བོད་ཡིག

e-texts based on the ACIP/ALL Input

/ //rgya gar skad du/ sa mA d+hi saM b+hA ra pa ri ba rta nA ma/ bod skad du/ ting nge 'dzin tshogs kyi le'u zhes bya ba/ sangs rgyas dang byang chub sems dpa' thams cad la phyag 'tshal lo/ /srid pa ji srid par du bzhugs pa yi/ /thub dbang sras bcas rnams la phyag 'tshal te/ /gsang sngags mdo sde pha rol phyin pa yi/ /mdo sde'i rjes 'gro ting 'dzin tshogs le'u brjod/ /deng seng skye bo phal cher bdud kyi lcags kyus bzung ste khyim gyi btson ra dam por bcug /bdud kyi 'jig rten skyod bzhis grims par bsrungs shing sred sogs 'ching ba rab tu dam pos bcings/ /sdom brtson dag kyang phal cher bdud kyi 'jig rten skyong bzhi'i dbang du gyur cing dge sbyong gi / gnas dang tshul spangs khyim pa rnams dang spyod mtshungs ngan 'gro'i g.yang sar mngon phyogs mtho ris spangs/ /de phyir 'di ni bdag nyid dran phyir byas kyi gzhan la phan pa'i re ba yod ma yin/ /'on kyang bdag dang skal pa mnyam pa la gnas 'dir 'ga' yang dag rtogs pas smras 'di nyon/ /de la ting nge 'dzin gyi tshogs kyi yan lag ni rnam pa dgu ste/ spang bar bya ba dang sngon du 'gro ba dang ldog par bya ba dang/ gdung ba bcad pa dang/ yid 'byung bar bya ba dang/ yon tan rjes su dran bar bya ba dang/ brtson par bya ba dang/ 'brel par bya ba dang/ gnas pa'i thabs shes bya ba rnams so/ /de la spang bar bya ba ni bdud kyi las so/ /de la bdud ni gang/ de las ni gang zhe na/ bdud ni 'dod pa'i lha sdig can zhes bya ba'i chung ma pad+ma'i phreng ba can dang/ 'khor 'jig rten skyong ba bzhi dang/ bdud kyi rigs kyi yi dags dang bcas pa gang yin pa'o/ /de dag gi las ni 'dod pa'i lha de chung ma dang bcas pa'i spyi bo na me tog gi mda' lnga yod pa ni 'di lta ste/ dregs par byed pa dang/ rmongs par byed pa dang/ kun tu rmongs par byed pa dang/ nga rgyal bar byed pa dang/ sems med par byed pa zhes bya ba rnams so/ /de'i me tog de dag bsnun pa de phog pa las/ nyon mongs pa lnga gang shes che ba de la des 'ongs pa kho nas rab tu 'bar bar 'gyur to/ de'i dbang du sang zhing/ thar pa dang mngon par ma thob las nyams par 'gyur ro/ /de'i 'khor 'jig rten skyod pa bzhi ni/ 'thab par byed pa dang/ g.yeng bar byed pa dang/ lhag par rab tu chags pa dang/ 'du shes log pa zhes bya'o/ /bdud de dag gi las ni tha dad de/ 'di ltar 'thab par byed pa'i bdud des ni/ /lam bsgom pa dag 'thab pa dang/ rtsod pa dang/ 'gyed pa la 'jug cing/ de'i rgyan 'bad pas sgrub po/ /g.yeng par byed pa'i bdud des ni/ lam bsgom pa dag gnyid dang rmugs pa rab tu 'phel ba 'am/ chos nyan pa dag kyang gnyid la rab tu sbyor ba 'am/ kha cig rab tu g.yeng bar byed par yang gnas so/ /lhag par rab tu chags pa'i bdud des ni/ phal cher khyim na gnas pa la bar du gcod de/ sbyin pa'i dus nye bar gnas pa na/ bu dang bu mo dang/ chung ma dang bdag nyid longs ci spyad ces de rang gi sha la gcod pa snyam byed pa'i 'du shes nye bar bsgrub po/ /'du shes log pa'i bdud gang yin pa des ni/ phal cher rab tu byung ba'i phyogs sun 'byin par byed de/ 'di ltar rab tu 'byung ba'i sems nye bar gnas na/ 'khrig pa'i bde ba dang/ bza' ba dang btung ba'i bde ba dang/ rang gi skye bo'i tshogs dang/ glu dang gar la sogs pa dran pas chags pa dang/ de'i rang gi skye bos su ba dang/ 'drid pa dang/ bsdigs pa dang/ bzung bas de'i nges par 'byung ba'i bar chad byed du 'jug go /rab tu byung ba dag la yang bud med kyi mtshan ma dag yid la byed pa dang/ mngon brgad pa dang/ tses? pa dang/ dran par byed pa dang/ tshong dang zhing las dang rang gi 'brel ba dang/ yid bcugs par bya ba'i sems bskyed cing rmi lam na bud med du sbrul cing des chags pa dang/ sa bon 'byung bar byed la/ sna tshogs kyis kyang rab tu byung ba las 'babs shing/ de dag gi tshangs par spyod pa dri ma can du yang byed do/ /'di dag bzhi car yang 'dzam bu gling ba rnams sdug bsngal bar bya ba'i phyir/ klu ma rungs pa rnams bskul la lha ma yin dag bskul zhing/ lo tog ma rungs par byed/ mi chos dang ldan pa'i srog 'phreg / lus la nad sna tshogs gtong bar byed de/ 'di ltar rgyal po chen po bzhi po dag chos ma yin pa sbyin ba dag la chad pa sbyin pa ltar/ 'di dag ni chos dang ldan pa rnams la chad pa sbyin pa'o/ /bdud kyi rigs kyi yi dags ni yi dags kyi rigs gsum cu rtsa drug las 'di dag rigs gcig tu bgrangs pa yin te/ de dag gi bdud kyi las ni bsam gtan pa dag rmi lam du 'jigs pa bskyed par byed de/ sangs rgyas kyi sku mtshan dang dpe byad kyis spras pa nye bar ston pas bar du gcod/ bsam gtan la mnyam par bzhag pa na sgra chen po sgrogs par byed do/ /mdor bsdu na bdud dang/ bdud kyi rigs su gtogs pa rnams ni yang dag par zhugs pa thams cad la chags pa skyed pa 'am/ 'jigs pa bskyed pa la sogs pas bar du gcod de/ de ltar yang 'jig rten gsum las rnam par rgyal ba'i rtogs pa las/ mi bzang brtul zhugs bzung ba yis/ /bsgrub pa la ni bdud kyi rigs/ /lha mo 'dod pa'i gzugs dag dang/ /de bzhin gzhan gyi lus su yang/ /rnam pa sna tshogs gzugs dag gis/ /dbang po bsdams la 'tshe bar byed/ /ces gsungs te/ 'dir brtul zhugs bzung ba ni nye bar mtshon pa ste/ sems las su rung ba thams cad la yang de dag de ltar 'tshi bar byed do/ /de lta bu'i bdud kyi las de dag su zhig la 'byung zhe na/ bsam pa dag pas yang dag brtson pa dag la 'byung ste/ ji skad du 'phags pa 'jam dpal rnam par 'phrul ba las gsungs pa/ 'jam dpal byang chub sems dpa' rnams kyi bdud kyi las ci las 'byung bar rig par bya/ 'jam dpal gyis smras pa/ lha'i bu byang chub sems dpa' rnams kyi bdud kyi las ni brtson 'grus las 'byung bar rig par bya ste/ de ci'i phyir zhe na/ mi brtson pa la ni