rgya gar skad du/ su ma ga d+ha a ba dA na ma/ bod skad du/ ma ga d+ha bzang mo'i rtogs pa brjod pa/ sangs rgyas dang byang chub sems dpa' thams cad la phyag 'tshal lo/ / sangs rgyas bcom ldan 'das mnyan yod na/ rgyal bu rgyal byed kyi tshal mgon med zas sbyin gyi kun dga' ra ba na bzhugs te/ de nas de'i tshe mnyan yod na/ mgon med zas sbyin gyi bu mo ma ga d+ha bzang mo zhes bya ba dang pa dang ldan pa/ rang bzhin bzang ba/ bsam pa dag pa/ bdag dang gzhan la phan pa'i phyir zhugs pa zhig gnas so// ji tsam na bu ram shing 'phel zhes bya ba'i grong khyer na tshong dpon gzhan zhig gnas la/ de'i bu khyu mchog byin zhes bya'o// de yang gzhan mu stegs pa bsten pas/ gcer bu pa rnams la mngon par dad pa zhig gnas pa dang / gang gi tshe bcom ldan 'das kyis cho 'phrul chen po rnam par bstan pa de'i tshe/ mu stegs pa rnams mtha' 'khob tu kun tu gnas te/ la la ni grong khyer bzang byed ces bya bar na'o/ / la la ni mud kyi ri ka zhes bya ba'i yul na'o// la la ni bu ram shing 'phel zhes bya ba'i grong khyer na gnas so// de'i tshe de'i dus na/ khyu mchog byin de'i bar du khyim bdag ma byas pa dang / de la gcer bu pa rnams kyis smras pa/ mgon med zas sbyin gyi bu mo ma ga d+ha bzang mo zhes bya ba gzugs bzang ba/ blta na sdug pa mdzes pa/ skye bo dam pa rnams dang 'dra ba zhig yod do// ji srid des thos pa dang / bdag nyid gcer bu pa'i cha byad du byas te/ mnyan yod du song ngo // ji tsam na khyim bdag mgon med zas sbyin gyi khyim du slong ba'i phyir zhugs pa dang / des bu mo de mthong ngo // mthong ba'i mod kho na la bu mo de la kun tu chags par gyur la/ de der bslangs pa'i phye zhwa'i nang du blangs so/ / de nas bu mo des log par spyod pa de mthong ba dang / 'di ni shes med par slongs mo len to zhes brgal to// de nas khyu mchog byin de ngo tsha bar gyur pa dang / bu ram shing 'phel gyi grong khyer du song ste/ pha la smras nas/ des bu mo de bslangs so// mgon med zas sbyin gyis bcom ldan 'das la zhus pa dang / bcom ldan 'das kyis bka' stsal pa/ gzhan du gang gi tshe ma ga d+ha bzang mo 'di bu ram shing 'phel du song na rab tu byung ba rnams kyi bya ba dang / sangs rgyas kyi bya ba byed par 'gyur ro// yang ji srid cig na khyim bdag mgon med zas sbyin gyi nye du rnams la yang go bar byas nas byin pa dang / bu ram shing 'phel du khyer ro// ji tsam na dus gzhan zhig gi tshe khyim de na gcer bu pa rnams zan za ba dang / de la sgyug mos smras pa/ de ring bdag cag gi khyim na mchod gnas rnams bshos gsol gyis tshur shog/ mchod gnas rnams la ltos shig/ ma ga u0f7f bzang mos de thos pa dang / dga' ba dang / mgu ba dang / rangs pa dang / yid bde ba skyes te bsams pa/ nges par btsun pa shA ri'i bu 'am/ mo'u 'gal gyi bu chen po la sogs pa nyan thos chen po rnams byon par gyur to snyam nas/ de yid rab tu dga' ba dang / 'jigs pa med par song ba dang / gcer bu nags kyi ma he 'dra ba/ sgra rnams btogs pa/ phug ron gyi phrug gu 'dra ba'i gtse zhupa rnams mthong ngo / / mthong ba dang de'i mod la ma ga rna bzang mo nga tshaste/ de gdong gzhan du bltas pa dang / de la stug mo des smras pa/ bu mo khyod ci'i phyir yi mug par gyur/ des smras pa/ gang 'di lta bu mchod gnas yin na mchod gnas ma yin pa go ji lta bu zhig yod par 'gyur/ de la des smras pa/ bu mo khyod la 'di bas ches khyad par du 'phags pa'i ston pa 'ga' zhig yod dam/ bu mos smras pa/ bdag gi pha'i gtsug lag khang rgyal byed kyi tshal na sangs rgyas zhes bya ba'i ston pa bzhugs te/ de na rgyu ba dang mi rgyu ba'i 'jig rten gyi mchod gnas yin no// khyod kyi ston pa de ci 'dra ba zhig/ smras pa/ bdag gi ston pa tsam pa'i tshogs ltar