/ // 'phags pa zhal bcu gcig pa'i rig sngags kyi snying po zhes bya ba'i gzungs/ sangs rgyas dang byang chub sems dpa' thams cad la phyag 'tshal lo/ / 'di skad bdag gis thos pa dus gcig na/ bcom ldan 'das mnyan yod 'od ma'i myu gu'i dkyil 'khor na/ dge slong gi dge 'dun chen po stong nyis brgya lnga bcu dang / byang chub sems dpa' sems dpa' chen po tshad med grangs med pa dang thabs cig tu bzhugs te/ byang chub sems dpa' byams pa ni gtso bor gyur to// gzhan yang de'i tshe bcom ldan 'das dge slong dang / dge slong ma dang / dge bsnyen dang / dge bsnyen ma tshad med pa snyed dang / lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / grul bum dang / sha za dang / mi dang / mi ma yin pa la sogs pa'i 'khor mang po dag gis yongs su bskor nas mchod cing rim gror byas/ bkur stir byas/ bla mar byas te/ gsang sngags brjod pa la chos ston par mdzad do// de nas byang chub sems dpa' sems dpa' chen po spyan ras gzigs dbang phyug drang srong rig sngags 'chang bye ba khrag khrig brgya stong tshad med pa dag gis yongs su bskor te/ bcom ldan 'das kyi spyan sngar lhags nas/ bcom ldan 'das kyi zhabs gnyis la mgo bos phyag byas te g.yas phyogs su lan gsum bskor ba byas nas phyogs gcig tu 'khod de/ bcom ldan 'das la 'di skad ces gsol to// bcom ldan 'das bdag la rig sngags kyi snying po gdong bcu gcig pa zhes bgyi ba mthu chen po dang ldan pa sangs rgyas bye ba phrag bcu gcig gis gsungs pa mchis te/ deng bdag gis sems can thams cad la sman cing bde bar bgyi ba dang / bro nad thams cad zhi bar bgyi ba dang / sdig pa thams cad sbyang ba dang / bkra mi shis pa thams cad bzlog par bgyi ba dang / rmi lam ngan pa thams cad dgag pa dang / dus ma lags par 'chi ba thams cad bzlog pa dang / ngan sems can rnams gdul zhing dang ba thob par bgyi ba dang / mya ngan gyi sdug bsngal dang ldan pa dag bde ba thob par bgyi ba dang / khon dang bcas pa rnams 'dun par bgyi ba dang / bdud dang gdon bgegs rnams zhi bar bgyi ba dang / sems kyi smon pa rnams mngon par bsgrub par bgyi ba'i slad du bshad par bgyi'o// bcom ldan 'das bdag gis ni 'jig rten lha dang bcas pa/ bdud dang bcas pa/ tshangs pa dang bcas pa/ dge sbyong dang bram zer bcas pa la sogs pa gang gis kyang rig sngags 'dis bsrung bar bgyis pa dang / 'di len pa dang / 'dzin pa dang / klog pa dang / bdon pa dang / yi ger bris nas spel bar bgyid pa de dag la bgegs bgyid pa dang / bdud kyi bar chad dang / mtshon cha dang / dbyig pa dang / dug dang / byang stems kyis gnod pa bgyid par 'gyur ba ma mchis lags so// bdag gis rig sngags 'di gnas pa'i phyogs su ring yang rung nye'ang rung ste/ ji tsam du mtshams bkum pa las 'das nas gnod pa bgyid du mchi ba ma mthong lags te/ sdig pa'i las nges par rnam par smin par gyur pa ni ma gtogs lags so// bcom ldan 'das des dngos po 'di nges par de lta bu lags par rig par bgyis nas mngon par yid ches pas blang bar bgyi'o/ / rnam par rtog pa ni mi bgyi/ de ltar bgyis na gdon bgegs thams cad thag ring du spong bas nye bar mchi zhing glags rnyed par mi 'gyur lags so/ / rig sngags kyi snying po 'di ni sangs rgyas thams cad kyis mtshungs par bsngags pa brjod cing / mtshungs par rjes su thugs rangs par mdzad pa lags so/ / de bzhin gshegs pa thams cad kyis yongs su bzung ba mdzad pa lags so// bcom ldan 'das bdag gis mngon par dran lags te/ bskal pa g ang+gA'i klung gi bye ma snyed kyi sngon rol na de bzhin gshegs pa dgra bcom pa yang dag par rdzogs pa'i sangs rgyas pad+ma brgya'i spyan thogs pa mi mnga' ba'i gtsug tor yon tan rab tu rgyas pa'i 'od zer gyi rgyal po zhes bgyi ba 'jig rten du byung ste/ bdag de'i tshe drang srong du gyur pas bcom ldan 'das de las rig sngags 'di