བོད་ཡིག

e-texts based on the ACIP/ALL Input

/ //rgya gar skad du/ si sA ra ma na nirya Ni ka sya gI ti/ bod skad du/ 'khor ba las yid nges par 'byung bar byed pa zhes bya ba'i glu/ /bla ma rnams la phyag 'tshal lo/ /dkon mchog gsum la phyag 'tshal lo /e ma'o/ /'du byed sdug bsngal 'gyur ba'i sdug bsngal dang/ /sdug bsngal sdug bsngal la sogs brgya rtsa bcu/ /sdug bsngal kun las skyob par mdzad pa yi/ /sman pa'i rgyal po de la phyag 'tshal lo/ /kye kye kwa ye grogs po dag /'khor ba'i rgyu ni nyon mongs pa dang las/ /nyon mongs khams gsum gnas na dgu bcu brgyad/ /zag pa chu bo sbyor ba nye bar len/ /rgyu dang yul dang sbyor ba'i stobs kyis byung/ /kye kye kwa ye grogs po dag / sna tshogs 'di dag las las gyur/ /de yang nyon mongs stobs las byung/ /dge dang mi dge lung ma bstan/ /mthong la myong ba skyes nas myong/ /gzhan du myong dang me nges pa'i/ /dkar dang gnag dang 'dren ma'o/ /'khor ba'i las ni lci gang dang// nye ba gang dang goms pa gang/ /sngon byas gang yin de las ni/ /snga ma snga ma rnam smin 'gyur/ /grogs dag soms shig thog ma med pa nas/ /ma rig la sogs bcu gcig rga shi'i mdza' / /yan lag bcu gnyis cha gsum zo chu'i tshul/ /nang gi rten 'brel yang dang yang du 'khor/ /tshe rabs tshe rabs grangs med de dang der/ /skye dang rga dang na dang 'chi ba yi/ /sdug bsngal rnams kyis yang dang yang du gdungs/ /'khrul nas 'khor gyur 'khrul cing 'khor bar 'gyur/ /kyi hud/ srid pa'i lam gyis dub pa'i 'dron po rnams/ /sdug bsngal bde bar mthong nas mi skyo bar/ /khyod yid de la rtag tu chags byed pa/ /phyugs dang khyad par med par bla ma gsung/ bla mas zin pa'i skye bo mkhas pa dag /skad cig skad cig 'gro ba lnga po kun/ /'khor ba'i sdug bsngal tsher ma zug 'dra la/ /dus pa'i gting nas snying rjes su mi skye/ /las ngan dbang gis 'khor pa'i rgya mtsho 'dir/ /yang yang skye zhing yang yang rga dang na/ /yang yang 'chi 'gyur 'di ni mi sems par/ /yul la chags byed bdag gis ji ltar bya/ /kye kye kwa ye grogs po dag / srid pa gsum nang gnas pa kun sdug bsngal/ /de yang mi yis sdug bsngal bdag gis mthong/ /mngal gyi sdug bsngal 'di lta bur gnas/ /nur nur mer mer gor gor nar nar bo/ /ltar ltar mkhrang dang rkang lag rim gyis rdzogs/ /nu zho mar gyis gso byed cing/ /shin tu nyam chung gan rkyal nyal/ /byis pa dar ma lang tsho dang/ rgas pas slar yang byis par 'gyur/ /tshe ni mi rtag shin tu g.yo ba ste/ /yud tsam sdod pa'i mthu yang yod ma yin/ /bdag ni nges par 'chi 'gyur mi sems pa/ /grogs dag skyes bu de ni ngo mtshar che/ /'khor ba'i skyon dang nyes dmigs mi shes pas/ /phyin ci log pa bzhi la gnas nas su/ /bdag ni nges par 'chi 'gyur mi sems par/ /yul la mngon zhen nyin mtshan don med 'das/ /dzam bu'i gling pa dus min 'chi ba ste/ /nges pa can yang zas par 'gyur bas na/ /yang dang yang du ngas par 'chi 'o zhes/ /bsam par rigs so kwa ye bzhin bzang dag /sos ka me tog rgyas pa'i dus 'di 'byung bar 'gyur/ /zla ba gsal bas mtshon pa'i ston dus 'di 'byung zhes/ /skye bo thams cad dga' 'gyur bdag gi tshe 'di ni// zas par 'gyur zhes shin tu ming gar 'gyur ba med/ /de ring 'di bya sang ni 'di bya de nas 'di dang 'di bya zhes/ /srid pa g.yo ba'i rang bzhin