བོད་ཡིག

e-texts based on the ACIP/ALL Input

dge slong rin chen bzang pos bcos nas zhus te gtan la phab pa// //rgya gar skad du/ a sho ka mu kha nA ga bi na ya pa ri ts+tsha da/ bod skad du/ mya ngan med pa'i sgo nas klu btul ba'i le'u'o/ /'di ltar rjes su thos te/ sangs rgyas bcom ldan 'das mya ngan las 'das nas lo brgya lon pa na/ grong khyer pa ta li bu trar rgyal po mya ngan med ces bya ba 'khor lo sgyur pa'i rgyal po bzhi cha la dbang byed pa zhig byung bar gyur to/ /des nor gyi don du tshod pa lnga brgya bkug nas smras pa/ shes ldan dag khyed song la rgya mtsho chen po nas rin po che sna tshogs pa long la shog cig /gang gi tshe de dag rim gyis song ste rgya mtsho chen por phyin nas/ rin po che dang/ gser dang/ dngul dang/ rdo rje dang/ bai DUrya dang/ shang ka shi la dang/ byi ru la sogs pa rin po che'i tshogs du mas de dag gis gru yongs su bkang ste dzam+bu'i gling du phyogs te chas so/ /de dag log nas 'ongs pa na rgya mtsho'i dkyil du klus gru bcom nas/ de nas tshod pa de dag srog gi lhag ma 'ba' zhig dang grus 'ongs te/ gang gi tshe rim gyis grong khyer pa ta li pu trar phyin pa dang/ rgyal po mya ngan med kyis chod pa rnams 'ongs so zhes thos so/ /de skad ces bya ste/ rtswa yi se me ni ngoms mi sreg /rgya mtsho chu yis ngoms pa med/ /'dir ni lha yul yid 'ong bas/ /'gro rnams dbang drug ngoms pa med/ /ces bya ba yin pas de 'dod pa'i rgyus sems bskyed cing nor dum dgram pa'i gnas bya'o snyam du bsams te/ de nas des rdzing bu dang bcas pa'i bskyed mos tshal du gnas rgyan thams cad kyis brgyan pa/ ba dan dang rgyal mtshan bsgreng ba/ bla bre dang/ gos kyis spras par yid du 'ong ba'i spos rnams ni gtul/ /gangs ltar bsil ba'i chus gang ba'i rdzing bu na shel lta bu'i phye ma dang ldan pa autpa la dang/ pad+ma dang/ ku mu ta dang/ puN+DA rI ka rnams kyis khebs pa/ ngang pa dang/ khu byug dang/ rma bya dang/ ne tso dang/ ri skegs dang/ dur pa dang/ ka la pingka dang/ shang shang ti'u dang/ bya skad snyan pa sgrogs pas nyams dga' ba/ pi wang dang/ gling pu dang/ rdza rnga dang/ sgra bzangs dang/ 'khar rnga dang/ pa Ta ha dang/ rnga bo che dang/ dung rnams rgyun tu brdung ba/ blon po dang/ grong mi dang/ ljongs kyi mi dang/ skye bo rnams ni 'dus/ dge sbyong dang bram ze dang/ kun tu rgyu dang/ gcer bu pa dang/ kun tu 'tsho ba la sogs pa ngo mtshar gyis 'dus te/ nor bu dang/ mu tig dang/ bai DUrya dang/ shang ka shi la dang/ byu ru dang/ mu tig dmar po dang/ mu sa la gar ba dang/ ain+d+ra nI la dang/ mthon ka chen po la sogs pa'i rin po che'i bye brag rnams blta bar bya'o snyam mo/ /de nas rgyal po nor dgram sar 'dug ste tshong pa lnga brgya po de dag kyang rgyal po'i drung du 'ongs pa dang/ thams cad stod g.yogs gcig pu dang ldan zhing gcer bur gnas so/ /rgyal pos smras pa/ ci'i phyir 'di lta bu'i gnas skabs su gyur/ tshong pa rnams kyis smras pa/ lha gru bcom pas 'di ltar gyur to/ /rgyal pos smras