rgyu gar gyi mkhan po ga ya d+hA ra dang / lo tsang dge slong shAkya ye shes kyis bsgyur ba'o// rgya gar skad du/ shI rat+na dz+wa la tan+ta rA nA ma/ bod skad du/ dpal rin chen 'bar ba'i rgyud kyi rgyal po zhes bya ba/ dpal kun tu bzang po la phyag 'tshal lo// he he rdo rje snying po dang // mkha' spyod ma la sogs pa dag/ sgo gsum legs par bsdus nas ni/ / ra li chen po'i dbye ba nyon// la las byung ba thabs kyi rgyud// ra las byung ba shes rab rgyud// i phyis a las gnyis med rgyud// thabs ni sku ste shes rab gsung / / gnyis med thugs su shes par bya// sku gsung thugs kyi rang bzhin las// nyi shu rtsa bzhi byung ba'o// a la la ho i ma'o// thabs ni la las ji ltar byung // ra las shes rab ji ltar byung / / a las gnyis med ji ltar byung // sku gsung thugs su ji ltar 'gyur// nyi shu rtsa bzhir ji ltar dbye// e ma ho mgon pos bshad du gsol// 'jigs byed chen pos bka' stsal pa/ / a las a ba d+hU tI ste// 'di nyid las ni gnyis med rgyud// 'byung ba'i gnas dang rgyu ru brtag/ la las la la nA yi rtsa// de las thabs kyi rgyud byung ba'i// rgyu dang gnas dang ngo bor brtag/ ra las ra sa nA ya rtsa// 'di nyid las ni shes rab kyi// ra li 'byung ba'i rgyud dang gnas// ra ni chags phyir shes rab ste// shes rab yi ge bcu drug brda/ / la ni nub phyir thabs yin te// thabs kyi yi ge bcu bzhi'i brda// thog ma med nas ma skyes pa// e ni gnyis med rang bzhin te// gnyis med blo yi spyod yul min// blo dang sgra ri kun rdzob phyir/ / g.yas ni thabs yin la la nA// g.yon pa shes rab ra sa nA// a ba d+hU tI gnyis su med// thabs dang shes rab gnyis med kyi// ra li'i ngo bo shes par bya// 'dod chags rdul/ la lus ni thabs// la la nA ni sku yin te// gti mug mun pa dag dang yang // shes rab ra sa nA ni gsung // zhe sdang snying stobs yid yin te// thugs te gsum gyis 'gyur ba'o// sku la brgyad de gsung la brgyad/ / thug la brgyad de nyi shu bzhi// ra li nyi shu bzhi ru nges// gnas ni nyi shu rtsa bzhi dang // tsaN+Da li dang phyag dag dang // mkha' 'gro 'byung po nyi shu bzhi// de nyid brda ru nges pa ste// sku gsung thugs kyi dbye bas so/ / gnas dang mkha' 'gro ra li dbye// sku gsum du ni de nyid bsdu// dang por rgyud kyi nges pa dang // rgyu yi gnas dang gnas nges pa// gtang sa nges dang go rims nges// grangs ngos rigs nges bco lngar nges/ / mdo sde 'dul ba mngon pa yi// dman pa'i rim pas dang por gsungs// dman pa rnams la bya ba'i rgyud// de rjes rnal 'byor nyid yin te// skyes pa 'dul phyir rnal 'byor rgyud/ / phyi nas rnal 'byor ma rgyad ni// bud med yongs su gzung phyir ro// dang po rtsa ba'i rgyud gsungs te// de nas bshad pa'i rgyud nyid do// de nas rgyud ni phyi ma'o// de rjes phyi ma'i phyi ma ste// rim pa bcu ni bskor ba ste// snod ngan dman pa'i rim pas gsungs// me tog snying po'i bcung bzhin du// phyi yi phyi nas bdud rtsi'i ro// ra li'i snying po snying po'i rgyud// dang por la las sku yi rgyud// dpa' bo mkha' 'gro mas zhus nas// sku yi mkha' 'gro brgyad la gtad// de rjes ra las gsung gi rgyud// gsung gi mkha' 'gro brgyad la gtad// phyi nas a las thugs kyi rgyud/ / thugs kyi mkha' 'gro brgyad la gtad// gnyis med ye shes bdud rtsi'i ro// lus las lus gsal mig gis lus// gsal ba'i phyir ni sgron ma ste// seng ge'i gzugs 'dra bdud rtsi'i ro/ / nyi ma'i 'od 'dra zla ba'i zer// 'brug gi sgra 'dra rgya mtsho'i gting // chu bo'i rgyun 'dra ri rab lhun// u dum wAr 'dra'i zhing gi rdul// 'di la 'dod 'dod tshol ba dang / / rtog ge pa yis dpyad du med// gal te rang 'dod dpyad gyur na// dpa' bo mkha' 'gro khros gyur to// mgo lus tshul pa brgya ru 'gas// de bas rang gi chung ma dang // bu dang yul 'khor lus ngag gis/ / bla ma dam pa mnyes bya ste// chu bo rgyun 'dra'i man ngag blang // kye ma'o mgon po snying rje can// ra li'i dbye ba de