gar skad du/ b+ha ga bAn nI lAm+ba ra d+ha ra badz+ra pa Ni tan+ta nA ma/ bod skad du/ bcom ldan 'das phyag na rdo rje gos sngon po can gyi rgyud ces bya ba/ bcom ldan 'das dpal phyag na rdo rje gos sngon po car la phyag 'tshal lo/ / sangs rgyas dang byang chub sems dpa' dus gsum du bzhugs pa rnams la phyag 'tshal lo// 'di skad bdag gis thos pa dus gcig na/ bcom ldan 'das mi bskyod pa rdo rje rig kyi sangs rgyas lcang lo can gyi pho brang na byang chub sems dpa' phyag na rdo rje dang / rdo rje sde dang / rdo rje kun tu 'dzin pa dang / rdo rje rab tu 'dul byed dang / rdo rje mi bzad 'joms dang / rdo rje gdug pa kun 'dul dang / rdo rje dbyings las rgyal ba dang / rdo rje dgyes gnas skyob la sogs pa'i 'khor bye ba phrag snyed rnams dang thabs cig tu zhugs so/ / de nas byang chub sems dpa' sems dpa' chen po lag na rdo rje nyid kyis rdo rje thugs kar lan gsum gsor te/ bcom ldan 'das la bskor ba lar gsum byas nas phyag 'tshal te/ pus mo g.yas pa'i lha lnga sa la btsugs te 'di skad ces gsol to// bcom ldan 'das de bzhin gshegs pa rdo rje 'dzin pa chen po 'byung po kun 'dul bar byed sa 'og gi gdug pa can 'dul bar byed pa'i rdo rje kun 'dul zhes bya ba'i rgyud chen po bshad du gsol/ rdo rje 'dzin pa chen po bshad du gsol/ khyab bdag chen po bshad du gsol/ gdug pa kun 'dul bar byed pa bshad du gsol/ mun pa kun 'joms pa chen po bshad du gsol zhes phyag na rdo rjes gsol ba btab bo// de skad ces gsol pa dang / bcom ldan 'das kyis/ phyag na rdo rje la bka' stsal pa/ rdo rje 'chang ba chen po gsang ba pa khyod sems can rnams kyi don du rdo rje kun 'dul zhes bya ba'i rgyud nga la zhu ba legs so// gsang ba'i bdag po legs so// byang chub sems dpa' chen po legs so/ / de'i phyir lag na rdo rje'i rigs rnam khyed rjes su nyon la yid la zung zhig/ ngas rnam par phye ste rdo rje sa 'og 'byung po 'dul ba zhes bya ba'i rgyud bshad kyis rjes su zung zhig/ de skad ces bka' stsal nas/ bcom ldan 'das kyis rdo rje kun gyi ting nge 'dzin gyis sa 'og gi gdon dang 'byung po kun 'joms pa zhes bya ba'i ting nge 'dzin la snyoms par zhugs so// bcom ldan 'das ting nge 'dzin de la snyoms par zhugs ma thag tu/ bcom ldan 'das kyi sku'i bu ga thams cad nas khro bo gdug pa kun 'dul bar byed pa du ma spros te/ sa 'og sa stengs sa bla gang bar mdzad de/ sa 'og gi klu rnams kyi gnas rnams gdug pa'i hUM sgras kun tu gang bar byas nas klu'i rgyal po brgyad 'khor dang bcas pa btul te/ bcom ldan 'das kyi spyan sngar bkug de nas klu'i rgyal po mtha' yas gdug pa'i sems langs te/ dbugs shin tu tsha bar gtong bar sems pa de bcom ldan 'das kyis mkhyen te/ gsang ba'i bdag po lag na rdo rje la byin gyis brlabs nas klu thams cad kyi zhe sdang rab tu zhi bar byed pa zhes bya ba'i sngags 'di gsungs so/ / oM nI lAM badz+ra kro d+ha nA ga hUM phaT/ ces bzlas so// de nas klu mtha' yas sems rab tu zhi ste byang chub kyi sems dang ldan par gyur pas klu thams cad sems rab tu zhi'o/ / de nas mtha' as la sogs pa'i klu rgyal sa 'og na bzhugs pa rnams kyis// bcom ldan 'das rdo rje 'dzin pa chen po la 'di skad ces gsol to// bcom ldan 'das phyi ma'i dus na slad ma'i tshe sems can rnams la sa 'og gi gdon rnams kyis bar du mi gcod cing / de dag gi gdug pa zhi bar byed pa'i cho ga bshad du gsol/ bdag cag klu'i rgyal po rnams dang bdag cag gi 'khor rnams kyis sems can chen po de la bar du gcod par mi nus pa bshad du gsol/ bdag cag klu'i rgyal po rnams kyi don du 'gyur ba bshad du gsol zhes gsol ba btab bo// de nas bcom ldan 'das rdo rje 'dzin pa chen pos/ klu'i rgyal po chen po rnams la cung zad spyan gyi gzigs nas bka' stsal pa/ klu'i rgyal po dag legs so// zhu ba'i dus la bab bo// ngas sems can rnams kyi don du rab tu phye ste bshad kyis nyon cig/ bcom ldan 'das legs so zhes gsol te/ klu rnams sngar nyan to// de nas bcom ldan 'das kyi klu 'dul ba zhes bya ba'i le'u bshad de/ hUM/ sems can kun gyi don gyi phyir// rdo rje 'dzin chen ston pa des// nyid kyi 'khor la rab gzigs te// 'od zer kun tu rab bkye nas// gdon rnams rlag byed thabs gsungs pa// dkar po'i phyogs