བོད་ཡིག

e-texts based on the ACIP/ALL Input

/rgya gar skad du/ su b+hA Shi ta ratna ka raN+Da ka ka thA/ bod skad du/ legs par bshad? pa rin po che za ma tog lta bu'i gtam/ 'jam dpal gzhon nur gyur pa la phyag 'tshal lo/ /gang gis glang chen mchog 'dri'i sems kyi lcags kyus ma yin ye shes lcags kyus btab nas thul/ /'dod chags mun pa'i dmag tshogs me yis ma yin ye shes me yis ma lus sregs bdud kyi stobs rnams mtshon chas ma yin blo gros rab zhi bzod pa'i mtshon gyis bzlog/ gus la bsgom pa zhi mdzad sangs rgyas mkhyen pa rab? rgyas thub dbang de la phyag 'tshal lo/ /dka' ba brgya yis rnyed pa yis/ /mi rnams thob pa'i khom pa dkon/ /zlog pa med pa'i 'chi bdag ni/ /rtag tu mdun na gnas pas na/ /gang gis dug sbyin yang dag sdom/ /rgyags tshags mang po ma bsdogs pa/ /mi bzad 'khor ba'i mya ngan du/ /'gro ba de dag sdug bsngal thob/ mi rnams thob pa rnyed dka' ba/ /bar snang glog 'gyu lta bu yin/ /srid pa zad byed mkhas pa yin/ /srid pa rnams su phan pa byas/ /yang dag mi nyid thob pa ni/ /glog dang rba ltar mi brtan pas/ /yid bzhin nor bu lta bu yis/ bsod nams rjes su skyes bus brten/ /da ltar mi rnams thob pa ltar/ /gang gis mthu yis phyis kyang thob/ /bsod nams mchog ni gang yin pa/ /de ni bde ba'i rgyu yin te/ gzugs dang gtong ba rigs mtho sogs/ /yon tan sna tshogs ldan par 'gyur/ /bsod nams de nyid mdza' ba gcig 'khor ba kun tu 'gro ba gnyen/ /de ltar 'dir ni bsod nams kyis/ /phyi phyir yon tan phun sum tshogs/ gang tshe dpal gnas thob bsten pas/ /de sngags 'jig rten bdag po nyid/ /phan pa'i phyogs su 'dren byed pa/ /bsod nams de nyid spel bar gyis/ /bsod nams che gyis sdig dga' spongs/ /yul la g.yo ba nyid kyi rta/ /rtag tu phyin ci log zhi gyis/ /dug stobs mi bzad 'chi sprul/ gyis/ sos ma bzung ba'i bar du ni/ /rtag tu khyed kyis thub dbang bzhin/ /gzhan phan la ni mngon dga' gyis/ /bsod nams la spro ba bskyed pa'i gtam ste dang po'o// //rgya mtsho gnya' shing bu ga ru/ /rul spal mgrin pa chud ba bzhin/ /yud tsam 'dzom ba ngo mtshar che/ /mi brtan 'di la yang dag soms/ /rab tu zhi ba'i grong khyer lam/ /ngan song 'jigs pa 'joms byed pa/ /de ni thub pa'i dbang pos gsungs/ /skad cig tsam yang thob par dka' / /mi khom brgyad kyi nyes spangs mi/ /gang zhig dkon la bskal pa brgyas/ /de ltar bde thob mkhas pa yis/ /dam chos mnyan la 'dir 'bad bya/ /dmyal ba yi dags 'gro ba dang/ /dud 'gro dbang po ma tshang ba/ /'chi med bla ma mdza' 'khob skyes/ log par lta ba sel ba dang/ /thub dbang gsung rab bdud rtsi ni/ /skyes bu mkhas pas 'thung nus pa/ /shes rab 'od mnga' thub dbang ni/ /ma shar bar du yod ma yin/ /de phyir bya min spangs nas ni/ bdag gi bya ba kun shes pas/ /'phags mchog dam chos mnyan par bya/ /chos 'di la ni gang 'bad pa/ /de la yon tan kun yod 'gyur/ /thub dbang gsung las rin chen 'byung/ /mkhas pa 'di yis thog mar dga' / /de ni gang gis thos pas kyang/ /rtag tu stobs ldan brling ba yis/ /mun pa'i tshogs ni 'joms par byed/ /bsams shing bsgoms na mthar thugs gsal/ /'jigs bcas skye ba 'khor ba'i rgyun/ nyon mongs ma lus rim gyis spongs/ /thams cad phun tshogs rtag pa'i gter/ /mi bzad 'khor ba'i rgyun 'joms shing/ /bla na med pa'i dga' bde thob/ /thos pas 'dir yid dri ma med/ /de ltas thub dbang gsung 'di soms/ /chos nyan pa la spro ba skyed ba'i gtam ste gnyis pa'o// // gang zhig thob nas 'khor ba'i rgya mtsho yi/ /pha rol phyin pa'i sa bon bskrun/ /byang chub dpal gyi sa bon mchog/ yid bzhin nor bu las lhag pa'i/ /yon tan rgyun gyi mi rnams ni/ /su zhig 'dir de 'bras med byed/ /gang zhig dge bas phyug pa'i mi/ ba skal pa grangs med kyis thob nas/ /'dir ni smongs pas bsod nams gter/ /cung zad tsam yang mi gsog pa/ /de dag 'jig rten pha rol tu/ /mi bzad mya ngan khang par 'jug/ rin chen gling phyin tshong pa ni/ /lag pa stong par rang khyim bzhin/ /dge bcu las kyi lam med par/ /phyi nas yang ni thob ma yin/ /mi ma thob par de bar ni/ /ci ltar de de sdug bsngal nyid/ de las pha rol slus yod min/ /de las mchog tu rmongs pa med/ 'di 'di'i khom pa thob nas ni/ bsod nams tshogs ni mi gsog pa/ /skad cig gcig las sdig spyad nas/ /mnar med par ni bskal par gnas/ /skye ba du mar sdig spyad pas/ /bde 'gro dka' lta ci zhig smos/ /rgya mtsho cher g.yengs gnya' shing gi/ bu gar rus sbal mgrin chud ltar/ /mi ni shin tu thob dka' bar/ /de skad bcom ldan 'das kyis gsungs/ /mi'i skye ba dkon pa'i gtam ste gsum pa'o// //za skom mal bstan gos mchog dang/ /phreng ba gnas dang rgyan rnams dang/ /grags pa yon tan khyad 'phags pa/ /de kun sbyin las myung bar gsungs/ /ngag snyan mdzes dang longs spyod ldan/ /khyad par 'phags gzugs g.yangs? ba dang/ /tshig snyan gzi ldan yid 'ong dag/ grags dang nad med tshe dag ste/ yid 'ong sdug pa de dang de// sbyin pa rnams kyi 'bras bu ste/ /rta dang dar dang glang po dang/ /rnga yab gdugs dang me tog tshogs/ /khang bzang mdzes dang rol mor bcas/ /sgra snyan rol mo dang ldan zhing/ /me tog phreng ldan bud med dang/ /zas dang rin chen phreng pa gnas/ /gur gum grong yul lha yi gnas/ /rdzogs sangs nyid dang sangs rgyas te/ /sbyin pa dpag bsam ljon shing gi/ 'di dang 'bras bu yin par gsungs/ /autpal sngon po'i 'dab ma 'jam/ /skyus ring dri ma med pa dang/ /bud med gang zhig mig 'grub cing// sked pa 'og bag g.yo bar ldan/ /dmar zhing mdzes pa'i gos ldan zhing/ /nur 'bur rgyas par rnam par g.yo/ /smin ma mdzes ldan de de dag/ de dag ser sna'i sgo phye nas/ /sbyin pa btang la rgyas par 'gyur/ /mgul pa rnga mas brgyan pa'i rta// bzhon pa kha lo srab kyis skyogs/ /mi dbang glang chen dregs zhon