mnos lags so// rig sngags 'di 'thob pa'i tshe phyogs bcu'i sangs rgyas rnams kyang mthong bar gyur/ mi skye ba'i chos kyi bzod pa'ang thob par gyur pas/ rig sngags 'di mthu chen po dang ldan par rig par bgyi lags so// de lta bas na yongs su dang ba dang ldan pa'i rigs kyi bu 'am/ rigs kyi bu mo la sogs pa dag gis rig sngags 'di len pa dang / 'dzin pa dang / klog pa dang / 'don par 'tshal na gus pas sems rtse gcig tu dran pas bcangs te rtag par nang par langs nas chos bzhin du yongs su dag par bgyis te/ rig sngags 'di lan brgya rtsa brgyad bzlas brjod bgyis na tshe 'di nyid la phan yon rnam pa bcu 'thob par 'gyur lags so// bcu gang zhe na/ rtag par lus la bro nad ma mchis par 'gyur ba dang / rtag par phyogs bcu'i sangs rgyas rnams kyis yongs su gzung bar 'gyur ba dang / nor dang / rin po che dang / gos dang / zas pas pa ma mchis pa dag la longs spyod par 'gyur ba dang / dgra thams cad thul zhing 'jigs pa ma mchis par 'gyur ba dang / ya rabs btsun pa rnams kyis bkur zhing gsod por smra bar 'gyur ba dang / dug dang 'dre gdon gyis mi tshugs shing gnod pa bgyid par mi 'gyur ba dang / mtshon cha dang dbyig pa thams cad kyis gnod pa bgyid par mi 'gyur pa dang / chab kyis/ 'gum pa'i dus bgyid par mi 'gyur ba dang / zhugs kyis 'gum pa'i dus bgyid par mi 'gyur ba dang / dus ma lags par 'gum pa'i dus bgyid par mi 'gyur ba dag lags so// gzhan yang yon tan gyi sman yon rnam pa bzhi thob par 'gyur te/ 'gum pa'i dus kyi tshe sangs rgyas rnams mthong bar 'gyur ba dang / nams kyang ngan 'gro rnams su lhung bar mi 'gyur ba dang / yang ba ma spangs pas 'gum pa'i dus bgyid par mi 'gyur ba dang / 'jig rten gyi khams bde ba can du skye bar 'gyur ba dag lags so// bcom ldan 'das bdag gis mngon par dran lags te/ 'di nas bskal pa gang+gA'i klung bcu'i bye ma snyed dag gi snga rol dag gi yang ches snga rol na de bzhin gshegs pa dgra bcom pa yang dag par rdzogs pa'i sangs rgyas man da ra ba'i bsung zhes bgyi ba 'jig rten du byung ste/ de'i tshe bdag khyim bdag chen po zhig tu gyur pas sangs rgyas de la rig sngags 'di mnos lags te/ rig sngags 'di thob ma thag tu bskal pa bzhi khri'i 'khor ba bsnyil lags so/ / rig sngags 'di klog pa dang 'dzin pa dag gis gzhan yang sangs rgyas rnams kyi thugs rje chen po'i ye shes kyi snying po dang / byang chub sems dpa' thams cad kyi rnam par thar pa'i chos kyi sgo thob par 'gyur te/ de'i mthu stobs kyi dbang gis gang dag btson ra dam por chud pa dang / mtshon char sprul ba dang / 'gum pa la thug pa dang / chab dang / zhugs dang / rlung dang / chom rkun dang / dug dang / byang stems dang / mi dang / mi ma lags pa la sogs pa'i sdug bsngal rnam pa sna tshogs kyi bgegs thams cad las yongs su skyob par bgyid pa lags so// bdag ni 'di'i dbang gis sems can thams cad kyi gnas dang / skyabs dang / yongs su skyob pa dang / yongs su srung ba dang / dbugs 'byin pa dang / gling dang / khang khyim du gyur pa lags so// rig sngags 'dibi mthus gnod sbyin dang srin po ma rungs pa la sogs pa thams cad yongs su bsdu zhing yongs su bzung nas sngar byams pa'i sems dang snying rje'i sems bskyed du sprul nas/ de'i rjes la bla nam mchis pa yang dag par rdzogs pa'i byang chub la 'god par bgyid lags so/ / bcom ldan 'das bdag gi rig sngags 'di'i gzi byin chen po'i mthu dang ldan pas gang la la zhig gis lan cig tsam bzlas brjod bgyis na'ang rtsa ba'i ltung ba bzhi dang mtshams ma mchis pa lnga yongs su 'byang bar 'gyur na/ ji skad bstan pa bzhin du sgrub pa lta smos kyang ci 'tshal lags/ gang dag sangs rgyas bye ba khrag khrig brgya stong du ma las dge ba'i rtsa ba bskrun pa rnams kyis deng gdod rig sngags 'di thos par 'gyur lags na/ len