kyi tshes brgyad dang // de bzhin bcu bzhi bco lnga la// rab tu dben pa'i sa phyogs su// phyag na rdo rje rab khros pa// gzhon tshul 'gyings pa rab bsams la// rin chen snod dam kham phor du// gser la sogs pa'i rin chen bdun/ / dag par bsgrubs te rab bcug nas// gsang sngags brgya rtsa brgyad bzlas te// dkon mchog gsum gyi bka' bden pas// 'byung po de la gtor byin te/ / gang gnas rten sar rab sras la// 'byung po klu gdug zhi bar 'gyur// gang tshe'i bsam phan na// de tshe gdug pa'i mtshon cha rnams// rang gi khang par rab tu 'bar/ / sdug bsngal mi bzang drag po ste// de tshe sngon gyi sems dran pas// zhi bar 'gyur bar the tsom med// de nas 'dir bcom ldan 'das kyis lha'i cho ga rab tu gsungs pa/ rtag tu byang chub sems thob cing // dam tshig sdom pa kun ldan pa// khrus kyi las rnams kun bya ste// rnam par dag pa'i sa gzhi la// dkyil 'khor ji ltar mdzes par hUM yig las byung lcags kyu yis/ / sangs rgyas byang chub sems dpa' rnams// skad cig mdun bsams mchod so bya// oM shU n+ya tA dz+nyA na badz+ra swa b+hA ba At+ma kohaM/ stong ba'i ting du 'dzin rnams 'acos// nam sa m+b+ha'i khams su ya ni// zlabadang sa mag// 'od zer kun rgyu bar bang gnas/ 'ayo ga nam ga/ smra su / pa nga pa #/ ra rnyen rnams/ / rdo rje'i dbor this par bya// de las khro ba chen po'i sa// su mdag sngon po cher 'bar ba// g.yon brgya na tshong bcu jug 'chang // mtha' yas la sogs kyis brgyad/ / sku mdog nag po'i gzugs can de// zhal gcig phyag gnyis rdo rje bsnams// na bza' sman po'i bar 'jal can// spyan gsum dmar mdzes kyin du 'jal/ ram pa gyen brdzes rdo rje yi// dbu rgyan can du bsam par bya'o// de nas ye shes khro bo che// spyan drangs chu hU~M'i hos gzhug/ mgo dang lkog ma sring kha ru// oM AHhUM gi rnaH pa yi/ / si kye bcu gsum sngags kyis brgyad// 'khor lo pad+mA rdo rje bsam// mi bskyod rdo rjes dbang bskur te// kun 'joms rnam par dag par bsam// de nas bcom ldan 'das kyis 'di'i rtsa ba'i sngags las thams cad pa gsungs/ oM nI lAm+ba ra d+ha ra badz+ra pA Ni hUM hUM phaT/ rab tu brjod par bya'o// sngags kyi 'phreng ba de dag kyang // 'i la rab dkar dbang la dmar/ / rgyus la ser po drag la gnag/ rtog pa kun tu spangs te bzlas// spro dang bsdu ba'i bye brag gis// ji ltar mos pa'i bsam gtan bya// mi mes rnal 'gyur/ rab tu spang // phyag na rdo rje khro rgyal gyis// dge kun rten pa'i yid 'di la// gang brtson pa de phan yon no// kun tu rab tu dga' sogs dag/ mi snang la sogs rab tu 'grub// kun rten rab tu spyad dge can// rten can sbyor ba rab tu dben// dngos grub mchog tu rab tu 'grub// dpal rdo rje sa 'og gi rgyud las// zhi ba'i las sgrub pa dang lha'i le'u ste dang po'o/ / // de nas bcom ldan 'das la/ byang chub sems dpa' sems dpa' chen po phyag na rdo rjes 'di skad ces gsol to// bcom ldan ston pa rdo rje 'dzin/ / bar chad zhi byed gtor ma yi// cho ga mchog ni bshad du gsol// sems can don du brtson ldan bgyi// zhes gsol to// de nas bcom ldan 'das kyis bka' stsal pa/ legs so rdo rje 'chang ba gtso// bar chod zhi ba'i cho ga dang // dngos grub thabs kyi cho ga ni// gtor ma kun gyis ster 'gyur bshad// rab tu mdzes pa'i snod mchog tu/ / bza' dang bca' ba la sogs pa'i// phun sum tshogs pa rab tu bya// stong pa'i ting nge 'dzin 'gro bas// bruM las mdzes pa'i snod bskyed de// khaM las kha zas nam mkha'i khams/ / mnyam par bsams te sngags 'di brjod// oM a kA ro mu khaM sarbaHmAdz+dza Ad+ya rut+pan+na tA tA oM AHhUM phaT+Ta swAhA/ zhes brjod do// badz+ra rdzir bsams te rab tu spel/ / spel ba gnyis kyis rnam par sbyang // nam mkha'i hrI las pad+ma brgyad// dpag tu med pa bsam bya ste// gtso bo mgon po rnam thos bu// gnod sbyin bye tshogs kyis bskor cing / / klu brgyad kyis mchog spyan drang bya// gnon sbyin rgyal po de dag la// rmugs 'dzin gang ba bzang po dang // nor bzangs ku ber dang ni// yang dag 'thog gnas lnga rtsen dang / / tsi bi kun+da li rnams ni// 'khor gyi tshul gyis gtso la bskor// phyogs dang mtshams su bsam par bya// bye ba'i 'khor tshogs thun mong yin// klu brgyad gnod sbyin phyi na'o// de nas lcags kyus spyan drang la// ma