ma sa sa la/ n+da da pa na rnas pa sa rdzogs su/ ma ma hA yA na sU tra/ bod skad du/ 'phags pa chos kyi tshul zhes bya ba theg pa chen po'i mdo/ sangs rgyas dang byang chub sems dpa' thams cad la phyag 'tshal mo/ 'di skad bdag gis thos pa dus gcig na/ bcom ldan 'das mnyan yod na/ rgyal bu rgyal byed kyi tshal na/ smig ma las byas pa'i 'khor gyi khyam na bzhugs te de'i tshe smig ma las byas pa'i 'khor gyi khyams su 'dus shing 'khod pa'i byang chub sems dpa' rab tu mang po dag 'di snyam du sems te/ bdag cag gis ji ltar gnas par bya/ ji ltar bsgrub par bya/ ji ltar rnal 'byor du bya/ ji ltar sems can rnams yongs su smin par bya snyam pa dang / de nas bcom ldan 'das kyis/ byang chub sems dpa' rab tu mang po de dag gi bsam pa mkhyen nas/ smig ma las byas pa'i 'khor gyi khyams ga la ba der gshegs te/ byon nas gdan bting ba la bzhugs so// bzhugs nas bcom ldan 'das kyis byang chub sems dpa' rab tu mang po de dag la 'di skad ces bka' stsal to/ / rigs kyi bu dag legs so legs so// khyed kyi rtog pa ni bzang po yin gyi dri ba ni mdzes so// spobs pa ni dge'o// yid la bya ba ni tshul bzhin no// rigs kyi bu dag de'i phyir legs par rab tu nyon la yid la zung shig dang / byang chub sems dpa' sems dpa' chen po rnams kyi tshul gang byang chub sems dpa'i spyod pa thams cad ston par byed pa dang / sangs rgyas kyi chos thams cad brjod par byed pa de lta bu'i chos kyi tshul de ngas khyed la bshad do// bcom ldan 'das legs so zhes gsol nas/ byang chub sems dpa' de dag bcom ldan 'das kyi ltar nyan pa dang / bcom ldan 'das kyis de dag la 'di skad ces bka' stsal to// rigs kyi bu dag de lta bas na/ mya ngan las 'das pa'i bsams pa can du gyis shig/ 'khor bar sbyor ba can gyis shig/ 'khor ba dang mya ngan las 'das pa la yang gnas par ma byed cig/ de dag gis gsol pa/ bcom ldan 'das ji ltar na byang chub sems dpa' rnams mya ngan las 'das pa'i bsam pa can dang / 'khor bar sbyor ba can lags/ ji ltar 'khor ba dang mya ngan las 'das pa la yang mi gnas pa legs/ bcom ldan 'das kyis bka' stsal pa/ 'chi ba med pa'i bde ba la reg par bya ba'i phyir mya ngan las 'das pa'i bsam pa can yin/ dge ba'i rtsa ba bsags pa'i phyir 'khor bar sbyor ba can yin/ 'phags padang so so'i skye bo dang bsten pa'i phyir 'khor ba dang mya ngan las 'das pa la yang mi gnas te de ni tshul lo/ / rigs kyi bu de lta bas na rang gi sems yongs su sbyongs shig/ pha rol gyi sems srungs shig/ sems spangs shig/ sems dpa' ba can du gyis shig/ gsol pa/ bcom ldan 'das ji ltar na byang chub sems dpa' rnams rang gi sems yongs su sbyong bar bgyid pa lags ji ltar na gzhan gyi sems srung ba lags/ ji ltar na sems dpa' ba can lags bka' stsal pa/ nyon mongs pasel bas rang gi sems yongs su sbyong bar byed pa yin/ khong khro ba med pas gzhan gyi sems srung ba yin/ byang chub kyi sems mi gtong bas sems dpa' ba can yin te de ni tshul lo// rigs kyi bud dag de lta bas na bya ba dang sa 'ga' bar ma byed cig bya ba ma yin pa la yang snang bar gyis shig/ bya ba la lan re ba med par gyis shig/ gsol pa/ bcom ldan 'das ji ltar na/ byang chub sems dpa' rnams bgyi ba dang mi 'gal bar bgyid pa lags/ ji ltar na mi bgyi ba la yang 'da' ba lags/ ji ltar na bgyis pa la lan re ba ma mchis pa lags/ bka' stsal pa/ bya ba dang 'gal bar mi bya ba ni rten cing 'brel bar 'byung ba'i chos la 'jug pa'am/ las kyi rnam par smin pa la yid ches par bya'o// bya ba ma yin pal snang ba ni snying rje chen po la 'jug pa'o// byas pa la lan re ba med pa ni lan du phan 'dogs par re ba med pa ste de ni tshul lo/ / rigs kyi bu dag de lta bas na dus ma yin par ni ma ldang shig/ dus la bab na ni ma nyal cig/ nyal ba rnams ni slong shig/ rtag tu ni nyol cig/ gsol pa/ bcom ldan 'das ji ltar na/ byang chub sems dpa' rnams dus ma lags par mi ldang ba lags/ ji ltar na dus la bab na mi nyal ba lags/ ji ltar na nyal ba rnams slong ba lags/ ji ltar na rtag tu nyal ba lags/ bka' stsal pa/ dus ma yin par mi ldang ba ni/ snod du ma gyur pa rnams la chos mi bstan pa'o// dus la bab na mi nyal ba ni snod du gyur pa las 'da' bar mi bya'o// nyal ba rnams bslang ba ni dus dang dus ma yin pas bskul ba'o/ / rtag tu nyal ba ni snyoms par 'jug pa las mi nyal ba ste de ni tshul lo// rigs kyi bu dag de lta bas na yid brtan pa med par gyis shig/ yid brtan pa gzhig par gyis shig/ yid ma brtan pa rnams la yid brtan par gyis shig/ gsol pa/ bcom ldan 'das ji ltar na/ byang chub sems dpa' rnams yid mi rton pa lags/ ji ltar na yid brtan pa 'jig par bgyid pa lags/ ji ltar na yid ma brtan pa rnams la yid rton pa lags/ bka' stsal pa/ yid mi brtan ces bya ba ni gzugs med pa'i snyoms par 'jug pa rnams la yid mi gzhag pa'o/ / yid brtan pa gzhig par bya ba ni snyoms par 'jug par bzlog pa'o// yid dam brtan pa rnams la yid brtan par bya ba ni/ log par zhugs pa rnams la ste de ni tshul lo/ / rigs kyi bu dag de lta bas na nor dang ldan par gyis shig/ bya sa pa shes pa med par sbyor cig/ ci la yang na re bar ma byed cig/ rnyed pa chen pos nye bar 'tshe bar gyis shig gsol pa bcom ldan 'das ji ltar na/ byang chub sems dpa' rnams nor dang ldan pa lags/ ji ltar na byang chub sems dpa' byas pa 'tshal ba ma mchis par sbyor ba lags/ ji ltar na ci la yang lan mir ba lags/ ji ltar na rnyed pa chen pos nye bar 'tsho ba lags/ bka' stsal pa/ nor dang ldan pa zhes bya ba ni nor bdun dang ldan pa'o// byas pa shes pa med par sbyar ba ni ser sna can rnams sbyin pa la sbyar ba dang / shes rab 'chal ba rnams shes rab la sbyar ba'o// ci la yang lan re ba med pa ni rang gi dgod pa la gnas kyang nan tan du bya ba'o// rnyed pa chen pos nye bar 'tsho ba