/ / sngon rgya las 'gyur ba'i brda rnying par 'dug/ @bod skad du/ 'phags pa rgyal bu kun tu dge zhes bya ba theg pa chen po'i mdo/ / sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig na/ bcom ldan 'das shAkya thub pa ni/ sngon yul dbus 'gyur tshal gyi rgyal po shing rta bcu pa'i sras rgyal bu kun tu dge zhes bya ba zhig tu skyes pa'i tshe skye bo yongs kyis kyang bkur bar gyur to/ / 'phong rtsal dang / yig rtsis dang / bzo dang sman dpyad dang / rig pa'i gnas lnga la mkhas shing gsal ba cog skyes pa'i tshe/ rgyal pos sras la bstod pa ni/ rigs dang gzugs byed mdzangs dang ldan// shes gsal mkhas shing spyod lam mdzes/ / shel ltar gsal ba'i sa gzhi la// zla ba'i 'od zer shar ba 'dra// nyid skyon mun pas mi gnas shing // yon tan rin chen mdzod du 'gyur// mthong na skye bo nyams dga' ste// thams cad yid dang ldan gyur to// gzhon nu rnams kyi slob dpon du gyur pa skyes pa'i tshe/ yab rgyal po ni sku na so'ang bgres pa'i steng du bsnyun drag po cag kyang btab ste/ 'jig rten mi yul 'di ru yun ring po gnas gnas mi 'dra nas/ sras kyis yab la phan dam pa cig gdags na cis gdags snyam pa'i rjes la// ring por ma lon par yab 'das par gyur nas/ 'bangs rnams kyis rgyas bu la rgyal srid ma phul gyi skabs su/ rgyal bu rab tu byung ste/ nags tshal dben par drang srong gi spyod pa la zhugs te/ tshangs par tshul bzhin du spyod do// re zhig na 'bangs rnams kyis rgyal bu la rgyal srid dbul bar bshams pa las/ rgyal bu rab tu byung ba mthong nas/ rgyal khams kyi mi yul yongs su ma he be'u stor ba 'am/ nya thang la lhung ba bzhin 'gre ldog cing smre sngags kyi tshig las kye ma'o/ / lus srog skyong ba'i rgyal po yab 'das nas// 'bangs rnams kyang mya ngan gdungs pas non// da ni sras kyang rab tu byung nas ni// 'jig rten 'di ru nyi nub mun gyis bsgribs/ / kyi hud kyi hud ces smre sngags 'den pa'i cho ga las/ ring po ma lon par 'bangs rnams kyis rgyal bu la yang zhus pa/ kye rgyal po lags/ lus srog skyong ba'i rgyal po yab 'das nas/ 'bangs kyis rgyal srid lugs bzhin ma phul ba// khri len chos bzhin chad pa nod// mes dang yab kyi mdzad lugs bzhin// rgyal srid bzhes la 'bangs rnams skyongs// rgyal po yab kyi bka' yang de lags te/ / 'bangs rnams kun kyang de bzhin spyan sngar mchi'o// de skad ces zhus pa las/ rgyal bus 'di skad ces gsol to// bdag ni 'di ltar yab rgyal po ma 'das pa nas rab tu 'byung bar dam bcas pa lags/ / da ni slar ldog par mi nus so// bdag gis bdud rnams bcom nas ni// gzhan gyi sdug bsngal bsal ba'i phyir// yi dam chen por bcas pa yin/ / slar yang ldog par mi nus kyis// blon po khyed rnams kyi nang nas gang mdzangs shing drang ba gcig gis rgyal srid zung zhig ces gsol pa dang / blon po rnams kyis slar gsol pa/ 'bangs kyis rgyal srid 'dzin pa ni// sngon chad med srid da byung bas// lugs med mkhos su mi rung bas// gzhan du smras na ngo tshar rung // zhes zhus pas/ yang rgyal bus gsol pa/ khong nas thang la bor zin