བོད་ཡིག

e-texts based on the ACIP/ALL Input

/ //rgya gar gyi mkhan po de nyid dang zhus chen gi lo tsA ba dge slong tshul khrims rgyal bas bsgyur cing zhus te gtan la phab pa'o// //rgya gar skad du/ karma bi b+haM ga nA ma/ bod skad du/ las rnam par 'byed pa zhes bya ba/ dkon mchog gsum la phyag 'tshal lo/ /ding sang dus kyi skye bo 'di dag gis/ /mtho ris bde bdag kyang thob dka' na/ /mya ngan 'das la re ba yod min pas/ /bdag nyid kho na dran phyir bri bar bya/ /yod med rtag chad dang bral ba/ /bde ba'i longs spyod phun sum tshogs/ /'gro rnams yongs su smin mdzad pa/ /dam pa skyes mchog de la 'dud/ bcom ldan 'das gang 'jig rten dang/ /'jig rten las 'das pa'i chen po las kyang phul du byung zhing khyad par du 'phags pa de la phyag 'tshal ces ji ltar bya zhe na/ las dge ba dang mi dge ba rnam par dbye bar bya ste/ mngon par mtho ba mtho ris lha dang mi/ /thob par byed pa sdom pa'i tshul khrims yin/ /de nyams gyur par ngan song 'gro ba ni/ /dmyal ba yis dags byol song 'di dag go /lha dang mi'i gtam rgyas pa 'di ni 'jig rten gzhag pa dang/ 'jig rten gdags pa dang bye brag tu bshad pa chen po'i nang nas che longs du btus pa mthong kyi gnas gsum pa la sogs par blta bar bya'o/ /'di ltar tsha ba'i sems can dmyal ba ni dzam bu'i gling 'di'i 'og na dpag tshad khri phrag gnyis na/ sems can dmyal ba chen por gnas so/ /gzhan bdun ni de'i ster na rim pa bzhin du gnas so/ /de dag gi tshe'i tshad kyi rim pa ni mi rnams kyi mo'i rim pa rnams la 'dod pa'i khams kyi lha rnams dang/ yang sos pa la sogs pa dmyal ba rnams kyi nyin zhag dang zla ba dang lo'i rim pa rnams bsgras nas shes par bya ste/ 'di ltar mi rnams kyi tshe lo lnga bcu la sogs pa las bsgyur nas shes par bya'o zhes bshad pas so/ /grang ba'i sems can dmyal ba yang ti se'i 'og na snga ma de dag gi thang na gnas pa ste/ de dag gi tshe'i tshad bar yul dbus kyi bres bcal ba'i til khal brgyad cus byung bur bkang ba'i nang nas/ skyes bu zhig gis lo brgya brgya na til re re phyung bas zad par gyur ba na sems can dmyal ba chu bur can gyi tshe zad pa yin te/ 'og ma rnams kyi tshe ni nyi shu ra bsgyur ro/ / 'di dag gi don yang cung zad tsam zhig mdo las bshad par bri bar bya'o/ /de ltar de dag dmyal ba ni/ bcu drug ces bya rgal bar dka' / /drag ba'i las kyi kun tu gang/ /re re la yang lhag bcu drug /rtsig pa bzhi dang ngos bzhi ste/ phye ris su chad pa yin/ /lcags kyi ra bas kun nas bskor/ /lcags dag gis ni gang ba yin/ /dpag tshad brgya phrag du mar ni/ /me lce dag gis khyab par gnas/ zhes bcom ldan 'das kyis gsungs so/ /mdzod las kyang de dag gis ni ngos bzhin/ me mar mur dang ro myags dang/ spu gri lam sogs chu bo yin/ zhes bshad do/ /sngon gyi mkhas pa chen po kha cig na re tsha ba la sogs pa bdun po 'di dag ni mnar med pa'i sems can dmyal ba'i g.yas ngos dang g.yon ngos na gnas so zhes zer ro/ /nyi tshe ba dang nye 'khor ba'i sems can dmyal ba dag la gan gyi nges pa med de/ chu bo dang/ ri dang mya ngam la sogs pa'i thad dang/ steng na gnas so/ /gtam rgyas par ni dran pa nye bar gzhag pa dang/ 'jig rten gzhag pa dang/ 'jig rten gdags pa la sogs par blta'o/ /yi dags kyi rtsa ba'i gnas ni rgyal po'i khab kyi grong khyer chen po'i 'og