Ar+ya shrI ma ta pra h+ma NI pa ri br-id tshA nA ma ma hA yA na sU tra/ bod skad du/ 'phags pa bram ze mo dpal ldan mas zhus pa zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal lo/ / 'di skad bdag gis thos pa dus gcig na/ bcom ldan 'das wa ra NA si drang srong lhung ba ri dgas kyi nags na/ dge slong bdun brgya tsam gyi dge slong gi dge 'dun chen po dang / byang chub sems dpa' sems dpa' chen po rab tu mang po dag dang thabs gcig tu bzhugs so// de nas bcom ldan 'das snga dro'i dus kyi tshe/ chos gos dang sham thabs bsnabs te/ lhung bzed bsnams nas phyi bzhin 'brang ba'i dge sbyong tshe dang ldan pa byang chub sems dpa' sems dpa' chen po ma pham pa dang thabs gcig tu grong khyer wa raNA sir bsod snyoms kyi phyir gshegs so/ / de nas bcom ldan 'das grong khyer wa ra NA sir mthar chags su bsod snyoms spyod cing / bram ze mo dpal ldan ma'i khyim ga la ba der gshegs te/ byon nas/ bsod snyoms kyi phyir phyogs gcig tu bzhugs pa dang / bram ze mo dpal ldan mas/ bcom ldan 'das mdzes pa dang bar bya ba/ dbang po zhing thugs zhi ba/ dul ba dang zhi gnas kyi pha rol tu byon pa/ zhi gnas mchog gi pha rol tu byon pa/ zhi ba dul ba bsrungs pa/ sdig pa med pa/ dbang po dul ba/ kha dog bzang po rgyas pa mchog dang ldan pa/ mtsho ltar dang zhing gsal la rnyog pa med pa/ gser gyi mchod sdong ltar mngon par 'phags pa/ mi bskyod pa/ mi g.yo ba/ brnyes pa/ dpal gyis 'bar ba/ lham me/ ldan ne/ lhang nge zhing gshegs pa/ rgyang ring po nyid nas mthong ngo // mthong nas kyang de sems dang bar gyur te/ de sems dang bas bcom ldan 'das ga la ba der song ste phyin nas/ bcom ldan 'das kyi zhabs dang / byang chub sems dpa' sems dpa' chen po ma pham pa'i rkang pa la phyag 'tshal nas/ bcom ldan 'das ga la ba der logs su thal mo sbyar ba btud de/ bcom ldan 'das la 'di skad ces gsol to/ / bcom ldan 'das legs par byon no// bcom ldan 'das legs par byon no// bcom ldan 'das gdan bshams pa 'di la bzhugs su gsol zhes gsol pa dang / bcom ldan 'das dang / byang chub sems dpa' sems dpa' chen po ma pham pa so so tsa rigs par bzhugs so// de nas bram ze ma dpal ldan mas/ bcom ldan 'das dang / byang chub sems dpa' sems dpa' chen po ma pham pa bde bar bzhugs par rig nas/ bcom ldan 'das ga la ba de logs su thal mo sbyar ba btud de/ bcom ldan 'das la 'di skad ces gsol to// bcom ldan 'das grong khyer wa ra NA si drang srong lhung ba ri dgas kyi nags 'dir/ bcom ldan 'das kyis chos kyi 'khor lo bskor to// zhes bdag gis thos na bcom ldan 'das kyis gang bskor ba'i chos de ji lta bu zhig lags/ de skad ces gsol pa dang / bcom ldan 'das kyis bram ze mo dpal ldan ma la 'di skad ces bka' stsal to// dpal ldan ma ma rig pa'i rkyen gyis 'du byed rnams/ 'du byed kyi rkyen gyis rnam par shes pa/ rnam par shes pa'i rkyen gyis ming dang gzugs/ ming dang gzugs kyis rkyen gyis skye mched drug/ skye mched drug gi skyen gyis reg pa/ reg pa'i rkyen gyis tshor ba/ tshor ba'i rkyen gyis sred pa/ sred pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung ste/ de ltar sdug bsngal gyi phung po chen po 'ba' shig po 'di 'byung bar 'gyur ro// ma rig pa 'gags pas 'du byed 'gag/ 'dra byed 'gags pas/ rnam par shes pa 'gag/ rnam par shes pa 'gags pas/ ming dang gzugs 'gag/ ming dang gzugs 'gags pas/ skye mched drug 'gag/ skye mched drug 'gags pas/ reg pa 'gag/ reg pa 'gags pas/ tshor ba 'gag/ tshor ba 'gags pas/ sred pa 'gag/ sred pa 'gags pas/ len pa 'gag/ len pa 'gags pas srid pa 'gag srid pa 'gags pas skye ba 'gag/ skye ba 'gags pas rga shi dang / mya ngan dang smre sngags 'don pa dang / sdug bsngal ba dang / yid mi bde ba dang / 'khrug pa rnams 'gag ste/ de ltar sdug bsngal gyi phung po 'ba' shig po 'di 'gag par 'gyur ro/ / zhes bya ba dpal ldan ma/ dge sbyong ngam/ bram ze'am/ lha 'am/ bdud ngam/ tshangs pa'am/ sus kyang chos dang mthun par 'jig rten du ma bskor ba'i chos kyi 'khor lo 'di grong khyer wa ra NA si drang srong lhung ba ri dgas kyi nags su de bzhin gshegs pas bskor ro/ / de skad ces bka' stsal pa dang / bram ze mo dpal ldan mas bcom ldan 'das la 'di skad ces gsol to/ / bcom ldan 'das cim rig pa nang na mchis sam/ slang rol na mchis/ bcom ldan 'das kyis bka' stsal pa/ dpal ldan ma de ni ma / no// gsol pa/ bcom ldan 'das gal te/ ma rig pa nang dang slad rol na ma mchis pa lags na/ ma mchis pa de ji ltar 'du byed rnams kyi rkyen du 'gyur te/ bcom ldan 'das chos gang yang 'jig rten pha rol nas 'chi 'am/ bka' stsal pa/ dpal ldan ma de ni ma yin no// gsol pa/ bcom ldan 'das ma rig pa'i rnam pa mchis sam/ bcom ldan 'das kyis bka' stsal pa/ dpal ldan ma de ni med de/ dpal ldan ma ma rig pa ni yang dag pa ma yin pa'i rnam par 'byung gi/ yang dag pa'i rnam par ni mi 'byung ngo // dpal ldan ma ma rig pa ni phyin ci log gi rnam par 'byung gi/ phyin ci ma log pa'i rnam par ni mi 'byung ngo // gsol pa/ bcom ldan 'das ma rig pa ma mchis na 'du byed rnams ci las 'byung / sdug bsngal yang ci las 'byung / bcom ldan 'das 'di lta ste dper na/ zhugs shing n+ya gro da'i rtsa ba ma mchis na/ de'i yal ga dang lo ma dang / yal ka dre'u ji ltar mngon par 'gyur/ bcom ldan 'das de bzhin du ma rig pa ma byung zhing mchis pa ma lags na/ ma rig pa 'du byed rnams kyi rkyen lags par ji ltar 'tshal bar 'gyur/ bcom ldan 'das kyis bka' stsal pa/ de bzhin te dpal ldan ma rang gi mtshan nyid stong pa nyid kyis chos thams cad stong na/ byis pa so so'i skye bos pa dang mi ldan pa mi shes pa ma rtogs pa/ ngag las mngon par 'du byed de/ las rnams yod pas srid pa mngon par 'grub par byed do/ / srid pa yod pas sdug bsngal myong bar zad de/ 'di la las mngon par 'du byed pa yang su yang med cing / srid pa mngon par 'grub par byed pa yang med de de ni chos rnams kyi don dam pa'o/ / dpal ldan ma 'on kyang sems can rnams ji ltar don dam pa rtogs par 'gyur snyam nas/ tha snyad nye bar bzung ste/ de bzhin gshegs pa dgra bcom pa yang dag par rdzogs pa'i sangs rgyas rnams sems can rnams la chos ston to/ / dpal ldan ma tha snyad ni yang dag pa ma yin te/ de ci'i phyir zhe na/ de la khong du chud par byed pa po yang med/ de la shes par byed pa yang med pa'i phyir ro/ / dpal ldan ma 'di lta ste dper na/ de bzhin gshegs pas sprul pa sprul la/ de bzhin gshegs pas sprul pa des kyang sprul pa gzhan sprul na/ de la de bzhin gshegs pas sprul pa gang gsog ste/ brdzun pa slu ba'i chos can no// sprul pa sprul pa gang yin pa de yang gsog ste/ brdzun pa slu ba'i chos can no// dpal ldan ma de bzhin du gang gis chos mngon par 'du bya ba mngon par 'dus byas pa de yang gsog ste/ brdzun pa slu ba'i chos can no// chos gang mngon par 'du bya ba de yang gsog ste/ brdzun pa slu ba'i chos can no// gsol pa 'di lta ste/ bcom ldan 'das kyis stong pa nyid kyi 'khor lo dang / nges par 'byin pa'i 'khor lo dang / nges par 'byed pa'i 'khor lo dang / bsam gyis mi khyab pa'i 'khor lo dang / bskor ba ma lags pa'i 'khor lo dang mtshungs pa ma mchis / pa'i 'khor lo dang / ji lta ba bzhin gyis 'khor lo dang / skyeb ma mchis pa'i 'khor lo dang / dngos po ma mchis pa'i 'khor lo dang / mtshan nyid ma mchis pa'i 'khor lo 'di skor ba ni/ nam mkha'i 'khor lo 'di bskor lags so/ / de nas bram ze mo dpal ldan mas can dun gyi phye ma sbar gang blangs te/ bcom ldan 'das kyis zhabs la gtor nas tshig 'di skad ces bcom ldan 'das dge ba'i rtsa ba 'dis bdag ma 'ongs pa'i dus na/ 'di lta ste/ stong pa nyid kyi 'khor lo nas mtshan nyid ma mchis pa'i 'khor lo'i bar du chos kyis 'khor lo de lta bu bskor bar gyur cig ces smras de nas bcom ldan 'das kyis de'i tshe 'dzum pa mdzad do/ / 'di ni sangs rgyas bcom ldan 'das rnams kyi chos nyid de/ gang gi tshe 'dzum pa mdzad pa de'i tshe/ bcom ldan 'das kyi zhal gyi sgo nas 'od zer kha dog du ma/ kha dog sna tshogs 'di lta ste sngon po dang / ser po dang / dkar po dang / dmar po dang / le brgan dang / shel dang dngul gyi kha dog lta bu dag byung nas/ de dag gis 'jig rten gyi khams mtha' yas mu med pa dag snang bas khyab par byas te/ tshangs pa'i 'jig rten gyi bar 'phags nas slar log ste/ bcom ldan 'das la lan gsum bskor ba byas nas/ bcom ldan 'das kyi dbu'i gtsug tu nub bo/ / de nas bcom ldan 'das la/ byang chub sems dpa' sems dpa' chen po ma pham pas 'di skad ces gsol to// bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rnams ni sgyu ma mchis rkyen ma mchis par 'dzum par mi mdzad na/ 'dzum pa mdzad pa'i rgyu gang lags/ rkyen gang lags de skad ces gsol pa dang / bcom ldan 'das kyis byang chub sems dpa' sems dpa' chen po ma pham pa la 'di skad ces bka' stsal to// ma pham pa khyod kyis bram ze mo dpal ldan ma 'dis tsan ngan gyi phye ma spar gang blangs te/ de bzhin gshegs pa'i zhabs la gtor ba mthong ngam/ gsol pa/ bcom ldan 'das mthong lags so// bde bar gshegs pa mthong lags so// bcom ldan 'das kyis bka' stsal pa/ ma pham pa bram ze mo dpal ldan ma 'di dge ba'i rtsa ba 'dis bskal pa phrag brgyad cu rtsa bzhir ngan 'gro log par ltung bar 'gro bar mi 'gyur ro// sangs