བོད་ཡིག

e-texts based on the ACIP/ALL Input

/ //de la sgom pa gang zhe na/ thog mar bya ba thams cad yongs su rdzogs par byas te/ stan bde ba'i steng du skyil mo krung bcas lus drang por bsrangs la yud tsam zhig bsdad do/ /de nas re zhig nang la brten pa'i mi sdug pa la sems 'di ltar gtad par bya ste/ lus 'di la skra dang spu dang glad pa dang/ glad rgyas dang gci ba'i bar dag la re re nas 'di ni rul ba dri mi zhim pa dri nga ba mi sdug pa nyid do/ /snyam du rab tu sgrims la ci gsal du bsgom/ /phyi rol brten brten pa'i mi sdug pa la sems gtod par byed pa ni rnam par bsdos pa la sems gtod par byed pa na/ des bud med ngam skyes pa'am mdza' shes sam/ tha mal pa'am/ ngan pa'am 'bring ngam/ bzang po 'am/ byis pa 'am/ bar ma'am/ rgan po shi ba'i ro bdag nyid kyi mthong ngam gzhan las thos sam yongs su brtags kyang rung ste/ de'i mtshan ma bzung na/ shi nas zhag gcig lon pa khrag zags la rul par ma gyur pa gang yin pa la/ 'di ni rnam par bsdos pa'o/ /zhes rab tu sgrims la ci gsal du bsgom mo/ /gzhan yang rus gong dang/ keng rus dang/ rus pa'i keng rus kyi bar dag gang la mos pa rab tu bsgrims la ci gsal du bsgom mo/ /khams kyi tshod gzung ba ni/ spyir khams rab dang 'bring dang tha ma gsum yod kyang/ dge sbyor gzhan la rab tu snang la sgom pa la mi nus pa yang snang bas khams rab kyis kyang thun thung ngu nas bsgom par bya'o/ /de bas na gsum gas kyang re zhig slob lugs gcig par bya'o/ /mtshan mo btang snyoms su bzhag ste gnyid ji tsam log pa de tsam gyis khams brtas pa tsam log cing brdal lo/ /nyin par zhar la tshod bzung zhing bsgom ste/ 'di ltar dang po'i nyin par snga dro thun gcig la gom pa tha mal pas mda' rgyang phyed du phyin pa'i yud tsam zhig bsgom mo/ /phyi dro thun gcig la yang de bzhin du bsgom mo/ /de nas nyi ma bcu'i bar du thun re re bsnan zhing bsgom mo/ /na tsha phran tshegs byung na 'phral la zhi bar bya ste/ sran skyed cing mi bsgom mo/ /khams ni bde ba med na gong du smos pa bzhin du bsgom mo/ /de lta bas na khams kyi tshong zhar la shes par 'gyur ro/ /de la sems kyis skye ba'i rim pa ni bzhi ste dang po rtsol ba drag zhan gnyi ga la dmigs pa mi gsal ba dang/ gnyis pa rtsol ba drag tu bsgoms nas/ phyogs 'ga' gsal te/ de yang yun ring por mi tshugs pa dang/ gsum pa ni rtsol ba drag tu bsgoms na gang la gtad kyang gsal la zhan na/ la la mi gsal te/ de yang yun ring por mi snang ngo/ /bzhi pa ni rtsol ba drag gzhan gzhig la glang pa la sogs pa gang la dmigs kyang shin tu gsal bar snang ba dang/ de nyid dmigs kyang rung/ rim gyis bgrangs kyang rung ste/ thun ring bar nus pa dang/ rang dbang med pa'i rgod pa dang/ bying ba dang bral dang/ lus kyi bde ba sngar nyams su ma myong bas lus la khyab pa dang/ sems kyi dga' ba dad pa dang/ mtshungs par ldan pas sems la khyab pa dang ldan pa'o/ /de la gnas pa'i tshad ni/ 'di ltar rnal 'byor pa de mi sdug pa'i sbyor ba kun tu bstan cing goms par byas lan mang du byas pa'i rgyus na/ rgyu gang yang rung gnas kyang rung ste/ yul mngon du gyur cing mtshan mar so sor rtags