བོད་ཡིག

e-texts based on the ACIP/ALL Input

/bde mtha' gcig bu dgyes pa'i rdo rje nyid gyur cig /dpal dgyes pa rdo rje'i gtso bo sems dpa' gsum gyi sgrub thabs rje nA ro pa'i zhal gyi lung sbyar ba rdzogs so//[]@##/ /rgya gar skad du/ ta t+t+wA le ka nA ma/ bod skad du/ de kho na nyid kyi snang ba zhes bya ba/ dpal dgyes pa'i rdo rje la phyag 'tshal lo/ /keng rus mtha' ni 'khor byed sprin tshogs 'dral zhing dri med nam mkha'i lam yin pa/ /rdo rje'i 'od zer spro byed seng ge dbang po tshangs pa skrag 'gyur bstod 'os pa/ /bskal mtha'i chu sbyin sgra bzhin sgra snyan 'jam 'gyur hUM gi yi ge sgrar 'gyur ba/ /'jigs pas bdud bzhi skrag cing srid gsum gyis ni phyag byas he ru ka yi gar khyod skyong gyur cig /nag 'gyur sa 'dzin dang 'dra 'jam pa'i dzan na dzan sgrar 'gyur ba'i pus mo'i zung dgod dang / /dpung par 'jigs pa'i spyan gsum gyis ni blta bas lha rnams skrag par mdzad pa dang / /spros 'gyur rengs pa'i khro gnyer 'joms pa bstan te zhal ni mi bzad pa/ /dpal ldan rdo rje mkha' 'gro ut+pal sngo 'dra rang skus lus can skyob gyur cig /rdo rje sems dpa' gnang ba yis/ /snying rjes sems can rnams la ni/ /de nyid snang ba zhes bya ba/ / de ni bdag gis bri bar bya/ /gdul bar dka' bar gyur pa yis/ /sems ni lam la gzhug pa'i phyir/ /bdag gis nan tan byed pa la/ /de nyid rig mkhan bzod par mdzod/ /rgyud ni dgyes pa'i rdo rje rgyud sogs snying po ste/ /bde gshegs kyis bstan nan tan gyis ni bzung nas su/ / sna tshogs skyed byed bstan bcos de nyid snang ba ni/ /'gro la phan thogs phyir ni bdag gis bstan par bya/ /dang por re zhig slob mas bla ma'i phyogs su blta zhing maN+Dal gyi cho ga byas la/ de nas sems can rnams skyo bar 'gyur ba'i phyir/ /'gro la phan thogs don du sangs rgyas 'gyur bar shog / ces bya ba ste/ dam bca' bar bya'o/ /de nas bdag nyid bla ma la dbul bya/ /zhes bya ba ni sbyin pa'o/ dam pa min pa'i lam la sems 'jug par 'gyur ba las ldog pa zhes bya ba'i tshul khrims so/ /lus dang ngag dang sems 'byung ba zhes bya ba ni bzod pa'o/ /sngon gyi dam bca' ba yongs su rdzogs pa'i grub pa zhes bya ni brtson 'grus so/ /sems rtse gcig tu gyur pa zhes bya ba ni bsam gtan no/ /'di dag thams cad rang bzhin med pa nyid kyis nges par shes pa zhes bya ba gang yin pa de ni shes rab kyi ming thob pa'o/ /de bas na shes rab dang ldan pa'i sbyin pa la sogs pa'i pha rol tu phyin pa lngas ming thob par 'gyur zhes bya ba ste/ byang chub sems dpa' sems dpa' chen pos pha rol tu phyin pa drug la rten par byed cing mi dge ba'i las bcu yongs su spang bar bya'o/ /de rnams kyang lus dang ngag dang sems la brten par gyur pa'o/ /lus ni ngag la brten pa dang / ngag ni sems la brten pa dang / sems ni nam mkha' la brten pa ste/ nam mkha' ni gang la yang brten par ma gyur pa'o/ /de bas na 'bad pa thams cad kyis/ gsum po 'di nyid dri ma med par byas la/ slar yang gsum po 'di nyid la rnam par bshad par brjod par bya'o/ /'di lta ste lus ni gzugs brnyan dang 'dra ba'o/ /ngag ni sgra brnyan bzhin du'o/ /sems ni nam mkha' dang mnyam pa ste/ gsum po de ni shes rab dang ldan pas rnam par dag par 'gyur zhes bya ba'o/ /de lta bas na mi dge ba bcus gnod par mi byed ces bya ba ni/ byang chub sems dpa' sngon du las rjes su dran par spyad par bya ba yin no/ /las dang po pa'i dum bu ste dang po'o// //de nas sngags bstan pa'i rgyud rnam pa bzhi las sngags kyi dngos grub bsgrub pa la sogs pa ni/ gang bcom ldan 'das kyis gsungs pa de thams cad/ ngan song du gnas pa'i sems can rnams bkug nas dam pa'i lam la dgod pa'i phyir bstan to/ /bstan pa yang tha ma dang 'bring dang rab dang sems can gyi bsam pa rab tu dbye bas sna tshogs par 'gyur te/ dper na gcig pu ni gcig min 'gyur ba bzhin du'o/ /ci ltar 'gyur zhe na/ dper na chus gang bar gyur pa'i chu snod rnams la zla ba gcig yin yang gzugs brnyan du mar gyur pa bzhin du zhes bya ba'o/ /de bas na theg pa thams cad las de kho na nyid gcig pu yin gyi gzhan ni ma yin par rtogs par gyis zhes bya ba'o/ /de ltar gtan la phebs nas sngon gyi dam bca' yongs su rdzogs par bya ba'i phyir/ skye ba 'di la nyin mtshan du byang chub bsgrub par bya'o/ /de nas gal te bsgrub par ma nus na de lta na ni/ bsod nams la spyad par bya ste/ bsod nams kyi mthu des ma 'ongs pa'i dus su gzhan la byang chub bsgrub par 'gyur zhes bya ba'o/ /khro ba dang ser sna dang nga rgyal dang ldan pa dang chang dang sha la sogs pa la rjes su chags par gyur pa gang rnams kyis bstan pa so so ru go bar byed pa de rnams kyis nges par bla na med pa yang dag par rdzogs pa'i byang chub kyi rgyu dang 'bras bu'i mtshan nyid bstan par mi nus te/ longs spyod kyi don du de rnams kyi slob ma gzung bar byed pa dang / dam pa'i chos 'tshong ba dang / log par 'tsho bar byed pa dang / byin gyis brlabs pa dang bral bas dmyal bar ltung bar 'gyur ba dang / don med par 'gyur ba zhes bya ba'o/ /de nas 'byung ba lnga dang khams lnga la sogs pa gang yin pa de rnams sems kyi phun sum tshogs pa yin gyi gzhan ni ma yin no/ /dper na rmi lam du bdag dang bral bar gyur pa'i 'gyur ba rnams gang skyes pa dang / gzung ba dang 'dzin pa las 'das par gyur pa'i zla ba'i gzugs brnyan dang 'dra ba dang / sgra brnyan dang 'dra ba dang / dri za'i grong khyer bzhin du rtogs par bya'o/ / sems kyang skye ba dang gnas pa dang 'jig pa dang song ba dang 'ongs pa las 'das pa dang / thog ma dang bar dang tha ma las rnam par grol ba yin la/ gnas pa gang las kyang thob par mi 'gyur te/ shes rab dang ldan par gyur pa 'di nyid 'di ni srid pa gsum la rol bar mdzad pa de/ dper na rdzu 'phrul mkhan skyes bu gang zhig gis/ skye ba dang / gnas pa dang / 'jig pa'i tshul gyis mi rnams la ngo mtshar bar ston par byed pa ji lta ba de bzhin du sems kyang shes par bya'o/ /de ltar brjod par gyur pa'i thabs rnal 'byor bas rig na/ sems kyi sa la gnod par mi 'gyur te/ rnal 'byor pas sems shes par gyur na chags pa dang bral bar nam mkha' bzhin du 'gyur te/ yid bzhin gyi nor bu rin po che bzhin du spro ba dang bsdu ba'i bdag nyid 'chi bar gyur na yang rung skad cig gis 'tsho bar gyur na yang rung ste/ dus kyis mi 'tsho ba la smos ci dgos/ de ltar nyams sum myong bar thos pa tsam gyis don med de/ dper na sman dpyad bklags pa tsam gyis nad pa la nad