phyogs bcu la gzigs pa sngon du 'gro ba rdo rje 'chang chen po'i sku dang gsung dang thugs rdo rje la mar la mar thim pa bzhin du gyur nas mi bskyod pa kho na i n+d+ra nI la dang 'dra ba'i rnam pa zhal gsum pa phyag drug pa cung zad mche ba gtsigs pa/ pad+ma dang nyi ma'i steng du rdo rje'i skyil mo krung gis bzhugs pas sems dpa' gsum gyi bdag nyid can sngon po dang dkar po dang dmar po'i zhal gsum gyi nye bar mdzes pa/ rdo rje dang 'khor lo dang pad+ma dang dril bu dang yid bzhin nor bu dang / ral gri 'dzin pa/ rdo rje 'chang chen po'i cod pan can mdog kha dog lnga dang ldan pa'i 'od zer gyi 'khor lo spro bar gyur to/ /de gsum gyi bdag nyid can zhes pa ni sems dpa' gsum gyi bdag nyid can no/ /bden pa gnyis kyi bdag nyid can/ /zhes pa ni yongs su dag pa'i lha'i rnal 'byor gyi skabs su zung du 'jug pa'i bdag nyid yin pas so/ /gcig tu gyur pa de ni rdo rje 'chang chen po de'i bdag nyid kyis so/ /snga ma bzhin no zhes kha dog gi khyad par ro/ /rdo rje 'chang chen po zhes bya ba la sogs pas ni gcig gi ngo bor rab tu gnas par bya ba'i phyir ro/ / rdo rje sems dpa' chung ba zhes pa ni dang po sbyor ba'i lhag ma'i ting nge 'dzin gyi lhag mar gyur pa phyag rgya sbyar ba dang mi bskyod pa'i dkyil 'khor gyi bdag po nyid ston par byed do/ /sgra ji bzhin zhes pa ni bskyed pa'i rim pa'i yan lag tu gyur pa dang dang po'i sbyor ba ston par byed pas so/ / dang po'i sbyor ba'i 'og tu zhes pa la sogs pas dkyil 'khor rgyal ba mchog ston par byed de/ sems can rmongs pa rnams rnam par sbyong bar bya ba'i phyir zhes pa ni gti mug gi rigs can gdul bya rnams sbyang bar bya ba'i phyir ro/ /zhi ba'i tshul ni zhi ba'i las kyi rab 'byams kyi ngo bo nyid rnam par snang mdzad yin zhes mtshon par byed do/ /rgyal ba'i ngang tshul can zhes pa ni so so'i skye bo'i sa la gnas pa'i sems can rnams las rgyal ba ste bdud do/ /bdud ni lha'i bu la sogs pa'i bdud rnams so/ /de dag las rtsibs bcu gnyis pa'i chos kyi 'khor los rgyal bas ni dzi na dzika go/ /sdug bsngal dang / kun 'byung ba dang / 'gog pa dang / lam ste bden pa bzhi'o/ /sdug bsngal ni shes par bya ba dang / kun 'byung spang bar bya ba dang / lam bsgom par bya ba dang / 'gog pa mngon du bya'o / /sdug bsngal shes zin pa dang / kun 'byung spong ba dang / lam bsgom pa dang / 'gog pa mngon du byas so zhes mthong ba dang bsgom pa dang mi slob pa'i lam gyis rtsibs bcu gnyis pa'o/ /rten 'brel yan lag bcu gnyis pa'i mtshan nyid chos kyi 'khor lo yin zhes la la 'dod do/ /drang ba'i don ni nyan thos dang theg pa chen po'i lta ba tsam bstan pas so/ /rdo rje lta bu'i ting nge 'dzin gyis zhes pa ni kun du 'od kyi sa'i skad cig ma dang pos thob par bya ba'i ting nge 'dzin gyi khyad par gyis so/ /nges pa'i don gyi bzhi pa dang lnga pa'i rim pa dag so sor bstan pa'i phyir ro/ /rnam par snang mdzad ces bya ba la sogs pas dzi na dzika ces spro ba'i rjes su chos 'byung ba'i phyag rgya nas phyi rol du byung ste/ gti mug la spyod pa'i sems can gyi khams sbyangs nas 'og min gyi gnas su bzhag nas slar yang gshegs te/ phyogs bcur gzigs pa sngon du 'gro bas bcom ldan 'das kyis shar phyogs su sna tshogs pad+ma dang zla ba'i gdan la 'khor lo'i steng du rdo rje dkyil mo krung du bzhugs pa/ 'khor lo la sogs pa phyag mtshan drug 'dzin pa sku mdog dkar po rnam par snang mdzad bzhugs so zhes bstan to/ /sgra ji bzhin pa ni snga ma bzhin no/ /kun rdzob byang chub kyi sems zhes pa ni bde ba chen po'i rgyu mthun pas rin thang med pa'i phyir ro/ /de las byung ba zhes pa ni dam tshig gi dkyil 'khor gyi nang du spros pa'i phyir ro/ /ting nge 'dzin yang de bzhin du shes par bya'o/ /drang ba'i don ni bskyed pa'i rim pa brjod par 'dod pa'i phyir ro/ /don dam pa'i byang chub kyi sems te zhes pa ni/ 'od gsal ba'i de kho na nyid do/ /de las byung bas na zhes pa ni bdag byin gyis rlob pa dang zung du 'jug pa'i rim pa dag brjod par 'dod pa'i phyir ro/ /nges pa'i don ni rdzogs pa'i rim pa so sor bstan pas so/ /bsam pa thams cad yongs su zhes bya ba la sogs pas rin chen 'byung ldan gyi don dang ldan pa'i mtshan so sor bstan to/ /re ba thams cad yongs su rdzogs par byed pas na zhes pa ni nam mkha' mdzod kyi ting nge 'dzin gyis sems can rnams la dbul ba nyid bcom pa'i phyir ro/ /drang ba'i don ni las kyi rgyal ba mchog brjod par mdzad par 'dod pas so/ /yang dag pa'i mtha'i rin po che zhes pa ni rim pa bzhi pas thob par bya ba'i 'od gsal ba'i de kho na nyid do/ /nges pa'i don ni mngon par byang chub pa'i rim pa/ rjod par byed pas so/ /nam mkha' ltar gos pa med pa'i mnyam pa nyid kyi ye shes zhes pa ni skye ba bzhis bsdus pa'i sems can thams cad tha dad pa rnams gcig tu yongs su shes pa'i phyir ro/ /nor gyis dregs shing zhes bya ba la sogs pa ni nor mang ba'i phyir nga rgyal gang la yod pa de rnams la nam mkha' mdzod kyi ting nge 'dzin las rin po che la sogs pa'i char 'bebs pa'i sgo nas dregs pa bcag pa'i phyir ro/ /bcom ldan 'das kyi g.yas phyogs su bzhugs zhes pa ni snga ma bzhin du rdo rje dang pad+ma'i ting nge 'dzin las phyung ste/ de nas yang phyi rol du gshegs te/ nga rgyal can gyi sems can gyi khams sbyangs te rin po che'i 'byung gnas zhes bya ba'i sangs rgyas kyi zhing la rab tu gnas par byas nas slar yang gshegs te/ zhal gsum pa phyag drug pa rin po che la sogs pa'i phyag mtshan 'dzin pa sku mdog ser po bcom ldan 'das kyi g.yas phyogs su sna tshogs pad+ma dang zla ba dang rin po che'i gdan la bzhugs nas so/ /sgra ji bzhin pa ni snga ma bzhin no/ /'dod chags kyi 'dod chags rab tu spang ba'i don du zhes pa ni 'dod chags ni de kho na nyid la chags pa'o/ /yang 'dod chags ni nyon mongs pa nyid do/ /don des spong ba ste gsal ba'o/ /mchog tu dga' ba ni 'dod chags chen po 'od gsal ba chen po'i rgyu mthun pa yin pa'i phyir ro/ /byang chub kyi sems yin la zhes pa ni kun rdzob pa'i rdzas kyi tshul can shu kra'o/ /de las byung ba ni dam tshig gi dkyil 'khor gyi rim pas rdzogs zhes pa'i bar du'o/ / drang ba'i don ni dkyil 'khor rgyal ba mchog brjod par 'dod pa'i phyir ro/ /'od gsal ba ste zhes pa ni mngon par byang chub pa'o/ /de las byung ba ni zung du 'jug pa'i ting nge 'dzin de las byung ba'i phyir ro/ /nges pa'i don ni yang dag pa'i don bstan pas so/ /so sor rtog pa'i ye shes la kun du chags pa zhes pa ni snang ba mtha' yas de'i ngo bo yin pa'i phyir ro/ /ro ni 'khor ba'o zhes pa ni ro'i sgra'i don to zhes 'byung bas sgra'i rnam par rtog pa'i ngo bo ni 'khor ba yin pas so/ /l-ika ces pa ni so sor rtog pa'i ye shes kyis 'khor ba las 'das pa'i phyir ro/ /drang ba'i don ni mi mthun pa'i phyogs dang gnyen po'i phyogs kyi lam rjod par byed pa'i phyir ro/ /ro zhes pa ni ye shes gsum ste/ ra a o'o/ /de la ra ni chags pa ste snang ba mched pa'o / /a ni 'dod chags dang bral ba ste snang ba'o/ /o ni 'dod chags bar pa ste snang ba thob pa'o/ /gcig tu bsdus pa las snang ba mched pa la sogs pa ye shes gsum bshad do/ /de las zhes bya ba la sogs pa la/ ye shes gsum la nye bar dmigs te slar yang 'od gsal ba la 'jug par bya'o/ /nges pa'i don ni yang dag pa'i don bstan pas so/ /don yod par grub pa zhes pa ni las thams cad pa yin pa'i phyir ro/ /bya ba grub pa'i ye shes zhes bya ba la sogs pas ni de bzhin gshegs pa rnams kyi sems can gyi don kho na dam tshig go/ /drang ba'i don ni sems can gyi don byed pa'i mtshan nyid can las kyi rgyal ba mchog brjod par 'dod pa'i phyir ro/ /'od gsal ba ni bzhi pa'o/ /mtshan ma med pa'i 'bras bu ster ba zhes pa la/ lhun gyis grub pa nyid kyis byang chub kyi mtshan nyid can gyi 'bras bu mngon par 'byung ba'i phyir ro/ /nges pa'i don ni yang dag pa'i don ston pas so/ /nyon mongs pa dam tshig nyams pa zhes bya ba la sogs pa la phrag dog can rnams kyi dam tshig nyams pa ni slar yang don yod par grub pa'i bsgom pas bzlog pa'i phyir ro/ /sogs pa'i sgras mchod pa chags pa la sogs pa gzung ngo / /drang ba'i don ni snga ma bzhin du bskyed pa'i rim pa'i bsgom pa brjod par 'dod pas so/ /khams phra ba ste zhes shes pa ni 'od gsal ba'o/ /des shes pa ni rgyu'i gsum pa ste/ des thabs kyi ye shes dgug pa ni snang ba mched pa'i ye shes bskyed nas/ de'i rjes su mchog tu dga' ba ni bde ba chen po bskyed la yongs su sbyang ba'i rigs ni 'dod chags la sogs pa rang bzhin thams cad sbyong bar byed pa'i rigs zhes bya ba'i bar ro/ /nges pa'i don ni rim pa gnyis pa bstan pas so/ /rab tu rnam par 'byed pa'i mtshan nyid ni shes rab ste zhes pa la bya ba nan tan grub pa'i ye shes kyi bdag nyid can rnam par rtog pa bla na med pa'i blo ste shes rab bo/ /drang ba'i don ni bsgom pa'i shes rab kyis rang bzhin yin pas so/ /zla ba ltar snang ba ste zhes pa ni snang ba'i ye shes so/ /de yang nye bar mtshon pa yin te/ nyi ma'i snang ba dang mtshams kyi snang ba'o/ /khams phra bar 'dzin par mdzad pas na / zhes pa la/ 'od gsal ba la 'jug par byed do/ /nges pa'i don ni sems rnam par dag pa brjod par 'dod pa'i phyir ro/ /byang phyogs su bzhugs so zhes pa la sogs pa ni snga ma bzhin no/ /zhe sdang zhes bya ba la sogs pas zhe sdang la sogs pa nyon mongs pa rnam par dag pa'i ngo bo de bzhin gshegs pa lnga yin zhes nye bar sdud pa bstan to/ /gdul bya rnams kyi thar pa'i mngon par 'dod pa zhes bya ba la sogs pas 'dod pa dang thar pa dag gi lam dang 'bras bu'i bye brag bstan to/ /drang ba'i don ni bskyed pa'i rim pa'i bstan pas so/ /'dod pa la nye bar longs spyod pas thar pa rab tu thob pa'am zhes pa ni spros pa dang bcas pa'i spyod pa yin pa'i sgo nas phyag rgya chen po'i dngos grub ster bar byed pa'o/ /yang na zhes bya ba la sogs pas 'dod pa dang thar pa dag ni cig car du sgrub par byed pa nyid du bstan to/ /sgra ji bzhin pa ni spyod pa brjod par 'dod pas so/ /bshad pa'i rgyud las zhes pa la/ dgongs pa lung bstan pa'i bshad pa'i rgyud las so/ /phung po 'di dag sangs rgyas te/ /zhes pa la phung po kho na sangs rgyas nyid yin te dam bca' ba'o/ /rdzogs pa'i byang chub rkyen du 'byung / /zhes pa ni phyag rgya chen po'i gzugs bsgrub par bya ba'i phyir pha dang ma'i bde ba dang yid bde ba'i mtshan nyid bde ba chen po'i rgyu mthun pa byang chub kyi sems kyi rgyu las 'byung ba ni yang dag par skyes pa'o/ /gnyis med de bzhin nyid sbyor bas/ /zhes pa ni 'od gsal ba las 'byung ba'i phyir ro/ /de yang de bzhin gshegs zhes bya/ /zhes pa la rang bzhin gyis grub pa'i de bzhin gshegs pa'i rkyen las byung ba kho na'o/ /de bas na phung po lnga rnam par dag pa'i ngo bo de bzhin gshegs pa lnga yin zhes gsungs te dgongs pa'o/ /nges pa'i don ni 'od gsal ba tsam bstan pa'i phyir ro/ /longs spyod kyi phyir ro zhes pa ni mchog tu dga' ba'i bde ba myong ba'i phyir ro/ /rdo rje 'dzin rjes su mnyes par byed pa'i dam tshig ni mA ma kI'o zhes pa la/ thugs kyi rdo rje 'dzin pa'i yid du 'ong ba'i lha mo yin zhes bya ba'i don to/ /sgra ji bzhin pa ni ting nge 'dzin tsam bstan pas so/ /drang ba'i don ni thugs kyi rdo rje'i btsun mo bstan pa tsam gyis so/ /nges pa'i don ni/ de rnam par dag pa'i rang bzhin lha mo bstan pas so/ / mA ma kI'i gzugs su gyur nas zhes pa ni rdo rje 'chang chen po nyid kyis mA ma kI'i gzugs su bdag nyid sprul pa yin gyi skyes pa dang bud med kyi dbye ba de la gang yang med de/ spros pa med pa'i de kho na nyid la gang yang bye brag med pa'i phyir ro/ /gdul bya rnams 'jug pa'i phyir sangs rgyas kyi rol ston sna tshogs yin te sprul pa bzhin no/ /shar phyogs kyi grar zhes bya ba la sogs pas me'i mtshams su nye bar bzhugs so/ /de bzhin thams cad du shes par bya'o/ /rnam par snang mdzad ni de bzhin gshegs pa thams cad kyi gong du byung ba'i phyir ro/ /sgra ji bzhin pas ni sangs rgyas spyan gyi gzugs tsam bstan pas so/ /drang ba'i don ni rnam par snang mdzad la rjes su chags pa'i lha mo bstan pas so/ /nges pa'i don ni de rnam par dag pa bstan pa'i phyir ro/ /'dod chags 'dzin pa ni 'od dpag tu med pa zhes pa ni 'dod chags rnam par dag pa'i rang bzhin yin pa'i phyir ro/ /gos dkar mo ste zhes pa la/ gsungs rdo rje'i btsun mo'o/ /drang ba'i don ni gos dkar mo'i gzugs bstan pas so/ /nges pa'i don ni rnam par dag pa bstan pas so/ /sgra ji bzhin pa ni zhes pa ni snga ma bzhin no/ /mi rtag pa zhes bya ba la sogs pa ni nye bar mtshon pa ste/ chos sgra sgrogs pa rnam pa bzhi ste/ 'dus byas thams cad mi rtag pa zhes pa dang / zag pa dang bcas pa thams cad sdug bsngal ba'o zhes pa dang / chos thams cad bdag med pa dang / mya ngan las 'das pa zhi ba yin no zhes so/ /gzhan dag la rab tu ston pa na gdul bya rnams la bstan pa'o/ /yi ge'i don ni chos bstan pa tsam yin pas so/ /chos thams cad stong pa'o zhes pa ni rnam par thar pa'i sgo nas zhes tshig gi lhag ma'o/ /spyi'i don ni/ mdo sde pa la sogs pa'i 'gyod pa bzlog pas so/ /snang ba gsum gyi ngo bo nyid ces pa ni snang ba la sogs pa'i rang bzhin no/ /khams phra ba ni 'od gsal ba'o/ /skad cig re re zhing zhes pa la/ skad cig dang thang cig dang yud tsam mig btsums dang thal mo brdebs pa la sogs pa'o/ /rjes su myong ba la sogs pas 'dod chags dang bral ba la sogs pas rang bzhin gyi tshogs brgya drug cu de'i bdag nyid kyis nyams su myong nas slar yang 'od gsal ba nyid du 'jug par bya zhes bstan to/ /ji skad du/ chu 'dzin du ma sna tshogs pa/ /mdog dang dbyibs ni tha dad pa/ /nam mkha'i dbyings las byung nas ni/ /de nyid du ni thim 'gyur bzhin/ /de bzhin rang bzhin thams cad ni/ /snang ba gsum gyi rgyu can te/ /ma lus yul la 'jug nas ni/ /'od gsal bar yang 'jug par 'gyur/ /zhes 'byung ngo / /sbas pa ni ye shes gsum rnam par spyod pas so/ /ril por 'dzin pa dang rjes su gzhig pa'i rim gyis zhes pa ni re zhig dang po rnal 'byor pas lte bar rtsibs brgyad pa'i chos kyi dbyings kyi 'khor lo la 'od 'bar ba'i yi ge raM la bltas te/ de las byung ba'i 'od zer gyi tshogs kyi spyi bo nas rkang pa'i bar du bsreg par bya ste/ 'od gsal ba'i rang bzhin du gnas pa gang yin pa de ni ril por 'dzin pa zhes bya ba'i ting nge 'dzin to/ /'od zer gyi tshogs de nyid kyis brtan pa dang g.yo ba'i 'jig rten gyi khams dang po snang ba med par byas la/ phyis bdag nyid kyang de bzhin du bya ba gang yin pa de nyid rjes su gzhig pa'i ting nge 'dzin to/ /de dag gis snang ba med par byas pa ni 'od gsal bar byas pa'o/ /mthar thug pa na de kho na nyid bzhi pa bstan pas so/ /don yod par grub pa zhes bya ba ni bya ba nan tan grub pa'i ye shes can no/ /dam tshig sgrol ma ni dam tshig gi rigs las 'byung ba'i phyir ro/ /de'i rnam par thugs rtse gcig pa zhes pa ni sgrol ma'i bskyed pa'i rim pa'i mtshan nyid can no/ /sgra ji bzhin pa ni bskyed pa'i rim pa tsam bstan pa'i phyir ro/ /don yod par grub pa zhes bya ba la/ dam tshig nyams pa la sogs pa'i skyon bzlog pa'i don du rtsol ba bstan pa'i phyir ro/ / drang ba'i don ni bskyed pa'i rim pa tsam 'dod pas so/ /rdo rje ye shes ni bya ba nan tan grub pa'i ye shes so/ /nges pa'i don ni rnam par dag pa'i ngo bo nyid de kho na nyid bstan pa'i phyir ro/ /sgra ji bzhin pa ni snga ma bzhin no/ /lha mo bzhi po'i de dag lhan cig spyod pa ste/ de bzhin gshegs pa rnams snyoms par zhugs par mngon par 'dod pa'o/ /de rnams dang lhan cig ces bya ba la sogs pas de bzhin gshegs pa rnams la de dang yang dag par sbyor bas/ bsod nams dang ye shes kyi tshogs phun sum tshogs pa 'grub par 'gyur ro/ /'dod pa'i dbang phyug yin pas zhes pa ni 'khyud pa dang 'o byas pa dang 'jib pa la sogs pa'i mtshan nyid can longs spyod pa'i mchog gi khyad par rgyu yin pas/ btsun mo mchog gi phun sum tshogs pa'i sgras spyan la sogs pa'i rigs kyi yum bshad do/ /sgra ji bzhin pa ni lha mo nye bar sdud pa'i don tsam so sor bstan pas so/ /rnam par snang mdzad nyid kyis dbang bskur ba'i rdo rje zhes pa ni 'phags pa gshin rje gshed po dpal rnam par snang mdzad kyi cod pan can yin pa'i phyir ro/ /dkyil 'khor bskyed pa gang yin pa zhes pa ni khro bo'i rgyal po rnams srung ba'i 'khor lo yin pa'i phyir ro/ /sgra ji bzhin pa ni bskyed pa'i rim pa tsam brjod pas so/ /dmyal ba zhes pa ni yi dags kyi lhag par bdag po'o/ /khro bo chen po'i ting nge 'dzin gyis zhes pa ni thabs la mkhas pa dang ldan pa'i khro bo'i ting nge 'dzin gyis zhes bya ba'i bar ro/ /drang ba'i don ni khro bo'i rnam pa brjod par 'dod pa'i phyir ro/ / rmongs pa'i mun pa ste zhes pa ni kun gzhi rnam par shes pa'i ngo bo nyid do/ /ma rig pa ni de'i khyad par ro/ /don dam pa'i bden pa shes pa ni phyag rgya dang sngags kyis thob par bya ba'i sems rnam par dag pa'i mtshan nyid can gyi 'od gsal bas so/ /nges pa'i don ni sems rnam par dag pa nyid bstan pas so/ /sgra ji bzhin pa ni snga ma bzhin no/ /rin chen 'byung ldan zhes pa ni de bzhin gshegs pa thams cad kyi nang na chos kyi rgyal srid kyi bdag po'i mtshan nyid kyis mngon par byang chub thob pa'i phyir dang nam mkha' mdzod kyi ting nge 'dzin dang ldan pa'i phyir ro/ /de'i cod pan du rdo rje gang la yod pa zhes pa ni 'phags pa gzhan gyis mi thub pa ni rin chen 'byung ldan gyi rigs yin pa'i phyir ro/ /drang ba'i don ni shes rab mthar byed kyi bskyed pa'i rim pa tsam bstan pa'i phyir ro/ /'od gsal ba zhes pa ni rim pa gnyis pas thob par bya ba de kho na nyid do/ /nges pa'i don ni rdzogs pa'i rim pa brjod pas so/ /shes rab kyis ni mthong ba dang bsgom pa'i lam gyi mtshan nyid kyi blos so/ /nyon mongs pa zhes pa ni khams gsum la gnas pa'i 'dod chags la sogs pa'o/ /de la mdor bsdus pa ni 'dir bden pa bzhi po la brten te/ nyon mongs pa spong bar byed pa yin te/ de la sdug bsngal gyi bden pa la brten te/ mthong ba'i lam gyi nyon mongs pa bcu spong ba yin te/ 'di lta ste/ 'dod chags dang / khong khro dang / gti mug dang / nga rgyal dang / the tshom dang lnga'o/ /lta ba yang rnam pa lnga yin te/ 'jig tshogs kyi lta ba dang / mthar 'dzin pa'i lta ba dang / log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa'i lta ba'o/ /kun 'byung gi bden pa la brten pa bdun spang bar bya ste/ 'jig tshogs kyi lta ba dang / mthar 'dzin pa'i lta ba dang / tshul khrims dang brtul zhugs mchog tu 'dzin pa'i lta ba ma gtogs pas so/ /'gog pa'i bden pa la brten te bdun po de nyid do/ /lam gyi bden pa la brten te mthong ba'i lam gyis sngar bshad pa'i nyon mongs pa bdun dang / tshul khrims dang / brtul zhugs mchog tu 'dzin pa'i lta ba ste spang bar bya ba'o/ /bsgom pas spang bar bya ba ni bzhi ste/ 'dod chags dang / khong khro dang / nga rgyal dang / ma rig pa'o/ /de ltar 'dod pa'i khams sum cu rtsa drug nyon mongs pa spang bar bya ba yin no/ /de bzhin du ni gzugs dang gzugs med pa'i khams su khong khro bcu ma gtogs par dgu bcu rtsa brgyad du 'gyur ro/ /gcig tu bsdus te/ mthong ba'i lam gyis brgyad cu rtsa brgyad spang ba dang / bcu ni bsgom pa'i lam gyis spang bar bya'o/ /gang yang nyon mongs pa'i chos gzhan rnams 'du byed kyi phung por 'dus pa de dag nye ba'i nyon mongs pa kho na yin te/ de dag gang zhe na/ sgyu dang / rgyags pa dang / rnam par 'tshe ba dang / 'tshig pa dang / khon du 'dzin pa dang / g.yo la sogs pa rnam pa du ma'o/ /bcu ni kun du sbyor ba ste/ ngo tsha med pa dang / khrel med pa dang / phrag dog dang / ser sna dang / rgyags pa dang / 'gyod pa dang / gnyid dang / rmugs pa dang / khro ba dang / 'chab pa dang / bcu'o/ /nyon mongs pa de dag ni zag pa'i sgras bshad pa'o/ /de la zag pa gsum du 'gyur te/ 'dod pa'i zag pa dang / srid pa'i zag pa dang / ma rig pa'i zag pa'o/ /de la 'dod pa'i khams su song ba'i nyon mongs pa ni ma rig pa rnam pa lnga ma gtogs par rdzas sum cu rtsa gcig gi ngo bo ni 'dod pa'i zag pa'o/ /de bzhin du yang gzugs dang gzugs med pa na gnas pa'i nyon mongs pa ni ma rig pa rnam pa bcu ma gtogs par rdzas lnga bcu rtsa gnyis kyi ngo bo srid pa'i zag pa'o/ /khams gsum pa'i ma rig pa ni rdzas bco lnga'i bdag nyid can ni ma rig pa'i zag pa'o/ /dmigs pa dang yang dag par sbyor ba dag ni rjes su 'gro bas na nyon mongs pa'o/ /srid pa'i rtse mo nas mnar med pa'i bar du skye mched drug gi rma nas kun du 'khor bar zag par byed pas na zag pa'i don to/ /chu bo bzhi ste/ 'dod pa dang / srid pa dang / lta ba dang / ma rig pa zhes pa'o/ /de la 'dod pa'i zag pa kho na 'dod pa'i chu bo'o/ /srid pa'i zag pa nyid ni srid pa'i chu bo ste/ lta ba rnams ma gtogs pa'o/ /khams gsum pa'i lta ba dag ni lta ba'i chu bo ste rdzas sum cu rtsa drug go/ /ma rig pa'i zag pa nyid ni/ ma rig pa'i chu bo ste khyer bar byed pas so/ /bzhi po de nyid ni sbyor ba bzhi ste/ sbyor bar byed pas na sbyor ba'i don to/ /len pa ni bzhi ste/ 'dod pa dang / lta ba dang / tshul khrims dang / brtul zhugs mchog tu 'dzin pa dang / bdag tu smra ba'i len pa'o/ /de la 'dod pa'i len pa ni rdzas nyi shu rtsa bzhi'o/ /gzugs dang gzugs med pa na gnas pa'i nyon mongs pa ni bdag tu lta ba'i len pa ste/ rdzas sum cu rtsa brgyad do/ /lta ba'i len pa ni rdzas sum cu'o/ /tshul khrims dang brtul zhugs len pa ni rdzas su drug go/ /bzung bar byed pas na len pa'i don to/ /mdud pa bzhi ste/ mnar sems dang / gnod sems dang / tshul khrims dang / brtul zhugs mchog tu 'dzin pa dang / 'di bden pa zhes mngon par zhen pa ni lus kyi mdud pa'o/ /sgrib pa lnga ste/ 'dod pa la 'dun pa dang / gnod sems dang / gnyid dang rmugs pa dang / rgod 'gyod dang / the tshom mo/ /mthong ba'i lam du shes pa bcu ni chos shes pa dang / rjes su 'gro ba shes pa dang / kun rdzob kyi shes pa dang / pha rol gyi sems shes pa dang / sdug bsngal shes pa dang / kun 'byung ba shes pa dang / 'gog pa shes pa dang / lam shes pa dang / zad pa shes pa dang / mi skye ba shes pa'o/ /bzod pa brgyad de/ sdug bsngal la chos shes pa'i bzod pa dang / de bzhin du sdug bsngal la rjes su 'gro ba shes pa'i bzod pa dang / de bzhin du kun 'byung ba dang / 'gog pa dang / lam dang lam gyi bden pa rnams la shes par bya'o/ /sdug bsngal la chos shes pa'i bzod pa skye bar gyur pas 'dod pa thob pa'i sdug bsngal gyi mthong bas spong ba nyon mongs pa thob pa la brten te 'gog par 'gyur ro/ /chos shes pa yang de rnams kyi de kho na mya ngan las 'das pa thob pa la brten te skye bar 'gyur ro/ /sdug bsngal nyid rjes su 'gro ba'i shes pa'i bzod pa skye bar 'gyur bas gzugs dang gzugs med pa na gnas pa'i sdug bsngal mthong bas spong ba'i nyon mongs pa thob pa blangs te 'gog par 'gyur ro/ /rjes su 'gro ba shes pa yang de rnams kyi mya ngan las 'das pa'i thob pa blangs te skye bar 'gyur ro/ /de la bzod pa rnams ni bar chad med pa'i lam mo/ /shes pa ni grol ba'i lam mo/ /de ltar kun 'byung ba dang / 'gog pa dang / lam rnams su sems bzhi bzhir shes par bya'o/ /sems rnam pa bcu drug gis bag la nyal brgyad cu rtsa brgyad spangs pas bden pa bzhi po mngon du gyur pa dang / rgyun du zhugs pa'i 'bras bu yang thob par 'gyur ro/ /bsgom pas spang bar bya ba bcu lhag par gyur pa ni 'dod pa na gnas pa bzhi dang / gzugs dang gzugs med pa la gnas pa gsum gsum mo/ /de la 'dod pa na gnas pa ni 'dod chags dang / khong khro dang / nga rgyal dang / ma rig pa gcig tu byas te/ rnam pa dgur 'gyur te/ dman pa dang / bar pa dang / rab kyi dbye bas so/ /de la rab kyi rab nyon mongs pa la dman pa'i yang dman pa 'phags pa'i lam ni gnyen po yin no/ /nyon mongs pa'i rnam pa drug spangs pa lan cig phyir 'ong ba'o/ /rnam pa dgu po spangs pas phyir mi ldog pa'o/ /ji ltar 'dod pa na gnas pa'i nyon mongs pa rnam pa dgu dang / de rnams kyi yang bar chad med pa dang / rnam par grol ba'i lam zhes bya ba dgu gnyen po yin pa de bzhin du yang sa re re la nyon mongs pa rnam pa dgu dgu dang / de rnams kyi gnyen po yang de bzhin du shes par bya'o/ /de'i phyir snga ma snga ma spong bas phyi ma phyi ma nyes pa rnams mi gnas pas srid pa'i rtse mo pa dman yang dman pa nyon mongs pa'i rnam pa rab tu spangs pas dgra bcom par 'gyur ro/ /'bras bu bzhi'i bar na gnas pa rnams ni lam du zhugs par shes par bya'o/ /sdug bsngal ba la sogs pa 'phags pa'i bden pa bzhi'i yul can skad cig ma bco lnga'i bdag nyid mthong ba'i lam dang / bcu drug pa bsgom pa'i lam gyis mdor bsdus te lam gnyis kyis nyon mongs pa rab tu spangs par 'gyur ro/ /ji skad du/ ma mthong mthong phyir mthong ba'i lam/ /der ni skad cig bco lnga yin/ /bcu drug pa ni bsgom pa'i lam/ /zhes bya ba la sogs pa 'byung ngo / /de'i phyir mthong ba dang bsgom pa'i lam la dmigs pa'i shes rab de lta bus nyon mongs pa rnams mthar byed pas na shes rab mthar byed do/ /drang ba'i don ni mi mthun pa dang gnyen po'i lam brjod do / /rnam par rtog pa'i bdag nyid can ni shes rab ste zhes pa la/ rtog pa ni gsum ste/ snang ba dang / snang ba mched pa dang / snang ba thob pa'o/ / de rnams sngags dang phyag rgya'i rim pas 'od gsal bar 'jug pas mthar byed pas shes rab mthar byed do/ /nges pa'i don ni sems rnam par dag pa brjod par 'dod pa'i phyir ro/ /rdo rje dam tshig gis zhes pa ni khro bo'i gzugs dang ha ha dgod pa dang gsod pa la sogs pa drag po las kyi rab 'byams rnams kyis so/ /gdug pa ni brgya byin la sogs pa phyogs skyong ba rnams so/ /de rnams skrag par mdzad pa ni dgug pa dang phur bus gdab pa dang / brdung ba'i mtshan nyid do/ /yang na zhes bya ba 'dis phyogs gzhan bshad pa yin te/ 'jig rten pa'i mkha' 'gro ma rnams ni/ u ma dang / bde phyogs ma dang / dpal mo dang / grags pa ma la sogs pa'o/ /de rnams skrag par mdzad pa ni nan gyis phrogs te longs spyod pa'o/ /khro bo'i gzugs kyis de dag gdul ba'i phyir ro/ /ji skad du/ bde mchog las/ sangs rgyas thams cad lhag mos pas/ /sdig med stobs kyis mnan nas kyang / /gnod dang zil gyis gnon pa yis / /'jig rten thams cad rab 'joms byed/ /shin du gdug pa drag po mchog /sems can khams ni du ma rnams/ /byi shor rgu ba bcings pa yis/ / sems can khams ni sbyor bar mdzad/ /nan gyis sgyu ma'i sbyor ba yis/ /sdig med stobs kyis bkug byas nas/ /mtshon cha lnga yi go bgo zhing / /'jig rten kun las rgyal bar 'gyur/ /'gro ba brtan dang g.yo ba dag /'grub pa thams cad las rgyal zhing / /sna tshogs gdul ba'i thabs kyis ni/ /rang gi rgyal srid skyong bar mdzad/ /'dod ldan ma la 'dod 'gyur zhing / /drag po rnams la drag po mchog /zhi ba rnams la zhi ba mchog /gnod byed rnams la gnod byed mdzad/ /dbang phyug dam pa dgug byas nas/ /sdig med stobs kyi nus pa yis/ /lha mo 'jigs ma dgug byas nas/ /rang gi longs spyod kyis ni spyod/ /khyab 'jug dag ni bkug nas kyang / /sdig med nus pa'i stobs kyis ni/ /lha mo dpal mo bkug byas nas/ /rang gi longs spyod kyis de spyad/ /skye dgu'i bdag po bkug nas kyang / /sdig med nus pa'i stobs kyis ni/ /nus pa'i lha mo phrogs byas nas/ /rang gi longs spyod kyis de spyad/ /'dod pa'i lha ni dgug byas nas/ /sdig med nus pa'i stobs kyis ni/ /dga' ma chags ma dbrog byas nas/ /rang gi longs spyod kyis de spyad/ /de la sogs te mtha' yas mchog /chos kyi dbyings dang mnyam mi mnyam/ /nam mkha'i mtha' yi mthar thug pa/ /rdo rje chos mchog dpa' bo rnams / /zhes 'byung bas so/ /sgra ji bzhin pa ni drag po'i spyod pa so sor bstan pas so/ /de nyid 'byung nas ni rigs su gyur pa zhes pa la/ rta mgrin ni 'od dpag tu med pa'i rigs yin pa'i phyir ro/ /drang ba'i don ni bskyed pa'i rim pa tsam bstan pas so/ /'od gsal ba zhes pa ni chos thams cad kyi snying por gyur pas rin thang med pa'o/ /de nyid 'byung gnas ni bdag byin gyis rlob pa'i rim pas 'byung ba'i phyir ro/ /nges pa'i don ni sgyu ma lta bu'i ting nge 'dzin bstan pas so/ /nyon mongs pa rnams kyis ma gos shing zhes pa ni de'i dbus su gnas pa dang de rnams bsnyen cing so sor sdud pa dang / bsam gtan gyi rim pas de'i skyon gyis mi gos pa'o/ /gang gi phyir 'dod chags la sogs pa'i nyes pa rnams kyis so so'i skye bo 'jig par gyur pa de rnams kho na thabs kyis bsten par gyur pa na byang chub sems dpa' rnams la de kho na nyid kyi 'bras bu ster bar 'gyur te thabs la mkhas pa'i phyir ro/ /don yod grub pa'i rgyud las kyang / /rmongs pa gang gis 'ching 'gyur ba/ /mkhas pa de nyid kyis grol 'gyur/ /de ltar byang chub bsgom don du/ /'di dag phyin ci log pa yin/ /zhes 'byung ngo / /dkon mchog brtsegs pa las kyang / 'di lta ste/ 'od srungs bu ram gyi zhing ngam/ 'bras kyi zhing dang 'dam bu'i zhing la lud kyi phung pos phan par 'gyur te/ de bzhin du yang byang chub sems dpa' sems dpa' chen po'i nyon mongs pa kho na phan par 'gyur te/ 'di lta ste/ 'od srungs ki ta ki'i me tog spos kyi glang pos zos par gyur na gla rtsi'i dngos por 'gyur ro/ /de nyid gzhan dag gis zos pa na mi gtsang ba'i gzugs su 'gyur ro/ /dpal mchog dang po las kyang / 'dod chags zhe sdang gti mug ni/ /'jig rten na ni dug chen gsum/ /dug nyid du ni bsten pa na / /dug nyid du ni nye bar 'gro/ /bdud rtsi rim pas bsten pa na / /de bzhin bdud rtsi nyid du 'gyur/ /zhes 'byung ngo / /rab tu byed pa las kyang / sems gang gis ni byis pa rnams/ /'khor bar 'ching ba nyid du 'gyur/ /sems de nyid kyis rnal 'byor pa/ /bde bar gshegs pa'i gnas su 'gro/ /zhes so/ /sbyor ba ni gang dang gang khyad par can gyi bud shing skam po'i rgyu las me la sogs pa de dang de rnams sreg pa dang / 'tshod pa la sogs pa'i bya ba byed par mthong ngo / /bsam pa bzang pos nye bar spyod pa'i 'dod pa'i yon tan lnga khyad par can gyi thar pa'i mtshan nyid can gyi 'bras bu ster bar 'gyur zhes mthun pa'i dpe'o/ /gang rgyu khyad par can las ma skyes pa me la sogs pa de dag don gyi bya ba sgrub par byed par mi nus te/ khyad par ma yin pa'i bsam pas gzugs la sogs pa'i yul rnams spyad par gyur pa na khyad par can gyi 'bras bu ster bar byed par mi 'gyur zhes mi mthun pa'i dpe'o/ /rgyu khyad par can gyi bsam pas gzugs la sogs pa rang bzhin gyi gtan tshigs so/ /de bas na byang chub sems dpa' rnams kyi thabs la mkhas pa nyid gang gis yul rnams spyad pa na yang de zhen pa las byung ba'i skyon rnams kyis gos par mi 'gyur te pad+ma bzhin no zhes dpe'o/ /rigs pa 'dis de nyid 'jigs par mdzad pa na zhes gsungs so/ /drang ba'i don ni thabs la mkhas pa nyid tsam bstan pas so/ /pad+ma ni skye gnas zhes pa la/ phyag rgya'i chos 'byung ba'o/ /mthar ni nang ste/ 'dod pa'i gdugs so/ /der dbang po gnyis snyoms par zhugs pa'i thabs kyis zhes pa ni gsang ba'i rdo rje dang chu skyes dang phrad pa'i mtshan nyid kyis so/ /mchog tu dga' ba'i bde ba zhes pa ni tha mal pa ma yin pa'i bde ba chen po skyed par byed cing gsal bar mdzad do/ /dgongs pa ni 'di yin te/ pad+ma mthar byed 'od dpag tu med pa'i rigs can yin pas byang chub sems kyi ngo bo nyid do/ /de yod pas mchog tu dga' ba yang dag par 'gyur gyis gzhan du ma yin no/ /pad+ma rdo rje'i zhal snga nas kyis kyang / dngos grub kun gyi gter gyur pa'i/ /byang chub sems ni lhung gyur na/ /rnam shes phung po brgyal 'gyur bas/ /bla med dngos grub ga las 'gyur/ /zhes 'byung bas so/ /rdo rje phreng ba las kyang / rin chen rgyal po dpag med gnyis/ /'khor ba bsgrub pa'i rtsa ba yin/ /zhes bya ba la sogs pa 'byung ngo / /de lta na yang snyoms par zhugs pa'i thabs kyis bde ba chen po skye bar 'gyur zhes mi rigs te/ ci'i phyir zhe na/ de nam mkha' bzhin du 'dus ma byas pa'i phyir ro/ /gang gi phyir rgyu gang gis kyang nam mkha' mi bskyed cing 'gog par yang mi nus te/ rtag par yin pa'i phyir ro/ /de bzhin du ni 'od gsal ba'i de kho na nyid chos thams cad kyi ngo bo nyid thabs gang gis kyang mi bskyed cing 'gog par yang mi nus so/ /gal te de ni bskyed par bya ba yin na ni de'i tshe/ 'dus byas pas 'jig pa'i chos can du thal bar 'gyur ro/ /'jim pa la sogs pa'i rgyu rnams kyis bskyed par 'gyur ba'i bum pa bzhin no/ /gang gi phyir chos nyid ni chos gang gis kyang 'brel par mi 'gyur zhing bral bar yang mi 'gyur ro/ /de dang ldan pa yin na tha mal pa'i skyes bu bzhin du byis pa dang / lang tsho dang / gnas skabs bar pa dang / rgas pa dang / shi bar thal bar 'gyur ro/ /'phags pa byams pas/ /chos kyi dbyings ni dbyer med cing / /rigs ni tha dad rung ma yin/ /gzhi yi chos kyi dbye ba yis/ /de yi dbye ba rab tu grags/ /zhes 'byung ngo / /de bzhin du/ ji ltar rlon pa chu shing sdong bu ni/ /snying po 'dod pa'i skyes bus rnam dpyad na/ /phyi dang nang med snying po yod mi snang / /de ltar chos rnams thams cad shes par gyis/ /zhes 'byung ngo / /rigs pa drug cu pa las kyang / /mi rtag bslus pa'i chos dang ldan/ /khong stong stong pa bdag med pa/ /dngos dang dngos med la mkhas pas/ /rnam par dben pa zhes mthong ngo / /rtog pa med cing dmigs pa med/ /bkod pa med cing gnas med pa/ /ma rig sa bon las byung ba'i/ /thog ma tha ma bar ma med/ /chu shing nang ltar snying po med/ /dri za'i grong khyer dang mtshungs pa/ /gzhan dag rmugs byed 'jigs pa ste/ /'gro ba sgyu ma bzhin du snang / /zhes 'byung ngo / /de bzhin du/ bdag las ma yin gzhan las min/ /gnyis ka las min rgyu med min/ /dngos po gang dang gang du yang / /skye ba nam yang 'thad ma yin/ /zhes 'byung ngo / /rab tu byed pa las kyang / /'dir ni kha cig mi skye zhing / /kha cig kyang ni 'chi mi 'gyur/ /sems kyi ngo bor rnam gnas pa'i/ /'khor ba nyid du shes par bya/ /zhes 'byung ngo / /srid pa 'pho ba'i mdo las kyang / /dngos po las kyang dngos mi skye/ /dngos med las kyang skye mi 'gyur/ /dngos po rtag tu skye ba ni/ /'khrul pas nam mkha'i me tog bzhin/ /zhes 'byung ngo / /kam+pa la'i zhal snga nas kyis kyang / /de nyid yang dag mtha' yin te/ /de nyid de bzhin de stong nyid/ /de nyid mnyam nyid de grol ba/ /de nyid rnam rig tsam nyid de/ /chos kun nang du chud pa'i phyir/ /ring por ma yin gam du min/ /de nyid rtogs par dka' ba'i phyir/ /de yi ngo bo spyod mi 'gyur/ /zhes gsungs pa'i phyir ro/ /de bas na dang po ma skyes pa'i rang bzhin gyi de kho na nyid thabs kyi dbang gis ji ltar skye bar 'gyur zhe na/ 'dir smras pa/ de kho na nyid ni thabs gang gis kyang skye bar mi 'gyur te/ rang bzhin gyis grub pa'i phyir ro/ /'on kyang de rang bzhin gyis grub kyang de'i dbang po gnyis snyoms par zhugs pa gsal bar byed pa'i rgyu yin gyi skyed par byed pa ni ma yin no/ /gang gi phyir rgyu ni rnam pa bcu yang yin te/ skye dang gnas dang gsal byed dang / /'gyur ba rkyen dang thob pa dang / sbyor dang gzhan dang rten dang ni/ /rgyu ni rnam pa bcu ru bshad/ /ces 'byung ngo / /de nyid kyi phyir gsal ba tsam rgyu yin na/ de kho na nyid la skyed pa'i skyon du thal bar mi 'gyur ro/ /'on te skad kyi dbyings don du ma yin pas mdzad pa'i sgra ni gsal bar byed pa tsam la 'jug gi byed pa po'i nus pa la ma yin no zhes shin tu rgyas pas chog go/ /da ni rnal ma dpyad par bya ste/ /sgra ji bzhin pa ni khro bo'i rgyal po dbyings tsam bstan pas so/ /don yod par grub pa ni/ de bzhin gshegs pa thams cad kyi sku la sogs pa'i nang du 'dus pa'i phyir ro/ /don yod grub pa ni phrag dog rnam par dag pa'i ngo bo phrag dog yang zhe sdang las byung ba ste/ zhe sdang gi ngo bo nyid thugs rdo rje 'dzin pa'i rigs su 'dus par 'gyur ro/ /yang na 'dod chags las byung ba yin na / snang ba mtha' yas kyi rigs su 'dus par 'gyur ro/ /de nyid rdo rje zhes pa ni rigs sam rgyas btab pas so/ /drang ba'i don zhes bya ba 'phags pa bdud rtsi 'khyil pa khro bo brjod par 'dod pa'i phyir ro/ /rnam par dag pa'i gnas ni 'od gsal ba ste/ sems rnam par dag pa'i rim pas thob par bya ba'i sems kyi de kho na nyid do/ /nges pa'i don zhes bya ba ni sems rnam par dag pa'i rim pas so sor bstan pas so/ /bgegs rnams mthar mdzad cing 'jigs par mdzad pas na zhes pa ni de la bgegs ni bdud bzhi ste/ de rnams la rdo rje lta bu'i ting nge 'dzin gyis mthar byed pas na bgegs mthar byed do/ /drang ba'i don ni bdud 'joms pa rnam par bstan pas so/ /khams bzhi po ste zhes pa ni sa la sogs pa'o/ /'phel ba dang 'grib pa zhes pa ni skye ba dang 'jig pa dag gis so/ /lus gzir bas na zhes pa ni lus kyis nye bar mtshon pa'i sems gzir bas so/ /de rnams thabs kyi ye shes shar bas na/ /zhes pa ni snang ba mched pa'i ye shes yang dag par 'byung bas so/ /snang ba la sogs pa'i ye shes kyi tshogs kyis rnam par rtog pa'i bdag nyid sems rnam par 'jig cing nyams par mdzad do/ /nges pa'i don ni sems rnam par dag pa'i rab tu bstan pa'i phyir ro/ /dkyil 'khor pa rnams mnyes par byed pa'i phyir zhes pa ni dkyil 'khor gyi bdag po dang bcas pa'i dkyil 'khor ba rnams brgya byin la sogs pa'i bgegs kyi rnam par g.yeng ba las bsrung bas mnyes par mdzad pa zhes bya ba'i don to/ /de bas na bgegs thams cad rnam par 'joms pa'i phyir ro zhes pa ni brgya byin la sogs pa phyogs skyong rnams 'joms par mdzad pas so/ /sgra ji bzhin pa ni khro bo'i rgyal po dang 'brel pa'i sku tsam ston pa'i phyir ro/ /gzhung de tsam gyis ni dkyil 'khor rgyal ba mchog gi ting nge 'dzin bstan to/ /dkyil 'khor gyi 'khor lo yongs su rdzogs par bya ba'i phyir dkyil 'khor pa gzhan rnams kyi 'brel pa mkhan gyis lung gi tshad ma nyid bstan par bya ba'i phyir/ de ltar sgo rnam pa bzhir bkod nas zhes smos te/ gshin rje gshed dang / shes rab mthar byed dang / pad+ma mthar byed dang / bgegs mthar byed rnams ni shar dang lho dang nub dang byang gi sgo rnams su dgod par bya'o/ / shar gyi mtshams nas brtsams te zhes pa ni me dang / bden bral dang rlung dang dbang ldan gyi mtshams rnams su'o/ /mi g.yo ba la sogs pa dgod par bya'o zhes pa ni mi g.yo mgon dang 'dod pa'i rgyal po dang dbyug sngon can dang stobs po che dgod pa ni bsam par bya'o/ /shar phyogs su ni snam bu zhes bya ba la sogs pas nang gi dkyil 'khor gyi phyi rol du snam bu bzhi la ni shar du sa'i snying po dang byams pa dag go/ /lho'i snam bu la nam mkha'i snying po dang phyag na rdo rje dag go/ /nub kyi snam bu la 'jam dpal dang 'jig rten dbang phyug go/ /byang gi snam bu la ni kun du bzang po dang sgrib pa rnam par sel ba dag dgod pa ni bsgom par bya'o/ /nang gi dkyil 'khor zhes pa ni gang du bcom ldan 'das mi bskyod pa dbus su bzhugs pa dang / shar la sogs pa'i phyogs su rnam par snang mdzad dang / rin chen 'byung ldan dang / snang ba mtha' yas dang / don yod grub pa dgod pa'o/ /mtshams su ni sangs rgyas spyan dang / mA ma kI dang / gos dkar mo dang / sgrol ma dgod par bya'o/ /de'i dkyil 'khor gyi phyi rol gyi byang shar gyi mtshams nas brtsams te zhes pa la nang gi dkyil 'khor gyi phyi rol dang byang chub sems dpa'i snam bu'i bar du grwa rnams la gzugs rdo rje la sogs pa dgod do zhes pa ni gzugs rdo rje ma dang / sgra rdo rje ma dang / dri rdo rje ma dang / ro rdo rje ma rnams dgod do/ /reg bya rdo rje ma ni dbus kyi bdag po la brten te bzhugs so/ /steng dang 'og dag tu ni gnod mdzes dang gtsug tor dgod do zhes rig par bya'o/ / de ltar sum cu rtsa gnyis kyi bdag nyid kyi dkyil 'khor yin no/ /thams cad kyi gdan la sogs pa'i nges pa zhes bya ba ni gdan dang sku mdog dang phyag mtshan la sogs pa'i nges pa'o/ /sgrub thabs su byas pa nyid yin no zhes pa ni mdor bsdus pa'i sgrub thabs sam yang na rang gis byas pa las zhes bya ba'i tha tshig go/ /de ltar na sum cu rtsa gnyis kyi dkyil 'khor gang las rtogs par bya ste/ bcu gsum las ma bstan zhe na/ smras pa/ lha yi rnal 'byor ji lta ba/ /zhes bya ba la sogs pa ni lha'i rnal 'byor ni bskyed pa'i rim pa'o/ /dkyil 'khor ni rten dang brten pa'i mtshan nyid do/ /gzhan dag tu bshad pa'i rgyud la sogs par ro/ /rdzogs pa ni ma lus pa'o/ /bcom ldan 'das ni rdo rje 'chang chen pos so/ /ma gsungs pa ni ma bstan pa'o/ /slob dpon med par 'jug par ma gyur cig snyam du dgongs pa yin no zhes pa la/ slob dpon dang slob ma'i rim pa ji lta ba bzhin du gyur cig ces dgongs nas so/ /gzhan du na glegs bam klog pa tsam gyis bdag cag slob dpon yin zhes smos pa rnams la nga rgyal skye bar gyur pas so/ /de bzhin du 'dir yang zhes pa ni/ dpal gsang ba 'dus pa'i le'u dang po las kyang ma bstan to/ / sku'i dkyil 'khor zhes bya ba la sogs pa la dkyil 'khor gyi 'khor lo ma lus pa nye bar sdud pa'i dus su dkyil 'khor pa thams cad sku'i dkyil 'khor du bsgom par bya'o/ /de bzhin du phyung ba'i dkyil 'khor la yang zhes pa ni phyung ba'i dus su yang lha sum cu rtsa gnyis de bzhin du spro bar bya'o/ / de lta na gang ma grub pas grub par byed pa de yang ma grub pa nyid ces 'byung bas sku'i dkyil 'khor nyid la yang nges pa 'di ga las 'gyur zhe na/ smras pa/ bcom ldan 'das nyid kyis zhes bya ba la sogs pas lan bstan to/ /bshad pa'i rgyud ces pa ni/ rdo rje phreng ba las so/ /'dus pa rnams la zhes pa ni rnal 'byor chen po'i rgyud gsang ba 'dus pa'i rnal 'byor pa rnams la'o/ /don the tshom med par zhes pa ni gsang ba 'dus pa'i dkyil 'khor gyi 'khor lo lha bcu gsum gyi bdag nyid yin nam sum cu rtsa gnyis yin zhes the tshom med par bya ba'i phyir ro/ /de nyid bstan par bya ba'i phyir/ sems zhes bya ba la sogs pa smos te/ sems dpa' chen po zhes pa ni khro bo'i rgyal po gshin rje gshed la bod pa'o/ /gang gi phyir rdo rje phreng ba'i rgyud las ni gshin rje gshed kho na zhu ba po yin no/ /rdo rje slob dpon lus 'di la/ /zhes pa ni rdo rje slob dpon gyi lus bshad pa'i sgo nas rdo rje 'chang ba'i sku kho na bstan par 'gyur te/ bden par rdo rje slob dpon dang rdo rje 'chang chen por dbyer med pa yin no/ /rgyal ba'i sku zhes bya ba la sogs pa la rgyal ba dang / rgyal ba'i sras ni rgyal ba'o/ /zhes mi 'dra ba rnams la gcig lhag ma'i bsdu ba'o / /de nas de bzhin gshegs pa dang lha mo dang byang chub sems dpa' dang khro bo rnams kyi sku gnas pa nyid bstan to/ /dang po zhes bya ba nas brtsams te rdo rje slob dpon nyid kyi lus zhes bya ba'i bar du ni go sla'o/ /'on kyang dkyil 'khor pa thams cad la de bzhin gshegs pa'i tshig gi khyad par ni longs spyod rdzogs pa dang sprul pa'i sku dbyer med par bstan pa'o/ /gzugs la sogs pa yang rnam par dag par shes par bya'o/ /gang gi phyir rdo rje phreng ba las/ gzugs rdo rje ma la sogs pa rnams sku'i dkyil 'khor la dgod pa ma bstan to zhes pa ni logs nas smra bar bya'o zhe na/ de ni ma yin te/ dkyil 'khor pa rnams kyi kha dog lnga gang yin pa de ni gzugs rdo rje ma'o/ /sngags brjod pa'i sgra'am rjes su chags pa'i sgra rdo rje ma'o/ /zhal gyi dri 'am chos 'byung ba'i dri ni dri rdo rje ma'o/ /bdud rtsi la sogs pa'i ro myang ba ni ro rdo rje ma'o/ /rnam pa sna tshogs la sogs pa'i skad cig mas thob par bya ba'i bde ba chen po nyams su myong ba'i mtshan nyid can rang rig pa'i rnam par dag pa'i ngo bo nyid ni reg bya rdo rje ma'o/ /rdo rje slob dpon nyid kyi lus/ /zhes bya ba la sogs pas phung po la sogs pa rnam par dag pa'i tshul du bstan pa'o/ /rdo rje can ni rdo rje slob dpon gyi gzugs can rdo rje sems dpa'o/ /sbyangs zhes pa ni don dang ldan pa'i bstan bcos bstan pa'o/ /mya ngan 'das pa 'jug 'gyur zhing / /zhes pa ni rdo rje 'chang chen po'i gnas thob par byed pa'o/ /khyod kyi rigs ni yongs smin pas/ / zhes pa ni bya ba byas pa'i phyir ro/ /bcom ldan myur du mya ngan 'das/ /zhes pa ni/ kye bcom ldan 'das khyod kyi sku rdo rje slob dpon gyi skur snang bar 'gyur te/ gzhan la ltos pa med pa'i phyir ro/ /de bas zhes bya ba la sogs pas rdo rje slob dpon gyi lus la sku'i dkyil 'khor nye bar bsdus pa bstan to/ /mthong na don ni yod pa skye/ /zhes bya ba la sogs pas ma 'ongs pa'i dus su sems can thams cad kyis rdo rje slob dpon kho na la bsnyen bkur bya zhes lung bstan pa nyid du gsungs so/ /de nas mthong ba don yod bcas/ /zhes pa ni gshin rje gshed dang lhan cig tu'o/ / byang chub sems dpa' ni byams pa la sogs pa'o/ /grags pa che zhes bya ba ni 'gro ba'i don byed pas grags pa thob pa'o/ /dga' zhing mgu la zhes pa ni sku'i dkyil 'khor thos pas so/ /rab dang ba ni de bsams pas so/ /phyag 'tshal nas ni mchi ma blags/ /zhes pa ni de bsgoms pas so/ /zhes rdo rje phreng ba las gsungs pa 'dis lung tshad ma nyid du bstan to/ /rigs pa 'dis zhes pa ni sngar bshad pas so/ /bri ba'i dkyil 'khor du yang zhes pa ni sgrub pa'i dkyil 'khor du'o/ /lha sum cu rtsa gnyis dgod par bya'o zhes pa ni sngar bshad pa'i zhal dang phyag mtshan la sogs pa'i dbye ba dang ldan pa'i lha'i 'khor lo dgod par bya zhes bya ba'i don to/ /bsdus pa'i don ni gleng gzhi'i tshig gis rgyud kyi don ma lus pa so sor bstan nas 'dod chags kyi rigs can gdul bar bya ba'i phyir/ lha mo dgu'i dbus su 'dod chags chen po'i ting nge 'dzin bstan to/ /de'i rjes la sgrub pa'i thabs kyi rim pas rdo rje 'chang chen po la zhugs pa'i mtshan nyid can thugs rdo rje 'dzin pa dbus kyi gtso bo nyid yin pas dang po'i sbyor ba zhes bya ba'i ting nge 'dzin bstan to/ /pad+ma'i nang du dam tshig gi dkyil 'khor sprul pa dang rnam par snang mdzad la sogs pa lha'i 'khor lo spro ba dang dgod pa'i rim pas dkyil 'khor rgyal ba mchog gi ting nge 'dzin bstan to/ /de'i nang du dbang bskur ba la sogs pa'i mtshan nyid las kyi rgyal ba mchog gi ting nge 'dzin dang rdzogs pa'i rim pa yang bstan to/ /de gleng gzhi'i tshig gi don yin te/ gang gi phyir gleng gzhi ni ston pa po dang nyan pa po dang / gnas phun sum tshogs pa gtso bor gyur pa yin no/ /de la bcom ldan 'das zhes bya ba 'dis ston pa po phun sum tshogs pa gtsor gyur pa ste dang po'i sbyor ba bstan to/ /de bzhin gshegs pa thams cad ces bya ba la sogs pa 'dis gzhi'i dkyil 'khor gyi ngo bo de nyid kyi yan lag ste gzhal yas khang pa so sor bstan pa'i phyir ro/ /badzra d+h+rika ces bya ba la sogs pa phyung ba'i dkyil 'khor spro ba'i sgo nas dkyil 'khor rgyal ba mchog gi ting nge 'dzin bstan to/ /nges pa'i don gyi phyogs su yang dbang bskur ba la sogs pa'i mtshan nyid las kyi rgyal ba mchog gi ting nge 'dzin dang / rdzogs pa'i rim pa mtshon pa'o / /bskyed pa dang rdzogs pa'i rim pa dag las ma gtogs pa'i rgyud kyi don gzhan med do/ /de nyid bstan par bya ba'i phyir/ gleng gzhi zhes bya ba la sogs pa smos pa la/ gleng gzhi ni dang po'i tshig dang de'i lhag mar gyur pa le'u dang po'o/ /dbang du mdzad nas kyang zhes pa ni de la brten pas so/ /don gang zhes pa ni rim pa gnyis kyi mtshan nyid do/ /bstan pa zhes pa ni so sor bstan pa'o/ /de nyid du ni zhes pa ni gleng gzhi'i tshig kho na la'o/ /rgyud kyi don zhes pa ni rgyud phyi ma dang lhan cig tu le'u bcu bdun gyi bdag nyid can gyi dpal gsang ba 'dus pa'i rgyud kyi don bstan to/ /arga las sbrang thob 'gyur na/ /ci yi phyir ni ri la 'gro/ /'dod pa'i don ni rnyed 'gyur na/ /mkhas pa gang gis yang 'bad byed/ /ces tshig las gleng gzhi'i tshig tsam yongs su shes pas rnal 'byor pa bya ba byas par 'gyur zhes ci'i phyir bcom ldan 'das kyis le'u bcu bdun gyi bdag nyid bstan zhe na/ smras pa/ lhag ma zhes pa la/ gleng gzhi'i tshig las gzhan thams cad rgyud kyi lus ni lhag ma'o/ /dgos pa las gzhan ni lhag ma yin zhes 'byung ngo / /zhar la byung ba zhes pa ni gleng gzhi'i tshig gis rgyud kyi don shes kyang de'i spobs pa'i mtshan nyid ni zhar la byung zhes bya ba'i don to/ /ji skad du/ sgrub pa'i de rnams ni legs par gzung ba yin te/ gang gi mtshan nyid dang spros pa yod pa'o zhes 'byung ngo / /de bzhin du/ yang rgyas par bshad pa ni shin tu gsal bar 'gyur ro zhes 'byung bas so/ /gal te de lta yin na bshad pa'i rgyud dang / rgyud phyi ma dang / yan lag gi rgyud bcom ldan 'das kyis ci'i phyir gsungs she na/ smras pa/ 'dir ni bskal pa dang po 'di la bcom ldan 'das kyis zhal gyi man ngag kho na gsungs te/ de tsam gyis gdul bya rnams kyi dngos grub thob par 'gyur ro/ /de'i rjes su zhal gyi man ngag 'dzin par nus pa med par gzigs nas rtsa ba'i rgyud rnams gsungs pas glegs bam du grags so/ /de'i yang rjes su rtsa ba'i rgyud kyis kyang rtogs pa med pas rgyud phyi ma yan lag gi rgyud gsungs so/ /de'i rjes su rgyud phyi ma dang yan lag gi rgyud kyis gang gsal bar ma gyur pas bshad pa'i rgyud rnams kyang gsungs te/ gang gi tshe de rnams kyis kyang rtogs par ma gyur na de'i tshe sngon gyi slob dpon khyad par du gyur pa rnams kyis 'grel pa dang / dka' 'grel dang / TI kA dang / rgyan la sogs pa byas pa dang / byed par yang 'gyur ro/ /de'i phyir na dus kyis dbye ba dang / gdul bya'i blo'i bye brag la brten te/ bcom ldan 'das kyis chos bstan pa ni mdor bsdus pa dang rgyas par gsungs pa zhes zhar la gsungs pa la skyon med do/ /sku dang gsung dang thugs gsang ba la gzigs nas zhes pa la don ni 'di yin te/ bskyed pa'i rim pa'i phyogs su rigs lnga nye bar bsdus pa'i rigs gsum gyi ngo bo de kho na nyid bstan pas sku gsung thugs so/ /gsang ba ni de yang nye bar sdud par byed pa rdo rje 'chang chen po'i ngo bo nyid so sor bstan pas so/ /rdzogs pa'i rim pa la yang lus dang ngag yid rnam par dag pa'i ngo bo nyid rdo rje bzlas pa dang / sems rnam par dag pa dang / bdag byin gyis rlob pa'i mtshan nyid dang man ngag bzhi pa'i 'od gsal ba'i mtshan nyid mngon par byang chub pa'i rim pa so sor bstan pa'i phyir/ sku gsung thugs gang yin pa la de nye bar bsdus pa myur du yang dag par skyes pa'i bde ba gnyis mi phyed pa'i mtshan nyid can mi gnas pa'i mya ngan las 'das pa'i ngo bo nyid zung du 'jug pa'i rim pa so sor bstan par byed pa'i phyir gsang ba yang yin pas sku gsung thugs kyi gsang ba'o/ /gzigs nas zhes pa ni thos pa dang bsam pa dag gis so/ /thugs su chud par zhes pa ni bsgom pas so/ /mdzad pa ni rdo rje 'chang chen po las thob nas dbyangs de nyid dang tshig de nyid dang / de dang mthun pa'i don gyis sdud pa pos rnam par mdzad pa'o/ /ting nge 'dzin gyi dkyil 'khor ni pad+ma'i nang du bskyed cing sprul pa'i dkyil 'khor ro/ /gsang ba 'dus pa zhes pa ni sngar bshad pa'i don dang ldan pa la'o/ /byin gyis rlob pa zhes pa ni spro ba dang dgod pa le'u gang la yod pa de ni de bzhin gshegs pa thams cad kyi ting nge 'dzin gyi dkyil 'khor byin gyis rlob pa zhes bya'o/ /le'u zhes pa ni 'di ni grags pa'i sgra ste rgyud kyi don yongs su gcod pa'i mtshan nyid so sor bstan pa'o/ /yang na sbyor ba la grags pa'i sgra'o/ /yan lag gi don gyi dbye ba'i sgo nas gzung bar bya'o/ /sha sbrang dang mchu snyung la sogs pa'i gnod pa 'joms par byed pa gos su grags pa de bzhin du/ nyon mongs pa dang las dang skye ba'i nye bar 'tshe ba 'joms par byed pas na/ gos dang 'dra bas na gos so/ /'dir bcom ldan 'das kyis rten cing 'brel pa yan lag bcu gnyis pa'i mtshan nyid srid pa'i 'khor lo gsungs pa 'di lta ste/ ma rig pa dang / 'du byed dang / rnam par shes pa dang / ming dang gzugs dang / skye mched drug dang / reg pa dang / tshor ba dang / sred pa dang / nye bar len pa dang / srid pa dang / skye ba dang / rga shi'o/ /de la dang po dang brgyad pa dang dgu pa ni ma rig pa dang / sred pa dang len pa ni nyon mongs pa zhes bya ba'o/ /gang gi phyir nyon mongs pa thams cad kyi rtsa ba ni ma rig pa'o/ /gang gi phyir mi rtag pa dang / mi gtsang ba dang sdug bsngal ba dang / bdag med pa rnams su rtag pa dang gtsang ba dang / bde ba dang bdag tu snang ba ni ma rig pa ste/ gti mug chen po'i mun pa'i mtshan nyid yin pa'i phyir ro/ /de dang lhan cig spyod pa ni srid pa dang dga' ba dang chags par bcas pa gang gis srid pa'i longs spyod rnams la 'dod pa skye ba'o/ /de dag srid pa snga ma ma rig pa dang srid pa dag gi 'gro ba rigs drug gi srid pa'i 'khor lo ma lus pa'i rtsa ba yin no/ /ji skad du/ bdag yod pa ni gzhan gyi 'du shes te/ /rang dang gzhan gyi dbye bas chags sdang byung / /de gnyis phan tshun kun du 'brel pa las/ /skyon rnams thams cad rab tu skye bar 'gyur/ /zhes 'byung ngo / /len pa yang de dag rgyas pa'i mtshan nyid phung po so sor len pa'o/ /de ltar nyon mongs pa de dag go/ /de bzhin du gnyis pa dang bcu pa ste 'du byed dang srid pa dag ni las so/ /de la 'du byed ni gnyis te/ sems dang ldan pa dang sems dang mi ldan pa'o/ /de la sems dang ldan pa ni rnam pa gsum ste/ dge ba dang / mi dge ba dang / lung du ma bstan pa ni rnam pa gnyis te/ bsgribs la lung du ma bstan pa dang / ma bsgribs la lung du ma bstan pa'o/ /de la gang nyon mongs pa dang ldan pa de ni bsgribs la lung du ma bstan pa'o/ /gang de dang bral ba de ni ma bsgribs la lung du bstan pa'o/ /de la sems dang ldan pa ni sems pa dang tshor ba dang 'du shes dang 'dun pa dang reg pa dang / blo dang dran pa dang yid la byed pa dang lhag par mos pa dang / ting nge 'dzin dang / dad pa dang / ngo tsha dang khrel dang ser sna med pa dang zhe sdang med pa dang / gti mug med pa dang / brtson 'grus dang / sbyangs pa dang bag yod pa dang btang snyoms dang rnam par 'tshe ba med pa dang / 'dod chags nas brtsams te spyod pa'i bar du lnga bcu rtsa gcig go/ /thob pa dang ma thob pa dang / skal ba mtshungs pa dang / 'du shes med pa dang / 'gog pa'i snyoms par 'jug pa dang / 'du shes ma yin pa'i snyoms par zhugs pa dang / srog gi dbang po dang / skye ba dang / gnas pa dang / rga ba dang / mi rtag pa dang ming gi tshogs dang tshig gi tshogs dang yi ge'i tshogs te sems dang mi ldan pa ni bcu bzhi'o/ /srid pa ni gsum ste/ 'chi ba'i srid pa dang / bar ma do'i srid pa dang / skye ba'i srid pa'o/ /de dag ni las te/ dge ba dang mi dge ba'i ngo bo yin pa'i phyir ro/ /lhag ma bdun ni sdug bsngal can gyi rnam grangs te skye ba'o/ /rnam par shes pa dang ming dang gzugs dang skye mched drug dang reg pa dang tshor ba dang skye ba dang / rga shi'o/ /de la rnam par shes pa ni kun gzhi rnam par shes pa dang / nyon mongs pa can gyi yid kyi rnam par shes pa dang / mig gi rnam par shes pa dang / rna ba'i rnam par shes pa dang / sna'i rnam par shes pa dang / lce'i rnam par shes pa dang / lus kyi rnam par shes pa dang / yid kyi rnam par shes pa ste brgyad do/ /yang na lnga ste/ kun gzhi dang / nyon mongs pa can gyi yid dang / rang dang gzhan gyi rgyud la gnas pa'i dbang po'i rnam par shes pa dang / 'jug pa'i rnam par shes pa dang / gzugs la sogs pa'i so sor snang ba'i rnam par shes pa'o/ /yang na gsum ste/ rnam par smin pa'i rnam par shes pa dang / yid kyi rnam par shes pa dang / 'jug pa'i rnam par shes pa'o/ /'jug pa'i rnam par shes pa drug po gcig tu byas te/ rnam par shes pa gcig ces la la 'dod de/ ji skad du/ don dang sems can bdag rnam rig /so sor snang ba rab skye ba/ /rnam par shes pa de don med/ /de med pas ni de yang med/ /gcig ni rkyen gyi rnam shes te/ /gnyis pa nye bar spyod pa can/ /longs spyod yongs su spyod pa dang / skul byed de la sems las byung / /zhes 'byung ngo / /de bzhin du yang / rnam par smin pa ngar sems dang / /yul la rnam par rig pa'o/ /zhes 'byung ngo / /de bzhin du/ gcig pu nyid ni gnyis su snang / /sems nyid rnam par 'khrul pas so/ /gzung 'dzin dag gi dbye ba yis / /shin tu mkhas pas ci min nam/ /zhes bya ba la sogs pa 'byung bas so/ /ming dang gzugs ni rnam pa bzhi ste/ tshor ba dang 'du shes dang 'du byed ni gzugs med pa'i phung po'o/ /gzugs ni gzugs kyi phung po ste/ /dbang po dang yul dang rnam par rig byed ma yin pa rnam pa bcu gcig go/ /de ltar phung po bzhi'i bdag nyid kyi ming dang / gzugs zhes bya'o/ /skye mched drug ste/ mig dang / rna ba dang / sna dang / lce dang / lus dang / yid kyi skye mched do/ /dbang po dang yul dang rnam par shes pa 'dus pa las skyes pa ni rig pa'o/ /tshor ba ni myong ba rnam pa gsum ste/ bde ba dang / sdug bsngal ba dang / btang snyoms kyi ngo bo nyid do/ /de yang mig la sogs pa'i dbye bas rnam pa bco brgyad du 'gyur ro/ /skye ba yang rnam pa bzhi ste/ sgo nga dang / drod gsher dang / mngal dang / rdzus te skyes pa'o/ /dmyal ba dang / yi dgas dang / byol song dang / lha dang / lha ma yin dang / mi'i dbye bas drug ces la la 'dod do/ /ngan song dang bde 'gro'i dbye bas gnyis su yang 'dod do/ /rga ba yang nus pa dang bral ba'i mtshan nyid kyi chos so/ /shi ba ni phung po 'dor bas rnam par shes pa'i skad cig ma tshor ba la gnas pa'i ngo bo chos bdun po de dag ni skye ba ste skyes pa la ni rnam par shes pa la sogs pa'i chos bdun dang 'brel pa'i phyir ro/ /nyon mongs pa dang las dang skye ba 'di dag gis khams gsum na gnas pa'i sems can gyi tshogs zo chun gyi 'khrul 'khor bzhin du 'khor bar byed pas 'gro ba gcig nas gcig tu thob par gyur nas nyon mongs pa [(]tshon [,]chen [)]po myong bar 'gyur ro/ /thal tshan gyi chu bo'i mdo las kyang / /nor phrogs rkun ma las kyang bdag mi 'jigs/ /de yis nor phrogs de yang yod ma yin/ /yid la bsags shing bsags pa'i dag pa'i nor/ /tha mal rtog pa dag gis nges par 'phrog /ces dgon pa'i dge slong gis lag pa gyen du brkyang zhes nyin mo'i 'o dod 'bod ces 'byung ngo / /de bas na nyon mongs pa'i dbang gis las 'byung ba dang / las kyi dbang gis skye ba dang / de las kyang las dang / yang nyon mongs pa skye zhes 'khor ba tha ma med pa 'khor lo bzhin du yongs su 'khor ba'o/ /srid pa'i 'khor lo 'di ni bdag la sogs pa gang gis kyang mi bskyed de/ /stong pa kho na las kyang chos stong pa 'byung ba'i phyir ro/ /ji skad du/ gsum las gnyis so skye bar 'gyur ba ste/ /gnyis las bdun po skye zhing bdun las ni/ /gnyis po yang dag skye 'gyur de phyir 'di/ /thog ma med pa'i srid pa'i 'khor lo yin/ /stong pa kho na'i chos las chos rnams ni/ /stong pa'i rang bzhin rab tu skye bar 'gyur/ /kha thon mar me me long rgya/ me shel sa bon skyur dang sgra/ /phung po nying mtshams sbyor ba yang / /mi 'pho bar yang mkhan rtogs bya/ /zhes 'byung ngo / /de'i phyir nyon mongs pa dang las dang skye ba nyid ni nye bar 'tshe ba ste skyon chen po'o/ /de rnams rim pa gnyis sgom pa'i sgo nas bzlog pa ni nye bar byed pas gos dang 'dra bas gos so/ /de len cing 'dzin pas na zhes pa la/ bskyed pa dang rdzogs pa'i mtshan nyid can gyis brjod par bya ba'i don rjod par byed pa'i tshig gi mtshan nyid do/ /de ston pa'i gzhung gi tshogs la yang le'u zhes bya'o zhes pa ni rim pa gnyis ka'i ngo bo rtog pa dang yongs su rdzogs pa'i lha'i sku ston par byed pa'i tshig gi tshogs ni le'u zhes bya ba'i don to/ /la la ni rlung dang char pa la sogs pa'i skyon sel bar byed pa'i khyim gyi bla gab bzhin du nyon mongs pa dang zhes bya ba la sogs pa'i sgrib pa zhi bar byed pas le'u zhes smra'o/ /sgron ma gsal bar byed pa zhes bya ba'i 'grel pa'i TI kA las le'u dang po'o// //de ltar le'u dang pos thams cad bskyed nas zhes pa ni le'u dang pos ni rgyud kyi don ma lus pa mtshon par byed pa gleng gzhi'i tshig gi khyad par du gyur pa'i le'us so/ /thams cad bskyed pa ni bcom ldan 'das rdo rje 'chang chen pos ma 'ongs pa'i sems can gdul bar bya ba'i phyir 'dod chags chen po'i ting nge 'dzin gyis lha mo'i 'khor lo nye bar spyod pa dang / bgegs bskrad pa nas brtsams te gzhal yas khang pa dang lhag par mos pa'i dkyil 'khor dang don dam pa'i dkyil 'khor dang / pad+ma la sogs pa'i gdan dang chos kyi dbyings kyi de kho na nyid mngon du bya ba dang / yi ge gsum yongs su gyur pa las skyes pa'i dkyil 'khor gyi gtso bo bsgom pa dang mig la sogs pa byin gyis rlob pa dang / sku gsung thugs byin gyis rlob pa'i bar du dang po sbyor ba'i ting nge 'dzin gyi 'og tu phyag rgya sbyang ba dang / rdo rje dang pad+ma snyoms par zhugs pa dang / de las mi bskyod pa la sogs pa dkyil 'khor ba spro ba dang / de dag gis sems can gyi don bya ba dang / dkyil 'khor gyi shar la sogs pa'i phyogs su dgod pa dang / cod pan du bya ba bstan to/ /sems rnam par dag pa la sogs pa'i rim pas yang dag par 'byung ba'i yongs su dag pa'i lha'i sku rdzogs pa'i rim pa'i phyogs su bstan pa ni de dag thams cad bskyed par bstan to/ /rdzogs pa'i rim pa gsal bar bya ba'i phyir zhes pa ni dpal gsang ba 'dus pa'i rgyud bstan pa'i ched du lha'i rnal 'byor gnyis kyi rang bzhin dam tshig gi dkyil 'khor spros te/ da ni don dam pa'i bden pa gcig pu gtod pa'i rang bzhin gyi de kho na nyid bskyed pa'i rim pa'i rgyur gyur pa dang / rdo rje bzlas pa la sogs pa'i mtshan nyid rdzogs pa'i rim pa lnga yang gsal bar bya ba'i phyir ro/ /byang chub kyi sems kyi le'u ni gdod ma nas ma skyes pa'i rang bzhin ston par byed pa'i le'u'o/ /gsungs te ni gsungs pa'o zhes sbyar ba ni bya ba dang byed pa po'i sgra dag gi phan tshun 'brel pa'o/ /rdo rje 'chang chen po ni sku la sogs pa nye bar bsdus pa'i mtshan nyid dpal rdo rje sems dpa' la'o/ /mchod pa ni me tog ma la sogs pa'i lha mo spros pas so / /bcom ldan 'das la gsol ba btab pa ni byang chub sems kyi le'u nyan pa'i don du'o/ /sku dang gsung dang thugs dang gsum gyi mi phyed pa'i ngo bo nyid ni tha mal pa'i lus la sogs pa stong pa nyid kyi bsgom pas mi snang bar byas pas rdo rje'i rang bzhin du skye bar 'gyur ro/ /rgyu la 'bras bu'i nye bar gdags pas mchog ni rgyu ni stong pa nyid kyi de kho na nyid do/ /'bras bu ni de'i dbang gis sku la sogs pa mi phyed par thob pa'o/ /de dag dbyer med par byas te sku gsung thugs kho na mchog tu bshad do/ /gang gi phyir nye bar btags pa ni rgyu mtshan gsum gyis 'gyur te/ don gtso bo bkag pa dang / rgyu mtshan dang dgos pas so/ /dper na tshong dpon ba lang yin te/ ba lang dang tshong dpon phyugs dang mi dang shin tu 'gal ba yin pas don gtso bo bkag pa'o/ /rgyu mtshan ni gsal ba dang blun pa la sogs pa'i yon tan dang 'brel ba'o/ /gang gi dbang gis gzhi mthun pa'i sgo nas ba lang dang tshong dpon dag byed pa'i tshig dang pos so sor bstan to/ /dgos pa ni ba lang dang 'dra bar rmongs par gyur pa'i tshong dpon la mi rtsi zhes bya ba'i don to/ /de bzhin du 'dir yang sku gsung thugs dang byang chub kyi sems phan tshun 'gal ba ste 'dus byas pa dang 'dus ma byas pa nyid kyis don gtso bo bkag pa'o/ /rgyu mtshan ni de la dmigs pa'i yon tan gyi 'brel ba'o/ /gang gi dbang gis sku gsung thugs ni byang chub kyi sems zhes gzhi mthun pas don gnyis ka yang byed pa'i tshig dang pos brjod do/ /dgos pa ni byang chub kyi sems bzhin du sku gsung thugs kyang stong pa dang sgyu ma'i rang bzhin du yongs su shes par bya ba yin pas nye bar gdags pa ni rigs pa kho na'o/ /bya ba'i rgyud la sogs pa la gnas pa rnams la mi bstan pas na zhes pa ni rnal 'byor gyi rgyud kyi bar du rnal 'byor pa rnams la sba bar bya'o/ /sgrib pa thams cad las rnam par grol bas na zhes pa la/ nyon mongs pa dang shes bya'i sgrib pa la sogs pa bral ba ste/ byang chub sems kyis rnam par rtog pa thams cad nye bar zhi bar byed pa'i phyir ro/ /yongs su dag pa lha'i sku bskyed pa'i phyir zhes pa ni yongs su dag pa'i sgra 'dir ni rnam pa gnyis te/ gcig ni sngags kyi sku rjod par byed pa yin te/ tha mal pa'i lus la sogs pa'i rnam par rtog pa zlog par byed pa'i phyir ro/ /gnyis pa ni ye shes kyi sku rjod par byed pa ste/ sgyu ma la sogs pa'i dpes nye bar mtshon pa'i phyir ro/ /rdo rje'i sku yang yongs su dag pa'i lha'i skur brjod pa yin te/ mi gnas pa'i mya ngan las 'das pa'i dbyings kyis rnam par rtog pa'i spros pa thams cad spangs pa'i phyir ro/ /'dir ni thams cad gzung bar bya ste/ byang chub kyi sems ni stong pa nyid kyi rang bzhin yin pa'i phyir dang / rdzogs pa'i rim pa ston par byed pa'i phyir ro/ /byang chub chen po'i sems brtan par mdzad pa na zhes pa la/ byang chub kyi sems chen po ni stong pa nyid kyi de kho na nyid dang rdzogs pa'i rim pa'i de kho na nyid do/ /chen po yang yin la byang chub kyi sems kyang yin pas na byang chub kyi sems chen po'o/ /des ni sems can gyi don chen por 'gyur ro zhes bya ba'o zhes pa ni sems can ni tsan+dan lta bu la sogs pa'i gang zag rnams so/ /chen po ni rin po che lta bu'i gang zag rnams so/ /de rnams kyi don ni rang gi bsam pa dang mthun pa'i rnam par grol ba'i mtshan nyid do/ /gang gi phyir tsan+dan lta bu la sogs pa gang yin pa de rnams bskyed pa'i rim pa'i yan lag tu gyur pa dang / stong pa nyid kyi de kho na nyid la lhag par mos pas grol bar 'gyur ro/ /rin po che lta bu'i gang yin pa de rnams kyang rdzogs pa'i rim pa'i de kho na nyid yid la byed pas grol bar 'gyur ro zhes bya ba'i don to/ /de lta bu'i sems kyi yongs su rtog pa thugs kyis mkhyen nas zhes pa ni sangs rgyas rnams ni mngon par shes pa drug dang ldan pa'i phyir ro/ /sgra ji bzhin pa ni rim pa gnyis mdo tsam bstan pas so/ /khyod kyis zhes bya ba la sogs pa la/ sku gsung thugs kyi bdag nyid can sngags kyi sku rnams tha mi dad par bstan to/ /sku rdo rje lta bur ni thugs kyi rdo rje'i ngo bo yang yin te/ sku rten med pas brten pa yang sems mi gnas pa'i phyir ro/ /thugs rdo rje lta bur zhes pa ni sku rdo rje'i sku yang thugs kyi rdo rje 'dzin pa'i sku'i ngo bo yin te/ sku ni sems kyi snang ba yin pa'i phyir ro/ /tshig tu brjod pa ni ngag tu smra ba ste zhes pa la/ ji srid ngag gi brjod pa ni 'jig rten pa'i brda la sogs pa dang 'jig rten las 'das pa'i kha thon dang klog pa dang / bzlas pa la sogs pa gang yin pa de rnams gsung rdo rje lta bur zhes pa ni gsung rdo rje'i sku'i rang bzhin gyis thugs rdo rje 'dzin pa'i gzugs kho na ste sems las ngag byung ba'i phyir ro/ /de ltar lte ba'i phyogs nas 'byung ba'i srog ces bya ba'i rlung yid kyis bskul ba'i phyi rol gyi don gzung bar 'dod pas gnas brgyad kun reg pas yi ge rnams bskyed par bya ste/ yi ge rnams kyis kyang tshig dang tshig de rnams kyis kyang ngag chen po 'byung bar 'gyur ro/ /de bas na ngag gi spros pa thams cad 'di sems kyi rtsa ba can yin no/ /ji skad du/ nam mkha' las byung rlung ni lus po las/ /kun du rgyu zhing dbyangs ni khar 'byin pa/ /gnas gzhan rnams la rab tu dbye 'gyur ba/ /yi ge nyid du gyur pa gang de sgra/ /yi ge de ni tshangs pa dag byed mchog /gsang ba la gnas bram ze yang dag 'dod/ /de ni yang dag rab tu sbyor ba na/ /legs thob mngon par 'byung bas skyes bur sbyar/ /zhes bshad pa'i phyir ro/ /de ltar sku rdo rje la sogs pa'i rnal 'byor pa rnams la/ sku la sogs pa'i rnam pa gsum gyi phan tshun dbyer med pa nyid bstan to/ /stong pa nyid kyi ngo bo nyid ces pa ni bgegs bskrad pa'i de kho na nyid don dam pa'i dkyil 'khor gyi rim pas thob pa'i stong pa nyid kyi de kho na nyid kyis so/ /gcig tu byas nas zhes pa ni ngo bo nyid med pa bsgom par bya'o/ /dgongs pa ni 'di yin te/ bgegs bskrad pa'i bsgom pas thugs rdo rje 'chang bsgom pa dang gzhal yas khang pa'i bsgom pas sku rdo rje 'chang bsgom pa dang / lhag par mos pa'i dkyil 'khor gyis gsung rdo rje 'chang gi rang bzhin gyi sku bsgom pa'o/ /sku gsung thugs kyi rdo rje 'chang gi sku rnams bsgoms nas yang rdo rje phreng ba las gsungs pa'i don dam pa'i dkyil 'khor gyi rim pas stong pa nyid du gyur par rnam par bsam par bya ba dang / oM shU n+ya tA zhes bya ba la sogs pa'i sngags kyang brjod do/ /drang ba'i don ni bskyed pa'i rim pa'i yan lag tu gyur pa dang po sbyor ba'i ting nge 'dzin gyi phyogs gcig pa'i rnal 'byor zhes bya ba'i yan lag don dam pa'i dkyil 'khor gyi rang bzhin stong pa nyid kyi de kho na nyid rab tu bstan pa'i phyir ro/ /rdzogs pa'i rim pa bstan pa'i phyir yid kyi rang bzhin gyi lus gcig pa zhes bstan to/ /sems gsum po zhes bya ba la/ kun gzhi la sogs pa rnam par shes pa gsum pa'o/ /khams phra ba ni 'od gsal ba dang lhan cig tu'o/ /longs spyod rdzogs pa'i sku lta bu zhes bya ba ni snang ba nye bar thob pa la sogs pa'i rim pa'am cig car gyis rdzogs pa'i sgyu ma lta bu'i sku'o/ /lus gang bskyed pa zhes pa ni 'od gsal ba las cig car ram/ rim gyis ye shes kyi sku spro ba'o/ / de ni sems nyid yin no zhes pa la/ sems la rnam par dag pa'i rim pas thob par bya ba'i 'od gsal ba'i de kho na nyid las ye shes kyi sku byung ba'i phyir ro/ /tshig tu brjod pa gang yin pa de dang de'i ngo bor sems nyid skyed cig pa'o zhes pa ni tshig tu brjod pa ni yi ge gsum po 'jug pa la sogs pa'i rim pas bzla ba'o/ /de gang gi tshe 'od gsal ba'i mtshan nyid sems la brten te 'jug pa de'i tshe tshig tu brjod pa nyid sems yin no zhes rdo rje bzlas pa dang sems rnam par dag pa dang bdag la byin gyis rlob pa'i rim pa bstan pa yin no/ /sku dang zhes bya ba la sogs pas bzhi pa dang lnga pa'i rim pa ston par byed de/ de ltar bskyed pa'i zhes pa ni rim pa gsum bsgom pas so/ /nam mkha'i ngo bo nyid kyis yang dag par sbyor zhing zhes pa la/ sgyu ma'i rang bzhin gyi lus kyang 'od gsal ba'i rang bzhin de kho na nyid kyi rnam par sbyangs nas so/ /rdo rje 'chang chen por bdag nyid bskyed par bya ba ste zhes pa la bden pa gnyis gnyis su med pa'i mtshan nyid can zung du 'jug pa'i ting nge 'dzin las rdzogs pa'i rdo rje'i sku rdzogs par bya'o zhes pa 'dis mngon par byang chub pa dang zung du 'jug pa'i rim pa bstan to/ /de la mdor bsdus pa ni rigs brgya'i dbye ba'i 'og tu rdzogs pa'i rnal 'byor pas yi ge gsum po 'jug pa dang / gnas pa dang / ldang ba'i rim pas rnam pa bcu gcig yan lag ma nyams pa'i bzlas pa bya ste/ ngag sbyang ba'i 'og tu sngags dang phyag rgya'i rim pas rnam shes gsum po gnas gyur pa'i mtshan nyid snang ba gsum rnam par dag pas sems la dmigs pa thob nas de la cig car ram snang ba nye bar thob pa la sogs pa'i rim gyis sems can gyi don du blangs la/ sgyu ma'i sku yang chags pa dang chags bral dang / chags pa bar ma'i rim pas sbyang zhing 'od gsal ba'i rang bzhin du byas te/ de las kyang cig car du rnam pa thams cad kyi mchog dang ldan pa'i mtshan dang dpe byad kyis rnam par mdzes pa mi gnas pa'i mya ngan las 'das pa'i dbyings kyi ngo bo rdo rje'i sku'i rnam grangs can zung du 'jug pa'i ting nge 'dzin gyis thob par bya ba rdo rje 'chang gi phyag rgya chen po'i sku bsgom par bya'o/ /dpal rdo rje phreng ba zhes bya ba la sogs pas lung tshad ma nyid du bstan to/ /snying por gyur pa zhes bya ba la sogs pa la khams gsum 'di la snying por gyur pa ni rang gi srog ste/ rnam par shes pa gsum mo/ /de la gzhan med pa ni rnam par shes pa'i sna tshogs pa nyid rnam pa de dang der snang ba'i phyir ro/ /de nyid sems rnam par dag pa'i rim pas rnam par sbyangs nas sems kyi 'od gsal ba nyid thob par 'gyur ro/ /des ni sems rnam par dag pa'i rim pa bstan pa yin no/ /skyes bu zhes pa ni rnal 'byor pas so/ /rlung gi khams gsum pa zhes pa la rlung gi khams kyi rang bzhin gyi rang gi lus dang khams gsum pa la yang dri ma med par mthong ngo / /des ni yi ge gsum gyi rang bzhin 'jug pa la sogs pa'i rim pas yan lag ma nyams pa'i bzlas pa rab tu bstan pa yin no/ /de ni rdo rje bzlas pa'i rim pa'o / / khams gsum bdag nyid ces pa ni khams gsum gyi nang du gnas pa khyab 'jug dang drag po dang dbyig snying la sogs pa'i nang na mchog tu gyur pa ye shes kyi sku'i rnam grangs can bdag la byin gyis rlob pa'i rim pa'i mtshan nyid can sgyu ma'i sku thob par 'gyur ro/ /des ni bdag la byin gyis brlab pa'i rim pa bstan to/ /gcig tu myur bar mthong ba ni zhes pa la chags pa dang chags bral dang / chags pa bar ma yongs su spangs nas gcig tu gyur pa lhan cig skyes pa'i bde ba chen po'i mtshan nyid shes rab kyi pha rol tu phyin pa'i ngo bo de kho na nyid bzhi pa'i man ngag myur bar phyi dang nang gi phyag rgya'i dbye ba'am/ ting nge 'dzin gyi rim pas mthong ba ni thob par 'gyur ro zhes bya ba 'dis mngon par byang chub pa'i rim pa bstan to/ /byin gyis brlabs nas de bzhin nyid/ /ces pa ni kun rdzob dang don dam pa dang chags pa dang chags bral dang / chags pa bar ma dang / rtag pa dang / chad pa dang / dngos po dang dngos po med pa dang / yod pa dang med pa dang 'khor ba dang mya ngan las 'das pa dang / srid pa dang zhi ba dang 'ching ba dang grol ba dang / kun nas nyon mongs pa dang / rnam par byang ba dang yongs su dag pa dang / ma dag pa dang / sngags kyi sku dang / ye shes kyi sku dang / stong pa nyid dang / snying rje dang / shes rab dang thabs dang / rnam pa dang bcas pa dang rnam pa med pa dang / gang zag la bdag med pa dang / chos la bdag med pa dang / ma rig pa dang rig pa la sogs pa ni byin gyis brlab pa rnams so/ /de rnams kyi gnas ni dbyer med pa'i sgo nas gzhir gyur pa'o/ /de bzhin nyid ni chos thams cad kyi snying por gyur pa mi slob pa'i lam gyis khong du chud par bya'o/ /dngos grub myur ba zhes pa ni 'jig rten pa dang 'jig rten las 'das pa'i dngos grub rnams kyis myur du rgyur gyur pa'o/ /thob par 'gyur zhes pa la rnal 'byor pas thob par 'gyur zhes bya ba 'dis zung du 'jug pa'i rim pa rab tu bstan pa yin no/ /nges pa'i don zhes bya ba ni rim pa lnga pa'i rang bzhin rdzogs pa'i rim pa gsal bar bshad pa'i phyir ro/ /rdo rje 'chang chen po zhes pa ni thog ma dang bar ma dang tha mar kun las bzang ba gang la yod pa zhes bya bas so/ /de'i byang chub kyi sems rab tu brtan pa ni ngo mtshar che'o zhes pa la bskyed pa'i rim pa'i phyogs su stong pa nyid kyi de kho na nyid mngon du gyur pa'i mtshan nyid dang rdzogs pa'i rim pa'i phyogs su rim pa lnga'i ngo bo byang chub kyi sems kyi rab tu brtan pa gang yin pa de ni ngo mtshar che'o zhes pa ni tshig gcig gis de rnams bstan pa'i phyir ro/ /don dam pa'i bden pa ni bskyed pa'i rim pa la don dam pa'i dkyil 'khor gyi ngo bo stong pa nyid mngon du bya'o/ /de yid kyi rang bzhin gyi lus 'jug pa ni lhag par mos pa'i dkyil 'khor rdo rje phreng ba las gsungs pa/ gzugs phung rtog pa me long dang / /zhes bya ba la sogs pas mi snang bar bya ba'o/ /'di gsal ba las zhes bya ba la sogs pa la 'od gsal ba las byung ba'o/ /yongs su dag pa'i lha'i sku 'dzin pa'i mtshan nyid ni tha mal pa'i phung po la sogs pa ldog pa'i mtshan nyid rdo rje 'chang gi phyag rgya chen po'i sku rdzogs pa'o/ /bzhengs pa zhes bya ba ni de nyid dkyil 'khor ma lus pa sprul par byed pa'o/ /gang gis rab tu sgrogs shing brjod pa zhes ngo mtshar ba'o/ /dgongs pa ma yin pa zhes bya ba ni bskyed pa'i rim pa'i yan lag tu gyur pa'i don dam pa'i dkyil 'khor dang de las byung ba'i dag pa'i sku bstan pa'i phyir ro/ /tshigs su bcad pa de nyid kyang bshad par bya ste/ don dam pa'i bden pa'o zhes pa ni sems rnam par dag pa'i rim pas thob par bya ba'i 'od gsal ba'o/ /der yid kyi rang bzhin gyi lus 'jug pa ni cig car du spros pas 'ja' tshon dang 'dra ba'i sku mngon par byang chub pa'i rim pa'i mtshan nyid kyi 'od gsal ba'i de kho na nyid dang gcig tu gyur pa'o/ /'od gsal ba las ni man ngag bzhi pa l as yongs su dag pa'i lha'i sku 'dzin pa'i mtshan nyid ces pa ni ji srid 'khor ba'i bar du 'gro ba'i don mdzad par bya ba'i phyir cig car du 'byung ba'i rnam pa sna tshogs pa'i sprul pa rnams kyis nam mkha'i dbyings khyab pa srid pa dang zhi ba ro gcig pa'i mtshan nyid dbyig snying la sogs pa'i lha'i mchog gi z habs kyi pad+ma mchod par bya ba rnam pa thams cad kyi mchog dang ldan pa mtshan dang dpe byad kyis rnam par mdzes pa phyag rgya chen po'i rang bzhin mi gnas pa'i mya ngan las 'das pa'i dbyings zhes bya ba chos kyi dbyings kyi ye shes kyi rnam grangs shes pa dang shes bya'i bag chags dang bral ba 'od kyi tshogs kyis zla ba dang nyi ma'i gzi brjid zil gyis gnon pa zung du 'jug pa'i ting nge 'dzin rdo rje'i sku'i mtshan nyid 'dzin pa ni dmigs par bya'o/ /bzhengs pa 'di ni zhes pa ni ldang ba'o/ /gang gis rab tu bsgrags shing ni bcom ldan 'das kyis gsungs pa'o/ /dgongs pa ma yin pa ni rim pa tha ma de kho na nyid so sor bstan pa'i phyir ro/ /de bzhin gshegs pa drug ces bya ba la sogs pas bcom ldan 'das rdo rje 'chang chen po'i bka' lung thos pa'i 'og tu byang chub kyi sems kyi ngo bo de bzhin gshegs pa rnams kyis thos pa gang yin pa de nyid bsams nas bsgoms te/ de'i don ston par byed pa tshigs su bcad pa drug drug gis 'byung bar bstan to/ /de la rdo rje 'chang chen po'i tshigs su bcad pa'i don ni stong pa nyid kyi de kho na nyid dang don dam pa'i dkyil 'khor gyi rang bzhin no/ /gzhan rnams kyi don ni rdo rje bzlas pa la sogs pa ste rdzogs pa'i rim pa'o/ /tshigs su bcad pa brjod pa'i sngon du de dang rjes su mthun pa'i ting nge 'dzin rnams bstan pa'i phyir/ bden pa gnyis gnyis su med pa'i mtshan nyid ces pa ni zung du 'jug pa'i ting nge 'dzin no/ /de mngon du bya ba'i thabs zhes pa la/ rim pa bzhi pa bsgom pa'i mtshan nyid do/ /gang gi phyir rim pa bzhi pas rim pa lnga pa thob par 'gyur zhes pa'i don to/ /dgongs pa ma yin pa zhes pa ni 'bras bur gyur pa'i de kho na nyid bstan pas so/ /de nyid bstan par bya ba'i phyir brtan pa dang g.yo ba zhes bya ba la sogs pa smos te/ 'di ltar snang bar gyur pa brtan pa dang g.yo ba'i bdag nyid 'di yod pa ma yin te/ gcig dang du mas bral ba de mi dmigs pa'i phyir gzugs brnyan bzhin no zhes khyab par byed pa mi dmigs pas so/ /de'i phyir dngos po rnams med do/ /bsgom par bya ba med pa'i phyir/ /zhes pa ni shes bya'i yul can gyi sgom pa yang med do/ /yang na/ 'gro ba'i dngos po thams cad 'di/ ma brtags pa la nyams dga' ba/ /zhes 'byung bas so/ / gang gi tshe mi dmigs pa'i sbyor bas mi spyod do/ /'on kyang ji ltar snang ba tsam yul nyid du 'dod pa de'i tshe dngos po de rnams yod pa ltar snang ngo zhes 'dod na/ de la smras pa/ gang yod par sgom pa zhes pa ni yongs su brtags pa'i tshul du snang bar gyur pa'i dngos po'i sgom pa gang yin pa de ni rjes su dran pa'am 'jog pa nyid gang yin pa de yang mi rigs te/ sgom pa med pas kyang yod pa'i phyir ro/ /de'i dgongs pa ni gang brtags pa'i dngos po 'di yin pa de rang las grub na rang las grub pa ni gzhan la rag ma las pas sgom pa mi dgos so/ /yang na gzhan las grub pa'i dngos po zhes brjod na de'i tshe de ni yod par mi brjod de rten cing 'brel pa las 'byung ba'i phyir ro/ /ji skad du/ de de rten nas gang byung ba/ /de nyid kyis ni de ma skyes/ /ngo bo nyid kyis ma skyes gang / /de ni skye zhes ji ltar yin/ /zhes 'byung ngo / /de bas na gzhan las grub pa'i phyogs su yang bsgom pa ni dgos pa ma yin no/ /gal te mi dmigs pa'i sbyor bas dngos po med par grub pa dang de nas yod pa'i bsgom pa bkag nas bsgom pa yang med do zhes dgongs na/ de'i phyir yod pa dang med par 'dres pa'i dngos po kha cig yod de zhes dgag par bya ba'i phyir/ dngos po med pa dang yod par 'dod pas ldan pa zhes bya ba ni dngos po yin na rang dang rjes su mthun pa'i tshogs pa las bdag nyid rnyed pa don gyi bya ba byed pa yin pa des dngos po thams cad kyi nus pa dang bral ba'i mtshan nyid nam yang med pa'i phyogs su mi 'gyur ro/ /dngos po med pa yang ri bong gi rwa dang 'dra ba don gyi bya ba byed pa'i nus pa dang bral ba brjod par mi nus pas ji ltar dngos po'i gnas 'thob par 'gyur te phan tshun spangs pa'i mtshan nyid can gyi 'gal ba dang ldan pa'i phyir ro/ /de nyid kyi phyir dngos po yang yin la/ dngos po med pa yang yin zhes gcig tu gnyi ga'i tha snyad mi rigs so/ /'o na dngos po nyid dang skad cig ma dang phan tshun 'gal ba ji ltar dngos po gcig la yod pa de bzhin du 'dir yang yin no zhe na/ smras pa/ dngos po nyid dang skad cig ma nyid ni dngos po gnyis ni 'thad de/ 'on kyang skad cig ma nyid gang yin pa de nyid dngos po nyid do/ /brtan pa ni dngos por smra bas 'dra ba gzhan dang gzhan skyed pas slu ba'i blo dang ldan pa dngos po brtan pa gcig 'di yin no zhes sems so/ /tho ba la sogs pa 'jig pa'i rgyu dang phrad pa'i dus su rmugs pa'i blo dang ldan pas bum pa 'jig go zhes sems so/ /don dam par de ni thog mar 'jig pa yin te/ skad cig ma yin pa'i phyir ro/ /de bas na dngos por smra ba brtan pa rnams kyi 'khrul pa bsal bar bya ba'i don du dngos po nyid dang skad cig ma nyid ldog pa'i dbye bas brtags te bsgrub par bya ba dang / sgrub par byed pa'i 'brel pa mkhas pa rnams kyis byas so/ /de bas na 'khrul pa nyid bsal bar bya ba'i phyir rjes su dpag pa'i tshad ma bstan to/ /ldog pa ma lus pa dang ldan pa'i rang bzhin gyi dngos po gzung ba la mkhas pa mngon sum gyi skad cig ma nyid gzung ba la nus pa med dam/ 'on kyang nges pas gang zhig cha gzung ba mi nus pa de la de'i tshad ma yang bstan to/ /cha dang bral ba'i khyad par ni/ /mngon sum gyis ni gzung bas kyang / /gang zhig khyad par rtogs nges pa/ /de ni rtogs par gyur pa yin/ /zhes bshad pa'i phyir ro/ /de bzhin du dngos po dang dngos po ma yin pa ni rang bzhin gcig par brjod par mi rigs te/ tha dad pa'i tshad ma'i yul yin pa'i phyir ro/ /de la don gyi bya ba byed pa'i dngos po ni rang gi mtshan nyid dang ma bral ba 'khrul pa med pa gsal bar snang ba dbang po'i mngon sum gyis nges par 'gyur ro/ /dngos po ma yin pa yang nus pa thams cad dang bral ba'i mtshan nyid snang ba mi dmigs pas med pa'i tha snyad du bya'o zhes bsgrub pa dang bkag pa sgrub par byed pa mngon sum dang rjes su dpag pa'i spyod yul dngos po dang dngos po ma yin pa zhes ji ltar dngos po gcig gi rang bzhin yin/ 'o na dngos po gcig gnyis ka'i rang bzhin de'i bdag nyid kyis bkag pas shes par bya ba ma yin nam/ dper na bum pa 'di sha za ma yin no zhes bya ba bzhin no/ /gal te yin na sha za yang mthong bar 'gyur ro/ /de bzhin du yod pa'i rang bzhin gyi dngos po dang dngos po med pa'i cha dang 'dres pa yin no zhe na/ de ni yang dag pa ma yin te/ dpe mi 'dra ba'i phyir ro/ /gang gi phyir bum pa 'di sha za ma yin no zhes bya bas/ sha za las ldog pa tsam bstan pa yin te/ bum pa las ldog pa dang ldan pa'i snam bu bzhin no/ /dngos po'i ldog pa ji srid yod pa de srid de brjod pa'i nus pa yod de/ de bas na sha za las ldog pa'i rang bzhin bum pa 'ba' zhig so sor snang bas 'di sha za ma yin no zhes de'i bdag nyid kyis dgag par rigs so/ /de bzhin du dngos po dang dngos po med pa dang ldan pa'i dngos po ni mi rigs so/ /dngos po med pa bkag pa'i sgo nas dngos po rtogs par 'gyur ba dang / dngos po dgag pa'i sgo nas kyang dngos po med pa rtogs par 'gyur ro/ /de bas na dngos po dgag pas/ dngos po med par bya ba dang dngos po med pa bkag pas dngos po nges par bya ba yin no/ / de bas na 'ba' zhig dngos po tsam du 'grub pa'am dngos po med pa tsam 'grub pa yin gyi dngos po dang dngos po med pa'i bdag nyid can gyi dngos po ni gnyis ka'i rang bzhin mi rigs so/ /de bas na zhes bya ba la sogs pas nye bar bsdus pa bshad par bya ste/ bsgom par bya ba ni shes bya'o/ / sgom pa po ni dngos po sgom par byed pa ste/ sgom pa gzhal bar byed pa'o/ /bsgom pa ni bya ba'i bdag nyid med de/ las dang byed pa po gnyis med pa'i phyir ro/ /de bas na chos thams cad stong pa nyid yin no zhes bya'o/ /yi ge'i don ni khyab par bya ba mi dmigs pas dngos po thams cad kyi stong pa nyid so sor bstan par bya ba'i phyir ro/ /rnam par thar pa'i sgo gsum gyi rim pas dngos po thams cad kyi stong pa nyid so sor bstan par bya ba'i phyir/ steng 'og ces bya ba la sogs pa smos te/ cha drug dang ldan pa'i sa la sogs pa'i khams bzhi'o/ /de rnams gcig dang du ma bral ba'i phyir stong pa yin no zhes stong pa nyid kyi mtshan nyid can gyi rnam par thar pa'i sgo gcig go/ /'dus byas dang 'dus ma byas pa ni 'dus byas pa ste phung po lnga'o/ /'dus ma byas pa ni nam mkha' zhes pa la sogs pa'o/ /de dag thams cad sngar bshad pa'i rigs pas stong pa ste/ dngos po med pa zhes bya ba ni/ pha rol tu phyin pa'i rnal 'byor pa rnams kyi sgom pa gang yin pa de ni sgom pa ma yin te/ ci'i phyir zhe na/ stong pa nyid la mngon par zhen par lta ba yin pa'i phyir ro zhes pa la/ chos thams cad stong pa yin zhes mngon par zhen pa'i bdag nyid kyi lta ba gang yin pa rgyu zhes bya ba'i don to/ /stong pa nyid la mngon par zhen pa'i lta bas 'dus byas pa dang 'dus ma byas pa'i dngos po'i yul can gyi bsgom pa ni mi rigs te/ de ni rten med pa'i phyir ro/ /stong pa nyid la mngon par zhen pa kho na bsgom pa'i rten yin no zhes pas ji ltar sgom pa dgag ce na smras pa/ stong pa nyid ces bya ba ma yin par dgag pa'i mtshan nyid can gyi don rtogs pa ma yin gyi/ 'on kyang med par dgag pa'i mtshan nyid do/ /de la dngos po 'dra ba yongs su 'dzin par byed pa de ma yin par dgag pa ste/ dper na bram ze ma yin pa la khyer shog ces bya bas bram ze dang 'dra ba'i rgyal rigs la sogs pa khyer ba ni rtogs pa'o/ /med par dgag pa ni dngos po med pa nyid ston par byed pa'o/ /de bzhin du stong pa nyid kyi dngos po bkag nas gang yang rung ba'i cig shos brjod pa ma yin te/ gang gis mngon par zhen pa tsam yang gzhag par bya/ 'on kyang dngos po'i cha thams cad dgag pa stong pa yin no/ /rnam pa du mas tha dad pa'i/ /dngos po rnams ni gos dang 'dra/ /stong pa nyid mes tshig gyur na/ /thal ba'i dbye ba gang yang med/ /sems can dang ni snod ces bya/ /'jig rten gnyis po 'dir bsregs nas/ / rang bdag kyang ni de nyid do/ /me sgron bzhin du zhi bar 'gyur/ /zhes bshad pa'i phyir ro/ /de nyid kyi phyir bcom ldan 'das kyis cha dang cha tsam gyi rnam par rtog pa yang spong ba'i phyir stong pa nyid ni rnam pa bco brgyad du gsungs te/ lta bas byas pa'i skyon kun ni/ /spong phyir stong pa nyid gsungs so/ /zhes bshad pa'i phyir ro/ /gal te nus pa thams cad dang bral ba'i mtshan nyid can stong pa nyid yin na/ de'i tshe bcom ldan 'das kyis shes rab kyi pha rol tu phyin pa las/ gzugs stong pa nyid dang stong pa nyid gzugs so zhes gsungs te/ med par dgag pa'i phyogs ni don gyi bya ba byed pa'i dngos po dang lhan cig tu