བོད་ཡིག

e-texts based on the ACIP/ALL Input

/ // */ /rgya gar skad du/ /tsit+ti ratna bi sho d+ha na kra ma nA ma le kha/ bod skad du/ sems rin po che rnam par spyang ba'i rim pa zhes bya ba'i spring yig/ sangs rgyas dang byang chub sems dpa' thams cad la phyag 'tshal lo/ /sa gsum dbang phyug skye dgu chos kyis skyong mdzad pa/ /lha mi'i bla ma 'phags pa'i gang zag rnams kyi yab/ /rgol ba tshar gcod rang gi 'khor gyi dga' bskyed pa/ /chos kyi rgyal po gcig bu de ni rgyal gyur cig /blo zhan bdag 'dras gzhan la bskul bar mi nus shing/ /bskul bas phan par 'gyur ba 'ang deng sang nyung? mod kyi/ /'on kyang sa yi bdag po khyod kyis nongs pa yal bor na/ /'gro mang de 'drar 'gyur 'di ma bzod khyod la bskul/ /mi skyong khyod kyi dbang phyug 'di ni sngon tshad nyid kyi thugs/ /gdul dka' legs par btul las brnyes kyi gzhan gyis byin pa dang/ /sa yi rum nas 'thon dang gnam babs lta zhig ga la lags/ /sa bdag dpal 'di mi nyams bzhed na da dung thugs thul 'tshal/ /gang zhig phan na de ni brtags te dka' yang mdzad rigs la/ / gang zhig mi phan de ni bsgrub par sla yang btang ba'i rigs/ /de phyir sngon tshe thub chen rgyal bu zla bar gyur pa yis/ /rgyal po su ta sa'i bu la gdams pa smras pa yang/ /rgyal po gcig pos g.yul dor dmag gi dpung las rgyal/ /sems tsam tshar gtsang phyir ni sngar ma ma mdzad cig /mi yi bdag po 'jig rten phyi ma 'ang gzigs pa'i rigs/ /de bas dgyes kyang phan pa ma yin bsten mi rigs zhes so/ de phyir gang gis dman pa'i rigs su ltung byed ba/ /nga rgyal dgra spangs bdag gi tshig 'di sang phyir yang/ /mi bdag khyod kyis gus pas gsan rigs te/ /legs smras byis las blang zhes thub chen gsal bar gsungs/ /sa bdag tsher ma'i shing las sbrang rtsi bzhin/ /dgra bo las kyang legs smras gzung bar bya/ /gser gyi ri? las dug gi chu rgyun bzhin/ /yid 'ong skye bo'i tshig ngan spang 'tshal lo zhes so/ /gang zhig ma btul mnar med sogs/ /sdug bsngal bzod dka' skye byed cing/ /de nyid btul bas lha mi dang/ /'jig rten min pa'i bde ba 'ang 'thob/ /rab tu mthu ldan sems 'di ni/ /mkhas pa su zhig 'dul mi byed/ /'dir sems ni rang bzhin gyis 'od gsal ba rtag tu rnam par mi rtog pa'i rang bzhin yin mod kyi/ lus dang ngag bran lta bu dang bcas pa blo bur gyi nyon mongs pa dang nye ba'i nyon mongs pa dag gis dkrugs pa ste/ /de'i phyir 'di dag rnam par sbyangs te nor bu chu shel gyi 'od ltar rab tu 'od gsal ba'i rang bzhin dkrugs ma dang bral ba bskyed de/ 'di tsam ni mi gnas pa'i mya ngan las 'das pa'o/ /de la 'dir bsdus na sems te dkrugs pas rtog pa can du byed cing/ /lus dang ngag bran ltar 'khor ba ni rnam pa bzhi ste/ thams cad kyi rgyu rnam par rtog pa mang ba dang/ 'dod chags dang/ zhe sdang dang/ gti mug shas che ba'o/ /de la gang rnam par rtog pa med pa des ni rlung gi ting nge 'dzin la dmigs pas re spang bar bya ste/ bgrang dang rjes 'gro 'jog pa dang/ /rtog pa dang ni bsgyur ba dang/ /yongs dag rnam pa drug du 'dod/ /de ni bgrang ba dang/ rjes su 'gro ba dang/ 'jog pa dang/ nye bar rtog pa dang/ sgyur ba dang/ yongs su dag pa ste rgyu drug dang ldan na/ yongs su rdzogs pa yin no/ /de la bgrang bzhes bya ba ni dbugs rdub pa dang dbugs 'byung ba dag la sems gtad nas mngon par 'du bya ba med par lus dang sems rnal du bzhag