zhi bar mi 'gyur ba bzhin du'o/ /de bas na nyams su myong ba'i sbyor bas 'bras bu rdzogs par 'gyur te/ rgyu de'i phyir sems rtogs par gyur na thams cad skye bar 'gyur ro/ /shes rab dang sems kyi mtshan nyid ni dbang dang bla ma'i drin gyis shes par 'gyur zhes bya'o/ /spyi'i gleng gzhi'i dum bu ste gnyis pa'o// //de nas slob ma rnams la dbang yang dag par sbyin pa brjod par bya ste/rdul tshon dgye bzhes bya ba ni nges pa'i don gyis shes rab yin la/ 'gro ba thams cad mtshon par byed pa'i phyir ro/ /de la dgye ba zhes bya ba ni yongs su 'dzin pas na ra dza ba da'o/ /de nyid lha'i dkyil 'khor yin gyi/ lha rnams la spyan 'dren pa dang / gshegs su gsol ba la sogs pa ni ma yin no/ ci'i phyir zhe na/ sangs rgyas bcom ldan 'das byon pa dang gshegs pa mi shes pa'i phyir ro/ /dper na rmi lam na skye ba dang gnas pa dang 'gag pa med pa bzhin du'o/ /rgyu de'i phyir lha rnams la spyan 'dren pa dang gshegs su gsol ba la sogs pa mi bya ste/ dmigs pa dang bcas pa'i bsam gtan gyis 'khor ba'i 'ching ba las grol bar mi 'gyur ro/ /med pa'i dngos po la smos ci dgos zhes bya ba'o/ / de bas na dngos po thams cad la mi dmigs pas thams cad la'o/ /dngos po dang dngos po min pa las grol bar gyur pa'i sems ni sangs rgyas zhes bya bar brjod do/ /thabs dang shes rab kyi bdag nyid gtso bo de lta bu las/ sngags dang phyag rgya la sogs pas mchod par bya'o/ / ji ltar mchod par bgyi zhe na/ dag pa dang ma dag pa'i sems gcig tu bya ba ni sngags so/ /de bzhin du skye dgu rnams kyi skye ba ni bzlas pa yin la 'jig rten gsum po rgyas gdab par byed pas na phyag rgya yin la de shes rab tu brjod de/ shes rab kyi maN+Dal de mdun du byas nas/ slob ma rnams la dbang sna tshogs pa sbyin par bya'o/ /dbang las ma gtogs par dngos grub med de/ de bas na sangs rgyas nyid kyi 'bras bu 'dod pa las dbang sbyin par bya'o/ /slob mas kyang zhu ba 'di ltar bya ste/ 'khor ba'i 'dam du bying gyur ba/ /mi bzad sdig pa byas pas g.yogs/ / de ltar bdag ni 'byung ba'i phyir/ /de bzhin gshegs pas skyob par mdzod/ /ces bya'o/ /de nas slob ma la bla mas dbang bdun po sbyin par bya ste/ chu'i dbang sbyin pa dang cod pan gyi dbang dang / /rdo rje'i dbang dang / bdag po'i dbang dang / ming gi dbang dang / gsang ba'i dbang dang / shes rab ye shes kyi dbang ngo / /dang por re zhig me long lta bu'i ye shes kyi bdag nyid rnam par snang mdzad yin la/ chags pa med par gyur pas na rnam par snang mdzad do/ /de dbang bskur ba zhes bya ste chu'i dbang ngo / /de nas chos kyi dbyings shin tu rnam par dag pa'i bdag nyid mi bskyod pa ste/ bskyod par mi 'gyur bas na mi bskyod pa yin la/ de mgo bo la gzung bar bya ste/ cod pan gyi dbang ngo / /de nas mnyam pa nyid kyi ye shes kyi bdag nyid rin chen 'byung ldan yin la/ gnyis po ma lus pa'i chags pa med par 'byung bar 'gyur bas na rin chen 'byung ldan te/ des dbang bskur ba ni rdo rje'i dbang ngo / /de nas so sor rtog pa'i ye shes kyi bdag nyid snang ba mtha' yas yin la/ mtha' yas na tshad med pa ste/ snang ba ni 'od zer gang la yod pa de snang ba mtha' yas so/ /des dbang bskur bas ni bdag po'i dbang zhes bya'o/ /de nas bya ba grub pa'i ye shes kyi bdag nyid don yod grub pa yin te/ don grub ces bya ba ni 'bras bu dang bcas pa'i grub pa yin la/ des ming gi dbang bskur ba ming gi dbang zhes bya ba ste/ ye shes lnga'i bdag nyid rdo rje sems dpa'o/ /rdo rje zhes bya ba ni/ mi phyed pa'i stong pa nyid yin la/ sems dpa' zhes bya ba ni srid pa gsum gyi gcig pa nyid snying rje ste/ rdo rje sems dpa'o/ /gsang ba ni gnyis po ma lus pa skyed par byed pa'i phyir gnyis su med pa'i ye shes gtan la 'bebs pa yin la/ des dbang bskur ba ni gsang ba'i dbang ngo / /shes rab ye shes zhes bya ba ni rang bzhin med pa'i chos kyi dbyings nam mkha'i khams yin la/ ye shes ni gzung ba dang 'dzin pa las 'das pa ste/ des dbang bskur ba ni shes rab ye shes kyi dbang ngo / /stong nyid ye shes brjod pa dang / snying rje gsal ba thabs yin no/ /gnyis ka gcig tu sbyor ba las/ bdud rtsi'i mchog ni 'dzag par 'gyur/ /zhes bya ba'o/ /dbang gzhan ma gang rnams yod pa de rnams de nyid du shes par bya'o/ /lan cig phyi'am nang du de rnams kyi don ni yang dag par sbyin pas gtan la phebs par bya zhes bya ba'o/ /dbang gi dum bu ste gsum pa'o// //da ni de'i don gtan la 'bebs par gyur pa'i phyir/ rtsa gsum gyi dbye ba bri bar bya ste/ la la nA ni g.yon nas 'bab par byed pa A li'i rang bzhin thabs so/ /ra sa nA ni g.yas nas 'bab par byed pa kA li'i rang bzhin shes rab bo/ /gnyis ka gcig pa nyid kyi dbus su a wa d+hU tI'o/ /la la nA chos dang / ra sa nA la longs spyod rdzogs pa dang / a wa d+hU tI la sprul pa'i sku ste/ lus dang ngag dang sems kyi dbye bas so/ /rtsa gsum dang 'khor lo bzhi la gnyis su med pa'i sbyor bas bde ba chen po'o/ /bzhi po 'di rnams las sprul pa la byams pa'o/ /chos la snying rje'o/ /longs spyod rdzogs pa la dga' ba'o/ /bde ba chen po la btang snyoms so/ /de bzhin du skad cig bzhis skye bar 'gyur te/ rnam pa sna tshogs pa dang / rnam par smin pa dang / rnam par nyid pa dang / mtshan nyid dang bral ba'o/ /bden pa bzhi ste/ sdug bsngal ba dang / kun 'byung ba dang / 'gog pa dang / lam mo/ de kho na nyid bzhi ste/ bdag gi de kho na nyid dang / sngags kyi de kho na nyid dang / lha'i de kho na nyid dang / ye shes kyi de kho na nyid do/ /dga' ba bzhi ste/ dga' ba dang / mchog tu dga' ba dang / dga' bral gyi dga' ba dang / lhan cig skyes pa'i dga' ba'o/ /sde pa bzhi ste/ gnas brtan pa dang / thams cad yod par smra ba dang / mang pos bkur ba dang / phal chen no/ /byams pa la sogs pa 'di rnams ji ltar 'gyur zhe na/ thams cad du ro mnyam pa nyid kyi gang blo gnas par 'gyur ba de byams pa'o/ /sngon gyi smon lam gyi bdag nyid gang sems yin pa de snying rje'o/ /'di dag la gcig pa de nyid gang yin pa de dga' ba'o/ / thams cad la ltos pa med pa'i blo gang yin pa de btang snyoms so/ /sprul pa la sogs pa ji lta bu yin zhe na/ sems can ma lus pa rnams ni/ gang du skye bar brjod pa de/ /de ru sprul pa'i sku yin te/ /de ni sprul par brjod par 'gyur ro/ /yang na spro bar byed pas na sprul pa'o/ / chos ni rang gi mtshan nyid 'dzin pa'i phyir sems kyi mtshan nyid do/ /longs spyod rdzogs pa ni mngar ba la sogs pa ro