rgya gar skad du/ kU la lo kanA thA pany+tsa da sha ka nA ma/ bod skad du/ rigs kyi 'jig rten mgon po'i lnga bcu pa zhe bya ba/ dpal ldan rigs kyi 'jig rten mgon po la phyag 'tshal lo/ / de nas 'di ni mchog tu gsang // 'jig rten yang dag rmongs pa'i mchog/ rigs dang rigs byung mngon brjod pas// gnyis med sngags ni rab bshad bya// dam tshig spyod pa nges par grol// bya ba dus tshod rnam par spangs// de nyid gsum ldan yang dag lha// 'jig rten mgon po 'gro ba'i bdag/ 'dod pa'i dbang phyug 'dod pa'i lnga/ / mthong dang ma mthong 'bras rab ster// de 'dir sngags ni mtshungs med pa// bla ma'i zhal la rnam par gnas// drag chen 'jigs byed lus la ni// lnga pa'i thig le dang bcas shing // / rnam gcod dang po yang dag ldan// chen po lnga pa'i lnga pas brgyan// lce gnyis yan lag med gnyis gnas// lus gsum gyis ni sngags mchog la// yi ge rnams kyi bsdu ba las// mtshan nyid cho ga bzhin du bzlas// 'di yi rjes dran sngags pa yis// gtsang ngam yang na mi gtsang rung // lha bzhin mthong ba lha rnams kyis// de yi lha mo 'dod lha bzhin// 'di bzhin sngags kyi 'dod lha yi/ / bya ba med cing sgrub pa'ang med// mchod med me la sbyin sreg med// rnal 'byor ldan dang yang dag ldan// dus tshod rnams las rnam nges grol// rtse gcig sems ni g.yo mi byed/ / sgrib pa dang bral mtshungs pa yi// mchog gi bsam gtan yang dag spyad// rigs kyi 'jig rten dbang phyug gi rtog pa lnga bcu pa las/ sngags kyi de kho na nyid kyi le'u ste dang po'o/ / // snying kha'i 'khor lo'i nang song ba'i// de nyid gzhan dang gzhan du 'gro// dbye ba gnyis 'gyur de las ni// ye shes nyid ni kun 'gro bya// mi 'gyur dga' ba'i yul rig pa/ / sems kyis rjes su rtog pa can// bya ba de yi bde 'dod phyir// rtog pa kun nas 'jug par 'gyur// de yi ngo bo rtags nyid 'jug/ de sems dga' ba'i spyod yul la// bya ba dang ni las rnams kun// tshig dang bcas pas the tsom med// bsam gtan rnal 'byor yang dag ldan// brtan par dgod bya blo ldan gyis// 'gro kun dgra yi rang bzhin gyi// sa steng sa 'og mtho ris sgrub/ / lte ba'i pad+mar pad+ma che// rnam gsum nam mkha'i nang song ba// pad+ma'i phyag rgya yang dag ldan// nam mkha' phyag rgya'i bdag nyid bzhin// srog 'bab pa yi tshad kyis ni/ gnas gnyis po yis goms par bya// de bzhin rab tu dgod byas nas// 'jig rteni mgon po'i sku ru 'gyur// gang gis gzhan du bzlas byas dang // las rnams kyang ni bsgrub byas na/ / de ni mkha' la khu tshur bsdun// rmongs pas spun stong 'joms par byed// bsam gtan sbyor bas cho ga bzhin// las gang rtag tu bya ba ste// de las myur du sgrub byed do// de yi las ni yid kyi 'dod/ / rigs kyi 'jig rten dbang phyug gi rtog pa lnga bcu pa las/ bdag gi de kho na nyid kyi le'u ste gnyis pa'o// // rang bzhin bsam gtan dang bcas shing // dzA ti mtshal gyi 'od zer bzhin// se 'dzul brgan me tog bzhin// li khri dmar po dang mtshungs gtso// sngags kyi sku yi lha yi lha// zhal gcig phyag ni bzhi pa ste// mkha' pad zla ba'i gdan la bzhugs/ / khyab bdag zhags pa lcags kyu bsnams// mchog sbyin phyag gis yang dag rol// mu ti ga nor bus rnam par brgyan// pad+ma'i phyag dang spyan gsum po/ gzi brjid chen po sna tshogs sku// dpa' bo dbang phyug 'gro ba'i mgon// rnal 'byor ma yi thugs dgyes pa// dngos grub thams cad rab ster ba'i// sngags rnams kun la bsam gtan bya// gang dang gang gis bsgoms pa yis/ / rnal 'byor goms par gyur pa'i phyir// de yis de yi rang bzhin 'gyur// yid bzhin nor mchog ji bzhin no// lha ni dkar pos zhi rab ster// de bzhin ngag ni rab sad byed/ / dbang dang dgug pa'i de nyid la// sku mdog dmar po rnam par bsam// du ba dmar po'i 'od mdog can// rlung gi dkyil 'khor gyis dkris pas// dgra bo rnams ni nyer skrod pa// / 'dir ni the tsom med par byed// du ba skya bo dmar ba yis// rnam par zhe sdang nges sbyor bas// gsad pa la ni kha dog gnag/ rengs pa la ni ser por shes// lug gi steng du gnas pa la// rkan gyi bar du rnam phug na/ / srid pa gsum du gang