བོད་ཡིག

e-texts based on the ACIP/ALL Input

na ya bin du TIka /bod skad du/ rigs pa'i thigs pa rgya cher 'grel pa/ bam po dang pos/ /'jam dpal gzhon nur gyur pa la phyag 'tshal lo/ /gang zhig rigs lam rnam par dag pa dang/ /rigs mthus bsgrub bya dag pa mchog gsung ba/ /thub pa smra mchog de la phyag 'tshal te/ /rigs thigs tshig re nas ni rnam par dbye/ /yang dag pa'i shes pa ni skyes bu'i don thams cad 'grub pa'i sngon du 'gro ba can yin pas na/ de bstan to zhes bya ba'i tshig dang po 'dis ni rab tu byed pa 'di'i 'brel pa dang/ dgos pa dang/ brjod par bya ba dang/ dgos pa'i yang dgos pa bstan to/ /'di ltar 'brel pa med pa dang/ dgos pa med pa dang/ brjod par bya ba med pa'i bstan bcos sam rab tu byed pa ni rtog pa sngon du gtong ba rnams khas mi len te/ 'di ltar 'dir bshad par bya ba ni ci zhig yin snyam pa'i rmongs pa de bsal ba'i phyir brjod par bya ba bsnyad do/ /'bras bu med du dogs pa bsal ba'i phyir dgos pa brjod do/ /thabs ma yin du dogs pa bsal ba'i phyir 'brel pa bsnyad do/ /de'i phyir nyan pa po sbro ba skyed pa'i don du 'brel pa la sogs pa brjod do/ /de la de bstan to zhes bya ba 'dis ni brjod par bya ba dang/ dgos pa sngon du bstan to/ /'brel pa ni shugs kyis bstan to/ /de la shugs ni 'di yin te/ 'di ltar yang dag pa'i shes pa bstan pa'i phyir/ rab tu byed pa rtsom pas/ don gyis rab tu byed pa ni thabs nyid du ston to/ /de lta ma yin na thabs ma yin pa la ji ltar 'jug par 'gyur te/ de bas na 'brel pa ni don gyis bstan to/ /'dir yang dag pa'i shes pa bstan to zhes bya ba de ni brjod par bya ba yin no/ /yang dag pa'i shes pa bstan pa ni dgos pa yin no/ /yang dag pa'i shes pa bstan pa de ni khong du chud par byed pa'i rang bzhin yin la/ rab tu byed pa 'dis byed pas na/ rab tu byed pa 'di ni dgos pa de'i thabs yin no/ / de lta bas na rab tu byed pa dang/ dgos par thabs dang thabs kyis bsgrub par bya ba'i mtshan nyid kyis 'brel pa yin te/ 'di ltar rab tu byed pa 'di thos pa las yang dag pa'i shes pa'i rang gi ngo bo ma nor bar shes par 'gyur bas/ de'i phyir rab tu byed pa ni thabs yin la/ yang dag pa'i shes pa yongs su shes pa ni thabs kyis bsgrub par bya ba yin par gnas so/ /de nyid bsgrub par bya ba dang/ bsgrub pa'i mtshan nyid dang/ bya ba dang byed pa'i ngo bo'i mtshan nyid kyis 'brel pa yin te/ 'di ltar bsgrub pa ni rab tu byed pa'o/ /bsgrub par bya ba ni 'bras bu'o/ /byed pa ni rab tu byed pa'o/ /bya ba ni 'bras bu yin pas de'i phyir yang dag pa'i shes pa yongs su shes par bya ba'i phyir rab tu byed pa 'di brtsam mo zhes bya bar gnas/ /de ltar gnas su zin kyang ci ste la la zhig yang dag pa'i shes pa yongs su shes pas ci zhig bya ste de ni gang du yang mkho ba med do/ /de'i phyir de ni bya rog gi so brtag pa bzhin du gnas pa ma yin par khyod yongs su ngal bar 'gyur ro zhes 'dri bar 'gyur pa de'i phyir skyes bu'i don thams cad 'grub pa ni yang dag pa'i shes pa sngon du 'gro ba can yin zhes bya ba 'di smos te des ni dgos pa'i yang dgos pa bstan to/ /de bas na tshig gi don ni 'di yin te/ gang gi phyir yang dag pa'i shes pa skyes bu'i don thams cad 'grub pa la mkho bar gyur pa de'i phyir bsgrims te/ de yongs su shes par bya'o/ /de yongs su shes pa ni rab tu byed pa las 'byung ngo/ /de bas na yang dag pa'i shes pa mkho bar gyur pa yongs su shes par bya ba'i phyir rab tu byed pa 'di brtsam par bya'o zhes bya'o/ /de ni re shig bsdu ba'i don yin no/ /yan lag gi don ni yang dag pa'i shes pa sngon du 'gro ba can yin pas na zhes bya ba la 'dir mi slu ba'i shes pa ni yang dag pa'i shes pa ste/ gang don byed pa la slu par mi byed pa yin gyi ma nor ba gang yin pa de ni yang dag pa'i shes pa ma yin no/ /de lta na ni rab tu byed pa rnal 'byor spyod pa'i lugs sel bar byed par 'gyur te/ rab tu byed pa ni mdo sde ba dang/ rnal 'byor spyod pa'i lugs kyi rjes su snyegs par 'jug par 'dod do/ /de lta bas na gnyi ga'i lugs bsdu ba'i phyir/ mi bslu ba'i shes pa ni yang dag pa'i shes pa yin par khong du chud par bya'o/ /gang la yang dag pa'i shes pa'i sngon du 'gro ba yod pa ni yang dag pa'i shes pa sngon du 'gro ba can no/ /sngon gyi sgra ni 'di rgyu yin par brjod de gang gi phyir 'bras bu bas rgyu snga ba de'i phyir sngon du zhes brjod de/ yang dag pa'i shes pa'i rgyu can zhes bya ba'i tha tshig go /skyes bu'i don thams cad 'grub pa zhes bya ba ni skyes bu'i don yin pas na skyes bu'i don to/ /don zhes bya ba'i sgras ni dgos pa yin par brjod de/ skyes bu'i dgos pa zhes bya ba'i tha tshig go /de ni thams cad kyang yin la skyes bu'i don yang yin pas skyes bu'i don thams cad de thams cad ces bya ba ni thag nye ba dang/ rgyang ring ba dang/ de bzhin du 'jig rten pa dang/ 'jig rten las 'das pa dang/ de bzhin du dor bar bya ba dang/ blang bar bya ba dang/ btang snyoms su bya ba'o/ /de la thag nye ba ni gang yul thag nye ba na yod pa'o/ /rgyang ring ba ni gang yul thag ring po na yod pa'o/ /'jig rten pa ni gang 'khor ba'i khongs su gtogs pa'o/ /'jig rten las 'das pa ni mya ngan las 'das pa zhes bya ba'o/ /dor bar bya ba ni mi 'dod pa ste sbrul dang/ tsher? ma dang/ dug dang/ mtshon cha la sogs pa'i mtshan nyid do/ /blang bar bya ba ni 'dod pa ste/ me tog phreng dang/ tsan dan dang/ gos dang/ bza' ba dang/ btung ba dang/ mal cha dang/ stan gyi mtshan nyid do/ /'dod pa dang mi 'dod pa gnyi ga las bzlog pa gang yin pa de ni btang snyoms su bya ba'o/ /skyes bu'i don de thams cad kyi rgyu ni yang dag pa'i shes pa yin te/ 'di ltar mngon sum la sogs pa'i shes pas dmigs nas mtshon cha dang/ dug dang/ tsher ma la sogs pa ni yongs su spong ngo/ /me tog 'phreng la sogs pa ni len to/ /de ma yin pa gzhan dag la ni btang snyoms su byed do/ /skyes bu'i don thams cad 'grub pa ni skyes bu'i don thams cad grub par byed pa'o/ /'grub pa zhes bya ba'i sgra ni 'dir grub par byed pa zhes bya bar brjod do/ /des ni 'di skad du skyes bu'i don 'grub par nges pa dang ldan pa gang ci snyed pa de thams cad kyi rgyu ni yang dag pa'i shes pa yin no zhes bstan par 'gyur ro/ /yin pas na zhes bya ba'i sgra ni de'i phyir zhes bya ba'i don yin la/ gang dang de ni rtag tu 'brel te/ des ni 'di skad du gang gi phyir yang dag pa'i shes pa ni skyes bu'i don thams cad 'grub pa'i rjon du btang ba can yin pa de'i phyir de bstan to zhes bya bar bstan par 'gyur ro/ /de bstan to zhes bya ba la de zhes bya ba ni yang dag pa'i shes pa dang sbyar bar bya ste/ ma ning gi rtags kyis bstan pa dang gtso bo yin pa'i phyir ro/ /'das ma thag pa yin yang skyes bu'i don thams cad 'grub pa ni ma yin te/ dngos su na gtso bo ma yin pa'i phyir ro/ /yang dag pa'i shes pa de ni log par rtog pa rnam pa bzhi bsal bas ma nor bar shes par byed de/ log par rtog pa rnam pa bzhi ni grangs la log par rtog pa dang/ rang gi ngo bo la log par rtog pa dang/ spyod yul la log par rtog pa dang/ 'bras bu la log par rtog pa'o/ /de la grangs la log par rtog pa ni kha cig gi ni gcig ste/ 'di lta ste/ phur bu ba rnams kyi lta bu'o// kha cig gi ni gsum ste/ 'di lta ste/ grangs can pa rnams kyi lta bu'o/ rigs pa can rnams kyi ni bzhi'o/ /spyod pa can rnams kyi ni drag go /rang gi ngo bo la log par rtog pa ni 'di lta ste kha cig gi ni mngon sum rnam par rtog pa dang bcas pas kha cig ni rnam par rtog pa med pa lta bu'o/ /yul la log par rtog pa ni 'di lta ste/ kha cig gi ni mngon sum gyi yul ni rang gi mtshan nyid kho na'o/ rjes su dpag pa'i yul ni spyi'i mtshan nyid kho na'o zhes brjod la gzhan dag gis gzhan du brjod blta bu'o 'bras bu la log par rtog pa ni 'di lta ste/ kha cig ni tshad ma las 'bras bu tha dad par khas len pa kha cig ni tha dad pa ma yin par khas len pa lta bu'o/ /de lta bas na de lta bu'i log par rtog pa rnam pa bzhi ba bsal bas rnam pa thams cad du ma nor bar yang dag pa'i shes pa'i rang gi ngo bo bstan pa yin no/ /de la re zhig dang po kho nar grangs la log par rtog pa bsal ba'i phyir/ yang dag pa'i zhes pa ni rnam pa gnyis te zhes bya ba smos so/ /'di rnam pa gnyis yod pas na 'di ni rnam pa gnyis/ /grangs kyi tshig smos pa nyid kyis na rnam pa gnyis kho na'o zhes bsnan par mngon te/ / des na rnam pa gcig dang/ rnam pa gsum pa sogs pa bsal ba yin no/ /grangs tsam gyis rnam pa gnyis su bstan gyi/ /rnam pa gnyis po gang gang gis yin bzhi mi shes pas de'i phyir mngon sum dang rjes su dpag pa'o zhes bye brag gis bstan to/ /dbang po la brten pa ni mngon sum ste/ des pa'i tshig 'di ni yul la shes pas mngon sum du byed pa nyid mtshan mtshon par byed pa ste/ dper na 'gro bas na ba lang ngo/ zhes bya ba de la 'gro bas ni ba lang nyid nye bar mtshon par byed de/ de bas na ba lang nyid dang ldan pa'i ril po la ba lang gi sgrag brjod par bya ba yin par ston par byed pa de bzhin du 'dir yang dbang po la brten pa nyid kyis na yul la shes pas mngon sum du byed pa nyid mtshon nas/ mngon sum rnam pa bzhi char yang mngon sum du brjod par bstan to/ /'dis dpog pas na dpag pa ste/ yongs su gcod par byed ces bya ba'i tha tshig go /rjes su zhes bya ba'i sgra ni phyir shes par bya ba'i don te/ phyis dpog pa ni rjes su dpag pa ste/ phyogs kyi chos 'dzin pa dang/ 'brel pa dran pa sngon du btang ba can zhes bya ba'i tha tshig go /mngon sum dang rjes su dpag pa'o zhes rnam par dbye ba tha dad par bstan pa ni/ don gyis na yul tha dad par ston te/ ji ltar de gnyis kyi rnam par dbye ba tha dad pa de bzhin du yul yang tha dad do zhes bya ba'i tha tshig go/ dang zhes bya ba'i sgra ni bsdu ba'i don to/ rjes su dpag pa dang mngon sum stobs mtshungs pa nyid du sdud do/ /ji ltar mngon sum don gyis skyes par byed pa yin pas mi slu ba ste/ de'i phyir tshad ma yin pa de bzhin du rjes su dpag pa yang de'i bdag nyid dang/ de las byung ba gnyis kyis don dang 'brel pas mi slu ba ste/ de'i phyir tshad ma yin no/ /de lta yin na gang la la dag tshad ma thams cad kyi gtso bo ni mngon sum yin no zhes brjod pa de bsil ba yin te/ gnyi ga yang mi slu ba kho nar ni 'dra na/ mngon sum gtso bo nyid yin no zhes su zhig gis byos/ rang gi ngo bo la log par rtog pa bsal bar bya ba'i phyir/ de la mngon sum ni rtog pa dang bral zhing ma 'khrul ba'o zhes bya ba smos so/ de la zhes bya ba'i sgra ni dgar ba'i don to/ yang dag pa'i shes pa gnyis las 'og nas 'byung ba'i mtshan nyid kyis mngon sum dgar bar byed do/ /mngon sum zhes bya bas ni mtshan nyid kyi bzhi bstan to/ /rtog pa dang bral zhing ma 'khrul ba'o zhes bya bas ni mtshan nyid bstan te/ des na 'di skad du rtog pa dang bral zhing ma 'khrul ba gang yin pa de ni mngon sum yin par rig par bya'o zhes bstan par 'gyur te/ de ni re zhig bsdus pa'i don yin no/ /yan lag gi gdon ni rtog pa rnams dang bral ba ni rtog pa dang bral ba ste/ rtog pa dang bye zhes bya ba'i tha tshig go/ yang na rtog par bral ba ni rtog pa dang bral ba ste/ rtog pas spangs shes bya ba'i tha tshig go /'khrul pa med pa ni ma 'khrul ba ste/ thob par byed pa'i yul la phyin ci ma log ces bya ba'i tha tshig go / ci'i phyir bye brag gnyis smos she na/ smras pa ma 'khrul pa smos pa ni re zhig rab rib can gyi shes pa 'khrul pa rnam par bcad par bya ba'i phyir ro/ /rtog pa dang bral ba smos pa ni rjes su dpag pa bsal bar bya ba'i phyir ro/ /'di ltar ma 'khrul ba nyid ni thob par byed pa'i yul la khas blang bar bya'i/ /dmigs pa'i yul la ni ma yin no/ /gal te dmigs pa'i yul lam 'khrul pa nyid khas len na/ des na 'dir rnal 'byor spyod pa'i lugs bsal bar byas par 'gyur te/ 'di ltar rnal 'byor spyod pa'i ni dmigs pa'i shes pa thams cad ni 'khrul pa yin par 'dod de/ de bas na de'i lugs bsal bar rab tu byed pa rtsom par 'gyur te/ rab tu byed pa ni mdo sde ba dang/ rnal 'byor spyod pa'i rjes su snyegs par rtsom par 'dod la/ gnyi ga yang thob par byed pa'i yul la mi bslu ba'i mtshan nyid ni ma 'khrul ba yin par khas len to/ /de lta yin na go /rjes su dpag pa yang mngon sum nyid du thal bar 'gyur te/ de yang mi bslu ba nyid du ma 'khrul par 'dod do/ /de'i phyir rjes su dpag pa bsal bar bya ba'i phyir rtogs pas bral ba zhes bya ba smos te/ de lta bas ba na bye bag gnyi ga smos dgos so/ /grub pa'i mdza' la grags pa'i rtog pa bsal zhing/ 'jig rten pa'i rtog pa brtan pa'i phyir rtog pa ni shes pa la rjod pa dang 'drer rung ba snang ba ste zhes bya ba smos so/ /'dis rjod par byed pas na rjod pa ste smra bar byed pa sgra'i spyi'i ngo bo yin no/ /brjod pa dang 'dre ba ni rjod pa dang 'dre ba ste 'dre ba ni 'brel ba la bya'o/ /rjod pa dang 'drer rung ba ni rjod pa dang 'drer rung ba ste don gyi spyi yin no/ /de ni rjes su 'gro ba dang ldog pa dang ldan pa nyid kyis khyab pa yin pa'i phyir brjod par nus kyi/ don gyi bye brag rang gi ngo bo'i mtshan nyid kyi ngo bo ni brjod par bzhus te de khyab par byed pa ma yin pa'i phyir ro/ /shes pa gang la rjod pa dang 'drer rung ba snang ba yin te/ don gyi spyi'i ni don gyi rnam pa shes bya ba'i tha tshig go / gzhan yang de ni brjod par bya ba'i yin pas rjod pa ste/ bsnyad par bya ba don gyi spyi gang yin pa'o/ /rjod pa dang 'dre ba ni rjod pa dang 'dre ba'o/ /rjod pa dang 'dre rung ba ni rjod pa dang 'dre rung ba ste sgra'i spyi yin no des rjes su 'gro ba dang ldog pa 'thad pa nyid kyis don rjod par nus kyi/ sgra'i bye brag gis ni mi nus te de thun mong ma yin pa'i phyir ro/ /shes pa gang la rjod pa dang 'drer rung ba snang ba de ni rjod pa dang 'drer rung ba snang ba yin te/ sgra'i spyi'i rnam pa zhes bya ba'i tha tshig go zhes bstan par 'gyur ro/ /rnam par rtog pa rnam pa de / nyi ga yang rjod pa dang 'drer rung ba snang ba zhes bya ba'i tshig zur gnyis su bshad pa 'dis bstan par rig par bya'o/ /shes pa zhes bya ba ni rig pa sta blo zhes bya ba'i tha tshig go/ de dang bral ba'o zhes bya ba ni rtog pa dang bral ba ste/ rtog pa'i 'dam rdzab dang bral zhes bya ba'i tha tshig go / des ni 'di skad du sgra dang don gyi spyi'i rnam pa ma yin pa'i shes pa gang yin pa de ni mngon sum gyi tshad ma yin no zhes bstan par 'gyur ro/ /rab rib dang/ myur du bskor ba dang/ grur zhugs pa dang/ 'khrugs pa la sogs pas 'khrul ba ma bskyed pa zhes bya ba la rab rib ces bya ba ni mig gi gnod pa'o/ /myur du bskor ba zhes bya ba ni mgal mi bskor ba la sogs pa'o/ /grur zhugs pa zhes bya ba ni grus 'gro ba'o/ /'khrugs pa zhes bya ba ni rlung dang khris pa 'khrugs pas khams ma snyoms pa'o/ /rab rib dang/ myur du bskor ba dang/ grur zhugs pa dang/ 'khrugs pa ni rab rib dang/ myur du bskor ba dang/ grur zhugs pa dang/ 'khrugs pa'o/ /de dag la sogs pa gang yin pa de dag ni rab rib dang/ myur du bskor ba dang/ grur zhugs pa dang/ 'khrugs pa la sogs pa ste/ sogs pa'i sgras ni mig sngon por gyur pa dang/ ser po mthong ba la sogs pa bsdu'o/ /gang la 'khrul pa skyed pa yod pa de ni 'khrul pa skyed pa'o/ /'khrul pa skyed pa med pa de ni 'khrul pa ma skyes pa ste/ rab rib dang/ myur du bskor ba dang/ grur zhugs pa dang/ 'khrugs pa dag gis 'khrul pa ma skyes pa ni rab rib dang/ myur du bskor ba dang/ grur zhugs pa dang/ 'khrugs pa dag gis ma skyed pa'o/ /'di ltar rab rib kyi gnod pa ni zla ba la gnyis su mthong bar 'gyur ro/ /myur du bskor ba ni mgal? me la 'khor lo'i blo 'byung ngo grur zhugs te 'gro bas ni chu dogs kyi shing 'gro bar gra thong ngo/ /rlung dang mkhris pa la sogs pa 'khrugs pas ni dngos po 'bar ba la sogs par mthong ngo/ /shes pa ni mngon sum mo zhes bya ba la mdo las shes pa ma smos par ji ltar rnyad ce na/ rtog pa ni shes pa kho na dang 'brel pa la 'khrul pa yang shes pa'i chos yin pas mthong ste/ de lta bas na rtog pa dang bral ba dang ma 'khrul pa ni shes pa kho na la bya'o/ /dper na be'u med pa'i drus ma khrid de shog cig ces byas na/ rta rgod ma khrid de mi 'od gi ba drus ma khrid de 'ong bas/ 'di ltar de nyid be'u dang 'brel bar mthong ba de bzhin du/ 'dir yang rtog pa dang 'khrul pa ni shes pa kho na dang 'brel bar mthong gi gzhan dang ni ma yin pas shes pa kho na mngon sum du 'dod pa/ /de ni rnam pa bzhi ste zhes bya bas ni mngon sum zhes bsnyed pa gang yin pa ste/ de ni dbang po las byung ba dang/ yid dang/ rang rig pa dang/ rnal 'byor pa'i shes pa dang rnam pa bzhing rig par bya'o/ /log par rtogs pa bsal ba'i phyir rab tu dbye ba 'di bstan te/ kha cig ni dbang po nyid mthong ba po yin par 'dod pas de bsal ba'i phyir ni dang po ste/ dbang po las byung ba'i shes pa mngon sum yin gyi dbang po ni ma yin no/ /kha gcig ni yid kyis mngon sum la skyon 'dogs te/ de'i phyir skyon de yongs su spang ba'i ched du gnyis pa'o/ /kha cig ni sems dang sems las byung ba rnams kyi rang rig pa khas mi len te/ de bsal ba'i phyir gsum pa'o/ /kha cig ni rnal 'byor pa rnams kyi mngon sum khas mi len te/ de bsal ba'i phyir mngon sum bzhi pa smos so/ /dbang po'i shes pa zhes bya ba ni mig la sogs pa'i dbang po lnga rnams la dbang bor 'dod kyi yid kyi dbang po ni ma yin no/ /yid kyi mngon sum ni logs shig tu bstan pa'i phyir ro/ /de bas na mig la sogs pa'i dbang po la brten pa'i shes pa ni dbang po las byung ba'i mngon sum yin no/ /rang gi yul gyis de ma thag pa yul lhan cig byed pa can dbang po'i shes pa mtshungs pa de ma thag pa'i rkyen gyis bskyed pa yid kyi rnam par shes pa'o zhes bya ba ni der rang gi yang yin la yul yang yin pas rang gi yul te/ bdag gi dmigs pa zhes bya ba'i tha tshig go /rang gi yul gyis de ma thag pa ni rang gi yul gyi de ma thag pa ste/ skad cig ma gnyis pa las byung ba nyid dang 'dra ba la ni de ma thag pa'i sgrar brjod do/ /de ni rang gi yul gyi de ma thag pa yang yin la yul yang yin pas rang gi yul gyi de ma thag pa yul/ /dbang po'i shes pa gang la de lhan cig byed pa yod pa de ni rang gi yul gyi de ma thag pa yul lhan cig byed pa can dbang po'i shes pa ste/ dbang po'i shes pa mtshungs pa de ma thag pa'i rkyen du gyur pa des bskyed pa gang yin pa de ni yid tsam la brten pa'i phyir yid kyi mngon sum zhes bya'o/ 'dir rang gi yul gyi de ma thag pa yul zhes bya ba'i sgras ni bzung ba 'dzin pa'i phyir rtogs par byed pa ma yin pa'i skyon dang/ rigs mi mthun pa'i yul la 'dzin pa'i skyon yang yongs su spangs par rig par bya ste/ 'di ltar yid kyi mngon sum de ni dbang po'i rnam par shes pa'i yul gyi de ma thag pa skad cig ma gnyis pa la skye ba gang yin pa de'i yul de yin par 'dod do/ /de bas na bzung ba 'dzin par lta ga la 'gyur/ gang gi tshe de ma thag pa'i sgra rigs mthun pa la yang bya ba de'i tshe rigs mi mthun pa'i yul la 'dzin par yang thal bar ga la 'gyur/ dbang po'i rnam par shes pa mtshungs pa de ma