ser// bcom gser ltar shin tu dri ma med/ / tshul khrims rnam dag shes rab shin tu dag/ 'jig rten gsum na mnyam med 'gro las 'phags// de thos ma thag tu sems rab tu dga' bar gyur nas smras pa/ bu mo nged cag rnams la/ bcom ldan 'das de sang bstan par nus sam/ ma ga d+ha bzang mos smras pa/ bshos gtsang rnams sbyor cig dang / sang bcom ldan 'das spyan drang bar bya'o/ / ji tsam na de rnams kyis smras pa/ bashro gtsang rnams sbyar gyis/ khyod kyis bcom ldan 'das spyan drongs shig/ de nas ma ga d+hA bzang mos khang pa'i yang thog gi steng du mngon par 'dzegs nas/ phyogs gang na bcom ldan 'das bzhugs pa'i phyogs der thal mo sbyar te phyag byas nas/ bcom ldan 'das kyi yon tan rjes su dran te/ me tog rnams 'thor zhing spos kyang gtul nas/ gser gyi bum pa'i chus bcom ldan 'das spyan drang ba'i phyir/ gser gyi bum pa'i chu yang sbrengs so// snying rje ba'i tshig 'di skad ces smras te/ bcom ldan 'das thugs rje chen po dang ldan pa/ bdag ni ri dgas dang 'dra bar gyur cing mtha' 'khob na mchis te/ dkon mchog gsum dang bral bar gyur pa la rjes su bzung bar mdzad cing / dge slong gi dge 'dun dang bcas par 'dir gshegs par mdzad du gsol/ yang 'di skad ces kyang smras te/ tshul khrims rnam dag shes rab shin tu dag/ dang ldan snying po nyan thos che rnams kyis// mgon med gyur pa bdag la rjes bzung ba'i// don mdzad thugs rjes gshegs par mdzad du gsol// ji tsam na me tog dang / spos dang // gser gyi bum pa'i chu'ang nam mkha' las 'phags par gyur to// bcom ldan 'das kyang de'i tshe nang du yang dag 'jog las bzhengs nas/ 'khor rnam pa bzhi la chos ston to// gser gyi bum pa'i chu de yang bcom ldan 'das kyi spyan sngar bai DUR+Ya'i sdong bu bzhin du rnam par gnas so/ / me tog de bcom ldan 'das kyi steng gi nam mkha' la khang pa brtsegs pa bzhin du gnas so// dri dang spos kyang sprin brtsegs pa bzhin du gnas par gyur to// de nas de mthong ba dang / tshe dang ldan pa kun dga' bos/ bcom ldan 'das la gsol pa/ bcom ldan 'das sman 'dren pa 'di ga las mchis/ bcom ldan 'das kyis bka' stsal pa/ kun dga' bo dpag tshad brgya drug cu rtsa gsum na bu ram shing 'phel gyi grong khyer yod pa nas 'ongs so// kun dga' bo grong khyer de ni mu stegs pa rnams kyis bzung ba yin pas/ rdzu 'phrul gyi rnam par 'phrul pas 'gro bar bya'o zhes dge slong rnams la tshul shing brims shig/ ji tsam na tshe dang ldan pa kun dga' bos rgan pa'i gnas mtha' nas bzung nas tshul shing brims te/ de skad ces smras te/ sang bu ram shing 'phel gyi grong khyer du 'gro bar bya ste/ grong khyer de ni mu stegs pa rnams kyis yongs su bzung bas/ khyed cag rnams las gang rdzu 'phrul thob pa des tshul shing long zhig/ ji srid cig na rgan pa'i mtha' nas tshul shing len par brtsams so// de yang de na pUr na kun da u pa da na zhes bya ba'i gnas brtan yod de/ der yang rdzu 'phrul ma thob par lag pa brkyang ste/ tshul shing len par brtsams pa dang / de la tshe dang ldan pa kun dga' bos smras pa dang / gnas brtan mgon med zas sbyin gyi khyim du 'jug pa ma yin gyi/ gzhan du na dpag tshad brgya drug cu rtsa gsum na bu ram shing 'phel zhes bya ba'i gnas yod de der 'gro dgos so// de 'di snyam du sems te/ ngas ni thog ma med pa'i dus na goms pa'i nyon mongs ni spangs nas/ mu stegs pa rnams dang thun mong du gyur pa'i rdzu 'phrul lta zhig dka' ba ci zhig yod nas bskyed par mi bya snyam nas/ des kyang dus de nyid du rdzu 'phrul bskyed pa dang / ji srid du tshul shing gnyis pa ma brims pa de srid du/ des glang po che'i sna 'dra ba'i lag pa brkyang ste tshul shing blangs so/ / ji tsam na tshe dang ldan pa kun dga' bos rgan pa'i mtha' logs su 'dug