dpag tshad lnga brgya na yod de/ de na yi dags kyi rgyal po gshin rje gnas so/ /gzhan ni de las 'phros pa yin no/ /gtam rgyas par ni yi dags kyi rtogs pa brjod par blta bar bya'o/ /byol song gi rtsa ba'i gnas ni rgya mtsho chen po yin no/ /thang dang/ chu dang/ ri dang/ dur khrod la sogs pa na gnas pa ni de las 'phros pa yin te/ rgyas par ni de dang de dag tu blta bar bya'o/ /gnas gsum po na bde ba med/ /sdug bsngal rgya dang bcas pa'i gtam/ /mdo dang bstan bcos dag na gsal/ /blo dang ldan pas blta bar gyis/ dmyal ba dang/ yi dags dang/ byol song gi sdug bsngal rgyu dang bcas pa mdo dang bstan bcos dag na gsal lo/ /ma'i sdug bsngal brgya rtsa bcu dag ni/ 'phags pa thogs med kyi mdzad pa'i yo ga tsArya blta bar bya'o/ /lha dag la ni sdug bsngal gzhan ni med kyi/ 'on kyang 'chi ltas lnga dang/ nye ba'i 'chi ltas lnga 'byung ste/ 'di ltar gos la dri ma 'chags pa dang/ me tog gi phrang brnyings pa dang/ mtshan khung nas rdul 'byung ba dang/ lus la dri ma 'byung ba dang/ rang gi stan la mi dga' bar 'gyur ba'o/ /nye ba'i 'chi ltas lnga ni gos dang rgyan dag las yid du mi 'ong ba'i sgra 'byung ba dang/ lus kyi 'od chung bar 'gyur ba dang/ khrus byas pa'i chu'i thigs pa lus la 'chags par 'gyur ba dang/ g.yo ba'i bdag nyid can yang blo yul gcig la 'chags par 'gyur ba dang/ mig 'byed pa dang 'dzum pa srid par 'gyur ba dag ste/ nye ba lnga ni ma nges pa'o/ /sdug bsngal de dag ci las byung zhe na/ las ni lci dang yang ba dag / yul dang bsam pa'i dbye ba yis/ /nyan thos theg pa chen po'i lugs/ /rnam pa gnyis su shes par bya/ /lci ba'i ni gnyis te/ yul gyis lci ba dang/ bsam bas lci ba'o/ /yang ba yang de dang 'dra'o/ /de yang nyan thos dang theg pa chen po'i lugs kyi lci ba dang yang ba so sor tha dad par shes par bya'o/ /de la yang nyan thos kyi yul gyi lci ba ni/ 'di ltar mtshams med pa lnga las pa bsad pa ma gtogs pa bzhi'o/ /de las kyang dge 'dun gyi 'khor lo'i dbyen lci ba'o/ /gzhan yang byams pa'i ting nge 'dzin la snyoms par zhugs pa dang/ rdo rje lta bu'i ting nge 'dzin dang/ srid pa'i rtse mo'i ting nge 'dzin las langs pa'i rnal 'byor pa dang/ mkhan po dang/ slob dpon dang/ dge slong dang/ dge slong dang/ dge slong ma dang/ pha dang ma dang/ srid pa tha ma pa'i byang chub sems dpa' dang/ nad pa dang/ chos smra ba dang/ ngas ba'i sa la gnas pa'i byang chub sems dpa' dang/ rgyun tu zhugs pa dang/ lan cig phyir 'ong ba dang/ phyir mi 'ong ba dang/ dgra bcom pa dag gsod pa dang/ de dag la rdeg pa dang/ lcags sgrog la sogs pas sdom pa dang/ de dag gi yo byad rku ba dang/ mchod rten gyi dang/ dge 'dun gyi dang/ chos kyi dang/ sangs rgyas kyi yo byad rku ba dang/ gang zag snga ma de dag dang/ dkon mchog gsum la brdzun du smra ba dang/ tshig rtsub po dang/ de dag phan tshun 'byed pa dang/ tshigs su bcad pa ma yin pa smra ba ni yul gyis lci ba'o/ /bsam pas lci ba ni log par lta ba chen po skyed pa dang/ yid kyi nyes pa chen po'o/ /yul gyis yang ba ni byol song dang/ dur khrod kyi sha za gsod pa la sogs pa'o/ /bsam pas yang ba ni de las gzhan pa rnams so/ /de la theg pa chen po'i yul gyis lci ba ni 'di ltar bla ma rnams dang/ sems dang po bskyed pa la sogs pa'i byang chub sems dpa' dang/ pha dang ma dang/ de kho na nyid kyi rnal 'byor ba dang/ rang gi lha dang/ dkon mchog gsum la sogs pa la snga ma'i tshul rnams bzhin du byed pa'o/ /don de nyid la dgongs nas bcom ldan 'das kyis rdo rje gtsug tor zhes bya ba/ rnal 'byor chen po'i rgyud las ji skad du/ gsang ba'i bdag po nyes par spyod pa de dag ni lci bar gyur pa dang/ tha mal bar gyur pa'o/ /de la pha ma la sogs pa gsod pa dang/ rdeg pa ni lus kyi nyes par spyod pa lci ba'o/ /srog gcod pa la sogs pa gzhan gsum ni lus kyi nyas bar spyod pa tha mal pa'o/ /dam pa'i chos spong ba dang/ lha rnams la tshig rtsub bo smra ba dang/ pha ma dang bla mar gyur pa la sogs pa la tshig ngan pa smra ba ni dag gi nyes par spyod pa lci ba'o/ /skyes bu 'ga' zhig dad pas dge ba nyams su len cing rtsom pa'i gtam gyi skabs su 'jig rten pha rol med do zhes bya ba'i tshig/ 'jig rten las 'das pa'i brdzun smra ba ni/ dag gi nyes par spyod pa'i lci ba'o/ /dge ba'i bar chad byed pa'i tshig 'khyal ba smra ba dang/ lkog 'phyas byed pa dang/ mi dge ba'i las kyi gtam rnams ni dag gi nyes par spyod pa tha mal ba'o/ /yid kyi nyes par spyod pa ni gsum ste/ de nyid las sems kyi nyes pa dang/ sems las? byung ba'i nyes pa dang/ ma rig pa'i nyes pa'o/ /de dag kyang dge ba bcu'i las kyi lam de nyid la ma chags pa nyid ni/ sems kyi nyes par spyod pa'o/ /dregs pa dang/ nga rgyal dang/ khro ba dang/ sems can rnam par 'jig pa dang/ 'dod chags kyi sems kyis gzhan gyi bud med la chags pa dang/ gzhan gyi srog 'phrog pa dang/ bla mar gyur pa la sems gya gyu zhing rab tu sdang ba ni sems las byung ba'i nyes pa'o/ /dge ba bcu'i las kyi lam rnams dang/ pha rol tu phyin pa drug 'dor zhing brjod ngas pa dang/ som nyir gyur pa dang/ yid shin tu rmongs par gyur ba ni ma rig pa'i nyes par spyod pa'o/ /zhes gsungs so/ /de la bsam pas lci ba ni theg pa chen po pa sems snying rje'i dbang du gyur pa/ sems can thams cad mi gtong bar rjes su 'dzin pa'i lci ba ni/ 'di ltar zhe sdang kho na yin te/ slob dpon zhi ba lha'i zhal snga nas/ bskal pa stong du bsags pa yi/ /sbyin dang bde gshegs mchod la sogs/ /legs spyad gang yin de kun kyang/ /khong khro gcig gis 'joms par byed/ ces gsungs so/ /'di kho na lci ba yin pa'i khungs mang du yod mod kyi/ re zhig bzhag go / yang ba'i las kyang tshul 'di las shes par bya'o/ /theg pa gnyis po 'di dag tu/ /lci dang yang ba'i las rnams bshad/ /'dod chags zhe sdang gti mug gis/ rnam pa gsum du 'gyur ba'o/ /de las srog gcod pa 'dod chags las skyes pa ni/ 'di ltar lus kyi yan lag gi phyir ram/ nor gyi phyir ram/ rtsed mo'i phyir ram/ bdag dang mdza' bo yongs su bskyabs pa'i phyir srog gcod pa'o/ /zhe sdang las byung ba ni gsod pa dang 'khon gyis byas pa'o/ /gti mug las byung ba ni mchod sbyin byed pa dang/ rgyal po'i chos 'don pa tshang mar byas nas chos kyi blos gsod ba dang/ mi mi 'grungs pa dag la chad pas bcang nas rgyal po'i bsod nams kyi snod du 'ong zhes zer nas gsod pa lta bu dang/ bar tshig pa dag ji skad du/ pha dang ma rgas sam/ nad tshabs pa ches thebs na bsad do/ /sprul dang/ sdig pa dang sbrang bu trai ma bu ka la sogs pa ni/ mi rnams la gnod par byed pas bsad do/ /ri dags dang phyugs dang bya dang ma he la sogs pa ni longs