rgya gar skad du/ Ar+ya san d+hi nir mo tsa nA ma ma hA yA na sU tra/ bod skad du/ 'phag // pa dgongs pa nges par 'grel pa zhes bya ba theg pa chen po'i mdo/ sangs rgyas dang / byang chub sem bya/ / dpa' thams cad la phyag 'tshal lo// 'di skad bdag gis thos pa dus gcig na/ bcom ldan 'das gzhal med khang chen po rin po che sna bdun shin tu 'bar bas bkod pa/ 'jig rten gyi khams dpag tu med pa rgyas par 'gengs pa/ 'od zer chen po kun tu 'byung ba/ gnas kyi be brag shin tu rnam par phye ba/ mtha' yas pa rnam par// gzhag pa/ dkyil 'khor yongs su ma chad pa/ khams gsum pa las yang dag par 'das pa'i spyod yul/ 'jig rten las 'das pa de'i bla ma'i dge ba'i rtsa ba las byung ba/ dbang sgyur ba'i rnam par rig pa shin tu rnam par dag pa'i mtshan nyid/ de bzhin gshegs pa'i gnas/ byang chub sems dpa' dpag tu med pa'i dge 'dun rjes su dong ba/ lha dang / klu dang / gnod sbyin dang / dri za dang / lha ma yin dang / nam mkha' lding dang / mi 'am ci dang / lto 'phye chen po dang / mi dang / mi ma yin pa mtha' yas pa rnam par rgyu ba/ chos kyi ro'i dga' ba dang / bde ba chen pos brtan pa/ sems can thams cad kyi don thams cad yang dag par thob par mdzad pas nye bar gnas pa/ nyon mongs pa'i dri ma'i gnod pa thams cad dang bral ba/ bdud thams cad yongs su spangs pa/ thams cad kyi bkod pa las lhag pade bzhin gshegs pa'i byin gyis brlabs kyis bkod pa/ dran pa dang / blo gros dang / rtogs pa chen pos nges par 'byung ba/ zhi gnas dang lhag mthong chen po'i theg pa/ rnam par thar pa'i sgo chen po stong pa nyid dang / mtshan ma med pa dang / smon pa med pa nas 'jug pa/ rin po che'i pad+ma'i rgyal po yon tan gyi tshogs mtha' yas pas brgyan pa'i bkod pa chen po la rten pa na bzhugs te/ bcom ldan 'das legs par thugs su chud pa'i blo dang ldan pa/ kun tu spyod pa gnyis mi mnga' ba/ mtshan nyid med pa'i chos la shin tu gzhol ba/ sangs rgyas kyi gnas pas gnas pa/ sangs rgyas thams cad dang mnyam pa nyid brnyes pa/ sgrib pa mi mnga' bas rtogs par thugs su chud pa/ phyir mi ldog pa'i chos dang ldan pa/ spyod yul gyis mi 'phrogs pa/ rnam par gzhag pa/ bsam gyis mi khyab pa/ dus gsum mnyam pa nyid mthar phyin pa/ 'jig rten gyi khams thams cad du khyab pa'i sku dang ldan pa/ chos thams cad la the tsom med pa'i ye shes mnga' ba/ spyod pa thams cad dang ldan pa'i blo mnga' ba/ chos mkhyen pa la nem nur med pa/ rnam par ma brtags pa'i sku mnga' ba/ byang chub sems dpa' thams cad kyis ye shes yang dag por blangs pa/ sangs rgyas kyi gnas pa gnyis su med pa dam pa'i pha rol tu phyin pa/ de bzhin gshegs pa ma 'dres pa'i rnam par thar par mdzad pa'i ye shes kyi mthar phyin pa/ mtha' dang dpung med pa'i sangs rgyas kyi mnyam pa nyid thugs su chud pa/ chos kyi dbyings kyis mtha' klas pa/ nam mkha'i khams kyi mthas gtugs pa de/ nyan thos kyi dge 'dun tshad med pa thams cad kyang cang shes pa/ sangs rgyas kyi sras sems shin tu rnam par grol ba/ shes rab shin tu rnam par grol ba/ tshul khrims shin tu rnam par dag pa/ chos 'dod pa rnams dang bde bar phrad pa/ mang du thos pa/ thos pa 'dzin pa/ thos pa bsags pa/ legs par bsam pa sems pa/ legs par smra ba brjod pa/ legs par bya ba'i las byed pa/ shes rab myur ba/ shes rab mgyogs pa/ shes rab rno ba/ 'byung ba'i shes rab can/ nges par 'byed pa'i shes rab can/ shes rab che ba/ shes rab yangs pa/ shes rab zab pa/ shes rab mnyam pa med pa/ shes rab rin po che dang ldan pa/ rig pa gsum dang ldan pa/ mthong ba'i chos la bde bar gnas pa'i mchog thob pa/ yon tan yongs su sbyong ba chen po/ spyod lam rang gi zhi ba phun sum tshogs pa/ bzod pa dang nges pa chen po dang ldan pa/ de bzhin gshegs pa'i bka' la shin tu zhugs pa sha stag dang / sangs rgyas kyi zhing sna tshogs nas 'dus pa'i byang chub sems dpa' dpag tu med pa thams cad kyang gnas chen po la yang dag par zhugs pa/ theg pa chen po'i chos kyis nges par 'byung ba/ sems can thams cad la sems mnyam pa/ rtog pa dang / rnam par rtog pa dang / yongs su rtogs pa thams cad dang bral ba/ bdud dang phyir rgol ba thams cad bcom pa/ nyan thos dang rang sangs rgyas kyi yid la byed pa thams cad las ring du gyur pa/ chos chen po'i ri'i dga' ba dang bde bas brtan pa/ 'jigs pa lnga las yang dag par 'das pa/ phyir mi ldog pa'i sa bgrod pa gcig pur gyur pa/ sems can thams cad kyi gnod pa thams cad rab tu zhi bar bya ba'i sa la mngon du gyur pa sha stag la/ 'di lta ste/ byang chub sems dpa' sems dpa' chen po don zab dgongs pa nges par 'grel dang / tshul bzhin kun 'dri dang / chos 'phags dang / blo gros shin tu rnam par dag pa dang / blo gros yangs pa dang / yon tan 'byung gnas dang / don dam yang dag 'phags dang / 'phags pa spyan ras gzigs dbang phyug dang / byams pa dang / byang chub sems dpa' sems dpa' chen po 'jam dpal la sogs pa dang thabs cig go// de nas byang chub sems dpa' tshul bzhin kun 'dri/ ba brjod du med pa/ gnyis su med pa'i mtshan nyid don dam pa la brtsams te/ byang chub sems dpa' don zab dgongs pa nges par 'grel la dri ba dris pa// kye rgyal paba'i sras/ chos thams cad gnyis su med pa/ chos thams cad gnyis su med pa zhes bya na/ chos thams cad ni gang ji ltar na gnyis su med pa yin/ rigs kyi bu chos thams cad ces bya ba ni gnyis ji tsam pa ste/ 'dus byas dang / 'dus ma byas so// de la 'dus byas ni 'dus byas kyang ma yin/ 'dus ma byas kyang ma yin no// 'dus ma byas 'dus ma byas kyang ma yin/ 'dus byas kyang ma yin no// kye rgyal ba'i sras/ ji ltar na 'dus byas ni/ 'dus byas kyang ma yin/ 'dus ma byas kyang ma yin la/ 'dus ma byas kyang 'dus ma byas ma yin/ 'dus byas kyang ma yin/ rigs kyi bu 'dus byas zhes bya ba de ni ston pas btags pa'i tshig yin te/ ston pas btags pa'i tshig gang yin pa de ni kun tu rtog pa las byung ba tha snyad du brjod pa yin la/ kun tu rtog pa las byung ba tha snyad du brjod pa gang yin pa de ni/ kun tu rtog pa sna tshogs kyi tha snyad du brjod pa/ gtan yongs su ma grub pa'i phyir/ 'dus ma byas ma yin no// rigs kyi bu 'dus ma byas zhes bya ba de yang tha snyad kyi khongs su gtogs pa yin la/ 'dus byas dang / 'dus ma byas su ma gtogs pa gang ci brjod kyang de yang de dang 'dra ba nyid du gyur/ de yang de dang 'dra ba nyid du 'gyur ro// dngos po med pa ni brjod pa yang med pas/ dngos po de yang gang zhe na/ 'phags pa rnams kyis 'phags pa'i ye shes dang / 'phags pa'i mthong bas brjod du med par mngon par rdzogs par sangs rgyas pa gang yin pa ste/ brjod du med pa'i chos nyid de nyid mngon par rdzogs par byang chub par bya ba'i phyir/ 'dus byas zhes ming du btags so// rigs kyi bu 'dus ma byas zhes bya ba de yang ston pas btags pa'i tshig yin te/ ston pas btags pa'i tshig gang yin pa de ni/ kun tu rtog pa las byung ba tha snyad du brjod pa yin la/ kun tu rtog pa las byung ba tha snyad du brjod pa gang yin pa de ni/ kun tu rtog pa sna tshogs kyi tha snyad du brjod pa gtan yongs su ma grub pa'i phyir 'dus ma byas ma yin no// rigs kyi bu 'dus byas zhes bya ba de yang tha snyad kyi khongs su gtogs pa yin la/ 'dus byas dang / 'dus ma byas su ma gtogs pa gang ci brjod kyang de yang de dang 'dra ba nyid du gyur/ de yang de dang 'dra ba nyid du 'gyur ro// brjod pa ni dngos po med pa can ma yin te/ dngos po de yang gang zhe na/ 'phags pa rnams kyis/ 'phags pa'i ye shes dang / 'phags pa'i mthong bas brjod du med par mngon par rdzogs par sangs rgyas pa gang yin pa ste/ brjod du med pa'i chos nyid de nyid mngon par rdzogs par byang chub par bya ba'i phyir 'dus ma byas zhes ming du btags so// rgyal ba'i sras ji ltar 'di ltar na/ 'phags pa rnams kyis dngos po de 'phags pa'i ye shes dang / 'phags po'i mthong bas brjod du med par mngon par rdzogs par sangs rgyas shing / brjod du med pa'i chos nyid de nyid mngon par rdzogs par byang chub par bya ba'i phyir 'dus byas dang / 'dus ma byas zhes ming du btags pa yin/ rigs kyi bu 'di lta ste/ dper na sgyu ma mkhan nam/ sgyu ma mkhan gyi slob ma mkhas pa zhig gis/ lam po che'i bzhi mdor 'dug ste/ rtswa dag gam/ lo ma dag gam/ shing dag gam/ gseg ma dag gam/ gyo dum dag gcig tu bsdus nas ra sgyu ma'i las rnam pa sna tshogs 'di lta ste/ glang po che'i tshogs dang / rta pa'i tshogs dang / shing rta'i tshogs dang / dpung bu chung gi tshogs dang / nor bu dang / mu tig dang / bai DUR+Ya dang / dung dang / man shel dang / b+hu ru'i tshogs dang / nor dang / 'bru dang / mdzod dang / bang ba'i tshogs dag rnam par bstan na/ de la sems can gang dag byis pa'i rang bzhin can/ rmongs pa'i rang bzhin can/ shes rab 'chal pa'i rang bzhin can/ rtswa dang / lo ma dang / shing dang / gsag ma dang / gyo dum de dag mi shes pa de dag ni de dag mthong ngam/ thos na 'di snyam du sems te/ snang ba gang yin pa'i glang po che'i tshogs 'di ni yod do// snang ba gang yin pa'i rta pa'i tshogs dang / shing rta pa'i tshogs dang // dpung bu chung gi tshogs dang / nor bu dang / mu tig dang / bai DUR+Ya dang / dung dang / man shel dang / byu ru'i tshogs dang / nor dang / 'bru dang / mdzod dang / bang ba'i tshogs 'di ni yod do snyam du sems shing / de dag ji ltar mthong ba dang / ji ltar thos pa bzhin du de dag la nan gyis mchog tu bzung zhing mngon par zhen nas 'di ni bden gyis/ gzhan ni brdzun pa'o zhes rjes su tha snyad 'dogs par yang byed do/ / de ni de dag gis phyis brtag par bya dgos pa yin no// de la sems can gang dag byis pa'i rang bzhin can ma yin pa/ rmongs pa'i rang bzhin can ma yin pa/ shes rab dang ldan pa'i rang bzhin can/ rtswa dang / lo ma dang / shing dang / gseg ma dang / gye dum de dag shes pa de dag ni de dag mthong ngam/ thos na 'di snyam du sems te/ gang 'di ltar snang ba 'di ni glang po che'i tshogs ma yin no// gang 'di ltar snang ba 'di ni rta pa'i tshogs dang / shing rta pa'i tshogs dang / dpung bu chung gi tshogs dang / nor bu dang / mu tig dang / bai DUR+Ya dang / dung dang / man shel dang / byu ru'i tshogs dang / nor dang / 'bru dang / mdzod dang / bang ba'i tshogs ma yin gyi/ gang la glang po che'i tshogs kyi 'du shes dang / glang po che'i tshogs kyi rnam grangs kyi 'du shes 'byung bar 'gyur pa dang / nor dang / 'bru dang / mdzod dang / bang ba'i tshogs kyi bar gyi 'du shes dang / de dag gi rnam grangs kyi 'du shes 'byung par 'gyur ba 'di ni/ sgyu ma byas pa yin no// 'di ni mag slu bar byed pa snyam du sems shing de dag ji ltar mthong ba dang / ji ltar thos pa bzhin du de dag la nan gyis mchog tu bzung zhing mngon par zhen nas/ 'di ni bden gyi gzhan ni brdzun pa'o zhes rjes su tha snyad mi 'dogs kyi/ 'di ltar don ji lta ba bzhin du/ rnam par rig par bya ba'i phyir rjes su tha snyad 'dogs par byed de/ de ni de dag gis phyis brtag par bya mi dgos pa yin no// de bzhin du sems can gang dag byis pa'i rang bzhin can so so'i skye bor gyur pa/ shes rab 'phags pa 'jig rten las 'das pa ma thob pa/ chos thams cad kyi brjod du med pa'i chos nyid mngon par mi shes pa de dag ni 'dus byas dang / 'dus ma byas de dag mthong ngam/ thos na 'di snyam du sems te/ snang ba gang yin pa'i 'dus byas dang / 'dus ma byas 'di dag ni yod do snyam du sems shing / de dag ji ltar mthong ba dang / ji ltar thos pa bzhin du nan gyis mchog tu bzung zhing mngon par zhen nas/ 'di ni bden gyi gzhan ni brdzun pa'o zhes rjes su tha snyad 'dogs par yang byed de/ de ni de dag gis phyis nye bar brtag par bya dgos pa yin no// de la sems can gang/ dag byis pa'i rang bzhin can ma yin pa/ bden pa mthong ba/ shes rab 'phags pa 'jig rten las 'das pa thob pa/ chos thams cad kyi brjod du med pa'i chos nyid mngon par shes pa de dag ni/ 'dus byas dang / 'dus ma byas de dag mthong ngam/ thos na 'di snyam du sems te/ snang ba gang yin pa'i 'dus byas dang / 'dus ma byas 'di dag ni med pa yin gyi/ gang la 'dus byas dang / 'dus ma byas kyi 'dus shA dang / 'dus byas dang / 'dus ma byas kyi rnam grangs kyi 'du shes 'jug par 'gyur ba 'di ni rnam par rtog pa las byung ba'i 'du byed kyi mtshon ma sgyu ma lta bu yin to/ / 'di ni blo rnam par rmongs par byed pa yin no snyam du sems shing / de dag ji ltar mthong ba dang / ji ltar thos pa bzhin du/ de dag la nan gyis mchog tu bzung zhing mo ngon par zhen nas/ 'di ni bden gyi gzhan ni brdzun pa'o zhes rjes su tha snyad du mi 'dogs kyi/ 'di ltar don ji lta ba bzhin du rnam par rig par bya ba'i phyir/ rjes su tha snyad 'dogs par byed de/ de ni de dag gis phyis nye bar brtag par bya mi dgos pa yin no// rigs kyi bu de ltar na 'phags pa rnams kyis/ dngos po de 'phags pa'i ye shes dang 'phags pa'i mthong bas brjod du med par mngon par rdzogs par sangs rgyas shing / brjod du med pa'i chos nyid de nyid mngon par rdzogs par byang chub par bya ba'i phyir/ 'dus byas dang / 'dus ma byas zhes ming du btags pa yin no// de nas byang chub sems dpa' don zab dgongs pa nges par 'grel gyis/ de'i tshe tshigs su bcad pa 'di dag smras so// zab mo byis pa'i spyod yul ma yin pa/ brjod med gnyis min rgyal bas bstan mdzad kyang // byis pa gti mug rmongs pa 'di dag ni// smra ba'i spros la dga' zhing gnyis la gnas// ma rtogs pa 'am log par rtog par dag/ lug dang ba yang dag tu yang skye zhing // de dag shes pa'i smra ba de bor nas// shin tu yun ring 'khor ba 'dir 'khor 'gyur// don zab dgongs pa nges par 'grel gyi le'u ste dang po'o/ / // de nas bcom ldan 'das la/ byang chub sems dpa' chos 'phags kyis 'di skad ces gsol to// bcom ldan 'das/ 'di nas 'jig rten gyi khams gang+gA'i klung bdun cu rtsa bdun gyi bye ma snyed 'das pa na/ de bzhin gshegs pa grags pa rgya chen gyi sangs rgyas kyi zhing 'jig rten gyi khams grags pa can zhes bgyi ba zhig mchis pa der/ bdag sngon gyi gdugs rnams kyi ches snga ba zhig na mchis pa'i tshe de na bdag gis/ mu stegs can rang rang gi ston pa la sogs pa 'bum phrag bdun cu rtsa bdun 'di lta ste/ chos rnams kyi don dam pa'i mtshan nyid bsam pa las brtsams nas/ sa phyogs shig na 'dug cing mchis nas/ de dag chos rnams kyi don dam pa'i mtshan nyid sems par bgyid/ 'jal bar bgyid/ nye bar rtog par bgyid/ yongs su tshol bar bgyid kyang ma rtogs nas/ blo gros tha dad pa yid gnyis can/ blo gros mi mthun pa/ rtsod pa dang 'gyed par gyur pa dag/ gcig la gcig kha shags kyis brtsad par bgyis/ yid byung bar bgyis/ gnod par bgyis// mtho ba tsam par bgyis/ skur pa btab par bgyis te/ so sor mchis pa dag cig mthong nas/ bcom ldan 'das bdag 'di snyam bgyid de/ kye ma de bzhin gshegs pa rnams 'jig rten du 'byung zhing / de dag byung bas don dam pa rtog ge thams cad las yang dag par 'das pa'i mtshan nyid 'di lta bu so sor rtogs pa dang / mngon sum du bgyi ba mchis pa ni ngo mtshar rmad du byung ba lags so snyam bgyid lags so// de skad ces gsol pa dang / bcom ldan 'das kyis/ byang chub sems dpa' chos 'phags la 'di skad ces bka' stsal to// chos 'phags de de bzhin no// de de bzhin te/ ngas ni don dam pa rtog ge thams cad las yang dag par 'das pa'i mtshan nyid mngon par rdzogs par sangs rgyas te/ mngon par rdzogs par sangs rgyas nas kyang bshad cing gsal bar byas/ rnam par phye/ gdags pa byas/ rab tu bstan to// de ci'i phyir zhe na/ don dam pa ni 'phags pa rnams kyi so so rang gis rig pa yin par ngas bshad la/ so so'i skye bo rnams kyi phan tshun rig pa bya ba ni/ rtog ge'i spyod yul yin pa'i phyir te/ chos 'phags de'i phyir rnam grangs des na/ khyod kyis 'di ltar rtog ge thams cad las yang dag par 'das pa'i mtshan nyid gang yin pa ni/ don dam pa yin par rig par bya'o/ / chos 'phags gzhan yang don dam pa ni mtshan ma med pa'i spyod yul yin par ngas bshad la// rtog ge ni mtshan ma'i spyod yul yin te/ chos 'phags de'i phyir rnam grangs des kyang khyod kyis/ 'di ltar rtog ge thams cad la yang dag par 'das pa'i mtshan nyid gang yin pa ni/ don dam pa yin par rig par bya'o// gzhan yang chos 'phags don dam pa ni brjod du med pa yin par ngas bshad de/ rtog ge ni brjod pa'i spyod yul yin pas/ de'i phyir chos 'phags khyod kyis rnam grangs 'dis kyang / 'di ltar gang rtog ge thams cad las yang dag par 'das pa'i mtshan nyid ni don dam pa yin par shes par bya'o/ / gzhan yang chos 'phags don dam pa ni tha snyad thams cad yang dag par chad pa yin par ngas bshad de/ rtog/ ge ni tha snyad kyi spyod yul yin pas/ de'i phyir chos 'phags khyod kyis/ rnam grangs 'dis kyang 'di ltar gang rtog ge thams cad las yang dag par 'das pa mtshan nyid ni don dam pa yin par shes par bya'o/ / gzhan yang chos 'phags don dam pa ni rtsod pa thams cad las yang dag par chad pa yin par ngas bshad de/ rtog ge ni rtsod pa'i spyo yul du lhung ba yin pas/ de'i phyir chos 'phags khyod kyis/ rnam grangs 'dis kyang 'di ltar gang rtog ge thams cad las yang dag par 'das pa'i mtshan nyid ni don dam pa yin par shes par bya'o/ / chos 'phags 'di lta ste dper na/ skyes bu gang zag ji srid 'tsho'i bar du tsha ba dang kha ba la 'dris pas sbrang rtsi'i ro 'am/ kha ra'i ro la brtag pa 'am/ rjes su dpag pa 'am/ mos par mi nus so// yun ring por 'dod pa'i 'dod chags la mos shing 'dod pa'i yongs su gdung bas yongs su gdungs pa dag gis/ nang gi rab tu dben pa'i bde ba/ gzugs dang / sgra dang / dri dang / ro dang / reg bya'i mtshan ma thams cad dang bral ba la brtag pa 'am/ rjes su dpag pa 'am/ mos par mi nus so// yun ring po nas smra ba la mos shing smra ba la mngon par dga' bas nang gi 'phags pa'i mi smra bar gyur pa'i bde ba la brtag pa 'am/ rjes su dpag pa 'am/ mos par mi nus so// yun ring por mthong ba dang thos pa dang / bye brag byed pa dang / rnam par rig pa'i tha snyad la mos shing mngon par dga' bas/ tha snyad thams cad yang dag par chad pa 'jig tshogs 'gog pa'i mya ngan las 'das pa la brtag pa 'am/ rjes su dpag pa 'am/ mos par mi nus so// chos 'phags 'di lta ste dper na/ yun ring por nga yir yongs su 'dzin pa'i phyi rtsod pa la brtson zhing rtsod pa la mngon par dga' bas / byang sgra mi snyan gyi nga'i ba med pa/ kun 'dzin pa med cing rtsod pa med pa la brtag pa 'am/ rjes su dpag pa 'am/ mos par mi nus so// de nas bcom ldan 'das kyis de'i tshe tshigs su bcad pa 'di dag gsungs so/ / so so rang gi mtshan med spyod yul te// brjod du med cing tha snyad yongs su chad// don dam chos ni rtsod dang bral ba ste/ de ni rtog/ ge kun las 'das pa'i mtshan// chos 'phags kyi le'u ste gnyis pa'o// // de nas bcom ldan 'das la/ byang chub sems dpa' shin tu rnam par dag pa'i blo gros kyis 'di skad ces gsol to/ / bcom ldan 'das gang bcom ldan 'das kyis 'di skad du/ don dam pa phra zhing zab ste gcig dang tha dad pa las yang dag pa'i mtshan nyid rtogs par dka' ba'o zhes bka' stsal te/ de ltar bcom ldan 'das kyis legs par gsungs pa ni ngo mtshar ro// bcom ldan 'das bdag gis 'dir sa phyogs gcig cig na mos pas spyod chos 'phags de bzhin du rtog ge pa thams cad kyis/ rtog ge thams cad las yang dag par 'das pa'i mtshan nyid don dam pa la brtag pa 'am/ rjes su dpag pa 'am/ mos par mi nus so// pa'i sa la bzhugs pa'i byang chub sems dpa' shin tu mang ba dag cig phan tshun nas lhags te tshogs nas/ 'di ltar 'du byed dang / don dam pa tha dad pa dang tha dad pa ma lags pa la brtsams te 'dus shing mchis pa mthong na/ de la byang chub sems dpa' kha cig ni 'di skad du/ 'du byed kyi mtshan nyid dang don dam pa'i mtshan nyid tha dad pa ma yin zhes mchi/ kha cig ni 'di skad du 'du byed kyi mtshan nyid dang / don dam pa'i mtshan nyid tha dad pa ma yin par mi rung gi 'du byed kyi mtshan nyid dang / don dam pa'i mtshan nyid tha da do zhes mchi'o/ / kha cig ni the tsom dang yid gnyis su gyur nas 'di skad ces mchi ste/ gang 'di skad du 'du byed kyi mtshan nyid dang / don dam pa'i mtshan nyid tha dad pa ma yin no zhes zer ba dang / gang 'di skad du 'du byed kyi mtshan nyid dang / don dam pa'i mtshan nyid tha dad do zhes zer ba'i byang chub sems dpa' de dag las/ bden par smra ba ni gang / brdzun par smra ba ni gang / tshul bzhin zhugs pa ni gang / tshul bzhin ma yin par zhugs pa ni gang zhes mchi ba mthong nas/ bcom ldan 'das bdag 'di snyam bgyid de/ de 'di ltar rigs kyi bu 'di dag thams cad kyang 'du byed rnams dang / tha dad pa dang tha dad pa ma lags pa las yang dag par 'das pa'i mtshan nyid don dam pa phra ba ma 'tshal bas/ de dag thams byis pa yin pa/ mi gsal ba// mi mkhas pa/ tshul bzhin ma lags pa la zhugs pa'o snyam bgyid do// de skad ces gsol pa dang / bcom ldan 'das kyis byang chub sems dpa' shin tu rnam dag blo gros la 'di skad ces bka' stsal to/ / de de bzhin no// shin tu rnam dag blo gros de de bzhin te/ rigs kyi bu de dag kun kyang de ltar 'du byed rnams dang tha dad pa dang / tha dad pa ma yin pa las yang dag par 'das pa'i mtshan nyid don dam pa phra ba mi shes pas byis pa blun pa/ mi gsal ba/ mi mkhas pa yin te/ tshul bzhin ma yin pa la zhugs pa'o/ / de ci'i phyir zhe na/ shin tu rnam dag blo gros 'du byed rnams la de ltar zhugs pa ni don dam pa shes pa 'am/ don dam pa mngon sum du byed par mi 'gyur ro/ / de ci'i phyir zhe na/ shin tu rnam dag blo gros 'du byed kyi mtshan nyid dang / don dam pa'i mtshan nyid gal te tha dad pa ma yin du zin na/ 'o na ni so so'i skye bo thams cad kyang bden pa mthong bar 'gyur te/ so so'i skye bor gyur bzhin du bla na med pa'i grub pa dang / bde ba'i mya ngan las 'das pa thob par 'gyur ro// yang bla na med pa yang dag par rdzogs ba'i byang chub mngon par rdzogs par sangs rgyas par 'gyur ro/ / de ste yang 'du byed kyi mtshan nyid dang / don dam pa'i mtshan nyid tha dad pa yin na ni de'i phyir bden pa mthong ba yang 'du byed kyi mtshan ma dang ma bral bar 'gyur te/ 'du byed kyi mtshan ma dang ma bral ba'i phyir/ bden pa mthong ba yang mtshan ma'i bcings pa las rnam par ma grol bar 'gyur ro/ / mtshan ma'i bcings pa las rnam par ma grol bas gnas ngan len gyi bcings pa las rnam par ma grol bar 'gyur ro// bcings pa de gnyis ka las ma grol na/ bden pa mthong ba des bla na med pa'i grub pa dang / bde ba'i mya ngan las 'das pa thob par yang mi 'gyur zhing / bla na med pa yang dag par rdzogs pa'i byang chub mngon par rdzogs par 'tshang rgya bar yang mi 'gyur ro/ / shin tu rnam dag blo gros 'di ltar so so'i skye bo yang bden pa mthong ba yang ma yin la/ so so'i skye bor gyur bzhin du/ bla na med pa'i grub pa dang bde ba'i mya ngan las 'das pa'ang mi 'thob/ bla na med pa yang dag par rdzogs po'i byang chub kyang mngon par rdzogs par 'tshang mi rgya bas/ de bas na 'du byed kyi mtshan nyid dang / don dam pa'i mtshan nyid tha dad pa ma yin zhes bya bar mi rung ste/ de la gang de dag 'di skad du 'du byed kyi mtshan nyid dang / don dam pa'i mtshan nyid tha dad pa ma yin zhes zer ba de ni khyod kyis rnam grangs 'dis 'di ltar de dag tshul bzhin ma yin par zhugs pa yin gyis/ tshul bzhin du zhugs pa ma yin par shes par bya'o// shin tu rnam dag blo gros 'di ltar yang bden pa mthong ba 'du byed kyi mtshan ma dang ma bral ba'ang ma yin te/ bral ba nyid yin la/ bden pa mthong ba mtshan ma bcings pa las ma grol ba'ang ma yin te/ rnam par grol zhing bden pa mthong bapa gnas ngan len gyi bcings pa las kyang rnam par ma grol ba'ang ma yin te/ rnam par grol la de gnyis ka las rnam par grol na/ bla na med pa'i grub pa dang / bde ba'i mya ngan las 'das pa 'thob cing / bla na med pa yang dag par rdzogs pa'i byang chub kyang mngon par rdzogs par 'tshang rgya ste/ de'i phyir 'du byed kyi mtshan nyid dang / don dam pa'i mtshon nyid tha dad ces bya bar mi rung ngo / / de la gang de dag 'di skad du/ 'du byed kyi mtshan nyid dang don dam pa'i mtshan nyid tha dad do zhes zer po de ni/ khyod kyis rnam grangs 'dis 'di ltar de dag tshul bzhin ma yin par zhugs pa ste/ tshul bzhin du zhugs pa ma yin par shes par bya'o// gzhan yang shin tu rnam dag blo gros 'du byed kyi mtshan nyid dang / don dam pa'i mtshan nyid tha dad pa ma yin du zin na ni/ / de'i phyir ji ltar 'du byed kyi mtshan nyid nas kun nas nyon mongs pa'i mtshan nyid du lhung ba de bzhin du/ don dam pa'i mtshan nyid kyang kun nas nyon mongs paba'i mtshan nyid du lhung bar 'gyur ro/ / shin tu rnam dag blo gros gal te 'du byed kyi mtshan nyid dang don dam pa'i mtshan nyid tha dad pa yin du zin na ni/ 'du byed kyi mtshan nyid thams cad la don dam pa'i mtshan nyid spyi'i mtshan nyid du gyur par mi rung ngo / / shin tu rnam dag blo gros 'di ltar don dam pa'i mtshan nyid 'di kun nas nyon mongs pa'i mtshan nyid du ltung ba'ang ma yin la/ 'du byed kyi mtshan nyid rnams la don dam pa'i mtshan nyid spyi'i mtshan nyid du'ang gyur pas na/ de'i phyir 'du byed kyi mtshan nyid dang / don dam pa'i mtshan nyid tha dad pa ma yin zhes byar yang mi rung / don dam pa'i mtshan nyid dang tha dad ces byar yang mi rung ngo // de la gang de dag 'di skad du 'du byed kyi mtshan nyid dang / don dam pa'i mtshan nyid tha dad pa ma yin no zhe 'am/ don dam pa'i mtshan nyid tha dad do zhes zer ba de ni/ khyod kyis rnam grangs 'dis kyang 