/ rgya gar skad du/ lo ki shwa kalpa/ bod skad du/ 'jig rten dbang phyug gi rtog pa/ bcom ldan 'das 'phags pa spyan ras gzigs dbang phyug la phyag 'tshal lo/ / sangs rgyas la phyag 'tshal lo// chos la phyag 'tshal lo// dge 'dun phyag 'tshal lo// 'jig rten mgon po'i rtog pa ni/ mdor bsdus 'dir ni brjod bya ste// sangs rgyas thams cad rgyun chen po// 'dod pa'i don kun ra ba ster ba/ / dang por re zhig rig pa 'dzin pas gtsang zhing dben pa'i sa phyogs su/ hUM gis dag par byas pas nye bar 'dug cing pad+ma'i phyag rgya bcings la/ oM shA n+ya tA dz+nyA na badz+ra swa b+ha ba At+ma kohaM/ zhes brjod la/ thams cad stong pa'i rnam par bsam par bya'o// de'i rjes la/ oM tsit+ta pra ti bo d+haM ka ro mi/ de ltar brjod la/ sna tshogs pad+ma 'dab ma brgyad par bsgoms nas/ pad+ma'i steng du zla ba'i dkyil 'khor bsam par bya'o/ / zla ba'i steng du hrIH'i sngags gyur pa las bdag nyid 'jig rten dbang phyug tu bsgom par bya ste/ sems dpa'i skyil mo krung gis bzhugs pa// phyag gnyis pa/ mdog dmar ba/ mtshan du ni gos dkar mo/ de la 'khyud pa/ pad+ma dmar po kha 'byed cing gar gyi tshul can/ khab kyi phyag rgyas kha 'byed par bsgoms la/ 'di brjod par bya ste/ ji ltar pad+ma dmar po ni/ 'dod chags skyon gyis mi gos shing / de bzhin sna tshogs bag chags skyon// khams gsum rnam par dag pa'o// dbu rgyan la 'od dpag tu med pa bsgom par bya'o// de nas 'di brjod par bya ste/ / oM sarba ta thA ga ta/ kA ya bAk+Shit+ta badz+ra swa b+hA ba At+ma kohaM/ de ltar bsgoms nas phyogs brgyad du lha mo rnams bsam mo// oM bi lo ko ni/ a ba lo ki ni/ a ba lo ka ya swA hA/ shar gyi 'dab ma la ni rnam par gzigs ma zhes bya ba'i lha mo pad+ma dmar po bsnams pa'o/ / oM tA re tut+tA re tu re swA hA/ lho'i pad+ma la bcom ldan 'das ma sgrol ma pa la sha'i 'dab ma lta bu'i pad+ma bsnams pa'o// oM b+hu ri Ni ma hA tsakra birta ni hUM/ nub kyi 'dab ma la b+hu ri Ni zhes bya ba'i lha mo ut+pal sngon po lta bu'i pad+ma bsnams pa'o// oM b+h+r-i ku TI tA re tu ta ma tA hUM/ byang gi 'dab ma la khro gnyer can zhes bya ba ba'i lha mo pad+ma ser po bsnams pa'o/ / oM ma hA shri ye ma Ni pad+me hUM/ 'di ni pad+ma'i gos can shar phyogs kyi mtshams su btsod lta bu'i pad+ma bsnams pa'o// oM badz+ra pad+me shwa ra ma ra pad+me hUM/ lho phyogs kyi mtshams su pad+ma dkar po bsnams pa'o// oM bi shra pad+me hUM/ 'di ni sna tshogs kyi pad+ma ste/ nub phyogs kyi mtshams su pad+ma nag po bsnams pa'o// oM bi shwa bak+She hUM/ 'di ni sna tshog kyi zhal can te/ byang phyogs kyi mtshams su sna tshogs pad+ma bsnams pa'o// oM hrIHpad+ma narte shwa ra hUM/ ze 'bru'i dbus su 'dod chags chen po'i bcom ldan 'das spyan ras gzigs dbang phyug go// de ltar gang sgom pa dang ldan zhing ting nge 'dzin la goms par byed na dngos grub brtan por 'gyur ro/ / des sangs rgyas nyid dang 