nas/ /gdugs bsgrengs rgyan ldan 'khor bcas dang/ /'gro ba thal mo sbyar byas nas/ /rtag tu mchod cing gsol 'debs pa/ /snga mar 'di 'dra sbyin pa yis/ /'bras bu yin par thub pas gsungs/ /gser gyi gdu bu rdo rjes sbras/ /dpung rgyan cod pan rin chen bkod/ /sa bdag mu tig phreng bas brgyan/ /rtag tu seng ge'i khri la gnas/ /'bangs sogs btsun mo'i 'khor brten cing/ /rtsed mo rtse bas rnam rol pa/ seng ge lta bu'i rnam rol de/ /sbyin 'bras yin par thub pas gsungs/ /khang bzangs gser dang rin chen spras/ /gdugs dang rgyal mtshan bsgreng bas brgyan/ /pi waM rdza rnga rig byed sgrogs/ /rin chen rnams kyi 'od 'bar ba/ /brgya byin bde sogs dga' spyod cing/ /lha mo'i tshogs kyi 'khor ldan de/ /snga mar 'di 'dra byin pa yi/ /'bras bu yin par thub pas gsungs/ /sbyin pa'i skye po'i yid du 'ong/ /mkhas pa'i tshogs kyis rtag tu brten pa phyogs rnams dri med phreng bas khyab/ /snyan pa'i gnas ni de dang der/ /'dir ni dri med nye bar gnas/ /lus dang bral nas lha rnams su/ /snyog bral sna tshogs btung ba bsil/ /me tog sna tshogs mgo lcogs rgyas/ /dpag bsam gyi ni shing rnams skyes/ /tsan dan la sogs kyis gang ba'i/ /skyed mos chal ni mchog rnams su/ /yun ring du ni bde spyod cing/ /lha mo gzugs mchog ldan pa yis/ /bsnyen bkur mchog tu byed par thob/ /sbyin ba zhes bya gter chen te/ /rkun sogs mi khyer rjes su 'dred/ /sbyin pas sems kyi ser sna dang/ /chags pa'i rul gyi dri ma 'khru/ /'khor ba'i lam gyi dub pa sel/ /sbyin ba gzhon pa du ma ste/ /sbyin pa bde ba du ma'i rten/ /yang dag grogs mchog bde ba'i sgo/ /sked pa gser gyi ska rags ldan/ /ngag 'jam zur mig bzhin skyob mdzes/ /mig gi skyus ring sna drung gsan/ /me tog phreng ba'i skra bcings mdzes/ /gang zhig rang 'khor yan lag dang/ /rkang gnyis 'gro ba mdzes pa yi/ /zas gtsang gi ni phun sum tshogs/ /de dag sbyin pa'i 'bras bu yin zhes/ /bdag nyid chen pos bka' stsal te/ /ha sa ka ri'i dum bu dang/ /autpal gyis bsgos? dri zhim la/ /bkris gser gyi snod du blugs/ /ban du ka dang zad mdog sa dang/ /btung ba chung ma mna' skyel zhing/ /tshung ma dang bcas yang yang 'thung/ /dga' ba'i bsam pas smra ba de'i/ /rgyu ni sbyin mchog bkra shis yin/ /zhi ba'ang sbyin pa'i yon tan te/ /mdzes pa 'dod pa bdag cag gis/ /sbyin pa 'di la 'bad par gyis/ /srid gsum mi bzad 'jigs chen la/ /sbyin las gzhan pa'i gnyen mchog med/ /sbyin pa'i gtam ste bzhi pa'o// //'gro ba gang zhig mdzes yid 'ong/ /gzugs dang rigs dang gnyen dang stobs/ /bde bar mthong ba gang yin pa/ /bsod nams bzo bos de byas bad?/ /'di skad mkhas pa rnams kyis bshad/ /gzhan phan byed pa'i skyes bu yis/ /bsod nams dang mnyam yod ma yin/ /rim pa sna tshogs kyis brgyan pa'i/ /rgyal mtshan dkar po mngon mtho btsugs/ /rta glang rkang thang shing rta yi/ dpung gi tshogs kyis nges 'khrug cing/ yu ba sna tshogs mdzes pa yi/ /rnga yab rnams kyis g.yo ba byed la/ /bsod nams lhag pa dbang sgyur zhing/ /sa rnams la ni spyod byed de/ /dar dang ka sh+ri du gu la/ /sna tshogs gos dang mu tig phreng/ gser dang nor bus yan lag brgyan/ /gang dag lha 'dri'i skyes bu dpal/ /bsod nams gzhon pa la zhon pas/ /de bas yin par shes par gyis/ shin tu tshe ring rigs btsun zhing/ /lus mdzes nad kyi 'jigs pa med/ /nor mang g.yog 'khor phun sum tshogs/ /bsod nams rnam smin chen po yin/ /gang yang 'khor los sgyur ba mchog/ bu ni dpa' bo stong dang ldan/ /rgya mtsho'i mtshams kyis la dbang/ /de dag bsod nams rin po che'i/ /'bras bu yangs pa chen po yin/ /sna tshogs pad+ma'i stan la 'dug/ lha dang lha dbang rtag phyag 'tshal/ /brjid kyis 'khor rnams zil gyis gnon/ /tshangs pa'i 'jig rten snang byed pa/ /de dag nyid dang bsod nams las/ gang la lha klu lha min grub/ /dri za gnod sbyin mi 'am ci/ /mchog tu gyur pa'i tshogs rnams ni/ /rtag tu lha dbang mchod byed pa/ /de ni bsod nams rin po che'i/ /'bras bu yangs pa chen po yin/ /gzugs dang brtson 'grus bzo rnams ni/ /dbang med yang nas mi rnams ni/ /las kyi rlung gis mngags nas ni// 'jig rten pha rol 'gro ba na/ bsod nams gcig pu mchog yin te/ /rjes su 'gro zhing bde ba 'char/ /bsod nams gzhan gyi 'phrog mi nus/ /de phyir bsod nams gter gyi mchog /gang gi stobs kyi ro rab kyang// phyogs dang phyogs su rnam 'thor ba'i/ /'jigs pa'i bskal pa'i rlung rnams kyis/ /des kyang bsod nams 'jig mi nus/ /'jig pa'i bskal pa'i chu yis ni/ /lcags kyang dbang med 'jig byed pa/ /rgya mtsho bzhi yi chu rnams kyis/ bsod nams gzhu bar nus ma yin/ /'od zer rab cha gsal ba yi/ /nyi ma bdun shar me rnams kyis/ /sa rnams sreg par byed med kyi/ /bsod nams gcig pu sreg ma yin/ /bsod nams kyi gtam ste lnga pa'o// // sangs rgyas sku gzugs bzhengs gsol ba/ /dang por mya ngan sel bar byed/ /rtsod pa kun spangs mthong na dga' / /skal ldan gter tshogs dpal dang ldan/ /lus stobs ldan zhing snyan pa dang/ /gzi brjid ldan zhing gzugs mdzes la/ gsung rab kun la mkhas gyur cing/ /dbang po'i rta ni thams cad thul/ /blo ldan gtod dang ldan par 'gyur/ /bcom ldan sku gzugs mchod rten la/ /phra rab rdul ni ji snyed song/ /de snyed sa 'og sa steng 'dir/ /de snyed rgyal por nges par 'gyur/ /gzugs dang gzugs med ting 'dzin 'grub/ /thams cad bde bar ma lus spyod/ /tha mar skye rga'i spangs nas/ /de dag byang chub go 'phangs thob/ /bde gshegs sku gzugs bzhengs gsol pa/ /mtshan bzad gis mtshan 'khor los sgyur/ /sum cu gnyis ldan lus mdzes thob/ /nyes pa'i dgra 'joms rgyal par 'gyur/ /dbang po rnams ni ma tshang med/ /dpal ldan ngan 'gro rnams las ring/ /mi yi gis sku skye 'gyur zhing/ /ngag ni brtsan pa nyid du 'gyur/ /skye bar thos dang dran ldan brtan/ /mngon