'di ltar de dag tshul bzhin ma yin par zhugs pa yin te/ tshul bzhin du zhugs pa ma yin par shes par bya'o// gzhan yang shin tu rnam dag blo gros gal te 'du byed kyi mtshan nyid dang / don dam pa'i mtshan nyid tha dad pa ma yin du zin na ni/ de'i phyir ji ltar 'du byed kyi mtshan nyid thams cad la don dam pa'i mtshan nyid khyad par med pa de bzhin du/ 'du byed kyi mtshan nyid thams cad kyang bye brag med par 'gyur la/ 'du byed thams cad ji ltar mthong ba dang / ji ltar thos pa dang / ji ltar bye brag phyed pa dang / ji ltar rnam par rig pa las rnal 'byor spyod pa rnams kyis gong du don dam pa btsal bar bya bar yang mi 'gyur ro/ / de ste yang 'du byed kyi mtshan nyid dang / don dam pa'i mtshan nyid tha dad du zin na ni/ 'du byed rnams kyi bdag med pa tsam dang / rang bzhin med pa tsam nyid don dam pa'i mtshan nyid du'ang mi 'gyur la/ kun nas nyon mongs pa'i mtshan nyid dang / rnam par byang ba'i mtshan nyid kyang dus gcig tu mtshan nyid tha dad du grub par 'gyur ro// shin tu rnam dag blo gros 'di ltar yang 'du byed kyi mtshan nyid rnams ni bye brag yod pa yin te/ bye brag med pa ma yin la/ 'du byed rnams la ji ltar mthong ba dang / thos pa dang / bye brag phyed pa dang / rnam par rig pa las kyang gong du rnal 'byor pa rnams don dam pa tshol bar byed cing / don dam pa ni 'du byed rnams kyi bdag med pas rab tu phye ba yin te/ kun nas nyon mongs pa dang / rnam par byang ba'i mtshan nyid kyang dus gcig tu mtshan nyid tha dad du grub pa med pas/ de'i phyir 'du byed kyi mtshan nyid dang / don dam pa'i mtshan nyid tha dad pa ma yin no zhe 'am/ tha dad do zhes byar mi rung ngo // de la gang de dag 'di skad du 'du byed kyi mtshan nyid dang / don dam pa'i mtshan nyid tha dad pa ma yin no zhe 'am/ tha dad do zhes zer ba de ni/ khyod kyis rnam grangs 'dis kyang 'di ltar de dag tshul bzhin ma yin par zhugs pa yin te/ tshul bzhin du zhugs pa ma yin par shes par bya'o// shin tu rnam dag blo gros 'di lta ste/ dper na dung gi dkar ba nyid ni dung dang tha dad pa'i mtshan nyid dang / tha dad pa ma yin pa'i mtshan nyid du gdags sla ba ma yin te/ dung gi dkar ba nyid ji lta ba bzhin du/ gser gyi ser po nyid dang / pi wang gi sgra snyan pa nyid kyang pi wang gi sgra dang tha dad pa ma yin pa'i mtshan nyid dam/ tha dad pa'i mtshan nyid du gdags sla ba ma yin no// a ka ru nag po'i dri zhim pa nyid kyang / a ka ru nag po dang / tha dad pa ma yin pa'i mtshan nyid dang / tha dad pa'i mtshan nyid du gdags sla ba ma yin no// na le zham gyi tsha ba nyid kyang na la zham dang tha dad pa ma yin pa'i mtshan nyid dang / tha dad pa'i mtshan nyid du gdags sla ba ma yin no// nA le zham gyi tsha ba nyid ji lta ba bzhin du a ru ra'i bska ba nyid kyang de bzhin no// 'di lta ste/ dper na shing bal gyi 'da' ba 'jam pa nyid shing bal dang tha dad pa ma yin pa'i mtshan nyid dam/ tha dad pa'i mtshan nyid du gdags sla ba ma yin no// 'di lta ste/ dper na mar gyi snying ku ni mar dang tha dad pa ma yin pa'i mtshan nyid dam/ tha dad pa'i mtshan nyid du gdags sla ba ma yin no// 'di lta ste dper na/ 'du byed thams cad la mi rtag pa nyid dang zag pa dang bcas pa thams cad la sdug bsngal ba nyid dang / chos thams cad la gang zag la bdag med pa nyid ni de dag la de tha dad pa ma yin pa'i mtshan nyid dam/ tha dad pa mtshan nyid du gdags sla ba ma yin no/ / shin tu rnam dag blo gros 'di lta ste/ dper na 'dod chags kyi ma zhi ba'i mtshan nyid ni 'dod chags dang tha dad pa ma yin pa'i mtshan nyid dam tha dad pa'i mtshan nyid du gdags sla ba ma yin no/ / 'dod chags ji lta ba bzhin du/ zhe sdang dang // gti mug la'ang de bzhin du shes par bya ste/ shin tu rnam dag blo gros de bzhin du 'du byed kyi mtshan nyid dang / don dam pa'i mtshan nyid tha dad pa'i mtshan nyid dang / tha dad pa ma yin pa'i mtshan nyid du gdags sla ba ma yin no// shin tu rnam dag blo gros de lta bur pra pa/ mchog tu phra ba/ zab pa/ mchog tu zab pa/ rtogs par dka' ba/ mchog tu rtogs par dka' ba/ tha dad pa dang / tha dad pa ma yin pa las yang dag par 'das pa'i mtshan nyid don dam pa/ ngas mngon par rdzogs par sangs rgyas te/ mngon par rdzogs par sangs rgyas nas kyang / bsgrags shing mngon par phye nas btags te rab tu bstan to// de nas bcom ldan 'das kyis/ de'i tshe tshigs su bcad pa 'di dag gsungs so// 'du byed khams dang don dam mtshan nyid ni// gcig dang tha dad bral ba'i mtshan nyid de// gcig dang tha dad rnam par gang rtog pa/ / de dag tshul bzhin ma yin zhugs pa yin// zhi gnas lhag mthong goms bya ste// mtshan ma dag gi bcings pa dang // gnas ngan len gyi bcings pa las/ skye bo rnam par grol bar 'gyur// blo gros shin tu rnam dag gi le'u ste gsum pa'o// / de nas bcom ldan 'das kyis/ tshe dang ldan pa rab 'byor la bka' stsal pa/ rab 'byor khyod kyis sems can gyi khams na sems can gang dag mngon pa'i nga rgyal can mngon pa'i nga rgyal gyis mngon du zin cing shes pa brda sprod pa ni du tsam yod par shes/ sems can gyi khams na sems can gang dag mngon pa'i nga rgyal med pa'i shes pa brda sprod pa ni du tsam yod par shes/ rab 'byor gyis gsol pa/ bcom ldan 'das bdag ni sems can gyi khams na sems can gang dag mngon pa'i nga rgyal ma mchis par shes pa brda sprod pa ni nyung ba snyam bgyid/ sems can gyi khams na sems can gang dag mngon pa'i nga rgyal gyis mngon du zin pas shes pa brda sprod pa ni tshad ma mchis/ grangs ma mchis/ brjod du ma mchis pa snyam bgyid do// bcom ldan 'das bdag dus gcig na dgon pa na nags khrod chen po zhig tu mchis na/ bdag gi mad ba de na dge slong shin tu mang ba dag cig gnas bcas shing dgon pa nags khrod chen po na mchis te/ dge slong de dag snga dro'i dus kyi tshe phan tshun nas 'dus te lhags nas/ chos la rnam pa sna tshogs su dmigs pas mngon par rtogs pa'i ston pas shes pa brda sprod pa mthong ste/ de dag las kha cig ni phung por dmigs pa dang / phung po'i mtshan ma dmigs pa dang / phung po'i skye bar dmigs pa dang / phung po 'jig par dmigs pa dang / phung po 'gog par dmigs pa dang / phung po 'gog pa mngon du bgyi bar dmigs pas shes pa brda sprod/ ji ltar kha cig phung por dmigs pa de bzhin du kha cig ni skye mched du dmigs pas/ kha cig ni rten cing 'brel par 'byung bar dmigs pa/ kha cig ni zas su dmigs pa dang / zas kyi mtshan ma dmigs pa dang / zas skye bar dmigs pa dang / zas 'jigs par dmigs pa dang / zas 'gog par dmigs pa dang / zas 'gog pa mngon du bgyi bar dmigs pas shes pa brda sprod/ kha cig ni bden par dmigs pa dang / bden pa'i mtshan ma dmigs pa dang / bden pa yongs su shes par dmigs pa dang / bden pa spang bar dmigs pa dang / bden pa mngon du bgyi bar dmig pa dang / bden pa bsgom par dmigs pas shes pa brda sprod/ kha cig ni khams su dmigs pa dang / khams kyi mtshan mar dmigs pa dang / khams tha dad par dmigs pa dang / khams du mar dmigs pa dang / khams 'gog par dmigs pa dang / khams 'gog pa mngon du bgyi bar dmigs pas shes pa brda sprod/ kha cig ni dran pa nye bar gzhag par dmigs pa dang / dran pa nye bar gzhag pa'i mtshan mar dmigs pa dang / dran pa nye bar gzhag pa'i mi mthun pa'i phyogs kyi gnyen por dmigs pa dang / dran pa nye bar gzhag pa bsgoms par dmigs pa dang / dran pa nye bar gzhag pa ma skyes pa skye bar dmigs pa dang / dran pa nye bar gzhag pa skyes pa gnas pa dang / mi nyams pa dang / phyir zhing 'byung ba dang / 'phel zhing rgyas par dmigs pas shes pa brda sprod/ kha cig ni dran pa nye bar gzhag pa la ji lta ba de bzhin du/ kha cig ni yang dag par spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams dang / cig ni 'phags pa'i lam yan lag brgyad par dmigs pa dang / 'phags pa'i lam yan lag brgyad pa'i mtshan mar dmigs pa dang / 'phags pa'i lam yan lag brgyad pa'i mi mthun pa'i phyogs kyi gnyen por dmigs pa dang / 'phags pa'i lam yan lag brgyad pa'i bsgom par dmigs pa dang / 'phags pa'i lam yan lag brgyad pa ma skyes pa skye bar dmigs pa dang / 'phags pa'i lam yan lag brgyad pa skyes pa gnas pa dang / mi nyams pa dang / phyir zhing 'byung ba dang / 'phel zhing rgyas par dmigs pas shes pa brda sprod pa bgyid pa dag mthong nas/ bdag 'di snyam bgyid de/ tshe dang ldan pa 'di dag ni chos rnam pa sna tshogs su dmigs pas mngon par rtogs pa ston pas shes pa brda sprod de/ de ltar thams cad du ro gcig pa'i mtshan nyid don das pa des 'chal pa ni tshe dang dran pa 'di dag thams cad kyang / mngon pa'i nga rgyal nan/ mngon pa'i dargyal gyis mngon du zin par blta ba lags so snyam brgyad do// de bas na bcom ldan/ 'das/ gang bcom ldan 'das kyis bstan pa 'di nyid du 'di skad du don dam pa ni phra zhing zab pa ste/ rtogs par dka' la thams cad du ro gcig pa'i mtshan nyid do zhes bka' stsal pa/ bcom ldan 'das kyis de ltar legs par gsungs pa de ni ngo mtshar ro// bcom ldan 'das kyis bstan pa 'di nyid la zhugs la/ dge slong du gyur pa'i sems can rnams kyis kyang don dam pa thams cad du ro gcig pa'i mtshan nyid de ltar rtogs par dka' na/ 'di las slad rol tu gyur pa'i mu stegs can rnams lta smos kyang ci 'tshal/ bcom ldan 'das kyis bka' stsal pa/ de de bzhin no// rab 'byor de de bzhin te/ phra ba/ mchog tu phra ba/ zab pa/ mchog tu zab pa// rtogs par dka' ba/ mchog tu rtogs par dka' ba/ thams cad du ro gcig pa'i mtshan nyid don dam pa ni ngas mngon par rdzogs par sangs rgyas te/ mngon par rdzogs par sangs rgyas nas kyang / bsgrags shing mngon par phye nas btags te rab tu bstan to// de ci'i phyir zhe na/ rab 'byor phung po rnams kyi rnam par dag pa dmigs pa gang yin pa de ni/ ngas don dam pa zhes yongs su bstan to// rab 'byor gang skye mched rnams dang / cing 'brel par 'byung ba dang / zas rnams dang / bden pa rnams dang / khams rnams dang / dran pa nye bar gzhag pa rnams dang / yang dag par spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams dang / rab 'byor gang 'phags pa'i lam yan lag brgyad pa'i rnam par dag pa dmigs pa de ni ngas don dam pa zhes yongs su bstan to/ / rnam par dag pa dmigs pa de 'am/ phung po thams cad ro gcig pa ste/ mtshan nyid tha dad pa ma yin no// phung po rnams la ji lta ba de bzhin du skye mched rnams nas/ 'phags pa'i lam yan lag brgyad pa'i bar du'ang ro gcig ste/ mtshan nyid tha dad pa ma yin no// de bas na rab 'byor khyod kyis rnam grangs 'dis kyang 'di ltar gang thams cad du ro gcig pa'i mtshan nyid ni don dam pa yin par shes par bya'o/ / gzhan yang rab 'byor rnal 'byor spyod pa'i dge slong ni phung po gcig gi de bzhin nyid don dam pa chos la bdag med pa rab tu shes nas/ so sor de ma yin pa'i phung po rnams dang / skye mched rnams dang / rten cing 'brel par 'byung ba dang / zas rnams dang / bden pa rnams dang / khams rnams dang / dran pa nye bar gzhag pa rnams dang / yang dag par spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams dang / 'phags pa'i lam yan lag brgyad pa'i de bzhin nyid don dam pa chos la bdag med pa/ so sor yongs su tshol bar mi byed do// de bzhin nyid kyi rjes su 'jug pa dang / gnyis su med pa'i ye shes la yang dag par rten pa de nyid kyis thams cad du ro gcig pa'i mtshan nyid don dam pa khong du chud cing mngon du rtogs par 'gyur te gzhan du ni ma yin no/ / de lta bas na rab 'byor khyod kyis rnam grangs 'dis kyang 'di ltar gang thams cad du ro gcig pa'i mtshan nyid ni don dam pa yin par shes par bya'o// gzhan yang rab 'byor ji ltar phung po 'di dag dang / skye mched rnams dang / rten cing 'brel par 'byung ba dang / zas rnams dang / bden pa rnams dang / khams rnams dang / dran pa nye bar gzhag pa rnams dang / yang dag par spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams phan tshun mtshan nyid tha dad pa dang / ji ltar 'phags pa'i lam yan lag brgyad pa phan tshun mtshan nyid tha dad pa de bzhin du/ gal te chos 'di dag gi de bzhin nyid don dam pa chos la bdag med pa yang mtshan nyid tha dad du zin na/ 'o na ni de bzhin nyid don dam pa chos la bdag med pa/ rgyu dang bcas shing rgyu las 'brel te 'byung bar 'gyur ro// rgyu las 'brel te byung ba yin na ni/ 'dus byas su 'gyur ro// 'dus byas yin na ni/ don dam par yang mi 'gyur te/ don dam pa ma yin pa'i phyir/ don dam pa gzhan zhig yongs su btsal bar 'gyur ro// rab 'byor 'di lta ste/ de bzhin nyid don dam pa chos la bdag med pa ni rgyu las 'brel te 'byung ba ma yin la/ 'dus byas ma yin te/ don dam pa ma yin par yang mi 'gyur la/ don dam pa de las don dam pa gzhan yongs su btsal bar mi bya ste/ rtag pa rtag pa'i dus dang / ther zug ther zug gi dus su de bzhin gshegs pa rnams byung yang rung // ma byung yang rung ste/ chos rnams kyi chos nyid chos gnas pa'i dbyings de ni 'dug pa yin gyi gzhan du ma yin no/ / de bas na rab 'byor khyod kyis rnam grangs 'dis kyang gang thams cad du ro gcig pa'i mtshan nyid ni don dam pa yin par shes par bya'o/ / rab 'byor 'di lta ste/ dper na nam mkha' ni gzugs kyi bye brag mtshan nyid tha dad pa rnam pa du ma sna tshogs la mtshan ma med cing rnam par 'phel bar mi rtog mi 'gyur/ tethams cad du ro gcig pa'i mtshan nyid do// de bzhin du mtshan nyid tha dad pa'i chos rnams la yang don dam pa ni thams cad du ro gcig pa'i mtshan nyid du blta'o// de nas bcom ldan 'das kyis/ de'i tshe tshigs su bcad pa 'di dag gsungs so// don dam de ni tha dad ma yin te// kun tu ro gcig mtshan ma sangs rgyas gsung // de la gang rnams tha dad kun rtog pa/ / de dag nga rgyal gnas pa rmongs pa yin// rab 'byor gyi le'u ste bzhi pa'o// // de nas bcom ldan 'das la/ byang chub sems dpa' blo gros yangs pas zhu ba zhus pa/ bcom ldan 'das byang chub sems dpa' sems dang / yid dang / rnam par shes pa'i gsang ba la mkhas pa byang chub sems dpa' sems dang / yid dang / rnam par shes pa'i gsang ba la mkhas pa zhes bgyi na/ bcom ldan 'das ji tsam gyis na/ byang chub sems dpa' sems dang / yid dang / rnam par shes pa'i gsang ba la mkhas pa lags// ji tsam gyis na de bzhin gshegs pas byang chub sems dpa' sems dang / yid dang / rnam par shes pa'i gsang ba la mkhas pa gdags par 'dogs/ de skad ces gsol pa dang // bcom ldan 'das kyis/ byang chub sems dpa' blo gros yangs pa la 'di skad ces bka' stsal to// blo gros yangs pa de ltar khyod skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang mir bcas pa'i skye dgu'i don dang / phan pa dang / bde ba'i phyir zhugs te/ khyod de bzhin gshegs pa la don 'di 'dri ba ni legs so legs so/ / blo gros yangs pa de'i phyir/ sems dang / yid dang / rnam par shes pa'i gsang ba khyod la bshad kyis nyon cig/ blo gros yangs pa 'gro ba drug gi 'khor ba 'di na/ yang na sgo nga las skye ba'i skye gnas sam/ yang na mngal nas skye ba 'am/ yang na drod gsher las skye ba 'am/ yang na rdzus te skye ba'i skye gnas sam/ sems can gyi ris gang dang gang du/ sems can gang dang gang dag gi lus mngon par grub cing skye bar 'gyur yang rung ste/ 'di ltar gnas dang bcas pa'i dbang po gzugs can nye bar len pa dang / / mtshan ma dang / ming dang / rnam par rtog pa la tha snyad 'dogs pa'i spros pa'i bag chags nye bar len pa rnam pa gnyis la brten nas/ der thog ma kho nar sa bon thams cad pa'i sems rnam par smin cing chags la 'phel zhing rgyas pa dang yangs par 'gyur ro/ / de la gzugs yod pa'i khams na nye bar len pa gnyis so// gzugs med pa'i khams na ni nye bar len pa gnyis su med do/ / blo gros yangs pa rnam par shes pa des de ltar lus 'di nye bar bzung zhing blangs pas na len pa'i rnam par shes pa zhes bya'o// de ltar de'i lus 'di la grub pa dang bde ba gcig pa'i phyir 'brel pa dang / rab tu 'brel pa kun gzhi rnam par shes pa zhes kyang bya'o// de ltar de ni gzugs dang / sgra dang / dri dang / ro dang / reg bya dang / chos rnams kyis kun nas bsgrubs shing rab tu bsags pas na sems zhes kyang bya ste/ blo gros yangs pa len pa'i rnam par shes pa de la brten cing gnas nas/ rnam par shes pa'i tshogs drug po dag 'di lta ste/ mig gi rnam par shes pa dang / rna ba dang / sna dang / lce dang / lus dang / yid kyi rnam par shes pa 'byung bar 'gyur ro// de la rnam par shes pa dang bcas pa'i mig dang gzugs rnams la brten nas/ mig gi rnam par shes pa 'byung bar 'gyur te/ mig gi rnam par shes pa de dang lhan cig rjes su 'jug pa/ dus 'thun pa/ spro yul 'thun pa/ rnam par rtog pa'i yid kyi rnam par shes pa 'byung ngo // blo gros yangs pa de la rnam par shes pa dang bcas pa'i rna ba dang / sna dang / lce dang / rnam par shes pa dang bcad ba'i lus dang / reg bya rnams la brten nas lus kyi rnam par shes pa 'byung bar 'gyur te/ lus kyi rnam par shes pa de dang lhan cig tu rjes su 'jug pa/ dus 'thun pa/ spyod yul 'thun pa/ rnam par rtog pa dang bcas pa'i yid kyi rnam par shes pa 'byung ngo // gal te mig gi rnam par shes pa gcig lan cig 'byung bar gyur na rnam par rtog pa'i yid kyi rnam par shes pa mig gi rnam par shes pa dang spyod yul 'thun pa gcig kyang lan cig 'byung ngo / / gal te lan cig dang / gnyis dang / gsum dang / bzhi dang lhan cig rnam par shes pa'i tshogs lnga rnams 'byung bar gyur na yang / de la rnam par rtog pa'i yid kyi rnam par shes pa rnam par shes pa'i tshogs lnga dang spyod yul 'thun pa gcig kyang lan cig 'byung ngo // blo gros yangs pa 'di lta ste/ dper na/ chu'i klung chen po 'bab pa la gal te rlabs gcig 'byung ba'i rkyen nye bar gnas par gyur na/ rlabs gcig 'byung bar 'gyur/ gal te gnyis dang / gal te rlabs/ mang po 'byung ba'i rkyen nye bar gnas par gyur na/ rlabs mang po 'byung bar 'gyur yang / chu klung de nyid rgyun chad par yang mi 'gyur/ yongs su zad par yang mi 'gyur ro// me long gi dkyil// 'khor shin tu yongs su dag pa la gzugs bsnyen gcig 'byung ba'i rkyen nye bar gnas par gyur na/ gzugs brnyan gcig 'byung bar 'gyur ro// gal te gnyis dang / gal te gzugs brnyan mang po 'byung ba'i rkyen nye bar gnas par gyur na/ gzugs brnyan mang po 'byung yang / me long gi dkyil 'khor de gzugs brnyan gyi rang bzhin du 'gyur ba yang ma yin la/ yongs su zad par yang mi mngon no/ / blo gros yangs pa de bzhin du chu bo lta bu dang / me long lta bu'i len pa'i rnam par shes pa de la gnas shing brten nas/ gal te mig gi rnam par shes pa gcig lan cig 'byung ba'i rkyen nye bar gnas par gyur na yang / mig gi rnam par shes pa gcig lan cig 'byung ngo // gal te rnam par shes pa'i tshogs lnga'i bar gyi rkyen nye bar gnas par gyur na yang / rnam par shes pa'i tshogs lnga rnams kyang lan cig 'byung bar 'gyur ro/ / blo gros yangs pa de ltar byang chub sems dpa' chos kyi lugs shes pa la brten/ chos kyi lugs shes pa la gnas nas/ sems dang / yid dang / rnam par shes pa'i gsang ba la mkhas par ni 'gyur mod kyi/ 'di tsam gyis de bzhin gshegs pas/ byang chub sems dpa' thams cad kyi thams cad du sems dang / yid dang / rnam par shes pa'i gsang ba la mkhas par gnas par mi 'dogs so// blo gros yangs pa byang chub sems dpas gang tshun chad nang gi so so rang gi len pa mi mthong / len pa'i rnam par shes pa yang mi mthong ste/ de yang yang dag pa ji lta ba bzhin du'o// kun gzhi yang ma yin/ kun gzhi'i rnam par shes pa yang ma yin/ bsags pa yang ma yin/ sems kyang ma yin/ mig kyang ma yin// gzugs kyang ma yin/ mig gi rnam par shes pa yang ma yin/ rna ba yang ma yin/ sgra yang ma yin/ rna ba'i rnam par shes pa yang ma yin/ sna yang ma yin/ dri yang ma yin/ sna'i rnam par shes pa yang ma yin/ lce yang ma yin/ ro yang ma yin/ lce'i rnam par shes pa'ang ma yin/ lus kyang ma yin/ reg bya'ang ma yin/ lus kyi rnam par shes pa'ang ma yin la/ blo gros yangs pa byang chub sems dpas gang tshun chad rang gi so so rang gi yid mi mthong zhing / chos kyang ma yin la/ yid kyi rnam par shes pa yang mi mthong ste/ de yang dag pa ji lta ba bzhin du'o// byang chub sems dpa' 'di ni don dam pa la mkhas pa zhes bya'o/ / don dam pa la mkhas pa'i byang chub sems dpa' ni/ de bzhin gshegs pas sems dang / yid dang / rnam par shes pa'i gsang ba la mkhas par gdagra ter blo gros yangs pa 'di tsam gyis na/ byang chub sems dpa' sems dang / yid dang / rnam par shes pa'i gsang ba la mkhas pa yin te/ 'di tsam gyis na de bzhin gshegs pas kyang / byang chub sems dpa' sems dang / yid dang / rnam par shes pa'i gsang ba la mkhas par gdags pas 'dogs so// de nas bcom ldan 'das kyis ra de'i tshe tshigs su bcad pa 'di dag gsungs so/ / len pa'i rnam par shes pa zab cing phra// sa bon thams cad chu bo bzhin du 'bab// bdag tu rtog par gyur na mi rung zhes// 'di ni byis pa rnams la ngas ma bstan/ / blo gros yangs pa'i le'u ste lnga pa'o// // de nas bcom ldan 'das la/ byang chub sems dpa' yon tan 'byung gnas kyis zhu ba zhus pa/ bcom ldan 'das byang chub sems dpa' chos rnams kyi mtshan nyid la mkhas pa/ byang chub sems dpa' chos rnams kyi mtshan nyid la mkhas pa zhes bgyi ba ji tsam gyis na/ byang chub sem/ dpa' chos rnams kyi mtshan nyid la mkhas pa lags/ ji tsam gyis na de bzhin gshegs pas/ byang chub sems dpa' chos rnams kyi mtshan nyid la mkhas par gdags pas 'dogs/ de skad ces gsol pa dang / bcom ldan 'das kyis/ byang chub sems dpa' yon tan 'byung gnas la 'di skad ces bka' stsal to// yon tan 'byung gnas de ltar khyod skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang mir bcas pa'i skye dgu'i don dang / phan pa dang / bde ba'i phyir zhugs shing / gang khyod de bzhin gshegs pa la don 'di 'dri ba ni legs so legs so/ / yon tan 'byung gnas de'i phyir chos rnams kyi mtshan nyid khyod la bshad kyis nyon cig/ yon tan 'byung gnas chos rnams kyi mtshan nyid ni gsum po 'di dag ste/ gsum gang zhe na/ kun btags pa'i mtshan nyid dang / gzhan gyi dbang gi mtshan nyid dang / yongs su grub pa'i mtshan nyid do// yon tan 'byung gnas chos rnams kyi kun btags pa'i mtshan nyid gang zhe na/ gang ji snyed du tha snyad gdags pa'i phyir/ chos rnams kyi ngo bo nyid dam bye brag tu ming gi brdas rnam par bzhag pa'o// yon tan 'byung gnas chos rnams kyi gzhan gyi dbang gi mtshan nyid gang zhe na/ gang chos rnams kyi rten cing 'brel par 'byung ba de nyid de/ 'di ltar 'di yod pas 'di 'byung / 'di skyes pa'i phyir 'di skye ba ste/ 'di ltar ma rig pa'i rkyen gyis 'du byed rnams zhes bya ba nas/ de ltar sdug bsngal gyi phung po chen po 'di 'ba' zhig 'byung bar 'gyur ro zhes bya ba'i bar du'o/ / yon tan 'byung gnas chos rnams kyi yongs su grub pa'i mtshan nyid gang zhe na/ gang chos rnams kyi de bzhin nyid de/ gang byang chub sems dpa' rnams kyis brtson 'grus kyi rgyu dang / yang dag par tshul bzhin yid la byed pa'i rgyus rtogs par 'gyur ba yin te/ de rtogs pa goms par byas pa yang dag par grub pas kyang / bla na med pa yang dag par rdzogs pa'i byang chub kyi bar du yang dag par 'grub pa'o/ / yon tan 'byung gnas 'di lta ste dper na/ skyes bu gang zag rab rib can gyi mig la rab rib kyi skyon song pa de lta bur ni kun btags pa'i mtshan nyid du blta'o/ / 'di lta ste dper na/ de nyid kyi rab rib kyi mtshan ma skra shad 'dzings pa 'am/ sbrang bu 'am/ til gyi 'bru 'am/ sngon po'i mtshan ma 'am/ ser po'i mtshan ma 'am/ dmar po'i mtshan ma 'am/ dkar po'i mtshan ma yang rung ste/ snang bar gyur pa de lta bur ni gzhan gyi dbang gi mtshan nyid du blta'o// yon tan 'byung gnas 'di lta ste dper na/ skyes bu gang zag de nyid kyi mig yongs su dag cing mig la rab rib kyi skyon chags pa med par gyur nas/ mig de'i rang bzhin gyi spyod yul ma nor ba'i spyod yul de lta bur ni yongs su grub pa'i mtshon nyid du blta/ yon tan 'byung gnas 'di lta ste dper na/ shel shin tu dang ba ni gang gi tshe tshon sngon po dang phrad par gyur pa de'i tshe nor bu rin po che an du rnyil dang / mthon ka chen po lta bur snang bar 'gyur te/ nor bu rin po che a na da rnyil dang / mthon ka chen por log par 'dzin pas kyang sems can rnams rnam par rmongs par byed do// gang gi tshe tshon dmar po dang phrad par gyur pa de'i tshe nor bu rin po che pad+ma rA ga ltar snang bar 'gyur te/ nor bu rin po che pad+ma rA ga ltar du log par 'dzin pas kyang sems can rnams rnam par rmongs par byed do// gang gi tshe tshan ljang ku dang phrad par gyur pa de'i tshe nor bu rin po che mar gad ltar snang bar 'gyur te/ nor bu rin po che mar gang du log par 'dzin pas sems can rnams rnam par rmongs par byed do// gang gi tshe tshon ser po dang phrad par gyur pa de'i tshe gser du snang bar 'gyur te/ gser du log par 'dzin pas kyang sems can rnams rnam par rmongs par byed do// yon tan 'byung gnas 'odi lta ste dper na/ shel shin tu dang ba tshon dang phrad pa de bzhin du ni gzhan gyi dbang gi mtshan nyid la kun btags pa'i mtshan nyid kyi tha snyad kyi bag chags su blta'o/ / 'di lta ste/ dper na shel shin tu dang ba la an da rnyil dang / mthon ka chen po dang / pad+ma rA ga dang / mar gad dang / gas du log par 'dzin pa de bzhin du ni gzhan gyi dbang gi mtshan nyid la kun btags pa'i mtshan nyid du 'dzin par blta'o/ / yon tan 'byung gnas 'di lta ste dper na/ shel shin tu dang ba de lta bur ni gzhan gyi dbang gi mtshan nyid du blta'o/ / 