bdud kyis ci zhig bya ste/ de nyid bdud yin pa'i phyir ro zhes so/ /de ltar bdud kyi las shes pas de bzlog par bya ste/ ji skad du 'phags pa lha'i bu rin chen mchog gis zhus pa las gsungs pa/ gang gi tshe bdud kyi las rtogs pa de lta bu'i kha na ma tho ba med pa yin no/ /gang yang bdud kyi las rnams zlog pa de lta bu ni dpyas med pa yin no zhes so/ /de ma bzlog pa ni rnam par thar pa mi 'thob pa kho na ste/ ji skad du 'phags pa dpung bzang gis zhus pa'i mod las gsungs pa/ bgegs kyis bsod nams ma lus zad par byed/ /de bas mi la gsang sngags 'grub mi byed/ /ji ltar zla ba sprin las rnam grol ltar/ /de bzhin bgegs las grol ba rnam par gsal zhes te/ 'dir bgegs kyang gnyis te/ rdzogs pa'i byang chub gzhig par bya ba'i phyir sbyor ba lha'i bu'i bdud dang/ de las gzhan pa ji skad du 'phags pa dpung bzang gis zhus pa las/ gtor ma 'dod pa'ang rtsed mo byed 'dod pa 'am/ gsang ba'i don du lus la dbab cing 'jug ces pa ste/ 'di ltar de gnyis ka bzlog par bya'o/ /thabs gang gis de bzlog par bya zhe na/ ji skad du 'phags pa rdo rje rtse mo las gsungs pa/ rang gi sems ni bdud ces gsungs/ /rang gi sems nyid bgegs yin no/ / rnam par rtog pa thams cad spang/ /bgegs kun rnam par rtog las byung/ /zhes pa'o/ /gzhan yang bdud kyi las bzlog pa'i thabs ni 'phags pa mya ngan med kyi byin pas zhus pa dang/ 'phags pa seng ge lung bstan pa las shes par bya'o/ 'di ni spang bar bya ba'i yan lag go /gang gis thos par bya ba'i rang bzhin gyi shes rab ma skyes pa des ni/ bdud kyi las bzlog par mi nus shing/ sems mnyam par 'jog par yang mi nus pas na/ dang por thos pa nyid sngon du bya ste/ ji skad du/ shes rab rgyas byed pa ni thos pa ste/ bsam pa dang ni gnyis po yod gyur na/ /de nas bsgom pa la ni sbyor ba ste/ /de las dngos grub bla na med pa 'thob ces bshad la/ 'phags pa byang chub sems dpa' i rnam par dgod pa bcu bstan pa'i le'u las/ kye rgyal ba'i sras byang chub sems dpa' las dang po ba de ni thog ma nyid du kha ton la bskul bar bya'o/ /mang du thos nas dben par gnas pa la bskul bar bya'o/ /zhes gsungs la/ ngan de ltar 'phags pa drag shul can gyis zhus pa dang/ 'phags pa dkon mchog sgron ma las kyang gsungs so/ /de bzhin du 'phags pa sdong po bkod pa las kyang/ /thog mar nyan 'dod bla ma bsnyen bkur bzod dang des byas shing/ /rang bzhin med pa'i chos la rab rtog bsam gtan rnyed byed pa/ /bde gshegs nyid ni rtogs 'gyur 'gro ba rnams sgom sems tshim byed/ /chos nyid de 'dra spyod pa myur du bde gshegs thob par 'gyur/ /zhes gsungs so// de bzhin du 'phags pa nyan thos kyi so sor thar pa'i mdo las kyang/ mang du thos pa nags kyi nang dag tu/ /lang tsho yol ba rnams kyi gnas pa bde/ /zhes gsungs te/ de bas na thos pa'i shes rab nyid don bsgrub pa'i sngon du 'gro ba'o/ /'di ni sngon du 'gro ba'i yan lag go / de ltar thos pa dang ldan pa'i byang chub sems dpa' de/ chos smra ba la 'jug pa dgag par bya ste/ mngon par shes pa ma thob par mang du thos pa tsam gyis ni gzhan la phan gdags par rgyal bas ma gsungs te/ de bas na 'phags pa byang chub sems dpa' i rnam par dgod pa bcu bstan pa'i le'u las byang chub sems dpa' las dang po pa de ni thog ma nyid du kha ton la bskul bar bya'o/ /mang du thos nas dben par gnas pa la bskul bar bya'o/ /rab tu dben par gyur nas dge ba'i bshes gnyen du gyur par yongs su bskul bar bya'o/ /dge ba'i bshes gnyen du gyur nang lo bde ba la yongs su bskul bar bya'o/ /nga la bde bar gyur nas dus shes pa la yongs su bskul bar bya'o/ /dus shes par gyur nas mi 'jigs pa la yongs su bskul bar bya'o/ /mi 'jigs par gyur nas dus shes pa la yongs su bskul bar bya'o/ /don shes par gyur nas chos kyi rjes su 'brang ba la yongs su bskul bar bya'o/ /chos kyi rjes su 'brangs par gyur nas rmongs pa med pa la yongs su bskul bar bya'o/ /rmongs pa med par gyur nas rnam par dgod pa la yongs su bskul bar bya'o/ /ci'i phyir zhe na/ de bas kyang shas cher sems can thams cad la snying rje chen po mngon du gzhag par bya ba dang/ gnas gang thos kyang nga la bdag nyid sbyar bar bya ba dang/ bdag nyid gzhan gyi drang mi 'jog par bya ba'i phyir te/ kye rgyal ba'i sras dag 'di ni las dang po pa'i byang chub sems dpa' i rnam par dgod pa'o/ /zhes gsungs so/ /don 'di nyid 'phags pa drag shul can gyis zhus pa dang/ dkon mchog sgron ma las kyang gsungs so/ /gzhan yang 'phags pa lhag pa'i bsam pa bskul ba'i mdo las kyang/ bdag ni sgrub nyams da ni ci bya zhes/ / byis pa 'chi ba'i dus na mya ngan byed/ /ces bya ba la sogs pa mang du thos pa dben pa mi bsten par chos smra ba la nyes pa rnam pa rab tu mang po gsungs pas/ der zhib tu blta'o/ /de bas na mang du thos pa tsam gyis chos smra bar mi bya bar de las ldog par bya zhing/ mngon par shes pa thob nas bzod 'gro ba'i don bya ste/ 'di ni ldog par bya ba'i yan lag go /de ltar chos smra ba las ldog cing/ spros pa spangs pa ste/ 'di snyam du bdag gis phung po la mkhas par bya ba yang yongs su ma gtugs/ /khams dang skye mched la mkhas par bya ba yang yongs su ma gtugs so/ /de dag la mkhas par ma gyur par ni thar pa yang mi 'thob ste/ ji skad du rig pa'i gnas lnga dag la brtson par ma byas par 'phags mchog ci sems thams cad mkhyen nyid mi 'gyur te/ /de bas gzhan dag tshar bcad rjes su gzung phyir ram/ rang gis kun shes bya phyir de la de brtson byed/ ces bstan pa'i phyir ro/ /zhes sems pa dang/ gzhan yang slob bar? dang/ yang slob kyi 'brel ba dang/ rnyed pa dang bskur sti dang grags pa dang sgra dang tshigs su bcad pa'i bde ba la 'dod pa byung na de ni nges par bzlog par bya ste/ chos thos nas bsgom