par 'dod par 'byung 'gyur zhing/ /gnas la mngon par dad pa dang/ /'dod chags sogs kyis gnod pa med/ /'di rgyal rdzogs pa'i byang chub kyi/ /khyad 'phags legs pa'i gzhung la brten/ gang 'di rgyal ba'i sku gzugs bzhengs/ /sangs rgyas sku 'am mchod rten nam/ /bzhengs byed srog dang ldan pa de/ bran dang dbul por mi skye zhing/ /mngag gzhug par min rigs dmar min/ /dbang po rnams ni tshang bar 'gyur/ /sku gzugs kyi gtam ste drug pa'o// //dri zhing sna tshogs kyis bsgos pas/ /bde bar gshegs la khrus gsol ba/ /me tog dri yis yan lag mdzes/ /rab tu dga' ba'i yid kyis su/ /rol mo'i sgra ni snyan pa yis/ /dal gyis 'bab dang stegs 'grun brjid/ /gser gyi rang bzhin pad+ma yi/ /ge sar rdul gyis khyab pa ru/ /zus gsol gang zhig mchod byed pa/ /de dag rnyog pa thams cad kyis/ /dri ma bkrus nas thar pa thob/ /lha yi bu mo nu 'bur rgyas mthong zhing/ /sked pa la 'bab g.yo ba dang/ /'dzam bu'i chu 'dra'i pad+ma'i ge sar gyi/ /rdul rnams gtor ba yis ni dri zhim la/ /dal gyis 'bab pa'i nang du lta yi tshogs/ /rgyun tu chu rnams la ni rtse byed pa/ /gang zhig dga' ba sna tshogs dri zhim chus/ /rje btsun khrus gsol ba yi 'bras de yin/ /gla rtsi ga pur tsan dan gur kum bsgos/ /dri zhim chu ni yid 'ong ba/ /kha dog dkar ser bye brag gis/ /yid 'ong thub pa khrus gsol 'dir/ /sems kyi dri ma spangs nas ni/ de ni 'gro ba'i bla mar 'gyur/ /khrus kyi gtam ste bdun pa'o// //khrus byed lha yi bu mo mchog /rked ldan brla dang chu ma rgyas/ /'dab skyes mgo lcags rgyas mthor zhing/ /lha dbang dal bab khrus byed cing/ /mdzes shes 'dod pas g.yo ba ni/ /'gro mchog yang yang mnyes byas yin/ /de ni spos chu rol mo dang/ /mdug pa dang ni me tog phreng/ /sbyin pa btang ba'i 'bras bu yin/ /gang zhig 'khor los sgyur rgyal la/ /mkha' la gur kum sprin tshogs dang/ ga bur gyi ni chu rgyun dang/ /ma la ya yi tsan dan bzhin/ /rdza rnga bi wi rnga mchog gis/ /bde bar gshegs mchog mchod byed pa/ /lha dang mi yi sgra rnams thos/ /khyad 'phags lha yi rna ba thob/ /gur kum la sogs pa'i gtam ste brgyad pa'o/ / //rta glang rkang thang shing rta dang/ rin chen sna bdun rnams dang ni/ /dpa' bo bu stong dang bcas par/ /mkha' la 'khor los sgyur 'gro zhing/ /zla ba lta bu'i gdugs kyis ni/ /nyi ma'i 'od zer sgrib byed cing/ 'bras bu mang la rgya che ba/ /gdugs phul ba las byung ba yin/ /bud ba yid 'ong sgra yis bskyod/ me tog g.yo ba 'khor bar bkod/ /kha dog sna tshogs dri zhim pa'i/ /me tog tshogs kyis ri mor bris/ /gdugs mdzes sna tshogs dar gyis brgyan/ /mchod rten rnams la phul ba yis/ /'khor los sgyur bas skyong ba/ /gling bzhi'i dbang phyug de yis 'thob/ /nyi ma'i 'od zer gser gdugs thogs/ /dpal ldan dul ba'i glang po mchog /rin chen du mas brgyan pa zhon/ /rdzu 'phrul brgya byin dang 'gran pa'i/ /gling bzhi yi ni 'khor los sgyur/ /sa rnams ma lus skyong bar byed/ /de dag bde gshegs sku gdung la/ /me tog gdugs phul 'bras bu yin/ /gdugs phul ba'i gtam ste dgu pa'o/ / //bde bar gshegs pa'i 'khrungs gnas dang/ /de yi yid tsam bzhugs pa'i gnas/ /rab tu gsal ba'i grags gyur pa/ /nus pa kun gyis gdung snod sku/ /shin tu khyad 'phags gtsug tor mtho/ /sku gzugs bzhengs nas legs sbyangs la/ /skye bo gang gis sku bzhengs pa'i/ /nang du ring bsrel bcug byas nas/ /kun nas brgya byin las 'phags pa'i/ /mi dbang gling bzhi rnams su ni/ /dpal dang ldan pas longs spyod nas/ /mdza' cu rnam dag go 'phang thob/ /rgyal ba'i sku gdung bcug las yin/ /zla ba dang 'dra ba lta na sdug/ /smin ma legs shing mig dkyus ring/ /mir skyes gser dang nor bur ldan/ /bzod cing nges pa dang ldan pa/ /rgya mtshos gtugs pa'i sa rnams ni/ skyong byed 'khor los sgyur rgyal yang/ /de dag sangs rgyas sku gzugs ni/ /ring bsrel dang bcas gus par 'thob/ /ring bsrel gyi gtam ste bcu pa'o// //bde bar gshegs pa mchog rnams kyi/ /pho brang mchog ni rgyan byed pa// gser gyi mdog dang ldan 'gyur zhing/ /nad rnams kun las grol bar 'gyur/ /lha dang mi las khyad 'phags shing/ /nyi ma'i 'khor lo lta bur mdzes/ /nor dang gser ni mang ba dang/ /rgyal po'i rigs kyi rgyal bar 'gyur/ /'jig rten gsum gyis mchod pa yi/ /sangs rgyas la ni gang zhig 'dir/ /maN+Dal me tog bcas byed pa/ /'gro ba'i bdag po tshe ring zhing/ /sna tshogs nad kyis 'jigs las grol/ /gang yin de yis skad cig thob/ /bde gshegs maN+Dal byed de dag pha rol phyin drug thob 'gyur to/ /chu dang sa bsres btang sbyin pa/ /grog mo sogs sel tshul khrims te/ /bsres nas nyes pa bzod pa yin/ /'bad pa byed pa brtson 'grus yin/ /skad cig de las rtse gcig tu/ /sems 'dzin byed pa bsam tan yin/ /legs par gzo ba shes rab bo/ /sna tshogs bsod nams kyis brgyan la/ /sa gzhi bris pa 'bul byed pa/ /lha yi bde ba thams cad dang/ /longs spyod mchog dang ldan 'gyur zhing/ /mir skyes gser las lhag pa yi/ kha dog dang ldan mdzes pa dang/ /pad+ma'i mdog ltar yan lag tshang/ /mig ni dkyus ring mdzes par 'gyur/ /maN+Dal gyi gtam ste bcu gcig pa'o// //pad+ma'i 'dab 'dra'i lag pa mdzes/ /'od gsal kha dog dri bzang ldan/ /ro zhim? reg na bde ba dang/ /lha dang ma yi khang bzangs na/ /'od gsal gser gyi gzhod pa ru/ /lha yi bdud rtsis bkang za ba/ /de dag sangs rgyas la sogs pa'i/ /dge 'dun yul du lhag pa la/ /zhal zas drangs pa'i 'bras bu yin/ /rdo rje gdan la bzhugs nas ni/ /'dod pa'i dgra dang bcas pa yi/ /tshogs ni byams pas des pham mdzad/ /gang zhig mthar thug dka' ba'i yul/ /mdza' med par ni spyod 'gyur pa'o/ /nyon mongs dka' ba'i dgra las rgyal/ /phung po'i bdud kyang rab bcom nas/ /'chi bdag bdud la mnga' brnyes pa/ /zhal zas phul bar gyur pas yin/ /ro rnams bro ba'i mchog dang