ma shes don med yid brtan tshol byed pa'i/ /skye dgu 'chi bdag gi ni chu srin khar ni gzhi zhugs pa ltar/ /bya ba mthar ma phyin bar yul gyi chu yi dpa' klong nang du lhung/ /'di ni sang bya'i 'di ni thang cig 'og tu bya/ /'di ni de'u re bya zhes skye bo sems pa na/ /gshin rje'i be con lag thogs zur gyis lta byed cing/ /mig rtsa dmar khros mar bas gad mo re snyam 'debs/ /rnal 'byor bstan bcos thams cad dang/ sbyor ba du ma shes rab kyang/ /deng bya sang bya zhes smra zhing/ /bsam dang ldan par 'chi bar 'gyur/ /tshe ni gnod mang rlung gis btab 'dra yi/ /chu yi chu bur bas kyang mi rtag na/ /dbugs 'byung dbugs rdub gnyid kyis log pa las/ /sad khom gang lags de ni ngo mtshar che/ /kye kye kwa ye grogs po dag /tshe ni yun thung shes bya'i rnam pa mang/ /tshe yi tshad kyang ji tsam mi shes pas/ /ngang pa chu las 'o ma len pa ltar/ /rang gi 'dod pa rang la blang bar gyis/ /kye kye kwa ye grogs po dag /'jig rten spyod pa dag la phar bltas na/ /byas pa thams cad don med sdug bsngal rgyu/ /ci la bsams kyang phan par mi 'gyur bas/ /rang gi sems la lta ba goms par gyis/ /kye kye kwa ye grogs po dag /tshad ma bdun dang brda sprod rnam pa bzhi/ /mngon pa dang ni yo ga tsarya'i sa/ /mdo sde dang ni 'dul ba mngon pa dang// gzhung du bkod pa ma lus thams cad kun/ /ma mthong ma mnyan ma bshad ma bris zhes/ /de la gdung ba mi bskyed bzhin bzang dag /bla ma'i man ngag ces bya bdud rtsi'i ro/ /gang gis sems mnyam 'jog pa de tsam zhig/ yongs su btsal gyi gzhung mang ci zhig dgos/ thams cad yid ni 'khrul par byed pa'i rgyu/ /'khor ba'i gnas 'di nges pa med pas na/ /pha ma la sogs pha mar ma nges pas/ /nye du 'brel ba dag la chags pa spang/ /dgra yang ma nges de la sdang ba spang/ /nad med lang tsho phun sum tshogs pa dang/ /'dod yon lnga la rang bzhin gyis chags spang/ /rnyad pa dang ni bkur sti grags pa dang/ /rigs dang rus dang tshigs su bcad pa spang/ /slob ma yang slob chos kyi 'brel pa spang/ /kyai kwa ye grogs po dag/ 'jig rten stag sbrul me dang dug 'dra bar/ /bsams nas spangs te dben bar gnas par bya/ /bud med mtshan nyid skyes pa'i mtshan nyid dang/ /sman dang glang chen brtag pa 'am gza' skar rtsis/ /mtshon cha brtag pa 'am rta dpyad rang bzo 'am/ /bstan bcos ngan pa slob dang klag pa spang/ /yul la mngon dga' i sems ni byung ba dang/ /rnam rtog de dag rnams ni byung ba na/ /bdag ni nges par 'chi ba dran byas la/ /'og nas 'byung ba'i gnyen po rnams kyi bzlog/ rnam rtog mang ba dbugs bgrangs pa yis gzhi la/ /'dod chags sems byung rnam par rtog pa de/ /rang bzhin mi gtsang keng rus lta bas bzlog /zhe sdang la ni byams pa'i chu yis gdang/ /gti mug la ni rten 'brel lam gyis so/ /mi gtsang ba dang byams pa rten 'brel gyi/ /man ngag bla ma'i zhal nas byung bzhin bya/ /'khor ba las yid nges par 'byung bar byed ba zhes bya ba'i glu slob dpon chen po dpal mar me mdzad ye shes kyi zhal snga nas mdzad pa rdzogs so/ / //rgya gar gyi mkhan po de nyid dang/ zhus chen gyi lo tsA ba rgya brtson seng ges bi kra ma sh+rI la'i gtsug lag khang du bsgyur pa'o// //slad nas bla ma de nyid dang/ lo tsA ba tshul khrims rgyal bas bcos shing gtan la phab pa'o// // */

CLOSE WINDOW