pa byang bar mi byed pa ni/ cir yang mi bsngags te/ ji skad du 'phags pa sdong po bkod pa las gsungs pa/ yang dag sangs rgyas bstan pa ni/ /thos pa tsam gyis mi 'grub po/ /dper na la la chu klung gis/ /stobs med na na gyis khyer bdag /skom pas shi bar gyur pa bzhin/ /ma bsgoms chos kyang de bzhin no/ /zhes pa dang/ yang gsungs pa/ dper na mtsho chen mnyam pa zhig /skye bo thams cad sgrol byed kyang/ /bdag ni de nang 'chi 'gyur ba/ /ma bsgoms chos kyang de bzhin no/ /zhes bya ba la sogs pas bsgom pas byang bar mi byed pa'i skyon rab tu bstan te/ rgyas par de nyid las shes par bya'o/ /de bas na ji tsam gyis sems mnyam par 'jog par nus pa de tsam gyis gdams ngag kho nas tshim par byas la sems kyi ngang tshul 'phral du byung ba yang bla ma la zhus shing sgom par bya'i/ /tshad ma rnam pa bdun dang/ brda sprod pa rnam pa bzhi dang/ chos mngon pa rnam pa bdun dang/ rnal 'byor spyod pa'i sa la sogs pa'i mtshan mas yid mi gdung ste/ ji skad du don dam pa'i rigs pa las/ gang zhig bla ma'i man ngag bdud rtsi'i chu/ /gdung sel bsil ldan ngoms par mi 'thung ba/ /de ni bstan bcos don mang mya ngam gyi/ /thang la skom pas gdungs te shi bar zad/ /ces bshad de/ bskal pa dpag tu med pa ngal ba byas kyang/ tha snyad nye bar sbyang ba dag ni mi bzad kyi/ tshe yongs su gtugs pa kho nar zang ngo/ /de bas na bde mchog phyi ma las kyang/ rnal 'byor pa ni phyi rol 'khor/ /de yi khams rnams zad par 'gyur/ /de bas phyi rol kun spangs te/ /rnal 'byor rol pas gnas par bya/ /zhes so/ /de bzhin du don dam pa'i rigs pa las kyang/ yud rnams bgrod cing gdung pas nyen byas kyang/ /lhan cig skyes pa'i cha tsam yang mi 'phrad/ /ces bshad do/ /phung po dang khams dang skye mched la mkhas par yang rnal 'byor gyis mthus dus gcig nyid la 'gyur gyi/ /de dag rim par bslabs pa las ni ma yin te/ ji skad du 'phags pa rdo rje gtsug tor las/ de las shes pa skye bar 'gyur/ /ma thos pa yang shes par 'gyur/ /zhes gsungs la/ 'phags pa dpung bzangs kyis zhus pa las kyang/ tshigs ni gzung bar 'os shing yid gzhungs la/ /snyan ngag dang ni bri ba rnams la mkhas/ /zhes gsungs so/ /'di dag kyang rnal 'byor gyi mthu las byung ba yin gyi/ rim gyis bslabs pa'i gnas skabs las ni ma yin no/ /chos mngon pa las kyang zad pa shes la zag bcas kyang/ /zhes bstan to/ /rnyed pa dang bskur sti 'dod pa'i gdung ba ni yid 'byung ba'i yan lag las shes par bya'o/ /'di ni gdung ba gcad pa'i yan lag go / rnam pa thams cad du 'khor ba la yid ma byung bar sgom pas byang bar byed nus pa ma yin pas de la yid 'byung bar bya ste/ ji skad du byang chub sems dpa' i spyod pa la 'jug pa las bshad pa/ thog mar zhi gnas btsal bya de yang ni/ /'jig rten chags ba med la mngon dags 'grub/ /ces gsungs te/ 'dir gnyen la mngon par dga' zhing dgra la sdang bas chags pa dang/ nad med pa dang lang tsho la sogs pa la chags pa dang/ rang bzhin gyis srid pa la chags pa dang/ rnyed pa dang bkur sti dang/ grags pa dang sgra dang tshigs su bcad pa la chags pa rnams rnam par spang bar bya ste/ ji skad du 'phags pa dpung bzangs kyis zhus pa las gsungs pa/ re zhig cig na dgra yang mdza' bor 'gyur/ /mdza' bo yang ni dgrar yang 'gyur ba nyid/ /de bzhin kha cig kyang ni bar mar 'gyur/ /bar ma de nyid kyang ni dgra bor 'gyur/ /de bzhin mdza' bshes 'gyur bar rig nas ni/ /blo gros ldan pas nam yang chags mi bya// gnyen la dga' ba'i sems kyis rnam rtog dag / bzlog nas dge la ci bder bzhag par bya/ /zhes so/ /'phags pa nA gardzu nas kyang/ /pha ni bu nyid ma ni chung ma nyid/ /skye bo dgrar gyur pa dag bshes nyid dang/ /bzlog pa nyid du mchi bas de slad du/ /'khor ba dag la nges pa 'ga' ma mchis/ /zhes bshad do/ /de bas na gnyen dang dgra la chags pa yongs su spang ngo/ /de bzhin du/ nad med mi rtag lang tsho rtag ma yin/ /tshe ring mi rtag 'byor pa rtag ma yin/ /zhes gsungs pas de dag la yang chags pa yongs su spang ngo/ /rnyed pa dang bkur sti dang grags pa dang sgra dang tshigs su bcad pa la chags pa yang spang ste/ ji skad du byang chub sems dpa' i spyod pa la 'jug pa las gsungs pa/ bdag ni rnyed mang bkur sti byas/ /bdag la mang po dga' o zhes/ /'di 'dra'i bsnyems pa 'chad gyur na/ /'chi ba'i 'og tu 'jigs pa ste/ /zhes pa dang/ yang de nyid las/ rnyed pa dag ni mang byung zhing/ /grags dang snyen pa byung gyur kyang/ /rnyed dang grags pa'i tshogs bcas te/ /gang du 'dod pa'i gtol med do/ /bdag la smod pa gzhan yod na/ /bstod bas bdag dgar ci zhig yod/ /bdag la bstod pa gzhan yod na/ /smod pas mi dgar ci zhig yod/ /ces bshad la/ yang de nyid las/ sems can rnyed pa med la smod de/ rnyed pa can la mi snyan smra/ /rang bzhin 'grogs dga' de dag gis/ /dga' ba ji ltar skye bar 'gyur/ /zhes bshad do/ /gzhan yang 'phags pa lhag pa'i bsam pa bskul ba'i mdo las rnyed pa dang bkur sti'i nyes pa rab tu mang po bstan pas de las shes par bya'o/ /'di'i slob ma dang yang slob la/ sogs pa la chags pa ni snying rje'i bdag nyid ma yin nam/ ji ltar de spang bar rigs she na/ ma yin te/ gnas skabs ma yin pa'i snying rje smad pa ste/ mngon par shes pa ma thob par slob ma yongs su smin par mi nus kyi rang 'ching bar zad do/ /ji skad du byang chub sems dpa' i spyod pa la 'jug pa de nyid las bshad pa/ sems can mos pa sna tshogs pas/ /rgyal bas kyang ni mi mgu na/ /bdag 'dra ngan pas smos ci dgos/ /de bas 'jig rten bsam pa gtang zhes so/ /yang de nyid las/ sems can rnams la chags byas na/ /yang dag nyid la kun nas bsgrib/ /skyo ba'i sems kyang 'jig par byed/ /tha mar mya ngan gdung bar 'gyur/ /de la sems pa 'ga' zhig gis/ /tshe 'di