shrI rA ga rA dza tan+t+ra rA dza/ bod skad du/ dpal chags pa'i rgyal po rgyud kyi rgyal po/ dpal rdo rje mkha' 'gro la phyag 'tshal lo// 'di skad bdag gis thos pa dus gcig na/ bcom ldan 'das/ de bzhin gshegs pa thams cad kyi sku dang / gsung dang / thugs rdo rje btsun mo'i b+ha ga la bzhugs so// de nas byang chub sems dpa' sems dpa' chen po rdo rje snying pos spos dang me tog la sogs pa'i mchod pas mchod nas/ he he dpa' bo 'jigs pa che// sems can sangs rgyas rang bzhin na// mtshan dang dpe byad gang dang gang // stong dang de bzhin rnam thar dang // rdzus skyes mngal skyes sgong skyes dang / / drod gsher gnyis gsum bzhi char ci// bcom ldan 'das kyis bka' stsal pa// a ni dbu yi gtsug tor te// A ni dbu skra g.yas su 'khyil/ i ni dpral ba'i dbyes mnyam pa// I ni smin mtshams mdzod spu ste// u ni spyan mig mthon mthing la// ba yi rdzi ma lta bu'o// U tshems bzhi bcu mnga' ba ste// r-i r-I tshims mnyam tshems thags bzang / / l-i l-I tshems dkar ro bro mchog/ e ni 'gram pa seng ge 'dra// oM ljags shin tu srab pa ste// oM ni tshangs pa'i dbyangs dang ldan/ oM ni dpung mgo shin tu zlum// a ni bdun mtho ba ru gsungs// aHni thal gong rgyas pa ste// 'di dag bcu drug g.yas bskor ro// de nas g.yon bskor mtshams nas kyang // a pags srab mdog gser 'dra/ / A ni bzhengs bzhin ma btud par// phyag gnyis pus mor sleb pa'o// i ni ro stod seng ge 'dra// I ni shing n+ya gro lta bur// chu dang zheng ni gab pa'o// u ni mdzod spu g.yas su 'khyil// U ni spu rnams gyen du phyogs// r-i mdoms sba ba sbubs su nub// r-I baR+Ya legs par zlum pa'o// l-i ni zhabs long tshogs ma mngon// l-I ni phyag zhabs 'jam zhing gzhon/ / l-I ni phyag mthil zhabs kyi mthil// 'jam zhing gzhon sha rgyas pa'o// e ni phyag zhabs dra bas 'brel// ai ni sen mo ring ba ste// oM ni phyag dang zhabs mthil la/ / 'khor lo dang ni ldan pa yin// oM ni zhabs ni shin tu gnas// aM zhabs rting pa yangs pa ste// aHni byin pa ri dgas ni// e n+ya ya yi lta bu ste// spyi bo'i mi shigs snying po haM/ / ston pa sum cu rtsa gnyis mtshan// ka ni sen mo zangs mdog 'dra// kha ni sen mo dog snum pa// ga ni sen mo mtho ba ste// g+ha ni sor mo rnams zlum pa// nga ni sor mo rnams rgyas pa/ / tsa ni sor rnams byin gyis phra// cha ni rtsa rnams mi mngon pa// dza ni rtswa mdud med pa yin// dzA ni long bu mi mngon pa// nya ni zhabs mi mnyam pa med// Ta ni seng ge'i stabs su/ gshegs// Tha ni glang po'i stabs su gshegs// Da ni ngang pa'i stabs su gshegs// D+ha ni khyu mchog stabs su gshegs// Na ni g.yas phyogs ldog cing gshegs// ta ni mdzes par gshegs pa ste/ / tha ni mi g.yo bar gshegs pa// da ni sku la 'khril bag chags// d+ha sU byi dor byas pa 'dra// na sku rim par 'tsham pa'o// pa ni sku gtsang ba sku mchog/ pab sku rnam par dag pa'o// b+ha ni mtshan rdzogs ngo bo nyid// ma sku kho lag yangs shing bzang // ya ni gom