ni/ /yan lag chang zhing yongs rdzogs ldan/ /bde zhing dpal ldan stobs dang ldan/ /tshe dang stobs dang kha dog dang/ /gzugs bzang ba dang ldan pa ni/ /mkhas pas zas mchog btang las byung/ /stobs dang brtson 'grus ldan pa yi/ /rnam grangs las ni nges par rgyal/ /yang dag dpal thob mi dbang gi / ro ldan kha zas longs spyod pa/ /rtag tu zas mchog sbyin nges yin/ /zas kyi gtam gyi ste bcu gnyis pa'o// //g.yo zhing autpal gyis bsgos pa/ /dri med pad+ma rA ga bzhin/ /yid 'ong gser gyi song du blugs/ /dri zhim tsan dan gyis bsgos mngar/ /yid du 'ong dang bdar zhing 'thung/ /cung zad mig ni zangs mdog 'dra/ /glu len sgra dang nges ldan pa'i/ /mi mchog de dag sgom? rnams ni/ /sbyin pa byin pa'i 'bras bu yin/ /ain+d+ra nI la bai DUrya/ /rin chen mchog rnams kyis spras pa'i/ /gser gyi snod ni gang yin par/ /lha gang lha yi bu mo ni/ brang gi dkyil na nu ma ni/ /bum pa lta bu'i 'bur ldan pa'i/ /rab mdzes bcugs dang lhan cig tu/ /sbrang rtsi ltar mngar btung 'thung ba/ /yon tan ldan pa'i tshogs la ni/ /btung ba yid 'ong byin pa yi/ /'bras bu yin par mkhas rnams gsung/ /gang zhig kha dog dri zhim sogs/ /tshogs ldan skom pa'i sdug bsngal sel/ bad kan rlung drag rab zhi byed// kha ra pi bi ling bsres tshor/ /tsan dan lta bur tsha ba sel/ /zla ba'i 'od zer dang ldan pa'i/ /snod du blugs nas de dag gis/ /gus par dge 'dun la phul bas/ /pha rol gyi ni skye gnas su/ /lha yi ltung ba thob par 'gyur/ /mngar zhim mngar mchog gus pa yis/ /btung ba tshogs mchog la phul bas/ /lha dang mi yi gnas rnams su/ /lha yi bu mo mchog rnams dang/ /yun ring btung ba lha cig 'thung/ /gang zhig sa gnas mi rnams kyis/ /dang pa'i dad pa'i yid kyis ni/ /dge 'dun la ni btung ba mchog / dus la bab par drang ba yis/ /'khor ba'i ri khrod gnas pa na/ /rtag tu btung ba'ang zhim bzang 'thob/ /btung ba'i gtam ste bcu gsum pa'o// //gang zhig sngo ser ljang dmar dkar/ /sna tshogs kha dog 'od bzang la/ /mdzes gsal gos kyi phreng ba ni/ /yon tan mchog dang ldan pa yi/ /'jig rten bla ma la phul bas/ /bsngags pa'i gos mchog thob par 'gyur/ /gang zhig dge 'dun mchog sogs la/ /gang zhig dad dang gus ba yis/ /gos kyi phreng ba 'bul byed pa/ /de ni ngo tsha shes gos dang/ /mchog tu gyur pa'i chos kyi gos/ /nyon mongs gnyen po'i chos gos thob/ /kha dog sna tshogs kyis spras pa'i/ /sngon po ser po dkar po dang/ /gzhan yang dmar po yid 'ong ba/ /shin tu mdzes pa'i gos dag dang/ /chos gos phreng ba 'bul byed pa/ /bde 'gro yi ni bde bar 'gro/ /gzugs dang ldan zhing yid 'ong la/ /lha yi gos ni zad med dang/ /ngo tsha shes pa'i gos kyis brgyan/ dag blo dang gis mkhas pa dang/ /de ni chos kyi dbang phyug 'gyur/ /gos kyi gtam ste bcu bzhi pa'o// //me tog bzang po dge 'dun la/ /rab tu 'thor zhing mchod byed pa/ /brgya byin las lhag longs spyod ldan/ /pad+ma'i dbang po lta bur mdzes/ /mchog tu grags pa dang ldan zhing/ /rtag tu de ni skad cig gis/ /dgra las rnam par rgyal bar 'gyur/ /sa rnams las ni spyod byed pa'i/ /rin chen mchog gi mir gyur pas/ /spos mchog dang ni dri bzangs kyis/ /rgyal ba rnam la 'bul byed pa/ /lus kyi grags pa'i dri yis khyab/ /autpal sngo dang mnyam pa yi/ /mig ni dri med dkyus ring mdzes/ /bai DUrya dang mu tig dang/ /rin po che yis yan lag brgyan/ /lus kun ku sha'i gos kyis g.yogs/ /skye ba kun tu mi yi mchog /gzugs dang ldan par gyur pa ni/ /dge 'dun dri bzang phul ba yin/ /sna tshogs pa yi sman rnams ni/ /de dge dge 'dun la phul bas/ /mdze la sogs pa'i nang rnams kyi// sdug bsngal mi bzad pa las grol/ /bzhin ni mdzed shing gser rnams dang/ /mnyam zhing kha dog yid du 'ong/ /rgyal po yi ni 'tshe ba rnams/ /gang yin pa dang bral ba 'thob/ /me tog la sogs pa'i gtam ste bco lnga pa'o// // sa bdag 'khor los bsgyur gang la/ /thal mo sbyar ba byas nas ni/ /mkhur ba rna rgyan mdzes ltung bas/ /gus ldan legs par spyi bo yis/ /lan mang du ni phyag byed pa/ /de dag sangs rgyas phyag byed pa'i/ /'bras bu yin zhes mkhas rnams smra/ /skyes pa tsam gyis gtsor 'gyur ba'i/ /rtag tu mthon po'i rigs skye zhing/ /rta dang glang pos rgyu byed pa/ /de dag bla ma 'phags pa la/ /legs par phyag ni byas pas yin/ /snyan pa yis ni khyab 'gyur zhing/ /nges par legs par 'dzin pa dang/ /gsal bar byed pa'i 'od kyis ni/ /sdug bsngal thams cad spong byed cing/ /nad ni thams cad 'joms par byed/ /'jig rten du ni bde 'gror des/ /mi dbang gis ni rgyun tu gyur/ /'bras bu dpal dang ldan pa yang// thub dbang phyug byas pa las yin/ /'khor los sgyur rgyal stobs grogs ldan/ /yan lag sum cu gnyis mtshan ldan/ /rgyal 'gyur sa steng gtso bo de/ /sangs rgyas la ni phyag byas pa'i/ /'bras bu yin par blo ldan gsungs// de ltar yon tan tshogs shes par/ /lus 'di 'jigs par shes nas ni/ /mkhas pas sangs rgyas phyag bya zhing/ /lus kyi las ni legs par spyad/ /phyag gcig 'tshal bar gyur pa yis/ /'khor ba spongs pa'i rgyu 'thob cing/ / 'khor ba'i 'jigs mthong gus pa yin/ /de ltar su zhig phyag mi byed/ /phyag gi gtam ste bcu drug pa'o// //griSh+Na sa ri ltar mdzes gzugs/ /stobs ldan 'jam zhing shin tu snum/ /dgun dus sro khang gos bzang bgos/ yid 'ong 'dzes ma la 'khyung nas/ /mi dbang gang zhig rtse byed cing/ /ro mchog sna tshogs ldan pa ni/ /rin chen snod blugs 'thung ba ni/ /de dag sgron ma phul ba yi/ /shin tu 'bras bu mngon yin par/ /yang dag rdzogs sangs rin chen gsung 'bar zhing me lce rgyas dang ldan/ /khang pa'i nang du me 'bar gsal/ /dgun dus grangs ba sel byed pa/ /sna pa thub pa'i dbang po ni/ /mchog tu gyur la phul ba yis/ /lha dang mi yi 'jig rten na/ /gsal zhing rab tu 'bar gyur dang/ /dri