su zin kyang mngon par 'du byed pa med par rang bzhin gyi mi sdug pa nyid ces mang du snang ste/ 'di lta ste mi sdug pa nyid shin tu goms par byas pa'i phyir 'dod pa'i 'dod chags dang/ mthun pa'i chos rnams la sems 'jug par mi 'gyur ro/ mos par mi 'gyur zhing gtang snyoms dang/ yid 'byung ba dang mi mthun par kun tu gnas na/ rnal 'byor pa bdag ni mi sdug pa thob pa yin no/ /bdag ni bsgom pa'i 'bras bu thob pa yin no/ /zhes rigs par bya'o/ /mi sdug pa de tsam gyis mi sdug pa yin no/ /de la brtan pa'i thabs ni/ sems gnas nas shes nas sngar bsgom pa bas thun gyi grangs nyung bar rig par bya ste/ yul cung zad ring bar bya/ srod tho rangs la yang bsgom/ dmigs pa la rtsol bar mi bya bar sngar ji tsam gsal ba de tsam la dmigs so/ /ji srid lus ngal ba dang sems dub pa 'am/ dang ba 'am/ shug 'byung ba 'am/ mgo bags kyi lci ba 'am/ yam yom byed pa'am/ 'dar ba 'am/ gnyid srab pa 'am/ zas mi zhim pa 'am/ ngag gi 'khrul pa mang du 'byung ba la sogs pa khams mi bde ba'i mtshan ma cung zad byung ba de srid du bsgom mo/ /de nam byung nas dal gso ste/ lus la sku mnye bya/ chos dang mthun pa'i zas skom gyis lus kyi nus pa brtas su bzhug ste/ khams sor ma chud kyi bar du nyin mtshan gnyis la bsgom snying 'dod pa'i dus su thun chung ngu re re blta ba tsam bsgom mo/ /khams sor chud na srod dang tho rangs thun re/ nyin par gsum tsam bsgom zhing/ thun snga na bas ring bar bya'o/ /de la 'khrul par shes par bya ba gang zhe na/ de la shes pa la shin tu gsal bar snang yang rang gi ngo bos yod pa ma yin pa de ni 'khrul pa yin te/ dper na rmi lam gyi gnas skabs na/ rang gi lus la nad byung ba dang/ phyi rol gyi lus la rnam par bsdos pa la sogs pa de na med kyang gsal por snang ba lta bu'o/ /sgom pa'i shes pa la phyi rol tu chad pa lta bu shin tu gsal bar snang ba'i mi sdug pa 'di dag kyang/ rang gis ngo bos don dam par yod pa ma yin pas sems nyid 'khrul pa yin no/ /bcom ldan 'das kyis 'phags pa lang kar gshegs pa las phyi rol gzugs ni yod min te/ /rang gi sems nyid phyi rol snang/ /zhes gsungs so/ /de lta bas na yang dag par med kyang yod par lta bur snang ba de ni phyin ci log gi don ston pas 'khrul pa yin te/ 'di ni yang dag pa'i mi bsdug pa'o/ /snyam du 'du shes bskyed par mi bya zhing/ skye ba med la des pa skye bar 'gyur pa'i rigs pa gang yang rung ba la brten nas lhag mthong bskyed par bya'o/ /las tshul bsam gyis mi khyab kyang/ /bdag pas blo gzhan mi srid de/ 'on kyang don du mi gnyer bas/ /mkhas pa'i gang dag mthos la/ phan srid bsams nas bris pa lags/ rab rib can gyi gzugs bltas nas/ /gzhan la 'di zhes ston 'dra bas/ /mkhas pa rnams la bzod par gsol/ /mi sdug pa'i sgo nas sems gnas pa'i thabs cung zad bris pa rdzogs so// // zhe sdang zug rngu bag chags bcas par spangs/ /'gro ba kun la bu gcig bzhin du byangs/ zug rngu 'byin pa'i sman 'dra gsung sgrogs la/ /phyag 'tshal de gsungs byams pa'i bsgom thabs bshad/ /sdom ni rtags dang phan yon shes bya dang/ / tshogs dang bsgom dang tshod gzung dang/ /skyed rim gnas tshad bstan pa'i thabs/ /skyo ba spang dang bcu yin no/ /de la rtags 'dir zhe sdang shas che ba'i rtags gzung ste/ de la gang zag zhe sdang spyad pa'i rtags rnams gang zhe na/ 'di na gang zag zhe sdang spyad pa ni/ /zhe sdang bar 'gyur pa'i dngos po la khong khro ba'i rgyu mtshan chung dus kyang khong khro ba'i kun nas dkris pa stug po dang mang po skyed par byed na/ 'bring dang chen po dag gis lta smos kyang ci dgos te/ khong khro ba'i kun nas dkris pa de yang yun ring du sems kyi rgyud la gnas par byed cing/ khong khro ba'i kun nas dkris pa de yang yun ring du rjes su 'brel bar 'gyur pa dang/ de khong khro bar 'gyur ba'i chos rnams kyis zil gyis non par 'gyur zhing khong khro bar 'gyur ba'i chos rnams/ zil gyis non par mi nus pa dang/ dbang po mi mnyen pa dang/ dbang po mi 'jam pa dang/ dbang po rtsub pa dang/ dbang po brlan pa dang/ gzhan dag la 'di lta ste/ lus dang ngag gis shin tu rnam par tho 'tsham ba'i rang bzhin can yin pa dang/ 'bral bar bla ba dang/ yid dbyung bar sla ba dang/ gcor ba dang mur gcor smra ba dang/ /spyi brtol che ba dang/ mi mos pa mang pa dang/ las kyi mdza' dma' ba dang/ las kyi mdza' brtan pa dang/ brtul zhugs dma' ba dang/ brtul zhugs brtan pa dang/ yid mi bde ba mang ba dang/ 'khrug pa mang ba dang/ bzod pa med pa dang/ spro thung ba dang/ mi mthun pa'i rang bzhin can yin pa dang/ mthun par 'dzin pa ma yin pa dang/ khro ba mang ba dang/ bzlog dka' ba'i rang bzhin can dang/ 'khrug pa mang ba dang/ bsam pa khro zhing gtum pa dang/ 'tshig cing brlang por smra ba dang/ de cung zad zhig smra ba yang mi dang zhing 'khrug la gnod sems bskyed pa dang gnod bzhin du gnas pa dang/ 'khrug pa bskyed pa dang/ khro gnyer dang ldan ba dang/ gzhin gyi mdog mi gsal ba dang/ gzhan gyi 'byor pa la zhe sdang zhing phrag dog mang ba yin te/ de lta bu dang mthun pa dag ni gang zag zhe sdang spyad pa'i rtags rnams yin par rig par bya'o zhes gsungs so/ /de la phan yon ni/ zla ba sgron ma'i mdo las ji skad gsungs pa lta bu ste/ bye ba khrag khrig dkrigs pa'i zhing dag na/ mchod pa rnam mang dpag med ji snyed pa/ skyes mchog rnams la de yi rtag mchod pa/ /byams pa'i sems kyi grangs dang char mi phod/ /ces gsungs so/ /bkra shis tshigs su bcad pa'i mod las kyang/ /gang zhig sems can thams cad la byams pa'i sems ni rab bsgom zhing /dpag tu med pa mi 'khrugs pa/ /de ni bkra shis dam pa yin/ /zhes gsungs so/ /de la shes par bya ba ni mdor bsdu na gnyis te/ dbye ba dang/ ngo bo'o/ /de la dbye ba ni gsum ste/ sems can la dmigs pa dang/ chos la dmigs pa dang/ dmigs pa med pa'o/ /de la sems can la dmigs pa'i byams pa ni sems dang po bskyed pa rnams kyis byams pa'o zhes gsungs so/ /ngo bo ni gzhan la phan pa dang bde bar 'dod pa ste/ nyon mongs pa can ma yin pa'i chags pa'o/ /de la tshogs ni spyir tshul khrims rnam par dag pa la sogs pa gzhan du blta'o/ /'dir bye brag cung zad tsam zhig bsam par bya ste/ dper na thabs? po myu gu mi skye ba de bzhin du bdag gi rgyud zhe sdang dang ldan na 'jig rten dang/ 'jig rten las 'das pa'i dge ba gzhan yang