rgya gar skad du/ shrI badz+ra hri da ya a laM kA ra tan+t+ra nA ma/ bod skad du/ dpal rdo rje snying po rgyan gyi rgyud ces bya ba/ dpal rdo rje sems dpa' la phyag 'tshal lo// 'di skad bdag gi thos pa dus gcig na/ bcom ldan 'das de bzhin gshegs pa thams cad kyi sku dang / gsung dang / thugs kyi snying po bud med bcu'i dkyil na cha shas lnga pa'i tshul du bzhugs so// brjod du med pa'i yang brjod du med pa'i 'khor rdo rje dang pad+mar sbyor ba la bzhugs pa 'di lta ste/ dam tshig yongs su spyod pa zhes bya ba'i rdo rje mkha' 'gro dang / ye shes kyi lus yongs su 'grub pa zhes bya ba'i rdo rje mkha' 'gro dang / sgra brnyan lta bu'i rdo rje'i gsung 'byung ba zhes bya ba'i rdo rje mkha' 'gro dang / gzhan gyis shes par byed pa zhes bya ba'i rdo rje mkha' 'gro dang / rtse gcig tu 'dris pa zhes bya ba'i rdo rje mkha' 'gro dang / gzhan las 'phags pa zhes bya ba'i rdo rje mkha' 'gro dang / rten par byed pa zhes bya ba'i rdo rje mkha' 'gro dang / rlan par byed pa zhes bya ba'i rdo rje mkha' 'gro dang smin par byed pa zhes bya ba'i rdo rje mkha' 'gro dang / skyod par byed pa zhes bya ba'i rdo rje mkha' 'gro dang / go 'byed par byed pa zhes bya ba'i rdo rje mkha' 'gro dang / hA ra nu pU ra la sogs pas mdzes pa zhes bya ba'i rdo rje mkha' 'gro dang / gi tA mgrin la sogs pa'i glu mkhan zhes bya ba'i rdo rje mkha' 'gro dang / sbrul gyi snying po la sogs pa'i dri ldan ma zhes bya ba'i rdo rje mkha' 'gro dang / tshong ma sna tshogs za ba'i ro ldan ma zhes bya ba'i rdo rje mkha' 'gro dang / rtsen pa sna tshogs kyis 'khyud mkhan ma zhes bya ba'i rdo rje mkha' 'gro ma dang / gsum rig par byed pa dngos med ma zhes bya ba'i rdo rjem 'gro ma la sogs pa ri rab kyi rdul dang mnyam pa'i rdo rje mkha' 'gro thams cad dang / rdo rje mkha' 'gro chen mo nam mkha'i dbyings dang mnyam pa 'di lta ste/ gzugs kyi mtshan nyid zhu ba zhes bya ba'i rdo rje mkha' 'gro chen po dang / tshor ba'i mtshan nyid sim pa zhes bya ba'i rdo rje mkha' 'gro chen po dang / 'du shes kyi mtshan nyid nub pa zhes bya ba'i rdo rje mkha' 'gro chen po dang / 'du byed kyi mtshan nyid la rtogs pa zhes bya ba'i rdo rje mkha' 'gro chen po dang / rnam par shes pa'i mtshan nyid bsdus pa zhes bya ba'i rdo rje mkha' 'gro chen po la sogs pa nam mkha'i dbyings dang mnyam pa rnams kyis/ sangs rgyas kyi zhing 'di til gyi gang bu lta bur gang bar snang ngo // de nas rdo rje mkha' 'gro de dag thams cad gcig tu 'dus nas/ mkha' 'gro chen po rdo rje 'dzin pa chen po la mchod pa'i sprin spros pa du ma yid las byung ba lha dang mi'i mchod pa las khyad par du 'phags pas mchod nas phyag 'tshal te 'di skad ces gsol to/ / de bzhin gshegs pa rnams thams cad kyi/ gsang gsum bsdus pa'i spyod pa'i mchog/ rdo rje snying po'i rgyan gyi rgyud// 'dren pa mchog gis bshad du gsol// de nas rdo rje chen pos gsol ba btab pa'i tshigs gsan nas/ mkha' 'gro thams cad rnam par bltas te cang mi gsung bar bzhugs so/ / de nas byang chub sems dpa'i rdo rje mkha' 'gro de dag thams cad kyis kyang 'di skad ces gsol to// bcom ldan 'das de bzhin gshegs pa thams cad kyi dbang phyug gis yon tan khyad par du 'phags pa'i rdo rje mkha' 'gro chen po la sogs pa'i 'khor du 'chad du mi bzhes pa de bdag cag la mi dgyes su ma mdzad cig/ de nas bzhin gshegs pa'i bdag po rdo rje 'dzin pa chen pos/ 'khor gyi dkyil 'khor la rnam par bltas te tshigs su bcad pa gsungs pa/ sems dpa' chen pos zhus pa legs// sa 'og ma yi sangs rgyas kyang / / 'di yi gzhung gis sems rmongs na/ sems dpa' gzhan ni smos ci dgos// sangs rgyas chos nyid dag pa 'di// byis pa rnams kyis mi rtogs phyir// byin gyis brlabs nas 'chad pa ni/ / ston pa rnams kyis chos nyid do// de nas rdo rje mkha' 'gro de dag thams cad rab tu dga' nas yang mchod pa'i tshogs kyis mchod de phyag 'tshal nas 'di skad ces gsol to// bcom ldan 'das legs so legs so/ / de bzhin gshegs pa thams cad kyi dbang phyug gis bdag cag byin gyis brlab par mdzad du gsol/ de bzhin gshegs pa thams cad kyi gsang ba thun mong ma yin pa bstan cing rnam pa thams cad kyi dbang phyug gis bdag cag byin gyis brlab par mdzad du gsol/ de nas de bzhin gshegs pa thams cad dbang phyug gi rdo rje mkha' 'gro de dag gis gsol ba btab pa mkhyen nas/ sems dpa' thams cad byin gyis rlob pa rdo rje zhes bya ba'i ting nge 'dzin la snyoms par zhugs nas/ de bzhin gshegs pa thams cad kyi sku dang / gsung dang / thugs kyi gsang ba bsdus pa zhes bya ba'i snying po 'di rang gi thugs ka las phyung ngo / / oM AHhUM sa ma ya badz+ra/ de nas phyung ma thag tu de'i 'od zer gyis rdo rje mkha' 'gro'i 'khor de dag thams cad bsdus nas rang gi snying khar btsud nas/ bud med kyi dkyil na thams cad brgyal bltar gnas so/ / de nas de bzhin gshegs pa thams cad kyi dbang phyug gis de bsrung ba'i phyir mkha' 'gro thams cad 'byung ba zhes bya ba'i ting nge 'dzin la snyoms par zhugs so/ / snyoms par zhugs ma thag tu de dag dran pa slar thob cing ji lta ba bzhin du gnas so// de nas de bzhin gshegs pa thams cad kyi dbang phyug gis 'khor lo rnam par dgod pa zhes bya ba'i ting 'dzin la snyoms par zhugs nas/ snyoms par zhugs ma thag tu rdo rje mkha' 'gro de dag thams cad rang rang gi gnas ji lta ba bzhin du 'khod par gyur to// de'i tshe bcom ldan 'das rdo rje 'dzin pa chen po'i phyi gyi rlabs kyis nam mkha'i dbyings na gnas pa ji snyed pa de dag thams cad kyang bde ba dang yid bde ba myong bar gyur to/ / de nas bcom ldan 'das de bzhin gshegs pa thams cad kyi dbang phyug gis rdo rje snying po rgyan gyis rgyud 'byung ba zhes bya ba'i ting nge 'dzin la snyoms par zhugs nas/ sems can gyi khams thams cad mnyam pa nyid du dmigs te/ dbugs rngub par mi mdzad/ 'byung bar mi mdzad/ lus 'gyur bar yang mi mdzad/ lus gnas par yang mi mdzad/ dus gsum gyi de bzhin gshegs pa thams cad la mi gzigs/ mi dgongs/ nye bar mi 'jig go/ thabs dang shes rab stong par yang mi mdzad/ shin tu 'gal ba can yang dag par 'dzud par mi mdzad/ mtho ris la'ang mi 'jog/ ma dad pa rnams dad par yang mi mdzad/ ma dul ba rnams dul bar yang mi mdzad/ nye bar 'tshe ba zhi bar yang mi mdzad/ ma 'gag pa rnams 'gag par yang mi mdzad/ ma bskul ba rnams bskul bar yang mi mdzad/ ma rgyas pa rnams rgyas par yang mi mdzad/ rnam par rmongs pa rnams rmongs pa sel bar yang mi mdzad/ dga' bar gyur pa rnams mi dga' bar yang mi mdzad/ mi dga' ba rnams dga' bar yang mi mdzad/ ma khros pa rnams khros par yang mi mdzad/ mi sdug pa rnams sdug par yang mi mdzad/ drag po ma rungs pa chen po dang / gtum po chen po dang / lha dang / lha ma yin dang / log 'dren dang / gdug pa chen po dang / yi dgas dang / sha ba dang / gnod sbyin dang / srin po dang / shin tu gdug pa'i dug chen po dang / tsha ba'i gdon dang / nad dang / sbrul dang / sems can thams cad la 'tshe bar byed pa rnams nye bar zhi bar yang mi mdzad do/ / rnam par dul bar yang mi mdzad do// de nas bcom ldan 'das ting nge 'dzin de las bzhengs te/ brjid pa dang bcas par gar mdzad cing zhal 'dzum pa dang / 'dor ba dang / bskum pa dang / 'gyed pa dang / spyan mdzes pas smin rings bskyod cing bsgyur ba dang / pad+ma'i phyag gi sor mo g.yas g.yon gar gyi 'phreng ba'i tshul gyis sa'i ngos la zhabs 'phen cing bsgyur ba dang / 'dor zhing bskul ba dang / 'jog cing 'degs pa'i rnam par gnon pa'i nam mkha'i dpying 'di thams cad kun tu khyab par mdzad de/ rlung gi khams chen por kun tu khyab par mdzad/ de la khyab nas me'i khams chen por kun tu khyab par mdzad de/ de nas chu'i khams chen por kun tu khyab par mdzad/ de nas sa'i khams chen por kun tu khyab par mdzad do/ / de'ang kun tu khyab nas bcom ldan 'das byang chub sems la kun tu khyab par mdzad do// ri dang sems can thams cad dang // sna tshogs phra ba sbom po dang // bud med gzhon nu rgan pa dang / / skyes pa dang ni ma ning dang // lha dang klu dang gnod sbyin dang // gdon dang skar ma gshin rje dang // chu bdag brgya byin la sogs dang // 'byung dang 'byung 'gyur thams cad la// bcom ldan 'das ni bde chen po/ / kun tu bzang po rdo rje 'dzin// kun tu khyab par byas te gnas// dpal rdo rje snying po'i rgyan gyi rgyud las/ rdo rje mkha' 'gro byin gyis rlob pa'i le'u ste dang po'o/ / // de nas gzhan yang bshad bya ba// las kyi mchog rnams 'grub byed pa'i// gsang sngags rnams ni bshad par bya// rtse gcig sems kyis mnyan bapar bya'o/ / oM a kA ro mu khaM sarba d+harmA NAM A d+ya nut+pa na na twA ta/ gtor ma'i sngag so// a hA/ i I/ u U/ e AM/ oM A~M/ oM aH/ bud med do// r-i r-I/ l-i lAM/ ma ning ngo // ka kha ga g+ha nga/ tsa cha dz+nyanya/ Ta Sha Da D+ha Na/ ta tha da d+ha na/ pa pha ba b+ha ma/ skyes pa'i 'o// ya ra la wa/ 'byung ba'i 'o// sha Sha sa ha/ 'jigs pa la sogs pa'o// k+ShaHchos kyi dbyings kyi sa bon no// badz+rab+hU/ hUM/ daM na dzi kadz+dza/ rat+na d+h+r-ik+Shasa~M/ A ro li ka d+hI/ pra d+h+r-ikA la~M/ mkha' 'gro chen po lta'i'o// de lta tinA~M/ so sa ra t+ti l-I/ rag ti / badz+ra d+hi trA~M/ ro ma 'gro rten pa pa la sogs pa'i'o/ / k+Shi ti gad+ha k+Shi/ badz+ra pA ti dzI/ ga ga nag d+hA khaM lo ke shwa rA ya ga/ nai ba ra NA bzhi s+thA ni kaM/ sa man+ta b+hadzas/ rdo rje mkha' 'gro dam tshig sprad pa la sogs pa'i'o/ rU pa badz+rAHshASh+Tha badz+ra hU~M/ gan rdza badz+ra ba/ ras badz+ra hoH/ sAr sha baHShe/ tham d+ha tu badz+rar/ rdo rje mkha'i' 'gro mdzes par byed pa la sogs pa'i'o// ya mAn+ta k+She)/ pradz+nyAn kr-it+ta/ pad+mA na kr-i/ big+h+na ta kr-iH/ kinanI yang d+d+ha/ ma hAb la/ a tsa ye kan swad+hana~M d+ha/ tsakra bi d+hi ni hU~M dz+dza/ rdo rje mkha' 'gro gshin rje gshed la sogs pa'i'o// wA ra~M dzi na b+h+rUM/ te dzo g+har+b+ha b+h+rU~M/ tsakr-i