pa dang / 'dzin pa dang / ji skad bstan pa bzhin du sgrub pa lta smos kyang ci 'tshal lags/ gang la la zhig gis gdugs mtshan du rig sngags 'di klog pa dang / 'don pa dang / 'dzin par bgyid na bdag gis de dag gi smon pa ci mchis pa yid bzhin du 'grub par bgyid lags so/ / gang la la zhig gis zla ba phyed cing tshes bcu bzhi'am bco lnga la smyung bar bgyis te/ sdom pa yang dag par blangs nas chos bzhin du yongs su dag par bgyis te/ sems rtse gcig tu bdag rjes su dran par bgyis nas rig sngags 'di bzlas brjod bgyis na/ bskal pa bzhi khri'i 'khor ba bsnyil bar 'gyur lags so// bcom ldan 'das bdag ni rig sngags 'di gi dbang gis ming btsun zhing thos par dka' bar gyur lags te/ gang la la zhig gis sangs rgyas bye ba khrag khrig brgya stong du ma'i mtshan nas brjod cing yid la bsams pa dang / gzhan yang 'ga' zhig gis skad cig tsam du bsam pa thag pa nas bdag gi ming nas brjod cing rjes su dran par gyur na/ de nyid kyi yon tan mnyam zhing mtshungs lags so// bdag gi ming nas brjod pa de dag thams cad kyang phyir mi ldog pa'i sa 'thob par 'gyur/ bro nad thams cad dang bral bar 'gyur/ sgrib pa thams cad dang 'jigs pa thams cad las thar par 'gyur/ lus dang / ngag dang / yid kyis nongs pa zhu byang bar 'gyur na/ bdag gis bstan pa'i rig sngags 'di len pa dang / 'dzin pa dang / klog pa dang / 'don pa dang / ji skad bstan pa bzhin du sgrub pa lta smos kyang ci 'tshal lags te/ gang zag de dag ni bla na ma mchis pa'i byang chub lag mthil na mchis pa bzhin du khong du chud cing legs par 'gyur bar rig par bgyid lags so// de nas bcom ldan 'das kyis/ byang chub sems dpa' spyan ras gzigs dbang phyug la legs so legs so zhes bsngags pa brjod nas/ rigs kyi bu khyod kyis sems can thams cad la de lta bu'i byams pa dang snying rje'i bsam pa bskyed nas rig sngags chen po 'di rnam par phye ste bstan pa yin pas/ khyod thabs 'di'i dbang gis sems can thams cad kyi nad kyi sdug bsngal dang / sgrib pa dang / bgegs dang / 'jigs pa dang / lus dang / ngag dang / yid kyi nyes pa las yongs su skyob pa thar par byas nas sems can thams cad bla na med pa yang dag par rdzogs pa'i byang chub kyi bar la rnam par 'jog pa yin te/ rigs kyi bu dbang rjes su yi rang nas khyod kyi rig sngags yongs su gzung gi/ khyod kyis spros shig/ de nas byang chub sems dpa' sems dpa' chen po 'phags pa spyan rag gzigs dbang phyug stan las langs te/ bla gos phrag pa gcig tu gzar nas/ pus mo g.yas pa'i lha nga sa la btsugs te/ bcom ldan 'das la 'di skad ces gsol to// rig sngags 'di 'don pa gang lags pa nges 'di skad du/ dkon mchog gsum la gus par phyag 'tshal lo// 'phags pa de bzhin gshegs pa ye shes rgya mtsho rnam par snang mdzad bkod pa'i rgyal po la gus par phyag 'tshal lo// de bzhin gshegs pa dgra bcom pa yang dag par rdzogs pa'i sangs rgyas thams cad la gus par phyag 'tshal lo// byang chub sems dpa' sems dpa' chen po 'phags pa spyan ras gzigs dbang phyug thugs rje chen po dang ldan pa la gus par phyag 'tshal lo/ / zhes brjod par bgyi lags so// tad+ya thA/ oM d+ha ra d+ha ra/ d+hi ri d+hi ri/ d+hu ru d+hu ru/ ir+d+he baT+Te/ tsi le tsa le/ pra tsa le prats+ra laM/ ku su me ku su me ba ra/ i li mi li/ tsi ti tsi ti/ dz+wa la ma hA pa na ya shud d+ha tA swA hA/ ma hA kA ru Ni kA ya swA hA/ bcom ldan 'das 'di ni rtsa ba'i rig sngags lags te/ gang la la zhig gis rjes su dran zhing bzlas brjod bgyis na/ gong du bstan pa lta bu'i yon tan khyad par du 'phags pa dag 'thob par 'gyur lags so// dkon mchog gsum le gus par phyag 'tshal lo// babags pa de bzhin gshegs pa ye shes rgya mtsho rnam par snang mdzad bkod pa'i rgyal po la gus par phyag 'tshal lo// de bzhin gshegs pa dgra bcom pa yang dag