drug la spyod pa'i phyir ro/ /sku gsum gyi dbye bas 'di rnams su 'gyur te/ de rnams yongs su shes par byed pas bde ba chen po'o/ 'khor lo 'di rnams la rnam pa sna tshogs pa la sogs pa'i skad cig rnams shes par bya'o/ /rnam pa sna tshogs pa la sogs pa ji lta bu yin zhe na/ 'khyud pa dang tsum+ba na la sogs pa sna tshogs par byed pas na rnam pa sna tshogs pa'o/ /ye shes kyi bde ba la spyod pas ni rnam par smin pa'o/ /thams cad mnyes par byed pas na rnam pa med pa ste rang bzhin med pa nyid do/ /chags pa dang bral bar gyur pas ni mtshan nyid dang bral ba'o/ /skad cig 'di rnams las dga' ba la sogs pa skye bar 'gyur ro/ /rnam pa sna tshogs la dga' ba'o/ /rnam par smin pa la mchog dga'o/ /rnam par nyed pa la sna tshogs dga' ba'o/ /mtshan nyid dang bral ba la lhan cig skyes pa'i dga' ba'o/ /dga' bas bde ba cung zad bskyed par 'gyur te/ mchog gi dga' bas de las lhag par 'gyur ba'i bde ba'o/ /sna tshogs dga' bas chags pa sna tshogs pa nyid do/ /thams cad kyi lhag ma ni lhan cig skyes pa'i dga' ba'o/ /sngon mas ni reg bya la 'dod pa dang / gnyis pas bde ba la chags pa dang / gsum pas chags pa nyams pa dang / bzhi pas mchog tu bde ba'o/ /mchog dang sna tshogs pa'i bar du ni lhan cig skyes pa ste/ gsum po 'di dag dang bral ba yin la gang gis kyang bstan par mi nus te/ gang las kyang thob par mi 'gyur ro/ /bla ma la ni brten pa dang / rang gi bsod nams kyis shes te/ /zhes bya ba'o/ /dga' ba 'di rnams la sdug bsngal la sogs pa'i bden pa bzhi shes par bya'o/ /de rnams kyang ji ltar shes she na/ sngon du skye ba la sdug bsngal gyi bden pa'o/ /mchog tu 'byung ba la kun 'byung gi bden pa'o/ /rnam par nyed pa la rang bzhin med pa nyid kyis 'gog pa'i bden pa'o/ /de bas na lhan cig skyes pa nyid kyis lam gyi bden pa'o/ /de nas de kho na nyid bzhi ni/ dga' ba skyes pa'i phyir bdag gi de kho na nyid do/ /gsang bar smra bar byed pas na mchog la sngags kyi de kho na nyid do/ /stong pa nyid kyi rang bzhin rtog par byed pas na rnam par nyed pa la lha'i de kho na nyid do/ /lhan cig skyes pa rnam par 'char bar bsgoms pa nyid kyis ye shes kyi de kho na nyid do/ /de nas sde pa bzhi ni/ dga' ba dang po la gnas brtan pa'o/ /dga' ba gnyis pa la thams cad yod par smra ba'o/ /sna tshogs pa'i bdag nyid mang pos bkur ba'o/ /lhan cig skyes pa'i rang bzhin phal chen zhes bya ba ste/ de dag thams cad dga' ba rnams las bskyed par 'gyur ba'o/ /de rnams kyang sprul pa dang longs spyod rdzogs pa dang / mnyam pa nyid dang / bde ba chen po'i 'khor lo rnams la shes par bya'o/ /sprul pa dang / chos dang longs spyod rdzogs pa ni la la nA dang ra sa nA dang a wa d+hU tI'o/ /'di dag thams cad ro mnyam pa nyid kyis bde ba chen po'o/ /de yang phyi dang nang du sems kyi rgyal po'i rnam par rol par shes par bya'o/ /bla mas mdzes pa'i ye shes ni/ /slob ma la ni bstan par bya/ /don dam pa yis dbye bas ni/ /rtsa gnyis po yi bar du'o/ /ma bcos pa dang mi rtag min/ /dngos dang dngos med zag med dang / /gzung dang 'dzin pa las 'das pa/ / gang la khams gsum skye ba dang / /khams gsum po la phan thogs pas/ /tshig tu brjod pa kun las 'das/ /dbang ni thob par gyur pa yi/ /skyes bus ye shes shes par bya/ /de nas de nyid rtogs pa'i phyir/ /rab tu sbyor ba brjod par bya/ /shes rab rang bzhin phyag rgyal chags pas gang sems la bde ba 'byung ba de dga' ba dang por skye bar 'gyur ro/ /de dag la 'khyud pas dbang po rnams gcig tu gyur nas lhag par 'gyur ba mchog gi dga' ba'o/ /thams cad mnyes par 'gyur pa'i rang bzhin med pa nyid kyis nam mkha' bzhin du mtshan nyid dang bral ba ni sna tshogs dga' ba'o/ /gsum po 'di dag las 'das par gyur pa lhan cig skyes pa zhes bya ba'i dga' ba ste/ de yang de bzhin nyid kyi gnas skabs su rnal 'byor pas rig par bya'o/ /de nas dbang po rtul por gyur pa rnams sangs rgyas pa'i phyir/ phyi rol gyi shes rab sbyor bas ye shes kyi mtshan nyid ni bla mas bstan par bya'o/ /yang na lte ba las 'bar tsaN+DalI/ /bde gshegs lnga ni sreg par byed/ /spyan ma la sogs bsregs nas ni/ /haM bsregs ri bong can 'dzag byed/ /ces bya ba la tsaN+Da zhes bya ba ni shes rab yin la/ A li zhes bya ba ni thabs te/ A li dang kA li'i rang bzhin la la nA dang ras nA'i bdag nyid do/ /thabs dang shes rab kyi bdag nyid 'di dag ni tsaN+Da lI'o/ /lte ba la zhes bya ba ni nam mkha' la yin la gnyis ka'i dbus su a wa d+hU tI la zhes bya ba'i don to/ /de 'bar bar gyur na bde gshegs lnga zhes bya ba ni phung po lnga yin la sreg par byed ces bya ba'o/ / de nas spyan ma la sogs zhes bya ba ni 'byung ba lnga bsregs nas rnam pa med par 'gyur te/ haM bsregs zhes bya ba ni bdag dang bdag gi bsregs nas so/ /de ltar gyur pas ri bong can zhes bya ba ni/ byang chub kyi sems yin la/ sems can thams cad kyi don du 'dzag par byed de/ de yang rang gis nye bar thob par 'gyur ro/ /dper na me tog ni snas snoms pa tsam gyis 'dzin kyang gang du yang mi mthong zhing rnam pa gang gis kyang nye bar mi 'gyur ro/ /'o na ci yin zhe na/ rang rig par 'gyur ba ji lta ba de bzhin du/ lhan cig skyes pa yang de bzhin du bstan zhes bya'o/ /de lta bur gyur pa'i lhan cig skyes pa la gnas pa'i sems ni dri za'i grong khyer bzhin dang / sgyu ma dang rdzu 'phrul dang 'dra ba dang / me long dang gzugs brnyan bzhin dang / sgra brnyan bzhin du spro ba dang / bsdu ba rnam par sna tshogs pa la sogs pa ston par byed ces bya ba'o/ /yang dag pa'i sbyin pa'i dum bu ste bzhi pa'o/ / //da ni shes rab ma rnams sbyin par bya ste/ rang bzhin med pa nyid kyis rnam par dbye ba ston par byed pas na sring mo ste mig la'o/ /ma reg pa'i phyir mna' ma ste rna ba la'o/ /rmi lam las skyes pa'i 'gyur ba bzhin du 'gro ba skyed par byed pas na ma yin te sna la'o/ /dngos po thams cad 'joms par byed pas na bu mo ste lce la'o/ /sra ba'i sems smyug ma bzhin du 'gugs par byed pas na smyug ma mkhan te reg bya la'o/ /bde ba bsnyen par byed pas na chung ma ste phra ma la'o/ /rdo rje chos la sgrib pa med par byed pas na ko mkhan ma ste phrag dog la'o/ /kaM zhes bya ba ni nam mkha' yin la 'di la skyong bar byed pa'i tshul khrims yod pas na ka pA li ni steng la'o/ /rnam par rtog pa ma lus pa'i mtha' gos su byas nas 'khor bar byed pas na ri khrod ma ste chu la'o/ /tsaN+Da zhes bya ba ni