བོད་ཡིག

e-texts based on the ACIP/ALL Input

/'khor 'das ma lus 'dren pa'i dpal du shog/ //dpal 'khor lo bde mchog gi rgyun bshags rgyas pa slob dpon b+hu ri bas mdzad pa rdzogs so/ /jo bo rje dang lo tsA ba rin chen bzang pos bsgyur ba'o// //[]lam gyi rab tu bya ba bzhugs so// // @##/ /dpal rdo rje sems dpa' la phyag 'tshal lo/ /bsnyen pa'i cho ga dang sta gon gyi cho ga dang dbang bskur ba'i cho ga'o/ /bsnyen pa la dang po skabs dbye ba ni/ slob ma dad pa dang / shes rab dang ldan pas maN+Dal byas te/ phyag gsum byas la me tog gsum dbul/ pus mo g.yas pa'i lha nga sa la btsugs te thal mo sbyar bas/ /slob dpon gyis bdag la bde mchog 'khor lo mngon par 'byung ba'i dkyil 'khor gyi rgyal por dbang bskur ba stsal du gsol zhes lan gsum zhu/ 'o na bdag gis bsnyen pa bya'i/ khyod kyis rdzas sogs shig ces gnang ba byin la/ khro bo bdud rtsi 'khyil pa'i sngags bzlas pa'i sngags su byin la srod tho rangs brgya rtsa zlos su gzhug go/ /de nas bdag nyid lU yi ba'i rnal 'byor ram/ dpa' bo gcig pa bsgom pa'am/ mngal skyes kyi yang rung bas rdo rje dang do li yi bzlas pa bya/ thun bzhi'i rnal 'byor gyis spyir rtsa sngags 'bum phrag gcig gam/ yang na yab yum gyi snying po'am nye snying gang yang rung ba 'bum/ /'khor gyi lha la khri khri sum+b+ha ni 'bum phrag gcig bzlas pa ni grangs kyi bsnyen pa'o/ /yang na mtshan ma'i bsnyen pa rmi lam du lhas dbang bskur la reg ces gnang ba 'am brdas kyang rung ngo / /dbang med na bzlas pa dum gcig byas la/ yid kyis lha mngon du dmigs te gnang bar bsams la byar rung ba ni bdag po'i bkas so/ /de'i tshe mchod pa lnga dang gtor ma re ma chags par gtang bar bya'o/ /de nas bskul ba'i phyir slob mas maN+Dal sngon du 'gro bas snga ma ltar zhu ba yang bya'o/ /rdzas tshogs sam ma tshogs zhes dri'o/ /kha cig ni tshogs la kha cig ni ma tshogs zhes zhu'o/ /de nas sdig pa bsal ba dang bsrung bar bya ba ni/ slob ma'i lte bar nyi ma la hUM sngon po bsams la yang de'i snying gar sdig pa kaM nag po las sha za'i gzugs rid pa rkang lag phra ba/ skra gyen du brdzes pa bsams la hUM gi 'od kyis gyen du phul te sna bug g.yas nas byung ba dang / hUM de sgo mtshams kyi lha mo brgyad du gyur nas/ de rnams kyis gri gug gis bgos nas zos te/ yang hUM du song nas sna bug de nyid nas slar thim par bsam/ srung ba ni lag pa g.yon par ha byas pas/ rdo rje rgya gram bsams la de slob ma'i spyi bor bzhag pas lus rdo rjer song bar bsam/ sum+b+ha ni brgya rtsa brgyad bzlas pa rdo rje rgya gram yang de'i spyi bor gnas par bsam/ de nas de dag skad cig mas phyag gnyis pa'i he ru kar bsams la mchod pa dang gtor ma la sogs pa byas te/ mdun du slob ma'i gtso bo la sogs pas maN+Dal byed pa sngon du 'gro bas phyag byed du bcug la thal mo bskyed par bya ste/ dkon mchog gsum la skyabs su mchi/ /sdig pa thams cad so sor bshags/ /'gro ba'i dge la rjes yi rang / /sangs rgyas byang chub yid kyis gzung / /byang