// rgya gar skad du/ Ar+ya ta thA ga ta pra ti bi ma ba/ pra tiSh+Tha a ru shang sa/ sam brna nA ma d+harma bar+ya ya/ bod skad du/ 'phags pa de bzhin gshegs pa'i gzugs brnyan bzhag pa'i phan yon yang dag par brjod pa zhes bya ba'i chos kyi rnam grangs thams cad mkhyen pa la phyag 'tshal lo/ / 'di skad bdag gis thos pa dus gcig na/ bcom ldan 'das mnyan yod na/ rgyal bu rgyal byed kyi tshal mgon med zas sbyin gyi kun dga' ra ba na bzhugs so// de'i tshe dge slong rab tu mang po dag ci rim gro'i gnas su lhags te 'dus nas bar skabs der gtam 'di lta bu zhig glengs so/ / khyed cag bram ze'am/ khyim bdag dad pa can thos pa 'dzin pa/ thos pa bsags pa dge ba ji ltar bya zhes tshol ba/ de bzhin gshegs pa'i gzugs brnyan bya bar spro bar bskyed pa dag snang la/ de dag gal te bdag cag gi drung du lhags nas btsun pa dag de bzhin gshegs pa'i gzugs brnyan bgyid pa'i gang zag sbyin pa po la/ phan yon ji tsam zhig mchis par rig par bgyi zhes rmed na/ de bzhin gshegs pa'i/ gzugs brnyan bgyid pa la phan yon ji tsam zhig yod pa bdag cag gis mi shes te/ de'i tshe de dag la bdag cag gis ji ltar chos dang mthun par lan gdab par bya/ gang don 'di dag nyid ni/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas thams cad mkhyen pa/ thams cad gzigs pa/ the tsom thams cad gcod par mdzad pa/ ston pa de la bdag gis zhu'o// 'on tang bcom ldan 'das de bdag cag la lung ston par mdzad de/ bdag cag gis de bzhin bzung nas/ bram ze dang khyim bdag dad pa can rnams la rgya cher phye ste lan gdab par bya'o zhes bgros so/ / de nas dge slong rab tu mang po dag bcom ldan 'das ga la ba der dong ste phyin nas/ bcom ldan 'das kyi zhabs la mgo bos phyag 'tshal te phyogs gcig tu 'khod do/ / phyogs gcig tu 'khod nas dge slong mang po dag gis bcom ldan 'das la 'di skad ces gsol to// btsun pa bdag cag dge slong rab tu mang po dag rim gro'i gnas der lhags te 'dus pa dang / bar der bka' mchid 'di lta bu zhig glengs te khyed cag la bram ze'am/ khyim bdag dad pa can thos pa 'dzin pa thos pa bsogs pa/ dge ba ji ltar bgyi zhes tshol ba de bzhin gshegs pa'i gzugs brnyan bgyi bar spro ba skyes pa dag gda' la/ de dag gal te bdag cag gi drung du mchis nas bgyid pa la phan yon ji tsam zhig mchis pa bdag cag gis ma 'tshal na/ de'i tshe de dag la bdag cag gis ji ltar chos dang mthun par lan gdab par bgyi/ gang don de dag nyid ni bcom ldan 'das de bzhin gshegs pa dgra bcom pa yang dag par rdzogs pa'i sangs rgyas thams cad mkhyen pa/ thams cad gzigs pa/ the tsom thams cad gcod par mdzad pa/ ston pa de la bdag cag gis zhu bar bgyi'o// 'on tang bcom ldan 'das de bdag cag la lung ston par mdzad de/ bdag cag gis de bzhin bzung nas/ bram ze dang khyim bdag dad pa can rnams la rgya cher bye ste/ lan gdab par bgyi'o snyam bgyid do// btsun pa bcom ldan 'das don de bdag nyid bdag cag zhu zhing mchis na/ btsun pa de bzhin gshegs pa'i gzugs brnyan bgyid pa'i gang zag sbyin pa po la phan yon ji tsam zhig mchis par rig par bgyi/ dge slong dag khyed skye bo mang po la phan pa dang / skye bo mang po la bde ba dang / 'jig rte la snying brtse ba dang / lha dang mi rnams la phan pa dang