b+h+rUM/ ba ra d+ha na b+hUM/ bi sa ra Na b+h+rUM/ bi ra dzi na b+h+rUM/ ka ro b+hA ba b+h+rU~M/ rdo rje mkha' 'gro gtsug tor rgyal ba la sogs pa'i'o// hUM hrIHkha/ rdo rje mkha' 'gro'i 'o// oM me de ni 'adz+ri gri ba ba 'amadz+dza hUM/ sa'i mi oM badz+ra prakA re NanArba d+hu/ ra ba'i'o// oM badz+ra bltar hUM la hU~M/ dra ba'i'o// oM badz+ra bi tAn d+hu She hU~M/ gur gyi'o// oM badz+ra sha rang sa dzA sa tAM/ mnga'i'o// mi yAn lArka nAM hUM hUM/ 'od kyi'o// oM shu n+ya tA dz+nyA na badz+ra swa b+hA ba At+ma kohaM/ stong pa nyid kyi sngags so// oM d+harmA d+hA tu swa b+hA ba At+ma eH/ chos kyi dbyings kyi sngags so// oM sarba ta thA ga ta ka sa tsit+ta badz+ra swa b+hA ba At+ma kohaM/ sku la sogs pa byin gyis brlab pa'i 'o// badz+ra sa ma ya sU traM mA ti kra ma hUM/ thig gdab pa'i 'o// badz+ra tsi tra sa ma ya hUM/ mtshon dgye ba'i'o// hUM haHA dz+dzaH/ dbab pa'i'o// badz+ra kI la ya mud ga ra A ko Ta ya hUM phaT/ phur bus brdung ba'i 'o// de la sogs pa'i mtha' yas pa// 'jig rten gsum du rnyed dka' ba'i// sngags kyi tshogs rnams ji snyed pa/ / de kun sngon du rgyas pa ru// gsang ba dang ni 'dzegs byed dang // bde mchog sogs la nga yis ni// las dang bcas par rab bshad pa// rnal 'byor rtogs pas shes bya'o dpal rdo rje snying po rgyan gyi rgyud las/ sngags kyi le'u ste gnyis pa'o// / de nas mkha' 'gro grong khyer mchog/ dkyil 'khor 'jigs pa bri bar bya// las kyi cho ga shes pa yis/ / ci rigs par ni las rnams bya// nyi shu rtsa lnga'i srad bu ni// sems med las byung byas nas su// byin rlabs mi bskyod rtag pa ru// byas te thig ni gdab pa'o// gru bzhi pa la sgo bzhi pa/ / tA ra Na bzhis brgyan pa ste// dar dang me tog 'phreng bas grubs// srad bu bzhi dang rab ldan pa// thur gyi cha ni thams cad du// zla ba rin chen rdo rje dgod// las kyi bye brag shes pa yis blotho dang ldan pas phyag rgya dgod/ / in+d+ra nI la lta bu yi// 'jigs byed rdo rje dbus su bri/ shar du lce brgyad 'khor lo dkar// lho ru rin chen grur dgu ljang // nub tu 'dab brgyad pad+ma mar/ thung ngural gri sngon po bri// me yi mtshams su 'khor lo ston// bden thal ut+pal dmar po dang // rlung gi mtshams su pad+ma dmar// dbang ldan ut+pal ser po ste// rdo rje thob shar gyis/ lho yi sgo ru rdo rje dbyug/ pad+ma'i sdong bu nub kyi sgo// byang sgo rdo rje kha bye ba// sbyor ba ldan pas dgod par bya// rnam pa nyi shu rtsa lngar ni// tshon rtsi dag kyang bsgom bya ste// rdul tshon lnga la sogs pa rnams/ / rim pa bzhin du gdab par bya// de nas bum pa gzung bya ba// rtsa ba nag nog med pa yi// zhabs brtan mgrin ring mchu 'phyang ba// lha yi grangs tsam sta gon gnas// mgul par ras kyis yang dag dkris/ / ldum bu yis ni kha mdzes pa// rin chen sman 'bru sna lnga dang // spos chu yis ni rab bkang nas// bum pa mngon par bsngags par bya// rnam rgyal bum pa dkyil 'khor gyi// bdag po lha mo rnams kyi bzhi// lha rnams kyi ni bum pa bzhi// sgo yi phyogs kyi bum pa ni// las kun byed pas bzlas byas te// ku sha'i chun pos sems can che// 'jug pa kun la gtor bar bya/ yon dang gtor ma mchod phul nas// de dag phyi grwar rab bkod de// g.yas su rgyal ba spyan drang ngo // de nas lha rnams rab gnas pa'i// bsam pa'i sbyor bas bsam bya ste// phyag rgya bral ba sbyor ba ni/ / lus can byin gyis mi rlob pas// bu mo gzugs bzang lang tshos brgyan// dbang thob lus rgyas thob pa mo// g.yon ma rgyan gyis rab brgyan te// de yis 'khor lo sprul par bya/ de la mar me brgya sogs pa'i// mchod pa phul nas bstod bya ste// bshang gci khu ba khrag rnams ni// dung chen po ru bzhag bya ste// lnga rnams la ni dbul bar bya// de nas mkha' 'gro grong mchog tu/ / slob ma rnams ni gzhug bya ste// rdo rje ye shes rab thob pa'i// de bzhin gshegs pa thams cad kyi// pho brang dkyil 'khor dam pa 'dir// bdag gis slob ma gzhug par bya/ / de nas slob ma de yis kyang // me tog sngags 'dis gtor ba'o// pra tits+tsha badz+ra hoHzhes bya// de nas tshig 'dis gdong g.yogs dgrol// de ring dad pa'i shugs kyis ni// dkyil 'khor du 'dir blta bar bya/ / sangs rgyas rigs su khyod skyes so// sngags dang phyag rgyas khyod byin brlab// dngos grub thams cad phun sum tshogs// dam tshig mchog tu 'grub par byed// rdo rje pad+mo rol pa'i mchog/ sngags kyi bdag 'ad shes par bya// pa sh+ya badz+ra/ gang dag me tog gsang ba ste// de de de yi lha yang dag/ de yi sbyor ba rab sbyin te// de yi nan tan du sgrub po// dung chen bdud rtsi lnga brudrung de/ / dmyal ba'i chu 'dis khyod la ni// dam tshig 'das na sreg par byed// dam tshig bsrungs na dngos grub pa'i// 'thung zhig rdo rje bdud rtsi'i chu// badz+ra u da ka/ de nas sangs rgyas thams cad kyi/ / dam tshig dang ni sdom pa rnams// bla mas slob ma sdig bral la// ji lta ba bzhin bsgrag par bya// dpal rdo rje snying po rgyan gyi rgyud las/ ri mo'i dkyil 'khor gyi le'u ste gsum pa'o/ / // de nas gzhan yang bshad bya ba// dbang bskur ba yi cho ga'i mchog/ gang gis legs par byed 'gyur na// de ni sangs rgyas nyid du 'grub// slob dpon mtshan nyid thams cad ldan// yang dag shes shing rgyud shes pa// de nyid bcu la sogs pa yi// gsang rig cho ga shes pa pos// bsgrims te slob ma yang dag gzung // bla ma la gus da pa'o/ / dge sgom lha rnams mchod byed pa// gtong phod yon tan ldan pa'o// de nas slob ma de yis kyang // langs te zhabs la mgos gtugs nas// rgyal po dbang phyug bde dam pa// gos dang rgyan gyis legs par bgos/ / steng du bla re bre bar bya// gdugs dang rgyal mtshan pa ngan dang // lAm dang tshangs pa'i skud pa dang // gdu bu dag dang ska rags dang // bkra shis tshigs bcad sna tshogs kyis// slob ma sdig dang bral ba la/ / slob dpon gyis ni dbang bskur ro// dang po rnam rgyal bum pa dang // de nas lha mo bzhi rnams dang // lha rnams kun gyi bzhi po bzhis// bkra shis tshigs bcad glu sgra dang // rdo rje dril bu gsil ba yis/ / skyob pa'i dkyil 'khor mngon sum du// til gyi gang bu bzhin gang ba'i// rgyal bas bum pa bzung nas ni// de nyid la ni dbang bskur bar// dkyil 'khor de nyid rig par bas de lta bu ni bsams nas kyang / / chos kyi mtshan nyid bstan par bya// de nas yid 'ong bu mo ni// legs par goms pa dbang thob pa// rgyan gyis rab brgyan rab mdzes pa// btsal te bla ma la phul nas/ de nas rgyal dbang slob ma de// nang ni sbas pa btus pa yi// gsang ba mnyam par 'jug pa yi// sbyor dang ldan pas dbang bskur bya// rdo rje pad+mo las drang ba// sbom po mtha' ltalhag rtse sbyar nas/ / rkan du rdo rje gzhag par bya// kye ma'o bde ba bde ba che// kye ma'o dam tshig bde brjod cing // kye ma'o bde ba blang bar bya'o// 'di ni gsang ba zhes bya ba'i// de dbang bskur ba'i thabs mchog go/ yang na shin tu dang ba dang // gzugs bzang sgrub la dga' ba dang // sbyor goms bla ma la ni dbul// bla mas byin brlabs lha mo dang // sgrub pa de la sbyin par bya// de yis blangs nas brtson pa'i tshogs/ / ji skad gsungs bzhin rab byas nas// rang gi lha dang sangs rgyas dang // byang chub sems dpa'i tshogs rnams kun// mnyes byed cho gas sems brtags te// mngon sum bde ba rang byung ba/ / gzhan gyis gang du bsgrag mi nus// go ba'i yul de bde ba che// bla ma de la dbul bar bya// bla ma gzhan la de bzhin du// ci dga' ba yi yon yang dbul// slob dpon cung zad ci 'dod pa/ / yid la bsams pa dbul bar bya// dam tshig 'da' bas 'jigs pa'i phyir// bsgrims te de bzhin dbul bar bya// slob dpon gyi ni yul gyi mchog/ rigs kyi khyad par gyis ni lnga// bum pa'i dbang sogs dbye ba yis// yang na gsum du 'gyur ba yin// rang gi ma dang seng ge'i gdan// yon gyi mchog ste sangs rgyas rigs// gser dang glang po rin chen dang // sring ma bla ma la dbul ba/ / rdo rje sems dpa'i rigs yin te// yon te yon gyi mchog yin no// shing rta rta ni shin tu brgyan// rang gi chung ma dbul bya ste// rin chen sna tshogs rnam dag pa/ yon de rin po che yi rigs// mu tig 'phreng ba shin tu mdzes// bu mo rin chen 'dra ba yis// brgyan te bla ma la dbul ba// yon de pad+ma'i rigs yin no// rgyal po dang ni dbang phyug dang // chung ma 'phrul gyi bzhon pa sogs/ / glang po rta ni shin tu brgyan// de bzhin gshegs pa kun gyi rje// nan tan bla ma dbul bya ba// sna tshogs rdo rje'i rigs yin no// de rnams bzhi dang 'gyur ba dang // mi 'gyur ba yi bye brag gis/ / gsum du shes bya bla ma la// blo ldan rdo rje slob ma yis// ci ste bde ba kun 'dod na// dad mos sems kyis dbul bar bya// yid la gang bsams ma phul lam// khas blangs de ni ma phul na// yi dgas dmyal ba rnam gnyis su// nges par skyes te rlag par 'gyur// de bas de rnams rab phul nas// gsol ba dag ni rab tu gdab// rdo rje dkyil 'khor chen po yi/ / dkyil 'khor du ni bdag zhugs so// sbyor ba'i dkyil 'khor chen po yi// dkyil 'khor du ni bdag zhugs so// sbyor ba'i dkyil 'khor chen po yi// dkyil 'khor bdag gis de ring mthong / / gsang ba'i dkyil 'khor chen po yi// dkyil 'khor du ni bdag dbang bskur// de nas bla ma de yis kyang // de la dbang bskur sbyin bya ste// dri dang me tog 'phreng bas brgyan// bsgrims te yang dag brtag par bya// dang po la ni bus pa'i dang // gnyis pa la ni gsang ba'i dbyung // gsum pa shes rab ye shes te// bzhi pa de yi ye shes te/ bla ma las ni thob pa'o// dpal rdo rje snying po rgyan gyis rgyud las/ phan yon dang bcas par dbang bskur ba'i le'u ste bzhi pa'o// // gang gis thabs kyis rigs lnga'i don/ / rang gi don gyur kun tu bzang // 'di dag gzhan la rab bde'i phyir// rdo rje sems dpa'i sgrub thabs bshad// yid 'ong dben pa'i sa phyogs su// ci bder gnas la nam mkha' kun/ / sems kyis khyab par byas nas su// rnam brtags e ma'o 'jig rten kun// sdug bsngal chos kyis kun nas gtses// byang chub sems nyams sems can rnams// kun las 'byung zhes dam bcas pa'i// sngags