pa/ gang gis gru bcom par gyur/ /tshong pa rnams kyis smras pa/ ba tshwa can gyi rgya mtsho na gnas pa'i klus bcom lags so/ /rgyal pos smras pa/ bdag gis ji ltar bsgrub par bya/ /tshong pa rnams kyis smras pa/ lha 'di yongs su btsal du gsol/ /gal te tshol bar mi mdzad na/ phyis nas yang tshong pa 'ga' yang rgya mtsho chen por 'jug par mi 'gyur ro/ /de'i tshe 'khor de na dge slong dbang po zhes bya ba bsod nams che ba zhig yod de/ de rgyal po dang ha cang yang mi ring ba zhig na 'dug par gyur to/ /rgyal pos tshe dang ldan pa dbang po la smras pa/ slob dpon bdag gis 'di la ji ltar bsgrub par bgyi/ tshe dang ldan pa dbang pos smras pa/ rgyal po chen po zangs ma'i byang bu la yi ge bris la rgya mtshor rdzongs shig /ci tsam na rgyal pos zangs ma la spring yig tu bris te smras pa/ sa 'di rgya mtshos gtugs pa skyong/ /rgyal po stobs ldan mya ngan med/ /rab tu drag cing btsan pa yis/ /nor khyer mtshor gnas gang yin pa/ /de dag 'dir ni myur pa ru/ /nga yi drung du bskyal bar bgyi?/ zhes yi ger bris te/ zangs ma'i byang bu rgya mtshor bskyur ro/ /de nas klu ma rangs nas/ rgya mtsho nas slar 'dzam+bu'i gling du bskyur ro/ /de nas rgyal po'i pho nyas zangs ma'i byang bu de blangs nas slar pa ta li pu trar 'ongs te/ rgyal po la skabs de bsnyad pa dang/ de nas rgyal po mya ngan med sems khong du chud nas mtshan mo stan gyi stengs su nyal te/ ji ltar 'di la bsgrub par bya snyam du sems so/ /de nas nam mkha' i dkyil na gnas pa'i lhas rgyal po la smras pa/ rgyal po chen po sdug bsngal ma byed cig /'jig rten gsum mchog lha mis mchod/ /stobs phyug chu srin rgyal mtshan can/ /mthar byed bde gshegs sku gdung la/ /mchod pa rnams kyis rab mchod kyis/ /de rjes khyod kyis dgong 'grub 'gyur/ /lha gnyis pas smras pa/ gang zhig bya min rgyal chen mya ngan ma mdzad par/ /sngags dang rigs sngags sman sbyor ma bgyid par/ /mi dbang dbang du bya bar nus 'gyur ba/ /bde gshegs bstan la lhag mar gus pa yis/ /de yis klu rgyal gang yin dbang du 'gyur/ /de nas zhag gnyis pa la rgyal po mya ngan med skra bkrus te/ /gos dkar po bgos nas dri dang/ me tog dang/ phreng ba dang/ byug pa rnams thogs nas tshig 'di skad ces smras so/ /phyogs mtshams mkha' bzhugs rdzu 'phrul ldan/ /shar gyi phyogs dang gzhan bzhugs la/ /bdag ni gsol 'debs spyan 'dren gyis/ /bdag la thugs rjes gzung du gsol/ /rgyal pos de skad ces smras ma thag tu shar phyogs dang/ /lho phyogs dang/ nub phyogs dang/ byang phyogs rnams nas dgra bcom pa stong phrag drug cu byon zhing 'dus par gyur to/ / rgyal pos me tog dang/ spos dang/ dri dang/ byug pa rnams thogs nas/ de bzhin gshegs pa'i sku gdung la mchod pa byas te/ /de nas bcom ldan 'das la mngon par bstod pa/ nad pa dang ni rgas dang sdug phongs gzhan yang 'chi gzigs nas/ /rgyal bas yul dang 'byor pa btsun mo'i 'khor dang nye du spangs/ /sa bdag zas gtsang drung gshegs bskrad nas rgyal po'i dpal spangs pa/ /bcom ldan de la