bam po gnyis pa// bod skad du/ bu mo rnam dag dang bas zhus pa zhes bya ba theg pa chen po'i ma do/ / / bam po dang po// sangs rgyas dang byang chub sems dpa' thams cad la phyag 'tshal lo// 'di skad bdag gis thos pa'i dus gcig na/ bcom ldan 'das mnyan yod na/ rgyal bu rgyal byed kyi tshal mgon med zas sbyin gyi kun dga' ra ba na/ dge slong gi dge 'dun chen po lnga brgya dang / byang chub sems dpa' sems dpa' chen po brgyad stong dang thabs cig tu bzhugs te/ thams cad kyang shes par bya ba rnams rab tu shes pa/ gzungs dang thogs med pa'i spobs pa thob pa/ bzod pa phun sum tshogs pa/ bdud kyi dpung rab tu bcom pa/ de bzhin gshegs pa rnams kyis brnyes pa'i chos rnams rab tu thob pa ga sdug la/ 'di lta ste/ byang chub sems dpa' 'jig rten 'dzin dang byang chub sems dpa' lam 'dzin dang / byang chub sems dpa' sa 'dzin dang / byang chub sems dpa' sa 'dzin chen po dang / byang chub sems dpa' mos pa'i blo gros dang / byang chub sems dpa' mos byed dang / byang chub sems dpa' gzugs mdzes bkod pa dang / byang chub sems dpa' rin po che tog dang / byang chub sems dpa' rin po che'i rgyal mtshan dang / byang chub sems dpa' rin chen sems dpa' dang / byang chub sems dpa' rin chen 'byung gnas dang / byang chub sems dpa' rin chen blo gros dang / byang chub sems dpa' rin chen yon tan dang / byang chub sems dpa' rin chen 'od dang / gzhan yang bskal ba bzang po'i byang chub sems dpa' byams pa la sogs pa gtso bor gyur pa dang thabs cig go// gzhan yang sems dpa' bla med pa'i byang chub sems dpa' 'jam dpal la sogs pa gtso bor gyur pa drug cu po de dag dang thabs cig go/ / gzhan yang skyes bu chen po byang chub sems dpa' bzang skyong la sogs pa gtso bo gyur pa bcu drug dang yang thabs cig go/ / gzhan yang dga' ldan gyi ris kyi lha'i bu nyi khri 'khor de nyid du 'dus par gyur pa dag dang yang thabs cig go// de'i tshe bcom ldan 'das bkod pa chen po'i mdzod ces bya ba seng ge'i gdan la 'khor brgya stong tshad med pa dag gis yongs su bskor nas bzhugs pas/ nyi zla lta bu'i 'od zer gyis ni kun tu snang bar mdzad/ brgya byin dang tshangs pa'i rgyal po ltar gzi byin gyis khyad par du 'phags/ ri'i rgyal po ri rab lta bur shin tu mtho zhing / phal las ni mngon par 'phags par gyur/ sgron ma chen po lta bur 'od zer dag ni rab tu 'bar/ glang po che'i rgyal po ltar phan tshun du ni gzigs par mdzad/ seng ge sgra sgrog pa ltar bsnyengs pa ma minga' bar ni chos ston par mdzad/ lha ma yin gyi rgyal po sgra gcan zin ltar 'khor mang po rnams ni zil gyis mnan/ / mtshan dang dpe byad bzang po dag gis ni sku rab tu brgyan/ gzi byin dang mthu stobs dag ni rab tu 'bar bar gyur te/ sems can thams cad ni nges pa'i don mchog la dgod cing khong du chud par mdzad pa'i phyir/ tshangs pa'i sgra dbyangs stong gsum gyi stong chen po'i 'jig rten gyi khams kun tu bsgrags nas/ 'khor mang po'i dbus na chos ston par mdzad do// de nas rgyal po gsal rgyal gyi bu mo rnam dag dang ba zhes bya ba gzhon nu ma byang bzhin sdug cing mdzes pas/ sems can rnams kyis mthong bar mos pa/ sngon dge ba'i rtsa ba bskyed pa// theg pa chen po bsgoms pa zhig yod pa de bu mo gzhon nu ma lnga brgyas yongs su bskor te/ so so nas gser gyi 'phreng ba thogs nas grong khyer mnyan yod nas byung ste/ rgyal bu rgyal byed kyi tshal du phyin pa dang / bcom ldan 'das kyi zhabs la spyi bos gtugs te/ phyag byas ras lan gsum bskor ba byas te/ bcom ldan 'das kyi spyan sngar phyogs gcig tu 'khod nas/ tshigs su bcad de mngon par bstod pa/ yun ring bsod nams rnam dag 'phrin las bsags/ yon tan rgya mtsho mtha' yas yongs rdzogs shing / / mang po dang mos dga' bar mdzad pas na/ de slang thub mchog khyod la bdag phyag 'tshal// gzi byin lham me ya mtshan rab ston cing // rin chen 'byung nas chos sgo ston par mdzad// sku yi 'od zer 'dom gang rtag gsal bas// blo chen bsil ba'i rdzi de la bdag phyag 'tshal// yon tan rdzogs shing bsod nams bas ma 'tshal/ / mi mchog khyod la 'jig rten kun gyis bsngags// smon lam chen po tshul khrims yongs rdzogs pas// de slad mchod 'os gtso la bdag phyag 'tshal// chos mchog rab gnas rtag par zhi zhing dben/ / 'jig rten kun la thugs snyoms bu gcig bzhin// mkhyen pa dag gis spyod rnams rab mkhyen pas// 'dren mkhan bzhin du mnyam pa'i shul yang ston/ / rab brtan brtson 'grus ldan par mchis 'gyur na// byams dang thugs rjes sems can sman mdzad pas// byang chub sems dpa'i spyod pa gang lags pa/ bzhin gshegs pa'i bkas ni bshad du gsol// ji ltar rab brtan stobs ni thob gyur nas// 'khor bar gnas kyang bdud dpung bam 'gyid lags// ji ltar mnyam pa'i chos ni thob 'gyur zhing / / ji ltar sems can yongs su smin bgyid lags// ji ltar bgyis na sa gzhi nam mkha' dang // rlung dang chu me ji lta bzhin du 'gyur// ji ltar yid ches thob nas chos gnas shing / / ri rab seng ge'i rgyal po bzhin du 'gyur// ji ltar byams sdang sems ni yongs spangs nas// sems gtsang drang la g.yo sgyu ma mchis 'gyur// ji ltar sbyin dang tshul khrims bzod pa dang / / brtson 'grus bsam gtan rnam grol skye 'gyur zhing // shes rab nyon mongs mun pa rab bcom zhing // rtag par thabs chen la ni gnas pa dang // ting 'dzin gzungs la thogs pa ma mchis shing // tshad med bzhi dang mngon shes lnga la gnas// ji ltar sangs rgyas spyan sngar gnas gyur nas// rtag par rdzus te skye zhing tshe rabs dran sbyangs pas brtsod pa ma mchis dgon gnas nas/ / sems ni rab btul nyon mongs zhi bgyid dang // tshul khrims ldan zhing byang chub lam sgom dang // bdud rtsi 'gag thob bdud dpung 'joms pa dang / / bde stsol chos kyi 'khor lo skor 'gyur ba// de 'dra'i yang dag lam ni bkas bshad gsol// de nas bcom ldan 'ad kyis bu mo rnam dag dang ba la bka' stsal pa/ byang chub sems dpa' gang stobs rnam pa brgyad dang ldan par gyur na/ 'khor ba na gnas kyang rab tu brtan pa'i dpa' bor 'gyur zhing / yongasu ngal ba med par 'gyur ro/ / brgyad gang zhe na/ dang po ni sems kyi 'dun pa'i stobs te/ g.yo sgyu med pa'i phyir ro// gnyis pa ni mos pa'i stobs te/ sdig pa rnams spong bar byed pa'i phyir ro// gsum pa ni sbyor ba'i stobs te/ rtag tu dge ba sgrub pa'i phyir ro// bzhi pa ni mngon par yid ches pa'i stobs te/ las kyi rnam par smin pa dag la shin tu mngon par yid ches pa'i phyir ro// lnga pa ni byang chub kyi sems kyi stobs te/ theg pa dma' ba rnams yongs su mi tshol ba'i phyir ro// drug pa ni byams pa chen po'i stobs te/ sems can la gnod pa mi byed pa'i phyir ro// bdun pa ni snying rje chen po'i stobs te/ gnod par byas pa rnams dang du len pa'i phyir ro// brgyad pa ni dge ba'i bshes gnyen gyi stobs te/ dus dus su sad par byed pa'i phyir ro// bu mo 'di ni stobs rnam pa brgyad ces bya ste/ byang chub sems dpa' gang stobs brgyad po 'di dag dang ldan par gyur na/ rab tu brtan pa'i dpa' bor 'gyur bas/ 'khor ba na gnas kyang mngon par zhen cing chags pa med par 'gyur ro/ / de nas bcom ldan 'das kyis yang tshigs su bcad de bka' stsal pa/ sems can 'dun pa gang yin pa// g.yo sgyu dag ni spong byed cing / rtag par drang por spyod pas na// yang dag byang chub gzhol bar 'gyur// mos pa'i stobs ni gang yin pa// nyes pa mang po spong byed cing // dge ba 'ba' zhig spyod pas na// yang dag brtson la gnas par 'gyur/ / sbyor ba phun sum tshogs gyur