za lha min mi 'am ci/ /byad bzhin mdzes dang lhan cig tu/ /ston zla dang 'dra rab mdzes pa/ /sdug pa yang bar 'khyud nas ni/ /lus ni yid du 'ong ba dang/ /mtho ris su ni spyod byed pa/ /de dag gang tshe 'phags tshogs la/ /snang ba dang bas phul ba yin/ /rkyen ma las rgyal bzhon par ldan/ /sa? rnams ma lus rjes su skyong/ /byad bzang gser gyis yan lag brgyan/ /de dag gis ni snang ba rnams/ /phul ba'i 'bras bu 'di dag yin/ /snang ba'i gtam ste bcu bdun pa'o/ / //ri rnams kyis ni bsgrib pa dang/ /mchog tu ring na gnas pa dang/ /shin tu phra ba'i dngos po dang/? mtshan mo smag gis bsgribs pa dag /gang tshe lag mthil gnas pa ltar/ /dge slong ma 'gag pa yi mthong/ /de ni bde bar gshegs pa la/ /zhu mar phul ba'i 'bras bu yin/ /spyan gyis dngos kun gzigs pa'i phyir/ /bde gshegs mar me phul ba yis/ /sangs rgyas nyid ni mnyen zhes grags/ /phul ba bcom ldan gang zhe na/ /thub dbang dri med spyan la phul/ /ring dang phra dang bsgribs pa dang/ /dpag tshad kyis mchod mthong la ltos/ /rgyal la zhugs mar phul ba yi/ /de 'bras yin par thub pas gsungs/ /sa bdag rgyal po gang yin pa// zla ba lta bu'i gzugs ldan pa/ /autpal lta bur mig dkyus ring/ /gang zhig yis 'jig rten na/ /gser mdog 'od kyis snang ba ltar/ /rang gi 'od kyis snang byed pa'i/ /'khor los sgyur ba'i rgyal po ni/ /nor bu brgya phrag 'od zer gyis/ sa rnams rgyu zhing sna byed pa/ /de dag shAkya seng ge la/ /gus par mar me phul ba yi/ /rgya cher 'phel bar gyur pa yin/ /lha gang 'jig rten gsal byed cing/ /autpal lta bu'i mig ldan la/ /smin ma legs shing gser mchog ldan/ mig stong dang ni ldan pa yi/ /brgya byin lha yi bdag po nyid/ /lha yi stan la 'dug pa dang/ /gang zhig 'dod bral tshangs pa yi/ /'od gsal lha mchog phyag byed cing/ /lha yi shing rta g.yo byed pa/ /ston pa yi ni ring bsrel la/ /mar me'i phreng ba mis phul bas/ /'bras bu rgya chen gyur pa yin/ /mar me'i gtam ste bco brgyad pa'o// //mi dbang dus ni thams cad du/ /nyams dga' ba yi khang bzangs mchog /rol mo'i gnas kyis nyams dga' bar/ /'tsho zhing rgyal ba'i sgra sgrogs par/ /brtson ma'o 'khor dang rol byed pa/ /grang ba sel ba'i khang pa ni/ /phyogs bzhi nas ni byon pa yi/ /dge 'dun bzhugs gnas phul bas yin/ /thub pa 'phags pa'i dge 'dun bcas/ /gtsug lag khang gi don du ni/ tshig gis rab tu bskul ba dang/ /tshogs pa yis ni grogs byed cing/ /nges par dus su 'gro byed pa/ /gnyid log pa 'am langs pa na/ /bsod nams rgyun ni tshad med 'phel/ /shes rab rdo rje'i mtshon tsha yis/ /phyin ci yog gi ri bcom nas/ /sa dang bcas pa'i khang bzang 'gyur/ /dge 'dun la ni yo byad dang/ /longs spyod bzang po dang bcas pa/ /gtsug lag khang ni gang zhig byed/ /rnam par rgyal ba'i khang bzangs ni/ /rin chen mchog gi rang bzhin gyi/ /rtsig pa ka ba dang ldan pa'i/ /mdzes ldan lhan cig dus kun tu/ /de ni lha yi 'jig rten 'dir/ /yun ring du ni mngon par dga' / /dpal dang ldan pa'i bla bre dang/ /sna tshogs kyis ni gos kyis spras/ /khang bzang mchog ni 'od phro ba/ /yang dag gnas par gyur ba ni/ /yon tan tshogs ldan phul pa yis/ /brgya byin gyis ni khang bzang mchog /rnam par rgyal byed thob pa yin/ /gtsug lag khang bzhengs pa'i gtam ste bcu dgu pa'o// //khyogs dang sten ni mnyam pa ru/ /'bol stan la ni chung ma ni/ nu ma rgyas dang lhan gcig tu/ /mal stan la ni sa bdag nyal/ /nyes pa'i tshogs spangs dam pa la/ /de yis mal stan phul ba yin/ /rkang rten dang bcas khri la ni/ /sna tshogs gos kyi rgyan la 'dug /dbyangs snyan rol mo dang mgrin 'debs/ /rin chen rang bzhin stan la ni/ /dri zhim pas ni byug pa yis/ /dad ldan mal stan chen po la/ /dpung ba la ni mgo brtan nas/ /yun ring lha yi khang pa ru/ /'jigs pa med par bde bar nyal/ /de dag mal cha stan rnams ni/ /dge 'dun rnams la phul ba yi/ /'di ni 'bras bu yin par bshad/ /ga bur tsan dan a ga ru/ /lus byug pa yi lha mo ni/ /num zung ldan lus brten nas/ /gos mchog 'bol stan la rtags nyal/ de dag mchod rten rnams la ni/ /gdugs dang gos khri phul bas yin/ /mal cha dang stan gyi gtam ste nyi shu pa'o// //gling bzhi la ni rnam rgyal nas/ /stobs ldan brgya byin gnas yin te/ /nga la nu yis sum cu gsum/ /bdag po'i stan phyed dbang byas nas/ /'dod pa'i bde ba'i dga' ba myong/ /zhag bdun bar du dbyig rnams kyi/ /char ni khang par dpag med phab/ /de dag lhung bzed du gtor ba'i/ /sbyin pa chen po de yis ni/ /'bras bu ngo mtshar chen po yin/ /snod ni de dang de dag gis/ /rgyu bzhi dag la bsten pa yis/ /sdug bsngal la sogs bye brag gis/ /'bras bu tha dad tha dad 'gyur/ /de phyir mi dbang khyad 'phags rgyal/ /zla ba lta bu'i bzhin dang ni// autpal lta bu'i kha dog dang/ /mi rnams nang du rtag par ni/ /dri med mig ldan ro sdod yangs/ /dga' zhing stan dang mal cha dang/ /zas dang snod du ldan pa yi/ mi rnams sbyin pas yang dag 'thob/ /mi mchog gis ni nad pa dang// dman pa dang ni dbul ba rnams/ /snying rje can gyis sbyin btang bas/ /dpal ldan yang dag khyad 'phags 'gro/ /mi dbang brgya byin dang mnyam rtse/ /dga' zhing bu dang bran g.yogs bcas/ /zla ba dang 'dra bzhin gyi mchog /mig yangs lus ni nyi ma bzhin/ /grags pa snyan pa dag dang ldan/ /mi dbang dgra yi stobs 'joms shing/ /bde ba thams cad thob pa ni/ /de yis rang gi bla ma dang/ /pha ma rnams la sbyin las byung/ /gang zhig rta dang shing rta glang/ /zhon la skye bo'i tshogs phyag 'tshal/ gser gyi yu ba dang ldan pa/ /zla ba'i dbyibs dang ldan pa yis/ /nyi ma'i 'od zer zlog byed thogs/ /mi dbang mchog tu gyur pa ste/ /'khor los sgyur byed rgyal po yin/ /sa rnams dbang phyug dang bcas pa'i/ /gang zhig rgyal por gyur pa ni/ yang dag