བོད་ཡིག

e-texts based on the ACIP/ALL Input

/ //rgya gar skad du/ da sha ku sha pa karma pa thA ni rde sha/ bod skad du/ dge ba bcu'i las kyi lam bstan pa/ dkon mchog gsum la phyag 'tshal lo/ /dge ba bcu po 'di dag ni mngon par mtho ba dang nges par legs pa thams cad kyi rgyu yin pas na/ sangs rgyas kyi slob pa dag gis 'di ltar bslab par bya'o/ /de la dge ba bcu gang zhe na/ lus kyi las ni rnam pa gsum ste/ srog mi gcod pa dang/ ma byin par mi len pa dang/ 'dod pas log par mi g.yem pa'o/ /ngag gi las ni rnam pa bzhi ste/ brdzun mi smra ba dang/ phra ma mi smra ba dang/ tshig rtsub mo mi smra ba dang/ tshig 'khyal ba mi smra ba'o/ /yid kyi las rnam pa gsum ste/ brnab sems spang ba dang/ gnod sems spang ba dang/ log par lta ba spang ba'o/ /de yang mi dge bcu spangs pa ni dge ba bcu yin pas/ spang bar bya ba bcu brjod par bya ste/ de ni byang chub sems dpa' i sde snod las ji skad du/ /srog gcod pa yi sems can dang/ /gzhan gyi nor la 'phrog ba dang/ /'dod pas log par g.yem pa dang/ /sems can dmyal ba'i bar du 'gro /dbyen byed pa dang tshig rtsub dang/ /brdzun du smra zhing mi sdom dang/ /byis pa 'khyal bar smra ba rnams/ /so so'i skye bo bslu bas bcings// gzhan gyis spyod la brnab sems dang/ /gnod sems dag ni mang ba dang/ /mi gang lta ba log zhugs pa/ /ngan 'gro dag tu 'gro bar 'gyur/ /lus kyi sdig pa rnam gsum dang/ /ngag gi sdig pa rnam bzhi dang/ /yid kyi sdig pa rnam gsum ni/ /sdig byed pa dag rab tu byed/ /sdig pa'i las rnams byas pas na/ /de phyir ngan 'gror 'gro bar 'gyur/ /ci nas ngan 'gror mi gtang bar/ /bskyab pa'i phyir ni rab tu byung/ /zhes bcom ldan 'das kyis rab tu gsungs pa dag go / ji ltar na nyes pa de dag rdzogs par 'gyur zhe na/ srog gcod pa ni gzhi sems can yin pa dang/ der 'du shes pa dang/ bsad par bsams pa dang/ sbyor ba byas pa dang/ sbyor ba byas pa de nyid kyi tshe 'am/ gzhan gyi tshe shi ba zhes pa yan lag lngas rdzogs par 'gyur ro/ /ma shi bar 'gyod pa las shi ba la ni smad do/ /smyos pa dang/ sems 'khrugs pa dang/ tshor bas gzir ba la nyes pa med par thams cad la sbyor ro/ /ma byin par len pa ni yan lag bzhis rdzogs par 'gyur te/ blang bar bya ba gzhan gyis yongs su bzung bar gyur pa yin pa dang/ der 'du shes pa dang/ rku bar bsams pa dang/ gnas nas spos pa'o/ /'dod pas log par g.yem pa ni rnam pa bdun te/ /bdag nyid las byung ba dang/ rang gi chung ma las byung ba dang/ chung mar mi rigs pa chung mar byas pa las byung ba dang/ chung ma ma yin pa las byung ba dang/ skyes pa las byung ba dang/ dud 'gro las byung ba dang/ khyi'u dang bu mo las byung ba'o de la bdag nyid las byung ba ni mi rigs pa'i yul dran pa las dbang po las rang dam gzhan gyi khu ba 'byin pa'o/ /rang gi chung mi las byung ba ni dus ma yin pa nyin par dang/ bsnyen gnas la gnas pa dang/ na ba dang/ sbrum ma dang/ mya ngan gyis gdungs pa dang/ zla mtshan dang ldan pa dang/ bang ma sangs pa la sogs pa dag dang gnas ma yin pa pha ma dang/ bla ma dang/ dkon mchog dang/ mchod rten la sogs pa'i gnas dang/ yan lag ma yin pa kha dang bshang ba'i lam dang lte ba la sogs pa ste/ mdor na bud med kyi dbang po las gzhan pa thams cad do/ /de ltar dus dang gnas dang/ yan lag ma yin pa dag tu rang gi chung ma la 'khrig pa spyod pa ni rang gi