བོད་ཡིག

e-texts based on the ACIP/ALL Input

/ @##/ /rgya gar skad du shrI ta t+t+wa i mr-i ta u pa de sha/ bod skad du/ dpal de kho na nyid kyi bdud rtsi'i man ngag /dpal bde ba chen po la phyag 'tshal lo/ /sprul pa'i chu skyes lte bar zla ba nyid/ /de yi steng du 'od dmar 'dab ma gsum/ /chu las byung ba'i pad+ma'i mig snying 'dra/ /rtsa rnams kyi ni ngo bo bdag nyid yin/ /de yi dbus su bde chen bdud rtsi grub/ /tshul gyi tshig gis brjod mi rnyed/ /nyams myong rang bzhin phyag 'tshal te/ /de nyid bdud rtsi bdag gis bshad/ /gang gi drin gyis de nyid bdud rtsi ni/ /ngag tu brjod phyir 'di ltar bdag blo rgyas/ /de zhabs pad la thal sbyar mgo bo yis/ /sa la dad pas yan lag brgyad btud de/ /ji ltar dpal ldan bla mas bdag la byin/ /de bzhin rang gi rig pas mngon byung ba/ /gzhan min nang gi reg bya 'jam pa sbyin/ /sngon med 'byung ba'i 'bel gtam bdag gis bya/ /yang dag blo chen skal ldan rtog ge min/ /ser sna med cing mngon pa'i nga rgyal spangs/ /bla ma'i rim gro lhur len dbang bskur ldan/ /sems can don la 'khor ba'i gti mug spangs/ /snying po mthun pa dgyes pa yis/ /gsang chen gnas su gang la lar/ /srid dang mya ngan 'das don rig /longs spyod rdzogs lus mchog gi sku/ /bde ba'i snying po dpe med pas/ /phra mo ru ni lta bas gzigs/ /dam pa'i dga' bas mos pa la/ /bzhag ste rnam pa 'di ltar spyod/ /re zhig 'di ci bdag gang yin/ /ci bsgom gang gis sgom par byed/ /'di ni thams cad de nyid min/ /rnam par 'khrul par dngos 'dul ba/ /nyams su myong bas 'bras bu'i dus/ /bzhi po'i don ni de kho na/ /bla ma'i zhal nas bstan pas rnyed/ /de ni bdag gis yang dag gces/ /de yi lugs ni nges bzung nas/ /yang dag ye shes tshor bya ste/ /dam pa'i bde ba la zhen chags/ /rang gi mchog dga' ba la 'bad/ /bde ba yi ni bdud rtsi ster/ /tshor ba yis ni nges par bzung / /rlung gi yon tan cho ga yis/ /lte ba yi ni dbus nas bskyod/ /gdu bu ut+pal gyi nang du/ /bde ba'i rgyal po khyab par byed/ /yang dag gzu lums can gleng gzhis/ /reg bya yi ni gnas su 'jug /brjod med nyams su myong bar byed/ /'du shes thams cad las ni grol/ /rang dang gzhan gyi bye brag ni/ /gang yang de ltar mi shes so/ /de nas de ni mya ngan 'das yid kyang / /de lta mod kyi snying rje'i sems bzung nas/ /ji ltar chu las nya ni 'phyong ba bzhin/ /sems can don phyir bdag dga' de lta bu/ /bdud rtsi ri bong can zhu bas/ /chu skyes rlon par byug pa yin/ /dga' ba'i lta bas gzigs nas su/ /bde ba yi ni reg bya gsol/ /spro ba yi ni tshad dus su/ /'di ltar thug pa med pa skye/ /'dar ba la sogs pas spro ba/ /drug gis lhag pa'i bcu yi grangs/ /dngos po byed la sogs par ldan/ /gnyid dang 'khrul dang brgyal dang skom dang 'dar/ /sgeg dang skrag dang bya rmyang dang / /rngam pa ba spu langs dang mchi ma 'bab/ /drod dang bde ba'i gzhan min dngos po dang / /rten dang de bzhin rnam par 'byed/ /thog ma tha ma rgyu sogs rnam par 'byed/ /rnam 'byed bzung nas rnam par 'byed min lam/ /rnam par 'byed pa'i 'byed pa rtog med pa/ /rnam par 'byed pa'i srid la 'byed bsgom ci/ /rnam 'byed gzhan min ji ltar gzhan ma phod/ /srid pa 'byed las mya ngan 'das gzhan med/ /srid bdag de nyid mya ngan 'das rab grags/ /de bas srid dang mya ngan 'das/ /bye brag bsgom par mi bya'o/ /gnyis su med par mthong nas su/ /gnyis med de yang spang bar bya/ /rnam rtog kun dang bral ba yi/ /gang zhig dgyes pa'i gnas su ni/ /lhun gyis grub pas mngon dga' ba/ /'ongs nas che bar rab tu gsol/ /sprin la sogs pa'i rkyen shes nas/ /mngon par dga' bas ltung mi 'gyur/ /khong du chud pa'i rab sems kyis/ /yang dag mchog gis gros shig bya/ /rin chen pad+ma'i gsang chen po'i/ /me yi dkyil gyi dbus su ni/ /gsum du dgyes pa'i de nyid shar/ /me yi grangs la gcig cig btsir/ /de nas snying po de ni 'dzag /zla ba bde ba'i mchog dgyes pa'o/ /mchog gi gzu lums can phyag rgya/ /steng gi lam du mthong ba yin/ /nam mkha' de yi dbus su rgyas/ /tshad med pa yi 'od zer gzugs/ /ri bong 'dzin pa dkar ba'i 'od/ /sku ni sprul pa'i phyag rgya yis/ /srid pa gsum rigs dbus su ni/ /srog rtsa yang na sgur mo yi/ /pad+ma'i yon tan 'di ni char/ /thig le de ni shu kra'i gzugs/ /mchog gi bde ba grub pa'i tshul/ /bdag nyid de ni ngo bo yin/ /'di ni sna tshogs don chen po/ /thams cad bskyed pa'i sbyor ba yin/ /gnas med pa yi gnas su ni/ /tshul can gyi ni grags pa mchog /bde ba grub pa zla ba'i lus/ /de bzhin dgyes pa grags pa'o/ /bsam du med pa'i phyag rgya rab/ /de ni mchog nyid nam mkha'i gzugs/ /mchog gi nam mkha'i 'od la ni/ /sku mtha' phyag rgya gzhan mchog yin/ /spyod pa sna tshogs pa yi ni/ /'das pa de ni rdzogs pa'o/ /nyams su myong ba mchog gnas su/ /de nyid rin chen bdag nyid gsum/ /rgyal mtshan kha ni 'dzin par grags/ / sgo yi dbus su char yang mchog /rdo rje sems dpa'i snying ga'i dbus/ /thig le grags pa med pa'i sku/ /mthe'u chung gdu bu gsang ba yi/ /ske yi 'khor lo tshul yin no/ /drug gis lhag pa'i drug pa bcu/ /'dab ma gnyis chad lte ba ru/ /zla ba bde ba mchog gi mtshan/ / yon tan gter ni grags pa'o/ /sna tshogs pad+ma 'dab brgyad pa'i/ /rgyal ba mchog gi pad gnas su/ /snying ga'i nam mkha'i dbus su ni/ /'od zer gzugs can phyag rgyar grags/ /ro drug nyams su myong ba yi/ /gnas su dgyes pa'i mtha' can yin/ /bcu gnyis phyed kyi phyed 'od zer/ /rang bzhin gyis ni dpe med grags/ /gang du sku gsum rnam par gshegs/ /thod pa'i mtshams ni gsang ba yi/ /pad+ma yi ni snying po'i tshigs/ /rgyas pa'i bu ga gsang ba yi/ /dri ma med pa nam mkha'i dbus/ /mtshan ma'i bdag po kun du gang / /mun gnag yar ngo yis ni dang / /rtog pa'i sprin gyis grol ba shar/ /snying ga'i dbus su rgyas mod kyi/ /smra ba ru ni mi nus so/ /gal te gsung gis rab brjod na/ /de lta min pa'i don