ni/ bla na med pa yang dag par rdzogs pa'i byang chub tu yongs su bsngo bar bya sto de ni tshul lo// rigs kyi bu dag de lta bas na chags pa yang shes par gyis shig/ chags pa rnams la yang / cig/ chags pa la zhen pa rnams la yang ltos shig/ chags pa med pa yang srung shig/ gsol pa/ bcom ldan 'das ji ltar na byang chub sems dpa' rnams la chags pa 'tshal ba lags ji ltar na chags pa rnams la spyod pa lags/ ji ltar na chags par zhen pa la lta ba lags/ ji ltar na chags pa ma mchis pa bsrung ba lags/ bka' stsal pa/ chags pa shes par bya ba ni gzugs med pa'i snyoms par 'jug pa rnams so/ / chags pa rnams la spyod pa skye mched drug bcad pa'o// chags par zhen pa la lta ba ni/ so so'i skye bo yongs su smin par bya ba'o// chags pa med par bsrung ba ni skyon med par mi 'jug pa ste de ni tshul lo/ / rigs kyi bu dag de lta bas na 'jigs par gyis shig/ mngon par dga' ba med par gyis shig/ snying brtse ba med par gyis shig/ snying rje ba med par gyis shig gsol pa/ bcom ldan 'das ji ltar// byang chub sems dpa' rnams 'jigs par bgyid pa lags/ ji ltar na mngon par dga' ba ma mchis pa lags/ ji ltar na snying brtse ba ma mchis pa laH ji ltar na snying rje ba ma mchis pa lags bka' stsal pa/ 'jigs shes pa ni nyan thos dang 'ang sangs rgyas kyisas 'jigs pa'o/ mngon par dga' ba med pa ces bya ba ni / gzugs med pa'i snyoms par 'jug pa rnams la dga'/ ba med pa'o// snying brtse ba med pa ni// phyi rol gyi dngos po rnams yongs su btang ba la'o// snying rje ba med pa ni/ nang gi dngos po mgo la sogs pa yong su btang ba la ste de ni tshul lo// rigs kyi budag de lta bas na bden pa yang khong du chud par gyis shig/ brdzun du smra ba yang ma spangs shig/ gsol pa/ bcom ldan 'das ji ltar na/ byang chub sems dpa' rnams bden pa khong du chud par gyid pa lags/ ji ltar na brdzun du smra ba mi spong ba lags/ bka' stsal pa/ bden pa khong du chud par bya ba ni nyan thos dang / rang sangs rgyas 'dul ba'i phyir ro// brdzun du smra ba mi spong ba ni 'dus byas thams cad la nye bar spyod pa'i phyir te de ni tshul lo/ / rigs kyi bu dag de lta bas na pha rol tu phyin pa bgyis te/ tshu rol gyi ngogs la blta bar gyis shig/ pha rol tu phyin par ma byed par pha rol gyi ngogs la blta bar gyis shig/ gsol pa/ bcom ldan 'das ji ltar na/ byang chub sems dpa' rnams pha rol tu phyin cing tshu rol gyi ngogs la blta ba lags/ ji ltar na pha rol tu phyin par mi bgyid cing pha rol gyi ngogs la lta ba lags/ bka' stsal pa/ pha rol tu phyin pa ni sems can thams cad kyi sems dang spyod pa dang bsam pa la'o// tshu rol gyi ngogs la lta ba ni sems can thams cad yongs su smin par bya ba'i phyir ro// pha rol tu phyin par mi bya ba ni pha rol tu bsgral ba'i phyir ro// pha rol gyi ngogs la blta ba ni rtag tu mya ngan las 'da' ba la gzhol bar bya ba ste/ de ni tshul lo// rigs kyi bu dag de/ bas na/ rtag tu mi mthun par yA bgyis la rtsod pa med pa mchog tu yang gyis shig/ byams pa la yang gnas la skyon yang mthong bar gyis shig/ gsol pa/ bcom ldan 'das ji ltar na/ byang chub sems dpa' rnams rtag tu mi mthun par bgyid pa dang rtsod pa ma mchis pa mchog tu bgyid pa lags/ ji ltar na byams pa la gnas shing skyon yang mthong ba lags/ bka' stsal pa/ rtag tu mi mthun par byed pa ni dam pa'i chos yongs su gzung ba'i phyir ro/ / rtsod pa med pa mchog tu byed pa ni bsam pa dag pa'i phyir ro// byams pa la gnas pa ni sems can yongs su bskyab pa'i phyir ro// nyes pa mthong ba ni 'dus byas kyi dngos po thams cad de de ni tshul lo/ / rigs kyi bu dag de lta bas na/ zad pa yang zad par ma byed cig/ mi zad par yang ltung bar ma byed cig/ zad pa'i chos nyid kyang khong du chud par gyis shig/ gsol pa/ bcom ldan 'das ji ltar na/ byang chub sems dpa' rnams zad pa zad par mi bgyid pa lags/ ji ltar na mi zad par mi ltung ba lags/ ji ltar na zad pa'i chos nyid khong du chud pa lags/ bka' stsal pa/ zad pa zhes bya ba ni 'dus byas so// mi zad pa zhes bya ba ni 'dus ma byas so// de la byang chub sems dpas dge ba'i rtsa ba bsags pa'i phyir/ 'dus byas kyang zad par mi bya'o/ / thabs la mkhas pas/ 'dus byas su yang ltung bar mi bya'o// zad pa'i chos nyid khong du chud par bya ba ni/ mi rtag pa'i mthar 'gyur ba ste de ni tshul lo// rigs kyi bu dag/ de lta bas na/ mun pa'i nang na yang gnas par gyis shig/ snang ba yang zin par gyis shig/ mi bya ba ni gyis shig/ bya ba ni yal bar zhog shig/ gsol pa/ bcom ldan 'das ji ltar na/ byang chub sems dpa' rnams mun pa'i nang na gnas pa lags/ ji ltar na snang ba zin pa lags/ ji ltar na mi bgyi ba bgyid pa lags/ ji ltar na bgyi ba yal bar gzhog pa lags/ bka' stsal pa/ mun pa zhes bya ba ni mi shes pa ste/ de la byang chub sems dpa' rnams kyi sems can mi shes pa rnams kyi don du bden pa thob par bya'o// snang ba zhes bya ba ni shes rab ste/ shes rab des kyang mun pa bsal bar bya'o// mi bya ba zhes bya ba ni mya ngan las 'das pa'o// bya ba zhes bya ba ni mngon par 'du bya ba med pa'o// de byang chub sems dpa' rnams kyis yal bar gzhag par bya ste de ni tshul lo/ / rigs kyi bu dag de lta bas na zab mo'i chos kyi snang ba la yang gnas par gyis shig/ snang ba'i chos rnams la yang brnyas par ma byed cig/ snang ba dang mi snang ba la yang ma gnas shig/ gsol pa/ bcom ldan 'das ji ltar na/ byang chub sems dpa' rnams zab mo'i chos kyi snang ba la gnas pa lags/ ji ltar na snang bar gyur pa'i chos rnams la brnyas pa ma mchis pa lags/ ji ltar na snang ba dang mi snang ba la gnas pa lags/ bka' stsal pa/ zab ces bya ba ni rten cing 'brel par 'byung ba ste/ de la byang chub sems dpa' rnams kyis lta ba thams cad dang bral ba chos thams cad la rten cing 