par rdzogs pa'i sangs rgyas thams cad la gus par phyag 'tshal lo/ / byang chub sems dpa' sems dpa' chen po 'phags pa spyan ras gzigs dbang phyug thugs rje chen po dang ldan pa la gus par phyag 'tshal lo/ / tad+ya thA/ ha ha ha ha/ i li mi li/ tsi li pi li/ khi li hi le swA hA/ bcom ldan 'das 'di ni chab dang gos la gdab pa'i sngags lags te/ gang la la zhig dkyil 'khor du 'jug par 'tshal na sngar khrus bgyis te/ de'i rjes la sngags 'dis chab la lan bdun btab ste lus la gtor bar byas nas bsang bar bgyi'o// gzhan yang sngags 'dis lan bdun btab ste gzod bgo bar bgyi lags so/ / dkon mchog gsum la gus par phyag 'tshal lo// 'phags pa de bzhin gshegs pa ye shes rgya mtsho rnam par snang mdzad bkod pa'i rgyal po la gus par phyag 'tshal lo// de bzhin gshegs pa dgra bcom pa yang dag par rdzogs pa'i sangs rgyas thams cad la gus par phyag 'tshal lo/ / byang chub sems dpa' sems dpa' chen po 'phags pa spyan ras gzigs dbang phyug thugs rje chen po dang ldan pa la gus par phyag 'tshal lo/ / tad+ya thA/ d+hu ru d+hu ru/ ha ha ha ha swA hA/ bcom ldan 'das 'di ni pog spos dang mar me la gdab pa'i sngags legs te/ dkyil 'khor du zhugs nas pog spos bsregs te mchod pa bgyid pa'i tshe sngar sngags 'das pog spos la lan bdun btab ste gdong bsreg par bgyi'o/ / mar me spar bar 'tshal na yang sngar sngags padis 'bru mar la lan bdun btab ste gdod mar me spar bar bgyi lags so/ / dkon mchog gsum la gus par phyag 'tshal lo// 'phags pa de bzhin gshegs pa ye shes rgya mtsho rnam par snang mdzad bkod pa'i rgyal po la gus par phyag 'tshal lo/ / de bzhin gshegs pa dgra bcom pa yang dag par rdzogs pa'i sangs rgyas thams cad la gus par phyag 'tshal lo// byang chub sems dpa' sems dpa' chen po 'phags pa spyan ras gzigs dbang phyug thugs rje chen po dang ldan pa la gus par phyag 'tshal lo/ / tad+ya thA/ si ri si ri/ d+hi ri d+hi ri/ si ri d+hi ri swA hA/ bcom ldan 'das 'di ni me tog dang / byug spos dang / 'phrang ba la gdab pa'i sngags lags te/ dkyil 'khor du zhugs nas me tog dang / byug spos dang / 'phreng ba dag gis mchod pa bgyid pa'i tshe sngar sngags 'dis me tog la lan bdun btab ste sku gzugs la gtor bar bgyi'o/ / gzhan yang sngags 'dis byug spos la lan bdun btab ste sku gzugs la byug par bgyi'o// gzhan yang sngags 'dis 'phreng ba la lan bdun btab ste sku gzugs la brgyan par bgyi lags so// dkon mchog gsum la gus par phyag 'tshal lo// 'phags pa de bzhin gshegs pa ye shes rgya mtsho rnam par snang mdzad bkod pa'i rgyal po la gus par phyag 'tshal lo// de bzhin gshegs pa daH/ bcom pa yang dag par rdzogs pa'i sangs rgyas thams cad la gus par phyag 'tshal lo// byang chub sems dpa' sems dpa' chen po 'phags pa spyan ras gzigs dbang phyug thugs rje chen po dang ldan pa la gus par phyag 'tshal lo/ / tad+ya thA/ sa te sa te/ si ti si ti/ su d+hu su d+hu swA hA/ bcom ldan 'das 'di ni sangs rgyas la mchod cing dbul ba'i zhal zas la gdab pa'i sngags lags te/ gang la la zhig zhal zas dang / me tog dang / 'bras bu la sogs pas sangs rgyas la mchod pa'i tshe sngar sngags 'dis lan nyi shu rtsa gcig bzlas te btab nas de'i rjes la gdod mchod pa bgyi lags so/ / dkon mchog gsum la gus par phyag 'tshal lo// 'phags pa de bzhin gshegs pa ye shes rgya mtsho rnam par snang mdzad bkod pa'i rgyal po la gus par phyag 'tshal lo// de bzhin gshegs pa dgra bcom pa yang dag par rdzogs pa'i sangs rgyas thams cad la gus par phyag 'tshal lo/ / byang chub sems dpa' sems dpa' chen po 'phags pa spyan ras gzigs dbang phyug thugs rje chen po dang ldan pa la gus par phyag 'tshal lo/ / tad+ya thA/ ma si tA si/ hu ru hu ru/ tsu ru tsu ru/ su ru su ru/ mA ru mu ru swA hA/ bcom ldan 'das 'di ni yam shing