thag pa'i rkyen gyis bskyed pa zhes bya ba'i tshig des ni long ba dang 'on pa la sogs pa med par thal ba'i nyes pa yang yongs su spangs pa yin te/ long ba dang 'on pa gnyis kyis yid kyi rnam par shes pa la ni mtshungs pa de ma thag pa'i rkyen dbang po'i rnam par shes pa med do/ /de bas na gang la la dag na re yid kyi rnam par shes pas phyi rol gyi yul mngon sum du byed par khas len na/ 'di ltar long ba dang 'on pa la sogs pa med par thal bar 'gyur ro zhes smra ba de yongs su spangs par rig par bya'o/ /sems dang sems las byung ba thams cad rang rig pa zhes bya ba ni de dag thams cad kyang yin la sems dang sems las byung ba yang yin pas sems dang sems las byung ba thams cad do/ /thams cad ces smos pa ni nor pa'i shes pa rnams kyang yongs su bsdus te/ de dag gi rang gi ngo bo rab tu gsal ba gang yin pa de ni rang gi rig pa yin no/ /'di ltar sems dang sems las byung ba thams cad ni rtog pa'i rang bzhin can yin pa'i phyir rang gi ngo bo rig par byed bzhin du skye ste/ dper na mar me ni rab tu gsal ba'i rang bzhin can yin pa'i phyir bdag nyid rab tu gsal bar byed bzhin du skye'i/ rang gi ngo bo rab tu gsal bar bya ba la mar me gzhan la mi ltos so/ /de bzhin du sems dang sems las byung ba rnams kyang rang gi ngo bo rtog par bya ba la shes pa gzhan la mi ltos pa yin no/ /de'i phyir rang grub pa'i ngo bo rnams ni bdag nyid la mngon sum gyi tshad ma yin no/ /yang dag pa'i don bsgoms pa'i rab kyi mdza' las byung ba rnal 'byor pa'i shes pa'o zhes bya ba la yang dag pa ni phyin ci ma log pa'i don te/ 'phags pa'i bden pa bzhi po dag go /de bsgoms pa ni yang dag pa'i don bsgoms pa ste/ bsgoms pa zhes bya ba ni goms pa'o/ /de'i rab ni yang dag pa'i don bsgoms pa'i rab ste/ dran pa nye bar bzhag pa dag dro bar gyur pa dang/ rtse mo dang/ bzod pa'i gnas skabs so/ /de'i mdza' ni yang dag pa'i don bsgoms pa'i rab gyi mdza' ste/ mdza' ni chos kyi mchog rnams so/ /de las skyes pa ni yang dag pa'i don bsgoms pa'i rab kyi mdza' las byung ba'o/ /rnal 'byor ni ting nge 'dzin la bya'o/ /de gang dag la yod pa de dag ni rnal 'byor pa rnams so/ de dag gi shes pa ni rnal 'byor pa'i shes pa ste/ 'di ltar de bsgoms pa'i stobs kyis 'byung ba ni 'byung ba dang/ 'byung ba dang/ 'byung bar 'gyur pa'i dngos po rnams gsal bar snang ba dang/ ma nor pa'i rnam pa dang ldan par 'byung ste/ dper na lha la sogs pa'i byin gyis brlabs kyis mthus rmi lam bden par rmis pa rnams kyi shes pa byung ba dang/ 'byung bar 'gyur ba'i dngos po'i rnam pa can ma nor bar 'byung ba de bzhin du/ rnal 'byor gyi mthus bsam gtan pa rnams kyi shes pa 'das pa dang/ ma 'ongs pa dang/ thag ring ba dang/ bar du chod pa dang/ phra mo'i dngos po yul gsal bar snang zhing ma nor ba'i rnam pa dang ldan pa 'byung ste/ de lta bas na mngon sum gyi tshad mar 'dod do/ 'dir sbyor ba ni sems rtse gcig pa lhag pa med pa thob pa rnal 'byor pa'i dbang phyug rnams kyi shes pa dngos po byung ba dang/ 'byung bar 'gyur ba'i yul dang ldan pa ni byung ba dang 'byung bar 'gyur ba'i dngos po dpag tu med pa dag ma nor bar ston pa'i rgyu yin pa'i phyir tshad ma yin te 'byung po dang gdon khyad par can babs pa'i shes pa bzhin no/ /gang dag tshad mar mi rung ba de ni byung ba dang/ 'byung bar 'gyur ba'i dngos po dpag tu med pa dag ma nor par ston pa'i rgyur yod mi 'gyur ste/ dper na smyon pa'i shes pa bzhin no/ /thob par byed pa med na byung ba dang 'byung bar 'gyur ba'i dngos po dpag tu med pa dag ma nor bar ston pa'i rgyu nyid du mi 'thad pa ni gnod par byed pa'i tshad ma yin no/ /'dod rgyal gyis ni dpag tu med pa ma nor bar ston mo srid do/ /de'i rnam par bshad pa ni/ dper na 'byung po dang/ gdon khyad par can babs na byung ba dang/ 'byung bar 'gyur pa'i dngos po rnams lung stan par byed pa de bzhin du rnal 'byor pa rnams la yang byung ba dang/ 'byung bar 'gyur pa'i dngos po ma nor bar lung ston par dmigs so/ /dper na a ru ra la sogs pa ma 'ongs pa'i nad bzlog pa la nus pa dang/ smin pa la sogs par drang srong rnams kyis ma nor bar lung bstan pa dmigs pa bzhin no/ /yang dper na bcom ldan 'das shAkya thub pa'i bstan pa la ma 'ongs pa'i ltas bcu lung bstan pa bdon par dmigs pa dang/ ma khol lung bstan pa dang/ dus 'grib par lung bstan pa dang/ rgyal po mya ngan mod la sogs pa lung bstan pa dang/ re ba'i tshal dang/ kha che la sogs pa'i yul phyin ci ma log par lung bstan par dmigs pa lta bu'o/ /yul la log par rtog pa bsal ba'i phyir/ de'i yul ni rang gi mtshan nyid yin te zhes bya ba smos te/ mngon sum gyi tshad ma bstan pa gang yin pa de'i yul ni rang gi mtshan nyid kho na yin par blta bar bya'i spyi'i mtshan nyid ni ma yin te/ spyi ni dngos po med pa yin pa dang/ mngon sum ni dngos po'i rang gi ngo bo la dmigs pa'i phyir ro/ /rang gi mtshan nyid kyang ji lta bu zhig yin par khong du chud par bya zhe na/ de'i phyir don gang nye ba dang/ mi nye ba dag las shes pa la snang ba tha dad pa de ni rang gi mtshan nyid do zhes bya ba smos so/ /nye ba ni yul rung ba na 'dug pa'o/ /mi nye ba ni yul rung ba ma yin pa na 'dug pa dang/ thams cad kyi thams cad du med pa'o/ /nye ba dang nye ba ma yin pa na nye ba dang mi nye ba'o/ /de gnyis kyi ni shes pa la rnam par gsal ba dang/ mi gsal bar bye brag tu byed de/ nye na ni gsal bar snang ba'i shes pa 'byung ngo/ /nye ba ma yin na ni gsal ba ma yin pa'i shes pa 'byung ngo/ /don gang shes pa la snang ba bye brag tu byed pa de ni rang gi mtshan nyid yin no/ /dngos po don dam par yod pa mngon sum gyi yul ma yin nam/ ji ltar na rang gi mtshan nyid yul zhes bya zhe na/ de'i phyir de nyid don dam par yod pa ste zhes bya ba smos te/ de ni don yang yin la dam pa yang yin pas don dam pa'o/ /dam pa zhes bya ba ni bcos ma ma yin pa ste btags pa ma yin pa zhes bya ba'i tha tshig go /don dam par yod pa na don dam par yod pa ste/ rang gi mtshan nyid don dam par yod pa zhes bya'o/ /de bas ji skad brjod pa'i skyon du mi 'gyur ro/ /ci'i phyir rang gi mtshan nyid nyid don dam par yod pa yin no zhes bya zhe na/ de'i phyir dngos po ni don byed nus pa'i mtshan nyid kho na yin pa'i phyir ro zhes bya ba smos te/ don zhes bya ba ni dgos pa'o/ /byed pa ni bya ba'o/ /don byed pa ni don byed pa ste/ dogs pa byed ces bya ba'i tha tshig go/ der nus pa ni don byed nus pa ste/ dngos po gang don byed nus pa'i mtshan nyid kyi rang bzhin yin pa de ni don byed nus pa'i mtshan nyid do/ /de'i ngo bo ni don byed nus pa'i mtshan nyid kho na'o/ /de lta bas na don byed nus pa'i mtshan nyid yin pa'i phyir/ 'di skad du gang don byed nus pa de ni dngos po zhes bya la/ rang gi mtshan nyid kyis don byed do zhes bstan par 'gyur te/ de'i phyir rang gi mtshan nyid don dam par yod pa'o/ /gzhan ni spyi'i mtshan nyid de zhes bya ba ni rang gi mtshan nyid kyi rang bzhin bshad pa las gzhan pa'i gzhal bya gang yin pa de ni spyi'i mtshan nyid de/ don gang nye ba yang rung mi nye yang rung shes pa rnam pa gcig kho nar 'gyur pa'o/ /de ni rjes su dpog pa'i yul yin no zhes bya ba ni spyi'i mtshan nyid ni rjes su dpag pa'i yul kho na ste/ rjes su 'gro ba dang ldog pa dang ldan pa nyid kyis khyab pa'i phyir ro/ /'dir ni skabs ma yin yang tshig mang por 'gyur du dogs pas bshad de/ 'di ltar 'dir ni rang gi mtshan nyid brjod pa'i skabs su babs pas mtshan nyid de las bzlog na rtogs par slabs spyi'i mtshan nyid smos te/ de ni rjes su dpag pa'i yul yin no zhes tshig nyung ngur bya ba'i phyir bkod do/ /gzhan du na ni rjes su dpag pa'i yul ston par tshig 'di dag thams cad yang bzlas dgos par 'gyur ro/ /'bras bu la log par rtog pa bsal ba'i phyir/ mngon sum gyi shes pa de nyid tshad ma'i 'bras bu ste zhes bya ba smos so/ /de'i 'brel pa ni 'di yin te/ gal te mngon sum tshad mar 'dod na/ de'i tshe gzhal bya gzugs la sogs pa la yongs su dpyod pa'i mtshan nyid tshad ma'i 'bras bu yin par 'gyur te/ dper na sta res shing la sogs pa bcad par bya ba la dum bu gnyis su 'gyur ba 'bras bu mthong ba bzhin no/ /de'i phyir mngon sum gyi shes pa de nyid tshad ma'i 'bras bu ste zhes bya ba smos te/ mngon sum gyi shes pa de nyid tshad ma'i 'bras bu yin gyi/ mngon sum las gung na 'bras bu med do/ /mngon sum gyi 'bras bu'i ngo bo nyid yin no zhes bya ba de ci'i phyir snyam pa la/ de'i phyir don rtogs pa'i ngo bo yin pa'i phyir ro zhes bya ba smos te/ rtogs pa ni gtan la phebs pa'o/ /ngo bo rang bzhin de dang ldan pa'i mngon sum gang yin pa de ni don rtogs pa'i ngo bo'o/ /de'i dngos po ni don rtogs pa'i ngo bo kho na ste/ de'i phyir don rtogs pa'i ngo bo yin pa'i phyir ro/ /de ni 'di skad du tshad ma dang gzhal byar tha snyad btags pa la don gtan la 'bebs pa'i mtshan nyid ni 'bras bu yin par 'gyur te/ shes pa ni don gtan la 'bebs pa'i rang bzhin yin la/ mngon sum yang shes pa'i rang bzhin yin par 'dod do/ /de lta bas na mngon sum ni don gtan la 'bebs pa'i rang bzhin yin pa'i phyir mngon sum nyid 'bras bu'i rang bzhin yin no zhes bya bar rig par bya'o zhes bstan par 'gyur ro/ /gal te mngon sum nyid 'bras bu'i rang bzhin yin na'o/ /na tshad ma gang zhig yin par rig par bya snyam pa la/ de'i phyir don dang 'dra ba ni 'di'i tshad ma ste zhes bya ba smos te/ 'dra ba ni mthun pa la bya'o/ /'di'i zhes bya ba ni mngon snyam gyi ste don gyi rnam pa can gyi mngon sum gang yin pa de nyid tshad ma yin no zhes bya ba'i tha tshig go /don dang 'dra ba tshad ma yin par ci mngon snyam pa la/ de'i phyir de'i dbang gis don rtogs par 'grub pa'i phyir ro zhes bya ba smos te/ gang gi phyir don dang 'dra ba'i dbang gis gtan la phebs pa de'i phyir 'dra ba de nyid tshad ma yin te/ 'di ltar 'di ni sngon por rtogs pa yin gyi/ ser po ni ma yin no zhes bya bar rnam par bzhag pa de'i rgyu gang yin pa de tshad ma yin par 'dod do/ dbang po ni rnam par bzhag pa 'di byed pa mi nus te/ 'di ltar dbang/ po de ni shes pa thams cad kyi thun mong gi rgyu yin pas/ de'i phyir so sor nges pa'i rnam par bzhag pa byed nus par ji ltar 'gyur/ gal te dbang po de sngon por shes pa kho nar skyed par byed la/ ser po la sogs par shes pa ni mi skyed na ni/ de'i tshe rnam par gzhag pa byed nus par 'gyur/ /nye ba yang thun mong yin pa'i phyir dbang po bzhin te/ rnam par bzhag pa'i rgyu ma yin no/ /'dra ba ni/ thun mong ma yin pa'i phyir so sor nges pa'i rnam par bzhag pa'i rgyur 'gyur te/ 'di ltar sngon po'i rnam par shes pa la sngon po'i rnam pa gang yin pa ni ser po la sogs par shes pa la med pas rnam par bzhag pa byed par 'gyur ro/ /gang gi tshe sngon po'i rnam pa yin pa'i phyir/ 'di ni sngon por rtogs pa yin gyi/ ser po ni ma yin no snyam pa de'i phyir don dang 'dra nyid tshad ma yin no/ /rigs pa'i thigs pa rgya cher 'grel pa slob ma la phan pa las le'u dang po'o// //mngon sum dang rjes su dpag pa'i bye brag gis yang dag pa'i shes pa rnam pa gnyis su bstan pa de la mngon sum ni spros pa dang bcas te bshad zin to/ /rjes su dpag pa bshad par bzhed nas/ rjes su dpag pa ni rnam pa gnyis te zhes bya ba smos te/ rjes su dpag pa ni rnam pa gnyis su rtogs par bya'o/ /shes pa dang brjod pa'i ngo bo kho nas rang dang gzhan gyi don gyi rjes su dpag pa gnyis shin tu tha dad pa'i phyir tha mi dad pa'i mtshan nyid ni cung zad kyang med na/ gang gis ni sngar mtshan nyid brjod par bya/ rab tu dbye ba bya ba ni so sor nges pa'i mtshan nyid bde blag tu brjod par nus pas de'i phyir sngar rab tu dbye ba bstan to/ /rang gi don dang/ gzhan gyi don to zhes bya ba ni bye brag gis rnam pa gnyis kho nar ston par byed do/ /'dir don zhes bya ba ni dgos pa la bya ste/ rang gi dgos pa dang/ gzhan gyi dgos pa zhes bya ba'i tha tshig go / gang gis bdag nyid kyi rtogs par 'gyur ba de ni rang gi don yin la/ gang gi gzhan la go bar byed pa de ni gzhan gyi don yin par khong du chud par bya'o/ /de la rang gi don ni rjes su dpag par bya ba la tshul gsum pa'i rtags las shes pa gang yin pa ste zhes bya ba ni 'di tshul gsum pa can yin pas na 'di ni tshul gsum pa'o/ /'dis don mtshon par byed pas na rtags so/ /de ni rjes su dpag par bya ba yin pas rjes su dpag par bya'o/ /rjes su dpag par bya ba la mtshan nyid gsum pa'i rgyu las shes pa skye ba gang yin pa de ni rang gi don gyi rjes su dpag pa zhes bya'o/ /rtags ltar snang ba las shes pa skye ba gang yin pa de rjes su dpag pa nyid yin pa bsal ba'i phyir tshul gsum pa zhes bya ba smos so/ /rtags shes pa dang dngos su rjes su dpag pa nyid yin pa bsal ba'i phyir/ rjes su dpag par bya ba smos so/ /shes pa smos pa ni rtags rjes su dpag pa dngos su 'gyur ba bsal ba'i phyir ro/ /gal te rjes su dpag par bya ba'i yul shes pa tshad ma yin par 'dod na 'o na 'bras bu gang zhig yin snyam pa la de'i phyir/ 'dir yang tshad ma'i 'bras bu rnam par bzhag pa ni mngon sum dang 'dra'o zhes bya ba smos te/ 'di ltar mngon sum la shes pa de nyid tshad ma'i 'bras bur bshad pa de bzhin du 'dir yang rjes su dpag pa'i shes pa nyid tshad ma'i 'bras bu yin te/ don gtan la 'bebs pa'i rang bzhin can yin pa'i phyir ro/ /ji ltar mngon sum gyi don dang 'dra ba tshad ma yin pa de bzhin du rjes su dpag pa'i don dang 'dra ba nyid tshad ma yin te/ de'i dbang gis don gtan la 'bebs pa 'grub pa'i phyir ro/ /tshul gsum pa'i rtags las zhes bshad pa/ tshul gsum po de gang yin snyam pa la de'i phyir/ tshul gsum pa nyid kyi rtags ni zhes bya ba smos te/ tshul gsum pa'i dngos po ni tshul gsum pa nyid do/ /rjes su dpag par bya ba la yod pa nyid dang zhes bya ba ni 'og nas 'byung ba'i rjes su dpag par bya ba'i mtshan nyid la yod pa nyid ni tshul gcig yin te/ de la yod pa zhes smos pas ni mig gis bzung ba yin pa'i phyir ro zhes bya ba la sogs pa bkag go /bsnan pa smos pa ni phyogs la phyogs gcig ma grub pa la sogs pa bsal to/ /mthun pa'i phyogs nyid la yod pa zhes bya ba ni rigs mthun pa la yod pa nyid tshul gnyis pa yin te/ 'dir yod pa zhes smos pas ni thun mong ma yin pa'i ma nges pa bsal to/ /bsnan pa smos pas ni thun mong la ma nges pa bsal to/ /gnyi ga smos pas ni 'gal ba bsal to/ /mi mthun pa'i phyogs la med pa nyid ces bya ba ni/ rigs mi mthun pa la gcig tu med pa nyid ni tshul gsum pa yin te/ 'dir med pa zhes smos pas ni thun mong la ma nges pa dang 'gal pa bsal to/ /bsnan pa smos pas ni mi mthun pa'i phyogs kyi phyogs gcig la yod pa yongs su spangs so/ /nges pa'o zhes bya ba ni tha mar smos pa'i phyir ro/ /gsum char la yang nges pa nyid rig par bya'o/ /tshul gsum po de dag ni bdag nyid kyi tshad ma ji lta bu dag gis nges pa yin par gzung bar bya'o/ /gzhan du na ni rjes su dpag par bya ba la yid ches par bya bar mi nus pa nyid do/ /rjes su dpag par bya ba yang gang yin snyam pa la de'i phyir rjes su dpag par bya ba zhes bya ba ni 'dir shes par 'dod pa'i bye brag dang ldan pa'i chos can no zhes bya ba smos te/ 'dir zhes bya ba ni gtan tshigs kyi mtshan nyid la'o/ /shes par 'dod pa ni rtogs par 'dod pa'o/ /bye brag ces bya ba ni khyad par la bya'o/ /gang la shes par 'dod pa'i bye brag yod pa de ni shes par 'dod pa'i bye brag dang ldan pa'o/ /chos rnams gang la yod pa de ni chos can no/ /des na 'di skad du chos can gang gi bye brag 'ga' zhig rtogs par 'dod pa'i chos can de ni rjes su dpag par bya ba yin la/ de ni gtan tshigs kyi mtshan nyid kyi skabs su yin par khong du chud par bya'o zhes bstan par 'gyur ro/ /gzhan du ni chos kyis khyad par du byas pa'i chos can ni rjes su dpag par bya ba yin no/ /'o na mthun pa'i phyogs gang yin snyam pa la/ mthun pa'i phyogs ni bsgrub par bya ba'i chos kyi spyi dang mthun pa'o zhes bya ba smos te/ mthun par dpag pa ni mthun pa'o/ /shes pa 'dra bas yongs su bcad par bya ba yin te/ 'dra ba zhes bya ba'i tha tshig ste/ don 'dra ba gang yin pa de ni mthun pa'i phyogs yin no/ /rnam pa gang gis mthun zhe na/ de'i phyir 'di skad du bsgrub par bya ba'i chos kyi spyi dang zhes bya ba smos so/ /de ni bsgrub par bya ba yang yin la/ chos kyang yin pas bsgrub par bya ba'i chos te/ de'i spyi ni bsgrub par bya ba'i chos kyi spyi'o/ /bsgrub par bya ba'i chos kyi bye brag ni don so sor nges pa'i phyir/ de dang ni 'gal yang mthun pa ma yin pas/ bsgrub par bya ba'i chos kyi spyi dang zhes bya ba smos so/ /mi mthun pa'i phyogs kyang gang yin snyam pa la/ de mthun pa'i phyogs ni mthun pa'i phyogs ma yin ste zhes bya ba smos te/ gang mthun pa'i phyogs ma yin pa de thams cad ni mi mthun pa'i phyogs zhes bya'o/ /de la gzhan pa zhes bya ba ni mthun pa'i phyogs las gzhan pa gang yin pa ste/ dper na tshe? ba'i reg pa bsgrub par bya ba la tsha ba yang ma yin grang ba yang ma yin pa'i dngos po lta bu'o/ /de dang 'gal ba zhes bya ba ni mthun pa'i phyogs de dang 'gal ba ste/ dper na tsha ba'i reg pa kho na bsgrub par bya ba la grang ba'i dngos po lta bu'o/ /de med pa'o zhes bya ba ni mthun pa'i phyogs med pa ste/ dper na mdo sde pa'i mi rtag pa nyid sgrub par byed pa la mi rtag pa nyid med pa tsam zhig mi mthun pa'i phyogs yin pa lta bu ste/ nam mkha' la sogs pa la rtag par de gang yang khas mi len pa'i phyir ro/ /don rnam pa gsum car mthun pa'i phyogs ma yin pas mi mthun pa'i phyogs shes bya ste med pa ni dngos su mthun pa'i phyogs ma yin no/ /gzhan pa dang 'gal ba gnyis ni brgyud pas mthun pa'i phyogs med pa nyid do/ /ji skad du bshad pa'i gtan tshigs kyis mtshan nyid dang ldan pa'i gtan tshigs ni du zhig snyam pa la de'i phyir/ tshul gsum 'dag ni rtags gsum kho na dang ldan pa zhes bya ba smos te/ ji skad bstan pa'i tshul gsum ni gsum kho na la srid de lhag pa med do ni zhes bya ba ni bsnan pa'i don te rtags gsum tsar la yang gsum po dag blta bar bya'i/ tshul re re 'am/ tshul gnyis gnyis par ni ma yin no/ /rtags gsum yang gang dag yin snyam pa la/ mi dmigs pa dang rang bzhin dang 'bras bu'o zhes bya ba smos te/ rang rang gi ming gis rtags gsum ston par byed do/ de la mi dmigs pa ni zhes bya ba ni re shig mi dmigs pa'i rang gi ngo bo ston par byed do/ /dper na zhes bya ba ni nye bar mtshon pa'i tshig go/ phyogs kyi bye brag 'ga' zhig na bum pa med de zhes bya ba ni phyogs nye bar bzhag pa'i tshig yin no/ /de la 'brel pa ni 'di ltar bya ste/ phyogs kyi bye brag 'ga' zhig na bum pa med de zhes bya ba la 'ga' zhig na zhes bya ba des ni chos can bstan to/ /phyogs kyi bye brag ces byas pas ni de nyid bye brag tu byas pa ste/ rgol ba 'dod pa'i phyogs na bum pa med do/ /sa bstan par 'gyur gyi/ phyogs thams cad na bum pa med par sgrub pa yang ma yin la/ gang yang rung ba zhig na yang ma yin no/ /dmigs pa'i rig byar gyur