ltar na// de yi chen po ji ltar lags// nang du nyi shu rtsa bzhi yi/ / nges pa slar yang bdag la gsungs// rdo rje can gyis bka' stsal pa// ma spangs nyi shu rtsa brgyad kyis// ra li 'di ni chen por nges// re re la yang chen po bdun/ / gang zhig 'bras bu 'dod pa la// rgyu nyid gtso bor gyur pa ste// sa lu las ni myu gu bzhin// de phyir dang po rgyu mi spang // lhan cig skyes gnyis rgyu yin te// rang bzhin lhan cig skyes pa dang / / lhan cig lhan cig skyes pa'o// thun mong dang ni thun mong min// bla ma'i zhal nas shes bya'i phyir// dpa' bo mkha' 'gro'i zhal yin te// de nyid ston pa'i bka' las 'das// de las 'khrul pa snying re rje// phung sogs rtsa dang shu kra ni// lhan cig skyes pa'i rgyu yin te// log rtog 'khrul pa rgyur 'dod dang // ngo bo ma grub rgyur 'dod dang // kun rdzob byang sems rgyur 'dod pa/ / 'di ni rmongs pa ma rungs pa// phung po 'byung ba dbang po dang // phyi yi skye mched dman pa'i rgyu// brtags pa rgyur 'dod snying re rje// nam mkha'i me tog gi dri gang // rang bzhin gnas pa'i rtsa rlung sogs/ / khyad par lam gyi rgyu yin te// rang bzhin gnas pa ma shes par// log par rtogs pa snying rje nyams// don dam byang chub sems kyis ni// lhan cig skyes pa'i ye shes rgyu/ / bla ma ma bsten de las 'khrul// kun rdzob shu kra rgyur 'dod pa// rgyu dang 'bras bu 'khrul pa'o// rkyen med rgyu yis 'bras mi 'byin// de phyir rkyen ni spang mi bya// ye shes rlung dang ye shes me/ / lhan skyes gnyis med rkyen yin te// de nyid spang bar mi bya zhing // las kyi rlung dang me nyid dang // gzhan du'ang de nyid sbyar bya dang // srid pa len dang bde ba len// las mi spang zhing bde ba yang // mi spang ba ni bzhi po'o// lus dang lus kyi snying po rtsa// gnas dang gnas chen mi spang ba// lnga pa drug pa yin par 'dod// de nyid phyi dang nang du shes// phyi nang dbye ba ma spangs pa'o/ / snang ba dang ni mun pa'i cha// gang ba dang ni stong pa'i char// 'pho ba ma spangs brgyad pa'o// rgyu yi gnas dang 'bras bu'i gnas// de nyid mi spang shes par bya// rin po che yi pho brang du// rten ni mi spang shu kra gzung // gal te de rum zin na// shor ba mi spang ro mar bstim// gnyen po mi spang gzugs sku gnyis// ma spangs pa ni bcu gnyis pa'o// nor bu'i rten las skyes pa yi// bde ba la brten dbang po yi// sgo bsdu ngo bo ma spangs pa'o// gong 'og khyad par shes byas nas// sgyu mas gnyen po ma spangs pa'o// dga' ba mchog dga' shes byas te/ / sngon du 'gro ba ma spangs pa'o// 'khor ba lugs las bzlog bya ste// gnas nas gnas su zlog byed pa// gnas kyi khyad par ma spangs pa'o// de nyid rim par 'pho byed pa/ bla ma'i bla ma las brgyud shes// 'khor bar 'jug ldog bye brag ni// 'pho ba ma spangs rnam pa gnyis// ye shes me ni cher 'bar bas// phung po 'byung po dbang po sogs// thams cad bdud rtsir gyur pa ni/ / rkyen gyi khyad par ma spangs pa'o// lus kyi ba spu'i bu ga dang // brtan dang g.yo ba'i dngos po kun// bde ba'i ngo bor gang snang ba// ngo bor khyad par ma spangs pa'o/ / de nyid sgyu ma'i rang bzhin med// gnyen po'i khyad par ma spangs pa'o// bzhin mdzes mig yangs phyag rgya ni// ldan pa phyag rgya ma spangs pa'o// dam tshig chos kyi phyag rgya dang / / de nas ye shes phyag rgya che// phyag rgya'i khyad par ma spangs pa'o// chags pa'i phyag rgya las yin te// dam tshig chos ni ma ning gi/ phyag rgya gnyis su shes par bya/ ye shes phyag rgya chen po gnyis// grol ba'i phyag rgya yin par 'dod// phyag rgya'i dbye ba ma spangs pa'o// dang por gsang ba'i 'khor lor te// phyi nas rang bzhin 'khor lor yin// 'khor lo'i dbye ba ma spangs pa'o// dang po gsang ba'i gtum mo ste// gnyis par rang bzhin gtum mo ni// gtum mo'i dbye ba ma spangs pa'o// las kyi rlung dang me gnyis ni// kun rdzob 'khor ba'i rkyen yin te// ye shes rlung dang me