bod skad du/ khang bu brtsegs pa'i mdo/ thams cad mkhyen pa la phyag 'tshal lo// 'di skad bdag gis thos pa dus gcig na/ bcom ldan 'das mnyan yod na/ rgyal bu rgyal byed kyi tshal mgon med zas sbyin gyi kun dga' ra ba na bzhugs so// de nas tshe dang ldan pa kun dga' bo bcom ldan 'das ga la ba der song ste phyin nas/ bcom ldan 'das kyi zhabs gnyis la phyag 'tshal te 'dug go/ / phyogs gcig tu 'dug nas/ bcom ldan 'das la/ tshe dang ldan pa kun dga' bos 'di skad ces gsol to// bcom ldan 'das phyag bdar bgyis pas dge ba'i rtsa ba cir 'gyur lags/ dkyil 'khor bgyis pas ni cir 'gyur lags/ skyabs su mchi ba dang bslab pa'i gzhi rnams kyi dge ba'i rtsa ba ni cir 'gyur lags/ de bzhin gshegs pa la phyag 'tshal ba'i thal mo sbyar ba'i sug las kyis ni cir 'gyur lags/ bcom ldan 'das dge ba'i rtsa ba 'khor bar bas par mi 'gyur zhing / yongs su gtugs par mi 'gyur la/ bas mi 'tshal ba'i mya ngan las 'das pa thob par 'gyur ba ni gang lags/ de bzhin gshegs pa'i sku gzugs bgyis pas ni cor 'gyur lags/ bcom ldan 'das kyis bka' stsal pa/ san dga' bo phyag bdar byas pa'i phan yan ni lngar 'gyur te/ lnga gang zhe na/ kun dka' bo 'di ltaste/ bdag gi sems dang bar 'gyur ba dang / gzhan gyi sems dang bar 'gyur ba dang / lha rnams yid dga' bar 'gyur ba dang / mdzes pa'i las byas shing bsags pa dang / lus zhig nas bde 'gro mtho ris kyi 'jig rten lha rnams su skye bar 'gyur ro/ / kun dga' bo gang la la zhig gis de bzhin gshegs pa'i ched du dkyil 'khor gru bzhi pa byed na/ de byang gi sgra mi snyan gyi gling gi dbang phyug gi bdag por 'gyur zhing / lus zhig nas sum cu rtsa gsum gyi lha rnams su skye bar smra'o// kun dga' bo gang gis de bzhin gshegs pa la sems dang bas dkyil 'khor zlum po byed na/ de nub kyi ba glang spyod kyi gling gi dbang phyug gi bdag por 'gyur zhing / lus zhig nas 'thab bral gyi lha rnams su skye bar smra'o// kun dga' bo gang la la zhig gis sangs rgyas bcom ldan 'das la sems dang bas dkyil 'khor zla gam lta bur byed na/ de shar gyi lus 'phags po'i gling gi dbang phyug gi bdag por 'gyur zhing / lus zhi gnas dga' ldan gyi lha rnams su skye b.rang smra'o// kun dga' bo gang la la zhig gis sangs rgyas bcom ldan 'das la sems dang bas dkyil 'khor shing rta'i dbyibs 'dra ba lnga bu byed na/ de 'dzam bu gling gi dbang phyug gi bdag por 'gyur zhing / lus zhig nas 'phrul dga'i lha rnams su skye bar 'gyur bar nga smra'o/ / kun dga' bo gang la la zhig gis sangs rgyas la skyabs su 'gro ba dang / gang chos dang dge 'dun la skyabs su 'gro zhing / bslab pa'i gzhi rnams kyang mnos nas yongs su srung bar byed na/ kun dga' bo dge ba'i rtsa ba de'i bsod nams ni dpag tu med cing grangs med par smra'o// nyan thos dang rang sangs rgyas thams cad kyi mya lus 'das par mthar thug pa'i bar du mtha' bzung bar mo nus par nga smra'o/ / de nas bcom ldan 'das kyis tshe dang ldan pa kun dga' bo'i sems thugs su chud nas/ ljags pad+ma dmar po'i 'dab ma dri ma med cing lo ma 'jam pa dang / mtshal dmar po dang / shing mya ngan 'chang gi lo ma dang / zangs kyi glegs ma srab mo 'dra ba chu zheng gab pas/ zhal gyi