brjod do/ /rang gis nyams su myong ba'i phyir/ /rang bzhin 'ba' zhig gis ni bla/ /gang gis de 'dra'i lam bstan pa/ /rgyal ba rnams kyis rnyed pa dka'/ /de ni rdo rje sems dag sku/ /mchog gi dbang phyug rgyal gyur cig /yon tan ldan pa'i bla zhal nas/ /gang gis de yi sgra nyan pa/ /mchog gi dam pa dge ba can/ /de ni skyes bus blta bkur 'os/ /sna tshogs du mar rnam par rtog / gang gis bor te rtse gcig sems/ /rgyud mi 'chad pa nye bar bsnyen/ /bsam gtan gyis ni rnal 'byor 'jug /'khor ba'i mun gnag sprin dang bral/ /de ni skyes bus reg bkur 'os/ /sangs rgyas sras kyis rnyed dka' ba/ /drug gis bye brag rin po che/ /blo gros brtan pas blo 'byed pa'i/ /gang zhig rab tu bsam gtan bstims/ /thar pa'i rnam rtog dang bral ba/ /de ni skyes bus mchod bkur 'os/ /pad+ma rdo rje sbyor ba las/ /phyi yis gzugs can mchog gis dga'/ /skad cig zil ba'i bde ba can/ /gang gis bsam rab spangs pa ni/ /nyams myong gi ni gnas su bstan/ /de ni skyes bus phyag bkur 'os/ /nang reg bdud rtsi longs spyod ni/ /tshim par myong ba gang gi tshe/ /de tshe rang nyams myong dga' las/ /dga' ba'i rnam pa yi ni sems/ /bdag las skye ba nang gi reg /nang nas skye ba dngos ci 'dra/ /khong du chud dbang gyur las ni/ /nang gi reg bya rnyed pa yin/ /tshad med pa yi yon tan gter/ /brjod du med pa de nyid do/ /rang gi bde ba kun du gsol/ /nyams su myong ba zhum pa yi/ /de ni brlag par rab tu brjod/ /ye shes sku yi rang ngo bo/ /dngos po min pa de ltar min/ /bsgom dang bral ba'i dngos po yin/ /dbang po bde ba'i bye brag ni/ /gsol ba longs spyod du ni grags/ /srid dang mya ngan 'das yongs gsol/ /longs spyod bde ba yis ni dbang / /dga' gsum tha dad rab tu gzhi/ /gang gi sa la de ni brlag /dpe med rang bzhin du ni grags/ /rnal 'byor ye shes rnyed pas so/ /de ni rin chen rdo rje rtser/ /gyen gyi lam du 'gro ba ru/ /snying ga yi ni phyogs su nye/ /byang chub kyi ni sems la dbang / /rang gi 'dug pa nang du yang / /longs spyod bde ba gya nom pa/ /'dzin pa'i gdu bu yis ni sa/ / slebs pa tsam gyis nang du ni/ /bde ba'i ngo bo nyams su myong / /de ni nang gi reg bya yin/ /bde chen grags pa rang bzhin brjod du med/ /skye dang gnas dang 'gag pa rnam par spangs/ /rnam par rtog pa tsam gyis blo rnyed min/ /rnam rtog phyi don bde ba min ngo bo/ /de bas ci ming gang la rag las bsgom/ /bsgom pa'i don gzhan grub pa des las gzhan/ /skad cig rtog pa thams cad dang bral bas/ /rnam par rtog med ngo bo nyid rang rig /gal te tshor ba yin pa de ni reg /reg na sgra yi rnam rtog gzugs su 'gyur/ /sgra med gnyis su med pas klags skabs med/ /dngos bral de ni de nyid don dam par/ /'di lta de nyid yin gyur kyang / /de bzhin de la bya ba yin pa gzhung / /dngos po'i bya bas lta ba log mi 'gyur/ /lta ba'i rim pa de nyid rin chen rnyed/ /ji ltar bur shing sa la lud btab na/ /de las khu mang shing