de'i bdag nyid kyi 'brel pa ji ltar yin zhe na/ smras pa/ med par dgag pa'i bdag nyid can stong pa nyid yin te/ gang gi phyir stong pa nyid dang dngos po dag ni de'i bdag nyid kyis dngos po ni stong pa yin no zhes rtogs pa dang / stong pa yang dngos po yin no zhes rtogs pas dngos po ni gud na med do/ /gal te de ltar yin na / don gyi bya ba byed pa'i dngos po stong pa nyid dang 'gal bar gyur pas ji ltar rtogs she na/ smras pa/ don dam pa don gyi bya ba byed pa ma yin te/ 'khrul pas de ltar snang ba'i phyir ro/ /dper na mya ngam gyi sa'i bye ma nyi ma'i 'od zer gyi tshogs dang phrad pas chu ltar snang ba'i ri bo'i rtse nas shin du dga' bas 'ongs pa'i ri dgas rnams kyi skom pa sel bar mi byed kyi 'on kyang rmos pa de rnams rnam par slu bar byed do/ /de bzhin du dngos po 'di rnams kyis dngos po las mngon par zhen pa 'khrul pa med pa'i sems kyi rgyu dang ldan pa thog ma med pa'i ma rig pa'i bag chags kyis ye shes kyi mig btsums pa rnams kyis don gyi bya ba mi byed do/ /de rnams kyi chos kyi dbyings kyi de kho na nyid mngon du byed pa'i mtshan nyid can gyi don gyi bya ba gang yin pa de ni rnal 'byor pa rnams kyis rtogs par bya ba yin gyi bag chags rags pas blo'i me long bsgribs pa bdag cag lta bu la mi snang ste/ mi shes pa'i dri ma dang ldan pa'i phyir ro/ /ji skad du/ sos ka'i dus su smig rgyu ni/ /ji ltar sems 'khrul g.yo ba ste/ /ri dgas rnams kyis chur 'dzin pa/ /de la chu ngoms yod pa min/ /zhes 'byung ngo / /de bzhin du yang / phra bar gzigs pa'i sangs rgyas kyis/ /phra phyir de ni rang rig yin/ /rang gnas kyang ni bdag 'dra bas/ /blo rags phyir ni ma mthong ngo / /rnal 'byor rig par nam yang ni/ /thar pa'i 'du shes ring mi bya/ / brtags pa'i ngang tshul rang bdag nyid/ /stong par mthong na thar pa yin/ /zhes bshad pa'i phyir ro/ /de bas na de'i bdag nyid kyi dgag pas dngos po rnams stong pa nyid yin no/ /de yang med par dgag pa'i bdag nyid yin pas stong pa nyid la mngon par zhen pa med do/ /des ni stong pa nyid ces bya ba rnam par thar pa'i sgo dang po bstan to/ /mtshan ma bzlog par bya ba'i phyir zhes pa ni/ rnam par thar pa'i sgo gnyis pa bstan par bya ba'i phyir ro/ /gang yang rgyu dang 'bras bu zhes pa ni rgyu ni rten cing 'brel par 'byung ba yan lag bcu gnyis kyi mtshan nyid nyon mongs pa dang las dang skye ba zhes bya'o/ /'bras bu ni sems can gyi khams rigs bzhi'i dbye bas phye bar gyur pa mtho ris dang ngan song zhes grags pa 'gro ba drug go/ /de rnams kyi rnam pa ni so sor snang ba'o/ /mngon par zhen pa ni rgyu 'di dag dang 'bras bu 'di dag ces rtog pa dang tha snyad do/ /de nyid kyang rigs pa ma yin te zhes pa ni rigs pas mi 'grub po/ /rgyu dang 'bras bu gnyis su med pa'i phyir ni bya ba dang byed pa dag gnyis su med pa ste rgyu ni rang bzhin gyis ngo bo med pa dang / 'bras bu yang rang bzhin gyis ngo bo med pa'o/ /ji skad du/ sgyu ma rmi lam smig rgyu chu zla dang mtshungs srid pa 'di dag gsum/ /yod pa ma yin 'gag phyir skye phyir gzhan min gnyis min min/ /skye dang gnas dang 'jig pa dang bral dngos po de rnams de bas na/ /gzhi med blo can la ni 'khor dang thar pa'i dbye ba med/ /ces 'byung ngo / /gang zhig rgyu med mi 'byung ba/ /rkyen med pas ni gnas pa med/ /rkyen dang bral bas gang bral ba/ /de yod ces ni ji ltar rtogs/ /rgyu zad pas ni gang zad pa/ /zad pa zhes bya nye bar bstan/ /gang zhig ngo bor ma zad pa/ /de ni zad ces ji ltar brjod/ /de ni gang gis yongs shes te/ /rten 'brel 'byung ba thob pas na/ /rten nam skyes pa ma skyes pa/ /de nyid rig pa mchog gis gsungs/ /de ltar gang yang mi bskyed cing / /cung zad 'gag par mi 'gyur te/ /skye ba dang ni 'jig pa'i lam/ /dgongs pa'i don du nye bar bstan/ /skye ba skyes pas 'jig shes te/ /'jig shes pas ni mi rtag shes/ /mi rtag pa la 'jug shes pas/ /dam pa'i chos ni 'byung bar 'gyur/ /zhes 'byung ngo / /de bzhin du/ bden pa gcig ni grub par ma gzigs pas/ /byang chub thob pas bzhi ni ga la gzigs/ /zhes 'byung ngo / /rje btsun rin chen tA la las kyang / /ji ltar rlon pa chu shing sdong bu ni/ /snying po 'dod pa'i skyes bus rnam par dpyod/ /phyi dang nang na snying po de med pa/ /chos rnams thams cad de ltar shes par gyis/ /zhes 'byung ngo / /yang na rgyu ni pha rol pa rnams kyis yongs su brtags pa bdag dang dbang phyug la sogs pa'o/ /de rnams rnam par dpyad na 'grub par mi 'gyur te/ ngo bo med pa'i phyir ro/ / 'bras bu yang de kho na nyid nyi shu rtsa bzhi'i rang bzhin rnam par dpyad na mi 'grub ste/ rgyu rnams med pa'i phyir ro/ /de rnams med pa kho na sngar bshad zin to/ /rgyu ma grub na 'bras bu gang las 'byung bar 'gyur te/ rgyu med pas 'bras bu med pa'i phyir ro/ /de bas na bdag dang dbang phyug la sogs pa'i rgyu yis sprul pa bstan pa dang / g.yo ba la sogs pa'i sems can snod du gyur pa khams gsum gyi nang na gnas pa'i dngos po'i tshogs ni don dam par yod pa ma yin no/ /ji skad du/ bdag dang chos su nyer brtags pa'i/ /gang zhig rnam pa du ma 'jug /de yang rnam shes g.yos 'gyur ba/ /zhes 'byung ngo / /de bzhin du/ bdag ces bya ba dngos po med/ /byed pa po zhes ga las brjod/ /chos can yod na 'jig rten pas/ /chos rnams la ni bsam pa 'gyur/ /phung po bdag min der de min/ /de la de min de med min/ /bdag dang phung po me shing bzhin/ /'dres min bdag des ji ltar yod/ /ces 'byung bas so/ /dbang phyug la sogs pa'i dgag pa'i sgo des mtshan ma med pa zhes bya ba rnam par thar pa gnyis pa bstan to/ /smon pa bzlog pa'i phyir zhes bya ba la sogs pas rang dbang gi rnam par rtog pa yongs su dgag par bya ba'i phyir bshad par bya ste/ de ltar zhes bya ba ni dngos po dang de'i byed pa po tshad ma med pas bkag na de'i don dang bral ba'i rnam par rtog pa yang mi 'grub po/ /de ltar phyi rol gyi rnam pa zhes pa ni rnam par rig pa smra ba rnams kyis 'di ltar khas blangs te/ rnam par shes pa 'ba' zhig tu 'di snang ba yin gyi don ni med de/ gcig dang du ma dang bral ba'i phyir ro/ /ji ltar snang ba rnam pa sna tshogs pa mtha' yas pa spros pa'i ngo bo'i dngos po'i tshogs ni rnam par shes pa'i so sor snang ba yin no/ /'di lta ste/ gang dang gang rang gi snang ba'i rang bzhin de ni yod de / /gang rang snang ba ma yin pa de ni med do/ /gzugs la sogs pa dngos po rnams ni gzhan gyi snang ba yin no/ /gang gis de rnams snang bar bya ba de nyid rnam par shes pa don dam par yod la/ phyi rol gyi don ni 'khrul pas brtags par byas te/ rnam par shes pa ni don gyi rnam pa yin pa'i phyir zla ba gnyis so sor snang ba'i shes pa bzhin no/ /gal te phyi rol gyi don dam par yod par 'gyur na de'i tshe bud med kyi ros mi rtag pa'i shes pa 'di nyid skye ba yin gyi tha dad pa ni ma yin no/ /bud med ro ni gcig pu la/ /dge slong 'dod pa khyi rnams kyis/ /ro dang 'dod ma bza' ba zhes/ /rnam par rtog pa gsum byung ngo / /zhes dang / de bzhin du/ nyin dang mtshan mo snang ba'i don/ /long ba yi ni 'dra ba na/ /nang par shes bya sgra thos pas/ /snang ba dang bcas 'dra bar 'gyur/ /mi gtsang ba yi ri dgas kyis/ /me za dug ni dug byi bas/ /zos kyang shi bar mi 'gyur ro/ /srog ni thar byed rdzas kyis so/ /byis pa rnams kyis yang dang yang / /gang dang gang ni bsgom bya ba/ /goms pa'i stobs kyis sbyor ba yis/ /de dang de ni mdun du snang / /gos kyi rnam pas bkab pa yang / /ma goms pas ni yan lag gnod/ /gangs kyi tshogs ni ma rungs pas/ /mig la mi gnod ngo mtshar che/ /goms pa'i sbyar ba'i nus pa yis/ /ko ba lag pas mnyes byed pa'i/ /lham mkhan gyi ni dri mi zhim/ /gnod par byed par mi 'gyur ro/ /dang por lus can rnams kyis ni/ /dug rnams zos na shi bar 'gyur/ /de nyid goms pa'i sbyor ba yis/ /mthar ni bcud kyis len par 'gyur/ /gal te 'byung ba 'di rnams ni/ /shes pa'i ngo bor mi rtag na/ /rkang lag la sogs bya ba rnams/ /bya ba gzhan la ji ltar 'jug /pha ma'i khrag dang khu ba las/ /mgo lag la sogs ji ltar 'gyur/ /sa bon las skyes yal ga can/ /ji ltar zhing rnams skye bar 'gyur/ /sgra ni kha las byung ba dang / /rdza rnga las kyang ji ltar byung / /de yi rgyu rnams re re la/ /rang bzhin med pa mthong phyir ro/ /bya rnams nam mkhar 'gro ba dang / /mun khung la yang don mthong ba/ /khang par byi ba la sogs pas/ /mtsho la sogs par nyas don mthong / /sbrul rnams kyi ni mig dag gis/ / thos pa dang ni mthong bar 'gyur/ /de bzhin 'khor bar du ma ni/ /gzhan dang gzhan gyis 'gal bar snang / /gnas dang dbyibs ni ma mthong ba'i/ /goms pa'i dbang gis sgra thos nas/ /ye shes rtogs pa rnams med na/ /'ben la mda' rnams ji ltar phab/ /brjod pa yang ni ma goms pas/ /ji ltar kha thon 'byung bar 'gyur/ /gal te rnam rig rgyun bzhin du/ /rab tu rgyu bar mi 'gyur ro/ /ri bo'i tshogs ni mtho ba dang / /rgya mtsho chen po dkyil med pa/ /rdul ni phra rab g.yo bsdus nas/ /las byed gang gis byed pa yin/ /lcags la sogs pa dgug pa'i phyir/ /rdo ni khab len la sogs dang / /sngags rnams dang ni sman rnams kyi/ /nus pa gang gis byas pa yin/ /de bas ma rig sna tshogs pas/ /cog chung gis ni skad rgyas bzhin/ /ji ltar 'di dag thams cad snang / /sems nyid kyi ni sprul pa yin/ / zad par skye mched sgom pa ni/ /rnal 'byor pa yis ji ltar sbyar/ /brtan pa'i rang bzhin dngos po rnams/ /gzhan dang gzhan du bzhag pa med/ /shel dang 'dra ba du ma ni/ /de ltar 'khrul pas sbyar bar rigs/ /bag chags chu la til mar bzhin/ / sems nyid 'di ni khyab par 'gyur/ /glog dang 'brug sgra char pa dang / sprin dang rlung dang thog rnams ni/ /sems tsam yod par med pa na/ /nam mkha'i dkyil la grub mi 'gyur/ /dngos po rnams kyi bdag nyid kyis / /ngo bo kha cig rab grub na/ /mdud pa'i dbye bas de rnams kyi/ / dbye ba du ma snang mi 'gyur/ /kha cig mdzes ma gzhon nu ma/ /gzhan la de nyid dar la bab/ /la la yi ni tshon po ste/ /kha cig la ni sha phra sngo/ /gang tshe sems nyid bud med kyi/ /rnam pa nyid du skyes gyur na/ /de tshe rang sems 'dod can gyis/ /bdag nyid bdag gis gang gis spyod/ / rnam pa thams cad bdag rang bzhin/ /blo dang ldan pas thams cad ni/ /yul rnams nye bar spyod pa'i phyir/ /byis pa bzhin du mi 'jug go/ /lag pas lag pa bzung nas ni/ /rmi lam 'khrul pa bdag nyid kyis/ /rkun ma bdag gis 'dzin shes pa'i / /rnam par smra ba gzhan gyis smod/ /skam po rtswa la phyugs rnams ni/ /bza' ba'i sems ni mi rnams min/ /e ma 'o rnam par rtog pa 'di / /rnal 'byor pas kyang bsam mi khyab/ /ma dran pa dang lus reg dang / / gnyid log pa dang rlung rnams kyis/ /nya dang bya dang khyi dang sbrul/ /sems can de dag 'tsho bar 'gyur/ /dben sa brlag sha khyi dang 'dra/ /rang gi 'khor dang khyab pa ste/ /gnod byed dang ni gnod sbyin mos / /las sna tshogs pas mthong bar 'gyur/ /bshang gcis khyab pa rnag rgyu ba/ /yi dags rnams kyis chu bor mthong / /dang ba dang ni bsil ba'i chu/ /mis de mthong dang btung bar 'gyur/ /'bras bu 'dod dang mi 'dod pa'i/ /rnam pa las kyis yongs gnas pa/ /rnam shes de dang de nyid kyis/ /stong pa'i don la 'jug par 'gyur/ /kye ma'o yul ni sna tshogs pa/ /dus gcig du ni rnam pa mang / /rol mo'i tshogs kyi sgra bzhin du/ /rtog pa nyid du rjes 'gror 'gyur/ /gal te don yod de med pas/ /don gyi bya ba byed mi 'gyur/ /skyur rdzas gzhan gyis zos pa na/ /gzhan gyi kha nas kha chu 'byung / /mtshan mor kha cig 'bras bu ni/ /zos pas gzhan la smra byed na/ /gal te skyur zos des smras na/ / nyan por 'gyur bar mi 'gyur ram/ /rmi lam 'dod pa'i mo phrad pas/ /bde ba'i phun sum tshogs rgyu med/ /don med pas kyang khu ba ni/ /ji ltar shor bar mi 'gyur ram/ /goms pa'i stobs kyis rmi lam du/ /mthong yang gal te yod zer na/ /bu mo'i lto las bu skyes pa/ /mthong ba zhes bya rigs pa min/ /yul rings lam dang ri rnams dang / /yul rnams khang pa'i nang du ni/ /tha dad pa ni rab mthong bas/ /rmi lam mthong ba don med pa'o/ /theg pa chen po'i rnal 'byor spyod pa'i gzhung la 'jug pa slob dpon kam pa la'i zhal snga la sogs pas dpe rnams bstan to/ /rnam rig gi rang bzhin gyi chos thams cad rnam par gzhag pa'i phyir ro/ /de phyi'i rnam pa can gyi rnam par shes pa yin gyi/ /don 'khrul pa'i rang bzhin du snang ngo / /don snang ba yang gsum ste/ yod par snang ba dang / med par snang ba dang log par snang ba'o/ / de la yod par snang ba ni dper na/ bye ma ni smig rgyu'i rnam pas so/ /med par snang ba ni rab rib can gyis skra shad la sogs pa bzhin no/ /log par snang ba ni dung dkar po ser po ltar snang ba bzhin no/ /de ltar snang ba gsum gyi dbang gis phyi rol gyi don med pa yang rmongs pa'i blo can gyis gzung bar 'gyur ro/ /smon pa'i 'bras bu zhes pa ni de nyid rnam par rig pa'i rang bzhin phyi rol gyi don snang ba'i phyir ro/ /de yang med de zhes pa la phyi dang nang gi ngo bo med do/ /smon lam la sogs pa'i nye bar dmigs pa med pa'i phyir ro zhes pa ni/ 'dun pa ni smon lam ste/ phyi'i rnam pa nyid du mngon par zhen pa'o/ /de'i nye bar dmigs pa ni gzung ba 'dzin pa'i tshul gyis gzung ba'o/ /med pa ni de'i ngo bo med pa'i phyir ro/ /ji skad du/ yang dag ma yin kun rtog yod/ /de la gnyis po yod ma yin/ /de la stong pa nyid yod de/ /de la yod na de yod do/ /yod dang med dang yod pa'i phyir/ /de yang dbu ma'i lam yin no/ /zhes 'byung ngo / /de bas na phyi rol gyi dngos po lta bur bsgom pa dmigs su med cing yod pa ma yin te zhes bya ba ni rnam par shes pa'i rnam pa dngos po so sor snang ba'i rtog pa ni med do/ /sems kyi rang bzhin yin pa'i phyir ro/ /zhes pa ni sems nyid so sor snang ba'i phyir ro/ /don dang sems can bdag rnam rig / so sor snang ba rab skyes pa/ /rnam par shes pa de don med/ /de med pas kyang de yang med/ /gcig ni rkyen gyi rnam par shes/ /gnyis pa nye bar longs spyod pa/ /spyod dang gcod dang skul byed ni/ /de la sems las 'byung ba yin/ /zhes 'byung ngo / /spyi'i don zhes bya ba ni mdo sde la sogs pa'i 'gyod pa sel bar byed pa'i phyir ro/ /gang gi phyir mdo sde pa la sogs pa rnams kyi phyogs ni phyi rol gyi don med pa dang rnam par rig pa tsam yod pa'o/ /gang phung po la sogs pa zhes pa la/ phung po dang khams dang skye mched rnams so/ /de rnams med pa ni gcig dang du ma dang bral ba'i phyir med pa'o/ /de bas na phyi rol tu gyur pa phung po la sogs pa med pas rnam par shes pa tsam 'ba' zhig tu yod pa zhes rnal 'byor spyod pa pa rnams kyi phyogs so/ /de nyid kyi phyir bsgom par bya bar gyur pa phung po la sogs pa med pas 'ba' zhig dri ma med pa mtha' yas pa nam mkha' dang mtshungs pa/ sems tsam gang yin pa ni zhes pa ni rnam par rig pa tsam mo/ /de ni dngos po med de zhes pa la/ /ma dag pa yin pas grol ba thob par mi 'gyur ro zhes bshad do/ /rtag tu med pa yin pa'i phyir/ /zhes pa ni/ shes bya med pas shes pa rnams mi dmigs pa'i phyir ro/ /ji skad du/ shes bya'i sngon du shes pa na/ /ci la dmigs te de 'byung 'gyur/ /shes bya 'jig nas shes pa na/ /ci la dmigs te de 'byung 'gyur/ /shes dang shes bya lhan cig na/ /ci la dmigs te de 'byung 'gyur/ /zhes bshad pa'i phyir ro/ /yang na rtag tu med pa ma yin pa'i phyir ro zhes pa ni/ /rtag tu ni dus thams cad de dus gsum la yang sems ni med do/ /gang gi phyir 'das pa'i sems gang yin pa de ni 'jig pa'i phyir zhes bya ba yod pa ma yin no/ /ma 'ongs pa'i sems kyang ma phrad pa'i phyir ro/ /rnam par shes pa zhes ma grags so/ /da ltar byung ba yang 'das pa dang ma 'ongs pa'i skad cig ma dang ldan pa'i phyir snga ma bzhin no zhes dus gsum gyi rang bzhin sems med do/ /gang 'das pa ni de 'jig pa/ /ma 'ongs pa ni ma thob ste/ /skad cig gnyis ka ldan pa'i phyir/ /da ltar byung ba gang la gnas/ / zhes 'byung ngo / /de bas na rigs pa 'dis/ /sems rnam par dpyad pa rnam par shes pa gsum gyi rang bzhin sngags dang phyag rgya'i rim pas 'od gsal bar bya'o/ /des ni ye shes gsum dpyod pa'i mtshan nyid sbas pa'i don bstan pa yin no/ /gang kun rdzob kyi bden pa'i bdag nyid can zhes pa la/ 'od gsal ba las myur du 'am snang ba thob pa la sogs pa'i rim pas brgya byin gyi gzhung dang 'dra ba'i ye shes kyi sku gang spros pa sgyu ma lta bu'i lha'i sku bsgom pa ni sgyu ma'i dpe bcu gnyis kyis nye bar mtshon pa'o/ /de yang mi rigs te zhes pa ni de kho na nyid kyi ngo bo ma yin pas so/ /'od gsal bar rnam par dag pa'i phyir ro zhes pa ni mngon par byang chub pa'i rim pa bzhi pas de yang sbyang bar bya ba'i phyir ro/ /de ltar kun rdzob kyi bden pa tsam gyi dngos po ni zhes pa la bdag byin gyis rlob pa'i rim pas thob par bya ba ye shes kyi sku'i mtshan nyid lha'i sku'i rnam pa'o/ / dngos po ma yin te zhes pa ni/ don dam pa ma yin no/ /de gnyis pa las ma 'das pa'i phyir ro zhes pa ni gnyis su snang ba'i phyir ro/ /der ni sgyu ma lta bu'i lha'i rnam pa dang / sgyu ma'i dpe de gnyis so sor snang ba yod pa'o/ /gang dang gang du gnyis so sor snang ba yod pa de dang de ru 'khor ba kho na yin te/ gzung ba dang 'dzin pa so sor snang ba bzhin no/ /de'i phyir na de yang rnam par dag par bya bar rigs so/ /de bas na zhes bya ba la sogs pas rim pa bzhi'i 'bras bu zung du 'jug pa'i rim pa'i phan yon tsam bstan to/ /bden pa gnyis lta bur bsgom pa ni zhes pa la kun rdzob dang don dam pa dbyer med pa'i ngo bo nyid zung du 'jug pa'i rim pa bsgom pa'o/ /dka' bas dmigs pa yin pas so/ /zhes pa ni sngon bsags pa'i dge ba'i stobs dang dge ba'i bshes gnyen dang phrad pa dang rjes su mthun pa'i gnas su skye ba dang byang chub sems dpa'i rigs dang 'brel pa dang / sangs rgyas kyis byin gyis brlabs pas thob par 'gyur zhes bya ba'i don to/ /des ni kun rdzob bden pa yang dag par rtogs pa'i mtshan nyid can sbas pa'i don bstan to/ /sbas pa zhes pa la sems rnam par dag pa dang bdag byin gyis rlob pa'i rim pa brjod par 'dod pas so/ /don dam pa'i bden pas zhes pa ni phyag rgya dang ting nge 'dzin gyi rim pas thob par bya ba mngon par byang chub pa'i rim pas thob par bya ba la'o/ /sgom pa med pa ste zhes pa ni sgom pa'i rigs pa ma yin te/ gang gi phyir sgom pa zhes bya ba ni sems kyi rnam par dpyod pa'i mtshan nyid can rtog bcas kyi rnam par shes pa'i ngo bo ste 'dus byas so/ /don dam pa'i bden pa ni rdzas su med pa'i phyir 'dus ma byas pa'o/ /'dus byas pa dang 'dus ma byas pa'i rgyu dang 'bras bu'i 'brel pa mi rigs te/ bum pa dang nam mkha' bzhin no/ /gang gi 'dus byas pa nyid 'dus byas pa'i rgyu 'am 'bras bur 'thad de nas kyi sa bon dang nas kyi myu gu bzhin no/ /de bzhin du yang 'jim pa dang dbyug pa dang 'khor lo dang skud pa dang skyes pa'i lag pa'i rtsol ba rnams kyis bum pa bzhin no/ /chos thams cad kyi chos nyid kyi ngo bo don dam pa'i bden pa la de ltar bsgom pa mi rigs te/ /rtag pa bskyed par bya ba ma yin pa'i phyir ro/ /ma grub pa 'am ma dag pa gang yin pa de thob par bya ba'am rnam par dag par bya ba'i phyir bsgom par bya ba yin te/ gang rang bzhin gyis grub pa'am rnam par dag pa yin pa de la sgom pas dgos pa med do/ /gal te yod na don dam pa nyid du mi 'gyur ro/ /de nyid bstan par bya ba'i phyir / gzod ma nas dag pa'i phyir zhes te/ rtag pa ni dri ma med pa zag pa med pa ni thog ma nas dag pa'i phyir ro/ /gal te de lta yin na mngon par byang chub pa thob par bya ba'i phyir phyag rgya dang ting nge 'dzin gyi rim pa'i sgom pa ci'i phyir bya zhe na/ smras pa/ phyag rgya'i 'brel pa'am ting nge 'dzin mngon du bya bas 'od gsal ba ni skye ba'am sbyang bar bya ba ma yin te/ de nyid gzod ma nas grub pa'i phyir ro/ /phyag rgya dang ting nge 'dzin tsam gyis glo bur gyi dri ma bsal bar bya ba yin gyi/ de kho na nyid thob pa ni ma yin no/ /de kho na nyid ni rang snang ba ste/ nam mkha' bzhin no/ /chu khams gser dang nam mkha' yi/ /dag pa bzhin du dag par 'dod/ /ces bshad pa'i phyir ro/ /des ni 'od gsal ba la 'jug pa'i mtshan nyid can gyi rim pa bzhi pa ston to/ /gang kun rdzob kyi bden pa'i bdag nyid can zhes bya ba la rim pa gsum pas thob par bya ba'i sgyu ma lta bu'i sku sgom pa de yang bsgom par bya ba ma yin zhes pa la bsam par bya ba mi rigs so/ /mi bden pa nyid do zhes bya ba ni rim pa bzhi pas rnam par dag pa la ltos pa'i phyir ro/ /rnam pa zhes bya ba la sogs pa 'dis zung du 'jug pa'i rim pa'i ting nge 'dzin bstan to/ /bden pa gnyis kyi bdag nyid zhes bya ba ni/ /kun rdzob dang don dam pa dbyer med pa'i zung du 'jug pa'i ting nge 'dzin to/ /dngos po'i bsgom par bya ba mi 'gyur te zhes pa ni de nyid bsam par bya ba ma yin no/ /de ci'i phyir zhe na/ bden pa gnyis gnyis su med par mthong ba tsam gyis grol bar 'gyur ba'i phyir ro zhes pa ni bden pa gnyis dbyer med pa'i rang bzhin gyi mi gnas pa'i mya ngan las 'das pa'i dbyings mngon du gyur pa tsam gyis rnam par grol ba thob pa'i phyir ro/ /de bas na zhes bya ba la sogs pas zung du 'jug pa'i rim pa nye bar bsdus pa bstan te/ sgom pa po zhes pa ni rnal 'byor pa'o/ /sgom pa ni bsgom pa'i shes rab bsgom par bya ba ni bsgom du rung ba'i man ngag go/ /de ltar mngon par zhen pa ni 'di nyid rnam par rtog pa'o/ /zung du 'jug pa'i rim pa rtogs pa rnams la zhes pa ni mi gnas pa'i mya ngan las 'das pa'i dbyings thob pa'o/ /rnal 'byor pa rnams la yod pa ma yin no zhes bya ba'i tha tshig ste mi slong ba'i phyir ro/ /zung 'jug ting 'dzin la gnas pas/ /slar zhing gang la mi slob po/ /'di ni rdzogs pa'i rnal 'byor zhes/ /de ni rdo rje 'chang chen po/ /rnam pa thams cad mchog ldan pa'i/ /thams cad mkhyen pa de nas 'gyur/ /'das pa dang ni ma 'ongs pa/ /da ltar byung ba srid gsum la/ /de yis skad cig ma lus par/ /'od gsal rnam dag 'dzin pas mthong / /zhes 'byung ngo / /rdo rje 'chang chen pos gsungs te zhes bya ba ni sdud pa po'i tshig go/ /mthar thug pa zhes bya ba ni 'od gsal ba la 'jug pa dang zung du 'jug pa bstan pa'i phyir ro/ /de ltar yi ge'i don gyis bskyed pa'i rim pa'i yan lag tu gyur pa'i stong pa nyid kyi de kho na nyid bstan pa dang / spyi'i don gyi rnam par thar pa'i sgo gsum gyi sgom pas mdo sde pa la sogs pa'i 'gyod pa sel ba'i mtshan nyid can gyi don bstan to/ /sbas pa'i don gyis sems rnam par dag pa dang / bdag la byin gyis brlab pa'i rim pa dag bstan to/ /mthar thug pas 'od gsal ba la 'jug pa dang zung du 'jug pa'i rim pa dag bstan to zhes rdo rje 'chang chen po'i tshigs su bcad pa'i bskyed pa'i rim pa'i phyogs gcig dang rdo rje bzlas pa ma gtogs pa'i rdzogs pa'i rim pa yang bstan to/ /de bzhin gshegs pa thams cad kyi zhes bya ba la rdo rje 'chang lnga'i'o/ /rnam pa kun nas zhes pa ni sku gsung thugs kyi bya ba rnams kyis so/ /'od gsal ba zhes pa ni de bzhin gshegs pa rnams kyi 'od gsal ba'i ngo bo nyid de gtan tshigs ni mi 'da' ba'i phyir ro/ /ting nge 'dzin de la dmigs pa zhes pa ni phyag rgya dang ting nge 'dzin gyi rim pas thob par bya ba'i mngon par byang chub pa'i ting nge 'dzin zhes bya ba'i tha tshig go/ /snod du gyur pa'i zhes bya ba la sogs pa ni bdag dang dbang phyug la sogs pa'i dngos po thams cad do/ /thams cad dang bral ba ni de dag dang bral ba'o/ /de la bdag ces bya ba sngar bshad pa'i rigs pas med do/ /de la rtag pa la sogs pa'i chos rnams ga las 'gyur/ bdag ces bya ba dngos po med/ /byed pa po zhes ga las brjod/ /chos can yod na 'jig rten pas/ /chos la bsam pa rab tu 'jug /phung po bdag min der de min/ /de la de med de med min/ /me shing bzhin du 'dres pa min/ /de phyir bdag ces ji ltar yod/ /ces 'byung ngo / /de'i don 'di yin te/ bdag ni phung po yin no zhes brjod pa mi rigs te de'i bdag nyid kyi 'brel pas phung po bzhin du bdag dang mi rtag par 'gyur ro/ /rigs pa pa rnams kyi phyogs ni bdag ces brtan pa'o/ /skyon de sel bar bya ba'i phyir/ /bdag la phung po yod ces phyogs 'dzin na/ de'i tshe rtag pa dang mi rtag pa dag gi gzhi dang gzhi can gyi 'brel par mi 'gyur ro/ /gzhi dang gzhi can gyi 'brel pa ni/ /rtag dang mi rtag dag gi med/ / ces 'byung ngo / /'o na gzhi rtag pa yin na gzhi can rnams mi rtag pa yin no zhes 'dod ce na/ smras pa/ gzhi dang gzhi can gyi 'brel pa nyid du mi 'gyur ro/ /gzhi dang gzhi can gyi 'brel pa nyid rgyu dang 'bras bu'i 'brel pa yin te/ phan gdags par bya ba ma yin pa ni gzhi can mi rigs pa'i phyir ro/ /phan gdags par bya ba dang phan 'dogs par byed pa nyid ni gzhi dang gzhi can gyi 'brel pa nyid yin no/ /rgyus ni 'bras bu la phan 'dogs na rang la gnas pa'i chos dang med par mi 'byung bas nges par phan 'dogs par byed pa dang / 'bras bus kyang rgyu la gnas pa'i chos ma blangs pas de la 'byung bar mi 'gyur ro/ /de bas na gal te bdag dang phung po dang rgyu dang 'bras bu'i 'brel pa khas blangs na de'i tshe phung po mi rtag pas kyang bdag kyang mi rtag par 'gyur ro/ /gal te bdag rtag pa yin na/ /phung po rnams kyang rtag par 'gyur ro/ /de yang ma mthong ste rang dang gzhan gyi grub pa'i mtha' dang 'gal ba'i phyir ro/ /gzhan yang bdag gzhi yin mod kyi de yang rgyu yin pas phung po bdag nyid kyi 'bras bu byung na 'jig par 'gyur ro/ /phyogs gnyis ka la yang mi rtag par 'gyur ro/ /gal te phung po la bdag yod de zhes 'dod na de'i tshe snga ma bzhin du gzhi dang gzhi can gyi 'brel pa mi 'grub bo/ /de lta yin mod kyi de bzhin du yang phung po rnams gzhi yin pas rgyu yin pa'i phyir 'bras bu rnams nges par mi 'byung ngo zhes pas phung po rnams kyis bdag skye bar mi 'gyur bas bdag kyang mi 'gyur ro/ /gal te res 'ga' byung na de'i tshe de rnams kyis bdag bsal bar 'gyur ro/ /gang zhig res 'ga' byung ba de ni rtag pa ma yin te lam gyi skyes bu'i bzhin no zhes de nyid mi rtag par 'gyur ro/ /phung po dang bdag phan tshun tha mi dad pa ste me dang bud shing bzhin no zhes 'dod na/ de'i tshe bud shing rnams sol ba bzhin du 'gyur ba me zhes brjod pa de bzhin du bdag ni phung po'i ngo bo nyid 'thob/ phung po'i tha snyad du brjod do zhes shin tu mi rtag pa nyid khas blangs pa yin no/ /de bas na phyogs bzhi po yang bzang po ma yin no/ /de bzhin du gzugs kyi phung po la rnam pa bzhi bkag nas tshor ba dang 'du shes dang 'du byed dang rnam par shes pa rnams kyi yang phan tshun bdag tu smra ba khas blangs pa bkag par shes par bya'o/ /des ni ri'i rtse mo rnam pa nyi shu las byung ba'i 'jig tshogs kyi lta ba bkag go/ /gang gis 'khor ba'i 'khor lo ma lus pa 'di nyid mtshan du 'khrul 'khor gyi rigs pas 'khor ba zhes bdag tu smra ba'i phyogs bkag pa'o/ /dbang phyug dang thams cad byed pa dang thams cad 'jig par byed pa nus pa gsum gyis sprul pa'i bdag nyid che ba rtag pa yin no zhes 'gal ba ste gang gi phyir gal te thams cad byed cing 'jig par byed pa na de'i tshe cig car du byed pa'am 'jig pa ci'i phyir mi byed/ de mi byed pas rim gyis byed pa ma yin te/ de nyid mi rtag pa nyid do/ /gang gi phyir gang gi dus su byed na de'i tshe de la nus pa yod de / dus gzhan du de med do zhes ltos pa dang bcas pa yin no/ /ltos pa dang bcas pa'i nus pa med pa ste/ lhan cig byed pa la ltos pa'i phyir te/ bum pa bzhin no/ / de bas na dbang phyug med do/ /sgrub dang byed pa nges pa rang bzhin dang / /dus dang gza' dang dbang phyug lha nyid dang / /rgal ba bsod nams gshin rje mthar byed ni/ /mngon du byas pa'i ming gi rnam grangs yin/ /zhes la la 'dod do/ /de la sgrub pa zhes pas dngos po 'di dag skyed par byed pa dang / 'jig par byed pa ste/ de nyid gcig pu 'gro ba'i rgyu yin zhe na/ de yang mi rigs te/ rang gi las kyi bag chags kyis sprul pa'i khams gsum pa la sprul pa gzhan ni med de de nyid sngar bkag pa'i phyir ro/ /lus dang ngag dang yid kyi las/ /dge dang mi dge rang gis byas/ /'jig rten pa yis de 'bras spyod/ /byed pa gzhan ni kha cig med/ /ces bshad pa'i phyir ro/ /byed pa po zhes bya ba rnam par dpyad na med de/ nyon mongs pa dang las dang skye ba'i rgyun gyi phung po rnams 'khor ba nyid khams gsum zhes bshad do/ /khur bu khur ba ltar kha cig gang zag yod de/ gang gis phung po 'di rnams spangs te/ phung po gzhan len pa'o/ /'dir gang zag ni las dang nyon mongs pa'i bag chags dang ldan pa'i rnam par shes pa nyid do/ /de nyid khams gsum gyi ngo bor yongs su 'khor bar 'gyur te/ de bas na byed pa po gzhan med do/ /nges pa zhes bya ba ni 'chi bdag ces brjod de / de nyid kyis 'gro ba bskyed cing 'jig par byed do zhe na/ de yang ma yin te/ gal te 'chi bdag yin na de'i tshe 'jig pa'i nus pa dang ldan pa yin gyi/ skye ba'i nus pa dang ldan par mi 'gyur ro/ /skye ba'i nus pa dang ldan na 'chi bdag ma yin no/ /de bas na nges pa'i smra ba 'di ni brtags pa pa yin no/ / rnam par shes pa dang dbang po dang tshe 'gag par 'gyur na/ shi'o zhes brjod pas 'chi bdag med do/ /rang bzhin gyis smra ba'i phyogs su dngos po rnam pa sna tshogs par skye bar mi 'gyur gyi thams cad rang bzhin gcig par 'gyur ro/ /sna tshogs pa nyid rang bzhin yin zhe na/ smras pa/ de ltar yin na cig car du skye ba dang 'jig par ji ltar mi 'gyur/ de bas na rang bzhin gyis smra ba'i phyogs ni mi rigs so/ /dus smra ba rnams na re/ dus kyi 'byung ba smin par 'gyur/ /zhes zer na/ de yang mi rigs te/ gang gi phyir dus de ni 'das pa dang ma 'ongs pa'i dbye bas gsum du 'gyur te/ 'das pa ni zhig pa'i phyir smin par byed pa'i nus pa med do/ /ma 'ongs pas kyang smin pa'i nus pa yod pa ma yin te ma thob pa'i phyir ro/ /da ltar byung ba la yang nus pa med de skad cig ma yin pa'i phyir ro/ /de bas na skye ba'am 'jig pa'i nus pa med do/ /gzhan yang nyin mo la sogs pa'i mtshan nyid nyi ma la sogs pas byas pa zla ba la sogs pa'i dus yin no zhes mi rigs te/ re zhig zla ba la sogs pa nyid ni yod pa ma yin te/ skad cig ma yin pa'i phyir ro/ /de rnams kyis byas par gyur pa'i dus kyis kyang 'byung ba skye ba la sogs pa'i nus pa ji ltar yin zhes dus kyi smra ba'i phyogs med do/ /nyi ma la sogs pa gza' rnams kyis kyang khyim dang rgyu skar la rgyu ba'i dbang gis 'gro ba skyed pa dang 'jig par byed do zhe na/ de yang mi rigs te/ gza' rnams ni shar ba dang / nub pa'i dbang gis mi rtag pa yin no/ /gang zhig rang yod pa ma yin pa des ni gzhan bskyed pa'i nus pa ji ltar yod/ smin drug la sogs pa gzung ba'i cha'i sbyor bas de rnams la dgos pa med do/ /rang nyid kyis ji ltar mi byed de/ ltos pa dang bcas pa'i phyir de rnams kyang mi rtag pa zhes bya'o/ /sngar bshad pa'i rigs pas dbang phyug bkag pas de'i byed pa nyid dang rtag pa nyid kyang mi rigs so/ /lhas thams cad byed do zhes zer na bde ba'i rang bzhin thams cad ci ste mi byed sdug bsngal gyi rang bzhin byed pa dgos pa med do/ /de yang spang bya yin pa'i phyir ro/ /de bas na/ 'dod dang mi 'dod 'bras bu can/ /las rnams kyis ni yongs smin pa/ /rnam par shes pa stong pa 'di/ /de de rnam pa don la 'jug / ces 'byung ngo / /de bzhin du/ las las 'jig rten sna tshogs skye/ / zhes bshad pa'i phyir ro/ /nga rgyal las ni rab skyes pa/ /bdag gi byed pas 'phel 'gyur te/ /'gro la phan pa nges smras pas/ /skye dgu ma lus 'di dag gsungs / /zhes klu sgrub kyi zhal snga nas kyis kyang bstan to/ /de bas lha gzhan med do/ /de bzhin du skal ba zhes bya ba ni gang gi dbang gis 'jig rten pa bde ba dang ldan par 'gyur ba dang de med pas sdug bsngal dang ldan par 'gyur ro/ /tshad mas gnod par bya ba'i phyir de rnams ni med do/ /gal te de lta yin na pha rol gyi bstan pas grub pa'i bdag la sogs pa med do/ /de rnams kyang las kyi rnam grangs yin pas de'i mtshan nyid ni logs su med do/ /de bzhin du bsod nams kyang 'gag par bya ba yin no/ /gshin rje mthar byed dag kyang nges pa bzhin du bshad par bya'o/ /de nyid kyi phyir de rnams ni sngar byas pa'i rang gi sems kyi chos kyi bag chags kyi ngo bo'i las la ming gi rnam grangs yin no zhes don gzhan med do/ /de ltar gzhan gyis yongs su brtags pa'i bdag la sogs pa de rnams snod du 'gyur ba yin no/ /dngos po thams cad bral ba dang / /zhes pa ni tshad mas gnod pa'i phyir ro/ /rgyu dang 'bras bu'i ngo bo sdug bsngal dang kun 'byung gi bden pa dag yod de/ sdug bsngal ba'i nye bar len pa'i phung po lnga'o/ /de la gzugs kyi phung po'i phyogs gcig gis bzung ba'i lus kyi dbang po 'byung ba chen po bzhi'i bdag nyid yin pa'i phyir khams bzhi ni mngon sum gyis grub bo/ /de bzhin du gzugs la sogs pa'i yul rnams kyang de'i phyogs gcig nyid kyis 'grub bo/ /dbang po dang yul phrad pa las skyes pa'i mig la sogs pa'i rnam par shes pa'i tshogs drug kyang mngon sum gyi spyod yul yin no/ /rten dang brten pa dang dmigs pa drug rnam par gzhag pa'i phyir khams bco brgyad ni mngon sum dang rjes su dpag pa'i tshad mas grub bo/ /kun 'byung gi bden pa yang ma rig pa dang sred pa'i rang bzhin 'bras bur gyur pa'i sdug bsngal gyi bden pa mthong bas rtogs par bya ste/ du ba las me bzhin no/ /de bas na phung po la sogs pa yod de/ de rnams spang bar bya ba'i phyir bcom ldan 'das kyis 'gog pa dang lam gyi bden pa gnyis gsungs te zhes smra ba la lan ni rnam par shes pa 'di 'ba' zhig phyi'i ngo bo snang ba ste rang gsal ba'i phyir ro/ /phung po la sogs pa gzhan rnams ni med de/ gzhan gyi snang ba yin pa'i phyir ro/ /rang snang ba gang yin pa de ni rnam par shes pa yin te gzhan ma yin pas/ gzugs la sogs pa med do/ /de'i rnam pa can de rnams ni phyi rol gyi ngo bor 'khrul pa'i dbang gis snang ste don dam par ma yin no/ /dper na rgya mtsho dang dba' rlabs bzhin no/ /ji skad du/ dba' rlabs g.yo ba de dang des/ /chus ni rang bzhin tha dad pa/ /snang bar byas te skad cig gis/ /slar yang g.yo med nyal bzhin 'gyur/ /gang zhig de ni gnyis snang ba/ /de la rigs pa'i spyod yul min/ /glo bur du ni brjod pa yi/ /brag ca yi ni sgra bzhin no/ /zhes bshad pa'i phyir ro/ /de bas na phung po dang khams dang skye mched can ni med de/ rnam par shes pa nyid de'i rnam pa nyid du snang ba'i phyir ro/ /des ni mdo sde pa yang bkag pa yin te/ gang gi phyir de'i rnam par shes pa'i rnam pa dngos po yin na yang mngon sum gyi yul ma yin no/ /'on kyang mig la sogs pa'i rnam par shes pa'i bskyed pa med par mi 'byung ba'i phyir/ phyi rol gyi don ni rjes su dpag pas rnam par gzhag go/ /de bas na mngon sum mam rjes su dpag par bya ba'i dngos po ni rnam pa thams cad du med de/ /rnam par shes pa kho na mngon sum dang rjes su dpag pa'i tshad ma gnyis kyi ngo bor snang ba'i phyir ro/ /des ni nyan thos pa dang mdo sde pa'i phyogs bkag pa yin no/ /rnam rig smra bas ni rnam par rig pa tsam 'ba' zhig tu don la mi ltos pa yod de/ /gang gis sems can snod du gyur pa'i khams gsum pa 'di snang ba yod pa yin no/ /nyi ma zla ba nam mkha' dang / /rgyu skar tshogs dang sa gzhi dang / /chu bo rgya mtsho phyogs ri rnams/ /de dag sems kyi sprul pa yin/ /ji srid pa yi rtse mo'i bar/ /khams gsum pa rnams 'di dag ni/ /gang zhig thams cad 'di ltar snang / /sems nyid las ni nges par byung / /zhes bshad pa'i phyir ro/ /de bzhin du dbyig gnyen gyi zhal snga nas kyang / /rnam rig tsam ni don med de/ /med pa'i don ni snang ba'i phyir/ /ji ltar rab rib can gyis ni/ /med pa'i sgra zla sogs mthong bzhin/ /zhes bshad do/ /de ltar rang bzhin gyis dag pa yang glo bur gyi dri ma dang ldan pa bzhin du snang ste me long bzhin no/ /de'i ngo bo ni nyams par mi 'gyur te/ /mtshan nyid gsum yongs su dag pas de'i rang bzhin rnam par dpyad par bya'o/ /'di lta ste/ kun brtags dang gzhan dbang dang yongs su grub pa'o/ /de la kun brtags ni phyi rol gyi don med pa yang 'di nyid kyis tha snyad du bya ba yin te/ bum pa 'di dang snam bu 'di zhes pa la sogs pa bzhin no/ /gzhan dbang ni med pa de nyid gzung ba dang 'dzin pa'i tshul du rtogs pa'o/ /yongs su grub pa ni gzung ba dang 'dzin pa'i ngo bo med pas 'ba' zhig dri ma med pa mtha' yas pa nam mkha' dang 'dra ba'i ye shes myong ba'o/ /glang po zhes don de rnam pa/ /de med pa ni mkhas pa yis/ /kun brtags la sogs rang bzhin rnams/ /grangs ni ji bzhin shes par bya/ /zhes 'byung ngo / /de bzhin du/ dang po yis ni mtshan nyid kyis/ /ngo bo med pa gzhan dag kyang / /rang nyid dngos med shes bya ba/ /de yi ngo bo med par bstan/ /gang phyir chos rnams don dam pa/ /de yang de bzhin nyid yin no/ /rtag tu de bzhin yod pa'i phyir/ /de nyid rnam rig tsam nyid do/ /zhes 'byung ngo / /mtshan nyid gsum yongs su brtags pas sems tsam shes nas rtag pa bde ba chos kyi sku'i mtshan nyid rnam par rig pa tsam dang shes pa dang 'dra ba rnam par snang bar 'gyur ro zhes bya bas thar pa dang 'ching ba'i cha dbye ba'o/ /de ni sems med mi dmigs pa/ /'jig rten las 'das ye shes te/ /gnas ngan lan gnyis spong ba'i phyir/ /de ni gzhi ni gnas gyur pa'o/ /de nyid zag pa med pa'i dbyings/ /bsam gyis mi khyab rtag par dge/ /bde ba rnam par grol ba'i sku/ /thub pa chen po'i chos zhes bya/ /zhes 'byung ngo / /'dir smras pa/ sems tsam zhes bya ba don dam par med de/ gang gi phyir shes pas na sems so/ /re zhig khyod nyid kyis phyi rol gyi dngos po bkag par byas so/ /de med pas ci shes pas sems zhes bya ste/ gzung ba med pas 'dzin pa med pa'i phyir ro/ /de bas na sems med na de'i phyi rol gyi snang ba gang las yin te/ mo gsham gyi bu 'gro ba dang 'ong ba la sogs pa bzhin no/ /gzod ma nas ma skyes pa'i ngo bo'i rang bzhin dngos po rnams la gang dang gang gi lhan cig tu snang ba'am mi snang ba yin no/ / gang gis sems nyid don gyi rnam pa zhes brjod de/ /don ni sgyu ma dang smig rgyu la sogs pa bzhin du brdzun pa yin pas de sems kyi rnam pa nyid ji ltar yin/ sems kyang cha cha'i dbye bas rnam par dpyad na stong pa nyid kyi rang bzhin yin pas de'i don gyi rnam pa ji ltar yin no/ /de bas na rnam par shes pa'i bag chags kyi gdon gyis bzung ba'i blo dang ldan pa khyod kyis gzung ba dang 'dzin pa'i dbye bas phyi nang gi tshul du brtags so/ /sems med pas de la mtshan nyid gsum gzhag pa ni ji ltar yin/ 'ba' zhig ngo bo med pa'i rang bzhin gyi sems la mtshan nyid gsum ni ga las 'byung / de ni dri ma dang bcas pa yang ma yin te/ gang zhig rnam par sbyang ba'i phyir/ /mtshan nyid gsum ni bsgom par bya/ /'byung ba la sogs rnam shes la/ /bshad pa gzhan dag 'gag par 'gyur/ /ye shes pas ni bral gyur na/ /log par rtog par ma yin nam/ /gang tshe de nyid kho na la/ /rgyal bas mya ngan 'das gsungs pa/ /de tshe lhag ma brdzun pa ni/ /mkhas pa gang gis rtogs par byed/ /ces 'byung ngo / /de kho na nyid gcig kho na ni stong pa nyid kyi mtshan nyid de mya ngan 'das pa kho na'o/ /rgyal bas gsungs pa ni bstan pa'o/ /de tshe lhag ma ni phung po dang khams dang skye mched yod pa'i mtshan nyid dang rnam rig snang ba yang brdzun pa nyid do/ /de ltar mkhas pa gang ni rig pa dang ldan pas rtogs par ni dpyad par bya'o/ /de bas na gzod ma nas grub pa smos pa thams cad dang bral ba de kho na nyid yin no zhes bya ba rnam par shes pa'i rnam pa'i don dang rnam rig tsam yang med do/ /de bas na gzung ba dang 'dzin pa rnam par spangs pa'o/ /des ni gang zag la bdag med pa dang chos la bdag med pa nyid bstan to/ / des ni rnal 'byor spyod pa rnams kyi rnam pa dang bcas pa dang / rnam pa med pa'i rnam rig tsam gyi phyogs sel to/ /gnyis ka la bdag med pa'i mtshan nyid can gyi theg pa chen po'i phyogs bstan par bya ba'i phyir/ chos bdag med pa ni rang bzhin gyis 'od gsal ba ste zhes pa la/ /chos thams cad ni phung po la sogs pa dang rnam rig tsam ste/ de dag rang bzhin gyis bdag med pa ste stong pa'o/ /sgom pa ni 'di la rnam par thar pa'i sgo gsum yan lag yin te/ de la chos thams cad stong pa yin te/ gcig dang du ma dang bral ba'i phyir te gzugs brnyan bzhin no/ /dbang phyug la sogs pa'i rgyu byas pa yang ma yin te/ rgyu rnams med pa'i phyir ro/ /smon pa'i 'bras bu yang ma yin te/ smon lam la sogs pa dmigs pa med pa'i phyir ro/ /de ltar 'od gsal ba zhes nye bar bsdus pa'o/ /gang gi rang bzhin ngo bo yod ma yin/ /ngo bo med de gzhan gyi ji ltar rgyu/ /ngo bo med pas ji ltar 'bras bu skye/ /bde bar gshegs pas gtan tshigs ji ltar gsungs/ /de bzhin du/ yi ge a ni chos thams cad kyi sgo yin te/ /gzod ma nas ma skyes pa'i phyir ro/ /yi ge tsa ni chos thams cad kyi sgo yin te/ 'chi 'pho ba dang skye ba med pa'i phyir ro/ /yi ge sha chos thams cad kyi sgo yin te/ zhi ba'i ngo bo yin pa'i phyir ro/ /yi ge ha chos thams cad kyi sgo yin te/ dga' ba dang mya ngan las 'das pa'i phyir ro/ /de la sogs pa chos kyi yi ge nges pa'i tshig gi sgo nas bdag med pa nyid bstan to/ /de ltar chos bdag med pa nyid ni 'od gsal ba ste/ gzung ba dang 'dzin pa dang bral ba/ chags bral dang chags pa dang chags pa bar ma'i rim gyis rnam par sbyangs pa'i de kho na nyid bzhi pa'o/ /de dang mnyam pa nyid ni gnyis su med pa yin par dgongs so zhes pa ni ji ltar bdag nyid kyis 'od gsal ba nyams su myong ba de bzhin du ting nge 'dzin de nyid kyis khams gsum pa yang 'od gsal ba'i rang bzhin du blta bar bya'o/ /dper na ril por 'dzin pa'i ting nge 'dzin gyis bdag nyid 'od gsal bar byas nas khams gsum pa yang de bzhin du bya ba ni rjes su gzhig pa'i ting nge 'dzin to/ /rab tu byed pa las/ mgo bo nas ni rkang pa'i bar/ /ji srid snying gar phyin gyi bar/ /rnal 'byor yang dag mtha' la 'jug /ril por 'dzin pa de bshad do/ /brtan pa dang ni g.yo ba dag /sngon du 'od gsal bar byas te/ /phyi nas de bzhin bdag byas pa'i/ /rjes su 'jig pa'i rim 'di yin/ /zhes 'byung ngo / /chos bdag med pa ste de rnams dang mnyam pa nyid yin pas/ shes pa ni rang dang gzhan gyi rgyud la gnas pa'i dngos po'i tshogs ngo bo med pa 'od gsal ba dang mtshungs pas so/ /rang gi sems zhes pa ni rang dang gzhan gyi rgyud la gnas pa'i sems so/ /ye nas ma skyes pa zhes pa ni 'od gsal ba'i rang bzhin no/ /rdo rje gsum mi phyed pa'i lus ni rdo rje 'chang chen po'i sku'i rang bzhin gang la yod pa de la de skad ces bya'o/ /de nyid kyi phyir/ stong pa nyid kyi ngo bo ste/ / zhes pa ni lhan cig skyes pa'i dga' ba'i ming gi rnam grangs can chos kyi dbyings kyi ye shes kyi ngo bo 'od gsal ba zhes bya ba'i don to/ /mig gi spyod yul ma yin pa'i phyir ro zhes pa la nye bar mtshon pa yin te/ dbang po kun las 'das pa yang yin par shes par bya ste/ 'dus ma byas pa'i phyir ro/ /dgongs pa ma yin pa ni rim pa bzhi pas mngon par byang chub pa ston pa'i phyir ro/ /mi bskyod pa'i tshigs su bcad pa bstan par bya ba'i phyir/ mi zad pa zhes bya ba ni mi zad cing 'jig par mi 'gyur bas na mi zad pa ni don dam pa'i bden pa ste/ skye ba dang 'jig pa med pa'i phyir ro/ /brtan zhing snying po khong stong med/ /gcod med dbyer med mtshan nyid med/ /sred pa med cing 'jig med pa/ /stong pa nyid ni rdo rjer bshad/ /ces rdo rje rtse mo las 'byung ngo / /yang dag pa'i mtha' zhes pa ni de bzhin nyid de sems rnam par dag pa'i rim pas thob par bya ba'i 'od gsal ba'i de kho na nyid do/ /de nyid rdo rje ste zhes pa ni bdud thams cad kyis dbyer mi phyed pa'i phyir ro/ /de la dmigs pa'i ting nge 'dzin zhes pa ni sngags dang phyag rgya'i rim pa'i mtshan nyid can gyi sems rtse gcig pa nyid do/ /de la snyoms par zhugs nas zhes bya ba'i tha tshig go/ /phyi dang nang gi bdag nyid can gyi dngos po 'di rnams zhes pa ni/ snod kyi 'jig rten dang bcud kyi 'jig rten gyi rang bzhin gyis snang ba'i rnam par shes pa gsum mo/ /de dag ma skyes pa ste zhes pa ni/ sngags dang phyag rgya'i rim pas spong bar 'gyur na rang bzhin med pa de nyid do/ /rang bzhin gyis 'od gsal ba'i phyir ro zhes pa ni thams cad stong pa'am/ gnas la 'jug pas so/ /de bas na chos rnams re zhig med pa kho na'o zhes pa ni sngar bshad pa'i rigs pas rnam par shes pa gsum spong bar 'gyur na yod pa ma yin pa'i rgyud de las so/ /chos nyid med pa ste zhes pa ni de rnams kyi chos nyid kyang med/ /rnam par shes pa gsum med pas de las byung ba'i shes rab dang thabs dang ma rig pa'i ngo bo/ /nyin dang mtshan mo rang bzhin brgya drug cu yang med do/ /chos rnams med pa'i phyir ro zhes pa ni sems kyi rang bzhin rnam par shes pa gsum med pas so/ /rang bzhin gyi tshogs ni rnam par shes pa gsum gyi rtsa ba can yin te/ rnam par shes pa gsum med na de las byung ba'i sems las byung ba'i rang bzhin rnams kyang med de rgyu med pa'i phyir ro/ /de bas na 'di ltar nam mkha' lta bur bdag med pa'i mtshan nyid can zhes pa ni de nyid thams cad stong pa zhes bya ba'i 'od gsal ba'i de kho na nyid kyi khyad par ro/ /byang chub pa'i thabs so zhes pa ni sems kyi 'od gsal ba la 'jug pa'i mtshan nyid kyi de kho na nyid kyi lam mo/ /snying po yod pa yin no zhes pa ni sngags dang phyag rgya'i rim pas brtan par 'gyur ro zhes bya ba'i don to/ /de bzhin gshegs pa mi bskyod pas gsungs pa ste zhes pa ni rnam par shes pa'i phung po rnam par dag pa'i ngo bo yin pa'i phyir ro/ /dgongs pa ma yin pa zhes pa ni sems rnam par dag pa'i rim pa bstan pa'i phyir ro/ /bdag med pa ni don dam pa'i bden pa'o zhes pa ni de bzhin gshegs pa thams cad kyi rang bzhin gyi rnam par shes pa gsum rnam par dag pa'i mtshan nyid yin pas 'od gsal ba nyid don dam pa'i bden pa zhes bshad do/ /snang ba la sogs pa'i rnam par dag pa'i ngo bo thams cad stong pa'i go 'phang zhes bya ba'i tha tshig go/ /de nyid rdo rje zhes pa ni sa bcu pa la ye shes kyi dbang thob pa dang zag pa dang bcas pa dang zag pa med pa rnams so zhes pa ni dge ba dang mi dge ba dang lung du ma bstan pa'i chos dang ldan pa rnam par shes pa gsum mo/ /mtshan ma med pa'i phyir ro zhes pa ni rnam par shes pa gsum gyi rgyu med pas so/ /chos kyi mtshan nyid rnam spangs pa/ /zhes bya ba ni chos ni rnam par shes pa gsum ste/ de rnams kyi mtshan nyid ni gang gi mtshon par 'gyur ba'i mtshan nyid de/ dge ba dang mi dge ba dang lung du ma bstan pa'i rang bzhin rnams so/ /rnam par spang bya ba ni de med pa'i 'od gsal ba zhes bya ba'i tha tshig go/ /'di nyid du ni rigs pa bstan pa'i phyir/ /re zhig chos rnams nyid ma grub na zhes pa ni rnam par shes pa gsum nyid sngags dang phyag rgya'i rim pas spong bar 'gyur na nang med pa kho na'o/ /de rnams kyi mtshan nyid ga la yod de zhes pa ni rnam par shes pa de rnams kyi sems las 'byung ba'i rang bzhin rnams ga las yod/ mo gsham gyi bu zhes bya ba la sogs pas dpe bstan to/ /'o na ji ltar lha'i sku bskyed ce na zhes bya ba la sogs pa gang gi tshe 'od gsal ba mngon du gyur na/ de'i tshe sems can gyi don ma yin no zhes de bsgrub par bya ba'i phyir lha'i sku bskyed pa bstan te/ 'od gsal ba las cig car ram snang ba nye bar thob pa la sogs pa'i rim pas ye shes kyi sku spro ba ni lha'i sku bskyed pa'o/ /don dam pa'i bden pa ste zhes pa ni thams cad stong pa'o/ /de las rang la byin gyis brlab pa zhes bya ba'i rim pa ni rim pa gsum pas so/ /kun 'byung bas na zhes pa la cig car ram rim gyis sgyu ma lta bu de nyid du skyes pa zhes bya ba'i don to/ /'o na 'od gsal ba ni bag chags kyi dri ma thams cad dang bral bas rnam par mi rtog pa yin na de las lha'i sku ji ltar bskyed ce na/ smras pa/ sngon gyi 'phen pa'i shugs kyis 'byung ba'i zhes pa ni sngar bsags pa'i thugs rje chen po dang smon lam gyi shugs kyis zhes bya ba'i tha tshig go/ /skyon rnams thams cad skyed byed 'jig tshogs lta bu'i bud shing rnam sreg pa/ /rang dang gzhan gyi bye brag yul rnam gnyis spangs de yi skyon 'byung med/ /nyes pa med kyang sgyu ma'i skyes bu las la thugs rjes rig bzhin bskul/ /sngon gyi smon lam gyis ni blo bzang 'jug ste/ rdza mkhan 'khor lo shugs bzhin 'phen/ /zhes 'byung ngo / /de bas na sangs rgyas bcom ldan 'das ni 'od gsal ba'i ting nge 'dzin la bzhugs pas kyang sems can gyi don mdzad de/ skyes bu yid bzhin nor bu bzhin/ /de yi gnas pa tsam gyis ni/ /rtsig pa la sogs rnams las kyang / /ji bzhin bstan pa rnams 'byung ngo / /zhes 'byung ngo / /dgongs pa ma yin zhes pa ni sems rnam par dag pa dang bdag byin gyis brlab pa gnyis 'chad pa'i phyir ro/ /ye shes kyi 'od zer zhes bya ba la sogs pas 'dri'o/ /'od gsal ba'i snang ba zhes bya ba ni lan no/ /'od gsal ba ni de kho na nyid bzhi pa'o/ / snang ba ni gsal ba ste bde ba chen pos so sor snang ba'o/ /de nyid rdo rje ste zhes pa ni rdo rje lta bu'i ting nge 'dzin gyi ngo bo yin pa'i phyir ro/ /'dus byas pa dang 'dus ma byas pa rnams la'o zhes pa ni chags pa dang bral ba dang chags pa dang chags pa bar ma spong bar 'gyur ba dang / /ril por 'dzin pa dang rjes su 'jig pa'i ting nge 'dzin dag kyang spang bar bya'o/ /bsgom par bya ba med pa'o zhes pa ni 'od gsal ba'i de kho na nyid thob na de rnams bsgom par bya bar mi rigs te/ 'bras bu thob pas thabs dor bar bya ba yin pa'i phyir ro/ /'bras bu thob pas gang 'dor ba de ni thabs zhes bshad pa yin/ de ltar kha cig me sgron mas/ /lam la mthong ste de nyid bor/ /shes pas shes bya gzigs nas ni/ /de bzhin gshegs pa 'dor bar bya/ /zhes 'byung ngo / /yang na bsgom par bya ba med pa'o zhes pa ni 'od gsal ba'i yul du nyin mo dang mtshan mo mtshams dang chags dang chags bral dang chags pa bar ma rnams ni bsgom par bya ba ma yin te/ 'dus byas pa dang 'dus ma byas pa dag 'gal ba'i phyir ro/ /mtshan mo snang ba'i cha ste nyi ma'i 'od zer 'gyed pa snang ba mched pa yin/ /mtshams ni snang ba mched pa rang gi rang bzhin lhan cig min dang sbyar/ /mtshan mo ma yin mtshams min nyin min rang bzhin gang dag pa/ /de ni byang chub skad cig bla ma mchog bshad rnal 'byor pa nyid yul/ /zhes 'byung ngo / /bsgom pa yang med de zhes bya ba ni de thob par bya ba'i phyir sems rtse gcig pa nyid kyi ting nge 'dzin gyi khyad par yang med do/ / bsgom par bya ba med pa'i phyir ro zhes pa la bsgom par bya ba ni 'od gsal ba ste/ de med pa ni 'dus byas pa'i tshul du med pa dang / ngo bo nyid kyis grub pa dang / bsgom pa ni glo bur gyi dri ma sel ba'i mtshan nyid yin pa'i phyir ro/ /'o na lha'i rnal 'byor du ji ltar 'gyur zhe na zhes pa ni/ dgongs pa ni 'di yin te/ mngon par byang chub pa'i rim pa thob pas zag pa med pa rnam par mi rtog pa don dam pa'i bden pa la 'jug pa'i rnal 'byor pa'i chad pa'i phyogs kyi mtshan nyid du thal bar 'gyur ro/ /de bas de spang bar bya ba'i phyir lha'i rnal 'byor bsgom par bya ba'i rigs so/ / don dam pa'i bden pa'o zhes pa ni phyag rgya dang ting nge 'dzin gyi rim pas rtogs par bya ba'i de kho na nyid bzhi pa ste/ de ni nam mkha' dang mtshungs pa'i phyir ro/ /kun rdzob kyi bden pa'o zhes pa ni de las byung ba'i rdo rje'i sku spros pas te sems can gyi don gyi bya ba la gzhir gyur pa'i phyir ro/ /gcig tu gyur pa ste zhes pa la bzhi pa dang lnga pa'i rim pas thob par bya ba'i don dam pa dang lha'i sku dag yang dag par sbyor ba zhes bya ba'i don to/ /de dag gis zhes bya ba la sogs pas kun tu 'od kyi sa la gnas pa'i rdo rje 'chang chen po'i sku bdag dang gzhan la phan thogs pa'i rgyur gyur pa rnal 'byor pas bsgom par bya'o zhes bstan to/ /dgongs pa ma yin pa ni mngon par byang chub pa dang zung du 'jug pa'i rim pa dag 'chad par 'dod pa'i phyir ro/ /bshad zin to zhes pa ni le'u dang po nas bshad pa rnam pa bzhi pos bstan to/ /chos rnams rang bzhin 'od gsal ba/ /zhes pa 'dis zung du 'jug pa'i ting nge 'dzin nyid bstan te/ rang bzhin ni kun rdzob kyi bden pa ste/ rgyu dang rkyen gyi khyad par gyis byas pa'i phyir ro/ /'od gsal ba ni don dam pa'i bden pa ste zhes pa la/ rtag pa dri ma med pa zag pa med cing de kho na nyid kyi rang bzhin yin pa'i phyir ro/ /phyi dang nang gi dngos po rnams ni brtan pa dang g.yo ba'i dngos po zhes bya ba'i tha tshig go/ /bden pa gnyis kyi ngo bo nyid do zhes pa ni rim pa gnyis pa dang bzhi pas thob par bya ba'i 'od gsal ba'i de kho na nyid rim pa gsum pa dang lnga pas thob par bya ba'i ye shes kyi sku dang / rdo rje'i sku'i rang bzhin no/ /de bas zhes bya ba la sogs pas chos nyid kyi phyogs la brten te rang bzhin gyis dag pa nam mkha' dang chos mthun pa bstan to/ /'bras bu'i ngo bo nyid do zhes pa ni zung du 'jug pa'i rim pa'i mtshan nyid mi slob pa'i phyir ro/ /de thob pa'i rgyu ste zhes pa ni/ rdo rje bzlas pa la sogs pa'i rim pa bzhi ste/ de rnams kyis rim pa ji lta ba bzhin du ngag dang sems dang lus dang kun rdzob dang don dam pa rnam par dag pa thob par byed pa sgom pas zung du 'jug pa'i ting nge 'dzin thob pa'i phyir ro/ /zung 'jug gi ting nge 'dzin la gnas pas/ /slar zhing gang la'ang mi slob po/ /zhes 'byung ngo / /rgyu dang 'bras bu dbyer med pa'i phyir ro zhes pa ni thams cad mkhyen pa'i ye shes kyi mtshan nyid can gyi zung du 'jug pa'i ting nge 'dzin de kho na nyid ces bya ba thob nas 'di'i rgyu dang 'di'i 'bras bu zhes tha dad par mi snang ste de ni de'i rang bzhin yin pa'i phyir ro/ /rgyu dang 'bras bu dag ces pa ni rdo rje bzlas pa la sogs pa'i rim pa bzhi dang / zung du 'jug pa'i rim pa dag go/ /mi phyed par yongs su shes pa nyid ni zhes pa la/ slob pa'i gnas skabs su yang lam ni de kho na nyid du mos pa'i phyir 'bras bu thob nas kyang lam ni de dang ro gcig par 'gyur ba'i phyir ro/ /las dang po pa can 'jug par bya ba'i don du rim pa'i dbye bas rgyu dang 'bras bu'i dbye ba rab tu bstan to/ /las dang po pa'i 'jig rten pa rnams don dam pa la 'jug pa'i phyir ro/ /thabs 'di rdzogs pa'i sangs rgyas kyis/ /skas kyi rim pa lta bur gsungs/ /zhes 'byung ngo / /dgongs pa ma yin pa zhes bya ba ni zung du 'jug pa'i rim pa 'ba' zhig tu bstan pa'i phyir ro/ /yid kyi rang bzhin gyi sku'o zhes pa ni/ bdag la byin gyis brlab pa'i rim pas thob par bya ba'i ye shes kyi sku'o/ /don dam pa'i bden pas rnam par dag pa'o zhes pa ni 'od gsal ba'i de kho na nyid bzhi pas so/ /gang gi phyir sgyu ma lta bu'i rnam par rtog pa nyid yongs su spong ba'i don du 'od gsal ba de kho na nyid bsgom par bya'o/ /de gsal bar byed pa'i ngag gi tshogs so zhes pa ni gsum pa dang bzhi pa'i rim pa rjod par byed pa'i tshogs rnams so/ /kun rdzob kyi bden pas so zhes pa ni sgyu ma lta bu'i ting nge 'dzin gyi rang bzhin gyi bdag byin gyis brlab pa'i rim pa'i man ngag gis so/ /don dam pa'i bden pas so zhes pa ni de rnam par dag par byed pa'i 'od gsal ba la 'jug pa'i mtshan nyid can gyi mngon par byang chub pa'i rim pas so/ /'gro ba'i don mdzad pa'i rdo rje 'chang chen po'i sku yang rnam par dag par bya ba yin no zhes bya bas ngo mtshar ba dang rmad du gyur pa'o/ /e ma'o sangs rgyas zhes bya ba la sogs pas don de nyid bstan par bya ste/ kun rdzob kyi bden pa'i sgo nas bstod pa'o zhes pa ni bdag la byin gyis brlab pa'i man ngag gi sgo nas so/ /don dam pa'i bden pa'i sgo nas so zhes pa ni sems rnam par dag pa dang mngon par byang chub pa bstan pa'i sgo nas so/ /bden pa gnyis mi phyed pa'i zhes bya ba la sogs pas zung du 'jug pa'i ting nge 'dzin gsal bar byed pa'i man ngag gi sgo nas bstod pa'o/ /'od gsal ba'o zhes pa ni sngags dang phyag rgya'i rim pas thob par bya ba'i sems rnam par dag pa'i mtshan nyid do/ /yongs su dag pa'i lha'i sku ste zhes pa ni de las byung ba ye shes kyi rang bzhin gyi sku'o/ /des ni rim pa gnyis kyi sgo nas bstod pa'o/ /don dam pa'i bden pa las yang dag par 'khrungs zhes pa ni rim pa bzhi pas thob par bya ba'i 'od gsal ba'i de kho na nyid las zung du 'jug pa 'byung bas so/ /des rim pa bzhi pa dang lnga pa zhes bya ba'i rim pa gnyis so sor bstan pa yin no/ /rdzogs pa'i rim pa'o zhes pa ni sngar bshad pa'i sems rnam par dag pa la sogs pa'i bdag nyid do/ /des ni rdzogs pa'i rim pas so/ /gdul bya rnams bskyed par mdzad pa zhes pa la rdo rje 'chang chen po'i sku nyid du rdzogs par byed pa'o/ /des ni rang gis gzigs pa'i de kho na nyid kyi don ston pas na bcom ldan 'das skyob pa zhes bshad do/ /rang mthong lam ston skyob pa yin/ /zhes 'byung ngo / /des na rang gi don dang gzhan gyi don phun sum tshogs pa bstan to/ /rtog pa thams cad las 'das pa / /zhes pa la chags bral la sogs pa'i rang bzhin rnams dang bral ba'i phyir ro/ /dmigs su med pa ste de nyid kyi khyad par ro/ /'khor ba dang mya ngan las 'das pa dag tu bzung bas na zhes pa la mi gnas pa'i mya ngan las 'das pa'i dbyings thob pa'i phyir kun tu bzang po ni rdo rje 'chang chen po nyid do/ /phun sum tshogs pa thams cad ces pa ni rang gi don la sogs pa de'i ngo bo ni de nyid do/ /lha'i dkyil 'khor spro bar mdzad pas na zhes pa la bran dang bran mo dang pho nya dang pho nya mo dang / bka' nyan dang bka' nyan mo la sogs pa dkyil 'khor pa du ma 'od zer gyi sbyor bas bskyed pa'i phyir ro/ /des ni zung du 'jug pa'i ting nge 'dzin la gnas pa'i bcom ldan 'das la bstod pa bstan pa yin no/ /byang chub pa ni don dam pa'i bden pa la zhes pa rim pa bzhi pa thob par bya ba'i de kho na nyid do/ /de gang gis spyad cing thob par byed pa ni zhes pa la rdo rje 'chang chen po'i go 'phang thob pa'i mos pas man ngag bzhi pa la rnal 'byor pa rnams brtson par byed pa'o/ /kun rdzob kyi bden pa'o zhes pa ni sgyu ma lta bu'i lha'i sku'i rnam pa bzung ba'o/ /rdo rje ni bden pa gnyis kyi bdag nyid can te zhes pa la bden pa gnyis kyi bdag nyid can rdo rje 'chang chen po nyid do/ /dag pa ni don dam pa'i bden pa ste zhes pa ni/ snang ba la sogs pa'i ye shes gsum dang / 'dod chags bral ba la sogs pa'i rang bzhin gyi tshogs brgya drug cu dang bral ba'i de kho na nyid do/ /des ni rim pa gnyis pa gsal bar bstan to/ /yongs su dag cing yid kyi rang bzhin gyi sku zhes pa ni 'ja' tshon dang dri za'i grong khyer dang chu zla la sogs pa sgyu ma'i dpes nye bar mtshon pa'i rnam pa thams cad kyi mchog dang ldan pa 'od gsal ba la cig car du byung ba'i rdo rje 'chang chen po'i sku zhes bya ba'i don to/ /de bzhin nyid du gshegs pas na/ /zhes pa ni sems rnam par dag pas thob par bya ba'i 'od gsal ba'i de bzhin nyid de bden par gyur pa'i phyir ro/ /gshegs pa ni sngags dang phyag rgya'i rim pas thob pa'i phyir ro/ /rdo rje gsum la sogs pa'i rnam par zhes bya ba ni sku rdo rje la sogs pa'i sku 'am sems rnam pa gsum gyi bdag nyid can gyi rdo rje 'chang chen po'i sku yis so/ /gdul bya rnams la snang bas so/ /zhes bya ba ni khams gsum gyi nang na gnas pa'i sems can rnams la rang gi sku gsal bar mdzad pa'i phyir ro/ /mi gnas pa'i mya ngan las 'das pa'i dbyings la mngon par byang chub pa thob pa'i 'og tu zung du 'jug pa'i ting nge 'dzin la 'jog pa'i don to zhes bya ba'i tha tshig go/ /des ni sems rnam par dag pa dang bdag la byin gyis brlab pa dang mngon par byang chub pa dang zung du 'jug pa'i rim pa rnams bstan to/ /sgra ji bzhin par bshad pa zhes pa ni bstod pa'i mtshan nyid kyi don bstan pa'i phyir ro/ /de yang sogs pa'i sgras shes par bya'o/ /'dir tshigs su bcad pa lnga ni rdo rje 'chang chen pos rjes su zhugs pa'i de bzhin gshegs pa rnams kyis gsungs so/ /gzhan du na rdo rje 'chang chen po ston pa yin pas gzhan rnams kyis chos ston par mi rigs so/ /la la na re rdo rje 'chang chen po longs spyod rdzogs pa'i sku'i ngo bo yin la de bzhin gshegs pa rnams ni sprul pa'i sku'i rang bzhin yin no zhes longs spyod rdzogs pa dang sprul pa'i sku gnyis dbyer med pa'i phyir rdo rje 'chang chen po kho nas gsungs so zhes zer ro/ /dbyer med yang 'gro ba'i don du gcig pa'i phyir ro/ /byang chub kyi sems rab tu ston pa zhes pa la byang chub sems ni bskyed pa'i rim pa'i phyogs su stong pa nyid do/ /de gsal bar byed pas na byang chub kyi sems rab tu ston pa'o/ /de nas rdzogs pa'i rim pa'i phyogs su rdo rje bzlas pa la sogs pa'i rim pa lngas thob par bya ba'i stong pa nyid dang snying rje dbyer med pa'i ngo bo rdo rje 'chang chen po'i go 'phang ni byang chub kyi sems so/ /de gsal bar byed pas na byang chub kyi sems rab tu ston pa'o/ /stong nyid snying rje dbyer med pa'i/ /byang chub sems zhes bshad pa yin/ /zhes rgyud phyi ma las 'byung ngo / /le'u'i sgra'i don ni sngar bshad zin to/ /sgron ma gsal bar byed pa'i 'grel pa'i TI kA las le'u gnyis pa'o// // rnal 'byor pa rnam pa gnyis kyis zhes bya ba la sogs pas lha'i le'u gsum pa bstan par bya ste/ gang gi phyir byang chub kyi sems kyi le'u las stong pa nyid thob nas de nas bskyed pa'i rim pas lha'i 'khor lo bsgom par bya'o/ /de bzhin du dang po sbyor ba dang dkyil 'khor rgyal ba mchog yongs su rdzogs nas las kyi rgyal ba mchog gsal bar bya ba'i phyir phra mo'i rnal 'byor bsgom par bya'o/ /rdzogs pa'i rim pa'i rnal 'byor pas phra mo'i rnal 'byor bsgom par bya ba'i phyir rdo rje bzlas pa'i rim pa bstan par bya'o/ /rnal 'byor pa gnyis kyi ni bskyed pa dang rdzogs pa'i rim pa'i rnal 'byor pa dag gis so/ /phra mo'i rnal 'byor bsgom pa gnyis bya'o zhes pa la bskyed pa'i rim pa'i rnal 'byor pas rdo rje la sogs pa phra mo'i rnal 'byor bsgom pa dang / rdzogs pa'i rim pa'i rnal 'byor pas kyang 'dod chags dang zhe sdang dang gti mug gi rigs kyi dbye bas gsang ba dang snying ga dang gdong gi sna rtser phra mo'i thig le bsgom par bya'o/ /de la 'dod chags kyi rigs can gyi rnal 'byor pas stong phrag bdun cu rtsa gnyis kyi rtsa'i khong stong nas rgyu ba'i byang chub kyi sems kyi thig le rdo rje nor bu'i rtse'am/ /pad+ma'i lte ba'i rtser yungs kar gyi 'bru'i tshad tsam gyi thig le bsgom par bya'o/ /zhe sdang gi rigs kyi rnal 'byor pas yi ge gsum cha shas bsdus nas thugs rdo rje 'chang gi sa bon gyi thig le tsam snying gar dmigs la sngags kyi thig le bsgom par bya'o/ /gti mug gi rigs can gyis dkyil 'khor bzhi po las g.yas dang g.yon dang dman pa dang dal bus rgyu ba'i dbye bas spros pa'i 'od zer gyi tshogs kun rdzob kyi sna rtser thig le'i gzugs bsgom par bya'o/ /de bzhin du rin chen 'byung ldan dang don yod grub pa'i rnal 'byor pa dag gis kyang smin mtshams dang lte ba'i dkyil du thig le bsgom par bya ba ni phra mo'i rnal 'byor rtogs par bya'o/ /de bzhin gshegs pa thams cad ni zhes pa la phung po lnga dang de rnams bsdu bar byed pa sku la sogs pa'o/ /de dag nye bar sdud par byed pa'i phyir sku gsung thugs kyi rdo rje ni rdo rje 'chang chen po ste drug pa'o/ /de bzhin gshegs p a thams cad ni mi bskyod pa la sogs pa ste phyag rgya legs par sbyang ba'i sngon du 'gro bar phyung ba'i sngags kyi rim pas dam tshig gi dkyil 'khor dang bsgrub pa'i dkyil 'khor spros la lha sum cu rtsa gnyis kyi bdag nyid can gyi de bzhin gshegs pa dang lha mo dang byang chub sems dpa' dang khro bo rnams so/ /de rnams kyis sems can gyi don gyi phyir zhes pa ni de dag gis 'gro ba'i don mdzad pa'i phyir ro/ /phyogs bcur khyab pa zhes pa la reg bya rdo rje ma'i chos 'byung ba'i nang nas phyi rol du spros te mngon par dga' ba la sogs pa'i sangs rgyas kyi zhing du 'jug par bya ba'i phyir phyogs bcur gshegs pa'o/ /de nyid ni chos kyi char 'bebs pas na zhes pa ni nye bar mtshon pa tsam yin te/ /brtan pa dang smin pa dang grol ba dang sangs rgyas kyi zhing la 'jug pa'i phyir ro/ /de nyid ni sems can bsam pa sna tshogs pas phye ba la zhes pa ni 'dod chags la sogs pa'i rigs can rnams kyis sems can gyi bsam pa'i rjes su 'brangs nas bud med dang skyes pa'i dbye bas spro ba dang zhi ba dang drag po'i gzugs dang sgeg pa la sogs pa'i nyams dang ldan pa'i sku'i dbye bas kyang spro ba zhes bya ba'i tha tshig go/ /sku du mar ston pa'i phyir bkod pa'o zhes pa ni zhal gsum pa la sogs pa dang rigs sna tshogs pa'i rang gi sku bstan pa'i phyir ro/ /gang gi phyir rdo rje 'chang chen po gcig pu kho na chos kyi dbyings kyi rang bzhin yin na yang kha dog lnga dang zhi ba dang drag po dang pho dang mo'i dbye bas rab tu snang ste/ de don dam par dbye ba ni med de/ 'od gsal ba'i rang bzhin yin pa'i phyir ro/ /de lta bu'i tshul gyis zhes bya ba la sogs pa ni dang po'i sbyor ba la sogs pa'i mtshan nyid can zhes bya ba'i tha tshig go/ /rdo rje ni de bzhin gshegs pa rnams so zhes pa la rdo rje bzhin du me long lta bu la sogs pa'i ye shes rnams kyis mi phyed pa'i phyir ro/ / 'dir de bzhin gshegs pa'i sgra ni nye bar mtshon pa yin te des na de'i rigs las 'byung ba'i lha mo dang byang chub sems dpa' dang khro bo rnams kyang gzung ngo / /de skad ces bya ba'i ting nge 'dzin gyi gzhi'i le'u zhes bya ba la/ /ting nge 'dzin ni gzhi can no/ /le'u ni gzhi'o/ /gzhi dang gzhi can gyi dbyer med par byas nas ting nge 'dzin gyi le'u zhes bstan te/ tshem bu ngu ba bzhin no/ /tshem bu la gnas pa'i bu chung ngu ba zhes bya ba'i tha tshig go/ /de ltar zhes bya ba la sogs pas le'u'i ming don dang ldan pa bstan to/ /lha rnams bskyed pa'i yan lag dag tu gyur pa'i gsang sngags dang por ston pa ni zhes pa la dang po sbyor ba'i ting nge 'dzin gyi yan lag tu gyur pa'i rnal 'byor gyi phyogs gcig pa stong pa nyid bsgom pa brtan par byed pa'i mtshan nyid kyi sngags dang po bstan par bya'o zhes pa'i don to/ /oM zhes bya ba la sogs pa la don dam pa'i dkyil 'khor bsgoms pa'i 'og tu sngags 'di brjod par bya zhes bya ba'i don to/ /chos 'byung ba la gnas pa'o zhes pa ni bgegs bskrad pa dang stong pa nyid bsgoms pa'i 'og tu yi ge hUM gi sa bon las bskyed pa'i gzhi'i dkyil 'khor gyi rang bzhin gyi chos 'byung gi phyag rgya'i steng du ye shes kyi sa gzhi 'byung ba chen po bzhi'i rang bzhin dang ri rab yongs su gyur pa las/ rin chen sna bdun gyi gzhal yas khang pa'i nang na sna tshogs pad+ma dang / zla ba dang / nyi ma'i dkyil 'khor du skad cig gis rdzogs pa'i lha sum cu rtsa gnyis kyis lhag par mos pa'i dkyil 'khor rnam par bsgom pa la/ de nyid rdo rje phreng ba las gsungs pa'i gzugs phung gtogs pa zhes bya ba la sogs pas don dam pa'i dkyil 'khor du byas la/ yab yum ro gcig par gyur nas sngags 'dis brtan par byas te/ yang yi ge gsum las byung ba'i pad+ma dang zla ba dang nyi ma'i steng du yi ge gsum yongs su gyur pa las zla ba'i dkyil 'khor la snga ma'i pad+ma la sogs pa gsum zhugs te chos kyi dbyings kyi sngags kyis rang gi sems brtan par byas la/ de'i steng du yi ge gsum rnam par bkod la de nas spro ba dang bsdu ba sngon du 'gro bar rdo rje bskyed la/ de yongs su gyur pa las rdo rje 'chang chen po la sogs pa'i lha'i 'khor lo gang yang rung ba rnam par bsgoms te/ ye shes sems dpa' dang ting nge 'dzin sems dpa' dgod pa'i mtshan nyid kyi rjes su rnal 'byor byas la phung po dang khams dang skye mched la yig 'bru dgod pa'i mtshan nyid kyi shin tu rnal 'byor rdzogs nas sku la sogs pa la byin gyis brlab pa'i rnal 'byor chen po byas te/ phyag rgya 'dus nas reg bya rdo rje ma'i chos 'byung gi nang du phyung ba'i sngags kyis dkyil 'khor pa rnams sprul te/ de las kyang phyi rol du spros la 'gro ba'i don byas nas slar yang gshegs te/ shar la sogs pa'i phyogs dang mtshams su dkyil 'khor pa rnams rim gyis bzhugs par bsams la/ dbang bskur ba dang rgyas btab cing de'i 'og tu 'chad par 'gyur ba'i las kyi rgyal ba mchog gi ting nge 'dzin gyi yan lag phra mo'i rnal 'byor bsgom par bya'o/ /de nyid bstan par bya ba'i phyir rnam par snang mdzad la sogs pa'i lha rnams kyi 'khor lo zhes smos te/ yi ge gsum yongs su gyur pa las skyes pa'i 'khor lo'i phyag mtshan las byung ba'i rnam par snang mdzad kyi sprul pa'i lha sum cu rtsa gnyis kyi bdag nyid kyi 'khor lo zhes bya ba'i don to/ /rigs dang der 'brel pa'i lha rnams te zhes pa ni rnam par snang mdzad la sogs pa'i rigs kyi 'brel pa dang ldan pa'i lha rnams zhes bya ba'i tha tshig go/ /de nyid gnas ji lta ba bzhin du yang dag par gnas pas na zhes pa la shar phyogs la sogs pa'i gnas la nye bar bkod pas so/ /rang gi bdag po'i sku mdog dang 'dra ba'o zhes pa ni dbus kyi gtso bo la ltos pas dbus kyi sa'i cha ni bdag po dang mtshungs pa zhes pa'i don to/ /de ltar rnam par snang mdzad kyi dkyil 'khor gyi dbus kyi sa'i cha ni dkar po'o/ /shar dang lho dang nub dang byang gi sa'i cha rnams ni nag po dang ser po dang / dmar po dang ljang gu'o/ /de bzhin du mi bskyod pa'i dkyil 'khor gyi dbus kyi sa'i cha ni kha dog nag po dang shar la sogs pa dkar po dang ser po dang / dmar po dang ljang gu'o/ /rin chen 'byung ldan gyi dkyil 'khor gyi dbus kyi sa'i cha ni ser po dang / shar la sogs pa dkar po dang nag po dang / dmar po dang / ljang gu'o/ /snang ba mtha' yas kyi dkyil 'khor gyi dbus kyi sa'i cha ni dmar po dang shar la sogs pa snga ma bzhin no/ /'on kyang nub ni nag po'o/ /don yod grub pa'i dkyil 'khor gyi sa'i cha ni ljang gu dang / shar la sogs pa snga ma bzhin no/ /'on kyang byang ni nag po'o/ /de ltar sangs rgyas spyan ma nas brtsams te gnod mdzes kyi rgyal po'i bar du lha sum cu rtsa gnyis kyi bdag nyid can gyi dkyil 'khor sum cu rtsa gnyis su shes par bya'o/ /de rnams mdor bsdus na stong phrag gcig dang nyi shu rtsa bzhi'i lha rnams su 'gyur ro/ /de rnams bdag po la ltos te gnas ji lta ba bzhin du dgod par bya'o/ /kha dog sna lnga'i sa'i cha dang ldan pa'o zhes pa la/ bdag po la ltos te shar la sogs pa'i phyogs su kha dog lnga dang ldan pa'o/ /thams cad du bzang po'i zhes pa ni nang gi dkyil 'khor gyi khyad par ro/ /phyi'i dkyil 'khor ni gru bzhi pa nyid do/ /gzugs rdo rje la sogs pa dang ldan pa'o zhes pa ni lha'i snam bu dang dra ba phyed pa dang rin po che'i pha gu dang pany+tsa rA ga la sogs pa dang ldan pa'o/ /lha la sogs pa nye bar bstan pa'i mchod pa rnam pa lnga dang bcas pa'o zhes pa la/ shin tu dad pa las 'ongs pa'i brgya byin la sogs pa'i lha'i tshogs kyi lag pas 'bul ba rnam pa sna tshogs pa'i mchod pa dang bcas pa zhes bya ba'i tha tshig go/ /mdor na zhes pa ni sngar bshad pa'i bskyed pa'i rim pas so/ /lha'i 'khor lo 'di ltar bsam par bya'o zhes bya ba ni dkyil 'khor rgyal ba mchog gi ting nge 'dzin gyi sgo nas bskyed pa'i de bzhin gshegs pa la sogs pa'i lha'i 'khor lo bsgom par bya'o/ /bdag nyid ni dkyil 'khor gyi 'khor lo las logs su bdag nyid kyang tha dad par bsgom par mi bya'i/ 'on kyang dkyil 'khor gyi bdag po'i rang bzhin du bzhugs par bdag nyid bsam par bya ba'i don to/ /'khor lo'i dkyil du zhes pa la lha sum cu rtsa gnyis kyi lha'i 'khor lo'i dbus su'o/ /bdag por gyur pa nyid kyis gzhag go zhes pa ni rnal 'byor bzhis bdag nyid kyi dang po sbyor ba'i ting nge 'dzin gyi zhes bya ba'i don to/ /skad kyi byings brjod pa ni don du ma yin pas bsgom pa'i sgra ni gzhag pa'i don la 'jug go/ /de nas zhes bya ba la sogs pas rdo rje 'chang chen po la rjes su 'jug pas rnam par snang mdzad la sogs pa'i phyag rgya chen po bsgom pa bstan to/ /gang gi phyir bcom ldan 'das rdo rje 'chang chen po ni/ shes pa dang shes bya nye bar bsdus pa'i ngo bo chos thams cad kyi chos nyid kyi rang bzhin no/ /de bas na des byin gyis brlabs pa'i de bzhin gshegs pa'i sku rnams kyis bsod nams kyi tshogs dang ye shes kyi tshogs ster bar 'gyur ro/ /gzhan du na brtag par bya ba tsam de rnams kyi 'bras bu gang yang ster bar mi 'gyur ro/ /de la rjes su zhugs pa'i lha'i sku brtags pa yang yongs su dag pa'i skur 'gyur ro/ /de nyid kyi phyir le'u bcu gsum pa las kyang / /rdo rje sems dpa' rgyal po che/ /yang dang yang du bskul bar bya/ /de ni sngags rnams thams cad kyi/ /rgyal po rtag pa mchog yin no/ /zhes 'byung ngo / /rab tu byed pa las kyang / /de ni rang byung bcom ldan 'das/ /gcig pu'i bdag nyid che ba'i lha/ /man ngag rnams ni rab ster bas/ /rdo rje slob dpon de bas lhag /ces 'byung ngo / /rdo rje 'chang gi sprul pa yi/ / zhes pa ni/ rdo rje 'chang chen pos bskyed cing / de la rjes su zhugs te de'i rnam pa nyid du 'gyur ba'o/ /brtan pa dang g.yo ba'i bdag nyid 'jig rten pa 'di ji srid de dag thams cad rdo rje 'chang ba las bskyed cing de nyid du thim mo/ /ji skad du/ pha rol 'gro ba kha cig gang / /rtags kyi dbye bas rnam par gnas/ /de rnams kyang 'dis smod mi bya/ /rdo rje sems dpas sprul pa yin/ /zhes 'byung ngo / /nam mkha'i dbyings ni thams cad la/ /rdo rje sems dpa' dpal ldan bzhugs/ zhes bde mchog las 'byung ngo / /rnam par snang mdzad kyi phyag rgya chen po ni rdo rje 'chang chen po'i lhag par mos pas/ bsgom pa'i rnam par snang mdzad la sogs pa'i sku zhes bya ba'i tha tshig go/ /sku rdo rje nyid du gyur pa yin yang / /zhes pa ni sku rnam par dag pa'i rang bzhin nyid du gyur pa'o/ /yon tan gyi ngo bo nyid kyang mnga' bas zhes pa ni nang du chud pa'i gsung dang thugs kyi nus pas so/ / gang gi phyir bcom ldan 'das rnam par snang mdzad ni sku rdo rje rnam par dag pa yin par ma zad kyi/ 'on kyang gsung dang thugs rnam par dag pa'i ngo bo yang yin no/ /de nyid kyi phyir de bzhin gshegs pa rnams kyi gtso bor gyur pa'i cha gcig gis mtshan gyi tha snyad bya ba yin te/ dper na snying rje'i rang bzhin 'jig rten dbang phyug bzhin no/ /de la snying rje gcig pu yod kyi shes rab la sogs pa sangs rgyas kyi yon tan gzhan med pa ma yin no/ /gtso bo dang gtso bo ma yin pa'i sangs rgyas kyi yon tan dang ldan pa sangs rgyas dang byang chub sems dpa' thams cad yin no/ /dper na zhi ba'i rang bzhin rnam par snang mdzad yin no zhes zhi ba tsam gyi ngo bo yang ma yin te/ rgyas pa la sogs pa yang mdzad pa'i phyir ro/ /de bzhin du rgyas pa la sogs pa'i rang bzhin rin chen 'byung ldan la sogs pa yang shes par bya'o/ /sems can rnams kyi bsam pa dang bag la nyal dang bag chags dang rigs kyi dbye bas de dang rjes su mthun pa'i gtso bor gyur pa'i yon tan gyi khyad par dmigs te/ bcom ldan 'das kyis de bzhin gshegs pa dang byang chub sems dpa' la sogs pa'i rang bzhin bstan to/ /de bzhin du me long lta bu la sogs pa'i ye shes lnga'i rang bzhin rnam par snang mdzad la sogs pa re re la yod na yang mos pa'i dbye bas ye shes re re'i rang bzhin du bstan to/ /nyon mongs pa dang shes bya'i sgrib pa med pa mngon par byang chub pa rnam pa lnga'i rim pas yang dag par rdzogs pa'i sangs rgyas kyi go 'phang thob pa de bzhin gshegs pa rnams la bar chod med de gang gis de rnams re res ming thob pa yin gyi tshang bas ni ma yin no/ /las dang po pa 'jug par bya ba'i phyir rim gyis ye shes thob pa yin no zhes me long lta bu la sogs pa'i rang bzhin bstan to/ /chos dang chos min dka' thub stong / /bsdams dang nges bsdams 'dul ba dang / /dud 'gro dmyal ba yi dags dang / /lha dang bcas pa'i mi rnams dang / /ston pa dang ni nyan thos dang / /thams cad de dag kun rdzob ston/ /las dang po yi 'jig rten pa/ /don dam pa la 'jug pa'i phyir/ /thabs 'di rdzogs pa'i sangs rgyas kyis/ /skas kyi rim pa lta bur gsungs/ /de ltar byis pa'i smra ba 'di/ /mthar ni thams cad 'jig par 'gyur/ /brjod du med cing brjod med pa'i/ /gang yang de nyid snang ba'o/ /zhes 'byung ngo / /de bas na de bzhin gshegs pa thams cad sku gsung thugs kyi rnam par dag pa'i rang bzhin yang gdul bya'i dbang gis ngo bo gcig yin no zhes bstan to/ /rgyu du ma tshogs pa las skyes pa'i 'bras bu gang las de ma thag tu skyes pa de des ming gi tha snyad du byas te/ dper na rnga bo che'i sgra dang nas kyi myu gu bzhin no/ /de bzhin du gang la dmigs nas rnam par dag pa 'byung ba gang yin pa de/ de'i ming gis bstan pa yin te/ dper na sku rdo rje dang gsung rdo rje dang thugs rdo rje la sogs pa bzhin no/ /'di la lha rnams kyi 'khor lo bsdus pas na zhes pa la/ rdo rje 'chang chen po nyid la dkyil 'khor gyi 'khor lo thams cad yongs su bsdu bar 'gyur te/ gang gi phyir zung du 'jug pa'i rim pas thob par bya ba'i rdo rje 'chang chen po'i sku la phung po la sogs pa'i dkyil 'khor gyi 'khor lo thim par snang ste/ bden pa gnyis gnyis su med pa'i phyir ro/ /de ni nye bar mtshon pa tsam yin te/ /nyon mongs pa dang nye ba'i nyon mongs pa'i khams gsum pa yang de la thim par 'gyur te/ ji skad du/ dbyibs dang kha dog sna tshogs pa'i/ /ji srid sprin ni du ma rnams/ /nam mkha'i khams las byung nas ni/ /de nyid du ni thim par 'gyur/ /de bzhin rang bzhin thams cad ni/ /snang ba gsum gyi rgyur gyur pa/ /ma lus yul la zhugs nas ni/ /'od gsal bar ni 'jug par 'gyur/ /zhes 'byung ngo / /theg pa chen po'i mdo las kyang / /skra rtse gcig las sangs rgyas du ma ni/ /gang gA'i bye ma snyed dang mtshungs pa ste/ /rdul gcig steng na rdul snyed sangs rgyas rnams/ /sangs rgyas sras kyi dbus na bzhugs pa'o/ /zhes 'byung ngo / /rdo rje 'chang chen po ste zhes pa ni drug pa'o/ /de dang lhan cig tu sbyor ba zhes pa ni dang po sbyor ba'i ting nge 'dzin gyi phyogs gcig ni ting nge 'dzin gyis rdzogs la rdo rje 'chang chen po'i sku bsgoms pa'i 'og tu rang gi thugs ka nas mi bskyod pa spros te/ /des 'gro ba'i don byas la de dang lhan cig dus gcig tu gyur nas mi bskyod rdo rjer bdag nyid bsgom par bya zhes bya ba'i don to/ /de bzhin du zhes bya ba la sogs pas rin chen 'byung ldan la sogs pa'i ting nge 'dzin bstan to/ /sku mdog ces bya ba la sogs pas zhe sdang rdo rje la sogs pa'i sku mdog dang phyag mtshan dang nyams dang rnam par dag pa bstan te/ khro ba dang 'dod chags chen po 'dres par gyur pas zhes pa ni rnal 'byor chen po'i rgyud ni 'dod chags dang / zhe sdang rnam par dag pa'i rang bzhin yin pa'i phyir ro/ /de la mche ba cung zad gtsigs pa'o zhes pa ni khro bo'i nyams dang ldan pa dang reg bya rdo rje mas 'khyud pa chags pa'i ro dang ldan par bstan to/ /shel zhes bya ba la sogs pas rnam par snang mdzad kyi dbyibs dang sku mdog dang phyag mtshan rnams bstan to/ /gser gyi mdog can la zhes pa ni rgyas pa'i rang bzhin yin pa'i phyir ro/ /de bzhin gshegs pa'i sprin gyis kun du 'khrigs par bsgom pa'o zhes pa ni dbus kyi gtso bo nyid du bzhugs nas 'gro ba dbul ba'i sdug bsngal bcom pa'i phyir rang dang rjes su mthun pa dzam+b+ha la la sogs pa spro bar mdzad pa'o/ /rdo rje rtse dgu pa zhes pa ni de bzhin gshegs pa lnga dang lha mo bzhi'i rang bzhin yin pa'i phyir ro/ /bshad pa'i rgyud las kyang / dbus rtse rnam par snang mdzad dang / /shar la mi bskyod rin chen lhor/ /nub dang byang gi rtse dag la/ /'od dpag med dang don yod grub/ /pad+ma 'dab ma brgyad pa ni/ /de yi 'dab ma re re la/ /shin du gsal ba'i phyag mtshan can/ /byang chub sems dpa' brgyad yin te/ /lag na pad+ma byams pa dang / /nam mkha'i snying po kun du bzang / /gnod sbyin bdag po 'jam dpal dang / /rnam par sel dang sa snying po/ /'og tu shar rtser rdor mkha' 'gro/ / lhor 'jigs ma yi mkha' 'gro ma/ /nub tu gtum mo zhes ni bya/ /ro langs ma ni byang du dgod / /dbus su ye shes mkha' 'gro ma/ /'og rtse rnam par dag pa yin/ /spyan ma dang ni mA ma kI/ /gos dkar mo dang sgrol ma dang / /skul byed ma dang rin chen sgron/ /ske rags gzhan gyis mi thub ma/ / pad+ma la gnas mkha' 'gro ma/ /rdo rje de nyid 'di yin no/ /dbus kyi chang zung ye shes dbyig /spro dang bsdu ba mdzad pa'o/ /zhes 'byung ngo / /de ltar lha nyi shu rtsa brgyad kyi rang bzhin ni rdo rje yin no/ /mar ga ta zhes bya ba ni nam mkha' ltar sngo ba zhes bya ba'i tha tshig go/ /rin chen 'byung ldan gyi phyag mtshan gsungs pa'o zhes pa ni zur drug pa'i rin po che ste 'gro ba rigs drug pa'i sems can gyi khams kyi zur re res bsam pa thams cad rdzogs par byed pa'i phyir ro/ /'od dpag tu med pa'i phyag mtshan gsungs pa'o zhes pa ni kha byed pa'i phyag rgya dang ldan pa'i pad+ma rA ga'i kha dog dang 'dra ba'i pad+ma zhes bya ba'i tha tshig go/ /ji ltar pad+ma dmar po 'di/ /'dam gyi skyon gyis ma gos pa/ /dngos po'i skyon ni sna tshogs pas/ /de bzhin khams gsum pa ni dag /ces 'byung ngo / /sna tshogs pa'i 'gro ba ma lus pa'i don sgrub par mdzad pa'i ngo bo nyid yin pas zhes pa la/ don yod pa ni bya ba nan tan grub pa'i ye shes kyi rang bzhin yin pa'i phyir ro/ /'od zer dkar po la sogs pa dang ldan pa'i phyir ro zhes pa de ni don yod grub pa las thams cad yin pa'i phyir ro/ /ral gri bsnams pa ni nyon mongs pa thams cad gcod par byed pa'i shes rab kyi ngo bo 'chang bas so/ / des ni sems can rnams gdul bar bya ba'i phyir ye shes nyid sngon po la sogs pa'i kha dog gi khyad par gyi rnam pa nyid du bstan to/ /in+d+ra b+hU ti'i zhal snga nas kyis kyang / /shin tu rnam dag ngo bo'i phyir/ /kha dog dkar pos rab tu bstan/ /kun la gtong bas ser po nyid/ /rtag tu brtse bas dmar po yin/ /dkon mchog gsum la gnod byed sogs/ /'dul bar byed pa la brtson pa/ /'gro ba'i don la mdzad pa'i mchog /ye shes de ni nag por bshad/ /sna tshogs thabs kyis gdul ba'i phyir/ /kha dog ljang gu rab bstan pa'o/ /zhes gsungs so/ /de bzhin du thugs rdo rje 'chang ba la sogs pa'i rdo rje la sogs pa phyag mtshan gang yin pa de rnams ye shes kyi khyad par nyid yin no/ /ji skad du/ gzugs la sogs pa skye mched rnams/ /gang phyir rang nyid kyis brjod pa/ /des na sangs rgyas ye shes ni/ /de bzhin gshegs pas phyag drug gsungs/ /byang chub sems ni rdo rje ste/ /shes rab dril bu mngon par brjod/ /ma rig gcod byed 'khor lo ste/ /rin chen rin thang med pa'i phyir/ /srid pa'i skyon gyis ma gos pas/ /ye shes de ni pad+mar bshad/ /ral gri nyon mongs dgra gcod pa/ / ut+pal de las skyob pa'i phyir/ /'khor ba'i dra ba nges tshig pa'i/ /gang phyir ye shes nyid skyes pa/ /sangs rgyas rjes gnang sems can gyis/ /rdeg par byed pa thob par bshad/ /chad pas gdul phyir dbyug pa ste/ /sems can 'dul byed de shes yin/ /phan tshun khyab pa mi byed phyir/ /sna tshogs rdo rje yin par bshad/ /sku mdog dang phyag mtshan dang ye shes kyi rang bzhin 'ba' zhig tu ma zad kyi/ /'on kyang rnam par snang mdzad la sogs pa yang de'i ngo bo nyid do/ /sems can kun la snang byed phyir/ /rang gi rang bzhin snang byed pas/ /de bzhin gshegs zhes dag pa ni/ /de ni rnam par snang mdzad bshad/ /ma rungs thams cad skye bo dang / /bla ma la ni log pa rnams/ /mi ston pa yi rang bzhin phyir/ /de ni mi bskyod rab tu bshad/ /gang phyir sangs rgyas la sogs pa/ /rin po che rnams rab byung bas/ /sems can don ldan ye shes ni/ /rin chen 'byung ldan bshad pa yin/ /mi gnas mya ngan las 'das pa'i/ /srid dang thar pa mi dmigs pa/ /mtha' yas yon tan dang ldan pas/ /de ni snang ba mtha' yas bshad/ /sems can kun gyi don mdzad pa'i/ /gang phyir rang nyid grub pas na/ /don dang bcas pa'i ye shes te/ /don yod grub par bshad pa yin/ /khams gsum pas ni yongs bsgoms pas/ /phra ba dang ni rags pa'i gzugs/ /zhing kun la gnas gzigs pa'i phyir/ /des na sangs rgyas spyan mar bshad/ /gang phyir bdag dang bdag gir ni/ /de bzhin gshegs kun ye shes te/ /phan tshun khyab par byed pa na/ /des ni mA ma kI ru bshad/ /skyon kun 'phrogs pa'i ye shes ni/ /de bzhin gshegs pa kun gyi mchog /sems can sbyang ba la brtson pa'i/ /gos dkar mor ni bshad pa yin/ /rtag tu thugs rje chen po yis/ /'gro ba 'don pa'i bsam pa can/ /sems can sgrol ba la brtson pa/ /sgrol ma shes rab tu ni grags/ /sa la sogs pa'i khams gyur pa/ /sangs rgyas ye shes kyis brjod pas/ /'dod pa thams cad longs spyod phyir/ /spyan ma la sogs rab tu grags/ /'chi sogs 'jigs pa las grol ba'i/ /de bzhin gshegs pa kun gyi mchog / gdul dka' 'dul ba'i ye shes ni/ /de phyir snying rje mthar byed bshad/ /dag pas spyad na 'gro ba ni/ /thams cad dga' ba'i rang bzhin 'gyur/ /srid pas mi gos rtogs pa'i phyir/ /de ni pad+ma mthar byed bshad/ /ye shes don kun sgrub byed pa/ /sangs rgyas kun gyi rang bzhin grub/ / bgegs la sogs pas mi gnod pa/ /de phyir bgegs ni mthar byed bshad/ /rmongs pa'i sems can gyis smras pa/ /log pa'i shes pa rnam spyad nas/ /yang dag ye shes la 'jog pas/ /shes rab mthar byed bshad pa yin/ /shes bya med pas shes pa min/ /snyoms par zhugs pa bshad pa yin/ /chags pa la sogs gsum sbyangs pas/ /srid gsum mngon 'gyur ye shes ni/ /sangs rgyas kun gyi rang bzhin 'grub/ /des ni zhal gsum bshad pa yin/ /zhes bya ba la sogs pa 'byung ngo / /des ni de bzhin gshegs pa lnga ni ye shes lnga'i rang bzhin nyid du bstan to/ /de rnams kyi nges tshig ni/ de las kyang ji skad du/ ji ltar gzugs brnyan me long la/ /rang gi gzugs ni gnyis snang ba/ /chos skur de bzhin ye shes ni/ /me long shes bya snang ba yin/ /de bzhin gshegs kun ye shes ni/ /srog chags rnams kyi rang lha nyid/ /rang nyid gcig tu rtogs pa'i phyir/ /mnyam nyid ye shes bshad pa yin/ /gzod ma nas dag ma skyes pa'i/ /rang bzhin nyid kyis 'od gsal ba/ /phan tshun khyab par byed pas na/ /so sor rtog pa'i ye shes bshad/ /kun du rtag tu kun nas ni/ /sangs rgyas mdzad pa rab 'jug pa/ /sangs rgyas kun mdzad gcig yin phyir/ /bya ba nan tan grub par bshad/ /nyon mongs shes bya'i sgrib pa kun/ /gang tshe grol na de tshe yi/ /rnal 'byor pa mchog rdo rje can/ /shin tu rnam par dag ces bshad/ / ces 'byung ngo / /de rnams bskyed pa'i zhes bya ba la sogs pa zhes pa ni/ dang po'i sbyor ba'i phyogs gcig tu gyur pa'i don dam pa'i dkyil 'khor gyi 'og tu pad+ma la sogs pa bsdu bar byed pa'i zla ba'i dkyil 'khor gyi rnam pa'i sems brtan par bya ba'i phyir chos kyi dbyings kyi sngags brjod pa'i mtshan nyid ces bya ba'i don to/ /gang chos kyi dbyings kyi ngo bo nyid du gyur pa zhes bya ba ni stong pa nyid kyi ye shes kyi rang bzhin no/ /skyed par mdzad pa ste zhes pa ni don dam pa'i dkyil 'khor gyi rim pas 'od gsal bar byas la yang de'i ngo bo nyid du sku gsung thugs bskyed par bya'o/ /byang chub kyi sems kyi zla ba'i dkyil 'khor gyi ngo bo ni rdo rje 'chang gi sku gsung thugs zhes bya ba'o/ /oM zhes bya ba la sogs pa la/ oM ni sku gsung thugs nye bar sdud par byed pa'i ngo bo don