pa// rtag tu legs par rab brten nas// brtson 'grus brtan par gyur pas na// sems can rnams ni bde bar byed// mngon par yid ches stobs dbang gis/ / las kyi rnam smin rig pas na// sangs rgyas ye shes yid ches shing // 'jig rten yongs su sdud par 'gyur// byang chub sems stobs gang yin des// theg pa dma' ba spong byed cing // sangs rgyas gdung ni mi gcod pas// chos nyid la ni gnas par 'gyur// byams chen stobs kyi dbang gis ni// sems can snyoms par lta byed cing // byams sdang dag ni med pas na// zhe sdang gnod pa skyed mi 'gyur// snying rje chen po'i stobs kyis ni// sems can dang du len byed cing // 'khor ba dag la zhen med cing // yongs su skyo zhing ngal ba med/ / dge ba'i bshes gnyen stobs kyis ni// rtag par phan tshun bde byed cing // sems ni bying bar mi 'gyur bas// byang chub la ni gnas par 'gyur// dpa' bo gang yin de dag gis stobs brgyad 'di dag thob gyur nas/ / byang chub snying por 'dug nas ni// bdud dpung mang po bcom par 'gyur/ gzhan yang bu mo byang chub sems dpa' chos rnam pa brgyad dang ldan par gyur na/ mnyam pa nyid la rab tu gnas par 'gyur ro// brgyad gang zhe na/ dang po ni sems can thams cad mnyam par gyur pa ste// rang bzhin gyis bdag med pa'i phyir ro/ / gnyis pa ni chos thams cad mnyam par gyur pa ste/ chos thams cad rab tu dben pa'i phyir ro// gsum pa ni zhing thams cad mnyam par gyur pa ste/ stong pa nyid kyi khams su 'jug pa'i phyir ro// bzhi pa ni shes pa thams cad mnyam par gyur pa ste/ stong pa nyid du ston pa'i phyir ro// lnga pa ni spyod pa thams cad mnyam par gyur pa ste/ rgyu dang rkyen la rang bzhin med pa'i phyir ro// drug pa ni theg pa thams cad mnyam par gyur pa ste/ 'dus ma byas su mtshungs pa'i phyir ro// bdun pa ni sems mnyam par gyur pa ste/ sems sgyu ma dang mtshungs pa'i phyir ro// brgyad pa ni bdud rnams mnyam par gyur pa ste/ nyon mongs pa'i thibs po mi dmigs pa'i phyir ro// 'di ni chos rnam pa brgyad kyis mnyam pa nyid la rab tu gnas pa zhes bya'o/ / de nas bcom ldan 'das kyis yang tshigs su bcad de bka' stsal pa/ sems can rang bzhin bdag med pas/ skad cig tsam yang dmigs mi 'gyur/ / mnyam pa nyid la gang gnas pa// de lta bur ni bstan par bya// chos rnams thams cad mnyam pas na// rang bzhin rtag par stong zhing dben/ ges tha dad phye bar zad// chos rnams rang bzhin bye brag med// phyogs bcu'i zhing rnams thams cad kun// mu mtha' dag ni mi dmigs pas// de yi rang bzhin nam mkha' 'dra/ sangs rgyas zhing ni rtag tu mnyam// dus gsum de bzhin gshegs pa kun// chos dbyings gnas par mnyam pas na// ye shes mtha' yas rnam par grol// sangs rgyas kun kyang de bzhin ni/ / sems can rang bzhin rgyu rkyen rnams// thams cad kun kyang mnyam pa dang // de yi spyod par rab shes pas// ci rigs par ni go bar byed// sems can ji snyed tha dad pa// sgyu 'phrul lta bur rab tu rtogs// phyi nang gnyis ka len med pas// rab bzhin rtag tu rnam par dag/ theg pa sna tshogs rab bshad kyang // 'dus ma byas su rab tu mnyam/ / 'dzin pas thabs ni rab mkhyen pas// rnam par phye ste theg gsum bshad// nyon mongs bdud la rab gnas kyang // nyon mongs dngos po ci yang med lha dang phung po 'chi bdag bdud/ / spyod yul thams cad stong pa yin// gzhan yang bu mo byang chub sems dpa' chos brgyad dang ldan na/ byams sdang rnams yongs su spong bar byed do/ / brgyad gang zhe na/ byams pa dang ldan pa dang / snying rje dang ldan pa dang / rtag par phan 'dogs par byed pa dang / 'jig rten pa'i chos la ma chags pa dang / rang gi lus la chags pa med pa dang / rtag tu ting nge 'dzin gyi sems sgom pa dang / lus dang srog yongs su gtong ba dang / nyon mongs pa rnams la so sor rtog pa ste/ chos brgyad po 'di dag mngon par sgrub par nus na/ byams sdang yongs su spong bar 'gyur ro// de nas bcom ldan 'das kyis yang chibs su bcad de bka' stsal pa/ byam sems go cha rab 'gos nas/ / thams cad kun la snying brtse zhing // mnyam pa'i sems la gang gnas pa// byams sdang sems ni skye mi 'gyur// blo ldan phan 'dogs spyod pa na// rtag par gzhan la bde ba gtong / / rnyed pa thob kyang rang mi mthong // brnyas shing smad kyang kho na 'dzin med// rlung brgyad kyis ni mi bskyed pas// byams sdang dag ni mi skye zhing // bdag gam gal te gzhan yang rung / / byams sdang 'du shes yongs mi skye// 'du shes dag ni rab spangs nas// spyod yul dag la zhen pa med// rtag par rang gi lus rtogs pas// lus srog dag la 'phangs pa med/ / mkhas rnams sdug bsngal bde ba yis// g.yos par mi 'gyur nam mkha' bzhin// nyon mongs legs par rtogs byed na// bdag dang bdag gi gnyis ka spong // spyod 'dzin rtag par sa 'dra bas// byams sdang dag ni yongs mi skye// gzhan yang bu mo byang chub sems dpa' chos brgyad dang ldan na/ 'khor bas yongs su ngal bar mi 'gyur ro// brgyad gang zhe na/ dge ba'i rtsa ba yangs shing rgya che ba'i phyir dang / sems can la so sor rtog par byed pa'i phyir dang / rtag par de bzhin gshegs pa rnams mthong zhing mchod pa byed pa'i phyir dang sangs rgyas kyi zhing tshad med pa rnams mthong ba'i phyir dang / rtag par sangs rgyas kyi mkhyen pa yongs su gnyer ba'i phyir dang / 'khor ba rmi lam lta bur rab tu rtogs pa'i phyir dang chos khyad par can dag la zhum pa med pa'i phyir dang / sngon gyi mtha' dang / phyi ma'i mtha' dang / yang dag pa'i mtha' la so sor rtog pa'i phyir ro// de nas bcom ldan 'das kyis yang tshigs su bcad de bka' stsal pa/ rnal 'byor lam ni gang sgom pa// dge sbyong skyon 'phan dri ma med// bar snang rnam dag zla ba bzhin// sdug bsngal sems can sgrol bar byed// yon tan rnams ni bsdu ba'i phyir// 'khor bar yongs su ngal mi 'gyur// sems can rang bzhin rtog med cing // rab brtan brtson 'grus spyod par byed// sangs rgyas zhing ni tshad med dang // sangs rgyas rnams ni gus mchod pas// de phyir stobs bcu gang ldan pa// 'khor bas yongs su ngal mi 'gyur// 'jig rten tshad med dpag tu med// bsam gyis mi khyab chos ston cing // / dkon mchog gsum gdung mi gcod pas// chos rgyal nyid du mngon 'tshang rgya// tshul khrims dam por gang srung ba// 'khor bas ngal bar mi 'gyur zhing // 'khor ba'i rang bzhin gang yin pa/ / rmi lam sprin dang glog ltar shes// chos las gang zhig rnam grol ba// 'khor bas yongs su ngal mi 'gyur// byang chub la ni rab gnas shing // dga' ba'i sems kyis rtag tu bde/ / thabs kyi pha rol gang yin pa// 'khor bas yongs su ngal mi 'gyur// rtag par dam chos sgrub pa yang // bar snang zla bzhin 'phel bar 'gyur/ sangs rgyas yon tan gang mos pas// 'khor bas yongs su ngal mi 'gyur// 'khor ba mu mtha' med gyur kyang // rtag par yang dag mtha' la gnas// yud tsam shes rab rjes 'thun pa/ / 'khor ba dag gis ngal mi 'gyur// gzhan yang bu mo chos brgyad dang ldan na// sems kyi khams mnyam par 'gyur ro// brgyad gang zhe na// sems sa dang mtshungs par gyur pa'i phyir dang / sems chu dang mtshungs par gyur pa'i phyir dang / sems me dang mtshungs par gyur pa'i phyir dang / sems rlung dang mtshungs par gyur pa'i phyir dang / sems nam mkha' dang mtshungs par gyur pa'i phyir dang / sems chos kyi dbyings dang mtshungs par gyur pa'i phyir dang / sems rnam par grol ba dang mtshungs par gyur pa'i phyir dang sems mya ngan las 'das pa dang mtshungs par gyur pa'i phyir te/ 'di ni sems kyi khams mnyam pa nyid rnam pa brgyad