ste/ dran pa tsam gyis gcig dang gnyis nas bcu'i bar du bgrang bar byed pa'o/ /sems mngon par bsdus pa rnam par g.yeng bar dogs pas ha cang mang ba dang nyung ngur ni ma yin no/ /de la skyon ni gsum yod de/ /gal te gcig la gnyis su brtsis na lhag par bgrangs pa'i skyon no// gal te gnyis la gcig tu 'dzin ni ma tshang bar bgrangs pa'i skyon no/ /gal te dbugs rdub ba la dbugs 'byin par 'dzin tam dbugs 'byin pa la rdub par 'dzin na 'tshol bar 'dzin par skyon no/ /de las gzhan pa ni yang dag par bgrang ba yin no/ /bar skabs su sems rnam par g.yeng na/ /yang mgo nas ji srid du ting nge 'dzin ma thob kyi bar du bgrang bar bya'o/ /rjes su 'gro ba zhes bya ba ni 'di dag ji srid gcig tu 'byung ngam 'jug /ci 'di dag lus thams cad la khyab pa dag gcig gam phyogs 'ga' zhig nas rgyu ba dag yin zhes mngon par 'du bya ba med par dbugs rdub pa dang dbugs 'byung ba'i rjes su 'gro ba ste/ de 'jug pa na lkog ma dang/ snying ga dang/ lte ba dang/ rked pa dang/ brla dang/ byin par 'jug pa'i rim gyis rkang pa gnyis kyi bar du rjes su 'gro la/ 'phyur? ba na mtho gang dang 'dom gang gi bar du 'byung ngo/ /gzhan dag na re rlung gi dkyil 'khor dang rnam par 'thor byed kyi rlung gi bar du'o/ /zhes zer te/ 'di ni de kho na yid la byed pa'i phyir rig pa ma yin no/ /'jog pa zhes bya ba nor bu'i phag pa bzhin du sna'i rtse mo nas rkang pa'i mthe bo'i bar du gnas par lta zhing ci 'di dag phan 'dogs par byed pa zhig gam/ /gnod pa byed pa zhig gam/ / grang ngam dro ba zhig ces rtog pa'o/ /nye bar rtog pa zhes bya ba ni 'di dag gi rlung 'bal zhig ma yin gyi 'byung ba chen po bzhi po ngag dang 'byung ba dag las mngon par grub pa'i rgyur byas pa'i gzugs dang de dag la brten pa'i sems dang sems las byung pa rnams kyang yod do/ /zhes phung po lnga nye bar rtog pa'o/ /sgyur ba zhes bya ba ni rlung la dmigs pa'i blo bsgyur te chos kyi mchog gi bar du blo gong nas gong du dge ba'i rtsa ba rnams la yang dag par sbyor ba'o/ /yongs su dag pa ni mthong ba'i lam la sogs pa la 'jug pa'o/ /gzhan dag na re sgyur ba ni dran pa nye bar gzhag pa nas rdo rje lta bu'i ting nge 'dzin gyi bar yin la/ /rnam par dag pa ni zad pa shes pa la sogs pa yin no zhes zer ro/ /'di lta bu ni slob dpon dbyig gnyen gyi zhal snga nas ji ltar bris pa kho bos 'dir yang byis par shes par bya'o/ /de ltar rim pa drug po de dag gis las ni ji skad du 'phags pa sa'i snying po 'khor lo bcu ba'i mdo las gsungs pa bzhin te/ de las ni ji ltar dran pa'i dbang gis yang dag pa ji lta ba bzhin du dbugs phyi nang du rgyu ba la rtog ce na/ yang dag pa ji lta ba bzhin du bgrang ba dang/ rjes su 'gro ba dang/ zhi gnas dang/ lhag mthong dang/ 'jug pa dang/ yongs su dag pa la rtog go /de la bgrang bas ni bya ba'i las kyi dngos po rnam pa gnyis byed par 'gyur te/ /rten du gyur pas rnam par rtog pa dang rnam par dpyod pa thul ba dang/ dbugs phyi nang du rgyu ba'i mtshan nyid 'dzin par nus pa'o/ /rjes su 'gro bas kyang bya ba'i las kyi dngos po rnam gnyis byed par 'gyur te/ yang dag par 'byung ba la rten cing rnam par rtog pa dang rnam par dpyod pa dang bral ba dang/ dbugs phyi nang du rgyu ba'i 'jug pa'i mtshan nyid la mkhas par 'gyur ba'o/ /zhi gnas kyis ni bya ba'i las kyi dngos po rnam pa gnyis