dam pa'i bden pa'i rnam pa can rdo rje 'chang chen po'o/ /d+harma d+hA tu ni chos thams cad gnyis su med pa'i ngo bo nyid yin pa'i phyir ro/ /swa b+hA ba ni rang bzhin gang la yod pa de ni chos kyi dbyings kyi rang bzhin khams gsum gyi bdag nyid g.yo ba dang brtan pa'i 'gro ba ste/ /de'i rnam pa bdag yin no zhes rnal 'byor pas nga rgyal bskyed par bya'o/ /'dis ni bdag nyid zla ba'i dkyil 'khor dang 'dra bar byin gyis brlabs la zhes pa ni yi ge gsum yongs su gyur pa las skyes pa'i pad+ma la sogs pa gsum gyi steng du yi ge gsum yongs su gyur pa las skyes pa'i zla ba la sngar bsgoms pa'i pad+ma la sogs pa gsum dang ro gcig par gyur pa'i zla ba'i dkyil 'khor dang 'dra ba'i sems nyid byin gyis brlabs nas zhes bya ba'i don to/ /yid mi bde ba las grol ba'i/ /rnam rtog mun pa sel byed cing / /nyon mongs dri ma kun las dag / zla ba bzhin du sems zla ba'o/ /zhes 'byung ngo / /rtsa ba'i rgyud las kyang / bcom ldan 'das zla ba'i dkyil 'khor dang 'dra ba'i sems mthong ngo zhes 'byung ngo / /de'i steng du yi ge gsum la sogs pa'i lha'i skur bskyed de zhes pa la zla ba'i dkyil 'khor gyi steng du yang yi ge gsum bkod pa de yongs su gyur pa las rdo rje rtse lnga pa 'am 'khor lo la sogs pa bsgoms la/ /de la yang yig 'bru dgod cing spro ba dang bsdu ba'i rim pa'i gro ba'i don byas la badzra At+ma kou0f85haM zhes bya bas nga rgyal byas la/ de yongs su gyur pa las rdo rje 'chang chen po'i sku dang gcig tu gyur pa'i rnam par snang mdzad la sogs pa'i de bzhin gshegs pa'i phyag rgya'i sku bsgoms la/ ye shes sems dpa' dang ting nge 'dzin sems dpa' dgod cing phung po dang khams dang skye mched rnam par dag par bya ste/ sku la sogs pa byin gyis brlab pa'i mtshan nyid kyi rnal 'byor chen po yongs su rdzogs shing dbus kyi gtso bor gyur nas/ dang po sbyor ba'i 'og tu phyag rgya legs par sbyang zhing dkyil 'khor pa rnams sprul la dkyil 'khor la dgod de/ dbang bskur ba dang rgyas gdab pa'i bar du dkyil 'khor rgyal ba mchog yongs su rdzogs te las kyi rgyal ba mchog gi phyogs gcig pa 'chad par 'gyur ba'i rim pas/ phra mo'i rnal 'byor zhes pa ni 'og nas 'chad par 'gyur ba'i rim pas bsgom par bya'o/ /drang ba'i don to zhes pa ni ting nge 'dzin gnyis 'chad par 'dod pa'i phyir ro/ /de nyid gsal bar bya ba'i phyir/ /bskyed pa'i rim pa'i ting nge 'dzin to zhes smras pa la/ 'chad par 'gyur ba'i phra mo'i rnal 'byor dang lhan cig tu ting nge 'dzin gsum gyi bdag nyid ces bya ba'i tha tshig go/ /da ni le'u brtsam pa nas brtsams te tshig de rnams nyid rdo rje bzlas pa la sogs pa rdzogs pa'i rim pa'i sgo nas bstan par bya ba'i phyir 'od zer lnga po zhes smos pa la/ me la sogs pa'i dkyil 'khor bzhi po las 'byung ba'o/ /steng gi sgo nas 'byung ba zhes bya ba ni gdong gi sna khung gnyis kyi lam nas so/ /tshogs so zhes pa ni nyin mo dang mtshan mor nyi khri chig stong drug brgya srog dang rtsol ba 'byung ba'o/ /dkyil 'khor re re la dkyil 'khor bzhi rab tu 'byung zhing zhes pa la lkog ma'i gnas su me'i dkyil 'khor yin na yang sa dang chu dang rlung gi khams kyi rang bzhin gyi cha gsum gyis khyab pa'o/ /de bzhin du snying ga chu'i dkyil 'khor yang sa dang me dang rlung gi dkyil 'khor gyi chas khyab pa'o/ /de bzhin du lte bar rlung gi dkyil 'khor yang sa dang chu dang me'i khams kyi chas khyab pa'o/ /de bzhin du gsang ba'i gnas su sa'i dkyil 'khor yang chu dang me dang rlung gi khams kyi chas khyab pa'o/ /de bzhin du dkyil 'khor gyi cha re re la nyis brgya dang nyi shu rtsa lnga'i grangs kyis cha bzhi po la dgu brgyar 'gyur ro/ /'jug pa dang ldang ba dang gnas pa'i rim pas dkyil 'khor gcig la nyis stong bdun brgyar 'gyur ro/ /chu dang rlung dang sa'i dkyil 'khor rnams su yang nyis stong bdun brgya dang nyis stong bdun brgya'i grangs kyis stong phrag bcu dang brgyad brgyar 'gyur ro/ /de bzhin du mtshan mor yang stong phrag bcu dang brgyad brgyar 'gyur ro/ /gcig tu bsdus te nyi khri chig stong drug brgyar 'gyur ro/ /de nyid kyi phyir dkyil 'khor bzhi po la 'jug pa la sogs pa'i rim gyis nyin mor rgyu ba bcu gnyis dang mtshan mor rgyu ba bcu gnyis te gcig tu bsdus nas nyi shu rtsa bzhir 'gyur ro/ /de nyid kyi phyir dkyil 'khor bzhi po la 'jug pa la sogs pa'i rim gyis dgongs pa lung bstan pa'i bshad pa'i rgyud las kyang / gos dkar mo la sogs par bshad/ /brgya phrag gnyis dang nyi shu lnga/ /bzhi po legs par bsgres pas ni/ /sbyor bzhi bsdus pas brgya phrag dgu/ /dgu brgya dag tu gang bstan pa/ /nyi shu rtsa bzhi'i rim pa yis/ /legs par bsdus te de dag ni/ /nyi khri chig stong drug brgyar 'gyur/ /zhes 'byung ngo / /dkar po la sogs pa kha dog rnams kyis phye bas na bkod pa ste zhes pa ni/ 'dir dkyil 'khor re re gal te rigs dang rjes su mthun pas kha dog dmar po la sogs pa dang ldan pa yin na yang de bzhin du kha dog lnga'i 'od zer gyi tshogs dang ldan pa de dag shes par bya'o/ /g.yas pa las byung 'od zer ni/ /de nyid me yi dkyil 'khor te/ /kha dog dmar po de gsal bas/ /der ni pad+ma'i mgon po lha/ /g.yon pa las byung 'od zer ni/ /rlung gi dkyil 'khor zhes bya ba'i/ /ljang ser kha dog dang mtshungs pa'i/ /der ni las kyi mgon po lha/ /gnyi ga las byung 'od zer ni/ /kha dog ser po 'od chen po/ /dbang chen dkyil 'khor de nyid de/ /der ni rin chen mgon po lha/ /dal bus dman par rgyu ba ni/ /dkar ba kun da zla ba mtshungs/ /de nyid chu yi dkyil 'khor te/ /der ni rdo rje mgon po lha/ /rlung ni lus kun rjes 'gro ba'i/ /bya ba kun la rab 'jug pa/ /rnam par snang mdzad rang bzhin te/ /'chi ba'i lus las 'byung bar 'gyur/ / zhes 'byung ngo / /ting nge 'dzin la yang dag par dmigs pa'o zhes pa ni rdo rje bzlas pa'i mtshan nyid can gyi ting nge 'dzin la dmigs nas so/ /rdo rje yi ge gsum mo zhes pa ni sku rdo rje la sogs pa'i sa bon yin pa'i phyir ro/ /de'i bkod pa ni tshogs te zhes pa ni bcom ldan 'das rdo rje 'chang gis sems can rnams kyi bsam pa dang bag chags dang bag la nyal dang rigs kyi dbye bas sngags kyi dbye ba bdun khri nyis stong gsungs so/ /de dag thams cad sku gsung thugs kyi rang bzhin gyi yi ge gsum la bsdu bar 'gyur te/ /de la 'byung ba'i rim pa ni lte ba'i phyogs nas srog ces bya ba'i rlung gi gnas brgyad la reg pas yi ge rnams 'byung ngo / /de rnams kyis tshig dang des kyang ngag chen po skye bar 'gyur ro/ /de rnams kyis kyang bya ba dang byed pa po dang rtags dang bsdu ba dang bdag gi tshig dang gzhan gyi tshig dang byed pa dang de la phan pa dang kun du bshad pa dang tshig phrad dang nye bar bsgyur ba dang las rab tu brjod pa la sogs pa'i dbye bas rol mo dang tshig lhug pa la sogs pa dang / /bya ba dang spyod pa la sogs pa'i dbye bas chos kyi phung po brgyad khri bzhi stong 'byung bar 'gyur ro/ /de ltar ngag gi spros pa thams cad kyi yi ge phyi mo gcig pu nyid rtsa ba yin te/ de la sde tshan brgyad ni rnam par shes pa brgyad kyi rang bzhin no/ /dbyangs kyi sde tshan gcig dang ka la sogs pa du ma'i bar du reg pa'i sde tshan lnga dang / mthar gnas pa dang drod kyi sde tshan gnyis so/ /de rnams kyang a la sogs pa dang po'i yi ge rnams la bsdu bar 'gyur ro/ /de rnams kyang a ka ya sha'i yi ge bzhi po la thim par 'gyur te/ khams bzhi'i rang bzhin yin pa'i phyir ro/ /yi ge bzhi po yang a ka ya yi ge gsum la thim par gyur to/ /de rnams las shes rab kyi rang bzhin yi ge a yongs su gyur pa 'od dpag tu med pa'i rang bzhin gyi yi ge a 'gyur te/ dbyangs kyi sde tshan ni mo rtags yin pas so/ /thabs kyi rang bzhin yi ge ka yongs su gyur pa las hUM byung bar gyur te/ de ni pho rtags yin pa'i phyir ro/ /gnyis ka'i rang bzhin gyi yi ge ya yongs su gyur pa las yi ge oM byung bar gyur te/ de ni ma ning gi rtags yin pa'i phyir ro/ /de ltar yi ge oM AHhUM yi ge gsum po ni sku gsung thugs la sogs pa'i rang bzhin du shes par bya'o/ /dgongs pa lung bstan pa'i rnal 'byor chen po'i rgyud las kyang / /dang po gcig ni dgu dbus na/ /gang zhig bcu yis ma bcings pa/ / de ni bcings med ces bya ste/ /de yis mchog gi gnas shes so/ /dbyangs dang gsal byed yi ge ste/ /grangs dgu ru ni rjes 'jug pa/ /as bcings phan tshun yang dag sbyor/ /gang gis shes te 'gro ba'i bla/ /'byung ba'i mtha' dang yang dag ldan/ /tsha la sogs pa bcu drug gnas/ /lnga pa lnga dang yang dag ldan/ /bzhi ni gsum du nges par sbyar/ /yi ge oM bcas ring por bcas/ /yon tan sbyor sogs phyis dang mtshungs/ /thung ngu ma lus dag tu 'gyur/ /gcig min du ma'ang ma yin no/ /drug bshad bzhi dang gsum gcig dang / / ngo bo nyid med rang bzhin can/ /de dag dang po'i don sbyar nas / /dus gsum ye shes skye bar 'gyur/ /zhes bya ba la sogs pa 'byung ngo / /yi ge gsum po de dag 'jug pa la sogs pa'i rim gyis nyin mtshan tu stong phrag nyi shu rtsa gcig dang drug brgya'i rlung rnams rgyu'o/ /de nyid yan lag ma nyams pa'i bzlas pas ngag rnam par dag pa byed de/ /de nyid cha shas su thim pas ma ning gi bzlas pa'i mthar 'od gsal ba nyid thob par byed do/ /de nyid khro bo'i bzlas pa'i dus su bzlas par gyur pas zhi ba la sogs pa'i las byed par 'gyur ro/ / de nyid kyis kyang bskyed pa'i rim pa'i rnal 'byor pa rnams la rdo rje la sogs pa yongs su gyur pa las lha'i sku yongs su rdzogs par byed do/ /de nyid kyis kyang de bzhin gshegs pa'i thugs bskul ba'i sgo nas de rnams kyi nus pa 'gugs par byed do/ / de nyid gyen du rgyu bas sngags thams cad kyi rgyur gyur pa'i A li dang kA li'i tshul du rnam par 'jug go/ /de nyid thabs dang shes rab kyi snyoms par zhugs pas thur du rgyu ba can khu ba dang khrag dang chu'i ngo bo nyid rin chen 'byung ldan dang snang ba mtha' yas dang mi bskyod pa'i gzugs su rjes su 'jug go/ /de nyid chos 'byung ba'i nang du spros pas bu dang tsha bo la sogs pa'i tshul du khams gsum pa dang de'i rnam par dag pa'i ngo bo nyid dkyil 'khor gyi 'khor lo yang skyed par byed do/ /mtha' mar 'od gsal ba la zhugs nas rdo rje 'chang chen po'i go 'phang thob par byed do/ /de'i phyir khams gsum khyab par byed pa la longs spyod dang grol ba'i 'bras bu ster ba rnam par snang mdzad la sogs pa de bzhin gshegs pa gsum gyi bdag nyid yi ge gsum po kho na sngags thams cad kyi tshul du grags pas tshogs zhes bshad do/ /de bas na sngags btu ba la sogs pa bzhi po gong du bshad pa gang yin pa de dag yi ge gsum po kho na la brten te bcom ldan 'das kyis gsungs so/ /ji skad du/ brjod dang dmigs par grags pa dang / /brdar gyur dang ni don dam mo/ /tshig gi brjod pa thun mong ste/ /dmigs par bcas pa sangs rgyas nyid/ /sngags kyi de nyid brda ru bshad/ /don dam de bzhin nyid yin no/ /zhes 'byung ngo / /gtan tshigs bshad par bya ba'i phyir A li kA li zhes bya ba la sogs pa smos te/ a la sogs pa'i phreng ba ni A li'o/ /a la sogs pa dbyangs kyi yi ge bcu drug zla ba'i cha'i ngo bo nyid gang yin pa de rnams kyi rtsa ba ni a nyid do/ /ji skad du/ snying gi dkyil ni mi shigs pa'i/ /'bar ba'i mar me lta bu ni/ /yi ge dam pa phra ba ni/ /a yig gsal ba'i gtso bor gnas/ /zhes 'byung ngo / /dbyangs yig gi phreng ba de nyid thabs dang shes rab nyis 'gyur du byas te mtshan bzang po sum cu rtsa gnyis kyi ngo bo nyid du 'gyur ro/ /de nyid tsheg drag dang rjes su 'jug pa'i dbyangs dang lce'i rtsa ba'i yi ge dang bung ba'i yi ge dang rjes su dbyangs dang bcas pa'i mthar gnas pa'i yi ge gsum dang bcas par gsal bya sum cu rtsa gsum nyis 'gyur gyis dpe byad brgyad cu'i rang bzhin du 'gyur ro/ /de nyid thung ngu lnga'i bdag nyid kyis phung po lnga'i ngo bo nyid ye shes lnga'i mtshan nyid can thabs kyi rang bzhin de bzhin gshegs pa lnga'i bdag nyid du 'gyur ro/ /de nyid ring po lnga dang 'brel pa'i yi ge bzhi'i tshul gyis shes rab kyi rang bzhin gyi sangs rgyas spyan ma la sogs pa'i yum bzhi dang gzugs rdo rje ma la sogs pa mchod pa'i lha mo lngar shes par bya'o/ /ma ning gi yi ge bzhi yongs su spangs nas dbyangs bcu gnyis kyi tshul du phyi dang nang gi skye mched kyi rang bzhin du 'gyur ro/ /thung ba dang ring ba gnyis kyi tshul du 'brel pa'i yi ge bzhi dang lhan cig spyan ma la sogs pas 'khyud pa de bzhin gshegs pa lnga dang gshin rje mthar byed la sogs pa'i khro bo bzhi ste bcu gsum gyi bdag nyid can gyi dkyil 'khor gyi 'khor lo'i rang bzhin nyid du 'gyur ro/ /de nyid ka la sogs pa'i yi ge lnga lnga pa'i sde tshan lnga'i rang bzhin gyi lha mo bzhis yongs su bskor ba'i de bzhin gshegs pa lnga'i dkyil 'khor lnga mthar gnas pa dang drod kyi yi ge dang tsheg drag dang rjes su 'jug pa'i dbyangs dang lhan cig tu khro bo'i rgyal po bcus bskor ba'i dkyil 'khor gyi 'khor lo nyid du 'gyur ro/ /de ni thung ba dang ring ba dang 'phar ba'i dbye bas rnam pa bco brgyad kyi tshul gyis khams bco brgyad kyi ngo bo nyid du 'gyur ro/ /de la thung ba dang ring ba dang 'phar ba ste re re la rjes su 'jug pa'i dbyangs dang bcas pa dang rjes su 'jug pa'i dbyangs med pa dang mtho ba dang dma' ba dang bar ma'o/ /ji skad du/ thung dang ring dang 'phar ma dang / /dbyangs ni gsum po dang sbyar dang / /sna rjes 'gro ba'i med pa yis/ / grangs su rnam pa bco brgyad yin/ /zhes 'byung ngo / /de ltar gyur pa'i yi ge a'i 'brel pa dang ldan pa'i phreng ba ni A li zhes bya'o/ /de bzhin du ka'i 'brel pa dang ldan pa'i phreng ba ni kA li zhes bya'o/ /A li dang kA li de dag yi ge bzhi bcu rtsa dgu'i yi ge ni phyi mo'i rang bzhin no/ /ma ning la sogs pa'i gzugs can rnams ni zhes pa ni de la bud med kyi rang bzhin ni yi ge a la sogs pa ste/ shes rab kyi ngo bo yin pa'i phyir ro/ /pho rtags kyi rang bzhin ni ka la sogs pa ste/ thabs kyi ngo bo yin pa'i phyir ro/ /gnyis ka dang snyoms par zhugs pa'i rang bzhin ya la sogs pa ste ma ning gi rtags kyi ngo bor shes par bya'o/ /yi ge gsum du zhugs pas mo rtags la sogs pa'i rang bzhin gyi a la sogs pa de rnams sku gsung thugs kyi bdag nyid kyi yi ge gsum la bsdus pa'i phyir ro/ /da ni 'di ltar dpyad par bya ste/ mo rtags dang pho rtags dang ma ning gi rtags ni ji lta bu yin zhe na/ de la kha cig na re/ nu ma skra can bud med yin/ kha spu dang ldan skyes par bshad/ /gang zhig gnyis ka las 'das pa'i/ /de ni ma ning bshad pa yin/ zhes zer ro/ /de yang mi rigs te/ gal te nu ma dang skra can mo rtags yin na/ de'i tshe phreng ba dang nyal khri la sogs pa dag mo rtags su mi 'gyur te/ de rnams nu ma dang skrar mi ldan pa'i phyir ro/ /'breg pa'i skra dang ldan pa'i sa phyogs dag kyang mo rtags su 'gyur ro/ /sbyar ba'i nu ma dang skra'i cha lugs 'dzin pa'i gar mkhan skyes pa yang mo rtags nyid du thal bar 'gyur ro/ /de bzhin du/ kha spu dang ldan pa pho rtags yin na sgog pa la sogs pa yang de nyid du thal bar 'gyur te/ de rnams ni sgra'i gzugs la ltos pas ma ning gi rtags yin pa'i phyir ro/ / gnas la sogs pa gnas pa'i rnal 'byor ma rnams kha spu dang ldan pas pho rtags su 'gyur ba dang / skyes pa kha cig kha spu dang mi ldan pas mo rtags su thal bar 'gyur ro/ /de yang mi 'thad de/ gnyis ka'i rang bzhin gyi rtags ma ning yin na sa la sogs pa rnams kyang ma ning nyid du thal bar 'gyur ro/ /de yang mi 'thad de/ de rnams mo rtags yin pa'i phyir ro/ /gzhan na re 'phel ba dang 'grib pa dang / bar ma ni pho rtags la sogs pa'i mtshan nyid yin no zhes zer ro/ /de la 'phel ba ni nus pa dang po dang ldan pa'o/ /'grib pa ni nus pa chung ba dang ldan pa'o/ /bar ma ni nus pa bar ma dang ldan pa'o zhe na/ de yang ma yin te/ gang gi phyir gal te 'grib pa ni mo rtags kyi mtshan nyid yin na de'i tshe bu mo skye na de'i tshe nus pa 'phel bas pho rtags su thal bar 'gyur ro/ /de yang mi 'thad de/ de bzhin du 'phel ba zhes bya ba pho rtags kyi mtshan nyid yin na de'i tshe skyes bu rgas pas de'i nus pa 'grib par 'gyur na mo rtags su thal bar 'gyur ro/ /de yang mi 'thad de/ skyes pa dang ma bral ba'i phyir ro/ /nus pa bar ma ma ning gi rtags kyi mtshan nyid yin na de'i tshe skyes pa'am bud med nus pa bar ma dang ldan pas ma ning nyid du thal bar 'gyur ro/ /de bas na mtshan nyid de dag ni ma nges pa yin no/ /kha cig na re skad rags pa la sogs pa pho rtags kyi mtshan nyid yin la/ /skad phra ba la sogs pa ni mo rtags kyi mtshan nyid yin no/ /de dag med na ni ma ning gi mtshan nyid yin no zhe na/ de yang ma yin te/ gal te skad rags pa la sogs pa pho rtags kyi mtshan nyid yin na/ de'i tshe mdzes zin pa'i skyes pa rnams skad phra ba yin pas mo rtags su thal bar 'gyur ba dang / dbyangs rags pa'i mo rnams kyang pho rtags su thal bar 'gyur ro/ /gnyis ka med pa ma ning yin na phreng ba dang nyal khri la sogs pa ma ning du thal bar 'gyur ro/ /de yang mi 'thad de/ de rnams mo rtags yin pa'i phyir ro/ /skad rags pa dang ldan pa'i rdza rnga la sogs pa yang pho rtags su thal bar 'gyur ro/ /de yang mi 'thad de/ ma ning yin pas so/ /de bas na mtshan nyid de yang ma nges pa'o/ /bu chung chags pa la sogs pa yang mo rtags kyi mtshan nyid du mi rigs te/ mo [(]bsham [,]gsham [)]la de med pas skyes pa nyid du thal bar 'gyur ba'i phyir ro/ /shes rab dang ldan pa pho rtags kyi mtshan nyid du mi rigs te/ de dang ldan pa'i mo rnams kyang skyes pa nyid du thal bar 'gyur ro/ /chags pa'i cha che ba dang chung bas mo rtags dang pho rtags yin na de'i chags pa che ba'i skyes pa yang mo rtags nyid du thal bar 'gyur ba dang / chags pa chung ba'i bud med kyang skyes pa nyid du thal bar 'gyur ro/ /de bas na mtshan nyid de yang ma nges pa'o/ /pho'i dbang po dang mo'i dbang po dang ldan pa yang pho rtags dang mo rtags kyi mtshan nyid dang ldan pa ma yin te/ /nang du chud pas pho'i dbang po mi mngon pa'i sangs rgyas dang byang chub sems dpa' rnams mo rtags su thal bar 'gyur ba'i phyir ro/ /mo'i dbang po dang ldan pa yang mo rtags ma yin te/ ma ning la de yod pa'i phyir ro/ /de bas na mtshan nyid de yang ma nges so/ /rtags ni khyad par med pa ste/ /'jig rten la brten pa'i phyir ro zhes bya bar brda sprod pa rnams kyis smra ba de ni ma yin te/ gal te 'jig rten la brten pa'i rtags yin na/ de'i tshe dngos po thams cad ni rtags thams cad dang ldan par thal bar 'gyur te/ 'gram dang khang pa la sogs pa'i sgra bzhin no/ /de bas na pho rtags la sogs pa'i mtshan nyid ni rigs pas grub pa ma yin no/ /'dir smras pa khyab par bya ba dang khyab par byed pa dang gnyis ka dang bral ba ni pho rtags dang mo rtags dang ma ning gi rtags yin te/ gang gi phyir snyoms par zhugs pa'i dus su lhan cig skyes pa'i dga' ba'i bde ba chen pos gang gis khyab par byed pa ni sems kyi rgyud de'i rang bzhin du byed pa khyab par byed pa de ni mo rtags yin no/ /bde ba chen pos khyab par bya ba ni pho rtags yin no/ /bde ba chen pos khyab pa dang khyab par byed pa med pas gnyis ka dang bral ba ni ma ning gi rtags yin te/ snod kyi 'jig rten no/ /snod kyi 'jig rten gyi dngos po rnams la mo rtags la sogs pa gang yod pa de ni brtags pa pa yin te/ don dam par de med pa'i phyir ro/ /de bzhin du dbyangs kyi sde tshan zla ba'i cha bcu drug gi rang bzhin gyis gsal bya'i sde tshan khyab par byed pas ni tshim par byed pa shes rab kyi rang bzhin ni A li ste mo rtags so/ /khyab par bya ba ni de rnams kyis brjod par bya ba de ni kA li ste thabs kyi rang bzhin gyi pho rtags yin no/ /khyab par bya ba dang khyab par byed pa gnyis ka'i rang bzhin ni ya la sogs pa'i sde tshan te ma ning gi rtags so/ /de nyid kyi phyir mo rtags kyi rang bzhin dbyangs kyi sde tshan gyi thog ma dang tha ma'i yi ge gnyis yang dag par sbyar nas shes rab kyi rang bzhin gyi yi ge a ru 'gyur ro/ /yi ge ka la sogs pa yang dag par sbyor bas thabs kyi rang bzhin ni yi ge hUM ste pho rtags yin no/ /ya la sogs pa sde tshan yongs su gyur pa las yi ge oM du 'gyur ro/ /de la a u ma zhes yang dag par sbyor bas oM du 'gyur ro/ /yi ge a ni shes rab kyi rang bzhin no/ /yi ge ma ni thabs kyi rang bzhin te/ /gsal bya yin pa'i phyir ro/ /yi ge oM ni de dang sbyor ba'i rang bzhin te ma ning zhes bya'o/ /de nyid kyi phyir shes rab dang thabs gnyis ka yang dag par sbyor ba'i rang bzhin gyi ma ning gi rtags so/ /de ltar pho rtags dang mo rtags gnyis ka'i rang bzhin ni oM la sogs pa'i yi ge gsum yin no/ / mnyam par gzhag cing zhes pa ni skad kyi byings don du ma yin pa'i phyir mnyam par gzhag pa'i sgra ni bzlas pa'i don la 'jug pa'o/ /de nyin dang mtshan du ldang ba dang 'jug pa dang / gnas pa dang zhes pa ni srog gi rlung nang du zhugs pa ni 'jug pa'o/ /me dang mnyam pa'i rlung bar du gzhag pa ni gnas pa'o/ /srog gi rlung gyen du rgyu ba ni ldang ba yin no/ /de bas na rlung gi bya ba de dag gsum ni 'gugs pa dang / bzhugs su gsol ba dang / gshegs su gsol ba'i rang bzhin du shes par bya'o/ /gang gi phyir yi ge oM brjod pa'i dus su nang gi tshul du rlung 'jug par 'gyur ro/ /yi ge hUM brjod pa'i dus su phyi'i tshul du rlung 'byung bar mtshon pa'o/ /yi ge a brjod pa'i dus su rlung ni bar na gnas pa mtshon par 'gyur te/ rlung dang yi ge tha mi dad pa'i phyir ro/ /de la rlung rgyu bas yi ge rnams 'byung ba yin te/ yi ge brjod pa'i dus su rlung nyid kyis rtsol bar byed pa'i phyir ro/ /de bas na bya ba dang byed pa'i 'brel pa'am phan gdags par bya ba dang phan 'dogs par byed pa'i 'brel pas rlung dang yi ge dbyer med pa yin no/ /rlung gi las kyi bdag nyid kyi 'jug pa la sogs pa'i bya ba ni rlung dang de'i bdag nyid du 'jug pas rlung las tha dad pa ma yin te/ 'gro ba dang bskum pa dang brkyang ba'i mtshan nyid de yin pa'i phyir ro/ /ji skad du/ yi ge oM gyi dbugs ni nang du 'jug pa dang / yi ge a'i sngags ni bar du gnas pa dang / yi ge hUM gi sngags ni ldang bar gyur pa ste/ rkan dang mchu dag 'brel med gsang sngags bzla/ /zhes 'byung ngo / /der ni 'gro ba dang 'ong ba dang bar du gnas pa'i 'jug pa dang gnas pa dang ldang ba de rnam pa gsum gyis bzlas pas na zhes pa ni yan lag ma nyams pa'i bzlas pas rdo rje 'chang chen po la sogs pa'i rnam pa bcu gcig pa'i rdo rje bzlas pa ting nge 'dzin gang gis byed pa de la de skad ces bshad do/ /yan lag ma nyams pa'i bzlas pa ni sngags dang rlung dang lha'i rnam par dag pa'i ngo bo ye shes gsum dang khams gsum dang rtsa gsum dang de kho na nyid gsum dang rnam par thar pa'i sgo gsum dang sku gsung thugs dang sku gsum dang rdzas gsum dang srid pa gsum dang 'jig rten gsum la sogs pa gcig tu byas pa'i yid la byed pa'i mos pas rdo rje tshig gis sems rtse gcig pa thob pa'i bar du rdo rje bzlas pa bya ba yin gyi/ phyi rol gyi bzlas pa brjod pa'am thos pa ngag gi bzlas pa'i rang bzhin brtag par bya ba ma yin no/ /rkan dang mchu dang lce sogs kyi/ /gang zhig g.yo bar gyur pa ni/ /de nyid mi 'gyur ga las te/ /'gyur ba nyid du gnas pa'i phyir/ /zhes kam pa la'i zhal snga nas kyis gsungs pa'i phyir ro/ /de bzhin du/ yi ge rang bzhin sngags rnams ni/ /de nyid kyi phyir mi 'thad de/ /gang phyir rtswa mchog tsam nyid ni/ /'gugs par byed par mi nus so/ /zhes gsungs so/ /rab tu byed pa las kyang / de yi brtul zhugs ma bshad cing / /bgrang phreng ma yin 'das pa min/ /'dzin dang sbyin sreg las rnams ni/ /yang dang yang du 'jug pa min/ /zhes 'byung ngo / /rtsa ba'i rgyud las kyang / /slong mo za zhing mi bzla ste/ /ma blangs pa la 'ang chags mi bya/ /thabs dang shes rab la gnas pas/ /yan lag ma nyams gsang sngags bzlas/ /de bzhin du de nyid las kyang / /don rtogs pa yis bzlas pa ni/ /ngo bo nyid med mdzes pa ste/ /dus gsum sangs rgyas rnam dpyod pas/ de ni rdo rje bzlas par bshad/ ces gsungs so/ /de lta bu ting nge 'dzin zhes pa ni rlung gi de kho na nyid dang sngags kyi de kho na nyid rjes su rtogs pa sngon du 'gro bar rdo rje bzlas pa'i mtshan nyid can gyi sems rtse gcig pa nyid do/ /gang yin pa de la de skad ces bya ste zhes pa la/ brjod par bya ba'i sgo nas le'u gang du yod pa zhes tshig gi don to/ /don 'di nyid ni zhes pa ni gtso bor gyur pa'i dang po rdo rje bzlas pa dang / de'i 'og tu sems rnam par dag pa la sogs pa'i rim pa gzhan rnams kyang zhes bya ba'i tha tshig go/ /oM ni dang po gcig dang ldan pa zhes pa ni bcom ldan 'das rnam par snang mdzad de/ de'i yi ge 'bru yin pa'i phyir ro/ /shU n+ya tA ni gnyis pa ste zhes pa ni nam mkha'i dbyings ni stong pa nyid de de'i rang bzhin ni rin chen 'byung ldan te gnyis pa'o/ /dz+nyA na zhes pa gsum pa nyid ces pa ni mkhyen pas na ye shes so/ /de bas na dngos po thams cad so sor rtog pa'i ye shes kyi bdag nyid ni bcom ldan 'das snang ba mtha' yas te gsum pa'o/ /badzra zhes bya ba ni bzhi pa'o zhes pa ni rdo rje ltar mi phyed pa'i chos kyi dbyings kyi ye shes kyi rang bzhin ni bzhi pa ste mi bskyod pa'o/ /swa b+hA ba At+ma kou0f85 lnga pa zhes pa ni bya ba nan tan grub pa'i ye shes kyi rang bzhin nam/ rlung gi khams kyi rang bzhin te/ lnga pa de don yod grub pa'o/ /a haM zhes pa drug par brjod/ /ces pa ni de bzhin gshegs pa lnga sdud par byed pa thams cad gcig gi bdag nyid can rdo rje 'chang chen po zhes bya ba'i don to/ /de ltar bde gshegs drug po ni/ /rnam par snang mdzad la sogs pa drug po rdzogs pa'i rim pa sgom par byed pa'i rin po che lta bu'i gang zag la bstan to/ /des na don 'di yin te/ rdo rje bzlas pa bsgom par bya bar 'dod pa'i rnal 'byor pas dang por cig car du lha'i sku bskyed cing de bzhin gshegs pa drug gi rang bzhin bsgoms la/ de nas rnam pa bcu gcig bzlas par bya'o/ /yang na sgra ji bzhin ma yin pa bshad pa'i rim pas yi ge drug gis mtshon pa'i rnam par snang mdzad la sogs pa drug gi rnal 'byor pas zla ba gcig gis 'bum phrag drug bzlas par bya'o/ /de la nyin mtshan gcig gis nyi khri chig stong drug brgyar 'gyur/ zhag lngas 'bum phrag gcig dang stong rtsa brgyad ni 'bum phrag gcig ces bstan pa yin no/ /grangs 'di nyid kyis mdor na zla ba gcig gis 'bum phrag drug tu 'gyur ro/ /ji skad du/ sngags ni rnam shes las 'byung ba'i/ /'bum phrag drug tu bzlas byas te/ /rdo rje sems la phyag 'tshal nas/ /de ni nya la 'grub par 'gyur/ /zhes 'byung ngo / /rnam pa gzhan gyis kyang rdo rje bzlas pa bstan pa'i phyir/ oM shU n+ya tA zhes bya ba la sogs pa smos te/ zung ni tshig gnyis so/ /dang po rnam par snang mdzad do/ /dz+nyA na badzra gnyis po zhes pa ni snang ba mtha' yas so/ /swa b+hA ba At+ma kou0f85haM gyur zhes pa ni tshig gnyis kyis mi bskyod pa bstan to/ /de nyid gsum du 'dir brtags pa'o zhes pa la sku gsung thugs kyi bdag nyid can gyi rdo rje 'chang chen po a haM zhes cig car du nga rgyal bskyed la snga ma bzhin du/ lha la sogs pa'i rnal 'byor gyi bzlas pa bya'o/ /rab tu byed pa las kyang / 'jug pa dang ni gnas pa dang / /ldang ba yi ni rim pa yis/ /mtshon bya mtshon byed grangs kyis ni/ /yan lag ma nyams gsang sngags bzlas/ /zhes 'byung ngo / /yang na sku rdo rje la sogs pa rnal 'byor pa gsum gyis sna'i rtse mor yungs kar gyi 'bras bu'i tshod tsam gyi thig le phra mor bsgoms la brtan pa'i rtags mthong ba'i bar du bzlas par bya'o/ /de nyid gsum ni gcig gyur pa/ /zhes pa ni sku la sogs pa nye bar sdud pa las 'byung ba'i gzugs so/ /yang dag ces pa ni rnal 'byor pa'i mngon sum mam rang rig pa'i mngon sum gyis thob par bya ba gsal bar snang ba rnam par mi rtog ma 'khrul pa zhes pa'i tha tshig go/ /gsal ba zhes bya ba ni dag cing zla ba dang kun da ltar mtshungs pa'i phyir ro/ /mi gsal zhes pa ni khams nyi shu rtsa bzhi nye bar bsdus pa las byung ba'i zhal dang phyag dang sku mdog dang dbyibs la sogs pa dang bral ba thig le'i gzugs zhes bya ba'i don to/ /lha mo bzhis yongs su zhus pa'i bshad pa'i rgyud las kyang / /de phyir lha mo bshad bya ba/ /snying po las ni snying po mchog /sangs rgyas kun gyi gsang ba na/ /thams cad bdag nyid gang zhig gnas/ /de nyid ye shes lnga rang bzhin/ /yungs kar gyi ni 'bru tshod tsam/ /de yi dbus na gnas pa'i lha/ /mi gsal gsal ba'i bdag nyid can/ /zhes 'byung ngo / /rdo rje bzlas pa bshad nas/ sems la dmigs pa la sogs pa'i rim pa bzhi bstan par bya ba'i phyir/ /yang dag par sbyor ba gsum gyi skur bsgom zhing zhes pa ni snang ba la sogs pa gsum gyis nye bar mtshon pa'i 'od gsal ba'i de kho na nyid do/ / snang ba gsum gyi tshogs kyis snang ba 'khrigs pa'o zhes pa ni sngags dang phyag rgya'i rim pas thob pa'i zla ba dang nyi ma dang mtshams kyi snang ba dang 'dra ba'i snang ba la sogs pa'i ye shes kyi ngo bo ste de kho na nyid bzhi po 'od kyi tshogs dang bcas pa sprin med pa'i nam mkha' dang mtshungs pa thams cad stong pa zhes bya ba'i de kho na nyid bsgom par bya'o/ /des ni sems la dmigs pa'i rim pa bstan to/ /'ja' tshon ltar zhes bya ba la sogs pa ni sngon gyi smon lam gyi shugs kyis ye shes kyi sku sgyu ma'i dpe bcu gnyis kyis nye bar mtshon pa bsgom par bya'o/ /dkar po la sogs pa'i 'od zer lngas brgyan pa'o zhes pa ni dkar po la sogs pa'i sku mdog lngas nye bar mtshon pa'i de bzhin gshegs pa rigs lnga las 'byung ba lha mo dang byang chub sems dpa' dang khro bo'i rgyal po dang bcas pa'o/ /khams phra ba zhes pa la/ 'od gsal ba'i de kho na nyid do/ /snang ba mched pa la sogs pa'i rim pa'am cig car gyi rnal 'byor gyis de las 'byung ba'i yongs su rdzogs pa zhes bya'o/ /dngos po thams cad kyi ngo bo nyid do zhes pa la brtan pa dang g.yo ba'i bdag nyid dam/ rang dang gzhan gyi rgyud sgyu ma'i dpe bcu gnyis kyis nye bar mtshon pa'i rang bzhin yin no/ /rgyu ba la sogs pa'i 'od zer lnga ste zhes pa la rgyu ba dang rnam par rgyu ba dang yang dag par rgyu ba dang / rab tu rgyu ba dang nges par rgyu ba dang zhes bya ba yan lag gi rlung lnga ste sgra ji bzhin ma yin pas rdo rje'i sgo zhes bya ba'i rnal 'byor chen po'i rgyud las/ sbrul dang rus sbal rtsangs pa dang / /lha sbyin dang ni gzhu las rgyal/ / zhes 'byung ngo / /de rnams kyi 'od zer ni yul gzung bar bya ba'i phyir mig la sogs pa'i dbang po rnams 'jug go/ /de dang ldan pa ni so sor sdud pa dang bsam gtan gyi yan lag dag gis yul dang dbang po'i nye bar spyod pa dang ldan pa zhes bya ba'i tha tshig go/ /ji skad du/ gang zhig mthong ba reg pa dang / /thams cad sgyu ma bzhin mthong ste/ /kun rdzob tu ni mi gnas pas/ /sgyu ma bzhin du mtshon par bya/ /dbang po gang dang gang lam gyis/ /de dang de yi rang bzhin 'gro/ /mnyam par ma bzhag sbyor ba yis/ /sangs rgyas kun gyi rang bzhin lha/ /gzugs dang sgra dang de bzhin dri/ /ro dang reg bya nyid dag la/ /mig la sogs pa'i 'jug pa ni/ /sgyu ma bzhin du mtshon par bya/ /'dir ni mang po smos ci dgos/ /rdo rje theg par de nyid la/ /gang yang rnal 'byor pas dmigs pa'i/ de de sgyu ma bzhin gzhan min/ /zhes 'byung ngo / /yul rnams la nye bar longs spyod pa zhes pa ni so sor sdud pa'i rim pas gzung ste/ bsam gtan gyi rim pas rnam par dag pa thob pa gang yin pa'o/ /dbang po lnga rnams so zhes pa ni mig la sogs pa'o/ /de rnams kyis brgyan pa zhes pa la sgyu ma lta bu'i dbang po dang ldan pa yin gyi/ khrag dang sha la sogs pa'i rang bzhin ni ma yin no/ /rab tu byed pa las kyang / /khyod kyi sku la khong stong med/ /sha dang rus pa khrag kyang med/ /nam mkha'i 'ja' tshon dang mtshungs pa'i/ /khyod kyi sku ni ston par byed/ /sku la snyun dang mi gtsang med/ /bkres dang skom pa mi srid de/ /khyod kyis 'jig rten 'jug pa'i phyir/ /'jig rten bya ba bstan par mdzad/ /ces 'byung ngo / /dbang po tshang ba'i phyir ro zhes pa ni ji ltar dri za'i sems can gzugs dang dbang po phra ba dang ldan pa de bzhin du sgyu ma'i sku yang gzugs dang dbang po phra ba dang ldan pa zhes bya'o/ / dbang po tshang ba'i dri za ni/ /de nyid dri za'i sems can te/ /rdo rje'i sku yang de nyid do/ /zhes 'byung ngo / /de lta bu'i rnam pa zhes pa ni sgyu ma lta bu'i sku'o/ /sangs rgyas kyi dkyil 'khor gsal bar 'jug cing zhes pa la/ sangs rgyas ni de bzhin gshegs pa rnams la dkyil ni snying po'o/ /de len zhing 'dzin par byed pas na sangs rgyas kyi dkyil 'khor ro/ /chos kyi dbyings dang de bzhin nyid dang / shes rab kyi pha rol tu phyin pa dang yang dag pa'i mtha' dang chos nyid kyi rang bzhin 'od gsal ba zhes pa'i tha tshig go/ /de la 'jug cing zhes pa ni phyag rgya'i rim pa'am ting nge 'dzin gyi rim pas yang dag pa'i mthar 'jug par bya'o zhes pa'i don to/ /de ltar bdag nyid ces bya ba la sogs pas bdag la byin gyis brlab pas mtshan nyid kyi sku rim pa bzhi pas 'od gsal ba la 'jug par bya'o/ /skad cig ma'i rnam par shes pa ni cig car du spro ba'o/ /rdo rje 'chang chen po'i sku zhes pa la rdo rje sku'i rnam grangs can dpal rdo rje sems dpa'i phyag rgya chen po'i gzugs so/ /'khor ba dang mya ngan las 'das pa dag gi dbus su zhes pa ni/ srid pa dang zhi ba'i ro mnyam pa'i rang bzhin can no/ /yod pa dang med pa'i phyogs dang bral ba zhes pa la/ de ni nye bar mtshon pa tsam yin te/ yod pa dang med pa dang dngos po dang dngos po ma yin pa dang rtag pa dang chad pa dang kun rdzob dang don dam pa dang brtags pa dang yongs su rdzogs pa dang sngags kyi sku dang ye shes kyi sku dang / thabs dang shes rab dang stong pa nyid dang snying rje la sogs pa'i rnam par rtog pa dang bral ba'o/ /bdag nyid ces pa ni rang gi sku'o/ /shes par bya ba la rjes su dran par bya'o/ /des ni zung 'jug gi rim pa bstan pa'o/ /rim pa 'di nyid kyis zhes bya ba la sogs pas rdo rje bzlas pa la sogs pa'i rim pa'i mtshan nyid can gyi rdzogs pa'i rim pas so/ /rnam par snang mdzad la sogs par zhes pa ni de bzhin gshegs pa drug gi phyag rgya chen po'i sku'o/ /bsam pa ji lta ba'i dbye bas zhes pa ni gti mug la sogs pa'i nyon mongs pa'i bag chags kyi dbye ba'i sgo nas so/ /rang gi bdag nyid bskyed pa la/ /zhes pa ni spros nas so/ /bdag gi don bya'o zhes pa la nye bar mtshon pa tsam yin te gzhan gyi don kyang bya'o zhes bya ba'i tha tshig go/ /de bas na zhes bya ba la sogs pas rnam par snang mdzad la sogs pa'i phyag rgya chen po'i sku rdzogs pa'i rim pas bsgom par bya'o zhes bstan to/ /rdo rje 'chang chen po'i rnal 'byor zhes bya ba ni rdzogs pa'i rim pa las 'byung ba'i rdo rje 'chang chen po'i lha'i sku'o/ /'di nyid ni rim pa lnga'i sgo nas rdzogs pa'o/ /brten par bya ba'i phyir zhes pa ni chos kyi dbyings kyi ngo bo nyid ni de bzhin gshegs pa drug gi rang bzhin du bya ba'i phyir ro/ /gsungs te ni sdud pa po'i tshig ces lhag ma'o/ /'od gsal ba'o zhes pa ni dngos po thams cad de'i rang bzhin yin pa'i phyir ro/ /ting nge 'dzin to zhes pa ni spros pa thams cad dang bral ba'i sems rnam par dag pa'i rim pas thob par bya ba'am mngon par byang chub pa'i rim pas thob par bya'o/ /de la dmigs pa'o zhes pa ni bsgom par byas nas so/ /bskyed pa de ni zhes pa la rdzogs pa'i rim pas ye shes kyi sku'i rang bzhin nam rdo rje'i sku'i rang bzhin du bsgrub par bya zhes bya ba'i don to/ /'di'i don ni bshad pa'i rgyud las zhes pa ni rdo rje phreng ba'i rgyud las so/ /oM ni dang por shes par bya/ /zhes pa rnam par snang mdzad de/ de ni oM las 'byung ba'i phyir ro/ /d+harma zhes bya gnyis pa'o/ /zhes pa ni chos kyi phung po brgyad khri bzhi stong gi rnam par dag pa'i rang bzhin gyi rdo rje chos te snang ba mtha' yas so/ /d+hA tu zhes bya gsum par bshad/ /ces pa ni chos thams cad kyi rang bzhin chos kyi dbyings rnam par dag pa'i ngo bo ni mi bskyod pa'o/ /swa b+hA bar grags bzhi pa'o/ /zhes pa ni nam mkha'i khams kyi rang bzhin rin chen 'byung ldan no/ /At+ma kou0f85 ni lnga pa yin/ /zhes pa ni thams cad kyi bdag nyid las thams cad pa ste don yod par grub pa'o/ /a haM du gyur drug par 'dod/ /ces pa ni de bzhin gshegs pa lnga nye bar sdud par byed pa'i rnam pa can te rdo rje 'chang chen po'o zhes pa'i don to/ /sngags ni dbang po thams cad dang rnam par shes pa rnam par dag pa'i mtshan nyid can gyi bsgom pa'i rnam pa'o/ /'di brjod nas zhes pa ni de bzhin gshegs pa drug gi mos pa byas nas so/ /rgyud phyi ma las kyang / dbang po dang ni yul gyis yid/ /rten te byung ba gang yin pa/ /de ni min zhes bshad pa ste/ /tra ni skyob pa'i don yin no/ /zhes 'byung ngo / /de'i 'og tu zhes pa ni de dang 'dra ba'i lhag par mos pa byas nas so/ /sgom pa'i bdag nyid can gyis zhes pa ni rdzogs pa'i rim pa'i rnal 'byor pas so/ /bsgom zhes pa ni zung du 'jug pa'i rim pa'i ting nge 'dzin gyi de bzhin gshegs pa drug gi nga rgyal bya zhes bya ba'i don to/ /nges pa'i don ni rdzogs pa'i rim pa so sor bstan pa'i phyir ro/ /de ltar le'u nas brtsams te yongs su dag pa dang yongs su ma dag pa'i lha'i sku'i dbye bas rim pa gnyis bstan to/ /bskyed pa'i rim pa'i phyogs su dang po'i sbyor ba dang dkyil 'khor rgyal ba mchog gi ting nge 'dzin dag gis rnam par snang mdzad la sogs pa de bzhin gshegs pa lnga dang de'i lha'i dkyil 'khor bstan to/ /rdzogs pa'i rim pa'i phyogs su yang rdo rje bzlas pa la sogs pa'i rim pas zung du 'jug pa'i bar du rdo rje 'chang chen po'i sku rdzogs par bstan to/ /da ni zhes pa ni bskyed pa'i rim pa'i yan lag tu gyur pa'i las kyi rgyal ba mchog gi phyogs gcig phra mo'i rnal 'byor zhes bya ba yan lag dang po bstan par bya ba yin no/ /rang gi sems brtan par bya ba'i phyir zhes pa ni rdul phra rab dang shin tu rags pa'i bsgom pa'i mtha'i bar du sems dbang du 'gyur ba'i phyir ro/ /dgongs pa ni sa 'og bdun gyi bar du khyab par byed pa'i zhabs kyi pad+ma dang / srid pa'i rtse mo'i bar du spyi bos khyab pa phyag rnams kyis phyogs bcu dang nam mkha'i dkyil khyab par byed pa'i rdo rje 'chang chen po la sogs pa'i lha'i sku sna tshogs pa'i rang bzhin yin no zhes gang gi tshe rnal 'byor pas bsgoms na de'i tshe rang gi sems brtan par 'gyur ro/ /gang gi tshe yungs kar gyi 'bru'i tshad tsam gyi phra ba brtan pa dang g.yo ba'i khams gsum gyi rang bzhin skra'i rtse mo'i brgya stong gi cha'i tshad tsam thig le'i bdag nyid bsgoms na de'i tshe rang gi sems dbang du 'gyur ro/ /'dir ni rdul phra rab bsgom pa'i gnas skabs yin te/ shin tu rags pa'i bsgom pa ni sngar bshad pa'i phyir ro/ /phra mo'i rnal 'byor rnam pa gsum bsgom pa gsungs te zhes pa ni bskyed pa'i rim pa'i rnal 'byor pa'i gcig dang gzhan ma gnyis rdzogs pa'i rim pa'i rnal 'byor pa'o / /'chad par 'gyur ba'i gsum pa la yang rdzogs pa'i rim pa'i rnal 'byor pa nyid kyi'o/ /bsdus pa'i don ni 'di yin te/ spyi'i don gyi phyogs su bskyed pa'i rim pa'i rnal 'byor pas phra mo'i rnal 'byor bsgom pa dang / sbas pa dang mthar thug pa'i bshad pa'i phyogs dang 'og nas bshad pa'i nges pa'i don gyi phyogs su yang rdzogs pa'i rim pa'i rnal 'byor pas phra mo'i rnal 'byor bsgom pa'o/ /de ltar bskyed pa'i rim pa dang rdzogs pa'i rim pa'i rnal 'byor pa dag la phra mo'i rnal 'byor rnam pa gsum gyi bsgom pa bstan te/ 'dod chags dang zhe sdang dang gti mug gi rigs can gyi rnal 'byor pa'i dbye bas so/ /de la dang po bshad pa'i phyir/ /rdo rje la sogs pa'i phyag mtshan te zhes pa ni rdo rje dang 'khor lo dang rin po che dang pad+ma dang ral gri la sogs pa'o/ /rin chen ltar rin che ba nyid do zhes pa ni mtha' yas pa'i 'jig rten gyi khams la gnas pa'i sems can rnams kyi bsam pa thams cad cig car du rdzogs par byed pa'i phyir ro/ /rigs las byung bas so zhes pa ni rigs lnga'i 'brel pa dang ldan pa'i de bzhin gshegs pa la sogs pa spro ba'i rgyu ste thig le'i khyad par ro/ /de ni yungs kar gyi 'bru'i tshad tsam zhes pa ni nas dang tsa na ka la sogs pa'i 'bru'i tshad tsam yang yin no zhes bya ba'i tha tshig go/ /sna'i rtse mor zhes pa ni reg bya rdo rje ma'i chos 'byung ba la'o/ /rang gi lha yi rnal 'byor gyis/ /zhes pa ni rnam par snang mdzad la sogs pa'i lha'i phyag rgya chen po la sogs pa'i gzugs kyis so/ /nyin mtshan du ni dus ji srid kyi sems rtse gcig tu 'gyur ba'o/ /gang gi tshe mthong ba'i mtshan ma zhes bya ba la sogs pa ni gang gi tshe thig le bsgom pa brtan par 'gyur na de'i tshe rnal 'byor pa la mtshan ma 'di ltar 'byung ste/ thig le tsam la khams gsum thams cad kyi nga rgyal dang phyi'i sems can du gyur pa'i rnam par rtog pa dang bral ba dang / sems dang sems las byung ba'i chos mi 'byung ba dang / gam na gnas pa'i sgra la sogs pa mi zin pa dang / rang gi lus mi tshor ba zhes bya ba la sogs pa'o/ /de'i tshe rdo rje la sogs pa zhes pa ni thugs rdo rje la sogs pa'i rnal 'byor pa rnams kyis bsgom par gyur pa'i rang gi phyag mtshan no/ /bsgom pas mi g.yo bar shes nas zhes pa ni bsgom par bya ba dang sgom pa dag gcig tu gyur pa'i mtshan nyid kyis de'i bdag nyid du shes nas so/ /bsgom pa la dbang du gyur pa bskyed pa'i phyir zhes pa ni thig le bsgom pa 'di ni brtan pa yin nam mi brtan pa yin zhes dbang nyid du rdzogs par bya ba'i phyir ro/ /spro bar bya'o zhes pa ni 'chad par 'gyur ba'i 'od zer la sogs pa spro bar bya'o/ /bsgom pa la slob bzhin par mi spro ba'o zhes pa ni bsgom pa'i dus su de nyid ma rdzogs na de las spro ba ga la yod de/ de nyid kyi phyir slob bzhin par zhes bya ba ni da ltar byung ba'i dus kyi rkyen gyis bstan pa'o/ /rdo rje la sogs pa kha dog sna lnga pa'i 'od zer dang phyag mtshan rnams bstan par gyur pa'o/ /phyag rgya chen po'i gzugs kyang zhes pa ni de bzhin gshegs pa dang lha mo dang byang chub sems dpa' dang khro bo'i tshogs rnams kyang sems can gyi don bya ba'i phyir spro bar bya'o/ /dkar po la sogs pa'i kha dog dang ldan pa'o zhes pa ni rang gi rigs dang mthun pa'i 'od kyis mdzes pa'o/ /sangs rgyas kyi tshogs so zhes pa ni de bzhin gshegs pa'i tshogs so/ /'khor lo dang zhes bya ba la sogs pas de rnams kyi phyag mtshan rnams bstan to/ /nye bar mtshon pas zhes bya ba la sogs pas sprul pa'i sku'i rang bzhin gyi byang chub sems dpa' dang lha mo dang khro bo rnams kyang spro bar bya'o zhes bstan to/ /nam mkha' khyab par spro bar bya zhing g.yogs par bya'o zhes pa la 'gro ba'i don bya ba'i phyir nam mkha'i khams sngar bshad pa'i sprin gyis g.yogs par bya'o zhes bya ba'i don to/ /spyi don zhes bya ba ni bskyed pa'i rim pa'i phyogs gcig las kyi rgyal ba mchog gi yan lag dang po ste phra mo'i rnal 'byor yin pa'i phyir ro/ / de bas na bsdus pa'i don ni 'di yin te/ dkyil 'khor rgyal ba mchog gi ting nge 'dzin gyi mthar zhe sdang rdo rje'i ting nge 'dzin la gnas pa'i rnal 'byor pas rang la 'khyud pa'i reg bya rdo rje ma'i chos 'byung ba'i phyag rgya'i nang du sna tshogs pad+ma dang zla ba'i dkyil 'khor gyi steng du dkyil 'khor pa dang lhan cig dkyil 'khor gyi bdag po'i tshul du bdag nyid bsgoms la/ thabs dang shes rab snyoms par zhugs pa'i rjes su chags pa'i dam pa'i sgras de bzhin gshegs pa thams cad 'gugs shing 'jug la/ 'dod chags chen po'i rang bzhin gyi ye shes kyi mes bzhus la/ thig le'i gzugs su dmigs la de nyid yungs kar gyi 'bru'i tshad tsam gyi nang na lha sum cu rtsa gnyis kyi lha'i 'khor lo cig car du bsams la/ de rnams kyi thugs kar yang ye shes sems dpa' dang ting nge 'dzin sems dpa' dag bsgoms la/ ye shes sems dpa'i yig 'bru'i thig ler yang sum cu rtsa gnyis kyi bdag nyid kyi dkyil 'khor gyi 'khor lo'am/ gsang ba lnga'i dkyil 'khor chen po bsams la sems can dang snod kyi 'jig rten gnyis kyi rnam par rtog pa spangs nas/ gam na gnas pa'i sgra la sogs pa mi zin pas bsgom pa la dbang bskyed par bya ba'i phyir dang po kha dog lnga pa'i 'od zer gyi 'khor lo spro zhing des sems can gyi khams sbyangs te slar yang bsdus la de nyid du zhugs te/ de nas rang gi rigs dang rdo rjes su mthun pa'i rdo rje la sogs pa spro zhing nam mkha'i khams khyab la de las byung ba'i 'od zer gyi tshogs kyis 'gro ba ma lus pa'i don byas te/ slar yang bsdu zhing de nyid du 'jug par byas la de nas rnam par snang mdzad la sogs pa de bzhin gshegs pa lnga'i phyag rgya chen po'i sku yang spros te/ 'gro ba'i don bya ba de ni rdo rje 'chang chen po'i rnal 'byor pa'i phra mo'i rnal 'byor bsgom pa'i rim pa'o/ /sku rdo rje'i rnal 'byor pas sangs rgyas spyan ma'i chos 'byung ba'i nang du/ yungs kar gyi 'bru'i tshad tsam gyi 'khor lo'i phyag mtshan bsgoms la de'i lte bar snga ma bzhin du bdag nyid bsams la/ brtan pa'i rtags mthong nas spro ba dang bsdu bas sku rdo rje'i rigs kyis 'gro ba'i don byas te/ sku rdo rje'i rnal 'byor pa'i phra mo'i rnal 'byor bsgom pa'i rim pa'o/ /de bzhin du gsung rdo rje'i rnal 'byor pas gos dkar mo'i chos 'byung gi nang du tsa na ka'i 'bru'i tshad tsam gyi pad+ma dmar po bsams la de'i lte bar snga ma bzhin du bdag nyid bsams te/ brtan pa'i rtags mthong zhing gsung rdo rje'i lha'i rigs spro ba dang bsdu bar bya ba ni gsung rdo rje'i rigs kyi rnal 'byor pa'i phra mo'i rnal 'byor bsgom pa'i rim pa'o/ /rin chen 'byung ldan gyi rnal 'byor pas mA ma kI'i chos 'byung ba'i nang du kha dog ser po tsa na ka'i 'bru'i tshad tsam gyi zur drug pa'i rin po che bsgoms la/ de'i chang zung la snga ma bzhin du bdag nyid bsams la/ brtan pa'i rtags mthong bas rin po che'i rigs kyi lha rnams spro ba dang bsdu ba rin chen 'byung ldan gyi rnal 'byor pa'i phra mo'i rnal 'byor bsgom pa'i rim pa'o/ /dam tshig rdo rje'i rnal 'byor pas sgrol ma'i chos 'byung ba'i nang du yungs kar gyi 'bru'i tshod tsam gyi ral gri bsgoms la/ de'i chang zung du snga ma bzhin du bdag nyid bsams te brtan pa'i rtags mthong zhing dam tshig gi rigs kyi lha rnams spro ba dang bsdu bar byed pa'i dam tshig gi rdo rje'i rnal 'byor pa'i phra mo'i rnal 'byor bsgom pa'i rim pa'o/ /des ni rigs drug gi rjes su 'brang ba'i phra mo'i rnal 'byor bstan to/ /phra mo'i rnal 'byor des kyang dkyil 'khor bri ba dang de la slob ma gzhug pa dang / sngags dang phyag rgya dang ting nge 'dzin rnams pha rol la ston pa dang / sngags kyi theg pa bshad pa'i phyir mngon par dga' ba la sogs pa'i sangs rgyas kyi zhing la bzhugs pa'i bcom ldan 'das de bzhin gshegs pa rnams kyis rnal 'byor pa la lung ston par 'gyur ro/ /rdzogs pa'i rim pa'i phra mo'i rnal 'byor bstan pa'i phyir/ kun rdzob byang chub kyi sems te zhes smos pa la/ thabs dang shes rab snyoms par zhugs pa las byung ba'i shu kra'i thig le'i gzugs so/ /yungs kar gyi 'bru'i tshad tsam zhes bya ba 'dis shin tu phra ba nyid bstan to/ /rang gi rdo rje'i khar zhes pa ni rang gi gsang ba'i rdo rje'i bu ga la'o/ /de bzhin gshegs pa lnga'i bdag nyid du byas la zhes pa ni 'byung ba chen po lnga'i rang bzhin dang ye shes lnga'i ngo bo nyid du byas la'o/ /de la de'i sra ba nyid gang yin pa de ni sa'i khams so/ /de'i gsher ba nyid gang yin pa de ni chu'i khams so/ /de'i dro ba'i mtshan nyid gang yin pa de ni me'i khams so/ /de'i 'gro ba dang ldog pa la sogs pa'i mtshan nyid gang yin pa de ni rlung gi khams so/ /de'i nang na khyab pa'i bde ba chen po'i chos kyi dbyings kyi ye shes kyi khyad par gang yin pa de ni nam mkha'i khams so/ /de bzhin du dag pa kun da dang zla ba dang 'dra ba'i gsal ba'i rang bzhin gyi tshul gang yin pa de ni me long lta bu'i ye shes so/ /de bzhin du de'i khams nyi shu rtsa bzhi sdud par byed pa'i khams drug gi tshul gang yin pa de ni mnyam pa nyid kyi ye shes so/ /de'i rnam par mi rtog pa'i mtshan nyid can gyi spyod pa gang yin pa de ni so sor rtog pa'i ye shes so/ / de bzhin du de'i 'od zer gyi tshogs spro bas sems can gyi don rdzogs pa gang yin pa de ni bya ba nan tan grub pa'i ye shes so/ /de bzhin du de'i rtag pa dri ma med pa zag pa med pa'i chos kyi sku'i mtshan nyid can gyi don dam pa byang chub kyi sems kyi ngo bo nyid gang yin pa de ni shin tu rnam par dag pa'i chos kyi dbyings kyi ye shes so/ /ji skad du bshad pa'i cho ga zhes bya ba la sogs pa ni cho ga 'di yin te/ dang por rdo rje dang pad+ma'i gnas dang po stong pa nyid du bsgoms la/ de nas hUM AHsa bon gnyis yongs su gyur pa las rtse lnga pa'i gsang ba'i rdo rje dang pad+ma 'dab ma brgyad pa yang bsgoms la/ de dag gi rtse mor tshar gcad pa'i don du hUM dang phaT bkod cing rin chen 'byung ldan dang / don yod grub pa'i sngags dag gis rdo rje dang pad+ma sbyor zhing bskyed par bya ste rjes su chags pa'i mchog gi sgras de bzhin gshegs pa bkug cing 'jug la bdun khri nyis stong gi rtsa nas chu'i rgyun dang 'dra ba'i byang chub kyi sems dbu ma'i lam nas rdo rje'i rtse mor smig rgyu la sogs pa'i rtags lnga mtshon pa sngon du 'gro bar byang chub kyi sems la mchog tu dga' ba nyams su myong zhing de'i mthar byang chub kyi sems las snga ma bzhin du 'od zer dang phyag mtshan dang / phyag rgya chen po'i gzugs spro zhing / de rnams kyis 'gro ba'i don byas la slar yang bsdus te de nyid du 'jug par bsam par bya'o zhes bstan to/ /byang chub kyi sems phyung ba las zhes pa ni byang chub kyi sems de nyid 'od zer gyi tshogs kyi sgo nas sangs rgyas dang byang chub sems dpa'i tshul du spro bar bya'o zhes bya ba'i tha tshig go/ /bu ni rdo rje 'chang chen po la ltos pas de bzhin gshegs pa lnga'o/ /tsha bo ni de rnams las kyang byung ba'i byang chub sems dpa' rnams so/ /sogs pa'i sgras ni rigs kyi yum dang mchod pa'i lha mo dang khro bo'i 'khor lo yang bstan to/ /sbas pa'o zhes pa ni 'dod chags kyi chos nyid bstan pa'i phyir ro/ /'dod chags kyi rigs can gyi rnal 'byor pa'i phra mo'i rnal 'byor te rdzogs pa'i rim pa'i phyogs su yin no/ /zhe sdang gi rigs can gyi rnal 'byor pa'i phra mo'i rnal 'byor gnyis pa bstan par bya ba'i phyir/ de bzhin gshegs pa'i bdag nyid can/ /zhes smos pa la sku rdo rje la sogs pa de bzhin gshegs pa gsum gyi yig 'bru nye bar bsdus pa las 'byung ngo / /mi shigs par grags pa ste zhes pa ni 'ba' zhig tu sngags kyi thig le brjod du mi nus pa'i phyir ro/ /sangs rgyas kyi rin po che skyed pas so zhes pa ni de las kyang spro ba'i sbyar bas sangs rgyas 'byung ba'i phyir ro/ /yungs kar gyi 'bru tshad tsam ni rjes su 'jug pa'i dbyangs kho na'o/ /thig le'i gzugs can yin pas so zhes pa ni rjes su 'jug pa'i dbyangs kyi rang bzhin yin pa'i phyir ro/ /snying ga'i pad+ma'i lte bar zhes pa ni thugs rdo rje 'chang gi gnas la'o/ /de la zhen pas ni de la sems rtse gcig pas so/ /de nyid kyi bshad pa ni 'jug pa dang ldang ba dang / gnas pa dang sdud pa'i rnal 'byor gyis so/ /thugs rdo rje 'chang gi yig 'bru 'ba' zhig tu dmigs la/ de'i cha shas nye bar bsdu zhing srog dang rtsol ba dang me dang mnyam pa'i rlung gsum gyi bya ba'i mtshan nyid kyis 'gro ba dang 'ong ba dang bar du gnas pa'i tshul gsum du gnas par bya'o/ /sdud pa'i rnal 'byor zhes pa ni rlung gi gsum po yang sngags kyi thig le de nyid du phyin nas bsdu bar bya'o/ /snga ma bzhin du brtan pa'i rtags mthong ba sngon du 'gro bas spro bar bya'o zhes bya bas rtag pa ste zhes ston te/ thig le nye bar sdud pa'i mtshan nyid can gyi 'od gsal ba'o/ /mi shigs pa zhes pa ni rdo rje 'chang gi sa bon gyi thig le'o/ /de la rin po che ste 'od gsal ba'o/ /de rtogs shing mngon du byas la des yang dag par sbyor ba ni spro ba'i dus su yang de nyid du lhag par mos par bya'o/ /'od zer gyi tshogs zhes pa la kha dog lnga dang ldan pa'i dkyil 'khor de las yongs su brtags te g.yas pa la sogs pa'i dbye bas me'i dkyil 'khor la sogs pa'i rim gyis de bzhin gshegs pa'i tshogs spro bar bya'o zhes bya ba'i don to/ /mthar thug pa'o zhes pa ni/ thugs kyi bzlas pa'i 'od gsal ba'i de kho na nyid bstan pa'i phyir ro/ /'dir ni bsdus pa'i don ni 'di yin te/ zhe sdang rdo rje'i rnal 'byor pas mgo bo la sogs par yi ge gsum bkod la 'jug pa dang ldang ba la sogs pa'i rim gyis de nyid bzla zhing kun rdzob kyi phyogs 'dor bar bya ba yin pas sku rdo rje'i yig 'bru gsung rdo rje'i sa bon la 'jug cing / de'i cha rnams kyang snying ga'i pad+ma la gnas pa'i thugs kyi rdo rje'i yi ge 'bru'i thig le la bsdus te/ de'i cha rnams kyang de nyid du thim la 'od gsal ba nyid du dmigs nas/ de las spros pa'i dkyil 'khor bzhi'i 'od zer gyi sgo nas de bzhin gshegs pa'i tshogs kyis nam mkha'i dkyil khyab par byas la/ de rnams kyis 'gro ba'i don byas te de nyid du 'jug par bya'o zhes pa ni/ zhe sdang gi rigs can gyi rnal 'byor pa'i phra mo'i rnal 'byor bstan to/ /de ltar phra mo'i rnal 'byor pa rnam pa gsum las bskyed pa'i rim pa gtso bor gyur pa'i rnam pa drug ni gcig yin te rigs drug las byung ba'i phyir ro/ /gnyis pa dang gsum pa ni rdzogs pa'i rim pa'i rnal 'byor pa 'dod chags dang zhe sdang gi rigs can dag la bstan to/ /gti mug gi rigs can dag la ni 'og nas 'chad par 'gyur ro/ /da ni sngar bshad pa'i rnam par snang mdzad la sogs pa'i bskyed pa'i rim pa'i yan lag tu gyur pa rnal 'byor dang rjes su rnal 'byor bstan par bya ba'i phyir rnam par snang mdzad ces pa la sogs pa smos te/ de bzhin nyid la dmigs pa sngon du 'gro bas zhes pa ni don dam pa'i dkyil 'khor bsgom pa sngon du 'gro bas so/ /zla ba'i dkyil 'khor bsgoms la zhes pa ni yi ge gsum yongs su gyur pa las bskyed pa'i pad+ma dang zla ba dang nyi ma'i gdan gyi steng du yi ge gsum bkod pa yongs su gyur pa las skyes pa'i zla ba'i dkyil 'khor la sngar bshad pa'i pad+ma la sogs pa thim zhing ro gcig par byas la chos kyi dbyings kyi sngags kyis brtan par byas pa'i zla ba'i dkyil 'khor zhes bya ba'i don to/ / de'i steng du 'khor lo bsams te zhes pa ni zla ba'i dkyil 'khor de nyid la yi ge gsum bkod cing yi ge gnyis yi ge oM la zhugs te/ spro ba dang bsdu ba byas la de yongs su gyur pa las skyes pa'i kha dog dkar po rtsibs bcu gnyis pa'i 'khor lo bsgom par bya'o zhes bya ba'i don to/ /bsgom mo zhes pa ni 'khor lo de'i lte ba'i dbus su yang yi ge oM bkod la/ spro ba dang bsdu ba byas te zla ba dang 'khor lo dang sa bon yongs su gyur pa las bcom ldan 'das rnam par snang mdzad bsgom par bya'o zhes bya ba'i don to/ /de bzhin du zhes bya ba la sogs pas de bzhin gshegs pa bzhi po'i bskyed pa'i rim pa ston to/ /snang ba mtha' yas pa'i rnal 'byor pas bgegs bskrad pa nas brtsams te chos kyi dbyings kyi sngags kyi bar du rang gi sems zla ba'i dkyil 'khor dang 'dra bar dmigs la de'i steng du yi ge gsum dgod cing yi ge gnyis rang gi sa bon la zhugs te/ /de yongs su gyur pa las bskyed pa'i kha dog dmar po pad+ma 'dab ma brgyad pa bsams la/ de'i lte bar yang yig 'bru de nyid dgod cing zla ba dang pad+ma dang yig 'bru yongs su gyur pa las bcom ldan 'das 'od dpag tu med pa bsgom par bya'o/ /rin chen 'byung ldan gyi rnal 'byor pas bgegs bskrad pa nas brtsams te chos kyi dbyings kyi sngags kyi bar du rang gi sems zla ba'i dkyil 'khor dang 'dra bar lhag par mos la/ de'i steng du yi ge gsum swa dang bcas par dgod cing yi ge gsum yang rang gi sa bon la dgod de/ de yongs su gyur pa las kha dog ser po zur drug pa'i rin po che bsgoms la/ de las sa bon de nyid dgod de zla ba dang rin po che dang yig 'bru yongs su gyur pa las bskyed pa'i bcom ldan 'das rin chen 'byung ldan bsgom par bya'o/ /don yod grub pa'i rnal 'byor pas bgegs bskrad pa nas brtsams te/ chos kyi dbyings kyi sngags kyi bar du rang gi sems zla ba'i dkyil 'khor dang 'dra bar bsgoms la/ yi ge gsum ha dang bcas par dgod de/ yi ge gsum yang rang gi sa bon la 'jug cing spro ba dang bsdu bar byas te / de yongs su gyur pa las bskyed pa'i ral gri bsgoms la/ de'i chang zung la yig 'bru de nyid dgod de/ zla ba dang ral gri dang sa bon yongs su gyur pa las bcom ldan 'das don yod grub par bsgom par bya'o/ /mi bskyod pa'i rnal 'byor pas bgegs bskrad pa nas brtsams te/ chos kyi dbyings kyi sngags kyi bar du rang gi sems zla ba'i dkyil 'khor dang 'dra bar bsgoms la/ de'i steng du yi ge gsum dgod cing yi ge gnyis thugs kyi rdo rje'i sa bon la zhugs te/ spro ba dang bsdu ba byas la de yongs su gyur pa las bskyed pa'i rdo rje rtse lnga pa rnam par bsgoms la/ de nyid kyi dbus kyi rtse mor yig 'bru de nyid dgod cing zla ba dang rdo rje dang sa bon yongs su gyur pa las bskyed pa'i bcom ldan 'das mi bskyod pa bsgom par bya'o/ /de tsam gyis dang po'i sbyor ba'i ting nge 'dzin gyi phyogs gcig par gyur pa'i rnal 'byor dang rjes su rnal 'byor bstan to/ /de yang nye bar mtshon pa tsam yin te/ phyag rgya legs par sbyang ba sngon du 'gro bar dkyil 'khor rgyal ba mchog gi ting nge 'dzin yang bsgom par bya'o/ /las kyi rgyal ba mchog gi phyogs gcig phra mo'i rnal 'byor ni rang gi tshig gis gsungs so zhes ting nge 'dzin gsum gyi bdag nyid can gyi bskyed pa'i rim pa bstan pa dang rdzogs pa'i rim pa yang rdo rje bzlas pa la sogs pa'i dbye ba'i sgo nas bstan to/ /de ltar rim pa gnyis ni gsal bar bshad pa yin no/ /de ltar pad+ma yongs su gyur pa las zhes pa ni zla ba dang pad+ma dang yig 'bru yongs su gyur pa las zhes bya ba'i don to/ /pad+ma rA ga'i 'od can ni dbang gi las la nus pa'i phyir ro/ /kha dog ser po ni rgyas pa'i las la nus pa'i phyir te gser bzhin no/ /sna tshogs rdo rje ni sgra ji bzhin ma yin pas ral gri 'am rang gi gzugs so/ /nam mkha' dang 'dra ba der gnas pa ni zhes pa ni de'i kha dog dang ldan pa'o/ /nam mkha' ltar sngo bsangs zhes bya ba'i don to zhes pa ni de nyid kyi bshad pa'o/ /sku dang gsung dang thugs sgrub pas mtshon pa'i zhes pa ni sku gsung thugs rdo rje'i nang nas thugs rdo rje nyid gtso bo yin te/ lus dang ngag gi rtsa ba de yin pa'i phyir ro/ /de bas na sku gsung thugs kyi sgrub pa ni de bskyed pa ni rgyur gyur pa yi ge gsum mo/ /des mtshon pa ni thugs rdo rje 'chang nyid de 'od gsal ba'i rang bzhin gyi thugs la yi ge gsum byung ba'i phyir ro/ /de dang 'dra ba bcom ldan 'das ni mi bskyod pa'o/ /de'i rdo rje las byung ba'o zhes pa ni zla ba dang rdo rje dang yig 'bru dang de'i bdag nyid kyi nga rgyal las bskyed pa zhes bya ba'i tha tshig go/ /thams cad mkhyen pa nyid ni zhes pa la rang gi go 'phang nyon mongs pa dang shes bya'i sgrib pa spangs pa me long lta bu'i ye shes la sogs pa'o/ /sems can rnams dmigs shing zhes pa ni sems can rnams la ster bar byed pa bcom ldan 'das rnam par snang mdzad la sogs pa rnams so/ /ngang tshul gang la yod pa de la de skad ces bya'o zhes pa ni nye bar bsdu ba'i sgo nas dkyil 'khor rgyal ba mchog gi ting nge 'dzin bstan te de ni sems can gyi don byed pa'i ngo bo yin pa'i phyir ro/ /rdo rje ni de bzhin gshegs pa rnams so zhes pa ni rdo rje ltar mi phyed pa'i ye shes dang ldan pa'o/ /'dus pa mdzad pa zhes pa ni de bzhin gshegs pa lnga'i bdag po nyid kyis so/ /de rnams kyi re re la lha sum cu rtsa gnyis kyi dkyil 'khor ro/ /de ltar dkyil 'khor sum cu rtsa gnyis ni lha sum cu rtsa gnyis kyi bdag nyid bsdus par mdzad pa'o/ /drang ba'i don ni bskyed pa'i rim pa bstan pa'i phyir ro/ /gti mug gi rigs can gyi rnal 'byor pa'i phra mo'i rnal 'byor bstan par bya ba'i phyir 'od gsal ba'o zhes smos pa la/ /lus rnam par dben pa'i mthar chos kyi dbyings kyi ye shes kyi ngo bo 'od gsal ba'i de kho na nyid ces bya ba'i tha tshig go/ /de'i dbus su gnas pa'i zla ba'i dkyil 'khor de mi shigs pa'o zhes pa ni zla ba'i dkyil 'khor ltar 'bar bar 'gyur ba'i dbyangs kyi yi ge dang po mi shigs pa zhes bya'o/ / rab [(]du [,]tu [)]byed pa las kyang / thung ngu ma lus ngag yin te/ /gcig min du ma ma yin no/ /zhes 'byung ngo / /rdo rje dkyil 'khor gyi rgyan las/ 'bar zhing mar me dang mtshungs pa'i/ /snying ga'i dbus na mi shigs pa/ /mi 'gyur pad+ma phra ba ste/ /a yig gtso bo mchog yin no/ /zhes 'byung ngo / /sgyu 'phrul dra ba las kyang / /a ni yig 'bru kun gyi mchog /don chen yi ge dam pa yin/ /khong nas 'byung ba skye ba med/ /tshig tu brjod pa spangs pa ste/ /brjod pa kun gyi rgyu yi mchog /tshig kun rab tu gsal bar byed/ ces 'byung ngo / /mi shigs pa la nges par 'byung ba'o zhes pa ni chos kyi dbyings kyi 'khor lo rtsibs brgyad pa'i yi ge a las 'byung zhing de'i sprul pa las bskyed pa'o/ /chu'i dkyil 'khor te mi bskyod pa'i ngo bo nyid kha dog dkar ba ni zhes pa la snying gar gnas pa'i phyir dang / chu'i khams kha dog dkar ba'i phyir dang / zhi ba'i las la brtson pa'i phyir ro/ /dal bar rgyu ba'i phyir ro zhes pa ni rlung gi dkyil 'khor bzhin du chu ni drag par rgyu ba ma yin te/ 'on kyang rang bzhin gyi chu'i khams dal bar rgyu ba ste/ steng dang 'og gi gnas kyi 'brel pas de rnams kyi myur ba dang dman pa dang bar ma rgyu ba yin te/ chu bo dang rgya mtsho la sogs pa bzhin no/ /me'i dkyil 'khor kha dog dmar po'o zhes pa la de nyid kyi rang bzhin las byung ba gru gsum pa lkog mar gnas pa'o/ /g.yas nas 'byung ba zhes pa ni sna khung g.yas pa las 'byung ba'o/ /me'i dkyil 'khor gyi rang gi kha dog ni dmar po nyid do/ /dbang chen gyi dkyil 'khor zhes pa ni sa'i dkyil 'khor te/ /de nyid kyang yi ge laM las byung ba gsang ba'i gnas su gru bzhi par gnas pa'o/ /gnyi ga las 'byung bar zhes pa ni sna khung gnyi ga las 'byung ngo / /sa'i dkyil 'khor kha dog ser po ste gser gyi rang bzhin yin pa'i phyir ro/ /de yang dal bus dman par rgyu ba yin te sa gzhi ni snod kyi 'jig rten yin pas brtan pa'i phyir ro/ /rlung gi dkyil 'khor te zhes pa ni de nyid kyi yi ge yaM las byung ba gzhu'i dbyibs can lte bar gnas pa'o/ /kha dog nag po zhes pa rlung ni ngo bo nyid kyis kha dog sngo ba yin pas so/ /g.yon nas rgyu ba yin par zhes pa ni sna khung g.yon pa las rgyu ba'o/ /yin par shes par bya ste zhes pa ni bsam par bya'o/ /de rnams ni de bzhin gshegs pa'i ngo bo nyid 'od zer bzhi'i rab tu rgyu ba zhes pa ni mi bskyod pa la sogs pa'i ngo bo nyid do/ /de ni nye bar mtshon pa tsam yin te/ gos dkar mo la sogs pa lha mo bzhi'i rang bzhin dang / sa la sogs pa'i khams bzhi dang / zhi ba la sogs pa phrin las bzhi dang / dkar po la sogs pa 'od zer 'byung ba/ g.yas dang g.yon dang gnyi ga dang dal bus rgyu ba dang / wa la sogs pa'i yi ge las byung ba dang gru gsum dang zlum po dang gzhu'i dbyibs dang gru bzhi dang kha dog dmar po la sogs pa dang ldan par shes par bya'o/ /bshad pa yin no zhes pa ni sdud pa pos bshad pa'o/ /sku la sogs pa bskyed pas na/ /zhes pa ni 'jig rten las 'das pa'i ye shes kyi sku'i rang bzhin gyi sku gsung thugs rdzogs par byed pa zhes bya ba'i tha tshig go/ /de nyid bstan par bya ba'i phyir 'od gsal ba las bzhengs te zhes smos te/ rim pa bzhi pas thob pa'i de kho na nyid las 'byung ba'o/ /bden pa gnyis kyi bdag nyid can gyi zhes pa ni mi gnas pa'i mya ngan las 'das pa'i dbyings kyi rang bzhin no/ /lha'i dkyil 'khor yin par shes par bya'o zhes pa ni mi bskyod pa la sogs pa de bzhin gshegs pa'i tshogs bsgom par bya'o/ /thams cad mkhyen pa'i go 'phang thob par 'dod pa'i zhes pa ni rnal 'byor pas zhes tshig lhag ma'o/ /de ni byed pa'i drug pa yin no/ /dgongs pa ni 'di yin te/ re zhig dang po'i rnal 'byor pas cig car du ye shes kyi sku dmigs la/ lte ba'i phyogs su rtsibs brgyad pa'i chos kyi dbyings kyi 'khor lo'i yi ge las ya ra la wa sprul te/ de dag yongs su gyur pa las lkog ma la sogs pa'i gnas bzhi las gru gsum dang zlum po dang zla gam dang gru bzhi pa'i me dang chu dang rlung dang sa'i dkyil 'khor rnams bsgoms la/ /de rnams re re la yi ge gsum dmigs pa sngon du 'gro bar 'jug pa la sogs pa gsum gyi rim pas bzlas par bya ste/ de las byung ba'i 'od zer gyi 'khor los phra mo'i rnal 'byor bslab par bya'o/ /de'i rim pa ni me'i dkyil 'khor la kha dog dmar po 'od zer sna khung g.yas pa las 'byung zhing gdong gi sna rtser thun phyed phyed kyi dus su zin na de'i tshe rnal 'byor pas 'bad rtsol med par dbang gi las 'grub par 'gyur ro/ /de bzhin du rlung gi dkyil 'khor las kha dog ljang ser sna bug g.yon pa nas 'byung zhing gdong gi sna rtser thun phyed phyed kyi dus su zin na de'i tshe rnal 'byor pas 'bad rtsol med par dgug pa dang mngon spyod dag grub bo / /de bzhin du sa'i dkyil 'khor kha dog ser po sna khung gnyis ka las 'byung zhing gdong gi sna rtser thun phyed phyed kyi dus su zin na/ de'i tshe rnal 'byor pas 'bad rtsol med par rgyas pa'i las grub bo/ /de bzhin du chu'i dkyil 'khor las gnyi ga las byung ba'i kha dog dkar po 'od zer 'byung zhing gdong gi sna rtser thun phyed phyed kyi dus su zin na/ de'i tshe rnal 'byor pas 'bad rtsol med par zhi ba'i las grub bo/ /'od zer gyi thig le de las snga ma bzhin du brtan pa'i rtags mthong ba sngon du 'gro bar 'od zer dang phyag mtshan dang de bzhin gshegs pa'i phyag rgya chen po spro zhing slar yang dkyil 'khor de nyid du 'jug pa ni/ gti mug gi rigs can gyi rnal 'byor pa'i phra mo'i rnal 'byor bsgom pa'o/ /'di dang snga ma gnyis bsdus te rdzogs pa'i rim pa'i rnal 'byor pa'i sku rdo rje la sogs pa'i dbye bas phra mo'i rnal 'byor rnam pa gsum bstan to/ /rin chen 'byung ldan dang don yod grub pa'i rnal 'byor pa dag gis kyang / /smin mtshams dang lte ba'i dbus su thig le tsam bsgom par bya'o/ /de la gsang ba'i gnas kyi byang chub kyi sems kyi thig le gang yin pa de nyid thur du sel ba'i rlung bzlog nas gyen du 'dren par bsgom par bya'o zhes bla ma'i man ngag go/ /yang na sku'i rigs la sogs pa la bsdus pa'i phyir logs su bsgom par mi bya ste/ gang gi phyir rin chen 'byung ldan ni nga rgyal gyi rang bzhin no/ /nga rgyal yang gti mug las 'byung ba'am zhe sdang las byung ba'o/ /de la gti mug las 'byung na rnam par snang mdzad kyi rigs la bsdu'o/ /zhe sdang las 'byung na mi bskyod pa'i rigs la bsdu'o/ /don yod grub pa yang phrag dog gi rang bzhin te phrag dog kyang zhe sdang las 'byung bas na thugs rdo rje'i rigs kyi nang du bsdu'o/ /de'i phyir rnam par snang mdzad dang mi bskyod pa dag gi phra mo'i rnal 'byor gyi bsgom pa gang yin pa de dag ni de nyid rin po che dang don yod grub pa'i rnal 'byor pas bsgom par bya zhes gud nas bshad par mi bya'o/ /de nyid kyi phyir rgyud phyi ma las kyang / sku gsung thugs ni rnam pa gsum/ /gsang ba zhes bya mngon par bshad/ /rigs ni rnam pa brgyar bshad de/ /mdor bsdus pas ni rnam pa lnga/ /sku gsung thugs kyi dbye ba yis/ /gsum du yang ni bstan pa yin/ /zhes 'byung ngo / /rdo rje'i bdag nyid can gyi tshogs te zhes bya ba ni nye bar bsdus pa'o/ /yongs su rdzogs pa'i lha'i sku yin la zhes pa ni bdag la byin gyis brlab pa'i rim pas ye shes kyi sku bskyed pa zhes bya ba'i don to/ /de'i don ston pa'i le'u la yang de skad ces bya'o zhes pa ni/ de'i don so sor ston pa'i tshig gi tshogs ni le'u zhes bya'o/ /bshad pa'i rgyud ni zhes pa la/ /dgongs pa lung bstan pa 'dus pa'i bshad pa'i rgyud las so/ /gsal bar ston pa zhes pa ni the tshom med pa'o/ /de 'dir 'jug par bya ste zhes pa ni 'grel pa 'dir yang bstan par bya'o/ /thog mtha' med pa zhes pa ni/ thog ma dang tha ma'i skad cig ma dang bral ba'o/ /de la thog ma ni snang ba dang snang ba mched pa dag go/ /tha ma ni snang ba nye bar thob pa'o/ /de med pa ni thog ma dang tha ma med pa'o/ /rnal 'byor zhes pa ni thabs dang shes rab yang dag par sbyor bas thob par bya ba ste rgyu la 'bras bu'i ming btags pa'i phyir ro/ /phra mo ni zhes pa la rnal 'byor gyi mngon sum gyi tshad mas lhag par rtogs par bya ba ting nge 'dzin gyi khyad par gyis thob pas te sangs rgyas kyi spyod yul yin pa'i phyir ro/ /phra bar gzigs pa'i sangs rgyas kyis/ /phra phyir rang gi rig pa yin/ /rang bzhin gnas kyang bdag 'dra ba'i/ /blo rags pa ni ma mthong ngo / /zhes 'byung ngo / /dbyig gnyen gyi zhal snga nas kyis kyang / /rnam rig tsam ni grub pa ste/ / rang nus 'dra ba bdag gis ni/ /byas pa thams cad bsam mi khyab/ /sangs rgyas rnams kyi spyod yul yin/ /zhes 'byung ngo / /de lta bu'i 'od gsal ba'i de kho na nyid dbyangs kyi yi ge dang po gzod ma nas ma skyes pa'i ye shes kyi rang bzhin gyis mtshon par bya ba ste/ nye bar brtags pas yi ge a yang phra mo'i sgras bstan to/ /de yang ji lta bu yin zhe na/ mi gsal ba zhes pa ni spros pa thams cad dang bral bas so/ /gsal bar yang dag sbyor zhes pa ni de las dkyil 'khor bzhi phyung ba'i phyir ro/ /dngos med ces pa ni gzod ma nas ma skyes pa'o/ /ngo bo nyid du byung zhes pa ni 'od gsal ba las byung ba'o/ /a yig chos kun sgo yin te/ /gzod ma nas ma skyes pa'i phyir zhes 'byung ngo / /rang bzhin gyis grub pa zhes pa ni/ chos nyid kyi ngo bo yin pas so/ /dang po zhes pa ni chos thams cad kyi gtso bor gyur pa'am/ A li dang kA lir thog mar dmigs pa'i phyir ro/ /gcig ni sde tshan brgyad sdud par byed pa'i dngos po'i yi ge brgyad / /de sdud par byed pa'i yi ge bzhi yongs su gyur pa las yi ge gsum sdud par byed pa'i rang bzhin yin pa'i phyir ro/ /ji skad du/ dang po gcig ni dgu dbus na/ /gang zhig bcu yis ma bcings pa/ /de ni bcings med ces bya ste/ /ye shes pa ni mchog gi gnas/ /dbyangs dang gsal byed yi ge ste/ /grangs dgu yi ni rjes 'jug pa/ /as bcings phan tshun yang dag sbyor/ /gang gis shes te 'gro ba'i bla/ /'byung ba'i mtha' dang yang dag ldan/ /cha la sogs pa bcu drug gnas/ /lnga pa lnga dang yang dag ldan/ /bzhi ni gsum du nges par sbyar/ /yi ge oM bcas ring por bcas/ /yon tan sbyor sogs phyis dang mtshungs/ /thung ngu ma lus ngag tu 'gyur/ /gcig min du ma ma yin no/ /yi ge gang zhig sngar bshad dang / /gang yang mngon par phyogs pa rnams/ /skyes pa bud med ma ning dang / /khams la sogs pa yongs su brtags/ /steng dang 'og tu bcas par ni/ /shes nas blo ni nges par sbyar/ /brjod pa yi ni sngags 'di dag /dngos med ngo bo nyid du 'byung / /zhes gsungs so/ /gcig dang du ma rnams spangs pa/ /zhes pa ni yi ge phyi mo thams cad de nyid kyi nang du bsdus pa'i phyir dang / /de nyid la ngag gi spros pa thams cad 'byung ba'i phyir ro/ /rten cing 'brel 'byung chos su grags/ /zhes pa ni rten cing 'brel par 'byung ba'i rang bzhin gyis las dang / nyon mongs pa dang / skye ba'i ngo bo srid pa gsum gyi bdag nyid can gyi 'khor ba'i 'khor lo'i chos nyid yin te/ de dag stong pa yin pa'i phyir ro/ /de bzhin du/ dngos po kun gyi 'byung gnas gcig /ces pa ni sems can dang snod kyi 'jig rten zhes bya ba'i 'byung ba'i gnas gcig go/ /gang las 'byung ba ni 'byung gnas te skyed pa'i rgyu'o/ /de la khams gsum thams cad bskyed pa'o/ /brjod pa kun gyi rgyu yi mchog / ces 'byung ba'i phyir ro/ /srid pa gsum po 'di dag ni/ /ma lus mun pa ltar 'gyur te/ /gal te sgra zhes sgron ma yis/ /tha snyad 'di dag mi gsal na/ /zhes 'byung bas so/ /bdag nyid 'di ltar byas na ni/ /zhes pa la 'od gsal ba gcig pu las 'byung ba'i yi ge a'i rang bzhin du byas nas so/ /chos kyi dkyil 'khor bri bar bya/ /zhes pa ni chos kyi de bzhin gshegs pa bzhi po'i dkyil 'khor ni me la sogs pa'i dkyil 'khor bzhi zhes bya ba'i don to/ /dkyil 'khor zhes bya ba ni rigs kyi don du tshig gcig dang sbyar ro/ /de rnams kyi kha dog bshad pa'i phyir dmar po zhes bya ba la sogs pa smos te/ dmar po ni me'i dkyil 'khor te lkog mar ro/ /nag po ni rlung dkyil 'khor te lte bar ro/ /ser po ni sa'i dkyil 'khor te gsang bar ro/ /dkar po ni chu'i dkyil 'khor te snying gar ro/ /mdor bsdus pa ni 'byung ba chen po bzhi'i ngo bo yin pas so/ /bzhi bzhi yi ni sbyor ba yis/ /zhes pa ni dkyil 'khor re re la yang cha bzhis khyab pa'i phyir ro/ /de la lkog ma'i dkyil 'khor me'i khams kyi ngo bo yang sa dang chu dang rlung gi khams kyi chas khyab pa'o/ /snying ga'i dkyil 'khor chu'i khams kyi ngo bo yang sa dang me dang rlung gi khams kyi chas khyab pa'o/ /lte ba'i dkyil 'khor rlung gi rang bzhin yang sa dang me dang chu'i khams kyi chas khyab pa'o/ /gsang ba'i dkyil 'khor sa'i rang bzhin yang chu dang me dang rlung gi khams kyi chas khyab pa'o/ /sa la sogs pa 'byung ba chen po rnams ni phan tshun med par mi 'byung ba'i 'brel pa dang ldan pa yin te/ byas pa dang mi rtag pa bzhin no/ /gos dkar la sogs legs par bri/ / zhes pa ni snang ba mtha' yas la sogs pa'i de bzhin gshegs pa bzhi po'i btsun mo khams bzhir byin gyis brlab pa zhes bya ba'i don to/ /sa ni spyan ma zhes pa ste/ /chu yi khams ni mA ma kI/ /gos dkar ma ni mer bshad pa/ /rlung ni sgrol mar rab tu grags/ /zhes 'byung ngo / /de yi dbus su rang gi lha/ /zhes pa ni dkyil 'khor bzhi po'i nang na rang gi lta ste 'od dpag tu med pa dang mi bskyod pa dang don yod grub pa dang / rin chen 'byung ldan gyi byin gyis brlabs par shes par bya ste/ 'dir ni pad+ma'i mgon po lha/ /zhes bya ba la sogs pa bshad pa'i phyir ro/ /sbyor ba bzhi yi go 'phang mchog /ces pa ni gru gsum dang zlum po dang gzhu'i dbyibs dang gru bzhi pa dang lkog ma dang snying ga dang lte ba dang gsang ba'i gnas dang / dmar po dang nag po dang ser po dang dkar po'i kha dog la sogs pa dang ldan pa'i phyir ro/ /steng dang zur dang mnyam dang 'og /ces pa ni steng ni lkog ma'o/ /zur ni snying ga'o/ /mnyam pa ni lte ba'o/ /'og ni gsang ba'o/ /yang na steng ni me'i dkyil 'khor g.yas pa'i sgo nas 'byung ba'o/ /zur ni rlung gi dkyil 'khor g.yon nas rgyu ba'o/ /mnyam pa ni chu'i dkyil 'khor gnyis ka las rgyu ba'o/ /'og ni sa'i dkyil 'khor gnyis ka kho na las byung ba zhes bya ba'i tha tshig go/ /gos dkar la sogs zhes pa ni gos dkar la sogs pa'i lha mo bzhis nye bar mtshon pa'i dkyil 'khor pa bzhi zhes bya ba'i tha tshig go/ /ji bzhin du zhes pa ni rim pa ji lta ba bzhin du zhes bya ba'i don to/ /me dang rlung dang dbang chen dang chu ste zhes pa ni dkyil 'khor rnams kyi gnas kyi rim pas ni ma yin gyi/ 'on kyang rlung rab tu rgyu ba'i rim pas so/ /de la thun dang por me'i dkyil 'khor g.yas pa las rgyu ba'o/ /thun gnyis pa la rlung gi dkyil 'khor ni g.yon las rgyu ba'o/ /thun gsum pa la sa'i dkyil 'khor gnyi ga las rgyu ba'o/ /thun bzhi pa la chu'i dkyil 'khor dal bus dman pa gnyi ga las rgyu ba'o/ /so so'i dkyil 'khor ro zhes pa ni nyin mo dang mtshan mo 'jug pa dang gnas pa dang ldang ba'i rim gyis rgyu ba'i nyi shu rtsa bzhir 'gyur ro/ /rgyu ba de rnams kyi nyi khri chig stong drug brgyar rlung gi grangs su 'gyur ro/ /gos dkar la sogs bzlas bshad pa/ /brgya phrag gnyis dang nyi shu lnga/ /bzhi po legs par bsgres pas na/ /sbyor bzhi bsdus pas brgya phrag dgu/ /dgu brgya dag tu gang bshad pa/ / nyi shu rtsa bzhi'i rim pa yis/ /legs par bsdus te de dag ni/ /nyi khri chig stong drug brgyar 'gyur/ /zhes 'byung ngo / /de la don bsdus pa ni gti mug gi rigs can gyi rnal 'byor pas phra mo'i rnal 'byor bsgom par 'dod pas sems rnam par dag pa'i rim pas 'od gsal ba la 'jug ste de las bdag byin gyis brlab pa'i rim pas ye shes kyi sku dmigs la/ lte ba'i phyogs su rtsibs brgyad pa'i chos kyi dbyings kyi 'khor lo cig char du bsgom zhing de'i lte bar dang po yi ge 'bar ba bsams te de'i me stag dang 'dra ba'i ra la sogs pa yi ge bzhi'i lkog ma la sogs pa'i gnas las spros te/ de yongs su gyur pa las me la sogs pa'i dkyil 'khor bzhi bsgoms la/ kha dog dmar po la sogs pa'i dbye ba dang g.yas pa la sogs pa'i sgo'i dbye bas 'od zer gyi tshogs spros te/ de nyid sna'i rtse mor thun phyed phyed kyi dus 'dzin nas brtan pa'i rtags mthong ba sngon du 'gro bas spro ba dang bsdu ba byas la/ 'bad rtsol med par zhi ba la sogs pa bsgrubs la ji srid sems rtse gcig par 'gyur ba de srid kyi bar du gnas par bya'o zhes gti mug gi rigs can gyi rnal 'byor pa'i rdzogs pa'i rim pa'i sgo nas phra mo'i rnal 'byor bsgom pa bstan to/ /de ltar rdzogs pa'i rim pa'i rnal 'byor pa'i rnam pa gsum gyi phra mo'i rnal 'byor bsgom pa bstan pa dang / bskyed pa'i rim pa'i rnal 'byor pa ni gcig ste/ mdor bsdus pa'o zhes bcom ldan 'das kyis gsungs te zhes pa ni sdud pa po'i tshig go/ /nges pa'i don to zhes pa ni rdo rje bzlas pa'i rim pa'i rgyur gyur pa phra mo'i rnal 'byor bstan pa'i phyir ro/ /rlung gi de nyid rim gyis ni/ /sngags kyi de nyid yang dag 'jug /sngags kyi bskyed pa rtogs nas ni/ /rdo rje bzlas pa rnams la slob/ /ces 'byung ngo / /sgron ma gsal ba'i TI kA las le'u gsum pa'o// //lha'i sku yang dag par thob pas gzhan rnams rjes su gzung ba'i phyir dkyil 'khor bri bar bya'o zhes bya bas lha la dmigs pa zhes bya ba la sogs pas le'u bzhi pa'i bshad pa rtsom par byed de/ lha la dmigs pa sngon du 'gro bas zhes pa ni le'u gsum pa nas gsungs pa'i dang po'i sbyor ba dang dkyil 'khor rgyal ba mchog gi ting nge 'dzin gnyis kyis bsgrub par bya ba'i lha'i sku bsgom pa sngon du 'gro ba zhes bya ba'i tha tshig go/ /phra mo'i rnal 'byor bsgom pas zhes pa ni las kyi rgyal ba mchog gi ting nge 'dzin gyi phyogs gcig tu gyur pa/ phyag rgya'i pad+ma'i nang du thig le bsgom pa dang sna rtser gsum la thig le la bsgom pas so/ /khyad par thob pas zhes pa ni sems rtse gcig pa nyid thob pa dang de bzhin gshegs pa rnams kyis 'gro ba'i don bya ba'i phyir lung bstan pa la'o/ /slob ma rnams la rdul tshon gyi dkyil 'khor du dbang bskur ba'i phyir zhes pa ni/ mtshan ma'i phyag rgya dang ldan pa'i rdul tshon gyi dkyil 'khor du rig pa'i dbang la sogs pa bskur ba'i phyir ro/ /des na don 'di yin te phra mo'i rnal 'byor bsgom pa'i sgo nas sems la dbang thob pa'i slob dpon gyis thugs kyi dkyil 'khor du slob ma la dbang bskur ro zhes bya ba'i don to/ /bla ma la gsol ba 'debs pa'i cho ga zhes pa ni rdo rje slob dpon la dkyil 'khor du 'jug pa'i phyir slob mas zhu ba zhes pa'i don to/ /sgra ji bzhin par ni sogs pa'i sgras shes par bya'o/ /mi bskyod pa'i sgo nas zhes pa ni de bzhin gshegs pa lnga'i nang nas thugs rdo rje gtso bo yin pa'i phyir ro/ /bstod pas ni bstod pa byas nas so/ /mnyes par byed pa zhes pa ni gsol ba 'debs pa'o/ / rnam par snang mdzad kyi ngo bo nyid kyis so zhes pa ni nyon mongs pa dang shes bya'i sgrib pa'i spros pa zhi ba'i mtshan nyid kyi me long lta bu'i ye shes kyi rang bzhin nam zhi ba'i phrin las mdzad pa'i rang bzhin gyis so/ /de bzhin gshegs pa kun gyi ni de bzhin gshegs pa thams cad kyi 'od gsal ba las byung ba rnam par dag pa'i rang bzhin te 'byung ba chen po bzhi'o/ /de rnams kyi gnas ni bskyed pa'i gnas te nam mkha'o/ /de'i ngo bo ni rin chen 'byung ldan zhes bya ba'i don to/ /mdo sde la sogs pa yan lag bcu gnyis kyi gsung rab ni chos kun te de'i rnam par dag pa'i rang bzhin 'od dpag tu med pa zhes pa ni ngag rnam par dag pa'i ngo bo yin pas so/ /yang na chos kun ni sems can dang snod kyi 'jig rten gyi rang bzhin no/ /de rnams kyi byang chub kyi sems kyi rgyu yin te rgyu dang 'bras bu dbyer med pa'i phyir ro/ /chos thams cad kyi rgyur gyur pa'i byang chub kyi sems kyi ngo bo 'od dpag tu med pa de nyid yin no zhes bya ba'i don to/ /yang na chos kun ni chos thams cad rab tu byed pa'i mtshan nyid can gyi so sor rtog pa'i ye shes te de'i rang bzhin de nyid yin no/ /bdag med pa'i zhes pa ni rdo rje 'chang gi go 'phang ngo / /mchog gi khams gsum la bya ba nan tan grub pa'i ye shes kyis de thob par byed pas na bdag med pa mchog ni don yod grub pa'o/ /yang mchog ni g.yo ba'i rang bzhin gyi rlung gi khams te/ de nyid rdo rje bzlas pa'i rim pas dbang du byed cing mi snang bar byed pas na/ bdag med de bdag med mchog ni don yod grub pa nyid do/ /rlung gi khams rnam par dag pa'i phyir ro/ /rigs gsum gyi ngo bo nyid kyis zhes pa ni rin chen 'byung ldan dang don yod grub pa sngar bshad pa'i rigs pas rigs gsum la bsdus pa'i phyir ro zhes bya bar sbyar te zhes pa ni bya ba dang byed pa'i tshig go / de skad du bshad pa'i dkyil 'khor gyi mtshan dang zhes pa ni 'og nas bshad pa'i mtshan nyid do/ /chad pa dang lhag pa'i zhes pa ni thugs kyi dkyil 'khor ni khru tshad bcu gnyis bya ba yin gyi de las chad pa khru bcu gcig la sogs pa dang / de las lhag pa khru bcu gsum la sogs pa zhes bya ba'o/ /nyes pa ni bcom ldan 'das rdo rje 'chang chen pos ma gsungs pa'i phyir ro/ /bral ba zhes pa ni de med pa zhes bya'o/ /sku'i mchog ces pa ni sku rnam par dag pa'i rang bzhin rnam par snang mdzad ces bya ba'i don to/ /des ni sku'i rigs kyi gtso bos rdo rje slob dpon la bstod pa bstan to/ /don dam pa'i bden pa la nges par 'byung ba zhes pa ni 'od gsal ba las kun nas nyon mongs pa dang rnam par byang ba'i chos 'byung ba'i phyir ro/ /ji skad du/ ji ltar chu klung dang ba las/ /nya dag myur du ldang ba bzhin/ /thams cad stong pa'i dang ba las/ /sgyu 'phrul dra ba de bzhin 'byung / zhes bshad do/ /snang ba gsum po zhes pa ni bde ba dang sdug bsngal dang btang snyoms kyi tshor ba gsum dang ldan pa'i kun gzhi la sogs pa'i rnam par shes pa gsum mo/ /'dod chags la sogs pa ste zhes pa ni rnam par shes pa de rnams kyi dge ba dang mi dge ba dang lung du ma bstan pa'i sems las byung ba'i 'du byed kyi phung po'i ngo bo ste spyod pa'o/ /'dod chags la sogs pa ni shes rab kyi rang bzhin sum cu rtsa gsum gyi chos dang / thabs kyi rang bzhin bcu dang ma rig pa'i rang bzhin bdun te/ nyin dang mtshan du brgya bcu gnyis gyur nas brgya drug cur 'gyur ba'o/ /de rnams kyang rang bzhin zhes pa ni brgya drug cu'i grangs dang ldan pa'o/ /mngon par byang chub par bsgoms pas zhes pa ni sngags dang phyag rgya'i rim pas sems rnam par dag pa'i rim pas so/ /rnam par sbyong bar mdzad pas na/ /zhes pa ni mi snang bar byed pa'o/ /ye shes sbyong ba rnam sbyong ba'o/ /zhes pa ni rang bzhin gyis dag pa'i 'od gsal ba'i de kho na nyid rtogs pa zhes bya ba'i don to/ /thams cad kyi dbang phyug brnyes pas na zhes pa ni sku'i dbang phyug la sogs pa'i yon tan brgyad dang ldan pa'i phyir dang phra ba la sogs pa'i sgyu 'phrul brgyad thob pa'i phyir ro/ /de tshe dbang phyug kun thob nas/ /rdo rje sku ni mgu bar 'gyur/ /zhes 'byung ngo / /ngag gi dbang phyug brnyes pas na/ /zhes pa ni yan lag drug cu dang ldan pa'i tshangs pa'i dbyangs la sogs pa'i mtshan nyid can gyi ngag gi dbang phyug ste dbang du gyur cing mngon du byas pa de thob pa'i phyir ro/ /des ni gsung gi rang bzhin gyi 'od dpag tu med pa'i sgo nas rdo rje slob dpon la bstod pa bstan to/ /sems can thams cad kyi sems ni rdo rje nyid pas na zhes pa ni sems can thams cad de rigs bzhi las byung ba'i 'gro ba rigs drug las/ rang rig pa'i mngon sum gyis rtogs par bya ba'i rnam par shes pa'i phung po rnam par dag pa'i rang bzhin yin pa'i phyir ro/ /'dod chags la sogs pa rnams rnam par dpyad nas dmigs su med pas zhes pa ni/ chos thams cad rang bzhin gyis dag pa dang / bdag kyang rang bzhin gyis rnam par dag pa'o/ /'dod chags la sogs pa'i dri ma dang bral bas ni zhes pa ni sngags dang phyag rgya'i rim pas rang bzhin brgya drug cu dang bral ba'i phyir ro/ /de na khams gsum pa ni 'od gsal ba'i rang bzhin nyid dang sems kyang stong pa nyid kyi rang bzhin no zhes de med pas sems las byung ba'i chos kyi ngo bo 'dod chags la sogs pa'i nyon mongs pa dang nye ba'i nyon mongs pa rnams ga la yod de/ chos can yod na chos rnams la 'jig rten pa'i bsam pa 'jug pa zhes bshad pa'i phyir ro/ /de bzhin du gzhan las kyang / dbang po'i tshogs la chags pa med/ /don la ma yin sems la min/ /gzhan dang bdag la'ang mi dmigs te/ /des na yod min med min te/ /bsam gyis mi khyab 'brel pa yis/ /rgyu can sems kyi 'khrul pa las/ /sprin gyi bu ga gang las kyang / /thog ni me ltar 'byung bar 'gyur/ /zhes 'byung ngo / /de bzhin du/ 'dod chags rang gi sems rtogs te/ /mun pa zhe sdang lus can gyi/ /brdzun pa'i bdag nyid byis pa yis/ /gang dag chos rnams brtag pa ste/ /don dam rnam rtog la yang ni/ /mkhas pas zhen par mi bya'o/ /zhes 'byung ngo / /zhi ba'i lha'i zhal snga nas kyis kyang / nyon mongs yul la med cing dbang po'i tshogs la'ang med la bar yang mi gnas te/ /de las gzhan du ma yin gar gnas 'on kyang de yis 'gro ba thams cad bcom par byed/ /'di ni sgyu ma yin gyi de phyir sems kyi 'jigs pa 'dor zhing rtsol ba brten par gyis/ /shes rab kyis ni don du don med pas ni dmyal bar bdag nyid ci phyir gnod par byed/ /ces bshad pa'i phyir ro/ /de nyid kyis na kun du bzang po'i zhes pa ni nyon mongs pa'i dri ma thams cad dang bral bas thog ma dang tha ma dang bar mar dge ba zhes pa'i don to/ /rang gi thugs so sor thugs su chud pas na zhes pa la rang gi sems phra mo'i bsgom pa dang sngags dang phyag rgya'i bsgom pa'i sgo nas 'od gsal ba'i de kho na nyid mngon du byed pa ni rang gi thugs so sor thugs su chud pa'o/ /rtsa ba'i rgyud las kyang rigs kyi bu rang gi sems la so sor rtog cing mnyam par zhog la zhes gsungs so/ /yid mi bde las rnam grol ba'i/ /rnam rtog mun pa sel byed pa/ /nyon mongs dri ma las dag pa'i/ /zla ba bzhin du sems zla'o/ /zhes 'byung ngo / /de bzhin du rtsa ba'i rgyud las kyang / /bcom ldan 'das zla ba'i dkyil 'khor dang 'dra ba'i sems bdag gis mthong ngo zhes 'byung ngo / /sems can thams cad mya ngan las 'das pa thob par mdzad pas na zhes pa ni 'gro ba rigs drug pa'i sems can thams cad brtan pa dang smin pa la sogs pa'i rnam par thar pa chen po'i mtshan nyid kyi grong khyer chen po la 'jug pa'i phyir ro/ /dgongs pa ma yin pa'o zhes pa ni sku gsung thugs kyi rdo rje 'chang gi ji lta ba bzhin du de kho na nyid bstan pa'i phyir ro/ /sdud pa po ni lag na rdo rjes so/ /gdul bya rnams la ci rigs par rjes su ston par mdzad pas na zhes pa la bsam pa ji lta ba dang rigs ji lta ba bzhin du bstan pa la sogs pas sems can gyi don mdzad pa'i phyir ro/ /ji skad du/ ri bong stag dang seng ge dang / /glang po rnams kyi skye bar yang / /thugs rje'i thugs dang ldan pa yis/ /phyag rgya grub par skye bar 'gyur/ /zhes 'byung ngo / /gnyis su med pa'i ye shes te zhes pa ni gzung ba dang 'dzin pa'i rnam par rtog pa'i bag chags gnyis dang bral ba'i de kho na nyid ces bya ba'i don to/ /de la dngos po 'di dag rang bzhin gyis stong pa ste gcig dang du ma dang bral ba'i phyir te gzugs brnyan bzhin no zhes sbyor ba gcig go/ /gnyis pa yang re zhig dang po gcig dang du ma la sogs pas rnam par dpyad na med pas 'dzin par gyur pa'i sems kyang med de/ gzung ba med pas 'dzin pa med pa'i phyir ro/ /de ltar gzung ba dang 'dzin pa'i rnam par rtog pa gnyis dang bral bas rang bzhin med pa gang yin pa de ni gnyis su med pa'i ye shes te de 'dzin par mdzad pas na rdo rje 'dzin no/ /gzung ba dang ni 'dzin pa dag / rnam pa gnyis ni blo med pa/ /gang zhig tha dad med pa ste/ /de ni zung 'jug bshad pa yin/ /zhes 'byung ngo / /de ltar na mi gnas pa'i mya ngan las 'das pa'i dbyings kyi rnam grangs can/ gzung ba dang 'dzin pa gnyis kyi rnam par rtog pa dang bral ba zung du 'jug pa'i ting nge 'dzin la gnas pa bcom ldan 'das rdo rje 'chang zhes bya'o/ /sa 'og dang sa steng dang mtho ris kyi ngo bo nyid du gyur pas na zhes pa la pha rol gyi bstan pa la grags pas 'jig rten gsum pa'o / /'dod pa'i khams la sogs pa zhes pa ni rang gi bstan pa la grags pas 'dod pa dang gzugs dang gzugs med pa ste khams gsum pa'o/ /de'i ngo bo nyid kyis zhes pa ni bcom ldan 'das te 'dod pa'i khams la sogs pa'i ngo bo nyid kyis bzhugs pas na 'o/ /'jig rten gsum gyi sgras lha'i rigs drug ste/ de rnams kyi nang na mchog ni drag po dang khyab 'jug dang dbyig snying la sogs pa'o/ /de rnams kyi nang na yang lung bstan pa nyid kyi rdo rje dang 'dra bas na rdo rje ste/ rang sangs rgyas la sogs pa ni nyan thos dang rang sangs rgyas dang yang dag par rdzogs pa'i sangs rgyas rnams so/ / de rnams kyi mchog ni gtso bor gyur pas so zhes pa la thams cad kyi mchog ni dpal rdo rje 'chang ngo / /'jig rten gsum mchog ni zhes pa la tshangs pa la sogs pa ste mngon par shes pa lnga thob pa dang / dpal rdo rje 'chang gi sprul pa'i ngo bo yin pa'i phyir ro/ /de rnams la rjes su brten pa nyid de zhes pa ni rang gi phyogs las bkag cing theg pa chen po'i lam la 'jug pa'o/ /gang gi phyir de rnams kyi skyes bu la sogs pa'i yod pa'i lta ba log par rtogs pa gang yin pa de las ldog cing yang dag pa'i lam gyi mtshan nyid kyi gang dag dang chos la bdag med pa'i de kho na nyid la 'jug pa'i phyir ro/ /'jig rten 'di la bden pa gang / /tshangs pa la sogs rnams kyis bstan/ /'phags pas de nyid brdzun bshad de/ /de las lhag ma gzhan ci yod/ /srid pa'i chu bo'i rjes 'brang ba'i/ /ma rig mun pa 'jig rten dang / /srid pa med pa'i mkhas pa rnams/ /dam pa dang ni ji ltar mnyam/ / zhes 'byung ngo / /de lta bu'i rdo rje 'chang chen po zhes pa ni/ phan yon dang bcas pa'i tshig go/ /de rnams kyi bzhugs gnas su gyur pas so zhes pa ni gang gzhi'i dkyil 'khor gyi rang bzhin zhes pa'o/ /de bzhin gshegs pa thams cad gshegs pas na zhes pa ni de bzhin gshegs pa thams cad kyi yon tan gyi tshogs kyi mtshan nyid can gyi byang chub kyi phyogs kyi chos kyi rang bzhin yin pa'i phyir ro/ /sku dang gsung gi dkyil 'khor dag dga' ba'o zhes pa ni sku dang gsung gi cha de la yon tan gyi sgo nas yod kyi gtso bo ni ma yin no/ /gtso bo ni thugs kyi dkyil 'khor nyid de kun gyi nang na thugs mchog yin pas so/ /sku gsung thugs kyi dkyil 'khor dag ni 'og nas 'chad par 'gyur ro/ /dkyil ni snying po'o zhes pa la dkyil 'khor gyi de kho na nyid kyi mtshan nyid de/ mi mnyam pa med pas gru bzhi pa zhes bya ba la sogs pa'o/ /de len pas na dkyil 'khor zhes bya'o/ /de'i rnam pa lta ba'i dkyil 'khor gang yin pa zhes pa ni 'dir bcom ldan 'das rdo rje 'chang gis 'dod chags la sogs pa'i rigs can gyi sems can gyi khams rjes su gzung bar bya ba'i phyir dbang po rno bas rtogs par bya ba'i sangs rgyas kyi chos rnams thabs bla bas rtogs pa'i don du'o/ /gru bzhi pa dang ldan pa'i dkyil 'khor gyi sgo nas bstan to/ /gang gis de dag dkyil 'khor 'dri ba dang 'jug pa dang / de'i de kho na nyid thob pas sangs rgyas kyi chos de rnams khong du chud cing dpal rdo rje 'chang gi go 'phang thob par 'gyur ro/ /phyi rol gyi dmar po la sogs pa'i kha dog dang gru bzhi pa la sogs pa'i dbyibs dang ldan pas dgos pa ni cung zad kyang med de/ las dang po pa'i sems can 'jug pa'i don du bcom ldan 'das kyis dkyil 'khor la sogs pa bstan to/ /ji skad du/ chen po ma yin thung ba min/ /ring po ma yin zlum po min/ tshad dang ldan pa nyid thob pa'i/ /gzhal med khyod la phyag 'tshal bstod/ /dmar dang ljang dang dud ka ste/ khyod la kha dog mi dmigs te/ /dkar nag ser po ma yin pa'i/ /kha dog las 'das khyod la 'dud/ /ces gsungs so/ /dkyil 'khor 'dra ba zhes pa ni de ltar gyur pa gzhi'i dkyil 'khor yang / de bzhin gshegs pa thams cad kyi yon tan gyi tshogs dang ldan pa'o/ /yid du 'ong bas na zhes pa la rin po che 'bar ba nyid kyi sems la tshim par byed pa'o/ /sgra ji bzhin pa'o zhes pa ni dkyil 'khor bshad pa'i phyir ro/ /rdo rje 'chang chen po'i gsung gis zhes pa ni sdud pa pos rjes su brjod pa zhes bya ba'i tha tshig go/ /de nas zhes bya ba ni tshig gi skabs 'byed pa'o zhes pa ni tshig phrad rnams don du ma dang ldan pa'i phyir ro/ /de'i phyir zhes pa'i sgra ni gtan tshigs kyi don te zhes pa la snga ma'i rnal ma la ltos pa'o/ /bkra shis dang ni dbang nyid brjod/ / de nas sgra dang de phyir sgras/ /rim dang gtan tshigs don ston to/ /zhes 'byung ngo / /gtan tshigs kyi don de nyid bstan par bya ba'i phyir slob ma'i tshogs khas blangs nas zhes smos te/ sngar bshad pa'i de bzhin gshegs pa lnga'i rang bzhin gyi rdo rje slob dpon la bstod pa'i tshig ste gsol ba gdab pa'i tshig ces bya ba'i don to/ /dad pa la sogs pa'i yon tan rdzogs pa yin pas na zhes pa la sogs pa'i sgras shes rab dang tshul khrims dang brtson 'grus dang ldan pa la sogs pa'i yon tan gzung ngo / /ji skad du/ slob dpon bsnyen bkur dag gis ni/ / mkhas pa rnams kyis mgu byas te/ dkyil 'khor lag len bsgrub pa rnams/ /mthong zhing mkhas pa rnams kyis 'dod/ /zhi dang rgyas dang rab gnas sogs/ /'dod cing don byed la nus pa'i/ /dkyil 'khor bri phyir slob ma yis/ /lan ni gnyis gsum gsol 'debs bya/ /zhes 'byung ngo / /dkyil 'khor zhes bya ba la sogs pas ni yon tan phun sum tshogs pa du ma dang ldan pas de la bshad par bya'o/ /thugs gtso bor byas pa'i dkyil 'khor ni zhes pa la bar ma'i tshig mi mngon pa'i las 'dzin pa'i bsdu ba'o/ /mi bskyod rdo rje bdag po nyid du gyur pa zhes bya ba'i don to/ /de nyid kyi phyir rdo rje'i rigs gtso bo yin pas na zhes smos te thugs kyi rigs kho nas rdo rje'i rigs yin no zhes bya'o / /thugs gtso bor yin te de med pas lus dang ngag mi gnas pa'i phyir ro/ /sems kyis byang chub thob pa dang / /sems kyis 'gro ba lngar 'gro ba/ /sems las ma gtogs cung zad kyang / /bde dang sdug bsngal mtshan nyid med/ /ces 'byung ngo / /de bas na 'di nyid ni dang por gsungs so zhes pa la sems ni dang po nyid du dmigs pa'i phyir ro/ /mi bskyod pa'o zhes pa ni sems ni chos kyi dbyings kyi ye shes kyi rang bzhin yin pa'i phyir ro/ /de dang 'dra bar zhes bya ba la sogs pas ji ltar phung po'i bdud la sogs pa bzhi pos rdo rje lta bu'i ting nge 'dzin la zhugs pa'i bcom ldan 'das kyi thugs g.yo bar ni nus pa de bzhin du dkyil 'khor 'di yang g.yo bar mi nus te de'i rten yin pa'i phyir dang de'i ngo bo yin pa'i phyir ro/ /brten pa'i chos ni rten la yang mthong ste nyi ma'i 'od zer gyis gsal bar bya ba'i don nam mkha' bzhin no/ /snying po ste gsang ba'o zhes pa la lus la sogs pa'i tha mal pa'i ngo bo nyid spangs nas ting nge 'dzin gsum gyi sgo nas rnam par snang mdzad la sogs pa'i ngo bo nyid du snang ba gang yin pa de ni snying po gsang ba ste/ de len pas na dkyil 'khor ro/ /gang gi phyir sku gsung thugs kyi rigs kyi lha rnams kyi gzhir gyur pa de nyid kyi phyir sku gsung thugs kyi dkyil 'khor te zhes bstan pa yin gyis 'dri ba'i dkyil 'khor tsam ni ma yin no/ /de yang dag par zhes pa ni dkyil 'khor gyi cho ga'i rim pas bshad par bya zhes bya ba'i don to/ /lus dang ngag dang sems mnyam par gzhag pas so zhes pa ni rdo rje slob dpon gyis rang gi lus la sogs pa yang dag par bsdams pas so/ /de la rdo rje slob dpon g yis dkyil 'khor bri ba'i dus su sems ni rang gi yi dam gyi lha bsgom pa la 'jug pa dang ngag kyang sngags bzlas pa la brtson par 'gyur ba dang lus kyang dkyil 'khor dri ba dang thig gdab pa dang g.yas brkyang ba la sogs pas yongs su bskor ba'i bya ba la 'jug par 'gyur ba'i bya bas so/ /las kyi cho ga mthong ba'i slob dpon zhes pa ni gang gi dkyil 'khor mang po 'dri ba dang de'i sgo nas grags pa thob pa de ni las kyi cho ga mthong ba'i slob dpon no/ /gang gi tshe de kho na nyid bcu shes pa dang bzo'i rigs thams cad shes pa'i rdo rje slob dpon yin na de'i tshe dkyil 'khor bri ba la sogs pa'i snod du gyur pa yin no/ /de nyid bcu ni yongs shes pa/ /dkyil 'khor bri ba la ni mkhas/ /zhes 'byung ngo / /dkyil 'khor dang ni ting 'dzin phyag rgya dang / /sngags dang byed pa stang stabs bzlas sbyin sreg /phyag rgya sngags dang nges spyir bsdu ba ni/ / de nyid bcu ni sngags kyi tshul las so/ /zhes 'byung ngo / / rnam par bgo ba'o zhes pa thig kyang brgya rtsa brgyad kyis phye bar bya ste cha chung la sogs pa'i rim pas zhes bya ba'i tha tshig go/ /dkyil 'khor ston pas thig skud do/ /zhes pa ni phyi dang nang gi dkyil 'khor gyi dbye bas phye ba'i de nyid thig skud kyis gsal bar byed pa'i phyir ro/ /gzhan dag tu ma spyad pa'o zhes pa ni khru tshad drug dkyil 'khor gzhan la thig ma btab pa'o/ /yang dag par bsgril ba'o zhes pa ni brtan par bsgril bas te ji ltar chad par mi 'gyur bas so/ /gzhan du na skyon chen por 'gyur te/ thig skud chad na bla ma 'chi/ /zhes bshad pa'i phyir ro/ /dkyil 'khor gyi nyis lnga pa bo zhes pa ni khru tshad nyi shu rtsa bzhi 'am yang na khru tshad drug gis so/ /de yang phyogs re re 'am thams cad du dkyil 'khor gyi dbyibs las shes par bya'o/ /des ni mtshams bzhi'i thig legs par btab par 'gyur ro/ /tshon sna lnga pa la ste zhes pa ni rim pa ji lta ba bzhin du kha dog lnga dang ldan pa'i thig skud kyis so/ /des ni de bzhin gshegs pa lnga'i rang bzhin gyis gsungs zhes 'byung ngo / /dkyil 'khor 'dri ba dang rjes su mthun pa'i thig skud bstan to/ /shin du phra ba dang sbom po ma yin pa'i zhes pa ni tshad bar ma tsam gyis zhes bya ba'i tha tshig go/ /thig skud sbom pos ri mo sbom po dang phra bas kyang phra mor gyur te/ sbom po byung na nad 'byung dang / /phra ba yis ni nor 'jig 'gyur/ /zhes bshad pa'i phyir ro/ /de lta bu'i thig skud kyis zhes pa ni/ thig skud kyi mtshan nyid dang ldan pa'o zhes bya ba'i tha tshig go/ /dkyil 'khor gyi tshad bstan pa yin no zhes pa ni sdud pa pos zhes tshig lhag ma'o/ /khru bcu gnyis pa zhes pa ni phyogs re'ang kun du ste/ snang ba dang snang ba mched pa dang snang ba nye bar thob pa dang 'od gsal ba'i bdag nyid can gyi sems re re'am chung ba dang 'bring dang che ba'i dbye bas rnam pa bcu gnyis yin pa'i phyir ro/ /gang gi phyir snang ba la sogs pa'i ye shes kyi rang bzhin ni bcom ldan 'das mi bskyod pa yin no/ /zur bzhi dang ldan pa'i phyir ro zhes pa ni kun tu bzang po yin pas so/ /shar la sogs pa'i sgo bzhi dang ldan pa ste/ /zhes pa ni rta babs dang dril bu dang ba dan dang mu tig gi phreng ba dang rnga yab dang dra ba dang dra ba phyed pa la sogs pa dang ldan pa'i shar la sogs pa'i sgo bzhi dang bcas pa zhes bya ba'i don to/ /don gyis na phyi'i dkyil 'khor yin no zhes pa ni nang gi dkyil 'khor la khru bzhi pa la sogs pa med do zhes bya ba'i don to/ /'khor lo ste nang gi dkyil 'khor zhes pa ni dkyil 'khor 'di ni rim pa gnyis pa yin no zhes bstan to/ /nang gi zlum po dang / phyi'i gru bzhi pa zhes bya ba'i don to/ /de nyid bstan par bya ba'i phyir kun nas yongs su zlum po lta bur bri bar bya'o zhes pa ni nang gi dkyil 'khor nyid do/ /cho ga ni sa sbyang ba la sogs pa'i cho ga nyi shu'o zhes pa ni 'phags pa klu sgrub kyi zhal snga nas kyis mdzad pa'i sa sbyang ba la sogs pa'i cho ga rnam pa nyi shu ston par byed pa'i cho ga'o/ /da ni sems can rnams 'jug par bya ba'i phyir sgrub pa'i dkyil 'khor gyi cho ga bshad par bya ste/ slob dpon la lan gnyis gsum zhus pa/ /gsang ba'i bdud rtsi dam pa'i snod/ /yang dag dang zhing dad pa ldan/ /thar pa 'dod pa'i slob ma rnams/ /dpal ldan 'dus pa'i rjes bzung ba'i/ /byang chub la sbyor bdag gis 'di/ /de ltar bla mas de dag gzung / /snying rje dang ldan sems kyis so/ /rdo rje slob dpon ni theg pa chen po'i tshul la mkhas pa 'gro ba thams cad gdon pa'i bsam pa dang ldan pa dad pa dang thos pa la sogs pa'i stobs kyis/ chos thams cad kyi rang bzhin gyis 'od gsal ba khong du chud pas/ yul gyi spyod pa ma lus pa dri ma med par byas pa kun tu 'gro ba'i chos kyi dbyings so sor 'bigs pa'i bsam pas dga' ba'i rnam par dag pa la gnas pa/ shes rab kyi tshogs mngon par 'phel bas brdzun pa'i rnam par rtog pa'i bag chags las byung ba'i gti mug gi dra ba'i rab rib ring du byas pa'i slob dpon la gang gi tshe slob mas zhus pa de'i tshe/ sems can gyi khams thams cad 'di ni bla na med pa'i bde ba chen po'i go 'phang la bdag gis gzhag par bya'o zhes bsam pas/ khyod kyis yo byad kun tshogs sam ma tshogs zhes slob ma la dri bar bya'o/ /cung zad tshogs te cung zad ma tshogs so zhes gal te de skad smra na de'i tshe/ de'i lte bar dgod pa'i nyi ma'i dkyil 'khor gyi steng du yi ge hUM gi 'od zer gyis snying la gnas pa'i yi ge kaM las bskyed pa kha dog nag po ma rungs pa sha za dang 'dra ba'i sdig pa sna khung g.yas pa nas phyung ste/ yi ge hUM yang snying gar phyin pa las byung ba g.yas brkyang ba la gnas pa/ mche ba rnam par gtsigs pa lto ba 'phyang ba/ kha dog nag po mche ba dang bcas pa'i g.yon pa'i sdigs mdzub snying gar 'chang ba/ mche ba dang bcas pa'i phyag g.yas pa 'greng ba rdo rje gnod sbyin gyi khro bo'i rgyal po'i gzugs bsams te/ phyung la oM badzra ya k+Sha kro d+ha kha da kha da sarba pA paM bya s+ya hUM phaT ces bya bas sdig pa de zos la/ yi ge saM yongs su gyur pa las kun du bzang po'i gzugs su slob ma bsams la/ sngar bshad pa'i bdud rtsi 'khyil pa'i sngags kyis de'i sems kyi bgegs phur bus btab la/ de las byung ba'i drag po'i 'od zer gyi tshogs kyis gdug pa rnams bsregs la/ slob ma'i sems bsrung bar bya ba'i don du spyi bo'i steng du dbyangs dang po las byung ba'i zla ba'i dkyil 'khor la gnas pa'i dbyangs tha ma las byung ba rdo rje rgya gram de nyid du gnas pa yi ge haM gis byin gyis brlab par bya'o zhes slob ma gzung ba'o/ /de nas sgrub thabs las bshad pa'i gnas su/ de las bshad pa'i bsrung ba'i cho ga dang ting nge 'dzin gsum bsgom pa sngon du 'gro bar phra bo'i rnal 'byor la sogs pa gang yang rung ba'i bsgom pas sems brtan par byas la/ lha re re la 'bum phrag gcig dang khri phrag gcig bzlas la shar dang byang phyogs kyi cha ru/ mdor bsdus pas ni dge ba sgrub/ /zug rngu'i skyon dang nges par bral/ /shar dang byang phyogs mtho ba ste/ /me tog shing gis nye bar mdzes/ /yang na gang du yid dga' ba/ /de nyid du ni brtsam par bya/ /de nas phyi dro'i dus su mi bskyod pa'i rnal 'byor dang ldan pas yi ge laM las byung ba'i sa'i lha mo kha dog ser mo lag pa gnyis kyis gser gyi bum pa bsnams pa/ lus kyi phyed phyi rol du byung bar bsams la/ lag pa g.yas pas sa gnon pas bskul bar bya'o/ /skyob pa sangs rgyas thams cad kyi/ /spyod pa'i tshul dang khyad par gyi/ /sa dang pha rol phyin pa la/ /lha mo khyod ni dbang du gyur/ /shAkya seng ge skyob pa yis/ /ji ltar bdud dpung 'joms par mdzad/ /de bzhin bdud dpung las rgyal nas/ /bdag gis dkyil 'khor bri bar bgyi / /sngags pas cho ga bzhin bskul nas/ /sa gzhi lag pas reg byas nas/ /me tog dri tshogs kyis mchod nas/ /de nyid du ni thim par bsam / /de nas zhing skyong la sogs pa la gtor ma dang mchod pa la sogs pa byin nas sa gzhi la gsol ba gdab cing de nyid du nyal bar bya'o/ /gal te rmi lam la sogs pas slu bar gyur na de'i tshe/ zhag gnyis pa'i nyin phyed kyi dus su gang yang rung ba'i khro bo'i rnal 'byor dang ldan pas mngon spyod kyi cho gas bgegs gzhom par bya ba'i don du sbyin sreg byas la de'i phyi dro khrus byas shing gtsang sbra yan lag dris byugs pa/ rdo rje 'chang gi nga rgyal dang ldan pas 'chad par 'gyur ba'i cho gas zhi ba'i sbyin sreg byas te/ pus mo dang rked pa dang / lte ba tsam ste/ tha ma dang bar ma dang / mchog gi dngos grub kyi dbye bas sa gzhi brkos la phub ma dang rdo dang / rus pa dang rde'u la sogs pa bton nas/ dri bzangs kyi bdud rtsi lngas dri zhim pa'i chu dang ldan pa yang bya ste/ des gang bar byas la bdud rtsi 'khyil pa bzlas pa'i bdud rtsi'i chus bsang gtor bya zhing / mi bskyod pa'i rnal 'byor pas gzhal yas khang pa'i nang na gnas pa rin po che dang sman dang 'bru thams cad kyi snying po can phyogs bzhir rta babs dang lcags ris bskor ba thams cad du rnam pa sna tshogs pa'i dril bu dang ba dan dang / rgyal mtshan dang bla re rgyas pas mchog tu mdzes pa dpal bdud rtsi zhes bya ba khro bo'i rnal 'byor gyis yi ge gsum gyis mngon par 'dus byas pa'i bdud rtsi lngas byugs pa/ me tog dang spos la sogs pa dang ldan pa khro bo'i lta bas g.yon phyogs su blta zhing rim gyis bgegs bskrad pa dang phyogs bcing ba byas la/ oM b+huM khaM zhes bya bas sa gzhi nam mkhar byas te hUM laM hUM zhes bya bas rdo rje'i rdul phra rab kyis yongs su rdzogs par byas la/ oM me dI nI badzrI b+ha ba badzra ban+d+ha hUM zhes bya bas byin gyis brlabs la lag pa g.yas pas reg cing yi ge gsum gyis byin gyis brlab cing mi mngon par sngags gdab par bya'o/ /khang thog gam 'og khang ngam nags tshal lam kun dga' ra ba'am gtsug lag khang la sogs pa'am chu bo'i 'gram du sa gzhi brko na yi ge gsum bzlas par bya'o zhes bya bas sa sbyang dang sa gzung ba'i cho ga dag go/ /'dir smras pa/ ston zla tha chungs la sogs nas/ /zla ba gsum gsum brtsams nas g.yon / /lho dang nub dang byang phyogs dang / /shar du mgo ni gzhag nas nyal/ /glo g.yon nyal ba de nyid kyi/ /mgo bo bor nas sa gzhi brko / /mgo dang skra la sogs brkos pas na/ /skyon ni rgya chen shes par bya/ /zhes 'byung ngo / /de nas nyin re 'am zla re 'am lo re dkyil 'khor bri bar bya ste/ nya nas brtsams te ji srid nya phyi ma'i bar du yar gyi ngo'i tshes gcig nas brtsams te brgyad pa'am dgu pa la sogs pa'i bar du dang / nya'i snga dro'i mtshams nas brtsams te zhag de nyid du thams cad bya'o/ /de nas sngar bshad pa'i gnas bskyed pa'i rim pas gzhal yas khang pa'i nang du dkyil 'khor gyi rnam pa can gyi sa gzhi lhag par mos te de bzhin gshegs pa la sogs pa dang dkyil 'khor pa'i lha'i gnas su de bzhin du pad+ma dang zla ba la sogs pa'i gdan rnams bsams la/ de'i dbus kyi gdan la bzhugs pa'i rdo rje 'chang gi rang bzhin gyi bdag nyid du mgu bar byas te/ deng bdag skye ba 'bras bur bcas/ /bdag ni gson pa 'ang 'bras bur bcas/ / lha dang dam tshig gis mnyam par/ /gyur par bdag ni som nyi med/ /byang chub sems dang sems gcig las/ /mi ldog par ni bdag 'gyur te/ /de bzhin gshegs pa'i rigs su ni/ /deng bdag skye bar the tshom med/ /de ring bdag la zhag mchog ste/ /deng bdag mchog sbyin bla na med/ /sangs rgyas thams cad spyan drangs pas/ /deng bdag tshogs ni mchog yin no/ /zhes bya ba la sogs pas so/ /de nas yan lag kun 'dud de/ lag na spos khang 'dzin pa yis/ /sangs rgyas thams cad spyan 'dren bya/ /phyogs rnams thams cad na bzhugs pa'i/ /sangs rgyas bdag la dgongs su gsol/ /che ge mo bdag rdo rje can/ /che ge mo zhes dkyil 'khor bri/ /sangs rgyas kun sogs 'dir gshegs nas/ /bdag la dngos grub stsal du gsol/ /zhes bya bas so/ /de nas dbus kyi gdan la gnas shing bdag po'i r nal 'byor dang ldan pas sku la sogs pa byin gyis brlabs pa'i 'og tu rdo rje'i rigs can mngon par 'dus byas pa'i phyi'i phyag rgya dang ldan pas mchod pas bsdus pa'i zla ba'i dkyil 'khor du badzra d+h+r-ika ces bya ba la sogs pas mi bskyod pa la sogs pa phyung zhing zhe sdang la sogs pa'i spyod pa dang ldan pa'i sems can gyi don byas la slar yang gshegs te rang rang gi gnas la bzhugs par bsams la/ spro ba dang bsdu ba dang 'jug pa dang brtan par 'gyur ba dang / rjes su chags pa dang las la gnas par bya ste/ oM badzra At+ma kou0f85haM/ oM swa b+hA ba shud+d+hou0f85haM/ oM sarba sa mou0f85haM / zhes bya ba brjod pas rdo rje'i bdag nyid dang rang bzhin gyis dag pa dang / lha thams cad dang dbyer med pa'i bdag nyid bsgom par bya'o/ /des rnam par snang mdzad la sogs pa'i rnal 'byor dang ldan pas shar la sogs pa'i phyogs la gnas pa rdo rje dang dril bu mchog tu 'dzin pa nye bar sgrub pa po rnams kyis/ de bzhin gshegs pa kun zhi zhes bya ba la sogs pa'i bstod pa'i mchod pas dkyil 'khor bri bar bya ba'i phyir slob dpon la gsol ba gdab par bya'o/ /de nas rdo rje dril bu 'dzin pa'i slob dpon gyis sangs rgyas thams cad la phyag 'tshal nas hUM badzro ta tiSh+Tha zhes bya bas ji ltar sprul pa'i dkyil 'khor gyi 'khor lo nam mkhar bzhag ste/ dpal rdo rje 'chang gi nga rgyal dang ldan pas/ mig g.yon pa Ta las zla ba/ mig g.yas pa ma las nyi mar byas pa/ rdo rje 'chang gi nga rgyal dang ldan pas dkyil 'khor gyi sa gzhi'i phyogs su yongs su bskor nas rdo rje ra ba la sogs pa kun du bkod nas rkang pa'i 'og tu sna tshogs rdo rje bsgoms nas/ sgeg pa dang bcas pa'i gar byas te rdo rje'i zhabs kyis khro ba dang bcas pa rdo rje sems dpa'i nga rgyal dang ldan pas yi ge gsum brjod cing dkyil 'khor gyi sa gzhi la yongs su bskor bar bya'o/ / rdo rje sems dpa'i rnal 'byor ldan/ /ma mchu'i kha sbyor ngos gzung ba/ /dpal ldan g.yon phyogs sgeg 'chang bas/ /phyogs kyi 'khor lo bskor bar bya/ /steng dang 'og gnyis byin brlabs nas/ /sa dang sa steng mtho ris bsgom/ yi ge hUM ni brjod bzhin pa/ /bdag nyid ngan pas mnan mi nus/ /zhes 'byung ngo / /de nas snga ma bzhin du rin po che sna bzhi'i rang bzhin gyi mchod rten bsams la gsang ba'i dkyil 'khor du mi'u thung lto ba chen po kha dog nag po ral pa can zhal bzhi pa/ phyag bzhi pa/ g.yas pa dag gis rdo rje dang 'khor lo bsnams la / cig shos kyis pad+ma dang dril bu 'chang ba/ /zhal de rnams sgo bzhir gyur pa las gdul bya rnams sangs rgyas kyi go 'phang thob par bya ba'i phyir rang gi lto ba la 'jug par byed pa'i rten gyur pa rdo rje he ru ka'i rang bzhin gyi dkyil 'khor du gyur par bsams te/ sgo phye ba'i sngags kyis sgo rnams phye bar byas te gsang ba'i dkyil 'khor sngags 'dis dgug par bya ste/ oM badzra maN+Dal hUM dzaH/ oM ma hA badzra tsakra a d+hi tiSh+Tha hUM/ de dag gis dkyil 'khor gyi 'khor lo'i rnam pa byin gyis brlabs la/ oM kha kha zhes bya ba la sogs pa snga ma bzhin du 'phags pa bdud rtsi 'khyil pa zhes bya ba'i khro bo'i bsam gtan gyi phur bus/ dkyil 'khor gyi phyi rol gyi grwa bzhir oM badzra mung+ga ra hUM zhes bya ba 'dis phur bu gdab par bya'o/ /de nas snga ma bzhin du yi ge hUM brjod pas phyogs dang phyogs mtshams dang nam mkha' bcing ba la sogs pa'i srung ba byas la 'chad par 'gyur ba'i cho gas 'phags pa bdud rtsi 'khyil pas yongs su bzlas pa'i las thams cad pa'i bum pa ku shu'i chun po dang ldan pa dkyil 'khor gyi phyi rol lam nang ngam sgo'i gam du 'jug par 'dod pa'i slob ma rnams la bsang gtor bya ba'i phyir gzhag la/ bgegs mthar byed kyi nga rgyal gyis snying po'i sngags bzla bar bya'o/ /nye ba'i sgrub pa pos kyang / shar phyogs nas brtsams te bdud rtsi lngas dkyil 'khor gyi sa gzhi byug par bya'o/ /de nas bdag po lnga'i gnas su gru bzhi pa tsan+dan dang bcas pa'i bdud rtsi lnga'i maN+Dal rang rang gi lha'i sngags kyis yang dag par bzlas pa gnas ji lta ba bzhin du byas la me tog dgram ste rdo rje slob dpon dbus kyi maN+Dal gyi sna tshogs pad+ma dang zla ba la gnas pas/ maN+Dal de nyid la snga ma bzhin du gdan rnams bsams te/ lha'i 'khor lo rang rang gi gnas la bzhugs par bltas te nam mkha' la gnas pa gcig tu byas nas bla na med pa dang bcas pa'i mchod pa la sogs pas mchod la/ gser dang dngul dang rdza la sogs pa'i rang bzhin nag po dang rtsa ba med pas lto ba che ba mgrin pa ring ba mchu 'phyang ba me tog gi phreng ba dang bcas pa'i ras gnyis kyis mgul ba bcings pa khar lo ma dang bcas pa rang gi lhag pa'i lha'i mtshan mas mtshan pa/ dkar po'am dmar po ba dan gtod pa la br-i ha ti dang kaN+Da ka ri dang / shel dang / a pa ra dzi ta ste sman chen po dang ldan pa/ nor bu dang mu tig dang byi ru dang dngul dang gser gyi rin po che dang ldan pa til dang nas dang ma sha dang gro dang 'bras so ba ste 'bru lnga dang ldan pa'i rnam par rgyal ba'i bum pa badzra d+h+r-ika ces bya ba brgya rtsa brgyad du bzlas pa'i ar+g+ha'i dri'i chu cung zad mngon par 'dus byas pa bdud rtsi lnga yang der bcug ste/ yi ge hUM gis 'phags pa bdud rtsi 'khyil ba ral pa gcig ma dang snyoms par zhugs par bsgoms te dbang bskur nas mchod pa rnam pa lnga bla na med pa dang bcas pa la sogs pa'i mchod pas mchod la/ de la me tog gi phreng ba dang bcas pa'i h+ya sha steng du rdo rje gzhag nas de'i phreng ba'i mthar lag pas blangs la/ oM AHbig+h+na n+ta kr-ita hUM phaT ces bya ba brgya rtsa brgyad bzlas la/ me tog dkar po bkram nas spos dbul bar bya'o/ /de bzhin du rdo rje me ltar 'bar ba dang thugs rdo rje dag gis thams cad la yang byas te spos gtul bar bya'o/ /de la me ltar 'bar ba ni yi ge hUM las byung ba kha dog sngon po g.yas brkyang pa la gnas pa snying gar g.yon pa'i khu tshur gyi khro bo'i sdigs mdzub can/ cig shos kyis 'bar ba'i rdo rje bsnams pa bsgom mo/ /de'i bzlas pa'i sngags ni/ oM badzra a na la ha na da ha pa tsa ma tha b+ha ny+dza ra Na hUM phaT/ ji srid lha'i 'khor lo dgod pa de srid kyi bar du nyin re dag lan gsum du byas te bum pa lhag par gnas pa'o/ /de nas phyi rol gyi gtor ma byin nas 'phags pa bdud rtsi 'khyil ba zhes bya bas bgegs bskrad pa'i sbyin sreg dang rdo rje 'chang chen pos zhi ba'i sbyin sreg kyang byas la dkyil 'khor la bzhugs su gsol nas mchod cing ar+g+ha phul nas lhag par gnas par bya'o/ / lce'i rtse mor yi ge hUM las byung ba'i rdo rje bsams la oM pad+ma sa ra sa te ma warta ya sho d+ha ya hUM hrIHra hrIH zhes bya bas lce byin gyis brlabs la spos khang lag tu thogs te yan lag thams cad [(]gyis [,]kyis [)]phyag byas la/ thugs rjes phan 'dogs nus ldan pa'i/ /sangs rgyas bdag la dgongs su gsol/ /bdag ces bya ba che ge mo/ /thugs kyi rdo rje dkyil 'khor mchog /ci nus pa yi mchod pa yis/ /bdag gis nang par dkyil 'khor bri/ /slob ma rnams la brtse ba dang / /khyed rnams la yang mchod pa'i phyir/ /slob ma dang bcas bdag la ni/ /thugs rje nye bar blangs nas su/ /sras bcas kun gyis dkyil 'khor du/ /yang dag par ni bzhugs par mdzod / /sras dang bcas par 'dir gshegs nas/ /dkyil 'khor yongs su gzung bar mdzod/ /ces bya'o / /de ni dkyil 'khor lhag par gnas pa'o/ /de nas slob ma lhag par gnas par bya ste/ sngar bshad pa'i mtshan nyid dang ldan pa'i slob ma dkyil 'khor gyi sgor mngon par kha bltas pas slob dpon la phyag byas te 'di ltar smra bar bya'o/ /dga' chen khyod bdag ston pa po/ /slob dpon khyod ni dgongs su gsol/ /byang chub chen po'i tshul bstan pa'i/ /mgon po chen po bdag 'tshal lo/ /dam tshig de nyid bdag la stsol / /byang chub sems kyang bdag la stsol / /sangs rgyas chos dang dge 'dun ni/ /dkon mchog gsum yang bdag la stsol / /thar pa chen po'i grong mchog tu/ /mgon po bdag ni 'jug par 'tshal/ /zhes bya bas so/ /de nas slob dpon gyis slob ma gtso bo mngon du byas nas 'di skad bka' stsal te/ de yang slob ma re res 'bod pa re rer shes par bya'o/ /tshur shog rigs bu theg chen gyi/ /sngags kyi spyod pa cho ga'i tshul/ /theg chen la khyod snod gyur pas/ /yang dag khyod la bstan par bya/ / gang zhig sangs rgyas 'das pa dang / /de bzhin gang zhig ma byon dang / /gang zhig mgon po da ltar byung / /'gro la phan phyir bzhugs pa ste/ /thar pa'i cho ga mchog 'di ni/ /bzang po mkhyen nas de kun gyis/ /byang chub drung du dpa' bo yi / /kun mkhyen mtshan nyid med thob bo/ / sngags kyi sbyor ba gzhal med 'di/ /gang gis shAkya seng ge yis/ /bdud dpung 'jigs pa chen po na / /skyob pa yis ni 'joms par mdzad/ /bu kye kun mkhyen nyid thob phyir/ /de bas blo ni brtan par gyis/ /zhes bya bas mnga' bdag byas la slob ma re re me'i dkyil du gnas pa'i yi ge raM gyi mes thal bar byas la/ de'i rnam par shes pa yi ge gsum gyi bdag nyid rang gi khar bcug ste/ bde ba chen po'i rang bzhin rdo rje'i lam nas phyung la de'i sku la sogs pa byin gyis brlab pa dang hUM las byung ba'i snying gar rdo rje dang / A khaM wI ra hUM zhes bya bas lkog ma dang spyi bo dang dpung pa g.yas pa dang g.yon pa dang snying gar rim pa ji lta ba bzhin du bkod la/ sdig pa bshags pa la 'di ltar byed du bcug ste/ bdag gis sdig pa gang byas pa'am/ /byed du 'jug gam rjes yi rang / /deng de sangs rgyas thams cad kyi/ /mdun du so sor bshags par bgyi/ /sangs rgyas mgon po'i bsod nams gang / /rang rgyal slob ma rnams kyi gang / /'gro ba thams cad rnams kyi yang / /de ni bdag gis rjes yi rang / /sangs rgyas byang chub sems dpa' yis / /chos kyi rin chen bla na med/ /byang chub sems sogs slob dpon la/ /bdag gis yang dag skyabs su mchi/ /sangs rgyas rnams ni chos gsungs shig / nam yang mya ngan 'das ma gshegs/ /sems can bde ba can mdzod cig /go 'phang mchog ni thob par mdzad/ /byang chub sems ni bla na med/ /ji ltar sangs rgyas kyis bskyed pa/ /de sras byang chub sems dpas kyang / /de bzhin bdag gis bskyed par bgyi/ /kun gyi dbang phyug gnas nas kyang / /bdag ni kun rig gyur pa yis/ /gting med srid pa'i rgya mtsho la/ /'gro ba thams cad bsgral bar bgyi/ /ji ltar stobs ni sangs rgyas nyid/ /thob pa'i rgyur ni bdag gyur cig /gal te ma nus de yi tshe/ /smon lam dag ni bdag gis bgyi/ / skye ba 'di la grub pa'i phyir/ /de yi thabs la brtson byas pa/ /skyon med bde dang yon tan ldan/ /phun sum tshogs kun dbang phyug 'gyur/ /bdag gis bsod nams gang byas pa/ /gang zhig kyang ni byed par 'gyur/ /des ni bdag dang 'gro ba dag /bde gshegs go 'phang thob par shog / ces brjod du gzhug ste/ de'i snying gar yi ge hUM gis zla ba'i steng du rdo rje bsams la dri'i chu dang bcas pa lag pa g.yas pa'i rdo rje can gyis reg cing su ra ta sa ma ya s+t+waM ho sid+d+h+ya badzra ya thA su khaM zhes bya bas byin gyis brlabs la/ yi ge oM dang AH dag las spyi bo dang lkog ma dag tu 'khor lo dang pad+ma bsams la/ /dzi na dzika / A ro lika ces bya ba dag gis de nyid la reg la yi ge gsum brjod pas de rnams kyi lag tu dri dang me tog byin nas spos gtul te snang bas gsal bar byas nas 'phags pa bdud rtsi zhes bya ba bzlas pa'i shing u dum+bA ra'am a shwat+tha sor bcu gnyis pa bu ga med pa dri'i chus bkrus la dkyil 'khor la me tog bcings pa'i so shing thal mo sbyar ba'i slob ma rnams la byang phyogs su bltas pa'i bla mas sbyin par bya'o/ /de rnams kyis kyang ba'i pags pa tsam gyi tshad kyi dkyil 'khor gyi dkyil du 'dug nas/ shar phyogs su su kha bltas pa'am byang phyogs su kha bltas pas rtse mo zos te ma chags pa mngon du ltos pa med par dor bar bya'o/ /de la mngon du bab pa na bar chad med pa'i dngos grub thams cad 'grub par 'gyur ro/ /de ni gyen du bab na rig pa 'dzin pa'i dngos grub tu 'gyur ro/ /'og tu kha dang ldan pa bab nas 'og gi dngos grub tu 'gyur ro/ /g.yas skor ba'i rim pas shar phyogs su kha bltas par bab na/ rgyas pa dang mngon spyod dang / dbang dang zhi ba la sogs pa 'grub par 'gyur ro/ /maN+Dal nas phyi rol du bab na grub par mi 'gyur ro/ /de nas yi ge baM las skyes pa de nyid kyis bzlas pa'i slob dpon gyis chu blangs la/ de rnams kyi lag pa la sbyin te/ A+oM hrIH bi shud+d+haHsarba d+harmA sarba pa paM ni sh+tsa s+ya bi shod+ha ya/ sarba bi kalpan a pa na ya hUM zhes bya ba bzlas pa'i dri dang bdud rtsi'i chu'i 'thor 'thung gsum blud par bya'o/ /oM AHhUM zhes bya ba bzlas pa'i yi ge hUM las skyes pa sar pa ma nyams pa'i ku sha gcig dbu sngas dang yi ge hUM las skyes pa'i bdud rtsi 'khyil pa bzlas pa'i ku sha gnyis mal stan du byin te/ de nyid kyis bzlas pa'i srung skud gsum khugs yi ge gsum gyis brtan par byas la/ de rnams kyi dpung pa g.yas pa la mdud pa gsum rang gis bcings te/ oM bud+d+ha mai tri rak+Sha rak+Sha sarba swA hA zhes bya ba'i byams pa'i go chas bsrung zhing chos bstan pas dga' bar byas te/ bdag nyid chen po khyod rnams kyis/ /de ring rnyed pa gzhal med rnyed/ /gang gis khyod ni rgyal ba kun/ /sras dang bcas pas bstan 'di la/ /thams cad yongs su gzung gyur la/ /bdag nyid che las skyes par 'gyur/ /des ni khyod rnams theg chen la/ /gang phyir nang par skye bar 'gyur/ /theg pa chen po 'byung ba che/ /de ni lam mchog dam pa yin/ /gang gis khyod rnams ma 'ongs pa'i/ /de bzhin gshegs pa rnams su 'gyur/ /rang 'byung skal ba che ldan pa'i/ /'jig rten thams cad 'dul byed pa/ /yod dang med pa las 'das pa'i/ /nam mkha' bzhin du dri ma med/ /zab cing gsang ba kun 'gro ba'i/ /rtog pa med cing gnas med pa/ /spros pa thams cad dang bral ba'i/ /spros pa rnams kyis ma spros pa/ /las dang bya ba la sogs bral/ /bden pa gnyis dang dbyer med pa/ /'di ni theg chen dam pa ste/ /tshul la gnas pas thob par 'gyur/ /zhes brjod nas/ kye bzhin bzangs dag longs shig rdo rje 'chang chen po'i drin gyis nang par thugs kyi dkyil 'khor mthong bar 'gyur ba dang / ji ltar mthong ba'i rmi lam yang bdag kho na la smros shig ces brjod nas nyal du gtong ngo zhes pa ni lha dang slob ma lhag par gnas pa'i cho ga'o/ /de nas dkyil 'khor yang dag par mchod cing / slob ma dang bcas pas yid mnyam par gzhag pa'i slob dpon gyis dkyil 'khor gyis gzhi'i mthar nyal bar bya'o/ /zhag gnyis pa'i rnal 'byor byas pas de bzhin du dkyil 'khor de ni nam mkha'i dkyil du bteg nas dkar po dang ser po dang dmar po dang ljang gu dang sngon po bdud rtsi dang bcas pa dri zhim po'i rdul tshon yungs kar gyi phye ma dang 'dres pas thig skud kha dog so sor btsos la rim pa de nyid kyis gzhag ste/ oM swA AHhA hUM gi sa bon gyis rnam par snang mdzad la sogs pa thig skud la 'god de / sa bon de nyid kyis rang rang gi phyogs na bzhugs pa'i de bzhin gshegs pa rnams kyi thugs ka na gnas pa de dang de'i kha dog dang ldan pa'i 'od zer gyis thig skud mthong nas / bcom ldan 'das de bzhin gshegs pa thams cad kyi thugs kyi dkyil 'khor la thig gdab par bya ba'i phyir/ rdo rje'i thig skud bdag la stsol cig ces bya bas rnam par snang mdzad la sogs pa bskul bar bya ste/ oM dAb+ti dr-iSh+Ta ang+ku sha dza zhes bya ba mig dag la bkod de/ rab tu g.yo zhing 'gul ba'i mig /'bar ba'i lta ba zhes su bshad/ /ces bya bas 'bar ba'i lta ba'i lcags kyus rnam par snang mdzad la sogs pa'i thugs ka nas 'od zer gyi thig skud de rnams kyis gsal bar 'gugs shing rang gi lag pa la gnas pa'i thig skud de dang 'dres par byas la/ oM a n+yo n+yA nu ga ta sarba d+harmAHs+pha ra s+pha ra a nu pra biSh+Ta sarba d+harma zhes brjod pas yi ge gsum bzla zhing dkyil 'khor las nyis 'gyur ba sgo'i nyi shu cha'i sbom pa'i thig skud bsgril bar bya'o/ /yi ge ma dang Ta dag las nyi ma dang zla ba mig dag la dgod de/ triSh+Ti ma Ta zhes bya bas brtan par byas la dri dang bdud rtsis byugs pa'i gser la sogs pa'i snod du bzhag la dri la sogs pas mchod la lag pas rig cing yi ge gsum gyis brgya rtsa brgyad bzla'o/ /yang d kyil 'khor gyi sa gzhi snga ma bzhin du nye ba'i sgrub pa pos dris byugs la rnam pa sna tshogs pa'i me tog dgram zhing bar snang la gnas pa rnams la ar+g+haM dang dri la sogs pas mchod de phyag 'tshal nas rdo rje 'chang du gyur pas thig skud 'dzin pa rnam par snang mdzad dam bdud rtsi 'khyil pa'i rnal 'byor la gnas pa yang dag par byung ste/ mig g.yon pa dang g.yas pa dag la yi ge dza las byung ba'i kha dog ser po zla ba dang nyi mar bsgoms la yi ge gsum gyis bzlas pa'i yungs kar phye ma dang 'dres pas bdud rtsi lnga dang ldan pa'i dri bzangs kyi chus bskus la/ thig skud de lag pa g.yon pa'i khu tshur gyis lte bar gzung bar bya'o/ /oM dza dza dza zhes bya bas slob ma la gtad la nye ba'i sgrub pa pos kyang oM dza dza dza zhes bya bas de nyid gzung zhing de bzhin du lte ba'i phyogs su 'dzin par bya'o/ /lha dang gnod sbyin gyi bdag po'i phyogs su zhal bltas pa'i rdo rje 'chang gis nam mkha'i thig skud gdab par bya'o/ /de nas phyogs thams cad kyi mnyam pa nyid la dmigs te tshangs pa'i thig skud gnyis dbus la btab nas gnod sbyin dang dbang po'i phyogs su zhal bltas pas yi dags dang klu'i phyogs su btab pa dang me dang rlung gi mtshams la gnas pa'i bla mas/ shar dang nub dang byang dang lho'i phyogs la thig btab nas yang me'i mtshams la gnas nas rlung gi mtshams thig gdab pa dang / bden bral la gnas pas dbang ldan gyi mtshams thig btab nas/ shar dang nub dang byang dang lho'i phyogs bzhi'i thig gis dum bu brgyad pa'i dkyil 'khor la yang rim pa 'di nyid kyis yi ge gsum brjod pa sngon du 'gro bas thig gdab par bya'o/ /oM badzra sa ma ya sU traM mA ti kra ma hUM zhes zlos pas thig gdab pa'i sgras de bzhin gshegs pa nam mkha' la bzhugs pa la khyod kyis sems can gyi don bya ba'i dus yin pas 'di nyid du gshegs su gsol zhes pas bskul bar bya'o/ /thams cad la yang slob dpon dang nye ba'i sgrub pa po dag gis g.yas skor du 'gro bar bya'o/ /gru bzhi pa dang zur bzhi pa/ /sgo bzhi pa dang rta babs bcas/ /thig bzhi dang ni yang dag ldan/ /dar dang me tog phreng bas brgyan/ /grwa yi cha ni thams cad dang / /sgo dang sgo khyud kha khyer la/ /rdo rje rin chen gyis spras pa'i/ /phyi yi dkyil 'khor thig gdab bya/ /de yi nang gi dkyil 'khor ni/ /dum bu brgyad dang dkyil 'khor mtshungs/ /phyi yi dkyil 'khor phyed kyi tshad/ /kun nas yongs su zlum po ste/ /rdo rje ka ba mchog gis spras/ /dge zhing rdo rje phreng bas bskor/ /hri yi khro bo'i lta ba yis/ /de nas sgo rnams phye bar bya/ /sgo ni 'khor lo'i cha brgyad pa/ /kha khyer dang ni bral bar 'dod/ /sgo khyud sgo yi tshad yin te/ /de bzhin lha yi snam bu yang / /kun du kha khyer sgo yi phyed/ /de bzhin sgo 'gram sgo logs so/ /rdul tshon sa gzhi de phyed kyis / /rtsa ba'i thig las phyi rol du/ /dra ba dra phyed me tog phreng / /dar dpyang sogs rnams de bzhin no / /kha khyer re khA la brten te/ /rta babs la ni ka ba gnas/ /rdo rje ka ba'i thig rnams ni/ /rdul tshon sa gzhi dang mtshungs pa/ /sgo las nyis 'gyur rta babs te / ba dan dril bu dang ldan pa/ /dril bu dang bcas rlung gis g.yo/ /phyi yi mtshams la ba dan rnams/ /'khor lo dang mtshungs gzhan dag ni/ /ji ltar mdzes par brtag par bya/ /gal te kha cig thig btab la/ /snod med de tshe rang gis ni/ /nye bar sgrub pa po med pas/ /phur bus btab la thig gdab bya/ /de nas dkyil 'khor gyi lte bar ji ltar bshad pa'i phur bu'am rdo rjes btab nas de la thig skud btags nas de mthe bong gi nang du sbyar ba'i thig skud kyis/ phyi dang nang gi dkyil 'khor dag dang phyi rol gyi rdo rje dang 'khor lo dang pad+ma'i ra ba dang dbang ldan gyi mtshams nas brtsams te/ /g.yas skor du thig btab nas/ /ye shes kyi thig skud gshegs su gsol bar bya'o/ /de nas baM laM raM yaM haM gi sa bon las bskyed pa'i thig skud la bshad pa'i kha dog gi rim pas dkar po la sogs pa tshon rnams rin po che las byung ba'am lcags lnga las byung ba'am/ khams lnga las byung ba'am/ 'bru sna lnga las byung ba'am/ so phag las byung ba'i sngar bshad pa'i sa bon las spyan ma la sogs pa dang yang dag par ldan pa'i de bzhin gshegs pa'i rang bzhin du bsgoms la/ yi ge hUM gis mngon par bzlas pa'i yi ge dza yis 'bar ba'i lta bas rdul tshon rnams yang dag par sbar la yi ge hUM gis phur bu rnams gdon te/ de'i bu ga tshon rnam pa lngas kun du gang bar byas la thugs rdo rje'i rnal 'byor dang ldan pas bla na med pa'i shes rab kyi dril bu'i sgras mtshan ma ngan pa la sogs pa bsal te chos kyi dbyings rnam par dag pa la lhag par mos nas g.yon pa'i khu tshur gyis dbang ldan gyi mtshams nas brtsams te shar phyogs su kha bltas par gyur nas/ oM badzra tsi tra sa ma ya hUM zhes brjod nas g.yas skor nas rdul tshon gdab par bya'o/ /de nas ji ltar bde ba yis / /mnyam pa bar med yon po med/ /bar chad med cing g.yas skor ba/ /sgo yi nyi shu'i cha yi tshad/ /ri mo mnyam po bri bar bya/ /sbom po byung na nad 'byung ste/ /phra ba yis ni nor 'jig 'gyur/ /yon po yis ni sdang ba ste/ /bar chad pas ni mkhan slob 'chi/ /g.yas skor ma yin phab pa na/ /rdul tshon phur bus btab par 'gyur/ /phyi yi re khA dkar po ste/ /gnyis pa kha dog ser po yin/ /gsum pa pad+ma rA ga mtshungs/ /bzhi pa margad dang 'dra ba'i/ /nang gi re khA nag po ste/ /des na pany+tsa rA ga'i rim/ /shar gyi sa gzhi dkar po ste/ /lho phyogs ser po dang mtshungs pa/ / nub ni kha dog dmar po dang / /byang ni ljang gu dang ldan pa/ /dbus ni in+d+ra nI la mtshungs/ /thugs kyi dkyil 'khor de 'dra'o / /rtag tu mnyam par gzhag pa yis/ /rdo rje dril bu 'dzin pas bri/ /nas kyi 'bru tshod rdul tshon gyi/ /re khA phan tshun gdab par bya/ /dkyil 'khor bri ba'i dus su gal te bgegs byung na de'i tshe bdud rtsi zhes bya ba'i khro bo'i rnal 'byor dang ldan pas de'i phreng ba'i sngags bzlas nas bzlog par bya'o/ /na maHsa man+ta kA ya wA k+tsit+ta badzrA NAM/ na mo badzra kro d+hA ya ma hA daM Sh+T+roMt+ka Ta b+hair wA ya a si mu sa la pA ra shu pA sha ha stA ya/ oM a mr-i ta kuN+Da li kha kha khA hi khA hi tiSh+Tha tiSh+Tha ban+d+ha ban+d+ha ha na ha na da ha da ha gardza gardza bi s+pho Ta ya bi s+pho Ta ya sarba big+h+nAn bi nA ya kA nAM ma hA ga Na pa ti dzI wi tAn+ta ka rA ya hUM phaT swA hA / bdud rtsi 'khyil pa'i rnal 'byor dang ldan pas lag pa g.yon pa'i srin lag dang mdzub mo gung mo dag bskum par byas te mthe'u chung dang mthe bong gi rtse mor yang dag par sbyar nas mche ba'i phyag rgya kha 'gram du bcas la yi ge phaT bzlas pas bgegs bskrad par bya'o/ /yang na sngar bshad pa'i srung ba'i 'khor lo'i phur bus gdab par bya'o/ /yang na don dam par byang chub kyi sems bsgom par bya ste/ gang gi phyir 'od gsal ba'i sems kyi bgegs 'byung ba gang yin pa de ni gnas skabs kyang ma yin gyi gnas kyang med de/ bgegs la sogs pa'i tha mal pa'i rnam par rtog pa las 'byung ba'i phyir ro/ /de nas lha rnams dgod pa'i gnas su snga ma bzhin du pad+ma dang nyi ma la sogs pa'i gdan rnams ji lta ba bzhin du blos bkod la badzra d+h+r-ika ces bya ba la sogs pa'i snying po'i sngags brjod pas mtshan ma la nang du gnas pa'i lha'i gzugs dang nam mkha'i de bzhin gshegs pa gcig tu bya ba'i phyir/ blugs pa'am 'bur du byas pa 'am bris pa'i phyag mtshan rnams dgod par bya'o/ /de la dbus su in+d+ra nI la dang 'dra ba bskal pa'i me ltar 'bar zhing 'jigs pa rtse lnga pa'i rdo rje bri bar bya'o/ /rnam par snang mdzad kyi gnas su rdo rje'i rnam pa dang 'dra ba'i 'bar ba can rtsibs brgyad pa'i 'khor lo dkar po dgod do/ /de bzhin du rin chen 'byung ldan gyi gnas na brtsams te/ lha mo ro rdo rje ma'i bar du rim pa ji lta ba bzhin du me stag spro ba'i nyi ma dang 'dra ba'i rin po che dang pad+ma dang ral gri 'od zer dang bcas pa dang sprin dang 'dra ba'i 'od 'phro ba'i mig dang / 'bar zhing kha dog sngon po rdo rje dang sdong bu dang bcas pa'i pad+ma dang / de dang 'dra ba'i ut+pa la sngon po dang 'bar ba dang bcas pa'i tho ba dang rdo rje la sogs pa'i 'bar ba dang ldan pa'i dbyug to dang ral gri'i rnam pas spro ba'i pad+ma dang kha dog sngon po'i sna tshogs rdo rje dang dbus dang shar la sogs pa'i phyogs bzhi ru sngon po dang dkar po dang dmar po dang ljang gu bri bar bya'o/ /shar gyi snam bu nas brtsams te/ /'khor lo dang nA ga ge sar gyi yal ga dang / yang na rdo rje dang rin po che dang pad+ma dang / ral gri dang / yang ral gri dang / chos ston pa'i phyag rgya dang / phyi rol gyi snam bu'i grwa bzhi ru me long dang pi wang dang dri'i dung phor dang khrag chen pos yongs su bkang ba'i thod pa bri bar bya'o/ /sgo bzhi po me'i mtshams la sogs pa bzhi la lcags kyu dang dbyug to dang rtse gsum dang ral gri bkod nas/ shar phyogs kyi sgo'i tho ba'i gong du 'khor lo dang / de bzhin du nub kyi sgo'i pad+ma'i rgyab tu dril bu dang bcas pa'i rdo rje'i pad+ma dang nyi ma'i gdan gyi steng du dgod par bya'o/ /gal te 'dir thugs rdo rje la sogs pa nas gang yang rung ba'i lha sgrub par 'dod na de'i tshe/ lo bcu gnyis lon pa'i bu mo dang / khye'u dag la mi bskyod pa dang mA ma kI la sogs pa zhugs nas/ de dag gis thig gdab pa la sogs pa'i cho ga sngon du 'gro bar bris pa'i rten gyi dkyil 'khor la sgrub thabs las bshad pa'i gdan la gzugs dang kha dog dang zhal dang phyag la sogs pa dang ldan pa lha ma lus pa dgod pa'i gnas la ji bzhin du zhugs nas bsgrub par bya'o/ /phyogs bzhi ru rin po che la sogs pa'i rang bzhin gyi rta babs bzhi dang / me tog gi phreng ba dang dril bu dang ba dan la sogs pa dang ldan pa'i sgo bzhi rdo rje 'chang gi sngags kyis dbul bar bya'o/ /dkyil 'khor gyi phyi rol du phyogs bzhi ru shes rab kyi pha rol tu phyin pa dang / phal po che dang / de bzhin gshegs pa'i gsang ba dang / gser 'od dam pa'i mdo sde rnams klog du gzhug go/ /ga bur dang a ga ru dang tu ruska la sogs pa'i spos khang phyogs dang mtshams su rgyun mi 'chad par gtul bar bya'o/ /de nas nye ba'i sgrub pa pos bdud rtsi 'khyil ba'i nga rgyal dang ldan pas rdo rje ra ba nas phyi rol du bdud rtsi lnga dang bcas pa'i dri'i chus sa gzhi byugs te me tog bkram nas las thams cad pa bzlas pa'i chus dkyil 'khor la bsang gtor byas te de'i dbus su lag pa bzhag nas 'khor lo byin gyis brlab par bya ba'i phyir yi ge gsum brgya rtsa brgyad du bzlas nas/ oM AHbig+h+nAn+ta kr-ita hUM phaT/ ces bzlas par bya'o/ /de nas mtshams kyi dus su dpal gnod mdzes kyi rgyal po'i nga rgyal dang ldan pas me tog sngon po'i phreng ba blangs nas/ oM sum+b+ha ni zhes bya ba la sogs pa'i sngags brjod pas dkyil 'khor du gzhug ste/ dril bu dkrol zhing lan gsum bskor te/ ma tshang ba dang lhag pa'i skyon zhi bar bya ba'i phyir rdo rje la bltas te me tog gi phreng ba bcom ldan 'das la phul zhing / yang de nyid gar gyi tshul gyis blangs la rang gi mgo bo la yi ge hUM bzhi'i sngags kyis bcing bar bya'o/ /de nas phyi dang nang gi dkyil 'khor dag gi bar na gnas pa'i mnyam par gzhag pa'i rdo rje slob dpon gyis yi ge gsum brjod nas yid kyis sgo phye bar bya'o/ /sgo rnams shar la sogs par ni/ /nub kyi phyogs su gnas pa yis/ /rim gyis phye bar byas pa ste/ /de bzhin g.yas brkyang la sogs pas/ /zhes 'byung ngo / /sngar lhag par gnas par byas pa'i rnam par rgyal ba'i bum pa cho ga de nyid kyis lan bdun bzlas pas bdag po'i mdun du gzhag par bya'o/ /gzhan ma badzra d+h+r-ika ces bya ba brgya rtsa brgyad bzlas pas 'jug pa'i sgo la mngon par phyogs par gzhag nas de'i chus bdag nyid dang slob ma bsang bar bya ba'i phyir bzhag nas bzlas la/ dkyil 'khor gyi phyi rol dang rdo rje'i ra ba'i bar na/ shar dang lho'i sgo'i mtshams su mtshan nyid dang ldan pa rang gi lha dang rjes su mthun pa'i tshon gyis bris pa/ ras dam pa gnyis kyis mgul ba bcings pa lo ma dang 'bras bur bcas par khar bcug la rin po che lnga dang sman dang 'bru lngar ldan pa dang / bdud rtsi dang ldan pa'i tsan+dan gyi chus bkang ba/ rang rang gi sngags kyis brgya rtsa brgyad bzlas pa/ 'phags pa gshin rje mthar byed pa la sogs pa'i khro bo'i rgyal po'i bum pa gzhag par bya'o/ /de bzhin du lho dang nub kyi mtshams su dpal gnod mdzes kyi rgyal po nas brtsams te dri rdo rje ma'i bar du bum pa bzhi dang lnga gzhag go/ /de bzhin du nub dang byang gi mtshams su 'jig rten dbang phyug nas brtsams te spyan ma'i bar du bum pa bdun nyid do/ /byang dang shar gyi sgo'i mtshams su mA ma kI nas brtsams te mi bskyod pa'i bar du bum pa brgyad dgod do/ /ma tshogs na rnam par rgyal ba dang spyan ma la sogs pa bzhi dang / lha rnams kyi bzhi dang / las thams cad kyi bum pa gang ba yang gzhag ste bcu las nyung bar mi bya'o zhes bshad pa'i phyir ro/ /de nas sgrub thabs las gsungs pa'i tshogs la sogs pa dang phyi'i yo byad kyis kyang dkyil 'khor mchod nas rdo rje slob dpon gyis ji ltar bshad pa'i rig ma dang lhan cig tu slob ma gzhug pa'i cho ga dang 'dra bar rang zhugs te/ bcom ldan 'das kyi drung nas bum pa'i dbang dang gsang ba dang shes rab ye shes kyi dbang dang rjes su gnang ba dang dbugs dbyung ba dang lung bstan pa dang ting nge 'dzin bsgom pa thob nas/ sna tshogs pad+ma ras kyis bkab pa'i gdan gyi steng du gnas pas/ sme sha can gyi bu mo lo bcu gnyis pa/ bzhin bzangs mig ni yangs pa ste/ /rgyan rnams thams cad kyis brgyan pa/ /de nyid rig la rjes gnang ba/ /yon tan ska rags mA ma kI/ /sgrub thabs las bshad cho ga yis/ /dri dang me tog gis khyab pa/ /lha rnams thams cad mchod pa'i phyir/ /rnal 'byor pas de 'dod par bya/ /de nas rang gi byang chub kyi sems spro ba dang bsdu zhing zla ba'i dkyil 'khor du sngar bshad pa'i snying po rnams kyis dam tshig gi dkyil 'khor phra mo phyung ste/ phyag mtshan gyi nang du gnas pa'i lha'i sku rnams la bsdus par bsams te/ lcags kyu dang zhags pa thogs pa'i gnod mdzes kyi rgyal po'i yi ge dza'i mtha' can gyi hUM bzhi po'i sngags kyis ye shes kyi 'khor lo dgug cing lha re re'i thugs kar zhugs pa sngon du 'gro bas phung po la sogs pa byin gyis brlab pa dang sku gsung thugs byin gyis brlab pa'i bar du byas te/ snga ma bzhin du rdo rje 'chang chen po la sogs pa'i cod pan dang dar dpyangs kyis dbang bskur te/ rjes su chags pa'i cho gas rjes su chags par byas nas snga ma bzhin du byang chub kyi sems de bzhin gshegs pa dgod pa'i rnam pa can du bsdus te pad+ma la zhugs nas zhu bar gyur pa ye shes kyi bdud rtsi'i rang bzhin de bzhin gshegs pa la sogs pas spyod par bya ba'i phyir phul la yang lha mo'i tshogs kyi gzugs su phyung zhing / bla na med pa'i mchod pa dang bcas pa'i mchod pa de rnams kyis dkyil 'khor la mchod nas yi ge gsum gyis bzlas pa'i me tog dang spos dang snang ba dang dri dang lha bshos phul te rdo rje 'chang la sogs pas mngon par bzlas pa'i dung phor la sogs pa'i snod la gnas pa bdud rtsi dang til dang nas dang ku sha dang dri bzangs me tog dkar po dang bcas pa'i dri chu gang yin pa des lha rnams la zhabs bsil dang mchod yon dbul bar bya ste/ de nas mchod pa bya ba ni lha re re la na bza' gnyis gnyis sam/ yang na thams cad la gcig gcig phul nas rnam pa sna tshogs pa'i gdugs dang rgyal mtshan dang ba dan dang bla re rnams yi ge oM mam rdo rje sems dpa' bzlas te/ badzra s+pha ra Na khaM zhes bya ba 'dis dbul lo/ /oM sarba ta thA ga ta pU dza me g+ha sa mu dra s+pha ra Na sa ma ya shri ye hUM/ zhes bya ba'i sngags kyis mngon pa 'dus byas pa'i ga bur dang a ga ru dang tu ruSh+ka la sogs pa'i dri bzangs tsan+dan dang 'dres pa dang me tog gi shing yang rung brgya'am bzhi dang me tog thams cad dang / spos khang stong ngam brgya'am bcu las nyung bar mi dbul lo/ /mar me 'bum phrag brgya'i grangs sam yang na mar me snod brgya'am yang na bzhi 'bul lo/ / de ma thag du bshad pa'i sngags kyis me tog dang spos dang mar me'i mchod pa la sogs pa la re re dang sbyar ro/ /yi ge gsum gyis mngon par bzlas pa'i oM lo pi la sogs pa'i bza' ba dang / rnam pa sna tshogs pa'i bza' ba dang bca' ba dang myang ba dang nyes pa dang bcas pa dang nyes pa med pa'i gtor ma'i mchod pa yang stong phrag gi grangs su de nyid kyis dbul lo/ /rol mo stong ngam pi wang ngam/ /dung la sogs pa yang na rol mo bcu dbul lo/ /phyi'i gar mkhan dang gdu bu dang rna cha dang cod pan la sogs pa dang / rta dang glang po dang ba lang gi tshogs kyang legs par brgyan pa dbul bar bya'o/ /gos dang bcas pa'i rta babs dang dril bu dang bcas pa'i rnga yab dang / dkar po dang / dur ka dang / nag po dang / dud kha dang / dmar po dang / kha dog sna tshogs pa dang / ser po dang / ljang gu dang / dbang po'i phyogs la sogs par dkyil 'khor gyi phyi rol du rim gyis ba dan brgyad dbul bar bya'o/ / yang bla na med pa'i mchod pa dang bcas pa'i mchod pa la sogs pas mchod cing / /mi bskyod rdo rje ye shes che/ /zhes bya ba la sogs pas snga ma bzhin du bstod par bya'o/ /de'am gzhan gyis bstod nas dung phor la gnas pa'i bshang gci la sogs pa dang ldan pa'i spros pa'i byang chub kyi sems yi ge gsum gyis mngon par sbyangs te dkyil 'khor gyi 'khor lo'i dbus su phul nas dkyil 'khor pa rnams des tshim par bya'o/ /de nas mngon par 'dus byas pa'i bza' ba la sogs pa yang dbul lo/ /shar phyogs nas brtsams te lha la sogs pa la gtor ma byin nas lha rnams tshim par byed pa'i sbyin sreg bya'o/ /de nas gzhan la dkyil 'khor du zhugs nas dbugs dbyung ba dang lung bstan pa thob pa sngon du 'gro ba thams cad bskyed la slob ma rnams 'jug par bya ba'i phyir de ltar bden pa gsan du 'jug par bya ste/ chos rnams gzugs brnyan dang mtshungs pa'i/ /dag cing dang ba dri ma med/ /gzung ba ma yin brjod bya min/ /rgyu dang las las kun 'byung ba/ /de bzhin de nyid las byung ba'i/ /de ltar bden pas dkyil 'khor 'di/ /dri med slob ma thams cad kyis/ / gzugs brnyan ltar gsal mthong bar byed/ /nam mkha' skyed pa'i mtshan ma'i phyir/ /thog ma tha ma med pa'i mchog /sems dpa' rdo rje che rang bzhin/ /rdor sems deng bdag 'grub par mdzod/ /dngos grub chen po kun gyi mchog /dbang phyug chen po lhag pa'i lha/ /rdo rje 'chang kun rgyal po ste/ /mi 'gyur dam pa bdag grub mdzod/ /khyod ni skyon med rtag pa ste/ /chags pa kun gyi rjes chags pas/ /chags pa chen po dga' ba che/ /bcom ldan de nyid bdag grub mdzod/ /shin du dag pa kun gyi mchog /gzod ma nas dag de bzhin gshegs/ / kun du bzang po kun bdag nyid/ /byang chub sems dpa' bdag grub mdzod/ /dngos grub chen po kun gyi mchog /dbang phyug chen po rgya mchog gi/ /rdo rje chen po phul du byung / /rdo rje sgeg bdag bdag grub mdzod/ /sems can kun gyi yid khyab pa/ / sems can kun gyi yab nyid de/ /dam tshig mchog ldan 'dod pa mchog / dben pa gang gis dkyil 'khor 'di/ /thabs dang shes rab bdag nyid can/ /mgon po bden pa de nyid kyis/ /bdag la re ba rdzogs par mdzod/ /ces bya ba'i dam tshig gsum gyi glu'i mchod pa dang gsol ba 'debs pa yang bya'o/ /de ni slob ma 'jug pa'i cho ga yin te snga ma bzhin du slob ma mngon par 'dus byas pas/ /dam tshig dang sdom pa khas blangs pa yon phul ba de'i snying gar snyoms par zhugs pa'i bde ba chen po rnam par bsams te/ de'i sbyor ba'i g.yo ba las byung ba'i sgra'i kha dog dmar po yi ge a'i 'od zer gyi phreng bas lus thams cad snang bar byas par bsgoms la/ bdud rtsi 'khyil ba'i khro bo bzlas pa'i mig dgab pa dang stod smad kyi ras dang ldan pa sgo skyong bzhi pos mngon par bzlas pa'i mig bkab pa'i gos byas te rang gi dbang bskur ba'i de bzhin gshegs pas byin gyis brlabs pa'i ras kyis spyi bor bkab la ji ltar bshad pa'i rang gi rigs kyi bu mo lag pa g.yon pas 'khyud pa'i phyag rgyas bzung ba zhugs par byas te las thams cad pa'i bum pa'i chus bsang gtor byas la phyag bzhi byed du gzhug par bya ste/ e ma'o sangs rgyas e ma'o chos/ /e ma'o chos kyi bstan pa ste/ /dag pa'i de nyid don dag pa/ / byang chub sems khyod la phyag 'tshal/ /chos rnams bdag med las byung ba'i/ /sangs rgyas byang chub rdzogs byed pa/ /rnam par mi rtog dmigs pa med/ /byang chub sems la phyag 'tshal lo/ /kun du bzang po kun gyi don/ /sangs rgyas byang chub rab 'jog pa/ /byang chub sems ni rdo rje che/ /byang chub sems khyod la phyag 'tshal/ /thugs ni de bzhin gshegs pa'i bdag /sku gsung thugs kyi rdo rje can/ /sangs rgyas byang chub rab stsol ba'i/ /byang chub sems khyod la phyag 'tshal/ /zhes bya bas so/ /de nas A khaM wI ra hUM zhes bya ba'i sngags kyis thal mos me tog gi phreng ba bzung ba sgo ru gnas pa dga' ba la brten pa khyod gang yin zhes dri bar bya'o/ /des ni skal ba dang ldan pa'i bde ba chen po bdag yin no zhes smra bar bya'o/ /de nas rdo rje sems dpa'i bum pa'i chus bsangs la/ /yi ge lngas 'jug cing 'di skad smra bar bya ste/ khyod de ring de bzhin gshegs pa'i rigs su zhugs pa de bas na khyod la bdag gis rdo rje ye shes bskyed par bgyi gang gis de bzhin gshegs pa thams cad kyi dngos grub thob par 'gyur na/ dngos grub gzhan dag smos kyang ci dgos/ dkyil 'khor chen po su zhig gis ma mthong ba'i mdun du smra bar mi bya ste/ gzhan du na dam tshig nyams par 'gyur ro/ /rdo rje sems dpa' khyod kyi deng / /snying ga ru ni yang dag bzhugs/ /gal te tshul 'di smra ba na/ /'gas nas skad cig gis 'byung 'gyur/ /sbyang ba dang ni sad pa ste/ /ye shes 'bar ba'i 'od kyis khyab/ /'khor lor gnas pa 'grub ster ba/ /dung chen la gnas bdud rtsi lnga/ /sa bon lnga'am gsum bkod pa'i/ /slob mar blud par bya ba ste/ /'di ni dmyal ba'i chu yin te/ /dam tshig 'das pa sreg par byed/ /dam tshig bsrungs na 'grub 'gyur bas/ /rdo rje bdud rtsi'i chu 'di spyod/ /oM badzrod ka ThaHThaH zhes bya bas byin no/ /di ring nas brtsams nas khyod kyi lag na rdo rje nga yin no/ /de bas na khyod kyis 'di gyis shig ces bya ba 'di dag gi smra ba gang yin pa de khyod kyis bya ba dang bdag khyod kyis smad par mi bya'o/ /gzhan du na dka' bar ma 'das pas dus byas nas dmyal bar ltung bar 'gyur ro/ /de nas slob ma la 'di skad smra ste/ /de bzhin gshegs pa thams cad bdag la byin gyis brlab par mdzod cig ces pa dang / rdo rje sems dpa' yang bdag la zhugs shig ces brjod du bcug nas/ de'i snying gar yi ge hUM las byung ba'i kha dog ser po rtse gsum pa'i rdo rjes mtshan pa/ /zur bzhi pa dbang chen gyi dkyil 'khor la gnas pa'i yi ge hUM las byung ba'i kha dog dkar po bum pas mtshan pa zlum po chu'i dkyil 'khor la gnas pa yi ge haM ste spyi bo la'o/ /yi ge yaM las byung ba kha dog sngon po ba dan gyis mtshan pa g.yo ba gzhu'i dbyibs can te rlung gi dkyil 'khor la gnas pa yi ge a ste lkog ma la'o/ /yi ge raM las bskyed pa me ltar 'bar ba gru gsum pa me'i dkyil 'khor la gnas pa yi ge dz+haiM 'od gsal ba rkang pa'i 'og tu bkod nas hUM ha AHdz+hai zhes bya bas bskul nas rdo rje dbab par bya'o/ /ji ltar bshad pa'i dbang chen la sogs pa'i dkyil 'khor la yi ge hUM las byung ba'i thugs rdo rje la sogs pa/ yi ge dz+haiM las byung ba me'i 'od zer gyis khyab par gyur par bsams la dbab par byas pa'i lce la yi ge a dmar po bsams la smros shig rdo rje zhes 'dri na dge ba dang mi dge ba thams cad smra bar 'gyur ro zhes bcom ldan 'das rdo rje 'chang gis gsungs so/ /'bab pa de nyid tiSh+Tha badzra dr-i D+ho me b+ha wa shA shwa to me b+ha hr-i da ya me a d+hi tiSh+Tha sarba sid+d+hi m+me pra yats+tsha hUM ha ha ha ha ho/ /zhes bya ba brjod nas brtan par byas la yi ge lnga pas phreng ba de dkyil 'khor la gtor zhing de nyid kyis blangs la de'i spyi bor byin nas snying ga'i zla ba la hUM bdag po dang mig la oM dang dpral ba la raM bsgoms nas yi ge lnga pas mig phye la man ngag ji lta ba bzhin du dkyil 'khor bstan zhing 'di skad smra bar bya ste/ kye'i rdo rje'i bu mig sman bzhin pas/ 'di ni da ni khyod kyis mthong / /sangs rgyas chos kyi rigs las byung / /sngags dang phyag rgyas byin gyis brlabs / /dngos grub kun gyis phun sum tshogs/ /dam tshig rnams kyi mchog tu 'gyur/ /rdo rje pad+ma rol mchog gis / /sngags rnams la ni brten par gyis/ /gru bzhi pa ni mi mnyam med/ /dran dang dbang po sgo bzhi pa/ /bsam gtan dag gis rta babs bzhi/ /snam bu rnams ni ting 'dzin bshad/ /'dod yon la gnas rdo rje mchog /gzugs kyi lha mo dang ldan pa/ /bsam pa thams cad yongs rdzogs pas/ /rnam pa sna tshogs rgyan kun ldan/ /sna tshogs rtse mor ba dan dang / /dril bu sgra sgrogs gdul bya'i phyir/ /me long ye shes byang chub kyi/ /yan lag me tog phreng ba can/ /dra ba dra phyed rin chen mchog /nyi ma zla ba gdan gyis khyab/ /mi 'gyur bde ba dngos grub kun/ /bde ba chen po zhes par bshad/ /de yi nang gi 'khor lo ni/ /dkyil 'khor rnam pa brgyad dang mtshungs/ /rnam par thar brgyad de yin pas/ /dngos grub thams cad rab tu ster / /theg pa chen po'i byang chub sems/ /chos kyi 'khor lo rab bskor bas/ /rdo rje ra bas yongs bskor ba/ /thams cad kyis kyang yongs su rdzogs/ /tshon dag rdzogs pa'i sangs rgyas lnga/ /sems can ye shes kyis mtshon phyir/ / dbang po yul dang rnam dag pa/ /rang gi mtshan nyid rab dbye bas/ /ye shes bdud rtsi lngar spyod gang / /rdo rje'i bum pa de nyid yin/ /tshogs rdzogs rgyu mthun snying rje yis/ /rlan pas gang ba'i bum pa yin/ /me tog spos dang mar me dang / /dri zhes bya ba'i dkyil 'khor la/ /byang chub yan lag yid tshim pa'i/ /chos sgron grags pa'i tshogs yin no/ /chos kyi bza' ba lha bshos te / /ngo tsha khrel yod na bza' yin/ /glu dang gar dang rol mo ni/ /bde ba chen po 'phel byed phyir/ /grong khyer thar pa grong yin pas/ /dkyil 'khor snying po len pas so/ /zhes bya ba 'dis rgyu dang 'bras bu'i rang bzhin gyi rten gyi dkyil 'khor bstan nas brten pa'i dkyil 'khor bstan par bya ste/ de la re zhig dad pa'i dbang po'i rnam par dag pas gshin rje mthar byed de/ sems can thams cad kyi rgyud la gnas pa 'chi bdag gi bdud zil gyis gnon pa'i rang bzhin yin no/ /de bzhin du dran pa dang ting nge 'dzin brtson 'grus kyi dbang po'i rnam par dag pas 'phags pa gzhan gyis mi thub pa dang rta mgrin dang 'phags pa bdud rtsi 'khyil pa zhes bya ba ste/ nyon mongs pa dang phung po dang lha'i bu'i bdud zil gyis gnon pa'i rang bzhin te sgo skyong rnams so/ /de bzhin du 'dod pa'i rgyal po dang dbyug sngon dang stobs po che dang mi g.yo ba dang gtsug tor 'khor los sgyur ba dang gnod mdzes kyi rgyal po zhe sdang gi rigs rnam par dag pa'i rang bzhin te/ mig gi rnam par shes pa la sogs pa rnam par dag pa'i ngo bo yin no/ /mig gi skye mched rnam par dag pa'i rang bzhin ni sa'i snying po'o/ /phyi'i gzugs rnam pa gsum rnam par dag pa'i rang bzhin ni gzugs rdo rje ma'o/ /byams pa dam pa rnam par dag pa'i rang bzhin ni byams pa'o/ /rna ba'i skye mched rnam par dag pa'i ngo bo ni phyag na rdo rje'o/ /sgra gsum rnam par dag pa dang rin chen 'byung ldan gyi rang bzhin ni sgra rdo rje ma'o/ /sna'i skye mched rnam par dag pa nam mkha'i snying po'o/ /dri gsum rnam par dag pa 'od dpag tu med pa'i rang bzhin ni dri rdo rje ma'o/ /lce'i skye mched rnam par dag pa ni 'jig rten dbang phyug go/ /ro gsum rnam par dag pa dang don yod grub pa'i rang bzhin ni ro rdo rje ma'o/ /shes rab rnam par dag pa'i rang bzhin ni 'phags pa 'jam dpal lo/ /lus rnam par dag pa ni sgrib pa rnam par sel ba'o/ /reg bya gsum rnam par dag pa dang mi bskyod pa'i rang bzhin ni reg bya rdo rje ma'o/ /yid rnam par dag pa ni kun du bzang po'o/ /phyi dang nang gi bdag nyid kyi sa'i khams rnam par dag pa'i rang bzhin ni sangs rgyas spyan ma'o/ /de bzhin du chu dang me dang rlung rnam par dag pa'i rang bzhin ni mA ma kI dang gos dkar mo dang sgrol ma rnams so/ /de bzhin du stong pa nyid kyi rgyu mthun pa me long lta bu la sogs pa ye shes kyi rang bzhin rnam par snang mdzad dang rin chen 'byung ldan dang 'od dpag tu med pa dang don yod grub pa rnams so/ /stong pa nyid la sogs pa rnam par thar pa'i sgo bzhi ni rgyu mthun pa ye shes lnga'i rang bzhin ni bcom ldan 'das te mi bskyod rdo rje'o/ /gang du 'jug pa tsam gyis ni/ /zil gyis gnon min phyir ldog min/ /bde ba chen po'i dngos grub phyir/ /mkhas pa de rnams 'byung bar 'gyur/ / zhes bshad par bya'o/ /de nas rdo rje slob dpon la/ /yon ni mang du phul nas ni/ /phyag 'tshal byas nas tshig bshad pas/ /dbang bskur thob phyir gsol 'debs bya'o/ /byang chub rdo rje sangs rgyas la/ /ji ltar mchod cing gsol ba bzhin/ /bdag la yang ni skyob don du/ /nam mkha'i rdo rje deng bdag stsol/ /'jug pa'i sgo yi kha bltas pa/ /pad+ma 'dab ma brgyad steng du/ /sna tshogs gdan la gzhag nas ni/ /rang gi lhag pa'i lhar sbyor bas/ /lus la dgod pa'i dkyil 'khor can/ /cho ga 'dis ni dbang bskur bya/ /gdugs dang rgyal mtshan ba dan dang / /bum pa rol mo na bza' mchog /lha yi rgyan dag thogs pa ste/ /sangs rgyas kun gyis nam mkha'i khams/ /sngar bshad bya ba'i dbang gis ni/ /khyad par chen po yang dag ldan/ / dbang gi dus su slob dpon gyis/ /yongs su gang ba rnam par bsgom/ /bum pa'i chu la de bsdus nas/ /bdud rtsi lnga sogs bzhus gyur pa/ /mgul ni dar gyis bcings pa ste/ /spyan sogs phyag gis gzung bya ba/ /bum pas ba spu'i bu ga nas/ /sangs rgyas thams cad 'jug par bya/ /tshigs bcad dang ni sngags brjod pas/ /slob ma dga' bas dbang bskur bya/ /dbang bskur ba ni rdo rje che/ /khams gsum pas ni phyag bya ba/ /sangs rgyas kun gyi gsang ba gsum/ /gnas las byung ba bdag gis stsol/ /ji ltar cod pan dag gis kyang / /dbang bskur byas te de nas blos/ /brtan par byas te rnal 'byor gyis/ /de ltar rim pas phyag mtshan sbyin/ /sangs rgyas rdo rje'i dbang bskur gyis/ /khyod ni di ring dbang bskur ro/ /'di ni sangs rgyas kun nyid de/ /dngos grub thob phyir rdo rje long / /oM badzrA d+hi ba ti s+t+waM a b+hi Shany+tsA mi tiSh+Tha badzra sa ma ya s+t+waM/ /sems dpa' thog mtha' med pa ni/ /rdo rje sems dpa' dga' ba che/ /kun du bzang po kun bdag nyid/ /rdo rje sgeg pa bdag po'i bdag /hUM las byung ba'i rdo rje'i dbang / /'di ni sangs rgyas thams cad kyi/ /shes rab sgra ni rjes 'gror bshad/ /rgyal bas bzhed pa'i byang chub mchog /khyed kyis rtag tu gzung bar gyis/ /yi ge a las skyes pa'i dril bu'o/ /srid pa ngo bo nyid kyis dag /ngo bo nyid kyis srid bral byas/ /rang bzhin dag pa'i sems dpa' mchog /srid pa'i mchog ni grub par byed/ /ces bya bas de nyid dkrol bar bya'o/ /srid pa'i bde ba shin tu chung / / sdug bsngal chen po dag bya'i phyir/ /shin du bde ba dam pa'i thabs/ /dam tshig 'di ni rtag tu skyed / /'dod pa'i longs spyod thams cad dag /ci 'dod pa ni bsten bzhin du/ /rang gi lha yi sbyor ba yis/ /bdag dang gzhan la mchod par gyis/ /ji srid 'khor ba'i gnas su ni/ / mkhas pas mchog ni gnas gyur pa/ /de srid 'gro don yal med pa/ /mya ngan 'das pas byed par nus/ /shes rab pha rol phyin pa'i thabs/ /bsod nams byin rlabs 'grub byed pa/ /dngos grub kun dbang 'grub pa yis/ /sems can gyi don brtan par byed/ /phyag rgya mngon par rtogs bshad de/ /yid kyi sku ni brtan phyir ro/ /gang gis sku kun brtan pa ste/ /de phyir phyag rgya mngon par brjod/ /ces bya ba ni dam tshig go/ /de ltar dam tshig gsum byin nas/ /oM badzrA d+hi pa ti s+t+waM a b+hi Shiny+tsa mi badzra mA mA b+hi She ka ta zhes bya bas kye dpal che ge mo rdo rje zhes bya bas dpal gyi sgra dang sbyar ba ni ming gi dbang bskur ro/ /'di de sangs rgyas thams cad kyi/ /rdo rje sems dpa'i phyag na gnas/ /phyag na rdo rje'i brtul zhugs brtan/ /khyod kyis kyang ni rtag tu zung / /oM sarba ta thA ga ta sid+d+hi badzra sa ma ya e Sha s+t+waM d+ha ra yA mi hi hi hi hi hi hUM zhes bya ba brjod pas slob ma bzung du bcug nas/ me tog la sogs pas mchod cing gzhag go/ /de ni bum pa'i dbang zhes bya bas bsdus pa'i phyi'i dkyil 'khor gyi dbang bskur ro/ /bum pa'i dbang ni dang po ste/ /gsang ba'i dbang bskur gnyis pa yin/ /shes rab ye shes gsum pa yin/ /zhes le'u bco brgyad pa nas gsungs pa'i phyir ro/ /de nas skye bos dben pa'i sa phyogs su sngags dang rgyud la legs par slob pa/ /bzhin bzang ba mig yangs pa de nyid/ rig pa la sbyor ba dam tshig bsrung ba la brtson pa/ bde ba thams cad kyi yo byad dang ldan pa rang gi rigs kyi bu mo rdo rje slob dpon la slob mas dbul bar bya'o/ / de nas g.yon phyogs na gnas pa'i de dang lhan cig tu gnas pa'i bla ma la/ /lcags kyu dang sgron ma'i bsnyen bkur dang dri dang phreng ba la sogs pa dang / /rgya che ba'i phyi'i yo byad dang / bla na med pa dang bcas pa la sogs pa'i mchod pas yang dag par mchod cing pus mo g.yas pa sa la btsugs te/ de nas thal mo sbyar nas/ slob dpon che la gsol ba gdab/ /khyod kyis zhabs kyi drin gyis ni/ /bla med bya ba bdag gis shes/ /da ni dbang bskur rin chen gyis/ /mgon po rjes su gzung bar mdzod/ /ji ltar bde chen mgon po yis/ /dpal ldan rdo rje chos can la/ /dag pa'i de nyid ces ston pa/ /mgon po bdag la 'ang de bzhin stsol/ /sdug bsngal kun gyi gnas gyur pa/ /gtso bo dmyal ba las 'don mdzod/ /sdug bsngal thams cad nges gcod phyir/ /mgon med la ni thugs rjes gzigs/ /khyod zhabs pad+ma spangs nas ni/ /gtso bo bdag la gzhan skyabs med/ /de phyir sangs rgyas mchog 'gro ba'i/ /dpa' bo thub chen bka' drin mdzod/ /gsol ba 'debs la mkhas pa yi/ /de ltar tshig mchog gsan nas ni/ /slob mar snying rje bskyed byas nas/ /bla ma dpal ldan yon tan mtsho/ /zhal ni rab tu dga' 'gyur bas/ /brtse ba dang bcas mgu ba yis/ /gsang ba'i las ni gsang ba mchog /dam tshig mchog de nyan du gzhug /khyod kyis srog chags gsad bya ste/ /ma byin par yang khyod kyis blang / /gzhan gyi bud med bsten pa dang / /tshig kyang brdzun du smra bar bya/ /thugs kyi sdom pa mchog 'di ni/ /bu bzang khyod kyis bsrung bar bya/ /bshang gci dang ni sha dang khrag /sems las byung ba lnga pa ste/ /khyi mi glang po ba lang rta'i/ /sha ni sbyang sogs cho ga yis/ /khyod kyis rtag tu bza' bya ba/ /'di ni dam tshig rmad byung che/ /de nas sngar bshad pa'i dkyil 'khor ram yang na bsgom pas yongs su brtags pa'i lha'i 'khor lo thams cad kyi nang na bzhugs pa'i rdo rje slob dpon rdo rje 'chang chen po'i nga rgyal dang ldan pas rang gi rig ma'i pad+ma'i khar bdud rtsi lnga'i ri lu bcug la/ man ngag ji lta ba bzhin du yang dag pa'i dbang bskur ba'i don du snyoms par zhugs par bya ste rang gi lhag pa'i lha phyung zhing des 'gro ba'i don byas la/ /de dgug cing rang gi lus la bcug ste de'i rnam par 'gyur nas slob ma yang de'i rang bzhin du phung po la sogs pa byin gyis brlab pa rang gi lha mo dang bcas par bsams te/ rang gi ba spu'i bu ga las byung ba'i 'od zer gyi lcags kyu'i tshogs kyis nam mkha'i dbyings ma lus par khyab par byed pa'i de bzhin gshegs pa rnams bsdus la/ rang gi sku gsung thugs la 'jug ste lam la gnas par 'gyur zhing / /rang gi snying ga nas de bzhin gshegs pa rnams phyung la/ mchog tu dga' ba'i tshe zhu bar gyur pa de dag la slob ma'i khar bcug par bya'o/ /e ma'o bde chen 'di brjod nas/ /slob mas sems byung spyod par bya/ /'di de sangs rgyas thams cad kyi/ /dbang bskur ba yi gnas kyi mchog /las kyi rab 'byams mchog dang ni/ /rdo rje kun yang 'grub par 'gyur/ /de ni gsang ba'i dbang bskur ba'o/ /sems byung me tog dang bcas pa/ /pad+ma la gnas blangs nas ni/ /rang gi zhal gyis mchod pa'i phyir/ /rig ma'i kha ru gzhug par bya/ /bshang gci sha dang yang dag ldan/ /mi yi dung phor la gzhag go/ /shin du dad ldan shes rab che/ /gzugs bzang sgrub pa po la dga'/ /rnal 'byor gcig la goms byas pas/ /dam tshig la mkhas rnal 'byor ma/ /sgrub pa pos ni bla ma la/ /sngar ni yon du phul ba gang / /bla mas de nyid byin brlabs nas/ /slob ma de la sbyin par bya/ /me tog la sogs dam tshig ldan/ /sangs rgyas sogs kyis byin brlabs pa/ /de dang lhan cig snyoms zhugs pa/ /bla ma dang bcas la sogs pas/ /phyi yi nye bar spyod pa yis/ /rdor can gnyis pa bzhin du mchod/ /bkra shis pa yi tshigs bcad dang / /rol mo dang ni sna tshogs dbyangs/ /rnga yab rgyal mtshan gdugs sogs dang / /me tog phreng ba sogs kyis mchod/ /shes rab ye shes dbang bskur gyi/ /mnyam par brtan par gzhag nas ni/ /sngar ni thal mo dang sbyar ba/ /cho ga 'dis ni dbang bskur bya/ /de la rdo rje slob dpon spyan ma dang bcas pa'i gti mug rdo rje'i rnal 'byor dang ldan pas slob ma la ji ltar bshad pa byed du bcug la/ /rnam par snang mdzad dang snyoms par zhugs pa'i sangs rgyas spyan ma'i sprin kha dog dkar po'i byang chub kyi sems kyis yongs su gang ba'i chu shel gyi bum pa lag na thogs pa snoms par zhugs pa las spros te/ de rnams kyis dbang bskur la de rnams kyis snyoms par zhugs pa las byung ba'i kha dog dkar po byang chub kyi sems kyi rgyun gyis dbang bskur byas la/ sku rdo rje dang spyan ma'i tshogs de dag thams cad bde ba chen po'i dbang gis gzhan dbang du gyur pa/ mar gyi bum pa bzhin du bzhus pa ye shes kyi bdud rtsi'i rnam pa slob ma'i lus la rjes su bcug nas/ de yang lha'i sku bde ba chen po'i rang bzhin du bsam par bya'o/ /don ni 'di ltar bshad pa yin te/ rmongs pa la ni gti mug bdag /gti mug dga' ma'i rnal 'byor ldan/ /gti mug rgyun gyis dbang bskur bas/ /gti mug rdo rje rang nyid 'gyur/ /zhe sdang can la zhe sdang bdag /zhe sdang dga' ma'i rnal 'byor ldan/ /zhe sdang rgyun gyis dbang bskur bas/ /zhe sdang rdo rje rang nyid 'gyur/ /chags pa can la chags bdag nyid/ /chags pa'i dga' ma'i rnal 'byor ldan/ /'dod chags rgyun gyis dbang bskur bas/ /'dod chags rdo rje rang nyid 'gyur/ /shes rab ye shes bdag nyid can/ /rdo rje dga' ma'i rnal 'byor ldan/ /ye shes rgyun gyis dbang bskur bas/ /shes rab ye shes rang nyid 'gyur/ /zhes bya bas rang rang gi de bzhin gshegs pa dang rjes su mthun pa'i byang chub kyi sems kyi rgyun rnams shes par bya'o/ /de ni shes rab ye shes kyi dbang bskur ro/ /de nas de ltar gnas pa'i slob ma'i lag du rig ma'i lag pa bla mas byin nas de bzhin gshegs pa rnams dbang por bya'o/ /'di nas brtsams te bdag gis ni/ /'di la rig pa yang dag sbyin/ /byang chub chen po bsgrub pa'i phyir/ /de bzhin gshegs pas snang bar mdzad/ /de nas slob ma la smra bar bya ste/ /'di ni gzugs ma dga' ma ste/ khyod kyis rtag tu bsten par bya/ /bar du gnas pa'i bla ma yis/ /slob ma'i spyi bor phyag bzhag nas/ /sangs rgyas nyid la thabs gzhan med/ /de phyir rig ma 'di nyid mchog / chos rnams thams cad gnyis med pa/ /gnyis su snang ba rtog pa yin / /de phyir rtag tu khyod kyis ni/ /'khor ba spang bar bya ba min/ /'di ni sangs rgyas thams cad kyi/ /rig pa'i brtul zhugs bla na med/ /rmongs pa gang gis 'das pa ni / /de yi dngos grub thob mi 'gyur/ /de nas brtsams te des de la/ /gsang ba mchog ni bstan par bya/ /rgyud kun las ni gang zhig ni/ /brda yis rgyas btab sbas par bshad/ /yang ji lta ba bzhin du sangs rgyas la sogs pa'i rnal 'byor dang ldan pas/ sems can kun la phan pa'i phyir/ /'jig rten thams cad kun nas ni/ /ji ltar gdul bya sna tshogs pa/ /chos kyi 'khor lo bskor bar gyis/ /de bzhin du rdo rje dang rin po che dang pad+ma dang / 'khor lo bskor bar gyis zhes bya ba la sogs pa'i tshigs su bcad pa lngas rjes su gnang ba byin nas langs te/ de bzhin gshegs pa thams cad kyi rnal 'byor gyis snying gar lag pa g.yon pa'i khu tshur gyis chos gos kyi dkyil bzung ba'i tshul dang / g.yas pa'i mchog sbyin gyis phyag rgya rdo rje ming gi dbang bskur gyis lung bstan par bya ste/ rdo rje sems dpa' de bzhin gshegs/ /bdag gis khyod la lung bstan te/ /srid pa'i ngan 'gro las bton nas/ /shin du srid pa grub phyir ro/ /he badzra nA ma ta thA ga ta sid+d+h+ya sa ma ya s+t+waM b+hur b+hu wa swaH / langs nas lung bstan pa 'dis mchog tu gsang ba'i cho gas lung bstan par bya ba de la rdo rje 'chang chen po dang bcas pa de bzhin gshegs pa thams cad dang byang chub sems dpa' dang / dkyil 'khor pa rnams kyis de bzhin gshegs pa thams cad kyi rang gi dam tshig gi slob dpon nyid du bya ba'i phyir ngag gcig gis bla na med pa yang dag par rdzogs pa'i byang chub tu lung bstan par 'gyur ro/ /gzhan yang lung bstan pa'i phyag rgya chen po de'i gsang ba dam pa mchog gi dngos grub kyis byin gyis brlab pa dang sngags de nyid kyi stobs kyis dad par bya'o zhes slob ma la smras nas gsang ba bstan par bya ste/ chags bral dang mtshungs sdig pa ni/ /khams gsum las ni gzhan med de/ /de phyir 'dod pa'i chags bral nyid/ /blo can khyod kyis mi bya'o/ /oM ma hA sa ma yA ha na phaT/ /de nas slob ma'i g.yas pa'i mthe bong nas/ /lag pa g.yon pas gzung byas te/ /slob ma gtso bo la brten cing / /mar gyi dgang blugs brgya brgyad bsregs/ /sbrang rtsi mar dang zho bsres pa'i/ /dgang blugs brgya dang rtsa brgyad bsregs / /kun gyi snying rigs rig pa yis/ /bsangs te snying gar reg par bya/ /bdud rtsi 'khyil ba'i bzlas bya ba/ /de yi dpung la srung skud gdags/ /spyi bor gdugs ni sbyin byas nas/ /thal mo dang bcas sgor 'jug nas/ /gdugs dang bcas pa'i slob ma ni/ /dkyil 'khor sgo ru 'dud du gzhug / slob ma 'di ni bdag gis dbul / /rgyud rnams 'dzin par 'gyur ba yin/ /slob dpon gyis ni gdugs blangs pas/ /de la tshig snyan bstan par bya/ /da ni dkyil 'khor slob dpon te/ /sngags dang rgyud 'chang khyod yin te/ /sangs rgyas byang chub sems dpa' dang / /lha mo rnams kyis yang dag bshad/ /sems can rnams la brtse ba'i phyir/ /khyod kyis dkyil 'khor cho ga yis / /'bad de bri bar bya ba dang / /rgyud la slob ma sbyang bar gyis/ /de nas man ngag ji lta ba bzhin du byin nas drang ba'i don la sogs pa dang dgongs pa'i gnas kyang bstan par bya'o/ /de nas ji ltar 'jug pa la de bzhin gshegs pa thams cad kyis dbugs dbyung ba sbyin par bya ste/ gsang ba mchog gi dkyil 'khor 'di/ /dam pa mthong dang 'jug byas nas/ /sdig pa thams cad las grol ba'i/ /khyed rnams ding nas bde bar gnas/ /khyod la slar yang 'chi ba med/ /bde ba chen po theg chen la / /zil gyis mi gnon gsod byed pa/ /gang las 'jigs med rol bar gyis/ /srid pa'i sdug bsngal khyed la med/ /shin du srid pa grub phyir ro/ /dam tshig sdom pa grub pa 'di/ /khyod kyis rtag tu bsrung bar gyis/ /bka' lung dam pa rtag pa 'di / /sangs rgyas kun gyis mnyam par gsungs/ /rdo rje zhes bya phyag rgya 'dis/ /byang chub sems 'dor mi bya ste/ /gang zhig bskyed pa tsam gyis ni/ /sangs rgyas nyid de gdon mi za/ /dam pa'i chos ni 'dor mi bya/ / rdor bcas sangs rgyas thams cad kyis/ /khyod rnams de ring dbang bskur ro/ /khams gsum pa ni rgyal srid che/ /rgyal po'i bdag po rnams su gnas/ /de ring bdud rnams rnam bcom nas/ /grong khyer dam pa la ni zhugs/ /de ring khyod kyis sangs rgyas nyid/ /thob par byas te the tshom med/ / nam yang smod par mi bya'o/ /mi shes pa'am rmongs pa la/ /tshul chen bstan par mi bya'o/ /rang gi bdag nyid yongs spangs nas/ /dka' thub gyis ni gzir mi bya/ /'di ni ma 'ongs sangs rgyas pas/ /ci bde bas ni bde bar gzung / /rdo rje dril bu phyag rgya rnams/ /nam yang 'dor bar mi bya ste/ /slob dpon smod par mi bya zhing / /de ni sangs rgyas kun dang mnyam/ /bla ma sangs rgyas kun dang mtshungs/ /gang gis smod par gyur pa na/ /sangs rgyas thams cad smad pas na/ /des ni rtag tu sdug bsngal thob/ /rims dang sbyar dug dug dang nad/ /mkha' 'gro 'tshe ba gdon rnams dang / /bgegs dang log 'dren 'jigs pa yis/ /bsad nas dmyal bar 'gro ba yin/ /de phyir 'bad pa thams cad kyis/ /rdo rje slob dpon bla ma che/ /dge ba dam pa rab sbas pa'i/ /nam yang smad par mi bya'o/ /bza' bca' yon dang bcas par ni/ bla ma la ni mthun par dbul/ /de nas rims sogs gdung ba rnams/ /slar yang 'byung bar mi 'gyur ro/ /rang gi dam tshig slob dpon ni/ /rang srog gis kyang bsten par bya/ /bud med la sogs dbul byas te/ /'byor pa gzhan dag smos ci dgos/ /grangs med bskal pa bye ba yi/ /gang phyir rtag tu rnyed dka' ba/ /rtsol ba ldan la sangs rgyas nyid/ /tshe 'di nyid du ster bar byed/ /der sbyin sangs rgyas thams cad la/ /rtag tu dbul bar gyur pa yin/ /de phul bas ni bsod nams tshogs/ /tshogs las dngos grub dam pa yin/ /rtag tu dam tshig bsgrub bya ba/ /rtag tu de bzhin gshegs pa mchod/ /bla ma la yang rtag tu dbul/ /de ni sangs rgyas kun dang mtshungs/ /ding sang khyod skye 'bras bur bcas/ /gang phyir 'di la 'bras bur gnas/ /dam tshig lha dang mnyam pa ni/ /khyod rnams gyur te the tshom med/ /rdor bcas sangs rgyas thams cad kyis/ /khyod rnams di ring dbang bskur ro/ /khams gsum pa yi rgyal srid che/ /rgyal po'i bdag po rnams su gnas/ /de ring bdud rnams rnam bcom nas/ /grong khyer dam pa la ni zhugs/ /di ring khyod kyis sangs rgyas nyid/ /thob par byas te the tshom med/ /de ltar yid ni dang ba'i rdo rjer gyis/ /rang gi dam tshig mi zad bde ba bsten / /bde ba 'gro la de ring rdo rje sems dpa' ni/ /'dra bar rtag tu khyod rnams 'gyur ba yin/ /dad dang ldan pa'i slob ma yis/ /bla ma'i zhabs la phyag 'tshal nas/ /ji ltar gtso bos bka' stsal pa/ /thams cad bgyi zhes smra bar bya/ /de ltar dam bca' rnams byas pa'i/ /slob ma'i cho ga 'di nyid kyis / /zhi ba'i don du sbyin sreg bya / /'chad par 'gyur ba'i rim pas so/ /de nas slob ma re re yi/ /mthe bo g.yas pa mkhas pa yis/ /lag pa g.yon pas gzung byas nas/ /dgang blugs bdun pos sbyin sreg bya/ /g.yas skor ba yi rim pa yis/ /spyi bor blugs gzar bskor byas nas/ /sbyin sreg byas te slob kun las / /bla mas yon ni blang bar bya/ /gser dang dngul dang rin chen dang / /rta dang glang po sa gzhi dang / /de rnams kyis phul blangs nas ni/ /cho ga bzhin du sngags sbyin bya/ /sngags kyi rgyal po'i ting 'dzin te/ /ji bzhin nye bar bstan byas nas/ /ji ltar gsungs pa'i phyag rgya yi/ /gsang ba'i sbyor ba byed bcug nas/ /de las byung ba kun blangs nas/ /byang chub sems ni spyod du gzhug /de nyid la ni yi dam gyi/ /sgrub thabs de tshe bshad par bya/ /de nas sngar bshad pa'i mchod pa rnam pa lnga dang 'dod pa'i yon tan lnga dang bla ma dang bcas pa la sogs pa'i mchod pa rnams kyis dkyil 'khor mchod cing slob ma rnams la 'di skad smra bar bya ste/ khyed rnams kyis ci nus pa de bzhin gshegs pa thams cad la mchod pa gyis shig /de nas ji ltar gnas pa thams cad la bza' ba la sogs pa dang ba lang dang rta dang glang po dang khyi dang mi'i sgron ma dang bdud rtsi dang / nyes pa dang bcas pa dang nyes pa med pa'i btung ba'i khyad par gyis dkyil 'khor la phul bas tshim par bya'o/ /de nas/ 'di ni sangs rgyas thams cad nyid/ /ces bya ba la sogs pas yang rdo rje brtul zhugs byin la/ /de dang lhan cig tu mtshan mo gnyid ma log pas dga' ba dam pa'i cho ga dang dpal bde ba chen po'i sgom pa dang / gar dang glu la sogs pas gnas shing bzlas par bya'o/ /yang su la yang smra bar mi bya ste/ /zhes bya ba thams cad mna' bskyal zhing 'jug pa thams cad la yang 'jug cing mgon po rnams la mchod cing bstod la/ phyogs skyong la gtor ma byin nas nye reg byas te phyag btsal nas/ ar+g+ha dbul zhing dge ba'i rtsa ba yongs su bsngos te/ dkyil 'khor la lan gsum bskor nas/ badzra d+h+r-ika a zhes brjod la yi ge gsum muH'i yi ge'i mtha' c an gyis nam mkha' dang mnyam pa nyid kyis rang gi lus ngag yid la dkyil 'khor gyi 'khor lo zhugs nas a kA ro mu khaM sarba d+harmA NAM Ad+ya nut+pan+na twAta zhes bya ba brjod nas dkyil 'khor gyi 'khor lo phyung zhing snga ma bzhin du gsang ba'i ye shes kyi dkyil 'khor gshegs su gsol nas r dul tshon la sogs chu bo chen po la gtor zhing sngags de nyid brjod pas dkyil 'khor gyi phur bu rnams bton nas bdud rtsi dang bcas pa'i 'o mas bkrus la rang dang slob ma dang rgyal po rnams la bsrung ba dang zhi ba'i don du dus gsum mnyam pa nyid kyi sgom pas ji ltar bde bas gnas par bya'o/ /de ni thugs kyi dkyil 'khor gyi cho ga ste cho ga'i sgra bstan to/ /cho ga mthong ba ste zhes pa ni dkyil 'khor gyi cho ga de nyid la mthong ba'o/ /las de zhes pa ni dkyil 'khor gyi cho ga las gsungs pa'i bya ba'i khyad par gyis so/ /gzhir gyur pa'i dkyil 'khor zhes pa la 'dri ba'i dkyil 'khor ji lta ba bzhin du rdul tshon gyi 'bar ba rdzogs par byas nas so/ /de nas zhes pa ni rdul tshon gyis dkyil 'khor bris pa'i 'og tu'o/ /slob dpon rdo rje slob dpon gyis so/ /rdo rje la sogs pa'i phyag rgya rnams dgod par bya'o zhes pa ni sngar bshad pa'i sngon po'i rdo rje la sogs pa mtshan ma sum cu rtsa gnyis so zhes bya ba'i tha tshig go/ /chos kyi phyag rgya zhes bya ba la sogs pas mdor bstan pa ste sku gsung thugs kyi rnam par dag pa la sogs pas de nyid gsum gyis rgyas btab pa'o/ /yi ge hUM la sogs pa chos kyi phyag rgya'o zhes pa ni/ yi ge hUM la sogs pa yig 'bru de bzhin gshegs pa'i sa bon yin pa'i phyir dang rgyu dang 'bras bu dbyer mi phyed pa'i phyir ro/ /de bas na de bzhin gshegs pa'i brda bstan pa'i dus su yig 'bru la sogs pa phan tshun ming dang ming can gyi tha snyad yin no/ /chos kyi phyag rgya'o zhes pa ni/ de bzhin gshegs pa'i brda'i mtshan nyid kyi chos ni yi ge rnams kyis brjod par bya ba'i phyir ro/ /de bzhin gshegs pa'i de kho na nyid rgyas btab pa gang gis de ni phyag rgya'o/ /chos la rgyas btab pas na chos kyi phyag rgya ste de'i skyes bu'i bsdu ba'o/ /rdo rje la sogs pa mtshan ma'i phyag rgya'o zhes pa ni/ /thugs rdo rje la sogs pa lha sum cu rtsa gnyis kyis brten pa'i dkyil 'khor de rnams phyag mtshan yin pa'i phyir ro/ /de'i rnam par dag pa'i le'u sum cu pa nas bstan to/ /mtshan ma yang yin la phyag rgya yang yin pas na mtshan ma'i phyag rgya ste las 'dzin pa'i bsdu ba'o/ /mi bskyod pa la sogs pa lha'i 'khor lo ni zhes pa la zhal gsum pa la sogs pa'i rnam pas thugs rdo rje la sogs pa'i dkyil 