bral gtso dang lcags kyu'o// bzhon pa seng ge rta yi tshogs// kun kyang zhal gcig phyag gnyis pa// rin chen 'bar ba'i rgyal mtshan dang / / nor bu rin chen ral gri dang // gri mdu khang brtsegs ral gri phub// mtshon cha sna tshogs 'phyar bar bsgom// spyan 'dren tshe na rnga sogs dang // dung chen 'bras spos dag ni dbul/ / oM bai shra ba Na sa pa ri bA ra sa mA dzaH/ dza hUM baM ho// oM be sAhA/ oM bai shra ba Na A kaR+Sha ya hUM dza/ zhes spyan drang ba'i sngags so// a mr-i ta kunA li ha na ha na hUM phaT/ ces pa ni bgeg sku bskrad pa'i sngags so// de nas mye tog la sogs pas// mchod pa dag ni nam mkha' ru// rab tu mchod de spro bar bya// lAm+ba ra d+ha ra badz+ra pA Ni/ A dz+nyA pa ya ti/ i maM ba laM gr-ih+na tu/ sa ma ya rak+Shan+tu ma ma sid+d+him+ba pra yats+tsha tu ma ma sarba satwa sA hA/ oM be shra ba NA ya sAhA/ oM dzAm+b+ha lA ya sAhA/ oM pUr+Na b+ha dzA ya swA hA/ oM ma NaM b+ha drA ya swA hA/ oM ku be rA ya swA hA/ oM si pra dz+nyA nA ya swA hA/ oM gu h+ya d+ha nA ya swA hA/ oM pany+tsi kA ya swA hA/ oM tsa pi kun+da lA ya swA hA/ gtor ma dbul ba'i sngags so// de nas mchod de mgron rnams btang // 'od zer lcags kyu bkrol nas su// bkrol ba'i dus na gshegs dang mnyam// mnyam longs spyod pa'i cho ga bya'o/ / rdo rje sa 'og gi rgyud las// gtor ma'i le'u ste gnyis pa'o// / de nas yang bcom ldan 'das kyis 'jig rten pa'i dngos grub bsgrub par 'dod pa'i don du 'jig rten pa'i 'khor lo kun 'byung ba zhes bya ba'i ting nge 'dzin la snyoms par zhugs nas/ sku'i ba spu nas 'od zer spros te rnam thos sras 'khor bcas kyi thugs bskul nas 'khor der 'dus te/ bcom ldan 'das la phyag 'tshal te/ rin po che'i phye mas gtor nas 'di skad ces gsol to// bcom ldan 'das bdag ni chos skyong ba'i rgyal po rnam thos kyi bu zhes bgyi ba lags te/ bdag gis chos dang ldan pa rnams kyi chos bsrung zhing yun ring du gnas par bya ba'i phyir bdag nyid kyis gas ba bshad na/ bcom ldan 'das kyis skabs dbye bar ci ga nang zhes gsol to// bcom ldan 'das kyis bka' stsal pa/ rgyal po chen po legs so// rang gi gsang ba legs pabar shod cig/ ngas rjes su yi rang zhing byin gyis brlab par bya'o// rdo rje 'chang ba kun gyis kyang byin gyis rlob par 'gyur gyis/ khyod kyis legs par smros shig ces bka' stsal to// de nas rnam thos kyi bu rang gi stan las langs te/ bcom ldan 'das la phyag 'tshal nas rang gi rig pa 'di smras so// oM be shra ba NA ya hUM hUM pa tsa pa tsa ts+tshin+da ts+tshin+da swA hA/ zhes brjod nas bcom ldan 'das la 'di skad ces gsol to/ / bcom ldan 'das bdag gi sngags 'di'i sgrub pa ni 'di lags te/ gang zhig bdag sgrub par 'dod pa des dus gsum du mchod pabargya chen po bshams te/ bdag 'khor dang bcas pa mchod la sems rtse gcig dang ldan pas gnas dben par 'dug ste/ bcom ldan 'das phyag na rdo rje sgom pa pos bdag gi sngags de khri zag gcig 'bras/ de nas las rnams bsgrub par bya'o// de ltar bdag sgrub pa dang bdag gi las sgrub pa po des bdag 'khor dang bcas pa la gtor ma dang mchod pa rgya chen pos mchod par bya'o/ / de la bdag dang bdag gi 'khor rnams la mchod pa dang gtor ma rgya chen po dbul ba'i sngags ni 'di rnams yin te/ oM baM shra ba NA ya swAhA/ oM dzam+b+ha lA ya swAhA oM pun+da b+ha dA ya swAH/ oM ma Ni b+ha d+hA ya swA hA/ oM ku be rA ya swAhA/ oM saM pra dz+nyA nA ya swA hA/ oM gu h+ya d+ha nA ya swAhA/ oM pany+tsi kA ya swA hA/ oM pi tsi kun+d+ha lA ya swA hA/ zhes pa'i sngags de rnams ni bdag gi 'khor dang bcas pa la mchod pa dang gtor ma sbyin pa'i sngags gnyis su shes par bya'o// de nas bdag gi las sgrub pa ni bdag gis bshad kyis/ bcom ldan 'das kyis byin gyis brlab tu gsol zhes gsol nas/ 'di'i las bshad pa ni/ gang zag gang gis sgrub 'dod pas// gsad dang sbyin sreg mnan pa gsug rim pa ji bzhin shes par bya/ / bsgrub bya bstan la sdang ba rnams// spra tshil la sogs gzugs byas la// dgug dang gzhug sogs dbang du bya// yig 'bru bco brgyad sngags kyis ni/ / dus gsum brdeg par rab byas nas// 'phral du yid ches 'joms pa ste// bsgrub byas gsod par the tsom med// gal te sbyin sreg byed pa na// zhi rgyas dbang