kye btsun pa yon tan chen po'i gnas khyod la// blo gros ngan pas 'khrul te ma rig nas// nongs pa chen po smras pa'i tshig de rnams// thugs rje chen po'i sku la bzed par gsol/ / bdag kyang rab tu 'byung bar cig nang lags// zhes zhus pas/ rab tu 'byung bar gnang nas/ sgra dang kha spu bregs te/ gos ngur smrig gyon nas/ rgyal bu'i g.yas gral du gnab par gyur to/ / de'i tshe 'bangs rnams kyis bsam pa las/ rgyal khams gnyis kyi rgyal po rab tu byung ba las bsams na/ dam pa'i chos bya ba 'di bzang bar yid ches nas bdag cag kyang rab tu 'byung bar ci gnang zhes zhus pas/ rab tu 'byung bar gnang ste/ skra dang kha spu bregs nas/ gos ngur smrig gyon nas/ rgyal bu'i g.yon gral du gnang bar gyur to// de'i tshe de'i dus na/ bsod nams dang ye shes kyi tshogs kyis/ sa bon ma btab par rtse shing dang nags tshal thams cad kyang zas dang skom du gyur to// de'i tshe de'i dus na/ rgyal bu kun tu dge rab tu byung ba ni gzhan du ma sems shig/ bcom ldan 'das shAkya thub pa nyid do// rgyal po dga' ba'i 'od rab tu byung ba ni gzhan du ma sems shig/ 'phags pa byams pa nyid do// 'khor blon po dang 'bangs rnams rab tu byung ba ni gzhan du ma sems shig/ tshe dang ldan pa shA ri'i bu la sogs pa tshe dang ldan pa rnams so// rgyal bu kun tu dge rab tu byung ba'i sku'i yon tan gyis rgyal khams gnyis kyi blon po dang 'bangs rnams mngon par rdzogs par sangs rgyas so/ / @rgya gar skad du/ spri bi ro pa ni man tra na/ bod skad du/ gnas brtan spyan drang ba/ thams cad mkhyen pa la phyag 'tshal lo// btsun pa rnams dgongs su gsol/ dgongs nas kyang shel dang / nor bu dang / dngul dang / ku mu da dang kha ba'i phung po dang / zla ba'i zer dang / ston gyi chu dang / nam thang ba dang / pad+ma'i rtsa lag ltar dri ma med par mdzod la/ rlung gi stobs kyis shing gi lcug phran bskyod pa dang / smig rgyu dang sgyu ma dang rmi lam dang / glog des/ rta'i shing rta'i rdul dang / bal glang gi phrug gu'i rna mchog dang / sbrul gyi lce dang zil pa dang / rgya mtsho bskyod pa'i rlabs ltar g.yo ba'i yod skad cig re re la'ang mi sdod par 'gro ba/ rtse gcig pa'i ting nge 'dzin gyi stobs kyis yud tsam zhig rgyu ba nang du dgag tu gsol/ smras pa/ ri gzar 'bab pa'i dba' rlabs 'gyur bas kyang / / gang go dba' rlabs 'gyur la bskrun med par// 'jig pa thogs med g.yo ba'i yid de ni// yud tsam rtse gcig mdzod cig btsun pa rnams// lha yi bu mo yid chad shugs phyung skad cig zim mer byas pa'i mig/ ring zhing rdzi ldan bkral 'od zer mig chags lta ba'i g.yo ba yis// gang gi thugs ni skye ba rgyun gcod rgyu las 'khrugs par ma gyur pa// bdud rtsi dpung 'joms mkhas gcig thams cad mkhyen pa de la phyag mdzod cig/ skye ldan gang du brten nas dud 'gro'i skye gnas sems dmyal ma zhi dang // yi dgas 'jig rten gnas su 'gro bar mi 'gyur sdug bsngal 'jig byed pa/ / 'khor ba dag na 'gro ba chen po rnams kyi grogs 'gyur 'phags gcig pu// zhi bde grong khyer sgor gzhol/ chos de la ni gus pas sten par mdzod/ / zhi ba'i bdag nyid gang zhig bde gshegs gsung rab mthar phyin 'byung smra zhing // gang la gus par cung zad tsam zhig byin yang sbyin pa 'phel 'gyur la// ye shes snang bas mun pa zad byas dge slong dge 'dun de la ni/ / nyon mongs gcod pa'i ched du thams cad kyis kyang gus par phyag mdzod cig/ lcang lo chun po'i sku mang mgo la thogs shing dpung mgo gnyis yog la// rang gi 'od zer phyogs mthar 'phro ba rnams kyis 'jig rten kun 'gengs pa// lha dbang brgya byin cod pan btud de tshangs la phyag bya gang yin de// byin nas dga' byas sems kyi ting 'dzin shin tu chen po'i 'bras bu yin/ / rdo rje 'od 'phro 'phreng bas dpung rgyan 'dres nas mdzes gyur cing // lha la bka' stsol dbang po mtho ris skyong ba gang yin pa// de dag dge ba dag 'byung rnam smin 'gyur/ dus nyams dga' zhing // mngon par 'dod pa'i 'bras bu phun sum tshogs pa'i rgyu rnam yin// kha nas rgyags 'gyur dri zhim 'byung zhing mig gi mtha' dmar la// dbugs 'byung do shal g.yas pas nu ma 'bur la 'drud byed pa/ / sdug gu lhan cig nor bdag dga' tshal 'dug pa gang yin pa// de yang 'gro nyams dga' sbyin pa'i bdag nyid chen po yin// 'brug sgra sgrog cing sprin rnams chu ni// kun tu len byed pa// rlabs 'byung dus na nor bu byu ru dung dang nya phyis 'byung // rin chen gnas ni chu la nyid kyi 'byor pas gang