chung ma las byung ba'i 'dod pas log par g.yem pa'o/ /chung mar mi rigs pa chung mar byas pa las byung ba ni/ tshangs par spyod pa'i dge bsnyen mo 'am dge slong ma 'am/ dge slong ma 'am/ dge tshul ma 'am/ bsnyen gnas la gnas pa'i bud med chung mar blangs te/ de dag mi dga' 'am/ dga' yang rung ste/ sdom pa gtor ba'i rkyen byas pa ste/ 'di ni chung mar mi rigs pa/ chung mar byas pa las byung ba'o/ /chung ma ma yin pa las byung ba ni bud med gang khyim thab gzhan gyis bzung ba dang/ rang gi bdun rgyud las ma 'das pa'i 'brel par gyur pa dang/ chos kyi rgyal mtshan can dang/ sdom pa can dang/ pha ma dang/ ming po dang/ spun zla dang/ rus chags dang/ tsho 'brang du smos par bsrungs pa dang/ gyos sgyug dang/ rkud po la sogs pa byo'i? phyogs smos pas bsrungs pa dang/ mi mnyam pa'i rigs dang yon tan gyis bsrungs pa/ smad 'tshong ma dag kyang skyes bu gzhan gyis rin sngar byin pas bzung ba dang/ skyes bu gzhan gyi chung ma dang 'dra bar bdag gir byas pa rnams te/ de dag dang 'khrig pa spyod pa rnams ni gzhan gyis tshor ba na ni ches sdig pa che la/ mtshor du zin kyang 'dod pas log par g.yem pa'i rnam par smin pa 'byung ngo/ /skyes pa las byung ba ni skyes bu gzhan gyi kha dang bshang ba'i lam la sogs par mtshan sbyor ba'o/ dud 'gro las byung ba ni ba lang dang/ ra lug dang rta bong la sogs pa'i mtshan dang/ bshang ba'i lam la sogs par mtshan sbyor ba'o/ /khye'u dang bu mo las byung ba ni 'khrig pa spyad mi bzod pa'i khye'u dang bu mo'i kha dang mtshan dang bshang ba'i lam du mtshan sbyor ba'o/ /de ltar 'dod pas log par g.yem pa de dag ni yan lag gsum gyis rdzogs par 'gyur te/ dus la sogs pa de dag la de dag tu 'du shes pa dang/ sbyor ba byas pa dang/ rjes su mthun pa'i tshor ba nyams su myong ba'o/ /de ltar de dag ni lus kyi nyes bar spyod pa gsum mo/ /brdzun du smra ba ni yan lag gsum gyi rdzogs par 'gyur te/ gzhi ma nor bar khong du chud pa dang/ de la 'du shes bsgyur ba dang/ log par smras pa'o/ /phra ma ni yan lag gnyis kyis rdzogs par 'gyur te/ dbye bar bya ba sems can nyid dang/ dbyen gyi tshig smras pa'o/ /tshig rtsub mo ni yan lag gnyis kyis rdzogs par 'gyur te/ gzhi sems can yin pa dang/ tshig rtsub mo smras pa'o/ /tshig 'khyal ba ni yan lag gnyis kyis rdzogs par 'gyur te/ chos dang mi ldan pa der bsam pa dang/ tshig 'khyal par smras pa'o/ /de dag ni dag gnyis por spyod pa bzhi'o/ /brnab sems ni yan lag gnyis kyis rdzogs par 'gyur te/ gzhi gzhan gyi yin pa dang/ de la brnab sems bskyed pa'o/ /gnod sems ni yan lag gnyis kyis rdzogs par 'gyur te/ gzhi sems can yin pa dang/ de la kun nas mnar sems par gyur pa'o/ /log par lta ba ni yan lag gnyis kyis rdzogs par 'gyur te/ gzhi phyin ci ma log pa dang/ de nyid la bsam pa phyin ci log bskyed pa'o/ /de dag ni khyad par gyi yan lag go / thun mong gi yan lag ni sems gtso bo zhes bya'o/ /de dag ni yid kyi nyes par spyod pa gsum mo/ /de ltar na kun nas slong ba'i sems pa dang/ rjes su spyod pa'i sbyor ba dang/ sbyor ba'i gzhi bsam pa de nyid dang/ sbyor ba'i 'bras bu dngos gzhi nyid spyad pa dang/ mjug rjes su yi rang ba ste/ yan lag lnga rdzogs pas ni mi dge ba gang yang legs par rdzogs pa yin no/ /thams cad ma tshang na ni cung zad spyad pas ci rigs su sbyar ro/ /cung zad du na