dang mngon spyod las/ / 'dir ni drag pos bsgral bar bya// ner sbar tshal rab bsreg bya// bab khung rab dang 'bring tha ma// rab kyis mtho gsum 'bring gis do// thams mtho gang tshad du bya/ / bud shing tsher ma can shing gis// kun tu drag po rab tu sgrub// bag zan yungs kar mer sreg cing // sdang ba'i lus ngag yid gsum rnams// rdzas la bstim ste sbyin sreg bya// 'khor bcas gnod sbyin mer bsams te// sreg pa'i rdzas kyi mchod pa 'am// las me gnod sbyin rdzas kyis brag/ gang ltar byas kyang 'grub par 'gyur/ / de tshe bstod pa 'dis kyang ni// rtse gcig sems kyis bstod par bya// hUM/ kun 'dul mi bzad gnod sbyin sogs// gdug pa dpal tsha rab tu 'jigs// khro bo rngam pa cher / sgrog pa// 'khor bcas rnams la phyag 'tshal bstod// oM be shra ba Na puSh+pe hUM swA hA/ oM bai shra ba Na d+hu pe hUM swA hA/ oM bai shra ba Na dI pe hUM swA hA/ oM bai shra ba Na gan+d+he hUM swA hA/ oM bai shwa pa Na nai d+ye hUM swAhA/ gtso bo gnod sbyin 'khor yang mchod// de nas rim pas mchod pa ni// gsang sngags kun tu spel te bzlas// spro dang bsdu ba kun tu bya// spel byed kun gyi thun mong yin/ / oM bai shra ba Na che ge mo mA ra ya phaT swAhA/ gtso bo ji ltar 'khor yang de// rang gi rig pas mchod par bya// rig pa kun tu brten byas nas// rdul phran bzhin du brlab bapar bsam/ / 'phrin las bcol la gtor ma gtang // mchod dang gtor ma'i rim pa ni// go rims bzhin du dbul bar bya// zhi ba'i las kyi rim pa ni// thab khung mtho gang tshad nyid la/ / sreg rdzas la sogs rab tu dbul// lus ngag yid gsum sdig bcom nas// ye shes me yi ngo bor bya// snod dang za ba ni dor bar bya// der ni gdon rnams kun sreg cing / / bgegs chen zhi ba'i las kyang bya// rgyas dang dbang du bya ba la// las dang bye brag rim pa rnams// sngar bshad pa yi lus bzhin du// thab dbyibs bye brag shes par bya// ser dang dmar ba'i bud shing sogs// rim pa rdzas ldan dbul ba ni// oM bai shra ba NA ya d+ha naM puSh+paM ku ru swA hA/ oM bai shra ba NA ba shi ku ru swA hA/ oM bai shra ba NA ya shAn+tiM ku swA hA/ gtso bos ji bzhin 'khor bcas ni// rig pa'i rdzas kyis mchod par bya// sreg pa'i rdzas ni bag zan dang // yungs kar mngar sogs rim pas mchod// 'phrin las rnam bzhi kun 'grub ste/ / brtse bar brtson pas nye bar 'grub// 'bring dang tha mas 'bring dang ni// tha ma nyid du shes par gyis// de nas bcom ldan 'das la/ rnam thos kyi bu 'khor dang bcas pa rnams kyis 'di skad ces gsol to/ / bcom ldan 'das bdag cag rnams kyis bshad pa'i las 'di rnams sgrub pa po des dus rgyun du bcom ldan 'das phyag na rdo rje dang / gnod sbyin rnams la dkar gsum gyis mchod par bya/ chang kun tu spang bar bgyi'o// sha rnams ni 'os pa dang shis pa drang bar bya'o// de ltar rtse gcig gis bdag cag sgrub pa de rnams kyi 'phrin las ji lta ba bzhin du bdag cag gis ma bsgrubs na/ bdag cag gis bcom ldan 'das la 'khus par gyur cing // bdag cag gi chos ma bskyangs par byas pa yin no/ / de la bdag gi bro tshig ni 'di yin no// oM bai shra ar+tha kha thaM zhes bya'o// de nas bcom ldan 'das kyis bka' stsal pa/ rnam thos kyi bu chen po legs so// shin tu rab tu legs so// ma 'ongs pa'i gang zag gi don du rang gi gsang ba smras pa ni don chen po dang ldan no// ngas kyang de rnams kyi don nges par 'grub par bya ba'i phyir sngags 'di bshad kyis nyon cig/ bcom ldan 'das la legs so zhes rnam thos kyi bu la sogs pa rnams ltar nyan no// de nas bcom ldan 'das kyis bka' stsal pa/ oM badz+ra pA Ni nI lAm+ba ra d+ha ra badz+ra s+pho Ta hUM phaT swA hA/ rig pa 'di ni las thams cad dbang du sdud pa'i sngags so// rnam thos kyi bu chen pos ji ltar khas blangs pa ltar gsang ba dang ldan par byed pa'o// de bzhin gyur ces nas gnod sbyin mi snang bar gyur to// rdo rje sa 'og gi rgyud las/ rnam thos sras kyi le'u ste gsum pa'o// // de nas yang byang chub sems dpa' phyag na rdo rjes/ bcom ldan 'das la 'di skad ces gsol to// bcom ldan 'das ma 'ongs pa'i sems can rnams kyi don du gdug pa can la bsnun pa'i 'khor lo bshad du gsol zhes gsol ba btab bo/ / de nas bcom ldan 'das kyis cang mi gsung bar thugs kyis gnang nas rang