byed par 'gyur te/ dbugs phyi nang du rgyu ba'i 'bri bar mngon du ston pa dang/ ting nge 'dzin gyi mchog la gnas par nus pa'o/ /lhag mthong gis kyang bya ba'i las kyi dngos po rnam pa gnyis byed par 'gyur te/ dbugs phyi nang du rgyu ba zad par mngon du ston pa dang/ sems dang sems las byung ba'i chos so so bar rtogs pa la gnas pa'o/ /'jug pas kyang bya ba'i las kyi dngos po rnam pa gnyis byed par 'gyur te/ /nye bar len pa'i phung po spong ba'i sbyor ba la mkhas pa dang/ /'phags pa'i sar 'jug pa la sbyor ba'o/ /yongs su dag pas kyang bya ba'i las kyi dngos po rnam pa gnyis byed par 'gyur te/ kun nas nyon mongs pa spong pa dang/ lta ba yongs su dag pa'o zhes so/ /de ltar dbugs thung ngu rdubs na yang dbugs thung du rdubs so snyam du yang dag pa ji lta ba bzhin du rab tu shes so snyam mo zhes bya ba la sogs pa bcu drug kyang legs par rtogs par 'gyur ro/ /'dir rnam par rtog pa mang ba la bstan pa ni gtsor byas kyi yon tan ma lus pa 'di la brten pas na thar pa'i grong khyer gyi sgo 'byed pa ni dbugs rdug pa dang 'byung ba dran pa yin te zhes gsungs so/ /ji ltar zhen rab tu gdul dka' ba'i sems zhes brjod pa de ni rlung las gud du ma dmigs pa'i phyir te/ /de bas na sems zhes bya ba de ni rlung du brjod do zhes gsungs so/ /de ltar mi bdag khyod kyis rlung gi phra dang zab mkhyen nas/ /yun ring dus nas rnam rtog dgra yis rab tu gces pas shin tu yang/ /mnyel zhing skyo ba'i thugs ni deng nas ngal? bsos rtog dgra bzlog pa dang/ /lo yis ma yin gus par sbyor bas zhag gi rim pas rtog bral mdzod/ /de nas rim gyis yongs su dag pa'i mthar yang khyod kyi thugs gzhal na/ /sa bdag khyod kyis skye ba 'bras bcas de nas chos kyi rgyal por 'gyur/ /de yi bar du lha mi'i bde ba tshad med rnams la dgyes bzhin du/ /thugs btul mthu yis spyod par 'di la the tshom med par mngon sum gnas/ /rnam par rtog pa'i gnyen po bshad zin te/ /sems kyi rtog pa spyad pa'i rim pa'o/ /mi skyod khyod kyi thugs ni gal te bud med kyis phrogs na/ /'di nas yi bdag po mthu rtsal rab tu dman pa ste/ /gang gis g.yul chen 'jigs rung ba gzhom pa'i thabs mkhyen na/ /mi gtsang kun smod mngon gyur bud med mtshan nyid mi mkhyen 'di mtshar che/ /shin tu yid 'ong tsher ma'i gnod pa'ang mi bzod lus 'di ni/ /bud med bsten pa'i rgyu las 'di dang slad ma mgo gcod sogs/ /rab tu bzod dka' i sdug bsngal 'byung 'di nyid kyi mngon sum na/ /'on kyang bla ma bka' yis 'dod chags zhi bar byed pa mdor brjod bgyi/ /chags pa can rnams kyi gnyen po ni rus gong yid la bya ba yin te/ keng rus chags can thams cad la zhes bshad pas so/ /ji ltar zhe na/ rus pa rgya mtsho'i bar du mi/ /spro zhing sdud pas las dang po/ /rkang rus dang ni thod phyed par/ /tang bas spyad pa byas par bshad/ /smin ma'i bar du sems 'dzin pas/ /yid la byed pa rdzogs pa yin/ /zhes bshad pa'i rim pas so/ /gzhan yang byis pa rnams ni phal cher kha dog dang/ dbyibs dang/ reg pa 'jam pa dang/ bsnyen bkur la chags te/ de dag gi gnyen por ni rnam par bsngos pa dang/ rnam par dmar ba dang/ rnam par tshig pa dag yid la byed pas kha dog la chags pa dag sel to/ /rnam par rnags pa dang/ rnam par zos pa dang/ rnam par 'thor ba dag yid la byed pas ni dbyibs la chags pas sel to/ /rnam par 'bus zhigs pa dang rus gong rgus pas 'brel