bdag gus dang bas de yi sku gdung mchod/ /gang gi stobs kyis bdud ni shin tu stobs ldan blta bar dka' rnams bcom/ /gang gi bA ra Na ser 'khor lo legs bskor srid spang zhi bar mdzad/ /gang gis lnga sde skye ba'i sdug bsngal gyis gdung 'chi ba bkrol/ /shAkya thub de'i sku gdung dpe med 'di la bdag gis yang dag mchod/ /gang zhig gang du mya ngan 'das gshegs 'dir ni mar me 'gags pa bzhin/ /glang po stong stobs las lhag de ni mi rtag stobs kyis phye mar brlag /sa bdag mchog gis cha brgyad mnyam bgos sku gdung yang dag mchod gyur pa/ /de yi sku gdung dpe med 'di ni 'jig rten mkhas pas yang dag mchod/ /de nas dge slong gis dge 'dun la gdugs tshod drangs nas mchod do/ /de nas rgyal pas tshe dang ldan pa dbang po la smras pa/ 'phags pa ci zhig mchog tu bsgrub par bgyi tshe dang ldan pa dbang pos smras pa/ rgyal po chen po dang ni khyod kyi gzugs gnyis pa klu'i gzugs te/ sku gzugs legs pa gnyis mdzod la gser gyi snod chen po byas pa'i nang du de gnyis stsol cig dang de las mngon sum du gzigs par 'gyur ro/ /de bzhin du byas te/ phyis rgyal pos bltas pa dang/ klu'i gzugs 'dug pa la rgyal po'i gzugs phyag byed pa rgyal pos mthong ngo/ /rgyal po yid la gcags par gyur pa dang/ tshe dang ldan pa dbang pos smras pa dang/ rgyal po chen po dus 'dir yang dang yang du nyi ma re re la khyad par gzigs par 'gyur ro/ /ji lta ji ltar rgyal pos de bzhin gshegs pa la me tog dang/ phreng ba dang/ dri dang/ spos dang/ byug pa rnams kyis mchod cing dge slong gi dge 'dun la yang rang gi lag nas bza' ba dang bca' ba rnams tshim par bstabs shing rgya cher mchod par byas te/ chos kyang gus par mnyan pa de lta de ltar rgyal po'i gzugs langs pa la klu'i gzugs phyag 'tshal bar gyur to/ /yang de'i rdzas la klu'i gzugs de yan lag thams cad kyis rgyal po'i gzugs la phyag 'tshal bar gyur pa mthong bas de rgyal po yid rab tu dga' bar gyur te/ tshe dang ldan pa dbang po la smras pa/ kye ma dkon mchog gsum mchod pa'i/ 'bras bu ci 'dra 'di la gzigs/ /rgya mtsho'i nang na gnas pa'i klu/ bdag gis btul zhing 'di dbang bgyis/ /blo gros chung ba'i mi rnams kyang/ /su zhig sangs rgyas mchod mi bgyid/ /gang zhig 'bras bu phral bskyed la/ /su zhig yid kyis sems mi bgyid/ /bdag nyid che ba 'thob 'dod pa'i/ /lha rnams dang ni mi rnams kyis/ /rdzogs pa'i sangs rgyas yang dag mchod/ /skye ba zad cing yang sred med/ /slob dpon dbang pos skabs la bab par shes nas smras pa/ rgyal po'i chen po zangs ma'i yi ge yang da spring ba'i rigs so/ /rgyal pos yang zangs ma'i yi ge de skur nas btang ngo/ /de rgya mtshor bskyur ba dang/ /klu'i rgyal pos yi ge de spyi bos blangs so/ /de nas rgyal po la lan mang du lha tshong ba de dag 'dir rdzongs shig /so so'i rin po che gang lags pa skur la slar brdzang ngo zhes smras pa dang/ de nas rgyal po'i pho nya slar 'ongs nas rgyal po la phrin de smras pa dang/ de nas rgyal pos tshong pa bos nas smras pa/ khyed cag song la so so'i