chub mchog gi sems ni bdag gis bskyed/ sems can thams cad bdag gis mgron du gnyer/ /byang chub spyod mchog yid 'ong spyad pa yis/ /'gro la phan phyir sangs rgyas 'grub par shog /ces lan gsum brjod do/ /de nas snying ga dang / lkog ma dang / spyi bor dri'i thig le gsum byas la rdo rje reg pa sngon du 'gro bas hUM AHoM zhes brjod cing rim pa bzhin du pad+ma dang / 'khor lo dag la yi ge gsum po de nyid rim pa bzhin du mtshan pa 'og ma gnyis nyi ma la 'khor lo zla ba la bsam par bya'o/ /de nas oM pu dzA o a zhes bya ba la sogs pa brjod pas yul nyer bzhir lag pa g.yon pa'i srin lag gis reg bzhin du yul de dang / de'i gnas rnams su mos par bya'o/ /de nas skyes pa la ni snying ga la sogs par oM hal sogs pa bsam zhing bud med la ni lte ba la sogs par oM baM la sogs pas byin gyis brlab par bya'o/ /de nas de dag la mchod pa bya ste/ me tog ni mgo la'o/ /spos ni shangs la'o/ /mar me ni spyan la'o/ /dri ni thugs kar ro/ /zhal zas ni zhal du dmigs te'o/ /de yang oM AHbadzra puSh+pe hUM zhes bya ba la sogs pas so/ /de nas tshems shing dor bar bya ste/ mdun du ba lang gi ko ba tsam du sa gzhi ba'i lci ba sar pas byugs la pad+ma 'dab ma brgyad pa khyams grub bzhi'i nang du chud pa bris pa la me tog gi tshom bu dgu bkod nas/ der slob ma shar ram byang du kha blta bas tshems shing ma yo ma gas pa/ lo 'dab kyis kha brgyan pa can tsan+dan gyis byugs pa la/ me tog gi phreng ba bcings la/ oM badzra da na da kaSh+Tha bi ma la bi shud+d+he swA hA/ zhes bya bas gtad pa/ cho ga bzhin du bcas nas thal mo'i bar nas dkyil 'khor gyi dbus su 'dor du gzhug go/ /'dir tshems shing gi mtshan ma brtag par bya ste/ shar du bltas na zhi ba'i dngos grub po/ /byang du bltas na rgyas pa'o/ /nub tu bltas na dbang ngo / /lhor bltas na mngon spyod do/ /gyen du bltas na rig pa 'dzin pa lha'i dngos grub bo/ /thur du bltas na 'og gi dngos grub bo/ /dkyil 'khor gyi phyi rol du song na dngos grub med do zhes brtag par bya'o/ /de nas ngag dag pa'i don du bdud rtsi lnga dang sbyar ba'i dri'i chu la 'khor lo kun gyi rnal 'byor ma bzlas te/ de nas oM hrIHbi shud+d+ha d+harmAHsarba pA paM ni tsa A s+yA bi sho d+ha ya sarba bi kalpa a pa na ya hUM zhes brjod pas/ /lag pa g.yon pa'i khyor bar lan gsum blud par bya'o/ /de nas yi ge nyer gnyis pa'i sngags lan gsum bzlas pa'i ku sha sngas dang stan gyi phyir byin la/ rang rang gi mi gang dang lag tshad kyi skud pa sum sgril byas la gsum pa gsum gyis mdud pa byas te/ snying po'i sngags lan bdun bzlas la dpung par bcing bar bya'o/ /de nas chos bshad pas spro ba skyed par bya ste/ 'jig rten du ni kun mkhyen rnams/ /u dum+WA ra'i me tog bzhin/ /brgya lam na yang res 'ga' zhig /'byung 'gyur yang ni mi 'byung ngo / /gsang sngags spyod pa'i tshul 'byung bzhin/ /de bas kyang ni dkon pa ste/ /gang gis mtshungs med sems can don/ / mya ngan mi 'da' byed par nus/ /bskal pa bye ba du mar ni/ /sngon chad