ba dag yid la byas pas ni reg bya 'jam pa la tshigs pa sel to/ /rnam par bam pa'i ro mi g.yo ba rkyal ba steng pa bus pa lta bu/ rdo ltar bsnyen bkur byed pa dang bral ba yid la byed pas ni rkang pa bkru ba la sogs pa'i bsnyen bkur la chags pa sel bar byed do/ /gzhan yang rnam par phye ste brjod na/ sngo bsangs la sogs pa'i kha dog la chags pa zhig na rnam par bsngos par yid la bya'o// tsanda dang ga pur la sogs pa'i dris byugs pa'i lus la chags pa lta na rnam par rnags par yid la bya'o/ /mtshan sprang pa'i reg bya la chags pa zhig na rnam par 'bus zhig par yid la bya'o/ /dbyigs phun sum tshogs ba lta na rnam rnam par bam par yid la bya'o/ /rgyan gyis mdzes pa'i lus la chags pa zhig na rnam par dmar bar yid la bya'o/ /sha rgyas pa'i lus la chags pa zhig na rnam par zos par yid la bya'o/ /'khyud pa dang 'o byas pa la sogs pa'i rtsed 'jo la chags pa'i dus na rnam par 'thor bar yid la bya'o/ /kha dog dang dbyibs phun sum tshogs pa la chags par gyur na rnam par tshig par yid la bya'o/ /so rnams dkar ba la chags pas zhi bar 'gyur ro/ /rab tu mi bzad nags bsregs me lce'i tshogs/ /char rgyun drag pos skad cig zhi byed ltar/ khyis pa'i nags tshal thal bar byed pa yi/ /'dod chags me chen mi sdug char gyis 'joms/ /'jig rten gnod pa'i rtsa ba ji snyed pa/ /kun gyis phul byung 'khrig pa'i 'dod chags te/ /sa bdag 'di mkhyen 'dod las phyir ltos dang/ /rab tu dgyes pa byis pas ma myong ba/ /bsam gtan 'debs lus la phan 'dogs shing/ /kha na ma tho med pa myang ba'i rigs/ /'dod chags dang bcas pa'i sems spyad pa'i rim pa ste/ 'dod chags kyi gnyen po bshad zin to/ /lha mi'i bla mas gang du 'bad pas bkag /de ni 'gro la byams dang snying rje med pa ste/ /de phyir mi dbang khyod kyis thub la gus pa dang/ /nyid kyi thugs kyang dam pa'i grangs su 'gyur ba'i phyir/ /gang la skra rtses gzung bya'i skye bo de la yang/ /nyid kyi sras bzhin gces shing byams pas bskyod pa'i rigs/ /bshes gnyen dam pa'i lung gis goms par byas pa las/ /srin po sha za seng ge sogs kyang 'gro la byams/ /de phyir mi dbang khyod kyi thugs ni 'jams pa dang/ /'gro ba bskyang las nam yang phyir ldog ma mdzad cig /legs pa'i lam ni ji snyed bstan pa dag las kyang/ / gtso bor gyur pa byams dang snying rjer dam pas gsungs/ /'di ji ltar bsgom par bya zhe na/ dang por rang gi ma 'am pha 'am bu 'am bu mo 'am/ 'brel pa gnyis sam/ /gang yang rung ba gcig la bde ba ma lus pa dang phrad par gyur cig snyam pa dang/ bdag gis de dang phrad par bya'o/ /zhes pa dang nus pa lta na dngos su de bsgrub pa dang/ phrad pa la phrag dog med pa nyi ma 'ga' zhig gus par bsgom mo/ /de nas ni de bas cung zad mi btsugs pa'o/ /rim gyis bar ma la'o/ /de nas dgra bo dman pa la'o/ /de nas de bar ma la'o/ /de nas de dgra bo rab tu ma rungs pa la'o/ /de la ma la sogs pa dang mnyam pa thob pa na grong dang grong khyer pa la'o/ /de nas ni yul dang ljongs dang gling gcig dang gnyis la sogs pa nas stong spyi phud dang/ stong gnyis bar ma dang/ stong gsum gyi stong chen po dang/ phyogs bcu'i 'jig rten gyi khams gang+ga'i klung gi bye ma snyed la sogs par byams pas khyab par byas te/ de nas gzhung de bzhin du sdug bsngal dang bral bar gyur cig ces pa dang/ sdug bsngal dang bral ba la dga' ba dang/ de dag 