'brel par 'byung ba yin par rig par bya'o// chos gang dag rten cing 'brel bar 'byung bas snang bar gyur pa de dag la yang sems can yongs su smin par bya ba'i phyir brnyas par mi bya'o/ / snang ba dang mi snang ba la gnas par mi bya ba ni gnyis dang bral ba'i phyir te de ni tshul lo// rigs kyi bu dag de lta bas na gang yang dag par bsdu bar bya ba de la 'dod pa med par gyis shig/ yang dag par bsdu ba'i phyir yang brtson 'grus ma klod cig/ gsol pa/ bcom ldan 'das ji ltar na/ byang chub sems dpa' rnams gang yang dag par bsdu bar bgyi ba de la 'dod pa ma mchis pa lags/ ji ltar na yang dag par bsdu ba bgyi ba'i slad du brtson 'grus glad par mi bgyi ba lags/ bka' stsal pa// yang dag par bsdu ba zhes bya ba ni dge ba'i rtsa ba rnams so/ / de la 'dod pa med pa ni mi lta bar sems can rnams la btang ba'o// yang dag par bsdu ba la brtson 'grus mi glod pa ni dge ba'i rtsa ba la ngoms mi shes par brtson par bya ba ste de ni tshul lo/ / rigs kyi bu dag de lta bas na/ gting dpag dka' bar yang gyis shig/ spyod pa bsal ba la yang snang bar gyis shig/ gsol pa/ bcom ldan 'das ji ltar na/ byang chub sems dpa' rnams gting dpag dka' ba lags/ ji ltar na spyod pa la gsal ba la yang dga' ba lags/ bka' stsal pa/ gting dpag dka' ba zhes bya ba ni zab ba la snyoms par 'jug pa ste/ gang la nyan thos dang / rang sangs rgyas rnams kyis kyang gting mi rnyed pa'o// spyod pa gsal ba la yang snang ba zhes bya ba ni byis pa so so'i skye bo'i chos rnams dang / 'dra bar bya ba ste de ni tshul lo// rigs kyi bu dag de lta bas na/ lam las bzur bar gyis shig/ lam gol ba na yang snang bar gyis shig/ yang dag pa'i lam yang 'dor cig/ gsol pa/ bcom ldan 'das ji ltar na/ byang chub sems dpa' rnams lam las 'dzur ba lags/ ji ltar na lam gol ba na yang gda' ba lags/ ji ltar na yang dag pa'i lam mi 'dor ba lags bka' stsal pa/ lam las 'dzur ba zhes bya ba ni nyan thos dang / rang sangs rgyas kyi lam las 'byol ba'o// lam gol ba na snang ba ni sems can yongs su smin par bya ba'i phyir ro// yang dag pa'i lam mi 'dor ba 'di lta ste/ pha rol tu phyin pa drug gi lam ste de ni tshul lo// rigs kyi bu dag de lta bas na/ phyir mi ldog pa'i go cha yang bgo bar gyis shig/ thams cad las kyang phyir mi ldog par gyis shig/ phyir log nas kyang sgrol cig/ gsol pa/ bcom ldan 'das ji ltar na/ byang chub sems dpa' rnams phyir mi ldog pa'i go cha bgos pa lags/ ji ltar na thams cad las phyir ldog pa lags/ ji ltar na phyir ldog nas sgrol ba lags/ bka' stsal pa/ phyir mi ldog pa'i go cha bgos zhes bya ba ni chos dang mthun pa'i dam bcas pa la gnas pa'o/ / thams cad las phyir ldog pa ni chos dang mi mthun pa'i dam bcas pa las ldog pa'o// phyir log nas bsgral ba ni dag pa'i chos thams cad kyis te de ni tshul lo// rigs kyi bu dag de lta bas na 'dum par gyis shig/ rtag tu bye bar gyis shig/ brtan par gyis shig/ blo rgod cing mi rgod par yang gyis shig/ gsol pa/ bcom ldan 'das ji ltar na/ byang chub sems dpa' rnams 'dum pa lags/ ji ltar na rtag tu bye ba lags/ ji ltar na brtan pa lags/ ji ltar na blo rgod cing mi rgod pa lags bka' stsal pa/ 'dum pa zhes bya ba ni bdud zil gyis mnan pa'i phyir ro/ / rtag tu bye ba ni gcig nas gcig tu brgyud cing mi gnas pa'i sems gzhan dang gzhan shes pa'o// brtan pa ni bsgrub pa la'o// blo rgod cing mi rgod pa ni dge ba'i chos gzhan dang gzhan la dmigs pa'i phyir te de ni tshul lo/ / rigs kyi bu dag de lta bas na/ rjes su chags par yang gyis shig/ rtag tu zhes 'gras par yang gyis shig/ yun ring por blta bar yang gyis shig/ byas pa mi gzo bar yang gyis shig/ gsol pa/ bcom ldan 'das ji ltar na/ byang chub sems dpa' rnams rjes su chags pa lags/ ji ltar na rtag tu zhe 'gras pa lags/ ji ltar/ yun ring por lta ba lags/ ji ltar na byas pa mi gzo ba lags/ bka' stsal pa/ rjes su chags pa zhes bya ba ni theg pa chen po la'o// zhe 'gras pa zhes bya ba ni theg pa dman pa la'o// yun ring por blta ba ni 'khor ba yongs su bzung ba'i phyir ro/ / byas pa mi gzo ba ni sdig pa byas pa rnams la phyir lan mi glon pa ste de ni tshul lo// rigs kyi bu dag de lta bas na gtong ba yang shin tu thong shig/ ser sna can du yang gyis shig/ 'dzin pa'i sems kyang med par gyis shig/ gsol pa/ bcom ldan 'das ji ltar na/ byang chub sems dpa' rnams gtong ba shin tu gtong ba lags/ ji ltar na ser sna can lags/ ji ltar na 'dzin pa'i sems ma mchis pa lags/ bka' stsal pa/ gtong ba shin tu btang ba ni sems can thams cad yongs su mi btang ba'i phyir/ sbyin pa btang ba'o// ser sna can du bya ba ni snod du ma gyur pa rnams la'o/ / 'dzin pa med pa'i sems su bya ba ni/ chos la slob dpon gyi pe mkhyud med pa'i phyir te de ni tshul lo// rigs kyi bu dag de lta bas na gang dag spangs pa de/ dag ni yongs su zung shig/ gang dag yongs su bzung ba de dag ni yal bar zhog shig/ nad pa ltar yang gyis shig/ na ba rnams kyang gsos shig/ gsol pa/ bcom ldan 'das ji ltar na/ byang chub sems dpa' rnams gang dag yongs su 'dzin pa lags/ ji ltar na gang dag yongs su bzung ba de dag yal bar 'jog pa lags/ ji ltar na nad pa lta bur gyur pa lags/ ji ltar na na ba rnams kyang gsol ba lags/ bka' stsal pa/ gang dag spangs pa de dag yongs su gzung ba ni log pa nyid du nges pa'i sems can sangs rgyas thams cad kyis spangs pa dag/ byang chub sems dpas yongs su bzung bar bya ba'o// gang dag yongs su bzung ba de dag yal bar gzhag pa ni/ slob pa dang mi slob pa thams cad do// nad pa ltar yang bya zhing na ba rnams kyang gso bar bya ba ni bsams bzhin du rga ba dang na ba bstan nas so so'i skye bo rnams la chos bstan pa ste de ni tshul lo/ / rigs kyi bu dag de lta bas na/ bdud kyi las rnams