ces bya'o// de nas bcom ldan 'das kyis yang tshigs su bcad de bka' stsal pa/ sems ni sa dang mtshungs pas na// thams cad khur du khyer bar byed// dge ba dang ni sdig pa'ang rung // 'phel ba med cing 'grib pa'ang med// sems ni chu dang mtshungs pas na/ / dri ma mi gtsang 'khru byed cing // 'jig rten rnams ni gso ba dang // nyon mongs gdung ba sel bar byed// sems ni me dang mtshungs pas na// nyon mongs dag ni sreg byed cing / / sgron ma chen po snang ba yis// gsal bar mi byed gang yang med// sems ni rlung dang mtshungs pas na// gnas pa med cing rten med par// tshul khrims thos pa'i dri/ yis ni// dus gsum kun tu khyab par byed// sems ni mkha' dang mtshungs pas na// lta ba spong zhing rnam par dag/ thams cad kun tu 'jug byed cing // bdud kyi rjes su 'brang mi byed sems ni chos dbyings mtshungs pas na/ / bde ba nyid du rab gnas shing // 'phel ba med cing 'grib med par// rtag par mnyam pa nyid la 'jug/ nyan thos dang ni rang rgyal gyi// rnam par grol ba thob gyur kyang / / 'ching ba dag kyang yod min la// grol ba dag kyang yod pa min// 'khor ba dang ni mya ngan 'das// 'ong ba med cing 'gro med ces// rab dben nyer zhi gnas nas dus gsum kun tu 'gro bar byed/ gzhan yang bu mo chos rnam pa brgyad dang ldan pa'i byang chub sems dpa' ni byang chub kyi 'byung gnas su 'gyur ro// brgyad gang zhe na/ dang po ni sbyin pa 'byung gnas su gyur pa yin te/ ci bdog pa rnams yongs su gtong ba'i phyir ro// gnyis pa ni tshul khrims 'byung gnas su gyur pa yin te/ nyams pa med pa'i phyir ro/ / gsum pa ni bzod pa 'byung gnas su gyur pa yin te// zhe sdang med pa'i phyir ro// bzhi pa ni brtson 'grus 'byung gnas su gyur pa yin te/ le lo med cing nur ba med pa'i phyir ro/ / lnga pa ni bsam gtan 'byung gnas su gyur pa yin te/ thabs la mkhas pa'i phyir ro// drug pa ni shes rab 'byung gnas su gyur pa yin te/ tshul khrims srung zhing mang du thos pa dang ldan pa'i phyir ro/ / bdun pa ni tshangs pa'i gnas pa 'byung gnas su gyur pa yin te/ rnam par grol bas nye bar zhi bar gyur pa'i phyir ro// brgyad pa ni mngon par shes pa 'byung gnas su gyur pa yin te/ / rtag par mnyam par bzhag pa la rab tu gnas pa'i phyir ro// de nas bcom ldan 'das kyis yang tshigs su bcad de bka' stsal pa/ rtag par sbyin pa gang gtong ba/ / 'dod chags gdung ba spong bas na// 'bras bu rnam smin mi re bar// sangs rgyas byang chub sngo bar byed// khrims ldan theg pa chen po'i phyir// bcad cing gtungs kyang khong khro med/ / rtse gcig bde chen gnyer byed cing // bag chags spangs nas 'gog mngon byed// byang chub sems dpa' brtson 'grus can// bskal mang sems can ched du ni// sdug bsngal bzod cing 'jig rten rgya// brtson 'grus stobs ni 'phel bar byed// bsam gtan dag ni gang sgom pa// spros pa rnams ni spong byed cing // bsam gtan pha rol phyin gyur kyang / / bsam gtan rjes su yongs mi skye// shes rab chen po mtshungs med pas// mthar lha rnams ni spong byed cing // 'jig rten stong dben rig pas na// gti mug mun pa ma lus sel/ / nyer zhi tshangs gnas gang sgom pa// ngan song rnams ni spangs pas na// rtag par brgya byin tshangs par 'gyur// don gyis phan pa nan tan bsgoms// mngon shes sangs rgyas zhing rgyu ba// sangs rgyas bsnyen bkur chos kyang nyan// rang bzhin mos pa rab shes pas// chos bshad sems can zlos par byed// gzhan yang bu mo byang chub sems dpa' ni chos brgyad dang ldan pa'i phyir/ gzungs dang thogs pa med pa'i spobs pa thob par 'gyur ro// brgyad gang zhe na/ chos la bla mar byed pa'i phyir dang / mkhan po dang / slob dpon la rim gro byed pa'i phyir dang / chos yongs su gnyer ba la skyo ba med pa'i phyir dang / ji skad thos pa bzhin du yang dag par ston par byed pa'i phyir dang / chos la ser sna mi byed pa'i phyir dang / gzhan gyi nyes pa sgrogs par mi byed pa'i phyir dang / chos smra ba dag la mkhan po bzhin du gus pas sri zhu byed pa'i phyir dang / gzhan gyi nyes pa mi mthong zhing nyes pa spang bar skul bar byed pa'i phyir te/ 'di ni byang chub sems dpa' chos brgyad dang ldan na// gzungs dang thogs pa med pa'i spobs pa phun sum tshogs pa thob par 'gyur ba zhes bya'o/ / de nas bcom ldan 'das kyis yang tshigs su bcad de bka' stsal pa// rtse gcig rtag tu chos gnyer ba// mkhan po dge bshes rim gro byed// sdig pa'i grogs po spong bas na/ / mi zad gter 'dzin thob par 'gyur// mang thos yongs su skyo med pa// rab brtson chos ni gnyer bar byed// ji skad thos bzhin ston byed pas// rnyed pa dag la re tshol med// spobs pa rnam dag gang thob pa/ / 'khor mang dga' bar byed pas na// chos sbyin pa la rab mos shing // ser sna phrag dog spong bar byed// chos spyod mngon par zhen med cing // gzugs ni gang zhog thob gyur pa/ / khrims srung rang lus lta bas na// gzhan gyi nyes skyon yongs mi tshol// byams dang snying rje gnas gyur cing // dus min tshig ni mi smra bas// thogs med spongs pa thob gyur nas/ / spro tshig pha rol phyin pa ston// chos ni legs par smra ba la// mkhan po bzhin du gus par byed// skyon 'chab nyes pa spong bskul bas// mi zad kun 'dzin rgya mtsho 'thob/ / gzhan yang bu mo byang chub sems dpa' ni chos rnam pa brgyad dang ldan pa'i phyir/ sangs rgyas rnams kyi spyan sngar pad+ma las rdzus te skye bar 'gyur ro// brgyad gang zhe na/ srog la bab par gyur na'ang gzhan gyi nyes pa mi rjod pa dang / sems can rnams dkon mchog gsum la skyabs su 'gro bar skul ba dang / thams cad byang chub sem la 'god pa dang / tshangs par spyod pa la gos pa med pa dang / de bzhin gshegs pa'i sku gzugs dag byas nas pad+mo'i gdan la 'jog pa dang / sems can mya ngan byed pa dag gi mya ngan sel bar byed pa dang / khengs shing nga rgyal byed pa dag gi mdun du rtag par bdag nyid dman par byed pa dang / gzhan la 'tshe bar mi byed pa gang yin pa'o// de nas bcom ldan 'das kyis yang tshogs su bcad de bka' stsal pa/ gal te sdug bsngal gzir gyur kyang // nam yang gzhan gyi skyon mi smra// rtag par dkon mchog gang bsngags pa// sangs rgyas spyan sngar rdzus te skye/ byang chub sems ni bskyed pa dang // thams cad mkhyen pa nyer bskul nas// rtag tu tshangs par gang spyod pa// sangs rgyas spyan sngar rdzus te skye// gser gyis sangs rgyas gzugs brgyan te/ / rin chen pad+ma'i gdan la bzhag/ sems can mya ngan gang sel ba// sangs rgyas spyan sngar rdzus te skye// nga rgyal byed pa de dag la// slob ma bzhin du bdag dman zhing / / gzhan la gang zhig mi 'tshe ba// sangs rgyas spyan sngar rdzus te skye// gzhan yang bu mo byang chub sems dpa' chos brgyad dang ldan par gyur na spungs pa'i yon tan phun sum tshogs par 'gyur zhing / rtag par dgon pa na gnas par mos par 'gyur ro// brgyad gang zhe na/ 'dod pa chung ba dang / cho ga shes pa dang / dge ba'i chos yongs su rdzogs par gyur pa dang / dge bas bdag nyid gso bar byed pa dang / rtag par 'phags pa'i rigs yongs su 'dzin pa dang / 'khor ba'i nyes dmigs mthong bas sems la rtag par skyo ba dang / rtag par mi rtag pa dang / sdug bsngal ba dang / stong pa dang / bdag med par lta ba dang / dad pa shin tu brtan zhing gzhan dring la mi 'jog pa gang yin pa'o/ / de nas bcom ldan 'das kyis yang tshigs su bcad de bka' stsal pa/ 'dod pa chung zhing chog shes pas// chos dga' dge mang bdag nyid gso/ / rtag par 'phags rigs sgrub la mos// 'khor ba'i