'dod pa'i longs spyod thams cad ster ro// sangs rgyas pha rol phyin grub cing / gzungs dang sa yang de bzhin no// 'jig rten kun gyi bde ston cing // so so rang nyid rjes su sgrub// sangs rgyas nyid ni byab sems nyid// rang rgyal nyid kyang de bzhin no// yid 'ong sangs rgyas go 'phang ni// / spyad mi dgos par 'grub par 'gyur// byang chub sems dang ga pur bcas// tsan dan dmar dang rab sbyar te// rdo rje chu dang yang dag ldan// sangs rgyas kun gyi bcud len yin// sbyor ba bzang po 'di yis ni/ bcud kyis len ni bde ba yang // 'grub 'gyur 'jig rten mgon po yi// gzhon zhing nad med dam bde zhing // tshe dang stobs dang brtson 'grus dang // skal bzang ye shes bla na med// skye ba 'di la 'grub pa'o/ / ma lus lus pa med pa 'grub// dbang dang dgug dang dbye ba dang // gsad dang bskrad pa la sogs pa// rengs dang phur bus gdab nyid dang // nam mkhar 'gro ba de bzhin no// sa bcu'i dbang phyug thob 'gyur zhing / / ting nge 'dzin la gnas par 'gyur// de phyir ting 'dzin ldan pa yis// rdo rje dam tshig de yi ni// rig pa dang ni bcas pa'i mchog/ 'jig rten mgon por 'grub par 'gyur/ oM hrIHpad+ma narte shwa re hUM/ rtsa ba'i sngags 'di brgya rtsa brgyad bzlas na nyin mo dang nub mo byas pa'i sdig pa nyams par 'gyur ro// yang na lnga brgya bzlas brjod byas na nad thams cad las grol bar 'gyur ro/ / yang na stong bzlas brjod byas na dus ma yin par 'chi ba med par 'gyur ro// yang na stong phrag gnyis bzlas brjod byas na thams cad kyis mchod pa'i 'os su 'gyur ro// gzhan yang stong phrag gsum bzlas brjod byas na skal ba bzang ba dang g.yang rab tu 'phel bar 'gyur ro/ / gzhan yang stong phrag bzhi bzlas brjod byas na dbul ba med par 'gyur ro// yang na stong phrag lnga bzlas brjod byas na dgra thams cad kyi snying 'khrug par byed do/ / stong phrag drug bzlas brjod byas na dgra thams cad med par 'gyur ro// stong phrag bdun bzlas brjod byas na bdud bzhi las mchog tu rgyal bar 'gyur ro/ / stong phrag brgyad bzlas brjod byas na rig 'dzin ma 'grub par 'gyur ro// stong phrag dgu bzlas brjod byas na gnod sbyin mo 'grub par 'gyur ro// khri tsho gcig bzlas brjod byas na lha dang / klu dang / mi'i bu mo rnams 'grub par 'gyur ro// stong phrag nyi shu bzlas brjod byas na bar snang la 'gro ba'i rnal 'byor ma rnams 'grub par 'gyur ro// stong phrag sum cu bzlas brjod byas na bsam pa thams cad rdzogs par 'gyur ro/ / stong phrag bzhi bcu bzlas brjod byas na nam mkha' la spyod pa'i rig pa 'dzin par 'gyur ro// stong phrag lnga bcu bzlas brjod byas na ral gri'i rig pa 'dzin par 'gyur ro/ / stong phrag drug cu bzlas brjod byas na grub pa'i rig 'dzin du 'gyur ro// stong phrag bdun cu bzlas brjod byas na sa gsum gyi bdag por 'gyur ro// stong phrag brgyad cu bzlas brjod byas na 'khor los sgyur ba'i rgyal por 'gyur ro/ / 'bum phrag gcig bzlas