pas spyi bor gzhag pa ni// AHsems kyi rdul phran cha drug rnams// phyogs bcu dag tu phye nas su// chos kyi don rnams nges bsal nas// shin tu dri mang sems dag pa/ / 'das dang ma 'ongs pa yi sems// da ltar yang ni dmigs su med// gnyis med de la gnyis med med// nam mkha' zhes pa'ang gnas pa med// de ltar kun tu brtags nas su// 'gro ba thams cad shin tu stong / / dri med rnal 'byor nyid kyi yin// dngos po med par rang sems bsam// 'gro ba 'di ni de lta bu'i// dngos po gang dag yod min na// sdug bsngal sna tshogs gang dag lags// sems nyams sems can 'byung bar sgom/ / 'on kyang sngon gyi smon lam shugs// dbyangs yig spel ba'i glu ldan bya// rin chen sems ni rmugs pa la// bde gshegs rnams kyis bskul bar snang // shUn+ta tI ti yo ga bArda / swAhA/ pra b+hA bI A kA shA ta mA pa ga ta sa ma ya/ u pa ta pa yan+ti sug ta su ga te shrI badz+ra swA hA/ pU pu s+t+waM haM/ rnam rtog kun spangs dri med pa'i// rnam par mi rtog sgom pa'i sems// sngags kyi de nyid bskyod byas la/ hUM zhes pa yi gzugs su brtag/ ting nge 'dzin gyis dbang 'gyur na// gang phyir de ni bsgoms pas thob// dam pa nam mkha'i dbyings la gnas// byang chub sems tshogs der bcas la// rnal 'byor yid kyis kun bsams nas/ / rgyas par rnam par brtag par bya// yi ge bruM gyis lha yi gnas// rdo rje rin chen gyis ni brgyan// sgo khyud rta babs ka ba dag/ dar gyi 'phreng bas rnam par klubs// gru bzhi pa la sgo bzhi pa// dril bu'i dra ba ngag gis brgyan// rtag par do shal ma long dang // me tog 'phreng bas rgyan rnams bres// de yi dbus su seng ge'i gdan// seng ge brgyad kyis rnam par brgyan// smon lam dbang gis de dag kun/ byang chub sems dpa' mthu bo che// shar phyogs pa glang shin tu rgyas// lho phyogs rta yi gdan bzang ste// nub phyogs su ni rma bya bshad// de bzhin byang phyogs nam mkha' lding // mi bskyod khro bo bsam pa ni// mthing kha dkar po dmar po'i zhal// rdo rje phyag rgya thugs ka na// mthing kha kha dog gsal la bzang // g.yas na rin chen 'khor lo ste// ral gri pad+ma g.yon pa na// 'jig rten khams ni kun 'khrug pa'o// brtul zhugs can gyis zhal gsum bsam/ / dang po yi ni stong pa nyid// gnyis pa de bzhin mtshan ma med// gsum pa smon pa med pa yi// zhal du mkhas pas rig par bya// phyag drug rtag tu 'bar bar sgom/ / mtshon cha sna tshogs rnams dang ldan// pad+ma la ni mnyam bzhag nas// ye shes phyag rgya snying kha nas// dbus kyi gnas su bsam pa ni// rdo rje skyil mo krung du gnas// shar gyi gnas su bsam pa ni/ / sngags pas rnam snang thub pa ste// dkar dang mthing kha dmar ba'i zhal// 'khor lo phyag rgya snying kha na// rdo rje 'bar sogs 'od gsal ba// rin chen rdo rje g.yas pa na// ral gri pad+ma g.yon pa na// rnal 'byor can gyis rtag par bsam/ / thor tsugs dbu rgyan dag gis brgyan// rin chen mgon po lho phyogs na// ser dang mthing kha dkar ba'i zhal// rin chen phyag rgya snying kha na// mar gang lta bur snang ba'o// g.yas na 'khor lo ral gri ste// rdo rje pad+ma g.yon na'o// rtag par rnal 'byor pas bsam pa// rin chen char du 'bebs pa'o// nub phyogs gnas su dgod bya ba// snang ba mtha' yas bsam pa ni// dmar dang mthing kha dkar ba'i zhal// pad+ma rA ga'i mdog lta bu// pad+ma'i phyag rgya snying kha na// rdo rje rin chen g.yas pa na// 'khor lo ral gri g.yon pa na// pad+ma la ni mnyam gzhag bsam// byang phyogs gnas su don grub ni/ / ljang khu mthing kha dkar ba'i zhal// ral gri phyag rgya snying kha na// 'bar ba'i 'phreng bas mnyam pa'o// pad+ma rdo rje g.yas pa na// 'khor lo rin chen g.yon pa na// zla ba'i dkyil 'khor dbus gnas pa/ / byang gi gnas su bsam par bya// sngags pas phyag drug bsam pa ni// spyan de zhal gsum dkar mo yi// rnam par snang mdzad phyag rgya bzhin// de yi don du rnam par sgom// sA ma kI/ yang bsam pa ni// ut+pal dang ni mthing 'dra ba// zhal gsum phyag drug chags pa ste// mi bskyod phyag rgya mchog 'dzin pa'o// chags pas chags pa rigs kyi sngags// zhal gsum phyag drug dge ba ste// sbyor ba'i sa ni dkar mo bsam/ / pad+ma rA ga'i phyag rgya'o// sgrol ma kha dog sar mo ste// 'khril bag rgyan gyis rab tu brgyan// zhal gsum phyag drug rab tu bsam// thogs med rgyal po'i phyag rgya'o// sgo bzhi sgo srungs dgo bya ba sgo rnams su ni khro bo bsam/ / khro bo chen po gshin rje gshed// gzhan gyis mi thub de bzhin te// thub par dga' ba rta mgrin dang // khro bo bdud rtsi 'khyil pa bsam// de dag kun kyang zhal gsum pa drag cing drag por gnon pa'o/ / mthing kha ser po de bzhin dmar// ljang khu dag ni kha dog tu'o// mtshon cha sna tshogs 'dzin pa ste// thod pa'i 'phreng thogs de bzhin no// gdon rnams thams cad skrag byed pa gnod sbyin srin po 'phra man ma/ / ma he seng ge stag rnams dang // ba lang zhon pa rnam bzhi'o// rnam par 'gyur ba'i khro gnyer can// khro bo spyan ni kun nas bsdus// sngags 'di rnams kyis bsam pa ni/ gshin rje gshed la sogs pa'o// sngags kyi de nyid rjes mthun par// sngags pas dkyil 'khor bsgrubs nas su// sa yi snying po la sogs pa// sems dpa' rnams ni der gnas bsam// lus dang ngag dang sems @de nyid/ / hUM zhes bya ba'i yi ge mchog/ sems ni de ru zhugs par bsam// mi bskyod pa ni bdag nyid che// dbang po'i lam du byung nas su// dang ba'i dkyil 'khor gyis ni brgyas bdag nyid gcig cing gcig 'gyur bar/ / skad cig gis ni brtag par bya// khyod ni rdo rje sems zhes bya// de la sogs pas bstod par byed// de nas rnam snang mdzad la sogs// rang gi snying khar rab tu gzung/ / gzugs rnams kyi ni rang bzhin du// rnam par snang mdzad thub pa bzhugs// tshor ba rin chen mgon po yin// mtha' yas 'od ni 'du shes su'o// 'du byed kun tu gdon mi za/ mi bskyod pa ni phung po lngar// de bzhin gshegs pa lnga rnams ni// sngags 'di rnams kyis bzhugs par bsam// sa yi khams kyi rang bzhin du// de nas spyan ni bzhugs bya ste// rnal 'byor yid kyis bsam pa ni/ / de yang spro bar gnas par bsam// mA ma kI yang chu yi khams// brlan zhing khrag ni rgyu ba'i phyir// rnal 'byor pas ni yid kyis bsam// de yi lus ni rgyas par 'gyur// me yi khams kyi rang bzhin du// gos dkar mo yang bzhugs par bya// kun tu khyab par zhugs pa yi// 'od rnams su ni der 'gyur ro// sgrol ma rlung gi rang bzhin du// bzhugs par de ni bsam par bya/ / rlung ni rnam pa lnga ru 'gyur// de bzhin yid mgyogs rdzu 'phrul 'grub// rdo rje dbyings kyi dbang phyug ma// nam mkha'i rang bzhin dag tu 'jug/ de lus khong stong nyid la ni/ / rang sems yon tan sgom pa'i sems// nam mkha'i dbyings kyi rnal 'byor gyis// sangs rgyas sgyu ma'i sbyor bas su// dag pa'i bdag nyid ci 'dod par// de nas ri rab phul nas 'gro/ / sa yi snying po bdag nyid che// sangs rgyas spyan ni bdag nyid de// mig gi phyogs su zhugs nas ni// 'phrul gyi mig tu rtag tu 'gyur// phyag na rdo rje bdag nyid che// rna ba'i rnam shes sbyor bas na/ / sgra rnams thams cad shes pa de// rna ba'i rnam shes de bzhin 'gyur// nam mkha'i snying po bdag nyid che// sna yi rnam shes sbyor bas na// sangs rgyas shangs ni bdag nyid shes/ de yang de yi ngo bor 'gyur// 'jig rten dbang por rab chags pa// rdo rje rtse yi sbyor bas su// ro yi dngos po myong ba des// skad cig gcig la de ru 'gyur// blo ldan sgrib pa thams cad ni/ rnam par sel ba'i ming dang ldan// nyon mongs thams cad rnam par sel// nye ba'i nyon mongs pa yang 'jig/ me long gi ni rnam pa ltar// rten pa'i tshul gyis 'byung ba ni// gzugs brnyan gyi ni sbyor bas su/ / skad cig gis ni de ru 'gyur// bcom ldan rdo rje sems dpa' dpal// rnam pa bcu dang drug tu dang // sbyor ba de ni byin brlabs nas// sngags pas de ni sems la gzhug/ khro bo lcags kyu dpung pa yis// zhags pa lta bu gnyis pa'o// su gu rgyud kyi kha sprad gsum// rgyal mtshan gzhug par khyab par gzhag/ de ltar don rnams rab tu zhugs/ sangs rgyas kun gyi ngo bor bdag/ rdo rje phyag rgya dang ldan pa// g.yon pa dril bsnams sta zur brten// rdo rje sems dpa' de gnas 'gyur// rnal 'byor chen po dkar ba'i gzugs/ / dkar dang mthing kha dmar po'i dbu// stong nyid la sogs bdag sbyor ba// rdo rje sems dpa' zhes su smra// rdo rje phyag rgya rjes su chags pa la// oM sarba ta thA ga ta a nu rA ga Na badz+ra swa b+hA ba At+ma kohaM/ sangs rgyas mchod pa la/ oM sar+b+ba ta thA ga ta pU dza badz+ra swa b+hA ba At+ma kohaM/ rang gi dkyil 'khor snga ma bzhin// mdun du bsams nas nam mkha' la/ / khyab pa'i sbyor bas gcig byas te// dkyil 'khor snga ma bzhin bsams bzlas// bcom ldan mi mnyam gzhug bcing bzhugs// rdo rje phyag rgya thugs kar bsnams// g.yas par 'khor lo rin po che// pad+ma ral gri g.yon pa'o// de nyid gsum gyi tshul gyis ni// ci tsam nus par bzlas pa bya// skyo na yid kyis drangs nas ni// de dag thams cad snying khar gzhug/ mnyam pa nyid kyi gnas 'dug na// lus kyis ci tsam bskyod pa dang // tshig tu rab tu 'phro ba'i rnams// de dag sngags dang phyag rgyar 'gyur// rtag tu sgom pa'i sbyor bas ni// de la sems dpa'i gzhan ma yin// rnal 'byor ngo bo gzugs can la// lha mo rnams kyang de la 'dzin// dbang po lam du gang gyur pa// de dang de yi ngo bo dag/ shin tu mnyam gzhag sbyor bas su/ / bdag nyid lhag pa'i ltar bya'o// dpal rdo rje snying po rgyan gyi rgyud las/ lha'i le'u ste lnga pa'o// / de nas bcom ldan 'das rnam par snang mdzad chen po sku/ dang / gsung dang / thugs rdo rje'i de bzhin gshegs pa la/ de bzhin gshegs pa thams cad dang / byang chub sems dpa' thams cad kyis tshig 'thun par sgra dbyangs gcig gis gsol ba btab pa/ bcom ldan de bzhin gshegs kun gyi// ye shes gces pa dri med pa// byang chub sems ni rin po che// bla na med pa bshad du gsol// de nas bcom ldan 'das la de bzhin gshegs pa thams cad kyis gsol ba btab par thugs su chud nas/ byang chub sems dpa' rnams la 'di skad ces bka' stsal to// sems