rab che ba skyes/ /don gyi phyir ru thabs ni thams cad bshad/ /ji ltar sbyin sogs rgyal bas rgyal ba'i yum/ /mchog gi bdud rtsi yi ni rgyun/ /tshigs kyi bu ga las ni myong / /'dzin pa'i gdu bu yi ni sker/ /'bad pas de la gzhag par bya/ /bsrub dang bsrubs pa'i sbyor ba yis/ /rnam par smin pa'i 'bras bu rnyed/ /dri med kyi ni bdud rtsi'i thigs/ /tshangs pa'i bu ga las rgyal mtshan/ /rab tu 'jug pa kha nye tsam/ /de las rnam pa 'joms pas rnyed/ /de yang snying gar 'gro ba na/ /ye shes rlung gis dgug pa yis/ /dpe med pa yi rang bzhin grags/ /mtshan nyid bral ba de ni rnyed/ /yang ni bde ba'i sbyor ba yis/ /mgo bo ru ni chab kyi rgyun/ /mtshog ma'i spyi rtser mchog tu 'bab/ /de las rnam pa sna tshogs rnyed/ /rdo rje yi ni rigs su 'gyur/ /'khor los sgyur ba gzhan ma yin/ /pad+ma rdo rje sbyor ba yi/ /ye shes kyis ni rab tu rnyed/ /sar pa gzu lums can gyis 'dir/ / de kun rmi lam lta bur mthong / /tshon rtsi lta bu sbyor ba de'i lam/ /phyi yi gzugs can rnam par dgod/ /bde ba'i rnam par rtog dang bral/ /nam mkha' bzhin du rtog med pa/ /rang gi ngo bo rlabs dang bral/ /thams cad kun la bzhugs pa'o/ /de la chos dang dam bcas sogs/ / bsnyung ba byed dang gtsang sbra med/ /rin chen gser dang dngul dag gi /lha la nam yang phyag mi bgyid/ /me tog rab dang rdul tshon gyi/ /dkyil 'khor nam yang mchod mi bya/ /brtul zhugs 'dzin pa'i rgan po la'ang / /de la nam yang phyag mi bgyid/ /nyams su myong ba ro yis tshim/ / de las ci zhig gzhan dgos min/ /lhag pa yi ni 'bras bu 'dod/ /de las nam yang dgos sam ci/ /chos kun la ni 'bad pa yis/ /gal te tha snyad de 'dzin na/ /shel gyi rin chen rdo ba la/ /ji ltar tshon rtsi yi ni rdzas/ /'dod pa yis ni longs spyod bgyid/ /sdig pa yang ni de bgyid na/ /des ni gos par yong mi 'gyur/ /ji ltar pad+ma 'dab chus so/ /tshig gi don ni ma rtogs na/ /de la thams cad dgos pa yin/ /brtul zhugs sdom pa bzlas pa sogs/ /bsam gtan tshul khrims bya don no/ /rnal 'byor kun la don dam par/ /gang du yang ni gsung ba min/ /yul gyi bde ba bsgrags pa las/ /byang chub kyi ni lam rnyed pa/ /dbang po gnyis la sogs par sbyor/ /de ni gal te tshig rigs na/ /rtag tu byol song tha mal pa/ /'dod pa yis ni longs spyod zhen/ /de yis mya ngan 'das pa yi/ /da dung yang ni rnyed pa min/ /de bas kun nas 'bad pa yis/ /rtag tu rang bzhin don du spyod/ /skyon med ngo bo grags bde las/ /rtog pa med par rim gyis 'byung / /'dzin pa la sogs bsgom lam gyi/ /dri med snying gi nam mkha' la/ /rig pa yis ni rang bzhin dga'/ /rnal 'byor skyes bu mchog gis rnyed/ /de la bsgom par mi bya ste/ /de nyid rnyed pas gzhan ci rnyed/ /gang tshe mthe'u chung sogs par ni/ /gnas ni bslab par mi bya ste/ /de tshe snying ga'i nam mkha' la/ /rang bzhin nam yang rnyed pa yin/ /de bas thams cad 'bad pa yis/ /rtsa ba'i gnas ni rab grub bya/ /grub nas 'bad