brjod byas na byang chub sems dpa' nyid du 'gyur ro// 'bum phrag bcu bzlas brjod byas na rang dga'i gzugs su 'gyur ro/ / bzhi cha dang bcas pa'i 'bum phrag bzlas brjod byas na sangs rgyas nyid du 'gyur ro// bye ba phrag gcig bzlas brjod byas na thams cad du rjes su 'dzin par byed pa'i nus pa can spyan ras gzigs dbang phyug lta bu 'grub par 'gyur zhing / lus dang / ngag dang / yid kyang byin gyis rlob bo// 'di ni bcom ldan 'das gsung rdo rjes gsungs pa'o// oM paN+Da ra ba si ni ba ri de hUM/ 'di ni gos dkar mo'i sngags te lan cig brjod pas sdig pa'i rigs kyi tshogs sreg par byed do// nub bdun gyi nang rol du rgyal po blon po dang bcas pa mdun na 'don dang / skye 'gro'i tshogs dang / btsun mo'i tshogs dang bcas pa dbang du 'gyur ro/ / bzlas pa tsam gyis phun sum tshogs pa thams cad kyi skal ba dang ldan par 'gyur ro// de lta bu'i rim pas 'bum phrag gcig bzlas na gang yang sangs / rgyas dang byang chub sems dpa' dang nus pa mnyam zhing / dngos su 'phags pa spyan ras gzigs dbang phyug 'grub par 'gyur ro// oM baM lo ki ni a ba lo kA ya swA hA/ 'di'i sbyor ba ni stong phrag bcu bzlas brjod byas na me long dang / mtheb chen dang / nam mkha' la sogs pa kha gsal po pra dbab pa 'grub par 'gyur ro// gang sngon byung ba dang yang da ltar dang byis 'ong ba de ston par byed do// yang na so shing la lan nyi shu rtsa gcig mngon par bsngags par byas la/ nub mo nyal ba'i dus su so shing 'chos nas mi smra bar nyal na dgos pa gang yin pa rmi lam du ston par byed/ de'ang 'khrul pa med par ston no/ / oM tA re tut+tA re tu re swA hA/ bcom ldan 'das sgrol ma 'di 'bum phrag gcig bzlas na 'jig rten gsum grub par 'gyur ro// lha'i bu mo dang / klu'i bu mo dang / mi 'am ci'i bu mo dang / gnod sbyin gyi bu mo dang / mi'i bu mo ste/ 'di rnams kyi nang nas gang 'dod pa de'i chos 'byung du gur kum dang / rgya skyegs dang / rang byung gi me tog dang / byang chub kyi sems dang yang dag par ldan pas rtsibs drug pa shin tu rno ba'i 'khor lo dmar po 'khor bzhin pa rnam par bris pa bsam la/ / chos 'byung de sgrub pa pos ri sul chu ngogs gsang ba'i gnas su bsam par bya'o// de'ang myos shing sgrub pa po'i steng du lhung ba'i rnam pa bsgom par bya'o/ / de bkug la rang la chu shing nor dang bcas pa dbang du 'gyur bar blta'o zhes bya'o// yang na lha dang / klu dang / lha ma yin dang / mi 'am ci dang / rig pa 'dzin pa dang / gnod sbyin dang / 'khor los sgyur ba dang / blon po dang / skyes bu 'am/ gang 'dod pa de dmar por rnam par bsams la/ de'i snying khar rdo rje lcags kyu 'od 'bar ba'i 'phreng ba 'khrug pa'i lcags kyus 'bigs bzhin pa dang / zhags pas rked pa nas bcings la 'gugs bzhin pa 'dod pas myos par gyur pas rab tu gsal por bsam par bya'o// bdag nyid nor dang bcas pa 'gugs shing dbang du 'gyur ro zhes bya'o/ / oM pu ri Ni ma hA tsakra