ste smras pa/ gang gis rdzu 'phrul gang thob pa des bu ram shing 'phel zhes bya ba'i grong khyer du 'gro bar bya'o/ / de nas nyi ma gnyis pa la nam nangs te/ dge slong rnams rdzu 'phrul gyi rnam par 'phrul pas yang dag par chas so// de nas rgyal po chen po bzhi yang mnyan yod gang na ba der mngon par lta bar sems so/ / ji tsam na bar skabs der kun shes ko'u di n+ya zhes bya ba rta'i shing rta la zhon te/ glog 'gyur ba'i snang ba ston cing dal bus char rab tu 'bab/ te/ de lta bu'i rang gi rdzu 'phrul rnam par ston cing 'ong ngo // de nas ma ga d+ha bzang mo'i bdag pos de mthong ba dang dris pa/ ma ga d+ha bzang mo 'di khyod kyi ston pa de yin nam/ des smras pa/ 'di ni kun shes ko'u di n+ya zhes bya ba yin te/ 'di ni bcom ldan 'das kyis chos kyi 'khor lo dang po bskor ba na 'dis thog mar bdag med pa mngon sum du byas pa de thog mar 'ongs pa 'di yin no/ / bar skabs der gnas brtan 'od srungs chen pos brag gi rin po chen po shing sna tshogs pa rnam pa brgyas khyab pa/ bya rnam pa sna tshogs kyis khyab pa/ me tog sna tshogs yang dag par khebs pa/ g.ya' chu sna tshogs kyis nye bar mdzes par byas pa mngon par sprul te/ steng gi nam mkha' las 'ong ngo // de nas khyim bdag des de mthong nas smras pa/ ma ga d+ha bzang mo 'di khyod kyi ston pa de yin nam/ des de la smras pa/ 'di ni 'od srungs chen po zhes bya ba yin te/ bcom ldan 'das kyis sbyangs pa'i yon tan la gnas par smra ba rnams kyi mchog tu gsungs pa yin te/ 'dis gcig gis ma tshang ba'i glang dor stong bor zhing / ser skya bzang mo skye bos dge ba rnams dang mtshungs pa dang / dbyig dang gser mang po mchil ma'i thal ba bzhin spangs nas/ mngon par byung ste rab tu byung ba de ni 'ong ba 'di yin no// bar skabs der tshe dang ldan pa shA ri'i bus seng ge'i shing rta mngon par sprul te/ steng gi nam mkha' las rdzu 'phrul gyis 'ong ngo / / de nas khyim bdag des de mthong ba dang dris pa/ ma ga d+ha bzang mo gang seng ge'i shing rtas 'ong ba 'di khyod kyi ston pa de yin nam/ des de la smras pa/ 'di ni dge slong shA ri'i bu zhes bya ba yin te/ bcom ldan 'das kyis shes rab dang ldan pa rnams kyi mchog tu bstan pa yin te/ 'di ma'i mngal du zhugs tsam gyis/ 'dzam bu gling thams cad kyi rtsod par smra ba rnams las rgyal bar gyur to/ / 'di ni ston pa gnyis pa/ mchog gnyis pa/ chos kyi ded dpon/ chos kyi 'khor lo rjes su bskor ba de ni seng ge'i shing rtas 'ongs pa 'di yin no/ / de'i rjes thog nyid la tshe dang ldan pa mo'u 'gal gyi bu chen pos/ glang po ches srungs 'dra ba'i glang po che'i rgyal por mngon par sprul te/ steng gi nam mkha' la rdzu 'phral gyis 'ongs so// de nas khyim bdag des de mthong nas/ ma ga d+ha bzang mo la dris pa// gang glang po ches srungs 'dra ba'i glang pos 'ong ba 'di khyed kyi smon pa de yin nam/ des de la smras pa/ 'di ni dge slong mo'u 'gal gyi bu chen po zhes bya ba yin te/ bcom ldan 'das kyis rdzu 'phrul can rnams kyi mchog tu bstan pa ste/ 'di'i rdzu 'phrul gyis lha'i dbang po brgya byin gyi rnam par rgyal ba'i khang bzang rkang pa'i mthe bos kun tu bskul ba dang / 'dis klu'i rgyal po dga' bo dang / nye dga' bo gnyis btul ba de/ glang po'i shing rtas 'ong ba 'di yin no/ / bar skabs der tshe dang ldan pa ma 'gags pas shing rta'i 'phang lo tsam gyi pad+ma thams cad gser las byas pa/ bai DUR+Ya'i sdong bu can/ dngul gyi ge sa ra dang ldan par mngon par sprul te/ rdzu 'phrul gyis nam mkha' las 'ong ngo // de nas khyim bdag des de mthong ba dang dris pa/ ma ga d+ha bzang mo 'di khyod kyi ston pa de yin nam/ des de la smras pa/ 'di ni dge slong ma 'gags pa zhes bya ba bcom ldan 'das kyis lha'i