don med 'da' bar 'gyur/ /rtag pa med pa'i ye shes kyis/ /rtag pa'i chos kyang 'jig par 'gyur/ /zhes bshad do/ /de bas na slob ma la sogs pa rig pa'i 'bras bus 'brel pa dang/ 'jig rten pa'i tha snyad kyis 'brel pa gnyis ka la snying brtse ba kha nas ma chags par dben par gnas par bya'o/ /srid pa la rang bzhin gyis chags pa yang spang bar bya ste/ ji skad du 'phags pa dpung bzangs kyis zhus pa las gsungs pa/ 'jig rten stag dang sbrul dang me 'dra pa/ /sems nas spangs te dben la dga' bar bya/ /bud med mtshan nyid skyes pa'i mtshan nyid dang/ /sman dang glang chen brtag pa skar ma'i dpyad/ /mtshon cha brtag pa 'am rta dpyad rang bzo 'am/ bstan bcos ngan pa slob cing klog ba spang zhes so/ /yang de nyid las/ glang chen rta dang bya gag bya/ byi ra ra/ /gong ma sreg pa dur pa skyes pa dang/ /bud med bu mo byis par lug sogs/ /'thab mo 'gyed pa blta bar mi bya'o/ /yul sa'i gtam dang rang dbang brtan pa dang/ /dmag dang rgyad dang na chung gtam dag dang/ /sgrung dang lde'u dang sngon gyi lo rgyus gtam/ /'dod chags gtam dang smad 'tshong gtam mi bya/ /sngags pa gsang sngags bzlas la brtson pa dang/ /dbyar zla gsum ni gcig pur gnas par bya/ /zhes 'byung ngo/ /lang de nyid las/ /las kyi dbang gyur bdag po med pa dang/ /mgon med rten med tshe rabs gcig nas gcig /lus kyi kha brgyud rjes su rab 'gro ba/ /de yi rjes su dge dang mi dge 'brang/ /'tsho dang mdza' bshes dang ni rnam par bral// mi sdug pa dang phrad cing 'dod pas gdungs/ /ngan ba skye rga na 'chi'i sdug bsngal can/ /yul rnams kun tu song na'ang med pa min/ /sha sbrang tsha grang bkres dang ngal la sogs/ /gang du song yang sdug bsngal nyid yin pas/ /yul la mngon dga' i sems ni byung ba na/ /rnam rtog de dag rnams kyis bzlog par bya/ /'dod chags shas che mi gtsang sha tshil dang/ /pags pa keng rus blta bas rnam par bzlog /byams dang snying rje'i chus gdab zhe sdang la/ /gti mug la ni rten 'brel lam gyis so/ /zhes gsungs so/ /'phags pa nA gArdzu nas kyang 'jig rten gyi nyes pa du ma bstan nas/ de ltar 'di kun mi rtag bdag med de/ /skyabs med mgon med gnas ming de slad du/ /'khor ba chu shing snying po med pa la/ /mi mchog khyod kyi thugs ni dbyung bar mdzod/ /ces bshad do/ /gzhan yang byang chub sems dpa' i spyod pa la 'jug pa dang/ gzhon nu ma bdun la gdams pa dang/ bshes pa'i spring yig dang/ slob ma la spring ba la sogs pa'i gzhung la brten te/ srid pa la rang bzhin gyi chags pa spang bar bya'o/ /'di ni yid 'byung bar bya ba'i yan lag go /de ltar mi mthun pa'i phyogs spangs nas ting nge 'dzin gyi yon tan dran par bya ste/ de la 'dir yon tan ni gnyis te/ mthong ba'i chos nyams su myong bar 'gyur ba dang/ de las gzhan pa'o/ /ji ltar zhe na/ lus bde bar gnas pa dang/ ngag bde bar gnas pa dang/ sems bde bar gnas pa dang/ chos skyong ba rnams dga' ba dang/ de'i mi'i lus thob pa don yod pa dang/ ston pa dang pha ma dang bla ma'i drin bsab pa dang/ mi ma yin pas mi tshugs pa dang/ nad nyung bar 'gyur ba dang/ tshe ring bar 'gyur ba dang/ 'chi ba'i dus su 'byod pa med pa dang/ mkhas pa rnams kyis bsngags pa dang/ bza' ba dang btung ba dang gnas mal dang nad kyi rkyen rtsi dang gos rnams bde blag tu rnyed pa dang/ nyon mongs pa dang las la gnod par byed pa ste/ 'di dag ni dang po'i yon tan yin no/ /gang du 'dod pa'i sangs rgyas kyi zhing du skye ba dang/ ngan song gsum spangs pa dang/ mi khom pa lhag ma spangs pa dang/ bud med du mi skye ba dang/ dbang po rno ba dang/ dkon mchog gsum dang 'bral bar mi 'gyur ba dang/ der yang ting nge 'dzin la dga' ba dang/ mngon par rdzogs par byang chub par 'gyur ba ste/ 'di ni yon tan gnyis pa'o/ /shin tu sbyangs pas ni tshe byin gyis brlabs pa dang/ lha'i gnas su tshe 'di nyid la bgrod pa zhes bya'o/ /don 'di nyid la bsams te btsun pa zla bas rang gi slob ma'i phyir/ zla ba'i dkyil 'khor gsal bas nye bar brgyan byas shing/ rked cing char chen sprin gyis 'khrigs pas 'khyud gyur ba'i/ /ri rtse nags kyi mthongs der chags pa med par ni/ /rlung ltar g.yo ba'i rang bzhin tshe gtugs skas pa che/ /nags mthong ri dags rgyu ba'i tshogs kyis gbsten byas pa/ /kun gnas bzang po de na skyid pa gang yin pa/ /de ci dga' ba'i nags tshal lha mo'i nyam phag tu/ /thal gyis phebs pa'i rdo leb can na'ang yod 'gyur ram/ /nags klung chu gtsang ngogs bde dben par skyid pa gang/ /de ci lha yi bu mo dri zhim byugs pa yi/ /lan bu'i rgyan du thogs pa rgyun ldan me tog tshogs/ /mdzes pas zil gnon lha yi chu la'ang yod 'gyur ram/ ri sul yangs pa skye bo lang long med pa rab bde ba/ /nyer spyod rgya chen 'khor yug nags tshal sngo 'khrungs phreng bas sbrengs/ /chu ngogs snyan pa phu chu'i rgyun sgra rnga ltar snyan pa yis/ /bdag cag nyon mongs can? gyi yul min 'gron la sgrogs pa bzhin/ /zhes bstan la/ slob dpon zhi ba'i lhas kyang/ nags na ri dags bya rnams dang/ /shing rnams mi snyan rjed mi byed/ /'grogs na bde ba de dag dang/ /nam zhig lhan cig bdag gnas 'gyur/ /phug gam lha khang stong pa 'am/ /ljon shing drung du gnas bcas te/ /nam zhig rgyab tu mi lta zhing/ /chags pa med par 'gyur zhig gu /sa phyogs bdag gir bzung med pa/ /rang bzhin gyis ni yangs rnams su/ /rang dbang spyod cing chags med bar/ /nam zhig bdag ni gnas par 'gyur/ /lhung bzed la sogs nyi tshe dang/ /kun la mi mkho'i gos 'chang zhing/ /lus 'di sba ba ma byas kyang/ /'jigs med gnas par nam zhig 'gyur/ /dur khrod song nas gzhan dag gi /rus gong dag dang bdag gi lus/ /'jig pa'i chos can dag tu ni/ /nam zhig mgo snyoms byed par 'gyur/ /zhes bshad do/ /de bzhin du 'phags pa zla ba sgron ma