pa snyoms pa'o// ra sku shin tu gzhon mdog can// la ni sku la 'khrul pa med// wa ni sku lus rgyas pa ste// sha ni shin tu grims pa'o// Sha ni yan lag thams cad mdzes// sa gzigs rab rib med cing dag/ ha dku zlum pa nyid yin te// k+Sha ni dku skabs phyed pa'o/ / ya dku ma rnyongs pa yin te// ra ni phyal phya ma med pa yin// la ni lte ba zab pa ste// wa ni lte ba g.yas su 'khyil// Da ni kun nas mdzes pa ste// D+ha ni kun spyod gtsang ma yin/ / 'di dag thabs kyi rang bzhin gyis// g.yas nas bskor ba bzhi bcu yin// de nas g.yon gyi bzhi bcu ni// ka ni sku sme gnag bag med// kha ni shing bal ltar 'jam phyag/ ga phyag ri mo mdangs yod pa/ / gA phyag ri mo zab pa dang // nga phyag ri mo ring ba'o// tsa zhal ha cang mi ring ba// tsha zhal gzugs kyi gzugs brnyan snang // dza dzA lcug mnyen ljags srab pa/ / nya ni ljags dmar ngo bo ste// glang po'i nga ro 'brug sgra Ta// Sha ni gsung snyan mnyen 'jam pa// Da D+ha mche ba zlum dang rno// Na ni mche dkar ta tshems mnyam// tha ni mche ba byin gyis phra/ / da shangs shin tu mtho ba dang // dA shangs shin tu gtsang ba'o// na ni spyan 'od rnam par dag/ pa pha spyan bzang rdzi ma lcug/ ba ni dkar nag phye pad+ma'i// 'dab ma'i mdangs 'dra pad+ma'i spyan/ / b+ha ni de bzhin smin mtshams ring // ma la smin mtshams smin spu mnyam// ra ni de bzhin smin mo snum// la ni snyan shal stug cing ring // de bzhin wa ni snyan shal mnyam/ / sngon gyi dbang po ma nyams sha// dpral ba legs par 'byes pa Sha// sa ni dpral ba'i dbyes che ba// hA ni dbu dag shin tu rgyas// dbu skra bung ba ltar gnag k+Sha// dbu sgra sdug pa ya yin te/ / de bzhin dbu skra 'jam par// dbu skra mi 'dzing ba ni la// dbu skra mig shor ba ni wa// dbu skra dri zhim Da yin te// phyag la dpal gyi be'u dang ni// bkra shis g.yung drung 'khyil bas brgyan/ / sdong ris lta bu d+ha yin te// lte ba sprul pa'i snying po aM// gtso bo dpe byad brgyad cur ldan// a ni phyi nang stong pa nyid// A ni stong pa nyid stong pa/ i ni chen po stong pa nyid// I ni don dam stong pa nyid// u ni 'dus byas stong pa nyid// U ni 'dus ma byas stong pa// r-i ni mtha' las 'das stong pa// r-I ni thog mtha' stong pa nyid/ l-i ni dor ba med pa stong // l-I ni rang bzhin stong pa nyid// e ni chos rnams thams cad stong // aM ni rang gi mtshan nyid stong // oM ni mi dmigs stong pa nyid// oM ni dngos po med stong nyid// aM ni ngo bo stong pa nyid// dngos med ngo bo sdong nyid aH/ mgrin pa longs spyod snying po au// shes rab stong pa bcu drug rtsa// gzugs can gzugs rnams la lta ba// rnam par thar pa dang po a/ / nang gzugs med par 'du shes pas// phyi rol gzugs rnams la lta ba// rnam thar gnyis pa ka yin no// sdug pa rnam par thar pa'i lus// mngon sum byas nas rdzogs pa ni/ / de dag rnam thar gsum pa tsa// gzugs kyi 'du shes la 'das pa// sna tshogs 'du shes yid mi byed// nam mkha' mtha' yas