gang gnas// thams cad rab tu rmongs par byed// gzhan dag rmongs pas ci zhig bya// don mang tshig ni rab 'dus pa// 'jig rten gsum gyi las rnams ni/ / yon tan brgyad dang ldan pa yi// rgyud gzhan rnams la nyer spyod pa// gsungs dang ma gsung gyur pa ni// rang bzhin bsam gtan sbyor ba yis// bya ba 'di la the tsom med// gang zhig lha ni mkha' dang mtshungs// kha dog dbye bas so so ste// 'jig rten gsum na gang spyod pa'i// las rnams thams cad bya ba'o// skal bzang byed pa'i sngags rnams ni// snang kha'i chu skyes dbus song ba/ / snying kha'i chu skyes sbyor ba yis// dbang la sogs pa yang dag sgrub// yi ge gsum dang bcas pa'i lha// steng du 'gro ba gsum ldan pas// mi rnams las ni chag sgrub pa/ / rnal 'byor ma rnams zhal la gnas// rnam pa gsum ni 'gugs par byed// pad+ma gzugs ldan gyur pas mdzes// rtag sbyor rgyun du rnal 'byor pas// mar me g.yo med gnas pa bzhin/ / sngon gsungs lha yi lha dbang phyug/ skya rengs dmar po dang mtshungs 'od// mtshan mo phyed kyi dus gnas la// rnal 'byor nyid ni yang dag spyod// de yi gzugs 'dzin lus la yang dag sngon du bkod pa yis/ / zhags pa lcags kyu 'dzin pa'i lha// bsgrub bya'i lus la yang dag blang // thams cad bla ma'i zhal la gnas// rigs pa lcags kyu'i 'od zer gyis de las lcags kyu bsnun nas ni/ / zhags pa yis ni 'gugs par byed// rnam par myos shing lus ni dmar// yang dang yang du brgyal gyur te// bu ga sgo dgu nas bsnun nas// khrag ni rab tu 'bab par byed/ / sgrib pa med pa dang mtshungs par// rang lus rnam par blta bar bya// de yi dbus las bzhengs pa'i sngags// yi ge'i dbang po dang por bsam// 'bar zhing 'bar ba lta bu yi// kha li sgro ru sngon 'dod rol// pad+ma'i gzugs 'dzin de yang ni// kha yi nang nas nges par 'byung // bsgrub bya'i kha ru thim gyur te// ji srid de snying nu skyes la// gang zhig de yi snying gnas pa/ / 'dir ni de'i snying kun nas phrogs// mar mer por ni blangs pa yis// grol ma'i gzugs bzhin yid 'phrog pa// de ni gsum pas cho ga bzhin// rlung gis lo ma g.yo ba ltar/ / rang gi khyim du thim par bsgom// gcig gi ngo bor gyur pa mchog/ lha dang lha yi sgrub pa'i thabs// mtshan mo mdun du bsgrub par bya// bran gyi ngo bos 'jug 'gyur zhing // 'tsho ba dang ni nor gyis kyang / / sa steng 'jig rten slar ci smos// 'grub 'gyur 'di la the tsom med// sngags kyi dbang po sgrub pa pos// rang dbang med rnams sgyur mi bya// sngags kyi rgyal dbang bzlas byas pas/ / rgyal srid sgrub pa de mchog go// gzhan du gang gis rang bsgrubs na// bud med 'dod pas long bzhin myos// gang de lha yi bu mo yang // de yi skad cig nyid la 'chi// rigs kyi 'jig/ rten mgon po'i lnga bcu pa las/ lha'i de kho na nyid kyi le'u ste gsum pa'o// // 'jig rten dbang phyug snying po mchog/ sba zhing srog bzhin yang dag srung // dam tshig spyod pa dman pas kyang / / 'dren pa'i bdag nyid sngags bzlas bya// gcig pu grogs dang bral byas te// blo dang ldan pas 'bum du bzlas// de yi mngon sum 'ong 'gyur te// 'khor lo gsum du legs 'gro mchog/ 'jig rten thams cad 'byin pa dang // sdud pa dang ni yang dang yang // nam mkha'i go 'phang der 'gro ste// dran pas 'di la the tsom med// sems dang sems med sbyor ba na// sems ni sems med la nges mthong // sems ni sems ma la thim nas// rab 'jug lus skyes ma rnams la// nad bcas nad med pa dang ni// nad med de bzhin nad bcas byed// zhags pa lcags kyu 'dzin pa'i mchog/ sngags kyi rgyal po'i dbang pos so// gzhan du byis pa rmongs pa yis// zla ba 'dzin par 'dod pa bzhin// gang zhig rang bzhin sbyor bral bas// las rnams sgrub pa de mchog min/ / gang gis gsum gsum gnas skabs gsum// 'jig rten mgon po nyid rig nas// chu 'dzin bral ba'i nam mkha' bzhin// 'jig rten mgon po'i go 'phang 'gro// zhes pa ni dpal pad+ma 'bar ba'i rgyud chen po las phyung ba rigs kyi 'jig rten mgon pa'i lnga bcu pa rdzogs so// / paN+Di ta chen po bi ma la shrI b+ha dra'i zhal snga ras/ byang chub rin chen gyis bskul nas/

CLOSE WINDOW