spyod pa'i phyir/ bsad do zhes zer ba lta bu'o/ /ma byin par len pa chags pa las byung ba ni gang zhig gang don du gnyer ba des 'phrogs pa 'am/ gzhan gyi rnyed pa'o/ /bkur sti 'am/ grags pa'i phyir ram bdag dang mdza' bo yongs su bskyab pa'i phyir 'phrog pa'i/ /zhe sdang las skyes pa ni sngar bzhin no/ /gti mug las byung ba ni rgyal po'i chos 'don pa tshad mar byas nas mi bgrungs pa dag chang pas bcad nas 'phrog pa lta bu dang/ bram ze dag na de 'di thams cad tshangs pas bram ze rnams la byin ba lon ba las/ da ltar bram ze rnams nyams pas rigs gzhan spyod du zad mod/ de bas na bram ze 'phrog pa ni rkub ma yin gyi/ bram ze bdag nyid kyi len par byed par zad pas bdag nyid kyis za ba dang/ bdag nyid kyis 'thung pa dang/ bdag nyid kyis gyon pa dang/ bdag nyid kyis sbyin pa yin no/ /zhes zer ba lta bu'o/ /de las 'dod pas log par g.yem pa 'dod chags las byung ba ni/ gzhan gyi chung ma la chags pa 'am/ rnyed pa 'am/ bkur sti'i phyir ram/ bdag gam mdza' bo yongs su bskyab pa'i phyir mi tshangs par spyod pa'o/ /zhe sdang las byung ba ni snga ma bzhin no/ /gti mug las byung ba ni bar sib pa dag na re/ ma la sogs pa la nyal ba dang/ ba lang 'brad gi mchod sbyin la chog can gyi chu 'thung ngo/ /rtsa bcad do/ /ma'i gan du nyal bo la 'gro'o/ /srin mo'i gnad du dang/ rus gcig pa'i gan du 'gro bar bya'o zhes bya ba dang/ ba lang la sogs pa la yang spyad par bya'o zhes zer ba lta bu'o/ /de lta bas na 'di lta bu byung ba na ni/ rgyal po bzhad gad lta bu byed pa dang/ bag ma len pa'i tshe dang gsod pa dang/ nor kun 'phrog tshe brdzun smras gnod med de/ /brdzun lnga ltung bar byed pa min zhes bshad/ /ces zer ba dang/ gang yang log par lta ba'i brdzun du smra ba'o/ /mi dge ba lhag ma dag kyang snga ma bzhin no/ /yid kyi gsum ni 'dod chags la sogs pa gsum gyi mjug tu skyes pa'o/ /srog gcod pa ni bsams bzhin du/ /ma nor bar ni gzhan bsad na'o/ /ma byin len pa gzhan gyi nor/ /mthu dang 'je 'bus bdag gir byed/ /log g.yem bgrod min ba la 'gro/ /'du shes gzhan bsgyur brdzun tshig don/ /nyon mongs sems kyis pha rol 'byed/ /tshig rtsub po ni mi snyan pa'o/ /ngag 'khyal klu dang zlos gar dang/ /bstan bcos ngan dang 'du 'dzi'i gtam/ /brnab sems gzhan gyi nor la chags/ /gnod sems sems can la sdang ba'o/ /rgyu 'bras med zer log lta'o/ /de ltar theg pa chen po'i 'di ltar yin te/ /de yang rnam par snang mdzad mngon par byang chub pa'i rgyud las/ /bcom ldan 'das kyis bka' stsal pa/ byang chub sems dpa' ched du bsam nas srog gcod pa las slar log pa bya'o/ /dbyug pa spang zhing kho na du 'dzin pa yang spang bar bya'o/ /des bdag nyid la ji lta ba de bzhin du gzhan gyi srog kyang yongs su bsrung bar bya'o/ /ma byin par len pa las slar ldog par bya ste/ des gzhan gyi yongs su bzung ba'i longs spyod la chags pa bskyed par yang mi bya na/ gzhan gyis yongs su bzung ba'i longs spyod la ma byin par len pa lta ci smos/ 'dod pas log par g.yem pa las ldog par bya ste/ des gzhan gyi sems yongs su bzung ba'i chung ma dang/ rigs dang/ mtshan ma dang/ chos kyis bsrungs pa rnams la chags pa bskyed par yang mi bya na/ yan lags ma yin par spyod pa dang/ dbang po gnyis sprod pa lta ci smos/ /brdzun du smra ba las ldog par bya ste/ de'i ched du bsams nas gang gis sangs rgyas kyi byang chub bslu bar 'gyur ba'i brdzun gyi tshig srog gi phyir yang smra bar mi bya'o/ /tshig rtsub po las ldog par bya ste/ des sems can rnams la mnyen pa dang/ 'jam pa dang/ yid la 'bab pa de lta bu'i tshig smra bar bya'o/ /de ci'i phyir zhe na/ gsang ba'i bdag po byang chub sems dpa' sems can thams cad kyi don bya ba'i / thog mar 'gro ba ni tshig snyan pa yin pa'i phyir ro/ /phra ma las ldog par bya ste/ des ci nas kyang dbyen du mi 'gyur ba'i tshig dang/ gnod par mi 'gyur ba'i tshig de ltar bsgrub par bya'i/ byang chub sems dpa' rnams ni sems can dbye ba la zhugs pa ma yin no// tshig 'khyal pa las ldog pa bya ste/ des yul dang dus dang don dang ldan pa'i rjes su 'jug pas sems can thams cad la yid du 'ong ba dang/ ran par spyod pa'i tshig smra bar bya'o/ /de'i ci'i phyir zhe na/ byang chub sems dpa' ni tshig bzang po dang ldan pa'i phyir ro/ /brnab sems las ldog par bya ste/ nges gzhan gyi longs spyod dang/ gzhan gyi nor la chags pa'i sems can bskyed par mi bya'o/ /de ci'i phyir zhe na/ byang chub sems dpa' ni sems ma chags pa yin no/ /gal te byang chub sems dpa' bdag sems chags na thams cad mkhyen pa nyid kyi sgo'i phyogs gcig la nyams par 'gyur ro/ /gsang ba'i bdag po byang chub sems dpa' i rab tu dga' ba bskyed pa des 'di ltar bsam par bya ste/ gang bdag gis bya dgos pa de dang des rang 'byor bar gyur pa de legs so snyam nas/ sems can de dag gi longs spyod de dag chung mi zab la yang dang yang du dga' ba bskyed par bya'o/ /gsang ba'i bdag po gzhan yang gnod sems las ldog par bya ste/ des thams cad la bzod pa dang ldan pa dang/ byams pa dang/ khong khro ba med cing sems snyoms par bya'o/ /nges mdza' bo la ji lta ba bzhin du dgral yang de bzhin du bya'o/ /de ci'i phyir zhe na/ byang chub sems dpa' ni yid kyi gnas ngan len dang ldan pa ma yin gyi/ byang chub sems dpa' ni rang bzhin gyi bsam pa yongs su dag pa yin no/ /gsang ba'i bdag po de lta bas na byang chub sems dpa' gnod sems dang bral bar bya'o/ /gsang ba'i bdag po gzhan yang byang chub sems dpa' 'og par lta ba las/ bldog par bya ste/ des yang dag pa'i lta ba dang/ 'jig rten pha rol la 'jig par lta ba dang/ g.yo med pa dang/ gya gyu med pa dang/ drang ba dang/ sangs rgyas dang/ chos dang/ dge 'dun dag la bsam pa nges par bya'o/ /de ci'i phyir zhe na/ gsang ba'i bdag po log par lta ba ni byang chub sems dpa' i kha na ma tho ba chen po ste/ dge ba'i rtsa ba thams cad gcod par 'gyur ro/ /'di ni mi dge ba'i rtsa ba thams cad kyi phyi mo'o/ /gsang ba'i bdag po de lta bas na tha na bzhang gang tsam du yang log par lta ba bskyed par mi byed pa'o/ /zhes gsungs so/ /yul dang bsam pa nyon mongs dang/ /dus dang grangs dang yan lag sogs/ /chung dang bring dang chen po ste/ rnam pa gsum du shes par bya/ /las kyi lam bcu po de dag kyang yul la sogs pa de dag gi dbang gis chung ngu dang/ 'bring po dang/ chen por 'gyur ro/ /de la yul gyis 'gyur ba ni sngar ji skad brjod pa'i tshul de las shes par bya'o/ /de la bsam pas gsum du 'gyur ba ni mi shes pas byas pa ni chung ngu'o/ /bag med pas byas pa ni 'bring po/ /ma gus pas byas pa ni chen po'o/ /de la nyon mongs pas gsum du 'gyur ba ni 