srung ba// der yang rgyu ni sbyin pa mchog ces thub pas bka' stsal to/ gang yang 'od zer rnams kyis mkha' la skar ma'i 'khor lo zil mnan cing / ku mu da yi rdzing yangs rnams su dpal ni rab tu rnam phye nas// glang po'i che ba'i dpal dang ldan zhing mtshan mo shin tu rab mdzes pa/ / de yang nges par sbyin pa nyid kyis 'bras bu ro bro mang po yin// raM reb rtse la shing rtas lam ka 'dug pa'i rin chen rdo gcog cing // rta yi rkang lag rnams kyi dgu tshig chu bo'i rlabs ni gcod byed la/ / mun pa bsal phyir nyi mas skar ma zil mnan lam me gang yin pa// de rgyu yid kyi ting nge 'dzin gyi bskyed pa'i sbyin par thub pas gsungs// rgyal mtshan rtser gtags rin chen 'od zer snang ba nam mkha' dmar gyur cing // rta rmig 'dor bas mkha' la sprin gyi 'phreng ba dag kyang 'dral byed la// rnga yab dkar pos g.yabs shing 'khor los sgyur ba song ba gang yin pa/ / 'dod pa'i 'bras bu de yang sbyin pas bsgrubs zhes thub pas bka' stsal to// gser gyi pad+ma'i rdul gyi phye mas dmar bris mtshor ni khrus byas te/ / de yi gnas 'dab bung sgra 'byin rnams su nyal ba'i bde rnyed nas// rig 'dzin chung ma lhan cig 'jigs med mkha' las 'gro ba gang yin pa// de yang ser sna 'jil zhing skyon med dga' ba'i sbyin pa'i gzi brjid yin/ / mA la yi ri rtse tsan dan grib mas bsil ba yangs pa dang // 'bigs byed ri dang gangs dang lhun po'i ri dang man+da ri'i bo la grub pa'i tshogs chen chung ma lan cig 'jigs bral dga' ba gang yin pa/ / 'dod pa'i 'bras bu tshe 'di'i snying po 'byor pa de yang gtong ba'i yin// bud med rkang gdub 'khrol ba'i 'grogs nas 'phur ba'i phug ron gnas pa yin/ / khang pa mthon po rnams dang 'bigs byed ri rtse 'gran pa'i ba glang dang // gdugs dang rnga yab bud med g.yog 'khor rin chen gser dang rta rnams dang / / bzang mdzes de dag kun kyang sngon gyi sbyin pa'i dge ba'i rnam smin yin// ban d+hu ka ltar rtsa dmar rgun chang gser snod bzang por legs blugs pa// yongs 'du a mra smin gas lta bur dri zhom ut+pal 'gying zhing ldem/ / no chung shin ma nam sgogs dus kyis stobs shing yams grangs mang 'grim pa// mchog tu dge ba de rgya smyon pa yin zhes blo gros dag pas gsungs/ / gser gyi phag skad sked bcings snyan smra 'dzin zhing smin pa ya gcig skyod// mig yangs rnar thug dkar gnag 'byes la skra bgab me tog 'phreng dkrigs pa'i// na chung bzang po brda rgyas bdag nyid legs byas rnams kyis bran ltar byed// tshogs bsags 'bras de sbyin pa'i che ba nyid ces zas gtsang rgyal pos gsungs// de ltar lags pas bde bar gshegs pas gsung rab mtha' dag thugs su chud pa shin tu rgyas pa'i chu ltar gyur pa/ snying po dri ma med pa dang / lha'i skye bos klu'i gnas su gyur pa tshul khrims 'dren ma ma yin zhing rgya che ba'i chu dang ldan pa/ dge ba la rnam par rtog pa'i zla ba shar ba'i dbang gis/ ting nge 'dzin sna tshogs rgyas pa'i dus kyi rlabs kyis byang chub yan lag skyon med pa'i nor bu mang po kun tu g.yengs pa/ sems kyis gzhi la 'phags pa'i lam yan lag brgyad pa'i ri bo chen po rten pa/ 'bras bu'i bye brag thob pa/ gang zag chen po'i chu srin rgyu ba/ 'phags pa'i bden pa dang / yang dag par spong ba dang / rdzu 'phrul gyi rkang pa'i shing ljon pas mdzes par byas pa/ dran pa nye bar bzhag pa'i ngogs dang ldan pa/ sgrib pa'i ro mi gnas pa/ sbyangs pa'i yon tan goms pa/ dag pa'i mu tig gi nye phyis kyi khog lus dang ldan pa/ mngon par rtogs pa'i chos nyid gting mi dpogs shing zab pa/ rgyun mi 'chad par klog pa dang kha ton byed pa'i sgra char 'byung ba/ 'phags pa'i dge slong dge 'dun gyi tshogs rgya chen po la bdag gsol ba 'tshal lo// 'di lta ste/ srid pa'i 'gro ba gcig nas gcig tu brgyud pa/ du ma nas dge ba'i sa bon btab pa/ bde bar gshegs pa'i bstan pa'i gzhal med khang gi sa gzhi gcig pur gyur pa bzod pa dang / nges pa dang / byams pa dang / tshul khrims dang / thos pa dang / zhi ba'i gnas/ bdag dang gzhan gyi gzhung gi don gyi de kho na ma lus par rtogs pa/ yongs su shes pa bsgoms pas dran pa nye bar gnas pa/ yang dag pa'i ye shes dang mthong bas/ log par lta ba'i rab rib bsal ba/ legs par brjod cing shis la rgya che ba'i ming dang ldan pa/ skye bo bla ma la bsnyen bkur byed pa dang / mngon du smra pab dang / phyag 'tshal ba la sogs pa'i tshul bzang po dang ldan zhing / mdongs gsol bas snyan pa rnams bsnyad