gi thugs ka nas 'od zer kun tu khyab par spros te/ sems can thams cad la byams pas khyab par mdzad nas lag na rdo rje la bka' stsal pa/ lag na rdo rje ngas bgegs la bsnun pa'i 'khor lo bshad kyis khyod rtse gcig tu nyon cig/ de ltar 'tshal lo zhes wAr nyan no/ / bcom ldan 'das kyis bka' stsal pa/ gang zhig 'khrul 'khor byed 'dod pas// rnams dga' dben pa'i gnas dag tu// phyag na rdo rje'i rnal 'byor bya// sdod bcud rdo rje gtum por sgom/ / rlung las ri rab mthar thug pa// rdul snyed grangs kyi sku ru bsam// dbus na phyug rdor rnal 'byor bsgom// ri bong 'dzin pa zhabs kyis brdabs/ stong gsum chod kyi zla ba la// bgegs chen kun tu 'dar bar bsgom// sku la nyi ma snying ldan pa'i// gzi brjid bzod dka'i 'od zer gyis// bgegs rnams ma lus 'tshig par bsgom/ / ljags las bzlas pa'i sngags 'phreng gis// stong gsum gang bar rab tu bsgom// rgyan du byas pa'i klu brgyad kyis// kha rlangs chen po btang ba la// lha klu thams cad sbags par 'gyur/ / thugs las khro spos de dag gis// bskal pa'i rlung ltar 'thor bar 'gyur// phyag gis rdo rje rab bsnun pas// sgyogs gzer bzhin du bsnun pa 'gyur/ / hUM hUM 'brug ltar rab tu sgrogs// skad kyis kun tu bkug par bsam// de ltar byas gyur thams cad 'grub// las kyi mnar ba 'jig par 'gyur/ / phyag na rdo rje mi shes par// gang zhig gzhan du skal dman par// 'di la gang 'grub thams cad 'grub// mchog dang thun mong bye brag go/ rdo rje sa 'og gi rgyud las bsnun pa'i 'khor lo ste le'u bzhi pa'o/ / / de nas gzhan yang 'khrul 'khor gyi// cho ga rdo rje 'dzin pas gsungs// gro ga'am shing shun dag la ni/ re mig nyi shu rtsa gcig pa'i// 'khor lo dag ni rab bris te// zla ba yar gyi ngo la brtsam// rtse gcig sems kyis rab tu bri// dbus su drag po'i yi ge dgod// gnyis par nor 'dzin yi ge ste// gsum par badz+ra zhes pa dang // bzhi par chu yig dang po dgod// lnga par na ni rab tu dgod// mtshams bzhir bsgrub bya'i gsod snying bri/ de ni nang gi re mig go// phyi yi re mig bcu gnyis la// oM spangs yi ge bcu gnyis la// de yi gsang sngags 'di yin te// nI lAM ba ra d+ha ra badz+ra pA Ni hUM paT// ces bya'o// rab tu rdzogs pa'i 'khor lo ste// bsgrub bya'i snying khar dril de gzhug/ dang po mtha' nas dril bar bya// de nas sbyin sreg cho ga bya// gal te mnan pa byed 'dod pas// sngar bzhin 'khrul 'khor rdzogs byas nas// mtha' ru mnan pa'i cho ga bya// kham por gsar pa kha sbyar du// bcug nas rdo rje rgya gram bri// rdo rje spyan gyis rab sbyar nas// gtsug lag khang sogs mnan par bya// gal te re mig mi 'dod na// rtsibs bcu gnyis pa'i 'khor lo la// hUM yig dbus su rab dgod de// lhag ma bcu gnyis rtsibs la dgod/ / bri ba rdzogs na snying khar gzhug/ dgug dang gzhug sogs byas la bsreg/ mi 'dod mnan pa'i cho ga bya// mar gyi dus la shis pa yin// 'khrul 'khor ji ltar bris pa ltar/ / gang 'dod las la the tsom med// dper na me lces rtsa bsregs 'dra// gang yin gnas par mi 'gyur ro// bri ba'i 'khrul 'khor gyi cho ga ste rdo rje sa 'og gi rgyud las le'u lnga pa'o/ / / de nas yang lag na rdo rjes bcom ldan 'das la 'di skad ces gsol to// bcom ldan 'das thams cad zab mo'i spyod yul lag pas sbyin sreg la sogs pas grol bar cang 'gyur lags sam/ bdag gi the tsom bsal du gsol zhes zhus so// bcom ldan 'das kyis bka' stsal pa/ lag na rdo rje snying rje che/ / dad pa'i shugs kyis rab nyams te// dkyil 'khor rdzas kyis sbyor ldan zhing // sbyin sreg las dang de nyid shes// sdom pa dam tshig rgyud ldan na// mtshan mas grol bar 'gyur ba ste/ / dkyil 'khor sbyin sreg rdzas la sogs// med na dngos grub mi 'grub pas// sbyin sreg las ni 'bad pas brtsam// 'phrin las bzhi yi sbyin sreg las/ / drag po'i rim pa bya ba ni// khru bzhi pa yi dkyil 'khor la// dbus su zur gsum khru re tshad// zabs su khru phyed brko bar bya// phyi rol rim pa gsum ldan pa/ dbus su rdo rje'i mtshan ma zi// rim pa gsum la rdo rje yi// rtse gsum 'phreng gis bskor ba bri// mtshams su lcags kyu zi bar bya// tsher ma can gyi shing bu ni// khru gang tshad kyis rab tu shis/ / dug dang khrag dang ske tshe sogs// rdzas ni rim par shes par bya// bdag nyid lha yi