zhing la de dag gis/ /sbyin pa'i sa bon sbyangs pa yi/ /yon tan mchog gi 'bras de yin/ /dman pa'i snod la sbyin pa yis/ /mang du byin yang 'bras bu nyung/ /yur ma tsher ma'i skyon bcas dang/ /rdo ba'i steng gi zhing rnams la/ sa bon mang pa btab pa bzhin/ /'dod chags zhe sdang ti mug spangs/ /yon tan gyis bzhan zhing la sbyin/ /nyung ngu byin yang mang du 'byung/ /n+ya gro d+ha'i sa bon bzhin/ /zhing gi gtam ste nyi shu gcig pa'o// //gang gis chos kyi sbyin byin zhing/ /bri ba dang ni nyan pa dang/ /rtag tu de dag sems nyid dang/ /gal te yang dag sgom byed na/ /skye ba dran pa rtag tu 'thob/ /gang zhig lha yi 'jig rten na/ /dpag bsam gyi ni shing gi mchog /don rnams thams cad 'grub byed pa// lha tshogs bde ba'i mchog gyur pa/ /de ni ba mchog sbyin pa yin/ /rgya che ba yi 'bras bu yin/ /gang zhig mngal du rdzogs par ni/ gtsang zhing yid 'ong ro myong la/ /mar dang sbrang rtsi stobs dang ni/ /gang zhig 'o ma 'thung tshe yang/ /pad+ma'i ge sar mdangs ldan pa/ /bu lce'i dus gang yin par 'thung/ /skyes rdzogs nas kyang de bzhin te/ /bdud rtsi'i mchog kyang 'thung byed pa/ /de ni pa mchog btang las byung/ /seng ge ni khi ni rab dga' zhing/ mdzes pa gus pas chos la ni/ /rim pa bzhin du des phul bas/ /gzhig par mi nus rdo rje'i gdan/ /rab mchog seng ge'i khri la bzhugs/ /lha klu grub pa phyag 'tshal 'gyur/ /gser gyi snod du rtag tu der/ /ro ldan 'o ma rlugs nas ni// mi yi mchog ni 'thung byed cing/ /dpal ldan phun sum tshogs pa dang/ /pad+ma'i mdog ldan bud med snyed/ /de ni ma he mchog btang yin/ /rtag tu nad pa nyam chung la/ /bzhon pa mchog ni sbyin pa dang/ /bla ma rnams ni mnyams? byas nas/ /btsun zhing mi rnams kyis bstod 'gyur/ /gser gyi chas kyi brgyan pa yi/ /rta ni yid du 'ong ba la/ /mi mchog rtag tu zhon nas rgyu/ /shin tu ring ba'i yul rnams su/ /rdzu 'phrul gyis ni 'gro byed pa/ /bzhon pa mchog ni byin pa yis/ /de lta bu yi mi ru 'gyur/ /do shal dang ni do shal phyed/ /'og bag dang ni ldan pa yi/ /yid 'ong lha mo rnams la rtse/ /sum cu gsum bdag dang 'gran pa/ /ltos pa med par byin pa las/ /byung bar mkhas rnams rab tu bshad/ /bdud kyis zil gyi mi non cing/ /legs par gsung pa rtag tu ni/ /bdud rtsi lta bur mnyan par gyis/ /sa gzhi lta bur chos kyi yum/ /nyon mongs dgra ni spong bar byed/ /'khor ba'i bde ba nyams myong zhing/ phun sum tshogs pa thams cad kyi/ /rab mchog nyid ni thob par 'gyur/ /dub pa'i dus ni thams cad du/ /mkhas pa gnas ni phul ba yis/ /mtho ris phyin nas rtag tu dga' / /brgya byin dang ni lhan cig tu/ /rtag tu dga' ba myong bar byed/ /'dir ni skyang mos tshal phul gas? tshogs yin shing rnams la/ /me tog dri zhim dang ldan zhing/ /mngon par mtho ba'i mi thob nas/ /skyed mos tshal rnams longs spyod ldan/ /chu bo rgal ?dka' ba yi/ /gnas su zam pa 'dzugs byed pa/ /mi de longs spyod dang ldan pa'o/ /mtho ris gnas su 'gro bar 'gyur/ /gser mdog lta bu'i lus dang ldan/ /nyams dga' rdzing bu byed pa'i mi/ /mtho ris gnas ni thob par 'gyur/ /'jig rten 'di ru mir gyur nas/ /rgyal po yi ni dga' bde thob/ /khron pa dang ni bu nyen khang/ /sems can rnams ni brten pa dang/ /snyan pa grang ba skyob gyur pa/ /byed pa'i mi mchog gar yin pa/ /lha yi bde ba myong bar 'gyur/ /nyi ma'i 'od zer tsha ba yi/ /shin tu sdug bsngal ldan pa la/ gang zhig gdugs ni sbyin byed pa/ /gdugs dang 'dra bar de dag ni/ /dgra yi tshogs las rgyal 'gyur zhing/ /rtag tu bde ba mchog dang ldan/ /mchil lham rgyan gyis brgyan pa ni/ /sems can thams cad dag la ni/ /gus pa yis ni sbyin byed pa/ /de dag bzhon pa mchog rnams la/ /lha dang mi yi 'jig rten du/ /yun ring zhon par skye bar 'gyur/ /yon tan rnams ni sgrogs pa yis/ /rgyal ba mchog gis bstod byed pa/ /thams cad dag ni bstod pa yis/ /lus kyi phyag ni 'tshal byed pa/ /bla mar bsten pa'i rigs skyes zhing/ /de dag so sor rig pa 'thob/ /rdza rnga bi wang paTa tas?/ /bde bar gshegs mchog mchod byed pa/ /mir gyur nas ni dbyangs snyan la/ /sgra ni shin tu snyan par 'os/ /yid du 'ong ba'i gzugs dang ldan/ /bde bar gshegs pa'i mchod rten la/ /dga' bas srog shing 'dzugs byed cing/ /gdugs dang dril bu rnams dang ni/ /gdugs kyi phreng ba 'bul byed pa/ /de dag ming ni rgya che zhing/ /dpal ni phun sum tshogs pa 'thob mir gyur pa ni ma lus pa'i/ /bdag po nyid ni stobs dang ldan/ /dpung rgyan mu tig brgyan ldan pa/ /sa rnams sbyin par btang ba las/ /yin pa ru ni mkhas pa 'chad/ /mchod rten dang ni rgyal ba yi/ /sku mchog rnams ni bzhengs byed pa/ /gdugs ldan sku gdung 'jug byed pa/ /mtho ris yang dag 'dir thob nas/ /mi rnams kyis ni bstod par 'gyur/ /gang zhig dang por sangs rgyas la/ /sa dang lci bas byugs nas ni/ /me tog 'bras bu zas skoms phul/ /rtag tu mchod pa byed pa ni/ /rgyal po'i mchog ni thob par 'gyur/ /rgyal chen mar me sna tshogs dang/ /dri zhim me tog bdug pa dang/ /bu ram la sogs btung ba rnams/ /dge 'dun la ni 'bul byed pa/ /de yang nor dang ldan 'gyur zhing/ /lha ma'i bde ba dag dang ldan/ /mchod rten gdung bcas gtsug lag khang/ /mi gang 'bad pas nyen 'khor 'chag/ /kun nas dri ma med byed pa/ /gser gyi kha dog 'dra bar 'gyur/ /rtag tu snang ba 'bul byed cing/ /grang dus gos dang khang ba dang/ /rgyan dang bu mo btung ba byin/ /skye gnas rnams su bde ldan 'gyur/ /sa stengs du ni tshe ring zhing/ /thams cad nad las 'grol bar 'gyur/ /mnyam pa med pa'i bde ba thob/ /de dag rtag tu bde dang ldan/ /lha yi bde ba sna tshogs pa/ /nyams su myong zhing 'byung 'gyur pa/ /srog gcod spangs pa las yin par/ /nges par mkhas pa rnams kyis bstan/ /gzhan mthong brnab sems mi byed pa/ /chem