/ rgya gar skad du/ Ar+ya sing ha pa ri prits+tsha nA ma ma hA yA na su tra/ bod skad du/ 'phags pa seng ges zhus pa zhes bya ba theg pa chen po'i mdo// sangs rgyas dang byang chub sems dpa' thams cad la phyag 'tshal lo/ / 'di skad bdag gis thos pa dus gcig na/ bcom ldan 'das rgyal po'i khab na bya rgod kyi phung po'i ril/ dge slong stong nyis brgya lnga bcu'i dge slong gi dge 'dun chen po dang thabs cig tu bzhugs te/ byang chub sems dpa'i dge 'dun chen po dang yang thabs cig go// thams cad mkhyen cing thams cad gzigs// / / rgyal ba gang zag mtshungs pa med// rgyal po ma skyes dgra yi bu// seng ge zhes ni grags pa zhig/ tshong dpon bu mo lnga brgya yis// mdun du bdar te lhan cig tu// rgyal po'i khab nas de byung nas// rgyal po'i 'byor pa chen po yis/ / gser las byas pa'i gdugs thogs te// rdzogs sangs rgyas kyi gan song nas// zhabs la mgo bos phyag 'tshal te// lnga brgya po yis gdugs de dag/ tshang bar thub pa tsheche la phul/ / kun kyang byang chub don du zhugs// rdzogs sangs rgyas kyi mthu yis ni// de dag mi 'jigs skyes gyur nas// seng ges thal mo sbyar byas te// rdzogs sangs rgyas la zhus pa ni// byang chub sems dpa'i spyod pa gang / / de ni 'dren pas bdag la gsungs// gang gis mdzes par 'gyur ba lags// gang gis rdzus te skye bar 'gyur// skye ba dran par ji ltar 'gyur// thub pa chen pos lung bstan gsol/ / de dag lhag bsam ye shes kyis// mkhyen nas sangs rgyas lung bstan pa// byang chub sems dpa'i spyod gang zhes// khyod kyis dris pa de bstan to// bzod pa yi ni mdzes par 'gyur// tshangs par spyad pas rdzus te skye// chos kyi sbyin pas skye ba dran// gzhon nu de ltar shes par gyis// gang gis sum cu rtsa gnyis mtshan// dpe byad bzang po brgyad cu dang // gser mdog 'dra ba'i lus 'gyur zhing / / de mthong sems can dga' bar 'gyur// sbyin pa kun gyi mtshan du 'gyur// byams pas de bzhin dpe byad bzang // sems can kun la sems mnyam pas// rgyal ba gser gyi mdog 'drar 'gyur/ / gzungs ni gang gis thob par 'gyur// gang gis ting 'dzin skyes 'gyur lags// gzung ba'i tshig tu gang gis 'gyur// thub pa chen pos bstan du gsol// chos la bzod pas gzungs rnams 'thob/ / sems bsgoms pas ni ting 'dzin skye// bkyal pa'i tshig rnams spang byas na// gzung bar 'os pa'i tshig tu 'gyur// dran dang ldan par ji ltar 'gyur/ / thub pa ji ltar blo gros ldan// ji ltar chos spyod 'gyur ba lags// skyes bu dam pa mkhas cis 'gyur// g.yo med pas ni dran ldan 'gyur// don la sems pa blo gros ldan/ / gus dang bcas pas chos spyod 'gyur// chos kyi mtshan nyid rtogs pa mkhas// 'jig rten mgon po'i spun sngar ni// las gang gis ni skye bar 'gyur// 'jig rten mgon gyi mngon sum du// zhu ba/ zhu bar ji ltar 'gyur// gang gis chos kyi sbyin pa la// nam yang bar chad mi byed pa// de ni des na myur rab tu// 'jig rten mgon dang phrad par 'gyur// gang gis mi khom spong bar 'gyur// gang gis bzang 'gror mchi 'gyur lags/ / skye ba kun tu skye ba na// bag mchis par ni ji ltar 'gyur// dad pas mi khom spong bar 'gyur// tshul khrims kyis ni bzang 'gror 'gro// stong pa nyid ni bsgom byas na// rtag tu bag dang ldan par 'gyur/ / thub pa byang chub sems