'di lta ste dper na/ shel shin tu dang ba de nyid an da rnyil dang / mthon ka chen po dang / pad+ma rA ga dang / mar gad dang / gser gyi mtshan nyid der yong su ma grub cing / rtag pa rtag pa'i dus dang / ther zug ther zug gi dus su rang bzhin med pa de bzhin du gzhan gyi dbang de nyid kun btags pa'i mtshan nyid der rtag pa rtag pa'i dus dang / ther zug ther zug gi dus su yongs su ma grub cing rang bzhin med pa nyid ni yongs su grub pa'i mtshan nyid du blta'o// yon tan 'byung gnas de la ming dang 'brel pa'i mtshan ma la brten te/ kun btags pa'i mtshan nyid rab tu shes so/ / gzhan gyi dbang gi mtshan nyid la kun btags pa'i mtshan nyid du mngon par zhen pa la brten te gzhan gyi dbang gi mtshan nyid rab tu shes so// de gzhan gyi dbang gi mtshan nyid la kun btags pa'i mtshan nyid du mngon par zhen pa la brten te yongs su grub pa'i mtshan nyid rab tu shes so// yon tan 'byung gnas de la byang chub sems dpas chos rnams kyi gzhan gyi dbang gi mtshan nyid la kun btags pa'i mtshan nyid yang dag pa ji lta ba bzhin du rab tu shes na/ mtshan nyid med pa'i chos yang dag pa ji lta ba bzhin du rab tu shes so// yon tan 'byung gnas de la byang chub sems dpa' gzhan gyi dbang gi mtshan nyid yang dag pa ji lta ba bzhin du rab tu shes na/ kun nas nyon mongs pa'i mtshan nyid kyi chos yang dag pa ji lta ba bzhin du rab tu shes so// yon tan 'byung gnas de la byang chub sems dpas yongs su grub pa'i mtshan nyid yang dag pa ji lta ba bzhin du rab tu shes na/ rnam par byang ba'i mtshan nyid kyi chos yang dag pa ji lta ba bzhin du rab tu shes so// yon tan 'byung gnas de la byang chub sems dpas gzhan gyi dbang gi mtshan nyid la mtshan nyid med pa'i chos yang dag pa ji lta ba bzhin du rab tu shes na/ kun nas nyon mongs pa'i mtshan nyid kyi chos rab tu spang ngo // kun nas nyon mongs pa'i mtshan nyid kyi chos rab tu spangs na/ rnam par byang ba'i mtshan nyid kyi chos 'thob par 'gyur ro// yon tan 'byung gnas gang tshun chad byang chub sems dpas de ltar chos rnams kyi kun btags pa'i rang bzhin yang dag ba ji lta ba bzhin du rab tu shes shing / chos rnams kyi gzhan gyi dbang gi mtshan nyid dang / yongs su grub pa'i mtshan nyid dang / mtshan nyid med pa dang / kun nas nyon mongs pa'i mtshan nyid dang / rnam par byang ba'i// mtshan nyid yang dag pa ji lta ba bzhin du rab tu shes la/ mtshan nyid med pa'i chos yang dag pa ji lta ba bzhin du rab tu shes na/ kun nas nyon mongs pa'i mtshan nyid kyi chos rab tu spong zhing / kun nas nyon mongs pa'i mtshan nyid kyi chos rab tu spangs na/ rnam par byang ba'i mtshan nyid kyi chos rtogs par 'gyur ba de tsam gyis na/ byang chub sems dpa' chos rnams kyi mtshan nyid la mkhas pa yin te/ de tsam gyis na de bzhin gshegs bra/ kyang byang chub sems dpa' chos rnams kyi mtshan nyid la mkhas par gdags par 'dogs so// de nas bcom ldan 'das kyis de'i tshe tshigs su bcad pa 'di dag gsungs so// mtshan nyid med pa'i chos rnams rab shes na/ / kun nas nyon mongs mtshan nyid chos rnams spong // kun nas nyon mongs chos rnams rab spangs na/ shin tu rnam dag mtshan nyid chos 'thob po// skye bo bag med nyes brlag le lo can// 'du byed skyon la rtog par mi byed de/ / brtan dang g.yo ba med yod chos rnams la// ma rung byed pa snying brtser bya ba yin// yon tan 'byung gnas kyi le'u ste drug pa'o// // de nas bcom ldan 'das la/ byang chub sems dpa' don dam yang dag 'phags kyis 'di skad ces gsol to/ / bcom ldan 'das 'di na bdag gcig pu dben pa zhig na mchis mchis na/ 'di snyam du sems la yongs su rtog pa skyes te/ bcom ldan 'das kyis rnam grangs du mar phung po rnams kyi rang gi mtshan nyid kyang bshad/ skye ba'i mtshan nyid dang / 'jig pa'i mtshan nyid dang / spang ba dang / yongs su shes pa yang bshad/ phung po rnams la ji lta ba de bzhin du skye mched rnams dang / rten cing 'brel par 'byung ba dang / zas rnams dang / bcom ldan 'das kyis rnam grangs du mar bden pa rnams kyi rang gi mtshan nyid kyang bshad/ yongs su shes pa dang / spang ba dang / mngon du bgyi ba dang / bsgom pa yang bshad de/ bcom ldan 'das kyis rnam grangs/ du ar khams rnams kyi rang gi mtshan nyid kyang bshad/ khams sna tshogs dang / khams du ma dang / spang ba dang / yongs su shes pa yang bsha dang bcom ldan 'das kyis rnam grangs du mar dran pa nye bar gzhag pa rnams kyi rang gi mtshan nyid kyang bshad/ mi mthun pa'i phyogs dang / gnyen po dang / bsgom pa dang / ma skyes pa rnams skye ba dang / skyes pa rnams gnas pa dang / mi nyams pa dang / phyir zhing 'byung ba dang / 'phel zhing rgyas pa'ang bshad/ dran pa nye bar gzhag pa rnams la ji lta ba de bzhin du/ bcom ldan 'das kyis rnam grangs du mar yang dag par spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams dang bcom ldan 'das kyis rnam grangs du mar 'phag pa'i lam yan lag brgyad pa'i rang gi mtshan nyid kyang bshad/ mi mthun pa'i phyogs dang / gnyen po dang / bsgom pa dang / ma skyes pa skye ba dang / skyes pa rnams gnas pa dang / mi nyams pa dang / phyir zhing 'byung ba dang / 'phel zhing rgyas pa'ang bshad nas/ bcom ldan 'das/ bcom ldan 'das kyis chos thams cad ni ngo bo nyid med pa/ chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes kyang bka' stsal na/ ci las dgongs te bcom ldan 'das kyis chos thams cad ni ngo bo nyid med pa/ chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes bka' stsal snyam bgyid na/ bcom ldan 'das la bdag don 'di nyid zhu ste/ bcom ldan 'das kyis ci las dgongs nas/ chos thams cad ni ngo bo nyan med pa/ chos thams cad ni ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa zhes bka' stsal/ de skad ces gsol pa dang / bcom ldan 'das kyis/ byang chub sems dpa' don dam yang dag 'phags la 'di skad ces bka' stsal to// don dam yang dag 'phags khyod kyi sems kyis yongs su rtog pa tshul bzhin skyes pa legs so legs so/ / de ltar khyod skye bo mang po la phan pa dang / skye bo mang po la bde ba dang / 'jig rten la snying brtse ba dang / lha dang mir bcas pa'i skye dgu'i don dang / phan pa dang bde ba'i phyir zhugs te/ 'di ltar khyod de bzhin gshegs pa la don 'di 'dri bar sems pa ni legs so// don dam yang dag 'phags de'i phyir/ ngas gang la dgongs te/ chos thams cad ni ngo bo nyid med pa/ chos thams cad ni ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o// zhes bshad pa nyon cig/ don dam yang dag 'phags ngo bo nyid med pa/ rnam pa gsum 'di lta ste/ mtshan nyid ngo bo nyid med pa dang / skye ba ngo bo nyid med pa dang / don dam pa ngo bo nyid med pa la dgongs nas ngas chos thams cad ni ngo bo nyid med pa'o zhes bshad do/ / don dam yang dag 'phags chos rnams kyi mtshan nyid ngo bo nyid med pa gang zhe na/ gang kun btags pa'i mtshan nyid de/ de ci'i phyir zhe na/ 'di ltar de ni ming gi brdas rnam par gzhag pa'i mtshan nyid de/ rang gi mtshan nyid kyis rnam par gnas pa ma yin pas de'i phyir mtshan nyid ngo bo nyid med pa zhes bya'o/ / don dam yang dag 'phags chos rnams kyi skye ba ngo bo nyid med pa gang zhe na/ gang chos rnams kyi gzhan gyi dbang gi mtshan nyid de/ de ci'i phyir zhe na/ 'di ltar de ni gzhan gyi rkyen gyi stobs kyis 'byung gi/ bdag nyid kyis ma yin pas na/ de'i phyir skye ba ngo bo nyid med pa zhes bya'o// don dam yang dag 'phags chos rnams kyi don dam pa ngo bo nyid med/ pa gang zhe na/ rten cing 'brel par 'byung ba'i chos gang dag skye ba ngo bo nyid med pas ngo bo nyid med pa de dag ni don dam pa ngo bo nyid med do// de ci'i phyir zhe na/ dron dam yang dag 'phags gang chos rnams kyi rnam par dag pa dmigs pa de ni ngas don dam pa zhes yongs su bstan to/ / gzhan gyi dbang gi mtshan nyid de ni rnam par dag pa'i dmigs pa ma yin pas na/ de'i phyir don dam pa ngo bo nyid med pa zhes bya'o/ / don dam yang dag 'phags gang chos rnams kyi yongs su grub pa'i mtshan nyid de'ang don dam pa ngo bo nyid med pa zhes bya'o// de ci'i phyir zhe na// don dam yang dag 'phags gang chos rnams kyi chos bdag med pa de ni de dag gi ngo bo nyid med pa zhes bya ste/ don dam pa yang de yin no// don dam pa ni chos thams cad kyi ngo bo nyid med pas rab tu bya ba yin te/ de'i phyir don dam pa ngo bo nyid med pa zhes bya'o// don dam yang dag 'phags de la 'di lta ste/ mtshan nyid ngo bo nyid med pa ni nam mkha'i me tog lta bur blta'o// don dam yang dag 'phags de la 'di lta ste/ skye ba ngo bo nyid med pa ni sgyu ma byas pa lta bur blta ste/ de dag las gcig kyang don dam pa ngo bo nyid med pa nyid du blta'o// don dam yang dga' de la 'di lta ste/ nam mkha' gzugs kyi ngo bo nyid med pa tsam gyis rab tu phye zhing kun tu 'gro ba de bzhin du de dag las gcig don dam pa ngo bo nyid med par blta ba ni gang chos la bdag med pas rab tu phye ba kun tu 'gro ba'o/ / don dam yang dag 'phags ngas ngo bo nyid med pa rnam pa 'di gsum la dgongs te/ chos thams cad ngo bo nyid med pa'o zhes bshad do/ de la don dam yang dag 'phags mtshan nyid ngo bo nyid med pa la dgongs nas/ chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes bshad do/ / de ci'i phyir zhe na/ don dam yang dag 'phags/ gang rang gi mtshan nyid kyis med pa de ni ma skyes pa'o// gang ma skyes pa de ni ma 'gags pa'o// gang ma skyes ma 'gags pa de ni gzod ma nas zhi ba'o/ / gang gzod ma nas zhi ba de ni rang bzhin gyis yongs su mya ngan las 'das pa ste/ de la yongs su mya ngan las bzla bar bya ba ci yang med pas na/ de'i phyir mtshan nyid ngo bo nyid med pa la dgongs nas/ chos thams cad ni ma skyes pa/ chos thams cad ni ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes ngas bshad do/ / yang don dam yang dag 'phags chos la bdag med pas rab tu phye ba don dam pa ngo bo nyid med pa dgongs nas/ chos thams cad ma skyes pa/ chos thams cad ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes ngas bshad do// de ci'i phyir zhe na/ 'di ltar chos la bdag med pas rab tu phye ba/ don dam pa ngo bo nyid med pa chos rnams kyi chos nyid/ 'dus ma byas pa nyid/ nyon mongs pa thams cad dang bral ba nyid de ni rtag pa rtag pa'i dus dang / ther zug ther zug gi dus su rnam par gnas pa'o// gang rtag pa rtag pa'i dus dang / ther zug ther zug gi dus su chos nyid de nyid kyis gnas pa ni 'dus ma byas te/ 'dus ma byas pa'i phyir de ni ma skyes pa'o// de ma 'gags pa'o// nyon mongs pa thams cad dang bral ba'i phyir de gzong ma nas zhi ba'o// de rang bzhin gyis yongs su mya ngan las 'das pa'o/ / de bas na chos la bdag med pas rab tu phye ba don dam pa ngo bo nyid med pa la yang dgongs nas chos thams cad ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes ngas bshad do// don dam yang dag 'phags gang gi phyir/ sems can gyi khams na sems can rnams kyis kun btags pa'i ngo bo nyid la ngo bo nyid kyis tha dad par mthong la/ gzhan gyi dbang gi ngo bo nyid dang / yongs su grub pa'i ngo bo nyid kyang ngo bo nyid kyis tha dad par mthong bas/ dngo bo nyid med pa rnam pa gsum du 'dogs pa ma yin gyi/ sems can rnams ni gzhan gyi dbang dang yongs su grub pa'i ngo bo nyid la kun btags pa'i ngo bo nyid du sgro btags nas// gzhan gyi dbang dang yongs su grub pa'i ngo bo nyid la kun btags pa'i ngo bo nyid kyi mtshan nyid du rjes su tha snyad 'dogs te/ ji lta ji ltar rjes su tha snyad btags pa de lta de ltar tha snyad btag pa ga sems yongs su bgos shing tha snyad gdags pa'i rjes su 'brel pa 'am/ tha snyad btags pa bag la nyal gyis gzhan gyi dbang dang / yongs su sgrub pa'i ngo bo nyid la kun btags pa'i ngo bo nyid kyi mtshan nyid du mngon par zhen no/ / ji lta ji ltar mngon par zhen pa de lta de lta bur gzhan gyi dbang gi ngo bo nyid la kun btags pa'i ngo bo nyid du mngon par zhen pa'i rgyu de dang rkyen des phyi ma la gzhan gyi dbang gi ngo bo nyid rab tu bskyed do/ / gzhi des na nyon mongs pa'i kun nas nyon mongs pas kyang kun nas nyon mongs so// las kyi kun nas nyon mongs pa dang / tshe'i kun nas nyon mongs pas kyang kun nas nyon mongs te/ yAn ring por gal te sems can dmyal bar ram/ yang na dud 'gror ram/ yang na yi dgra su 'am/ yang na lhar ram/ yang na lha ma yin du 'am/ yang na mir 'khor zhing kun tu rgyug ste/ 'khor ba las mi 'da' 'o// don dam yang dag 'phags de la sems can gang dag sngon dge ba'i rtsa ba ma bskyed pa/ sgrib pa yongs su ma dag pa/ rgyud yongs su ma smin pa/ mos pa mi mnga' ba/ bsod nams dang ye shes kyi tshogs yang dag par ma bsgrub pa de dag la skye ba ngo bo nyid med pa la brtsams te chos ston to/ / de dag gis de thos nas rten cing 'brel par 'byung ba 'du byed rnams la mi rtag pa nyid du 'du shes shing mi brtan pa nyid dang / yid gzhag tu mi rung ba nyid dang / rnam par 'gyur ba'i chos nyid du shes nas/ 'du byed thams cad las yid sdang bar byed/ skyo bar byed do// yid sdang ba dang / skyo bar byas nas sdig pa las phyir bzlog ste/ de dag sdig pa gang yin pa de mi byed cing / dge ba'ang spyod do// de dag dge ba spyad pa'i rgyus kyang dge ba'i rtsa ba ma skyed pa rnams ni bskyed do/ / sgrib pa yongs su ma byang ba rnams kyang yongs su sbyong ngo // rgyud yongs su ma smin pa yang yongs su smin par byed/ gzhi des mos pa mang zhing bsod nams dang ye shes kyi tshogs yang dag par sgrub par 'gyur ro/ / de dag de ltar dge ba'i rtsa ba bskyed pa nas/ bsod nams dang ye shes kyi tshogs kyi bar du yang dag par bsgrubs par gyur mod kyi/ 'on kyang skye ba ngo bo nyid med pa de la/ mtshan nyid ngo bo nyid med pa dang / don dam pa ngo bo nyid med pa rnam pa gnyis yang dag pa ji lta ba bzhin du mi shes pas 'du byed thams cad las yang dag par skyo bar mi 'gyur/ yang dag par 'dod chags dang bral bar mi 'gyur/ yang dag par rnam par grol bar mi 'gyur te/ nyon mongs pa'i kun nas nyon mongs pa las yongs su grol bar mi 'gyur// las kyi kun nas nyon mongs pa las yongs su grol bar mi 'gyur/ tshe'i kun nas nyon mongs pa las yongs su grol bar mi 'gyur te/ yang de bzhin gshegs pa ni de dag la 'di lta ste/ mtshan nyid ngo bo nyid med pa dang / don dam pa ngo bo nyid med pa la brtsams te 'di ltar 'du byed thams cad las yang dag par skyo bar bya ba dang / 'dod chags dang bral bar bya ba dang / rnam par grol bar bya ba dang / nyon mongs pa'i kun nas nyon mongs pa las yang dag par bzla ba dang / las kyi kun nas nyon mongs pa las yang dag par bzla ba dang / tshe'i kun nas nyon mongs pa las yang dag par bzla ba'i phyir chos ston to/ / de dag gis chos de thos nas gzhan gyi dbang gi ngo bo nyid la kun btags pa'i mtshan nyid du mngon par ma zhen pas/ skye ba ngo bo nyid med pa de la mtshan nyid ngo bo nyid med pa dang / don dam pa ngo bo nyid med par mos shing shes nas ji lta ba bzhin du khong du chud pas 'di lta ste/ tha snyad kyis yongs su ma bsgos pa'i shes pa dang / tha snyad dang rab tu ma 'brel pa dang / tha snyad bag la nyal ba med pa'i shes pas/ tshe 'di la shes pa'i stobs bskyed pa dang / phyi ma la yang rgyu yongs su chud pas gzhan gyi dbang gi mtshan nyid de 'gog par byed do/ / gzhi de las kyang 'du byed thams cad las yang dag par skyo ba dang / yang dag par 'dod chags dang bral ba dang / yang dag par rnam par grol bar 'gyur te// nyon mongs pa'i kun nas nyon mongs pa dang / las kyi kun nas nyon mongs pa dang / tshe'i kun nas nyon mongs pa las yongs su grol bar 'gyur ro// de la don dam yang dag 'phags/ sems can nyan thos kyi theg pa'i rigs can rnams kyang lam 'di nyid dang / bgrod pa 'di nyid kyis bla na med pa'i grub pa dang / bde ba'i mya ngan las 'das pa 'thob bo// sems can rang sangs rgyas kyi theg pa'i rigs can rnams dang / de bzhin gshegs pa'i rigs can rnams kyang lam 'di nyid dang / bgrod pa 'di nyid kyis bla na med pa'i grub pa dang / bde ba'i mya ngan las 'das pa 'thob ste/ nyan thos dang / rang sangs rgyas dang / byang chub sems dpa' rnams kyi rnam par dag pa'i lam de ni gcig po 'di yin la/ rnam par dag pa yang gcig ste gnyis su gang yang med do/ / 'di la dgongs nas ngas theg pa gcig tu bshad kyi/ sems can gyi khams na sems can gyi rigs sna tshogs rang bzhin gyis dbang po rtul ba dang dbang po bar ma dang / dbang po rnon po dag ni med pa ma yang yin no// don dam yang dag 'phags nyan thos kyi rig kyi gang zag zhi bar bgrod pa gcig pu pa ni/ sangs rgyas thams cad brtson pa dang ldan par gyur kyang / byang chub kyi snying po la bzhag ste/ bla na med pa yang dag par rdzogs pa'i byang chub thob par bya bar mi nus so// de ci'i phyir/ zhe na/ 'di ltar de ni snying rje shin tu chung ba dang / sdug bsngal gyis shin tu 'jigs pa'i phyir rang bzhin gyis rigs dma' ba yin te/ de ji ltar snying rje shin tu chung ba de bzhin du sems can gyi don bya ba las shin tu phyir phyogs par 'gyur ro/ / ji ltar sdug bsngal gyis shin tu 'jigs pa de bzhin du/ 'du byed thams cad mngon par 'du byed pa las kyang phyir phyogs par 'gyur ro/ / sems can gyi don bya ba las phyir phyogs pa dang / 'du byed mngon par 'du byed pa las phyir phyogs pa ni bla na med pa yang dag par rdzogs pa'i byang chub tu ngas ma bshad do/ de bas na zhi bar bgrod pa gcig pu pa zhes bya'o// gang yang byang chub tu yongs su 'gyur ba'i nyan thos de ni ngas byang chub sems dpa'i rnam grangs su bshad do// de ni 'di ltar nyon mongs pa'i sgrib pa las rnam par grol nas/ de nas de bzhin gshegs pa rnams kyis bskur ba dang / shes bya'i sgrib pa las sems rnam par grol bar byed do// de la thog mar bdag gi don du sbyor ba'i rnam pas de nyon mongs pa'i sgrib pa las rnam par 'grol te/ de'i phyir de bzhin gshegs pas de nyan thos kyi rigs su 'dogs so// don dam yang dag 'phags/ de ltar ngas legs par bshad pa/ legs par bstan pa'i chos 'dul ba shin tu bsam pa rnam par dag pas bshad pa legs par smras pa'i chos la sems can rnams kyi dad pa sna tshogs kyang snang ngo / / don dam yang dag 'phags 'di la de bzhin gshegs pa ni ngo bo nyid med pa rnam pa gsum po 'di dag nyid la dgongs nas drang ba'i don gyi mdo sde brjod pa'i rnam pas 'di lta ste/ chos thams cad ni ngo bo nyid med pa/ chos thams cad ni ma skyes pa/ ma 'gags pa/ gzod ma nas zhi ba/ rang bzhin gyis yongs su mya ngan las 'das pa'o zhes chos bstan to/ / de la sems can gang dag dge ba'i rtsa ba cher bskyed pa/ sgrib pa yongs su dag pa/ rgyud yongs su smin pa/ mos pa mang ba/ bsod nams dang / ye shes kyi tshogs cher bsags pa de dag gis chos de thos nas nga'i dgongs te bshad pa yang dag pa ji lta ba bzhin du rab tu shes shing chos de la yang mos par 'gyur ro// don de yang shes rab kyis yang dag pa ji lta ba bzhin du rtogs par 'gyur te/ de rtogs pa bsgoms pas kyang sbyar te myur bar shin du mthar thug pa thob par 'gyur ro// nga la yang kyes bcom ldan 'das 'di ni yang dag par rdzogs pa'i sangs rgyas te/ 'dis chos thams cad yang dag par mngon du rdzogs par sangs rgyas so zhes dad pa rab tu myong bar byed do// de la sems can gang dag dge ba'i rtsa ba chen po ma skyed pa/ sgrib pa yongs su ma dag pa/ rgyud yongs su ma smin pa/ mos pa chung ba/ bsod nams dang / ye shes kyi tshogs chen po yang dag par ma bsags pa/ drang po drang po'i rang bzhin can/ rtog pa dang sel mi nus pa/ bdag gi lta ba la mchog tu 'dzin par mi gnas pa de dag gis chos de thos nas nga'i dgongs te bshad pa yang dag pa ji lta ba bzhin du mi shes kyang / chos de la mos par byed cing dad pa myong bar byed de/ mdo 'di rnams ni de bzhin gshegs pas bshad pa yin/ te/ zab pa zab par snang ba/ stong pa nyid dang ldan pa/ mthong bar dka' ba/ shes par dka' ba/ brtag tu med pa/ rtog ge'i spyod pa ma yin pa/ zhib mo brtags pa'i mkhas pa dang mdzangs pas rig pa yin no zhes mos par byed do/ / mdo do dag gi don dang nges par bstan pa la/ bdag mi shes par bzung nas 'dug ste/ 'di skad du sangs rgyas kyi byang chub ni phab pa yin te/ chos rnams kyi chos nyid kyang zab pas na/ de bzhin gshegs pa nyid kyis mkhyen gyis/ bdag cag ni mi shes so// de bzhin gshegs pa rnams kyis chos bstan pa ni sems can mos pa sna tshogs can gyi phyir 'jug pa yin te/ bdag cag gis mthong ba dang / shes pa ni ba lang gi rjes tsam la/ de bzhin gshegs pas mkhyen pa dang / gzigs pa ni mtha' yas so zhes de dag mdo sde rnams ri mor byas te yi ger 'dri'o// bris nas kyang 'dzin pa dang / klog pa dang / yang dag par 'gyed pa dang mchod pa dang / ston pa dang / kha ton bya ba byed kyang / de ltar nga'i dgongs te bshad pa zab mo 'di khong du ma chud pa'i phyir/ bsgoms pa'i rnam pas sbyor ni mi nus mod kyi de dag gzhi des bsod nams kyi tshogs kyis kyang 'bogs/ ye shes kyi tshogs kyis kyang 'bogs te/ gong du yang rgyud yongs su ma smin pa yang yongs su smin par byed do// ji ste sem can de dag las sems can gang dag dge ba'i rtsa ba chen po nas bsod nams dang / ye shes kyi tshogs kyi bar du yang dag par ma bsgrubs pa zhig yin la/ mi drang zhing drang ba'i rang bzhin can ma yin gyi/ rtog pa dang sel nus pa/ bdag nyid lta ba mchog tu 'dzin pa la gnas pa de dag gis chos de thos nas nga'i dgongs te bshad pa zab mo yang dag pa ji lta ba bzhin du mi shes te/ chos de la mos kyang chos 'di dag thams cad ni ngo bo nyid med pa nyid/ chos 'di dag thams can ni ma skyes pa nyid/ ma 'gags pa nyid/ gzod ma nas zhi ba nyid/ rang bzhin gyis yongs su mya ngan las 'das pa nyid yin no zhes chos la sgra ji bzhin gyi don du mngon par zhen nas/ de dag gzhi de las chos thams cad la med par lta ba dang / mtshan nyid med par lta bar 'gyur te/ med par blta ba dang / mtshan nyid med par blta bar gyur nas thams cad la mtshan nyid thams cad kyis skur te/ chos rnams kyi kun btags/ ba'i mtshan nyid la'ang skur to// chos rnams kyi gzhan gyi dbang gi mtshan nyid dang / yongs su grub pa'i mtshan nyid la'ang skur to// don dam yang dag 'phags/ de ci'i phyir zhe na/ 'di ltar gzhan gyi dbang gi mtshan nyid dang / yongs su grub pa'i mtshan nyid yod na ni/ kun btags pa'i mtshan nyid kyang rab tu shes par 'gyur na/ de la gang dag gzhan gyi dbang gi/ mtshan nyid dang / yongs su grub pa'i mtshan nyid la mtshan nyid med par mthong ba de dag gis ni kun btags pa'i mtshan nyid la'ang skur ba yin te/ de bas na mtshan nyid rnam pa gsum la yang skur ces bya'o/ / de dag nga'i chos la chos su 'dus shes shing / don ma yin pa la yang don du 'du shes pas chos la yang chos su 'dzin/ don ma yin pa la don du 'dzin te/ de dag chos la mos pa'i phyir dge ba'i chos rnams kyis 'gog mod kyi/ don ma yin pa la mngon par zhen pa'i phyir/ shes rab las yongs su nyams par 'gyur te/ shes rab las yongs su nyams pas/ dge ba'i chos shin tu rgya che ba dang / shin tu dpag tu med pa rnams las yongs su nyams par 'gyur ro// gzhan rnams kyang de dag la chos su bya ba dang / don ma yin pa la don du thos nas/ gang dag lta bas rjes su mos par byed pa de dag kyang / chos la chos su 'du shes/ don ma yin pa la don du 'du shes pas// chos la chos su/ don ma yin pa la don du mngon par zhen te/ de dag kyang gzhi de las de bzhin du dge ba'i chos las yongs su nyams par rig par bya'o// gang dag lta bas rjes su mos par mi byed pa de dag ni/ de dag las chos rnams ngo bo nyid med pa thos shing / chos rnams kyi skye ba med pa dang / 'gags pa med pa dang / gzod ma nas zhi ba nyid dang / rang bzhin gyis yongs su mya ngan las 'das pa nyid thos nas/ skrag cing dngangs la shin tu dngangs par 'gyur te/ 'di skad du 'di ni sangs rgyas kyi bka' ma yin gyi/ 'di ni bdud kyis smras pa zhig go zhes zer zhing de ltar rig nas/ mdo de dag la skur pa 'debs shing spong la/ ngan du brjod de mi snyan par smra'o// gzhi de las ma chen po 'byung bar 'gyur te/ las kyi sgrib pa rgya chen pos reg par 'gyur ro/ / gzhi de las gang dag skye bo phal po che la las kyi sgrib pa chen po thob pas slu bar byed pa/ mtshan nyid thams cad med par lta ba can/ don ma yin pa la don du ston pa de dag kyang las kyi sgrib pa rgya chen po dang ldan par ngas bshad do/ / sems can gang dge ba'i rtsa ba ma bskyed pa/ sgrib pa yongs su ma dag pa/ rgyu yongs su ma smin pa/ mos pa mi mnga' ba/ bsod nams dang / ye shes kyi tshogs yang dag par ma bsags pa/ drang po ma yin te/ drang po'i rang bzhin can ma yin kyang rtog pa dang sel nus la/ bdag nyid lta ba mchog tu 'dzin par gnas pa de dag gis chos de thos nas/ nga'i dgongs te bshad pa yang yang dag pa ji lta ba bzhin du mi shes shing / chos de dag la'ang mi mos par 'gyur te/ de dag chos la yang chos ma yin par 'du shes shing / don la yang don ma yin par 'du shes par 'gyur te/ de dag chos la yang chos ma yin par 'du shes shing / don la yang don ma yin par 'du shes pas/ chos la yang chos ma yin par mngon par zhe na/ don la yang don ma yin par mngon par zhen nas/ 'di skad du 'di/ ni sangs rgyas kyi bka' ma yin gyi/ 'di ni bdud kyis smras pa zhig go zhes zer zhing de ltar rig nas/ mdo de dag la skur pa 'debs shing spong la/ ngan du brjod de mi snyan par smra zhing lhad kyang 'jug par byed de/ rnam grangs du mas kyang mdo sde de dag gzhig pa dang / bsal ba dang / ma rung ba bya ba'i phyir