བོད་ཡིག

e-texts based on the ACIP/ALL Input

/spyi'i yi ge rdzogs so// //me 'bar 'obs 'dra'i 'jig bcas 'dod pa dag /gang gis bag chags bcas par gtan spangs la/ /rab tu dang bas phyag 'tshal de gsungs pa'i/ /bdud rtsi chu rgyun 'dod me zil gnon bshad/ /sdom ni/ rtags dang phan yon shes bya dang/ /tshogs dang bsgom dang tshod gzung dang/ /skye rims gnas chad bstan pa'i thabs/ /'khrul par shes dang bcu yin no// de la rtags ni 'dir 'dod chags shas che ba'i rtags bzung ste/ de yang gang zhe na/ 'di na gang zag 'dod chags spyad pa ni/ /chags par 'gyur ba'i dngos po chung ngu dang/ /ngan pa thams cad la yang 'dod chags kun nas dkris pa stug po dang/ chen po skyed par byed na/ 'bring dang bzang po dag smos kyang ci dgos/ bsod nams kyi kun nas bkris pa de yang yun ring du sems kyi rgyud la gnas par byed cing/ 'dod chags kyi kun nas dkris pa de yang yun ring du rjes su 'brel par 'gyur ba dang/ de chags par 'gyur ba'i chos rnams kyis zil gyis non par 'gyur zhing/ chags par 'gyur ba'i chos rnams zil gyis gnon par mi nus pa dang/ dbang po mnyen pa dang/ dbang po 'jam pa dang/ dbang po mi rtsub pa dang/ dbang po mi brlang ba dang/ gzhan dag la 'di lta ste/ lus dang ngag gis shin tu rnam par tho 'tsham pa'i rang bzhin can ma yin pa dang/ dbral bar dka' ba dang/ yid 'byung bar dka' ba dang/ dman pa la mos pa dang las kyi mdza' dma' ba dang/ las kyi mdza' brtan pa dang brtul zhugs dma' ba dang/ brtul zhugs brtan pa dang/ spro ring ba dang/ 'tshogs chas dang yo byad dag la brgam pa'i rang bzhin can yin zhing/ de la gdung dang/ yid bde ba mang ba dang/ kun dga' ba mang ba dang/ khro gnyer med pa dang/ bzhin gyi mdog gsal ba dang/ 'dzum pa sngon du gtong ba yin te/ de lta bu dang mthun pa dag ni/ gang zag 'dod chags spyad pa'i rtags rnams yin par bya'o/ /zhes gsungs so// de la phan yon ni/ nang dang phyi rol la brten pa'i 'dod pa me dang 'dra ba de nang dang phyi rol gyi mi sdug pa goms pa chu dang 'dra ba'i gnyen pos zhi bar 'gyur te/ de skad du 'dod chags me ni mi sdug chus zhi byed ces gsungs so/ /gzhan yang 'dod pa ni gnod pa thams cad kyi rtsa ba'o zhes gsungs pas de bzhin de la brten pa'i nyon mongs pa gzhan yang zhi bar 'gyur ro/ /de'i phyir ting nge 'dzin sngon du myur du thob nas de la brten pa'i shes rab goms pas nyon mongs pa rtsa nas spong ba yongs su dag pa'i ye shes shar nas lus phun sum tshogs pa gser gyi kha dog lta bu thob cing/ bdag dang gzhan gyis phun sum tshogs pa'i sgrub pa lhun gyis grub pa thob par 'gyur ro/ /de skad du bu mo zla mchog gis zhus pa las kyang/ gser gyi kha dog lta bu rab 'bar zhing/ /yid du 'ong ba bdag lus 'di la ltos/ /kye ma rab tu lus mdzes 'di lta bu/ /chags pa'i sems dang ldan la yod re skan zhes gsungs so/ /de la shes par bya ba ni 'dir 'dod chags kyi gnyen po mi sdug pa'i mtshan nyid shes par bya'o/ /'dod chags ni gnyis te/ nang gi 'dod pa rnams kyi 'dod pa la 'dun pa'i 'dod chags dang/ phyi rol gyi 'dod pa rnams kyi 'khrig pa la 'dun pa 'khrig pa'i 'dod chags so/ /de la nang la brten pa'i mi gtsang ba'i mi sdug pa nyid la dmigs pas ni/ nang gi 'dod pa rnams kyi 'dod pa la 'dun pa'i 'dod chags las sems ldog par byed do/ /de yang gang zhe na/ 'di lta ste/ skra dang spu dang sen mo dang so dang klog pa dang/ dri ma dang pags