pa las zhes bya ba des ni gtan tshigs kyi bye brag ston to/ /dmigs pa zhes bya ba ni shes pa yin par ston to/ /de ni rig par bya ba yin pas rig bya ste yul zhes bya ba'i tha tshig go /dmigs pa'i rigs bya ni dmigs pa'i rig bya'o/ /der gyur pa ni dmigs pa'i rigs byar gyur pa ste/ dmigs pa'i yul nyid du rung zhes bya ba'i tha tshig go/ mi dmigs pa'i phyir ro zhes bya ba lta bu'o/ /zhes bya ba ni mi snang ba'i phyir ro zhes bya ba'i don to/ /'di skad du phyogs la sogs pa ni snang la mtshungs par rung ba'i ngo bo bum pa la sogs pa ni mi snang ba'i phyir te/ bum pas stong pa'i sa gzhi snang ba'i phyir ro zhes bya ba'i tha tshig go / 'o na dmigs pa'i rig byar gyur pa de yang gang yin snyam pa la de'i phyir/ dmigs pa'i rig byar gyur pa ni dmigs pa'i rkyen gzhan tshang ba nyid dang/ rang bzhin khyad par can zhes bya ba smos te/ dmigs pa zhes bya ba ni shes pa'o/ /de'i rkyen gzhan ni dmigs pa'i rkyen gzhan dag go/ dmigs pa'i rkyen ni der bum pa nyid do/ /de las gzhan pa dag ni de ma thag pa'i rkyen la sogs pa dag go/ de dag tshang ba ni dmigs pa'i rkyen gzhan tshang ba nyid de/ tshogs pa ni tshang ba'i sgrar brjod do/ /khyad par can gyi rang bzhin ni rang bzhin khyad par can te/ de gnyis ni dmigs pa'i rig byar gyur pa'i sgrar brjod do/ /'o na rang bzhin khyad par can gang yin snyam pa la/ rang bzhin gang yod la dmigs pa'i rkyen gzhan dag kyang yang na mngon sum kho nar 'gyur pa'o zhes bya ba smos te/ dngos po gang zhig yod cing mig la sogs pa nye bar gyur la bskal pa rnam pa gsum gyis ma bskal na mthong bar nus pa de ni 'dir rang bzhin khyad par can du bzhed de/ des na 'di skad du/ mig la sogs pa la tshogs kyang bltar rung ba bum pa mi dmigs pa'i phyir/ 'di na bum pa med do zhes bya bar bstan par 'gyur ro/ /rang bzhin gyi gtan tshigs kyi mtshan nyid bstan par bya ba'i phyir/ rang bzhin ni rang yod pa tsam du gyur pa bsgrub par bya ba'i chos kyi gtan tshigs te zhes bya ba smos te/ yod pa tsam zhes bya ba ni bsgrub pa yod pa tsam la bya'o/ /yod pa tsam du gyur pa'i ngang tshul can gang yin pa de ni yod pa tsam du gyur pa'o/ /yod pa tsam du gyur pa bsgrub par bya ba'i chos de la rang gi gtan tshigs yin par khong du chud par bya'o/ /dper na shing sha pa yin pa'i phyir/ 'di ni shing ngo zhes bya ba lta bu'o/ /zhes bya ba la shing ni shing sha pa tsam dang 'brel pa yin te/ de lta bas na des sgrub par byed do/ /'bras bu ni dper na du ba yod pa'i phyir/ de na me yod do zhes bya ba lta bu'o zhes bya ba ni 'bras bu'i gtan tshigs ston par byed de/ me la rag lus te skye ba'i du ba gang na yod pa de na me yod par khong du chud par byed do/ /'o na ci'i phyir rtags gsum du rnam par bzhag snyam pa de'i phyir 'di la gnyis ni dngos po sgrub pa'o/ /gcig ni dgag pa'i gtan tshigs so zhes bya ba smos te/ gang gi phyir dngos po dang/ dngos po med pa'i ngo bos rjes su dpag par bya ba rnam pa gnyis yin pa'i phyir/ dngos po sgrub pa dang/ dngos po med pa sgrub pa'i gtan tshigs kyang gnyis so/ /rjes su dpag par bya ba la dngos po'i ngo bo yang rnam pa gnyis te/ dngos po dang tha dad pa dang/ tha mi dad pa'o/ /rjes su dpag par bya ba'i dngos po'i ngo bo rnam pa gnyis yod pas dngos po sgrub pa yang rnam pa gnyis su 'gyur te/ 'di ltar bsgrub par bya ba'i gtan tshigs dngos po dang tha dad pas kyang bsgrub par bya ba tha mi dad pa bsgrub par mi nus la/ bsgrub par bya ba'i gtan tshigs tha mi dad pas kyang bsgrub par bya ba tha dad pa sgrub par mi nus te/ de la bsgrub par bya ba dang/ sgrub par byed pa tha mi dad pa ni rang bzhin gyi gtan tshigs yin no// sgrub par bya ba dang/ sgrub par byed pa tha dad pa ni 'bras bu'i gtan tshigs yin no/ /mi dmigs pa ni dngos po med pa'i gtan tshigs yin no/ /de bas na gang gi phyir gnyis ni dngos po sgrub par byed la/ gcig ni dgag pa sgrub par byed pa de'i phyir rtags gsum ste/ gnyis ni dngos po sgrub pa yin la/ gcig ni dgag pa'i gtan tshigs kho na yin par blta bar bya'o/ /'o na ci'i phyir/ dngos po sgrub par byed pa gnyis kho na yin snyam pa la/ de'i phyir/ rang bzhin 'brel pa yod na/ don gyis don go bar byed de zhes bya ba smos te/ rang bzhin dang 'brel pa dang/ rang bzhin gyi ngo bos 'brel pa ni rang bzhin gyi 'brel pa ste/ de yod na rtags kyi mtshan nyid kyi don gyis bsgrub par bya ba'i mtshan nyid kyi don yid ches par byed do zhes bya ba'i tha tshig go /ci'i phyir rang bzhin 'brel pa kho na yod na/ don gyis don go bar byed ce na/ de'i phyir/ de dang ma 'brel na der mi 'khrul par nges pa med pa'i phyir zhes bya ba smos te/ gang gi phyir gang zhig dang ma 'brel pa de ni/ der mi 'khrul par gdon mi zab ma yin pa de'i phyir/ 'brel ba yod na go bar byed pa dang/ go bar bya ba yin par rig par bya'o/ /gzhan du ni ma yin no/ /da ni gang zhig gang dang 'brel pa dang/ ngo bos 'brel pa gang yin pa de bstan par bya ba'i phyir/ bsgrub par bya ba'i don la rtags 'brel pa de yang dngos su na 'grub par bya ba'i don gyi rang bzhin yin pa'i phyir ro zhes bya ba smos te/ gang gi phyir don dam par na/ rtags 'ga' zhig bsgrub par bya ba'i don gyi rang bzhin yin pa de'i phyir de ni de dang 'brel pa yin no/ /sgrub par bya ba'i don las byung ba'i phyir te zhes bya ba ni gang gi phyir/ rtags 'ga' zhig bsgrub par bya ba'i don las byung ba yin pa de'i phyir/ de ni de dang 'brel pa yin no/ /ci'i phyir na/ bsgrub bar bya ba'i don gyi rang bzhin dang/ bsgrub par bya ba'i don las byung ba kho na rtags kyi 'brel pa nyid du brjod ce na/ de'i phyir/ de'i rang bzhin ma yin pa dang/ de las byung ba ma yin pa de ni de dang 'brel pa med pa'i rang bzhin yin pa'i phyir ro zhes bya ba smos te/ gang zhig bsgrub par bya ba dang lhan cig tu rang bzhin gcig pa ma yin pa dang/ gang yang bsgrub par bya ba'i don las byung ba ma yin pa de ni de dang rnam pa gang gis 'brel par brjod/ ma 'brel pa ni rtags ma yin te/ ha cang thal bar 'gyur ba'i phyir ro/ /de bas na de'i bdag nyid dang/ de las byung ba nyid kho nas 'brel pa nyid du brjod par bya'i/ /gzhan du ni ma yin no/ /gal te de lta yin du zin kyang/ de las ci zhig tu 'gyur zhe na/ de'i bdag nyid dang/ de las byung ba de gnyis ka rang bzhin dang 'bras bu kho na yin te zhes bya ba smos te/ de'i bdag nyid ni rang bzhin gyi gtan tshigs kyi 'brel pa yin no/ /de las byung ba ni 'bras bu'i gtan tshigs kyi 'brel pa yin te/ de'i phyir/ de gnyis kho nas dngos po 'grub pa'o zhes bya ba smos so/ /gang gi phyir de'i bdag nyid dang/ de las byung ba gnyis rang bzhin dang 'bras bu kho na yin pa de'i phyir/ de gnyis kho nas dngos po sgrub par nus kyi/ 'brel pa med pa gzhan gyis ni ma yin te/ de lta bas na dngos po sgrub pa ni gnyis kho na'o zhes bya bar gnas so/ /gcig ni dgag pa'i gtan tshigs so zhes bshad pa gang yin pa de gang zhe na/ de'i phyir/ dgag pa sgrub pa yang ma dmigs pa ji skad smos pa kho nas 'gyur zhes bya ba smos te/ dmigs pa'i rig byar gyur pa la mi dmigs pa zhes bshad pa gang yin pa gcig po de gnyis dgag pa'i gtan tshigs yin no/ /ci'i phyir zhe na de'i phyir/ dngos po yod na ni de mi srid pa'i phyir ro/ /zhes bya ba smos te/ 'di ltar dngos po yod par gyur na de mi srid pa nyid do/ /mi dmigs pa ji skad du bshad pa nyid dngos po med pa'i tha snyad sgrub par byed pa yin no zhes bya ba de gang las she na/ gzhan du na ni yul dang dus dang rang bzhin gyis bskal pa'i don dmigs pa'i rig byar ma gyur pa rnams la rang gi mngon sum log kyang dngos po med par nges pa med pa'i phyir ro/ /zhes bya ba smos te/ gal te ji skad smos pa'i khyad par la mi brten na/ de'i tshe dmigs pa'i rig byar gyur pa ma yin pa yul dang/ dus dang/ rang bzhin gyis bskal pa dag gis bskal pa'i don gang dag yin pa de dag la sgrub pa po'i mngon sum log pa gang yin pa des dngos po med par nges par byed mi nus so/ /ni zhes bya ba ni/ gang gi phyir zhes bya ba ni don yin par khong du chud par bya'o/ /yul dang dus dang rang bzhin rnams ni yul dang dus dang rang bzhin dag ste/ de dag gis bskal ba la ni de skad ces brjod do/ /de la yul dpag tu med pas bar du chod pa ni yul gyis bskal pa rnams so/ /bskal pa mi nyung ba zhig gis bar du chod par dag ni dus kyis bskal pa rnams so/ /dbang pos mi sod pa'i dngos po rnams ni rang bzhin gyis bskal pa dag yin par khong du chud par bya'o/ /de'i phyir 'dir dmigs pa'i rig byar ma gyur ba zhes bya ba des ni dmigs pa'i rkyen tshang ba med par ston to/ /yul dang dus dang rang bzhin gyis bskal ba zhes bya ba des ni rang bzhin khyad par can gyis dngos po med par ston par byed de/ de lta bas na mi dmigs pa ji skad bshad pa nyid dgag pa sgrub pa yin no zhes bya bar gnas so/ /de ltar re zhig dus kyi bye brag khas mi blang bar ji skad smos pa'i mi dmigs pa ni dgag pa sgrub pa nyid yin par brjod do/ /da ni dus kyi bye brag yongs su smos pas de bsgrub pa nyid du bstan bar bya ba'i phyir/ mi rmongs par dran pa'i 'du byed ces bya ba smos te/ dran pa skyed bar byed pa'i 'du byed yin te/ dran ba'i sa bon zhes bya ba'i tha tshig go/ mi rmongs pa dran pa'i 'du byed bum pa la sogs pa gang la yod pa de la de skad ces brjod do/ /sgrub pa po'i mngon sum 'das pa dang da ltar gyi log ces bya ba ni 'das pa dang/ da ltar gyi dus ni stong pa'i ngo bo'i phyogs la sogs pa dmigs pa gang yin pa'i phyogs la sogs pa de dang mthun par rung ba'i ngo bo bum pa la sogs pa gang yin pa de ni 'das pa dang/ da ltar gyi phyogs dang mthun par rung ba'i ngo bo yin pa'i phyir 'das pa dang da ltar du bstan to/ /gzhan du na ni phyogs la sogs pa ni bum pa la sogs pa med na/ 'das pa nyid du 'am/ da ltar nyid du lta ga la 'gyur/ sgrub pa po ni lhas byin la sogs pa'o/ /de'i mngon sum gyis yongs su gcad par bya ba yin pa'i phyir/ bum pa la sogs pa ni mngon sum yin no/ /'dir yang mngon sum gyis yongs su bcad par bya ba phyogs la sogs pa dang mthun par rung ba'i ngo bo yin pa'i phyir/ bum pa la sogs pa mngon sum nyid du bstan to/ /don dam par na de na ? bum pa la sogs pa med na ji ltar mngon sum du 'gyur/ de skad du bshad pa'i tshul gyis ni sgrub pa po'i mngon sum 'das ba dang/ da ltar gyi log pa ni ma yin pa la brten pa'i phyir/ gzhan gyi dngos po'i mtshan nyid yin te/ bum pa la sogs pas stong pa'i sa gzhi'i rang bzhin no zhes bya ba'i tha tshig go/ dngos po med pa'i tha snyad 'jug ste zhes bya ba la dngos po med pa'i tha snyad ni 'di na bum pa med do snyam pa de lta bu'i rnam par shes pa dang/ ngo bo de brjod pa dang dogs pa med pas phyogs la sogs pa der 'gro ba'i mtshan nyid 'jug pa'o/ /shes pa dang/ rjod pa dang/ 'jug pa'i mtshan nyid dngos po med pa'i tha snyad de ni des 'jug par byed bas na/ dngos po med pa'i tha snyad 'jug go/ de ni 'di skad du 'das pa dang/ da ltar byung ba'i yul mi dmigs pa kho na dngos po med pa'i tha snyad sgrub pa yin gyi/ ma 'ongs pa'i yul ni ma yin no zhes bstan par 'gyur ro// 'di ltar ma 'ongs pa'i dus kyi phyogs la sogs pa chos can ni mngon sum ma yin te/ stong pa'i phyogs kyi ngo bo dmigs pa'i mtshan nyid kyang dmigs par mi 'grub bo/ /'das pa'i dus la ni chos can yang mngon sum du gyur la/ bum pas stong pa'i ngo bo'i phyogs kyang dran pas/ de gnyis kyi phyir mi rmongs par dran pa'i 'du byed ces bya ba smos so/ /de bas na kha rtsang la sogs pa'i nyi ma dag la bum pa la sogs pas stong pa'i ngo bo'i phyogs la sogs pa dran pa la dngos po med pa'i tha snyad 'jug par 'gyur ro/ /da ltar gyi dus la ni chos can bum pa la sogs pas dben pa'i phyogs kyang mngon sum du 'grub ste/ de lta bas na der ni dngos po med pa'i tha snyad gdags par yang sla'o/ /mi rmongs pa'i dran pa'i 'du byed ces bya ba smos pas ni/ gtan tshigs ma grub pa yongs su bsal ba yin te/ gzhan du na ni stong pa'i ngo bo'i phyogs la sogs pa mi dran na/ mi dmigs pa nyid 'grub par mi 'gyur ro/ /'das pa dang/ da ltar zhes bya bas ni dus kyi bye brag yongs su smos par bstan to/ /sgrub pa po'i mngon sum zhes smos pas kyang sgrub pa po ma lus pa'i mngon sum bsal ba yin no/ /sgrub pa po ma lus pa'i mngon sum smos pas ni gtan tshigs 'grub par mi 'gyur ba nyid de/ sgrub pa po thams cad kyi mngon sum log pa ni phyir rgol ba la mi 'grub po/ /bshad ma thag pa'i mi dmigs pa nyid dngos po med pa'i tha snyad 'jug pa yin no zhes bya ba de gang las she na de nyid kyis dngos po med par nges pa'i phyir ro/ /zhes bya ba smos te/ dran pa ma nyams pa'i sa bon sgrub pa po'i mngon sum 'das pa dang/ da ltar byung ba'i yul gyi dngos po log pa gang yin pa de nyid kyis dngos po med pa nges par byed nus kyi/ gzhan ma 'ongs pa'i yul gyis ni ma yin no/ /de ltar re zhig sngar bshad pa'i gtan tshigs kyis mi dmigs pa'i ngo bo dang/ dus kyi bye brag bshad zin to/ /de ni sbyor ba'i bye brag bstan pa'i phyir/ de ni sbyor ba'i bye brag gis rnam pa bcu gcig ste zhes bya ba smos so/ /sbyor ba zhes bya ba ni/ mtshan nyid gsum sgrub par byed pa'i tshig brjod pa yin no/ /de ni bye brag gis mi dmigs pa rnam pa bcu gcig tu 'gyur ro// rnam pa'i bye brag bstan pa'i phyir/ rang bzhin mi dmigs pa ni zhes bya ba smos te/ rang bzhin gyi dngos po rang gi ngo bo mi dmigs pa'o/ /dpe bstan pa'i phyir/ dper na 'di na du ba med do zhes bya ba smos te/ dper na zhes bya ba ni dpe'i tshig yin te/ 'dir thams cad du blta bar bya'o/ /'di na zhes bya bas ni chos can bstan to/ /du ba med zhes bya bas ni bsgrub par bya ba'i chos bstan to/ /dmigs pa'i rig byar gyur ba las mi dmigs pa'i phyir ro zhes bya ba lta bu'o zhes bya ba ni dmigs pa'i rkyen gzhan dag ni yod na bltar rung ba'i rang bzhin du ba mi dmigs pa'i phyir ro zhes bya ba'i tha tshig go/ 'bras bu mi dmigs pa ni zhes bya ba ni 'bras bu mi dmigs so zhes bya bar tshig rnam par sbyar ro/ /dpe ni dper na 'di na du ba'i rgyu nus pa thogs pa med pa dag med de/ zhes bya ba smos te/ nus pa thogs pa med pa me dang bud shing la sogs pa du ba'i rgyu gang dag la yod pa de dag la de skad ces bya'o/ /'di na zhes bya bas ni chos can bstan to/ /du ba'i rgyu nus pa thogs pa med pa dag med ces bya bas ni bsgrub par bya ba'i chos bstan to/ /du ba med pa'i phyir ro/ /zhes bya ba lta bu'o/ /zhes bya ba ni gang gi phyir 'di na du ba med pa kho na yin pa de'i phyir zhes bya ba'i tha tshig ste/ gal te 'di na du ba'i rgyu nus pa thob pa med pa dag yod na ni du ba yang 'byung ba kho nar 'gyur ro// //bam po gnyis pa/ khyab par byed pa mi dmigs pa zhes bya ba ni khyab par byed pa na khyab par byed pa ste/ de mi dmigs pa la de skad ces bya'o/ /dper na 'di na shing med pa'i phyir shing sha pa med do zhes bya ba lta bu'o zhes bya bas ni dpe ston to/ /shing ni shing sha pa la khyab par byed pa yin te/ de ldog pa na de yang ldog par byed do/ /'di na zhes bya bas ni chos can bstan to/ /shing med pa'i phyir zhes bya bas ni gtan tshigs bstan to/ /shing sha ba med do zhes bya bas ni bsgrub par bya ba'i chos bstan to// rang bzhin 'gal ba dmigs pa zhes bya ba ni rang bzhin gyi 'gal ba ni rang bzhin 'gal ba ste/ de dmigs pa la de skad ces bya'o/ /dpe ni dper na 'di na me yod pa'i phyir grang pa'i reg pa med do zhes bya ba lta bu'o/ /zhes bya ba smos pa'o/ /'di na zhes bya bas ni chos can bstan to/ /me yod pa'i phyir zhes bya bas ni gtan tshigs bsnyad do/ /grang ba'i reg pa med do zhes bya bas ni bsgrub par bya ba'i chos bstan to/ /'di ltar me ni grang ba'i reg pa dang lhan cig par 'gal bas de yod na grang pa'i reg bzlog par byed do/ /'gal ba'i 'bras bu dmigs pa zhes bya ba ni 'gal ba'i 'bras bu ni 'gal ba'i 'bras bu ste/ de dmigs pa la de skad ces bya'o/ /dper na 'di na du ba yod pa'i phyir grang ba'i reg pa med do zhes bya ba lta bu'o zhes bya bas ni de bston to/ 'di na zhes bya ba ni chos can yin no/ /du ba yod pa'i phyir zhes bya ba ni gtan tshigs yin no/ /grang ba'i reg pa med do zhes bya ba ni bsgrub par bya ba'i chos yin no/ /grang ba'i reg pa dang 'gal ba ni me yin la/ de'i 'bras bu ni du ba yin te/ de bas na gang na du ba yod pa de na me yod pa yin la/ gang na me yod pa de na grang ba'i reg pa ga la yod/ 'gal ba khyab pa dmigs pa zhes bya ba ni 'gal bas khyab pa ni 'gal ba khyab pa ste/ de dmigs pa la de skad ces bya'o/ /dpe ni dper na dngos po 'byung pa yang 'jig par nges par 'gyur ba med do zhes bya ba smos te/ nges par 'gyur ba zhes bya ba ni gdon mi za bar 'gyur ba'i chos shes bya ba'i tha tshig go /dngos po byung ba zhes bya ba ni dngos po skyes pa zhes bya ba'i tha tshig go /dngos po byung ba 'jig pa zhes bya bas chos can bstan to/ /nges par 'gyur ba med de zhes bya bas ni bsgrub par bya ba'i chos bstan to/ /des ni 'di skad du dngos po skyes pa gang gdon mi za bar 'jig par 'gyur ba ma yin no zhes bstan par 'gyur ro/ /'di gang las she na/ rgyu gzhan la bltos pa'i phyir ro zhes bya ba smos te/ 'di ltar 'jig pa rgyu gzhan la bltos par khas len te/ rgyu gzhan la ltas pa gang dag yin pa de dag ni gdon mi za ba ma yin no/ /dper na ras la tshon lta bu'o/ /'dir yang nges par 'gyur ba nyid dang ni nges par 'gyur ba ma yin pa nyid du lhan cig par 'gal la/ des ni rgyu gzhan ltos pa la khyab pas/ de bas na gang na rgyu gzhan na bltos pa nyid yod pa de na nges par 'gyur pa ma yin pa nyid do/ /gang na nges par 'gyur ba ma yin pa nyid yod pa de na nges par 'gyur ba nyid lta ga yod/ 'bras bu 'gal ba dmigs pa zhes bya ba ni 'bras bu dang 'gal ba ni 'bras bu dang 'gal ba ste/ de dmigs pa la de skad ces bya'o/ /dpe ni dper na 'di na me yod pa'i phyir grang ba'i rgyu nus pa thogs pa med pa dag med do zhes bya ba lta bu'o zhes bya ba smos pa'o/ /'di na zhes bya ba ni chos can yin no/ /me yod pa'i phyir zhes bya ba ni gtan tshigs bstan pa'o/ /grang ba ni rgyu'i nus pa thogs pa med pa dag med do zhes bya ba ni bsgrub par bya ba'i chos bstan pa'o/ /'dir yang grang pa'i rgyu rnams kyi 'bras bu ni grang ba yin la/ grang pa ni mer lhan cig par 'gal te/ gang na me yod pa de na grang ba'i rag pa ga la yod/ gang na grang pa'i reg pa med pa de na grang pa'i rgyu'i cus pa thogs pa med pa dag kyang yod re skan/ gal te de lta bu'i rnam pa dag yod na ni gdon mi za bar grang bar yang 'gyur ro/ /khyab par byed pa 'gal ba dmigs pa zhes bya ba ni khyab par byed pa dang 'gal ba ni khyab par byed pa 'gal ba ste/ de dmigs pa la de skad ces bya'o/ /dpe ni dper na 'di na me yod pa'i phyir ba mo'i reg pa med do zhes bya ba lta bu'o zhes bya ba smos so/ /'di ni zhes bya bas ni chos can bstan to/ /me yod pa'i phyir zhes bya bas ni gtan tshigs bstan to/ /ba mo'i reg pa med do zhes bya bas ni bsgrub par bya ba'i chos bstan to/ /ba mo'i