zhugs pa yin no// de la mos pa'i gang zag rnams la yang dgrar 'du shes par 'gyur te/ de dag snga nas kyang las kyi sgrib pas bsgribs la/ yang gzhi de las kyang 'di ltar las kyi sgrib pa de lta bus bsgribs par 'gyur te/ las kyi sgrib pa de'i thog ma nyid ni gdags par sla'i/ bskal pa bye ba khrag brig 'di snyed tsam zhig na 'byung bar 'gyur ba ni gdags par sla ba ma yin no// don dam yang dag 'phags/ de ltar nga'i chos 'dul ba legs par bshad pa/ legs par bstan pa/ bsam pa shin tu rnam par dag pas nges par bstan pa de lta bu'i legs par bshad pa la sems can rnams kyi mos pa sna tshogs rnam pa de lta bu dag kyang snang ngo / / de nas bcom ldan 'das kyis/ de'i tshe tshigs su bcad pa 'di dag gsungs so// chos rnams ngo bo nyid med chos rnam ma skyes dang / / chos rnams ma 'gags chos rnams gzod nas zhi ba dang // chos rnams thams cad rang bzhin mya ngan 'das par ni// dgongs pa med par mkhas pa su zhig smra bar byed/ mtshan nyid ngo bo nyid med skye ba ngo bo med// don dam ngo bo med ces de dag ngas bshad de// 'di la mkhas pa gang zhig dgongs pa shes pa ni// rab tu ma rung 'gyur ba'i lam du de mi 'gro/ / shin tu rnam par dag pa'i lam ni thams cad la// rnam par dag pa 'di gcig gnyis su gang yang med// de phyir 'di ni theg pa gcig tu rab 'dogs te// sems can rigs ni rnam pa sna tshogs med ma yin/ / sems can gang rnams bdag nyid mya ngan 'das byed pa// de ni sems can khams 'di dag na dpag tu med// gang rnams mya ngan 'das kyang sems can mi gtong ba'i/ / brtan zhing snying rje ldan pa de dag shin tu dkon// gang grol de dag rnams ni zag pa med pa'i dbyings// phra zhing bsam gyis mi khyab/ mnyam zhing khyad par med// thaH cad don grub sdug bsngal nyon mongs spangs pa ste// gnyis su brjod pa ma yin bde zhing brtan pa'o// de nas de'i tshe bcom ldan 'das la/ byang chub sems dpa' don dam yang dag 'phags kyis 'di skad ces gsol to// bcom ldan 'das de ltar sangs rgyas bcom ldan 'das rnams kyis dgongs te bshad pa/ phra ba/ mchog tu phra ba/ zab pa/ mchog tu zab pa/ rtogs par dka' ba/ mchog tu rtogs par dka' ba ni ngo mtshar rmad du byung ba'o// bcom ldan 'das/ bcom ldan 'das kyis bka' stsal pa'i don bdag gis 'di ltar 'tshal te/ gang rnam par rtog pa'i spyod yul kun btags pa'i mtshan nyid kyi gnas 'du byed kyi mtshan ma la gzugs kyi phung po zhes ngo bo nyid kyi mtshan nyid dam/ bye brag gi mtshan nyid du ming gi brdas rnam par bzhag pa dang / gzugs kyi phung po skye'o zhe'am/ 'gog go zhe 'am/ gzugs kyi phung po spang ba dang / yongs su shes pa'o zhes ngo bo nyid kyi mtshan nyid dam/ bye brag gi mtshan nyid du ming gi brdas rnam par gzhag pa de ni kun btags pa'i mtshan nyid de/ de la brten nas bcom ldan 'das kyis chos rnams kyi mtshan nyid ngo bo nyid med par btags so/ / gang yang rnam par rtog pa'i spyod yul kun btags pa'i mtshan nyid kyi gnas 'du byed mtshan ma de ni gzhan gyi dbang gi mtshan nyid de/ de la brten nas bcom ldan 'das kyis chos rnams kyi skye ba ngo bo nyid med pa dang / de dag las gcig don dam pa ngo bo nyid med par btags so/ / bcom ldan 'das bcom ldan 'das kyis bka' stsal pa'i don bdag gis 'di ltar 'tshal te/ gang rnam par rtog pa'i spyod yul kun btags pa'i mtshan nyid kyi gnas 'du byed kyi mtshan ma de nyid kun btags pa'i mtshan nyid der yongs su ma grub cing / ngo bo nyid de nyid kyis ngo bo nyid med pa nyid chos bdag med pa/ de bzhin nyid rnam par dag pa'i dmigs pa de ni yongs su grub pa'i mtshan nyid de/ de la brten nas bcom ldan 'das kyis de dag las gcig don dam pa ngo bo nyid med par btags so// gzugs kyi phung po la ji lta bar phung po lhag ma rnams la yang de bzhin du sbyar ro/ / phung po rnams la ji lta bar skye mched bcu gnyis kyi skye mched re re la yang de bzhin du sbyar ro// srid pa'i yan lag bcu gnyis srid pa'i yan lag re re la yang de bzhin du sbyar ro/ / zas bzhi'i zas re re la yang de bzhin du sbyar ro// khams drug dang / khams bco brgyad kyi khams re re la yang de bzhin du sbyar ro// bcom ldan 'das bcom ldan 'das kyis bka' stsal pa'i don bdag gis 'di ltar 'tshal te/ gang rnam par rtog pa'i spyod yul kun btags pa'i mtshan nyid kyi gnas 'du byed kyi mtshan ma la sdug bsngal gyi bden pa dang / sdug bsngal gyi bden pa yongs su shes pa zhes ngo bo nyid kyi mtshan nyid dam/ bye brag gi mtshan nyid du ming gi brdas rnam par gzhag pa de ni kun btags pa'i mtshan nyid de/ de dag la brten nas bcom ldan 'das kyis chos rnams kyi mtshan nyid ngo bo nyid med par btags so// gang yang rnam par rtog pa'i spyod yul kun btags pa'i mtshan nyid kyi gnas 'du byed kyi mtshan ma de ni gzhan gyi dbang gi mtshan nyid de/ de la brten nas bcom ldan 'das kyis chos rnams kyi skye ba ngo bo nyid med pa dang / de dag las gcig don dam pa ngo bo nyid med par btags so/ / bcom ldan 'das/ bcom ldan 'das kyis bka' stsal pa'i don bdag gis 'di ltar 'tshal te/ gang rnam par rtog pa'i spyod yul kun btags pa'i mtshan nyid kyi gnas/ 'du byed kyi mtshan ma de nyid kun btags pa'i mtshan nyid der yongs su ma grub cing ngo bo nyid de nyid kyis ngo bo nyid med pa nyid chos bdag med pa de bzhin nyid rnam par dag pa dmigs pa de ni yongs su grub pa'i tshan nyid de/ de la brten nas bcom ldan 'das kyis de dag las gcig don dam pa ngo bo nyid med par btags so// sdug bsngal 'phags pa'i bden pa la ji lta ba de bzhin du lhag ma rnams la yang sbyar ro// bden pa rnams la ji lta ba de bzhin du dran pa nye bar gzhag pa rnams dang / yang dag par spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams dang / lam gyi yan lag rnams kyi yan lag re re la yang de bzhin du sbyar ro/ / bcom ldan 'das/ bcom ldan 'das kyis bka' stsal pa'i don bdag gis 'di ltar 'tshal te/ gang rnam par rtog pa'i spyod yul kun btags pa'i mtshan nyid kyi gnas 'du byed kyi mtshan ma la yang dag pa'i ting nge 'dzin zhe 'am/ ting nge 'dzin gyi mi mthun pa'i phyogs dang gnyen po zhe'am/ ting nge 'dzin sgom pa zhe'am/ ma skyes pa skye ba zhe 'am/ skyes pa gnas shing mi nyams pa dang / phyir zhing 'byung ba dang / 'phel zhing rgyas pa zhes ngo bo nyid kyi mtshan nyid dam/ bye brag gi mtshan nyid du ming gi brdas rnam par gzhag pa de ni kun btags pa'i mtshan nyid de/ de la brten nas bcom ldan 'das kyi chos rnams kyi mtshan nyid ngo bo nyid med par btags so// gang yang rnam par rtog pa'i spyod yul kun btags pa'i mtshan nyid kyi gnas 'du byed kyi mtshan ma de ni gzhan gyi dbang gi mtshan nyid de/ de la brten nas bcom ldan 'das kyis skye ba ngo bo nyid med pa dang / de dag las gcig don dam pa ngo bo nyid med par btags so/ / bcom ldan 'das/ bcom ldan 'das kyis bka' stsal ba'i don bdag gis 'di ltar 'tshal te/ gang rnam par rtog pa'i spyod yul kun btags pa'i mtshan nyid kyi gnas 'du byed kyi mtshan ma de nyid kun btags pa'i mtshan nyid der yongs su ma grub cing / ngo bo nyid de nyid kyis ngo bo nyid med pa nyid chos bdag med pa de bzhin nyid rnam par dag pa dmigs pa de ni yongs su grub pa'i mtshan nyid de/ de la brten nas bcom ldan 'das kyis chos rnams kyi de dag las gcig don dam pa ngo bo nyid med par btags so/ / bcom ldan 'das 'di lta ste dper na// bca' lga ni smen phye ma sbyar ba dang / sman bcud kyis len sbyar ba thams cad la yang stsal bar bgyi ba lags te/ de bzhin du bcom ldan 'das kyis chos rnams kyi ngo bo nyid med pa la brtsams shing mi skye ba dang / mi 'gag pa dang / gzod ma nas zhi ba nyid dang / rang bzhin gyis yongs su mya ngan las 'das pa nyid la brtsams te/ nges pa'i don bstan pa 'di ni/ drang ba'i don gyi mdo thams cad kyi nang du stsal bar bgyi bar 'gyur ro// bcom ldan 'das 'di lta ste dper na/ ri mo bri ba'i gzhi ni sngon po 'am/ ser po 'am/ dmar po 'am/ dkar po yang rung ste/ ri mo'i las thams cad la ro gcig pa lags shing / ri mo dras pa rnams shin tu yang mngon par bgyid pa lags so/ / de bzhin du bcom ldan 'das kyis chos rnams kyi ngo bo nyid med pa la brtsams te/ rang bzhin gyis yongs su mya ngan las 'das pa'i bar du nges pa'i don bstan pa 'di ni drang ba'i don gyi mdo thams cad la ro gcig pa lags te/ drang ba'i don de dag mngon par yang bgyid do// bcom ldan 'das 'di lta sde dper na/ btso ba'i sha'i rnam pa dang / bag chos kyi rnam pa thams cad la mar gyis btab pa ni shin tu bda' bar 'gyur ro// de bzhin du bcom ldan 'das kyis chos rnams kyi ngo bo nyid med pa la brtsams te/ rang bzhin gyis yongs su mya ngan las 'das pa'i bar du nges pa'i don bstan pa 'di ni/ drang ba'i don gyi mdo thams cad du stsal na/ shin tu dga' zhing mchog tu dga' bar 'gyur ro/ / bcom ldan 'das 'di lta ste dper na/ nam mkha' ni thams cad du ro gcig pa lags te/ rtsom pa thams cad la yang mi sgrib par 'gyur ro// de bzhin du bcom ldan 'das kyis chos rnams kyi ngo bo nyid med pa la brtsams te/ rang bzhin gyis yongs su mya ngan las 'das pa'i bar du nges pa'i don bstan pa 'di ni drang ba'i don gyi mdo thams cad la ro/ gcig pa lags te/ nyan thos kyi theg pa dang / rang sangs rgyas kyi theg pa dang / theg pa chen po la brtson pa thams cad la yang mi sgrib par 'gyur ro// de skad ces gsol pa dang / bcom ldan 'das kyis byang chub sems dpa' don dam yang dag 'phags la legs so zhes bya ba byin te/ don dam yang dag 'phags khyod kyis de bzhin gshegs pa'i// / dgongs te bshad pa khong du chud do// khyod kyis don 'di la 'di lta ste/ bca' sga dang / ri mo bri ba'i gzhi dang / mar gyis gdab pa dang / nam mkha'i dpe rnams legs par byas pa legs so legs so/ / don dam yang dag 'phags de de bzhin te/ rnam pa gzhan du ma yin gyis/ de bzhin du zung zhig/ de nas bcom ldan 'das la/ byang chub sems dpa' don dam yang dag 'phags kyis 'di skad ces gsol to/ / bcom ldan 'das kyis sngon yul wA rA NA si drang srong lhung ba ri dgas kyi gnas su nyan thos kyi theg pa la yang dag par zhugs pa rnams la 'phags pa'i bden pa bzhi'i rnam par bstan pas/ chos kyi 'khor lo ngo mtshar rmad du byung ba/ sngan chad 'jig rten du lhar gyur pa 'am/ mir gyur pa sus kyang chos dang 'thun pas ma skor ba rab tu bskor te/ bcom ldan 'das kyis chos kyi 'khor lo bskor ba de yang bla na mchis pa/ skabs mchis pa drang ba'i don/ rtsod pa'i chog gi gnas su gyur pa lags so/ / lan gnyis su bcom ldan 'das kyis theg pa chen po la yang dag par zhugs pa rnams la chos rnams kyi ngo bo nyid ma mchis pa la brtsams shing / skye ba ma mchis pa dang / 'gag pa ma mchis pa dang / gzod ma nas zhi ba dang / rang bzhin gyis yongs su mya ngan las 'das pa la brtsams te/ spros pa'i rnam pas chos kyi 'khor lo shin tu ngo mtshar rmad du byung ba rab tu bskor te/ bcom ldan 'das de yang bla na mchis pa/ skabs mchis pa/ drang ba'i don rtsod pa'i tshig gi gnas su gyur pa lags so// bcom ldan 'das/ bcom ldan 'das kyis lan gsum du theg pa thams cad la zhugs pa rnams la chos rnams kyi ngo bo nyid ma mchis pa la brtsams shing skye ba ma mchis pa dang / 'gag pa ma mchis pa dang / gzod ma nas zhi ba dang / rang bzhin gyis yongs su mya ngan las 'das pa la brtsams te/ shin tu rnam par phye ba'i bye brag gis ha cang yang ngo mtshar la/ ha cang yang rmad du byung ba'i chos kyi 'khor lo bskor ba 'di ni/ bla na ma mchis pa/ skabs ma mchis pa/ nges pa'i don rtsod pa'i gnas su ma gyur pa lags so// bcom ldan 'das kyis chos rnams kyi ngo bo nyid ma mchis pa la brtsams pa nas/ rang bzhin gyis yongs su mya ngan las 'das pa'i bar la brtsams te/ nges pa'i don bstan pa 'di thos nas/ mos sam/ yi ger 'dra 'am yi ger 'drir stsol tam/ 'dzin tam/ klog gam/ mchod dam/ yang dag par 'gyed dam/ lung nod dam/ kha ton du bgyid dam/ sems sam/ sgom pa'i rnam pas sbyoran bcom ldan 'das rigs kyi bu 'am/ rigs kyi bu mo de bsod nams ji tsam skyed par 'gyur/ de skad ces gsol pa dang // bcom ldan 'das kyis byang chub sems dpa' don dam yang dag 'phags la 'di skad ces bka' stsal to/ / rigs kyi bu 'am/ rigs kyi bu mo do bsod nams tshad med grangs med par bskyed de/ de la dpe bya bar yang sla ba ma yin mod kyi/ khyod la mdo tsam du bshad do// don dam yang dag 'phags 'di lta ste dper na/ sen mo'i rtse mo la gnas pa'i rdul dang / sa la gnas pa'i rdul du bskrun na/ brgya'i char yang nye bar mi 'gro'o// stong gi char yang / brgya stong gi char yang / grangs su yang / char yang / dper yang / rgyur yang nye bar mi 'gro'o// ba glang gi rmig rjes dang / rgya mtsho chen po bzhi'i chur bskrun na/ brgya'i char yang nye bar mi 'gro ba nas/ rgyur yang nye bar mi 'gro ste/ de bzhin du drang ba'i don gyi mdo sde rnams la mos pa nas/ bsgom pa'i rnam pas sbyor ba'i bar gyi bsod nams ngas bshad pa de ni/ nges pa'i don bshad pa la mos pa las yang dag par grub pa nas/ bsgom pa'i rnam par sbyor ba las yang dag par grub pa'i bar gyi bsod nams dang bskrun na/ brgya'i char yang nye bar mi 'gro bas na/ rgyu'i bar du yang nye bar mi 'gro'o// de skad ces bka' stsal pa dang / bcom ldan 'das la/ byang chub sems dpa' don dam 'a dag 'angags kyis 'di skad ces gsol to// bcom ldan 'das dgongs pa nges par 'grel pa'i chos kyi rnam grangs 'di la nges par bstan pa 'di'i ming ci lags/ 'di ji ltar gzung bar bgyi/ bcom ldan 'das kyis bka' stsal pa/ don dam yang dag 'phags 'di ni don dam pa nges pa'i don bstan pa ste/ 'di don dam pa nges pa'i don bstan pa'o zhes zung zhig/ don dam pa nges pa'i don bstan pa 'di bshad pa'i tshe/ srog chag drug 'bum ni bla na med pa yang dag par rdzogs pa'i byang chub tu sems skyes so/ / nyan thos su ma 'bum ni chos rnams la chos kyi mig rdul med cing dri ma dang bral ba rnam par dag go// nyan thos 'bum lnga khri ni len pa med par zag pa las sems rnam bar grol lo/ / byang chub sems dpa' 'dun khri lnga stong ni mo skye ba'i chos la bzod pa thob par gyur to// don dam yang dag 'phags kyi le'u ste bdun pa'o// / de nas bcom ldan 'das la/ byang chub sems dpa' byams pas zhu ba zhus pa/ bcom ldan 'das byang chub sems dpa' ci la gnas/ ci la brten te/ theg pa chen po la ni gnas dang lhag mthong sgom par bgyid/ bcom ldan 'das kyis bka' stsal pa/ byams pa chos rnams kyi gdags pa rnam par dgod pa dang / bla na med pa yang dag par rdzogs pa'i byang chub tu smon lam mi gtong ba la gnas shing brten nas so/ / bcom ldan 'das kyis dmigs pa'i dngos po bzhi ni 'di lta ste/ rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan dang / dngos po'i mtha' dang / dgos pa yongs su grub pa'o zhes gang bstan pa de dag la/ bcom ldan 'das zhi gnas kyi dmigs pa du lags/ bka' stsal pa/ gcig ste 'di ltar rnam par mi rtog pa'i gzugs brnyan no// lhag mthong gi dmigs pa du lags/ bka' stsal ba gcig ste rnam par rtog pa dang bcas pa'i gzugs brnyan no/ / de gnyis ka'i dmigs pa du lags/ bka' stsal pa/ gnyis te dngos po'i mtha' dang / dgos pa yongs su grub pa'o/ / bcom ldan 'das ji ltar na/ byang chub sems dpa' zhi gnas dang lhag mthong gi dmig pa'i dngos po bzhi po 'di dag la gnas shing / zhi gnas tshol ba dang / lhag mthong la mkhas pa lags/ byams pa ngas chos gdags pa rnam par bkod pa 'di lta ste/ mdo'i sde dang / dbyangs kyis bsnyad pa'i sde dang / lung bstan pa'i sde dang tshigs su bcad pa'i sde dang / ched du brjod pa'i sde dang / gleng gzhi'i sde dang / rtogs pa brjod pa'i sde dang / de lta bu byung ba'i sde dang / skyes pa rabs kyi sde dang / shin tu rgyas pa'i sde dang / rmad du byung ba'i chos kyi sde dang / gtan la bab par bstan pa'i sde gang dag byang chub sems dpa' rnams la bshad pa de dag byang chub sems dpas legs par thos/ legs par bzung / kha ton tu yang legs par byas/ yid kyis kyang shin tu brtags/ mthong bas kyang legs par rtogs par gyur la/ de gcig pu dben par 'dug ste/ nang du yang dag bzhag nas ji ltar bsams pa'i chos de dag nyid yid la byed cing / sems gang gis yid la byed pa'i sems de/ nang du rgyun du 'byung ba'i yid la byed pas yid la byed do 'de de ltar zhugs shing / de la lan mang du gnas pas/ lus shin tu sbyangs pa dang / sems shin tu sbyangs pa skye ba 'di ni zhi gnas zhes bya ste/ de ltar na byang chub sems dpa' zhi gnas tshol ba yin no/ / de lus shin tu sbyangs pa dang / sems shin tu sbyangs pa de dag thob nas de nyid la gnas te/ ji ltar bsams pa'i chos de dag nyid nang du ting nge 'dzin gyi spyod yul gzugs brnyan du sems kyi rnam pa spangs nas/ so sor rtog cing mos par byed do// gang 'di ltar ting nge 'dzin gyi spyod yul gzugs brnyan de rnams la shes par bya ba'i don de 'byed pa dang / rab tu rnam par 'byed pa dang / kun tu brtag pa dang / kun tu dpyad pa dang / bzod pa dang / mos pa dang / blo gros dang / lta ba dang / rtog pa 'di ni lhag mthong zhes bya ste/ de ltar na byang chub sems dpa' lhag mthong la mkhas pa yin no// bcom ldan 'das byang chub sems dpa' sems la dmigs pa'i sems nang du yid la bgyid pa/ lus shin tu sbyangs pa dang / sems shin tu sbyangs pa nas ma thob pa de'i bar du yid la bgyid pa de ci zhes bgyi/ byams pa zhi gnas dang 'thun pa'i mos pa dang ldan pa yin te/ zhi gnas ni ma yin no// bcom ldan 'das byang chub sems dpa' lus dang / sems shin tu sbyangs pa ma thob kyi rab du ji ltar bsams pa'i chos rnams kyi gzugs brnyan ting nge 'dzin gyi spyod yul nang du yid la bgyid na/ yid la bgyid pa de ci zhes bgyi/ byams pa lhag mthong dang 'thun pa'i mos pa dang ldan pa yin te/ lhag mthong ni ma yin no/ / bcom ldan 'das zhi gnas kyi lam dang / lhag mthong gi lam tha dad ces bgyi'am/ gcig ces bgyi/ bka' stsal pa/ byams pa tha dad pa yang ma yin/ gcig pa yang ma yin te/ ci'i phyir tha dad pa ma yin zhe na/ lhag mthong gis dmigs pa'i sems la dmigs pa'i phyir ro// ci'i phyir gcig pa ma yin zhing rnam par rtog pa dang bcas pa'i gzugs brnyan la dmigs pa'i phyir ro/ / bcom ldan 'das rnam par lta ba'i ting nge 'dzin gyi spyod yul gyi gzugs brnyan gang lags pa de sems de las tha dad pa zhes bgyi'am/ tha dad pa ma lags zhes bgyi/ byams pa tha dad pa ma yin zhes bya'o// ci'i phyir tha dad pa ma yin zhe na/ gzugs brnyan de rnam par rig pa tsam du zad pa'i phyir/ byams pa rnam par shes pa ni dmigs pa rnam par rig pa tsam gyis rab tu phye ba yin no zhes ngas bshad do// bcom ldan 'das ting nge 'dzin gyi spyod yul gzugs brnyan de gal te sems de dang tha dad pa ma lags na/ sems de nyid kyis sems de nyid la ji ltar brtag par bkyi/ bka' stsal pa/ byams pa de la chos gang yang chos gang la yang so sor rtog pa med mod kyi/ de ltar skyes pa'i sems de ni de ltar snang ngo // byams pa 'di lta ste dper na/ me long gi dkyil 'khor shin tu dag pa la gzugs kyis rkyen byas te/ gzugs nyid mthong yang gzugs brnyan mthong ngo snyam sems te/ de la ni gzugs de dang gzugs brnyan snang ba de/ don tha dad par snang ngo // de bzhin du de ltar skyes ba'i sems de yang ting nge 'dzin gyi gzugs brnyan zhes bya ba dang / don de tha dad par snang ngo // bcom ldan 'das sems can rnams kyi sems kyi gzugs brnyan rang bzhin du gnas pa/ gzugs la sogs pa gang lags pa de yang sems de dang tha dad pa ma lags zhes bgyi'am/ bka' stsal pa/ byams pa tha dad pa ni ma yin te/ byis pa phyin ci log gi blo can rnams kyis gzugs brnyan de dag la rnam par rig pa tsam de yang dag pa ji lta ba bzhin du mi shes pas phyin cing log tu sems so/ / bcom ldan 'das ji tsam gyis na/ byang chub sems dpa' lhag mthong la gcig tu sgom pa lags/ bka' stsal pa/ nam rgyun du yid la byed pas/ sems kyi mtshan ma nyid yid la byed pa na'o// ji tsam gyis na zhi gnas la gcig tu sgom pa lags/ bka' stsal pa/ nam rgyun du yid la byed pas/ de ma thag pa'i sems yid la byed pa na'o// ji tsam gyis na zhi gnas dang lhag mthong gnyis 'dres par gyur te/ mnyam pa zung du 'byung ba lags/ bka' stsal pa/ nam sems rtse gcig pa nyid yid la byed pa na'o// bcom ldan 'das sems kyi mtshan ma gang lags/ byams pa gang ting nge 'dzin gyi spyod yul rnam par rtog pa dang bcas pa'i gzugs brnyan te/ lhag mthong gi dmigs pa'o// de ma thag pa'i sems gang lags/ byams pa gang gzugs brnyan de la dmigs pa'i sems te/ zhi gnas kyi dmigs pa'o// sems rtse gcig pa nyid gang lags/ gang ting nge 'dzin gyi spyod yul gzugs brnyan de la 'di ni rnam par rig pa tsam mo zhes rab tu rtogs te/ de rtogs nas kyang de bzhin du yid la byed pa'o// bcom ldan 'das lhag mthong la rnam pa du mchis/ bka' stsal pa/ byams pa rnam pa gsum ste/ mtshan ma can dang / kun tu tshol ba dang / so sor rtog pa'o// mtshan maca gang zhe na/ gang ting nge 'dzin gyi spyod yul rnam par rtog pa dang bcas pa'i gzugs brnyan 'ba' zhig yid la byed pa'i lhag mthong ngo / / kun tu tshol ba gang zhe na/ gang de dang des shes rab kyis legs par ma rtogs pa'o chos de dag nyid legs par rtogs par bya ba'i phyir yid la byed pa'i lhag mthong ngo / / so sor rtog pa gang zhe na/ gang de dang der shes rab kyis legs par rtogs pa'i chos rnams rnam par grol ba la shin tu reg par bya ba'i lhag mthong ngo // zhi gnas la rnam pa du mchis/ bka' stsal pa/ de ma thag pa'i sems de'i rjes su 'jug pas de yang rnam pa gsum du rig par bya'o// byams pa yang zhi gnas la rnam pa brgyad dang bsam gtan dang po/ gnyis pa dang / gsum pa dang / bsam gtan bzhi pa dang / nam mkha' mtha' yas skye mched pa dang / rnam shes mtha' yas skye mched pa dang / ci yang med pa'i skye mched pa dang / 'du shes med 'du shes med min skye mched pa'o// yang rnam pa bzhi ste/ byams pa tshad med pa dang / snying rje dang / dga' ba dang btang snyoms tshad med pa'o/ / bcom ldan 'das chos la gnas pa'i zhi gnas dang lhag mthong zhes kyang bgyi/ chos la mi gnas pa zhes kyang bgyi na/ chos la gnas pa ni gang lags/ chos la mi gnas pa ni gang lags/ byams pa ji ltar bzung ba dang / bsam pa'i chos kyi mtshan ma'i rjes su 'jug pas/ don gyi zhi gnas dang / lhag mthong de ni chos la gnas pa'o/ / gang bzung ba dang / bsams pa'i chos la mi ltos par gzhan las gdams pa dang rjes su bstan pa thob nas/ don gyi zhi gnas dang lhag mthong 'di lta ste/ rnam par bsngos pa'am/ rnam par brnags pa 'am/ de lta bu'i cha dang mthun pa rnams sam/ 'du byed thams cad mi rtag pa'am/ sdug bsngal ba 'am/ chos thams cad bdag med pa 'am/ mya ngan las 'das pa zhi ba'o zhes bya ba de lta bu'i cha dang mthun pa'i zhi gnas dang lhag mthong de ni chos la mi gnas pa yin par shes par bya'o// byams pa de la chos la gnas pa'i zhi ga nas dang lhag mthong bzung ste/ ngas chos kyi rjes su 'gro ba'i byang chub sems dpa' dbang po rnon por btags so// chos la mi gnas pa bzung nas dad pas rjes su 'gro ba dbang po rdul por btags so/ / bcom ldan 'das ma 'dres pa'i chos la dmigs pa'i zhi gnas dang lhag mthong zhes kyang bgyi/ 'dres pa'i chos la dmigs pa'i zhi gnas dang lhag mthong zhes kyang bgyi na/ ma 'dres pa'i chos la dmigs pa ni gang lags/ 'dres pa'i chos la dmigs pa ni gang lags/ byams pa gal te byang chub sems dpa' ji ltar bzung ba dang / bsam pa'i chos rnams la mdo la sogs pa'i chos la so so re rer dmigs pa'i zhi gnas dang / lhag mthong la sgom pa 'di nam 'dres pa'i chos la dmigs pa'i zhi gnas dang lhag mthong ngo / / gal te yang mdo la sogs pa'i chos de dag nyid gcig tu bsdu ba dang / gcig tu spung ba dang / gcig tu brtul ba dang phung po gcig tu byas te/ chos de dag thams cad de bzhin nyid la gzhol ba/ de bzhin nyid la 'bab pa/ de bzhin nyid la bab pa/ byang chub la gzhol ba/ byang chub la 'bab pa/ byang chub la bab pa/ mya ngan las 'das pa la gzhol ba/ mya ngan las 'das pa la 'bab pa/ mya ngan las 'das pa la bab pa/ gnas gyur pa la gzhol ba/ gnas gyur pa la 'bab pa/ gnas gyur pa la bab pa ste/ chos 'di dag thams cad ni dge ba'i chos grangs med pa/ dpag tu med pa mngon par brjod par/ mngon par brjod do zhes yid la byed pa 'di ni/ 'dres pa'i chos la dmigs pa'i zhi gnas dang lhag mthong zhes bya'o// bcom ldan 'das chung ngu 'dres pa'i chos la dmigs pa'i zhi gnas dang lhag mthong zhes kyang bgyi/ cher 'dres pa'i chos la dmigs pa zhes kyang bgyi/ tshad med par 'dres pa'i chos la dmigs pa zhes kyang bgyi na/ chung ngu 'dres pa'i chos la dmigs pa ni gang lags/ cher 'dres pa'i chos la dmigs pa ni gang lags/ tshad med par 'dres pa'i chos la dmigs pa ni gang lags/ byams pa mdo'i sde nas shin tu rgyas pa'i sde dang / rmad du byung ba'i chos kyi sde dang / gtan la bab par bstan pa'i sde so sor gcig tu bsdu bar byas te/ yid la byed pa ni chung ngu 'dres pa'i chos la dmigs pa yin par shes par bya'o/ / mdo sde la sogs pa ji snyed bzung ba dang / bsams pa de dag nyid gcig tu bsdu ba byas te/ yid la byed pa ni cher 'dres pa'i chos la dmigs pa yin/ par shes par bya'o// de bzhin gshegs pa rnams kyi chos bstan pa ni tshad med do// chos kyi tshig dang / yi ge yang tshad med do// gong nas gong du shes rab dang / spobs pa yang tshad med do zhes gcig tu bsdu ba byas te/ yid la byed pa ni tshad med par 'dres pa'i chos la dmigs pa'i zhi gnas dang lhag mthong yin par shes par bya'o// bcom ldan 'das ji tsam gyis na/ byang chub sems dpas 'dres pa'i chos la dmigs pa'i zhi gnas dang lhag mthong thob par 'gyur/ byams pa rgyu lngas de thob par 