'khor sngon du 'dri ba'o/ /phyag rgya chen po'i zhes pa ni zhal gsum la sogs pa'i bdag nyid kyi phyag rgya yang yin la/ chos kyi dbyings la sogs pa'i ye shes kyi rang bzhin yin pas chen po yang yin te/ phyag rgya chen po ni bcom ldan 'das mi bskyod pa la sogs pa'i 'dri bar bya ba'i sku zhes bya ba'i don to/ /de la phyag rgya chen po ni sems kyi rang bzhin yin te sems nyid de'i rnam par snang ba'i phyir ro/ /chos kyi phyag rgya ni ngag gi rang bzhin te yig 'bru rnams ngag yin pas so/ /mtshan ma'i phyag rgya ni lus kyi rang bzhin te de rnams su lus kyis 'dzin pa'i phyir ro/ /sems can gyi rgyud thams cad la ltos nas zhes pa ni gti mug dang 'dod chags dang zhe sdang gi rigs can gyi sems can gyi rgyud thams cad ces bya ba la sogs pa ste/ bsam pa dang bag la nyal ba dang rigs dang bag chags la sogs pa'o/ /ltos nas zhes pa ni de rnams la brten pas so/ /rnam pa gsum po 'di dag gis/ /zhes pa ni blo la gnas pa dbye ba gsum gyi chos la sogs pa zhes bya ba'i phyag rgya rnams so/ /dgod pa yang bya'o zhes pa ni de dag thams cad bri bar bya'o zhes bya ba'i tha tshig go/ /'di skad bshad pa yin te gal te gti mug gi rigs can gyi rnal 'byor pa yin na de'i tshe/ phyag rgya chen pos mtshan ma'i dkyil 'khor bri bar bya'o/ /de bzhin 'dod chags dang zhe sdang gi rigs can dag la ltos nas chos dang mtshan ma'i phyag rgya dag dgod par bya'o/ /de dag la nye bar mtshon pa'i don tsam du zhes pa ni chos dang phyag rgya chen po dag mtshon par bya ste/ tha mi dad pa'i phyir ro zhes sngar bshad zin to/ /mtshan ma'i phyag rgya zhes pa ni zhe sdang gi rigs can gyi phal che ba la brten pas so/ /zhe sdang gi de kho na nyid yin pa'i phyir zhes pa ni nyon mongs pa zhe sdang dang de'i 'brel pa dang ldan pa'i nye ba'i nyon mongs pa rnams kyang thugs rdo rje 'chang gis sbyang bar mdzad pa'i phyir ro/ /rnam shes zhe sdang bshad pa ste/ /spong dang rig pa gnyis sbyor bas/ /zhes 'byung ngo / /rdo rje ni 'jigs pa rnams kyang 'jigs par byed pa'o zhes pa ni 'khor ba las 'jigs par 'gyur ba'i 'jigs pa ni nyon mongs pa dang shes bya'i sgrib pa gnyis so/ /de yang 'jigs par byed pa ni mthong ba dang bsgom pa'i lam gyi rim pas 'joms par byed pa ste/ chos kyi dbyings kyi ye shes so/ /de nyid dbyer med pas na rdo rje ste/ /rdo rje'i gzugs su phyi rol tu snang ba'i phyir ro/ /ji skad du/ spang bya lnga dang rig pa lnga/ /rdo rje zhes bya mngon par bshad/ /brtan pa snying po khong stong med/ /gcod med dbyer med mtshan nyid can/ /bsreg pa med cing 'jig med pa/ /stong pa nyid ni rdo rjer bshad / ces 'byung ngo / /rdo rje ni de bzhin gshegs pa rnams so zhes pa ni me long lta bu la sogs pa mi phyed pa'i ye shes lnga'i rang bzhin yin pa'i phyir ro/ /'od zer lnga ste zhes pa ni zhi ba la sogs pa'i las kyi rab 'byams lnga'i rang bzhin nyid do/ /des 'khor lo rnam par brgyan pa'o zhes pa ni 'od zer lnga dang ldan pa'i rnam par snang mdzad kyi phyag mtshan zhes bya ba'i don to/ /des ni 'khor lo kha dog dkar po yin na yang de bzhin gshegs pa lnga'i de kho na nyid kyi rang bzhin bstan pa yin te/ gang gi phyir me long lta bu'i ye shes ni mnyam pa nyid la sogs pa'i ye shes kyi chas khyab pa'i phyir ro/ /de bzhin du gzhan rnams kyang shes par bya'o/ /rin po che la 'od zer gyi tshogs kyi rgyal po'o zhes pa ni de bzhin du rin po che yang 'od zer lngas khyab pa zhes bya ba'i tha tshig go/ /kha dog sna lnga pa'o zhes pa ni ral gri'i rang bzhin gyi 'od lnga yin te/ las thams cad pa yin pa'i phyir ro/ /gang gi phyir bya ba nan tan grub pa'i ye shes kyis ni zhi ba la sogs pa'i phrin las thams cad 'grub par 'gyur bas so/ /ral gri la 'od de'i tshogs kyis khyab pa'o zhes pa ni bya ba nan tan sgrub pas bsam pa sna tshogs pa'i gdul bya yin pas tshogs yin pa'i phyir ro/ /shar gyi mtshams la zhes pa ni me'i mtshams la'o/ /sprin gyi mdog 'dra ba ste zhes pa ni mig gi dbus gnag pa ste mig 'bras sngon po yin pas so/ /mtha' dkar ba'i 'od dang ldan pa gang yin pa de ni zhes pa la mig gi mtha' ma'i cha gnyis dkar po yin pas so/ /sprin gyi mdog dang 'dra ba zhes bya ba la sogs pas las 'dzin pa'i bsdu ba byas nas kha dog dkar po dang / nag po mig la bstan pa yin te me long lta bu'i ye shes kyi dngos po thams cad kyi ngo bo nyid de kho na nyid mthong ba'i phyir ro/ /rdo rje'i rigs la ltos pa ste/ /zhes pa ni rdo rje'i phyag mtshan no/ /gang gi rin chen gyi rigs la ltos par gyur pa zhes pa ni nga rgyal kun de nas 'chad par 'dod na mA ma kI ni rin chen gyi rigs can du 'gyur ro/ /de'i tshe na rin po che yang mA ma kI ni phyag mtshan du gyur te zhes pa ni rin po che yang phyag mtshan yin no zhes bya ba'i don to/ /rdo rje ni ma yin no zhes pa ni rdo rje tsam 'ba' zhig bkag pa zhes dgongs pa'o/ /'o na de bzhin gshegs pa lnga'i rim pa ji lta ba bzhin du reg bya rdo rje ma dang / spyan ma dang / mA ma kI dang / gos dkar mo dang sgrol ma ste btsun mo mchog go/ /de la mA ma kI ni rin chen 'byung ldan gyi rigs yin pas gnyis ka'i rigs can ci'i phyir zhe na/ smras pa/ 'dir khams bzhi'i rang bzhin ni yum bzhi ste/ stong pa nyid bzhi'i rang bzhin nyid du rab tu grags so/ /de bzhin gshegs pa lnga yang phung po lnga rnam par dag pa'i rang bzhin no zhes thabs lnga la shes rab bzhi ji ltar rigs/ /de bas na zhe sdang dang nga rgyal dag dbyer med par byas nas thugs rdo rje dang yid bzhin nor bu'i rigs dag la mA ma kI gcig pu sbyar na rigs gnyis par 'gyur/ 'o na dbus kyi gtso bo'i reg bya rdo rje ma nyid 'khyud par gnas na de la mA ma kIs dgos pa ci bya zhe na/ smras pa/ reg bya rdo rje ma'i rnam grangs can mA ma kI kho na yin te skyon med do/ /de nyid kyi phyir de mA ma kI chen mo yin no zhes ming du grags so/ /de bas na gnyis ka'i rigs can mA ma kI yin no zhes bstan pa ni rigs so/ /pad+ma kha phye zhing bya ba la sogs pas 'od dpag tu med pa'i rigs can gyi phyag mtshan bstan te so sor rtog pa'i ye shes kyi dngos po thams cad rab tu 'byed pas rgyas pa'i phyir ro/ /sprin sngon po ltar zhes pa ni kha dog ljang gu ut+pal srid pa'i 'jigs pa las grol bar byed pa dam tshig gi rigs kyi phyag mtshan te/ bya ba nan tan grub pa'i ye shes kyis sems can thams cad kyi rgyud lhag par gnas par byed pa'i phyir ro/ /des ni nang gi rim pa phyag rgya dgod pa bstan pa yin no/ /phyi'i rim pa'i sgo rnams la mtshan ma'i phyag rgya dgod pa'i phyir tho ba zhes smos te gshin rje mthar byed kyi phyag mtshan te/ nyon mongs pa'i sgrib pa rlag par byed pa'i phyir ro/ /sngon po la sogs pa zhes bya bas rigs lnga'i rang bzhin gyi 'phags pa gzhan gyis mi thub pa'i phyag mtshan bstan to/ /dbyug pa ni shes bya'i sgrib pa gdul bar byed pa'i rang bzhin yin pa'i phyir ro/ /pad+ma zhes pa ni las kyi sgrib pa rnam par sbyong ba'i rang bzhin yin pa'i phyir ro/ /ral gri ltar rno ba'i 'od 'phro ba gang yin pa zhes pa ni pad+ma mthar byed kyi phyag mtshan gyi khyad par ro/ /rdo rje ni sna tshogs rdo rje'o zhes pa la rig byed bzhin du mdo rnams kyang yin no zhes bya bas snga ma'i tshig mi mngon pa zhes bya ba'i dgongs pas so/ /bdud rtsi 'khyil pa zhes pa ni de'i phyag mtshan te las thams cad pa yin pa'i phyir dang / rnam par smin pa'i sgrib pa sbyong bar byed pa bya ba nan tan grub pa'i ye shes kyi bdag nyid de kun du zhal yin pa'i phyir ro/ /thugs kyi dkyil 'khor zhes bya ba la sogs pas nye bar bsdus pa yin te/ mtshan ma'i phyag rgya'i dkyil 'khor bri ba'i cho ga rdzogs pa'i phyir ro/ /'dir rgya cher zhes pa ni byang chub sems dpa' dang / mchod pa'i lha mo dang / khro bo drug po'i mtshan ma'i phyag rgya dgod pa'i spros pa dang / dkyil 'khor la thig gdab pa la sogs pa'o/ /dkyil 'khor gyi cho ga las ni rang gis byas pa'am dpal klu sgrub kyi zhal snga nas kyis mdzad pa las so/ /blta bar bya ba ni dpyad par bya ba ste de yang sngar bshad zin to/ /mchod pa rnam pa gsum ni dkyil 'khor rdzogs pa dang bum pa dang dkyil 'khor dang lha dang slob ma lhag par gnas pa rdzogs nas slob ma 'jug pa dang / /de la byin gyis brlab pa dang / dbang bskur ba la sogs pa rdzogs pa'i 'og tu slob dpon gyis dkyil 'khor pa rnams mnyes par bya ba'i phyir lus kyi mchod pa phyag la sogs pa dang / ngag gi mchod pa bstod pa la sogs pa dang / yid kyi ni de'i rtse gcig pa nyid kyis yid la byed pa'i mtshan nyid kyi mchod pa bya ste de ni phyi'i mchod pa'o/ /nang gi mchod pa bstan par bya ba'i phyir zhes bya bas nang gi mchod pa bstan te/ rang gi rigs kyi bu mo ni ut+pal sngon po'i 'dab ma dang 'dra ba'i sme sha can gyi bu mo'o/ /gzugs sdug pa la sogs pa'i yon tan dang ldan pa'o zhes pa ni rang bzhin skyes pa'i mdzes pa nyid dang sman dang nu ma chen po dang / rked pa phra ba dang mig yangs pa dang ma mchu dmar ba la sogs pa'i yon tan gyi tshogs dang ldan pa zhes bya ba'i tha tshig go/ /lo grangs bcu drug lon pa zhes pa ni gal te gzugs kyi dkyil 'khor du lo bcu gnyis lon pa gsungs pa de bzhin du yang gsung gi dkyil 'khor la mthun pa'i phyag rgya gzung ba bstan te/ gsung dang sku'i dkyil 'khor dag la thugs kyi dkyil 'khor las gsungs pa'i phyag rgya gzung ba bzhin no/ /dri dang me tog ces bya ba la sogs pas phyi'i yo byad kyis mdzes pa nyid dang ldan par bstan to/ /phyag rgya'i mdzes pa ni rnam pa gnyis te/ /rang bzhin pa dang byas pa'o/ /de la rang bzhin pa ni lus mdzes pa la sogs pa'i mtshan nyid do/ /byas pa ni rgyan la sogs pa'i mtshan ma'o / /snga ma ni rtag pa ste rgyan med pas kyang mdzes pa'i phyir ro/ /phyi ma ni mi rtag pa ste snga ma med pas yid mi mgu ba'i phyir ro/ /'dir gnyis ka yang gzung bar bya'o/ /dkyil 'khor de'i dbus su zhes pa ni dkyil 'khor gyi sa gzhi'i phyogs gcig dbus su dmigs nas de dang lhan cig snyoms par zhugs par bya'o/ /gzhan du dkyil 'khor la gnod par 'gyur te de'i dbus la lhag par mos pa'i yid la byed pas de'i phyogs gcig tu rol par bya ba zhes bya ba'i tha tshig go/ /sngar bshad par zhes bya ba ni thugs kyi dkyil 'khor la mthun pa'i phyag rgya'o/ /mkhas pa zhes pa ni 'o dang 'khyud pa la sogs pa'i rnam pa sna tshogs pa'i las kyi bya ba la mkhas pa'o/ /de la shing la 'dzeg pa dang / yal gas 'khril ba dang / til 'bras dang chu dang 'o ma 'dres pa zhes bya ba la sogs pa 'khyud pa rnam pa brgyad dang stod smad kyi mchu la sogs pa rnam pa brgyad kyi tsum+ba na dang ri bong mchong ba dang nor bu'i phreng ba la sogs mtshan nyid kyi sen mo 'debs pa dang stag rjes la sog pa'i mtshan nyid kyi rnam pa brgyad kyi sos 'debs pa dang rnam pa brgyad kyi nye bar phul ba dang rang bzhin dang dus dang yul gyi mthun pa nyid dang / drug cu rtsa bzhi dbye ba'i rked pa'i las dang / bde ba'i sgra dang phyin ci log pa'i dga' ba la sogs pa'i dbye ba shes pa gang yin pa de ni sngags pa mkhas pa zhes bshad do/ /de yang dpal rdo rje gdan bzhi'i rgyud las 'brang bar bya'o/ /sngags pa'o zhes pa 'di sngags dang rgyud dang sbyor ba la sogs pa la mkhas pa'o/ /gang yon tan nyid kyis ske rags su byas pa zhes pa la ji ltar gser la sogs pa sna tshogs pa'i rin po ches byas pa'i ske rags kyis bud med kyi rked pa'i phyogs mdzes par byed pa/ de bzhin du yon tan gyi rang bzhin gyi ske rags kyis brgyan pa'i phyag rgyas thabs kyi sems 'phrog par byed do zhes bya ba ni dgongs pa'o/ /de mA ma kI dang 'dra bar byin gyis brlabs te zhes pa ni bskyed pa'i rim pas tha mal pa'i rang bzhin spangs nas reg bya rdo rje ma'i ming gi rnam grangs can mA ma kI'i rang bzhin du sprul pa zhes bya ba'i tha tshig go/ /rang bzhin gyi tha mal pa'i dngos po bsal te zhes pa ni de nyid kyi don to/ /rigs lngas zhes bya ba la sogs pas rigs lnga'i bskyed pa'i rgyur gyur pa oM la sogs pa'i sa bon de rigs lnga'o/ /khyab pa ni mgo bo la sogs pa gnas lnga la de dag dgod pa'o/ /mnyes par byed pa'o zhes pa ni byed pa'i tshogs dgod pa sngon du 'gro bas rol par bya'o/ /yang gi sgra ni nges par bzung ba la'o zhes pa ni nges par bzung na ste gzhan las rnam par gcod pa'o/ /de nas nges par mnyes par bya ba kho na zhes pa ni gnas pa tsam 'ba' zhig dang / tsum+ba na dang 'khyud pa tsam dgag par byed de bde ba chen po dang de'i rgyur gyur pa'i byang chub kyi sems dam pa rnams kyis mi 'byung ba'i phyir ro/ /de nyid rnal 'byor pa rnams kyi mchog tu blang bar bya ba yin te/ de med pas mchod pa nyid du mi 'gyur ro/ /sangs rgyas kun la mnyes byed pa/ /de ni mchod pa chen por 'dod/ /ces gsungs pa'i phyir ro/ /zhi ba ni byang chub kyi sems te zhes pa ni zhi ba nyid ni zhi ba ste zla ba'i rang bzhin byang chub sems zhes bya ba'i don to/ /spros pa zhes pa'i bshad pa ni rdo rje'i lam nas phyi rol du bya ba'o zhes pa ste/ phyogs bcu'i 'jig rten gyi khams na bzhugs pa'i de bzhin gshegs pa thams cad la 'jug pa sngon du 'gro bas mchog tu dga' ba'i bde ba myong zhing rtsa stong p hrag bdun cu rtsa gnyis las 'bab pa'i chu'i rgyun rgyu'i rnam pas byang chub kyi sems 'dzag par 'gyur na rtags lnga 'byung ba'i de ma thag tu bde ba chen po nyams su myong zhing de la rtse gcig pa'i yid kyis 'di ni don dam pa'i bden pa'i phyogs yin gyi kun rdzob kyi bden pa'i phyogs ma yin no zhes rnam par dpyad nas/ sems can gyi don med pas snga ma'i smon lam gyi 'bras bu med par 'gyur ro zhes bya bas rmi lam bzhin du so sor rtog cing rang gi phyag rgya'i chos 'byung gi nang na hUM phaT kyi rang bzhin gyi sgras byang chub kyi sems spro bar bya'o zhes bya ba'i don to/ /sangs rgyas rab tu 'byung ba zhes pa ni de bzhin gshegs pa thams cad kyi skyed pa'i rgyur gyur pa ste de las de bzhin gshegs pa thams cad 'byung ba'i phyir ro/ /nam mkha'i khams ma lus par brgyan par 'gyur ba zhes pa ni nam mkha'i dbyings ma lus pa brgyan par byed pa de bzhin gshegs pa spro bar bya'o/ /'di skad bstan pa yin te zhes bya ba la sogs pas byang chub kyi sems las byung ba'i de bzhin gshegs pa bsgom par bya'o zhes bya ba'i tha tshig go/ /byang chub kyi sems 'ba' zhig gis mchod par ma zad de zhes pa ni shu kra 'ba' zhig tu dgag pa'o/ /gzhan yang lus kyi rgyu mthun pas kyang zhes pa ni khams nyi shu rtsa bzhi'i rdzas kyi bdag nyid kyi lus po las 'byung ba ma ra da we sho mu dang lcags kyu rnams kyis so/ /bdud rtsi lnga zhes pa ni bshang ba la sogs pa rdzas lnga'o/ /dkyil 'khor gyi 'khor lo la dbul lo zhes pa ni de'i cho ga 'di yin te/ skyes ma thag pa'i bu chung gis lam lhung ba'i bshang ba kham phor kha sbyar du gzhag la zhag bdun gyi bar du rang gi 'dod pa'i lha'i sngags dang rje btsun yi ge brgya pa dang lhan cig tu mngon par bzlas la grib ma la skam du bcug la/ phyi nas dri bzang dang / shrI khaN+Da dang / tsan+dan bsres nas btags te bskyed pa'i rim pas rnam par snang mdzad kyi gzugs su bskyed la de yongs su gyur pa las slar yang de nyid rdzas su bsam par bya'o/ /de med na rang las byung ba'i mtha' mar ma gyur pa thigs pa gsum tsam blang bar bya ste/ dang po byung ba'i rags pa'i dri ma ni blang bya ma yin pa'i phyir ro/ /de la byin gyis brlab pa'i rim pa ni snga ma bzhin du'o/ /dri chu yang tha ma nas byung ba'i thigs pa gsum tsam mi bskyod pa'i rnal 'byor gyis byin gyis brlabs te blang ngo / /khrag kyang lo bcu gnyis lon pa'i bu mo'i rang byung ba'i me tog blang bar bya ste med na g.yon pa'i srin lag las byung ba'i rin chen 'byung ldan gyi bskyed pa'i rim pas byin gyis brlabs nas blang ngo / /byang chub kyi sems kyang zla ba gzas zin pa'i dus su dbang po gnyis snyoms par zhugs pa las byung ba sa la ma ltung ba dung phor gyis blangs te gsung rdo rje'i rnal 'byor gyis byin gyis brlab pa'o/ /zla ba gzas zin dus su ni/ /kha ru bcug ste 'dzin par bya/ /zhes gsungs pa'i phyir ro/ /la la na re thur du sel ba'i rlung gyen du drangs nas rnal 'byor dang rnal 'byor mas ngag gi lam nas phyung ba blang bar bya'o/ /snang ba mtha' yas kyis byin gyis brlab pa yang de nyid la bya'o/ /sha chen po yang dpal rdo rje bdud rtsi'i rgyud las gsungs pa'i cho gas blang bar bya ste/ de la re zhig dang po rnal 'byor pas dpal rdo rje he ru ka'i bdag nyid bsgoms la/ keng rus la sogs pa 'jigs pa'i dur khrod kyi phyogs su phyin nas de la lang tsho dang ldan pa lo bcu drug pa so sum cu rtsa gnyis tshang ba/ 'gegs nas shi ba gdol pa mo'i bud med dam yang na gang yang rung ba'i lus po mthong nas dpa' bo'i sems byas la bdud rtsi 'khyil ba yongs su bzlas pa'i bdud rtsi dang dri bzangs kyi chus de nyid bkrus la dbang bskur gyi cho gas dbang byin la keng rus kyi gdan la sgrub pa po'i sngon phyogs su bzhag la/ dpal rdo rje he ru ka bzlas pa'i yungs kar gyis kha la gtor te rkang dang bcas pa'i til mar chen pos de'i lus byugs la mdun du dpal rdo rje he ru ka'i dkyil 'khor bris te/ mchod pa rnam pa lnga la sogs pas de nyid mchod la/ rdo rje dang dril bu lag na thogs pa phyag rgya lngas brgyan pa khro bo'i tshig gis sngags brjod bzhin pas dur khrod sa la bzhugs te spos gtul ba dang / cang te'u'i sgras de nyid du gtul bar bya'o/ /de ma thag tu 'bab par gyur pa ro langs te ha ha dgod pa'i sgra sgrogs par byed de/ de nas sgrub pa pos dpal he ru ka'i nga rgyal dang ldan pa 'jigs pa med pas 'das pa la sogs pa de nyid la dris te/ rang gi lag pas de'i lag tu zangs gri byin nas / rang gi sna la sogs pa'i yan lag brgyad pa'i sha'i dum bu rnams bdag la byin cig ces smra bar bya'o/ /des kyang khyod la sgrubs shig ces smras nas byin na sgrub pa pos blangs nas de gshegs su gsol bar bya'o/ /sgrub pa pos kyang de dang 'dra ba'i sha'i dum bu blangs nas dpal las kyi rdo rje'i bskyed pa'i rim pas bskyed pa sngar bshad pa'i rdzas dang 'dres par bya'o/ /dpal rdo rje bdud rtsi rnal 'byor chen po'i rgyud las kyang / /de nas gzhan yang bshad bya ba/ /ro langs chen po bsgrub pa ste/ /mar ngo'i brgyad dam bcu bzhi la/ /rtags gcig gam ni bzhi mdo'am/ /shing gcig gam ni sum mdo'am/ /chu bo'i 'gram mam ri bo la/ /phrin las thams cad 'grub bya ba/ /ro langs kyang ni de bzhin no/ /mtshan nyid thams cad dang ldan pa'i/ /'gegs nas shi ba bud med gang / /sme sha can nam rigs ngan ma / /yan lag ma nyams mdzes ma ste/ /zhi ba so ni sum cu gnyis/ /lo ni nyi shu lnga lon pa/ /yang na bu chung skyed dus su/ /shi ba'i bud med ro blangs te/ /lha yi chu yis khrus bya ba/ /sngags dang sman gyis 'dres pa yis/ /tsan+dan dkar po ga bur gyis/ /de nyid lus la byug par bya/ /me tog spos kyis mchod bya ba/ /rnam pa sna tshogs gtor ma sbyin/ /til mar chen pos lus byugs nas/ /yungs kar rnams ni gdong la gtor/ /mi bskyod pa yi dkyil 'khor ni/ /sgrub pa pos de bri bar bya/ /zla ba phyed dang thod pa dang / /bdung ba'i gzhu yi dbyibs can te/ /rig pa brgyad dang yang dag ldan/ /thod pa rnams kyis nye bar mdzes/ /gdan ni thod pa rnams yin te/ /thams cad kyang ni kha T+wAM 'dzin/ /zhal gsum pa dang phyag drug pa/ /bdag po'i gzugs can ral gri thogs/ /de yi dkyil 'khor phyi rol du/ /phyogs skyong rnams ni dgod par bya/ /ba sna dang ni glang sna dang / /bzhin bzangs dang ni bzhin mi bzang / /drag po lcags kyu thogs pa ste/ /'jigs su rung ba'i 'jigs byed pa/ /zhal gcig pa dang phyag gnyis pa'i/ /me tog spos ma la sogs bri/ /rol mo rnam pa sna tshogs pa'i/ /dkyil 'khor la ni mchod phyir bri/ /de nas dpa' bo sgrub pa pos/ /rdo rje he ru gzugs 'chang ba/ /dung chen pos ni brgyan byas nas/ /cod pan thod pa rnams kyis bya/ /de la cang te'u brdung bya ste/ /gar byed pas ni grong du 'jug /sngags rnams kyis ni lus bcings pa/ /de la phyi sgra sgrogs par bya/ /khrag chen pos ni bsang gtor nas/ /dkyil 'khor mchog ni mchod par bya/ /dpal ldan rdo rje he ru ka'i/ /sgrub pa pos ni sngags chen bzlas/ /khro dang bcas pa'i ro langs kyis/ /ha ha dgod pa sgrogs par byed/ /sngags pa chen pos 'jigs mi bya/ /rdo rje he ru yang dag dran/ /ro langs de ni langs nas su/ /sgrub pa po la 'di skad smra/ /dpa' bo chen po bdag ci byed/ /rdo rje can mchog bka' lung sbyin/ /ral gri mig sman sa 'og dang / /mkha' spyod nyid dang rgyal ba nyid/ /sgrub pa po ni gang 'dod pa/ /las ni de nyid sgrub par byed/ /de nas sgrub pa pos smras pa/ /gang dang gang ni yid kyis 'dod/ /pad+ma rgyas pa'i mA ma kI/ /de de thams cad sgrub par byed/ /rdo rje bdud rtsi las byung ba'i/ /ro langs sgrub pa mchog yin no/ /lus dang ngag yid dag pa'i phyir/ /sgrub pa po la bde bskyod pa'o/ /rdo rje bdud rtsi bde ba che/ /bcom ldan rdo rjes de skad gsungs/ /zhes 'byung ngo / /rdzas lnga de dag bsdus nas rlung dang me'i dkyil 'khor gyi steng du yi ge a las byung ba kha dog dmar po pad+ma'i snod bsgoms nas/ de'i steng du bdud rtsi lnga'i sa bon las bskyed pa'i rdzas bsams la/ /de rnams la yang yig 'bru bkod nas/ de yongs su gyur pa las de bzhin gshegs pa mi b skyod pa la sogs pa lnga bsgoms te rnal 'byor dang rjes su rnal 'byor dang shin du rnal 'byor dang rnal 'byor chen po byas la de bzhin gshegs pa thams cad 'jug pa sngon du 'gro bar rjes su chags pa'i ting nge 'dzin dam pas bzhus pa'i gzugs can rnam par bsams la de yongs su gyur pa las 'o ma'i rgya mtsho'i dba' rlabs ltar dkar la byang chub kyi sems nyid du bsgom par bya'o/ /de nas bcom ldan 'das yi ge gsum gyis sbyang ba la sogs pa byas la de nyid kyis byin gyis brlabs pa dkyil 'khor pa rnams la dmigs nas/ oM sarba ta thA ga ta pri Na ya me swA hA/ zhes bya ba'i sngags kyis dbul bar bya'o/ /bdag nyid kyi lag pa dang gdong pa la sogs pa sbyangs nas lus kyi dkyil 'khor yang tshim par bya'o/ /de nyid bstan par bya ba'i phyir lha bshos su gyur pas dkyil 'khor gyi 'khor lo la bstabs par bya zhing zhes bya ba smos te/ sngags kyis byin gyis brlabs pa'i khyad par gyi rdzas dang bcas pa'i snod ni lha bshos su gyur pa de nyid kyis bsams pas so/ /de nyid kyis bdag nyid tshim par bya'o zhes pa ni bdag rang gis kyang de nyid bza' bar bya'o/ /de ltar bya ba la sogs pas nang gi bdag nyid kyi mchod pa'i phan yon bstan to/ / gzugs kyi phung po la sogs pa zhes pa ni de rnams dag par gyur na/ sangs rgyas kyi ngo bo 'byung bar 'gyur ba dang / rang bzhin gyis kyang chos thams cad de bzhin gshegs pa'i ngo bo yin pa'i phyir ro/ /'dir rnam par dag pa ni rnam pa gnyis de khyab par byed pa dang nyi tshe ba'o/ /de la khyab par byed pa ni gzugs kyi phung po la sogs pa stong pa nyid du grags pa'o/ /nyi tshe ba ni so sor nges pa nyid kyis rnam par snang mdzad la sogs pa'i mtshan nyid do/ /'dir ni gnyis ka yang gzung bar bya'o/ /mdor bsdus pas ni phung po lnga/ /sangs rgyas lngar ni rab tu grags/ /rdo rje skye mched nyid dag kyang / /byang chub sems dpa'i dkyil 'khor mchog /ces 'byung ngo / /de nyid bstan par bya ba'i phyir/ /mig la sogs pa'i skye mched de/ /zhes bya ba la sogs pa smos so/ /grags pa che zhing zhes pa ni mngon par shes pa'i ye shes thob pa'o/ / spyod pa bzang po de rnams zhes pa ni skad cig tsam gyis bskal pa'i dngos po rnams mthong ba la gzhol ba'o/ /mnyes shing zhes bya ba la sogs pas 'gro ba'i mig la bde ba ster bar 'gyur te chog mi shes pa yin pa'i phyir ro/ /de dus brtsams nas de ni rtog med pa/ /de yi dbyibs dang kha dog mtshan ci bzhin/ /bsam gyis mi khyab rnam par smin pa'i sku/ /sdom pa de las bya ba byas pas thob/ /ces 'byung ngo / /de bzhin du/ mi bskyod bsten pa'i rnal 'byor pa/ /nad rnams kun dang bral bar 'gyur/ /zhes bya ba la sogs pa bshad pa'i rgyud las gsungs so/ /drang ba'i don to zhes pa ni/ /bskyed pa'i rim pa gtso bor gyur pa'i dkyil 'khor bstan pa'i phyir ro/ /lung gi bshad pa brjod par bya ba zhes pas dkyil 'khor gyi rnam par dag pa'i mtshan nyid kyi de kho na nyid bstan par bya ba'i phyir bdag nyid kyi ye shes ni dkyil 'khor lta bur snang ngo zhes bstan par bya ste/ de nas zhes bya ba ni sdud pa po'i tshig go/ /thugs kyang yin la thugs nyid dkyil 'khor yin pas thugs kyi dkyil 'khor de las 'dzin pa'o/ /'dir rang bzhin gyis sam rnam par dag pa'i rim pas dag pa'i sems gang yin pa de nyid snying po len pas na dkyil 'khor zhes bya'o/ /rdo rje ye shes ni ye shes lnga ste de dang 'dra ba ni de'i rang bzhin te de'i bdag nyid du 'jug pa zhes bya ba'i don to/ /lus la sogs pa tha mal pa'i ngo bo spangs nas 'od gsal ba'i rang bzhin du gyur pa gang yin pa de nyid thugs kyi ngo bo yin no zhes bya ba'i snying po len pas na sku gsung thugs kyi dkyil 'khor zhes bya ba'i don to/ /gzhan yang ji lta bu yin zhe na/ 'di ni dgu'i bdag nyid ces pa ni snang ba dang snang ba mched pa dang snang ba nye bar thob pa dang stong pa dang shin du stong pa dang stong pa chen po dang shes rab dang thabs dang ma rig pa'i rang bzhin no/ /yang na gsung rab yan lag dgu pa'i rang bzhin zhes kha cig zer ro/ /de'i phyir mchog yin no/ /sna tshogs lung gi brdar gyur pa/ /zhes pa ni rnam pa sna tshogs pa'i lung gis nye bar mtshon pa'i sems zhes bya ba'i tha tshig go/ /de la sems ni gcig yin te nyan thos la sogs pa'i rigs sna tshogs pa'i gdul bya'i dbang gis ngo bo tha dad par snang ste/ ngo bo snang ba thams cad sems kyi me long la gzugs brnyan du snang ste/ shel gyi nor bu la sngon po la sogs pa bzhin no/ /lha rnams la ni dmigs pa'i phyir/ /sems can mos pa sna tshogs pa/ /sems rdo rje las rnam grol ba'i/ /lha gzhan grub pa ma yin no/ /sems kyi byang chub rnyed bya ba/ /sems kyis 'gro ba lngar 'gro ba/ /sems las ma gtogs kha cig ni/ /bde dang sdug bsngal mtshan nyid med/ /ces 'byung ngo / /kun rdzob ni btags pa'i tshul du so sor snang ba ste dngos po'i tshogs so/ /don dam pa ni dngos po thams cad kyi chos nyid kyi mtshan nyid de stong pa nyid do/ /rnam par rtog pa gzhan med pa/ /rnam par rtog pa kun rdzob bshad/ /rnam par rtog pa ldog pa yin/ /don dam pa ni de nyid yin/ /zhes bshad do/ /kun rdzob dang ni don dam pa de dag phan tshun med par mi 'byung bas 'jug pa yin te/ /'phags pa brgyad stong pa'i shes rab kyi pha rol du phyin ma las/ ji skad du/ rab 'byor gzugs ni rang bzhin gyis stong pa nyid dang / gzugs kyang stong pa nyid dang / /stong pa nyid kyang gzugs so/ /gzugs las stong pa nyid tha dad pa ma yin/ stong pa nyid las kyang gzugs tha dad pa ma yin te/ /gnyis su med pa rnam pa gnyis med pa bcad du med pa zhes 'byung ngo / /klu sgrub kyi zhal snga nas kyis kyang / /med par mi 'byung nges pa ni/ /byas dang mi rtag pa bzhin no/ /zhes 'byung ngo / /kun rdzob dang don dam pa de dag sems gang la dbyer med par snang ba de gnyis pa ste/ gnyis su med pa'i ye shes kyi ngo bos mdzes pa zhes bstan te/ rnam par rtog pa gnyis kyi dri ma dang bral ba'i phyir ro/ /yang na kun rdzob ni ye shes kyi sku ste/ bdag la byin gyis brlab pa'i rim pas so/ /don dam pa ni 'od gsal ba ste/ /mngon par byang chub kyi rim pas so/ /de dag gnyis su med pa'i zung du 'jug pa'i rim pas thob par bya ba'i rdo rje'i sku ste/ mi gnas pa'i mya ngan las 'das pa'i dbyings kyi rang bzhin no/ /de nyid mdzes pa ni bskal pa'am bskal pa stong gi bar du sems can gyi don mdzad pa la brtson pas so/ /shes rab 'di ni thig yin te/ /zhes pa ni chos thams cad stong pa nyid kyi rang bzhin so sor rtog par byed pa'i bdag nyid can gyi blo ni shes rab bo/ /de nyid thig btab pa yin te khams gsum pa sems can dang snod kyi 'jig rten gnyis so/ /de'i rang bzhin gyis mtshon pas so/ /chad pa'i phyogs spang bar bya ba'i don du thabs ni de'i rjes su 'jug pa zhes smos te/ 'gro ba ma lus pa'i don byed pa'i snying rje chen po ni thabs so/ /de la rjes su 'jug pa ni ldang ba'o/ /shes rab ces bya ba ni thig gdab pa yin te/ shes rab dang snying rje dag gis sems can gyi don 'grub pa'i phyir ro/ /chos dang longs spyod rdzogs pa zhes pa ni sku gnyis kyi rang bzhin gyi dkyil 'khor te thugs kyi dkyil 'khor ro/ /de la zag pa med pa shes rab kyi pha rol du phyin pa'i rang bzhin ni sangs rgyas rnams kyi chos kyi sku nyid do/ /de nyid sems can rnams kyi don mdzad pa'i phyir mtshan dang dpe byad kyis mdzes pa ni longs spyod rdzogs pa'i sku'o/ /shes rab thabs kyi thig gcig gis/ /zhes pa ni stong pa nyid dang snying rje gtsor gyur pa'i sems kyi rgyud kyis so/ /thugs kyi dkyil 'khor thig gdab bya/ /zhes pa ni de'i bag chags dang ldan pa'i sems kyi rgyud bya ba gang yin pa de ni thig btab pa zhes bya'o/ /rten 'brel yan lag bcu gnyis pa/ /zhes pa ni 'di lta ste/ ma rig pa dang / 'du byed dang / rnam par shes pa dang / ming dang gzugs dang / skye mched drug dang / reg pa dang / tshor ba dang / sred pa dang / len pa dang / srid pa dang / skye ba dang / rga ba dang / shi ba'o/ /de rnams las dang po dang brgyad pa dang dgu pa ni nyon mongs pa'o/ /gnyis pa dang bcu pa ni las so/ /lhag ma bdun ni sdug bsngal lo/ /gsum po de dag gis bsdus pa'i yan lag bcu gnyis kyis 'gro ba 'di nyid yongs su 'khor te 'khrul 'khor bzhin no/ /de la dbang phyug la sogs pa byed pa po kha cig yod pa ma yin te/ gang gis 'di sprul par bya ba yin/ yan lag bcu gnyis pa rten cing 'brel par 'byung ba'i rang bzhin gyi srid pa 'khor lo 'di mthong ba dang / bsgom pa'i lam gang gis sbyang bar bya ba de ni sems nyid khru bcu gnyis pa'i dkyil 'khor zhes bya'o/ /bden pa ni bzhi ste/ sdug bsngal dang / kun 'byung ba dang / 'gog pa dang / lam mo/ /de la 'phags pa rnams kyi bden pa gnyis dang / 'phags pa rang gi bden pa gnyis so/ /de la sdug bsngal ni nye bar len pa'i phung po lnga ste 'bras bu'o/ /kun 'byung ni ma rig pa dang srid pa ste rgyu'o/ /'gog pa ni nyon mongs pa dang bral ba'i mtshan nyid do/ /lam ni rnam pa lnga ste/ 'jig rten pa dang 'jig rten las 'das pa'i dbye bas so/ /de rnam par dag par byed pa sems nyid ni bzhi zhes bya ba'i don to/ /tshangs pa'i gnas bzhi zhes pa ni byams pa dang snying rje dang dga' ba dang btang snyoms so/ /de la sems can thams cad bde ba dang ldan par gyur cig ces bsam pa gang yin pa de ni byams pa ste/ rnam par sdang ba dang khro ba la sogs pa ldog par byed pa'i las can no/ /sdug bsngal dang ldan pa'i sems can rnams sdug bsngal dang bral bar gyur cig ces bsam pa ni snying rje'o/ /bsod nams can gyi sems can rnams kyi dge ba la rjes su yi rang ba'i bsam pa gang yin pa de ni dga' ba'o/ /bsod nams med pa'i sems can rnams la khong khro ba dang rjes su chags pa dang bral ba'i bsam pa gang yin pa de ni btang snyoms so/ /de rnam par dag pa'i rnal 'byor pa'i sems nyid grwa bzhi yin zhes bya ba'i don to/ /ji skad du byams pa dang snying rje dang dga' ba dang btang snyoms dang bde ba dang sdug bsngal ba dang bsod nams dang bsod nams med pa'i yul can bsgom pas sems dag par 'gyur ro zhes 'byung ba dang / de bzhin du/ bsam gtan tshad med gzugs med pas/ /tshangs pa la sogs bde thob 'gyur/ /zhes 'byung ngo / /bsdu ba'i dngos po grangs ni bzhi ste/ sbyin pa dang / tshig snyan pa dang / don spyod pa dang / don mthun pa'o/ /yan lag bzhi po de dag gi rnal 'byor pas sems can rnams bsdu bar 'gyur ro/ /longs spyod 'dod pa la ni sbyin pas bsdus so/ /nga rgyal dang ldan pa dang zhe sdang dang bcas pa la ni tshig snyan pas so/ /gti mug dang ldan pa la ni don spyod pas so/ /de dag thams cad la ni don mthun pas so/ /rnam par dag pa de nyid kyis rnal 'byor pa'i sems nyid ni sgo bzhi yin te/ gang gi phyir sgo nas ji ltar srog chags rnams khang pa la sogs pa la 'jug pa de bzhin du bsdu ba'i dngos po'i sgo nas thar pa'i grong khyer la sems can rnams 'jug pa la 'jug go/ /re re ni bsdu ba'i dngos po re re'i grangs kyis bzhi'i ming can ni sgo bzhi po'i ming gi tha snyad du bya'o/ /chos ni kun rdzob kyi bden pa'o/ /de nyid don ni don dam pa'i bden pa'o/ /de dag dbyer med pa ste zung du 'jug pa'i ting nge 'dzin gyi sgo nas brda ste ming can no/ /'khor lo'i nang gi dkyil 'khor ro zhes pa ni snying po'i dkyil 'khor zhes pa ste kun rdzob dang don dam pa dbyer med pa'i ngo bo rdo rje 'chang chen po'i de kho na nyid ni nang gi dkyil 'khor gyi rnam pa so sor snang ba ste sems nyid ces bya ba'i don to/ /mi byed ye shes mtshan ma ste/ /zhes pa ni chos kyi dbyings kyi ye shes kyi rang bzhin no/ /rdo rje in+d+ra nI la rgya/ /zhes pa la dbus su mi bskyod pa'i phyag rgya gang yin pa de ni sems nyid do zhes bya ba'i don to/ / mi phyed pa'i rang bzhin ye shes de nyid sems te de'i rnam pa lnga nyid du bstan par bya ba'i phyir/ rnam pa lnga yi dbye bar bshad/ /ces smos te sems nyid gang yin pa de nyid me long lta bu la sogs pa'i ye shes lnga'i rang bzhin te dri ma rnams glo bur ba yin pa'i phyir ro/ /chu khams gser dang nam mkha' ni/ /dag pa bzhin du dag par 'dod/ /ces 'byung ngo / /ye shes lnga ni kun gzhi la sogs pa rnam par shes pa lnga'i gnyen po'i phyogs yin pas rtse mo 'khor ba 'jigs byed pa'o/ /yang dag ma yin kun rtog ni/ /sems dang sems byung khams gsum pa'o/ /zhes 'byung ngo / / rgyud phyi ma las kyang / /spang bya lnga dang rig pa lnga/ /rdo rje zhes ni bshad pa yin/ /zhes 'byung ngo / /shar nas zhes bya la sogs pas rnam par snang mdzad kyi mtshan ma 'bar ba dang bcas pa'i 'khor lo gang yin pa de ni me long lta bu'i ye shes kyi rang bzhin du shes par bya ste/ de bas na rnal 'byor pa'i sems la bsgom pa'i dus su sa dang por mthong ba'i lam gyi me long lta bu'i ye shes 'byung bar 'gyur ro/ /de bas na phyi rol du yang shar phyogs su de nyid rnam par dgod par bya'o/ /de bzhin du lho ru zhes bya ba la sogs pas lho phyogs su yid bzhin nor bu rin chen gang yin pa de ni mnyam pa nyid kyi ye shes kyi rang bzhin te sems nyid du rtogs par bya'o/ /bsgom pa'i lam gyi sa gnyis pa dang gsum pa dang bzhi pa la de nyid khams gsum pa dang dbyer med pa'i snang bas so/ /de bas na rin thang med pa dang / dkon pas na de nyid rin po che zhes bya'o/ /nub tu zhes bya ba la sogs pas nub kyi phyogs su ngag gi dbang phyug gi mtshan ma pad+ma gang yin pa de ni kun du so sor rtog pa'i ye shes kyi rang bzhin gyi sems nyid du shes par bya ba ste/ sa lnga pa dang drug pa dang bdun pa la khams gsum yang dag par so sor rtog pa'i bdag nyid du skyes pa'i phyir ro/ /byang du zhes bya ba la sogs pas byang phyogs su ral gri gang yin pa de ni khams gsum gyi yul gyi rnam par rtog pa gcod par byed pas na bya ba nan tan grub pa'i rang bzhin gyi sems nyid du shes par bya ste/ sa brgyad pa dang dgu pa dang / /bcu pa la kun gzhi gnas su gyur pa dang / las kyi dbang dang ye shes kyi dbang gis rang bzhin de skyes pa'i phyir ro/ /rnam par mi rtog pa'i ting nge 'dzin la zhugs pa'i sangs rgyas bcom ldan 'das rnams kyi sems can gyi don mdzad kyang / sems can rnams ni mi dmigs te/ /skyes bu yid bzhin nor bu bzhin/ /de yi phrad pa tsam gyis ni/ /rtsig pa la sogs rnams las kyang / /ji bzhin bstan pa rnams 'byung ngo / /zhes 'byung ngo / /shar lho zhes bya ba la sogs pa la me'i mtshams su sangs rgyas spyan ma'i mtshan ma mig gang yin pa de ni dga' ba dang sbyor ba'i 'dod pa mthong ba'i rang bzhin tshangs pa'i gnas byams pa zhes bya ba'i ngo bo rang gi sems nyid du shes par bya'o/ /lho nub ces bya ba la sogs pa ni bden bral gyi mtshams su mA ma kI'i mtshan ma rdo rje gang yin pa de ni sdug bsngal ba dang bral bar 'dod pa'i mtshan nyid tshangs pa'i gnas snying rje zhes bya ba'i rang bzhin rnal 'byor pa'i sems nyid du shes par bya ste/ sdug bsngal gyi ngo bo rnams gzhom pa'i phyir ro/ /nub byang zhes bya ba la sogs pa ni rlung gi mtshams su gos dkar mo'i mtshan ma pad+ma gang yin pa de ni sems can thams cad kyi dge ba'i spyod pa rjes su yi rang ba'i mtshan nyid tshangs pa'i gnas dga' ba zhes bya ba'i ngo bo sems nyid du shes par bya ste/ pad+ma kha phye ba ni dga' ba dang ldan pa'i bde ba rgyas par 'gyur ba'i phyir ro/ /byang shar zhes bya ba la sogs pa ni dbang ldan gyi mtshams su bcom ldan 'das ma sgrol ma'i mtshan ma ut+pal sngon po gang yin pa de ni dge ba dang mi dge ba'i dri ma gnyis dang bral ba btang snyoms kyi ngo bo'i sems nyid de/ ut+pal bzhin du 'dam las byung na yang de'i skyon gyis mi gos pa'i phyir ro/ /de bzhin du sbyin pa la sogs pa bsdu ba'i dngos po bzhi don dang ldan pa'i ming can sngar bshad pa gang yin pa de dag shar la sogs pa'i sgo bzhi la gnas pa 'phags pa gshin rje mthar byed la sogs pa khro bo'i rgyal po bzhi'i mtshan ma tho ba la sogs pa bzhi'i rang bzhin gyi sems nyid du shes par bya'o/ /de nyid bstan par bya ba'i phyir/ de bzhin shar sgor zhes bya ba la sogs pas bstan to/ /phyag rgya dgod pa'i mtshan nyid ni phyi rol gyi mtshan ma'i phyag rgya dgod pa'i de kho na nyid ces bya ba'i don to/ /legs par zhes bya ba la sogs pas dkyil 'khor gyi de kho na nyid nye bar sdud par bstan to/ /legs par bshad pa ni ji lta ba bzhin du gsal bar bshad pa'o/ /ji lta ba'i dbyibs kyis mchod pa zhes pa ni de dang 'dra ba'i rang gi sems nyid do/ /rnam gsum bsgoms pas gyur pa yin/ /zhes pa ni snang ba la sogs pa'i ye shes gsum gyi mchod pas mchod par byed de 'od gsal ba la 'jug go/ /de nyid rnam pa gsum gyi mchod pa yin te/ /mchod pa'i 'bras bu yin pas so/ /dang por chen po zhes pa ni mchod pa'i khyad par ro/ /des na sems rnam par dag pa'i mtshan nyid kyi mchod pa ni mchod pa chen po zhes bya'o/ /de yi brtul zhugs mi bshad de/ /bgrang phreng ma yin bzlas pa min/ /'dzin pa dang ni sbyin sreg las/ /gzhan dag kyang ni 'jug pa min/ /zhes 'byung ngo / /phyag rgya'i dkyil 'khor yin par bshad/ /ces bya ba las/ phyag rgya ni chos kyi dbyings kyi ye shes kyi rang bzhin te chos nyid ces bya'o/ /de nyid snying po'i don len pas na dkyil 'khor zhes bshad do/ /nang la sogs pa'i dbye ba yin/ / zhes pa ni snang ba dang snang ba mched pa dang snang ba nye bar thob pa dang zhi ba dang stong pa dang shin du stong pa dang chen po stong pa dang thams cad stong pa dang shes rab dang thabs dang ma rig pa dang 'od gsal ba dang / nyin mo dang mtshan mo dang dus mtshams dang de dang ldan pa'i mtshan nyid de skad cig ma bcu drug go/ /stong pa nyid bcu drug ces zer ro/ /de'i grangs kyis lo bcu drug lon pa'i sems nyid de shes rab bstan to/ /ma skyes pa yi zhi ba gang / /zhes pa ni gzod ma nas ma skyes pa'i de kho na nyid ni chos nyid do/ /spros pa thams cad dang bral bas na zhi ba'o/ /rkyen gzhan med pa zhi ba ni/ /spros pa rnams kyis ma spros pa/ /tha dad ma yin du ma min/ /de ni de nyid mtshan nyid do/ /zhes so/ /bud med ces pa ni/ shes rab kyi pha rol du phyin pa zhes bshad do/ /zhi ba'i chos dang rjes ldan pa/ /zhes pa ni 'od gsal ba la 'jug pa'i sems tsam de nyid kyi zhi ba'i chos dang rjes su 'gro ba'i yon tan gang yin pa de ni mdangs bzang 'od yin par bshad do/ /rten 'brel bag chags dri yin te/ /zhes pa ni/ shes rab kyi pha rol du phyin pa de nyid rten cing 'brel pa bcom pa'i mtshan nyid kyi bag chags te rang rig pa'i chos gang yin pa de ni sems kyi rgyud dga' bar byed pas na dri zhes bya'o/ /nyon mongs pa las rnam grol ba'i/ /snang ba gsum dang bral ba'o/ /zhes 'byung bas so/ /ye shes kha phye me tog go/ /zhes pa ni/ de ltar gyur pa'i 'od gsal ba'i ye shes las kha phye ba ni cig car ram snang ba nye bar thob pa la sogs pa'i rim pas ye shes te sku bskyed pa gang yin pa de ni 'gro ba ma lus pa'i re ba yongs su rdzogs par byed pas dga' ba bskyed pas na me tog ces bya'o/ /de dang 'dra ba'i dri dang me tog dag gis brgyan pa'i shes rab kyi pha rol tu phyin pa bud med ces bya'o/ /dngos po med pa rigs yin te/ /zhes pa ni de nyid kyi thams cad mkhyen pa'i ye shes mi zad pa thog ma dang tha ma med pa chos kyi dbyings kyi de kho na nyid rang bzhin med pa'i rigs zhes bya ba ste/ chos thams cad ni 'od gsal ba las byung ba'i phyir ro/ /ji ltar chu bo dang ba las/ /nya dag myur bar ldang ba ltar / /thams cad stong pa dang ba las/ /sgyu 'phrul dra ba 'byung bar 'gyur/ /zhes 'byung ngo / /de bzhin du/ 'od gsal dag pa de nyid las/ /ye shes gsum ni yang dag 'byung / /zhes 'byung ngo / /chos dbyings zhes bya ba la sogs pa ni/ /sngar bshad pa'i mtshan nyid can chos kyi dbyings kyi ye shes kyi ngo bo 'od gsal gyi rang bzhin bud med de/ sa bcu gnyis pa la shes rab mnyam par bya ba ni sngags dang phyag rgya'i rim pas mnyes par bya'o/ /de nyid kyi phyir shes rab ni sngags kyi mtshan nyid dang phyag rgya'i mtshan nyid dang ldan pa'i shes rab kyis so/ /sgyu ma thams cad rnams kyis ni/ /bud med sgyu ma khyad par 'phags/ /ye shes gsum gyi dbye ba ni/ /de las gsal bar mtshon par byed/ /ces 'byung ngo / /sems rnam par dag pa'i rim pas 'od gsal ba'i rang bzhin gyi shes rab mA ma kI'i ming gis tha snyad bya ba'i phyir/ nang na ma yin phyi na min/ /zhes smos te/ nang ni mig la sogs pa'i skye mched rnams so/ /phyi ni gzugs la sogs pa'i yul rnams so/ /gnyis ka ni sems can gyi 'jig rten dang snod kyi 'jig rten dag go/ /rnam par rtog pa de dag gsum spangs pas gnas med pa'i 'od gsal ba'o/ /de la gnas pa'i rnal 'byor ni 'jug pa'i mtshan nyid kyi 'brel pa gang yin pa de ni mA ma kI zhes bya'o/ /mA ma'i sgras ni dgag pa gnyis rjod par byed pa dang / kI'i sgras kyang phur bus gdab pa bzhin du dgag pa nyid bstan pa'i phyir ro/ /de'i ngo bo nyid gcig pa zhes pa ni 'od gsal ba'i rang bzhin lhan cig skyes pa'i dga' ba'i mtshan nyid kyi de kho na nyid do/ /gcig ni gnyis su med pa ste rnal 'byor la 'jug pa gang yin pa de ni byin gyis brlab pa zhes bya'o/ /nam mkha' dang ni gcig tu gnas/ /zhes pa de ni nam mkha'i dbyings dang 'dra ba mi gos pa de kho na nyid do/ /spros pa med pas ni zhi ba'o/ /sangs rgyas thams cad skyed pa'i rgyur gyur pas na sangs rgyas kyi gnas so/ /'gyur ni bsgom par bya'o / /gang gA'i bye ma dang mtshungs pa'i/ /'di nyid las ni sangs rgyas 'gyur/ /zhes 'byung ngo / /de bas na 'od gsal ba'i de kho na nyid la 'jug pa'i phyir ro/ /yul du rnam brtags pa zhes pa ni mig la sogs pas longs spyod pa gzugs la la sogs pa bstan to/ /sdud pa dag ni bshad pa yin/ /zhes pa mig la sogs pa'i dbang po la 'jug pas na de kho na zhes bya'o/ /ye shes dbang po stong pa gci/ /zhes pa ni mig gi rnam par shes pa la sogs pa drug dang / de bzhin du mig la sogs pa'i dbang po drug gang yin pa de rnams kyi stong pa ni 'od gsal ba'i chos nyid gci ba yin te nyon mongs pa thams cad zad par byed pa'i phyir ro/ /rnam dag chos ni zhes pa ni rang bzhin brgya drug cu'i tshogs spong bar byed pa'i mtshan nyid do/ /de nyid srid pa la 'khor ba'i mtshan nyid kyi mya ngan gcod pas na khu ba zhes bya'o/ /thams cad mkhyen pa'i ye shes ni 'od gsal ba la rtogs pa'i ye shes kyi mtshan nyid do/ /sems can gyi don gyi bya ba la rjes su chags pas de nyid khrag ces bya'o/ /gang zhig chos rnams yongs brtags pa/ /zhes pa ni phyi dang nang gi chos te bdud rtsi lnga la sogs pas brda ru byas pas dbang po la sogs pa'o/ /de nyid lha rnams zhes pa ni chos nyid la 'jug pa'i phyir ro/ /dngos po med pa ni sems rnam par dag pa'i mtshan nyid kyi stong pa nyid gang yin pa de la sngar bshad pa'i de rnams dbul ba ni 'jug par bya'o/ /de ni bdud rtsi lnga 'bul ba/ /zhes bshad do/ / de byas zhes bya ba la sogs pa ni 'dir sangs rgyas dang rgyal sras ni phung po la sogs pa'o/ /khyad par du zhes pa ni the tshom med pas so/ /mnyes par gyur pa zhes pa ni 'od gsal ba nyid du 'gyur ro/ /gang yang zhes bya ba la sogs pas phyi'i dkyil 'khor la mngon par zhen pa'i lta ba gang yin pa de rnams kyis de spang bar bya ba'i phyir de ltar sems kyi ngo bo'i mtshan nyid bstan te/ bshad pa'i rgyud las bcom ldan 'das kyis gsungs so zhes tshig gi lhag ma bstan to/ /de nyid bstan par bya ba'i phyir/ /de ltar bri ba'i dkyil 'khor la sogs pa bstan pas zhes smos te/ phyi'i dkyil 'khor bri ba dang mchod pa la sogs pa'i rim pas so/ /yongs su dag pa'i lha'i ngo bo nyid rab tu gnas pa yin te zhes pa ni sems rnam par dag pa dang bdag la byin gyis brlab pa dag gis thob par byed pa yid kyi rang bzhin gyi sku bstan to/ /nges pa'i don to zhes pa la sems rnam par dag pa dang bdag la byin gyis brlab pa'i rim pa gnyis bstan pa'i phyir ro/ /thugs rdo rje zhes pa ni thugs rdo rje bdag po nyid du 'jug pa 'dri ba'i dkyil 'khor zhes bya ba'i tha tshig go/ /dkyil ni snying po ste zhes pa ni rtog pa dang bcas pa'i rdul tshon la sogs pa nyid du snang ba'o/ /kun rdzob kyi bden pa'o zhes pa ni gzhi'i dkyil 'khor zhes pa'i don to/ /de len cing 'dzin pas na dkyil 'khor te zhes pa ni byin gyis rlob par byed pa gang yin pa de ni lha'i 'khor lo'i bdag nyid kyi rten pa'i dkyil 'khor zhes bya ba'i don to/ /drang ba'i don to zhes pa ni rten dang brten pa'i rang bzhin gyi dkyil 'khor so sor bstan pas so/ /dkyil 'khor ni snying po de don dam pa'i bden pa'o zhes pa ni sems rnam par dag pa'i rim pa thob par bya ba'i de kho na nyid bzhi pa'o/ /de len cing 'dzin pa na dkyil 'khor de zhes pa ni dngos po thams cad kyi de kho na nyid du gyur pa'i don dam pa'i bden pa len par byed pa ting nge 'dzin gyis thob par byed pa'i ye shes zhes bya ba'i don to/ /lung gi tshad ma nyid bstan par bya ba'i phyir/ ji skad du zhes bya ba la sogs pa bstan to/ /bshad pa'i rgyud ces bya ba ni rdo rje phreng ba las so/ /yan lag kun bsgom las 'das shing / /zhes pa ni dang por sbyor ba dang dkyil 'khor rgyal ba mchog dang las kyi rgyal ba mchog ste bsgom pa'i yan lag kun no/ /de las 'das pa ni de dang bral ba zhes bya'o/ /rtog pa ni 'jug pa dang gnas pa dang ldang ba'i mtshan nyid kyi rlung gi spyod pa'o/ /rtog min ni snang ba gsum dang rang bzhin rnam pa gsum mo/ /de dang bral ba rnam par spangs pa zhes pa ni rang bzhin snang ba rnam par dag par byed pa'i de kho na nyid kyis de rnams spangs pa'o/ /gug skyed ni i la sogs pa dbyangs bcu drug go/ /thig le ni snying ga la dgod pa'i yungs kar phra mo'i tshad tsam mo/ /'das pa ni de dang bral ba'o/ /'di ni dkyil 'khor zhes pa ni snying por gyur pa'i 'od gsal ba'i de kho na nyid ces bya ste/ thams cad stong pa 'od gsal ba/ /zhes bshad pa'i phyir ro/ /mchog yin no zhes pa ni don dam pa'i bden pa'i rang bzhin yin no/ /nges pa'i don to zhes pa ni sems rnam par dag pas 'od gsal ba'i de kho na nyid bstan pa'i phyir ro/ /sgron ma gsal bar byed pa'i TI kA las le'u bzhi pa'o// //rim pa gnyis zhes bya ba la sogs pas le'u lnga pa'i bshad pa brtsam par bya ste/ de la le'u dang po nas rnam pa gnyis kyi lha'i sku bstan to/ /le'u gnyis pa nas don dam pa'i bden pa 'ba' zhig tu bstan to/ /le'u gsum pa nas lha'i sku'i bdag nyid kun rdzob kyi bden pa bstan to/ /le'u bzhi pa nas kun rdzob dang don dam pa'i bden pa'i bdag nyid kyi thugs kyi dkyil 'khor bstan to/ /de ltar bsgoms pas rim pa gnyis yongs su rtogs pa'i rim pa gnyis rtogs pa'o/ /dbang bskur ba thob pas kyang zhes pa ni le'u bzhi pa nas gsungs pa'i rim pas so/ /spyod pa dang bral bas ni 'grub par mi 'gyur ro zhes pa ni spros pa la sogs pa'i rnam pa gsum gyi spyod pa spangs nas rnal 'byor pas dngos grub thob par mi 'gyur ro zhes bya ba'i don to/ /gang gi phyir rim gyis bsgom pa dang goms pas bla na med pa'i go 'phang thob par 'gyur ro/ /spyod pa ni rgyu yin te des 'bras bur gyur pa'i de kho na nyid khong du chud par 'gyur ro/ /goms pas thob par bya ba yin gyi rang bzhin gyis thob par bya ba ma yin no/ /goms pa'i sbyor bas ci zhig bya/ / gzod nas grub pa'i ngo bo nyid/ /de nyid rang bzhin gyis grub kyi/ /rnam rtog las skyes ma yin no/ /ye shes rim pa spangs nas ni/ /gang zhig 'di ltar rtog byed pa/ /de yi dbye ba mi shes pas/ /phyir yang de rnams slob bzhin 'gyur/ /las dang po yi 'jig rten 'di/ /don dam pa las 'jug pa'i phyir/ /thabs 'di rdzogs pa'i sangs rgyas kyis/ /skas kyi rim pa lta bur gsungs/ /zhes bshad pa'i phyir ro/ /de bzhin gshegs pa thams cad kyi zhes pa ni sku rdo rje 'chang la sogs pa rnams kyi'o/ /sku dang gsung dang thugs kyi bdag nyid can gyi zhes pa nye bar sdud par byed pa dpal rdo rje sems dpa'o/ /de la/ rigs ni rnam pa brgyar bstan te/ mdor bsdus pa ni rnam pa lnga/ /sku gsung thugs kyi dbye ba yis/ /phyi nas rnam pa gsum du 'gyur/ /zhes 'byung ngo / /de nyid kyi phyir de rnams kyi bdag po yin pas na rgyal po ste khams gsum gyi bdag po'o/ /sa 'og dang sa steng dang mtho ris rnams su rjes su ston par mdzad pas na zhes pa ni mtho ris dang sa bla dang sa 'og la gnas pa'i sems can gyi khams gdul ba la brtson pas ston pa zhes bya'o/ /khyab 'jug dang lha chen po la sogs pa 'jig rten gyi lha rnams shes pa la mngon par shes pa lnga thob pa'i phyir ro/ /nyan thos la sogs pa zhes pa ni/ /nyan thos pa dang rang sangs rgyas dang byang chub sems dpa' rnams so/ /'jig rten las 'das pa zhes pa ni mngon par shes pa drug thob pa'i phyir ro/ /yang na bdag dang bcas pa dang bdag med pa'i phyogs kyi lta ba gtso bo yin pas 'jig rten pa dang 'jig rten las 'das pa nyid do/ /yang na rnam par 'tshe ba dang bcas pa dang / rnam par 'tshe ba med pas so/ /rdzu 'phrul la sogs pas zil gyis gnon par mdzad pas na zhes pa ni 'bar ba dang snang ba la sogs pa lus kyi rdzu 'phrul dang / bstan pa la sogs pa gsung gi rdzu 'phrul dang / rtse gcig pa la sogs pa thugs kyi rdzu 'phrul gyis de rnams zil gyis gnon par mdzad pa'i phyir ro/ /ji skad du/ rgya mtsho yi ni gting mi rnyed/ /ba yi rjes dang 'dra bar 'gyur/ /gang tshe khyod kyi blo zab pa/ /gting dang pha rol med mthong na/ khyod kyi bstan pa mngon gyur pas/ /chos rnams kun gyis mi g.yo ba/ /sa yi khams kyi brtan pa nyid/ /shing gi 'dab rtse ltar yang 'gyur/ /zhes 'byung ngo / /bdag dang gzhan gyi tshogs kyi zhes pa ni de la bdag gi tshogs ni sngar bshad pa nyan thos la sogs pa'o/ /gzhan gyi tshogs ni grangs can la sogs pa'o/ /de rnams kyi spyod pa ni gang zag dang chos la bdag med pa'i spyod pa dang / skyes bu la sogs pa yod pa'i mtshan nyid la sogs pa'o/ /mchog gi chos shes pa ni yon tan mchog dang ldan pa'o/ /de rnams kyis don du gnyer bar bya ba'i phyir don to/ /de nas las 'dzin pa'o/ /de ltar rang dang gzhan gyi tshogs kyis mngon par 'dod par bya ba bcom ldan 'das rdo rje 'chang chen po zhes bya ba'i don to/ /de la sangs rgyas rnams kyi 'od zer gyi 'khor los bskul bas mu stegs pa dang nyan thos la sogs pa yang dag par rdzogs pa'i byang chub thob par 'gyur te/ bsod nams kyi ni tshogs bsags nas/ /de yang 'jig rten 'dren par 'gyur/ /zhes bshad pa'i phyir ro/ /thar pa 'dod pa thams cad kyis kyang / thams cad mkhyen pa nyid gsol ba gdab par bya ba yin pas so zhes pa ni mu stegs dang nyan thos la sogs pa thams cad mkhyen pa nyid 'dod pas so/ /sems ni rab tu 'jug pa la/ /spyod pa la ni 'jug mi bya/ /'khor ba rab tu bcom pa'i phyir/ /kun gyi blo ni mnyam po yin/ /zhes bshad do/ /spros pa dang bcas pa dang spros pa med pa dang shin du spros pa med pa ste spyod pa rnam pa gsum po zhes pa ni rim pa gnyis la brten te/ rnal 'byor pa rnams kyis spyod par bya'o/ /bskyed pa'i rim pa'i rnal 'byor pas gnyis spyod pa dang / rdzogs pa'i rim pa'i rnal 'byor pas gcig spyod par bya ste khyad par ro/ /spyod pas ni khyad par ro zhes pa ni brtul zhugs kyi khyad par gang gis so/ /de'i mtshan nyid ni rang gi ngo bo nyid de zhes pa ni 'chad par 'gyur ba'i spyod pa gsum gyi de kho na nyid do/ /bka' stsal pa ste zhes pa ni rig byed kyi tshul du dus log par bstan to/ /sgra ji bzhin pa'o zhes pa ni spyod pa ji lta ji ltar gsungs zhes bstan pa'i phyir ro/ /gang la brten nas spyod pa rdo rje theg pa de nyid kyi khyad par bstan par bya ba'i phyir/ /don dam pa'i bden pa ste zab pa'i mtshan nyid do zhes pa la/ shes rab kyi pha rol tu phyin pa'i ngo bo chos thams cad kyi chos nyid kyi mtshan nyid 'od gsal ba'i rim pa gnyis pa dang bzhi pa thob par bya ba man ngag bzhi pa de kho na nyid ces bya'o / /kun rdzob kyi bden pa ste zhes pa ni don thams cad byed pa la gzhol ba/ rim pa gsum pa dang bzhi pa thob par bya ba ye shes kyi sku 'am rdo rje'i sku'i mtshan nyid de lha rnam pa gnyis kyi rnal 'byor gyi mtshan nyid do/ /de nyid kyi phyir rgya che ba'i mtshan nyid de zhes bya ba 'gro ba'i don byed pa la brtson pa/ /sar zhing sar pa'i dkyil 'khor gyi 'khor lo spros pas nam mkha'i khams ma lus pa rdzogs par byed pa'i rang bzhin no/ /gnyis po de dag ces pa ni kun rdzob dang don dam pa'i bden pa gnyis so/ /gnyis su med pa'i rnam pa zhes pa ni mi gnas pa'i mya ngan las 'das pa'i dbyings kyi rnam pa'o/ /yang dag par ni ji ltar bstan pa de bzhin du bsgom pa'o/ /rnal 'byor pa de zhes pa ni de lta bu'i sgrub pa po rnams so/ /'dod chags la sogs pas 'khrugs kyang zhes pa ni 'dod chags kyi spyod pa spros pa dang bcas pa zhes bya ba dang ldan pa yang ngo / /theg pa mchog ni rdo rje theg pa zhes pa la sngags kyi theg pa chen po zhes bya'o / /gtan tshigs bshad par bya ba'i phyir theg pa thams cad kyi bla mar gyur pa zhes smos so/ /de la nyan thos pa'i theg pa ni theg pa chung ngu zhes bya ste/ rang gi don tsam 'grub pa dang thabs dang thabs las byung ba'i lam dang 'bras bu ma dag pa'i phyir ro/ /de la re zhig mi sdug pa'i bsgom pa ni keng rus bsgom pa'i bdag nyid yang dag pa'i lam ma yin te/ de dag ngo bo nyid kyis ma grub pa'i phyir ro/ /'bras bu yang 'gog pa'i snyoms par 'jug pa'i mtshan nyid ni yang dag pa ma yin te bag chags dang bcas pa'i phyir dang slar yang de rnams byung nas 'khor ba'i rgya mtshor lhung ba'i phyir rang sangs rgyas kyi theg pa yang gzhan gyis don dang bral bas chung ba nyid de/ de rnams kyi thar pas kyang 'dud par gyur pa rnam par rig pa tsam yod pa'i mtshan nyid kyis rnam par mi rtog pa nyid thob par mi 'gyur bas ma dag pa'o/ /byang chub sems dpa'i lam yang bskal pa grangs med pa gsum gyis byang chub thob pa'i phyir thabs nyid kho na ma yin no/ /rdo rje theg pa ni thabs dang 'bras bu dag la ma 'khrul ba yin te gang gi phyir 'dod pa'i yon tan lnga nye bar spyod pa dang phyag rgya bsten pa la sogs pa'i bde ba'i thabs kyis 'ba' zhig dri ma med pa mtha' yas pa nam mkha' dang 'dra ba chos kyi dbyings kyi ye shes su grags pa rdo rje 'chang chen po'i go 'phang rang dang gzhan gyi don grub pa la brtson pa/ skad cig ma gcig gis sna tshogs sprul pa dang bsdu bar mdzad pa 'gro ba ma lus pa'i rang bzhin mngon du byed pa de bzhin gshegs pa thams cad kyi ngo bo de kho na nyid skad cig ma gcig gis thob par 'gyur te rgyu dang 'bras bu la ma 'khrul ba'i phyir ro/ /the tshom gyi bdag nyid kyi 'khrul pas de mngon du byed pa dang yun yang ring bar 'gyur ro zhes bya ba de yod na dag par mi 'gyur ro/ /sbyong ba ni gang dang gang 'khrul ba'i ngo bo snang ba gtan tshigs la sogs pa de dag ma 'khrul ba'i 'bras bu la 'brel pa med de/ brgya byin gyi spyi bo la sogs pa las byung ba'i du ba la sogs pas me la sogs pa bzhin no/ /nyan thos kyi lam la sogs pa 'khrul ba'i rang bzhin du snang bas mi 'khrul pa'i rdo rje 'chang chen po'i go 'phang 'bras bur gyur pa'i sgyu ma yin no zhes rgyu mi dmigs pa'o/ /ma 'khrul ba'i ngo bo snang ba'i lam gyis thob par bya ba dpal rdo rje 'chang gi go 'phang zhes nye bar bsdu ba'o/ /de bas na theg pa thams cad kyi mchog rdo rje theg pa zhes bya'o/ /gcig la gcig ces zhes pa ni phan tshun la ltos pas so/ /tshig lhag ma zhes pa ni tshig rdzogs par byed pa'o/ /phul du phyung ba'i dngos grub ste zhes pa ni phyag rgya chen po'i dngos grub rdo rje 'chang chen po'i sku'o/ /skyed par byed pa ni mngon du byed pa ste spros pa dang bcas pa'i spyod pas rdo rje 'chang chen po nyid thob par 'gyur ro zhes bya ba'i don to/ /dgongs pa ma yin pa'o zhes pa ni gsal ba'i de kho na nyid bstan pas so/ /rang bzhin yongs su zhes bya ba la sogs pas rigs la sogs pa bkag par bstan to/ /rdo rje theg pa la brten nas bla ma'i man ngag bsgom pa gang yin pa de rnams rigs la sogs pa dman pas kyang byang chub thob par 'gyur te/ skye ba sna tshogs rigs dang ni/ /yul dang dus la ma ltos pa/ /bcom ldan khyod kyis bstan bcos ni/ /thams cad la ni bstan pa lags/ /zhes bshad pa'i phyir ro/ /skye gnas kyis smad pa nyid du bstan pa'o zhes pas ni rigs dman pa bstan to/ /las kyis so zhes pa ni ba lang gi pags pa dang gzhu la sogs pa byed pa dang mi gtsang ba la sogs pa gdon pas so/ /sgyu ni yi ge pa rnams kyis gzhan gyi zhing la sogs pa 'phrog pas log par 'tsho ba'o/ /'khrul 'khor dang zhes pa ni/ /btson ra'i khang pa la lag pa dang rkang pa la sogs pa 'ching ba'i shing la sogs pa'o/ /mtshon ni ral gri la sogs pa'o/ /rgya ni ri dgas la sogs pa bshor ba'i don du srad bu'i sbyor ba'o/ / sogs pa'i sgras ni rtsig pa phug nas nor rku ba dang chang gi nang du d+ha du ra'i khu ba btab nas brgyal bar byed pa dang / lcags kyus nya bzung ba dang / grong la sogs pa la me gtong ba zhes bya'o/ /dgang bar zhes pa ni rang gi lto ba rgyas pa tsam mo/ /sems pas ni bsam par byed pa'o/ /theg pa chen po bla na med pa'o zhes pa ni kun gyi mchog ces bya ba'i don to/ /bla na med pa'o zhes pa ni rdo rje theg pa ste bla na med pa'i sgra dang bral bas so/ /spyi bo'i sgra ni khyad par du 'jug pa ste don la sogs pa'i 'brel pa zhes sngar bshad zin to/ /rin po che'i gang zag ces pa ni tsan+dan la sogs pa la ltos pas dam pa chen po yin pas so/ /de nyid kyis 'gro bas na zhes pa ni nye bar mtshon pa'i tshig yin te tsan+dan la sogs pa rdo rje theg pas mi 'gro ba ma yin te des thams cad rjes su bzung bas so/ /gtso bos kyang tha snyad mthong bas te gang 'gro ba rgyal po zhes pa bzhin no/ /pha zhes bya ba la sogs pa la de la pha gsod pa ni rgyal bu khyab 'jug bzhin du ste/ des pa dang de'i blon po bsad pas so/ /ma gsod pa ni sor 'phreng can no/ /dgra bcom pa gsod pa ni mya ngan med pa'i rgyal po gtum po'o/ /sangs rgyas kyi sku 'jig ces pa ni stag gzig rnams so/ /dam pa'i chos spong ba zhes pa ni grangs can la sogs pa'o/ /mtshams med pa'i don bshad pa'i phyir/ 'chi ba'i dus byas ma thag tu dmyal bar lhung bar 'gyur bas na zhes pa ni dmyal bar skyes ma thag tu las kyi 'bras bu myong bas so/ /nye bar mtshon pa zhes bya ba ni dbyer med pa'i nye bar brtags pa'i mtshan nyid kyi chos las so/ /de byed pa la 'jug go zhes pa ni las dang byed pa po la dbyer med pas so/ /mtshams med pa dang nye ba rnams bzung ba ni ma dang dgra bcom pa ma yin pa la bgrod pa dang byang chub sems dpa' des gnas dang / slob pa gsod pa dang / dge slong gi nor 'phrog pa dang / dge slong 'byed pa dang / mchod rten bshig pa ste/ de byed pa'o/ /rtsa ba bzhi'i ltung ba zhes pa ni srog gcod pa dang rku ba dang / gzhan gyi bud med la bgrod pa dang / brdzun smra bas so/ /tA la mgo bcad pa ltar zhes pa ni mgo bcad pa'i tA la'i shing drung bzhin no/ / sangs rgyas kyi bstan pa las nyams nas zhes pa ni de bzhin gshegs pa'i theg pa chen po las ltung ba zhes bya ba'i don to/ /theg pa las nyams pa ni sdig pa chen po'i rgyu yin te/ tshul khrims las kyang nyams pa ru/ /lta ba las ni ma yin te/ /tshul khrims kyi ni mtho ris 'gro/ /lta bas gnas ni dam pa thob/ /ces 'byung ngo / /dmyal ba las gzhol ba zhes pas ni sangs rgyas kyi bstan pa las nyams pa'i 'bras bu bstan to/ /de rnams kyang 'dir zhes pa ni sdig pa chen po byed pas kyang zhes bstan to/ /bla ma'i drin gyis zhes pa ni/ /rdo rje slob dpon gyi zhabs rjes su bzung bas so/ /rdzogs pa'i rim pa thob na zhes pa la zung du 'jug pa'i ting nge 'dzin thob nas so/ /'grub par 'gyur zhing zhes pa ni 'bras bu'i gtso bo'i sgo nas bstan te bskyed pa'i rim pa la sogs pa yang 'bras bu la mngon du gyur pa'i phyir ro/ /sangs rgyas thob par gyur na zhes pa la rdo rje 'chang nyid thob par 'gyur ro/ /sangs rgyas rdo rje sems dpa' nyid/ /de bzhin kun gyi dbang phyug nyid/ /rdo rje lta bu'i ting nge 'dzin/ /de ni gnyis med bstan pa'o/ /zhes 'byung bas so/ /rigs ngan la sogs pa lta smos kyang ci dgos zhes pa ni gang de rnams kyi skye gnas la sogs pa ngan pa tsam yod pa'o/ /de la skye gnas kyi skyon tsam gyis skal ba med pa ma yin te/ bstan pa la mi dmigs pa'i yan lag ma yin pa'i phyir ro/ /dad pa la sogs pa'i yon tan rnams ni bstan pa la brten pa'i rjes su mthun pa yin gyi skye gnas la sogs pa ma yin te/ lha sbyin dang ko ka li ka dag gis dmyal bar 'gro ba dang 'khor los sgyur ba'i gnas thob pa bzhin no/ /de ltar zhes bya ba la sogs pas nye bar bsdus pa bstan to/ /snod dang snod ma yin pa la ltos pa med par don mdzad pas na zhes pa ni skal ba dang skal ba med pa'i slob ma'i rjes su gzung bar byed pas zhes pa'i don to/ /theg pa'i che ba'i bdag nyid gsal bar ston pa yin no zhes pa ni rdo rje theg pa'i phul du byung ba rab tu gsal bar bstan pa yin no zhes bya ba'i don to/ /de ltar zhes bya bas ldog pa bstan to/ / skye bo sdig can ma lus pa/ / zhes pa ni sngar bshad pa'i mtshams med pa byed pa la sogs pa'o/ /rnam par sbyong ba zhes pa ni de rnams grol bar byed pa'o/ /rdo rje theg pa zhes bya ba la sogs pas bla ma la smod pa 'grub par mi 'gyur ro zhes bstan to/ /dang por slob dpon la bsnyen bkur byas te zhes pa ni sngon gyi bsnyen pa'i rim pa dang zla ba la sogs pa'i dus kyi dbye bas de la bsnyen bkur byas te/ mgu bar 'gyur ba de las rigs pa'i dbang bskur ba la sogs pa rnyed nas thos pa la sogs pa'i rim gyis man ngag mngon du byas la lhan cig skyes pa'i shes rab dang ldan pa'i phyir nga'i blo'i khyad par 'di yin gyis slob dpon gyis cung zad kyang phan pa ma byas so zhes bsams pas de la smod pa gang yin pa de ni bla ma la brnyas par byed pa'o/ /tshogs la mthong nas rgyab kyis phyogs su 'gro/ /dben pa la gnas de la phyag byed pa/ /de ltar bdag nyid ngan pa'i slob ma ni/ /rang gi bu 'am 'phags pas bzung ba ste / /bram ze 'am ni rgyal rigs rje'u rigs la/ /bstan pa yi ni gam du mi bya'o/ /zhes bshad pa'i phyir ro/ /de dang lhan cig zang zing gi longs spyod kyis zhes pa ni bza' ba la sogs pa'i spyod pas so/ /kun du dga' bar byed pa ni rol par byed pa'o/ /gang yin pa yang zhes bya ba la sogs pa'i de dag kyang 'grub par mi 'gyur te sdig pa can dang 'brel pa'i phyir ro/ /slob dpon zhes bya ba la sogs pas rang sdig pa can bla ma la nyes par byed pa bzung bar bstan to/ /nges par mdzad pa'o zhes pa ni nges par gzung bar mdzad pa'o/ /des ni mngon spyod kyi snod du rung ba la sangs rgyas kyis phyogs mdzad na yang dngos grub thob par mi 'gyur zhes bstan to/ / srung ba sogs dang sngags rnams dang / /lha rnams la yang phur bus gdab/ /ces gsungs pa'i phyir ro/ /'grub par mi 'gyur ba zhes pa ni/ /gdol pa la sogs pas 'grub par byed pa ni 'grub pa ster bas 'grub pa ni ma lus pa nyid do/ /sgrub pa de la yang 'grub par mi 'gyur na zhes pa 'dis bla ma la nyes pa byed pa la 'grub pa ni ma yin no/ /zhes bstan to/ /gzhan dag tu zhes pa ni bya ba'i rgyud la sogs pa la smos ci dgos so/ /ji skad du zhes bya ba la sogs pas lung gi tshad ma nyid bstan to/ /slob dpon la smod par byed pa'i mi rnams la gnyid log pa'i dus su yang de bzhin gshegs pa mthong bar mi 'gyur te/ gang gi phyir dang po de rnams kyis slob dpon la smod par mi bya ba dang / de bzhin du de ring nas brtsams te/ lag na rdo rje bdag gis khyod la smras pa gang yin pa de khyod kyis bya ste gzhan du na dus byas te dmyal bar ltung bar 'gyur ro/ /zhes mnas bskyal ba sngon du 'gro bar khas blangs nas yang rdo rje 'chang dang 'dra ba'i bla ma de nyid la smod pa zhes rang gi tshig gis de'i dam tshig nyams pa dang de'i 'bras bu de bzhin gshegs pa la sogs pas byin gyis ma brlabs par 'gyur ro zhes ston to/ /mthong ba'i chos la myong ba'i las kyi rnam par smin pa bshad pa'i phyir/ slob dpon smod pa gang yin de/ /zhes pa ni bla ma la smod par byed pa'o/ /bgegs dang log 'dren rnams kyis bzung / /zhes pa ni/ tshogs bdag la sogs pa dang / srin po la sogs pas bzung bar 'gyur ro/ /ngan pa ni sdig pa'i bsam pa can no/ /gtum po'i las can zhes pa ni drag po'i spyod pa dang ldan pa'o/ /mkhas pas rtag tu spang bar bya/ /zhes pa ni bla ma dam pas gam du mi bya'o zhes bya ba'i don to/ /sgra ji bzhin pa zhes pa ni sogs pa'i sgra zhes tshig lhag ma'o/ /rgyud kyi rgyal po khyad par du gyur pa bstan nas zhes pa ni spyod pa gsum gyi gzhir gyur pa'i rgyud kyi rgyal po bstod nas so/ /slob dpon med par 'jug par ma gyur cig /ces pa ni bla ma'i zhal gyi man ngag dang bral ba zhes bya ba'i tha tshig go/ /bla ma'i zhal gyi man ngag med pas yang dag par gyur pa'i de kho na nyid kyi man ngag rtogs par mi 'gyur ro/ /spyod pa'i khyad par bstan pa'i phyir zhes pa ni spros pa med pa'i spyod pa'i khyad par ro/ /bshad pa'i rgyud ni dgongs pa lung bstan pa'i bshad pa'i rgyud las so/ /phung po la sogs pa zhes pa ni sngags dang phyag rgya'i rim pas dngos med pa ni 'od gsal ba'i go 'phang thams cad stong pa'i gnas la 'jug pa'o/ /zhi gnas las byung zhes pa ni/ /zhi gnas kyi bsgom pas byas pa gang yin pa de rnams ni srog gcod par byed pa ste srog ni rlung yongs su gyur pa las skyes pa'i phung po lnga la sogs pa spong ba'i phyir ro/ /des sems rnam par dag pa'i rim pa bstan to/ /nang zhes bya ba la sogs pas nang dang phyi dang gnyis ka'i rang bzhin gyis chos thams cad stong pa yin no zhes lhag par mos pas ye shes kyi sku gzung ba sngon du 'gro bar bstan pa gang yin pa de la dga' ba ni brdzun smra ba la dga' ba zhes bshad par bya ste/ lha'i bu chos thams cad brdzun dang sgyu ma yin pa de skad bdag smra bas na/ des na de ni brdzun smra ba yin no zhes gsungs pa'i phyir ro/ /gnas med la gnas rnal 'byor pa'o/ /zhes pa ni/ sgyu ma la sogs pa'i dpe bcu gnyis la gnas pa zhes bya ba'i don to/ /des ni bdag byin gyis brlab pa'i rim pa bstan to/ /rdzogs sangs rgyas kyi ye shes gang / /zhes pa ni mi gnas pa'i mya ngan las 'das pa'i rang bzhin de kho na nyid rim pa lnga pas thob par bya ba'i rdo rje 'chang chen po'i go 'phang zhes bya ba'i don to/ /de nyid bstan pas na rdzas zhes bya ba ste/ brtan pa snying po khong stong med/ /ces pa'i phyir ro/ / de 'phrog ngang tshul gang yin pa/ / zhes pa ni zung du 'jug pa'i ting nge 'dzin sgom par byed pa gang yin pa de rnams gzhan gyi nor la chags par 'dod pa'i rnal 'byor pas bshad do/ /des ni zung du 'jug pa'i rim pa gsal bar bstan pa yin no/ /de nyid ces pa ni sngags dang rlung gi de kho na nyid rtogs pa sngon du 'gro bar ma ning gi bzlas pa'i dus su byung ba'i 'od gsal ba'o/ /de la dngos cig ni bsgom pa gang la yod pa de ni de nyid dngos cig ste rdo rje bzlas pa'i rnal 'byor pa zhes bstan to/ /de bzhin nyid ni phyag rgya dang / /ting nge 'dzin gyi rim pas thob pa'i 'od gsal ba'i gnas so/ /de la rtag tu sbyor ba ni mngon par byang chub pa'i rim pa zhes bya ba'i don to/ /sems can de de 'dod pa la dga' zhes pa ni rim pa dang po dang bzhi pas nye bar bstan pa'i de kho na nyid la 'dod pa'i rnal 'byor pa zhes bya ba'i tha tshig go/ /sgrub pa mchog la dam par 'gyur/ /zhes pa ni rnal 'byor pa lnga po de dag sngags kyi theg pa chen po la snod du gyur pa rang dang gzhan gyi don phun sum tshogs par byed pa zhes bya ba'i tha tshig go/ /de'i stong pa nyid gti mug la zhes pa ni stong pa nyid kyi gti mug ste mi shes pa ste ma rig pa'o/ / rgyu de las skrag pa ni 'jigs pa gang yin pa de dag gcin gyi sgras ni dbang po rnams bshad do/ /yul rnams la 'jug pa'i rang bzhin yin pas bshad pa'i sgras ni yul rnams bstan to/ /de dag zhi ba zab pa yin/ /zhes pa ni dbang po dang yul dag yan lag drug pa'i phyogs gcig pa so sor sdud pa'i rim pas sbyor bar byed pa zhes bya ba'i tha tshig go/ /theg pa chen po'i chos mchog 'dir/ /zhes pa ni sgrub par byed pa dpal gsang ba 'dus pa zhes pa theg pa thams cad kyi mchog la/ /snod du gyur pa ni skal ba dang ldan par 'gyur ro/ /dgongs pas bshad pa zhes pa ni srog gcod pa la sogs pa'i sgra'i 'gal ba'i sgo nas rim pa lnga'i mtshan nyid dang / so sor sdud pa zhes bya bas de'i rang bzhin bstan pa'i phyir ro/ /de ni rim pa lnga sgom par byed pa'i rnal 'byor pa rnams la ye shes kyi phyag rgya dang snyoms par zhugs pas/ shin tu spros pa med pa'i spyod pa bstan to/ /spros pa dang bcas pa'i spyod pa bstan par bya ba'i phyir/ ma dang 'dra bar rjes su mthun pa'i zhes pa la sogs pa smos so/ /rigs dang rjes su mthun pas rnal 'byor pa la chags pa nyid du bstan to/ /'di rnams las gang yang rung ba zhes pa ni mi bskyod pa la sogs pa'i rigs dang rjes su mthun pa'o/ /rang gi rigs kyi bud med ces pa la/ sme sha can dang / gar mkhan dang khrus mkhan dang bram ze mo la sogs pa'o/ /sgrub pa'i thabs las bshad pa'i rim pas zhes pa ni dkyil 'khor rgyal ba mchog gi ting nge 'dzin gyi phyogs gcig phyag rgya legs par sbyang bas so/ /rigs lnga bkod pa zhes bya ba la sogs pas de nyid gsal bar bstan to/ /mnyes par byas pa ni rigs dang rjes su mthun pa shing gi sdong po la phyag la sogs pa byas nas mtshal la sogs pas bris pa ji ltar 'dod pa'i bza' ba dang bcas pa rang gi brtul zhugs dang rjes su mthun pa'i phyag rgya dang bcas pa'i rnal 'byor pas snyoms par 'jug par bya'o/ /de dngos grub rgya chen po zhes pa ni rdo rje 'chang chen po'i go 'phang gi mtshan nyid thob par 'gyur ro/ /mchog gi chos zhes pa ni rnam par mi rtog pa'i mtshan nyid gang la yod pa de dag / theg chen mchog gi chos nyid ces pa ni/ /chos kyi dbyings kyi de kho na nyid so sor rig pas shes rab kyi pha rol du phyin pa'i rnal 'byor pa zhes bya ba'i don to/ /de yi nang du dngos grub rgya che zhing / /zhes pa la rdo rje 'chang chen po'i dngos grub ste rang dang gzhan gyi don sgrub par byed pa'i mtshan nyid do zhes bya ba'i don to/ /pha rol tu phyin pa'i rnal 'byor pas ni yang dag par rdzogs pa'i byang chub kyang rgya che ba ma yin te/ dus mang pos thob pa'i phyir rang dang gzhan gyi don phun sum tshogs pa chung ba'i phyir ro/ /rdo rje theg pa las de las ldog pa thams cad yin no zhes sngar bshad zin to/ /ldog pa bstan par bya ba'i phyir rjes su mi mthun pa'i phyag rgya dang mnyam par sbyor ba zhes bya ba ni mi mthun pa'i shes rab dang 'brel bas so/ /rjes su mthun pa ni rigs dang mthun pa nyid gal te rtag par byed na de'i tshe dngos grub rten par 'gyur te/ gzhan du ni ma yin no/ /'jigs shing 'khrul pa'i sems ldan g.yo sgyu can dang gzhan dbang 'gyur/ /zhes 'byung ngo / /sems g.yeng ba skye bar 'gyur ro zhes pa ni rtse gcig pa nyid 'chad par 'gyur ba ste yid bde bar 'gyur ba'i phyir ro/ /rjes su mthun pa de yang skye ba gzhan dag tu'ang yid gcugs par 'gyur ba zhes pa ni smon lam gyi dbang gis so/ /sangs rgyas kyis byin gyis brlabs pa'i mthus lung bstan de dang 'dra ba'i shes rab dang phrad par 'gyur ro zhes bya ba'i tha tshig go/ /des ni spros pa dang bcas pa'i spyod pa bstan to/ /sngags dang rgyud la sogs pa la/ / zhes pas spros pa med pa'i spyod pa bstan par bya ste/ sngags dang rgyud la sogs pa la legs par bslabs pa'o zhes pa ni dbang thob pa dang sngags la sogs pa'i sbyor ba la mkhas pa'o/ /sgrub pa po dang rjes su mthun par zhes pa ni phyag rgya chen po'i sgrub pa'i yan lag tu gyur pa dam tshig gi phyag rgya zhes bya'o/ /ma rnyed na zhes pa ni dkon pa'am sgrub pa po dge slong yin pas so/ /sangs rgyas kyi yum shes rab kyi pha rol du phyin pa zhes pa ni/ gang las sangs rgyas thams cad 'byung ba de ni sangs rgyas kyi yum ste/ de bzhin gshegs pa thams cad kyi yum zhes bya ba'i don to/ /gang zhig kun mkhyen nyid kyis zhi bar 'dod pa'i nyan thos pa rnams nye bar zhi mdzad pa/ /gang zhig lam mkhyen nyid kyis 'gro la phan 'dogs mdzad pas sems can don rdzogs pa/ /gang dang 'brel pas rnam pa thams cad sna tshogs 'di nyid thob pa rnams kyi rigs/ /nyan thos byang chub sems dpa'i tshogs dang ldan pa sangs rgyas kyi yum de la 'dud/ /ces 'byung ngo / /de nyid bstan par bya ba'i phyir/ /rang gi snying la gnas pa zhes smos te/ bsgom par bya ba'i tha tshig go/ /phyung la ni yid kyi rang bzhin nyid du rdzogs par bya'o zhes bya ba'i tha tshig go/ /de dang lhan cig snyoms par 'jug par bya ste zhes pa ni nags tshal du slong mo za ba'i mtshan nyid can gyi rdzu 'phrul shugs dang ye shes kyi phyag rgya dang lhan cig tu bde ba chen po nyams su myong bar bya'o zhes bya ba'i don to/ /lung gi tshad ma nyid bstan par bya ba'i phyir snying la gnas pa zhes smos te/ yid kyi ngo bo nyid du bsgom pa'o/ /lha mo che zhes pa ni ye shes kyi phyag rgya zhes bya'o/ /rnal 'byor pa'i zhes pa ni thabs dang shes rab snyoms par 'jug pa'i mtshan nyid kyi sbyor ba dang ldan pa'o/ /rnal 'byor skyed ces pa ni/ /ting nge 'dzin gyi bde ba ster bar byed pa'o/ /de nyid kyi phyir sangs rgyas kun gyi yum du gyur pa ni sngar grub pa'i de bzhin gshegs pa rnams kyi yum ste sems tsam mo/ /shes rab kyi pha rol du phyin pa'i ngo bo ye shes kyi phyag rgya blangs nas bcom ldan 'das sangs rgyas rnams kyis dngos grub thob par gyur to/ /rdo rje dbyings kyi dbang mor bshad/ /ces pa ni/ rdo rje ltar mi phyed pa'i dbyings ni rdo rje dbyings te/ chos kyi dbyings kyi ye shes so/ /de la dbang mo ni chos nyid kyi ngo bos bdag po nyid du gnas pa zhes bya'o/ /mnyes par byas kyang zhes bya ba la sogs pas dam tshig dang ye shes kyi phyag rgya dag nye bar bsdus pa dag bstan to/ /mchog tu dga' ba'i bde ba nyams su myong bar byas pas ni zhes pa la bde ba chen pos yang dag par rigs pas so/ /'dod chags la sogs pa'i nyon mongs pas gos par mi 'gyur ba'o zhes pa ni 'dod chags la sogs pa rnam par sbyang bar bya ba'i phyir phyag rgya rnams blang bar bya'o/ /ji skad du/ sgyu ma dag ni thams cad las/ /bud med sgyu ma khyad par 'phags/ /ye shes gsum gyi dbye bas ni/ /gsal bar 'di las mtshon pas so/ /rdo rje pad+ma yang dag sbyar/ /kun rdzob tu ni gang la'ang med/ /lan cig tu ni nyams myong bas/ /rnal 'byor stobs kyis 'grub par 'gyur/ /ye shes 'jug pa'i rang bzhin ni/ /ji ltar dbye ba shes nas ni/ /slar yang rang bzhin de nyid de/ /rnal 'byor pas ni rtag tu mtshon/ /'dod chags la sogs zhes bya ba la sogs pas 'dod chags la sogs pa rnam par sbyong ba 'ba' zhig tu mi 'gyur gyi 'on kyang sangs rgyas nyid kyang thob par 'gyur ro zhes bstan to/ /legs par bslabs pa'i phyag rgya zhes pa ni/ /shes rab kyi rnam grangs yin pas so/ /ngo bo nyid shes pas zhes pa ni gang gi don du 'jug pa de nyid mngon du byas pas so/ /de yi rang bzhin mi shes pas/ /mi shes mun pas bsgribs pa rnams/ /dge dang mi dge'i las byas nas/ /'gro ba lngar ni 'khor bar 'gyur/ /zhes 'byung ngo / /bdag nyid rdzogs par 'gyur ba ste/ /zhes pa ni 'bad pa med par 'grub par 'gyur ro/ /dngos po'i chos ni 'di nyid yin te dam tshig gi phyag rgya dang ye shes kyi phyag rgya 'brel pas de kho na nyid snang ngo / /drang ba'i don ni spros pa med pa'i spyod pa bshad pas so/ /yang lung gis brjod par bya ste zhes pa 'dis shin du spros pa med pa'i spyod pa bstan par bya ste/ chos skur mtshan nyid gcig pa'o zhes pa ni chos kyi sku'i rang bzhin nyid de de bzhin nyid ces bya ba yum mo/ /ji skad du/ gcig min du ma ma yin rang gzhan phan 'dogs phun sum tshogs chen gzhir gyur pa/ /dngos min dngos med ma yin mkha' bzhin ro gcig ngo bo rtogs par dka'/ /gos med 'gyur med zhi ba mi mnyam dang mtshungs khyab byed spros pa med/ /rang gis rig pa dpe med rgyal ba'i chos kyi sku la rtag tu 'dud/ /ces 'byung ngo / /shes rab kyi pha rol du phyin pa zhes pa ni sems rnam par dag pa'i rim pas thob par byed pa'i thabs stong pa'o/ /de nyid yum ste bsgoms pa'i rang bzhin gyi 'bras bur gyur pa dang de las chos thams cad 'byung ba'i phyir ro/ /dbyibs dang kha dog sna tshogs pa'i/ /ji ltar sprin rnams du ma ste/ /nam mkha'i khams nas byung nas ni/ /de nyid du ni thim par 'gyur/ /de bzhin rang bzhin thams cad ni/ /snang ba gsum gyi rgyur gyur pa/ /yul ni ma lus la 'jug nas/ /'od gsal bar ni zhugs par 'gyur/ /ji ltar chu bo dang ba las/ /nya ni myur du ldang bar 'gyur/ /thams cad stong pa dam pa las/ /de bzhin sgyu 'phrul dra ba 'byung / /zhes bshad pas so/ /gnyis med de bzhin nyid sbyor bas/ /zhes pa ni sems rnam par dag pa'i rim pas so/ /dngos med ces bya don spyod pa'o zhes pa ni mngon du bya'o/ /des ni sems rnam par dag pa'i rim pa bstan to/ /longs spyod rdzogs dang mnyam gang yin/ /zhes pa ni cig car ram snang ba nye bar thob pa la sogs pa'i rim pas spros pa'i sku'o/ /de nyid sring mo ni sgyu ma'i dpe bcu gnyis kyis nye bar mtshon pa'o/ /rang lha'i rnal 'byor ldan pa yis / /zhes pa ni mi bskyod pa la sogs pa de bzhin gshegs pa'i mos pa dang ldan pas so/ /gsang sngags lugs kyis mnyes par zhes pa ni ye shes kyi sku bsgom par bya'o/ /des ni bdag la byin gyis brlab pa'i rim pa bstan to/ /sprul sku'i gzugs can bu mo zhes pa ni mig yor dang sgyu ma dang 'dra ba'i rdo rje'i sku'i mtshan nyid kyi zung du 'jug pa'i rim pas thob par bya ba'i sku zhes pa'i don to/ /sgrub pa pos ni bsgom pa zhes pa nye bar bsdus pa'o/ /ma dang zhes bya ba la sogs pa snga ma bzhin du phan yon bstan to/ /des ni zung du 'jug pa'i rim pa bstan pa yin no/ /nges pa'i don to zhes pa ni sems rnam par dag pa dang bdag la byin gyis brlab pa dang zung du 'jug pa'i rim pa bsten pas so/ /des ni sems shin tu spros pa med pa'i spyod pa bstan to/ /chos 'byung mngon par byang chub pa/ /chags sogs rol mo rgya che bas/ /chos dbyings mngon par byang chub pa/ /ji ltar rnyed pa'i spyod pa yis/ /bla med mngon par byang chub pa/ /mngon par byang chub sbyor ba yis/ /spro ba la sogs spyod pa ni/ /rnal 'byor pa rnams slob par byed/ /ces 'byung ngo / /rigs ngan la sogs pa zhes bya ba la sogs pas snod du ma gyur pa rnams kyis kyang 'bad pa chen pos bsgrub par bya ba sangs rgyas kyi go 'phang snod ma yin pa'i skye bos thob pa thos na ngo mtshar la sogs pa 'gyur ba bstan to/ /sgrib pa rnam par sel ba la sogs pa zhes pa ni las kyi rigs can gyi byang chub sems dpa' gzung ba ste spyod pa dang mthun pa'i phyir ro/ /spyad pa ni spyod pa'i mtshan nyid de bya ba nan tan grub pa'i ye shes kyi rang bzhin dang rlung gi khams rnam par dag pa'i ngo bo nyid kyis so/ /gzhan du na 'jam dpal la sogs pa ci ste ma blangs so zhes tshig gi don to/ /pad+ma dkar po lta bu'i gang zag la sogs pa dbang po rtul po zhes pa ni ma 'ongs pa'i sems can dang mthun pa'i rol mo rab tu bstan par byed pa'i byang chub sems dpa' rnams kyis de dag rjes su gzung bar bya ba'i don du de lta bu'i spyad pa spyod de/ gzhan du na 'khrul pa dang nyon mongs pa med pa'i byang chub sems dpa' rnams kyis sngar med pa'i thob par bya ba ci yod do/ /gang thos pas de rnams ngo mtshar ba dang rmad du byung ba thob par 'gyur ro/ /bde ba chen po zhes bya gtso bos ni/ /rnam pa sna tshogs rol mo'i mchog la 'jug / gang du spros pa thams cad dang bral bas/ /gcig kyang du ma'i ro yis gar mdzad pa'o/ /zhes 'byung ngo / /rdo rje'i tshig rnams shes pa ni/ /don zab pa yi tshig rnams so/ /dgongs pas bshad pa la zhes pa ni 'jig rten dang 'gal ba'i tshig gis de kho na nyid so sor ston par byed pa'o/ /sgra ji bzhin pa'i don la zhes pa ni brjod par bya ba'i tshul du don gzung bar bya ba yin gyi gsal bar bya ba'i tshul du ma yin no/ / brjod par bya ba dang gsal bar bya ba ni sgra'i don gnyis te sngar gtan la phab pa'o/ /ci zhes pa ni smod pa'i don la sbyor bas smad par bya ba bstan pa zhes dgongs pa'o/ /bcom ldan 'das ni tshogs gnyis dang ldan pa zhes pa ni kun rdzob dang don dam pa'i bdag nyid kyi rgyu dang 'bras bu mngon du mdzad pa dang sems can rnams la de ston par mdzad pa'o/ /'phags par gyur pa zhes pa ni mi bskyod pa la sogs pa de bzhin gshegs pa'i nang nas gtso bor gyur pa de ji ltar de bzhin du bstan pa'o zhes pas smod do/ /tshig 'di nyid kyis ni zhes pa ni/ /sngar bshad pas so/ /rang mthong bzhin du gzhan rnams la/ /nges par bskyed par bya ba'i phyir/ /dam pa rnams kyis 'jug pa ste/ / rtag tu slu ba med pas so/ /zhes byang chub sems kyi rnam 'grel las 'byung ngo / /de bzhin du/ skyob pa rang mthong lam ston pa'o/ /zhes 'byung ngo / /de ltar gyur pa gang yin pa des ni tshig ngan pa ston pa mi rigs so zhes bya bas tshig ngan pa gsungs pa'i gnas ma yin par bstan to zhes bshad do/ /rdzogs pa dang ma rdzogs pa zhes pa ni tsan+dan la sogs pa dang rin po che lta bu'i gang zag rnams so/ /de'i tshul rjes su byed pa byang chub sems dpa' dang de bzhin gshegs pa rnams yin te sa bcu pa dang bcu gcig pa thob pa'i phyir ro/ /der yang zhes bya ba la sogs pa 'dis gsung ba ni mi rigs so zhes bstan to/ /'phags pa ma yin pa rab tu 'jug pa'i las kyi mtshan nyid do/ /zhes pa ni mi dge ba'i las te lus la sogs pa'i rnam pa bcu mi dge ba'i las rnam pa bcu zhes bya ba'i don to/ /de gsung bas na gsungs pa ste/ / zhes pa ni bcom ldan 'das kyi bka' lung ngo / /tshig ngan pa zhes bya ba la sogs pa ni las 'dzin pa'i bsdu ba'o/ /mi bskyod pa la sogs pas zhes pa ni thugs rdo rje la sogs pas so/ /de la 'di skad ces bka' stsal to/ /zhes pa ni byang chub sems dpa' rnams la lan ston te rdo rje 'chang chen po dang de bzhin gshegs pa la sogs pa rnams kyang dbyer med pa'i phyir ro/ /gzhan du na rdo rje 'chang chen po gsung ba po yin na/ de nyid kyis the tshom sel bar bya ba'i rigs pa yin no zhes pa ci'i phyir de bzhin gshegs pa rnams kyis lan btab par 'gyur ro/ /bzlog pa ste zhes pa ni yongs su rdzogs pas bzlog pa zhes bya'o/ /khyed rnams kyi bsam pa shes kyis zhes bya ba la sogs pas don de nyid bstan to/ /dgongs pa de nyid bstan pa'i phyir/ /bcom ldan 'das kyi dgongs pas bshad pa'i zhes bya ba la sogs pas de nyid kyi don ston par byed pa'i dgongs pas bshad pas brjod par bya ba'i tshig rnams ni zab pa ma yin pa'i don dang ldan pa'i sgra ji bzhin pas dbye bar mi 'gyur te/ gang gi phyir pad+ma'i rtsa ba'i snal mas lcags kyi lu gu rgyud mi phyed pa bzhin no/ /de bas na log pa'i don bzung bas smod pa'i yid la byed pa byang chub sems dpa' rnams kyi dgongs pa yin no zhes bya'o/ /de ci'i phyir zhe na/ zhes bya ba la sogs pas sgra ji bzhin pa'i don med pa dgongs pas bshad pa'i de kho na nyid de bzhin gshegs pa rnams kyis bshad do zhes bstan to/ /chos rnams kyi de bzhin nyid ni zhes pa la chos thams cad kyi nang du khyab pa stong pa nyid ces bya ba'i tha tshig go/ /blo mchog tu gyur pa'i rin po che lta bu'i gang zag ces pa ni rdzogs pa'i rim pa 'ba' zhig la snod du rung ba'i slob ma rnams so/ /mi gnas pa'i mya ngan las 'das pa'o zhes pa ni zung du 'jug pa'i man ngag go/ /de la ye shes ni khong du chud pa zhes bya ba ni de'i bdag nyid du 'jug pa zhes bya ba'i don to/ /don dam pa'i bden pa zhes bya ba la sogs pas gnyis su med pa'i ting nge 'dzin gyi mtshan nyid rtogs par byed pa'o/ /rin po che lta bu'i gang zag rnams la chos nyid bstan par bya'o zhes ston to/ /gzhan la ni ma yin te zhes bya bas tsan+dan la sogs pa la dgag par bstan to/ /de bas zhes bya ba la sogs pas nye bar bsdu ba bstan to/ /byang chub thob par bya ba'i phyir spyod pa ni byang chub spyod pa ste/ /spros pa dang bcas pa la sogs pa'i spyod pa gsum mo/ /gnas ni de'i 'bras bur gyur pa'i byang chub spyod pa'i gnas te rdo rje 'chang nyid du bstan to/ / 'di ni 'di nyid de zhes bya ba la sogs pas the tshom med par spyod pa des rdo rje 'chang nyid thob par 'gyur ro zhes bstan to/ /sgra ji bzhin pa zhes pa ni spyod pa ji ltar gsungs zhes bshad pas so/ /bshad zin to zhes pa ni le'u dang po las so/ /de'i rnam par smin pa tsha ba'i phyir zhes pa ni mnar med pa la sogs pa la ltung ba'i rgyu mthun pa'i 'bras bu yin pas so/ /bya ba ma yin pas zhes pa ni srog gcod la sogs pa mi byed pas so/ /bcom ldan 'das kyi bka' las 'das pa'i zhes bya ba la sogs pa ni bde bar gshegs pa'i bka' las 'das pa'i mtshan nyid kyi rtsa ba'i ltung ba thos pas so/ /rtsa ba'i ltung ba'i 'bras bu bstan par bya ba'i phyir dmyal ba'i 'jigs pa zhes bya ba smos te/ dka' ba ma spangs pas dus byas te khyod dmyal bar ltung bar 'gyur zhes bshad pa'i phyir ro/ /bya ba la rmongs pas kun du 'khor bar 'gyur te zhes pa ni bsam pa 'di yin te/ bcom ldan 'das kyis gsungs pa'i kha na ma tho ba dang bcas pa byed pa'am yang na srog gcod pa la sogs pa mi byed do zhes phyogs gcig la brten pa dang / phyogs gnyis pa yongs su spong ba'am yang na de las ldog pa zhes rnam pa thams cad du bcom ldan 'das kyis bka' lung blang bar bya ba yin nam ma yin zhes the tshom dang ldan pa'i blos gnyis pa'ang mi bya'o zhes yid mi bde bar 'gyur ro / /phyi nas zhes bya ba la sogs pas nges pa'i gsung thos pa'i dga' ba las 'byung ba'am rgyal ba thob pa nyid du bstan to/ /nges pa'i don zhes pa ni rdo rje'i tshig gi khyad par te sngar khong du chud pa'i don ji lta ba bzhin du rigs pa'i phyir ro/ /sngon chad ma rtogs pa'i chos nyid rtogs pas zhes pa ni dgongs pas bshad pa'i don thos pas so/ /de yid rtse gcig tu gyur pas zhes pa ni dgongs pas bshad pa'i chos nyid kyi mtshan nyid brjod par bya ba la bsam pa dang bsgom pa la zhen pa'i yid dang ldan pa'i phyir ro/ /drang ba'i don to zhes pa ni thos pa la sogs pa'i rang bzhin