la sogs pa'i mdo rnams las ting nge 'dzin gyi phan yon rgya cher shes par bya'o/ /'di ni yon tan rjes su dran pas spro ba'i yan lag go /de ltar yon tan mthong nas spro bar gyur pa des gnyen po yid la bya bas rab tu spro bar bya ste/ ji skad du/ byang chub sems dpa' i spyod pa la 'jug pa las/ de ltar bzod pas brtson 'grus brtsam/ /'di ltar brtson la byang chub gnas/ /rlung med g.yo ba med pa bzhin/ /bsod nams brtson 'grus med mi 'byung/ /zhes bstan pa lta bu'o/ /'di ltar bdag gis rab tu brtson pas 'dod pa'i don ma bsgrubs na tshe 'di ni rab tu g.yo ba yin pas yid brtan par bya ba 'am/ /ring du gnas par bya ba'i nus pa med pas skad cig tsam yang g.yel bar mi bya'o snyam du yid la bya ste/ don 'di nyid thugs la bzhag nas 'phags pa nA gArdzu na'i zhal snga nas/ tshe 'di gnod mang rlung gis btab pa yi/ /chu yi chu bur bas kyang mi rtag na/ /dpugs 'byung dbugs rdub gnyid kyis log pa las/ /sang khom gang lags de ni ngo mtshar che/ /zhes pa dang/ yang mgo 'am gos la blo bur me shor na/ /de dag phyir bzlog bgyi ba btang nas kyang/ /yang srid bas bgyi'i slad du 'bad 'tshal te/ /'di bas che mchog dgos pa gzhan ma mchis/ /zhes rgyal po mthar 'gro zhon gyi phyir gdams pa byas so/ /btsun pa zla bas kyang rang gi slob ma la 'di skad du/ mi yi dngos po shin tu rnyed dka' rnyed gyur nas/ /don du brnag pa gang yin de nyid brtun te bsgrub/ /mar me me lce shugs drag rlung gis bskyod pa lta'i/ /tshe ni skad cig gnas pa'i gdong yang yod ma yin/ /'di ni sang bya 'di ni thang cig 'og tu bya/ /'di ni de'u re bya zhes skye bo sems ba na/ /gshin rje be co na lag thogs zur gyis blta ba yi/ /mig rtsa dmar khros ma rangs gang mos ra snyem 'debs// so ga me tog rgyas ba'i dus 'di 'byung bar 'gyur/ /zla ba gsal bas mtshon pa'i ston dus 'di 'byung zhes/ /skye bo thams cad dga' 'gyur bdag gi tshe 'di ni/ /zad par 'gyur zhes shin tu mi dga' 'gyur ba med/ /ces gdams so/ /slob dpon zhi ba lha'i zhal snga nas kyang/ /yid brtan mi rung 'chi bdag 'di/ /byas dang ma byas mi sdod pas/ /na dang mi na kun gyis kyang/ /glo bur tshe la yid mi brtan/ /zhes bshad do/ /de bzhin du dpal ngag gi dbang phyug grags pa'i zhal snga nas kyang/ /'di bya nang bar slar yang 'di bya de nas gzhan yang 'di bya zhes/ /srid pa g.yo ba'i rang bzhin ma shes don med yid brtan 'tshol byed pa'i/ /skye dgu 'chi bdag khar ni chu srin ba ru gru ni zhugs pa ltar/ /bya ba mthar ma phyin bar yul gyi chu yi dpa' klong nang du lhung/ /zhes bshad do/ /de bzhin du slob dpon sa ha ra'i zhal snga nas kyang/ di ring de bzhin du ni sang snyam pa'i/ /skyes bu nor rnams phun sum tshogs 'dod pa'i/ /snyim pa chu yis bkang ba 'dzag pa bzhin/ /mi mngon 'dra'o kwa ye bzhin bzangs rnams/ /zhes bstan pas 'di ni gnyen po yid la bya bas brtson par bya ba'i yan lag go /de ltar rab tu brtson pa des yan lag gnyis zung du 'brel bar bya ste/ 'di ltar zhi gnas dang/ lhag mthong dang/ thabs dang/ shes rab go / de ci'i phyir zhe na/ zhi gnas kyi brtan po nyid du ma byas pa'i lhag mthong ni brtan par mi gnas te mar me la rlung bzhin no/ /lhag mthong dang bral ba'i zhi gnas kyis ni sgrib pa'i dra ba rnams ma lus par byang bar mi nus te/ ji ltar gzugs dang gzugs med pa la sogs pa'i zhi gnas slar 'khor ba lta bu'o/ /de bas na byang chub sems dpa' i spyod pa la 'jug pa las/ zhi gnas rab tu ldan pa'i lhag mthong gis/ /nyon mongs rnam par 'joms par shes byas nas/ /thog mar zhi gnas btsal bya de yang ni/ /'jig rten chags pa med la mngon dags 'grub/ /ces bshad do/ /de bzhin du thabs dang/ shes rab kyang ste/ ji ltar zhe na/ sku rnam pa gnyis 'grub par bya ba yin pa dang/ sgrib pa gnyis spang bar bya ba yin pa'i phyir ro/ /de bas na 'phags pa dri ma med par grags pas bstan pa dang/ 'phags pa ga ya go ri'i mdo las/ thabs dang bral ba'i shes rab ni 'ching ba'o/ /shes rab dang bral ba'i thabs kyang 'ching ba'o/ /zhes gsungs so/ /de bzhin du 'phags pa sdong po bkod pa las/ smon lam mngon par mi 'grub pa'i ri chos kyi ye shes khong du chud pa ni mngon par mi 'grub pa'i bdud do zhes bdud bcu las gcig tu gsungs so/ /ci'i phyir stong pa nyid kho nas de dag mi 'grub ce na/ ma yin te/ 'bras bus ni rgyu'i rjes su 'brang ba'i phyir ro/ /de bas na 'phags pa sdong po bkod pa las gsungs pa/ smra ba'i mchog ni gang yang rung/ /chos gcig gis ni byung ba med/ /gang yang byung ba yod ma yin/ /'byung bar 'gyur ba de bzhin med ce'o/ /de bzhin du 'phags pa rdo rje'i dra ba las kyang/ gal te stong pa thabs yin na/ /de tshe sangs rgyas nyid mi 'gyur/ /rgyu las 'bras bu gzhan med phyir/ /thabs ni stong pa nyid ma yin zhes gsungs so/ /'o na ci'i phyir lung las stong pa nyid 'ba' zhig bsgoms pas chog par gsungs she na/ 'di ni bdag tu lta ba la sogs pa nyid dang 'gal bar 'jug pa de dag gi phyir stong pa nyid kyi che ba bstan pa ste/ de ltar yang 'phags pa rdo rje'i dra ba de nyid las/ lta ba rnams las log rnams dang/ /bdag tu lta ba tshol rnams kyi/ /bdag tu 'dzin pa bzlog pa'i phyir/ /rgyal ba rnams kyis stong pa bstan/ /de phyir dkyil 'khor 'khor lo zhes/ /thabs bde ba la yi sdom pa ste/ /sangs rgyas nga rgyal rnal 'byor gyis// sangs rgyas nyid yun mi ring 'gyur/ /zhes stong pa nyid 'ba' zhig mi bsten gyi/ lha'i sku bsgom par bya'o zhes gsungs so/ /de bas na rdzogs par byang chub par bya ba la ni stong pa nyid snying rje'i snying po can bsgom gyi stong pa nyid 'ba' zhig ma yin no/ /lung dag ni dgongs pa dang ldan pa ste/ ji ltar maN+Dal phul ba las pha rol tu phyin pa drug thob par bstan pa lta bu ste/ de bas na lung la sgra ji