shes rab ste A li zhes bya ba ni chos thams cad kyi 'byung gnas yin la/ tsaN+DalI zhes bya ba ste me la'o/ /mi rig pa'i phyir rigs ngan ma ste rlung la'o/ /brdzun gyi ri mo bzhin du 'gro ba gsum pa gtan la 'bebs par byed pas na rol mo mkhan ma ste na ma mkha' la'o/ /'gro ba sna tshogs pa brdzun du byed pas na ri mo mkhan te gzugs la'o/ /nyon mongs pa ma lus par 'dral bar byed pas 'dreg mkhan ma ste tshor ba la'o/ /glang po che'i sems kyi so la rgyun du byed pas na so mkhan te 'du shes la'o/ /dmigs pa med pa'i gdugs kyis 'gro ba bkab par byed pas na gdugs mkhan ma ste 'du byed la'o/ / ma rig pa gsod par byed pas na shan mkhan ma ste rnam par shes pa la'o/ /mda' zhes bya ba ni dbang po lnga yin la/ de rnams gcig pa nyid du byed pas mda' mkhan ma ste sbyin pa la'o/ /rnam par rtog pa ma lus pa skum par byed pas tshul khrims 'di la yod pas na ku tsi ni ste tshul khrims la'o/ /dga' bar byed pas na nan+di ste bzod pa'o/ /gnyis po ma lus par byed pas na tsha mo ste brtson 'grus la'o/ /gzugs brnyan bzhin du sna tshogs pa ston par byed pas na gar mkhan ma ste bsam gtan la'o/ /rang bzhin med pa'i dra bas spro ba'i rnam par rtog pa'i yid 'ching bar byed pas na nya ba mo ste shes rab la'o/ /bden pa'i chos rnams la rgyas gdab par byed pas na ma'i sgyug mo ste byams pa la'o/ /dmigs pa med pa'i skud pa la sna tshogs pa'i me tog 'ching bar byed pas na phreng ba mkhan ma ste snying rje la'o/ /rnam par rtog pa'i shing gcod par byed pas na shing mkhan ma ste dga' ba la'o/ /ma lus pa'i sgrib pa med pas na lhag ma za mkhan ma ste btang snyoms la'o/ /phyogs gnyis srub shing gis gzung bar byed pas na rdza mkhan ma ste lus la'o/ /rang gi ros 'gro ba smin par byed pas na chang 'tshong ma ste ngag la'o/ /bram ze ni de bzhin nyid kyi ye shes te shes rab byed pas na bram ze mo ste sems la'o zhes bya ba'o/ /phyag rgya 'di rnams kyi bdag nyid mkha' 'gro ma rnams su 'gyur te de rnams bri bar bya'o/ /gzugs la dkar mo'o/ /sgra la chom rkun mo'o/ /dri la ro langs ma'o/ /ro la g+hasma rI'o/ / reg bya la sa spyod ma'o/ /yid la mkha' spyod ma'o/ /sa la ro sreg ma'o/ /chu la ri khrod ma'o/ /me la tsaN+DalI'o/ /rlung la rigs ngan ma'o/ /nam mkha' la bdag med ma'o/ /'dod chags la ro langs ma'o/ /zhe sdang la rdo rje can ma'o/ /gti mug la rdo rje ma'o/ /phra ma la gsang ba'i dkar mo'o/ /phrag dog la rdo rje mkha' 'gro ma'o/ /gzugs la rdo rje ma'o/ /tshor ba la chom rkun ma'o/ /'du shes la chu'i rnal 'byor ma'o/ /'du byed la rdo rje mkha' 'gro ma'o/ /rnam par shes pa la bdag med ma'o/ /sbyin pa la dkar mo'o/ /tshul khrims la chom rkun ma'o/ / bzod pa la ro langs ma'o/ /brtson 'grus la g+hasma rI'o/ /bsam gtan la sa spyod ma'o/ /shes rab la mkha' spyod ma'o/ byams pa la spyan ma'o/ /snying rje la mA ma kI'o/ /dga' ba la gos dkar mo'o/ /btang snyoms la sgrol ma'o/ /lus la sa spyod ma'o/ /ngag la mkha' spyod ma'o/ /sems la bdag med ma zhes bya ba ste/ lha mo 'di rnams la mkha' 'gro ma sna tshogs pa'i rigs bstan nas de rnams kyi de bzhin gshegs pa rnams brjod par bya ste/ gzugs la sogs pa rnams la rnam par snang mdzad dang / mi bskyod pa dang / snang ba mtha' yas dang / don yod grub pa dang / rin chen 'byung ldan dang / rdo rje sems dpa'o/ /sa la sogs pa rnams la rnam par snang mdzad la sogs pa'o/ /'dod chags la sogs pa la snang ba mtha' yas dang / mi bskyod pa dang / rnam par snang mdzad dang / rin chen 'byung ldan dang / don yod grub pa'o/ /gzugs dang / tshor ba la sogs pa la/ rnam par snang mdzad dang / rin chen 'byung ldan dang / snang ba mtha' yas dang / don yod grub pa dang / de bzhin gshegs pa mi bskyod pa'o/ /sbyin pa la sogs pa la rnam par snang mdzad dang / mi bskyod pa dang / snang ba mtha' yas dang / don yod grub pa dang / rin chen 'byung ldan dang / /rdo rje sems dpa'o/ /byams pa la sogs pa la/ rnam par snang mdzad dang / mi bskyod pa dang / snang ba mtha' yas dang / don yod grub pa'o/ /lus la sogs pa la rnam par snang mdzad dang / snang ba mtha' yas dang / mi bskyod pa zhes bya ba'o/ /da ni mkha' 'gro ma rnams la rgyas gdab pa brjod par bya ste/ gau rI dang ro sreg ma la mi bskyod pas rgyas gdab pa'o/ /ri khrod ma dang chom rkun ma la rnam par snang mdzad kyis so/ /ro langs ma dang tsaN+DalI la rin chen 'byung ldan gyis so/ /g+hasma rI dang rigs ngan ma la snang ba mtha' yas kyis so/ /don yod grub pa dang rin chen 'byung ldan la snang ba mtha' yas kyis rgyas gdab po/ /rnam par snang mdzad dang snang ba mtha' yas la mi bskyod pas rgyas gdab pa'o/ /de la rdo rje sems dpas rgyas gdab pa'o/ /mkha' 'gro ma thams cad de bzhin gshegs pa'i sbyor bas phan tshun du rgyas gdab pa'o/ /de nas bdag med ma ni rang bzhin gyis rdo rje sems dpa' dang mnyam pa'o/ /'di dag dngos po gcig pa nyid ni/ dpal ldan dpa' bo he ru ka 'byung ba chen po lnga'i gzugs can/ 'dod chags la sogs pa gzugs kyi bdag nyid de bzhin gshegs pa lnga phyag rgya 'dzin pa yul drug la khyab pa'o/ /yul drug gi rang bzhin du gyur pa pha rol tu phyin pa drug yongs su rdzogs par mdzad pa/ stong pa nyid bcu drug gis yongs su bskor ba/ dge ba bcu rgyan du gyur pa/ bdud bzhi mnan par mdzad pa/ bden pa bzhi bstan par mdzad pa/ sku bzhi'i bdag nyid du gyur pa/ de kho na nyid bzhi dbus su zhugs pa/ dga' ba bzhi gnang bar mdzad pa/ skad cig bzhi'i rang bzhin du gyur pa/ tshangs pa'i gnas bzhi la zhugs pa/ bdag med ma'i sbyor ba dang ldan pa'i mnga' bdag /srid pa gsum la rol par mdzad pa zhes bya'o/ /thabs dang shes rab gtan la 'bebs pa'i dum bu ste lnga pa'o// //da ni bdag med ma'i 'khor lo bskyed pa'i rim pa bri bar bya ste/ re phas nyi ma mdun du bsgoms nas su/ /nyi der hUM skyes sna tshogs rdo rje ste/ /rdo rje de nyid kyis ni ra ba dang / /dra ba bcing ba rnam par bsgom par bya/ /dang por re zhig chos kyi dbyings kyi bdag nyid ro bsgoms la/ de nas he ru ka nyid bsgom par bya'o/ /me'i dkyil 'khor gyi rnam pa kha sbyor du gyur pa chos kyi 'byung gnas las skyes pa'i 'khor lo ste/ de'i dbus su gdan bco lnga'i bdag nyid du gyur par ro bsgom par bya'o/ /de'i steng du dbyangs dang po las skyes pa'i zla ba'i dkyil 'khor te/ de'i steng du re pha las skyes pa'i nyi ma'i dkyil 'khor bsam par bya'o/ /'di dag ni me long lta bu dang / mnyam pa nyid kyi ye shes kyi rang bzhin du gyur pa thabs dang shes rab kyi bdag nyid dag go/ /'di dag yang dag par sbyor bas rdo rje sems dpa'i gdan yin no/ /dkyil 'khor de la rim pa de nyid kyis yi ge hUM las skyes pa'i bcom ldan 'das zhal gcig pa la phyag g.yas pa na rdo rje dang phyag g.yon pa na thod pa ste/ mgo bo'i phreng bas brgyan par gyur pa/ sku mdog chu shel dang 'dra bar/ bdag med ma'i sku la 'khyud par bsgom par bya'o/ /de nas sngon bzhin du zla ba nyi ma 'byung ba'i rim pas/ yi ge a la sogs pa'i yi ge 'bru bco lnga bdag med ma la sogs par gyur te/ dbus su bdag med ma'o/ /shar du rdo rje ma'o/ /gshin rje dkar mo'o/ /chu ru ro langs ma'o/ /gnod sbyin du rdo rje mkha' 'gro ma'o/ /phyi rol gyi shar gyi sgo la dkar mo'o/ /lho ru chom rkun ma'o/ /nub tu ro langs ma'o/ /byang du g+hasma rI'o/ /dbang ldan du ro sreg ma'o/ /me ru ri khrod ma'o/ /bden bral du tsaN+DalI'o/ /rlung du rigs ngan ma'o/ /steng du mkha' spyod ma'o/ 'og tu sa spyod ma ste lha mo 'di rnams zhal gcig phyag gnyis pa sku mdog nag po mi bzad pa/ spyan dmar ba phyag rgya lnga 'dzin pa/ phyag g.yas pa na gri gug dang / g.yon pa na thod pa dang kha T+wAM ga'o/ /stag gi pags pa gos su mdzad pa/ skra ser la gyen du gyur par bsgom par bya'o/ /bdud la sogs pa'i skyon rnams gcod par byed pa'i gri gug go/ /bsgom pa dang sgom pa po'i rnam par rtog pa nyams par byed pa ni thod pa ste/ bdud bzhi za bar byed pa ni khrag gis gang ba'o/ /kha T+wAM ga ni stong pa nyid yin la/ ro ni thabs so/ /'dod chags dang / zhe sdang la sogs pa'i bdag nyid 'gro ba gsum po za bar byed pas na stag ste de'i pags pa gos su mdzad pa'o/ /de lta bur gyur pa'i 'khor lo rnal 'byor pa gang gis bsgom pa des myur bar dngos grub thob par 'gyur zhes bya ba'o/ /lha mo de thams cad ji ltar brjod pa'i rim pas rdzogs nas rje btsun bcom ldan 'das rdo rje sems dpa' la thim nas de'i bdag nyid du 'gyur ro/ /de nyid cha bco lnga'i bdag nyid zla ba ste byang chub kyi sems yin la/ kun rdzob dang don dam pa'i bdag nyid byang chub kyi sems de ni/ dkyil 'khor gyi 'khor lo la sogs pa'i thabs dang / byin gyis brlabs pa'i rim pas skye bar 'gyur ro/ /de'i cha bco lngas rnal 'byor ma bco lngar yang dag par 'dod do/ /de rnams ji ltar 'gyur zhe na/ bya ba byed pa'i phyir zla ba ni byang chub kyi sems te/ A li'i gzugs kyi bde ba chen por brjod do/ /de bas na lha mo re re ni thabs shes rab kyi bdag nyid bskyed pa'o/ /kun rdzob ni 'dus pa ste/ de bas na kun+da dang 'dra zhes pa ni thabs nyid kyi gnas pa'o/ /don dam par ni dpyod pa ste/ bde ba'i gzugs shes rab ma mngon par brjod ces bya ba'o/ /bdag med ma'i dum bu ste drug pa'o// //de nas gnyis su med pa'i bdag nyid du gyur pa'i bcom ldan 'das phyag bcu drug pa'i sgrub pa brjod par bya ste/ phyag rnams ni stong pa nyid bcu drug tu bstan te/ de rnams gang yin zhe na/ nang stong pa nyid dang / phyi stong pa nyid dang / phyi nang stong pa nyid dang / stong pa nyid stong pa nyid dang / chen po stong pa nyid dang / don dam pa stong pa nyid dang / 'dus byas stong pa nyid dang / 'dus ma byas stong pa nyid dang / mtha' las 'das pa stong pa nyid dang / thog ma dang tha ma med pa stong pa nyid dang / chos thams cad stong pa nyid dang / rang gi mtshan nyid stong pa nyid dang / mi dmigs pa stong pa nyid dang / dngos po med pa stong pa nyid dang / ngo bo nyid stong pa nyid dang / dngos po med pa'i ngo bo nyid stong pa nyid ces bya ba ste/ stong pa nyid bcu drug ni phyag bcu drug tu brjod do/ /yang dag par bsdu ba bzhi ni zhabs bzhi yin la/ de rnams gang yin zhe na sbyin pa dang tshig snyan pa dang / don spyod pa dang / don mthun pa ste/ de rnams ni zhabs rnams so/ /byang chub kyi yan lag bdun ni pags pa ste/ de rnams gang yin zhe na/ dran pa dang brtson 'grus dang / dga' ba dang / shin tu sbyangs pa dang / ting nge 'dzin dang / btang snyoms dang / chos rnam par 'byed pa ste/ de rnams ni pags pa'o/ /sha la ro sreg ma dang / khrag la ri khrod ma dang / shu kra la tsaN+DalI dang / rkang dang klad pa la rigs ngan ma ste/ de rnams ni sha dang khrag dang shu kra dang / rkang dang klad par brtags so/ /rus pa rnams ni bden pa bzhi ste/ sdug bsngal dang / kun 'byung dang / 'gog pa dang / lam ni rus pa rnams su 'gyur ro/ /rnam par thar pa brgyad ni zhal brgyad de/ de rnams gang yin zhe na/ phyi'i gzugs stong par mthong ba dang / nang gi gzugs stong par mthong ba dang / dge ba dang mi dge ba'i lta bas byas pa'i stong par mthong ba dang / nam mkha' mtha' yas skye mched stong par mthong ba dang / rnam shes mtha' yas skye mched stong par mthong ba dang / ci yang med pa'i skye mched stong par mthong ba dang / 'du shes med 'du shes med min skye mched stong par mthong ba dang / 'du shes kyis rig pa'i 'gog pa stong par mthong ba zhes bya ba ste/ rnam par thar pa brgyad ni zhal brgyad do/ /'dod chags chen po las byung ba'i zhal ni g.yon pa dmar po'o/ /gti mug chen po'i bdag nyid g.yas pa ste dkar po'o/ /nyon mongs pa thams cad zhi bar byed pa'i phyir zhe sdang chen po las byung ba'i nub kyi zhal ni mche ba gtsigs pa ste bdud bzhi nyams pa'i don du'o/ /zhe sdang chen po dang gti mug chen po dang / 'dod chags chen po las 'byung ba'i gar gyi ro dgu 'bab par byed pa rtsa ba'i zhal shes par bya'o/ /steng gi zhal ni mi bzad pa'i 'jigs su rung ba'o/ /zhal gzhan ma rnams ni/ shin tu mi bzad pa dang 'jigs par mdzad pa'o/ /gar gyi ro dgu ni rol pa dang / dpa' ba dang / gshe ba dang / dgod pa dang / mi bzad pa dang / 'jigs byed dang / gshin rje dang / ngo mtshar ba dang / zhi ba ste gar gyi ro dgu dang ldan pa'o/ /log par lta ba nyams par byed pa'i phyir mche ba gtsigs pa'o/ /spyan ni sdang bar mdzad pas log par lta ba nyams pa'i phyir ro/ /rnam par thar pa gsum ni spyan gsum ste/ stong pa nyid dang / mtshan ma med pa dang / smon pa med pa'o/ /rim pa 'di nyid kyis zhal brgyad la spyan nyi shu rtsa bzhir 'gyur ro/ /sems can rnams la snying rje'i phyir de rnams dmar po'o/ /phyag rgya rnam pa lnga sangs rgyas lngar 'gyur te/ dbu la 'khor lo'i tshul gyis mi bskyod pa'o/ /phyag la phyag gdub kyi gzugs kyis rnam par snang mdzad do/ /snyan cha'i bdag nyid snyan la snang ba mtha' yas so/ /mgul la mgul nor gyi rang bzhin