pa/ ston gyi zla ba nya ba'i 'od zer dag pa lta bu'i yid 'byung ba sbyin bdag chen po che ba'i bdag nyid can ming 'di zhes bya ba 'di ni/ khyim bdag legs sbyin dang / bzang ldan dang / btsun mo 'khor gyi blo dang / mu shil dang / tra pu sa dang / gau shi la dang / rta pa gar ni ka dang / mgon med zas sbyin dang / drag po dang / nag pa dang / nam gru la sogs pa dang / gzhan yang bcom ldan 'das la yid dad pa gsal rgyal dang tshangs pas byin dang / rgyal po shar pa'i bu dang / gtum po rab tu snang la sogs pa sa'i steng la dbang ba'i sbyin pa las byung ba'i legs par sprad pa'i rjes su slob ste/ lus dang / longs spyod dang / srog la sgyu ma dang / smig rgyu dang / dri za'i grong khyer dang / mgal me bskor ba dang rmi lam dang / ri'i 'bab chu'i chu ltar g.yo bar rig nas/ stobs bcu mnga' bas gsungs pa'i tshigs su bcad pa dang / chos mngon pa dang / 'dul ba dang / mdo sde 'dzin cing / dge ba'i las kyi 'bras bu rnam par smon pa yod do zhes bsod nams kyi sa bon skyed pa'i rgyu/ 'khor ba'i bde ba phun sum tshogs pa'i gan/ skye bo ngan pas rnyed par dka' ba/ ser sna can gyi yid 'joms pa sgrub pa na/ ston gyi zla ba dri ma med pa ltar dang ba'i thug mnga' ba/ srid pa'i nyon mongs pa'i sa bon gcod pa/ sems can thams cad du bsam pa mkhyen pa/ grags pa 'jig rten gsum du khyab pa/ bdud kyi bu mo steg pa rgyun gcod pa'i rgyu/ skyabs su 'os pa/ chos ston pa/ 'gro ba la dge ba'i phyir bya dka' ba'i 'phrin las rnams kyis/ chos thams cad thugs su chud pas rnam par sangs rgyas pa'i sangs rgyas nyi ma'i 'od zer gyi snang ba gsal bas rig nas pad+ma'i 'dab ma rgyas pa ltar ring zhing rdzi ma legs pa'i spyan dang ldan pa/ gnod sbyin gyi bdag po'i gtsug gi nor bu chen pos zhabs kyi sor mo kun tu bskor ba gser gyi mchod sdong ltar gsal ba bas/ sku la rdo rje dang / lcags kyu dang / pad+ma dang / nya dang / rgyal mtshan dang / gdugs dang / 'khor lo la sogs pa'i mtshan rnams kyi mtshan mnga' ba/ pad+ma'i 'byung gnas rnams la snang ba mdzad pa'i 'od kyi 'phreng bas bye brag med par khyab par 'gengs pa/ bung ba'i tshogs ltar sngo ba'i gtsug tor gyi nang nas kun tu 'byung ba'i 'od kyi dra bas phyogs kyi dkyil 'khor ma lus par bkram par byas pa/ kha na ma tho ba med par zhugs pa/ 'phags pa'i bden pa ston pa/ zhi bar gzhol ba'i lam du 'dren pa/ 'jig rten sgrol ba mnyes gshin pa'i gnyen gcig pu/ mu stegs can ngan pa'i rgol ba rnams kyis gsung dang / thugs dang / dga' ba dang / mthu la mi non pa zas gtsang ma'i sras/ yul rnams kun la sred pa 'byung ba'i rgyun skabs byed pa'i rgyu/ skye bo mkhas pa rnams ni sad par bya phyir shar gyur pa/ bag la nyal gyi rab rib sel ba ye shes snang ba'i mchog/ sa rnams mtha' dag snang ba phyogs rnams thams cad snang mdzad pa/ phyag dang zhabs dang dbu ni rab tu byin zhing tshul khrims dang / smon lam dag gis byang chub lam bzang yang dag bsgrubs gyur pa/ / srid pa'i 'gro ba'i dug gi snye ma'i steng du lhung ba yi// skye dgu rnams la kha na ma tho med pa ston mdzad pa// srid pa rnam pa gsum 'jig pa/ bcom ldan 'das stobs bcu'i stobs dang ldan pa/ mi 'jigs pa bzhi mnga' ba/ dpa' ba dang mthu kha na ma tho ba med pa/ mtshan dang dpe byad bzang pos brgyan pas sku brjid pa/ pha rol tu phyin pa drug dang / dka' ba brgya phrag du dam pa'i chos dkon mchog bsgrubs pa/ btsal ba tsam gyis sems can mtha' dag gi bsam pa thugs su chud pa/ thams cad mkhyen pa 'phags pa nyan thos kyi dge 'dun rab tu zhi ba dang / tshul khrims dang / thos pa dang / ting nge 'dzin dang / bzod pa dang / byams pa dang / sbyangs pa'i yon tan dang ldan pa/ nyon mongs pa'i rab rib dang ling tog ma lus par bsal ba/ 'khor ba'i rang bzhin rig pa dang / phyogs phyogs kyi gtsug lag khang dang / kun dga' ra ba dang / ri dang / nags 'dab dang khrad khrod dang / chu dang / ri sul dang / gshes dang / ne'u gsing dang / shing gi grib ma rnam pa sna tshogs la dgyes pa/ yul dang ljongs du ma la phan gdags pa stsol bar mdzad pa/ yang dag pa'i dran pa dang / ting nge 'dzin dang / dga' ba thob pa las ma nyams pa/ phung po lnga spyir skad cig par yang dag par so sor rtog pa'i yid la byed par bskyed pa/ mdo dang / 'dul ba dang / chos mngon pa dang / skyes pa'i rabs dang / gleng gzhi dang / tshogs su bcad pa dang / rtogs pa brjod