brti ni hUM/ 'di'i sbyor ba ni dri chen dang rdo rje chu la sogs pas dkyil 'khor byas la/ ji ltar rnyed pa'i me tog gis mnyam par mchod la// de na gnas pa'i sgrub pa pos gling ngam/ / gling gzhan dang / grong khyer dang / grong dang / yul 'khor gyi rgyal por bsam zhing bzlas par bya'o// des bdag po nyid du 'gyur zhing longs spyod pa la longs spyad nas bde ba can gyi 'jig / rten gyi khams su skye ba thob par 'gyur ro// oM b+h+r-i ku TI tA re tu ta ma ta hUM/ lha mo khro gnyer can zhes bya ba 'di ni/ dgra'i rkang rjes kyi rdul blangs la/ dug dang / tshwa dang / ske tshe dang / khrag dang / chu bo'i 'gram gnyis kyi sa dang dri chen rdo rje chus bsnos la gzugs brnyan byas la/ mi'i rus pa'i rang bzhin gyi phur bus tshigs dang gnad kun la btab la/ thod pa kha sbyar gyi nang du bzhag ste dur khrod kyi me la gdung bar bya'o/ / zhag bdun du sbyor ba byas pas 'chi bar 'gyur ro// gal te sems la sdig pa med par gyur na zhag nyi shu rtsa gcig gis ni sangs rgyas kyang 'chi bar 'gyur ro// oM ma hA shri ye ma Ni pad+me hUM/ / lha mo 'di la dri dang / me tog dang / mar me dang / bsod snyoms kyi zas kyis so sor mchod la bzlas pa byas na thams cad du bsrungs par 'gyur ro// yul chos kyi rtsod pa las rgyal bar 'gyur ro/ / spun ras gzigs dbang phyug dang mnyam par 'gyur ro// nor chen po'i bdag por 'gyur ro// yang na pad+ma stong phrag bcu sbyin sreg byas na rgyal por 'gyur ro// oM badz+ra pad+me shwa ri ma ra pad+me hUM/ rdo rje pad+ma'i dbang phyug ma 'di yid kyis bzlas na dbang dang dgug pa la sogs pa byed do// la na bdun mngon par bsngags te gtsug pud mdun na rang srung zhing rims dang lkog nad dang / nad thams cad dang / mtshon dang / me dang / rkun po dang / seng ge dang / glang po che dang / sbrul dang / 'ching ba dang / rgya mtsho dang / sha za'i nad stong phrag gcig bzlas pas zhi bar 'gyur ro/ / lan cig gi las kyis brjed byed kyi gdon dang / zad byed dang / skyug pa dang / bri bar dka' ba dang / sgom par dka' ba'i gdug pa can gyi sems can thams cad nyams par 'gyur ro/ / 'bum phrag gcig bzlas na lus 'phel zhing skal ba bzang ba dang / lus gzhon zhing nad med par byed cing dus ma yin pa'i 'chi ba nyams par byed do// yang na klu thab khung du bris la der dug dang / ske tshe dang / tsha ba'i sbyin sreg bya zhing / klu'i ming dang spel bas 'bum phrag gcig sbyin sreg byas na char chen po phab nas mu ge med par 'gyur ro// oM bi shwa pad+me hrIH/ sna tshogs pad+ma 'di ni rmongs pa dang / rengs pa dang / mnan pa dang / phur bus gdab pa dang / gzhan gyi nor 'phrog pa dang / phur bu dang / mig 'phrul dang / ngo mtshar dang / mi mtho bar byed pa dang / phug tu 'jug pa dang / nam mkha' la 'gro ba dang / lcags sgrogs gcod pa dang / ril por dgug pa gang dang gang yin pa rgyud las bstan pa dang / rgyud gzhan dang yang