la gdab pa'i sngags lags te/ gal te la la zhig gong du bstan pa'i rtsa ba'i rig sngags kyis bgyi ba mchis te/ sngar sngags 'dis me tog sha ta'i shing la lan gcig gdab par bgyi'o// zhugs 'bud par 'tshal na logs shig tu me tog sha ta'i shing blangs nas dum bu sum cur gtubs te zho dang / mar dang / sbrang rtsi'i nang du spangs nas zhag lon par bgyis te/ gdugs re dum bu re re blangs nas sngags lan re btab ste zhugs kyi nang du dor bar bgyi'o/ / de dag thams cad bas par bsregs lags nas de'i rjes la gdod bgyi ba ci mchis pa bgyi lags so// dkon mchog gsum la gus par phyag 'tshal lo// / 'phags pa de bzhin gshegs pa ye shes rgya mtsho rnam par snang mdzad bkod pa'i rgyal po la gus par phyag 'tshal lo// de bzhin gshegs pa dgra bcom pa yang dag par rdzogs pa'i sangs rgyas thams cad la gus par phyag 'tshal lo/ / byang chub sems dpa' sems dpa' chen po 'phags pa spyan ras gzigs dbang phyug thugs rje chen po dang ldan pa la gus par phyag 'tshal lo// tad+ya thA I li mi li/ be li ti li/ tsi li hi li swA hA/ bcom ldan 'das 'di ni mtshams dgum pa'i sngagaso lags te/ mtshams dgum par 'tshal na sngar sngags 'dis chab la lan bdun btab sta phyogs bzhir gtor bar bgyi'o/ / yang na yungs kar ram thal ba gtsang ma la lan bdun sngags kyis btab ste/ phyogs bzhir gtor na sems kyis nyi ring ji tsam bkum pa mtshams su gyur nas yongs su srung bar 'gyur lags so/ / dkon mchog gsum la gus par phyag 'tshal lo// ba phags pa de bzhin gshegs pa ye shes rgya mtsho rnam par snang mdzad bkod pa'i rgyal po la gus par phyag 'tshal lo/ / de bzhin gshegs pa dgra bcom pa yang dag par rdzogs pa'i sangs rgyas thams cad la gus par phyag 'tshal lo// byang chub sems dpa' sems dpa' chen po 'phags pa spyan ras gzigs dbang phyug thugs rje chen po dang ldan pa la gus par phyag 'tshal lo/ / tad+ya thA/ bi Te bi Te/ ti Te ti Te/ tsi Te tsi Te/ bin+d+he bin+d+hu/ ka tsa ka tsa/ b+ha ga bAn/ Ar+ya ba lo ki te shwa rA ya/ sa b+hA sa b+ha sa b+ha na~M swA hA/ bcom ldan 'das 'di ni bdag slar rang gi gnas su mchi bar bskul ba'i sngags lags na bgyi ba ci mchis pa bgyis legs nas/ bdag slar rang gi gnas su mchi bar bskul ba'i tshe sngags 'dis chab la lan bdun sngags kyis btab ste/ phyogs bzhir gtor na bdag slar mchi bar 'gyur lags so// bcom ldan 'das rig sngags 'di ni dngos grub mngon du ma gyur lags kyis kyang las su bgyi ba rnam pa sna tshogs bgyis pas sems rtse gcig tu bzlas brjod bgyis na smon pa rnams kyang mi 'grub pa gang yang ma mchis lags so/ / gang zhig smyos nad gdugs re lan re ldang ba 'am/ gdugs gnyis shing lan re ldang ba 'am/ gdugs gsum zhing lan re ldang ba 'am/ gdugs bzhi zhing lan re ldang ba 'am/ gdon 'byung pos bgyi ba 'am mkha' 'gro mas bgyis pa 'am/ sha zas bgyis pa 'am/ lus srul pos bgyis pa'am/ smyo byed kyis bgyis pa 'am/ brjed byed kyis bgyis pa 'am/ 'dre gdon ma rungs pa rnam pa sna tshogs kyis bgyis pa'ang rung ste/ nad pa de dag la sngags 'dis lan brgyad btab na 'tsho bar 'gyur lags so// gal te sgrib pa lci ba zhig lags na tshon sna lnga'i skud pa la sngags lan re bzla zhing re re mdung de brgya rtsa brgyad tshang bar bgyis nas nad pa'i mgul pa 'am dpung pa la btags na kha na ma tho ba'i sgrib pa zhu byang zhing bro nad kyang sos par 'gyur lags so/ / gal te skrangs pa dang / 'bras kyi 'phreng ba dang / shu ba dang / phol mig dang / rma 'dzags pa dang / g.yan pa la sogs pa'i nad rnam pa sna tshogs kyis bro 'tshal bar gyur tam/ ral gri dang / mda' dang / mdung la sogs pa phog ste smos par gyur tam sbrul dang / sdig pa dang / rtsangs pa dang / bung ba dang / gdug pa la sogs pas zin par gyur na sngags 'dis lan bdun bzlas te btab na sos par 'gyur lags so// gal