rin po che gang yin pa long la slar shog cig /de nas gnas brtan dbang pos rgyal po la brgyad pa chos kyi rgyal po la sa rdul ngan pa 'bul bar byed pa yin mod/ de nas rgyal pos gnas brtan dbang po la smras pa/ slob dpon 'o na ji ltar bsgrub par bgyi/ gnas brtan dbang pos smras pa/ khyod la chad pa yin gyis rang gi phrag pa la khur la 'dir skyol cig ces zangs ma la yi ge slar btang bar gyis shig / de nas rgyal pos spring yig du bris pa/ dzam+bu'i gling gi dbang phyug dam pa'i bka' bcag pa'i chad par rang gi phrag par khur la skyol cig ces yi ge btang ba dang/ yi ge bklags ma thag tu klu'i rgyal po skrag par gyur nas smras pa/ lha de lta lags na gdugs bdun na 'tshal mchi'o/ /de rgyal pos thos pa dang/ ba ta li pu tra'i grong khyer thams cad du dril bsgags te/ gang zhig grong khyer 'di na gnas pa'i skyes pa dang bud med bsod nams kyi khyad par dang/ rgyal po'i rnam par 'phrul pa mthong bar 'dod pa dag zhag bdun pa la rgyal po'i pho brang du shog cig /de nas rgyal pos zhag bdun pa la grong khyer pa rnams dang/ blon po dang/ grong rdal dang/ ljongs kyi mis yongs su gang bar bskor te/ rgyal po'i rdzu 'phrul chen po dang/ mthu chen po dang 'byor pa chen pos 'khor gyi khyams su song nas seng ge'i khri la 'dug go / de nas klu'i rgyal po klu du mas yongs su bskor nas mi'i cha byad du sprul te/ rang rang gi phrag pa la rin po che'i khur thogs nas rgyal po chen po mya ngan med ga la ba der song ste phyin nas khur rnams phog nas rkang pa gnyis phyag byas so/ /skye bo'i tshigs chen po ngo mtshar du gyur nas/ sngon ma mthong ba mthong ngo zhes ca co'i sgra bsgrags te 'di skad ces kyang smras so/ /'di 'dra'i bsod nams stobs kyis ni/ /rgyal po yongs su gzung bar gyur/ /skye bo rnams ni ngo mtshar skyes lha rnams dang ni 'di ru yang/ /phun sum tshogs pa 'dod pa yis/ /bsod nams gang yin zhes bya ba/ /'di lta'i bye brag su me bsgrub/ /bsam du med pa'ang gang bsams pa/ /don de 'bad pa med pa ru/ /mi rnams la ni 'bras bur smin/ /rkang thang glang chen myos pa dang/ /rta dang shing rtas rgya mtsho na/ /gnas pa'i klu dang lhan cig g.yul/ /stobs chen sna tshogs mtshon chas min/ /sdug bsngal mgo bo'i gdengs ka can/ /bsod nams rang bzhin 'di 'dra ba'i/ /zhags pa yi ni des bcings nas/ mya ngan med rgyal zhal mthong ba/ /bka' drin bsams pas rjes mthun 'jug /des kyang de dag sna tshogs pa'i bka' bas 'ongs pa mthong nas/ bcom ldan 'das kyis bka' i yon tan rjes su brjod pa/ bcom ldan 'das kyis 'di skad gsungs/ / bsod nams me yis mi tshig ste/ /rlung gi 'jig par mi 'gyur ro/ /bsod nams chu yis 'ju mi 'gyur/ /sa bzhin du ni khyer mi 'gyur/ /rgyal po dang ni chom rkun gyis/ /dpog tu med par bsod nams gnas/ /skyes pa dang ni bud med kyis// dbrog par nus pa ma yin no/ /bsod nams bde ba skyed par gter/ /'dir ni lus par ma 'gyur te/ /gang dang gang du skyes pa ru/ /de dang der ni rjes su 'brang/ /da nas blon po gzhan zhig ngo mtshar skyes