ni lus kyi rnam pa yin la/ lus kyang sems kyi rnam pa yin zhing / sems kyang tshig gis rab tu brjod pa yin no// de nas byang chub sems dpa' de dag gis de bzhin gshegs pa thams cad kyi sku dang / gsung dang / thugs sbyor ba thob nas ched du brjod pa 'di ched du brjod do/ / kye ma kun tu bzang po 'di// sku gsung thugs kyi rdo rje can// chos rnams skye ba med pa ste// g.yo ba med rang gnas med pa// rtog pa'i dri ma spangs pa yin/ / bskyed par bya zhes rab tu gsungs// de nas bcom ldan 'das mi 'khrugs pa de bzhin gshegs pa gsung spros pa'i rdo rje zhes bya ba'i ting nge 'dzin la snyoms pa zhugs nas/ byang chub kyi sems 'di gsung ngo // dngos po 'di dag ma skyes te// chos can med cing chos nyid med// nam mkha' bzhin du dmigs med pa'i// byang chub sems ni bstan pa yin/ / zhes bcom ldan 'das de bzhin gshegs pa rdo rje mi 'khrugs pas gsungs so// de nas bcom ldan 'das de bzhin gshegs pa rin chen 'byung gnas kyis bzhin gshegs pa thams cad dmigs su med pa zhes bya ba'i ting nge 'dzin la snyoms par zhugs nas/ byang chub kyi sems 'di gsung ngo // dngos po 'di dag dngos med de// chos kyi mtshan nyid spangs pa yin/ / bdag med chos las legs byung ba'i// byang chub sems ni brtan pa yin// zhes bcom ldan 'das rin chen tog gis gsungs so// de nas bcom ldan 'das de bzhin gshegs pa 'od dpag med kyis rdo rje me lce 'bar ba zhes bya ba'i ting nge 'dzin la snyoms par zhugs nas/ byang chub kyi sems 'di gsungs so// dngos po skye ba med pa ste// dngos po ngo bo yod min pas sanam mkha'i go 'phang thob po zhes/ / dngos rnams rab tu brjod pa yin// zhes bcom ldan 'das 'od dpag med kyis gsungs so// de nas bcom ldan 'das de bzhin gshegs pa don yod grub kyis de bzhin gshegs pa thams cad kyi bla ma'i yang bla ma'i rdo rje zhes bya ba'i ting nge 'dzin la snyoms par zhugs nas/ byang chub kyi sems 'di gsungs so// chos rnams rang bzhin 'od gsal ba/ / gzod nas dag cing rnyog pa med// sems can med cing srog kyang med// sangs rgyas nyid dang byang chub med// rmi lam sgyu ma ltar snang ba'i// byang chub sems ni brtan pa yin// zhes bcom ldan 'das don yod grub kyis gsungs so// de nas yang byang chub sems dpa' sems dpa' chen po byams pa la sogs pa/ de bzhin gshegs pa thams cad kyi sku dang / gsung dang / thugs rdo rje de bzhin gshegs pa'i byang chub kyi sems rnam par dag pa thob nas ngo mtshar skyes par gyur te tshad du brjod pa 'di ched du brjod de// kye ma'o sangs rgyas kye ma'o dag/ kye ma'o chos ni bstan pa rnams/ / bdag med chos las legs byung ba// byang chub sems khyod phyag 'tshal lo// byang chub sems kyi sgom pa yi// mi g.yo yi ge las byung zhing // rmi lam la sogs ma skyes pa// byang chub sems khyod phyag 'tshal lo// gnas dang stan ni rnam bsams te// sems dpa'i skyil mo krung bcas nas// dang por rang bzhin dag go zhes// dag pa'i chos kyi tshul la gnas// yid kyis hUM byas rdo rje can/ / rdo rje sems mas byin gyis brlab// rin chen lus mya nga rgyal bya// lag po stong de bskor ba ni// lcags kyu yis ni spyan yang drang // byin nas drang por phyogs bcing ste/ dam tshig mchog kyang dbul bar bya/ / gdan rnams so sor phul nas su// mchod yon 'dul ba'i sbyor ba bya// dbang bskur mtshon cha go cha sogs// sil snyan mchod sogs ngo bo bya// rnam pa kun gyis mnyes bya ba/ rnal 'byor bdag nyid can gyi bdag/ rnal 'byor rnam gsum shes bya ste// byin gyis brlabs dang yongs brtags dang // gzugs nyid yongs su rdzogs pa dag/ rnal 'byor yin zhes sangs rgyas gsungs/ / sngags kyis byin brlabs nga rgyal bskyed// rnal 'byor byin rlabs yin par gsungs// byang chub sems ni dag pa dang // gsang sngags sa bon skye ba che// phyag rgya tshogs su brtag pa yi/ / rim gyis gzugs kyi rdzogs bya ba// de ni brtags pas brjod pa ste// rnal 'byor cho ga yin par gsungs// bsdu dang spro bar bya ba las// rnam pa'i mchog kun ldan pa dang // skad cig ye shes kyis rdzogs pa/ / rdzogs pa'i rnal 'byor zhes brjod do// dang por dam tshig byin brlabs par// rnal 'byor rig pa dag gis brtag/ rab tu rdzogs par bya ba dag/ 'di ni rnal 'byor cho gar bshad/ / nyon mongs dri mar bcas pa'i sems// byang chub sems kyis dag bya ste// de ni rang bzhin dag pa'o zhes// brjod cing thal mo gsum gyis sbyar// ngag gyur de nas blo yis ni// sems la so sor brtag par bya// sems la so sor brtags nas kyang // phyi rol rang bzhin stong par bya// sems tsam la ni gnas nas su// byang chub tshogs kyi bag chags des// bsgom par bya ba'i ngo bo dag zla ba'i gzugs su rnam par brtag/ dag pa'i pad+ma la gnas pa// oM gyi myu gus bskrun pa yi// yan lag kun gyi mtshan nyid gzugs// rdo rje sku ni bsgom par bya// AHzhes bya ba'i spros med gsung / sems ni hUM zhes bya bar sprul// yi ge gsum gyis byin brlabs lus// snying la gan+d+ha pa zla ba'i gzugs// de la rang gi yi ge ni// mdog gzugs 'od ni byed bsams te// nga rgyal bskyed nas de la ni/ / rdo rje'i bdag nyid bdag nyid brjod// rgyan kun yongs su rdzogs pa dang // 'od kyi dkyil 'khor gyis brgyan pa// cha shas kyis ni dra ba can// ye shes sems dpa' rdzogs par brtag/ de 'og lag pa'i phyag rgya yis/ / go cha mtshon cha la sogs bya// rdzogs sangs rgyas lnga dbang bskur te// cod pan 'phreng ba rnams kyis klubs// de nas de 'og sangs rgyas kyi// sprul pa mdzad pa'i sgyu ma 'phro/ / yan lag bzhi pa dpung ldan pa'i// phyogs bcur khro bo bcu dag dang // bsnyems ma dang ni tog ldan ma// mtshon cha ma dang rtsed mo can// sgyu ma'i cha byad rnam pa'o// rnam par 'phrul pa byin gyis brlab/ / kun la khyab par byed pa yi// sna tshogs dbus su gzhag nas ni// de nyid chen po bdag nyid lngas// phyogs bzhi 'khor la khyab bya ste// dga' bas dga' byed bzhi yang spro/ / ting 'dzin kun gyi dga' ba la// 'os par byed pa'i sngags pa yis// 'khor lo dang ni rdo rje'i gzugs// pad+ma'i gzugs la de dag ni// 'khor lo kun la pad+ma yi// ngo bo yis ni rol pa dang / / e zhes bya ba 'phro ba las// mdog ldan bdag nyid gzugs su bya// mdzes pa'i rgyan rnams kun ldan pa'i// nyid kyi gdan la bzhugs par lta// sgeg dang glu dang gar rnams dang / rgyal mtshan la sogs mtshon dgye dang // sil snyan mchod pa'i rnam pa ni// sna tshogs rnams kyis mchod pa bya// rnam pa kun dang ldan par ni// bdag nyid kyi ni lus bsgoms nas myur ches bya ba bul ba dang / / mi gsal gug kyang nyams pa dang // rtog pa ngan pa rnam par spangs// de nas gsang sngags bzlas brjod bya// bzlas pas skyon lag g.yas kyis// bsgrims nas rdo rje gsor nas su/ / g.yon pas dril bu la gsil zhing // rdo rje gru tshul sna tshogs dang // ba ngan tshul du byas pas mchod// bzlas pa yis ni mjug brtul nas// gshegs su gsol dang rang nyid 'grub/ / lus dang ngag dang sems bsgoms te// brtan por ci bder 'gro bar bya// bar chad du ni gyur nas kyang // yi ge brgya pas byin gyis brlab// de ltar bsgoms pas sgom byed pa/ rdo rje theg pas rab rdzogs pa'i// byang chub de ni myur thob nas// zla nyi dkyil 'khor lta bur snang // sna tshogs las kyi thob 'dren cing // rin chen rgyal mtshan rab dga' byed// rgyal byed pad+ma'i gdung brgyud can/ / gnas tshan 'jig rten dbang phyug 'gyur// dpal ldan rig sngags kun gyi gtso// dga' chen 'dod dgur lcags kyu 'gyur// sgyu ma bzhin du kun shes shing // dregs pa 'joms byed khro bor 'gyur// dpal rdo rje snying po rgyan gyi rgyud las/ byang chub kyi sems sgom pa'i ye shes sgrub pa'i le'u ste drug pa'o// / sbyin sreg de nyid la gnas pa'i/ / me ni lha yi zhal yin pas// sna tshogs las rnams grub byed pa'i// sbyin sreg las ni rab tu bshad// sbyin sreg las ni lha rnams tshim// tshim par gyur na dngos grub ster gsang sngags lhag chad gang yin pa/ / thams cad sbyin sreg dag gis bskongs// de phyir sku gsung chos mchog gis// sbyin sreg rab tu bsngags par mdzad// gtsub shing las ni byung ba'i me/ / dge ba yi ni las rnams byed// gdol pa'am dur khrod byung ba yi// me ni las rnams rab tu sgrub// thab khung zlum po gru bzhi dang // zla gam dang ni zur gsum dang / dkyil 'khor gyi ni kha khyer la/ / rdo rje mtshan ma dag gis brgyan// sbyin sreg de nyid tshul rigs pas// thab khung rnams kyi dbus su ni// pad+ma'i steng gnas gtsug tor dang / rdo rje rin chen pad+ma gzhag ji ltar dmigs pas 'dug nas su/ / lag gnyis pus mo'i bar bzhag ste// dgang gzar mar gyis bkang nas ni// blugs gzar bkang ste de bzhin sreg/ sbyin sreg la dgos g.yas su gzhag g.yon du chu yi snod dgang ngo / / las kun byed pas bzlas nas su// bsang gtor dang ni 'thor 'thung bya// ku sha rtse mo rnon po yis// thab khung khor yug bskor bar bya// me ni 'bar bar shes pa dang / g.yas pa mi 'jigs thob spyod cing // gsang sngags 'dis ni cho ga bzhin// me yi lha ni spyan drang ngo // tshur spyon tshur spyon 'byung po yi// lha yi drang srong bram ze mchog/ sreg blugs zhal zas pazhes nas kyang / / 'di nyid du ni bzhugs su gsol// oM ag+na ye A di byA A bi she A bi she ma hA shri ye ha bya ka bya bA hA nA ya swA hA/ phyag g.yon rdo rje bsang gtor te// mchod yon mchod pa rnam lnga dbul/ / me yi phyogs nas bos pa yin// gsus po che la mig gsum pa// gdong bzhi pa la lag bzhir ldan// mdog dmar ral pa'i thor tsugs can// me yi dkyil 'khor la gnas shing las kyi 'od zer rnams kyis brgyan/ / lag pa dang po mchog sbyin la// gnyis pa na ni sngags nor 'phreng // g.yon pa ril ba spyi blugs te// gnyis pa na ni be con nyid// mdog dmar rgyan ni med pa la/ / drang srong rnams kyis yongs bskor ba// 'di lta'i gzugs ni bsams nas kyang // thab kyi dbus su bzhugs su gsol// de la sbyin sreg la dgos pa// kun la lan gsum sreg blugs dbul/ / de nas 'thor 'thung byas nas su// 'bar ba'i rnam par bsgyur bar bya// rim pa 'di yi tshul gyis ni// mkhas pas lha rnams tshim par bya// legs par tshim byas bzod gsol