ta sgrib pa lci ba zhig lags na dog sa ser po'i 'jim pa la lan bdun sngags kyis btab ste bro 'tshal ba'i dmigs su byugs na sel bar 'gyur lags so/ / gal te rlung nang na ba 'am/ phyogs gcig pa langs par gyur tam/ rna ba 'on pa 'am/ sna 'tshubs pa 'am/ rlung gis zin pa'i nad la sogs pas bro 'tshal bar gyur na sems rtse gcig tu sngags 'di bzlas brjod bgyis nas nad pa de dag la lan brgya rtsa brgyad sngags kyis btab na nad sos par 'gyur lags so/ / gal te sgrib pa lci ba zhig lags na 'bru mar dang / chab mar dang / gro dang / ru rta rnams bskol te sngags lan bdun btab nas lus la bskus sam/ rna ba dang snar blugs sam/ 'tshal du sprul na bro nad sos par 'gyur lags so// gzhan yang bro nad gzhan rnam pa sna tshogs kyis bro 'tshal bar gyur na sems rtse gcig tu sngag 'di gdab par bgyi'o/ / yang na bdag nyid kyis bzlas brjod bgyis na 'tsho bar 'gyur lags so// gal te rig sngags 'di sgrub par 'tshal na sngar sra zhing 'phan skyon ma mchis pa'i tsan dan dkar po las/ byang chub sems dpa' spyan ras gzigs dbang phyug gi gzungs srid du mtho phyed dang do mchis pa/ sug pa lag pa g.yon pa na pad+ma la brgan dang ril ba thogs pa/ lag pa g.yas pa brkyang nas bgrang ba phreng thogs shing 'jigs pa ma mchis pa stsol ba'i lag tu ston pa gdong gcu gcig par bgyis te/ mdun gyi gdong gsum ni byams pa dang snying rje dang bcas pa'i mtshan dang ldan par bgyi'o/ / g.yon phyogs kyi gdong gsum ni khro bo'i mtshan can du bgyi'o// g.yas phyogs kyi gdong gsum ni mche ba dkar po gyen du 'byung ba'i mtshan can du bgyi'o/ / rgyab kyi gdong gcig ni khro ga tum che zhing rab tu dgod pa'i mtshan can du bgyi'o// spyi bo'i gdong gcig ni sangs rgyas kyi zhal gyi gzugs can du bgyi'o// mgo rgyan de dag thams cad kyi nang na sangs rgyas kyi sku bzhugs par bgyi'o/ / byang chub sems dpa' spyan ras gzigs dbang phyug de'i lus ni do shal la sogs pa rgyan rnam pa sna tshogs dang ldan par bgyi'o// gzugs bgyis/ lags nas smon pa rnams grub par 'tshal ba gang lags pa des gos gsar pa gtsang ma bgos te/ smyung ba bgyis nas sdom pa yang dag par blangs te/ zla ba dkar po yar gyi ngo tshas gcig nas tshes brgyad kyi bar du gdugs gcig la dus gsum du sngags 'di lan brgya rtsa brgyad dam/ yang na dpag tu ma mchis par bzlas brjod bgyi'o// de slan chad gnas dben pa gcig tu stan gtsang ma bting ste/ byang chub sems dpa' spyan ras gzigs dbang phyug gi gzugs bgyis pa kha nub phyogs su bstan te bzhag la nyams kyis ci 'byor pa'i bza' ba dang btung ba dag gis mchod nas/ a ka ru dang du ru ka 'ba' zhig bsreg par bgyi'o/ / rnal 'byor pa de 'bru phye dang 'o ma'i zas 'tshal nas snga ma bzhin du bzlas brjod bgyis te/ gdugs gsum pa la thug pa'i bar bgyi'o// de slan chad mchod pa'i yo byad bshams pa'ang snga ma bas ches khyad par du 'phags par bgyi'o/ / rnal 'byor pa de zas dkar gsum po 'di lta ste/ 'o ma dang / zho dang / 'bras chan 'ba' zhig 'tshal bar bgyi'o/ / byang chub kyi shing blangs nas gzugs de'i mdun du zhugs spar bar bgyi'o// gzhan yang shing de blangs nas dum bu stong rtsa brgyad du gtubs te du ru ka'i mar gyi nang du blangs nas gdugs gcig la dum bu gcig blangs te/ sngags lan re bzlas nas zhugs kyi nang du dor bar bgyi zhing thams cad bas par gyur na/ de'i tshes chen po rnams rab tu g.yo bar gyur la/ de'i dbang gis sku gzugs bgyis pa de'ang rab tu g.yo zhing nang gi gong na mchis pa'i gdong gi kha nas sgra phyung nas rnal 'byor pa de la 'di skad du/ rigs kyi bu legs so legs so// khyod kyis 'di ltar nan tan brtson 'grub kyis smon pa rnams yongs su gnyer bas bdag gis khyod kyi smon pa yongs su rdzogs par bgyi'o/ / khyod 'di nas nam mkha' la 'phur te 'gro 'am/ yang na khyod rgyu zhing 