pa'i// mchil ma'i thal bar gyur pa de// sngar la blangs nas 'thung byed pa// dpe zla gzhan la ga na yod// skad cig sgyu ma'i rgyal srid ni// mchil mthang la bor ba 'dra'o/ / phyogs mtshams skyong bar byed pa dang // rgyal khams skyong bar byed pa gnyis// snying rje tsam du 'dra mod kyang // de gnyis khyad par bsam las te// mtsho dang glang rjes snyoms pa 'dra/ / rab tu byung nas log pa dang // log par lta ba'i sdig mthong na// shin tu 'jigs shing smyig yar rung // gnyis ka phung byed ma smra bar// blon po rnams kyang phyir la deng / / de skad ces gsol pa dang / blon po rnams kyis bsam pa la/ lha sras chos la mkhregs pa'i steng du/ 'o skol 'bangs su gyur pas// tshig gsan du mi bzhed na/ da ji ltar bgyi zhes bgyis pa dang / sngon yab kyi thugs grogs po/ yul bar rtan rgyal po dga' ba'i 'od ces bya ba yod de/ des rgyal bu rab tu byung ba la gros btab na/ rgyal srid 'dzin du btub par nges so snyam nas/ rgyal po dga' ba'i 'od kyi spyan sngar mchis te 'phrin btang / phyag bgyis// zhus gsol pa/ kye rgyal po lags/ bdag cag yul dbus 'gyur tshal gyi rgyal po shing rta bcu pa ni 'das/ sras rgyal bu kun tu dge ni rab tu byung nas/ rgyal sa ni stongs/ 'bangs rnams ni sil bur gyur na/ de rgyal bu rab tu byung ba las slar phab ste/ rgyal srid 'dzin du mi gzhug tu mi rung / de skad ces gsol pa dang / rgyal po dga' ba'i 'od kyang thugs la gcags nas/ 'khor blon po dang bcas nas/ rgyal bu rab tu byung ba'i spyan sngar mchis te 'phrin btang / phyag bgyis/ zhus gsol pa/ kye btsun pa lags/ sku na tshod de tsam la/ gzhon pa rnams la'ang mi gzigs sam/ khyim bzangs dpal dang 'dra ba bor nas niri dgas bzhin du nags tshal dben par 'khyams/ / mtho btsun rgyal po'i lus bor nas// dbul po'i lus kyang nye bar blangs// ngan pa'i gos gyon skye bo yongs kyis 'phyas/ long spang bzhin du grong khyer spongs mos 'debs// dus 'dir khyod kyi gnas skabs 'di la ni// bltas nas dgra yi mig kyang mchi mas khengs par 'gyur// yang na spyos sam bgegs kyis bslus par nges/ / de lta mya ngan dbang du ma gyur par// rgyal srid bzhes la 'bangs rnams skyong du gsol// rgyal po yab kyi bka' yang de lags te// 'bangs rnams kun kyang de bzhin spyan sngar mchi'o/ / de skad ces smras pa dang / rgyal bus slar gsol pa/ kye rgyal po lags/ dper na mi lto 'grangs pa la kha zas kyi gtam zer ba yi gar mi 'ong ba dang 'dra bar bdag dad pa skyes nas rab tu byung ba la/ slar zlog pa'i gros ngan pa 'debs pa 'di ni thi bur yang ma legs so snyam nas yang zhus pa/ kye rgyal po lags/ khyod kyis smras pa'i tshig de rnams/ / byams te smras par yin shes kyang // bdag gi don dang shin tu 'gal// nags tshal dben pa gcig pu'i brjid mthong na// rgyal po 'khor// mangs longs spyod sgyu ma grog tshang 'dra// tsaM ber tshems can dag gi brjid mthong na// dar ber klubs pa sgyu ma'i 'ja' tshon 'dra// brtan po dag thub tshe mthar gtugs mthong na// srog lus yal bar 'dor ba smyon pa 'dra/ / skyon sel mgo mang 