བོད་ཡིག

e-texts based on the ACIP/ALL Input

saM brit+ti bo d+hi tsit+ta b+ha ba no pa de sha war+Na saM gra ha/ bod skad du/ kun rdzob byang chub kyi sems bsgom pa'i man ngag yi ger bris pa/ sangs rgyas dang byang chub sems dpa' thams cad la phyag 'tshal lo/ /kun rdzob byang chub kyi sems bsgom pa'i yi ge pad+ma spungs pa zhes bya ba cung zad bri bar bya'o/ /shes rab snying rje ldan pa'i mis/ /'gro ba mgon med rnams kyi phyir/ /dag par byed cing sdig sel ba/ /byang chub sems mchog rab bskyed nas/ /byang chub pa yi 'gros chen gyis/ /nges 'byung lam ni mthar 'byin na/ /pha dang ma la rab gus shing/ /rgan la sri zhu byed pa dang/ /mi yi chos lugs legs bsrung dang/ /'di ni ya rabs spyod pa yin/ /mi 'tshe ba dang bden pa dang/ /byin nas len dang tshangs par spyod/ /'dzin pa thams cad btang ba ni/ /'di ni bde 'gro'i spyod pa yin/ /'khor ba'i sdug bsngal yongs mthong nas/ /spang phyir bde pa'i lam bsgom zhing/ /kha na ma tho gnyis spong ba/ /'di ni zhi ba'i spyod pa yin/ /'di dag kun kyang blang bya ste/ /nges 'byung lam gyi yan lag yin/ /chos kun stong ba nyid rtogs pas/ /'gro la snying rje'i chu rgyun 'byung/ /thabs mkhas spyod pa mdza' yas pa/ /nges 'byung mchog gi spyod pa yin/ /de yang thog mar 'di lta ste/ /don dam rnam par bslu ba yi/ /'jig rten chos la ma chags par/ /nags tshal la sogs dben bar bsdad/ /sems nyid gdod nas ma skyes pa/ /rang byung dgon pa yin mod kyang/ /las dang po yi sems can gyis/ /phyi rol dgon pa thog mar bsten/ /de 'og sems nyid dgon pa btsal/ /byang chub snying po'i sa bon la/ /brten nas don chen 'di ltar bsgrub/ /de yang thog mar tshad med blo/ /btang bsnyoms sa gzhi legs bdal la/ /byams pa'i chu bos rnam bcu sa la/ /rab tu dga' ba'i rnal 'byor pas/ /snying rje'i sa bon legs par gdag/ lta ba'i nam mkha' go phye la/ /byang sems myu gu thabs kyis bskyed/ /dngos grub lo tog rab btsal la/ /ma chags blo yis kun la dgye/ /sbyin pa'i g.yab mos legs bos la/ /snyan par smra bas gtam bya ste/ /don mthun ba yis bag phab cing/ /don spyod gros chen nges bar gdab/ /dad pa'i chu bum rab thogs la/ /bdag gzhan sdig pa rnam bar bkru / gsan pa'i phreng ba mchog thogs te/ /yang dag gdam ngag gzungs su bzung/ /shes bzhin mar me lag thogs te/ /bag yod gom pa legs par bor/ /nad med sbyin pa'i lus la ni/ /tshul khrims gtsang ma'i gros bgo zhing// bzod pa'i mdangs chen rab phyung ste/ /brtson 'grus yan lag legs bskyod la/ /ting nge 'dzin gyi khang pa ru/ /bsam gtan kha zas logs sbyar zhing/ /shes rab snang bas sgo phye ste/ /stong nyid ye shes khang chen la/ /khams gsum skye bo mgron po'i tshogs/ /smon lam snying rjes bos nas su/ /thabs mkhas theg pa'i go rim bzhin/ /dam chos stobs kyi dga' ston bya/ /dad pa 'khor lo rin po ches/ /nyin mtshan dge ba'i lam sna drang/ /tshul khrims btsun mo rin po ches/ /rab tu mdzes pa'i rgyan phreng gdags/ /gtong ba blon po rin po che/ /bsod nams ye shes 'phrul chen dbyung/ /thos pa dmag dpon rin po ches/ /log rtogs dgra yi g.yul ngo gzhom/ /ngo tsha shes pa'i rta mchog gis/ /nyon mongs bdag med sbubs su sba/ /khrel yod stobs kyis glang po ches/ /phyin ci log gi lam rnams spang/ /shes rab nor bu rin po ches/ /bdag dang gzhan gyi re ba bskang/ /yon tan mdza' yas 'phags pa'i nor/ /nor gzhan phal pa sdug bsngal rgyu/ /thog mar dge bshes bsten pa yis/ /phyi nang chos kun slob dpon yin/ /nag sogs dus kyis 'gyur ba yis/ /'dus byas mi rtag stong par ston/ /nags sogs rgyu 'bras so so yis/ /kun rdzob slu ba med par ston/ /ro dang rus pa chu shing sogs/ /phyi nang chos kun bdag med ston/ /kun la khyab pa'i nam mkha' yis/ /don dam spros bral la sogs ston/ /rang bzhin yongs su she pa'i blos/ /chags med mig gis phyogs su blta/ /de tshe yul na ci yang snang/ /sgyu ma bzhin du gos pa med/ /don gyi chos ni rtags gyur na/ /tha snyad dag gis ci zhig bya/ /grogs mchog rnyed na shin tu lags/ /de ltar min na 'ang gcig pur gnas/ /bung ba rgyags lding glu len cing/ /ljon shing yal ga gar byed de/ /bya rnams snyan pa'i skad kyang 'byin/ /bsil yab dang 'jam phyogs na g.yo/ /phu chu lhung rgyun sgra yang sgrogs/ /mdzes pa'i ri dags rgyug cing bskor/ /me tog tshogs ni rgod pa 'dra/ /tsan dan spos sogs dri ngad ldang/ /dgon ba'i yon tan 'di lta bus/ /rang gzhan dag la phan 'dogs shing/ /lan la cung zad mi re ste/ /grogs mang rnal 'byor ci phyir skyo/ /'jig rten phal po de lta min/ /ji ltar nags kyi ri dags bzhin/ /rtsa ba sdong bu la sogs bza' / /yang na bung bas me tog bzhin/ /yang dag 'tsho ba gtsang ma blang/ /yang na thabs mkhas bya bzhin du/ /sdig med sog 'jog cung zad bya/ /ji ltar nags kyi dum bu bzhin/ /dro ba'i skyabs la brtan par bya/ /yang na sman bzhin mi mkho'i gos// yang na bsod nams stobs dang sbyar/ /ji ltar ri dags phyogs su bdas/ /bag phebs nas ni nyal ba bzhin/ /de ltar bla mas brtan pa yi/ /yang dag don la rnal 'byor bya/ /bying rgod dbang du mi gtang bar/ /zhi gnas lhag mthong cha mnyam mo/ /nang gi zhi gnas ma rnyed kyang/ /phyi yi zhi gnas la brten te/ /ci nus pa yi chos spyod ni/ /nyin mtshan g.yel ba med par bya/ /de ltar bsod nams tshogs kyis ni/ /rang rgyud me long dag par 'gyur/ /de bas dka' ba med par ni// shes rab ye shes 'char bar 'gyur/ /the tsom med cing dad ldan pas/ /chos gcig nan tan byas ba yis/ /yon tan mdza' yas rab song ba/ /lo rgyus bzang dang gzhung nyid mthong/ /de lta bas na yon tan gyi skabs nas kyang/ byang chub sems dpa' i spyod ba'i 'byung khungs so zhes pa dang/ blang dang dor ba'i dngos po'i bye brag phyed pa'i shes rab nyid do zhes pa dang/ ming yang dag par brjod du 'di ni sangs rgyas kyi chos yang dag pa'i bar du yang yongs su rdzogs par byed pa'o zhes pas bstan to/ /blo langs rgya mtsho lta bu yi/ /spyod pa mdza' yas pad+ma gsal/ /blo dman rdzing bu lta bu'i phyir/ /pad+ma spungs pa tsam 'di bris/ /kun rdzob byang chub kyi sems bsgom pa'i yi ge /pad+ma spungs pa zhes bya ba slob dpon mkhas pa chen po rta dbyangs kyis zhal snga nas mdzad pa rdzogs so/ / //rgya gar gyi mkhan po pad+ma ka ra barma dang/ zhu chen gyi lo tsA ba dge slong rin chen bzang pos bsgyur cing zhus te gtan la phab pa'o// //sems ni ras yug dkar po 'dra/ /lta spyod gnyis kyis sbyang gsungs pas/ /'di las gong du gyur pa yi/ /spyod pa yod med mkhas la dris/ /mi lus thob pa bzhin du dkon/ /'gro ba'i tshe dang shin tu thung/ /blo gros nyams kyang shin tu zhan/ /bshes gnyen mchog kyang rnyed dka' ba/ /byis pa rnams ni don med 'khyam/ /'jig rten chos la rab bltas na/ /rang dbang med par mchi ma dgu/ /phan srid snyam nas bris pa yin/ /lta ba rnam dag sems la phan/ /spyod pa dri med lus la phan/ /phan pa mchog gi sman 'di la/ /bdag gzhan kun gyis nan tan mdzod// //rgya gar skad du/ Arya bud d+hA nu smri ta/ bod skad du/ 'phags pa sangs rgyas rjes su dran pa/ sangs rgyas dang byang chub sems dpa' thams cad la phyag 'tshal lo/

CLOSE WINDOW