bzhin par mi bzung ngo/ /'on kyang stong pa nyid la goms pas phul du phyin pa na/ dge ba'i las thams cad rang gi ngang gis 'byung ste/ dang po sems can gyi don gyi phyir stong pa nyid la zhugs pa na nyan thos ltar zhi ba nyid mi 'gyur te/ ji tsam du stong pa nyid bstan pa de tsam du sems can de tsam ma rtogs pa rnams la snying rje skye ste/ ji skad du 'phags pa nA gA rdzu na'i zhal snga nas bshad pa/ de ltar rnal 'byor pa rnams kyis/ stong pa nyid 'di ni sgom byas na/ /blo ni gzhan don la dga' bar/ /'gyur ba nyid du dgos pa med/ /ces so/ /gzhan yang/ chos la bdag med mkhas pa na/ /rang bzhin med la goms byas pas/ /phyin ci log las byung ba yi/ /nyon mongs bsgrib pa med par spong/ /zhes dbu ma'i rgyan las bshad pa'i rig pas de'i nyon mongs pa spong bar 'gyur te/ gang gi snying rje yang ma spangs la/ nyon mongs pa yang zhi ba de la 'jig rten pa dang 'jig rten la 'das pa'i yon tan rnams tshegs med par 'grub par 'gyur te/ de bas na rgyu'i gtso bor gyur pa dang/ de 'ba' zhig las kyang yon tan mang po 'byung ba la dgongs te/ 'phags pa rnam par snang mdzad mngon par byang chub pa las/ mtshan mar bcas pas mtshan bcas kyi/ /dngos grub dam pa rgyal bas bzhed/ /mtshan ma med la gnas pas ni/ /mtshan mar bcas pa'ang 'grub tu rung/ /de bas rnam pa thams cad du/ /mtshan ma med pa bsten par bshad/ /ces bya ba la sogs pa gsungs pas stong pa nyid 'ba' zhig gis chog par gsungs pa nyid do/ /'di ni 'brel par bya ba'i yan lag go /de ltar yan lag brgyad dang ldan pa de gnas rjes su mthun par kha zas dang spyod lam rjes su mthun pa dang/ gos dang grogs rjes su mthun pa dang ldan par byas la sems mnyam par gzhag par bya'o/ /de la rjes su mthun pa'i gnas ni 'phags pa dpung bzangs kyis zhus ba las gsungs pa rang sangs rgyas dang bde gshegs nyid skyes dang/ /rgyal ba sngon chad gang na bzhugs pa yi/ /gnas gang bsod nams ldan zhing yid dga' ba'i/ /lha dang lha min la sogs phyag 'tshal mchod/ /gso sbyong sdom pa dang ni ldan pa yis/ /bdag nyid dag par bya phyir bsten bya ba/ /de lta bu na ma rnyed gzhan yang ni/ /chu bo chu klung 'bab chu yod pa dang/ /pad+ma autpa las ni brgyan pa'i mtsho/ /skye bo rnams ni shin tu mi rgyu ba/ /dangs shing zhim pa'i chu ni mang ba dang/ mi bzang gdon rnams kyang ni mi gnas pa/ /me tog 'bras bu gtsang ma yod pa dang/ /sman ljongs ljon shing sna tshogs dkrigs pa dang/ /sa stengs gnas mal shin tu gtsang ba dang/ /gang na stag gzig seng ge med pa dang/ yid 'ong mnyam zhing tsher ma med pa dang/ /mi yi dngos grub gnas su bsgrags pa yin/ /grogs po grog mkhar thal ba skra shad dang/ /nyal nyil sol ba tshwa sgo tshogs bcas spang/ /der ni sa brkos sbyangs nas gnas brtsig pa/ /dri la brtan cing 'jim pas zhal zhal bya/ /shar ram byang ngam nub tu sgo gdong cing/ /lho phyogs su ni nam yang sgo mi gdod/ /ces gsungs te/ 'di ni rjes su mthun pa'i gnas so/ /kha zas kyang rjes su chags pa med pa dang/ /tshod zin pa dang/ lus kyi stobs dang 'tsham pa de ltar bza' ste/ de bas na 'phags pa klu sgrubs kyi zhal snga nas/ kha bas sman dang 'dra bar rig pa yis/ /'dod chags zhe sdang med par bsten bgyi ste/ /rgyags phyir ma lags bsnyems pa'i phyir ma lags/ mchog phyir ma lags lus gnas 'ba' zhig phyir/ /zhes bshad do/ /chags par gyur pa'i nyes pa ni ji skad du 'phags pa gang pos zhus pa las gsungs pa/ zhim po'i ro la zhen cing chags/ /skyon rnams mthong bar ma gyur pas/ /bdud kyi glags ni rnyed 'gyur te/ /mchil pas bzung ba'i nya bzhin no/ /zhes gsungs so/ /de bzhin du 'phags pa dpung bzangs kyis zhus pa las kyang/ dper na rma ni gso dang bsal ba'i phyir/ /nad pa dag la sman ni sbyin pa ltar/ /de bzhin 'dir yang bkres pa'i sdug bsngal dag /bsal phyir rgyal bas kha zas bza' bar gsungs/ /la la lam gyis dub cing 'gro ba'i tshe/ /bkres skom gdung bas rang gi bu yi sha/ za ba bzhin du rnal 'byor sems dman zhing/ / 'tshe dang rgyags phyir bza' bar mi bya'o/ /mang du blugs pas rtsol med mtho ba dang/ /de bzhin nyung dus srang ni dma' la gyur la/ /ran pas skad cig mnyam par 'gro ba ltar/ /lus can kha zas de ltar bza' bar bya/ /dper na khang rnying mi zhig bya ba'i phyir/ /mi yis ka ba bzang po 'jug pa lta/ /de bzhin lus kyi 'khrul 'khor gnas pa dang/ /shing rta'i mig skud bzhin du kha zas bza' / /'dod pa'i khams ni kha zas kyis gnas shes/ /rgyal bas chos gcig tu ni bka' stsal pas// lus ni chu shing bzhin du rig bya ste/ /sems ni bza' btung sogs la chags mi bya zhes gsungs so/ /de bzhin du lus kyi nyam dma' ba lta na rnal 'byor pa thams cad kyis smyung bar gnas par mi bya ste/ ji skad du 'phags pa rab tu grub par byed pa las gsungs pa/ dub par byed pa'i skyon yod phyir/ /smyung bar gnas pa smad par bshad/ /gal te lus la dub pa med pa lta na ni lus yang bar bya ba'i phyir rnal 'byor pa thams cad kyis kyang smyung bar gnas par bya ste/ ji skad du 'phags pa dpung bzangs kyis zhus pa las/ bu cig lus dag bya phyir smyung bya zhes/ /bde bar gshegs pa nam yang mi gsung yang/ /lus 'di mi gtsang lpags pa sha khrag rkang/ /klas rgyas rgyu ma mcher mchin mkhal ma zhag/ mkhris pa bad kan khu chu phyi sa dang/ /gcin snabs ba spu skra dang rus pa dang/ /mig dang rna ba sna dang kha dang ni/ /bshang sgo mtshan ma bu ga dgu po yi/ /rma nas dri ma sna tshogs mi gtsang ba/ /'dzag pa'i rgyun ni rtag tu 'byung ba yin/ /de ltar yan lag thams cad 'dus pa dang/ /sa chu me rlung nam mkha' rnams dang ldan/ /ji bzhin las kyi rjes su 'brang ba'i lus/ /thams cad ldan pa'i gzugs la gnas pa yis/ /bshang gci snabs dang mchil ma bad kan dang/ /'di dag zad par