dkyil 'khor dbu'i sgra mtshams la thug pa'i bar thams cad brkyang ste/ kun dga' bo la bka' stsal pa dang / kun dga' bo khyod kyis brdzun du smra ba dang / phra ma smra ba dang / tshig rtsub mo smra ba dang / tshig 'khyal ba smra ba la lce 'di lta bu mthong ngam/ btsun pa ma lags so// kun dga' bo de bzhin gshegs pa dgra bcom pa yang dag par rdzogs pa'i sangs rgyas rnams ni bden pa gsung ba yin no// kun dga' bo gang la la thal mo sbyar te/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de la phyag 'tshal lo// phyag 'tshal lo zhes phyag 'tshal bar byed na/ sems can de dag ngas yongs su bzung na/ yongs su mya ngan las bzlas pa yin no// sems can de rnams ning thugs khral chung ba yin no// ci'i phyir zhe na/ kun dga' bo 'di ltar de bzhin gshegs pa'i chos dbyings ni shin tu rab tu gnas pa yin no// de shin tu rab tu gnas pa'i phyir/ thal mo sbyar ba'ang chud za bar mi 'gyuran/ sbyin pa la sogs pa byed pa lta smos kyang ci dgos/ kun dga' bo ltos shig/ skyes bu zhig la rang gi gzar bu bkrus pa tsam mam/ phor bu bkrus pa tsam mam/ phru lkog bkrus pa tsam gang yin pa de'ang yod la/ gal te de sems la 'di snyam du/ 'di na gnas pa'i srog chags thams cad 'dis bde bar gyur cig snyam du sems shing / stor khung du 'bog par byed na/ kun dga' bo 'on kyang bsod nams skye ba'i sgor 'gyur bar nga smra'o// mir gyur pa lta smos kyang ci dgos/ kun dga' bo gsum po 'di dag ni bar gyi bskal pa dag yin no// gsum po gang zhe na/ mtshon gyi bar gyi bskal pa dang / nad kyi bar gyi bskal pa dang / mu ge'i bar gyi bskal pa'o// kun dga' bo de gang gis nyi ma cig gcig srog gcod pa spong zhing yang dag par blangs te gnas par byed na/ de mtshon gyi bar gyi bskal par mi skye bar 'gyur ro// gang zhig gis a rur gcig tsam yang dge 'dun la 'bul bar byed na/ de nad kyi bar gyi bskal par mi skye bar 'gyur ro/ / gang zhig gis zas nal ze gang tsam dge 'dun la phul na/ de mu ge'i bar gyi bskal par mi skye bar 'gyur ro// kun dga' bo dge ba'i rtsa ba gsum po 'di dag bskyed pa ni 'khor bar zad par mi 'gyur zhing / yongs su gtugs par mi 'gyur la/ zad mi shes pa'i mya ngan las 'das pa thob par 'gyur bar byed pa yin no// gsum po gang dag ce na/ kun dga' bo sangs rgyas la dge ba'i rtsa ba bskyed pa ni/ 'khor bar zad par mi 'gyur zhing / yongs su gtugs par mi 'gyur la/ zad mi shes pa'i mya ngan las 'das pa thob par byed pa yin no/ / dge ba'i rtsa ba chos la bskyed pa dang / dge 'dun la bskyed pa ni/ 'khor bar zad par mi 'gyur zhing / yongs su gtugs par mi 'gyur la/ zad mi shes pa'i mya ngan las 'das pa thob par byed pa yin no/ / de nas bcom ldan 'das kyis/ de bzhin gshegs pa'i yon tan bstan pa'i phyir/ kun dga' bo la bka' stsal pa/ kun dga' bopo khyod kyis 'dzam bu gling mthong ngam/ kye btsun pa mthong lags so// kun dga' bo 'dzam bu gling ni zheng du ni dpag tshad bdun stong / mchur yang dpag tshad bdun stong ste/ byang gi zheng ni che/ lho'i ni shing rta'i dbyibs so// ngo rigs kyi bu 'am/ rigs kyi bu mo dad pa can la la dag gis rin po che sna bdun gyis bkang ste/ rgyun du zhugs pa rnams dang / lan cig phyir 