gnyis ni// don dam gnyis med rkyen yin te// rkyen gyi dbye ba ma spangs pa'o// srid pa bskyed cing 'dzag pa bde// kun rdzob shu kwa'i las yin no/ / srid pa mi len rang rig skyes// don dam byang sems las yin no// las kyi dbye ba ma spangs pa'o// sbyor thabs rtsa ni rgyas po dang // kha 'byed pa yi las yin te/ sbyor thabs bzhi la ma rmongs pa// 'di ni ma spangs nyi shu brgyad// spyi mthun las las grub pa yi// mig drug la sogs grangs kyis bstan// rang rig ye shes gang 'dod pas// bla ma'i dus thabs legs par bsten// mi spangs nges pa'i gdams ngag blang // 'di nyid rdo rje 'chang gi rgyu// de las byung ba khyad par 'bras// dang por cha ste thig le dang // tshul dang tshul can mchog gzhan mchog/ 'di nyid de nyid drug yin te// de nyid drug ni tsaN+Da lI// re re la yang bani bzhi ste// tsaN+Da lI ni nyi shu bzhi// ra li nyi shu rtsa bzhir nges// phyi ru gnas ni nyi shu bzhi/ / spyan dang phyag rgya nyi shu bzhi// tsaN+Da lI dang ra li yi// phyi dang nang du grangs su nges// he he dpa' bo rdo rje 'chang // ra li 'byung ba'i rgyu gang lags// ra li'i ngo bo gang gang lags/ / bcom ldan 'das kyis bka' stsal pa// sku dang phyag mtshan rags pa kun// ra li'i ngo bo dman pa'i lam// mkha' spyod sa spyod sa 'og spyod// sgo gsum la gnas khyad par gyi/ / ra li'i ngo bor gsungs pa yin// dga' ba bcu drug rten dang bcas// zab pa'i ra li'i ngo bor brtag/ rang rig stong pa thobs dang bcas// mthar thug ra lir shes par bya// a ni thog mar ma skyes pa// la ni nub dang skyong ba ste// ra ni chags dang rin po che// ra las 'dod chags khrag yin te// la las zhe sdang khu ba'o// a las gti mug khu ba ste// sems can ra li'i rang bzhin te/ / ye shes lnga dang sa bcu sogs// kun la ldan pas ra lir gnas// sku yi ra li spyi bo yi// gtsug tor dag las byung ba'o// gsung ni ljags kyi dbang po las// thugs kyi re li thugs ka nas// byung ba rnam par nges pa'o// sku gsung thugs kyi rdo rje yi// spyan rnams la ni rang bzhin byung // sku gsung thugs kyi gnas las te/ / spyi bo la sogs dag las byung // phyag gi mthil nas rim pas byung // bla ma'i zhal nas blang bar bya// bye brag 'byung ba'i sgo yin te// he he sems can sangs rgyas kyi/ / rang bzhin sa dang lam ldan te// zla ba bcu sogs sa sogs ni// rdzus skyes la sogs ji ltar lags// 'on te sangs rgyas min nam ci// sems can thams cad gdod ma nas/ / sangs rgyas yin par gsungs pa ste// rdzus skyes sgong skyes drod gsher sogs// sems kyi gnas bcu sa bcu ste// rnam shes brgyad ni byang chub lnga// mkhan po sems kyi rgyal po ste/ / rang bzhin dag pa chos gos yin// rang bzhin gnas pa kha spu bregs// a dang haM gnyis sngags kyi don// thams cad sems la gnas pa ste// sems med sangs rgyas ma yin te/ / ngam grog la sogs bems po'o// sems nyid sangs rgyas yin pa'i phyir// sems can sangs rgyas rang bzhin no// rgyu dang 'bras bu'i tshul dang yang // bag la nyal dang kun tu rgyu/ / nus pa'i tshul dang mngon sum tshul// gzugs can gzugs med mkhas pas brtag/ sangs rgyas sems can de bzhin no// de ltar sems can sangs rgyas pas// ra li sems can rang bzhin phyir// lus la sku yi phyag rgyas gdab// ngag la gsung gi phyag rgyas gdab// sems la thugs kyi phyag rgyas gdab// sku gsung thugs kyi rang bzhin du// dngos po ro mnyam gyur pa la// sangs rgyas sems can ga la yod// dman dang gya nom ga la yod// 'khor ba yongs su shes pa la// mya ngan 'das zhes de la brjod// thams cad 'jigs dang rnam rtog spong / / 'di la thams cad ngo mtshar gyis// legs par gtad kyis dam du spro// de'i tshe 'khor 'dus pa thams cad ngo mtshar du gyur te mi snang bar gyur to// dpal rin chen 'bar ba'i rgyud kyi rgyal po rdzogs so// / rnal 'byor ma zla ba'i 'phreng ba dang / lo tsa ba dge slong shAkya ye shes kyis bsgyur cing zhus te gtan la phab pa'o//

CLOSE WINDOW