'jig rten las 'das pa'i lam la dgod par bya'o zhes pa'i rim pas snying rje dang dga' ba dang btang snyoms rnams bsgom mo/ /dang po nyid du sdug cing yid du 'ong ba'i mtshan nyid can byams pa yid la ma byas par ni sdug bsngal dang bral ba'i snying rje ga la 'jug ste/ de ltar rim pa gzhan yang ngo/ /gnod par sems pa'i yid tsam bor bas kyang/ /'khor los sgyur nyid thob par thub pas gsungs/ /byams sogs goms las 'chi med ma brnyes kyang/ /tshangs pa'i 'jig rten bde ba rgya chen 'thob/ /de phyir mi rje khyod kyi ci spyod pas/ /tshangs pa'i gnas bzhi yis ni gnas par rigs khyod kyis 'byor pa dug can zas bzhin du/ /bor nas gcig pu gzhan du gshegs 'tshal na/ /grogs bzang 'dor med dge ba de bkra'i phyir/ /thugs ni rnam par sbyang bar cis mi mdzad/ /zhe sdang dang bcas pa'i sems sbyang ba'i rim pa ste/ zhe sdang gi gnyen po bshad zin to/ /rang dang gzhan dang gnyis ka las skye dang/ /rgyu med 'byung zhes smra ba gang lags pa/ /'di dag log par smra ba phung khrol ba/ /legs par spyad kyang 'bras bu mi 'dod 'byin/ /de phyir khyod kyis rten cing 'brel 'byung ba/ /lta ngan des 'joms thub pa'i man ngag mchog/ bdud rtsi'i mchog 'di myur du gsol ba yis/ /dkar mchog ma lus rgyas shing brtan por mdzod/ /rten cing 'brel bar 'byung ba ji lta bu zhe na/ 'di lta ste ma rig pa'i rkyen gyis 'du byed/ 'du byed kyis rkyen gyis rnam par shes pa/ rnam par shes pa'i rkyen gyis ming dang/ gzugs/ ming dang gzugs kyi rkyen gyis skye mched/ de'i rgyan gyis reg pa/ de'i rkyen gyis tshor ba de'i rkyen gyis sred pa/ de'i rkyen gyis len pa/ de'i rkyen gyis srid pa/ de'i rkyen gyis skye ba/ de'i rkyen gyis rga shi dang/ mya ngan dang/ sme sngags 'don pa dang/ sdug bsngal ba dang/ yid mi bde ba dang/ 'khrug pa rnams 'byung bar 'gyur te de ltar na sdug bsngal gyi phung po chen po 'di 'ba' zhig 'byung bar 'gyur ro zhes/ /shes rab kyi mig gis blta bar byas te rgyu med pa la sogs pa bsal lo/ /don 'di ni 'phags pa byang chub sems dpa' i sde snod las/ gang du ma rig skye 'gyur ba/ /nyon mongs rgyu ni tshul bzhin min/ /de yi rkyen ni 'du byed de/ /sdug bsngal bar du skye bar 'gyur zhes pa dang/ gang gis sems can dag 'gyur ba/ /rgyu gnyis dang ni rkyen gnyis te/ /gzhan las rjes su mthun sgra dang/ /nang du tshul bzhin lta ba'o/ /de bzhin rgyu ni zhi gnas te/ /lhag mthong yang ni rkyen yin no/ /zhes gsungs so// de ltar srid pa 'byung ba'i rim pa la yid ches par byas nas yang ma rig pa 'gags pas 'du byed 'gags pa nas sdug bsngal gyi phung po chen po 'di 'ba' zhig 'gag par 'gyur ro/ /zhes bya ba'i bar du yid la bya'o/ / de nas rtag par ma yin pa dang/ chad par ma yin pa dang/ 'pho bar ma yin pa dang/ de dang 'dra ba'i rgyu 'jug pa dang/ rgyu chung ngu las 'bras bu chen po 'byung zhes nges par gzung ste/ phyi rol yang sa bon lam myu gu dang/ de las 'dab ma dang/ de las sdong bu dang/ de las me tog dang/ de las 'bras bu 'byung zhing/ rgyu de dag dang rkyen dang 'brel bar 'byung bar 'byung ba khams bzhi dang/ nam mkha' dus kyi khams te/ rnam pa bcu gnyis po 'di dag tsam mo zhes 'byung ba dang/ 'gag pa la rgyu med pa dang/ mi mthun pa'i rgyu spangs te/ 'di ni mdor bsdus nas rten cing 'brel par 'byung ba yid la byas pas rig pa bskyed pa dang/ ma rig pa'i ngo bo 'am/ de las 'byung ba'i log par lta ba spang ba'o/ /gal te rgyas par yid la byed pa lta zhig na rang rang gi mtshan nyid dang/ ming gi don dang/ las tha dad pa dang/ yan lag lngas yang dag par bsdus pa dang/ yan lag gsum gyis yang dag par bsdus pa dang/ gsum las gnyis 'byung ba dang/ gnyis las bdun 'byung ba dang/ bdun las gsum 'byung ba dang/ dus gsum pa'i ngo bor bzhag pa dang/ rkyen dang 'brel ba dag yid la bya'o/ / sa bdag rten cing 'brel 'byung mkhyen na snang bas mun pa bzhin/ /khyod kyi thugs la gnas pa'i gti mug go skabs ga la mchis/ /'di mkhyen srid pa'i 'khor lo phra zhing zab pa gzigs pa'i phyir/ /shes rab ye shes spyan gnyis dri med lung gi sman byugs gzigs/ /ji skad du 'phags pa klu sgrub kyi zhal snga nas kyang/ rten cing 'brel bar 'byung 'di rgyal ba yi/ /gsung gi mdzod kyi gces pa zab mo ste/ /gang gis 'di ni yang dag mthong ba des/ /sangs rgyas de nyid rig pa rnam mchog mthong zhes bstan to/ /gti mug dang bcas pa'i sems spyad pa'i rim pa ste/ rten cing 'brel par 'byung ba yid la byed pa bshad zin to/ /mi yi bdag po gal te phra ba'i thugs kyi go skabs su/ /thog ma'i rtsom dus can sdig pa'i rtsa ba'i rtog dgra 'di/ zhen pa gnas snyam zhu ma pa'i rtog pa mi bzad zhugs gyur na/ /de yi gnyen por rten cing skyes pa'i dngos po'i rang bzhin gzigs/ /dri med me long ngos la skyes pa'i bzhin gyi gzugs brnyan gang/ /gal te yang dag gnas na rkyen la rag las mi 'gyur zhing/ /slar 'di rnam par 'jig 'gyur go skabs can du ga la 'gyur/ /de phyir dngos med rkyen la rag las gcig pu rnam par spangs/ /ji ltar gnas pa'i rang bzhin 'di yang legs par rnam par dpyad na/ /rab tu phra rdul bar du 'gyur zhes dam pas dang por gsungs/ /gal te dngos yod de dag shes rab cis mi 'bab/ /de phyir de yang phyogs cha'i bye brag ngag gis ga la gnas/ /rin chen sems kyi khyad par 'ga' zhig sna tshogs snang zhe na/ de bzhin 'di la'ang skad cig ces bya rab phra dam pas gsungs/ /skad cig skad cig ces bya'i gang ngag phra la rnam par rmongs/ /de yang ji lta thog ma dbus mdza' blta mi nus/ /de'i phyir rin po che yi phreng ba las/ skad cig ji ltar mdza' yod ltar/ /thog ma dang dbus de ltar brtag / skad cig rang bzhin gsum gyi phyir/ /'jig rten skad cig la mi gnas/ zhes bstan to/ /de ltar 'di dag phyi dang nang du bcas pa gcig min zhing/ /de nyid phyir na de yi rang bzhin rnam bsags du ma'ang min/ /'di dag las dben dngos po shes rab mig gi 'ga' ma dmigs/ /des na 'di dag mdza' gnyis grol bar dam pas gsal bar gsungs/ /de bzhin gcig gis gcig nyid skyed pa mngon sum 'gal mthong ste/ / rab tu phra ba'i 'bras bu rgyu ni gcig min la bltos par/ /'gro ba'i mngon sum nyid du ston pa bzhin du nges par gnas/ /de bzhin gcig gis gcig min bskyed sogs thams cad gnod par bcas/ /dngos rnams thug med ma lus slar skyed 'gyur 'di bzlog dka' i phyir/ /yod ba 'ga' zhig skye zhes 'di ni sus kyang smra mi nus/ /gang med 'ga' zhig skye na med pa'i tha snyad su zhig 'jog /de phyir bdag las skye sogs 'di dag mkhas pas rtsa nas bton/ de lta khyod kyis shes rab spyan gsal dri med rnam rgyan pas/ /rten cing 'brel 'byung mtshan nyid 'di la yun ring gzigs pa na/ /thog med srid rgyud bsags pa'i bsnyings gnas rab tu phra ba yang/ / gang na'ang gnas par 'gyur 'di gzigs min mi