pa dang / de lta du byung ba gtan la bab pa'i gtam gyis sems sbyangs pa/ rang gi lus dang / ngag dang / yid kyi 'jug pa dran pa nye bar gnas par rgyu ba/ dbang po dang / stobs dang byang chub kyi yan lag dang / bden pa dang / 'phags pa'i lam dang / dran pa nye bar gzhag pa bsgom pa goms pas dad pa thob pa dang / tshe rabs gzhan dang gzhan na bsags pa'i rnam par smin pas grub pa/ ji ltar 'byor par nus pa dang 'thun pa'i rtsom pas tshogs bsags pa/ phan yon lnga'i rgyu/ sems can thams cad gnas par byed pa 'jig rten pha rol tu bde ba thob par byed pa/ kha dog dang / dri dang / ro dang / reg pa dang ldan pa/ yid du 'ong ba gya nom pa'i bza' ba dang / bca' ba dang bldag pa dang / brngub pa dang / gzhib pa la sogs pa zhal zas bsham par bya ba rnam pa sna tshogs zhal zas khyad par can gyis spyan 'dren to// de la thog mar bcom ldan 'das shAkya thub pa yongs su mya ngan las ma 'das pa'i tshe/ gang dag ye shes kyi mes nyon mongs pa'i shing thams cad ma lus par bsregs pa/ gtong ba'i ngang tshul can gyi sbyin pa'i sa bon 'phel ba'i rgyur gyur pa/ phra ba gzigs pa mkhas pa/ de kho na la sgom pa 'di lta ste/ gnas brtan b+ha ra d+h+wa dza bsod snyoms len dang / 'phags pa sgra gcan 'dzin dang / sbyin byed dang lam bstan pa dang / skyed bod dang / gser be'u dang / rtogs byed dang / rdo rje can gyi bu dang / 'phags pa bsrungs pa'i klu dang / klu sde la sogs pa slob ma bstan pa gnas par bya ba'i phyir/ gnod par gyur kyang lus kyi khur khyer ba rnams dang / gzhan yang gang dag sum cu rtsa gsum pa'i skye ba la phan pa'i phyir/ gser gyi rdo leb chen po'i steng na 'dug pa'i rig sngags 'chang ma gru len pas glang po che yur ba/ bung ba'i pad+ma la 'jib cing 'khod pa'i ma mda' ka'i rdzing gi chu dang ldan zhing / yal ga gsal ba'i steng na rin po che'i me tog gi 'phreng ba bres pa'i shing yongs su 'dus kyis kun tu mdzes par byas pa'i ri lhun po 'bab chu 'bab pa'i sa gzhi la 'khod pa rnams dang / yang gang dag/ gser gyi rked nas bsil ba'i chu 'bab la/ / chu la zla ba'i gzugs brnyan 'byung 'gyur zhing // zla ba'i 'od kyis ku mud kha phye ste// ku mu ta tshal na skad snyan ngang pa gnas// dang mo mtshe'u na sgra skad snyan pa 'byin// mtsho ngogs rma bya dgar bcas rgyags pa gnas// rma bya rgyags sgras ri sul snyan pa grags// ri su la yal ga glags pas ri rtse 'khris// ri rtse stong rnams na ni sprin chags la// lang ling sprin gyi smin shong khra khro sdang / / sman shong skyes pa'i nor bu ldum bu gsal// ldum bu las brul lhung ba'i me tog ldan// me tog rgyas pa'i dpag bsam shing tshal mdzes// mdzes pa'i lha mos gser gyi phag skad drud/ / gser gyi phag ska'i sgras ni bya 'drogs shing // byas chos shing thog rtsa las chad cing thul// rtsa 'phyang khu ba zag pa spos kyi dri// spos glang dbang po 'dreg zag dri rab zhim/ / dri rab zhim pa'i li shi ri 'khor mang // bal glang mo rgyags drag 'gro lang long gyur// bung ba'i khyu yis me tog zegs gyur cing // yal ga me tog rgyas pas gad pa dkar// gad pa chad pas nor bu'i dum bu snang // me tog mgo ldog brul bas rnam par bkra// nor bu sil ma mang pos ri zhol spras// me tog zegs pa'i shing gi yal gar gnas pa'i bung ba dga' bas phung rnams dang / / zla ba 'dog zer dkar po ngang pa lta bus nye 'khor rdo ba chag cha ga btab// lhun po mtho ba'i r-i le thug pa gang dag / rab tu zhi ba'i thugs kyis zhugs// dri dag dri med zla 'dra'i grag ldan 'di yi sbyin pa'i gnas la sten du gsol// rgya mtsho nye ba'i chu 'gram ri bo ma la ya'i// ri ngos ta ma la sbal mig 'thon pa yi 'phreng ba can/ / sbrul ma 'khris pa tsan dan shing gi nags tshal no// bstan pa gang dag bzhugs par gyur pa de dag dang // nyi ma'i shing rta'i rmig pas rdo bcag cing // mi 'am ci mi phrugs kyi nyams dga' ba// ri sul mthon po dpag bsam nags mang dang // ri bgab rnams na gang dag bzhugs pa dang // shing gi me tog 'brul bas dri zhim byas pa'i ser bu ngad ldang zhim/ / nags na glang po dregs pa zags pas bsgom pa'i rin chen 'khri shing khyim// khyim la chags pa med pas bsten pa'i bsod nams chu gling gi gnya' shing 'dzin ri bya rgyags khyug gnas pa na gang dag bzhugs pa dang / / bal glang mo snyogs snang ba ro bro'i tshal// me tog ldan zhin ser bu dad ldan pa// sa h+ya ri bo ngo ngos yangs pa la yongs dag thugs