sdig pa gang byas pa/ /de kun dkyil 'khor 'di 'dra ba/ /mthong bas kyang de byang 'gyur na/ /grags pa mtha' yas gsang sngags kyi/ /tshul la spyod pa smos ci dgos/ /skyob pa'i gsang sngags bzlas na ni/ /go 'phang bla na med par 'gyur/ /gang dag spyod pa mchog 'di la/ /blo gros shin tu dri med pa/ /de dag gis ni ngan 'gro'i rgyun/ /sdug bsngal kun 'byung rab tu bcad/ /gang gis khyed rnams sras bcas pa'i/ /rgyal ba rnams kyis bstan 'di la/ / bdag nyid chen po khyed rnams kyis/ /rnyed pa mnyam med de ring rnyed/ /theg pa chen po cher 'byung ba'i/ /lam mchog 'di ni dpal dang ldan/ /gang gis khyed rnams 'byung 'gyur bar/ /de bzhin gshegs pa rnams su 'gyur/ /zhes bya ba dag gis dam pa'i chos bsgrags pa byas nas/ sum+b+ha nis srung ba byas te/ tho rangs kyi rmi lam ci mthong ba kho bo la bos shig byas nas/ /dkyil 'khor gyi sa gzhi'i mthar seng ge'i nyal thabs kyis nyal du gzhug go/ /slob dpon dkyil 'khor gyi khang par zhugs te/ bsrung ba'i don du sum+b+ha ni bzlas par bya'o zhes bya ba ni slob ma sta gon du gnas pa'i cho ga'o/ / //de nas bum pa sta gon du gnas pa brjod par bya ste/ re zhig bum pa bcu 'am drug gam gnyis sam gcig kyang rung ste/ rtsa ba dang nag po la sogs pa'i skyon med pa/ gser ram dngul lam kham pa la sogs pa'i rgyu las byas pa/ kha dog dkar por bsgyur ba rigs kyi mtshan mas mtshan pa/ 'o ma can gyi shing gis kha brgyan pa/ rigs kyi sku mdog mthun pa'i gos kyis mgul pa dkris pa/ bsti gnas kyi chu 'o ma can gyis bkang ba/ tsan+dan dang ga pur dang / gur gum gla rtsi dang / hu lu ka ste dri lnga dang bcas pa/ bdud rtsi lnga dang rin po che lnga dang / 'bru lnga dang sman lngas gang ba'i snod steng du bzhag ste/ 'og tu pad+ma'i gdan steng du gdugs phub la/ dkyil 'khor du rim pa bzhin/ sangs rgyas kun gyi mkha' 'gro ma/ /re re bzlas te bzhag la lhag par gnas par bya'o/ /re zhig bum pa bcu'i lugs la ni/ rnam par rgyal ba la gcig/ /pad+ma'i snod bzhi dang bcas pa'i yum bzhi la re re/ thugs dang gsung sku dang dam tshig gi 'khor lo rnams la re re ste de ltar na dgu'o/ / las thams cad pa dang bcu'o/ /drug gi lugs la 'khor lo lnga la re re rnam par rgyal ba dang drug go/ /las thams cad pa dam tshig gi 'khor lor bsdu'o/ /gnyis pa ni thabs dang shes rab kyi dbye bas so/ /las thams cad pa ni gtso bo la bsdu'o/ /gcig gi lugs la ni dkyil 'khor gyi lha ma lus pa gcig tu bsdu zhing las thams cad pa yang der bsdus te/ de ni khyim pa dbang bskur ba la yin gyi/ dge tshul yan chad la ma yin no/ /gcig gis ma yin par rgyud las bkag pa'i phyir ro/ /rtsa ba ni dbyibs kyi skyon no/ /nag po ni kha dog gi skyon te de dag med pa'o/ /tshad kyang mchur sor nyer gcig /zheng du bcu drug gce'u med pa'o/ /mgrin pa la sor drug go/ /mchu la sor brgyad do/ /mgrin pa'i sbubs la sor gnyis so/ /mngon spyod la sogs pa'i phrin las gzhan la ni tshad gzhan dang gzhan du brjod do/ /dkar por bsgyur ba ni rang bzhin