bdag gang gis zhum/ /de ltar ni 'phags pa mi pham pa'i zhal snga nas/ 'di la bsal bci lang med/ /bsnan par bya ba cung zad med/ /yang dag nyid la yang dag blte/ /yang dag mthong na rnam par grol/ zhes gsungs shing/ 'phags pa klu sgrub kyi zhal snga nas kyang/ /mthong ba'i chos la mya ngan 'das/ /bya ba byas pa 'ang de nyid yin/ zhes gsungs so/ /de nas gang la dga' ba 'am yang dag skrag nas 'di ci zhig / bskal pa bye bar bsgrub kyang gtan nas de ni su yis nus/ /gang zhig rnam par gzhom zhes 'bad pa 'ang blun te rnam par ngal/ /ci'i phyir zhe na gdod nas ma skyes de la su yis dgag /de 'dra'i gnas med 'dir gnas ye shes can te rtag bde ldan/ /gang la rnam rtog med 'di ba de zhes thub pas gsal bar gsungs/ /'di spangs lha yul 'dod pa'i rab tu yid 'phrog byed pa dang/ /'khor los sgyur ba'i 'byor pa'ang dam pas tsher ma'i gnod 'drar gsungs/ /sa bdag 'on kyang gnas 'dir shin tu dgyes par ma gyur cig /ci phyir zhe na bdag gzhan phan ba mi bzod 'byor las khyod/ /rnam par ltung pa'i sgo mo mi mkhas rnams la 'dir ba spangs/ / kha cig sgo 'dir rab dga' 'jug la snying brtse ring du spangs/ /gzhan dag gnas 'dir 'khrug phyir las 'bras thal ba bzhin du byed/ /gzhan dag shin tu med las sangs rgyas yon tan bsam yas 'dod/ /'di 'dra 'di dag sgo 'dir zhugs las rang gzhan de las nyams/ /de phyir 'di ni yan lag ldan par bags kyi bsten par bgyi/ /de ltar ni 'phags pa dri ma med par grags pas bstan/ zhes bya ba theg pa chen po'i mdo las kyang/ ming yang yod dang yod ma yin par tshig gis gsungs/ /rgyu las rten te byung ba'i chos ni 'di kun te/ /'di la bdag med tshor ba po dang byed med kyang/ /dge dang mi dge'i las rnams cung zad med mi 'gyur zhes gsungs so/ /rten cing 'brel par byung ba'i de bzhin nyid bsam gyis mi khyab par yid la bya'o/ /mi dbang yan lag bzhi po 'di tsam gyis/ /khyod kyi thugs kyi dri ma rags pa rnams/ /nges par bsal 'gyur 'di la dgos ma mdzad/ /de las gong du khyad par rnam bzhed na/ /dkyil 'khor byug pa sngon du 'gro ba yis/ /skye ba gzhan du 'byor pa mi bzad pa/ /da lta'i bzhed pa nyid kyi phyag gnas ltar/ /slu ba med par bdag gis brjod par bgyi/ /aoM badzra re khe hUM/ gtsang spyod pa yi lci ba ni/ /chu dang 'o ma zho dang mar/ /thams cad de las byung ba dag /snod gtsang bskol te chu rnams dbo/ /tshigs ma dor te dbus kyi chas/ /dbyibs ci dga' ba'i maN+Dal ni/ /sa bdag khru gang yan chad par/ /gsang sngags 'don la gzhol bar byug /de nas de ni gus pa yis/ /rgyal ba sras gsum bcas la dbul/ /'jug tu thub pas gsungs pa yi/ /tshigs bcad 'di dag brjod par bya/ /ba yi lci ba chur bcas sbyin pa ste/ /legs par byugs par byed pa tshul khrims so/ /srin bu grog spur bsal ba bzod pa yin/ /bya ba la ni nye zhugs brtson 'grus te/ /de yi skad cig sems ni gcig byed pa/ /bsam gtan shes rab ri mo bsal ba'o/ /thub pa'i maN+Dal byas pa yis/ /pha rol phyin pa 'di drug 'thob/ /gser gyi mdog tu 'gyur ba ste/ /nad rnams kun dang bral bar 'gyur/ /zla ba ltar mdzes gsal ba yi/ /lha dang mi ni dam par skye/ /nor dang gser ni 'byor ba yi/ /rgyal po'i rigs su skye bar 'gyur/ /bde bar gshegs pa'i pho brang mchog /maN+Dal gang zhig byed pa dang/ /sdig pa thams cad mi byed cing/ /dge ba phun tshogs pa dang/ /rang gi sems ni yongs 'dul ba/ /'di