'ong ba rnams dang / phyir mi 'ong ba rnams dang / dgra bcom pa rnams dang / rang sangs rgyas rnams dang / phyogs bzhi'i dge slong gi dge 'dun la 'bul bar byed pa dang / gang zhig de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'jim pa las skyu ru ra tsam byed du 'jug/ srog shing ni khab tsam 'dzugs su bcug/ gdugs ni rgya shug gi lo ma tsam 'gebs su 'jug cing / sku gzugs nas 'bru tsam byed du 'jug la/ sku gdung yungs kar gyi 'bru tsam 'jug par byed na/ kun dga' bo 'di nyid de bas bsod nams shin tu mang bar nga smra'o/ / kun dga' bo 'dzam bu gling gi gling lta zhog gi/ kun dga' bo shar gyi lus 'phags zhes bya ba'i gling zheng du ni dpag tshad brgyad stong chur yang dpag tshad brgyad stong yod pa/ kun nas zla ba kham pa lta bu zhig yod de/ de rigs kyi bu 'am/ rigs kyi bu mo gang la las rin po che sna bdun gyis bkang ste/ rgyun du zhugs pa rnams dang / yan cig phyir 'ong ba rnams dang / phyir mi 'ong ba rnams dang / dgra bcom pa rnams dang / rang sangs rgyas rnams dang / phyogs bzhi'i dge slong gi dge 'dun la 'bul bar byed pa dang / gang zhig de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'jim pa las skyu ru ra tsam byed du 'jug/ srog shing ni khab tsam 'dzugs su 'jug/ gdugs ni rgya shug gi lo ma tsam 'gebs su 'jug cing / sku gzugs nas 'bru tsam byed du 'jug la/ sku gdung yungs kar gyi 'bru tsam 'jug par byed na/ kun dga' bo 'di nyid de bas bsod nams shin tu mang bar nga smra'o// kun dga' bo 'dzam bu gling gi gling lta yang zhog/ shar gyi lus 'phags po'i gling lnga yang zhog gi/ kun dga' bo nub kyi ba glang spyod ces bya ba'i gling zheng du dpag tshad dgu stong / chur dpag tshad dgu stong yod pa/ kun nas zla ba nya ba lta bu zhig yod de/ de rigs kyi bu'am/ rigs kyi bu mo dad pa can la las rin po che sna bdun gyis bkang ste/ rgyun du zhugs pa rnams dang / lan cig phyir 'ong ba rnams dang / phyir mi 'ong ba rnams dang / dgra bcom pa rnams dang rang sangs rgyas rnams dang / phyogs bzhi'i dge slong gi dge 'dun la 'bul bar byed pa dang / gang zhig gis de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'jim pa las skyu rur tsam byed du 'jug/ srog shing ni khab tsam 'dzugs su 'jug/ gdugs ni rgya shug gi lo ma tsam 'gebs su 'ju cing / sku gzugs nas 'bru tsam byed du 'jug la/ sku gdung yungs kar gyi 'bru tsam 'jug par byed na/ kun dga' bo 'di nyid de bas bsod nams shin tu mang bar nga smra'o// kun dga' bo 'dzam bu'i gling gi gling lta yang zhog/ shar gyi lus 'phags po'i gling lta yang zhog/ nub kyi ba glang spyod kyi gling lta yang zhog gi/ kun dga' bo byang gi sgra mi snyan ces bya ba'i gling zheng du dpag tshad khri/ chur yang dpag tshad khri yod pa/ kun nas gru bzhi pa zhig yod de/ rigs kyi bu 'am/ rigs kyi bu mo gang la las rin po che sna bdun gyis bkang ste/ rgyun du zhugs pa rnams dang lan cig phyir 'ong ba rnams dang / phyir mi 'ong ba rnams dang / dgra bcom pa rnams dang / rang sangs rgyas rnams dang / phyogs bzhi'i dge slong gi dge 'dun rnams la 'bul bar byed pa dang / gang zhig gis de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'jim pa