rgyas drug khri bzhi stong la bsti stang byed par 'gyur/ bla mar byed par 'gyur/ ri mor byed par 'gyur/ mchod pa byed par 'gyur/ de dag las chos kyang nyan par 'gyur/ thos nas kyang 'dzin par 'gyur/ dam pa'i chos kyang yongs su 'dzin par 'gyur ro/ / de bzhin gshegs pa bzhugs pa 'am/ yongs su mya ngan las 'das pa de dag la yang mchod pa chen po byed par 'gyur/ sems can grangs med dpag tu med pa dag kyang byang chub la 'god par gyur ro/ / de phyi ma'i tshe phyi ma'i dus na bdag snang ba zhes bya ba'i bskal pa la/ stong gsum gyi stong chen po'i 'jig rten gyi khams 'di nyid du/ de bzhin gshegs pa dgra bcom pa yang dag par rdzogs pa'i sangs rgyas chos snang ba zhes bya ba 'jig rten du 'byung bar 'gyur te/ de'i tshe'i tshad ni bskal pa stong tshang bar 'gyur ro// de sems can grangs med dpag tu med pa dag gi don byas nas/ phung po lhag ma med pa'i mya ngan las 'das pa'i dbyings su yongs su mya ngan las 'das par 'gyur ro/ / de skad ces bka' stsal pa dang / bcom ldan 'das la byang chub sems dpa' sems dpa' chen po ma pham pas 'di skad ces gsol to/ / bram ze mo dpal ldan ma'i sngon gyi dge ba'i rtsa ba gzhan yang mchis lags sam/ bka' stsal pa/ ma pham pa yod de/ bram ze mo dpal ldan ma bla na med pa yang dag par rdzogs pa'i byang chub 'di nyid 'dod pas/ sngon bud med kyi lus nyid la gnas nas/ de bzhin gshegs pa rnam par gzigs kyi sku la me tog gi 'phreng ba gsol to// de bzhin gshegs pa gtsug tor can gyi sku la yang chos gos gsol to/ / de'i gsung rab la rab tu byung nas lo stong du tshangs par spyod pa spyad do// bcom ldan 'das de la zab mo'i gnas rnams kyang zhus so// de bzhin gshegs pa thams cad skyob nyan thos kyi dge 'dun dang bcas pa la yang zhal zas kyis tshim par byas so/ / bstabs pa yang byas so// de bzhin gshegs pa 'khor ba 'jig la yang a ti mug ta ka'i me tog dag gis gtor nas/ bcom ldan 'das de las bslab pa'i gzhi lnga po dag blangs so// de bzhin gshegs pa gser thub la yang ji srid 'tsho'i bar du na bza' dang / bshos dang / gzims cha dang spun gyi gsos sman dang / yo byad rnams kyis mgron du gnyer te/ bcom ldan 'das des zla ba gnyis bshos gsol to// chags zung zhig kyang phul lo// bla na med pa/ yang dag par rdzogs pa'i byang chub 'di nyid 'dod pas de bzhin gshegs pa 'od srung la gser gyi phreng bas gtor te/ 'di skad ces bdag bla na med pa yang dag par rdzogs pa'i byang chub tu lung bstan par ma gyur gyi bar du bud med kyi dngos po las ma gyur cig ces smras te/ / ma pham pa 'di yang bram ze mo dpal ldan ma'i sngon gyi dge ba'i rtsa ba yin no// bcom ldan 'das kyis de skad ces bka' stsal nas/ byang chub sems dpa' sems dpa' chen po ma pham pa dang / bram ze mo dpal ldan ma dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ / 'phags pa bram ze mo dpal ldan mas zhus pa zhes bya ba theg pa chen po'i mdo rdzogs so// // rgya gar gyi mkhan po dzi na mi tra dang / zhu chen gyi lo tsa ba ban+d+he ye shes sdes bsgyur cing zhus te gtan la phab pa/

CLOSE WINDOW