rgya gar skad du/ shrI dz+nyA nA tsin+ta tan+da rA dza/ bod skad du/ dpal ye shes bsam pa'i rgyud kyi rgyal po/ dpal rdo rje sems dpa' la phyag 'tshal lo// 'di skad bdag gis thos pa dus gcig na/ bcom ldan 'das dpa' bo dang mkha' 'gro ma'i 'khor grangs med pa dang / ye shes gsang ba'i gnas na thabs gcig tu bzhugs pa'i dus su dpa' bo ye shes mkha' 'gro zhes bya bas/ bcom ldan 'das kyi zhabs la spyi bos gtugs te thal mo sbyar nas gsol pa/ bcom ldan ye shes mnga' bdag che// ye shes kyi ni rang bzhin dang // ye shes skye gnas gang dang gang / / rgyal po ji ltar lags pa dang // gang la dbang byed gang gis 'dul// de nyid bdag la bshad du gsol// bcom ldan 'das kyis bka' stsal pa// dpa' bo ye shes mkha' 'gro nyon/ / ye shes zhes bya rnam pa lnga// de nyid don la shes pa dang // log rtog shes pas ma bsgribs phyir// spyi bo'i ye shes bshad pa'o// me long ye shes mnyam nyid dang / so sor rtog dang bya nan tan// chos dbyings ye shes lnga pa'o// de la me long ye shes ni// dper na g.ya' dag me long la// gzugs brnyan gsal bar snang ba bzhin// de bzhin sems kyi me long la/ / nyon mongs g.ya' ni dag byas na// chos rnams gzugs brnyan sgyu mar mthong // sems kyi me long gang yin la// sgyu ma tsam du snang ba de// tha dang mi phyed mnyam ye shes/ / mnyam nyid ye shes gang yin pa// kun rdzob sgyu ma tsam de ni// las dang mtshan nyid ma 'dres pa// de nyid so sor rtog ye shes// de nyid nan tan sgrub byed de// de nyid don grub ye shes te/ / thams cad chos dbyings gzhan min te// de phyir chos dbyings ye shes yin// ye shes skye gnas gang yin pa// kha sbyar dbus kyi rtsa brgyad do// dbyings dang ye shes gnyis med tshul/ / shar dang lho dang nub dang byang // ye shes bzhi po skye ba'i gnas// de dag kun 'dus lte ba ni// chos dbyings ye shes skye ba'i gnas// me long ye shes mnyam nyid dang // so// sor rtog dang bya ba grub// chos dbyings ye shes la sogs pa// bdag po byed pa'i phyir dang ni// zhe sdang dang ni nga rgyal dang // 'dod chags dang ni phrag dog dang // de bzhin gti mug la sogs pa'i/ / nyon mongs thams cad 'joms pa'i phyir// rgyal po zhes ni bstan pa yin// ye shes mkha' 'gros yang gsol pa// byang chub sems ni ji ltar lags// de nyid dbye/ ba gang lags dang // de yi gnas dang gzung ba'i gnas// nges par bzlog pa'i tshul nyid dang // de nyid kyi ni 'bras bu dang // rtags dang yon tan gang lags pa// de nyid bdag la bshad du gsol// bcom ldan 'das kyis bka' stsal pa// byang chub sems ni rang rig ste// dbye ba'i don ni gnyis su bstan// de yi gnas ni rtsa yin te// gzung ba rig pa'i 'khor lor te/ / nges par bzlog pa'i thabs dag ni// go bzlog pa yi tshul yin no// de nyid 'bras bu gnyis med rtogs// rtags ni lus la khrag byung dang // ba spu langs dang 'dar ba dang / / kha zas dang chung lus yang dang // skra dkar gnyer ma dengs pa dang // le lo mad dang brtson 'grus ldan// de la sogs pa'i rtags rnams 'grub// de nas yon tan bshad pa ni// rkang mgyogs sa steng sa 'og gi/ 'jig rten dngos grub gang yin dang // 'jig rten las 'das thob par 'gyur// gnyis med byang chub sems kyi gnas// rang rig 'od gsal de nyid do// ye shes rang bzhin gnas yin te// rtags ni 'od gsal de nyid do// 'bras bu chos sku 'chang chen po'i// sa ni nges par thob pa'o// rnal 'byor sems gzung sgom pa brtag/ lus sems tshachags su bcug nas ni/ / rang rig sems kyi de nyid la// de nyid dbyer med bsgom par bya// de yis thob med 'bras bu thob// bcom ldan 'das kyis de skad ces bka' stsal pa dang // ye shes mkha' 'gro la sogs pa'i 'khor thams cad rjes su yi rang nas/ de kho na nyid bla na med pa'i mchod pas mchod de mi snang bar gyur to// dpal 'khor lo sdom pa ye shes bsam pa'i rgyud kyi rgyal po rdzogs so/ / // paN+Di ta ga ya d+ha ra dang / lo tsa ba dge slong shAkya ye shes kyis bsgyur ba'o// // rgya gar skad du/

CLOSE WINDOW