reg pa ni kha ba'i reg pa'o/ /de la khyab par byed pa ni grang ba'i reg pa'o/ /de dang lhan cig par 'gal ba ni me ste/ de bas na gang la me yod pa de na grang ba'i reg pa ga la yod/ gang na grang ba'i reg pa med pa de na ba mo'i reg pa yang yod re skan/ rgyu mi dmigs pa zhes bya ba ni rgyu'i mi dmigs pa ni rgyu'i mi dmigs pa'o zhes tshig rnam par sbyar ro/ /dpe ni/ dper na 'di na me med pa'i phyir du ba med do zhes bya ba lta bu'o zhes bya ba la/ 'di na zhes bya bas ni chos can bstan to/ /me med pa'i phyir zhes bya bas ni gtan tshigs yang dag par bsgrags so/ /du ba med do zhes bya bas ni bsgrub par bya ba'i chos brjod do/ /'dir yang me'i 'bras bu ni du ba yin pas/ gang na me med pa de na du ba yod re skan/ rgyu 'gal ba dmigs pa zhes bya ba ni rgyu dang 'gal ba ni rgyu 'gal ba ste/ de dmigs pa la de skad ces bya'o/ /dpe ni/ dper na 'di na spu long zhes byed pa la sogs pa'i bye brag dag med de zhes bya ba ste/ 'di na zhes bya bas ni chos can bstan pa'o/ /spu long zhes byed pa la sogs pa med de zhes bya bas ni bsgrub par bya ba'i chos bstan pa'o/ /spu long zhes byed pa ni spu gyen du langs pa'o/ /de la sogs pa gang dag yin pa de dag ni spu long zhes byed pa la sogs pa ste/ sogs pa smos pas ni/ so tham tham byed pa dang/ lus 'dar ba la sogs pa yongs su bsdu ba'o/ /de dag ni spu long zhes byed pa la sogs pa yang yin la bye brag kyang yin pas/ spu long zhes byed pa la sogs pa'i bye brag dag ste/ skrag pa dang dga' ba la sogs pa dag kyang spu long zhes byed pa la sogs par 'gyur bas/ de bsal bar bya ba'i phyir bye brag ces smos te/ 'di la ni gang dag lhags pas nyen pa de dag yin par rtogs par bya'o/ /gdung bar byed pa'i bye brag nye ba nyid kyi phyir ro zhes bya ba la gdung par byed pa'i bye brag ni me'i bye brag go /nye ba zhes bya ba ni thag nye ba ste/ de ni gdung bar byed pa'i bye brag kyang yin la nye ba yang yin pas gdung par byed pa'i bye brag nye ste/ de'i dngos po ni de nyid do/ /de bas na gdung bar byed pa'i bye brag nye ba'i phyir me'i rnam pa ji lta bus grang ba zlog par byed nus pa de lta bu'i rnam pa bsgrub par bya ba'i phyir bye brag ces smos so/ /de bas na 'dir spu long zhes byed pa la sogs pa'i bye brag gi rgyu ni grang pa'i reg pa yin no/ /de dang 'gal ba ni me yin la/ me nye na grang ba'i reg pa zlog par byed do/ /grang ba log na spu long zhes byed pa la sogs pa'i bye brag lta yod re skan/ rgyu 'gal ba 'bras bu dmigs pa zhes bya ba ni rgyu dang 'gal ba ni rgyu 'gal ba yin la/ de'i 'bras bu ni rgyu 'gal ba'i 'bras bu ste/ de dmigs pa ni rgyu 'gal ba'i 'bras bu dmigs pa'o/ /dpe ni/ dper na phyogs 'di na du ba yod pa'i phyir/ spu long zhes byed pa la sogs pa'i bye brag dang ldan pa'i mi dang ldan pa ma yin no zhes bya ba lta bu'o zhes bya ba smos pa'o/ /phyogs 'di na zhes bya bas ni chos can bstan to/ /du ba yod pa'i phyir zhes bya bas ni gtan tshigs bstan to/ /spu long zhes byed pa la sogs pa'i bye brag dang ldan pa'i mi dang ldan pa ma yin no zhes bya bas ni bsgrub par bya ba'i chos bstan to/ /spu long zhes byed pa la sogs pa'i bye brag dang ldan pa ni/ spu long zhes byed pa la sogs pa'i bye brag dang ldan pa ste/ 'di ni spu long zhes byed pa la sogs pa'i bye brag dang ldan pa yang yin la mi yang yin pas spu long zhes byed pa la sogs pa'i bye brag dang ldan pa'i mi ste/ de phyogs gang na yod pa de ni spu long zhes byed pa la sogs pa'i bye brag dang ldan pa'i mi dang ldan pa zhes bya ba'o/ /'dir spu long zhes byed pa la sogs pa'i bye brag gi rgyu ni grang ba'i reg pa yin no/ /de dang 'gal ba ni me yin la/ me'i 'bras bu ni du ba yin te/ de bas na gang na du ba yod pa de na me yod la/ gang na me yod pa de na grang pa'i rag pa med do/ /gang na grang ba'i reg pa med pa de na grang ba'i 'bras bu spu long zhes byed pa la sogs pa dag lta yod par ga la 'gyur/ sngar ni dmigs pa'i rig byar gyur pa las mi dmigs pa gcig po dgag pa'i gtan tshigs su bshad pa ma yin nam/ 'o na ji ltar 'bras bu mi dmigs pa la sogs pa dang/ rang bzhin 'gal ba dmigs pa la sogs pa dag gis dgag par byed ce na/ de'i phyir/ 'bras bu mi dmigs pa la sogs pa mi dmigs pa la sogs pa'i sbyor ba bcu po de dag thams cad ni rang bzhin mi dmigs pa'i nang du bsdu bar 'gyur ro zhes bya ba smos te/ de dag ces bya ba ni bshad ma thag pa rnams so/ /thams cad ces bya ba ni grangs bcur yongs su chad pa rnams ma lus pa ste/ mi dmigs pa'i sbyor ba rnams ni rang bzhin mi dmigs pa'i nang du 'du bar 'gyur ro/ /rang bzhin mi dmigs pa'i sbyor ba yang gzhan la/ 'bras bu mi dmigs pa la sogs pa yang gzhan te/ 'di ltar 'bras bu mi dmigs pa la sogs pa dag la ni don gzhan dgag pa yin la/ rang bzhin 'gal ba dmigs pa la sogs pa la ni don gzhan yod pa ma yin nam/ 'o na ji ltar na de'i nang du 'du zhe na/ de'i phyir don gzhan yod pa dang dgag pa dag gis sbyor ba tha dad kyang brgyud pa'i sgo nas zhes bya ba smos te/ gal te don gzhan yod pa dang/ dgag pa dag gis sbyor ba tha dad du gyur kyang/ brgyud pas 'di'i nang du 'du bar dgongs kyi/ dngos su ni ma yin te/ 'di ltar re zhig 'bras bu mi dmigs pa dag la ni du ba med pas na/ du ba'i rgyu nus pa thogs pa med pa dag med par rtogs par 'gyur la/ gang na du ba med pa de na de'i rgyud dmigs pa'i rig byar gyur pa kho na dag mi dmigs pas/ rang bzhin mi dmigs par 'dus so/ /sgrub pa po rnams kyi bsam pa tha dad pa'i phyir ro/ /la la ni 'bras bu med pa'i sgo nas rgyu med par rtogs par 'gyur ro/ /la la ni rang bzhin med pa'i sgo nas te/ de bzhin du khyab par byed pa mi dmigs pa dang/ rgyu mi dmigs par brgyud par khong du chud par bya'o/ /rang bzhin 'gal ba dmigs pa la yang me yod pas grang ba med par rtogs par byed la/ gang na me yod pa de na dmigs pa'i rig byar gyur pa grang ba'i reg pa mi dmigs pas rang bzhin mi dmigs pa'i nang du 'du'o/ /de bzhin du 'gal ba'i 'bras bu dmigs pa la yang du bas mi bsgrubs na grang ba med par khong du chud par byed do/ /der yang dmigs pa'i reg byar gyur pa grang ba mi dmigs pas na/ rang bzhin mi dmigs pa'i nang du 'du ba nyid do/ /'gal ba khyab pa mi dmigs pa la yang rgyu gzhan la bltos pa nyid kyis nges par 'gyur ba med pa nyid bsgrubs nas/ nges par 'gyur ba nyid sel bar byed de/ de yang der dmigs pa'i rig byar gyur pa kho na mi dmigs pa zhes snga ma bzhin du 'du bar 'gyur ro/ /de ni dpe'i sgo nas rig par bya ste/ 'di ltar gos kyis tshon thams cad du snang du rung ba'i rang bzhin yin yang mi dmigs pa bzhin no/ /de bzhin du rgyu 'gal ba'i 'bras bu dmigs pa'i ga la yang du bas me bsgrubs te/ grang ba zlog par byed la/ de log na gang na yang spu long zhes byed pa la sogs pa'i bye brag dang ldan pa'i mi med par sgrub par byed de/ de yang der dmigs pa'i rig byar gyur pa'i mi de lta bu kha nas mi dmigs pas/ rang bzhin mi dmigs pa'i nang du 'du ba nyid do/ /gang dag 'bras bu dang rgyu gnyis khyab pa dang tha mi dad pa dag gis bye brag med par nye bar btags nas/ rang bzhin mi dmigs pa'i nang du 'du'o zhes brjod ba de dag gi de ni btags pas 'du ba yin gyi don dam par ni ma yin no/ /dam bcas pa'i phyogs gcig kyang gtan tshigs su 'gyur la/ brgyud pa'i don yang mi 'thad do/ /rang bzhin 'gal ba dmigs pa la sogs pa dag la yang mi mthun pa can gyi chad mas bzlog par brjod par 'du'o zhes bya ba ni/ gang zhig gang dang mthun par 'gyur/ rang gi don gyi rjes su dpag pa la ni sbyor ba ni srid pa ma yin nam/ der mi dmigs par sbyor ba'i bye brag las rnam pa bcu gcig go zhes bya ba ga las she na yang de'i phyir/ sbyor ba mthong ba goms pa las bdag nyid kyang de bzhin du rnam par bcad pa rtogs par 'gyur bas/ bdag gi don gyi rjes su dpag pa la yang bye brag bstan to zhes bya ba smos te/ sbyor ba rnams mthong ba ni rtogs pa'o/ /de yang dang du mngon du byed pa ni goms pa'o/ /de lta bas na sbyor ba rnams la shin tu goms pa'i phyir/ bdag nyid kyang gang gi tshe 'ga' zhig rnam par bcad pa rtogs par byed pa de'i tshe/ sbyor ba'i tshul kho nas rtogs par 'gyur te/ de lta bas na bdag gi don gyi rjes su dpag pa la yang mi dmigs pa'i sbyor ba'i bye brag bstan to/ /rnam par dpyad pa rtogs pa ni dgag pa yid ches pa zhes bya ba'i tha tshig go /yang na rnam par dpyad par rtogs pa ste bye brag tu rtogs pa zhes bya ba'i tha tshig go/ rang bzhin mi dmigs pa la bye brag smos kyi/ 'bras bu mi dmigs pa la sogs pa la ni de med pas de'i phyir/ ji lta na de dag ma 'khrul ba nyid yin zhe na/ de'i phyir/ med pa'i tha snyad sgrub pa'i mi dmigs pa de thams cad la rang bzhin 'gal ba la sogs pa dmigs pa dang/ rgyu la sogs pa mi dmigs pas dgag par bshad pa gang yin pa de dag ni dmigs pa'i rig byar gyur pa kho na dag las dmigs pa dang/ mi dmigs par rig par bya'o zhes bya ba smos te/ bye brag de ni med pa'i tha snyad sgrub pa mi dmigs pa rnam pa mang po bshad pa gang yin pa de thams cad du blta bar bya ste/ gal te rgyu la sogs pa dmigs pa'i rig byar gyur pa las mi dmigs pa zhig yin na ni/ de'i tshe 'bras bu la sogs pa dgag pa sgrub nus kyi gzhan du na ma yin no/ /rang bzhin 'gal ba la sogs pa yang gal te dmigs pa'i rig byar gyur pa zhig yin na ni/ de'i tshe mi mthun pa can dgag par nus kyis/ gzhan du na ni ma yin no/ /ci'i phyir zhe na/ de'i phyir/ gzhan dag la ni 'gal ba dang/ rgyu dang/ 'bras bu yod pa dang/ med pa mi 'grub pa'i phyir ro zhes bya ba smos te/ 'gal ba dang/ rgyu dang/ 'bras bu yod pa dang/ med pa ni 'gal ba dang/ rgyu dang/ 'bras bu yod pa dang med pa dag ste/ de dag mi 'grub pa la ni de skad ces brjod do/ /de ni 'di skad du gang dag dmigs pa'i rig byar gyur pa ma yin pa de dag la ni 'gal ba yang mi 'grub la/ 'gal ba med pa yang mi 'grub bo/ /rgyu dang 'bras bu yod par yang mi 'grub la/ rgyu dang 'bras bu nyid med par yang mi 'grub po zhes bstan par 'gyur ste/ 'di ltar dmigs pa'i rig byar gyur pa rgyun chags su 'jug pa gang dag mthong ba rnams la ni 'ga' zhig nye bas ma snang na ni de dang 'gal bar yid ches par yang nus la/ gang dag 'ga' zhig nye na yang de kho na bzhin du 'dug ste/ dmigs pa de la ni 'gal ba med do zhes nges par byed do/ /de bzhin du dmigs pa'i rig byar gyur pa gang yod na/ dmigs pa'i rig byar gyur ba sngon ma mthong ba gang zhig dmigs la/ de med na mi dmigs na/ de ni de las byung ngo zhe de gnyis rgyu dang 'bras bu'i dngos por nges par byed la/ gang med kyang gang zhig dmigs pa de gnyis ni rgyu dang 'bras bu nyid du med par rtogs par byed do/ /de ltar re zhig med pa'i tha snyad sgrub pa dmigs pa'i rig byar gyur pa las mi dmigs pa rnam par bzhag pa bshad zin to/ /'o na de las gzhan pas ci zhig sgrub ce na/ bskal pa'i yul mi dmigs pa mngon sum dang/ rjes su dpag pa log pa'i mtshan nyid ni the tshom gyi rgyu yin te/ zhes bya ba smos te/ bskal pa'i yul mngon sum dang/ rjes su dpag pa log pa'i rang bzhin gang yin pa de ni the tshom gyi rgyu yin gyi/ dngos po med pa'i tha snyad kyi gtan tshigs ni ma yin no/ /de ci'i phyir zhe na/ tshad ma log kyang don med par mi 'grub pa'i phyir ro zhes bya ba smos te/ tshad ma log pa'i mtshan nyid du ni bskal pa'i yul mi dmigs pa ste/ tshad ma log kyang don med par mi 'grub bo/ /tshad ma ni don gyi 'bras bu yin pas tshad ma log pas rgyu tsam ldog par mi 'grub bo/ rigs pa'i thigs pa'i rgya cher 'grel pa slob ma la phan pa las le'u gnyis pa'o// // yang dag pa'i shes pa bstan pa'i zhar la/ rang gi don dang/ gzhan gyi don gyi bye brag gis rjes su dpag pa rnam pa gnyis su khas blangs pa de las rang gi don ni spros pa dang bcas te bshad zin to/ /gzhan gyi don gyi rjes su dpag pa bshad par bzhed nas/ 'di skad du/ gzhan gyis don gyi rjes su dpag pa ni tshul gsum pa'i rtags brjod pa ste/ zhes bya ba smos so/ /'dis brjod par byed pas na rjod pa ste tshig ces bya'o/ /'di tshul gsum bcan yin pas na 'di ni tshul gsum pa'o/ /'di ni tshul gsum pa yang yin la rtags kyang yin pas tshul gsum pa'i rtags te/ de brjod pa la ni de skad ces bya'o/ /rjes su dpag pa ni yang dag pa'i shes pa yin no zhes bshad na/ ji ltar na rjes su dpag pa tshig yin zhe na/ de'i phyir/ rgyu la 'bras bu btags pa'i phyir ro zhes bya ba smos te/ rgyu ni tshig yin la/ 'bras bu ni rjes su dpag pa yin pas/ tshig la rjes su dpag pa der sgro btags nas/ tshigs de nyid la rjes su dpag pa zhes bshad de/ rjes su dpag pa'i rgyu yin pa'i phyir rjes su dpag pa zhes bya'o zhes bya ba'i tha tshig go /de ni rnam pa gnyis te zhes bya ba la de ni zhes bya ba ni gzhan gyi don gyi rjes su dpag pa dang sbyar ro/ /tshul gsum pa'i rtags brjod pa yin na/ ji ltar rnam pa gnyis zhes bya zhe na/ sbyor ba'i bye brag gis zhes bya ba smos so/ /sbyor ba ni tshig tu ?? 'bod? pa ste de'i bye brag gis rnam pa gnyis nyid do// rnam pa gnyis po gang yin zhe na/ chos mthun pa nyid can dang/ chos mi mthun pa nyid can no zhes bya ba smos so/ /'di ni chos mthun pa yin pas 'di ni chos mthun pa'o/ /chos de'i dngos po ni chos mthun pa nyid do/ /de gang la yod pa de ni chos mthun pa nyid can zhes bya'o/ 'di chos mi mthun pa yin pas chos mi mthun pa'o/ /chos mi mthun pa'i dngos po ni chos mi mthun pa nyid do/ /de gang la yod pa de ni chos mi mthun pa nyid can te/ rjes su 'gro ba dang ldan pa dang/ ldog pa dang ldan pa zhes bya ba'i tha tshig go /gal te rjes su 'gro ba dang ldan pa ni chos mthun pa nyid kyi sbyor ba yin la/ ldog pa dang ldan pa ni chos mi mthun pa nyid kyi sbyor ba yin no/ /don du yang bye brag yod na/ de ci'i phyir sbyor ba'i bye brag gis rnam pa gnyis te zhes brjod ce na/ de'i phyir 'di gnyis don du ni bye brag ci yang med do zhes bya ba smos te/ chos mthun pa nyid can yang tshul gsum la bltos par bya ba yin la/ chos mi mthun pa nyid can yang tshul gsum la bltos par bya ba yin te/ de bas na thams cad la tshul gsum yod pa'i phyir ro/ /don la ni bye brag phra mo yang med do/ /sbyor ba'i bye brag ma gtogs par zhes bya ba ni 'dir sbyor ba'i dbye ba kho nar zad kyi kho na ni ma yin te/ 'di ltar gcig yin rjes su 'gro ba dngos su brjod par byed la/ ldog pa ni shugs kyis go par byed do/ /gnyis pa la yang ldog pa ni dngos su rjod par byed la/ rjes su 'gro ba ni don gyis shes par byed do/ /de la chos mthun pa nyid can ni zhes bya ba ni re zhig dang por nye bar 'god pa'o/ /dmigs pa'i rig byar gyur ba gang ma dmigs pa de ni med pa'i tha snyad kyi yul du grub ste/ zhes bya ba 'di ni mi? dmigs pa'i rjes su 'gro ba bsnyad pa yin no/ /dper na ri bong gi rwa la sogs pa gzhan 'ga' zhig mthong ba bzhin du zhes bya ba la/ med pa'i tha snyad kyi yul tu mthong ba de ni dper na ri bong gi rwa la sogs pa lta bu'o/ /mthong ba zhes bya ba ni grub pa ste rtog pa zhes bya ba'i tha tshig go / des ni dpe bstan to/ /phyogs kyi bye brag gang na dmigs pa'i rig byar gyur pa bum pa mi dmigs pa zhes bya ba 'dis ni phyogs kyi chos bstan to/ /rang bzhin gyi gtan tshigs kyi sbyor ba ni zhes bya ba ni gtan tshigs gnyis pa'i sbyor ba chos mthun pa nyid can ston pa'o/ /gang yod pa de thams cad ni mi rtags pa ste/ dper na bum pa la sogs pa lta bu'o zhes bya ba la/ gang zhes bya ba ni dngos po ci yang rung ba yod pa de thams cad ni ril gyis mi rtag pa ste/ des ni rjes su 'gro ba tsam stan to/ /rang bzhin dag pa'i sbyor ba'o zhes bya ba/ rang bzhin gyi gtan tshigs kyi sbyor ba bye brag dang bral ba yin no/ /zhes bya ba'i tha tshig go / gang skye ba dang ldan pa de ni mi rtog pa'o/ /zhes bya ba'i tshig 'di ni rang bzhin gtan tshigs gnyis pa'i rjes su 'gro ba yin no/ /rang bzhin du gyur pa'i chos kyi bye brag gis rang bzhin gyi sbyor ba'o zhes bya ba ni bdag nyid du gyur pa'i chos kho nas bye brag tu byas nas/ rang bzhin gyi gtan tshigs kyi sbyor bar byas pa ste/ 'di ltar skye ba ni dngos su skye pa dang ldan pa dang tha mi dad mod kyi/ 'on kyang gang la skye ba yang ba de skye ba dang ldan pa'o zhes bye brag tu bstan to/ /gang byas pa de ni mi rtag pa'o zhes bya bas ni rang bzhin gyi gtan tshigs gsum pa'i rjes su 'gro ba bstan to/ /khyad par gyi bye brag gis te zhes bya ba la khyad par ni bye brag ste/ rang bzhin gyi gtan tshigs kyi sbyor ba bye brag mi mngon pa yin no zhes bya ba'i tha tshig go /ji ltar na bye brag mi mngon zhe na/ rang gi ngo bo 'grub par bya ba'i phyir ro/ /gzhan gyi byed pa la bltos pa'i ngo bo ni byas pa zhes bya'o zhes bya ba smos te/ gang zhig pha rol gyi byed pa la bltos pa zhes bya bar tshig rnam par sbyar te/ dngos po gang zhig gis rang gi ngo bo sgrub pa'i phyir/ rgyu rnams kyi byed pa la bltos pa de/ gang gi phyir byas pa zhes brjod pa de'i phyir bye brag mi mngon pa ste/ rang bzhin gyi gtan tshigs gzhan yin no/ /brtsal ma thag tu 'byung ba dang/ rkyen gyi bye brag gis tha dad pa can nyid la sogs pa yang de bzhin du lta bar bya'o/ /zhes bya ba ni rang bzhin gyi gtan tshigs de dag kyang khyad par gyi bye brag la bltos pa kho nas yin par blta bar bya ste/ 'di ltar brtsal zhes bya ba rgyu'i bye pa pa la ltos te grub pa gang yin pa de ni brtsal ma thag tu 'byung ba zhes bya ste/ de'i phyir brtsal ma thag tu 'byung ba'i phyir mi rtag pa'o zhes bya ba 'di yang rang bzhin gyi gtan tshigs bye brag mi mngon pa yin no/ /rkyen gyi bye brag ni rkyen gyi bye brag go / 'di rkyen gyi bye brag las tha dad pa'i dang tshul can yin pas 'di ni rkyen gyi bye brag gi tha dad pa can no/ /de'i dngos po ni rkyen gyi bye brag gis tha dad pa can nyid do/ rgyu'i bye brag gis rjes su mthun pa can nyid ces bya ba'i tha tshig go / 'di ltar 'jim pa'i gong bu chung ngu las ni bum pa chung ngu? 