te// 'dod pa'i dngos grub gsol ba gdab/ / bum pa rgyal mtshan rdo rje gdugs// pad+ma'i lcags kyu'i rnam pa dang // me lce mdog dkar snang ba dang // 'khyil ba'i mtshan mas mkha' las brtag/ des ni myur du 'byung 'gyur ba/ / bsgom dang bzlas la 'bad par bya// zhi dang rgyas dang dbang la ni// oM zhes pa dang swA hA mthar// dbyangs kyi rgyud ni sring pa ni// bar chad med pa'i dbyangs kyis sbyar// zhi ba'i sems ni zhi ba la 'byor pas rgyas pa mngon par spel/ / dregs bde stabs tshul bcas pa dang // dbang du gyur pas dbang du bya'o// drag shul spyod tshul la gnas pa// hUM zhes pa dang phaT dang bcas// lus ni me lce 'bar ba dang / / 'jig rten gsum po bzar bsams nas// bskul ba'i tshig dang spel ba yi// gsang sngags yi ge nges par sbyor// sngags grub cho ga shes pa yis// sbyin sreg cho ga thams cad la/ / sna tshogs las dang ldan pa yi// yang dag yin par mchod par bya// sbyin sreg de nyid la bskul zhing // dang po dgong blugs sreg cing dbul// phyis ni rim bzhin rnam pabapar spel/ / zhi dang rgyas dang dbang rnams la// dge ba'i rdzas rnams sbyin sreg bya// bshang gci khrag rkang rus pa dang // sha chen dag kyang sbyin sreg bya// ci ste ye shes sems dpa'i zhal// mi gtsang ba yis bkang na go/ ji ltar sdig pa skye mi 'gyur// gal te sdig 'gyur 'bras bu gang // sems can mi shes pas rmongs pa// thabs dang shes rab rnam spangs shing // phyi rol dngos la mngon zhen pa// rnam rtog dra bas blugs byas gang / / de dag gis ni dge sdig gi/ phung po gnyis su rnam par brtags// chos 'di rang bzhin gyis dag ste// skye ba med cing gnas med kyang // sems can shes pa spel ba'i phyir// sangs rgyas rnams kyis thabs su bstan// dam pa'i don du dge spangs nas// bsod nams min pa ci zhig smos// dper na mi gang chu klung gi/ pha rol 'gro ba'i sems can dag/ rtswa dang shing la sogs bsdus nas/ / chu la rgal ba'i gzings byas te// de la 'jug ste legs brgal nas/ bor te bde bar 'gro ba ltar// de bzhin 'khor ba'i pha rol gyi// chos kyi lam gyi bskyed byas kyang / / chos dang chos min rnam spangs nas// byang chub bde ba thob pa ni// de phyir rnam rtog rnam spangs la// zab mo yi ni chos spel te// de bzhin gshegs pas gsungs rnams la// sngags rig rnam rtog ma byed cig/ rnam rtog rmongs pa chen po ste// 'khor ba'i rgya mtshor ltung byed pas// nam mkha' lta bur dri med pa'i// rnam par mi rtog ting 'dzin gnas// dbang po gnyis ni mnyam sbyar te/ / lus dang ngag dang sems bsdus nas// nga'o snyam pas gzi skyed lus// rnam pa kun gyis rnam brgyan na// rnal 'byor ldan pas tshe 'di la// ye shes rdzogs pa nyid du 'gyur// las las byung bar bstan pa yi/ / skyes pa bud med gzugs mngal// mnyes pa nyid du mi bya 'di// rdo rje lus can dam tshig yin// ngan rtog bzang rtog dra ba yi// sems kyis sems can rnams la ni// sna tshogs gdung bas sun mi 'byung / / rdo rje dang ldan dam tshig yin// sred pas bskyed rtsub phra ma yi// tshig dag rnam par mi smra zhing // mnyan na bde ba byed pa 'di// rdo rje ngag can dam tshig yin// rnam par snang mdzad chen 'khrug mchog/ sha yi khams la gnas pa yin// rkang la mi 'khrugs rgyas pa ste// khrag la rin chen 'byung ba gtso// sems can rnams kyi rus phung gi/ rus gong la ni 'od dpag med// rtsa yi tshogs rnams rnam 'brel la/ / thub pa skyes mchog don yod la// dam tshig shes pa rnams la ni// gsang chen pa yis bstan pa 'di// blo ldan rdo rje rnams kyis ni// rtag tu bsten cing bsgom par bya// 'dod chags de bzhin gti mug rmongs/ / sred dang 'du byed rnam sel ba'i// chos ni rnam pa lnga po 'di// thub pa skyes mchog rnams kyis gsungs// bshang gci khu chu mchil ma khrag/ 'dzag pa 'byung ba bzhis bsdus pa/ / sgom pa'i blo gros rtogs pa yis// dam tshig brtan par bya ba ste// rtag tu bza' zhing sbyin par bya// dpal rdo rje snying po rgyan gyi rgyud las/ sbyin sreg gi le'u sna bdun pa'o// / de nas gzhan yang bshad bya ba// 'gro ba mi shes mun bsal phyir// ye shes nyi ma shar ba las// bkag pu mun pa bsal tshul gsungs// gshin rje gshed la sogs pa yi/ / mdog dang phyag mtshan la sogs pa// de kun mngon du rgyas pa ru// bye brag gis ni rgyas par bstan// de ni las kyi khyad par gyi// dbang du byas pa khro bo tshogs// gzhan du ma gsungs gang yin pas de dag 'di ru bshad par bya/ / bruM gyi ye shes las byung ba// gtsug tor gzi brjid phung po ste// zhal gsum ser po mdangs dang ldan// phyag drug nyi ma la sogs pa// 'dzin cing skyil mo krung bcas pa/ / ral pa'i gtsug tor gyis brgyan cing // 'jig rten khams kun 'khrug byed pa'i// gzugs kyi spros pas nam mkha'i gar// rig mas sku la rab 'khyud pas// chags phyir spro ba'i rtsol ba can/ / 'di 'dra sgom par byed pa la// bgegs kyis gnod pa yod dgos// skyon med rdo rje zhes bya ba'i ting nge 'dzin to// yang ni bruM gyi ye shes las// byung ba sngags kyi 'khor lo can// zhal gsum gsar 'dra mdangs po che// phyag drug 'khor lo la sogs pa// ral pa'i gtsug tor gyis brgyan pa// 'dzin cing stag gis smad g.yogs te/ thod pa'i 'phreng bas sku la brgyan// rig ma dang ldan chags pa po// 'jo sgeg nyams kyi sbyor ba mdzad// 'di sgom spro bar byed pa la// nyin dang mtshan du rdo rje sems// 'khor bcas gnas su byon nas su/ / rtag tu srung ba nyid du byed// bka' bzhin byed pas rdo rje zhes bya ba'i ting nge 'dzin to// de bzhin bruM gyi ye shes las// byung ba'i khro bo gtsug tor rgyal// zhal gsum ser po mdangs dang ldan/ / phyag drug lcags kyu la sogs pa// 'dzin cing sbrul gyis yang dag brgyan// 'og tu bgegs kyi gtso mnan nas// gad mo'i sgras ni 'debs par byed// ral pa'i gtsug tor gyis brgyan pa/ / khro bo 'di 'dra sgom byed pa'i// rnal 'byor gang la sangs rgyas kyi// sprul pa'i bgegs kyang rlag byed na// gzhan ma rnams ni smos ci dgos// snying 'gugs pa rdo rje zhes bya ba'i ting nge 'dzin to/ / bruM las yang ni byung ba yi// gtsug tor dam tshig spyod pa can// zhal gsum gser zhun mdangs ldan pa// phyag drug ka pA la sogs pa// 'dzin cing sna tshogs rab tu 'bar// ral pa'i gtsug tor gyis brgyan pa// zhabs rnams bsgyur zhing rnam par 'phen// spro dang bsdu ba'i blo gros can// 'di 'dra gang zhig sgom pa la// bi na ya ka la sogs pa'i// bgegs kyis skabs ni mi rnyed phyir/ / ji bzhin rab tu bsgom par bya// gzhan gyis mi thub pa rdo rje zhes bya ba'i ting nge 'dzin to// bruM gyi yi ge las kyang byung // ming gi gtsug tor rnam par mthong // zhal gsum gser ni btsom 'dra/ / phyag drug tri shU la sogs pa// 'dzin cing srog song steng na gnas// rol pa'i stabs kyis bgegs mchu bcings// ral pa'i gtsug tor gyis brgyan pa// sangs rgyas sprin ni spro ba'o/ / gang zhig de 'dra sgom byed pa'i// rnal 'byor de yis go cha bgos// sra ba'i ngang tshul can yin pas// bgegs lus gang gis mi g.yo'o// bgegs las rgyal ba'i rdo rje zhes bya ba'i ting nge 'dzin to/ / bruM gyi ye shes mthu las byung // gtsug tor rnam par 'joms pa'i mchog/ zhal gsum gser 'dra'i nyi 'od mtshungs// phyag drug rdo rje la sogs pa// 'dzin cing tshems kyis sgros mnan te/ / chags ldan rig mas 'khyud pa'o// ral pa'i gtsug tor gyis brgyan pa// khrag can ljags kyang 'dril ba ste// bla med byang chub thob 'dod pa// 'di 'dra sgom par byed pa la/ / bskal pa brgyad bcu'i bar du yang // bgegs kyis gnod pa yong mi 'ong // bgegs kyi stong pa ye shes rdo rje zhes bya ba'i ting nge 'dzin to// yang ni bruM gyi ye shes las// yang dag byung ba'i skabs dkar po/ / zhal gsum gser zhun lta bur gnas// phyag drug gdugs la sogs 'dzin cing // skyabs med 'phongs pa'i skyabs mdzad cing // ma ning rnams dang za ma la/ / bu ni sbyin par byed pa po// ral pa'i gtsug tor gyis brgyan pa// rim ma dang ldan sku chen 'di// rnal 'byor gang gis sgom byed cing // bzlas pa rtse gcig tu byed na// bgegs kyi gnod pas de mi brji/ / rim chen gyi skabs rdo rje zhes bya ba'i ting nge 'dzin to// rnal 'byor khyad par can gyis ni// 'di rnams byang chub thob pa'i phyir// 'khor lo gtso bor rab bsgoms na// 8 gi bgegs kyis yong mi tshugs/ / byang chub snying po don gnyer bas// 'di 'dra'i 'khor lo can bsgoms na// bsgrims nas rnal 'byor bsgoms pa yis// ring po mi thogs 'dod pa 'thob// dpal rdo rje snying po rgyan gyis rgyud las/ byang chub kyi snying po'i rgyan gtsug tor 'byung ba'i le'u ste brgyud pa'o// / de nas yang rdo rje mkha' 'gro ma thams cad 'dus nas/ de bzhin gshegs pa thams cad kyi dbang phyug rdo rje 'dzin pa la phyag 'tshal nas 'di skad ces gsol to// 'di yi dpal ni gang zhig lags// rdo rje dang ni snying po dang // de bzhin rgyan gyi don ni ci/ / kye he mchog de bstan du gsol// de nas de bzhin gshegs pa thams cad kyi dbang phyug rdo rje 'dzin pas/ de dag la 'di skad ces bka' stsal to// 'di ni thun mong ma yin/ pa'i gsang ba'i rgyud du rab sbas pa// ji bzhin gnas pa'i de kho na// yang dag bstan gyis rtse gcig nyon// lus ngag yid gsum bde dam pas// lha mo las ni bskyed bya ste// byang chub chen po bde ba yis/ / tshul bzhin du ni sngags pas bya// bskul ba'i snying pos 'di smra ste// dzaHzhes skad cig skad cig tu// rang gi gnas na gnas pa yis// de nyid lha nyid bskyed par bya// bcu drug cha dang yang dag ldan// zla ba gsang ba'i thig le la// me tog dang ni 'dra ba nyid// rlung gis phul bas bskyed par bya// de bzhin bskyod pas bsgrub par bya// de bzhin du yang bskal bya/ bas rgyud kyi 'phreng ni 'od gsal bzhin// steng dang mdun du rtsa gnyis las// bcu drug gnas su yang dag gnas// de las snying dbus rab zhugs te// rlung gi sbyor bas phul byas pas// steng dang mdog rab mdzes rdzogs sku/ / bdag gi dpal du shes par bya// de las byung ba'i dngos grub che// nor bu la gnas rtog bral ba// thig le yig med bsdus pa'i sku// lhan cig skyes par shes par bya/ / de la de yi gzugs kyi sku// nam mkha'i khams kun gang ba