/ / rgya gar gyi paN+Di ta mchog gi dngos grub brnyes pa b+ha ro phyag rdum gyi zhal snga nas dang / bod kyi lo tsa ba dge slong rdo rje grags kyis bsgyur @bcom ldan 'das dpal gshin rje gshed la phyag 'tshal lo/ / don dam chos sku zhi ba nyid// gang 'dir khams gsum rnam rgyal te/ / gshin rje dgra zhes grags pa yi// 'khor lo bskor ba'i cho ga bshad// yon tan ldan pa'i sngags pa yis// cho ga bzhin du mnyes par bya// dur khrod dben pa la sogs par// dkyil 'khor khru do tshad du bya// dri dang ba yi rnam lnga dang // nyi zla sogs pa byi dor bya// ba glang la sogs dam rdzas lnga// gzhan yang tshogs kyi 'khor lo dang / / phyi nang phyed pa'i bye brag gis// legs par mchod pa byas nas ni// 'khor lo bri dang btu ba dang // drang ba dang ni spo ba brtsams// sngags pa rnal 'byor ldan pa yis/ / lho yi phyogs su kha bltas te// dam tshig rjes su dran pa yis// oM badz+ra sa ma ya s+t+waM/ gsang sngags 'di ni rjes dran byed// 'khor lo bri ba brtsam par bya// dbus nas sor tshad bcu drug par// kun nas zlum pos bskor na ni// 'di ni nang gi dkyil 'khor te// rim pa gsum du bskor ba la// sgo med lcags mkhar bcu drug bya 'di ni gshin rje'i grong khyer te/ / srid pa gsum gyi 'jugs sa yin// de yi phyi rim mu khyud gsum// kun tu lcags ris bskor ba ste// mu khyud de dag re re yang // khang pa sum cu gnyis dang ldan/ / 'gro ba'i chos bzhin gsod pa yi// 'khor lo 'di ltar bris nas ni// phyi rol mu khyud mtha' ma la// yi ge ka sogs da yig mthar// nganya bsal nas dgod par bya/ / yi ge d+ha sogs kA yig mthar// de yi rjes su bri bar bya// mu khyud dbus ma dag la ni// dbyangs yig bcu gnyis nyis 'gyur dgod/ / btu dang dgod sogs rtsom pa na// mtshan ma 'di dag shes par bya// zla ba mig dang yon tan dang // rig byed mda' dang dbang po dang // rgya mtsho bkra shis gza' dang phyogs/ / dregs pa nyi ma yan lag sogs// tshes zhes bya bar rab tu grags// phyi rol mu khyud mtha' ma la// shar gyi tshangs thig nas brtsams nas// rim min gza' can khang pa nas/ / yi ge bkra shis tsam blangs te// nang gi ngos kyi mu khyud kyi// tshangs thig gi ni ngos dag la// phyogs bzhir dmig gi tshad du sbyin// rim min phyogs can khang pa nas/ / yi ge dmig gi tshad blangs te// shar du de'i g.yas g.yon gzhag/ rim min bkra shis khang pa nas// dbyangs yig gnyis pa can blangs nas// mig gi tshad du byas nas ni/ / de yi ngos la re re gzhag/ nub kyi tshangs thig nas bgrangs pa'i// rgya mtsho can gyi khang pa nas// dbyangs yig bcu gcig pa ldan pa// dmig gi tshad du blangs nas ni// lho yi ngos su de bzhin sbyin/ / nub nas rim pa min pa'o// zla ba can gyi khyim nas ni// dbyangs yig bcu gsum pa ldan pa// mig gi tshad du blangs nas ni// lho ngos de rjes sbyin par bya// de nyid dbyangs yig gsal ba ni// mig gi tshad du blangs nas kyang // sngon sbyin nub kyi ngos su sbyin// nub nas bkra shis khang pa nas// dbyangs yig bcu gsum pa ldan pa// mig gi tshad du blangs nas ni/ / nub kyi ngos su de bzhin sbyin// byang nas bkra shis khang pa nas// dbyangs yig bcu gcig pa ldan pa// dmig gi tshad du blangs nas ni// byang gi ngos la de bzhin sbyin// rlung gi sa bon zhes bya ba// mig gi tshad blangs de bzhin sbyin// mda' can khang pa na gnas pa'i// 'od kyi gong bur byas pa dang // de nyid nas ni bgrangs pa yi// gza' can khang pa la gnas pa/ / dbyangs yig gnyis pa ldan pa dag/ zla ba'i tshad du blangs nas ni// byang shar mtshams su re re sbyin// rgya mtsho'i khang pa la gnas pa// dbyangs yig gnyis pa ldan pa dag rim min yon tan khang pa nas/ / zla ba'i tshad du blangs nas ni// shar lho mtshams su de bzhin sbyin// rim min bkra shis khang pa nas// dbyangs yig lnga pa ldan pa dag/ yan lag can gyi khang pa nas/ / za ba'i tshad du blangs nas ni// lho nub mtshams su de bzhin sbyin// rim min tshes can khang pa nas// dbyangs yig gsum pa ldan pa dang // rim min bkra shis khang pa nas// zla ba'i tshad du blangs nas ni// byang shar mtshams su de bzhin sbyin// de ltar dgod par byas nas ni// de nas drang ba brtsam par bya// dam tshig rjes su dran byed cing // rdo rje shugs dang ldan pa yi// shar gyi tshangs thig ngos gnyis nas// yi ge zung ldan drangs nas ni// dbus kyi khang par gzhab par bya// phyogs gzhan tshangs thig ngos dag na// de bzhin zung ldan drangs nas ni/ / de bzhin dbus kyi khang par gzhag/ de na shar gyi yi ge yang / rim pa gnyis pa'i khang par drangs// phyogs gzhan du yang de bzhin no// shar gyi zung ldan gsum pa yang // rim pa gsum pa'i khang par drang // phyogs gzhan du yang de bzhin no// mtshams kyi yi ge ya bral 'dis// rang rang gi ni mtshams su drang // de dag phyung ba'i khong stong du// dbyangs kyi yi ge drang bar bya/ / dbyangs kyi yi ge bzhi la ni// ming gi yi ge drang bar bya// so so'i las dang mthun pa yi// bskul ba'i yi ge dgod par bya// gsad dang bskad dang dbye ba la// yi ge phaT ni gzhag par bya/ / mnan pa la yang yi ge laM// zhi ba la ni yi ge au// rgyas pa de bzhin yi ge swa// dbang la bo gyis brgyan pa ste// 'gug pa la ni yi ge dza// de la las kyi 'od zer ni// zhi ba chu ste rgyas pa sa// dbang ni rlung ste drag po me// dbye dgug bskrad pa dbang dang mthun// mnan pa dag ni rgyas pa bzhin// drang ba'i sbyor ba byas nas ni// bsre ba'i sbyor ba brtsam par bya// gnyis med sngags dang ldan pa yis// dbus kyi bkra shis yi ge yang // zla ltar 'od kyi gong bur bya// sngags kyi rgyal po bcu pa yang // 'od kyi gong du de nang du/ 'dod pa'i bsgrub bya gzhag par bya/ / de dkyil rang ming dang por gzhag/ phyogs kyi khyim na gnas pa yi// yi ge zung ma thams cad dang // de tshe 'od kyi gong bur blta// sngags kyi rgyal po bcu pa yang // bcu gnyis khyim du spel te zi/ / byin rlob hUM zhes bya ba yang // khang pa re la zur res kye// yongs su dag pa dgod byas nas// mchod dang gtor ma byas nas ni// spo ba dag ni brtsam par bya// las kyi dbye ba ji lta bar/ / 'khor lo