ni 'bar bar gyis shig/ sangs rgyas kyi chos rnams ni zhi bar gyis shig/ gsol pa/ bcom ldan 'das ji ltar na byang chub sems dpa' rnams bdud kyi las rnams ni 'bar bar bgyid pa lags ji ltar na sangs rgyas kyi chos rnams ni zhi bar bgyid pa lags/ bka' stsal pa/ bdud kyi las 'bar bar byed pa ni dge ba'i chos la brtson pa rnams la'o// sangs rgyas rnams kyi chos zhi bar byed pa ni// chos thams cad nyon mongs pa dang / nye ba'i nyon mongs pa med par sbyor ba ste de ni tshul lo// rigs kyi bu dag de lta bas na bdud rnams dang ni 'thab par gyis shig/ ston pa ni mtshol cig gsol ba/ bcom ldan 'das ji ltar na/ byang chub sems dpa' rnams bdud dang 'thab pa lags/ ji ltar na ston pa mi tshol ba lags/ bka' stsal pa/ bdud dang 'thab par bya ba ni byang chub sems dpa' dag gang gi tshe/ sems can rnams yongs su smin par byed pa de'i tshe/ bar chad bya ba'i phyir bdud brtson par byed pa na'o// ston pa mi tshol ba ni dge ba'i chos thams cad dang ldan pa ste de ni tshul lo/ / rigs kyi bu dag de lta bas na/ gang dag nyan thos kyis smad par bya ba de khyed kyis ma smad cig/ gang la nyan thos mngon par dga' ba de la khyed dga' bar ma byed cig gsol pa/ bcom ldan 'das ji ltar na/ byang chub sems dpa rnams gang dag nyan thos kyis sman par bgyid pa de dag la mi smad pa lags/ ji ltar na gang la nyan thos dga' ba de la mi dga' ba lags/ bka' stsal pa/ nyan thos ni skye ba'i gnas rnams la smod de/ de dag khyed kyis smad par mi bya'o// nyan thos ni rang yongs su mya ngan las 'da' ba la mngon par dga' na/ de la khyed kyis mngon par dga' bar mi bya ste/ do ni tshul lo// rigs kyi bu dag de lta bas na/ 'jig rten na gnas par gyis shig/ 'jig rten gyi chos rnams myong bar gyis shig/ 'jig rten gyis kyang ma gos par gyis shig/ 'jig rten na thogs pa rnams kyang sgrol cig/ gsol pa/ bcom ldan 'das ji ltar na/ byang chub sems dpa' rnams 'jig rten na gnas pa lags / ji ltar na 'jig rten gyi chos rnams myong ba lags/ ji ltar na 'jig rten gyis mi gos pa lags/ ji ltar na 'jig rten du thogs pa sgrol ba lags/ bka' stsal pa/ 'jig rten na gnas par bya ba ni 'dod pa dang / gzugs dang / gzugs med pa'i rnams su'o// 'jig rten gyi chos rnams myong bar bya ba ni 'jig rten gyi chos brgyad po dag go// 'jig rten gyis mi gos par bya ba ni bde ba dang sdug bsngal gyis mi bskyod pa'i phyir ro/ / 'jig rten du thogs pa bsgral ba ni khams gsum gyi btson ra nas 'don pa ste de ni tshul lo// rigs kyi bu dag de lnga bsan yang bar gyis shig/ lci bar gyis shig/ sdug bsngal bar gyis shig/ bde bar gyis shig/ gsol pa/ bcom ldan 'das ji ltar na/ byang chub sems dpa' rnams yang ba lags ji ltar na lci ba lags/ ji ltar na sdug bsngal ba lags/ ji ltar na bde ba lags/ bka' stsal pa/ yang ba ni sems can thams cad kyi bya ba ci yod pa la snying las su byed pa'o// lci ba ni yid dam la bstan pa'o// sdug bsngal bar bya ba ni mi mthun pa'i gnyen po rnams la'o// bde bar bya ba ni bsod nams byas pa'i phyir te de ni tshul lo// rigs kyi bu dag de lta bas na/ mi snang bar yang gyis shig/ thams cad du snang bar yang gyis shig/ byol bar bya ba rnams las ni byol cig/ bsdad par bya ba rnams la ni sdod cig/ gsol pa/ bcom ldan 'das ji ltar na/ byang chub sems dpa' rnams la mi gda' ba yang lags/ ji ltar na thams cad du gda' ba yang lags/ ji ltar na byol bar bgyi ba rnams la byol ba lags/ ji ltar na bsdad par bgyi ba rnams la sdod pa lags/ bka' stsal pa/ mi snang bar bya ba ni ltung ba dang 'khrul pa thams cad las yang dag par 'das par bya'o// thams cad du snang bar yang bya ba ni// byang chub kyi phyogs kyi chos yang dag par bsgrub pa'i phyir ro// byol bar bya ba rnams las byol ba ni 'thab mo dang / rtsod pa rnams las so// bsdad par bya ba rnams la sdod pa ni/ sems can tshegs par bya ba'i phyir te de ni tshul lo/ / rigs kyi bu dag de lta bas na ma byas pa rnams la yang gnas par gyis shig/ byas pa rnams la yang gnas par gyis/ byas pa dang ma byas pa rnams la yang sems mnyam par gyis shig/ gsol pa/ bcom ldan 'das ji ltar na/ byang chub sems dpa' rnams ma bgyis pa rnams la gnas pa lags/ ji ltar na bgyis pa rnams la yang gnas pa lags/ ji ltar bgyis pa dang ma bgyis pa rnams la yang sems mnyam pa lags/ bka' stsal pa/ ma byas pa rnams la yang gnas pa ni dge ba'i rtsa ba yang dag par bsgrub pa'i phyir ro/ / byas pa rnams la gnas pa ni/ dge ba'i rtsa ba de'i gong ma'i chos dang sbyar bar bya ba'i phyir ro// byas pa dang ma byas pa rnams la sems mnyam par bya ba ni/ tshul khrims dang ldan pa dang tshul khrims 'chal pa rnams la bye brag med pa'i 'du shes su bya ba ste de ni tshul lo// rigs kyi bu dag de lta bas na/ snying po med pa las kyang snying po tshol cig/ snying po la yang snying po med pa'i 'du shes bskyed cig/ snying po dang snying po med pa la yang spyod cig/ gsol pa/ bcom ldan 'das ji ltar na byang chub sems dpa' rnams snying po ma mchis pa la snying po tshol ba lags/ ji ltar na snying po la snying po ma mchis par 'du shes bskyed pa lags/ ji ltar na snying po dang snying po ma mchis pa la spyod pa lags/ bka' stsal pa/ snying po med ces bya ba ni/ lus dang srog dang longs spyod rnams te/ de las dam pa'i chos yongs su rdzogs par bya bas snying po btsal ba'o// / snying po zhes bya ba ni/ 'dus ma byas te/ sangs rgyas kyi chos la gzud pa'i phyir te de la snying po ma yin pa'i 'du shes bskyed par bya'o// snying po dang snying po ma yin pa la spyod pa ni/ 'dus byas dang 'dus ma byas kyis chos rnams la blo btang ba ste de ni tshul lo/ / rigs kyi bu dag de lta bas na/ dam bcas pa ni nyam par gyis shig/ tshul khrims ni ma nyams par gyis shig/ tshul khrims 'chal pa rnams la