/ // rgya nag las 'gyur bar snang ngo // rgya gar skad du/ gaN+DI sU tra/ bod skad du/ gaN+DI'i mdo/ sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig na/ bcom ldan 'das rgyal po'i khab 'ong ma'i tshal bya ka/ lan da ka gnas pa na/ dge slong stong du tshang ba'i dge slong gi dge 'dun chen po dang / byang chub sems dpa'i tshogs chen po dang thabs cig tu bzhugs te/ thams cad kyang dgra bcom pa zag bzang pabya ba byas pa/ khur bor ba/ bdag gi don rjes su thob pa/ srid par spyod pa yongs su zad pa/ yang dag pa'i shes pas sems shin tu rnam par grol ba rnams dang / bcom ldan 'das thabs cig go/ / de'i tshe rgyal po gsal rgyal zhes bya ba stan las langs nas/ bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te/ bcom ldan 'das la 'di skad ces gsol to// bcom ldan 'das ma 'ongs pa'i dus su rtsod dus kyi tshe/ sems can thams cad bsdig pa'i sems dang 'thab pa'i sems dang / 'dod chags dang / zhe sdang dang / gti mug dang kun tu ldan pa/ pha rol gyi yul rnams la mchog tu zhen pa/ gcig la gcig za ba la brtson pa/ bcom ldan 'das kyis sngon gsungs pa'i dus 'jig par byed pa/ dam pa'i chos spong bar byed pa/ sangs rgyas dang / chos dang / 'dod chags dang bral ba rnams sun 'byin pa/ de rnams gzhig pa'i thabs gang gis byang chub mchog tu gzhol bar 'gyur ba'i thabs bstan du gsol/ de skad ces gsol pa dang / bcom ldan 'das kyis bka' stsal pa/ rgyal po khyod sems can thams cad kyi don dang / phan pa dang / bde ba'i phyir dang / sangs rgyas dang / chos dang / dge 'dun yang dag par bsrung ba'i phyir 'dri bar byed pa legs so legs so// de'i phyir legs par rab tu nyon la yid la zung zhig ngas bshad par bya'o/ / de nas bcom ldan 'das de'i tshe kun tu sgra sgrogs pa zhes bya ba'i ting nge 'dzin la snyoms par zhugs so// bcom ldan 'das ting nge 'dzin gang la snyoms par zhugs pa de'i tshe/ dmyal ba thams cad rgyun chad pa dang / sdang ba'i sems dang ldan pa thams cad kyang sdang ba'i sems dang bral zhing / byang chub kyi sems la rab tu gzhol bar gyur pa dang / bcom ldan 'das kyis bka' stsal pa/ gsal rgyal khyod kyis mthong ngam/ kun tu thos sam/ shes sam rtogs sam/ bcom ldan 'das mthong lags so// bde bar gshegs pa mthong lags so// khums shing kun tu khums la 'tshal cing rtogs so// bcom ldan 'das kyis bka' stsal pa/ gsal rgyal 'di ni sems can thams cad kyi ma sangs rgyas dang byang chub sems dpa' skyed pa nyan thos dang / rang sangs rgyas dang / yang dag par rdzogs pa'i sangs rgyas thams cad kyis phyag byas pa/ mchod pa/ bsams pa/ bsgoms pa/ shes rab kyi pha rol tu phyin pa sgra'i gzugs kyis sems can thams cad yongs su skyong pabar byed pa/ mu stegs pa thams cad rnam par 'jig par byed pa/ sdang ba'i sems 'dul bar byed pa/ bsdig pa'i sems 'joms par byed pa/ zhe sdang gi sems rnam par sel bar byed pa/ gti mug gi sems rab tu 'jig par byed pa/ 'dod chags kyi sems rnam par spong bar byed pa/ byang chub kyi sems yongs su skyong bar byed pa/ sangs rgyas kyi sems 'phel bar byed pa/ sangs rgyas 'byung ba sten par byed pa/ 'thab pa dang / 'gyed pa dang / 'khrug pa dang / rtsod pa dang / sdug bsngal ba dang / rmi lam ngan pa dang mtshan ma ngan pa kun 'dul ba/ gnod pa thams cad 'jig pa/ glo bur gyi nad dang 'chi ba zhi bar byed pa/ dus ma yin par 'chi ba dang rims la sogs pa zhi bar byed pa dang pha rol gyi dpung 'dul bar byed pa/ bdud rnam par 'jig par byed pa/ gdung ba sel bar byed pa/ bskal pa bzang po yang dag par 'phel bar byed pa/ tshe dang nad med pa ster bar byed pa/ 'chi ba'i 'jigs pa zhi bar byed pa/ thar pa dang 'phel bar byed pa/ gang gis thos nas rjes su yi rang ba de la yid bzhin gyi nor bu ltar 'bras bu rab tu ster ba/ yum shes rab kyi pha rol tu phyin pa gaN+DI'i gzugs kyis bzhugs so zhes thos pa dang / gsal rgyal sems dang ba skyes nas yang bcom ldan 'das la 'di skad ces gsol to// bcom ldan 'das 'di'i tshad ni ji tsam lags/ mdog ni ci 'dra ba lags/ bye brag ni du zhig lags/ brdung ba ni ci 'dra ba lags/ gang gis brdung bar bgyi/ gang gi tshe gang gi dus na ji srid du brdung bar bgyi/ ji ltar gzhag par bgyi/ de skad ces gsol ba dang / bcom ldan 'das kyis bka' stsal pa/ 'byor par 'dod pas shing rnams ni// rab tu 'bad de brtag par bya// tsan dan bil ba ba la sha// a shwad tha dad tsan dan dmar// rgya shu ta la king shu ka/ shing sha ba dang ta ma la// a mra star bu