bde ba'i phyir zhugs te/ khyed gang de bzhin gshegs pa dgra bcom pa yang dag par rdzogs pa'i sangs rgyas la don 'di dag nyid zhu bar sems pa le gA so legs so/ / dge slong dag de'i phyir legs par rab tu nyon la yid la zung zhig dang bstan par bya'o// dge slong dag de bzhin gshegs pa'i gzugs brnyan byed pa'i gang zag sbyin pa po la phan yon 'di lnga yod de/ lnga gang zhe na/ gzhal med khang chen por gnas pa dang / bong sded bzang por grags pa dang / spro ba mang ba dang / tshe ring ba dang / grags pa dang ldan pa dang / bde ba mang ba ste/ dge slong dag 'di ni de bzhin gshegs pa'i gzugs brnyan byed pa'i gang zag sbyin ba po'i phan yon dang po yin no/ / gzhan yang phyug pa dang / nor mang ba dang / longs spyod che ba dang / nor rdzas dang / yo byad mang ba dang / bdag dbang ba bdag gir bya ba mang ba dang / nor dang / 'bru dang / dbyig dang / gser dang / mdzod dang / bang ba'i tshogs mang ba dang / rta dang / glang po che dang / ba glang dang / lug dang / bran dang / bran mo dang / las byed pa dang / zho shas 'tsho ba mang ba dang / blon po dang / mdza' bshes dang / gnyen dang / snag gi gnyen mtshams mang por 'gyur te/ dge slong dag 'di ni de bzhin gshegs pa'i gzugs brnyan byed pa'i gang zag sbyin pa po'i phan yon gnyis pa yin no// dge slong dag gzhan yang gzugs bzang ba dang / blta na sdug pa dang mdzes pa dang / mdog gser ltar bzang ba dang / mgo gdugs ltar zlom pa dang / lag pa ring ba dang / dpral ba dbyes che ba dang / smin mtshams bar ma chad pa dang / yan lag nying lag thams cad dang ldan pa dang / rgyan thams cad kyis brgyan par 'gyur te/ dge slong dag 'di ni de bzhin gshegs pa'i gzugs brnyan byed pa'i gang zag sbyin pa po'i phan yon gsum pa yin no/ / dge slong dag gzhan yang 'khor los sgyur ba'i rgyal po 'khor bzang po rin po che sna bdun dang ldan pa dang / bu stong gis bskor bar 'gyur te/ de'i bu 'am/ chung ma 'am bran nam/ nye bar 'tsho ba gang yin pa de dag thams cad de la gus par nyan pa dang / bka' nyan par byed de/ dge slong dag 'di ni de bzhin gshegs pa'i gzugs brnyan byed pa'i gang zag sbyin pa po'i phan yon bzhi pa yin no/ / dge slong dag gzhan yang de lus dang bral na/ bde 'gro mtho ris kyi 'jig rten lha rnams kyi nang du skye bar 'gyur te/ der skyes nas lha'i rgyal po khyad par can lha dang / lha'i bu dang / lha'i bu mo rnams kyi rten du 'gyur la/ gnas bcu po lha'i tshe dang / lha'i mdog dang / lha'i stobs dang lha'i bde ba dang / lha'i dbang phyug la dbang byed pa dang / lha'i gzugs dang / sgra dang / dri dang / ro dang / reg bya rnams kyis dga' bar byed de/ dge slong dag 'di ni de bzhin gshegs pa'i gzugs brnyan byed pa'i gang zag sbyin pa po'i phan yon lnga pa yin no/ / bcom ldan 'das kyis de skad ces bka' stsal pa dang / dge slong de dag bcom ldan 'das kyis gsungs pa la yi rangs te mngon par bstod do/ / 'phags pa de bzhin gshegs pa'i gzugs brnyan bzhag pa'i phan yon yang dag par bstan pa zhes bya ba'i chos kyi rnam grangs rdzogs so/ / rgya gar gyi mkhan po d+harma kar dang / lo tsA ba ban+de ye shes snying pos bsgyur/ ban+de dpal brtsegs kyis zhu chen bgyis te gtan la phab pa/

CLOSE WINDOW