ni ltos shig/ tshul khrims dang ldan pa rnams ni yal bar zhog shig/ gsol pa/ bcom ldan 'das ji ltar na/ byang chub sems dpa' rnams dam bcas pa nyams par bgyid pa lags/ ji ltar na tshul khrims ma nyams pa lags/ ji ltar na tshul khrims 'chal pa rnams la lta ba lags/ ji ltar na tshul khrims dang ldan pa rnams yal bar gzhog pa lags/ bka' stsal pa// dam bcas pa nyams par bya ba ni dge ba'i rtsa ba gong ma dang / gong ma la lhags par dmigs pa'i phyir ro// tshul khrims ma nyams par bya ba ni byang chub kyi sems la lhag par dmigs pa'i phyir ro/ / tshul khrims 'chal pa rnams la lta ba ni/ tshul khrims la sbyar ba'i phyir ro// tshul khrims dang ldan pa rnams yal bar bzhag pa ni bya ba byas pa'i phyir te de ni tshul lo/ / rigs kyi bu dag de lta bas na/ gzhan gyi nor la dga' bar gyis shig/ rang gi nor ni yongs su mthong shig/ nye bar gnas par gyis shig/ gsol pa/ bcom ldan 'das ji ltar na/ byang chub sems dpa' rnams gzhan gyi nor la dga' ba lags/ ji ltar na rang gi nor yongs su gtong ba lags/ ji ltar na nye bar gnas pa lags/ bka' stsal pa/ gzhan gyi nor la mngon par dga' ba zhes bya ba ni/ byang chub sems dpa' dang / nyan thos dang / rang sangs rgyas thams cad dang / sems can thams cad kyi bsod nams la rjes su yi rang bar bya ba'o/ / rang gi nor yongs su btang ba ni/ rang gi dge ba'i rtsa ba rnams sems can thams cad la yongs su gtang bar bya ba'o// nye bar gnas par bya ba ni byang chub tu yongs su bsngo ba'i phyir te de ni tshul lo/ / rigs kyi bu dag de lta bas na mchog tu phyin par yang gyis shig/ sems dma' bar yang gyis shig/ le lo can du yang gyis shig/ rtag tu brtson par yang gyis shig/ gsol pa/ bcom ldan 'das ji ltar na/ byang chub sems dpa' rnams mchog tu phyin pa lags/ ji ltar na sems dma' ba lags/ ji ltar na le le can lags/ ji ltar na rtag tu brtson pa lags/ bka' stsal pa/ mchog tu phyin pa ni shes rab dang ye shes kyis so// sems dma' ba ni nga rgyal med pa'i phyir ro// le lo can ni nyan thos dang / rang sangs rgyas kyis thob par bya ba la'o// rtag tu brtson pa ni pha rol tu phyin pa rnams la ste de ni tshul lo// rigs kyi bu dag de lta bas na mi bsrun par yang gyis shig/ dul ba'i sa la gnas par yang gyis shig/ 'jigs par yang gyis shig/ seng ge'i rtsal gyis rnam par gnon par yang gyis shig/ gsol pa/ bcom ldan 'das ji ltar na byang chub sems dpa' rnams mi bsrun pa lags// ji ltar na dul ba'i sa la gnas pa lags/ ji ltar na 'jigs pa lags/ ji ltar na seng ge'i rtsal gyis rnam par gnon pa lags/ bka' stsal pa/ mi bsrun par bya ba ni bdud thams cad gdul ba'i phyir ro/ / dul ba'i sa la gnas pa ni sems can cang shes gdul ba'i phyir ro// 'jigs par bya ba ni sdig pa thams cad las so// seng ge'i rtsal gyis rnam par gnon par bya ba ni phas kyi rgol ba thams cad sma dbab pa'i phyir te de ni tshul lo/ / rigs kyi bu dag de lta bas na yid du 'ong bar yang gyis shig/ yid du mi 'ong bar yang gyis shig/ smad du med par yang gyis shig/ smad du yod par yang gyis shig/ gsol pa/ bcom ldan 'das ji ltar na byang chub sems dpa' rnams yid du 'ong ba lags/ ji ltar na yid du mi 'ong ba lags/ ji ltar na smad du ma mchis pa lags/ ji ltar na smad du mchis pa lags/ bka' stsal pa/ yid du 'ong bar bya ba ni yon tan gyis phyug pa'i phyir/ sangs rgyas thams cad kyi thugs su byon pa'o// yid du mi 'ong ba ni mngon par shes pa thams cad kyis rnam par 'phrul pa'i phyir/ bdud thams cad kyi yid du mi 'ong ba'o// smad du med pa ni lus dang ngag dang / yid yongs su dag pa'i phyir ro// smad du yod pa ni mi dge ba'i chos thams cad la smod pa'i phyir te do ni tshul lo/ / rigs kyi bu dag de lta bas na/ rma byung ba rnams la rmam 'byin cig/ rma ma byung ba rnams la rma phyung shig/ ye shes tshol cig/ ye shes kyi bya ba rnams la dga' bar ma byed cig/ gsol pa/ bcom ldan 'das ji ltar na/ byang chub sems dpa' rnams rma byung ba rnams la rma mi 'byin pa lags/ ji ltar na rma ma byung ba rnams la rma 'byin pa lags/ ji ltar na ye shes tshol ba lags/ ji ltar na ye shes kyi bgyi ba rnams la mi dga' ba lags/ bka' stsal pa/ rma byung ba rnams zhes bya ba ni nyan thos dang rang sangs rgyas kyi sa ste/ de la rma dbyung bar mi bya'o// rma ma byung ba rnams zhes bya ba ni/ so so'i skye bo thams cad de/ de dag ni rmad byung bar bya'o// ye shes btsal bar bya ba ni zad pa dang mi skye ba shes pa'o/ / ye shes kyi bya ba la dga' bar mi bya ba ni 'dus ma byas su ltung bar mi bya ste de ni tshul lo// rigs kyi bu dag de lta bas na mnyam par gzhag par yang gyis shig/ sems rnam par g.yeng bar yang gyis shig/ sems mi gnas par yang gyis shig/ rtag tu snyoms par zhugs par yang gyis shig/ gsol pa/ bcom ldan 'das ji ltar na/ byang chub sems dpa' rnams mnyam par gzhag pa lags/ ji ltar na sems rnam par g.yeng bar bgyid pa lags/ ji ltar na sems mi gnas pa lags/ ji ltar na rtag tu snyoms par zhugs pa lags/ bka' stsal pa/ mnyam par gzhag pa ni byang chub kyi sems kyis so// sems rnam bar g.yeng bar bya ba ni nyan thos kyi sems las so// mi gnas pa ni de la mi chags pa'i phyir ro/ / rtag tu snyoms par zhugs pa ni/ sems can thams cad la sems mnyam pa'i phyir te de ni tshul lo// rigs kyi bu dag de lta bas na bsreg par bya ba ni sre shig/ tshig pa ni bskyed cig/ skyes pa ni thong shig/ rnam par phye ba ni sdub shig/ gsol pa/ bcom ldan 'das ji ltar na/ byang chub sems dpa' rnams sreg par bgyi ba bsreg pa lags ji ltar na tshig pa rnams bskyed pa lags/ ji ltar na skyes pa rnams gtong ba lags/ ji ltar na rnam par phye ba rnams sdud pa lags/ bka' stsal pa/ bsreg par bya ba sregs pa ni nyen mongs pa thams cad shes rab kyi mes bsreg pa'o/ / tshig pa bskyed pa ni/ thabs