dpa' rnams// ji ltar las rnams dag par 'gyur// ji ltar bdud kyis snyas mi thogs// ji ltar chos kyis 'phongs 'gyur spong // rnam par grol bas las rnams 'dag/ brtson 'grus kyis ni bdud 'dul 'gyur// ci smras de bzhin byed pas ni// chos kyis 'phongs pa spong bar 'gyur// ka la bing ka'i sgra snyan dang // tshangs pa'i dbyangs 'drar ji ltar 'gyur/ / thub pa mos pa sna tshogs kyi// sems can rnams ni gang gis dga'// bden par smras pas tshangs pa'i dbyangs// ngag rtsub spangs pas sgra snyan 'gyur// bkyil pa'i tshig dang phra ma rnams/ / spangs pas sems can dga' bar 'gyur// ji ltar tshe ring 'gyur ba lags// bro nang nyung bar ji ltar 'gyur// rnam par 'dren pa gang gis na// g.yog 'khor rnams ni mi byed 'gyur// gsod pa mi byed tshe ring 'gyur// mi 'tshe bas ni nang nyung 'gyur// mi mthun pa dag bsdums byas na// g.yog 'khor rnams ni mi phyed 'gyur// don rnams ji ltar 'grub 'gyur lags// gang gis longs spyod nyams mi 'gyur/ / gang dang gang du skye ba der// dbang chen grags pa ji ltar 'gyur// chags pa med pas don rnams 'grub// ser sna med pas longs spyod 'phel// gang dang gang du skye ba der/ / phrag dog med pas dpa' cher grags// ji ltar lha yi mig 'thob 'gyur// lha yi rna ba ji ltar thob// sems can 'chi 'pho skye ba dag/ 'dren pa gang gis 'tshal bar 'gyur// mar me sbyin pas mig 'thob 'gyur/ / rol mo'i sgra yis rna ba dag/ 'chi 'pho skye shes ye shes kyis// de bas de ltar 'grub par 'gyur// 'dren pa byang chub sems dpa' yi// zag pa gang gis bas par 'gyur// tshe rabs snga dran cis 'gyur lags// rdzu 'phrul ci yis thob par 'gyur// bzhon pa sbyin pas rdzu 'phrul 'thob// dran pa bsgoms pas rjes su dran// mtha' gnyis rab tu spang byas na// zag pa zad pas reg par 'gyur/ / gang gis zhing ni phun sum tshogs// cis na dge 'dun phur sum tshogs// gang gis phun sum tshogs 'od 'gyur// gang gis phyogs bcur lhang nger gda'/ smon lam gyis ni phun sum zhing // bsdu bas dge 'dun phun sum tshogs// 'dir ni rin chen gdugs phul bas// phyogs bcur lhang nger snang bar 'gyur// chos rnams thams cad bsdu ba ni/ / chos gang gis ni thob par 'gyur// gang dang gang du skyes pa der// byang chub sems dpa' dga' ba thob// sems can thams cad thar bya'i phyir// byang chub don du sems btud pas/ / des na chos rnams bsdu ba'ang 'thob// des ni dga' ba'ang 'thob par 'gyur// bslab pa ci 'dra bslabs pa dang // sems ni ci 'dra bsgoms pa yis// thub pa chen po khyod 'dra ba'i// / ston pa thams cad mkhyen par 'gyur// sems can ma lus thams cad la// mnyam pa'i sems nyid bslabs pa dang // mnyam par sems ni bsgoms pas na// thams cad zil gnon rgyal bar 'gyur/ / skye ba kun tu byang chub sems// rmi lam na yang sems de ni// 'dor mi 'gyur na mnyal tshe// smos ci 'tshal bar gang gis 'gyur// grong dang grong khyer rnams su 'am// gang du gan pa'i yul rnams su/ / byang chub la ni yang dag 'dzud// des na sems 'dor mi 'gyur ro// gang dang gang du skye bar yang // ji ltar stobs ni cher 'gyur dang // rtag tu mthu yis 'phags pa dang // bdud rnams bye bas tshugs mi 'gyur// 'dir ni snying po lnga byin zhing // skrag la mi 'jigs byin na ni// gang dang gang du skyes par