yi// bral ba'i shes pas don byed pa// gzhan gyi dpal du shes par bya// de rnams rgyu las byung ba yi// ye shes shes rab shin tu gsang / / gsang ba rnam par 'grub pa yi// rdo rje snying po'i rgyan ces bya// lha mo las byung bde dang ldan// 'ja' tshon ltar gsal rgyud dag pa// snang ba'i sku de mi shigs pa// rdo rje nga yis yang ngag bsgrags/ / snang zhing srid pa'i chos rnams kun// bsdus phyir bsags pa'i sku dam pa// rtog bral rgyud du sim gnas pa// 'byung phyir snying po zhes su bsgrags/ dag dang ma dag thams cad la// 'khor ba ji srid par snang ba// gnyis ka mdzes par byed pas na// rgyun du yang dag bsgrags pa yin// dpal dang rdo rje snying po dang // rgyan ces bya ba bzhi po ni// 'brel cing grub par byed pa'i phyir/ / rgyud ces bya bar bshad pa'o// chos kyi phung po brgyad khri dang // bzhi stong gi ni grangs snyed kyi// mtshan gyi don ni 'di don du// yang dag 'dus par ngas bshad do// gzhan du don ni ma bsgrags pa// bla ma la ni gus pa yi// slob ma la ni ma rtogs pa'i// rgyud gzhan dag tu sbas pa'o// don 'di yang dag ma shes na// ji snyed don ni bsam yas pa/ shes kyang de yi 'bras bu med/ / de 'dod mnyes byas yang dag blang // dpal rdo rje snying po rgyan gyi rgyud las/ ye shes gsum gyi mtshan 'byung ba zhes bya ba'i le'u ste dgu pa'o// // rtag par mi phyogs smra ba dang / / bla ma smod byed brtson pa la// dam tshig phyir ni yongs bsgral bya// de yi sha khrag klad pa rnams// drangs te tshogs kyi ston mo bya// de ltar ma byas sdug bsngal tshogs// gti mug can des thob par 'gyur/ / nad thams cad dang khros chen dang // 'jigs dang nye bar 'tshe ba yi// bskal pa grangs med bye ba ru// sdug bsngal chen po rab rnyed cing // 'i dod 'bod pas sbrul gyis brgyan// bstir med chen por rtag par 'gro// de bas las 'dis rgyas gdab bo// bdag nyid rdo rje mkha' 'gro yi// khro bo gzugs can nyid gyur nas// ut+pal mthing kha 'dra ba yi// zhal gsum pa la phyag drug pa/ / rdo rje tri shU la phur bu dang // thod pa gri gug 'khor lo 'dzin// mi sdug khros pa lce lnga pa// bsams nas de 'og nam mkha' la// bsgrub bya rgyas par dmigs nas su// rdo rje phur pa la sogs pa/ / sems can dkyil 'khor gnas pa la// sgrub pos de yi nyes pa bsgo// de nas phyag mtshan tri shU la dang // phur bu drag po mchog dag gis// mgo dang snying kha lte ba dang // rkang pa gnyis dang lag pa yi/ / gnas lnga rab tu phug bya ste// rtse lnga'i 'od zer lnga po yis// srin bu 'dza' lu ka bzhin du// khrag kun sngags kyis drangs nas su// thod par phab nas btung bar bya// de bzhin sha rnams yang bsdus nas// bza' ba ru ni rab tu brtag/ rus pa rnams kyang 'chos byas nas// shes pa rdo rje pad+mar sbyar// 'di ni don grub rab byed pas// zla ba phyed ni tshun chad kyis// rdo rje 'dzin pa chen po yang // 'chi bar 'gyur bar gdon mi za// rdo rje gsang ba 'di lta bu// bsgrub bya legs par bsgrub byas nas// las ngan bdag gis de mi 'khor// sangs rgyas su ni skye ba 'gyur/ / rnal 'byor de yang de yi mthus// khro bo mkha' 'gro zhes 'gyur te// khams gsum gsang dang gso ba dang // sems kyi rdo rje brtan byas nas// skad cig tsam du byed par 'gyur/ gsal bar nus pa gdon mi za// dpal rdo rje snying po rgyun gyi rgyud las/ rdo rje mkha' 'gro khro bo'i sbyor bas dgra gsad pa'i le'u ste bcu pa'o// de nas gzhan yang bshad bya ba/ / 'dod chags thabs chen po yi rgyud// gang gis legs par shes na ni// tshe 'di dngos grub sbyin par bshad// gsang ba 'dus pa stong phrag gcig/ rdo rje 'phreng ba 'bum phrag gsum/ / dgongs pa lung ston stong phrag bzhi// lha mo bzhis lus brgya bdun cu// u dar tan tra nyis brgya brgyad// de yi nye bar bshad pa'i rgyud// dam tshig chen po lnga bcu lnga// rdo rje lnga 'dus stong phrag gcig/ kun las btus pa 'bum phrag gcig/ mnyam nyid rnam rgya mi nyis brgya bcu// zla gsang thig le stong bdun brgya// rdo rjes 'og brgya nyi shu// cod pan rdo rje bdur brgya lnga// khro ba/ thig le 'bum phrag lnga// rdo rje rnam rgyal brgya dgu brgya// mnyam nyid gsang ba stong phrag lnga// rdo rje gsang rgyun stong phrag lnga// rdo rje gsang mdzod stong phrag bdun// nor bu gsang thig 'bum phrag gcis snang mdzad sgyu 'phrul stong dang brgya/ / rdo rjes dbargyan stong phrag gcig/ rdo rje thod panyis brgya brgya// de nyid brgya stong brgya stong bdun// dam tshig mngon can stong phrag 'bum// 'jam dpal bo'i 'bum phrag gcig/ gsang chen bsdus pa brgya lnga bcu// rin chen sdong po dgu brgya bdun// dus kyi thig le brgya brgyad cu// lha mo bstan chos lnga brgya bdun// 'di rnams dgos pa'i bye brag gis nga yis yang dag bstan par bya/ / 'di ni gnyis po 'khyud pa yi// rgyud kyi dbye ba bstan pa'o// de bzhin du ni lag bcangs dang // dgod dang blta bas shes par bya// de bzhin zhe sdang gti mug gi/ rgyud rnams kun kyang shes par bya// mkha' 'gro ma yi rgyud kun yang // 'di yi rim pas shes par bya// phyi nang dbye ba shes pa yis// rgyud kyi dbye ba shes par bya// nang du bstan pa bla ma'i las// / yang dag blangs te bsgrub par bya// ji bzhin gnas pa la dgongs te// bde bar gshegs pas rgyud kun bstan// rdo rje snying po rgyan gyi rgyud// mkha' 'gro ma dang mkha' 'gro ba// rgyud rnams kun gyi phyi mo ste/ / gzhan du ma bsgrags don gang zhig/ 'di ru yang dag bstan pa ste// rnal 'byor gang zhig len pa 'am// sgom par byed dam 'chad pa 'am// klog par byed pa rnal 'byor che// de yang nga dang 'dra bar 'gyur/ / dpal rdo rje snying po rgyan gyi rgyud thams cad kyi dbye ba'i le'u ste bcu gcig pa'o// // de nas gzhan yang bshad bya ba// sna tshogs mdo dang rgyud rnams kyi/ / sdom pa yang dag shes 'gyur na// mkha' 'gro chen por 'gyur bar bshad// gang gis nyan thos rab 'byin pa// spong ba ltung ba'i bye brag bshad// bslab pa dang ni rdzas grags kyis/ / 'di ru shes kyang yongs rdzogs byed// tshul khrims kyi ni bslab pa gsum// dge pa'i chos ni sdad pa dang // sdom pa nyi shu la sogs dang // sems can don byed pa'i tshul khrims/ / byang chub sems dpa' rab 'byin pa// lus ngag yid gsum rab byung ba'i// sdom pa des kyang mkha' 'gro yi// rgyud rnams yang dag sbyor bar byed// zla ba snyam dang gtsang sbra bsdam/ / grong dang gnag lhas thang la yang // ngag lus yid kyis sems can la// gnod pa dag ni yong mi byed// de bzhin gshegs pa'i sdom pa mchog/ bla na med pa'i byang chub sems/ / 'gro ba'i don byed byang chub sems// bde gshegs thob phyir rab tu gzung // rdo rje mi bskyod rigs chen po// rdo rje dang ni dril bu dang // slob dpon yang ni bzung byas pas// de yi yon tan thob par byed/ / rin chen tog gi rigs mthon po// nyin mo mtshan mo lan gsum du// zang zing mi 'jigs chos dang dbang // byin pas de yi yon tan 'thob// pad+mo snang ba'i rigs dag laphyi dang nang dang gsang ba yi/ / dam tshig rab tu gzung ba yis// bla med byang chub thob par byed// rnga sgra las kyi rigs mang po// dam tshig dang ni sdom par ldan// bsnyen bkur mchod pa sems can don/ / byas pa de yis yon tan thob// srog mi gcod cing g.yem mi bya// ma byin mi blang brdzun mi smra// phra ma 'khyal pa'i tshig rtsub mos// smra bar mi bya ba rnab sems dang // gnod sems log par lta ba rnams/ / nam yang bya ba ma yin no// dkon mchog gsum ni yong mi spang // lha dang bla ma de bzhin no// nyes pa kun gyi rtsa ba'i phyir// chang yang rnam par spang bar bya// phyag rgya bzhon pa mtshon cha sogs// mtshan ma 'am ni lha yi grib// 'gom dang bza' bar mi bya ba// de la sogs pa mtha' yas pa'i// sdom pa gang de gsungs pa rnams// 'di ru dang po'i las can la/ / de yis yang dag 'jug par byed// thun mong ma yin pas pham pa// bcu bzhir grags pa gang 'di ni// sngags pas don kun 'grub byed pas// spang zhing dor bar mi bya'o/ / slob dpon snying nas smod pa dang // bad gshegs bka' las 'da' byed dang // zhe sdang gis ni mched sun 'byin// byams sems med par sems can spangs// byang chub sems chen 'dor ba dang / / bdag gzhan grub pa'i mtha' smod byed// snod mi rung la gsang ba bstan// rgyal ba'i bdag nyid phung po smod// dag pa'i chos la som 'i byed// gsum ldan khro la byams ldan te/ / stong pa thal byung la rtog pa// dad ldan sems ni sun 'byin byed// dam tshig dang ldan gtso mi byed// shes ldan bud med smod par byed// sngags pas de dag yongs spangs na// nges par dngos grub thob par byed/ / de la sngags pa yong 'das na// nges par bdud dang phrad par 'gyur// nad dang sdug bsngal 'phel 'gyur te// bstir med spyi'u tshugs dmyal bar 'gro// sbom po ltung byed nyes dmigs kyang // de dang 'dra bar shes par bya// dam tshig mi ldan rig mar bsten// tshogs kyi 'khor lor rtsod par byed// gsang ba'i chos ni ston pa dang // dang ldan rnams la gzhan du ston/ / nyan thos nang du lhan rings gnas// snod mi rung la gsang ba bstan// kha na mtho sdom 'gyur te// sngags pa de yi dam smos zad // zad pas 'grub par yong mi 'gyur/ / de bas nyin lan gsum du// kha ton gyis ni bklag par bya// dkyil 'khor mthong dang zhugs pa dang // dbang bskur ba la sogs tshul gyi// rdo rje mkha' 'gro thob pa bzhin/ / byang chub sems dang nyan thos dang // byang dang gnyis ka rnal 'byor rgyud// dgongs gsungs rnams kyis de lta min// de lta bas nA sdom pa'i mchog/ nga yis yang dag bstan par bya/ dri chen dri chur k+ta dang // shes dang byang chub sems rnams ni// bza' ba'i sbyor bas yang dag bza'// b+ho yi ye shes mes sbyangs phyir// phyi rol zas las khyad par 'gyur// de bzhin grang chen sha dang / / baM lang khyi sha sha chen rnams// ye shes lnga yi ngo bo'i phyir// dga'o ba'i sems kyis bza' bar bya// de bzhin sems can gsad par bya// ma byin par yang brang bar bya'o// bud med thams cad 'dod pa spyad/ / brdzun tshig dag kyang smra bar bya// de ltar byas pas sangs rgyas dang // byang chub sems dpa' mnyes