kyis phung po dang / khams dang / skye mched rnams gzung ba'o// skyes nas gtong ba ni sems can thams cad kyi bya ba ci yod pa la snying las su bya ba'o/ / rnam par phye ba bsdu ba zhes bya ba de ni yongs su bsngo ba'i tshig bla dgas so// rigs kyi bu dag de lta bas na/ dus ma yin pa ni dus su shes par gyis shig/ dus ni dus ma yin par shes par gyis shig/ dus dang dus ma yin pa la mkhas par yang gyis shig/ gsol pa/ bcom ldan 'das ji ltar na/ byang chub sems dpa' rnams dus ma lags pa la dus su 'tshal ba lags/ ji ltar na dus la dus ma lags par 'tshal ba lags/ ji ltar na dus dang dus ma lags pa la mkhas pa lags bka' stsal pa/ gang nyan thos kyi sa thob par bya ba'i dus de ni/ byang chub sems dpa'i dus ma yin no// pha rol tu phyin pa thams cad yongs su rdzogs par byas te/ bla na med pa yang dag par rdzogs pa'i byang chub tu mngon par rdzogs par 'tshang rgya ba ni/ byang chub sems dpa'i dus so// dus dang dus ma yin pa la mkhas par bya ba ni/ dus bzhin du dge ba'i rtsa ba yang dag par bsgrub pa'i phyir te de ni tshul lo/ / rigs kyi bu dag de lta bas na/ 'byor pa ni phye shig/ ma 'byor pa ni sbyor cig/ 'byor pa dang ma 'byor pa la chags par ma byed cig/ gsol ba bcom ldan 'das ji ltar na byang chub sems dpa' rnams 'byor pa byed pa lags/ ji ltar nam 'byor pa rnams ni sbyor ba lags/ ji ltar na sbyor ba dang / mi sbyor ba la ma chags pa lags/ bka' stsal pa/ 'byor pa ni phyin ci log bzhi 'khor ba'i 'dam dang 'byor pa ste/ de ni byang chub sems dpas dbye bar bya'o// ma 'byor pa ni mya ngan las 'das pa'i tshul bzhin yid la bya ba ste/ de ni byang chub sems dpas sbyar bar bya'o// 'byor pa dang ma 'byor pa la chags par mi bya ba ni/ nyan thos dang / rang sangs rgyas kyi spyod pa dang / so so'i skye po'i spyod pa la ma chags par bya ba ste de ni tshul lo/ / rigs kyi bu dag de lta bas na/ dbugs phyin pa rnams ni dbugs ma dbyung shig/ dbugs ma phyin pa rnams ni dbugs phyung shig/ gsol pa/ bcom ldan 'das ji ltar na/ byang chub sems dpa' rnams dbugs phyin pa rnams dbugs mi 'byin pa lags/ ji ltar na dbugs ma phyin pa rnams dbugs 'byin pa lags// bka' stsal pa/ dbugs phyin pa rnams dbugs mi dbyung ba ni yongs su smin pa'i sems can rnams yongs su smin par mi bya ba'o// dbugs ma phyin pa rnams dbugs dbyung ba ni yongasus smin pa'i sems can rnams yongs su smin par bya ba ste de ni tshul lo/ / rigs kyi bu dag de lta bas na/ rma byung bar yang gyis shig/ rma smras par yang gyis shig/ rma byung ba rnams ni sos par gyis shig/ rma ma byung ba rnams ni rma ma 'byung shig/ gsol pa/ bcom ldan 'das ji ltar na/ byang chub sems dpa' rnams rma 'byin pa lags/ ji ltar na ma smras pa lags/ ji ltar na rma byung ba gso ba lags/ ji ltar na rma ma byung ba rma mi 'byin pa lags/ bka' stsal pa/ rma 'byung ba ni yan lag dang nying lag yongs su gtang ba'i phyir ro// ma smas par bya ba ni sems kyis so/ / ma byung ba rnams gso ba ni ltung ba byang ba rnams chos bzhin du bcos pa'o// rma ma byung ba rma mi dbyung ba ni srog gi phyir yang bslab pa las 'gal bar mi bya ba ste de ni tshul lo/ / rigs kyi bu dag de lta bas na/ nye bar 'tshor med par yang gyis shig/ sems can thams cad nye bar 'tsho bar yang gyis shig/ ma bsags pa rnams kyang bsogs shig/ bsags pa rnams kyang sgrogs shig/ bsags pa rnams kyang chud ma gzon cig/ gsol pa/ bcom ldan 'das ji ltar na/ byang chub sems dpa' rnams nye bar 'tshor ma mchis pa lags/ ji ltar na sems can thams cad nye bar 'tsho ba lags/ ji ltar nam bsags pa bsog pa lags/ ji ltar na bsags pa chud mi gzon pa lags/ bka' stsal pa/ nye bar 'tsher med pa ni bdud dang / mu stegs can thams cad kyis klags mi rnyed pa'o// sems can thams cad nye bar 'tsho ba ni dpag bsam gyi shing lta bu'o// ma bsags pa bsogs pa ni dge ba'i rtsa ba bskyed pa'i phyir ro/ / bsags pa chud mi gzon pa ni dge ba'i sems skyes so cog byang chub tu yongs su bsngo ba ste de ni tshul lo// rigs kyi bu dag de lta bas na stobs chung bar yang gyis shig/ stobs dang ldan par yang gyis shig/ rten pa med par yang gyis shig/ dpung gnyen med par yang gyis shig/ gsol pa/ bcom ldan 'das ji ltar na/ byang chub sems dpa' rnams stobs chung ba lags/ ji ltar na stobs dang ldan pa lags/ ji ltar na rten pa ma mchis pa lags/ ji ltar na dpung gnyen ma mchis pa lags/ bka' stsal pa/ stobs chung ngu bya ba ni gnod par byed pa rnams la lan mi bya ba'o// stobs dang ldan par bya ba ni/ phan par mi byed pa rnams la bzod pas phan gdags pa'o/ / rten pa med par bya ba ni so so rang gis shes pas so// dpung gnyen med par bya ba ni gzhan gyi dring mi 'jog pa ste de ni tshul lo// rigs kyi bu dag de lta bas na dang bdag ni rnyog pa can du gyis shig/ rnyog pa can dag ni dang bar gyis shig/ rnyog pa med par yang gyis shig/ rtag tu dang bar yang gyis shig/ gsol pa/ bcom ldan 'das ji ltar na/ byang chub sems dpa' rnams dang bdag rnyog pa can du bgyid pa lags/ ji ltar na rnyog pa can dag ni dang bar bgyid pa lags/ ji ltar na rnyog pa ma mchis pa lags/ ji ltar na rtag tu dang ba lags/ bka' stsal pa/ dang bdag rnyog pa can du bya ba ni/ mnyam par gzhag pa'i sems la dge ba'i rtsa ba dag gis bsgo ba'o// rnyog pa can dag dang bar bya ba ni nyon mongs pas rnyog pa'i sems byang chub kyi sems su dang bar bya ba'o/ / rnyog pa med par bya ba ni nyon mongs pa thams cad bsal ba'o// rtag tu dang bar bya ba ni sems can thams cad la sems dang ba ste de ni tshul lo/ / rigs kyi bu dag de lta bas na lugs las bzlog par yang gyis shig/ lugs bzhin du yang slobs shig/ spyi'u tshugs kyi rgyud kyang shes par gyis shig/ gsol pa/ bcom ldan 'das ji ltar na/ byang chub sems dpa' rnams lugs las