skye mi nus la/ bla na med pa'i byang chub chen po lha ga la 'thob/ de skad du zhe sdang zug ngu'i sems 'chad na/ /yid ni zhi ba'i nyams mi myong// dga' ba dang bde ba mi 'thob cing/ /gnyid mi 'ong bzhin brten mang 'gyur/ /zhes gsungs/ /'phags pa 'jam dpal rnam par 'phrul pa las kyang/ khong khro ba khong khro ba zhes bya ba ni/ bskal pa brgya stong du bsags pa'i dge ba'i rtsa ba zad par na khong khro ba zhes bya'o/ zhes gsungs so/ /de bas na 'jig rten dang 'jig rten las 'das pa'i dge ba'i rtsa ba bskyed pa'i phyir bdag gi rgyud thab skam po dang 'dra ba de byams pa chu dang 'dra ba des brlan pa zhig thog mar bsgrub par bya'o/ /snyam du sems bskyed par bya'o/ /de la bsgom pa ni/ 'di ltar yid du 'ong ba'i sa phyogs su stan bde ba'i steng du skyil mo krung bcas lus drang por bsrangs la yud tsam zhig bsdad do/ /de nas mi'i 'gro ba bdag gis mdza' bo 'am bshes pa 'am yid du 'ong bzhig la 'di ni bdag pha ma'o/ /'di la lan du phan 'dogs so/ /don du gnyer ro/ /'jig rten 'dir kha na ma tho ba med pa'i bde ba thob cing/ thob pa ma nyams shing gong du 'phel na ci ma rung/ phyi ma la ngan 'gro'i 'gro ba spangs te/ lha dang mi'i bde ba la brten nas 'jig rten las 'das pa'i tshogs rgya chen po la sogs pa rab tu brtson pa ci ma rung snyam du shin du bgrims la gtad do/ /de la khams kyi tshod bzung ba ni/ spyir khams rab 'bring tha ma gsum yod kyang dge sbyor gzhan la rab tu 'jug la sgom pa la ha cang mi nus pa yang snang bas/ rab kyis kyang thun thung ngu nas bsgom mo/ /de bas na re zhig slob lugs gcig par bya'o/ /mtshan mo btang snyoms su bzhag ste/ gnyid ji tsam log pa de tsam gyi khams brtas pa de tsam log cing gdal lo/ /nyin par zhig la chod gzung zhing bsgom mo/ /'di ltar nyi ma dang po snga dro thun cig yan gom pa tha mal pas mda' rgyang phyed du phyin pa tsam zhig bsgom mo/ /phyi dro thun gcig la yang de bzhin du bsgom mo/ /de nas nyi ma bcu'i bar du thun re re bsnan cing bsgom mo// na tshe 'phran tshegs byung na 'phral du zhi bar bya'o/ /sran bskyed cing mi bsgom mo/ /khams mi bde ba med na gong du smos pa bzhin du bsgom mo/ /de lta bas na khams kyi tshod zhar la shes par 'gyur ro/ /de la sems kyis skye ba'i rim pa ni bdun te/ thog mar snying du sdug pa'i sems can la mnyam par gzhag pa'i tshe/ phan pa dang bde ba'i sems mi mthun pa'i phyogs kyi mi 'phrogs par skye la/ langs pa'i gnas skabs su yang nam dran pa'i tshe phan pa dang bde ba'i sems dka' ba med pa 'jug ste/ bye brag ni mnyam par bzhag tsam na lus cung zad bde ba dang/ sems kyang sems can la dmigs pa'i mi de yang/ yid la gsal rab tu snang la/ de'i sbyor bas sems 'phro ba tsam du 'ong ngo/ /de'i 'og tu 'dris pa rnams la'o/ /de'i 'og tu tha mal pa rnams la'o/ /de'i 'og tu nye 'khor ba rnams la'o/ /de'i 'og tu rang gi grong na gnas pa rnams la'o/ de'i 'og tu gzhan gyi grong na gnas pa rnams la'o/ /de'i 'og tu phyogs gcig dang gnyis la sogs thams cad la yang mtshan nyid de 'dra ba'i sgo nas skye bar 'gyur ro/ /gnas pa'i tshad ni ji tsam gyi na byams pa la sems gnas pa yin