bya phyir smyung bar gsungs/ /dri ma zad nas mi yi lus dag na/ /rang gi 'byor phyir sgrub la bde bar 'jug /ces gsungs so/ /grogs po ni med pa 'am rjes su mthun pa bsten te/ ji skad du bcom ldan 'das kyis mdo sde dang de dag las gsungs pa/ mang po dag ni rtsod par 'gyur/ /gnyis po dag ni gtam bcas 'gyur/ /gzhon nu ma yi gdu bu bzhin/ /gcig po zhig ni gnas par bya/ /zhes so/ /rjes su mthun pa ni 'phags pa dpung bzangs kyis zhus pa las gsungs pa/ /nam yang 'khor lo gcig pa'i shing rta ni/ /rta dang ldan yang lam du mi 'gro ltar/ /de bzhin bsgrub pa po ni grogs med na/ /lus can dngos grub thob par mi 'gyur ro/ /de ni blo ldan gzugs bzang gtsang sbra che// rigs ni btsun zhing chos la gzhol ba dang/ /spobs pa che la dpa' zhing dbang po thul/ /snyan par smra zhing sbyin phod snying rje can/ /bkres dang sgom dang nyon mongs bzod pa dang/ /bram ze dang ni lha gzhan mchod mi byed/ /sgrin zhing gzo la byam pa gzo ba dang/ /dkon mchog gsum la dad pa grogs po yin/ /de ltar yon tan ma lus ldan pa dag /rtsod pa'i dus su shin tu dkan bas na/ /yon tan phyed dam bzhi cha brgyad cha can/ /de lta bu ni sngags pas grogs por bsten/ /zhes so/ /'dir ni spros pa spyod pa dang spros pa dang bral ba'i dbang gis grogs po med pa 'am/ rjes su mthun pa'i grogs po dang ldan par bya'o/ /de bzhin du ji tsam gyis gnod pa skyob pa de tsam gyis gos la brten gyi tshogs dang bcas shing lhag par chags par 'gyur ba'i gos dang mal bsten par mi bya ste/ 'phags pa dpung bzangs kyis zhus pa las ji skad du gsungs pa/ gtsug pus bzhag ste skra ni bregs nas su/ /'byung khungs tshon gyis gos kyi kha dog bsgyur/ /gos dkar dang ni shing lo'am gso ma 'am/ /zar ma'i shing shun rnams kyis gos bgo'o/ /zhes so/ /yang 'phags pa rab tu grub par byed pa las/ sngags zlos khyim pa mkhas pa yis/ /kha dog bsgyur ba'i gos mi bgo/ zhes gsungs te/ 'di dag ni rnyed sla bar bya ba dang/ sgeg pa nyid dgag par bya ba'i don yin no/ /rjes su mthun pa'i spyod lam ni gsum ste/ legs par gnas pa dang/ sdug bsngal gnon po dang/ khyad par du 'gro ba'o/ /de la legs par gnas pa ni ji lta bu'i spyod lam gyis gnas kyang des sems la rma mi 'byung ba ste/ ji skad du 'phags pa sdong po bkod pa las/ byang chub kyi sems nyams par byed pa'i dge ba'i rtsa ba rtsom pa thams cad ni bdud kyi las so/ /zhes gsungs so// byang chub sems dpa' i spyod pa la 'jug pa las kyang sems bsrung brtul zhugs ma gtogs pa/ /brtul zhugs mang pos ci zhig bya/ /zhes bshad la/ yang de nyid las/ bdag ni rnyed dang bkur sti dang/ /lus dang 'tsho ba med bla zhing/ /dge ba gzhan yang nyams bla yi/ /sems ni nam yang nyams mi bya/ /zhes bstan te/ de bas na dus dang gnas skabs thams cad du yang sems la mi gnod pa'i spyod lam spyad do/ /de bas na slob dpon DoM bi pa'i zhes snga nas/ slob dpon spyad spyad pa dang/ bram ze na yang gtsang sbra nyid/ /rtag tu gtsang sbra'i spyad pa bya/ /sems la gnod pas ma yin no/ /zhes bshad do/ /sdug bsngal gnon pa ni lam yid la byed pas grang ba dang/ tsha ba dang/ bkres pa dang bskam pa la sogs pa'i sdug bsngal ma lus pas mi g.yo bar bya ste/ byang chub sems dpa' i spyod pa la 'jug pa las ji skad du gsungs pa can/ nya ba gdol pa zhing pa la sogs pa/ /rang gi 'tsho ba tsam zhig sems dpa' yang/ /grang dang tsha la sogs pa'i gnod bzod na/ /'gro ba'i don phyir dag lta cis mi bzod/ /ces so/ /de bzhin du 'phags pa dpung bzangs kyis zhus pa las kyang/ 'dod la ma chags lus kyi nyon mongs bzod/ /ces gsungs la/ de bzhin du 'phags pa 'jig rten gsum las rnam par rgyal ba'i bka' las kyang lus ni nyon mongs spyad pa las/ /dngos grub rnam gsum thob par 'gyur/ /zhes gsungs so/ /de bzhin du dpal gsang ba 'dus pa las kyang/ 'dod chen sdug bsngal chen po yis/ /rang gi sdug bsngal zhi bar bya/ /zhes gsungs pas sdug bsngal 'bras bu dang cas pa rnams ni rab tu dga' bzhin du bsten par bya'i/ sems kyi ngan tshul sngar ba nyid du mi bya'o/ /de bas na 'phags pa dpung bzangs kyis zhus pa las/ lha yi bde ba dang ni 'byor pa dang/ /tshe dang stobs gzugs phun sum tshogs pa dang/ /thos mang dngangs dbang gcig tu yid gzhungs dang/ /dbang thang che kun dka' thub stobs kyis 'thob/ /ces gsungs so/ /khyad par du 'gro ba'i spyod lam ni des mnyam par ma bzhag pa na shes rab kyi pha rol tu phyin pa bklags pa dang/ sA ts+tsha gdab pa dang/ skor ba bya ba la sogs pa bsod nams kyis tshogs la gus pa nyid du bya ste/ de ltar yang 'phags pa khro bo'i rgyal po gdong drug pa'i rgyud las gsungs pa/ langs nas bcom ldan 'das kyi yum/ /shes rab pha rol phyin pa bklag ces gsungs so/ /'phags pa dpung bzangs kyis zhus pa las kyang/ /gtsang zhing dben pa'i sa yi phyogs su ni/ /'jim pa 'am ni bye ma las byas pa'i/ /bde gshegs mchod rten rten 'brel snying po can/ /sdig pa sbyang phyir 'bad pas gdab pa bya/ zhes gsungs so/ /de bzhin du 'jig rten gsum las rgyal ba'i cho ga zhib mo las kyang/ mkhas pas mchod rten las bya zhing/ /de bzhin dam pa'i chos kyang bklag /dge ba cung zad gzhan dag kyang/ /cung zad zin nas 'di dag kyang/ /dngos grub mchog ni thob 'dad pas/ /rtag tu sems can rnams la bsngo/ /zhes gsungs so/ /de bas na ji tsam du sems la mi gnod pa'i bsod nams dang ye shes kyi tshogs g.yeng ba dang bcas pa rnams sems can la phan par 'dod pas rab tu gus par byas la brtsam ste 'di ni rjes su mthun pa'i spyod pa rnam pa gsum mo/ /de ltar tshogs thob pa des spyod lam rnam pa bzhi gang bde bar gnas te/ mtshan ma dang bcas pa 'am/ mtshan ma med pa'i rnal 'byor la sems mnyam par bzhag par bya'o/ /de ltar sems mnyam par 'jog pa des nyes pa