gyis kha dog dkar po med pa la'o/ /rigs kyi mtshan ma rnam par rgyal ba la ni chos 'byung gi dbus su sna tshogs pad+ma'i lte bar ka pA la'i nang du chud pa'i rdo rje dang rdo rje gri gug go/ /rigs kyi yum bzhi la ni gri gug dang ka pA la'o/ /thugs kyi 'khor lo la rdo rje dang gri gug go/ /gsung gi 'khor lo la pad+ma dang gri gug go/ /sku'i 'khor lo la 'khor lo dang gri gug go/ /dam tshig gi 'khor lo la ka pA la dang gri gug go/ /las thams cad pa la ni sna tshogs rdo rje dang gri gug go/ /'o ma can gyi shing ni tsu ta la sogs pa'o/ /rin po che sna lnga ni gser dang dngul dang mu men dang mu tig dang byi ru'o/ /nas dang gro dang til dang 'bras so ba dang / ma sha ste 'bru lnga'o/ /pr-i ha sti dang / kaN+Da ka ri dang / a pa rA dzi ta dang / daN+Dot+pal dang / ha sa de ba ste sman lnga'o/ /pad+ma dang gdugs ni shog bu las byas pa'o/ /dkyil 'khor ni ser po 'ba' zhig las byas pa'o/ /de yang lha dang phyag mtshan med pa'i gdan gzhal yas khang pa'i rnam pa 'ba' zhig bri'o/ /gal te nus pa med na sngar gyi tshems shing dor ba'i dkyil 'khor gyi rnam pa lta bu bya'o/ /de nas bum pa lhag par gnas pa bya ste/ me tog la sogs pa mchod pa'i yo byad sna tshogs dang / gtor ma rnams sta gon byas nas/ slob dpon bdag nyid ting nge 'dzin rdzogs par bsgoms la dkyil 'khor nye bar bsdus te/ phyag gnyis pa'i ting 'dzin gyis gnas par bya'o/ /de nas skad cig mas rnam par rgyal ba'i bum par ni dkyil 'khor gyi 'khor lo rdzogs par bsam mo/ /rigs kyi yum bzhi la ni yum re dang ka pA la re re'o/ /thugs dang gsung dang sku dang dam tshig gi 'khor lo'o/ /de nas 'bar ba'i sngags dang phyag rgyas rnam pa thams cad yongs su rdzogs pa'i dkyil 'khor gyi 'khor lo mdun du spyan drangs te bum pa'i lha rnams la bstim mo/ /de dag ma lus par zhu ba las ye shes kyi bdud rtsi'i chus gang bar bsam mo/ /de nas bum pa'i gnas lnga dag tu rdo rje'i phyag rgyas reg cing / oM badzra pad+ma a mr-i ta su bi shud+ha d+harma d+hA tu swa b+hA ba sarba d+harmA na su bi shud+d+ha d+harma d+hA tu sarba na ku ru ku ru swA hA/ zhes lan gsum brjod par bya'o/ /de nas me tog gi phreng ba dang 'brel ba'i rdo rje bum pa'i steng du bzhag ste lag pa g.yon pa'i khu tshur gyis bzung ste/ lag pa g.yas pas bgrang phreng snying gar bzung nas 'khor lo'i gtso bo la ni brgya bzlas shing / 'khor gyi lha rnams la ni nyer gcig bzla'o/ /las thams cad pa la ni sum+b+ha ni brgya rtsa brgyad bzlas nas phyi'i mchod pa lnga dang yid las byung ba'i lha mo bcu drug dang / rin po che sna bdun gyis kyang mchod de spos snod dang rdo rje dril bu 'dzin pa'i lag pas/ dpal ldan rdo rje mkha' 'gro ma/ /mkha' 'gro ma yi 'khor los sgyur/ sku gsum ye shes lnga dang ldan/ /'gro ba'i mgon la phyag 'tshal lo/ /ji snyed rdo rje mkha' 'gro ma/ /rtog pa'i 'ching ba gcod mdzad cing / /'jig rten don du rab 'jug pa/ /de snyad pa la rtag phyag 'tshal/ /zhes bya bas bstod la/ yi ge brgya pa