བོད་ཡིག

e-texts based on the ACIP/ALL Input

/ //rgya gar skad du/ bud d+ha sya ni bA na sto tra/ bod skad du/ sangs rgyas yongs su mya ngan las 'das pa la bstod pa/ 'jam dpal gzhon nur gyur pa la phyag 'tshal lo// gang zhig ser skya'i gzhir ni shAkya'i rigs su 'khrungs/ /gang gis mnyam dkar byang chub dam pa thugs su chud/ /gang gis ba ra NA sir chos kyi 'khor lo bskor/ /sa la'i tshal du mya ngan 'das gyur de bstod pa/ /kyi hud snying rje ldan mgon rgyal ba'i sdig pa zhi/ /kyi hud sems can mnyen gshin kha lo sgyur bzang mchog /kyi hud ded dpon zhi ba'i las gyur ston pa po/ /kyi hud sdug dang mi sdug thugs snyoms 'jig rten gnyen/ /kyi hud mun nag gis bsgribs mig can 'jig rten spyan/ /kyi hud thub chen gru yis 'jig rten sgrol mdzad pa/ /kyi hud sa la'i tshal du ci phyir mya ngan 'das/ /khyod zhal zla rgyas pad+ma kha phye 'dra ba dang/ /autpal rgyas pa lta bu'i spyan ldan sku nyid kyang/ /gser gyi ri 'dra mtshan rnams rdzogs pa sus mthong 'gyur/ /kyi hud 'od 'dra'i gzugs mchog 'di ma mthong bas sdug bsngal lo/ /sngon tshe rgya che lam gyi rang bzhin gzings bcas te/ /nyid kyi don dang 'gro ba chen po'i gzhan don mdzad/ /srog chags brgya phrag mang po thar dang mtho ris bkod/ /kyi hud mi rtag me chogs dag gis zad mthar gyur/ /dag pa'i rdzing yangs tshul khrims chu yis bsil bar bltams/ /rdzogs pa'i sangs rgyas chos kyi chu srin ngur pas khyab/ /dge slong dam pa gzhan tshogs brgya yis nye bar bsten/ /kyi hud bde 'gro'i 'bab stegs skams la bdag phyag 'tshal/ /spyod pa'i rtsa ba brtan zhing dran pa'i sdong bos mdzes/ /byang chub yan lag me tog kha phye bzod yal ba/ /ngo tsha'i 'dab rgyas bdud rtsi 'bras bus mchog g.yur za/ /kyi hud bde gshegs shing 'gyel gyur la bdag phyag 'tshal/ /rdul med mya ngan 'das pa nam mkha' i ngos legs bzhugs/ /slob ma tshul khrims legs gnas dkyil 'khor skar ma can/ /'phags la ma skyed byed blo mig yid 'ong zla zer can/ /kyi hud bde gshegs zla ba nub la bdag phyag 'tshal/ /gti mug mun nag sel mdzad yon tan 'od zer ldan/ /gdul bya'i tshogs kyi rdzing gi pad+ma kha 'byed cing/ /lta ba drug cu rtsa gnyis dri ma'i 'dam skems mdzad/ /kyi hud bde gshegs nyi ma nub la bdag phyag 'tshal/ /byams mchog sku mnga' 'phags pa'i bden bzhi'i zhabs dang ldan/ /zhi gnas lhag mthong lha yi spyan gnyis dang ldan zhing/ /dad pa rab skyed rnam dag grol ba'i bgros kyis bzhud/ /kyi hud bde gshegs glang chen zhir gshegs bdag phyag 'tshal/ /sems can med pa sgra sgrogs mu stegs ri dags 'joms/ /ngo mtshar ral ba'i tshogs mnga' 'phyang bas sku la brgyan/ /shes rab mche ba rab rno tshul khrims dge ba'i zhabs/ /kyi hud bde gshegs seng ge zhir gshegs pa dag phyag 'tshal/ /sangs rgyas mya ngan yongs 'das khyod la bdag bstod pas/ /bsod nams rgya chen 'bras bu mdza' yas gang bsags pa/ /des ni bdag gis gnas mchog dam pa thob gyur nas/ /khyed 'dra kho nar 'gro la phan pa bgyid gyur cig /sangs rgyas yongs su mya ngan 'das pa la bstod pa slob dpon chen po dpal ldan chos kyi grags pas mdzad pa rdzogs so// // */

CLOSE WINDOW