gyis rin dbang ngo / /ska rags kyi yon tan gyi tshul gyis sku rked la don yod grub pa'o zhes bya ste/ sangs rgyas lnga ni zhe sdang la sogs pa'i gzugs kyi bdag nyid phyag rgyar 'gyur ro/ /bdud bzhi ni phung po'i bdud dang / nyon mongs pa'i bdud dang / 'chi bdag gi bdud dang / lha'i bu'i bdud de/ 'di rnams zhabs kyis mnan par mdzad de/ tshangs pa dang / drag po dang / khyab 'jug dang / 'dod pa'i lha yin la/ gti mug dang / phrag dog dang / zhe sdang dang / 'dod chags zhes bya ba'i don to/ /mi dge ba bcus mgo bo'i phreng ba mdzad de/ de rnams gang yin zhe na/ srog gcod pa dang / ma byin par len pa dang / 'dod pas log par g.yem pa dang / brdzun du smra ba dang / tshig 'khyal pa dang / phra ma dang / tshig rtsub pa dang / gnod sems dang / mnar sems dang / log par lta ba zhes bya ba ste/ de rnams kyis phreng ba mdzad do/ /dpung pa la rdzu 'phrul gyi rkang pa bzhis dpung rgyan du mdzad de/ 'dun pa dang / brtson 'grus dang / sems dang / dpyod pa'o/ /zhabs la zhabs gdub ni 'jig rten las 'das pa'i phung po lnga ste/ tshul khrims dang / bsam gtan dang / shes rab dang / rnam par grol ba dang / rnam par grol ba'i ye shes mthong ba'o/ /log pa'i 'dod chags nyams par byed pa'i phyir/ rnal 'byor ma'i dra ba nye bar bstan to/ /skrag pa nyams par byed pa'i phyir sku la thal bas byugs par mdzad pa/ 'khor ba rang bzhin med pa'i sgom pa nyid kyis gri gug dang thod pa 'dzin pa'i phyag rgyas 'khyud pa'o/ /thabs dang shes rab kyi rang bzhin gyis thod pa rnams yongs su brjod do/ /thod pa de rnams kyi nang nas g.yas pa'i thod pa brgyad la glang po che dang / rta dang / bong bu dang / ba lang dang / rnga mo dang / mi dang / sha ra b+ha dang / byi la'o/ /de bzhin du g.yon pa'i thod pa brgyad la/ sa dang / chu dang / me dang / rlung dang / zla ba dang / nyi ma dang / gshin rje dang / gnod sbyin no/ /'di rnams kyang 'dod chags dang / zhe sdang dang / gti mug dang / phra ma dang / phrag dog dang / ngar 'dzin pa dang / nga rgyal dang / ser snar brjod do/ / gang gi ye shes bla med ni/ /thams cad dbang gis thob pa ste/ /de yi cod pan mi bskyod pa/ /bla ma dam pas 'dzin pa yin/ /ye shes snang bar gyur pa'i phyir/ /'od zer 'bar bas brtags pa'o/ /theg chen po la zhon pa ste/ /yin pa dang min pa'i brtag pa thams cad phyogs las 'das pa'i phyir ro/ /theg pa chen po de pha rol tu phyin pa drug la gnas pa'o/ /de rnams kyang gang yin zhe na/ sbyin pa dang / tshul khrims dang / bzod pa dang / brtson 'grus dang / bsam gtan dang / shes rab po/ /'di rnams kyi gnas pa med pa'i sbyor bas/ thams cad mkhyen pa nyid la bzhugs te zhes bya ba ni bcom ldan 'das theg pa chen po nyid la bzhugs pa'o/ /bcom ldan 'das phyag bcu drug pa'i dum bu ste bdun pa'o// //de nas dkyil 'khor gyi rim pa brjod par bya ste/ dkyil 'khor chen po 'di nyid ni/ /zur bzhi pos ni yang dag mdzes/ /sgo bzhi pa dang 'od zer che/ /dra ba dra ba phyed kyis brgyan/ /phreng ba sna tshogs rnga mar ldan/ /ka pa brgyad kyis nye bar mdzes/ /mar me spos dang de bzhin dri/ /phreng ma la sogs lha mos bskor/ /mgrin pa la ni mgul chings dang / /rin po che ni sna lnga dgod/ /kha rgyan gyis ni brgyan pa ste/ /bum pa brgyad kyis yang dag ldan/ /rta babs bzhis ni mdzes par gyur/ /rgyal mtshan tshogs dang ldan pa'o/ /bla re sna tshogs kyis mdzes pa/ /dkyil 'khor de ni gru bzhi pa/ /phyi rol dur khrod brgyad kyis brgyan/ /zhes bya ba'o/ /ci'i phyir dkyil 'khor zhe na/ lus dang ngag dang sems bden par byed pas na dkyil 'khor du brjod do/ /bden pa bzhi yi rnam pa yis/ /gru bzhi pa ni rnam par brtags/ /bdud bzhi po la 'jigs byed phyir/ /dri ma med pa'i sgo bzhi pa'o/ /tshangs pa'i gnas ni bzhi yi phyir/ /zur bzhi pa ni yongs su brtags/ /rnam shes brgyad ni rtog pa'i phyir/ /ka ba brgyad ni bshad pa yin/ /phyi rol du ni dkyil 'khor te/ /tshogs gru bzhi pa ru bshad/ /rnam par shes pa brgyad gang yin zhe na/ /mig gi rnam par shes pa dang / rna ba'i rnam par shes pa dang / sna'i rnam par shes pa dang / lce'i rnam par shes pa dang / lus kyi rnam par shes pa dang / yid kyi rnam par shes pa dang / nyon mongs pa can gyi rnam par shes pa dang / kun gzhi'i rnam par shes pa'o/ /thod pa brgyad ni gzugs can brgyad de/ de rnams gang yin zhe na/ sa dang chu dang me dang rlung dang gzugs dang dri dang ro dang reg bya'o/ /kha brgyad ni 'phags pa'i lam yan lag brgyad pa ste/ de rnams gang yin zhe na/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i brtson 'grus dang / yang dag pa'i dran pa dang / yang dag pa'i ting nge 'dzin no/ /rin po che sna lnga dgod pa'i bum pa rnams so/ /rin po che sna lnga ni stobs lnga ste/ dad pa'i stobs dang / brtson 'grus kyi stobs dang / dran pa'i stobs dang / bsam gtan gyi stobs dang / shes rab kyi stobs so/ /nyon mongs pa bzhi bcom par mdzad pas na ha ra ste/ nyon mongs pa bzhi ni/ 'dod chags dang / zhe sdang dang / gti mug dang / nga rgyal lo/ /ha ra phyed ni nyon mongs pa phyed zad pa'i phyir zhes bya ba ni/ dra ba dang dra ba phyed do/ /bla bres rgyas par byed pa'i sems/ /gang phyir dngos po kun la'o/ /de nas bla bre sems yin par/ /don dam bden pas bshad pa'o/ /ting nge 'dzin gyi yan lag ni ting nge 'dzin gsum ste/ dkyil 'khor rgyal po mchog dang / thig le'i rnal 'byor te/ phra mo'i rnal 'byor ro/ /ting nge 'dzin gsum po 'di la yan lag re re ni/ bsnyen pa dang nye ba'i bsnyen pa dang sgrub pa dang sgrub pa chen po ste/ ting nge 'dzin gyi yan lag ni rta babs rnams so/ /'phags pa'i lam yan lag brgyad pa ni snga ma rnams su bshad do/ /byams pa la sogs pa yi sems/ /chos kyi dran pa sbyor ba ste/ /bder gshegs ye shes smra ba ste/ /rdo rje thig skud brjod pa yin/ /chos kyi sbyin pa bzhi ste/ chos thams cad mi rtag pa dang / chos thams cad sdug bsngal ba dang / chos thams cad bdag med pa dang / zhi ba dang mya ngan las 'das pa zhes bya ba ste/ chos kyi sbyin pa bzhi'o/ /phyi rol du ni me tog dang / spos dang / mar me dang / drir 'gyur zhes bya ba'o/ /dkyil 'khor 'di nyid ni phyi dang nang du shes par bya'o/ /de ltar shes rab ma dang / lhan cig tu bde bas rdo rje sems dpa' gnyis su med par 'gyur te/ bcom ldan 'das de nyid kyis rnal 'byor ma'i 'khor lo bstan par mdzad de/ bdag med lhan cig sbyor ba yis/ /gnyis kas bde ba