dag par ldan pa'i las thams cad byed do/ / lus dang / ngag dang / yid gsum gyi dngos grub ster te/ bcom ldan 'das 'phags pa spyan ras gzigs dbang phyug 'grub cing gang 'dod pa'i las thams cad ni 'grub par 'gyur ro zhes bya'o/ / oM bi shwa pad+me hUM/ sna tshogs rdo rje zhes brjod pa'i lha mo 'dis ni ngag gi dngos grub ster ro// tshigs shad mkhan du byed cing gzhan gyi ngag rengs par byed do/ / rang nyid srung ba dang gzhan yang srung bar 'gyur ro// rang skal ba bzang zhing gzhan yang skal ba bzang po'i rang don dang gzhan don byed do// ji ltar 'dir ni 'phags pa spyan ras gzigs dbang phyug sems can gyi don la spros zhing brtson pa de bzhin du/ 'dir bcom ldan 'das mas dmyal ba dang / yi dgas dang / byol song gi skye gnas su gtogs pa'i sems can rnams sgrol bar byed do/ / bde bar gshegs pa'i bstan pa la dad pa rnams la ma nyid kyis srung ngo zhes thugs kyi rdo rje de bzhin gshegs pas gsungs so// de ltar rtog pa'i rgyal po bsdus pa rab tu bstan to// sems brtan rtog pa med pa yi/ / blo dang ldan pas 'grub par 'gyur// gang zhig spyod lam bstan pa yi// sangs rgyas kun rgyu ji lta bar// de ltar 'dir ni rab sbyar nas// de nas rtag pa'i go 'phang 'grub// ji ltar 'dod par gnas byed cing / / kun la longs spyod kun byed ltar// ji ltar 'dod pa'i snying rjes spyod// ji ltar 'dod pa'i spyod pa yis// 'dug pa 'am ni langs kyang rung // 'chag pa 'am ni gang dang de/ / rgod pa 'am ni brjod pa 'am// gang de ji ltar don bzhin no// dkyil 'khor du ni ma zhugs pa'am// sgrib pa kun dang ldan pa yang // rang mos lha yi rnal 'byor bdag/ bsod nam chung ba'ang 'grub par 'gyur/ / 'di yis sangs rgyas thams cad nyid// thams cad mkhas pa nyid dang ni// thams cad rdo rje 'chang nyid kyang // skye ba 'di la 'grub par 'gyur// yang gsung pa rnal 'byor dag ni gzugs brnyan gyi/ / bcos ma'i sku las 'gyur ba min// byang chub sems chen la brtson na// rnal 'byor dag ni de lha yin// khrag chen po dang ga pur bcas// tsan dan dmar dang bsres pa ni/ / tshogs kyi nang du zhugs pa na// kun las mchog gyur bcud len no// sbyor ba bzang po 'di yis ni// bcud kyis len ni sla ba ru// dpal rdo rje sems dpa'i tshe bzang dang // nad med bde ba bzang po 'thob// grub pa'i mtshan nyid ji ltar gsungs// sangs rgyas pha rol phyin pa dang // gzungs dang sa yang de bzhin 'grub// bde ston thams cad thob 'gyur zhing // rang nyid so so rjes su 'grub/ / sangs rgyas thams cad mnyam sbyor bas// sangs rgyas thams cad nyid du 'gyur// sangs rgyas kun gyi dngos nyid kyang // sangs rgyas kun ni rab 'grub 'gyur// gzhan yang rnal 'byor gyi spyod pa byed par 'dod cing sems yongs su dag pa med na de'i tshe thang sku'i sgrub pa bshad de/ / bsnyen gnas dang ldan zhing smyung bar gnas pa'i lha bzos/ tshon sna ma 'dres par ras gsar pa de'ang rang rang gi kun tu khru re'i tshad kyis