skyon mthong sems la skrag/ spangs pa dag la rtag mos pas// bse ru gcig ltar grogs kyang med// 'dus byas sdug bsngal bdag med ces/ / blo yis rab dang brtson 'grus gnas// chos mthong gzhan byi rjes mi 'brang // rtag par dben gnas sangs rgyas bsngags// sbyangs pas thag bsrings gdung ba med/ / rtsod smras nyes dmigs mang po med// nye bshes yongs spangs bsngags pa rjod// des na dgon par gnas la mos// gzhan yang bu mo byang chub sems dpa' ni chos rnam pa brgyad dang ldan pa'i phyir/ bdud kyi dpung rab tu pham par byed de// brgyad gang zhe na/ ngo bo nyid stong pa nyid la zhugs pa dang / mtshan ma med pa la mngon par yid ches pa dang / smon pa med pa la mngon par yid ches pa dang / mngon par 'du bya ba med par rab tu shes pa dang / de la the tshom dang som nyi med pa dang / skye ba med par rab tu bzod pa dang / ngo bo nyid med par rab tu rtogs pa dang / thabs la mkhas pas chos thams cad la so sor rtog cing / de bzhin nyid 'jig par mi byed pa gang yin pa'o// de nas bcom ldan 'das kyis yang tshigs su bcad de bka' stsal pa/ / stong dang mtshan ma med dang smon med pa// rnam thar gsum thob bdud dpung rab tu 'joms// 'dus byas 'dus min mtshan nyid gnyis su med/ / skye med thob pas rnam par grol bar 'gyur// chos rnams skye med de ltar gang bzod pa// de dag bdud dpung rab tu pham par byed// skye ba med dang 'gag med 'di dag dang / phung po khams la bdag med sgyu ma 'dra// chos la ngo bo nyid med nges rtogs shing // de bzhin nyid ni mi 'jigs thabs mkhas pas// chos rnams bdud kyi las zhes gang byed pa// rnam rtog spangs nas bdud ni pham par byed/ / thabs dang shes rab gnyis ka rab spyod cing // yod dang stong la gnas pa med par ni// de ltar chos mchog gang zhig sgom byed pa// thabs mkhas gzugs lus mdzes pa thob par 'gyur/ / gzhan yang bu mo byang chub sems dpa' ni chos rnam pa brgyad dang ldan pa'i phyir/ byang chub dang nam yang 'bral bar mi 'gyur ro/ / brgyad gang zhe na/ yang dag pa'i lta bas log par lta ba'i sems can yongs su smin par byed pa dang / yang dag pa'i dran pas log par sems pa'i sems can la snying brtse bar byed pa dang / yang dag pa'i ngag gis log par smra ba rnams la snying brtse bar byed pa dang / yang dag pa'i las kyi mthas log pa'i las can rnams yongs su sdud pa dang yang dag pa'i rtsol bas log par rtsol ba yongs su zlog pa dang / yang dag pa'i 'tsho bas log pas 'tsho ba'i sems can rnams spong bar mi byed pa dang / yang dag pa'i rtog pas log par yid la byed pa spong bar byed pa dang / yang dag pa'i ting nge 'dzin gyis log pa'i ting nge 'dzin la gnas pa dag bslang nas/ gong du rtsol du gzhug pa gang yin pa'o// de nas bcom ldan 'das kyis yang tshigs su bcad de bka' stsal pa/ yang dag lha dang gang ldan pa// log lha de dag smin par byed// rtag par yang dag dran sgom pa// log sems dag la brtse bar byed/ / rnam dag yang dag ngag gis ni// log smra rnams la brtse bar byed// yang dag las mtha' gnas pa yis// log pa'i las can sdud par byed// rtag par yang dag rtsol bsgoms nas/ / log brtson dag ni sprod mi byed// yang dag 'tsho bas rjes mthun pas// log 'tsho gang yin sdud par byed// blo ldan yang dag rtog pa yis// log par yid byed brtse bar sems/ / yang dag ting 'dzin rtag gnas nas// log pa'i ting 'dzin sdud par byed// bla med yang dag lam brgyad kyis// chu bo dag las bde bar sgrol// rgyun phyogs ded pa zlog byed pas/ / de ni byang chub lam chen yin// nyan thos dang ni rang rgyal rnams// rtswa yi gzings bzhin bdag nyid zlos// byang chub sems dpa' kun zlos pas// dper na gru chen 'dren mkhan 'dra/ gzhan yang bu mo byang chub sems dpa' ni chos rnam pa brgyad dang ldan pa'i phyir/ bdud rtsi'i lam mngon sum du byed par 'gyur ro// brgyad gang zhe na/ rtsod pa med pa'i chos la gnas pa dang / thogs pa med pa'i sems legs par rab tu srung bar byed pa dang / rtag par de kho na nyid kyi don la lta bar byed pa dang / byang chub kyi sems la rab tu gnas nas rjes su dran pa drug sgom par byed pa dang / nan tan brtson 'grus kyi pha rol tu phyin pa rnams sgom par byed pa dang / dge ba'i rtsa ba bsags nas sems can yongs su smin bar byed pa dang / snying rje chen po la gnas nas yang dag pa'i chos yongs su sdud par byed pa dang / mi skye ba'i chos la bzod pa thob nas phyir mi ldog pa la rab tu gnas pa gang yin pa'o// de nas bcom ldan 'das kyis yang tshigs su bcad de bka' stsal pa/ rtag par rtsod med spyod bsgrubs nas// dge sbyong chen po chos la gnas// zhe sdang nyes pa yongs spangs nas/ / dge ba'i rtsa ba sogs par byed// yang dag don ni rab lta bas// mi zad spobs rnams thob par byed// byang chub sems la rab gnas nas// rtag par dran byed rjes su dras pha rol phyin pa thams cad kun/ / rab brtson bsgrubs pas log pa med// thabs mkhas stobs rnams thob pa nas// des ni sems can sgrol bar byed// chos kyi mnga' bdag nor gyis ni// brtse sems thams cad kun sbyin pas// myur du mi skye bzod thob nas// byang chub las ni ldog mi 'gyur// gal te de ltar spyod nus na// sangs rgyas chos ni thob mi dka'// ring por mi thogs bdud btul nas/ / byang chub mchog ni thob par 'gyur// de nas bu mo des chos de lta bu thos nas dga' mgu rangs par gyur nas/ bcom ldan 'das la 'di skad ces gsol to/ / bcom ldan 'das chos rnam pa du dang ldan par gyur na/ bud med kyi dngos po las ldog par 'gyur lags/ bcom ldan 'das kyis bka' stsal pa/ bu mo chos brgyad dang ldan par gyur na/ bud med kyi dngos po las ldog par 'gyur ro// brgyad gang zhe na/ phrag dog mi byed pa dang / ser sna mi byed pa dang / g.yo sgyu med pa dang / khong khro ba med pa dang / bden par smra ba dang / ngag rtsub po mi smra ba dang / 'dod chags spangs pa dang / log par lta ba rnams spangs pa gang yin pa ste/ bu mo chos brgyad po de dag mngon par bsgrubs na/ myur du bud med kyi dngos po las ldog par 'gyur ro/ / de nas bcom ldan 'das kyis yang tshigs su bcad de bka' stsal pa/ gzhan yang phrag dog mi byed cing // ser sna spangs nas chos mos pa// g.yo sgyu dag ni mi spyod cing / / bud med lus la skyo ba dang // byams sems zhe sdang rab spangs nas// rtag par bden tshig smra ba dang // 'dod bsal ngag rtsub spangs nas ni// yang dag lta la gnas par bya/ gang gis bud med lus skyo nas// 'di 'dra'i chos ni sgrub byed na// myur du bud med dngos spangs nas// skyes pa'i lus bzang len par 'gyur// gzhan yang bu mo chos brgyad dang ldan par gyur na/ bud med kyi dngos po las ldog par 'gyur ro// brgyad gang zhe na/ sangs rgyas la bla mar byed cing chos la shin tu mos pa dang / tshul khrims dang / bzod pa dang / mang du thos pa dang ldan pa'i dge sbyong dang bram ze dag la bsnyen bkur dang rim gro byed pa dang / skyes pa dang / bud med dang / khyim gyi dngos po dag la mngon par zhen cing chags pa med pa dang / bslab pa'i dngos po yang dag par blangs pa rnams 'jig par mi byed pa dang / srog chags thams cad la log pa'i bsam pa mi skyed pa dang / lhag pa'i bsam pas bud med kyi dngos po la yongs su skyo bar gyur pa dang / byang chub kyi sems kyis skyes bu chen pa'i chos la gnas pa dang // 'jig rten pa'i khyim gyi so chos rnams la sgyu ma dang rmi lam lta bur lta ba gang yin pa'o/ / de nas bcom ldan 'das kyis yang tshigs su bcad de bka' stsal pa/ sangs rgyas rab gus chos la mos// tshul