la gnas Ta// nam mkha' mtha' yas las 'das te/ rnam shes mtha' yas la gnas shing // rnam shes mtha' yas rdzogs pa te// rnam shes mtha' yas las 'das na// ci yang med pa la gnas te// de nyid rdzogs pa pa yin no// ci yang med pa las 'das te// 'du shes med min la gnas te// 'du shes med min rdzogs pa yang // 'du shes med min las 'das te// 'du shes tshor ba 'gog pa'i lus// mngon sum byas nas rdzogs pa ni// rnam par thar pa brgyad pa sha/ snying ba chos kyi 'khor lo hUM// gtso bo rnam thar brgyad dang ldan// 'di dag r+b+ha yi rnam par gnas/ 'khor lo'i rgya ni sor gsum ste// sems can kun la rang bzhin gnas// de phyir sems can sangs rgyas yin// sna tshogs sdud pa'i mtshan nyid kyang // ring du 'byung zhing thung ngu gnas/ smin mtshams kyi ni mdzod spu bzhin// chos kyi 'byung gnas lte ba la// g.yas g.yon bu ga lnga lnga ste// steng 'og kha yi bar nas 'byung // ro ma shar du mngon du phyogs// brkyang ma nub ste/ 'og gi char// ro mas brkyang ma la 'khyud cing // g.yas pa'i cha ru zung 'jug nyid// brkyang mas ro ma la 'khyud cing // g.yon gyi cha ru zung 'jug nyid// g.yas g.yon rtse mo sku gsung thugs/ / de sgra sngags su rab tu grags// sngags dang rgyud dang dngos grub sogs// de nyid las ni byung bas na// sems can sangs rgyas rang bzhin no// skye ba bzhi yi rim pa yang / snod bcud yab yum la thim ste// yab yum nyi ma zla bar 'gyur// snang ba'i thig le yang dag bcas// 'di dag nang gi mngal skyes tshul// A li kA l-i nyi zla ste// sems ni thig le'i ngo bor gnas/ / nang gi sgong skyes yin par 'dod// ka dang a las nyi zla ste// rang byung thig le drod gsher yin// de dag skad cig rkyen med las// rang bzhin 'byung ba rdzus skyes so/ / rkyen med sbyor ba sgong sogs las// bde ba skye dang bde ba'i rgyu// thams cad dran pa gsang ba yi// mngal na skyes pa'i tshul yin te// yar la bsreg dang mar la gso// gnas gsum nyi shu bzhir 'pho yin// phyi nang 'dod pa'i mtshan ma yis// rtsa rgyas bde ba ster ba dang // rin po che yi pho brang du// sems 'dzin gsang ba'i sgong skyes yin// nang gi 'dod pa'i mtshon cha yis/ / bde ba skye ba drod gsher skyes// gang gi rkyen gyis ma skyes par// gdong nas bde ba'i rgyur skyes la// bde ba skyes pa rdzus skyes so// gtum mo go bzlog rkyen gyis sbar/ / gtum mo rkyen gyis sbar ba dang // gtum mo go bzlog sbar ba dang // gtum mo rang bzhin sbar ba ni// mngal skyes sgong skyes drod gsher skyes// rdzus skyes rim par sbyar bar bya/ / du ma'i gzhi bcas gzhi bcas dang // gzhi med shin tu gzhi med de// mngal skyes skyong skyes drod gsher skyes// rdzus skyes bzhi char rim par sbyar// rgyu dang lam ste 'bras bu kun/ / skye ba bzhi yi ngo bor gcig/ de phyir sangs rgyas sems can gnyis// dngos po ro mnyam gyur pa la// log rtog sgyu mas gnyis su 'khrul// rdo rje snying po snying rje che/ / nang dang gsang ba'i dkyil 'khor yang // nga yis bshad