brjod de/ gtor ma byin gyis brlab par bya'o/ /de nas dpa' bo'i dga' ston dang tshogs kyi 'khor lo byin gyis brlab par bya'o zhes bya ba ni bum pa lhag par gnas pa'i cho ga'o/ / //de nas rdul tshon gyi dkyil 'khor ni/ dkyil 'khor bsgrub par bya zhing ras ris la ni dkyil 'khor mngon du dmigs te/ bdag 'jug byas nas slob ma la dbang bskur bar bya'o/ /de la phyogs bzhir slob dpon bzhi 'am bdag gcig pu yang rung ste/ bdud rtsi lnga dang bcas pa'i dri chus khrus byas nas/ gos dang phyag rgya lnga la sogs pa'i rgyan gyi chas su zhugs la/ dkyil 'khor gyi lho phyogs nas kha byang du bltas te/ stan mthon po la 'dug par bya'o/ /de nas yang snga ma ltar ting nge 'dzin rdzogs par bsgoms te/ phyag gnyis pa'i ting nge 'dzin la gnas nas go rims bzhin du dbang bdun dang / dbang gsum pa dang / bzhi pa'i mthar thug pa rnams dkyil 'khor gyi gtso bo las blang bar bya'o/ /de ni bdag 'jug pa'o// //de nas slob ma gzhug pa ni/ yol ba'i phyi rol du maN+Dal byed du bcug la phyag byas te/ me tog snyim par bzung nas gnas pa la/ slob dpon gyis nang nas bka' bsdam mo zhes brjod par bya'o/ /bde chen bdag ni skal ba bzang / /zhes bya ba ni slob ma'i lan no/ /de ltar lan gsum bya'o/ /dgos pa ci'i phyir 'jug /phyag rgya chen po'i dngos grub kyi phyir ro zhes slob ma'i lan no/ /de nas dung chos spyi bor bzhag ste/ khyor bar chu lan gsum blud la/ sum+b+ha ni bzlas pa'i ku sha'i chus bsang ba bya'o/ /de nas dbab pa'i cho ga bya ste/ mtshal chen bdud rtsi lnga dang bcas/ /dur khrod ras la byugs nas ni/ /bsdus pa'i phye ma cha gcig dang / /byi la nag po'i bshang ba ni/ /de mnyam cha ni gcig tu bya/ /de mnyam gu gul nag por spyad/ /dur khrod sol ba blangs nas ni/ /mchod yon snod du bdug pa sbyar/ /sku yi dkyil 'khor rdzogs par ni/ /slob ma'i lus la rab bkod de/ /de las byung ba'i 'od zer gyis/ /dpa' bo mkha' 'gro ma yi tshogs/ /rgyun mi 'chad par 'dzug par bsam/ /slob ma'i lag nas bzung nas ni/ /sangs rgyas kun gyi mkha' 'gro ma/ /rtse gcig sems kyis bzlas par bya/ /de la sku babs na ni 'phar ba la sogs pa lus kyi rdzu 'phrul 'byung ngo / /gsung babs na ni dbang pos mi sod pa'i don rnams smra bar 'gyur ro/ /thugs babs na ni mngon par shes pa lnga la sogs pa'i yon tan 'byung ngo / /ye shes babs na ni bsam gyis mi khyab pa'i ting nge 'dzin la gnas par 'gyur ro/ /de nas dbab pa bsdus la/ lag pa spyi bor bzhag ste/ snying po'i sngags de nyid lan bdun bzlas pas srung ba bya'o/ /de nas go bskon par bya'o/ /de nas sum+b+ha ni bzlas pa'i chus bsangs pa'i sna tshogs pa'i mdog gam kha dog ser po'i dar ras kyis gdong g.yogs bcings la stod g.yogs dang smad g.yogs kyang sbyin no/ /de la gdong g.yogs bcing ba'i sngags ni/ oM dwa da sha aM ga ni ro d+ha ka r-i Ni hUM phaT/ de nas brtul zhugs dbog par bya ste/ 'gro ba bgrod pa rnams kyis brtul zhugs sbyin bya de dag ni/ /srog gcod mi bden gzhan nor gzhan gyi chung ma de bzhin chang gi btung