mig dang ldan pa rnams kyi mchog tu bstan pa de/ 'di ni bsod nams kyi stobs kyis yongs su bzung bas snod tshol bas gang ba lnga brgya sgo na gnas pa dang / cung zad bsams pa tsam gyis chos gos dang / bsod snyoms dang / mal stan dang / nad kyi rkyen sman dang / yo byad rnams 'byung ba la spyod pa de pad+ma'i shing rtas 'ongs pa 'di yin no/ / bar skabs der tshe dang ldan pa gang pos nam mkha' lding gi shing rta mngon par sprul te/ rdzu 'phrul gyis steng gi nam mkha' las 'ong ngo // de nas khyim bdag des dris pa/ ma ga d+ha bzang mo nam mkha' lding gi shing rtas 'ong ba 'di khyod kyi ston pa yin nam/ des de la smras pa/ 'di ni dge slong gang po zhes bya ba bcom ldan 'das kyis chos ston pa rnams kyi mchog tu bstan pa de nam mkha' lding gi shing rtas 'ong ba 'di yin no/ / bar skabs der tshe dang ldan pa rta thul spyod lam rab tu zhi bas 'ong ngo // de nas khyim bdag des/ de la dris pa/ ma ga d+ha bzang mo gang lhung bzed lag na thogs te spyod lam rab tu zhi bas 'ong ba de khyod kyi ston pa de yin nam/ des de la smras pa/ 'di ni dge slong rta thul zhes bya ba yin te/ 'di'i spyod lam rab tu zhi bas/ glang po che smyon pa btul ba dang / 'di'i spyod lam rab tu zhi ba mthong bas/ 'phags pa shA ri'i bus bden pa mthong bar gyur te/ de mngon par byung nas bcom ldan 'das kyi bstan pa la rab tu byung ngo / / rab tu byung nas kyang dgra bcom pa nyid thob de spyod lam rab tu zhi bas 'ong ba 'di yin no// bar skabs der che dang ldan pa nye bar 'khor gyis gser gyi ta la'i nags mngon par sprul te/ rdzu 'phrul gyis steng gi nam mkha' las 'ong ngo // de nas khyim bdag des/ de la dris pa/ ma ga d+ha bzang mo gang gser gyi ta la'i nags la rten cing 'ong ba 'di khyod kyi ston pa de yin nam/ des de la smras pa/ 'di ni dge slong nye bar 'khor zhes bya ba bcom ldan 'das kyis 'dul ba 'dzin pa rnams kyi mchog tu bstan pa yin te/ 'di la shAkya lnga brgya tsam rab tu byung ba rnams kyi de shal dang / gdu bu dang / dpung rgyan dang / gser gyi gdugs la sogs pa'i rgyan rnams dang / gos rnams kyi phung po chen po mdun du bzhag pa dang / 'dis de mthong ba dang / skyo ba chen po skyes te/ de dag thams cad mi rtag par shes nas/ bcom ldan 'das kyi bstan pa la rab tu byung ngo // rab tu byung nas kyang dgra bcom pa nyid mngon sum du byas pa de gser gyi ta la'i nags la brten nas 'ong ba 'di yin no/ / de nas bar skabs der tshe dang ldan pa ka t+yA ya na'i bu chen pos bai DUR+Ya'i khyang pa brtsegs pa mngon par sprul te/ rdzu 'phrul gyis nam mkha' las 'ong ngo // de nas khyim bdag gis dris pa/ ma ga d+ha bzang mo bai DUR+Ya'i khang pa brtsegs pa na 'dug ste/ 'ong ba khyod kyi ston pa de yin nam/ des de la smras pa/ 'di ni dge slong ka t+ya ya na'i bu chen po zhes bya ba bcom ldan 'das kyis mdo sde pa dang / bye brag tu smra ba rnams kyi mchog tu bstan pa de bai DUR+Ya'i khang pa brtsegs pa'i nang du 'dug nas 'ong ba 'di yin no// bar skabs der tshe dang ldan pa gsus po ches khyu mchog gi shing rta mngon par sprul nas/ rdzu 'phrul gyis steng gi nam mkha' las 'ong ngo // de nas khyim bdag des/ de la dris pa/ ma ga d+ha bzang mo khyu mchog gi shing rta la zhon te 'ong ba 'di khyod kyi ston pa yin nam/ des de la smras pa/ 'di ni dge slong gsus po che zhes bya ba bcom ldan 'das kyis rig pa thob pa rnams kyi mchog tu bstan pa yin te/ khyu mchog gi shing rtas 'ong ba 'di yin no/ / bar skabs der tshe dang ldan pa srung dbang gi bu dang pa'i shing rtas steng gi nam mkha' las rdzu 'phrul gyis 'ong ngo // de nas khyim bdag des dris pa/ ma ga d+ha bzang mo gang ngang pa'i shing rtas 'ong ba 'di khyod kyi ston pa