bzhi ma nor ba nyid ni kha cig tu ma nges par srid do/ /de ltar mi dge ba bcu po de dag spyad pa'i 'bras bu rgya cher ni dam pa'i chos dran pa nye bar gzhag pa las shes par bya zhing/ mdor bsdus pa ni ji skad du/ bcom ldan 'das kyis 'phags pa sdong po bkod pa las gsungs pa/ srog gcod pas sems can dmyal bar khrid do/ /byol song gi skye gnas su khrid do/ /gshin rje'i 'jig rten du khrid do/ /de nas ji ste mir skyes na rnam par smin pa gnyis mngon par sgrub pa ni 'di lta ste/ tshe thung ba dang/ nad mang ba'o/ /ma byin par len pas ni sems can dmyal bar khrid do/ /byol song gi skye gnas su khrid do/ /gshin rje'i 'jig rten du khrid do/ /de nas ci ste mir skyes na yang rnam par smin pa gnyis mngon par sgrub pa ni 'di lta ste/ longs spyod chung ba dang/ thun mong gi longs spyod du 'gyur ba'o/ /'dod pas log par g.yem pas ni sems can dmyal bar khrid do/ /byol song gi skye gnas su khrid do/ /gshin rje'i 'jig rten du khrid do/ /de nas ci ste mir skyes na yang rnam par smin pa gnyis mngon par sgrub pa ni 'di lta ste/ lhod pa dang bcas pa'i chung ma dang/ g.yog 'khor mi bsrungs pa'o/ /brdzun du smras pas ni sems can dmyal bar khrid do/ /byol song gi skye gnas su khrid do/ /gshin rje'i 'jig rten du khrid do/ /de nas ci ste mir skyes na yang rnam par smin pa gnyis mngon par bsgrub pa ni 'di lta ste/ skur pa mang ba dang/ gzhan gyis bslu ba'o/ /phra mas ni sems can dmyal bar khrid do/ /byol song gi skye gnas su khrid do/ / gshin rje'i 'jig rten du khrid do/ /de nas ci ste mir skyes na yang rnam par smin pa gnyis mngon par sgrub pa ni 'di lta ste/ g.yog mi mthun pa dang/ g.yog ngan par 'gyur ba'o/ /tshig rtsub pos ni sems can dmyal bar khrid do/ /byol song gi skye gnas su khrid do/ /gshin rje'i 'jig rten du khrid do /de nas ci ste mir skyes na yang rnam par smin pa gnyis mngon par sgrub pa ni 'di lta ste/ yid du mi 'ong ba'i tshig thos pa dang/ 'thab mo'i tshig thos par 'gyur ba'o/ /ngag 'khyal pas ni sems can dmyal bar khrid do/ /byol song gi skye gnas su khrid do/ /gshin rje'i 'jig rten du khrid do/ /de nas ci ste mir skyes na yang rnam par smin pa gnyis nye bar sgrub pa ni 'di lta ste/ tshig mi btsun pa dang/ spobs pa mang ba'o/ /brnab sems kyis ni sems can dmyal bar khrid do/ /byol song gi skye gnas su khrid do/ /gshin rje'i 'jig rten du khrid do/ /de nas ci ste mir skyes na yang rnam par smin pa gnyis nye bar sgrub pa ni 'di lta ste/ chog mi shes pa dang/ 'dod pa che ba'o/ /gnod sems kyi ni sems can dmyal bar khrid do/ /byol song gi skye gnas su khrid do/ /gshin rje'i 'jig rten du khrid do/ /de nas ci ste mir skyes na yang rnam par smin pa gnyis mngon par sgrub pa ni 'di lta ste/ gnod par glags lta ba dang pha rol gyis mnar ba'o/ /log par lta bas ni sems can dmyal bar khrid do/ /byol song gi skye gnas su khrid do/ /gshin rje'i 'jig rten du khrid do/ /de nas ci ste mir skyes na yang rnam par smin pa gnyis mngon par sgrub pa ni 'di ni lta ste/ lta ba ngan par ltung ba dang/ g.yo sgyu can du 'gyur ba'o zhes gsungs te/ de dag kyang mtshon pa ste/ mi dge ba bcu po 'di dag ni re re la yang rnam par smin pa yang ba shin tu mang po yod bar rig par bya'o/ /da ni 'di dag gi lci ba nyid brjod par bya ste/ de ni 'phags pa de bzhin gshegs pa'i mdzod