ba spang / /'khor ba rdo rje zhags pas rang gi dge ba 'joms byed sdig pa lnga po 'di dag yin/ /gang dag gang gi dus byung sum cu mi yi bla ma de yi mtshan gyis rab tu sbyin bya ste/ sna tshogs gtso bo srid pa'i 'jigs pa 'joms mdzad bka' 'di khyod kyis kyang ni bskyang bar bya/ cho lo kha na ma tho'i zas dang brjod ngan 'byung po lha min dbang po'i chos/ /ba lang bud med skyes rnams de bcu mi yi bla ma lnga po la yang gnod mi bya/ /snying grogs la 'khu rje dpon de bzhin sum cu mi yi bla ma yid ches dge 'dun la'ang / /dbang po rnams kyi chags pa zhes byas mi yi bdag po'i brtul zhugs nyi shu rtsa lnga yis/ /de ltar brtul zhugs phog nas/ de nyid gsum lan bdun bzlas pa'i me tog gcig lag pa'i pad+ma'i dbus su gtad la shrI he ru ka ya bid ma he bid+yA rA dzA ya d+hi ma he swa hA/ zhes bya bas nang du gzhug par bya'o/ /de nas rdo rje slob dpon gyis lag pa nas bkri zhing / las kyi rdo rje phyi bzhin 'brang bas dkyil 'khor lan gsum bskor ba byas te/ dang por rigs nges par bya ba'i phyir dkyil 'khor gyi shar sgo nas/ slob dpon gyis bden pa bdar ba sngon du song bas me tog 'dor du gzhug go/ de la bden pa bdar ba'i tshig ni/ don dam smra ba'i seng ge rnal 'byor zhes bya ba/ /srid pa'i nyon mongs gcod pa'i don la shin tu mkhas gyur pa/ /srid pa'i nyes brgyas bskyod pa'i nyon mongs choms mdzod la/ /rnal 'byor don dam rgyal po'i de nyid grub par mdzad du gsol/ /de bzhin gshegs pa kun gyi gnas/ /he ru ka dpal grong khyer mchog /snying po'i dkyil 'khor 'di ru ni/ /bdag gis slob ma gzhug par bgyi/ /'di yi dngos grub cir gyur dang / /rigs gang la ni skal ldan dang / /bsod nams ci 'dra las byung ba/ / de 'dra dkyil 'khor 'di ru shog /oM sarba ta thA ga ta ku la bi shod+ha ni swA hA/ zhes brjod la hUM zhes brjod pas/ lag pa'i bar nas dkyil 'khor gyi dbus su me tog 'dor du gzhug go/ /de nas oM de bai dun+d+ri ya ud+g+ha Ta ya swA hA/ zhes bya bas gdong g.yogs bkrol la/ dkyil 'khor dang lha'i de nyid dang me tog lhung ba'i gnas dang rigs rnams bstan par bya'o/ /de nas de bzhin du bskor bas byang phyogs kyi sgor khyer te/ bum pa gzhan gyi dung chos las rnam par rgyal ba'i dung chos su me tog 'dor du gzhug go/ /nyung zad blugs la lag pa g.yon pa'i mthe bo dang srin lag gis skye ba'i gnas lnga dag tu dung chos kyi chus sngags 'di dag gis bsangs la/ /de nas ku sha'i chus khams lnga dag par bya ba'i phyir lan gsum du chu'i dbang bskur bar bya'o/ /de la sngags ni oM A I r-I U l-I pany+tsa skan d+ha bi sho d+ha ni swA hA/ de nas sngar bzhin gnas lnga dag tu/ oM a i r-i u l-i pany+tsa ta thA ga ta bi swA hA/ zhes bya bas bsangs la/ ri mor bris pa'am 'bur du brkos pa'am gos kyis kyang rung ste/ rgyal ba rigs lnga'i bdag nyid can gyi cod pan bskor bar bya'o/ / 'dis ni phung po lnga dag pa yin la de ltar byang phyogs sku'i sa gzhir chu cod pan gnyis kyis lus dag par byed pa'i dbang yin no/ /de nas de bzhin du bskor