nas 'di skad ces smas so/ /yongs su bskor ba'i 'khor dbus na/ /bsod nams rgyan gyi rgyal po mdzes/ /skar ma'i tshogs kyis yongs bskor ba'i/ /ston ka yi ni zla ba bzhin/ /chu dang mkha' la 'gro ba'i rlung/ /bsod nams kyis ni nges pham byas/ /sa la gnas pa'i dgra yi tshogs/ /bsod nams kyis ni zad par byed/ /ji ltar yid la bsams pa yis/ /bde ba bsod nams kyis thob byed/ /bsod nams 'di ni bsags pa ru/ /sems dang ldan pa su mi byed/ /spangs pas grub ces bya ba'i blon pos smras pa/ bcom ldan 'das kyis 'di skad gsungs/ /bsod nams 'di ni dag byed yin/ /bsod nams des la 'bar stegs te/ /mtho ris su ni 'gro ba'i lam/ /mi rnams bde rol bsod nams yin/ /bsod nams rnal 'byor pa rnams kyi/ /mya ngan 'das par 'gro ba'i lam/ /yang blon po gsum pa gzhan zhig gis smras pa/ bsod nams kyis ni khyod kyi bzhin/ /zla ba dangs pa shar dang mtshungs/ /rgya mtsho'i nang du zhugs pa yang/ /bsod nams kyis ni gtor ma mchis/ /yid du 'ong ba thob byed pas/ /bsod nams 'gro bas phyag byas 'os/ /bsod nams yang dag bsags pa la/ /'bad par mi rnams su byed pa/ /bsod nams kyis rgyal skyes bu ni/ /rta mis ma yin glang pos min/ shing rtas bsod nams las rgyal min/ /mnga' dang ral gris ma yin no/ / nor rnams dang ni yal dang ni/ /g.yal gyis bsod nams las rgyal min/ /bsod nams kyis ni rgyal ba la/ /rigs dang stobs dang gzugs kyis min/ /bsod nams kyis 'phags mi rnams kyi/ /sa rnams gsum gyi steng na gnas/ /bsod nams mi rnams gnas yin te/ /bsod nams thar ba thob byed mchog /bsod nams 'jig rten grags byed yin/ /de phyir bla med bsod nams btsal/ /mtho ris thob byed ngan song spong/ /mi yis rtag tu brten bya ste/ /mkhas pas bsod nams bya ba yin/ /de nas rgyal pos tshor ba de dag rnams la smras pa/ khyed rang rang gi rin po che rnams khyer cig /de nas de dag gis blangs nas rgyal po la rab tu bstabs te/ gzhan yang lha'i sbyor bas 'gas kyis/ /lha 'di dag legs par snoms shig /rgyal pos smras bkab dag la cung zad kyang dgos pa med kyis khyer la song la the tshom med par longs spyod cig / de nas rgyal pos rab tu dga' ba'i yid kyis dkon mchog la bstod pa 'di skad ces smras so/ /e ma'o sangs rgyas e ma'o chos/ /e ma'o bstan pa phun sum tshogs/ /sa rdul snyim gang phul ba yis/ /rnam par smin pa 'di 'dra thob/ /de nas rgyal pos yang smras pa/ /ding 'dir klu ni bdag dbang gyur/ /thub chen khyod kyis bka' drin las/ /legs spyod rgyal po bdag bgyid pa/ /bdag gis skye ba 'bras bcas lags/ / yon tan mchog ldan thub pa yi/ /bstan mchog 'di la su mi 'jug /dper na sa bon rdul btab pas/ /'bras bu chen po skyed byed na/ /rin chen phul ba smos ci 'tshal/ /de nas klu chos la sbyar nas slar song ngo/ /mya ngan med pa'i sgo nas klu btul ba'i le'u rdzogs so/ / //rgya gar gyi mkhan po gnas brtan a dzi ta sh+rI b+ha dra dang/ dge slong shAkya 'od kyis bsgyur pa// //gnas brtan spyan drang ba bzhugs// //rgya gar skad du/ s+tha bI ro pa ni man+t+ra na bod skad du/

CLOSE WINDOW