'gyur bar rig par bya ste/ yid la byed pa'i tshe/ skad cig re re la gnas ngan len gyi rten thams cad 'jig par byed pa dang / 'du shes sna tshogs rnam par spangs te/ chos kyi kun dga' la dga' ba thob pa dang / chos kyi snang ba phyogs bcur tshad med cing rnam pa yongs su ma chad pa yang dag par shes pa dang / rnam par ma brtags par dgos pa yongs su grub pa dang ldan pa par dag pa'i cha dang 'thun pa'i mtshan ma rnams de la kun tu 'byung ba dang / chos kyi sku yongs su rdzogs par bya ba dang / yongs su grub par bya ba'i phyir/ gong ma pas ches gong ma bzang po bas bzang po'i rgyu yongs su 'dzin par byed pa'o/ / bcom ldan 'das 'dres pa'i chos la dmigs pa'i zhi gnas dang lhag mthong gang la rtogs shing / gang la thob par 'tshal bar bgyi/ bka' stsal pa/ byams pa sa dang po rab tu dga' ba la rtogs nas/ sa gsum pa 'od byed pa la thob par shes par bya'o// byams pa de lta mod kyi/ las dang po pa'i byang chub sems dpas kyang / de'i rjes su bslab cing yid la bya ba mi gzhig par bya'o// bcom ldan 'das de ji ltar na/ zhi gnas dang lhag mthong rtog pa dang ba dpyod pa dang bcas pa'i ting nge 'dzin du 'gyur/ ji ltar na mi rtog cing dpyod pa tsam du 'gyur/ ji ltar na mi rtog mi dpyod par 'gyur/ byams pa ji ltar bzung ba dang / brtags ba dang / dpyad pa'i chos rnams la/ de'i mtshan ma gsal zhing che ba myong ba'i rjes su dpyod pa'i zhi gnas dang lhag mthong gang yin pa 'di ni rtog pa dang bcas/ dpyod pa dang bcas pa'i ting nge 'dzin to/ / de'i mtshan ma rnams nyid la gsal zhing che ba myong ba'i rjes su dpyod pa ma yin gyi/ de snang ba dran pa tsam phra ba myong ba'i rjes su dpyod pa'i zhi gnas dang lhag mthong gang yin pa 'di ni/ mi rtog cing dpyod pa tsam gyi ting nge 'dzin to// de'i mtshan ma la thams cad kyi thams cad du lhun gyis 'grub pas/ chos myong ba yid la byed pa/ rnam par dpyod pa'i zhi gnas dang / lhag mthong gang yin pa 'di ni mi rtog mi dpyod pa'i ting nge 'dzin to// yang byams pa kun tu tshol ba'i zhi ga nas dang lhag mthong gang yin pa 'di ni rtog pa dang bcas/ dpyod pa dang bcas pa'i ting nge 'dzin to// so sor rtog par byed pa gang yin pa 'di ni mi rtog cing dpyod pa tsam mo// 'dres pa'i chos la dmigs pa gang yin pa 'di ni mi rtog mi dpyod pa'i ting nge 'dzin no/ / bcom ldan 'das zhi gnas kyi rgyu ni gang lags/ rab tu 'dzin pa'i rgyu ni gang lags/ btang snyoms kyi rgyu ni gang lags/ byams pa sems rgod pa 'am/ rgod du dogs pa zhig tu gyur na/ skyo bar gyur pa'i chos rnams dang / de'i sems kyi de ma thag pa yid la byed pa 'di ni zhi gnas kyi rgyu zhes bya'o// byams pa sems bying ngam/ sems bying bar dogs pa zhig tu gyur na/ gang mngon par dga' bar 'gyur ba'i chos rnams dang / de'i sems kyi mtshan ma yid la byed pa 'di ni rab tu 'dzin pa'i rgyu zhes bya'o/ / byams pa zhi gnas la gcig tu nges pa'i lam mam/ lhag mthong la gcig tu nges pa 'am/ zung du 'brel pa'ang rung ste/ de gnyis kyi nye ba'i nyon mongs pas nyon ma mongs pa la gang lhun gyis 'grub pa yid la byed pa rang gi ngang gis 'jug pa'i sems 'di ni btang snyoms kyi rgyu zhes bya'o/ / bcom ldan 'das byang chub sems dpa' zhi gnas dang lhag mthong sgom pa/ chos rab tu rig pa dang / don rab tu rig par gyur na/ ji ltar na chos rab tu rig pa lags/ ji ltar na don rab tu rig pa lags/ byams pa rnam pa lngas chos rab tu rig par 'gyur te/ ming gi rnam pa dang / tshig gi rnam pa dang / yi ge'i rnam pa dang / so so'i rnam pa dang / bsdugs pa'i rnam pa'o// ming gang zhe na/ gang kun nas nyon mongs pa dang / rnam par byang ba'i chos rnams la ngo bo nyid kyi ming du bya bar btags pa'o// tshig gang zhe na/ gang ming de dag nyid kyi tshogs nas nyon mongs pa dang / rnam par byang ba'i don du tha snyad gdags pa'i phyir gnas dang / rten du 'dug pa'o// yi ge gang zhe na/ gang de gnyis ka'i gnas kyi yi ge'o// de dag so so'i rnam pa rab tu rig pa gang zhe na/ gang ma 'dres pa la dmigs pa'i yid la byed pas rab tu shes pa'o// bsdus pa'i rnam par rab tu rig pa gang zhe na/ gang 'dres pa dmigs pa'i yid la byed pas rab tu shes pa'o/ / 'di dag thams cad gcig tu bsdus nas chos rab tu rig pa zhes bya ste/ de ltar na chos rab tu rig pa yin no// byang chub sems dpa' rnam pa bcus ni/ don rab tu rig par 'gyur te/ ji snyed yod pa dang / ji lta ba bzhin du yod pa dang / 'dzin pa'i don dang / gzung ba'i don dang / gnas kyi don dang / longs par spyad pa'i don dang / phyin ci log gi don dang / phyin ci log med pa'i don dang / kun nas nyon mongs pa'i don dang / rnam par byang ba'i don to// byams pa de la kun nas nyon mongs pa dang / rnam par byang ba'i chos rnams kyis rnam pa thams cad du/ rnam par phye ba'i mthar thug pa gang yin pa 'di ni ji snyed yod pa ste/ de yang 'di ltar phung po rnams kyi grangs lnga dang / nang gi skye mched rnams kyi grangs drug dang / phyi rol gyi skye mched rnams kyi grangs kyang drug go zhes bya ba de dag la sogs pa'o// byams pa de la kun na nyon mongs pa dang / rnam par byang ba'i chos de dag nyid kyi de bzhin nyid gang yin pa 'di ni ji lta ba bzhin du yod pa'o// de yang rnam pa bdun te/ 'byung ba'i de bzhin nyid ni gang 'du byed rnams kyi thog ma dang / tha ma med pa'o// mtshan nyid kyi de bzhin nyid ni gang chos thams cad kyi gang zag la bdag med pa dang / chos la bdag med pa'o// rnam par rig pa'i de bzhin nyid ni gang 'du byed rnams rnam par rig pa tsam mo/ / gnas pa'i de bzhin nyid ni gang ngas sdug bsngal gyi bden pa bshad pa'o// log par sgrub pa'i de bzhin nyid ni gang ngas kun 'byung ba'i bden pa bshad pa'o/ / rnam par dag pa'i de bzhin nyid ni gang ngas 'gog pa'i bden pa bshad pa'o// yang dag par sgrub pa'i de bzhin nyid ni gang ngas lam gyi bden pa bshad pa'o/ / byams pa de la 'byung ba'i de bzhin nyid gang yin pa dang / gnas pa'i de bzhin nyid gang yin pa dang / log par sgrub pa'i de bzhin nyid gang yin pa des ni sems can thams cad dang mtshungs shing mnyam mo/ / byams pa de'i mtshan nyid de bzhin nyid gang yin pa dang / rnam par rig pa'i de bzhin nyid gang yin pa des ni chos thams cad mtshungs shing mnyam mo/ / byams pa de la rnam par dag pa'i de bzhin nyid gang yin pa des ni/ nyan thos kyi byang chub gang yin pa dang / rang sangs rgyas kyi byang chub gang yin pa dang / bla na med pa yang dag par rdzogs pa'i byang chub gang yin pa dang / byang chub de dag thams cad mtshungs shing mnyam mo// byams pa yang dag par sgrub pa'i de bzhin nyid gang yin pa des ni/ thos pa'i chos thams cad 'dres pa la dmigs pa'i zhi gnas dang / lhag mthong gis yongs su zin pa'i shes rab mtshungs shing mnyam mo// byams pa de la 'dzin pa'i don ni skye mched gzugs can lnga dang / sems dang / yid dang / rnam par shes pa dang / sems las byung ba'i chos rnams so// byams pa de la gzung ba'i don ni phyi rol gyi skye mched drug rnams so/ / yang byams pa 'dzin pa'i don gang yin pa de gzung ba'i don kyang yin no// byams pa de la gnas kyi don ni 'jig rten gyi khams gang yin pa ste/ sems can gyi khams gang la gnas par snang ba'o// de yang 'di lta ste/ grong dang / zhing dang / grong dang / zhing brgya dang / de stong dang / de stong phrag brgya la rgya mtsho la thug pa'i sa'o/ / de brgya dang / de stong dang / de stong phrag brgya la 'dzam bu'i gling ngo // de brgya dang / de stong dang / de stong phrag brgya la gling bzhi pa'o// de brgya dang / de stong dang / de stong phrag brgya la stong gi 'jig rten gyi khams so// de brgya dang / de stong dang / de stong phrag brgya la stong gnyis pa'i 'jig rten gyi khams bar ma'o// de brgya dang / de stong dang / de stong phrag brgya la stong gsum gyi stong chen po'i 'jig rten gyi khams so// de brgya dang / de stong dang / de stong phrag brgya la bye ba ste/ bye ba de brgya dang / bye ba de stong dang / bye ba de stong phrag brgya de ni grangs med pa'o// grangs med pa de brgya dang / grangs med pa de stong dang / grangs med pa de stong phrag brgya la stong gsum gyi stong chen po'i 'jig rten gyi khams grangs med pa'i stong phrag brgya'i rdul phra rab kyi rdul snyed dang / phyogs bcu'i 'jig rten gyi khams dpag tu med/ grangs med pa dag go/ byams pa de la yongs su longs spyod pa'i don ni gang ngas sems can rnams kyi yongs su spyad par bya ba'i phyir yongs su bzung ba'i yo byad bshad pa'o/ / byams pa de la phyin ci log gi don ni 'dzin pa la sogs pa'i don de dag nyid la mi rtag pa la rtag par 'du shes phyin ci log pa dang / sems phyin ci log pa dang / lta ba phyin ci log pa dang / sdug bsngal la bde'o zhes/ mi gtsang ba la gtsang ngo zhes/ bdag med pa la bdag go zhes/ 'du shes phyin ci log pa dang / sems phyin ci log pa dang / lta ba phyin ci log pa'o// byams pa de la phyin ci log med pa'i don ni 'di las bzlog pa dang / 'di ni gnyen por shes par bya'o// byams pa de la kun nas nyon mongs pa'i don ni rnam pa gsum ste/ khams gsum gyi nyon mongs pa kun nas nyon mongs pa dang / las kyi kun nas nyon mongs pa dang / tshe'i kun nas nyon mongs pa'o// byams pa de la rnam par byang ba'i don ni/ gang kun nas nyon mongs pa rnam pa gsum po de nyid dang bral bar bya ba'i phyir/ byang chub kyi phyogs kyi chos rnams so// byams pa rnam pa bcu po 'di dag gis don thams cad bsdus par shes par bya'o// yang byams pa chos rnam pa lngas ni byang chub sems dpa' don rab tu rig pa yin te/ de rnam pa lnga gang zhe na/ yongs su shes par bya ba'i dngos po dang / yongs su shes par bya ba'i don dang / yongs su shes pa dang / yongs su shes pa'i 'bras bu thob pa dang / de rab tu shes par byed pa'o// byams pa de la yongs su shes par bya ba'i dngos po gang zhe na/ shes par bya ba thams cad yin par blta ste/ 'di lta ste/ phung po rnams zhes bya ba 'am/ nang gi skye mched rnams sam/ phyi rol gyi skye mched rnams zhes bya ba la sogs pa'o/ / byams pa de la yongs su shes par bya ba'i don ni rnam pa ji snyed kyis shes par bya ba ji ltar shes par bya'o// de yang 'di lta ste/ kun rdzob dang / don dam pa dang / nyes pa dang / yon tan dang / rkyen dang / dus dang / skye ba dang / gnas pa dang / 'jig pa'i mtshan nyid dang / nad la sogs pa dang / sdug bsngal dang / kun 'byung ba la sogs pa dang / de bzhin nyid dang / yang dag pa'i mtha' dang / chos kyi dbyings dang / bsdus pa dang / rgyas pa dang / mgo gcig tu lung bstan pa dang / rnam par dbye ba dang / dri ba'i lung bstan pa dang / gzhag pa dang / gsang ba dang / rab tu bstan pa yang rung ste/ de lta bu'i cha dang 'thun pa dag ni/ yongs su shes par bya ba'i don du rig par bya'o// byams pa de la yongs su shes pa ni gang de gnyis ka 'dzin pa'i byang chub kyi phyogs te/ de'ang 'di ltar dran pa nye bar gzhag pa rnams dang / yang dag par spong ba rnams dang / de dag la sogs pa'o// / byams pa de la yongs su shes pa'i 'bras bu thob pa ni 'di lta ste/ 'dod chags dang / zhe sdang dang / gti mug rnam par 'dul ba ste/ 'dod chags dang / zhe sdang dang / gti mug gtan nas blangs te spangs pa dang / dge sbyong gi 'bras bu rnams dang / gang ngas nyan thos dang / de bzhin gsheg pa'i thun mong dang / thun mong ma yin pa dang / 'jig rten dang / 'jig rten las 'das pa dang / yon tan dang / gang de dag mngon du bya ba bstan pa'o// byams pa de rab tu shes par byed pa ni/ mngon du byas pa'i chos de dag nyid la rnam par grol bar shes pa dang / rgya cher yang gzhan la spyod cing 'chad pa dang / yang dag par ston pa ste/ byams pa don rnam pa lnga po 'di dag gis kyang don thams cad bsdus par shes par bya'o// byams pa yang rnam pa bzhi ni/ byang chub sems dpa' don rab tu rig pa yin te/ don rnam pa bzhi po gang zhe na/ sems kyi len pa'i don dang / myong ba'i don dang / rnam par rig pa'i don dang / kun nas nyon mongs pa dang / rnam par byang ba'i don te/ byams pa don rnam pa bzhi po 'di dag gis kyang don thamacas kyang bsdus par shes par bya'o// byams pa yang rnam pa gsum gyis/ byang chub sems dpa' don rab tu rig pa yin te/ don rnam pa gsum po gang zhe na/ tshig 'bru'i don dang / don gyi don dang / khams kyi don te/ byams pa de la tshig 'bru'i don ni ming gi tshogs la sogs par blta bar bya'o/ / byams pa de la don gyi don ni rnam pa bcur shes par bya ste/ de kho na'i mtshan nyid dang / yongs su shes pa'i mtshan nyid dang / spang ba'i mtshan nyid dang / mngon du bya ba'i mtshan nyid dang / bsgom pa'i mtshan nyid dang / de kho na'i mtshan nyid la sogs pa 'di dag gi rnam pa rab tu phye ba'i mtshan nyid dang / gnas dang rten cing 'brel pa'i mtshan nyid dang / yongs su shes pa la sogs pa'i bar chad kyi chos kyi mtshan nyid dang / rjes su mthun pa'i chos kyi mtshan nyid dang / yongs su mi shes pa la sogs pa dang / yongs su shes pa la sogs pa'i nyes dmigs dang / phan yon gyi mtshan nyid do// byams pa de la khams kyi don ni khams lnga ste/ 'jig rten gyi khams dang / sems can gyi khams dang / chos kyi khams dang / 'dul ba'i khams dang / gdul ba'i thabs kyi khams te/ byams pa don rnam pa gsum po 'di dag gis don thams cad bsdus par shes par bya'o/ / bcom ldan 'das gang thos pa las byung ba'i shes rab kyis don rab tu rig pa dang / gang yang bsams pa las byung ba'i shes rab kyis don rab tu rig pa dang / bcom ldan 'das gang yang zhi gnas dang / lhag mthong bsgoms pa las byung ba'i shes rab kyis don rab tu rig pa dang / 'di rnams la tha dad du dbye ba ci mchis// bka' stsal pa/ byams pa thos pa las byung ba'i shes rab kyis ni byang chub sems dpa' yi ge la gnas pa/ sgra ji bzhin pa/ dgongs pa med pa/ mngon du ma byas pa/ rnam par thar pa'i rjes su mthun pa/ rnam par thar par byed pa'i don rab tu shes pa ma yin pa'o// byams pa bsams pa las byung ba'i shes rab kyis yi ge la gnas la/ sgra ji bzhin du ma yin gyi/ dgongs pa can mngon du ma byas pa/ rnam par thar par byed pa'i don ma yin kyang / rnam par thar pa'i rjes su mthun la/ rnam par thar par byed pa'i don rab tu mi shes pa'o/ / byams pa bsgoms pa las byung ba'i shes rab kyis ni/ byang chub sems dpa' yi ge la gnas pa dang / yi ge la mi gnas pa dang / sgra ji bzhin pa dang / dgongs pa can yang shes par bya ba'i dngos po dang / mthun pa gzugs brnyan ting nge 'dzin gyi spyod yul du mngon du gyur pa/ rnam par thar pa'i rjes su mthun ches pa/ rnam par thar par byed pa'i don rab tu shes so/ / byams pa 'di ni 'di rnam kyi bye brag tu bya'o zhes bcom ldan 'das kyis bka' stsal to// bcom ldan 'das zhi gnas dang lhag mthong bsgom pa byang chub sems dpa' chos rab tu rig cing / don rab tu rig pa'i ye shes ni gang lags/ mthong ba ni gang lags/ byams pa ngas ye shes dang / mthong ba rnam grangs du mar bstan mod kyi/ yang mdor bstan to// gang 'dres pa'i chos la dmigs pa'i zhi gnas dang / lhag mthong gi shes rab 'di ni ye shes so// gang ma 'dres pa/ chos la dmigs pa 'di ni mthong ba'o// bcom ldan 'das byang chub sems dpa' zhi gnas dang lhag mthong bsgom pa yid la bgyid pa gang gis mtshan ma gang ji lta bu rnam par sel byams pa de bzhin nyid yid la byed pas/ chos kyi mtshan ma dang / don gyi mtshan ma yang rnam par sel lo// ming la ming gi rang bzhin kyang mi dmigs shing de la gnas pa'i mtshan ma yang yang dag par mi mthong bas rnam par sel lo/ / ming la ji lta ba de bzhin du tshig dang / yi ge dang / don thams cad kyang rig par bya'o// byams pa khams kyi bar du khams kyi rang bzhin yang mi dmigs shing / de la gnas pa'i mtshan ma yang dag par mi mthong bas rnam par sel lo// bcom ldan 'das de bzhin nyid kyi don rab tu rig pa'i mtshan ma de'ang rnam par sel lam/ byams pa de bzhin nyid kyi don rab tu rig pa la mtshan ma med par mi dmigs pa yin na/ de la ci zhig rnam par sel bar 'gyur/ byams pa de bzhin nyid kyi don rab tu rig pa ni chos dang / don gyi mtshan ma thams cad zil gyis gnon pa ste/ de la ni gang gis gang zil gyis gnon par bya bar mi bshad do// bcom ldan 'das gang / bcom ldan 'das kyis snod chu rnyog pa can gyis gang ba'i dpe dang / me long yongs su ma dag pa'i pe dang / mtshe'u 'khrugs pa'i dpes rang gi gdong gi mtshan ma blta bar/ mi rung ba dang / de las slar bzlog na rung ba de bzhin du ma bsgoms pa'i sems kyis yang dag pa ji lta ba bzhin du shes par mi nus kyi/ bsgoms pas nus so zhes bka' stsal pa de/ sems kyis brtag pa gang dang / de bzhin nyid gang las dgongs te gsungs/ bka' stsal pa/ byams pa sems kyis brtag pa rnam pa gsum gyi phyir te/ thos pa las byung ba'i sems kyis brtag pa dang / bsams pa las byung ba'i sems kyis brtag pa dang / bsgoms pa las byung ba'i sems kyis brtag pa dang / rnam par rig pa'i de bzhin nyid la dgongs te/ yongs su bstan to// bcom ldan 'das de ltar chos dang don rab tu rig pa'i byang chub sems dpa' mtshan ma sel ba la zhugs pa'i mtshan ma du zhig ni bka' stsal lags/ de dag gang gis rnam par sel bar bgyid/ byams pa bcu ste/ stong pa nyid kyis rnam par sel bar byed do// bcu gang zhe na/ chos kyi don rab tu shes par byed pa na/ tshig 'bru'i mtshan ma sna tshogs gang yin pa de ni chos thams cad stong pa nyid kyis rnam par sel to/ / gnas pa'i de bzhin nyid kyi don rab tu shes par byed pa na skye ba dang / 'jig pa dang / gnas pa dang / gzhan du 'gyur ba'i rgyu 'byung ba'i mtshan ma gang yin pa de/ mtshan nyid stong pa nyid dang / thog ma dang tha ma med pa stong pa nyid kyis rnam par sel to// 'dzin pa'i don rab tu shes par byed pa na/ lus la chags pa'i mtshan ma dang / nga zhes bya ba'i mtshan ma gang yin pa de ni/ nang stong pa nyid dang / mi dmigs pa stong pa nyid kyis rnam par sel to/ gzung ba'i don rab tu shes par byed pa na/ longs spyod la blta ba'i mtshan ma gang yin pa de ni/ phyi stong pa nyid kyis rnam par sel to// yongs su longs spyod pa'i don bud med dang skyes pa dga' dgur spyod pa dang / yo byad dang ldan pa rab tu shes par byed pa na/ nang gi bde ba'i mtshan ma dang / phyi rol gyi gzung ba'i mtshan ma gang yin pa de ni/ phyi nang stong pa nyid dang / rang bzhin gyis stong pa nyid kyis rnam par sel to// gnas kyi don rab tu shes par byed pa na/ tshad med pa'i mtshan ma gang yin pa de ni/ chen po stong pa nyid kyis rnam par sel to/ / gzugs med pa la yang brten nas/ nang gi zhi ba rnam par thar pa'o mtshan ma gang yin pa de ni 'dus byas stong pa nyid kyis rnam par sel to// mtshan nyid kyi de bzhin nyid kyi don rab tu shes par byed pa na/ gang zag la bdag med pa'i mtshan ma dang / chos la bdag med pa'i mtshan ma dang / rnam par rig pa tsam gyi mtshan ma dang / don dam pa'i rnam pa'i mtshan ma gang yin pa de ni/ mtha' las 'das pa stong pa nyid dang / dngos po med pa stong pa nyid dang / dngos po med pa'i ngo bo nyid stong pa nyid dang / don dam pa stong pa nyid kyis rnam par sel to/ / rnam par dag pa'i de bzhin nyid kyi don rab tu shes par byed pa na/ 'dus ma byas kyi mtshan ma dang rnam par 'gyur ba med pa'i mtshan ma gang yin pa de ni/ 'dus ma byas stong pa nyid dang / rnam par 'gyur ba med pa stong pa nyid kyis rnam par sel to// mtshan ma de'i gnyen po stong pa nyid de yid la byed pa na/ stong pa nyid kyi mtshan ma gang yin pa de ni/ stong pa nyid stong pa nyid kyis rnam par sel to// bcom ldan 'das mtshan ma rnam pa bcu rnam par sel ba na/ gang rnam par sel/ mtshan ma gang las rnam par 'gro la/ byams pa ting nge 'dzin gyi spyod yul gzugs brnyan gyi mtshan ma rnam par bsal na/ kun nas nyon mongs pa'i bcings pa'i mtshan ma las yongs su 'grol te/ de yang rnam par sel to/ / byams pa stong pa nyid 'di rnams ni gtsor mtshan ma 'di dag gi gnyen por gyur par shes par bya ste/ re res kyang mtshan ma thams cad kyi gnyen por mi 'gyur ba ni ma yin no/ / byams pa 'di lta ste dper na/ ma rig pa nas rga shi'i bar gyi kun nas nyon mongs pa mi skyed pa ma yin mod kyi/ rkyen du nye ba dang / shin tu nye ba'i phyir gtsor na 'du byed skyed par bshad do/ / tshul de bzhin du 'di la yang blta bar bya'o// bcom ldan 'das byang chub sems dpas stong pa nyid kyi mtshan nyid gang 'tshal bas stong pa nyid kyi don la mngon pa'i nga rgyal ma mchis shing / ma rung bar mi 'gyur ba'i stong pa nyid kyi mtshan nyid rdzogs pa gang lags// de nas bcom ldan 'das kyis/ byang chub sems dpa' byams pa la legs so zhes bya ba byin te/ byams pa gang khyod kyis ci nas byang chub sems dpa' rnams stong pa nyid la rab tu ma rung bar mi 'gyur bar bya ba'i phyir/ de bzhin gshegs pa la don 'di 'dri ba ni legs so legs so// de ci'i phyir zhe na/ byams pa stong pa nyid la rab tu ma rung ba'i byang chub sems dpa' ni theg pa chen po mtha' dag las rab tu ma rung ba yin te/ byams pa de'i phyir khyod la stong pa'i mtshan nyid rdzogs par bshad kyis nyon cig/ byams pa gzhan gyi dbang gi mtshan nyid dang / yongs su grub pa'i mtshan nyid la/ rnam pa thams cad du kun nas nyon mongs pa dang / rnam pa byang ba'i kun btags pa'i mtshan nyid dang shin tu bral ba de la de yang mi dmigs pa 'di ni theg pa chen po la stong pa nyid kyi mtshan nyid rdzogs pa zhes bya'o/ / bcom ldan 'das zhi gnas dang / lcug mthong gnyis kyi ting nge 'dzin du zhig yongs su bzung / bka' stsal pa/ ngas nyan thos rnams dang / byang chub sems dpa' rnams dang / de bzhin gshegs pa rnams kyi ting nge 'dzin rnam pa du ma gang ci bshad pa de dag thams cad yongs su bzung bar shes par bya'o/ / bcom ldan 'das zhi gnas dang / lhag mthong rgyu gang las byung / tshul khrims rnam par dag pa'i rgyu las byung ngo // thos pa dang / bsams pa las byung ba'i lta ba rnam par dag pa'i rgyu las byung ngo // bcom ldan 'das de dag gi 'bras bu gang lags zhes bgyi/ byams pa sems rnam par dag pa ni 'bras bu'o/ / shes rab rnam par dag pa ni 'bras bu'o// byams pa gzhan yang nyan thos dag gi 'am/ de bzhin gshegs pa rnams kyi yang rung ste/ 'jig rten pa dang / 'jig rten las 'das pa'i dge ba'i chos thams cad kyang / zhi gnas dang lhag mthong gi 'bras bur shes par bya'o// bcom ldan 'das zhi gnas dang lhag mthong gi las ci lags/ byams pa mtshan ma'i bcings pa dang / gnas ngan len gyi bcings pa ste/ bcings pa rnam gnyis las rnam par 'grel pa'o// bcom ldan 'das gang bcom ldan 'das kyis bgegs su 'gyur ba rnam pa lnga gsungs pa 'di dag las/ zhi gnas kyi bgegs su 'gyur ba ni du/ lhag mthong gi bgegs su 'gyur ba ni du/ de gnyis ka'i bgegs su 'gyur ba ni du lags/ byams pa lus dang longs spyod la lta ba ni zhi gnas kyi bgegs so// 'phags pa'i gtam gyis tshim pa ma thob pa ni/ lhag mthong gi bgegs so// 'du 'dzir gnas pa dang / cung zad tsam gyis chog par 'dzin pa ni/ de gnyis ka'i bgegs su 'gyur bar shes par bya ste/ de la yang gcig gis mi sbyor bar mi byed do// gnyis pas ni sbyo ba'i mthar phyin par mi 'gyur ro// bcom ldan 'das gang 'di sgrib pa lnga po dag las/ zhi gnas kyi sgrib pa ni du/ lhag mthong gi sgrib pa ni du/ de gnyis ka'i sgrib pa ni du lags/ byams pa rgod pa dang / 'gyod pa ni zhi gnas kyi sgrib pa'o// rmugs pa dang / gnyid dang / the tsom ni lhag mthong gi sgrib pa'o// 'dod pa la 'dun pa dang / gnod sems ni de gnyis ka'i sgrib pa'o// bcom ldan 'das ji tsam gyis na zhi gnas kyi lam yongs su dag pa lags/ byams pa nam rmugs pa dang / gnyid legs par shin tu choms par gyur pa'o// ji tsam gyis na lhag mthong gi lam yongs su dag pa lags/ nam rgod pa dang / 'gyod pa legs par shin tu choms par gyur pa'o// bcom ldan 'das zhi gnas dang / lhag mthong la gnas pa'i byang chub sems dpas sems kyi rnam par g.yeng ba rnam pa ngur 'tshal bar bgyi/ bka' stsal pa/ rnam pa lnga ste/ yid la byed pa'i rnam par g.yeng ba dang / phyi rol du sems rnam par g.yeng ba dang / nang gi sems rnam par g.yeng ba dang / mtshan ma'i rnam par g.yeng ba dang / gnas ngan len gyi rnam par g.yeng ba'o// byams pa gal te byang chub sems dpa' theg pa chen po dang ldan pa'i yid la byed pa btang ste/ nyan thos dang / rang sangs rgyas dang ldan pa'i yid la byed par lhung na/ 'di ni yid la byed pa'i rnam par g.yeng ba'o// gal te phyi rol gyi 'dod pa'i yon tan lnga rnams dang / 'du 'dzi dang / mtshan ma dang / rtog pa dang / nyon mongs pa dang / nye ba'i nyon mongs pa dang / phyi rol gyi dmigs pa rnams la sems 'phro bar gtong na 'di ni phyi rol du sems rnam par g.yeng ba'o/ / gal te snyoms par 'jug pa'i nye ba'i nyon mongs pa rmugs pa dang / gnyid dam/ bying ba 'am/ snyoms par 'jug pa'i myang ba 'am/ gang yang rung bas nye ba'i nyon mongs pa dang ldan par 'gyur ba/ 'di ni nang gi sems rnam par g.yeng ba'o// gal te phyi rol gyi mtshan ma la gnas pa/ nang gi ting 'dzin gyi spyod yul mtshan ma yid la byed pa 'di ni mtshan ma'i rnam par g.yeng ba'o/ / gal te nang gi yid la byed pa la brten nas byung ba'i tshor ba la gnas ngan len gyi tshogs kyis nga'o zhes snyems pa de ni gnas ngan len gyi rnam par g.yeng ba'o/ / bcom ldan 'das zhi gnas dang / lhag mthong dag byang chub sems dpa'i sa dang po nas bzung ste/ de bzhin gshegs pa'i sa'i bar la gang gi gnyen po lags/ byams pa sa dang po la ni/ zhi gnas dang / lhag mthong ngan song ba'i nyon mongs pa dang / las dang tshe'i kun nas nyon mongs pa'i gnyen