dag sangs rgyas rnams kyis bsngags/ zhes so/ /de nas dge ba de nyid rgyu mtshan du byas/ dkon mchog gsum la phyag 'tshal zhing/ /dkon mchog gsum la skyabs su mchi/ /bdag ni khyed la rnam kun dbul/ /sdig pa thams bshags par bgyi/ /'gro ba'i dge la rjes yi rang/ /dam chos 'khor lo mchog bskor dang/ /yongs su mya ngan 'das spang phyir/ /bdag ni khyod la gsol ba 'debs/ /'di sogs dge ba'i las rnams ni/ /byang chub bla na med par bsngo/ /'gro ba sdug bsngal khur chen por ba'i phyir/ /bdag gis sems ni byang chub phyir bskyed de/ /ma bsgral bsgral dang ma grol dgrol ba dang/ /dbugs ma phyin ba bdag gis dbubs 'byung ste/ / mya ngan ma bzlas bdag gis mya ngan bzla/ /de ltar byang chub kyi sems rab tu bstan par bskyed la ji ltar 'dod pa'i bya ba dge ba la 'jug par bya'o/ /mi dbang khyod thugs sbyangs pas dge ba rgya chen dag la dgyes bskyed na/ /sbyin dang tshul khrims bzod pa brtson 'grus bsam gtan shes rab pha rol phyin/ /rgya cher spel mdzad der yang khyod kyi thugs ni sma med 'bad 'tshal te/ /sems ma bsrungs pa'i skyes bu'i dge la 'jug pa phu chu'i rgyun khrus ltar/ /phan dang 'brel pa'i gnod pa'ang rab tu ma rungs gyur pa'i gnas skabs mchis/ /gnas 'di mkhas pas gzigs nas mthu ldan nyid kyi thugs ni bsrungs 'tshal lo/ /de ltar bsnyengs dang bral na mang du gsol ci 'tshal/ /phan pa'i man ngag don po 'di lags te/ /khyod kyi thugs thul mdzod kyi bcom ldan gyis/ /sems ni chos kyi rtsa ba lags zhes gsungs/ /tshigs su bcad pa gcig bu 'di 'phags pa klu sgrub kyi zhal snga nas mkhar gyi rgyal po bde spyod la gdams pa bshes pa'i spring yig las bdag gis drangs pa'o/ /mi skyong khyod ni gal te gsang ba'i lam la dgyes pa na/ /lam de rab tu rtogs dka' sems la rma 'byin tshig 'phros te/ / bud med 'khyud sogs tshul bzhin ma yin yid la byed par ldan/ /kha cig mngon sum 'khrig dang drag shul spyod la 'jug pa ste/ mi dbang thugs la gnod na thub pa'i bka' yang dug dang 'dra/ /de phyir khyod kyis gsang ba'i lam du zhugs pa'i rgyu mtshan las/ /khyod thugs 'dod chags la sogs dri mas gos pa 'di ni spang/ /gang gzhan skye bo de 'dra bzlog par khyod kyis rnam bsgrub rigs/ /don 'dis zhu ba'i 'og tu za ba la/ /mar gyi nyid khu ka ra dang/ /sprang rtsi dag ni bdud rtsi bzhin/ /ma zhu za ba dug du 'gyur/ /de bzhin rab rgyas bdud rtsi mchog /dgongs pa'i tshig la mi mkhas shing/ /byis pa'i blo dang ldan rnams la/ /mi bzad pa yi dug du 'gyur/ /zhes gsungs te/ 'di ni 'phags pa yongs su mya ngan las 'das pa chen po zhes bya ba theg pa chen po'i mdo las gsungs pa bdag gis 'dir bris pa'o/ /rin chen sems 'di rnam par sbyang ba'i phyir/ /thub pa'i bka' lung cung zad 'dir bris pas/ /sa yi bdag po thugs ni dri med pa/ /ston ka'i zla rgyas lta bur gsal gyur cig /'gro ba 'ang rim gyis sems ni rnam sbyangs te/ /gti mug dri med 'bru ltar rnam dag shog /sems rin po che rnam par sbyad pa'i rim pa zhes bya ba'i springs yig slob dpon byang chub sems dpa' chen po dgra las rgyal gsang bas mdzad pa rdzogs so/ / //rgya gar gyi mkhan po A tsarya du lo ba dang/ lo tsA ba dge slong chos kyi shes rab kyis bsgyur cing zhus te gtan la phab pa'o/ / // */ /rgya gar skad du/ gu ru le kha/ bod skad du/ bla ma la springs pa/ thams cad mkhyen pa la phyag 'tshal lo/

CLOSE WINDOW