bcom ldan 'das 'phags pa spyan ras gzigs dbang phyug bri bar bya ste/ sna tshogs kyi pad+ma 'dab ma brgyad pa/ ze'u 'bru'i dkyil du zla ba'i dkyil 'khor gyi dbus su bcom ldan 'das mdog dmar ba/ mi bskyod pa'i dbu rgyan can/ zhal gsum pa/ zhal gyi gtso bo ni dmar ba ste 'dod chags chen po nyid kyi phyir ro// g.yas pa gnag pa ste zhe sdang chen po nyid kyi phyir ro// g.yon pa dkar ba ste gti mug chen po nyid kyi phyir ro/ / phyag drug pa bya'o// g.yon pa'i phyag gcig gis gos dkar mo'i mgrin pa nas 'khyud pa dang / pad+ma dmar po bsnams pa dang / g.yon pa gnyis kyis me tog gi gzhu bsnams pa'o/ / g.yas pa gsum du khab kyi phyag rgyas pad+ma kha 'byed pa dang / me tog gi mda' dang / lcags kyu bsnams pa'o// sems dpa'i skyil mo krung gis gnas par bya'o// shar gyi 'dab ma la rnam par gzigs ma mdog dkar mo pad+ma dmar po dang rdo rje phyag na bsnams pa'o/ / lho phyogs kyi 'dab ma la lha mo sgrol ma ljang khu rgya skyegs kyi shing gi lo ma dang rin po che phyag na bsnams pa'o// nub phyogs kyi 'dab ma la b+hu ri ni ser mo ut+pal sngon po dang 'khor lo bsnams pa'o// byang phyogs kyi 'dab ma la khro gnyer can pad+ma dkar ser lta bu pad+ma ser po dang ral gri phyag na bsnams pa'o// shar phyogs kyi mtshams su pad+ma'i gos can ma gser lta bu'i mdog btsod lta bu'i pad+ma bsnams pa'o// lho phyogs kyi mtshams su rdo rje pad+ma'i dbang phyug ma nam mkha'i mdog can dkar po pad+ma dang shel gyi 'phreng ba bsnams pa'o/ / nub phyogs kyi mtshams su sna tshogs kyi pad+ma ston ka'i zla ba lta bu dkar ser gyi mdog pad+ma nag po dang po ti phyag na bsnams pa'o// byang phyogs kyi mtsham su sna tshogs rdo rje ma sna tshogs kyi mdog can du byas la/ / sna tshogs kyi rdo rje dang sna tshogs kyi pad+ma bsnams pa'o// de ltar pad+ma la bkod cing bris la/ sgeg mo la sogs pa rnams ni mtshams su'o// dzaHhUM baM hoH'i yi ge las yang dag par byung ba'i lcags kyu dang / zhags pa dang / lcags sgrog dang / dril bu rnams ni shar la sogs pa'i phyogs rnams su'o// yang thang sku gzhan brjod par bya ste/ ston ka'i zla ba lta bu'i dkar ser gyi bcom ldan 'das g.yas na skud pa dang / dbyug pa dang / rtse gsum dang / mchod sbyin pa'i phyag can/ g.yon na pad+ma dang / ril ba spyi blugs dang / zhags pa dang / thams cad mkhyen pa'i dam tshig gi po ti bsnams pa'i phyag can/ stag gi pags pa'i sham thabs 'chang ba/ sbrul mchod phyir thogs pa/ ral pa'i cod pan la 'od dpag med bzhengs pa 'am skyil krung byed pas gnas pa dbu rgyan du byas pa'o/ / de'i g.yas phyogs kyi cha ru sgrub pa po mchod yon gyi snod dang bdug spos kyi snod lag pas gzung bar bya'o// gzhan yang bcom ldan 'das phyag gnyis pa ri gru 'dzing la gnas shing seng ge'i khri la bzhugs pa/ g.yon pa sa la gnas shing zhabs g.yas pa pad+ma'i steng gi gdam stengs su bzhugs pa'o// phyag re re na 