thob 'gyur te/ /so ma nyi med pa'i bde thob nas/ /som nyi med pa'i gzugs can yin/ /lha dang lha mo'i grong khyer du/ /rgyun mi 'chad par bde bar rol/ /shar phyogs shar gyi sgo la ni/ /dkar mo phyung nas gnas pa yin/ /srub cing bsrub pa'i sbyor ba yis/ /de nas chom rkun ma ni phyung / /phyung nas lho yi sgo la ni/ /chom rkun mas ni sgo srung byed/ /bo la kak+kol sbyor ba yis/ /de nas ro langs ma ni dbyung / /phyung nas nub kyi sgo la ni/ /drag mo'i gzugs can ma gnas pa'o/ /srub cing bsrub pa'i sbyor ba yis/ /bdud 'joms ma ni gnas pa yin/ /gnyis med snyoms par zhugs pa las/ /phyi nas g+hasma rI phyung ste/ /phyung nas byang gi sgo la ni/ /mi bzad gzugs can ma gnas so/ /gnyi ga mnyes pa'i sbyor ba las/ /phyi nas ro sreg ma phyung ste/ /phyung nas dbang ldan mtshams su ni/ /drag mo'i gzugs can ma gnas pa'o/ /srub cing bsrub pa'i sbyor ba yis/ /de bzhin me la ri khrod ma'o/ /srin mo la ni tsaN+DalI/ /rlung gi mtshams la rigs ngan ma'o/ /brdzun gyi rnam par rtog pa gcod pa'i phyir dkar mo'i phyag g.yas pa'i gri gug tu brjod do/ /phyag g.yon pa la 'khor ba'i bag chags 'joms pa'i ro hi tar 'dod do/ /chom rkun ma'i g.yas na thabs dang shes rab kyi rang bzhin gtan la 'bebs par byed pa'i cang te'u ste/ g.yon pa la gti mug gi bdag nyid phag go/ /ro langs ma'i g.yas pa la stong pa nyid kyi rang bzhin du sbal pa ste/ g.yon pa la snying rje'i bdag nyid pad+ma'i snod do/ /g+hasma rI'i g.yas pa ni zhe sdang gi bdag nyid du gyur pa sprul te/ g.yon pa la thabs dang shes rab nyid kyi rnal 'byor gyi snod do/ /ro sreg ma'i g.yas pa na ma lus bdud kyi sde glang po che'i sna 'dral bar byed pa'i phyir seng ge yongs su brjod do/ /g.yon pa la rtog pa gnyis 'dzin ma lus pa gcod par byed pas na dgra sta'o/ /ri khrod ma'i g.yas pa la rnam pa lnga'i rang bzhin nyid kyi dge slong ste/ g.yon pa la gnyis su med pa'i ye shes rtog par byed pas na 'khar gsil du brjod do/ /tsaN+DalI'i g.yas pa na log pa'i lta ba gcod par byed pas na 'khor lo ste/ mi shes pa dbyung bar byed pas na thong gshol lo/ /rigs ngan ma'i g.yas pa ni mi phyed pa'i rnam pas ye shes rtogs par byed pas na rdo rje ste/ g.yon pa ni gdug pa thams cad bsdigs par byed pas sdigs mdzub tu brjod do/ /lha mo thams cad spyan gsum pa/ /phyag gnyis pa gar phyed kyi bzhugs stabs kyis bzhugs pa/ skra gyen du gyur pa/ phyag rgya lngas mdzes par gyur pa'o/ /rim pa ji lta bas lha mo dkar mo la sogs pa'i sku mdog ni nag mo dang / btsod dang 'dra ba dang / gser zhu na ma bzhin dang / dmar po dang / in+d+ra nI la dang / chu shel dang / sngon po dang / kha dog bsres par gyur pa'o/ / 'di rnams kyi gdan ni/ tshangs pa dang / dbang po dang / nye ba'i dbang po dang / drag po dang / gshin rje dang / gnod sbyin dang / bden bral dang rlung ngo / /'das pa dang / ma 'ongs pa dang / da ltar byung ba'i dus gsum mthong ba'i phyir/ spyan gsum pa'o/ /gzugs med pa gnyis sbyar ba'i phyir rnal 'byor ma rnams la phyag gnyis gnyis so/ /gzugs med pa gnyis gang yin zhe na/ nam mkha' dang rnam par shes pa ste/ de dag ni phyag gnyis so/ /'dod chags dang / zhe sdang dang / gti mug dang / phra ma dang / tshig rtsub pa dang / phrag dog dang / ser sna dang / ngar 'dzin pa ni tshangs pa la sogs pa'i gdan rnams so/ /phyag rgya lnga ni lta ba lnga ste/ 'jig tshogs la lta ba dang / log pa'i lta ba dang / mthar 'dzin par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa'i lta ba ste/ phyag rgya lngar 'gyur ro/ /gdug pa'i sems nyams par byed pa'i phyir 'jigs su rung ba dang skra gyen du gyur pa'o/ /rnal 'byor ma 'di rnams kyis yongs su bskor ba'i bcom ldan 'das bsgom par bya zhes bya ba'o/ /dkyil 'khor gyi 'khor lo rnal 'byor ma rnams yongs su rdzogs pa'i dum bu ste brgyad pa'o/ / //da ni dur khrod rnams brjod par bya ste/ shar sgo la gtum byed ces bya ba ni dur khrod do/ /brgya byin ni zhing skyong ngo / /klu ni nor rgyas kyi bu'o/ /shing ni shi ri sha'o/ /sprin ni sgra sgrogs byed pa'o/ /me'i mtshams su dur khrod ni a ta ta'i gad mo'o/ /zhing skyong ni me'o/ /klu ni pad+ma chen po'o/ /shing ni ka rany+dza'o/ /sprin ni mthug po'o/ /lho ru dur khrod ni keng rus 'jigs byed pa'o/ /zhing skyong ni gshin rje'o/ /klu ni pad+ma'o/ /shing ni tsu ta'o/ /sprin ni 'khor byed do/ /bden bral du dur khrod ni kI li kI la'i sgra'o/ /zhing skyong ni srin po'i dbang po'o/ /klu mtha' yas so/ /shing ni brka ti'o/ /sprin ni gar byed do/ /nub tu dur khrod ni 'bar bas bskor ba'o/ /zhing skyong ni chu lha'o/ /klu ni stobs kyi rgyu'o/ /shing ni a sho ka'o/ /sprin ni mi bzad pa'o/ /rlung du dur khrod ni mun pa mi bzad pa'o/ /zhing skyong ni rlung ngo / /klu rigs ldan no/ /shing a rdza ga'o/ /sprin ni chu 'dzag pa'o/ /gnod sbyin la dur khrod ni tshang tshing ngo / /zhing skyong ni gnod sbyin no/ /klu 'jog po'o/ /shing a shwa t+tha'o/ /sprin rgyal gyur pa'o/ /dbang ldan du dur khrod ni dpal 'phel ba'o/ /zhing skyong ni dbang phyug go/ /klu dung skyong ngo / /shing ni 'ba' ta'o/ /sprin ni gtum byed gdug par gnas pa'o/ /dur khrod ni 'jigs byed 'jigs su rung ba ste/ nyal ba dang gar byed pa la sogs pa'i 'dre dang ro'i tshogs kyis bskor ba dang / shing dang shing tog rnams kyis mdzes par gyur pa'o/ /brgya byin la sogs pa'i zhing skyong rnams kyi kha dog ni ser po dang / dmar po dang / sngon po dang / nag po dang / dkar po dang / ljang gu dang / kha dog dkar ser du gyur pa'o/ /glang po che dang / sprin dang ra skyes dang ma he dang lug dang 'ug pa dang chu srin dang / sha ba dang / mi dang / glang gi gdong pa rnams te/ lus po ni mi'i rnam pa bzhin du yin la/ de rnams shing rnams kyi steng du gnas par 'gyur ro/ /klu nor rgyas kyi bu la sogs pa'i kha dog ni dkar po dang / sngon po dang / ser po dang / dmar po dang / bsres pa dang / sngon po dang / rim pa ji lta ba bzhin kha dog sngon po'o/ /sprin rnams ni sna tshogs par shes par bya'o/ /'di rnams ni 'khor lo'i phyi rol du rdo rje gur gyi mthar bri ba'am/ bsgom par bya'o/ /dur khrod brgyad po 'di rnams la mi bzad pa'i gzugs dang ldan pa grangs med pa sna tshogs pa gar gyi ro dgu dang ldan pa'o/ / kha dog sngon po dang ser po la sogs pa dang rnam pa sna tshogs bsgom par bya'o/ /dur khrod ces bya ba ni lus po ste/ dbugs byung bas na