'gyur la/ chen po las ni chen por 'gyur pa dang/ rdza mkhan mkhas pas byed na ni sdug gur 'gyur la/ mi mkhas pa byed na ni mi sdug par 'gyur te/ de'i phyir rkyen gyi bye brag gis tha dad pa can nyid yin pa'i phyir mi rtag pa'o zhes bya ba 'di yang rang bzhin gyi gtan tshigs bye brag mi mngon pa kho na yin no/ /yod pa 'am skye ba dang ldan pa 'am byas pa zhes bya ba'i sgra ni phyogs kyi chos nye bar ston pa'o zhes bya ba la sngar ni rang bzhin gyi gtan tshigs gsum can gyi rjes su 'gro ba tsam bstan to/ /da ni go rim bzhin du phyogs kyi chos rnams bstan pa ste/ 'am zhes bya ba ni yod pa'i sgra dang skye ba dang ldan pa'i sgra dang/ byas pa'i sgra sbyor ba tha dad par bstan pa'i phyir ro/ /de tsam dang rjes su 'brel pa can gyi bsgrub par bya ba'i chos la rang bzhin gyi gtan tshigs so zhes sngar rang bzhin gyi gtan tshigs kyi mtshan nyid bshad pa gang yin pa de dang sbyar ba'i phyir/ sgrub pa'i chos de dag thams cad ni zhes bya ba smos so/ /sngar rang bzhin gyi gtan tshigs rnam pa gsum car gyi phyogs kyi chos bstan pa gang dag yin pa de dag ni/ rang gi bsgrub pa ji lta bu dag gis zhes bya ba ste/ gang gi bdag gi chad ma gang yin pa rang gi tshad ma de dag gis/ sgrub pa'i chos tsam dang/ bsgrub par bya ba'i chos rjes su 'brel par grub pa kho na khong du chud par bya ste/ sgrub pa'i chos kyi rang gi ngo bo ni sgrub pa'i chos tsam mo/ /sgrub pa'i chos tsam dang rjes su 'brel pa ni bsgrub pa'i chos tsam dang rjes su 'brel pa'o/ /rjes su 'brel pa ni mthun par 'brel pa ste/ rjes su 'gro ba zhes bya ba'i tha tshig go /bsgrub par bya ba'i chos gang la sgrub pa'i chos tsam dang rjes su 'brel par grub pa yod pa de la/ bdag nyid kyi sgrub pa ji lta bu dag gi sgrub pa'i chos tsam dang rjes su 'brel pa'i bsgrub par bya ba'i chos kho na la phyogs kyi chos de dag gtan tshigs nyid du brjod par bya'o/ /ci'i phyir bsgrub pa'i bya ba'i chos de sgrub pa'i chos tsam dang rjes su 'brel ce na/ de'i phyir/ dngos su na de nyid de'i rang bzhin yin pa'i phyir zhes bya ba smos te/ 'di ltar don dam par ni mi rtag pa'i rang bzhin nyid byas pa yin gyi/ byas pa yang gzhan la mi rtag pa yang gzhan pa ni ma yin no/ /ji lta zhe na/ rgyu dang rkyen rnams kyis byas pa gang yin pa de nyid 'jig pa'i dang tshul can gyi rang bzhin yin no/ /rang bzhin yang gtan tshigs yin pa'i phyir zhes bya ba ni/ 'dir bsgrub par bya ba'i rang bzhin nyid gtan tshigs kho nar bstan pa yin no// ci ltar na bsgrub par bya ba dang rjes su ma 'brel par 'gyur te/ 'di ltar de tsam dang rjes su 'brel pa la rang bzhin zhes bya'o/ /de ci'i phyir zhe na/ de grub la de ma grub na/ de'i rang bzhin nyid med pa'i phyir zhes bya ba smos te/ gal te sgrub pa'i chos byas pa can nyid la sogs pa ni grub la/ bsgrub par bya ba mi rtag pa nyid la sogs pa ni ma grub na/ de'i tshe byas pa nyid dang/ mi rtag pa nyid gnyis don dam par na rang bzhin nyid gcig pa nyid ma yin no/ /'khrul pa yang srid pa'i phyir ro zhes bya ba ni/ gal te byas pa nyid grub zin pa la phyis dbyug pa la sogs pa rgyu gzhan gyis mi rtag pa nyid du byed na/ de'i tshe 'khrul pa srid de/ dbyug pa la sogs pa yang rang gi rkyen la reg lus pas 'byung ba'i phyir/ de la gdon mi za bar 'byung ba ma yin pas 'ga' zhig mi 'jigs kyang srid do/ /'bras bu'i gtan tshigs kyi sbyor ba ni zhes bya bas ni chos mthun pa nyid can gyi rjes su dpag pa kho na'i 'bras bu'i gtan tshigs kyi sbyor ba ston par byed do/ /gang na du ba yod pa de na me yod de zhes bya ba la gang zhes bya ba ni phyogs gang na du ba yod pa de thams cad na me yod do zhes bya ba ni rjes su 'gro ba zhes bya ba'o/ /dper na tshad? mang la sogs pa bzhin te zhes bya ba ni dpe ston pa yin no/ /'di na yang du ba yod do zhes bya ba ni 'dod pa'i yul du du ba ston par byed pa na phyogs kyi chos ston par byed do/ /'dir yang rgyu dang 'bras bu dngos por grub pa kho na la rgyu bsgrub par bya bar 'bras bu gtan tshigs su brjod par bya'o zhes bya ba ni/ 'bras bu'i gtan tshigs la yang sngar rgyu dang 'bras bu'i ngo bo bsgrub par bya'o/ /phyis ni rgyu grub par bya ba'i phyir 'bras bu gtan tshigs nyid du brjod par bya'o/ /'di ltar rang gi ngo bos rtogs su des na go bar byed pa yin gyi ma nges pa ni ma yin no/ /chos mi mthun pa nyid can gyi sbyor ba ni zhes bya ba ni/ chos mi mthun pa nyid can gyi rjes su dpag pa gang yin pa de dag bshad par bya ste/ gang yod la dmigs pa'i rig byar gyur pa de ni dmigs pa kho nar 'gyur te zhes bya ba ni dngos po gang zhig yod la/ gal te de dmigs pa'i rig byar gyur pa yin na/ de'i tshe gdon mi za bar dmigs par 'gyur te/ des ni ldog pa bstan to/ /dper na sngon po la sogs pa'i bye brag lta bu yin zhes bya ba ni chos mi mthun pa nyid kyi dpe yin no/ /'di na ni dmigs pa'i rig byar gyur pa bum pa de ltar mi dmigs so zhes bya ba ni/ ji ltar dmigs pa'i rig byar gyur pa sngon po la sogs pa'i bye brag dmigs pa ltar 'di na bum pa ni de ltar ma yin no/ /'di na zhes bya bas ni 'dod pa'i phyogs bstan to/ /mi dmigs pa'i sbyor ba'o zhes bya ba ni 'di mi dmigs pa'i chos mi mthun pa nyid can gyi sbyor ba yin no/ /mi rtag pa nyid med na yod pa 'am skye ba dang ldan pa 'am/ byas pa nyid med pa yin na zhes bya bas ni/ rang bzhin gyi gtan tshigs gsum car gyi yang ldog pa ston par byed do/ /sgra na yod pa 'am skye ba dang ldan pa 'am byas pa zhes bya ba ni phyogs kyi chos rnams bstan to/ /rang bzhin gyi sbyor ba'o zhes bya ba ni de dag ni rang bzhin gyi gtan tshigs kyi sbyor ba chos mi mthun pa nyid can dag yin no/ /me med na du ba mi 'byung ba nyid ces bya bas ni ldog pa bstan to/ /'di na ni yod ces bya bas ni phyogs kyi chos bstan to/ /'bras bu'i gtan tshigs kyi sbyor ba'o zhes bya bas ni 'bras bu'i gtan tshigs kyi sbyor ba chos mi mthun pa nyid can ston par byed do/ /chos mthun pa can gyi rjes su dpag pa la yang rjes su 'gro ba dang/ phyogs kyi chos dang ldog pa dang/ tshul gnyis su mngon pa ma yin nam/ ji ltar na gzhan gyi don rjes su dpag pa tshul gsum pa'i rtags brjod pa yin zhe na/ de'i phyir ro/ don gyis na chos mthun pas kyang sbyor ba la chos mi mthun pa nyid rtogs te zhes bya ba smos so/ /gang gi phyir nus pa'i sgo nas chos mthun pa nyid can gyi sbyor ba la chos mthun pa nyid du rtogs par 'gyur ba de'i phyir/ ji skad du smras pa'i skyon du thal bar 'gyur ba med do/ /nus pa yang ci zhig ce na/ de med na bsgrub par bya bas gtan tshigs kyi rjes su 'gro ba med pa'i phyir ro zhes bya ba smos te/ gal te ldog pa med na de'i tshe bsgrub par bya bas gtan tshigs kyi rjes su 'gro ba mi 'grub par 'gyur ba nyid do/ /de bzhin du chos mi mthun pas rjes su 'gro ba rtogs te zhes bya bas ni/ chos mi mthun pa nyid can gyi sbyor ba la yang nus pas rjes su 'gro ba rtogs par 'gyur ro/ /'o na nus pa de yang ci zhig ce na/ de med na ni bsgrub par bya ba med na gtan tshigs med par mi 'grub pa'i phyir ro zhes bya ba smos te/ gal te bsgrub par bya bas gtan tshigs kyi rjes su 'gro ba ma yin na/ de'i tshe bsgrub par bya ba med par yang ci'i phyir yod par mi 'gyur/ rjes su 'gro ba med na ldog pa mi 'grub po zhes bya ba 'di ga las she na/ rang bzhin 'brel pa med na/ gcig log pas gzhan nges par ldog pa ma yin no zhes bya ba smos te/ gal te rang bzhin dang 'brel pa dang/ rang bzhin gyi ngo bos 'brel pa ma yin no/ /de'i tshe gcig log kyang gzhan ldog par nges pa med do/ /'ga' zhig la rta med ces te ba lang dag kyang med pa ma yin pa bzhin no/ /de yang thams cad kyi rnam pa gnyis te zhes bya ba ni dngos po thams cad kyi 'brel pa ci yang rung ba ci snyed pa de thams cad ni rnam pa gnyis kyi nang du 'dus te/ de'i bdag nyid dang de las byung ba zhes smos pa yin no zhes bya ba la de'i bdag nyid ni de'i bdag go /de'i bdag gi dngos po ni de'i bdag nyid do/ /'di de'i bdag nyid kyi mtshan nyid yin pas 'di ni de'i bdag nyid kyi mtshan nyid do/ /de las skyes pa ni de las byung ba'o/ /'di ni de las byung ba'i mtshan nyid yin pas zhes bya bar tshig rnam par sbyar te 'di ni sngar bshad zin to/ /des ni ldog pa brjod pas 'brel par bstan par bya'o zhes bya ba ni gang gi phyir 'brel pa yod de? gcig log pas gzhan ldog par 'gyur gyi/ med na ma yin pa'i gtan tshigs des gang 'ga' zhig log pas gzhan ldog par brjod do/ /des ni bzlog par bya ba dang zlog par byed pa de gnyis dang 'brel par brjod do/ /de lta bas na ldog pa'i tshig gis ni 'brel pa bstan pa bsdus pa kho na yin la zhes bya ba ni/ ldog pa'i tshig kho nas 'brel pa sdud par byed do/ /gal te de lta yin du zin kyang das cir 'gyur zhe na/ 'brel pa bstan pa gang yin pa de yang rjes su 'gro ba zhes bya ste zhes bya ba smos te/ 'brel pa bstan pa gang yin pa de nyid rjes su 'gro ba zhes bya'o/ /de lta bas na rjes su 'gro ba'i sgo yang rung ldog pa'i sgo yang rung ste/ tshig gcig brjod pas kyang mthun pa'i phyogs dang mi mthun pa'i phyogs la rtags yod pa dang med pa bstan par 'gyur bas zhes bya bas ni gal te rjes su 'gro ba'i sgo nas sbyor bar byed dam/ 'on te ldog pa'i sgo nas byed kyang rung ste/ 'on kyang bshad pa'i tshul gyis na mthun pa'i phyogs dang mi mthun pa'i phyogs gnyis la yod pa dang med pa bshad pa ni yod pa dang med pa rab tu bstan pa yin no/ /gnyi gas kyang rtags ni so sor byed do/ /de ltar na tshig gnyis sbyor ba des pa med do zhes bya ba ni/ de'i phyir sbyor ba gcig la chos mthun pa nyid can dang chos mi mthun pa nyid can gyi tshig gnyis sbyor nges pa ni med do/ /re shig de ltar 'bras bu dang rang bzhin gyi gtan tshigs kyi rjes su 'gro ba dang ldog pa gnyis gcig gis gcig sdud pa ni bshad zin to/ /gtan tshigs gsum bstan pa'i phyir mi dmigs pa la yang zhes bya ba smos te/ 'bras bu dang rang bzhin gyi gtan tshigs 'ga' zhig tu ma zad kyi zhes bya ba'i tha tshig go/ gang yod la dmigs pa'i rig byar gyur pa de ni dmigs pa kho nar 'gyur ro zhes bstan par mi dmigs na/ de lta bu med do zhes bya bar rtogs pa'i phyir rjes su 'gro ba grub bo zhes bya ba ni gang gi tshe dmigs pa'i rig byar gyur pa yod na gdon mi za bar dmigs par 'gyur ro zhes ldog pa brjod pa de'i tshe/ dmigs pa'i rig byar gyur pa mi dmigs na shugs kyis med do zhes bya ba rtogs par 'gyur te/ de'i phyir rjes su 'gro ba grub pa bsdus pa kho na yin no/ /de ltar na rjes su 'gro ba sdud par rjod pa yin no/ /mi dmigs pa la ldog pa sdud pa ni bdag nyid kyis brtags par bya'o/ /chos mthun pa dang chos mi mthun pa can gyi rjes su dpag pa gnyi ga la yang phyogs ma bstan pa ma yin nam/ ji ltar na phyogs bstan pa med par de tog par 'gyur zhe na/ de'i phyir/ sbyor ba 'di gnyi ga la yang phyogs bstan par nges pa med de zhes bya ba smos te/ gdon mi za bar phyogs bstan par bya ba'i nges pa gang yin pa'i nges pa 'di ni med do/ /'di ltar chos mthun pa nyid can gyi sbyor ba las yang dmigs pa'i rig byar gyur pa gang ma dmigs pa de ni med pa'i tha snyad kyi yul yin zhes bya ba ni dmigs pa'i rig byar gyur pa mi dmigs pa gang ji snyed pa de thams cad kyi med pa'i tha snyad kyi yul yin no zhes dngos po ma lus pa bsdu bas rjes su 'gro ba byas na/ 'di na yang dmigs pa'i rig byar gyur pa bum pa mi dmigs so zhes phyogs kyi chos bstan par shugs kyis 'di na bum pa med do zhes bya bar 'gyur ro zhes bya ba ni dngos po ma lus pa bsdu bas rjes su 'gro ba gang dang gang na phyogs kyi chos bstan pa de dang de na bsgrub par bya ba stobs kyis 'grub par 'gyur na phyogs bstan ci dgos/ de bzhin du chos mi mthun pa nyid can gyi sbyor ba la yang yod pa'i tha snyad kyi yul gang yod la dmigs pa'i rig byar gyur pa de ni/ dmigs pa kho nar 'gyur na zhes bya ba ni yod pa'i tha snyad kyi yul dngos po gang ji snyad pa de thams cad dmigs pa'i rig byar gyur na/ gdon mi za bar dmigs par 'gyur ro zhes ldog pa brjod na/ 'di na ni de 'dra ba'i bum pa de ltar mi dmigs shes phyogs kyi chos bstan par shugs nyid kyis 'dir yod pa'i tha snyad kyi yul med do zhes bya bar 'gyur ro zhes bya ba ni dngos po ma lus pa bsdu bas ldog pa bstan pa gang yin pa de dang/ phyogs kyi chos zhes bya ba de gnyi ga'i stobs kyis dam bcas pa rtogs pas dam bcas pa ma bstan te/ gzhan du na gang rtogs pa med pa de bstan to/ /gal te shugs kyis dam bcas pa'i don rtogs par 'gyur na/ de'i tshe dam bcas pa'i tshig la ngo mi chod pa ci yod 'di ltar skabs kyi shugs kyis log par rtog pa'i yul gyi don nges par shes pa dang/ phyogs kyi chos dang khyab pa bstan pa'i stobs kyis dam bcas pa'i don khong du chud pa de la phyogs bstan pas ci zhig bya/ de ni rnam par nges pa'i tshig brjod pa la lta bar bya'o/ /spros pa brjod par ni phyogs bstan kyang nyes pa 'ga' yang med do/ /de nyid kyi phyir nges pa med de zhes bya ba smos so/ /ci ste rnam pa thams cad du phyogs bstan pa dgag par dgongs pa kho na zhig yin par gyur na ni/ de'i tshe 'di skad du gdon mi za bar bstan par mi bya'o zhes bshad par 'gyur ro/ /gal te rnam par nges pa'i tshig brjod par phyogs mi bstan par chug na/ spros pa brjod pa gang du bstan pa der ni phyogs ci lta bu zhig ces bstan par bya zhes bya ba la/ mtshan nyid ci lta bu dang ldan pa'i phyogs shig bstan par bya zhe na/ rang gi ngo bo kho na dang/ bdag nyid dang/ 'dod pa dang/ ma bsal bas bstan par bya ba ni phyogs so zhes bstan par bya ba yin zhes bya ba smos te/ don gang zhig rgol ba'i 'dod pas yul du byas nas bsgrub par bya ba'i ngo bo kho nar ston cing/ mngon sum la sogs pas sel bar mi byed pa de lta bu'i don ni phyogs shes brjod par bya ste/ de ni re zhig bsdus pa'i don yin no/ /yan lag gi don ni/ rang gi ngo bos shes bya ba ni bsgrub par bya ba kho nar 'dod pa'o zhes bya ba ni phyogs ni bsgrub par bya ba'i ngo bo ma gtogs pa ngo bo gzhan du 'os pa ma yin pas/ de'i phyir rang gi ngo bos zhes bshad mod kyi/ bsgrub par bya ba kho na yin par khong du chud par bya'o/ /rang gi ngo bo kho nas shes bya ba ni bsgrub par bya ba kho nar 'dod pa yin gyi/ sgrub pa nyid yin yang rung pa ni ma yin zhes bya ba bsnan pas ni bsgrub par bya ba'i ngo bo kho na 'ba' zhig tu bstan par bya ba la phyogs kho nar brjod kyi/ ngo bo gzhan yang yin pa ma yin no/ /bsgrub par bya ba'i ngo bo gzhan dang yang ldan par bstan pa gang zhe na/ dper na sgra mi rtag pa nyid du bsgrub par bya ba la gtan tshigs mig gis gzung ba nyid ni sgra la ma grub pa'i phyir bsgrub par bya ba yin na zhes bya ba smos te/ gang zhig sgra ni mi rtags de/ mig gis bzung ba yin pa'i phyir ro zhes smra bar byed pa de'i mig gis gzung ba de ni sgra la ma grub pas bsgrub par bya ba yin no/ /de'i phyir bsnan pa med na mig gis gzung ba bstan pa yang phyogs nyid du thal bar 'gyur ro/ /gal te de las bsgrub par bya ba'i ngo bo yod kyang ci'i phyir phyogs ma yin zhe na/ de 'dir ni sgrub pa kho nar brjod pa'i phyir bsgrub par bya ba nyid kho nar mi 'dod ces bya ba smos te/ mig gis gzung ba nyid la bsgrub par bya ba'i ngo bo nyid yod mod kyi/ 'on kyang gtan tshigs nyid du ston pa na bsgrub par bya ba'i rang gi ngo bo kho na 'ba' zhig ni ma yin te/ bsgrub pa'i ngo bo nyid kyang yin no/ /de bas na bsgrub par bya ba yin yang sgrub pa'i ngo bo lhag par yod pa'i phyir bsnan pa'i tshig gi phyogs nyid yin pa bzlog go /bdag nyid ces pa ba ni de'i tshe/ rgol bas sgrub pa smras pa gang yin pa'o zhes bya ba ni sgrub pa smra bas/ bdag nyid kyis bstan par bya ba'i don gang yin pa de ni phyogs kho na yin gyi/ bstan bcos byed pas bstan par bya ba'i don ni ma yin no zhes bya ba'i tha tshig go /des na zhes bya ba ni rgol bas bstan par bya ba la phyogs kho nas brjod pas so/ /gal te bstan bcos 'ga' zhig la brten te sgrub pa smra na yang zhes bya ba ni re shig bstan bcos 'ga' zhig la brten te/ phyogs su bya ba'i nges pa gang yin pa de ni nges pa med mod kyi/ 'on kyang gal te bstan bcos khas blangs te/ tshad mar byed na yang zhes bya ba'i tha tshig te/ bstan bcos de byed pas bstan bcos de la chos mang zhig khas len du zin kyang zhes bya ba ni rgol pa bstan bcos gang la brten te sgrub pa smra ba'i bstan bcos de gang gis byas pa'i bstan bcos de byed pa des/ log par rtog pa'i yul chos can la gal te chos mang zhig khas blangs par gyur kyang 'on kyang/ de'i tshe rgol ba des chos gang bsgrub par 'dod pa de nyid bsgrub par bya ba yin gyi/ cig shos ni ma yin no zhes bstan par 'gyur ro zhes bya ba ni rgol ba kho nas chos gang bsgrub par 'dod pa de nyid bsgrub par bya ba yin gyi/ bstan bcos byed pa'i 'dod pa ni ma yin te/ 'di skad du gang gi tshe rgol bas bstan par bya ba'i phyogs nyid khas len pa de'i tshe/ rgol bas bstan bcos khas len pa'i sgo nas smra na yang 'dag nyid 'dod pa'i chos kho na bsgrub par bya ba yin gyi/ bstan bcos byed pas khas blangs pa ni ma yin no zhes bstan par 'gyur ro/ /'dod pa zhes bya ba ni don gang la rtsod pas sgrub pa bkod pa de grub par 'dod pa'o zhes bya ba'i sgra'i don 'tshad de/ dngos po gang la rtsod pa byung ba'i rtsod pa'i gzhi'i dngos po nyid grub par 'dod pas bsgrub pa bkod pa'i don de ni 'dod pa zhes bya'o/ /de ni tshig tu ma smras kyang bsgrub par bya ba yin te zhes bya ba yin te/ gal te log par rtogs pa'i yul don de tshig gis ma brjod kyang/ 'on kyang de ni bsgrub par bya ba kho na yin no/ /de ci'i phyir zhe na/ de ni rtsod pa'i gzhi yin pa'i phyir ro zhes bya ba smos te/ de'i phyir kho snar rtsod pa gang gi phyir rtsod pa de ji ltar na/ bsgrub par bya ba kho na ma yin/ rtsod pa'i gzhi gang la de tshig tu ma brjod kyang bsgrub par bya bar 'dod ce na/ de'i phyir/ dper na 'dus pa yin pa'i phyir mig la sogs pa ni gzhan gyi don yin te/ mal cha dang stan la sogs pa'i yan lag bzhin no zhes bya ba smos te/ dper na mal cha dang stan la sogs pa'i yan lag rnams 'dus pa'i ngo bo yin pas/ gzhan gyi don du mthong ba ltar de bzhin du mig la sogs pa yang 'dus pa'i ngo bo yin pa'i phyir/ gzhan gyi don yin no zhes bya ba ni sbyor ba'i don yin no/ /'dir bdag gi don zhes ma brjod kyang bdag gi don nyid du bsgrub par bya ba yin te zhes bya ba ni sbyor ba 'dir gal te mig la sogs pa ni bdag gi don to zhes ma brjod kyang bdag gi don kho nar sgrub par byed do/ /de lta ma yin na gzhan gyi don tsam zhig yin na/ grub pa bsgrub par 'gyur ro// bdag la log par rtog pas sgrub par bzhag ste de'i phyir/ de nyid bsgrub par bya ba yin no/ /des na smras pa tsam kho na ni bsgrub par bya ba ma yin no zhes bstan par 'gyur ro zhes bya ba ni gang gi phyir/ de skad du ma smras kyang 'dod pas yul du byas pa'i phyir bsgrub par bya bar 'dod pa de'i phyir smras pa kho na 'ba' zhig bsgrub par bya ba ma yin gyi/ ci lta zhe na/ 'dod pas yul du byas pa yang bsgrub par byas pa kho na yin no/ /ma bsal ba zhes bya ba ni mtshan nyid de dang ldan du zin kyang bsgrub par 'dod pa'i don mngon sum dang rjes su dpag pa dang/ grags pa dang/ rang gi tshig rnams kyis sal ba gang yin pa de ni phyogs ma yin no zhes bstan pa'i phyir zhes bya ba ni/ ji skad smos pa'i mtshan nyid dang ldan pa'i don sgrub pa'i skabs yin yang/ gal te mngon sum dang rjes su dpag pa dang/ grags pa dang/ rang gi tshig gis sal bar byed na/ de'i tshe don de phyogs ma yin no zhes bya bar bstan pa'i phyir ma bsal ba zhes bya ba smos so/ de la mngon sum gyis bsal ba ni dper na sgra ni mnyan du mi rung ngo zhes bya ba lta bu'o zhes bya ba la thos pa ni nyan pa ste/ rna pa'i rnam par shes pa zhes bya ba'i tha tshig go /nyan pa la grags pa 'am/ nyan pas gzung bar bya ba ni mnyan du rung ba'o/ /mnyan par bya ba ma yin pa ni mnyan du mi rung ba ste/ rna ba'i rnam par shes pa la grags par mi 'gyur zhes bya ba'i tha tshig go /de lta bas na 'dir sgra ni chos can yin no/ /mnyen du mi rung ba nyid ni bsgrub par bya ba'i