rnal 'byor gyi// ye shes khro bo spyan drangs te// 'jig rten gsum 'dul gzugs su bsam/ / mchod pa'i rim pa rab tu dbul// de la sbyin sreg gi sngags gsungs pa 'di yin te/ oM nI lAM ba ra d+ha ra/ oM badz+ra dzA la a na la ha na sarba duSh+TAn sarba b+hasmiM ku ru nI lAm+ba ba ra d+ha ra badz+ra pA Ni che ge mo mA ra ya hUM laT/ ces pas rdzas rnams sreg go// dug dang khrag dang lan tshwa las// gzugs byas rab tu bsgrubs te sreg oM nI lAM ba ra d+ha ra badz+ra pA Ni yak+Sha khA da ya ban d+ha ya ban d+ha ya mo ha ya mo ha ya sha hUM A kaR+Sha ya hUM phaT/ gzugs la brab pa'i sngags so// oM nI lAm+ba ra d+ha ra badz+ra pA Ni sha hU~M gr-ih+Na A kaR+Sha hUM dzadza/ 'gro ba dgug pa'i sngags so// de ltar sbyin sreg rab byas nas// chu bo bskams dang klu shing bcad// glang chen g.yang lgang me chen 'bar// nang dang yams sogs byung ba'i tshe/ / zhi ba mchog gi las bsgrubs te// thab khung zlum po rab dkar ba// rim pa gsum ldan khru gang tshad// zabs su khru phyed brkos byas nas// zhi ba'i las kyi cho ga bya/ / de ltar byas na mtshan ma yi// dngos grub thob par the tsom med// lag na rdo rje rdo rje 'dzin// gus pas rgyud don rab tu zung // 'gro ba'i don la rab brtson gyis// kye ma rgyud chen mchog tu gsang // byin rlabs sngon du cher 'byung ba// ston pa rdo rje 'chang gis gsungs// rab tu 'bad pas sgrub par gyis// dpal rdo rje sa 'og gi rgyud las// sbyin sreg gi rim pa ste le'u drug pa'o// / de nas ston pa rdo rje 'chang // dpal chen gdam la rab bzhengs nas// lag na rdo rje la gzigs nas// las kyi cho ga bshad par bya/ / dug la sogs pa'i rdzas rnams la// gang 'dod pa yi gzugs byas te// snying khar 'khrul 'khor rab tu gzhug/ bdag nyid las kyi lhar gsal bas// ga'u'i nang du rab bcug ste/ / tshon gyi tha gu sna lnga dkri// snying kha'i lcags kyu rab bkug nas// yi ge bcu gsum 'khrul 'khor bzlas// 'gul g.yo yi ni rtags byung nas// chu chen gzhung la gtang bar bya/ / gal te rtags de ma byung na// da ngur yi khu ba dang // khrag dang dug bsres rab byugs te// tsher ma can gyi shing mes sreg/ oM nI lAM ba ra d+ha ra badz+ra pA Ni stam+ma ya mo ha ya ban d+ha ya da ha na a hUM hUM phaT/ dus gsum dag tu bdugs byas na// skad ngan sna tshogs 'don par byed// de nas sngags 'dis chu la ngor/ oM tsaN+Da ma hA ro Sha Na hUM phaT/ tshon gyis gril nas rab tu bor// bsam pas ba tsha'i rgya mtshor bskur// de nas mi ldog bya ba'i phyir// sngags 'di rgyun du bzlas par b+h+ya/ mo nI lA pra rad+hA ra badz+ra pA Ni hu hU swam+ba a nan paT/ ces rgyun du bzlas par bya'o// de nas las de nges par 'grub bo// rdo rje sa 'og gi rgyud las/ bslang pa'i 'a lo'i le'u ste bdun pa'o/ / / de nas bcom ldan 'das rdo rje 'dzin pas sems can rnams kyi don du sngags kyi le'u 'di gsungs so// oM nI lAM ba ra d+ha ra badz+ra pA Ni hUM hUM phaT/ bcom ldan 'das kyi rtsa ba'i sngags las thams cad kyi sgrub pa'o// 'di ni sangs rgyas thams cad kyi thugs gsang ba'o// 'di ni ma bsgrub par yang las tham cad 'grub ste/ phyag rgya thams cad 'ching ba sgrub pa la ni rdo rje khu tshur gyis so// dam tshig thams cad sgrub pa la ni rdo rje rab tu gdengs pas so// sems can thams cad rjes su chags par bya ba la ni rdo rje bzhad pas so/ / thams cad lkugs par bya ba la ni rdo rje hUM smras so// nam mkha' la 'gro ba'i dngos grub la ni rdo rje ku mu das bya'o// klu thams cad 'dul ba la ni rma bya'i mjug sgros bya'o/ / dgra thams cad gsad pa la ni 'khrul 'khor gyis so// nor sgrub par 'dod na dzam+b+ha la'i chu sprin gyis bya'o// bgegs 'phangs par 'dod na ting nge 'dzin gyis bya'o/ / thams cad 'gugs pa la ni rdo rje lcags kyus bya'o// rims srung ba la ni rtsa ku sha'i 'brum bus bya'o// klu sgrub par 'dod na mtshar bu'i lcug ma dang bdud rtsi'i chus bya'o/ / pha rol gyi dpung 'joms par 'dod na gu gul gyis bya'o// las rnams la sngags 'bum gyis bya'o// rdo rje sa 'og gi rgyud las/ sngags kyi le'u ste brgyad pa'o/ / // de nas gzhan yang bzlas pa yi// nges par 'dir ni bshad par bya// gang zhig dngos grub sgrub 'dod pas// dam tshig sdom dang rab ldan pas/ / bdag nyid las kyis lhar bsgoms