'phags pa mdangs phyir 'phrog pa zhes bya ba'i mdo rdzogs so// // rgya gar skad du/ Ar+ya tsak+Shu bi sho d+ha ni nA ma bid+ya/ bod skad du 'phags pa mig rnam par sbyong ba zhes bya ba'i rig sngags/ sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig na bcom ldan 'das shAkya'i grong rdal bzang po zhig na shAkya rnams kyi nang na zhugs te/ de'i tshe sta du sa zhes bya ba na shAkya bde ba zhes bya ba sangs rgyas la mngon par dad pa dang / chos dang dge 'dun la mngon par dad pa dang / sangs rgyas la skyabs su song / chos la skyabs su song / dge 'dun la skyabs su song / sangs rgyas la gcig tu phyogs/ chos la gcig tu phyogs/ dge 'dun la gcig tu phyogs/ sangs rgyas la nem nur med cing the tsom med/ chos dang / dge 'dun dang / sdug bsngal dang / kun 'byung ba dang / 'gog pa dang / lam la nem nur med cing the tsom med la/ bden pa mthong ba'i 'bras bu thob pa/ mngon par rdzogs par gyur pa/ mtshon dang dbyig pa bor ba zhig gnas pa de'i mig la snang ba dang mi snang ba'i gzugs rnams mi snang bar gyur nas/ sangs rgyas bcom ldan 'das la dad pa skyes te yid la byed cing / sangs rgyas bcom ldan 'das la phyag 'tshal lo// sangs rgyas bcom ldan 'das snang ba mdzad pa sgron ma 'dzin pa gsal ba 'dzin pa la phyag 'tshal lo/ / bde bar gshegs pa thugs rje chen po dang ldan pa gsal bar mdzad du gsol/ sangs rgyas bcom ldan 'das bdag gi mig ni rnam par sbyang du gsol zhes bya ba dang / bcom ldan 'das lha'i gnas pa la bzhugs pa/ lha'i snyan rnam par dag pa mi las 'das pa/ shAkya bde bas tshig de skad ces brjod pa gsan to// gsan nas kyang ting nge 'dzin de las bzhengs te/ tshe dang ldan pa kun dga' bo la bka' stsal pa/ kun dga' po khyod song la mig rnam par sbyong ba'i rig sngags 'dis shAkya bde ba la srung ba kyis shig/ yongs su gzung ba dang / yongs su bskyab pa dang / yongs su bskyang ba dang / zhi ba dang / bde legs su 'gyur ba dang / chad pa spong ba dang / mtshon cha spang ba dang / dug gzhil ba dang / dug gsad pa dang / mtshams gcad pa dang / sa bcing bar gyis shig dang / de bzhin du 'khor bzhi po dge slong rnams dang / dge slong ma rnams dang / dge bsnyen rnams dang / dge bsnyen ma rnams dang / sems can gzhan gyi mig kyang rnam pa ra skyongs shig/ mig slu bas rnam par skyongs shig/ tat+ya thA/ hi la mi li/ ki li mi li/ hI la te/ hu yA hu yA hu yA ma ni/ hu lu hu lu hu lu/ hu du hu du hu du/ tsak+Shu ra mu kha bi sho d+ha ya swA hA/ kun dga' bo rig sngags kyi rgyal po mig rnam par sbyong ba 'di ni mig gi skyon dang / rlung gi skyon dang / mkhris pa'i skyon dang / bad kan gyi skyon dang / 'dus pa las gyur pa'i skyon sel te/ tshul khrims kyi bden pa dang / brtul zhugs kyi bden pa dang / drang srong rnams kyi bdon pa dang / rten cing 'brel par 'byung ba'i bden pa dang / sdug bsngal gyi bden pa dang / kun 'byung ba'i bden pa dang / 'gog pa'i bden pa dang / lam gyi bden pa dang / dgra bcom pa rnams kyi bden pa dang / rang sangs rgyas rnams kyi bden pa dang / sangs rgyas bcom ldan 'das rnams kyi bden pas/ shAkya bde ba'i mig na bar ma gyur cig/ mchi ma 'dzag par ma gyur cig/ kun tu mchi ma 'dzag par ma gyur cig/ bdag dang sems can thams cad kyi mig rnam par dag par gyur cig swA hA/ kun dga' bo rig sngags kyi rgyal mo mig rnam par sbyong ba 'di ni yang dag par rdzogs pa'i sangs rgyas drug gis gsungs pa'o// nga'ang da ltar 'chad de/ rgyal po chen po bzhi dang / lha rnams kyi dbang po brgya byin dang / mi mjed kyi bdag po tshangs pa'ang rjes su yi rang ngo // kun dga' bo rig sngags 'di dus gsum du brjod na/ de la thibs por 'gyur ba dang / rab rib bam/ ling tog gam/ mig nang sngon por mthong ba'am/ mig gi yul gyi skyon lha las gyur pa rnams sam/ klu las gyur pa rnams sam/ dri za las gyur pa rnams sam/ gnod sbyin las gyur pa rnams sam/ sha za las gyur pa rnams sam/ byad las gyur pa rnams sam/ ro langs las gyur pa rnams sam/ ro langs dang byad las gyur pa rnams sam/ kun tu rgyu las gyur pa rnams sam/ kun tu rgyu dang ro langs las gyur pa rnams kyis tshugs par 'gyur ba ni/ lha dang bcas pa dang / bdud dang bcas pa dang / tshangs pa dang bcas pa dang / dge sbyong dang bram zer bcas pa dang / lha dang / mi dang / lha ma yin du bcas pa'i skye dgu'i 'jig rten na ngas ma mthong ste/ de ni gnas med de// tshe dang ldan pa kun dga' bos bcom ldan 'das kyi ltar mnyan te/ bcom ldan 'das de bzhin no zhes gsol nas/ gsang sngags kyi gni 'di rnams bzung ste kun chub par byas nas/ shAkya bde ba ga la ba der song ste/ bde ba mig rnam par sbyong ba'i gsang sngags kyi gzhi 'di dag de bzhin gshegs pas khyod la bskur gyi/ nyin re zhing dus gsum du dran par gyis shig ces de la rgyas par smras so/ / shAkya bde bas thos ma thag kho na re mig rnam par dag ste/ mig rnam par dag pas dri ma med pa'i mig gis thams cad mthong ngo // bcom ldan 'das kyis de skad ces bka' stsal nas/ tshe dang ldan pa kun dga' bo dang / shAkya bde ba dang / lha dang bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ / 'phags pa mig rnam par skyong ba zhes bya ba'i rig sngags rdzogs so// / rgya gar skad du/ Ar+ya ak+Sha ro ka pra sha ma ni sU tra/ bod skad du'aphags pa mig na da rab tu zhi bar byed pa'i mdo/

CLOSE WINDOW