rkun las ni dbyen gyur cing// rdzas ni yongs su slang bar byed/ /gseng dang dpag med phun tshogs thob/ /rkun ma brgya phrag dag gis ni/ /mi dbang las ni dbral mi nus/ /chud ma gzhan la mi 'phyo zhing/ /legs bsrungs chung ma nyams med rnyed/ /skye bar dgrar gyur cung zad med/ /'dir ni 'jig rten yid rten cing/ /de la yid mi ches yod min/ /de dang der ni skye ba na/ /autpal sngon po lta bur ni/ /dri ldan yid du 'ong ba'i gzugs/ /de ni mi 'gyur kha dri zhim/ /rdzun gyi tshig kyang smre ma yin// dam pa yi ni grogs ldan zhing/ /mi dbang gis ni gus pas mchod/ /bu dang chung ma bran dang ni/ /longs spyod rgya ni chen po yis/ /dpag tu med pa'i bde 'thob pa/ /rtag tu phra ma spangs pas yin/ /yid du 'ong zhing sgra snyan la/ /ngag ni snyan par 'os pa dang/ /rtag tu shin tu mdzes pa dang/ /mi rnams dang ni lha rnams su/ /de rgyal tshig ni tsub mo dag /mi de yis ni spangs pas yin/ /chos don dben pa dga' ba yis/ /smra ba de ni 'jig rten gyi/ /rtag tu mchog tu yid 'ong 'gyur yang yang mchod pa ngo yis 'thob/ /rin chen mang dang bzhon pas phyug /mngon mtho 'jig rten sna tshogs pa'i/ /bde ba mdza' yas myong bar 'gyur/ /bdag gzhan chags pa spangs pa yis/ /de 'dir 'dod chags chung 'gyur zhing// rtag tu longs spyod rgya chen ldan/ /ngag la dbang zhing grags ldan 'gyur/ /rab tu mdzes pa nyid thob cing/ /de ni rtag tu phyug cing bde/ /rgyal srid kyis mtho 'jig rten gyi/ /tshangs pa nyid ni thob 'gyur zhing/ /yang dag byams pa'i sems ldan pa/ /dbang po yod pa'i mi ru skye/ /mtho ris thar 'bras bde ba thob/ /yang dag rdzogs dang mi de ldan/ /gang phyir 'di dag thams cad ni/ /yang dag lta ba mchog tu ni/ /dge ba'i rtsa ba'i 'bras bu yin/ /dang dang blo gros dang ldan pa'i// bsod nams kyi ni zhing mchog las/ /sa gsum bde ba rgya chen skyes/ /de lta'i khyad par mi shes nas/ /yon tan rin chen thams cad kyi/ /gter du gyur pa'i dad pa ni/ /rtag tu de yis bsten par bya/ /dad pa yis ni ma bzhin du/ /dge ba rnams ni bskyed par bya/ /de bas thog mar skyes bu yis/ /yid kyis legs par bsten par bya/ /'byung gnas dad pa spangs pa yis/ /dam chos rin chen byang chub phyogs/ /nges par gzung bar nus ma yin/ /rgyal po las ni nyams pa yis/ /longs spyod 'bras las nyams pa ltar/ /dad pa'i dbang po las nyams na/ /de bzhin 'bras rnams thob ma yin/ /de phyir skyes bu mkhas pa ni/ /'jig rten bde gshegs byed 'dod pas/ /yid ni rab tu dang ba yis/ rtag tu phan pa nyid du gyis/ /lhag mas nyes pa zhi ma yin/ /gzhan du dad pa dang ldan pa'i/ /nyes pa'i tshogs ni thams cad sreg/ dman zhing gos med rmongs pa dang/ /lag pa na ni thod pa thogs/ /'jig rten 'di na slong ba snad/ sbyin pa med pa'i 'bras la ltos/ /tha dad khyim du slong zhing rgyu/ /rtag tu bkres par kun tu 'khor/ /gang zhig lus la lag rkyong yi/ /khyi dang 'dra bar ring na gnas/ /kun tu 'jug cing slong ba la/ /phyir zlog nyung shas cha gcig kyang/ gang zhig kha zas mi ster ba/ /kha ni khab tsam lta ba ri/ /lus skam skra yi gos kyis ni/ /nyi ma'i 'od zer snang min la/ /yi dags skom gyis gdungs pa snang/ /'bras de lag gis ma byin cing/ /dus ma byin pa'i 'bras bur gsungs/ sna tshogs bsdus pa'i gtam ste nyi shu gnyis pa'o/ / //bsod nams spro ba bskyed pa mnyan par gyis/ /gtong dang bsod nams dkon pa ste/ /bde bar gshegs pa'i sku gzugs la/ /sku gdung rnams ni bcug byas na// khrus gsol gdugs ni 'degs pa dang/ /maN+Dal zas dang skom rnams dang/ /gos dang me tog la sogs dang/ /snang ba dang ni mar me dang/ /gtsug lag khang du mal stan dang/ /zhing dang sna tshogs phul nas ni/ /bstod cing phyag ni 'tshal byed pa/ /'di 'dra du ma? phun sum tshogs/ /gtam ni nyi shu rtsa gnyis kyis/ /yang yang sbyin pa'i bsngags pa brjod/ /mtsho ni sgrul gyis gang bzhin du/ /me tog lo ma rgyas pa yi/ /ljon shing ched ma dang bcas bzhin/ /thos dang dpyod dang rigs ldan zhing/ /de lta bu yi bye brag can/ /tshul khrims la ni rgyab phyogs yin/ /dbul yang khrims ldan mchog yin gyi/ /yon tan rgyan dang bral ba yi/ /nor ldan rnams dang mtshungs ma yin/ /dbul yang skyes bu dam pa rnams/ /de dag yon tan ro myang bas/ /bdud rtsi lta bur khyad par 'phags/ /yang dag dran bya bla ma bzhin/ /yon tan ldan 'phags gzi brjid ldan/ /nor rnams dang ni rgyan dang ni/ /de dag rgyal po rnams kyis ni/ /drung du nye bar mchod 'dod pas/ /tshul khrims/ 'di ni bsrung bar gyis/ /'jig rten bde ba rnams rgyal ba'i/ /'jigs dang zhe sdang bcas pa la/ /chos kyi bdag nyid blo byas te/ /bde mchog phyir ni skyes bu yis/ /bde ba rgya chen mi 'phrogs pa/ /thob par 'dod pa de yis ni/ /tshul khrims nyid ni bsrung bar gyis/ /tshul khrims las nyams 'dul zhing 'che/ /de yis 'jigs bcas nyams su myong/ /tshul khrims ldan la de dag med/ /de nas 'jig rten pha rol tu/ /mdza' yis gtugs shing 'gro ba na/ /bde ba'i yul rnams 'dod pa yis/ /de yis tshul khrims 'di nyid bsrungs/ /tshul khrims brtan dang des ldan na/ /bde 'gro nyon mongs bdag nyid min/ /log par lta bas lam gol phyir/ /de phyir thar pa rab byung zhing/ /rtags ldan mtho ris 'dod ba yis// de yis tshul khrims 'di nyid bsrungs/ /mi 'jigs dprog tu med pa'i rgyan/ /tshul khrims 'di yin bsrung bar gyis/ /tshul khrims nor gyi mchog yin te/ /gzhan gyi dbrog cing rkur mi tshugs/ /tshul khrims bstan te 'chi ba na/ /gzhan du rjes 'brang lus ma yin/ /tshul khrims rjes su 'brang ba'i grogs/ /tshul khrims rgyan gyi mchog yin te/ /rgyan de la ni stor ba med/ /yid gtsugs pa yi grogs po yin/ /tshul khrims lta bu'i phan byed med/ /tshul khrims yang dag nges pa'i gnyen/ /pha dang ma dang bu yin te/ /'dod pa ster ba tshul khrims te/ /mthu yis 