te// ye shes khro bo spyan drangs te// dzaHhUM baM hoHdgug sogs bya// rang nyid zla bar sngags kyi 'phreng // dngul sbram lta bur rab bsams te/ / myur dal gsal dang mi gsal spangs// yid kyis bsgrims pa'i bzlas pa bya// mchod pa rnam pa lngas kyang mchod// rab tu bsgrims pa'i bzlas pa 'dis/ / gang 'dod dngos grub nges par 'grub// oM AHhUM/ sku gsung thugs byin gyis brlab pa'i sngags so// oM badz+ra pA Ni a b+hi Shiny+tsa mAM/ dbang bskur ba'i sngags so/ / oM badz+ra pA Ni tiSh+Tha hUM/ thugs brtan pa'i sngags so// sku dang thugs kyi gsang ba dang // gsung gi gsang ba ma lus pas// myur du byang chub la reg 'gyur/ / gang tshe sgrub la brtson ldan pa// tshe gcig 'bras bu myur thob 'gyur// gnyis med rang bzhin rdo rje can// mkha' dbyings rdo rje kun tu khyab// brjod med rtog bral de nyid don/ / lhun grub pang la rab tu gzhag/ hUM dang AHyi rnam pa can// ji ltar chu yi zla ba bzhin// ma yengs sems kyis rgyun du bsgom// e maho mgon po bcom ldan 'das/ / mchog las mchog tu rnam par rgyal// e ma ho sprul pa'i rnam pa sku// sgra la rab tu dmigs pa med// dge chen kun gyi spyod yul yin// rang gsal nyid la rnam par dag/ mchog gi byang chub tshul du gnas// rdo rje sa 'og gi rgyud las/ nges pa dang rnam par dag pa'i le'u ste dgu pa'o// // de nas ston pa rdo rje 'chang // 'gro ba'i mgon la rab gzigs te// srung ba'i cho ga rab tu gsungs// lag na rdo rje rab tu nyon// 'gro ba gdug pas zin gyur pa// zangs ma dag la dud 'gro'i gzugs/ legs pa dag tu rab byas te// khong pa rdul la sogs pas dgang // gang nas 'dod pa'i sa phyogs sam// rang lus dag la legs sbas nas// srung ba dam par 'gyur ba'o// bde gshegs sku gdung ring bsrel can// rab tu gnas pa legs byas te// gang gnod sar ni rab smras na// bden stobs brjod pas zhi bar 'gyur// bya la sogs pa'i byol song tshogs/ / yid 'ong mdzes pa'i dud 'gro la// sangs rgyas gang+gA'i bye tshogs kyis// gsungs pa'i gzungs sngags dag gis ni// skud pa sngon po dag dang ni// dar la brgya rtsa brgyad bsngags te/ / bden pa bdar la rab tu bsngos// gtor ma btang na zhi bar 'gyur// kham por la sogs snod gtsang mar// sman dang dar sogs rab bcug ste// me tog bdug sogs mchod byas te/ / sa la sbas na gnod pa rnams// zhi ba dag tu 'gyur ba yin// skud pa dkar po gsum bsgril la// mdud pa nyi shu rtsa gcig bya// sgrub dang bsgrub pa'i mchod pa bya/ / rgyal la rab tu mgul du btags// bar mchod bzlog par 'gyur bar nges// yungs kar mar dang mu za rnams// cha snyoms lus la ra ba byugs na// gdug pas zin las thar par 'gyur/ / ba ku na da'i me tog dang // mda' hu na da'i 'bras bu la// smin drug dus su rab bsgrubs na// gdug pa'i phyogs su mi gnas so// stag dang phred dang 'jal thar gyi/ / spus ni gdug pa las grol 'gyur// 'bab chu rgya mtsho la sogs pa// lus bsrung bya ba mthar byin par// byas na mchog tu srung bar 'gyur/ / rdo rje 'chang ba khyod kyis zung // mthar phyin zla ba sprin gza' las// grol ba lta bur 'gyur ba yin// dpal rdo rje sa 'og gi rgyud las/ srung ba'i le'u ste bcu pa'o/ / // lag na rdo rje lags smras pa// bsdu ba sngags kyi cho ga ni// ji ltar legs so rdo rje 'chang // khyod la rab tu nyan par 'tshal// nyon cig rdo rje 'chang ba khyod/ / sngags btu khyod la bshad par bya// gru gsum dkyil 'khor nyams dga' bar// pad+ma 'dab ma brgyad pa bri// 'dod don thams cad rab 'grub la// der ni gsang sngags btu bar bya// dbus su yi ge'i bdag po gzhag/ bzhi pa yi ni lnga pa la// yi ge i ni rab tu sbyar// mthar gnas pa yi gsum pa la// lnga pa yi ni mtha' dang sbyar/ / de nas lnga pa'i bzhi pa gzhag/ de nas mthar gnas gnyis pa gzhag/ de nas bzhi pa'i bzhi pa gzhag/ de nas mthar gnas gnyis pa gzhag/ de nas lnga pa'i gsum pa dang / / gnyis pa yi ni gsum pa la// ra dang bcas pa gzhag par bya// de nas lnga pa'i dang po gzhag/ de nas gsum pa'i tha ma la// i ni rab tu sbyar te gzhag/ bdun pa yi ni bzhi pa la// yi ge U ni rab tu sbyar// stong pas mnan pas nyis 'gyur dang // lnga pa yi ni gnyis pa la// gsum pa ya ni dang por sbyar// yi ge bcu gsum rig pa'i sngags// brtse bas brtson par rab bzlas na// gang 