kha che'i paN+Di ta shAkya shrI las brgyud de byung zhes grag go// / rgya gar skad du/ Ar+ya pa ri sha ra Ni b+hany+dza nA ma sU tra/ bod skad du/ 'phags pa yongs su skyob pa'i snod ces bya ba'i mdo// sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig/ na/ bcom ldan 'das yul mnyan yod na rgyal byed kyi tshal mgon med zla sbyin gyi kun dga' ra ba na bzhugs te/ de'i tshe tshe dang ldan pa mo'u 'gal gyi bu chen po mngon par shes pa drug theb nas pha ma gnyis gdul zhing / drin bsab par 'dod pa'i phyir/ lam gyi mig gis 'jig rten rnams la rnam par bltas na/ bdag gis ma dus las 'das te/ yi dgras ltogs po'i nang du skyes te/ zas dang skem bza' zhing btung ba med pas/ pags pa dang rus pa 'ba' zhig phan tshun 'brel bar mthong nas/ mo'u 'gal gyi bu yongs su gdung bas ngus te/ lhung bzed zas kyis bkang ste ma'i drung du song ngo / / de'i ma lhung bzed kyi zas thob pa/ lag pa g.yen pas ni zas g.yogs/ lag pa g.yas na zas blangs te/ bza' bar bya ba las/ zas khar ma phyin papar me lce 'bar bar gyur pas zas thob par ma gyur to/ / mo'u 'gal gyi bu yongs su gdung bas dus te/ myur du slar log nas don 'di zhib tu bcom ldan 'das la gsol pa dang / bcom ldan 'das kyis bka' stsal pa/ khyod kyi ma'i sdig pa'i rtsa ba shin tu zab cing / mdud par gyur/ khyod gcig pu'i mthu'i stobs kyis ci byar yang med la/ khyod sri zhu sme bas/ gnams 'gul kyang / gnam gyi lha dang / sa'i lha dang / bdud dang mu stegs can lam la gnas pa'i skyes bu dang / rgyal chen bzhi'i lha dag gis kyang ci byar med pas/ phyogs bcu'i dge 'dun gyi mthu stobs kyis gdod de grol bar 'gyur te/ ngas de 'dir yongs su skyob pa'i chos bstan pa nyid kyis bgegs thams cad spong zhing sdug bsngal gyi phung po bzlog par bya'o/ / bcom ldan 'das kyis/ mo'u 'gal gyi bu la bka' stsal pa/ phyogs bcu'i dge 'dun ston zla ra ba'i nyal dgag dbye byed pa'i tshe/ rabs bdun tshun chad kyi pha ma dang da ltar gyi pha ma bgegs kyi gnas dang / gnas pa dag gi phyir/ ro brgya dang ldan pa'i zas dang / 'bras bu lnga dang / steng yongs su bkang ba dang / spos mar gyi sgron ma dang / mal cha dang / 'jig rten pa'i zas mngar zhing zhim pa ji snyed pa dag snod bkang ste/ phyogs bcu'i dge 'dun yon tan chen po dang ldan pa rnams mchod cig dang de'i nyin par 'phags pa'i dge 'dun brag phug na bsam gtan la mnyam par gzhag na/ 'bras bu bzhi thob pa dang / nags tshal dag na 'chag pa dang / mngon par shes pa drug la dbang thob pas don byed pa dang / nyan thos dang / rang sangs rgyas thams cad dang / sa bcu'i byang chub sems dpa'i skyes bu chen po thabs kyis dge slong lta bur ston pa dag 'khor mang po der 'dus te/ sems rtse gcig tu dgag dbye'i zas blangs te/ tshul khrims yongs su dag pa phun sum tshogs par byed par 'gyur te/ 'phags pa'i dge 'dun gyi lam gyis ni de lta bu yin pas/ gang gis dgag dbye byed pa'i dge 'dun 'di lta bu zhig de dag la mchod pa byed na da ltar gyi pha ma dang / nyes par ngan song gsum gyi sdug bsngal las nges par 'byung zhing rnam par grol nas/ gos zas dang ldan par 'gyur ro// da ltar gyi pha ma gang yin pa de dag ni bsod nams kyis lo brgya'i bar du bde bar gnas par 'gyur ro// rabs bdun gyi pha ma gang yin pa de dag ni/ ji ltar 'dod bzhin du lha'i gan su skye bar 'gyur bas/ lha'i me tog 'od can du rdzus te skye bar 'gyur ro// de nas bcom ldan 'das kyis phyogs bcu'i dge 'dun rnams la/ dge 'dun thams cad kyi ma yon bdag gi khyim du rabs bdun gyi pha ma'i ched du smon lam btab ste/ bsam gtan sgom pa'i bsam pa yid la byas nas de'i 'og tu zas blang bar bya'o/ / zas dang po len pa'i tshe/ sngar de bzhin gshegs pa'i mchod rten gyi mdun du bzhag ste/ dge 'dun gyis smon lam btab zin nas bdag nyid zas blang bar bya'o zhes bka' stsal pa dang / de'i tshe dge slong mo'u 'gal gyi bu dang / dge 'dun mang po dang / byang chub sems dpa'i dge 'dun chen po rnams rab tu dga' zhing dge slong mo'u 'gal gyi bu yongs su gdung bas ngu ba'i sgra yang zhi bar gyur to/ / de'i tshe mo'u 'gal gyi bu'i ma yang bskal pa gcig gi bar du yi dgas ltogs pa'i sdug bsngal myong ba las thar par gyur to/ / bcom ldan 'das la/ mo'u 'gal gyi bus yang 'di skad ces gsol to// bdag bskyed pa'i ma yin na/ dkon mchog gsum gyi yon tan gyi mthu dang / dge 'dun gyi mthu byin gyi rlabs kyi stobs kyis der thar te/ slad ma'i tshe dus kyi sangs rgyas kyi slob ma sri zhu spyod pas thams cad dang / sri zhu dang bcas pa su'ang rung ba de dag kyang / da ltar gyi pha ma dang / rabs bdun gyi pha ma yongs su skyob pa'i slad du yongs su skyob pa'i snod kyis mchod par bgyid rung lags sam/ bcom ldan 'das kyis bka' stsal pa/ ngas yang dag par bshad par bya ba las deng khyod kyis legs par nu bzlas pa shin tu legs so// rigs kyi bu dge slong ngam/ dge slong ma 'am/ rgyal po'i bu 'am/ rgyal phran nam/ blon po rnams sam/ dmangs kyang rung ste/ gang sri zhu spyod cing snying brtse ba dang bcas pa de dag gis kyang / da ltar gyi pha ma dang / rabs bdun tshun chad kyi pha ma'i ched du ston zla ra ba nya la/ de bzhin gshegs pa rnams dgyes shing / dge 'dun dgag dbye byed pa'i tshe ro brgya dang ldan pa'i zas rnams snod du bkang ste phyogs bcu'i dge 'dun dgag dbye byed pa'i mchod nas/ da ltar gyi pha ma lo brgya'i bar du na ba med cing sdug bsngal gyi mi bde ba rnams med pa dang / rabs bdun tshun chad kyi pha ma yang yi dgas ltogs pa'i sdug bsngal dang bral te/ lha dang mi'i nang du skyes nas/ bsod nams kyi bde ba thug pa med pa myong bar smon lam gdab par bya'o// sangs rgyas kyi nyan thos gang sri zhu bsgrub pa/ da ltar gyi pha ma dang / rabs bdun tshun chad kyi pha ma rtag tu rjes su dran pa de dag gis kyang / lo re bzhin du ston zla ra ba nya la rtag par sri zhu dang / snying brtse bas da ltar gyi pha ma dang / rabs bdun tshun chad kyi pha ma'i ched du yongs su skyob pa'i snod bshams te/ de bzhin gshegs pa dang dge 'dun mchod nas/ pha ma'i snying brtse ba'i byams pas rnyed pa'i drin bsab par bya'o/ / de bzhin gshegs pa'i nyan thos thams cad kyis kyang / gus pas chos 'di yongs su gzung bar bya'o zhes gsungs pa dang / de'i tshe tshad ldan pa mo'u 'gal gyi bu dang / 'khor bzhi po rnams shin tu dga' bas/ bcom ldan 'das kyis gsungs pa la mngon par bstod do// 'phags pa yongs su skyob pa'i snod ces bya ba'i mdo rdzogs so/ / zhu chen gyi lo tsa ba dge slong 'gos chos grub kyis rgya'i dpe las bsgyur cing zhus te gtan la phab pa'o// /

CLOSE WINDOW