gyis shes rab kyi 'brel pa bstan pa'i phyir ro/ /yang lung gis bshad pa zhes bya ba la sogs pas nges pa'i don bstan par bya ste/ mi g.yo ba ni sems rnam par dag pa'i rim pas thob par bya ba'i stong pa chen po'o/ /de las kyang gsang ba ni thams cad stong pa'o/ /zhi ba ni rnam par shes pa dang snang ba med pa'o/ /gcig ni gnyis su med pa'o/ /bde ba zhes pa ni bde ba chen po'o/ /rang bzhin thams cad spangs pas na mchog go/ /rdzogs pa'i byang chub thob byed pa/ /zhes pa ni rdo rje 'chang chen po'i go 'phang thob par byed pa'o/ /'di ni dgongs pas gsungs zhes pa ni bcom ldan 'das kyis gsungs pa'o/ /de yang rnal 'byor pas mngon du bya'o zhes bya ba 'dis sems rnam par dag pa'i rim pa bstan to/ /nam mkha' mtha' yas sbyor ba yis/ /zhes pa la nam mkha' bzhin du mtha' yas pa'i sgyu ma lta bu'i sbyor ba yis so/ /de'i 'brel pas gzugs la sogs pa ni sgyu ma'i rnam pas mtshon pa'i ye shes kyi sku yang mtha' yas pa ste sgyu ma'i dpe bcu gnyis kyi sgo nas mtshon pa'o/ /de nyid de bzhin gshegs pa dang / /de bzhin byang chub sems dpar bshad/ /ces pa ni sgyu ma nyid kyis nye bar mtshon pa'i lha'i sku'i 'brel pa dang ldan pa'i phung po dang khams dang skye mched yin no zhes bya ba'i don to/ /de nyid kyi phyir khams gsum pa thams cad bstan pa la sogs pas bsdu ba ni 'dul bar mdzad pa rnal 'byor pas ye shes kyi sku gzung ba gang yin pa de nyid lus kyi dkyil 'khor yin te dkyil 'khor pa thams cad de nyid du bsdus pas so/ /lus rtog la zhes pa ni sgyu ma'i lus de las sar zhing sar ba'i dkyil 'khor gyi 'khor lo'i rim pas spro bar byed pa gang yin pa de ni byang chub sems dpa' rgyal bar gyur zhes bstan to/ /des ni longs spyod rdzogs pa dang sprul pa'i sku'i rang bzhin gyi bdag la byin gyis brlab pa'i rim pa bstan pa yin no/ /de ltar bde ba ni de dang 'dra ba'i bde ba chen po bskyed pas so/ /bskul ba ni khyab pa'i rnal 'byor pa rnams kyis mi shes pa ni 'dod chags la sogs pa rnam par rtog pa thams cad yongs su gcod pas rnam par mi rtog par gyur pa gang yin pa de nyid byang chub sems dpa' rgyal bar 'gyur ro zhes bstan to/ /des ni mngon par byang chub pa'i rim pa bstan pa yin no/ /nges pa'i don to zhes pa ni sems rnam par dag pa dang bdag la byin gyis brlab pa dang / mngon par byang chub pa'i rim pa gsum gyi mtshan nyid can gyi rdzogs pa'i rim pa bstan pa'i phyir ro/ /sgra ji bzhin pa'o zhes pa ni/ rdo rje 'chang chen po'i gsol ba 'debs pa bstan pa'i phyir te/ sogs pa'i sgras shes par bya'o/ /de dang 'dra ba'i zhes pa ni spros pa thams cad las nges par grol ba'o/ /gnyis su med pas ni zhes pa ni zung du 'jug pa'i ting nge 'dzin gyi mtshan nyid la zhugs pa'o/ /de lta bu zhes bya ba la sogs pa ni zung du 'jug pa'i ting nge 'dzin gyis thob pa'i rdo rje'i sku'o/ /'od zer yang dag par bsdus pa zhes pa ni rang gi sku las byung ba'o/ /reg par gyur pa tsam gyis zhes pa ni zla ba'i 'od zer dang 'dra bar bsil ba byang chub sems dpa'i lus las phab pas so/ /rang rang gi stan la yang gnas par gyur to zhes pa ni pad+ma dang zla ba dang nyi ma la sogs pa'i gdan la bzhugs pa ste/ bsgoms pa las byung ba'i brgyal ba sangs nas dran pa thob par gyur to zhes bya ba'i don to/ /de nyid bstan par bya ba'i phyir dran pa slar yang so sor rnyed par gyur to zhes bstan to/ /drang ba'i don to zhes pa ni spro ba tsam ston par byed pa'i sogs pa'i sgras so/ /stong pa nyid gsum ni stong pa dang shin du stong pa dang chen po stong pa ste sngags dang phyag rgya'i rim pas thob par bya'o/ /'od gsal ba zhes pa ni stong pa gsum gyi rgyu can 'bras bur gyur pa ste thams cad stong pa'o/ /stong pa shin tu stong pa dang / /stong pa chen po gsum pa ste/ /bzhi pa thams cad stong pa ni/ /rgyu dang 'bras bu'i dbye bas so/ /zhes 'byung ngo / /zung du 'jug pa ni gang gi phyir zung du 'jug pa'i rim pa las rgyu dang 'bras bu'i dbye bas bsgom pa ni med do/ /rgyu dang 'bras bu'i bdag nyid ni/ /rang bzhin med par byas nas so/ /rnal 'byor pa ni gang gnas pa/ /zung 'jug sangs rgyas kyis gsungs so/ /mi phyed pas na rdo rje ste/ /zhes pa ni zung du 'jug pa ting nge 'dzin la rnam pa dang bcas pa la sogs pa'i rnam par rtog pa dang mi gtsang ba dang gtsang ba la sogs pa'i rnam par rtog pa yang 'byung bar mi 'gyur ro/ /rnam bcas dngos po'i rtog pa dang / rnam pa med pa'i rtog pa ste/ /gcig tu byas nas spyod pa ni/ /zung 'jug rim pa de bzhin no/ /ji ltar dri bzang ga bur dang / /de ltar mi gtsang dri bzhin no/ /zhes bya ba la sogs pa 'byung ngo / /de skad ces bya ba la sogs pa ni de 'dra ba'i ting nge 'dzin la bcom ldan 'das bzhugs par gyur to/ /mi g.yo ba zhes bya ba la sogs pas stong pa chen po la sogs pa la gnas pa byang chub sems dpa'i gzugs kyi longs spyod rdzogs pa dang sprul pa'i sku gnyis dbyer med pas gnas pa rdo rje 'chang chen po'i bdag nyid thob par gyur pa'o zhes pa rang gi ting nge 'dzin dang mtshungs par gyur to/ /de ltar byin gyis brlabs pa tsam gyis zhes pa ni rim pa lnga'i de kho na nyid khong du chud pas so/ /snang ba'i 'od kyi tshogs kyis zhes pa ni kha dog lnga pa'i 'od zer gyi tshogs kyis so/ /rlung ni reg pa'o zhes pa ni reg pa'i yon tan dang ldan pas so/ /des reg pa tsam gyis zhes pa ni 'bru mang po la 'od ni mchog tu gzung ba'o/ /tsam zhes bya ba ni rlung gi de kho na nyid de 'od gsal ba'o/ /des na 'od de khams phra ba la rjes su zhugs pa'i ye shes kyi 'od zer 'phros pas zhes smos pa la bsam pa ni 'di yin te/ zung du 'jug pa'i ting nge 'dzin la zhugs pa'i rdo rje 'chang chen pos 'od zer gyi 'khor lo spros la/ byang chub sems dpa' rnams 'od gsal ba'i go 'phang la 'jug pa'i sems kyi rgyud la 'jug ste/ cig car ram snang ba mchod pa la sogs pa'i rim pas bdag la byin gyis brlab pa'i rim pas thob par bya ba yid kyi rang bzhin gyi ye shes kyi sku blangs la rang rang gi gdan gyi brdar bstan pa'i 'jig rten gyi khams la sems can gyi don bya ba la nus pa dang ldan par mdzad do zhes ston to/ /de nyid bstan par bya ba'i phyir 'od gsal ba las ldang bar 'gyur ro/ /zhes bya ba la sogs pas bstan to/ /nges pa'i don te zhes pa ni sems rnam par dag pa dang bdag la byin gyis brlab pa dang zung du 'jug pa'i rim pa bstan pa'i phyir ro/ /zab pa'i chos ston pa zhes pa ni 'gal ba'i sgra'i sgo nas spyod pa gsum gyis thob par bya ba'i de kho na nyid bstan pa'o/ /de la mkhas pa ni 'jig rten las 'gal ba'i sgra'i sgo nas gsungs pa'o/ /sngon ma byung ba zhes pa ni sgra ji bzhin pa tsam gyis srog gcod pa la sogs pa la 'jug pa'o/ /gyur pa ni dgongs pas bshad pas de'i don yongs su spangs te de kho na nyid kyi don la 'jug pa'o/ /rmad du gyur pa ni gzhan thos pa dang rnam pa gzhan sgrub pa'o/ /rangs te zhes pa ni rmad du byung ba nyid kyi 'bras bur gyur pa'i sems kyi gnas skabs kyi khyad par ro/ /bka' stsal pa zhes pa ni 'gal ba'i sgras gtso bor gyur pa'i tshig bstan pas so / /rtogs shing zhes pa ni mngon du byas pa'o/ /ting nge 'dzin khyad par zhes bya ba ni sems rnam par dag pa la sogs pa'i mtshan nyid kyi rdzogs pa'i rim pa'o/ /des bskyed pa ni rdo rje 'chang gi go 'phang thob pas sems can gyi tshogs zhes pa ni khams gsum la gnas pa'i rin po che lta bu'i gang zag gang yin pa'o/ /de rnams gzigs pa ni gzigs pas dges pas khyab par gyur pa'o/ /rnam pa de lta bu zhes pa ni 'chad par 'gyur ba'o/ /chos dang yang dag par ldan pa zhes pa ni bcom ldan 'das kyis ma nges pa med pa yon tan gyi tshogs la bstod pa dang yang dag par ldan pa'o/ /chos bstan pas dges pas zhes pa ni rdzogs pa'i rim pa'i rgyur gyur pa spyod pa gsum gyi mtshan nyid can gyi chos bstan pas mgu ba zhes bya ba'i don to/ /chos bstan pa'i sgo nas zhes bya ba la sogs pa ni des gsungs pa'i chos dang gsung ba po la dbyer med pa'i phyir ro/ /rjod par byed pa dang brjod par bya ba'i bdag nyid can rdo rje 'chang chen po zhes le'u dang po nas bstan pas so/ /bstan pa'i mtshan nyid can gyi chos so/ /zhes pa la rjod par byed pa'i ngo bo'o/ / des bstan pa'i don zhes pa ni brjod par bya ba'i ngo bo'o/ /mtshon pa zhes pa ni 'chad pa po'i 'dod pas sgra rnams kyi sbyor ba yin gyis gzhan du ni ma yin no/ /rjod par byed pa gang dang gang / / 'chad pa pos ni nges sbyor ba/ /phyi yi don la ma rtogs pa/ /tshig de da bzhin rjod byed pa'o/ /zhes 'byung ngo / /chos ni brjod pa'i mtshan nyid do/ /zhes bya ba la sogs pa la rjes su smra ba tsam yin no/ /gang yin zhes bya 'dri ba la/ /chos ni thos pa'i rang bzhin no/ /zhes bya ba la sogs pas lan btab pa bstan te/ chos ni sgra yin pas rna bas gzung bya yin pa'i phyir ro/ /don dag pa ni bsam pa'i rang bzhin no zhes pa la rigs pa bzhi'i sgo nas chos de nyid rnam par dpyad na dag pa'i don du 'gyur te don nges par rtogs pa dang the tshom bral bas so/ /de dag mngon sum byas pa ni thos pa dang bsam pa rdzogs na chos kyi don bsgom par bya bar rigs so/ /de nyid bstan par bya ba'i phyir/ /rdo rje 'chang chen po zhes bstan to/ /de lta bu khyod la phyag 'tshal 'dud/ /ces bya ba 'dis brjod par bya ba dang rjod par byed pa dang de'i gzhi can gyi thos pa dang bsam pa dang de'i bsgom pa dang de'i 'bras bur gyur pa de kho na nyid kyi sku gcig pa rdo rje 'chang la bstod pa bstan to/ /rdo rje 'chang yang kun rdzob dang don dam pa dbyer med pa'i ngo bo yin pas phyag 'tshal ba'i sgra gnyis pa bstan to/ /de bzhin du 'og tu yang sbyar ro/ /sku la sogs pa phan tshun tha dad pa ma yin no/ / zhes pa ni sems ni lus lta bu zhes bya ba la sogs pa gsungs pa'i phyir ro/ /'od gsal ba ste zhes pa ni glo bur gyi dri mas mi gos pa'i phyir ro/ /de'i gnas zhes bya ba la sogs pas sngags dang phyag rgya'i rim pas thob par bya zhes bya'o/ /skye dang 'gag pa dang bral ba zhes pa ni 'od gsal ba ste 'dus ma byas pa'i phyir ro/ /snang ba rnam par dag pa zhes pa ni/ snang ba la sogs pa gsum spong bas so/ /de ni sems rnam par dag pa'i rim pa'i sgo nas bstod pa'o/ /'ja' tshon ltar zhes bya ba la sogs pas 'od gsal ba las spros pa'i ye shes kyi sku'i bdag nyid gzung bar bstan to/ /des ni bdag la byin gyis brlab pa'i rim pa'i sgo nas bcom ldan 'das la bstod pa'o/ /sangs rgyas thams cad kyi yon tan gyi zhes pa ni stobs dang mi 'jigs pa la sogs pa rnams so/ /thugs nyid yin pas na zhes pa ni de rnams kyis bsags pas na thugs te rnam pa thams cad mchog dang ldan pa'i rdo rje'i sku'i rang bzhin khyod yin no/ /de bzhin gshegs pa rnams kyi thog mar gyur pas zhes pa ni rdo rje 'chang chen po'i ngo bo yin pas so/ /gtso bo ni mi slob pas so/ /de 'ba' zhig tu ma zad kyi 'on kyang 'das pa la sogs pa'i dus la gnas pa'i dngos po rnams zhes pa ni sems can dang snod kyi 'jig rten gyi rang bzhin gnyis ka'i dngos po rnams so/ /nyid yin zhes pas dngos po thams cad khyab par byed pa bcom ldan 'das bstan to/ /dngos po thams cad kyi ngo bo nyid du gyur pas so zhes pa ni chos thams cad kyi nang du chud pa'i chos nyid kyi ngo bo yin pas so/ /'od gsal ba zhes pa ni 'od gsal ba'i 'bras bur gyur pa'i rdo rje'i sku khyod yin no/ /khyed nyid khams gsum pa yang yin te zhes pa ni khams gsum gyi bdag nyid yin pas so/ /sgyu 'phrul gyi dbang brnyes pas zhes pa ni sku la sogs pa'i dbang phyug brgyad thob pas so/ /bden pa gnyis kyi bdag nyid can yin pas zhes pa ni zung du 'jug pa'i de kho na nyid kyi rang bzhin yin pa'i phyir ro/ /des ni zung du 'jug pa'i rim pa'i sgo nas bcom ldan 'das la bstod pa'o/ /me long lta bu'i ye shes zhes pa ni nyon mongs pa dang shes bya'i sgrib pa'i sprin gyis ma bsgribs pa'i phyir ro/ /de las yang dag par byung ba ni rnam par snang mdzad de zhes pa ni ma 'brel pa rnam par gcod pas lha sbyin ni gzhu 'dzin pa bzhin no/ /de'i ngo bo nyid yin pa'i phyir ro zhes pa ni gtan tshigs kyang de bzhin no/ /de bzhin gshegs pa gzhan rnams kyi ni me long lta bu'i ye shes kyi ngo bo nyid med pa ma yin no/ /nam mkha' ni re zhig 'od gsal ba ste de'i lam ni de thob par byed pa'i ye shes te mnyam pa nyid kyi ye shes so/ /de las byung bas gnas par mdzad cing zhes pa ni skad kyi byings don du ma yin pa'i phyir gnas pa 'byung ba la 'jug go/ / nam mkha' zhes bya ba la sogs pas chos kyi dbyings kyi ye shes kyi rang bzhin gyi thugs gang la yod pa de ni mi bskyod pa ste ye shes dang rjes su mthun par bstan to/ /pad+ma'i rigs so zhes pa ni yan lag bcu gnyis pa'i gsung rab la 'jug pa la de nyid kyis dbang byed pas so/ /de rnams kyi mchog ces pa ni de rnams sprul pa'i ngo bo nyid do/ /'gro ba ma lus pa'i don ni zhes pa la bstan pa dang smin pa dang grol ba la sogs pa stobs kyi rnal 'byor gyi mtshan nyid kyi rang bzhin rlung gi khams kyi ngo bo ste/ de rnams bya ba nan tan grub pa'i ye shes kyis rdzogs par 'gyur bas de'i bdag nyid don yod grub pa 'dir bstan to/ /rigs lnga'i bdag nyid kyi zhes pa ni rdo rje 'chang chen po ste bdag nyid du gyur pas zhes bya ba'i tha tshig go/ /ji skad du/ rigs ni rnam pa brgyar bstan pa/ mdor bsdus pas ni rnam pa lnga/ /sku gsung thugs kyi dbye ba yis/ /phyi nas rnam pa gsum du 'gyur/ /de ni rang byung bcom ldan 'das/ /gcig pu nyid de lhag pa'i lha/ /zhes 'byung ngo / /bdag dang gzhan gyi don sgrub pa/ /zhes bya ba'i spyod pa ni zhes pa la sngar bshad pa'i rnam pa gsum gyi spyod pa'i rigs pas rang dang gzhan gyi don 'grub par 'gyur ro/ /de nyid khyad par du gyur pas na zhes pa ni theg pa dman pa la sogs pa la ltos pa dang / bya ba'i rgyud la sogs pa la ltos pas zhes tshig lhag ma'o/ /gang gi phyir bde ba'i ngo bo dang yun ring ba ma yin pas bsgrub par bya ba'i spyod pa ni lam gzhan dang rgyud gzhan las ma bstan te/ brtul zhugs dang sbyangs pa'i yon tan la sogs pas lus ngal bar byed pa'i phyir dang lan gsum bkrus pa la sogs pas lus gzir bar byed pa'i phyir ro/ /de'i don ston pa'i zhes pa ni spyod pa gsum rjod par byed pa'i gzhung gi tshogs la le'u zhes bya'o/ /dgongs pa ma yin no zhes bya ba ni yongs su gsal ba'i de kho na nyid bstan pa'i phyir ro/ /sgron ma gsal bar byed pa'i 'grel pa'i TI kA las le'u lnga pa'i rgya cher bshad pa'o// //bdag la byin gyis brlab pa'i nga rgyal zhes bya ba la sogs pas le'u drug pa'i bshad pa rtsom par byed de/ /bdag ni lha'i sku la'o/ /byin gyis brlab pa ni sku la sogs pa byin gyis brlab pa'o/ /sngon du 'gro ba'i spyod pa bya ba ni rnal 'byor chen po'i mtha'i bar du dang por sbyor ba bsgoms nas lha'i rnam pa thob pas spyod pa bya'o/ /gzhan du na khyi dang spyang ki la sogs pa dang / /so so'i skye bo'i bzhin du spyad pa thal bar 'gyur ro/ /sku la sogs pa byin gyis brlab pa'i rim pa zhes pa ni rnal 'byor dang rjes su rnal 'byor dang / shin tu rnal 'byor rdzogs nas rnal 'byor chen po'i mtshan nyid can gyi dang po'i sbyor ba'i yan lag tu gyur pa zhes bya ba'i don to/ /rab tu ston to zhes pa ni rab tu phye nas bshad par bya ba'i don to/ /mi bskyod pa zhes bya ba ni sku la sogs pa de'i rang bzhin yin pas so/ /de byin gyis rlob pa'i gsang sngags te zhes pa ni gang brjod pas thugs rdo rjes sgrub pa po byin gyis brlab par 'gyur ro/ /gang la ming de skad ces bya ba'i thugs rtse gcig tu mdzad de zhes pa ni thugs byin gyis rlob par byed pa'i sngags rjes su dran pa'i mtshan nyid kyi blo zhes bya ba'i don to/ /thugs byin gyis brlab pa gang yin pa zhes pa ni rtog pa dang bcas pa'i tha mal pa'i ngo bo bral nas ston ka'i zla ba'i dkyil 'khor rdzogs pa dang 'dra ba gang gis byed pa de la de skad ces bshad do/ /yid skyob pas na zhes pa la de la gcig tu gzhol bas rnam par rtog pa gzhan las skyob pas so/ /dbang po dang ni yul dag la/ /brten nas gang zhig yid byung ba/ /yid de man zhes bshad pa ste/ /tra ni skyob pa'i don yin no/ /zhes 'byung ngo / /bka' stsal par gyur to zhes pa ni bcom ldan 'das kyis te tshig lhag ma'o/ /oM zhes bya ba la sogs pa ni thugs la byin gyis brlab pa'i sngags so/ /de brjod pa tsam gyis thugs byin gyis brlab par 'gyur ro/ /me long lta bu'i ye shes kyi bdag nyid can zhes pa la nyon mongs pa dang shes bya'i sgrib pa'i rdul rnams med pa dang mi phyed pa'i phyir ro/ /de byin gyis rlob pa'i sngags te/ zhes pa ni skad kyi byings don du ma yin pas gnas kyi sgra ni byin gyis brlab pa'i rnam grangs so/ /sku byin gyis brlab pa'i sngags gsungs pa ni zhes pa la gang gi lus kyi tha mal pa'i ngo bo spangs nas mtshan sum cu rtsa gnyis dang dpe byad bzang po brgyad cus rnam par spras pa/ /rnam pa thams cad kyi mchog dang ldan par bya ba de la de skad ces bya'o/ /oM zhes bya ba la sogs pa ni lus byin gyis brlab pa'i sngags so/ /de brjod pas lus byin gyis brlab par 'gyur ro/ /tshad med gang las brnyes pa zhes pa ni byang chub kyi sems la spyod pa'i rnal 'byor pa rnams yun ring du 'tsho bar 'gyur ro/ /de phyir 'bad pa thams cad kyis/ /'pho ba'i chags pa bral bar bya/ /zhes 'byung ngo / /rag+ta gyen du 'dren pa'i bcom ldan 'das sangs rgyas rnams ni bskal pa'i bar du thub par 'gyur te byang chub kyi sems mi 'pho bas so/ / de dus brtsams nas de ni rtog pa med/ /de yi dbyibs dang kha dog ji ltar mtshan/ /bsam gyis mi khyab rnam par smin pa'i sku/ /sdom pa de la bya ba byas pas thob/ /ces rdo rje hUM mdzad kyi sgrub thabs las 'byung ngo / /de'i ngo bo ni tshe dpag tu med par bstan to/ /so sor rtog pa'i ye shes kyi bdag nyid can zhes pa ni mnyam pa nyid kyi ye shes dang tha mi dad pa so sor rtog pa'i ye shes yin te chos thams cad kyi rang bzhin rnam par dpyad par byas na mnyam pa nyid kyis khyab pa'i phyir ro/ /de med pas dngos po thams cad so sor rtog par mi 'gyur ro/ /de'i rang bzhin 'od dpag tu med pa ste chos rnams so sor rtog par mdzad pas so/ /de byin gyis rlob par byed pa zhes pa ni de mngon du 'gyur ba dang brtan pa nyid sgrub pa'i phyir ro/ /mi phyed pa'i ngo bo nyid kyi sngags te zhes pa ni gsung gi dbang phyug la sogs pa'i dngos grub dang dug dang dbral ba la sogs pa la nus pa ma nyams pa'o/ /tha mal pa'i ngag spangs nas yan lag drug cu dang ldan pa g.yas su 'khyil ba'i dung dang 'dra ba'i mgrin pa la gnas pa'i gdong gi dkyil 'khor khyab par byed pa'i ljags dang bcas pa gang gis byed pa de ni gsung byin gyis brlab pa'i sngags gsungs pa ste snga ma bzhin no/ /oM zhes bya ba la sogs pa sngags te de brjod pas gsung byin gyis brlab par 'gyur ro/ /de ltar zhes bya ba la sogs pas sngags rnams la mdor bstan pa dang rgyas par bshad pa yin te/ rim pa gang gis sku la sogs pa byin gyis brlab par bya zhes bstan to/ /mi bskyod pa la sogs pa'i ngo bo nyid ni shin du rnal 'byor gyi rim pas shes par bya'o / /nyan thos la sogs pas yongs su mi shes pas na zhes pa ni nyan thos nas brtsams te rnal 'byor gyi rgyud kyi rnal 'byor pa'i bar du zhes bya ba'i don to/ /sku dang gsung dang thugs rdo rje gang yin pa zhes pa ni bskyed pa'i rim pas sems dpa' gsum gyi bdag nyid yin pas so/ /de la dam tshig sems dpa' ni sku'i rang bzhin te phyi'i gzugs su snang bas so/ /ye shes sems dpa' ni gsung gi ngo bo ste bar na gnas pas so / /ting nge 'dzin sems dpa' ni thugs kyi rang bzhin te phra ba'i ngo bo yin pas so/ /yang na lha'i sku dam tshig sems dpa' zhes bya ba sku la sogs pa'i rang bzhin zhes bya ba'o/ /de nyid bstan par bya ba'i phyir lus zhes smos te/ rnal 'byor gsum gyis rdzogs pa'i rdo rje 'chang chen po la sogs pa'i sku'o/ /lha rnams kyi 'khor lo'i gzhir gyur pa'i phyir ro zhes pa ni rjes su rnal 'byor dang / /shin du rnal 'byor gyi rim pas de bzhin gshegs pa dang lha mo dang byang chub sems dpa' dang khro bo thams cad kyi ngo bo yin pas so/ /spyan la sogs pa bkod pa gsum pa zhes pa ni 'khor dang bcas pa'i spyan ma la sogs pa'i lha mo gsum zhes bya ba'i don to/ /bdag dang gzhan gyi don phun sum tshogs pa'i gzhir gyur pa'i phyir ro zhes pa ni spyan ma la sogs pa gsum po spros nas zhi ba la sogs pa'i phrin las grub pas na gzhan gyi don phun sum tshogs pa dang / des 'gugs pa'i rnam par snang mdzad la sogs pas rang gi sku la sogs pa byin gyis brlab pa'i phyir rang gi don phun sum tshogs pa yang 'grub par 'gyur ro/ /sku rdo rje la sogs pa byin gyis brlab pa'i phyir zhes pa ni rnam par snang mdzad la sogs pas rang gi lus la sogs pa de'i rang bzhin du bya ba'i phyir ro/ /spros pa ni yi ge oM la sogs pa las 'od zer gyi sgo nas phyung ba zhes bya ba'i don to/ /mi bskyod pa la sogs pa ste zhes pa la yid kyi rnam par rtog pa'i 'jig pa las skyob pa'i phyir ro/ /de rnams kyis mtshon pa gang yin pa zhes pa ni brjod par bya ba dang / rjod par byed pa mi phyed pa'i phyir dang / /rgyu dang 'bras bu'i dbye bas 'chad par 'dod pa ma yin pa'i phyir ro/ /des ni yi ge gsum gyis so/ /mgo dang lkog ma dang snying ga'i phyogs su zhes bya ba ni zla ba dang pad+ma dang rdo rje rnams kyis mtshon pa'o/ /rnam par bkod pa zhes pa ni de rnams bkod nas so/ /des shin du mtshan pa zhes pa ni lha'i sku gang yin pa de nyid sngar bshad ma thag pa zhes pa la/ sku la sogs pa byin gyis brlab pa'i sngags sngar bshad pa gsum gyis dam par gyur pa zhes pa ni de bzhin gshegs pa mngon du byed pa rnams kyis byin gyis brlab po zhes bstan pa bskyed par bya'o/ /'dir bsdus pa'i don ni rnal 'byor dang rjes su rnal 'byor dang shin du rnal 'byor byas la/ /rang gi mgo bo dang lkog ma dang snying gar zla ba dang pad+ma dang / nyi ma'i dkyil 'khor bkod la de rnams su dkar po dang dmar po dang nag po yi ge gsum bkod nas/ /oM la sogs pa'i yi ge gsum po'i thig le'i nang nas spyan ma dang gos dkar mo dang / mA ma kI rang dang 'dra ba'i mtha' yas pa'i spyan ma la sogs pa'i 'khor gyis bskor bar spros te/ des nam mkha'i khams gang bar byas nas 'og min dang bde ba can dang mngon par dga' ba'i sangs rgyas kyi zhing la bzhugs pa'i rnam par snang mdzad dang / 'od dpag med dang mi bskyod pa gsum spyan ma la sogs pa'i tshogs des tshig snyan pa dang / sgeg pas mgu ba byas la dpung pa'i zhags pas 'khyud cing bkug la shar phyogs kyi sgo ru pad+ma dang / zla ba'i dkyil 'khor gyi steng na bzhugs par mthong nas/ dpal ldan sku yi rdo rje 'chang / /zhes bya ba la sogs pa gsum gyis gsol ba btab nas mchod pa rnam pa lngas mchod la spyan ma la sogs pa'i tshogs de nyid dang bcas pa yi ge gsum de dag la 'jug cing / sangs rgyas kun gyi sku gang yin/ /zhes bya ba la sogs pa'i tshigs su bcad pa gsum gyis nga rgyal byas la sku gsung thugs ni rnam pa thams cad kyi mchog dang ldan pa la sogs pas mtshan pa mthong ste/ oM sarba ta thA ga ta kA ya badzra swa b+hA ba At+ma kou0f85haM/ /zhes bya ba la sogs pa'i sngags gsum gyis byin gyis brlab par bya'o zhes pa 'di ni sku la sogs pa byin gyis brlab pa'i bdag nyid can gyi rnal 'byor chen po bstan pa ste dang po sbyor ba'i ting nge 'dzin to/ /drang ba'i don to zhes pa ni bskyed pa'i rim pa'i yan lag tu gyur pa'i dang po sbyor ba'i ting nge 'dzin gyi phyogs gcig pa rnal 'byor chen po so sor bstan pas so/ /rdzogs pa'i rim pa'i rnal 'byor pa rnams kyis zhes pa ni/ rdo rje bzlas pa la sogs pa'i rim pa lnga po bsgom pas so/ /bshad pa'i rgyud las zhes pa ni rdo rje phreng ba'i rgyud ces bya ba las so/ /de nas dpal chen zhes bya ba la sogs pa'i ting nge 'dzin gyi don sngar bshad zin to/ /oM zhes bya ba dang po zhes pa ni rnam par snang mdzad do/ /sarba ni rin chen 'byung ldan te nam mkha'i khams ni thams cad kyi bdag nyid yin no/ / ta thA ga ta ni 'od dpag tu med pa ste byang chub kyi sems de bzhin gshegs pa'i bdag nyid yin pas so/ /yon tan yin pas zhes pa ni snying stobs dang rdul dang mun pa ste yon tan gsum mo/ /des na rnam par mdzad dang rin chen 'byung ldan dang 'od dpag tu med pa ste de bzhin gshegs pa gsum zhes bya ba'i don to/ /tsit+ta badzra zhes bya ba ni tshig gnyis te ldan pa ni gcig tu gyur nas tshig gcig go/ / des na mi bskyod pa yin te thugs rdo rje'i rang bzhin yin pas so/ /swa b+hA wa At+ma ko zhes pa ni rlung gi khams kyi rang bzhin don yod grub pa ste lnga pa'o/ /a haM zhes pa ni sna tshogs kyi nga rgyal gyi rang bzhin du gnas pa bcom ldan 'das rdo rje 'chang ste de nyid du drug pa'o/ /sku drug ces bya ba la sogs pas de dag dang de bzhin gshegs pa drug sku gsum gyi ngo bo yin te/ de'i rang bzhin nga yin no zhes lhag par mos pa nyid du thugs byin gyis brlab pa bstan to/ /de bzhin du 'og ma la yang sbyar ro/ /de nas zhes bya ba la sogs pa ni sngar bshad zin to/ /oM tshangs par bshad ces pa ni dang po yin pa dang / gcig yin pas tshangs pa ni rnam par snang mdzad de dang po'o/ /sarba ta thA ga ta zhes pa ni rin chen 'byung ldan te de bzhin gshegs pa thams cad kyi nang na chos kyi rgyal srid la mnga' mdzad pa'i phyir ro/ /chags gtogs dbang phyug ces pa ni 'dod chags rnam par dag pa'i rang bzhin te 'od dpag tu med pa'o/ /kA ya zhes pa ni kA ni sgra ste des na gsung gi rang bzhin gsum pa'o/ /badzra ni thugs rdo rje ste bzhi pa'o/ /snyan ngag gi rig byed dang mchod sbyin gyi rig byed dang srid srung ba'i rig byed dang mang du brjod pa'i rig byed de bzhi pa'o/ /swa b+hA wa At+ma ko zhes pa ni snga ma bzhin du don yod grub pa'o/ /'dod lha ni gzugs la sogs pa 'dod pa'i yon tan lnga ste des na lnga'o/ /a haM ni snga ma bzhin du rdo rje sems dpa'o / /smin drug ni smin drug gi bu kar ti ka ste gdong drug pa yin pa'i phyir ro/ /des na de bzhin gshegs pa drug gi rang bzhin ni nga'i sku yin no zhes lhag par mos pa gang yin pa de ni sku byin gyis brlab pa zhes bya'o/ /dgongs pa yis ni yang dag brtags/ /zhes pa ni tshig gi tshogs de dag dgongs pas bshad pa yin zhes bya ba'i don to/ /shes rab dbye bas dbye bar bya/ /zhes pa ni rdo rje slob dpon bsten pa las thob pa'i shes rab kyi khyad par gyis nges par rtogs par bya'o/ /de nas zhes bya ba la sogs pa'i don bshad zin to/ /oM ni dang po ste rnam par snang mdzad snga ma bzhin no/ /sarba ta thA ga ta zhes pa ni rin chen 'byung ldan te gnyis pa'o/ /wAka ni ngag gi rang bzhin te 'od dpag tu med pa gsum pa'o/ /badzra ni thugs kyi rdo rje'o/ /rdzogs ldan dang / sum ldan dang / nyis ldan dang / rtsod pa ste dus bzhi'o/ /de bas na bzhi pa zhes bya ba'i don to/ /swa b+hA wa At+ma ko zhes pa ni don yod grub pa'o/ /'dod lha ni 'dod pa'i lha'i smyo byed dang / nyams byed dang / rmongs byed dang / gdung byed dang / skem byed de mda' lnga'o/ /des na lnga pa zhes bya ba'i don to/ /a haM zhes pa ni rdo rje 'chang ngo / /dus ni dgun stod dang / dgun smad dang / dpyid ka dang sos ka dang / dbyar ka dang ston te drug go/ /des na drug pa zhes pa'i don to/ /des na don 'di yin te de bzhin gshegs pa drug gi rang bzhin ni nga'i ngag yin no zhes lhag par mos pa gang yin pa de ni gsung byin gyis brlab pa'o zhes bya'o/ /nye bar bsdus pa bstan pa'i phyir de ltar zhes bya ba la sogs pa smos te/ gsum ni sku la sogs pa byin gyis brlab pa gsum mo/ /ji lta bu yin zhe na/ re re ni sku byin gyis brlab pa dang / gsung byin gyis brlab pa dang / thugs byin gyis brlab pa la'o/ /drug gsum du bshad pa zhes pa ni/ de bzhin gshegs pa drug sku gsum gyi rang bzhin du bshad pa'o/ /thugs zhes bya ba la sogs pa ni thugs gsung sku zhes brjod par bya bar rigs na thugs sku gsung zhes ci'i phyir go rims log ce na/ smras pa/ de ltar bshad mod kyi/ 'on kyang go bzlog pa bstan te/ rang gi glegs bam mthong ba rnams kyis 'khrul pa skyed pa'i phyir ro/ /gzhan du na slob dpon dang slob ma'i 'brel pa dang / bsnyen bkur bya ba dang / bsnyen bkur byed pa'i 'brel pa yang chad par 'gyur ro/ /des na dngos grub kyang thob par mi 'gyur ro/ /rdo rje gsum zhes pa ni sku rdo rje la sogs pa'i rang bzhin ni lus la sogs pa yin no zhes 'du shes dang yid la byed pa gang la yod pa de ni rdo rje gsum zhes bya ba ste rdzogs pa'i rim pa'i rnal 'byor pa rnams so/ /bdag po'i chos can gcig tu byung / /zhes pa ni khams gsum pa 'dul bar bya ba'i dbang byed pa byin gyis brlabs pas 'byung ngo zhes sku la sogs pa byin gyis brlab pa dang ldan pas rnal 'byor pa rnams la phan yon bstan to/ /rdzogs pa'i rim pa'i ting nge 'dzin gsum bsgom pa'i don du ye shes gsum zhes bya ba smos te/ snang ba la sogs pa'i ye shes gsum ste tha mal pa rnams kyis mi phyed pa'i phyir ro/ /de bzhin gshegs pa rnams las byung ba zhes pa ni de bzhin gshegs pa la sogs pa 'brel pa drug gi sgron nas byung ba'o/ / yang na de bzhin gshegs pa ni 'od gsal ba'o/ /de las byung ba ni spros pa'o/ /ji ltar chu bo dang ba las/ /nya dag myur du ldang bar 'gyur/ /zhes bshad pa'i phyir ro/ /bskyed pa'i rim pa la gnas pa'i rnal 'byor pa'i spyod yul ma yin pa'i phyir ro zhes pa la gang gi phyir bskyed pa'i rim pa'i rnal 'byor pa rnams ni ye shes gsum rnams 'byed pa las snod ma yin te/ de ni rdzogs pa'i rim pa'i yan lag yin pa'i phyir ro/ /don dam pa'i bden pa ste zhes pa ni sems rnam par dag pa'i rim pas thob par bya ba'i 'od gsal ba'o/ /rnam par shes pa gsum gyi gnas su gyur pa yin pa'i phyir ro zhes pa ni de nyid las de bskyed pa'i phyir ro/ /kun rdzob kyi bden pa ste zhes pa ni snang ba la sogs pa'i rang bzhin gyi tshogs kyi mtshan nyid ni rtog pa dang bcas pa'i phyir ro/ /bskyed par gyur pa zhes pa ni 'od gsal ba nyid las kun nas nyon mongs pa dang rnam par byang ba'i chos thams cad 'byung bas so/ /gal te de ltar yin na gnyis su med pa'i rang bzhin ni ji ltar tha dad par 'gyur ba dang / de yod na tha mi dad pa ji ltar yin zhe na/ smras pa/ re zhig 'od gsal ba ni tha mi dad pa'i rang bzhin yin te/ brten par gyur pa snying po med pa'i chos kyi dbye bas de'i dbye ba so sor snang ste nam mkha' dang char bzhin no/ /gang gi phyir nam mkha' ni ngo bo gcig yin na yang dngos po'i dbye bas dbye bar 'gyur te/ bum pa'i nam mkha' dang snam bu'i nam mkha'i tha snyad bzhin no/ /char ngo bo gcig yin na yang bu ram gyi shing la sogs pa'i 'brel pas mngar ba la sogs pa'i ro dang ldan pa nyid du tha snyad du bya'o/ /de bzhin du 'od gsal ba yang dngos po'i tshogs de dang de bskyed pa dang 'jig pa'i 'brel pas dbye bas tha snyad du bya ba yin gyi 'od gsal ba la ni dbye ba gang yang med do/ /chos kyi dbyings la dbyer med phyir/ /rigs kyi dbye ba rigs ma yin/ /brten pa'i chos kyi dbye ba yis/ /de yi dbye ba rab tu brjod/ /ces 'byung ngo / /skye bo byis pas don dam pa'i bden pa ngo bo gcig yin na yang tha dad par snang ste rtog pa dang bcas pa'i phyir ro/ /dngos po'i ngo bo mthong ba'i rnal 'byor pa rnams kyis ma yin te/ rtog pa med pa'i phyir ro/ /rtsangs pa yis ni bdag nyid lus/ /sngo dang ser por snang ba bzhin/ /byis pa rnams la gzhan ston dang / /mkhas pa rnams la gzhan ston to/ /de yi ngo bo dang ba ni/ /rnam med gos pa med par 'dod/ /nam yang sangs rgyas ma yin pas/ / de ni shes par bya mi nus/ /ji ltar skye bo gzhan dag gis/ /de bzhin sangs rgyas kyis mi rig /de yi rang bzhin gang yin pa/ /de nyid kyis ni mkhyen pa yin/ /dam chos lung sogs la mthong nas/ /kho bo cag ni 'ba' zhig smra/ /mig dang bcas pa'i spyod yul ni/ /dmus long rnams kyi gzugs bzhin no/ /zhes 'byung ngo / /don dam pa'i bden pa de nyid kyi khyad par ro zhes pa ni sngar bshad pa'i mtshan nyid dang 'brel pas so/ /stong pa nyid bzhi zhes pa ni 'od gsal ba dang bcas pa'i ye shes gsum mo/ /de bzhin gshegs pa rnams so zhes pa ni/ /sngags kyi sku yin pas so/ /'od zer lnga ste zhes pa ni de rnams kyi de bzhin gshegs pa'i rang bzhin mtshon par 'gyur gyi gzhan du ma yin no/ /yul du gyur pa'i zhes pa ni 'od zer lngas mdzad pa'o/ /rdo rje sku zhes pa ni bdag la byin gyis brlab pa'i rim pas 'byung ba ye shes kyi sku zhes bya ba'i tha tshig go/ /bskyed par bya'o zhes pa ni spro bar bya'o/ /nges pa'i don to zhes pa ni sems rnam par dag pa dang / bdag la byin gyis brlab pa'i rim pa gnyis 'chad par 'dod pa'i phyir ro/ /de ltar zhes bya ba la sogs pas dang por sbyor ba'i 'og tu dkyil 'khor rgyal ba mchog la 'jug pa'i phyir ro/ /phyag rgya sbyang ba'i cho ga bstan par bya ste/ /sku byin gyis brlab pa la sogs pa byas nas/ /zhes pa ni rnal 'byor chen po'i mtha'i bar du zhes tshig lhag ma'o/ /rang gi rigs kyi yum la zhes pa ni mi bskyod pa la sogs pa'i rigs dang mthun pa sme sha can la sogs pa'i bu mo la'o/ /rigs lnga dgod par byas la zhes pa ni de bzhin gshegs pa la sogs pa'i yig 'bru rnams kyi yan lag byin gyis brlab pa byas nas so/ /gnyis ka'i 'khor lo rjes su mnyes pa'i gsang sngags bstan pa'i phyir zhes pa ni thabs dang shes rab dag gi brdar byas pa/ skyes pa dang bud med gnyis kyi yan lag la gnas pa dkyil 'khor pa rnams mnyes pa la 'jug pa'i phyir ro/ /bshad zin to zhes bya ba ni le'u dang po nas so/ /oM zhes bya ba la sogs pa ni sngags so/ /'dis 'khyud par bya'o zhes pa ni sor mo gzhug pa la sogs pa byas nas rdo rje dang pad+ma dag snyoms par 'jug par bya'o zhes bya ba'i tha tshig go/ /de nyid bstan par bya ba'i phyir snyoms par zhugs pa'i 'og tu zhes pa smos te/ 'khor lo gnyi ga la zhugs pa'i de bzhin gshegs pa thams cad kyi'o/ /mchod pa'i sngags bstan pa'i phyir zhes pa ni snang ba la sogs pa'i ye shes las 'byung ba rang rig pa'i bde ba myong ba'i phyir ro/ /oM zhes pa ni mchod pa'i sngags so/ /'dis bdag nyid kyi snang ba la sogs pa'i ye shes las 'byung ba'i bde ba myong nas de nyid byin gyis brlab par bya'o/ /de nyid bstan par bya ba'i phyir bshad ma thag pa'i cho ga zhes bya ba la sogs pas bstan to/ /de nyid la bstan par bya ba bskyed pa'i phyir zhes pa ni rdo rje dang pad+ma snyoms par zhugs pa la'o/ /des ni dkyil 'khor rgyal mchog bsgom par bya ba'i phyir/ dang po phyag rgya sbyong ba'i mtshan nyid kyi don bstan te/ de yang sgrub pa'i thabs las sngar bshad zin to/ /rdzogs pa'i rim pa la gnas pa'i rnal 'byor pa rnams kyi yang zhes pa ni rin po che lta bu'i spyod yul gyi mchod pa bstan to/ /nye bar 'phrog cing zhes pa ni nye bar bsgyur ba dang bcas pa'i 'phrog pa'i skad kyi byings ni zhu ba'i don la 'jug ste nye bar gyur pa'i dbang gis ni/ skad kyi byings las don gzhan 'gyur/ /gang gA'i chu ni mngar mod kyang / /rgya mtsho'i chu yis ji bzhin no/ /zhes bshad pas so/ /lnga ni rnam par snang mdzad la sogs pa'o/ /drug pa ni de bzhin gshegs pa'i zhes pa ni ye shes lnga'i 'od gsal ba la thim pas so/ /de bzhin gshegs pa zhes bya ba la sogs pas me long lta bu la sogs pa ye shes lnga ni rgyu'o/ /'od gsal ba khong du chud pa ni 'bras bu'o/ /de yang rim pa lnga dang sbyar ro/ /gang gi phyir rdo rje bzlas pa'i rim pa la sku la sogs pa'i bzlas pa rnam par snang mdzad la sogs pa'i ye shes lnga'i rang bzhin gyis ma ning gi bzlas pa'i dus su 'od gsal ba rtogs par 'gyur ro/ /sems la dmigs pa'i rim pa la yang phyag rgya'i rim pas byang chub kyi sems kyi thig le me long lta bu la sogs pa ni ye shes lnga'i rang bzhin nyams su myong bas 'bras bur gyur pa'i 'od gsal ba'i de kho na nyid mngon du gyur to/ /bdag la byin gyis brlab pa'i rim pa la yang de bzhin gshegs pa lnga'i sku blangs nas sgyu ma lta bu'i ting nge 'dzin gyis 'od gsal ba nyid myong bar 'gyur ro/ /mngon par byang chub pa'i rim pa yang ye shes lnga'i rang bzhin gyi rtags lngas 'od gsal ba nyid rtogs par 'gyur ro/ /zung du 'jug pa'i rim pa la yang rdo rje bzlas pa la sogs pas sngar bshad pa'i rim pas ye shes lnga'i rang bzhin gyi rgyus mi gnas pa'i mya ngan las 'das pa'i dbyings kyi ngo bo 'od gsal ba'i de kho na nyid rtogs par 'gyur ro/ /yan lag drug pa'i rim pas kyang 'di lta ste/ yul dang dbang po gcig tu gyur pa'i mtshan nyid can gyi de bzhin gshegs pa lnga'i ngo bo ye shes lnga'i rang bzhin gyis so sor sdud pas bde ba chen po'i ngo bo 'od gsal ba rtogs par 'gyur ro/ /de rnam par dag par byed pa ye shes lnga'i ngo bo dbye ba lngas phye ba'i bsam gtan gyi yan lag gi rgyus sems rtse gcig pa'i mtshan nyid can 'od gsal ba'i de kho na nyid rtogs so/ /steng dang 'og tu 'dren pa de bzhin gshegs pa lnga'i ngo bo ye shes lnga'i rang bzhin gyi srog gi rlung gi rgyus 'od gsal ba de kho na nyid rtogs par 'gyur ro/ /ye shes lnga'i rang bzhin gyi thig le sna gsum gyi rtse mor 'dzin pas 'od gsal ba'i de kho na nyid rtogs so/ /ye shes lnga'i rang bzhin gyi de bzhin gshegs pa'i dkyil 'khor gyi 'khor lo spros pas 'bras bur gyur pa'i 'od gsal ba'i de kho na nyid rtogs par 'gyur ro/ /de dag nye bar sdud par byed pa bden pa gnyis dbyer med pa'i bdag nyid can gyi ting nge 'dzin gyi rgyus mi gnas pa'i mya ngan las 'das pa'i dbyings kyi mtshan nyid can 'od gsal ba'i de kho na nyid rtogs par 'gyur ro/ /rtsa'i rim pas kyang 'di lta ste 'dod pa'i gzugs la sogs pa'i rtsa lnga po la kun du spyod pa ye shes lnga'i bdag nyid kyi byang chub kyi sems kyi don dam pa byang chub kyi sems kyi ngo bo 'od gsal ba'i de kho na nyid rtogs par 'gyur ro/ /de bzhin du rlung gi de kho na nyid dang sngags kyi de kho na nyid la sogs pa yang shes par bya'o/ /de yang 'og tu le'u bcu gnyis pa las 'chad par 'gyur ro/ /mchod pa de rnams kyis zhes pa la rdo rje bzlas pa la sogs pa rdzogs pa'i rim pa'i sgom pa rnams kyis zhes bya ba'i don to/ /sangs rgyas nyid ces bya ba la sogs pas bskal pa grangs med pa gsum gyis thob par bya ba'i byang chub shes rab kyi pha rol tu phyin pa'i rnal 'byor pa las ldog pa bstan to/ /mchod pa rnam pa gnyis smos pas/ /zhes pa ni rim pa gnyis kyi dbye bas so/ /rdo rje 'chang chen pos zhes pa ni bka' stsal to zhes sdud pa po'i tshig go/ /mchod pa'i cho ga zhes bya ba la sogs pas lung gi tshad ma nyid du bstan par bya ste/ gzugs zhes bya ba la sogs pa ni gzugs la sogs pa phyi'i skye mched drug go/ /de dag dngos po med byas pa/ /zhes pa ni so sor sdud pa dang bsam gtan gyi yan lag dag gi ngo bo nyid med pa gang yin pa de ni sangs rgyas la mchod pa bla na med pa bstan to/ /des ni so sor sdud pa dang bsam gtan dag gis bsdus pa'i sems rnam par dag pa'i rim pa bstan to/ /mig la sogs pa zhes bya ba la sogs pas tha mal pa'i mig la sogs pa dang de'i rnam par shes pa dang de dag 'od gsal ba las cig car ram snang ba nye bar thob pa la sogs pa'i rim pas so/ /ye shes las byung ba ni spros te mngon par shes pa lngas nye bar mdzes par byas la rnal 'byor pas sgom pa gang yin pa de ni myur du byang chub nyid thob par 'gyur te/ sgyu ma'i dpe bcu gnyis kyi nye bar mtshon pa'i ye shes kyi sku thob par 'gyur ro zhes bya ba 'dis bdag la byin gyis brlab pa'i rim pa bstan to/ /dgongs pas bshad pa'o zhes pa ni 'gal ba'i tshig gi sgo nas 'od gsal ba'i de kho na nyid dang ye shes kyi sku bstan pa'o/ /de ltar phyi dang nang gi mchod pa bstan nas zhes pa ni brtags pa dang rdzogs pa'i rim pa gnyis kyi mchod pa zhes pa'i tha tshig go/ /rdzogs pa'i rim pa dang bral bas zhes pa ni rdo rje bzlas pa la sogs pa'i rim pa lnga med pa zhes bya ba'i don to/ /gang gi phyir rim pa lnga las ma gtogs par rdzogs pa'i rim pa gzhan ni med do/ /yod na yang de'i nang du bsdus par 'gyur te de yang 'og nas bshad par bya'o/ /rdo rje 'chang chen po zhes bya ba la sogs pas de bzhin gshegs pa thams cad kyi sku gsung thugs kyi sngags bstan to/ /sngags la dmigs pa zhes bya ba la sogs pas rim pa lnga gsal por bstan to/ /sngags zhes pa ni bsam pa dang bag la nyal dang rigs dang bag chags kyi dbye bas bcom ldan 'das kyis dbye ba bdun cu rtsa gnyis gsungs so/ /de dag thams cad A li dang kA li'i ngo bo yi ge bzhi bcu rtsa dgu'i bdag nyid can gyi yi ge phyi mos byung ba ni bskyed pa'o/ /nam mkha' las rlung rab tu byung / /zhes bya ba la sogs pa'i rim pas so/ /sgra la sogs pa'i ngo bo yin la zhes pa ni lte ba'i phyogs nas dang po yid kyis bskul ba mi gsal ba'i sgra'i ngo bo 'byung ngo / /de nas gnas dang byed pa dang 'bad rtsol gyi dbang gis gnas brgyad la reg cing gsal bar 'gyur ba gang yin pa de ni sgra'o/ /de bas na yi ge dang tshig dang ngag dang ngag chen po'i rim gyis chos kyi phung po brgyad khri bzhi stong 'byung ngo / /yang na/ yi ge dbyangs dang sgra dang ni/ /mtha' sgra ku co 'brug sgra glu/ /phug nas 'byung 'dod tsheg drag dang / /sgra yi mtshan nyid bcu yin no/ /zhes rdo rje sa 'og gi rgyud las 'byung ngo / /sgra la sogs pa'i rang bzhin de dag bstan to/ /de rnams ni zhes pa ni sngags rnams kyi'o/ /bud med dang skyes pa dang ma ning nyid kyis zhes pa ni bud med kyi rang bzhin ni yi ge A ste shes rab kyi rang bzhin yin pas so/ /skyes pa'i rang bzhin ni yi ge hUM ste thabs kyi rang bzhin yin pas so/ /ma ning gi rang bzhin ni oM ste/ gnyi ga dang snyoms par zhugs pa'i ngo bo yin pas so/ /de la sde tshan brgyad ni dang po'i yi ge brgyad la bsdus nas bzhir 'gyur ro/ /bzhi po a ka ya zhes bya ba'i gsum la bsdu'o/ /de rnams kyang yi ge phyi mo ma lus pa nye bar bsdus pa'i sgo nas yongs su 'gyur zhing sbyar la/ oM AH hUM gsum zhes yi ge gsum du 'gyur ro/ /yi ge gsum gyis gzhir gyur pas/ /zhes pa ni yi ge gsum gyis bsdus pas sngags kyi sgras ni yi ge gsum bshad do/ /de nyid bstan pa'i phyir/ sngags ni yi ge gsum zhes bya'o/ /de rnams kyi zhes pa ni yi ge gsum gyi'o/ /'jug pa la sogs pa ni 'gro ba dang 'ong ba dang bar du gnas pa'i rim pas so/ /yongs su shes pa zhes pa ni yan lag ma nyams pa'i lha'i rnal 'byor gyi rim pas bzlas pa'o/ /de la srog la sogs pa rlung gsum dang / /de bzhin gshegs pa gsum dang / khams gsum dang / ye shes gsum dang / srid pa gsum dang / sku gsum dang / sku dang gsung dang thugs dang / ting nge 'dzin gsum dang rtsa gsum dang / ye shes sems dpa' gsum la dbyer med par lhag par mos nas 'jug pa la sogs pa'i rim pas yi ge gsum bzlas pa gang yin pa de ni sngags la dmigs pa ste yan lag ma nyams pa'i rim pas rdo rje bzlas pa zhes bya ba'i don to/ /ji skad du/ don rtogs pa yi bzlas pa ni/ /ngo bo nyid med bzang po ste/ dus gsum sangs rgyas rnams spyod pas/ /de ni rdo rje bzlas par bshad/ /ces 'byung ngo / /de las zhes bya ba la sogs pas rdo rje bzlas pa la lus ngag yid ni lhan cig byed pa yin no zhes bstan to/ /sprul pa'i lus dang zhes pa ni bdag la byin gyis brlab pa'i rim pas spros pa'i lus kyis so/ /des ni rdzogs pa'i rim pa bsgom pas ye shes kyi sku gzung ba yin gyi sngags kyi sku ni ma yin no zhes bstan to/ /rdo rje bzlas pa nye bar mtshon pas zhes pa ni de ltar gyur pa'i mtshon pa'i don du byed tshig gsum pa bstan to/ /snying gar gnas pa'i rdo rje sems dpa' zhes pa ni rdo rje bzlas pa'i dus su rdo rje sems dpa'i mos pas so/ /ji lta ba bzhin du yongs su shes pas yul du byas pa'o zhes pa ni/ shes pa dang shes bya dang bral ba'i 'od gsal ba'i de kho na nyid lhag par rtogs pa mngon du byas pa'o/ /phyag rgya chen po rnam par dag pa'i phyir ro zhes pa ni phyag rgya dang ting nge 'dzin gyi rim pas sgyu ma'i sku la mngon par zhen pa bcom pa'i phyir ro/ /don dam pa'i bden pa'o/ /zhes pa ni mngon par byang chub pa'i rim pas thob par bya ba 'od gsal ba zhes bya ba'i don to/ /srid pa dang zhi ba'i zhes pa ni 'khor ba dang mya ngan las 'das pa dang / rtag pa dang chad pa la sogs pa lta ba gzhan rnams kyi gcig gi mtshan nyid can zhes pa ni gnyis su med pa nyid du snang ba/ yid du 'ong ba'i zhes pa ni 'bras bur gyur pa nyid kyis mngon par 'dod pa rdo rje 'chang chen po'i sku ni mi gnas pa'i mya ngan las 'das pa'i dbyings kyi ngo bo rdo rje 'chang chen po'i phyag rgya chen po'i sku bskyed par gyur pa'o zhes pa 'dis zung du 'jug pa'i rim pa'i mdor bstan to/ /dngos grub ni bdag la byin gyis brlab pa'i mtshan nyid can phyag rgya chen po'o zhes pa la 'od gsal ba las cig car du byung ba sgyu ma'i dpes nye bar mtshon pa rdo rje 'chang la sogs pa'i sku zhes bya ba'i don te / /des ni bdag la byin gyis brlab pa'i rim pa mdor bstan to/ /phul du byung ba zhes pa ni rang bzhin dang snang ba'i dri ma bral bar byed pas mchog go/ /sems rnam par dben pa'i mtshan nyid can zhes pa ni rnam par shes pa gsum gyi rang bzhin gyi sems sngags dang phyag rgya'i rim pas rnam par sbyong ba'i phyir ro/ /rdo rje bzlas pa las lhag pa yin pa'i phyir ro zhes pa ni ngag dben pa las sems rnam par dben pa ni bsgom par dka' ba'o zhes bya bas so/ /de ni sems rnam par dag pa'i rim pa mdor bstan to/ /rnal 'byor pa'i rgyud las zhes pa ni sgrub pa po'i sems la'o/ / 'og nas bshad pa'i gnas skabs bzhi po zhes pa ni sems rnam par dag pa la sogs pa'o/ /bskyed par bya ste bcom ldan 'das rdo rje sems dpa' zhes tshig lhag ma'o/ /'di skad bshad pa yin te rdo rje bzlas pa'i rim pa bsgoms nas de'i 'og tu sems la sogs pa rnam par dag pa'i phyir sems la dmigs pa la sogs pa rim pa bzhi bsgom par bya'o zhes bya ba'i don to/ /'di dag gis ni zhes pa ni rim pa bzhi bsgom pa'i sgo nas so/ /rdo rje bzlas pa zhes pa ni rim pa dang po'i phan yon gsungs pa ni bstod pa bstan to/ /gang gi phyir rdo rje bzlas pa slob pa'i rnal 'byor pas rim pa bzhir thob par 'gyur ro/ /de bas na rdzogs pa'i rim pa'i yan lag gtso bo de nyid yin no/ /sngags dang sems dang de nas lus/ /rnam par dag dang zung 'jug ste/ /rim pa lnga yis bsdus pa'i don/ /shes pas mtha' drug la ni 'jug /ces 'byung ngo / /mdor bstan pa'i tshig bzhi zhes pa ni rim pa bzhi ston par byed pa'i tshig rnams so/ /bshad par bstan pa'i phyir zhes pa ni rgyas par bshad pa'i phyir ro/ /rim pa gnyis pas ji lta ba bzhin du yongs su shes pa'o zhes pa ni sngags dang phyag rgya'i rim pas rang bzhin dang ye shes kyi tshogs spangs nas thams cad stong pa mngon du byas pa'o/ /de nyid sems ni bdag med pa ste sems gnas 'gyur ba'i phyir ro/ /ngag dang lus dag kyang zhes pa ni rdo rje bzlas pa'i rim pa'i mtshan nyid kyi ngag dang ye shes kyi sku'i mtshan nyid kyi lus gang yin pa de dag kyang sems rnam par dag pa'i rim pas bdag med pa nyid du bsgom par bya'o/ /gang gi phyir lus dang ngag dag gi rgyu ni sems yin no zhes spangs pas 'bras bur gyur pa'i lus dang ngag kyang spong bar 'gyur ro zhes rgyu mi dmigs pa'o/ /sems so sor rtog par bsgrub par bya'o zhes pa ni ye shes gsum gyi rang bzhin can gyi sems ni 'od gsal ba'i ngo bor bya'o/ /'dis ni zhes pa ni 'das ma thag tu bshad pa'i sgom pa'i rim pas so/ /sku dang gsung dang thugs kyi mtshan nyid ces pa ni lus la sogs pa rnam par dag par byed pa las nus pa can no/ /shes rab dang thabs dang nye bar thob pa gsum zhes pa ni shes rab kyi rang bzhin sum cu rtsa gsum dang / de'i rgyur gyur pa 'jug pa'i rnam par shes pa dang thabs kyi rang bzhin bzhi bcu dang / de'i rgyur gyur pa'i nyon mongs pa can gyi yid kyi rnam par shes pa dang / ma rig pa'i rang bzhin bdun dang / de'i rgyur gyur pa kun gzhi rnam par shes pa nye bar sdud par byed pa ston par gyur pa yin no zhes pa ni 'od gsal ba bstan to/ /de ni sems rnam par dag pa'i rim pa rgyas par bshad pa'o/ /de nas zhes bya ba la sogs pas rim pa gsum pa bshad par bya ste/ don dam pa'i bden pa ste zhes bya ba la sogs pas 'od gsal ba las cig car du spro bar bstan to/ /bskyed par bya'o zhes pa ni 'od gsal ba las spro bar bya'o/ /sbyor ba gsum po gcig tu gyur pa de ni zhes pa ni go bzlog pas snang ba nye bar thob pa dang snang ba mched pa dang snang ba rnams yongs su gyur pa las byung ba'i rdo rje 'chang la sogs pa'i sku'o/ /de nyid bstan par bya ba'i phyir/ /yid kyi rang bzhin gyi lha'i gzugs zhes bstan to/ /des ni bdag la byin gyis brlab pa'i rim pa rgyas par bshad pa bstan to/ /lus zhes bya ba la sogs pas rim pa bzhi pa bstan par bya ste/ /lus dang ngag dang sems kyi dmigs pa nye bar rtogs pa zhes pa ni/ /lus la sogs pa'i sgyu ma lta bu yongs su shes pa'o/ /gang thob pa'i kun rdzob kyi bden pa ngo bo nyid de zhes pa ni 'ja' tshon ltar so sor snang ba rdo rje 'chang la sogs pa'i sku'o/ /de ni dmigs su med pa ste/ /zhes pa ni sngags dang phyag rgya'i rim pas 'od gsal ba la thim pas so/ /gtan tshigs bstan par bya ba'i phyir/ /thams cad ces bya ba la sogs pa smos te/ /thams cad ni sgyu ma lta bu nyid kyis mtshan pa rdo rje 'chang la sogs pa'i ye shes kyi sku'o/ /don dam pa'i bden pa nyid rtogs pas so zhes pa ni yang dag pa'i mtha' la 'jug pa'i phyir ro/ /'dis ni mngon par byang chub pa'i rim pa gsal bar byed do zhes pa ni mngon par byang chub pa'i rim pa rgyas par bstan to zhes bya ba'i don to/ /da ni brtags pa'i rnal 'byor gyis thar pa thob par mi 'gyur ro zhes bstan pa'i phyir 'dir zhes bya ba la sogs pa smos te/ 'dir ni rim pa bzhi bsgom par byas nas yang ngo / /ye shes kyi rang bzhin gyi sku la zhes pa ni bdag la byin gyis brlab pa'i rim pas thob par bya ba la'o/ /rab tu gnas pa mi dmigs kyang / /zhes pa ni dbang po dman pas gnas par mi 'gyur ro/ /kyang gi sgras 'od gsal ba la yang ngo / / gal te ni dam tshig nyams pa la sogs pa'i skyon gyi dbang gis so/ /rtogs pa'i rnal 'byor gyis zhes pa ni rdo rje bzhi po bsgoms pas so/ /lha'i skur gnas pa dmigs par zhes pa ni sngags kyi sku la gnas par 'gyur ro/ /de bzlog pa'i phyir zhes pa ni spong ba'i phyir ro/ /oM la sogs pa ni sbas nas brjod pas so/ /des lus su byas la zhes pa ni yongs su gyur pa las skyes pa'o/ /rdo rje bzhi po zhes pa ni/ /dang po byang chub stong pa nyid/ /gnyis pa sa bon bsdus pa dang / /gsum pa sku ni bskyed pa dang / /bzhi pa yi ge dgod pa'o/ /zhes 'byung ngo / /rdo rje ni de bzhin gshegs pa'i sku rnams skyed par byed pa'o/ /bzhi po ni bsgom pa bzhi zhes bya ba'i don to/ /des ni rdo rje bzhi pos so/ /sangs rgyas pa nyid ces pa ni rdo rje 'chang gi phyag rgya chen po thob par mi 'gyur ro/ /gang gi phyir zhe na zhes bya ba la sogs pas sngags las 'byung ba'i sku bden pa ma yin no zhes bstan to/ / sngags kyi yi ge zhes pa ni sngags kyang yin la yi ge yang yin pas na sngags kyi yi ge'o/ /sba bar bya bas na sngags so/ /gnas dang byed pa dang 'bad pa'i rjes su stobs kyis 'byung bas na yi ge'o/ /de srid tshogs pa las skyes pa yin te zhes pa ni 'dod pa dang gnas dang dbye ba la sogs pa'i 'brel pa 'byung ba'i phyir ro/ /skyes nas 'jig par 'gyur bas zhes pa ni oM brjod pa'i dus su A mi dmigs par 'gyur ba dang / de dag brjod pa'i dus su yang hUM mi dmigs so/ /de bzhin du oM brjod pa'i dus su 'jug pa'i dbyangs mi dmigs so/ /de bzhin du thams cad la sbyar ro/ /nam mkha' dang mnyam na zhes pa ni stong pa'o/ /de bas na stong pa'i rang bzhin gyi sngags las sngags kyi sku ni lha'i sku gang las skyed par 'gyur ro/ /gang gi phyir nam mkha'i me tog gi nam mkha' rgyur gyur pa ma yin te/ gnyi ga yang brdzun pas so/ /de nyid bstan pa'i phyir/ bsgom par bya ba'i lha'i sku med pas zhes pa ni las mi dmigs pas gzugs la sogs pa'i bsgom pa'i bya ba yang med do/ /de bas na bsgom par bya ba dang / sgom pa dag med pas gang la dmigs te sgom pa pos byang chub kyi mtshan nyid kyi 'bras bu thob par 'gyur ro/ /de bas na zhes bya ba la sogs pas nye bar bsdus pa bstan te/ bskyed pa'i rim pa'i chos ni chos kyi sku ste/ don dam pa'i bden pa 'ba' zhig gtso bo yin pas chad pa'i rang bzhin gyi phyir gzhan gyi don ji ltar nus te spang bya'o/ /longs spyod rdzogs pa'i sku yang stong pa'i rang bzhin gyi sngags las 'byung bas ma skyes pa nyid do/ /de brdzun yin na sprul pa'i sku yang med do/ /zhes bstan to/ /blang bar gyur pa'i zung du 'jug pa'i rim pa'i ting nge 'dzin bstan par bya ba'i phyir/ zhi ba dang skye ba mi gnas pa'i zhes smos te/ 'khor ba dang mya ngan las 'das pa dag la mi gnas pa ste/ shes rab kyis ni srid mi gnas/ /snying rjes zhi ba la gnas min/ /zhes 'byung ngo / /rdo rje 'chang chen po'i go 'phang zhes pa ni dpal rdo rje sems dpa'i go 'phang zhes bya ba'i don to/ /sku dang gsung dang thugs kyi mtshan nyid ces pa ni sku ni bdag la byin gyis brlab pa'i rim pa'i sgyu ma lta bu dang / gsung ni rdo rje bzlas pa'i rim pa sbyong ba dang / thugs ni rim pa gnyis pas 'od gsal ba rtogs pa dang / mtshan nyid ni ye shes kyi sku yang mngon par byang chub pa'i rim pas 'od gsal bar bya ba dpyad pas so/ /sngags la dmigs pa la sogs pa'i rim gyis zhes bya ba la sogs pa ni de nyid kyis bshad pa'o/ /stong pa nyid gsum zhes pa ni sems rnam par dag pa'i rim pas thob par bya ba stong pa gsum gyi rgyu can 'od gsal ba'o/ /kun rdzob kyi bden pa nyid kyis shes pa ni ye shes kyi sku bzung bas so/ /gcig tu byas pas zhes pa ni de dag gnyis su med par byas pa rim pa lnga pa zhes bya'o/ /de nyid kyi khyad par bstan par bya ba'i phyir/ 'od zer lnga ni de bzhin gshegs pa sngags kyi sku las byung ngo / /de rnams bskyed par zhes pa ni de bzhin gshegs pa lnga'i rang bzhin gyi 'od zer lngas rnam par spras pa zhes bya ba'i don to/ /rdo rje lta bu'i ting nge 'dzin to zhes pa ni kun du 'od kyi sa la de rtogs pas so/ /don dam pa'i bden pa zhes pa ni rim pa gnyis pa dang bzhi pa las bstan pa 'od gsal ba zhes bya'o/ /de dang sbyar ba zhes pa ni 'od gsal ba dang 'brel pa ste de las skyes pa'o/ /bslab par bya ba zhes pa ni goms par bya'o/ /'dis ni sngar bshad pa'i sgom pa'i rim pas so/ /zung du sbyor ba'i rim pa ston pa yin te zhes pa ni zung du 'jug pa'i rim pa rgyas par bshad pa yin no/ /dgongs pas bshad pa'o zhes pa ni 'gal ba'i tshig gi sbyar bas rim pa lnga'i de kho na nyid kyi don bstan pas so/ /da ni zhes bya ba la sogs pas rim pa gnyis kyi rnal 'byor pa rnams la rnam pa gsum gyi phra mo'i rnal 'byor gyi sgom pa le'u gsum pa nas bshad pa yang bstan par bya ste/ mdor bstan pa ni rgyas par bshad pa'i phyir ro/ /de la 'dod chags dang zhe sdang dang gti mug gi rigs can la rdzogs pa'i rim pa la brten nas rnam pa gsum gyis phra mo'i rnal 'byor dang / de'i phyogs gcig pa yang brtags pa'i rnal 'byor pa la gcig ces bya ba'i don to/ /rnam par shes pa rlung dang bcas pa zhes pa ni rlung dang rnam par shes pa dag ni rta dang rta ba'i rigs pa'i tshul du 'jug pa'o/ /de dag gis 'dres par gyur pa las 'byung ba thig le gang yin pa de ni rlung dang rnam par shes pa dang bcas pa'o/ /rdzogs pa'i rim pa bstan pa'i 'og tu 'o zhes pa ni rim pa lnga'i mtshan nyid kyi rdzogs pa'i rim pa bstan pa'i 'og tu zhes bya'o/ /tshogs gnyis zhes pa ni bsod nams dang ye shes kyi tshogs gnyis so/ /de la sbyin pa la sogs pa'i pha rol tu phyin pa lnga ni bsod nams kyi tshogs so/ /stong pa nyid kyi shes rab kyi pha rol tu phyin pa ni ye shes kyi tshogs te de dang ldan pa'o/ /rdo rje 'chang bar mdzad pa ste/ /zhes pa ni rtse lnga pa'i phyag mtshan 'chang bas so/ /yi ge'i don to zhes pa ni phyag mtshan tsam bstan pa'i phyir ro/ /me long lta bu la sogs pa ye shes lnga po zhes pa ni mthong ba dang sgom pa'i rim pas thob pa'i ye shes lnga 'chang bas so/ /spyi'i don to zhes pa ni mdo sde pa la sogs pa'i 'gyod pa sel ba'i phyir ro/ / yid kyi rang bzhin gyi sku zhes pa ni bdag la byin gyis brlab pa'i rim pas thob par bya ba'i ye shes kyi sku'o/ /sbas pa'o zhes pa ni kun rdzob kyi bden pa'i mtshan nyid kyi don bstan par dbye bas so/ /gnyis su med pa'i ye shes te zhes pa ni rim pa bzhi pas thob par byed pa'i 'od gsal ba'o/ /mthar thug pa'o zhes pa ni 'od gsal ba la zhugs pa'i mtshan nyid kyi don bstan pas so/ /spyan la sogs pa ste zhes pa la 'dir de bzhin gshegs pa'i sgra ni ma gtogs so/ /de rnams kyi mchod pas na zhes pa ni/ bde ba chen po'i mtshan nyid can gyi mchod pas mchod pa zhes pa'i don to/ /rnam par snang mdzad la sogs pa ste zhes pa ni ye shes lnga rtogs pas so/ /mchog tu gyur pa zhes pa ni de rnams nye bar sdud par mdzad pas so/ /thugs rdo rje zhes pa ni/ sems kyi rang bzhin khams gsum pa yongs su shes pas so bka' stsal cing zhes pa ni 'das pa'i dus su de ltar byung ba'i rkyen no/ /'od gsal ba la gnas pa'o zhes pa ni sems rnam par dag pa'i rim pas thob par bya ba thams cad stong pa'i gnas la gnas pa'o/ /snang ba'i tshogs so zhes pa ni zla ba dang nyi ma dang mtshams kyi snang ba dang 'dra ba'i 'od zer gyi 'khor lo'o/ /dang por longs spyod rdzogs pa'i sku bskyed pa'o zhes pa ni snang ba gsum yongs su gyur pa las snang ba nye bar thob pa la sogs pa'i rim pas ye shes kyi sku bsam par bya'o/ /phyi nas sems can la sogs pa rjes su zhugs pas zhes pa ni lus mchog tu dga' ba'i chags pa'i sgras khams gsum gyi nang na gnas pa rdzogs pa dang ma rdzogs pa'i sems can dang de bzhin gshegs pa rjes su zhugs pas so/ /de bzhin gshegs pa thams cad kyi phra rab las bsgrubs pa'i zhes pa ni ma lus pa lus pa med cing rigs lnga'i de bzhin gshegs pa rnams kyi cha shas rnams kyis rdzogs pa zhes bya ba'i don to/ /sprul pa'i skur zhes pa ni 'od gsal ba las byung ba'i sku ni sprul pa'i sku ste/ de la cig car ram snang ba nye bar thob pa la sogs pa'i rim pas 'byung ba zhes bya ba'i don to/ /'chad par gyur pa'i rim gyis zhes pa la 'og nas 'chad pa'i bsgom pa'i rim pas so/ /phra mo'i rnal 'byor kun tu brtsam par bya'o zhes pa ni rnam pa gsum gyi sna'i rtse mor thig le'i rnal 'byor bsgom par bya'o/ /rdo rje'i mdo zhes pa ni zab pa'i don dang ldan pa'i tshig gis so/ /yi ge nyung dang the tshom med/ /snying po can te don zab pa/ /mdo ni mkhas pa rnams kyis bshad/ /ces 'byung ngo / /mdo'i don bstan par bya ba'i phyir/ /tha mal pa'i sems can rnams kyi skye ba zhes bya ba ni sems can gyi 'jig rten gyi ngo bo sems can gyi rigs rnam pa bzhi skye ba'o/ /brtags pa'i lhar dmigs pa zhes pa ni dam tshig gi dkyil 'khor gyi rim pas de bzhin gshegs pa la sogs pa la dmigs par gyur pa'o/ /rlung gi de kho na nyid dang zhes pa ni srog la sogs pa'i rlung gi tshogs sdud par byed pa'i bdag nyid can gyi de kho na nyid do/ /sngags kyi de kho na nyid dang zhes pa ni sngags kyi dbye ba bdun cu rtsa gnyis bsdu bar byed pa'i yi ge gsum pa'i yang snying po zhes bya ba'o/ /ye shes kyi de kho na nyid dang zhes pa ni snang ba la sogs pa don dam pa 'jug pa'i rang bzhin te/ lhag par mos pa'i rnal 'byor gyis so/ /yongs su dag pa'i lha'i de kho na nyid nges pa ni 'dir bsgom par bya ba lha'i sku ni rnam pa gnyis te brtags pa dang yongs su dag pa'o/ /de la brtags pa ni bskyed pa'i rim pas so/ /yongs su dag pa ni bdag la byin gyis brlab pa'i rim pas so/ /de nyid kyi phyir sngags kyi sku dang ye shes kyi sku ste/ de'i ming gi rnam grangs so/ /ston to zhes pa ni de ltar phra mo'i rnal 'byor bsgoms na de bzhin gshegs pa drug gi rang bzhin tha mal pa'i sems can rnams skye ba la sogs pa de kho na nyid drug bsgom par 'gyur ro/ /dang po zhes bya ba la sogs pas yan lag dang po bstan par bya ste/ steng na gnas pa'i srog dang rtsol ba zhes bya ba ni gdong gi sna'i bu ga nas rgyu ba'o/ / dbang po gnyis po ni rdo rje dang pad+ma dag 'brel pa las so/ /nang gi shes rab dang thabs snyoms par 'jug pa'i zhes pa ni shes rab dang thabs la rgyur gyur pa bud med dang skyes pa gnyis kyis nyams su myong ba snang ba'i ye shes phrad pas so/ /dga' bas drangs pa zhes pa ni snang ba'i ye shes 'byung bas so/ /yan lag ma lus pa las zhes pa ni bdun khri nyis stong gi rtsa'i khong stong las so/ /'dod chags chen po'i mes zhes pa ni snang ba mched pa'i brda can gyi mchog tu dga' ba'i mes so/ /bzhus par gyur nas zhes pa ni yan lag thams cad kyi tshogs las byung zhing / rdo rje'i rtse 'am de'i dkyil du phyin pas so/ /byang chub kyi sems kyi thig le'i gzugs su zhes pa ni 'od gsal ba'i bdag nyid do/ /pad+ma'i sna'i rtse mor lhung ba zhes pa ni snang ba nye bar thob pa'i dus su chos 'byung ba'i lte ba las phyung zhing spro bar 'gyur ro/ /'dir ni zhes pa ni thig le tsam mo/ /srid pa skye ba'i rim pa ltar zhes pa ni khams gsum gyi nang na gnas pa'i sems can gyi tshogs bskyed pa'i rim pa'o/ /bsgom pa rnams la zhes pa ni/ de'i ngo bo bsam par byed pa'i rnal 'byor pa rnams la'o/ /de bzhin gshegs pa rnams kyi zhes pa ni de bzhin gshegs pa thams cad kyi ngo bo rdo rje 'chang gis so/ / yungs kar gyi sgras mtshon par mdzad ces pa ni/ shin du phra ba yin pas byang chub sems kyi thig le nyid la brda bstan to/ /tha ma'i bde ba'i dbang gis ni/ /skad cig mas ni khams gsum skyes / /me dang zla ba'i cha mnyam pas/ /'byung ba bzhi yi bag chags 'byung / /rlung gi stong pa nyid ngo bo/ /ye shes dang ni 'dres gyur pas/ /dbang po'i lam nas byung nas ni/ /yul rnams la ni bzung bar 'gyur/ /gang tshe snang ba dang ldan pa/ /rlung ni bzhon pa nyid gyur na/ /de tshe rang bzhin thams cad ni/ /ma lus yul la 'jug par 'gyur/ /'dir ni bsdus pa'i don 'di yin te/ re zhig dang po rnal 'byor pas bdag la byin gyis brlab pa'i rim pas ye shes kyi sku blangs la shes rab kyang de'i ngo bo nyid du dmigs la 'dod chags chen po'i sgras de bzhin gshegs pa 'jug pa sngon du 'gro bar legs par sbyangs pa'i rdo rje dang pad+mar sbyar la tshangs pa'i bu ga nas byang chub kyi sems 'pho ba'i dus su snang ba'i ye shes dang / yan lag thams cad la khyab pa'i dus su snang ba mched pa'i ye shes dang / rdo rje'i rtse mor byin pa'i dus su 'od gsal ba'i de kho na nyid nyams su myong zhing don dam pa'i bden pa la gnas pa mi rigs so zhes rnam par dpyad nas rig ma'i pad+ma'i nang du de nyid spro bar bya'o/ /de nyid kyi sems can gyi khams rnam pa bzhi thams cad skye bar 'gyur ro/ /'dus pa'i rgyud phyi ma las kyang gsungs te zhes pa ni le'u bco brgyad pa lags so/ /ye shes lnga yi rang bzhin dbugs/ /zhes pas ni de'i gsal ba nyid gang yin pa de ni me long lta bu'i ye shes so/ /khams nyi shu rtsa bzhi'i rdzas de dag gcig tu gyur pa gang yin pa de ni mnyam pa nyid kyi ye shes so/ /de'i nang du don dam pa'i mchog tu 'dzin pa gang yin pa de ni so sor rtog pa'i ye shes so/ /de'i spro ba dang bsdu ba'i rim pas sems can gyi don bya ba gang yin pa de ni bya ba nan tan grub pa'i ye shes so/ /de'i don dam pa'i chos nyid gang yin pa de ni shin du rnam par dag pa'i chos kyi dbyings kyi ye shes so/ /rlung bcu nye bar bsdus pas na dbugs so/ /'byung ba lnga ni sa la sogs pa ste de'i ngo bo nyid ni de'i rang bzhin no/ /de la der sra ba gang yin pa ni 'byung ba chen po sa'o/ /de'i gsher ba nyid gang yin pa de ni 'byung ba chen po chu'o/ /de'i dro ba'i reg pa gang yin pa de ni 'byung ba chen po me'o/ /de'i 'gro ba dang ldog pa'i mtshan nyid gang yin pa de ni 'byung ba chen po rlung ngo / / de'i 'ba' zhig zhi ba spros pa med pa'i ngo bo gang yin pa de ni 'byung ba chen po nam mkha' 'o/ /de ltar gyur pa'i byang chub sems kyi thig le pad+ma'i sna rtser zhes pa ni nye bar mtshon pa yin te/ des na rdo rje'i sna rtser yang ngo / /phyung nas ni zhes pa la yan lag dang tshigs thams cad kyi sgo nas spros nas so/ /thig le'o gzugs su brtag par bya/ /zhes pa ni yungs kar gyi 'bru'i tshad tsam gyi gang bu rdo rje rin po che'i rtser 'dzin par bya'o/ /de nyid nye bar bsdu ba'i sgo nas khyad par bstan par bya ba'i phyir/ rin chen kha dog sna lnga pa/ /zhes smos te/ rang dang gzhan gyi don 'grub pa la nus pas rin chen no/ /yang na rnam pa sna tshogs kyi sems can gyi khams skyed par byed pas na rin chen no/ /de bzhin gshegs pa lnga'i rang bzhin yin pas kha dog sna lnga pa'o/ /srog dang rtsol ba zhes pa ni srog gi rlung ste rtag tu gyen du rgyu'o/ /rtsol ba zhes pa ni de nyid nyer bar bsdus pas thur du sel ba ste/ srog dang rtsol ba zhes bya'o/ /des ni tha mal pa'i sems can bskyed pa'i mtshan nyid de yan lag dang po bstan to/ /sa bon gyi thig le'i dbus su zhes pa ni byang chub sems kyi nang na'o/ /skye bzhin par shes par bya ste zhes pa ni mos pa'i rnal 'byor gyis bskyed pa zhes bya ba'i don to/ /bdud rtsi sa bon zhes bya ba la sogs pa'i tshig ni dpal rdo rje bdud rtsi'i rnal 'byor gyi rgyud las 'byung ngo / /rtog pa'i rnal 'byor slob pa na/ /zhes pa ni lhag par mos pa'i rnal 'byor bsgom pas so/ /rgyu ba dang mi rgyu ba zhes pa ni brtan pa dang g.yo ba'i khams gsum pa'i rnam pa can gyi rdo rje sems dpa' bsam mo zhes pa ni lhag par mos par bya'o/ /'di nyid kyi khyad par ni zhes pa ni de'i lhag par gyur pa'i tshig ces bya'o/ /me long lta bu la sogs pa'i ye shes rnams kyi gzhir gyur pas na ye shes gnas so/ /rnam pa sna tshogs pa'i sangs rgyas sprul pas na nyams dga' ba'o/ /bya ba la sogs pa'i tshul la 'jug pa la ma bstan pas na gsal ba'o/ /yang na ra ni rdo rje'i rtse mo dang 'dra ba yin pas rdo rje'o/ /ha ni bya'i gdong dang 'dra bas pad+ma'o/ /s+ya ni 'dzag pa'i don ston te/ des na ra ha dang 'dra bas rdo rje dang pad+ma las s+ya ni 'dzags pas na/ ra ha s+ya ni gsang ba ste byang chub kyi sems zhes bya ba'i don to/ /ye shes kyis brtags pa zhes pa ni rang rig gi mngon sum gyi tshad ma'i spyod yul zhes bya ba'i tha tshig go/ /drang ba'i don zhes pa ni rdzas kyi ngo bo nyid du bstan pas so/ /rdzogs pa'i rim pa yang zhes pa ni/ yang gi sgra ni slar zhes bya ba'i don to/ /des na rdzogs pa'i rim pa'i 'brel pa dang ldan pa'i phra mo'i rnal 'byor gzhan yang bshad par bya zhes bya ba'i don to/ /snying ga zhes bya ba la sogs pa la lkog ma la sogs pa'i gnas bzhi po la gru gsum dang zlum po dang gzhu'i dbyibs can dang gru bzhi'o/ /gos dkar mo dang mA ma kI dang sgrol ma dang spyan mas byin gyis rlob pa/ 'od dpag tu med pa dang mi bskyod pa dang / don yod grub pa dang rnam par snang mdzad kyis dbang byas pa dmar po dang ljang gu dang dkar po dang kha dog ser por ldan pa/ de dang 'dra ba'i 'od spro ba dbang dang zhi ba dang 'gugs pa dang rgyas pa'i las can g.yas g.yon dang gnyi ga dang dal bus dman par rgyu ba/ me dang chu dang rlung dang sa'i khams kyi ngo bo dkyil 'khor bzhi bsams la/ de rnams la thun dang po nas brtsams te nyin mo dang mtshan mo'i rim pas kha dog dmar po la sogs pa'i 'od zer gyi tshogs spros la gdong gi sna rtser thun phyed phyed kyi dus su 'dzin nas ji srid sems rtse gcig par gyur pa de srid gnas par byas pas 'bad rtsol med par zhi ba la sogs pa'i las kyi tshogs 'grub par 'gyur ro/ /de ni gti mug gi rigs can gyi rnal 'byor pa'i phra mo'i thig le bsgom pa'i man ngag go/ /lus thams cad la gnas pa zhes pa ni rtsa rgyus thams cad kyi lus la zhes bya ba'i don to/ /ye shes lnga'i ngo bo zhes pa ni rnam par snang mdzad la sogs pa'i ngo bos so/ /'od zer lnga po zhes pa ni srog la sogs pa'i rlung lnga ste/ bzhi po ni phung po bzhi la gnas pa ste gsal ba'o / /lnga pa ni mi gsal ba'o/ /de nyid kyi phyir/ rlung gi las kun rjes 'gro ba'o/ /spyod pa kun la rab 'jug pa/ /rnam par snang mdzad ngo bo ste/ /'chi ba'i lus las 'pho bar 'gyur/ /zhes bshad pas so/ /srog dang rtsol bar gyur nas zhes pa ni/ lnga'i bdag nyid kyi rlung de nyid srog dang rtsol ba nyid du gyur nas so/ /steng gi sna yi bu ga las/ /zhes pa ni/ kun rdzob kyi sna khung g.yas pa la sogs pa'i dbye bas phye bar gyur pa las so/ /dkyil 'khor bzhi yi kha dog gis/ /zhes pa ni nyin mo'i thun dang po la me'i dkyil 'khor 'char ba dang / gnyis pa la rlung gi dkyil 'khor dang / /gsum la sa'i dkyil 'khor dang bzhi pa la chu'i dkyil 'khor 'char ba de bzhin du mtshan mor rtogs par bya'o/ /go rims bzhin du nges par 'byung / /zhes pa ni g.yas pa la sogs pa'i dbye bas rim pa ji lta ba bzhin du 'byung ngo zhes bya ba'i don to/ /ji skad du zhes pa la sogs pa'i lung tshad ma nyid du bstan to/ /sna rtse ni gdong gi sna rtser ro/ /yungs kar zhes pa ni yungs kar gyi 'bru'i tshad tsam gyi 'od zer gyi thig le'o/ /srog dang rtsol ba'i brtag pa'o/ /zhes pa ni de nyid rlung nye bar bsdus pa'o/ / thig le de nyid srog dang rtsol ba la sangs rgyas kyi rang bzhin te / de bzhin gshegs pa'i ngo bo 'od zer lnga yod de dkyil 'khor re re 'ang de bzhin gshegs pa lnga'i bdag nyid yin pas so/ /'od zer de rnams ni steng gi sna las te gdong gi sna las nges par 'byung bar 'gyur ro/ /sgo las 'byung ba'i rim pa bshad pa'i phyir/ g.yon zhes bya ba la sogs pa smos te/ rlung gi dkyil 'khor g.yon nas 'byung ba dang me'i dkyil 'khor g.yas las 'byung ba dang sa'i dkyil 'khor gnyi ga las 'byung ba dang / chu'i dkyil 'khor gnyi ga las dal bus rgyu ba'o/ / de nyid nang gi dus yin par bshad pa ni rnal 'byor pa rnams kyi nang gi dus yin no/ /dus kyi rim pa 'dis rnal 'byor pas zhi ba la sogs pa'i las byed de/ rang ni 'od gsal ba ste mi shigs pa'i ngo bo'o/ /de las byung ba'i sngags ni yi ge gsum mo/ /de'i gzhi ni dkyil 'khor bzhi'o/ / de rnams kyi sbyor ba ni rab tu sbyor ba ste 'od zer spro ba'i rim pa'o/ /nyin mtshan ni nyin mo dang mtshan mor des gnas shing sna'i rtse mor 'od zer de 'dzin par bya'o/ /thun phyed phyed ni chu'i tshod brgyad kyi bdag nyid kyi dus ni thun no/ /de'i phyed ni chu tshod bzhi'o/ /de yang phyed ni chu tshod gnyis so/ /des na thun re rer chu tshod gnyis gnyis kyi bar du 'od zer gyi thig le 'dzin pas 'od gsal ba rtogs par 'gyur ro/ /rim ni zhes pa ni kha dog dmar po la sogs pa'i dbye ba dang / g.yas pa la sogs pa'i dbye bas so/ /go rims ji bzhin du zhes pa ni me dang rlung dang sa dang chu'i dkyil 'khor shar ba'i rim pas so/ /rdo rje'i tshig gi don zhes pa ni don zab pa dang ldan pa'i tshig gis brjod par bya'o/ /rlung gi de kho na nyid ces pa ni yungs kar gyi 'bru'i tshad tsam gyi byang chub kyi sems kyi thig le'i de kho na nyid do/ /sngags kyi de kho na nyid ces pa ni yi ge gsum gyis bskyed pa'i rgyur gyur pa'i mi 'jigs pa'i mtshan nyid do/ /de las dkyil 'khor dang rlung dang yi ge gsum yang 'byung ba'i phyir ro/ /ye shes kyi de kho na nyid bstan pa'i phyir zhe sdang gi rigs can gyi phra mo'i rnal 'byor bstan par bya ste/ rnam par shes pa gsum ni sems can dang snod kyi 'jig rten gyi rang bzhin kun gzhi la sogs pa'i mtshan nyid can no/ / byang chub kyi bdag nyid can gyi sems zhes pa ni snang ba la sogs pa'i rang bzhin can no/ /khams phra ba ste zhes pa ni oM dang AHnye bar bsdus nas thugs rdo rje yig 'bru'i thig le lhag mar gyur pa'i khams phra ba'o/ /snying ga la gnas pa'i de la rten dang brten par gyur pa zhes pa ni 'gro ba de nyid rnam par shes par byed de bsam par bya'o/ /de ni ye shes kyi de kho na nyid de yan lag lnga pa'o/ /rlung dang rnam par shes pa zhes brtags pa'i zhes pa ni rlung ma lus pa'i 'khor lo dang rnam par shes pa gsum gyi rang bzhin gyi sngags kyi thig le de la'o/ /ye shes kyi sku zhes pa ni cig car du 'byung ba 'ja' tshon bzhin no/ /'ja' tshon ltar zhes pa ni yod pa dang med pa gnyis dang bral ba'o/ /dkar po la sogs pa zhes pa ni 'od zer gyi tshogs dang ldan pa'o/ /rtog pa'i rnal 'byor pa rnams kyi spyod yul ma yin pa'i phyir zhes pa ni bskyed pa'i rim pa'i rnal 'byor pa rnams la bstan par mi bya ba 'od gsal ba las 'byung ba rdo rje 'chang chen po'i sku bsgom par bya'o/ /des yongs su dag pa'i lha'i de kho na nyid bstan to/ /theg pa chen po'i mdo sde zhes pa ni rje btsun rin chen te la las so/ /dgongs pas bshad pa zhes pa ni 'gal ba'i tshig gi sbyor bas so/ /skra tsam zhes bya ba la sogs pa ni skra'i rtse mo dang 'dra ba shu kra dang sngags dang 'od zer gyi bdag nyid kyi thig le la ji srid gang gA'i klung gi bye ma dang 'dra bar bzhugs pa de bzhin du rdul re re'i cha cha'i dbye bas rdul ji srid yod pa de'i rtsis kyis de la yang byang chub sems dpa' de dang 'dra bar bzhugs so zhes bsam par bya'o/ /des ni brtan pa dang g.yo ba'i rang bzhin gyi dkyil 'khor gyi 'khor lo'i bdag nyid can thig le yin no zhes bstan to/ /lha'i de kho na nyid ces bya ba ni nye bar bsdu ba'o / /nges pa'i don ni rdo rje bzlas pa'i rim pa'i yan lag tu 'gyur ba rlung gi de kho na nyid la sogs pa bstan pas so/ /da ni zhes bya ba la sogs pas gti mug gi rigs can la ltos nas phra mo'i rnal 'byor spros pas bstan par bya ste/ sngags dang rlung mnyam par sbyor ba las zhes pa ni 'jug pa la sogs pa'i rang bzhin gyis srog la sogs pa'i ngo bo snang bar 'gyur ba'i yi ge gsum dang 'jug pa la sogs pa'i mtshan nyid can gyi rlung dang 'brel pas dkyil 'khor bzhi byung ba zhes bya ba ni g.yas pa la sogs pa las rgyu ba'o/ /de ltar gyur na yan lag ma nyams pa'i bzlas pa la zhes pa ni yan lag ma nyams pa'i lha la sogs pa'i dbyer med pa'i sbyor bas bzlas pa gang yin pa de'i rim pa ni go rims bstan pa'i phyir zhes pa ni gsal bar bya ba'i phyir ro/ /mi shigs pa zhes pa ni spros pa thams cad med pa'i mtshan nyid 'od gsal ba'o/ /de las byung ba ni 'od gsal ba las me la sogs pa dkyil 'khor bzhi 'byung ba'o/ /me'i dkyil 'khor kha dog dmar po'i ngo bo zhes pa ni nyi ma'i dkyil 'khor ni dmar po yin pas so/ /g.yas las 'byung ba zhes pa ni ngo bo nyid kyis de'i de lam yin pa'i phyir ro/ /rnam par snang mdzad do zhes pa ni de bzhin gshegs pa'i rigs yin pas so/ /sku ni nyi ma'i dkyil 'khor 'od dpag tu med pa ste kha dog dmar po yin pas so/ /oM dang AH ste zhes pa ni de dag gis bskyed pa'i sa bon yin pas so/ /de nyid 'jug pa dang gnas pa zhes pa ni sngags dang rlung gi tha dad pa ma yin gyi 'on kyang de'i bdag nyid du 'jug pa'o/ /yi ge hUM ldang ba'i bdag nyid can zhes pa ni thugs rdo rje'i sa bon yin pas dbang po la brten nas phyi rol yul la 'byung ba'i rang bzhin yongs su brtag pa ste bsgom par bya'o / /'di ni 'od dpag tu med pa'i bzlas pa'o zhes pa ni me'i dkyil 'khor la dbang byed pa'i phyir ro/ /chu'i dkyil 'khor te zhes pa ni zla ba dang 'dra bas so/ /spyan gyi yi ge ni yi ge oM mo/ /tshul ni kha dog dkar po'o/ /dkar zhing zhes pa ni de nyid do/ / de nas te zhes pa ni tshig phrad don du ma yin pas de nas kyi sgra ni bkra shis kyi don rjod par byed pa ste yi ge oM gyi rnam grangs so/ /'das ma thag pa'i don yang yin te snga ma 'das pa la ltos pas/ bkra shis dang ni dbang nyid brjod/ /des na sgra dang de'i phyir sgras/ /rim dang gtan tshigs don ston to/ /zhes 'byung ngo / /yi ge oM ni bkra shis kyi don la rab tu grags so/ /yongs su gyur pa'i rjes la zhes pa ni de nyid 'jug pa'i bdag nyid kyi bzlas pa'i 'og tu 'o/ /yi ge AHni pad+ma'i rigs kyi sa bon yin pas so/ /yi ge hUM ni rdo rje rigs kyi sa bon yin pas so/ /rdo rje bzlas pa zhes pa ni thugs rdo rje'i bzlas pa'o/ /kha dog ser po zhes pa ni rin chen 'byung ldan gyi dkyil 'khor te rgyas pa'i rang bzhin yin pas so/ /yi ge gsum zhes pa ni sngags thams cad kyi skyed pa'i rgyu yin pas so/ /rtse gcig tu bsgom zhing zhes pa ni dkyil 'khor gyi rnam pa dang kha dog dang sgo la sogs pa la mnyam par gzhag pas so/ /rin po che'i bzlas pa zhes pa ni nye bar bsdus pa'o/ /mi shigs pa ni 'od gsal ba las so/ /rlung gi dkyil 'khor te zhes pa ni gzhu'i dbyibs can no/ /sangs rgyas kyi tshul te yi ge hUM zhes pa ni sangs rgyas thams cad kyi bdag po mi bskyod pa bskyed pa'i sa bon yin pas so/ /zhi ba thung du zhes pa ni/ de nyid kyi khyad par te ldang ba'i rang bzhin yin pas so/ /'jug pa dang gnas pa'i rjes la zhes pa ni yi ge oM dang a'i gzhi 'jug pa dang gnas pa'i 'og tu zhes bya ba'i don to/ /don yod bzlas pa zhes pa ni nye bar bsdu ba'o/ /de ni gsung rdo rje la sogs pa rnam pa bzhi yan lag ma nyams pa'i bzlas pa bstan te sngags dang rlung dang rnam par shes pa la sogs pa dbyer med pa'i phyir ro/ /slong mo za zhing mi bzla ste/ /ma blangs pa la chags mi bya/ /'dod pa thams cad longs spyod pas/ /yan lag ma nyams gsang sngags bzla/ /zhes 'byung ngo / /re re'i zhes pa la me'i dkyil 'khor la sogs pa re re'i 'o/ /dkyil 'khor gsum po 'khor du gyur pas zhes pa ni chu la sogs pa'i dkyil 'khor gsum po'o / /de'i nang du chud pa spro/ /zhes pa ni de'i cha shas nyid kyis spro bar bya ste 'byung ba chen po'i gcig ni 'byung ba bzhi'i rang bzhin yin pas so/ /bshad pa'i rgyud ces pa ni dgongs pa lung bstan pa'i gsang ba 'dus pa'i rgyud las so/ /gos dkar can sogs bzlas bshad pa/ zhes bya ba la sogs pa tshigs su bcad pa gnyis po'i don ni le'u gsum pa nas bshad zin to/ /rnal 'byor pa gnyi ga zhes bya ba la sogs pas brtags pa dang rdzogs pa'i rnal 'byor pa rnams la phra mo'i rnal 'byor bstan par bya ste/ ut+pa la mthing ka'i kha dog dang 'dra ba zhes pa ni mi bskyod pa'i rigs yin pa'i phyir ro/ /rang gi rdo rje'i bu gar zhes pa ni gsang ba'i rdo rje'i rtse mo'i bu ga la'o/ /mi bskyod pa'i rnal 'byor pa de nyid kyis sme sha can gyi phyag rgya'i pad+ma'i nang du nas kyi 'bru'i tshad tsam gyi rdo rje phra mo bsgom par bya'o/ /tsa na ka zhes bya ba la sogs pas rnam par snang mdzad la sogs pa'i rnal 'byor pa rnams kyis 'khor lo la sogs pa bsgom par bya'o zhes bstan to/ /de nyid bstan pa'i phyir rigs kyi dbye ba zhes bya ba la sogs pa smos so/ /des ni bskyed pa'i rim pa'i rnal 'byor pa rnams kyi dkyil 'khor rgyal mchog gi ting nge 'dzin gyi dang po phyag rgya legs par sbyong ba'i dus su de dag bsdom par bya'o/ /rdzogs pa'i rim pa'i rnal 'byor pa rnams kyis kyang rim pa lnga char yang rtag tu bsgom par bya'o/ /des kyang cir 'gyur zhe na zhes bya ba la sogs pas phra mo'i rnal 'byor bsgoms pa'i 'bras bu bstan to/ /zhi ba la sogs pa zhes pa ni zhi ba dang rgyas pa dang / dbang dang dgug pa dang rnam par sdang ba dang gsod pa dang dgar ba dang rengs pa la sogs pa'o/ /'dod pa'i dbang phyug la sogs pa brgyad ces pa ni/ sku dbang phyug dang gsung dbang phyug /de bzhin thugs kyi dbang phyug dang / /cho 'phrul yon tan dbang phyug dang / /byed dang longs spyod yon tan brgyad/ / ces bshad pa'i phyir ro/ /gnyis su med pa'i ye shes zhes pa ni zung du 'jug pa'i mtshan nyid do/ /rgyu ni bzhi'o/ /don dam pa'i bden pa ni rim pa gnyis pa dang bzhi pa dag gis thob par bya ste 'od gsal ba'o/ /nyon mongs pa thams cad rnam par dag pas na zhes pa ni 'dod chags dang bral ba la sogs pa rang bzhin brgya drug cu spong ba'i phyir ro/ /yid dga' ba'o zhes pa ni 'dod chags dang 'dod chags bral ba dang 'dod chags par ma spong ba'i phyir ro/ /de lta bu'i dngos grub thams cad kyi gzhir gyur pa zhes pa ni/ dngos grub thams cad de las byung ba yin gyi gzhan las ma yin no/ /rnal 'byor pa de'i mngon du gyur pa zhes pa ni rnal 'byor pa'i mngon sum gyi tshad ma'i spyod yul du 'gyur ro zhes bya ba'i don to/ /don dam pa zhes bya ba la sogs pas de kho na nyid thob pa'i thabs bstan par bya ste/ / phung po la sogs pa'o zhes pa ni de'i rnam par dag pa'i rang bzhin yin pas so/ /sprul pa'i sku'i gnas skabs so/ /zhes pa ni sngags kyi sku blang ba'i skabs kyis bzung ba'o/ /ye shes gsum gyi sbyor bas gnas par zhes pa ni sngags dang phyag rgya dag gi rim pa gang yang rung bas snang ba la sogs pa ngo bos byas nas so/ /don dam pa'i bden pa der spro zhing 'jug pa'o zhes pa ni 'od gsal ba la de rnams 'jug par bya ste rim pa bzhi pas 'od gsal ba'i go 'phang la 'jug pa'o/ /ldang ba bstan par bya ba'i phyir/ zhes pa ni don dam pa'i bden pa la 'jug pas gzhan gyi don med pa'i phyir zhes bya ba'i tha tshig go/ /sku gsum gyi bdag nyid can no zhes pa ni chos dang longs spyod rdzogs pa dang sprul pa'i sku'i rang bzhin no/ /'od gsal ba'o zhes pa ni chos thams cad kyi rang bzhin du gyur pa ste rim pa gnyis pa dang bzhi pas thob par bya ba'i de kho na nyid do/ /rgyu gang yin pa zhes pa ni sa bcu pa la ye shes kyi dbang thob nas bdag la byin gyis brlab pa'i rim pas sku blangs te / mngon par byang chub pa'i rim pas rdo rje lta bu'i ting nge 'dzin thob nas zung du 'jug pa'i rim pas sa bcu gcig pa thob par 'gyur ro zhes bya bas 'od gsal ba nyid zung du 'jug pa'i rim pa'i rgyu yin no/ /de gang yin zhe na/ rdo rje 'chang chen po'i bdag nyid du bskyed par bya'o zhes pa ni zhi ba dang skye ba la mi gnas pa dpal rdo rje 'chang gi phyag rgya chen po'i sku rdzogs par bya'o zhes bya ba'i don to/ /'di skad bshad pa yin te/ bskyed pa'i rim pa'i rnal 'byor pas rdo rje dang pad+ma la sogs pa'i phra mo'i rnal 'byor bsgoms pas 'bras bur gyur pa'i zung du 'jug pa'i ting nge 'dzin la snod du gyur pa yin gyi de'i dus su thob pa ma yin te/ de'i dbang po dman pa nyid kyis de kho na nyid snang na yang mngon du mi 'gyur ba'i phyir ro/ /rdzogs pa'i rim pa'i rnal 'byor pas ni rdo rje 'chang chen po'i bdag nyid dmigs nas phra mo'i rnal 'byor bsgom pa de ma thag tu sems rnam par dag pa la sogs pa'i rim gyis 'od gsal ba la 'jug nas de'i 'bras bur gyur pa zung du 'jug pa'i rim pa thob par 'gyur ro/ /dgongs pas bshad pa zhes pa ni 'gal ba'i tshig gi sbyor bas zung du 'jug pa'i ting nge 'dzin thob pa'i phyir rdo rje bzlas pa la sogs pa'i mtshan nyid can gyi rdzogs pa'i rim pa bstan pas so/ /da ni zhes bya ba la sogs pas 'dod pa'i yon tan lnga la brten pas byang chub thob par 'gyur ro zhes bstan to/ / gang gi phyir brtul zhugs dang sbyangs pa'i yon tan la sogs pa dang lus ngal bas sangs rgyas nyid thob par mi 'gyur ro/ /dka' thub bsdams pas ma rungs pa'i/ /sdug bsngal gyis ni lus skams 'gyur/ /sdug bsngal gyis ni sems g.yengs te/ /g.yengs pas dngos grub thob mi 'gyur/ /zhes dpal mchog dang po las 'byung ngo / /gang phyir lus ni gdung ba yis/ /'ba' zhig gis ni chos med do/ /des gzhan 'tshe ba bral min dang / /gzhan dag rjes su gzung ba min/ /sbyin pa tshul khrims bzod pas gsal/ /dam pa'i chos ni lam chen po/ /gang zhig bor nas lus ngal ba'i/ /lam ngan nas ni 'gro 'gyur na/ /'khor ba'i dgon pa ma rungs pa/ /skye bo mtha' las shing drung can/ /nyon mongs sbrul gyis lus bcings pa/ /de ni yun ring 'khor bar 'gyur/ /zhes 'byung ngo / /'dod pa'i yon tan lnga zhes pa ni/ gzugs la sogs pa yul lnga nye bar spyod pa'i mtshan nyid do/ /rdzogs pa'i rim pa zhes pa ni so sor sdud pa dang bsam gtan gyi rim pas thob par bya ba rdo rje 'chang nyid ces bya ba'i tha tshig go/ /phra mo'i rnal 'byor bshad pa'i 'og tu zhes pa ni rim pa gnyis kyis bsgom par bya ba'i phra mo'i rnal 'byor rnam pa gsum gyi 'og tu zhes bya ba'i tha tshig go/ /gnyis su med pa'i ye shes te/ /zhes pa ni sems can thams cad kyis de nyid 'dod par bya bas so/ /kun ni zhes bya ba rnam pa gsum mo/ /spros pa dang bcas pa zhes pa ni chags pa'i rol pa la sogs pa'i rgya che bas nye bar mtshon pa'o/ /spros pa med pa zhes pa ni ji ltar rnyed pa'i spyod pas nye bar mtshon pa'o/ /shin du spros pa med pa zhes pa ni bla na med pa'i mngon par byang chub pa'i 'bras bu can mngon par byang chub pa'i sbyor bas so/ /de rnams kyi mchog ni longs spyod pa dang grol ba'i spyod pa'o zhes pa ni de la longs spyod rdzogs pa'i skus sems can thams cad la chos kyi bdud rtsi sbyin par byed pa'i longs spyod kyis tshim par byed pa dang / rang gi bdag nyid kyang de bzhin du tshim par byed pa ste longs spyod pa'i spyod pa'o/ /grol ba'i spyod pa ni chos kyi sku'i mtshan nyid de rtog pa thams cad yongs su spong ba'i rang bzhin no/ /de rnams kyi dag pa ni rnam par dag pa'i gnas thob par byed pa'o/ /rdo rje 'chang chen po'i go 'phang thob pas so zhes pa ni dpal rdo rje sems dpa'i go 'phang thob par byed pa yin pa'i phyir ro/ /gsang ba'i dam pa zhes pa ni nyan thos pa la sogs pa la bstan par mi bya'o/ /'og nas bshad pa ste zhes pa ni 'chad par 'gyur ba'o/ /gzugs la sogs pa zhes pa ni dus kyi tshad bstan par bya ste/ gzugs dang sgra dang dri dang ro dang reg dang ldan pa zhes pa ni gzugs la sogs pa 'dod pa'i yon tan lnga nye bar spyod pa'i mtshan nyid can gyi yul rnams kyi zhes bya ba'i don to/ /rdo rje ltar mi phyed pa'i rang bzhin gyi bdag nyid can du shes nas zhes pa ni bdag la byin gyis brlab pa'i rim pas/ chos dang longs spyod rdzogs pa dang sprul pa'i sku gsum gyi bdag nyid can ye shes kyi sku shes nas zhes pa'i don to/ /zas su dri chu zhes bya ba la sogs pas sbyang ba dang bsang ba dang sbar bar bya ba la/ sngon du 'gro bar bdud rtsi lnga rang gis spyad nas gtor ma'i don du lha rnams la yang dbul bar bya'o zhes ston to/ /sangs rgyas byang chub skyon med pa/ /zhes pa ni mi gnas pa'i mya ngan las 'das pa'i dbyings kyi brdar byas pa zung du 'jug pa'i go 'phang zhes bya ba'i tha tshig go/ /zas su zhes bya ba la sogs pas/ lcags kyu rnams kyang dbul bar bya/ /zhes bstan to/ /khro bo'i lha rnams la dbul bar bya ba'i phyir te zhes pa ni gshin rje mthar byed la sogs pa'i khro bo'i 'khor la dbul bar bya zhes pa'i don to/ /de'i tshe sha chen po brtag par bya'o zhes pa ni kha na ma tho ba med pa dpal rdo rje bdud rtsi'i rgyud kyi rim pas blang ba zhes bya ba'i don to/ /gsang ba ni sba bar bya ste zhes pa ni drag po'i las te de'i yul can ni de'i rgyur gyur pa'o/ /sku gsung thugs zhes pa ni rnal 'byor pa'i'o/ /rjes su mthun pa 'byung bar gyur pa'o/ /zhes pa ni gsod pa la sogs pa drag po'i las dang mthun par 'gyur ro zhes bya ba'i don to/ /de yang gshin rje mthar byed kyi rgyud la sogs pa las rtogs par bya'o/ /de dag la sogs pa 'ba' zhig tu bstan par ma zad kyi zhes bya ba la sogs pas drag po'i las kyis kyang dngos grub thob par ma zad kyi/ 'on kyang 'jig rten dang 'jig rten las 'das pa'i dngos grub kyang thob par 'gyur ro zhes bstan to/ /de rnams ji lta ba bzhin du bstan par bya ba'i phyir/ ri lu la sogs pa'i dngos grub rnams zhes pa ni/ ri lu dang mig sman dang rkang mgyogs dang ral gri dang pra dbab pa dang / sman mchog dang bcud kyis len dang bdud rtsi dang / khams sbyor ba dang dbang du bya ba dang nam mkha' lding dang sa 'og grub pa dang / ro langs dang sngags smra ba dang / zhi ba dang rgyas pa dang dbang dang dgug pa dang / rnam par sdang ba dang gsod pa dang dgar ba dang rengs pa la sogs pa'o/ /de dang 'dra ba'i dngos grub rnams la rnal 'byor pa de zhes pa ni khro bo la lha bshos dbul bar byed pa'i 'o/ /lus dang ngag dang yid legs par gnas par 'gyur ba zhes pa ni las su rung ba nyid 'grub par 'gyur ro/ / de ltar rdo rje rigs kyi zhes pa ni mi bskyod pa'i rigs can gyi khro bo'i lha rnams la ste/ rdo rje rigs ni thams cad kyi mchog yin pa'i phyir na sha chen 'bul lo/ /de bzhin gshegs pa la sogs pa'i rigs kyi zhes bya ba la sogs pas rnam par snang mdzad kyi rigs kyi khro bo rnams la glang po'i sha dang / rin chen 'byung ldan gyi rigs kyi khro bo rnams la rta'i sha dang / 'od dpag tu med pa'i rigs kyi khro bo rnams la khyi'i sha dang / don yod grub pa'i rigs can gyi khro bo rnams la ba lang gi sha dbul bar bya'o/ /dam pa zhes pa ni ba lang gi sha ste/ 'jig rten pa rnams kyi ba lang ni mchog yin no zhes sems so/ /de bzhin gshegs pa'i rigs la sogs pa'i khro bo'i tshogs kyis zhes pa ni rnam par snang mdzad la sogs pa de bzhin gshegs pa bzhi po'i 'brel pa dang ldan pa'i khro bo'i tshogs kyis/ zhes bya ba'i don to/ /de rnams med na ji ltar bya/ /zhes pa ni/ ji ltar bshad pa'i cho gas gzung ba'i kha na ma tho ba med pa'i sha ma rnyed na zhes bya ba'i don to/ /zas gzhan zhes bya ba la sogs pa gsungs te zhes pa ni 'jig rten pa dang mi 'gal ba gzugs brnyan la sogs pa'i sha ste bag zan gyis gzugs brnyan byas nas de dang 'dra ba'i phyugs rnams kyi brtags pa'i sha zhes bya ba'i tha tshig go/ /'bras chan no zhes bya ba la sogs pas 'bras chan bza' ba bkag par bya ste/ 'jig rten thams cad dang mthun pa'i bza' bas de ni dngos grub kyi yan lag ma yin te khyad par du ni khro bo'i rgyal po tshim pa zhes smos ci dgos/ 'bras bu bstan par bya ba'i phyir/ /zhes bya ba la sogs pas sngar bshad pa'i phra mo'i rnal 'byor la sogs pa bsgom pa khro bo rnams la zas dbul ba'i bar gyis mthong ba'i chos su skye ba dang gnas pa dang 'jig pa dang bral ba rdo rje'i sku thob pa'i mtshan nyid ces bya ba'i tha tshig go/ /rigs de dang 'brel pa'i zhes bya ba la sogs pas srid pa'i rtse mo'i steng na gnas mngon par dga' ba la sogs pa'i sangs rgyas kyi zhing la bzhugs pa 'khor los sgyur ba lnga dang / rang gi phyag rgya gzugs rdo rje ma la sogs pa'i lha mo dang bcas pa de dang de'i rigs kyi 'brel pa dang ldan pa byang chub sems dpa' sa'i snying po la sogs pa rnams kyang sngags kyis sbyangs pa'i lcags kyu phul bas sgrub pa po la mgu zhing mngon du 'gyur gyi gzhan du ni ma yin no zhes bstan to/ /de nyid bstan par bya ba'i phyir/ /rang gi rigs kyi mchod pa byas nas zhes pa ni rigs dang rigs can dbyer med pa'i phyir ro/ /'di skad bshad pa yin te sngags kyis brlabs pa'i kha na ma tho ba med pa'i lcags kyu lnga phul bas mi bskyod pa la sogs pa de bzhin gshegs pa dang lha mo dang byang chub sems dpa' dang / khro bo'i tshogs kyis rnal 'byor pa la kun tu bsrung zhing rjes su gzung bar 'gyur ro/ /yang 'di nyid kyi phan yon zhes bya bas ni 'jig rten pa dang 'jig rten las 'das pa'i mtshan nyid can zhes bya ba'i don to/ /'jig rten las 'das pa bstan par bya ba'i phyir/ /gtor ma'i sbyor ba 'di yis ni/ /zhes pa smos te/ lcags kyu dbul ba'i sbyor bas so/ /byang chub pa nyid thob par 'gyur ba zhes pa ni rdo rje 'chang chen po'i go 'phang thob par 'gyur ro/ /rnam par dag pa rjes su dran pas lha bshos dbul bas ye shes kyi tshogs thob par 'gyur gyi gzhan du ni ma yin te/ bsod nams kyi tshogs kyi rgyu yin pa'i phyir ro/ / bsod nams kyi tshogs de yang de las dman pa yin te so so'i skye bo bzhin no/ /ye shes dang ldan pa 'ba' zhig tu ma zad kyi zhes bya ba la sogs pas ye shes kyi tshogs thob pa 'ba' zhig tu dgag par byed do/ /'dod pa'i khams ni bud med thams cad ces pa ni 'dod pa'i longs spyod kyi bde ba'i gzhi yin pa'i phyir ro/ /bud med thams cad ni lha mo dang klu mo la sogs pa'o/ /ji skad du/ lha mo klu mo gnod sbyin mo/ /lha ma yin mo mi mo yang / /rnyed nas rig pa'i brtul zhugs bya/ /de ltar sgrub ste the tshom med/ /ces 'byung ngo / /de rnams kyi yul la dga' ba'i dbang du 'gyur ro zhes pa ni thams cad rnams kyang dbang du byas pas rol pa'i bdag por 'gyur te/ de kho na nyid shes pa la phyi'i dngos grub ni zhar las 'byung ba'i phyir ro/ /de yang / ri rab sum cu rtsa drug gi/ /zhes bya ba la sogs pa ni le'u bcu gsum pa las 'chad par 'gyur ro/ /las kyi sa zhes pa ni dge ba dang mi dge ba dang lung du ma bstan pa la sogs pa'i las kyis nye bar mtshon pa 'gro ba lnga'o/ /phyir mi ldog pa'o zhes pa ni sa brgyad pa la bskyed pa'i rim pa'i ting nge 'dzin gyis thob par bya'o/ /de'i las ni gzhan gyi don gyi mtshan nyid do/ /sems can smin cing grol bar byed pa'i mtshan nyid can no zhes pa ni ma bsgral ba sgrol bar byed pa dang / ma grol ba grol bar byed pa dang / dbugs ma phyung ba dbugs dbyung ba sbyin pa dang yongs su mya ngan las ma 'das pa yongs su mya ngan 'da' bar bya zhes bya ba'i tha tshig go/ /yongs su brtags pa'i rnal 'byor pa rnams kyi zhes pa ni bya ba dang / spyod pa dang / rnal 'byor rgyud kyi rnal 'byor pa rnams dang / rnal 'byor chen po'i rgyud kyis bskyed pa'i rim pa'i rnal 'byor pa rnams kyi mchog tu gyur pa ni zung du 'jug pa'i rim gyis sa bcu gnyis pa thob pa'i phyir ro/ /sdug bsngal ba zhes pa ni sdug bsngal gsum mo/ /yid mi bde ba zhes pa ni 'dod chags la sogs pa bag chags kyi mtshan nyid do/ /zil gyis mi gnon pa'i gzi brjid ni de rnam par sbyong bar byed pa 'od gsal ba'i mtshan nyid can gyi snang ba'o/ /de yod pas na gzi brjid can no zhes pa ni 'od gsal ba mngon du byas pa zhes bya ba'i tha tshig go/ /'jig rten gyi chos brgyad kyis zhes pa ni rnyed pa dang mi rnyed pa la sogs pas so/ /zung du 'jug pa thob pas 'jig rten gyi chos mngon du mi 'gyur te/ gnyis su med pa yin pa'i phyir ro/ /ji ltar drag po rdo rje can/ /zhes bya ba la sogs pa bshad pa'i phyir ro/ / rdo rje sems dpa'i zhes bya ba la sogs pa ni rdo rje sems dpa' bzhin du mi shigs pa tshe dang na sos ldan pa ste bsam gtan gyi zas kyis mi 'jigs pa'i phyir ro/ /rtag tu rab tu dga' bar gyur pas na zhes pa ni bsam gtan gyi bde ba la longs spyod pas mi zad pa'i dga' ba thob pa'i phyir ro/ /rnal 'byor chen po dang ldan pa zhes pa ni bya ba la sogs pa'i tshul la brtan pa la ltos pas so/ /mthong ba ni khong du chud pa ste zhes pa ni skad kyi byings don du ma yin pas mthong ba ni shes pa'i don la 'jug go/ /mig ni mthong ba ste mig gi rnam par shes pas yongs su shes pa'o/ /rna bas mthong ba zhes pa ni rna ba'i rnam par shes pas yongs su shes pa'o/ /yid kyis mthong ba ni yid kyi rnam par shes pas yongs su shes pa'o/ /de la mthong ba tsam zhes pa ni mig la sogs pas mthong ba dang thos pa dang rtogs par byas nas so/ /sna tshogs pas rnam par phye ba zhes pa ni slob pa dang mi slob pa la sogs pa'i khyad par dang ldan pa'o/ /dbang du byed par 'gyur ba ste zhes pa ni mngon par shes pa thob pas so/ /spyi'i spros pas 'grub par bya ba las kyi rab 'byams kyi sgo nas dbang du 'gyur zhe na/ smras pa ma yin te/ phyi'i sngags dang phyag rgya la sogs pa ni ngag gis bzlas par bya ba'i yi ge'i bdag nyid can ni sngags so/ /lag pa'i bya ba la sogs pa'i mtshan nyid khyad par ni phyag rgya'o/ /de rnams kyis bskul ba ni drangs pas dbang byed par mi 'gyur gyi 'on kyang lhun gyis grub pas so/ /'das pa dang ni ma 'ongs pa/ /da ltar byung ba srid gsum gyi/ /'od gsal rnam par dag 'dzin pas/ /skad cig de la ma lus mthong / /ya yi don gyis ci yang rung / /dngos grub 'dod pas bya ba ni/ /ra la sogs pa gsum gyis ni/ /'gro ba'i don la rab tu 'jug /ces 'byung ngo / /don dam par ni don gcig mthong ba na/ /'gro ba thams cad don gcig mthong bar 'gyur/ /'gram gyi phyogs su chu ni 'thungs pa yis/ /rgya mtsho ma lus pa ni myong bar 'gyur/ /zhes 'byung ngo / /mtshan ma dang bcas pa'i ting nge 'dzin la gnas pa las mtshan ma med pa'i 'bras bu mi 'byung ngo zhes pa la mtshan ma dang bcas pa'i ting nge 'dzin ni rnam par rtog pa dang bcas pa'o/ /de la gnas pa ni de la dmigs pa la'o/ /mtshan ma med pa'i 'bras bu ni mi 'gyur ba thar pa chen po'i bde ba'i mtshan nyid can gyis sangs rgyas nyid thob par mi 'gyur te/ rgyu dang 'bras bu mi 'dra ba'i phyir ro/ /rgyu mthun pa las 'bras bu 'dra bar 'gyur te gzhan du ni ma yin no/ /nas kyi sa bon las 'bras kyi myu gu bzhin no/ /de bzhin du sngags dang phyag rgya la gnas pa'i rnal 'byor pa las mtshan ma med pa'i 'bras bu 'byung bar mi 'gyur gyi/ /'on kyang rnam par mi rtog pa'i ting nge 'dzin la gnas pa la'o/ /rnam par snang mdzad mngon par byang chub pa'i rgyud ni gnyi ga'i rgyud de/ de las gsungs pa zhes bya ba 'dis lung tshad ma nyid du bstan to/ /bde ba thams cad bsdus pa ni bde ba thams cad de 'od gsal ba'o/ /lhun gyis grub pa nyid do zhes pa ni 'bad rtsol med pas rdzogs par 'gyur te zung du 'jug pa'i rim pa la de kho na nyid rang gsal ba'i phyir ro/ /zung 'jug ting 'dzin la gnas pas/ /slar zhing gang la yang mi slob po/ /'di ni rdzogs pa'i rnal 'byor zhes/ /de yang rdo rje 'chang chen po/ /rnam pa thams cad mchog ldan pa'i/ /de las thams cad mkhyen pa 'byung / /zhes bshad pa'i phyir ro/ /nye bar bsdu ba bstan par bya ba'i phyir/ /rtog pa'i rnal 'byor thams cad de/ /zhes pa ni tha mal pa'i spros pa thams cad spong ba'i phyir lha'i sku sgom par byed pa'o/ /de rnams kyi phul du byung ba'i zhes pa ni dbang po rno ba yin pas dam pa'o/ /rtogs shing zhes pa ni rim pa lnga yongs su shes pa'o/ /rdzogs pa'i rim pa'i ting nge 'dzin la gnas pa'o zhes pa ni rdo rje bzlas pa la sogs pa'i rim pa lnga po sgom par byed pa'o/ /de rnams kyi gsang ba ni sba ba ste rnal 'byor pa de rnams kyis bya ba'i rgyud la sogs pa'i tshul la brten pa'i rnal 'byor pa rnams la bstan par mi bya'o/ /de sku gsung thugs byin gyis brlab pa ni drang ba dang / nges pa'i don gyi dbye bas rnam pa gnyis dang phra mo'i rnal 'byor rnam pa gnyis kyis bsdus pa'i rnal 'byor pa la bstan pa'i phyir ro/ /byang chub dam pa zhes pa ni nyan thos pa la sogs pa la ltos nas rdo rje'i sku zhes bya ba zung du 'jug pa'i skad cig ma rdo rje 'chang chen po'i go 'phang ngo / /des thob par 'gyur ba zhes pa ni/ /sngar bshad pa bsgom pa'i sgo nas de mngon du byed pas so/ /nye bar brtags pas so zhes pa ni rgyu la 'bras bu nye bar brtags pa ste mar ni tshe bzhin no/ /de bzhin gshegs pa'i gsang ba'o zhes pa ni sku rdo rje la sogs pas byin gyis brlabs pa'i gsang ba zhes bya ba'i don to/ /tha mal pa'i lus dang ngag dang sems las zhes pa ni nye bar len pa'i phung po lnga'i rang bzhin bden pa ma mthong ba'i lus la sogs pa las so/ /'da' ba ni sbyang ba ste ting nge 'dzin gang gis dag par bya ba kho na nyid de la de skad ces bya'o/ /de nyid ni de kho na nyid thob par byed pa'i ting nge 'dzin yang de nyid de nye bar btags pas so/ /'di skad ston par 'gyur te zhes bya ba la sogs pas nye bar bsdus pa bstan te/ tha mal pa'i lus zhes pa ni nye bar len pa'i phung po lnga'i mtshan nyid do/ /brtag par bya ba spangs pa'o/ /gang gis ni sgom pa'i rim pas so/ /rdo rje'i rang bzhin gyi lus thob par 'gyur ba'i zhes pa ni 'jig rten las 'das pa'i rdo rje 'chang chen po'i rang bzhin 'grub par 'gyur ba'o/ /de kho na nyid de lta bu yin no zhes pa la le'u drug pa 'di nyid las gsungs pa lta bu'o/ /de skad du zhes pa ni gsang ba grub pa las zhes tshig lhag ma'o/ /rnam rtog med pa'i sngags pas ni / /zhes pa la sgom pa la mngon par zhen pa'i rnam par rtog pa dang bral bas so/ /'di lta bu'i ting nge 'dzin ldan pa dag ces pa ni sngar bshad pa'i rnam pa gnyis kyi ting nge 'dzin gang yin pa de dang ldan pas so/ /nges pa'i dus ni zhes pa zla ba la sogs pa'i mtshan nyid kyi 'od tsam gyi dus kyi tshad yongs su spangs nas so/ /bla med go 'phang thob par 'gyur/ /zhes pa ni phyag rgya chen po'i mtshan nyid rdo rje 'chang chen po'i gnas thob par 'gyur ro zhes tshigs su bcad pa'i don to/ /drang ba'i don to zhes pa ni lcags kyu lnga'i lha bshos 'bul bas bla na med pa'i go 'phang thob par bstan pa'i phyir ro/ /rdo rje'i tshig ces bya ba la sogs pas rdo rje phreng [(]sa'i [,]ba'i [)]rgyud las tshad ma nyid du bstan to/ /de nas zhes bya ba la sogs pa'i tshigs su bcad pa'i don ni sngar bshad zin to/ /skad cig ni se gol brdab pa'i dus so/ /thang cig ni yungs kar bskor ba'i dus so/ /yud tsam ni dbugs dbyung ba'o/ / zhag bco lnga ni zla ba phyed do/ /zhag sum cu ni zla ba'o/ /de bcu gnyis kyis lo'i dus so/ /de rnam pa drug gis dus kyi dbye ba'o/ /de rnams kyis 'jig rten pa 'di 'gro ba dang ldog pas srid par 'khor bar 'gyur ba dang / skye ba dang gnas pa dang 'jig pas ngal bar 'gyur ro/ /de bas na rnam pa drug la gnas pa'i dus de dang bskal pa grangs med pa gsum po ni thig le drug cu'i rtsis sum 'gyur la brten te dus kyi spros pa gang yin pa'o/ / de ni/ skad cig gcig ni yin par bshad/ /ces pa ni skad cig ma gcig gis mos pa'i 'od gsal bas myong bar bya ba'i skad cig ma zhes bya'o/ /zla ba drug bshad de nyid yin/ /zhes pa ni skad cig ma gcig gis sngar bshad pa'i mtshan nyid can gyi dus drug gi dbye ba zhes bya ba de'i dngos med gang yin pa de ni rdzogs par longs spyad pa ste/ 'od gsal ba'i sgom pa'i skad cig ma zhes bya'o/ /de nyid kyi skad cig ma gcig tu zhes pa ni 'od gsal ba la 'jug pa'i mtshan nyid kyis skad cig ma'o/ /dus gsum las 'das yin par dgongs/ /zhes pa ni 'das pa dang ma 'ongs pa dang da ltar byung ba'i rang bzhin gyi snang ba dang snang ba mched pa dang snang ba nye bar thob pa'i skad cig ma dang bral ba'i ngo bos bsam par bya zhes pa'i tha tshig go/ /gzugs dang sgra dang ror ldan pa/ /zhes pa ni dam tshig gi phyag rgya la gnas pa'i gzugs la sogs pa'i yul rnams la spyod par gyur pas so/ /rnal 'byor pas ni zla drug bsgom/ /zhes pa ni dus kyi dbye ba gang yin pa de 'od gsal ba nyid du bsgom par bya'o/ /mchod chen de ni zhes pa la 'od gsal ba la 'jug pa'i mtshan nyid kyi mchod pa chen po de ltar byas nas so/ / gsang ba'i de nyid ces pa ni 'od gsal ba'i de nyid bsgom par bya'o zhes pa'i don to/ /yul dang dbang po zhes bya ba la sogs pa sngar bshad pa'i rim pas yul dang dbang po nye bar bsdu ba'i mtshan nyid can rim pa gnyis pas thob par bya ba'i de kho na nyid gang yin pa de nyid bshang gci zas su byed pa'o zhes bstan to/ /de nyid kyi de 'dra ba'i dngos grub ste/ de mngon du byed pa'i mtshan nyid do/ / bza' ba rnam rtog med pa'o/ /zhes pa ni phyi'i bza' ba spangs nas bsam gtan gyi bza' ba'i mtshan nyid ces bya ba'i don to/ /de nyid kyi phan yon bstan par bya ba'i phyir/ de nyid ces bya ba la sogs pa smos te/ bla na med pa'i 'od gsal ba'i mtshan nyid do/ /byang chub sems gcig las 'byung ba'o zhes pa ni/ phyag rgya'i rim pas kun rdzob byang chub kyi sems la dmigs pa las 'byung ba'o/ /rtog pa med pa ni spros pa med pa'o/ /'dus ma byas pa ni rnam par shes pa gsum dang bral ba'o/ /dri med don ni zhes pa la rang bzhin brgya drug cu dang bral ba'o/ /'grub par 'gyur ba ni rnal 'byor pas mngon du 'gyur ro/ /sems rnam par dag pa'i rim pa'i thabs phyag rgya'i rim pa'i mtshan nyid bshad par bya ste/ ma zhes pa ni ming gi yi ge dang pos nye bar mtshon pa dang / dam tshig gi phyag rgya'i rang bzhin mA ma kI'o/ /de bzhin du ming gi yi ge dang pos nye bar mtshon pa ni phyag rgya de'i bka' drin rtogs nas mngon par byang chub pa'i sems rnam par dag pa'i mtshan nyid nyams su myong bar 'gyur ro / /de ltar gyur pa'i bsam gtan las dga' ba dang bcas pa'i bde ba chen po gang yin pa de ni dga' bcas zas te sha zhes bya'o/ /de ni bsam gtan gyi bza' bca'i mtshan nyid kyi de kho na nyid de sha'i sgra'i don to/ /rab tu byed pa las kyang / sgyu ma dag ni thams cad las/ /bud med sgyu ma khyad par 'phags/ /ye shes gsum gyi dbye ba ni/ /gsal bar 'di las mtshon par 'gyur/ /chags pa ma yin chags bral min/ /bar ma yang ni mi dmigs so/ /stong pa ma yin mi stong min/ /bar ma yang ni mi dmigs so/ /zhes 'byung ngo / /de kho na nyid de nam mkha'i khams dang 'dra ba mtha' yas pa yin pa de'i rnal 'byor dang ldan pas chen po'i sgras khyad par du byas nas sha chen de ni yin par bshad pa ste tshad med pa yin pas so/ /dam pa tshad med mkhas pa dang / /brtson 'grus spro ba'i bdag nyid dang / /rmad du byung ba'i byed pa ni/ /chen po zhes byar rtag tu bshad/ /ces 'byung ngo / /phan yon bstan par bya ba'i phyir/ /gsang ba zhes bya ba la sogs pa smos te/ gsang ba ni bskyed pa'i rim pa'i rnal 'byor pa rnams la bstan par mi bya'o/ /go 'phang ni brtan pa dang g.yo ba'i bdag nyid kyi khams gsum pa thams cad kyi gzhi'o/ /mchog ni ye shes la ltos nas bla na med pa'o/ /de nyid kyi khyad par ni rdo rje gsum bsdu bar byed pa ni/ rdo rje gsum ste/ 'od gsal ba'i go 'phang ni rgyur gyur pa snang ba la sogs pa'i ye shes gsum mo/ /de myur du 'grub pa ni rdzogs pa ste 'od gsal ba la 'jug pas dag par 'gyur ro zhes bya ba'i don to/ /dam tshig chen po zhes bya ba la sogs pas de kho na nyid phung po lnga rnam par dag par byed pa glang po la sogs pa'i lcags kyu lnga'i brdas/ brdar byas pa gang dang sbyor bas rnal 'byor pa ni bsam gtan gyi zas dang ldan par 'gyur ro zhes bstan te / kham zhes pa ni phyi'i bza' ba'i ngo bo'i ming ngo / /de nyid 'jig rten pa'i bza' ba yin no/ /'jig rten las 'das pa ni dgongs pas bshad pa bsam gtan gyi bza' ba zhes bya'o/ /de kho na nyid thob pa'i phan yon bstan pa'i phyir gang yang zhes smos te/ 'jig rten 'das mchog ces pa ni zag pa med pa'i ye shes thob pa'o/ /rnam par mi rtog pa la mkhas/ /zhes pa ni 'od gsal ba'i de kho na nyid la gcig tu gzhol ba zhes bya ba'i don to/ /de bzhin ni chos nyid de de nyid du ro gcig pa ni de'i bdag nyid du 'jug pa zhes bya ba'i don to/ /'khor ba ni kun rdzob kyi bden pa'i bdag nyid do/ /cig shos ni don dam pa'i bden pa ste spangs pa ni de la dbyer med pa mngon du byed pa zung du 'jug pa'i ting 'dzin la rab tu gnas par 'gyur ro/ /rnal 'byor brtul zhugs bzang po 'dis/ /zhes pa ni sngar bshad pa'i sems rnam par dag pa'i rim pa dang rdzogs pa'i rim pa'i mtshan nyid kyi bsgom pa'i brtul zhugs bzang pos so/ /byang chub sems dpa' blo can dang / /zhes pa ni phyag rgya dang ldan pa'i sa'i snying po la sogs pa rnams kyi'o/ /sangs rgyas kyi dbang bskur ba thob pas sangs rgyas rnams ni mnyes par 'gyur ba'o/ /dngos grub ni yang dag par rdzogs pa'i byang chub ste rim pa lngas thob par bya ba'i rdo rje 'chang chen po'i go 'phang zhes bya ba'i don to/ / myur du ni bde ba dang yun ring po ma yin pas thob par 'gyur ro/ /'dod khams dbang phyug ces pa ni khams gsum gyi bdag po'o/ /las kyi go 'phang zhes pa ni thams cad kyi gzhir gyur pa'i dngos grub thob par 'gyur ro/ /gzi brjid dang ldan pa zhes pa ni ye shes kyi dbang thob pas 'bar ba dang snang ba la sogs pa ston par byed pa'o/ /stobs kyis phyug ces pa ni gzhan la med pa sangs rgyas kyi spyod yul gnas dang gnas ma yin pa mkhyen pa'i stobs la sogs pa dang bcas pa'o/ /skyes bu chen po'i mtshan sum cu rtsa gnyis dang dpe byad brgyad cu dang ldan pas na mdangs dang ldan pa'o/ /ma 'dres pa'i dran pa nye bar gzhag pa dang thugs rje chen po dang thun mong ma yin pa'i sangs rgyas kyi chos bco brgyad dang / byang chub kyi phyogs kyi chos sum cu rtsa bdun dang ldan pas na mthong na dga' ba'o/ /mthong ba tsam gyis zhes pa ni chog mi shes pa'i sku mthong bas so/ /bskul nas zhes pa ni lam la 'jug par mdzad pa'o/ /'jig rten 'di dag dbang du 'gyur/ /zhes pa ni tshangs pa la sogs pa lha'i tshogs 'dul bar mdzad pas so/ /nye bar bsdu ba bstan par bya ba'i phyir ro / /'di na zhes bya ba la sogs pa smos te/ sangs rgyas thams cad kyi zhes pa ni rin po che lta bu'i gang zag rnams kyi'o/ /gsang ba byang chub dam pa'o/ /zhes pa ni tsan+dan la sogs pa la bstan par mi bya ba rdzogs pa'i rim pa'i de kho na nyid ces bya ba'i don to/ /yang dag sngags kyis bsang ba 'dis/ / zhes pa ni sems skyo ba bsang bar gyur pa'o/ /rdo rje gsum 'das dam pa'o/ /zhes pa ni ye shes gsum yongs su sbyong bar byed pa kun gyi mchog ces bya ba'i don to/ /de bas na rang dang gzhan gyi don phun sum tshogs pa rdzogs par mdzad pas na gtso bo'o/ /de bzhin gshegs pa thams cad bsdu bar mdzad pa'i rdo rje 'chang chen po las 'byung bas na de bzhin gshegs pa kun no/ /dam tshig ni dam tshig gi spyod pas thob par bya ba bskyed pa'i rim pa'i rnal 'byor pa rnams kyi sngags kyi sku'o / /de las kyang dam tshig ni 'jug pa la sogs pa'i rim pas thob pa sngags kyi de kho na nyid mngon du byed pa'i mtshan nyid de rdo rje bzlas pa'i rim pa'o/ /de las kyang mchog ni sems la dmigs pa'i de kho na nyid kyi mtshan nyid do/ /nges pa'i don to zhes pa ni sems rnam par dag pa'i rim pa brjod pas so/ /de kho na nyid rnam par mi 'jigs pa'i ngo bo nyid ces pa ni 'od gsal bas so/ /lus dang ngag dang yid ni ye shes gsum mo/ /byin gyis rlob cing bskyed pa zhes pa ni gang gis sbyang bar bya ba'o/ /de brjod pa'i gzhung gi tshogs kyi le'u ni zhes pa la de'i don ston par byed pa'i tshig gi tshogs ni le'u zhes bya'o / / sgron ma gsal bar byed pa'i 'grel pa'i TI kA las le'u drug pa'i rgya cher bshad pa'o// //de ltar zhes bya ba la sogs pas le'u bdun pa'i bshad pa brtsam par bya ste/ rnal 'byor pa tha mal pa dang mchog rnams kyi zhes pa ni rim pa gnyis sgom par byed pa'i sgrub pa po rnams kyi'o/ /spyod pa'i le'u lnga pa las bshad pa rnam pa gsum mo/ /yang dag par bstan nas zhes pa ni rnam par bshad nas so/ /de nyid slar yang spros nas bshad pa'i phyir zhes pa ni rgyas par so sor bshad par bya ba'i phyir ro/ /dam tshig chen po de bzhin gshegs pa lnga spro ba dang bsdu bar mdzad pas na dam tshig chen po ni rdo rje 'chang chen po'o zhes bya'o/ /yan lag drug go zhes pa ni so sor sdud pa la sogs pa'i mtshan nyid de de'i go 'phang thob par 'gyur te des nye bar brtags pas so/ /thun mong ma yin pa'i sgrub pa po zhes pa ni rdo rje bzhi pa'o / /de dag gi mngon par rdzogs par byang chub pa thob pa ni zhes pa la yan lag drug dang / rdo rje bzhi pos sngags kyi sku dang ye shes kyi sku thob pa ste rdo rje 'chang ba nyid do/ /de'i don gyi le'u ni zhes bya ba la sogs pa ni de rjod par byed pa'i phyir ro/ /tha mal mchog gi dbye ba yis/ /bsnyen pa rnam pa gnyis yin te/ /tha mal pa ni rdo rje bzhi/ /mchog ni yan lag drug gis so/ /zhes 'byung ngo / /'dod pa thams cad ces bya ba 'dis spros pa dang bcas pa'i spyod pa bstan par bya ba'i phyir/ nye bar brtsam par bya ste/ gzugs la sogs pa'i yul rnams so/ /zhes pa ni dam tshig gi phyag rgya la gnas pa'am logs su gnas pa'o/ /rjes su myong zhing bsten pas so/ /zhes pa ni so sor sdud pa'i rim pas bzung nas bsam gtan gyi yan lag gis de bzhin gshegs pa'i rang bzhin du rtogs pa'o/ /'dod pa ni 'dun pa ste zhes pa ni de bzhin gshegs pa'i yul rnams gzung ba'i 'dod pa'o/ /'dod pa ni gzung ba'i rnam pa ste zhes pa la dman pa la sogs pa'i mtshan nyid do/ /mig la sogs pas zhes pa ni dbang po drug gis so/ /gzugs la sogs pa zhes pa ni yul drug go/ /ngan pa dang 'bring dang mchog rnams gcig pa'i snang ba yul du byed pa'o zhes pa ni dbang po rnams kyi skad cig ma dang po la ngan pa la sogs pa'i rnam par rtog pa skye bar mi 'gyur te rtog pa las 'das pa'i phyir ro/ / mngon sum rtog pa las 'das pa/ /ma 'khrul pa zhes mngon par brjod/ /don rtogs pa ni rtogs pa ste/ /spyi las yang dag 'byung ba'o/ /zhes bshad do/ /mig la sogs pa de rnams kyis yul rnams gzung ba'i dus su ngan pa la sogs pa rnam par rtog pa ni med do/ /nges pa'i rtog pas ni de rnams la med pa dang ngan pa dang bar ma dang mchog nyid du gzung bar byed pa ste dngos po ni cha shas med pa'i ngo bo yin pas so/ /'dzin par byed pa'i rnam par rtog pa gang yin pa de ni bden pa las gzhan yin pa'i phyir ro/ /rnal 'byor pas kyang zhes bya ba la sogs pas mig la sogs pa'i rnam par shes pa drug pa'o / /gang dang gang 'dod pa 'byung ba de'i 'dod pa dang rjes su mthun pa'i yul rnams spyod par bya'o zhes bstan to/ /ji skad du/ dbang po'i lam ni gang dang gang / /rang bzhin de dang de nyid 'gro/ /mnyam par ma bzhag sbyor ba yis/ /sangs rgyas thams cad rang bzhin lta/ /dbang po'i lam ni de dang des/ /sgrub pa po ni yul phrad nas/ /ma lus de bzhin gshegs pa la/ /tshim par bya phyir dbul bar bya/ /zhes rdo rje phreng ba las 'byung ngo / /de nyid kyi phyir rten par byed pa zhes bya ba la sogs pa'i tshig gis spros pa dang bcas pa'i spyod pa bstan par bya'o zhes bstan to/ /ci zhig ce na zhes bya ba la sogs pas spyod pa'i 'bras bu bstan to/ /yul dang dbang po mnyam par sbyor ba zhes pa ni so sor sdud pa dang bsam gtan gyi yan lag gi yul 'dzin pa dang / de rnam par dag pa'i mtshan nyid kyi sbyor bas so/ /rdo rje 'chang nyid myur zhing zhes pa ni de'i 'og tu yan lag bzhi'i rnal 'byor bsgom par bya bas so/ /'dir dgongs pa 'di yin te/ re zhig dang po'i rnal 'byor pa rnam par snang mdzad la sogs pa'i lha rnams kyi gang yang rung ba'i rnal 'byor dang ldan pas gdong dang phyag rgya dang dbyibs la sogs pa shing gis byas la khang pa sum brtsegs la 'dug ste/ /'og khang la bza' ba dang bca' ba la sogs pa bzhag cing / bar khang la gar dang rol mo la sogs pa la mkhas pa bzhag cing / yang khang la stan 'jam po'i steng du dbus kyi gtso bo'i nga rgyal dang ldan pas bzhugs la/ phyogs bzhi po la gzugs bzang legs par brgyan pa dam tshig gi phyag rgya na so gzhon pa rigs kyi yum sangs rgyas spyan ma la sogs pa'i tshul dang ldan pa bzhi po bzhag cing / de rnams kyi yang phyi rol gyi mtshams su gzugs rdo rje ma la sogs pa yul gyi lha mo bzhi'i tshul dang ldan pa'i phyag rgya rnams bkod la/ /dam tshig gi phyag rgya ma gcig rang gis 'khyud la de dang lhan cig tu brang skyes dang mchan khung la sogs pa mtho zhing reg la/ mig yangs pa la sogs pa'i lta bas yid dga' bar gyur pa 'dod pa'i yon tan lnga nyams su myong zhing ji srid sems rtse gcig pa nyid kyi mtshan nyid bde ba chen po byung ba de srid kyi bar du gnas par bya'o/ /de ni spros pa dang bcas pa'i spyod pa ste/ bskyed pa'i rim pa'i rnal 'byor pa'i spyod yul yin no/ /de ltar zhes bya ba la sogs pas nye bar bsdus pa'o/ /spros pa med pa'i spyod pa'i dbang du mdzad nas zhes pa ni gnyis pa brtsam par bya ste/ bdag nyid 'dod pa dang rjes su mthun pa zhes pa ni ji ltar rnyed pa'i spyod pas so/ /'dod pa'i yon tan lngas bdag ste/ /zhes pa ni dam tshig gi phyag rgya la gnas pas so/ /rang nyid dang ni bdag nyid do/ /gzhan rnams la ni rnal 'byor ma dam tshig gi phyag rgya ste tshim par bya ba ni de dang lhan cig snyoms par 'jug par bya'o/ /sgyu ma lta bu'i ting nge 'dzin gyis so zhes pa ni bdag la byin gyis brlab pa'i bsgom pas so/ /gtsug lag khang la sogs pa'i sgrub pa'i dka' thub dang zhes pa ni de dag bsgrub pa'i don du 'bad pa chen po yin pas dka' thub yin no/ /shing drung pa la sogs pa sbyangs pa'i yon tan bcu gnyis kyi sdom pa dang zhes pa ni 'di lta ste/ bsod snyoms pa dang / chos gos gsum pa dang / phyag dar khrod pa dang / phying ba pa dang / shing drung pa dang / bla gab med pa dang / phyis mi len pa dang / gdan gcig pa dang / dur khrod pa dang /[ (]cog [,]tsog [)]pu pa dang / dgon pa pa ste sbyangs pa'i yon tan bcu gnyis ni lus ngal ba dang 'brel pa'i phyir ro/ /de rnams kyi lus ngal ba yin gyis de kho na nyid rtogs par mi 'gyur ro/ /ri las mchong zhing mar 'jug pa la sogs pa mi zad pa ste zhes pa ni mu stegs pa rnams kyi lta ba 'di ltar yin te/ ri las mchong bas sa rnam par dag par 'gyur ba dang / chu las mchong bas chu rnam par dag par 'gyur ba dang / /me las 'jug pas me rnam par dag par 'gyur ba dang / mi za bar shi bas rlung rnam par dag par 'gyur ba dang / 'pho ba shi bas nam mkha'i khams rnam par dag par 'gyur ba'o/ /de bzhin sdug bsngal grol bar byed pa'i don du rgan po gsod par byed pa zhes bya ba la sogs pa lta ba ngan pa gzhan yang rtogs par bya'o / /de rnams kyis gdungs bzhin pas ni zhes pa la lus dang yid la sdug bsngal dang yid kyi sdug bsngal sbyin pa'i phyir ro/ /byang chub rnyed par mi 'gyur ro/ / zhes pa ni thabs ma yin pa'i phyir dang log pa'i lta ba yin pa'i phyir ro/ /'o na zhes bya ba la sogs pas dka' thub bkag nas bde ba'i spyod pa la phan yon bstan par bya ste/ thams cad kyis 'dod cing don du gnyer bar bya ba yin pa'i phyir zhes pa ni sngar bshad pa'i gzugs la sogs pa'o/ /de rnams la nye bar longs spyod pa zhes bya ba la sogs pas de'i longs spyod kyi sgo nas gal te bdag nyid rdo rje 'chang chen po mnyes par byed na de'i tshe phyag rgya chen po'i 'bras bu mngon du byed par 'gyur ro/ /tshe 'di nyid la zhes pa ni pha rol tu phyin pa'i rnal 'byor pa las ldog par bstan to/ /gang gi phyir de ni bskal pa grangs med pa gsum gyis byang chub thob par 'gyur ro zhes dgongs pa'o/ /sgra ji bzhin pa zhes pa ni/ spyod pa ji lta ji ltar gsungs/ /zhes bshad pa'i phyir ro/ /'dir bsdus pa'i don 'di yin te re zhig dang po rnal 'byor pa rnam par snang mdzad la sogs pa'i lha'i gzugs 'dzin pa phyag rgya yang de dang 'dra bar byas te bdag la byin gyis brlab pa'i rim pa'i sgyu ma lta bu'i ting nge 'dzin mngon du byas la / ji ltar rnyed pa'i bza' ba tsam gyis chog shes pa/ lung bstan pa'i phyag rgya dang ldan pas yul nas yul du 'khor bas ji srid phyag rgya chen po'i dngos grub thob pa de srid du gnas par bya'o/ /de ni spros pa med pa'i spyod pa'o/ /de ltar zhes bya ba la sogs pas shin du spros pa med pa'i spyod pa bshad par bya ste/ lus gdung ba'i sgo nas zhes pa ni sngar bshad pa'i lus nges par bsdams pas so/ /phyag rgya chen por 'gyur ba thob par bkag nas zhes pa ni/ rdo rje 'chang chen po'i go 'phang bkag nas so/ /sgrub pa po'i yid kyi gdung ba yang dgag par bya ba'i phyir zhes bya ba ni rnam par rtog pa'i spros pa'i mtshan nyid dgag par bya ba'i phyir ro/ /byang chub sems dpa'i rtog pa ni nyon mongs pa yin no zhes 'byung bas so/ / brjod par mi bya'o zhes pa ni dman pa'i tshul du gang yang smra bar mi bya'o/ /slong mo za ba ni nye bar mtshon pa'i don yin te zhes pa ni 'dra ba'i sgras sbyor ba'i phyir ro/ /de bas na slong du 'gro ba dang 'dra bar zhes pa ni bza' ba slong du 'gro ba yid gdung ba dang tshig dman pa zhes rab tu grags so/ /yongs su tshol ba zhes pa la sogs pas ni g.yo sgyu dang pha rol la bstod pa dang tshig sbyang ba la sogs pa dang ldan pas mi 'gyur ro zhes bstan to/ /nye bar mtshon pas na zhes pa ni 'dra ba'i rkyen mi mngon pas so/ /zas la zhen par ma gyur pa zhes pa ni phyi'i bza' ba bkag pa'o/ / ji tsam zhes bya ba la sogs pas bsam gtan gyi bza' ba dang ldan pas shin du spros pa med pa'i spyod pas spyad par bya'o/ /gal te yod na ji tsam gyis lus gnas par 'gyur ba zhes pa ni 'bad pa med par rnyed pas 'bras bu dang rtsa ba la sogs pa nags tshal gyi lha mos sbyin pas cho ga shes par bya ba'o/ /rtag tu nags tshal slong du 'khor/ /brtan par nges pa'i sgrub po la/ /lha mos brgyan pas bza' ba ni/ /skrag cing 'jigs pas ster bar byed/ /rmongs pa'i bdag nyid gyis bltas nas/ /rdo rje ltar na'ang 'jig par 'gyur/ /zhes 'byung ngo / /de lha'i spyod pa zhes bya ba la sogs pas shin du spros pa med pa'i spyod par bya'o zhes bstan to/ /yi ge gsum ni sngags thams cad nye bar sdud pa'i rang bzhin dang gsang ba yin pa'i phyir ro/ /lha yi rnal 'byor mi phyed pa'i/ /zhes pa ni sogs pa'i sgra mi mngon par byas nas/ lha la sogs pa'i rnal 'byor dang mi phyed pa bsgom par bya'o zhes bya ba'i don to/ /'dod pa kun la longs spyod pa'i/ /sngags pas zhes pa ni gal te mi phyed pa'i bzlas pa rnal 'byor pas slob na de'i tshe 'dod pa thams cad nye bar spyod pas kyang 'gal bar mi 'gyur ro zhes dgongs pa'o/ /de ltar zhes bya ba la sogs pas phan yon bstan par bya ste/ rtse gcig par gyur pa zhes pa ni/ /rdo rje bzlas pa la sogs pa'i rim pa bzhi pos zhes bya ba ni rtse gcig pa nyid do/ /de thob na zhes pa ni rim gyis thob nas so/ /rdo rje 'chang chen po nyid thob cing zhes pa ni zung du 'jug pa'i rim pas thob par bya ba'i rdo rje 'chang gi go 'phang nyid do/ /yang dag par nyams su myong ba rnyed par 'gyur ba'i zhes pa ni bla mas nye bar bstan pa'i bsgom pa'i lam gyis thob par 'gyur ro zhes bya ba'i don to/ /gzhan du na zhes bya ba la sogs pas dka' thub dang bde ba'i spyod pa dag la skyon dang yon tan bstan to/ /ya nga ba ma spangs zhes pa ni rims la sogs pa ngal ba myong ba'i 'brel pas so/ /des ni tshe 'di nyid kyi tsha ba'i rnam par smin pa bstan to/ /'chi ba'i dus byas shing 'di nas 'phos nas zhes pa ni tshe 'di nyid la 'chi bar 'gyur bas so/ /mnar med pa la sogs par nges par bsreg par 'gyur ro zhes pa ni grang ba dang dro ba'i dmyal ba chen po la tshig par 'gyur ro zhes bya ba'i tha tshig go/ /drang ba'i don to zhes pa ni spyod pa tsam bstan pas so/ /lung gis bshad pa brjod par bya ste zhes pa ni rdo rje phreng ba'i rgyud las gsungs pa zhes bya'o / /tha dad yi ge slong mo yin/ /zhes bya bas ni sku gsung thugs kyi sa bon ni tha dad par brjod pa ni sa bon te/ yi ge rnams tha dad pa'i phyir ro/ /de lta bu'i yi ge ngag gi bzlas pa tsam gyis 'don pa gang yin pa de ni slong mo za ba'o/ /lkog ma rkan dang lce yis ni/ /gang zhig don ni g.yo 'gyur ba/ /de ni mi 'gyur ga la ste/ /'gyur ba nyid du 'jug pa'o/ /zhes 'byung ngo / /de dag slong mo za ba mi 'dod ces pa ni de ltar mi 'gyur ba'i slong mo za ba mi 'dod pa gang yin pa/ 'on kyang dbyer med pas rdo rje bzlas pa la sogs pa'i rim pas gang zhig bzlas pa ste/ mi 'jig pa tsam la gnas pas rdo rje bzlas par byed pa de dag la dga' bar mi 'gyur te/ ngag gi bzlas pa tsam la mchog tu gzhol bar mi 'gyur ro zhes dgongs pa'o/ /dbugs dbyung ba zhes pa ni yi ge hUM ldang ba'i bdag nyid bsgom par bya'o/ /rngub pa ni yi ge oM gyis 'jug par byed pa'o/ /sbyor ba bzhi zhes pa ni myur ba dang langs pa dang / rnam par bcings pa dang 'khyil ba ste/ /[(]ma [,]me [)]long la sogs pa'i dkyil 'khor bzhi po las sna'i rtse mor thun phyed phyed kyi dus su 'dzin par byed pas shes rab ni yi ge AHste dbyangs kyi sde tshan nye bar sdud par byed pas so/ /thabs ni yi ge hUM ste gsal bya ma lus pa'i tshogs mdor bsdus pas so/ /gzhan ni ma ning ste yi ge oM mo/ /der gnas nas zhes pa 'jug pa la sogs pa'i ngo bo yi ge gsum mi dmigs par byed pa'o/ /sngags kyi yan lag ma nyams bzlas/ /zhes pa ni lha la sogs pa'i sbyor ba dang ma nyams pa'i yi ge gsum bzla bar bya'o/ /rnal 'byor dbang po zhes bya ba la sogs pas nyin mo dang mtshan mo stong phrag nyi shu rtsa gcig dang drug brgya rnal 'byor pas bzlas par bya zhes bzlas pa'i grangs bstan te/ rlung rgyu ba ni de tsam gyi rtsis yin pas so/ / zhes bstan to/ /nges pa'i don to zhes pa ni rdo rje bzlas pa'i rim pa bstan pas so/ /'dir ni bsdus pa'i don 'di yin te/ rdzogs pa'i rim pa'i rnal 'byor pa ye shes kyi phyag rgya dang snyoms par zhugs pa bsgoms pas gang yang rung ba'i nags tshal las 'byung ba'i bza' bca'i chog shes pa'am bsam gtan gyi bza' bca' dang ldan pa bdag dang bdag gi med pa 'gro ba thams cad sgyu ma dang mtshungs par mthong ba smyon pa'i brtul zhugs 'dzin pa/ 'jig rten pas bzhad gad du byas pa gcer bu'am tshem po gyon pas ri dgas dgon pa la sogs pa la bla na med pa'i phyag rgya chen po'i sku dpal rdo rje 'chang gi go 'phang de ji srid thob pa de srid du gnas par bya'o/ /gcer bu'am ni gcer bu min/ /gang dang gang du ji lta bzhin/ /rang lhag lha yi rnal 'byor gyis/ /de nyid gcig pu bsam par bya/ /smyon pa'i brtul zhugs la brten te/ / phun sum tshogs kun 'grub par 'gyur/ /zhes 'byung ngo / /des na rdzogs pa'i rim pa'i rnal 'byor pa shin du spros pa med pa'i spyod pa bstan to/ /'das pa zhes bya ba la sogs pas spyod pa gsum gyi sgo nas ye shes can gyi dngos grub thob po zhes bstan to/ /ye shes can zhes pa ni sngar grub pa mi bskyod pa la sogs pa'o/ /spyod pa 'di nyid kyis zhes pa ni rnam pa gsum gyi spyod pas so/ /nyid kyi sgra ni nges par gzung ba'i don to/ /thabs gzhan gyis ma yin no/ /rin chen lta bu'i gang zag ces pa ni dbang po rno ba'o/ /pad+ma dkar po lta bu'i gang zag la sogs pa'o zhes pa ni dbang po dman pa'o/ /bya ba'i rgyud ni sgron ma 'byung ba la sogs pa'o/ /spyod pa'i rgyud ni rnam par snang mdzad mngon par byang chub pa la sogs pa'o/ /gnyis ka'i rgyud ni dpal mchog dang po la sogs pa'o/ /de las bshad pa'i spyod pa ni khyad par gyi spyod pa ste dam tshig rnams so/ /de dag gi mchog ni rnal 'byor gyi spyod pa ste zhes pa ni dpal 'dus pa las gsungs pa rnam pa gsum gyi spyod pa'o/ /de rnams spyod pa'i ngang tshul can gang yin pa de ni de bzhin du zhes pa ni sngar bshad pa dang 'chad par 'gyur ba'i rim pas des bsnyen pa'i rang bzhin gang la yod pa de ni rin po che lta bu la sogs pa zhes bya'o/ /kun rdzob kyi bden pa zhes pa ni rtog pa dang bcas pas so/ /don dam pa'i bden pa zhes pa ni mi 'jigs pa'i phyir ro/ /de bas na bar gyi tshig mi mngon pa ni las 'dzin pa'o/ /de dag zung du 'jug pa'i bdag nyid can zhes pa ni mi gnas pa'i mya ngan las 'das pa'i dbyings kyi brdar byas pa de nyid rdo rje 'chang chen po nyid ces bstan to/ /dbang phyug thams cad kyi gzhir gyur pas na zhes pa ni phun sum tshogs pa thams cad kyi gzhir gyur pas so/ /phul du byung ba ni dam pa'o/ /mngon sum du byas pa zhes pa ni rang rig par byas par 'gyur ro/ /rtse gcig par mi 'gyur ba'i phyir zhes pa ni ngal ba dang bcas pas sems g.yeng bar byed pas so/ /yang zhes bya ba la sogs pa'i slar yang dka' thub dgag pa bstan to/ /dgongs pa ma yin pa bshad pa'o zhes pa ni spyod pa gsum gyi rgyus thob pa shin du gsal ba'i de kho na nyid bstan pa'i phyir ro/ /de rnams kyis zhes bya ba la sogs pas spros pa dang bcas pa la sogs pa'i spyod pa gsum rgyas par bstan par bya ste/ yul thob pa rnams la zhen pa yin la zhes pa ni yul la mngon par zhen pa can no/ /de yang gnyis su med pa'i ye shes 'dod cing zhes pa ni yan lag drug gi rnal 'byor gyi rim pas spros pa med pa'i go 'phang 'dod pa ste spyod pa'i 'bras bu yin pa'i phyir ro/ /spyod lam thams cad du zhes pa ni ldang ba dang 'dug pa dang nyal ba dang 'chag pa zhes bya ba la brten pas so/ /sems can thams cad kyi 'dod cing zhes pa ni 'gro ba rigs drug po la gnas par 'dod pa ste 'dod pa'i khams de'i rang bzhin yin pas so/ /sangs rgyas nyid rab tu ster ba'i yon tan dang ldan pas na zhes pa ni so sor sdud pa dang bsam gtan gyi yan lag gis de rnams sangs rgyas nyid ster bas so/ /thabs la mkhas pas bsten pa'i skyon rnams kyang yon tan nyid du 'gyur bar mthong ste/ sngags kyis byin gyis brlabs pa'i dug zos pa la bdud rtsi nyid du 'gyur ba yin no/ /de nas las 'dzin pa ste/ yon tan gnyis rdzas gcig gi yul can yin pa'i phyir ro/ /lnga po de dag ni zhes pa la sogs pa la chos kyi dbyings yongs su spangs nas so zhes tshig gi lhag ma'o/ /mig la sogs pa zhes bya ba la sogs pa ni/ rdo rje skye mched rnams dang ni/ /byang chub sems dpa'i dkyil 'khor mchog / ces bshad pa'i phyir ro/ /byang chub ni sa la sogs pa'i rang bzhin de spyan la sogs pa zhes pa ni snyoms par zhugs pa'i sbyor bas byang chub thob par byed pa'i phyir ro/ /sa yi khams ni spyan mar bshad/ /chu khams mA ma kI yin te/ /me ni gos dkar mo zhes bya/ /rlung ni dam tshig sgrol mar bshad/ /ces 'byung ngo / /'od gsal ba las nyon mongs pa nges par bsreg pa'i lha mo dang snyoms par zhugs pa las 'byung ba'i bde bas chags pa la sogs pa'i rang bzhin rnams spangs pa'o/ /rnam par snang mdzad la sogs pa zhes pa ni de bzhin gshegs pa lnga'o/ /gzugs kyi phung po la sogs pa ngo bo nyid du zhes pa ni rnam par snang mdzad la sogs pa'i ming gi tha snyad du byas pas so/ /mdor bsdus pas ni phung po lnga/ /sangs rgyas lngar ni rab tu bshad/ /ces 'byung ngo / /dgyes par gyur la tshim par bya'o/ /zhes pa ni yan lag dang po gnyis pas so/ /rnam pa gsum po zhes bya ba la sogs pas so sor sdud pa'i yan lag spros par bstan te/ dman pa dang bar ma dang mchog gsum ni ngan pa dang 'bring dang dam pa'o/ /mchog gsum du rnam par shes shing zhes pa ni dam pa lhag par mos pas ngan pa dang 'bring dag mchog la bsdus pas so/ /de bzhin du kun dang sbyor ro/ /rang gi rigs kyi lha rnams zhes pa ni rnam par snang mdzad la sogs pa'i rigs can te/ phung po dang khams dang skye mched rnams la'o/ /gzugs sna tshogs pas zhes pa ni mig yangs pa la sogs pa'i spros pas so/ /spros pa dang bcas pa'i spyod pa la gnas pa'i sngags pas zhes pa ni sngar bshad pa'i rim pa dang ldan pas so/ /lha'i 'khor lo mchod par bya zhing zhes pa ni lus kyi 'khor lo'i nang du gnas pa rnam par snang mdzad la sogs pa'i dkyil 'khor pa'i 'khor lo zhes bya'o/ /de nyid lha'i mos pa nyid gzugs la sogs pa rnam pa gsum zhes bya ba la sogs pas bstan to/ /gang gsungs pa ni rnam pa gsum du gsungs pa'o/ /de dang gzhan ma yin pa zhes pa ni logs su dmigs pa ma yin pa'o/ /thams cad kyi bdag nyid can zhes pa ni brtan pa dang g.yo ba'i ngo bo nyid do/ /me long lta bu'i ye shes kyis nyon mongs pa dang shes bya'i sgrib pa dag pa'i mtshan nyid dang ldan pas na bcom ldan 'das so/ /rnam par snang mdzad do zhes pa ni khyad par du snang ba ste rags pa nyid du snang ba'i phyi rol gyi don gyi tshogs dag par byed pa bzhi pa'i ngo bo yin pas so/ /shes par ni so sor sdud pas dmigs nas so/ /rang gi rigs zhes pa ni rin chen 'byung ldan gyi rigs kyi rnam par dag pas gnas pa phung po dang khams dang skye mched rnams la'o/ /mnyam pa nyid kyi ye shes so sor tha dad pa'i rnam par rtog pa bcom pas na bcom ldan 'das so/ /rnam pa bco brgyad kyis tshor ba'i phung po sbyor bas na rin chen ltar dkon pa gang la yod pa de ni rin chen 'byung ldan no/ /yang na bsam pa thams cad rdzogs par byed pas na rin chen 'byung ldan te/ rgyas pa'i rang bzhin yin pas so/ /'od dpag tu med pa'i rigs can zhes pa ni 'od dpag tu med pa'i rigs kyi rnam par dag pas gnas pa phung po dang khams dang skye mched rnams la'o/ /'od dpag tu med pa zhes pa ni yan lag bcu gnyis pa'i gsung rab rnam par dag pa 'dzin pa dang / ngag sbyangs pa'i ngo bo yin pas so/ /yang na so sor rtog pa'i ye shes mtha' yas pa'i ye shes rang bzhin gyi 'od gang la yod pa de ni 'od dpag tu med pa'o/ /yang na byang chub sems kyi rang bzhin gyi 'od dang ldan pas na 'od dpag tu med pa ste/ dbang gi ngo bo yin pas so/ /las kyi rigs can zhes pa ni don yod grub pa'i rnam par dag pas gnas pa phung po dang khams dang skye mched rnams la'o/ /'grub pa'i phrin las mdzad pas na bcom ldan 'das so/ /bya ba nan tan grub pa'i ye shes kyis 'gro ba thams cad rjes su gzung bar mdzad pas na don yod grub pa'o/ /yang na dgug pa'i ngo bo yin pas so/ /bdag gi rigs te rdo rje rigs can rnams la zhes pa ni thugs kyi rdo rje 'chang ni rigs thams cad kyi nang na mchog yin pas so/ /mi bskyod pa zhes pa ni chos kyi dbyings kyi ye shes mngon du mdzad pas na bdud bzhis mi phyed pa'i phyir ro/ /yang na mngon spyod kyi las la nus pa ma nyams pas na mi bskyod pa zhes bya'o/ /bshad ma thag pa'i don zhes pa ni yul lnga nye bar spyod pa'i mtshan nyid do/ /bsdus nas ston pa ni mdor bstan nas bshad pa'o/ /de ltar zhes bya ba la sogs pa ni gzugs la sogs pa rnam par snang mdzad la sogs pa'i de bzhin gshegs pa lnga'i rang bzhin yin te de la phyi rol du snang ba'i gzugs ni rags pa nyid du snang ngo / /de las gzhan sgra la sogs pa ni phra ba nyid du snang ngo / /de bzhin du me long lta bu la sogs pa'i ye shes rnams kyang rags pa dang phra ba nyid dang gong nas gong gi rim pas snang bar 'gyur bas gzugs la sogs pa rnam par snang mdzad kyi rang bzhin yin pa'i phyir ro/ /de rnams la zhes pa ni rgyu de las gzugs la sogs pa la'o/ /nyin dang mtshan zhes pa ni des rnal 'byor pa la don med pa'i skad cig ma yang bkag ste yun rings dang bar chad med pa dang dad pas bsten nas bstan par 'gyur ro zhes 'byung bas so/ /yid la byed pa ni lhag par mos pa de bskyed par bya'o/ /'di ni zhes bya ba la sogs pas phan yon bstan te/ sems bskyed pa zhes pa ni so sor sdud pa dang bsam gtan dag gi yan lag dag las 'byung ba'i yid la byed pa'i khyad par ro/ /sba bar gyur pa zhes pa ni zhal gyi man ngag gi rgyud la gnas pa'o/ /sangs rgyas kyi 'bras bu thob par byed pas ni zung du 'jug pa'i rim pas thob par bya ba dpal rdo rje 'chang gi go 'phang thob par byed pas so/ /de nyid snying po btus pa zhes bya'o/ /thabs kyi rang bzhin du zhes pa ni rnam par snang mdzad la sogs pa de bzhin gshegs pa lnga'i rigs kyi ngo bos so/ /spyan ma la sogs pa shes rab kyi ngo bo nyid du zhes pa ni stong pa bzhi'i rang bzhin gyi rigs kyi yum bzhi'i ngo bos so/ /yongs su gyur pa zhes pa ni des byin gyis brlab pa nyid do/ /'dir ni chos kyi dbyings kyi ye shes ni gcig ste dbyer med pa gcad du med pa mi 'jigs pa nyid bcom ldan 'das rdo rje sems dpa'o/ /des ni gzhan rnams yongs su gzung ba'i phyir rnam pa gnyis su snang ste/ de la rnam par snang mdzad la sogs pa'i de bzhin gshegs pa'i gzugs kyis thabs kyi ngo bo ste pho'i rtags ltar snang ngo / /spyan ma la sogs pa rigs kyi yum bzhi'i gzugs kyis shes rab kyi ngo bo ste/ mo'i rtags ltar snang bar 'gyur te/ snying rje chen po dang stong pa nyid kyi rang bzhin yin pa'i phyir dang / chos kyi dbyings ni cha gnyis kas thob pa'i phyir ro/ /ji skad du/ chos kyi dbyings la dbyer med phyir/ /rigs kyi dbye ba mi 'thad de/ /brten pa'i chos kyis dbye ba yis/ /de yi dbye ba rab tu bshad/ /ces 'byung ngo / /rgyud phyi ma las kyang / /gang zhig shes rab dngos med de / /thabs ni dngos po'i mtshan nyid do/ /thabs dang shes rab snyoms 'jug pa/ /rnal 'byor zhes ni mngon par brjod/ /ces 'byung ngo / /phyogs gzhan ston par byed pa'i tshig phrad ces pa ni shes rab kyi phyogs ston par byed pa'o/ /shes rab ni rigs kyi yum rnams las gang yang rung ba zhes bya'o/ /gzugs rdo rje la sogs par rigs kyi dbye bas zhes pa ni de'i sprul pa'i rang bzhin yin pas so/ /rigs kyi dbye bas zhes pa ni yul rnam par dag pa'i ngo bo yin pas so/ /gzugs rdo rje la sogs pa rigs lnga las byung ba zhes pa ni mchod pa'i lha mo dang byang chub sems dpa' dang / khro bo'i mtha'i bar du dbang po la sogs pa rnam par dag par byed pa de rnams kyis so/ /rdo rje 'chang chen por dmigs par byed de zhes pa ni ji ltar mos pas gzugs la sogs pa spyod cing yan lag drug gi rnal 'byor yongs su rdzogs nas dpal rdo rje sems dpa'i go 'phang thob par bya'o zhes bya ba la sogs pa sbyor ba thams cad la ni sngar bshad zin to/ /spyi'i don to zhes pa ni mdo sde pa la sogs pa'i 'gyod pa zlog par byed pa dang / bskyed pa'i rim pa bstan pas so/ /spros pa dang bcas pa'i spyod pa'o zhes pa ni chags pa la sogs pa'i rol pa rgya che ba'i don dang ldan pas so/ /yid du 'ong ba dang yid du mi 'ong ba dang lung du ma bstan pa'i dbye bas rnam pa gsum zhes pa ni bde ba dang sdug bsngal dang btang snyoms kyi dbye bas gsum mo/ /snang ba ni phyi rol du gzugs su snang bas na snang ba gsum ste rnam par shes pa gsum mo/ /de las byung ba ni zhes pa ni sems las byung ba'i rang bzhin no/ /chags pa dang chags pa dang bral ba dang btang snyoms kyi rang bzhin rnams kyi zhes pa ni nyin mo dang mtshan mor brgya drug cu'i rang bzhin gyis so/ /yul zhes bya ba la sogs pas ni rang bzhin de rnams kyis phyi rol gyi ngo bor snang ba gzugs la sogs pa gang yin pa rnams mig la sogs pa'i rnam par shes pas nyams su myong zhing / rnam par shes pa gsum las byung ba'i chags pa dang bral ba la sogs pa'i rang bzhin gyi ngo bo yul de dag yin no zhes mig la sogs pa'i rnam par shes pas nyams su myong zhing mchod par bya zhes bstan to/ /mchod pa dang len pa nye bar mtshon pa'i zhes pa ni bya ba'i stobs kyis byed pa po dang las ni mchod par bya ba dang mchod par byed pa dag mchog tu 'dzin no/ /rnal 'byor pas bdag nyid la zhes pa ni/ bdag nyid sangs rgyas kun nyid do / /byang chub sems dpa' kun rang bzhin/ /de phyir 'bad pa thams cad kyis/ /rang gi bdag nyid mchod par bya/ / zhes 'byung ngo / /brtan pa dang g.yo ba'i bdag nyid ces pa ni sems can dang snod kyi 'jig rten gnyi ga'i rang bzhin no/ /rigs thams cad kyi bdag nyid can zhes pa ni rnam par snang mdzad la sogs pa'i sku'i rigs kyi bdag nyid ces bya ba'i don te / rdo rje 'chang chen po ni rigs thams cad kyi bskyed pa'i rgyu yin pas so/ /mgon po sangs rgyas kun bdag nyid/ /ces 'byung ngo / /gang du thim par gyur pa zhes pa ni skad kyi byings nye bar bsdus pa yin na yang don du ma yin pas bskyed pa'i don du 'jug go/ /des na rnam par snang mdzad kyi gzhi ni rnam par snang mdzad bskyed par mdzad pa zhes ston to/ /tshogs gnyis dang ldan pa zhes pa ni bsod nams dang ye shes kyi tshogs gtso bor gyur par rim pa gnyis ston par mdzad pa'o/ /de nyid rnal 'byor pa zhes pa'o zhes pa ni 'od gsal bas ye shes gsum spangs nas rdo rje 'chang ba nyid du thob par 'gyur ba'i phyir ro/ / shes rab dang thabs nye bar thob pa rnams la 'jug pa'i rnam par shes pa dang nyon mongs pa can gyi rnam par shes pa dang kun gzhi rnam par shes pa dang de las byung ba'i rang bzhin rnams la dbul bar bya ba ni de'i ngo bo nyid du bsdu bar bya'o/ /rin chen 'byung gnas gtso zhes pa ni brtan pa dang g.yo ba'i bdag nyid can gyi 'gro ba'o/ /'di las rin po che rnams 'byung bas na zhes pa ni de dag gang las byung ba de ni rin chen 'byung gnas gtso bo ste/ 'od gsal ba'i bdag nyid rdo rje 'chang zhes bya ba'i don to/ /de nyid kyi phyir sna tshogs kyi bdag nyid rdo rje 'chang chen po zhes bstan to/ /des ni thams cad 'di khyab ste/ /til mar gyis ni til sogs bzhin/ /zhes rdo rje sa 'og las 'byung ngo / /rnam par shes pa gsum gyi bdag nyid can zhes pa la de rnams nye bar bsdu bar byed pa 'od gsal ba'i de kho na nyid kyi bdag nyid can zhes bya'o/ /rnal 'byor can de nyid do zhes pa ni dbyer med pa nyid du bstan to/ /snang ba la sogs pa dbul bar bya'o zhes pa ni/ snang ba dang snang ba mched pa dang snang ba nye bar thob pa ni zla ba dang nyi ma dang mtshams kyi snang ba rnams de'i bdag nyid du shes par bya'o/ /'dod chags rnam par dag par byed pas na 'od dpag tu med pa'o/ /rdo rje 'chang chen po zhes pa ni de las byung ba dang der bsdus pa'i phyir ro/ /de bskyed pa'i ngo bo nyid kyis 'chang bar mdzad pas na zhes pa ni spro ba dang bsdu ba'i rang bzhin de la de skad ces bya'o/ /bdag nyid la dbul bar bya'o zhes pa ni bdag nyid ni de bzhin gshegs pa thams cad kyi rigs kyi rang bzhin yin pa'i phyir ro/ /bdag nyid sangs rgyas thams cad nyid/ /ces 'byung bas so/ /kun du kun nas thams cad ni / /kun ngo rnam pa kun bdag nyid/ /sangs rgyas kun gyi rang bzhin grub / /rang gi bdag nyid des mthong ngo / /zhes 'byung ngo / /mi bskyod par snang ba zhes pa ni rnal 'byor pa de'i rnam pas snang ba'o/ /rdo rje 'chang chen po de nyid do zhes pa ni dbyer med pa bstan pa'o/ /bshad ma thag pa'i don gnyis gsal bar ston pa yin te zhes pa ni spros par bshad pa'o/ /'das pa dang ma 'ongs pa'i skad cig ma med par zhes pa ni/ gang zhig 'das pa de med pa/ /ma 'ongs pa ni ma byung ba'o/ /zhes bshad pa'i phyir ro/ /da ltar gyi skad cig mas zhes pa ni de ltar byung ba skad cig ma dang yud tsam dang thang cig la sogs pa'o/ /skad cig thang cig yud tsam dang / /mig btsums thal mo sbyar ba ste/ /skad cig se gol gtogs pa tsam/ /thang cig yungs kar bskor ba tsam/ /yud tsam dbugs rngub 'byung ba ste/ /mig btsums mig ni 'dzums pa'i bar/ /lag gnyis thal mo sbyar ba ste/ /skad cig ma sogs mtshan nyid do/ /de rnams gang yang rung ba la skad cig ma zhes bya'o/ /rnam par shes pa gsum la sbyor bar bya'o zhes pa ni snang ba la sogs pa ye shes gsum yongs su spangs nas 'od gsal ba'i rang bzhin du bya'o/ /gzugs la sogs pa sems nyid du shes par bya'o zhes pa ni gzugs la sogs pa phyi rol gyi yul lnga gang yin pa de rnams ni rang gi snang ba med pas kun gzhi la sogs pa rnam par shes pa gsum gyi ngo bo nyid do/ /de rnams kyi rang bzhin yod pa ma yin te/ gcig dang du ma dang bral ba'i phyir ro/ /bdag dang chos rnams nyer brtags pa/ /rnam pa sna tshogs gang zhig 'jug /rnam par shes pa yongs gyur te/ /'gyur ba de yang rnam gsum yin/ /rnam par smin dang yid dang ni/ /yul ni rnam par rig pa'o/ /zhes 'byung ngo / / de bzhin du/ gcig ni rnam pa gnyis snang ba/ /sems ni rnam par 'khrul pa can/ /gzung ba 'dzin pa'i dbye ba yis/ /ji ltar shin tu mkhas pa yin/ /dbyer med pa yang tha dad pas/ /phyir 'gro ming dang phyi rol dang / /yul gyi rnam pa dri ma can/ /sems ni rnam pa du mar snang / /zhes 'byung ngo / /dgongs so zhes pa ni dgongs pa'o/ /'di zhes bya ba la sogs pas phan yon bstan par bya ste/ bshad ma thag pa nyid yongs su shes pa zhes bya ba la sogs pa rnam par shes pa gsum gyi bdag nyid kyi gzugs la sogs pa'i yul gyi tshogs zhes bya ba'i don to/ /rin po che lta bu'i gang zag rnams la sbyin par bya ba yin gyi zhes pa ni dbang po rno ba'i phyir ro/ /tsan+dan lta bu la sogs pa rnams la bstan par bya ba ma yin pas na zhes pa ni bskyed pa'i rim pa tsam de rnams kyi yul yin no zhes dgongs pa'o/ /yang dag pa zhes pa ni ji lta ba bzhin du'o/ /blangs nas bsags shing zhes pa ni bshad pa'i rgyud la sogs pa las btus te rdzogs pa'i rim pa nyid kyis bsag par bya ba zhes pa'i tha tshig go/ /de nyid bstan pa'i phyir/ dus gsum du bzhugs pa'i de bzhin gshegs pa rnams te zhes pa ni snying por gyur pa'i chos kyi dbyings rtogs par gyur pas so/ /yang na yang dag pa'i ye shes gang la yod pa de la 'di skad ces bya'o / /bshad ma thag pa'i tshul lo zhes pa ni sems rnam par dben pa'i rim pa'i mtshan nyid do/ /sngags pas te yan lag ma nyams par bzlas pas zhes pa ni rdo rje bzlas pa'i rim pa'i mthar thob nas sems la dmigs pa bsgom par 'dod pas so/ /rdo rje bzlas nas rnal 'byor pas/ /sems la dmigs pa thob par 'gyur/ /zhes 'byung ngo / /rnam pa gsum ni sngar bshad zin pas so/ /ye shes gsum du shes par bya'o zhes pa ni dag par 'gyur na de nyid lha'i rnam pa nyid du 'gyur ro zhes dgongs pa'o/ / rang bzhin gyi dbye ba nyid ni de'i sems las byung ba'i rnam pa'o/ /rigs te zhes pa ni nyon mongs pa'i bag chags dang ldan pa'i sems kyi chos rnams so/ /chags pa zhes pa ni thabs kyi rang bzhin bzhi bcu ste nyon mongs pa can gyi yid las byung ba'o/ /chags pa dang bral ba ni shes rab kyi rang bzhin sum cu rtsa gsum ste 'jug pa'i rnam par shes pa las 'byung ba'o/ /chags pa bar ma ni shes rab dang thabs snyoms par zhugs pa las byung ba rang bzhin bdun te kun gzhi las 'byung ba'o/ /rang bzhin zhes pa ni sems las byung ba'i chos rnams so/ /de rnams kyi dbye ba ni khyad par rnams kyi tshul la zhes pa ni dge ba dang mi dge ba dang lung du ma bstan pa la sogs pa'i dbye ba'i mtshan nyid do/ /de ni 'di skad ces bya ba la sogs pa phyi rol gyi rnam pa nyid du gzugs la sogs pa'i yul rnams snang ba gang yin par d man pa la sogs pa'i dbye bas nye bar mtshon pa de dag rnam par shes pa gsum gyi rgyu can rang bzhin brgya drug cu'i ngo bo yin no zhes nges par byas la de rnams kyi 'od gsal ba nyid rang bzhin yin no zhes sngags dang phyag rgya'i rim pas de dag sbyangs la 'od gsal ba'i ngo bo nyid du shes par bya'o/ /sbas pa zhes pa ni ye shes gsum rnam par spyod pa'i mtshan nyid kyi don bstan pas so/ /'di ni spros pa med pa'i spyod pa'o zhes pa la sems rnam par dag pa'i rim pa sgom par byed pa'i rnal 'byor pas ji ltar rnyed pa'i spyod pa'i don bstan pas so/ /mchog la sogs pa zhes pa la sogs pa ni yid du 'ong ba dang yid du mi 'ong ba dang gnyis ka'i ngo bo nyid do/ /snang ba gsum gyi ngo bo nyid du yongs su shes pa'o zhes pa ni sngags dang phyag rgya'i rim pas rnam par sbyangs nas 'od gsal ba'i ngo bo nyid du bya'o/ /rang bzhin shes pa'o zhes pa ni chags pa dang chags pa dang bral ba dang chags pa bar ma'i bsgom pa'i sgo nas chags pa la sogs pa de rnams kyi 'od gsal mngon du byed pa'o/ /'od gsal ba'i ngo bo nyid du yongs su bstim pa ste zhes pa ni bde ba chen po'i ngo bo dang ro gcig par bya'o/ /'di nyid ni bla na med pa'i mchod pa ste zhes pa ni 'od gsal ba la 'jug pa'i mtshan nyid do/ /de nyid kyi phyir le'u bcu bdun pa las/ rdo rje gsum mchog phyag mi bya/ /zhes bya bas 'od gsal ba la 'jug pa'i dgongs pas phyi rol gyi phyag dang mchod pa la sogs pa bcom ldan 'das kyis dgag par gsungs so/ /de bzhin du/ sangs rgyas thams cad mnyes byed la/ /de ni mchod pa chen por 'dod/ /ces 'byung ngo / /de nyid rdo rje 'chang chen po ste zhes pa ni/ 'di ni rdzogs pa'i rnal 'byor zhes/ /rdo rje 'chang chen de nyid de/ /rnam pa thams cad mchog ldan pa/ /de las kun mkhyen 'byung bar 'gyur/ /zhes bshad pas so/ /de'i bskyed pa'i rgyur gyur pa'i phyir ro zhes pa ni rim pa bzhi pa la zung du 'jug pa'i rim pas rdo rje 'chang chen po 'byung ba'i phyir ro/ /de ltar zhes bya ba la sogs pas sgra la sogs pa rnams kyang 'od gsal ba las nges par sbyar bar bya'o zhes bstan to/ /ji skad du bshad pa'i rgyud las zhes pa ni dgongs pa lung bstan pa las so/ /nang ni rang gi rgyud la gnas pa'o/ /phyi rol ni gzhan gyi rgyud la gnas pa dang / snod kyi 'jig rten la gnas pa ni gnyi ga zhes bya'o/ /de lta bu'i rnam pa gsum gyi gzugs la sogs pa mi dmigs pa ste gcig dang du ma dang bral ba'i phyir ro/ /de bas na 'od gsal ba'i rang bzhin du bya ba gang yin pa de ni lha rnams la dbul ba zhes bya'o/ /shin tu spros pa med pa'i spyod pa ste zhes pa ni ye shes kyi phyag rgya dang snyoms par 'jug pa la mngon par byang chub kyi sbyor bas spyod pa bstan pa'i phyir ro/ /mthar thug pa'o zhes ni 'od gsal ba la 'jug pa'i mtshan nyid kyi don ston pas so/ /da ni zhes bya ba la sogs pas rjes su dran pa drug gi sgo nas rgyud thams cad kyi snying por gyur pa rim pa gnyis las gcig ni rigs brgya'i dbye ba'i bar dang / gnyis pa ni rim pa lnga pa'i mtshan nyid so sor bstan par bya ste gcig gi rjes su dran pa gcig gis bskyed pa'i rim pa lngas ni rim pa lnga bstan to/ /rigs brgya'i dbye bas zhes pa ni sngar rgyas par bshad pas so/ /lus rnam par dben pas byed pa zhes pa ni lus kyi cha cha'i dbye bas rigs lnga'i de bzhin gshegs pa nyid du rtogs par byed pa'o/ / de nyid kyi phyir sangs rgyas rjes su dran pa ni phung po dang khams dang skye mched rnams de bzhin gshegs pa nyid du rjes su dran pa zhes bya'o/ /de bzhin du rdo rje bzlas pa mthar thug pa zhes pa ni rdo rje 'chang chen po la sogs pa rnam pa bcu gcig gi rdo rje bzlas pa yongs su rdzogs nas so/ /ngag rnam par 'byed pa ni nyon mongs pa'i ngag sbyang bas so/ /chos rjes su dran pa zhes pa ni A li dang kA li'i rang bzhin gyi yi ge dang tshig dang ngag dang chen po la sogs pa'i dbye ba dang ldan pa'i ngag gi spros pa ni chos rnams so/ /rjes su dran pa ni de rnams kyi rang bzhin yongs su shes par 'gyur ro/ /rdo rje bzlas pa'i rim pa 'dis/ /gsung gi rdo rje sgrub byed pa/ /ye shes gsum gyi dbye ba yis/ /sems tsam la ni nges par sbyor/ /zhes 'byung bas so/ /rang bzhin snang ba'i rim gyis zhes pa ni/ /sngags dang phyag rgya'i rim pas nye bar bsdus pa'i rnam par shes pa gsum dang / /de'i rang bzhin gyi chos bsgom pa'i sgo nas so/ /sems la rnam par rtog pa ni/ /zhes pa la rnam par shes pa gsum po 'od gsal ba'i go 'phang la 'jug par byed pas so/ /rdo rje rjes su dran pa'o/ /zhes pa ni rdo rje ltar mi phyed pa gnyis su med pa'i ye shes kyi rang bzhin gyi 'od gsal ba las rjes su dran pa'o/ /snang ba la sogs pa ye shes gsum thob nas phyi nas 'od gsal ba mngon du 'gyur ro/ /lus dang ngag dang yid do zhes pa la rdul phra rab tu ma tshogs pa'i bdag nyid yin pas so/ /ye shes gsum gyi ngo bo so sor yongs su shes pa'o zhes pa ni ye shes gsum gyi bdag nyid can ni lus la sogs pa yin no zhes lhag par mos pa gang yin pa'o/ /sbyor ba ni phyis gcig tu byas pa ste zhes pa ni 'od gsal ba rtogs pas ro gcig tu 'gyur ba ste/ ngo bo nyid med rdzogs pa'o/ / de bas na zhes bya ba la sogs pas snang ba nye bar thob pa la sogs pa'i rim pa las 'byung ba ye shes kyi sku ste bdag byin gyis brlab pa'i rim pa'i mtshan nyid do/ /khro bo ni thabs kyi ye shes so zhes pa ni ma rig pa'i 'og tu 'byung ba zhes brjod par bya'o/ /des na snang ba nye bar thob pa dang snang ba mched pa dang snang ba ste/ mtshan mo dang nyin mo dang zla ba'i snang ba dang 'dra bas ro gcig tu bsgom pa ni khro bo rjes su dran pa ste/ sgyu ma'i sku yi rgyur gyur pa/ /zhes bstan to/ /rang gi zla ba'i gzugs brnyan 'dra/ /bdag nyid kyis ni sems nyid mthong / /gal te zla ba la dmigs nas/ / rdo rje mtshan ni rab tu brtag /de ni thabs te ston byed pa/ /rdor sogs bskyed pa'i rnal 'byor pa'i/ /zla ba rdo rje sogs sbyor bas/ /sems dang sems byung yang dag sbyar/ /shes rab thabs dang kun sbyor bas/ /lha yi sku ni 'byung bar 'gyur/ /zhes 'byung ngo / /lha ni phyag rgya chen po'i tshul lo zhes pa ni ma lus lus pa med pa de bzhin gshegs pa thams cad kyi sku rnams kyis byin gyis rlob pa ye shes kyi sku zhes bya ba'i tha tshig go/ /de'i rjes su dran pa ni de mthong ba ste sgyu ma la sogs pa dang 'dra bar yongs su shes pa'o/ /de nyid bstan par bya ba'i phyir/ chu zla la sogs pa'i rnam pas yongs su shes pa'o zhes pa ni chu zla la sogs pa sgyu ma'i dpe bcu gnyis kyis nye bar mtshon pa zhes bya ba'i don to/ /des ni bdag la byin gyis brlab pa'i rim pa bstan pa yin no/ /don dam pa'i bden pas gcig tu byas pa'o zhes pa ni phyi dang nang gi mngon par byang chub pa'i rim pa'am ril por 'dzin pa dang rjes su gzhig pa'i ting nge 'dzin gnyis kyis rim pas 'od gsal ba nyid du 'gyur ba man ngag bzhi pas mngon du bya ba zhes bya ba'i don to/ /des ni mngon par byang chub pa'i rim pa bstan pa yin no/ /de bas na rjes su sbyor bas zhes pa ni don dam pa'i bden pa dang gcig tu byas pa ste/ ye shes kyi sku dang 'od gsal ba ro gcig tu gyur pa'i mtshan nyid kyi mngon par byang chub pa'i rim pa las so zhes bya ba'i don to/ /bsgom pa ni bden pa gnyis kyi rnam pas dmigs nas zhes pa ni nye bar mtshon pa tsam yin te/ rnam pa dang bcas pa dang rnam pa med pa dang thabs dang shes rab la sogs pa dbyer med pas kyang bsgom par bya'o zhes bya ba'i don to/ /ji skad du/ rnam bcas dngos po rtog pa dang / /rnam pa med pa'i rtog pa ste/ /gcig tu byas nas gang du spyod/ /de ni zung du 'jug par bshad/ / ces 'byung ngo / /chos thams cad ji lta ba bzhin du yongs su shes pa'i mtshan nyid ni byang chub po/ /de nyid bde ba chen po'i mtshan nyid gcig pa zhes pa ni chos kyi sku ro gcig pa'i ngo bo rtag tu bde ba'i rang bzhin zhes bya ba'i don to/ /ji skad du/ de nyid zag pa med pa'i dbyings/ /bsam gyis mi khyab dge ba rtag /bde ba rnam par grol ba'i sku/ /thub pa chen po'i chos zhes bya/ /zhes 'byung ngo / /rdo rje 'chang chen po thob par 'gyur ba'o zhes pa ni dpal rdo rje sems dpa'i phyag rgya chen po'i sku'o zhes pa'i don to/ /des ni zung du 'jug pa'i rim pa bstan pa yin no/ /don 'di nyid ces pa ni rdo rje bzlas pa la sogs pa rdzogs pa'i rim pa'i mtshan nyid do zhes bya ba'i don to/ /bshad pa'i rgyud las zhes pa ni rdo rje phreng ba las so/ /nyams dga' sangs rgyas kun gyis bsten/ /zhes pa ni de bzhin gshegs pa thams cad kyi rang bzhin sku rnam par dben pa'o/ /b+ha ga ni bsod nams dang ye shes kyi tshogs dang ldan pa'o/ /zhi ba gcig pu'i ming zhes pa ni 'gro ba dang 'ong ba rnam par grol ba'i rang bzhin gyi rdo rje bzlas pa'i mthar thug pa ma ning gi bzlas pa'o/ /rang gi sku la sogs pa'i de kho na nyid de snang ba la sogs pa'i ye shes rnams so/ /de nyid gnyis med ces pa ni stong pa gsum mo/ /de 'byung ba ni gang las skyes pa ste de ni rang gi ngo bo nyid gnyis med 'byung ste 'od gsal ba'o/ /rdo rje ni sngar bshad pa'i lus la sogs pa'o/ /de nyid du sbyor ba zhes pa ni 'od gsal ba'i de kho na nyid bzhi pa de la sngags dang phyag rgya'i rim pas mi snang bar bya'o/ /sangs rgyas rjes dran sbyor ba ste/ /zhes pa ni de bzhin gshegs pa thams cad ro gcig par byed pa 'od gsal ba rtogs pa'i mtshan nyid kyi de kho na nyid ces bya ba'i don to/ /de nyid b+ha gar ni 'od gsal ba la'o/ / ling ga ni thim pa nyid yin par grags pa ni bstan to zhes bya ba'i don to/ /des ni sems rnam par dag pa'i rim pa bstan to/ /bzhugs pa zhes pa sgyu ma la sogs pa'i rnam pas so/ /gnyis med sbyor ba ste zhes pa ni sbyor ba ni tha mi dad do / /sangs rgyas gzugs su bsgom pa'o/ /zhes pa ni de ltar gyur pa'i sangs rgyas kyi sku sgyu ma'i rnam pa'i lha'i sku'o/ /sgom pa'i zhes pa ni snang ba nye bar thob pa la sogs pa'i rim pa'am cig car du spro bar bya'o/ /des ni bdag la byin gyis brlab pa'i rim pa bstan pa yin no/ /de las ni de la dmigs nas mngon par byang chub pa'i rim pa'i mtshan nyid kyi man ngag gang yin pa de las ni man ngag bzhi pa mngon du byed pa'i mtshan nyid 'od gsal ba las so/ /blo ldan gyis zhes pa ni rnal 'byor pa las so/ /spro ba ni zhi ba dang skye ba la mi gnas pa rdo rje 'chang chen po'i sku bskyed par bya'o/ /de'i tshe/ /ba spu'i bu ga'i rtse mor gnas/ / zhes pa ni ba spu'i bu ga la sogs pa la gnas pa'o/ /mnyam pa med pa khyad par du/ /zhes pa ni brjod du mi nus pa'o/ /sangs rgyas sprin rnams der spro'o/ / zhes pa ni gzhan gyi don bya ba'i phyir de bzhin gshegs pa rnams spro bar bya'o zhes pa 'dis zung du 'jug pa'i rim pa bstan pa yin no/ /dgongs pas bshad pa'o zhes pa ni 'gal ba'i tshig gi sgo nas rim pa lnga'i de kho na nyid kyi mtshan nyid bstan pa'i phyir ro/ /de ltar zhes bya ba la sogs pas sngar bshad pa'i don bsdu ba'i phyir bshad par bya ste/ yongs su dag pa'i lha yi sku/ / zhes pa ni zung du 'jug pa'i rim pas thob par bya ba'i rdo rje 'chang chen po'i phyag rgya'i sku bskyed nas so/ /rnal 'byor pa thams cad kyi thun mong gi zhes pa ni bskyed pa dang rdzogs pa'i rim pa dag gis thun mong ba'o/ /snyoms par 'jug pa'i rim pa zhes pa ni dbang po gnyis yang dag par sbyor ba'i mtshan nyid can gyi rim pa zhes bya ba'i don to/ /de la bskyed pa'i rim pa'i rnal 'byor pa la dkyil 'khor rgyal ba mchog gi ting nge 'dzin rtsom na phyag rgya legs par spyod pa'i dus su snyoms par 'jug pa'i rim pa bstan pa dang / rdzogs pa'i rim pa'i rnal 'byor pa la rim pa lnga char la yang snyoms par 'jug pa'i rim pa bstan to/ /na tshod gzhon pa la sogs pa dang ldan pa'i zhes pa ni gzhon pa nyid dang mdzes pa nyid dang dam tshig dang sdom pa la sogs pa dang ldan pa zhes bya ba'i don te / bud med ni dam tshig dang ye shes kyi phyag rgya las gang yang rung ba'o/ /rnyed cing zhes pa ni rnyed pa dang bsgom par byas nas so/ /der ji ltar rnyed pa'i gzugs dang zhes pa ni thams cad ma tshogs na las kyi phyag rgya ste/ byol song sa la 'ang rab tu brtag /ces 'byung bas so/ /yan lag ma nyams pa gzugs dang ldan zhing zhes pa ni rigs dang rjes su mthun pa ut+pal sngon po'i kha dog dang 'dra ba zhes bya ba'i tha tshig go/ /rab tu dben zhing yid dang mthun pa zhes pa ni spros pa dang bcas pa dang spros pa med pa'i rnal 'byor pa dag gis lha khang sum brtsegs la sogs pa'o/ /gzugs la sogs pa'i yul gyi mtshan nyid kyi mchod pa brtsam par bya'o zhes pa ni dpal sangs rgyas thams cad dang mnyam par sbyor ba mkha' 'gro dra ba'i bde mchog gi rim pa'i rgyud las gsungs pas chags pa'i rol pa la sogs pa'i rgya che ba'i mtshan nyid kyi yul gyi mchod pa bya'o/ /gang gis she na zhes bya ba la sogs pas brtson pa'i dus su bya ba bshad par bya ste/ yul du byin gyis brlabs pa na/ /zhes pa ni yul rnams len pa'am dmigs pa'am de las gzung ba'i gtso bo'i sgo nas 'byung ba'o/ /'dod chags la sogs pa rang bzhin gsum zhes pa ni chags pa bral ba dang chags pa dang chags pa bar ma la sogs pa ste/ shes rab dang thabs dang nye bar thob pa gsum zhes bya ba'i tha tshig go/ /yid du 'ong ba'i yul rnams zhes pa ni rnam pa gsum gyi yul rnams gcig tu bya ste yid du 'ong ba'i yul zhes bya'o/ /yul gsum po dag gis zhes pa ni 'dod chags la sogs pa'i rgyur gyur pa'i yul rnams zhes bya ba'i don to/ /ngag gi bdag nyid mchod par bya'o zhes pa ni rnam par snang mdzad la sogs pa'i de bzhin gshegs pa'i rigs kyi 'brel pa dang ldan pa'i yul rnams nye bar spyod pa la brten nas rang gi rgyud tshim par bya'o zhes bya ba'i don to/ /de ltar rdo rje 'chang chen po ni dbus kyi gtso bo ste dpal rdo rje sems dpa'o/ /reg bya rdo rje ni dbus kyi gtso bo ste khyad par du ma gzung bas so/ /rnam par snang mdzad la sogs pa zhes pa ni rigs kyi dbye bas gnas pa zhes pa'i tha tshig go/ /'di ni de bzhin gshegs pa'i yin pas na zhes pa ni rnam par snang mdzad kyi rigs las 'byung ba'o/ /rigs de'i phyag rgya gzhan rnams kyis ni zhes pa la rnam par snang mdzad de bzhin gshegs pa'i rigs kyi 'brel pa dang ldan pa'i phyag rgya gang yin pa de rnams kyi nang na gtso bo ni btsun mo yin pas so/ /nyon mongs pa dang shes bya'i sgrib pa la sogs pa spong ba'i phyogs su me long lta bu'i ye shes dang po gtso bo yin pas so/ /btsun mo chen mo ste sngar bshad pa zhes pa ni snga ma bzhin du mtshan nyid dang ldan pa zhes bya'o / /ma bshad pa rnams kyang bsdus pa'i don to zhes pa ni rin chen 'byung ldan la sogs pa'i de bzhin gshegs pa'i rigs gzung bar bya ba'i phyir ro/ /de nyid rin po che'i rnal 'byor pas mA ma kIr bsgom par bya'o zhes pa ni rigs kyi dbang gis bsgom par bya'o zhes dgongs pa'o zhes sbyor ro zhes pa ni bya ba'i tshig med kyang rtogs par bya'o zhes bya ba'i don to/ /de ltar zhes bya ba la sogs pas gsung rdo rje la sogs pa'i rnal 'byor pa rnams kyis kyang de nyid gos dkar mo dang sgrol ma'i gzugs su bsgom par bya zhes bstan to/ /skyes pa dang bud med kyi dbang po zhes pa ni rdo rje dang pad+ma gnyis zhes bya ba'i don to/ /phan tshun rjes su chags pas sngon du 'gro bas zhes bya ba'i rim pa yin te/ re zhig dang por rnal 'byor pas ji ltar bshad pa'i mtshan nyid dang ldan pa'i phyag rgya blangs la/ de'i yan lag dang nying lag la de bzhin gshegs pa lnga la sogs pa'i sa bon dgod cing mig dang lcags kyu dang ba dan dang sdigs mdzub gnyis la sogs pa'i lag pa'i phyag rgya de'i pad+ma'i nang du bcug la byang chub sems 'dzag pa 'dod pa'i gdugs la sogs pa'i rtsa rnams dro ba'i reg pa rnyed pa'i bar du bskul nas rang gi rdo rje'i rtse mo nas 'od zer gyi tshogs spro zhing / lha mo'i pad+ma'i snar zhugs pa des de'i lus po'i nang gsal bar byas nas pad+ma las kyang 'od zer gyi tshogs spros te/ rdo rje'i lam nas thabs kyi lus des gsal zhing 'dod pas 'byung na rang nyid kyis thabs kyi rke la 'khyud pa'i 'dod pa dang ldan pa'i phyag rgya 'gyur na/ oM sarba ta thA ga ta a nu rA ga na badzra swa b+hA wa At+ma kou0f85hUM/ /zhes brjod nas rdo rje dang pad+ma sbyor ba'i dus su oM sarba ta thA ga ta pU dza badzra swa b+hA wa At+ma kou0f85haM/ zhes bya ba brjod pas bsgom pa gang yin pa de ni phan tshun rjes su chags par rnal 'byor pas bsgom par bya'o zhes bya ba'i don to/ /'khyud pa la sogs pa'i las rjes su bsten pa ste zhes pa ni 'khyud pa dang 'o dang 'jib pa dang so dang sen mo gdab pa la sogs pa rang gi bya ba rdzogs par bya'o zhes bya ba'i tha tshig go/ /rdo rje 'chang chen po zhes pa ni sangs rgyas thams cad kyi ngo bo gcig pas so/ /mchog tu dga' ba'i mtshan nyid gcig pa ste zhes pa ni bde ba chen po zhes bya'o/ /'dir zhes bya ba la sogs pas rim pa gnyis sgom pa po'i nang na bskyed pa'i rim pa'i rnal 'byor pa rnams la nges par gzung bar bya ste sngags pa rjes su gzhol ba rnams kyi zhes pa ni sngags la mngon par zhen pa bskyed pa'i rim pa'i rnal 'byor pa rnams kyi'o/ /cho ga ni sngags dgod pa'i mtshan nyid can zhes bya ba'i don to/ /yi ge hUM yongs su gyur pa las ni thugs rdo rje'i sa bon las 'byung ba rtse lnga pa'i rdo rje bsgom par bya'o/ /oM gyis nor bu'i cha byin gyis brlab par bsam pa dang zhes pa ni sra ba yin pas rnam par snang mdzad kyi sa bon gyis byin gyis brlab par bya'o/ /a las phyag rgya'i pad+ma mngon par 'dus byas pa zhes pa gsung rdo rje 'chang gi sa bon shes rab kyi rang bzhin gyis dam tshig gi phyag rgya'i chos 'byung sa bon de nyid las bskyed cing de nyid dgod par bya ste/ de shes rab kyi yan lag yin pas shes rab kyi rang bzhin yin pa'i phyir ro/ /rin chen 'byung ldan gyi nga rgyal dang ldan pas ni/ nam mkha'i khams kyi rang bzhin gyi rgya che ba'i sems kyis so/ /yi ge hUM gi rlung dang dga' ba nyid kyis rdo rje dang pad+ma snyoms par zhugs pa las 'byung ba'i yi ge hUM gi dbugs bsgoms pas mnyes nas te/ rang gi phyag rgya mnyes nas mchog gi bsnyen pa la sogs pas snang ba la sogs pa'i ye shes 'byung ba dang yang dag par sbyar nas so/ /yi ge phaT kyi sgras byang chub kyi sems dbab par bya'o zhes pa ni lhan cig skyes pa zhes bya ba bde ba chen po nyams su myong zhing de nas dam tshig gi dkyil 'khor bskyed par bya ba'i phyir rdo rje'i lam nas pad+ma'i nang du rang gi rag+ta spro bar bya'o/ /rdo rje'i tshig gi don 'di yin no zhes pa ni zab pa'i don dang ldan pa'i tshig don zhes bya'o/ /'di dag thams cad sku gsum gyi rtog pa zhes pa ni snang ba la sogs pa ye shes gsum gyi rdzogs pa'i rim pa dang dam tshig dang ye shes dang ting nge 'dzin sems dpa' gsum gyi bdag nyid de bskyed pa'i rim pas so/ /rnam par rtog pa tsam nyid yin gyi zhes pa ni brtags pa yin pa'i phyir ro/ /de kho na nyid ma yin no zhes pa ni thabs dang shes rab kyi bdag nyid du bsgom pa yang yin pa de ni don dam pa ma yin no zhes bya ba'i tha tshig go/ /de kho na nyid ni spros pa du mas bsgrub bya ma yin te 'ba' zhig tu rang snang ba'i phyir ro/ /phyag rgya la sogs pa'i rgyu'i tshogs pa de kho na nyid gsal bar byed pa yin gyi byed pa ni ma yin no/ /de kho na nyid ni rang snang ba khams gsum la gnas pa ste/ glo bur gyi dri ma'i bag chags mang bas mi snang ngo zhes phal cher du sngar bshad pas 'dir ma bstan to/ /snyoms par zhugs pa'i dus su zhes bya ba la sogs pas snyoms par zhugs pa'i bsgom pa'i rim pa'i khyad par bstan par bya ste/ dkar po la sogs pa'i 'od zer lnga zhes pa ni de bzhin gshegs pa lnga'i rang bzhin yin pa 'am/ rdo rje dang pad+ma dag gis 'dod pa'i gdugs la sogs pa'i rtsa lnga dang ldan pa zhes bya ba'i don to/ /zla 'od ces bya ba la sogs pas zhes pa ni kha dog dkar po 'od spro ba zhes bya'o/ /zla 'od ces bya ba la sogs pas me long lta bu'i ye shes kyi ngo bos phyi rol du yang rnam pa sna tshogs kyi 'od zer gyi tshogs spro ba zhes bya ba'i tha tshig go/ /yid 'phrog pa'i bud med ces pa ni phyag rgya'i mtshan nyid nu ma rgyas pa dang pad+ma can dang byang chub kyi sems 'dzag pa dang bde ba'i sgra mkhas pa la sogs pa'i rnal 'byor pa'i sems 'phrog pa zhes bya ba'i don to/ /bsam pa 'di ni nye bar mtshon pa zhes pa ste gsung dang thugs dang rin chen dang don yod grub pa'i rnal 'byor pa rnams kyis rang gi rjes su 'brangs nas/ dmar po dang sngon po dang ser po po dang kha dog ljang gu dang ldan pa sngar bshad pa'i yon tan gyi tshogs kyis brgyan pa'i phyag rgya bsgom par bya zhes bya ba'i tha tshig go/ /dgongs pa ma yin pas bshad pa'o zhes pa ni shin tu gsal ba'i de kho na nyid bstan pa'i phyir ro/ /sngar gsungs pa'i rjes su dran pa drug ces pa ni rim pa gnyis rjod par byed pa'o/ /nges par ston par bzhed nas zhes pa ni phyogs gcig tu chad par bzhed pas so/ /gzhan du na mdor bstan pa dang rgyas par bshad pa mthun par mi 'gyur ro/ /gang gi phyir lus rnam par dben pa nas brtsams te rjes su dran pa drug mdor bstan par byas so/ /'di ni bskyed pa'i rim pa rnam par snang mdzad la sogs pa de bzhin gshegs pa lnga'i sku bsgoms nas rim pa gnyis kyis 'od gsal la zhugs nas bdag la byin gyis brlabs pas de rnams rdo rje 'chang chen po'i sku bsgom par bya'o/ /de ltar na phyogs gcig gi sgo nas mdor bstan pa dang rgyas par bshad pa rnams dang 'brel lo/ /la la ni ma lus pas 'brel te zhes zer te gang gi phyir bskyed pa'i rim pa'i rnam par snang mdzad la sogs pa'i sku bsgoms la/ rim pa dang pos ngag rnam par dben par byas te gnyis pas 'od gsal ba la 'jug cing gsum pas de rnams rnam par snang mdzad la sogs pa bsgoms te bzhi pas 'od gsal bar byas nas lnga pas rdo rje 'chang gi phyag rgya chen po'i sku bsam par bya'o/ /de bas na mdor bstan pa dang rgyas par bshad pa rnams mthun pa yin no zhes gnas so/ /de nyid bstan par bya ba'i phyir gnas ston par mdzad pa yin te zhes smos te/ rgyas par bshad pa'i rim pas brtson par bshad do/ /ston pa po rang nyid kyis zhes pa ni 'dri ba dang lan 'debs par rang nyid kyis mdzad pa ste pha rol gyi rtog pa la dgongs nas zhes tshig lhag ma'o/ /de nyid yang nas yang bslab par bya ba yin par shes pa shin tu gsal bar bya ba'i phyir ro/ /sgom pa ni sems rtse gcig pa'i ting nge 'dzin gyi khyad par ro/ /b+ha ga ni don dam pa'i bden pa zhes pa ni chags pa dang bral ba la sogs pa'i rang bzhin bcom pas so/ /de thim pas na zhes pa ni de las 'byung ba 'am de la 'jug pa'o/ /kun rdzob kyi bden pa'o zhes pa ni sgyu ma lta bu'i sku'o/ /'od gsal ba la rab tu zhugs nas zhes pa ni phyag rgya dang ting nge 'dzin gyi rim pas stong par byas nas so/ /sangs rgyas kyi sku zhes bya ba la sogs pas zung du 'jug pa'i rim pa bstan par bya ste / don dam pa'i bden pa las ldang bar bya'o zhes pa ni mngon par byang chub pa'i rim pa las phyag rgya chen po'i sku blang bar bya'o/ /ba spu'i bu ga zhes bya ba la sogs pas rim pa lnga pa la gnas pas gzhan gyi don bstan to/ / de la gang las byung ba de ni ba spu'i bu ga ste ba spu'i rtsa ba zhes bya'o/ /de rnams kyi mtha' ni rtse mo'o/ /ba spu'i gnyi ga'i bar zhes pa ni ba spu'i bar la bya'o/ /des na don 'di yin te dang po bskyed pa'i rim pas rnam par snang mdzad la sogs pa'i sku bsgoms la rdzogs pa'i rim pas mi gnas pa'i mya ngan las 'das pa'i dbyings kyi rang bzhin de kho na nyid thob nas de bzhin gshegs pa thams cad spro ba sngon du 'gro bar gzhan gyi don bya'o zhes tshig gi don to/ /mkhas pa ni rang bzhin shes pa zhes bya ba la sogs pa'i rim pa gnyis thob nas rdo rje 'chang gi gzugs kyi rang bzhin shes pas spro bar bya'o zhes bstan to/ /de ltar zhes bya ba la sogs pas spro ba'i khyad par bshad par bya ste/ gti mug la spyod pa zhes bya ba la sogs pas gti mug gi rigs can rnams sangs rgyas spro zhing gti mug gi dri ma de las bzlog ste / rnam par snang mdzad du gyur pas 'od zer gyi sbyor bas de rnams rang gi rdo rje'i sku la 'jug par bya'o zhes gzhan gyi don phun sum tshogs pa sgrub par bstan to/ /de bzhin du gsung rdo rje la sogs pa la yang shes par bya'o/ /mi 'jigs pa'i ngo bo nyid yin pa'i phyir ro zhes pa ni/ brtan pa snying po khong stong med/ /gcad med dbyer med mtshan nyid de/ /sred pa med cing 'jig med pa/ /stong pa nyid ni rdo rjer bshad/ /ces 'byung bas so/ /de la sngar bshad pa'i rim pas zhes pa ni 'dod chags kyi spyod pa dang ldan pa sems can gyi khams sbyang ba'i rim pas spro zhing bsdu bar bya'o/ /rdo rje sems dpa' ni rdo rje 'chang chen po'o zhes pa ni/ lnga spong ba dang lnga rig pa / /rdo rje zhes byar bshad pa yin/ /de la sems dpa' ni rang bzhin gang la yod pa de la rdo rje sems dpa' zhes bya'o/ /sku ni sa'o zhes pa ni tshig phrad kyi don du ma yin pas so/ /la ste 'dzin cing bdag gir mdzad pas na zhes pa ni re ba thams cad yongs su rdzogs pas so/ /rin chen 'byung ldan ni nam mkha'i mdzod kyi nye bar mtshon pas so/ /sangs rgyas thams cad kyi rang bzhin yin pas na rdo rje 'chang chen po'o / /dam tshig gis khro bar mdzad pas na/ zhes pa ni dam tshig nyams pa la khros pa'i stobs kyis nges par bsdams pa'am sbyang bar byed pa'o/ /dam tshig gsos pa la bcom ldan 'das don yod grub pa dbang byed pa yin no zhes bla ma'i rgyud yin no/ /zhe sdang las byung ba'i phyir khro bo ni mi bskyod pa zhes bya'o/ /de ni sangs rgyas rjes su dran pa la sogs pa lnga pos rim pa gnyis sngar mdor bstan pas ni rgyas par bshad pa yin no/ /dam tshig gi rjes su dran pas las kyi rgyal ba mchog gi yan lag gcig tshim par bya ba'i cho ga bstan par bya ste/ dam tshig thams cad sprul par mdzad pas na dam tshig ni rdo rje 'chang chen po'o/ /ye shes kyi sku'i rang bzhin gyi zhes pa ni ye shes lnga'i rang bzhin gyi lha'i sku zhes bya ba'i don to/ /bdag la byin gyis brlab pa'i rim pas thob par bya ba'i ye shes kyi sku 'dir 'chad par 'dod pa ma yin te/ de rdzogs pa'i rim pa yin pas bdud rtsis tshim pa'i cho ga mi rigs pa'i phyir ro/ /dgos na yang rdzogs pa'i rim pa nyams par 'gyur ro/ /de'i phyi nas rjes su dran zhing zhes pa ni ting nge 'dzin gnyis kyis rdzogs pa rdo rje 'chang ni sku phyi ma'i dus su'o/ /sprul pa'i sku'o zhes pa ni spyan ma la sogs pa lha mo bzhis bskul ba dang / mi bskyod pa la sogs pa de bzhin gshegs pa lngas bstod pa las 'byung ba'o/ /de rgyas par bya ba'i phyir zhes pa ni de tshim pa'i phyir ro/ /lce rdo rje ni rdo rje lta bu'i lce bsgoms nas so/ /rkan gyi pad+ma zhes pa ni rkan gyi phyogs so/ /rdo rje pad+ma la sogs pas dpe bstan to/ /klad rgyas na gnas pa'i bdud rtsi zhes pa ni tshangs pa'i bu ga'i nang na gnas pa'i byang chub kyi sems so/ /thigs pa'i bskul ba dbab pa'i cha rnams kyis zhes pa ni oM gyis yi ge 'bar bas bzhus pa dang dbyangs bcu drug gi bdag nyid kyi zla ba'i dkyil 'khor zhes bya'o/ /gzugs kyi phung po la sogs pa zhes pa ni phung po dang khams dang skye mched kyi bdag nyid kyi lus so/ /sems dang sems las byung ba rnams zhes pa ni sems dang sems las byung ba'i rang bzhin te/ rnam par shes pa lus bde bar gyur na sems la yang yid bde ba bskyed pa'i phyir ro/ /tshim par bya zhes pa ni tshim pa nyid mchod pa zhes dgongs pa'o/ /bdud rtsi dbab pa zhes bya ba la sogs pas bdud rtsi myang ba'i cho ga la phan yon bstan to/ /tshig gi don 'di yin te/ phra mo'i rnal 'byor dang bzlas pa dang 'od du zhu ba dang lha mos bskul bas ldang ba dang / de bzhin gshegs pas bstod pa'i 'og tu sems dub par gyur na mtho gang tsam bor nas rang gi spyi bor cha bcu drug yongs su gyur pa las gdugs dkar po lta bu rgyas pa bdud rtsi lnga'i rang bzhin gyi zla ba'i dkyil 'khor dkar po bsams la/ de'i dkyil du thur du kha bltas pa yi ge oM 'bar ba dgod de/ lce'i rdo rje rkan gyi phyogs su yang dag par sbyar zhing yi ge oM de'i 'bar bas de bzhus par 'gyur ba tshangs pa'i sgo nas 'dzag pa lces myang bar bsams la kun du spyod pa'i rim pas lus po thams cad tshim par 'gyur ba bsgom par bya'o/ /de'i phan yon ni/ rga ba ma yin gnyer ba min/ / de bzhin dus med 'chi ba med/ /rdo rje sems dpa' bzhin du de'i tshe dang nad med gzhon par 'gyur zhes 'byung ngo / /de ni las kyi rgyal ba mchog gi ting nge 'dzin to/ /dkyil 'khor rgyal ba mchog gi ting nge 'dzin gyi dang po'i yan lag bshad par bya ste/ mchog sgrub pa la gnas pa zhes pa ni snyoms par 'jug pa la gnas pa'o/ /phyi'i bud med dang yang dag par sbyor bas zhes pa ni legs par sbyangs pa shin tu slob pa dam tshig gi phyag rgya dang 'brel pas so/ /bdud rtsi 'byin pa'i dgos pa bstan par bya ba'i phyir zhes pa ni snyoms par 'jug pa las 'byung ba'i byang chub kyi sems spro bar bya'o/ /phyung ba'i dkyil 'khor zhes bya ba ni badzra d+h+r-ika ces bya ba la sogs pa'i phyung ba'i sngags kyi ngo bo byang chub sems kyi thig le rnams kyis sprul pa'i dkyil 'khor zhes bya ba'i don to/ /rang gi bya ba la dbang byed pas na dbang po'o zhes pa ni dkyil 'khor pa spro ba'i phyir bdag po yin pas so/ /skyes pa dang bud med kyi bdag po dag ste zhes pa ni sngar bshad pa'i rim pas sngags kyi yi ge ma lus pa dgod pa gsang ba'i rdo rje dang pad+ma'o/ /'khyud pa la sogs pa'i sbyor ba la byang ba'o zhes pa ni dpal rdo rje gdan bzhi'i rgyud las gsungs pa'i sgong thog la sogs pa'i bya ba la mkhas pa'o/ /rang gi sa bon zhes pa ni byang chub kyi sems so/ /rtsa sbubs stong bdun cu rtsa gnyis bskul nas zhes pa ni/ rdo rje dang pad+ma snyoms par 'jug pa'i mtshan nyid kyi sbyor bas so/ /snying gar phyin pa zhes pa ni rtsa thams cad kyi gtso bor gyur pa snying ga ni 'dod pa'i gdugs te rtsa dbu ma'o/ /de las thob pa'i byang chub sems zhes bya'o/ /rdo rje'i lam nas phab pa'o zhes pa ni snang ba la sogs pa'i ye shes gsum myong zhing rtags lnga mtshon pa sngon du 'gro ba'i 'od gsal ba la 'jug ste/ badzra d+h+r-ika ces bya ba la sogs pa phyung ba'i sngags kyi bdag nyid phaT kyi sgra ste spro bar bya'o/ /de nas zhes bya ba la sogs pas byang chub kyi sems spro ba'i 'bras bu bstan par bya ste/ bu dang tsha bo la sogs pa'i dkyil 'khor zhes pa ni rdo rje 'chang chen po las 'byung ba'i phyir bu ni de bzhin gshegs pa lnga'o/ /de'i sprul pa yin pa dang de'i bya ba byed pas tsha bo ni sa'i snying po la sogs pa byang chub sems dpa' rnams so/ /de rnams kyi dkyil 'khor ni