khrims mang thos bla mar byed/ / 'dod chags sred sems mi skyed na// bud med dngos po myur du spong // khrims srung ngo tsha khrel yod ldan// gzhan la mi bden bsam mi byed// byang chub sems la rab gnas nas/ / theg pa gzhan la mos byed na// des ni myur ba kho nar yang // mi gtsang bud med dngos po spong // bsam pa mchog gis sems skyo nas// thams cad sgyu ma lta bu dang / chos rnams rang bzhin g.yo med dang // rgyu rkyen rang bzhin stong dben zhes// nan tan yang dag chos bsgoms na// myur du skyes pa'i lus thob 'gyur// de nas bu mo rnamangs dang bas gser gyi 'breng ba thogs pa de dag bcom ldan 'das la gtor ba dang / steng gi bar snang la gser gyi gzhal med khang dang / khang pa brtsegs pa dag tu gyur nas/ gzhal med khang de dag ginang na sprul pa'i de bzhin gshegs pa gser gyi gdan la bzhugs pa sha stag byung bar gyur to/ / de nas bu mo lnga bcu po de dag gis kyang so so nas rgyan rnams bkrol nas/ bcom ldan 'das la mngon par gtor ba dang / steng gi bar snang la gser gyi gzhal med khang dang / rin po che'i gur dang / rin po che'i gdugs dang / bkod pa rnam pa sna tshogs su gyur to// de nas bu mo lnga brgya po de dag gis de lta bu'i cho 'phrul chen po mthong ba dang / skad mthun par tshigs su bcad de smras pa/ bcom ldan mi mchog khyad par 'phags pas na// thugs rjes sems can rnams la sman par mdzad/ / bdag cag deng ni byang chub sems bskyed nas// mos pa rjes mthun rab tu 'dul la gnas// bcom ldan 'dren pa de bar rab stsal nas// bdag cag mi mchog la ni mchod par bgyi/ / chos thos dbang gis rdul rnams rab spangs pas// bdag cag the tshom nem nur yongs ma mchis// des na bud med nyon mongs mang spangs nas// nyon mongs gtan bcom bdud ni pham par bgyis// phyogs bcu'i sangs rgyas bye ba tshad med rnams// bdag cag dga' bas rtag tu mchod par 'tshal// sbyin dang tshul khrims brtson 'grus rab gnas nas/ / bzod dang bsam gtan sems ni rab tu bgyi// thabs dang shes rab sems can yongs bsdus nas// byang chub mchog lam gang lags mngon du bgyi// mi 'khor ni tshad med sman bdags nas// thams cad theg chen sems ni bskyed par skul// bdag cag seng ge'i sgra ni sgrogs par 'gyur// bdag cag lha mi'i ston pa bgyid par mchi// de nas bcom ldan 'das 'dzum pa mdzad do// sangs rgyas rnams kyi chos nyid ni nam 'dzum pa mdzad pa na/ 'od zer kha dog rnam pa sna tshogs 'di lta ste/ sngon po dang ser po dang / dmar po dang / dkar po dang / le brgan dang / dngul dang / shel gyi kha dog lta bu dag de bzhin gshegs pa'i zhal gyi sgo nas byung ste/ 'jig rten gyi khams tshad med dpag tu med pa dag nas/ tshangs pa'i 'jig rten gyi bar du khyab par snang bar byas nas/ de bzhin gshegs pa la lan gsum bskor ba byas ste/ de bzhin gshegs pa'i dbu'i gtsug tu thim par gyur pas/ / de nas tshe dang ldan pa kun dga' bo stan las langs te/ bcom ldan 'das la 'di skad ces gsol to// bcom ldan 'das rgyu dang rkyen gang gi slad du 'dzum pa 'di lta bu bstan par mdzad lags/ bcom ldan 'das kyis bka' stsal pa/ kun dga' bo khyod kyis bu mo rnam dag dang ba 'di mthong ngam/ kun dga' bos gsol pa/ mthong lags so// bcom ldan 'das kyis bka' stsal pa/ kun dga' bo bu mo rnam dag dang ba la sogs pa bu mo lnga brgya po 'di dag ni 'di nas tshe zad pa dang / bud med kyi lus spangs nas/ dga' ldan gyi lha'i ris su skyes te/ bcom ldan 'das byams pa dang / bskal pa bzang po'i de bzhin gshegs pa thams cad la bkur sti dang / rim gro dang / mchod pa byed par 'gyur bas/ bu mo rnam dag dang ba bskal pa bye ba khrag khrig brgyad khri bzhi stong 'das pa'i 'og tu 'jig rten gyi khams glog gi 'od ces bya bar mngon par rdzogs par 'tshang rgya bar 'gyur te/ de bzhin gshegs pa 'od zer gyi bkod pa zhes bya bar 'gyur ro/ / bskal pa'i ming ni rtag tu snang ba zhes bya'o// de bzhin gshegs pa'i sku tshe'i tshad ni dga' ldan gyi lha bzhin du tshe lo stong phrag bcu gnyis thub par 'gyur ro/ / 'jig rten gyi khams de na'ang byang chub sems dpa' sems dpa' chen po 'ba' zhig gi 'khor tshad med dpag tu med pa dag gis 'khor byed par 'gyur ro// bu mo lnga brgya po 'di dag kyang 'khor de dag gi nang na gtso bo mchog byed par 'gyur te/ ji ltar da ltar nga'i tshe byang chub sems dpa' 'jam dpal la sogs pa drug cu po 'di dag gtso bor gyur pa bzhin no// kun dga' bo bud med gang la la zhig gis chos kyi rnam grangs 'di thos nas yongs su 'dzin par byed/ klog par byed/ kha ton du 'don par byed na/ bud med kyi lus 'di gtugs nas/ phyis yang len par mi 'gyur zhing / bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro// bcom ldan 'das kyis de skad ces bka' stsal nas/ bu mo rnam dag dang ba la sogs pa bu mo lnga brgya po de dag dang / lnga dang / mi dang / lha ma yin du bcas pa'i 'jig rten thams cad kyis/ bcom ldan 'das kyis gsungs pa la rab tu dga' nas mngon par bstod do/ / 'phags pa dkon mchog brtsegs pa chen po chos kyi rnam grangs stong phrag brgya pa las/ rnam dag dngabs zhus pa'i le'u 'dus pa bzhi bcu pa rdzogs so/ / // lo tsa ba 'gos chos grub kyis rgya nag gi dpe las bsgyur cing zhus te gtan la phab pa// / rgya gar skad du/ Ar+ya mai tre ya pri ts+tsha ba ri brta nA ma ma hA yA na sU tra/ bod skad du/ 'phags pa byams pas zhus pa'i le'u zhes bya ba theg pa chen po'i mdo// bam po gcig pa/ sangs rgyas dang byang chub sems dpa' thams cad la phyag 'tshal lo// 'di skad bdag gis thos pa dus gcig na/ bcom ldan 'das yul brge na/ chu srin byis pa gsod lta bu'i ri la 'jigs su rung ba'i nags ri dgas kyi gnas na/ dge slong lnga brgya tsam gyi dge slong gi dge 'dun chen po mngon par shes pa mngon par shes pa/ gnas brtan nyan thos chen po sha stag la 'di lta ste/ tshe dang ldan pa kun shes ko'u di n+ya dang / tshe dang ldan pa rta thul dang / tshe dang ldan pa rlangs pa dang / tshe dang ldan pa ming chen dang / tshe dang ldan pa bzang ldan dang / tshe dang ldan pa dri ma med pa dang / tshe dang ldan pa gang po dang / tshe dang ldan pa ba grang bdag dang / tshe dang ldan pa ri dgas mgo dang / tshe dang ldan pa lteng rgyas 'od srungs dang / tshe dang ldan pa chu klung 'od srungs dang / tshe dang ldan pa ga ya 'od srungs dang / tshe dang ldan pa byin pa 'od srungs dang / tshe dang ldan pa 'od srungs chen po dang / tshe dang ldan pa don yod rgyal po dang tshe dang ldan pa blo gros bzang dang / tshe dang ldan pa shA ri'i bu dang / tshe dang ldan pa mo'u 'gal gyi bu chen po dang / tshe dang ldan pa ri rgyal dang / tshe dang ldan pa dga' bo dang / tshe dang ldan pa nye dga' dang / tshe dang ldan pa kun dga' bo dang / tshe dang ldan pa sgra gcan zin dang / de dag la sogs pa dge slong lnga brgya tsam dang thabs cig tu bzhugs so// byams pa la sogs pa byang chub sems dpa' sems dpa' chen po mngon par shes pa mngon par shes pa khri dang yang thabs cig pa la 'di lta ste/ byang chub sems dpa' blo gros 'phel dang / byang chub sems dpa' blo gros bzang dang / byang chub sems dpa' blo gros brtan dang / blo gros yangs pa dang / spobs pa brtsegs dang / spyan ras gzigs dbang phyug dang / mthu chen thob dang me tog dpal dang / 'jam dpal dang / mngon par shes pa'i me tog shin tu rgyas pa dang / dmigs pa med pa yid la byed pa dang / dad ldan dang / rin po che tog dang dbang po'i lha dang / chu lha dang / sgra dbyangs snyan dang / zhing rnam par sbyong dang / lhun po brtsegs dang / spobs pa phun sum tshogs pa dang / dbang po'i dpal dang / sa 'dzin dang sems can dmyal bsnyems dang / ngan song spong dang // rin chen ze ba can dang / de dag la sogs pa byang chub sems dpa' khri dang thabs cig ste/ de nas bcom ldan 'das 'khor brgya stong du mas yongs su bskor cing / mdun gyis bltas nas chos ston to// de'i tshe byang chub sems dpa' byams pa 'khor de nyid du 'dus par gyur te 'dug go/ / de nas byang chub sems dpa' byams pas byang chub sems dpa'i 'khor chen po de 'dus par rig nas/ stan las langs te bla gos phrag pa gcig tu gzar nas pus mo g.yas pa'i lha nga sa la btsugs te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to// gal te zhus nas zhu ba lung bstan pa'i slad du/ bcom ldan 'das kyis bdag la skabs phye na/ de bzhin gshegs pa dgra bcom pa yang dag par rdzogs pa'i sangs rgyas la bdag phyogs 'ga' zhig zhu'o/ / de skad ces gsol pa dang / bcom ldan 'das kyis byang chub sems dpa' sems dpa' chen po byams pa la 'di skad ces bka' stsal to// byams pa dri ba lung bstan pa'i phyir/ de bzhin gshegs pas rtag tu skabs phyes// byams pa khyod ci dang ci 'dod pa dris shig dang / dris pa de dang de'i lung bstan pas khyod kyi sems rangs par bya'o// de nas bcom ldan 'das la byang chub sems dpa' sems dpa' chen po byams pas 'di skad ces gsol to/ / bcom ldan 'das byang chub sems dpa' chos du dang ldan na/ ngan song thams cad spong zhing sdig pa'i grogs po'i sug par lhung bar mi 'gyur la/ myur du bla na med pa yang dag par rdzogs pa'i byang chub mngon par rdzogs par 'tshang rgya bar 'gyur pa lags/ de skad ces gsol pa dang / bcom ldan 'das kyis byang chub sems dpa' sems dpa' chen po byams pa la 'di skad ces bka' stsal to// byams pa khyod ni 'di ltar sngon gyi rgyal ba la lhag par bya ba byas pa/ dge ba'i rtsa ba bskyed pa/ tshe rabs dran pa/ spobs pa thob pa/ yun ring po nas tshangs par spyod pa spyad pa ste/ byams pa khyod skye bo mang po la phan pa dang // skye bo mang po la bde ba dang / 'jig rten la snying brtse ba dang / skye bo phal po che dang / lha dang / mi rnams kyi don dang / phan pa dang / bde ba dang / byang chub sems dpa'i theg pa pa'i rigs kyi bu dang / rigs kyi bu mo da ltar gyi deng ma 'ongs pa rnams yongs su gzung ba'i phyir zhugs nas/ khyod de bzhin gshegs pa la don 'di 'dri bar sems pa legs so legs so/ byams pa de'i phyir legs par rab tu nyon la yid la zung zhig dang bshad do// byang chub sems dpa' sems dpa' chen po byams pas bcom ldan 'das la legs so zhes gsol te/ bcom ldan 'das kyi ltar nyan pa dang / bcom ldan 'das kyis 'di skad ces bka' stsal to// byams pa byang chub sems dpa' chos gcig dang ldan na ngan song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya ste/ chos gcig gang zhe na'adi lta ste/ lhag pa'i bsam pa phun sum tshogs pa'i byang chub kyi sems te/ byams pa byang chub sems dpa' chos gcig po de dang ldan na/ ngan song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya'o// byams pa gzhan yang byang chub sems dpa' chos gnyis dang ldan na/ ngan song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya ste/ gnyis gang zhe na/ 'di lta ste/ zhi gnas yongs su tshol ba dang / lhag mthong la mkhas pa ste/ byang chub sems dpa' chos gnyis po de dag dang ldan na/ ngan song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya'o// byams pa gzhan yang byang chub sems dpa' chos gsum dang ldan na/ ngan song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya ste/ gsum gang zhe na/ 'di lta ste/ snying rje chen po thob pa dang / stong pa nyid kyi chos nges par sems pa dang / des kyang rlom sems su mi byed pa ste byams pa byang chub sems dpa' chos gsum po de dag dang ldan na/ ngan song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya'o/ / byams pa gzhan yang byang chub sems dpa' chos bzhi dang ldan na/ ngan song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya ste/ bzhi gang zhe na/ 'di lta ste/ tshul khrims la gnas pa yin/ chos thams cad la som nyi med pa yin/ dge ba'i chos la mngon par dga' ba yin/ yang dag par zhugs shing / yang dag par blangs pa las mi g.yo ba yin te/ byams pa byang chub sems dpa' chos bzhi po de dag dang ldan na/ ngan song thams cad spong zhing // sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya'o/ / byams pa gzhan yang byang chub sems dpa' chog lnga dang ldan na/ dran song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya / lnga gang zhe na/ 'di lta ste/ stong pa nyid la gnas pa dang / gzhan dag gi 'khrul pa'i tshol ba dang / bdag la rtog pa dang / chos la mngon par dka' ba dang / gzhan la phan 'dogs par zhugs pa yin te/ byams pa byang chub sems dpa' chos lnga po de dag dang ldan na/ ngan song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya'o// byams pa gzhan yang byang chub sems dpa' chos drug dang ldan na/ ngan song thams cad spong zhing / sdig pa'i grogs po'i lag tu mi 'gro la/ byur du bla na med pa yang dag par rdzogs pa'i byang chub mngon par rdzogs par 'tshang rgya ste/ drug gang zhe na/ 'di lta ste/ brkas pa med pa yin/ sdang ba med pa yin/ rmongs pa med pa yin/ dris ma thag tu yang dag pa ji lta ba bzhin du lan ldon pa yin/ bsnyen par dka' ba med pa yin/ stong pa nyid spyod yul ba yin te/ byams pa byang chub sems dpa' chos drug po de dag dang ldan na/ ngan song thams chang thong zhing sdig pa'i thogs po'i lag tu mi 'gro la/ myur du tha na med pa yang dag par rdzogs pa'i byang chub mngon par rdzogs par 'tshang rgya'o// byams pa gzhan/ yang byang chub sems dpa' chos bdun dang ldan na/ ngan song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya ste/ bdun gang zhe na/ 'di lta ste/ dran pa la mkhas pa yin/ chos la mkhas pa yin/ brtson 'grus brtsams pa yin/ dga' ba thob pa yin/ shin tu sbyangs pa dang ldan pa yin/ ting nge 'dzin la mkhas pa yin/ shes rab kyis rab tu dbye ba la mkhas pa yin te/ byams pa byang chub sems dpa' chos bdun po de dag dang ldan na/ ngan song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya'o/ / byams pa gzhan yang byang chub sems dpa' chos brgyad dang ldan na/ ngan song thams cad spong zhing / sdig pa'i grogs po'i lag tu mi 'gro la/ myur du rma na med pa yang dag par rdzogs pa'i byang chub mngon par rdzogs par 'tshang rgya ste/ brgyad gang zhe na/ 'di lta ste/ yang dag pa'i lta ba can yin/ yang dag pa'i rtog pa can yin/ yang @#dag pa'i ngag can yin/ yang dag pa'i las kyi mtha' can yin/ yang dag pa'i 'tsho ba can yin/ yang dag pa'i rtsol ba can yin/ yang dag pa'i rlan pa can yin// yang dag pa'i ting nge 'dzin can yin te/ byams pa byang chub sems dpa' chos brgyad po de dag dang ldan na/ ngan song thams can thong zhing / sdig pa'i grogs po'i lag tu mi 'grol/ sbyar/ du bla na med pa yang dag par rdzogs pa'i byang chub mngon par rdzogs par 'tshang rgya'o// byams pa gzhan yang byang chub sems dpa' chos dgu dang ldan na/ ngan song thams cad spong zhing sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya ste/ dgu gang zhe na/ 'di lta ste/ byams pa 'di la byang chub sems dpa' ni 'dod pa dag las dben pa/ sdig pa mi dge ba'i chos rnams las dben pa/ rtog pa dang bcas pa/ dpyod pa dang bcas pa/ dben