mnga' thub pa bzhugs dgu dang / / pad+ma ut+pal rgyas pa 'byung ba'i gnas// nyin re nyi ma'i shing rtas rdo snad can// srid pa'i 'jigs bral rab tu yid 'ong ba// 'char ba'i ri steng gang dag bzhugs pa dang / / ri yi rtse mos sngo sangs sprin thal sman ljongs can// dogs ldan chu bo na ra ma das na sul bkrus// glang po che yi mche ba snyoms pas phyogs grogs pa yi ri/ / 'bigs byed rma bya rgyags gnas pa na bzhugs dgu dang // sna tshogs 'byung khung tshon gyis kha bsgyur phug dang ldan zhing sprin kyang chags gyur la// ko lpags ldan pa gtsang ma'i chu yis ngogs kyis rdob mang po bkrus gyur cing / / ngos la ba glang mjug ma mang po 'phyang zhing glog 'grus snang byas pa// yongs 'dus ri rtse phrog na gcig pu sred dang bral ba gang dag bzhugs pa dang / / yang gang dag shing dang 'khri shing rnam pa mang po 'dab chags par gnas pa/ ne'u gsing 'jam zhing sngo ba'i steng na rma bya'i khyu gar byed cing sgra snyan pa 'byin pa ri dgas kyi tshogs bag yangs su gnas pa'i sos bcad pa'i rtswa'i myu gu yod pa/ me tog gi dri zhim pos bsgos pas bser bu 'jam zhing bsil ba'i ngang ldang ba'i nags 'dab rnams su gnas bcas te bzhugs pa rnams dang / yang gang dag dus su rlabs 'byung ba'i chu'i dba' rlabs kyis g.yengs pa'i na le sham dang / li shi dang / la pa li'i 'bras bu sngon po mang po 'grigs pa'i tsen dan dang / a ka ru'i shing khrod na gnas pa'i sbrul mgo gdengs ka gdengs shing 'jigs su rung ba yod pa/ glang po che dregs pa dang bcas pa'i snas byu ru'i sdong bu bsgyel ba dang ldan zhing / / nyi ma'i 'od zer gyis reg pa'i dbang gis mu tig gis yod pa'i nya phyis kha bye ba'i khog pas rnam par spras pa/ nye bar bul ba dang ldan pa/ nor mchog gi rdol grub pa'i chung ma'i skye bo gnas shing bya 'i khyu dga' ste sgra 'byin pas glu len pa lta bu yod pa'i rgya mtsho'i gling dag na/ klu'i bdag pos lus chen pos sku dkris te/ gdengs ka'i gdugs kyis nyi ma'i 'od zer bsgribs shing bsam gtan mdzad pa rnams dang / sman ljongs dag na phyogs kyi glang chen brang gis rdo ba khebs pa'i khyu 'khod cing // 'khor bcas lan cig ma yin ra re/ ba'i gnod sbyin mo dag gnas gyur la// klu yi rgyal po mgo bos bstod de kha nas 'od 'bar 'byung bas shing 'bar shing // gangs ri te sa la ni blo gtsang gang dag zhal ton mdzad cing bzhugs pa dang / / rgya mtsho'i rlabs kyis bshal ba'i ro 'gab ldan pa ma smad pa// ri bo man+da ra la nyin phyed tshun chad bzhugs// bzhugs shing nyi ma phyed par 'gyur nas gang dag gzhan bzhugs pa'i phyir/ / nor bus rtse mo bkram pa'i khor yug ri la sten pa dang // gang dag 'khri shing gzhon nus rdo bas khebs gyur pa'i// dbang chen rtse mo yid du 'ong bar bder gnas te/ mkha' lding shugs kyis nang du klu rnams krugs pa yi// rgya mtsho rin chen gnas pa gzigs pa dang // ngang pa'i tshogs can shin tu gtsang ba drag 'bab can gyi chu yis ri bgab bkrus gyur cing // phyogs kyi glang pos bsgyel ba'i sa la ka yis rdo ba chen po mang po 'khebs gyur la// gcan gzan dbang po ral pa 'khyil cing gsal bas dpung ba'i phyogs 'bar nyal bas gang gyur cing // sbal mig 'thon pa'i lcug mas 'khor ba grub pa ngal sos ri bo kron dzar gang gshegs dang // gang dag mun bsal khyad par can gyi blos// shing ljon sna tshogs me tog rgyas gyur cing ridags rgyu bas ne'u go seng gzhon bsnang ba/ / gzi rdonags rnams mi spong bzhugs pa dang // yang gang dag nub kyi ba lang spyod dang / shar gyi lus 'phags dang / byang gi sgra mi snyan dang gling gzhan dag na skyes pa'i lcug phran mdog snum zhing sde la 'jam par mang pos sa gzhi kun tu khebs pa shing gi grob ma'i dkyil 'khor bsil ba dang / 'khri shing gis 'khor cing ri dgas mang po gnas pa'i nags tshal de dang de dag na bzhugs pa rnams dang / yul dar dang / gan da ra dang / gu zan dang / li dang / shi ring dang / bag le dang bru sha dang / kha che dang / rgya yul dang / grong khyer zas 'dra dang / rdo 'jog zas 'dra dang / skyes pa'i grong khyer dang / phyogs mtshams dang / kun ti ma la ba dang / srung byed dang gro khyer dang / tsa tu ga dang / tsa ta dang / b+hu ru kad tsa dang / ko'u sham+b+hi dang / ser skya'i gnas dang / mnyan yod dang / mi thub pa dang / grong khyer me tog dang / tI ra dang / bcom brlag dang / grong khyer longs spyod dang / tsam pa dang / rgyal po'i khab dang / dbang