yin nam/ des de la smras pa/ 'di ni dge slong srung dbang gi bu zhes bya ba bcom ldan 'das kyis snying rje la gnas pa rnams kyi mchog tu bstan pa de 'di yin te/ 'di ni chu bo gang+gA brgal bar 'dod pa na bzang mo 'dug cig ces smras pa dang / tshig de'i rjes thog nyid la ri bo brtsegs pa bzhin du gnas te/ rnam pa thams cad du ma 'bab par byed pa de ngang pa'i shing rtas 'ong ba 'di yin no/ / bar skabs der tshe dang ldan pa rna ba bye ba nyi shu ri nags kyi tshogs la 'chag cing 'dug pa de 'chag bzhin du 'ong ngo // de nas khyim bdag des dris pa/ ma ga ng+gA bzang mo gang shing nags shing brgya dag gis khyab pa'i nags 'di la 'chag cing 'ong ba 'di khyod kyi ston pa de yin nam/ des de la smras pa'adi ni dge slong rna ba can zhes bya ba bcom ldan 'das kyis brtson 'grus rtsom pa rnams kyi mchog tu bstan pa yin te/ 'di skyes pa tsam gyis rna ba bye ba nyi shu ri ba dang bcas par skyes pa dang / gang gi rkang mthil gyi 'og nas sor bzhi tsam gyi spu yang dag par skyes pa dang / gang 'di dang po'i zan la kar sha pa Na lnga brgya zad par byas pa dang / gang bcom ldan 'das srung ba dang / mo'u 'gal gyi bu chen pos bshos gtsang nye bar blangs pa dang / gang gi dris 'od ma'i tshal thams cad dris kun tu gang ba dang / rgyal po gzugs can snying pos bsnams nas/ mchog tu ngo mtshar skyes te/ gang gi rkang pa gnyis bzhag pa tsam gyis sa 'di rab tu g.yos pa dang / gang zhig rab tu byung nas 'chag sar 'chag pa na/ de'i rkang pa gnyis las khrag byung ba zag pa khwa rnams 'thung ba de 'chag cing 'ong ba 'di yin no/ / bar skabs der tshe dang ldan pa sgra gcan 'dzin 'khor los sgyur ba'i cha lugs mngon par sprul te 'ong ba dang / de nas khyim bdag des dris pa/ ma ga d+ha bzang mo gang 'di 'khor los sgyur ba'i cha byad kyis 'ong ba 'di khyod kyi ston pa de yin nam/ des de la smras pa/ 'di ni bcom ldan 'das kyi sras bcom ldan 'das kyis bslab pa 'dzin pa rnams kyi mchog tu bstan pa yin no/ 'dis yab kyis spangs pa'i dpal ston par byed cing / 'khor los sgyur ba'i cha lugs kyi rin po che sna bdun dang ldan pa bu stong gi yongs su bskor te/ gza' dang / rgyu skar dang / skar ma'i tshogs kyis bskor ba'i zla ba lta bu dang / rgyal po'i lam bzung nas 'gro ba'i mi'i bdag po lta bu dang / chu bo stong phrag gi chu 'bab pas kun tu 'gengs pa'i rgya mtsho lta bu dang / 'jigs pa dang / nad dang / mya ngan sel ba'i skye dgu skyong ba chen po lta bu dang / ri dgas kyi nang na seng ge lta bu dang / bya rnams kyi nang na nam mkha' lding lta bu dang / thams cad sel ba'i nyi ma dang / gling bzhi la dbang ba'i 'khor los sgyur ba'i rgyal po dang / chos bzang na mig stong dang ldan pa/ chos skyong ba lta bur 'ong ba yin no// de bzhin du la la ni 'bar bar byed pa dang / la la ni char 'bebs pa dang / de bzhin du cho 'phrul sna tshogs pa ston cing 'ong ba yin no// la la sa las 'phags pa dang / la la nam mkha'i gzhi la gnas// la la stan ni sprul byed de// rdzu 'phrul ldan pa'i mthu la ltos// de ltar bcom ldan 'das kyi slob ma rnams yang dag par song ba dang de nas bcom ldan 'das kyis 'od gang gis 'dzam bu gling thams cad gser btso ma'i mdog 'dra ba'i 'od kyis gang ba de lta bu'i 'od bkye zhing / mnyan yod nas brtsams te/ bu ram shing 'phel gyi bar 'dir 'od kyi dkyil 'khor chen po bkye bas/ gang du yang mig gis mi mthong ba med pas thams cad kyis mthong bar gyur to// bcom ldan 'das kyang nam mkha' la gshegs pa dang / lag na rdo rje ni snam logs nas 'brang ngo // gnas gtsang ba rnams ni steng nas so// 'dod pa na spyod pa'i lha rnams ni 'og nas so// g.yon logs nas ni brgya byin no/ / g.yas nas ni tshangs pa'o// de