'gro ba la thogs pa med pa'am/ yang na drang srong rig 'dzin gyi rgyal po byed par gyur pa 'am/ yang na bdag ji lta ba bzhin du rang dbang thogs pa med pa nyid du bya'o// zhes bsngags pa brjod par 'gyur lags so/ / gzhan yang rnal 'byor pas zla ba dkar po yar gyi ngo tshas bco lnga la byang chub sems dpa' spyan ras gzigs dbang phyug gi gzugs gdong bcu gcig pa de sangs rgyas kyi ring bsrel dang bcas pa'i mchod rten gyi nang du bzhag ste/ gos gsar pa gtsang ma bgos la gso sbyong dang sdom pa yang dag par blangs te/ gdugs mtshan gcig la rab tu smyung bar bgyis nas su ma na'i me tog stong rtsa brgyad blangs te/ me tog re re blangs nas sngags lan re btab ste/ thams cad bas pa'i bar du bgyis na/ de'i tshe gzugs bgyis pa de'i mdun du gdong gicig gi kha nas 'brug sgra lta bu'i sgra 'byung bar 'gyur la/ de'i dbang gis sa chen po'ang rab tu g.yo bar 'gyur bas/ rnal 'byor pas de'i tshe rang gi sems bde bar bzhag nas/ skrag cing 'jigs pa mi skyed par rig sngags dang smon cing sgrub pa gang lags pa 'ba' zhig rjes su dran par bgyis te 'di skad du/ byang chub sems dpa' sems dpa' chen po 'phags pa spyan ras gzigs dbang phyug thugs rje chen po dang ldan pa la gus par phyag 'tshal lo// bdag nam zhig na sems can thams cad kyi mgon dang skyabs su gyur nas sems can thams cad kyi sems kyi smon pa rnams yongs su skong bar 'gyur zhes brjod par gyur na/ de'i tshe spyan ras gzigs dbang phyug gis ji ltar smon pa rnams stsol bar 'gyur te/ smon pa rnams stsol ba'i tshe lha dang klu la sogs pa gang gis kyang bar chad dang bgegs bgyid par mi 'gyur lags so// gzhan yang rnal 'byor pas zla ba la gza' zhugs pa'i tshe chab mar srang gcig blangs te dngul gyi snod kyi nang du stsal nas gzugs bgyis pa'i mdun du bzhag ste/ sngags 'dis bzlas brjod bgyis na zla ba'ang snga mkho bzhin du skyab 'og tu gyur pas/ de nas blangs te 'tshal na lus kyi bro nad rnams mi 'byang ba gang yang ma mchis lags so// gzhan yang rnal 'byor pas ldong ros dang gi'u wang cha mnyam par bgyis te/ gzugs bgyis pa de'i mdun du bzhag nas sngags 'di lan stong rtsa brgyad bzlas te chab kyis spras nas dpral ba la thig le bgyis na don rnam pa gsum 'grub par 'gyur lags so/ / sngar bstan pa bzhin du chab dron po dang sbyar te khrus bgyis na bgegs thams cad dang bro nad ma rungs pa thams cad bsal zhing 'byang bar 'gyur lags so/ / gzhan yang gal te pha rol gyi dmag tshogs kyis g.yul 'phrog par gyur na/ spyan ci mar rtsi'i 'bras bu gcig blangs te sngags 'di lan brgya rtsa brgyad kyis btab nas gzugs bgyis pa de'i g.yon phyogs kyi khro bo'i gdong la byugs te/ dgra'i phyogs su kha bstan na dgra'i dmag tshogs rnams drung du mchi bar mi 'gyur lags so/ / gzhan yang gal te yul phyogs su mi dang phyugs la rims nad byung bar gyur na/ gzugs bgyis pa de'i mdun du shing shug pa'i zhugs bus la/ gzhan yang shing de blangs nas dum bu stong rtsa brgyad du gtubs te/ dum bu gcig blangs nas yungs 'bru'i mar gyis bskus te/ sngags lan re bzlas nas zhugs kyi nang du dor bar bgyi zhing thams cad bas pa'i bar du bgyi'o/ / gzhan yang skud pa dmar po la thag mdud pa bdun mdud de/ mdud pa lan re mdud cing sngags lan re bzlas nas nang gi gong namachis pa'i gdong gi spyi bo la btags na rims nad thams cad rab tu zhi bar 'gyur te/ rims nad zhi nas sngags thag kyang 'grol bar 'gyur lags so// gzhan yang glo bur du mkha' 'gro ma n gadang 'byung po la sogs pa'i gdon gyis zin te bro 'tshal bar gyur na skud pa dkar po la sngags mdung nyi shu rtsa gcig mdung de sngags lan re bzlas shing mdud pa re re mdud nas mdun gyi byams pa dang snying rje dang ldan pa'i gdong gi spyi bo la btags nas zhag lon te slar bkrol la nad pa'i mgul du btags