'dul ba'i rlabs mthong na// gzhan tshon 'dra byed byis pa'i rtsed mo 'dra// kye rgyal po chen po da yang snyan gson cig/ khyim gyi so nam bya ba la/ / bya thag chad pa gnyis yod de// snga ma bsams pa sdug bsngal yin// phyi ma bsams pa sha thang ngo // 'jig rten 'di ni che btsan phyugs dregs kyang // 'chi bdag dbang du ma gyur gang yang med/ / tshe 'di srid la zhe don rgya che yang // yun gyi chos 'dod rgyal srid ma shes na// skra dkar skyes shing gnyer ma'i tshogs 'dus kyang // byis pa shed ma bye dang ci ma 'dra// don la mkhas pas brtags pas sems can snying re rje// kye rgyal po lags/ da yang snyan gson cig/ skyon rnams sgyu mar rtogs pas dgral zhe mi sdang // yon tan sgyu mar bshad pas gnyen la dang mi chags/ / gnas su nges pa med pas spyugs pas nyam mi nga // sems la skye shi med pas bsad pas 'jigs pa med// nor du nges pa med pas dbrog pas nyam ming // dpal gyi ri la srid kyi chu brag kyang // 'grogs pa'i grogs po bla med byang chub bzang // gser gyi ri la g.yu yi khron babs kyang // nor gyi dbyig tu sems kyis chog shes bzang // stong zhing dben pa'i gnas ni yun du bde/ / chog shes khrel 'dzem gos ni kun la snyoms par dro// mi rtog rnam grol zas ni sman dang bcud// yang dag bde bar 'tsho yis rgyal po khyod kyang deng // de skad ces gsungs pas/ rgyal po dga' ba'i 'od kyis bsams pa/ btsun pa dad pa skyes nas rab tu byung ba la/ slar zlog pa'i gros ngan pa 'debs pa 'di ni thi bur yang ma legs so snyam nas yang zhus pa/ kye btsun pa yon tan chen po'i gnas khyod la// blo gros ngan pas 'khrul te ma rig nas// nongs pa chen po smras pa'i tshig de rnams// thugs rje chen po'i sku la bzed par gsol/ / bdag kyang rab tu 'byung bar cig nang lags// zhes zhus pas/ rab tu 'byung bar gnang nas/ sgra dang kha spu bregs te/ gos ngur smrig gyon nas/ rgyal bu'i g.yas gral du gnab par gyur to/ / de'i tshe 'bangs rnams kyis bsam pa las/ rgyal khams gnyis kyi rgyal po rab tu byung ba las bsams na/ dam pa'i chos bya ba 'di bzang bar yid ches nas bdag cag kyang rab tu 'byung bar ci gnang zhes zhus pas/ rab tu 'byung bar gnang ste/ skra dang kha spu bregs nas/ gos ngur smrig gyon nas/ rgyal bu'i g.yon gral du gnang bar gyur to// de'i tshe de'i dus na/ bsod nams dang ye shes kyi tshogs kyis/ sa bon ma btab par rtse shing dang nags tshal thams cad kyang zas dang skom du gyur to// de'i tshe de'i dus na/ rgyal bu kun tu dge rab tu byung ba ni gzhan du ma sems shig/ bcom ldan 'das shAkya thub pa nyid do// rgyal po dga' ba'i 'od rab tu byung ba ni gzhan du ma sems shig/ 'phags pa byams pa nyid do// 'khor blon po dang 'bangs rnams rab tu byung ba ni gzhan du ma sems shig/ tshe dang ldan pa shA ri'i bu la sogs pa tshe dang ldan pa rnams so// rgyal bu kun tu dge rab tu byung ba'i sku'i yon tan gyis rgyal khams gnyis kyi blon po dang 'bangs rnams mngon par rdzogs par sangs rgyas so/ / @rgya gar skad du/ spri bi ro pa ni man tra na/

CLOSE WINDOW