'phreng ba bsnams par sems pa pos 'phreng ba'i 'og tu 'dren pa'i tshul 'dis bsam par bya ba ni sems pa lta bur gnas pa zhes bya'o/ / cho ga gzhan yang bcom ldan 'das dkar zhing dmar ba phyag bcu pa ri dgas seng ge'i gdan la pad+ma'i steng du skyil krung phyed pas bzhugs pa/ g.yas na 'phreng ba bsnams pa'o// seng ge dang / glang po che dang / me dang / sbrul gyis 'jig pa rnam las grol ba'i cha byad can no// g.yon na pad+ma dmar po sdong bu gnyis pa steng du po ti can te/ rku ma dang / lcags sgrog gis bcings pa dang / mtshon dang / thog chen po dang / sha zas za ba rnams sgrol ba'i cha byad can no// gnas de brgyad du sgrub pa po rgyan thams cad kyis brgyan pa/ yan lag thams cad yongs su rdzogs pa/ sngon bzhin du langs pa'am 'dug par bsam par bya'o// gzhan yang cho ga ni zla ba'i dkyil 'khor gyi dbus su bcom ldan 'das sna tshogs kyi gzugs 'chang ba/ dbu bcu gsum pa/ spyi bo'i mgo bo ni ljang khu'i rta zhal lo// yang na zhi ba sangs rgyas shAkya thub pa'i zhal lo// phyag brgya pa'i bcom ldan 'das 'di ni sna tshogs kyi mtshon cha bsnams pa'o/ / yang na zhal brgya po phyag stong pa'ang bya'o// kha cig tu rdo rje skyil mo krung gis gnas pa 'am bzhengs pa'ang bya'o// tsam pa lta bu'i dkar ser gyi bcom ldan 'das so// thang sku de kun gyi g.yas phyogs kyi bar du sgrub pa po me tog dang / mchod yon gyi snod dang / bdug spos kyi snod lag pa na gzung bar bya'o// de rnams kyi dbu la dbu rgyan du 'od dpag med pa 'am/ chos kyi rgyal po'i mchod rten bri bar bya'o// 'di ni thang sku'i cho ga'o// thang sku'i mdun du rtsa ba'i sngags ji lta ba 'dod pa de bzla zhing bsam gtan yang byas nas/ mchod pa rnam pa lngas mchod la/ mchod yon snod dang / yongs su gang ba'i bdud rtsi lta bu'i zas dang / sgron ma'i zas la byas nas mchod yon byin te sngags gang 'dod pa de bzlas pa byas na/ de la gsungs pa'i dngos grub tu 'gyur ro// gsang ba po ni sngags 'di nyid/ kha cig la yang mi sbyin no// blo ldan sems can don brtson pa'i// sems brtan pa la sbyin par bya// mchod rten las byed nyid la ni// blo ldan 'bad pas sbyin par bya// rang nyid dang ni nor dag gis/ / bla ma la rtag gus par bya// rdo rje slob dpon rnal 'byor la// mchog tu gyur pa'i yon yang dbul// gang dang gang ni gtang dka' ba// mchog tu gyur par 'dir ni sngags// chung ma sring mo dang yang ni bu mo dang ni tsha mo dag/ bu mo rgyan kun brgyan par bya'o// glang chen rta dang shing rta dang // phyogs dang grong khyer rgyal srid dang // yul 'khor rgyal srid ldan pa dang // rin chen sna tshogs dag kyang ni// gzhan yang rdo rje slob dpon dbul/ / rdo rje slob dpon dgyes gyur pa// thams cad rab sbyin dbul bar bya// 'jig rten dbang phyug gi rtog pa rdzogs so// / rgya gar gyi mkhan po dzem+b+ha la dang bod kyi lo tsa ba dge slong ba ris bsgyur cing gtan la phab pa/

CLOSE WINDOW