min rang bzhin dga'/ /the tshom med par rnyed pa yin/ /de lta'i gsang ba'i bsgom pa yis/ /tshe 'di yis ni mang rab tu/ /phyag rgya chen po dngos grub mchog /bdag gis mngon sum bskyed pa'o/ /dang po dpal bde zhal snga nas/ /de bzhin yang ni tshangs pa'i zhabs/ /bram ze mo ni rdo rje ldan/ /de nas dpal rgyal badzra bud/ /slob dpon u sam de nas de/ /dpe yi slob dpon de phyi ma/ /gos bral zhal snga de bzhin no/ /dpal rgyal dz+nyA na bo d+hi dang / /de bzhin shrI o ga bud+d+hi/ /slob dpon pad+ma badzra'i zhabs/ /Do mi'i zhal snga de bzhin no/ /yan lag rab ma dpal lha mo/ /bung ba'i pad+ma de bzhin no/ /dur khrod ki la ri zhal snga/ /lha lcam legs smin de bzhin no/ /bdag kyang dang por grub pa yin/ /'on kyang sems can don du dgyes/ /de bas grub mchog don dam pa/ /des na 'di yi gzhung gzung bya/ /mchog tu yul gyi dga' ba ni/ /shes rab can gyis nam mi bya/ /gang zhig 'di ltar yin na yang / /longs spyod la sogs yongs su gzung / /de ni phung sogs bsrung ba'i don/ /don dam de kho na nyid min/ /bsam gtan la sogs mi nus phyir/ /longs spyod la sogs byas dag gsol/ /dag na de nyid skyon mi byed/ /tha mal rab mchog 'bras bu sbyin/ /ji ltar dug shes pa yis dug gsol ba/ /de la nam yang skyon ni byed mi 'byung / /tha mar yang ni rab mchog 'bras bu sbyin/ /mdze nad tshabs po che yang med par byed/ /de lta'i 'gros su bcas pa'o/ /gang zhig bdag gis 'di ru bstan/ /yon tan du ma dge ba'i lam/ /'gro ba yi ni thabs yin no/ /nyams su myong ba'i mthar phyin pa/ /de nyid shes pa brten pa yin/ /de dang drang don bye brag tu/ /gsang ba chen po ye shes mchog /rnal 'byor rnal 'byor ma rgyud dag /rdo rje sems dpas rgyas btab pa/ /de bas gang zhig rgyud rgyas btab/ /de la rang gis sgrub mi byed/ /gal te de ni log par 'gro /shes pa ma yin grub ma yin/ /'on kyang de la log pa ste/ /myur du dmyal bar 'gro bar 'gyur/ /de bas kun du 'bad pa yis/ /sgrub thabs la sogs bla ma'i bka'/ /spyad pa sgrub pa'i dbang sngags pa/ /the tshom med par dngos grub thob/ /'di ni bdag gis yang dag lam nyid bstan/ /gsang ba'i gsang mchog snying po kun dga' ba/ /bla ma'i rim pa gshegs pa sngon med pa/ /rab kyi man ngag rnyed pa rmad byung ngo / /'di ni dpal u rgyan rdo rje chen po'i gnas nas byung ba/ dpal de kho na nyid kyi bdud rtsi man ngag dpal in+d+ra b+hU ti rang las byung ba'o/ /slob dpon chen po rgyal po in+d+ra b+hU ti'i zhal snga nas/ dpal de kho na nyid kyi bdud rtsi'i man ngag /mchog gi dngos grub brnyes nas mdzad pa rdzogs so// //rgya gar gyi mkhan po pra dz+nyA shrI gup+ta dang / bod kyi lo tsA ba dge slong rin chen rgyal mtshan gyis bsgyur cing zhus te gtan la phab pa'o// @##/ /rgya gar skad du/ rat+na mA lA u pa de sha /bod skad du/ dbang rin chen phreng ba'i man ngag /dpal bde ba chen po la phyag 'tshal lo/ /bde ba chen po 'khor lo'i bar/

CLOSE WINDOW