'dod dngos grub nges par 'gyur// kye maho rdo rje can gyis gsungs// sngags kyi rgyal po bla med lam/ / phyag na rdo rje'i dngos grub thob// dpal rdo rjes 'og gi rgyud las/ sngags btu ba'i le'u ste bcu gcig pa'o// // de nas ston pa rdo rje 'chang // spyan mig 'od zer sprul mdzad nas// slob ma rab tu smin bya'i phyir// dbang bskur cho ga rab tu bshad// rdo rje slob dpon dka' thub che// gsang dang ldan pa dbang thob cing / dul dang drang dang bshes gnyen che// g.yo chung dang bzang byang sems thob// dkyil 'khor cho ga rab mkhas pa// slob ma dam pa dbang bskur phyir// yid 'ong gtsug lag khang sogs su/ / brtul zhugs sngon du legs spyad nas// de nas sa yi cho ga bya// brtag dang sbyar zhing bsrung ba dang // mchod dang gsol ba gdab pa dang // rmi lam mtshan ma'i thos brtag/ zhi ba'i tshogs sbyin sreg ni// brgya rtsa brgyad kyi cho ga bya// 'byung po rnams la mchod cing brko// dkyil 'khor dbus su rab gnas te// sku las rdo rje chen po bsgom/ gru las gzhal yas khang chen bsgom// spyan gnyis nyi zla'i 'od zer gyis// bgegs rnams ma lus tshar gcod do// rdo rje chen po gar 'gros kyis// sa gzhi lan gsum bskor bar bya/ / ba yi rnam lngas legs byugs te// tshom bu gcig gis lha dgod bya// mchod dang bstod dang snyan gsan dbab// bum pa lhag par gnas par bya/ / slob mchogs rab smin bya// thig dang tshon gyi cho ga ni// las kyi cho ga bzhin du bya// gdong g.yogs dang ni sngon po yis// slob ma dag ni gzhug par bya// sdom ldan dbang bskur lngas bskur ro/ / bum pa dang po rdo rje dang // dril bu dbu rgyan ming gi dbang // las kyi cho ga ji bzhin no// tshes bcu bzhi dang bcu gsum la// slob ma las la gzud par bya/ / byin rlabs rim pas 'pho ba dang // 'phral du yid ches bskyed par bya// rin chen snying po dri med rgyud// rgyud rnams kun gyi rtsa ba ni// 'dir dbang bskur ba dam pa yin/ / smin pa'i las la brten pa yi// dbang bskur mchog gi rgyud gsungs pas// rab gnas dge ba sdom pa ldan// dam pa yon gyis mnyes par bya// grol ba mthar byin rab tu gnas/ / slob ma smin pa'i cho ga'o// rdo rje sa 'og gi rgyud las/ slob ma la dbang bskur ba'i le'u ste bcu gnyis pa'o// // de nas byang chub sems dpa' phyag na rdo rjes/ bcom ldan 'das la 'di skad ces gsol to// bcom ldan 'das sems can rnams kyi dor du bdag gi thugs kyi gsang ba bshad du gsol zhes gsol ba btab bo/ / bcom ldan 'das kyis bka' stsal pa/ lag na rdo rje mi bzang khyod// gzhan don bag brtson legs so legs// gang zhig dus kyi snyigs ma la// gdul dka'i sems can 'dul 'dod pas/ / dang po byang chub sems bskyed la// tshogs gnyis kun rdzogs mthar phyin pas// rin chen snod du pad+ma'i gter// dbus su gsang ba'i bdag po can/ / 'dab ma brgyad la klu chen brgyad// sbrul mgos brgyan pa'i dgod par bya// khrus dang gtsang sbra dang ldan pas// las kyi lha yi rnal 'byor gyis// dang po spyan drangs rab mchod nas/ / bdag dang lha gnyis 'phro 'dur bzlas// klu brgyad zhi bar 'gyur sems kyis// hUM dang hUM gi thag pa las// bsgrub bya 'od kyi phung por bya// skad cig mas ni hUM du bslang // oM badz+ra kro d+ha a hI tsan+d+ra phaT/ khri bzlas gdon las nges grol 'gyur// lag na rdo rje khyod kyis ni// thugs kyi 'phro 'du gsang ba yin// bsgrub bya'i lus ni mtshon gyis dkri/ hUM chen 'phreng ba'i 'gro 'dus bcad// rdzas chen rnams la rab brtags nas// nges par gdon las grol bar 'gyur// gal te des kyang ma grub na// sngags kyi 'phreng ba bzlog ste bzlas/ / rdo rje 'phreng bas rab bcad na// the tsom med par 'grub par 'gyur// 'og gi bgegs bzlog cho ga mchog/ yid bzhin nor ltar 'byung ba yin// theg pa gsum la nges rgyal ba'i// rgyud chen gsang ba mthar thug pa// skyob pa thugs kyi rnam pa yin// de nas bcom ldan 'das kyis de skad ces bka' stsal ma thag tu// lag na rdo rje la sogs pa'i rigs kyi 'khor rnams dang lha'i tshogs thams cad yi rangs te/ / bcom ldan 'das rdo rje 'chang gis gsungs pa la mngon par bstod do// dpal rdo rje sa 'og gi rgyud las/ gsang ba gtan la dbab pa'i le'u ste bcu gsum pa'o// // kha che'i paN+Di ta tse lu dang / bod kyi lo tsa ba 'phags pa shes rab kyis bsgyur ba'o//

CLOSE WINDOW