pa dang sha dang/ rus pa dang/ chu rgyus dang/ rtsa dang mkhal ma dang/ snying dang mchin pa dang/ glo ba dang/ rgyu ma dang/ gnye ma dang/ pho ba dang/ long ka dang/ mtsher ba dang/ phyi sa dang/ mchi ma dang rdul dang mchil ma dang/ snabs dang zhag dang chu ser dang/ rkang dang tshil dang mkhris pa dang/ bad kan dang rnag dang khrag dang/ glad sprin dang glad rgyas dang gcin dang/ de lta bu dang mthun pa dag ni nang la brten pa'i mi sdug pa dag yin par rig par bya'o/ /de yang khams gnyis po sa'i khams dang chu'i khams kyis bsdus te/ de la skra dang spu dang bshad pa'i bar dag ni sa'i khams so/ /mchi ma dang rdul dag nas lci'i bar dag ni chu'i khams so/ /de la phyi rol la brten pa'i mi sdug pa nyid gang zhe na/ 'di lta ste/ rnam par bsdos pa dang/ rnam par rnags pa dang/ rnam par 'bus gshigs pa dang/ rnam par bam pa dang/ rnam par zos pa dang/ rnam par dmar ba dang/ rnam par 'thor ba dang/ rus gong dang/ keng rus dang/ rus pa'i keng rus dang/ bshang bas gos pa dang/ gci bas gos pa dang/ mchil mas gos pa dang/ snabs kyis gos pa dang/ khrag gis gos pa dang/ rnag gis gos pa dang/ chab khungs dang/ ljan ljin dang de lta bu dang mthun pa dag ni phyi rol la brten pa'i mi sdug pa dag yin par rig par bya'o/ /de yang 'dod chags rnam pa bzhi'i gnyen po ste kha dog dang/ dbyibs dang/ reg pa dang/ nye bar spyod pa la chags pa dang ldan pa las sems rnam par sbyor bar byed do/ /de la gang gi tshe rnam par bsdos pa nas rnam par zos pa'i bar yid la byed pa de'i tshe/ kha dog la 'dod chags pa las sems rnam par spyod par byed do/ /gang gi tshe rnam par dmar ba yid la byed pa de'i tshe/ dbyibs kyi 'dod chags las sems rnam par sbyor par byed do/ /gang gi tshe rus gong dang keng rus dang rus pa'i keng rus yid la byed pa de'i tshe reg pa'i 'dod chags las sems rnam par sbyong bar byed do/ /gang gi tshe rnam par dmar ba yid la byed pa de'i tshe/ nye bar spyod pa la 'dod chags pa las sems rnam par sbyong bar byed do/ /de lta bas na bcom ldan 'das kyis kyang phyi rol la brten pa'i mi sdug pa dur khrod rnam pa bzhi gsungs so/ /de ni re zhig shes par bya'o/ /de la tshogs ni tshul khrims rnam par dag pa la sogs pa gzhan du blta'o/ /'dir cung zad tsam zhig bsam par bya ste/ 'di snyam du sgrub pa snying por bya ba la sems gnas pa zhig med na sgrub par dka' bas/ bdag gis thog mar sems gnas pa zhig bsgrub par bya'o snyam du bsam par bya'o/ /de yang nang gi lus dang phyi rol gyi bud med la chags na gnod pa sna tshogs bskyed cing ngan song gsum du 'gro na/ sems gnas pa dang/ bde 'gror skye zhing thar par lta ga la nus par 'gyur/ /bde 'gro med par ji ltar sgrub/ de skad du zla ba sgron ma'i mdo las/ dul par gyur pa'i lus 'di dang srog kyang g.yo ba dbang med do/ /rmi lam sgyu ma 'dra ba la/ /byis pa 'di dag chags pas na/ /de dag mi bzad sems dmyal 'gro/ zhes gsungs so/ /yang gsungs pa /gang zhig 'dod chags sems kyis ni/ /bud med rul pa brten byed pa/ /'gro ba rul bar 'gro 'gyur te/ /des na ngan 'gror 'gro bar 'gyur/ zhes gsungs so/ /de lta bas na lus dang bud med la chags pa'i sems spang bar bya'o/ / //de la sgom pa gang zhe na/ thog mar bya ba thams cad yongs su rdzogs par byas te/ stan bde ba'i steng du skyil mo krung bcas lus drang por bsrangs la yud tsam zhig bsdad do/

CLOSE WINDOW