yang // des na stobs ni cher 'gyur te// rtag tu mthu yis pa lag/ ba dang // bdud rnams bye bas mi tshugs so// byang chub sems dpa'i spyod pa de// 'jig rten mgon gyis mngon sum du// lung bstan pa 'di thos nas su// seng ge yid ni dga' bar gyur// seng ge grogs dang lhan cig tu// 'di skad kyi ni tshig smra ste// spyod pa bstan pa 'di la ni// bdag cag rjes su bslab par bgyi// de nas sangs rgyas 'dzum mdzad de// stong gsum po yang g.yos gyur nas/ / ma pham pas ni sangs rgyas la// ci zhig slad du 'dzum mdzad pa// thub chen lung bstan gsol zhes zhus// de skad zhu ba zhus pa dang // ma pham pa la sangs rgyas kyis 'di skad ces ni bka' stsal to/ / gang gi phyir ni 'dzum mdzad pa// ma pham nga las 'dir nyon cig/ sangs rgyas bye ba brgyad cu dang // gzhan yang khrag khrig phrag bcu la// byang chub don du 'dus nas ni/ / mi yi 'dren pa rnams la mchod// rdzogs pa'i sangs rgyas rkang gnyis mchog/ mar me mdzad pa tshun chad du// bram ze'i khye'u 'di dag rnams// nga yis yongs su smin par byas// snang ba che zhes bya ba yi/ / bskal pa chen po 'byung 'gyur te// de dag bskal pa gcig de la// rnam par 'dren par 'gyur ba ste// ye shes tog gi rgyal mtshan zhes// 'jig rten 'den pa rnams su 'gyur/ / 'od dpag med kyi bkod pa ltar// de dag gi yang de 'drar 'gyur// byams pa nas ni bzung nas su// bskal pa sum brgya tshad ni// de yi bar du dus kun tu// rtag tu sangs rgyas phrad par 'gyur// 'di dag byang chub thob pa yi// ming ni gang sus thos pa rnams// de dag thams cad 'jig rten du// kun mkhyen gang zag mtshungs med 'gyur// gang zhig lung bstan 'di thos nas/ / mos pa skyed par byed pa ni// 'jig rten gsum po 'di dag na// de dang mtshungs bu'i bsod nams med// gang gis bskal pa drug stong du// sangs rgyas zhing rnams thams cad du// rin chen rnams kyis bkang byas nas// byang chub phyir 'dir byin pa bas// gang gis chos kyi rnam grangs 'di// thos nas byang chub phyir 'jug na// sngar smos pa yi bsod nams kyis// grangs dang char yang mi phod do/ / chos 'di bshad pa'i tshe na ni// 'jig rten mgon po'i mthu yis ni// lha rnams me tog char pa 'bebs// stong gsum po yang gsos par gyur// seng ge grogs dang bcas pa yis// mngon par shes pa lnga thob nas// nyin bdun par du mchod byas te// bstan pa la ni rab tu byung // de kun gyis ni ting 'dzin thob// zad mi shes kyi gzungs kyang thob// sems can rnams kyi don byed de/ / sangs rgyas chos la 'dzud par byed// chos kyi rnam grangs 'di bstan pa// sems can bye ba phrag brgyad cu byang chub mchog la zhugs so// bcom ldan 'das kyis de skad ces bka' stsal nas/ seng ge grogs dang bcas pa dang / lha dang / mi dang / lha ma yin dang / dri zar bcas pa'i 'jig rten yi rangs te/ bcom ldan 'das kyis gsungs pa la mngon par bstod do/ / 'phags pa dkon mchog brtsegs pa chen po'i chos kyi rnam mangs le'u stong phrag brgya pa las/ 'phags pa seng ges nus nga'i le'u zhes bya ste/ 'dus pa sum cu rtsa bdun pa rdzogs so/ / / rgya gar gyi mkhan po dAn shI la dang / mu ne bar ma dang / zhu chen gyi lo tsa ba ban de ye shes sdes bsgyur cing nus te/ skad gsar bcad kyis kyang bcos nas gtan la phab pa'o/

CLOSE WINDOW