dur khrod yin la sa'o/ /de nas zhing skyong bar byed pas na zhing skyong ste rlung ngo / /bsreg pa'i bdag nyid klu ste me'o/ /khyab par byed pas na shing ste nam mkha'i mtshan nyid do/ /chu'i bdag nyid ni sprin no/ /de ltar dur khrod brgyad la zhing skyong dang / klu dang / shing dang / sprin rnams su 'gyur ro/ /'di dag ni dbus su mchog gi dga' ba gnang bar mdzad pa dga' ba dang bcas pa'i rnal 'byor ma'i tshogs kyis bskor ba'o/ / ro la sogs pa'i gar gyi ro dgu dang ldan pa'i bcom ldan 'das rdo rje mkha' 'gro bzhugs par shes par bya'o/ /rang gi ming gi yi ge las skyes pa'i rnal 'byor ma rnams kyis yongs su bskor ba'i bcom ldan 'das rnal 'byor gyi bdag nyid bsgom par bya zhes pa'o/ /dur khrod kyi dum bu ste dgu pa'o/ / //phyi dang nang gi gzugs can pa'i/ /sems kyi de dag thams cad yin/ /rnam rtog sbyor ba bral ba'i phyir/ /srid pa gsum la rol pa yin/ /phyag rgya'i rgyu ni bral ba'i phyir/ /rnal 'byor pas ni snying rje bsgom/ /stong nyid snying rje dbyer med pa/ /byang chub sems zhes dran pa'o/ /'jig rten khams ni gang zhig dang / /gzhan du sangs rgyas mthong mi 'gyur/ /sems nyid rdzogs pa'i sangs rgyas te/ /gzhan du sangs rgyas ma bstan to/ /gdol pa smyig mkhan la sogs gang / /gsod pa'i don phyir bsams pas so/ /dgyes rdor de rnams kyis thos nas/ /'grub 'gyur de la the tshom med/ /lam 'di dag ni ma shes par/ /byis pa mi shes pas g.yogs te/ /'gro drug 'khor ba'i btson khang du/ /rmongs pa de rnams 'khyams par 'gyur/ /tshig tu brjod pa las 'das pa'i/ / dbang po kun la spyod yul min/ /yid kyi rnam shes spyod yul ba/ /ye shes 'di ni rang rig pa'o/ /byin gyis brlab pa'i rim pa 'di/ /kun mkhyen ye shes bdag nyid yin/ /mtho ris mi dang sa 'og tu/ /skad cig gis ni rnam gcig 'gyur/ /rang bzhin dbye ba'i rtog pa ni/ / gnod par byed par mi nus te/ /lha min dbang po dang 'dra gang / /nges par drung du gnas gyur na/ /de la 'jigs par mi bya ste/ /seng ge'i tshul bzhin spyod par bya'o/ /chu klung gi ni rgyu ba bzhin/ /mar me'i 'od zer bzhin du ste/ /de nyid sbyor bar rtag tu ni/ /nyin dang mtshan du gzhag par bya/ /sems can thams cad rgyu ba'i phyir/ /rtag tu snying rje btung bar bya/ /sbyor btung dga' bya rnal 'byor pas/ /btung gzhan la ni chags mi bya/ /zhes bya ba'o/ /de nas dgongs pa'i skad bri bar bya ste/ chang ni smyo byed stobs ni sha /de bzhin 'dus pa ma la ya dza/ /'gro ba khyi dang 'dzag pa ro/ /rdul med bsdus pa'i rgyan yin te/ /'ongs pa bri mkhan brjod pa'o/ /cang te'u kr-i pi Tar 'dod dang / /dun dur skal ba mi ldan brjod/ /skal ldan ka leM dza rar brjod/ /DiN+Di ma ni mi reg brjod/ /pad+ma'i snod ni thod pa'o/ /zan ni 'grangs byed shes par bya/ /chod ma mA la tin+ta'o/ /dri chen bzhi mnyam brjod pa dang / /dri chu gla rtsir brjod pa'o/ /rang byung si hA lar zhes bya/ /sa bon ga bur 'dod pa dang / /sha chen sA lu las skyes brjod/ /dbang po gnyis sbyor kun du ru/ /rdo rje bo lar brjod par bya/ /pad+ma kak+kol 'dod pa'o/ /rigs kyi dbye bas phye ba yis/ / rigs ni rnam pa lnga ru bshad/ /dgongs pa'i skad ni 'di yin te/ /rigs can sangs rgyas lnga yin no/ /rdo rje rigs can rigs ngan brjod/ /de bzhin gar mkhan ma yi rigs/ /rin chen rigs can tsaN+Da lI/ /de bzhin rigs can gnyis skyes ma'o/ /las kyi rigs can tshos mkhan ma'o/ /phyag rgya de rnams grub bzangs te/ /rdo rje mchod byas brtul zhugs can/ /de rnams kyi ni shu kra btung / /de nas don la dpyad par bya/ /mang na zhes bya ba ni/ /gsum ka rmongs par gyur pa dang / /dbang po lnga po 'di dag gcig tu gyur pa'o/ /stobs ni 'dod chags la sogs pa'i sde'o/ /sha ni bsam pa rlag pa'i sems ngan no/ /ma la ya dza ni thabs dang shes rab gcig pa nyid du byed pa yin pa la de nyid 'dus pa'o/ /khyi 'di rang bzhin med pa'i lam la 'jug pa'o/ /ro ni sems yin la 'dzag pa ni shes rab kyi bsam pas 'dzag ces bya'o/ /rus pa'i rgyan ni rnam par mdzes pa'o/ /rdul med ni bag chags kyi rdul dang bral ba'i sems so/ /'ong ba ni dngos dang dngos med las 'das pa'o/ /phreM kha Na dad cang te'u ni rang bzhin med pa nyid kyis thabs dang shes rab gtan la 'bebs pa ste cang te'u 'dod do/ /skal bar mi ldan ni gdul bar dka' pa'i sems yin la/ dun+du rar brjod do/ /skal ldan ni 'od gsal ba'i sems so/ /ka liM dza ni shes rab yin la sems gang la chags par gyur pa de ka li dza ra'o/ /mi reg pa ni thugs kyis rdo rje'o/ /DiN+Di ma ni sgra'i rdo rje dang ldan pa'o/ /b+hany+dza ma ni dri ma dang bral ba'o/ / ma la tin+da na ni shes rab kyi bdag nyid yin la sems kyi dri ma bsreg pa'o/ /zan ni tshul khrims kyi sems la rnyed pa'o/ /'grangs par byed pa ni shes rab po/ /ka pA la zhes bya ba la ka zhes bya ba ni nam mkha' skyong bar byed pa'o/ /pad+ma'i snod ni shes rab la snod du gyur pa'o/ /dri chen ni byams pa la sogs pa bzhi ro mnyam pa nyid du byed pa'i phyir bzhi mnyam pa'o/ /dri chu ni snying rje'o/ /gla rtsi ni rang byung ba'o/ /sih+la ni dga' ba'o/ /shu kra ni btang snyoms so/ /ga pur ni sha chen no/ /sA lu las skyes pa ni gnyis ka'i yan lag gi cha shas kyi rtog pa gang du med de sgrib pa med pa'o/ /dbang po gnyis kyis sbyor ba ni stong pa nyid dang snying rje yang dag par sbyor ba'o/ /kun du ru ni mi phyed pa'i tshul gyis phye ba'o/ /bo la ka ni shes rab brnyes pa'o/ /pad+mo ni nam mkha'i rang bzhin du gyur pa'i sih+la'o/ /kak+kolA ni bde ba mchog tu sbyin pa zhes bya'o/ /san+di ni nye bar sdud pa ste/ a pa sha zhes bya ba ni de skyed par byed pa ste/ sa na d+h+ya ba sha zhes bya ba'o/ /de ltar bdag gis snying rje mchog gi sbyor ba de nyid snang ba ni/ sna tshogs la ni phan thogs byed pa'i bstan bcos legs par brjod nas su/ bdud rtsi'i bdag nyid gyur pa gang thob de yis 'gro gsum po/ /skad cig phyed kyis dgyes rdor go 'phang bla na med par 'gyur bar shog /dgongs pa'i dum bu bcu pa'o// //snying rjes thugs ni brlan gyur pa'i/ /dpal ldan 'jig rten mgon po yis/ /sna tshogs la ni phan pa'i phyir/ /de nyid snang bar mdzad pa yin/ /zhes bya ba'o/ /de kho na nyid kyi snang ba rdzogs so/ /kha che'i paN+Di ta so ma nA thas bsgyur te gtan la phab pa'o/ /le'u ston rgya nag gis nan gyis zhus pa'o// @##/ /rgya gar skad du/ he badzra s+ya ha sta bya bar kra ma nA ma/ bod skad du/ dgyes pa rdo rje'i lag tu blang ba'i rim pa zhes bya ba/

CLOSE WINDOW