po'i brag phug dang / 'brog dang / ko'u na'i grong dang / kun dga'i grong dang / mchod rten gyi grong dang / 'khrul bcug gi grong dang / rnam par rgyal ba'i grong dang / yangs pa li dang / kha ra'i shing 'phel ba dang / 'phyel byed dang / zangs kyis g.yogs dang / sngo snyogs 'dzin dang / ko sa la dang / an dra dang / ka ling ga dang bar ba ra dang / ya ba ni'i gling dang / sing ga la'i grong khyer dang / gser gyi sa dang / ha ri ke la dang / ba ro sha ka ta ha dang / na li ke ra dang / pa ne sa'i gling dang / shur pa ra dang / nim pa'i grong khyer dang / dpal gyi zhing dang / dngul chu'i gnas la sogs pa yul dang / cha byad dang / skad dang / gnas pa dang / cho ga dang / rigs dang / rus dang / tshul khrims dang / tshul khrims can du ma'i yul mi gnas pa'i yul gzhan dag na bzhugs pa rnams dang / gang dag sngon chad nyi zla'i 'od kyis ma phog cing / she sha sbrul gyi lus kyi 'obs nas ri yi drung // de yi gtsug gi rin chen 'od kyis mun bsal ba'i/ ngas 'og tu ni ring por ma thogs gshegs gyur dang // gang dag chu ltar sa la thogs med bye'u zul mdzad pa dang // gang dag sar gnas phyag gi rtse mos zla ba reg mdzad dang // gang dag bya ltar nam mkha' la ni shugs kyis rgyu mdzad cing / / na bza' mtha' mas sprin mthar reg pas sprin ling 'jig mdzad dang // gang dag lha dang / klu dang / grub pa dang / 'khor ba dang / tshogs rnams kyis rtag tu mchod pa'i ri 'jig med dang / bung ba'i ri dang / rgyal bu rgyal byed kyi tshal dang / shar gyi ri bo dang / nub kyi ri bo dang / shi ri kun ba ta dang / kun+da so ma dang / ta ma sa'i tshal dang / bsil tshal dang lhas sprul dang / 'jigs med ri dang / nags tshal chen po dang / tsher ma can gyi nags tshal dang / byams pa'i ri dang / chu srin byis gsod cing kyi dang / ri nag po dang / gnas kyi ri dang gser skya'i ri dang / me tog dang / ri dang / tsan dan ri dang / klu'i po ri dang / tsan dan ri bo dang / tsher ma'i ri bo dang / lha yul babs dang / a ba sim b+ha dang / kun dga' stong ldan dang ri be'i rgyal mtshan dang / bzhi bkrus dang / rang rig mchod rten dang / sa lu spungs ldan dang / pho brang 'khor dpal yon can dang / bya rgod kyi phung po dang / ri dgas kyi nags dang / ka shod dang / gtsug lag khang gsar ka nis ka sha hi la sogs pa cho 'phrul rmad du byung ba sna tshogs dang ldan pa rnams dang / dar ma ra dzi ka'i mchod rten du ma dang / sangs rgyas bzhi'i gdan khro yod pa/ bsod nams su 'gyur ba'i sa phyogs rgyun mi 'chad par klog pa dang / kha ton dang / bsam gtan dang / ting nge 'dzin dang / snyoms par 'jug pa dang / tshul bzhin yid la byed pas 'jug pa dag pa'i dgra bcom pa rnams bzhugs bzhugs pa/ chos gos dang / bsod snyoms dang / mal cha dang / na ba'i gsos sman yo byad dang / 'tshog chas rnams kyis legs par byas pa/ mtha' mtha' na chu'i gnas yod pa la nye bar spyod pas nyams dga' ba/ bde bar gshegs pa'i zhabs kyis bcags pas gtsang bar gyur pa'i sa gzhi can/ zhi ba thub pa'i skye bo gnas pa rnams la/ de kho na bsgoms pas yid kyi ting nge 'dzin bskyed pa/ tshe'i lhag ma gnas par mdzad pa rnams dang / gang dag glog 'gru bya gar dag gogis sku lus bkra byas sprin snum 'drar gyur nas/ / bkres pa'i sdug bsngal snod gyur mda' rtse rnon po lta bu'i spu yis rab gang zhing // skom pas mig zhu me stag bcas pa'i me rnams kyis ni kun nas lus bskor ba'o/ / yi dgas gnam du lta ba rnams la thugs rjes steng nas char gyi rgyun 'bebs dang // rin chen bye ma'i 'phreng ba gya gyur dkrigs mtho la// ngang khyu bag yangs gnas shing lang long nyal gyur cing / / chu dang nye bar chu yi zer mas bsil gyur pa// man sa yi mtsho gling bsam gtan mdzad dgu dang / gang dag mi ro mang po'i sha dang khrag gi ro bro b as dga' bar gyur pa'i bya khA'i tshogs kyis gang gyur pa'o sa phyogs mgo'i thod pa gas nas tshol thigs thogs zag pa'i snum gyis mched pa'i mes tshig cing rang gi me lces shing gcer ba bskams shing rnyis pa/ lag pa dang / rkang pa dang / so dang / skra'i dum grugs kyis gang zhing zla ba dri ma med pa'i 'od lta bu'i keng rus kyi phung po yod la/ skad cig tu ro langs byung nas/ a la la a la la zhes sgra 'byin cing / me stag dang bcas pa'i gang mo drag pos 'byung po 'khrugs shing skrag par gyur pa/ ce spyang me shis pa'i kha nas du ba dang bcas pa'i me lce 'byung