chos yin no/ /sgra ni mnyan du mi rung ba nyid do zhes dam 'cha' na/ de ni mngon sum gyis sel bar byed do/ /'di ltar rna ba'i rnam par shes pa sgra'i rnam par snang ba na srog chags so cog gis rang gi rig ste/ des na mnyan par bya ba nyid du rang gis rig pa'i grags pas mnyan du mi rung ba nyid sel bar byed do/ /rjes su dpag pas bsal ba ni dper na bum pa ni rtag pa'o zhes bya ba lta bu'o zhes bya ba la bum pa rtag pa nyid du dam 'cha' na/ byas pa la sogs pa'i rjes su dpag bas sel bar byed de/ 'di ltar byas pa ni mi rtag par mthong la bum pa yang byas ba yin te/ des na rtag pa nyid du ga la 'gyur/ grags bas bsal ba ni dper na ri bong can ni zla ba ma yin no zhes bya ba lta bu'o zhes bya ba ste/ la la zhig ri bong can ni zla ba'i sgrar brjod par bya ba ma yin no/ /zhes dam 'cha' bar byed na/ de ni ri bong can zla ba'i sgrar brjod pa nyid du gnag rdzi mo yan tshad la grags bas sel bar byed do/ /yang na don thams cad la sgra thams cad kyi brjod par byar rung bas sel bar byed de/ sgra dang don du 'brel pa ni brdad rtags pa yin pa'i phyir/ dper na bum pa la yang zla ba'i sgrar brjod par bya ba nyid du rung ngo/ /rang gi tshig gis bsal bzhi dper na rjes su dpag pa ni tshad ma ma yin no zhes bya ba lta bu ste zhes bya ba ste/ gang zhig rjes su dpag pa ni tshad ma ma yin no zhes smra na yang/ de ni rang gi tshig dang 'gal te/ rjes su dpag pa tshad ma nyid ma yin na tshig de nyid kyang brjod par bya bar mi 'gyur ste/ 'di ltar tshig ni rjes su dpag pa'i khongs su 'dus la/ rjes su dpag pa yang tshad ma ma yin na tshig kyang tshad mar ga la 'gyur/ tshig de tshad ma ma yin na ci'i phyir brjod ces rang gi tshig dang 'gal lo/ /phyogs ltar snang ba bzhi bsal ba yin no zhes bya ba la lung dang 'gal ba ni rang gi tshig dang 'gal ba'i khongs su 'dus bar mkhyen nas/ phyogs ltar snang ba bzhi zhes bshad do/ /yang na lung ni rjes su dpag pa dngos po'i stobs kyis zhugs pa la brten par bya ba ma yin pa nyid kyis mi 'gal ba'i phyir na yang bzhi zhes bshad do/ /de ltar na zhes bya ba ni bshad pa'i tshul gyis na'o/ /grub pa dang ma grub kyang sgrub pa nyid du 'dod pa dang/ de'i tshe rgol ba bdag nyid kyis sgrub par mi 'dod pa dang/ smras pa tsam dang bsal ba las bzlog pa la ni bsgrub par bya ba yin no zhes bya ba la/ 'dir bzlog pa zhes bya ba ni re re la yang sbyar bar bya ste/ des na 'di skad du grub pa las zlog pa dang/ ma grub kyang sgrub pa nyid du 'dod pa las bzlog pa dang/ de'i tshe rgol ba bdag nyid kyis bsgrub par mi 'dod pa las bzlos pa dang/ smras pa tsam las bzlog pa dang/ bsam pa tsam las bzlog pa ni phyogs yin par blta bar bya'o zhes bstan par 'gyur te/ de ltar re zhig de ni bzlog pa'i sgo nas phyogs kyi mtshan nyid bstan pa yin no/ /da ni bsgrub pa'i ngo bor ston par byed de/ de gnyis kyis ngo bor zhes bya ba ni bsgrub par bya ba nyid kho nar zhes bya ba'i tha tshig go rgol ba'i 'dod pa zhes bya ba ni bstan bcos byed pa'i 'dod pa sal ba'o/ /'dod pa zhes bya ba ni smras pa tsam nyid ma yin pa'o/ /ma bsal ba zhes bya ba ni ma spangs pa zhes bya ba'i tha tshig go /phyogs zhes bya ba ni bsgrub par bya ba'o zhes bya ba'i tha tshig go / de ltar na phyogs kyi mtshan nyid skyon med par bstan pa yin no zhes bya ba ni/ de ltar phyogs kyi mtshan nyid nyes pa dang bral bar bshad pa yin te/ de ltar re zhig yang dag pa'i mtshan nyid dang ldan pa'i rjes su dpag pa bshad zin to/ /rjes su dpag pa ltar snang ba bshad par bzhed nas/ gzhan gyi don gyi rjes su dpag pa ni tshul gsum pa'i rtags brjod pa ste zhes smras pa zhes bya ba smos te/ smras pa zhes smos pas ni gtan tshigs ltar snang ba dang 'brel par ston to/ /de la tshul gsum las tshul gcig ma smras na yang sgrub pa ltar snang ba yin zhes bya ba ni phyogs kyi chos dang/ rjes su 'gro ba dang ldog pa zhes brjod pa ste/ tshul gsum las gal te gcig cig ma brjod na yang de'i tshe ma tshang ba zhes bya ba'i sgrub pa'i nyes par 'gyur ro/ /smras kyang go bar bya ba dang go bar byed pa gnyis la grub pa ma the tshom za na yang ngo/ /zhes bya ba ni tshul gsum las gang yang rung ba zhig smras kyang/ gal te rgol ba dang phyir rgol ba gnyis la ma grub pa ma the tshom za bar gyur na/ 'on kyang sgrub pa ltar snang ba yin te/ de ltar re zhig sgrub pa ltar snang ba spyir bstan to/ /bye brag tu bstan par bya ba'i phyir chos can dang 'drel pa'i tshul gcig ma grub bam the tshom za na ma grub pa'i gtan tshigs ltar snang ba yin zhes bya ba smos te/ chos can dang 'brel pa ni chos can dang 'brel pa ste/ phyogs kyi chos zhes bya'o/ /de ma grub pam the tshom za ba ni ma grub pa zhes bya ba'i gtan tshigs ltar snang ba yin no// dpe bstan pa'i phyir dper na sgra mi rtag par bsgrub pa la mig gis gzung ba nyid ni gnyi ga la ma grub pa lta bu'o zhes bya ba smos te/ sgra mig gis gzung bar bya ba yin par ni rgol ba dang phyir rgol ba gnyis ka yang khas mi len to/ /shing rnams la sems pa yod par sgrub pa la shun pa thams cad bshus na 'chi ba ni phyir rgol ba la ma grub ces bya ba ni gang gi tshe phyogs kyi gos can na re shing rnams la sems pa yod do/ /shun pa thams cad bshus na 'chi ba'i phyir ro zhes sangs rgyas pa la tshad mar byed pa de'i tshe/ shing dag la shun pa thams cad bshus pas 'chi bar sangs rgyas pa la ma grub bo/ /ci'i phyir ma grub ce na/ de ni rnam par shes pa dang/ dbang po dang/ tshe 'gags pa'i mtshan nyid la 'chi ba yin par khas len pa'i phyir ro zhes bya ba smos te/ rnam par shes pa dang/ dbang po rnams dang/ tshe zhes tshig rnam par sbyar ro/ /de dag 'gags pa ni rnam par shes pa dang/ dbang po dang/ tshe 'gags pa'o/ /mtshan nyid de 'chi ba gang la yod pa de ni rnam par shes pa dang/ dbang po dang/ tshe 'gags pa'i mtshan nyid kyi 'chi ba yin te/ sangs rgyas ba dag ni de lta bu'i 'chi ba khas len gyi/ skam pa tsam la ni ma yin no/ /de yang shing dag la mi srid pa'i phyir ro zhes bya ba ni de 'dra ba'i 'chi ba shing dag la mi srid pa'o/ /bde ba la sogs pa sems pa med par sgrub pa la skye skye ba can nam mi rtag pa nyid ni grangs can rgol ba bdag nyid la ma grub pa'o zhes bya ba ni gang gi tshe/ grangs can na re bde ba la sogs pa ni sems pa med pa ste/ skye ba'i phyir ram mi rtag pa'i phyir ro zhes sangs rgyas pa la tshad mar byed pa de'i tshe/ bde ba la sogs pa dag la skye ba 'am mi rtag par ni grangs can bdag nyid la ma grub ste/ de'i ni ci yang skye ba med cing 'jig pa med do/ /de bzhin du de'i bdag nyid dam/ de'i gzhi la the tshom za na ma grub ces bya ba ni gang gi tshe/ gtan tshigs bdag nyid dam/ de'i gzhi la the tshom za bar gyur na/ de'i tshe ma grub pa'i gtan tshigs ltar snang ba yin no/ /'dir dpe ni/ dper na me 'grub par bya ba la rlangs pa la sogs pa'i dngos por the tshom za ba'i 'byung ba 'dus pa lta bu'o zhes bya ba ste/ rlangs pa la sogs pa gang dag yin pa de dag ni rlangs pa la sogs pa'o/ /de dag gi dngos po ni rlangs pa la sogs pa'i dngos po ste/ rlangs pa la sogs pa'i ngo bo zhes bya ba'i tha tshig go /'byung ba rnams 'dus pa ni 'byung ba 'dus pa ste/ me grub par bya ba la de gtan tshigs su byed na gang gi tshe 'di ci rlangs pa 'am rdul lam/ du ba 'am/ khug na yin zhes rlangs pa la sogs pa'i dngos por the tshom za ba'i ma grub pa'i gtan tshigs ltar snang ba yin no/ /de'i gzhi la the tshom za ba bstan pa'i phyir/ dper na rma bya'i sgra grags pa'i phyir/ ri sul 'di na rma bya yod do zhes bya ba la zhes bya ba smos te/ rma bya'i sgra 'byin pa ni rma bya'i sgra'o/ /ri sul ni ri'i phyogs gcig go /gal te la la zhig 'di skad du rma bya'i sgra grags pa'i phyir/ ri sul 'di na rma bya yod do zhes tshad mar byed na/ de na rma bya'i sgra grags pa ni de la des na 'dod pa dang 'brel ba'i ri sul la ni the tshom za'o/ ji ltar the tshom za zhe na/ de grag pa'i yul mi rtogs pa lta bu'o zhes bya ba smos te/ rma bya'i sgra de grag pa'i yul la the tshom za ste/ rma bya'i sgra 'di ri sul gang nas grag ces de la the tshom za ba yin no/ /chos can ma grub na yang ma grub pa yin te/ dper na bdag thams cad na gnas par sgrub pa la thams cad la dmigs pa'i yon tan nyid lta bu'o zhes bya ba ni/ kun na gnas pa ni thams cad na gnas pa ste/ thams cad na yod ces bya ba'i tha tshig go /thams cad na dmigs pa'i yon tan rnams gang la yod pa zhes tshig rnam par sbyar ro/ /de'i dngos po ni thams cad dmigs pa'i yon tan nyid do /su zhig thams cad na dmigs pa'i yon tan nyid kyi bdag thams cad na gnas pa nyid du sgrub par byed pa de la gzhi ma grub pa'i gtan tshigs su 'gyur te/ 'di ltar gang na thams cad na dmigs pa'i yon tan nyid kyi chos yod par brjod pa'i bdag de nyid ma grub po/ /pha rol po'i lo rgyus ni 'di yin te/ bde ba la sogs pa ni bdag gi yon tan rnams yin zhes grag la de dag kyang yul thams cad na gnas pa'i lhas byin la dmigs so/ /bya ba med pa'i phyir bdag la ni 'gro ba dang 'ong ba med de/ gang gi phyir de'i yon tan thams cad na dmigs pa de'i phyir/ bdag ni thams cad na gnas par nges so zhe'o// // bam po gsum pa/ de bzhin du mi mthun pa'i phyogs la med pa'i tshul gcig ma grub na yang ma nges pa'i gtan tshigs ltar snang ba yin te/ zhes bya ba ni ldog pa la ma grub na ma nges pa'i gtan tshigs ltar snang ba yin par blta bar bya'o/ /dpe bstan pa'i phyir dper na sgra rtag pa nyid la sogs pa'i chos su bsgrub pa la gzhal bya nyid la sogs pa'i chos ni mthun pa'i phyogs dang/ mi mthun pa'i phyogs thams cad la 'am/ phyogs gcig la yod pa lta bu'o zhes bya ba na rtag pa nyid la sogs pa'i chos gang yin pa de ni rtag pa nyid la sogs pa'o/ /de bzhin du gzhal bya nyid la sogs pa'i chos gang yin pa de ni gzhal bya nyid la sogs pa ste/ gzhal bya yin pa'i phyir sgra ni rtag go nas sgrub pa la gzhal bya nyid ni mthun pa'i phyogs dang/ mi mthun pa'i phyogs thams cad la yod do/ /mi rtag pa'i phyir sgra ni brtsal ma thag tu 'byung ba ma yin no zhes sgrub pa la mi rtag pa nyid ni mthun pa'i phyogs kyi phyogs gcig la yang la/ mi mthun pa'i phyogs thams cad la yod do/ /mi rtag pa'i phyir sgra ni rtsal ma thag tu 'byung ba yin no zhes bsgrub pa la mi rtag pa nyid ni mthun pa'i phyogs thams cad la yod la/ mi mthun pa'i phyogs kyi phyogs gcig la yod do/ /reg pa ma yin pa'i phyir sgra ni rtag go zhes sgrub pa la reg pa ma yin pa nyid ni mthun pa'i phyogs dang mi mthun pa'i phyogs gnyi ga'i phyogs gcig la yod do/ /des ni thun mong gi ma nges pa rnams pa bzhi bstan to/ /de bzhin du tshul de nyid la the tshom za na yang ma nges pa kho na ste zhes bya ba ni mi mthun pa'i phyogs la med pa nyid la/ gang gi che the tshom du gyur pa de'i tshe yang ma nges pa kho na yin no/ /dpe bstan pa'i phyir dper na rjod par 'dod pa'i mi la la zhig thams cad mkhyen pa ma yin pa'am/ 'dod chags la sogs pa dang ldan par sgrub pa la smra ba la sogs pa'i chos lta bu ste zhes bya ba smos te/ gang zhig rjod par 'dod pa'i mol la zhig smra ba'i phyir/ thams cad mkhyen pa ma yin no zhes smra bar byed pa dang/ de bzhin du smra ba kho na'i phyir 'dod chags la sogs pa dang ldan pa yin no zhes smra na/ de'i smra ba nyid la sogs pa'i chos ni ma nges pa kho na yin na/ /ma nges pa de med ci zhes bya zhe na/ mi mthun pa'i phyogs las ldog pa de the tshom za ba yin no zhes bya ba smos te/ 'di la mi mthun pa'i phyogs las ldog pa la the tshom za ba yod pas 'di ni mi mthun pa'i phyogs las ldog pa la the tshom za ba yin te/ ldog pa la the tshom za ba zhes bya ba'i tha tshig go /thams cad mkhyen pa la la zhig smra bar ma mthong ba la/ ma mthong ba'i phyir na ldog pa grub pa ma yin nam/ /ji ltar na 'di ma nges pa zhes bya ba na de'i phyir/ thams cad mkhyen pa smra ba ma dmigs so zhes bya ba'i mi dmigs pa'i rnam pa de lta bu ni yul bltar mi snang ba nyid kyis the tshom gyi rgyu yin pa'i phyir ro zhes bya ba smos te/ thams cad mkhyen pa smra bar ma mthong du zin kyang mi dmigs pa 'di ni yul bltar mi snang ba'i bdag nyid yin la/ yul bltar mi snang ba'i bdag nyid yin pa'i phyir yang the tshom gyi rgyu yin gyi/ ldog pa sgrub par brjod pa ni ma yin no/ /de bas na thams cad mkhyen pa ma yin pa las bzlog pa la smra ba la sogs pa ldog pa ni the tshom du 'gyur ba yin te zhes bya ba ni yul bltar mi snang ba'i mi dmigs pa ni the tshom gyi rgyud kho na yin pa'i phyir/ thams cad mkhyen pa ma yin pa las bzlog pa thams cad mkhyen pa nyid las smra ba'i mtshon nyid kyi gtan tshigs log pa ni the tshom du 'gyur ba yin no/ /mi dmigs pa ni yul ltar mi snang ba'i bdag nyid yin pa'i phyir ldog pa sgrub pa ma yin du zin kyang/ rang bzhin 'gal ba dmigs pas sgrub par byed do zhe na/ de'i phyir smra ba nyid dang thams cad mkhyen pa nyid la 'gal ba med pa'i phyir ro zhes bya ba smos te/ smra ba nyid dang thams cad mkhyen pa nyid ni 'gal ba med de/ de bas na ma mthong du zin kyang thams cad mkhyen pa gang smra ba de smra ba yin no zhes bya ba'i ldog pa ni mi 'grub ste/ the tshom za ba'i phyir ro zhes bya ba ni/ thams cad mkhyen pa smra bar mthong du zin kyang smra ba nyid dang/ thams cad mkhyen pa nyid 'gal ba med pas smra ba nyid ni thams cad mkhyen pa nyid las ldog par mi 'grub ste/ the tshom za bar 'gyur ba'i phyir ro/ /de gnyis ci ltar 'gal ba med ce na/ de'i phyir dngos po rnams kyi 'gal ba rnam pa gnyis te zhes bya ba smos te/ gang la 'gal ba gang ci snyed pa de thams cad ni rnam pa gnyis kyi nang du 'dus te/ gcig ni dngos po las gyur pa'i 'gal ba'o/ /gnyis pa ni mtshan nyid las gyur pa'i 'gal ba'o/ dngos po las gyur pa'i 'gal ba bstan pa'i phyir/ rgyu ma tshang ba med par 'byung ba la gzhan yod na med pa'i phyir 'gal ba ste/ grang ba dang cha ba'i reg pa lta bu'o/ /zhes bya ba smos te/ gang gi tshe dngos po'i rgyu'i tshogs ma nyams par rgyu chags su 'jug pa na dngos po gzhan zhig nye bar gyur na ldog par gyur pa de'i tshe 'gal bar rtogs par 'gyur te/ dper na grang ba dang tsha ba'i reg pa gnyis la grang ba'i rgyu ma tshang ba med par 'byung ba na/ gang gi tshe tsha ba nye bar gyur pa de'i tshe grang ba ldog par 'gyur ba lta bu ste/ de gnyis ni 'jig rten na 'gal bar rtogs so/ /gcig gis gcig spangs te gnas pa'i mtshan nyid kho nas te/ yod pa dang med pa lta bu'o/ /zhes bya ba ni gang gcig gis gcig spangs te gnas pa'i mtshan nyid de dag ni gcig gis gcig spangs te gnas pa'i mtshan nyid dag go / de'i dngos po ni gcig gis gcig spangs te gnas pa'i mtshan nyid kho na ste/ des 'gal ba'o/ /dper na yod pa dang med pa gnyis la yod pa ni med pa spangs pas rnam par gzhag go/ med pa na yod pa spangs pas rnam par bzhag go / 'gal ba rnam pa de gnyis yang smra ba nyid dang thams cad mkhyen pa nyid la mi srid ces bya ba ni 'gal ba rnam pa da gnyis ka yang thams cad mkhyen pa nyid dang/ smra ba nyid du ldan pa la mi srid de/ smra ba nyid kyi rgyu ma tshad ma med par 'byung ba la thams cad mkhyen pa nyid nye bar gyur na ldog pa yang ma mthong ngo/ /smra ba nyid spangs pas thams cad mkhyen pa nyid rnam par gzhag pa yang ma yin la/ thams cad mkhyen pa nyid spangs pas smra ba nyid rnam par bzhag pa yang ma yin no/ /'gal ba med du zin kyang 'gal ba med bzhin du nyid ni thams cad mkhyen pa nyid kyi bzlog pa bor 'gyur ro zhe na/ de'i phyir/ mi 'gal ba yod pa'i phyir/ mi dmigs kyang med pa'i rtogs pa ma yin zhes bya ba smos te/ gang du 'gal bar mi brjod par der dngos po gnyis mi dmigs kyang med par yid ches par mi nus so/ /thams cad mkhyen pa nyid ma yin par bsgrub pa'i phyir/ smra ba nyid kyi ldog pa la the tshom za ba ni/ re zhig de lta bu yin no// 'dod chags la sogs pa dang ldan par ston pa la yang ldog par the tshom za bar bstan pa'i phyir/ 'dod chags la sogs pa dang/ tshig la sogs pa la yang rgyu dang 'bras bu'i dngos por ma grub pa'i phyir zhes bya ba smos te/ 'dod chags la sogs pa ni tshig gi rgyu yin no zhes bya ba de ni ma grub po/ /'dod chags la sogs pa dang/ tshig rgyu dang 'bras bu'i dngos por ma grub na de la cir 'gyur zhe na/ don gzhan rgyu ma yin pa log pas tshig la sogs pa ldog pa ni ma yin zhes bya ba smos so/ /don gzhan ni 'dod chags la sogs pa ste/ rgyur ma gyur pa de las log pas ci'i phyir tshig la sogs pa ldog par 'gyur/ de ltar na tshig la sogs pa ldog pa la the tshom za ba dang ldan pa'i ma nges pa yin no zhes bya ba ni gang gi phyir de ltar smra ba nyid dang/ thams cad mkhyen pa nyid 'gal ba ci yang med la/ 'dod chags la sogs pa dang tshig kyang rgyu dang 'bras bu'i dngos po ma yin pa de'i phyir/ thams cad mkhyen pa nyid ma yin pa log pa dang 'dod chags la sogs kha log pas tshig ldeg pa la the tshom za ba ste/ de'i phyir ldog pa la the tshom za ba zhes bya ba'i ma nges pa yin/ tshul gnyis kyi phyin ci log tu grub pa ni 'gal ba yin no/ /zhes bya ba ni gang gi tshe tshul gnyis kyi phyin ci log tu grub pa de'i tshe 'gal ba'i gtan tshigs ltar snang ba yin no/ /gnyis po gang dag gi zhe na zhes bya ba ni tshul gnyis po gang dag phyin ci log tu rtogs pa na/ gtan tshigs 'gal ba ston par byed pa'o/ /mthun pa'i phyogs la yod pa dang/ mi mthun pa'i phyogs la med pa la nas bya ba ni rjes su 'gro ba dang ldog pa zhes bya ba'i tha tshig ste/ de ni re zhig 'gal ba'i mtshan nyid spyid bstan pa yin no/ /bye brag tu bstan par bya ba'i phyir/ byas pa nyid dang btsal ma thag tu 'byung ba nyid du rtag pa nyer sgrub pa la 'gal ba'i gtan tshigs ltar snang ba yin zhes bya ba smos te/ gang gis byas pa nyid dam/ brtsal ma thag tu 'byung ba nyid kyis rtag pa nyid sgrub par byed pa de'i tshe 'gal ba'i gtan tshigs ltar snang ba yin no/ /ji ltar na 'dir phyin ci log tu grub pa yin zhe na/ 'di gnyis kyi mthun pa'i phyogs la med pa dang/ mi mthun pa'i phyogs la yod pas phyin ci log tu grub ces bya ba smos te/ rtag pa nyid du bsgrub pa la nam mkha' la sogs pa ni mthun pa'i phyogs yin no/ /de la ni byas pa nyid dang/ brtsal ma thag tu 'byung ba gnyi ga mi srid do/ /mi rtag pa bum pa la sogs pa ni mi mthun pa'i phyogs yin na/ de lan de gnyi ga yod pa nye dang/ de ltar na de gnyis kyi phyin ci log tu grub pa yin no/ /de gnyis ni bsgrub par bya ba phyin ci log tu sgrub pa'i phyir 'gal pa dag yin zhes bya ba ni/ gang gi phyir tshul de gnyis kyi phyin ci log tu grub pa de'i phyir/ bsgrub par bya ba phyin ci log tu sgrub pa ni bsgrub par bya ba phyin ci log tu sgrub pa'i phyir yang 'gal ba'i gtan tshigs ltar snang ba yin no// 'dod pa la gnod pa byed pa 'gal ba gsum pa yang ma yin nam zhes bya ba ni 'dod pa la gnod pa byed pas na 'dod pa la gnod pa byed pas na 'dod pa la gnod pa byed pa ste/ 'gal ba gsum pa ni bstan bcos mdzad pas bstan to/ /dpe bstan pa'i phyir/ dper na 'dus pa yin pa'i phyir mig la sogs pa ni gzhan gyi don byed de/ mal cha dang stan la sogs pa'i yan lag bzhin no zhes bya ba ste/ de'i don ni rnam par bshad zin to/ /'gal ba 'di yang ci lta bu zhig ce na/ de ni 'dus pa ma yin pa gzhan gyi don byed pa nyid du 'dod de/ phyin ci log tu sgrub pa'i phyir 'gal ba'o zhes bya ba smos te/ gzhan dag gi don byed pa ni gzhan gyi don byed pa'o/ /de'i dngos po ni gzhan gyi don byed pa nyid do/ /'dus pa ma yin pa la gzhan gyi don byed pa ni 'dus pa ma yin pa gzhan gyi don byed pa'o/ /de ni de'i 'dod pa yang yin la 'dus pa ma yin pa gzhan gyi don byed pa yang yin no zhes bya bar tshig rnam par sbyar ro/ /de phyin ci log pa ni 'dus pa ma yin pa gzhan gyi don byed par de'i phyin ci log pa ste/ de sgrub pa la ni de skad ces bya'o/ /de lta bas na de'i 'dus pa ma yin pa gzhan gyi don byed par 'dod pa ni phyin ci log tu sgrub pa'i phyir de 'gal ba nyid yin par blta bar bya'o/ /ci'i phyir ma smras she na zhes bya ba ni bstan bcos byed pas khas blangs pa yang yin la/ 'gal ba'i mtshan nyid dang yang ldan na zhes bsam pa'o/ /'di gnyis kho na'i nang du 'dus pa'i phyir zhes bya ba ni 'gal ba 'di gnyis bshad pa gang yin pa de nyid kyi nang du 'dus pas sogs shig tu ma brjod do/ /nang du 'dus pa de nyid bstan pa'i phyir/ de ni bsgrub par bya ba log par sgrub pas 'di gnyis dang tha dad pa ma yin no zhes bya ba smos te/ byas pa nyid dang brtsal ma thag tu 'byung ba'i mtshan nyid kyi gtan tshigs dag ni rtags pa nyid bsgrub pa la bsgrub par bya ba phyin ci log tu sgrub pa'i phyir 'gal ba dag tu bshad la/ 'di yang bsgrub par bya ba phyin ci log tu sgrub pas de gnyis dang 'gal ba nyid du 'dra'o/ /snga ma de ni tshig tu smos pa'i bsgrub par bya ba la phyin ci log tu sgrub pa la/ 'dir ni 'dod pa'i don la phyin ci log tu sgrub pa ma yin nam/ de'i phyir ji ltar de gnyis dang 'di 'dra zhe na de'i phyir/ 'dod pa dang smras pa gnyis la bsgrub par bya ba nyid du ni bye brag ci yang mang? ces bya ba smos te/ 'dod pa gang yin pa dang smras pa gang yin pa de gnyis ni bsgrub par bya ba la bye brag ci yang med do zhes de ni sngar bstan zin to/ /tshul gnyis las gcig ni ma grub na cig shos ni the tshom za na yang ma nges pa yin zhes bya ba ni rjes su 'gro ba dang ldog pa kho na la gcig ni ma grub la/ ci shos la ni the tshom za na gtan tshigs ma nges pa nyid yin no/ dpe bstan pa'i phyir/ dper na smra ba'i phyir 'dod chags dang bral ba 'am/ thams cad mkhyen pa yin zhes bya ba ste/ de'i don ni bshad zin to/ /'di la ldog pa ni ma grub la rjes su 'gro ba la ni the tshom za ba yin zhes bya ba ni sbyor ba 'di la ldog pa ni med la rjes su 'gro ba ni the tshom za ba yin te/ 'di ltar thams cad mkhyen pa nyid sgrub pa la mi mthun pa'i phyogs ni thams cad mkhyen pa nyid ma yin pa yin na/ thams cad mkhyen pa ma yin pa dag las kyang tshig ni log pa ma yin no/ /rjes su 'gro ba la the tshom za ba bstan pa'i phyir/ thams cad mkhyen pa dang 'dod chags dang bral ba dag ni bskal pa yin pa'i phyir de la tshig la sogs pa/ yod dam med par the tshom za ba yin no zhes bya pa smos te/ gang gi phyir thams cad mkhyen pa nyid dang/ 'dod chags dang bral ba nyid ni dbang po'i spyod yul ma yin pa de'i phyir/ ci de la tshig yod dam med ces the tshom za ste/ 'di ltar dpe nyid du bstan pa'i mi gang yin pa de/ ci thams cad mkhyen pa zhig yin te smra 'am/ 'on te thams cad mkhyen pa ma yin la smra? snyam pa ste/ de la nges pa med do/ /tshul de gnyis nyid la the tshom za na ma nges pa yin te zhes bya ba ni gang gi tshe rjes su 'gro ba 'am ldog pa gnyi ga la yang the tshom za bar gyur pa de'i tshe/ yang ma nges pa kho na'i gtan tshigs ltar snang ba yin no/ /dpe bstan pa'i phyir dper na sog la sogs pa dang ldan pa nyid kyi phyir/ gson po'i lus ni bdag dang bcas pa yin no zhes bya ba lta bu ste zhes bya pa smos so/ /srog la sogs pa gang yin pa de dag ni srog la sogs pa ste/ sogs pa'i sgras ni 'byed pa dang/ 'dzums pa dang/ brkyang pa dang/ bskum pa la sogs pa yongs su bsdu'o/ /bdag dang bcas pa zhes bya ba ni/ bdag longs spyod kyi rten nyid du gnas pa'o/ /gson po'i lus zhes bya ba des ni shi pa'i lus bsal to/ /'dir re zhig ldog pa la the tshom za ba bstan pa'i phyir/ bdag dang bcas pa dang/ bdag med pa las gang la srog la sogs pa gnas par 'gyur pa'i phung po gzhan ni med do zhes bya ba smos te/ phung po ni gnyis te/ bdag dang bcas pa dang bdag med pa ste/ de la ma gtogs pa gzhan ni med do/ /srog la sogs pa dang ldan pa nyid ni dngos po'i chos yin na/ de bdag dang bcas pa dang/ bdag med pa gnyis las log ste/ gzhan gang du gnas par 'gyur/ ci'i phyir phung po gsum pa mi srid ce na/ bdag gnas pa dang/ rnam par gcod pa dag gis thams cad bsdus pa'i phyir ro zhes bya ba smos te/ gnas pa dang rnam par gcod pa ni gnas pa dang rnam par gcod pa dag ste/ gnas pa ni yod pa'o/ /rnam par gcod pa ni med pa'o/ /bdag gi gnas pa dang rnam par gcod pa ni bdag gnas pa dang rnam par gcod pa dag go /de gnyis kyis ni dngos po thams cad bsdus te/ 'di ltar gang la bdag gnas pa de ni bdag dang bcas pa yin no/ /de la ma gtogs pa gzhan thams cad ni bdag med pa yin no/ /de'i phyir phung po gsum pa lta ga la srid de/ de ltar re shig srog la sogs pa dang ldan pa ni bdag dang bcas pa dang bdag med pa dag las ldog par ma grub po/ /gal te de gnyis las ldog pa ma grub na 'o na de la rjes su 'gro ba yod par 'gyur ro zhe na/ de'i phyir/ de gnyis las gcig la gnas par yang nges pa med zhes bya ba smos te/ sog la sogs pa dang ldan pa ni nga dag dang bcas pa 'am bdag med pa la yod do zhes bya ba nges par bya mi nus so/ /de ci'i phyir zhe na/ bdag dang bcas pa 'am bdag med par sgrub pa la srog la sogs pa ma grub pa'i phyir ro zhes bya ba smos te/ bdag dang bcas pa nyid du nges pa'i dngos po 'am/ bdag med pa nyid du nges pa'i dngos po la srog la sogs pa dang ldan pa nyid ni ma mthong ngo/ /de'i phyir gnas par nges pa lta na/ la yod/ de bas na gson pa'i lus dang 'brel pa can gyi srog la sogs pa zhes bya ba ni mjug sdud par byed pa na phyogs kyi chos ston par byed pa ste/ gson po'i lus dang 'brel pa zhes bya bar tshig rnam par sbyar ro/ /de gang la yod pa de ni gson po'i lus dang 'bral pa can to/ /phyogs kyi chos shes bya ba'i tha tshig go /bdag dang bcas pa dang/ bdag med pa thams cad las ldog pa nyid du ma grub pa'i phyir de gnyis dang ma bral lo zhes bya ba 'dis ni mjug bsdus te ldog pa med par ston to/ /bdag gcig pu la yang ma grub pa'i phyir/ de la rjes su 'gro ba med do zhes bya ba 'dis ni mjug bsdus nas rjes su 'gro ba med par ston te/ de ltar re shig rjes su 'gro ba dang ldog pa gnyis yod par ma grub pa yin no/ /'o na de la de gnyis med par nges pa yod do zhe na/ de'i phyir bdag dang bcas pa dang/ bdag med pa las de'i rjes su 'gro ba dang ldog pa gnyis med par nges pa med de zhes bya ba smos te/ ji ltar bdag dang bcas pa la rjes su 'gro ba dang ldog pa gnyis yod par ma nges pa de ltar med par yang ma nges te/ de bzhin du bdag med pa la yang brjod par bya'o/ /yod par nges pa med du zin kyang med par nges par go ci'i phyir mi 'gyur zhe na/ de'i phyir rjes su 'gro ba dang ldog pa gnyis ni phan tshun rnam par gcod pa'i ngo bo nyid yin pa'i phyir ro zhes bya ba smos so/ /rjes su 'gro ba dang ldog pa dag ni gcig la gcig med pa'i ngo bor gnas pa dag yin te/ 'di ltar gang na rjes su 'gro ba med par de na ldog pa yod pa 'am/ gang na ldog pa med pa de na rjes su 'gro ba yod pa'o/ /de gnyis phan tshun du rnam par gcod pa'i ngo bor gnas pa yin du chug na des cir 'gyur zhe na/ gcig med par des na cig shos yod par gdon mi za ba'i phyir ro zhes bya ba smos te/ gang gi tshe de gnyis gcig la gcig med pa'i ngo bor gnas pa de'i tshe rjes su 'gro ba med par nges pa gang yin pa des/ ldog pa yod par nges par gdon mi za bar 'gyur ro/ de bzhin du ldog pa med par nges pas kyang rjes su 'gro ba yod par nges par gdon mi za bar 'gyur te/ 'di ltar gang du srog la sogs pa dang ldan pa nyid yod pa med do zhes bya bar nges pa der med par nges pa yin la/ gang du de med pa med do zhes bya bar nges pa der yang yod par nges pa yin no/ /gang gi phyir de ltar rjes su 'gro ba dang ldog pa gnyis la gcig med par nges na/ cig shos yod par nges par gdon mi za ba de'i phyir bcad dang bcas pa dang/ bdag med pa gnyis la srog la sogs pa dang ldan pa med par nges pa yang med pa kho na yin no/ /de nyid kyi phyir rjes su 'gro ba dang ldog pa gnyis la the tshom za ba'i ma nges pa yin te zhes bya ba ni gang gi phyir rjes su 'gro ba dang ldog pa dag la the tshom za ba nyid kyi phyir de ni ma nges pa yin no/ /rjes su 'gro ba dang ldog pa dag la the tsom zar? zin kyang ma nges par go ci'i phyir 'gyur zhe na/ de'i phyir bsgrub par bya ba dang/ cig shos la nges pa med pa'i phyir ro zhes bya ba smos te/ gang gi phyir bsgrub par bya ba dang/ bsgrub par bya ba'i mi mthun pa'i phyogs la srog la sogs pa dang ldan pa nges pa med pa de'i phyir ma nges pa yin no/ /de ltar na zhes bya ba ni smras pa'i tshul gyis so/ /tshul gsum po zhes bya ba ni phyogs kyi chos dang rjes su 'gro ba dang ldog pa zhes bya ba rnams so/ /de dag ces bya ba ni gtan tshigs ltar snang ba zhes bya ba dang sbyar ro/ /tshul re re 'am/ gnyis gnyis la lar ma grub pa 'am/ the tshom za ba zhes bya ba ni/ la lar ni tshul gcig ma grub pa 'am/ the tshom za ba yin no/ /la lar ni tshul gnyis so/ /ci rigs par zhes bya ba ni ji ltar mthun par sbyar ro/ gtan tshigs ltar snang ba gsum po ma grub pa dang/ 'gal ba dang/ ma nges pa dag yin zhes bya ba ni/ ma grub pa dag dang/ 'gal ba dag dang/ ma nges pa rnams zhes tshig rnam par sbyar ro/ /'gal ba ma 'khrul pa can yang the tshom gyi rgyur bshad ces bya ba ni 'gal ba 'khrul pa med pa ni 'gal ba mi 'khrul pa'o/ /de 'di la yod pas 'gal ba mi 'khrul pa can no/ /yang na 'di 'gal ba mi 'khrul pa'i ngang tshul can yin pas 'di ni 'gal ba mi 'khrul pa can ste/ de ni bstan bcos byed pas ma nges par bshad do/ /de 'dir ni ma smos so zhes bya ba ni bdag gis ma bstan pa'o/ /de ci'i phyir zhe na/ rjes su 'gal ba'i yul la mi srid pa'i phyir zhes bya ba smos te/ 'di ltar dngos po'i stobs kyis zhugs pa'i rjes su dpag pa la mi srid do/ /ji ltar mi srid ce na/ 'bras bu 'am/ rang bzhin nam/ mi dmigs pa'i mtshan nyid smos pa la 'gal ba mi srid ces bya ba smos te/ rgyu yod na 'bras bu yod pa nyid ni 'bras bu'i gtan tshigs kyi mtshan nyid yin/ de tsam dang rjes su 'brel ba'i gtan tshigs nyid ni rang bzhin gyi gtan tshigs kyi mtshan nyid yin/ dmigs pa'i rig byar gyur pa las mi dmigs pa ni mi dmigs mtshan nyid yin na/ 'gal ba dag ni mtshan nyid smos pa dang ldan pa de dag la mi srid de/ 'di ltar shing sha pas shing nye bar bsgrub pa la mi mthun pa gang shing med par grub par byed pa/ ci skad smos pa'i mtshan nyid dang ldan pa gnyis pa ni mi srid do/ /gal te mtshan nyid smos pa gsum car la mi srid du zin na/ 'o na gzhan la srid par 'gyur ro zhe na/ de'i phyir mi 'khrul pa can gzhan ni med ces bya ba smos te/ gtan tshigs gsum la ma gtogs pa gang la 'gal ba mi 'khrul pa can srid par 'gyur pa'i mi 'khrul pa can gyi gtan tshigs gzhan ni med do/ /gang gi phyir gsum po de dag la mi srid pa de'i phyir dngos po ma mthong ba'i stobs kyis zhugs pa yin zhes bya ba ni gang la 'brel pa'i tshad mas gtan la phab pa med pa de ni dngos po ma mthong ba'i stobs kyis zhugs pa zhes bya'o/ /lung la brten pa'i rjes su dpag pa la brten te/ zhes bya ba ni/ 'di la lung la brten pa'i yod pas 'di ni lung la brten pa ste/ gang du lung gi sgo nas chos can dang/ phyogs kyi chos la sogs pa gtan la 'debs pa de ni lung la brten pa'i rjes su dpag pa zhes bya'o/ /de'i don dpyad pa dag la zhes bya ba ni lung gi don dpyad pa dag la'o/ /'gal ba mi 'khrul pa can ni sgrub pa'i skyon du bshad ces bya ba de ni go sla'o/ /gal te 'di rigs pa ma yin na de'i tshe lung la brten pa'i rjes su dpag pa la yang de ci'i phyir srid ce na/ bstan bcos byed pa rnams ni don rnams la 'khrul pas rang bzhin log par ston pa srid pa'i phyir ro zhes bya ba smos so/ /bstan bcos byed pa thams cad ni de kho na mthong ba byung ba ma yin pas de rnams ni don kha cig dag la rang bzhin log par smra ba yang 'gyur bas/ de'i phyir 'gal ba mi 'khrul pa can gyi skabs su 'gyur ro/ /gal te lung dang 'brel pa'i rjes su dpag pa la de yod pa nyid du 'dod na go /'o na lta dngos po'i stobs kyis zhugs pa la yang ci'i phyir mi 'dod ce na/ de'i phyir/ dngos po ji lta ba bzhin du gnas par 'dug pa bdag dang 'bras bu dang mi dmigs pa dag la ni de mi srid ces bya ba smos te/ dngos po ji lta ba bzhin du gnas par 'dug ba gang dag yin pa de dag ni dngos po ji lta ba bzhin du gnas par 'dug pa rnams te/ 'dug pa ni rnam par gnas pa'o/ /bdag dang 'bras bu dang mi dmigs pa zhes bya bar tshig rnam par sbyar te/ bdag ni rang bzhin zhes bya'o/ /ji ltar yang dag pa'i don du dngos po rnam par gnas pa de ltar rang bzhin dang 'bras bu dang mi dmigs pa zhes bya ba'i gtan tshigs rnams rnam par 'jog pa gang dag yin pa de dag la 'gal ba mi 'khrul pa can lta ga la srid/ 'dir dpe ni zhes bya ba ni lung la brten nas tshad ma ston par byed pa'o/ /gang zhig yul thams cad na gnas pa rang dang 'brel pa can dag dang/ cig car du mngon par 'brel ba de ni thams cad na gnas pa zhes bya ba la yul thams cad du gnas pa dag ni yul thams cad na gnas pa rnams so/ /de dag ni rang dang yang yin la 'brel pa can yang yin pas rang dang 'brel ba can rnams so/ /dngos po gang zhig yul thams cad na gnas pa rang dang 'brel pa can rnams dang/ cig car tu mngon par 'brel pa de ni thams cad du gnas pa yin par mthong ste/ dper na nam mkha' bzhin no zhes bya ba la nam mkha' ni yul thams cad na rnam par gnas pa rang dang 'brel ba can bum pa la sogs pa zhes bya ba dag dang mngon par 'brel te/ de ni thams cad na gnas pa yin par 'dod do/ /tshig des ni rjes su 'gro ba bstan to/ /spyi yang yul thams cad na gnas pa rang dang 'brel ba can dag dang/ cig car du 'brel to zhes bya ba ni spyi dang 'brel pa can gsal ba'i bye brag yul thams cad na yod pa de dag dang spyi ni cig car du 'brel te/ des ni phyogs kyi chos bstan to/ /rang bzhin gyi gtan tshigs kyi mtshan nyid kyi sbyor ba bstan pa'i phyir/ de dang 'brel pa can gyi rang bzhin tsam gyi rjes su 'jug pa'i ngang tshul can de'i yul na 'dug pa'i rang bzhin nyid ces bya ba smos te/ de dang 'brel pa can rnams ni de dang 'brel ba can dag go /de dang 'bral ba can rnams kyi rang bzhin tsam gyi rjes su 'jug pa'i dang tshul can gang yin pa de ni de dang 'brel pa can gyi rang bzhin tsam gyi rjes su 'jug pa'i dang can no/ /'brel pa can de dag gi yul ni de'i yul lo/ /de'i yul na 'dug pa ni de'i yul na 'dug pa'o/ /de ni de'i yul na 'dug pa yang yin la rang bzhin yang yin pas de'i yul na 'dug pa'i rang bzhin no/ /de'i dngos po ni de'i yul na 'dug pa'i rang bzhin nyid do/ 'brel pa can gyi yul na nye bar gnas pa zhes bya ba'i tha tshig go /thams cad du song ba kho nas 'brel pa can rnams khyab par bya ba yin no zhes bya ba 'di ga las she na/ gang na gang med pa de ni de'i yul la bdag nyid kyis khyab par byed pa ma yin zhes bya ba smos te/ gang na gang med pa des ni de'i yul khyab par bya bar ci ltar nus/ de'i yul zhes bya ba ni yul de gang gi yin pa de ni de'i yul lo/ /yul gang na de med na yul de 'brel pa can gang yin pa de khyab par bya bar mi nus so zhes bya ba'i tha tshig go /rang bzhin gyi gtan tshigs kyi sbyor ba zhes bya ba de ni go sla'o/ /da re shig de ltar gzegs zan pa kha cig gis spyi ni thams cad kyi thams cad ni gnas pa yin par bstan to/ /gzegs zan pa gzhan dag ni rten tsam pa la spyi thams cad na gnas pa nyid yin pa kho nar 'dod de/ de'i lugs rab tu bstan par bya ba'i phyir/ sbyor ba gnyis pa yang zhes bya ba smos te/ de ni go sla'o/ /dmigs pa'i rig byar gyur pa gang zhig gang na mi dmigs pa de ni de na med do dper na gang zhig na bum pa med de zhes bya ba lta bu'o zhes bya ba de ni mi dmigs pa'i rjes su 'gro ba bsnyad pa'o/ /gsal ba'i bar rnams na yang dmigs pa'i rig byar gyur pa spyi mi dmigs pa zhes bya ba ni gsal ba gzhan rnams gsal ba'i bar rnams ni gsal ba'i bar rnams te/ de dag na dmigs pa'i rig byar gyur pa spyi ni mi dmigs so/ /des ni phyogs kyi chos bstan to/ /rgol ba des kyang rten tsam la thams cad na gnas nyid du bstan to/ /mi dmigs pa 'di dang rang bzhin de ni phan tshun 'gal ba'i don sgrub pa yin pas gcig la the tshom skyed par byed ces bya ba la bshad ma thag pa'i mi dmigs pas ni rten tsam la spyi thams cad na gnas pa nyid du sgrub par byed la/ snga ma bzhin gyi gtan tshigs kyis ni thams cad kyi thams cad na gnas pa nyid du sgrub par byed pas phan tshun 'gal ba'i don sgrub pa de gnyis ni ci gsal ba'i bar rnams na spyi mi dmigs pa'i phyir rang gi rten tsam la thams cad na gnas pa nyid gcig yin nam/ 'on te yul thams cad can na rnam par gnas pa rang dang 'brel pa can gyi rjes su 'jug pa'i phyir/ thams cad kyi thams cad na gnas pa zhig yin snyam na spyi gcig la the tshom za bar byed do/ /re zhig de ltar gzhan gyi don gyi rjes su dpag pa 'dra ba dang bcas pa bstan to/ /ci ste ci'i phyir dpe'i mtshan nyid ma bstan ce na/ de'i phyir/ gtan tshigs kyi mtshan nyid gsum smos pa de tsam gyis rtogs pas/ dpe zhes bya ba sgrub pa'i yan lag ni logs shig na ci yang med de/ des na de'i mtshan nyid logs shig tu ma brjod ces bya ba smos so/ /sngar gtan tshigs kyi mtshan nyid gsum smos pa gang yin par tshul? gsum po 'di nyid kyis bsgrub par bya ba'i don 'grub par 'gyur te/ de lta bas na dpe zhes bya ba bsgrub pa'i yan lag logs shig na med de/ de'i phyir de'i mtshan nyid log shig tu ma brjod do/ /don go ba'i phyir zhes bya ba ni gtan tshigs kyi don nyid kyis dpe'i don yang go bar 'gyur ba'i phyir ro/ /da ci lta zhe na/ gtan tshigs ni mthun pa'i phyogs nyid la yod pa dang/ mi mthun pa'i phyogs thams cad las log pa'i tshul du bye brag med par bshad ces bya ba smos te/ re zhig spyir na 'di ni gtan tshigs kyi mtshan nyid yin te/ 'di lta ste/ mthun pa'i phyogs nyid la yod pa zhes bya ba'i tshul dang/ mi mthun pa'i phyogs thams cad las log pa zhes bya ba tshul lo/ /yang bye brag ni 'bras bu dang rang bzhin gnyis ni skye ba dang/ de tsam gyi rjes su 'jug pa yin par bstan par bya bar bshad ces bya ba ni bye brag tu na gtan tshigs kyi mtshan nyid 'bras bu'i gtan tshigs ni skye ba yin par rab tu bstan par bya'o zhes bshad do/ rang