pa las skyes pa'i dga' ba dang bde ba can/ bsam gtan dang po bsgrubs te gnas so// rtog pa dang dpyod pa dang bral zhing nang rab tu dang ste/ sems kyi rgyud gcig tu gyur pas/ rtog pa med pa/ dpyod pa med pa/ ting nge 'dzin las skyes pa'i dga' ba dang bde ba can/ bsam gtan gnyis pa bsgrubs te gnas so// dga' ba'i 'dod chags dang bral bas btang snyoms la gnas shing / dran pa dang shes bzhin can yin te/ bde ba lus kyis myong la/ 'phags pa rnams kyis gang de dran pa dang ldan pa bde ba la gnas pa btang snyoms pa'o zhes brjod pa de/ dga' ba med pa bsam gtan gsum pa bsgrubs te gnas so/ / bde ba'ang spangs te/ snga nas sdug bsngal ba'ang spangs shing / yid bde ba dang yid mi bde ba'ang nub pas/ bde ba'ang ma yin// sdug bsngal ba'ang ma yin pa/ btang snyoms dang dran pa yongs su dag pa/ bsam gtan bzhi pa bsgrubs te gnas so// rnam pa thams cad du gzugs kyi 'du shes rnams las yang dag par 'das te thogs pa'i 'du shes rnams nub par gyur cing / / sna tshogs kyi 'du shes rnams yid la mi byed pas/ nam mkha' mtha' yas so snyam nas/ nam mkha' mtha' yas skye mched bsgrubs de gnas so/ rnam pa thams cad du nam mkha' mtha' yas skye mched las yang dag par 'das te/ rnam par shes pa mtha' yas so snyam nas/ rnam shes mtha' yas skye mched bsgrubs te gnas so/ / rnam pa thams cad du rnam shes mtha' yas skye mched las yang dag par 'das te/ ci'ang med do snyam nas/ ci yang med pa'i skye mched bsgrubs te gnas so// rnam pa thams cad du ci'i nga med pa'i skye mched las yang dag par 'das nas/ 'du shes med 'du shes med min skye mched bsgrubs te gnas so// rnam pa thams cad du 'du shes med 'du shes med min skye mched las yang dag par 'das nas/ 'du shes dang tshor ba 'gog pa bsgrubs nas gnas pa ste/ byams pa byang chub sems dpa' chos dgu/ po de dag dang ldan na/ ngan song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya'o/ / byams pa gzhan yang byang chub sems dpa' chos bcu dang ldan na/ ngan song thams cad spong zhing / sdig pa'i grogs po'i lag tu mi 'gro la/ myur du bla na med pa yang dag par rdzogs pa'i byang chub mngon par rdzogs par 'tshang rgya ste/ bcu gang zhe na/ 'di lta ste/ rdo rje lta bu'i ting nge 'dzin dang ldan pa yin/ gnas dang gnas ma yin pa la mngon par brtson pa'i ting nge 'dzin dang ldan pa yin/ rlabs kyis 'gro ba'i ting nge 'dzin dang ldan pa yin/ rnam par snang byed kyi ting nge 'dzin dang ldan pa yin/ kun nas snang ba'i ting nge 'dzin dang ldan pa yin/ kun tu gsal ba'i ting nge 'dzin dang ldan pa yin// rin chen zla ba'i ting nge 'dzin dang ldan pa yin/ zla ba blon ma'i ting nge 'dzin dang ldan pa yin/ nyon mongs pa med pa'i ting nge 'dzin dang ldan pa yin/ rgyal mtshan gyi rtse mo'i dpung rgyan gyi ting nge 'dzin dang ldan pa yin te// byams pa byang chub sems dpa' chos bcu po de dag dang ldan na/ ngan song thams cad spong zhing sdig pa'i grogs po'i lag tu mi 'gro ya/ myur du bla na med pa yang dag par rdzogs pa'i byang chub mngon par rdzogs par 'tshang rgya'o// de nas byang chub sems dpa' sems dpa' chen po byams pa tshim zhing mgu la yi rangs te/ rab tu dga' nas dga' ba dang yid bde ba skyes te/ stan las langs nas bla gos phrag pa gcig tu bgos te/ pus mo g.yas pa'i lha nga sa la btsugs nas/ bcom ldan 'das ga la ba de logs su thal mo sbyar ba btud de/ bcom ldan 'das la tshul dang 'dra ba'i tshigs su bcad pa 'di dag gis mngon par bstod do// sngon chad sbyin pa sbyin mdzad pa/ / sdug pa'i bu dang zas skom dang // mgo dang mig kyang btang mdzad de// sangs rgyas sbyin kun pha rol phyin// g.yag rnga bzhin du yun ring nas// khyod kyis tshul khrims ma nyams bsrungs/ / khrims kyis khyod 'dra ma mchis te// sangs rgyas khrims legs pha rol phyin// bzod pa'i stobs ni bskyed mdzad nas// byis pas nongs pa bgyis pa bzod/ / bzod pa'i stobs rnams kun dang ldan// sangs rgyas bzod legs pha rol phyin// brtson 'grus stobs ni bskyed mdzad nas// zhi bde bla na med pa brnyes// brtson 'grus stobs kyi stobs dang ldan// sangs rgyas brtson legs pha rol phyin// sdig pa thams cad bsreg mdzad nas// 'dren pa skyes chen bsam gtan dgyes/ bsam gtan stobs kyis stobs dang ldan/ / sangs rgyas bsam legs pha rol phyin// chos rnams de dag rang bzhin stong // ngo bo nyid kyis gang mi skye// shes rab kyis ni pha rol gshegs/ / sangs rgyas shes legs pha rol phyin// mkhyen chen byang chub shing drung du// sder bcas bdud ni khyod kyis gtul// don gyi mchog kyang brnyes par gyur/ / sangs rgyas bdud kyi tshogs ngan 'joms// skyes chen wA rA NA sir ni// chos kyi 'khor lo rab tu bskor// mu stegs tshogs ngan skrag par mdzad// sangs rgyas mu stekra can tshogs 'joms/ / shes rab chen po bla na med// kun nas zla dpe yongs ma mchis// dkon mchog chos de ston par mdzad// 'dren pa sangs rgyas 'od mdzad lags// sbyin pa dang ni khrims stobs dang / / bzod brtson khyod dang 'dra ma mchis// kun gyi pha rol phyin par gyur// sangs rgyas yon tan mang pos 'phags// de nas byang chub sems dpa' sem dpa' chen po byams pas/ bcom ldan 'das la tshul dang 'dra ba'i tshigs su bcad pa 'di dag gis mngon par bstod nas/ phyogs gcig tu 'dug go/ de nas bcom ldan 'das la tshe dang ldan pa kun dga' bos 'di skad ces gsol to/ / btsun pa bcom ldan 'das byang chub sems dpa' sems dpa' chen po byams pa 'di/ 'di ltar spobs pa phun sum tshogs pa dang / 'di ltar shin tu rnam par nges pa'i tshig gis chos ston pa dang / 'di ltar tshig dang yi ge mtshungs pa'i chos ston pa dang / 'di ltar zab mo'i tshig gis chos ston pa dang / 'di ltar legs par 'brel ba'i tshig gis chos ston pa dang / dran pa'i tshig gis chos ston pa ni ngo mtshar lags so// bcom ldan 'das kyis bka' stsal pa/ kun dga' bo de de bzhin no// dza skad smras pa de bzhin te/ byang chub sems dpa' byams pa spobs pa phun sum tshogs pa dang ldan zhing / byang chub sems dpa' byams pa shin tu rnam par nges pa'i tshig gis chos ston pa nas rjes su dran pa'i tshig gi bar gyis chos ston pa ni ngo mtshar to/ / kun dga' bo byang chub sems dpa' byams pa ni da ltar nga la tshul dang 'dra ba'i tshigs su bcad pa dag gis mngon par bstod par yang ma zad de/ de ci'i phyir zhe na/ kun dga' bo sngon byung ba 'das pa'i dus na/ bskal pa grangs med pa bcur tshang bar gyur pa de'i tshe de'i dus na/ de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/ bde bar gshegs pa/ 'jig rten mkhyen pa/ skyes bu 'dul ba'i kha lo sgyur ba/ bla na med pa lha dang mi rnams kyi ston pa sangs rgyas bcom ldan 'das snang bas rnam par rol pa'i mngon par shes pa zhes bya ba 'jig rten du byung ste/ de'i tshe bram ze'i khye'u bzang dag ces bya ba gzugs bzang ba/ mdzes pa/ blta na sdug pa/ kha dog bzang po rgyas pa mchog dang ldan pa zhig yod pa de skyed mos tshal du 'gro ste/ grong bar du phyin pa dang / de bzhin gshes pa dgra bcom pa yang dag par rdzogs pa'i sangs rgyas snang bas rnam par rol pa'i mngon par shes pa mdzes pa/ dad par bya ba/ dbang po zhi ba/ thugs zhi ba/ dul ba dang zhi gnas kyi mchog brnyes pa/ dul ba dang zhi gnas kyi dam pa brnyes pa/ dbang po bsrungs pa/ glang po che dbang po thul ba lta bu/ mtsho ltar dang zhing rnyog pa med la gsal ba/ skyes bu chen po'i mtshan sum cu rtsa gnyis po de dag gis sku legs par brgyan pa/ dpe byad bzang po