po'o/ / gnyis pa la ni ltung ba'i 'khrul pa shin tu phra mo 'byung ba rnams kyi'o// gsum pa la ni 'dod pa la 'dod chags kyi'o// bzhi pa la ni snyoms par 'jug par sred pa dang / chos la sred pa'i 'o// lnga pa la ni 'khor ba dang / mya ngan las 'das pa la shin tu phyir phyogs pa dang / mngon du phyogs pa'i 'o// drug pa la ni mtshan ma mang po 'byung ba'i 'o/ / bdun pa la ni mtshan ma phra mo 'byung ba'i 'o// brgyad pa la ni mtshan ma med pa la sgrib pa 'am/ mtshan ma la mi dbang ba'i'o// dgu pa la ni rnam pa thams cad du chos ston pa la dbang du ma gyur pa'i 'o/ / bcu pa la ni chos kyi sku yongs su rdzogs par rab tu shis pa mi 'thob pa'i 'o// byams pa de bzhin gshegs pa'i sa la ni// zhi gnas dang / lhag mthong nyon mongs pa dang / shes bya'i sgrib pa shin tu phra ba bas kyang ches phra ba'i gnyen po ste/ de legs par bcom pa'i phyir/ chos kyi sku shin tu rnam par/ dag pa la gnas pas/ dgos pa yongs su grub pa'i dmigs pa la thams cad du mi thogs mi chags pa'i ye shes mthong ba rab tu 'thob bo// bcom ldan 'das zhi gnas dang / lhag mthong la nan tan bgyid pa'i byang chub sems dpa' ji ltar bla na med pa yang dag par rdzogs pa'i byang chub mngon par rdzogs par 'tshang rgya/ bcom ldan 'das kyis bka' stsal pa/ byams pa 'di la byang chub sems dpa' zhi gnas dang / lhag mthong rab tu thob nas/ de bzhin nyid rnam pa bdun la brtsams te/ ji ltar thos pa dang bsams pa'i chos rnams la mnyam par gzhag pa'i sems kyis de dag nyid legs par rtogs pa dang / shin tu bsam pa dang / shin tu bkod pa'i de bzhin nyid nang du yid la byed do// de de ltar yid la byed pas mtshan ma shin tu phra ba 'byung ba rnams las kyang / sems shin tu btang snyoms su 'gyur na/ chen po lta la ci smos/ byams pa de la mtshan ma shin tu phra ba ni 'di dag ste/ gang sems kyi len pa'i mtshan ma 'am/ myong ba'i mtshan ma 'am/ rnam par rig pa'i mtshan ma 'am/ kun nas nyon mongs pa dang / rnam par byang ba'i mtshan ma 'am/ nang gi mtshan ma 'am/ phyi rol gyi mtshan ma 'am/ de gnyis ka'i mtshan ma'am/ sems can thams cad kyi don la sbyor ro snyam pa'i mtshan ma 'am/ ye shes kyi mtshan ma 'am/ de bzhin nyid dang sdug pasngal dang / kun 'byung ba dang / 'gog pa dang / lam gyi mtshan ma 'am/ 'dus byas kyi mtshan ma 'am/ 'dus ma byas kyi mtshan ma 'am/ mi rtag pa'i mtshan ma 'am/ rtag pa'i mtshan ma 'am/ sdug bsngal 'gyur ba dang bcas pa'i rang bzhin can gyi mtshan ma 'am/ de mi 'gyur ba'i rang bzhin can gyi mtshan ma 'am/ 'dus byas kyi mtshan nyid kyi mtshan ma 'am/ de'i rang gi mtshan nyid kyi mtshan ma 'am/ thams cad la thams cad ces bya bar shes nas/ thams cad kyi mtshan ma 'am/ gang zag la bdag med pa'i mtshan ma 'am/ chos la bdag med pa'i mtshan ma dag ste/ de dag 'byung ba las/ sems btang snyoms su byed do// de de ltar zhugs shing de la na mang du gnas pas/ dus dus su bgegs dang / sgrib pa dang / rnam par g.yeng ba las sems yongs su sbyong ba na/ de bzhin nyid rnam pa bdun la nang gi so so rang gis shes par bya bar rab tu rtogs pa'i ye shes rnam pa bdun skye bar 'gyur ro/ / de ni de'i mthong ba'i lam ste/ de thob pas byang chub sems dpa' yang dag pa nyid du nges par gyur pa la zhugs pa yin te/ de bzhin gshegs pa'i rigs su skyes pa'i sa dang po yang thob pa yin no/ / sa de'i phan yon yang myong ba yin no// de sngar zhi gnas dang / lhag mthong thob pa'i phyir/ rnam par rtog pa dang bcas pa dang / rnam par mi rtog pa'i gzugs brnyan la dmigs pa rnam pa gnyis thob pa yin no/ / da gdod mthong ba'i lam thob pas dngos po'i mtha'i dmigs pa thob pa yin te/ des rnams la gong nas gong du bsgom pa'i lam la rab tu zhugs shing / dmigs pa gsum po de dag yid la byed pas/ 'di lta ste dper na/ la la zhig gis shin tu phra ba'i khye'us de bas sgom pa'i khye'u dbyung ba de bzhin du/ de'ang khye'us khye'u dbyung ba'i tshul du nang gi mtshan ma rnam par sel bas/ kun nas nyon mongs pa'i phyogs kyi mtshan ma thams cad rnam par sel to// mtshan ma rnam par sel bas gnas ngan len rnams kyang rnam par sel to/ / mtshan ma dang gnas ngan len thams cad legs par bcom pas rim kyis sa rnams la gong nas gong du gser lta bur sems rnam par sbyong zhing / bla na med pa yang dag par rdzogs pa'i byang chub kyi bar du mngon par rdzogs par 'tshang rgya ste/ dgos pa yongs su grub pa la dmigs pa yang rab tu thob bo// byams pa de ltar na zhi gnas dang / lhag mthong la nan tan byed pa'i byang chub sems dpa' ni bla na med pa yang dag par rdzogs pa'i byang chub mngon par rdzogs par 'tshang rgya'o// byang chub sems dpa' ji ltar na nan tan bgyid na/ byang chub sems dpa'i mthu chen po mngon par sgrub pa lags/ byams pa gnas drug la mkhas pa'i byang chub sems dpa' ni// byang chub sems dpa'i mthu chen po sgrub pa yin te/ sems skye ba la mkhas pa dang / gnas pa la mkhas pa dang / bslang ba la mkhas pa dang / 'phel ba la mkhas pa dang / 'grib pa la mkhas pa dang / thabs la mkhas pa'o// ji ltar na sems skye ba la mkhas pa yin zhe na/ rnam pa bcu drug tu sems skye ba shes na/ sems skye ba yang dag pa ji lta ba bzhin du mkhas pa yin no/ / de la sems skye ba rnam pa bcu drug po la/ rab tu mi rtogs shing brtan pa snod kyi rnam par rig pa ni 'di lta ste/ len pa'i rnam par shes pa'o// rnam pa sna tshogs la dmigs pa'i rnam par rig pa de 'di lta ste/ rnam par rtog pa'i yid kyi rnam par shes pa thang cig tu/ gzugs la sogs pa'i yul 'dzin pa thang cig tu/ phyi nang gi yul tshor ba 'dzin pa thang cig tu/ skad cig yud tsam thang cig gcig la ting nge 'dzin mang po la yang snyoms par 'jug pa/ sangs rgyas kyi zhing mang po yang mthong ba/ de bzhin gshegs pa mang po yang mthong ba/ rnam par rtog pa'i yid kyi rnam par shes pa'o// mtshan ma chung ngu'i dmigs pa rnam par rig pa ni/ 'di lta ste/ 'dod pa dang ldan pa'o// mtshan ma chen por gyur pa'i dmigs pa rnam par rig pa ni 'di lta ste/ gzugs dang ldan pa'o// mtshan ma tshad med pa'i dmigs pa rnam par rig pa ni/ 'di lta ste/ nam mkha' dang / rnam shes mtha' yas skye mched dang ldan pa'o/ / mtshan ma phra mo'i dmigs pa rnam par rig pa 'di lta ste/ ci yang med pa'i skye mched dang ldan pa'o// mtha' ma'i mtshan ma dmigs pa rnam par rig pa ni/ 'di lta ste/ 'du shes med 'du shes med min gyi skye mched dang ldan pa'o// mtshan ma med pa'i rnam par rig pa ni/ 'di lta ste/ 'jig rten las 'das pa dang / 'gog pa la dmigs pa'o/ / sdug bsngal dang ldan pa ni/ 'di lta ste/ sems can dmyal ba'o// 'dres pa'i tshor ba dang ldan pa ni/ 'di lta ste/ 'dod pa spyod pa'o// dga' ba dang ldan pa ni// 'di lta ste/ bsam gtan dang po dang gnyis pa'o// bde ba dang ldan pa ni/ 'di lta ste/ bsam gtan gsum pa'o// sdug bsngal yang ma yin/ bde ba yang ma yin pa dang ldan pa ni/ 'di lta ste/ bsam gtan bzhi pa nas 'du shes med 'du shes med min skye mched pa'i bar du'o// nyon mongs pa can dang ldan pa ni/ 'di lta ste/ nyon mongs pa dang / nye ba'i nyon mongs pa dang ldan pa'o/ / dge ba dang ldan pa ni/ 'di lta ste/ dad pa la sogs pa dang ldan pa'o// lung du mi ston pa dang ldan pa ni 'di lta ste/ de gnyis ka dang mi ldan pa'o// ji ltar na gnas pa la mkhas pa yin zhe na/ gal te rnam par rig pa'i de bzhin nyid yang dag pa ji lta ba bzhin du rab tu shes pa'o// ji ltar na bslang ba la mkhas pa yin zhe na/ gal te mtshan ma dang / gnas ngan len gyi bcings pa dang / bcings pa rnam gnyis yang dag pa ji lta ba bzhin du rab tu shes te/ de rab tu shes nas/ sems 'di ni 'di las bslang ngo zhes mkhas pa yin no/ / ji ltar na 'phel ba la mkhas pa yin zhe na/ gal te gang mtshan ma dang / gnas ngan len de'i gnyen po'i sems de skye zhing / 'phel ba'i tshe skye'o/ / 'phel lo zhes 'phel ba la mkhas pa yin no// ji ltar na 'grib pa la mkhas pa yin zhe na/ gal te de de dang mi mthun pa'i phyogs su gyur pa/ mtshan ma dang / gnas ngan len gyis kun nas nyon mongs pa'i sems 'grib cing 'bri bar gyur pa na/ 'grib bo zhes 'grib pa la mkhas pa yin no// ji ltar na thabs la mkhas pa yin zhe na/ gal te rnam par thar pa dang / zil gyis gnon pa'i skye mched dang / zad par gyi skye mched sgom pa'o// byams pa de ltar na byang chub sems dpa' rnams/ byang chub sems dpa'i mthu chen po mngon par bsgrubs pa dang / mngon par bsgrubs par 'gyur zhing mngon par bsgrub bo// bcom ldan 'das kyis 'di skad du phung po'i lhag ma med pa'i mya ngan las 'das pa'i dbyings su tshor ba thams cad ma lus par 'gag go zhes bka' stsal pa/ 'gag par 'gyur ba'i tshor ba de dag gang lags/ byams pa mdor na tshor ba rnam pa gnyis 'gag par 'gyur te/ gnas kyi gnas ngan len myong ba dang / de'i 'bras bu yul myong ba'o// de la gnas kyi gnas ngan len myong ba ni/ rnam pa bzhir shes par bya ste/ gzugs kyi gnas myong ba dang / gzugs med pa'i gnas myong ba dang / 'bras bu grub pa'i gnas ngan len myong ba dang / 'bras bu ma grub pa'i gnas ngan len myong ba'o// de dag kyang 'bras bu 'grub pa ni gang da ltar gyi'o/ / 'bras bu ma grub pa ni gang ma 'ongs pa'i rgyur gyur pa'o// yul myong ba yang rnam pa bzhi ste/ rten myong ba dang / yo byad myong ba dang / longs spyod myong ba dang / ltos pa myong ba'o// de la phung po'i lhag ma dang bcas pa'i mya ngan las 'das pa'i dbyings su ni 'bras bu ma grub/ rig pa dang ldan pa'i reg pa las byung ba'i tshor ba myong ba na/ de'i mi mthun pa'i phyogs thams cad kyi thams cad du 'gags pa ma yin te/ thun mong ba myong ba'o// 'bras bu grub pa myong ba'i tshe ni/ tshar pa rnam pa gnyis po de dag thams cad kyi thams cad du 'gags pa yin te/ rig pa dang ldan pa'i reg pa las byung ba'i tshor ba 'ba' zhig myong ba/ phung po'i lhag ma med pa'i mya ngan las 'das pa'i dbyings su yongs su mya ngan las 'das na/ de yang 'gags par gyur te/ de'i phyir na/ phung po'i lhag ma med pa'i mya ngan las 'das pa'i dbyings su tshor ba thams cad 'gag ces bya'o/ / de skad ces bka' stsal nas/ bcom ldan 'das kyis/ byang chub sems dpa' byams pa la bka' stsal pa/ byams pa khyod kyis rnal 'byor gyi lam yongs su dag pa/ shin tu yongs su rdzogs pa la brtsams te/ de bzhin gshegs pa la dri ba dris pa legs so legs so// de ltar ngas kyang shin tu rtogs shing shin tu mkhas pa'i tshul gyis/ rnal 'byor gyi lam 'di yongs su dag cing / yongs su rdzogs par bstan to// gang 'das pa dang / ma 'ongs pa'i yang dag par rdzogs pa'i sangs rgyas de dag thams cad kyis kyang 'di nyid bstan te/ ston par 'gyur ro// de ltar na 'di la rigs kyi bu 'am/ rigs kyi bu mo rnams kyis rab tu brtson par bya ba'i rigs de nas bcom ldan 'das kyis de'i tshe tshigs su bcad pa 'di dag gsungs so/ / chos rnams btags shing rnam par gang bzhag de/ rnal 'byor bag yod pa yi don chen yin/ / gang dag chos der brten nas rnal 'byor 'dir// yang dag brtson pa de dag byang chub 'thob// glags tshol 'di skad rgol bar glags lta ba// gang dag thar pa'i chos ni 'dzin byed pa/ / de dag byams pa rnal 'byor 'di las ring // shin tu ring ba gnams ji bzhin no// sems can don la brtan zhing lan mi re// shes nas sems can don brtson shes rab can/ / de yi bya byed zang zing med pa dang // kun gyis dam pa'i dga' ba thob par 'gyur// 'dod phyir su dag dam chos ston byed pa// de dag 'dod pa btang ba'i phyir len te/ / myos pa de dag thang med rin chen chos// thob par gyur kyang sprang por rgyu ba byed// de phyir rtsod dang 'du 'dzi spros dang chags// rnam par spongs la brtson 'grus mchog byos te/ / lhar bcas 'jig rten bsgul bar bya ba'i phyir// rnal 'byor 'di la rab tu brtson par gyis// de nas bcom ldan 'das la byang chub sems dpa' byams pas 'di skad ces gsol to/ / bcom ldan 'das dgongs pa nges par 'grel pa'i chos kyi rnam grangs 'di la nges par bshad pa 'di'i ming ci lags 'di ji ltar gzung bar bgyi/ bcom ldan 'das kyis bka' stsal pa/ byams pa 'di ni rnal 'byor nges pa'i don bstan pa yin te/ rnal 'byor nges pa'i don bstan par zung zhig/ rnal 'byor nges pa'i don bstan pa 'di bshad pa na/ srog chags 'bum phrag drug bla na med pa yang dag par rdzogs pa'i byang chub tu sems skyes so// nyan thos sum stong chos la chos kyi mig rdul dang bral zhing dri ma med par rnam par dag go/ / nyan thos 'bum phrag lnga khri ni len pa med par zag pa las sems rnam par grol lo// byang chub sems dpa' bdun khri lnga stong ni rnal 'byor chen po yid la byed pa thob par gyur to/ / byams pa'i le'u ste brgyad pa'o// // de nas bcom ldan 'das la/ byang chub sems dpa' spyan ras gzigs dbang phyug gis zhu ba zhus pa/ bcom ldan 'das/ gang byang chub sems dpa' rnams kyi sa bcu de dag ni 'di lta ste/ rab tu dga' ba dang / dri ma med pa dang / 'od byed pa dang / 'od 'phro ba dang / shin tu sbyang dka' ba dang / mngon du gyur pa dang / ring du song ba dang / mi g.yo ba dang / legs pa'i blo gros dang / chos kyi sprin te/ sangs rgyas kyi sa ni bcu gcig pa lags na/ sa 'di dag rnam par dag pa du zhig dang / yan lag du zhig gis bsdus pa lags/ bcom ldan 'das kyis bka' stsal pa spyan ras gzigs dbang phyug 'di rnams ni/ rnam par dag pa bzhi dang / yan lag bcu gcig gis bsdus par shes par bya'o// spyan ras gzigs dbang phyug de la bsam pa rnam par dag pas ni sa dang po bsdus so/ / lhag pa'i tshul khrims rnam par dag pas ni sa gnyis pa'o// lhag pa'i sems rnam par dag pas ni sa gsum pa'o// lhag pa'i shes rab rnam par dag pas ni/ gong nas gong du 'bogs paras bzhi nas sangs rgyas kyi sa'i bar du bsdus par shes par bya ste/ rnam par dag pa bzhi po 'di rnams kyis 'di rnams bsdus pa yin no/ / yan lag bcu gcig po rnams gang zhe na/ spyan ras gzigs dbang phyug mos pas spyod pa'i sa la chos spyod pa bcu shin tu bsgoms pas mos pas spyod pa'i byang chub sem dpa' sa de las 'das nas/ byang chub sems dpa'i yang dag pa nyid skyon med pa la 'jug go/ de yan lag des yongs su rdzogs pa yin yang ltung ba phra mo'i 'khrul pa 'byung ba rnams la shes bzhin du spyod par mi nus pas de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang 'thob bo// de yan lag des yongs su rdzogs pa yin yang / 'jig rten pa'i ting nge 'dzin yongs su rdzogs par snyoms par 'jug pa dang / thos pa'i gzungs yongs su rdzogs par 'thob par mi nus pas de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de'ang 'thob bo// de yan lag des yongs su rdzogs pa yin yang / byang chub kyi phyogs kyi chos ji ltar thob pa de dag la mang du gnas par bya ba dang / snyoms par 'jug pa la sred pa dang / chos la sred pa las sems btang snyoms su 'jog mi nus pas de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang 'thob bo// de yan lag des yongs su rdzogs pa yin yang bden pa rnam par dpyad pa dang / 'khor ba dang / mya ngan las 'das pa la shin tu phyir phyogs pa dang / mngon du phyogs pa yid la byed pa btang snyoms su bzhag nas/ thabs kyis yongs su zin pa'i byang chub kyi phyogs kyi chos rnams sgom mi nus pas de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang 'thob bo/ / de yan lag des yongs su rdzogs pa yin yang / 'dus shes 'byung ba ji lta ba bzhin du mngon sum du byas te/ de la skyo ba mang ba dang / mtshan ma med pa yid la byed pas/ mang du spyod par mi nus pas/ de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang 'thob bo// de yan lag des yongs su rdzogs pa yin yang / mtshan ma med pa la bar chad med cing rgyun ma chad par mang du gnas mi nus pas/ de yan lag des yongs su ma rdzogs pa yin te/ de yan lag des yongs su rdzogs par bya ba'i phyir/ 'bad pas de yang 'thob bo// de yan lag des yongs su rdzogs pa yin yang / mtshan ma med par gnas pa de la bsgrim pa btang snyoms su bzhag pa dang / mtshan ma'i dbang thob par mi nus pas/ de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang 'thob bo/ de yan lag des yongs su rdzogs pa yin yang / rnam grangs dang / mtshan nyid dang / nges pa'i tshig dang / rab tu dbye bas rnam pa thams cad du chos bstan pa la dbang thob par mi nus pas/ de yan lag des yongs su ma rdzogs pa yin te/ de yan lag nges yongs su rdzogs par bya ba'i phyir 'bad pas de yang 'thob bo// de yan lag des yongs su rdzogs pa yin yang chos kyi sku'i yongs su rdzogs pa 'thob pa dang / rab tu myong bar mi nus pas/ de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de'ang 'thob bo/ / de yan lag des yongs su rdzogs pa yin yang / shes bya thams cad la mi thogs mi chags pa'i ye shes mthong ba thob par mi nus pas/ de yan lag des yongs su ma rdzogs pa yin te/ de yan lag des yongs su rdzogs par bya ba'i phyir 'bad pas de yang 'thob bo// de yan lag des yongs su rdzogs pa yin te/ de yan lag des yongs su rdzogs pa'i phyir/ yan lag thams cad yongs su rdzogs pa yin no// spyan ras gzigs dbang phyug yan lag bcu gcig po de dag gis sa 'di rnams bsdus par shes par bya'o/ / bcom ldan 'das ci'i slad du sa dang po la rab tu dga' ba zhes bgyi/ ci'i slad du sangs rgyas kyi sa'i bar du sangs rgyas kyi sa zhes bgyi// don chen po 'jig rten las 'das pa 'dris pa ma yin pa'i sems rnyed pas/ rgya cher dga' zhing mchog tu dga' ba'i phyir/ sa dang po ni rab tu dga' ba zhes bya'o// ltung ba phra mo'i tshul khrims 'chal pa'i dri ma thams cad dang bral ba'i phyir sa gnyis pa ni/ dri ma med pa zhes bya'o// ting nge 'dzin de dang / thos pa'i gzungs de'i ye shes snang pa tshad med pa la gnas pa'i phyir sa gsum pa ni 'od byed pa zhes bya'o/ / nyon mongs pa'i shing sreg pa'i phyir byang chub kyi phyogs kyi chos bsgom pa'i ye shes kyi 'od 'phro bar gyur pas sa bzhi pa ni 'od 'phro ba can zhes bya'o/ / byang chub kyi phyogs kyi chos de dag nyid thabs kyis bsgom pa de la dbang byed par dka' ba'i phyir sa lnga pa ni shin tu sbyang dka' zhes bya'o/ / 'du byed rjes su 'byung ba la mngon sum du gyur pa dang / mtshan ma med pa'i yid la bya ba mtho bar mngon sum du gyur pa'i phyir sa drug pa ni mngon du gyur ces bya'o// mtshan ma med pa'i yod la bya ba bar chad med pa dang / rgyun mi 'chad pa la ring du zhugs pa dang / rnam par dag pa'i sa dang rjes su 'brel pa'i phyir sa bdun pa ni ring du song ba zhes bya'o// mtshan ma med pa la lhun gyis grub pa dang / mtshan ma la yang nyon mongs pa 'byung bas mi skul ba'i phyir/ sa brgyad pa ni mi g.yo ba zhes bya'o// rnam pa thams cad du chos ston pa'i dbang // kha kha na ma tho ba med pa'i blo gros shin tu yangs pa thob pa'i phyir/ sa dgu pa ni legs pa'i blo gros zhes bya'o// gnas ngan len gyi tshogs nam mkha' dang 'dra ba la chos kyi sku sprin chen po lta bus khyab pa dang / yog pa'i phyir sa bcu pa ni chos kyi sprin zhes bya'o// shes bya'i sgrib pa shin tu phra ba rab tu spangs pa mi chags mi thogs par shes bya'i rnam pa thams cad mngon par rdzogs par byang chub pa'i phyir/ sa bcu gcig pa ni sangs rgyas kyi sa zhes bya'o// bcom ldan 'das 'di rnams la shin tu rmongs pa ni du/ gnas ngan len mi mthun ba'i phyogs ni du mchis/ bcom ldan 'das kyis bka' stsal pa/ spyan ras gzigs dbang phyug shin tu rmongs pa nyi shu rtsa gnyis dang / gnas ngan len mi mthun pa'i phyogs bcu gcig ste/ sa dang po la gang zag dang / chos la mngon par zhen pa'i shin tu rmongs pa dang / ngan song ba'i nyon mongs pa'i shin tu rmongs pa dang / de'i gnas ngan len mi mthun pa'i phyogs so/ / gnyis pa la ni ltung ba phra mo'i'o 'khrul pa'i shin tu rmongs pa dang / las kyi 'gro ba rnam pa sna tshogs la shin tu rmongs pa dang / de'i gnas ngan len mi mthun pa'i phyogs so/ / gsum pa la ni 'dod chags kyi shin tu rmongs pa/ thos pa'i gzungs yongs su rdzogs pa'i shin tu rmongs pa dang / de'i gnas ngan len mi mthun/ paba'i phyogs so// bzhi pa la ni snyoms par 'jug pa la sred pa'i shin tu rmongs pa dang / chos la sred pa'i shin tu rmongs pa dang / de'i gnas ngan len mi mthun pa'i phyogs so// lnga pa la ni 'khor ba las shin tu phyir phyogs pa dang / mngon du phyogs pa'i yid la byed pa'i shin tu rmongs pa dang / mya ngan las 'das pa las shin tu phyir phyogs pa dang / mngon du phyogs pa yid la byed pa'i shin tu rmongs pa dang / de'i gnas ngan len mi mthun pa'i phyogs so// drug pa la ni 'du byed 'byung ba mngon sum du gyur pa'i shin tu rmongs pa dang // mtshan ma mang du 'byung ba'i shin tu rmongs pa dang / de'i gnas ngan len mi mthun pa'i phyogs so// bdun pa la ni mtshan ma phra mo 'byung ba'i shin tu rmongs pa dang / rab tu mtshan ma med pa yid la bya ba'i thabs la shin tu rmongs pa dang / de'i gnas ngan len mi mthun pa'i phyogs so// brgyad pa la ni mtshan ma med pa la bsgrim pa'i shin tu rmongs pa dang / mtshan ma dag la dbang pa'i shin tu rmongs pa dang / de'i gnas ngan len mi mthun pa'i phyogs so// dgu pa la ni chos bstan pa tshad med pa dang / chos kyi tshig dang / yi ge tshad med pa dang / gong nas gong du shes/ rab dang / spobs pa la gzungs kyi dbang gi shin tu rmongs pa dang / spobs pa la dbang gi shin tu rmongs pa dang / de'i gnas ngan len mi mthun pa'i phyogs so// bcu pa la ni mngon/ par shes pa chen po shin tu rmongs pa dang / gsang ba phra mo la 'jug pa'i shin tu rmongs pa dang / de'i gnas ngan len mi mthun pa'i phyogs so// sangs rgyas kyi sa la ni shes bya thams cad la rab tu phra ba'i chags pa'i shin tu rmongs pa dang thogs pa'i shin tu rmongs pa dang / de'i gnas ngan len mi mthun pa'i phyogs so// spyan ras gzigs dbang phyug shin tu rmongs pa nyi shu rtsa gnyis po 'di rnams dang / gnas ngan len bcu gcig po 'di dag gis sa 'di rnams rnam par dgod pa yin no// bla na med pa yang dag par rdzogs pa'i byang chub ni mi ldan pa'o/ / bcom ldan 'das ji tsam du bla na med pa yang dag par rdzogs pa'i byang chub phan yon che zhing 'bras bu che ba dang / de ltar gti mug chen po'i dra ba bsal nas/ gnas ngan len thibs po chen po las yang dag par 'das te/ byang chub sems dpa' rnams bla na med pa yang dag par rdzogs pa'i byang chub mngon par rdzogs par 'tshang rgya ba ngo mtshar ro// bcom ldan 'das 'di rnams rnam par dag pa du zhig gis rnam par bkod pa lags/ spyan ras gzigs dbang phyug brgyad kyis te/ lhag pa'i bsam pa rnam par dag pa dang / sems rnam par dag pa dang / snying rje rnam par dag pa dang / pha rol tu phyin pa rnam par dag pa dang / sangs rgyas mthong zhing bsnyen bkur bya ba rnam par dag pa dang / sems can yongs su smin par bya ba rnam par dag pa dang / skye ba rnam par dag pa dang / mthu rnam par dag pas so// spyan ras gzigs dbang phyug sa dang po la lhag pa'i bsam pa rnam par dag pa nas/ mthu'i bar du rnam par dag pa gang yin pa dang / sa gong ma gong ma rnams dang / sangs rgyas kyi sa'i bar du/ lhag pa'i bsam pa rnam par dag pa nas// mthu'i bar du rnam par dag pa gang yin pa de/ rnam par dag pa'i rab dang / rnam par dag pa'i mchog tu rig par bya'o// de la sangs rgyas kyi sa la skye ba rnam par dag pa ma gtogs pa ras dang po'i yon tan gang yin pa de dag gis/ de'i gong ma'i sa rnams de'i yon tan dang yang mnyam la/ rang gi sa'i yon tan gyis 'phags par yang shes par bya'o// byang chub sems dpa'i sa bcu po thams cad ni/ yon tan bla na yod pa yin te/ sangs rgyas kyi sa ni yon tan bla na med par shes par bya'o// bcom ldan 'das ci'i slad du/ srid par skye ba thams cad kyi nang na/ byang chub sems dpa'i skye ba rab mchog ces bgyi/ spyan ras gzigs dbang phyug rnam pa bzhi'i phyir te/ shin tu rnam par dag pa'i dge ba yang dag par 'grub/ pa dang so sor brtags te len pa dang / 'gro ba thams cad yongs su bskyab pa'i snying rje dang / bdag nyid kun nas nyon mongs pa med cing / gzhan gyi kun nas nyon mongs pa bzlog pa'i phyir ro/ / bcom ldan 'das ci'i slad du/ byang chub sems dpa' smon lam rgya chen pos mchi ba dang / smon lam gra nom pa dang / smon lam gyi stobs can lags/ spyan ras gzigs dbang phyug rnam pa bzhi'i phyir te/ 'di ltar byang chub sems dpa' rnams mya ngan las 'das pa'i bde ba'i gnas par yang mkhas pa dang / de myur du 'thob par yang nus pa dang / myur du 'thob pa de dang / bde bar gnas pa de yang spangs te/ sgyu med cing dgos pa med pa'i sdug bsngal yun ring po mang po sna tshogs 'byung yang sems can gyi don la yid kyis smon par byed pa ste/ de'i phyir smon lam rgya chen pos 'gro ba dang / smon lam gya nom pa dang / smon lam gyi stobs can rnams zhes bya'o// bcom ldan 'das/ byang chub sems dpa'i bslab pa'i dngos po du mchis/ spyan ras gzigs dbang phyug drug ste/ sbyin pa dang / tshul khrims dang / bzod pa dang / brtson 'grus dang bsam gtan dang / shes rab bo// bcom ldan 'das dngos po drug po 'di dag las lhag pa'i tshul khrims kyi bslab pa ni du/ lhag pa'i sems kyi bslab pa ni du/ lhag pa'i shes rab kyi bslab pa ni du lags/ spyan ras gzigs dbang phyug thog ma'i gsum po ni/ lhag pa'i tshul khrims kyi bslab par shes par bya'o// bsam gtan ni lhag pa'i sems kyi bslab pa'o// shes rab ni lhag pa'i shes rab kyi bslab pa'o// brtson 'grus ni kun tu 'gro bar ngas bshad do// bcom ldan 'das bslab pa'i dngos po drug po 'di rnams las bsod nams kyi tshogs ni du/ ye shes kyi tshogs ni du lags/ spyan ras gzigs dbang phyug lhag pa'i tshul khrims kyi bslab gang yin pa de ni bsod nams kyi tshogs so/ / lhag pa'i shes rab kyi