zhe na/ 'di ltar rnal 'byor pa des byams pa'i sbyor ba kun tu bsten cing goms par bya ba dang/ lan mang du byas pa'i rgyus na/ rgyu yang rung gnas kyang rung ste/ yul mngon du gyur cing mtshan ma so sor brtags su zin kyang/ mngon par 'du byed pa med par rang bzhin gyis byams pa'i sems mang du snang la/ 'di lta ste byams pa shin tu goms par byas pa'i phyir khong khro ba'i sems med pa dang/ gnod sems dang mthun pa'i chos rnams la sems mi 'jug par rig par bya ste/ de tsam gyis na byams pa thob pa yin no/ /de la brtan pa'i thabs ni/ sems gnas par shes nas/ sngar bsgoms pa las/ thun gyi grangs nyung bar bya ste/ yun cung zad ring bar bya/ /srod tho rangs la yang bsgom mo/ /sems can thams cad pha pa dang bde bar 'dod pa'i nyon mongs pa can ma yin pa'i chags pa zhes bya ba/ byams pa'i sems de sngar ji tsam 'jug pa de tsam las lhag par gdung ba mi bskyed par dmigs pa'o/ /ji srid lus ngal ba 'am/ sems dub pa 'am/ sgom tsam na dngang ba 'am/ shugs 'byung ba 'am/ mgo bgas kyis lci ba 'am/ yam yom byed pa 'am/ 'dar ba 'am/ nub mo gnyid srab pa 'am/ zas mi zhim pa 'am/ ngag gi 'khrul pa mang du 'byung ba la sogs pa khams mi bde ba'i mtshan ma cung zad ma byung gi bar du bsgom mo/ /de nam byung tsa na ngal gso ste/ lus bsku mnye bya/ chos dang mthun pa'i zas skom gyi lus kyi nus pa brtas su gzhug ste/ khams sor ma chud kyi bar du nyin mtshan gnyis la bsgom snying 'dod pa'i dus su thun chung re re lta tsam bsgom mo/ /nus pa rtas sros tho rangs thun re tsam bsgom zhing dge spyod gzhan yang 'jug par bya'o/ /de la skyo ba spang ba gang zhe na/ 'di ltar byams pa'i mtshan nyid ni sems can thams cad bde bar 'dod pa yin la/ sems can ni sdug bsngal dang/ sdug bsngal gyi rgyu la gnas pa de la dmigs pa'i snying rje dang shes 'byung bas snying rje/ shin tu goms shing lan mang du byas pa'i rgyus gzhan gyi sdug bsngal la brten nas bdag la sems kyi sdug bsngal chen po skye zhing/ des na shin tu skyo bas sems can gtong bar 'gyur ro/ /sems can btang nas theg pa chen po las nyams par 'gyur ro/ /de bas na skyo ba spang ba'i ched du 'gro ba mdza' dag don dam par ngo bo nyid med par rtogs par bya ba'i ched du lhag mthong bskyed par bya'o/ /'di skad du mdo las kyang snying rje gcig pus kyang sems can gtong ste skyob skye ba'i phyir ro/ /shes rab gcig pus kyang gtong ste/ gzhan gyi sdug bsngal stong par mthong ba'i phyir ro zhes gsungs so/ /de bas na gnyis ka zung du 'brel dgos so/ /las tshul bsam gyis mi khyab kyang/ /bdag pas blo gzhan mi srid de/ /'on kyang don du mi gnyer bas/ /mkhas pa'i gdams ngag ma thos la/ /phan srid bsams nas bris pa lags/ /rab rib can gyis gzugs bltas na/ /gzhan la 'di zhes ston 'dra bas/ mkhas pa rnams la bzod par gsol/ /byams pa sgom pa'i sgo nas sems gnas par bya ba'i thabs cung zad bris pa rdzogs so/ / //gti mug mun pa bag chags bcas par gtan spangs nas/ /'gro ba'i don du rten 'brel zab mo'i gsung sgrogs la/ /rab tu dang ba sngon du 'gro bas phyag 'tshal te/ /dang ba'i las can gti mug shas che'i don bshad/

CLOSE WINDOW