bas lho'i sgor khyer te/ shes rab pha rol phyin ma dag par bya ba'i phyir sngar bzhin skye ba'i gnas lnga dag tu dung chos kyi chus oM a A aM ha hA haHho phreM da sha pA ra mi tA pa ri pU ra Ni swA hA/ zhes bya ba 'dis bsangs la gser ram dngul lam dar la sogs pa'i ste dar dpyang bcing bar bya'o/ /de nas nyi zla dag par bya ba'i phyir sngar bzhin skye ba'i gnas lnga dag tu/ oM sU r+ya tsan+d+ra bi sho d+ha ka swA hA/ zhes bya bas bsangs la rdo rje dril bu snying gar lan gsum bsnol ba sngon du 'gro bas spyi bor gzhag par bya'o/ /de ltar lho phyogs gsung gi sa gzhir ngag dag pa'i dbang rnam pa gnyis so/ /de nas thugs rdo rje dag par bya ba'i phyir shar sgor khyer te yul dang dbang po dag par bya ba'i phyir sngar bzhin skye ba'i gnas lnga dag tu/ oM a A e ai/ ar Ar o au al Al bi Sh+yi nri ya bi sho d+ha ni swA hA/ zhes bya bas bsangs la spyi po dang mgrin pa dang rna ba dang dpung pa dang lag pa dang ska rags dang rkang pa dag tu me tog gi phreng ba bcu bcings la/ lag par rdo rje'i sor gdub gtad pa ni rdo rje brtul zhugs kyi dbang ngo / /de nas nyon mongs pa can gyi yid dag par bya ba'i phyir sngar bzhin skye ba'i gnas lnga dag tu/ oM ha hA ya yA ra rA wa wA la lA tsa tur brah+ma bi ha ra bi shud+d+he swA hA/ zhes bya bas bsangs la sngar gyi me tog lhung ba blangs la spyi bor gzhag ste/ me tog gar babs pa'i rigs dang mthun pa'i ming gis dbang bskur bar bya'o/ /de ltar brtul zhugs dang ming shar phyogs thugs kyis gzhir sbyin no/ /de nas nub sgo ye shes sa gzhir khyer te ye shes dag par bya ba'i phyir/ sngar bzhin skye ba'i gnas lnga dag tu oM k+Sha d+harma tsa kra pra brta ka swA hA/ zhes bya bas bsangs la rdo rje dril bu lag tu gtad te/ rnam par dag pa'i lam ston pa'i phyir rjes su gnang ba'i dbang sbyin par bya'o/ /de nas phyi'i ngag dag pa sngon du song bas bum pa dang gsang ba dang shes rab ye shes kyi dbang khyim pa'i phyogs dang rab tu byung ba'i phyogs la rim pa bzhin du'am tshig gis brda sprad par bya'o/ /dbang bdun gyi rjes la'am/ skabs 'dir yang rung ste rigs drug gi dam tshig dang / rtsa ba'i ltung ba la sogs pa'i dam tshig dbog par bya'o/ /de ltar na rang don gyi dbang rnam pa bcu ste 'jig rten pa'i dbang ngo / /'jig rten las 'das pa ni tha snyad pa dang mtshan nyid pa'i dbye bas gnyis te/ tha snyad pa ni khyab bdag rnam pa gsum gyi dbang yin la/ mtshan nyid pa ni bsgoms pa las byung ba'i ye shes nang gi byang chub kyi shing drung du thob pa gang yin pa ste/ rgyas par ni bla ma'i man ngag las shes par bya'o/ /gang phyir dbang gi don la ni/ chen po rnams sbyar te me tog 'dzin pa rnams la 'di skad ces brjod par bya'o/ /kha cig gsang sngags grub don du/ /dkyil 'khor 'dir ni 'jug par byed/ /bsod nams 'dod pa de las gzhan/ /gzhan dag 'jig rten gzhan don gnyer/ /'jig rten pha rol don gnyer bar/ /dad pa mang du byed pa yis/ /blo ldan dkyil 'khor 'jug bya yi/ / tshe 'di don du