kyi mdo las gsungs pa/ 'od srungs pha yang yin la/ rang sangs rgyas kyang yin pa gsod pa gang yin pa 'di ni srog gcod pa'i nang na ma rungs pa'o/ /dkon mchog gsum gyi dkor 'phrog pa 'di ni ma byin par len pa'i nang nas ma rungs pa'o/ /ma yang yin la dgra bcom ma yang yin pa la nyal po byas pa 'di ni 'dod pas log par g.yem pa'i nang na ma rungs pa'o/ /de bzhin gshegs pa la skur pa 'debs pa 'di ni brdzun du smra ba'i nang nas ma rungs pa'o/ /dge 'dun gyi dbyen byas pa 'di ni phra ma'i nang nas ma rungs pa yin no/ /'phags pa rnams la mi snyan pa brjod pa 'di ni ngag rtsub po rnams kyi nang nas ma rungs pa yin no/ /chos thos par 'dod pa rnams rnam par g.yeng bar byed pa 'di ni tshig 'khyal pa'i nang nas ma rungs pa yin no/ /yang dag par song ba dang yang dag par zhugs pa rnams kyi rnyed pa 'phrog par sems pa 'di ni brnab sems kyi nang na ma rungs pa yin no/ /mtshams med pa byed pa 'di ni gnod sems kyi nang na ma rungs pa yin no/ /lta ba mchog tu 'dzin pa ni log par lta ba'i nang na ma rungs pa yin no/ /zhes bya ba la sogs pa'o/ /mdor bsdu na rgyun tu spyod pa dang/ nyon mongs pa drag pos spyod pa dang/ rten gyi rang bzhin byang chub kyi sems dang/ dkon mchog gsum la mi brten cing/ rnam par sun 'byin ba kun tu spyod pa la sogs pa med pa dang/ yon tan dang gtso bos 'phags pa'i gzhi las byung ba ste/ de dag dang gang ldan pa'i mi dge ba bcu ni lci ba nyid do/ /de bas na 'phags pa nA gA rdzu nas kyang/ rtag dang mngon par zhen dang gnyen po med/ /yon tan gtso ldan gzhi las byung ba'i las/ /dge dang mi dge rnam lnga chen po ste/ /de las dge ba spyod pa brtson par bgyi/ zhes bshad pa'o/ /da ni de dag rtsa ba'i nyon mongs pa gang gis rdzogs par byed par bstan ce na/ de ni chos mngon pa'i tshig le'ur byas pa las/ gsod dang gnod sems tshig rtsub dang/ /zhe sdang gis ni mthar phyin byed/ /log g.yem brnab sems ma byin len/ /chags pa yis ni mthar phyin byed/ /log par lta ba gti mug gis/ /lhag ma gsum gyis rdzogs par 'dod/ /ces bshad pa las shes par bya'o/ /da ni de dag gi gnang ba nyid brjod par bya ste/ gang bdag gi don la rjes su lta ba cung zad tsam yang med la/ byed pa gzhan gyi don la 'ba' zhig 'dod cing/ thams cad du snying rje dang ldan pa dag la ni yid kyi nyes par spyod pa gsum ma gtogs pa 'am log par ltag nyid ma gtogs pa dag la rjes su gnang ba snang ste/ de ni byang chub sems dpa' i sdom pa gtan la dbab pa'i gtsug lag dag las blta'o/ /de ltar blang bar bya ba dang/ mi mthun pa'i phyogs dang/ yan lag dang/ 'bras bu dang/ lci yang dang/ rgyu dang rjes su gnang ba dag gis dge ba bcu'i las kyi lam rgyas par bstan pa yin no/ /dge ba bcu yi las kyi lam/ /legs brjod bsod nams dri med gang/ /de 'dir bdag gis bsgrubs pa des/ /'gro ba mi dge bcu spang shog /bdag kyang dge bcu'i yon tan gyis/ /brgyan cing ngan 'gro spangs pa dang/ /'gro ba'i mi dge'i las lam bcu/ /gtan nas rgyun chad byed par shog /dge ba bcu'i las kyi lam bstan pa zhes bya ba/ slob dpon bram ze'i btsun pa chos ldan rab 'byor dbyangs kyis zhal snga nas mdzed pa rdzogs so/ / //rgya gar gyi mkhan po bud+d+hA ka ra warma dang/ bod kyi lo tsA ba dge slong chos kyi shes rab kyis bsgyur cing zhus te gtan la phab pa'o// //rgya gar skad du/ sho ka bI no da na/

CLOSE WINDOW