bzlog par 'jugs pa lags/ ji ltar na lugs bzhin du slob pa lags/ ji ltar na spyi'u tshugs kyi rgyud 'tshal ba lags/ bka' stsal pa/ lugs las bzlog par 'jug par bya ba ni byis pa so so'i skye bo thams cad kyi spyod pa las phyir log pa'o// lugs bzhin du bslab pa ni byang chub sems dpa'i bslab pa thams cad la'o/ / spyi'u tshugs kyi rgyud shes par bya ba ni 'du shes med 'du shes med min gyi skye mched kyi snyoms par 'jug par las log ste/ 'dod pa'i khams su snang bar bya ba ste de ni tshul lo/ / rigs kyi bu dag de lta bas na/ bdud rtsi dang dug tu ma badres par gyis shig/ dug med pa rnams dang yang ma bsten cig/ dug dang ldan pa rnams la bdud rtsi'i sbyin pa gyis shig/ gsol pa/ bcom ldan 'das ji ltar na/ byang chub sems dpa' rnams bdud rtsi dang dug tu ma 'dres pa lags/ ji ltar na dug ma mchis pa rnams dang mi bsten pa lags/ ji ltar na dug dang ldan pa rnams la bdud rtsi'i sbyin pa bgyid pa lags/ bka' stsal pa/ bdud rtsi zhes bya ba ni bag yod pa'o// dug ces bya ba ni bag med pa ste/ de la byang chub sems dpas bag yod par bya zhing / bag med pa'i sems dang ma 'dres par bya'o// dug med pa rnams zhes bya ba ni nyan thos rnams te/ de dag dang bsten par mi bya'o/ / dug dang ldan pa zhes bya ba ni so so'i skye bo rnams te/ de dag la bdud rtsi bstan par bya ste de ni tshul lo// rigs kyi bu dag de lta bas na mngon par dga' bar bya ba la ni mngon par dga' bar ma byed cig/ mngon par dga' bar mi bya ba la mngon par dga' bar gyis shig/ dga' ba dang 'dod chags dang ldan par yang gyis shig/ dga' ba dang 'dod chags yongs su gcad par yang gyis shig/ gsol pa/ bcom ldan 'das ji ltar na byang chub sems dpa' rnams mngon par dga' bar bgyi ba la mngon par dga' bar mi bgyid pa lags ji ltar na mngon par dga' bar mi bgyid pa la mngon par dga' bar bgyid pa lags/ ji ltar na dga' pa dang 'dod chags dang ldan pa lags/ ji ltar na dga' ba dang 'dod chags yongs su gcod pa lags/ bka' stsal pa/ mngon par dga' ba zhes bya ba ni/ ngar 'dzin pa dang / nga yir 'dzin pa ste/ de dag la mngon par dga' bar mi bya'o// mngon par mi dga' ba ni bdud rnams kyis sangs rgyas kyi ye shes la ste/ de la mngon par dga' bar bya'o// dga' ba dang 'dod chags dang ldan par bya ba ni 'khor ba na sred pa ni zla yin pa'o// dga' ba dang 'dod chags yongs su gcad pa ni/ 'gog pa yongs su shes par bya ba ste de ni tshul lo// rigs kyi bu dag de lta bas na bcing bas bcings par yang gyis shig/ bcing bas bcings pa rnams kyang khrol cig/ grol ba rnams la yang bsnyen bkur gyis shig/ ma grol ba rnams kyi rjes su yang 'brang bar gyis shig/ gsol pa/ bcom ldan 'das ji ltar na/ byang chub sems dpa'/ rnams bcing bas bcings pa lags/ ji ltar na bcings pa rnams 'grol ba lags/ ji ltar na grol ba rnams la bsnyen bkur bgyid pa lags/ ji ltar na ma grol ba rnams kyi rjes su 'brang ba lags/ bka' stsal pa/ bcing bas bcings par bya ba ni bslab pa'i bcing bas so// bcings pa rnams 'grol ba ni sred pa'i bcing ba las so// grol ba rnams la bsnyen bkur bya ba ni/ nyan thos dang / rang sangs rgyas rnams la'o// ma grol ba rnams kyi rjes su 'brang bar bya ba ni/ byis pa so so'i skye bo rnams yongs su smin par bya ba ste de ni tshul lo// rigs kyi bu dag de lta bas na 'dod par bya ba rnams la ni 'dod par gyis shig/ 'dod par mi bya ba rnams la ni 'dod par ma byed cig/ 'dod pa dang bral bar yang gyis shig/ gsol pa/ bcom ldan 'das ji ltar na/ byang chub sems dpa' rnams 'tshal bar bgyi ba rnams 'tshal ba lags/ ji ltar na 'tshal bar mi bgyi ba rnams mi 'tshal ba lags ji ltar na 'tshal ba dang bral ba lags/ bka' stsal pa/ byang chub sems dpa'i 'dod par mi bya ba ni/ nyan thos dang / rang sangs rgyas thams cad de/ de dag la 'dod par mi bya'o// lha dang bcas pa'i 'jig rten gyi khams 'dod par bya ba ni sangs rgyas bcom ldan 'das rnams te/ de dag la 'dod par bya'o// 'dod pa dang bral bar bya ba ni brgya byin dang tshangs par skye ba la ste de ni tshul lo/ / rigs kyi bu dag de lta bas na/ ji tsam du chung ba'i sa bon la yang ma brnyas shig/ zhing tshad med pa la yang mos par gyis shig/ thob pa chen po ni ma sgrub cig gsol pa/ bcom ldan 'das ji ltar na/ byang chub sems dpa' rnams ji tsam du chung ba'i sa bon la yang brnyas par mi bgyid pa lags ji ltar na zhing tshad ma mchis pa la yang mos pab lags/ ji ltar na thob pa chen po mi sgrub pa lags/ bka' stsal pa/ ji tsam du chung ba'i sa bon zhes bya ba ni ji tsam du chung ba'i dge ba'i rtsa ba ste/ de la brnyas par mi bya'o// zhing tshad med pa la yang mos par bya ba ni sangs rgyas la phul ba'i sbyin pa tshad med pa la mos par bya ba'o// thob pa chen po mi sgrub pa ni sems can thams cad la sbyin pa'i phyir te de ni tshul lo// rigs kyi bu dag de lta bas na/ chags pa rnams ni khong du chud par gyis shig/ chags pa rnams la ni spyod cig/ chags pa la zhen pa rnams la ni ltos shig/ chags pa med par ni ma ltung zhig/ gsol pa/ bcom ldan 'das ji ltar na byang chub sems dpa' rnams chags pa rnams 'tshal ba lags/ ji ltar na chags pa rnams la spyod pa lags/ ji ltar na chags pa la zhen pa rnams la lta ba lags/ ji ltar na chags pa ma mchis pa nyid du mi ltung ba lags/ bka' stsal pa/ chags pa shes par bya ba ni theg pa dman pa la 'dod pa dang khong khro ba'i sems te de gnyis ni byang chub sems dpas bsrung bar bya'o/ / chags pa rnams la sprad pa ni 'dod pa dang / gzugs dang / gzugs med pa rnams su'o// chags pa la zhen pa rnams la blta/ ba ni/ chags pa med pa nyid du mi ltung ba ni mngon par 'du bya ba med pa ste de ni tshul lo// rigs kyi bu dag de lta bas na/ yang bar yang gyis shig/ khur chen po yang khyer cig/ ma blang pa ni ma len cig/ blangs