ba'i dur khrod chen po dag na bud med kyi re spros shing lto lhung nger gyur pa'i steng na 'dug cing dga' ba'i bya rgod kyi mchu dang sder mos phrad cing lto'i nang na srin bu'i rigs rnams gnas pa/ ce spyang gi stobs kyi shugs kyis drangs pa'i nang khrol dri mi zhim pa'i dum bus 'khor la/ bya khwa bkres pas mig gi sha brus pa dag la gzigs shing rtag tu mi sdug pa bsgoms te/ gang dag kha cig ro yi gnas mal dong nas ni/ / khrag dang sa chags dmar zhing rtsub pa'i sgra 'khyil dang // bya yi mchu dang sder mos mig rgo brus par yang // mi ro bor ba lus la gzigs par gyur pa dang // sgo dang srang bar la lar me 'bar me lce'i rtse mo mang pos mgo rmongs shing / / ral gri gtun dang rdo bas bsnun cing brdungs nas skye bo khu co 'don gyur la// gshin rje'i pho nya snying brtse med pa sdod cig zer ba'i bzod rlag sgras gang ba'o/ / sems can dmyal ba rnams su'ang srog chags don phyir gang dag skad cig 'jug pa dang / gzhan yang sha ba ri mo'o dug mangs glang po che 'khrugs pa'i mdun logs na/ yal ga bregs pa'i sdong bu yod pa// phyogs kyi bar nas rlung chen po langs pas 'od ma'i tshel bskyod nas 'khri shing gi dra ba dang 'drud pa las me byung ba'i me lces shing mchog sna tshogs tshig nas/ ri dgas dang phag rgod mchog mgyogs pa brgya dag skrag cing mgo rmongs pa yod pa/ shing lo mang po lhags shing rnyis pa can/ bsol ba'i grib ma sang seng med pa/ nyams dga' ba'i longs spyod yod pa/ nags kyi ma he dang phag rgod kyi me tog ut+pa la dang / pad+ma dang / ka ha ra bskyod pas chu dri zhim por gyur pa'i mtshe'u 'gram na shing la spre'u khyu gnas pa/ nye 'khor gyi ri las chu rlabs mi drag par 'bab pas 'khor nas ne'u gsing mod pa'i sa gzhi yod pa'i 'brog dag na/ zhi ba'i bdag nyid can 'chang pa dang / klog pa dang / kha ton dang / bsam gtan la mngon par brtson pa gang dag bag med pa'i gnas dar la bab pa yal bar mdzad pa rnams dang / ri bo'i rdo leb che zhing yangs la rab tu snum pa 'dra gyur cing / / glog gi 'phreng bar mi rtogs yod la 'ja' yis bkra ba'i bdag nyid can// chu bsil spron chags rnams la chu 'bab zer phran chags pa'i rdzi ldan spyan/ / bser bus na bza' g.yo ba gang dag nyi ma'i gung la bzhugs pa dang // de bzhin du rtag tu goms pa'i lam nas 'dong ba'i glang po'i khyu'i rmig rjes yod pa/ nags kyi ma he/ 'khrugs pa'i rAs grog 'khar chen po bshig pa'i shol gyi khung bu nas sbrul gyis lus phyed phyung ste/ nags kyi rlung 'gam pa yod pa/ spa tshal stug po dang / 'dam bu dang / shing ka sha stug po'i khrod na/ stag zung du gnas pa can/ phag rgod kyi snas glogs pa'i glang sgang gi rtse ba 'dzings pa ral pa ltar 'dug pa yod pa/ shing ni tsu li'i me tog brul bas rdo pa rtsa dmar bar gyur pa yod pa/ gshong gi phyogs su ri dgas kyi khyu 'dam rdzab thogs pa yod pa/ shing lo dri sngon po stug por skyes pa mang po yod pa'i gsher sa'i chu dgur dag tu mngon par dgyes shing dge ba'i phyogs ston pa rnams dang / rin po che'i 'od zer gyi chu rtsa dmar bar gyur la/ thugs bsam gtan la zhen pas dpag bsam gyi shing gi lcug ma'i rtse mes reg pa'i ri spos kyi ngad ldang gi sul na rtsol ba med par gang dag bzhugs pa dang / gang dag seng ge bsgyings pa yod pa/ ri dgas rgyu ba dang ldan pa dang / chu 'dus te 'bab pa yod pa/ g.yos pas steng gi rtse mo ldem pa'i sngangs kyis skar ma'i tshogs pa/ sa'i steng na lci ba lhun po lcug phran la la bya bzhin du bsgrim mi dgos par zhabs kyi sor mo sa'i 'og gi rmang dang bcas par 'phen pa dag dang / ting nge 'dzin thob pa gang dag char pa'i chus rdol ba'i bu ga du ma nas nyi ma'i 'od zer byung ba/ zla ba lta bu yod cing / rmang rdo dang rtsog ngos shag shig tu gyur pa'i mtshams su ba rgya chags la/ sbrul gsob rlung gis gang ste/ lgang nger 'dug pa'o 'phreng ba rtag tu yod cing / nags kyi ri dgas kyi lces tsha sgo rdul can rtsub po bldags pas shing rtsa sang seng du gyur pa yod la/ rmig rmad du srin bu go de'i tshogs ring nas gnas par gyur cing / sre mo mgo bstod de phyogs su lta bas byi ba skrag pa yod la/ nang du rtswa sngon po stug po skyes pa'i 'jig pa'i drung gi gseb na phye ma leb rgyu ba yod cing / 'ug pa mang po sgra 'byin cing glu len pa lta bu yod pa'i grong stong / sus kyang ting nge 'dzin ma byas pa rnams na/ ston pa'i bka' nan gyis bsgrub pa rnams dang / gzhan