las skyu ru ra tsam byed du 'jug/ srog shing ni khab tsam 'dzugs su 'jug/ gdugs ni rgya shug gi lo ma tsam 'gebs su 'jug cing / sku gzugs nas 'bru tsam byed du 'jug la/ sku gdung yungs dkar gyi 'bra tsam 'jug par byed na/ kun dga' bo 'di nyid de bas bsod nams shin tu mang bar nga smra'o// kun dga' bo 'dzam bu'i gling lta yang zhog/ shar gyi lus 'phags po'i gling lta yang zhog/ nub kyi ba glang sprod kyi gling lta yang zhog/ byang gi sgra mi snyan gyi gling lta yang zhog gi/ kun dga' bo lha rnams kyi dbang po brgya byin gyi khang bzangs rnam par rgyal ba zhes bya ba yod de/ de rigs kyi bu'am/ rigs kyi bu mo dad pa can gang la las rin po che sna bdun gyis bkang ste/ rgyun du zhugs pa rnams dang / lan cig phyir 'ong ba rnams dang / phyir mi 'ong ba rnams dang dgra bcom pa rnams dang / rang sangs rgyas rnams sam/ phyogs bzhi'i dge slong gi dge 'dun la 'bul bar byed pa dang / gang de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'jim pa las skyu ru ra'i 'bru tsam byed du 'jug/ srog shing khab tsam 'dzugs su 'jug/ gdug ni rgya shug gi lo ma ce 'gebs su 'jug cing / sku gzugs nas 'bru tsam byed du 'jug la/ sku gdung yungs kar gyi 'bru tsam 'jug par byed na/ kun dga' bo 'di nyid de bas bsod nams shin tu mang bar nga smra'o// kun dga' bo 'dzam bu gling gi gling lta yang zhog/ shar gyi lus 'phags kyi gling lha yang zhog/ nub kyi ba glang spyod kyi gling lta yang zhog/ byang gi sgra mi snyan gyi gling lta yang zhog/ lha rnams kyi dbang po brgya byin gyi bang bzangs rnam par rgyal ba lnga yang zhog gi/ kun dga' bo stong gsum gyi stong chen po'i 'jig rten gyi khams yod de/ de rigs kyi bu 'am/ rigs kyi bu mo dad pa can gang la las rin po che sna bdun gyis bkang ste/ rgyun du zhugs pa rnams dang / lan cig phyir 'ong ba rnams dang / phyir mi 'ong ba rnams dang / dgra bcom pa rnams dang / rang sangs rgyas rnaMs dang / phyogs bzhi'i dge slong gi dge 'dun la 'bul bar byed pa dang / gang zhig de bzhin gshegs pa dgra bcom pa yang dag par rdzogs pa'i sangs rgyas yongs su mya ngan las 'das pa'i mchod rten 'jim pa las skyu ru ra'i 'bru tsam byed du 'jug/ srog shing ni khab tsam 'dzugs su 'jug/ gdugs ni rgya shug gi lo ma tsam 'gebs su 'jug/ sku gzugs nas 'bru tsam byed du 'jug la/ sku gdung yungs dkar gyi 'bru tsam 'jug par byed na/ kun dga' bo 'di nyid de bas bsod nams shin tu mang bar nga smra'o// ci'i phyir zhe na/ kun dga' bo 'di ltar de bzhin gshegs pa dgra bcom pa yang dag par rdzogs pa'i sangs rgyas ni sbyin pa dpag tu med pa// tshul khrims dpag tu med pa/ bzod pa dpag tu med pa/ brtson 'grus dpag tu med pa/ bsam gtan dpag tu med pa/ shes rab dpag tu med pa/ byams pa nas/ btang snyoms kyi bar du dpag tu med de/ kun dga' bo de bzhin gshegs pa dgra bcom pa yang dag par rdzogs pa'i sangs rgyas ni yon tan dpag tu med pa dang ldan pa'i phyir ro/ / bcom ldan 'das kyis de skad ces bka' stsal pa dang / tshe dang ldan pa kun dga' bo dang / dge slong de dag bcom ldan 'das kyis gsungs pa la rjes su yi rang nas mngon par bstod do// khang bu brtsegs pa'i mdo rdzogs so//

CLOSE WINDOW