rang rang gi phyung ba'i sngags las 'byung ba'o/ /de ltar gyur pa'i dkyil 'khor ni brgyan pa zhes bya ba la chos 'byung ba'i nang dang dam tshig gi dkyil 'khor dang sgrub pa'i dkyil 'khor la yang rgyan du gyur pa'o/ /sangs rgyas nyid rab tu ster bas na sangs rgyas kyi bur gyur pa'o/ /de ltar zhes bya ba la sogs pas nye bar bsdus pa bstan to/ /dgongs pas bshad pa zhes pa ni 'gal ba'i sgra'i sgo nas dkyil 'khor gyi de kho na nyid bstan pas so/ /dkyil 'khor rgyal ba mchog ces bya ba'i ting nge 'dzin to/ /rnal 'byor ni thugs rje chen po bsgom pa sngon du 'gro ba khyad par gyi gnas bzung ba dang bgegs bskrad pa dang / stong pa nyid bsgom pa dang / ye shes kyi sa gzhi bsgom pa dang / gzhal yas khang pa bskyed pa dang / lhag par mos pa'i dkyil 'khor bsgom pa dang / don dam pa'i dkyil 'khor bsgom pa dang / gdan la sogs pa'i dbye ba dang / chos kyi dbyings kyi sngags kyis byin gyis brlab pa dang / zla ba'i dkyil 'khor bsgom pa dang / /de la sa bon dgod pa dang / /de yongs su gyur pa las phyag mtshan dang / de yongs su gyur nas rdo rje sems dpa' la sogs pa'i sku rdzogs pa de rnal 'byor ro/ /ye shes sems dpa' dang ting nge 'dzin sems dpa' gnyis bsgom pa ni rjes su rnal 'byor ro/ / phung po dang khams dang skye mched dang / de bzhin gshegs pa dang lha mo dang byang chub sems dpa'i sa bon gyi byin gyis brlabs pa ni shin tu rnal 'byor ro/ /de rdzogs nas gang zhig bya ba yin pa de zhes pa ni sku la sogs pa byin gyis brlabs pa'i mtshan nyid can gyi rnal 'byor chen po'o/ /de bstan pa'i phyir zhes pa ni gsal bar bshad pa'i phyir ro/ /rnam par snang mdzad la sogs pa zhes pa ni gzhung gi 'di skad bshad par bya ste/ mgo bo dang lkog ma dang snying ga'i phyogs su zla ba dang pad+ma dang rdo rje yi ge gsum las 'byung ba bsgoms nas/ de'i steng du dkar po dang dmar po dang sngon po'i yi ge oM la sogs pa gsum po de nyid bkod la/ de rnams las byung ba'i 'od zer gyi tshogs las spyan ma dang na bza' dkar mo dang mA ma kI'i tshogs spros la des 'og min dang bde ba can dang mngon par dga' ba'i sangs rgyas kyi zhing na bzhugs pa/ rnam par snang mdzad dang 'od dpag tu med pa dang mi bskyod pa rnams tshig snyan pa dang rol pa'i nyams kyis gsol ba 'debs shing rjes su chags par byas la phyag gi zhags pas 'khyud cing 'gugs te mdun du gzhal yas khang pa'i shar phyogs kyi sgor sna tshogs pad+ma dang zla ba'i dkyil 'khor gyi steng du bzhugs nas/ mchod pa lngas mchod cing mnyes pa byas nas spyan ma la sogs pa de dang lhan cig tu 'jug par bya ste/ dpal ldan rdo rje gsung gi lam/ /zhes bya ba'i gsol ba gdab pa sngon du 'gro bas oM sarba ta thA ga ta kA ya wAka tsit+ta badzra swa b+hA wa At+ma kou0f85haM/ zhes bya ba la sogs pa sngags kyi tshig rnams kyis brtan par byas la/ tshigs su bcad pa 'di rnams kyis nga rgyal bya'o/ /rnam par snang mdzad de zhes pa ni lus rnam par dag pa'i rang bzhin yin pas so/ /dus gsum zhes pa la sogs pas longs spyod rdzogs pa dang sprul pa'i sku'i rang bzhin gyis rnam par snang mdzad kyi dkyil 'khor du zhugs pas de'i rang bzhin gyi nga rgyal bya'o zhes bstan to/ /sprul pa'i sku gang zhig yod pa zhes pa ni sems can gyi don mdzad pa'i phyir dang 'byung ba'i sku ni sprul pa'i sku zhes bya'o/ /gzhan du na rtag tu dga' ba nam mkha' dang mtshungs pa me long lta bu la sogs pa'i ye shes kyi rang bzhin gyi de bzhin gshegs pa rnams la sku dang 'brel pa ci dgos so/ /ji skad du/ dmar dang ljang gu dud kha ste/ /khyed la sku mdog yod pa min/ /dkar nag ser po ma yin pa'i/ /kha dog las 'das khyod la 'dud/ /chen po ma yin thung ba min/ /ring po ma yin zlum po min/ /tshad med kyi ni tshul thob pa'i/ /tshad med khyod la phyag 'tshal bstod/ /ces 'byung ngo / /bdag gi slob mar gyur pa yang / /zhes pa ni slob mar 'dod pa'i yang ngo / /lus ni lta bu'i ngo bor gyur cig pa ste zhes pa ni rnam par snang mdzad kyi rang bzhin skyes bu chen po'i mtshan sum bcu rtsa gnyis kyis brgyan pa/ dpe byad bzang po brgyad cu dang ldan par gyur cig /gsol ba ni gsol ba 'debs par bya'o/ /de'i ngo bo nyid du gyur pas na zhes pa ni gsung rab yan lag bcu gnyis kyi rang bzhin yin pas na 'od dpag tu med pa'o zhes grags so/ /byang chub kyi sems kyi ngo bo yin pas na rdo rje'o/ /gsung rab thams cad kyi chos kyi rang bzhin yin pas na chos so/ /rdo rje yang yin la chos kyang yin pas na rdo rje chos te ngag gi dbang phyug ces bya ba'i don to/ /nges pa ni ming gi rnam grangs thams cad kyi sgo nas bshad pa ni gsung ba ste nges par bshad pa'o/ /yang dag pa zhes pa ni phyin ci ma log pa gang la yod pa de la de skad ces bya'o/ /nye bar mtshon pa tsam ste zhes pa ni nges pa'i tshig 'ba' zhig tu ma yin no/ /nges zhes bya la sogs pa ni de la chos so so yang dag par rig pa ni gsung rab yan lag bcu gnyis kyi chos ma lus pa kha ton du mnga' ba'o/ /don so so yang dag par rig pa ni de'i brjod par bya ba'i don dran pa'o/ /spobs pa so so yang dag par rig pa zhes pa ni sngar ma byung ba'i gzhal bya rtsom par byed pa ste/ ji skad du/ sar zhing sar pa'i gzhal bya ni/ /rtsom pa'i shes rab spobs par bshad/ /ces 'byung ngo / /chos 'dzin pa dang 'dra bar gyur cig pa'o zhes pa ni yan lag drug cu dang ldan pa pad+ma'i 'dab ma dang mtshungs pa mnga' ba g.yas su 'khyil pa'i dung dang 'dra ba'i lkog ma'i phyogs su gnas pa gsung rnams su gyur cig ces gsol ba 'debs pa'o/ /mi bskyod pa'o zhes pa ni chos kyi dbyings kyi ye shes kyi rang bzhin sems yin pas so/ glo bur gyi dri ma so sor snang ba dang ldan pas 'khor bar 'khor bar 'gyur ro/ /sems 'di'i rang bzhin 'od gsal te/ glo bur ba rnams dri ma yin/ /chu khams gser dang nam mkha' yi/ /dag pa bzhin du dag par 'dod/ /ces 'byung ngo / /gsang ba ni gnyis su med pa'i ye shes so zhes pa ni chos kyi dbyings kyi ye shes so/ /de gsung zhing ston par mdzad pa ste zhes pa ni de ston par mdzad pas na gu h+ya ka ni gsang ba ste bcom ldan 'das rnam par snang mdzad la sogs pa'o/ /de kho na nyid bstan pa rnams kyi gtso bor gyur pa zhes pa ni de rnams kyi bdag po yin pas thugs rdo rje'o/ /blo ni reg bya rdo rje'i zhes pa ni shes rab kyi rang bzhin yin pa'i phyir ro/ /kun nas bzang bas na zhes pa la thog ma dang bar ma dang tha mar bzang ba ni de dag gang las 'byung ba de ni kun du bzang po ste dpal thugs kyi rdo rje 'chang ba'o/ /de lta bu'i zhes bya ba la sogs pas nyon mongs pa dang / shes bya'i sgrib pa dang bral ba zla ba'i dkyil 'khor rdzogs pa dang 'dra bar bdag la yang sems gyur cig ces gsol ba 'debs pas nga rgyal bya'o/ /sgra ji bzhin pa'o zhes pa ni dang po sbyor ba'i ting nge 'dzin gyi phyogs gcig rnal 'byor chen po'i mtshan nyid 'chang bar 'dod pa'i phyir ro/ /de ni sogs pa'i sgras shes par bya'o/ /da ni zhes bya ba la sogs pas bskyed pa'i rim pa'i rnal 'byor pa rnams la sku la sogs pa byin gyis brlab pa bstan nas rdzogs pa'i rim pa'i rnal 'byor pa rnams la yang bstan par bya ste/ sgrub pa'i mchog la gnas pa'i zhes pa ni rdzogs pa'i rim pa'i rnal 'byor pa'o/ /rang bzhin yongs su shes pa tsam gyis zhes pa ni khams gsum la gnas pa'i sems can gyi khams kyi lus la sogs pa dang / bdag gi yang lus la sogs pa gang yin pa de dag thams cad ngo bo nyid du mnyam pa yin te/ chos kyi dbyings kyi rang bzhin yin pas so/ /sgo nga las skyes pa dang zhes pa ni/ 'dab chags bya la sogs pa'o/ /mngal nas skyes pa dang zhes pa ni mi dang phyugs dang ri dgas la sogs pa'o/ /drod gsher las skyes pa dang zhes pa ni sbrang bu la sogs pa'o/ /brdzus te skyes pa dang zhes pa ni dmyal ba dang yi dags dang lha dang lha ma yin rnams so/ /bshad ma thag pa rnams kyi'o zhes pa ni rnam pa bzhi'i sems can rnams kyi skye gnas zhes bya ba'i tha tshig go/ /'di ni lus so zhes pa ni rkang pa'i dkyil nas brtsams te mgo bo'i bar du bshang gci la sogs pa'i rdzas rnams kyis gang ba'o/ /'di ni dag go zhes pa ni rnam pa bzhi'i gnas ngan len pa la sogs pa'i rtog pa bzhi dang bcas pa'o/ /'di ni sems so zhes pa ni rnam par shes pa brgyad kyi mtshan nyid rnam pa sna tshogs pa'i sems las byung ba'i chos dang ldan pa'o/ /brtags pa zhes bya ba la sogs pas de ltar gyur pa lus la so sor snang ba'i sems ni khams gsum pa dang / bdag gis gang yin pa de ni 'dra ba yin no/ /ci'i phyir zhe na zhes pas gtan tshigs bshad par bya ste/ de kho na nyid rig pa zhes pa ni rdzogs pa'i rim pa la gnas pa'i rnal 'byor pa rnams kyi'o/ /gang gi phyir sems de nam mkha' dang 'dra ba'i zhes pa ni nam mkha'i dkyil dang mtshungs pa'o/ /'dres par gyur pas zhes pa ni sems nyams pas so/ /ji skad du/ dngos po kun ni dngos po gcig rang bzhin/ /dngos po gcig ni dngos po kun ngo bo/ /gang gis dngos gcig de nyid du mthong na/ /dngos po kun gyi de nyid nges mthong 'gyur/ /zhes 'byung ngo / /'dis ni thams cad du song ba'i dbang phyug tu bstan pas zhes pa ni thams cad du song ba ni khams gsum gyi yul can no/ /dbang phyug ni sems kyi dbang phyug gang yin pa de bstan pas so/ /thugs byin gyis brlab par 'gyur ro zhes pa ni sems kyi mnyam pa nyid shes pas so/ /zla ba'i dkyil 'khor dang 'dra ba'i/ /sems ni rang nyid kyis mthong 'gyur/ /zhes 'byung ngo / /de ni thugs byin gyis brlab pa'o/ /tshig thams cad don zhes pa ni sngags kyi sgras tshig gi don ston pas so/ / phung po de dag gi tshogs so zhes pa ni 'byung ba chen po las rgyur gyur pa'i sgra zin pa la sogs pa'i dbye ba'am/ yi ge dang tshig dang ngag dang ngag chen po la sogs pa'i dbye ba'am/ chos kyi phung po brgyad khri bzhi stong gi dbye bas so/ /sku dang zhes bya ba ni brjod par bya ba'i thugs gang yin pa zhes pa la lus nyid du snang ba'i sems so/ /sku'i ngo bo nyid du yongs su gyur pa de ni zhes pa sems nyid lus kyi rnam pa nyid du snang ba'i phyir ro/ /lus ni logs su yod pa ma yin te/ gzhan gyi snang ba yin pa'i phyir ro/ /rang snang ba gang yin pa de ni don dam par yod pa ste/ rang gi rnam par shes pa yin no/ /gzugs la sogs pa ni gzhan gyi snang ba yin no zhes rang bzhin gyi gtan tshigs so/ /sems can thams cad kyi sngags kyi gzugs dang / sku dang gsung dang thugs gang yin pa la zhes pa ni ngag dang / lus kyang gang zhes bya ba'i don to/ / yan lag ces pa ni ngag dang lus ngag ces bya ba'i don to/ / ngag yin la zhes pa ni smra ba'i don dang ldan pas so/ /mi phyed pas na rdo rje'o zhes pa ni so so skye bo rnams kyis dgag par bya ba ma yin pa'o/ /lus ngag yin pa ni lus kyi sgra ni tshogs kyi rnam grangs so/ /de nyid bstan par bya ste/ sgo nga las skyes pa la sogs pa'i sgra'i tshogs gang yin pa de ni/ de rnams kyi rnam pa sna tshogs pa'i skad rnams so/ /des ni sems can thams cad kyi ngag gi tshogs bstan to/ /kun du rtogs pas na zhes pa ni bsgom zhing tha snyad du bya'o/ / tshig gi sku rnam par bsgom pa ni ngag gi sgo nas lus tha snyad du bya'o/ /tshig tu brjod cing sku zhes btags pa ni ngag gis brjod pa lus zhes brdar bstan par bya ste/ rnam par rtog pa'i tshig 'byung ba dang / tshig las sgra 'byung ba'i phyir sgra rnams kyi lus zhes tha snyad du byas te/ sgra rnams kyis ni brda ston pa/ /de ni tha snyad bya phyir bshad/ /ces 'byung ngo / /de dang 'dra ba'i sku zhes pa ni ngag gi brjod pa tha snyad du byas pa'o/ /sems can thams cad kyi sngags kyi gzugs dang zhes pa ni tshig gi tshogs so/ /de rnams nyid kyi sgo nga la sogs pa sngar bshad pa rnams kyi'o/ /rdo rje chen po'i sku zhes pa ni lus nyid do/ /bdag gi lus zhes bya ba la sogs pas khams gsum la gnas pa'i lus dang ngag dang bdag gi yang de dag mnyam pa yin no zhes bya ba'i tha tshig go/ /dus gsum ni 'das pa la sogs pa'i dus gsum la'o/ /de ni dus mnyam pa yang rab tu bstan pa yin no/ /'o na 'das pa dang ma 'ongs pa ni 'jig pa dang ma phyin pa'i phyir ji ltar mnyam pa yin zhe na/ da ltar byung zhing zhes bya ba la sogs pa ni da ltar byung ba'i dus ni dus kun la 'dra ba yin pas de la log par rtog pa ni med do/ / 'das pa dang ma 'ongs pa gang yin pa de dag de'i cha tsam gyis brten te dus gsum brtag par bya'o zhes skyon med do/ /yang rgyun rtag pa nyid kyis da ltar byung ba'i dus ni 'das pa dang / ma 'ongs pa'i tshul du thob pas dus gsum la gnas pa'i sems can thams cad kyi ngag dag dang lus mnyam pa nyid kyi lhag par mos pa rnal 'byor pas bya'o zhes dgongs pa'o/ /sngags 'dzin pa ni rdo rje 'chang chen po ste zhes bya ba la/ de bzhin gshegs pa thams cad spro ba dang bsdu ba mdzad pa'i phyir ro/ /des ni rdzogs pa'i rim pa'i rnal 'byor pa rnams kyis rdo rje 'chang chen po'i lhag par mos pas khams gsum gyi yul can gyi lus la sogs pa dang / rang gi bdag nyid kyi lus la sogs pa yang mnyam pa nyid du rtogs par bya'o zhes bstan pa yin no/ /bdag ni sangs rgyas kun nyid de/ /byang chub sems dpa' thams cad nyid/ /de phyir 'bad pa thams cad kyis/ /rang gi bdag nyid rtag tu mchod/ /ces 'byung ngo / /de bzhin du/ nam mkha'i dbyings ni thams cad la/ /dpal ldan rdo rje sems dpa' bzhugs/ /zhes dpal bde mchog las 'byung ngo / /dgongs pas bshad pa zhes pa ni sngags dang sku la sogs pa'i 'gal ba'i tshig gi sgo nas rdzogs pa'i rim pa bstan pas so/ /rnal 'byor pa thams cad kyi thun mong gi zhes pa ni rim pa gnyis sgom par byed pa'i rnal 'byor pa dag gis lhag par rtogs pas na mnyam pa'o/ /don dam pa'i dkyil 'khor gyi rim gyis zhes pa ni ngo bo med pa'i mtshan nyid de dkyil 'khor ma lus pa nye bar bsdus pas so/ /de la bskyed pa'i rim pa'i rnal 'byor pa rnams kyis dkyil 'khor rgyal ba mchog gi mthar las kyi rgyal mchog gi phyogs gcig dkyil 'khor ma lus pa nye bar sdud pa'i mtshan nyid kyi don ston pa dang / rdzogs pa'i rim pa yang sems rnam par dag pa'i rim pas 'od gsal bar bya zhes pa'i don to/ /mi 'da' ba'i don ni 'od gsal ba ste thams cad kyis de nyid 'dod pas so/ /sems ni rab tu 'jug pa'i phyir/ /dpyod la 'jug par mi bya ste/ /'khor ba 'joms par bya ba'i phyir/ /ma lus pa yi blo mnyam pa'o/ /zhes 'byung ngo / /sangs rgyas kyi sku bskyed pa'i rjes thogs la zhes pa ni dang por sbyor ba dang / dkyil 'khor rgyal ba mchog gi ting nge 'dzin dag gi sems can gyi khams ma lus pa sbyong bar byed pa'i rnal 'byor pas so/ /don dam pa'i bden pa rtogs pa ste zhes pa ni phra mo'i rnal 'byor dang bzlas pa'i 'og tu zhu ba'i de nyid bstan pa'i phyir/ dam tshig las ni khu ba phyung ste zhes bya ba la sogs pas legs par sbyangs pa'i phyag rgya dang snyoms par zhugs pas de bzhin gshegs pa thams cad 'jug pa sngon du 'gro bar reg bya rdo rje ma'i chos 'byung ba'i nang du badzra d+h-ika ces bya ba la sogs pa phyung ba'i sngags kyis dkyil 'khor pa ma lus pa spro bas dam tshig gi dkyil 'khor bskyed la/ de las kyang phyi rol du spros te phyogs bcu la gnas pa'i sems can gyi khams rab tu sbyor ba sngon du 'gro bar sgrub pa'i dkyil 'khor dgod pa dang / dbang bskur ba dang / rgyas gdab pa byas la phra mo'i rnal 'byor dang bzlas pa byas te/ bya ba byas nas dkyil 'khor la 'jug pa sngon du 'gro bar dbu ma nas byung ro mnyam par gyur pa 'od du zhu ba nyid bstan to/ /shes rab dang thabs su sbyor bas so zhes pa ni thugs rdo rje dang reg bya rdo rje ma la snyoms par zhugs pas so/ /de nas mer mer po la sogs pa'i rim gyis zhes pa ni snang ba la sogs pa nyams su myong ba sngon du 'gro bar dbu ma nas 'byung ba'i byang chub kyi sems kyi thig le 'dzag pa dang sra bar gyur pa dang bsdu bar gyur pa'i rim pas so/ /mngon par 'phel lo zhes pa ni sngags la sogs pa'i gzugs kyis 'phel bar 'gyur ro/ /de nyid sa bon dang myu gu dang 'dra ba zhes pa ni badzra d+h-ika la sogs pa phyung ba'i sngags kyi gzugs ni sa bon no/ /de yongs su gyur pa las dkyil 'khor pa rnams 'byung ba ni myu gu'o/ /gzhon nu ni thig le phyung ba'i mtshan nyid do/ /bar ma ni phyung ba'i sngags yongs su gyur pa'i mtshan nyid do/ /gnas skabs zhes pa ni rnam par snang mdzad la sogs pa'i dkyil 'khor ba rnams kyi gzugs grub pa'i mtshan nyid do/ /yang na gzhon nu ni dam tshig sems dpa' bskyed pa'i mtshan nyid do/ /bar ma ni ye shes sems dpa' dgod pa'i mtshan nyid do/ /skabs ni ting nge 'dzin sems dpa' dgod pa'i mtshan nyid do/ /de nas chos 'byung gi nang du sems dpa' gsum gyi bdag nyid dkyil 'khor pa bskyed pa ni gzhon nu dang bar ma'i gnas skabs thob pa zhes bya'o/ /de nyid bstan par bya ba'i phyir/ rnam par snang mdzad la sogs pa sku'i dkyil 'khor ni yongs su rdzogs pa ma tshang ba med par bzhugs pa ni sangs rgyas kyi bya ba rdzogs pa 'gro ba'i don rdzogs nas shar la sogs pa la bzhugs pa'o/ /'dod pa'i yon tan lnga rjes su myong bar 'gyur ro zhes pa ni rang gi phyag rgya dang snyoms par zhugs pas gzugs la sogs pa'i yul lnga so sor sdud pa dang / bsam gtan gyi yan lag gis myong zhing spyod par 'gyur ro/ /des ni dkyil 'khor rgyal ba mchog gi ting nge 'dzin rab tu bstan to/ /de nas zhes bya ba la sogs pas phra mo'i rnal 'byor dang bzlas pa'i 'og tu 'od du zhu ba nyid bstan te/ rdo rje phreng ba zhes bya ba la sogs pa'i don ni 'di yin te/ bya ba byas par bdag nyid shes na rnam par snang mdzad dang / spyan ma dang / gzugs rdo rje ma dang / sa'i snying po dang / byams pa dang / gshin rje mthar byed dang / 'dod pa'i rgyal po rnams 'od zer gyi sbyor bas bsdus la gzugs kyi phung po la 'jug go/ /rin chen 'byung ldan dang / mA ma kI dang / sgra rdo rje ma dang / nam mkha'i snying po dang / lag na rdo rje dang / shes rab mthar byed dang / mi g.yo ba rnams ni tshor ba'i phung po la 'jug go/ / 'od dpag tu med pa dang / gos dkar mo dang / dri rdo rje ma dang / 'jam dpal dang / spyan ras gzigs dang / pad+ma mthar byed dang / dbyug sngon can rnams 'du shes kyi phung po la 'jug go/ /don yod grub pa dang / dam tshig sgrol ma dang / ro rdo rje ma dang / sgrib pa thams cad rnam par sel ba dang / kun du bzang po dang / bgegs mthar byed dang / stobs po che ste 'du byed kyi phung po la 'jug go/ /gnod mdzes rgyal po dang / gtsug tor 'khor los sgyur ba gnyis dang / sngar bshad pa'i phung po bzhi po rnam par shes pa'i phung po la 'jug go/ /rnam par shes pa gsum pa yang 'od gsal ba la 'jug par bya ste/ de'i rim pa ni reg bya rdo rje ma dang snyoms par zhugs pas bdag nyid rtag tu dga' ba dang ldan par bsgoms te tshangs pa'i sgo nas byang chub kyi sems 'byung ba'i dus su snang ba'i ye shes nye bar mtshon zhing yan lag thams cad kyi tshigs khyab pa'i dus su mchog tu dga' ba'i bde ba snang ba mched pa'i ye shes nyams su myong zhing rdo rje'i dkyil 'khor la byang chub kyi sems gnas par gyur na snang ba nye bar thob pa'i ye shes mngon du byas te/ smig rgyu dang / du ba dang mkha' snang dang / mar me dang / sprin med pa'i nam mkha' dang 'dra ba'i rtags lnga / de nyid mthong ba la mi slu ba mthong nas spros pa thams cad dang bral ba'i de kho na nyid bzhi pa mngon du bya'o/ /de ni don dam pa'i dkyil 'khor la 'jug pa'i cho ga'o/ /rang bzhin lnga bcu'i zhes pa ni gzugs ni rnam pa gnyis te/ kha dog dang dbyibs kyi dbye bas so/ /kha dog ni rnam pa bcu gnyis dbyibs ni rnam pa brgyad de/ de ltar gzugs ni rnam pa nyi shu'o/ /tshor ba ni bde ba la sogs pa rnam pa gsum rnam par shes pa tshogs drug gi dbye ba bco brgyad du 'gyur ro/ /'du shes ni rnam pa gcig go/ /'du byed ni dge ba dang / mi dge ba dang / lung du ma bstan pa'i dbye bas rnam pa gsum mo/ /kun gzhi la sogs pa rnam par shes pa'i dbye bas rnam par shes pa'i phung po ni rnam pa brgyad de lnga bcu bstan to/ /don dam pa'i bden pa la 'jug par bya'o zhes pa ni sngar bshad pa'i rim pas mi snang bar bya'o/ /'bras bu 'dod pa zhes bya ba la sogs pas rim pa bzhi pas rtogs par bya ba zung du 'jug pa'i rim pa mngon du bya ba bstan to/ /ji ltar don dam pa'i dkyil 'khor gyi rim pas song zhing zhu bar gyur pa zhes pa ni 'od gsal ba la rab tu zhugs pa'o/ /de bzhin du slar 'ong bas na zhes pa ni de las kyang sems can gyi don bya ba'i phyir yang dag par 'byung ba'o/ /rnam par snang mdzad la sogs pa'i brtags pa'i gzugs kyi phung po la sogs pa zhes pa ni de'i rnam par dag pa'i rim pas 'chad par 'dod pa gzugs la sogs pa'o/ /srog dang rtsol ba la gnas pa de bcad de zhes pa ni rdo rje bzlas pa'i rim pas 'jug pa la sogs pas srog bkag pa ni/ don dam pa'i bden pa la 'jug par bya'o zhes pa ni sems rnam par dag pa'i rim pas thob par bya ba'i 'od gsal ba sngags dang phyag rgya'i rim pas 'jug pa ni de'i rang bzhin du bya'o/ /shin tu mchog tu gyur pa'i zhes pa ni zung du 'jug pa'i ting nge 'dzin gyis thob par bya ba'o/ /phyag rgya chen po'i dngos grub thob par 'gyur ba'o zhes pa ni rdo rje 'chang gi phyag rgya chen po'i sku thob par 'gyur ro/ /des ni rdzogs pa'i rim pa'i rnal 'byor pas yang dag pa'i mtha' la 'jug pa bstan to/ /rdzogs pa'i go rims rtogs par gyur kyang zhes pa ni rdo rje bzlas pa la sogs pa'i rim pa lnga bsgoms pas so/ /gal te rtul ba can gyi brtson 'grus can ma yin na zhes pa ni brtson 'grus dman pa ma yin pa'o/ /de'i tshe 'gro ba'i rgyud nyid du byas nas zhes pa ni mthong ba'i chos kyis myong ba'i lus kyi sems rnam par dag pa'i rim pa 'od gsal ba mngon du byas nas so/ /langs te zhes pa ni de las cig car du snang ba nye bar thob pa la sogs pa'i rim pas rdo rje 'chang gi phyag rgya chen po'i sku spros nas so/ /sgyu ma lta bu'i ting nge 'dzin gyis mngon du byed do zhes pa ni ye shes kyi sku dmigs par bya'o zhes don bsdus pa'o/ /rdo rje'i tshig 'di nyid kyi don zhes pa ni don sbas pa dang ldan pa'i tshig gis brjod par bya ba'o/ /dam tshig rjes su dran pa ni ji lta bu yin zhe na smras pa/ de bas na rdo rje dang pad+ma'i snyoms par 'jug pa'i 'brel pas so/ /tshangs pa ni de kho na nyid kyi ngo bor rak+ta ste byang chub kyi sems shin tu byung ba ni phyag rgya'i chos 'byung la phyung ba'o/ /des ni dkyil 'khor rgyal ba mchog gi ting nge 'dzin bstan to/ /de'i rjes la don dam pa'i dkyil 'khor gyi rim pas/ dngos med gcig tu sbyor ba yis/ /zhes pa ni thim pa'i cho ga'i rim pa'i man ngag gis/ mkhas pas cho ga bzhin du btud/ /ces pa ni don dam pa'i dkyil 'khor gyi cho gas mi snang bar bya'o/ /de ni brtags pa'i rnal 'byor pas 'od gsal ba rtogs pa'o/ /rdzogs pa'i rim pa'i rnal 'byor pa la yang bstan par bya ste/ de bzhin gshegs pa tshogs che ba ni zhes pa la snga ma bzhin no/ /dngos med ces bya gsad pa ste/ /zhes pa ni sngags dang phyag rgya'i rim pas tha mal pa'i phung po la sogs pa mi snang bar byed pa stong pa nyid ces bya'o/ /blo dang ldan pa zhes pa ni phan yon no/ / don 'di nyid rdo rje gtsug tor gyi rgyud las kyang rgyas par bshad par bya ste/ 'chi ba zhes bya ba ni phung po 'jig pa'i mtshan nyid de ni mi rtag pa ste don dam par skye ba dang 'jig pa med pa'i phyir ro/ /ji skad du/ 'dir ni kha cig mi skye zhing / /kha cig yang ni 'chi ba med/ /sems kyi rnam par dngos gnas pa'i/ /'khor ba nyid du shes par bya/ /ma rig rkyen las byung ba yi/ /yang dag ye shes kyis bltas na/ /skye ba'am ni 'jig pa dag /kha cig dmigs par mi 'gyur ro/ /zhes 'byung ngo / /rgyu de las kha cig kyang 'byung ba dang 'gog par mi 'gyur gyi/ 'on kyang shes rab kyi pha rol tu phyin ma ni chos thams cad bdag med pa'i mtshan nyid de bskyed pa'i rim pa'i rnal 'byor pa dag la de nyid tshul ni lam ste ting nge 'dzin gsum sgom pa'i bdag nyid can no/ /rnam par rtog pa'i rang bzhin can gyi tha mal pa'i lus ngag gis sbyong bar bya'o/ /de bzhin d u rdzogs pa'i rim pa'i rnal 'byor pa la yang 'jug pa la sogs pa'i rim pa rnam pa bcu gcig gis rdo rje bzlas pa'i rim pa slob pa na tha mal pa'i rnam par rtog pa'i bdag nyid can gyi ngag spangs nas 'jig rten las 'das pa'i rang bzhin skye ba shes rab pha rol phyin ma gsung rdo rje skye bar 'gyur ro/ /rdo rje bzlas pa'i rim pa 'di/ /gsung gi rdo rje sgrub byed pa'o/ /zhes 'byung bas so/ /yang bcom ldan 'das ma shes rab kyi pha rol tu phyin ma de nyid rtog pa dang bcas pa rnam par shes pa gsum gyi 'brel pa dang ldan pa rang bzhin gyi tshogs brgya drug cu spong bas 'od gsal ba thob par byed pas dran pa ni de kho na nyid yid la byed pa mngon du bya ba'i sems la dmigs pa zhes bya'o/ /de bzhin du de nyid sems can gyi don byed pa'i phyir 'ja' tshon ltar yongs su snang ba rnam pa thams cad mchog dang ldan pa ye shes kyi sku sgyu ma'i dpe bcu gnyis kyis nye bar mtshon pa byang chub ces bya ste sgyu ma'i rnam pa nyid kyis ma lus pa lus pa med pa'i dngos po rtogs pa'i phyir ro/ /de bzhin du de nyid sgyu ma lta bu'i rnam pa can gyi kun rdzob sbyang ba'i phyir 'od gsal ba la thim pas na thim pa zhes bya'o/ /de bzhin du de nyid bden pa gnyis su med par byed pa'i mtshan nyid srid pa dang zhi ba ro gcig par gyur pa zung du 'jug pa'i bdag nyid can dpal rdo rje 'chang gi phyag rgya chen po'i sku ni grol ba zhes bya ste/ mi slob pa'i lam gyi ngo bo yin pas so/ /de nyid kyi phyir 'khor ba'i bar du sems can gyi don sgrub par byed pas na bsam pa thams cad rdzogs par byed pa zhes bstan to/ /de ltar bshad pa'i rgyud kyi tshigs su bcad pa gnyis kyi rim pa gnyis bshad pas dam tshig rjes su dran pa yang bshad do/ /dgongs pas bshad pa'o zhes pa ni 'gal ba'i sgra'i sbyor bas de kho na nyid so sor bstan pas so/ /de la zhes bya ba la sogs pas rim pa bzhi pas thob par bya ba'i 'od gsal ba thob par bya ste/ shes rab ni snang ba'o zhes pa ni zla ba'i snang ba dang 'dra ba ni dga' ba'o/ /'dir rtsom pa'i sgra ni mi mngon par byas pa yin par blta bar bya ste/ don rtogs pas mi sbyong ba nyid mi mngon pa'o/ /de bas na shes rab ni bshad zin to/ /thabs ni nyi ma'i snang ba dang 'dra ba ste snang ba mched pa'o/ /nye bar thob pa ni mtshams kyi snang ba dang 'dra ba ste snang ba nye bar thob pa'o/ /mthar phyin pa zhes pa ni spong bar byas nas gnas pa'o/ /don dam pa'i bden pa zhes pa ni yang dag pa'i mtha'i mtshan nyid can gyi 'od gsal ba'o/ /de nyid ni sems can thams cad kyi 'da' bar mi bya ba yin pas zhes pa ni sems can thams cad kyi chos can yin pa'i phyir ro/ /ji skad du/ sangs rgyas thams cad 'gyur ba ste/ /rgal min 'khor bar yod pa min/ /yang dag rdzogs pa'i byang chub ni/ /'grub phyir le lo mi bya'o/ /zhes 'byung ngo / /de ril por 'dzin pa zhes pa ni rang gi lus kyi phung po la sogs pa mi snang bar byed pa'o/ /rjes su 'jug pa'i rim gyis zhes pa ni rtsibs brgyad pa chos kyi dbyings kyi 'khor lo la gnas pa yi ge raM 'bar bas rang gi lus kyi phung po la sogs pa bsreg cing pha rol gyi yang bsreg go/ /de nyid la rgyun mi 'chad pa ni yang dang yang du'o/ /ji skad du/ me long la ni dbugs kyi rlung / /ji ltar de la thim 'gyur ba/ /yang dag mtha' la rnal 'byor pas/ /yang dang yang du de bzhin 'jug /ces 'byung ngo / /kun tu snang ba la sogs pa snang ba gsum po ni chags bral dang chags pa dang chags pa bar ma rnams so/ /'dod chags la sogs pa rang bzhin brgya drug cu dang bcas pa rnams ni zhes pa ni dge ba dang mi dge ba dang lung du ma bstan pa'i sems las byung ba'i chos dang bcas pa'o/ /'od gsal ba zhes pa ni dri ma med pa ste/ phyag rgya dang ting nge 'dzin gyi rim pas spangs na shel sgong dag pa dang 'dra bar 'gyur ro/ /thams cad stong pa la ltos pas zhes pa ni de kho na nyid bzhi pa la 'jug pas so/ /sgyu ma lta bu'i lus mi len/ /zhes pa ni bdag la byin gyis brlab pa'i rim pas thob par bya ba'i sgyu ma'i lus sbyong bar byed pas so/ /ye shes gsum ni snang ba ste/ /de med pas na snang ba med pas so/ /'bras bu'o zhes pa ni/ zung du 'jug pa'i ting nge 'dzin to/ /de thob pa'i rgyu ste zhes pa ni rdo rje bzlas pa la sogs pa rim pa gsum mo/ /rtog pa gnyis po de dag de nas yod pa ma yin no zhes pa ni rim pa bzhi pa la rim pa dang po la sogs pa gsum dang rim pa lnga pa yang med pas so/ /dngos po thams cad rang bzhin gyis/ /rang rang ngo bo la gnas so/ /zhes 'byung ngo / /dngos po ni dngos po gzhan las ldog pa la 'jug pa'o/ /gnas ni phyag rgya'i pad+ma'o/ /gnas pa'o zhes pa ni gsang ba'i rdo rje'o/ /ting nge 'dzin gyi rim pa la yang gnas ni rtsibs brgyad pa'i chos kyi dbyings kyi 'khor lo'o/ /gnas pa ni 'od spro ba'i rim pa'o/ /gnyis po de dag 'od gsal ba la 'jug pa des na mi dmigs par 'gyur te zhes pa ni rnam par mi rtog pa yin pas so/ /ji skad du/ ji srid sgom pa'i sbyor ba ni/ /de srid las ni dang po can/ /yongs su rdzogs pa'i rnal 'byor ni/ /de ni 'od gsal bstan par bya/ /zhes 'byung ngo / /dgongs pa ma yin pas bshad pa'o zhes pa ni shin tu gsal ba'i de kho na nyid bstan pas so/ / de ni zung du 'jug pa'i rim pa zhes bya ba ni rim pa lnga pas so/ /ldang ba'i gnas bstan pa'i phyir zhes pa ni 'od gsal ba de las rdo rje'i sku gzung ba'i gnas bstan pa'o / /'dzin pa'i yan lag ces pa ni yan lag bzhi pa'i rgyud phyi ma las kyang / so sor sdud dang bsam gtan dang / / srog dang rtsol ba 'dzin pa dang / /rjes su dran dang ting 'dzin ni/ /yan lag drug gi rnal 'byor bshad/ /ces 'byung ngo / /de'i rjes su 'og tu dran pa ni ldang ba'i zhes pa ni rmi lam dang sgyu ma dang mtshungs pas de las spro ba zhes bya'o/ /de bsgom pa ni bden pa gnyis kyi bdag nyid de nye bar mtshon pas rnam pa dang bcas pa dang rnam pa med pa la sogs pa gnyis kyi bdag nyid kyang yin no zhes bya'o/ /rdo rje 'chang chen po zhes pa ni drug pa'i 'o/ /ting nge 'dzin ni rtse gcig pa nyid kyis dmigs pa'o/ /de nas zhes bya ba'i sgra ni tha dad pa'i rim pa ste zhes pa ni tshig gnyis pa las drangs te 'dir bshad par bya'o/ /de nyid bstan par bya ba'i phyir/ /'dzin pa'i yan lag 'og tu zhes pa ni man ngag bzhi pa'i 'og tu zhes bya ba'i don to/ /kun rdzob kyi bden pa ste zhes pa ni byis pa'i skye bos de nyid rang bzhin bzung bas so/ /don dam pa'i bden pa ste zhes pa ni spros pa thams cad bral ba rab tu snang ba'i phyir ro/ /rang bzhin dang ldan pa'i zhes bya ba la sogs pa ni bar ma'i tshig mi mngon pa'i las 'dzin pa'i bsdu ba ste lo ma'i rgyal po bzhin no/ /de gang yin zhe na zhes pa ni dri ba'o/ /gnyis su med pa'i ye shes kyi bdag nyid can zhes pa ni kun rdzob dang don dam pa dbyer med pa'i rang bzhin no/ /rdo rje 'chang chen po'i sku'o zhes pa ni drug pa'o/ /de na gnas pa'i 'ja' tshon zhes pa ni dbang po'i gzhu ste/ rten dang brten pa dbyer med pa'i phyir tshem bu ngu ba bzhin no/ /de dang mnyam pas na zhes pa ni mig yor dang / sgyu ma nyid du snang bas de nyid nam mkha'o/ /rgyu ni rim pa bzhi pa'o/ /'bras bu ni rim pa lnga pa'o/ /de dag gnyis su med pa ni dbyer med pas so/ /zung du 'jug pa'i rim pa la rgyu dang 'bras bur snang ba ni med de/ rnam par mi rtog pa'i phyir ro/ /snga ma'i smon lam gyi dbang gis sems can gyi don 'grub pa yin gyi dgongs pas ni ma yin no/ /skyes bu yid bzhin nor bu ltar/ /de yi phrad pa tsam gyis ni/ /rtsig pa la sogs rnams las kyang / /ji bzhin bstan pa rnams 'byung ngo / /zhes 'byung ngo / / 'jig cing zad pas na zhes pa ni 'dus byas pa'i dngos po skye ba'i chos dang ldan pa'o/ /de las gzhan bstan mi zad pa'o zhes pa ni mi 'jig pa'i chos can gyi ngo bo las byung bas na/ mi 'gyur ba ste zhes pa ni gnyis ka dang bral ba'o/ /skye ba dang 'jig pa dang bral ba zhes bya ba'i bar du'o zhes pa ni nye bar mtshon pa yin te/ 'on kyang yod pa dang med pa dang dngos po dang dngos po ma yin pa dang / 'phel ba dang 'grib pa dang / stong pa dang snying rje dang / thabs dang shes rab dang / rtag pa dang chad pa dang / 'gro ba dang 'ong ba la sogs pa dang bral ba zhes bya'o/ /bden pa gnyis so zhes bya ba la sogs pas gang gi tshe ye shes de la bden pa gnyis po ro gcig par 'gyur bar snang ba de'i tshe gnyis su med pa yin no/ /gang gi tshe zung 'jug de la yod pa de'i tshe gnyis su med pa yang yod pa ma yin no/ /sdug bsngal thams cad ni 'jig rten pa'i chos brgyad la sogs pa'i rnam par rtog pa'o/ /nye bar zhi ba'i mtshan nyid can yin pas na zhes pa ni de bcom par byed pas na zhi ba zhes bya'o/ /de nyid kyi phyir zag pa ni chags pa la sogs pa dang de las byung ba rang bzhin brgya drug cu'o/ /de med pas na zag pa med pa'o/ /reg bya'i yul ma yin pas na zhes pa ni 'dus byas pa'i dngos po ni reg par bya bar nus te/ / 'dus byas ma yin pa'i rang bzhin gang yin pa de ni gang gis reg par bya'o/ /dgongs pas bshad pa'o zhes pa ni 'gal ba'i tshig gi sgo nas de kho na nyid ston pas so/ /de ltar zhes bya ba la sogs pas sngar bshad pa'i don bsdus nas bshad par bya ste/ chos kyi sku ni rim pa gnyis pa dang bzhi pa dag gis thob par bya'o/ /longs spyod rdzogs pa'i sku ni rim pa gsum pa dang lnga pas thob par bya'o/ /gnyis su med pa'i mtshan nyid can du nges par byas nas zhes pa ni de dag dbyer med pa ste zung du 'jug pa'i rim pa bshad nas so/ /sprul pa'i sku bzhi zhes pa ni brtag pa'i rnal 'byor pas rtogs par bya ba'i sku'i phyag rgya bzhi bstan par bya ba'i phyir bshad par bya ste/ zhe sdang sbyong bar mdzad pas na mi bskyod pa ni thugs kyi rdo rje'o/ /rang gi bdag nyid las nges par byung ba'i lha mo rnams kyi 'khor lo zhes pa ni snyoms par zhugs pa las byung ba'i rigs kyi yum bzhi dang / gzugs la sogs pa yul lnga'i lha mo'i tshogs so/ /bud med kyi gzugs su mngon par sprul nas zhes pa la sogs pa ni le'u dang po nas bshad pas na/ 'dir ma bshad do/ /des zhes bya ba la sogs pas ni lha mo'i 'khor los byas pa'i phyi dang nang dang gsang ba'i mchod pa bstan to/ /chags pa la sogs pa nyams su myong ba zhes pa ni snyoms par 'jug pa'i dbang gi ye shes gsum rang gis rig pa'o/ /bu mo'o zhes pa ni sme sha can gyi bu mo ste ut+pal sngon po'i kha dog 'dra ba'o/ /rang bzhin brtan pa thob cing rnyed pa zhes pa ni dam tshig dang sdom pa la sogs pa la brten par brtan pa ste yid ma 'khrul ba rnyed pa'am rang gis btsal ba'am bcom ldan 'das kyis lung bstan pas thob pa'am dgu pa'o/ /ji skad du/ lha mo klu mo gnod sbyin mo / /lha ma yin mo mi mo yang / /rnyed de reg pa'i brtul zhugs bya/ /the tshom med pas de ltar 'grub/ /ces 'byung ngo / /pad+ma can zhes bya ba la sogs pa rigs bzhi zhes pa ni pad+ma can dang dung can dang / ut+pal can dang / ba zhes bya'o/ /de la pad+ma can ni thun mong gi pad+ma dang ldan pa'o/ /dung can ni yon po'i pad+ma dang ldan pa'o/ /ut+pal can ni pad+ma phra mo'o/ /ba ni shin tu rgyas pa yan lag mchog dang ldan pa'o/ /gzhan dag na re bud med ni gsum ste/ ri dgas mo dang / rgod ma dang / glang po mo'o/ /skyes pa ni gsum ste/ ri bong dang / glang dang / rta'o zhes zer ro/ /der byas pa'i rab tu dbye ba'i las kyis so zhes pa ni ji ltar rdo rje'i ra ba dang / pad+ma chung ba dang / mnyam por 'gyur ro/ /de bzhin du rdo rje phra ba dang pad+ma che ba mnyam por 'gyur ro/ /de ltar rdo rje bar ma dang phra ba'i pad+ma la sogs pa la yang shes par 'gyur ro/ /las kyi dbye bas de yang drug cu rtsa bzhi'i bya ba'i sbyor bas bsgrub par bya ba dpal rdo rje gdan bzhi'i rgyud las rjes su 'brang bar bya'o/ /'dod pa'i bstan bcos las kyang / yang dag par 'jug byed ces dbyer med dngos/ /khyad par sbyor bas de nyid sna tshogs dga'/ /de yi spro ba dang ni bshad bya ba/ /'khor ba'i lam ni rgyas dang bsdu ba'i phyir/ /zhes 'byung ngo / /bdag nyid kyi'o zhes pa ni rnal 'byor pas so/ /shu zhes bya ba la sogs pas mya ngan ni shing dang 'dra ba sog le dang 'dra bas gang gis gcod par 'gyur ba de ni mchog tu dga' ba zhes bya'o/ /khu ba de dang bdag nyid mchod par bya'o zhes pa ni gnyis kas kyang bdag nyid tshim par bya'o/ /'dod pa'i dbang phyug tu gsal bar bstan pa yin no zhes pa ni spros pa'i spyod pa'i sgo nas chags pa'i rol pa la sogs pa rgya che ba bstan pa'o/ /rjes su dran pa'i 'bras bu ni phan yon no/ /yongs su shes pas ni zhes pa la/ /sgom pa yongs su rdzogs nas mngon du byed pas so/ /rnam par snang mdzad la sogs pa'i ngo bo nyid kyis zhes pa ni sku rdo rje la sogs pa'i rang bzhin no/ /rdzu 'phrul dang ldan pa'i sku thob par 'gyur ba dang zhes pa ni sku'i dbang phyug la sogs pa'i dngos grub brgyad dang ldan par 'gyur ro/ /'das zhes bya ba la sogs pas yun ring du gnas pa nyid bstan to/ / mi bskyod pa dang 'brel pa'i zhes bya ba la sogs pas thugs kyi rang bzhin yin pas sems kyi dbang phyug nyid thob par 'gyur ro zhes bstan to/ /yid la gang dang gang 'dod pa zhes pa ni 'khor los sgyur ba'i rgyal srid la sogs pa'i zhes bya ba'o/ /ri bo la sogs g.yo ba dang / / de bzhin 'jigs pa 'phrog pa dang / de'i steng du chu bzhin du nus pa dang 'byung bar 'gyur zhes 'byung ngo / /de'i gsung ni de dang 'brel pas zhes pa ni 'od dpag tu med pa'i 'brel pa dang ldan pa'i gsung gi dbang phyug nyid thob par 'gyur te/ de ni gsung gi rang bzhin yin no zhes bstan pa'i phyir ro/ /ji lta bu zhe na zhes pa ni dri ba'o/ /sgra brnyan dang mtshungs pa'i sgra'i ngo bo nyid ces pa ni de'i ngo bo nyid ces pa'o/ /gang zhig smra bar 'gyur ba zhes pa ni dmod pa 'debs pa dang rjes su gzung ba la sogs pa'i tshig gang yin pa de ni rang bzhin yongs su shes pa nyid kyis 'grub par 'gyur ba ni ngag gi dbang phyug go/ /yang na sngar med pa'i bstan bcos so sor rtsom pas na ngag gi dbang phyug go/ /skye ba srid pa tha ma yin zhing zhes pa ni skye ba phyi ma dang mi ldan pa ste skye ba gzhan med pa'i phyir ro/ /zung du 'jug pa'i bdag nyid can gyi ni zhes pa la thams cad mkhyen pa'i ye shes thob pa'i'o/ /tshe 'di nyid las zhes bya ba ste zhes pa'i bskal pa grangs med pa gsum gyis byang chub thob pa'i shes rab pha rol phyin pa'i rnal 'byor pa las ldog pa bstan to/ /las kyi dbang gis zhes pa ni sa dgu pa la las kyi dbang gis thob pa'i rgyur gyur pas so/ /skye bar 'gyur ba dgag par mdzad pas zhes pa ni slar yang srid pa'i skye ba len pa dgag pa yin no/ /skye ba'i las ni rtsa ba yin te/ las dbang du 'gyur na skye ba yang med do/ /rlung gi sbyor ba med pa yis/ /sems kyi rang bzhin ma dmigs te/ /sems ni rang bzhin rgyur gyur pas/ /las dang skye ba 'byung bar 'gyur/ /zhes 'byung ngo / /mthong ba'i chos ni mya ngan 'das/ /zhes bya ba la sogs pa 'phags pa'i tshig gis tshad ma nyid du bstan to/ /'bras bu'i khyad par zhes pa ni 'jig rten dang 'jig rten las 'das pa'i dngos grub kyi khyad par ro/ / phyag rgya chen po 'grub pa'o/ /zhes pa ni dpal rdo rje 'chang chen po'i lha'i sku sgrub pa'o/ /sngags la rjes su gzhol ba rnams/ /zhes pa ni bskyed pa'i rim pa'i rnal 'byor pa rnams so/ /'jig rten pa'i dngos grub rnams kyang zhes pa ni sman mchog dang bcud kyis len la sogs pa ste/ 'jig rten pa rnams 'dul ba tsam byed pas so/ /zung du 'jug pa'i ting nge 'dzin la gnas pa rnams la 'grub par 'gyur ro zhes pa ni 'bad rtsol med pas 'grub par 'gyur ro zhes tshig gi lhag ma'o/ /khams gsum mo zhes pa ni khams gsum gyi rang bzhin te/ /sangs rgyas thams cad do/ /dbyer med par gyur pa'o zhes pa ni dus gsum pa'i sangs rgyas dang bdag nyid dbyer med pa'i mos pas so/ /bsgoms pa'i rgyu des na 'grub par 'gyur ba ste dbyer med pa'i bsgom pas so/ /yan lag ma nyams par bzlas shing zhes pa ni lha la sogs pa dbyer med pa dang ldan pa'i rdo rje bzlas pas so/ /bden pa mthong bas so zhes pa ni chos thams cad rtogs pa'i mtshan nyid kyi de kho na nyid yid la byed pas so/ /gal te zhes bya ba la sogs pas tha mi dad pa'i bsgom pas 'jig rten pa'i dngos grub kyang thob par mi 'gyur na 'jig rten las 'das pa'i dngos grub thob par 'gyur ro zhes smos kyang ci dgos pa'o/ /gang gi phyir dngos grub thams cad kyi rgyu ni gnyis su med pa'i ting nge 'dzin te de kho na nyid yid la byed pa'i ngo bo yin pas so/ /thub pa chen po'i chos kyi phung / /brgyad khri bzhi stong shes na yang / /gang zhig de nyid mi shes pas/ /de dag thams cad 'bras bu med/ /ces 'byung ngo / /rnal 'byor thams cad ces bya ba/ /la sogs pas lung tshad ma nyid bstan te/ rnal 'byor thams cad ni thabs gang la yod pa de ni rnal 'byor thams cad de thabs thams cad kyis bsgrub par bya ba'o/ /nyon mongs pa'i sgrib pa la sogs pa bcom pas na bcom ldan 'das so/ /rdo rje sems dpa' ni rdo rje 'chang chen po'o/ /de nyid thob pa dang de las gshegs pa ni de bzhin gshegs pa'o/ /khams gsum ma lus zhes pa ni 'gro ba thams cad do/ /de'i longs spyod ni 'jig rten dang 'jig rten las 'das pa'i dngos grub ster ba'i sgo nas dpal rdo rje sems dpa'i dbang du gyur pa'o/ /'di skad bshad pa yin te/ 'jig rten pa dang 'jig rten las 'das pa'i dngos grub ni gnyis su med pa'i ye shes kyi rang bzhin dpal rdo rje sems dpa' la rag lus pa yin no zhes bya bas de nyid la 'bad rtsol bya'o zhes dgongs pa'o/ / 'don cing zlos pa zhes pa ni yan lag ma nyams pa'i rim pa dang ngag gis bzlas pas bzlas pa gang yin pa de dag sgrub pa pos ni rim pa gnyis la gnas pa'i rnal 'byor pa zhes bya'o/ /spros pa med pa la slob pa'i ngo bo nyid ces pa ni nye bar mtshon pa ste spros pa dang bcas pa dang shin tu spros pa med pa dag kyang slob pa zhes bshad par bya ste/ le'u'i brjod bya de rnams yin pas so/ /de nyid mchog ces pa ni dpal rdo rje 'chang gi gnas thob par byed pa'am bya ba dang spyod pa la sogs pa las khyad par du gyur pas so/ /de ston pa ni spyod pa gsum ston par byed pa'o/ /sgra'i tshogs zhes pa ni tshig gi tshogs te le'u zhes bya'o/ /sgra ji bzhin pa zhes pa ni phan yon tsam so sor bstan pa ste/ sogs pa'i sgras shes par bya'o/ /sgron ma gsal ba'i 'grel pa'i TI kA las le'u bdun pa'i rgya cher bshad pa'o// // de ltar zhes bya ba la sogs pas le'u brgyad pa'i bshad pa brtsam par bya ste/ /spyod pa la gnas pa zhes pa ni rnam pa gsum gyi spyod pa la rtsol ba byas pas so/ /tshogs yongs su rdzogs par bya ba'i don du zhes pa ni bsod nams dang ye shes kyi tshogs gnyis 'phel bar bya ba'i phyir ro/ /de la spyod pa spyod par 'dzin pa'i rnal 'byor pa la gsang ba'i dbang bskur med pas dngos grub tu mi 'gyur ro zhes le'u brgyad pas de ston pa yin no/ /de la gsang ba'i dbang thob pa'i phyir bla ma la phyi dang nang dang gsang ba'i mchod pa byas na bsod nams kyi tshogs thob par 'gyur ro/ /gang gi tshe mgu bar gyur pa'i bla mas kyang / slob ma la gsang ba'i dbang bskur byin na de'i tshe des ye shes kyi tshogs thob par 'gyur ro/ /de nyid bstan pa'i phyir/ bla na med pa'i mchod pa bya'o zhes pa ni gang gis ye shes kyi tshogs thob par 'gyur ro/ /spyod pa thos pa'i 'og tu zhes pa ni/ de nas kyi sgras de ma thag pa'i don bshad pa'i phyir ro/ /dkon mchog dpal ni ci'i phyir zhe na smras pa / nam mkha'i khams kyi rang bzhin ni byang chub kyi sems te de'i rang bzhin yang rin chen dpal lo zhes pas de la 'dri ba po ni mthun pa'o/ /de nyid bstan pa'i phyir/ byang chub kyi sems zhes pa ni byang chub kyi sems kyis bsam pa thams cad rdzogs par byed pas so/ /byang chub kyi sems dbang bskur ba'i gsol ba gdab pa'i gzhir gyur pa'i phyir ro zhes pa ni gsang ba'i dbang bskur de'i rang bzhin gsol ba 'debs par byed pa yin pas so/ /b+ha gar bzhugs pas na zhes pa ni b+ha ga'i nang du 'dod pa'i gdugs kyi rtsal byang chub kyi sems gnas pas so/ /rigs thams cad kyi bdag nyid can zhes pa ni rigs lnga nye bar sdud pas so/ /dam pa ni spyan la sogs pa zhes pa ni mchog tu dga' ba rab tu ster ba rigs kyi yum bzhi zhes bya ba ste drang ba'i don to/ /mchog gi de kho na nyid gzhal bar byed pas na dam pa ni 'byung ba'i rtsa bzhi'o/ /spyan ma la sogs pa ni/ rus sbal ma dang zla ba'am/ /lha sbyin ma dang nor rgyas ma/ /zhes bya'o/ /de rnams kyi dbang phyug ni gtso bor gyur pa ste zhes pa ni rtsa dbu ma bzhi dang ldan pa thig le'i gzugs su 'jug pa ste nges pa'i don to/ /rdo rje 'chang chen po ni drug pa'o/ /mnyes par byas so zhes pa ni gsol ba 'debs par byas pa'o/ /tshigs su bcad pa de bzhis de bzhin gshegs pa drug gi sgo nas bstan par bya ste/ rdo rje ltar mi phyed pa'i tshul gyis mdzes pas na zhes pa ni de bzhin gshegs pa lnga bsdu bar byed pa rnam par mi rtog pa'i ye shes mi phyed pa'i de kho na nyid ston pa'i ngang tshul can te/ bcom ldan 'das rdo rje 'chang chen po'o/ /gang gis sems can mang zhing zhes pa ni sangs rgyas dang byang chub sems dpa' rnams so/ /sangs rgyas nyid du son par mdzad pa ni rdo rje 'chang chen po bsgoms nas sangs rgyas nyid thob pa yin gyi/ gzhan gyis ni ma yin te/ rtog pa dang bcas pa'i phyir ro/ /gang gi phyir de bzhin gshegs pa'i dbugs dbyung ba ni 'khor ba dang rdo rje 'chang gi dbugs dbyung ba ni mya ngan las 'das pa yin no zhes 'byung ngo / / des ni rdo rje 'chang chen po'i sgo nas bstod pa'o/ /don dam pa'i bden pa ni rim pa gnyis pa'am/ bzhi pas thob par bya ba'i 'od gsal ba'o/ /de rnam par dag pa'i spyod pa ni zhes pa la 'jig rten pa'i chos brgyad rnam par dag pa'i mtshan nyid do/ /ji ltar sdug bsngal de bzhin bde/ /zhes bya ba la sogs pa 'byung bas so/ /des rnal 'byor pa'i rgyud sbyong bar byed pas na zhes pa ni rnam par mi rtog par byed pa'o/ /de spyod pas ni sems so sor rtog par bya ba yin te/ des ni rin chen 'byung ldan gyi sgo nas bstod pa'o/ /rnam par rtog pa thams cad kyi spros pa dang bral ba zhes pa ni sems can rnams la ma smin pa la sogs pa rtog pa thams cad de/ de dang bral ba ni sems can rnam la bstan pa dang grol ba dang smin pa la sogs pa'i mtshan nyid can gyi spyod pa'o/ /des na phul du byung bas na zhes pa ni bya ba nan tan grub pa'i ye shes dang ldan pa'o/ /rgyal bar gyur pas na zhes pa ni mthong ba dang bsgom pa la sogs pa'i lam gyis nyon mongs pa dag par mdzad pas na rgyal ba'o/ /rang sangs rgyas la sogs pa ste zhes pa ni bse ru la sogs pa'o/ /de rnams 'od zer gyis bskul bas sngags kyi tshul la 'jug par mdzad pas na mchog ni don yod grub pa'o/ /des ni don yod grub pa'i sgo nas bstod pa'o/ /sgra ji bzhin pa'o zhes pa ni spyod pa'i sgo nas bstod pa'i don bstan pa'i phyir ro/ /'dod chags la sogs pa nyon mongs pa dang nye ba'i nyon mongs pa rnams 'dod chags la sogs pa'i sgo nas sbyong bar mdzad pa'i phyir / 'dod chags zhes bya ba la sogs pas bstan te/ bar gyi sbyong ba tshig mi mngon pa zhes dgongs so/ /de ston par mdzad pas na de skad ces bya'o/ /nam mkha'i dbyings dang mtshungs pa zhes pa ni rnam par mi rtog pa'i byang chub kyi sems kyang nam mkha'o/ /de'i rang bzhin yin pas na mchog ces 'od dpag tu med pa'i sgo nas bstod pa'o/ /dus gsum du gshegs pa'i de bzhin gshegs pa rnams te rnam par snang mdzad kyi rigs can no/ /skyed par mdzad pas na zhes pa ni rnam par snang mdzad kyi rigs las 'byung bas so/ /bag chags ma lus pa dang bral ba zhes pa ni nyon mongs pa dang shes bya'i sgrib pa med pa'o/ /'khor ba ji srid par gnas pa zhes pa ni 'khor ba'i bar du gnas pa'o/ /sems can gyi khams sbyong bar byed pa'i ye shes ni me long lta bu'i ye shes te grol bar byed pas na thar pa zhes bya'o/ /lam ni lam lnga'i mtshan nyid kyi rgyu'o/ /'chad par mdzad pa zhes pa ni rnam par snang mdzad nyid do/ /nyan thos la sogs pa'i theg pa gsum mo zhes pa na de'i tshe dgongs pas chos kyi 'khor lo bskor ba'i phyir ro/ /de la lam gyi ngo bo nyid kyis rab tu gnas pas na zhes pa ni lam gyi ngo bor bcom ldan 'das gnas pa'o/ /rnam par snang mdzad la sogs pa zhes pa ni sprul pa'i rnam par snang mdzad dang / spyan ma dang gzugs rdo rje ma la sogs pa'o/ /de rnams kyi bdag por gyur pas zhes pa ni longs spyod rdzogs pa'i sku'i rang bzhin gyi rnam par snang mdzad de bdag po'o/ /des na dag pa'i bdag nyid can gyis zhes pa ni rang dang gzhan gyi don phun sum tshogs pa la mkhas pas dag pa'i gnas thob pa'o/ /des ni rnam par snang mdzad kyi rang bzhin gyis bstod pa'o/ /byang chub ni chos kyi dbyings kyi ye shes so/ /de'i ngo bo'i thugs gang la yod pa de ni mi bskyod pa zhes bya ba'i don to/ / rgyas pa'i spyan dang ldan pa gang yin pa de ni zhes pa ni skyes bu chen po'i mtshan dang ldan pa nyid bstan to/ /chos kyi 'khor lo ni rnam pa bcu gnyis pa'o zhes pa ni bden pa ni bzhi ste/ sdug bsngal ba dang / kun 'byung dang / 'gog pa dang / lam zhes bya ba ste/ mthong ba'i lam la'o/ /sdug bsngal shes par bya/ kun 'byung dgag par bya/ 'gog pa mngon du bya/ lam bsgom par bya zhes bya ba bsgom pa'i lam mo/ /sdug bsngal shes/ kun 'byung spong / 'gog pa mngon du byas/ lam bsgom zhes mi slob pa'i lam ste/ de ltar rnam pa gsum bskor ba ni bden pa bzhi ste rnam pa bcu gnyis zhes bya'o/ /bcom ldan 'das kyis khams gsum po la rab tu bskor ba mdzad do/ /sku dang gsung dang thugs rdo rje 'chang gi ngo bo yin pas na/ rdo rje gsum mi phyed pa'i mtshan nyid do/ /des ni mi bskyod pa'i sgo nas bstod pa'o/ /drang ba'i don zhes pa ni de bzhin gshegs pa drug gi ni bstod pa tsam bstan pas so/ /da ni rdo rje 'chang chen po nyid nges pa'i don gyi sgo nas bstod par bya ste/ ye shes gsum gyi sgo nas zhes pa ni snang ba ni zhe sdang ngo / /snang ba mched pa ni 'dod chags so/ /snang ba nye bar thob pa ni gti mug ste ma rig pa'i ngo bo yin pas so/ /de nyid bstan pa'i phyir/ 'dod chags ni thabs kyi rang bzhin zhes bya ba la sogs pa bstan to/ /'od gsal ba zhes pa ni mi phyed pa'i phyir ro/ /de nyid ces bya ba la sogs pa 'od gsal ba'i dri ma rnam par dag par byed pa nyid bstan to/ /dbang po mchog ni rnam par shes pa ste thams cad kyi mchog yin pas so/ /de nyid shel sgong dag pa dang mtshungs pa ni dbang po mchog tsam mo/ /de bzung bas ni bcom ldan 'das te rnal 'byor gyi mngon sum gyis rtogs par bya ba nyid du bstan to/ /rdo rje 'chang chen po ni brtan pa dang g.yo ba'i dngos po thams cad kyi dang por gyur pas na mchog ces bya'o/ /'od gsal ba yang dngos po'i tshogs thams cad kyi dang po nyid chos kyi ngo bo yin pas so/ /rnam par snang mdzad la sogs pa sangs rgyas dang byang chub sems dpa' rigs lnga las byung ba ste/ gang du ni rdo rje 'chang chen po'i rigs gcig la thim par gyur pas na de la de skad ces bya ba'o/ /gnyis su med pa'i ye shes kyi bdag nyid can no zhes pa ni 'od gsal ba dang de'i bdag nyid kyi mchod pa zhes bya'o/ /rdo rje sku nyid kyis zhes pa ni zung du 'jug pa'i sku nyid kyis so/ /tshad med pa'i lha mo dang snyoms par zhugs pas zhes pa ni rigs kyi yum dang mchod pa'i lha mo dang / pho nya mo dang bka' nyan mo dang bran mo'i pad+ma'i 'brel pas so/ /mchog tu dga' ba'i mtshan nyid gcig par zhes pa ni bde ba chen po'i ngo bo gcig gis so/ /lha dang mi las 'das pa'i zhes pa ni lha dang mi rnams kyi bde ba ni ma dag pa ste/ mi rtag pa'i chos dang ldan pa'i phyir dang bral ba'i sdug bsngal gyi rnam par smin pa che ba yin pas dri ma med pa ma yin no/ /bcom ldan 'das kyis bde ba chen po ni zag pa med pa ste rtag pa zhes bya'o/ /yon tan brgyad kyi dbang phyug gi bde ba zhes pa ni/ / sku'i dbang phyug la sogs pa ste sngar bshad zin no/ /de ltar gyur pa'i bde ba chen po thob pa'i thabs ni rigs dang bsam pa la sogs pa'i dbye bas rnam pa du ma gang yin pa de ston par mdzad pa ni de so sor ston par mdzad pas so/ /shes rab dang thabs dang nye bar thob pa gsum ni snang ba gsum mo/ /de nyid bgrod par bya ba yin pas na lam ste rgyu'o/ /don dam pa'i bden pa'o zhes pa ni rim pa gnyis pa dang bzhi pas thob par bya ba'i 'od gsal ba'o/ /de nyid blang ba yin pas na grong khyer dang 'dra ba ni grong khyer chen po'o/ /der 'jug par mdzad pas na zhes pa ni de ston par byed pa'o/ /bde ba thams cad ni snang ba la sogs pa'o/ /bdag nyid ni 'od gsal ba'o/ /de sgrub pa ni rdzogs par byed pa zhes bya ba'i tha tshig go/ /bden pa gnyis kyi bdag nyid can yin pas na zhes pa ni kun rdzob dang don dam pa gnyis kyi ngo bo yin pa'i phyir ro/ / byang chub ni don dam pa'i bden pa zhes pa la sogs pas zung du 'jug pa'i rim pa gtso bor gyur pa bcom ldan 'das bstan to/ /rgyas shing zhes bya ba la sogs pas mdor bstan pa'o/ /de gang zhe na/ zhes pa ni 'dri ba'o/ /sha zhes bya ba la sogs pa ni rgyas par bshad pa'o/ / de la sha'i mig gis bcom ldan 'das skyes bu chen po'i mtshan dang ldan pa zhes bya'o/ /lha'i mig gis ring ba dang bskal pa dang bar chod dang bcas pa'i dngos po rnams gzigs so/ /shes rab kyi mig gis dngos po'i rang gi mtshan nyid gzigs so/ /chos kyi mig gis chos thams cad stong pa ye shes lnga gzigs so/ /sangs rgyas kyi mig gis 'ba' zhig dri ma med pa mtha' yas pa nam mkha' dang mtshungs pa chos kyi dbyings so sor rtogs par 'gyur ro/ /'dus byas pa dang 'dus ma byas pa bden pa gnyis kyi bdag nyid can no zhes pa ni kun rdzob dang don dam pa la sogs pa'o/ /de sems can gyi 'jig rten du rab tu ston par mdzad pas na zhes pa ni de'i man ngag ston par byed pas so/ /yang dag pa'i mtha' ni 'od gsal ba'o/ /des rnam par dag pa'i sku gsum la sogs pa bdag la byin gyis brlab pa'i rim pas thob par bya ba'o / /de'i bdag nyid can ni de'i rang bzhin yin pa'i phyir ro/ /mi 'jigs pa'i lam gyi bdag nyid yin pas na zhes pa ni phyir mi ldog pa'i lam gyi rang bzhin yin pas so/ /nges pa'i don to zhes pa ni yang dag pa'i de kho na nyid ston pa'i phyir ro/ /thams cad stong pa ste zhes pa ni de kho na nyid bzhi pa ste/ nam mkha' la ni nam mkha' sbyar/ /thams cad nam mkha' nam mkha' che/ /zhes 'byung ngo / /ye shes chen po la ltos pas chen po yang yin la/ 'od gsal yin pa'i phyir mi 'gyur ba yang yin no zhes bsdu ba'o/ /thams cad kyi dbang bskur bar gyur pas na zhes pa ni/ de bzhin gshegs pa thams cad kyi rdo rje 'chang chen po ni cod pan du 'gyur bas so/ /nam mkha'i mdzod kyi ting nge 'dzin gyis zhes pa la sogs pa ni mi zad pa'i gter gyis phun sum tshogs par byed pa'i dngos po dang ldan pas so/ /'jig rten gsum gyis mchod par bya ba drag po dang khyab 'jug dang tshangs pa la sogs pa rnams kyi yang bdag po yin pas so/ /don dam pa'i bden pa zhes pa ni gnyis pa'am bzhi pa'i 'od gsal ba ste mi phyed pa'i phyir ro/ /bsam pa thams cad rdzogs par byed pas zhes pa ni sgyu ma lta bu'i ting nge 'dzin gyis 'gro ba'i don rdzogs par byed pas so/ /bdag la byin gyis brlab pa'i rim pas thob par bya ba'i ye shes kyi sku ni rin chen zhes bya'o/ /de'i ngo bo nyid kyis de zung du 'jug par byed pas na zhes zung du 'jug pa'i rim pa bstan to/ /dgongs pa ma yin par bshad pa zhes pa ni shin tu gsal ba'i de kho na nyid so sor bstan pas so/ /dus gsum du bzhugs pa'i rgyal ba rnams ni 'das pa la sogs pa'i dus gsum la bzhugs pas so/ /de dang 'brel pa dang ldan pa'i mchod pa ni zhes pa la/ de bzhin gshegs pa thams cad 'jug pa sngon du 'gro bar byang chub kyi sems spro zhing spyod pa'i phyir ro/ /bskyed pa'i rim pa la gnas pa'i thun mong ma yin pas zhes pa ni ting nge 'dzin gsum sgom par byed pa'i rnal 'byor pa rnams la spyod yul ma yin pa'i phyir ro/ /'o na dang po dbang bskur ba'i dus su ji srid slob dpon dang gsang ba dang shes rab dang bzhi pa yang ni de bzhin no zhes bya bas dbang ma bskur na de srid sngags kyi theg pa bstan pa dang nyan pa dang bsam pa dang bsgom pa la dbang ba ma yin no/ /bskyed pa'i rim pa'i rnal 'byor pa rnams kyis kyang 'di dag thams cad byed pas na ji ltar thun mong ma yin pa zhes bshad ce na/ smras pa/ bskyed pa'i rim pa'i rnal 'byor pa rnams la dbang bskur ba'i rim pa thams cad bla ma rnams kyis kun du spyod par byed pa ste/ snod du bya ba'i phyir ro/ /de rnams kyi pha rol la bstan pa'i phyir dbang ni ma gnang ste rdzogs pa'i rim pa mi rtog pa'i phyir ro/ /rdzogs pa'i rim pa'i rnal 'byor pa rnams kyis thams cad la dbang byed pa yin no zhes nyes pa ni cung zad kyang med do/ /rdo rje mi phyed gsum zhes pa ni sku gsung thugs kyi rdo rje 'chang chen po dbyer med pa'i rang bzhin no/ /de ni khams gsum pa rnams nyid kyi sku dang gsung dang thugs dang 'dus par mdzad pas na zhes pa ni khams gsum gyi nang na gnas pa rgyal ba'i tshogs dang / rang gi sku la sogs pa dang lhan cig tu gcig tu bya'o / /gsang ba'i dbang bskur ba'i dus su khams gsum na gnas pa'i de bzhin gshegs pa thams cad rdo rje slob dpon gyis kha sbyar du bya'o zhes bstan to/ /rgyal ba rnams 'di las 'byung bar gyur pas na zhes pa ni de spyod pa tha mal pa'i lus spangs nas slob ma rnams kyis rdo rje 'chang gi rnam par smin pa'i sku thob par 'gyur ro/ /de dus brtsams nas de ni rtog pa med/ /de yi dbyibs dang kha dog ji ltar mtshon/ /bsam gyis mi khyab rnam par smin pa'i sku/ / bya ba byas pas sdom pa de las thob/ /ces 'byung ngo / /dgongs pas bshad pa zhes pa ni/ /'gal ba'i tshig gi sbyor bas de kho na nyid so sor bstan pas so/ /de nyid ces bya ba la sogs pas gsang ba'i dbang bskur ba sbyin par bya ba'i phyir rdzogs pa'i rnal 'byor bdag la byin gyis brlab pa'i rim pas ye shes kyi sku gzung ba bstan to/ /yid du 'ong ba'i gzugs can yin pas na zhes pa ni 'ja' tshon ltar 'od spro ba'i bdag nyid dam rnam pa thams cad mchog dang ldan pa'o/ /bden pa gnyis kyi bdag nyid can ni sems rnam par dag pa'i rim pas don dam pa'i bden pa'i bdag nyid can dang bdag la byin gyis brlab pa'i rim pas kun rdzob kyi bden pa'i bdag nyid can no/ /gzugs bzang zhes pa ni chog mi shes pa'i gzugs so/ /gzhon pas brgyan pa'i zhes pa ni rnam pa thams cad mchog dang ldan pas so/ /lha nyi shu rtsa lnga'i bdag nyid can gyi zhes pa ni nye bar mtshon pa tsam yin te/ lha sum cu rtsa gnyis 'khor dang ldan pa zhes bya ba'i tha tshig go/ /bdag la byin gyis brlab pa'i mtshan nyid can zhes pa ni cig car ram snang ba nye bar thob pa la sogs pa'i rim pas 'od gsal ba las 'byung ba zhes bya ba'i don to/ / bla ma'i kha nas rnyed pa zhes pa ni rdo rje slob dpon gyi zhal nas thob nas so/ /yang na dgongs pas bshad pas bla ma'i kha ni 'od gsal ba ste de las rnyed nas so/ /de nyid dang bla na med pa'i mchod pa rab tu brtag cing bya ba'o zhes pa ni bdag la byin gyis brlab pa'i rim pa'i mtshan nyid kyi ye shes kyi sku gzung ba'i rang bzhin gyi mchod pa zhes bya'o/ /dbus kyi gtso bo'i bdag la byin gyis brlab pa'i rim pas skye bar bstan nas/ dkyil 'khor pa rnams la ji lta bu yin zhe na/ smras pa/ byol song gi sgras ni logs na yod pa la bya ste zhes pa ni shar la sogs pa'i phyogs dang mtshams brjod pa'i phyir ro/ /des na bdag po las gzhan pa ni 'khor rnams la'o/ /dkyil 'khor gyi lha'i sku zhes pa ni 'khor gyi lha'i sku rnams so/ /rdo rje 'chang chen po dang 'dra bar bzung ste zhes pa ni cig car ram snang ba nye bar thob pa'i rim pa la sogs pa gzung ba'o/ /rdo rje 'chang chen po'i rnam par 'phrul pa'i phyir ro zhes pa ni de'i sprul pa'i sku'i rang bzhin yin pa'i phyir gtan tshigs bshad do/ /dgongs pas bshad pa'o zhes pa ni bu mo la sogs pa'i 'gal ba'i sgra'i sgo nas bdag la byin gyis brlab pa'i rim pa bstan pas so/ /'jig rten las 'das pa'i rnal 'byor pa zhes pa ni rdzogs pa'i rim pa'i rnal 'byor pa rnams so/ /de ni bskyed pa'i rim pa'i rnal 'byor pa rnams kyi zhes pa ni sngags la mos pa'i brtags pa'i rnal 'byor pa rnams kyi'o/ /sa'i phyogs zhes pa ni gtsug lag khang dang nags tshal dang chu bo'i 'gram la sogs pa la'o/ /sa sbyang ba la sogs pa'i rim pas zhes pa ni sa sbyang ba la sogs pa rnam pa nyi shu'i cho gas so/ /yongs su dag pa ni zhes pa la rdo dang phub ma la sogs pa bton pa'o/ /ji skad du/ phub ma rdo dang rde'u dang ni / /sol ba la sogs bton byas nas/ /'bru dang rin chen sman snying po/ /shin tu legs par brdung bar bya/ /zhes 'byung ngo / /skye ba dang 'dus pa dang bral bas zhes pa ni de'i dbang gis sems rtse gcig par 'gyur ro/ /lam gyi sgra ni tha dad pa'i rim pa ste sa la sogs pa'i sgra las 'og tu blta bar bya'o/ /phyogs gzhan ston pa yin par blta bar bya'o zhes pa ni rnam par rtog pa rab tu ston pa'i phyir ro/ /sngags pa'o zhes pa ni sngags pa sgrub pa la gzhol ba'i sgrub pa po'o/ /skye bo dam pa'o zhes pa ni skyes bu dam pa ste dge bsnyen rnams so/ /de rnams kyi khyim ni mchod khang la'o/ /lha'i khang pa zhes pa ni lha chen la sogs pa'i lha khang la'o/ /gang gi phyir dbang phyug dang lha chen po la sogs pa smod par bya ba ma yin te/ bcom ldan 'das rdo rje 'chang gi sprul pa yin pas so/ /ji skad du/ pha rol rgol ba kha cig gang / /rtags kyi dbye bas rnam par gnas/ /de rnams 'dir smod mi bya ste/ rdo rje sems dpa'i sprul pa'i phyir/ / zhes 'byung ngo / /ba'i lci ba la sogs pa'i zhes pa ni ba'i 'brel pa dang ldan pa'i lci ba dang chu blang bar bya ste gtsang sbra yin pa'i phyir ro/ /shing shun dri bzang po la sogs pa yongs su bzung ste zhes pa ni tsan+dan la sogs pa'i dri'i chu zhes bya ba'i tha tshig go/ /byug cing dkyil 'khor bya'o zhes pa ni gru bzhi pa'i dkyil 'khor bya'o/ /lam gyi sgra ni ma bshad pa dag kyang bsdu ba'i don te zhes pa ni me tog la sogs pa yang gzung ba'i phyir ro/ /des na me tog la sogs pa zhes bya ba la sogs pa bstan to/ /rang gi lha mnyes par bya ba'i don to zhes pa ni rang gi yi dam gyi lha yongs su mgu bar bya ba'i don to/ / nyin re'o ni ji srid dkyil 'khor gyi cho ga yongs su rdzogs pa'o/ /de ltar zhes bya ba la sogs pas snying rje chen po bya ba sngon du 'gro bar gnas gzung ba dang bgegs bskrad pa dang / stong pa nyid bsgom pa dang / ye shes kyi sa gzhi dang / gzhal yas khang bskyed pa dang / lhag par mos pa'i dkyil 'khor dang / don dam pa'i dkyil 'khor bsgom pa dang / gdan pa la sogs pa'i dbye ba dang / chos kyi dbyings kyi sngags brjod pa sngon du 'gro bar sngags dgod pa dang phyag mtshan las rdo rje 'chang gi sku sgrub pa dang mi bskyod pa rjes su 'jug pas dbus kyi gtso bo rdzogs pa dang / ye shes sems dpa' dang ting nge 'dzin sems dpa' bsgom par byas la 'chad par 'gyur ba'i zhes bya ba ste/ de nyid bstan par bya ba'i phyir/ rnal 'byor dang rjes su rnal 'byor byas la bstan to/ /bdag nyid ni rang gi lha'i sku'o/ /rang gi phyag rgya ni dam tshig gi phyag rgya dang ye shes kyi phyag rgya dag las gang yang rung ba'o / / rigs lngar bya ba ni/ phung po dang khams dang skye mched la sngags dgod pa'i mtshan nyid can gyi shin tu rnal 'byor dang / de bzhin du sku la sogs pa byin gyis brlab pa'i rnal 'byor chen po zhes bya'o/ /de srid kyi bar 'dir yi ge hUM ste rnam par shes pa ni snying la gnas pa'i phyir mi bskyod pa'i rigs dgod par shes par bya'o/ /skra skye ba'i gnas ji srid pa'i bar du yi ge oM las byung ba'i rnam par snang mdzad dgod do zhes pa ni yan lag dang nying lag thams cad kyi rang bzhin gyi lus kyi mgo bo gtso bo yin pa'i phyir ro/ /lus kyi rang bzhin yang rnam par snang mdzad yin pa'i phyir ro/ /bskyed pa'i rim pa shes pa'o zhes pa ni shin tu rnal 'byor gyi dgod pa shes pas so/ /'dir yi ge a las byung ba'i 'od dpag tu med pa dgod par bya'o zhes pa ni 'od dpag tu med pa ni ngag gi rang bzhin yin pa'i phyir ro/ /ngag kyang lkog ma nas gsal bar 'gyur ro zhes bya ba'i tha tshig go/ /der yi ge ha las byung ba'i don yod grub pa dgod par bya'o zhes pa ni rkang pa'i bar dang rkang pa gnyis la las kyi rdo rje dgod par bya ste/ don yod grub pa ni 'gro ba dang 'ong ba'i rang bzhin gyi rlung gi khams kyi mtshan nyid dang mthun pa'i phyir ro/ /lte ba zhes pa la sogs pas lte ba la sogs pa las swA las byung ba'i rin chen 'byung ldan dgod par bya ste lte ba la sogs pa khong stong yin pas nam mkha'i khams kyi ngo bo rin chen 'byung ldan dang mthun pa'o/ /rgyal ba dang rgyal ba'i sras dag ni rgyal ba'i sras zhes bya ste zhes pa ni mi 'dra ba rnams kyang gcig tu bsdu bar 'gyur ro/ /rnam par snang mdzad la sogs pa zhes bya ba la sogs pas mdor bsdus pa'i sgrub thabs la sogs pa'i rim pas de rnams kyi kha dog la sogs pa shes par bya'o zhes bstan to/ /rigs lnga'i bdag nyid dgod pa zhes pa ni rnam par snang mdzad la sogs pa dang de'i rigs can rnams dgod do/ /ji lta ji lta bar bya'o zhes pa ni de bzhin gshegs pa la sogs pa gang dang gang gi gnas la de dang de dgod par bya ba dang / sku gsung thugs kyi byin gyis brlab pa yang bya'o/ /de ltar byas pa'i snyoms par 'jug pa'i phyag rgya sbyong ba sngon du 'gro bar rdo rje dang pad+ma mnyam par sbyar bar byas pas so/ /des ni yan lag bzhi pa dang po sbyor ba zhes bya ba'i ting nge 'dzin bstan to/ /dkyil 'khor rgyal ba'i mchog bstan pa'i phyir/ rang gi phyag rgya'i chos 'byung ste / zhes smos te reg bya rdo rje ma la sogs pa'i pad+ma'o/ /de'i dbus su gnas pa zhes bya ba la sogs pas 'di skad bshad pa yin te/ phyag rgya 'dus byas pa'i 'og tu rjes su chags pa byas la reg bya rdo rje ma la sogs pa'i chos 'byung gi nang du zla ba'i dkyil 'khor bsams te/ de las 'od zer gyi tshogs spro zhing de nam mkha'i dbyings la bzhugs pa de bzhin gshegs pa thams cad bkug cing bcug la/ rtsa dbu ma nas spros te zla ba'i dkyil 'khor de nyid la mchod pa'i lha mo'i gzugs su bskyed cing spros la/ de rnams kyis bla na med pa dang bcas pa rnam pa lnga byas te slar yang bsdus nas byang chub kyi sems kyi ngo bo pad+ma'i nang du thig le'i gzugs su yongs su gyur nas de'i nang du rdo rje 'chang gi rnam pa'i bdag nyid bsgom par bya'o/ /de nyid bstan pa'i phyir/ byang chub kyi sems so zhes pa ni/ de bzhin gshegs pa 'jug pa yongs su gyur pa las skyes pa'o/ /kun rdzob byang chub kyi sems kyi dbus na gnas par zhes pa ni de bzhin gshegs pa zhugs pa yongs su gyur pa'i byang chub kyi sems kyi nang na gnas pa bsam par bya'o/ /de bzhin gshegs pa rnams spro bar bya'o zhes pa ni mchod pa'i lha mo'i gzugs su de rnams rnam par spros nas so/ /sems rtse gcig pa'o zhes pa ni zla ba'i dkyil 'khor gyi rnam pa bsgom pa la sems brtan pa nyid du bstan to/ /bdag nyid kyi snying gar bsdu ba dag kyang rab tu bya'o zhes pa ni mchod pa byas nas slar yang bdag nyid kyi rtsa dbu ma la bsdu bar bya'o/ /bsdu ba zhes pa la sogs pas dkyil 'khor rgyal ba mchog gi gnas skabs su dkyil 'khor ba spro ba ni gtso bo yin la/ sngar bshad pa'i de bzhin gshegs pa 'jug pa dang mchod pa dang mchod pa'i lha mo spros pa dang slar yang bsdu ba'i gtso bo ma yin pa gal te rnal 'byor pa 'dod na de'i tshe bya ste gzhan du ni ma yin no zhes bstan to/ /da ni dkyil 'khor pa spro bar bya ba'i phyir/ de ltar zhes bya ba la sogs pa smos te/ slar yang bdag nyid kun rdzob byang chub kyi sems kyi nang nas langs la khams bzhi'i rang bzhin gyi spyan ma la sogs pa lha mo bzhi'i rang bzhin gyi ngo bo rnam pa thams cad kyi mchog dang ldan pa sems dpa' gsum gyi bdag nyid reg bya rdo rje ma dang snyoms par zhugs par bsams te/ rjes su chags pa'i dam pa'i ting nge 'dzin gyis snang ba la sogs pa'i ye shes 'byung ba yang dag par dmigs la/ thig le spro ba'i skabs su/ badzra d+h+r-ika ces bya ba la sogs pa phyung ba'i sngags yongs su gyur pa las mi bskyod pa la sogs pa de nyid du bskyed cing phyi rol du spros la de rnams kyis kyang 'gro ba'i don byas te/ slar yang gshegs nas shar la sogs pa'i phyogs dang mtshams rnams su go rims kyis gnas pa yongs su bskor ba bsgom par bya'o zhes bstan to/ /dkar po la sogs pa zhes pa ni 'od zer lngas brgyan pa ste/ de bzhin gshegs pa lnga'i rang bzhin yin pas so/ /de bzhin gshegs pa rnams so zhes pa ni me long lta bu la sogs pa'i ye shes pa'i rang bzhin yin pas so/ /dus gsum du bzhugs pa ste zhes pa ni dus gsum la yang 'grub pa'o/ /zhing du gyur pa yin par rnam par bsam pa ste zhes pa ni de bzhin gshegs pa thams cad kyi rdul phra rab kyis mdzad pa zhes bya ba'i don to/ /sngar bshad pa'i bdag gi ba spu'i bu ga rnams las zhes pa ni lha mo'i pad+ma nas spros te/ de'i ba spu'i bu ga nas thams cad las spro bar bya'o/ /bskyed pa'i rim pa la byung ba'i mkhas pas zhes pa ni dkyil 'khor rgyal ba mchog la gzhol ba'i sgrub pa po zhes bya ba'i don to/ / ji ltar 'dod pa'i don rdzogs par byed pas zhes pa ni zhe sdang la sogs pa'i nyon mongs pa rnam par sbyang ba sngon du 'gro bar mngon par dga' ba la sogs pa'i sangs rgyas kyi zhing la rab tu gnas pas so/ /rjes su 'dzin par mdzad pas na mchod pa ste zhes pa ni don de nyid do/ /de bzhin gshegs pa ste zhes pa ni rnam par snang mdzad la sogs pa'o/ /tshogs te zhes pa ni dkyil 'khor pa ste/ lha mo dang byang chub sems dpa' dang khro bo rnams so/ /sgra ji bzhin pa zhes pa ni dang po sbyor ba dang dkyil 'khor rgyal ba mchog gi ting nge 'dzin gnyis so sor bstan pas so/ / da ni zhes bya ba la sogs pas rim pa gnyis kyi rnal 'byor pa la mchod pa bya ste/ de la bskyed pa'i rim pa'i rnal 'byor pa la las kyi rgyal ba mchog gi ting nge 'dzin gyi phyogs gcig tu gyur pa mchod pa'i cho ga dang / rdzogs pa'i rim pa'i rnal 'byor pas rdo rje bzlas pa'i rim pa skyob pa nyid mchod pa'o/ /ji skad du/ de yi brtul zhugs ma bshad de/ /phreng ba ma yin sdom pa min/ /'dzin pa sbyin sreg las rnams ni/ /yang yang 'jug pa min zhes bya/ /zhes 'byung ngo / /rigs rnam pa lnga'i dbye bas shes par byas la zhes pa ni rnam par snang mdzad la sogs pa'i kha dog lnga'i dbye bas so/ /kun+da ma li ka ma la ti/ /sangs rgyas rdo rje can la dbul/ /de bzhin du zhes bya ba la sogs pas de dang 'dra ba'i dpe bstan to/ /dzA ti ni kha dog gsum yod pas te zhes pa ni/ dkar po dang dmar po dang nag po ste sku la sogs pa rigs gsum gtso bo yin pas so/ /de bzhin kar+Ni ka ra dang / /zhes bya ba la sogs pa rnam pa bzhi'i rigs kyi yum bzhi gtso bo yin pas dbul bar bya'o/ /bsam gtan gyi stobs kyis rab tu bskyed nas zhes pa ni phyi rol gyi me tog med na yid kyi mchod pas de bzhin gshegs pa rnams mchod par bya'o/ /drang ba'i don to zhes pa ni phyi'i mchod pa tsam bstan pas so/ /lung gis bshad par bya ba ste zhes pa ni rdo rje phreng ba'i rgyud las te tshig gi lhag ma'o/ /gang zhig rlung ni bcur bsgrags pa/ /zhes pa ni srog la sogs pa rlung lnga dang rgyu ba la sogs pa nye ba'i rlung lnga ste/ bcu ni phung po dang dbang po la brten pa'i phyir ro/ /de ni pad+ma ut+pal ming / /zhes pa ni/ shin tu zab pa 'od gsal ba'i de kho na nyid kyi mtsho las skyes pa'i phyir ro/ /de nyid ni yi ge gsum mo/ /rdo rje gsum ni sku la sogs pa'o/ /de nyid rnam pa gsum ni dzA ti gcig pu 'dod pa ste sku la sogs pa nyid yi ge gsum las 'byung ba'i phyir ro/ /kar+Ni ka ra la sogs pas me'i dkyil 'khor la sogs pa bzhi yin te/ kha dog dang mthun pa'i phyir ro/ /mchod pa'i don bshad par bya ste/ dngos med go 'phang la goms pas/ /zhes pa ni/ 'od gsal ba'i go 'phang bsgoms pas so/ /lha rnams kyi ni skur sbyor ba/ / zhes pa ni dkyil 'khor bzhi la dbang byed pa spyan ma la sogs p a'i gzugs dang mthun pas rdo rje bzlas pa la slob pa gang yin pa de ni gcig tu sangs rgyas kun mnyes pa'i zhes pa ni de bzhin gshegs pa thams cad kyi rang bzhin phung po dang khams dang skye mched sbyong bar byed pas mchod pa chen por de 'gyur ro zhes pa ni bla na med pa'i mchod pa 'dod par bstan pa'o/ /de nyid ni dgongs pas bshad pas me tog bstan to/ /phyi dus skye bos mi shes pa/ /zhes pa ni ma 'ongs pa'i dus su sems can rnams kyis shes par mi 'gyur ro/ /ma rtogs pa zhes bya ba la sogs pas dgongs pa'i don ma rtogs pas rdo rje 'chang chen po'i dngos grub thob par mi 'gyur ba dang / mos pa dman pa'i dbang gis nyan thos pa'i rigs can dang 'dra ba bdag cag sngags kyi theg pa chen po la snod ma yin no zhes smras na lha'i ngo bo rang gi bdag nyid smod nas mi sdug pa'i sgom pa bshang gci la sogs pa'i rang bzhin rtogs pas de smod pa sangs rgyas thams cad kyang smod par 'gyur ba'i phyir 'khor ba la 'khor bar 'gyur ro zhes bstan to/ /nges pa'i don to zhes pa ni rdo rje bzlas pa'i rim pa so sor bstan pas so/ /rnal 'byor pa gnyi ga'i thun mong zhes pa ni rdzogs pa dang ma rdzogs pa'i rnal 'byor pa'i spyod yul lo/ /ngos re zhing dpag tshad nyi shu rtsa lnga yod pas na zhes pa ni rigs brgya'i dbye ba rnam par dag pas so/ /de ni nye bar mtshon pa tsam yin te/ stong dang khri dang 'bum la sogs pa rgya che ba yin te/ rnal 'byor pa'i sems kyi rgyud kyi mos pa rgya che ba yin pa'i phyir ro/ /nye bar mtshon pas zhes pa ni phyag mtshan gyi sgo nas de bzhin gshegs pa nye bar mtshon pas so/ /yid kyis sam bris pas bskyed par bya'o zhes pa ni gal te rgyal po la sogs pa slob ma yin na de'i tshe dpag tshad brgya'i tshad tsam gyis rgyas pa bri bar bya'o/ /khyim pa la sogs pa rnams la rnam par snang mdzad kyis dkyil 'khor ni rgyud las gsungs pa'i tshad dang ldan pa bri bar bya'o/ /yid kyis ni dpag tshad brgya tsam gyi tshad tsam bsgom par bya'i 'bri ba ni dgag pa ma yin no zhes dgongs pa'o/ /'og nas bshad pa zhes pa ni mi bskyod pa la sogs pa'i dkyil 'khor bzhi po la yang gru bzhi pa la sogs pa dang sbyar ro/ /de yang phyi'i dkyil 'khor gyi tshad yin te/ nang gi dkyil 'khor ni zlum po nyid do/ /bag yod pa dus thams cad du'o zhes pa ni dkyil 'khor 'bri ba la sogs pa la sems rtse gcig pa'o/ /mi bskyod pa la sogs pa'i rigs rnams te zhes pa ni thugs rdo rje 'chang dang / des sprul pa'i rigs rnams so/ /de yang zhes bya ba la sogs pas rnam par snang mdzad kyi mtshan ma dang 'dra bar 'od dpag tu med pa la sogs pa'i yang mtshan ma'i sgo nas dkyil 'khor mtshon pa bstan to/ /sdeb sbyor gyi don dang 'gal ba zhes pa ni tshigs su bcad pa ma tshang bar 'gyur ro/ /ut+pal ni rin po che ste rdo rje'i khyad par yin pas so/ /de yang dpag tshad nas brtsams te zhes bya ba la sogs pas slob dpon dang slob ma dag la mos pa'i khyad par bstan to/ /mchod rten dang 'dra bas na mchod rten te zhes pa ni sangs rgyas thams cad kyi gzhi yin pas so/ /rin po che sna bzhi'i bdag nyid yin pas na zhes pa ni shar la sogs pa'i phyogs kyi dbye bas so/ /'dis ni kha dog dkar po yongs su gzung ba zhes pa ni dbus kyi sa gzhi'i kha dog bstan to/ /de bzhin gshegs pa bdag po'i dbang gis kha dog ldog par shes par bya'o/ /dkyil 'khor gyi de kho na nyid kyi bdag nyid can yin pas zhes pa ni dkyil 'khor gyi rnam pa dag dang ldan pas so/ /gzhir gyur pa zhes pa ni rten dang brten gyi rang bzhin no/ /gsang ba'i dbang bskur ba'i phyir zhes pa ni slob ma la de sbyin pa'i phyir ro/ /bsgom par bya'o zhes pa ni rdzogs pa'i rim pa la ltos nas bsam par bya'o/ /de ltar zhes bya ba la sogs pas slob ma'i bya ba bstan par bya ste gzugs la sogs pa yul lnga zhes pa ni na bza' la sogs pa phyi'i yo byad rnams so/ /dkyil 'khor la brten par gyur pa'am lha rnams la zhes pa ni mi bskyod pa la sogs pa rnams la'o / /mchod pa sna tshogs pa'i rgya mtsho zhes pa ni mtha' yas pa mthar thug pa med pa'i mchod pa'o/ /'dod pa'i yon tan zhes bya ba la sogs pas mchod pa'i spros pa bstan to/ /pad+ma rA ga la sogs pa zhes pa ni rigs kyi dbye bas rnam pa sna tshogs pa'i rin po che dbul bar bya'o/ /na bza' ni dar dang bal la sogs pa ste zhes pa ni dar dpyang la sogs pa'o/ /mig ces bya ba la sogs pas dbang po lnga'i spyod yul bstan to/ /dri ma'i rnyog pa thams cad 'khrud pas zhes pa ni gtsang ba dang mi gtsang ba la sogs pa'i rnam par rtog pa'i dri ma gsang ba'i dbang bskur gyis ldog par 'gyur ro/ /de thob pa'i 'dod pas kyang mchod par bya'o/ /ji srid dbang bskur ba yongs su rdzogs kyi bar du zhes pa ni de bzhin gshegs pa rnams dgug pa'i phyir ro/ /me tog la sogs pa zhes bya ba la sogs pas bla ma dang lha dag la mchod pa dbul bar bstan to/ /thun mong gi mchod pa zhes pa ni gnyi ga la yang mtshungs pa'o/ /bla ma'i khyad par gyi mchod pa ni gsang ba'i mchod pa'o/ /'khor ba ji srid par gnas pa/ /zhes pa ni bla ma'i bka' drin gyis bskal pa la sogs pa'i dus kyi bar du gnas pa'o/ /bskal pa'am ni bskal stong par/ /ye shes dbang bskur gyis gnas 'gyur/ /ye shes gsum las dam pa yin pas na mchog go/ /chags pa la sogs pa'i rang bzhin brgya drug cu dang bral bas na zag pa med pa'o/ /'od gsal ba yin pas na bde ba chen po'o/ /de skyed pa'i zhing du gyur pas zhes pa ni phyag rgya mtshon pas so/ /lang tsho ma nyams pa'o zhes pa ni lo bcu gnyis nas brtsams te rigs kyi dbye bas lo bcu gnyis pa'i bar du'o/ /thams cad med na nyi shu rtsa lnga pa las phyi ma blang bar mi bya'o zhes dpal 'dus pa'i rgyud kyi man ngag go/ /bud med kyi yon tan thams cad dang ldan pa zhes pa ni brang skyes dang yan lag mchog la sogs pa rgyas pa dang ldan pa'o/ /pad+ma can no zhes pa ni/ pad+ma 'bring po'am spu med pa dang mtshan mo'i pad+ma'o/ /dpag tu med pa tha dad pa zhes bya ba la sogs pas cha lugs kyi mdzes pa nyid bstan to/ /'bras bu tha mal pa'o zhes pa ni zhi ba la sogs pa'i las kyi tshigs so/ /khyad par can grub pa sangs rgyas nyid de zhes pa ni phyi ma'i spros pa la mi ltos pa'i phyir ro/ /'grub pa'i rgyur zhes pa ni 'jig rten pa dang 'jig rten las 'das pa'i dngos grub kyi don to/ /sangs rgyas thams cad kyi rang bzhin yin pas zhes pa ni/ rdo rje slob dpon sku 'di la/ /go rims kyi ni rgyal ba gnas/ /zhes 'byung ba'i phyir ro/ /de nyid bstan pa'i phyir/ bla ma zhes bya ba la sogs pas bstan to/ /rab tu btab pa zhes pa ni dad pas dbul ba'o / /bla ma la khyad par can gyi rdzas dbul bar bya ba'i don du zhes pa ni dbul bar bya ba'i rdzas kyi phyir ro zhes bya ba'i don to/ /tshad yongs su chad pa med pa zhes pa ni bla ma la dbul ba'i yon la yongs su gcod pa'i nges pa ni med de thams cad yongs su dbul ba'i phyir ro/ /pad+ma rA ga la sogs pa ni rin po che bdun no/ /yongs su bkang ba'i zhes pa ni gal te yod na de'i tshe dbul bar bya'o/ /yang na bud med la sogs pa rin po che bdun te lam gyi sgra'i don to/ /de la bud med rin po che ni gzhon pa ma nyams pa lo bcu drug lon pa'o/ /skyes pa ni mdzod de nor mi zad pa'o/ /nor bu rin po che ni yid bzhin gyi nor bu rin po che ste bsam pa thams cad rdzogs par byed pa'o/ / 'khor lo ni 'khor lo rin po che'o/ /ral gri ni ral gris nye bar mtshon pa'i dmag dpon no/ /glang po ni kha dog dkar po mche ba drug pa'o/ /rta rin po che ni ut+pal sngon po dang 'dra ba'o/ /bsod nams dang ye shes kyi tshogs la mkhas pa ni zhes pa 'dis ni bsod nams dang ye shes kyi tshogs 'phel bar 'gyur ro zhes bsam pa dang ldan pa'o/ /mthar thug pa'i ye shes dang ldan zhing zhes pa ni sngags kyi theg pa'i don ma lus pa rtogs pa'o/ /gnyis su med pa'i ye shes zhes pa ni byang chub kyi sems spyod pas/ gtsang ba dang mi gtsang ba la sogs pa'i rnam par rtog pa gnyis dang bral ba'i de kho na nyid ces bya'o/ /so sor rtogs par bya bar 'dod cing zhes pa ni de mngon sum du bya ba'i phyir 'dod pa dang ldan pa'o/ /de'i man ngag gis zhes pa ni gsang ba'i dbang bskur gyi man ngag gis so/ /phyag rgya chen po'i dngos grub bsgrub par 'dod pas zhes pa ni dpal rdo rje 'chang gi go 'phang thob pa'i rgyur gyur pa shes rab dang ye shes 'dod pas so/ /shes rab dang ye shes kyi dbang bskur ba ni gsang ba'i dbang bskur ba sngon du 'gro bas so/ /bsam gtan zhes bya ba la sogs pas phyi'i yo byad med na yid kyis bya'o zhes bstan to/ /de ltar zhes bya ba la sogs pas bla ma'i bya ba bstan te/ ji ltar rang gi zhes bya ba la sogs pas dkyil 'khor gyi bdag po gang yang rung ba'i rdo rje 'chang gi phyag rgya chen po bsgom par 'dod pa blangs nas de bzhin gshegs pa'i 'khor lo'i dbus su ni lha'i tshogs kyi nang du gnas pa/ sangs rgyas ni de bzhin gshegs pa ste rang gi phung po dang khams dang skye mched rnams la reg bya rdo rje ma las 'byung ba'i bde ba ni rang gi phyag rgya dang snyoms par zhugs pa las 'byung ba'i bde ba chen po dbul bar bya'o zhes bstan to/ /de yang ci ltar zhe na zhes pas de nyid spros par bstan te/ de'i dbus na gnas par zhes pa ni nam mkha'i dkyil la zhugs pa'i de bzhin gshegs pa'i tshogs so/ /gzugs kyi phung po la sogs par gyur pa'i zhes pa ni gzugs la sogs pa'i phung po lnga la'o/ /rnam par snang mdzad la sogs pa'i zhes pa ni nam mkha'i dbyings la bzhugs pa rtag pa la sogs pa'o/ /ye shes kyi rang bzhin gyi sku la zhes pa ni bdag byin gyis brlab pa'i rim pa las 'byung ba'i sku la'o/ /sprul pa'i sku 'dzin par bya ba'i phyir zhes pa ni de yongs su gyur pa las rdo rje 'chang chen po'i sku rdzogs pa'i don to/ /de nas zhes bya ba la sogs pas de bzhin gshegs pa thams cad bzhugs nas sangs rgyas thams cad kyi rang bzhin gyi rdo rje 'chang chen po bsgom par bya'o zhes bstan to/ /yul dang dbang po'i gzugs rnams kyis/ /zhes pa ni snyoms par zhugs pa'i rim pas so/ /bla ma la mchod cing zhes pa ni rang gi bdag nyid tshim par bya'o/ /mchod pa de nyid ces bya ba la sogs pa snyoms par zhugs pa'i mchod pa bstan par bya ba'i phyir bstan pa'o/ /dga' bas sems rab tu dang ba'i yid ces pa ni mchod pa la sogs pa'i sbyin pa las byung ba'i rab tu dga' bas dri ma med pas shin tu mgu ba'i yid dang ldan pa'o/ /tshim par byed pa'i phyir zhes pa ni na so gzhon pa dang / mdzes pa la sogs pa'i khyad par gyis yid tshim par byed pa'i phyir ro/ /yid du 'ong ba ni dga' bar byed pa'o/ /slob mas bstabs pa'o zhes pa ni gsang ba'i dbang bskur ba'i don du slob mas dbul ba'o/ /lhag par gnas pas na zhes pa sku la sogs pa la dmigs nas gang gis rjes su bzung ba de la de skad ces bya'o/ /oM la sogs pa sa bon rnams ni skyed pa'i sa bon rnams so/ /de'i phyag rgya'i lus la zhes pa ni dam tshig gi phyag rgya'i lus la'o/ /gnas ji lta ba bzhin du zhes pa ni yan lag dang nying lag rnams la bkod nas so/ /rigs lngas byin gyis brlab par byas la zhes pa ni de bzhin gshegs pa lnga po'i sa bon gyi byin gyis brlab pa byas pa'o/ /snyoms par 'jug pa'i mtshan nyid can zhes pa ni rdo rje dang pad+ma sbyor ba'i rang bzhin zhes bya ba'i tha tshig go/ /phyi'i mchod pa ni mchod pa rnam pa lnga'i mtshan nyid dang yid kyis te/ de la ltos nas de kho na nyid kyis mchod pa ni mchog ces bya'o/ /gtan tshigs bstan pa'i phyir/ chags pa dang chags pa dang bral ba dang chags pa bar ma ni snang ba la sogs pa ye shes gsum mo/ / nyon mongs pa rnam par dag pa'i gnas ni 'od gsal ba ste/ snang ba la sogs pa dang de las byung ba'i rang bzhin rnams kyang sbyong bar byed pa'i phyir ro/ /mngon sum du byed pa'i phyir ro zhes pa de ni de myong bas so/ /slob ma la bla mas byin pa zhes bya ba la sogs pas snyoms par zhugs pa'i cho ga'i 'og tu 'od gsal ba la dmigs pa'i phyi ma'i dus su phaT kyi sgras byang chub kyi sems spro zhing sa la ma lhung ba dung phor gyi pad+ma'i nang nas blangs te/ bla mas byin pa de bzhin gshegs pa thams cad kyi rang bzhin phung po la sogs pa tshim par bya ba dang / kye ma'o bde ba chen po zhes smra ba'i slob mas spyod par bya ba dang / bla mas kyang bdud rtsi lnga dang 'dres shing spyod pa las lhag ma byang chub kyi sems de nyid kyis bkra shis kyi tshigs su bcad pa sngon du 'gro bar slob ma la spyi bor dbang bskur bar bya'o zhes bstan to/ /la la ni snyoms par zhugs pa'i 'og tu shes rab kyi pad+ma nyid ces bya ba la 'jug par bya'o zhes shes rab kyi gsang ba'i dbang bskur ro/ /rdo rje slob dpon gyi byang chub kyi sems kyi thig le 'dzag pa pad+ma'i nang nas bstan pa gsang ba'i rdo rje myang ba la 'jug go zhes thabs kyi gsang ba'i dbang bskur ba la 'jug go/ /de bas na thabs dang shes rab kyi gsang ba'i dbang bskur yin no zhes lang ga li'i zhal snga nas kyis gsungs so/ /ji skad du zhes bya ba la sogs pas lung tshad ma nyid du bstan to/ /byang chub sems zhes bya ba la sogs pas rin po che lta bu bsam pa thams cad rdzogs par byed pa'i byang chub kyi sems spro bar bya ste/ de bzhin gshegs pa thams cad 'jug pa sngon du 'gro bar byas la nam mkha'i khams la bzhugs pa rgyal ba ma lus pa'i rnam par dag pa'i sku ni dri ma med pa'i ye shes kyi rang bzhin gyi sku lhag par mos te/ dbang bskur ba ni slob ma'i kha la nges par 'jug pa'o/ /de bzhin du rin chen dang 'dra ba rdo rje las byung ba ye shes kyi chu bdud rtsi lnga dang ldan pa'i byang chub kyi sems kyi thig le dang bcas pas spyi bor yang dbang bskur bar bya'o zhes bstan to/ /'di ni zhes bya ba la sogs pas phan yon bstan par bya'o/ /mchod pa bstan pas zhes pa ni/ bla na med pa'i mchod pa'i tshul gyis so/ /gsang ba'i dbang bskur ba ste zhes pa ni sngar bshad pa'o/ /de bzhin gshegs pa thams cad dang 'brel par gyur pa'o zhes pa ni nam mkha'i dbyings la bzhugs pa'i de bzhin gshegs pa thams cad 'jug pa yongs su gyur pa las byung ba'o/ /mi 'jigs pa'i sku dang gsung dang thugs bskyed pa zhes bya ba ni rnam par smin pa dpal rdo rje 'chang gi sku la sogs pa rdzogs par byed pa'o/ /ji skad du/ de dus nas brtsams de ni rtog pa med/ /de yi kha dog dbyibs dang ji ltar mtshan/ /bsam gyis mi khyab rnam par smin pa'i sku/ /sdom pa de las bya ba byas pas thob/ /ces 'byung ngo / /slob bzhin pa'i rnal 'byor pa rnams kyis zhes pa ni bskyed pa'i rim pa sgom par byed pa'i rnal 'byor pa rnams so/ /bya ba'i rgyud la sogs pa la zhugs pa rnams la gsang ba yin pas so zhes pa ni bya ba'i rgyud la sogs pa 'jug pa la sba bar bya'o/ /'jig rten pa'i dngos grub ni zhi ba la sogs pa'o/ /A li dang kA li las byung ba zhes bya ba ni A li dang kA li bsdu bar byed pa'i yi ge gsum gyis slob pa'o/ /sbrul zhes bya ba la sogs pa zhes pa ni sbrul dang / mgo med dang / mtha' med dang / bsdu ba la sogs pa'o/ /ma tshang ba med pa'i dngos grub skyed pa zhes bya ba ni zhi ba la sogs pa'i phrin las yongs su tshang bar byed pa'o/ /sgra ji bzhin pa zhes bya ba ni spyod pa'i don bstan pa ste/ spyod pa ji lta ji ltar gsungs/ /zhes 'byung ba'i phyir ro/ /sgron ma gsal bar byed pa'i 'grel pa'i TI kA las le'u brgyad pa'i rgya cher bshad pa'o// //

CLOSE WINDOW