gnyer mi bya/ /tshe 'di don du gnyer ba la/ /'jig rten pha rol don mi 'byung / /'jig rten pha rol don gnyer mis/ /tshe 'dir yang ni 'bras bu rgyas/ /zhes bya bas 'jig rten pa'i dngos grub kyi phyir min gyi/ 'jig rten las 'das pa'i dngos grub kyi phyir bsam pa brtan po la sbyar bar bya'o/ /'khor ba'i dgra las rnam rgyal ba/ /dpa' chen khyed bdag ston pa bas/ /slob dpon khyod ni dgongs su gsol/ /byang chub chen po'i tshul bstan pa/ /mgon po chen po bdag 'tshal lo/ /dam tshig de nyid bdag la stsol/ /byang chub sems kyang bdag la stsol/ /sangs rgyas chos dang dge 'dun te/ skyabs gsum dag kyang bdag la stsol/ /thar pa chen po'i grong mchog tu/ /mgon pos bdag ni 'jug tu gsol/ /zhes lan gsum bzlas/ zhes bya ba ni slob ma gzhug pa'o/ /de nas slob dpon bdag nyid skad cig mas rang snang gi rig ma dang / gnas lnga byin gyis brlab pa byas nas/ slob ma rnams zhal nas gzhug pa'i sbyor bas thig le'i rnam par zhu ba dang / lhan cig skyes pa'i mthar yum gyi lhums su spros la/ grangs ji snyed pa de snyed kyi hUM gi rnam par bsams la de dag yongs su gyur pa las/ phyag gnyis pa'i he ru kar bsams te de nas de dag rdo rje'i lam nas drangs te thugs ka nas phyung la mdun du rang la mngon par phyogs par sna tshogs pad+ma'i gdan re re la 'khod par bsam mo/ /de nas de dag la mchod pa lngas mchod la 'di skad ces brjod par bya'o/ /bu tshur theg pa chen po la/ /khyod ni tshul chen snod yin te/ /gsang sngags spyod yul cho ga ni/ /khyod la yang dag bstan par bya/ /sku gsung thugs kyi rdo rje can/ /dus gsum byung ba'i sangs rgyas rnams/ /de dag gis kyang gsang sngags kyi/ /cho ga bzang po 'di mkhyen nas/ /dpa' bos byang chub shing drung du/ /thams cad mkhyen pa mtshan med brnyes/ /gsang sngags sbyor ba mnyam med de/ /skyob pa dpal ldan he ru kas/ /bdud sde shin tu mi bzad pa'i/ /dpung chen dag kyang des bcom ste/ / 'jig rten 'jug pa yongs mkhyen nas/ /'khor lo bskor nas mya ngan 'das/ /de bas kun mkhyen thob bya'i phyir/ /bu yis blo gros 'di gyis shig /ces bya ba ni rjes su gnang ba sbyin pa'o/ /des na sems kyang rmongs pa'i phyir/ /dam pa'i man ngag la brten nas/ /dbang gi de nyid gsal bar byas/ /dpal ldan dang po'i sangs rgyas dang / /rdo rje mkha' 'gro gur dang ni/ /de bzhin sgyu 'phrul dra ba dang / /bde mchog la brten lung gi rkyen/ /grong khyer sum+b+ha ri'i rgyal po'i sras/ dpal 'jigs byed lha'i zhal snga nas bstan pa rgyal po seng ge gdan gyi rnam par dag pa'i lam gyi dbang bskur ba'i rab tu bya ba rdzogs so/ / //rgya gar gyi mkhan po de nyid kyi spyan sngar bod kyi lo tsA ba shAkya'i dge slong grags 'byor shes rab kyis bsgyur ba'o// //log par dad pa'i skye bo rnams/ /lam 'dir dbang ba ma yin no/ /de phyir dbang bskur dam pa 'di/ /bla ma rje yis bdag la gnang / /phyi rabs gdul bya skal ldan mis/ /bla ma dam pa rtag bsten pas/ /lam 'di rim gyis bgrod byas te/ /mi 'gyur ye shes mchog thob shog //

CLOSE WINDOW