las ni blang bya ste// zhi ba dang ni rgyas pa la// shin tu rgyas pa'i ras la bya// dbang dang dgug la smad 'tshong sogs// gsad dang dbye ba bskrad pa dang // mnan pa la ni dur khrod ras// gi'u wang gur kum zhi ba rgyas// dbang dang dgug la tsan dan dmar// mnan pa la ni ldong ros sogs// bskrad la bya rog khrag gis te// dbye ba rta dang ma do'i sogs/ / gsad la dug la sogs pas bri// dge ba'i las la bzang po'i shing // dge min la ni rus pa dang // lcags la sogs pas bri bar bya// zhi ba shar blta dbang la nub/ rgyas la byang ste drag po lho// gzhan ni ci rigs sbyar bar bya// zhi rgyas dbang dang dgug pa la// sa bskor rim bzhin dgod par bya// gnam bskor dag ni rim par bzlog/ gsad bskrad dbye ba mnan pa la/ / sa bskor rim las bzlog pa ste// gnam bskor dag ni rim bzhin bri// de ltar legs par ma bris na// 'khor lo rang la ldog par 'gyur// de bas nan tan bskyed de bya/ / ras kyi 'khor lo legs zin nas// dkyil 'khor la gnas dkyil 'khor te// ras kyi 'khor lor spyan drangs te// rdo rje bsdu ba'i sbyor ba yin// dkyil 'khor 'khor lo btu bar bya/ / ras kyi 'khor lo mchod nas ni// bden pa'i byin rlabs dmigs par bya// ji ltar gsungs pa'i cho ga bzhin// 'khor lo spo ba byas nas ni// gsang sngags bzlas pa brtsam par bya/ / oM badz+ra sa ma ya s+t+waM/ dam tshig gi sngags so// oM badz+ra be ga/ rdo rje shugs kyi sngags so// oM badz+ra a sa me tri sa me ma hA sa ma ye swA hA/ yi ge bsre ba'i sngags so/ / oM badz+ra sa mA dza/ 'khor lo spo ba'i sngags so// oM badz+ra sa ma ya ma rA dzA sa do ma ya/ ya me do ru Na yo da ya/ ya da yo ni ra ya k+She ya/ yak+She yats+tsha ni rA ma ya phaT phaT/ 'di ni rtsa ba'i sngags te/ las thams cad pa'o// shAn+ti ku ru swA hA/ zhi par skul ba'o// puSh+TiM ku ru sA hA/ rgyas pa'i'o// ba shaM ku ru sA hA/ dbang gi'o// mA ra ya phaT/ gsad pa'i'o/ / ut+k+r-i Ta ya swAhA/ bskrad pa'i'o// staM b+ha ya hU laM/ mnan pa'i 'o// A kaR+Sha ya hUM dzaHdzAH/ dgug pa'i 'o// oM mu/ slar dgrol ba'i sngags so// A li kA l-i grong khyer ni/ / gsang sngags 'byung ba'i rtsa ba ste// las kyi btson ra dag kyang yin// yi ge btu ba med na ni// gsang sngags sgra ni log par 'gyur// yi ge tshang bar ma bkod na// gsang sngags sgra ni log par 'gyur/ / gsang sngags brda yis ma brjod na// sngags ni dngos grub med par 'gyur// drang ba dag ni ma byas na// shin tu 'khor bar mi 'gyur ro// yi ge bsre ba ma byas na/ / bcu drug khang pa don med 'gyur// bskor phyogs log na don mi 'grub// rig sngags nyams dang log pa ni// lha min g.yul las pham pa dang // dbang po dgra yis bsad bzhin no/ / 'khor lo spro ba ma byas na// cho ga dag ni nyams par 'gyur// rgyu yin pa dang sbyor ba dang // dad pa brtan pas 'grub par 'gyur// de bas nan tan bskyed de bya// dpa' gshin rje gshed kyi 'khor lo bri ba'i cho ga'o/ / rdzogs so// / de nas gzhan yang bshad pa ni// las kyi 'grogs kyis byed pa ste// zhi ba'i las ni bla ba yin/

CLOSE WINDOW