bslab pa gang yin pa de ni/ ye shes kyi tshogs so// brtson 'grus dang / bsam gtan ni kun tu 'a bar ngas bshad do/ / bcom ldan 'das bslab pa'i dngos po 'di dag la/ byang chub sems dpas ji ltar bslab par bkyi/ spyan ras gzigs dbang phyug rnam pa lnga ste/ pha rol tu phyin pa dang ldan pa'i dam pa'i chos bstan pa/ byang chub sems dpa'i sde snod la de thog mar shin tu mos pa dang / de nas chos spyod pa rnam pa bcu dang / thos pa dang bsam pa dang / bsgom pa las byung ba'i shes pas sgrub pa dang / byang chub kyi sems rjes su bsrung ba dang / dge ba'i bshes gnyen la bsten pa dang / dge ba'i phyogs rgyun mi gcod pa'i sbyor bas bslab par bya'o/ / bcom ldan 'das ci'i slad du/ bsgrub pa'i dngos po 'di grangs drug tu bcas par 'tshal bar bgyi/ spyan ras gzigs dbang phyug sems can la phan gdags pa dang / nyon mongs pa'i gnyen po dang gnyis kyi phyir te/ de la gsum ni sems can la phan gdags pa/ gsum ni nyon mongs pa'i gnyen por shes par bya'o/ / de la sbyin pas ni byang chub sems dpa' yo byad rab tu sbyin pas sems can rnams pan 'dogs pas phan 'dogs so// tshul khrims kyis ni 'phongs pa dang / gnod pa dang / gtse bar mi bya ba'i phan 'dogs pas phan 'dogs so// bzod pas ni 'phongs pa dang / gnod pa dang / gtse ba la mi mjed pas phan 'dogs te/ 'di gsum gyis phan 'dogs so/ / brtson 'grus kyis ni nyon mongs pa ma bcil ba dang / nyon mongs pa yang dag par ma bcom pa/ dge ba'i phyogs la rab tu sbyor zhing nyon mongs pas de dag dge pa'i phyogs la sbyor ba dang bral bar mi nus so/ / bsam gtan gyis ni nyon mongs pa rnams rnam par gnon to// shes rab kyis ni bag la nyal yang dag par 'joms te/ 'di gsum ni nyon mongs pa'i gnyen po'o/ / bcom ldan 'das ci'i slad du/ pha rol tu phyin pa gzhan rnam grangs bzhir bcas par 'tshal bar bgyi/ spyan ras gzigs dbang phyug pha rol tu phyin pa drug po 'di dag nyid kyi grogs su 'gyur ba'i phyir te/ de la pha rol tu phyin pa gsum gyis phan gdags pa'i sems can rnams la byang chub sems dpa' bsdu ba'i dngos pos yongs su zin pa'i thabs mkhas pas dge ba la rab tu gzhog ste/ de'i phyir ngas thabs mkhas pa'i pha rol tu phyin pa ni/ gsum gyi grogs su 'gyur par bshad do/ / spyan ras gzigs dbang phyug gal te byang chub sems dpa' tshe 'di la nyon mongs pa mang ba dang / khams dang mos pa dman pa'i phyir/ bsgom pa rgyun mi gcod par mi nus shing lhag pa'i bsam pa nyam chung ba'i phyir/ sems nang du gzhog par mi nus la/ byang chub sems dpa'i sde snod thos pa la dmigs pa yongs su bsgoms pa'i bsam gtan ma yin pa'i phyir 'jig rten las 'das pa'i shes rab mngon par bsgrub mi nus pa yin na/ de bsod nams kyi tshogs chung ngu yang blangs te/ spros pa phyi ma la nyon mongs pa chung ngu 'gyur ba kyis smon pa de ni des smon lam gyi pha rol tu phyin pa yin te/ des nyon mongs pa chung zhing brtson 'grus kyang rtsom nus par 'gyur ro// de'i phyir smon lam gyi pha rol tu phyin pa ni/ brtson 'grus kyi pha rol tu phyin pa'i grogs su gyur pa'o/ / de skyes bu dam pa la bsten pa dang / dam pa'i chos nyan pa dang / tshul bzhin yid la byed pa la brten nas/ lhag pa'i bsam pa nyam chung ba bzlog ste/ dam pa'i khams la bsam pa'i stobs rab tu 'thob pas/ de ni de'i stobs kyi pha rol tu phyin pa yin te/ des ni nang du sems 'jog nus par 'gyur ro// de'i/ phyir stobs kyi pha rol tu phyin pa ni/ bsam gtan gyi pha rol tu phyin pa'i grogs su gyur pa'o// de byang chub sems dpa' sde snod thos pa la dmigs pa yongs su bsgoms pa'i bsam gtan byed de/ de ni de'i ye shes kyi pha rol tu phyin pa ste/ des ni 'jig rten las 'das pa'i shes rab mngon par sgrub nus par 'gyur bas/ de'i phyir ye shes kyi pha rol tu phyin pa ni ngas shes rab kyi pha rol tu phyin pa'i grogs su gyur par bshad do/ / bcom ldan 'das pha rol tu phyin pa drug po 'di rnams kyi go rims ci'i slad du nges par bstan par 'tshal bar bgyi/ spyan ras gzigs dbang phyug de dag gong nas gong du bsgrub pa la brten du gyur pa'i phyir te/ byang chub sems dpa' lus dang longs spyod la mi blta ba ni tshul khrims yang dag par len par byed do/ / tshul khrims rjes su srung ba ni/ bzod pa can du 'gyur ro// bzod pa can ni brtson 'grus rtsom par 'gyur ro// brtson 'grus brtsams pa ni bsam gtan yang dag par sgrub bo/ / bsam gtan phun sum tshogs pa ni 'jig rten las 'das pa'i shes rab shin tu 'thob bo// bcom ldan 'das pha rol tu phyin pa 'di rnams rnam par rab tu dbye ba du mchis/ spyan ras gzigs dbang phyug/ rnam pa gsum mo// de la sbyin pa rnam pa gsum ste/ chos kyi sbyin pa dang / zang zing gi sbyin pa dang / mi 'jin pa'i sbyin pa'o/ / tshul khrims rnam pa gsum ste/ mi dge ba zlog pa'i tshul khrims dang / dge ba la 'jug pa'i tshul khrims dang / sems can gyi don la 'jug pa'i tshul khrims so/ bzod pa rnam pa gsum ste/ gnod par byas pa mi mjed pa'i bzod pa dang / sdug bsngal la ji mi snyam pa'i bzod pa dang / chos la nges par rtog pa'i bzod pa'o// brtson 'grus rnam pa gsum ste/ go cha'i brtson 'grus dang / dge ba la sbyor ba'i brtson 'grus dang / sems can gyi don la sbyor ba'i brtson 'grus so// bsam gtan rnam pa gsum ste/ rnam par mi rtog cing zhi ba rab tu zhi bas nyon mongs pa dang sdug bsngal gyi gnyen po bde bar gnas pa'i bsam gtan dang / yon tan mngon par sgrub pa'i bsam gtan dang sems can gyi don mngon par bsgrub pa'i bsam gtan no/ / shes rab rnam pa gsum ste/ kun rdzob kyi bden pa la dmigs pa dang / don dam pa'i bden pa la dmigs pa dang sems can gyi don la dmigs pa'o/ / bcom ldan 'das ci'i slad du pha rol tu phyin pa 'di rnams pha rol tu phyin pa zhes bgyi/ spyan ras gzigs dbang phyug lnga'i phyir te/ ma chags pa mi blta ba dang / kha na ma tho ba med pa dang / rnam par mi rtog pa dang / yongs su bsngo ba'i phyir ro// de la ma chags pa ni pha rol tu phyin pa dang 'gal ba'i dngos po rnams la gang ma chags// pa'o// de la mi blta ba ni pha rol tu phyin pa rnams kyi 'bras bu rnam par smin pa dang / phyir bya ba la sems ma 'dzings pa'o// de la kha na ma tho ba med pa ni pha rol tu phyin pa 'di rnams nyon mongs pa'i chos dang ma 'dres shing thabs ma yin pa rnam par spangs pa'o/ / de la rnam par mi rtog pa ni pha rol tu phyin pa 'di rnams kyi mtshan nyid sgra ji bzhin du gang mngon par zhen pa med pa'o// de la yongs su bsngo ba ni pha rol tu phyin pa 'di dag byas shing bsags pa rnams kyis byang chub chen po'i 'bras bur smon pa'o// bcom ldan 'das pha rol tu phyin pa rnams dang 'gal pa'i dngos po gang lags/ spyan ras gzigs dbang phyug de dag ni dngos po drug tu shes par bya ste/ 'dod pa'i dga' ba dang / longs spyod dang / dbang phyug la bdag bde bar gnas pa la yon tan gyi phan yon du lta ba dang / lus dang / ngag dang / yid rang nyam du spyod pa dang / brnyas pa mi bzod pa dang / mi brtson zhing bsod nyams su gnas pa dang / 'du 'dzi dang / 'jig rten gyi sna tshogs la rnam par g.yeng ba'i rnam pa dang / mthong ba dang / thos pa dang / bye brag phyed pa dang / rnam par rig pa'i tha snyad rab tu spros pa la yon tan gyi phan yon du lta ba'o/ / bcom ldan 'das pha rol tu phyin pa 'di rnams kyi 'bras bu rnam par smin pa gang lags/ spyan ras gzigs dbang phyug de yang rnam pa drug tu shes par bya ste/ longs spyod che ba dang / bde 'gror 'gro ba dang / kho na med cing dbye ba med pa dang / bde ba dang / yid bde ba mang ba dang / sems can gyi bdag po dang / lus la gnod pa med pa dang / dbang che bar grags pa'o// bcom ldan 'das pha rol tu phyin pa 'di rnams la kun nas nyon mongs pa'i chos dang rnam par 'dres pa gang lags/ spyan ras gzigs dbang phyug de ni sbyor ba rnam pa bzhir shes par bya ste/ snying rje med pa'i sbyor ba dang / tshul bzhin ma yin pa'i sbyor ba dang / rgyun mi 'chad pa ma yin pa'i sbyor ba dang / rim gro med pa'i sbyor ba'o// de la tshul bzhin ma yin pa'i sbyor ba ni 'di yin te/ gang de las gzhan pa'i pha rol tu phyin pa dag la de ma yin pa'i pha rol tu phyin pa gzhan dang mi ldan zhing bral bar sgom pa'o/ / bcom ldan 'das thabs ma lags pa gang lags/ spyan ras gzigs dbang phyug/ byang chub sems dpa' pha rol tu phyin pa 'di dag gis sems can rnams la phan 'dogs pa/ gal te zang zing gis phan 'dogs pa nye bar bsgrub pa tsam gyis chog par 'dzin cing mi dge ba'i gnas nas bslang ste/ dge ba'i gnas su mi gzhog pa 'di ni thabs ma yin pa'o// de ci'i phyir/ zhe naspyan ras gzigs dbang phyug de tsam gyis ni/ sems can la phan gdags par byas pa ma yin te/ 'di lta ste/ dper na mi gtsang ba ni che yang rung / chung yang rung ste/ rnam pa gang gis kyang dri zhim por bya bar mi nus so// de bzhin du sems can 'du byed kyi sdug bsngal gyi rang bzhin gyis sdug bsngal ba rnams rnam pa gang gis kyang zang zing gis phan gdags patsam gyis ni bde bar bya bar mi nus kyi/ dge ba la gzhog pa gang yin pa de ni/ de dag la phan gdags pa'i dam pa'o// bcom ldan 'das pha rol tu phyin pa 'di rnams kyi rnam par dag pa du mchis/ spyan ras gzigs dbang phyug rnam pa 'di lnga ma yin par pha rol tu phyin pa rnams kyi rnam par dag pa gzhan du nga mi smra'o/ / 'on kyang de nyid bzung ste/ pha rol tu phyin pa'i rnam par dag pa bsdus pa dang / spros pa khyod la bshad do// de la pha rol tu phyin pa thams cad kyi rnam par dag pa ni rnam pa bdun du shes par bya ste/ bdun gang zhe na/ de ni 'di ltar byang chub sems dpa' pha rol las shes kyi khe mi tshol ba dang / chos de dag la lta bas mngon par zhen par mi byed pa dang / chos 'di rnams byang chub tu nges par 'byung ba yin nam ma yin zhes the tsom dang nem nur mi skyed pa dang / bdag la mi bstod pa dang / gzhan la mi smod pa dang / brnyas par mi byed/ dregs par mi byed/ bag med par mi byed pa dang / cung zad kyis chog par mi 'dzin pa dang / chos de dag gis pha rol la 'jungs pa'i phyir phrag dog gis rnam par 'khrugs pa ma yin pa'o/ / pha rol tu phyin pa'i rnam par dag pa so sor spros pa yang rnam pa bdun du shes par bya ste/ so so'i rnam pa bdun po gang zhe na/ de ni 'di ltar byang chub sems dpa' gang ngas sbyin pa'i rnam par dag pa bdun du bshad pa yang dag par blangs shing spyod pa yin te/ sbyin pa'i dngos po rnam par nga pas rnam par dag pa'i sbyin pa sbyin par byed pa dang / tshul khrims rnam par dag pa dang / lta ba rnam par dag pa dang / sems rnam par dag pa dang / ngag rnam par dag pa dang / ye shes rnam par dag pa dang dri ma rnam par dag pas/ rnam par dag par sbyin pa sbyin par byed de/ de ltar rnam pa bdun po 'di ni sbyin pa rnam par dag pa'o// de 'di ltar byang chub sems dpa' sdom pa bcas pa'i bslab ba'i gzhi'i rnam pa thams cad la mkhas pa yin/ ltung ba las dbyung ba la mkhas pa yin/ de la brtan pa'i tshul khrims pa yin/ tshul khrims dam pa dang / rgyun mi 'chad byed pa dang / rgyun mi 'chad par 'jug pa dang / yang dag par blangs shing bslab pa'i gzhi la slob pa yin te/ de ltar rnam pa bdun po 'di ni tshul khrims rnam par dag pa'o// de 'di ltar bdag gis las rnam par smin pa ba la rton pas thams cad du thams cad las gnod pa nye bar gnas pa la mi 'khrug pa dang / spyo ba dang / gshi ba dang / brdeg pa dang / bsdigs pa dang / mtshang 'dru ba gnod par bya bas/ lan ga bya bar mi sbyor ba de'i khon gyi bag la nyal mi 'dzin pa dang / bshags na nyon mongs par mi byed pa dang / bshags pa la mi sdod pa dang / 'jigs pa dang / zang zing can gyi sems kyis bzod pa ma yin pa dang / phan par bya ba la yal bar mi gzhog pa yin te/ de ltar rnam pa bdun po 'di ni bzod pa rnam par dag pa'o// de 'di ltar brtson 'grus kyis mnyam pa nyid rab tu shes pa yin/ brtson 'grus brtsams pa des bdag la mi bstod cing gzhan la mi smod pa yin/ mthu dang ldan pa yin/ brtson 'grus dang ldan pa yin/ spro ba can yin/ rtul ba brtan pa yin/ dge ba'i chos la brtson pa mi 'dor ba yin te/ de ltar rnam pa bdun po de ni brtson 'grus rnam par dag pa'o// de 'di ltar mtshan ma shin tu rtogs pa'i ting nge 'dzin la bsam gtan pa yin/ yongs su rdzogs pa'i ting nge 'dzin la bsam gtan pa yin/ gnyis ka'i cha'i ting nge 'dzin la bsam gtan pa yin/ shugs kyis 'byung ba'i ting nge 'dzin la bsam gtan pa yin/ mi gnas pa'i ting nge 'dzin la bsam gtan pa yin/ shin tu sbyang ba byas pa'i ting nge 'dzin la bsam gtan pa yin/ byang chub sems dpa'i sde snod la dmigs shing bsgom pa dpag tu med pa'i ting nge 'dzin la bsam gtan pa yin te/ de ltar bdun po de ni bsam gtan rnam par dag pa'o// de 'di ltar sgro btags pa'i mtha' dang / skur pa'i mtha' spangs nas/ dbu ma'i lam gyis nges par 'byung bar 'gyur ba de ni de'i shes rab yin no/ / shes rab des kyang rnam par thar pa'i sgo stong pa nyid dang / smon pa med pa dang / mtshan ma med pa gsum la rnam par thar pa'i sgo'i don kyang yang dag pa ji lta ba bzhin rab tu shes so/ / kun brtags pa dang / gzhan gyi dbang dang / yongs su grub pa'i ngo bo nyid gsum la/ ngo bo nyid kyi don kyang yang dag par ji lta ba bzhin rab tu shes so/ / mtshan nyid dang / skye ba dang / don dam pa ngo bo nyid med pa gsum la/ ngo bo nyid med pa'i don kyang yang dag pa ji lta ba bzhin rab tu shes so// rig pa'i gnas lnga la kun rdzob kyi bden pa'i don kyang yang dag pa ji lta ba bzhin rab tu shes so/ / de bzhin nyid rnam pa bdun la/ don dam pa'i bden pa'i don kyang yang dag pa ji lta ba bzhin rab tu shes so// rnam par mi rtog pa dang / spros pa med pa dang / tshul gcig par de la lan mang du gnas pa dang / tshad med pa 'dres pa'i chos dmigs pa'i lhag mthong gis chos kyi rjes su mthun pa'i phyogs kyi nan tan yang dag par sgrub ste/ de dag ni shes rab rnam par dag pa 'dun du rig par bya'o// bcom ldan 'das rnam pa lnga po de dag gi so so'i las gang lags/ spyan ras gzigs dbang phyug de ni las rnam pa lngar shes par bya ste/ ma chags pas ni mthong ba'i chos la byang chub kyi sems dang / pha rol tu phyin pa rnams la rgyun mi 'chad pa dang / gus pa'i sbyor bas bag byed pa yin/ mi lta bas ni phyi ma la de la bag bya ba'i phyir/ rgyu yongs su 'dzin par byed pa yin/ kha na ma tho ba med pas ni pha rol tu phyin pa shin tu yongs su rdzogs pa dang / yongs su dag pa dang / yongs su byang par bsgom mo/ / rnam par mi rtog pas ni/ thabs mkhas pa des myur du pha rol tu phyin pa yongs su rdzogs par 'gyur ro// yongs su bsngo bas ni/ tshe rab thams cad du bla na med pa yang dag par rdzogs pa'i byang chub kyi bar du 'thob par bya ba'i phyir/ 'dod pa'i 'bras bu rnam par smin pa dang bcas pa mi zad pa'i pha rol tu phyin pa rab tu 'thob bo// bcom ldan 'das pha rol tu phyin pa 'di rnam kyi rgya che ba gang lags/ spyan ras gzigs dbang phyug/ gang ma chags pa dang / mi lta ba dang / yongs su bsngo ba'o// kun nas nyon mongs pa ma mchis pa gang lags/ gang kha na ma tho ba med pa dang / rnam par mi rtog pa'o// rab tu gsal ba gang lags/ gang shin tu so sor brtags pas byed pa'o// mi g.yo ba gang lags/ gang sa la rab tu zhugs pa rnams kyi mi 'dri ba'i chos nyid do/ / shin tu rnam par dag pa gang lags/ spyan ras gzigs dbang phyug gangs bcur gtogs pa dang / sangs rgyas kyi sar gtogs pa'o// bcom ldan 'das ci'i slad du/ byang chub sems dpa' rnams rtag tu pha rol tu phyin pa'i 'bru bu yid du 'ong ba rnam par smin pa mi bas pa dang / pha rol tu phyin pa mi bas pa lags/ spyan ras gzigs dbang phyug/ gcig la gcig yang dag par rten pas grub par sgom pa'i phyir ro// bcom ldan 'das byang chub sems dpa' rnams ci'i slad du/ pha rol tu phyin pa rnams la dad pas rab tu gzhog pa de bzhin du/ pha rol tu phyin pa'i 'bras bu yid du 'ong ba rnam par smin pa'i mos pa gzhog pa ma lags/ spyan ras gzigs dbang phyug/ rnam pa lnga'i phyir te/ pha rol tu phyin pa rnams shin tu lhag par bde ba dang / yid bde ba'i rgyur gyur pa dang / bdag dang gzhan la phan 'dogs pa'i rgyur gyur pa dang / phyi ma la de'i 'bras bu yid du 'ong ba'i rnam par smin pa'i rgyur gyur pa dang / kun nas nyon mongs pa med pa'i gzhir gyur pa dang / rnam par mi 'gyur ba'i chos nyid kyi phyir ro// bcom ldan 'das pha rol tu phyin pa 'di rnams kyi so so'i mthu gang lags spyan ras gzigs dbang phyug/ 'di dag gi so so'i mthu ni rnam pa bzhir rig par bya ste/ pha rol tu phyin pa rnams shin tu bsgoms pas ser sna dang / 'chal pa'i tshul khrims dang / sems 'khrugs pa dang / le lo dang / rnam par g.yeng ba dang / blta bar gyur pa'i mi mthun pa'i phyogs rab tu spong ba dang / bla na med pa yang dag par rdzogs pa'i byang chub kyi tshogs su gyur pa dang / mthong ba'i chos la bdag dang / sems can rnams la phan 'dogs par 'gyur ba dang / phyi ma la yang rgya chen po zad mi shes pa'i 'bras bu ming du 'ong ba rnam par smin pa rab tu 'thob par 'gyur pa'o/ / bcom ldan 'das pha rol tu phyin pa rnams rgyu ci las byung / 'bras bu gang lags/ don gang lags/ bcom ldan 'das kyis bka' stsal pa/ spyan ras gzigs dbang phyug pha rol tu phyin pa rnams ni rgyu snying rje las byung ngo / / 'bras bu ni yod du 'ong ba'i 'bras bu rnam par smin pa dang / sems can la phan 'dogs pa'o// don chen po ni byang chub chen po yongs su rdzogs par bya ba'o/ / bcom ldan 'das gal te byang chub sems dpa' rnams longs spyod mi bas shing snying rje can lags na/ ci'i slad du/ 'jig rten na dbul po dag gda'/ spyan ras gzigs dbang phyug de ni sems can rnams kyi rang gi las kyis nyes pa yin no/ / de lta ma yin te/ brgya la sems can rnams kyi rang gis nyes pa byas pa bgegs su ma gyur tu zin na/ de dag rtag tu bya la zhugs la/ longs spyod mi zad pa yod na/ 'jig rten na sdug bsngal ba lta ga la snang bar 'gyur/ spyan ras gzigs dbang phyug 'ji lta ste// dper na/ yi dgas lus skom pas gdungs pas/ rgya mtsho'i chu bskams par mthong ba de ni/ yi dgas de dag gi rang gi las kyi 'bras bu'i nyes pa yin te/ rgya mtshos nyes pa ma yin no// de bzhin du byang chub sems dpa' sbyin pa rgya mtsho lta bu rnams la nyes pa med kyi/ gang 'bras bu med par gyur pa ni/ sems can yi dgas lta bu dag gis nyes par byas pa rnams kyi rang gi las kyi nyes pa'o// bcom ldan 'das chos rnams kyi ngo bo nyid ma mchis pa la byang chub sems dpa' pha rol tu phyin pa gang gis 'dzin/ spyan ras gzigs dbang phyug/ shes rab kyi pha rol tu phyin pas so// bcom ldan 'das ngo bo nyid ma mchis pa de ltar/ shes rab kyi pha rol tu phyin pas 'dzin du lags na/ ngo bo nyid mchis pa'i rnams kyang ci'i slad du mi 'dzin/ spyan ras gzigs dbang phyug ngo bo nyid med pa nyid la ngo bo nyid med par mi 'dzin par ni mi bshad de/ ngo bo nyid med pa nyid ni tshig 'bru med pa so sor rang gis rig pa yin pas/ tshig 'bru bstan pa ma gtogs par bshad mi nus te/ de'i phyir de ni ngo bo med pas 'dzin ces bya'o// bcom ldan 'das pha rol tu phyin pa zhes kyang bgyi/ nye ba'i pha rol tu phyin pa zhes kyang bgyi/ pha rol tu phyin pa chen pobopo zhes kyang bgyi na/ bcom ldan 'das pha rol tu phyin pa ni gang lags/ nye ba'i pha rol tu phyin pa ni gang lags/ pha rol tu phyin pa chen po ni gang lags/ spyan ras gzigs dbang phyug 'di la byang chub sems dpa' tshad med pa'i dus su sbyin pa la sogs pa dge ba'i chos yongs su bsgom pa dang ldan pa yang yin la/ de'i nyon mongs pa dag kyang 'byung ste/ de zil gyis non par mi nus kyi/ des zil gyis mnan pa 'di lta ste/ mos pa dang spyod pa'i sa la mos pa tha ma dang / 'bring la gnas pa de ni pha rol tu phyin pa zhes bya'o// yang tshad med pa'i dus su dge ba'i chos de dag rab tu yongs su bsgoms pa dang ldan pa yang yin la/ de'i nyon mongs pa dag kyang byung na/ de zil gyis non te/ des ni zil gyis mi gnan pa 'di lta ste/ sa dang po nas bzung ba 'di ni/ nye ba'i pha rol tu phyin pa'o// yang tshad med pa'i dus su dge ba'i chos de nyid shin tu yongs su bsgoms pa dang ldan pa yang yin la/ de'i nyon mongs pa yang thams cad kyi thams cad du mi 'byung ba'i chos can du gyur pa 'di lta ste/ sa brgyad pa nas bzung ba 'di ni pha rol tu phyin pa chen po zhes bya'o// bcom ldan 'das sa 'di rnams la nyon mong pa'i bag la nyal du mchis/ spyan ras gzigs dbang phyug/ rnam pa gsum ste/ grogs yang dag par bcom pa ni/ 'di lta ste/ spyan ras gzigs dbang phyug/ sa lnga rnams la lhan cig skyes pa ma yin pa'i nyon mongs pa byung ba ni/ lhan cig skyes pa'i nyon mongs pa 'byung ba'i grogs te/ de'i tshe de la de med pas de'i phyir grogs yang dag par bcom pa zhes bya'o// / nyam chung ba'i bag la nyal ba ni 'di lta ste/ sa drug pa dang / bdun pa la 'byung ba shin tu phra ba dang / bsgoms pas non pas mi 'byung ba'i phyir ro// bag la nyal shin tu phra ba ni 'di lta ste/ sa brgyad pa dang / de'i gong ma rnams la nyon mongs pa thams cad kyi thams cad du mi 'byung ba dang / shes bya'i sgrib pa rnams la gnas pa'i phyir ro// bcom ldan 'das kan+da ngan len rab tu spangs pa rnam pa dus bag la nyal 'di dag rab tu phye ba lags/ spyan ras gzigs dbang phyug rnam pa gsum gyis te/ shun pa la yod pa lta bu'i gnas ngan len spangs pa ni/ dang po dang gnyis pa'o// phri la yod pa lta bus ni gsum pa'o// gang yang snying po la yod pa lta bu'i gnas ngan len rab tu spangs te/ bag la nyal thams cad kyi thams cad du med pa'i gnas skabs de ni ngas sangs rgyas kyi sar bshad do/ / bcom ldan 'das bskal pa grangs ma mchis pa du zhig gis gnas ngan len 'di rnams rab tu spangs par 'gyur/ spyan ras gzigs dbang phyug gsum gyis te/ dus tshigs dang / zla ba dang / zla ba phyed dang / zhag dang / nyi ma dang / thun dang / thun phyed dang / skad cig dang / thang cig dang / yud tsam gyi bskal pa tshad med pas so// bcom ldan 'das sa 'di rnams la byang chub sems dpa' rnams kyi nyon mongs pa skye ba mtshan nyid ni ci lags/ nongs pa ni ci mchis// yon tan ci legs par rig par gyi/ spyan ras gzigs dbang phyug mtshan nyid ni kun nas nyon mongs pa med pa ste/ de ci'i phyir zhe na/ byang chub sems dpa'i sa dang po la thog ma nyid du chos kyi dbyings thams cad rab tu rtogs te/ de'i phyir byang chub sems dpa'i nyon mongs pa ni shes bzhin du skye'i/ mi shes par ma yin te/ de bas na kun nas nyon mongs pa med pa ni/ mtshan nyid do// bdag gi rgyud la sdug bsngal skye bar mi nus pa'i phyir/ nyes pa med pa'o// sems can gyi khams na/ sdug bsngal rnam par bzlog pa'i rgyu'i phyir ro// byang chub sems dpa' rnams kyi nyon mongs pa skye ba ni/ yon tan tshad med pa'o// bcom ldan 'das de ltar byang chub sems dpa' rnams kyi nyon mongs pa skye bas kyang sems can dang nyan thos dang / rang sangs rgyas kyi dge ba'i rtsa ba thams cad zil gyis gnon na/ de ma lags pa'i yon tan rnams kyis lta smos kyang ci 'tshal te/ byang chub don che ba de ni ngo mtshar ro// bcom ldan 'das bcom ldan 'das kyis 'di ltar nyan kyi theg pa gang lags pa dang / theg pa chen po gang lags pa de ni theg pa gcig go zhes bka' stsal pa/ de la dgongs pa gang lags/ spyan ras gzigs dbang phyug ngas nyan thos kyi theg pa la chos sna tshogs kyi rang bzhin gang dag bshad pa 'di lta ste/ phung po lnga dang / nang gi skye mched drug dang / phyi'i skye mched drug dang / de dag la sogs pa bstan pa de dag nyid theg pa chen po la yang chos kyi dbyings tshul gcig par bstan pas nges par bshad do/ / de bas na theg pa sna tshogs su mi smra'o// de la yang sgra ji bzhin gyi don du rnam par rtog pas la la ni sgro 'dogs/ la la ni skur/ la la ni theg pa sna tshogs kun tu rtogs/ de dag 'gal bar sems shing / phan tshun du rtsod pa 'di ni de'i dgongs pa'o// de nas bcom ldan 'das kyis de'i tshe tshigs su bcad pa 'di dag gsungs so// theg pa che dang theg pa dman pa la// rang bzhin sna tshogs chos rnams gang bstan pa/ de dag nyid ni tshul cig yang bstan te// de phyir theg pa sna tshogs nga mi smra// ji bzhin sgra yi don du rnam rtog cing // sgro gdags pa dang skur pa byas nas kyang // de dag 'a gal ba snyam du sems gyur cing / / rnam par rmongs pa sna tshogs blor 'gyur ro// sa rnams bsdus dang ming dang mi mthun phyogs// khyad par skye dang smon dang bslab pa rnams// de ni sangs rgyas rnams kyis theg chen bshad/ / 'di la gang brtson de dag sangs rgyas 'gyur// de nas bcom ldan 'das la/ byang chub sems dpa' spyan ras gzigs dbang phyug gis 'di skad ces gsol to/ / bcom ldan 'das dgongs pa nges par 'grel pa'i chos kyi rnam grangs la nges par bstan pa'i ming ci zhes bgyi/ 'di ji ltar gzung bar bgyi/ spyan ras gzigs dbang phyug 'di ni sa dang pha rol tu phyin pa rnams kyi nges pa'i don bstan pa yin te/ 'dri ni sa dang pha rol tu phyin pa nges pa'i don du bstan pa zhes bya bar zung zhig ces/ bcom ldan 'das kyis de la bka' stsal to/ / sa dang pha rol tu phyin pa nges pa'i don du bshad pa 'di bstan pa na/ byang chub sems dpa' bdum khri lnga stong byang chub sems dpa'i ting nge 'dzin theg pa chen por/ snang ba thob par gyur to// spyan ras gzigs dbang phyug gi le'u ste dgu pa'o// / de nas bcom ldan 'das la/ byang chub sems dpa' 'jam dpal gyis zhu ba zhus pa/ bcom ldan 'das/ de bzhin gshegs pa rnams kyi chos kyi sku zhes bgyi ba/ bcom ldan 'das/ de bzhin gshegs pa rnams kyi chos kyi sku'i mtshan nyid ji lta bu lags/ bcom ldan 'das kyis bka' stsal pa/ 'jam dpal de bzhin gshegs pa rnams kyi chos kyi sku'i mtshan nyid