kyis legs par nyon// sku yi dkyil 'khor spyi bor sgom// gsung ni mgrin pa thugs ni snying // yon tan lte ba 'phrin las ni/ / sna rtse dag tu bsam par bya// 'bar ba bzhi yi a la yang // rdo rje phag mo rab tu grags// ha ni bde mchog he ru ka/ dpa' bo gcig pa yin par 'dod/ / bdun pa dang ni dgu pa dag/ gsum pa hUM las rab tu grags// bcu gsum pa dang bco lnga pa// bcu dgu oM las rab tu grags// nyi shu rtsa lnga nyi shu dgu// haM gi ngo bor yang dag gnas/ / sum cu bdun dang drug cu bzhi// a yi dkyil 'khor yin par nges// rtsa ni rdo rje phag mo ste// g.yas g.yon phyag la dbu ma zhal// dpa' bo byang chub sems yin te/ skye mched bcu gnyis dngas ma yang // bcu gnyis phyag tu rab tu grags// 'byung bzhi'i dngas ma zhal bzhir nges// mdzes pa'i phyir na rgyan du bshad// gsung mchog bla ma'i zhal nas blang / / g.yas g.yon steng 'og sgo bzhi ste// 'dom gang mnyam pa gru bzhi yin// bdud rtsi lnga ni tshon rtsi lnga// rtsa ni thig gi rang bzhin te// ka ba brgyad ni rkang brgyad do// so sen pa sU tA ra sogs// mkhas pas brtag cing shes par bya// 'di dag rang bzhin dkyil 'khor te// dper na rang byung gser dang 'dra// 'di ni bcos ma ma yin te// rang rig ye shes gzugs brnyan ni/ / gzugs brnyan dkyil 'khor sgom pa min// rdul tshon la sogs bri ba min// spos la sogs pas mchod pa min// rdo shing lha la phyag mi bya/ rang bzhin gnas pa'i sangs rgyas la// rang bzhin mchod pas rtag tu mchod// sku ni dgun dus rang bzhin te// 'byung ba'i sku gsum zla ba gsum// gsung ni dpyid dus ngo bo ste// 'jug pa'i sku gsum zla ba gsum/ / thugs ni dbyar dus ngo bo ste// gnas pa sku gsum zla ba gsum// ye shes ston gyi dus yin te// sku gsung thugs ni zla ba gsum// dang po rgyu yis pa yin/ 'khor lo chags pa dmar po la// yi ge rnams ni dkar pos gnas// lam gyi sa pa rnam pa gnyis// ring ba dang ni nye ba'o// de ni 'bras bu'i sa pa yin// 'khor lo yang dag gnas pa ste/ 'khor lo de rnams lha rnams kyang // sku mdog phyag mtshan kun dang bral// rang bzhin gsal ba dri ma med// shel ltar gsal ba dri ma med// mi mthong mthong ba'i ngo bo can// zab cing phra ba'i rang bzhin can// phyi ru sku mdog phyag mtshan lha// nang gi shin tu phra ba'i gzugs// gsang ba'i bde ba lha ru nges// de las bzlog pa bzhi pa'i lha// lus las byung phyir lnga zhe 'am/ / rgyud rnams dag byed phyir na lha// chags pa'i phyir na lha yin te// rgyal po shes rab rang bzhin te// thabs dang shes rab rang bzhin gyi// chags pa chen po'i rgyud gsungs so/ / de nas sa chen po'ang cher g.yos par gyur te/ mchod pa'i sprin gyi char chen po babs par gyur to// de nas dpa' bo dang mkha' 'gro ma rnams kyang rgyud kyi don la dga' zhing mgu sde rjes su li rang nas mi sdang bar gyur to/ / dpal chags pa'i rgyal po'i rgyud kyi rgyal po rdzogs so// rnal 'byor ma tsan+da mA la dang / lo tsa ba slong shAkya ye shes kyis bsgyur ba'o/

CLOSE WINDOW