na bro nad sos par 'gyur lags so/ / gal te las kyi sgrib pa lci ba zhig lags te sos par ma gyur na sngags thag de blangs nas yang lan brgya rtsa brgyad sngags kyis btab ste/ snga ma'i gzugs kyi spyi bo la btags nas zhag lon te slar bkrol la nad pa'i mgul du btags na nges par 'tsho bar 'gyur ba lags so// gzhan yang gang la la zhig bro nad rgyun rings kyis btab nas sdug bsngal zhing sos bar ma gyur tam/ 'dre gdon ma rungs pa khyim du zhugs par gyur na/ hun lug thang 'brum bu brgya rtsa brgyad blangs te gzugs bgyis pa de'i mdun du 'brum bu re re blangs la sngags lan re btab nas zhugs kyi nang du dor bar bgyi zhing thams cad bas pa'i bar du bgyi'o/ / gzhan yang skud pa dkar po la sngags mdung nyi shu rtsa gcig mdung de sngags lam+ba ra bzla zhing mdud pa re re mdud nas mdun gyi byams pa dang snying rje dang ldan pa'i gdong gi spyi bo la btags nas zhag lon te/ slar bkrol nas nad pa'i mgul du btags na bro nad rnams 'byang zhing gdon bgegs ma rungs pa rnams 'byer zhing 'gyes par 'gyur lags so/ / gzhan yang mi mdza' ba dag gis glags btsal bar gyur tam/ 'thab cing rjod pa dang byang stems kyis gnod pa bgyis par gyur na/ me tog dang pog spos la sogs pa sna tshogs kyis gzugs bgyis pa de la mchod cing bi na ya ka'i gzugs kyi mdun du zhugs sngar nas 'un ti 'bras bu 'brum bu brgya rtsa brgyad blangs te sngags lan re btab nas zhugs kyi nang du dor bar bgyi'o/ / gzhan yang skud pa dkar po la mdud pa brgya rtsa brgyad mdud de/ sngags lan re bzlas shing mdud pa re re mdud nas gzugs de'i g.yon phyogs kyi khro bo'i gdong gi spyi bo la btags nas zhag bzhi lon te/ slar bkrol la skud pa de blangs te mi mdza' ba de'i ming nas brjod de mdud pa re re nas so so tha dad par sbas nas re re la'ang sngags lan re bzlas shing re re nas gtugs te thams cad bas pa'i bar du bgyis na/ mi mdza' ba de dag ci bgyi'o 'tshal mi 'byor cing rang nyid skyabs su mchi bar 'gyur lags so/ / gzhan yang gang la la zhig legs pa'i dngos po 'grub par 'tshal na tshon sna lnga'i skud pa la sngags mdud brgya rtsa brgyad mdud de/ sngags lan re bzla zhing mdud pa re mdud nas gzhan yang gzugs bgyis pa'i mdun du sngags lan bdun gyis btab ste/ byams pa dang snying rje dang ldan pa'i gdong gi spyi bo la btags nas zhag lon te slar bkrol nas bdag nyid kyi lus la btags na smon pa rnams yid bzhin du 'grub par 'gyur lags so/ / gzhan yang gang la la zhig sgrib pa'i bgegs dang ldan pas legs pa'i dngos po rnams phal cher smon pa yid bzhin du 'grub par ma gyur tama?/ bkra mi shis pa'i dngos po dag dus dus su rgyun ma chad par 'gyur na spos chab kyis gzugs bgyis pa de bkru bar bgyi'o// gzhan yang chab la lan brgya rtsa brgyad sngags kyis btab ste bi na ya ka'i gzugs bkru bar bgyi'o/ / gzhan yang chab la lan brgya rtsa brgyad sngags kyis btab ste rang nyid kyi lus la gtor na/ sgrib pa dang bgegs thams cad zhu byang nas smon pa rnams yid bzhin du 'grub par 'gyur lags so/ / de'i tshe byang chub sems dpa' sems dpa' chen po spyan ras gzigs dbang phyug gis de skad ces smras pa dang / 'khor mang po thams cad kyis mthun par skyes bu chen po legs so legs so// sems can thams cad la phan par 'dod pa'i phyir rig sngags 'di smras pas bdag cag kyang rjes su yi rang nizhing yongs su 'dzin par smon to zhes bsngags pa brjod par gyur to/ / de nas 'khor mang po thams cad dgrab mgu yi rangs par gyur te/ bcom ldan 'das la lan gsum bskor ba byas nas phyag byas te gyes par gyur to/ 'phags pa spyan ras gzigs dbang phyug zhal bcu gcig pa zhes bya ba'i gzungs rdzogs so// / zhu chen gyi lo tsa ba bcom ldan 'das kyi ring lugs pa ban d+he chos grub kyis rgya'i dpe las bsgyur cing zhus te gtan la phab pa/

CLOSE WINDOW