ni sa dang pha rol tu phyin pa shin tu bsgoms pa'i nges par 'byung bas gnas gyur pa yang dag par bsgrub pa'o/ / de yang rgyu gnyis kyis bsam gyis mi khyab par rig par bya ste/ de ni spros pa med cing mngon par 'du bya ba med pa dang / sems can rnams ni spros pa dang / mngon par 'du bya ba la mngon par zhen pa'i phyir ro/ / bcom ldan 'das nyan thos dang rang sangs rgyas rnams kyi gnas gyur pa de la yang chos kyi sku zhes bgyi'am/ 'jam dpal mi bya'o// bcom ldan 'das 'o na ci'i sku zhes bgyi/ 'jam dpal rnam par grol ba'i sku ste/ 'jam dpal de bzhin gshegs pa rnams dang / nyan thos dang rang sangs rgyas rnams rnam par grol ba'i skus ni mnyam zhing mtshungs te/ chos kyi skus ni khyad par du 'phags so// chos kyi skus khyad par du 'phags pas yon tan gyi khyad par tshad med pas/ khyad par du 'phags pa yin// de la dper bya bar sla ba ma yin no// bcom ldan 'das/ de bzhin gshegs pa rnams kyi skye ba srid pa'i mtshan nyid ji lta bur bstan par bgyi/ 'jam dpal sprul pa'i sku'i mtshan nyid de 'jig rten gyi khams 'byung ba dang 'dra'o/ / sprul pa'i sku'i mtshan nyid 'byung ba de ni/ de bzhin gshegs pas yon tan bkod pa'i rgyan gyi rnam pa thams cad kyis byin gyis brlabs pa'i mtshan nyid du blta'o/ / chos kyi sku la ni skye ba med do// bcom ldan 'das sprul pa'i sku bstan pa la thabs mkhas pa gang lags par blta/ 'jam dpal sangs rgyas kyi zhing thams cad kyi stong gsum gyi stong chen po dag tu bdag por kun gyis bkur ba'i rigs sam/ sbyin gnas su kun gyis bkur ba yang rung ste/ lhums su 'jug pa dang / btsas pa dang / skye ba dang / 'dod pa la spyod pa dang / mngon par 'byung ba dang / dka' ba spyod pa thang cig tu bstan pa dang de btang ba dang / mngon par rdzogs par byang chub pa'i rim pa bstan pa ni 'jam dpal sprul pa'i sku bstan pa la thabs mkhas pa'o/ / bcom ldan 'das de bzhin gshegs pa byin gyi rlabs kyi skus dbyangs su gsung ba gang gis 'dul ba'i khams yongs su ma smin pa rnams yongs su smin par 'gyur ba dang / yongs su smin pa rnams kyang dmigs pa de nyid kyis rnam par grol bar 'gyur ba'i dbyangs su gsung ba du zhig gsung / 'jam dpal de bzhin gshegs pa'i dbyangs su gsung ba 'di gsum ste/ mdo gsung ba dang / 'dul ba gsung ba dang / ma mo gsung ba'o// bcom ldan 'das mdo gang lags/ 'dul ba gang lags/ ma mo gang lags/ 'jam dpal gang la chos rnams kyi dngos po bsdu ba tsam du bstan pa 'di ni mdo sde ste/ 'di ltar dngos po bzhi'am/ dgu 'am/ nyi shu rtsa dgu 'di dbang du byas pa'o// dngos po bzhi gang zhe na/ 'di lta ste/ thos pa'i dngos po dang / skyabs su 'gro ba'i dngos po dang / bslab pa'i dngos po dang / byang chub kyi dngos po'o// dngos po dgu gang zhe na/ sems can gdags pa'i dngos po dang / de yongs su longs spyod pa'i dngos po dang / de skye ba'i dngos po dang / de skyes nas gnas pa'i dngos po dang / de'i kun nas nyon mongs pa dang / rnam par byang ba'i dngos po dang / de'i sna tshogs kyi dngos po dang / ston pa'i dngos po dang / bstan par bya ba'i dngos po dang / 'khor gyi dngos po'o// dngos po yi du rtsa dgu gang zhe na/ kun nas nyon mongs pa'i phyogs la brtsams te/ 'du byed bsdu ba'i dngos po dang / de'i go rims kyi rjes su 'jug pa'i dngos po dang / de dag nyid la gang zag gi 'du shes su byas nas phyi ma pa 'byung ba'i rgyu'i dngos po dang / chos kyi 'du shes su byas nas phyi ma la 'byung pa'i rgyu'i dngos po dang / rnam par byang ba'i phyogs la brtsams te/ dmigs pa la nye bar 'dogs pa'i dngos po dang / de nyid la rtsol ba'i dngos po dang sems gnas pa'i dngos po dang / mthong ba'i chos la bde bar gnas pa'i dngos po dang / sdug bsngal thams cad las yang dag par 'da' ba la dmigs pa'i thabs kyi dngos po dang de yongs su shes pa'i dngos po ste/ de rnam pa gsum la phyin ci log yongs su shes pa'i gnas dang / sems can du 'du shes pa la brtsams te/ phyi rol gyi sems can rnam la log pa'i nan tan yongs su shes pa'i gnas dang / nang gi mngon pa'i nga rgyal med pa yongs su shes pa'i gnas dang / bag chags kyi gnas kyi dngos po dang / mngon du bya ba'i dngos po dang / bsgom pa'i dngos po dang / de snying por bya ba'i dngos po dang / de'i rnam pa'i dngos po dang / de'i dmigs pa'i dngos po dang / spangs pa dang / ma spangs pa spod pa la mkhas pa'i dngos po dang / de las rnam par g.yeng ba'i dngos po dang / de las rnam par mi g.yeng ba'i dngos po dang / rnam par mi g.yeng ba'i gnas kyi dngos po dang / bsgom pa la skyo ba sbyor bas bsal ba'i dngos po dang / bsgom pa'i ban yon gyi dngos po dang / de brtan pa'i dngos po dang / 'phags pa'i dbang phyug bsdu ba'i dngos po dang / 'phags pa'i phyogs dang / g.yog 'khor bsdu ba'i dngos po dang / de kho na rab tu rtogs pa'i dngos po dang / mya ngan las 'das pa yang dag par 'thob par bya ba'i dngos po dang / legs par bshad pa'i 'dul ba la 'jig rten gyi yang dag par lta ba yang 'di las phyi rol tu gyur pa'i yang dag par lta ba thams cad las spyi bor phyin pa'i dngos po dang / de ma bsgoms pas yongs su 'bri ba'i dngos pa ste/ 'di ltar 'jam dpal legs par bshad pa'i chos 'dul ba la ni/ ma bsgoms pas yongs su nyams par 'gyur te/ lta bas nyes pas ni ma yin no// 'jam dpal gang langs nyan thos rnams dang / byang chub sems dpa' rnams kyi so sor thar pa 'am/ so sor thar pa dang ldan pa yongs su bstan pa 'di ni 'dul ba'i dngos po'o// byang chub sems dpa' rnam kyi so sor thar pa rnam pa dus bsdu bar 'tshal bar bgyi/ 'jam dpal rnam pa bdun gyis te/ yang dag par blang ba'i cho ga bstan pa dang / pham pa'i gnas kyi dngos po bstan pa dang ltung ba'i gnas kyi dngos po bstan pa dang / ltung ba'i rang bzhin bstan pa dang / ltung ba med pa'i rang bzhin bstan pa dang / ltung ba las byung ba bstan pa dang / sdom pa bdang ba bstan pa'o/ / yang 'jam dpal ngas gang la mtshan nyid rnam pa bcu gcig tu nges par bshad de/ rnam par phye zhing bstan pa 'di nim mo zhes bya'o// de la mtsham ring rdza bcu gcig gang zhe na/ kun rdzob kyi mtshan nyid dang / don dam pa'i mtshan nyid dang / byang chub kyi phyogs kyi chos rnams kyi dmigs pa'i mtshan nyid dang / rnam pa'i mtshan nyid dang / rang bzhin gyi mtshan nyid dang / de'i 'bras bu'i mtshan nyid dang / de myong ba rnam par bsnyad pa'i mtshan nyid dang / de'i bar du gcod pa'i chos kyi mtshan nyid dang / de dang rjes su 'thun pa chos kyi mtshan nyid dang / de'i nyes dmigs kyi mtshan nyid dang / de'i phan yon gyi mtshan nyid do// 'jam dpal de la kun rdzob kyi mtshan nyid ni rnam pa gsum ste/ gang zag shin tu bstan pa dang / kun brtags pa'i ngo bo nyid bstan pa dang / chos rnams kyi g.yo ba dang / byed pa dang / las bya bar bstan par blta'o// de la don dam pa'i mtshan nyid ni/ de bzhin nyid rnam pa bdun du bstan par blta'o// dmigs pa'i mtshan nyid ni/ shes bya'i dngos po rnam pa thams cad du bstan par blta'o// rnam pa'i mtshan nyid ni brtag pa rnam pa brgyad bstan par blta ste/ brtag pa rnam pa brgyad gang zhe na/ bden pa dang / gzhag pa dang / nyes pa dang / yon tan dang / tshul dang / 'jug pa dang / rigs pa dang / bsdus pa dang / rnam par spros pa'o// de la bden pa ni/ de bzhin nyid gang yin pa'o// gzhag pa ni gang zag rnam par gzhag pa 'am/ kun brtag pa'i ngo bo nyid rnam par gzhag pa 'am/ mgo gcig dang / rnam par dbye ba dang / dri ba'i lung bstan pa rnam par gzhag pa 'am/ gzhag pa rnam par gzhag pa'am/ gsang ba dang // bsnyad pa lung bstan pa rnam par gzhag pa dag go// nyes pa ni ngas kun nas nyon mongs pa'i chos rnams kyi nyes dmigs gang dag rnam grangs du mar bstan pa dag go// yon tan ni ngas rnam par byang ba'i chos rnams kyi phan yon gang dag rnam grangs du mar bstan pa dag go/ / tshul ni rnam pa drug tu shes par bya ste/ de kho na'i don gyi tshul dang / 'thob pa'i tshul dang / bshad pa'i tshul dang / mtha' gnyis rnam par spangs pa'i tshul dang / bsam gyis mi khyab pa'i tshul dang / dgongs pa'i tshul lo// 'jug pa ni dus gsum dang / 'dus byas kyi mtshan nyid gsum dang / rkyen bzhi rnams so// rig pa ni rnam pa bzhir shes par bya ste/ ltos pa'i rigs pa dang / bya ba byed pa'i rigs pa dang / gtan tshigs bsgrub pa'i rigs pa dang chos nyid kyi rigs pa'o/ / de la ltos pa'i rigs pa ni/ 'du byed rnams skye ba dang / rjes su tha snyad gdags pa'i phyir/ gang dag rgyur gyur pa dang / gang dag rkyen du gyur pa de dag ni/ ltos pa'i rigs pa'o// chos rnams 'thob pa'i phyir ram/ 'grub pa'i phyir ram/ skyes nas kyang las su bya ba'i phyir/ gang dag rgyur gyur pa dang / gang dag rkyen du gyur pa de dag ni/ bya ba byed pa'i rigs pa'o// dam bcas shing bstan te smras pa'i don bsgrub pa dang / yang dag par shes par bya ba'i phyir/ gang dag rgyur gyur pa dang / gang dag rkyen du gyur pa de dag ni/ gtan tshigs sgrub pa'i rigs pa'o// de yang mdor na rnam pa gnyis te/ yongs su dag pa dang / yongs su ma dag pa'o// de la yongs su dag pa'i mtshan nyid ni lnga'o/ / yongs su ma dag pa'i mtshan nyid ni bdun no// yongs su dag pa'i mtshan nyid rnams gang zhe na/ de mngon sum du dmigs pa'i mtshan nyid dang / de la gnas pa mngon sum du dmigs pa'i mtshan nyid dang / rang gi rigs kyi dpe nye bar sbyar ba'i mtshan nyid dang / yongs su grub pa'i mtshan nyid dang / shin tu rnam par dag pa'i lung gtan la bab par bstan pa'i mtshan nyid de/ de la 'du byed thams cad mi rtag pa nyid dang / 'du byed thams cad sdug bsngal ba nyid dang / chos thams cad bdag med pa nyid du gang 'jig rten na mngon sum du dmigs pa 'di dang / rnam pa 'di lta bu dag ni de mngon sum du dmigs pa'i mtshan nyid do// 'du byed thams cad skad cig pa nyid dang / 'jig rten pha rol yod pa dang dge ba dang / mi dge ba'i las rnam par chud mi za ba gang de la gnas pa'i mi rtag pa rigs pa mngon sum du dmigs pa dang / gang sems can sna tshogs las sna tshogs la gnas pa mngon sum du dmigs pa dang / gang sems can bde ba dang / sdug bsngal ba dge ba dang / mi dge ba'i las la gnas pa mngon sum du dmigs pa yin te/ gang gis mngon sum du gyur pa la rjes su dpag par bya ba yin no/ / 'di dang rnam pa 'di lta bu dag ni de la gnas pa mngon sum du dmigs pa'i mtshan nyid do// gang yang nang dang phyi'i 'du byed rnams kyi 'jig pa dang / skye bar dmigs pa 'jig rten thams cad la grags pa nye bar sbyar ba dang / skye ba la sogs pa'i sdug bsngal dmigs pa'i nye bar sbyar ba dang / rang dbang med par dmigs pa nye bar sbyar ba dang / pha rol gyi phun sum tshogs pa dang / rgud par dmigs pa 'jig rten thams cad la grags pa nye bar sbyar ba 'di dang / rnam pa 'di lta bu dag ni rang gi rigs kyi dpe nye bar sbyar ba'i mtshan nyid du shes par bya'o/ / gang 'di de mngon sum du dmigs pa'i mtshan nyid dang / de la gnas pa mngon sum du dmigs pa'i mtshan nyid dang / rang gi rigs kyi dpe nye bar sbyar ba'i mtshan nyid ni des grub par bya ba la gcig tu nges pa'i phyir yongs su grub pa'i mtshan nyid du nges par bya'o// gang thams cad mkhyen pas bshad pa 'di lta ste/ mya ngan las 'das pa ni zhi ba'o// zhe bya ba 'di dang / rnam pa 'di lta bu dag ni 'jam dpal shin tu rnam par dag pa'i lung gtan la bab par bstan pa'i mtshan nyid du shes par bya'o/ / de bas na mtshan nyid lnga po 'di dag gis rigs par brtags pa yongs su dag pa ste/ yongs su dag pa'i phyir bsten par bya'o// bcom ldan 'das thams cad mkhyen pa'i mtshan nyid rnam pa dus 'tshal bar bgyi/ 'jam dpal lngas te/ su gang 'jig rten du thams cad mkhyen par sgra rnam par grags shing 'byung ba dang / skyes bu chen po'i mtshan sum cu rtsa gnyis dang ldan pa dang / stobs bcus sems can thams cad kyi the tsom gcod pa dang / mi 'jigs pa'i chos bstan pa bzhis des bshad pa la phas kyi rgol ba thams cad kyis brgal du med cing brtsad du med pa dang / su'i chos 'dul ba la 'phags pa'i lam yan lag brgyad snang zhing dge sbyong bzhi snang ba yin te/ de ltar na 'byung ba dang / mtshan dang / the tsom gcod pa dang / brgal du med cing brtsad du med pa dang / dge sbyor dmigs pas thams cad mkhyen pa'i mtshan nyid lngar shes par bya'o// gtan tshigs bsgrub pa'i rigs pa ni de ltar mngon sum gyi tshad ma dang / rjes su dpag pa'i tshad ma dang / yid ches pa'i lung gi tshad ma dang / mtshan nyid lnga rnams kyis yongs su dag pa yin no/ / yongs su ma dag pa'i mtshan nyid rnam pa bdun gang zhe na/ de las gzhan dang mthun pa'i dmigs pa'i mtshan nyid dang / de las gzhan dang mi mthun par dmigs pa'i mtshan nyid dang / thams cad mthun par dmigs pa'i mtshan nyid dang / thams cad mi mthun par dmigs pa'i mtshan nyid dang / gzhan gyi rigs kyi dpe nye bar sbyar ba'i mtshan nyid/ dang yongs su ma grub pa'i mtshan nyid dang / lung rnam par ma dag pa bstan pa'i mtshan nyid do// de la chos thams cad ni yid kyi rnam par shes pas rnam par shes par bya ba nyid do// zhes bya ba 'di ni/ thams cad mthun par dmigs pa'i mtshan nyid do// gang yang rtags dang / las dang / chos dang / rgyu dang / 'bras bu mi mthun pa gang yang rung ba gcig gi mi mthun pas phan tshun nges par mi mthun pa zhes bya ba 'di ni/ thams cad mi mthun par dmigs pa'i mtshan nyid do// 'jam dpal de las gzhan dang mthun par dmigs pa'i mtshan nyid dpe dang bcas pa la thams cad mi mthun par dmigs pa'i mtshan nyid yod pa'i phyir de 'grub par bya ba la gcig tu ma nges pas na de yongs su ma grub pa'i mtshan nyid ces bya'o/ / de las g zhan dang mi mthun par dmigs pa'i mtshan nyid dpe dang bcas pa la thams cad mthun par dmigs pa'i mtshan nyid yod pa'i phyir de grub par bya ba la gcig tu ma nges pas de na yongs su ma grub pa'i mtshan nyid ces bya'o/ / yongs su ma grub pa'i phyir rigs pas brtag pa yongs su ma dag pa yin te/ yongs su ma dag pas na/ bstan par mi bya'o// de la lung shin tu rnam par ma dag pa'i mtshan nyid ni rang bzhin gyis ma dag pa yin par shes par bya'o/ / de la de bzhin gshegs pa rnams byung yang rung / ma byung yang rung ste/ rgyas nyid dang / rgyas gnas pa'i da sna 'dug pade na/ chos nyid kyi rigs pa'o// de ltar bsdus pa dang rnam par skyes pas mngon pa bad+d+hA chos kyi tshig gcig tu bstan pa la gong nas gong ma'i chog gis shin tu phye ste/ mthar gtugs pa'o// rnam pa dang bcas pa'i dmigs pa la 'dzin pa'i byang chub kyi phyogs kyi chos dran pa nye bar gzhag pa la sogs pa ngas bshad pa 'di ni de dag gi rang bzhin gyi mtshan nyid do/ / 'jig rten dang / 'jig rten las 'das par bcas pa'i nyon mongs pa spongs bas de'i 'bras bu 'jig rten dang 'jig rten las 'das pa'i yon tan mngon par bsgrub pa 'di ni/ de'i 'bras bu thob pa'i mtshan nyid do// de nyid rnam par grol ba'i ye shes kyis rab tu shes pa dang / gzhan la yang rgya cher bshad cing bstan pa de ni/ de myong ba rnam par bstan pa'i mtshan nyid do// byang chub kyi phyogs su gtogs pa'i chos 'di dag nyid bsgom pa la bgegs kyi gnas nyon mongs pa can gyi chos de dag ni de'i bar du gcod pa'i chos kyi mtshan nyid do/ / de dag nyid la gang gces spras byed pa'i chos de dag ni/ de dang mthun pa'i chos kyi mtshan nyid do/ / bar du gcod pa rnams kyi nyes par gyus de dag ni nyes dmigs kyi mtshan nyid do// mthun pa rnams kyi yon tan de dag ni 'jam dpal phan yon gyi mtshan nyid du shes bar bya'o/ / de nas byang chub sems dpa' 'jam dpal gyis/ yang bcom ldan 'das la 'di skad ces gsol to// bcom ldan 'das byang chub sems dpa' kyi mdo dang / 'dul ba dang / ma mo 'di rnams kyi gzungs kyi don ma lus pa gang gis byang chub sems dpa' rnams de bzhin gshegs pas gsungs pa'i chos zab mo rnams kyi ldem por dgongs pa la yang dag par 'jug par 'gyur zhing / de las slad rol tu gyur pa rnams dang thun mong ma lags pa'i gzungs kyi don bstan du gsol/ 'jam dpal de'i phyir nyon cig/ dang ji tsam du byang chub sems dpa' rnams ngas ldem po ngag tu gsungs pa la 'jug par bya ba'i phyir gzungs kyi don ma lus par khyod la bshad do// 'jam dpal kun nas nyon mongs pa'i chos rnams dang / rnam par byang ba'i chos de dag thams cad ni g.yo ba med pa gang zag med pa yin te/ de'i phyir ngas chos rnams rnam pa thams cad du byed pa med par bstan to/ / kun nas nyon mongs pa'i chos rnams kyang sngon kun nas tshon mongs par gyur la/ bris rnam par byang bar 'gyur ba ma yin/ rnam par byang ba'i chos rnams kyang byis rnam par byang la/ sngon kun nas nyon mongs par gyur pa ma yin te/ de la byis pa so so'i skye bo rnams gnas ngan len gyi tshogs la chos dang / gang zag gi rang bzhin du mngon par zhen pa'i bag la nyal gyi lta ba la bsten te/ 'di ltar mthong ngo // thos so// bsnams so// myong ngo // reg go// rnam par shes so// za'o// byed do// kun nas nyon mongs so// rnam par byang ngo zhes bdag gam bdag gi zhes bya bar gyur cing log pa'i mngon par 'du byed par 'byung ngo // la la zhig gis de ltar yang dag pa ji lta ba bzhin/ rab tu shes na/ gnas ngan len gyi tshogs rab tu spong ste/ de nyon mongs pa thams cad la mi gnas shing rab tu rnam par dag pa spros pa med pa/ 'dus ma byas pa'i gnas mngon par 'du byed pa med pa rab tu thob bo/ / 'jam dpal 'di ni gzungs kyi don ma lus par spros par bya'o// de nas bcom ldan 'das kyis de'i tshe tshigs su bcad pa 'di dag gsungs so/ / kun nas nyon mongs chos dang rnam par byang ba'i chos// thams cad byed pa med cing gang zag med pa ste// de phyir de dag byed pa med par ngas bshad do// de dag snga phyir rnam par dag dang nyon mongs min// gnas ngan len gyi tshogs la bdag dang bdag gi zhes// bag la nyal ba'i lta la brten nas 'byung ba ni// mthong ngo ba'o/ byed do zhes ni bya ba dang // nyon mongs rnam par byang bar gyur to snyam pa 'byung // de ltar gang zhig yang dag ji bzhin rab shes te// gnas ngan len gyi tshogs ni rab tu spong byed pa/ de ni nyon mongs rten med shin tu rnam dag gnas// spros pa med cing 'dus ma byas pa thob par 'gyur// bcom ldan 'das de bzhin gshegs pa'i sems 'byung ba ji ltar 'tshal bar bgyi/ 'jam dpal de bzhin gshegs pa ni sems dang / yid dang / rnam par shes pas rab tu phye ba ma yin mod kyi/ mngon par 'du byed pa med par de bzhin shegs pa'i sems 'byung ba sprul pa lta bur shes par bya'o/ / bcom ldan 'das de ste de bzhin gshegs pa rnams kyi chos kyi sku mngon par 'du byed pa thams cad dang bral na/ ji ltar mngon par 'du byed pa ma mchis par sems 'byung bar 'gyur/ 'jam dpal sngon thabs dang / shes rab bsgoms pa'i mngon par 'du byed pa'i phyir ro// 'jam dpal 'di lta ste dper na// sems med par gnyid log pa'i tshe phyir sad pa mngon par 'du byed pa med kyang / 'on kyang sngon gyi mngon par 'du byed kyi dbang gis sad par 'gyur ba yang yod do// 'gog pa la snyoms par zhugs pa yang ldang bar mngon par 'du byed pa med kyi/ sngon gyi mngon par 'du byed kyi dbang gis ldang ba yang yod do// ji ltar gnyid kyis log pa dang / 'gog pa la snyoms par zhugs pa'i sems 'byung ba de lta bur/ de bzhin gshegs pa'i sems 'byung ba dang / sngon thabs dang shes rab bsgoms pa'i mngon par 'du byed pa las shes par bya'o/ / bcom ldan 'das de bzhin gshegs pa sprul pa la sems mchis sam ma mchis zhes bgyi/ 'jam dpal rang dbang med pa dang / sems gzhan gyi dbang gi phyir sems yod pa yang ma yin/ sems med pa yang ma yin no// bcom ldan 'das de bzhin gshegs pa'i spyod yul zhes bgyi ba dang / de bzhin gshegs pa'i yul zhes bgyi ba la bye brag ci mchis/ 'jam dpal de bzhin gshegs pa'i spyod yul ni de bzhin gshegs pa thams cad kyi thun mong gi bsam gyis mi khyab pa tshad med pa'i yon tan gyi rgyan bkod pa sangs rgyas kyi zhing yongs su dag pa'o/ / de bzhin gshegs pa'i yul ni khams lnga ste/ sems can gyi khams dang / 'jig rten gyi khams dang / chos kyi khams dang / 'dul ba'i khams dang / 'dul ba'i thabs kyi khams rnam pa thams cad de/ de gnyis kyi bye brag tu bya ba ni 'di'o// bcom ldan 'das de bzhin gshegs pa'i mngon par rdzogs par byang chub pa dang / chos kyi 'khor lo bskor ba dang / yongs su mya ngan las 'da' ba chen po 'di dag mtshan nyid ji lta bur 'tshal bar bgyi/ 'jam dpal gnyis su med pa'i mtshan nyid de/ mngon par rdzogs par byang chub pa yang ma yin/ mngon par rdzogs par byang ma chub pa yang ma yin/ chos kyi 'khor lo bskor ba yang ma yin/ chos kyi 'khor lo mi bskor ba yang ma yin/ yongs su mya las 'das pa chen po yang ma yin/ yongs su mya ngan las 'das pa chen po med pa yang ma yin te/ chos kyi sku shin tu rnam par dag pa dang / sprul pa'i sku yang dag par ston pa'i phyir ro// bcom ldan 'das sprul pa'i sku la lta ba dang / nyan pa dang / bsnyen bkur bas sems can rnams bsod nams rab tu skyed pa de ci'i slad du/ de bzhin gshegs pa las byang bar 'tshal bar bgyi/ 'jam dpal de bzhin gshegs pa la rab tu dmigs pa'i rgyu dang / sprul pa'i sku yang de bzhin gshegs pa'i byin gyi rlabs kyi phyir ro// bcom ldan 'das mngon par 'du byed pa ma mchis par 'dra na/ ci'i slad du de bzhin gshegs pa'i chos kyi sku 'ba' zhig las sems can rnams la ye shes kyi snang ba chen po 'di lta bu 'byung zhing tshad ma mchis pa'o sal pa'i gzugs brnyan rnams 'byung gi/ nyan thos dang / rang sangs rgyas kyi rnam par grol ba'i sku las ni mo 'byung / 'jam dpal 'di lta ste dper na// mngon par 'du byed pa med par 'dra yang / zla ba dang / nyi ma'i dkyil 'khor dang / chu dang / me'i shel 'ba' zhig las sems can rnams la snang ba chen po 'byung gi/ chu dang me'i shel de ma yin pa gzhan las ni mi 'byung ste/ de ni sems can mthu chen pos byin gyis brlabs pa dang / sems can gyi las kyi dbang gi phyir ro// rigs kyi bu nor bu las kyis byi dor byas pa'i nor bu rin po che las rgya'i gzugs brnyan 'byung gi/ de ma yin pa'i gzhan gyis byi dor ma byas pa las ni mi 'byung ngo // de bzhin du de bzhin gshegs pa'i chos kyi sku ni tshad med pa'i chos kyi dbyings la dmigs pa'i thabs dang shes rab bsgom pas yongs su sbyangs pa las yang dag par grub pa'i phyir/ de las ye shes kyi snang ba dang / sprul pa'i gzugs brnyan 'byung gi/ rnam par grol ba'i sgo 'ba' zhig las ni mi 'byung ngo // bcom ldan 'das de bzhin gshegs pa'i byin gyi rlabs kyi mthus/ 'dod pa'i khams kyi mo'i lus phun sum tshogs pa dang / rgyal rigs dang / bram ze'i rigs shing sA la chen po lta bu dang / 'dod pa na spyod pa'i lha'i lus phun sum tshogs pa thams cad dang / gzugs na spyod pa'i lha'i lus phun sum tshogs pa thams cad dang / gzugs med pa na spyod pa'i lha'i lus phun sum tshogs pa thams cad gda' 'o// zhes bgyi ba bcom ldan 'das de ci las dgongs/ 'jam dpal de ni de bzhin gshegs pa rnams de bzhin gshegs pa'i byin gyi rlabs kyis byin gyis brlabs pa lam gang dang bgrod pa gang gis thams cad du lus phun sum tshogs pa thams cad rab tu 'thob par 'gyur ba'i lam de dang / bgrod pa ji lta ba bzhin du ston to// su lam de dang / bgrod pa de la 'jug pa de dag thams cad du lus phun sum tshogs pa rab tu 'thob bo/ / su lam de dang / bgrod pa de spong zhing mi snyan par brjod pa dang / nga la yang kun nas mnar sems dang / khong khro ba'i sems de 'chi ba'i dus byed par gyur pa de dag ni thams cad du lus dang / longs spyod pa thams cad ngan par 'gyur ro// 'jas dpal de ni rnam grangs 'dis kyang khyod kyis 'di ltar lus phun sun tshogs pa 'ba' zhig de bzhin gshegs pa'i byin gyi rlabs kyi mthu las 'byung ba ma yin gyi/ lus ngan par skye ba yang / de bzhin gshegs pa'i byin gyi rlabs kyi mthu las 'byung bar shes par bya'o/ / bcom ldan 'das 'jig rten gyi khams yongs su ma dag pa na ci ni mod pa lags/ ci ni dkon pa lags/ yongs su dag pa na ci ni mod pa lags/ ci ni dkon pa lags/ 'jam dpal 'jig rten gyi khams yongs su ma dag pa na/ dngos po brgyad ni mod la/ gnyis ni dkon no// de 'di lta ste/ mu stegs can dang / sems can sdug bsngal ba dang / rigs dang / rus dang / cho rigs dang / phun sum tshogs pa dang / rgud pa'i bye brag dang / nyes par spad pa spyod pa dang tshul khrims zhig pa dang / ngan song dang / theg pa dman pa dang / bsam pa dang sbyor ba dman pa'i byang chub sems dpa' rnams ni mod do// byang chub sems dpa' bsam pa dang / sbyor ba mchog rnams rab tu gnas pa dang / de bzhin gshegs pa dag 'byung ba ni dkon no// 'jam dpal 'jig rten gyi khams yongs su dag pa na ni// 'di dag las phyir bzlog ste/ dngos po brgyad ni dkon zhing / gnyis po ni mod par shes par bya'o// de nas bcom ldan 'das la/ byang chub sems dpa' 'jam dpal gyis 'di skad ces gsol to/ / bcom ldan 'das dgongs pa nges par 'grel pa'i chos kyi rnam grangs las nges par bstan pa 'di'i ming ci legs/ 'di ji ltar gzung bar bgyi'ajam dpal 'di ni de bzhin gshegs pa'i bye ba bsgrubs pa nges pa'i don du bstan pa yin te/ 'jam dpal 'di ni de bzhin gshegs pa'i bya ba bsgrub pa nges pa'i don du bstan pa zhes zung zhig/ ces bcom ldan 'das kyis de la bka' stsal to// de bzhin gshegs pa'i bya ba bsgrub pa nges pa'i don du bstan pa 'di bshad pa ni/ byang chub sems dpa' bdun khri lnga stong gis yongs su rdzogs pa'i chos kyi sku yang dag par rig pa thob par gyur to/ / 'phags pa dgongs pa nges par 'grel pa zhes bya ba theg pa chen po'i mdo// yon tan gyi tshogs rnam par nges pa bstan pa'i le'u zhes bya ba rdzogs so// / skad gsar chad kyis kyang bcos te gtan la phab pa/

CLOSE WINDOW