'bras bu 'di sbyin byed/ /tshul khrims kyi gtam ste nyi shu gsum pa'o// //bskal ba stong du bsags pa yi/ /sbyin dang bde gshegs mchod la sogs/ /legs spyad gang yin de kun yang/ /khong khro gcig gis 'joms par byed/ /zhe sdang dang mnyam sdig pa med/ /bzod dang mnyam pa'i dka' thub med/ /de phyid 'bad pas bzod pa bsgoms// sna tshogs pa yi tshul gyis ni/ /zhi ba'i yid kyis ma bzung na/ /dga' dang bde ba myong ma yin/ /sdang pa'i zug rdu yid gnas la/ /gnyid med brtan pa yod ma yin/ /zhe sdang bral bar ma gyur na/ /ji srid 'tsho bar gnod dang bcas khos ba gcig pu bcom pa yis/ /rnam par sdang ba thams cad bcom/ /rtog pa'i bud shing la mched pa'i/ /khro ba'i me yis 'gro ba sreg/ dang por bdag nyid sreg byed la/ /gzhan dag sreg pa 'am yang na min/ /rgas pa yis ni gzugs bzhin dang/ /khros dang mun pas mig dang ni/ /blo dang bral bas 'dod don ldan/ /de bas khro ba 'joms par byed/ /dge ba'i las la 'di sbyar bya/ /bdag la gnod byed 'byung ba dang/ /de las bzlog par bya snyam na/ / sdig ldan sems yin khrod ci yod/ mtshon sogs byed pa spangs nas ni/ /'phen pa ci zhig khro ru yod/ /rtsod byed zhe sdang yin pas na/ /de phyir zhe sdang la sdang bsngags/ /bzod pa'i gtam ste nyi shu bzhi pa'o/ // yon tan rin chen thams cad kyi/ /gter du gyur pa brtson 'grus te/ /nyon mongs rgya mtsho kun sgrol ba'i/ /rgya chen mchog ni brtson 'grus yin/ /brtson 'grus shing rta gang zhon pa/ /dngos po bsam pas mi 'thob pa/ /de 'dra 'gro na yod ma yin/ /glang po rta dang rkang thang dang/ /mda' dar 'da' chen dgra sta dang/ /mtshon cha yis ni g.yul 'gyed cing/ /dgra bgegs mthar ni rgyal byed pa/ /'di de stobs dang ldan pa yi/ /brtson 'grus dpa' bo chen po yin// rgya mtsho chu srin tshogs gnas shing/ /chu rlabs mthon por rim rgyu ba/ /brtson 'grus ldan pa'i dpa' bo yis/ /ba glang rjes bzhin 'gom par byed/ /rin thang med pa'i rin chen gyis/ /gter ni len par byed pa yin/ /'dod chags la sogs sprul gdug rnams/ /lus la brtson 'grus can gyis spong/ /khrims ldan skye bo dam pa ni/ /sems ni dri med khyad 'phags pas/ /mir ni yang dag mnyam bzhig 'dzin/ /ri rab mdzes pa'i rtse mo ru/ /blta na sdug pa'i lha mo la/ /phang du lag pas 'khyud pa yis/ /bde dang ldan zhing dga' bar byed/ /mkha' gnas lha ni gang yin pas/ /gnyis gnyis ldan pa des spangs nas/ /yang dag nyid kyi bde ba myong/ /shin tu 'bras bu rgya che ba'i/ /bskyed pa'i rgyu ni brtson 'grus te/ bstan pa la sbyor de sbyor byed/ /brtson 'grus kyi gtam ste nyi shu lnga pa'o// //nyon mongs dgra yi sde tshan rnams/ /bsam gtan ldan pas zil mnan nas/ /yang dag byang chub dpal rnams 'thob/ /byang chub yan lag rab sbyin zhing/ /'chi med skye ba'i rgyur gyur pa/ /'dod chags zhe sdang la sogs pa/ /nyes pa thams cad sel ba yi/ /rgyu ni bsam gtan yin pa ru/ /blo ldan de yis rab tu gsungs/ /nam mkha' dang ni sems mnyam la/ /gser dang dong? bar mnyam pa yis/ /bsam gtan sgom byed skyes bu yi/ /yon tan rnams kyi rgyu ru gsungs/ /nyon mongs dgra tshogs las rgyal ba'i/ /dge ba'i stobs kyis bsgrubs pa las/ /mtshan ni thams cad ldan pa yis// yang dag rdzogs pa'i byang chub dpal/ /yon tan rab mchog bdag nyid can/ /dkon pa'i rig pa thob par 'gyur/ /sems la ye shes bdag po yis/ /dgra yi 'jigs pa rnams spangs nas/ /gang gis mi yi dbang po bskyed/ /bsam gtan gcig pu de rgyu ste/ /yon tan kun gyi gter yin pas/ /'phags pa'i yon tan gyis phyug gsungs/ /rmongs pa'i mun pa sel mdzad cing/ /rgyun gyi rtal pa'i ye shes kyis/ /rdzogs sangs rgyas kyi nyi ma dang/ /mi rnams dang ni lha rnams kyi/ /bde rgyu bsam gtan rab mchog yin/ /bsam gtan gyi gtam ste nyi shu drug pa'o// //shes rab stobs dang bral na yang/ /skyes pa'i gzugs brnyan 'ba' zhig ste// snying po yangs pa'i mdza' thug par/ /ri mo bris pa'i gzugs dang mtshungs/ /blo ldan brtson 'grus yang ldan pa'i/ /blo ldan de la 'bras 'dod 'byung/ /bla med bdag gsod pa yi dgra/ /skye ba du mas gang chod dang/ /bdag nyid skye bar 'gyur pa yis/ /rigs dang ming dang dus rnams dang/ /dbus bzhin du ni mdza' bzung la/ /rnal 'byor pa yi shes pa 'jug/ shes rab stobs kyis de shes gsungs/ /'jig rten rnams ni dri ma yi/ /rab rib tshogs ni sel byed pas/ bde bas blo de chos mchog yin/ /ye shes snang ba bskyed pa yis/ /mi rnams kyis ni nyes pa'i tshogs/ /rtag tu stongs par byed pa yin/ /dang por dbang po 'di bsgrub bya/ /yid kyi phra rab rnam shes shing/ /rig pa thams cad gsal byed yin/ shes rab de yang rtag par ni/ /stobs kyi dge ba skyed byed pa'i/ /rgyu yin par ni rtag tu grag/ bya ba'i rgya mtsho'i nang du ni/ /gdon mi za bar nub pa dang/ /g.yul gyi nang du shes rab gtso'o/ /shes rab stobs kyis rnam rgyal thob? thos pa'i shes rab gang yin de/ /dge ba rnams kyi rgyu ru 'gyur/ /de lta yon tan thams cad ni/ /sgrub par byed pa yin pa'i phyir/ /gdon mi za bar shes rab bsgrubs/ /shes rab med pa'i skyes bu ni/ /mi gsal the rangs mar me bzhin/ /shes rab kyi gtam ste nyi shu bdun pa'o/ //mtho ris? thar pa'i yon tan ni/ /rin po che yi gter gyur pa/ /pha rol phyin pa drug 'di nyid/ /sa gzhi bzhin du shes pa'i mis/ /bdag phan bsgrubs pa de yis ni/ gzhan la phan par bya ba'i phyir/ /myur bar rtag par rgyun tu 'bab/ /pha rol tu phyin pa'i gtam ste nyi shu brgyad pa'o// //legs par bshad pa rin po che'i za ma tog lta bu'i gtam snyan dngags chen po slob dpon dpa' bos mdzad pa rdzogs so/ / //rgya gar gyi mkhan po ru tra dang/ dge slong shAkya 'od kyis bsgyur// //rgya gar skad du /tsa tur bi parya? ka tha/ bod skad du/ phyin ci log bzhi spong ba'i gtam/ 'jam dpal gzhon nur gyur pa la phyag 'tshal lo/

CLOSE WINDOW