skyu ru ra tin ti sa ra a sho ka/ 'di dag thams cad med na yang // 'o sa las ni 'bad de bya// rgyal po 'bad pas thams cad du// 'di dag med na mi bya'o// shing ngan las ni byas pa dang / brdungs na sgra ni mi 'byung ba'i// sangs rgyas yum 'di brdungs na ni// yul 'khor 'tshe ba nges par 'byung // gtsug lag khang du dge slong rnams// de bzhin blo ni mi mthun dang / nye bar gdung ba 'byung 'gyur zhing // rnam pa du mar rtsod par 'gyur// mu stegs can gyi dbang 'gyur zhing // bdud kyang 'byung bar 'gyur ba yin// gdug pa'i klu ni du ma yis/ 'bru rnams kyang ni nyams par byed// rgyal khams 'dir mang sems can rnams// rnam par 'jigs pa nyid du 'gyur// gtsug lag khang yang 'jig 'gyur zhing // chos kyang nub par 'gyur ba yin// bdud kyi lha rnams dge slong gi/ dge 'dun shin tu ma bsdams byed// de ltar yang dag shes nas kyang // legs par yongs su brtags te bya/ tshad ni chung ngu sor brgyad kyi// brgyad cu rtsa bzhi nyid bya zhing // zheng du sor ni drug bya ste// dpangs su yang ni gnyis bya'o// sor mo'i tshigs kyi tshad dag gis// zur bzhir chad ni gnyis pa yin/ / legs mnyam nyid na shin tu gsal// rtse gnyis sbal pa'i mgo bzhin no// de nas rdung bar byed pa yang // shing de nyid las bcad de bya// sor bcu gnyis kyi tshad dag la/ / zlum zhing rtse gnyis ne'u le'i mgo/ chang zungs tshad kyang de bzhin te// shin tu 'jam dang rtsibs mnyam par// gang phyir de brdungs gzhan dgongs pas// 'og tu'ang de ni khri bya ba/ / gtsug lag khang gi sgo stengs sam// yang na dbus ma'i steng du bya// de yi rab gnas bya ba ni// shin tu brtan pa'i chos kyi sku// skyed pa ma yin 'jigs byed mi ni/ gdod nas ma skyes par dge ba// de ltar rab tu gnas byas nas// de yi spyan dbyer gyur pa yin// gaN+DI spyan dbye byas nas kyang // de 'og gtsug lag khang kun tu// klu ba dum gyis ni brgyan pa ltar/ / bskyed pa'i rim gyis brdung bar bya// de 'og dkon mchog gsum la ni// phyag byas nas ni brdung bya zhing // shad tsa lan gsum brjod pas ni// chos kyi rnga rnams brdung bar bya/ / me tog gis ni de bzhin khrus// zan za nyi ma 'char nub tshe// dus gsum la ni lan gsum ste// sku khrus tshe na lan gnyis bsngags// glo bur gnod pa char mi/ 'bab/ de bzhin 'thab dang rtsod pa dang // glog dang gnod pa chen po dang // gnas brtan rnams ni spyan 'dren dang // nad dang mu ge zhi ba'i phyir// ma 'dzel rim gyis brdung bar bya// dge slong rnams dang dge tshul gyis// dus rnams rtag tu brdung ba ste// gso sbyin la ni gnas pa'i tshe// dge bsnyen gyis kyang brdung bar bya// mtshan nyid thams cad rdzogs pa dang / / klu bdun gyis ni brgyan par bya// rgyal po gang tshe yul 'khor du// gaN+DI de ni grogs gyur pa// der ni dpal dang grags pa dang // 'dod pa dang na lo legs 'gyur// pha rol dpung gi 'jigs med cing // 'bru rnams kyang ni nyams mi 'gyur// sangs rgyas byin rlabs 'byor pa yis// der ni bdud rnams 'dul bar 'gyur// chos kyi rnga ni srid rtser bcas// / kun nas rab tu g.yo bar 'gyur// dmyal dang yi dgas 'jig rten rnams// 'jig par 'gyur bar the tsom med// thams cad sangs rgyas rtag dad cing // thams cad chos la gzhol bar 'gyur/ der ni dge 'dun 'dul bar ldan// mkhas pa rnams kyang 'phel bar 'gyur// 'dod chags zhe sdang gti mug rnams// der ni nub par gyur pa yin// rgyal po tshe ring chos ldan zhing / / bde ba dag dang ldan par 'gyur// rgyal po gtsug lag khang kun tu// chos kyi rnga ni brdungs pa yi// sgra ni gang gi rna ba yi// lam du dag ni grags 'gyur cing // dus bzhi dag tu thos pa ni/ / de rnams byang chub thob par 'gyur// gang zhig snying nas yi rang ba// de ni grol 'gyur the tsom med// gaN+DI'i mdo las lan cig thos// mi de skye ba dran par / 'gyur/ gang du mdo sde'i mchog 'di gnas// yul 'khor der yang 'byor par 'gyur// dus kun du ni gnas pa dang // klog gam yang na mchod par byed// 'di ni yid la 'dzin byed la/ sdig pa las ni grol bar 'gyur// bcom ldan 'das kyis de skad ces bka' stsal pa dang / rgyal po gsal rgyal bcom ldan 'das la yang dang yang du phyag byas/ nas song ngo // bcom ldan 'das kyis de skad ces bka' stsal nas/ thams cad dang ldan pa'i 'khor de dang / lha dang / mi dang / lha ma yin dang / nam mkha' lding dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do// gaN+DI'i mdo rdzogs so// // rgya gar gyi mkhan po d+harma shri ba tra dang lo tsa ba dge slong tshul khrims yon tan gyis bsgyur/

CLOSE WINDOW