bzhin du gtsug lnga pa dang / shin tu dga' dang / mig sbyin la sogs pa'i dri za rnams pi wang dang / gling bu dang / rnga dang / rdza rnga la sogs pa rol mo'i bye brag snyan pa rnams brdung zhing me tog dang / bdug pa dang / dri dang / 'phreng ba rnams kyang 'thor zhing 'byor pa chen pos gshegs te/ bar skabs der bcom ldan 'das kyis srog chags stong phrag bdun cu rtsa bdun bden pa la thog mar rab tu bkod pa mdzad nas/ de'i 'og tu bu ram shing 'phel gyi grong khyer du gshegs te/ grong khyer de na 'ang bco brgyad yod pa dang / der bcom ldan 'das kyis sangs rgyas bco brgyad sprul par mdzad nas/ sgo re re zhing snang bar gyur pa nas/ bcom ldan 'das mag d+ha bzang mo'i khyim du gshegs so/ / de nas skye bo'i tshogs chen po de rnams kyis sangs rgyas bcom ldan 'das ma mthong ste/ de nas khros nas de'i khyim bshig par brtsams so// de nas bcom ldan 'das kyis rmo khyer de thams cad shel gyi rang bzhin du byin gyis brlabs te/ gang khyim thams cad du yang sangs rgyas kyi sku bzhugs par mthong bar mdzad do// ji srid bu ram shing 'phel du ma ga d+ha bzang mo la sogs pa'i srog chags brgya stong du ma rnams kyis bcom ldan 'das la me tog dang / dri dang / 'phreng ba dang / spos rnams kyis mchod par byas so// bcom ldan 'das kyis kyang ma ga d+ha bzang mo la sogs pa'i skye bo'i tshogs chen po de rnams la gang zhig thos na/ ma ga d+ha bzang mo la sogs pa'i srog chags brgya stong du ma rnams kyis bden pa mngon du mthong ba thob par gyur pa de lta bu'i chos bstan par mdzad cing / 'khor de thams cad kyang sangs rgyas la gzhol ba dang / chos la 'bab pa dang / dge 'dun la bab par gyur to// yang dge slong rnams the tsom skyes te/ the tsom thams cad gcod par mdzad pa sangs rgyas bcom ldan 'das la zhus pa/ bcom ldan 'das ji srid ma ga d+ha bzang mo mchis nas/ srog chags brgya stong du ma mtho ris dang thar pa la gzhol bar gyur pa dang / 'dis sangs rgyas kyi mdzad pa bgyis pa ni ngo mtshar che'o// bcom ldan 'das kyis bka' stsal pa/ da ltar 'ba' zhig tu ma zad de/ 'das pa'i dus na 'dis sangs rgyas kyi bya ba byas pa de nyon cig/ dge slong dag sngon byung ba 'das pa'i dus na/ skye dgu'i tshe lo nyi khri thub pa na/ yang dag par rdzogs pa'i sangs rgyas 'od srungs zhes bya ba rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa/ lha dang mi rnams kyi ston pa sangs rgyas bcom ldan 'das 'jig rten du byung ste/ yang dus de'i tshe grong khyer wA ra Na si na/ rgyal po kri kr-i zhes bya ba rgyal po byed de/ de'i bu mo gser gyi 'phreng ba dang ldan pa zhig btsas te/ de'i ming yang gser 'phreng zhes bya bar btags so// ji srid cig na bu mo de cher skyes par gyur pa dang / na zla gzhon nu ma lnga brgya thams cad kyang / gzhon nu mas bskor cing thabs cig tu yang dag par rdzogs pa'i sangs rgyas 'od srungs la bsnyen bkur byed de/ de la dad pa yang dag par thob pas/ yang dag par rdzogs pa'i sangs rgyas bcom ldan 'das 'od srungs la ji srid 'tsho'i bar du chos gos dang / bsod snyoms dang / gzims cha dang / snyun gyi rkyen sman dang / yo byad rnams kyis bsnyen bkur byed do// yang dus de'i tshe/ rgyal po kri kris mtshan gcig la rmi lam bcu rmis te/ des smras pa/ glang po che'i rgyal po skar khung nas byung ba na mjug ma phra mo thegs pa dang / skom pa'i phyi nas khron pa snyeg pa dang / phye bre gang dang mu tig bre gang tshong byed pa dang / tsan dan dang shing rin mnyam par byed pa dang / kun dga' ra ba me tog dang / 'bras bu phun sum tshogs pa ma byin par len pa rnams kyis phrogs pa dang / glang po phrug gus spos kyi glang po 'jigs par byed pa dang / spre'u mi gtsang bas gos pas gzhan la skud pa dang / spre'u rgyal por dbang bskur bar mthong ba dang / ras gcig mi bco brgyad kyis drangs kyang ma ral ba dang / skye bo'i tshigs chen po gcig tu 'dus nas/ 'thab pa dang / rtsod pa dang / g.yul 'gyed pa dang // mtshang 'dru bar 'gyur bas 'jigs pa mthong ngo / / de nas rgyal po de sad pa dang / 'jigs shing skrag pa dang / skyo bas nga'i srog gi 'tshe ba'i bar chad du 'gyur ba 'am/ rgyal srid las nyams par mi 'gyur ram snyam ste/ des bram ze rmi ltas kyi mtshan ma ston shes pa rnams bsdus nas de rnams la rmi lam de rnams smras so// de rnams kyang gser 'phreng can la zhe sdang ba yin pas/ / de rnams kyis smas pa// lha khyod la thams cad kyi nang na thugs su byon pa de'i snying dang // me la sprin sreg gi mchod sprin mdzod cig/ de nas rgyal po de yi mug pas bsams pa/ thams kyi nang na nga la sdug pa ni nga'i gser 'phreng can yin no// gser 'phreng can gyis thos pa dang / de yang mkhas pa yin pas/ rgyal po de'i gan du song ste/ phyin nas smras pa/ lha nyi ma shar na sgron mar mar me'i 'od dgos pa ci mchis/ yang dag par rdzogs pa'i sangs rgyas bcom ldan 'das 'od srung 'di drang srong smra ba'i ri dgas rgyu ba na bzhugs te/ der gshegs la zhus shig dang / bcom ldan 'das des khyed la lung ji ltar bstan pa de bzhin du khyed kyis zung zhig/ de nas rgyal po kri kris grong khyer wA ra NA sa ra/ ra deng bcom ldan 'das de'i drung du 'gro'o zhes dril chen po bsgrags nas/ de 'khor brgya stong du ma dang / gser 'phreng can de dang thabs cig tu bcom ldan 'das gang ba der song ste byin nas/ bcom ldan 'das kyi zhabs gnyis la mgo bos phyag 'tshal te/ chos nyan pa'i phyir bcom ldan 'das kyi spyan sngar 'dug go/ dzasri cig na rgyal po kri kri stan las langs te/ bcom ldan 'das gang na ba der thal mo sbyar ba btud nas/ bcom ldan 'das la 'di skad ces gsol to// bcom ldan 'das 'dir bdag dgung gcig la bdag gis rmi lam bcu khums pa/ glang po che skar khung nas byung ba na de'i mjug ma thogs pa la sogs pa snga ma bzhin te/ bcom ldan 'das kyis rmi lam de'i 'bras bu 'dir bdag la lung bstan du gsol/ bcom ldan 'das kyis bka' stsal pa/ rgyal po chen po ma 'jigs shig/ khyod kyi yul 'khor mi nyams par 'gyur la/ srog gi bar chad du yang mi 'gyur gyis/ rgyal po chen po gzhan du na ma 'ongs pa'i tshe skye dgu'i tshe lo brgya thub pa na/ shAkya thub pa zhes bya ba yang dag par rdzogs pa'i sangs rgyas 'byung ste/ de'i phyi ma'i dus/ nyan thos rnams lus ma bsdams pa/ sems ma bsdams pa/ shes rab ma bsdams pa rnams 'byung bar 'gyur te/ de rnams gnyen gyi tshogs spangs nas rab tu 'byung bar 'gyur te/ de rnams gtsug lag khang rnams su khyim gyi 'du shes 'jog pa las chags par 'gyur te/ glang po che skar khung nas byung ba na/ de'i mjug ma thog pa ni de'i snga lhas yin no// rgyal po khyod kyis som pa'i phyi nas khron par snyegs par rmi lam du mthong ba gang yin pa de ni/ de rnams gtsug lag khang gi nang na lhan cig gnas pa rnams la chos ston par 'gyur yang // de rnams mnyan par 'dod par mi byed cing / yid la mi 'jog ste/ de'i snga ltas ni 'di yin no// rgyal po chen po khyod kyis phye bre gang dang / mu tig bre gang tshong byed pa rmi lam du mthong bar byed pa gang yin pa de ni/ / de nyid kyi nyan thos rnams te/ gang bza' ba tsam gyi don du dbang po dang / stobs dang / byang chub kyi yan lag rin po che rnams yang dag par ston pa 'byung bar 'gyur te/ de'i snga ltas ni 'di yin no// rgyal po chen po khyod kyis tsan dan dang shing mnyam por tshong byed par rmi lam du mthong ba gang yin pa de ni/ de nyid kyi nyan thos rnams mu stegs kyi tshig gang yin pa rnams bzung nas/ sangs rgyas kyi bka' dang snyoms par 'byung