par 'gyur// sems can rnams kyang tshim zhing dga'// de bzhin rnal 'byor skyeng yis/ / sangs rgyas dang ni byang chub sems// rang 'dren nyan thos sku gzugs sogs// rang nyid dag pa gsum sbyor bas// phyag byas na ni mi rung 'gyur// kun tu rdo rje sems dpa' yi// lus ngag yin dkyil 'khor las/ / rang nyid bsam gtan gsum sbyor bas// dbyer med blo yis mi bya'o// dkyil 'khor dag kyang mi bri'o// glegs bam dag kyang mi bklag go/ mchod rten las kyang yong mi bya// lag pa'i phyag rgya rnams kyang spang / / nyin re zhing ni dus bzhi ru// bu mo legs par goms pa las// ga pur tsan dan khas blangs te// cho ga bzhin du lus 'khor mchod// rol mo'i thabs ni sna tshogs pa// nga yi rgyud las rab bstan pas// bcu drug thig le ngal so las// sngags kyi snying po brtag par bya// bla ma dam pa thugs rje ches// yang dag bstan pa la dmigs pas// phyin ci log khur yongs 'dod de// rdo rje 'dzin pa nga 'drar 'gyur// dpal rdo rje snying po rgyan gyi rgyud las/ dam tshig dang sdom pa dbye ba'i le'u ste bcu gnyis pa'o// / de nas ro langs chen mo yi// sgrub pa yang da bshad par bya/ / sgrub pos legs par shes gyur na// dngos grub thob par 'gyur ba'o// nag po yi ni tshes brgyad dang // yang na bcu bzhi gang yang rung // shing gcig dur khrod ma mo 'am// yang na mi med grong bar du/ sngon du sgrub pa'i bdag nyid can// las kun 'grub par byed pa sgrub// mda' mkhan ma dang sme sha can// gdol pa mo dang gar mkhan sogs// mdun gyi so la lhag yod pa// byad dang mdangs ldan rma med ma/ / lo ni sum cu rtsa gnyis bsngags// yang na nyi shu rtsa lnga'o// yang na chu dang dang por skyes// sbyangs nas shi ba ma sbags pa// yang dag blangs te pha bong steng // gzhan yang bu mo sgra bzung ste/ / lha bzhad dang ni dbang po lag/ dkar po dang ni ri sgra dang // gru gnon chu yis bkru bar byas// de nas tsan dan dkar po yis// bu mo lus byugs rgyan dang gos/ / yang dag brgyan te mdun bzhag nas// dkyil 'khor 'jigs pa bri bya ste// rtsa sogs gsang sngags rab tu bzla// 'byung po'i gtor ma yang byin te// sha ni nag po mdangs dang ldan// myos byed bsregs pa ro yi khar/ / mtshan gcig thog thag sbyin sreg bya// de nas tho rangs dus su yang // khrag chen phyogs bzhir gtor nas ni// mar khu chen po ro la bku// de nas ro de langs 'gyur te// khro dang ldan pa'i ag tsar gyis/ / sa gsum mo yi sgras 'gengs byed// da cha sgrub po skrag mi bya// mA ma kI yi sbyor ba sogs// srung ba'i 'khor los bsrung bar bya// skrag na de ma thag tu gsod// de tshe srung bas bsrung byas nas/ / bdag nyid langs te de yi ror// yungs kar gyis ni brdeg par bya// de nas de ni babs gyur te// sgrub pa po yi mdun gnas nas// bka' nod 'di skad smra bar byad// sems can chen po khyod ci 'dod/ / bdag la yang dag bka' stsol cig/ ral gri mig sma na sa 'og gam// rkang mgyogs de bzhin bcud kyis len// mi snang 'gugs pa las gang dag/ bdag gis gcig cig sbyar bar bya/ / de nas sgrub po de yis kyang // gang 'dod smras nas cang te'u brdung // de nas ro langs kha de nas// du ba 'thul zhing me 'bar ba// de nas sbrul nag lta bu ru// ro yi kha nas 'byung bar byed/ / de de sgrub pas kha yis blang // byung ste gser gyi ral grir 'gyur// de thogs tshangs pa'i 'jig rten khams// steng du nges par 'gro bar byed// de bzhin kun tu 'gro bar byed// de bzhin rdzas kun gang la bstan/ / thams cad gser 'gyur rtsi lta bu// de bzhin thabs sgrub de byas nas// ro ni snga mkho bzhin 'gyur te// de yi sbyin sreg rab byas nas// dkyil 'khor yang dag tshim par bya// de bas 'di ni sgrub pa'i mchog/ don kun yang dag 'grub byed pa// las thams cad kyi gtso bo ste// bcom ldan rdo rje sems dpas gsungs// dpal rdo rje snying po rgyan gyi rgyud las/ ro langs chen mo'i le'u ste bcu gsum pa'o/ / // da ni nga yi sgrub po yi// dngos grub slob dpon las byung phyir// rgyud rnams kun las gsungs pa yi// slob dpon bkur ba'i cho ga bshad// slob dpon med par gyur na ni// dngos grub thob par mi 'gyur bas// slob dpon grangs dang mtshan nyid ni// yid gcig bsdus la mnyan par gyis// dam sdom gyi ni snod gtsang la// slob dpon mtshan nyid yongs rdzogs par/ / byed cing dang po las 'jug par// byed pa rgyu yi slob dpon no// ri bong 'dzin pa skul byed cing // de yis sgrub po zhing dag cing // ye shes sgyu ma'i snod rung byed// rkyen gyi slob dpon chen po'o/ / lhan cig nyan par gang gyur pa// de las dga' ba yang dag thob// thos pas yang dag rab mthar phyin// lhan cig byed pa'i slob dpon no// mi 'gyur byams ldan shes rab can// sngags rgyud sbyor shes dkyil 'khor mkhas/ / de nyid bcu shes theg chen dga'// gsang ba zungs thub slob dpon yin// mig bzang ya so bcu drug pa// khu 'khrig rtog pa yang dag spangs// bla ma dga' ba dang mos can// shin tu rgyan gyis rab brgyan pa// dad ldan sbyor ba la goms pa// gzugs bzang 'dod chags kyis myos byed// shin tu 'dul ba khyad par can// bskul ba'i gnas su yang dag blangs/ / dge dang sgom pa la dga' ba// rtag tu bla ma la gus pa'i// slob mas bla ma 'di ltar blta// bla ma sangs rgyas kun dang mnyam// de nyid rtag tu rdo rje 'chang // de bzhin gshegs pa rin chen 'byung / / de ni ye shes rgya mtsho che// yid bzhin nor bu rin chen sbyin// de yi yon tan thams cad gzung // skyon kun sems kyis kyang mi bsam// yon tan gzung na dngos grub thob// skyon gyis dngos grub nyams par byed/ / mchod rten bshig dang sdig 'dra'i phyir// de yi grib ma'ang mi 'gom ste// stan dang lham dang bzhon pa dang // 'gom par bya ba smos ci dgos// rgyu ba dang ni mi rgyu ba'i// mchog kun da yis spangs par 'gyur/ / slob dpon smod par byed pa de// rmi lam du yang mthong mi bya// de ni bgegs dang log 'dren dang // rims dang spug dang gshin rjes 'dzin// 'chi bar rab tu 'gyur ba ste// ngan pa gtum po blun chen te// phyogs bzhi dag tu song gyur kyang // blo ldan rnams kyis mi bsrung bar// mdung la sogs pa'i mtshon cha yis// kha na ma tho byed pa bsad// mdo sogs bstan pa'i dmyal ba ru/ / slob dpon smod par byed pa de// gnas par 'gyur bar nga yis bstan// de bas bla ma'i zhabs drung du// bag ma bzhin du ngo tsha srung // glal dang dgod pa lud pa sogs// kha la lag pas bkab nas su// shin tu 'jam par smra bar bya// mgo thod bcing dang tshon byug pa// bla ma'i drung du mi bya'o// bro brdung ba dang brkam tshig dag/ thos pa'i yul nas mi bya'o// mdun 'gro ba dang rkang pa brkyang // yang dag nyid du mi bya'o// las ni gang dag byed pa 'am// mnyan par la sogs 'dod pa la// gzung phyir thal mo ma bshig par// gnas nas langs te mthong yul du/ / rgyab kyis phyogs par mi bya ste// mtshan mo dang ni chu rgal dang // gcong rong dag tu gnas gyur na// bka' lung gnyer du dgum pa'i phyir// mdun du 'gro ba nyes mi 'gyur// de bas thabs ni thams cad kyis/ / rdo rje 'dzin pa bla ma mchog/ rjes su 'thun pas mnyes par bya// de mnyes sangs rgyas thams cad mnyes// gang gis slob dpon yang dag smad// de yis rgyud kun sgrub pa'i mchog/ gnyid dang 'du 'dzi rnams spangs te// bskal pa stong du legs bsgrubs kyang // dmyal sogs sgrub par byed pa'o// de phyir kun gyis rab bsgrims te// bsam pa 'bras bu smin byed pa'i// sangs rgyas 'bras bu 'dod pa yis// sems can dang dang ldan pas mchod// dpal rdo rje snying po rgyan gyis rgyud las/ bla ma bkur ba'i le'u ste bcu bzhi pa'o// / rdo rje pad+mo spyod pa las/ / yang dag ye shes skye 'gyur bas// sgyu ma'i mchog ni bud med de// de yi ming dang mtshan nyid bstan// ha sti nI dang shang khi nI// ka ma lA dang tsi tran// thams cad rigs ni bzhir 'gyur te/ / hasti rak+ta ro tsha ba// sbom mo 'dod chags yang dag che// pad yangs kha nas sha rul bro// dkar 'chang mtha' phra go sbom byed// shang khi rak+ta ro sgyur ba// rked pra sna lags cung zad khro/ / kha nas dud 'gro 'gros dal legs// dkar 'chang dpal gyi 'bras bu 'dra// ka ma'i rak+ta'i ro dmar zhing // shang khi rak+ti ro sgyur ba// phra sbom ran pa dmar mo ste// 'dod chags mig ni mi 'dzums blta/ / dkar 'chang a ri sha 'dra ba// tsi tra rak+Sha ro mngar zhing // thun run khro bag dang bcas pa// chags min lta byed ngo gnag pa// dkar 'chang g.yas g.yon dgye ba ste/ / 'di rnams yang dag phrad gyur na// sgrub pa po la tshe 'di ru// dngos grub yang dag ster ba ste// de bas 'di rnams 'bad pas btsal// yang dag rnyed nas gang rung du// ba lang bza' ni mnga' yi nang / / btung bas shel khams rnam par 'phel// de ni thabs kyis sten pa yis// yang dag tu ni rang bzhin brtag/ rang bzhin nam mkha' lta bu ste// dngos po thams cad zad pa ste/ / rnam par rtog pa thams cad dang // bral ba'i dga' ba yang dag zab// bsam med zad med phra mo ste// dam pa zhi ba rnam dag pa// 'chi med rdo rje bdud rtsi brjod// gang gi dbus su 'dab brgyad pa/ / snying po lnga yis yang dag brgyan// de dbus de gnas cha nas lnga// cha gnyis pa ni brgyad mthar dbyung // sum cu bcu pa lnga yi ni// cha gnyis lnga pa drug pa yi// thig le ru ni gzhug pa ste// skyes bu gang gis de la ni// mig gis 'od zer gyis blta ba// de la ji bzhin gnas pa yi// ye shes skye ba the tsom med// nam zhig 'gog pa'i sems gyur na// sangs rgyas kun gyi mchog 'dzin pa// dpal ldan mkha' 'gro 'dra bar 'gyur// de ring phan chad bu khyod ni// dkyil 'khor yang dag 'dri ba dang // sgrub po rgyud pa yi// slob dpon chen po nyid du 'gyur/ / 'di ni sangs rgyas kun gyis kyang // dbang bskur bar ni rab bsngags te// thams cad sngags ni sgrub 'gyur te// las mchog khyad par can yang 'grub// bu mo 'di ni khyod dang 'thun// sems can khyod kyis 'dod pa gyis// yid du 'ong ba'i rig ma 'di// bde gshegs kun gyis khyod spyod gnas// stong pa la ni sems sbyor na// khyod ni yang dag dam par 'gyur// 'di ni bde gshegs bde mdzad pa/ / khyod nyid 'di las rab byung ngo // dpal rdo rje snying po rgyan