'dod chags la sogs pa'i nyon mongs pa chung ngu/ 'bring dang chen pos srog gcod pa la sogs pa'i las kyang de bzhin du byed pa'o/ /de la dus kyis 'gyur ba ni sbyor ba dang/ dngos gzhi dang/ mjug rnams las gcig deng ldan pa ni chung ba'o/ /gnyis dang ldan pa ni 'bring po'o/ /de dag gsum ka rdzogs pa ni chen po'o/ /de la las kyi lam bcu po de dag grangs kyis 'gyur ba ni lan cig byas pa'i ni chung ba'o/ /lan gnyis byas pa ni 'bring po'o/ /lan gsum phan chad byas pa ni chen po'o/ /de la yan lag gis 'gyur ba ni srog gcod pa la sogs pa de dag gi yan lag phal cher ma tshang ba ni chung ba'o/ /phal cher tshang ba ni 'bring po'o/ /thams cad rdzogs shing tshang ba ni chen po'o/ /sogs zhes bya ba ni srog gcod pa la sogs pa de dag las gang yang rung ba lan cig byas pa tsam ni chung ba'o/ /de la 'gyod pa med pa ni 'bring po'o/ /de la gnyen po mi bsten pa ni chen po'o/ /bsngam par bya ba ni chung ngu'o/ /bshags par bya ba ni 'bring po'o/ /pham pa ni chen po'o/ /rtsed mo dang/ gzhan gyi g.yam la rgyugs kyis byas ba ni chung ngu'o/ /rang nyid la nyon mongs pa dang nyes pa med kyang gzhan dbya zhing gzhan gyi sdig pa byed pa'i rkyen byed ba ni 'bring po'o/ /rang nyid la nyes pa yod cing gzhan gyis dpyas pas ni chen po'o/ /gzhan yang sdig pa'i grogs po dang mi dge ba'i bshes gnyen gyi dbang gis rang dbang med par byas pa ni chung ba'o/ /grags pa dang snyan pa'i phyir byas pa ni 'bring po'o/ /rnam par smin pa la mi 'jigs pa ni chen po'o/ /gzhan yang las kyi lam bcu po 'di dag gi don rgyas par ni/ /'phags pa dran pa nye bar gzhag pa la sogs pa'i mdo sde dang/ slob dpon bram ze chos ldan rab 'byor dbyangs kyis mdzad pa dang/ 'phags pa thogs med kyis mdzad pa'i rnam par gtan la dbab pa bsdu ba la sogs pa/ g.yog tsArya'i sa chen por blta'o/ /gzhan yang/ bsam bzhin pa dang rdzogs pa dang/ /mi 'gyod gnyen po med pa dang/ /'khor dang rnam par smin par las/ /bsags pa'i las zhes bya ba yin yang/ /'khor bar las ni lci gang dang/ /nye ba gang dang goms pa gang/ /sngon byas de dag gang yin las/ /snga ma snga ma rnam min 'gyur/ /yang/ shin tu yid la gcags pa dang/ /las de gsar du byas pa dang/ /yang dang yang du byas pa goms/ /de las gang rung sngar myong 'gyur/ /mthong ba'i chos la myong 'gyur dang/ /skyes nas myong bar 'gyur ba dang/ /lan grangs gzhan du myong 'gyur dang/ /myong bar 'gyur par ma nges pa'o/ /las ni dkar dang gnag pa dang/ /'dren ma'i las dang rnam pa gsum/ /mdo dang bstan bcos dag na gsal/ /de bas na las rnams bskal pa brgyar yang ni/ /chung mi za bar nges bsags nas/ /smin nas lus can rnams la ni/ /'bras bu nyid du ston par byed/ /ces bya ste/ de lta bu la yang nges par yid ches par bya'o/ /'gro rgyud lnga yi sems can thams cad dag /dzam gling 'dir skyes dge ba bcu spyad do/ /mthar gyis bla ma bzang po bsten byas te/ /zag pa med pa'i tshul khrims thob gyur cig /las rnam par 'byed pa zhes bya ba/ /slob dpon mkhas pa chen po dpal mar me mdzad ye shes kyis mdzad pa rdzogs so/ / //rgya gar gyi mkhan po de nyid dang/ zhus chen gyi lo tsA ba dge slong tshul khrims rgyal bas bsgyur cing zhus te gtan la bab pa'o// // */ /rgya gar skad du/ sa mA dI sa b+hA ra ba ri brta/ bod skad du/

CLOSE WINDOW