'phags pa bzang po spyod pa'i smon lam gyi rgyal po rdzogs so// / rgya gar skad du/ Ar+ya mai tri pra Ni d+ha na/ bod skad du/ 'phags pa byams pa'i smon lam/ dkon mchog gsum la phyag 'tshal lo// kun dga' bo 'di la byang chub sems dpa' sems dpa' chen po byams pas sngon byang chub sems dpa'i spyad pa spyod pa'i tshe/ tin lan gsum mtshan lan gsum du bla gos phrag pa gcig tu gzar nas/ pus mo g.yas pa'i lha nga sa la btsugs te thal mo sbyar nas/ sangs rgyas thams cad mngon sum du byas te/ tshig 'di skad ces smras so/ / sangs rgyas kun la phyag 'tshal lo// drang srong lha mig ldan pa yi// byang chub sems dpa' rnams dang yang // nyan thos rnams la phyag 'tshal lo// ngan 'gro thams cad zlog bgyid cing mtho ris lam ni rab ston la/ / rga shi med par 'dren mdzad pa// byang chub sems la phyag 'tshal lo// sems kyi dbang du gyur pas na// bdag gis sdig pa ci bgyis pa// sangs rgyas spyan sngar mchis nas su/ / de dag bdag gis bshags par bgyi// bdag las rnam pa gsum gang yis// bsod nams tshegs ni bskyed pa de// bdag gi kun mkhyen sa bon te// bdag gis byang chub mi zad shog/ phyogs bcu dag gi zhing rnams su// sangs rgyas mchod pa gang byung ba// sangs rgyas mkhyen pa yi rang bas// de la bdag kyang yi rang ngo // sdig pa thams cad bshags par bgyi// bsod nams kun la yi rang ngo // sangs rgyas kun la phyag 'tshal lo// bdag ni ye shes mchog thob shog/ phyogs bcu dag gi phyogs rnams na// sa bcu dag la gnas pa yi// byang chub sems dpa' byang chub mchog/ 'tshang rgya bgyid par bskul ma 'debs// byang chub dam par sangs rgyas shing // sde dang bcas pa'i bdud btul nas// srog chag kun la sman slad du// chos kyi 'khor lo skor gyur cig/ chos rnga chen po'i sgra yis ni// sdug bsngal sems can thar bgyid shog/ bskal pa bye ba bsam yas su// chos ston mdzad cing bzhugs gyur cig/ 'dod pa'i 'dam du bying gyur pa'i/ sred pa'i srad bus dam bcings pa// 'ching ba kun gyis bcings dag la// rkang gnyis mchog rnams gzigs su gsol// sems kyis dri mar bgyis pa la// sangs rgyas rnams ni smod mi mdzad// sems can rnams la byams thugs ldan// srid pa'i mtsho las sgrol bar shog/ rdzogs pa'i sangs rgyas gang bzhugs par// gang dag 'das dang ma byon pa// de dag rjes su bdag slob cing / / byang chub spyad pa spyod gyur cig/ pha rol phyin drug rdzogs bgyis nas// 'gro drug sems can thar bgyid shog/ mngon shes drug po mngon bgyis nas// bla med byang chub reg gyur cig/ ma skyes pa dang mi 'byung dang // rang bzhin ma mchis gnas a mchis// rnam rig ma mchis dngos ma mchis// stong pa'i chos rnams rtogs par shog/ sangs rgyas drang srong chen po ltar// sems can ma mchis srog ma mchis// gang zag a achis gso a achis// bdag ma mchis pa'i chos rtogs shog/ bdag 'dzin bdag gir 'dzin pa yi// dngos po kun la mi gnas pa ra// sems can kun la bde slad du// ser sna ma mchis sbyin gtong shog/ dngos po dngos po ma mchis pas// bdag gi longs spyod lhun grub shog/ dngos po thams cad rnam 'jig pas// sbyin pa'i pha rol phyin rdzogs shog/ khrims kyis tshul khrims skyon med cing // tshul khrims rnam par dag dang ldan// rlom sems med pa'i tshul khrims kyis// tshul khrims pha rol phyin rdzogs shog/ sa 'am yang na me 'am chu/ / rlung gi khams ltar mi gnas shing // bzod pa khro ba ma mchis par// bzod pa'i pha rol phyin rdzogs shog/ brtson 'grus brtsams pa'i brtson 'grus kyi// bstan spro le lo ma mchis shing / / stobs dang ldan pa'i lus sems kyis// brtson 'grus pha rol phyin rdzogs shog/ sgyu ma lta bu'i ting 'dzin dang // dpa' bar 'gro ba'i ting 'dzin dang // rdo rje lta bu'i ting 'dzin gyis// bsam gtan pha rol phyin rdzogs shog/ rnam par thar pa'i sgo gsum dang // dus gsum mnyam pa nyid dang yang // rig gsum mngon sum bgyis pa yis// shes rab pha rol phyin rdzogs shog/ sangs rgyas kun gyis bsngags pa dang / / 'od dang gzi brjid 'bar ba dang // byang chub sems dpa'i brtson 'grus kyis// bdag gi bsam pa rdzogs gyur cig/ de ltar spyad pa spyod byed cing // byams bgrags dang ldan pa yis/ / pha rol phyin drug rdzogs bgyis nas// sa bcu la ni rab tu gnas// kun dga' bo byang chub sems dpa' sems dpa' chen po byams pas/ gang la gnas nas thabs la mkhas pas theg pa bde ba/ 'jug pa bde ba/ bla na med pa yang dag par rdzogs pa'i byang chub yang dag par bsgrub pa'i thabs la mkhas pa ni de yin no// 'phags pa byams pa'i smon lam rdzogs so// /

CLOSE WINDOW