lnga spangs pa'i phyir spong ba'i 'du byed brgyad bsten par bya ste/ de la nyes pa lnga ni dbus dang mdza' rnam par 'byed pa'i tshig le'ur byas pa las/ le lo dang ni gdams ngag rnams/ /brjed dang bying dang rgod pa dang/ /'du mi byed dang 'du byed de/ /'di dag nyes pa lngar 'dod do/ zhes gsungs so/ /de dag gi gnyen po spong ba'i 'du byed brgyad kyang de nyid las gsungs te/ gnas dang de la gnas pa dang/ /rgyu dang 'bras bu nyid du'o/ /dmigs pa rjed par ma gyur dang/ /bying dang rgod pa rtogs pa dang/ /de spong mngon par 'du byed dang/ /zhi tshe rnal du 'jug pa'o/ /zhes so/ /de ltar yan lag yongs su rdzogs pa des zhi gnas dang lhag mthong bsgom par bya ba las 'dir zhi gnas ni gnyis te/ kha nang du bltas pas thob pa dang/ kha phyir bltas pa la dmigs pa'o/ /de la kha nang du bltas pa la yang gnyis te/ lus la dmigs pa dang/ lus la brten pa la dmigs pa'o/ /lus la dmigs pa la yang gsum ste/ lus nyid la lha'i rnam par dmigs pa dang/ keng rus la sogs pa mi sdug par dmigs pa dang/ kha TwAM ga la sogs pa mtshan ma khyad par can la dmigs pa'o/ /lus la brten pa la yang lnga ste/ dbugs la dmigs pa dang/ mtshan ma phra mo la dmigs pa dang/ thig le la dmigs pa dang/ 'od zer gyi yan lag la dmigs pa dang/ dga' ba dang bde ba la dmigs pa'o/ /kha phyir ltas pa la dmigs pa la yang gnyis te/ khyad par can dang/ phal pa'o/ /de la khyad par can la yang gnyis te/ sku la dmigs pa dang/ gsung la dmigs pa'o/ /'di dag ni zhi gnas la 'jug pa'i yan lag go /ji ltar bsgom pa ni 'dir mi brjod de/ gzhung shin tu mang por 'gyur bas 'jigs pa'i phyir dang/ bla ma dam pas nyams su myong pa'i man ngag la brten par rigs kyi/ bsgom par bya ba'i man ngag ni yi ger gnas pas shes par dka' ba'i phyir dang/ zhib tu ni zhi gnas dang lhag mthong bstan pa las bshad pa'i phyir ro/ /zhi gnas kyi 'bras bu ni lhag mthong yin la/ lhag mthong gi 'bras bu ni zhi gnas dang lhag mthong zung du 'brel ba yin te/ de yang dngos po gang yang mi gnas pas dngos po med pa bye brag tu mthong la/ de nyid kyi tshe sems rtse gcig tu gyur pas dmigs pa du ma la rab tu rgyug pa rab tu zhi bar gnas pa'i phyir ro/ /de ltar zhi gnas dang lhag mthong zung du 'brel pa'i gnas skabs 'dir ye shes kyi dmigs pa gang yin pa dang/ ye shes nyid tshul ji ltar gnas pa dang/ rnal 'byor spyod pa pa'i zhi gnas dang lhag mthong/ bdag cag dbu ma pa'i zhi gnas dang lhag mthong zung du 'brel pa la khyad par ci yod pa dag la bdag gi blo rab tu 'phro bar bzod mod kyi/ 'dir nyams su blang ba'i thabs tsam gsal bar byed par 'dod kyi/ grub pa'i mdza' gtan la 'bebs par 'dod pa ni ma yin pa dang/ 'phags pa nA gA rdzu na la sogs pas gsal bar mdzad pa las cung zad kyang smrar med pa'i phyir gyi cher ma spros so/ /da ni gzhan 'di brjod par bya ste/ ci mtshan ma dang bcas pa'i zhi gnas mdun du ma byas par lhag mthong skye ba rung ba yin nam zhe na/ de ni rung ba nyid de/ mtshan ma med pa'i zhi gnas so sor rtog pa'i shes rab nyid las mtshan ma med pa'i lhag mthong rnam par mi rtog pa'i ye shes 'byung ste/ de ltar yang 'phags pa 'od srungs kyis zhus pa las/ shing gnyis drud pa las ni me 'byung ste/ /byung ba de yis de nyid sreg pa ltar/ /de bzhin shes rab dbang po skyes nas kyang/ /skyes pa de yis de nyid sreg par byed/ /ces gsungs so/ /so sor rtog pa'i shes rab ni zhi gnas ma yin te/ rnam pa du mas dmigs so zhe na/ de lta na ni zhi gnas kyang zhi gnas ma yin te/ skad cig ma du ma dang cha shas du ma la dmigs pa'i phyir ro/ /gzhan yang zhi gnas las lhag mthong la 'jug pa na yang ji ltar so sor rtog pa'i shes rab kyis mtshams sbyor bar mi byed/ de mi byed pa ni 'ga' zhig tu zad do/ /de la 'di'i rim pa yang lus kho na la brtags pas 'grub pa ste/ 'phags pa nA gA rdzu na'i zhal snga nas 'jig rten rnam par rtog las byung/ /rnam par rtog pa sems las byung/ /sems kyang lus las byung bas na/ /de phyir lus la dpyad par bya/ /zhes bshad la/ 'phags pa nA gA rdzu na'i zhal snga nas kyang bshad pa/ lus med rnam par shes pa ni/ /med ces bya bar rtogs par gyis/ /zhes bshad cing/ mdo las kyang/ rnam par shes pa ni lus las mi 'da' o/ /zhes gsungs so/ /de bas na chos thams cad sems la bsdu ba dang/ sems lus la bsdu ba dang/ lus chos kyi dbyings su nye bar rnal 'byor du bya ba 'di ni man ngag go /yang na lus dang ngag dang sems tha dad pa la dmigs par bya ste/ 'di'i man ngag ni sangs rgyas rjes su dran pa las shes par bya'o/ /de bas na mtshan ma dang bcas pa'i zhi gnas la brten pa bas ni mtshan ma med pa'i zhi gnas la dmigs nas lhag mthong bskyed pa'i phyogs 'di bsngags te/ de'i gnas pa brtan pa dang/ zhi gnas 'ba' zhig gi nyon mongs pa rab tu gnon cing sel ba dang/ 'bras bu dang rjes su mthun pa'i rgyu yin pa'i phyir ro/ /'dir ni bdag gis bla ma'i man ngag las byung 'di bris pas/ /nye bar 'phel ba'i dge ba'i zla zer dri ma med pa des/ /'gro ba'i mi shes rab rib mun bsal gdung ba zhi bya ste/ /shes rab mig gis de bzhin nyid yul rab bsal thob par shog /bdag kyang rnam par g.yeng sogs rlung sogs rab zhi mun bsal nas/ /myur du thub dbang rnams dang spyod yul gcig la blta bar shog / ting nge 'dzin gyi tshogs kyi le'u zhes bya ba/ slob dpon byang chub bzang pos mdzad pa rdzogs so// //rgya gar gyi mkhan po bi nA ya tsan+d+ra las zhus te/ bod kyi lo tsA ba dge slong chos kyi shes rab kyis bsgyur cing zhus te gtan la phab pa'o/ / //rgya gar skad du/ sa mA d+hi saM b+hA ra pa ri barta nA ma/ bod skad du/ ting nge 'dzin gyi tshogs kyi le'u zhes bya ba/ sangs rgyas dang byang chub sems dpa' thams cad la phyag 'tshal lo/

CLOSE WINDOW