brgyad cu po de dag gis sku legs par spras pa/ shing sa la'i rgyal po me tog shin tu rgyas pa 'dra ba/ ri'i rgyal po ri rab ltar mngon par 'phags pa/ zhal zla ba'i dkyil 'khor ltar zhi ba/ nyi ma'i dkyil 'khor ltar lham me/ lhan ne/ lhang nge ba/ shing n+ya gro d+ha ltar chu zheng ga pa/ 'od 'bar ba'i skus dpal chen po 'bar ba mthong ngo // mthong nas kyang de bcom ldan 'das la sems dad par gyur to// de sems dang nas 'di snyam du sems te/ a la la de bzhin gshegs pa'i sku 'di rnam par spras shing / kha dog dang / gzi brjid dang / dpal dang / mtshan rnams kyis 'bar zhing lham me/ lhan ne/ lgang nge ba ngo mtshar to snyam mo// de nas bram ze'i khye'u bzang dag gis 'di skad ces smras te/ a la la bdag kyang ma 'ongs pa'i dus na lus 'di 'dra ba dang ldan par gyur cig/ kha dog dang / gzi brjid dang / dpal dang mtshan rnams kyis 'di ltar 'bar zhing / lham me/ lhan ne/ lhang nge bar gyur cig ces des smon lam de skad btab nas/ sa la nyal te 'di snyam du bsams so// gal te bdag kyang ma 'ongs pa'i dus na 'di lta bu'i lus dang ldan par 'gyur te/ kha dog dang / gzi brjid dang / dpal dang / mtshan rnams kyis 'bar zhing lham me/ lhan ne/ lhang nger 'gyur zhe na/ de bzhin gshegs pa'i zhabs bdag gi lus la reg par gyur cig snyam mo// kun dga' bo de nas de bzhin gshegs pa dgra bcom pa yang dag par rdzogs pa'i sangs rgyas snang bas rnam par rol pa'i mngon par she ba des/ bram ze'i khye'u bzang dag gi lhag pa'i bsam pa mkhyen nas/ bram ze'i khye'u bzang dag ga la ba der gshegs te/ bram ze'i khye'u bzang dag la zhabs kyis reg par mdzad do/ / de bzhin gshegs pa snang bas rnam par rol pa'i mngon par shes pa des/ bram ze'i khye'u bzang dag la zhabs kyis reg par mdzad ma thag tu/ de nas de'i tshe mi skye ba'i chos la bzod pa thob par gyur to// kun dga' bo de nas de bzhin gshegs pa snang bas rnam par rol pa'i mngon par shes pa sa snam logs su zigs nas/ dge slong rnams la bka' stsal pa/ dge slong dag khyed gang gis kyang bram ze'i khye'u bzang dag de'i lus la rkang pas pa rdzi zhig/ de ci'i/ phyir zhe na/ byang chub sems dpa' sems dpa' chen po 'di mi skye ba'i chos la bzod pa thob pa'i phyir ro// de nas de nyid kyi tshe bram ze'i khye'u bzang dag gis lha'i mig dang lha'i rna ba dang / pha rol gyi sems shes pa dang / sngon gyi gnas rjes su dran pa mngon sum du bya ba'i shes pa thob bo// rdzu 'phrul yang mngon par bsgrubs so// des de bzhin gshegs pa snang bas rnam par rol pa'i mngon par shes pa'i spyan sngar tshul dang 'dra ba'i tshigs su bcad pa dag gis kyang mngon par bstod do/ / phyogs dang phyogs mtshams rnams su bskor te btsal gyis kyang / / 'jig rten dag na mi dbang khyod 'dra yongs ma mchis// 'gro ba kun nas rdzogs pa'i sangs rgyas mngon par 'phags// rnam par 'dren pa rang byung khyod la bdag phyag 'tshal/ / dper na bar snang la ni nyi ma lhan ne ltar// phyogs dang phyogs mtshams kun gyi 'jig rten khams rnams na// 'jig rten 'di dag thams cad 'od kyis lham mer 'gyur/ / sangs rgyas yon tan gzi mnga' khyod la bdag phyag 'tshal// ji ltar seng ge nags khrod dag na sgra sgrogs pa// wa tshogs phal cher thams cad zil gyis gnon par bgyid/ / de ltar mi yi dam pa mthu chen mnga' ba yang // mu stegs can mang 'dus pa thams cad zil gyis gnon// bde bar gshegs pa srin mtshams par gyi mdzod spu dkar/ / dngul dang kha ba'i tshogs bzhin mtha' yas gzi brjid can// des ni 'jig rten 'di dag thams cad snang bar bgyis// 'jig rten kun na sangs rgyas khyod ni mi mnyam mnyam/ / skyes bu khyu mchog zhabs la lha yi 'khor lo mnga'// gsal zhing mdzes la rtsibs stong tshang zhing mu khyud 'khor// de dag gis ni ri dang nags bcas sa 'di rnams// rab tu g.yo bgyid thub pa gang zag mtshungs med pa// nyon mongs shas chen dor bar bgyi ba thams cad bor// 'phags pa nges par 'byin pa'i lam ni rab tu brnyes// nor rnams kun dang ldan zhing yon tan rnams kyis phyug/ bsam pa bzhin du 'phags pa'i nor rnams bkod pa mdzad// sa dang mtshungs shing sbyin pa'i gnas gyur mtshungs ma mchis// yon tan kun la mngab brnyes tshul khrims rnam dag pa/ / ji ltar nam mkha' lag pa mi thogs mi chags ltar// 'jig rten dag na khyod la rjes chags khro mi mnga'// bzod pa zad kyis gzugs pa don dang chos rnams kun/ / snying po ma mchis pa dang gsol dang gsog tu mkhyen// srid pa'i 'gro ba thams cad dag na gang rnams la// rlom sems 'gyur ba'i sems can thog dang dngos ma brnyes/ / khams dang spyod pa dag dang sbyor dang bsam pa mkhyen// rmad du byung dang rnam par 'byed mdzad smon par gyur// chu bo chen por dang / pa'i 'gro ba gzigs gyur nas// sngon chad brtson 'grus stobs brtan mthu ni bsnyen pa mdzad// skye ba spangs shing nyon mongs zhi ba'i thugs dang ldan// thugs rgya chen po skye dang na shi mtha' mar 'byin/ / nam mkha'i dkyil dang mtshungs par chags pa mi mnga' rgyu// 'jig rten chos kyis mi gos 'jig rten gsum na rgyu// bdag nyid chen po shes rab kyis ni snang bar mdzad/ / mun pa mun nag gyur pa thams cad rnam par sel// 'dod chags rdul zhi mdzad cing zhe sdang gti mug gi/ dri ma sna tshogs mun bsal khyod la phyag 'tshal lo// kun dga' bo de tshun chad zam ze'i khye'u bzang dag de'i rdzu 'phrul rnams sam/ mngon par shes pa rnams yongs su nyams par ma gyur to// kun dka' bo de'i tshe de'i dus na zam ze'i khye'u bzang dag ces bya bar gyur pa de gzhan zhig yin pa snyam du khyod dogs shing yid gnyis sam/ re tshom za na de ltar mi blta'o// de ci'i phyir zhe na/ byang chub sems dpa' sems dpa' chen po byams pa 'di nyid de'i tshe de'i dus na bram ze'i khye'u bzang dag ces bya bar gyur te/ de bzhin gshegs pa dgra bcom pa yang dag par rdzogs pa'i sangs rgyas snang bas rnam par rol pa'i mngon par shes pa de la tshigs su bcad pa 'di dag gis mngon par stod do/ / de skad ces bka' stsal pa dang / bcom ldan 'das la tshe dang ldan pa kun dka' bos 'di skad ces gsol to/ / bcom ldan 'das byang chub sems dpa' sems dpa' chen po byams pa 'di gal te yun ring po de srid nas mi skye ba'i chos la bzod pa thob pa lags na/ ci'i slad du myur du bla na med pa yang dag par rdzogs pa'i byang chub mngon par rdzogs par sangs pa rgyas de skad ces gsol pa dang / bcom ldan 'das kyis tshe dang ldan pa kun dga' bo la 'di skad ces bka' stsal to/ / kun dga' bo byang chub sems dpa' rnams kyi bkod pa dang / yongs su gzung ba ni gnyis po 'di dag ste gnyis gang zhe na/ sems can bkod pa dang / sems can yongs su gzung ba dang / zhing bkod pa dang / zhing yongs su gzung ba dang gnyis po 'di dag yin na/ byang chub sems dpa' sems dpa' chen po byams pas ni sngon byang chub sems dpa'i spyad pa spyod pa'i tshe/ zhing bkod pa rnam par sbyangs shing / zhing yongs su gzung ba yongs su bzung ngo // kun dga' bo nga sngon byang chub sems dpa'i spyad pa spyod pa'i tshe/ ngas ni sems can bkod pa rnam par sbyangs/ sems can yongs su gzung ba yongs su bzung / zhing bkod pa'ang rnam par sbyangs/ zhing yongs su gzung ba'ang yongs su bzung ngo // kun dga' bo ngas mngon par shes te/ byang chub sems dpa' sems dpa' chen po byams pa yang dag par zhugs nas/ bskal pa bzhi bcu rtsa gnyis lon pa'i 'og tu ngas gdod bla na med pa yang dag par rdzogs pa'i byang chub tu sems bskyed de/ kun dga' bo bskal pa bzang po 'di 'das nas/

CLOSE WINDOW