gyi rgyud las/ dmigs pa dang bcas pa'i shes rab kyi mtshan nyid brtag pa'i le'u ste bco lnga pa'o// / / de nas yang ni bshad bya ba// dngos kun chog shes med na// sgrub po dngos grub 'byung mi 'gyur// de phyir 'dir ni brtul zhugs bstan// sbyor ba'i rtsol ba thams cad ni// de nyid rig pas spang bar bya/ / rdo rje sems dang des 'dug pa// spangs nas gzhan du mi bya'o// dag pa de nyid la gnas pas// sbyor ba rnams kyang mi bya ste// bdag med gnas pa'i sbyor ba yis/ / ji srid bar du so sor brtag/ dngos med go 'phang la gnas dang // thabs bzang dag dang ldan pa yis// rgyud las gang ci 'byung ba rnams// ma brtags pas ni 'byung bar 'gyur// sgom pa'i sbyor ba'i stobs kyis ni// dngos grub mtshan nyid gang yang rung // de kun skad cig tsam la ni// rang nyid gnas par gyur pa yin// de bas dge slong dngos gnas dang // de bzhin rtog dga' rgan po dang / / rang gi bu dang rgyal po la// de nyid yang dag bshad mi bya// ji ltar mar me bum nang gnas// pha rol tu ni 'od mi gsal// bum pa de nyid chag par gyur// de 'og mar me gsal bar 'gyur// de bzhin rang lus bum pa nyid// de nyid mar ma nyid lta bu// bla ma'i kha yis lags bcag nas// sbyor ba'i de nyid ston pa yin// sbyor ba de nyid la gnas na// gang tshe brtan pa mi rtag la// gnas shing 'jig rten pa spangs te/ / spyod pa thams cad byas na ni// de la de tshe sangs rgyas gzigs// kun tu the tsom gcod pa yi// rig pas byis pa bzhin du spyad// gang tshe chags med rnal 'byor pa// de tshe phun sum tshogs 'phel 'gyur/ / sdig pa ma lus ldan pa dang // gti mug sgrib pa rab gnas pa// smon pa'i rnal 'byor sbyor ba yis// zla drug gis ni don yod grub// rang nyid sangs rgyas kun mthong zhing // 'dod pa kun gyis rab tu 'gengs// zad med gzhom du med pa dang // dang ba'i sku tshe 'byung bar 'gyur// bla na med pa'i byang chub mchog/ 'bad pa med par yang dag 'thob// 'dod pa kun gyi dga' mos rnams/ / 'bad bral bas ni 'grub par 'gyur// 'gro dang 'dug dang gnas pa na// mchog tu zab pa'i gnas la brtag/ 'od gsal ye shes lam mkhan pa// mtshan nyid rtog pa'i rnal 'byor pa'i/ / bsam gtan sbyor ba 'di yis ni// sems kyi rin chen brtan par 'gyur// sangs rgyas byang chub rab bzhugs pa// byin gyis brlab pa'ang mdzad par 'gyur// de ltar gyur pas zhugs nas kyang / / ji srid sems ni mi skyo bar// mnyam gzhag yid ni bzang po dang // de la 'bad pas bsgom par bya// de 'og la ni ci dga' ga'i// spyad pa yis ni gcig byas na/ / cung zad spyan phye ba yi mtshan// byang chub rgya chen thob par 'gyur// dgod dam smra 'am 'gug pa 'am// la la rab tu gar byed par// ji srid skyo bar mi 'gyur bar// sgom pa'i sems la zhen par bya/ / de lta'i dam tshig ldan gyur cing // rnam par mi rtog sngags pa yis// dus kyi nges pas yongs spangs nas// bla med byang chub thob par 'gyur// dpal rdo rje snying po rgyan gyi rgyud las/ shes byed kun tu spyod pa'i le'u ste bcu drug pa'o// // de nas mkha' 'gro de dag thams cad gcig tu 'dus te/ bcom ldan 'das rdo rje 'dzin pa la tshigs su bcad pas bstod pa/ sangs rgyas kun gyi rang bzhin las// 'byung ba'i lha ste khyod mchog pas// sems dpa' kun gyi phyag rgya che// mkha' 'gro chen po phyag 'tshal lo/ / gti mug thams cad 'od gsal ba// mkha' 'gro sangs rgyas chen po ste// gzugs snang chos ni rnam dag pa// bde gshegs mkha' 'gro khyod phyag 'tshal// nga rgyal thams cad 'od gsal ba// mkha' 'gro ra 'dod skong ba ste// sim sogs chos ni rnam dag pa// rin chen mkha' 'gro khyod phyag 'tshal// 'dod chags thams cad 'od gsal ba// skyon gyis gos med mkha' 'gro che// mtshan mar 'dzin pa rnam dag pa// pad+mo mkha' 'gro khyod phyag 'tshal// phrag dog chos ni 'od gsal ba// mkha' 'gro sna tshogs las byed pa// mngon par 'du byed chos kun dag/ sna tshogs mkha' 'gro phyag 'tshal bstod// mtshan mchog 'di yis khyod bstod pas// gang zag 'di yang bsod nams tshogs// ye shes tshogs chen yongs rdzogs nas/ / sangs rgyas 'gyur bar the tsom med// de nas bcom ldan 'das rdo rje 'dzin pa chen pos kun tu bzang po'i bde ba chen po nam mkha'i dbyings thams cad du khyab pa'i bdag nyid chen pos de bzhin gshegs pa thams cad kyi snying po mi shigs pa'i zla ba skul bar byed pa zhes bya ba'i ting nge 'dzin la snyoms par zhugs te/ / rang gi thugs ka'i mi shigs pa'i thig le las shin tu dgyes pa chen po zhes bya ba'i 'od zer gyi tshogs phyung ste/ de bzhin gshegs pa thams cad kyi gsang ba'i snying po zla ba'i thig le'i dbus su rgyas par byas te/ nam mkha'i dbyings thams cad du'ang snang bar byas nas steng 'og tu'ang bzhugs te/ ma lus shing lus pa med pa'i ri dang / sems can thams cad la gsal bar byas nas shin tu dgyes pa chen po'i bde bas mnyes par byas te slar log nas/ bcom ldan 'das shin tu dgyes pa chen po'i bde ba'i bdag po'i snying po'i mchog gi zla ba'i thig le'i dbus na bde bar bzhugs so// de nas bcom ldan 'das de bzhin gshegs pa thams cad 'od zer gyi tshogs kyi phres pa mchog tu bde bar gyur pa'i snying po des bskul ba na gar mdzad cing rang rang gi ting nge 'dzin du dmigs nas/ bcom ldan 'das dpal kun tu bzang po'i thugs ka'i zla ba'i thig le'i dbus su gsang ba'i dgyes pa chen po'i bde bar gcig tu bsdus par gyur te/ rang rang gi sku bud med kyi tshul du bskyed nas bcom ldan 'das kyi thugs ka nas mngon par byung bar gyur to/ / de nas mkha' 'gro'i tshogs de dag thams cad rab tu dga' nas ca co'i sgra yang dag par 'byin cing dpyad chen po brjod par gyur to// kye ma'o rdo rje sems dpa' yi// rdo rje shin tu dgyes chen po// kye ma'o sna tshogs thabs ni bde byed che// sna tshogs ye shes bde ba che// kye ma'o kun tu bzang po yi// dge ba'i ye shes bde byed che// gang bde'i phyir ni rig ma yi// pad+mo la ni gnas par mdzod// kye ma'o reg pa shin tu zab// shes rab pha rol phyin ma 'di// sems can kun la shes rab kyis// mun pa thibs po sel bar mdzad/ / kye ma 'o thams cad ngo mtshar che// mkha' 'gro dra bar gar mdzad cing // rnam par snang mdzad myang ba dang // mnye ba dang ni 'phrog pa mchog/ kye ma'o shin tu rab tu dgyes/ / skal ldan skal spyod pa dang ni// sna tshogs skal bas bde byed che// sna tshogs rdo rje shin tu mdzes// de nas de bzhin gshegs pa thams cad kyi bdag po rdo rje 'chang chen pos ting nge 'dzin las bzhengs te 'khor gyi dkyil 'khor la rnam par bltas te 'di skad ces bka' stsal to/ / A li dang ni kA li dang // de byung zla ba rnam pa gnyis// me long lta bu'i ye shes te/ gcig tu gyur pa mnyam nyid do// sa bon mtshan mar gyur pa ni// so sor rtog par ngas pa shad do// de byung sangs rgyas thams cad kyis// 'gro don byed pa bya/ na tan// gzugs brnyan rdzogs pa chos dbyings te// lha yi dbang po sang+yas bskyod// de la bar mas khu bas bskyed// bskur bas rang gi lhar bskyed nas// byin gyis brlab par bya ba ni// rgyud rnams kyi ni thun mong ngo / / gsang dang gsang chen shin tu gsang // rnal 'byor rnal 'byor chen po dang // rjes su rnal 'byor zhes bya dang // stong pa dang ni shin tu stong // chen po stong pa zhes bya dang // dga' dang dga' ba bar ma dang / / dga' bral gyi ni dga' ba rnams// rgyud rnams kun gyi spyi bo'o// phyir bzlog gnyis kyi cho ga dang // gsang dang shes rab ye shes dang // kha sbyor 'byed pa'i cho ga dang / gtor ma rdo rje'i bzlas pa dang // drag shul sgrub pa'i cho ga dang // rab tu gnas dang dkyil 'khor sgrub// gsang ba'i de nyid bcu yin no// dkyil 'khor ting 'dzin phyag rgya dang // stang stabs 'dug stangs bzlas brjod dang / / sbyin sreg mchod pa las sbyar dang // slar sdud pa yi rnam pa ni// phyi yi de nyid bcu yin no// yang dag de nyid dngos po mi shes par// gsang sngags smra ba pa yin zhes brjod/ pa de dag mngon pa'i nga rgyal gsang sngags cho ga 'chad// de ni dam nyams 'di dang pha rol brlag/ nyams pas bdud kyis bzung nas shi nas dmyal bar 'gro// sems can rnams la rab brten te// byang chub dam pa thob 'gyur ba// sems can slu bar mi bya ste// bde gshegs las la sems can sbyar// gang zhig sbyor 'di mi brtson pas// rkang lag mig sogs sbyin pa dang // dka' thub ci 'dra/ spyad byas kyang // bdud rtsi ro thob mi nus so// rnal 'byor gcig cig shes byas nas// dben par song sde rab 'bad na// sdig dag tshe 'dir sangs rgyas 'grub// chos bdag med par rab bsgoms nas/ thams cad mkhyen pa khong du chud// thabs shes gnyis kyi 'jo sgeg gis// gsang ba lnga yis bdag nyid mchod// dngos po thams cad dngos med par// bzhi bcu'i don ni rtogs pa dang // rdo rje pad+ma dbang bskur ba/ / bdud rtsi yis ni dga' bar byed// gsang bar bya ba'i chos gsang bas// gsang zhing sbas te spyad par bya// 'dod pa'i yon tan lnga la ni// rnal 'byor sems pas spyad bya zhing / / de bzhin bza' dang btung byas nas// sems can thams cad dbang du byed// 'di la khrus dang gtsang sbra med// de mchod phyir thob pa yang med// dkyil 'khor sbyin sreg med de dus dang gza' tshes med/ / gtor ma la sogs bya bar bya ba med de mchog gi mchog dang ba// rdo rje sems dpa'i sgrub pa yang dag 'di nyid yin te brtson par bya// de nas mkha' 'gro de dag thams cad rab tu dga' nas bcom ldan 'das rdo rje 'dzin pa chen po la legs so zhes gsol te/ legs so legs so bde byed che// legs so legs so ye shes che// legs so legs so bde ba che// legs so legs so sna tshogs cha/ / legs so legs so dgyes pa che// de nas bcom ldan 'das rdo rje 'dzin pa chen pos thugs rje chen po'i thugs rang gi thugs yang dag pa la dmigs nas cang mi gsung bar bzhugs so// dpal rdo rje snying po rgyun gyi rgyud rnal 'byor chen po'i de kho na nyid nges pa zhes bya ba dpal yo rgyan gyi gsang ba'i dgon pa nas byung ba rdzogs so// / rgya gar gyi mkhan po ka ma la gup+ta da bong gyi lo tsab chen po mnga' bdag lha ye shes rgyal mtshan gyis bsgyur cing nus te gtan la babag/

CLOSE WINDOW