pa ni nyams 'og tu chud par gyis shig/ gsol pa/ bcom ldan 'das ji ltar na/ byang chub sems dpa' rnams yang ba lags/ ji ltar na khur chen po khyer ba lags/ ji ltar na ma blangs pa mi len pa lags/ ji ltar na blangs pa nyams 'og tu chud par bgyid pa lags/ bka' stsal pa/ yang bar bya ba ni nyon mongs pa thams cad do/ / khur chen po bkur ba ni sems can thams cad do// ma blangs pa mi blang ba ni nyan thos dang / rang sangs rgyas thams cad kyi theg pa'o// blangs pa nyams 'og tu chud par bya ba ni theg pa chen po ste de ni tshul lo/ / rigs kyi bu dag de lta bas na/ smad par yang gyis shig/ bstod par gyis shig/ nye bar bsnyen par yang gyis shig/ spang bar yang gyis shig/ gsol pa/ bcom ldan 'das ji ltar na/ byang chub sems dpa' rnams smod pa lags/ ji ltar na bstod pa lags/ ji ltar na nye bar bsnyen pa lags/ ji ltar na spang ba lags/ bka' stsal pa/ smad pa ni mi dge ba'i chos thams cad smad pa'o// bstod pa ni dge ba'i chos thams cad bstod pa'o// bsnyen pa ni 'phags pa'i lam mo// spang ba ni mimedage ba'i phyogs kyi lam thams cad de de ni tshul lo/ / rigs kyi bu dag de lta bas na/ grong dang / grong khyer dang / yul 'khor dang / pho brang 'khor dag tu ni/ bsam gtan gyi stobs ston cig/ dgon pa dang / bas mtha' rnams su ni nyon mongs pa chung bar ston cig/ gsol pa/ bcom ldan 'das ji ltar na/ byang chub sems dpa' rnams grong dang / grong khyer dang / yul 'khor dang / pho brang 'khor rnams su bsam gtan gyi stobs ston pa lags/ ji ltar na dgon pa dang / bas mtha' rnams su nyon mongs pa chung bar ston pa lags/ bka' stsal pa/ grong dang / grong khyer dang / yul 'khor dang / pho brang 'khor dag tu phyin pa na/ gzugs dang / sgra dang / dri dang / ro dang / reg bya rags pa dag snang bar 'gyur te/ de dag ni bsam gtan gyi stobs kyis mnan par bya'o/ / dgon pa dang bas mtha' rnams na 'dug pa'i tshe/ nyon mongs pa gang dag skye bar 'gyur ba de dag ni dben pa'i yon tan gyis mnan par bya ste de ni tshul lo// rigs kyi bu dag de lta bas na chu'i nang du yang 'dug par gyis shig/ rtag par skom par yang gyis shig/ skom pa yang sol cig/ skom pa med par yang ma byed cig/ gsol pa bcom ldan 'das ji ltar na/ byang chub sems dpa' rnams chab kyi nang na mchis pa lags/ ji ltar na rtag tu skom pa lags/ ji ltar na skom pa bsal ba lags/ ji ltar na skom pa ma mchis par mi bgyid pa lags/ bka' stsal pa/ chu'i nang na 'dug par bya ba ni chos kyi chu la gnas par bya'o// rtag par skom par bya ba ni chos kyis skom par bya ba'o// skom pa bsal ba ni chos kyi bya ba sgrub pa'o// skom pa med par mi bya ba ni 'dus ma byas su ltung bar mi bya ba ste de ni tshul lo// rigs kyi bu dag de lta bas na/ gcig pu grogs med par yang gyis shig/ g.yog mang po dang 'khor mang po dang ldan par yang gyis shig/ gsol pa/ bcom ldan 'das ji ltar na/ byang chub sems dpa' rnams gcig pu grogs ma mchis par bgyid pa lags/ ji ltar na g.yog mang po dang 'khor mang po dang ldan pa lags/ bka' stsal pa/ gcig pu grogs med par bya ba ni/ dge ba'i rtsa ba thams cad yang dag par sgrub pa la'o/ / g.yog mang po dang ldan par bya ba ni dge ba'i rtsa ba de dag sems can thams cad kyis nye bar 'tsho bar bya'o// 'khor mang po dang ldan par bya ba la 'khor mang po zhes bya ba ni/ byang chub kyi phyogs pa'i chos te de ni tshul lo// rigs kyi bu dag de lta bas na/ grol bar yang gyis shig/ btson rang chud par yang gyis shig/ pha rol tu phyin par yang gyis shig/ chu bo chen po'i nang du 'dug par yang gyis shig/ gsol pa/ bcom ldan 'das ji ltar na/ byang chub sems dpa' rnams grol ba lags/ ji ltar na btson rar tshud pa lags/ ji ltar na pha rol tu phyin pa lags/ ji ltar na chu bo chen po'i nang du gnas pa lags/ bka' stsal pa/ grol bar bya ba ni nyon mongs pa dang bdud kyi bcing ba thams cad las so/ / btson rang chud par yang bya ba yang ni bsams bzhin du skye ba rnams so// pha rol tu phyin par yang bya ba ni sems can thams cad kyi skad shes pa la'o// chu bo chen po'i nang na gnas par yang bya ba ni/ chu bo bzhis khyer ba'i sems can sgrol ba'i phyir te de ni tshul lo// rigs kyi bu dag de lta bas na tshad yod pa la yang so sor rtog par gyis shig/ tshad med pa la yang mnyam pa nyid du khong du chud par gyis shig/ gsol pa/ bcom ldan 'das ji ltar na/ byang chub sems dpa' rnams tshad mchis pa la yang so sor rtog par lags/ ji ltar na tshad ma mchis pa yang mnyam pa nyid khong du chud par bgyid pa lags/ bcom ldan 'das kyis bka' stsal pa/ rigs kyi bu dag tshad yod pa zhes bya ba ni 'dus byas so// tshad med pa zhes bya ba ni 'dus ma byas ste/ de la byang chub sems dpas 'dus byas kyang spang bar mi bya ste/ 'dus byas su rtog pa'i nyon mongs pa rnams dang yang 'grogs par mi bya'o// 'dus ma byas la yang rtag par bya ste/ skyon med par yang 'jug par mi bya'o// 'dus byas dang / 'dus ma byas gcig pa'i mtshan nyid dang ldan pa'i shes rab kyis byang chub kyi snying por mnyam pa nyid du mngon par rdzogs par sangs rgyas par bya ste de ni tshul lo/ / tshul gyi tshig 'di dag bstan pa'i tshe/ lha'i bu brgyad stong ni byang chub tu sems bskyed par gyur to// byang chub sems dpa' lnga brgya ni mi skye ba'i chos la bzod pa thob par gyur to/ / bcom ldan 'das kyis de skad ces bka' stsal nas/ byang chub sems dpa' sems dpa' chen po rab tu mang po de dag dang / lha dang mi dang lha ma yin dang / dri zar bcas pa'i 'jig rten yi rang ste/ bcom ldan 'das kyis gsungs pa la mngon par bstod do// 'phags pa chos kyi tshul zhes theg pa chen po mdo rdzogs so/ / / rgya gar gyi mkhan po pradz+nyA bar ma dang / zhu chen gyi lo tsa ba ban+de ye shes sde la sogs pas bsgyur cing zhus te gtan la phab po//

CLOSE WINDOW