bar 'gyur te/ de'i snga ltas ni de yin no// rgyal po chen po khyod kyis kun dga' ra ba phun sum tshogs pa ma byin par len pa rnams kyis phrogs pa rmi lam du mthong ba gang yin pa de ni/ de nyid kyi nyan thos lus ma bsdams pa/ sems ma bsdams pa/ tshul khrim/ ma bsdams pa/ shes rab ma bsdams pa rnams 'byung bar 'gyur te/ de rnams dge 'dun rnams kyi me tog mchog dang / 'bras bu'i mchog rnams 'tshe ba'i phyir dge 'dun las bcad nas khyim pa rnams la ster bar 'gyur te/ de'i snga ltas ni de yin no// rgyal po chen po khyod kyis glang po phrug gus spos kyi glang po 'jigs par byed pa rmi lam du mthong ba gang yin pa de ni/ de nyid kyi nyan thos rnams tshul khrims 'chal pa/ sdig pa'i chos can de rnams gang dge slong tshul khrims dang ldan pa/ dge ba'i chos can rnams zil gyis gnon par byed par 'gyur te/ de'i snga ltas de yin no// rgyal po chen po khyod kyis spre'u mi gtsang bas gos pas gzhan la skud par rmi lam du mthong ba gang yin pa 'di ni/ de nyid kyi nyan thos rnams tshul khrims 'chal pa/ sdig pa'i chos can rnams 'byung bar 'gyur te/ de rnams kyis tshul khrims dang ldan pa rnams la skur pa 'debs par 'gyur te/ de'i snga ltas de yin no// rgyal po chen po khyod kyis spre'u rgyal por dbang bskur bar mthong ba gang yin pa de ni/ dus de'i tshe rmongs pa rnams rgyal por dbang bskur bar 'gyurate/ de'i sa lngas de yin no// rgyal po chem khyod kyis ras gcig mi bco brgyad kyis drangs kyang ma ral bar rmi lam mthong ba gang yin pa de ni/ de nyid kyi bstan pa sde bco brgyad du gyes par gyur kyang / rnam par grol ba'i ras ni ra bar mi nus te/ de'i snga ltas de yin no// rgyal po chen po khyod kyis skye bo'i tshigs chen po gcig tu 'dus nas/ 'thab pa dang / rtsod pa dang / g.yul 'gyed pa dang / mtshang 'dru bar rmi lam mthong ba gang yin pa de ni/ de nyid kyi bstan pa rtsod pas nub par 'gyur te/ de'i snga ltas de yin no// rgyal po chen po de ltar mi bzad pa rnams ma 'ongs pa'i dus na 'byung bar 'gyur ro/ / bcom ldan 'das kyis bka' stsal pa/ gang bcom ldan 'das yang dag par rdzogs pa'i sangs rgyas 'od srungs la yang rgyal po kri kri dang / gser 'phreng can gyis thar pa'i cha dang 'thun pa'i dge ba'i rtsa ba rnams bskyed pa yin no/ / dge slong dag 'di ji snyam du sems/ de'i tshe na gser 'phreng can gang yin pa de ni ma ga d+ha bzang mo 'di nyid yin te// de'i tshe yang 'dis sangs rgyas kyi bya ba byas te/ da ltar yang 'di 'ongs nas sangs rgyas kyi bya ba byas so// yang dge slong rnams the tsom skyes nas/ sangs rgyas bcom ldan 'das la zhus pa/ btsun pa gser 'phreng can gyis las ci zhig bgyis nas gser gyi 'phreng ba btags par skyes/ bcom ldan 'das kyis bka' stsal pa/ dge slong dag 'di nyid kyis las byas pa yod de/ sngon byung ba na zhing pa gzhan zhig gi chung mar gyur/ rang sangs rgyas kyis mchod rten la kha dag sna tshogs pa'i me tog rnams kyis 'brang ba byas nas btags/ de'i rnam par smin pas gser gyi 'phreng ba btags par skyes so// de bas na dge slong dag las gcig tu gnag pa rnams kyi rnam par smin pa ni gcig tu gnag pa yin la/ gcig tu dkar pab rnams kyi rnam par smin pa ni gcig tu dkar ba yin te/ 'dren ma rnams kyi rnam par smin pa ni 'dren ma'o// dge slong dag de bas na las gcig tu gnag pa rnams dang / 'dren ma rnams spangs la/ las gcig tu dkar ba rnams la mngon par brtson par bya ste/ dge slong dag khyed rnams kyis de ltar bslab par bya'o// bcom ldan 'das kyis de skad ces bka' stsal pa dang / / dge slong de dag bcom ldan 'das kyis gsungs pa la mngon par bstod do// ma ga d+ha bzang mo'i rtogs pa brjod pa rdzogs so// rgya gar gyi mkhan po d+harma shrI b+ha dra dang /

CLOSE WINDOW