yang gang dag/ g.yag gi rmig pas rdo bcag yod cing sprin glings ldan gyur la// mtha' mar sa ra la dang thang shing skyes la chu bsil mi khebs 'bab yod cing / / bsam gtan zhen pa'i glos na kha ba bab pas chos gos lci zhing zag gyur kyang // gangs ri dag gi ldong na 'gro ba shing gi drung du bzhugs par dgyes pa dang nang na chu srin 'khrugs te g.yos pas nya rnams kun 'byer zhing / / skom pas nyam chung gyur pa'i sprin btud kha yis chu 'thung la// gshong du 'khyil bar sprul dbugs phyung bas dpa' rlabs rgyun 'chad pa'o/ / rgya mtsho la yang mtshan mo brtan pa gang dag 'chag mdzad pa// snod gyur bdag nyid thugs ldan gtsang ma'i lhung bzed phyag bsnams shing // bsod nams ldan pa sku lus na bza' chos gos rab g.yo ba/ / de dag sang gi gdugs ni gnam gyi gung du phyin pa na// gaN+DI brdungs pa'i sgra snyan skad gsang grags pa'i tshe// bstan bcos sna tshogs kyi de kho na goms pa'i chu blugs pas mi shes pa'i sems kyi dri ma bkrus pa'i khams pa'i tshogs 'dus pa/ nyi ma shin tu mang po dang nas 'dris pa'i srid pa'i spros pa bcad pa/ bde bar gshegs pa'i gsung rab rin po che'i sgrom du gyur pa/ dge ba'i chos bdud rtsi'i btung ba'i gzhi bro ye shes kyi gser ma rtogs pa/ bdar ba'i brdar rdo sngon por gyur pa/ legs par spyad pa stong gi tshogs bsags pas grags pa/ rgya che ba dang ldan pa// sbyin bdag chen po bdag nyid chen po can/ ston gyi nam thang ba lta bu'i yid dang ldan pa/ ming 'di zhes bya ba 'di'i gan du/ ma ha'i rwa ltar sngo zhing dri med mkha' las 'phur/ / gzi brjid kyis ni nyi ma'i 'od stong 'thor zhing mngon du phyogs nas 'ong ba'i sprin ni dral nas su// skye bo phan phyir thub rnams sang 'dir gshegs su gsol/ / rgyun mi 'chad par ting nge 'dzin dang / klog pa dang / 'chang ba dang / skye bo bla ma la sten par mngon du dga' ba'i blo gros dang ldan pa/ mya ngan las 'das pa'i lam gyi rjes su 'thun pa'i kha na ma tho ba med pa'i rig pa gsum rab tu sgrub pa/ nyon mongs pa las grol bar 'dod pa'i dge slong gang dag 'di na gnas pa/ 'dul ba'i cho ga la goms pa/ lus dang / ngag dang / yid kyi 'jug pa zhi ba dang ldan pa de dag kyang ma lus par ci bder do mod kyi mtshan mo zad par mdzod la 'di nyid du gnas par mdzod cig/ thub pa'i sras mo shes rab zhi dang dul bas brgyan pa'i dge slong ma/ / tha dad gling dang klu dang nags dang ring gnas spros pa'i bsam bral zhing // 'dod chags zhe sdang gti mug dri bral mchod 'os 'gro ba'i ma lta bu/ / de dag dgyes par mdzod la sbyin pa dag par bzhed pas sang 'dir spyon// phyag na rdo rje la sogs la gnod sbyin gtso bo dang // grub pa rnams dang gang dag lha ma yin dang klu rnams dang / / sangs rgyas la ni rab tu dad pa'i lha mchog gang yin pa// de dag rnams kyang sbyin bdag 'di la phan phyir sang spyon cig/ lha dang / klu dang / gnod sbyin dang rig sngags 'chang dang / grub pa dang / mi 'am ci dang / nam mkha' lding la sogs pa 'byung po chen po rnams dang / stobs bcu mnga' ba'i bstan pa'i yon tan sgrub pa dang ldan pa rnams kyis kyang dam pa'i chos gnas par bya ba dang / sbyin bdag chen po bdag nyid che ba 'di snod bzang po la sbyar ba dang / sbyin pa chen po 'di la grogs bgyi bas nyid kyi dge ba'i yon tan bskyed pa la nan tan mdzod cig/ rgyun mi 'chad par bsrung ba dang / bskyab pa la brtson par mdzod cig/ yang dul ba dang / tshul khrims dang / thos pas shin tu che ba'i 'phags pa'i dge slong gi dge 'dun 'dus pa la gsol pa 'tshal lo/ / lhun po las byung sbrul mgo lnga 'dra rdo rje ka na ka/ nya dang gdugs dang 'khor lo dag dang lcags kyu'i mtshan mnga' ba// pad+ma/ gser gyi dpal ldan phyag sor dra ba srab mos 'brel// sen mo 'od kyis khyab pa rgyal ba'i phyag gis bskyab par shog/ srid pa'i 'dod chags nyon mongs zhags pa bsal cing sred med la/ nga chu yi chu gtor lta bur yon tan rnams kyi gnas gcig po// thub pa'i sras mchog dge 'dun bdag gis gus pa spyan drangs pas// de ring dge ba gang bsags des ni byang chub thob gyur cig/ ji srid mkha' la 'od dro 'od kyis gsal ba rnam par snang byed cing // ri dgas rtags can 'od kyi rigs pa'i dkyil 'khor ldan la 'char ba dang // rgya mtsho rgyas par gnas pa de srid lha dang lha min phyag byas pa'o/ / bde bar gshegs kyi bstan pa thog pa med pa sa la gnas par shog/ gnas brtan spyan drangs pa rdzogs so//

CLOSE WINDOW