bzhin gyi gtan tshigs ni de tsam gyi rjes su 'jug pa yin par bsnyad par bya ba yin no zhes bshad do/ /de yang ston par byed pas shes bya ba ni spyi'i mtshan nyid dam/ bye brag gi mtshan nyid ston par byed pas shes bya'i tha tshig go / gang na du ba yod pa de na me yod la/ me med na du ba gang na yang med de/ dper na tshang ba dang gzhan lta bu'o zhes bya ba ni re zhig 'bras bu'i gtan tshigs spyi'i mtshan nyid dam/ rang gi mtshan nyid kyang rung/ 'di skad du rab tu bstan par bya'o zhes ston par byed par ste/ 'di ltar 'di la mthun pa'i phyogs la yod par rab tu ston par byed pas gdon mi za bar tshang bar lta bu'o zhes brjod par bya'o/ /gzhan du na mthun pa'i phyogs la yod pa nyid du bstan par mi nus so/ /de bzhin du mi mthun pa'i phyogs las ldog par brjod pas kyang gdon mi za bar chu lta bu'o zhes brjod par bya'o/ /gzhan du na ldog pa nyid ma bstan par 'gyur ro/ /skye ba yang de bzhin du bstan pa yin te/ 'di ltar me yod na du ba yod pa ni de'i 'bras bu nyid yin te/ de nyid rjod par byed pas na gang dang gang na du ba yod pa de dang de na gong ni mi za bar me yod de/ dper na tshang bar la sogs pa lta bu'o zhes brjod pas bstan par 'gyur ro/ /gang na byas pa nyid yod pa de na mi rtag pa nyid yod la/ mi rtag pa nyid med na byas pa yang mi srid de/ dper na bum pa dang nam mkha' dag lta bu'o zhes bstan par bya'o zhes bya ba 'dis ni rang bzhin gyi gtan tshigs spyi dang bye brag gi mtshan nyid ji lta bar bstan par bya bar de ltar ston par byed de/ 'dir yang gal te bum pa lta bu'o zhes ma brjod na de'i tshe mthun pa'i phyogs nyid la yod par bstan par mi nus so/ /gal te nam mkha' lta bu'o zhes ma brjod na/ de'i tshe ldog pa yang bstan par mi nus so/ /de tsam gyi rjes su 'jug pa yang de bzhin du bstan par nus te/ 'di ltar gal te gang dang gang na byas pa nyid yod pa de dang de na gdon mi za bar mi rtag pa nyid yod de/ dper na bum pa lta bu'o zhes ston par byed pa de'i tshe/ de tsam gyi rjes su 'brel pa bstan pa yin no/ /gzhan du na mthun pa'i phyogs dang mi mthun pa'i phyogs dag la yod pa dang/ med par ji skad du smos pa'i rnam pa dag bstan par mi nus so/ /zhes bya ba ni/ mthun pa'i phyogs la yod par ston par byed pas/ gal te tshang bar lta bu'o/ /bum pa lta bu'o zhes ma brjod na/ de'i tshe mthun pa'i phyogs nyid la yod pa ma bstan pa yin no/ /gal te yang mi mthun pa'i phyogs la med par ston par byed bas chu lta bu'o/ /nam mkha' lta bu'o zhes ma brjod na/ de'i tshe ldog pa ma bstan pa kho na yin te/ de ltar re zhig spyi'i mtshan nyid bstan par mi nus par bshad do/ /bye brag gi mtshan nyid mi nus pa bstan pa'i phyir/ 'bras bu'i rtags ni de'i 'bras bu nyid du nges pa 'am/ zhes bya ba smos te/ de'i 'bras bu ni de'i 'bras bu'o/ /de'i dngos po ni de'i 'bras bu nyid do/ /der nges pa ni de'i 'bras bu nyid du nges pa ste/ rgyu yod na 'bras bu yod pa nyid do zhes bya bar nges pa gang yin pa de ni de'i 'bras bu nyid du nges pa zhes bya'o/ /rang bzhin gyi rtags ni rang bzhin gyis khyab pa zhes bya ba la ngo bo nyid kyis khyab pa ni rang bzhin gyis khyab pa ste/ de tsam gyis rjes su 'jug pa'o zhes bya ba'i tha tshig go /de gnyi ga yang dpe bstan pa med par bstan par mi nus la/ gang gi tshe ji skad smos pa'i rigs pa'i chos can 'ga' zhig la gtan tshigs kyis spyi'i mtshan nyid dam/ bye brag gi mtshan nyid bstan par gyur pa de'i tshe dpe yang bstan pa kho na yin no/ /de ci'i phyir zhe na/ de'i phyir/ de'i tshul ni de tsam du zad pa'i phyir zhes bya ba smos te/ 'di ltar de'i tshul ni de kho nar zad de/ 'di lta ste/ gang du 'ga' zhig na bsgrub par bya bas gtan tshigs kyi rjes su 'gro bar ston par byed pa de ni chos mthun pa'i dpe yin no/ /gang na bsgrub par bya ba med na gtan tshigs med par ston par byed pa de ni chos mi mthun pa'i dpe yin no/ /'dis ni dpe'i nyes pa rnams kyang bsal ba yin zhes bya ba ni gang gi tshe/ gang du gtan tshigs kyi spyi'i mtshan nyid dam/ bye brag gi mtshan nyid ston par byed pa de yang dag pa'i dpe yin no zhes brjod pa de'i tshe/ gang gi mtshan nyid de gnyis ston par mi nus pa de ni dpe ltar snang ba yin no zhes bshad par 'gyur ro/ /dpe rnams bstan pa dper na sgra ni rtag pa ste/ lus can ma yin pa'i phyir/ las dang rdul phra rab dang bum pa bzhin no zhes bya ba ni sgrub par bya ba dang/ sgrub pa'i chos dang/ gnyi ga med pa yin zhes bya ba'o/ /sgra ni rtag pa ste lus can ma yin pa'i phyir/ las bzhin no zhes bya ba ni bsgrub par bya ba'i chos med pa? yin no// rdul phra rab bzhin no zhes bya ba ni sgrub pa'i chos med pa yin no/ /bum pa bzhin no zhes bya ba ni chos gnyi ga med pa yin no/ /de bzhin du bsgrub par bya ba'i chos la the tshom za ba la sogs pa yang zhes bya ba ni/ 'di la bsgrub par bya ba'i chos la the tshom za ba yod pa zhes bya bar tshig rnam par sbyar te/ bsgrub par bya ba'i chos la the tshom za ba la sogs pa gang dag yin pa de dag la ni de skad ces brjod do/ /dpe rnams bstan pa/ dper na smra ba'i phyir 'dod chags la sogs pa dang ldan pa yin te/ lam po che'i mi bzhin no zhes bya ba 'di ni bsgrub par bya ba'i chos la the tshom za ba yod pa'o/ /mi 'di ni 'dod chags dang ldan pa'i phyir 'chi ba'i chos can yin te/ lam po che'i mi bzhin no zhes bya ba 'di ni sgrub pa'i chos la the tshom za ba yod pa'o/ /'dod chags la sogs pa dang ldan pa'i phyir thams cad mkhyen pa ma yin te/ lam po che'i mi bzhin no zhes bya ba ni chos gnyi ga la the tshom za ba yod pa'o/ /rjes su 'gro ba med pa zhes bya ba ni gang la rjes su 'gro ba med pa nyid do/ /rjes su 'gro ba rab tu ma bstan pa zhes bya ba ni gang la rjes su 'gro ba yod kyang rab tu ma bstan pa'o/ /dpe bstan pa/ dper na gang smra ba de ni 'dod chags la sogs pa dang ldan pa ste/ 'dod pa'i mi bzhin zhes bya ba ni de la ni rjes su 'gro ba med de/ gang gis de la tshig dang 'dod chags la sogs pa rnams khyab par bya ba dang/ khyab par byed pa'i dngos po 'am rgyu dang 'bras bu'i dngos por 'gyur ba ni med do/ /sgra ni byas pa'i phyir mi rtag ste bum pa bzhin zhes bya ba 'di la ni rjes su 'gro ba yod kyang rab tu ma bstan par yin no/ /de bzhin du rjes su 'gro ba phyin ci log ni zhes bya ba ni dpe gang la rjes su 'gro ba phyin ci log yod pa zhes tshig rnam par sbyor ro/ /dpe bstan pa gang mi rtag pa de ni byas pa'o zhes bya ba lta bu'o zhes bya ba lta bu ste/ 'di la ni gang byas pa de ni mi rtag pa'o zhes brjod par bya ba yin na/ gang mi rtag pa de ni byas pa'o zhes log par smras so/ /chos mthun pas yin zhes bya ba ni/ de dag thams cad ni chos mthun pa'i dpe ltar snang ba yin no/ /chos mi mthun pas kyang zhes bya ba ni chos mthun pa'i dpe ltar snang ba ston par byed pa'o/ /rdul phra rab dang las dang nam mkha' bzhin zhes bya ba ni bsgrub par bya ba la sogs pa las mi ldog pa can dag yin zhes bya ba ni bsgrub par bya ba la sogs pa gang dag yin pa de dag ni bsgrub par bya ba la sogs pa'o/ /de dag las mi ldog pa rnams ni bsgrub par bya ba la sogs pa las mi ldog pa rnams te/ de dag gang dag la yod pa de rnams ni bsgrub par bya ba la sogs pa las mi ldog pa can dag yin no/ /de la rdul phra rab bzhin no zhes bya ba ni bsgrub par bya ba las mi ldog pa can yin te/ rdul phra rab rnams ni rtag pa'i phyir bsgrub par bya ba las log pa ma yin no/ /las bzhin no zhes bya ba ni sgrub pa las mi ldog pa can yin te/ las rnams ni lus can ma yin pa'i phyir sgrub pa las log pa ma yin no/ /nam mkha' bzhin no zhes bya ba ni gnyi ga las mi ldog pa can yin te/ nam mkha' las gnyi ga ma log pa yin no/ /de bzhin du bsgrub par bya ba las ldog pa la the tshom/ /za ba la sogs pa ni zhes bya ba ni/ gang la bsgrub par bya ba la ldog pa las the tshom za ba yod pa zhes tshig rnam par sbyar zhing/ bsgrub par bya ba las ldog pa la the tshom za ba la sogs pa gang dag yin pa zhes bsdu'o/ /dpe rnams bstan pa/ dper na ser skya la sogs pa ni thams cad mkhyen pa 'am yid ches pa ma yin te zhes bya ba ni dam ba ces pa gnyis bkod pa yin no/ /thams cad mkhyen pa dang 'dod chags dang bral ba'i rtags su gyur pa'i tshad ma'i phul du phyin pa bstan pa la med pa nyid kyi phyir zhes bya ba ni thams cad mkhyen pa nyid dang/ 'dod chags dang bral ba nyid ni thams cad mkhyen pa nyid dang 'dod chags dang bral ba nyid dag go / thams cad mkhyen pa nyid dang 'dod chags dang bral ba nyid kyi rtags su gyur pa/ tshad ma'i phul du phyin pa bstan pa la med pa gang dag yin pa de dag ni thams cad mkhyen pa nyid dang/ 'dod chags dang bral ba nyid kyi rtags su gyur ba tshad ma'i phul du phyin pa bstan pa la med pa rnams so/ /de'i dngos po ni nyid de/ de lta bas na thams cad mkhyen pa nyid dang/ 'dod chags dang bral ba nyid kyi rtags su gyur pa tshad ma'i phul du phyin pa bstan pa med pa nyid kyi phyir ro/ /'dir chos mi mthun pa'i dpe ni zhes bya ba ni brdar sprad par bla'o/ /gang zhig thams cad mkhyen pa 'am/ 'dod chags dang bral ba des ni skar ma shes pa la sogs pa bstan te/ dper na khyu mchog dang sdong ris la sogs pa lta bu zhes bya ba la/ skar ma'i shes pa ni skar ma'i dpyad ces bya ba'i gtan tshigs te/ bu lbu kA mA Sha la sogs pa la bya'o/ /de ni thams cad mkhyen pa nyid dang/ 'dod chags dang bral ba nyid dag gis rtags su gyur pa yin par khyu mchog dang sdong ris la sogs pas bstan pa ste/ de'i phyir de dag thams cad mkhyen pa 'am/ 'dod chags dang bral ba yin par yid ches par nus so zhes/ /chos kyi mi mthun pa'i dpe las bsgrub par bya ba'i chos thams cad mkhyen pa nyid dang yid ches pa ma yin pa gnyis ldog pa la the tshom za ba yin zhes bya ba ni/ 'dir khyu mchog dang sdong ris la sogs pa chos mi mthun pa'i dpe nyid du bstan na/ thams cad mkhyen pa nyid ma yin pa dang/ 'dod chags dang bral ba nyid ma yin pa ni de dag las log par nges pa med do/ /sgrub pa las ldog pa la the tshom za ba zhes bya ba ni de'i don ni go bar zad do/ /dpe ni dper na gsum rig pa'i bram zes ni mi 'ga' zhig gi brjod par 'dod pa'i tshig gzung bar mi bya ste/ 'dod chags la sogs pa dang ldan pa'i phyir ro zhes bya ba ste/ des brjod kyi rig byed dang/ mchod sbyin gyi rig byed dang/ snyan dngags kyi rigs byed dang/ rig byed gsum po de dag la ni gsum gyi sgra brjod do/ /gsum rig pas gsum rig pa'o/ /'di la gzung bar bya ba'i tshig yod pas 'di ni gzung bar bya ba'i tshig ste/ tshad mar byas pa'i tshig ces bya ba'i tha tshig go / des ni 'di skad du gsum rig pa 'bram ze gang yin pa des ni rjod par 'dod pa'i ma'i tshig rtag tu tshad mar mi bya'o zhes bstan par 'gyur ro/ /'dir chos mi mthun pa'i dpe ni zhes bya ba de'i don ni go bar zad do/ /tshig gzung bar bya ba gang dag yin pa de dag ni 'dod chags la sogs pa dang mi ldan pa ste/ dper na go'u ta ma la sogs pa chos kyi bstan bcos rnams byed pa lta bu'o zhes bya ba ni gau tam dang/ drang srong rgyas pa la sogs pa dag gis chos kyi bstan bcos rnams byas pa gang dag yin pa de dag ni/ gsum rig pa'i bram ze rnams kyis tshig tshad mar byas pa yin no/ /gtam la sogs pa las sgrub pa'i chos 'dod chags la sogs pa dang ldan pa ldog pa la the tshom za ba yin zhes bya ba na/ 'dod chags la sogs pa dang ldan pa ni de dag las log par nges pa med do/ /gnyi ga las ldog pa la the tshom za ba ni zhes bya ba ni gang la gnyi ga las ldog pa la the tshom za ba yod pa zhes bsdu'o/ /dpe ni dper na ser skya ma sogs pa ni yongs su 'dzin pa dang/ kun tu 'dzin pa dang ldan pa'i phyir/ 'dod chags dang bral ba ma yin zhes bya ba lta bu zhes bya ba ste/ yongs su 'dzin pa ni rdzas bdag gir byas pa'o/ /kun tu 'dzin pa ni bdag gir byas pa'i 'og tu zhen pa'o/ /yongs su 'dzin pa dang kun tu 'dzin pa ni yongs su 'dzin pa dang kun tu 'dzin pa dag ste/ de dag dang ldan pa la de skad ces bya'o/ /'dir chos mi mthun pa'i dpe ni gang zhig 'dod chags dang bral ba de la ni yongs su 'dzin pa dang kun tu 'dzin pa med de/ dper na khyu mchog la sogs pa lta bu zhes bya pa ni/ khyu mchog la sogs pa ni byin pa na cung zad kyang mi len te/ de'i phyir de dag la yongs su 'dzin pa med do/ /yongs su 'dzin pa med pa nyid kyis kun tu 'dzin pa med de/ de dag ni 'dod chags dang bral ba yin no/ /bsgrub par bya ba dang/ sgrub pa'i chos 'dod chags dang bral ba ma yin pa nyid dang/ yongs su 'dzin pa dang/ 'dzin pa la ldan pa dag khyu mchog la sogs pa las ldog pa la the tshom za ba yin zhes bya ba ni/ 'dod chags dang bral ba ma yin pa nyid ni 'dod chags dang ldan pa zhes bya'o/ yongs su 'dzin pa yang sems kyis bdag gir byed pa'o/ /kun tu 'dzin pa yang sred pa ste/ de thams cad ni sems la yod pa'i phyir/ dbang po'i spyod yul ma yin no/ /de'i phyir khyu mchog la sogs pa las log pa nyid du nges par bya mi nus so/ /ldog pa med pa zhes bya ba ni 'di la ldog pa med pas na zhes tshig rnam par sbyar ro/ /dper na smra ba'i phyir 'dod chags dang bral ba ma yin zhes bya ba de ni don go bar zad do/ /gang la 'dod chags dang ma bral ba nyid med pa de ni smra ba ma yin te/ dper na rdo'i dum bu bzhin zhes bya ba de ni chos mi mthun pa'i dpe yin no/ /gal te rdo'i dum bu las gnyi ga log pa yin mod kyi/ 'on kyang 'dod chags dang bral ba thams cad smra ba ma yin no zhes bya bar khyab par ldog pa ma grub pa'i phyir ro/ /ldog pa med ces bya ba ni gal te rdo'i dum bu la sems med pa'i phyir/ 'dod chags la sogs pa dang ldan pa dang/ smra ba ma yin mod kyi/ 'on kyang 'dod chags dang bral ba thams cad smra ba ma yin no zhes bya bar khyab par mi 'grub ste/ 'dod chags can nyid dang/ smra ba gnyis 'brel pa med pa'i phyir/ 'dod chags can nyid ldog pa na smra ba nges pa zlog par byed pa ni ma yin no/ /de'i phyir dngos su na 'di la ldog pa med do/ /ldog pa rab tu ma bstan zhes bya ba ni/ gang la ldog pa yod bzhin du ma bstan pa'o/ /dpe bstan pa/ chos mi mthun par dper na sgra ni byas pa'i phyir rtag pa ste/ nam mkha' bzhin no zhes bya ba lta bu zhes bya ba ste/ gang zhig chos mi mthun pa'i dper sgra ni ma byas pa yin pa'i phyir rtag pa ste/ nam mkha' bzhin no zhes brjod par byed na/ des ni ldog pa yod bzhin du ma bstan pa yin te/ 'di ltar gal te dngos po ma lus par sdud pa gang dag rtag pa de dag ni ma byas pa'o zhes brjod na/ de'i tshe ldog pa bstan pa yin gyi/ dpe tsam gyis ni ma yin no/ /ldog pa phyin ci log ces bya ba ni/ 'di la log pa phyin ci log yod ces bya bar tshig rnam par sbyar ro/ /dpe bstan pa/ dper na gang ma byas pa de ni rtag pa yin no zhes bya ba ste/ 'di la ni gang rtag pa de ni ma byas pa yin no zhes brjod par bya ba yin pa las log par smras so// dpe ltar snang ba de dag gis ni gtan tshigs kyis spyi'i mtshan nyid mthun pa'i phyogs nyid la yod pa dang/ mi mthun pa'i phyogs thams cad la med pa nyid dam/ bye brag gi mtshan nyid bstan par mi nus zhes bya ba ni/ dpe ltar snang ba de dag gis ni gtan tshigs kyis spyi'i mtshan nyid gang yin pa dang/ bye brag gi mtshan nyid gang yin pa dag bstan par mi nus te/ de nyid kyi phyir de dag dpe ltar snang ba zhes bya'o/ /dpe dang 'dra bar snang bas na dpe ltar snang ba rnams so/ /de'i phyir don gyi dbang gis de dag bsal bar rig par bya'o zhes bya ba ni/ gang gi phyir rnam pa de gnyi gas kyang gtan tshigs kyi mtshan nyid ston par mi nus pa de'i phyir/ don gyi dbang gis na de dag bsal bar blta bar bya'o/ /de ltar na re zhig yang dag pa'i shes pa 'dra ba dang bcas pa bshad zin to/ /da ni de'i gnyen po bshad par bzhed de/ ma tshang ba nyid la sogs par smras pa sun 'byin pa dag yin na zhes bya ba smos so/ /ma tshang ba nyid la sogs pa gang dag yin pa de dag ni ma tshang ba nyid la sogs pa'o/ /de dag smras pa ni ma tshang ba nyid las sogs par smras pa ste/ de re re la sun 'byin pa rnams yin no/ /sngar bsgrub pa'i skyon ma tshang ba nyid la sogs pa smos pa gang dag yin pa de dag brjod pa ni sun 'byin pa yin zhes bya ba la/ 'dir sogs pa zhes smos pas ni ma grub pa dang/ 'gal ba dang/ ma nges pa dang/ de'i skyon rnams yongs su bsdu'o/ /'dis rjod par byed pas na rjod pa ni tshig ste/ tshig gang gis skyon rnams sgrogs par byed pa de ni sun 'byin pa zhes bya'o/ /de ci'i phyir zhe na/ de'i phyir des pha rol pa 'dod pa'i don 'grub pa la gegs byed pa'i phyir zhes bya ba smos te/ gang gi phyir tshig des phyogs snga ma pas sgrub par 'dod pa'i don 'grub pa la gegs byed pa de'i phyir/ de ni sun 'byin pa zhes bya'o/ /re zhig de dag ni yang dag pa'i sun 'byin pa yin no/ /sun 'byin pa ltar snang ba dag ni ltag chod rnams te/ ltag chod rnams ni sun 'byin pa ltar snang ba nyid du rig par bya'o/ /yang ltag chod de dag kyang gang zhe na/ yang dag pa ma yin skyon rjod bdag ni ltag chos rnams yin no zhes bya ba smos te/ de dag ni yang dag pa ma yin pa yang yin la/ skyon yang yin pas yang dag pa ma yin pa'i skyon rnams so/ /yang dag pa ma yin pa zhes bya ba ni mi bden pa'o/ /de dag brjod pa ni yang dag pa ma yin pa'i skyon rnams rjod pa ste/ tshig gang dag gis sgrub pa'i skyon med bzhin du rjod pa de dag ni ltag chod dag yin par blta bar bya'o/ /yang dag pa'i shes pa bstan pa'i skabs yin na/ ci'i phyir sun 'byin pa dag dang de ltar snang ba ston ce na/ lan btab pa/ sun 'byin pa dag dang/ sun 'byin pa ltar snang ba dag bstan na/ yang dag pa'i shes pa de dag gnyen po dang bcas par bstan pa yin te/ 'di ltar 'di dag ni 'di la sun 'byin pa yin pas de dag yongs su spangs te bsgrub par bya'o// gang gi tshe 'di dag ni sun 'byin pa ltar snang ba yin pas/ de dag gis mi 'jigs par rig par bya'o zhes bshad pa yin pa de'i tshe/ yang dag pa'i shes pa nyid rnam pa thams cad du bstan par 'gyur bas/ de'i phyir ji skad smras pa'i thal bar 'gyur ba med do// rigs pa'i thigs pa tshig re rnam phye bas/ /dge ba rgya chen deng thob gang yin des/ /'gro kun rigs pa'i bdud rtsi thob gyur nas/ /nges par srid pa'i zad pa byed par shog /rigs pa ji bzhin rigs pa yi/ /rgyal po 'dod nas rigs thigs kyi/ /rgya cher 'grel pa dul ba'i lhas/ /slob ma la phan bskyed phyir byas/ /rigs pa'i thigs pa rgya cher 'grel pa slob ma la phan pa las le'u gsum pa'o// //rgya cher 'grel pa'i gzhung tshad ni/ /shlo ka tshig stong dag dang ni/ /de bzhin shlo ka sum cur ni/ /yongs su bsdoms te mngon par brjod/ /rigs pa'i thigs pa rgya cher 'grel pa slob ma la phan pa zhes bya ba slob dpon dul ba'i lhas mdzad pa rdzogs so// //rgya gar gyi mkhan po dza ni mi tra dang/ zhu chen gyi lots+tsha ba bande ye shes sde la sogs pas bsgyur cing zhus te gtan la phab pa/ / (//rigs pa'i thigs pa'i rgya cher 'grel pa chos mchog gis mdzad pa bzhugs/) /rgya gar skad du/ na ya bindu TI kA/ bod skad du/ rigs pa'i thibs pa'i rgya cher 'grel pa/

CLOSE WINDOW